ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ད༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཔལ་གསང་བ་འདུས་པའི་སྒྲུབ་ཐབས་ཀུན་ཏུ་བཟང་པོའི་ཉི་འོད་ཀྱི་དོན་འགྲེལ་ལམ་བཟང་གསལ་བའི་སྣང་བ།

དཔལ་གསང་བ་འདུས་པའི་སྒྲུབ་ཐབས་ཀུན་ཏུ་བཟང་པོའི་ཉི་འོད་ཀྱི་དོན་འགྲེལ་ལམ་བཟང་གསལ་བའི་སྣང་བ་ཞེས་བྱ་བ་བཞུགས་སོ།། བཅོམ་ལྡན་འདས་འཇམ་པའི་རྡོ་རྗེ་གཙོ་བོར་གྱུར་པའི་དཔལ་གསང་བ་འདུས་པ་ལྷ་བཅུ་དགུའི་དཀྱིལ་འཁོར་གྱི་སྒྲུབ་པའི་ཐབས་ཀུན་ཏུ་བཟང་པོའི་ཉི་འོད་ཀྱི་དོན་འགྲེལ་ལམ་བཟང་གསལ་བ་སྣང་བ་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ལམ་མཆོག་ཀུནྡའི་ཚལ་རབ་རྒྱས་མཛད་པ། །ཐར་འདོད་བྲམ་ཟེ་དགའ་བའི་འོད་དཀར་གྱི། །ཕྲེང་བ་བཟང་པོ་ལྷ་བརྒྱའི་གཙུག་ནོར་དང་། །མཉམ་དུ་འགྲོགས་པ་འཇམ་དབྱངས་བླ་མ་རྒྱལ། །སངས་རྒྱས་ཀུན་གྱི་གསང་ཆེན་འདུས་པའི་རྒྱུད། །ཡེ་ཤེས་དྲི་མེད་སྤྱན་གྱིས་ལེགས་གཟིགས་པ། །དེ་ཡི་ཞབས་བསྟེན་མྱང་འདས་མཆོག་ཐོབ་བཞི། །ཆེར་འོས་བཅོ་བརྒྱད་ཚོགས་བཅས་ལ་ཕྱག་འཚལ། །གང་གིས་ལེགས་པར་བཀྲལ་བའི་འདུས་པའི་ལམ། །རིམ་པ་དང་པོ་ཐ་མལ་རྟོག་བཅོམ་ནས། །ཟབ་གསལ་གཉིས་མེད་ལྷ་སྣང་སྒྲུབ་པའི་ཐབས། །ཚུལ་བཞིན་བཤད་ལ་སྐལ་བཟང་དགའ་བས་ཉོན། །སངས་རྒྱས་ཐམས་ཅད་ཀྱི་གསང་ཆེན་གཅིག་ཏུ་འདུས་པ་གོང་ན་མེད་པའི་རྒྱུད་ཆེན་པོ་རྩ་རྒྱུད་ལེའུ་བཅུ་བདུན་པ་རྒྱུད་ཕྱི་མ་དང་བཅས་པ་འདི་ལ་ཐོག་མར་སངས་རྒྱས་གཉིས་པ་ཀླུ་སྒྲུབ་ཞབས་ཀྱིས་བསྐྱེད་པའི་རིམ་པ་ཏིང་ངེ་འཛིན་གསུམ་དང་། རྫོགས་པའི་རིམ་པ་རིམ་པ་ལྔས་འཆིང་བའི་སྲོལ་ཆེན་པོ་ཕྱེས་ཏེ། སློབ་ཚོགས་དང་བཅས་པས་གཞུང་ཕྲན་གྱི་སྒོ་ནས་འཛམ་བུའི་གླིང་དུ་དར་ཞིང་རྒྱས་པར་མཛད་དོ། །དེའི་རྗེས་སུ་དཀྱིལ་འཁོར་ཆེན་པོའི་སློབ་དཔོན་སངས་རྒྱས་ཡེ་ཤེས་ཞབས་ཀྱིས་མགོན་པོ་འཇམ་པའི་དབྱངས་ཀྱི་དཀྱིལ་འཁོར་ལས་དབང་བསྐུར་བ་མནོས་ཏེ། ཞལ་གྱི་ལུང་ཐོབ་ནས་ལམ་ཡོངས་སུ་རྫོགས་པའི་ལམ་སྲོལ་ཕྱེས་པའི་ནང་ནས་བསྐྱེད་པའི་རིམ་པ་ནི་གང་བཤད་པར་བྱ་བའི་ཆོས་སོ། །འདི་ལ་གསུམ་སྟེ། བླ་མ་ཆེན་པོ་ཇི་ལྟར་བྱོན་པའི་ལོ་རྒྱུས་སྨོས་པ། དེས་བཀྲལ་བའི་ལམ་སྤྱིའི་རྣམ་གཞག་མདོར་བསྡུས་པ། དེ་ལས་བསྐྱེད་པའི་རིམ་པ་བྱེ་བྲག་ཏུ་བཤད་པའོ། །དང་པོ་ནི། བླ་མ་འདི་རྒྱ་གར་ཤར་ལྷོའི་ཡུལ། སིནྡྷུ་ར་ཞེས་བྱ་བར། རྒྱལ་པོ་གྷ་པ་རོ་པྲ་བྷ་བ་ཞེས་བྱ་བའི་སྲས་སུ་འཁྲུངས་སོ། །དེ་བྱིས་པ་ཉིད་ནས་གཟུགས་དང་། ཤེས་རབ་དང་། ཀུན་དུ་སྤྱོད་པ་རྣམ་པར་དག་པར་གྱུར་ནས། སྒྲ་དང་། སྡེབ་སྦྱོར་དང་། ལུགས་ཀྱི་བསྟན་བཅོས་ལ་སོགས་པ་ལ་རབ་ཏུ་མཁས་པར་སྦྱངས་སོ། །ཆེར་སྐྱེས་པ་དང་། རྒྱལ་སྲིད་མཆིལ་མའི་ཐལ་བ་བཞིན་དོར་ནས། ནཱ་ལེནྟྲའི་ཕྱོགས་གཅིག་དུ་གྲོང་ཁྱེར་རྡོ་འཇོག་ཅེས་བྱ་བར། རྒྱལ་པོ་ཤྲཱི་དྷརྨཱ་པཱ་ལས་བརྩིགས་པ། ཏྲྀཀ་ཅེས་བྱ་བའི་གཙུག་ལག་ཁང་དུ། མཁན་པོ་རྣམ་པར་སྣང་མཛད་བཟང་པོའི་སློབ་མ། ཐུགས་རྗེ་དང་། བྱང་ཆུབ་ཀྱི་སེམས་ལ་གོམས་པ། བདེ་བར་གཤེགས་པའི་གསུང་རབ་དུ་མའི་མཛོད་འཛིན་ཅིང་། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་གསལ་བར་འཆད་པ་སློབ་དཔོན་སེང་གེ་བཟང་པོའི་དྲུང་དུ་ཕ་རོལ་ཏུ་ཕྱིན་པའི་གཞུང་ལུགས་སྦྱངས་ནས། ཤྲཱི་ནཱ་ལེནྟྲར། རིགས་ལྡན་ཡོན་ཏན་བཤེས་གཉེན་གྱིས་གསོལ་བ་བཏབ་པའི་ངོར། རྩོམ་པ་དང་། བཤད་པ་སོགས་བྱས་ནས། དེར་གནས་པ་རྣམས་བྲོད་པ་བསྐྱེད་དོ། །དེ་ནས་བྱང་ཕྱོགས་ཨུ་རྒྱན་གྱི་ཡུལ་དུ་བྱོན་ཏེ། ཡུལ་དེའི་ཕྱོགས་གཅིག་ན་སློབ་དཔོན་ནོར་བུའི་གླིང་དུ་སྐྱེས་པས་ནོར་བུ་གླིང་པ་ཞེས་ཀྱང་བྱ། གཟུགས་སྣ་ཚོགས་སུ་སྟོན་པས་སྣ་ཚོགས་གཟུགས་ཞེས་ཀྱང་བྱ། འཇོལ་སྒེག་རྡོ་རྗེ་ཞེས་ཀྱང་བྱ་བ་དེའི་དྲུང་དུ། བྱ་བ་དང་། རྣལ་འབྱོར་གྱི་རྒྱུད་མང་དུ་གསན། དེ་ནས་ཡུལ་དེའི་ཕྱོགས་གཅིག་ན་གུ་ནི་རུ་ཞེས་བྱ་བར་གྲགས་པའི་བླ་མ་དེའི་དྲུང་དུ་བསྙེན་ཏེ་ལུང་མང་དུ་གསན་ནོ། །ཡང་ཡུལ་དེའི་ཕྱོགས་གཅིག་ན་ལཀྵ་མེ་སེ་ན་ཆེན་མོའི་དྲུང་དུ་ཟླ་བ་བརྒྱད་ཀྱི་བར་དུ་བཞུགས་ནས་རྣལ་འབྱོར་བླ་ན་མེད་པའི་རྒྱུད་གསན་ཏེ། དེར་འཕགས་པ་གནོད་གནས་ཀྱི་གྲུབ་པ་ཐོབ་བོ། །དེ་ནས་ཛ་ལེན་དྷ་རར། བ་མོ་པ་ཏཱ་སྟེ། སློབ་དཔོན་བྱིས་པ་ཆུང་ངུའི་ཞབས་ཞེས་བྱ་བ་ཤེས་རབ་ཀྱི་རྒྱུད་ལ་བསམ་པ་ཆུ་ཀླུང་ལྟ་བུར་གྱུར་པའི་དྲུང་དུ་ཤེས་རབ་ཀྱི་རྒྱུད་མང་དུ་གསན་ནོ། །དེ་ནས་ལྷོ་ཕྱོགས་ནམ་མཁའི་ཤིང་ལྡན་ཀོང་ཀ་ནར་བ་ལིཾ་པཱ་ཏ་སྟེ། སློབ་དཔོན་སྲུང་བའི་ཞབས་ཞེས་བྱ་བ། ཐབས་ཀྱི་རྒྱུད་ལ་བསམ་པ་ཆུ་ཀླུང་ལྟ་བུར་གྱུར་པའི་དྲུང་དུ་ལོ་དགུ་བཞུགས་ཏེ། འདུས་པའི་རྒྱུད་ཆེན་འགྲེལ་བཅས་བཅོ་བརྒྱད་བར་དུ་ཉན་ཞེས་གསུངས་ཏེ། བླ་མའི་དགོངས་པ་འདུས་པའི་རྒྱུད་ཆེན་ནི་རྣལ་འབྱོར་རྣམས་སོ། །འགྲེལ་བཅས་ནི་རྣལ་འབྱོར་ལེགས་པར་བསླབས་པ་སྨེ་ཤ་ཅན་གྱི་བུ་མོ། བི་ལ་མུ་ཏྲ་སྟེ་དེ་དང་བཅས་པས་ཟླ་བ་བཅོ་བརྒྱད་ཀྱི་བར་དུ་ཉན་པར་གསུངས་སོ། །དེའི་ཚེ་བླ་མའི་ཞལ་ནས་བདག་གིས་དོན་འདི་མ་རྟོགས་ཞེས་གསུངས། དེ་ལ་ཐུགས་ཅུང་ཟད་ཆད། འདི་མ་རྟོགས་ན་གཞན་དོན་མེད་སྙམ་ནས་ཕྱག་རྒྱ་འདུས་པའི་གླེགས་བམ་དུ་བྱས་ནས་མགུལ་པར་བཏགས་ཏེ། རྡོ་རྗེ་གདན་གྱི་བྱང་ཕྱོགས་ཀུ་བ་ཙ་ཞེས་བྱ་བ་སྟག་དང་། དྲེད་ལ་སོགས་པ་མང་པོ་གནས་པའི་ཚལ་དུ་བྱོན་ཏེ། ཟླ་བ་དྲུག་བསྒོམས་པས་དེ་ཁོ་ན་ཉིད་རྟོགས་སོ། །དེ་ནས་སྟོན་ཟླ་རྭ་བའི་ཚེས་བརྒྱད་ཀྱི་ཐོ་རངས་སྐར་མ་རྒྱལ་ལ་བབ་པའི་ཚེ་འཇམ་པའི་དབྱངས་འཇོལ་སྒེག་རོལ་པ་དང་བཅས་པ་གཙོ་བོར་གྱུར་པའི་དཀྱིལ་འཁོར་དང་། སྤྲུལ་པའི་དགེ་སློང་བླ་མ་གཉིས་དང་བཅས་པ་སློབ་དཔོན་གྱི་ཁང་པ་ཆུང་ངུ་ཞིག་ཏུ་སྣང་བར་གྱུར་ཏོ། །དེའི་ཚེ་སློབ་དཔོན་གྱིས་གསོལ་བ་བཏབ་པས། འཇམ་པའི་དབྱངས་ཀྱི་ཞལ་ནས་རིམ་པ་གཉིས་པའི་དེ་ཁོ་ན་ཉིད་ཅེས་བྱ་བ་འཇམ་དཔལ་གྱི་ཞལ་ནས་ལུང་གསུངས་ཞེས་པ་འདི་ཙམ་ཞིག་ཞལ་ལུང་ལས་འབྱུང་ལ། གཏམ་རྒྱུད་གཞན་ལས་ནི་བླ་མ་བ་ལིཾ་ཏ་པའི་ཞལ་ནས་ཁྱོད་ཀྱི་ཐེ་ཚོམ་གྱི་མདུད་པ་དེ་དག་རྒྱ་ནག་རི་བོ་རྩེ་ལྔར་འཇམ་པའི་རྡོ་རྗེ་བཞུགས་པའི་དྲུང་དུ་ཞུས་ཤིག དེས་གྲོལ་བར་འགྱུར་རོ་ཞེས་ལུང་བསྟན་ནས་བྱོན་པའི་ལམ་ཁར་རྡོ་རྗེ་གདན་གྱི་བྱང་ཕྱོགས་སུ་ཁང་བུ་གཅིག་གི་དྲུང་ན། བུད་མེད་གཅིག་དང་། ཁྱི་མོ་ཞིག་གནས་པ་དང་། དེ་དང་ཉེ་བ་ན་བཙུན་པ་ཞིག་ཆོས་གོས་ཀྱིས་ཐོད་བྱས་ནས་ཞིང་རྨོད་ཅིང་འདུག་པ་གཟིགས་པས། ཀྱེ་མ་རབ་དུ་བྱུང་བ་བུད་མེད་དང་བཅས་ཞིང་རྨོད་པ་འདི་འདྲ་བ་བྱུང་བས་བསྟན་པ་ཉམས་སོ་སྙམ་དུ་དགོངས་ནས་ཐུགས་སྐྱོ་བར་གྱུར་ཏོ། །དེ་ལྟ་ན་ཡང་ཉི་མའི་དུས་ལ་བབ་པས་དེར་བྱོན་ནས་བསོད་སྙོམས་མཛད་པར་དགོངས་པ་དང་། བཙུན་པ་དེས་བུད་མེད་ལ་རབ་ཏུ་བྱུང་བ་འདི་ལ་གྲོ་དྲོངས་ཤིག་ཅེས་བསྒོས་པས། བུད་མེད་དེས་ཉ་རྒྱ་ཁྱེར་ནས་ཆུ་ཕྲན་གཅིག་ལ་ཉ་བཤོར་ཏེ་དེ་བཙོས་ནས་ཁྱི་མོའི་འདུན་དུ་ཤིང་ལོ་ལ་བཞག་ནས་ཆོས་སྟོན་དྲོངས་ཞེས་བསྒོས་པས། ཁྱི་མོ་སྐྱུགས་པ་དང་། དེར་སྔར་གྱི་ཉ་དང་བཅས་པ་དྲངས་པས་སློབ་དཔོན་གྱིས་ཆེད་དུ་དམིགས་པའི་ཤ་དང་། མི་གཙང་བར་དགོངས་ནས་མ་གསོལ་ལོ། །དེ་ནས་བཙུན་པ་ན་རེ་ཀྱཻ་འཛམ་བུའི་གླིང་པ་ལ་ཕལ་པའི་ཟས་བྱིན་ཞེས་བསྒོས་པས། འབྲས་ཆན་ཞོ་དང་བཅས་པ་དྲངས་པ་དང་། སློབ་དཔོན་གྱིས་གསོལ་ནས་ཡང་གཤེགས་པར་དགོངས་པ་དང་། བཙུན་པ་དེ་ན་རེ་ད་འདི་ན་ཕར་སོང་ཡང་། དོ་ནུབ་སྡོད་ས་མི་རྙེད་ཀྱི་སང་སོང་ཅིག་ཟེར་བས་དེར་བཞུགས་སོ། །དེར་སློབ་དཔོན་གྱིས་གསང་བ་འདུས་པ་ཞལ་ཐོན་དུ་བཏོན་པ་དང་། གང་དུ་སློབ་དཔོན་གྱིས་མ་ཤེས་པའི་སར། བུད་མེད་དེ་མི་མགུ་བ་དང་མ་རངས་པའི་རྣམ་འགྱུར་རེ་བྱས་པ་དང་། སློབ་དཔོན་གྱིས་འདིས་ཐེ་ཚོམ་ཆོད་པར་གྱུར་རོ་སྙམ་དུ་དགོངས་ཏེ། ཕྱག་འཚལ་ནས་གསོལ་བ་བཏབ་པ་དང་། བུད་མེད་དེ་ན་རེ་ངས་མི་ཤེས། ད་ཅིའི་བཙུན་པ་དེ་ཤིན་ཏུ་མཁས་པ་ཡིན་པས་དེ་ལ་ཞུས་ཤིག་ཟེར་རོ། །དེ་གར་སོང་དྲིས་པས་ཆང་ཉོར་སོང་ཟེར། བསྒུགས་པས་ཕྱེ་མ་རེད་ཆང་གིས་བཟི་ནས་འཁྱོར་བཞིན་པ་འོངས་པ་གཟིགས་པས། མ་དད་ཀྱང་ང་རྒྱལ་བཅག་ནས་ཕྱག་འཚལ་ཏེ། བདག་ལ་གསང་བ་འདུས་པ་བཤད་པར་ཞུ་ཞེས་གསོལ་བ་བཏབ་པས་དབང་བསྐུར་ལོང་ཞིག་ཅེས་གསུངས། བདག་གིས་དབང་བསྐུར་ཐོབ་ཅེས་བརྗོད་པས། ང་ཉིད་ཀྱི་དབང་བསྐུར་དགོས་ཞེས་གསུངས་པས། སློབ་དཔོན་གྱིས་ཡོ་བྱད་བཙལ་ནས་དབང་ཞུས་སོ། །དེར་སྟོན་ཟླ་རྭ་བའི་ཚེས་བརྒྱད་ཀྱི་མཚན་མོ་སྤྱིལ་པོ་གཞལ་མེད་ཁང་དུ་སྤྲུལ། དེའི་དབུས་སུ་འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་བཞུགས་པ་མངོན་སུམ་དུ་བསྟན་ནས་དབང་ཞུས་ཞེས་པ་སྣང་ངོ་། །ལོ་རྒྱུས་གཞན་ལས་ནི་སྔར་གྱི་བཙུན་པ་དེ་ཡང་དཀྱིལ་འཁོར་གྱི་དྲུང་དུ་འདུག་ནས་ང་ལ་དབང་ལེན་ནམ། དཀྱིལ་འཁོར་ལ་དབང་ལེན་ཞེས་གསུངས་པ་ལ། དཀྱིལ་འཁོར་ལ་དབང་ལེན་ཞུས་པས་དཀྱིལ་འཁོར་མི་སྣང་བར་གྱུར་ནས། དེར་དཀྱིལ་འཁོར་བཙུན་པས་སྤྲུལ་པ་ཡིན་པར་དགོངས་ནས་ཕྱག་འཚལ་ཏེ། ཁྱོད་ནི་སེམས་ཅན་ཀུན་གྱི་ཡབ་སྟེ་ཡུམ་ཡང་ཡིན། ཞེས་སོགས་ཀྱིས་བསྟོད་ནས། གསོལ་བ་བཏབ་པས་དཀྱིལ་འཁོར་སྤྲུལ་པ་ལ་ཐོ་རངས་དབང་བླངས་ཟེར་བ་ཡང་མ་དག་པ་འདྲ་སྟེ་ཞལ་ལུང་ལས། མགོ་དང་ལག་གཉིས་ཡོལ་དང་ཚེས་བརྒྱད་རྒྱལ་ལ་བབ། །སྟོན་ཟླ་འབྲིང་པོའི་ཐོ་རངས་སྐྱ་རེངས་ཤར་དུས་སུ། །འཇམ་པའི་དབྱངས་ཀྱི་དཀྱིལ་འཁོར་སྤྲུལ་པ་ལ། །བདག་གིས་དོན་འདི་བླང་ཕྱིར་གསོལ་བ་རབ་ཏུ་བཏབ། །ཁྱོད་ནི་སེམས་ཅན་ཀུན་གྱི་ཡབ་སྟེ་ཡུམ་ཡང་ཡིན། །ཞེས་གསུངས་པ་ཙམ་ལས་མི་སྣང་ཡང་། དེའི་འགྲེལ་པར་དེ་ནས་དགེ་སློང་གིས་གསང་སྔགས་ཀྱི་སྤྱོད་པའི་མཆོག་ལ་གནས་པར་ཤེས་ནས་དེ་ལས་སྤྱན་རས་ཀྱིས་བཙལ་བའི་ཕྱིར་འཇམ་དབྱངས་ཀྱི་དཀྱིལ་འཁོར་སྤྲུལ་ལོ། །ཚེས་གང་ཞེ་ན་མགོ་དང་ལག་གཉིས་ཡོལ་ནས་ཚེས་བརྒྱད་རྒྱལ་ལ་བབ། ཞེས་སོ། །ནམ་ཟླ་གང་ཞེ་ན་སྟོན་ཟླ་རྭ་བ་ཞེས་སོ། །དེར་སྤྲུལ་པའི་དཀྱིལ་འཁོར་དང་བླ་མ་ལ་མོས་པ་དྲིས་པ་དང་། སྤྲུལ་པའི་དཀྱིལ་འཁོར་ལ་མོས་པར་བཀའ་གསལ་བ་དང་། དགེ་སློང་བླ་མ་དང་བཅས་པ་དེ་ཉིད་དུ་ཁང་པ་ཆུང་ངུ་གཅིག་གི་ནང་དུ་བཞུགས་སོ། །དེ་ནས་བླ་མ་ཆེན་པོས་འཇམ་པའི་དབྱངས་ཀྱི་དཀྱིལ་འཁོར་ལ་དེ་བཞིན་ཉིད་བླང་བར་བྱ་བའི་ཕྱིར་གསོལ་བ་འདི་སྐད་དུ་བཏབ་བོ། །ཁྱོད་ནི་ཞེས་པ་ལ་སོགས་པའོ། །ཞེས་གསུངས་པས་སོ། །དེས་ན་འགྲེལ་པ་འདིར་དཀྱིལ་འཁོར་སྤྲུལ་པ་ཡང་ཚེས་བརྒྱད་ཀྱི་ཐོ་རངས་སྤྲུལ་པར་གསུངས་ཤིང་མཇུག་དུ་ཞལ་གྱི་ལུང་གནང་ཟིན་ནས་སྐྱ་རེངས་ཤར་བའི་ཚེ་སྤྲུལ་པའི་དཀྱིལ་འཁོར་དགེ་སློང་བླ་མ་གཉིས་དང་བཅས་པ་མི་སྣང་བར་གསུངས་པས་སྤྲུལ་པའི་དཀྱིལ་འཁོར་སྤྲུལ་མ་ཐག་ཏུ་གསོལ་བ་བཏབ་ནས་གདམས་པ་གནང་བ་གསལ་ལོ། །གཏམ་རྒྱུད་དེ་ལྟར་འཆད་པ་ནི་སྤྲུལ་པའི་དཀྱིལ་འཁོར་དང་། བླ་མ་ལ་མོས་པ་དྲིས་པ་དང་། སྤྲུལ་པའི་དཀྱིལ་འཁོར་ལ་མོས་པར་ཤེས་ནས་དགེ་སློང་བླ་མ་དང་བཅས་པ་དེ་ཉིད་དུ་ཁང་པ་ཆུང་ངུ་གཅིག་གི་ནང་དུ་ཞུགས་ཞེས་པས་འཁྲུལ་གཞི་བྱས་པར་སྣང་ཡང་། དེའི་དོན་སྤྲུལ་པའི་དཀྱིལ་འཁོར་ལ་མོས་པར་ཤེས་པའི་ཚེ་དགེ་སློང་བླ་མ་དང་བཅས་པ་སྤྲུལ་པའི་དཀྱིལ་འཁོར་གནས་པའི་སར་ཞུགས་ནས་དཀྱིལ་འཁོར་དང་ཐ་དད་དུ་སྣང་ལ། བླ་མ་ལ་མོས་པར་ཤེས་ན་སྤྲུལ་པའི་དཀྱིལ་འཁོར་ཉིད་དགེ་སློང་བླ་མ་དང་བཅས་པ་དེར་བྱོན་ནས་ཐ་མི་དད་དུ་སྣང་ཞེས་པའི་དོན་ཏོ། །གཏམ་རྒྱུད་སྔ་མ་བ་ལིཾ་པཱ་ཏས་ལུང་བསྟན་ནས་རི་བོ་རྩེ་ལྔར་འགྲོ་བའི་ལམ་ཁར་དེ་ལྟར་བྱུང་བར་བཤད་པ་ཡང་ཅུང་ཟད་མ་དག་པ་འདྲ་སྟེ། ཞལ་ལུང་ལས། རྡོ་རྗེ་གདན་རྒྱབ་ཀུ་པ་ཙ་ཞེས་བྱ་བའི་ཚལ། །སྟག་དང་དྲེད་སོགས་མང་ཞིང་ཤིན་ཏུ་འཇིགས་པའི་སར། །ཟླ་བ་དྲུག་ཏུ་གནས་ནས་ཆོས་རྣམས་དེ་ཉིད་རྟོགས། །སྤྲུལ་པའི་དགེ་སློང་བླ་མ་གཉིས་དང་བཅས་དང་ཕྲད། །མགོ་དང་ལག་གཉིས་ཡོལ་དང་ཞེས་སོགས་སྔར་དྲངས་པ་གསུངས་པའི་ཕྱིར་རོ། །འོན་ཀྱང་ཟླ་བ་དྲུག་སོང་བའི་མཐར་སྔར་བཤད་པ་ལྟར་གྱི་སྤྲུལ་པ་གསུམ་པོ་དང་ཕྲད་ནས། ཟས་དང་སྤྱོད་པ་ལ་ཅུང་ཟད་མ་དད་པས་བཙུན་པས་དཀྱིལ་འཁོར་སྤྲུལ་ཏེ། བཙུན་པ་དེ་དང་ཁྱི་མོ་དཀར་མོ་དང་། བུད་མེད་ངན་མ་བུ་ཆུང་ངུ་དང་བཅས་པ་གསུམ་པོ་ཡང་དཀྱིལ་འཁོར་གྱི་དྲུང་དུ་གནས་པ་ལ་གསོལ་བ་བཏབ་པས་དབང་བསྐུར་ནས་ལུང་ཐོབ་པར་གསལ་ཏེ། ཞལ་ལུང་ལས། སྤྲུལ་པ་གསུམ་པོ་དེ་ལྟར་དུ་གནས་པ་ཡང་གསུངས་ཤིང་། མཇུག་དུ། ཁྱོད་ཀྱང་ཟས་ཀྱི་བྱ་བ་དང་། །ང་ལ་ཅུང་ཟད་འཁྲུལ་རྟོག་པས། །ཞེས་སོགས་གསུངས་པས་སོ། །གཏམ་རྒྱུད་ཁ་ཅིག་ལས། ཚིགས་བཅད་འདི་དག་བཙུན་པས་བཤད་པར་གསུངས་པ་ཡང་ངོ་བོ་གཅིག་པ་ལ་འགལ་བ་མེད་ཀྱང་རྣམ་པའི་ཆ་ནས་དེ་ལྟར་མ་ཡིན་ཏེ། ཞལ་ལུང་གི་འཕྲོ་ཉིད་དུ། ཁྱོད་ཀྱང་ཟས་ཀྱི་བྱ་བ་དང་། །ང་ལ་ཅུང་ཟད་འཁྲུལ་རྟོག་པས། །ཁྱེད་ཀྱིས་ཚེ་འདི་ཉིད་ལ་ནི། །གཟུགས་བཅས་ཕུང་པོ་རང་ལུས་ནི། །གནས་ནི་ཡང་དག་མི་འགྱུར་ཏེ། །རྣམ་པར་ཤེས་པ་མི་བཤིག་པར། །ཕྱག་རྒྱ་ཆེན་པོ་རབ་ཏུ་འགྲུབ། །དེ་བས་ཁྱོད་ཀྱིས་ཡང་དག་བློས། །སངས་རྒྱས་ཀུན་གྱི་འདུས་པའི་རྒྱུད། །གསང་ཆེན་གསང་ལ་རབ་གསང་བ། །གོང་ན་མེད་པའི་ལུང་ཆེན་པོ། །འདི་ཡི་རིམ་པ་དང་པོ་ཡིས། །སྒྲུབ་པའི་ཐབས་དང་སྦྱིན་སྲེག་དང་། །གཏོར་མ་སྣ་ཚོགས་འཁོར་ལོ་དང་། །བསྡུས་པ་དང་ནི་རྣམ་བཤད་དང་། །དཀྱིལ་འཁོར་ཆོ་ག་ལ་སོགས་པ། །མི་ཤེས་མུན་སྒྲིབ་སེམས་ཅན་གྱི། །ཐུར་མ་ལྟ་བུར་བརྩམ་པར་གྱིས། །ཞེས་ལུང་བསྟན་ནོ། །དེ་ལ་སྒྲུབ་པའི་ཐབས་ནི་ཀུན་ཏུ་བཟང་པོ་གསུམ་མོ། །སྦྱིན་སྲེག་ནི་གཉིས་ཀྱི་ཆོ་གའོ། །གཏོར་མ་ནི་མི་ནུབ་པའི་སྒྲོན་མའོ། །སྣ་ཚོགས་འཁོར་ལོ་ནི་ཚོགས་འཁོར་གྱི་ཆོ་གའོ། །བསྡུས་པ་ནི་རིན་པོ་ཆེ་འབར་བའོ། །རྣམ་བཤད་ནི་མ་མཛད་དོ། །དཀྱིལ་འཁོར་གྱི་ཆོ་ག་ནི་ཉིས་བརྒྱ་ལྔ་བཅུ་པ་ཞིག་མཛད་དེ། བླ་མས་རྒྱ་དཔེ་ཁ་ཆེར་ཁྱེར་ནས་ཡུལ་དབུས་ཀྱི་སློབ་མ་རྣམས་ཀྱིས་མ་མཐོང་བར་གྲག་གོ །སོགས་ཀྱི་སྒྲས་བསྡུས་པ་རྩ་བའི་ཡེ་ཤེས་ཆེན་པོ་ཚིགས་སུ་བཅད་པ་མཛད་དོ། །གྲོལ་བའི་ཐིག་ལེ། བདག་ཉིད་གྲུབ་པ་འབྱུང་བ། བྱང་ཆུབ་སེམས་ཀྱི་ཐིག་ལེ། དཔལ་བཀྲ་ཤིས་ཀྱི་རྣམ་བཤད་ཆེན་མོ། བཞི་པ་ལ་འཇུག་པའི་ཐབས་དང་བཅས་པ། ནོར་སྦྱིན་དབང་པོའི་སྒྲུབ་ཐབས་ཏེ། ལུང་དང་མཐུན་པའི་ཆོས་བཅུ་བཞི་མཛད་དོ། །དེ་དག་གིས་སློབ་མའི་ཚོགས་ལ་ཕན་གདགས་པའི་ནང་ནས་རྒྱལ་ཚབ་ཀྱི་ས་སྤར་འོས་པའི་གང་ཟག་བཅོ་བརྒྱད་དེའི་ནང་ནས་མཐོང་བའི་ཆོས་ལ་མྱ་ངན་ལས་འདའ་བའི་གང་ཟག་མར་མེ་མཛད་བཟང་པོ། རབ་ཞི་བཤེས་གཉེན། སྒྲ་གཅན་འཛིན་བཟང་པོ། རྡོ་རྗེ་བདེ་བ་ཆེན་པོ་སྟེ་བཞིའོ། །དཀྱིལ་འཁོར་གྱི་ཆོ་ག་ནི་བླ་མ་ཆེན་པོའི་དགོངས་པ་ཇི་ལྟ་བ་བཞིན་ཡིན་པས་མར་མེ་མཛད་བཟང་པོས་མཛད་པའི་བཞི་བརྒྱ་ལྔ་བཅུ་པའི་རྗེས་སུ་འབྲང་བར་སྨན་པའི་ཞབས་ཀྱིས་བཤད་དོ། །བླ་མ་ཆེན་པོས་རྣམ་བཤད་མ་མཛད་པས་རྩ་རྒྱུད། རྒྱུད་ཕྱི་མ་དང་བཅས་པ་ལ་འགྲེལ་པ་མཛད་པའི་སློབ་མ་བཅུ་གསུམ་བྱུང་བར་གྲགས་ཤིང་། རྗེས་འཇུག་ལ་ཡང་སྨན་པའི་ཞབས་དང་། དཔལ་འབྲས་རྡོ་རྗེ་དང་། ཙི་ལུ་པ་དང་། ཐ་ཀ་ན་ལ་སོགས་པ་མཁས་ཤིང་གྲུབ་པ་མཉེས་པ་མང་དུ་བྱུང་སྟེ་སྲོལ་བླ་ན་མེད་པའོ། །གཉིས་པ་དེས་བཀྲལ་བའི་ལམ་སྤྱིའི་རྣམ་གཞག་མདོར་བསྡུས་པ་ལ་བཞི་སྟེ། ལམ་གྱི་སྔོན་དུ་འགྲོ་བ། བསྒོམ་པར་བྱ་བའི་ལམ་དངོས། རྟོགས་པའི་རིམ་པས་གཞག་པའི་གང་ཟག ལམ་གྱིས་བསྒྲུབས་པའི་འབྲས་བུའོ། །དང་པོ་ལ་བཞི་སྟེ། དཀྱིལ་འཁོར། སློབ་དཔོན། དབང་། དམ་ཚིག་དང་སྡོམ་པའོ། །དང་པོ་ལ་བཞི་སྟེ། རི་མོའི་དཀྱིལ་འཁོར། ལུས་དང་། བྱང་ཆུབ་ཀྱི་སེམས་དང་། བྷ་གའི་དཀྱིལ་འཁོར་རོ། །དང་པོ་ལ། མར་མེ་མཛད་ཀྱི་བཞི་བརྒྱ་ལྔ་བཅུ་པ་དང་། སྨན་པའི་ཞབས་ཀྱི་དངོས་གྲུབ་འབྱུང་བའི་གཏེར་གཉིས་ལས། རྡུལ་ཚོན་གྱི་དཀྱིལ་འཁོར་ཉིད་ལ་གསུངས་ཤིང་། ངག་དབང་གྲགས་པའི་དབང་གི་རབ་བྱེད་ལས། རྡུལ་ཚོན་དང་། རས་བྲིས་དང་། ཡིད་ཀྱི་དཀྱིལ་འཁོར་དང་གསུམ་དུ་གསུངས་སོ། །རྡུལ་ཚོན་ལ་ཡང་གང་ཟག་གི་སྒོ་ནས་འབྲི་ཚུལ་གསུམ་སྟེ། ལས་དང་པོ་པས་འབྲི་ཚུལ་དང་། ཡེ་ཤེས་ལ་ཅུང་ཟད་དབང་བ་དང་། ཡེ་ཤེས་ལ་དབང་བས་འབྲི་ཚུལ་ལོ། །དང་པོ་ནི། དཀྱིལ་ཆོག་ཉིད་ལས་བཤད་པའི་ཐིག་ཚོན་གྱི་ཆོ་ག་ཅི་ལྟ་བ་བཞིན་དུ་འབྲིའོ། །གཉིས་པ་ནི་ཁྱེའུ་དང་། བུ་མོ་ལོ་བཅུ་གཉིས་ལོན་པ་གྲོང་པའི་ཆོས་ཀྱིས་མ་ཕོག་པ་ལ་པྲ་ཕབ་ནས་རང་གི་ཐིག་ཚོན་བྱིན་བརླབས་བྱས་པ་གཏད་དེ་འབྲིར་བཅུག་པའོ། །འདི་ལ་ཡང་ཐུགས་ཀྱི་དཀྱིལ་འཁོར་འབྲི་ན་ཁྱེའུ་ལ་མི་བསྐྱོད་པ་དང་། བུ་མོ་ལ་མཱ་མ་ཀཱི་ཕབ། གསུང་གི་དཀྱིལ་འཁོར་ལ་འོད་དཔག་མེད་དང་གོས་དཀར་མོ། སྐུའི་དཀྱིལ་འཁོར་ལ་རྣམ་སྣང་དང་། སངས་རྒྱས་སྤྱན་ཕབ་པར་གསུངས་ཤིང་། དགོས་པ་ནི་འཇིག་རྟེན་པ་དག་གིས་ནུས་པ་མེད་དོ་ཞེས་བརྙས་པ་སྤོང་བའི་ཕྱིར་ཡིན་པར་གསུངས་སོ། །གསུམ་པ་ནི་ས་ཆོག་ནས་བརྩམས་ཏེ། མཇུག་ཡོངས་སུ་རྫོགས་པའི་བར་ཏིང་ངེ་འཛིན་འབའ་ཞིག་གིས་རྡུལ་ཚོན་གྱི་དཀྱིལ་འཁོར་སྤྲུལ་ཏེ་གསུམ་ཆར་ལ་ཡང་ཆོ་ག་ལྷག་མ་རྣམས་ནི་འདྲ་བར་བཤད་དོ། །འདི་ལ་སྨན་པའི་ཞབས་ཀྱིས། བསམ་གཏན་དཀྱིལ་འཁོར་བསམ་གཏན་གྱིས། །མཆོད་དང་དབང་བསྐུར་དེ་བཞིན་དུ། །བྱས་ནས་གཞན་ལ་འགའ་ཡི་དོན། །བསྒྲུབ་ཕྱིར་ལུང་འདི་བསྒོ་བའོ། །ཞེས་བསམ་གཏན་གྱི་དཀྱིལ་འཁོར་སོགས་ཀྱི་ཐ་སྙད་གསུངས་སོ། །བླ་མས་དེ་ལྟར་སྤྲུལ་ནུས་ཀྱང་། སློབ་མ་དཀྱིལ་འཁོར་དེ་བལྟ་ནུས་པ་དང་། མི་ནུས་པ་གཉིས་ལས། དང་པོ་དཀྱིལ་འཁོར་དེར་དབང་བསྐུར་བ་དང་། ཕྱི་མ་ལ་ཡེ་ཤེས་ལ་ཅུང་ཟད་དབང་བའི་ལུགས་ལྟར་པྲ་ཕབ་ནས་དབང་བསྐུར་བའི་ལུགས་གཉིས་གསུངས་སོ། །དཀྱིལ་འཁོར་ཕྱི་མ་གསུམ་ནི་སཾ་བུ་ཊི་དང་། འདུས་པའི་རྒྱུད་ཕྱི་མ་གཉིས་ལས། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་གསུངས་པ་ཉིད། །དཀྱིལ་འཁོར་བྱང་ཆུབ་སེམས་ཉིད་དེ། །དཀྱིལ་འཁོར་གསུམ་ནི་ཡོངས་སུ་བརྟག །ཞེས་གསུངས་པའི་དོན། རྣལ་འབྱོར་དབང་ཕྱུག་བིརྺ་པའི་བཞེད་པས། གསང་བ་ཆོས་ཀྱི་དཀྱིལ་འཁོར་གསུམ་ལ་འཆད་པའི་ལུགས་ཡོད་ཀྱང་འདིའི་ལུགས་ཀྱིས། རྒྱུའི་སློབ་དཔོན་གྱི་ལུས་ཀྱི་དཀྱིལ་འཁོར་དང་། རྒྱུ་དང་རྐྱེན་གྱི་སློབ་དཔོན་གཉིས་ཀྱི་བྱང་ཆུབ་ཀྱི་སེམས་དང་། ལྷན་ཅིག་བྱེད་པའི་སློབ་དཔོན་གྱི་བྷ་གའི་དཀྱིལ་འཁོར་ལ་འཆད་དོ། །ལུས་ཀྱི་དཀྱིལ་འཁོར་གྱི་དོན་ཡང་འདུས་པ་འཕགས་ལུགས་དང་། མ་རྒྱུད་ལྟར་གྱི་ལུས་ཀྱི་དཀྱིལ་འཁོར་མ་ཡིན་གྱི་སློབ་དཔོན་གྱིས་རྡུལ་ཚོན་གྱི་དཀྱིལ་འཁོར་གྱི་དབུས་སུ་ཏིང་ངེ་འཛིན་གསུམ་གྱི་དཀྱིལ་འཁོར་སྤྲུལ་ནས་དབང་བསྐུར་བའི་ཚེ་གཙོ་བོའི་ཐུགས་ཀ་ནས་ཕྱེ་སྟེ། དཀྱིལ་འཁོར་དང་སློབ་དཔོན་སོ་སོར་སྣང་བའི་ཆ་ནས་སློབ་དཔོན་གྱི་ལུས་ཀྱི་དཀྱིལ་འཁོར་ཞེས་གསུངས་ཏེ། སྨན་པའི་ཞབས་ཀྱིས་རི་མོ་དང་། ལུས་ཀྱི་དཀྱིལ་འཁོར་གཉིས་ལས་བུམ་དབང་ལེན་པར་གསུངས་པའི་ཕྱིར་རོ། །འདིའི་དོན་སྔ་རབས་པ་ཁ་ཅིག རི་མོའི་དཀྱིལ་འཁོར་ལས་གཞན་མི་མཐོང་བའི་སྐལ་མེད་རྣམས་ལ་རི་མོའི་དཀྱིལ་འཁོར་དུ་དང་། ལུས་ཀྱི་དཀྱིལ་འཁོར་མཐོང་བའི་སྐལ་ལྡན་རྣམས་ལ་ལུས་ཀྱི་དཀྱིལ་འཁོར་དུ་དབང་བསྐུར་ཞེས་དང་། གཞན་དག་རི་མོའི་དཀྱིལ་འཁོར་དུ་སློབ་མའི་དབང་ཐོབ། ལུས་ཀྱི་དཀྱིལ་འཁོར་དུ་སློབ་དཔོན་གྱི་དབང་ཐོབ་ཟེར་བ་གཉིས་ཀ་དོན་ལ་མི་གནས་ཏེ། སྔ་མ་དེ་བདེ་མཆོག་དྲིལ་བུ་པ་སོགས་ལ་ཡོད་ཀྱང་ལུགས་འདི་ལ་མེད་པའི་ཕྱིར་དང་། ཕྱི་མ་ལ་ནི་དེ་ལྟ་བུའི་ཁྱད་པར་དབྱེར་མེད་པའི་ཕྱིར་རོ། །གཉིས་པ་སློབ་དཔོན་ལ་གསུམ་སྟེ། རྒྱུའི་སློབ་དཔོན། རྐྱེན་གྱི་སློབ་དཔོན། ལྷན་ཅིག་བྱེད་པའི་སློབ་དཔོན་ནོ། །དང་པོ་ནི། བུམ་དབང་བསྐུར་བ། གཉིས་པ་ནི་གསང་དབང་བསྐུར་བའི་བླ་མའི་ཕྱག་རྒྱ། གསུམ་པ་ནི་ཤེས་རབ་ཡེ་ཤེས་ཀྱི་དབང་བསྐུར་བའི་སློབ་མའི་ཕྱག་རྒྱ་སྟེ། འདི་ཉིད་སྔོན་བྱུང་གི་རྣམ་འཕྲུལ་དང་སྦྱར་ན་དགེ་སློང་བྱི་བའི་ཤམ་ཐབས་ཅན་ཆོས་གོས་ལ་ཐོད་བྱས་པ་ནི་རྒྱུའི་སློབ་དཔོན། ཁྱི་མོ་དཀར་མོ་ནི་རྐྱེན་གྱི་སློབ་དཔོན། བུད་མེད་ངན་མ་བུ་ཆུང་དང་བཅས་པ་ནི་ལྷན་ཅིག་བྱེད་པའི་སློབ་དཔོན་ཡིན་པར་ཞལ་ལུང་གི་འགྲེལ་པར་བཤད་དོ། །གསུམ་པ་དབང་ལ་གསུམ་སྟེ། བུམ་དབང་། གསང་དབང་། ཤེས་རབ་ཡེ་ཤེས་ཀྱི་དབང་ངོ་། །གསུམ་པོ་རེ་རེ་ལ་ཡང་། སློབ་དཔོན་དང་། ཡོན་དང་། སྡོམ་པ་དང་། དཀྱིལ་འཁོར་དང་། ཆོ་ག་དང་། ངོ་བོ་དང་། དག་བྱ་དང་། སྐལ་བ་གང་དང་མཉམ་པ་དང་། གདམས་ངག་དང་། རྟོགས་པ་དང་། ངེས་ཚིག་སྟེ། བཅུ་གཅིག་བཅུ་གཅིག་གི་སྒོ་ནས་སྨན་པའི་ཞབས་ཀྱི་སྦྱོར་བ་བདུན་པ་ལས་གསུངས་ཏེ། སློབ་དཔོན་གྱི་སྐབས་སུ་རྒྱུའི་སློབ་དཔོན་ལས་བུམ་དབང་། རྒྱུ་དང་རྐྱེན་གྱི་སློབ་དཔོན་ལས་གསང་དབང་། དེ་གཉིས་དང་ལྷན་ཅིག་བྱེད་པའི་སློབ་དཔོན་གསུམ་ལས་ཤེས་རབ་ཡེ་ཤེས་ཀྱི་དབང་ལེན་པ་དང་། སྡོམ་པའི་སྐབས་སུ་བུམ་དབང་ལས་ཐུན་མོང་དང་ཐུན་མོང་མ་ཡིན་པའི་སྡོམ་པ། གསང་དབང་ལས་སྲོག་གཅོད་སོགས་ཐུན་མོང་མ་ཡིན་པའི་སྡོམ་པ། ཤེས་རབ་ཡེ་ཤེས་ལས་དཀྱིལ་འཁོར་འབྲི་བ་སོགས་འགོག་པའི་མཆོག་གི་སྡོམ་པ་ཐོབ་པ་དང་། དཀྱིལ་འཁོར་གྱི་སྐབས་སུ་རི་མོ་དང་ལུས་ཀྱི་དཀྱིལ་འཁོར་ལས་བུམ་དབང་། བྱང་ཆུབ་སེམས་ཀྱི་དཀྱིལ་འཁོར་ལས་གསང་དབང་། བྷ་གའི་དཀྱིལ་འཁོར་ལས་ཤེས་རབ་ཡེ་ཤེས་ཀྱི་དབང་ལེན་པར་གསུངས་སོ། །འོ་ན་དེ་དག་ཐམས་ཅད་དབང་བཞི་པ་ལ་ཅིའི་ཕྱིར་མ་བཤད་སྙམ་ན། བཞི་བརྒྱ་ལྔ་བཅུ་པ་དང་། དངོས་གྲུབ་འབྱུང་བའི་གཏེར་གཉིས་ལས། དབང་བཞི་པ་བསྐུར་བའི་ཚུལ་གཏན་མ་གསུངས་ཤིང་། དབང་གི་རབ་བྱེད་ལས་ནི་ཤེས་རབ་ཡེ་ཤེས་ཀྱི་དབང་གི་ཡེ་ཤེས་ལ་ཡན་ལག་བདུན་ལྡན་གྱི་ངོ་སྤྲོད་བྱེད་པའི་སྒོ་ནས་བསྐུར་ཚུལ་གསུངས་སོ། །སྦྱོར་བ་བདུན་པ་ལས་ནི། ད་ནི་ཡང་དག་བཤད་བྱ་བ། །བཞི་པ་མངོན་པར་བྱང་ཆུབ་པ། །བླ་མའི་ཞལ་ནས་ངེས་ཐོབ་པ། །སྦྱོར་བ་བདུན་གྱི་དེ་ཉིད་བཤད། །རང་བཞིན་གནས་ཕྱིར་སློབ་དཔོན་མེད། །རིན་ཐང་མེད་ཅིང་ཡོན་མེད་དེ། །སྡོམ་པ་བས་ན་སྡོམ་པ་མེད། །དེ་ཉིད་དཀྱིལ་འཁོར་དཀྱིལ་འཁོར་མེད། །སྟོབས་ཀྱིས་ཐོབ་ཕྱིར་དབང་མེད་དེ། །སྤྱི་བས་རང་གི་ངོ་བོ་མེད། །ཆོས་ཀུན་གཉེན་པོ་གཉེན་པོ་མེད། །རྡོ་རྗེ་འཛིན་གནས་ས་མེད་དེ། །རང་བཞིན་མེད་ཕྱིར་ཆོ་ག་དང་། །ལྟ་བ་ངེས་ཚིག་མེད་པ་རུ། །བླ་མ་ཡིས་ནི་ཡང་དག་བཤད། །ཅེས་བཤད་དོ། །འོ་ན་དབང་བཞི་པ་ལ་སློབ་དཔོན་སོགས་གཏན་མེད་པ་ཡིན་ནམ་སྙམ་ན། ཤེས་རབ་ཡེ་ཤེས་ཀྱི་དབང་ལས་ལོགས་སུ་གྱུར་པའི་དེ་དག་མེད་ཅེས་པའི་དོན་ཡིན་གྱི་དབང་བཞི་པ་མཚན་ཉིད་པ་དང་། དེ་ཚིག་གིས་བསྐུར་བའི་ཚུལ་མི་བཞེད་པ་ནི་མ་ཡིན་ཏེ། འདུས་པའི་རྒྱུད་ལས། བུམ་པའི་དབང་ནི་དང་པོ་སྟེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་དབང་། །དེ་ལྟར་དེ་བཞིན་བཞི་པ་ཡང་། །ཞེས་གསུངས་པས་སོ། །འདི་ལ་གསུམ་སྟེ། དབང་བཞི་པ་མཚན་ཉིད་པ། མཚོན་བྱེད་དཔེའི་དབང་བཞི་པ། དེ་ཚིག་གི་སྒོ་ནས་ཇི་ལྟར་བསྐུར་བའི་ཚུལ་ལོ། །དང་པོ་ནི་སངས་རྒྱས་ཀྱི་སའི་སྐུ་གསུམ་ཡན་ལག་བདུན་དང་ལྡན་པ་སྟེ། སློབ་དཔོན་ངག་གི་དབང་ཕྱུག་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཡན་ལག་བདུན་པོ་ཉིད་དང་ལྡན་པའི་བསྒྲུབ་བྱ་འདིར། །བདག་འདོད་ཚད་མས་ཡོངས་བསྒོས་བློ་ཅན་རྣམས་ཀྱང་བསྔགས། །ཞེས་དང་། དེའི་འགྲེལ་པར། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་སྟོན་པར་བྱེད་པ་སྟེ། ཕྱག་རྒྱ་ཆེན་པོ་ཁོ་ན་དབང་བསྐུར་བ་བཞི་པ་ཡིན་ནོ་ཞེས་གསུངས་པས་སོ། །གཉིས་པ་ནི། དབང་གསུམ་པའི་དུས་ཀྱི་ཡེ་ཤེས་གཅིག་ཉིད་ལ་སྔར་གྱི་སློབ་དཔོན་ལ་སོགས་པའི་དོན་ཚན་བཅུ་གཅིག་རང་བཞིན་ལྷུན་གྲུབ་ཀྱི་ཚུལ་དུ་ཚང་བ་སྟེ། སྦྱོར་བ་བདུན་པ་ལས་སྔར་གྱི་དབང་བཞི་པ་སྟོན་པའི་ཚིག་གི་མཇུག་ཏུ། ཤེས་རབ་ལས་སྐྱེས་ཡེ་ཤེས་ནི། །བཞི་པ་ཡིན་པར་ཤེས་པར་བྱ། །ཞེས་གསུངས་པས་སོ། །གསུམ་པ་ནི། དེ་ལྟར་དེ་བཞིན་བཞི་པ་ཡང་། །ཞེས་དེ་ལྟར་དང་། ཡང་དང་དེ་བཞིན་ཞེས་པའི་ཚིག་གསུམ་གྱིས་དབང་གསུམ་པའི་ཡེ་ཤེས་ལ་ཡན་ལག་བདུན་ལྡན་ཚང་བར་ངོ་སྤྲོད་པ་སྟེ། ངག་གི་དབང་ཕྱུག་གྲགས་པའི་གཞུང་ལས། དེ་ལྟར་སྒྲ་དང་ལྡན་ཉིད་ཕྱིར། །ཡང་གི་སྒྲ་དོན་སྐྱེས་ཉིད་ཕྱིར། །དེ་བཞིན་སྒྲ་དོན་ལྡན་ཉིད་ཕྱིར། །བཞི་པ་དེ་བཞིན་ཉིད་བདག་འདོད། །ཅེས་གསུངས་པས་སོ། །རྣལ་འབྱོར་དབང་ཕྱུག་གི་མན་ངག་ལས། དབང་བཞི་པོ་རེ་རེ་ལ་ཡང་སྦྱང་གཞི་དང་སློབ་དཔོན་སོགས་དོན་ཚན་བཅུ་དྲུག་སོ་སོར་བཞེད་པ་ནི་གྲུབ་ཆེན་གྱི་འགྲེལ་ཚུལ་གཞན་ཡིན་ནོ། །གསུམ་པ་དམ་ཚིག་དང་སྡོམ་པ་ལ་གཉིས་ཏེ། ཐུན་མོང་བའི་སྡོམ་པ་དང་། ཐུན་མོང་མ་ཡིན་པའི་སྡོམ་པའོ། །དང་པོ་ནི། སྟ་གོན་དང་འཇུག་པའི་སྐབས་སུ་ཐོབ་པའི་སོ་ཐར་དང་། བྱང་སེམས་ཀྱི་སྡོམ་པ་དང་། རིག་པའི་དབང་ལྔའི་སྐབས་སུ་ཐོབ་པའི་རིགས་ལྔའི་སྡོམ་པ་སྟེ། སློབ་དཔོན་དང་སློབ་མ་གཉིས་ཀའི་ཐུན་མོང་བའོ། །གཉིས་པ་ལ་གསུམ་སྟེ། སྤང་བའི་དམ་ཚིག་སྡོམ་པ་དང་། བཟའ་བ་དང་བསྲུང་བའི་དམ་ཚིག་དང་། རྣལ་འབྱོར་སྙིང་པོའི་སྡོམ་པའོ། །དང་པོ་ནི་བུམ་པའི་དབང་གི་སྐབས་སུ་ཐོབ་པ་སྟེ་རྩ་བའི་ལྟུང་བ་བཅུ་བཞི་དང་། ཡན་ལག་གི་ལྟུང་བ་བརྒྱད་བསྲུང་བའོ། །གཉིས་པ་ནི། གསང་དབང་གི་སྐབས་སུ་ཐོབ་པ་སྟེ། ཤ་ལྔ་དང་། བདུད་རྩི་ལྔ་བཟའ་བ་དང་། བསྲུང་བ་སྲོག་གཅོད་སོགས་བཞིའོ། །འདི་ནི་ཀྱཻ་རྡོ་རྗེ་ལས། དགོངས་ཏེ་གསུངས་པར་བྱས་ནས་བཞི་པའི་དམ་ཚིག་དུ་གསུངས་ཡང་འདིར་ནི་སེམས་ཅན་གྱི་དོན་དུ་འགྱུར་ན་སྲོག་གཅོད་པ་སོགས་བྱང་ཆུབ་སེམས་དཔའ་དང་ཐུན་མོང་བ་དང་། རྣམ་རྟོག་གི་སྲོག་གཅོད་པ་སོགས་དགོངས་ཏེ་གསུངས་པ་རྣམས་གསང་དབང་གི་དམ་ཚིག་ཏུ་གསུངས་སོ། །གསུམ་པ་ནི་ཤེས་རབ་ཡེ་ཤེས་ཀྱི་སྐབས་སུ་ཐོབ་པ་སྟེ། ཕྱི་རོལ་གྱི་དཀྱིལ་འཁོར་བྲི་བ་ལ་སོགས་བཀག་ནས་ཕྱག་རྒྱ་སྤྱན་མ་ལ་སོགས་པ་དང་། སྒྲུབ་པ་པོ་རིགས་ལྔར་ཤེས་པར་བྱས་ནས་དག་མ་དག་གི་འདུ་ཤེས་འགོག་པའོ། །ཡང་དམ་ཚིག་འདི་དག་བསྡུས་ནས་ལུས་ངག་ཡིད་གསུམ་གྱི་སྡོམ་པ་གསུམ་དུ་ཡང་གསུངས་ཏེ། ལུས་ཀྱི་སྡོམ་པ་ནི་རང་གཞན་གྱི་ལུས་རྡོ་རྗེ་སེམས་དཔའ་ལས་བྱུང་བར་ཤེས་པར་བྱས་ནས་གཞན་གྱི་ལུས་ལ་མི་སྨོད་པ་དང་། རང་གི་ལུས་ཀྱི་སྤྱོད་པ་ལ་བླང་དོར་དགག་པ་དང་། རང་གཞན་གྱི་ངག་རྡོ་རྗེ་སེམས་དཔའ་ལས་བྱུང་བར་ཤེས་པར་བྱས་ནས་གཞན་གྱི་ངག་ལ་མི་སྨོད་པ་དང་། རང་གི་ངག་བཟང་ངན་ལ་བླང་དོར་དགག་པ་དང་། རང་གཞན་གྱི་སེམས་རྡོ་རྗེ་སེམས་དཔའ་ལས་བྱུང་བར་ཤེས་པར་བྱས་ནས་གཞན་གྱི་སེམས་ལ་མི་སྨོད་པ་དང་། རང་གི་སེམས་ཕྱི་མས་སྔ་མ་སུན་མི་དབྱུང་བ་གསུམ་དུ་བསྡུས་ནས་གསུངས་ཏེ། སྔ་མ་རྣམས་ནི་ལས་དང་པོ་པའི་དམ་ཚིག་དང་། ཕྱི་མ་རྣམས་ནི་བརྟན་པ་ཐོབ་པའི་དམ་ཚིག་དུ་མངོན་ནོ། །གཉིས་པ་བསྒོམ་པར་བྱ་བའི་ལམ་གྱི་ངོ་བོ་ནི་བསྐྱེད་རྫོགས་གཉིས་ཏེ། འདི་ལ་དབྱེ་གཞི། དབྱེ་ངོ་། གྲངས་ངེས་པ། བསྒོམ་པའི་གོ་རིམ་དང་བཞི་ལས། དང་པོ་ནི་ཡིད་མཚན་རྟོག་ལས་སྐྱོབ་པའི་ཐབས་ཁྱད་པར་ཅན་དུ་གྱུར་པའི་སྔགས་ཀྱི་སྤྱོད་པ་སྟེ། འདུས་པའི་རྒྱུད་ཕྱི་མ་ལས། དབང་པོ་དང་ནི་ཡུལ་རྣམས་ཀྱི། །རྐྱེན་ལས་གང་དང་གང་བྱུང་བའི། །ཡིད་དེ་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །གང་བཤད་དམ་ཚིག་སྡོམ་པ་ནི། །རྡོ་རྗེ་ཀུན་གྱི་བསྲུང་བ་ནི། །སྔགས་ཀྱི་སྤྱོད་པ་ཞེས་བཤད་དོ། །ཞེས་གསུངས་པ་ལྟར་རོ། །འདི་ལ་གང་སྐྱོབ་པར་བྱ་བའི་ཡིད། གང་ལས་སྐྱོབ་པའི་སྤང་བྱ། གང་གིས་སྐྱོབ་པའི་ཐབས་དང་གསུམ་ལས། དང་པོ་ནི། མནྟྲ་ཞེས་པའི་མ་ན་ལ་ཨོ་བྱིན་པ་མ་ནོ་ནི་ཡིད་དེ། དབང་པོ་དྲུག་དང་། ཡུལ་དྲུག་གི་རྐྱེན་ལས་བྱུང་བའི་རྣམ་པར་ཤེས་པ་ཚོགས་དྲུག་གོ །དེ་ནི་ཚིག་རྐང་དང་པོ་གསུམ་གྱིས་སྟོན་ནོ། །གཉིས་པ་ནི་གཞུང་ལས་དངོས་སུ་མེད་ཀྱང་། དོན་གྱིས་ཐོབ་པ་མཚན་མ་དང་རྣམ་པར་རྟོག་པའོ། །གསུམ་པ་ནི་རྩ་རྒྱུད་ལེའུ་བཅུ་བདུན་པར་གང་བཤད་པའི་དམ་ཚིག་དང་། སྡོམ་པ་ཐམས་ཅད་འཇིག་རྟེན་པའི་སྤྱོད་པ་མཚན་རྟོག་ལས་གྲོལ་བའི་ཐབས་ཁྱད་པར་ཅན་རྡོ་རྗེ་གསུམ་གྱི་བསྲུང་བ་བླ་ན་མེད་པར་འདུས་ཏེ། འདི་ལ་བསྐྱེད་རིམ་གྱི་རྡོ་རྗེ་གསུམ་གྱི་བསྲུང་བ་ནི་ལུས་ངག་ཡིད་གསུམ། སྐུ་གསུང་ཐུགས་ཀྱི་རྡོ་རྗེ་གསུམ་དུ་ཤེས་པར་བྱས་ནས་ཉམས་སུ་ལེན་པ་ཡིན་ལ། རྫོགས་རིམ་ལ་ནི་ཡེ་ཤེས་གཅིག་ཉིད་ལ་བསྲུང་བ་གསུམ་ཆར་ཚང་བའོ། །དེ་ནི་ཚིག་རྐང་ཕྱི་མ་ལྔས་སྟོན་ཏོ། །གཉིས་པ་དབྱེ་ངོ་ནི། འདུས་པའི་རྒྱུད་ཕྱི་མར། སངས་རྒྱས་རྣམས་ཀྱིས་དེར་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པའི་རིམ་པ་ཉིད་དང་ནི། །དེ་བཞིན་རྫོགས་པའི་རིམ་ཉིད་དོ། །ཞེས་གསུངས་པ་ལྟར་བསྐྱེད་རིམ་དང་། རྫོགས་རིམ་གཉིས་སོ། །དང་པོ་ནི་འོག་ཏུ་རྒྱས་པར་འཆད་དོ། །གཉིས་པ་ལ་སྙིང་ཁར་མི་ཤིགས་པའི་ཐིག་ལེ་བསྒོམས་པ་དགའ་བའི་རང་བཞིན། གསང་གནས་སུ་གསང་བའི་ཐིག་ལེ་བསྒོམས་པ་དགའ་བ་བར་མའི་རང་བཞིན། ལུས་ཀྱི་གནས་བཞིར་སྤྲུལ་པའི་ཐིག་ལེ་བསྒོམས་པ་དགའ་བྲལ་གྱི་རང་བཞིན། དགའ་བ་གསུམ་ཆར་རོ་གཅིག་པ་མི་ཤིགས་པའི་ཐིག་ལེ། དེ་ཉིད་བསྒོམས་པ་ལྷན་སྐྱེས་ཀྱི་རང་བཞིན་ཏེ་གཙོ་བོ་ཐིག་ལེའི་རྣལ་འབྱོར་བཞི་གསུངས་ལ། དེ་ཡང་སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་པའི་ཚུལ་གྱིས་ལས་རྒྱ་ལ་བརྟེན་ནས་སྒྱུ་མའི་དཔེ་བཅུ་གཉིས་ཀྱིས་མཚོན་པའི་སྒྱུ་མ་ལྟ་བུའི་ཏིང་ངེ་འཛིན་དཔེའི་ཚུལ་གྱིས་མངོན་སུམ་དུ་རྟོགས་ནས་རིག་པ་བརྟུལ་ཞུགས་ཀྱི་སྤྱོད་པ་ཟླ་བ་དྲུག་གམ་བཅོ་བརྒྱད་དུ་སྤྱོད་པས་ཚེ་འདིར་རྡོ་རྗེ་འཆང་སྒྲུབ་པ་སྟེ། དངོས་གྲུབ་འབྱུང་བའི་གཏེར་ལས། རྫོགས་པའི་རིམ་པའི་རྣལ་འབྱོར་དང་། །ཕྱག་རྒྱ་ལས་སྐྱེས་ཆོས་ཐམས་ཅད། །སྒྱུ་མ་ལ་སོགས་འདྲར་སྒྲུབ་པ། །རང་བཞིན་གནས་པའི་རྣལ་འབྱོར་རོ། །ཞེས་གསུངས་པ་ལྟར་རོ། །སྒྱུ་མའི་དཔེ་བཅུ་གཉིས་ནི་ཞལ་ལུང་ལས། སྒྱུ་མ་དང་ནི་སྨིག་རྒྱུ་དང་། །བྲག་ཆ་མགལ་མེའི་འཁོར་ལོ་དང་། །སྤྲུལ་པ་དྲི་ཟའི་གྲོང་ཁྱེར་དང་། །ཆུ་བུར་དང་ནི་མིག་འཕྲུལ་དང་། །གཟུགས་བརྙན་ཆུ་ཟླ་ལ་སོགས་པར། །ཞེས་དང་། སོགས་ཀྱི་སྒྲས་བསྡུས་པ་རྨི་ལམ་དང་། དབང་པོའི་གཞུ་གཉིས་ཡིན་པར་གསུངས་སོ། །དེ་ལྟར་བསྐྱེད་རྫོགས་གཉིས་པོ་དེ་ཡང་། འབྲས་བུ་སངས་རྒྱས་ཀྱི་ཡེ་ཤེས་ཟབ་གསལ་གཉིས་མེད་ཡིན་པ་ལྟར། ཟབ་གསལ་གཉིས་མེད་ཀྱི་ཚུལ་གྱིས་བསྒོམ་དགོས་པ་ལས། བསྐྱེད་རིམ་གྱི་ཟབ་གསལ་གཉིས་མེད་ནི་ཡེ་ཤེས་ཀྱི་ཚོགས་ཀྱི་ཟབ་མོ་སྟོང་པ་ཉིད་བསྒོམས་ནས། དེ་ལས་ལངས་ཏེ་སེམས་གསལ་བ་དང་། དཀྱིལ་འཁོར་གྱི་འཁོར་ལོའི་རྣམ་པར་བརྟགས་པ་ན། ཟབ་མོ་སྟོང་པ་ཉིད་དང་གསལ་བ་དཀྱིལ་འཁོར་གྱི་འཁོར་ལོ་དབྱེར་མེད་པ་སྟེ། སྒྲུབ་ཐབས་ཀུན་བཟང་ལས། ཐ་མལ་རྣམ་རྟོག་རྒྱུན་ནི་མ་རྟོགས་པར། །སྲིད་པའི་སྡུག་བསྔལ་གཞན་ཅིའང་ཡོད་མ་ཡིན། །ཞེས་དང་། ཟབ་ཅིང་རྒྱ་ཆེ་བ་ཡི་བདག་ཉིད་ཅན། །དེར་ནི་ཀུན་རྟོག་གང་ཡིན་སྣང་མི་འགྱུར། །ཞེས་གསུངས་པས་སོ། །རྫོགས་རིམ་གྱི་ཟབ་གསལ་གཉིས་མེད་ནི་ཕྱག་རྒྱ་ལ་བརྟེན་ནས་དཔེའི་ཚུལ་གྱིས་རྟོགས་པ་སྟེ། ཞལ་ལུང་ལས། དེ་བཞིན་ཕྱིན་ལོག་རྣམ་པར་ཤེས། །ལོག་པས་ཟབ་གསལ་གཉིས་མེད་ཀྱི། །དོན་འདྲ་ཞེས་དང་། དེའི་འགྲེལ་པར་ཟབ་གསལ་གཉིས་མེད་ཀྱི་དོན་འདྲ་ཞེས་པ་ནི། ཇི་བཞིན་མ་ཡིན་པའི་ཕྱིར་འདྲ་བ་སྟེ་བརྟགས་པའི་སྒོ་ཞེས་གསུངས་པས་སོ། །གསུམ་པ་གྲངས་ངེས་པ་ལ་བཞི་སྟེ། སྤང་བྱ་གཉིས་ཡིན་པས་དང་། བསྒྲུབ་བྱ་གཉིས་ཡིན་པས་དང་། བསྐྱེད་བྱ་གཉིས་ཡིན་པས་དང་། རང་གི་ངོ་བོ་རྟེན་དང་བརྟེན་པ་ཡིན་པས་རིམ་པ་གཉིས་སུ་གྲངས་ངེས་པའོ། །དང་པོ་ནི། སྤང་བྱ་ཐ་མལ་གྱི་རྣམ་པར་རྟོག་པ་དང་། ལྷར་ཞེན་པའི་རྣམ་པར་རྟོག་པ་གཉིས་སྤོང་བས་རིམ་པ་གཉིས་སུ་གྲངས་ངེས་པ་སྟེ། སྤང་བྱ་དང་པོའི་ལུང་ནི་སྔར་དྲངས་ཟིན་ལ། གཉིས་པ་ནི་ཞལ་ལུང་གི་འགྲེལ་པར། དེ་ལྟར་བསྐྱེད་པའི་རིམ་པའི་གཞི་རྣམ་པར་བཀོད་ནས། ད་ནི་རྫོགས་པའི་རིམ་པས་དེ་སྦྱོང་བའི་ཐབས་གསུངས་པ་ཞེས་གསུངས་སོ། །གཉིས་པ་ནི་བསྒྲུབ་པར་བྱ་བ་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་གཉིས་སུ་ངེས་པས་རིམ་པ་གཉིས་སུ་ངེས་ཏེ། འདུས་པའི་རྒྱུད་ལས། ཐ་མལ་པ་ནི་རྡོ་རྗེ་བཞི། །ཡེ་ཤེས་རྡོ་རྗེ་མཆོག་རྣམས་སོ། །ཞེས་གསུངས་པས་སོ། །གསུམ་པ་ནི་བསྐྱེད་པར་བྱ་བ་སྔགས་ཀྱི་སྐུ་དང་། ཡེ་ཤེས་ཀྱི་སྐུ་གཉིས་སུ་ངེས་པས་རིམ་པ་གཉིས་སུ་ངེས་ཏེ། ཞལ་ལུང་གི་འགྲེལ་པ་ལས། དང་པོའི་རིམ་པ་ཞེས་པ་ནི་བསྐྱེད་པའི་རིམ་པའི་ཡན་ལག་དང་བཅས་པ་རྟོགས་པས་རང་གི་རྒྱུད་ཀྱི་ལས་ཀྱི་སྒྲིབ་པའི་དྲི་མ་རྣམ་པར་དག་པར་བྱས་ཏེ། ཡེ་ཤེས་སྒྱུ་མ་ཞེས་པ་ནི་ཡེ་ཤེས་ཅུང་ཟད་དག་པའི་སྐུ་སྟེ། ཞེས་གསུངས་པས་སོ། །བཞི་པ་ནི་རྫོགས་པའི་རིམ་པས་ཟབ་གསལ་གཉིས་མེད་དཔེའི་ཚུལ་གྱིས་བསྒྲུབ་པ་ལ་བསྐྱེད་རིམ་ངེས་པར་རྟེན་དུ་དགོས་པས་རིམ་པ་གཉིས་སུ་གྲངས་ངེས་ཏེ། ཞལ་ལུང་ལས། དེ་བས་ལུས་ངག་ཡིད་གསུམ་གྱི། །སྡོམ་པ་མཆོག་ལ་གནས་བྱས་ནས། །ང་འོ་སྙམ་པས་གཟི་བསྐྱེད་ལ། །རིམ་པ་གཉིས་པ་དེ་ཉིད་བསྒྲུབ། །ཅེས་གསུངས་པའི་མཇུག་ཏུ། བསྐྱེད་རིམ་བསྒོམ་ཚུལ་ཚིགས་སུ་བཅད་པ་ལྔ་གསུངས་ནས། དེ་མཉེས་དེ་ལ་གོམས་བསླབས་པས། །ཕྱི་རོལ་ལུས་ནི་ལོག་བྱེད་དེ། །སངས་རྒྱས་རྣམས་ཀྱི་སྤྱོད་ཡུལ་མཆོག །མཐའ་ཡི་དེ་ཉིད་བསྒོམ་པར་བྱ། །ཞེས་དང་། འགྲེལ་པར། དང་པོར་རིམ་པ་གཉིས་པའི་གཞི་རྣམས་དགོད་པའི་ཕྱིར། བསྐྱེད་པའི་རིམ་པ་གསུངས་པ་ཞེས་གསུངས་པས་སོ། །བཞི་པ་བསྒོམ་པའི་གོ་རིམ་ནི། འཕགས་པ་ཀླུ་སྒྲུབ་ཀྱིས། བསྐྱེད་པའི་རིམ་ལ་ལེགས་གནས་ནས། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་གསུངས། །ཞེས་དང་། སྤྱོད་བསྡུས་སྒྲོན་མེར་ཡང་བསྐྱེད་རིམ་ལ་ལོབས་ནས་རྫོགས་རིམ་ལ་བསླབ་པར་གསུངས་པས་བསྐྱེད་རིམ་ལ་བརྟན་པ་ཐོབ་ནས་རྫོགས་རིམ་སྒོམ་པར་བཞེད་ཅིང་། ཌོཾ་བྷི་ཧེ་རུ་ཀ་ཡང་དེ་དང་མཐུན་པར་བཞེད་དོ། །ལུགས་འདི་ལ་ནི་བསྐྱེད་རིམ་རྟེན་ཙམ་དུ་བྱས་ནས་རྫོགས་པའི་རིམ་པ་གཙོ་བོར་བསྒོམ་པ་དང་། བསྐྱེད་པའི་རིམ་པ་ཉིད་ཀྱིས་ཡང་དག་པའི་ཡེ་ཤེས་ལ་དབང་བའི་བར་བགྲོད་པར་བྱེད་པའི་ལུགས་གཉིས་ཀྱེ་རྡོར་མན་ངག་ལུགས་དང་། མཚོ་སྐྱེས་ལུགས་ལྟར་བཞེད་པ་གཉིས་ཡོད་པ་ལས། དང་པོ་ནི་སྔར་རྟེན་དང་བརྟེན་པའི་སྐབས་སུ་བཤད་ཟིན་ལ། ཕྱི་མ་ནི་དེ་མ་ཐག་དུ་འཆད་པར་འགྱུར་རོ། །གསུམ་པ་རྟོགས་པའི་རིམ་པས་བཞག་པའི་གང་ཟག་ལ་བཞི་སྟེ། ལས་དང་པོ་པ། ཡེ་ཤེས་ལ་ཅུང་ཟད་དབང་བ། ཡེ་ཤེས་ལ་དབང་བ། ཡང་དག་པའི་ཡེ་ཤེས་ལ་དབང་བའོ། །དང་པོ་ནི། དབང་བསྐུར་བ་དང་། བསྐྱེད་རིམ་གྱི་གདམས་ངག་ཚུལ་བཞིན་དུ་ཐོབ་ནས་རགས་པ་དང་། ཕྲ་བའི་ལྷའི་རྣལ་འབྱོར་ཐམས་ཅད་རིམ་པ་བཞིན་དུ་བསྒོམ་དགོས་པའོ། །གཉིས་པ་ནི་རགས་པའི་ལྷའི་རྣལ་འབྱོར་ཡུད་ཙམ་གྱིས་བསྒོམ་ནུས་ཤིང་། ཕྲ་བའི་སའི་སྙིང་པོ་ལ་སོགས་པ་རིམ་པ་བཞིན་དུ་བསྒོམ་ནུས་པ་སྟེ། འདི་ལ་རགས་པའི་ལྷའི་བསྐྱེད་ཆོག་ཕྲི་ནས་ཕྲ་བའི་ལྷ་སྔ་མ་བཞིན་དུ་བསྒོམ་དགོས་སོ། །གསུམ་པ་ནི་རགས་པ་དང་ཕྲ་བའི་ལྷའི་རྣལ་འབྱོར་གཉིས་ཀ་ཡུད་ཙམ་གྱིས་བསྒོམ་ནུས་པ་སྟེ། འདི་ལ་ཕྲ་བའི་ལྷའི་བསྐྱེད་ཆོག་རྣམས་ཀྱང་ཕྲི་ནས་ཕྲ་རགས་ཀྱི་ལྷའི་རྣལ་འབྱོར་ཐམས་ཅད་སེ་གོལ་གཏོགས་པ་ཙམ་ལ་ཅིག་ཅར་དུ་རྫོགས་པའི་རྣལ་འབྱོར་བསྒོམ་པའོ། །བཞི་པ་ནི་རྡུལ་ཕྲན་གཅིག་གི་ནང་དུ་དཀྱིལ་འཁོར་གྱི་འཁོར་ལོ་དོག་པ་མེད་པར་བསྒོམ་ནུས་པ་སྟེ། འདི་ནི་དྲོད་ཆེན་པོ་མཐོང་བའི་ལམ་ཐོབ་པ་ན་སྟོང་གསུམ་ཡུངས་འབྲུར་སྡུས་པ་ལ་ཆེ་ཆུང་མེད་པར་རྣལ་འབྱོར་དབང་ཕྱུག་གིས་གསུངས་པ་དང་མཐུན་པར་མངོན་ནོ། །དེས་ན་སྨན་པའི་ཞབས་ཀྱིས། གང་ཟག་དང་པོ་གསུམ་དུ་བསྡུས་པར་གསུངས་པ་ཡང་། སོ་སོ་སྐྱེ་བོའི་གནས་སྐབས་སུ་རྟོགས་པའི་རིམ་པས་བཞག་པའི་གང་ཟག་གསུམ་དུ་ངེས་པ་ལ་དགོངས་ཏེ། སློབ་དཔོན་འདི་དང་། མར་མེ་མཛད་གཉིས་ཆར་གྱིས་རྡུལ་ཚོན་གྱི་དཀྱིལ་འཁོར་ལ་བརྟེན་ནས་དབང་བསྐུར་བའི་རྡོ་རྗེ་སློབ་དཔོན་ལ། གང་ཟག་དང་པོ་གསུམ་གྱི་རྣམ་གཞག་ཁོ་ན་གསུངས་པ་ཐམས་ཅད་དགོངས་པ་གཅིག་པའི་ཕྱིར་རོ། །གང་ཟག་བཞིའི་རྣམ་པར་གཞག་པ་འདི་ནི། བཞི་བརྒྱ་ལྔ་བཅུ་པ་ལས། ནངས་པར་ལངས་ནས་སྔ་མ་བཞིན། །ལེགས་ཟློས་དང་པོའི་ལས་ཅན་ཡིན། །ཡེ་ཤེས་ཅུང་ཟད་བབས་གྱུར་པས། །སྔགས་ཀྱི་ཚུལ་ཁྲིམས་བརྟུལ་ཞུགས་བརྟན། །མིག་དང་སྐུ་སོགས་བྱིན་གྱིས་བརླབས། །ཐུན་མཚམས་སུ་ནི་རབ་སྒྲིམས་བཟླས། །ཡེ་ཤེས་ཅུང་ཟད་དབང་ཐོབ་པས། །རྣམ་པ་ཀུན་དུ་རབ་རྫོགས་པར། །སྤྲོ་དང་བསྡུ་བའི་བྱེད་པ་པོ། །ཉིན་མཚན་རྣལ་འབྱོར་ཡང་དག་བསྟེན། །ཡང་དག་ཡེ་ཤེས་དབང་ཐོབ་བསྒོམས། །ཁམས་ཀྱི་རྡུལ་ནའང་འཁོར་ལོ་མཆོག །གཟུགས་ཅན་བདག་ཉིད་གཟུགས་ཀྱིས་ནི། །འགྲོ་བའི་དོན་གྱི་བྱ་བ་བྱ། །ཞེས་གསུངས་པ་རྣམས་ཀྱིས་བསྟན་ནོ། །བཞི་པ་ལམ་གྱིས་བསྒྲུབས་པའི་འབྲས་བུ་ལ་གཉིས་ཏེ། ཐུན་མོང་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་བོ། །དང་པོ་ལ་བརྒྱད་དེ། རིག་འཛིན་དང་། མངོན་ཤེས་དང་། མི་སྣང་བ་དང་། རྒྱ་མཚོ་བཅག་པ་དང་། མངགས་གཞུག་དང་། སྔགས་ཀྱི་ཁྱད་པར་དང་། མིག་སྨན་དང་། ལས་བཞིའི་རབ་ཏུ་དབྱེ་བའོ། །གཉིས་པ་ནི་ཡང་དག་པའི་ཡེ་ཤེས་ལ་དབང་ཐོབ་པ་ས་དང་པོ་མཐོང་བའི་ལམ་ནས་བརྩམས་ཏེ། གསང་གསུམ་གཅིག་དུ་འདུས་པ་རྡོ་རྗེ་འཛིན་པའི་སའི་བར་ཏེ། དངོས་གྲུབ་འབྱུང་བའི་གཏེར་ལས། ཅིག་ཤོས་རྡོ་རྗེ་གསུམ་ཡིན་ཏེ། །དེ་དང་དེ་རུ་རབ་བརྟན་པའི། །སངས་རྒྱས་ཉིད་གྲུབ་དངོས་གྲུབ་ནི། །ཡང་དག་ཡེ་ཤེས་དབང་ཐོབ་བོ། །ཞེས་གསུངས་པས་སོ། །འབྲས་བུ་མཐར་ཐུག་ནི་ཟབ་གསལ་གཉིས་མེད་དེ། གྲོལ་བའི་ཐིག་ལེ་ལས། ཟབ་མོ་ཁོ་ན་རྟོགས་པས་མིན། །གསལ་བ་དག་ཀྱང་དེ་བཞིན་ནོ། །དེ་ཕྱིར་ཐལ་བྱུང་ཟབ་མོ་ཡིས། །གྲོལ་འདོད་དེ་ལ་ང་མ་དད། །དེ་བས་གཉིས་མེད་རང་བཞིན་དུ། །རྟོགས་པས་ཚེ་འདིར་འབྲས་ཐོབ་ངེས། །རྣམ་པར་རྟོག་པ་ཀུན་བྲལ་བས། བསམ་བརྗོད་ཡུལ་ལས་ཤིན་དུ་འདས། །མཁའ་བཞིན་དྲི་མེད་ཀུན་འབྱུང་བ། །བརྟགས་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། །སྒྱུ་མ་འཇའ་ཚོན་ལྟ་བུ་རུ། །རང་དང་གཞན་གྱིས་རྒྱུད་སྦྱོང་བ། །ཡང་དག་གསལ་བ་ཞེས་བྱའོ། །ཞེས་གསུངས་པ་ལྟར་རོ། །དེ་ལྟར་ལམ་སྤྱིའི་རྣམ་པར་གཞག་པ་མདོར་བསྡུས་པ་བསྟན་ཟིན་ནས། གསུམ་པ་དེ་ལས་བསྐྱེད་པའི་རིམ་པ་བྱེ་བྲག་ཏུ་བཤད་པ་ལ་གསུམ་སྟེ། གང་གིས་བསྒོམ་པའི་གང་ཟག གང་དུ་བསྒོམ་པའི་གནས། གང་བསྒོམ་པའི་རྣལ་འབྱོར་རོ། །དང་པོ་ནི། སྙིང་རྗེ་ཆེན་པོའི་སྟོབས་ཀྱིས་བྱང་ཆུབ་ཀྱི་སེམས་བསྐྱེད་པ། སྦྱིན་པ་ལ་སོགས་པའི་ཡོན་ཏན་གྱིས་བརྒྱན་པ། ཟབ་མོ་སྔགས་ཀྱི་ཚུལ་ལ་ལྷག་པར་མོས་པ། དཔལ་ལྡན་འདུས་པའི་དཀྱིལ་འཁོར་དུ་དབང་བསྐུར་ཞིང་རྗེས་སུ་གནང་བ་ཐོབ་པ་སྟེ། ཁྱད་པར་བཞི་ལྡན་གྱིས་བསྒོམ་པར་ཀུན་བཟང་བསྡུས་པ་དང་། མར་མེ་མཛད་དང་། སྨན་པའི་ཞབས་སོགས་ཀྱིས་མཐུན་པར་གསུངས་སོ། །གཉིས་པ་ནི། ཀུན་བཟང་བསྡུས་པ་ལས། ལ་ལར་དྲི་མེད་ཆུ་ནི་ཕུན་ཚོགས་ཤིང་། །ཤིང་མཆོག་མཛེས་པས་རྣམ་པར་བརྒྱན་པ་ཡི། །རི་བོའི་ཕྱོགས་གཅིག་ཏུ་ནི་བཅོམ་ལྡན་འདས། །འཇམ་པའི་དབྱངས་ཞེས་བྱ་བར་རབ་བསྒྲུབ་བྱ། །ཞེས་གསུངས་ཤིང་། །དེ་ཡང་རྩ་རྒྱུད་ལེའུ་བཅུ་གཉིས་པར། །དགོན་པ་ཆེན་པོའི་ས་ཕྱོགས་ནི། །མེ་ཏོག་འབྲས་བུ་སོགས་པས་བརྒྱན། །རི་བོ་དབེན་པ་དག་ཏུ་ནི། །དངོས་གྲུབ་ཐམས་ཅད་བསྡུས་པ་བསྒྲུབ། །ཞེས་གསུངས་པའི་དོན་དུ་མཛད་པར་སྣང་ཞིང་། གཞུང་གཞན་རྣམས་ལས་ཀྱང་དེ་བཞིན་དུ་འབྱུང་ངོ་། །གནས་དེར་སྟེགས་བུ་གྲུ་བཞི་པ་བརྩེགས་ཏེ། ཙནྡན་དམར་པོ་སོགས་ཀྱིས་བྱུགས་ནས་མེ་ཏོག་སིལ་མ་བཀྲམ་སྟེ། དེར་བདེ་བའི་སྟན་ལ་རྡོ་རྗེའི་སྐྱིལ་ཀྲུང་གིས་འདུག་པར་གཞུང་གཞན་ཀུན་ལས་བཤད་ཅིང་། རིན་ཆེན་རྡོ་རྗེས། མི་བསྐྱོད་རྡོ་རྗེའི་སྒྲུབ་ཐབས་སུ། ཟླ་བ་དང་། ཉི་མ་དང་། ཆུ་དང་། སྨན་དང་། དྲི་ཞེས་བྱ་བས་དཀྱིལ་འཁོར་གྲུ་བཞི་པར་བྱུགས་ལ། མེ་ཏོག་དྲི་ཞིམ་པོ་སྣ་ཚོགས་པའི་སིལ་མ་གཏོར་བར་བྱའོ། །དེ་དག་མེད་ན་ནི་ཐམས་ཅད་ཡིད་ཀྱིས་བྱས་ནས་དེར་སྟན་བདེ་བ་ལ་རྡོ་རྗེའི་སྐྱིལ་ཀྲུང་གིས་འདུག་སྟེ། ཞེས་བཤད་དོ། །གསུམ་པ་ལ་གསུམ་སྟེ། དང་པོ་སྦྱོར་བ། དཀྱིལ་འཁོར་རྒྱལ་མཆོག ལས་རྒྱལ་མཆོག་གོ །དང་པོ་ལ་གསུམ་སྟེ། སྔོན་དུ་འགྲོ་བ་དང་། དངོས་གཞི་དང་། རྗེས་སུ་ཆགས་པའི་རྣལ་འབྱོར་རོ། །དང་པོ་ལ་གསུམ་སྟེ། ལམ་ཐམས་ཅད་སངས་རྒྱས་ཀྱི་རྒྱུར་འགྱུར་བའི་ཕྱིར་དུ་ཚངས་པའི་གནས་བཞི་བསྒོམ་པ། ལས་ཀྱི་སྒྲིབ་པ་བཟློག་པའི་ཕྱིར་དུ་བསོད་ནམས་ཀྱི་ཚོགས་བསག་པ། དངོས་འཛིན་བཟློག་པའི་ཆེད་དུ་ཡེ་ཤེས་ཀྱི་ཚོགས་བསག་པའོ། །དང་པོ་ནི། ཀུན་བཟང་རྒྱས་པར། ནངས་པར་ལངས་མ་ཐག་ཏུ། རྣམ་ཐར་སྒོ་གསུམ་གྱིས་གདོང་དག་པར་བྱས་ནས་སྙིང་ཁར་ཨཱཿཚེག་དྲག་ཅན་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ་མཾ་གྱི་ཡི་གེ་གཟུང་འཛིན་གྱིས་སྟོང་པ་བསྒོམས་ནས་དེའི་འོད་ཀྱིས་སྙིང་རྗེ་ཐོག་མར་བྱས་པའི་ཚད་མེད་བཞི་བསྒོམ་ཚུལ་རྒྱས་པར་གསུངས་ལ། དེ་བཞིན་དུ་ཞལ་ལུང་ལས། དེ་ནས་སེམས་ཅན་ཐམས་ཅད་ཀུན། །ཚངས་སྤྱོད་ཆེན་པོ་བཞིས་དམིགས་ཏེ། །ཞེས་དང་། དེའི་འགྲེལ་པར་སེམས་ཅན་ཐམས་ཅད་ཀུན་ཞེས་པ་ནི་ཡུལ་ཚད་མེད་པའོ། །ཡུལ་ཅན་གང་ཞེ་ན་ཚངས་སྤྱོད་ཆེན་པོ་བཞིས་དམིགས་ཏེ། ཞེས་པ་ནི་སྟོན་པ་སངས་རྒྱས་བཅོམ་ལྡན་འདས་ནི་ཚངས་པ་ཆེན་པོ་སྟེ། དེའི་སྤྱོད་པ་ནི་སྙིང་རྗེ་ལ་སོགས་པ་བཞིའོ། །དེས་དམིགས་པའོ། །ཇི་ལྟར་དམིགས་ཞེ་ན། ས་བོན་གྱི་འོད་ཟེར་གྱིས་སྣང་བའི་སེམས་ཅན་རྣམས་མཐོང་བའི་ལམ་དུ་བྱས་ལ། དེ་རྣམས་སྡུག་བསྔལ་དང་། དེའི་རྒྱུ་ལས་གྲོལ་བར་བྱའོ་སྙམ་པ་ནི་སྙིང་རྗེས་དམིགས་པའོ། །ཞེས་སོགས་རྒྱས་པར་གསུངས་སོ། །དངོས་གྲུབ་འབྱུང་བའི་གཏེར་ལས། འོད་ཟེར་གྱིས་མཐོང་ཡུལ་དམིགས་ཏེ། །སྙིང་རྗེ་ལ་སོགས་བསྒོམ་པར་བྱ། །ཞེས་དང་། རིན་ཆེན་རྡོ་རྗེས། རྣམ་པར་དག་པའི་སྒོ་གསུམ་རྣམ་པར་དག་ཅིང་བྱམས་པ་ལ་སོགས་པ་བསྒོམས་པ་སྔོན་དུ་འགྲོ་བ་དང་། ཞེས་གསུངས་སོ། །བསོད་སྙོམས་པས་ཐོག་མར་བྱམས་པ་དང་། སྙིང་རྗེ་གཉིས་བསྒོམས་ནས། དེའི་འོག་ཏུ་སྙིང་ཁར་ས་བོན་བསྒོམས་ཏེ། ཚོགས་ཞིང་སྤྱན་དྲང་བར་བཤད་ཅིང་། ཀུན་བཟང་བསྡུས་པ་དང་། ཇོ་བོ་རྗེའི་འཇིག་རྟེན་དབང་ཕྱུག་གི་སྒྲུབ་ཐབས་དང་། མར་མེ་མཛད་རྣམས་ཀྱིས་སྐབས་འདིར་ཚད་མེད་བཞི་བསྒོམ་ཚུལ་གསལ་བར་མ་གསུངས་ཀྱང་། དེ་དག་ཏུ་ཡང་ཁ་བསྐང་བར་བྱ་སྟེ། ཀུན་བཟང་རྒྱས་པ་དང་། ཞལ་ལུང་ལས་གསུངས་པའི་ཕྱིར་རོ། །ཞལ་ལུང་གི་འགྲེལ་པའི་ལུང་དེས་ཚངས་པའི་གནས་ཞེས་པ་དང་། ཚངས་པའི་སྤྱོད་པ་ཞེས་པ་དོན་གཅིག་པར་ཡང་བསྟན་ཅིང་། ཚངས་པ་སངས་རྒྱས་བཅོམ་ལྡན་འདས་ལ་ངོས་འཛིན་པས་འདི་བསྒོམ་པའི་དགོས་པ་ཡང་གསལ་བར་བཤད་དོ། །བསྒོམ་པའི་གོ་རིམ་ཀྱང་གཞུང་གཉིས་ཀྱི་བྱམས་པ་ནས་བསྒོམ་པར་བཤད་ཀྱང་། ཚད་ལྡན་གྱི་གཞུང་གསུམ་ལས། སྙིང་རྗེ་ནས་བསྒོམ་པར་གསུངས་པས་ཉམས་སུ་ལེན་པའི་ཚེ་ཡང་དེ་བཞིན་དུ་ཤེས་པར་བྱའོ། །གཉིས་པ་ལ་བཞི་སྟེ། ཚོགས་ཀྱི་ཞིང་དམིགས་པ། ཕྱག་འཚལ་ཞིང་མཆོད་པ། རྒྱུན་བཤགས་བྱ་བ། དེ་དག་གི་དགོས་པ་བཤད་པའ་ོ། །དང་པོ་ནི་ཀུན་བཟང་གཉིས་དང་། འཇིག་རྟེན་དབང་ཕྱུག་གི་སྒྲུབ་ཐབས་དང་། བསོད་སྙོམས་པ་དང་། རིན་ཆེན་རྡོ་རྗེའི་གཞུང་རྣམས་ལས། སྙིང་ཁའི་ས་བོན་ལས་འོད་ཟེར་སྤྲོས་ཏེ། བསྒོམ་པར་འགྱུར་བའི་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་དམིགས་པ་ཙམ་ལས་གཞན་གསལ་ཁ་མི་སྣང་ཡང་། བློའི་བྱེ་བྲག་གིས། སངས་རྒྱས་ཀུན་དུ་བཞུགས་པ་འོད་ཟེར་གྱིས་གསལ་བར་བྱ་སྟེ། ལྟ་བ་དང་། ལོགས་ནས་སྤྱན་འདྲེན་པ་གང་ཡང་རུང་བས་ཆོག་པར། ཀྱཻ་རྡོ་རྗེའི་མན་ངག་འགའ་ཞིག་ལས་འབྱུང་བ་ལྟར་འདིར་ཡང་དེ་བཞིན་ནོ། །ཁྱད་པར་དུ་ཡང་ཀུན་བཟང་རྒྱས་པར། སྙིང་ཁའི་ས་བོན་ལས་འོད་ཟེར་ཁ་དོག་གཅིག་པ་སྤྲོས་ཏེ། འོད་ཟེར་གྱི་རྩེ་མོ་ལ། འཇམ་པའི་རྡོ་རྗེ་སྤྲོས་པས་ཞེས་གསུངས་པས་སྤྱན་འདྲེན་པ་ལ་ཉེ་བར་སྣང་ཞིང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་དང་། རྡོ་རྗེ་རྣལ་འབྱོར་མ་མཐའ་དག་གིས་ནམ་མཁའི་དཀྱིལ་འཁོར་ཁྱབ་པར་བལྟ་བར་བཤད་དོ། །སྨན་ཞབས་ཀྱིས། འོད་ཟེར་གྱིས་གསལ་སངས་རྒྱས་དང་། །བླ་མ་ལ་སོགས་མདུན་དུ་དམིགས། །ཞེས་པ་ནི་ལུགས་དང་པོ་ལ་ཉེ་བར་སྣང་ལ། རིན་ཆེན་རྡོ་རྗེ་མི་བསྐྱོད་པ་གཙོ་བོར་བྱས་པའི་དབང་དུ་བྱས་ནས། སྙིང་ཁར་ཉི་མའི་དཀྱིལ་འཁོར་ལ་ཧཱུྃ་བསམ་ནས། དེའི་འོད་ཀྱིས་དཀྱིལ་འཁོར་གྱི་འཁོར་ལོ་དང་། དེ་དང་ཐ་མི་དད་པའི་གཟུགས་ཅན་གྱི་ལྷ་མོ་རྣམས་ཀྱིས་ཀྱང་གང་བར་དམིགས་པར་བསམ་པར་བཤད་ལ། བསོད་སྙོམས་པས་སངས་རྒྱས་ལྔ་རྣམས་དང་། རང་གི་འདོད་པའི་ལྷ་དང་། སློབ་དཔོན་མངོན་སུམ་དུ་ནམ་མཁའ་ལ་བསམ་སྟེ་ཞེས་བཤད་དོ། །མར་མེ་མཛད་ཀྱིས། ཕྱོགས་བཅུ་དུས་གསུམ་འབྱུང་བ་ཡི། །སངས་རྒྱས་རྣམས་ཀྱི་མདུན་གནས་ཏེ། །ཞེས་པ་ཙམ་ལས། དཀྱིལ་འཁོར་འཁོར་ལོ་སྤྱན་འདྲེན་པའི་གསལ་ཁ་མི་སྣང་ངོ་། །གཉིས་པ་ནི་ཀུན་བཟང་བསྡུས་པར། སྣ་ཚོགས་མཆོད་པའི་སྤྲིན་རྣམས་ནི། །དང་པོར་སྤྲོ་སོགས་བློ་ལྡན་གྱིས་བྱ་ཞིང་། །ཞེས་པ་ཙམ་ལས་མི་སྣང་ལ། ཇོ་བོ་རྗེས་ཐོག་མར། ཀཱ་ཡ་ཝཱཀྐ་ཙིཏྟ་སོགས་ཀྱིས་ཕྱག་བྱས་ནས། དེའི་རྗེས་ལ་མཆོད་པ་བྱ་བར་བཤད་ཅིང་གཞུང་གཞན་ཐམས་ཅད་ལས། ཐོགས་མར་མཆོད་པ་བྱས་ནས། ཕྱག་རྗེས་ལ་བྱ་བར་བཤད་དོ། །མཆོད་པའི་རྣམ་གྲངས་ལ་ཀུན་བཟང་རྒྱས་པར། འོད་ཟེར་གྱི་རྩེ་མོ་ལས། མེ་ཏོག་དང་། བདུག་པ་དང་། མར་མེ་དང་། དྲི་དང་། ལྷ་བཤོས་དང་། ན་བཟའ་དང་། རྒྱལ་མཚན་དང་། དྲིལ་བུ་དང་། འཕན་དང་། ནོར་བུ་དང་། རིན་པོ་ཆེ་དང་། བཻ་ཌཱུརྻ་དང་། རྟ་རིན་པོ་ཆེ་དང་། གླང་པོ་རིན་པོ་ཆེ་དང་། རལ་གྲི་རིན་པོ་ཆེ་དང་། འཁོར་ལོ་རིན་པོ་ཆེ་དང་། ནོར་བུ་རིན་པོ་ཆེ་དང་། བློན་པོ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། ཕྱི་དང་གསང་བའི་མཆོད་པས་མཆོད་ནས་ཞེས་དང་། རིན་ཆེན་རྡོ་རྗེས་ཀྱང་། གཟུགས་རྡོ་རྗེ་མ་སོགས་ལྔ་དང་། རིན་པོ་ཆེ་སྣ་བདུན་དང་། རྒྱལ་མཚན་དང་། ལྷ་བཤོས་ལ་སོགས་པ་ཕྱིའི་མཆོད་པ་དང་། སྤྱན་ལ་སོགས་པའི་རིག་མས་གསང་བའི་མཆོད་པ་བྱ་བར་བཤད་དོ། །མར་མེ་མཛད་དང་། སྨན་ཞབས་དང་། ཇོ་བོ་རྗེ་དང་། བསོད་སྙོམས་པ་རྣམས་ཀྱིས། གཟུགས་རྡོ་རྗེ་ལ་སོགས་པ་ཞེས་པ་ཙམ་ལས་གཞན་གསལ་ཁ་མི་སྣང་ལ། ཐམས་ཅད་ཀྱང་མཆོད་བྱ་མཆོད་བྱེད་གཉིས་སུ་མེད་པའི་སྔགས་བརྗོད་པར་ནི་མཐུན་ནོ། །མར་མེ་མཛད་ཀྱིས། མཆོད་པ་ལས་གཞན་གྱིས་ཕྱག་མ་བཤད་ཅིང་། ཇོ་བོ་རྗེ་དང་། ཀུན་བཟང་རྒྱས་པ་ལས། ཀཱ་ཡ་ཝཱཀྐ་ཙིཏྟ་སོགས་ཀྱིས་ཕྱག་བྱེད་པར་བཤད་ལ། སྨན་པའི་ཞབས་ཀྱིས། གཟུགས་རྡོ་རྗེ་ལ་སོགས་པ་ཡི། །མཆོད་པའི་སྤྲིན་སྤྲོ་ཕྱག་ཀྱང་འཚལ། །ཞེས་དང་། བསོད་སྙོམས་པས། གཟུགས་རྡོ་རྗེ་ལ་སོགས་པ་རྣམས་ཀྱིས་ཡང་དག་པར་མཆོད་ལ་ཕྱག་བྱ་སྟེ། ཞེས་བཤད་ཀྱང་། ཕྱག་ཅི་ལྟར་བྱ་བའི་ཚུལ་མ་བཤད་པས་བསྡུ་ན་ཀཱ་ཡ་སོགས་ཀྱིས་ཕྱག་བྱ་ཞིང་། རྒྱས་པར་སྤྲོ་ན། ཞལ་ལུང་དང་། སྒྲུབ་ཐབས་ཀུན་བཟང་གི་མཆོད་པར་བརྗོད་པའི་ཚིགས་སུ་བཅད་པ་གཉིས་ཀྱིས་ཀྱང་རུང་ཞིང་། ཀུན་བཟང་རྒྱས་པ་ལས་ནི་དེ་ཉིད་ལྔ་པས་བསྟོད་པར་བཤད་དོ། །གསུམ་པ་ནི། ཀུན་བཟང་རྒྱས་པར། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསོད་ནམས་ཡོངས་སུ་བསྔོ་བ་དང་། སྐྱབས་སུ་འགྲོ་བ་དང་། བདག་ཉིད་ཀྱི་དངོས་པོ་དབུལ་བ་དང་། བྱང་ཆུབ་ཀྱི་སེམས་རྣམ་པ་གཉིས་བསྐྱེད་པར་བྱ་བར་གསུངས་ཤིང་། ཚིག་ནི། གང་ཞིག་ཐོག་མེད་ཅེས་བྱ་བ་ལ་སོགས་པའི་ཚིགས་སུ་བཅད་པས་བྱ་བར་གསུངས་པས་ཚིགས་བཅད་དེ་ལ་སྐྱབས་འགྲོ་དང་། སེམས་བསྐྱེད་ཀྱི་བར་དུ། བདག་ཉིད་ཀྱི་དངོས་པོ་དབུལ་བ་ཡོད་པར་སྣང་ངོ་། །ཀུན་བཟང་བསྡུས་པར། བདག་ཉིད་ཀྱི་དངོས་པོ་དབུལ་བའི་ཚིགས་བཅད་མི་སྣང་ཞིང་། སྨན་པའི་ཞབས་ཀྱིས། ཞལ་ལུང་གི་འགྲེལ་པར། བདག་ཉིད་ཀྱི་དངོས་པོ་དབུལ་བ་མེད་པར། བྱང་ཆུབ་ཀྱི་སེམས་བསྐྱེད་པའི་རྗེས་སུ་ལམ་བརྟེཾན་པ་བཤད་ཀྱང་དེ་ནི་འཇུག་པ་སེམས་བསྐྱེད་ཡིན་པ་འདྲའོ། །མར་མེ་མཛད་དང་། རིན་ཆེན་རྡོ་རྗེ་གཉིས་ཀྱིས། བསྔོ་བ་དང་། སྐྱབས་འགྲོའི་བར་དུ། ཀུན་འདོད་དབུགས་འབྱིན་སྩོལ་མཛད་པའི། །སངས་རྒྱས་ཀུན་ལ་བདག་བསྐུལ་བས། །བསྟན་པ་ནམ་མཁའི་མཐའ་མཉམ་པར། །འཇིག་རྟེན་ཀུན་སྡིག་མེད་སྣང་མཛོད། །ཅེས་པ་བསྣན་པར་གསུངས་ཤིང་། ཇོ་བོ་རྗེ་དང་། བསོད་སྙོམས་པ་སོགས་ཀྱིས། ཀུན་བཟང་བསྡུས་པ་ལས་འབྱུང་བའི་ཚིགས་སུ་བཅད་པ་འདི་ཁོ་ནས་བྱ་བར་བཤད་པས། ཀུན་འདོད་དབུགས་འབྱིན་སོགས་དང་། བདག་ཉིད་ཀྱི་དངོས་པོ་དབུལ་བར་མི་བཞེད་དོ། །ཀུན་བཟང་བསྡུས་པ་འདི་ནི། སྤར་པ་ཏའི་ཕུག་ཏུ། བླ་མ་ཆེན་པོས་གཞུང་ཕལ་ཆེར་བརྩམས་ཟིན་པའི་མཇུག་ཏུ། བླ་མ་བ་ལིཾ་པཱ་ཏའི་ཐུགས་མཉེས་པའི་ཆེད་དུ་མཛད་པར་གསུངས་པས། རྒྱུན་བཤགས་འདི་ཉིད་གཙང་བར་སྣང་སྟེ། ཞལ་ལུང་ལས། དེ་ནས་བླ་མ་ཆེན་པོ་བ་ལིཾ་པཱ་ཏའི་དྲུང་དུ་བགྲོད། །བདག་གི་བླ་མ་དེ་ཡང་མཉེས་བྱའི་ཕྱིར་ན་སྒྲུབ་པའི་ཐབས། །ཅུང་ཟད་བསྡུས་པས་དེ་རུ་བླ་མ་ལ་སོགས་ཀུན། །མཉེས་པར་བྱས་ཏེ་སྔོན་གནས་བགྲོད་ནས་སྐལ་ལྡན་དོན་འགའ་བྱས། །ཞེས་གསུངས་པས་སོ། །ཤཱནྟི་པས། ཕྱག་འཚལ་བ་ནས་བསྔོ་བའི་བར་བདུན་དང་། དེའི་རྗེས་སུ་སྐྱབས་འགྲོ་དང་། སེམས་བསྐྱེད་དང་། ལུས་དབུལ་བ་སྟེ། བཅུ་བཤད་པ་ནི་དང་པོ་གཉིས་ཀྱི་ངོས་འཛིན་ཙམ་མ་གཏོགས་ཀྱེ་རྡོར་ཌོྃ་བྷི་ལུགས་ཀྱི་རྒྱུན་བཤགས་དང་མཐུན་པར་སྣང་ངོ་། །བཞི་པ་ནི་དེ་ལྟར་བསོད་ནམས་ཀྱི་ཚོགས་བསགས་པའི་དགོས་པ་ཡང་། ཞལ་ལུང་གི་འགྲེལ་པར། མཚམས་མེད་པ་ལ་སོགས་པའི་ལས་ཀྱི་སྒྲིབ་པ་བཟློག་པའི་ཆེད་དུ་ཡིན་པར་གསུངས་པས། སེར་སྣའི་ལས་སྒྲིབ་ཀྱི་གཉེན་པོར་མཆོད་པ། ཡུལ་ཁྱད་པར་ཅན་ལ་མ་གུས་པའི་ལས་སྒྲིབ་ཀྱི་གཉེན་པོར་ཕྱག་འཚལ་བ། མཚམས་མེད་པ་ལ་སོགས་པའི་ལས་སྒྲིབ་ཚབས་ཆེ་བའི་གཉེན་པོར་སྡིག་པ་བཤགས་པ། གཞན་གྱི་དགེ་བ་ལ་ཕྲག་དོག་གི་ལས་སྒྲིབ་ཀྱི་གཉེན་པོར་རྗེས་སུ་ཡི་རང་བ། གཞན་གྱི་དགེ་བ་ཆུད་གསོན་པའི་ལས་སྒྲིབ་ཀྱི་གཉེན་པོར་བསྔོ་བ། ལོག་པར་མོས་པའི་ལས་སྒྲིབ་ཀྱི་གཉེན་པོར་སྐྱབས་སུ་འགྲོ་བ། གཞན་ལ་གནོད་པ་བྱས་པའི་ལས་སྒྲིབ་ཀྱི་གཉེན་པོར་བྱང་ཆུབ་ཀྱི་སེམས་གཉིས་བསྐྱེད་པའོ། །ཡང་འོག་གི་ཡེ་ཤེས་ཀྱི་ཚོགས་དང་། ཟུང་དུ་འབྲེལ་བས་ཚོགས་གཉིས་ཟུང་དུ་འཇུག་པའི་དགོས་པ་སྟེ། གསང་སྔགས་འབྲས་བུ་ལམ་དུ་བྱེད་པས་བསྐལ་པ་གྲངས་མེད་གསུམ་དུ་ཚོགས་བསག་པ་དང་། དེའི་འབྲས་བུ་མངོན་པར་སངས་རྒྱས་པའི་སྣོད་བཅུད་སྦྱང་བ་ཐམས་ཅད་མངོན་པར་རྟོགས་པ་གཅིག་གི་ནང་དུ་ཉམས་སུ་ལེན་པའི་ཚེ་སྔོན་འགྲོ་ཚོགས་བསག་པ་དགོས་པའི་ཕྱིར་རོ། །གསུམ་པ་དངོས་འཛིན་བཟློག་པའི་ཕྱིར་ཡེ་ཤེས་ཀྱི་ཚོགས་བསག་པ་ལ་གཉིས་ཏེ། གཞན་གྱི་ལོག་རྟོག་དགག་པ་དང་། རང་ལུགས་འཐད་པའི་ཕྱོགས་བཤད་པའོ། །དང་པོ་ལ་གཉིས་ཏེ། སྣང་བ་མི་བསལ་བའི་ཕྱོགས་དགག་པ་དང་། བདེན་པ་མི་བསལ་བའི་ཕྱོགས་དགག་པའོ། །དང་པོ་ནི། མན་ངག་མེད་པར་གསང་སྔགས་རང་བཟོར་འཆད་པའི་བོད་ཁ་ཅིག་ན་རེ། ཡེ་ཤེས་ཚོགས་བསག་གི་སྟོང་ཉིད་བསྒོམ་པའི་དོན། སྣང་བའི་སྟེང་དུ་བདེན་པ་བསལ་ནཾས་བདེན་མེད་སྒྱུ་མ་ལྟ་བུའི་སྣང་བ་ནི་བསལ་དུ་མི་རུང་སྟེ། དེ་བསལ་ན་ཐ་སྙད་བདེན་པ་ལ་སྐུར་པ་བཏབ་པས་ཆད་ལྟར་འགྱུར་བའི་ཕྱིར་དང་། འཆད་ལྟ་ནི་སེམས་ཅན་དམྱལ་བའི་རྒྱུ་ཡིན་པས་ཡེ་ཤེས་ཚོགས་བསག་ཏུ་མི་རུང་བའི་ཕྱིར་རོ། །གནད་འདི་མ་རྟོགས་པར་བོད་སྔ་མ་དག་བཙན་ཐབས་སུ་སྟོང་ཉིད་བསྒོམ་པ་ཞེས་བྱ་བ་སྔགས་བརྗོད་པ་ཙམ་གྱིས་སྐད་ཅིག་གིས་སྣང་བ་ཐམས་ཅད་མི་དམིགས་པར་བསམ་པ་ནི་ལོག་རྟོགས་ཆེན་པོ་ཡིན་ཏེ། དེ་ལྟར་ན་ཐོ་བ་བུམ་པའི་འཇིག་རྒྱུ་ཡིན་པ་ལྟར། སྟོང་ཉིད་སྣང་བའི་འཇིག་རྒྱུར་ཐལ་བའི་ཕྱིར་རོ་ཞེས་འཛེར་བར་བྱེད་དོ། །འདིའི་དོན་ལ་དཔྱད་ན་ཁྱོད་ཀྱིས་ཕྱོགས་སྔར་བྱས་པའི་སྣང་བ་བསལ་བའི་དོན་སྣང་བ་ཐམས་ཅད་གཏན་མེད་དུ་བཏང་བ་ལ་བྱེད་དམ། དེའི་ཚེ་རེ་ཞིག་བློ་ངོར་མི་དམིགས་པ་ཙམ་ལ་བྱེད། དང་པོ་ལྟར་ན་ཁྱོད་ཀྱི་ཕྱོགས་སྔར་བྱས་པའི་རྣལ་འབྱོར་པ་དེས་ཡེ་ཤེས་ཚོགས་བསག་བསྒོམས་པའི་རྗེས་སུ་ད་ལྟར་གྱི་སྣང་བ་འདི་དག་རྒྱུ་མེད་པར་གསར་དུ་བྱུང་བ་ཡིན་ནམ། ཡང་ན་ད་ལྟ་ཡང་སྣང་བ་གཏན་མེད་གང་ཡིན་སྨྲ་དགོས་ཏེ། དེའི་ཚེ་སྣང་བ་ཐམས་ཅད་གཏན་མེད་དུ་བཏང་འདུག་པའི་ཕྱིར། གཉིས་པ་ལྟར་ན་ལུང་དང་འགལ་བ། མྱོང་བ་དང་འགལ་བ། ཁས་བླངས་དང་འགལ་བ་གསུམ་ལས། དང་པོ་ནི། ཁྱོད་ཡེ་ཤེས་ཚོགས་བསག་གི་ཚེ་སྣང་བ་རེ་ཤིག་བློ་ངོར་མི་དམིགས་པ་ཙམ་ཡང་བཀག་ནས། སྣང་བ་དམིགས་པར་འདོད་ན། ཞལ་ལུང་གི་འགྲེལ་པར། བྱང་ཆུབ་ཀྱི་སེམས་བྱིན་གྱིས་བརླབ་པའི་སྔགས་ཀྱིས་གུད་ན་ཡོད་པ་ལྟ་བུའི་ཕྱི་རོལ་གྱི་རང་བཞིན་སྟོང་པར་བྱས་ཏེ། དེར་སྣང་བ་ཡིད་ལ་མི་བྱེད་པས་སོ་ཞེས་གསུངས་པ་འདི་དང་འགལ་ལོ། །གཉིས་པ་ནི་དེའི་ཚེ་བློ་ངོར་སྣང་བ་མི་བསལ་ན། ཁང་མིག་ཆུང་ངུ་གཅིག་གི་ནང་ན་རྣལ་འབྱོར་པ་གནས་ནས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་རྒྱ་ཆེ་བ་བསྒོམ་པའི་ཚེ་ཁང་པ་ཆུང་ངུ་དེ་གཞལ་ཡས་ཁང་གི་ཕྱི་རོལ་ན་ཡོད་དམ་ནང་དུ་ཡོད། རང་གི་གཏིང་བའི་གདན་དེ་གདན་པད་ཟླ་སོགས་ཀྱི་སྟེང་ན་ཡོད་དམ་འོག་ན་ཡོད། ལུས་ལ་གོན་པའི་གོས་དེ་ཞལ་ཕྱག་མང་པོ་བསྒོམས་པའི་ཕྱི་རོལ་ན་གཡོགས་པ་ལྟ་བུར་ཡོད་དམ། དཀྲིས་པའི་ཚུལ་དུ་ཡོད་ལེགས་པར་སོམས་ལ་སྨྲོས་ཤིག དེའི་ཚེ་ཁང་ཆུང་སོགས་ཡིད་ལ་མི་བྱེད་པ་ཡིན་ནོ་སྙམ་ན་གཞན་གྱིས་ཀྱང་དེ་ལས་གཞན་གཏན་མེད་ཇི་ལྟར་བྱས་སེམས་རྣལ་དུ་ཕོབ་ལ་སྨྲོས་ཤིག གསུམ་པ་ནི། ཁྱེད་རང་གིས་འདུས་པ་འཕགས་ལུགས་ཀྱི་ཡེ་ཤེས་ཀྱི་ས་བསྐྱེད་པའི་སྐབས་སུ། སྣོད་བཅུད་སྲུང་བའི་འཁོར་ལོ་དང་བཅས་པ་འོད་གསལ་སྟོང་པ་ཉིད་དུ་ཐིམ་ཞེས་དང་། ལྷག་མོས་འོད་གསལ་དུ་ཐིམ་པའི་སྐབས་སུ་ལྷག་མོས་ཀྱི་ལྷ་ཐམས་ཅད་གཙོ་བོའི་ལུས་ལ་བསྡུས། གཙོ་བོའི་ལུས་ཀྱང་རིམ་གྱིས་བསྡུས་ནས་མི་དམིགས་པ་དང་། གཙོ་བོ་འོད་གསལ་དུ་བསྡུ་བའི་སྐབས་སུ་ཡང་དེ་ལྟར་ཁས་བླངས་པ་དང་འགལ་ཏེ། དེ་འདྲ་བའི་སྣང་བ་གསལ་ན་ཐ་སྙད་བདེན་པ་ལ་སྐུར་པ་བཏབ་པའི་ཆད་ལྟ་ཡིན་པས་སེམས་ཅན་དམྱལ་བའི་རྒྱུ་ཡིན་གྱི་ཡེ་ཤེས་ཀྱི་སའི་ཆ་བསྐྱེད་པ་སོགས་སུ་མི་རུང་བའི་ཕྱིར་ཞེས་དང་། ཡེ་ཤེས་ཀྱི་སའི་ཆ་བསྐྱེད་པ་སོགས་སྣང་བ་དེ་དག་གི་འཇིག་རྒྱུར་ཐལ་བའི་ཕྱིར་རོ་ཞེས་ཅིའི་ཕྱིར་མི་མཚུངས། དེའི་ལན་ལ་གཟུ་བོར་མི་གནས་པའི་རྒོལ་བ་དེ་ན་རེ། ངེད་ཀྱིས་དེའི་ཚེ་སྣང་བ་དེ་དག་རེ་ཤིག་བློ་ངོར་མི་དམིགས་པ་ཙམ་ཡིན་གྱི་གཏན་མེད་དུ་མ་བཏང་། ཁྱེད་ཀྱིས་གཏན་མེད་དུ་གཏང་བ་ཡིན་ནོ་ཞེས་སྨྲའོ། །འདིའི་ལན་དྲན་པ་གནས་པའི་ངོར་གོང་དུ་བརྗོད་ཟིན་ཀྱང་། ད་ནི་སྨྱོན་པ་དང་ལྷན་ཅིག་མི་རྩོད་དོ། །གཉིས་པ་ལ་གཉིས་ཏེ། འཕགས་པའི་ཡུལ་དུ་དགག་སྒྲུབ་ཇི་ལྟར་བྱུང་བའི་ཚུལ། བོད་དུ་བྱུང་བའི་ལོག་རྟོག་གློ་བུར་བ་དགག་པའོ། །དང་པོ་ནི། ཤཱནྟི་པ་ལ་སོགས་པ་སེམས་ཙམ་གྱི་གྲུབ་མཐའ་ཁས་བླངས་པའི་སྔགས་པ་དག་གིས་ཡེ་ཤེས་ཚོགས་བསག་གི་སྔགས་དོན་སྟོང་པ་ཉིད་ཡེ་ཤེས་རྡོ་རྗེའི་རང་བཞིན་གྱི་བདག་ཉིད་ངའོ་ཞེས་པའི་དོན་ལ། ཀུན་བཏགས་ཀྱིས་བསྡུས་པའི་ཆོས་ཐམས་ཅད་ཀྱི་རང་བཞིན་རྒྱུ་དང་། འབྲས་བུ་དང་བྲལ་བ་ནི་སྟོང་པ་ཉིད་ཡིན་ལ་དེའི་ཡེ་ཤེས་ནི་རྣམ་ཐར་སྒོ་གསུམ་རོ་གཅིག་པའི་སེམས་ཞེས་བྱ་བའི་དོན་ཏོ། །དེ་ཉིད་མི་མཐུན་ཕྱོགས་ཀྱིས་མི་ཤིགས་པའི་ཕྱིར་རྡོ་རྗེ་དང་། རང་གི་ངོ་བོས་ཡོད་པས་རང་བཞིན་དང་། བདེན་པའི་བདག་ཉིད་ཅན་ཡིན་པས་བདག་ཉིད་དེ། དེ་ལ་ང་རྒྱལ་འཇོག་པ་ཡིན་ནོ། །ཞེས་སྨྲའོ། །ངག་གི་དབང་ཕྱུག་གྲགས་པ་སོགས་དབུ་མའི་སྐྱེས་ཆེན་རྣམས་ཀྱིས་འདི་ལ་སྐྱོན་འདི་ལྟར་བརྗོད་དེ། དེ་ལྟར་ན་སངས་རྒྱས་ཀྱི་ཡེ་ཤེས་རང་བཞིན་གྱིས་ཡོད་དགོས་པས་རང་བཞིན་མེད་པའི་ཡན་ལག་མ་ཚང་བར་འགྱུར་བའི་སྐྱོན་ཡོད་ཅིང་། སངས་རྒྱས་ཀྱི་ཡེ་ཤེས་ནི་རང་བཞིན་གྱིས་མེད་པ་ཡིན་ཏེ། གཅིག་དང་དུ་མ་ལ་སོགས་པའི་རང་བཞིན་གྱིས་སྟོང་པའི་ཕྱིར། དེ་སྐད་དུ་ཤེར་ཕྱིན་གྱི་མདོ་ལས། སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུའོ། །མྱ་ངན་ལས་འདས་པ་ལས་ཆེས་ཁྱད་པར་དུ་འཕགས་པའི་ཆོས་འགའ་ཞིག་ཡོད་ན་དེའང་སྒྱུ་མ་ལྟ་བུ་རྨི་ལམ་ལྟ་བུའོ། །ཞེས་ང་སྨྲའོ། །ཞེས་གསུངས་པས་སོ། །རང་བཞིན་མེད་པ་དེ་ཡང་ནམ་མཁའི་མེ་ཏོག་གམ། རི་བོང་གི་རྭ་ལྟར་ཅི་ཡང་མེད་པ་ནི་མ་ཡིན་ཏེ། དེ་བཞིན་ཉིད་དང་། ཡང་དག་མཐའ་ལ་སོགས་པའི་མིང་གི་རྣམ་གྲངས་དང་ལྡན་པའི་རྣམ་ཀུན་མཆོག་ལྡན་གྱི་སྟོང་ཉིད་ཡིན་ལ། དེ་ཉིད་རང་བཞིན་གྱིས་གྲུབ་ན་ལུང་དང་འགལ་ཏེ། ཇི་སྐད་དུ། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །གང་དག་སྟོང་པ་ཉིད་ལྟ་བ། །དེ་ནི་སྒྲུབ་ཏུ་མེད་པར་གསུངས། །སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ལོག་པར་སྒྲུབ་པ་བཞིན། །ཞེས་གསུངས་པས་སོ། །གཞན་ཡང་སྟོང་ཉིད་ཀྱི་དོན་རང་གི་ངོ་བོས་མི་སྟོང་པར་ཆོས་གཞན་གྱིས་སྟོང་པ་ལ་བྱེད་ན། སངས་རྒྱས་ལ་སོགས་པའི་དངོས་པོ་དང་། དེའི་སྟོང་ཉིད་ཐ་དད་པ་ཞིག་གམ་ཐ་མི་དད་པ་ཡིན། དང་པོ་ལྟར་ན་དངོས་པོ་རྣམས་སྟོང་པ་ཉིད་དུ་མི་རུང་སྟེ། དངོས་པོ་ལས་ཐ་དད་པའི་སྟོང་ཉིད་ཀྱིས་དངོས་པོ་སྟོང་པར་བྱེད་མི་ནུས་པའི་ཕྱིར། གལ་ཏེ་ཐ་དད་པའི་སྟོང་ཉིད་བསྒོམས་པའི་རིཾམ་པས་དངོས་པོ་ཐམས་ཅད་སྟོང་པར་བྱེད་ཅིང་ཉམས་པར་བྱེད་དོ་ཞེ་ན། དེ་ལྟར་ན་འདས་པའི་སངས་རྒྱས་གཅིག་གིས་སྟོང་པ་ཉིད་བསྒོམས་པའི་རིག་པ་མངོན་སུམ་དུ་མཛད་པའི་ཚེ་ཁམས་གསུམ་གྱི་དངོས་པོ་ཐམས་ཅད་མི་སྣང་བར་འགྱུར་རོ། །གལ་ཏེ་དངོས་པོ་ལས་སྟོང་པ་ཉིད་ཐ་མི་དད་པ་ཡིན་ན་ནི་དེའི་ཚེ་སྟོང་ཉིད་ཀྱི་དོན། ཆོས་གཞན་གྱིས་སྟོང་པ་ཡིན་གྱི་རང་གི་ངོ་བོས་སྟོང་པ་མ་ཡིན་ནོ་ཞེས་པའི་དམ་བཅའ་ཉམས་སོ། །ཞེས་སོགས་ཀྱི་རིགས་པ་དུ་མས་སུན་ཕྱུང་ནས་དངོས་པོ་དང་། སྟོང་པ་ཐ་མི་དད་པ་དབུ་མ་པའི་ལུགས་གཞུང་འཛུགས་པར་མཛད་དོ། །ཞལ་ལུང་རྩ་འགྲེལ་ལས་ཀྱང་རྣལ་འབྱོར་སྤྱོད་པ་བ་འདོད་པའི་བདེན་དངོས་དབུ་མ་པས་བདེན་མེད་དུ་གཏན་ལ་ཕབ་པའི་ཚུལ་གསུངས་པ་ནི་འོག་དུ་བཤད་པར་བྱའོ། །གཉིས་པ་ནི། གངས་རིའི་ཁྲོད་འདིར་གཞན་སྟོང་གི་གྲུབ་མཐའི་མིང་བཏགས་ནས་དབུ་སེམས་གང་ཡང་མ་ཡིན་པའི་ཐེག་པ་ཆེན་པོར་སྨྲ་བ་དག་ན་རེ། ཡེ་ཤེས་ཚོགས་བསག་གི་དོན་གཟུང་འཛིན་གཉིས་ཀྱིས་སྟོང་པའི་ཤེས་པ་རང་རིག་རང་གསལ་བདེན་པར་གྲུབ་པ་ནི་སྟོང་ཉིད་ཡེ་ཤེས་རྡོ་རྗེའི་རང་བཞིན་ཡིན་ལ་དེ་ལ་ང་རྒྱལ་འཇོག་པ་ཡིན་ཅིང་། འོག་ཏུ་ལྷར་བསྐྱེད་པ་ཡང་དེ་ཉིད་བསྐྱེད་པ་ཡིན་ནོ། །གཉིས་སྟོང་གི་རང་རིག་དེ་ནི་ཆོས་དབྱིངས་དང་། བདེ་གཤེགས་སྙིང་པོ་དང་། དོན་དམ་པའི་བདེན་པ་དང་། ཀུན་གཞི་ཡེ་ཤེས་ཀྱང་ཡིན་ལ། འདི་ཉིད་བརྗོད་བྱའི་གཙོ་བོར་སྟོན་པའི་སྡོམ་རྣམ་གཉིས་དང་། ཚད་མ་རྣམ་འགྲེལ་དང་། ཉི་ཤུ་པ་དང་། སུམ་ཅུ་པའི་རབ་བྱེད་རྣམས་ཀྱང་དབུ་མ་ཆེན་པོའི་གཞུང་ཡིན་ཞིང་། ཀྱེ་རྡོར་དང་གསང་འདུས་ལ་སོགས་པའི་རྒྱུད་སྡེ་རྣམས་ཀྱི་དགོངས་པའང་འདི་ཉིད་ཡིན་ནོ། །དབུ་མའི་གཞུང་ལས། ཡོད་མིན་མེད་མིན་སོགས་མཐའ་བཞིའི་སྤྲོས་བྲལ་སྟོན་པ་རྣམས་ཡུལ་ཆོས་དབྱིངས་མཐའ་བཞིའི་སྤྲོས་བྲལ་དུ་སྟོན་པ་མ་ཡིན་གྱི་ཡུལ་ཅན་མངོན་ཞེན་འགོག་པའི་ཚུལ་སྟོན་པ་ཡིན་ནོ་ཞེས་སྨྲའོ། །འདི་དགག་པ་ལ་སེམས་ཅན་ཐམས་ཅད་འབད་མེད་དུ་གྲོལ་བར་ཐལ་བ། གྲུབ་མཐའ་བཞིའི་རྣམ་གཞག་མི་རུང་བ། སེམས་ཙམ་གྱི་གྲུབ་མཐའ་དང་དེ་སྨྲ་བའི་གང་ཟག་མི་རུང་བ། མཐར་ཐུག་གི་ལྟ་བ་ངོས་བཟུང་མི་རུང་བ། དབུ་མའི་དོན་མི་རུང་བ། འཁོར་འདས་ཀྱི་བྱ་བྱེད་མི་རུང་བ། ཞེན་པ་འགོག་ཚུལ་རྒྱ་ནག་གི་ལྟ་བར་འགྱུར་བ། རྗེས་ཀྱི་ཚིག་སྦྱོར་མི་རུང་བ། གོང་འོག་དང་ཟུང་འཇུག་མི་རུང་བ་སྟེ་དགུ་ལས། དང་པོ་ནི་ཡུལ་བདེན་གྲུབ་ལ་ཡུལ་ཅན་ངར་འཛིན་འཇོག་པ་ཡེ་ཤེས་ཚོགས་བསག་ཡིན་ན། སེམས་ཅན་ཐམས་ཅད་འབད་པ་མེད་པར་གྲོལ་བར་འགྱུར་ཏེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པར། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བར་འགྱུར། །ཞེས་དང་། སྟོང་ཉིད་བདུན་ཅུ་པ་ལས། རྒྱུ་དང་རྐྱེན་ལས་སྐྱེས་དངོས་རྣམས། །ཡང་དག་པར་ནི་རྟོག་པ་གང་། །དེ་ནི་སྟོན་པས་མ་རིག་གསུངས། །དེ་ལས་ཡན་ལག་བཅུ་གཉིས་འབྱུང་། །ཞེས་སེམས་ཅན་ཐམས་ཅད་དང་པོ་ནས་ཡུལ་བདེན་དངོས་ལ་ཡུལ་ཅན་ངར་འཛིན་འཇོག་པར་གསུངས་པའི་ཕྱིར་རོ། །གཉིས་པ་ནི། རྩ་རྒྱུད་བརྟག་གཉིས་དང་། འཇམ་དཔལ་ཞལ་གྱི་ལུང་དང་། ཡེ་ཤེས་སྙིང་པོ་ཀུན་ལས་བཏུས་རྣམས་ལས། སངས་རྒྱས་པའི་གྲུབ་མཐའ་སྨྲ་བ་བཞིའི་རྣམ་གཞག་མཛད་པའི་ཚེ་བྱེ་བྲག་སྨྲ་བ། མདོ་སྡེ་པ། རྣལ་འབྱོར་སྤྱོད་པ་བ། དབུ་མ་པ་ཞེས་བཞི་བགྲངས་པའི་གསུམ་པ་དེ་སེམས་ཙམ་པ་ཡིན་ནམ། དབུ་མ་པ་ཡིན། དང་པོ་ལྟར་ན་གཉིས་མེད་ཀྱི་ཤེས་པ་རང་རིག་རང་གསལ་བདེན་པར་གྲུབ་པ་འདི་དབུ་མའི་གྲུབ་མཐའ་ཡིན་པ་འགལ་ཏེ། གསུམ་པ་དེས་དེ་ལྟར་འདོད་པ་བཞི་པ་དབུ་མ་པས་བཀག་པའི་ཕྱིར་ཏེ། ཞལ་གྱི་ལུང་ལས། གཟུང་འཛིན་སྤངས་པའི་ཡེ་ཤེས་ཆེ། །དོན་དམ་ཤེལ་ལྟར་དག་པ་རུ། །རྣལ་འབྱོར་སྤྱོད་པས་རབ་ཏུ་རྟོགས། །སོ་སོར་སྣང་བའི་གཞུང་ཐམས་ཅད། །དོན་དམ་མིན་ཏེ་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །ནམ་མཁའི་ཆུ་སྐྱེས་བཞིན་དུ་ནི། །གཉིས་མེད་གཉིས་སུ་མེད་མིན་ཞིང་། །ཤིན་དུ་དྲི་མེད་ནམ་མཁའ་ལྟར། །བློ་ལྡན་དབུ་མ་པ་ཡིས་རྟོགས། །ཞེས་དང་། དེའི་འགྲེལ་པར། གཉིས་པོས་སྟོང་པའི་རྣམ་པར་ཤེས་པ་ཤེལ་དག་པ་ལྟ་བུ་དོན་དམ་པ་རྫས་ཉིད་དུ་སེམས་པ་རྣལ་འབྱོར་སྤྱོད་པ་བས་རབ་ཏུ་རྟོགས་སོ། །ཞེས་སོ། །སོ་སོར་སྣང་བའི་གཞུང་ཐམས་ཅད་ཞེས་པ་ནི་བདག་དང་། གཟུང་འཛིན་དང་། དངོས་པོ་ཀུན་ཏུ་བརྟགས་པའོ། །དེ་དག་ཀྱང་དོན་དམ་པ་མ་ཡིན་ཏེ། ཅིའི་ཕྱིར་ཞེ་ན། གཅིག་དང་དུ་མའི་རང་བཞིན་དང་བྲལ་བའི་ཕྱིར། དཔེར་ན་ནམ་མཁའི་ཆུ་སྐྱེས་བཞིན་དུ་གཞུང་ཐམས་ཅད་སྤངས་པ་སྟེ། ཞེས་དང་ཡེ་ཤེས་སྙིང་པོ་ཀུན་ལས་བཏུས་ལས། གཟུང་དང་འཛིན་པ་ལས་གྲོལ་བའི། །རྣམ་པར་ཤེས་པ་དོན་དམ་ཡོད། །བློ་མཚོའི་ཕ་རོལ་ཕྱིན་པ་ཡིས། །རྣལ་འབྱོར་སྤྱོད་པའི་གཞུང་དུ་བསྒྲགས། །རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམས་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་ཕྱིར་ནམ་མཁའི་པདྨོ་བཞིན། །ཞེས་གསུངས་པས་སོ། །གཉིས་པ་ལྟར་ན། བཀའ་དང་བསྟན་བཅོས་དྲི་མ་མེད་པ་དེ་དག་གིས། སངས་རྒྱས་པའི་གྲུབ་མཐའ་སྨྲ་བ་བཞི་བགྲངས་པའི་ཚེ། བྱེ་བྲག་སྨྲ་བ། མདོ་སྡེ་པ། དབུ་མ་པ། དབུ་མ་པ་ཞེས་བགྲངས་ནས་སེམས་ཙམ་པ་ཡ་གྱལ་གཅིག་དུ་མི་བགྲང་བ་འདི་འདྲའི་བསྟན་པ་དཀྲུགས་པ་ལ་དགོས་པ་ཅི་ཞིག་བསྒྲུབ། གལ་ཏེ་གཉིས་མེད་ཀྱི་ཡེ་ཤེས་བདེན་པར་གྲུབ་པ་དབུ་མ་པ་ཆེན་པོའི་ལུགས་ཡིན་ཞིང་། དེ་བདེན་པར་མེད་པ་དབུ་མ་ངོ་བོ་ཉིད་མེད་པར་སྨྲ་བའི་ལུགས་ཡིན་ནོ་སྙམ་ན་དེ་ལྟར་ན་གཉིས་མེད་ཀྱི་ཡེ་ཤེས་བདེན་པར་མེད་པའི་ཕྱོགས་དང་པོར་བརྗོད་ནས། དེ་བདེན་པར་ཡོད་པའི་ཕྱོགས་ཀྱིས་འགོག་དགོས་པར་འགྱུར་ཏེ། གོང་མ་གོང་མའི་རིགས་པས་འོག་མ་འོག་མ་སུན་ཕྱུང་བར་གསུངས་པའི་ཕྱིར། འདོད་ན་སྔར་གྱི་ལུང་དང་འགལ་ཞིང་། གཏན་ཚིགས་ཀྱང་གྲུབ་སྟེ། ཞལ་ལུང་ལས། འོག་མའི་བློ་ནི་གོང་མ་ཡི། །ཤེས་རབ་ཀྱིས་ནི་སུན་འབྱིན་ནོ། །ཞེས་དང་། སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཞེས་གསུངས་པས་སོ། །གལ་ཏེ་གཉིས་མེད་ཀྱི་རྣམ་ཤེས་དང་། ཀུན་གཞིའི་རྣམ་ཤེས་གཞན་དབང་ཡིན་པས་བདེན་པར་མེད་ཀྱང་། དེ་གཉིས་ཀྱི་ཡེ་ཤེས་ཡོངས་གྲུབ་ཡིན་པས་བདེན་པར་ཡོད་དོ་སྙམ་ན། ཁྱད་པར་དེ་ཡང་རང་བཟོ་སྟེ། ཞལ་ལུང་ལས། གཉིས་མེད་ཀྱི་ཡེ་ཤེས་ཞེས་དང་། ཡེ་ཤེས་སྙིང་པོ་ཀུན་ལས་བཏུས་ལས། གཉིས་མེད་ཀྱི་རྣམ་ཤེས་ཞེས་དོན་གཅིག་དུ་གསུངས་པའི་ཕྱིར་དང་། ལང་ཀར་གཤེགས་པ་ལས། བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བྱ་བ་སྦྱང་བར་བྱའོ། །ཞེས་དང་། རྡོ་རྗེའི་ཚིག་རྐང་ལས། ཀུན་གཞི་རྣམ་ཤེས་དག་པའི་བྱང་ཆུབ་ཆེན་པོ་ཞེས་བདེ་གཤེགས་སྙིང་པོའི་རྣམ་གྲངས་ལ་ཀུན་གཞི་རྣམ་ཤེས་ཀྱི་སྒྲས་གསུངས་པའི་ཕྱིར་རོ། །གཞན་དུ་ན། ཆོས་མངོན་པའི་མདོ་ལས་གསུངས་པའི་ཐོག་མ་མེད་པའི་དུས་ཀྱི་ཁམས་དེ་ཀུན་གཞི་རྣམ་ཤེས་ཡིན་ན། རྒྱུད་བླའི་འགྲེལ་པར། བདེ་གཤེགས་སྙིང་པོའི་སྒྲུབ་བྱེད་དུ་དྲངས་པ་དང་འགལ་ཞིང་། ཡེ་ཤེས་ཡིན་ན་ཐེག་བསྡུས་ལས། ཀུན་གཞི་རྣམ་ཤེས་ཀྱི་སྒྲུབ་བྱེད་དུ་དྲངས་པ་དང་འགལ་ཏེ། གཞུང་དེ་གཉིས་དབུ་མ་ཆེན་པོའི་ལུགས་སུ་སྨྲས་ཤིང་། ཡེ་ཤེས་དང་རྣམ་ཤེས་འགལ་བར་སྨྲས་པའི་ཕྱིར་རོ། །གསུམ་པ་ནི། སྡོམ་རྣམ་གཉིས་དང་། ཚད་མ་རྣམ་འགྲེལ་དང་། ཤཱནྟི་པའི་འགྲེལ་པ་དག་ལྡན་དང་། དབྱིག་གཉེན་གྱི་ཡུམ་གསུམ་གནོད་འཇོམས་རྣམས་དང་། ཉི་ཤུ་པ་དང་། སུམ་ཅུ་པའི་རབ་བྱེད་སོགས་དབུ་མ་ཆེན་པོའི་གཞུང་ཡིན་ཅིང་། ཤཱནྟི་པ་སོགས་དབུ་མ་ཆེན་པོ་པ་ཡིན་ན་འཕགས་པའི་ཡུལ་ནས་བོད་དུ་འགྱུར་བའི་སེམས་ཙམ་གྱི་གཞུང་གང་ཡིན། འཕགས་པའི་ཡུལ་དུ་སེམས་ཙམ་གྱི་གྲུབ་མཐའ་འཛིན་པའི་པཎྜི་ཏ་གང་ཡིན་སྨྲ་དགོས་སོ། །བཞི་པ་ནི། ཀླུ་སྒྲུབ་ཀྱི་རིགས་ཚོགས་ལས་རང་སྟོང་འགྲེལ་ཞིང་། བསྟོད་ཚོགས་ལས་གཞན་སྟོང་འགྲེལ་ན། དེ་གཉིས་གང་དབུ་མའི་ལྟ་བ་མཐར་ཐུག་ཡིན། རང་སྟོང་ཡིན་ན། གཞན་གྱི་འདོད་པ་གྲུབ་ཅིང་། རང་ལ་ཁས་བླངས་འགལ། གཞན་སྟོང་ཡིན་ན་འོག་མས་གོང་མ་སུན་ཕྱུང་བར་ཐལ་བ་སྔར་བརྗོད་ཟིན། གཉིས་ཀ་ཡིན་ན། གཉིས་མེད་ཀྱི་རྣམ་ཤེས་ཆོས་ཅན། ཁྱོད་རང་གི་ངོ་བོས་སྟོང་པར་ཐལ། ཁྱོད་རང་གི་ངོ་བོས་སྟོང་པ་དེ་དབུ་མའི་ལྟ་བ་མཐར་ཐུག་ཡིན་པའི་ཕྱིར། འདོད་ན་དེ་ཆོས་ཅན། ཁྱོད་རང་གི་ངོ་བོས་མི་སྟོང་པར་ཐལ། ཁྱོད་རང་གི་ངོ་བོས་མི་སྟོང་པ་དེ་དབུ་མའི་ལྟ་བ་མཐར་ཐུག་ཡིན་པའི་ཕྱིར། མཁས་པའི་མདུན་སར་ངོ་ཚ་ཐུབ་པའི་ཚིག་སྨྲ་དགོས་པ་ཡིན་ནོ། །ལྔ་པ་ནི་དངོས་པོ་རང་བཞིན་གྱིས་གྲུབ་པར་ཁས་བླངས་ན་དབུ་མའི་དོན་དང་ཐ་སྙད་གཉིས་ཀ་མི་གནས་ཏེ། ཀླུ་སྒྲུབ་ཀྱིས། གང་དག་རང་བཞིན་གྱིས་ཡོད་པ། །དེ་ནི་མེད་པ་མིན་པས་རྟག །སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་གསུངས་པས་སོ། །གལ་ཏེ་ཁོ་རང་གི་གཞུང་ནས་དབུ་མར་བཤད་དོ་སྙམ་ན། དེ་ལྟར་ན་གྲུབ་མཐའ་སྨྲ་བ་བཞི་ཆར་དབུ་མར་འགྱུར་རོ། །དྲུག་པ་ནི་ཁྱོད་འདོད་པའི་བདེ་གཤེགས་སྙིང་པོ་དང་། ཆོས་དབྱིངས་ལ་འཁོར་འདས་ཀྱི་བྱ་བྱེད་མི་རུང་བར་འགྱུར་ཏེ། སྟོང་ཉིད་མིན་པར་བདེན་པར་གྲུབ་པའི་ཕྱིར། ཁྱབ་སྟེ་ཀླུ་སྒྲུབ་ཀྱིས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་མི་རུང་ངོ་། །ཞེས་གསུངས་པས་སོ། །བདུན་པ་ནི་ཆོས་དབྱིངས་བདེན་པར་གྲུབ་ཀྱང་། ཡུལ་ཅན་བདེན་ཞེན་འགོག་པར་འདོད་པ་ཁྱོད་ལ་འདི་འདྲི་སྟེ། ཞེན་ཡུལ་བདེན་པ་རིགས་པས་དཔྱད་པའི་ཚེ་མ་རྙེད་པས་ཡུལ་ཅན་བདེན་ཞེན་རང་ལྡོག་དུ་འགྲོ་བ་ལ་བྱེད་དམ། ཞེན་ཡུལ་བདེན་པ་མ་བཀག་པར་ཡུལ་ཅན་བདེན་ཞེན་རང་དགར་བཀག་པ་ལ་བྱེད། དང་པོ་ལྟར་ན་དངོས་སུ་འགལ་ཏེ་ཞེན་ཡུལ་བདེན་པ་རིགས་པས་དཔྱད་པའི་ཚེ་རྙེད་པར་ཁས་བླངས་པའི་ཕྱིར། ཕྱི་མ་ལྟར་ན་རྒྱ་ནག་ཧ་ཤང་གི་ལྟ་བར་འགྱུར་ཏེ། ཡུལ་ལ་དཔྱད་པ་མ་བྱས་པར་ཡུལ་ཅན་རྟོག་པ་རང་དགར་བཀག་པ་ཡིན་པའི་ཕྱིར། དབུ་ཚད་ཀྱི་རིགས་པ་དང་ཡང་འགལ་ཏེ། རྣམ་འགྲེལ་ལས། འདི་ཡུལ་སུན་ཕྱུང་མེད་པར་ནི། །དེ་སྤང་བར་ནི་ནུས་མ་ཡིན། །ཞེས་དང་། བཞི་བརྒྱ་པ་ལས། ཡུལ་ལ་བདག་མེད་མཐོང་ནས་ནི། །སྲིད་པའི་ས་བོན་ལྡོག་པར་འགྱུར། །ཞེས་དང་། འཇུག་པ་ལས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བ་བློ་ཡིས་མཐོང་གྱུར་ཞིང་། །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་ཞེན་ཡུལ་སུན་མ་ཕྱུང་བར་ཡུལ་ཅན་ཞེན་པ་འགོག་པར་མི་རུང་བར་གསུངས་པའི་ཕྱིར་རོ། །བརྒྱད་པ་ནི་ཡེ་ཤེས་ཚོགས་བསག་ལ་མཉམ་པར་བཞག་ནས་དེ་ལས་ལངས་པའི་ཚེ། སྟོང་པའི་ངང་ལས་ཞེས་པ་ཁྱོད་ལ་འགལ་ཏེ། མཉམ་གཞག་ཏུ་བདེན་གྲུབ་བསྒོམས་པས་བདེན་པའི་ངང་ལས་ཞེས་པ་ཐོབ་པའི་ཕྱིར་རོ། །དགུ་པ་ནི་སྔ་མ་བསོད་ནམས་ཀྱི་ཚོགས་དང་ཚོགས་གཉིས་ཟུང་འཇུག་ཕྱི་མ་གཟུགས་སྐུར་ལངས་པ་དང་སྐུ་གཉིས་ཟུང་འཇུག་མི་རུང་བར་འགྱུར་ཏེ། ཡུལ་བདེན་གྲུབ་ལ་ཡུལ་ཅན་ངར་འཛིན་བསྒོམས་པ་ནི་སྡུག་བསྔལ་གྱི་རྒྱུ་ཡིན་པའི་ཕྱིར་ཏེ། སྤྱོད་འཇུག་ལས། འདིར་ནི་སྡུག་བསྔལ་རྒྱུར་གྱུར་པའི། །བདེན་པར་ཞེན་པ་བཟློག་བྱ་ཡིན། །ཞེས་གསུངས་པའི་ཕྱིར། དེ་ལ་སོགས་པའི་གནོད་བྱེད་མཐའ་ཡས་ཏེ། རེ་ཤིག་བཞག་གོ །གཉིས་པ་རང་ལུགས་འཐད་པའི་ཕྱོགས་བཤད་པ་ལ་བཞི་སྟེ། བསྒོམ་བྱའི་བྱང་ཆུབ་ཀྱི་སེམས་ངོས་བཟུང་། དེ་ཇི་ལྟར་བསྒོམ་པའི་ཚུལ། ང་རྒྱལ་འཇོག་པའི་དོན། དེ་ལྟར་བསྒོམས་པའི་དགོས་པའོ། །དང་པོ་ནི། ཨོཾ་ནི་སྟོང་པ་ཉིད་ཁས་བླངས་པའོ། །ཤཱུ་ནྱ་ཏཱ་ནི་སྟོང་པ་ཉིད་དེ། སངས་རྒྱས་ཡེ་ཤེས་ཞབས་ཀྱིས་ངོ་བོ་དང་། རྒྱུ་དང་འབྲས་བུས་སྟོང་པའི་རྣམ་ཐར་སྒོ་གསུམ་དུ་བཤད་ལ། ཀླུ་སྒྲུབ་ཀྱིས་ཕྱི་རོལ་པས་བཏགས་པའི་བདག་དང་། ཉན་ཐོས་སྡེ་གཉིས་ཀྱིས་བཏགས་པའི་ཕུང་པོ་ལ་སོགས་པའི་གཟུང་འཛིན་དང་། རྣམ་རིག་པས་བཏགས་པའི་གཉིས་མེད་ཀྱི་ཡེ་ཤེས་ཀྱིས་སྟོང་པ་ཉིད་དུ་བཤད་དོ། །འོ་ན་རི་བོང་གི་རྭ་ལྟར་ཅི་ཡང་མེད་པའི་སྟོང་ཉིད་ཡིན་ནམ་སྙམ་ན། དེ་དགག་པའི་ཕྱིར་ཛྙཱ་ན་ནི་ཡེ་ཤེས་ཏེ། གསལ་བ་ཙམ་མི་འགག་པའོ། །དེས་ན་སྟོང་པའི་ཚེ་ན་ཡང་ཚོལ་མཁན་གྱི་གསལ་བ་མི་འགག་པས། གསལ་བ་མི་འགག་པ་དང་། གསལ་བ་རྙེད་པ་ནི་གཅིག་ཏུ་འཁྲུལ་པར་མི་བྱའོ། །དེ་ཉིད་བཛྲ་ནི་རྡོ་རྗེ་སྟེ། ཕར་མཚན་རྟོག་འཇོམས་ཤིང་། ཚུར་གང་གི་ཀྱང་མི་ཤིགས་པའོ། །སྭ་བྷཱ་ཝ་ནི་རང་བཞིན་ཏེ། གསལ་བ་དང་སྟོང་པ་ཟུང་དུ་འཇུག་པའི་རང་བཞིན་ཞེས་པའི་དོན་ཏོ། །ཨཱཏྨ་ཀོ྅ཧཾ་ནི་བདག་ཉིད་ངའོ་ཞེས་པ་སྟེ། འོག་ཏུ་བཤད་པར་བྱའོ། །གཉིས་པ་ནི་རྗེ་ས་ཆེན་གྱིས་གང་ཟག་དམན་པ་དབུ་མའི་ལྟ་བ་ལ་བློ་མ་བྱང་བས་རིམ་གྱིས་སྟོང་ཉིད་བསྒོམ་པ་དང་། བློ་བྱང་བ་མཆོག་གིས་བཙན་ཐབས་སུ་སྟོང་ཉིད་བསྒོམ་པ་གཉིས་བཤད་པ་ལས། དང་པོ་ནི། ཐོག་མར་སྣང་བ་ཐམས་ཅད་སེམས་སུ་བསྡུས་ནས་སེམས་དེ་ཉིད་ལ་གཅིག་དུ་བྲལ་ལ་སོགས་པའི་རིགས་པས་རིམ་གྱིས་དཔྱད་ནས་མ་རྙེད་པ་སྟེ། ཞལ་ལུང་ལས། སེམས་ཙམ་ལ་ནི་ལྟ་བྱས་ཏེ། །ཕྱི་རོལ་རང་བཞིན་སྟོང་པར་བྱ། །སེམས་ཙམ་དེ་ཡང་སྟོང་བྱས་ནས། །ཞེས་དང་། ཀུན་བཟང་རྒྱས་པ་ལས། ཅི་སྟེ་ཅི་ཙམ་ཞིག་སྟོང་པ་ཡིན་ཞེ་ན་རང་བཞིན་ཐམས་ཅད་སྟོང་པ་ཉིད་དོ། །རང་བཞིན་སྟོང་པ་ཉིད་ཅི་ཙམ་ཞེ་ན། གཅིག་དང་དུ་མ་དང་བྲལ་བ་ཞེས་སོགས་རྒྱས་པར་གསུངས་པ་ལྟར་རོ། །དེ་ལྟར་གཅིག་དུ་བྲལ་སོགས་ཀྱིས་དཔྱད་པའི་ཚེ་མ་རྙེད་པའི་ངང་ལ་མཉམ་པར་བཞག་ནས་སྔགས་ཀྱིས་བྱིན་གྱིས་བརླབ་པར་བྱའོ། །གཉིས་པ་ནི་སྔགས་བརྗོད་པ་ཙམ་གྱིས་སྣང་བ་ཐམས་ཅད་སེམས་སུ་བསྡུས་ནས་སེམས་དེ་ཡང་མི་དམིགས་པར་བསམས་ཏེ་བློ་བྱང་བས་དེ་ཙམ་གྱིས་རང་བཞིན་སྟོང་པ་ཉིད་ལ་ངེས་ཤེས་འདྲེན་ནུས་པའི་ཕྱིར་རོ། །གསུམ་པ་ལ་གསུམ་སྟེ། སྤང་བྱའི་ང་རྒྱལ་ངོས་བཟུང་བ། །གཉེན་པོའི་ང་རྒྱལ་ངོས་བཟུང་བ། སྐབས་སུ་བབ་པའི་དོན་ལ་སྦྱར་བའོ། །དང་པོ་ནི། ཉེར་ལེན་གྱི་ཕུང་པོ་རྫས་ཡོད་ལ་དམིགས་པའི་བློ་སྔོན་དུ་སོང་ནས་ངའོ་སྙམ་དུ་སེམས་ཁེངས་པའི་རྣམ་པ་ཅན་ཏེ་རྩ་ཉོན་དྲུག་གི་ནང་ཚན་དུ་གྱུར་པའི་ང་རྒྱལ་ལོ། །གཉིས་པ་ལ་གཉིས་ཏེ། ཕ་རོལ་ཏུ་ཕྱིན་པའི་གཞུང་ནས་བཤད་པ་དང་། རྡོ་རྗེ་ཐེག་པའི་གཞུང་ནས་བཤད་པའོ། །དང་པོ་ནི། སྤྱོད་འཇུག་ལས། ཕྲག་དོག་འགྲན་དང་ང་རྒྱལ་བསྒོམ། །ཞེས་པ་སྟེ། རང་ལས་མཆོག་ལ་ཕྲག་དོག་སྐྱེས་པའི་ཚེ་ཡུལ་རང་ཉིད་དུ་བཞག རང་ཉིད་ཡུལ་མཆོག་དེར་བསྒོམས་ཏེ། རང་ཉིད་དམན་པ་ལ་ང་རྒྱལ་བསྒོམ་པའོ། །གཉིས་པ་ལ་སེམས་བསྐྱེད་ཀྱི་ང་རྒྱལ། ལྟ་བའི་ང་རྒྱལ། བསྐྱེད་རིམ་གྱི་ང་རྒྱལ། རྫོགས་རིམ་གྱི་ང་རྒྱལ་དང་བཞི་ལས། དང་པོ་ནི། ཞལ་ལུང་ལས། དེ་བས་ལུས་ངག་ཡིད་གསུམ་གྱི། །སྡོམ་པ་མཆོག་ལ་གནས་བྱས་ནས། །ངའོ་སྙམ་པའི་གཟི་བསྐྱེད་ལ། །ཞེས་དང་། དེའི་འགྲེལ་པར། ཐབས་དང་ཤེས་རབ་ཀྱི་སྒོ་མཉམ་པར་སྦྱར་བས་བདག་གི་ལུས་ངག་ཡིད་གསུམ་ཡེ་ཤེས་སུ་རབ་ཏུ་བསྡུས་ནས་དེ་ལྟ་བུའི་རློམ་པ་ངའོ་སྙམ་པས་སེམས་ཀྱིས་གཟི་བསྐྱེད་པའོ། །ཞེས་གསུངས་པའོ། །གཉིས་པ་ནི། ཡེ་ཤེས་ཀྱི་ཚོགས་ཀྱི་ང་རྒྱལ་ལྟ་བུའོ། །གསུམ་པ་ནི་རང་ཉིད་བསྐྱེད་པའི་རིམ་པའི་ལྷ་ཞལ་ཕྱག་གི་རྣམ་པ་ཅན་བསྒོམས་ནས། ང་དང་ལྷ་དེ་ཉིད་ཐ་མི་དད་པའི་ང་རྒྱལ་བསྐྱེད་པར་བྱ་སྟེ། རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་ངེས་པར་འགྲུབ། །ཞེས་གསུངས་པས་སོ། །བཞི་པ་ནི་རྫོགས་རིམ་བསྒོམས་པ་ལས་བྱུང་བའི་ཡེ་ཤེས་སྐྱེས་པའི་ཚེ་ཡེ་ཤེས་དེ་ཉིད་ང་ཡིན་པས། དེས་སྣང་བ་ཐམས་ཅད་ལ་ཁྱབ་པར་བསྒོམ་པ་སྟེ། ཀྱེ་རྡོ་རྗེའི་རྒྱུད་ལས། ང་ལས་འགྲོ་བ་ཐམས་ཅད་འབྱུང་། །ང་ལས་གནས་གསུམ་པོ་ཡང་འབྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་གསུངས་པས་སོ། །འོ་ན་ཡེ་ཤེས་དེ་ཉིད་ངར་འཐད་དམ་སྙམ་ན། ངའི་ངོས་འཛིན་ཉན་ཐོས་གནས་མ་བུ་བས་བརྗོད་དུ་མེད་པའི་གང་ཟག་རྫས་ཡོད་དང་། ཁ་ཆེ་བྱེ་བྲག་ཏུ་སྨྲ་བ་ནས་སེམས་ཙམ་པའི་བར་གྱི་ཕུང་པོ་རྫས་ཡོད་ལ་བཏགས་པའི་གང་ཟག་བཏགས་ཡོད་དང་། དབུ་མ་རང་རྒྱུད་པས་ཕུང་པོ་བཏགས་ཡོད་ལ་བཏགས་པའི་གང་ཟག་བཏགས་ཡོད་དང་། ཐལ་འགྱུར་བས་ཕུང་པོ་ལ་དམིགས་པའི་བློ་སྔོན་དུ་སོང་ནས་གཞི་མེད་ལ་ངའོ་སྙམ་དུ་འཛིན་པའི་ཡུལ་ལ་འདོད་པ་ཡོད་ཀྱང་། རྡོ་རྗེ་ཐེག་པ་འདིར་སེམས་གསལ་སྟོང་དེ་ཉིད་ང་ཡིན་ཏེ། ལུང་རྣམས་ནི་གོང་དུ་བརྗོད་ཟིན་ཏོ། །འོ་ན་ངར་འཛིན་མ་འཁྲུལ་བར་འགྱུར་རོ་སྙམ་ན། ངར་བདེན་པར་འཛིན་པའི་བློ་འཁྲུལ་པ་ཡིན་གྱི། ངའོ་སྙམ་པའི་བློ་ཙམ་ནི་འཁྲུལ་པར་མི་འདོད་དེ། ངའོ་སྙམ་པའི་གཟི་བསྐྱེད་ལ་ཞེས་སོགས་གོང་དུ་དྲངས་པ་ལྟར་རོ། །གསུམ་པ་ནི་སེམས་ཀྱི་རང་བཞིན་ཐ་སྙད་དུ་གསལ་བ་ཙམ་མི་འགག་ཀྱང་དེའི་རང་བཞིན་བཙལ་ན་མི་རྙེད་པའི་སྟོང་ཉིད་དང་། ང་དབྱེར་མེད་པའི་དོན་ལ་མཉམ་པར་བཞག་པ་ནི་སྐབས་འདིའི་ང་རྒྱལ་འཇོག་པའི་དོན་ཡིན་གྱི། ཡུལ་གཞན་ལ་ཡུལ་ཅན་གྱི་བློས་ཐ་དད་དུ་འཛིན་པའི་སྒོ་ནས་ང་རྒྱལ་འཇོག་པ་ནི་སྐབས་འདིའི་ང་རྒྱལ་གྱི་དོན་མ་ཡིན་ཏེ། ཐ་གཾ་པས། དེ་ཉིད་ནི་མི་ཕྱེད་པས་ན་རྡོ་རྗེའོ། །དེ་ཉིད་ནི་རང་བཞིན་ཏེ། དེའི་ངོ་བོ་ཉིད་ནི་བདག་ཉིད་ཡིན་གྱི། སྟོང་པ་ཉིད་ནི་གཞན་མ་ཡིན་ལ་སྟོང་ཉིད་ལས་ཀྱང་བདག་གཞན་མ་ཡིན་ནོ། །ཞེས་བྱ་བའོ། །ཞེས་གསུངས་པ་ལྟར་རོ། །བཞི་པ་དེ་ལྟར་བསྒོམས་པའི་དགོས་པ་ནི། རྗེ་ས་ཆེན་གྱིས་སྔ་མ་བསོད་ནམས་ཀྱི་ཚོགས་དང་། ཚོགས་གཉིས་ཟུང་འཇུག་ཏུ་འགྱུར་བ་དང་། ཕྱི་མ་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་གཟུགས་ཀྱི་སྐུ་བསྒོམ་པ་དང་། སྐུ་གཉིས་ཟུང་འཇུག་ཏུ་འགྱུར་བ་དང་། རྡོ་སོགས་རགས་པ་མ་བསལ་ན། མྱུ་གུ་སྐྱེ་བའི་སྐབས་མེད་པ་བཞིན་སྣང་བ་མ་བསལ་ན་ལྷ་བསྐྱེད་པའི་སྐབས་མེད་པས་ལྷ་བསྐྱེད་པའི་དགོས་པ་དང་རྣམ་པ་གསུམ་གསུངས་སོ། །ཞལ་ལུང་གི་འགྲེལ་པར། བསོད་ནམས་ཀྱི་ཚོགས་ཀྱིས་ལས་ཀྱི་སྒྲིབ་པ་བཟློག་ཀྱང་དངོས་འཛིན་མ་བཟློག་ན་དཀྱིལ་འཁོར་གྱི་འཁོར་ལོ་དང་མི་མཐུན་པས། དངོས་འཛིན་བཟློག་པའི་ཆེད་དུ་ཡིན་པར་གསུངས་ཏེ། དེ་ཉིད་ལས། དེ་ལྟར་ན་ཡང་དོན་གཞན་དུ་འགྱུར་བ་དང་། དངོས་པོར་འཛིན་པ་ནི་དཀྱིལ་འཁོར་གྱི་འཁོར་ལོ་དང་མི་མཐུན་པའི་ཕྱིར་དེ་བཟློག་པར་གསུངས་པས། སེམས་ཙམ་ཞེས་པ་ལ་སོགས་པའོ། །ཞེས་གསུངས་པས་སོ། །གཉིས་པ་དངོས་གཞི་ལ་གསུམ་སྟེ། ཆད་མཐའ་དགག་པའི་ཕྱིར་གསལ་བའི་ངོ་བོར་ལངས་པ། དེཾས་རྣལ་འབྱོར་ཇི་ལྟར་བསྒོམ་པའི་ཚུལ། རྣལ་འབྱོར་དེས་སྦྱང་གཞི་སྦྱོང་བའི་ཚུལ་ལོ། །དང་པོ་ལ་གསུམ་སྟེ། ཡི་གེ་གསུམ་ལངས་པ་ཡོད་པའི་ལུགས། དེ་མེད་པའི་ལུགས། ཁ་བསྐང་དགོས་མི་དགོས་དཔྱད་པའོ། །དང་པོ་ནི། ཀུན་བཟང་རྒྱས་པ་ལས། འགྲོ་བ་ཐམས་ཅད་ལུས་དང་ངག་དང་ཡིད་ཀྱི་རང་བཞིན་བརྟགས་པ་ཙམ་ཡིན་ཏེ། བརྟགས་པ་ཡང་འདོད་པ་ལ་རགས་ལས་པ་ཡིན་ལ། འདོད་པ་ལ་རགས་ལས་པས་རྣལ་འབྱོར་པ་ཡི་གེ་གསུམ་གྱི་ངོ་བོར་གྱུར་པ། བར་སྣང་ལ་ཡི་གེ་ཨ་ཡོངས་སུ་གྱུར་པའི་ཟླ་བའི་དཀྱིལ་འཁོར་ཡིན་ལ་དེའི་སྟེང་དུ་ལུས་མཐའ་དག་གི་རང་བཞིན་ཡི་གེ་ཨོཾ་དཀར་པོ། དེའི་རྗེས་ལ་ངག་མཐའ་དག་གི་རང་བཞིན་ཡི་གེ་ཨཱཿཁ་དོག་དམར་པོ། དེའི་རྗེས་ལ་ཡིད་མ་ལུས་པའི་རང་བཞིན་ཡི་གེ་ཧཱུྃ་ཁ་དོག་ནག་པོ་ཕ་དང་མའི་རང་བཞིན་གྱི་ངོ་བོ་ཁ་དོག་དམར་པོའི་ཡི་གེ་ཧོཿགཉིས་ཀྱི་བར་དུ་བཅུག་པའོ། །ཞེས་དང་། ཞལ་ལུང་ལས། སེམས་ཙམ་སྟོང་པ་ཉིད་བྱས་ནས། །རང་རིག་ཙམ་དུ་གནས་པར་བྱ། །ཞེས་པའི་འགྲེལ་པར། དེ་ཉིད་སེམས་ཙམ་སྟེ་ཆད་པའི་མཐའ་དགག་པའི་ཕྱིར་ཡི་གེ་གསུམ་དུ་བལྟ་བར་བྱ་སྟེ། དེ་ཡང་དངོས་པོར་འཛིན་པ་སྟོང་པ་ཉིད་དུ་བྱས་ནས། རྣམ་པར་ཤེས་པ་རང་རིག་མཐའ་གཉིས་དང་བྲལ་བ་ཙམ་དུ་གནས་པར་བྱའོ། །ཞེས་དང་། དངོས་གྲུབ་འབྱུང་བའི་གཏེར་ལས། སྔགས་དེས་བདག་གཞན་དངོས་པོ་གསུམ། །གཅིག་བྱས་དེ་ཉིད་གསུམ་མཚན་མ། །དགྱེས་མཛད་ཡས་མར་སྦྲེངས་པ་ཡི། །མདུན་གྱི་མཁའ་ལ་བསམ་པར་བྱ། །ཞེས་དང་། བསོད་སྙོམས་པས། དེ་ནས་སེམས་གཅིག་པུ་ཉིད་ནི་བསོད་ནམས་དང་ཡེ་ཤེས་ཀྱི་སྟོབས་ཀྱིས་རྣམ་པ་གཉིས་སུ་འགྱུར་ཏེ། ཨོཾ་ཨཱཿཧཱུྃ་ཞེས་བྱ་བ་ནི་འཇུག་པའོ། །སོ་སོར་སྣང་བའི་བདག་ཉིད་ཅན་ནི་སྨོན་པའོ། །ཞེས་གསུངས་པ་རྣམས་ཏེ། ཀུན་བཟང་གི་ལུང་གི་དོན། ཨོཾ་ཨཱཿཧཱུྃ་བསྒོམ་པ་ཡང་། འགྲོ་བ་ཐམས་ཅད་ཀྱི་ལུས་ངག་ཡིད་གསུམ་དུ་བསྒོམ་པར་གསུངས་པས་མཚོན་ནས་རྣལ་འབྱོར་གང་བསྒོམ་པ་ཐམས་ཅད་འགྲོ་བ་མཐའ་དག་གི་སྦྱང་གཞི་སྦྱོང་བའི་རྣལ་འབྱོར་བསྒོམ་དགོས་ཏེ། བསླབ་བཏུས་ལས། བྱེ་བྲག་མེད་པར་རབ་ཏུ་འཇུག །ཅེས་གསུངས་པའི་དོན། ཐེག་ཆེན་གྱི་ཉམས་ལེན་ཐུན་མོང་མ་ཡིན་པའོ། །ཞལ་ལུང་གི་འགྲེལ་པའི་དོན། ཡེ་ཤེས་ཚོགས་བསགས་གིས་ཕྱི་ནང་གི་སྣང་བ་ཐམས་ཅད་སྟོང་པར་བསྒོམས་པ་ན། ཆད་མཐའ་དགག་པའི་ཕྱིར། སེམས་གསལ་བ་ཙམ་གྱི་ངོ་བོར་ལངས་ཏེ། དེ་ཉིད་འོག་ནས་འཆད་པར་འགྱུར་བའི་རྟེན་དང་བརྟེན་པར་བཅས་པའི་འཁོར་ལོ་བསྒོམས་པས་རྟག་ཆད་ཀྱི་མཐའ་དང་བྲལ་བའི་ཟབ་གསལ་གཉིས་མེད་ཀྱི་ལྷའི་རྣལ་འབྱོར་དུ་འགྱུར་བའི་ཚུལ་སྟོན་ཏེ། རྣལ་འབྱོར་བསྒོམ་པ་ཐམས་ཅད་ལ་འདི་བཞིན་དུ་ཤེས་དགོས་སོ། །བསོད་སྙོམས་པའི་གཞུང་གིས། ཡེ་ཤེས་ཚོགས་བསག་དོན་དམ་བྱང་ཆུབ་ཀྱི་སེམས་བསྒོམ་པར་བྱས་ནས། དེ་ལས་ལངས་ནས་ལྷའི་རྣལ་འབྱོར་བསྒོམ་པ་ཀུན་རྫོབ་བྱང་ཆུབ་ཀྱི་སེམས་བསྒོམས་པས་བདེན་གཉིས་ཟུང་དུ་འཇུག་པའི་བྱང་ཆུབ་ཀྱི་སེམས་བསྒོམས་པར་འགྱུར་བར་སྟོན་ཏེ། ཡེ་ཤེས་ཀྱི་ཚོགས་ལ་མཉམ་པར་བཞག་ནས། དེ་ལས་ལངས་པར་འདོད་པ་ན། ཐོབ་བྱ་དོན་དམ་བྱང་ཆུབ་ཀྱི་སེམས་དང་། ཐོབ་བྱེད་འཇུག་པ་སེམས་བསྐྱེད་སོ་སོར་སྣང་ནས་ཐོབ་བྱ་འདི་ཐོབ་པའི་ཆེད་དུ། ཐོབ་བྱེད་འདི་བསྒོམ་པར་བྱའོ་སྙམ་དུ་སེམས་བསྐྱེད་པ་ནི་སྨོན་པ་བྱང་ཆུབ་ཀྱི་སེམས་བསྐྱེད་པ་ཡིན་ལ། ཡི་གེ་གསུམ་བསྒོམ་པ་ནས་བཟུང་སྟེ། རྣལ་འབྱོར་ཐམས་ཅད་འཇུག་པ་བྱང་ཆུབ་ཀྱི་སེམས་བསྒོམ་པའོ། །མདོར་ན་གཞུང་གསུམ་པོ་དེས། ཡེ་ཤེས་ཀྱི་ཚོགས་ལས་ལངས་ནས། འགྲོ་བ་མཐའ་དག་གི་སྦྱང་གཞི་སྦྱོང་བའི་ཆེད་དུ་རྣལ་འབྱོར་བསྒོམ་པ་དང་། དེ་ཡང་སེམས་གསལ་བ་ཙམ་རྣལ་འབྱོར་གྱི་ངོ་བོར་བསྒོམ་པ་དང་། དེ་ཡང་འཇུག་པ་སེམས་བསྐྱེད་དུ་འགྱུར་བར་སྟོན་ཏེ། ཡི་གེ་གསུམ་དུ་མ་ཟད་ས་བོན་ཙམ་དུ་ལངས་པ་ཐམས་ཅད་ལ་ཡང་སྦྱར་བར་བྱའོ། །གཉིས་པ་ནི། ཀུན་བཟང་བསྡུས་པ། འཇིག་རྟེན་དབང་ཕྱུག་གི་སྒྲུབ་ཐབས། བཞི་བརྒྱ་ལྔ་བཅུ་པ། རིན་ཆེན་རྡོ་རྗེས་མཛད་པའི་མི་བསྐྱོད་པའི་སྒྲུབ་ཐབས་རྣམས་ལས། ཡེ་ཤེས་ཚོགས་བསག་གི་རྗེས་སུ་ཡི་གེ་གསུམ་དུ་ལངས་པ་མི་སྣང་སྟེ། གཞུང་དང་པོ་ལས། དེ་འོག་ཧཱུྃ་གི་རྡོ་རྗེར་བྱས་པའི་སར། །ཞེས་དང་། གཉིས་པ་ལས། དེའི་འོག་ཏུ་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དོན་དུ་སྟོང་པའི་བདག་ཉིད་ཅན་གྱི་སེམས་དེ་ཉིད། ཡི་གེ་ཨཾ་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ཞེས་དང་། གསུམ་པ་ལས། ཧཱུྃ་མཛད་ཡང་ན་གཙུག་ཏོར་རམ། །ཞེས་དང་། བཞི་པ་ལས། དེ་ནས་སེམས་དེ་ཉིད་ཉི་མའི་དཀྱིལ་འཁོར་དེའི་སྟེང་དུ་ཡི་གེ་ཧཱུྃ་སྔོན་པོ་ལས་རྡོ་རྗེ་ཞེས་སྲུང་འཁོར་གྱི་ས་བོན་ནམ། དེའི་གདན་གྱི་ས་བོན་དུ་ལངས་པར་གསུངས་སོ། །གསུམ་པ་ནི། འོ་ན་གཞུང་ཕྱི་མ་དེ་དག་ལ་ཡི་གེ་གསུམ་དུ་ལངས་པ་ཁ་བསྐང་དགོས་སམ་མི་དགོས་སྙམ་ན། ཁ་བསྐང་ན་ཡང་ཆོ་ག་རྒྱས་པར་འགྱུར་བ་ཡིན་གྱི། ལྷག་པར་མི་འགྱུར་ཏེ། སྔར་བཤད་པའི་དོན་གསུམ་པོ་དེ་ཉིད་སྒྲུབ་པའི་ཆོ་ག་རྒྱས་པར་འགྱུར་བའི་ཕྱིར། ཁ་བསྐང་བར་མ་བྱས་ན་ཡང་ཆད་པར་མི་འགྱུར་ཏེ། དོན་གསུམ་པོ་སྒྲུབ་པ་ཉིད་ས་བོན་ཙམ་དུ་ལངས་པ་ལ་ཡང་ཚང་བའི་ཕྱིར་རོ། །རྒྱུད་སྡེ་གཞན་གྱི་སྒྲུབ་པའི་ཐབས་ལ་ཡང་། གནད་ཀྱི་དོན་འདི་བཞིན་དུ་ཤེས་པར་བྱ་སྟེ། ཡེ་ཤེས་ཚོགས་བསག་གི་རྗེས་སུ་ཡི་གེ་གསུམ་དུ་ལངས་པའམ། ནཱ་ད་ཙམ་དུ་ལངས་པའམ། པཾ་ལས་པདྨ་ཞེས་དང་། ཡཾ་ལས་རླུང་གི་དཀྱིལ་འཁོར་ཞེས་སོགས་ས་བོན་ཙམ་དུ་ལངས་པ་ཐམས་ཅད་ལ་ཡང་། འགྲོ་བ་མཐའ་དག་གི་སྦྱང་གཞིའི་ངོ་བོར་བསྒོམ་པ་དང་། ཆད་མཐའ་དགག་པ་དང་། འཇུག་པའི་སེམས་བསྐྱེད་དུ་འགྱུར་བའི་ཚུལ་གསུམ་པོ་ལེགས་པར་གནས་པའི་ཕྱིར་རོ། །གཉིས་པ་དེས་རྣལ་འབྱོར་ཇི་ལྟར་བསྒོམ་པའི་ཚུལ་ལ་གཉིས་ཏེ། སྣོད་སྦྱང་བའི་ཕྱིར་དུ་རྟེན་བསྒོམ་པ་དང་། བཅུད་སྦྱང་བའི་ཕྱིར་དུ་བརྟེན་པ་བསྒོམ་པའོ། །དང་པོ་ལ་གསུམ་སྟེ། གཞིའི་ཡན་ལག རྒྱུའི་ཡན་ལག གནས་ཐབས་ཀྱི་ཡན་ལག་གོ །དང་པོ་ནི། འདུས་པའི་རྒྱུད་ཕྱི་མ་ལས། ཆོས་འབྱུང་བ་ནི་ཇི་ལྟར་བསྒོམ། །ཞེས་པའི་ལན་དུ། ལོངས་སྤྱོད་བཞི་དང་ཡང་དག་ལྡན། །རིག་པའི་སྐྱེས་བུ་རྡོ་རྗེ་ཅན། །སྐུ་གསུང་ཐུགས་ཀྱི་དབྱེ་བ་ཡིས། །གྲུ་གསུམ་དེ་ནི་རྣམ་པར་བསྒོམ། །ཀུན་ནས་སེར་བའི་འཁོར་ལོ་ནི། །རྩིབས་བཅུ་དེ་དབུས་རྣམ་པར་བསྒོམ། །རྩིབས་ཀུན་ལ་ནི་ཁྲོ་བོ་བཅུ། །ཡེ་ཤེས་བདག་ཉིད་བཅུ་ལས་བྱུང་། །འགོག་པའི་རྡོ་རྗེ་བསྒོམ་བྱ་ཞིང་། །མཆོག་ཏུ་མཛེས་པས་བསྒྲུབ་པར་བྱ། །རྡོ་རྗེ་འབར་བའི་སྤྲིན་སྤྲོ་བས། །མི་གཡོ་བ་དང་མཚུངས་པར་འཁོར། །དེ་ལྟར་ཆོས་འབྱུང་ཡེ་ཤེས་ནི། །རང་བཞིན་དྲི་མ་མེད་ཞི་བ། །བསྒོམས་པས་སྐད་ཅིག་ཉིད་ཀྱིས་ནི། །སངས་རྒྱས་སྤྱན་ནི་རབ་དུ་འབྱུང་། །ཞེས་གསུངས་ཏེ། འདི་ལ་ཆོས་འབྱུང་གི་རྟེན་དུ། རྩིབས་བཅུ་པའི་སྲུང་འཁོར་མི་བསྒོམ་པའི་ལུགས། དེ་བསྒོམ་པའི་ལུགས། བསྒོམ་ཚུལ་རྒྱས་པར་བཤད་པ། ཆོས་འབྱུང་ཉིད་ཇི་ལྟར་བསྒོམ་པའི་ཚུལ་དང་བཞི་ལས། དང་པོ་ནི། ཀུན་བཟང་བསྡུས་པ་རྩ་འགྲེལ། འཇིག་རྟེན་དབང་ཕྱུག་གི་སྒྲུབ་ཐབས། བསོད་སྙོམས་པའི་གཞུང་རྣམས་ལས། ཐུན་མོང་བའི་སྲུང་འཁོར་གྱི་དབུས་སུ་ཆོས་འབྱུང་བསྒོམ་པ་མ་གཏོགས་རྩིབས་བཅུ་པ་བསྒོམ་པ་མི་སྣང་སྟེ། གཞུང་དང་པོ་ལས། ཧཱུྃ་གིས་རྡོ་རྗེར་བྱས་པའི་སར། །ཞེས་དང་། དེའི་འགྲེལ་པར། ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུྃ་ལས་སྣ་ཚོགས་རྡོ་རྗེའི་ས་གཞི། དེའི་ངོས་ཀྱི་འོད་ཟེར་ལས་རྡོ་རྗེའི་རྭ་བ། སྟེང་གི་འོད་ཟེར་ལས་རྡོ་རྗེའི་བླ་རེ་སྟེ་གསུམ་བསྒོམ་ཞིང་། དེ་ལྟ་ན་ཡང་གལ་ཏེ་རྣམ་པར་རྟོག་པའི་སྟོབས་ཀྱིས་བགེགས་ཀྱི་དོགས་པ་འབྱུང་བར་གྱུར་ན། དེའི་ཚེ་རྡོ་རྗེའི་བླ་རེའི་ཕྱི་རོལ་དུ་ལཾ་ལས་དབང་ཆེན་གྱི་དཀྱིལ་འཁོར་སེར་པོ་དང་། དེའི་ཕྱི་རོལ་དུ་ཡཾ་ལས་རླུང་གི་དཀྱིལ་འཁོར་སྔོན་པོ་དང་། དེའི་ཕྱི་རོལ་དུ་རཾ་ལས་མེའི་དཀྱིལ་འཁོར་དམར་པོ་བསམ་པར་གསུངས་ཏེ། འདིས་ནི་སྲུང་འཁོར་རིམ་པ་མང་པོ་བསྒོམ་པའི་དགོས་པ་ཡང་གསལ་བར་བསྟན་ཏོ། །བོད་དག་གནད་འདི་མ་མཁྱེན་པར། སྔར་ཡོད་ཀྱི་བགེགས་ལ་བསྣུན་བསྲེག་བཅིང་གསུམ་དང་། ཕྱིན་ཆད་ཀྱི་བགེགས་མི་འབྱུང་བའི་ཕྱིར་རྡོ་རྗེའི་རྭ་གུར་བསྒོམས་ཟིན་པའི་རྗེས་སུ་ཁྲོ་བོ་སྤྱན་འདྲེན་པ་ལ། རྐང་པ་ཚ་བ་ལས་མེད་དོ་ཞེས་སྨྲ་བ་ནི་རྣམ་རྟོག་གི་བྱེ་བྲག་གིས་སྲུང་འཁོར་གྱི་རིམ་པ་མང་ཉུང་ཡོད་པའི་གནད་མ་ཤེས་པའོ། །གཞུང་གཉིས་པ་ལས། ཉི་མའི་དཀྱིལ་འཁོར་གྱི་སྟེང་དུ། ཡི་གེ་ཧཱུྃ་ནག་པོ་ལ། རྡོ་རྗེ་རྩེ་ལྔ་པ་ནག་པོ་ཁ་གྱེས་པ་ལྟེ་བ་ལ་ཧཱུྃ་གིས་མཚན་པ། དེའི་འོད་ཟེར་གྱིས་བགེགས་ཐམས་ཅད་བསལ་ནས་འོད་ཟེར་དེ་ཉིད་ལས། རྡོ་རྗེའི་རྭ་བ་དང་། དྲྭ་བ་དང་། ཕྱི་རོལ་དུ་མེ་རི་དང་། འོག་དུ་རྡོ་རྗེའི་ས་གཞི་བསྒོམ་པར་བཤད་དོ། །གཞུང་གསུམ་པ་ལས། སྨོན་འཇུག་གི་སེམས་བསྐྱེད་དེ་ལ་ཡང་བགེགས་འབྱུང་བར་དོགས་ནས། ཨོཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་བསྒོམ་ཚུལ་སྔ་མ་དང་འདྲ་བ་ལས། འོད་ཟེར་དེ་ཉིད་ཀྱིས་རྡོ་རྗེའི་རྭ་བ་འབའ་ཞིག་བསྒོམ་པར་བཤད་དོ། །གསུམ་ཆར་གྱིས་ཐུན་མོང་བའི་སྲུང་འཁོར་གྱི་ནང་དུ་ཆོས་འབྱུང་བསྒོམ་པ་མ་གཏོགས་རྩིབས་བཅུ་པ་བཤད་པ་མེད་དོ། །གཉིས་པ་ནི་ཀུན་བཟང་རྒྱས་པ། བཞི་བརྒྱ་ལྔ་བཅུ་པ། དངོས་གྲུབ་འབྱུང་བའི་གཏེར། རིན་ཆེན་རྡོ་རྗེའི་གཞུང་རྣམས་ཏེ། གཞུང་དང་པོ་ལས་ཡི་གེ་གསུམ་གྱི་འོག་གི་ཆར་ཨོཾ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་སེར་པོ་ལས། འཁོར་ལོ་སེར་པོ་རྩིབས་བཅུ་དང་། དབུས་དང་ཕྱོགས་བཅུར་ཧཱུྃ་མཛད་ལ་སོགས་པའི་ཁྲོ་བོ་བཅུ་གཅིག རྡོ་རྗེ་ཆོ་ག་གསུམ་ལས་བསྐྱེད་དེ། སེམས་དཔའ་སུམ་བརྩེགས་སུ་བྱས་ནས་ཏིང་ངེ་འཛིན་སེམས་དཔའི་འོད་ཟེར་ལས་འབར་བའི་རྡོ་རྗེ་རྩེ་ལྔ་པ་ཁ་གྱེས་པའི་ཚོགས་ཀྱིས་ལུས་དང་། ངག་དང་། ཡིད་ལ་གནས་པའི་བདུད་ཕྱུང་ནས་ཕྱོགས་བཅིང་བ་དང་། གུར་དང་། རྭ་བ་དང་། ས་གཞི་བསྒོམ་པར་བཤད་དོ། །གཞུང་གཉིས་པ་ལས། ཧཱུྃ་མཛད་ཡང་ན་གཙུག་ཏོར་རམ། །རྣམ་པར་སྣང་མཛད་ལ་སོགས་ཉིད། །ཁྲོ་བོའི་འཁོར་ལོ་གནས་བསྲུང་ཕྱིར། །བསམ་ལ་བགེགས་ནི་རྣམ་པར་གཞོམ། །ཞེས་རྩིབས་བཅུ་པའི་སྲུང་འཁོར་ཁོ་ན་དང་། གཞུང་གསུམ་པ་ལས། སྟོང་ལས་ཉི་དཀྱིལ་ཧཱུྃ་ནག་ལས། །རྡོ་རྗེ་གཟེར་འཕྲོས་ཕྱི་རོལ་བཅད། །འོག་དང་ཕྱོགས་མཚམས་སྟེང་སྤྲོས་པས། །ས་གཞི་རྭ་བ་བླ་རེ་བསྐྱེད། །བྷྲཱུྃ་འཁོར་རྩིབས་བཅུ་འོད་ཟེར་དྲག །པད་ཉིར་ཁྲོ་བོ་འཁོར་ལོ་བསྒོམ། །དེར་དབུས་ཧཱུྃ་མཛད་བརྟག་པ་སོགས། །གནས་གྱུར་དེ་ལས་ཆོས་འབྱུང་བསྐྱེད། །ཅེས་དང་པོར་ཐུན་མོང་བའི་སྲུང་འཁོར་བསྒོམས་ནས་དེའི་ནང་དུ་རྩིབས་བཅུ་པ་བསྒོམ་པར་བཤད་དོ། །གཞུང་བཞི་པ་ལས། ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་ཧཱུྃ་གིས་མཚན་པ་དེ་ལས་རྡོ་རྗེ་སྤྲོས་ཏེ། རྡོ་རྗེའི་ས་གཞི་དང་། སྲུང་བའི་འཁོར་ལོའི་ཕྱི་རོལ་དུ་རཾ་ལས་མེའི་དཀྱིལ་འཁོར་གྱིས་ཕྱོགས་བཅིངས་ལ། དེའི་བར་དུ་ལཾ་ལས་སའི་དཀྱིལ་འཁོར་གྱིས་མཚམས་བཅིངས་ཏེ། དེའི་ནང་དུ་ཧཱུྃ་ལས་རྡོ་རྗེའི་རྭ་བ་བྱས་ནས། རྭ་བའི་སྟེང་དུ་བཾ་ལས་ཆུའི་དཀྱིལ་འཁོར་གྱི་རྡོ་རྗེའི་རྭ་བ་བསྒོམ་པར་བྱའོ། །དེའི་དབུས་སུ་འཁོར་ལོ་སེར་པོ་རྩིབས་བཅུ་པ་བསྒོམས་ནས་རྩིབས་བཅུ་ལ་ཁྲོ་བོ་བཅུ་བསྒོམ་ཏེ་ཁྲོ་བོ་བཅུ་པོ་ཤེས་པ་བཅུ་རེ་རེའི་ངོ་བོར་བསྒོམ་པའམ། ཡང་ན་རེ་རེ་ཡང་མེ་ལོང་ལྟ་བུ་ལ་སོགས་པའི་ཡེ་ཤེས་ལྔ་པོ་དང་། དེའི་རྒྱུ་རྣམ་པར་བྱང་བའི་ཕུང་པོ་ལྔ་སྟེ། ཡེ་ཤེས་བཅུ་བཅུ་ལས་བསྒོམ་པར་བཤད་དེ། རྒྱུད་ལས། ཡེ་ཤེས་བདག་ཉིད་བཅུ་ལས་བྱུང་། །ཞེས་པའི་དོན་དུ་མཛད་པར་སྣང་ངོ་། །རྒྱལ་བས་བྱིན་གྱི་འགྲེལ་པ་ལས་ཀྱང་འདི་ལྟར་བཤད་མོད། རྒྱུད་ཀྱི་དགོངས་པ་ནི། སཾ་བུ་ཊི་དང་། དྲིལ་བུ་པའི་གཞུང་དང་། ཞལ་ལུང་གི་འགྲེལ་པར། རྒྱུད་ཀྱི་ལུང་དྲངས་པ་རྣམས་ལས། ཧཱུྃ་ཡེ་ཤེས་ལྔའི་བདག་ཉིད་དུ་བཤད་པ་ལྟར་ཡེ་ཤེས་ལྔའི་བདག་ཉིད་ཀྱི་ཧཱུྃ་བཅུ་ལས་བྱུང་ཞེས་པའི་དོན་དུ་མངོན་ནོ། །གསུམ་པ་ནི། སྙིམ་པའི་མེ་ཏོག་ལས། འདུས་པའི་རྒྱུད་ཕྱི་མའི་ཚིགས་བཅད་བཞི་པོའི་དོན་ལ་ལོངས་སྤྱོད་དེ་དགའ་བ་བཞིས་ཡོངས་སུ་བསྐོར་བ་དང་ལྡན་པའི་རིག་པའི་སྐྱེས་བུ་རྡོ་རྗེ་ཅན་ཆོས་འབྱུང་གྲུ་གསུམ་པའི་ནང་དུ་ཚུད་པའི་གཞལ་ཡས་ཁང་གི་དབུས་སུ་བསྒོམས་ནས། དེའི་དབུས་སུ་སྟེ་སྙིང་ཁར་འཁོར་ལོ་སེར་པོ་རྩིབས་བཅུ་པ་བསྒོམ་པ་ལ་འཆད་ཅིང་འདི་ཡང་དྲག་ཤུལ་གྱི་སྦྱོར་བ་བྱ་མི་ནུས་པ་རྣམས་ཀྱི་ཆོ་གར་བཤད་པ་མ་གཏོགས། མངོན་རྟོགས་ཀྱི་སྔོན་འགྲོར་འདོད་པའི་གསལ་ཁ་མི་སྣང་ལ། ལེའུ་དང་པོའི་འགྲེལ་པར། མངོན་རྟོགས་ཀྱི་ཐོ་བསྒྲིག་པའི་སྐབས་སུ་རྩིབས་བཅུ་པ་བསྒོམ་པར་བཤད་འདུག་ཀྱང་། བསྒོམ་ཚུལ་འདི་དང་མི་འདྲ་བར་སྣང་ངོ་། །གཞུང་གཞན་ཐམས་ཅད་ལས་འཁོར་ལོ་རྩིབས་བཅུ་པའི་དབུས་སུ་ཆོས་འབྱུང་བསྒོམ་པའི་དོན་དུ་འཆད་ཅིང་། མངོན་རྟོགས་ཀྱི་སྔོན་འགྲོར་ཡང་བཤད་ལ། ཐ་ག་ནས་རིག་པའི་སྐྱེས་བུ་རྡོ་རྗེ་ཅན་ནི་འོག་ཏུ་བསྒོམ་པར་འགྱུར་བའི་དཀྱིལ་འཁོར་གྱི་གཙོ་བོ་ཡིན་ལ། དེ་ལོངས་སྤྱོད་བཞི་དང་ཡང་དག་པར་ལྡན་པ་ནི་བསྙེན་སྒྲུབ་ཡན་ལག་བཞི་དང་ལྡན་པ་སྟེ། དེ་ཆོས་འབྱུང་གི་ནང་དུ་བསྒོམ་ལ། ཆོས་འབྱུང་བསྒོམ་པའི་དོན་གྱི་གནས། སྔོན་དུ་འཁོར་ལོ་རྩིབས་བཅུ་པ། ཁྲོ་བོ་བཅུ་དང་ལྡན་པ། སྲུང་བའི་དོན་དུ་བསྒོམ་པར་བྱའོ། །ཞེས་ཏེ། ཆོས་འབྱུང་གི་དབུས་སུ་སྲུང་བའི་འཁོར་ལོ་བསྒོམ་པར་བྱ་བ་ནི་མ་ཡིན་ཞེས་དོགས་གཅོད་དང་བཅས་ཏེ་གསུངས་སོ། །འགོག་པའི་རྡོ་རྗེའི་དོན་ནི། དབུགས་འཇུག་པ་གཅོད་པའི་སེམས་ཀྱིས་མི་གཡོ་བ་དང་མཚུངས་པར་འཁོར་བ་ནི་མྱུར་དུ་འཁོར་བས་བརྟན་པར་གནས་པ་དང་འདྲ་བར་འཁོར་བའོ། །འདི་ལ་ངག་གི་དབང་ཕྱུག་གྲགས་པའི་དེ་ཉིད་བཅུ་པའི་གཞུང་ལས། རང་བསྲུང་བ་དང་། གནོད་པ་ཕྱིར་བཟློག་གཉིས་སུ་བྱས་ནས། དང་པོ་ནི་ཇི་སྐད་བཤད་པ་བཞིན་ཡིན་ལ། དེ་ཡང་མངོན་རྟོགས་ཀྱི་སྔོན་འགྲོར་བཤད་ཅིང་། ཕྱི་མ་ནི་དེ་བཞིན་གང་ཚེ་དེས་འཁོར་ལོ། །དབུས་སུ་གཙུག་ཏོར་གྱིས་བརྒྱན་ན། །སྟེང་གི་རྩིབས་ལ་ཧཱུྃ་མཛད་དེ། །གཡོན་དུ་འཁོར་བར་བསམ་པར་བྱ། །མཆོད་པ་ལ་སོགས་སྔོན་བྱས་ནས། །མཚན་མོ་དག་ནི་ལན་གསུམ་ཞིག །གསང་སྔགས་བརྗོད་དེ་མཆོད་པར་བྱ། །ཕྱིར་བཟློག་ཞེས་བྱར་འགྱུར་བ་ཡིན། །ཨོཾ་ཨཱཿཨུཥྞི་ཥ་ཞེས་སོགས་ཀྱི་སྔགས་བཟླ་བར་བྱའོ། །པཎྜི་ཏ་ས་མནྟ་བྷ་ཏྲ་ནས་བརྒྱུད་པ་ཡིན་ཟེར་ནས་རྭ་པ་རྣམས་ཀྱིས་མན་ངག་ཟབ་མོར་བྱེད་པ་ཡང་འདི་ཉིད་ལོགས་སུ་ཕྱུང་བར་སྣང་ངོ་། །བཞི་པ་ནི་ཀུན་བཟང་བསྡུས་པར། རྡོ་རྗེར་བྱས་པའི་སར་ཀུན་ཏུ་བཟང་པོ་སྟོན་ཀའི་ཟླ་བ་ལྟར་དཀར་བ་ཞུ་བ་ལས་ཆོས་ཀྱི་འབྱུང་གནས་བསྒོམ་པར་གསུངས་ལ། དེའི་དབྱིབས་ནི་འགྲེལ་པར་གྲུ་གསུམ་གྱེན་དུ་གནས་པ་ཞེས་བྱ་བ་ནི། གྱེན་ཀར་གནས་ཤིང་སྐྱེ་གནས་ཀྱི་གཟུགས་ཅན་ནོ། །ཞེས་གསུངས་ཏེ། ཕྱོགས་གང་ནས་བལྟས་ཀྱང་གྲུ་གསུམ་གྱེན་ཀར་གནས་པ། སྐྱེ་གནས་ཀྱི་གཟུགས་ཅན་ཞེས་པའི་དོན་ཡིན་ཞིང་། དཔལ་འཛིན་གྱི་བཞེད་པ་ཡང་འདི་ཉིད་ཡིན་པས། ཕ་རྒྱུད་དང་མ་རྒྱུད་ཀྱི་ཆོས་འབྱུང་ལ་ཁྱད་པར་ཡོད་པ་མ་མཐོང་ངོ་། །ཁ་དོག་ནི་གཞུང་ཐམས་ཅད་ཀྱིས་དཀར་པོར་བཤད་དོ། །བསོད་སྙོམས་པ་དང་། ཇོ་བོ་རྗེ་གཉིས་ཀྱིས་ཐུན་མོང་བའི་སྲུང་འཁོར་གྱི་དབུས་སུ། དང་པོ་ནས་ཆོས་འབྱུང་བསྒོམ་པ་མ་གཏོགས་ཀུན་བཟང་ཞུ་བ་ལས། ཆོས་འབྱུང་བསྒོམ་པའི་གསལ་ཁ་མི་སྣང་ངོ་། །ཀུན་བཟང་རྒྱས་པ་ལས། རྩིབས་བཅུ་པའི་སྲུང་འཁོར་གྱི་དབུས་ཀྱི་ཧཱུྃ་མཛད་ཞུ་བ་ལས། ཀུན་ཏུ་བཟང་པོ་ཞལ་གསུམ་ཕྱག་དྲུག་པར་བསྒོམས་ནས་དེ་ཞུ་བ་ལས་ཆོས་འབྱུང་བསྒོམ་པར་བཤད་ལ། མར་མེ་མཛད་དང་། སྨན་ཞབས་དང་། རིན་ཆེན་རྡོ་རྗེས་འཁོར་ལོ་རྩིབས་བཅུ་པའི་དབུས་སུ། ཧཱུྃ་མཛད་དམ། གཙུག་ཏོར་འཁོར་ལོས་སྒྱུར་བའམ། རྟག་པ་ལ་སོགས་པའི་འཁོར་ལོས་སྒྱུར་བ་དྲུག་སྟེ། བརྒྱད་པོ་གང་རུང་བསྒོམས་ནས། དེ་ཞུ་བ་ལས་ཆོས་འབྱུང་བསྒོམ་པ་མ་གཏོགས་པར། སྐབས་དེར་ཀུན་ཏུ་བཟང་པོ་བསྒོམ་པ་མི་བཞེད་དོ། །ངག་གི་དབང་ཕྱུག་གྲགས་པས། སྲུང་བའི་དོན་དུ་འཁོར་ལོ་འདི། །ལྟེ་ནང་ཁོང་སྟོང་གནས་པ་ཡང་། །རྡོ་རྗེ་ཧཱུྃ་མཛད་སྙིང་དབུས་སུ། །ཆོས་ཀྱི་འབྱུང་གནས་ཕྱག་རྒྱ་དེར། །གཞལ་ཡས་ཁང་སོགས་བསྒོམ་པར་བྱ། །ཞེས་ཧཱུྃ་མཛད་ཀྱི་སྙིང་ཁར་ཆོས་འབྱུང་བསྒོམ་པར་བཤད་དོ། །དེ་ལྟར་ན་ཆོས་འབྱུང་འདི་ནི་རྒྱུད་ཕྱི་མ་ལས། ཆོས་འབྱུང་བ་ནི་ཇི་ལྟར་བསྒོམ་ཞེས་པའི་ལན་གྱིས་གཞིའི་ཡན་ལག་དངོས་ཡིན་ལ། དེ་ཉིད་འཁོར་ལོ་རྩིབས་བཅུ་པ་ཁྲོ་བོ་བཅུ་དང་བཅས་པའི་དབུས་སུ་བསྒོམ་པར་གསུངས་པ་ནི་རྒྱས་པའི་ཡན་ལག་ཡིན་ལ། ཐུན་མོང་བའི་སྲུང་འཁོར་གྱི་དབུས་སུ་བསྒོམ་པ་ནི་བསྡུས་པ་ཡིན་པས་རྩིབས་བཅུ་པ་མ་བསྒོམས་ཀྱང་ཆོ་ག་ཆད་པའི་སྐྱོན་མེད་པར་མངོན་ནོ། །འཕགས་ལུགས་ལ་རྩིབས་བཅུ་པ་བསྒོམ་པ་ནི་ལུགས་འདི་དར་ཚུན་ཆད་བསྲེ་བར་སྣང་ཡང་དེ་ནི་མ་དག་པ་སྟེ། ལུགས་དེར་ཆོས་འབྱུང་ཡོད་སར་སྔར་གྱི་སྲུང་འཁོར་མེད་པའི་ཕྱིར་རོ། །གཉིས་པ་རྒྱུའི་ཡན་ལག་ནི། ཀུན་བཟང་རྒྱས་པ་དང་། བསོད་སྙོམས་པའི་གཞུང་གཉིས་ལས། ཆོས་འབྱུང་གི་དབུས་སུ་ཨོཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ་ཁཾ་ལྗང་གུ་ལས་བྱུང་བའི་སྣ་ཚོགས་རྡོ་རྗེ། དེའི་སྟེང་དུ་བྷཱུཾ་ལས་འཁོར་ལོ་དཀར་པོ་བྷཱུཾ་གྱིས་མཚན་པ་ལས་རྣམ་སྣང་དཀར་པོ་ཞལ་གསུམ་ཕྱག་དྲུག་པ་ཡུམ་དང་བཅས་པ་བསྐྱེད་པར་བཤད་ཅིང་། འཁོར་ལོའི་རྩིབས་ཀྱི་གྲངས་ཀུན་བཟང་རྒྱས་པ་ལས་རྩིབས་བརྒྱད་པ་དང་། རིན་ཆེན་རྡོ་རྗེ་དང་། ཇོ་བོ་རྗེས་རྩིབས་བཅུ་གཉིས་པར་བཤད་ལ། གཞུང་གཞན་རྣམས་ལས་རྩིབས་ཀྱི་གསལ་ཁ་མི་སྣང་ངོ་། །འཁོར་ལོའི་གཞན་བཞི་བརྒྱ་ལྔ་བཅུ་པ་ལས། མཁའ་ནང་འོག་པད་རྡོ་རྗེ་གནས། །ཞེས་དང་། སྨན་ཞབས་ཀྱིས། ནམ་མཁའི་དཀྱིལ་དུ་པད་མ་དང་། །སྣ་ཚོགས་རྡོ་རྗེ་བསམ་པར་བྱ། །ཞེས་དང་། ཇོ་བོ་རྗེས། ཧཱུྃ་ནག་པོ་ལས་བྱུང་བའི་སྣ་ཚོགས་རྡོ་རྗེ་ཞེས་བཤད་དོ། །བསོད་སྙོམས་པས། དེའི་ཡེ་ཤེས་སེམས་དཔའི་སྙིང་པོའི་འོད་ཟེར་རྣམས་ཀྱིས་སངས་རྒྱས་རྣམས་ཡང་དག་པར་བསྐུལ་ནས་བཅུག་ལ། དེ་ཡོངས་སུ་གྱུར་པ་ལས་ཁང་པ་བརྩེགས་མ་ཟུར་བཞི་ལ་སོགས་པ་དང་ལྡན་པར་བསམས་ལ། ཞེས་རྐྱེན་གྱི་ཡན་ལག་གསུངས་ཤིང་། གཞུང་གཞན་རྣམས་ལས། རྣམ་པར་སྣང་མཛད་ཞུ་བ་ལས་གཞལ་ཡས་ཁང་དུ་བསྒོམས་པར་གསུངས་སོ། །གསུམ་པ་གནས་ཐབས་ཀྱི་ཡན་ལག་ནི་གཞུང་རྣམས་ལས་གཞལ་ཡས་ཁང་གི་ཁྱད་ཆོས་རགས་རིམ་སྨོས་ནས་དག་པ་དང་སྦྱར་བ་ཙམ་ལས་མཚན་ཉིད་གསལ་བ་གསུངས་པ་མི་སྣང་ཡང་། རྗེ་བླ་མའི་ཞལ་ནས། འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །ཞེས་གསུངས་པ་ལྟར་ཞིབ་ཏུ་ཤེས་པར་བྱ་ཞིང་། རྟ་བབས་ནི་བཞི་བརྒྱ་ལྔ་བཅུ་པ་ལས་ཐིག་སྐུད་ཆ་ཕྲན་དྲུག་ཅུ་རྩ་བཞི་པའི་ཕྱོགས་གསུངས་པས། དཔངས་སུ་སྒོ་ཚད་གཅིག་མ་སྣམ་བུ་བཞི་དང་ལྡན་པ། སྨན་པའི་ཞབས་ཀྱིས་དཔངས་སུ་སྒོ་ཚད་གསུམ་མ་ལ། མུན་སྣམ་དང་། ཡ་ཕུབས་ཀྱི་རྩིག་པ་ཡང་ཡོད་པའི་ཕྱོགས་གསུངས་ཏེ། ཨ་བྷྱའི་ལུགས་དང་གཏན་མི་འདྲ་བར་སྣང་ངོ་། །རྩིག་པའི་རིམ་པ་མི་བསྐྱོད་པའི་རིགས་གཙོ་བོར་གྱུར་པའི་ཚེ་ཕྱི་ནས་རིམ་པ་བཞིན། དཀར། སེར། དམར། ལྗང་། སྔོ་བ་དང་། རྣམ་སྣང་གི་རིགས་གཙོ་བོར་གྱུར་པའི་ཚེ། སྔོ། སེར། དམར། ལྗང་། དཀར་བ་དང་། རིན་འབྱུང་གི་རིགས་གཙོ་བོར་གྱུར་པའི་ཚེ། དཀར། སྔོ། དམར། ལྗང་། སེར་བ་དང་། འོད་དཔག་མེད་ཀྱི་རིགས་གཙོ་བོར་གྱུར་པའི་ཚེ། དཀར། སེར། སྔོ། ལྗང་། དམར་བ་དང་། དོན་གྲུབ་ཀྱི་རིགས་གཙོ་བོར་གྱུར་པའི་ཚེ། དཀར། སེར། དམར། སྔོ། ལྗང་བ་སྟེ། རིགས་གང་ཡིན་པ་དེའི་ཁ་དོག་ནང་དུ་འོང་ཞིང་། དེའི་ཤུལ་དུ་སྔོན་པོ་འགྲོ་བའོ། །དེ་བཞིན་དུ་ལྷ་སྣམ་ལ་ཡང་མི་བསྐྱོད་པའི་རིགས་གཙོ་བོར་གྱུར་པའི་ཚེ། ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ་ཡིན་ལ། རིགས་གཞན་གཙོ་བོར་གྱུར་པའི་ཚེ་དེའི་ཁ་དོག་དབུས་སུ་འོང་ཞིང་། དེའི་ཤུལ་དུ་སྔོན་པོ་འགྲོ་བའོ། །ཐོག་ཕུབས་ཀྱི་ཚུལ་ནི་རྩིག་པའི་ནང་དུ་ལྷ་སྣམ་ཆ་ཆེན་གཅིག་བཅད་ནས་དབུས་སུ་ཆ་ཆེན་དྲུག་པ། དཔངས་སུ་ཆ་ཕྲན་ལྔ་ཡོད་པ་ལ་ཕྱོགས་བཞིར་ཀ་བ་གཉིས་གཉིས་ཏེ་བརྒྱད། དཔངས་སུ་ཆ་ཕྲན་བཅུ་གཉིས་ཡོད་པའི་སྟེང་དུ་ཤིང་བརྩེགས་ལ་ཆ་ཕྲན་གཅིག་དང་། གཅིག་གི་ལྔ་ཆ་གཅིག གདུང་ཟླུམ་ལ་ཆ་ཕྲན་གཅིག་སྟེ། དེ་དང་ཕྱིའི་གསེར་གྱི་གདུང་ལེབ་མཉམ་པའི་སྟེང་དུ་ཐོག་འོག་མ་ཕུབ། གཞན་རྣམས་སྤྱི་དང་འདྲའོ། །ཀ་བ་བརྒྱད་ཀྱི་བར་དུ་རྡོ་རྗེའི་རྭ་བ་དང་། ཕྱི་རོལ་འོད་ཟེར་ཕྲེང་བས་བསྐོར་བའི་ནང་དུ་རིགས་ལྔ་དང་། ཡུམ་བཞིའི་གདན་ལྷ་སྣམ་གྱི་མཚམས་བཞི་དང་། ཤར་གྱི་སྣམ་བུའི་གཡས་གཡོན་གཉིས་སུ་རྡོ་རྗེ་མ་དྲུག་གི་གདན། སྒོ་བཞིའི་ཐད་སོའི་ལྷ་སྣམ་ལ་ཁྲོ་བོ་བཞིའི་གདན་ཏེ། རབ་ཏུ་རྒྱས་པའི་པད་མ་བཅུ་དགུའི་སྟེང་དུ་དབུས་དང་། རྣམ་སྣང་གི་གནས་དང་། ཡུམ་བཞི་དང་། རྡོ་རྗེ་མ་དྲུག་གི་གནས་སུ་ཟླ་བའི་དཀྱིལ་འཁོར་རེ་རེ། རིགས་གཞན་གསུམ་དང་། ཁྲོ་བོ་བཞིའི་གནས་སུ་ཉི་མའི་དཀྱིལ་འཁོར་རེ་རེའོ། །རྣམ་སྣང་མ་གཏོགས་པའི་རིགས་གཞན་བཞི་གཙོ་བོར་གྱུར་པའི་ཚེ་དབུས་སུ་ཡང་ཉི་མའི་དཀྱིལ་འཁོར་ཡོད་པར་རིགས་སོ་སྙམ་ན། དེ་ནི་མ་ཡིན་ཏེ་རིགས་གང་གཙོ་བོར་གྱུར་ཀྱང་རྒྱུ་རྡོ་རྗེ་འཆང་གི་གདན་ལ་ཟླ་བ་དགོས་པའི་དབང་དུ་བྱས་པའི་ཕྱིར་རོ། །གཉིས་པ་བཅུད་སྦྱང་བའི་ཕྱིར་བརྟེན་པ་བསྐྱེད་པ་ལ་གཉིས་ཏེ། བསྐྱེད་ཆོག་སྤྱིའི་རྣམ་པར་གཞག་པ་དང་། སྐབས་ཀྱི་དོན་ལ་སྦྱར་བའོ། །དང་པོ་ལ་གསུམ་སྟེ་བསྙེན་སྒྲུབ་ཡན་ལག་བཞི་ངོས་བཟུང་བ། དེ་ཉིད་འབྲས་བུ་བཞིར་བཞག་པའི་ཚུལ། ཆུང་ངུ་ལ་སོགས་པའི་ཁྱད་པར་དཔྱད་པའོ། །དང་པོ་ནི། རྩ་བའི་རྒྱུད་ལེའུ་བཅུ་གཉིས་པ་ལས། བསྙེན་པའི་དམ་ཚིག་སྦྱོར་བ་དང་། །ཉེ་བར་སྒྲུབ་པ་འབྱུང་བ་དང་། །སྒྲུབ་པའི་དོན་གྱི་དམ་ཚིག་དང་། །སྒྲུབ་པ་ཆེན་པོ་དག་དང་བཞི། །རྡོ་རྗེའི་བྱེ་བྲག་ཤེས་བྱས་ལ། །དེ་ནས་ལས་རྣམས་བསྒྲུབ་པར་བྱ། །བསྙེན་པའི་ཏིང་འཛིན་རབ་སྦྱོར་བ། །བྱང་ཆུབ་མཆོག་གི་བསྒོམ་པར་བྱ། །ཉེ་བར་སྒྲུབ་པ་གྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་དཔྱད། །སྔགས་ཀྱི་བདག་པོ་བསྒོམ་པ་ཡིས། །སྒྲུབ་པའི་ཚེ་ན་བསྐུལ་བར་གསུངས། །སྒྲུབ་པ་ཆེན་པོ་བྱེད་པའི་ཚེ། །རང་སྔགས་རྡོ་རྗེ་ཅན་གྱི་གཟུགས། །དབུ་རྒྱན་ལ་ནི་བདག་པོ་བསམ། །ཡེ་ཤེས་རྡོ་རྗེ་ཅན་འགྲུབ་འགྱུར། །ཞེས་གསུངས་ཏེ། ཚིགས་བཅད་དང་པོས་ཡན་ལག་བཞིའི་མིང་གི་ཐ་སྙད་དང་། དེ་ནས་རྐང་པ་གཉིས་ཀྱིས་ཐུན་མོང་གི་ལས་སྒྲུབ་པ་དང་། ཚིགས་བཅད་ཕྱེད་དང་གསུམ་གྱིས་ཡན་ལག་རྒྱས་པར་བཤད་པར་བསྟན་ཏོ། །འདི་ལ་རྣལ་འབྱོར་དབང་ཕྱུག་གི་མན་ངག་གིས་འགྲེལ་ཚུལ་དང་། འཕགས་པ་ཡབ་སྲས་ཀྱིས་འགྲེལ་ཚུལ་དང་། ལུགས་མཆོག་འདིས་འགྲེལ་ཚུལ་དང་གསུམ་ལས། དང་པོ་ནི། བརྟག་གཉིས་དང་། འདུས་པའི་རྒྱུད་ཕྱི་མ་ལས། དང་པོ་སྟོང་ཉིད་བྱང་ཆུབ་སེམས། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་གསུངས་པ་དང་དོན་གཅིག་ཏུ་མཛད་དེ། བསྐྱེད་ཆོག་གང་གིས་བསྐྱེད་ཀྱང་དམ་ཚིག་པ་བསྐྱེད་པ་ནི་བསྙེན་པའི་ཡན་ལག་གོ །སྐྱེ་མཆེད་དམ་ཡང་ན་སྐུ་གསུང་ཐུགས་བྱིན་གྱིས་བརླབ་པ་ནི་ཉེར་སྒྲུབ་ཀྱི་ཡན་ལག་གོ །ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི་སྒྲུབ་པའི་ཡན་ལག་སྟེ། སྔགས་ཀྱི་བདག་པོ་ནི་སྙིང་ཁའི་ས་བོན་ལ་བཞེད་དོ། །དབང་བསྐུར་ནས་རིགས་ཀྱི་བདག་པོས་རྒྱས་གདབ་པའམ། ཡང་ན་དབུ་རྒྱན་རང་ཆས་ཅན་དུ་བསམ་པ་ནི་སྒྲུབ་པ་ཆེན་པོ་སྟེ། ཡིག་འབྲུའི་སྐད་དོད་ལ། ཨ་ཀྵ་ར་ཅེས་པ་འགྱུར་མེད་ཡིན་ལ་གང་གིས་རྒྱས་གདབ་པ་དེའི་རིགས་ལས་འགྱུར་བ་མེད་པས་ན་རིགས་བདག་སྟོན་ནོ། །གཉིས་པ་ནི་སྒྲོན་གསལ་ལས། བསྙེན་པའི་ཏིང་ངེ་འཛིན་ཞེས་བྱ་བ་ལ་སོགས་པས་ནི། མདོར་བསྟན་པའི་ཡན་ལག་སྟོན་པ་ཡིན་ཏེ། བྱང་ཆུབ་ཀྱི་སེམས་ལ་དམིགས་པ་ནི་བསྙེན་པའོ། །དེ་ཉིད་རྩེ་གཅིག་ཏུ་བྱེད་ཅིང་སེམས་ལ་འཇོག་པས་ན་ཏིང་ངེ་འཛིན་ནོ། །རབ་སྦྱོར་བ་ནི་ཡང་དག་པར་སྦྱོར་བའོ། །དེ་གང་ཞེ་ན་སའི་ཆ་ལ་སོགས་པ་ནས། དཀྱིལ་འཁོར་གྱི་འཁོར་ལོའི་བར་དུ་ལྷག་པར་མོས་པས་བསྐྱེད་པ་སྟེ། བསྙེན་པའི་ཏིང་ངེ་འཛིན་དང་རབ་ཏུ་སྦྱོར་བ་ནི་བསྙེན་པའི་ཏིང་ངེ་འཛིན་རབ་སྦྱོར་བའོ། །དེ་ལྟར་བྱས་ལ་ཨོཾ་ཤཱུ་ནྱ་ཏཱ་ཞེས་པའི་སྔགས་ཀྱིས་དོན་རབ་ཏུ་རྣམ་པར་དཔྱད་པ་ལས་བྱུང་བའི་བྱང་ཆུབ་ཀྱི་སེམས་དེ་ཁོ་ན་ཉིད་ཀྱི་མཚན་ཉིད་ཅན་བསྒོམས་པར་བྱས་ནས་ཉི་མ་དང་། ཟླ་བ་དང་། པདྨ་ལ་སོགས་པའི་རིམ་གྱིས་གོང་ནས་གོང་དུ་བཞག་ལ། དེའི་སྟེང་དུ་ཡི་གེ་གསུམ་རྣམ་པར་བཀོད་དེ། ཐམས་ཅད་བསྡུས་པ་ལས། ཟླ་བའི་དཀྱིལ་འཁོར་བསམ་ཞིང་། དེའི་སྟེང་དུ་ཡང་ཡི་གེ་གསུམ་པོ་བཀོད་ལ། དེ་ཡོངས་སུ་གྱུར་པ་ལས་ཕྱག་མཚན། ཕྱག་མཚན་ཡོངས་སུ་གྱུར་པ་ལས། ཕྱག་རྒྱ་ཆེན་པོའི་གཟུགས་སུ་བསྐྱེད་པ་ནི་ཉེ་བར་ཏེ། གཞན་དུ་སྒྲུབ་ཅིང་བསྐྱེད་པས་ཉེ་བར་སྒྲུབ་པའོ། །གྲུབ་པ་ནི་ཕྱག་རྒྱ་ཆེན་པོ་གྲུབ་པའོ། །དེའི་མཆོག་ནི་ཐོག་མར་གྱུར་པའི་ཨོཾ་ལ་སོགས་པའི་སྔགས་གང་ཡིན་པ་དེ་ནི། ཉེ་བར་སྒྲུབ་པ་གྲུབ་མཆོག་ལའོ། །སྔགས་ཀྱི་ཡི་གེ་མ་ལུས་པར་རྣམ་པར་བཀོད་ལ། ཕྱག་རྒྱ་ཆེན་པོའི་གཟུགས་དེ་ལ་རྡོ་རྗེའི་སྟེ། རྣམ་པར་སྣང་མཛད་ལ་སོགས་པ་ནས་གནོད་མཛེས་ཀྱི་བར་དེ་རྣམས་ཀྱི་སྐྱེ་མཆེད་ནི་གཟུགས་ཀྱི་ཕུང་པོ་ལ་སོགས་པའོ། །དེ་རྣམས་ཀྱིས་རིམ་པ་གསུམ་པའི་སྐབས་སུ་འཁྲུགས་ཀྱི་གོ་རིམ་གྱི་ངེས་པར་བྱས་ལ། རྒྱུ་དང་འབྲས་བུ་ཡོངས་སུ་ཤེས་པས་རྣམ་པར་དཔྱད་ནས་སྒྲུབ་ཅིང་བྱིན་གྱིས་བརླབ་པའི་ཕྱིར། གང་གིས་མཉེས་པར་བྱེད་པ་དེ་ལ་ནི་སྒྲུབ་པའི་ཚེ་ན་བསྐུལ་བར་གསུངས་ཏེ་ཞེས་བྱ་བ་ནི་རྣམ་གྲངས་སུ་བཤད་པའོ། །དེ་གང་ཞེ་ན། སངས་རྒྱས་སྐུ་འཛིན་དཔལ་དང་ལྡན། །ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་སོ། །སྔགས་ཀྱི་བདག་པོར་བསྒོམ་པ་ཡིས། །ཞེས་བྱ་བ་ལ་སོགས་པ་ལ་སྔགས་ནི་ཡི་གེ་ཨོཾ་ལ་སོགས་པ་སྟེ། ཏིང་ངེ་འཛིན་སེམས་དཔའ་དང་། བདག་པོ་སྟེ་ཡེ་ཤེས་སེམས་དཔའ་རྣམས་ནི། སྔགས་ཀྱི་བདག་པོ་སྟེ་རིགས་ཀྱི་དབྱེ་བས་ཅི་རིགས་པར་བསྒོམ་པ་ནི། སྔགས་ཀྱི་བདག་པོ་བསྒོམ་པ་ཡིས། །ཞེས་བྱའོ། །སྒྲུབ་པ་ཆེན་པོ་ཞེས་གསུངས་པའི་སྒྲུབ་པ་ཆེན་པོ་དེ་བསྐྱེད་པར་བྱེད་པའི་ཚེ་ན་རྡོ་རྗེ་ཅན་གྱིས་ཏེ། རང་གི་ལྷག་པའི་ལྷའི་སྦྱོར་བ་དང་ལྡན་པའི་སྔགས་པས་རྡོ་རྗེ་དང་པདྨ་མངོན་པར་འདུས་བྱས་པ་སྔོན་དུ་འགྲོ་བའི་སྙོམས་པར་འཇུག་པ་བྱས་ལ། རང་གི་སྔགས་བཛྲ་དྷྲྀཀ་ཅེས་བྱ་བ་ལ་སོགས་པ་དེ་ལས་བྱུང་བའི་རྡོ་རྗེ་ཅན་ཏེ། དེ་བཞིན་གཤེགས་པ་རྣམས་ནི་རང་སྔགས་རྡོ་རྗེ་ཅན་ནོ། །དེ་རྣམས་ཀྱི་གཟུགས་ཏེ། ཕྱག་རྒྱ་ཆེན་པོའི་གཟུགས་བསྒོམས་ནས། །དབུ་རྒྱན་ལ་ནི་བདག་པོ་བསམ། །ཞེས་བྱ་བ་དེ་བཞིན་གཤེགས་པ་ལྔའི་ཕྱག་རྒྱ་ཆེན་པོའི་གཟུགས་ཀྱི་དཀྱིལ་འཁོར་བ་དང་། དབུ་རྒྱན་ལ་ནི་བདག་པོ་རྡོ་རྗེ་འཆང་ཆེན་པོ་བསམ་ལ། དེའི་རིགས་ལྷག་མ་རྣམས་ཀྱི་དབུ་རྒྱན་ལ་ནི་རྣམ་པར་སྣང་མཛད་ལ་སོགས་པ་བསམས་ན་འགྲུབ་པར་འགྱུར་རོ་ཞེས་བྱ་བ་དངོས་གྲུབ་ཐོབ་པར་འགྱུར་བ་སྟེ། སྒྲ་ཇི་བཞིན་པའོ་ཞེས་གསུངས་སོ། །འདིའི་དོན་མདོར་བསྡུ་ན། ཡེ་ཤེས་ཀྱི་ས་བསྐྱེད་པ་ནས་ལྷག་མོས་འོད་གསལ་དུ་བསྡུ་བའི་བར་ནི་བསྙེན་པའི་ཡན་ལག དེ་བཞིན་ཉིད་ལས་བྱང་ཆུབ་པ་ནས་ལུས་དཀྱིལ་བཀོད་པས་སྤྲུལ་སྐུ་རྡོར་སེམས་སུ་གྱུར་པའི་བར་ནི་ཉེར་སྒྲུབ་ཀྱི་ཡན་ལག སྐུ་གསུང་ཐུགས་བྱིན་གྱིས་བརླབ་པ་དང་། སེམས་དཔའ་སུམ་བརྩེགས་བསྒོམ་པ་ནི་སྒྲུབ་པའི་ཡན་ལག རྗེས་ཆགས་ཀྱི་རྣལ་འབྱོར་ནས་དཀྱིལ་འཁོར་རྒྱལ་མཆོག་གི་ལྷ་དབུ་རྒྱན་རང་ཆས་ཅན་དུ་བསྒོམ་པའི་བར་ནི་སྒྲུབ་པ་ཆེན་པོའི་ཡན་ལག་ཏུ་བཞེད་དོ། །གསུམ་པ་ནི། ཙི་ལུ་པ་དང་། ཐ་ག་ནའི་རྩ་རྒྱུད་ཀྱི་འགྲེལ་པ་གཉིས་དང་། སྒྲུབ་ཐབས་ཀྱི་གཞུང་ཐམས་ཅད་ཀྱི་དགོངས་པ་ཞུ་བ་གླུས་བསྐུལ་ལས། འབྲས་བུ་རྡོ་རྗེ་འཛིན་པ་ཡབ་ཡུམ་དང་། མངལ་དུ་དཀྱིལ་འཁོར་རྒྱལ་མཆོག་བསྐྱེད་ནས་ཕྱིར་སྤྲོས་ཏེ་རང་གནས་སུ་བཀོད་པ་ལ། ཡེ་ཤེས་ཀྱི་འཁོར་ལོ་གཞུག་པ་རྣམས་ནི་བསྙེན་པའི་ཡན་ལག དེ་གསུམ་ཆར་ལ་མིག་ལ་སོགས་པ་ས་སྙིང་སོགས་དྲུག་བསྐྱེད་པ་ནི་ཉེར་སྒྲུབ་ཀྱི་ཡན་ལག སྐུ་གསུང་ཐུགས་བྱིན་གྱིས་བརླབ་པ་ནི་སྒྲུབ་པའི་ཡན་ལག དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་ནི་སྒྲུབ་པ་ཆེན་པོའི་ཡན་ལག་ཏུ་བཞེད་དོ། །རྒྱུད་ཕྱི་མ་ལས་གསུངས་པའི། དང་པོ་སྟོང་ཉིད་བྱང་ཆུབ་སེམས། །ཞེས་སོགས་ཀྱི་དོན་ནི་དཀྱིལ་འཁོར་རྒྱལ་མཆོག་གི་ཁྱད་ཆོས་སུ་སྦྱར་ཏེ། དེ་བཞིན་གཤེགས་པ་ཐམས་ཅད་ཡབ་ཀྱི་ཞལ་དུ་ཞུགས་ནས་ཟླ་བ་ཞུ་བའི་གཟུགས་སུ་གྱུར་པ་རྡོ་རྗེའི་ལམ་ནས་ལྷ་མོའི་པདྨར་བབས་པ་དང་པོ་དང་། དེ་ཉིད་གཙོ་བོའི་ས་བོན་དུ་གྱུར་པ་གཉིས་པ་དང་། དེ་ཉིད་དཀྱིལ་འཁོར་གྱི་ལྷར་གྱུར་པ་གསུམ་པ་དང་། དེ་ཉིད་རང་སྔགས་ཀྱིས་ཕྱིར་དབྱུང་ནས་རང་རང་གི་གནས་སུ་འཁོད་པ་བཞི་པར་བཤད་ཅིང་རྒྱུ་རྡོར་འཛིན་དང་། འབྲས་བུ་རྡོར་འཛིན་ལ་ཆོ་ག་བཞི་སྦྱར་བའི་ཚུལ་ནི་འོག་ཏུ་འཆད་དོ། །སྔར་གྱི་བསྙེན་སྒྲུབ་ཡན་ལག་བཞི་སྟོན་པའི་གཞུང་། ཤཱནྟི་པའི་འགྲེལ་པར། བསྐྱེད་རིམ་ལ་མི་སྦྱོར་བར་རྫོགས་རིམ་ཁོ་ན་ལ་སྦྱར་ནས་བཤད་པ་ནི་སྔར་གྱི་ལུགས་གསུམ་པོ་གང་དང་ཡང་མི་མཐུན་ཞིང་། འདུས་པའི་རྒྱུད་ཕྱི་མ་ལས། ཐུན་མོང་མཆོག་གི་བྱེ་བྲག་གིས། །བསྙེན་པ་རྣམ་པ་གཉིས་སུ་འགྱུར། །ཐ་མལ་པ་ནི་རྡོ་རྗེ་བཞི། །མཆོག་ནི་ཡན་ལག་དྲུག་གིས་སོ། །ཞེས་གསུངས་པ་དང་ཡང་འགལ་ལོ། །གཉིས་པ་ནི། ཡན་ལག་བཞི་པོ་དེ་ཉིད་ལ་གཞུང་ཐམས་ཅད་མཐུན་པར་རྒྱུ་མཐུན་གྱི་འབྲས་བུ་དང་། རྣམ་སྨིན་གྱི་འབྲས་བུ་དང་། སྐྱེས་བུ་བྱེད་པའི་འབྲས་བུ་དང་། བདག་པོའི་དབང་གི་འབྲས་བུ་ཞེས་པའི་ཐ་སྙད་མཛད་དོ། །དེའང་རྒྱུ་མཐུན་གྱི་དོན་ནི། བཞི་བརྒྱ་ལྔ་བཅུ་པ་ལས། བཤེས་གཉེན་དམ་པས་རྒྱུ་མཐུན་བྱས། །ཞེས་དང་། ཐ་ག་ནས། དེ་ལྟར་བསྙེན་པའི་ཡན་ལག་འདི་ནི་བསྐུལ་བའི་དབྱངས་ཀྱིས་དེ་མ་ཐག་པ་སྔོན་དང་འདྲ་བའི་ལྷ་གྲུབ་པའི་མཚན་ཉིད་ཆུང་ངུའི་རྒྱུ་མཐུན་པའི་འབྲས་བུར་བཤད་དོ། །ཞེས་གསུངས་ཏེ། བཤེས་གཉེན་དམ་པ་ནི་རྒྱུའི་རྡོ་རྗེ་འཆང་ཡིན་ལ་དེ་དང་འདྲ་བའི་ལྷའི་སྐུ་ཡིན་པས་ན་འབྲས་བུ་རྡོ་རྗེ་འཛིན་པ་ལ་རྒྱུ་མཐུན་གྱི་འབྲས་བུ་ཞེས་བྱའོ། །ཅིའི་ཕྱིར་རྒྱུའི་རྡོ་རྗེ་འཛིན་པ་ལ་བཤེས་གཉེན་དམ་པ་ཞེས་བྱ་ཞེ་ན་གཞིའི་སྐབས་སུ་ཕ་མ་དང་། ལམ་གྱི་སྐབས་སུ་བླ་མ་དང་། འབྲས་བུའི་སྐབས་སུ་ཆོས་སྐུ་ནི་བཤེས་གཉེན་དམ་པ་སྟེ་དེ་མཚོན་པའོ། །རྣམ་སྨིན་གྱི་འབྲས་བུ་ནི་བཞི་བརྒྱ་ལྔ་བཅུ་པ་ལས། སྨིན་ལས་ཐམས་ཅད་མཁྱེན་ཉིད་གྱུར། །དེ་ནི་མིག་སོགས་བྱིན་བརླབས་པ། །ཉེ་བར་སྒྲུབ་པ་ཡིན་པར་འདོད། །ཅེས་དང་། ཐ་ག་ནས་ཉེ་བར་སྒྲུབ་པའི་ཡན་ལག་ཐམས་ཅད་མཁྱེན་པ་ཉིད་ཀྱི་ངོ་བོ་ཆུང་ངུའི་རྣམ་པར་སྨིན་པའི་འབྲས་བུ་གསུངས་པ་ཞེས་གསུངས་ཏེ། རྒྱུ་མཐུན་གྱི་འབྲས་བུ་གྲུབ་པའི་ཚེ་ཐམས་ཅད་མཁྱེན་པ་འབད་མེད་ལྷུན་གྲུབ་དུ་འབྱུང་བས་ན་རྣམ་སྨིན་གྱི་འབྲས་བུ་ཞེས་བྱའོ། །སྐྱེས་བུ་བྱེད་པའི་འབྲས་བུའི་དོན་ནི། བཞི་བརྒྱ་ལྔ་བཅུ་པ་ལས། སྐྱེས་བུ་བྱེད་པ་ཆོས་ལོངས་སྤྱོད། །སྤྲུལ་པ་ལས་བྱུང་འགྲོ་དོན་ཉིད། །ཐུགས་ཀྱི་གསང་སོགས་བྱིན་གྱིས་བརླབས། །དེས་ནི་སྒྲུབ་པའི་དོན་ཐོབ་འགྱུར། །ཞེས་དང་། ཐ་གཾ་པས། སྒྲུབ་པའི་ཡན་ལག་ཆོས་དང་ལོངས་སྤྱོད་དང་། སྤྲུལ་པའི་སྐུ་གསུམ་རྣམ་པར་མཐར་པའི་ངོ་བོ་ཆུང་ངུའི་སྐྱེས་བུ་བྱེད་པའི་འབྲས་བུ་གསུངས་ཞེས་དང་། རིན་ཆེན་རྡོ་རྗེས། དེ་ནས་ཆོས་དང་ལོངས་སྤྱོད་རྫོགས་པ་དང་སྤྲུལ་པ་ཐོབ་པས་ནི་འགྲོ་བའི་དོན་བྱེད་པའི་ཆོས་དང་ལོངས་སྤྱོད་རྫོགས་པ་དང་། སྤྲུལ་པའི་སྐུ་རྣམ་པར་དག་པ། ཐུགས་དང་། གསུང་དང་། སྐུ་བྱིན་གྱིས་བརླབ་པ་ཞེས་བྱའོ། །ཞེས་གསུངས་ཏེ། སྐུ་གསུམ་གྱི་ངོ་བོ། ཐུགས་གསུང་སྐུའི་རྡོ་རྗེ་ནི་སྐྱེས་བུ་ཡིན་ལ་དེས་སེམས་ཅན་གྱི་དོན་བྱེད་པ་སྟེ། དེས་ན་སྐྱེས་བུ་བྱེད་པའི་འབྲས་བུ་ཞེས་བྱའོ། །ཀུན་བཟང་རྒྱས་པ་དང་། ཙི་ལུ་པ་དང་། ཐ་གཾ་པའི་འགྲེལ་པ་གཉིས་ལས། དྲི་མ་མེད་པའི་འབྲས་བུ་ཞེས་དང་། བཞི་བརྒྱ་ལྔ་བཅུ་པ་ལས། དབང་འབྲས་ཆུང་ངུ་རྣམ་དག་ཕྱིར། །སྒྲུབ་པ་ཆེན་པོ་ཡིན་པར་འདོད། །ཅེས་དང་། བསོད་སྙོམས་པ་དང་། རིན་ཆེན་རྡོ་རྗེ་གཉིས་ཀྱིས་ཀྱང་། དབང་འབྲས་ཞེས་པའི་ཐ་སྙད་མཛད་དེ། དོན་གཅིག་གོ །ཅི་ལྟར་དབང་བསྐུར་བས་དྲི་མ་དག་པར་བྱས་པའི་ཆ་ནས་དྲི་མ་མེད་པའི་འབྲས་བུ་དང་། ཁམས་གསུམ་ཆོས་ཀྱི་རྒྱལ་པོར་དབང་བསྐུར་བའི་ཆ་ནས་དབང་གི་འབྲས་བུ་དང་། དབང་བྱེད་པ་དང་། བདག་པོ་དོན་གཅིག་པས་བདག་པོའི་འབྲས་བུར་ཡང་འཇོག་པའི་ཕྱིར་ཏེ། རིན་ཆེན་རྡོ་རྗེས། དེ་ནས་ཁམས་གསུམ་གྱི་ཆོས་ཀྱི་རྒྱལ་པོར་དབང་བསྐུར་བ་མེད་པར་ཡང་དག་པར་རྫོགས་པའི་སངས་རྒྱས་ཉིད་དུ་མི་འགྱུར་བས། དབང་གི་འབྲས་བུ་ཆུང་ངུ་དང་། སྒྲུབ་པ་ཆེན་པོའི་ཡན་ལག་ཆུང་ངུ་བསྒོམ་པར་བྱའོ་ཞེས་གསུངས་པས་སོ། །ཡན་ལག་བཞི་པོ་འདི་དག་ལ། ཙི་ལུ་པས། མྱ་ངན་ལས་འདས་པའི་ཡན་ལག ཐམས་ཅད་མཁྱེན་པའི་ཡན་ལག སྐུ་གསུམ་ཐོབ་པའི་ཡན་ལག ཆོས་ཀྱི་དབང་ཕྱུག་གི་ཡན་ལག་ཅེས་པའི་ཐ་སྙད་ཀྱང་མཛད་དེ། མི་གནས་པའི་མྱ་ངན་ལས་འདས་པ་ཐོབ་ནས་ཐམས་ཅད་མཁྱེན་པར་འབད་མེད་དུ་འགྱུར་ལ། དེ་ནས་སྐུ་གསུམ་གྱིས་སེམས་ཅན་གྱི་དོན་བྱེད་ཅིང་། དེས་ཁམས་གསུམ་ཆོས་ཀྱི་དབང་ཕྱུག་དུ་འགྱུར་ཞེས་འབྲས་བུ་བཞིའི་གོ་རིམ་དང་། སྒྲ་དོན་གཉིས་ཀ་ལེགས་པར་གྲུབ་བོ། །གསུམ་པ་ནི་འོ་ན་བཞི་པོ་དེས་རྗེ་བཙུན་ཡབ་བསྐྱེད་པ་ལ་འབྲས་བུ་བཞི་ཆུང་ངུ་དང་། ཡུམ་བསྐྱེད་པ་ལ་འབྲས་བུ་བཞི་འབྲིང་དང་། འཁོར་བསྐྱེད་པ་ལ་འབྲས་བུ་བཞི་ཆེན་པོར་ཅིའི་ཕྱིར་འཇོག་སྙམ་ན། དང་པོར་ཐ་མལ་གྱི་རྣམ་རྟོག་སྤོང་བ་ལ་མཐུ་ཆུང་བས་ན་ཆུང་ངུ་དང་། བར་དུ་མཐུ་བར་མར་གནས་པ་རྣམས་བར་མའམ་འབྲིང་དང་། མཐར་མཐུ་ཆེན་པོར་འགྱུར་བས་ན་ཆེན་པོར་འཇོག་པ་ནི་གསུང་རབ་སྤྱི་དང་མཐུན་ཏེ། ཙི་ལུ་པའི་འགྲེལ་པར། ཡེ་ཤེས་ཞེས་བྱ་བའི་ངོ་བོ་མ་ཡིན་པས་ན་མི་མཐུན་པའི་ཕྱོགས་ཐམས་ཅད་སེལ་བར་མི་ནུས་ཤིང་མ་བསྒྲིབས་པས་ན་ཆུང་ངུའི་སྒྲས་བསྟན་ཏོ། །ལྷ་གཙོ་བོ་གཅིག་པུ་གཏོགས་པའི་ཕྱིར་ན། དེ་རྣམས་ལ་མཆོག་གི་སྒྲས་ཁྱད་པར་དུ་བྱས་པའོ་ཞེས་དང་། རིན་ཆེན་རྡོ་རྗེས། ད་ནི་ཆུང་ངུ་རྣམས་ལ་གུས་པ་དང་བཅས་ཤིང་རྒྱུན་མི་ཆད་པར་ཡུན་རིང་དུ་གོམས་པར་གྱུར་ནས། བར་མ་བསྒོམ་པར་བྱ་བ་ཡིན་པས་ཞེས་དང་། ཏིང་ངེ་འཛིན་བར་མ་བསྒོམ་པ་ལ་རབ་ཀྱི་མཐར་ཐུག་པ་ལ། མཐར་ཐུག་པ་རྟོགས་པའི་ཕྱིར་ཆེན་པོ་བྱ་བ་ཡིན་ཏེ་ཞེས་གསུངས་པས་སོ། །གཉིས་པ་སྐབས་ཀྱི་དོན་ལ་སྦྱར་བ་ལ་གཉིས་ཏེ། ཡན་ལག་དང་འབྲས་བུ་ཆུང་ངུ་བཞིས་རྗེ་བཙུན་ཡབ་བསྐྱེད་པ། དེ་དག་འབྲིང་བཞིས་རྗེ་བཙུན་ཡུམ་བསྐྱེད་པའོ། །དང་པོ་ལ་བཞི་ལས། དང་པོ་བསྙེན་པའི་ཡན་ལག་དང་། རྒྱུ་མཐུན་གྱི་འབྲས་བུ་ཆུང་ངུ་ལ་ཡང་གཉིས་ཏེ། བཤེས་གཉེན་དམ་པ་རྒྱུའི་རྡོ་རྗེ་འཆང་བསྐྱེད་པ་དང་། དེའི་རྒྱུ་མཐུན་འབྲས་བུ་རྡོ་རྗེ་འཛིན་པ་བསྐྱེད་པའོ། །དང་པོ་ལ་གསུམ་སྟེ། མངོན་བྱང་ལྔའི་ཆོ་ག དེས་ཆགས་པ་ཅན་གྱི་སེམས་ཅན་འདུལ་བའི་ཚུལ། འགྲོ་བ་དབང་བསྐུར་བའི་ཚུལ་ལོ། །དང་པོ་ལ་གཉིས་ཏེ། ཉམས་ལེན་གྱི་རིམ་པ་དང་། དེ་ཉིད་རྒྱུད་ཀྱི་ལུང་དང་སྦྱར་བའོ། །དང་པོ་ནི་ཀུན་བཟང་རྒྱས་པ་ལས། དབུས་ཀྱི་ཟླ་བའི་གདན་ལ་རྣལ་འབྱོར་པ་ཡི་གེ་གསུམ་གྱི་གཟུགས་བརྙན་གྱི་རྣམ་པར་ཞུགས་ནས་འདུག་སྟེ། འདི་ལྟར་རྣལ་འབྱོར་པས་བསམ་སྟེ། བདག་འཇམ་པའི་རྡོ་རྗེར་གྱུར་ནས་འགྲོ་བའི་དོན་བྱའོ། །འདི་རྣམས་ལ་ཀ་ཀནྟི་ཀའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱིས་སེམས་ཅན་བྱང་ཆུབ་ཀྱི་རྒྱུ་རུ་བྱ་བར་དམ་བཅས་པ་ཡིན་ཏེ། དེའི་དུས་ན་རྣལ་འབྱོར་པས་བསམས་ནས་དེ་བཞིན་གཤེགས་པ་རྣམས་ཀྱི་གྲོགས་བྱའོ་ཞེས་བསམ་པ་ནས་གཞལ་ཡས་ཁང་གི་སྟེང་ན་བཞུགས་པའི་དེ་བཞིན་གཤེགས་པ་རྣམས་ལ་རྣལ་འབྱོར་པས་ཡེ་ཤེས་སེམས་དཔའི་ས་བོན་བསྐུལ་ཏེ། བསྐུལ་བའི་རྗེ་བཙུན་དེ་བཞིན་གཤེགས་པ་རྣམས་ཀྱིས་བདག་ལ་གཟིགས་པ་མཛད་དོ། །འདི་ལྟར་དེ་རྣམས་ལ་ཡེ་ཤེས་སེམས་དཔའ་བསྐུལ་བས་ན་དེ་བཞིན་གཤེགས་པ་རྣམས་རྣལ་འབྱོར་པའི་ལུས་དང་གཅིག་ཏུ་གྱུར་ཏེ། ཡི་གེ་གསུམ་པོའི་འོག་གི་ཆ་ལ་ཨ་ཡིག་ལ་སོགས་པའི་དབྱངས་ཀྱི་ཡི་གེ་བཅུ་དྲུག་ཏུ་འགྱུར་བ། དེ་ལྟར་ཡན་ལག་བཅུ་གཉིས་སུ་བསྒོམ་པའི་དབྱངས་ཡིག་ཡིན་ཏེ། ལུགས་དང་མཐུན་པ་དང་མི་མཐུན་པའི་ཕྲེང་བ་གཉིས་སུ་བསམ་སྟེ། ཡི་གེ་གསུམ་གྱི་སྟེང་གི་ཆར། ཡ་ར་ལ་ཝ་ཌ་དྷ་ཞེས་པ་ཞུགས་པས། ཀ་ཡིག་ལ་སོགས་པའི་གསལ་བྱེད་བཞི་བཅུར་གྱུར་པ་དེ་ལན་གཉིས་སུ་བསྐོར་བ་ཡི་གེ་བརྒྱད་ཅུ་ལུགས་དང་མཐུན་པ་དང་། མི་མཐུན་པའི་ཕྲེང་བ་གཉིས་སུ་བསམ་སྟེ་ཞེས་དང་ཨཱ་ལི་ཉིས་འགྱུར་མཚན་སུམ་ཅུ་རྩ་གཉིས་དང་། དེས་ལས་བྱུང་བའི་ཟླ་བ་ཤེས་རབ་ཀྱི་རང་བཞིན་སྨོན་པའི་སེམས་དང་། ཀཱ་ལི་ཉིས་འགྱུར་དཔེ་བྱད་བཟང་པོ་བརྒྱད་ཅུ་དང་། དེ་ལས་བྱུང་བའི་ཟླ་བ་ཐབས་ཀྱི་རང་བཞིན་འཇུག་པ་བྱང་ཆུབ་ཀྱི་སེམས་དང་། ཟླ་བ་གཉིས་པོ་མེ་ལོང་ལྟ་བུའི་ཡེ་ཤེས། དེ་ནས་གཅིག་ཏུ་འདུས་ནས་ཟླ་བ་གཅིག་ཏུ་གྱུར་པ་མཉམ་པ་ཉིད་ཀྱི་ཡེ་ཤེས། ཟླ་བ་ཡོངས་སུ་གྱུར་པ་ལས། ཧཱུྃ་དམར་པོ་ལས་རྡོ་རྗེ་དམར་པོ་རྩེ་ལྔ་པ་སོ་སོར་རྟོག་པའི་ཡེ་ཤེས། དེའི་ལྟེ་བའི་ཧཱུྃ་ལས་འོད་ཟེར་འཕྲོས་པས་སེམས་ཅན་ཐམས་ཅད་སངས་རྒྱས་སུ་གྱུར་ཏེ། དེ་རྣམས་འོད་ཟེར་གྱིས་བཀུག་ནས་ཧཱུྃ་ལ་ཐིམ་པ་བྱ་བ་ནན་ཏན་གྱི་ཡེ་ཤེས། སླར་ཡང་ཧཱུྃ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་བཀུག་ནས་ཧཱུྃ་ལ་ཐིམ། ས་བོན་ཕྱག་མཚན་དང་བཅས་པ་ཡོངས་སུ་གྱུར་པ་ལས། རྒྱུ་རྡོ་རྗེ་འཆང་ཡབ་ཡུམ་བསྐྱེད་པ་ནི་ཆོས་ཀྱི་དབྱིངས་ཀྱི་ཡེ་ཤེས་སུ་བཤད་དོ། །འདི་དང་མཐུན་པར། དངོས་གྲུབ་འབྱུང་བའི་གཏེར་ལས། དེ་ཉིད་གསུམ་གནས་སེམས་བབས་པས། །བདེ་གཤེགས་རྣམས་ཀྱིས་དེ་ལ་གཟིགས། །རང་གི་ཁམས་སུ་ཤེས་རབ་ཐབས། །དབྱངས་ཡིག་སྡེ་པའི་ཡི་གེར་འགྱུར། །དབུ་རྩེ་ལ་བྱོན་ཡེ་ཤེས་སེམས། །འདྲེས་གྱུར་བབས་པས་ཟླ་ཉིར་གྱུར། །འདུ་ཞིང་འཕྲོ་བའི་སྦྱོར་བ་ལས། །གཅིག་དུ་གྱུར་པ་བསམས་པའོ། །དེ་ལས་ཧཱུྃ་དཀར་ལས་བྱུང་བ། །རྡོ་རྗེ་རྩེ་ལྔ་མེ་ཤེལ་གཟུགས། །ཕྱོགས་ཀུན་འོད་ཟེར་འཕྲོས་བསམས་ནས། །ཧཱུྃ་བཅས་ལྡན་པར་ང་རྒྱལ་བྱ། །ཨོཾ་བཛྲ་ཨཱཏྨ་ཀོ྅ཧཾ། དེ་ལས་འཕྲོས་པའི་བདེ་གཤེགས་ཀྱིས། །འགྲོ་བ་སངས་རྒྱས་ཉིད་དུ་བྱས། །སླར་འདུས་ཐུགས་ཀྱི་རྡོ་རྗེ་ལ། །བཙུད་ནས་བདག་ལ་ང་རྒྱལ་བྱ། །ཨོཾ་ཡ་ཐ་སརྦ་ཏ་ཐཱ་ག་ཏ་སྟ་ཐ་ཨ་ཧཾ། ས་བོན་གསང་གསུམ་རྡོ་རྗེར་གྱུར། །གཅིག་གྱུར་རྡོ་རྗེ་སེམས་དཔའ་མཆོག །འགྲོ་ཀུན་རོ་མཉམ་གཅིག་པ་པོ། །ཞེས་དང་། ཞལ་ལུང་གི་འགྲེལ་པར། མྱུ་གུས་བསྣུན་བྱས་ཞེས་པ་ནི་གདན་དེ་ལ་ཆོ་ག་དང་པོ་རྫོགས་པས་རང་རིག་པའི་མྱུ་གུས་བསྣུན་ནས་ཡི་གེར་བཏགས་པའོ། །དེ་ལས་མཚན་མའོ། །དེ་ལས་རང་གི་ལྷའི་སྐུར་བསྐྱེད་པར་བྱའོ་ཞེས་པའི་དོན་ཏོ། །དེས་འདི་སྟོན་ཏེ། ཁང་པ་བརྩེགས་མའི་དབུས་ལ་ཡི་གེ་གསུམ་ལ་གནས་པའི་སེམས་བབས་པ་ལ་སོགས་པ་ཟླ་བ་གཉིས་སུ་གྱུར་པ་དང་། དེ་གཅིག་ཏུ་གྱུར་པ་དང་། དེ་ལས་ཡི་གེར་གྱུར་པ་དང་། དེ་ལས་མཚན་མའི་ཡི་གེར་མཚན་པར་གྱུར་པ་དང་། དེ་ལས་སྤྲོ་བསྡུ་དང་ལྡན་པའི་ང་རྒྱལ་བྱ་བ་དང་། རང་དང་འདྲ་བ་ལས་བྱུང་བའི་སྐུར་བསྐྱེད་པ་ནི་དང་པོའོ། །ཞེས་གསུངས་སོ། །བསོད་སྙོམས་པའི་གཞུང་ལས་སྔར་ནམ་མཁར་ཡི་གེ་གསུམ་འཇོག་པ་ཡོད་ཀྱང་འདིར་གཞལ་ཡས་ཁང་གི་དབུས་སུ་ཕབ་པའི་རྣམ་གཞག་མི་སྣང་ལ། གཞུང་གཞན་རྣམས་ལས། སྔར་ཡི་གེ་གསུམ་འཇོག་པ་ཡང་མེད་པས་ཡི་གེ་གསུམ་གཞལ་ཡས་ཁང་གི་དབུས་སུ་བབས་པ་དང་། ཟླ་བ་ཡོངས་སུ་གྱུར་པ་ཧཱུྃ་ལས་རྡོ་རྗེར་བསྐྱེད་པ་རྣམས་གཞུང་འདི་གསུམ་གྱི་ཁྱད་ཆོས་སུ་སྣང་ངོ་། །བཞི་བརྒྱ་ལྔ་བཅུ་པར། དབྱངས་ཡིག་མཚན་དང་ཡང་དག་ལྡན། །ཀ་སོགས་དཔེ་བྱད་འོད་ཟེར་ཅན། །དབུས་མའི་ཟླ་བའི་གདན་ལ་སེམས། །ཡེ་ཤེས་ཟླ་བ་རྣམས་བསྒོམས་དེར། །དང་པོའི་སྙིང་ལས་བྱུང་རྡོ་རྗེ། །དམར་ཞིང་དང་པོའི་སྙིང་པོར་ལྡན། །ཞེས་ཡི་གེ་གསུམ་བབས་པ་མ་གཏོགས། གཞན་རྣམས་སྔ་མ་དང་འདྲ་བར་སྣང་ཞིང་། རྡོ་རྗེ་ཟླ་བ་ཡོངས་སུ་གྱུར་པ་ལས་བསྒོམ་པ་དང་། ཟླ་བའི་སྟེང་དུ་བསྒོམ་པ་གང་ལ་འབྲུ་བསྣན་ཀྱང་བཏུབ་ཙམ་དུ་སྣང་ངོ་། །ཀུན་བཟང་བསྡུས་པ་ལས། བཅུ་དྲུག་ཆ་དང་ཚོགས་ལས་བྱུང་བ་ཡི། །ཟླ་བའི་དཀྱིལ་འཁོར་དག་ནི་དབུས་ཉིད་དུ། །ཞེས་དང་། དེའི་འགྲེལ་པར་ཐ་གཾ་པས། བཅུ་དྲུག་གི་ཆ་ནི་ཨ་ལ་སོགས་པ་དང་། ཚོགས་ནི་ཀ་ལ་སོགས་པ་ཞེས་པ་ཙམ་ལས་མི་སྣང་ཡང་། འོག་དུ་མཚན་སོ་གཉིས་དང་། དཔེ་བྱད་བརྒྱད་ཅུའི་དག་པ་སྦྱར་འདུག་པས་སྔ་མ་དང་དོན་གཅིག་ཅིང་། འཇིག་རྟེན་དབང་ཕྱུག་གི་སྒྲུབ་ཐབས་ལས་ཀྱང་འདི་བཞིན་དུ་བཤད་ལ། ཟླ་བའི་དཀྱིལ་འཁོར་དེ་ཉིད་ལས་ཡི་གེ་ཧཱུྃ་དམར་པོ་བསམ་ལ་ཞེས་པ་ནི་ཟླ་བའི་སྟེང་དུ་ཧཱུྃ་ལས་རྡོ་རྗེ་བསྒོམ་པར་སྣང་སྟེ། འོག་ཏུ་དེ་ནས་ཟླ་བ་དང་། རྡོ་རྗེ་དང་། ཡི་གེ་ཧཱུྃ་ཡོངས་སུ་གྱུར་པ་སྔོན་དུ་འགྲོ་བ་ལས་བདག་ཉིད་རྡོ་རྗེ་སེམས་དཔའི་སྐུ་ཞེས་བཤད་པས་སོ། །ཤཱནྟི་པའི་རྩ་རྒྱུད་ཀྱི་འགྲེལ་པ་སྙིམ་པའི་མེ་ཏོག་ལས། དེ་ནས་དབུས་སུ་གནས་པའི་ཟླ་བའི་དཀྱིལ་འཁོར་ལས། སངས་རྒྱས་རྣམས་ཀྱི་ཡོན་ཏན་གྱི་ས་བོན་དབྱངས་ཀྱི་ཡི་གེ་དཀར་པོ་བཅུ་དྲུག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྒྱས་པར་གྱུར་པ་ནི་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཅན་ནོ། །དེའི་དབུས་སུ་གསལ་བྱེད་ཡི་གེ་དཀར་པོ་སུམ་ཅུ་རྩ་བཞིའོ། །རྣམ་པ་སངས་རྒྱས་ཀྱི་ཡོན་ཏན་ཐམས་ཅད་ཀྱི་ཡི་གེ་ཧཱུྃ་དཀར་པོ་དང་བཅས་པ་ཡོངས་སུ་གྱུར་པ་ལས་བྱུང་བ་པདྨ་ར་ག་ལྟར་དམར་བའི་དང་པོའི་རྡོ་རྗེ་ནི་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་ཅན་ནོ། །དེའི་ལྟེ་བ་ལ་ཡི་གེ་ཧཱུྃ་དེ་ཉིད་ནི་མཉམ་པ་ཉིད་ལ་ངེས་པར་སྤྱོད་པ་ཉིད་ཀྱི་ཕྱིར་རོ། །སོ་སོར་རྟོག་པའི་ཡེ་ཤེས་ཀྱི་བདག་ཉིད་ཅན་ནོ། །འོད་ཟེར་དེས་དཀྱིལ་འཁོར་པ་ཐམས་ཅད་ཀྱི་མཆོག་སྤྲོ་བ་དང་། བསྡུས་པ་ནི་བྱ་བ་ནན་ཏན་སྒྲུབ་པའི་ཡེ་ཤེས་ཀྱི་བདག་ཉིད་ཅན་ཡིན་པར་བསྒོམས་ནས་ཟླ་བ་དང་། རྡོ་རྗེ་དང་། སྔགས་ཡོངས་སུ་གྱུར་པ་ལས་བྱུང་བའི་ཆོས་ཀྱི་དབྱིངས་ཤིན་དུ་རྣམ་པར་དག་པའི་ཡེ་ཤེས་ཀྱི་བདག་ཉིད་ཅན་བཅོམ་ལྡན་འདས་དང་པོའི་སྐྱེས་བུ་ཞེས་བཤད་དེ། འདི་ནི་ཡེ་ཤེས་ཞབས་ལུགས་ཀྱི་རྗེས་སུ་འབྲང་བར་སྣང་ཡང་སྔར་གྱི་གཞུང་དེ་དག་གང་དང་ཡང་མི་མཐུན་པར་སྣང་ངོ་། །རིན་ཆེན་རྡོ་རྗེ་མི་བསྐྱོད་པའི་སྒྲུབ་ཐབས་ལས། གདན་དབུས་མའི་སྟེང་དུ་ཨཱ་ལི་ཚར་གཉིས་ལས་ཟླ་བ་དང་པོ་བསྐྱེད་པ་ནི་འདྲ་བར་སྣང་ལ། དེའི་སྟེང་དུ་ཧ་ཀྵ་སྤངས་པའི་གསལ་བྱེད་སོ་གཉིས་ཚར་གཉིས་སུ་བྱས་པ་དྲུག་ཅུ་རྩ་བཞིའི་དབུས་སུ་ཨཱ་ལི་བཅུ་དྲུག་ཕྲེང་གཅིག་གནས་པ་དཔེ་བྱད་བརྒྱད་ཅུའི་ངོ་བོ་ཞུ་བ་ལས་ཟླ་བ་གཉིས་པ་བསྒོམ། ཟླ་བ་གཉིས་གཅིག་ཏུ་གྱུར་པའི་སྟེང་དུ་ཧཱུྃ་ལས་བྱུང་བའི་རྡོ་རྗེ་ཧཱུྃ་གིས་མཚན་པ་ལས་སྤྲོ་བསྡུ་བྱས་ནས་ཀུན་ཏུ་བཟང་པོ་བསྒོམ་པར་བཤད་དོ། །བསོད་སྙོམས་པས་སྟོང་ཉིད་བཅུ་དྲུག་གི་ངོ་བོ་ཨཱ་ལི་བཅུ་དྲུག་ལས་ཟླ་བ་དང་པོ་ཨཱ་ལིས་མཚན་པ་དང་། དེའི་སྟེང་དུ་མཚན་སོ་གཉིས་ཀྱི་ངོ་བོ་ཀཱ་ལི་སོ་གཉིས་ལས་ཟླ་བ་གཉིས་པ་ཀཱ་ལིས་མཚན་པ། དེའི་སྟེང་དུ་ཧཱུྃ་ལས་རྡོ་རྗེ་སོགས་སྔ་མ་དང་འདྲ་སྟེ་འདི་གཉིས་ཀྱང་གཞུང་སྔ་མ་རྣམས་དང་མི་འདྲ་བར་སྣང་ངོ་། །རྒྱུ་རྡོ་རྗེ་འཆང་གི་སྐུ་མདོག་ཕྱག་མཚན་ལ་གཞུང་འགྲེལ་རྣམས་མི་མཐུན་པ་མི་སྣང་ཞིང་། རྣམ་པ་ལ་ཤཱནྟི་པས་མ་མཆུ་འཇིབ་པ་ཞེས་དང་། ཙི་ལུ་པ་དང་། རིན་ཆེན་རྡོ་རྗེས་ཚེམས་ཀྱིས་མ་མཆུ་བཙིར་བ། །ཞེས་བཤད་དོ། །ཐ་སྙད་ཀྱང་གཞུང་ཕལ་ཆེར། ཀུན་ཏུ་བཟང་པོ་ཞེས་དང་། ཙི་ལུ་པས་དང་པོའི་མགོན་པོ་ཞེས་བཤད་ཅིང་། རྩ་རྒྱུད་ལས་གསུངས་པའི་རིག་པ་ཆེན་པོའི་སྐྱེས་བུ་དང་དོན་གཅིག་པར་བཞེད་ལ། ཤཱནྟི་པས་དང་པོ་སྐྱེས་བུ་ཞེས་དང་། བསོད་སྙོམས་པས་རྡོ་རྗེ་སེམས་དཔའ་ཞེས་པའི་ཐ་སྙད་མཛད་དོ། །གཉིས་པ་ནི། རྩ་རྒྱུད་ཀྱི་ཟིལ་གནོན་རྡོ་རྗེ་དང་། དམ་ཚིག་འབྱུང་བ་རྡོ་རྗེ་གཉིས་ཀྱིས་འདི་དག་སྟོན་པར་བཞེད། ཡི་གེ་གསུམ་བབས་ནས་ཨཱ་ལི་ཀཱ་ལིར་གྱུར་པའི་བར་ནི་ཟིལ་གནོན་རྡོ་རྗེ་དང་། དེ་ལས་ཟླ་བར་གྱུར་པ་སྐབས་འདིར་དངོས་སུ་མ་བཤད་ཀྱང་། རྣལ་འབྱོར་ཆེན་པོའི་རྒྱུད་གཞན་ལས་བཤད་པའི་ཚུལ་དང་། ཟླ་བ་གཉིས་ཟླ་བ་གཅིག་དུ་གྱུར་པ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་དཀྱིལ་འཁོར་གྱི་གཙོ་བོའི་རྣམ་པའི་སྤྲོ་བསྡུ་བྱས་ནས་དེ་ལས་རྒྱུ་རྡོ་རྗེ་འཆང་དུ་གྱུར་པ་ནི། དམ་ཚིག་འབྱུང་བ་རྡོ་རྗེས་སྟོན་པར་ཙི་ལུ་པས་བཤད་པའི་ཕྱིར་ཏེ། འགྲེལ་པ་ལས། ཟིལ་གྱིས་གནོན་པ་རྡོ་རྗེ་ཞེས་པ་ནི་མཐའ་ཡས་པའི་ཚོགས་ཀྱིས་བསྡུས་པའི་དངོས་པོར་འཛིན་པ་ནི་དེ་ཁོ་ན་ཉིད་གསུམ་དུ་ཟིལ་གྱིས་མནན་ནས་གནས་པའི་སེམས་ཀྱིས་དབུས་ཀྱི་གདན་ལ་གནས་པ་ལ། དེ་བཞིན་གཤེགས་པ་ཐམས་ཅད་ཀྱིས་དེ་ལ་གཟིགས་ནས་སྔོན་རྫོགས་པར་བྱེད་པའི་ཆེད་དུ་རང་གི་བྱ་བར་ཆད་པ་བཤིག་པར་དོགས་ནས་བདག་པོའི་ཁམས་སུ་དབྱིངས་དང་དོན་མཚོན་གྱི་ཡི་གེར་གྱུར་པ་ནི་ཟིལ་གྱིས་གནོན་པ་སྟེ་ཞེས་དང་། རྡོ་རྗེའི་ངོ་བོར་གནས་པར་གྱུར་ཏོ་ཞེས་པ་ནི་བདག་པོའི་ཁམས་ནས་བྱོན་པ་གཞལ་ཡས་ཁང་གི་གཙུག་ཏོར་ལ་གནས་པ་དང་། དེ་ཡེ་ཤེས་ཀྱིས་འགྲོ་བའི་སེམས་ཅན་དྲངས་ནས་གཅིག་ཏུ་འདྲེས་པ་དང་བརྟེན་ལ་བབས་པ་ལས་ཟླ་བ་གཉིས་སུ་གྱུར་པ་ནི་རྡོ་རྗེའི་ངོ་བོ་སྟེ། དེའི་རང་བཞིན་དུ་གནས་པར་གྱུར་ཏོ། །ཡི་གེ་ལས་ཟླ་བར་གྱུར་པའི་སྒྲ་རྒྱུད་འདི་ལས་བསྟན་པ་མེད་ཀྱང་སྟོང་པ་ཉིད་དང་སྙིང་རྗེའི་བྱང་ཆུབ་ཀྱི་སེམས་བཅོམ་ལྡན་འདས་ལ་མངའ་བས་ན་འགལ་བ་མེད་དོ་ཞེས་དང་། རིག་པའི་སྐྱེས་བུ་ཞེས་པ་ནི་རིག་མ་དང་ལྡན་པའི་ཕྱིར་དེ་སྐད་དེ། དེ་ཉིད་མགོ་ལ་སོགས་པ་དང་ལྡན་པ་ནི་ཆེན་པོའི་གཟུགས་སོ། །སྔགས་ཀྱི་བདག་པོ་འདིས་བྱིན་གྱིས་བརླབ་བོ་ཞེས་པ་ནི་བདེ་བར་གཤེགས་པ་རྣམས་ས་བོན་གྱི་ནང་དུ་གཞུག་པའོ། །བྱིན་གྱིས་བརླབས་མ་ཐག་དུ་ཞེས་པ་ནི་ཞུགས་མ་ཐག་ཏུ་ཞེས་སོ། །དེས་ཅིར་འགྱུར་ཞེ་ན། །ཞལ་གསུམ་པ་ལྟ་བུར་གཟིགས་པར་གྱུར་ཏོ་ཞེས་ཏེ། ས་བོན་དང་བཅས་པ་གནས་པར་གྱུར་པའི་མཚན་ཉིད་སྒྱུ་མ་ལྟ་བུའི་སྐུ་དབུས་དཀར་བ་ཞེས་སོགས་གསུངས་སོ། །འཕགས་ལུགས་པས་ནི་ཟིལ་གནོན་རྡོ་རྗེའི་ཏིང་ངེ་འཛིན་སྤྱི་དོན་དུ་བཤད་པས་ལྷག་མོས་མཛད་པ་དང་བཅས་པ་དང་། དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་དྲང་དོན་དུ་བཤད་པས་དང་པོའི་མགོན་པོའི་ལུས་ལ་ལུས་དཀྱིལ་བཀོད་པ་ནས། སེམས་དཔའ་སུམ་བརྩེགས་ཀྱི་བར་སྟོན་པར་བཞེད་པ་ནི་ཤིང་རྟའི་སྲོལ་སོ་སོའོ། །གཉིས་པ་དེས་ཆགས་པ་ཅན་གྱི་སེམས་ཅན་འདུལ་བའི་ཚུལ་ལ་གཉིས་ཏེ། ཉམས་ལེན་གྱི་རིམ་པ་དང་། དེ་ཉིད་རྒྱུད་ཀྱི་ལུང་དང་སྦྱར་བའོ། །དང་པོ་ནི། དེ་ནས་ཡབ་ཡུམ་སྙོམས་པར་ཞུགས་པའི་སྒྲས་དེ་བཞིན་གཤེགས་པ་རྣམས་སྤྱན་དྲངས་ལ་རྗེ་བཙུན་ཡབ་ཀྱི་ལུས་ལ་ཞུགས་པས་དེ་བཞིན་གཤེགས་པ་རྣམས་སྤྱན་ལ་སོགས་པའི་ལྷ་མོ་དགུར་གྱུར་ནས་ཕྱིར་ཕྱུང་སྟེ། རིགས་ལྔའི་ནང་དུ་ཞུགས་པར་གསུངས་ཏེ། ཀུན་བཟང་བསྡུས་པ་ལས། མཆོག་ཏུ་རྗེས་ཆགས་ཕུན་ཚོགས་དཔག་མེད་ཀྱིས། །འདུལ་བའི་འཇིག་རྟེན་ཐམས་ཅད་དམིགས་ནས་ནི། །དགའ་བའི་སྒྱུ་མའི་སྒྲ་ཡིས་དེ་རྣམས་དང་། །རྒྱལ་བའི་ཚོགས་རྣམས་མ་ལུས་གཞུག་པར་བྱ། །དེ་ནི་སྤྱན་ལ་སོགས་པའི་ལྷ་མོ་དང་། །གཟུགས་སོགས་མ་ལུས་ཡུལ་གྱི་རང་བཞིན་དུ། །ཕྱུང་ནས་རིག་མ་དེ་དག་ཐམས་ཅད་ནི། །རང་གི་རིག་མའི་ནང་དུ་ཚུད་པར་བྱ། །ཞེས་དང་། བཞི་བརྒྱ་ལྔ་བཅུ་པ་ལས། དེ་ནས་འདོད་ཆགས་ཆེས་འདུལ་བ། །སྣོད་ཀྱི་འཇིག་རྟེན་མཐོང་བ་དང་། །དགའ་བའི་སྒྲ་ཡིས་རང་བཞིན་དུ། །རྒྱལ་བའི་ཚོགས་རྣམས་གཞུག་པར་བྱ། །དེ་ནི་སྤྱན་སོགས་རིགས་མཆོག་དང་། །གཟུགས་སོགས་ཡུལ་གྱི་བདག་ཉིད་ཀྱི། །ལྷ་མོ་དགུ་རུ་ཕྱུང་ནས་ནི། །རང་གི་རིག་མའི་ནང་དུ་གཞུག །ཞེས་དང་། དངོས་གྲུབ་འབྱུང་བའི་གཏེར་ལས། དེ་ནས་འདོད་ཆགས་ཆེན་པོ་ཡིས། །འདུལ་བའི་སེམས་ཅན་གཟིགས་གྱུར་ནས། །སྦྱོར་བའི་སྒྲ་ཡིས་རང་ལུས་ལ། །རྣམ་སྣང་མཛད་སོགས་གཞུག་པར་བྱ། །དེ་ནི་སྤྱན་མ་ལ་སོགས་པ། །གཟུགས་ལ་སོགས་པ་ཡུལ་གྱི་བདག །རྣམ་པ་དགུ་ནི་སྤྲོས་བྱས་ནས། །རང་གི་ཤེས་རབ་ཉིད་ལ་ཐིམ། །ཞེས་གསུངས་ཤིང་། རིན་ཆེན་རྡོ་རྗེ་དང་། བསོད་སྙོམས་པས་ཀྱང་དེ་བཞིན་དུ་གསུངས་སོ། །ཀུན་བཟང་རྒྱས་པ་ལས། བདེ་བའི་སྒྲས་བསྐུལ་བའི་དེ་བཞིན་གཤེགས་པ་ཐམས་ཅད་རང་གི་ལུས་ལ་བ་སྤུའི་བུ་ག་ནས་ཞུགས་པར་བསམ་སྟེ། རྗེ་བཙུན་ཡབ་རྒྱས་པར་གྱུར་ནས་ལྷ་མོ་མཉེས་པར་བྱེད་དོ། །རྗེ་བཙུན་གྱི་བ་སྤུའི་བུ་ག་ནས་འོད་འཕྲོས་ཤིང་བྱུང་བས་འོད་ཟེར་གྱི་རྩེ་མོར། སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་། གཟུགས་རྡོ་རྗེ་དང་། སྒྲ་རྡོ་རྗེ་དང་། དྲི་རྡོ་རྗེ་དང་། རོ་རྡོ་རྗེ་དང་། རེག་བྱ་རྡོ་རྗེ་སྟེ་ལྷ་མོ་དགུ་པོའི་ངོ་བོ་སྤྲོས་ལ་རྗེ་བཙུན་མའི་བ་སྤུའི་བུ་གར་ཞུགས་པ་འདིས་ཡུམ་རྒྱས་པར་གྱུར་པས་རྗེ་བཙུན་ཡབ་མཉེས་པར་བྱེད་དོ། །ཞེས་ཡབ་གཟི་མདངས་སྐྱེས་པས་ཡུམ་མཉེས་པ་དང་། ཡུམ་གཟི་མདངས་སྐྱེས་པས་ཡབ་མཉེས་པ་དགོས་པར་གསུངས་སོ། །འདིའི་དགོས་པ་ཡང་འདོད་ཆགས་ཆེན་པོས་འདུལ་བའི་སེམས་ཅན་རྣམས་གསང་བ་འདུས་པའི་ཐབས་ཀྱིས་འདུལ་བར་བསྟན་པའི་ཆེད་ཡིན་པར་སྒྲུབ་ཐབས་ཐམས་ཅད་ལས་གསུངས་ལ། དེའི་ཚེ་འདོད་ཆགས་ཀྱི་སྤྱོད་པ་དང་ཆོས་མཐུན་པར་བསྟེན་དགོས་པའི་ཕྱིར་ཏེ། ཙི་ལུ་པའི་འགྲེལ་པར། ཤེས་རབ་མ་དགའ་བར་བྱ་སྟེ། འདོད་ཆགས་ཅན་ཕལ་ཆེ་བ་དང་ཆོས་མཐུན་པར་བྱ་བའི་ཕྱིར་རོ་ཞེས་སོ། །གཉིས་པ་ནི་རྩ་རྒྱུད་ལེའུ་དང་པོ་ལས། དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་འདོད་ཆགས་ཆེན་པོའི་ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པའི་བཀོད་པ་དེ་དག་ཐམས་ཅད་ཉིད་ཀྱི་སྐུ་ལ་ཞུགས་པར་མཛད་དོ། །དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་ཀྱི་བདག་པོ་ཡོངས་སུ་མཉེས་པར་བྱ་བའི་ཕྱིར། ཉིད་ཀྱི་སྐུ་བུད་མེད་ཀྱི་གཟུགས་སུ་མངོན་པར་སྤྲུལ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོའི་སྐུ་ལས་མངོན་པར་བྱུང་བར་གྱུར་ཏོ། །དེས་ལ་ལ་ལ་ནི་སངས་རྒྱས་སྤྱན་ལྟ་བུ་ཞེས་པ་ནས་ལ་ལ་ནི་རིག་གི་ངོ་བོ་ལྟ་བ་དེར་ཡང་དག་པར་གནས་པར་གྱུར་ཏོ་ཞེས་གསུངས་པའི་དོན། འཕགས་ལུགས་པས། འདོད་པ་ཁམས་ཀྱི་སེམས་ཅན་གཟུགས་སོགས་ལ་ཆགས་པ་རྣམས་རྗེས་སུ་གཟུང་བའི་ཕྱིར་གཟུངས་ཀྱི་དཀྱིལ་འཁོར་སྟོན་པར་བཞེད་ལ། ལུགས་འདིས་འདོད་ཆགས་ཆེན་པོས་འདུལ་བའི་འཇིག་རྟེན་གསང་བ་འདུས་པའི་སྣོད་དུ་རུང་བར་བྱ་བའི་ཕྱིར། སྔར་གྱི་ཉམས་ལེན་དེ་ཉིད་སྟོན་པར་བཞེད་དོ། །འོ་ན་ལྷ་མོ་དགུ་གསུངས་ནས། ཆོས་དབྱིངས་རྡོ་རྗེ་མ་ཅིའི་ཕྱིར་མ་གསུངས་སྙམ་ན་འདིའི་ལན་གསུམ་ལས། ཙི་ལུ་པའི་འགྲེལ་པར། ཆོས་ཀྱི་དབྱིངས་ཀྱི་རྡོ་རྗེ་མ་དབྱུང་བར་མ་གསུངས་པ་ནི། ཆོས་ཀྱི་དབྱིངས་ནི། ཡེ་ཤེས་གསུམ་གྱི་ངོ་བོས་ནི། དགུས་མྱང་བར་བྱ་བའི་ཕྱིར་རོ་ཞེས་གསུངས་ཏེ། འདིའི་དོན། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །གསལ་བར་དེ་ལས་མཚོན་པར་འགྱུར། །ཞེས་པ་ལྟར། ལྷ་མོའི་སྦྱང་གཞི་ནི་འབྱུང་བ་བཞི་དང་། འབྱུང་བ་ལས་གྱུར་པའི་གཟུགས་སོགས་ཡིན་ལ། ཡེ་ཤེས་སྣང་མཆེད་ཐོབ་གསུམ་ཕྱག་རྒྱ་བསྟེན་པ་ལས་བྱུང་བ་ཡང་ཞུ་བདེ་མི་རྟོག་པ་གསུམ་གྱི་རང་བཞིན་ཡིན་ཅིང་། རྟེན་ཞུ་བ་འབྱུང་བ་ལས་གྱུར་པ་ཡིན་པས་ལྷ་མོ་དགུ་ནི་མྱོང་བྱེད་ཞུ་བདེའི་ངོ་བོ་དང་། ཆོས་དབྱིངས་རྡོ་རྗེ་མའི་སྦྱང་གཞི་ཆོས་དབྱིངས་ནི་མྱང་བྱ་ཆོས་ཀྱི་དབྱིངས་དང་དབྱེར་མེད་པ་ཡིན་ཞེས་པའི་དོན་ཏོ། །རྒྱལ་བས་བྱིན་གྱིས་འགྲེལ་པར། ཆོས་ཀྱི་དབྱིངས་ཀྱི་རྡོ་རྗེ་མ་ནི་རྡོ་རྗེ་འཛིན་པའི་རྒྱུ་མཐུན་པའི་ཕྱིར་འདིར་མི་སྲིད་དོ་ཞེས་གསུངས་ཏེ། འདིའི་དོན་ཆོས་དབྱིངས་རྡོ་རྗེ་མ་ནི་གང་ལ་གཞུག་པའི་གཞི་རྒྱུ་རྡོ་རྗེ་འཛིན་པའི་ཡུམ་ཡིན་པས་གཞུག་པར་བྱ་བ་མ་ཡིན་ཞེས་པའི་དོན་ཏོ། །སྙིམ་པའི་མེ་ཏོག་ལས། ཅིའི་ཕྱིར་དགུ་པོ་ཉིད་ཡིན་ཞེ་ན་འདི་ལྟར་བཅུ་པའི་ནང་དུ་བསྡུ་བར་བྱ་བ་ཡིན་ཏེ་ཞེས་གསུངས་ཏེ། འདིའི་དོན་ཆོས་དབྱིངས་རྡོ་རྗེ་མ་ལྷ་མོ་དགུའི་སྡུད་བྱེད་ཡིན་པས་མ་བྱུང་ཞེས་པའི་དོན་ནོ། །དབྱུང་ཚུལ་ལ་ཡང་སྒྲོན་གསལ་ལས། ས་སོགས་བཞི་སྤྱན་སོགས་བཞི་དང་རིགས་ལྔ་རྡོ་རྗེ་མ་ལྔར་སྤྲུལ་ནས་དབྱུང་བར་གསུངས་ཀྱང་འདིའི་འགྲེལ་པ་གསུམ་ཆར་ལས། རིགས་ལྔ་ཉིད་ལྷ་མོ་དགུར་བསྒྱུར་ཏེ། རྣམ་སྣང་ནི་སྤྱན་དང་གཟུགས་རྡོ་རྗེ་མར་བསྒྱུར་བ་སོགས་སོ། །གསུམ་པ་འགྲོ་བ་དབང་བསྐུར་བའི་ཚུལ་ལ་གཉིས་ཏེ། ཉམས་ལེན་གྱི་རིམ་པ་དང་། དེ་ཉིད་རྒྱུད་ཀྱི་ལུང་དང་སྦྱར་བའོ། །དང་པོ་ལ་དྲུག་སྟེ། དབང་བསྐུར་བའི་འཐད་པ། གང་དུ་བསྐུར་བའི་དཀྱིལ་འཁོར། དེར་འགྲོ་བ་གཞུག་པའི་ཚུལ། ཞུགས་པ་ལ་དབང་བསྐུར་བའི་ཚུལ། དེས་ལྷར་གྱུར་ཏེ་ཕྱིར་སྤྲོ་བ། དེ་ཉིད་ཀྱི་དོགས་པ་འགོད་པའོ། །དང་པོ་ནི། དེ་ལྟར་ཡབ་ཡུམ་གཟི་མདངས་བསྐྱེད་ནས་བླ་མ་མཉེས་པ་དེས། འདོད་ཆགས་ཆེན་པོས་འདུལ་བའི་སེམས་ཅན་རྣམས། གསང་བ་འདུས་པའི་སྣོད་རུང་དུ་བྱ་བའི་ཕྱིར་དུ་དབང་བསྐུར་བ་དགོས་ཏེ་ཀུན་བཟང་རྒྱས་པ་ལས། བླ་མ་མཉེས་པའི་བདག་ཉིད་ཀྱིས་སེམས་ཅན་དབང་བསྐུར་རོ། །ཅིའི་ཕྱིར་ན་སེམས་ཅན་སྣོད་དང་མི་ལྡན་པ་རྣམས་དཔལ་གསང་བ་འདུས་པ་བཤད་པ་ལ་འཇུག་པར་བྱེད་པའི་རིགས་པས་སོ། །ཅི་སྟེ་སེམས་ཅན་སྣོད་དུ་རུང་བའི་དོན་དུ་ཇི་ལྟར་འགྱུར་ཞེ་ན་བརྗོད་པ། དབང་བསྐུར་བས་སོ་ཞེས་གསུངས་པས་སོ། །གཉིས་པ་ནི་དབང་བསྐུར་བ་ལ་དཀྱིལ་འཁོར་སྔོན་དུ་འགྲོ་དགོས་པས། སྒྲུབ་ཐབས་གཞན་རྣམས་ལས་ཡུམ་གྱི་པདྨར་དཀྱིལ་འཁོར་བསྐྱེད་ཅེས་པ་ཙམ་ལས་མ་གསུངས་ཀྱང་། ཀུན་བཟང་རྒྱས་པ་ལས། དབང་བསྐུར་བར་ཇི་ལྟར་འགྱུར་ཞེ་ན་བརྗོད་པ། དཀྱིལ་འཁོར་སྔོན་དུ་སོང་བས་སོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་རྡོ་རྗེ་བཀོད་པའི་དཀྱིལ་འཁོར་བསམ་སྟེ། ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་སྤྲོས་ཤིང་བྱུང་བས། དེ་བཞིན་གཤེགས་པ་ཐམས་ཅད་ལ་རེག་སྟེ། འོད་ཟེར་རེག་པས་དེ་བཞིན་གཤེགས་པ་ཐམས་ཅད་ཀྱིས་བདེ་བ་ཐོབ་ནས་ཟླ་བ་ཞུ་བ་བཞིན་དུ་ཞུ་བར་གྱུར་ཏེ། རྡོ་རྗེའི་ལྟེ་བ་ནས་ལྷ་མོའི་པད་མའི་ནང་དུ་ཞུགས་ཏེ་ཞུ་བ་དེ་ལྷ་མོའི་པད་མའི་ནང་དུ་རྡོ་རྗེ་འཛིན་པ་གཙོ་བོར་གྱུར་པ་སྐད་ཅིག་གིས་དཀྱིལ་འཁོར་གྱི་འཁོར་ལོ་བསྐྱེད་ནས་ཞེས་གསལ་བར་གསུངས་སོ། །གསུམ་པ་ནི་སྒྲུབ་ཐབས་རྣམས་ལས། འགྲོ་བ་ཐམས་ཅད་དཀྱིལ་འཁོར་དེར་གཞུག་པར་གསུངས་པ་ལ་ནི་ཁྱད་པར་མི་སྣང་ལ། ཀུན་བཟང་རྒྱས་པ་ལས། སླར་ཡང་རྣལ་འབྱོར་པས་དཀྱིལ་འཁོར་གྱི་སྒོ་བཞི་ནས་བློ་ཡིས་སེམས་ཅན་ཐམས་ཅད་བཀུག་ནས་བཅུག་སྟེ། ཞེས་པའི་ཁྱད་པར་གསུངས་སོ། །བཞི་པ་ནི་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཡབ་ཀྱི་ཞལ་དུ་ཞུགས་ཏེ། བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་བྱུང་ནས་སེམས་ཅན་རྣམས་ལ་དབང་བསྐུར་བར་ཀུན་བཟང་རྒྱས་པ་ལས་གསུངས་ལ། དེ་བཞིན་དུ་ཀུན་བཟང་བསྡུས་པ་ལས། གསང་བའི་རྡོ་རྗེ་སེམས་དཔའི་དབུས་སུ་ནི། །རྣམ་སྣང་ལ་སོགས་རྒྱལ་བའི་ཚོགས་གཞུག་ཏེ། །ཟླ་བ་ཞུ་བའི་གཟུགས་སུ་གྱུར་པ་དང་། །དེས་ནི་དེ་རྣམས་དེ་འོག་དབང་བསྐུར་བྱ། །ཞེས་པ་དང་། བཞི་བརྒྱ་ལྔ་བཅུ་པ་ལས། མཁའ་ཁྱབ་སངས་རྒྱས་བཤེས་གཉེན་མཆོག །རང་རྡོ་རྗེ་ནང་ཞུ་ལས་བྱུང་། །མི་ལྡོག་ཕྱིར་དང་དེ་ཉིད་ཀྱི། །ཡེ་ཤེས་འབྲས་ཐོབ་ཕྱིར་དབང་བསྐུར། །ཞེས་དང་། དངོས་གྲུབ་འབྱུང་བའི་གཏེར་ལས། རང་གི་ས་བོན་འོད་ཟེར་གྱིས། །ནམ་མཁའ་ཁྱབ་པའི་བདེ་གཤེགས་རྣམས། །ཟླ་བ་ལྟ་བུར་ཞུ་བྱས་པས། །དེ་རྣམས་དག་ཕྱིར་དབང་བསྐུར་བྱ། །ཞེས་གསུངས་ཤིང་། རིན་ཆེན་རྡོ་རྗེ་དང་། བསོད་སྙོམས་པ་དང་། ཇོ་བོ་རྗེས་ཀྱང་དེ་བཞིན་དུ་བཤད་དོ། །ལྔ་པ་ནི་ཀུན་བཟང་རྒྱས་པ་ལས། དབང་བསྐུར་བའི་རྗེས་ལ་སེམས་ཅན་ཐམས་ཅད་ཀྱི་བདེ་བ་ཐོབ་ནས་ཞུ་བར་གྱུར་ནས། རྡོ་རྗེ་སེམས་དཔའ་དང་། རྣམ་པར་སྣང་མཛད་ཀྱི་བར་དུ་ཟླ་བའི་གདན་ཉི་ཤུ་རྩ་གཅིག་ལ་ཐིག་ལེ་ཆ་ཉི་ཤུ་རྩ་གཅིག་དུ་གྱུར་ཏེ། དེ་ཡང་ས་བོན་ཉི་ཤུ་རྩ་གཅིག་ཏུ་གྱུར་ཏོ་ཞེས་པ་ནས་ཀྵིཾ་ལ་སོགས་པའི་ས་བོན་ཉེར་གཅིག་ལས་འཁོར་ལོ་ལ་སོགས་པའི་ཕྱག་མཚན་ཉེར་གཅིག་ས་བོན་ཉེར་གཅིག་གིས་མཚན་པ། ས་བོན་རྣམས་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་ཞལ་གསུམ་ཕྱག་དྲུག་པའི་གཟུགས་ཀྱིས་ས་བོན་ལ་ཐིམ་པ་ཡོངས་སུ་གྱུར་པ་ལས། ས་སྙིང་ལ་སོགས་པའི་ལྷ་ཉེར་གཅིག་དུ་གྱུར་པ་ཤར་སྒོ་ནས་བྱུང་བར་གྱུར་ནས་ལན་གསུམ་བསྐོར་བ་དང་། ཕྱག་འཚལ་ཏེ། ཆེད་དུ་བརྗོད་པ་བྱས་ནས་མཐའ་ཡས་པ་སྤྲོ་བའི་བར་གསལ་བར་གསུངས་སོ། །བསོད་སྙོམས་པ་དང་། ཇོ་བོ་རྗེས། ས་བོན་ཙམ་ལས་བསྐྱེད་ནས་སྤྲོ་བར་གསུངས་ལ། དངོས་གྲུབ་འབྱུང་བའི་གཏེར་ལས། དེ་ཡི་སྟོབས་ཀྱིས་དེ་དག་རྣམས། །བདེ་དང་ཡིད་བདེ་ཐོབ་པ་དང་། །ཐ་མལ་ཕུང་སོགས་བཤིག་པའི་ཕྱིར། །ཟླ་བ་ལྟ་བུར་ཞུ་བའོ། །དེ་ལ་མིག་ལ་སོགས་པ་རྣམས། ཀྵིཾ་ཛྲཱིཾ་ཁཾ་གཾ་ཀཾ་སཾ་གྱུར། །དེ་བཞིན་གཟུགས་ལ་སོགས་པ་རྣམས། །ཛཿཧཱུྃ་བཾ་ཧོ་ཁཾ་རཾ་གྱུར། །ས་ལ་སོགས་པའི་རང་བཞིན་དག །ལཾ་མཱཾ་པཱཾ་ཏཱཾ་དུ་གྱུར་པ། །གཟུགས་སོགས་ཕུང་པོའི་བདག་ཉིད་རྣམས། །བྷྲཱུཾ་ཨཾ་ཛྲཱིཾ་ཁཱཾ་ཧཱུྃ་དུ་གྱུར། །དེ་ལས་མཚན་མ་དེ་ཡིས་མཚན། །ཁམས་ཀུན་འདུས་པར་བྱས་ནས་སུ། །དྲིས་ཤིང་རྟོགས་ཕུལ་མི་སྨྲར་འདུག །དེ་ནི་པདྨའི་གཞལ་ཡས་ནས། །ཕྱི་རོལ་བྱུང་ནས་བསྟོད་ནས་ནི། །སྣ་ཚོགས་པ་ཡི་གཟུགས་ཀྱིས་སུ། །རང་རང་ཁམས་སུ་སྤྲོས་པར་བསམ། །ཞེས་རྡོ་རྗེ་ཆོ་ག་གསུམ་ལས་བསྐྱེད་པ་དང་། ཕྱིར་ཕྱུང་ནས་བསྟོད་པ་སོགས་ཀུན་བཟང་རྒྱས་པ་ཅི་ལྟ་བ་བཞིན་གསུངས་སོ། །དྲུག་པ་ནི་རིན་ཆེན་རྡོ་རྗེའི་མི་བསྐྱོད་པའི་སྒྲུབ་ཐབས་ལས། ལུགས་གསུམ་གྱི་དཔྱད་པ་མཛད་དེ། ས་བོན་ཉེར་གཅིག་གིས་ཆོས་འབྱུང་གི་ནང་དུ་རེ་རེ་ནས་བསྐྱེད་པ་དང་། གཞན་དག་བསྐྱེད་པ་མ་ཡིན་གྱི་མིག་སོགས་བྱིན་གྱིས་བརླབས་ནས་རྣམ་པར་སྦྱང་བ་ཡིན་ནོ། །ཞེས་པ་དང་། ཡང་གཞན་དག་གིས་རྒྱུད་ལས། རྡོ་རྗེ་ནམ་མཁའི་ཁམས་འདིར་སེམས་ཅན་གང་སྐུ་དང་གསུང་གི་དམ་ཚིག་ལས་ཡང་དག་པར་བྱུང་བ་དེ་རྣམས་རྡོ་རྗེ་དཔལ་གྱིས་རེག་པ་དང་། དེ་ཐམས་ཅད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསུམ་གྱི་ཡེ་ཤེས་ཐོབ་པར་གྱུར་ཏོ་ཞེས་གསུངས་པས་ས་བོན་གྱིས་ལྷ་བསྐྱེད་པ་ཡང་མ་ཡིན། མིག་སོགས་རྣམ་པར་སྦྱང་བ་ཡང་མ་ཡིན་གྱི། ཕྱི་རོལ་དུ་འབྱིན་པའི་འབྱིན་སྔགས་ཡིན་ནོ། །གཞན་དུ་བསྐྱེད་པ་དང་སྦྱང་བ་ཡིན་ན། སངས་རྒྱས་ཡེ་ཤེས་ཞབས་ཀྱིས། དེར་རྗེས་ས་བོན་གྱིས་ནི་བསྐྱེད་པར་བྱ། །ཞེས་དང་། །མིག་ལ་སོགས་པ་རྣམས་པར་སྦྱང་བར་བྱ། །ཞེས་གསུངས་རིགས་པ་ལས་མ་གསུངས་པར། དེར་རྗེས་ས་བོན་གྱིས་ནི་དབྱུང་བར་བྱ། །ཞེས་གསུངས་པས་འབྱིན་སྔགས་སུ་ངེས་སོ། །གལ་ཏེ་དེ་ནི་སྙན་ངག་ཆེན་པོ་ཉིད་ཡིན་པས་བསྐྱེད་པ་དང་སྦྱང་བ་བསྟན་ནུས་ན་ཡང་དེ་ལྟར་མ་ཡིན་ཏེ། མར་མེ་མཛད་བཟང་པོའི་ཞལ་སྔ་ནས་ཀྱང་ཁྱད་པར་མ་གསུངས་པའི་ཕྱིར་ཞེས་སྤྲོས་པ་དང་བཅས་ཏེ་བསྒྲུབས་ནས་རང་ལུགས་ཕྱི་མ་ཉིད་མཛད་དོ། །འདི་ནི་འཐད་པར་མ་མཐོང་སྟེ། སྔར་གྱི་སྒྲུབ་ཐབས་ཁྱད་པར་ཅན་བཞི་དང་འགལ་བའི་ཕྱིར་དང་། འདིར་དབང་བསྐུར་བའི་ནུས་པས་ས་བོན་ལས་ལྷར་གྱུར་པ་གཙོ་བོར་བྱས་ནས། ཕྱིར་དབྱུང་བ་རང་གནས་སུ་གཤེགས་པ་ཙམ་ཡིན་གྱི། དཀྱིལ་འཁོར་རྒྱལ་མཆོག་ལྟར་འབྱིན་སྔགས་ཀྱིས་འབྱིན་པ་དོན་མེད་པའི་ཕྱིར་རོ། །ཀུན་བཟང་བསྡུས་པ་ལས། དེར་རྗེས་ས་བོན་གྱིས་ནི་དབྱུང་བར་བྱ། །ཞེས་པའི་དོན་ཡང་། ལྷར་གྱུར་པའི་རྗེས་སུ་ས་བོན་གྱིས་དབྱུང་ཞེས་པའི་དོན་མ་ཡིན་གྱི། དབང་བསྐུར་བ་དེའི་རྗེས་ས་བོན་གྱིས་ལྷར་བསྐྱེད་ནས་དབྱུང་ཞེས་པའི་དོན་ཡིན་ནོ། །ཁྱེད་རང་གིས་དྲངས་པའི་རྒྱུད་ཀྱི་དོན་ཡང་རྡོ་རྗེ་དཔལ་གྱིས་རེག་པས་སེམས་ཅན་རྡོ་རྗེ་ཆོ་ག་གསུམ་ལས་རྫོགས་པའི་སངས་རྒྱས་སུ་གྱུར་ཅེས་བར་གྱི་ཚིག་མི་མངོན་པ་སྔ་མ་དང་འདྲ་ལ། མར་མེ་མཛད་ཀྱི་ཞལ་སྔ་ནས་ཁྱད་པར་གྱི་བྱེ་བྲག་མ་གསུངས་པའང་མ་ཡིན་ཏེ། ས་ཡི་སྙིང་པོ་ལ་སོགས་དྲུག །མིག་སོགས་རང་གི་ངོ་བོར་དབྱུང་། །ཀྵིྃ་ཛྲཱིྃ་ཁྃ་གྃ་ཥྐྃ་གཞན་ཡང་། །སྃ་ནི་རིམ་བཞིན་ས་བོན་ཡིན། །ཞེས་སོགས་ས་བོན་ཡིན་པར་གསུངས་པའི་ཕྱིར་རོ། །དེ་ཡིས་དངོས་བྱུང་ས་བོན་གྱིས། །སེམས་ཅན་ཐམས་ཅད་ཕྱུང་ནས་ནི། །ཞེས་དང་། བྷྲཱུྃ་ཨཱྃ་ཛྲཱི་ཁྃ་ཧཱུྃ་རྣམས་ཀྱིས། །ཆོས་རྣམས་ཐམས་ཅད་ཡང་དག་དབྱུང་། །ཞེས་པའང་སྔར་གྱི་ཀུན་བཟང་བསྡུས་པའི་ལུང་དང་དོན་ཅིག་ཤེས་པར་བྱའོ། །གཉིས་པ་ནི། རྩ་རྒྱུད་ལེའུ་དང་པོ་ལས་ཟིལ་གནོན་རྡོ་རྗེའི་སྐབས་སུ། དེ་ནས་ནམ་མཁའི་དབྱིངས་ཐམས་ཅད་ན་གནས་པའི་སེམས་ཅན་ཇི་སྙེད་པ་དེ་དག་ཐམས་ཅད་རྡོ་རྗེ་སེམས་དཔའི་བྱིན་གྱིས་བརླབས་ཀྱིས་དེ་བཞིན་གཤེགས་པ་ཐམས་ཅད་ཀྱི་བདེ་བ་དང་། ཡིད་བདེ་བ་ཐོབ་པར་གྱུར་ཏོ་ཞེས་གསུངས་པའི་དོན་སྒྲོན་གསལ་ལས་ལྷག་མོས་ཀྱི་མཛད་པ་ལ་སྦྱར་ནས་བཤད་ཀྱང་། ལུགས་འདིས་འགྲོ་བ་དབང་བསྐུར་སྟོན་པར་ཙི་ལུ་པ་དང་། རྒྱལ་བས་བྱིན་གྱི་འགྲེལ་པར་བཤད་དོ། །གཉིས་པ་དེའི་རྒྱུ་མཐུན་འབྲས་བུ་རྡོ་རྗེ་འཛིན་པ་བསྐྱེད་པ་ལ་གསུམ་སྟེ། རྒྱུ་རྡོ་རྗེ་འཆང་ཞུ་བ། དེ་ལས་གླུས་བསྐུལ་བ། འབྲས་བུ་རྡོ་རྗེ་འཛིན་པར་བཞེངས་པའོ། །དང་པོ་ནི། སྒྲུབ་ཐབས་ཀྱི་གཞུང་ཐམས་ཅད་ལས། བར་སྲིད་མཚོན་བྱེད་ཀྱི་ཡི་གེ་ལྔ་ཞུགས་པས་རྐྱེན་བྱས་ནས་ཞུ་བ་ལ་ནི་ཁྱད་པར་མི་སྣང་ལ། ཞུགས་ཚུལ་ལ་ཀུན་བཟང་རྒྱས་པ་ལས་ཡི་གེ་ལྔ་པོ་ཡབ་ཀྱི་ཞལ་དུ་ཞུགས་ཏེ། དེ་ནས་ཟླ་བ་ཞུ་བ་བཞིན་དུ་རྡོ་རྗེའི་ལམ་ནས་ལྷ་མོའི་པདྨར་ལྷུང་བའི་ཁུ་བ་ལས་འོད་ཟེར་ཁ་དོག་དམར་པོ་སྤྲོས་པས་ཡབ་ཡུམ་ཞུ་བར་བཤད་ཅིང་། བསོད་སྙོམས་པ་དང་། ཇོ་བོ་རྗེས་ཀྱང་འདི་ཁོ་ན་བཞིན་དུ་བཤད་དོ། །ཀུན་བཟང་བསྡུས་པ་ལས། ཨོཾ་ཨཱཿཧཱུྃ་ཞེས་བྱ་བའི་སེམས་ཉིད་ནི། །འོད་ལྡན་ཧོཿདང་ཆོ་ག་སྤེལ་མ་བཞིན། །པདྨའི་ནང་དུ་ཞུགས་པའམ་མཉམ་མེད་པ། །ཤེས་རབ་ཆགས་པས་ཞུ་བར་བྱས་པར་བསམ། །ཞེས་པ་ནི་ཡིག་འབྲུ་ཞུ་བ་པདྨའི་ནང་དུ་ཞུགས་པ་དང་། ཡིག་འབྲུ་པདྨའི་ནང་དུ་ཞུགས་ནས་ཞུ་བ་གང་ལ་སྦྱར་ཡང་འདྲ་བར་སྣང་ངོ་། །བཞི་བརྒྱ་ལྔ་བཅུ་པ་ལས། དེ་ནས་ཨོཾ་ཨཱཿཧཱུྃ་ཞེས་པའི། སེམས་ནི་འོད་ལྡན་ཧོཿགཉིས་སྤེལ། །གསང་བའི་ཆུ་སྐྱེས་ཁོང་ན་གནས། །རྒྱུ་མཐུན་ཆུང་ངུ་དག་ཕྱིར་བྱ། །འདོད་ཆགས་མེ་དེ་འབར་བ་ཡིས། །སྐུ་གཉིས་དག་ནི་ཞུ་བར་བྱ། །ཞེས་དང་། དངོས་གྲུབ་འབྱུང་བའི་གཏེར་ལས། དེ་ནས་འབར་བའི་སེམས་ཅན་རྣམས། །སྐར་མ་ལྟུང་བཞིན་ཞལ་ཞུགས་ནས། །རྡོ་རྗེར་ཕྱུང་ནས་པདྨར་གནས། །ཤེས་རབ་ཆགས་པས་དེ་ཞུ་བྱེད། །དེའི་འོད་ཟེར་དམར་འཕྲོས་པས། །ཡབ་ཡུམ་བྱང་ཆུབ་སེམས་སུ་ཞུ། །ཞེས་དང་། རིན་ཆེན་རྡོ་རྗེས། ཧོ་དམར་པོ་གཉིས་དང་སྤེལ་བ་སྐུ་དང་། གསུང་དང་། ཐུགས་ཀྱི་ངོ་བོ་ཉིད་ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་བསམ་པར་བྱའོ། །དེ་ནས་ཐབས་དང་ཤེས་རབ་ཀྱི་འདོད་ཆགས་ཆེན་པོའི་མེ་འབར་བ་རྣམས་ཀྱིས་ཡི་གེ་ལྔ་པོ་དེ་ཞུ་བར་བསམ་ལ། དེའི་ཡང་འོད་ཟེར་རྣམས་ཀྱིས་རྡོ་རྗེ་སེམས་དཔའ་རིག་མ་དང་བཅས་པ་ཡང་ཟླ་བར་ཞུ་བར་གྱུར་ནས་ཞེས་པ་འདི་དྲི་ཟ་ཁར་བཅུག་པའི་རྗེས་ལ་འབྱུང་བས་གཞུང་འདི་གསུམ་གྱིས་ཡིག་འབྲུ་ལྔ་པོ་པདྨར་ལྷུང་བའི་རྗེས་ལ་ཞུ་བར་བཞེད་དོ། །འོ་ན་བར་དོ་མཚོན་བྱེད་ཀྱི་ཡིག་འབྲུ་ལྔ་པོ་དེ་སྔར་ཡེ་ཤེས་ཚོགས་བསག་གི་རྗེས་སུ་ནམ་མཁར་བཞག་པ་དེ་ཡིན་ནམ་སྙམ་ན་མ་ཡིན་ཏེ། ནམ་མཁར་བཞག་པ་དེ་ཉིད་རྒྱུ་རྡོ་རྗེ་འཆང་བསྐྱེད་པའི་སྐབས་སུ་དབུས་ཀྱི་གདན་གྱི་སྟེང་དུ་ཕབ་ནས་རྒྱུ་རྡོ་རྗེ་འཆང་གི་རྒྱུར་སོང་ཟིན་པའི་ཕྱིར་ཏེ། སྔར་གྱི་བསྐྱེད་ཆོག་ལས་དེ་ལྟར་བཤད་ཅིང་། ཙི་ལུ་པའི་འགྲེལ་པར་རྒྱུད་ཀྱི་ལུང་དྲངས་པ་ལས། རང་བཞིན་གནས་པའི་སངས་རྒྱས་རྣམས། །ཡི་གེ་གསུམ་གྱི་ཚུལ་བཟུང་སྟེ། །ང་ཡི་རྒྱུ་རུ་རབ་ཏུ་གནས། །མངོན་པར་འབྱུང་བའི་སངས་རྒྱས་རྣམས། །ཨཱ་ལི་ཀཱ་ལིའི་ཚུལ་བཟུང་སྟེ། །དེ་ཡང་ང་ཡི་རྒྱུ་རུ་གནས། །དེ་ཕྱིར་དེ་རྣམས་འདུས་ཞེས་བྱ། །ཞེས་གསུངས་པས་སོ། །དེས་ན་སྔར་ཡེ་ཤེས་ཚོགས་བསག་གི་རྗེས་སུ་ཡིག་འབྲུ་ལྔ་བར་སྣང་དུ་འཇོག་པ་ཡོད་པ་དང་། མེད་པ་གང་ལ་ཡང་འདིར་ཡིག་འབྲུ་ལྔ་གསར་དུ་བསྐྱེད་ནས་འཇུག་པ་ཡིན་ཏེ། ཇོ་བོ་རྗེས་དེའི་འོག་དུ་ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་ཁ་དོག་དཀར་པོ་དང་། དམར་པོ་དང་། ནག་པོ། སྐུ་དང་། གསུང་དང་། ཐུགས་རྡོ་རྗེའི་རང་བཞིན་ཅན་སྙིང་རྗེ་དང་ཤེས་རབ་ཀྱི་རང་བཞིན་གྱི་ཧོཿདམར་པོ་གཉིས་ཀྱི་ནང་དུ་ཆུད་པ་མདུན་གྱི་ནམ་མཁའ་ལ་བསམ་ལ་ཁའི་སྒོ་ནས་རང་གི་ལུས་ལ་བཅུག་སྟེ། ཞེས་གསུངས་པས་སོ། །དེ་ལྟར་ན་འདི་གང་ཟག་གཞན་གྱི་བར་དོར་འགྱུར་རོ་སྙམ་ན་འདིའི་དོན་འདི་ལྟར་ཡིན་ཏེ། སྦྱང་གཞི་རྒྱ་ཆེ་བ་སེམས་ཅན་ཐམས་ཅད་ཀྱི་བར་དོ་ལ་སྦྱར་བ་དང་རྣལ་འབྱོར་པ་རང་ཉིད་ཀྱི་བར་དོ་ལ་སྦྱར་བ་གཉིས་ལས། དང་པོ་ལྟར་ན་འགྲོ་བ་གསང་བ་འདུས་པའི་སྣོད་རུང་དུ་བྱ་བའི་ཕྱིར། དབང་བསྐུར་བྱས་པ་དེ་དག་གི་བར་དོ་འདིར་སྦྱོང་བ་སྟེ། ཀུན་བཟང་རྒྱས་པ་ལས། འདིས་ནི་ཕྱི་རོལ་གྱི་འགྲོ་བ་ཡོངས་སུ་དག་པར་བྱས་ཏེ། སྣོད་དུ་གྱུར་པ་ལ་ཕ་མའི་ངོ་བོ་བདེ་བ་ཆེན་པོ་ཡབ་དང་ཡུམ་ལ་བལྟས་ཏེ། ཡི་གེ་གསུམ་ཁའི་སྒོར་ཞུགས་ཏེ་ཞེས་དང་། དངོས་གྲུབ་འབྱུང་བའི་གཏེར་ལས་དེ་ནས་བར་མའི་སེམས་ཅན་རྣམས་ཞེས་མང་ཚིག་གསུངས་པ་དང་དོན་མཐུན་པས་སོ། །དེས་ན་སྔར་ནམ་མཁར་འཇོག་པ་དེ་ཡང་སེམས་ཅན་ཐམས་ཅད་ཀྱི་བར་དོ་ཡིན་པས་ཡབ་ཀྱི་སྐབས་སུ་ལན་གཉིས་སྦྱོང་ཞིང་། དེ་བཞིན་དུ་རྗེ་བཙུན་ཡུམ་གྱི་སྐབས་སུ་ཡང་ལན་གཉིས་སྦྱོང་བས་སྦྱང་གཞི་སྦྱོང་བའི་ནུས་པ་ཆེ་བ་ཡིན་གྱི། བར་དོ་ལན་གཉིས་བྱུང་བས་རྒྱུད་ཐ་དད་དུ་འགྲོ་བ་དང་། བར་སྐབས་སུ་འཆི་སྲིད་སྦྱོང་བྱེད་དགོས་པ་ནི་གཏན་མ་ཡིན་ནོ། །བསོད་སྙོམས་པས་ནི་སྔར་ནམ་མཁར་བཞག་པ་དེ་ཉིད་འདིར་འཇུག་པར་བཞེད་པ་འདྲ་སྟེ། སྔར་ནམ་མཁར་བཞག་པ་ལ་ཡང་འཇུག་པའི་སེམས་ཞེས་དང་། འདིར་ཡི་གེ་གསུམ་ལ་ཡང་འཇུག་པའི་ཐ་སྙད་མཛད་པའི་ཕྱིར་རོ། །གཉིས་པ་ནི་ཞུ་བ་དེ་ལ་མཱ་མ་ཀཱི་ལ་སོགས་པ་ལྷ་མོ་བཞིས་རྒྱུད་ཕྱི་མ་ལས། སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །ཞེས་སོགས་ཚིགས་བཅད་བཞིས་བསྐུལ་བ་ནི་སྒྲུབ་ཐབས་ཐམས་ཅད་འདྲ་བར་སྣང་ལ། ལྷ་མོ་བཞི་པོ་ཐིག་ལེ་ལས་སྤྲོས་ཏེ་རང་རང་གི་གནས་ཀྱི་གདན་ལ་འདུག་ནས་བསྐུལ་བར་ཀུན་བཟང་རྒྱས་པ་དང་། དངོས་གྲུབ་འབྱུང་བའི་གཏེར་གཉིས་ལས་གསལ་བར་གསུངས་ཤིང་། བསོད་སྙོམས་པས། དེ་ནས་འབྱུང་བ་ཆེན་པོ་བཞི་སྤྱན་ལ་སོགས་པའི་ལྷ་མོར་གྱུར་ནས་ཞེས་དང་། ཇོ་བོ་རྗེས་རང་གི་རྒྱུད་ལས་ཐ་མི་དད་པའི་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་ངོ་བོ་ཉིད་ལྷ་མོ་སྤྱན་དང་། ཞེས་སོགས་གསུངས་པ་ཡང་སྔ་མ་དང་དགོངས་པ་གཅིག་པར་སྣང་སྟེ། ཐིག་ལེ་དེ་ཉིད་ཀྱིས་འབྱུང་བཞི་ལྷ་མོ་བཞིར་སྤྲུལ་ཞེས་དང་། རྒྱུ་རྡོ་རྗེ་འཆང་དང་ཐ་མི་དད་པའི་ཚད་མེད་བཞི་པོ་ལྷ་མོ་བཞི་རུ་སྤྲུལ་ཞེས་པའི་དོན་ཡིན་པའི་ཕྱིར་རོ། །ཀུན་བཟང་བསྡུས་པ་ལས། སྤྱན་ལ་སོགས་པའི་ལྷ་མོ་རྣམས་ཀྱིས་ནི། །གླུ་ཡི་སྒྲ་ཡིས་བསྐུལ་བར་བྱས་པར་བསམ། །ཞེས་དང་། བཞི་བརྒྱ་ལྔ་བཅུ་པ་ལས། བཤེས་མཆོག་ལྟར་སྣང་ཕྱོགས་ལྷ་མོ། །གླུ་ཡིས་གསོལ་བ་ལེགས་པར་བསྐུལ། །ཞེས་པ་ཙམ་ལས་གསལ་ཁ་མི་སྣང་ཡང་དགོངས་པ་སྔ་མ་ཉིད་ལས་མ་འདས་སོ། །རིན་ཆེན་རྡོ་རྗེས། ལྷ་མོ་བཞི་པོ་དེ་བཞིན་གཤེགས་པའི་འོད་ཟེར་གྱི་སྣང་བས་བསྐུལ་ཏེ་བྱུང་བས་བསྐུལ་བར་གསུངས་པ་དང་། ཤཱནྟི་པས་དེའི་འོག་ཏུ་ཏིང་ངེ་འཛིན་དེ་ལས་བསླང་བར་བྱ་བའི་ཕྱིར་འབད་རྩོལ་མེད་པ་མཱ་མ་ཀཱི་ལ་སོགས་པ་ལྷ་མོ་བཞིས་བསྐུལ་བའི་གླུས་བསྐུལ་བར་བསམ་པར་བྱའོ་ཞེས་པ་ནི་རང་བཞིན་གྱི་གནས་ནས་འོངས་པའི་ལྷ་མོས་བསྐུལ་བར་བཞེད་པར་སྣང་ངོ་། །བསྐུལ་བའི་ཚིག་གི་དོན་ནི་ཡི་གེ་མང་གིས་དོགས་པས་འདིར་མ་བཤད་དོ། །གསུམ་པ་ནི། ཀུན་བཟང་རྒྱས་པ་ལས། དེ་ལྟར་བསྐུལ་བས་སྒྱུ་མ་ལྟ་བུའི་ཐིག་ལེ་དེ་མཾ་ཡིག་གུར་གུམ་གྱི་མདོག་ལྟ་བུར་གྱུར། དེ་ལས་རལ་གྲི་ལྗང་གུའི་ཡུ་བ་ལ་མཾ་གིས་མཚན་པ། དེ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་འཇམ་པའི་རྡོ་རྗེ་ཞལ་གསུམ་ཕྱག་དྲུག་པའི་གཟུགས་སུ་གྱུར་ཏེ། མཾ་ཡིག་ལ་བསྡུས་ནས་དེ་ཡོངས་སུ་གྱུར་པ་ལས། དཀྱིལ་འཁོར་གྱི་གཙོ་བོ་རང་འོད་ཀྱི་རིག་མས་འཁྱུད་པ་བསྐྱེད་པར་བཤད་ཅིང་། དངོས་གྲུབ་འབྱུང་བའི་གཏེར་དང་། བསོད་སྙོམས་པ་དང་། ཇོ་བོ་རྗེའི་གཞུང་རྣམས་ལས་ཀྱང་རང་རང་གི་ས་བོན་ལས་ཕྱག་མཚན་ས་བོན་གྱིས་མཚན་པ་ལས་སྤྲོ་བསྡུ་བྱས་ནས་བསྐྱེད་པ་སྔ་མ་བཞིན་དུ་གསལ་བར་གསུངས་སོ། །ཀུན་བཟང་བསྡུས་པ་ལས། ཆོས་ཀུན་སྒྱུ་མ་ལྟ་བུར་ཡང་དག་རིག །སྣང་བའི་འོད་ཟེར་གྱིས་ནི་དཀྱིལ་འཁོར་ཅན། །རང་གི་སྔགས་ཀྱི་ལུས་སུ་རང་ཉིད་འབྱུང་། །དེ་ཡི་འོད་ཟེར་མ་ལུས་པ་རྣམས་ཀྱིས། །རང་ལྷ་དང་མཚུངས་སྤྲུལ་པའི་གཟུགས་དབང་པོ། །དཔག་དུ་མེད་པ་ཡིད་ཀྱིས་བཅུག་པ་ལས། །དཔལ་ལྡན་འཇམ་པའི་རྡོ་རྗེ་ཞེས་བྱར་འགྱུར། །ཞེས་དང་། བཞི་བརྒྱ་ལྔ་བཅུ་པ་ལས། སློང་བར་བྱེད་པའི་ངོར་བྱས་པས། །ཞུ་བ་རྒུད་པ་ལྟར་མཐོང་སྟེ། །དངོས་རྣམས་སྒྱུ་མ་ལྟར་རིག་ནས། །རང་སྔགས་དོན་དུ་སླར་ཡང་གྱུར། །ཞལ་མདོག་གུར་གུམ་ལྟ་བུ་སྟེ། །ཞེས་པ་ཙམ་ལས་གསལ་བ་མི་སྣང་ཡང་། དེ་གཉིས་ཀྱི་འགྲེལ་པ་ཐ་ག་པ་དང་། ཤཱནྟི་པས་ས་བོན་ལས་ཕྱག་མཚན་ས་བོན་གྱིས་མཚན་པ་བསྐྱེད་པ་སྔ་མ་བཞིན་དུ་གསུངས་སོ། །རིན་ཆེན་རྡོ་རྗེས་ས་བོན་རྐྱང་པ་ལས་བསྐྱེད་པར་བཤད་པ་ནི་མི་ཐད་དེ། ཞུ་བའི་ཐིག་ལེ་ཆོ་ག་དང་པོ་བྱང་ཆུབ་ཀྱི་སེམས་དང་དེ་ཉིད་ས་བོན་དུ་གྱུར་པ་ཆོ་ག་གཉིས་པ་ས་བོན་བསྡུ་བ་དང་། དེ་ལས་ཕྱག་མཚན་དུ་གྱུར་པ་ཆོ་ག་གསུམ་པ་གཟུགས་བརྙན་རྫོགས་པ་དང་། དེ་ལས་ས་བོན་གྱིས་མཚན་པ་ཆོ་ག་བཞི་པ་ཡིག་འབྲུ་འགོད་པ་ཚང་དགོས་པའི་ཕྱིར་རོ། །འདི་ནི་ཙི་ལུ་པའི་འགྲེལ་པར་བཤད་ལ། ཚུལ་དེས་སྔར་རྒྱུ་རྡོ་རྗེ་འཛིན་པ་བཤད་པ་ལ་ཡང་ཆོ་ག་བཞི་ཚང་བ་དང་། མངལ་དུ་དཀྱིལ་འཁོར་རྒྱལ་མཆོག་གི་ལྷ་བསྒྲུབ་པ་ལ་ཡང་ཆོ་ག་བཞི་ཚང་བར་གྲུབ་བོ། །ཆོ་ག་བཞི་པོ་ལ་རྒྱལ་བའི་བྱིན་གྱིས་འགྲེལ་པར་འདི་ལྟར་བཤད་དེ། རྒྱུ་རྡོ་རྗེ་འཆང་གི་ཞལ་དུ་བར་སྲིད་ཞུགས་ཏེ་ཞུ་བའི་གོང་བུ་ནི་ཆོ་ག་དང་པོ། ལྷ་མོ་བཞིས་བསྐུལ་ནས་ཐིག་ལེ་དེ་ས་བོན་ལས་ཕྱག་མཚན་ས་བོན་གྱིས་མཚན་པར་གྱུར་པ་ནི་ཆོ་ག་གཉིས་པ། དེ་ལས་ལྷའི་སྐུ་ཡོངས་སུ་རྫོགས་པ་ནི་ཆོ་ག་གསུམ་པ། དྷརྨ་དྷཱ་ཏུའི་སྔགས་ཀྱིས་ཆོས་ཀྱི་དབྱིངས་སུ་བྱིན་གྱིས་བརླབ་པ་ནི་ཆོ་ག་བཞི་པར་བཤད་དེ། ལུགས་འདི་ནི་རྨད་དུ་བྱུང་བར་སྣང་ཞིང་། ཕྲ་རགས་ཀྱི་ཚུལ་གྱིས་ལུགས་སྔ་མ་ལ་ཡང་མི་གནོད་དོ། །ཞལ་ཕྱག་གི་ཚུལ་ལ་ནི་སྨན་ཞབས་དང་། རིན་ཆེན་རྡོ་རྗེས་མི་བསྐྱོད་པ་གཙོ་བོར་བྱས་པ་དང་། ཇོ་བོ་རྗེས་འཇིག་རྟེན་དབང་ཕྱུག་གཙོ་བོར་བྱས་པ་ལ་ནི་སོ་སོའི་ཕྱག་མཚན་བཤད་ཅིང་། སྒྲུབ་ཐབས་གཞན་རྣམས་ལས་འཇམ་པའི་རྡོ་རྗེའི་ཕྱག་མཚན་ལ་མི་མཐུན་པ་མི་སྣང་ངོ་། །གཉིས་པ་ཉེར་སྒྲུབ་ཀྱི་ཡན་ལག་དང་། རྣམ་སྨིན་གྱི་འབྲས་བུ་ཆུང་ངུ་ནི་ཀུན་བཟང་རྒྱས་པ་ལས། ད་ནི་མིག་ལ་སོགས་པ་བྱིན་གྱིས་བརླབ་པར་བྱ་སྟེ། མིག་དག་གི་དབུས་སུ་ཡི་གེ་ཀྵིཾ་ཁ་དོག་དཀར་པོ་དེ་ཡོངས་སུ་གྱུར་པ་ལས་འཁོར་ལོ་དཀར་པོ་རྩིབས་བརྒྱད་པ། འཁོར་ལོའི་ལྟེ་བ་ལ་ཡི་གེ་ཀྵིཾ་ཡིག་ཟླ་བའི་དཀྱིལ་འཁོར་ཅན། དེ་ལས་འོད་ཟེར་བྱུང་བས་དེ་བཞིན་གཤེགས་པ་ཐམས་ཅད་ལ་རེག་སྟེ་འོད་ཟེར་རེག་པས་ཐམས་ཅད་བདེ་བ་ཐོབ་ནས་ཞལ་གསུམ་ཕྱག་དྲུག་པ་སའི་སྙིང་པོའི་གཟུགས་ཅན་ཀྵིཾ་ཡིག་ལ་ཐིམ་པར་བསམ་མོ། །ལྷ་རྣམས་ཐིམ་པས་ས་བོན་དང་ཕྱག་མཚན་ཡོངས་སུ་གྱུར་པ་ལ་སྐད་ཅིག་ལ་སའི་སྙིང་པོར་གྱུར་ནས། ཞལ་གསུམ་ཕྱག་དྲུག་པ་ཞེས་གསུངས་ཤིང་། དེ་བཞིན་དུ་སེམས་དཔའ་གཞན་ལྔ་པོའི་བསྐྱེད་ཆོག་ཀྱང་རྒྱས་པར་གསུངས་སོ། །ཀུན་བཟང་བསྡུས་པ་ལས། དེ་འོག་རང་སྙིང་ས་བོན་འོད་རྣམས་ཀྱིས། །རང་གི་མིག་སོགས་ས་སྙིང་ལ་སོགས་པས། །ཇི་བཞིན་བཀང་ནས་ཞེས་དང་། བཞི་བརྒྱ་ལྔ་བཅུ་པ་ལས། བཤེས་གཉེན་དམ་པས་རྒྱུ་མཐུན་བྱས། །སྨིན་ལས་ཐམས་ཅད་མཁྱེན་ཉིད་གྱུར། །དེ་ནི་མིག་སོགས་བྱིན་བརླབ་པ། །ཉེ་བར་སྒྲུབ་པ་ཡིན་པར་འདོད། །ས་སྙིང་རྡོ་རྗེ་ཅན་མཁའ་སྙིང་། །འཇིག་དབང་སྒྲིབ་སེལ་ཀུན་དུ་བཟང་། །དེ་ཡིས་ས་བོན་རྣམས་ཀྱིས་ནི། །མིག་ལ་སོགས་པ་ཡང་དག་དགོད། །ཞེས་དང་། །དངོས་གྲུབ་འབྱུང་བའི་གཏེར་ལས། ས་སྙིང་རྡོ་རྗེ་ནམ་མཁའ་དང་། །དབང་ཕྱུག་སྒྲིབ་སེལ་ཀུན་བཟང་རྣམས། །ཀྵིཾ་ལ་སོགས་པའི་རིམ་པ་ཡིས། །མིག་ལ་སོགས་པར་དགོད་པར་བྱ། །ཞེས་ས་བོན་ལས་བསྐྱེད་པ་མ་གཏོགས། རྡོ་རྗེ་ཆོ་ག་གསུམ་བསྐྱེད་གསལ་བར་མི་སྣང་ཡང་། ཀུན་བཟང་རྒྱས་པའི་ལུགས་བཞིན་ཁ་བསྐང་དགོས་ཏེ། བཞི་བརྒྱ་ལྔ་བཅུ་པའི་འགྲེལ་པར། རྡོ་རྗེ་ཆོ་ག་གསུམ་བསྐྱེད་གསུངས་ཤིང་། བསོད་སྙོམས་པ་དང་། རིན་ཆེན་རྡོ་རྗེ། ཇོ་བོ་རྗེས་ཀྱང་ཀུན་བཟང་རྒྱས་པ་ཇི་ལྟ་བ་བཞིན་གསུངས་པའི་ཕྱིར་རོ། །སྒྲུབ་ཐབས་གཞན་རྣམས་སེམས་དཔའ་དྲུག་གིས་མིག་སོགས་དྲུག་ཁོ་ན་བྱིན་གྱིས་བརླབ་པར་མཐུན་ཡང་། རིན་ཆེན་རྡོ་རྗེས། དེ་ནས་ཕུང་པོ་དང་། ཁམས་དང་། སྐྱེ་མཆེད་བྱིན་གྱིས་བརླབས་པའི་མཚན་ཉིད་ཅན་གྱི་རྣམ་པར་སྨིན་པ་མེད་པར་ཐམས་ཅད་མཁྱེན་པ་ཉིད་དུ་མི་འགྱུར་བས་དེ་ཐོབ་པར་བྱ་བའི་ཕྱིར་ཞེས་མདོར་བསྟན་ནས། རྒྱས་བཤད་ཀྱི་སྐབས་སུ་ནང་གི་སྐྱེ་མཆེད་དྲུག་སེམས་དཔའ་དྲུག ཕྱིའི་སྐྱེ་མཆེད་དྲུག་རྡོ་རྗེ་མ་དྲུག ཁམས་བཞི་ཡུམ་བཞི། ཕུང་པོ་ལྔ་རིགས་ལྔར་རྡོ་རྗེ་ཆོ་ག་གསུམ་ལས་བསྐྱེད་པར་མཛད་དོ། །དེ་ཉིད་བསྒྲུབ་པར་འདོད་ནས་དགག་སྒྲུབ་འདི་ལྟར་མཛད་དེ། འདིར་ལ་ལ་ནི་རང་སྙིང་ས་བོན་འོད་རྣམས་ཀྱིས། །རང་གི་མིག་སོགས་ས་སྙིང་ལ་སོགས་པས། །ཇི་བཞིན་བཀང་ནས་ཞེས་སོགས་སྨོས་པས་ནང་གི་བདག་ཉིད་ཅན་གྱི་སྐྱེ་མཆེད་དྲུག་བྱིན་གྱིས་བརླབ་པ་ཉིད་ནི་ཉེ་བར་སྒྲུབ་པ་ཡིན་ནོ་ཞེས་ཟེར་མོད་ཀྱི་དེ་ནི་མ་ཡིན་ནོ་ཞེས་གཞན་དག་ཟེར་ཏེ། གང་གི་ཕྱིར་རྣམ་པར་སྨིན་པ་ནི་ཐམས་ཅད་མཁྱེན་པའི་མཚན་ཉིད་ཅན་ཡིན་ལ་ཐམས་ཅད་མཁྱེན་པ་དེ་ཡང་ནང་གི་བདག་ཉིད་ཅན་གྱི་སྐྱེ་མཆེད་ཡོངས་སུ་ཤེས་པའི་མཚན་ཉིད་ཡིན་ནོ། །དེ་བས་ན་མིག་ལ་སོགས་པ་ནི་ཉེ་བར་མཚོན་པ་ལྟ་བུར་བྱེད་པ་ཕྱིའི་སྐྱེ་མཆེད་རྣམས་དང་། ཁམས་དང་། ཕུང་པོ་ཡང་ཡང་དག་པར་བྱིན་གྱིས་བརླབ་པར་བལྟ་བར་བྱའོ། །དེ་ཡང་ལུང་ལས། དགེ་སློང་དག ཐམས་ཅད་ཅེས་བྱ་བ་ནི་ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་དེ་གང་གི་ཤེས་པ་དེ་ནི་ཐམས་ཅད་མཁྱེན་པའོ་ཞེས་གསུངས་པ་ཡིན་ནོ། །གཞན་ཡང་ལྷག་པར་བསྒོམ་པར་གྱུར་པས་ནི་འབྲས་བུ་ལྷག་པར་ཐོབ་པར་རིགས་པ་ཡིན་པས་ལྷག་པ་ནི་མཆོག་ཡིན་གྱི་མ་ཚང་བ་ནི་དེ་ལྟར་མ་ཡིན་ནོ་ཞེས་འཆད་དོ།། །།འདི་ཡང་མི་འཐད་དེ། སྒྲུབ་ཐབས་གཞན་རྣམས་ལས། མིག་སོགས་བྱིན་གྱིས་བརླབས་པ་ལས་གཞན་མ་གསུངས་པའི་ཕྱིར་རོ། །སྒྲུབ་བྱེད་གཉིས་ལས་དང་པོ་འདིར་རྣམ་པར་སྨིན་པ་ཐམས་ཅད་མཁྱེན་པའི་ཡན་ལག་ཡིན་པས་ཕྱི་ནང་གི་ཕུང་ཁམས་སྐྱེ་མཆེད་ཐམས་ཅད་མཁྱེན་དགོས་པའི་ཕྱིར་ཞེས་པ་མ་ངེས་ཏེ། འདིར་ཡུལ་ཅན་སྐྱེ་མཆེད་དྲུག་བྱིན་གྱིས་བརླབ་པས་ཡུལ་ཐམས་ཅད་མཁྱེན་ཞེས་པའི་དོན་ཡིན་གྱི་མཁྱེན་པར་བྱ་བའི་ཡུལ་བྱིན་གྱིས་བརླབ་པའི་དོན་མ་ཡིན་པའི་ཕྱིར་རོ། །སྒྲུབ་བྱེད་གཉིས་པ་འབྲས་བུ་ལྷ་ཉི་ཤུ་རྩ་གཅིག་ཐོབ་པ་ལ་རྒྱུ་ཕུང་ཁམས་སྐྱེ་མཆེད་ཀྱི་ཆོས་ཉི་ཤུ་རྩ་གཅིག་བྱིན་གྱིས་བརླབ་པ་དགོས་ཞེས་པ་ཡང་མ་ངེས་ཏེ། འདིར་ཡུལ་ཅན་སྐྱེ་མཆེད་དྲུག་ཐམས་ཅད་མཁྱེན་པར་འགྱུར་བའི་རྒྱུ་ཉེར་སྒྲུབ་བསྒོམ་པའི་སྐབས་ཡིན་གྱི་འབྲས་བུ་ཐམས་ཅད་ཀྱི་རྒྱུ་བསྒོམ་པའི་སྐབས་མ་ཡིན་པའི་ཕྱིར་ཏེ། རྩ་རྒྱུད་ལས། ཉེ་བར་སྒྲུབ་པ་གྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་སྤྱད། །ཞེས་པའི་དོན་ཉམས་སུ་ལེན་པའི་སྐབས་ཡིན་པའི་ཕྱིར། གལ་ཏེ། ཀུན་བཟང་བསྡུས་པ་ལས། མིག་སོགས་ཞེས་པའི་སོགས་ཁོངས་ནས། ཉེར་གཅིག་པོ་ལྷག་མ་ཡང་འདོན་དགོས་ཏེ། འགྲོ་བ་དབང་བསྐུར་གྱི་སྐབས་ཡིན་ནོ་སྙམ་ན། དེ་དང་མི་འདྲ་སྟེ། དེས་ནི་འགྲོ་བའི་ཕུང་ཁམས་སྐྱེ་མཆེད་ཐམས་ཅད་སྦྱོང་བའི་སྐབས་ཡིན་ལ་འདི་ནི་ཡན་ལག་བཞིའི་ནང་ནས་ཉེར་སྒྲུབ་ཀྱི་སྐབས་ཡིན་པའི་ཕྱིར་རོ། །གསུམ་པ་སྒྲུབ་པའི་ཡན་ལག་དང་། སྐྱེས་བུ་བྱེད་པའི་འབྲས་བུ་ཆུང་ངུ་ནི། རྩ་བའི་རྒྱུད་ལེའུ་བདུན་པ་ལས། སངས་རྒྱས་ཀུན་འཛིན་དཔལ་དང་ལྡན། །ཞེས་སོགས་གནས་གསུམ་བྱིན་གྱིས་བརླབ་པ་གསུངས་པ་འདིར་སྦྱར་བར་སྣང་ཡང་གོ་རིམ་ནི་བཟློག་པར་སྣང་སྟེ། ནུ་མ་གཉིས་ཀྱི་བར་དང་། མགྲིན་པ་དང་། སྤྱི་བོར་ཟླ་བ་ལ་གནས་པའི་ཧཱུྃ་དང་ཨཱཿདང་ཨོཾ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་པ་དང་། པདྨ་འདབ་མ་བརྒྱད་པ་དང་། འཁོར་ལོ་དཀར་པོ་རྩིབས་བརྒྱད་པ་བསྒོམས་ནས་སླར་ཡང་། དེ་དག་གི་ལྟེ་བར་ཡི་གེ་གསུམ་ལས་བྱུང་བའི་ཕྱག་མཚན་གསུམ་ཡི་གེ་གསུམ་གྱིས་མཚན་པ་ལས་འོད་ཟེར་འཕྲོས་ཏེ། དེ་བཞིན་གཤེགས་པ་ཐམས་ཅད་རྡོ་རྗེ་གསུམ་པོ་ཞལ་གསུམ་ཕྱག་དྲུག་པའི་རྣམ་པར་སྤྱན་དྲངས་ཏེ། སོ་སོ་ལ་ཐིམ་པ་ལས་ཐུགས་གསུང་སྐུའི་རྡོ་རྗེ་ཞལ་གསུམ་ཕྱག་དྲུག་པའི་རྣམ་པར་བསྐྱེད་དོ། །དེ་ནས་ཐུགས་རྡོ་རྗེའི་ཡེ་ཤེས་སེམས་དཔའི་ཐུགས་ཀའི་ས་བོན་ཡི་གེ་ཧཱུྃ་ལས་འོད་ཟེར་གྱི་རྩེ་མོ་ལ་སྤྱན་མ་ལ་སོགས་པའི་རིག་མ་སྤྲོས་ཏེ། དེས་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ལ་མེ་ཏོག་སོགས་ཀྱིས་མཆོད་ཅིང་བསྟོད་ནས། རིག་མ་རྣམས་དེ་བཞིན་གཤེགས་པའི་ལུས་ལ་ཕར་ཞུགས་པས་བདེ་བ་ཐོབ་ནས་དེ་བཞིན་གཤེགས་པ་རྣམས་མདུན་གྱི་ནམ་མཁར་བྱོན་ཏེ་མདུན་གྱི་ནམ་མཁར་བཞུགས་པ་ལ། དཔལ་ལྡན་རྡོ་རྗེ་ཐུགས་འཆང་བ། །ཞེས་སོགས་ཚིགས་བཅད་དང་པོས་གསོལ་བ་བཏབ་པས། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་རང་གི་ཐུགས་རྡོ་རྗེ་ལ་ཞུགས། ཕྱོགས་བཅུར་བཞུགས་པའི་སངས་རྒྱས་རྣམས། །ཞེས་སོགས་ཚིགས་བཅད་དང་སྔགས་ཀྱིས། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་བདག་ཉིད་ཀྱི་ཐུགས་རྡོ་རྗེ་ལ་ཐིམ་པར་བསམ་ཞིང་། དེ་བཞིན་དུ་གསུང་རྡོ་རྗེ་དང་། སྐུ་རྡོ་རྗེ་ལ་ཡང་སྦྱར་བར་ཀུན་བཟང་རྒྱས་པ་ལས་གསུངས་སོ། །སྐུ་གསུང་ཐུགས་ཀྱི་རྡོ་རྗེ་ཕྱག་མཚན་གསུམ་གྱི་ལྟེ་བར་བསྒོམ་དགོས་པ་ནི་སྒྲུབ་ཐབས་གཞན་རྣམས་ལས་ཀྱང་གསུངས་ཏེ། ཀུན་བཟང་བསྡུས་པ་ལས། དྲི་མེད་རང་གི་སྙིང་དབུས་ཟླ་བ་ཡི། །རྡོ་རྗེ་ལྟེ་བའི་དབུས་གནས་ཡི་གེ་ཧཱུྃ། །ཐུགས་ཀྱི་རྡོ་རྗེ་དེ་བཞིན་ཁ་དང་ནི། །མགོ་བོར་པདྨ་འཁོར་ལོ་གནས་པ་ཡི། །ཨཱཿདང་ཨོཾ་ནི་གསུང་གི་རྡོ་རྗེ་དང་། །སྐུ་ཡི་རྡོ་རྗེ་ཉིད་དུ་བསམ་པར་བྱ། །ཞེས་དང་། བཞི་བརྒྱ་ལྔ་བཅུ་པ་ལས། རང་སྙིང་ལྐོག་མ་སྤྱི་བོའི་ཟླར། །ཧཱུྃ་ཨཱཿཨོཾ་ལས་བྱུང་བའི་གཙོ། །རྡོ་རྗེ་ཆུ་སྐྱེས་འཁོར་ལོ་ཡི། །དབུས་གནས་ཐུགས་སོགས་གསང་བ་བསྒོམ། །ཞེས་དང་། དངོས་གྲུབ་འབྱུང་བའི་གཏེར་ལས། དེ་བཞིན་སྙིང་མགྲིན་མགོ་ཟླ་ལ། །ཧཱུྃ་ཨཱཿཨོཾ་ལས་བསྐྱེད་པ་ཡི། །རྡོ་རྗེ་པདྨ་འཁོར་ལོ་ཡི། །ལྟེ་བར་ཐུགས་རྡོ་རྗེ་སོགས་བསྐྱེད། །ཅེས་དང་། རིན་ཆེན་རྡོ་རྗེ་སོགས་ཀྱིས་ཀྱང་དེ་སྐད་དུ་བཤད་དོ། །ཀུན་བཟང་རྒྱས་པ་མ་ཡིན་པའི་སྒྲུབ་ཐབས་གཞན་རྣམས་ལས། རྡོ་རྗེ་གསུམ་གྱི་ཐུགས་ཀའི་ས་བོན་ལས། སྤྱན་ལ་སོགས་པའི་རིག་མ་སྤྲོས་ཏེ། མཆོད་ཅིང་བསྟོད་ནས་གསོལ་བ་གདབ་པ་ཙམ་ལས་གཞན་གསལ་ཁ་མི་སྣང་ངོ་། །འདི་དག་ནི་རྩ་རྒྱུད་ལས། སྔགས་ཀྱི་བདག་པོ་བསྒོམ་པ་ཡིས། །སྒྲུབ་པའི་ཚེ་ན་བསྐུལ་བར་གསུངས། །ཞེས་པའི་དོན་ཏེ། སྔགས་ཀྱི་བདག་པོ་ནི་སྐུ་གསུང་ཐུགས་ཀྱི་རྡོ་རྗེ་གསུམ་སྟེ། བྱ་བ་བྱེད་པ་པོ་ཡིན་པས་ན་སྐྱེས་བུ་ཞེས་ཀྱང་བྱ་ལ། དེས་སེམས་ཅན་གྱི་དོན་བྱེད་པ་ནི་སྐྱེས་བུ་བྱེད་པའི་འབྲས་བུའོ། །བཞི་པ་སྒྲུབ་ཆེན་དང་། དྲི་མ་མེད་པའི་འབྲས་བུ་ཆུང་ངུ་ནི་རང་གི་སྙིང་གར་རྡོ་རྗེ་ཆོ་ག་གསུམ་ལས་རང་འདྲའི་ཡེ་ཤེས་སེམས་དཔའ་བསྐྱེད། དེའི་ཐུགས་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་རྣམས་བསྐུལ་བས་དེ་རྣམས་ཀྱི་ཐུགས་ལས་འོད་ཟེར་བརྟོན་ནས། འོད་ཟེར་གྱི་རྩེ་མོ་ལ་གནས་པའི་རིག་མ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར་བར་གསུངས་པ་ལ་ནི་སྒྲུབ་ཐབས་ཐམས་ཅད་འདྲ་བར་སྣང་སྟེ། ཀུན་བཟང་རྒྱས་པ་ལས་འདི་ཉིད་གསལ་བར་གསུངས་ཤིང་། ཀུན་བཟང་བསྡུས་པ་ལས། ཕྱོགས་བཅུ་ཀུན་ན་བཞུགས་པའི་ཐུབ་པའི་ཚོགས། །སྙིང་པོའི་འོད་ཟེར་རྣམས་ཀྱིས་ཡང་དག་བསྐུལ། །ཐུབ་པའི་མཆོག་གི་འོད་ཟེར་ལས་བྱུང་བའི། །རིག་པཾའི་ཚོགས་རྣམས་ཕྱག་ན་བུམ་བསྣམས་ཏེ། །ཡེ་ཤེས་ཆུ་ཡིས་མངོན་པར་དབང་བསྐུར་བས། །རང་གི་རིགས་ཀྱི་གཙོས་བརྒྱན་ཅོད་པཎ་གྱུར། །ཞེས་དང་། བཞི་བརྒྱ་ལྔ་བཅུ་པ་ལས། ཡེ་ཤེས་སེམས་ཐུགས་སྙིང་འོད་ཀྱིས། །ཕྱོགས་བཅུའི་མགོན་པོ་ཡང་དག་བསྐུལ། །དེ་འོད་ལས་བྱུང་རིག་མ་རྣམས། །བདུད་རྩིའི་ཆུས་གང་བུམ་བསྣམས་པས། །གཙོ་བོ་དཔལ་ལྡན་རང་དབང་བསྐུར། །རིག་དབང་ཅོད་པཎ་དམ་པ་ཡིན། །ཞེས་དང་། དངོས་གྲུབ་འབྱུང་བའི་གཏེར་ལས། ཡེ་ཤེས་སེམས་དཔའི་ས་བོན་གྱི། །འོད་ཀྱིས་ཕྱོགས་བཅུའི་མགོན་པོ་བསྐུལ། །དེ་ཡི་འོད་ཟེར་ལས་བྱུང་བའི། །སྤྱན་ལ་སོགས་པ་མཆོག་རྣམས་ཀྱིས། །བདུན་རྩི་ལྔ་ཡི་ཆུས་གང་བའི། །བུམ་པས་དབང་བསྐུར་བཀྲ་ཤིས་སྒྲ། །རྔ་བརྡུང་དྲིལ་སོགས་རོལ་མོ་སྒྲ། །དབུ་རྒྱན་རྡོ་རྗེ་འཆང་ལྡན་བྱ། །ཞེས་གསུངས་ཤིང་། རིན་ཆེན་རྡོ་རྗེ་དང་། བསོད་སྙོམས་པས་ཀྱང་འདི་ཁོ་ན་ལྟར་བཤད་དོ། །འཇིག་རྟེན་དབང་ཕྱུག་གི་སྒྲུབ་ཐབས་ལས་ནི། ས་བོན་གྱི་འོད་ཀྱིས་དེ་བཞིན་གཤེགས་པ་རྣམས་མདུན་གྱི་ནམ་མཁར་སྤྱན་དྲངས་པ་ལ་བྱང་ཆུབ་རྡོ་རྗེས་སོགས་ཀྱིས་གསོལ་བ་བཏབ་པས་དེ་དག་གི་ཐུགས་ཀ་ནས་འོད་ཟེར་གྱི་རྩེ་མོ་ལས་རིག་མ་བྱོན་པ་སོགས་སྔར་བཞིན་གསུངས་སོ། །ཀུན་བཟང་རྒྱས་པ་ལས། ཡེ་ཤེས་སེམས་དཔའ་བསྐྱེད་པའི་སྐབས་སུ་ལྷ་བཅུ་དགུའི་གནས་དང་བཅས་པའི་ཡེ་ཤེས་སེམས་དཔའ་གྲུབ་པ་ནི་ཞེས་དང་། རིག་མ་རྣམས་ཀྱི་ཕྱག་ན་བཾ་ཡོངས་སུ་གྱུར་པ་ལས་བུམ་པ་དང་། ས་ཧ་ཡོངས་སུ་གྱུར་པ་ལས་ཡེ་ཤེས་ཀྱི་ཆུས་གང་བར་བསམ་སྟེ་ཞེས་དང་། དབང་བསྐུར་ཚེ་རུ་རུ་ཕུ་རུ་ཞེས་སོགས་ཀྱི་སྔགས་བཞི་བརྗོད་པ་དང་། རྒྱས་གདབ་ཀྱི་ཚེ་གཙོ་བོ་དང་། ཡེ་ཤེས་སེམས་དཔའ་དང་། སྐྱེ་མཆེད་ཀྱི་ལྷ་དྲུག་དང་། ཐུགས་གསུང་སྐུའི་ལྷ་གསུམ་སྟེ་བཅུ་གཅིག་གི་རྒྱས་གདབ་རྣམས་རྒྱས་པར་གསུངས་ལ་སྒྲུབ་ཐབས་གཞན་རྣམས་ལ་འདི་དག་གི་གསལ་ཁ་མི་སྣང་ཞིང་རྒྱས་གདབ་ཀྱི་ཚེའང་གཙོ་བོ་འབའ་ཞིག་གི་རྒྱས་གདབ་ལས་མ་གསུངས་པ་ནི་རྒྱས་བསྡུས་ཀྱི་ཁྱད་པར་ཡིན་པར་མངོན་ནོ། །གཉིས་པ་ཡན་ལག་དང་འབྲས་བུ་འབྲིང་བཞིས་རྗེ་བཙུན་ཡུམ་བསྐྱེད་པ་ལ་གཉིས་ཏེ། མཐའ་དཔྱད་པ་དང་། ཉམས་ལེན་གྱི་རིམ་པ་བཤད་པའོ། །དང་པོ་ནི་རིན་ཆེན་རྡོ་རྗེས། མི་བསྐྱོད་པའི་སྒྲུབ་ཐབས་ལས། དེ་ལ་ལ་ལ་དག་ནི་སྡིག་པ་བཤགས་པ་ལ་སོགས་པ་ནས་བརྩམས་ཏེ། གཞལ་ཡས་ཁང་དང་ཟླ་བ་ཞུ་བ་བསྒོམ་པ་སྔོན་དུ་འགྲོ་བས་རིག་པ་ལོགས་ཤིག་ཏུ་བསྐྱེད་པའི་བར་བྱས་ལ་རང་དང་འདྲ་བའི་རིག་པར་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་པའི་མཐར་ཐུག་པའི་བསྙེན་པ་བར་མ་ཡིན་པར་འདོད་མོད་ཀྱི། དེ་བཞིན་ཡང་དག་ལྟས་ཞེས་བྱ་བ་ལྟས་ཞེས་བྱེད་པའི་ཚིག་དང་འབྲེལ་པ་དང་། སྤྲུལ་ཞེས་བྱ་བའི་འདས་མ་ཐག་པའི་ཚིག་གིས་བཤད་པ་ལས་ནི་འདི་དག་དེ་ལྟ་མ་ཡིན་ནོ་ཞེས་གཞན་དག་འདོད་དེ། གཞན་དུ་ན་དེ་ལྟར་སྤྲུལ་ཞེས་བྱ་བ་ནི་སྙན་མངགས་མཁན་ཆེན་པོ་པ་ཉིད་ཀྱིས་སྨྲ་བར་ནུས་མོད་ཀྱི་དེ་ལྟར་མ་བཤད་དེ། དེ་ལྟར་ན་ཐེ་ཚོམ་མེད་པར་ལྟ་བར་འགྱུར་བ་ཡིན་པ་དང་། ཡང་བསྐྱེད་པ་ལ་དོན་མེད་པའམ། དཀྱིལ་འཁོར་པ་རེ་རེའང་རིག་པ་རེ་རེ་ནས་བསྐྱེད་དགོས་པར་ཐལ་བར་འགྱུར་ཏེ། ཁྱད་པར་མེད་པའི་ཕྱིར་རོ། །ཡང་ན་ཁྱད་པར་ཡོད་དོ་ཞེ་ན་དེ་ཉིད་དེ་ལྟ་ན་ནི་ཐབས་ཀྱི་ཆ་དང་ཤེས་རབ་ཀྱི་ཆ་ལས་འགྱུར་རོ། །དཀྱིལ་འཁོར་གྱི་ཆོ་གར་ཡང་ཁྱད་པར་མ་བསྟན་ནོ། །དེ་བས་ན་ཅིག་ཆར་བསྐྱེད་པ་ཡང་ལས་དང་པོ་པ་ཉིད་ཀྱིས་སྐུ་མདོག་དང་ཕྱག་མཚན་ལ་སོགས་པ་བསྒོམ་པར་མི་ནུས་པས་ན། ཕྱིས་སྐུ་མདོག་དང་ཕྱག་མཚན་ལ་སོགས་པ་བསམ་པ་འདི་ནི་བསྙེན་པ་བར་མ་ཡིན་ནོ་ཞེས་བྱ་བར་རིགས་ཏེ། དེས་ན་དེ་བཞིན་བལྟས་ཞེས་བྱ་བ་ཡང་གོ་རིམ་དུ་གྱུར་པ་ཡིན་ནོ། །ཤིན་ཏུ་སྤྲོས་པས་ཆོག་གོ་ཞེས་བཤད་དོ། །དེ་དག་ནི་མི་འཐད་དེ། ཆོ་གའི་སྒོ་ནས་བསྐྱེད་པ་ལ་བལྟས་ཞེས་བྱེད་པའི་ཚིག་ཏུ་འགྱུར་བའི་ངེས་པ་མེད་པའི་ཕྱིར་དང་། སྤྲུལ་ཞེས་པ་བསྐྱེད་ཆོག་ལ་མི་འཇུག་པ་ཡང་མ་ཡིན་པའི་ཕྱིར་ཏེ། དེའི་འགྲེལ་པར་ཐ་ག་པཾས། དེས་སྤྲུལ་པ་ནི་བསྐྱེད་པའོ། །ཞེས་གསུངས་པས་སོ། །ལོགས་སུ་བསྐྱེད་པ་ལ་དོན་མེད་པ་ཡང་མ་ཡིན་ཏེ། ཡན་ལག་དང་འབྲས་བུ་འབྲིང་པོ་བཞི་བྱ་དགོས་པའི་ཕྱིར་རོ། །ཡབ་ཡུམ་གཉིས་པོ་བསྐྱེད་ཆོག་སོ་སོར་བསྐྱེད་པས་འཁོར་གྱི་ལྷ་རེ་རེ་ནས་བསྐྱེད་ཆོག་སོ་སོར་དགོས་པར་ཡང་མ་ངེས་ཏེ། འཁོར་གྱི་ལྷ་རྣམས་ནི་དཀྱིལ་འཁོར་རྒྱལ་མཆོག་གི་ཚུལ་གྱིས་བསྐྱེད་པ་དེ་ཉིད་ཡན་ལག་དང་འབྲས་བུ་ཆེན་པོ་ཡིན་པའི་ཕྱིར་རོ། །ཐབས་ཀྱི་ཆ་དང་། ཤེས་རབ་ཀྱི་ཆ་ཡང་འགྱུར་རོ་ཞེས་པའི་དོན། གཙོ་བོ་ལ་བསྐྱེད་ཆོག་ཡོད་པ་དང་། འཁོར་ལ་བསྐྱེད་ཆོག་མེད་པར་འགྱུར་རོ་ཞེས་པའི་དོན་ཡིན་ན་ནི། དེའི་སྐྱོན་གྱིས་མི་གོས་ཏེ། འཁོར་ལ་དཀྱིལ་འཁོར་རྒྱལ་མཆོག་གི་བསྐྱེད་ཆོག་ཡོད་པའི་ཕྱིར་རོ། །དཀྱིལ་འཁོར་གི་ཆོ་གར་ཁྱད་པར་མ་བསྟན་པ་ཡང་མ་ཡིན་ཏེ། དེ་བཞིན་རྒྱུ་མཐུན་སོགས་བར་མས། །རང་རིག་ཤེས་རབ་རྣམ་པར་སྦྱང་། །ཞེས་གསུངས་པའི་དོན་ནི། ཞེས་པའི་ཚིག་གི་མངོན་བྱང་ལྔ་ལས་རྒྱུའི་རྡོ་རྗེ་འཆང་བསྐྱེད་པ་ནས་བཟུང་དགོས་པའི་ཕྱིར་རོ། །དེས་ན་སྐབས་འདིར་ཡུམ་སྐད་ཅིག་གིས་སྤྲུལ་པ་ཙམ་གྱིས་མི་ཆོག་པར་རྒྱུ་འབྲས་ཀྱི་རྒྱུ་རྡོ་རྗེ་འཛིན་པ་གཉིས་ཀ་ཚང་བའི་བསྐྱེད་ཆོག་གི་སྒོ་ནས་བསྐྱེད་དགོས་ལ། སྡིག་པ་བཤགས་པ་ལ་སོགས་པ་ནས་བརྩམས་ཏེ་གཞལ་ཡས་ཁང་ལོགས་སུ་བསྐྱེད་པའི་བར་ནི་མི་དགོས་ཏེ། ཀུན་བཟང་རྒྱས་པ་ལས། ཡབ་ཡན་ལག་བཞིས་བསྐྱེད་པའི་རྗེས་སུ་མདུན་དུ་ཡི་གེ་ཨཱཿཡོངས་སུ་གྱུར་པ་ལས་ཟླ་བའི་དཀྱིལ་འཁོར། ཟླ་བའི་དཀྱིལ་འཁོར་གྱི་གཟུགས་བརྙན་གྱི་ཚུལ་ལ་ཡི་གེ་གསུམ་གྱི་གཟུགས་ལ་རྣལ་འབྱོར་པ་འདུག་ནས་འདི་ལྟར་བསམས་ཏེ། ཞེས་སོགས་རྒྱུ་རྡོ་རྗེ་འཛིན་པ་བསྐྱེད། དེ་ནས་འགྲོ་བ་དབང་བསྐུར་དོར་ནས་ཞུ་བ་གླུས་བསྐུལ་བ་ལས་འབྲས་བུ་རྡོ་རྗེ་འཛིན་པ་རང་སྣང་གི་ཐབས་དང་སྙོམས་པར་འཇུག་པ་བསྐྱེད་པའི་བར་ཡབ་ཀྱི་གནས་སྐབས་བཞིན་དུ་གསུངས་པའི་ཕྱིར་དང་། དངོས་གྲུབ་འབྱུང་བའི་གཏེར་ལས། དེ་བཞིན་ཟླ་བ་གཉིས་ལ་སོགས། །འགྲོ་བའི་དབང་བསྐུར་མ་གཏོགས་པ། །ཐམས་ཅད་སྔོན་བཞིན་བཤེས་གཉེན་དང་། །གཟུགས་ཀྱི་ཁྱད་པར་ཤེས་བྱས་ནས། །བྱིན་གྱིས་རློབ་ཅིང་མིག་ལ་སོགས། །ས་སྙིང་སོགས་བཀོད་རྡོ་རྗེ་གསུམ། །གནས་གསུམ་མཚན་ནས་དབུ་རྒྱན་ལ། །རྡོ་རྗེ་འཛིན་པས་མཚན་མའོ། །ཞེས་གསལ་བར་གསུངས་པའི་ཕྱིར་རོ། །དེས་ན་འདིར་བསྙེན་པའི་ཡན་ལག་རྒྱུན་བཤགས་ནས་བརྩམས་པ་དང་། ཟླ་བ་གཉིས་སོགས་ནས་བརྩམས་པ་དང་། སྐད་ཅིག་གིས་སྤྲུལ་པ་གསུམ་ལས། བར་པ་འདི་ཉིད་བླ་མ་ཆེན་པོ་དང་། སྨན་པའི་ཞབས་ཀྱིས་གསལ་བར་གསུངས་པས། ཀུན་བཟང་བསྡུས་པ་ལས། དེ་བཞིན་རང་གི་ལྷ་འདྲ་རང་སྙིང་པོས། །སྤྲུལ་པའི་རིག་པ་འདི་གཉིས་ཡང་དག་ལྟས། །ཞེས་དང་། བཞི་བརྒྱ་ལྔ་བཅུ་པའི་ལུང་སྔར་དྲངས་པ་དང་། བསོད་སྙོམས་པས་མཆོག་གི་བསྙེན་པ་ལ་སོགས་པའི་ཡན་ལག་འདི་དག་གིས་རྒྱུ་མཐུན་པའི་འབྲས་བུ་འབྲིང་པོ་ལ་སོགས་པ་ནི་རང་དང་འདྲ་བ་བསྐྱེད་པར་བྱའོ་ཞེས་དང་། ཇོ་བོ་རྗེས། དེ་ནས་རང་དང་འདྲ་བའི་རིག་པ་ཡང་བདག་ཉིད་ལྷར་བསྐྱེད་པ་ཆུང་ངུ་ལ་སོགས་པའི་རིམ་པས་མིག་ལ་སོགས་པ་བྱིན་གྱིས་བརླབ་པ་དང་། ཐུགས་དང་། གསུང་དང་། སྐུའི་རྡོ་རྗེ་ལ་སོགས་པ་སྐུའི་རྡོ་རྗེར་བྱིན་གྱིས་བརླབ་པ་དང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་བྱ་སྟེ། ཡན་ལག་བཞི་པ་བར་མ་རྫོགས་པར་བྱས་ནས་རིགས་ལྔ་དང་བསྲེ་བར་བྱའོ་ཞེས་གསུངས་པའི་དགོངས་པ་ཡང་འདི་ཉིད་ལས་མ་འདས་སོ། །གཉིས་པ་ནི་ཇི་སྐད་བཤད་པའི་བསྙེན་པའི་ཡན་ལག་དང་། རྒྱུ་མཐུན་པའི་འབྲས་བུ་བར་མ་བྱས་ནས་ཉེ་བར་སྒྲུབ་པ་དང་། རྣམ་པར་སྨིན་པའི་འབྲས་བུ་བར་མ་ལ་ནི་སྒྲུབ་ཐབས་ཐམས་ཅད་ལ་ཁྱད་པར་མི་སྣང་ངོ་། །ཡན་ལག་དང་པོ་ལ་འགྲོ་བ་དབང་བསྐུར་དོར་བ་ནི། ཀུན་བཟང་རྒྱས་པ་དང་། དངོས་གྲུབ་འབྱུང་བའི་གཏེར་ལས་གསལ་བར་གསུངས་སོ། །སྒྲུབ་པའི་ཡན་ལག་དང་སྐྱེས་བུ་བྱེད་པའི་འབྲས་བུ་འབྲིང་པོ་ནི་སྒྲུབ་ཐབས་གཞན་རྣམས་ལས་སྔ་མ་བཞིན་ཞེས་པ་ལས་གཞན་ཁྱད་པར་མ་གསུངས་ཀྱང་། རིན་ཆེན་རྡོ་རྗེས་གསོལ་བ་གདབ་པ་མེད་པར་ཐུགས་དང་། གསུང་དང་། སྐུ་བྱིན་གྱིས་བརླབ་པ་ནི། སྐྱེས་བུ་བྱེད་པའི་འབྲས་བུ་བར་མ་དང་། སྒྲུབ་པ་བར་མའོ་ཞེས་གསོལ་བ་གདབ་པ་མི་དགོས་པར་གསུངས་ཤིང་། དངོས་གྲུབ་འབྱུང་བའི་གཏེར་ལས། རྡོ་རྗེ་གསུམ། གནས་གསུམ་མཚན་ནས་ཞེས་གསུངས་པས་ཡང་གསོལ་བ་འདེབས་པ་མི་དགོས་པར་གསུངས་པའི་དོན་ཡིན་པར་མངོན་ནོ། །སྒྲུབ་པ་ཆེན་པོའི་ཡན་ལག་དང་། དྲི་མ་མེད་པའི་འབྲས་བུ་འབྲིང་པོ་ནི་དབང་བསྐུར་ཞིང་རིགས་བདག་གིས་རྒྱས་གདབ་པ་ལས་སྒྲུབ་ཐབས་རྣམས་ལ་ཁྱད་པར་མི་སྣང་ངོ་། །གསུམ་པ་རྗེས་སུ་ཆགས་པའི་རྣལ་འབྱོར་ནི། རྩ་རྒྱུད་ལེའུ་བརྒྱད་པ་ལས། ནུ་མའི་དབུས་བར་སྤྱི་གཙུག་མཐའ་ཡི་བར། །ཆོ་ག་ཤེས་པས་ཡང་ན་རྐང་མཐིལ་བར། །ལྟེ་བ་སྐེད་པར་གསང་བར་རྒྱལ་བའི་སྲས། །རིགས་ལྔ་རྣམས་ནི་འགོད་པ་རབ་ཏུ་བྱ། །ཞེས་གསུངས་པའི་དོན་འདུས་པ་འཕགས་ལུགས་པ་དག དང་པོའི་མགོན་པོའི་ལུས་ལ་ལུས་དཀྱིལ་འགོད་པའི་དོན་དུ་འཆད་ཀྱང་འདིར་ནི་རྗེ་བཙུན་ཡུམ་ལ་རིགས་ལྔས་གཏམས་པའི་དོན་དུ་འཆད་པར་གཞུང་འགྲེལ་ཀུན་ཁྱད་པར་མི་སྣང་ངོ་། །འདི་ལ་གནས་ཀྱི་ངེས་པ་ནི་སྤྱི་བོ་ནས་མགྲིན་པའི་བར་དང་། ནུ་མ་གཉིས་ནས་ལྟེ་བའི་བར་དང་། དེ་ནས་གསང་གནས་ཀྱི་བར་དང་། གསང་གནས་ནས་བརླ་གཉིས་ལ་ཐུག་པའི་བར་དང་། དེ་ནས་རྐང་མཐིལ་གྱི་བར་ལ་རིམ་པ་ལྟར་རྣམ་སྣང་དང་། མི་བསྐྱོད་པ་དང་། རིན་འབྱུང་དང་། འོད་དཔག་མེད་དང་། དོན་ཡོད་གྲུབ་པ་རྣམས་འགོད་པར་གཞུང་འགྲེལ་ཕལ་ཆེར་ལས་བཤད་དོ། །ཇི་ལྟར་འགོད་པའི་ཚུལ་ནི་ཀུན་བཟང་རྒྱས་པ་ལས། སྤྱི་བོར་ཨོཾ་ཡིག་དཀར་པོ་ཟླ་བའི་དཀྱིལ་འཁོར་ཅན། རྡུལ་ཕྲ་རབ་ཀྱི་ངོ་བོ་མགྲིན་པ་ཡན་ཆད་དུ་ཁྱབ་པའོ། །སྙིང་ཁར་ཧཱུྃ་ཡིག་ནག་པོ་ཉི་མའི་དཀྱིལ་འཁོར་ཅན་རྡུལ་ཕྲ་རབ་ཀྱི་ངོ་བོ་ནུ་མའི་བར་དུ་ཁྱབ་པའོ། །ལྟེ་བའི་སྟེང་དུ་སྭཱ་ཡིག་སེར་པོ་ཉི་མའི་དཀྱིལ་འཁོར་ཅན་རྡུལ་ཕྲ་རབ་ཀྱི་ངོ་བོ་བཅུ་དྲུག་སུམ་མདོའི་མཐར་ཐུག་པ་ལ་ཁྱབ་པའོ། །པདྨའི་དབུས་ལ་ཨ་ཡིག་དམར་པོ་ཉི་མའི་དཀྱིལ་འཁོར་ཅན་རྡུལ་ཕྲ་རབ་ཀྱི་ངོ་བོ་བརླ་ལ་ཐུག་པར་ཁྱབ་པའོ། །བྱིན་པ་གཉིས་ལ་ཧ་ཡིག་ལྗང་ཁུ་ཉི་མའི་དཀྱིལ་འཁོར་ཅན་རྡུལ་ཕྲ་རབ་ཀྱི་ངོ་བོ་རྐང་པའི་བར་དུ་ཁྱབ་པའོ་ཞེས་ས་བོན་ཁོ་ན་འགོད་པར་གསུངས་སོ། །གཞུང་འདིས་སྙིང་ཁ་དང་ནུ་མ་གཉིས་ཀྱི་བར་སོ་སོར་བྱས་ལ་གཞུང་འགྲེལ་གཞན་རྣམས་ལས་དེ་གཉིས་གཅིག་པར་འཆད་ཅིང་། ཀུན་བཟང་བསྡུས་པ་ལས་ཀྱང་། དེ་ཉིད་ཤེས་པས་མགོ་དང་སྙིང་ཁ་དང་། །ལྟེ་བ་གསང་བ་དེ་བཞིན་བརླ་གཉིས་སུ། །ཨོཾ་ཧཱུྃ་སྭཱ་ཨ་ཧ་ཞེས་གྲགས་པ་རྣམས། །དེ་ནི་སྐུ་ཐུགས་རྡོ་རྗེ་བཟང་རིཾང་སོགས། །ལྔ་པོ་རྣམས་ཀྱིས་ཡང་དག་བྱིན་བརླབས་ཏེ། །ཞེས་པ་འདིས་ཀྱང་ནུ་མ་གཉིས་ཀྱི་བར་དང་སྙིང་ཁ་གཅིག་པར་བཞེད་དོ། །བཞི་བརྒྱ་ལྔ་བཅུ་པ་ལས། སྤྱི་བོ་སྙིང་ཁ་ལྟེ་བ་གསང་། །རྐང་མཐར་ཐུག་པའི་ཆ་རེ་ལ། །ཨོཾ་ཧཱུྃ་སྭཱ་ཨ་ཧ་སྙིང་པོས། །རྟག་སོགས་རིམ་གྱིས་བདག་ཉིད་ཅན། །སངས་རྒྱས་ལྔ་ཡིས་དགང་བར་བྱ། །ཞེས་དང་། དངོས་གྲུབ་འབྱུང་བའི་གཏེར་ལས། མགོ་སྙིང་ལྟེ་བ་གསང་རྐང་པར། །ཨོཾ་ཧཱུྃ་སྭཱ་ཨ་ཧ་རྣམས་སམ། །ཆ་ཤས་ངོ་བོ་ཉིད་ཀྱིས་ནི། །སངས་རྒྱས་ལྔ་ཡིས་དགང་བར་བྱ། །ཞེས་གསུངས་པའི་གཞུང་གསུམ་པོ་འདི་དང་། རྒྱལ་བས་བྱིན་གྱིས་འགྲེལ་པ་ལས་ཨོཾ་གྱི་རྣམ་པར་སྣང་མཛད་ཀྱི་རང་བཞིན་བསྒོམ་པར་བྱའོ། །ཞེས་གསུངས་པས་ནི་ས་བོན་ལྔ་བཀོད་ནས་རིགས་ལྔའི་ངོ་བོར་བྱས་ཏེ། གནས་རྣམས་སུ་ཁྱབ་པ་ཀུན་བཟང་རྒྱས་པ་དང་མཐུན་པར་མངོན་ནོ། །ཙི་ལུ་པ་དང་། ཐ་ག་པཾའི་འགྲེལ་པ་དང་། རིན་ཆེན་རྡོ་རྗེའི་སྒྲུབ་ཐབས་རྣམས་ལས་ནི་ས་བོན་ལས་ཕྱག་མཚན་ས་བོན་གྱིས་མཚན་པ་ལས་རིགས་ལྔ་བསྐྱེད་ནས་བཀོད་པའི་ཚུལ་དང་། བསོད་སྙོམས་པ་དང་། ཇོ་བོ་རྗེའི་སྒྲུབ་ཐབས་གཉིས་ལས། ས་བོན་ལས་རིགས་ལྔ་བསྐྱེད་ནས་བཀོད་པར་གསུངས་པ་གཉིས་ནི་སྔ་མ་དང་ཅུང་ཟད་མི་འདྲ་བར་སྣང་ངོ་། །དངོས་གྲུབ་འབྱུང་བའི་གཏེར་ལས། རྣམས་སམ་ཞེས་པའི་གདམས་ཀ་ཅན་ལྟར་ན་ས་བོན་འགོད་པ་དང་། དེ་ལས་རིགས་ལྔར་བསྐྱེད་ནས་འགོད་པ་གཉིས་གདམས་ཁ་ཅན་ཡིན་པར་མངོན་ནོ། །རྗེས་སུ་ཆགས་པའི་རྣལ་འབྱོར་དངོས་ནི་ཀུན་བཟང་རྒྱས་པ་ལས། ཧཱུྃ་ཡིག་དམར་པོ་ལས་ཡབ་ཀྱི་རྡོ་རྗེ་དམར་པོ་ཨོཾ་ཡིག་དཀར་པོ་ལས་ནོར་བུའི་ཆ་ལ་བུ་གར་ཕཊ་སེར་པོས་བཀག་པ་དང་། ལྷ་མོའི་པདྨ་ཧཱུྃ་ལས་པདྨ་དམར་པོ་འདབ་མ་བརྒྱད་པ་ཨ་ཡིག་དམར་པོ་ལས་ཟེའུ་འབྲུའི་བུག་པར་ཕཊ་སེར་པོས་བཀག་པར་བསམ་པར་གསུངས་ཤིང་། སྒྲུབ་ཐབས་གཞན་རྣམས་ལས་ཀྱང་མཁའ་གསང་བྱིན་གྱིས་བརླབ་པའི་ཚུལ་འདི་ཁོ་ན་ལྟར་གསུངས་སོ། །དེ་ལྟར་མཁའ་གསང་བྱིན་གྱིས་བརླབས་ནས་རྗེས་ཆགས་དངོས་ནི་ཀུན་བཟང་རྒྱས་པ་ལས། རྗེ་བཙུན་གྱི་ཡེ་ཤེས་སེམས་དཔའི་ཐུགས་ཀའི་ས་བོན་མཾ་ལས་འོད་ཟེར་འཕྲོས་ཤིང་ཕྱུང་བ་དེས་ལྷ་མོ་ལ་རེག་ནས་བདེ་བ་ཆེན་པོ་ཐོབ་སྟེ། སྐུ་དམར་པོ་དང་། སྤྱན་དམར་བ་དང་། ན་བཟའ་མེད་པ་དང་། བ་སྤུ་ལངས་པ་དང་། འདར་བར་བསམ་སྟེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་ཨཱཏྨ་ཀོ྅ཧཾ། ཞེས་བརྗོད་པ་འདིས་གྲིབ་མ་ལ་གྲིབ་མ་བཞིན་དུ་ཆུ་ལ་ཆུའམ་མར་ལ་མར་བཞིན་དུ་རྗེ་བཙུན་དང་རྗེ་བཙུན་དུ་ལྷ་མོ་དང་ལྷ་མོར་ཞུགས་པར་བསམ་མོ། །འདི་ལྟར་ཞུགས་པ་ལ་ཚངས་པའི་གནས་བཞི་ལ་སོགས་པ་ནས་རྗེས་སུ་ཆགས་པའི་བར་ནི་སྦྱོར་བ་དང་པོའི་ཏིང་ངེ་འཛིན་ཏོ་ཞེས་དང་། ཀུན་བཟང་བསྡུས་པ་ལས། ཤེས་རབ་དམ་པའི་རྒྱུ་མཐུན་ངོ་བོ་ཉིད། །ཐབས་དང་བཅས་པར་བྱུང་བ་རང་གི་ལུས། །དེ་ཡིས་བདེ་གཤེགས་རྗེས་སུ་མཉེས་བྱ་ཞེས། །སྔགས་པས་དགའ་བ་ཀུན་དུ་སྤེལ་བར་བྱ། །ཞེས་དང་། རིན་ཆེན་རྡོ་རྗེས། ཤེས་རབ་དམ་པའི་རྒྱུ་མཐུན་པའི་ཐབས་དང་བཅས་པ་ཡིན་པའི་ཕྱིར། ཕྱིན་ཅི་མ་ལོག་པའི་གཉུག་མའི་ལུས་རང་དང་། གཉིས་ཀའི་ལུས་ལ་དེ་བཞིན་གཤེགས་པ་ཐམས་ཅད་བཅུག་སྟེ་ཞེས་གསུངས་པ་རྣམས་ཀྱིས་ནི་མཁའ་གསང་བྱིན་གྱིས་བརླབས་པའི་རྗེས་སུ་མདུན་དུ་བསྐྱེད་པའི་རྗེ་བཙུན་ཡུམ་ཡབ་ཀྱི་རང་འོད་ཀྱི་རིག་མ་ལ་བཀུག དེའི་རང་འོད་ཀྱི་ཐབས་རང་ཉིད་ལ་བཅུག་ཏེ། དེ་བཞིན་གཤེགས་པ་ཐམས་ཅད་མཆོད་པའི་ཕྱིར། རྗེས་ཆགས་ཀྱི་སྦྱོར་བ་བྱ་བར་གསུངས་སོ། །དངོས་གྲུབ་འབྱུང་བའི་གཏེར་ལས། མཚན་ཉིད་ལྔ་དང་ལྡན་བསམ་ནས། །བདེ་མཆོག་འབྱུང་བར་བྱ་བའི་ཕྱིར། །རང་གི་ཤེས་རབ་ལ་ཞུགས་ནས། །དབང་པོ་གཉིས་སྦྱོར་རྗེས་ཆགས་བྱ། །ཞེས་དང་། ཇོ་བོ་རྗེས། དེ་ནས་དེ་བཞིན་གཤེགས་པ་ཐམས་ཅད་ཀྱི་བདེ་བ་ལ་ཡང་དག་པར་ལོངས་སྤྱོད་པའི་མཆོད་པའི་དོན་དུ་རང་དང་འདྲ་བ་དང་ལྷན་ཅིག་དགའ་བ་བརྩམས་པ་བྱིན་གྱིས་བརླབ་པར་བྱའོ་ཞེས་གསུངས་པ་འདིས་མདུན་གྱི་ཡབ་ཡུམ་གཉིས་སོ་སོར་ཐིམ་པ་དངོས་སུ་མི་གསལ་ཡང་སྔར་གྱི་རྗེ་བཙུན་ཡབ་ལ་རང་སྣང་གི་ཡུམ་ཡོད་པས་སོ་སོར་ཐིམ་པའི་དགོངས་པ་སྔ་མ་ལས་མ་འདས་སོ། །བཞི་བརྒྱ་ལྔ་བཅུ་པ་དང་། བསོད་སྙོམས་པའི་གཞུང་ལས། དེ་དང་ལྷན་ཅིག་དགའ་བ་བརྩམ་ཞེས་པ་ཙམ་ལས་མི་སྣང་ཡང་དགོངས་པ་སྔ་མ་ལས་མ་འདས་སོ། །ཀུན་བཟང་རྒྱས་པའི་གཞུང་སྔར་སྨོས་པ་དེས། དང་པོ་སྦྱོར་བའི་ས་མཚམས་ཚངས་པའི་གནས་བཞི་བསྒོམ་པ་ནས་འདིའི་བར་ལ་བྱ་དགོས་པ་ཡང་གསལ་བར་གྲུབ་བོ། །གསུམ་པ་རྣལ་འབྱོར་དེས་སྦྱང་གཞི་སྦྱོང་བའི་ཚུལ་ལ་གསུམ་སྟེ། སྦྱང་གཞི་སྦྱོང་བྱེད། ཇི་ལྟར་སྦྱོང་བའི་ཚུལ་ལོ། །དང་པོ་ནི་འཁྲུལ་ངོར་མ་དག་པར་སྣང་བའི་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་དོ། །ཇི་ལྟར་བྱུང་བའི་ཚུལ་ནི། ཐོག་མ་མེད་པའི་དུས་ནས་ཆོས་ཐམས་ཅད་རང་བཞིན་གྱིས་རྣམ་པར་དག་པ་གཉུག་མའི་གནས་ལུགས་རྟོག་མེད་ཀུན་དུ་སྣང་བ་ཞེས་བྱ་བའི་ཡི་གེ་ཨའི་རྣམ་པ་ཅན་བྱུང་ངོ་། །དེ་ལས་བག་ཆགས་ཀྱི་དབང་གིས་ལས་ལས་གྲུབ་པའི་རྟོག་པའི་ཡི་གེ་བྱི་བྱུང་ངོ་། །དེ་ལས་གཡོ་འགུལ་རླུང་གི་ས་བོན་ཡི་གེ་ཡཾ་བྱུང་། དེ་ལས་རྟོག་དཔྱོད་མེའི་ས་བོན་ཡི་གེ་རཾ་བྱུང་། དེ་ལས་དགའ་བདེ་ཆུའི་ས་བོན་ཡི་གེ་བཾ་བྱུང་། དེ་ལས་བརྟན་བྱེད་སའི་ཡི་གེ་ལཾ་བྱུང་། དེ་ལས་འབྱུང་བ་བཞིའི་དཀྱིལ་འཁོར་རི་རབ་དང་བཅས་པ་གླིང་བཞི་གླིང་ཕྲན་གྱིས་བསྐོར་བ་དུ་མ་བསྒྲིགས་ཏེ། སྟོང་གསུམ་མི་མཇེད་འཇིག་རྟེན་གྱི་ཁམས་རིམ་གྱིས་བྱུང་། ཡང་སྔར་གྱི་རིག་པའི་ས་བོན་བྱི་ལས་བཅུད་ཀྱི་སེམས་ཅན་གྱི་ཕུང་པོ་ལྔའི་རང་བཞིན་ཧཱུྃ་བྱུང་། དེ་ལས་སྐྱེ་གནས་བཞི་ལ་སོགས་པ་ཐམས་ཅད་བྱུང་སྟེ། འཇམ་དཔལ་ཞལ་གྱི་ལུང་ལས། དེ་ནས་འཇམ་དབྱངས་བྱང་ཆུབ་སེམས་དཔའ་སེམས་དཔའ་ཆེན་པོ་ཡིས། །བདག་ལ་འཛུམ་པའི་བཞིན་བལྟས་ལེགས་ཞེས་ལན་གསུམ་གསུངས། །རོལ་པའི་གར་དང་བཅས་ཏེ་ཆོས་ཀུན་དེ་བཞིན་ཉིད། །སྒྲ་བརྙན་ལྟ་བུར་གར་དང་བཅས་ཏེ་རྡོ་རྗེའི་གླུ་ཡིས་བདག་ལ་བསྟན། །ཨ་བྱི་ཡཾ་རཾ་བཾ་ལཾ་ཧཱུྃ་ཨ་ལ་ལ་ཧོ། །ཞེས་གསུངས་པའི་དོན་ནོ། །གཉིས་པ་ནི་ཞལ་ལུང་གི་འགྲེལ་པར་ཨ་ལས་ཀྱི་ཕྱག་རྒྱ་དང་། ལ་གསུམ་དེ་བརྟེན་ཚུལ་གྱི་རིམ་པ་དང་། ཧོ་དེ་ལས་སྐྱེས་པའི་ཡེ་ཤེས་ལ་འཆད་པ་ཡོད་མོད་ཀྱི་དེ་ནི་རྫོགས་རིམ་ཁོ་ན་འཆད་པའི་སྐབས་ཡིན་པས་འདིར་རིམ་པ་དང་པོའི་སྐབས་ཀྱི་སྦྱོང་བྱེད་ནི་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོའོ། །གསུམ་པ་ནི་ཞལ་ལུང་གི་འགྲེལ་པར། བསོད་ནམས་ཀྱི་ཚོགས་བསགས་པས་རང་རྒྱུད་ཀྱི་ལས་ཀྱི་སྒྲིབ་པ་བཟློག་པ་དང་། ཡེ་ཤེས་ཀྱི་ཚོགས་བསགས་པས་དངོས་པོར་འཛིན་པ་བཟློག་པར་གསུངས་པ་ནི་ཚོགས་གཉིས་བསག་པའི་དགོས་པ་གསུངས་པ་ཡིན་ཀྱང་སྦྱང་གཞི་དང་སྦྱར་བ་ཡང་འདི་ཉིད་ཀྱིས་འགྲུབ་སྟེ། ལས་ཀྱི་སྒྲིབ་པས་མཚོན་པའི་ཚེ་སྔ་མའི་ལས་དང་ཉོན་མོངས་པ་རྣམས་ལ་ཐ་མལ་གྱི་རྣམ་རྟོག་སྤངས་ནས་བསོད་ནམས་ཀྱི་ཚོགས་ཀྱི་ངོ་བོར་བསྒོམ་པས་དེ་སྦྱོང་བའོ། །ཡེ་ཤེས་ཀྱི་ཚོགས་ཀྱིས་དངོས་འཛིན་བཟློག་པས་སྣང་བ་ཙམ་མི་དམིགས་པའི་རྣལ་འབྱོར་བསྒོམ་པ་ཡིན་ལ་དེས་སྣོད་བཅུད་སྔ་མ་ཞིག་པ་ལ་ཐ་མལ་གྱི་རྣམ་རྟོག་སྤངས་ནས་ཡེ་ཤེས་ཀྱི་ཚོགས་ཀྱི་ངོ་བོར་བསྒོམས་པས་དེ་སྦྱོང་བའོ། །དངོས་གཞིའི་སྦྱོང་ཚུལ་ལ་སེམས་གསལ་བ་ཙམ་དུ་ལངས་པས་སྦྱོང་ཚུལ་དང་། རྟེན་གྱིས་སྣོད་སྦྱོང་ཚུལ་དང་། བརྟེན་པས་བཅུད་ཀྱི་སེམས་ཅན་སྦྱོང་བའི་ཚུལ་གསུམ་ལས་དང་པོ་ནི། ཐམས་ཅད་སྟོང་པ་གཉུག་མའི་ངང་ལས་སེམས་གསལ་བ་ཙམ་དུ་ལངས་པ་ནི་ཡེ་ཤེས་ཀྱི་ཚོགས་བསག་གི་རྗེས་སུ་ནམ་མཁར་ཡིག་འབྲུ་ལྔ་འཇོག་པ་ཡོད་ན་དེའམ། མེད་ན་སྲུང་འཁོར་གྱི་གཞིའི་ས་བོན་གྱི་ཡི་གེར་ལངས་པས་སྦྱོང་སྟེ། ཞལ་ལུང་གི་འགྲེལ་པར། དེའི་ངོ་བོ་ལས་ཤེས་པ་ཙམ་ལྟ་བུར་སྣང་བ་ནི་བྱི་སྟེ། རིག་པ་ཞེས་བྱ་བའི་མིང་གི་ཡི་གེ་དང་པོའོ་ཞེས་གསུངས་པས་སོ། །གཉིས་པ་ནི་ཞལ་ལུང་གི་འགྲེལ་པ་ལས། རང་རིག་དེ་ཡང་ཟླ་བ་སོགས། །གདན་དུ་བརྟགས་ནས་ཞེས་པ་ལ། །ཚིག་གི་དོན་འདི་འབྱུང་སྟེ། རླུང་གི་དཀྱིལ་འཁོར་ལ་སོགས་པའི་སྟོབས་ཀྱིས་གྲུབ་པའི་ས་གཞི་དང་། ལྕགས་རི་དང་། གླིང་སོ་སོའི་ཁ་དོག་ལ་སོགས་པ་བཟློག་པའི་ཕྱིར། སྲུང་བའི་འཁོར་ལོར་བརྟགས་པ་དང་། རང་རིག་པ་ཞེས་ཚིག་སྔ་མའོ། །དེའི་ནམ་མཁའ་ཐོགས་པར་བྱེད་པའི་རེག་བྱ་དང་བྲལ་བའི་ཕྱོགས་གང་ཡིན་པ་དེའི་རྟོག་པ་བཟློག་པའི་ཕྱིར་ཆོས་ཀྱི་འབྱུང་གནས་སུ་བརྟགས་པ་དང་། དེ་ལ་རི་རབ་དང་། གླིང་དང་། ཤིང་གེལ་པ་དང་། ལྷ་དང་། མིའི་གྲོང་ཁྱེར་དང་། ཁང་བཟང་ལ་སོགས་པ་བཟློག་པའི་ཕྱིར་གཞལ་ཡས་ཁང་དུ་བརྟགས་པ་དང་། དེ་ལ་གནས་མལ་ལ་སོགས་པའི་རྟོག་པ་བཟློག་པའི་ཕྱིར། ཟླ་བ་དང་། ཉི་མ་དང་། པདྨའི་གདན་དུ་བརྟགས་པའོ། །ཞེས་གསུངས་ཏེ། འདི་ནི་རྣལ་འབྱོར་ཆེན་པོའི་སྒྲུབ་པའི་ཐབས་ཐམས་ཅད་ལ་མཁོ་བ་ཞིག་སྣང་ངོ་། །གསུམ་པ་ནི་ཡང་དེ་ཉིད་ལས་དེ་ན་གནས་པའི་སེམས་ཅན་ནི་སྐྱེ་གནས་བཞིས་བསྡུས་པ་སྟེ། ཏིང་ངེ་འཛིན་ལྷག་མས་གོ་རིམ་བཞིན་དུ་དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། མངལ་ལས་སྐྱེས་པ་དང་། སྒོ་ང་ལས་སྐྱེས་པ་སྦྱོང་བ་སྟེ་ཞེས་གསུངས་པའི་དོན་རྗེ་བཙུན་ཡབ་བསྐྱེད་པ་ལྟ་བུ་ལ་སྦྱར་ན་ཟླ་བ་གཉིས་ལས་གཅིག་དུ་གྱུར་པས་ནི་དྲོད་གཤེར་སྐྱེས་སྦྱོང་སྟེ། ཟླ་བ་འོག་མ་ཨཱ་ལི་ལས་བསྐྱེད་པ་དཀར་བའི་ཆ་ཡིན་པས་གཤེར་དང་། གོང་མ་ཀཱ་ལི་ལས་བསྐྱེད་པ་དམར་བའི་ཆ་ཡིན་པས་དྲོད་དང་། དེ་གཉིས་འདུས་ནས་ཟླ་བ་གཅིག་དུ་གྱུར་པ་ནི་དེའི་ལུས་གྲུབ་པ་ཡིན་པའི་ཕྱིར་རོ། །ས་བོན་དང་ཕྱག་མཚན་ལས་རྒྱུ་རྡོ་རྗེ་འཆང་དུ་གྲུབ་པ་ནི་རྫུས་སྐྱེས་སྦྱོང་སྟེ། བསྐལ་པ་དང་པོའི་མི་རྫུས་སྐྱེས་རྣམས་ནི་གསལ་སྟོང་ལས་གྲུབ་ཅིང་ལུས་འོད་ཀྱི་རང་བཞིན་ཡིན་པ་མཚོན་པའི་ཕྱིར་རོ། །འགྲོ་བ་དབང་བསྐུར་གྱིས་མངལ་སྐྱེས་སྦྱོང་སྟེ། དཀྱིལ་འཁོར་དང་དབང་བསྐུར་བྱ་གཉིས་ཀ་མངལ་ནས་སྐྱེས་པའི་ཕྱིར་རོ། །ཞུ་བ་གླུས་བསྐུལ་བ་ལས་རྡོ་རྗེ་འཛིན་པར་བཞེངས་པས་ནི་སྒོ་ང་ལས་སྐྱེས་པ་སྦྱོང་སྟེ། ཐིག་ལེའི་གོང་བུ་དང་། ཕྱག་མཚན་གྱི་གོང་བུ་གཉིས་ལས་བྱུང་བའི་ཕྱིར་རོ། །སྔ་རབས་པ་དག་སྦྱར་ཚུལ་གཞན་དུ་འཆད་ཀྱང་གོ་རིམ་འཆོལ་བར་སྣང་བས་གོ་རིམ་བཞིན་དུ་ཞེས་པའི་ཡི་གེའི་དོན་ལ་མ་ཞུགས་སོ། །ཡང་འགྲེལ་པ་དེ་ཉིད་ལས་ཁང་པ་བརྩེགས་མའི་དབུས་ལ་ཡི་གེ་གསུམ་ལ་གནས་པའི་སེམས་བབས་པ་ལ་སོགས་པ་ནས་བཟུང་སྟེ་རྒྱུ་རྡོ་རྗེ་འཆང་བསྐྱེད་པའི་བར་ལ་དང་པོ་ཞེས་དང་། འགྲོ་བ་དབང་བསྐུར་ནས་འབྲས་བུ་རྡོ་རྗེ་འཆང་དུ་བསྐྱེད་པའི་བར་ལ་གཉིས་པ་ཞེས་དང་། སྐྱེ་མཆེད་དང་། གནས་གསུམ་བྱིན་གྱིས་བརླབ་པ་དང་། དབང་བསྐུར་བ་རྣམས་ལ་གསུམ་པ་ཞེས་དང་། ཡན་ལག་བར་མ་བཞིས་ཡུམ་བསྐྱེད་པ་ནས་དཀྱིལ་འཁོར་རྒྱལ་མཆོག་སྤྲོས་ཏེ་རང་གནས་སུ་འགོད་པའི་བར་ལ་བཞི་པ་ཞེས་གསུངས་པ་ལྟར་ན་སྐྱེ་གནས་བཞི་སྦྱོང་བ་ལ་རིམ་པ་བཞིན་སྦྱར་བ་ཡིན་ནམ་སྙམ་སྟེ་དཔྱད་དོ། །སྦྱར་ཚུལ་སྔ་མ་ལྟར་ན། ཡན་ལག་བར་མ་བཞི་དང་། ཆེན་པོ་བཞི་ལ་ཡང་སྐྱེ་གནས་བཞི་སྦྱོང་བའི་ཚུལ་སྦྱར་དགོས་ཏེ། མངལ་སྐྱེས་སྦྱོང་བ་ནི་སྔ་མ་ལས་སྦྱར་ཚུལ་གཞན་ཞིག་དགོས་སོ། །གཉིས་པ་དཀྱིལ་འཁོར་རྒྱལ་མཆོག་ལ་གཉིས་ཏེ། ཡན་ལག་བཞིས་བསྐྱེད་པ་དང་། མཆོད་བསྟོད་བདུད་རྩི་མྱོང་བའོ། །དང་པོ་ལ་བཞི་ལས། དང་པོ་བསྙེན་པའི་ཡན་ལག་དང་རྒྱུ་མཐུན་གྱི་འབྲས་བུ་ཆེན་པོ་ལ་ཡང་བདུན་ཏེ། བསྐྱེད་ཆོག་གི་ངེས་པ། འབྱིན་སྔགས་ཀྱི་ངེས་པ། མཛད་པའི་ངེས་པ། ཞལ་ཕྱག་གི་ངེས་པ། ལྷའི་གྲངས་ཀྱི་ངེས་པ། གཙོ་བོ་གོ་འཕོ་བའི་དཀྱིལ་འཁོར་གྱི་གྲངས་ཀྱི་ངེས་པ། ཡེ་ཤེས་པ་གཞུག་པའི་ངེས་པའོ། །དང་པོ་ནི་ཀུན་བཟང་རྒྱས་པ་ལས། ཡེ་ཤེས་སེམས་དཔའི་ཐུགས་ཀའི་ས་བོན་གྱིས་དེ་བཞིན་གཤེགས་པ་སྤྱན་དྲངས་ཞལ་དུ་ཞུགས་ཟླ་བ་ཞུ་བའི་གཟུགས་སུ་གྱུར་ནས་ལྷ་མོའི་པདྨར་ལྷུང་བ་ཡོངས་སུ་གྱུར་པ་ལས་མཾ་ཡིག་ཏུ་གྱུར། དེ་ལས་མི་བསྐྱོད་པ་གཙོ་བོར་གྱུར་པའི་ལྷ་བཅུ་དགུ་གྲུབ་པར་བསམ་ཞེས་ས་བོན་གཅིག་ལས་མ་གསུངས་ལ། ཀུན་བཟང་བསྡུས་པ་ལས་ཀྱང་། རང་གི་སྙིང་པོ་ལས་ནི་མ་ལུས་པའི། །རང་གི་དཀྱིལ་འཁོར་པ་ཡི་གཟུགས་བསམ་ལ། །ཞེས་པ་ལས། ས་བོན་བཅུ་དགུའི་གསལ་ཁ་མི་སྣང་ངོ་། །བཞི་བརྒྱ་ལྔ་བཅུ་པ་ལས། རྒྱལ་བའི་འཁོར་ལོ་ས་བོན་གྱིས། །དེར་བསྐྱེད་ནས་ནི་བརྟན་བྱས་ལ། །ཞེས་པ་ཡང་སྔ་མ་དང་འདྲ་བར་སྣང་ངོ་། །དེ་བཞིན་དུ་རིན་ཆེན་རྡོ་རྗེ་དང་། བསོད་སྙོམས་པ་དང་། ཇོ་བོ་རྗེས་ཀྱང་རང་རང་གི་གཙོ་བོའི་ས་བོན་ལས་སྐྱེས་པ་ཙམ་ལས་བཅུ་དགུ་དགོས་པའི་གྲངས་ཀྱི་ངེས་པ་མི་སྣང་ངོ་། །སྨན་པའི་ཞབས་ཀྱིས། པད་གནས་ཟླ་བ་ལྟ་བུ་གཟུགས། །དེ་ལས་ས་བོན་ཧཱུྃ་བཅུ་དགུའི། །མི་བསྐྱོད་པ་ཡི་འཁོར་ལོ་མཆོག །ཞེས་པ་ནི། ཐིག་ལེ་དེ་ས་བོན་ཧཱུྃ་བཅུ་དགུར་གྱུར་པར་བཞེད་པ་ཡིན་ན་ནི་སྔ་མ་རྣམས་ལ་ཡང་དེ་ལྟར་དུ་བྱ་དགོས་ལ། ཡང་ན་གཞུང་འདིའི་དོན་ས་བོན་ཧཱུྃ་ལས་ལྷ་བཅུ་དགུའི་བདག་ཉིད་ཀྱི་མི་བསྐྱོད་པའི་འཁོར་ལོ་བསྐྱེད་ཅེས་མར་སྦྱར་ན་སྔ་ཕྱི་ཐམས་ཅད་འགྲིག་པར་འགྱུར་རོ། །འདིར་གཙོ་བོའི་ས་བོན་ལས་བསྐྱེད་པ་དེ་ཡང་དཀྱིལ་འཁོར་རྒྱལ་མཆོག་གི་གཙོ་བོ་འབྲས་བུ་རྡོ་རྗེ་འཛིན་པའི་ས་བོན་ཡིན་གྱི་མངལ་གྱི་གཙོ་བོའི་ས་བོན་དུ་ནི་མ་ངེས་ཏེ། ཀུན་བཟང་རྒྱས་པ་ལས། མཾ་ལས་བསྐྱེད་པར་གསུངས་པ་དང་། ཇོ་བོ་རྗེས་ཧྲཱིཿལས་བསྐྱེད་པར་གསུངས་པ་ནི་དཀྱིལ་འཁོར་རྒྱལ་མཆོག་གི་གཙོ་བོ་ལ་དགོངས་ལ། སྨན་ཞབས་དང་། རིན་ཆེན་རྡོ་རྗེས་ཧཱུྃ་ལས་བསྐྱེད་པར་གསུངས་པ་ནི་དཀྱིལ་འཁོར་རྒྱལ་མཆོག་གི་གཙོ་བོ་ཡང་མི་བསྐྱོད་པ་ཡིན་པས་དེ་གཉིས་གཅིག་པ་ལ་དགོངས་པའི་ཕྱིར་རོ། །ཅིའི་ཕྱིར་གཙོ་བོའི་ས་བོན་ཁོ་ན་ལས་བསྐྱེད་ཅེ་ན། ལྷ་ཐམས་ཅད་ཆོས་ཀྱི་དབྱིངས་ལས་མ་བྱུང་བའི་སྐྱོན་དང་སྔགས་གཅིག་བཟླས་པས་ཐམས་ཅད་མ་བཟླས་པའི་སྐྱོན་བསལ་བའི་ཆེད་དུ་སྟེ། ཙི་ལུ་པའི་འགྲེལ་པ་ལས། རང་སྔགས་ཀྱི་ཞེས་པ་ནི་གཙོ་བོའི་སྙིང་པོ་ཁོ་ནས་བསྐྱེད་པ་སྟེ་རང་རང་གི་ས་བོན་གྱིས་མ་ཡིན་ནོ། །ཆོས་ཀྱི་དབྱིངས་ལས་མི་འབྱུང་བའི་ཕྱིར་དང་། སྔགས་གཅིག་བཟླས་པས་ཐམས་ཅད་མ་བཟླས་པའི་སྐྱོན་བསལ་ན་དབྱེ་བ་ཉེ་བར་བླངས་པའོ། །སྔགས་རྣམས་ནི་ལྷ་ཐམས་ཅད་ཀྱི་སྙིང་པོ་བསྡུས་པ་ཡིན་ཞེས་ཏེ། གཙོ་བོ་ལས་བྱུང་བ་བསྟན་པའི་ཕྱིར་རོ། །ཞེས་གསུངས་པས་སོ། །དབྱེ་བ་ཉེ་བར་བླངས་ཞེས་པ་ནི་གཙོ་བོ་གོ་འཕོ་བའི་ཚེ་ན་ས་བོན་ཐ་དད་དུ་འབྱུང་ཞེས་པ་སྟེ། སྔགས་རྣམས་ནི་ཞེས་པ་དང་དོན་གཅིག་པར་མངོན་ནོ། །འདི་དག་ཀྱང་རྡོ་རྗེ་ཆོ་ག་བཞིས་བསྐྱེད་པ་སྟེ། མངལ་དུ་ཐིག་ལེར་ཞུ་བ་ནི་བྱང་ཆུབ་སེམས་ཀྱི་ཆོ་ག དེ་ས་བོན་དུ་གྱུར་པ་ནི་ས་བོན་བསྡུ་བའི་ཆོ་ག དེ་ལས་ལྷའི་སྐུ་ཡོངས་སུ་རྫོགས་པ་ནི་གཟུགས་བརྙན་རྫོགས་པའི་ཆོ་ག དེ་ཉིད་འབྱིན་སྔགས་ཀྱིས་ཕྱུང་སྟེ་བསྡུས་ནས་རང་གནས་སུ་བཞག་པ་ནི་ཡིག་འབྲུ་འགོད་པའི་ཆོ་གའོ། །ལུགས་འདིས་རྒྱུ་འབྲས་ཀྱི་རྡོ་རྗེ་འཛིན་པ་རྣམས་དང་། འགྲོ་བ་དབང་བསྐུར་གྱི་སྐབས་སུ་སེམས་ཅན་ལྷར་བསྐྱེད་པ་རྣམས་ལ་ཡང་ཆོ་ག་བཞིས་བསྐྱེད་པར་བཞེད་དེ། རྒྱུ་རྡོ་རྗེ་འཛིན་པ་ལ་ཟླ་བ་གཉིས་ཟླ་བ་གཅིག་དུ་གྱུར་པ་ནི་ཆོ་ག་དང་པོ། དེ་ཉིད་ས་བོན་ལས་ཕྱག་མཚན་ས་བོན་གྱིས་མཚན་པར་གྱུར་པ་ནི་ཆོ་ག་གཉིས་པ། དེ་ལས་སྐུ་རྫོགས་པ་ནི་ཆོ་ག་གསུམ་པ། དེ་ཉིད་གཞན་དུ་མི་གཡོ་བར་རང་གནས་སུ་བཞག་པ་ནི་ཆོ་ག་བཞི་པའོ། །དེའི་རྒྱུ་མཐུན་གྱི་སྐུ་ལ་ཐིག་ལེར་ཞུ་བ་ནི་ཆོ་ག་དང་པོ། བར་མ་གཉིས་ནི་སྔ་མ་དང་འདྲ་ལ། སྔགས་ཀྱིས་ཆོས་ཀྱི་དབྱིངས་ཀྱི་ཡེ་ཤེས་སུ་བྱིན་གྱིས་བརླབ་པ་ནི་ཆོ་ག་བཞི་པའོ། །འགྲོ་བ་དབང་བསྐུར་ལ་ཆོ་ག་དང་པོ་གསུམ་ནི་འདྲ་ལ། ཕྱིར་སྤྲོས་ཏེ་རང་གནས་སུ་གཤེགས་པ་ནི་ཆོ་ག་བཞི་པའོ། །གཉིས་པ་ནི་ལྷ་བཅུ་གསུམ་གྱི་འབྱིན་སྔགས་བཛྲ་དྷྲྀཀ་ནས་བི་གྷཱན་ཏ་ཀྲྀཏ་ཞེས་པའི་བར་མཚན་སྔགས་དེ་ཉིད་གསུམ་གྱིས་མ་སྤེལ་བ་ཡིན་པ་ལ་ནི་སྒྲུབ་ཐབས་ཀུན་མཐུན་ཏེ། རྩ་རྒྱུད་ལེའུ་དང་པོར་དཀྱིལ་འཁོར་སྤྲུལ་བཤད་ཀྱི་སྐབས་སུ་འདི་བཞིན་དུ་བཤད་པ་ལ་དགོངས་པའོ། །རྡོ་རྗེ་མ་དྲུག་གི་འབྱིན་སྔགས་ཀུན་བཟང་རྒྱས་པ་ལས། ཨོཾ་ཨཱཿཧཱུྃ་ཞེས་པ་འབའ་ཞིག་གསུངས། ཀུན་བཟང་བསྡུས་པ་ལས། དེ་ཉིད་གསུམ་གྱི་གཟུགས་ཀྱི་རྡོ་རྗེ་སོགས། །ལྷ་མོ་རྣམས་ནི་སྐུ་ལ་སོགས་འདྲ་བར། །ཞེས་དང་། བཞི་བརྒྱ་ལྔ་བཅུ་པ་ལས། མེ་ལ་སོགས་པའི་མཚམས་བཞི་དང་། །ཤར་སྒོ་ཡི་ནི་ངོས་གཉིས་སུ། །དེ་ཉིད་གསུམ་གྱིས་གཟུགས་སོགས་པ། །མེ་ལོང་སོགས་རྣམས་སྐུ་སོགས་པ། །ཞེས་དང་། དངོས་གྲུབ་འབྱུང་བའི་གཏེར་ལས། ཨོཾ་ཨཱཿཧཱུྃ་གིས་ལྷ་མོ་དྲུག །གོ་རིམ་བཞིན་དུ་དབྱུང་བར་བྱ། །ཞེས་དང་། རིན་ཆེན་རྡོ་རྗེས། གཟུགས་རྡོ་རྗེ་མ་ལ་སོགས་པ་འདི་རྣམས་ཀྱིས་སོ་སོར་ངེས་པའི་འབྱིན་པ་ནི་མེད་པས། སྤྱིར་ཨོཾ་ཨཱཿཧཱུྃ་ཞེས་བྱ་བ་དེ་ཁོ་ན་ཉིད་གསུམ་པོ་ཉིད་ཀྱིས་དབྱུང་བར་བྱའོ་ཞེས་དང་། བསོད་སྙོམས་པས་ཕྱི་རིམ་གྱི་ཤར་ལྷོར། དེ་ཁོ་ན་ཉིད་གསུམ་གྱིས་གཟུགས་རྡོ་རྗེ་མ་སའི་སྙིང་པོ་ལྟ་བུ་མེ་ལོང་ལ་སོགས་པ་དང་ལྡན་པའོ་ཞེས་སོགས་གསུངས་པས་འདི་རྣམས་ཐུན་པར་སྣང་ངོ་། །ཇོ་བོ་རྗེས་ཨོཾ་ཨཱཿརཱུ་པ་བཛྲ་ཧཱུྃ་ཞེས་བྱ་བའི་ཡི་གེ་གསུམ་གྱི་བར་དུ་མིང་བཅུག་ལ་རེ་རེའི་སྔགས་བརྗོད་ནས་ཞེས་གསུངས་པ་ནི་འབྱིན་སྔགས་ཀྱི་སྐབས་སུ་སྔ་མ་རྣམས་དང་མི་མཐུན་པས་འདི་མི་དགོས་ཀྱང་སོ་སོའི་སྔགས་ཟློས་པར་སྤྲོ་ན་བཟླས་སྔགས་སུ་དགོས་པ་ཡང་སྲིད་དོ། །གསུམ་པ་ནི་འབྱིན་སྔགས་ཀྱིས་མི་བསྐྱོད་པ་བསམ་གྱིས་མི་ཁྱབ་པ་སྤྲོས་ཏེ། ཞེ་སྡང་གཙོ་བོར་གྱུར་པའི་སེམས་ཅན་གྱི་དོན་བྱས་ཏེ། ཞེ་སྡང་ཆེན་པོ་བསྐྱེད་པའི་རྣམ་པར་ཤེས་པའི་ཕུང་པོ་དང་། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རང་བཞིན་རང་གི་ལུས་ལ་ཐིམ་པར་བསམ་མོ་ཞེས་སོགས་རིགས་ལྔ་ལ་རིགས་བསྒྲེས་ཏེ། ཀུན་བཟང་རྒྱས་པ་ལས་གསུངས་སོ། །ཀུན་བཟང་བསྡུས་པ་ལས་ནི། སྐྱེ་བོ་དམ་པའི་དོན་མཛད་ཡང་དག་བསྐུལ། །ཞེས་པ་ཙམ་ལས་གསལ་ཁ་མི་སྣང་ལ། བཞི་བརྒྱ་ལྔ་བཅུ་པ་ལས། ཞེ་སྡང་ཆེན་པོའི་དོན་མཛད། གཏི་མུག་ཆེན་པོའི་དོན་མཛད། ཞེས་སོགས་དང་། དངོས་གྲུབ་འབྱུང་བའི་གཏེར་ལས། སངས་རྒྱས་མཛད་པ་བྱས་ནས་སུ། །ཞེས་པ་ཙམ་དང་། རིན་ཆེན་རྡོ་རྗེས། རྣམ་པར་ཤེས་པའི་ཕུང་པོ་དང་། ཐུགས་དང་། ཞེ་སྡང་ཆེན་པོ་དང་། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ངོ་བོ་མི་བསྐྱོད་པ་སྔར་བཤད་པའི་ཞལ་ལ་སོགས་པ་དང་ལྡན་པ་ཕྱུང་ལ་ཞེས་རྣམ་དག་ལ་སྦྱར་བ་ཙམ་ལས་མཛད་པ་མཛད་པའི་གསལ་ཁ་མི་སྣང་ངོ་། །བསོད་སྙོམས་པས་ཕྱིར་ཕྱུང་ལ་བསྡུས་ནས་རང་གནས་སུ་འགོད་པ་ཙམ་ལས་གཞན་མ་གསུངས་ཤིང་། ཇོ་བོ་རྗེས་ཀྱང་དེ་བཞིན་དུའོ། །ལྷག་མ་ཡུམ་བཞི་མན་ཆད་ཀྱི་མཛད་པ་སྒྲུབ་པའི་ཐབས་སུ་བྲིས་པ་རྣམས་ནི་ཀུན་བཟང་རྒྱས་པ་ཇི་ལྟ་བ་བཞིན་དུ་བྲིས་ལ། སྒྲུབ་ཐབས་གཞན་རྣམས་ལས་དེ་ཙམ་གྱི་གསལ་ཁ་མི་སྣང་ངོ་། །བཞི་པ་ནི་འདིར་དཀྱིལ་འཁོར་གྱི་གཙོ་བོ་སྐུ་མདོག་སེར་པོ་ལ་རྩ་བའི་ཞལ་ནི་སྐུ་མདོག་དང་འདྲ་ཞིང་། གཡས་པ་ནི་སྔོན་པོ། གཡོན་པ་ནི་དཀར་པོའོ། །དེ་ཉིད་ཀྱི་རིམ་པས་རྩ་བའི་ཞལ་དཀར་བའི་ཚེ་གཡོན་པ་དམར་པོར་འབྱུང་ཞིང་། རྩ་བའི་ཞལ་སྔོ་བའི་ཚེ་སྔོན་པོའི་ཚབ་ཏུ་དཀར་པོ་འགྲོ་ལ། གཡོན་པ་དམར་པོ་ཡང་སྔ་མ་དང་འདྲའོ། །དམར་པོ་དང་ལྗང་ཁུ་རྩ་ཞལ་དུ་སོང་བའི་ཚེ་དེའི་ཚབ་གཡོན་པ་དཀར་པོར་འགྲོའོ། །དེ་བཞིན་དུ་ཕྱག་མཚན་ལ་ཡང་། འདུས་པ་འཕགས་ལུགས་པ་དག་ཕྱག་དྲུག་ལ་རིགས་དྲུག་ཆར་གྱི་ཕྱག་མཚན་ཚང་བའི་རིམ་པའི་འབྲི་ལུགས་ཡོད་མོད་ཀྱི། ལུགས་འདིར་ནི་ཕྱག་དྲུག་པ་ཕྱག་མཚན་ལྔ་པ་ཅན་དུ་བཞེད་དོ། །དེ་ཡང་རྩ་ཕྱག་གཉིས་ཀྱིས་ཡབ་རྣམས་ཀྱིས་རང་འོད་ཀྱི་ཡུམ་དང་ལྷ་མོ་རྣམས་ཀྱིས་རང་འོད་ཀྱི་ཡབ་ལ་འཁྱུད་པ་ནི་ཕྱག་མཚན་གཅིག་ཏུ་བཞེད་ཅིང་། ལྷག་མ་བཞིའི་གཡས་ཀྱི་དང་པོ་རྣམས་ཀྱིས། རྩ་རྒྱུད་ལེའུ་བཞི་པར་གསུངས་པའི་རྡོ་རྗེ་དང་འཁོར་ལོ་ལ་སོགས་པ་རང་རང་གི་ཕྱག་མཚན་དང་། རྡོ་རྗེ་མ་དྲུག་གིས་མེ་ལོང་ལ་སོགས་པའི་རང་རང་གི་ཕྱག་མཚན་འཛིན་ཅིང་། གཡོན་པ་གཉིས་ཀྱིས་ནོར་བུ་དང་པདྨ་འཛིན་པའོ། །གང་གི་ཚེ་ཕྱག་མཚན་ཕྱི་མ་གཉིས་པོ་རང་རང་གི་ཕྱག་མཚན་དུ་སོང་བའི་ཚེ་དེའི་ཤུལ་དུ་འཁོར་ལོ་འགྲོ་སྟེ། ཞལ་གཞན་གྱི་ཤུལ་དུ་དཀར་པོ་འགྲོ་བ་དང་། ཕྱག་མཚན་གཞན་གྱི་ཤུལ་དུ་འཁོར་ལོ་འགྲོ་བ་འདི་ནི་རྒྱུའི་དུས་སུ་གཏི་མུག་ཉོན་མོངས་པ་ཐམས་ཅད་དང་ལྡན་པ་དང་ཁ་དོག་དཀར་པོ་ཐམས་ཅད་དུ་བསྒྱུར་དུ་རུང་བ་དང་། མེ་ལོང་ལྟ་བུའི་ཡེ་ཤེས་ཡེ་ཤེས་ཐམས་ཅད་ཀྱི་གཞི་བྱེད་པ་མཚོན་པའི་ཕྱིར་ཏེ། སྙིམ་པའི་མེ་ཏོག་ལས། རྒྱུད་འདིར་ཡང་ལྷ་ཐམས་ཅད་ཕྱག་དྲུག་དང་། ཕྱག་མཚན་ལྔ་ཅན་ཏེ། ལེའུ་བཅུ་དགུ་པ་ལས། རྡོ་རྗེ་ཕྱག་དྲུག་མཚོན་བྱ་ནི། །བཟང་པོ་སྣ་ཚོགས་བསྣམས་པར་བསྒོམ། །ཞེས་གསུངས་པའི་ཕྱིར་རོ། །ལྷ་རྣམས་ཀྱི་ཕྱག་མཚན་རེ་རེར་གསུངས་པ་གང་ཡིན་པ་དེ་ཡང་དེ་རྣམས་ཀྱི་ཁྱད་པར་གྱི་ཕྱག་མཚན་ཡིན་པར་རིགས་ཏེ། ལྷག་མ་བཞི་ནི་རིགས་པས་ཤེས་པར་བྱའོ། །དེ་ལ་རིགས་པ་ནི་འདི་ཡིན་ནོ། །ལེའུ་གསུམ་པ་ལས། ཕྱག་མཚན་རྣམས་ཀྱི་དང་པོ་བསྟན་པ་དེ་ནི་དེ་རྣམས་ཀྱི་གཙོ་བོ་བསྟན་པའི་དོན་ཏོ། །དེ་ཡང་དེ་བཞིན་གཤེགས་པ་ལྔ་པོ་ཁོ་ན་ཡིན་ནོ། །དེ་བས་ན་དེ་བཞིན་གཤེགས་པའི་ཕྱག་མཚན་རྣམས་ཀྱང་ཅི་རིགས་པར་ལྷ་རྣམས་ཀྱི་ཕྱག་ལ་ཡང་བརྗེ་བར་བྱའོ། །དེ་ལ་མི་བསྐྱོད་པ་ནི་ཆོས་ཀྱི་དབྱིངས་ཀྱི་རང་བཞིན་ཉིད་ཡིན་པའི་ཕྱིར་རོ། །ཆོས་ཀྱི་དབྱིངས་ཀྱང་ཕྱག་མཚན་ཡིན་ལ། དེའི་ཡེ་ཤེས་ཀྱང་ཡིན་ཏེ། ལེའུ་གསུམ་པ་ལས། ཚོགས་གཉིས་དང་ནི་ལྡན་པ་ཡི། །མི་བསྐྱོད་པ་ཡི་རྒྱ་མཆོག་དང་། །ཞེས་གསུངས་པའི་ཕྱིར་རོ། །དེ་བས་ན་འདིའི་ཕྱག་མཚན་འདི་གཉིས་ཀ་གཞན་དག་ལ་ཡང་སྦྱར་བར་བྱ་སྟེ། ཤེས་རབ་དང་ཡེ་ཤེས་ལ་བརྟེན་པ་ཉིད་ཀྱིས་ནི་ཤིན་དུ་གཙོ་བོ་ཉིད་ཡིན་པའི་ཕྱིར་རོ། །དེ་བས་ན་ཐབས་ཀྱི་རང་བཞིན་གྱི་ལྷ་རྣམས་རྩ་བའི་ཕྱག་གཉིས་ཀྱིས་ཤེས་རབ་ལ་འཁྱུད་པ་ཅན་ཡིན། ཤེས་རབ་ཀྱི་རང་བཞིན་གྱི་ཡང་དེ་གཉིས་ཀྱིས་ཐབས་ལ་འཁྱུད་པ་ཅན་ཡིན་ནོ། །ཐམས་ཅད་ཀྱི་གཡས་པའི་གཉིས་པས་ཁྱད་པར་གྱི་ཕྱག་མཚན་བསྣམས་པ་ཡིན་ལ། གཅིག་ཤོས་གསུམ་པས་ནི་རལ་གྲིའོ། །གཡོན་ལ་ནི་གོ་རིམ་བཞིན་དུ་ནོར་བུ་དང་པདྨའོ། །གནས་འཕྲོག་པར་བྱེད་པའི་གནས་ལ་ནི་འཁོར་ལོ་ཡིན་ཏེ། གཏི་མུག་ཉིད་ཀྱིས་དང་པོ་ཡིན་པའི་ཕྱིར་རོ། །གང་དག་ལ་ཁྱད་པར་གྱི་མཚན་མ་འཁོར་ལོ་མེད་པ་དེ་དག་ནི་ཐུན་མོང་དུ་གཏི་མུག་གི་མཚན་མ་ལུས་ཉིད་ཡིན་ནོ། །ཆོས་ཀྱི་དབྱིངས་ནི་མ་ཡིན་ཏེ། དེ་དག་གི་ནང་ནས་རྩ་བའི་ཕྱག་གཉིས་ཀྱིས་འཁྱུད་པ་ཉིད་ཀྱི་ཕྱིར་རོ། །རྡོ་རྗེ་ཅན་དག་གིས་གཡས་ཀྱི་གཉིས་པ་ལ་ནི་རྡོ་རྗེའོ། །ཆོས་ཀྱི་དབྱིངས་ཀྱིས་ནི་ཆོས་འབྱུང་གི་ཕྱག་རྒྱ་སྟེ་ཁྱད་པར་གྱི་ཕྱག་མཚན་གྱི་དོན་ཡིན་ནོ། །སྐུ་མདོག་གི་རིགས་པ་ནི་སྔར་བཤད་ཟིན་ཏོ། །རྣམ་པར་དག་པའི་དབྱེ་བ་ནི་ལ་ལར་རྣམ་པ་གཞན་དུ་ཡང་འགྱུར་རོ་ཞེས་གསུངས་པས་སོ། །ལྔ་པ་ནི་རྩ་རྒྱུད་ལེའུ་དང་པོར་ཕྱུང་བའི་དཀྱིལ་འཁོར་ལ་ལྷ་བཅུ་གསུམ་དང་། ལེའུ་བཞི་པར་བྲིས་པའི་དཀྱིལ་འཁོར་ལ་ཡང་ལྷ་བཅུ་གསུམ་དུ་གསུངས་ལ། ཅིའི་ཕྱིར་ལྷ་བཅུ་དགུ་མཛད་ཅེ་ན་འཕགས་མཆོག་ཀླུ་སྒྲུབ་ཀྱིས་བཤད་རྒྱུད་རྡོ་རྗེ་ཕྲེང་བ་ལས། ལུས་དཀྱིལ་ལ་ལྷ་སུམ་ཅུ་སོ་གཉིས་འགོད་པར་གསུངས་པའི་ལུང་དང་། རྒྱུ་ལུས་དཀྱིལ་གྱི་ལྷ་སོ་གཉིས་སུ་གྲངས་ངེས་པས། འབྲས་བུ་ཕྱུང་བའི་དཀྱིལ་འཁོར་དང་། བྲིས་པའི་དཀྱིལ་འཁོར་ལ་ཡང་ལྷ་སུམ་ཅུ་སོ་གཉིས་སུ་ངེས་པའི་རིགས་པས་དཀྱིལ་འཁོར་གྱི་ལྷའི་གྲངས་ངེས་བསྒྲུབ་པ་རྣམ་གཞག་རིམ་པ་དང་། སྒྲོན་གསལ་ལས་འབྱུང་བ་ནི་ཤིང་རྟའི་སྲོལ་གཞན་ཡིན་ནོ། །འདིར་ལྷ་བཅུ་དགུར་གྲངས་ངེས་པར་བསྒྲུབ་པ་ལ་འཁོར་བའི་འདྲ་འབག་གི་སྒོ་ནས་ལྷ་བཅུ་དགུར་གྲངས་ངེས་པར་བསྒྲུབ་པ་དང་། ཐར་པའི་འདྲ་འབག་གི་སྒོ་ནས་ལྷ་བཅུ་དགུར་གྲངས་ངེས་པ་དང་། གྲངས་གཞན་དུ་རྟོག་པ་མི་འཐད་པ་དང་གསུམ་གྱིས་རྟོགས་པར་བྱ་བ་ལས། དང་པོ་ནི། ཙི་ལུ་པའི་འགྲེལ་པ་ལས། དེ་བས་ན་དེ་རྣམས་ནི་འབྱུང་བ་ལས་གྱུར་པའི་ནང་གི་སྐྱེ་མཆེད་དག་པས་ན་དེ་བྱིན་གྱིས་བརླབ་པ་དགོས་ཀྱི་རྒྱུ་དེ་མེད་པའི་དཀྱིལ་འཁོར་གཉིས་ཀྱི་ལྷ་མ་ཡིན་པར་ཤེས་སོ་ཞེས་དང་། རྡོ་རྗེ་མ་དྲུག་གི་སྐབས་སུ་རྒྱུའི་ཚོགས་པ་མངའ་བས་ན་དཀྱིལ་འཁོར་གྱི་ལྷ་ཡང་ཡིན་ནོ་ཞེས་དང་། ལེའུ་དང་པོའི་དཀྱིལ་འཁོར་སྤྲུལ་བཤད་ཀྱི་མཇུག་ཏུ། དེ་བས་ན་འབྱིན་པའི་དཀྱིལ་འཁོར་ལ་ལྷ་བཅུ་དགུར་ངེས་པས་ན་འབྲི་བའི་དཀྱིལ་འཁོར་ཡང་དེ་བཞིན་དུ་ཤེས་པར་བྱའོ་ཞེས་གསུངས་པ་རྣམས་ཀྱིས་བསྟན་ཏེ། འདིའི་དོན་སྦྱང་གཞི་སྦྱོང་བའི་དབང་དུ་བྱས་པ་དང་། སྤང་གཉེན་བླང་དོར་གྱི་དབང་དུ་བྱས་པ་གཉིས་ལས། དང་པོ་ལ་ཕུང་པོ་ལྔ་སྦྱོང་བ་ལ་རིགས་ལྔ། ཁམས་བཞི་སྦྱོང་བ་ལ་ཡུམ་བཞི། ནང་གི་སྐྱེ་མཆེད་དྲུག་སྦྱོང་བ་ལ་སེམས་དཔའ་དྲུག ཕྱིའི་སྐྱེ་མཆེད་དྲུག་སྦྱོང་བ་ལ་ལྷ་མོ་དྲུག་དགོས་པ་ལས། སེམས་དཔའ་དྲུག་གི་སྦྱང་གཞི་ནང་གི་སྐྱེ་མཆེད་དྲུག་ནི་འབྱུང་བ་ལས་གྱུར་པའི་ནང་གི་སྐྱེ་མཆེད་ཡིན་ལ། དེ་ཕྱི་རོལ་ན་མེད་པས་ཏིང་ངེ་འཛིན་གྱི་དཀྱིལ་འཁོར་དང་། རི་མོའི་དཀྱིལ་འཁོར་གཉིས་ལ་སྦྱོང་བྱེད་སེམས་དཔའ་དྲུག་མ་བཀོད་དོ། །འོ་ན་དེའི་སྦྱོང་བྱེད་ཆད་པར་འགྱུར་རོ་སྙམ་ན་མ་ཡིན་ཏེ། ཡན་ལག་དང་འབྲས་བུ་ཆུང་ངུ་དང་། འབྲིང་དང་། ཆེན་པོ་གསུམ་ཆར་གྱི་ཉེར་སྒྲུབ་ཀྱི་སྐབས་སུ་མིག་སོགས་སེམས་དཔའ་དྲུག་ཏུ་བྱིན་གྱིས་བརླབ་པ་དེ་ཉིད་ཀྱིས་སྦྱོང་བའི་ཕྱིར་རོ། །དེས་ན་རིན་ཆེན་རྡོ་རྗེས་སྐབས་འདིར་ལྷ་ཉེར་གཅིག་འགོད་པ་ཡང་མི་འཐད་པར་གྲུབ་བོ། །འདི་དག་ཀྱང་འཕགས་ལུགས་ལ་ལུས་དང་། ཕྱུང་བའི་དཀྱིལ་འཁོར་གཉིས་ཀ་ལ་ལྷ་སོ་གཉིས་ཚང་བར་བཀོད་ཀྱང་། འདིར་ནང་གི་སྐྱེ་མཆེད་སྦྱོང་བྱེད་ནང་གི་སྐྱེ་མཆེད་ལ་བཀོད། ཕྱིའི་སྐྱེ་མཆེད་སྦྱོང་བྱེད་དཀྱིལ་འཁོར་ལ་བཀོད་ཅེས་པའི་དོན་ཡིན་གྱི་སྦྱང་གཞི་ཕྱི་རོལ་ན་མེད་ན་དཀྱིལ་འཁོར་གཉིས་ལ་མི་བཀོད་པས་ཁྱབ་ཅེས་པའི་དོན་དུ་མི་བཟུང་ངོ་། །གཉིས་པ་ནི་སྤང་བྱ་མ་དད་པ་སོགས་བཞི་དང་། བདུད་བཞི་དང་། སྒྲིབ་པ་བཞི་སྤངས་ནས་བླང་བྱ་དད་སོགས་དབང་པོ་བཞི་དང་། སྤྱི་ཁྱབ་ཏུ་ཤེས་རབ་ཀྱི་དབང་པོས་ཐར་པའི་གྲོང་ཁྱེར་དུ་འཇུག་པའི་དབང་དུ་བྱས་ནས་ཁྲོ་བོ་བཞི་སྟེ། དགོས་པ་དེ་དག་བསྒྲུབ་པ་ལ་ཉེར་སྒྲུབ་ཀྱི་སྐབས་སུ་སེམས་དཔའ་དྲུག་དང་། ཕྱུང་བ་དང་བྲི་བའི་དཀྱིལ་འཁོར་ལ་ལྷ་བཅུ་དགུར་གྲངས་ངེས་པ་ནི་ངོ་མཚར་རྨད་དུ་བྱུང་བའི་སྲོལ་དུ་སྣང་ངོ་། །གཉིས་པ་ནི་རྒྱལ་བས་བྱིན་གྱི་འགྲེལ་པར་འདི་ལྟར་བཤད་དེ་རྡོ་རྗེ་མ་དྲུག་མཆོད་པའི་རང་བཞིན་ཡིན་པའི་ཕྱིར། འབྱིན་པའི་དཀྱིལ་འཁོར་ལ་འགོད་ཅིང་། སའི་སྙིང་པོ་ལ་སོགས་པ་འབྱིན་པ་མེད་པས། དཀྱིལ་འཁོར་པ་བཅུ་དགུར་གྲངས་ངེས་སོ། །ཅིའི་ཕྱིར་གྲངས་ངེས་ཅེ་ན་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་གྱི་རང་བཞིན་རྣམ་པར་ཐར་པའི་སྒོ་བཞི་ཁྲོ་བོ་བཞིའི་ངོ་བོས་མ་དད་པ་དང་། ལེ་ལོ་དང་བརྗེད་ངེས་པ་དང་། རྣམ་པར་གཡེང་བ་དང་བྲལ་ནས་ཤེས་རབ་ཀྱིས་ཐར་པའི་གྲོང་ཁྱེར་དུ་འཇུག་པའི་ཕྱིར་ན་ཁྲོ་བོ་བཞི། གཟུགས་བརྙན་གྱི་སྦྱོར་བས་མེ་ལོང་གི་གཟུགས་བརྙན་དང་འདྲ་བའི་སངས་རྒྱས་ཀྱི་སྐུ་བསྟན་ནས་དེ་ཐོབ་པའི་ཆོས་སྒྲ་རྡོ་རྗེ་མ་བསྟན་པ་ལས་ཐོས་ནས་དེ་རྣམས་ལ་བདག་མེད་པར་མོས་པའི་དྲི་དང་། དེ་ལ་གོང་ནས་གོང་དུ་མོས་པའི་རོའི་དབང་དུ་བྱས་ནས་རྡོ་རྗེ་མ་དང་པོ་བཞི་སྟེ་ཚོགས་ལམ་གྱི་ཉམས་ལེན་བསྟན་ནོ། །དེས་ཀྱང་སྣང་བ་ཐོབ་པ་དང་། སྣང་བ་མཆེད་པ་དང་། དེ་ཁོ་ན་ཉིད་ཀྱི་དོན་གྱི་ཕྱོགས་གཅིག་ལ་རབ་དུ་འཇུག་པ་དང་། བར་ཆད་མེད་པའི་ཏིང་ངེ་འཛིན་གྱི་མཚན་ཉིད་དང་། ངེས་འབྱེད་ཆ་བཞི་ལ་རེག་པ་ནི་རེག་རྡོ་རྗེ་མའོ། །དེ་ནས་ས་དང་པོར་ཐམས་ཅད་དུ་འགྲོ་བའི་སྟོང་པ་ཉིད་མངོན་དུ་བྱེད་པ་ནི་ཆོས་དབྱིངས་རྡོ་རྗེ་མའོ། །དེ་ནས་བསྒོམ་ལམ་གྱི་སྐབས་སུ་དེ་གོམས་པར་བསྐྱེད་པའི་རང་བཞིན་སྤྱན་ལ་སོགས་པའི་ལྷ་མོ་བཞིའོ། །དེ་ལས་མི་སློབ་པའི་ལམ་དུ་ཡེ་ཤེས་ལྔ་འཆར་བ་ནི་རིགས་ལྔ་སྟེ། འདི་ལས་སྒྲུབ་པར་བྱ་བ་གྲུབ་སྟེ། གཞན་འདིར་བསྒོམ་པར་མི་བྱ་ཞེས་པའི་དོན་ཏེ། དེས་ན་ལྷ་བཅུ་དགུར་གྲངས་ངེས་པར་བཞེད་དོ། །གསུམ་པ་གྲངས་ངེས་གཞན་དུ་རྟོག་པ་མི་འཐད་པ་ནི། སྙིམ་པའི་མེ་ཏོག་ལས། རྩ་རྒྱུད་ལེའུ་བཅུ་དྲུག་པར། སྐུ་གསུང་ཐུགས་ཀྱི་རྡོ་རྗེ་མཆོག །གྲྭ་རྣམས་ཀུན་དུ་འགོད་པར་བྱ། །ཞེས་པ་འདིས་ལྷ་མོ་བཅུ་བཟུང་པའི་གཞན་ལུགས་དང་། ལྷ་མོ་བཅུའི་སྟེང་དུ་ཡང་། སྐུ་ནི་སའི་སྙིང་པོ། གསུང་ནི་འཇིག་རྟེན་དབང་ཕྱུག ཐུགས་ནི་ཕྱག་ན་རྡོ་རྗེ། རྡོ་རྗེ་ནི་ནམ་སྙིང་། སྒྲིབ་སེལ། ཀུན་བཟང་གསུམ། མཆོག་ནི་ལྷ་མོ་བཅུ་སྟེ། བཅུ་དྲུག་བཟུང་སྟེ་གྲྭ་རྣམས་ཀུན་དུ་འགོད་པར་བཟུང་ངོ་། །གཞན་དུ་ན་ཀུན་ཞེས་སྨོས་པ་དོན་མེད་པར་འགྱུར་རོ། །དེ་དག་ཀྱང་གླེང་གཞིའི་གཞུང་དང་། དཀྱིལ་འཁོར་ཆེན་པོའི་བསྟོད་པ་ལས་ངེས་པར་བྱས་པ་ཡིན་ནོ། །ཞེས་པའི་རང་ལུགས་གཉིས་བཤད་དོ། །འདི་ཡང་ཅུང་ཟད་མི་འཐད་དེ། ཆོ་གའི་འགྲོས་ཐམས་ཅད་བླ་ཆེན་སངས་རྒྱས་ཡེ་ཤེས་ཞབས་ཀྱི་རྗེས་སུ་འབྲང་བར་སྣང་བས་ལྷའི་གྲངས་ལ་བླ་ཆེན་གྱི་བཞེད་པ་འགོག་པ་འགལ་བ་འདུས་པ་ཡིན་པའི་ཕྱིར་རོ། །ལེའུ་བཅུ་དྲུག་པའི་གཞུང་དེས་ལྷ་བཅུ་དྲུག་བཟུང་བའི་ཚུལ་དེ་ཡང་ཧ་ཅང་ཐལ་ཏེ། དེ་ལྟར་ན་དཀྱིལ་འཁོར་གྱི་ལྷ་ཀུན་དེ་ཉིད་ཀྱི་སྟེང་དུ་བཤད་ནུས་པར་ཐལ་བའི་ཕྱིར་རོ། །གླེང་གཞིའི་གཞུང་ལས་དམ་ཚིག་རྡོ་རྗེ་ལ་སོགས་པ་དྲུག་གསུངས་པ་དང་། དཀྱིལ་འཁོར་ཆེན་པོའི་བསྟོད་པ་ལས་ནང་གི་སྐྱེ་མཆེད་དྲུག་གི་རྣམ་དག་གསུངས་པས་སེམས་དཔའ་དྲུག་ཕྱིའི་དཀྱིལ་འཁོར་ལ་འགོད་པ་ལུགས་འདི་ལ་མི་འགྲུབ་སྟེ། དེ་གཉིས་ཆར་ཡང་ཉེར་སྒྲུབ་ཀྱི་ཡན་ལག་དང་རྣམ་སྨིན་གྱི་འབྲས་བུའི་སྐབས་སུ་མིག་སོགས་སེམས་དཔའ་དྲུག་འགོད་པའི་ལུང་ཡིན་པར་ཙི་ལུ་པས་བཤད་པ་ལྟར་བླ་མ་ཆེན་པོའི་དགོངས་པ་ཡིན་པའི་ཕྱིར་རོ། །དེས་ན་སྐུ་གསུང་ཐུགས་ཀྱི་རྡོ་རྗེ་མཆོག་ཞེས་པའི་གཞུང་། སྐུ་ནི་སངས་རྒྱས་སྤྱན། གསུང་ནི་གོས་དཀར་མོ། ཐུགས་ནི་མཱ་མ་ཀཱི། རྡོ་རྗེ་མཆོག་ནི་སྒྲོལ་མ་ཡིན་པར་འཕགས་ལུགས་པ་དང་། ལུགས་འདིའི་ཙི་ལུ་པ་དང་། རྒྱལ་བས་བྱིན་དང་། ཐ་ག་ནའི་འགྲེལ་པ་རྣམས་སུ་བཤད་པས་དེས་སེམས་དཔའ་དྲུག་དཀྱིལ་འཁོར་ལ་འགོད་པ་མི་འགྲུབ་བོ། །འོ་ན་རྡོ་རྗེ་མ་དྲུག་ལེའུ་བཅུ་དྲུག་པའི་གཞུང་གང་གིས་སྟོན་སྙམ་ན། ལེའུ་དང་པོ་དང་། བཞི་པ་དང་། བཅུ་དྲུག་པ་གསུམ་ཆར་གྱི་དངོས་བསྟན་ལ་ལྷ་བཅུ་གསུམ་ལས་མེད་པས། དེ་སྟོན་བྱེད་ཀྱི་གཞུང་མེད་ཀྱང་གླེང་གཞིར། གཟུགས་རྡོ་རྗེ་མ་སོགས་གསུངས་པ་དང་། རྒྱུད་ཕྱི་མར་བསྟོད་པའི་སྐབས་སུ་ཕྱིའི་སྐྱེ་མཆེད་དྲུག་གི་རྣམ་དག་གསུངས་པ་ལུང་དང་། དཀྱིལ་འཁོར་ནི་མཆོད་པ་དང་བྲལ་བ་རིགས་པ་མ་ཡིན་ཞེས་པ་རིགས་པ་ཡིན་པར་བཀའ་སྲོལ་འདིའི་འགྲེལ་པ་རྣམས་ལས་བཤད་ཅིང་། སྒྲུབ་བྱེད་ཀྱི་གཙོ་བོ་ནི་བླ་མ་ཆེན་པོ་ལ་འཇམ་པའི་དབྱངས་ཀྱིས་དཀྱིལ་འཁོར་སྤྲུལ་ནས་དབང་བསྐུར་བའི་ཚེ་ལྷ་བཅུ་དགུར་གཟིགས་པ་འདི་ཉིད་ཡིན་ནོ། །དྲུག་པ་ནི་འདིར་དཀྱིལ་འཁོར་ལ་བཀོད་པ་ཁོ་ན་གཙོ་བོ་གོ་འཕོ་ན། འཇམ་པའི་དབྱངས་གཙོ་བོར་གྱུར་པ་དོན་མེད་དེ། ཏིང་ངེ་འཛིན་གྱི་དཀྱིལ་འཁོར་དང་། རྡུལ་ཚོན་གྱི་དཀྱིལ་འཁོར་སྟོན་པའི་ལེའུ་གསུམ་ལས། རིགས་ལྔ། ཡུམ་བཞི། ཁྲོ་བོ་བཞི་ལས་མ་བཤད་ཅིང་། རྡོ་རྗེ་མ་དྲུག་ལུང་དང་རིགས་པས་བསྣན་ན་ཡང་། དེར་འཇམ་པའི་དབྱངས་མེད་ཅིང་། ནང་གི་སྐྱེ་མཆེད་དྲུག་གི་རྣམ་དག་ལ་ཡང་མེད་པའི་ཕྱིར་རོ། །གལ་ཏེ་དཀྱིལ་འཁོར་ལ་མ་བཀོད་པ་གཙོ་བོ་གོ་འཕོ་ན་ཐུག་པ་མེད་པར་འགྱུར་རོ་ཞེས་པའི་སྐྱོན་ཡོད་དོ་སྙམ་ན། འདིར་འཕགས་ལུགས་པས་སྔར་བཤད་པ་ལྟར་དཀྱིལ་འཁོར་གྱི་ལྷ་སུམ་ཅུ་སོ་གཉིས་སུ་གྲངས་ངེས་པར་གྲུབ་ཟིན་པས་གཙོ་བོ་གོ་འཕོ་བའི་དཀྱིལ་འཁོར་ཡང་སུམ་ཅུ་སོ་གཉིས་སུ་འགྱུར་ཏེ། སྒྲོན་གསལ་ལེའུ་བཅུ་དྲུག་པ་ལས། དེ་ལྟར་སྐུ་དང་གསུང་དང་ཐུགས་ཀྱི་དཀྱིལ་འཁོར་གསུམ་བཤད་ནས། དེ་བཞིན་གཤེགས་པ་ལྷག་མ་གཉིས་དང་། དཀྱིལ་འཁོར་པ་གཞན་རྣམས་ཀྱི་ཡང་དབུས་སུ་གཙོ་བོ་གང་ཞིག་བྱས་པ་དེའི་ཚུལ་བསྟན་པར་བྱ་བའི་ཕྱིར་ཞེས་གསུངས་པས་སོ། །ལུགས་འདི་ལ་སྙིམ་པའི་མེ་ཏོག་ལས། འདི་ནས་བཤད་པའི་ཆུང་ངུ་དང་འབྲིང་དང་ཆེན་པོའི་ཡན་ལག་གི་རིམ་པས་རྒྱུད་སྡེ་གཞན་ནས་བཤད་པའི་ལྷ་གང་ཡིན་པ་དེའི་ཞལ་ཕྱག་དང་། ས་བོན་དང་། རིགས་བདག་ངེས་པར་བྱས་ནས་བསྒྲུབ་པའི་ཚུལ་དང་། དཀྱིལ་འཁོར་འདི་ཉིད་ལ་བཀོད་པའི་ལྷ་གཙོ་བོ་གོ་འཕོ་བའི་ཚུལ་གཉིས་གསུངས་སོ། །ཕྱི་མ་འདི་ལ་མི་བསྐྱོད་པ་དབུས་སུ་བཞག་ན་རྣམ་སྣང་ཤར་དུ་འགྲོ་བ་དང་། རྣམ་སྣང་དབུས་སུ་བཞག་ན་མི་བསྐྱོད་པ་ཤར་དུ་འགྲོ་ཞིང་། དེ་བཞིན་དུ་རིགས་གཞན་གསུམ་གང་དབུས་སུ་བཞག་པ་དེའི་ཤུལ་དུ་མི་བསྐྱོད་པ་འགྲོ་བ་དང་། སྤྱན་མ་མན་ཆད་དཀྱིལ་འཁོར་ལ་བཀོད་པའི་ལྷ་དབུས་སུ་བཞག་ན། དཀྱིལ་འཁོར་རྒྱལ་མཆོག་བསྐྱེད་པའི་ཚེ་དེའི་རིགས་བདག་གིས་གཙོ་བྱས་པའི་དཀྱིལ་འཁོར་བསྐྱེད་ནས། རིགས་བདག་དེ་ཉིད་ཕྱུང་བའི་རྗེས་སུ་རང་ཉིད་ལ་བསྟིམ། རང་ཉིད་ཀྱི་ཤུལ་དུ་རང་ཉིད་གཉིས་པ་བཞག་པ་དང་། དཀྱིལ་འཁོར་ལ་མ་བཀོད་པའི་ལྷ་དབུས་སུ་བཞག་ན་རིགས་བདག་བསྟིམ་པ་ཁོ་ནས་ཆོག་པའི་ཁྱད་པར་རྣམས་ཞིབ་ཏུ་གསུངས་ཏེ། འགྲེལ་པ་དེ་ཉིད་ལས། འདིར་ཚིགས་སུ་བཅད་པ་ནི། གཞན་གྱི་ས་བོན་སྔགས་རིགས་དང་། །དེ་ཉིད་རིག་པའམ་ཡང་སྐྱེས་བུ། །དེ་དག་རྗེས་སུ་དཔག་པར་བྱ། །གཞན་རྣམས་ཐམས་ཅད་བཤད་པ་ཡིན། །རྒྱུད་གཞན་ལས་ནི་བསྟན་པ་ཡི། །ས་བོན་སྐུ་མདོག་རིགས་ལ་སོགས། །མཚན་མའམ་མཚན་མ་བཞི་པོ་དག །དེ་ཉིད་ལས་ནི་ངེས་པར་བཟུང་། །གསུངས་པའམ་མ་གསུངས་པ་བཞིན་དུ། །གཞན་ལས་ས་བོན་སོགས་བཟུང་བྱ། །འདུས་པའི་ཆོ་གས་རྡོ་རྗེ་རྣམས། །ཐམས་ཅད་འདུས་པ་པ་ཡིན་ཕྱིར། །ཐུགས་ཀྱི་དཀྱིལ་འཁོར་གྲུབ་པའི་ཕྱིར། །འཁོར་ལོ་ཅན་གྱི་རྟེན་གནས་ཀྱི། །གལ་ཏེ་རྒྱལ་གཞན་དབུས་མར་གྱུར། །དེ་ཡི་གནས་ལ་མི་བསྐྱོད་འགྱུར། །གང་ཚེ་འཁོར་གཙོ་སངས་རྒྱས་འགྱུར། །ཕྱུང་བ་དེ་ནི་བསྟིམ་པར་བྱ། །བྱང་ཆུབ་སེམས་དཔའ་འཁོར་གཙོར་གྱུར། །དེ་ཡི་རིགས་བདག་བསྟིམ་པར་བྱ། །རྒྱལ་བ་ལས་གཞན་དཀྱིལ་འཁོར་པ། །གལ་ཏེ་འཁོར་ལོ་གཙོ་བོར་བྱེད། །དབུས་མ་དེ་ཡང་གཞན་ཉིད་དེ། །རང་གནས་སུ་ཡང་གཞན་དེ་ཉིད། །ཚོགས་རྣམས་བསག་པ་དེ་དག་ནི། །ཚེ་འདི་ཉིད་ལ་གྲུབ་ཕྱིར་རོ། །སྐྱེ་བ་གཞན་དུ་གྲུབ་པའི་ཕྱིར། །ཅུང་ཟད་བཟླས་དང་བསྒོམ་པའང་བྱ། །ཞེས་གསུངས་སོ། །རྒྱལ་བས་བྱིན་དང་། ཙི་ལུ་པ་དང་། ཐ་ག་པཾའི་འགྲེལ་པ་རྣམས་ལས་ཀྱང་དཀྱིལ་འཁོར་ལ་བཀོད་པའི་ལྷའི་གཙོ་བོ་གོ་འཕོ་བའི་ཚེ་འདི་ཁོ་ན་ལྟར་བཤད་ཅིང་། སྒྲོན་གསལ་ལས་ཀྱང་བཤད་པས་འཕགས་ཡུལ་གྱི་སྲོལ་ཆེན་དུ་སྣང་ངོ་། །འགྲེལ་པ་ཕྱི་མ་འདི་གསུམ་ལས་དཀྱིལ་འཁོར་ལ་མ་བཀོད་པའི་ལྷ་གཙོ་བོ་གོ་འཕོ་བ་དང་། མི་འཕོ་བའི་གསལ་ཁ་མི་སྣང་ཡང་། མར་མེ་མཛད་བཟང་པོས་ཀྱང་། དེ་ཡི་དབུས་གནས་གང་ཡིན་པ། །དེ་ཡི་འཁོར་ལོ་རེ་ཞེས་བྱ། །དེ་བཞིན་གཤེགས་པ་ཀུན་བདག་གཙོ། །དེ་ཡི་གནས་སུ་མི་བསྐྱོད་གནས། །གཞན་ལ་གཙོ་བོ་དེ་གནས་པ། །རང་བདག་ཁོ་ན་རང་གི་བདག །ཕྱུང་ནས་སྔོན་དུ་བློ་ལྡན་པས། །ཆོ་ག་བཞིན་དུ་ཐིམ་པར་བྱ། །ཞེས་བསྡུས་པའི་དོན་ལས་བཤད་པ་དང་། ཤཱནྟི་པའི་འགྲེལ་པ་དང་། རྒྱལ་བས་བྱིན་གྱི་འགྲེལ་པར་བྱང་ཆུབ་སེམས་དཔའ་གཙོ་བོ་གོ་འཕོ་བའི་རྣམ་གཞག་བཤད་པ་དང་། བླ་མ་ཆེན་པོས་འཇམ་པའི་དབྱངས་གཙོ་བོར་གྱུར་པའི་དཀྱིལ་འཁོར་གཟིགས་པས་བྱང་སེམས་བརྒྱད་གཙོ་བོ་གོ་འཕོ་བར་གྲུབ་ལ་དེས་ཁྲོ་བོ་གཞན་དྲུག་ཀྱང་གཙོ་བོ་གོ་འཕོ་བར་གྲུབ་བོ། །འོ་ན་གཙོ་བོ་གོ་འཕོ་བ་སྟོན་པའི་རྒྱུད་ཀྱི་ལུང་གང་སྙམ་ན། རྩ་རྒྱུད་ལེའུ་བཞི་པར་ཐུགས་ཀྱི་དཀྱིལ་འཁོར་བྲི་ཚུལ་དང་། ལེའུ་བཅུ་དྲུག་པར་སྐུའི་དཀྱིལ་འཁོར་དང་། གསུང་གི་དཀྱིལ་འཁོར་གཙོ་བོ་གོ་འཕོ་ཚུལ་གསལ་བར་གསུངས་པའི་རྗེས་སུ། རྡོ་རྗེ་འཛིན་མཆོག་གང་ཡིན་པའི། །གཟུགས་ནི་དབུས་སུ་ལེགས་བྲིས་པ། །དེ་ཡི་དཀྱིལ་འཁོར་གནས་སུ་འགྱུར། །སྐུ་གསུང་ཐུགས་ཀྱི་གསང་ལས་བྱུང་། །ཞེས་པ་འདི་ཉིད་ཀྱིས་དེ་བཞིན་གཤེགས་པ་ལྷག་མ་གཉིས་དང་། དཀྱིལ་འཁོར་པ་གཞན་རྣམས་ཀྱི་གཙོ་བོ་གོ་འཕོ་ཚུལ་སྟོན་པར་སྲོལ་ཆེན་གཉིས་ཀ་མཐུན་པར་སྣང་ཞིང་། ལུགས་མཆོག་འདི་ལ་ཡང་། བྱང་ཆུབ་སེམས་དཔའ་བརྒྱད་དང་། ཁྲོ་བོ་གཞན་དྲུག་དཀྱིལ་འཁོར་ལ་བཀོད་པ་མེད་ཀྱང་གཙོ་བོ་གོ་འཕོ་བར་བཞེད་པས། འཕགས་ལུགས་དང་ཡེ་ཤེས་ཞབས་ལུགས་གཉིས་ཆར་ལ། རྒྱུད་འདི་ཉིད་ཀྱི་ལྷ་གཙོ་བོ་གོ་འཕོ་བའི་དཀྱིལ་འཁོར་སུམ་ཅུ་སོ་གཉིས་སུ་བཞེད་པ་འདྲ་བར་སྣང་ལ་ཤཱནྟི་པས་བཤད་པ་ལྟར་རྒྱུད་སྡེ་གཞན་གྱི་གཙོ་བོ་གོ་འཕོ་ཚུལ་སྦྱར་ན་གྲངས་མེད་དུ་ཤེས་པར་བྱའོ། །བདུན་པ་ནི་ཀུན་བཟང་རྒྱས་པ་ལས། དེ་ལྟར་དཀྱིལ་འཁོར་ཡོངས་སུ་རྫོགས་པར་བལྟས་པའི་རྗེས་ལ་ཡེ་ཤེས་སེམས་དཔའི་ཐུགས་ཀའི་ས་བོན་མཾ་ཡིག་ལས་འོད་ཟེར་འཕྲོས་ཏེ། གཤིན་རྗེ་མཐར་བྱེད་ལ་རེག་པས་དེས་ཛཿཞེས་བརྗོད་པས་དེའི་ཐུགས་ཀའི་ས་བོན་ལས་གཤིན་རྗེ་མཐར་བྱེད་སྤྲོས་ཏེ། དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཀུག་ནས་སྲུང་བའི་འཁོར་ལོའི་ནང་དུ་བཞག་གོ །དེ་ནས་བདུད་རྩི་བྱིན་གྱིས་བརླབ་པ་དང་། ཆུ་གསུམ་བྱིན་གྱིས་བརླབ་པ་བྱ་སྟེ་གཙོ་བོའི་སྔགས་ཀྱིས་ཆུ་གསུམ་ཕུལ་ནས་བསྒྲུབས་པའི་བདུད་རྩི་ལྔ་བཏབ་བོ། །དེའི་རྗེས་སུ་ཐུགས་ཀའི་མཾ་ཡིག་ལས་འོད་ཟེར་འཕྲོས་ཏེ། ཁྲོ་བོ་གཞན་གསུམ་ལ་རེག་པས་དེ་དག་གིས་རིམ་པ་ལྟར་ཧཱུྃ་བཾ་ཧོཿཞེས་བརྗོད་པས་ཡེ་ཤེས་ཀྱི་འཁོར་ལོ་དེ་དག་དམ་ཚིག་འཁོར་ལོ་ལ་བསྟིམ་པ་དང་། བཅིང་བ་དང་། མཉེས་པར་བསམ་པར་བཤད་དོ། །འདི་ཁོ་ན་བཞིན་དུ་དངོས་གྲུབ་འབྱུང་བའི་གཏེར་ལས་ཀྱང་། དེ་ལྟར་དངོས་པོ་ཐམས་ཅད་ཀྱིས། །རྫོགས་པའི་དཀྱིལ་འཁོར་མཐོང་ནས་སུ། །ས་བོན་འོད་ཟེར་ལྕགས་ཀྱུ་ཡིས། །གཤིན་རྗེའི་གཤེད་བསྐུལ་འཁོར་ལོ་དགུག །དེ་དང་ལྷན་ཅིག་འོངས་པའི་བགེགས། །བསྐྲད་ནས་བསྲུང་བྱས་ཁྲོ་བོ་ཐིམ། །བདེ་བས་རྒྱས་པའི་འཁོར་ལོ་ནི། །མདུན་དུ་དམིགས་ལ་མཆོད་པར་བྱ། །དུང་གི་ཆུ་ཡིས་བསང་གཏོར་དང་། །ཀུ་ཤས་ཁ་བཀབ་ཆུ་ཉེ་རེག །མཆོད་ཡོན་སྣོད་ཀྱིས་མཆོད་ཡོན་དང་། །མཐའ་སོགས་དབྱེ་བས་ཞབས་བསིལ་ལོ། །དེ་བཞིན་ཁྲོ་བོ་གཞན་བསྐུལ་བས། །འོད་ཟེར་གྱིས་ནི་གཞུག་པ་དང་། །བཅིང་དང་རྗེས་སུ་དགྱེས་བསྐྱེད་པ། །ཆོས་ཀྱི་དབྱིངས་སུ་བྱིན་གྱིས་བརླབ། །ཞེས་གསུངས་པས་སོ། །སྒྲུབ་ཐབས་གཞན་རྣམས་ལས་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱིས་དཀྱིལ་འཁོར་གྱི་འཁོར་ལོ་སྤྱན་དྲངས་པ་ལ་མཆོད་ནས། སླར་ཡང་ཁྲོ་བོ་བཞི་སྤྲོས་ཏེ་དགུག གཞུག་བཅིང་དབང་དུ་བྱ་བར་བཤད་ཅིང་། མཆོད་པ་ནི་བཞི་བརྒྱ་ལྔ་བཅུ་པ་ལས། ཟླ་སོགས་མེ་ཏོག་ལྡན་པ་ཡི། །གསང་སྔགས་མཆོག་བཟླས་མེ་ཏོག་དབུལ། །ཞེས་དང་། རིན་ཆེན་རྡོ་རྗེས། ཟླ་བ་ལ་སོགས་པ་དང་། མེ་ཏོག་དང་ལྡན་པའི་མཆོད་ཡོན་ལ། ཨོཾ་ཨཱཿཧཱུྃ་མངོན་པར་བཟླས་ལ་ཕུལ་ལ་ཞེས་དང་། བསོད་སྙོམས་པས་བདུད་རྩིས་གང་བའི་སྣོད་ཀྱིས་མཆོད་ཡོན་ཕུལ་ལ། སྙིང་པོའི་འོད་ཟེར་ལས་བྱུང་བའི་གཟུགས་རྡོ་རྗེ་མ་ལ་སོགས་པ་རྣམས་ཀྱིས་ཡང་དག་པར་མཆོད་ནས་ཞེས་དང་། ཇོ་བོ་རྗེས་རང་གི་སྔགས་ཀྱིས་མཆོད་ཡོན་ཕུལ་ལ། གཟུགས་རྡོ་རྗེ་མ་སོགས་ལེགས་པར་སྤྲོས་ཏེ། ཡང་དག་པར་མཆོད་ནས་ཞེས་སོགས་རྣམ་གྲངས་ཅུང་ཟད་མི་འདྲ་བར་སྣང་ཡང་། གཞུང་སྔ་མ་གཉིས་ལས་ཆུ་གསུམ་ལས་མ་བཤད་ཅིང་། ཀུན་བཟང་བསྡུས་པ་ལས་ཀྱང་། རང་གི་སྙིང་པོ་བཟླས་པའི་མཆོད་ཡོན་ནི། །ཙནྡན་བཟང་སོགས་མེ་ཏོག་གིས་མཛེས་དབུལ། །ཞེས་པ་ཙམ་ལས་མ་གསུངས་པས། འདིར་ཆུ་གསུམ་དང་། རྡོ་རྗེ་མ་ལྔས་ཆོག་པར་སྣང་ངོ་། །ཆུ་གསུམ་བྱིན་གྱིས་བརླབ་པའི་སྔགས་ལ་ཀུན་བཟང་རྒྱས་པ་ལས། ཆུ་དང་པོ་གཙོ་བོའི་སྔགས་དང་། ཕྱི་མ་གཉིས་ཨོཾ་ཨཱཿབིགྷྣ་ཏ་ཀྲྀཏ་ཧཱུྃ་ཕཊ་སྭཱཧཱ། ཞེས་པའི་བྱིན་གྱིས་བརླབ་པར་བཤད་ཅིང་། འབུལ་སྔགས་ནི་གཙོ་བོའི་སྔགས་ཁོ་ན་ཡིན་པར་སྒྲུབ་ཐབས་ཐམས་ཅད་མཐུན་པར་སྣང་ངོ་། །གཉིས་པ་ཉེར་སྒྲུབ་ཀྱི་ཡན་ལག་དང་། རྣམ་སྨིན་གྱི་འབྲས་བུ་ཆེན་པོ་ནི། མིག་ལ་སོགས་ལ་སེམས་དཔའ་དྲུག་བཀོད་པ་སྔ་མ་བཞིན་ནོ། །གསུམ་པ་སྒྲུབ་པའི་ཡན་ལག་དང་། སྐྱེས་བུ་བྱེད་པའི་འབྲས་བུ་ཆེན་པོ་ནི་གནས་གསུམ་བྱིན་གྱིས་བརླབ་པ་སྔ་མ་བཞིན་ཏེ། རིན་ཆེན་རྡོ་རྗེས། བར་མའི་སྐབས་སུ་གསོལ་བ་གདབ་པ་མི་དགོས་པར་བཤད་པ་ལྟར་ན་འདིར་ཡང་མི་དགོས་པར་གྲུབ་བོ། །བཞི་པ་སྒྲུབ་ཆེན་གྱི་ཡན་ལག་དང་། དབང་གི་འབྲས་བུ་ཆེན་པོ་ནི་དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་སྔ་མ་བཞིན་ཏེ། རིགས་བདག་ནི་སྒྲུབ་ཐབས་ཐམས་ཅད་མཐུན་པར་སྣང་ལ། རིན་ཆེན་རྡོ་རྗེ་དང་། ཇོ་བོ་རྗེས་སྐབས་འདིར་སྐྱེ་མཆེད་ཀྱི་སེམས་དཔའ་དྲུག་དང་། གནས་གསུམ་གྱི་རྡོ་རྗེ་གསུམ་གྱི་རིགས་བདག་ཡང་བཤད་ཅིང་། སྒྲུབ་ཐབས་གཞན་རྣམས་ལས་དཀྱིལ་འཁོར་པ་རྣམས་ཀྱི་རིགས་བདག་ཁོ་ན་བཤད་དོ། །གཉིས་པ་ལ་མཆོད་པ་ནི། ཀུན་བཟང་རྒྱས་པ་ལས། ཡེ་ཤེས་སེམས་དཔའི་ཐུགས་ཀའི་ས་བོན་མཾ་ལས་འོད་ཟེར་སྤྲོས་ནས་དེ་བཞིན་གཤེགས་པ་ཐམས་ཅད་བཀུག་སྟེ་ཁའི་ལམ་ནས་བཅུག་ཏེ། ཟླ་བ་ཞུ་བར་གྱུར་པ་རྡོ་རྗེའི་ལམ་ནས་ལྷ་མོའི་པདྨར་ལྷུང་སྟེ། ཟླ་བའི་གདན་བཅུ་ལ་ས་བོན་བཅུར་གྱུར་པ་ལས་འོད་ཟེར་གྱི་སྤྲོ་བསྡུ་བྱས་ནས་སྤྱན་མ་ལ་སོགས་པའི་ལྷ་མོ་བཅུར་གྱུར་པ་ཕྱིར་སྤྲོས་ཏེ། མེ་ཏོག་དང་། བདུག་པ་དང་། དྲི་ལ་སོགས་པ་རྣམས་ཀྱིས་མཆོད་ནས་ང་རྒྱལ་འཛིན་པའི་སྔགས་བརྗོད་པར་བཤད་ལ། དངོས་གྲུབ་འབྱུང་བའི་གཏེར་ལས་ཀྱང་འདི་ཁོ་ན་ལྟར་བཤད་དོ། །ཀུན་བཟང་བསྡུས་པ་དང་། བཞི་བརྒྱ་ལྔ་བཅུ་པ་དང་། རིན་ཆེན་རྡོ་རྗེས་ས་བོན་གྱི་འོད་ཀྱིས་གཟུགས་ལ་སོགས་པ་ཞལ་དུ་བཅུག་པར་བཤད་ལ་གཞན་འདྲ་བར་སྣང་ངོ་། །བསྟོད་པ་ནི། དེ་ཉིད་ལྔ་པས་བསྟོད་པར་སྒྲུབ་ཐབས་ཐམས་ཅད་འདྲ་བར་སྣང་ཞིང་། བདུད་རྩི་མྱང་བ་ནི་ཀུན་བཟང་རྒྱས་པ་ལས། སྔགས་ཀྱི་ཆོ་གས་བདུད་རྩི་བསྒྲུབས་ཏེ། ཡི་གེ་ཧཱུྃ་གིས་ལྷ་རྣམས་ཀྱི་ལྕེ་བྱིན་གྱིས་བརླབས་ཏེ་བདུད་རྩི་མྱོང་བར་བྱའོ། །འདི་ལྟར་དཀྱིལ་འཁོར་སྤྲུལ་པ་ནས་བདུད་རྩི་མྱོང་བ་ལ་ཐུག་པ་ནི་དཀྱིལ་འཁོར་རྒྱལ་པོ་མཆོག་སྟེ། ཏིང་ངེ་འཛིན་གཉིས་པའོ། །ཞེས་དང་། ཀུན་བཟང་བསྡུས་པ་ལས། འབར་བའི་ཨོཾ་གྱིས་བྱིན་བརླབས་རླུང་དང་མེའི། །དཀྱིལ་འཁོར་ལ་གནས་རབ་སྦར་བདུད་རྩི་ལྔ། །དེ་ནས་ཡི་གེ་གསུམ་ལས་དཔག་མེད་པའི། །ཐུབ་པའི་དབང་པོ་ནང་དུ་ཚུད་པར་བྱ། །ཡེ་ཤེས་བདུད་རྩིའི་ངོ་བོར་བསམ་ནས་ནི། །ཞེས་དང་། དངོས་གྲུབ་འབྱུང་བའི་གཏེར་ལས། རླུང་དང་མེ་ཡི་དཀྱིལ་འཁོར་གནས། །པདྨ་བྷན་དྷར་བདུད་རྩི་ལྔ། །ཟླ་བ་ཉི་མར་ཡི་གེ་ལྔ། །བསམ་ནས་འོད་ཟེར་སྤྲོ་བྱའོ། །རྟག་སོགས་བཀུག་ནས་ས་བོན་གཞུག །བཞུ་ཞིང་བསྐོལ་བའི་རླངས་པས་ཧཱུྃ། །དེ་བྱུང་རྡོ་རྗེ་ཞུ་བྱས་ནས། །ཕྲེང་བའི་རྒྱུན་དུ་དབབ་པར་བསམ། །ཨོཾ་གྱིས་གསལ་བར་བྱས་ནས་སུ། །ལྷ་རྣམས་ཕྱག་དུ་སྤྲོས་བྱས་ལ། །ལྕེ་ཧཱུྃ་ལས་བྱུང་རྡོ་རྗེ་བཀོད། །སྙིང་ཟླཾའི་འཁོར་ལོ་ཚིམ་པར་བྱ། །དཀྱིལ་འཁོར་རྒྱལ་མཆོག་ཅེས་བྱ་བའི་ཏིང་ངེ་འཛིན་ཞེས་གསུངས་པ་འདི་ནི་ཀུན་བཟང་རྒྱས་པ་ཇི་ལྟ་བ་བཞིན་དུ་སྣང་ཞིང་། རིན་ཆེན་རྡོ་རྗེ་དང་བསོད་སྙོམས་པས་ས་བོན་རྣམས་ཚུལ་འདི་དང་མི་འདྲ་བར་སྣང་ལ། སྒྲུབ་ཐབས་གཞན་རྣམས་ནི་མཐུན་པར་སྣང་ངོ་། །གསུམ་པ་ལས་རྒྱལ་མཆོག་ནི་ཀུན་བཟང་རྒྱས་པ་ལས། ཡེ་ཤེས་སེམས་དཔའི་ཐུགས་ཀའི་ས་བོན་ལས་ཁ་དོག་ལྔའི་འོད་ཟེར་བྱུང་བས། གཞལ་ཡས་ཁང་གི་ཕྱི་རོལ་དུ་འཐོན་ཏེ། འོད་ཟེར་ལས་དེ་བཞིན་གཤེགས་པ་ཐམས་ཅད་ཀྱིས། སེམས་ཅན་ཐམས་ཅད་སངས་རྒྱས་སུ་བྱས་ནས། སེམས་ཅན་སངས་རྒྱས་སུ་བྱས་པ་ཐམས་ཅད་བསྡུས་ནས་ས་བོན་མཾ་ཡིག་ལ་ཐིམ་སྟེ། ལྷ་རྣམས་ཐིམ་པས་ས་བོན་མཾ་ཡིག་རྒྱས་པར་བྱས་ཏེ། ས་བོན་མཾ་ཡིག་རྒྱས་པ་དེ་ཐིག་ལེའི་རྣམ་པར་གྱུར་ཏེ། ཐིག་ལེའི་དབུས་སུ་རྣལ་འབྱོར་པའི་སེམས་གཞན་ཞུགས་ནས་ཚངས་པའི་གནས་བཞི་བསྒོམས་ལ། སྐད་ཅིག་མས་ཏིང་ངེ་འཛིན་གསུམ་བསྒོམས་ཏེ། ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་བྱུང་བས། རལ་གྲིའི་ཡུ་བ་ལ་ཁྱབ་ཅིང་རལ་གྲི་ལ་ཁྱབ་ནས་ཡེ་ཤེས་སེམས་དཔའི་ནང་གི་ལུས་དང་། ཕྱིའི་ལུས་དང་། དཀྱིལ་འཁོར་གྱི་ལྷ་དང་། རལ་གྲི་དང་། གཞལ་ཡས་ཁང་དང་། དམ་ཚིག་སེམས་དཔའི་ནང་གི་ལུས་དང་། ཕྱིའི་ལུས་དང་། དཀྱིལ་འཁོར་གྱི་ལྷ་དང་། གཞལ་ཡས་ཁང་དང་། རལ་གྲི་དང་། རལ་གྲིའི་ཡུ་བ་དང་། ཡེ་ཤེས་སེམས་དཔའི་ཕྱིའི་ལུས་དང་། ནང་གི་ལུས་དང་། དཀྱིལ་འཁོར་གྱི་ལྷ་དང་། གཞལ་ཡས་ཁང་དང་། རལ་གྲི་དང་། དམ་ཚིག་སེམས་དཔའི་ནང་གི་ལུས་དང་། ཕྱིའི་ལུས་དང་། དཀྱིལ་འཁོར་གྱི་ལྷ་དང་། གཞལ་ཡས་ཁང་དང་། དེ་ནས་ཕྱི་རོལ་དུ་བྱུང་སྟེ། འགྲོ་བ་གསལ་བར་བྱས་ནས་སླར་ཡང་ལོག་པས་གཞལ་ཡས་ཁང་ལ་ཐིམ་མོ། །སླར་ཡང་དཀྱིལ་འཁོར་གྱི་ལྷ་ཡིན་ལ། དམ་ཚིག་སེམས་དཔའི་ཕྱིའི་ལུས་དང་། ནང་གི་ལུས་དང་། ནང་གི་ལུས་ནི་རལ་གྲི་དང་། རལ་གྲིའི་ཡུ་བ་དང་། ཡེ་ཤེས་ཀྱི་དཀྱིལ་འཁོར་གྱི་གཞལ་ཡས་ཁང་དང་། ལྷ་རྣམས་དང་། ཡེ་ཤེས་སེམས་དཔའི་ནང་གི་ལུས་དང་། རལ་གྲི་དང་། རལ་གྲི་ཞུ་བའི་ས་བོན་མཾ་ཡིག་ལ་ཐིམ་པར་ལྟའོ། །དེ་ལ་ཡང་དང་ཡང་དུ་ཇི་ལྟར་འདོད་པར་སྤྲོ་བ་དང་བསྡུ་བ་འདི་ནི་ཐིག་ལེའི་རྣལ་འབྱོར་རོ། །ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཐོན་པ་དེས། དེ་བཞིན་གཤེགས་པ་ཐམས་ཅད་ལ་རེག་སྟེ། འོད་ཟེར་རེག་པ་དེས། བདེ་བ་དང་ཡིད་བདེ་བ་ཐོབ་སྟེ། དེ་བཞིན་གཤེགས་པ་ཐམས་ཅད་ཁའི་སྒོ་ནས་ཞུགས་ཏེ་ཟླ་བ་ཞུ་བའི་གཟུགས་སུ་གྱུར་པ་དེ་པདྨའི་ནང་དུ་ལྷུང་ནས། ཞུ་བ་ཡོངས་སུ་གྱུར་པ་ལས་ནས་ཀྱི་ཚད་ཙམ་གྱི་རལ་གྲི་ལ་ཡུངས་ཀར་གྱི་ཚད་ཙམ་གྱི་ཡུ་བའོ། །ཡུ་བའི་དབུས་སུ་ཡི་གེ་ཧཱུྃ་གི་ས་བོན་ལ་མངོན་པར་བྱང་ཆུབ་པ་ལྔའི་རིམ་པས། གཞལ་ཡས་ཁང་དང་བཅས་པ་གློ་བུར་དུ་སྐད་ཅིག་གིས་རྗེ་བཙུན་རྡོ་རྗེ་སེམས་དཔར་གྱུར་ཏེ། གཉིས་ཀ་ལ་མཉེས་པ་ལ་སོགས་པའི་ཆོ་གས། ཐིག་ལེའི་རྣལ་འབྱོར་ལ་ཐུག་པའི་ཏིང་ངེ་འཛིན་བསྒྲུབས་ནས་རྡོ་རྗེ་རྩེ་ལྔ་པར་གྱུར་ཏེ། དེའི་དབུགས་ཀྱི་ལྕགས་ཀྱུས་རལ་གྲི་བཀུག་ནས་བཞག་གོ །སྔར་བཞིན་འོད་ཟེར་སྤྲོས་པ་དང་། བསྡུས་པ་ནི་ཕྲ་མོའི་རྣལ་འབྱོར་རོ། །སྤྱི་བོར་འཁོར་ལོ་རྩིབས་བརྒྱད་པའི་དབུས་སུ་སྐུ་རྡོ་རྗེ། སྐུ་རྡོ་རྗེའི་ཐུགས་ཀར་འཁོར་ལོ་རྩིབས་བརྒྱད་པའི་སྟེང་དུ་ཟླ་བའི་དཀྱིལ་འཁོར་ལ་ཨོཾ་མོ། །མགྲིན་པར་པདྨ་དམར་པོ་འདབ་མ་བརྒྱད་པའི་དབུས་སུ་གསུང་རྡོ་རྗེའོ། །དེའི་ཐུགས་ཀར་པདྨ་འདབ་མ་བརྒྱད་པའི་དབུས་སུ་ཟླ་བའི་དཀྱིལ་འཁོར་ལ་ཡི་གེ་ཨཱཿའོ། །རལ་གྲིའི་ཡུ་བའི་དབུས་སུ་འཇམ་པའི་རྡོ་རྗེ་སྟེ། འཇམ་པའི་རྡོ་རྗེའི་ཐུགས་ཀར་རལ་གྲིའི་ཡུ་བའི་དབུས་སུ་ཟླ་བའི་དཀྱིལ་འཁོར་ལ་མཾ་ཡིག་གོ །སྙིང་ཁར་རྡོ་རྗེ་རྩེ་ལྔ་པའི་དབུས་སུ་ཐུགས་ཀྱི་རྡོ་རྗེ་སྟེ། ཐུགས་རྡོ་རྗེའི་ཐུགས་ཀར་རྡོ་རྗེ་རྩེ་ལྔ་པའི་དབུས་སུ་ཟླ་བ་ལ་ཧཱུྃ་ཡིག་གོ །བཟླས་པ་ནི་ཨོཾ་ཨཱཿམཾ་ཧཱུྃ་ཞེས། ཡི་གེ་ཨོཾ་ཞེས་བཟླས་པས། སྐུའི་རྡོ་རྗེ་དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལྷ་མོ་བཅུ་ཡིས་མཆོད་དོ། །ཨཱཿཞེས་བརྗོད་པས་གསུང་རྡོ་རྗེ་དང་། དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལྷ་མོ་བཅུས་མཆོད་དོ། །མཾ་བརྗོད་པས་བསྡུ་བའོ། །ཧཱུྃ་བརྗོད་པས་ཐུགས་རྡོ་རྗེ་དང་། དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལྷ་མོ་བཅུས་མཆོད་དོ། །གཉིས་ཀའི་ཡང་ཡེ་ཤེས་སེམས་དཔའ་མི་སྤྲོའོ། །རིམ་གྱིས་པའི་བཟླས་པའོ། །ཅིག་ཆར་བའི་བཟླས་པ་ནི་ཨོཾ་བརྗོད་པས་སྐུ་རྡོ་རྗེ་དང་། གསུང་རྡོ་རྗེ་དང་། ཐུགས་རྡོ་རྗེ་དང་། དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལ་ལྷ་མོ་བཅུས་མཆོད་དེ། ཨཱཿབརྗོད་པས་བསྡུ་བའོ། །མཾ་བརྗོད་པས་གསུང་རྡོ་རྗེ་དང་། ཐུགས་རྡོ་རྗེ་དང་། སྐུ་རྡོ་རྗེ་དང་། དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལ་ལྷ་མོ་བཅུས་མཆོད་དེ། ཧཱུྃ་བརྗོད་པས་ཐུགས་རྡོ་རྗེ་དང་། སྐུ་རྡོ་རྗེ་དང་། གསུང་རྡོ་རྗེ་དང་། དེ་བཞིན་གཤེགས་པ་ལྔ་དང་། ལྷ་མོ་བཅུ་སྤྲོས་ཏེ། དེ་བཞིན་གཤེགས་པ་ལྔ་ལ། ལྷ་མོ་བཅུས་མཆོད་དེ། འདི་ལྟར་བཟླས་པ་བྱའོ། །འདི་ལྟ་བུ་ནི་ཅིག་ཆར་བའི་བཟླས་པའོ། །སྤྱི་བོར་ཡི་གེ་ཨོཾ་ལས་བྱུང་བའི་དཀྱིལ་འཁོར་གཡོ་བ་གཞུའི་རྣམ་པ་ལྟ་བུ་ཡཾ་ཡིག་གིས་བྱིན་གྱིས་བརླབས་པ་ཁ་དོག་སྔོན་པོ་བ་དན་གྱིས་མཚན་པ་སྟེ། དེའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཨོཾ་ཨཱཿཧཱུྃ་བསམ་མོ། །མགྲིན་པར་བཾ་ལས་ཆུའི་དཀྱིལ་འཁོར་བུམ་པས་མཚན་པ་ཟླུམ་པོ་བཾ་ཡིག་དཀར་པོས་མཚན་པའོ། །སྙིང་ཁར་རཾ་ལས་མེའི་དཀྱིལ་འཁོར་འོད་ཟེར་འབར་བས་བསྐོར་བ་དམར་པོ་ལ་རཾ་གྱིས་བྱིན་གྱིས་བརླབ་པ་བསམ་མོ། །ཡི་གེ་ཨཱཿལས་པདྨའི་སྣོད་ཕྱི་དཀར་བ། ནང་ཁྲག་རློན་པའི་མདོག་ཅན་རཾ་དམར་པོས་བྱིན་གྱིས་བརླབ་པ་སྟེ། དེའི་དབུས་སུ་རྣམ་པར་སྣང་མཛད་ལ་སོགས་པའི་རྫས་ལྔ་ས་བོན་ལྔས་བྱིན་གྱིས་བརླབ་པའོ། །ས་བོན་རྣམ་པ་ལྔ་ལས་འོད་ཟེར་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ལ་རེག་སྟེ། དེ་རྣམས་ཀྱིས་ཡེ་ཤེས་སེམས་དཔའ་དང་རོ་གཅིག་དུ་གྱུར་ནས་རྣལ་འབྱོར་པའི་ཁའི་ལམ་ནས་ཞུགས། སྙིང་ཁར་བཅུག་ལ་སྤྱི་བོའི་སྟེང་དུ་སོར་བརྒྱད་ན་ཟླ་བའི་དཀྱིལ་འཁོར། དེའི་དབུས་སུ་རྣམ་པར་སྣང་མཛད་ལ་སོགས་པའི་རྫས་ལྔ། ས་བོན་ལྔས་བྱིན་གྱིས་བརླབས་ལ་ཟླ་བའི་དཀྱིལ་འཁོར་གྱི་འོག་དུ་ཙ་ན་ཀའི་ཚད་ཙམ་གྱི་བུ་ག་ལ་བལྟས་ལ། བུ་ག་ནས་བདུད་རྩིའི་རྒྱུན་གྱིས་རྣལ་འབྱོར་པའི་སྐུ་དང་། གསུང་དང་། ཐུགས་ཚིམ་པར་བྱའོ། །འདི་ནི་ཚིམ་པའི་ཆོ་གའོ། །ཞེས་གསུངས་ཤིང་། སྒྲུབ་ཐབས་གཞན་རྣམས་ལས་ཀྱང་། རྒྱས་བསྡུས་ཀྱི་ཁྱད་པར་མ་གཏོགས་དོན་འདྲ་བར་སྣང་བས་ཐམས་ཅད་ཡིད་ཆེས་ཤིང་འཇུག་པའི་རྒྱུར་འགྱུར་བ་ཡིན་ནོ། །སངས་རྒྱས་ཀུན་གྱི་གསང་ཆེན་ཀུན་འདུས་འདུས་པའི་རྒྱུད་ཆེན་ཕྱི་མའི་རྒྱུད་དང་བཅས། །འཇམ་དཔལ་ཞལ་གྱི་བདུད་རྩི་གསན་པའི་སྙིམ་པས་ལེགས་གསོལ་ཤིང་རྟ་ཆེན་པོ་དེས། །ལེགས་པར་བཀྲལ་བའི་གཞུང་བཟང་རྣམས་དང་དེ་ཡི་རྗེས་འབྲང་གྲུབ་པའི་སར་གནས་པ། །མར་མེ་མཛད་བཟང་སྨན་ཞབས་རིན་ཆེན་རྡོ་རྗེ་བསོད་སྙོམས་ཨ་ཏི་ཤ་ཡི་གཞུང་། །རྒྱལ་བས་བྱིན་དང་ཐ་ག་ན་དང་ཙི་ལུ་རིན་ཆེན་འབྱུང་གནས་ཞི་བ་ཡི། །རྒྱུད་ཆེན་འགྲེལ་པའི་རྣམ་འགྲེལ་དེ་དག་ཡུན་རིང་འབད་པའི་བློ་ཡིས་ཚུལ་བཞིན་དུ། །ཞིབ་མོར་དཔྱད་པའི་བློ་གྲོས་སྤྱི་གཙུག་དམ་པའི་མན་ངག་ནོར་བུས་ལེགས་སྤྲས་པའི། །གཙུག་རྒྱན་འོད་ཀྱིས་གསུང་རབ་བང་མཛོད་གསལ་བར་བྱེད་པའི་བསྟན་བཅོས་ཆེན་པོ་འདི། །རང་ཉིད་དྲན་གསོ་གཟུར་གནས་གཞན་ལའང་ཕན་ཕྱིར་མང་ཐོས་བསོད་ནམས་སེང་གེས་སྦྱར། །འདི་ལས་རྣམ་དཀར་དགེ་བའི་ཚོགས། །ཉི་ལྟར་གསལ་བ་གང་ཐོབ་དེས། །འགྲོ་བའི་སྙིང་མུན་ཀུན་བསལ་ནས། །འཇམ་དབྱངས་ཉི་མ་ཐོབ་པར་ཤོག །བདག་ཀྱང་ཛྙཱ་ན་པཱ་ཏ་ཇི་བཞིན་དུ། །འཛུམ་བཅས་རོལ་བའི་འཇམ་དབྱངས་ཞལ་ལྟ་ཞིང་། །ཞལ་གྱི་བདུད་རྩིས་རང་རྒྱུད་གྲོལ་བྱས་ནས། །གསང་ཆེན་བསྟན་པ་རྒྱས་པའི་མཐུ་ལྡན་ཤོག །འཛིན་མའི་ཁྱོན་འདིར་རྗེ་བཙུན་ས་སྐྱ་པའི། །བསྟན་པའི་ཉི་འོད་ལྷམ་མེར་གསལ་བ་འདི། །ལོག་སྨྲའི་སྒྲ་གཅན་ཁ་ཡིས་མ་བསྒྲིབས་པར། །གདུལ་བྱའི་པད་མཚོ་ཀུན་དུ་ཁྱབ་པར་ཤོག །འཇམ་པའི་རྡོ་རྗེ་གཙོ་བོར་གྱུར་པའི་དཔལ་གསང་བ་འདུས་པ་ལྷ་བཅུ་དགུའི་དཀྱིལ་འཁོར་གྱི་སྒྲུབ་པའི་ཐབས་ཀུན་ཏུ་བཟང་པོའི་ཉི་འོད་ཀྱི་དོན་འགྲེལ་ལམ་བཟང་གསལ་བའི་སྣང་བ་ཞེས་བྱ་བ་འདི་ནི། འདུས་པའི་རྒྱུད་ཆེན་ལུགས་གཉིས་ཀྱི་འགྲེལ་པ་དང་། གཞུང་རྣམས་ལ་ཡུན་རིང་དུ་འདྲིས་པར་བྱས་ཤིང་། ལེགས་པར་དཔྱད་དེ། རྒྱལ་བའི་རིང་ལུགས་པ་མཐའ་དག་གི་གཙུག་གི་ནོར་བུར་གྱུར་པ་ཐམས་ཅད་མཁྱེན་པ་ཀུན་དགའ་བཟང་པོ་ཡབ་སྲས་ཀྱི་གསུང་ལས་སྐྱེས་པ་ཤཱཀྱའི་དགེ་སློང་བསོད་ནམས་སེང་གེས་ཤིང་མོ་སྦྲུལ་གྱི་ལོ་ས་གའི་ཟླ་བའི་ཡར་གྱི་ངོ་ལ་དཔལ་ཨེ་ཝཾ་ཆོས་ལྡན་གྱི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ། །འདིས་ཀྱང་རྡོ་རྗེ་ཐེག་པའི་བསྟན་པ་རིན་པོ་ཆེ་ཕྱོགས་ཀུན་དུ་དར་ཤིང་རྒྱས་པར་གྱུར་ཅིག། །།དགེའོ། །དགེའོ། །དགེའོ།། ༈ །།འདི་བསྒྲུབས་པ་ལས་བྱུང་བ་ཡི། །རྣམ་དཀར་དགེ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །འཇམ་དབྱངས་ཡེ་ཤེས་ཐོབ་པར་ཤོག། །།

དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས།

དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས་བཞུགས་སོ།། སྲིད་ཞི་ཀུན་ཁྱབ་ཡེ་ཤེས་འཇམ་པའི་དབྱངས། །ཐུགས་རྗེའི་དབང་གིས་ཁྲོས་པའི་སྐུར་སྟོན་པ། །དཔལ་ཆེན་རྡོ་རྗེ་འཇིགས་བྱེད་ལ་བཏུད་ནས། །དེ་ཡི་སྒྲུབ་ཐབས་རིམ་པར་བཤད་པར་བྱ། །བཅོམ་ལྡན་འདས་རྡོ་རྗེ་འཇིགས་བྱེད་ཀྱི་བསྐྱེད་པའི་རིམ་པ་བསྒོམ་པ་ལ། སྔོན་འགྲོ་དང་། དངོས་གཞི་དང་། ཐུན་མཚམས་སུ་གཏོར་མ་གཏོང་བའི་ཚུལ་དང་གསུམ་ལས། དང་པོ་ལ། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསག་པ་གཉིས། དང་པོ་ལ་ཡུལ་དག་པ་ལ་བརྟེན་པའི་ཚོགས་བསག་ནི། དབེན་པའི་གནས་སུ་བཅོམ་ལྡན་འདས་ཀྱི་བྲིས་སྐུ་བཤམས་པའི་མདུན་དུ། ཆུ་གཉིས་སྔོན་དུ་འགྲོ་བའི་མཆོད་པ་ལྔ་དང་། ནང་མཆོད་རྡོ་རྗེ་དྲིལ་བུ་རྣམས་བཤམས་ནས། སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་སྔོན་དུ་བྱས་ཏེ། རང་སྐད་ཅིག་གིས་དཔལ་རྡོ་རྗེ་འཇིགས་བྱེད་དུ་གསལ་བའི་ཐུགས་ཀར་ཉི་མ་ལ་གནས་པའི་ཧཱུྃ་མཐིང་ནག་ལས་འོད་འཕྲོས་པས། བླ་མ་དང་དཔལ་རྡོ་རྗེ་འཇིགས་བྱེད་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿཞེས་པས་སྤྱན་དྲང་། དེའི་མདུན་དུ་ཚོགས་བསག་བཅུ་གསུམ་བྱ་བ་ལ། དང་པོ་ཕྱག་འཚལ་བ་ནི། ན་མོ་གུ་རུ་བྷྱཿས་བླ་མ་དང་། ན་མཿཤྲཱི་བཛྲ་བྷཻ་ར་ཝེ་བྷྱཿས་རྡོ་རྗེ་འཇིགས་བྱེད་ལ་ཕྱག་བྱའོ། །གཉིས་པ་མཆོད་པ་ནི། མདུན་དུ་བཤམས་པའི་མཆོད་པ་རྣམས་བསང་སྦྱང་བྱིན་གྱིས་བརླབས་ནས། ཨོཾ་སརྦ་ཏ་ཐཱ་ག་ཏ་ཤྲཱི་བཛྲ་བྷཻ་ར་ཝ་ས་པ་རི་ཝཱ་ར་སོ་སོའི་མགོར་སྦྱར་བའི་ཨརྒྷཾ་པྲ་ཏཱིཙྪ་སྭཱཧཱ། པཱ་དྱཾ་པྲ་ཏཱིཙྪ་སྭཱཧཱ། བཛྲ་པུཥྤེ། བཛྲ་དྷཱུ་པེ། བཛྲ་ཨཱ་ལོ་ཀེ བཛྲ་གནྡྷེ། བཛྲ་ནཻ་ཝི་དྱཱ་ཨཱཿཧཱུྃ་སྭཱཧཱས་ཕྱི་མཆོད་དང་། བདུད་རྩི་ཡང་གཏོར་མ་བཞིན་བྱིན་གྱིས་བརླབས་ལ། རྩ་སྔགས་ལ་འབྲུ་གསུམ་བཏགས་པ་བརྗོད་པས་ནང་མཆོད། དུར་ཁྲོད་རྒྱན་གྱིས་རྣམ་བརྒྱན་པའི། །ཞེ་སྡང་གཤིན་རྗེའི་གཤེད་པོ་ནི། །དངོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་སྟོན་པའི། །ཡེ་ཤེས་ཁྲོ་རྒྱལ་རབ་འཇིགས་པ། །དུད་ཁ་མུན་ཆེན་ཁྱོད་ལ་འདུད། །ཅེས་པས་བསྟོད་པ་རྣམས་བྱའོ། །གསུམ་པ་སྡིག་པ་བཤགས་པ་ནི། བདག་གིས་སྐྱེ་བ་ཐོག་མ་མེད་པ་ནས་སྡིག་པ་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་སོ་སོར་བཤགས་པར་བགྱིའོ། །བཞི་པ་སྐྱབས་སུ་འགྲོ་བ་ནི། བླ་མ་དང་རྡོ་རྗེ་འཇིགས་བྱེད་འཁོར་དང་བཅས་པ་ལ་སྐྱབས་སུ་མཆིའོ། །ལྔ་པ་དམ་ཚིག་དང་སྡོམ་པ་བླང་བ་ནི། ཐུན་མོང་དང་ཁྱད་པར་གྱི་དམ་ཚིག་དང་སྡོམ་པ་རྣམས་བླང་ཞིང་བསྐྱང་བར་བགྱིའོ། །དྲུག་པ་རྗེས་སུ་ཡི་རང་བ་ནི། སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་དང་། སོ་སོ་སྐྱེ་བོའི་དགེ་བའི་རྩ་བ་ལ་རྗེས་སུ་ཡི་རང་བར་བགྱིའོ། །བདུན་པ་སྨོན་པའི་སེམས་བསྐྱེད་པ་ནི། བདག་གིས་འཁོར་བའི་རྒྱ་མཚོ་ལས་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །བརྒྱད་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི། ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །དགུ་པ་མྱ་ངན་ལས་མི་འདའ་བར་གསོལ་བ་འདེབས་པ་ནི། འཁོར་བ་མ་སྟོངས་ཀྱི་བར་དུ་མྱ་ངན་ལས་མི་འདའ་བར་གསོལ་བར་བགྱིའོ། །བཅུ་པ་འཇུག་པའི་སེམས་བསྐྱེད་པ་ནི། བདག་གི་དཔལ་རྡོ་རྗེ་འཇིགས་བྱེད་ཀྱི་བསྒོམ་བཟླས་ལ་གནས་པར་བགྱིའོ། །བཅུ་གཅིག་པ་བསྔོ་བ་ནི། བདག་དང་སེམས་ཅན་ཐམས་ཅད་དཔལ་རྡོ་རྗེ་འཇིགས་བྱེད་ཀྱི་གོ་འཕང་ཐོབ་པར་གྱུར་ཅིག སྡིག་པ་བཤགས་པ་ནས་བསྔོ་བའི་བར་འདི་ལན་གསུམ་བརྗོད་དོ། །བཅུ་གཉིས་པ་གནང་བ་ནོད་པ་ནི། བླ་མ་དང་འཇིགས་བྱེད་ཀྱི་ཞལ་ནས་དེ་ལྟར་བསྒྲུབས་པས་ལམ་ལེགས་པ་ལ་གནས་པ་ཡིན་ནོ། །ཞེས་གསུངས་པར་བསམ་ཞིང་ངག་ཏུ་ཡང་བརྗོད་དོ། །བཅུ་གསུམ་པ་གཤེགས་སུ་གསོལ་བ་ནི། ཨོཾ་སརྦ་བིད་པཱུ་ར་པཱུ་ར། སུ་ར་སུ་ར། ཨཱ་ཝརྟཱ་ཡ་ཨཱ་ཝརྟཱ་ཡ་ཧོཿཞེས་པས་མཆོད་དེ། ཨོཾ་བཛྲ་མུཿས་གཤེགས་སུ་གསོལ་ལོ། །ཡུལ་མ་དག་པ་ལ་བརྟེན་པའི་ཚོགས་བསག་ནི། ཚད་མེད་བཞི་བསྒོམ་མོ། །གཉིས་པ་ཡེ་ཤེས་ཀྱི་ཚོགས་བསག་པ་ནི། སྣང་བ་ཐམས་ཅད་སེམས་ཙམ་དུ་བསམས་ལ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད། སེམས་དེའང་མི་དམིགས་པར་བསམས་ལ། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧཾཞེས་བརྗོད་དོ། །གཉིས་པ་དངོས་གཞི་ལ་གསུམ་སྟེ། བདག་ཉིད་སངས་རྒྱས་སུ་བསྐྱེད་པ། དེ་ལ་མཆོད་པ་བྱ་བ། སྔགས་ཀྱི་བཟླས་པ་བྱ་བའོ། །དང་པོ་ལ་བཞི་སྟེ། བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་ནོ། །དང་པོ་ནི། སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར་དུ་བའི་མདོག་ཅན། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་དྷིཿཡོངས་སུ་གྱུར་པ་ལས། རང་ཉིད་འཕགས་པ་འཇམ་དཔལ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ། གཡས་པས་རལ་གྲི་དཔུང་པའི་ཐད་དུ་འཕྱར་བ། གཡོན་པས་ཨུཏྤ་ལའི་སྟེང་ན་གླེགས་བམ་བསྣམས་པ། རིན་པོ་ཆེའི་རྒྱན་གྱིས་བརྒྱན་ཅིང་། རལ་པའི་ཟུར་ཕུད་ལྔ་དང་ལྡན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་ཐུགས་ཀར་ཨ་ལས་ཉི་མའི་དཀྱིལ་འཁོར། དེ་ལས་འོད་ཟེར་འཕྲོས་པས་ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ། རིག་པའི་ལྷ་མོ། ཁྲོ་བོ་ལ་སོགས་པ་དཔག་ཏུ་མེད་པ་བསྡུས་ནས་ཉི་མ་ལ་ཐིམ། འཇམ་དཔལ་ཟླ་བའི་དཀྱིལ་འཁོར་དང་བཅས་པའང་ཉི་མ་ལ་ཐིམ་པས། ཉི་མ་དེའང་དཔག་ཚད་འབུམ་གྱི་ཚད་དང་ལྡན་པ་འོད་ཟེར་བརྒྱ་སྟོང་འཕྲོ་བར་གྱུར། དེ་ལས་འོད་ཟེར་མེའི་ཚྭ་ཚྭ་ལྟ་བུ་འཕྲོས་པས་སྡང་བའི་སེམས་ཅན་རྣམས་ཚར་བཅད། ཉི་མའི་སྟེང་དུ་ཆུ་ལས་ཆུ་བུར་རྡོལ་བའི་ཚུལ་གྱིས་ཧཱུྃ་ནག་པོ་འོད་ཟེར་ལྔ་དང་ལྡན་པ། དེ་ལས་འོད་འཕྲོས། སླར་འདུས་ཡོངས་སུ་གྱུར་པ་ལས་རྡོ་རྗེ་ནག་པོ་རྩེ་ལྔ་པ་རྭ་གདེངས་པ་འོད་ཟེར་ལྔ་དང་ལྡན་པའི་ལྟེ་བ་ལ་ཧཱུྃ་གིས་མཚན་པར་བསམས་ལ། ཧཱུྃ་ལས་རྡོ་རྗེའི་ཚོགས་དཔག་ཏུ་མེད་པ་འཕྲོས། རབ་ཏུ་སྡང་བའི་སེམས་ཅན་རྣམས་རྡོ་རྗེའི་ཆར་གྱིས་བརྡུངས་ནས་ཚར་བཅད། ཡང་ཧཱུྃ་གི་འོད་ཟེར་ལས་སངས་རྒྱས་ལ་སོགས་པའི་སྐུ་ཕྲ་མོ་ཏིལ་གྱི་གོང་བུ་ཇི་སྙེད་བསྡུས་ནས་ཉི་མ་ལ་ཞུགས། དེ་རྣམས་ཀྱིས་སེམས་ཅན་གྱི་དོན་བྱས་ནས། ཉི་མ་དང་བཅས་པ་རྡོ་རྗེ་ལ་ཐིམ། དེ་ལྟ་བུའི་རྡོ་རྗེ་དེ་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ཀྱི་རྟེན་དང་བརྟེན་པར་བཅས་པའི་དཀྱིལ་འཁོར་ཅིག་ཆར་དུ་གྱུར་པ་ནི། སངས་རྒྱས་ཀུན་གྱི་ཡེ་ཤེས་སྐུ། །གཅིག་ཏུ་བསྡུས་པ་འཇམ་པའི་དབྱངས། །ཐུགས་རྗེས་གདུག་པ་འདུལ་བའི་ཕྱིར། །ཁྲོ་བོར་གྱུར་པ་གཤིན་རྗེའི་གཤེད། །མདོག་ནག་རབ་ཁྲོས་འཇིགས་པའི་གཟུགས། །དབུ་དགུ་སུམ་ཅུ་རྩ་བཞིའི་ཕྱག །བཅུ་དྲུག་ཞབས་ཀྱི་གཡས་རྣམས་བསྐུམ། །གཡོན་བརྐྱང་རྣམ་པར་བསྒྱིངས་པས་བཞུགས། །རྩ་ཞལ་མ་ཧེ་ཁྲོས་པའི་གདོང་། །ཧཱུྃ་དང་ཕཊ་ཀྱི་སྒྲ་ཆེན་སྒྲོགས། །སྟེང་ཞལ་དམར་པོ་རྒྱ་ཆེར་བཞད། །དེ་སྟེང་འཇམ་དཔལ་གཞོན་ནུའི་ཞལ། །གསེར་གྱི་མདོག་ཅན་ཅུང་ཟད་ཁྲོ། །གཡས་པ་རྭ་ཡི་ཕྱོགས་ཀྱི་ཞལ། །དང་པོ་སྔོན་པོ་མཆེ་བ་གཙིགས། །གཉིས་པ་དམར་པོ་ལྗགས་འདྲིལ་ཞིང་། །གསུམ་པ་སེར་པོ་ཁྲོ་གཉེར་ཅན། །གཡོན་པ་རྭ་ཡི་ཕྱོགས་ཀྱི་ཞལ། །དང་པོ་དཀར་པོས་རྨོངས་པར་བྱེད། །གཉིས་པ་དུད་ཁས་རེངས་པར་བྱེད། །གསུམ་པ་ནག་པོས་གསོད་པར་བྱེད། །ཞལ་རྣམས་ཐམས་ཅད་སྤྱན་གསུམ་ལྡན། །ཕྱག་གཡས་རྣམས་ཀྱིས་རིམ་བཞིན་དུ། །གྲི་གུག་འཕང་མདུང་གཏུན་ཤིང་དང་། །ཆུ་གྲི་རྡོ་རྗེ་རྩེ་གཅིག་པ། །དགྲ་སཏྭ་མདུང་མདའ་ལྕགས་ཀྱུ་དང་། །དབྱུག་པ་ཁ་ཊྭཱཾ་འཁོར་ལོ་དང་། །རྡོ་རྗེ་རྩེ་ལྔ་ཐོ་བ་དང་། །རལ་གྲི་རྔེའུ་ཆུང་རིམ་བཞིན་འཛིན། །ཕྱག་གཡོན་རྣམས་ཀྱིས་རིམ་བཞིན་དུ། །ཁྲག་གིས་གང་བའི་ཐོད་པ་དང་། །མགོ་ཕུབ་རྐང་པ་ཞགས་པ་གཞུ། །རྒྱུ་མ་དྲིལ་བུ་ལག་པ་དང་། །རོ་རས་སྐྱེས་བུ་གསལ་ཤིང་ཕུབ། །མེ་ཐབ་ཐོད་ཚལ་སྡིགས་མཛུབ་དང་། །འཕན་རྩེ་གསུམ་དང་རླུང་རས་འཛིན། །ཐ་མ་ཡི་ནི་ཕྱག་གཉིས་ཀྱིས། །གླང་ཆེན་པགས་པ་གོས་སུ་གྱོན། །ཞབས་གཡས་རྣམས་ཀྱིས་རིམ་བཞིན་དུ། །མི་དང་མ་ཧེ་གླང་བོང་བུ། །རྔ་མོ་ཁྱི་ལུག་ལྕེ་སྤྱང་མནན། །གཡོན་རྣམས་རིམ་བཞིན་བྱ་རྒོད་དང་། །འུག་པ་བྱ་རོག་ནེ་ཙོ་དང་། །ཁྭ་དང་ཁྱུང་ཆེན་རི་སྐེགས་བཞད། །མནན་ཅིང་ཞབས་རྣམས་ཐམས་ཅད་ཀྱིས། །ཚངས་པ་དབང་པོ་ཉེ་དབང་པོ། །དྲག་པོ་གཞོན་ནུ་གདོང་དྲུག་རྣམས། །བསྒྱེལ་ནས་ཁས་བུབ་ཉིད་དུ་མནན། །མི་མགོ་སྐམ་པོ་ལྔ་ལྔ་ཡིས། །ཁྲོ་ཞལ་རྣམས་ཀྱི་དབུ་ལ་བརྒྱན། །མི་མགོ་ཁྲག་འཛག་ལྔ་བཅུ་དང་། །སྦྲུལ་ནག་ཆུན་པོས་དོ་ཤལ་བྱས། །དབུ་སྐྲ་སེར་པོ་གྱེན་དུ་འབར། །སྤྱན་རྩ་དམར་པོ་གློག་ལྟར་འཁྱུག །ལིངྒ་དམར་པོ་གྱེན་དུ་ལངས། །སྐུ་ལས་སྤྲུལ་པའི་ཕོ་ཉ་འཕྲོ། །སྒེག་པ་དཔའ་བ་མི་སྡུག་པ། །དགོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་ཉམས་དང་ལྡན་པ་ཡིས། །ཡེ་ཤེས་མེ་དཔུང་དབུས་ན་བཞུགས། །དེའི་ཕྱི་རོལ་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ། གྲུ་བཞི་སྒོ་བཞི་རྟ་བབས་བཞིས་མཛེས་པར་བྱས་པ། ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པའི་སྟེང་ན། ཕ་གུ་དང་། དྲྭ་བ་དང་། དྲྭ་བ་ཕྱེད་པ་དང་། མདའ་ཡབ་དང་། པུ་ཤུས་བརྒྱན་ཅིང་། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་ནོར་བུའི་ཏོག་གིས་སྤྲས་པ། ནང་ཀ་བ་བརྒྱད་དང་ལྡན་ཞིང་། ཕྱི་རོལ་འདོད་ཡོན་གྱི་སྣམ་བུ་ལ་མཆོད་པའི་ལྷ་མོས་བསྐོར་བ། ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། གཞལ་ཡས་ཁང་གི་ཕྱི་རོལ་དུ་དུར་ཁྲོད་ཆེན་པོ་བརྒྱད། ཕྱོགས་སྐྱོང་བརྒྱད། ཤིང་བརྒྱད། ཞིང་སྐྱོང་བརྒྱད། སྤྲིན་བརྒྱད། ཀླུ་བརྒྱད། མེ་བརྒྱད། ཆུ་བརྒྱད། མཆོད་རྟེན་བརྒྱད། གྲུབ་པ་ཐོབ་པའི་དཔའ་བོ་དང་། རྣལ་འབྱོར་མའི་ཚོགས་དང་། འདྲེ་དང་། རོ་ལངས་དང་། ལྕེ་སྤྱང་ལ་སོགས་པའི་ཚོགས་ཀྱིས་ཡོངས་སུ་གང་བའི་ཕྱི་རོལ་དུ་སྲུང་བའི་འཁོར་ལོ་ཡེ་ཤེས་ཀྱི་མེ་རབ་ཏུ་འབར་བ་དང་བཅས་པའོ། །གཉིས་པ་ནི། རང་གི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་བསམ་མོ། །གསུམ་པ་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས། རང་བཞིན་གྱི་གནས་ནས་བཅོམ་ལྡན་འདས་རྡོ་རྗེ་འཇིགས་བྱེད་རྟེན་དང་བརྟེན་པར་བཅས་པའི་དཀྱིལ་འཁོར་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས་ལ། ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་ནས། ཛཿཧཱུྃ་བྃ་ཧོཿས་དབྱེར་མེད་དུ་བསྟིམ་མོ། །བཞི་པ་ནི། སླར་ཡང་ཐུགས་ཀའི་ཧཱུྃ་ལས་འོད་འཕྲོས་པས། དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས་ལ། སྔར་བཞིན་མཆོད་ནས། ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས་ཨོཾ་བཛྲཱི་བྷ་ཝ་ཨཱ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་པར་བསམ་མོ། །གཉིས་པ་དེ་ལ་མཆོད་པ་བྱ་བ་ལ། སྔགས་ཀྱི་མཆོད་པ། ཕྱིའི་མཆོད་པ། འདོད་ཡོན་གྱི་མཆོད་པ། ནང་གི་མཆོད་པ། བསྟོད་པའི་མཆོད་པའོ། །དང་པོ་ནི། རྩ་སྔགས། སྙིང་པོ། ཉེ་སྙིང་གསུམ་ལན་གཅིག་བརྗོད་དོ། །གཉིས་པ་ནི། ཚོགས་ཞིང་གི་སྐབས་ལྟར་ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་དོ། །གསུམ་པ་ནི། ཨོཾ་སརྦ་ཏ་ཐཱ་ག་ཏ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ་ཞེས་སོགས་ལྔ་ཕྱག་རྒྱ་དང་བཅས་པས་མཆོད་དོ། །བཞི་པ་ནི། རྩ་སྔགས་བརྗོད་དེ་ནང་མཆོད་གཏོར་རོ། །ལྔ་པ་ནི། དུར་ཁྲོད་རྒྱན་གྱིས་རྣམ་བརྒྱན་པ། །སོགས་ཀྱིས་བསྟོད་དོ། །གསུམ་པ་སྔགས་ཀྱི་བཟླས་པ་བྱ་བ་ནི། སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག་ལ་ཡི་གེ་བཅུ་པས་གཡས་སྐོར་དུ་བསྐོར་བ་ལས་འོད་ཟེར་འཕྲོས་པས་སེམས་ཅན་གྱི་སྡིག་སྒྲིབ་སྦྱངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་སྣ་ཚོགས་ཀྱིས་མཆོད་ནས། དེ་དག་གི་ཐུགས་གཉིས་སུ་མེད་པའི་ཡེ་ཤེས་འོད་ཟེར་གྱི་རྣམ་པར་བསྡུས་ནས་སྙིང་གའི་ཡི་གེ་རྣམས་ལ་ཐིམ་པས་སྡིག་པ་དང་སྒྲིབ་པ་ཐམས་ཅད་སྦྱངས་ཤིང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་རླབས་ཞུགས་པར་བསམས་ལ། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཕཊ་ཅེས་པ་ཅི་ནུས་བཟླའོ། །དེ་ནས་ཧཱུྃ་དང་ཡིག་འབྲུ་རྣམས་མི་དམིགས་པར་བྱས་ཏེ། དབུས་སུ་ཡ་ལ་མཐའ་སྐོར་དུ་ཡི་གེ་བདུན་པས་བསྐོར་བ་སོགས་དམིགས་པ་སྔར་བཞིན་བྱས་ཏེ། ཨོཾ་ཡ་མཱནྟ་ཀ་ཧཱུྃ་ཕཊ་ཅི་ནུས་བཟླའོ། །ཡང་ཡིག་འབྲུ་རྣམས་མི་དམིགས་པར་བྱས་ཏེ། དབུས་སུ་མ་ལ་མཐའ་སྐོར་དུ་ཡི་གེ་སོ་གཉིས་པས་བསྐོར་བའི་དམིགས་པ་སོགས་གོང་བཞིན་བྱས་ནས། ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ད་ཡོ་ད་ཡ། ཡ་ད་ཡོ་ནེ། ར་ཡཀྵེ་ཡ། ཡཀྵེ་ཡཙྪ། ནཱིར་མཱ་ཡ་ཧཱུྃ་ཕཊ། ཅེས་ཅི་ནུས་བཟླ། སྔགས་ཀྱི་འོད་ཟེར་གྱི་ཁ་དོག་ནི་ཞི་བ་ལ་དཀར་པོ། རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོར་བསམ་མོ། །བཟླས་པའི་ཡུལ་ཕྲེང་བ་ནི། བཟླས་པ་ལ་འཇུག་པའི་སྔོན་དུ་བསང་སྦྱངས། སྟོང་པའི་ངང་ལས་ཕྲེང་རྡོག་རེ་རེ་བཞིན་པད་ཉིའི་སྟེང་དུ་བཅོམ་ལྡན་འདས་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པར་བསྐྱེད། སྐུ་གསུང་ཐུགས་བྱིན་གྱིས་བརླབ། ཡེ་ཤེས་པ་བཅུག དབང་བསྐུར་ཞིང་རིགས་ཀྱི་བདག་པོས་རྒྱས་གདབ། མཆོད་བསྟོད་ཞུ་བ་ལས། ཕྲེང་རྡོག་རེ་རེ་ཡང་མི་མགོ་རློན་པ་ཁྲག་འཛག་པར་བསམས་ལ་སྔགས་བཟླའོ། །མཇུག་ཏུ་སྔར་ལྟར་མཆོད་པ་ལྔས་མཆོད་ནས། རང་གི་སྙིང་གའི་ས་བོན་ལས་འོད་ཟེར་འཕྲོས། སྣོད་བཅུད་ཐམས་ཅད་ལ་ཕོག་པས་འོད་ཟེར་གྱི་རང་བཞིན་དུ་བྱས་ཏེ་སྲུང་བའི་འཁོར་ལོ་ལ་ཐིམ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་གདན་རྣམས་ལ། གདན་རྣམས་རིམ་གྱིས་སྲོག་ཆགས་རྣམས་ལ། དེ་རྣམས་ཞབས་ཐ་དད་ལ། ཞབས་ལྷག་མ་རྣམས་རིམ་གྱིས་རྩ་བའི་ཞབས་གཉིས་ལ། ཕྱག་ལྷག་མ་རྣམས་རིམ་གྱིས་རྩ་བའི་ཕྱག་གཉིས་ལ། ཞལ་ལྷག་མ་རྣམས་རྩ་བའི་ཞལ་ལ་ཐིམ་སྟེ། རང་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ་མ་ཧེའི་གདོང་པ་ཅན་དུ་བསམས་ཏེ། ཐུན་མཚམས་ཀྱི་བྱ་བ་རྣམས་ལ་འཇུག་གོ །གསུམ་པ་ཐུན་མཚམས་སུ་གཏོར་མ་གཏོང་བའི་ཚུལ་ནི། མདུན་དུ་གཏོར་མ་གཉིས་བཤམས་པ་ལ། ནང་མཆོད་ཆུ་ཆང་གིས་སྦྱང་། མེད་ན་ཆུ་གཙང་མས་སྦྱངས་ལ། ཡི་གེ་སུམ་ཅུ་རྩ་གཉིས་པས་བསང་། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡྃ་ལས་རླུང་། རྃ་ལས་མེའི་སྟེང་དུ་ཨ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བ། དེའི་ནང་དུ་ཤར་དུ་གོ་ལས་བ་གླང་གི་ཤ ལྷོར་ཀུ་ལས་ཁྱིའི་ཤ ནུབ་ཏུ་ད་ལས་རྟའི་ཤ བྱང་དུ་ཧ་ལས་གླང་པོ་ཆེའི་ཤ དབུས་སུ་ན་ལས་མིའི་ཤ དེ་རྣམས་ཀྱི་སྟེང་དུ། ཤར་དུ་བི་ལས་དྲི་ཆེན། དབུས་སུ་མུ་ལས་དྲི་ཆུ། ནུབ་ཏུ་ཤུ་ལས་བྱང་སེམས། བྱང་དུ་མ་ལས་ཀླད་པ། ལྷོར་ར་ལས་རཀྟ། དེ་རྣམས་ཀྱི་སྟེང་དུ་དབུས་སུ་ཧཱུྃ་ཆོས་ཀྱི་དབྱིངས་ཀྱི་ཡེ་ཤེས། ཤར་དུ་ཨོཾ་མེ་ལོང་ལྟ་བུའི་ཡེ་ཤེས། བྱང་དུ་ཁྃ་བྱ་བ་གྲུབ་པའི་ཡེ་ཤེས། ནུབ་ཏུ་ཛྲཱིཾ་སོ་སོར་རྟོག་པའི་ཡེ་ཤེས། ལྷོར་ཏྲཱྃ་མཉམ་པ་ཉིད་ཀྱི་ཡེ་ཤེས། དེ་དག་གི་སྟེང་གི་ནམ་མཁར་ཨ་ལས་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་མགོ་ཐུར་དུ་བལྟས་པ་འཕྱང་བ། ཟླ་བའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ལྟེ་བར་ཟླ་བ་ལ་ཧཱུྃ་གིས་མཚན་པ། ཧཱུྃ་ལས་འོད་ཟེར་འོག་ཏུ་འཕྲོས་པས་རླུང་གཡོས། མེ་སྦར་ནས་ཐོད་པའི་ནང་གི་རྫས་རྣམས་བསྐོལ་ཞིང་ཞུ་བའི་རླངས་པ་ཨོཾ་དང་། སྣ་ཚོགས་རྡོ་རྗེའི་ལྟེ་བའི་ཧཱུྃ་ལ་ཕོག་པས། དེ་དག་ལས་བདུད་རྩིའི་རྒྱུན་འཛག ཡང་ཧཱུྃ་ལས་འོད་ཟེར་འཕྲོས་ཏེ། ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་ཐོད་པ་གང་བ་དཔག་ཏུ་མེད་པ་བཀུག མདུན་གྱི་ཐོད་པ་ལ་ཐོད་པ་ཐིམ། བདུད་རྩི་ལ་བདུད་རྩི་ཐིམ། སྣ་ཚོགས་རྡོ་རྗེ་ཟླ་བ་ཨོཾ་དང་བཅས་པ་ཐོད་པའི་ནང་དུ་ལྷུང་བ་འོད་དུ་ཞུ་ནས་སྔར་གྱི་བདུད་རྩི་རྣམས་དང་གཉིས་སུ་མེད་པར་གྱུར་ཏེ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བསམས་ལ། ཨོཾ་ཨཱཿཧཱུྃ་ཞེས་ལན་གསུམ་བརྗོད། དེ་ནས་གཏོར་མགྲོན་སྤྱན་འདྲེན་པ་ནི། རང་རྡོ་རྗེ་འཇིགས་བྱེད་དུ་གསལ་བའི་ཐུགས་ཀ་ནས་འོད་ཟེར་འཕྲོས་པས་བཅོམ་ལྡན་འདས་རྡོ་རྗེ་འཇིགས་བྱེད། གཡོན་དུ་སྨྱོན་པ་འཇིགས་བྱེད་བཀའ་ནོད་པ་དང་། མཐའ་སྐོར་དུ་དུར་ཁྲོད་ཀྱི་བདག་པོ་རྣམས་དང་བཅས་པ་ཨོཾ་བཛྲ་ས་མཱ་ཛཿཞེས་པས་སྤྱན་དྲངས་ལ། བཛྲ་བྷེ་ར་ཝ་ཨ་གྲ་ཊིཋ་ཊིཋ་བཛྲ་ཞེས་དང་། ཨུཏྨན་ཌ་བྷཻ་ར་ཝ་ཨ་གྲ་ཊིཋ་ཊིཋ་ཞེས་དང་། ས་སྭ་ཏི་ཨ་དྷི་པ་ཏི་ཨ་གྲ་ཊིཋ་ཊིཋ་ཞེས་པས་བརྟན་པར་བཞུགས་སུ་གསོལ་ལ། དེ་རྣམས་ཀྱི་ལྗགས་ཀྱི་འོད་ཟེར་གྱིས་གཏོར་མ་གསོལ་བར་བསམས་ཏེ། བཅོམ་ལྡན་འདས་ལ་རྩ་སྔགས་ཀྱི་རྗེས་སུ། ཨོཾ་བྷཻ་ར་ཝ་གྲྀཧྞེ་དཾ་བ་ལིཾ་སྭཱཧཱ་ཞེས་དང་། སྨྱོན་པ་འཇིགས་བྱེད་ལ། ཨོཾ་ཨུཏྨནྜ་ལ་བྷཻ་ར་ཝ་ཡ་བ་ལིཾ་གྲྀཧྣ་གྲྀཧྣ་མ་མ་ཀརྻ་སདྱ་ཡ་སྭཱ་ཧཱ། ཞེས་དང་། དུར་ཁྲོད་བརྒྱད་ལ། ཨཥྚ་ས་སྭཱ་ན་ཏིཥྛ་བྷུ་ཏ་ས་ས་ན་རཀྵན་ཏ་སརྦ་གྲྀཧྣ་དཾ་བ་ལིཾ། མ་མ་སརྦ་ཀརྻ་སདྱ་ཡ་སྭཱ་ཧཱ། ཞེས་པ་རྣམས་ལན་གསུམ་གསུམ་བརྗོད་དོ། །དེ་ནས་ཕྱི་མཆོད་དང་ནང་མཆོད་ཀྱིས་མཆོད། བསྟོད་པས་བསྟོད། ཕྲིན་ལས་གཞོལ། ཡི་གེ་བརྒྱ་པ་བརྗོད་ཅིང་མགྲོན་གཤེགས་སུ་གསོལ་ལོ། །འཇམ་དབྱངས་ཁྲོས་ཆེན་རྒྱལ་པོའི་སྒྲུབ་པའི་ཐབས། །གསལ་བར་བགྱིས་པའི་བསོད་ནམས་གང་ཐོབ་དེས། །བདག་དང་མཁའ་མཉམ་འགྲོ་བ་མ་ལུས་པ། །འཇམ་དཔལ་གོ་འཕང་མྱུར་དུ་ཐོབ་པར་ཤོག །བཅོམ་ལྡན་འདས་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་འདི་ནི་དཔལ་ས་སྐྱ་པ་ཆེན་པོའི་དགོངས་པ་ཇི་ལྟ་བ་བཞིན་དུ་རྗེ་བཙུན་བླ་མ་མུས་པ་ཆེན་པོའི་ཞབས་རྡུལ་སྤྱི་བོས་བླངས་པ་ཤཱཀྱའི་དགེ་སློང་བསོད་ནམས་སེང་གེས་སྡེ་སྣོད་འཛིན་པ་དུ་མས་བསྐུལ་བའི་ངོར་དཔལ་ངམ་རིངས་ཀྱི་ཆོས་གྲྭ་ཆེན་པོར་སྦྱར་བའོ། །འདིའི་བརྒྱུད་པ་ནི། རྡོ་རྗེ་འཆང་། འཕགས་པ་འཇམ་དཔལ། སངས་རྒྱས་ཡེ་ཤེས་ཞབས། མར་མེ་མཛད་བཟང་པོ། གྲུབ་ཆེན་དཔལ་འཛིན། རྗེ་བཙུན་ནཱ་རོ་ཏ་པ། ཨསྡྱུལ་བཛྲ། བྷ་རོ་ཧཾ་ཐུང་། མལ་ལོ་ཙཱ་བ་བློ་གྲོས་གྲགས་པ། རྗེ་ས་སྐྱ་པ་ཆེན་པོ། རྗེ་བཙུན་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། གན་པ་སྟོན་དར། གན་པ་སོ་སྟོན། གན་པ་ཆོས་རྒྱལ། གན་པ་རིན་རྒྱལ། ཆོས་རྗེ་བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོ། མཁན་ཆེན་བྱང་ཆུབ་དཔལ་བཟང་པོ། ཆོས་རྗེ་ཡེ་ཤེས་རྒྱལ་མཚན་དཔལ་བཟང་པོ། རྗེ་བཙུན་ཀུན་དགའ་བཟང་པོ། ཆོས་རྗེ་དཀོན་མཆོག་རྒྱལ་མཚན་དཔལ་བཟང་པོ། དེས་བདག་བསོད་ནམས་སེང་གེ་ལའོ།། །།དགེའོ།། ༄༅། །སྤྲོས་མེད་རྒྱུན་གྱི་རྣལ་འབྱོར་བཞུགས། །གང་ཞིག་རྟོག་ན་འཇམ་དབྱངས་ཡེ་ཤེས་ཀྱི། །ཉི་མ་སྙིང་གི་དཀྱིལ་ན་གསལ་གྱུར་པ། །ཤིན་ཏུ་སྤྲོས་མེད་ཡེ་ཤེས་ལ་བཏུད་ནས། །དེ་ཡི་ཉམས་ལེན་ཚུལ་བཞིན་བཤད་པར་བྱ། །འདིར་བཅོམ་ལྡན་འདས་གཤིན་རྗེའི་གཤེད་ཀྱི་དཀྱིལ་འཁོར་དུ་དབང་བསྐུར་བ་ཐོབ་ཅིང་། དམ་ཚིག་དང་སྡོམ་པར་ལྡན་པ་ཤིན་ཏུ་སྤྲོས་མེད་ཀྱི་བྱིན་རླབས་དང་། ཁྲིད་ཐོབ་པའི་རྣལ་འབྱོར་པས་རྒྱུན་དུ་ཉམས་སུ་ལེན་ཚུལ་ནི་སྟན་བདེ་བ་ལ་རྡོ་རྗེའི་སྐྱིལ་ཀྲུང་ལ་སོགས་པ་རྣམ་སྣང་གི་ཆོས་བདུན་དང་ལྡན་པས་སྐྱབས་འགྲོ་དང་སེམས་བསྐྱེད་སྔོན་དུ་སོང་ནས། མདུན་གྱི་ནམ་མཁར་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་། ཉི་མ་དང་། མ་ཧེ་དམར་པོའི་སྟེང་ན་རྩ་བའི་བླ་མ་འཇམ་པའི་དབྱངས་གཤིན་རྗེའི་གཤེད་ཀྱི་རྣམ་པ་ཅན། ཞལ་གཅིག ཕྱག་གཉིས། གཡས་འཇིག་རྟེན་གསུམ་འདུལ་བའི་དབྱུག་པ་འཕྱར་བའི་ཚུལ་གྱིས་འཛིན་ཅིང་། གཡོན་བདུད་བཞིའི་ཁྲག་གིས་གང་བའི་ཐོད་པ་ཐུགས་ཀར་འཛིན་པ། དམར་ལ་ཟླུམ་པའི་སྤྱན་གསུམ་དང་ལྡན་པ། ཞལ་ཆེ་བ་བཞི་གཙིགས་ཤིང་། སྐྲ་སེར་པོ་གྱེན་དུ་བརྫེས་པ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ཀླུ་ཆེན་པོ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་བཞུགས་པ། དེའི་པང་ན་ཡུམ་རོ་ལངས་མ་སྐུ་མདོག་དམར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། དེའི་མཐའ་སྐོར་དུ་བླ་མ་བརྒྱུད་པ་དང་། ཡི་དམ་དཀྱིལ་འཁོར་གྱི་ལྷ་ཚོགས་དང་། སངས་རྒྱས་བྱང་སེམས། འཕགས་པ་ཉན་ཐོས། རང་སངས་རྒྱས། ཆོས་སྐྱོང་སྲུང་མའི་ཚོགས་བཅས་མངོན་སུམ་དུ་བཞུགས་པར་དམིགས། དེའི་མཐའ་སྐོར་དུ་རིགས་དྲུག་གི་སེམས་ཅན་རྣམས་ཀྱང་གཤིན་རྗེའི་གཤེད་ཀྱི་རྣམ་པས་འཁོད་པར་བསམ། བླ་མའི་ཐུགས་ཀ་ནས་འོད་ཟེར་འཕྲོས་པས་བླ་མ་བརྒྱུད་པ། ཡི་དམ་ལྷ་ཚོགས་སངས་རྒྱས་བྱང་སེམས། ཆོས་སྐྱོང་སྲུང་མ་རྣམས་སྤྱན་དྲངས་ནས་གཉིས་སུ་མེད་པར་ཐིམ། དེ་ནས་གང་གི་དྲིན་གྱིས་བདེ་ཆེན་ཉིད་ནས། །སློབ་དཔོན་ལ་ནི་བདག་སྐྱབས་མཆི། །ཞེས་པའི་བར་ཚིགས་རྐང་དྲུག་དང་། གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཁྱོད་ཞབས་པདྨོ་སྤངས་ནས་ནི། །བདག་ལ་གནས་སུ་སྐྱབས་མ་མཆིས། །ཁྱོད་ཀྱི་ཐུགས་རྗེའི་བྱིན་རླབས་ཀྱིས། །ད་ལྟ་ཉིད་དུ་བཀའ་དྲིན་མཛོད། །ཨོཾ་བཛྲ་ཨརྒྷཾ་ཨཱཿཧཱུྃ་ནས། ཐོག་མཐའ་འདྲ་བ་ལ་པུཥྤེ། དྷཱུ་པེ། ཨཱ་ལོ་ཀེ གནྡྷེ། ནཻ་ཝི་དྱ། ཤབྡའི་བར་གྱིས་ཕྱི་མཆོད་དབུལ། ཨོཾ་ཨཱཿཧཱུྃ་གིས་ནང་མཆོད་དབུལ། བདག་གིས་དགྲ་ཐམས་ཅད་དཔལ་ལྡན་བླ་མ་དམ་པ་ལ་དབུལ་བར་བགྱིའོ། །གཉེན་ཐམས་ཅད༞ བར་མའི་སེམས་ཅན་ཐམས་ཅད༞ བདག་ཏུ་གཟུང་བའི་ཡོ་བྱད་ཀྱི་དངོས་པོ་ཐམས་ཅད་དབུལ་བར་བགྱིའོ། །ཞེས་བརྗོད། དེ་ནས་ལག་པ་གཡས་པས་རལ་གྲི་རྣོ་ངར་དང་ལྡན་པ་གཟུང་བར་བསམས་ནས། རང་གི་ཐོད་པ་བཅད་དེ་མདུན་དུ་མི་མགོའི་སྒྱེད་བུ་གསུམ་གྱི་སྟེང་དུ་བཀན་ནས་གཞག དེ་ནས་ལག་པ་གཡོན་པ་བཅད་དེ་དུམ་བུར་གཏུབས། ཐོད་པའི་ནང་དུ་བསྐྱུར། དེ་བཞིན་དུ་རྐང་པ་གཡོན། ཁོག་སྨད། ཁོག་སྟོད། ནང་ཁྲོལ་རྣམས་དུམ་བུར་གཏུབས་ནས་ཐོད་པའི་ནང་དུ་བསྐྱུར། མཐར་ལག་པ་གཡས་པ་རལ་གྲི་དང་བཅས་པའང་ཐོད་པའི་ནང་དུ་བསྐྱུར་ནས། རང་སེམས་རླུང་གི་བཞོན་པ་དང་བཅས་པ་རྫོགས་རིམ་གྱི་གཤིན་རྗེའི་གཤེད་ཀྱི་སྐུར་བསམས་ཏེ། ཨོཾ་ཨཱཿཧཱུྃ་གསུམ་གྱིས་ཡེ་ཤེས་ཀྱི་བདུད་རྩིའི་རྒྱ་མཚོར་བྱིན་གྱིས་བརླབ། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པས་བདག་གི་རྒྱུད་བྱིན་གྱིས་བརླབ་ཏུ་གསོལ། བདག་གི་བསམ་པ་མཁྱེན་པར་མཛད་དུ་གསོལ། བདག་ལ་ཐུགས་རྗེས་གཟུང་དུ་གསོལ། ཞེས་གསོལ་བ་བཏབ་པས་མདུན་གྱི་ཐོད་པ་བདུད་རྩིས་གང་བ་མང་དུ་ཆད་དེ་རྩ་བའི་བླ་མའི་ཞལ་དུ་བླུགས་ཏེ། ཨོཾ་ཨཱཿཧཱུྃ་མང་དུ་བརྗོད། དེ་ནས་བརྒྱུད་པའི་བླ་མ་ནས་ཆོས་སྐྱོང་སྲུང་མའི་བར་རང་རང་གི་ཐུགས་བཞེད་དང་མཐུན་པའི་མཆོད་པ་སྣ་ཚོགས་ཀྱིས་མཆོད་པར་བསམས་ནས་ཨོཾ་ཨཱཿཧཱུྃ་བརྗོད། དེ་བཞིན་དུ་ཐོད་པའི་བདུད་རྩི་ལས་རིགས་དྲུག་གི་སེམས་ཅན་གྱི་དགོས་འདོད་ཐམས་ཅད་ཡིད་བཞིན་དུ་སྐོང་། ཁྱད་པར་དུ་བདག་ལ་རྦོད་གཏོང་བྱེད་པའི་ལྷ་འདྲེ་རྣམས་ལ་རང་རང་གི་བསམ་པ་དང་མཐུན་པའི་ལོངས་སྤྱོད་ཀྱིས་ཚིམ་པར་བསམས་ནས་རང་གནས་སུ་དེངས་པར་བསམ། ཆོས་སྐྱོང་སྲུང་མ་ནས་ཡར་རིམ་པ་བཞིན་བསྡུས་ནས་རྩ་བའི་བླ་མ་ལ་ཐིམ། དེ་ནས་སངས་རྒྱས་ལ་སྐྱབས་སུ་མཆིའོ། །ཞེས་པས་བླ་མའི་ཐུགས་དང་རང་སེམས་དབྱེར་མེད། ཆོས་ལ་སྐྱབས་སུ་མཆིའོ། །ཞེས་པས་བླ་མའི་གསུང་དང་རང་གི་ངག དགེ་འདུན་ལ་སྐྱབས་སུ་མཆིའོ། །ཞེས་པས་རང་གི་ལུས་དང་བླ་མའི་སྐུ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པ་ལ་སྐྱབས་སུ་མཆིའོ། །ཞེས་པས་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པ་དང་རང་གི་ལུས་ངག་ཡིད་གསུམ་བྱ་བ་དང་བཅས་པ་དབྱེར་མེད་དུ་གྱུར་པར་བསམས་ལ། རང་སེམས་ནམ་མཁའ་ལ་དུ་བ་ཡལ་བ་བཞིན་ཕྱལ་དེ་སོང་བས་རང་སེམས། ནམ་མཁའ། ཆོས་དབྱིངས། བདེ་བ་རྣམས་དབྱེར་མེད་པའི་ངང་ལ་འཛིན་པ་གང་ཡང་ལྷོད་དེ། སིང་ངེ་བར་མཉམ་པར་གཞག་གོ །དེ་ནས་རྣམ་རྟོག་ལངས་ན་རྣམ་རྟོག་འོད་གསལ་གྱི་རྣལ་འབྱོར་བསྒོམ་སྟེ། ཕྱི་ཡུལ་ལ་འཕྲོ་བའི་རྣམ་རྟོག་ཐམས་ཅད་བུ་ག་དགུ་ནས་སྙིང་གར་འདུས་ཏེ་མར་མེའི་རྩེ་མོ་ལྟ་བུ་དམར་ནག་པ་མཐེ་བོང་གི་ཚད་ཙམ་ཞིག་ལུས་ཀྱི་ནང་དུ་ཡར་ཧྲིལ་མར་ཧྲིལ་བྱེད་པར་བསམ། དེ་ནས་སྙིང་དཀར་ནག་གི་མཚམས་སུ་བུ་ག་གཅིག་བྱེ་ནས་རྒྱངས་ཏེ་འཐོན། རྒྱ་མཚོའི་མཐར་སོང་བར་བསམ། ལུས་གོགས་པོ་དེ་ལས་ཀྱི་རླུང་གིས་དེད་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སངས་རྒྱས་འོད་དཔག་མེད་ཀྱི་ཞབས་དྲུང་དུ་གཞག དེ་ནས་སྔར་གྱི་རྣམ་རྟོག་དེ་ཇེ་སྲབ་ཇེ་སྲབ་ཏུ་སོང་ནས་ནམ་མཁའི་ཁམས་ཐམས་ཅད་ཁྱབ་སྟེ། རང་སེམས་དང་། རྣམ་རྟོག་དང་། ནམ་མཁའ་དབྱེར་མེད་པའི་ངང་ལ་གཞག མཇུག་ཏུ། དགེ་བ་འདི་ཡིས་མྱུར་དུ་བདག །འཇམ་དབྱངས་ཡེ་ཤེས་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་སོགས་བསྔོ་བ་སྨོན་ལམ་བྱའོ། །ཚུལ་འདི་ཤེས་ལྡན་རྣམ་རྒྱལ་ལེགས་མ་དང་། །དད་ལྡན་ཚེ་དབང་དཀོན་མཆོག་སྐྱབས་གཉིས་ཀྱིས། །ཚུལ་བཞིན་བསྐུལ་ནས་བསོད་ནམས་སེང་གེ་ཡིས། །སྦྱར་བའི་དགེ་བས་འགྲོ་ཀུན་སངས་རྒྱས་ཤོག། །།དགེའོ།། །།

དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག

དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་བཞུགས་སོ།། ཨོཾ་སྭསྟི། རྒྱལ་བ་ཀུན་གྱི་ཡབ་དུ་གྱུར་ཀྱང་རྒྱལ་སྲས་གཞོན་ནུའི་ཚུལ་འཛིན་ཅིང་། །དམིགས་མེད་ཐུགས་རྗེས་འགྲོ་ལ་བརྩེ་ཡང་གདུག་ཅན་འགྲོ་ལ་ཁྲོ་ཚུལ་སྟོན། །སྤྲོས་བྲལ་ཆོས་དབྱིངས་ངང་དུ་གྱུར་ཀྱང་སྣ་ཚོགས་སྤྲོས་པ་ཀུན་སྟོན་པ། །ལྷ་མཆོག་དེ་ལ་གུས་པས་བཏུད་ནས་དཀྱིལ་འཁོར་ཆོ་ག་འདིར་བཤད་བྱ། །འདིར་ཇི་སྐད་བཤད་པའི་མཚན་ཉིད་ཅན་གྱི་རྡོ་རྗེ་སློབ་དཔོན་ལ། སློབ་མ་མཚན་ཉིད་དང་ལྡན་པས་རྡོ་རྗེ་འཇིགས་བྱེད་ཀྱི་དཀྱིལ་འཁོར་དུ་དབང་བསྐུར་བར་གསོལ་བ་འདེབས་པ་ན། དེ་རྗེས་སུ་བཟུང་བའི་ཕྱིར། གནས་དབེན་པར་སྒྲུབ་ཐབས་ལྟར་ལྷ་བསྐྱེད་ནས། ཧྲཱིཿཥྚཱིཿའབུམ་དུ་བསྐྱལ། ཐུན་མཚམས་སུ་ཡི་གེ་སོ་གཉིས་པ་དང་། ཡི་གེ་བདུན་པ་ཡང་སྟོང་སྟོང་ཙམ་བཟླས་ཏེ་སྔོན་དུ་བསྙེན་པའོ། །དེ་ནས་དཀྱིལ་འཁོར་གྱི་ལས་ལ་འཇུག་པ་ལ་གསུམ་སྟེ། སའི་ཆོ་ག སྟ་གོན་གྱི་ཆོ་ག དངོས་གཞིའི་ཆོ་གའོ། །དང་པོ་ནི། དཀྱིལ་འཁོར་གྱི་ཁང་པར་སྐྱང་ནུལ་བྱས་ལ། ཆུ་གཉིས་སྔོན་དུ་འགྲོ་བའི་ཉེར་སྤྱོད་དང་། སྔོན་འགྲོ་གཏོར་མ་དང་། ནང་མཆོད། རྡོ་རྗེ་དྲིལ་བུ། ཕུར་བུ་ལ་སོགས་པ་འོག་དུ་དགོས་པའི་ཡོ་བྱད་རྣམས་ཚང་བར་བཤམས་ནས། སློབ་དཔོན་སའི་དབུས་སུ་འདུག་ལ། སྒྲུབ་པའི་ཐབས་ལས་འབྱུང་བའི་འཇིག་རྟེན་པའི་གཏོར་མས་སྔོན་འགྲོ་གཏོར་མ་བཏང་བ་དང་། མཆོད་པ་བྱིན་གྱིས་བརླབ་པ་ནས་བརྩམས་ཏེ། ལྷའི་རྣལ་འབྱོར་བཟླས་པ་དང་བཅས་པའི་བར་བྱས་ལ། རང་གཙོ་བོའི་ང་རྒྱལ་གྱིས་ལག་པ་གཉིས་ཀྱིས་ཐལ་མོ་བརྐྱང་བ་གཤིབས་ཏེ་ཁ་སྦུབས་པས་དཀྱིལ་འཁོར་གྱི་ས་གཞི་ལ་རེག་ཅིང་། ཨོཾ་བྷུ་ཁཾ་ཞེས་པས་ས་གཞི་ནམ་མཁའི་རང་བཞིན་དང་། ཧཱུྃ་ལཾ་ཧཱུྃ་ཞེས་པས་ས་རྡོ་རྗེའི་རང་བཞིན་ཅན་དང་། ཨོཾ་མེ་དཱི་ནི་བཛྲི་བྷ་ཝ་བནྡྷ་ཧཱུྃ་ཞེས་པས་བྱིན་གྱིས་བརླབ་པ་ནི་ས་སྦྱང་བའོ། །དེ་ནས་སློབ་དཔོན་གཙོ་བོའི་ང་རྒྱལ་ལྡན་པ་ལ། ལས་ཀྱི་སློབ་མས་ཕྱོགས་བཞི་ནས་མཆོད་པར་བསམས་ཤིང་དངོས་སུ་ཤར་ཕྱོགས་ནས། ཕྱི་ནང་གི་མཆོད་པས་མཆོད། དུར་ཁྲོད་རྒྱན་གྱིས་རྣམ་བརྒྱན་པའི། །ཞེས་སོགས་ཀྱིས་བསྟོད་ལ། གཤིན་རྗེ་འཇོམས་པའི་དཀྱིལ་འཁོར་འཇིགས། །དཀྱིལ་འཁོར་ཀུན་གྱི་གཙོ་བོ་ནི། །སྡིག་པ་ཐམས་ཅད་ཟད་མཛད་པ། །མགོན་པོ་དཀྱིལ་འཁོར་བྲི་བར་འཚལ། །ཞེས་གསོལ་བ་གདབ། སློབ་མ་མེད་ན་རང་གིས་བརྗོད་ཅིང་བསམ་མོ། །དེ་ནས་དཀྱིལ་འཁོར་བསྡུས་ལ་ལངས་ཏེ། རང་གི་མིག་གཡས་པ་མ་ལས་ཉི་མ། གཡོན་པ་ཊ་ལས་ཟླ་བ། མིག་འབྲས་གཉིས་ཧཱུྃ་ལས་བསྐལ་པའི་མེ་ལྟར་འབར་བར་བསམས་ལ། གཡས་གཡོན་དུ་བལྟས་པས་བགེགས་བསྐྲད་ཅིང་གསོས་པར་བསམ། རྐང་པ་ཧཱུྃ་ལས་རྡོ་རྗེར་བསྒོམས་ལ། རྡོ་རྗེ་གསོར། དྲིལ་བུ་གསིལ་ཞིང་། རྡོ་རྗེའི་འགྲོས་ཀྱིས་དཀྱིལ་འཁོར་གྱི་ས་གཞི་ལ་བསྐོར་ལ་ངག་ཏུ་ཡི་གེ་སོ་གཉིས་པ་བརྗོད་ཅིང་། དབང་ལྡན་དུ་གནས་པས་བགེགས་ལ་བཀའ་བསྒོ་སྟེ། ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་རྣམས་ཀུན་ཉོན་ཅིག །ང་ནི་དཔལ་ལྡན་རྡོ་རྗེ་འཆང་། །སྲུང་བའི་འཁོར་ལོ་སྦྱོར་བ་པོ། །རྡོ་རྗེ་གཟུགས་ནི་འབར་བ་ཡིས། །ལུས་གསུམ་ལས་སྐྱེས་དགས་པར་བྱ། །གལ་ཏེ་ཁ་ཅིག་བདག་ལ་འདའ། །འཇིག་པར་འགྱུར་གྱི་གཞན་དུ་མིན། །ཞེས་དང་། ཤར་དུ་རྡོ་རྗེའི་གནས་སུ་འཁོར་ལོ་དང་། ལྷོར་རིན་ཆེན། ནུབ་དུ་པདྨ། བྱང་དུ་རལ་གྲི་བཅུག་པས་བཀའ་བགོ་ཞིང་། ཐམས་ཅད་དུ་རོལ་མོའི་སྒྲ་དྲག་པོ་དང་། ཡི་གེ་སོ་གཉིས་པ་བཟླས་པས་བགེགས་བསྐྲད་པར་བསམ་མོ། །དེ་ནས་ཕུར་བུ་གཅིག་བསང་སྦྱངས་སྟོང་པའི་ངང་ལས་སྟོད་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པ་མ་ཧེའི་གདོང་པ་ཅན་གྲི་གུག་དང་ཐོད་པ་འཛིན་པ་དང་། སྨད་ཕུར་བུའི་རྣམ་པར་བསྒོམས་ནས། རང་གི་སྙིང་ཁ་ནས་ཁྲོ་བོ་ལྕགས་ཀྱུ་དང་། ཞགས་པ་ཐོགས་པ་དཔག་ཏུ་མེད་པ་སྤྲོས། བགེགས་ཀྱི་གཙོ་བོ་ཕྱོགས་སྐྱོང་བཅུའི་སྙིང་ཁ་ནས་ལྕགས་ཀྱུས་ཕུག མགྲིན་པ་ནས་ཞགས་པས་བཅིངས་ཏེ་དབང་ལྡན་གྱི་ཕྱོགས་སུ་བཅུག་ལ། དེ་རྣམས་ཀྱི་སྤྱི་བོར་ཕུར་བུ་བཙུགས་ཤིང་ཐོ་བས་བརྡུངས་པར་བསམས་ལ། ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལ་ཡ། ཀཱི་ལ་ཡ། སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་ར་ཡ་ཨཛྙཱ་པ་ཡ་ཏི། སརྦ་བིགྣཾ་ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཅེས་བརྗོད་ཅིང་བརྡུངས་པས་བགེགས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུག་ནས་ས་གཞི་ལ་སྦྲག་པར་བསམས་ལ། དངོས་སུ་ཕུར་བུ་དབང་ལྡན་དུ་གདབ་པ་ནི། ས་ཡོངས་སུ་བཟུང་བ་སྟེ་ནུབ་དང་པོའི་བྱ་བའོ། །གཉིས་པ་སྟ་གོན་གྱི་ཆོ་ག་ནི། སང་ནངས་པར་སྔོན་འགྲོ་གཏོར་མ་ནས། བདག་བསྐྱེད་བཟླས་པ་དང་བཅས་པའི་བར་སྔོན་དུ་སོང་ནས། དཀྱིལ་འཁོར་གྱི་དབུས་སུ་དྲིའི་ཐིག་ལེ་དང་། མེ་ཏོག་གི་ཚོམ་བུ་བྱས་ལ། དེར་མཚམས་བཅིང་བའི་ཕྱིར་སྲུང་བའི་འཁོར་ལོ་བསྒོམས་ཏེ། རང་ལྷར་གསལ་བའི་ཐུགས་ཁ་ནས་འོད་ཟེར་འཕྲོས་པས་ས་འོག་ནས། པཾ་ལས་བྱུང་བའི་སའི་ལྷ་མོ་སྐུ་མདོག་སེར་མོ་རྒྱན་སྣ་ཚོགས་ཀྱིས་བརྒྱན་པ། ལུས་ཕྱེད་འཐོན་པ། ཕྱག་གཡས་པས་དམ་བཅའ་ཁས་ལེན་པའི་ཕྱག་རྒྱ་དང་། གཡོན་པས་བུམ་པ་འཛིན་པ་སྤྱན་དྲངས་ནས་བདག་ལ་ཕྱོགས་པར་བཞུགས་པ་ལ། མདུན་གྱི་མཆོད་པ་རྣམས་ཀྱིས། ཨོཾ་པྲྀ་ཐཱི་ཝཱི་ས་པ་རི་ཝཱ་ར། ཞེས་པ་ལ་ཨརྒྷཾ་སོགས་བཏགས་པས་ཕུལ། ནང་མཆོད་ཀྱིས་ཀྱང་མཆོད། གཏོར་མ་བྱིན་གྱིས་བརླབས་ཏེ། ཨ་ཀཱ་རོས་ཕུལ་ལ། གཡས་སྤོས་དང་བཅས་པའི་རྡོ་རྗེ་དང་། གཡོན་དྲིལ་བུ་འཛིན་པས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ལྟར་བདག་གིས་བདུད་ཀྱི་དཔུང་། །བཅོམ་ནས་དཀྱིལ་འཁོར་བྲི་བར་བགྱི། །ཞེས་ལན་གསུམ་བརྗོད་པས། དཀྱིལ་འཁོར་གྱི་ལས་ཅི་བདེ་བར་གྱིས་ཤིག་ཅེས་གནང་བ་བྱིན་པ་ལ་སླར་ཡང་མཆོད་ནས་ས་དེ་ཉིད་དུ་ཐིམ་པར་བསམས་ཏེ། སའི་ལྷ་མོ་ལྷག་པར་གནས་པའོ། །དེ་ནས་དཀྱིལ་འཁོར་གྱི་ས་གཞིར་ལྷ་གནས་མི་འཆོལ་བར་བྱ་བའི་ཕྱིར་ཐིག་ཆེན་བརྒྱད་ཙམ་བཏབ་པའམ། ཡང་ན་འོག་ནས་འབྱུང་བ་ལྟར་གྱི་ལས་ཐིག་རྫོགས་པར་བཏབ་ལ། དེའི་མཐར་མཆོད་པ་དང་གཏོར་མ་རྣམས་ཕྱག་ལེན་བཞིན་དུ་བཤམས་ཏེ། དྲི་བཟངས་ཀྱི་ཆུས་དབུས་དང་ཕྱོགས་མཚམས་བརྒྱད་དུ་གྲུ་བཞིར་བྱུགས་ལ། མེ་ཏོག་གི་ཚོམ་བུ་བཀོད་ནས་ཡ་མ་རཱ་ཛ་ཞལ་གྱི་གྲངས་དང་མཉམ་པར་བརྗོད་དོ། །དེ་དག་བསང་སྦྱངས། སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་དུ་བའི་མདོག་ཅན་ནས་སྒྲུབ་ཐབས་ལྟར་རྟེན་དང་བརྟེན་པར་བཅས་པ་ཅིག་ཆར་བསྐྱེད་ནས་གསལ་གདབ་པའི་ཚེ། ཐོག་མར་རྟེན་གསལ་གདབ་སྟེ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ངམ་ཞེས་པ་ནས་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང་བའི་དབུས་སུ་རྡོ་རྗེ་རྭ་བ་ཟླུམ་པོས་བསྐོར་བའི་ནང་དུ་རེའུ་མིག་གི་དབུས་དང་། ཕྱག་མཚན་རྣམས་ཀྱི་གནས་དང་། སྒོ་མཚམས་བརྒྱད་དུ་པདྨ་དང་ཉི་མའི་གདན་རེ་རེ། ཕྱི་རོལ་དུ་དུར་ཁྲོད་བརྒྱད་དང་སྲུང་བའི་འཁོར་ལོ་གསལ་བཏབ་ནས་དབུས་ཀྱི་གདན་གྱི་སྟེང་དུ་གཙོ་བོ་སྒྲུབ་ཐབས་ལྟར་གསལ་གདབ། ཤར་གྱི་རེའུ་མིག་ཏུ་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པ། ཤར་ལྷོར་ཐོད་པ། ལྷོ་ནུབ་དུ་ཐོད་ཚལ། ནུབ་བྱང་དུ་དུར་ཁྲོད་ཀྱི་རས། བྱང་ཤར་དུ་སྐྱེས་བུ་གསལ་ཤིང་གིས་ཕུག་པ། དེའི་ཕྱི་རོལ་གྱི་ལྷ་སྣམ་གྱི་ཤར་གྱི་གཡས་ནས་རིམ་པ་བཞིན་དུ་གྲི་གུག འཕང་མདུང་། གཏུན་ཤིང་། ཆུ་གྲི། རྡོ་རྗེ་རྩེ་གཅིག་པ། ལྕགས་ཀྱུ། ལྷོར་དགྲ་སཏྭ། མདའ། དབྱིག་པ། ཁ་ཊྭཱཾ་ག འཁོར་ལོ། རྡོ་རྗེ་ཞགས་པ། ནུབ་ཏུ་རྡོ་རྗེ་རྩེ་ལྔ་པ། རྔེའུ་ཆུང་། ཕུབ། གཞུ། དྲིལ་བུ། རླུང་རས། བྱང་དུ་སྡིགས་མཛུབ་འཕན་རྩེ་གསུམ་པ། གླང་པོ་ཆེའི་ལྤགས་པ། ཐོ་བ། མདུང་། མེ་ཐབ། དེའི་ཕྱི་རོལ་གྱི་སྒོ་མཚམས་བརྒྱད་དུ། རོ་ལངས་ཆེན་པོ་བརྒྱད་ནི། གཅེར་བུ་སྐྲ་གྲོལ་བ། མདོག་ནག་པོ་ཁྲོ་བོའི་གདོང་པ་ཅན། རབ་དུ་དམར་བའི་མིག་གསུམ་དང་ལྡན་ཞིང་། སོ་རྣོ་བའི་ཁ་གདངས་ནས། ཧ་ཧ་ཞེས་དགོད་པ། སྲིན་པོ་ལྟ་བུ་གྲི་གུག་དང་ཐོད་པ་ཐོགས་ཤིང་། རུས་པའི་ཕྲེང་བ་དང་། སྦྲུལ་གྱིས་བརྒྱན་ཏེ། མེ་འབར་བའི་དབུས་ན་གཡས་བསྐུམ་གཡོན་བརྐྱངས་པས་གནས་པའོ། །དེ་ནས་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའི་བར་སྒྲུབ་ཐབས་ལྟར་བྱས་ལ། ཁྱད་པར་ནི་གཙོ་འཁོར་ཐམས་ཅད་ལ་མི་བསྐྱོད་པས་རྒྱས་གདབ་བོ། །དེ་ནས་སྔགས་གསུམ་གྱི་སྔགས་མཆོད་ཀྱིས་མཆོད། མཆོད་པ་རྣམས་བསང་སྦྱང་བྱིན་གྱིས་བརླབས་ཏེ། དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་མཆོད་ཡོན་འདི། །བཅོམ་ལྡན་འཁོར་དང་བཅས་ལ་འབུལ། །བཞེས་ནས་བདག་ལ་དགྱེས་པར་མཛོད། །ཨོཾ་སརྦ་ཏ་ཐཱ་ག་ཏ་སོགས་རིམ་པ་བཞིན་སྦྱར་རོ། །དེ་བཞིན་དུ་ཚིག་རྐང་དང་པོ་དང་གསུམ་པ་མན་ཆད་ཐམས་ཅད་ལ་སྦྱར་ཞིང་། སྔགས་དང་ཕྱག་རྒྱ་དང་བཅས་པས། ལྷ་རྫས་དམ་པའི་ཞབས་བསིལ་འདི། །དེ་བཞིན་དུ། མེ་ཏོག་འདི། བདུག་སྤོས་འདི། མར་མེ་འདི། དྲི་ཆབ་འདི། ཞལ་ཟས་འདི། རོལ་མོ་འདི། ཞེས་པས་ཕྱི་མཆོད་ཀྱིས་མཆོད། འཛམ་བུ་གླིང་དང་གླིང་གཞན་ན། །ལྷ་རྫས་ན་བཟས་བཀང་བ་ཡང་། །བླ་མ་གཤིན་རྗེ་གཤེད་པོ་ལ། །ཞུམ་པ་མེད་པར་བྱས་ཏེ་དབུལ། །ཨོཾ་བཛྲ་ཝསཏྲ་ཡེ་སྭཱཧཱ། ཞེས་པས་གོས་ཟུང་དང་། དེ་བཞིན་འདོན་པ་བསྒྱུར་ལ། གཟུགས་མཆོག་ཚོགས་ཀྱིས་བཀང་བ་ཡང་། །ཨོཾ་ཨཱཿརཱུ་པ་བཛྲ་ཧཱུྃ། དེ་བཞིན་དུ་སྒྲ་སྙན་དང་། ཤབྡ། དྲི་མཆོག་དང་། གནྡྷེ། རོ་མཆོག་དང་། ར་ས། རེག་འཇམ་དང་། སྤརྵེ། ཞེས་པས་དབུལ་ཞིང་དེ་ནས་ནང་མཆོད་གཏོར་མ་ལྟར་བྱིན་གྱིས་བརླབས་ཏེ་ཐོད་པའི་དབུས་ནས་མཐེབ་སྲིན་གྱིས་བླངས་ལ། ཐོག་མར་རྩ་བའི་བླ་མའི་མཚན་དང་། དེ་ནས་བརྒྱུད་པའི་བླ་མ་དང་། དེ་ནས་དཀྱིལ་འཁོར་པ་རྣམས་ལའང་ཡི་གེ་སོ་གཉིས་པའི་མཐར་ཨོཾ་ཨཱཿཧཱུྃ་བཏགས་ལ་དབུལ། དེ་ནས་ཕྱོགས་སྐྱོང་ནས་རིགས་དྲུག་གི་བར་དུའང་ཕུལ་ནས་མཐར། ཨོཾ་ཨ་མྲྀ་ཏ་སྭཱ་ད་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་བདག་ཉིད་ཀྱིས་ཀྱང་མྱངས་ལ། རྡོ་རྗེ་དྲིལ་བུ་འཛིན་པས་དུར་ཁྲོད་རྒྱན་གྱིས་རྣམ་བརྒྱན་པའི། །ཞེས་སོགས་དང་། སྤྲོ་ན། དངོས་པོ་ཀུན་གྱི་དེ་ཉིད་ཆོས་དབྱིངས་ཀུན་རྟོག་བྲལ། །ཞེས་སོགས་ཀྱིས་ཀྱང་བསྟོད་དོ། །དེ་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། སྤོས་དང་བཅས་པའི་རྡོ་རྗེ་དྲིལ་བུ་འཛིན་པས། བཅོམ་ལྡན་གཤིན་རྗེའི་གཤེད་རྡོ་རྗེ། །རིགས་པའི་རྒྱལ་མཆོག་ཁྱེད་ལ་འདུད། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །དཀྱིལ་འཁོར་འབྲི་བར་བདག་འཚལ་ལོ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གཞན་ཡང་གང་དག་གསང་སྔགས་ཀྱི། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །སེམས་ཅན་བསྟན་ལ་མངོན་དགའ་བ། །གང་སུ་རྡོ་རྗེའི་སྤྱན་ལྡན་རྣམས། །བདག་ལ་ཡང་དག་དགོངས་སུ་གསོལ། །རྡོ་རྗེ་འཆང་ཆེན་ཆེ་གེ་བདག །རྡོ་རྗེ་འཇིགས་བྱེད་དཀྱིལ་འཁོར་ནི། །ཇི་ལྟར་ནུས་པའི་ཉེར་སྤྱོད་ཀྱིས། །འགྲོ་བ་སྦྱང་ཕྱིར་བྲི་བར་བགྱི། །དེང་བདག་སློབ་མར་བཅས་པ་ལ། །རྗེས་སུ་བརྩེ་བས་ཉེར་བཟུང་ནས། འདུས་པ་ཐམས་ཅད་དཀྱིལ་འཁོར་དུ། །ཉེ་བར་གནས་པར་མཛད་པར་རིགས། །ཞེས་ལན་གསུམ་བརྗོད་པས་གསོལ་བ་གདབ་སྟེ། གནང་བ་བྱིན་པར་བསམས་ལ། སླར་མཆོད་ཅིང་ཧཱུྃ་བཛྲོདཿཏིཥྛ་ཞེས་པས་དཀྱིལ་འཁོར་ནམ་མཁར་བཏེག་སྟེ། ལྷ་ལྷག་པར་གནས་པའོ། །དེ་ནས་མཚན་ཉིད་དང་ལྡན་པའི་བུམ་པ་གཉིས་རྡོ་རྒྱུས་ལ་སོགས་པས་དཀར་པོར་བྱུག་གཉིས་ཀ་ལ་མཚན་མ་རྡོ་རྗེ་རེ་རེ་དྲིས་ཏེ། རས་བཟང་པོས་མགྲིན་པ་དཀྲིས། ཡི་གེ་སོ་གཉིས་པ་བཟླས་པའི་ཉུངས་ཀར་གྱིས་བརྡེག གུ་གུལ་གྱི་དུད་པས་བདུག ཙུ་ཏ་ལ་སོགས་པས་ཁ་བརྒྱན། རིན་པོ་ཆེ་ལྔ། སྨན་ལྔ། འབྲུ་ལྔ་རྣམས་དང་། སྲོག་ཆགས་མེད་པའི་ཆུ་གཙང་མས་དགང་། རྣམ་རྒྱལ་གྱི་སྟེང་དུ་དྲི་བཟང་གི་ཆུས་བཀང་བའི་དུང་ཆོས་དང་། རྡོ་རྗེ་ལ་མེ་ཏོག་གི་ཕྲེང་བ་བཏགས་པ་བཞག་ལ། བསང་སྦྱངས་སྟོང་པའི་ངང་ལས། པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། བཾ་ལས་རིན་པོ་ཆེའི་བུམ་པ་མཚན་ཉིད་དང་ལྡན་པ་གཉིས་སུ་བསྐྱེད་པའི་ནང་དུ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས་འཕགས་པ་འཇམ་དཔལ་སྐུ་མདོག་གསེར་བཙོ་མ་ལྟ་བུ་ནས། རྡོ་རྗེའི་སྐྱིལ་ཀྲུང་གིས་བཞུགས་པའི་བར་སྒྲུབ་ཐབས་ལྟར་བསྐྱེད་ལ། དེ་ཡོངས་སུ་གྱུར་པ་ལས་རྡོ་རྗེ་འཇིགས་བྱེད་ཞལ་ཕྱག་རྫོགས་པར་བསྐྱེད་ནས། སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་པ་གཞུག་པ་དང་། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པར་བྱའོ། །དེ་ནས་ཕྱི་ནང་གི་མཆོད་པ་དང་བསྟོད་པ་བྱས་ལ། མེ་ཏོག་ཕྲེང་བ་ནས་བཟུང་སྟེ། རྣམ་རྒྱལ་ལ་སྔགས་གསུམ་ཆར་བརྒྱ་རྩ་བརྒྱད་ལ་སོགས་པ་བཟླ། ལས་ཐམས་ཅད་པ་ལ་སྙིང་པོ་དེ་ལྟར་བཟླའོ། །སླར་ཡང་ཕྱི་ནང་གིས་མཆོད་ཅིང་བསྟོད་ནས། མཆོད་ཡོན་ཕུལ་ཏེ་ལྷ་རྣམས་ཞུ་ནས་ཆུའི་རང་བཞིན་དུ་གྱུར་པར་བསམ་པ་ནི་བུམ་པ་ལྷག་པར་གནས་པའོ། །དེ་ནས་གྲུབ་ན་སྦྱིན་སྲེག་བྱ་ཞིང་། དཀྱིལ་འཁོར་གྱི་ཁང་པའི་ཕྱི་རོལ་དུ་མཚན་ཉིད་དང་ལྡན་པའི་སློབ་མ་རྣམས་ཁྲུས་བྱས། ཕྱག་དང་མཎྜལ་ཕུལ་བ་ལ་ཆོས་བཤད་པས་སྤྲོ་བ་བསྐྱེད་པར་བྱ་སྟེ། རང་གི་བསླབ་ལྡན་འཁོར་བཞི་པོ། །ཐེག་ཆེན་གློ་ཅན་རྣམས་ལ་ནི། །དེ་བཞིན་གཤེགས་པས་གསུངས་པ་ཡི། །ཡང་དག་ཆོ་ག་རྗེས་སུ་གནང་། །ཁ་ཅིག་གསང་སྔགས་སྒྲུབ་དོན་གཉེར། །དཀྱིལ་འཁོར་དུ་ནི་འཇུག་པར་འགྱུར། །དེ་བཞིན་གཞན་གྱིས་བསོད་ནམས་འདོད། །གཞན་དག་འཇིག་རྟེན་ཕ་རོལ་གཞོལ། །བློ་བཟང་ཕལ་ཆེར་དད་བྱས་ནས། །འཇིག་རྟེན་ཕ་རོལ་དོན་གཉེར་འཇུག །འཇིག་རྟེན་འདི་འབྲས་དོར་ནས་ནི། །འཇིག་རྟེན་ཕ་རོལ་འབྲས་གཉེར་ན། །གང་ཕྱིར་ཚེ་འདི་བདེ་བླག་འགྲུབ། །འདི་ཡིས་འཇིག་རྟེན་ཕ་རོལ་མིན། །དེ་ཕྱིར་འཇིག་རྟེན་ཕ་རོལ་གྱི། །དོན་དུ་ཡིད་ནི་བརྟན་པར་གྱིས། །ཞེས་པའི་དོན་བཤད་ལ། སེམས་ཅན་གྱི་དོན་དུ་སངས་རྒྱས་ཐོབ་འདོད་ཀྱི་བློ་བསྐྱེད་དུ་གཞུག་གོ །དེ་ནས་བླ་མ་རིགས་བདག་མི་བསྐྱོད་པ་ཡབ་ཡུམ་སྙོམས་པར་ཞུགས་པའི་སྒྲས། སློབ་མ་རྣམས་སློབ་དཔོན་གྱི་ཞལ་དུ་ཞུགས། རྡོ་རྗེའི་ལམ་ནས་ལྷ་མོའི་པདྨར་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་གཟུགས་སུ་གནས་པ་ལ། སློབ་དཔོན་གྱི་སྙིང་ཁའི་ས་བོན་གྱི་འོད་ཟེར་གྱིས་སྤྱན་དྲངས་པའི་དེ་བཞིན་གཤེགས་པ་རྣམས་རང་གི་ཞལ་ནས་ཞུགས་ཤིང་བྱང་ཆུབ་ཀྱི་སེམས་ཀྱི་རང་བཞིན་དུ་ཞུ་བར་གྱུར་པ་རྣམས་ཀྱིས་དབང་བསྐུར་ཏེ། ཧཱུྃ་ཞེས་པས་པདྨ་ནས་ཕྱིར་ཕྱུང་ནས་རང་རང་གི་གདན་ལ་འཁོད་པར་བསམས་ལ། མཱ་མ་ཀཱི་དང་ལྷན་ཅིག་སྦྱོར། །བདག་གིས་སྟོན་པ་དགེས་ཆེན་ཁྱོད། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོ་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་ལན་གསུམ་གྱིས་གསོལ་བ་བཏབ་ལ། བུ་ཚུར་ཤོག་ཤིག་ཐེག་ཆེན་པོའི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ནོ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་ཟད་ཆེན་པོ་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད་པས་སྤྲོ་བ་བསྐྱེད་ནས། སྒྲུབ་ཐབས་ལྟར་རྒྱུན་བཤགས་སྔོན་དུ་འགྲོ་བས་ཐུན་མོང་གི་སྡོམ་པ་བཟུང་། ཡི་གེ་སོ་གཉིས་པས་བསྲུངས་ནས། སློབ་དཔོན་གྱིས་རྡོ་རྗེ་དང་བཅས་པའི་དྲིའི་ཆུས་གནས་གསུམ་དུ་རེག་ཅིང་། ཧཱུྃ་ཨཱཿཨོཾ་ཞེས་བརྗོད་པས་སྙིང་ཁར་ཧཱུྃ་ལས་རྡོ་རྗེ་དང་། མགྲིན་པར་ཨཱཿལས་པདྨ་དང་། སྤྱི་བོར་ཨོཾ་ལས་འཁོར་ལོ་བསྒོམ། ཡང་ཡས་རིམ་གྱིས་རེག་ཅིང་། ཨོཾ་ཨཱཿཧཱུྃ་ཞེས་བརྗོད་པས་ཕྱག་མཚན་དེ་རྣམས་ཡིག་འབྲུ་དེ་དག་གིས་མཚན་པར་བསམ་མོ། །དེ་ནས་མགོ་བོར་མེ་ཏོག མདུན་དུ་སྤོས། སྙིང་ཁར་དྲི། མདུན་དུ་མར་མེ་རྣམས་ཀྱིས་མཆོད། ཨ་ཤྭད་ཐ་ལ་སོགས་པའི་སོ་ཤིང་མེ་ཏོག་གི་རྩེ་མོ་ཅན་རྣམས་དྲི་བཟང་གི་ཆུས་བྱུག་ཅིང་། ཡི་གེ་སོ་གཉིས་པ་བཟླས་པས་སློབ་མ་ལ་བྱིན། དེས་ཀྱང་ཁ་ཤར་དུ་བལྟས་ནས་སོ་ཤིང་འཆོས་ནས་མཎྜལ་གྱི་སྟེང་དུ་དོར་བས་རྩེ་མོ་ཤར། ལྷོ། ནུབ། བྱང་། སྟེང་། འོག་ཏུ་བལྟས་ན། ཞི། རྒྱས། དབང་། དྲག མཁའ་སྤྱོད། ས་འོག་རྣམས་འགྲུབ་ཅིང་། དཀྱིལ་འཁོར་དུ་མ་ལྷུང་ན་དངོས་གྲུབ་མེད་པར་གོ་བར་བྱའོ། །དེ་ནས་ཨོཾ་ཧྲཱིཿབི་ཤུདྡྷཿསརྦ་དྷརྨཿསརྦ་པཱ་པཾ་ནཱི་ཙ་ཨ་སྱ་བི་ཤྭ་དྷ་ཡ་སརྦ་བི་ཀལྤ་ན་ཨ་པ་ན་ཡ་ཧཱུྃ། ཞེས་བཟླས་པའི་ཆུ་ཁྱོར་བ་གསུམ་འཐུང་དུ་བཅུག ཧཱུྃ་ལས་སྐྱེས་པའི་ཀུ་ཤ་ཆུང་བ་སྔས་དང་། ཆེ་བ་སྟན་དུ་བྱིན་གྱིས་བརླབས་ལ། ཡི་གེ་སོ་གཉིས་པ་བཟླས་ཤིང་སྦྱིན། སྲུང་སྐུད་དམར་པོ་ལུས་ཚད་དང་མཉམ་པ་སུམ་སྒྲིལ་དུ་བྱས་པ་རྡོ་རྗེའི་མདུད་པ་གསུམ་བོར་ཏེ། སློབ་མའི་དཔུང་པ་གཡོན་པར་བཅིང་ཞིང་། ཡི་གེ་སོ་གཉིས་པ་བཟླས་པས་བསྲུང་ངོ་། །དེ་ནས་འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་འབྱུང་། །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་ཤིན་དུ་དཀོན། །བསྐལ་པ་བྱེ་བ་དུ་མ་རུ། །སྔོན་ཆད་སྡིག་པ་ཅི་མཆིས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་གྱུར་ན། །གྲགས་པ་མཐའ་ཡས་གསང་སྔགས་ཀྱི། །སྤྱོད་ཚུལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །སྤྱད་མཆོག་འདི་ལ་གང་རྣམས་ཀྱིས། །བློ་གྲོས་ཤིན་དུ་དྲི་མེད་པ། །དེ་རྣམས་ཀྱིས་ནི་སྡུག་བསྔལ་ཀུན། །འབྱུང་བའི་ངན་འགྲོ་ཡང་དག་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱི། །བསྟན་པ་འདི་ལ་ཐམས་ཅད་ནི། །ཡོངས་སུ་བཟུང་ཞིང་སྐྱེ་འགྱུར་བ། །དེ་ཡིས་ཁྱེད་རྣམས་ཐེག་ཆེན་ལས། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་ལ་ཁྱེད་རྣམས་འགྲོ་འགྱུར་བ། །དེ་བཞིན་གཤེགས་པར་འགྱུར་བ་ཡིན། །ཞེས་པས་ཆོས་བཤད་ལ། ཀུ་ཤའི་སྟན་ལ་ཉལ་དུ་བཅུག་སྟེ། རྨི་ལམ་གང་ཅུང་ཟད་མཐོང་བ། སྔ་དྲོ་ང་ལ་སྨྲོས་ཤིག ཅེས་བརྗོད་ཅིང་རྨི་ལམ་བཟང་ན་སྤྲོ་བ་བསྐྱེད་ཅིང་། ངན་ན་བསྲུང་བ་བྱའོ། །དེ་ནས་སློབ་དཔོན་གྱི་སྡོམ་པ་བཟུང་བའི་ཕྱིར་མཎྜལ་ཕུལ་ནས། འཁོར་ལོ་ཕྱིར་མི་ལྡོག་པའི་དབང་། །དམ་པ་བདག་ལ་སྩལ་ནས་ནི། །མགོན་པོ་འཁོར་ལོ་ལྷ་དག་གི །དེ་ཉིད་སློབ་དཔོན་ཕྲིན་ལས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་པ་གསང་མཆོག་རྟག་ཏུ་ནི། །སེམས་ཅན་ཀུན་གྱི་དོན་གྱི་ཕྱིར། །སློབ་དཔོན་བདག་འགྱུར་གསུང་དུ་གསོལ། །ཞེས་ལན་གསུམ་གྱིས་གསོལ་བ་བཏབ་ནས། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་ཆེ་གེ་མོ་ཞེས་བྱ་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་བསླབ་པ་རྣམ་པ་གསུམ། །དགེ་བ་དང་ནི་ཆོས་སྡུད་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་སོ་སོར་བརྟན་པོར་བཟུང་། །སངས་རྒྱས་ཆོས་དང་དགེ་འདུན་སྟེ། །དཀོན་མཆོག་གསུམ་མཆོག་བླ་ན་མེད། །སྡོམ་པ་སངས་རྒྱས་རྣལ་འབྱོར་འབྱུང་། །དེ་ནས་བརྩམས་ཏེ་བཟུང་བར་བགྱི། །རྡོ་རྗེ་ཆེན་པོའི་རིགས་བསྡུས་པ། །རྡོ་རྗེ་དྲིལ་བུ་ཕྱག་རྒྱ་ཡང་། །དེ་ཉིད་ཀྱིས་ནི་བར་དུ་བཟུང་། །སློབ་དཔོན་དག་ཀྱང་བཟུང་བར་བགྱི། །རིན་ཆེན་ཆེན་པོའི་རིགས་མཆོག་ནི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོ་འབྱུང་བ་ལ། །ཕྱི་ནང་གསང་བ་ཐེག་པ་གསུམ། །དམ་ཆོས་སོ་སོར་བཟུང་བར་བགྱི། །ལས་ཆེན་རིགས་ནི་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་ནི་ཅི་ནུས་བཞིན། །ཀུན་ནས་སོ་སོར་བཟུང་བར་བགྱི། །སེམས་ཅན་ཀུན་གྱི་དོན་གྱི་ཕྱིར། །བྱང་ཆུབ་སེམས་ནི་བླ་ན་མེད། །དམ་པ་ཡང་དག་བསྐྱེད་བགྱི་ཞིང་། །སྡོམ་པ་མ་ལུས་བཟུང་བགྱིས་ནས། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་བརྗོད་པ་ནི། སློབ་མ་ལྷག་པར་གནས་པ་སྟེ་ནུབ་གཉིས་པའི་ཆོ་གའོ།། །།གསུམ་པ་དངོས་གཞིའི་ཆོ་ག་ནི། ནངས་པར་སྔ་བར་ལངས་ལ་སྔོན་འགྲོ་གཏོར་མ་ནས་བརྩམས་ཏེ། བདག་བསྐྱེད་བཟླས་པ་དང་བཅས་པའི་བར་བྱས་ནས། རས་བལ་གྱི་སྲད་བུ་ལྔ་ཚོན་སྣ་ལྔས་ཁ་དོག་བསྒྱུར་ལ། དྲི་བཟང་པོས་བྱུག རང་དོན་གྲུབ་རྡོ་རྗེ་འཇིགས་བྱེད་དུ་བསྒོམས་པའི་ལག་པར་བཟུང་ལ། དཀར་པོ་ཀྵེ་ལས་རྣམ་སྣང་རྡོ་རྗེ་འཇིགས་བྱེད་རྩ་ཞལ་དཀར་པོ་མ་ཧེའི་གདོང་པ་ཅན། དེ་བཞིན་དུ་སེར་པོ་མ། དམར་པོ་མེ། ལྗང་ཁུ་ད། སྔོན་པོ་ཡ་རྣམས་ལས་རིན་འབྱུང་རྡོ་རྗེ་འཇིགས་བྱེད་སོགས་རྩ་ཞལ་གྱི་ཁ་དོག་འགྱུར་ཞིང་། གཞན་ཞལ་ཕྱག་ཡོངས་སུ་རྫོགས་པར་སྒྲུབ་ཐབས་ལྟར་བསྒོམ། རང་གི་མིག་གཉིས་ཛཿལས་བྱུང་བའི་ཟླ་བ་དང་ཉི་མར་བསྒོམས་ལ་འབར་བའི་ལྟ་སྟངས་དང་། ཨོཾ་དྷཱི་ཏ་དིཥྚ་ཨཾ་ཀུ་ཤ་ཛ་ཞེས་པས་དེ་བཞིན་གཤེགས་པ་རྣམས་མདུན་དུ་སྤྱན་དྲངས་ལ། ཨོཾ་ཨཱཿཔྲ་ཡ་ཙ་ཀཱ་ལ་ཨ་རི་སྭཱ་ཙ་ཀྲ་སུ་ཀྲ་ན་མ་ཧཱུྃ། ཞེས་གསོལ་བ་བཏབ་པས་ཡེ་ཤེས་ཀྱི་སྲད་བུ་རྣམས་ལག་པར་གནས་པའི་དམ་ཚིག་གི་སྲད་བུ་རྣམས་ལ་ཐིམ་པར་བསམས་ལ། རྣམ་སྣང་རྡོ་རྗེ་འཇིགས་བྱེད་ཀྱི་ང་རྒྱལ་འཛིན་པའི་སློབ་མ་དང་ལྷན་ཅིག ཨོཾ་ཨཱཿཨ་ནྱོ་ནྱ་ཨ་ནུ་ག་ཏཱཿསརྦ་དྷརྨཱ། སྥ་ར་སྥ་ར་ཨ་ནུ་ག་ཏཱཿསརྦ་དྷརྨཱཿ ཨ་དྱན་ཏ་ཨ་ནུ་པྲ་བི་ཏ་སརྦ་དྷརྨཱཿཧཱུྃ། ཞེས་བརྗོད་ཅིང་དང་པོ་སོ་སོ་དང་། དེ་ནས་གཅིག་དུ་བསྒྲིལ་ཞིང་དྲི་བཟངས་ཀྱི་ཆུས་བྱུགས་ལ་གསེར་གྱི་སྣོད་དུ་བཞག མེ་ཏོག་ལ་སོགས་པས་མཆོད། ཡི་གེ་སོ་གཉིས་པ་བཟླས་པས་བསྲུང་ངོ་། །དེ་ནས་དཀྱིལ་འཁོར་གྱི་ས་གཞིའི་ནུབ་ཏུ་སློབ་དཔོན་དང་། ཤར་དུ་སློབ་མ་འདུག་ལ་གཡོན་པའི་ཁུ་ཚུར་གྱིས་ལྟེ་བར་ཐིག་སྐུད་བཟུང་ནས། ཛྫཿཛྫཿཛྫཿ ཞེས་བརྗོད་ཅིང་སློབ་མ་ལ་ཐིག་སྣ་གཏད། དེས་ཀྱང་ཛྫཿགསུམ་བརྗོད་ཅིང་དྲངས་ལ་ལྟེ་བར་བཟུང་ལ་སློབ་དཔོན་གྱིས་གཡས་རྡོ་རྗེ་དང་བཅས་པའི་མཐེབ་སྲིན་གྱིས། ཨོཾ་ཨཱཿབཛྲ་ས་མ་ཡ་སུ་ཏྲཾ་མ་ཏི་ཀྲ་མ་ཧཱུྃ་ཞེས་བརྗོད་ཅིང་། ཐིག་གི་སྒྲ་དང་། སེམས་ཅན་དོན་ལ་ཁྱེད་རྣམས་ཀྱི། །དུས་ཡིན་དེ་ཕྱིར་འདིར་བྱོན་ཅིག །ཅེས་པས་བསྐུལ་བས་ནམ་མཁར་བཞུགས་པའི་དེ་བཞིན་གཤེགས་པ་རྣམས་ཐིག་ལ་ཐིམ་པར་བསྒོམས་ལ་ཚངས་ཐིག་དང་པོ་གདབ། དེ་བཞིན་དུ་གཡས་སྐོར་གྱིས་སློབ་དཔོན་ལྷོ་དང་། སློབ་མ་བྱང་དུ་གནས་པས་ཚངས་ཐིག་གཉིས་པ་དང་། སློབ་དཔོན་མེ་དང་སློབ་མ་དབང་ལྡན་དུ་གནས་པས་ཤར་གྱི་རྩ་ཐིག་དང་། སློབ་དཔོན་རླུང་དང་སློབ་མ་བདེན་བྲལ་དུ་གནས་པས་ནུབ་ཀྱི་རྩ་ཐིག་དང་། སློབ་དཔོན་དེ་ཉིད་དང་། སློབ་མ་དབང་ལྡན་དུ་གནས་པས་བྱང་གི་རྩ་ཐིག་དང་། སློབ་དཔོན་མེ་དང་སློབ་མ་བདེན་བྲལ་དུ་གནས་པས་ལྷོའི་རྩ་ཐིག་དང་། དེ་ནས་གཞུང་དུ་མ་བཤད་ཀྱང་། ལག་ལེན་ལ་སློབ་དཔོན་དེ་ཉིད་དང་། སློབ་མ་རླུང་དུ་གནས་པས་ཟུར་ཐིག་དང་པོ་དང་། སློབ་དཔོན་བདེན་བྲལ་དང་། སློབ་མ་དབང་ལྡན་དུ་གནས་པས་ཟུར་ཐིག་གཉིས་པ་སྟེ། ཐམས་ཅད་ཀྱང་ནམ་མཁའ་དང་ས་གཞི་གཉིས་ལ་བཏབ་ནས། ལས་ཐིག་གི་ཆ་དབྱེ་བའི་ཕྱིར་བསྐོར་ཕྱོགས་དང་གོ་རིམ་སྔར་དང་འདྲ་བ་ལས། ལས་ཐིག་དཀྱིལ་འཁོར་རྟ་བབས་སྣམ་བུ་བཞི་མ་སྤྱི་དང་མཐུན་པར་བཏབ་ལ། དེའི་ནང་དུ་ལྷ་སྣམ་ཆ་ཆེན་གཅིག་བཞག་ནས་རྡོ་རྗེའི་རྭ་བ་ཆ་ཕྲན་གཅིག་ཟླུམ་སྐོར་བྱས་ཏེ། དེའི་ནང་དུ་ཚངས་ཐིག་གི་གཡས་གཡོན་དུ་ཆ་ཆེན་རེ་རེ་དོར་ནས། ཆ་ཕྲན་རེའི་ཐིག་བཞི་བཏབ་པས་རེའུ་མིག་དགུར་འགྱུར་རོ། །དེ་ནས་ཐིག་སྐུད་ཀྱི་ཡེ་ཤེས་པ་གཤེགས་སུ་གསོལ་ནས། ཧྲཱིཿལས་མིག་གཡས་གཡོན་གཉིས་ཉི་ཟླ་དང་། མིག་འབྲས་ཧཱུྃ་ལས་ཁྲོ་བོའི་རྡོ་རྗེར་བསྐྱེད་ལ། ཧི་ཧི་ཞེས་བརྗོད་ཅིང་། ཁྲོ་བོའི་ལྟ་བས་བལྟས་པས། ཁྲོ་བོའི་རྡོ་རྗེ་འཕྲོས་ཐར་པའི་སྒོའི་གེགས་སུ་གྱུར་པའི་བགེགས་རྣམས་བཅོམ་པར་བསམས་ལ། དྲི་བཟང་གི་ཆུས་སྒོ་བཞིའི་ཐད་ཀྱི་རྩ་ཐིག་ཕྱིས་ཏེ་ཐིག་གིས་བྲི་བའི་ཆོ་གའོ།། ༈ །དེ་ནས་རྡུལ་ཚོན་ཁ་དོག་ལྔ་ལ་ཡཀྵེ་མ་མེ་ད་བྲིས་ཏེ་ཕྱོགས་མ་འཛོལ་བར་བཀོད་ལ། བསང་སྦྱངས། རྡོ་རྗེ་འཇིགས་བྱེད་རིགས་ལྔར་བསྐྱེད། ནམ་མཁར་བཞུགས་པའི་རིགས་ལྔའི་ཐུགས་ཁ་ནས་ཡེ་ཤེས་ཀྱི་རྡུལ་ཚོན་སྔར་ལྟར་འབར་བའི་ལྟ་སྟངས་དང་། སྔགས་ཀྱིས་བཀུག་ལ་མཆོད་ཅིང་བསྟོད་དེ། ཞུ་བ་ལས་བྱུང་བའི་རྡུལ་ཚོན་དུ་བལྟས་ལ། ཨོཾ་བཛྲ་ཙི་ཏྲ་ས་མཱ་ཡ་ཧཱུྃ། ཞེས་དང་། ཡི་གེ་སོ་གཉིས་པ་ལན་བདུན་བཟླས་པས་བྱིན་གྱིས་བརླབས། དེ་ནས་དཀྱིལ་འཁོར་གྱི་ནུབ་ཕྱོགས་ནས་ཨོཾ་བཛྲ་བཻ་ག་ཨཀྲ་མ་ཧོ་ཞེས་བརྗོད་ལ་རྡོ་རྗེ་ཤུགས་ཀྱི་འཇུག་པས་ནང་དུ་ཞུགས་ལ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་སྒྲོལ་བྱེད། །འཇམ་དབྱངས་རྒྱལ་པོ་རང་ཉིད་ནི། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་གྲོལ་བ། །འཁོར་ལོའི་ནང་དུ་ཡང་དག་གནས། །ཞེས་བརྗོད་ཅིང་དབང་ལྡན་ནས་བརྩམས་ཏེ། གཡོན་པའི་མཐེབ་སྲིན་གྱིས་རེ་ཁཱ་ལྔའི་སྒོ་ཚད་གཅིག་གི་བར་བྲིས་ལ། སྣོད་ལ་སོགས་པ་བཞག་ཅིང་། རྡོ་རྗེ་བཞག་པས་བསྲུང་ངོ་། །ཕྱིས་སྦྲེལ་རན་པ་དང་སྣོད་བསལ་ལ་རྩིག་པ་གཞན་དང་སྦྲེལ་ལོ། །དེ་ནས་རང་ངམ་གཞན་གྱིས་ཀྱང་རུང་སྟེ། ལེ་དགུའི་ཀ་ཐིག་རྣམས་གཞི་སེར་པོ་ལ། ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པ་བྲི། རྡོ་རྗེ་རྭ་བ་གཞི་སེར་པོ་ལ་རྡོ་རྗེ་སྔོན་པོ་བྲི། ལེ་དགུའི་གཞི་སྔོན་པོ་ལ་དབུས་སུ་རོ་མགོ་མེད། ལག་མེད་ཀྱི་སྟེང་དུ་གཙོ་བོའི་མཚན་མ་བྲི། ཤར་གྱི་རེ་མིག་ཏུ་མགོ་བོ་ལ་སོགས་པ་དང་། ལྷ་སྣམ་ཕྱོགས་མདོག་ཅན་ལ་སྔར་གྱི་ཕྱག་མཚན་རྣམས་རིམ་པ་བཞིན་དུ་བྲི། སྒོ་མཚམས་བརྒྱད་དུ། རོ་ལངས་བརྒྱད་དངོས་སམ། ཕྱག་མཚན་ནམ། ས་བོན་ནམ། ཐིག་ལེ་བྲི། སྒོ་དང་རྟ་བབས། དུར་ཁྲོད། རྡོ་རྭ། མེ་རི་རྣམས་སྤྱི་དང་མཐུན་པར་བྲིའོ། །དེ་ལྟར་ལེགས་པར་བྲིས་ཟིན་པ་དང་ཚོན་ལྷག་མ་རྣམས་མཆོད་ནས། ཡེ་ཤེས་པ་སྟ་གོན་གྱི་ལྷའི་ཐུགས་ཁར་གཤེགས། དམ་ཚིག་པ་རང་ལ་བསྡུས་ལ། ཚོན་གནས་ཇི་ལྟ་བ་བཞིན་དུ་བཞག་སྟེ། ཚོན་གྱིས་བྲི་བའི་ཆོ་གའོ། །དེ་ནས་དཀྱིལ་འཁོར་གྱི་མཐར་དྲི་བཟང་གི་ཆུས་བྱུག་ཅིང་། མཆོད་རྫས་རྣམས་བཟང་བར་བཤམ། རྣམ་རྒྱལ་བུམ་པ་ཤར་སྒོའི་ཐད་དང་། ལས་བུམ་དབང་ལྡན་གྱི་མཚམས་སུ་དགོད། གདུགས་དང་། བ་དན་དང་། གོས་ཟུང་ལ་སོགས་པ་དང་། འཇིག་རྟེན་དང་འཇིག་རྟེན་ལས་འདས་པའི་གཏོར་མ་སོགས་འོག་དུ་དགོས་པའི་ཡོ་བྱད་རྣམས་ཚང་བར་བཤམས་ཏེ་རྒྱན་དགྲམ་པའོ།། །།དེ་ནས་རང་དཀྱིལ་འཁོར་གྱི་ཤར་འཇིག་རྟེན་པའི་ལྷོ་ཕྱོགས་སུ་འདུག་སྟེ། རྡུལ་ཚོན་སྦྱང་བའི་ཕྱིར། མེ་ལོང་གི་ངོས་ལ་དཀྱིལ་འཁོར་གྱི་གཟུགས་བརྙན་འཆར་བར་བྱས་ལ། ཧྲཱིཿཥྚཱིཿབཟླས་ཤིང་། དང་པོར་གཏོར་མ། དེ་ནས་ཏིང་ལོ་དང་ཆང་བུས་སྦྱང་། གུ་གུལ་གྱིས་བདུག ཡུངས་ཀར་བརྡེག དཀྱིལ་འཁོར་གྱི་མ་དག་པ་དང་འབགས་བཙོག་རྣམས་ཏིལ་ལ་ཐིམ་པར་བསམ་ལ་ཏིལ་བསྲེག ལས་ཐམས་ཅད་པའི་ཆུ་དང་། ཇི་ལྟར་བལྟམས་པ་ཙམ་གྱིས་ནི་ཅེས་སོགས་ཀྱིས་བཀྲུ་སྟེ་སྦྱང་བའོ། །དེ་ནས་སྔགས་གཉིས་ཀྱིས་སྟོང་པར་བསྒོམས་ནས། ལྷ་སྟ་གོན་གྱི་སྐབས་ལྟར་དམ་ཚིག་པ་བསྐྱེད། སྐུ་གསུང་ཐུགས་བྱིན་གྱིས་བརླབས། ཡི་གེ་སོ་གཉིས་པ་བརྗོད་པས་བགེགས་བསྐྲད་ཅིང་། སྟ་གོན་གྱི་ལྷ་ལ་མཆོད་དེ་དགུག་གཞུག་བྱ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའི་བར་བྱས་ལ། དཀྱིལ་འཁོར་བྱིན་གྱིས་བརླབ་པ་ནི། ཞལ་གྱི་གྲངས་དང་མཐུན་པར་ལྷ་དགུ་ལ་དམིགས་ཏེ། ཡི་གེ་བདུན་པ་བརྒྱ་རྩ་བརྒྱད་རེ་བཟླས། དེ་བཞིན་དུ་ཞལ་དང་མཐུན་པར་ཨཱ་ལི་ཀཱ་ལི་ཕྲག་རེ་དང་། ཡི་གེ་བརྒྱ་པ་རེ་རེ་བཟླས། དེ་ནས་སྟ་གོན་གྱི་སྐབས་ལྟར་སྔགས་མཆོད། ཕྱི་མཆོད། གོས་ཟུང་། འདོད་ཡོན་ལྔས་མཆོད་ནས། ནག་པོ་ར་རི་མེད་པ་ཡི། །བུམ་པ་ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་ལྡན་པ། །སྙིང་པོར་ལྡན་པའི་སྨན་སོགས་གཞུག །མགྲིན་པ་རས་བཟང་དག་གིས་དཀྲིས། །འདབ་མར་ལྡན་པའི་ལྕུག་མ་ཡང་། །དྲི་དང་ལྡན་པའི་ཁ་རྒྱན་ཅན། །བདུད་རྩིར་ལྡན་པ་ཡིས་ཀྱང་མཆོད། །གཞན་ཡང་མཆོད་པའི་རྣམ་པ་ནི། །བླ་རེ་གདུགས་དང་རྒྱལ་མཚན་དང་། །བ་དན་སིལ་སྙན་རོལ་མོ་ཡིས། །གུས་པས་དཀྱིལ་འཁོར་པ་རྣམས་མཆོད། །ཞེས་པས་མཆོད་ལ། ནང་བདུད་རྩི་དང་། བསྟོད་པ་ཡང་སྔར་བཞིན་བྱས་ཏེ། སྒྲུབ་པའི་གྲོགས་དཀྱིལ་འཁོར་བསྲུང་དུ་བཅུག་ནས། རང་ཕྱི་རོལ་དུ་ཕྱིན་ནས་སྨྱོན་པ་འཇིགས་བྱེད། དུར་ཁྲོད་ཀྱི་བདག་པོ་རྣམས་ལ་གཏོར་མ་བྱིན་ལ། ནང་དུ་འོངས་ཏེ། རོལ་མོ་དང་བཅས་པས་དཀྱིལ་འཁོར་ལ་བསྐོར་བ་བྱས་ནས་ལྷག་ཆད་ཞི་བའི་ཕྱིར་ཡི་གེ་བརྒྱ་པ་བཟླས་ཏེ། དཀྱིལ་འཁོར་སྒྲུབ་ཅིང་མཆོད་པའོ། །དེ་ནས་སློབ་དཔོན་གྱི་བྱ་བ་རྣམས་དཀྱིལ་འཁོར་གྱི་གཙོ་བོ་དང་། སློབ་མའི་བྱ་བ་རྣམས་རང་གིས་བྱས་པར་མོས་ལ། དབང་བསྐུར་གྱི་སྐབས་ལྟར་དབང་ཐམས་ཅད་རྫོགས་པར་བླངས་ལ། སློབ་དཔོན་གྱི་ལས་ཐམས་ཅད་ཀྱི་རྗེས་སུ་གནང་བ་བྱིན་པར་བསམས་ཏེ་བདག་འཇུག་གོ །དེ་ནས་ཁྲུས་བྱས་པའི་སློབ་མ་རྣམས་ཡོལ་བའི་ཕྱི་རོལ་དུ་སྟ་གོན་ལྟར་འཁོད་ནས། ཕྱག་དང་མཎྜལ་ཕུལ་ལ་སྔར་ལྟར། མཱ་མ་ཀཱི་དང་ལྷན་ཅིག་སྦྱོར། །ཞེས་སོགས་ལན་གསུམ་གྱིས་གསོལ་བ་བཏབ་ལ། རྣམ་སྣང་རྡོ་རྗེ་འཇིགས་བྱེད་དུ་བསྐྱེད། ཨཱ་ཁཾ་ཝཱི་ར་ཧཱུྃ་གིས་མེ་ཏོག་ཕྲེང་བ་གཏད། གདོང་གཡོགས་དམར་པོ་བཅིང་། ལས་ཐམས་ཅད་པའི་ཆུ་དང་། ཡི་གེ་སོ་གཉིས་པས་བསངས་ནས། རྒྱུན་བཤགས་སྔོན་དུ་འགྲོ་བའི་སེམས་བསྐྱེད་དང་མཎྜལ་ཕུལ་ཏེ། སློབ་དཔོན་དུ་གསོལ་བ་གདབ་པ་དང་། ཐུན་མོང་མ་ཡིན་པའི་སྡོམ་པ་བཟུང་བ་རྣམས་སྔར་ལྟར་བྱས་ལ། ཀྱེ་དགའ་བ་ལ་དགའ་ཁྱོད་སུ་ཡིན་ཞེས་དྲི། དེས། བདེ་ཆེན་བདག་ནི་སྐལ་བཟང་ལགས། །ཞེས་ལན་གདབ། སློབ་མའི་སྙིང་ཁར། ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ། དོན་དམ་བྱང་ཆུབ་སེམས་ཀྱི་མཚོན་བྱེད་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་བསྒོམས་ལ། བདེན་གཉིས་ཟུང་འཇུག་ཏུ་སེམས་བསྐྱེད་པའི་བསམ་པས། ཨོཾ་སརྦ་ཡོ་ག་ཙིཏྟ་ཨུཏྤཱ་ཏ་ད་ཡཱ་མི་ཞེས་བརྗོད། སྙིང་ཁར་མེ་ཏོག་དང་བཅས་པའི་རྡོ་རྗེ་བཞག་ལ། ཨོཾ་སུ་ར་ཏེ་ས་མ་ཡ་སཏྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། ཞེས་བརྟན་པར་བྱའོ། །དེ་ནས་ཨཱ་ཁཾ་ཝཱི་ར་ཧཱུྃ་གིས་ཡོལ་བའི་ནང་དུ་བཅུག་ལ་མགོ་བོར་རྡོ་རྗེ་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་དེ་བས་ན་ངས་ཁྱོད་ལ་རྡོ་རྗེ་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། ཞེས་པས་ཕན་ཡོན་གྱི་སྒོ་ནས་དང་། འདི་ནི་རྡོ་རྗེའི་དམ་ཚིག་སྟེ། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་སྤྱི་བོ་འགེམས། །ཞེས་པས་ཉེས་དམིགས་དང་། སྙིང་ཁར་རྡོ་རྗེ་བཞག་ལ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པས་ཕན་ཡོན་དང་ཉེས་དམིགས་གཉིས་ཀའི་དང་། དུང་ཆོས་སུ་དྲི་བཟང་པོའི་ཆུ་ལ། ཨོཾ་བཛྲ་ཨུ་ད་ཀ་ཋ་བདུན་བཟླས་པས་སློབ་མའི་ཁར་བླུད་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུང་ཞིག །ཨོཾ་བཛྲ་ཨུ་ད་ཀ་ཋཿཞེས་པས་མནའི་ཆུ་བླུད་པ་དང་། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི། ངས་འདི་གྱིས་ཤིག་ཅེས་གང་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མི་བྱ་སྟེ། ཁྱོད་ཡ་ང་བ་མ་སྤངས་པར་འཆི་བའི་དུས་བྱས་ནས་དམྱལ་བར་ལྷུང་བར་གྱུར་ཏ་རེ། ཞེས་བླ་མའི་བཀའ་གཉན་པའི་སྒོ་ནས་དམ་ལ་བཞག་གོ །དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཏེ། རྡོ་རྗེ་སེམས་དཔའ་བདག་ལ་དབབ་དུ་གསོལ། ཞེས་གསོལ་བ་བཏབ་ལ། སློབ་མ་འོད་དཔག་མེད་རྡོ་རྗེ་འཇིགས་བྱེད་དུ་བསྒོམས་པའི་སྤྱི་བོར་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པའི་དབུས་སུ་ཧཿ སྙིང་ཁར་ལྃ་ལས་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་རྩེ་གསུམ་པས་མཚན་པའི་དབུས་སུ་ཧཱུྃ། ལྟེ་བར་མེའི་དཀྱིལ་འཁོར་གྲུ་གསུམ་དམར་པོ་རྣོ་ཞིང་འབར་བའི་དབུས་སུ་ཨཱཿ རྐང་འོག་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་གཡོ་བའི་བ་དན་གྱིས་མཚན་པ། དེ་ལ་ཛྷཻཾཿདྲག་ཅིང་བཟོད་པར་དཀའ་བ་འབར་བའི་གཟུགས་ཅན་རླུང་གིས་བསྐྱོད་པས་རྐང་མཐིལ་གཉིས་ནས་ཞུགས་ཏེ། ལྟེ་བའི་མེའི་དཀྱིལ་འཁོར་དང་མཉམ་པར་ཕྱིན་ནས། དེ་དང་དེས་བསྐྱོད་ནས་ཤིན་དུ་དྲག་དུ་འབར་བས་སྙིང་ཁའི་སའི་དཀྱིལ་འཁོར་བསྲེགས། དཔྲལ་བའི་ཆུ་ཁོལ་དེ་ལས་བདུད་རྩིའི་ཚོགས་བབས་པས་རྒྱུད་ཚིམ་པར་གྱུར་པའི་སློབ་མ་རླུང་གིས་འདེགས་བཞིན་པར་བསམས་ལ། རང་གཙོ་བོའི་ང་རྒྱལ་གྱིས་ཐུགས་ཁ་ནས་འོད་ཟེར་འཕྲོས། རྡོ་རྗེ་འཇིགས་བྱེད་ཀྱི་ལྷ་ཚོགས་དཔག་དུ་མེད་པ་སྤྱན་དྲངས་ནས་སློབ་མ་ལ་ཐིམ་ཞིང་། གུ་གུལ་གྱིས་བདུག རོལ་མོའི་སྒྲ་དྲག་དུ་སྒྲོགས་བཞིན་པ་དང་བཅས་པས། ཨོཾ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུྃ་ཕཊ། ཨཱ་བེ་ཤ་ཡ། སཏྭཾ་བྷ་ཡ། ར་ར་ར་ར། ཙཱ་ལ་ཡ། ཙཱ་ལ་ཡ། ཧཱུྃ་ཨཱཿཧ་ཛྷཻཾ་ཧཱུྃ་ཕཊ། ཅེས་བརྗོད་ཅིང་དབབ་བོ། །ཕེབས་པ་དང་། འོད་དཔག་མེད་རྡོ་རྗེ་འཇིགས་བྱེད་དུ་བསྒོམས་པའི་ལྕེ་ལ་ཨཱཿདམར་པོ་བཀོད་ལ། ཏིཥྛ་བཛྲ་ཞེས་བརྗོད་ལ། མགོན་པོ་རྡོ་རྗེ་ཆོས་ཆེན་པོ། །སྣང་བ་མཐའ་ཡས་བདེ་བ་ཆེ། །སྨྲོས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་པར་འདྲི། །ཞེས་བརྗོད་ལ་འདྲི་བར་བྱའོ། །དེ་ཡང་གསུང་བབས་པས་དགེ་བ་དང་མི་དགེ་བ་སྨྲ་བའོ། །ཐུགས་བབས་པས་ནི་འཇིག་རྟེན་གསུམ་དུ་རྟོག་པ་ཤེས་སོ། །སྐུ་བབས་པས་ནམ་མཁའ་ལ་འཕར་རོ། །དེའི་ཚེ་མགོ་བོའི་སྟེང་དུ་ལྃ་ལས་བྱུང་བའི་དབང་ཆེན་གྱི་དཀྱིལ་འཁོར་སྣ་ཚོགས་རྡོ་རྗེས་མཚན་པ་དེས་མནན་པར་བསྒོམས་ན་མི་འགུལ་བར་འགྱུར་རོ། །དེ་ནས་སྔར་གྱི་མེ་ཏོག་གི་ཕྲེང་བ་དེ་ཏྲཱཾ་ལས་རིན་པོ་ཆེའི་མེ་ཏོག་དུ་མོས་ལ། པྲ་ཏཱིཙྪ་བཛྲ་ཧོཿ ཞེས་པས་རང་གི་ལྷ་ལ་ཕུལ། ཨོཾ་པྲ་ཏི་གྲྀཧྣ་སྟོཾ་ཨི་མཾ་ས་ཏྭ་མ་ཧཱ་བ་ལ། ཞེས་མེ་ཏོག་མགོ་ལ་བཅིང་། མིག་དུ་ཨོཾ་བསམས་ལ། ཨོཾ་དེ་རིང་རྡོ་རྗེ་སེམས་དཔའ་རང་། །ཁྱེད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་མེད་པ། །ཐམས་ཅད་མིག་ནི་འབྱེད་པར་མཛོད། །ཅེས་པས་གདོང་གཡོགས་བཀྲོལ་ལ། ཧེ་བཛྲ་པཱ་ཤྱེ་ཞེས་བརྗོད་པས་རྟེན་དང་བརྟེན་པར་བཅས་པའི་དཀྱིལ་འཁོར་བསྟན་ཏེ་དཀྱིལ་འཁོར་དུ་འཇུག་པའི་ཆོ་གའོ།། །།དེ་ནས་མཎྜལ་ཕུལ་ནས། སངས་རྒྱས་ཤེས་རབ་ཆེན་པོ་ཡིས། །རྡོ་རྗེ་སེམས་དཔར་དབང་བསྐུར་ལྟར། །བདག་ལ་མགོན་པོས་དབང་བཀུར་ཞིང་། །མཆོག་ཀྱང་བདག་ལ་སྩལ་དུ་གསོལ། །ཞེས་གསོལ་བ་བཏབ་ལ། ལས་བུམ་གྱི་ཆུ་དང་། ཡི་གེ་སོ་གཉིས་པས་སློབ་མ་དང་བུམ་པ་བསང་། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང་། རཾ་ལས་ཉི་མའི་སྟེང་དུ། ཡ་དང་རྡོ་རྗེ་ལས་མི་བསྐྱོད་པ་རྡོ་རྗེ་འཇིགས་བྱེད་ཞལ་ཕྱག་ཡོངས་སུ་རྫོགས་པ་སྒྲུབ་ཐབས་ལྟར་བསྐྱེད། སྐུ་གསུང་ཐུགས་བྱིན་གྱིས་བརླབ། ཡེ་ཤེས་པ་གཞུག དབང་རྫས་ལ་དབང་བསྐུར། མི་བསྐྱོད་པས་རྒྱས་བཏབ་ནས། ཞུ་བ་ལས་བྱུང་བའི་བུམ་པའི་ཆུར་བལྟ། རང་གི་སྙིང་ཁའི་ས་བོན་གྱི་འོད་ཀྱིས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས་དེ་རྣམས་ལ་མཆོད་ཅིང་། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། རྡོ་རྗེ་ཙརྩི་ཀ་ལ་སོགས་པའི་ཡུམ་རྣམས་ཀྱིས་བུམ་པ་ཡེ་ཤེས་ཀྱི་བདུད་རྩིས་གང་བས་དབང་བསྐུར་བར་བསམས་ལ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་བྱུང་སྦྱིན་པར་བྱ། །ཞེས་རྣམ་རྒྱལ་བུམ་པ་ནས་རྡོ་རྗེ་དང་བཅས་པའི་ཁུ་ཚུར་གྱིས་ཆུ་བླངས་ལ། ཨོཾ་བཛྲཱི་བྷ་ཝ་ཨ་བྷི་ཥིཉྩཱ་མི་ཞེས་བརྗོད་ཅིང་། དབང་བསྐུར། ལུས་གང་། དྲི་མ་དག ཆུ་ལྷག་མ་ཡར་ལུད་པ་ལས་སྤྱི་བོར་མི་བསྐྱོད་པས་དབུར་བརྒྱན་པར་བསམ་མོ། །དེ་ནས་ལྷ་མོ་རྣམས་ཀྱིས་མཆོད་པར་བསམས་ལ། དངོས་སུ་ལས་ཀྱི་རྡོ་རྗེས་མཆོད། དེ་ལྟར་ན་མི་བསྐྱོད་པའི་སྒོ་ནས་ཆུའི་དབང་ཐོབ། ཞེ་སྡང་དག རྣམ་པར་ཤེས་པའི་ཕུང་པོ་གནས་གྱུར། ཆོས་དབྱིངས་ཡེ་ཤེས་མངོན་དུ་བྱས། མི་བསྐྱོད་པའི་ས་བོན་དང་བག་ཆགས་རྒྱུད་ལ་བཞག་ཅེས་རྟོགས་པ་བསྐྱེད་དོ། །དེ་རྣམས་ནི་ལྷ་དང་དབང་རྫས་ཀྱི་ཁྱད་པར་མ་གཏོགས་འོག་མ་རྣམས་ལའང་འདྲའོ། །དེ་བཞིན་དུ་སློབ་མ་དང་། དབུ་རྒྱན་བསང་སྦྱངས། མ་དང་རིན་པོ་ཆེ་ལས། རིན་ཆེན་འབྱུང་ལྡན་རྡོ་རྗེ་འཇིགས་བྱེད་རྩ་ཞལ་སེར་པོ་མ་ཧེའི་གདོང་པ་ཅན། གཞན་རྣམས་སྔར་དང་འདྲ་བར་བསྐྱེད་ནས་ཞུ་བ་ལས་བྱུང་བའི་དབུ་རྒྱན་དུ་གྱུར་པར་བལྟས་པའི་བར་དུ་བྱས་ལ། སྔར་གྱི་ཚིགས་བཅད་ཀྱིས་དབུ་རྒྱན་བཅིང་། ཆུས་ཀྱང་དབང་བསྐུར་ནས་རིན་འབྱུང་གིས་རྒྱས་གདབ། མཆོད་པས་མཆོད། དེ་ལྟར་ན་རིན་ཆེན་འབྱུང་ལྡན་གྱི་སྒོ་ནས་དབུ་རྒྱན་གྱི་དབང་ཐོབ། ང་རྒྱལ་དང་སེར་སྣ་དག ཚོར་ཕུང་གནས་གྱུར། མཉམ་ཉིད་ཡེ་ཤེས་མངོན་དུ་བྱས། རིན་ཆེན་འབྱུང་ལྡན་གྱི་ས་བོན་དང་བག་ཆགས་རྒྱུད་ལ་བཞག་ཅེས་རྟོགས་པ་བསྐྱེད་དོ། །དེ་ནས་སློབ་མ་དང་། རྡོ་རྗེ་བསང་སྦྱངས། མེ་དང་པདྨ་ལས། འོད་དཔག་མེད་རྡོ་རྗེ་འཇིགས་བྱེད་རྩ་ཞལ་དམར་པོ་མ་ཧེའི་གདོང་པ་ཅན་དུ་བསྐྱེད་པ་སོགས་བྱས་ཏེ། ཞུ་བ་ལས་བྱུང་བའི་རྡོ་རྗེར་བལྟས་ལ། སངས་རྒྱས་ཀུན་གྱི་རྡོ་རྗེ་ཡི། །དབང་གིས་དེ་རིང་ཁྱོད་དབང་བསྐུར། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་རབ་ཏུ་གྲུབ་ཕྱིར་གཟུང་། །ཞེས་བརྗོད་དེ་རྡོ་རྗེ་སྙིང་ག་ལ་སོགས་པར་རེག་ལ། ལག་པ་གཡས་སུ་བྱིན། ཆུས་ཀྱང་དབང་བསྐུར། འོད་དཔག་མེད་ཀྱིས་རྒྱས་གདབ་ལ་མཆོད་ནས། དེ་ལྟར་ན་འོད་དཔག་མེད་ཀྱི་སྒོ་ནས་རྡོ་རྗེའི་དབང་ཐོབ། འདོད་ཆགས་དག འདུ་ཤེས་གནས་གྱུར། སོར་རྟོག་ཡེ་ཤེས་མངོན་དུ་བྱས། འོད་དཔག་མེད་ཀྱི་ས་བོན་དང་བག་ཆགས་རྒྱུད་ལ་བཞག་ཅེས་རྟོགས་པ་བསྐྱེད་དོ། །དེ་ནས་སློབ་མ་དང་། དྲིལ་བུ་བསང་སྦྱངས། ད་དང་རལ་གྲི་ལས་དོན་གྲུབ་རྡོ་རྗེ་འཇིགས་བྱེད་རྩ་ཞལ་ལྗང་ཁུ་མ་ཧེའི་གདོང་པ་ཅན་དུ་བསྐྱེད་པ་སོགས་བྱས་ཏེ། ཞུ་བ་ལས་བྱུང་བའི་དྲིལ་བུར་བལྟས་ལ། ཨོཾ་བཛྲ་ཨ་དྷི་པ་ཏི་སཏྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སཏྭཾ་ཞེས་པས་དྲིལ་བུ་ལག་པ་གཡོན་དུ་བྱིན། ཆུས་ཀྱང་དབང་བསྐུར། དོན་ཡོད་གྲུབ་པས་རྒྱས་གདབ་མཆོད་ནས། དེ་ལྟར་ན་དོན་ཡོད་གྲུབ་པའི་སྒོ་ནས་དྲིལ་བུའི་དབང་ཐོབ། ཕྲག་དོག་དག འདུ་བྱེད་གནས་གྱུར། བྱ་གྲུབ་ཡེ་ཤེས་མངོན་དུ་བྱས། དོན་གྲུབ་ཀྱི་ས་བོན་དང་བག་ཆགས་རྒྱུད་ལ་བཞག་ཅེས་རྟོགས་པ་བསྐྱེད་དོ། །དེ་ནས་སློབ་མ་བསང་སྦྱངས། ཀྵེ་དང་འཁོར་ལོ་ལས། རྣམ་སྣང་རྡོ་རྗེ་འཇིགས་བྱེད་རྩ་ཞལ་དཀར་པོ་མ་ཧེའི་གདོང་པ་ཅན་དུ་བསྐྱེད་པ་སོགས་བྱས་ལ། ཨོཾ་བཛྲ་སཏྭ་སཏྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷཱི་ཥེ་ཀ་ཏེ། ཀྱཻ་དཔལ་ཆེ་གེ་མོ་རྡོ་རྗེ་ལ་སོགས་པ་སྔར་མེ་ཏོག་གང་ལ་ཕོག་ཀྱང་མི་བསྐྱོད་པའི་རིགས་ཀྱི་མིང་གདགས་སོ། །ཆུས་ཀྱང་དབང་བསྐུར། རྣམ་པར་སྣང་མཛད་ཀྱིས་རྒྱས་བཏབ་ལ་མཆོད་ནས། དེ་ལྟར་ན་རྣམ་པར་སྣང་མཛད་ཀྱི་སྒོ་ནས་མིང་གི་དབང་ཐོབ། གཏི་མུག་དག་གཟུགས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། རྣམ་པར་སྣང་མཛད་ཀྱི་ས་བོན་དང་བག་ཆགས་རྒྱུད་ལ་བཞག་ཅེས་རྟོགས་པ་བསྐྱེད་དོ། །དབང་བསྐུར་བ་འདི་དག་གིས་བྱ་བ་དང་སྤྱོད་པའི་རྒྱུད་བཤད་པ་དང་། སྔགས་བསྒྲུབ་པ་ལ་དབང་བར་འགྱུར་རོ། །དབང་ལྔ་པོ་དེ་ཉིད་ཅོད་པཎ་གྱི་དབང་སྟེ། ཐམས་ཅད་དུ་ཙརྩི་ཀ་ལ་སོགས་པ་རྣམས་ཀྱི་ཅོད་པཎ་ལ་དབང་གི་ཚུལ་དུ་བྱ་བའི་ཕྱིར་རོ། །དེ་ནས་སློབ་དཔོན་གྱི་དབང་གི་དོན་དུ་མཎྜལ་ཕུལ་ནས། གང་གི་བདག་ནི་ཁྱོད་དྲིན་ལས། །རང་དང་གཞན་དོན་ནུས་གྱུར་པ། །རྡོ་རྗེ་སློབ་དཔོན་གྱི་ནི་དབང་། །སྙིང་རྗེའི་གཏེར་གྱིས་བདག་ལ་སྩོལ། །ཞེས་གསོལ་བ་བཏབ་ལ། དཀྱིལ་འཁོར་གྱི་ཤར་དུ་རྡུལ་ཚོན་དཀར་པོས་པདྨ་འདབ་བརྒྱད་བྲིས་པའི་སྟེང་དུ། ཤིང་སྟན་ལ་སློབ་མ་གཙོ་བོའི་ང་རྒྱལ་གྱིས་བཞག་གོ །གོང་ལྟར་རིག་པའི་དབང་ལྔ་མདོར་བསྡུས་པ་བསྐུར་ཏེ། ཧཱུྃ་ལས་བྱུང་བའི་རྡོ་རྗེ་ལག་པ་གཡས་པར་བྱིན་ལ། ཁམས་གསུམ་པ་ཡི་རལ་གྲི་ཆེ། །སངས་རྒྱས་ཀུན་གྱིས་ཕྱག་བྱས་པ། །ལས་ཀྱི་རལ་གྲི་མཆོག་ལྟ་བུ། །བདུད་ལས་རྒྱལ་བར་བྱ་ཕྱིར་ཟུང་། །ཞེས་དང་། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། །ཞེས་བརྗོད་པ་རྡོ་རྗེ་ཐུགས་ཀྱི་དམ་ཚིག་གོ །ཨཿལས་བྱུང་བའི་དྲིལ་བུ་ལག་པ་གཡོན་དུ་བྱིན་ལ། ཤེས་རབ་ཐབས་ཀྱི་རང་བཞིན་ཉིད། །རྡོ་རྗེ་དྲིལ་བུར་རབ་གྲུབ་ཕྱིར། །བུ་ཡིས་ཡང་དག་གུས་པར་གྱིས། །ཁྱོད་ཀྱིས་སློབ་མ་བསྡུ་བར་གྱིས། །ཞེས་དང་། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་མཆོག་སེམས་དཔའ་ཡིས། །དམ་པའི་སྲིད་པ་བྱེད་པར་འགྱུར། །ཞེས་བརྗོད་དེ་དྲིལ་བུ་གསུང་གི་དམ་ཚིག་གོ །དེ་ནས་རང་དཀྱིལ་འཁོར་གྱི་གཙོ་བོར་བསྒོམས་ནས། ཤེས་རབ་མ་ལ་འཁྱུད་པའི་ཚུལ་བྱས་ལ། ཡིད་ཀྱི་ལུས་བརྟན་དེ་ཉིད་ཀྱིས། །ཕྱག་རྒྱའི་དམ་ཚིག་རབ་དུ་བཤད། །གང་གིས་ལུས་འདི་ཐམས་ཅད་བརྟན། །དེས་ན་ཕྱག་རྒྱར་རབ་དུ་གྲགས། །ཞེས་པ་ནི་ཕྱག་རྒྱའི་དམ་ཚིག་སྟེ། ཤེར་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་བརྗོད། །ཅེས་པའི་དོན་ངོ་སྤྲད་ལ། ཆུ་དབང་བསྐུར་ནས། དཀྱིལ་འཁོར་དང་། ལྷའི་དེ་ཁོ་ན་ཉིད་བཤད་དོ། །དེ་ལ་དཀྱིལ་འཁོར་གྱི་དེ་ཁོ་ན་ཉིད་ནི། སངས་རྒྱས་སངས་རྒྱས་མིན་དབང་པོ། །མི་མཉམ་མེད་པས་གྲུ་བཞི་པ། །དྲན་པ་ཉེ་བར་བཞག་པ་བཞི། །དད་པ་རྣམ་དག་ཤར་སྒོའོ། །ཡང་དག་སྤོང་བཞི་བརྩོན་འགྲུས་ནི། །རྣམ་པར་དག་པ་ལྷོ་སྒོའོ། །རྫུ་འཕྲུལ་རྐང་པ་རྣམ་བཞི་ཡི། །དྲན་པ་རྣམ་དག་ནུབ་ཀྱི་སྒོ། །དབང་པོ་ལྔ་ཡི་ཏིང་ངེ་འཛིན། །རྣམ་པར་དག་པ་བྱང་སྒོའོ། །རྟོག་དཔྱོད་དགའ་བདེ་བཏང་སྙོམས་ཏེ། །བསམ་གཏན་བཞི་དག་རྟ་བབས་བཞི། །དཔའ་བར་འགྲོ་སོགས་ཏིང་འཛིན་བཞི། །རྣམ་པར་དག་པ་འདོད་སྣམ་བཞི། །དོན་ཚིག་ངེས་སྤོབས་གཟུངས་བཞི་པོ། །དག་པ་འདོད་ཡོན་ལྷ་མོའོ། །སྣ་ཚོགས་རྒྱན་གྱིས་བརྒྱན་པ་ནི། །བསམ་པ་ཐམས་ཅད་ཡོངས་རྫོགས་པའོ། །གསུང་རབ་ཡན་ལག་དགུ་བསྟན་པ། །དག་པ་དྲིལ་བུ་བ་དན་ནོ། །བྱང་ཆུབ་ཡན་ལག་བདུན་དག་པ། །དྲྭ་བ་དྲྭ་ཕྱེད་ལ་སོགས་བདུན། །རྣམ་ཐར་བརྒྱད་དག་ཀ་བའམ། །སྣ་ཚོགས་རྡོ་རྗེའི་ལོགས་ཟུར་རོ། །སྔགས་ཐོག་ཆོས་འཁོར་བསྐོར་བ་དག །རྡོ་རྗེའི་ཕྲེང་ཐིག་ཉམས་ལྡན་པའོ། །འཇིག་ཚོགས་ལྟ་རི་ཉི་ཤུ་དག །སྣ་ཚོགས་རྡོ་རྗེའི་རྭ་རྣམས་སོ། །ཁ་དོག་ལྔ་ནི་རྣམ་དག་པ། །སྟེང་འོག་རྩིག་པའི་རིམ་པའོ། །གཅིག་དང་དུ་བྲལ་ཆོས་སྟོན་དག །ལྷ་གནས་སྣ་ཚོགས་པད་གདན་ནོ། །བྱང་ཆུབ་སེམས་མིན་མྱུ་གུ་བསྐྱེད། །དག་ཕྱིར་ཉི་ཟླའི་གདན་དང་ལྡན། །སྙིང་རྗེའི་བདུད་རྩིས་ཡོངས་གང་བ། །དག་པ་བུམ་པ་བརྒྱད་ཡིན་ནོ། །ཆོས་ཀྱི་སྒྲོན་མ་དྲི་དང་ཟས། །དག་པ་སྣང་གྲག་ལྷ་བཤོས་སོ། །ཞེས་བརྗོད། དེ་ནས་ལྷའི་དེ་ཁོ་ན་ཉིད་བརྗོད་པར་བྱ་སྟེ། དམ་པའི་དོན་དུ་བྱ་བ་དག །དུས་ནི་དཔའ་བོ་ཆེན་པོའི་གཟུགས། །ཞལ་བརྒྱད་ཐུན་ཚོད་བརྒྱད་ཡིན་ནོ། །ཞལ་དགུ་ཐུན་ཚོད་སྤྱི་ཡིན་ནོ། །ཕྱག་དང་རྭ་གཉིས་ཟླ་བ་དང་། །ཟླ་བ་ཕྱེད་དང་ཡང་དག་སྦྱོར། །ཞོན་པ་བཅུ་དྲུག་དུས་དང་ནི། །ཟླ་བ་ཡི་ནི་ཞག་ཏུ་ཤེས། །ཞལ་ནི་གཟའ་དགུ་དག་ཏུ་ཤེས། །ཕྱག་ནི་རྒྱུ་སྐར་དག་དང་སྦྱར། །ཞབས་ནི་འཕོ་བ་བཅུ་གཉིས་དང་། །དུས་བཞི་ཡང་ནི་དེ་བཞིན་ནོ། །མཚོན་ཆ་རྣམས་ནི་སྟོང་པ་དང་། །སྙིང་རྗེ་དག་ནི་བཅུ་དྲུག་གཉིས། །གླང་ཆེན་ལྤགས་པ་བགེགས་ཆེན་སྟེ། །དྲག་པོའི་གཟུགས་ནི་སྡུག་བསྔལ་ཆེ། །སེར་བར་བྱེད་པའི་གཙོ་བོའོ། །ཁ་དོག་ནག་པོ་བྱམས་པ་ཆེ། །ཐོད་པའི་རྒྱན་ནི་མི་འགྱུར་བའོ། །འཇམ་དཔལ་མིན་པའི་ཞལ་བརྒྱད་པོ། །དག་པ་རོ་ལངས་བརྒྱད་ཡིན་ནོ། །ཞེས་བརྗོད་ཅིང་། དེ་ལྟ་བུའི་དཀྱིལ་འཁོར་དང་། ལྷའི་དེ་ཁོ་ན་ཉིད་ནི། སློབ་དཔོན་ལ་ཡང་ཚང་བ་ནི་སློབ་དཔོན་གྱི་དེ་ཁོ་ན་ཉིད་དོ། །དེ་ནས་སློབ་མ་རྡོ་རྗེ་འཇིགས་བྱེད་ཀྱི་སྐུར་བསྒོམ་དུ་བཅུག་ལ། སེམས་ཅན་ཀུན་ལ་ཕན་དོན་ཕྱིར། །འཇིག་རྟེན་ཀུན་དུ་ཐམས་ཅད་ན། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་དུ་རྡོ་རྗེའི་འཁོར་ལོ། རིན་ཆེན་འཁོར་ལོ། པདྨའི་འཁོར་ལོ། སྣ་ཚོགས་འཁོར་ལོ་རབ་ཏུ་བསྐོར། ཞེས་པ་རྣམས་རིམ་པ་བཞིན་དུ་བྱིན་ཏེ་རྗེས་གནང་ངོ་། །རྡོ་རྗེ་ཧཱུྃ་ལས་རྡོ་རྗེ་སེམས་དཔའ་ཡན་ལག་བཞི་རྫོགས་སུ་བསྐྱེད། ཞུ་བའི་རྡོ་རྗེར་བལྟས་ལ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟན། །ཁྱོད་ཀྱིས་ཀྱང་ནི་རྟག་དུ་ཟུང་། །ཨོཾ་སརྦ་ཏ་ཐཱ་ག་ཏ། སིདྡྷི་བཛྲ་ས་མ་ཡ་ཏིཥྛ་ཨེ་ཥ་སཏྭཾ་དྷ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧཱུྃ། ཞེས་བརྗོད་དེ་རྡོ་རྗེའི་བརྟུལ་ཞུགས་སོ། །དེ་ནས་སློབ་དཔོན་ཤཱཀྱ་ཐུབ་པའི་ང་རྒྱལ་གྱིས་གཡོན་པའི་ཁུ་ཚུར་གྱིས་སྙིང་ཁར་ཆོས་གོས་ཀྱི་གྲྭ་ནས་འཛིན་པའི་ཚུལ་དང་། གཡས་པས་མཆོག་སྦྱིན་དུ་བྱས་པས། ཨོཾ་ངས་ཁྱོད་འདིར་ནི་ལུང་བསྟན་བྱ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་མཆོག་ཏུ་གྲུབ་བྱའི་ཕྱིར། །སྲིད་པའི་ངན་འགྲོ་ལས་བཏོན་ནས། །ཀྱཻ་ཆེ་གེ་མོ་རྡོ་རྗེ་ཞེས་བྱ་བ། །ཏ་ཐཱ་ག་ཏ་སིདྡྷི་ས་མ་ཡ་བྷུ་ར་བྷུ་ཝཿསྭ། ཞེས་བྱ་བས་ལུང་བསྟན་ནས། གང་འདི་དག་ལས་བྱུང་བའི་ཕྱག་རྒྱས་ལུང་སྟོན་པར་བྱེད་པ་དེ་ལ་དེ་བཞིན་གཤེགས་པ་འཁོར་དང་བཅས་པ་ཐམས་ཅད་ཀྱིས་མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་མཛད་དོ། །དེ་ཉིད་ལས་བྱུང་བའི་ཕྱག་རྒྱའི་མཐུ་དང་སྔགས་འདིའི་སྟོབས་ཀྱིས་སོ་ཞེས་བརྗོད་པར་བྱ་སྟེ་ལུང་བསྟན་པའོ། །དེ་ནས་འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མི་བྱའོ། །མ་ཧཱ་ས་མ་ཡ་ཧཱ་ན་ཧཱུྃ་ཕཊ། ཅེས་ཉན་རང་གི་ས་ཡིད་བྱེད་ཀྱི་སེམས་བཅོམ་པར་བསམ་སྟེ་གསང་བར་བརྗོད་པའོ། །དེ་ནས། མཆོག་ཏུ་གསང་བ་དམ་པ་ཡི། །དཀྱིལ་འཁོར་མཐོང་ཞིང་ཞུགས་པ་ཡིས། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱེད་རྣམས་ལེགས་པར་གནས། །བདེ་ཆེན་ཐེག་པ་འདི་ཡིས་ནི། །ཕྱིན་ཆད་འཆི་བ་ཁྱོད་ལ་མེད། །སྲིད་པ་ཤིན་དུ་གྲུབ་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །རྡོ་རྗེའི་ཕྱག་རྒྱ་གང་ཡིན་པ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་ཐེ་ཚོམ་མེད། །བྱང་ཆུབ་སེམས་ནི་བཏང་མི་བྱ། །དམ་པའི་ཆོས་ནི་སུན་མི་དབྱུང་། །ནམ་ཡང་འདོར་བར་མི་བྱའོ། །མི་ཤེས་པའམ་རྨོངས་པ་ཡི། །དེ་ཡང་ངེས་པར་བརྟེན་མི་བྱ། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་དོར་བར་མི་བྱ་སྟེ། །སློབ་དཔོན་སྨད་པར་མི་བྱའོ། །འདི་ནི་སངས་རྒྱས་ཀུན་དང་མཉམ། །རང་གི་བདག་ཉིད་དོར་ནས་ནི། །དཀའ་ཐུབ་ཀྱིས་ནི་མི་གདུང་ཞིང་། །ཅི་བདེ་བར་ནི་བདེ་བར་གཟུང་། །འདི་ནི་མ་བྱོན་རྫོགས་སངས་རྒྱས། །ད་ནི་ཁྱོད་ཀྱིས་དཀྱིལ་འཁོར་གྱི། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀྱིས་ནི་མཐུན་པར་དགོངས། །སེམས་ཅན་རྣམས་ལ་རྗེས་བརྩེ་བས། །ཁྱོད་ཀྱི་དཀྱིལ་འཁོར་ཆོ་ག་བཞིན། །རྟག་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་པའི་དོན་བཤད་དེ། དབུགས་དབྱུང་སྦྱིན་པའོ། །རྗེས་གནང་ལ་སོགས་པ་ལྔ་པོ་འདི་དག་ནི་སློབ་མའི་དབང་ཙམ་དོན་དུ་གཉེར་བ་ལ་ཅོད་པཎ་གྱི་དབང་ལྔའི་རྗེས་སམ། སྐབས་འདིར་རམ། དབང་བཞི་ཡོངས་སུ་རྫོགས་པའི་རྗེས་ལ་ཡང་སྦྱར་བར་ཡང་བཤད་དོ། །དེ་ལྟར་ན་ཕྱི་རྡུལ་ཚོན་གྱི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་དྲི་མ་དག ལམ་བསྐྱེད་པའི་རིམ་པ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་མངོན་དུ་བྱེད་པའི་སྐལ་བ་ཅན་དུ་བྱས་སོ་ཞེས་རྟོགས་པ་བསྐྱེད་དེ། སློབ་དཔོན་གྱི་དབང་ངམ་བུམ་པའི་དབང་ངོ་།། །།དེ་ནས་སློབ་མས་རིག་མ་དང་མཎྜལ་ཕུལ་ནས། བྱང་ཆུབ་རྡོ་རྗེས་སངས་རྒྱས་སོགས་སམ། ཨེ་མ་སངས་རྒྱས་སློབ་དཔོན་ཆེ། །ཨེ་མ་ཆོས་ཀྱང་ཚོགས་ཀྱི་གཙོ། །བདག་ལ་དམ་ཚིག་དེ་ཉིད་སྩོལ། །བྱང་ཆུབ་སེམས་ཀྱང་བདག་ལ་སྩོལ། །ཞེས་པས་གསོལ་བ་བཏབ་ལ། གདོང་གཡོགས་བཅིང་། བླ་མས་རང་རིགས་བདག་མི་བསྐྱོད་པ་དང་། རིག་མ་མཱ་མ་ཀཱིར་བསྐྱེད་སྙོམས་པར་ཞུགས་པའི་སྦྱོར་བ་བྱས་པས་དགའ་བའི་སྒྲས་སངས་རྒྱས་ཡབ་ཡུམ་དཔག་དུ་མེད་པ་སྤྱན་དྲངས། སྤྱི་བོ་ནས་ཞུགས་རྗེས་སུ་ཆགས་པས་བྱང་ཆུབ་ཀྱི་སེམས་སུ་ཞུ་བར་གྱུར་པ་རྡོ་རྗེ་ནོར་བུའི་རྩེ་མོར་བརྟན་པར་བྱས་པ་དེ་ཉིད་སྲིན་ལག་དང་མཐེ་བོང་གིས་བརྩིར་ཏེ། བཏུང་བ་རིན་ཆེན་འདི་དེ་ནི། །ལུས་ཀྱི་རྡོ་རྗེ་རབ་གསལ་བྱེད། །བུ་ཁྱོད་རྟག་ཏུ་ཤེས་ནས་ཀྱི། །ཡིད་ལས་བྱུང་བའི་ཆུ་འཐུང་མཛོད། །ཅེས་དང་། ཧྲཱིཿཥྚཱིཿས་སློབ་མའི་ལྕེ་ཐོག་དུ་སྦྱིན། དེས་ཀྱང་ཨ་ཧོ་མ་ཧཱ་སུ་ཁཾ། ཞེས་བརྗོད་ཅིང་བླངས་ནས་མྱང་ལ་མགྲིན་པར་མིད་དོ། །ཤེས་རབ་ཀྱིས་ཀྱང་རང་གི་པདྨ་ན་གནས་པའི་ཐིག་ལེ་སློབ་མའི་ཁར་བྱིན་ལ་སྔར་བཞིན་མྱངས་པས་མཆོག་དུ་དགའ་བའི་བདེ་བས་རྒྱུད་གང་ཞིང་ཡུལ་སྣ་ཚོགས་ལ་དམིགས་པའི་རྟོག་པ་རགས་པ་རྣམས་འགགས་ནས་གསལ་སྟོང་བདེ་བས་བརྒྱན་པའི་ཏིང་ངེ་འཛིན་རྒྱུད་ལ་སྐྱེས་པར་བསྒོམས་ལ། གདོང་གཡོགས་བཀྲོལ་ཏེ། ཁྱོད་ཀྱིས་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་དྲི་མ་དག ལམ་སྲོག་རྩོལ་རླུང་གི་རྣལ་འབྱོར་བསྒོམ་པ་ལ་དབང་། འབྲས་བུ་ལོངས་སྐུ་མངོན་དུ་བྱེད་པའི་སྐལ་བ་ཅན་དུ་བྱས་སོ་ཞེས་རྟོགས་པ་བསྐྱེད་དེ་གསང་བའི་དབང་ངོ་།། །།དེ་ནས་མཎྜལ་ཕུལ་ནས། ཇི་ལྟར་བླ་མེད་དཔའ་བོ་ཡིས། །མགོན་ལ་དབང་ནི་བསྐུར་བ་ལྟར། །མགོན་པོས་བདག་ལ་དབང་བསྐུར་ཞིང་། །བདག་ལ་དོན་མཆོག་སྩལ་དུ་གསོལ། །ཞེས་གསོལ་བ་བཏབ་ལ། གདོང་གཡོགས་བཅིངས་ཏེ། རིག་མའི་ལག་པ་སློབ་མའི་ལག་པར་གཏད་པར་བསམས་ལ། གཟུངས་མ་ཡིད་འོང་འདི་དེ་ནི། །བསྟེན་བྱར་སངས་རྒྱས་རྣམས་ཀྱིས་བཏགས། །རྡོ་རྗེ་རྗེས་ཆགས་སྦྱོར་བ་ཡིས། །བདེ་བ་དམ་པ་མྱང་བར་གྱིས། །ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདིའང་དག་པ་ཡིན། །དེ་བས་འཁོར་བར་བརྗོད་བྲལ་ཉིད། །ཁྱེད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱིས། །རིག་མའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ལ་བྱིན་པ་དང་། དེས་ཙནྡན་ལ་སོགས་པས་བྱུགས། མེ་ཏོག་ལ་སོགས་པས་བརྒྱན། གོས་མེད་པར་བྱས་ཏེ། པདྨ་རྒྱས་པར་སྟོན་ཅིང་། དྲི་ཆེན་དྲི་ཆུ་ཟ་བ་དང་། །ཁྲག་དང་ཁུ་བ་དེ་བཞིན་ཤ །བུད་མེད་གུས་མཆོད་དེ་བཞིན་དུ། །བྷ་ག་པདྨར་ཙུམྦྷ་ན། །བུ་ཁྱོད་སྤྲོ་བ་ཡིན་ནམ་ཅི། །ཇི་ལྟར་བདེ་བར་བུས་སྨྲོས་ཤིག །ཅེས་སོ། །དེས་ཀྱང་། དྲི་ཆེན་དྲི་ཆུ་སོགས་ཟ་བ། །ལྷ་མོ་ཅི་ཕྱིར་བདག་མི་སྤྲོ། །བུད་མེད་རྣམས་ལ་རྟག་གུས་བྱ། །བྷ་ག་ཉིད་ལའང་ཙུམྦྷ་ནའང་། །ཞེས་ལན་བཏག་པས་མཉེས་ཏེ། ཨེ་མ་ང་ཡི་པདྨ་འདི། །བདེ་བ་ཀུན་དང་ཡང་དག་ལྡན། །གང་ཞིག་ཆོ་གས་བསྟེན་བྱེད་པ། །དེ་ཡི་མདུན་ན་བདག་གནས་ཏེ། །སངས་རྒྱས་བསྟན་པ་ལ་སོགས་པ། །པདྨར་བྱ་བ་ཇི་བཞིན་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་དུ་བཞུགས། །བྷཉྫ་མོཀྵ་ཧོ། ཞེས་བརྗོད་པར་བསམ། དེ་ནས་སློབ་མ་རིགས་བདག་མི་བསྐྱོད་པ་དང་། རིག་མ་མཱ་མ་ཀཱིར་བསྐྱེད་ལ། རྡོ་རྗེ་དང་པདྨ་བྱིན་གྱིས་བརླབ་པ་སྔོན་དུ་འགྲོ་བས། འོ་དང་འཁྱུད་པ་ལ་སོགས་པ་སྐད་ཅིག་དང་པོ་ལ་དགའ་བའི་ཡེ་ཤེས། རྡོ་རྗེ་དབྱིངས་ཀྱི་དབང་ཕྱུག་མའི་རྩ་བཙལ་ཏེ། རྡོ་རྗེ་པདྨ་སྙོམས་པར་ཞུགས་པས་སྐད་ཅིག་གཉིས་པ་ལ་མཆོག་དགའི་ཡེ་ཤེས། རིམ་གྱིས་བསྲུབས་པས་བྱང་ཆུབ་སེམས་ཀྱིས་གསང་གནས་ཀྱི་བར་གང་བ་ཁྱད་པར་གྱི་དགའ་བའི་ཡེ་ཤེས། ནོར་བུའི་རྩེ་མོའི་མཐར་ཐུག་པའི་བར་གང་ནས་ཕྱིར་མ་འཛག་པ་ཆགས་པ་དང་། ཆགས་བྲལ་གྱི་མཐའ་སྤངས་པ་ལྷན་ཅིག་སྐྱེས་པའི་དགའ་བའི་ཡེ་ཤེས་ཏེ། དེ་ལ་ཅི་ནུས་སུ་གནས་པར་བྱ་བ་སྟེ། རྣལ་འབྱོར་པ་ཡིས་ཇི་སྲིད་དུ། །བྱང་སེམས་འབྱིན་པར་མི་བྱེད་པ། །དེ་སྲིད་ཐོབ་འགྱུར་རྒྱུན་མི་ཆད། །དགའ་བ་ལས་སྐྱེས་བདེ་གཞན་ཅི། །དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་སེམས་ནི་ལྷུང་གྱུར་ན། ཕུང་པོ་རྣམ་ཤེས་བརྒྱལ་བ་ལ། །མ་སྨད་དངོས་གྲུབ་ག་ལ་ཡོད། །མཁའ་ཁམས་རྡོ་རྗེ་ཀུན་སྦྱོར་དང་། །རེག་བྱ་ཡིས་ནི་རྨད་བྱུང་ཆེའི། །བདེ་བ་བསྐྱེད་པར་བྱེད་པ་གང་། །དེ་ནི་མཆོག་དགའ་བྱེད་པ་པོ། །དགའ་བྲལ་དག་གི་དུས་སུ་ནི། །མཚོན་པ་ལྟོས་པ་བརྟན་པར་གྱིས། །པདྨའི་ནམ་མཁར་རྡོ་རྗེ་ཡིས། །ལྟེ་བ་མནན་པའི་གནས་དག་ཏུ། །རྡོ་རྗེ་སྐྱིལ་ཀྲུང་དག་གི་སེམས། །ནོར་བུའི་ནང་དུ་སོན་བལྟས་པས། །ཡེ་ཤེས་བསྐྱེད་པ་གང་ཡིན་པ། །ཡེ་ཤེས་ངོ་བོ་ཞེས་པས་བརྒྱན། །ཆགས་པ་མ་ཡིན་ཆགས་བྲལ་མིན། །དབུ་མར་དམིགས་པ་མ་ཡིན་ནོ། །གང་ཚེ་རྣལ་འབྱོར་ཡེ་ཤེས་མཐོང་། །དེ་ལ་གནས་བྱ་འགྱུར་མི་བྱ། །ཐུན་ནམ་ཡང་ན་ཉིན་གཅིག་གམ། །ཟླ་ཕྱེད་ཟླ་བ་ལོ་དང་ནི། །བསྐལ་པ་བསྐལ་པ་སྟོང་དུ་ཡང་། །ཡེ་ཤེས་མངོན་འབྱོར་གྱིས་གནས་བྱ། །ཞེས་བརྗོད་ལ་ཡེ་ཤེས་ངོས་བཟུང་དུ་བཅུག་ལ། མས་བརྟན་གྱི་དགའ་བ་བཞི་བརྟན་ནས། ལུས་ཐམས་ཅད་བདེ་བས་ཁྱབ་པ་ལ་སེམས་བཟུང་། དེས་ནས་གདོང་གཡོགས་བཀྲོལ་ལ། ཕྱག་རྒྱའི་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། སེམས་ཀྱི་དྲི་མ་དག ལམ་ཕོ་ཉའི་ལམ་བསྒོམ་པ་ལ་དབང་། འབྲས་བུ་ཆོས་སྐུ་མངོན་དུ་བྱེད་པའི་སྐལ་བ་ཅན་དུ་བྱས་སོ་ཞེས་རྟོགས་པ་བསྐྱེད་དེ་ཤེས་རབ་ཡེ་ཤེས་ཀྱི་དབང་ངོ་།། །།དེ་ནས་ཡོན་དང་མཎྜལ་ཕུལ་ལ། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་གདབ། གདོང་གཡོགས་བཅིངས་སམ་མ་བཅིངས་ཀྱང་རུང་སྟེ། དབང་གསུམ་པའི་དུས་སུ་ཉམས་སུ་མྱོང་བའི་ལྷན་ཅིག་སྐྱེས་པའི་དགའ་བའི་ཡེ་ཤེས་དེས་མཚོན་པའི་དོན་གྱི་ལྷན་ཅིག་སྐྱེས་པའི་དགའ་བའི་ཡེ་ཤེས་དབང་བཞི་པ་ཉིད་ཚིག་གི་སྒོ་ནས་ངོ་སྤྲད་ན། རྒྱུད་ལས། དེ་ལྟར་བཞི་པ་དེ་བཞིན་ཡང་ཞེས་གསུངས་པས། དབང་གསུམ་པའི་དུས་སུ་ཡུམ་དང་ལྷན་སྦྱོར་གྱི་ལྷའི་སྐུར་བསྒོམ་པ་དེ་ཉིད་གོམས་པའི་སྟོབས་ཀྱིས་གཉིས་སྣང་གི་རྟོག་པ་ཐམས་ཅད་འོད་གསལ་ལྷའི་སྐུར་གནས་གྱུར་ཏེ། རང་དང་སྣོད་བཅུད་ཀྱི་སྣང་བ་ཐམས་ཅད་ལྷ་སྐུ་ཞལ་སྦྱོར་གྱི་རྣམ་པ་ཅན་གསལ་ལ་མ་འགགས་པ་མངོན་དུ་གྱུར་པ་སྤྲུལ་པའི་སྐུ་དང་། དབང་གསུམ་པའི་གནས་སྐབས་སུ་ཕྱག་རྒྱ་ལ་བརྟེན་པའི་བདེ་བ་དེ་ཉིད་རྒྱུན་གོམས་པས་སྔར་གྱི་བདེ་བ་ལས་ཆེས་ཁྱད་པར་དུ་འཕགས་པ་འཛག་པ་མེད་པའི་བདེ་བ་ཆེན་པོ་ཡང་དག་རིག་པ་འཁོར་འདས་ཐམས་ཅད་བདེ་བ་ཆེན་པོའི་རྣམ་པར་མངོན་དུ་གྱུར་པ་ལོངས་སྤྱོད་རྫོགས་པའི་སྐུ་དང་། དབང་གསུམ་པའི་དུས་སུ་བདེ་བའི་ངོ་བོ་སྟོང་པར་བསྒོམས་པའི་དོན་གོམས་པ་ལས། གཟུང་འཛིན་གྱི་དྲི་མ་མཐའ་དག་དག་སྟེ། ཐོབ་བྱ་འབྲས་བུ་དང་། ཐོབ་བྱེད་ལམ་དང་། ལམ་དེ་གོམས་པའི་སེམས་ལ་སོགས་པའི་རྟོག་པ་དང་བྲལ་ཞིང་ཁམས་བཅོ་བརྒྱད་དང་། ཀུན་གཞིའི་རྣམ་ཤེས་ལ་སོགས་པ་དོན་དམ་པར་མ་གྲུབ་པ་ཐམས་ཅད་སྟོང་པ་འོད་གསལ་ནམ་མཁའ་ལྟ་བུ་རྟོག་པ་ཐམས་ཅད་དང་བྲལ་བ་མངོན་དུ་གྱུར་པ་ནི་ཆོས་ཀྱི་སྐུ་དང་། དེ་གསུམ་དབྱེར་མེད་ཟུང་འཇུག་ཏུ་འདྲེས་ནས་ལྷ་སྐུ་བདེ་བ་དང་བཅས་པའི་སྣང་བ་མི་འདོར་ཞིང་དེ་དག་གི་ངོ་བོ་ཡང་སྟོང་པ་ཉིད་སྤྲོས་པའི་མཐའ་ཐམས་ཅད་དང་བྲལ་བ་ཆོས་ཐམས་ཅད་ཡིན་ལུགས་ལ་ཞུགས་པའི་ངོ་བོ་ཉིད་ཀྱི་སྐུ་སྟེ། འབྲས་བུ་དབང་བཞི་པ་ཞེས་བྱ་བ་ཡིན་ནོ། །དེ་མངོན་དུ་བྱེད་པའི་ཐབས་ནི་ལུས་མཉམ་བཞག་གི་སྤྱོད་ལམ་དང་ལྡན་ཞིང་། ངག་རླུང་རྒྱུ་བ་སོར་བཞག སེམས་ཀྱི་ལུས་ཡུམ་དང་བཅས་པའི་ལྷའི་སྐུར་གསལ་བ་དང་། དེའི་སེམས་རྒྱུད་འཛག་མེད་ཀྱི་བདེ་བས་གང་བ་དང་། དེ་དང་འཁོར་འདས་ཀྱི་ཆོས་ཐམས་ཅད་ཀྱི་གནས་ལུགས་སྐྱེ་འཇིག་འགྲོ་འོང་། རྟག་ཆད་འཁོར་འདས་བདེ་སྡུག་ལ་སོགས་པ་གཉིས་སྣང་ཐམས་ཅད་དང་བྲལ་བའི་སྟོང་པ་ཉིད་ནམ་མཁའ་ལྟ་བུ་སྟེ། དེ་གསུམ་དབྱེར་མེད་པའི་ངང་ལ་མ་ཡེངས་པར་མཉམ་པར་འཇོག་པ་སྟེ། བྱང་ཆུབ་མེད་ཅིང་མངོན་རྟོགས་མེད། །དངོས་པོ་མིན་ཅིང་བསྒོམ་པ་མིན། །ཁམས་ཀྱང་མིན་ཅིང་རྣམ་ཤེས་མིན། །ནམ་མཁའི་དཀྱིལ་དང་མཚུངས་པ་ཉིད། །ནམ་མཁའ་ལྟ་བུར་བདག་མེད་པའི། །ཆོས་འདི་བདེ་བ་ཆེན་པོའོ། །ཞེས་པའི་དོན་ངོ་སྤྲད། དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། སྒོ་གསུམ་གྱི་དྲི་མ་བག་ཆགས་དང་བཅས་པ་དག ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་ཀྱི་སྐུ་མངོན་དུ་བྱེད་པའི་སྐལ་བ་ཅན་དུ་བྱས་སོ་ཞེས་རྟོགས་པ་བསྐྱེད་དེ་དབང་བཞི་པའོ། །དེ་ནས་སྤྲོ་བ་བསྐྱེད་དེ་དམ་ཚིག་དང་སྡོམ་པ་བསྲུང་བར་གདམས་པ་ནི། མཆོག་ཏུ་གསང་བ་དམ་པ་ཡི། །དཀྱིལ་འཁོར་མཐོང་ཞིང་ཞུགས་པས་ན། །སྡིག་པ་ཀུན་ལས་རྣམ་གྲོལ་བར། །དེ་རིང་ཁྱེད་རྣམས་ལེགས་པར་གནས། །བདེ་ཆེན་ཐེག་པ་འདི་ལས་ནི། །ཕྱིན་ཆད་འཆི་བ་ཁྱེད་ལ་མེད། །མི་ཚུགས་པ་དང་མ་བཅིངས་པར། །གང་ལའང་འཇིགས་མེད་དགའ་བར་གྱིས། །སྲིད་པ་ཤིན་དུ་ཞི་བའི་ཕྱིར། །སྲིད་པའི་ངན་འགྲོ་ལས་ཁྱོད་འདས། །སྲིད་པ་ཤིན་དུ་གྲུབ་པའི་ཕྱིར། །སྟོན་པའི་མཆོག་ཏུ་ཡང་དག་འགྱུར། །དངོས་གྲུབ་དམ་ཚིག་སྡོམ་པ་འདི། །ཁྱོད་ཀྱིས་རྟག་ཏུ་བསྲུང་བྱ་སྟེ། །སངས་རྒྱས་ཀུན་གྱིས་མཐུན་པར་གསུངས། །མཆོག་ཏུ་རྟག་པའི་བཀའ་ཡིན་ནོ། །སློབ་དཔོན་སྨད་པར་མི་བྱ་སྟེ། །བདེ་གཤེགས་བཀའ་ལས་འདའ་མི་བྱ། །དེ་བཞིན་ཁྲོས་ནས་སྤུན་རྣམས་ལ། །ཉེས་པ་བརྗོད་པར་མི་བྱའོ། །སེམས་ཅན་རྣམས་ལ་བྱམས་པའི་སེམས། །ནམ་ཡང་ངེས་པར་སྤང་མི་བྱ། །བྱང་ཆུབ་སེམས་ནི་དོར་མི་བྱ། །རང་གཞན་ཆོས་ལ་མི་སྨད་དོ། །ཡོངས་སུ་མ་སྨིན་སེམས་ཅན་ལ། །གསང་བ་ཉིད་ནི་བསྟན་མི་བྱ། །བདག་ཉིད་ཕུང་པོར་སྨད་མི་བྱ། །ཆོས་རྣམས་ངོ་བོ་སུན་མི་དབྱུང་། །གདུག་ལ་བྱམས་པ་རྟག་ཏུ་སྤོང་། །ཆོས་ལ་ཚད་བཟུང་མི་བྱའོ། །དད་ལྡན་སེམས་ཅན་བསླུ་མི་བྱ། །རྟག་ཏུ་དམ་ཚིག་བསྟེན་པར་བྱ། །ཤེས་རབ་རང་བཞིན་བུད་མེད་རྣམས། །སྐྱོན་གྱི་ཉེས་པ་མི་བརྗོད་དོ། །རྣལ་འབྱོར་སློང་མོས་མི་རྒྱུ་ཞིང་། །རྣལ་འབྱོར་སྤང་བར་མི་བྱའོ། །རྟག་པར་རྒྱུན་དུ་གསང་སྔགས་བཟླས། །རྟག་ཏུ་དམ་ཚིག་ལ་སོགས་བསྟེན། །གལ་ཏེ་བླ་མ་སྨོད་དེ་བཞིན། །དམ་ཚིག་བག་མེད་པར་གྱུར་ན། །དེ་ཚེ་དཀྱིལ་འཁོར་ངེས་བྲིས་ལ། །བདེ་གཤེགས་རྣམས་ལ་སྡིག་པ་བཤགས། །དེང་ཁྱོད་སྐྱེ་བ་འབྲས་བུར་བཅས། །གང་ཕྱིར་འདི་ལ་ལེགས་པར་གནས། །དམ་ཚིག་ལྷ་རྣམས་དང་མཉམ་པར། །གནས་པར་འགྱུར་བར་ཐེ་ཚོམ་མེད། །སངས་རྒྱས་རྡོ་རྗེ་སྤྱན་བཅས་པས། །ཀུན་གྱིས་ཚེ་ལྡན་དེ་དབང་བསྐུར། །ཁམས་གསུམ་པ་ཡི་རྒྱལ་པོ་ཆེ། །རྒྱལ་སྲིད་བདག་པོར་བརྟན་པ་ཡིན། །དེ་རིང་བདུད་ལས་རྣམ་པར་རྒྱལ། །གྲོང་ཁྱེར་མཆོག་ཏུ་རབ་ཞུགས་སོ། །དེ་རིང་ཁྱོད་ནི་སངས་རྒྱས་ཉིད། །ཐོབ་པ་འདི་ལ་ཐེ་ཚོམ་མེད། །འདི་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་སྟེར་བསྟེན་པར་གྱིས། །དེ་རིང་འགྲོ་ལ་བདེ་མྱུར་རྡོ་རྗེ་སེམས་དཔའ་དང་། །མཚུངས་པའི་རྟག་པ་ཉིད་དུ་ཁྱོད་རྣམས་ཕྱིན་པར་འགྱུར། །ཞེས་བརྗོད་ལ་དོན་བཤད་དེ། དམ་ཚིག་དང་སྡོམ་པའི་བསྲུང་མཚམས་ཕྱེད་པར་བྱའོ། །དེ་ནས་སློབ་མས་གཙོ་བོས་ཇི་ལྟར་བཀའ་བསྒོ་བའི། །གསུང་ནི་དེ་ལྟར་བདག་གིས་བགྱི། །ཞེས་དམ་ཚིག་དང་སྡོམ་པ་བསྲུང་བར་ཁས་བླང་ངོ་། །འབྱོར་ན་སྦྱིན་སྲེག་ཀྱང་བྱ་ཞིང་། ཡོན་ཕུལ་ཚོགས་ཀྱི་འཁོར་ལོ་ཆོ་ག་བཞིན་བྱས་ལ་སླར་ཡང་། དཀྱིལ་འཁོར་ལ་ཕྱི་ནང་གིས་མཆོད་ཅིང་བསྟོད་ནས་འདོད་པའི་དོན་ལ་གསོལ་བ་གདབ། ཡི་གེ་བརྒྱ་པས་ལྷག་ཆད་ཁ་བསྐང་སྟེ་བཟོད་པར་གསོལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཞེས་བྱ་བ་ལ་སོགས་པས་རྡུལ་ཚོལ་གྱི་དཀྱིལ་འཁོར་གྱི་ཡེ་ཤེས་པ་གཤེགས་སུ་གསོལ། དམ་ཚིག་པ་བདག་ལ་བསྡུ། དེ་ནས་ལྷ་ཡིས་ང་རྒྱལ་བརྟན་པས་ཆོས་ཐམས་ཅད་ནི་སྐྱེ་བ་མེད་པའོ་ཆོས་ཐམས་ཅད་ནི་དངོས་པོ་མེད་པའོ་ཞེས་བརྗོད་ཅིང་། རྡོ་རྗེའི་རྩེ་མོས་དབང་ལྡན་གྱི་རྩིག་པ་དང་པོར་བཤིག་ཅིང་ལྷའི་མཚན་མ་རྣམས་ཤར་ནས་རིམ་གྱིས་བསྡུས་ལ། དོན་དུ་གཉེར་བ་ཡོད་ན་ཅུང་ཟད་སྦྱིན། ཚོན་ལྷག་མ་རྣམས་བསྡུས་ཏེ་རྒྱ་མཚོར་འབབ་པའི་ཆུ་ཀླུང་དུ་དོར་ནས་སྔར་བཤད་པའི་སྔགས་དང་། སྐམ་པའི་ཕྱག་རྒྱས་ཕུར་བུ་ཕྱུང་ལ། ཕུར་ཁུང་འོ་མས་ཀྱང་བཀང་། ཐིག་རྗེས་དབྱི་བ་སོགས་ལས་ཀྱི་རྗེས་མི་མངོན་པར་བྱས་ལ། སྨོན་ལམ་དང་བཀྲ་ཤིས་བྱའོ།། །།ད་ནི་དེ་དག་གི་ངེས་པ་བཤད་པར་བྱ་སྟེ། རྟོག་པ་བདུན་པའི་རྒྱུད་འདི་ལ། རྗེ་བཙུན་ནཱ་རོ་པའི་མན་ངག བླ་མ་མལ་ལོཙྪ་བ་ནས་དཔལ་ས་སྐྱ་པ་ཆེན་པོ་ལ་བརྒྱུད་པའི་ལུགས་བཟང་པོ་འདི་ནི་བླ་མ་དེ་ཉིད་ཀྱི་རྟོག་བདུན་གྱི་ཊཱི་ཀར་བཀོད་པ་འདི་ཡིན་པས་སྒྲུབ་ཐབས་ཊཱི་ཀ་ལས་རྫོགས་པར་ཐོན་ལ། དཀྱིལ་འཁོར་གྱི་ཆོ་ག་ཐུན་མོང་མ་ཡིན་པ་རྣམས་ཊཱི་ཀར་འབྱུང་ཞིང་། ཐུན་མོང་བ་རྣམས་ནག་པོའི་དཀྱིལ་འཁོར་གྱི་ཆོ་གར་ཁ་འཕངས་པར་མཛད་དོ། །དེ་ལ་ནག་པོའི་དཀྱིལ་འཁོར་གྱི་ཆོ་ག་ནི་གྲུབ་ཆེན་དཔལ་འཛིན་གྱིས་མཛད་པའི་དགྲ་ནག་གི་དཀྱིལ་ཆོག་འདི་ཡིན་ལ། འདི་དང་དེས་མཛད་པའི་གཤེད་དམར་གྱི་དཀྱིལ་ཆོག་གཉིས་དཀྱིལ་འཁོར་སོ་སོའི་ཁྱད་ཆོས་དང་། འགྱུར་ཅུང་ཟད་ཙམ་མ་གཏོགས་པ་ཆོ་གའི་འགྲོས་ཁྱད་པར་མི་སྣང་ལ། བླ་མའི་ཕྱག་ལེན་ཡང་རྗེས་མཛད་པའི་གཤེད་དམར་ལྷ་ལྔའི་དཀྱིལ་མཆོག་འདི་ཉིད་ཀྱི་སྟེང་ནས་འདོར་ལེན་མཛད་པས་འདིར་ཡང་དེ་བཞིན་དུ་བྲིས་སོ། །དེ་ལ་སྔོན་དུ་བསྙེན་པ་ནི་ཊཱི་ཀར། དེ་ཡང་མ་ཧེའི་གདོང་ཅན་གྱི་རྣལ་འབྱོར་གྱིས་ཞེས་པའི་བར་གྱིས་བསྙེན་པ་བསྟན་ཏེ། འོག་གི་སྒྲུབ་པའི་ཐབས་ལྟར་ལྷ་བསྐྱེད་ནས། ཧྲཱིཿཥྚཱིཿའབུམ་དུ་བསྐྱལ། ཐུན་མཚམས་སུ་ཡི་གེ་སོ་གཉིས་པ་དང་། ཡི་གེ་བདུན་པ་ཡང་སྟོང་སྟོང་ཙམ་བཟླའོ་ཞེས་གསུངས་ལ། སའི་ཆོ་ག་དང་། ལྷ་སྟ་གོན་ལ་ཊཱི་ཀར་དེ་ནས་དཀྱིལ་འཁོར་གྱི་ལས་ལ་འཇུག་པའི་དུས་སུ། སའི་ཆོ་ག་དང་། སྟ་གོན་གྱི་སྐབས་སུ། ཕྱོགས་མཚམས་བརྒྱད་དབུས་དང་དགུར། ཞལ་གྱི་གྲངས་དང་མཐུན་པར་ཡ་མ་རཱ་ཛ་བརྗོད་ཅིང་། ཐིག་ལེ་དང་མེ་ཏོག་གི་ཚོམ་བུ་དགུ་བཀོད། མཆོད་བསྟོད་སྙན་གསན་དབབ་པ་སོགས་འདྲ་ཞེས་པ་ཙམ་ལས་མ་གསུངས་ཀྱང་། གཞན་རྣམས་དཀྱིལ་ཆོག་བཞིན་དུ་བྱ་དགོས་པ་ལས། ས་ཆོག་གི་སྐབས་སུ་བདག་བསྐྱེད་ཀྱི་དཀྱིལ་འཁོར་ནམ་མཁར་བཏེག་ནས། ལྷ་སྟ་གོན་གྱི་སྐབས་སུ་ཕབ་ནས་གསལ་གདབ་པ་ནི་འདི་ལ་མི་རུང་སྟེ། བདག་བསྐྱེད་ཀྱི་སྐབས་སུ་ཕྱག་མཚན་དང་རོ་ལངས་བརྒྱད་བསྒོམ་པ་མེད་པའི་ཕྱིར་རོ། །འོ་ན་བསྡུ་བའི་ལུགས་མེད་དོ་སྙམ་ན། ནཱ་རོ་པའི་མན་ངག་ལས་འབྱུང་སྟེ། བདེ་མཆོག་བཞིན་ནོ། །སའི་ལྷ་མོ་སྟ་གོན་ཊཱི་ཀར་མ་གསུངས་ཀྱང་ཐུན་མོང་བ་ཡིན་པ་ལ་དགོངས་ལ། ལྷ་སྟ་གོན་གྱི་སྐབས་སུ་རྟེན་ཐོག་མར་བསྐྱེད་ནས། བརྟེན་པ་ལྷ་སྙིང་པོ་ཚིག་ཙམ་གྱིས་བསྐྱེད་པ་ནི་འདིའི་ལུགས་མ་ཡིན་ཏེ། བདག་བསྐྱེད་དང་འོག་དངོས་གཞིའི་སྐབས་གཉིས་ཆར་དུ་རྟེན་བརྟེན་པ་ཅིག་ཆར་དུ་བསྐྱེད་པ་དེ་བཞིན་དུ་བྱ་དགོས་པའི་ཕྱིར་ཏེ། ནཱ་རོ་པའི་ལུགས་ཀྱི་བདེ་མཆོག་ལོ་ཧི་པའི་ཕྱི་རོལ་མཆོད་པའི་ཆོ་གའི་སྐབས་བཞིན་ནོ། །མཆོད་པ་ལ་གྲངས་ཀ་གསལ་བར་མ་གསུངས་ཀྱང་བདག་བསྐྱེད་ཀྱི་སྐབས་ཀྱི་མཆོད་པའི་གྲངས་རྣམས་དང་། གོས་ཟུང་གི་མཆོད་པ་ནི་ངེས་པར་དགོས་ལ། ཉེར་སྤྱོད་ཀྱི་ཚིགས་བཅད་གསལ་ཁ་མེད་པ་རྣམས་ལ་དྲི་མེད་ཡིད་འོང་སྦྱར་བ་ནི་བླ་མ་གོང་མའི་ཕྱག་ལེན་དུ་སྣང་སྟེ། ཀྱེ་རྡོར་མན་ངག་ལུགས་བཞིན་ནོ། །འདིར་ནི་ནག་པོ་དཀྱིལ་ཆོག་གི་རབ་གནས་ཀྱི་སྐབས་བཞིན་སྦྱར་ན་ཡང་རུང་ངོ་། །བུམ་པ་དབུལ་བ་ནི་འོག་དངོས་གཞིའི་སྐབས་སུ་འབྱུང་བ་ཡིན་གྱིས་འདིར་ནི་མི་དགོས་སོ། །སྙན་གསན་དབབ་པའི་རྗེས་སུ་དཀྱིལ་འཁོར་ནམ་མཁར་འདེགས་པ་ནི་དཀྱིལ་ཆོག་གཉིས་ལས་འབྱུང་བས། དེ་ལྟར་བྱེད་ན་དཀྱིལ་འཁོར་མ་བཏེག་པའི་སྔོན་དུ་གཏོར་མ་རྣམས་བསྔོས་ནས། དེའི་རྗེས་སུ་དཀྱིལ་འཁོར་འདེགས་དགོས་སོ། །ཡང་ན་ཕྱག་ལེན་སྤྱི་དང་མཐུན་པར་བུམ་པ་སྟ་གོན་གྱི་རྗེས་སུ་གཏོར་མ་བསྔོས་ནས་སློབ་མ་སྟ་གོན་གྱི་རྗེས་སུ་དཀྱིལ་འཁོར་འདེགས་པར་བྱའོ། །བུམ་པ་སྟ་གོན་གྱི་སྐབས་སུ་ཊཱི་ཀར་བུམ་པ་ལྷག་གནས་ལ་བུམ་པ་གཉིས་བཅས་ཏེ། གཉིས་ཀ་ལ་མཚན་མ་རྡོ་རྗེ་རེ་རེ་བྲིས་ཏེ་སྨན་ལ་སོགས་པ་འདྲ། བུམ་པ་གཉིས་ཀར་ལྷ་བསྐྱེད་པ་ཉི་མའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་དེ་ལས་ཞི་བའི་འཇམ་དཔལ། དེ་ལས་ཁྲོ་བོར་བསྐྱེད་དེ། དེ་དག་ལ་དམིགས་ལ། རྣམ་རྒྱལ་ལ་སྔགས་གསུམ་ཆར་བརྒྱ་རྩ་བརྒྱད་ལ་སོགས་པ་བཟླས། ལས་ཐམས་ཅད་པ་ལ་སྙིང་པོ་དེ་ལྟར་བཟླས་ཞེས་གསུངས་སོ། །ཡན་ལག་བཞི་རྫོགས་གསལ་བར་མི་སྣང་ཡང་། བདག་མདུན་གཞན་གྱི་རིགས་པས་ངེས་པར་དགོས་སོ། །སློབ་མ་སྟ་གོན་གྱི་སྐབས་སུ་ཊཱི་ཀར་སློབ་མ་ལྷག་གནས་གཞན་དང་འདྲའོ་ཞེས་གསུངས་ལ། འདིར་མཁས་པ་དག འཇིགས་བྱེད་ལ་ཡུམ་མེད་པས། ནང་དབང་བསྐུར་བ་མེད་ཅེས་གསུངས་ཀྱང་བླ་མ་རིགས་བདག་ཡབ་ཡུམ་དུ་བསྒོམས་ནས་ནང་དབང་བསྐུར་བ་རུང་ཞེས་བླ་མ་གསུང་ངོ་། །སློབ་མ་ལ་མཆོད་པའི་ཉེར་སྤྱོད་ལ། དཀྱིལ་ཆོག་འདི་གཉིས་ཀྱི་ལུགས་ལྟར་ཞལ་ཟས་མེད་པ་དང་། ཀྱཻ་རྡོར་ལུགས་གཉིས་དང་། གསང་འདུས་ལྟར་ཞལ་ཟས་ཡོད་པ། སངས་རྒྱས་ཐོད་པའི་དཀྱིལ་ཆོག་ལྟར་དེའི་སྟེང་དུ་རོལ་མོ་ཡང་དབུལ་བ་དང་གསུམ་ཡོད་དོ། །ཐིག་ཆོག་གི་སྐབས་སུ་ཊཱི་ཀར་ཐིག་ཆོག་དང་ཚོན་ཆོག་བྱ་ལུགས་མི་འདྲ་བ་ནི་དཀྱིལ་འཁོར་ཇི་ལྟ་བུ་བྲི་ཞིང་། མཚན་མ་དགོད་པ་མི་འདྲའོ། །ཞེས་པ་ཙམ་ལས་མ་གསུངས་ལ། ཡེ་ཐིག་གི་རྗེས་སུ་ལས་ཐིག་བཏབ་པ་ནི་དཀྱིལ་ཆོག་ལས་འབྱུང་བ་དེ་བཞིན་བྱེད་པའམ། ཕྱག་ལེན་ལ་ས་ཆོག་གི་རྗེས་སུ་ལས་ཐིག་བཏབ་ནས་སྟ་གོན་ལ་འཇུག་པར་མཛད་པས་དེ་བཞིན་ཡང་རུང་ངོ་། །ཐིག་ཆོག་གི་སྔོན་དུ་སྔོན་འགྲོ་གཏོར་མ་ནས་བརྩམས་ཏེ་བདག་བསྐྱེད་བཟླས་པ་དང་བཅས་པའི་བར་བྱ་བར་གསུངས་པ་ནི་ཐིག་ཚོན་གྱི་ཆོ་ག་དངོས་གཞིར་གཏོགས་པའི་དབང་དུ་མཛད་པ་ཡིན་ལ། ཕྱག་ལེན་ལ་སློབ་མ་སྟ་གོན་གྱི་རྗེས་སུ་ཐིག་ཚོན་བྱིན་བརླབས་བྱས་ནས་དཀྱིལ་འཁོར་འབྲི་བ་ལ་འཇུག་པའི་ཚེ་མི་དགོས་སོ། །དེ་ལྟར་ན་རྒྱན་དགྲམ་པའི་རྗེས་སུ་སྔོན་འགྲོ་གཏོར་མ་ནས་བརྩམས་ཏེ་བདག་བསྐྱེད་བཟླས་པ་དང་བཅས་པ་བྱས་ནས་དཀྱིལ་འཁོར་སྦྱང་བ་ལ་འཇུག་སྟེ། ཊཱི་ཀར་འབྱུང་ངོ་། །འདིའི་དཀྱིལ་འཁོར་གྱི་ཤར་འཇིག་རྟེན་པའི་ལྷོ་ཕྱོགས་སུ་འབྱུང་ཡང་ཡེ་ཐིག་གི་བསྐོར་ཕྱོགས་ནི་འཇིག་རྟེན་པའི་ཕྱོགས་མཚམས་ཀྱི་དབང་དུ་བྱ་དགོས་ཏེ་བདེ་མཆོག་བཞིན་ནོ། །ཐིག་ཚོན་གྱི་རིགས་ལྔ་ནི་རིག་པའི་དབང་ལྔའི་སྐབས་བཞིན་དུ་ཤེས་པར་བྱའོ། །དངོས་གཞིའི་སྐབས་སུ་ཊཱི་ཀར་མཆོད་པའི་ཡོ་བྱད་དང་ཚོགས་ལ་སོགས་པ་བཤམས་ཏེ། དེ་ནས་དཀྱིལ་འཁོར་བྱིན་གྱིས་བརླབ་པ་ནི་བདག་ཉིད་ལྷར་བསྐྱེད་དེ། བྱ་བ་རྫོགས་པར་བྱས་ལ། རྡུལ་ཚོན་སྦྱང་བ་ནི་ལྷོ་ཕྱོགས་ཀྱི་སྒོ་ནས་མེ་ལོང་གི་ངོས་ལ་དཀྱིལ་འཁོར་གྱི་གཟུགས་བརྙན་འཆར་བར་བྱས་ལ། དང་པོར་གཏོར་མ། དེ་ནས་ཏིང་ལོ་དང་ཆང་བུས་སྦྱང་ངོ་། །གུ་གུལ་གྱིས་བདུག ཉུངས་ཀར་བརྡེག འདི་དག་ནི་ཧྲཱིཿཥྚཱིཿབཟླས་ཤིང་ཏིལ་བསྲེག དེ་ནས་ལས་ཐམས་ཅད་པའི་ཆུས་བཀྲུས་ཏེ་སྦྱང་བའོ། །དེ་ནས་ཐ་མལ་པའི་ཚོན་མི་དམིགས་པར་བྱས་ལ། རྟོག་པ་བཞི་པའི་སྒྲུབ་ཐབས་ལྟར། སྟོང་པ་ནས་དམ་ཚིག་སེམས་དཔའི་བར་དུ་བསྐྱེད། ཡེ་ཤེས་པ་གཞུག རིགས་བདག་གིས་མཚོན་པའི་བར་དུ་བྱས་ལ། དཀྱིལ་འཁོར་བྱིན་གྱིས་བརླབ་པ་ནི་ཞལ་རེ་རེ་ཞིང་ཡི་གེ་བདུན་པ་བརྒྱ་རྩ་བརྒྱད་བཟླས། དེ་བཞིན་དུ་ཞལ་རེ་རེ་ཞིང་ཨཱ་ལི་ཀཱ་ལི་ཕྲག་རེ་བཟླ། དེ་བཞིན་དུ་ཞལ་རེ་རེ་ཞིང་ཡི་གེ་བརྒྱ་པ་རེ་རེ་བཟླས། དེ་ནས་ཕྱི་ནང་གི་མཆོད་པས་མཆོད་ཅེས་གསུངས་སོ། །དེ་ལ་ལྷོ་ཕྱོགས་ཀྱི་སྒོ་ནས་ཞེས་པ་ནི་འཇིག་རྟེན་པའི་དབང་དུ་བྱས་པའོ། །རྟེན་བརྟེན་པ་གཅིག་ཆར་དུ་བསྐྱེད་པ་ནི་དངོས་སུ་འབྱུང་ཞིང་། ཡེ་ཤེས་པ་གཞུག་པ་ནི་སྟ་གོན་གྱི་ལྷ་གཞུག་པ་ཡིན་གྱིས། ཡན་ལག་བཞི་རྫོགས་སུ་བྱས་པའི་རྗེས་སུ་སྟ་གོན་གྱི་ལྷ་གཞུག་པ་ནི་མ་ཡིན་ཏེ། རིགས་བདག་གིས་རྒྱས་གདབ་པའི་རྗེས་ཁོ་ན་ལ་བྱིན་གྱིས་བརླབ་པ་གསུངས་པའི་ཕྱིར་རོ། །ཞལ་རེ་རེ་ཞིང་སྔགས་བཟླ་ཞེས་པའི་དོན་ནི། རྗེ་བཙུན་གྱིས་ལྷ་དགུའི་རང་བཞིན་ཉམས་དགུའི་ཞལ་ལྡན་ཞིང་ཞེས་གསུངས་པ་ལྟར། ལྷ་དགུ་ཡང་ཞལ་དགུའི་ངོ་བོ་ཡིན་པ་ལ་དགོངས་པ་ཡིན་གྱི། དམིགས་པ་ནི་ལྷ་དགུ་ལ་དམིགས་སོ། །ཕྱི་རོལ་པའི་གཏོར་མ་མཆོད་པ་དང་བཅས་པ་སྤྱི་དང་མཐུན་པར་བཤམས་ལ། གཏོར་མ་ལྟར་བྱིན་གྱིས་བརླབས་ནས་རང་སྐད་ཅིག་གིས་རྡོ་རྗེ་འཇིགས་བྱེད་དུ་གསལ་བའི་ཐུགས་ཁ་ནས་འོད་ཟེར་འཕྲོས། སྨྱོན་པ་འཇིགས་བྱེད་དུར་ཁྲོད་ཀྱི་བདག་པོ་རྣམས་དང་བཅས་པ་ཨཱ་ཀརྵ་ཡ་ཛཿ ཞེས་པས་སྤྱན་དྲངས་པ། ཨུཏྨནྟྲ་བྷཻ་ར་ཝ་ཨ་གྷྲ་ཊཋི་ཊཋི་ཞེས་དང་། སྭ་སྭ་ཏི་ཨ་དྷི་པ་ཏི་ཨ་གྷྲི་ཊཋི་ཊཋི། ཞེས་པས་བརྟན་པར་བཞུགས་སུ་གསོལ་ལ། དེ་རྣམས་ཀྱི་ལྗགས་ཀྱི་འོད་ཟེར་གྱིས་གཏོར་མ་གསོལ་བར་བསམས་ཏེ། འཇིག་རྟེན་པའི་གཏོར་མའི་སྔགས་གཉིས་པོ་ལན་གསུམ་བརྗོད་པས་དབུལ་ལོ། །ཕྱི་ནང་གི་མཆོད་པས་མཆོད། གཤིན་རྗེའི་གཤེད་ཀྱི་རྣམ་འཕྲུལ་ལས། །འཇིག་རྟེན་སྐྱོང་བའི་ཚུལ་འཛིན་པ། །བཀའ་སྡོད་སྨྱོན་པ་འཇིགས་བྱེད་དང་། །དུར་ཁྲོད་བདག་པོ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། །ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད། ཡི་གེ་བརྒྱ་པ་དང་། མ་འབྱོར་པ་དང་ཞེས་སོགས་ཀྱིས་ནོངས་པ་བཟོད་པར་གསོལ་ནས། ཧྲཱིཿབི་ཤུདྡྷཿསོགས་ཀྱིས་ཁ་བཤལ་ཆུ་བྱིན་ནས་གཏོར་མགྲོན་གཤེགས་སུ་གསོལ་བར་བྱའོ། །སློབ་མ་དབང་བསྐུར་གྱི་སྐབས་སུ་ཊཱི་ཀར། དེ་ནས་སློབ་མ་འཇུག་པའི་ཆོ་ག་རྣམས་འདྲ། རིག་པའི་དབང་ལྔའི་དུས་སུ་མིང་གི་དབང་ལྔར་མཚན་མ་གང་ལ་མེ་ཏོག་ཕོག་ཀྱང་རྡོ་རྗེའི་རིགས་སུ་མིང་གདགས། གཞན་རྡོ་རྗེ་སློབ་དཔོན་གྱི་དབང་དང་རྗེས་སུ་གནང་བ་དང་། བརྟུལ་ཞུགས་དང་། ལུང་བསྟན་དང་། དབུགས་དབྱུང་དང་། གཟེངས་བསྟོད་ཐམས་ཅད་ནག་པོའི་དཀྱིལ་ཆོག་ཏུ་ཤེས་པར་བྱའོ་ཞེས་གསུངས་ལ། རིག་པའི་དབང་ལྔའི་ལྷ་ནི་རིགས་བདག་ཁ་དོག་དང་ཕྱག་མཚན་སོ་སོར་བྱས་པ་ཞལ་གཅིག་ཕྱག་གཉིས་པ་བསྐྱེད་པས་རུང་ཞེས་བླ་མ་གསུང་ཞིང་ཕྱག་ལེན་ལ་ཡང་མཛད་པར་སྣང་ངོ་། །ཊཱི་ཀར། སྦྱིན་སྲེག་གི་སྐབས་སུ་རྡོ་རྗེ་འཇིགས་བྱེད་རིགས་ལྔ་གསུངས་པ་ནི། རྩ་ཞལ་གྱི་ཁ་དོག་འགྱུར་བ་མ་གཏོགས་པ་གཞན་ཞལ་ཕྱག་ཡོངས་སུ་རྫོགས་པ་བསྐྱེད་པར་གསུངས་པས་དེ་གཉིས་གང་ཡང་རུང་བ་ཞིག་བྱའོ། །སྔར་མཚན་མ་གང་ལ་མེ་ཏོག་ཕོག་ཀྱང་རྡོ་རྗེའི་རིགས་སུ་མིང་གདགས་པ་ནི་ལྷ་དགུ་ཆར་མི་བསྐྱོད་པའི་རིགས་ཡིན་པའི་དབང་དུ་བྱས་སོ། །དེ་ན་རིགས་ལྔར་ཕྱེ་བ་ཡང་རྩ་གཞལ་གྱི་ཁ་དོག་འགྱུར་བ་མ་གཏོགས་པ། སྐུ་མདོག་སྔོན་པོར་བསྒོམ་པར་འདྲ་བས་མི་བསྐྱོད་པའི་རིགས་ལ་རིགས་ལྔར་ཕྱེ་བའི་གནད་དུ་སྣང་སྟེ། ལུགས་བཟང་རྨད་དུ་བྱུང་བའོ།། །།བཅོམ་ལྡན་ཁྲོ་བོའི་རྒྱལ་པོའི་དཀྱིལ་འཁོར་གྱི། །ཆོ་ག་ལུང་རིགས་གཉིས་ཀྱིས་ངེས་པའི་ཚུལ། །ཇི་བཞིན་བཤད་པའི་དགེ་ཚོགས་འགྲོ་བ་ཀུན། །འཇམ་དབྱངས་ཡེ་ཤེས་ཐོབ་པའི་ཕྱིར་བསྔོའོ། །དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་འདི་ནི། དོན་དུ་གཉེར་བ་དུ་མས་ཡང་ཡང་བསྐུལ་ཞིང་། བླ་མ་འོད་ཟེར་བཟང་པོས་འཕྲལ་དུ་བསྐུལ་ཏེ་ཡི་གེའི་རྐྱེན་སྦྱར་བ་ལ་བརྟེན་ནས། རྗེ་བཙུན་དཀོན་མཆོག་རྒྱལ་མཚན་དཔལ་བཟང་པོའི་གསུང་ལས་སྐྱེས་པ་ཤཱཀྱའི་དགེ་སློང་བསོད་ནམས་སེང་གེས་ལྕགས་ཕོ་སྟག་གི་ལོ་ཆོ་འཕྲུལ་ཆེན་པོའི་ཟླ་བ་ལ་རྟ་ནག་གསེར་གླིང་གི་དགོན་པར་སྦྱར་བའོ།། །།དགེའོ།། །།མངྒ་ལཾ།། །།

བདེ་མཆོག་ཆོས་འབྱུང་བརྒྱུད་པའི་རྣམ་ཐར་དང་བཅས་པ།

བདེ་མཆོག་ཆོས་འབྱུང་བརྒྱུད་པའི་རྣམ་ཐར་དང་བཅས་པ་བཞུགས་སོ།། སྤྲོས་བྲལ་ལྷུན་གྲུབ་ངང་ལས་མ་གཡོས་ཀྱང་། །མཁའ་ཁྱབ་སྒྱུ་མའི་གར་གྱི་སྤྲོས་པ་ཡིས། །འགྲོ་རྣམས་འདུལ་བ་དུས་ལས་མི་འདའ་བའི། །ཧེ་རུ་ཀ་དཔལ་བླ་མ་མཆོག་ལ་འདུད། །གང་གི་མཁྱེན་པའི་ཆུ་འཛིན་ལས་བྱུང་བའི། །ལེགས་གསུང་ཆར་གྱིས་བདག་བློ་ཚིམ་པ་ལས། །བདེ་མཆོག་འཁོར་ལོའི་དམ་ཆོས་བྱུང་བའི་ཚུལ། །བརྒྱུད་པའི་རྣམ་ཐར་དང་བཅས་བྲི་བར་བྱ། །འདིར་འཁོར་ལོ་བདེ་མཆོག་གི་དམ་པའི་ཆོས་བྱུང་བའི་ལོ་རྒྱུས་བརྒྱུད་པའི་རྣམ་ཐར་དང་བཅས་པ་ལ་དོན་དྲུག་སྟེ། སྤྱིར་རྒྱུད་སྡེ་སྒོ་དྲུག་ཏུ་དབྱེ་བ། སྒོ་དྲུག་པ་དེའི་རྩ་བཤད་ཀྱི་བཞུགས་ཚུལ། སྒོ་དྲུག་པར་འཇོག་པའི་འཐད་པ། དེ་ལ་རྒྱ་བོད་དུ་སྲོལ་ཇི་ལྟར་བྱུང་བའི་ཚུལ། དེ་ལས་ཁྱད་པར་དུ་འཕགས་པའི་ལུགས་ངོས་བཟུང་བ། དེ་ཉིད་ཀྱི་བླ་མ་བརྒྱུད་པའི་རྣམ་ཐར་བཤད་པའོ། །དང་པོ་ནི་རྗེ་བཙུན་བིརྺ་པ་ཡབ་སྲས་ཀྱིས་རྡོ་རྗེ་གུར་གྱི་རྒྱུད་ལ་བརྟེན་ནས་རྒྱུད་སྡེ་བཞིར་མཛད་པ་དང་། རྗེ་འགོས་ཀྱིས་ཡེ་ཤེས་རྡོ་རྗེ་ཀུན་ལས་བཏུས་ཀྱི་རྒྱུད་ལ་བརྟེན་ནས་གསང་བ་འདུས་པའི་སྐབས་སུ་རྒྱུད་སྡེ་ལྔར་མཛད་པ་ནི། རང་རང་གི་རྒྱུད་ལ་བརྟེན་ནས་སྐབས་དེར་རྒྱུད་སྡེའི་རྣམ་གཞག་མཛད་པ་ཡིན་པས་ཤིན་ཏུ་ལེགས་པ་ཡིན་ལ། དེ་བཞིན་དུ་འདིར་ཡང་རྩ་རྒྱུད་ལེའུ་ལྔ་བཅུ་རྩ་གཅིག་པ་ནས། ཇི་སྲིད་མདོ་བྱ་སྤྱོད་པ་ནི། །རྣལ་འབྱོར་གསང་བའི་དབྱེ་བ་ཡིས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། །ཞེས་གསུངས་པ་ལ་བརྟེན་ནས་མདོ་སྡེ་རྟོག་པའི་རྒྱུད། བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད། གསང་བའི་རྒྱུད། རྣལ་འབྱོར་གསང་མཐའི་རྒྱུད་དེ་རྒྱུད་སྡེ་སྒོ་དྲུག་ཏུ་མཛད་དོ། །དེ་ཡང་རྩ་བའི་རྒྱུད་ལས། དགོད་དང་ལྟ་བ་ལག་བཅངས་དང་། །གཉིས་གཉིས་འཁྱུད་ལ་སོགས་པའི་བདག །རྒྱུད་རྣམས་ཀུན་ཏུ་མ་གསུངས་ཏེ། །དེ་ཉིད་བསྡུས་པ་འཁོར་སྡོམ་མམ། །གསང་བའམ་རྡོ་རྗེ་འཇིགས་བྱེད་ལས། །དཀྱིལ་འཁོར་རྣམས་ཀྱི་མཆོག་འདི་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས་པས་བསྟན་ཏེ། དགོད་པ་དག་པ་བྱ་རྒྱུད། ལྟ་བ་དག་པ་སྤྱོད་རྒྱུད། ལག་བཅངས་དག་པ་རྣལ་འབྱོར་གྱི་རྒྱུད། གཉིས་གཉིས་འཁྱུད་པ་དག་པ་བླ་མེད་གཞན་ལས་ཀྱང་མ་གསུངས་པའི་དོན་གཅིག་འདིར་བསྟན་པ་གསང་བའི་མཐའ་ཞེས་བླ་མེད་སྤྱི་ལས་ཟབ་པར་གྲུབ་ལ། དེ་ཡང་རྣལ་འབྱོར་རྒྱུད་ཀྱི་མཚན་གཞི་དེ་ཉིད་བསྡུས་པ་དང་། མ་རྒྱུད་ཀྱི་མཚན་གཞི་འཁོར་ལོ་སྡོམ་པ་ནི་སངས་རྒྱས་མཉམ་སྦྱོར་སོགས་ཡིན་ལ། ཕ་རྒྱུད་ཀྱི་མཚན་གཞི་གསང་བ་འདུས་པ་དང་། རྡོ་རྗེ་འཇིགས་བྱེད་ལས་ཀྱང་མ་གསུངས་ཞེས་པའོ། །དེ་ལ་དང་པོ་རྟོག་པའི་རྒྱུད་ནི་བྱ་རྒྱུད་ཀྱི་ནང་ཚན་ལས་ཚོགས་གཙོ་བོར་སྟོན་པ་རྣམས་སོ། །བྱ་བའི་རྒྱུད་ནི་བདག་ཉིད་ཐ་མལ་དུ་གནས་ནས་མདུན་དུ་རས་བྲིས་ལ་ཡེ་ཤེས་པ་སྤྱན་དྲངས་པ་ལ། དཀའ་ཐུབ་དང་གཙང་སྦྲ་སོགས་ཀྱི་སྒོ་ནས་དངོས་གྲུབ་སྒྲུབ་པ་སྟེ་ལེགས་གྲུབ་དང་དཔུང་བཟང་ལ་སོགས་པའོ། །སྤྱོད་པའི་རྒྱུད་ནི་བདག་ཉིད་ཀྱང་ལྷར་བསྐྱེད། མདུན་དུ་ཡེ་ཤེས་པ་སྤྱན་དྲངས་ཏེ་བདག་ལ་མི་བསྟིམ་པར་གྲོགས་པོ་ལྟ་བུའི་སྒོ་ནས་དངོས་གྲུབ་བསྒྲུབ་པ་སྟེ་རྣམ་སྣང་མངོན་བྱང་ལ་སོགས་པའོ། །རྣལ་འབྱོར་གྱི་རྒྱུད་ནི་བདག་ཉིད་ཀྱང་ལྷར་བསྐྱེད་དེ་ལ་ཡེ་ཤེས་ཀྱི་འཁོར་ལོ་དགུག་གཞུག་བྱས་ནས་ཕྱག་རྒྱ་བཞིས་རྒྱས་བཏབ་སྟེ་ཆོ་ག་ཚར་ནས་ཡེ་ཤེས་པ་གཤེགས། དམ་ཚིག་པ་རྐྱང་པའི་ང་རྒྱལ་དུ་གནས་པའི་སྒོ་ནས་དངོས་གྲུབ་བསྒྲུབ་པ་སྟེ་དེ་ཉིད་བསྡུས་པ་ལ་སོགས་པའོ། །རྣལ་འབྱོར་གསང་བའི་རྒྱུད་ལ་རྣལ་འབྱོར་ཆེན་པོ་ཕའི་རྒྱུད་དང་། མའི་རྒྱུད་གཉིས་ལས། འདི་གཉིས་ཀྱི་ཁྱད་པར་ལ་རྗེ་འགོས་ཀྱིས་ཕ་རྒྱུད་གསང་བ་འདུས་པ་སོགས་ནི་ཟབ་པ་དང་རྒྱ་ཆེ་བ་གཉིས་ཀ་སྟོན་པས་བརྗོད་བྱ་རྒྱ་ཆེ་བ་ཡིན་ལ། མ་རྒྱུད་ལས་ནི་ཕོ་ཉའི་ལམ་ལ་བརྟེན་ནས་དབང་གིས་མཚོན་པའི་ཡེ་ཤེས་སྐྱོང་བ་ཙམ་ཡིན་པས་འདི་ལ་ལྟོས་ནས་བརྗོད་བྱ་རྒྱ་ཆུང་སྟེ། དེ་ཙམ་ནི་སེམས་དབེན་གྱི་ཁོངས་སུ་འདུ་བའི་ཕྱིར་ཞེས་གསུངས་སོ། །འོ་ན་ལས་རྒྱ་ལ་བརྟེན་པའི་ལམ་ཐམས་ཅད་ཀྱིས་སེམས་དབེན་གྱི་རྟོགས་པ་ལས་ལྷག་པ་མི་སྐྱེད་པ་ཡིན་ནམ། དེ་ལས་ལྷག་པ་སྐྱེད་པ་ཡང་ཡོད། དང་པོ་ལྟར་ན་འོད་གསལ་གྱི་སྐབས་སུ་ཡང་ལས་རྒྱ་ལ་བརྟེན་ནས་དེ་ལས་ལྷག་པའི་རྟོགས་པ་མི་སྐྱེད་པར་འགྱུར་ཞིང་ཕྱི་མ་ལྟར་ན་ཕོ་ཉའི་ལམ་གྱིས་ཀྱང་དེ་ལས་ལྷག་པའི་རྟོགས་པ་བསྐྱེད་པར་གྲུབ་སྟེ། དེའི་སྔོན་དུ་རླུང་དང་གཏུམ་མོའི་རྣལ་འབྱོར་ཁྱད་པར་ཅན་རྣམས་སོང་བའི་ཕྱིར་རོ། །དེས་ན་འདི་གཉིས་ཀྱི་ཁྱད་པར་ལ་བླ་མ་གོང་མས་རྗོད་བྱེད་ཚིག་གི་ཁྱད་པར་དང་། བརྗོད་བྱ་དོན་གྱི་ཁྱད་པར་སོགས་མང་དུ་གསུངས་པ་ནི་ཕྱོགས་རེ་ལ་དགོངས་ཏེ་འགལ་བ་ཡང་མེད་ལ་ཁྱད་པར་དངོས་ནི་རིམ་གཉིས་ཀྱི་ནང་ནས་བསྐྱེད་རིམ་དངོས་བསྟན་གྱི་བརྗོད་བྱའི་གཙོ་བོར་སྟོན་པ་དང་། རྫོགས་རིམ་དངོས་བསྟན་གྱི་བརྗོད་བྱའི་གཙོ་བོར་སྟོན་པ་ནག་པོ་སྤྱོད་པས་གསུངས་སོ། །དེ་ལ་ཕ་རྒྱུད་ལ། འདོད་ཆགས་ཞེ་སྡང་གཏི་མུག་གིས། །རྒྱུད་ཀྱང་རྣམ་པ་གསུམ་དུ་འགྱུར། །ཞེས་པ་ལྟར། འདོད་ཆགས་ལམ་དུ་བྱེད་པ་གསང་བ་འདུས་པའི་སྐོར། ཞེ་སྡང་ལམ་དུ་བྱེད་པ་གཤིན་རྗེ་གཤེད་ཀྱི་སྐོར། གཏི་མུག་ལམ་དུ་བྱེད་པ་རྣམ་སྣང་སྒྱུ་དྲྭའི་སྐོར་ཏེ་གསུམ་ཡོད་དོ། །མ་རྒྱུད་ལ་རྒྱུད་སྡེ་སྒོ་དྲུག་ལས་ཧེ་རུ་ཀའི་རིགས་ཀྱི་རྒྱུད་ནི་ཀྱེ་རྡོར་གྱི་རྒྱུད་རྣམས་དང་། སངས་རྒྱས་ཐོད་པ་དང་། མ་ཧཱ་མཱ་ཡཱ་ལ་སོགས་པ་རྣམས་ཡིན་ལ། རྒྱུད་སྡེ་བཞིར་འབྱེད་པའི་ཚེ་གསང་མཐའི་རྒྱུད་རྣམས་ཀྱང་འདིའི་ཁོངས་སུ་གཏོགས་སོ། །རྣམ་སྣང་གི་རིགས་ཀྱི་རྒྱུད་ནི་མི་གཡོ་བ་བླ་མེད་དང་། རྩ་རྒྱུད་རྡོ་རྗེ་གདན་བཞི་དང་། དེའི་བཤད་རྒྱུད་མནྟྲ་ཨོཾ་པ་སྟེ་ཐམས་ཅད་གསང་བའི་རྒྱུད་རྣམས་སོ། །རིན་འབྱུང་གི་རིགས་ཀྱི་རྒྱུད་ནི་རྡོ་རྗེ་བདུད་རྩིའི་རྒྱུད་དེ། འདི་ལ་ཕྲེང་བར། རྡོ་རྗེ་བདུད་རྩི་རྩ་བའི་དཀྱིལ་འཁོར་དངོས་སུ་བཤད་ཅིང་། རྡོ་རྗེ་བདུད་རྩི་འཁྱིལ་པ་རྡོ་རྗེ་བདུད་རྩི་ཁྲོ་བོ་སྟེ་གསུམ་དུ་རྒྱུད་ལས་གསུངས་སོ། །འོད་དཔག་མེད་ཀྱི་རིགས་ཀྱི་རྒྱུད་ནི་ཀུ་རུ་ཀུལླེའི་རྟོག་པ་དང་། རིགས་ཀྱི་འཇིག་རྟེན་མགོན་པོ་ལྔ་བཅུ་པ་རྣམས་སོ། །དོན་ཡོད་གྲུབ་པའི་རིགས་ཀྱི་རྒྱུད་ལ་མགོན་པོ་མངོན་འབྱུང་དང་། སྒྲོལ་མ་བླ་མེད་ཀྱི་རྒྱུད་དང་། ཕུར་པ་རྩ་དུམ་གསུམ་ལས། དང་པོ་ལ་པཎྜི་ཏ་ས་མནྟ་ཤྲཱིའི་སྒྲུབ་དཀྱིལ་དང་། དབང་བཀའ་རོང་པ་ལས་བརྒྱུད་ནས་ད་ལྟ་ཡང་ཡོད་ཅིང་གཉིས་པ་ལ་ཉི་མ་སྦས་པས་སྒྲོལ་མ་ལྷ་ཉི་ཤུ་རྩ་གཅིག་སོ་སོའི་སྒྲུབ་ཐབས། སྤྱིའི་སྒྲུབ་ཐབས། ཉི་ཤུ་རྩ་གཅིག་ལུས་ལ་བཀོད་པ་ལུས་དཀྱིལ་གྱི་སྒྲུབ་ཐབས། ལྷ་བཅུ་གསུམ་མའི་སྒྲུབ་ཐབས། སྦྱིན་སྲེག་གི་ཆོ་ག་རྣམས་ཡོད་དོ། །རྡོ་རྗེ་སེམས་དཔའ་རིགས་ཀྱི་རྒྱུད་ནི་ཇི་བཞིན་བརྙེས་པའི་ནམ་མཁའ་དང་མཉམ་པའི་རྒྱུད་ལ་སོགས་པའོ། །གསང་བའི་མཐའི་རྒྱུན་ནི་རྩ་རྒྱུད་ལེའུ་ལྔ་བཅུ་རྩ་གཅིག་པ་ལས་བཤད་རྒྱུད་རྣམ་པ་ལྔས་འཆད་པའི་ལུགས་ཏེ་འོག་ཏུ་འཆད་དོ། །གཉིས་པ་སྒོ་དྲུག་པ་དེའི་རྩ་བཤད་ཀྱི་བཞུགས་ཚུལ་ནི། སྤྱིར་བདེ་མཆོག་ལ་མ་རྒྱུད་སྤྱི་དང་མཐུན་པར་བཤད་པ། གསང་འདུས་འཕགས་ལུགས་དང་མཐུན་པར་བཤད་པ། དུས་འཁོར་དང་མཐུན་པར་བཤད་པ། གསང་མཐར་བཤད་པ་དང་བཞི་ལས། དང་པོ་ནི་བདེ་མཆོག་སངས་རྒྱས་མཉམ་སྦྱོར་དང་། ཇོ་བོ་རྗེ་ལ་སོགས་པ་སློབ་དཔོན་གཞན་གྱི་བཤད་སྲོལ་རྣམས་སོ། །གཉིས་པ་ནི་བདེ་མཆོག་སྡོམ་འབྱུང་སྟེ། གཙོ་བོ་ཞལ་གསུམ་ཕྱག་དྲུག་པ་དང་། བསྐྱེད་པའི་རིམ་པ་ཏིང་ངེ་འཛིན་གསུམ་གྱིས་འཆིང་བ་དང་། རྫོགས་རིམ་རིམ་པ་ལྔ་ལ་སོགས་པ་གསང་འདུས་འཕགས་ལུགས་དང་ཆ་འདྲ་བར་བཤད་དོ། །གསུམ་པ་ནི་བདེ་མཆོག་མཁའ་འགྲོ་རྒྱ་མཚོ་སྟེ། ས་དུམ་བུ་བཅུ་གཉིས་དང་བསྟུན་ནས་འཁོར་ལོ་བཅུ་གཉིས་སུ་བྱེད་པ་དང་། རྫོགས་རིམ་སྦྱོར་བ་ཡན་ལག་དྲུག་ལ་སོགས་པ་དུས་འཁོར་དང་ཆ་འདྲ་བར་བཤད་དོ། །བཞི་པ་ནི་རྩ་རྒྱུད་རྒྱས་པ་ནམ་མཁའ་དང་མཉམ་པ་འབུམ་ཕྲག་བདུན་པ་དང་། དེ་ལས་བསྡུས་པ་ལེའུ་ལྔ་བཅུ་རྩ་གཅིག་པ་ནི་འདི་ཡིན་ལ་བཤད་རྒྱུད་ནི་སློབ་དཔོན་སྐར་རྒྱལ་ཟླ་བའི་འགྲེལ་པར། འབྱུང་དང་མཁའ་འགྲོ་ཀུན་སྤྱོད་དང་། །ཁ་སྦྱོར་རྒྱུད་དང་བླ་མ་སྟེ། །བཤད་རྒྱུད་རྣམ་པ་ལྔར་འདོད་དོ། །ཞེས་གསུངས་པ་ལྟར་ཧེ་རུ་ཀ་མངོན་འབྱུང་། རྡོ་རྗེ་མཁའ་འགྲོ། རྣལ་འབྱོར་མ་ཀུན་སྤྱོད། སཾ་བུ་ཊིའི་རྒྱུད། ངེས་བརྗོད་བླ་མ་ཏེ་ལྔར་ངེས་སོ། །དེ་ལྟར་ངེས་པའི་རྒྱུ་མཚན་ཡང་འདིའི་ལུགས་ཀྱི་ཉམས་ལེན་གྱི་གཙོ་བོ་སྨིན་བྱེད་ཀྱི་དབང་དང་། གྲོལ་བྱེད་ཀྱི་ལམ་རིམ་པ་གཉིས་ལས། སྨིན་བྱེད་ཀྱི་དབང་ནི་རྩ་རྒྱུད་ལས་ཅུང་ཟད་བཤད་ཅིང་། གསང་མཐའ་བའི་ལུགས་ཀྱི་ཐུན་མོང་མ་ཡིན་པའི་དཀྱིལ་འཁོར་གྱི་ཆོ་ག་ནི་ཧེ་རུ་ཀ་མངོན་འབྱུང་གིས་སྟོན། གྲོལ་བྱེད་བསྐྱེད་པའི་རིམ་པ་ནི་རྩ་རྒྱུད་ལས། བ་གླང་ལྷས་ཀྱི་སྟེང་ལྡིང་དང་། །ལྷག་མ་སྐེམས་བྱེད་རྩ་གནས་སོ། །ཞེས་པ་འབྱུང་བ་ལུགས་བཟློག་གི་མངོན་རྟོགས་བསྟན། ཡང་ན་རུས་སྦལ་དག་གིས་སོ། །ཞེས་པས་འབྱུང་བ་ལུགས་འབྱུང་གི་མངོན་རྟོགས་བསྟན། འདི་གཉིས་ལ་མིང་གི་རྣམ་གྲངས། གཞན་ཡང་ཨ་བྷི་དྷ་ན་ལས་མངལ་སྐྱེས་ཀྱི་མངོན་པར་རྟོགས་པ་དང་། སྒོང་སྐྱེས་ཀྱི་མངོན་པར་རྟོགས་པ་ཞེས་གསུངས་ལ་དེ་གཉིས་ཀྱི་ཁྱད་པར་ཡང་། མངལ་སྐྱེས་གླུ་ཡི་སྦྱོར་བ་དང་། །སྒྲ་དང་སྒྲ་མིན་རྣམ་པར་བརྟག །སྒོང་སྐྱེས་གླུ་ནི་མེད་པ་དང་། །སྒྲ་དང་སྒྲ་མིན་སྤངས་པའོ། །ཞེས་གསུངས་སོ། །དེ་ལ་རྩ་རྒྱུད་དང་རྡོ་རྗེ་མཁའ་འགྲོ་རྩ་བཤད་དུ་སྦྲེལ་བ་ལ་བརྟེན་ནས་མངལ་སྐྱེས་ཀྱི་མངོན་པར་རྟོགས་པ་སྟོན། རྩ་རྒྱུད་དང་རྣལ་འབྱོར་མ་ཀུན་སྤྱོད་རྩ་བཤད་དུ་སྦྲེལ་བ་ལ་བརྟེན་ནས་སྒོང་སྐྱེས་ཀྱི་མངོན་པར་རྟོགས་པ་བསྟན་ནོ། །རྩ་བའི་རྒྱུད་དུ། བཅོམ་ལྡན་འདས་ཀྱི་མཚན་ཙམ་དང་འཁོར་གྱི་ལྷ་རྣམས་ཀྱི་མིང་ཙམ་ལས་ཞལ་ཕྱག་ལ་སོགས་པ་གསལ་བར་མ་གསུངས་པས་དེ་ཉིད་ཨ་བྷི་དྷ་ན་ནས་གསལ་བར་བསྟན། བསྐྱེད་རིམ་གྱི་ལམ་གྱི་ཡན་ལག་སྔགས་ཀྱི་བཟླས་པ་དང་། གྲོགས་དམ་ཚིག་དང་སྡོམ་པ་སྐྱོང་བ་དང་། རིགས་ལྡན་མ་མཆོད་པ་དང་། སྦྱིན་སྲེག་གི་ཆོ་ག་དང་། ལས་ཚོགས་རབ་འབྱམས་རྣམས་ནི་རྩ་བའི་རྒྱུད་ཉིད་དུ་བསྟན། བསྐྱེད་རིམ་མངལ་སྒོང་གཉིས་ཆར་གྱི་ལུས་དཀྱིལ་རྣམས་དང་། རྫོགས་པའི་རིམ་པ་ཕྱག་རྒྱ་བཞིའི་ནང་ནས་ཆོས་ཀྱི་ཕྱག་རྒྱ་གཏུམ་མོ་འཁོར་ལོ་བཞིའི་རྣལ་འབྱོར་དེ་ཁ་སྦྱོར་གྱིས་བསྟན་ནོ། །ཕྱག་རྒྱ་བཞི་ལ་ལས་ཀྱི་ཕྱག་རྒྱ་རྡོ་རྗེ་རིགས་ཀྱི་གཡུང་མོ་ལ་སོགས་པ་ནི་རྩ་རྒྱུད་ལས་དངོས་སུ་བསྟན། དམ་རྒྱ་དང་པོར་ལས་རྒྱ་ལ་བརྟེན་ནས་སྐྱེས་པའི་བདེ་བ་ཕྱིས་རང་འོད་ཀྱི་རིག་མ་ལ་བརྟེན་ནས་སྐྱོང་བར་བྱེད་པ་ནི་ཅུང་ཟད་ཙམ་བཤད། ཆོས་རྒྱ་རྩ་རྒྱུད་ལས་དངོས་སུ་མ་བསྟན་ཀྱང་དྲག་པོའི་སྦྱིན་སྲེག་དང་ཆོས་འབྱུང་གི་ནཾང་དུ་ཨཱ་ལི་ཀཱ་ལི་བཀོད་པ་ལས་སྔགས་བཏུ་བ་དེ་ཉིད་སཾ་བུ་ཊིར་ངེས་དོན་དུ་བཤད་པས་བསྟན། ཕྱག་རྒྱ་ཆེན་པོ་ནི་དེ་ལ་བརྟེན་ནས་མཚོན་བྱ་དོན་གྱི་ཡེ་ཤེས་སྐྱེས་པའོ། །བུ་སྟོན་རིན་པོ་ཆེས་འབྱུང་དང་ཞེས་པས་སྡོམ་འབྱུང་། ཧེ་རུ་ཀ་མངོན་འབྱུང་། ཕག་མོ་མངོན་འབྱུང་དང་གསུམ་ཟིན། མཁའ་འགྲོ་ཞེས་པས་རྡོ་རྗེ་མཁའ་འགྲོ་དང་མཁའ་འགྲོ་རྒྱ་མཚོ་གཉིས། ཁ་སྦྱོར་ཞེས་པས་སཾ་བུ་ཊི་དང་། རྣལ་འབྱོར་མ་བཞིའི་ཁ་སྦྱོར་གཉིས་ཟིན་པ་ཡིན་ཞེས་གསུང་ངོ་། །དེ་ནི་ལུང་དེ་ལ་ཚད་མར་བྱེད་ན་སློབ་དཔོན་དེས་གྲངས་ཀྱང་མ་ཤེས་པར་འགྱུར་ཏེ། བཤད་རྒྱུད་དགུ་ཡིན་པ་ལ་བཤད་རྒྱུད་རྣམ་པ་ལྔར་འདོད་དོ། །ཞེས་བཤད་པའི་ཕྱིར་རོ། །ཚད་མར་མི་བྱེད་ན་ཁྱེད་རང་གིས་རང་དགར་བཤད་རྒྱུད་དགུར་འབྱེད་པར་སོང་གི་ལུང་དེའི་ཚིག་འདིས་འདི་ཟིན་ཞེས་པ་ལ་དོན་མེད་དོ། །དེས་ན་གསང་མཐའི་བཤད་སྲོལ་འདི་ལ་སྡོམ་འབྱུང་སོགས་མི་དགོས་པས་ན་བཤད་རྒྱུད་རྣམ་པ་ལྔར་ངེས་སོ། །འོ་ན་སྡོམ་འབྱུང་སོགས་བཤད་རྒྱུད་དུ་གཏན་མི་འདོད་དམ་སྙམ་ན་སྤྱིར་བདེ་མཆོག་གི་བཤད་རྒྱུད་ཡིན་ཀྱང་རྣལ་འབྱོར་གསང་མཐའི་བཤད་སྲོལ་འདི་ལ་མི་དགོས་པ་ཡིན་ཏེ། དཔེར་ན་གྲུབ་ཆེན་ཀུན་སྙིང་གིས་གསང་འདུས་རྩ་རྒྱུད་དང་། རྣམ་སྣང་སྒྱུ་དྲྭ་རྩ་བཤད་དུ་སྦྲེལ་ནས་འཆད་པའི་ཚེ་དགོངས་པ་ལུང་སྟོན་སོགས་སྤྱིར་བཤད་རྒྱུད་དུ་ཁས་ལེན་ཀྱང་ལུགས་དེ་ལ་མི་དགོས་པ་བཞིན་དང་། འཕགས་པ་ཡབ་སྲས་ཀྱིས་གསང་འདུས་རྩ་རྒྱུད་དང་། དགོངས་པ་ལུང་སྟོན་སོགས་བཞི་རྩ་བཤད་དུ་སྦྲེལ་ནས་འཆད་པའི་ཚེ་རྒྱུད་ཕྱི་མ་དང་རྡོ་རྗེ་སྙིང་པོ་རྒྱན་གྱི་རྒྱུད་སོགས་སྤྱིར་བཤད་རྒྱུད་དུ་ཁས་ལེན་ཀྱང་ལུགས་དེ་ལ་མི་དགོས་པ་བཞིན་ནོ། །གསུམ་པ་དེ་ཉིད་སྒོ་དྲུག་པར་འཇོག་པའི་འཐད་པ་ནི། བླ་མ་ཕམ་ཐིང་པའི་བཞེད་པས་རྩ་རྒྱུད་རྒྱས་པ་ནམ་མཁའ་དང་མཉམ་པ། རྡོ་རྗེ་འཆང་ཆེན་པོས་འཁོར་ས་བཅུ་པའི་དཔའ་བོ་དང་རྣལ་འབྱོར་མ་གྲངས་མེད་པ་ལ་གསུངས་ནས་དེ་དག་གིས་ཉམས་ལེན་མཛད་དེ་མ་འོངས་པའི་སྙིགས་མ་ལྔ་ལྡན་གྱི་གང་ཟག་རྣམས་ཀྱི་ལམ་དུ་མི་འགྱུར་བ་ལ་དགོངས་ནས་དེ་རྣམས་ཀྱི་གཞུང་ཡི་གེར་བྲི་བར་མ་ནུས་པར་སྒྲ་ནམ་མཁའ་ལ་དེངས་པར་མཛད་དེ་རྒྱས་བཏབ་པས་སྒོ་དྲུག་པར་བཞེད། རྒྱ་གར་དྷ་རི་ཀ་པ་དང་། བལ་པོ་ཐུགས་རྗེ་ཆེན་པོའི་བཞེད་པས་རྩ་རྒྱུད་ནམ་མཁའ་དང་མཉམ་པ་ཨོ་ཌི་བི་ཤའི་གཙུག་ལག་ཁང་དུ་དཔའ་བོ་དང་རྣལ་འབྱོར་མ་རྣམས་ཀྱིས་བཻ་ཌཱུརྻའི་གླེགས་བམ་ལ་གསེར་ཞུན་མས་བྲིས་ཏེ་རྒྱས་བཏབ་ནས་བཞུགས་པས་སྒོ་དྲུག་པར་བཞེད་དོ། །དེ་དག་གི་དོན་ཡང་ས་བཅུ་པ་ལ་གནས་པའི་དཔའ་བོ་དང་རྣལ་འབྱོར་མ་རྣམས་ཀྱི་ཉམས་ལེན་ནི་རྒྱུད་སྡེ་འདི་ཁོ་ན་ཡིན་པས་རྒྱུད་སྡེ་གཞན་ལས་ཟབ་པའི་སྒྲུབ་བྱེད་དུ་འབྲེལ་ལོ། །ཡང་རྩོད་པའི་དུས་ཀྱི་ཐམས་ཅད་མཁྱེན་པ་གཉིས་པ་ཤཱནྟི་པས་ཀྱང་རྒྱུད་འདི་ལ་རང་སྟོབས་ཀྱིས་འགྲེལ་པ་རྩོམ་པར་མ་ནུས་པས་རྒྱུད་སྡེ་སྒོ་དྲུག་པར་བཞེད་ཅིང་། ཆོས་གཞན་རྣམས་ཀྱི་དབང་དུ་བྱས་ནས་སྤྲུལ་པའི་སྐུ་མྱ་ངན་ལས་འདས་ནས་མི་བཞུགས་པར་བཞེད་ལ། རྒྱུད་འདིའི་སྟོན་པ་སྤྲུལ་པའི་སྐུ་ཡེ་ཤེས་ཀྱི་དཔའ་བོ་དང་རྣལ་འབྱོར་མ་རྣམས་འཛམ་བུའི་གླིང་གི་ཡུལ་ཉི་ཤུ་རྩ་བཞི་ན་དངོས་སུ་བཞུགས་ཤིང་དེ་རྣམས་ཀྱིས་སྒྲུབ་པ་པོའི་རྒྱུད་བྱིན་གྱིས་རློབ་པར་བྱེད་པས་བྱིན་རླབས་མྱུར་ཞིང་དངོས་གྲུབ་ཉེ་བས་སྒོ་དྲུག་པར་བཞེད་དོ། །གལ་ཏེ་སྤྲུལ་པའི་སྐུ་དེ་རྣམས་སྒྱུ་མ་བདེ་མཆོག་ལ་སོགས་པ་བདེ་མཆོག་གཞན་རྣམས་ཀྱིས་ཀྱང་སྟོན་པ་ཡིན་པས་འདིའི་ཁྱད་ཆོས་སུ་མི་འགྲོའོ་སྙམ་ན་སྟོན་པ་ཡིན་པར་འདྲ་ཡང་བྱིན་རླབས་ཟབ་མོ་འཇུག་པའི་ཐབས་འདི་ཁོ་ན་ལ་ཡོད་པས་ཁྱད་པར་འཕགས་ཏེ། ཐབས་ཟབ་མོ་བསྐྱེད་རིམ་གྱི་སྐབས་སུ་ཕོ་ཉ་གསུམ་བསྲེས་དང་། རྫོགས་རིམ་གྱི་སྐབས་སུ་དཔྱིད་ཀྱི་ཐིག་ལེའི་མན་ངག་བདེ་མཆོག་གཞན་རྣམས་ལས་ཀྱང་ཟབ་པ་ཡོད་པའི་ཕྱིར་རོ། །འོ་ན་ཐབས་ཀྱི་སྒོ་ནས་ཁྱད་པར་འཕགས་པར་སོང་གི་སྟོན་པ་སྤྲུལ་སྐུ་བཞུགས་པའི་སྒོ་ནས་ཁྱད་པར་འཕགས་པར་མ་སོང་ངོ་སྙམ་ན་རྒྱུད་སྡེ་གཞན་ལས་དེ་གཉིས་ཀའི་སྒོ་ནས་ཁྱད་པར་དུ་འཕགས་ལ། བདེ་མཆོག་གཞན་ལས་ཐབས་ཀྱི་སྒོ་ནས་ཁྱད་པར་དུ་འཕགས་པ་ནི་གནད་ཀྱི་དོན་ཏོ། །བཞི་པ་དེ་ལ་རྒྱ་བོད་དུ་སྲོལ་ཇི་ལྟར་བྱུང་བའི་ཚུལ་ལ་གཉིས་ཏེ། སྤྱིར་བདེ་མཆོག་གི་སྲོལ་བྱུང་ཚུལ་དང་། ཁྱད་པར་གསང་མཐའི་སྲོལ་བྱུང་ཚུལ་ལོ། །དང་པོ་ལ་རྒྱ་གར་དུ་བྱུང་ཚུལ་དང་། བོད་དུ་བྱུང་ཚུལ་གཉིས་ལས། དང་པོ་ནི་རྩ་བའི་རྒྱུད་ལ་བྱང་ཆུབ་སེམས་དཔའ་ཕྱག་ན་རྡོ་རྗེས་མཛད་པའི་སྟོད་ཀྱི་འགྲེལ་པ་རྣལ་འབྱོར་བླ་མེད་ཀྱི་ཟབ་དོན་ཐམས་ཅད་དུས་ཀྱི་འཁོར་ལོ་དང་མཐུན་པར་བཤད་པ་དང་། རྒྱལ་པོ་ཨིནྡྲ་བྷཱུ་ཏིས་མཛད་པའི་འགྲེལ་པ་མ་རྒྱུད་སྤྱི་དང་མཐུན་པར་བཀྲལ་བའི་དཀའ་འགྲེལ་དང་། སློབ་དཔོན་ཀར་རྒྱལ་ཟླ་བས་མཛད་པའི་འགྲེལ་པ་ཨ་བྷི་དྷ་ནའི་བསྐྱེད་རིམ་གྱི་བཤད་པ་རྣམས་དང་བསྟུན་ཏེ་བཤད་པ་དང་། ཡང་སློབ་དཔོན་དེས་མཛད་པའི་འཁོར་ལོ་བདེ་མཆོག་གི་སྒྲུབ་ཐབས་བདུད་རྩི་འཛག་པ་ཞེས་བྱ་བ་ཡང་ཡོད་ལ། དེ་དག་ཀྱང་། འཁོར་ལོ་གཅིག་པའི་གྲོང་ཁྱེར་ན། །ཚོང་དཔོན་བུ་མོ་རྣལ་འབྱོར་མ། །རྡོ་རྗེ་ཕག་མོ་དེ་ཡི་བཀས། །འཁོར་ལོ་སྡོམ་པའི་རྣམ་བཤད་བྱས། །ཞེས་བཤད་པས་རྡོ་རྗེ་རྣལ་འབྱོར་མས་གདམས་ངག་བྱིན་ནས་མཛད་པར་འདུག་གོ །དེའི་རྗེས་སུ་སློབ་དཔོན་ཀོང་ཀ་ན་རྒྱལ་བ་བཟང་པོས་མཛད་པའི་དཀའ་འགྲེལ། དེའི་འགྲེལ་བཤད་སྐལ་ལྡན་གྲགས་པས་མཛད་པ། དེ་གཉིས་ཀྱི་བཤད་སྦྱར་ཏ་ཐཱ་ག་ཏ་རཀྵི་ཏས་མཛད་པ་སྟེ་དེ་དག་ཀྱང་མ་རྒྱུད་དང་མཐུན་པར་བཤད་པ་ཡིན་ཞིང་ལོ་ཆེན་ནས་བརྒྱུད་དེ་རྗེ་བཙུན་གོང་མ་རྣམས་ལ་བཞུགས་སོ། །ཡང་གྲུབ་ཆེན་ལྭ་བ་པས་མཛད་པ་ནག་ཚོའི་འགྱུར། སློབ་དཔོན་ལྷས་སྦས་ཀྱི་མཛད་པའི་འགྲེལ་པ་འགོས་འགྱུར། པཎྜི་ཏ་སུ་མ་ཏི་ཀིརྟིས་མཛད་པའི་འགྲེལ་པ་ཉུང་ངུའི་མཚམས་སྦྱོར་ཏེ་གསུམ་ནི་རྣལ་འབྱོར་གསང་མཐར་བཤད་པ་ཡིན་ཞིང་། རྩ་རྒྱུད་ཀྱི་འགྲེལ་པ་རྣམ་པར་དག་པ་ནི་དགུ་པོ་དེ་ཙམ་ཡིན་ལ། དཔའ་བོ་རྡོ་རྗེས་མཛད་པའི་འགྲེལ་པ་ནི་བསྟན་འགྱུར་བསྡུད་པ་པོ་རྣམས་ཀྱིས་བསྟན་འགྱུར་དུ་བསྡུས་ཀྱང་དོན་ལ་ཟངས་དཀར་ལོ་ཙཱ་བས་བྱས་པ་ཡིན་ཞིང་དཔའ་བོ་རྡོ་རྗེ་ཡང་ཁོང་གི་མཚན་ཡིན་ནོ། །བཤད་རྒྱུད་ཧེ་རུ་ཀ་མངོན་འབྱུང་ལ། ཀུ་མཱ་ར་ཙནྟྲས་མཛད་པའི་འགྲེལ་པ་དང་། རྡོ་རྗེ་མཁའ་འགྲོ་ལ་ནོར་བཟང་གིས་མཛད་པའི་འགྲེལ་པ་དང་། བྷ་ཝ་བྷ་ཏྲས་མཛད་པའི་འགྲེལ་པ་གཉིས་ཡོད་ཅིང་། ཡང་རྒྱུད་དེའི་ཞི་བའི་དཀྱིལ་འཁོར་དང་། ངེས་དོན་གྱི་བཤད་པ་རྣམས་ལ་ཡི་གེའི་སྒྲས་དྲངས་པའི་བཤད་པ་ཡང་དག་པའི་ལྟ་བ་ཉི་མའི་འོད་ཟེར་ཞེས་བྱ་བ་ཞིག་ཀྱང་ཡོད་དོ། །མངོན་བརྗོད་བླ་མ་ལ་ཛྙཱ་ན་བཛྲས་མཛད་པ་དང་། ཤུ་རངྒ་ཝརྨས་མཛད་པའི་འགྲེལ་པ་གཉིས་ཡོད་དོ། །མཁའ་འགྲོ་རྒྱ་མཚོ་ལ་སློབ་དཔོན་པདྨ་བཛྲས་མཛད་པའི་འགྲེལ་པ་གྲུ་གཟིངས་ཞེས་པ་ཡོད་ཅིང་། དེའི་སློབ་མ་ཛ་ཡ་སེ་ནས་རིན་ཆེན་སྣ་བདུན་ཞེས་པའི་གཞུང་བདུན་མཛད་པ་ལས། ཚོགས་འཁོར་དང་རབ་གནས་ཀྱི་གཞུང་བོད་དུ་མ་འགྱུར་ཅིང་དབང་བཀའ་ཡང་དེ་སང་ཡོད་དོ། །རོང་པ་རྣམས་ལ་པཎྜི་ཏ་ས་མནྟ་ཤྲཱི་ནས་བརྒྱུད་པའི་མངོན་འབྱུང་གསུམ་གྱི་དབང་བཀའ་ཡོད་ཟེར་ཀྱང་ཧེ་རུ་ཀ་མངོན་འབྱུང་ལ་དབང་ཟུར་པ་མེད་ཅིང་། ཕག་མོ་མངོན་འབྱུང་ནི་པཎྜི་ཏ་ས་དྷི་ཏྲས་ལྷ་སོ་བདུན་མ། བཅུ་གསུམ་མ། ལྔ་མའི་གཞུང་གསུམ་ཡོད་པའི་སོ་བདུན་མ་ནི་ཕག་མོ་མངོན་པར་འབྱུང་བའི་རྒྱུད་ལ་བརྟེན་ནས་བྱས་ཟེར་བ་ཡོད་ཀྱང་རྒྱུད་དང་མི་མཐུན་ཏེ། རྒྱུད་ནས་གདོང་བརྙན་གྱི་ཚུལ་དུ་བཞུགས་པར་བཤད་ལ་ཁོང་གི་དེ་ནི་རྩ་རྒྱུད་ཀྱི་དབང་བཀའ་དེ་ཕྱུང་བ་ཡིན་པའི་ཕྱིར་རོ། །རྣལ་འབྱོར་མ་བཞིའི་ཁ་སྦྱོར་གྱི་རྒྱུད་ནི་ཆགས་ལམ་གསལ་བར་བསྟན་པས་རྣལ་འབྱོར་མའི་རྒྱུད་དུ་འདུག་ཀྱང་། ཀྱཻ་རྡོར་དང་བདེ་མཆོག་གང་ཡིན་གྱི་གསལ་ཁ་མི་སྣང་ངོ་། །རྒྱ་གར་དྷ་རི་ཀ་པ་ན་རེ། ལས་ཆེན་བཅུ་གཉིས་སྟོན་པ་ལ་བཤད་རྒྱུད་རྡོ་རྗེ་མཁའ་འགྲོ་ལས་ཀྱང་མཁའ་འགྲོ་རྒྱ་མཚོ་ཤིན་ཏུ་རྒྱས་པས་དེ་ཡང་གསང་མཐའི་བཤད་རྒྱུད་དུ་འདོད་དགོས་སོ་ཞེས་གསུངས་ཀྱང་མཁའ་འགྲོ་རྒྱ་མཚོའི་ལས་ཆེན་བཅུ་གཉིས་ནི་དུས་འཁོར་ནས་བཤད་པའི་ལས་ཆེན་བཅུ་གཉིས་ཡིན་པས་ལུགས་འདི་ལ་མི་ཕན་ནོ། །བརྫུས་མའི་སྐོར་ལ་ནམ་མཁའ་དང་མཉམ་པ་ཆེ་བ། ནམ་མཁའ་དང་མཉམ་པ་ཆུང་བ། ར་ལི་ནམ་མཁའ་དང་མཉམ་པ་གསུམ་ནི་པཎྜི་ཏ་ག་ཡ་དྷ་ར་དང་། འབྲོག་མིས་བསྒྱུར་ཟེར་བ་ཡོད་ཀྱང་དོན་ལ་གཉོས་ལོ་ཙཱ་བས་བཟོས་པ་ཡིན་ཞིང་དགེ་སློང་གི་བཤད་པ་ལ། འཁོར་བའི་ཚུལ་ནི་དགེ་བ་སྟེ། །དེ་ལས་ལངས་པ་དགེ་སློང་ཡིན། །ཞེས་དང་། དུར་ཁྲོད་ཀྱི་སྒྲ་བཤད་ལ་དུར་ཆོས་ཉིད་དང་། ཁྲོད་དེ་རྟོགས་པའི་ཡེ་ཤེས་ལ་བྱས་པའི་བཤད་པ་ཡོད་པས་བླ་མ་རྣམས་ཀྱིས་བརྫུས་མར་མཛད་ཅིང་དོན་ལ་ཡང་གནས་པ་ཡིན་ནོ། །གཉིས་པ་ནི་བསྟན་པ་སྔ་དར་གྱི་དུས་སུ་སངས་རྒྱས་མཉམ་སྦྱོར་མ་གཏོགས་པའི་བདེ་མཆོག་གི་སྐོར་གཞན་རྣམས་བོད་དུ་མ་འགྱུར་ལ་ཕྱི་དར་ལ་ལོ་ཆེན་རིན་ཆེན་བཟང་པོ་ཁ་ཆེར་བྱོན་ནས་པཎྜི་ཏ་ཤྲ་དྷ་ལ་བདེ་མཆོག་རྩ་རྒྱུད་ཀྱི་འགྲེལ་པ་སློབ་དཔོན་ཀོང་ཀ་ནས་མཛད་པའི་ཆོས་སྐོར་རྣམས་གསན་ཅིང་། རྩ་རྒྱུད་དང་འགྲེལ་པ་གསུམ་པོ་དེའི་འགྱུར་ཡང་མཛད། དེའི་བཤད་སྲོལ་དར་བར་མཛད་དེ་རྗེ་བཙུན་གོང་མ་ཡང་རྣལ་འབྱོར་གསང་མཐའ་མ་གསན་གོང་དུ་འདི་ལ་ཐུགས་གཙིགས་ཆེ་བ་ཡིན་ནོ། །ཇོ་བོ་རྗེ་བོད་དུ་བྱོན་དུས་ལོ་ཆེན་གྱིས་ཇོ་བོ་རྗེ་ལ་ཇོ་བོའི་ལུགས་ཀྱི་དབང་བསྐུར་དང་བཤད་བཀའ་གསན། ཇོ་བོའི་ལུགས་ཀྱི་ལཱུ་ཧི་པའི་འགྲེལ་པ་ཡང་མཛད་དོ། །ལོ་ཆེན་གྱི་སྐུ་ཚེའི་མཇུག་ལ་འབྲོག་མི་བྱོན་ཅིང་བདེ་མཆོག་ལ་ཤིན་དུ་མཁས་ཀྱང་སློབ་མ་རྣམས་ཀྱིས་དོན་གཉེར་མ་བྱས་པའི་སྟོབས་ཀྱིས་བཤད་སྲོལ་ཆད་དོ། །རྗེ་འགོས་ལ་ལྷས་སྦས་ཀྱི་འགྲེལ་པའི་བཤད་སྲོལ་སོགས་བདེ་མཆོག་གི་ཆོས་སྐོར་བྱུང་ཀྱང་ད་ལྟ་ཆད་དོ། །ཇོ་བོ་རྗེས་རོང་པ་མགར་དགེ་ལ་ལྷས་སྦས་ཀྱི་འགྲེལ་པའི་སྟེང་ནས་བཤད་པ་གནང་ཡང་། ལྷ་རྩེ་བ་གྲགས་པ་དཔལ་ཡན་ཆོད་ལ་ཡོད་ཅིང་དེ་ནས་ཆད་དོ། །ཡང་པཎྜི་ཏ་སུ་མ་ཏི་ཀིརྟི་བོད་དུ་བྱོན་དུས་མར་པ་དོ་པ་དང་། པུ་ཧྲངས་ལོ་ཆུང་གཉིས་ཀྱིས་བདེ་མཆོག་གི་ཆོས་སྐོར་རྣམས་ལེགས་པར་གསན་ཅིང་མར་དོས་རྩ་རྒྱུད་དང་། ཀུན་སྤྱོད་དང་། ནག་པོ་གཞུང་དྲུག་སོགས་གཞུང་ཕལ་ཆེ་བ་ལ་འགྱུར་ཡང་མཛད། རྩ་རྒྱུད་དང་ལཱུ་ཧི་པའི་ཊཱི་ཀ་ཡང་མཛད་དོ། །དེའི་སློབ་མ་ལ་ཟེ་བ་ཇོ་བདེ། ཟེ་བ་ཇོ་འབུམ་སོགས་ཟེ་བ་མང་དུ་བྱུང་། ཟེ་བའི་སློབ་མ་ལ་གཡག་པ་བྱང་ཆུབ་དངོས་གྲུབ་སོགས་གཡག་པ་མང་དུ་བྱུང་ངོ་། །པུ་ཧྲངས་ལོ་ཆུང་གི་སློབ་མ་ལ་དམར་ཆོས་ཀྱི་རྒྱལ་མཚན། བྲོག་ར་བ་དངོས་གྲུབ་ཤེས་རབ། འབྲི་ཕྱ་རུ་བ། ཡར་ལུངས་པ་ལྷ་རྗེ་དཔལ་གྱི་རྒྱལ་མཚན་སོགས་བདེ་མཆོག་ལ་མཁས་པ་མང་དུ་བྱུང་ངོ་། །གཉིས་པ་བྱེ་བྲག་ཏུ་གསང་མཐའི་སྲོལ་བྱུང་ཚུལ་ལ་རྒྱ་གར་དུ་བྱུང་ཚུལ་དང་། བོད་དུ་བྱུང་ཚུལ་གཉིས་ལས། དང་པོ་ནི། ཐོག་མར་གྲུབ་ཆེན་ལཱུ་ཧི་པས་རྣལ་འབྱོར་མ་ཀུན་སྤྱོད་དང་། མངོན་བརྗོད་བླ་མ་ལ་བརྟེན་ནས་རིམ་གཉིས་སྤྱོད་པ་དང་བཅས་པའི་སྒྲུབ་ཐབས་དཔལ་མངོན་པར་རྟོགས་པ་ཞེས་བྱ་བ་མཛད། དེའི་འགྲེལ་པ། ཕྱི་རོལ་མཆོད་པའི་ཆོ་ག ལག་མཆོད། གཏོར་མའི་ཆོ་ག་རྣམས་པྲཛྙཱ་རཀྵི་ཏས་མཛད་པ་རྩ་བ་དང་བཅས་པ་ལ་ལཱུ་ཧི་པ་སྨད་ལྔར་གྲགས་སོ། །གཞན་ཡང་བྷཱུ་རི་པས་འཁོར་ལོ་བདེ་མཆོག་གི་རྒྱུན་བཤགས། ལཱུ་ཧི་པའི་རྗེས་སུ། སློབ་དཔོན་དྲིལ་བུ་པས་རྩ་བཤད་ཀྱི་གཞུང་དྲུག་ཆར་ལ་བརྟེན་ནས་ལུས་དཀྱིལ། སྒྲུབ་ཐབས། དཀྱིལ་ཆོག རྫོགས་རིམ་རིམ་པ་ལྔ་པ་རྣམས་མཛད་དོ། །དེའི་རྗེས་སུ་གྲུབ་ཆེན་ནག་པོ་སྤྱོད་པས་བསྐྱེད་རྫོགས་ཀྱི་གཞུང་དྲུག་མཛད་དེ། རྩ་བའི་རྒྱུད་བདེ་མཆོག་ཉུང་ངུ་དང་། བཤད་པའི་རྒྱུད་ཧེ་རུ་ཀ་མངོན་འབྱུང་དང་། རྡོ་རྗེ་མཁའ་འགྲོ་དང་། བླ་མའི་མན་ངག་ལ་བརྟེན་ནས་དང་པོར་དཀྱིལ་འཁོར་གྱི་ཆོ་ག་མཛད་དོ། །དེ་ནས་བསླབ་བྱ་རིམ་པ་གཉིས་ལ་སློབ་པ་ལ་ཐོག་མར་བསྐྱེད་པའི་རིམ་པའི་དབང་དུ་བྱས་ཏེ་ལྷ་མ་གྲུབ་པ་གྲུབ་པར་བྱེད་པ་ནི་རྩ་རྒྱུད་དང་། ཨ་བྷི་དྷ་ན་དང་། རྡོ་རྗེ་མཁའ་འགྲོ་ལ་བརྟེན་ནས་ནག་པོ་མངོན་རྟོགས་མཛད་ཅིང་དེ་ཡང་ཏིང་ངེ་འཛིན་གསུམ་མམ། བསྙེན་སྒྲུབ་བཞིས་བསྡུས་པ་ཡིན་ལ། སྔགས་མ་གྲུབ་པ་གྲུབ་པར་བྱེད་པ་ནི་རིན་ཆེན་བཞི་ཡིན་ལ། དེ་སྒྲུབ་པའི་བར་ཆད་སེལ་བ་ནི་སུམ་བྷ་ནིའོ། །ཐུན་མོང་གི་དངོས་གྲུབ་ལ་དགོངས་ནས་གྲུབ་པའི་འབྲས་བུ་མྱུར་དུ་འབྱིན་པའི་ཐབས་སྦྱིན་སྲེག་ནི། རྩ་རྒྱུད་དང་། སཾ་བུ་ཊི་དང་། རྡོ་རྗེ་མཁའ་འགྲོ་ལ་བརྟེན་ནས་མཛད་དོ། །གཉིས་པ་རྫོགས་རིམ་གྱི་དབང་དུ་བྱས་ན་གཞུང་གསུམ་དུ་འབྱུང་བའི་རྒྱུ་མཚན་ནི། དང་པོར་རྣལ་འབྱོར་ཆེན་པོ་ཐབས་ཀྱི་རྒྱུད་གསང་བ་འདུས་པ་དང་། ཤེས་རབ་ཀྱི་རྒྱུད་འཁོར་ལོ་བདེ་མཆོག་གཉིས་གླེང་གཞི་རྗོད་བྱེད་ཀྱི་སྒྲ་དང་། ཡི་གེ་ཐ་དད་ཀྱང་བརྗོད་བྱའི་དོན་གཅིག་པར་བསྟན་པའི་ཕྱིར། དེ་གཉིས་ཀྱི་གླེང་གཞི་ལ་བརྟེན་ནས་གསང་བའི་དེ་ཉིད་རབ་ཏུ་གསལ་བ་མཛད་དོ། །རྣལ་འབྱོར་མའི་རྒྱུད་ཉིད་ལ་ཡང་སྙིང་པོ་ཀྱཻ་རྡོ་རྗེ་དང་། འཁོར་ལོ་བདེ་མཆོག་ལ་སོགས་པ་རྗོད་བྱེད་ཀྱི་སྒྲ་ཐ་དད་ཀྱང་བརྗོད་བྱའི་དོན་གཅིག་པར་བསྟན་པའི་ཕྱིར། འཁོར་ལོ་སྡོམ་པའི་རྩ་བ་དང་བཤད་པའི་རྒྱུད་རྣམས་དང་། ཀྱཻ་རྡོ་རྗེའི་རྒྱུད་གསུམ་དང་། རྡོ་རྗེ་གདན་བཞི་ལ་སོགས་པ་ལ་བརྟེན་ནས་ཨོ་ལ་པ་ཏི་མཛད་དོ། །འཁོར་ལོ་སྡོམ་པ་ཉིད་ལ་ཡང་བརྗོད་པར་བྱ་བའི་དོན་དེ་རིམ་པ་བཞི་ལས་མེད་དོ་ཞེས་བསྟན་པའི་ཕྱིར། རྩ་རྒྱུད་དང་། སཾ་བུ་ཊིའི་བརྟག་པ་དྲུག་པ་ལ་སོགས་པ་ལ་བརྟེན་ནས་དཔྱིད་ཀྱི་ཐིག་ལེ་མཛད་དོ། །གྲོགས་སྤྱོད་པ་གསུམ་མམ་བཞི་དང་། འབྲས་བུ་རྣམ་པ་གཉིས་ནི་གཞུང་དྲུག་པོ་དེ་དག་གིས་གསེབ་ཚགས་ནས་སྟོན་པ་ཡིན་གསུངས་སོ། །གཉིས་པ་ནི་རྗེ་བཙུན་ནཱ་རོ་ཏ་པའི་སློབ་མ་ཕམ་མཐིང་པ་སྐུ་མཆེད་བཞི་ལས་བར་པ་གཉིས་ལ་ཀློག་སྐྱ་ཤེས་རབ་བརྩེགས་དང་། མལ་ལོ་ཙཱ་བ་གཉིས་ཐུག བླ་ཆེན་མལ་ལ་རྗེ་བཙུན་ས་སྐྱ་པ་ཆེན་པོ་དང་། གཉན་ཕུལ་བྱུང་བ་གཙུག་ཏོར་རྒྱལ་པོ་གཉིས་ཀྱིས་བཏུགས་ལ་གཉན་གྱིས་སུ་མ་ཏི་ཀིརྟི་ལས་ཡང་རྩ་རྒྱུད་གསན་ནོ། །བླ་ཆེན་མལ་གྱིས་རྩ་རྒྱུད་ལ་མཆན་དང་། ས་ཆེན་གྱིས་དེའི་མཆན་སྣ་བསྲིང་བ་དང་། སློབ་དཔོན་རིན་པོ་ཆེ་བསོད་ནམས་རྩེ་མོས་དེའི་ཡང་མཆན་སྣ་བསྲིངས་ཏེ་མཆན་ཞིབ་པོ་མཛད་ཅིང་ལཱུ་ཧི་པའི་ཕྱི་རོལ་མཆོད་པའི་ཆོ་ག་དང་། དྲིལ་བུ་པའི་དཀྱིལ་ཆོག་གི་ཊཱི་ཀ་ཡང་མཛད་དོ། །རྗེ་ས་ཆེན་གྱིས་ཉུང་ངུའི་མཚམས་སྦྱོར་ཚིགས་བཅད་དུ་དྲིལ་བའི་བདེ་མཆོག་ལེ་འགྲེལ་དང་། རྒྱུད་ཀྱི་ས་བཅད་དང་། ནག་འབུམ་དུ་གྲགས་པ་རྣམས་མཛད་ལ། ནག་འབུམ་ལ་ནག་པོ་པའི་རྣམ་ཐར། ནག་པོ་གཞུང་དྲུག་གི་བསྡུ་བ། གཞུང་དྲུག་གི་མཆོད་བརྗོད་དང་། བཤད་པར་དམ་བཅའི་དགོས་པ། གཞུང་དྲུག་གི་བསྡུས་དོན་དྲུག ཐོ་ཡིག་དྲུག་སྟེ་ཡིག་སྣ་བཅོ་ལྔ་ཡོད་དོ། །གཉན་ཕུལ་བྱུང་བས་སུ་མ་ཏི་ཀིརྟི། བླ་ཆེན་མལ། ས་ཆེན་གསུམ་གྱི་གསུང་སྒྲོས་བྲིས་པའི་རྩ་རྒྱུད་ཀྱི་ཊཱི་ཀ་མུ་ཏིག་ཕྲེང་བ་ཅེས་པ་མཛད། རྗེ་བཙུན་རིན་པོ་ཆེས་རྣལ་འབྱོར་མ་ཀུན་སྤྱོད་ལ་ཊཱི་ཀ་དང་། ལཱུ་ཧི་པའི་སྒྲུབ་ཐབས་རྒྱས་འབྲིང་བསྡུས་གསུམ་དུ་དབྱེ་བ་དང་། དྲིལ་བུ་པའི་སྒྲུབ་ཐབས། དཀྱིལ་ཆོག རིམ་ལྔའི་ཁྲིད་ཡིག་གསུམ་དང་། རྡུལ་ཚོན་ལ་བརྟེན་པའི་ནག་པོ་པའི་དཀྱིལ་ཆོག་རྣམས་མཛད། རྗེ་བཙུན་གྱི་དངོས་སློབ་ནུབ་པ་རིག་འཛིན་གྲགས་ཀྱིས་གཉན་གྱི་ཊཱི་ཀ་དེ་ཉིད་བདེ་རུ་བཏང་བའི་རྩ་རྒྱུད་ཀྱི་ཊཱི་ཀ་དང་། ལཱུ་ཧི་པའི་མངོན་རྟོགས་ཀྱི་འགྲེལ་པ་རྣམས་མཛད། དཀར་གྱིས་བླ་མ་བརྒྱུད་པའི་རྣམ་ཐར། རྩ་རྒྱུད་ཀྱི་ཊཱི་ཀ ལཱུ་ཧི་པའི་སྒྲུབ་ཐབས་སོགས་མཛད། བླ་མ་དམར་ཆོས་ཀྱི་རྒྱལ་པོས་ཆུང་ངུ་ནས་རྗེ་བཙུན་རིན་པོ་ཆེ་ལས་ལཱུ་ཧི་པའི་དབང་བསྐུར་ཐོབ་ནས་ནུབ་པ་རིག་འཛིན་གྲགས་ལ་སྤྲེད་ཁང་ལ་བཞུགས་པའི་བདེ་མཆོག་གི་ཆོས་སྐོར་རྣམས་ལ་མཁས་པར་མཛད་དོ། །ལྔ་པ་དེ་ལས་ཁྱད་པར་དུ་འཕགས་པའི་ལུགས་ངོས་གཟུང་བ་ནི། བཤད་རྒྱུད་ཀྱི་བཤད་པའི་ཚུལ་རྣམ་པ་བཞིའི་ནང་ནས་གསང་མཐའི་ལུགས་ཁྱད་པར་དུ་འཕགས་ཤིང་དེ་ལ་ཡང་རྗེ་བཙུན་ནཱ་རོ་ཏ་པའི་མན་ངག་བླ་མ་ཕམ་མཐིང་པ་སྐུ་མཆེད་ནས་རྒྱུད་པ་འདི་ཉིད་ཁྱད་པར་དུ་འཕགས་པ་ཡིན་ནོ། །དེའི་རྒྱུ་མཚན་སློབ་དཔོན་ཟླ་བ་གྲགས་པས། བཤད་པ་ལ་ཚོགས་བཤད་དང་། སློབ་བཤད་གཉིས་ཡོད་པར་གསུངས་པ་ལྟར་གསང་སྔགས་གཞན་རྣམས་ལ་ཡང་ཡོད་པས་ནཱ་རོ་པའི་སློབ་མ་གཞན་རྣམས་ལ་ཚོགས་བཤད་ལས་མེད་དེ། སློབ་དཔོན་པྲཛྙཱ་རཀྵི་ཏ་ནི་ནཱ་རོ་པ་ལོ་བཅུ་གཉིས་ཀྱི་བར་དུ་བསྟེན་ཀྱང་ཚོགས་བཤད་ལས་མ་ཐོབ་ཅེས་གྲགས་པ་ལྟ་བུའོ། །འོ་ན་ཕམ་ཐིང་པ་སྐུ་མཆེད་ལ་སློབ་བཤད་ཡོད་ན་དེའི་ཁྱད་པར་ཇི་ལྟ་བུ་སྙམ་ན། སྨིན་བྱེད་ཀྱི་སྐབས་སུ་དཔའ་བོ་བསྐུལ་བ་དང་། བསྐྱེད་རིམ་གྱི་སྐབས་སུ་དང་པོར་ནག་པོ་པའི་ལུགས་ལྟར་ཕྱི་བསྐྱེད་རིམ་གཙོ་བོར་བསྒོམས་ཞིང་། དཀྱིལ་འཁོར་རྒྱལ་མཆོག་གི་ཞར་ལ་ལུས་དཀྱིལ་བསྒོམ་པའི་སྒོ་ནས་བཀྲི། དེ་ཉིད་ལ་རྟོགས་པ་བརྟན་ནས་ཅུང་ཟད་ནང་ལ་གཞོལ་བའི་ཚེ་ཕྱི་དཀྱིལ་ཡང་སྒྲ་ཚུལ་ལས་བསྐྱེད། ལུས་དཀྱིལ་ཡང་སྒྲ་ཚུལ་ལས་བསྐྱེད་པ་ལཱུ་ཧི་པའི་ལུགས་ཀྱི་ཕྱི་ནང་མཉམ་པའི་སྒོ་ནས་བཀྲི། དེ་ཉིད་ལ་རྟོགས་པ་བརྟན་ནས་ནང་ལ་མཆོག་ཏུ་གཞོལ་བའི་ཚེ་ཕྱི་དཀྱིལ་ལ་ཕྱིའི་ཧེ་རུ་ཀ་གསལ་བཏབ་པ་ཙམ་ལས་མེད་ཅིང་། ལུས་དཀྱིལ་གཙོ་བོར་བསྒོམས་པ་དྲིལ་བུ་པའི་ལུགས་ཀྱིས་བཀྲི་བའི་ལམ་གྱི་རིམ་པ་དང་བསྐྱེད་རིམ་གྱི་མངོན་པར་རྟོགས་པ་ལ་ཡང་སྦྱོར་བའི་སྐབས་སུ་ཚད་མེད་བཞི་བསྒོམ་ཚུལ་དང་། ཚོགས་བསག་བཅུ་གསུམ་དང་དངོས་གཞིའི་སྐབས་སུ་རྒྱུད་ལས་ཕོ་ཉ་གསུམ་བསྲེ་བར་གསུངས་ཤིང་། དེ་བསྲེས་ན་སྒྲུབ་པ་པོ་ལ་དངོས་གྲུབ་སྟེར་བར་གསུང་ཤིང་དེ་ཇི་ལྟར་བསྲེ་བའི་ཚུལ་འདི་ཁོ་ན་ལ་ཡོད་པ་དང་། རྒྱུད་ལས། སྒྲ་ཡི་ཚུལ་ལ་ངེས་འབྱུང་ཞིང་། །ཞེས་གསུངས་ཀྱང་། སྒྲ་ཚུལ་ཇི་ལྟར་བསྐྱེད་པའི་ཚུལ་འདི་ཁོ་ན་ལ་ཡོད་པ་དང་། མཇུག་གི་གནས་སྐབས་སུ། གོ་ཆ་གསུམ་གྱིས་བསྲུང་བ་དང་། རྫོགས་པའི་རིམ་པ་རྩ་དབུ་མའི་མན་ངག་ལ་སོགས་པ་རྣམས་ནི་ལུགས་འདིའི་ཁྱད་པར་གྱི་ཆོས་ཡིན་ནོ། །དྲུག་པ་དེ་ཉིད་ཀྱི་བླ་མ་བརྒྱུད་པའི་རྣམ་ཐར་ལ། དང་པོ་ཧེ་རུ་ཀའི་བྱུང་ཚུལ་ནི་རྡོ་རྗེ་ཐེག་པའི་ལུགས་ཀྱི་རྫོགས་པའི་སངས་རྒྱས་ཀྱི་གཟུགས་སྐུ་དེ་ལ་ལོངས་སྤྱོད་རྫོགས་པའི་སྐུ། སྤྲུལ་པ་མཆོག་དང་སྤྲུལ་པ་མཆོག་མ་ཡིན་ཏེ་གསུམ་དུ་ངེས་པ་ལས། དང་པོ་ནི། འོག་མིན་སྟུག་པོ་བཀོད་པའི་ཞིང་ཁམས་སུ་ས་བཅུ་པའི་བྱང་སེམས་རྣམས་ལ་ཆོས་སྟོན་པར་མཛད་པའི་རྣམ་པར་སྣང་མཛད་དེ་ཉིད་དོ། །གཉིས་པ་ནི། མི་མཇེད་འཇིག་རྟེན་གྱི་ཁམས་ལ་སོགས་པ་འཇིག་རྟེན་གྱི་ཁམས་དུ་མ་ནང་དུ་འདུས་པ་ནི་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་ཡིན་ལ་དེ་ལ་སོགས་པའི་འཇིག་རྟེན་གྱི་ཁམས་དུ་མ་ནང་དུ་འདུས་པ་ནི་འཇིག་རྟེན་གྱི་ཁམས་རྒྱ་མཚོ་སྟེ་དེ་ནི་རྣམ་པར་སྣང་མཛད་དེའི་ཕྱག་གི་མཐིལ་ན་གནས་ཤིང་དེ་ལ་སོགས་པ་བ་སྤུའི་བུ་ག་རྣམས་ལ་ཡང་སངས་རྒྱས་ཀྱི་ཞིང་ཁམས་གྲངས་མེད་པ་གནས་པ་རྣམས་ནི་སྤྲུལ་སྐུའི་ཞིང་ཁམས་ཡིན་པས་ཞིང་ཁམས་དེ་དག་ཏུ་རྒྱུན་ཆད་མེད་པར་སྤྲུལ་པའི་དཀྱིལ་འཁོར་སྤྲུལ་ཏེ། གདུལ་བྱ་གྲུབ་པའི་ས་ལ་གནས་པ་ཡན་ཆད་ལ་མངོན་པར་དབང་བསྐུར་ནས་རྡོ་རྗེ་ཐེག་པའི་ཆོས་སྟོན་པར་མཛད་པ་པོ་ནི་སྤྲུལ་པ་མཆོག་ཡིན་ནོ། །གསུམ་པ་ནི། མཛད་པ་བཅུ་གཉིས་ཀྱི་ཚུལ་སྟོན་པའི་ཤཱཀྱ་ཐུབ་པ་ལྟ་བུ་ནས་བཟུང་སྟེ། ཉན་ཐོས་དང་། རང་རྒྱལ་དང་། ཚངས་པ་དང་། བརྒྱ་བྱིན་ལ་སོགས་པའི་གཟུགས་དང་། གཟེངས་དང་། ཟམ་པའི་བར་དུ་སྤྲུལ་ཏེ་གཙོ་བོར་སོ་སྐྱེ་ལས་དག་པ་དང་། ཉན་ཐོས་རྣམས་ཀྱི་དོན་མཛད་པ་སྟེ། གཉིས་པོ་དེ་ནི་སྔར་གྱི་ལོངས་སྐུ་དེ་ཉིད་ཀྱི་སྤྲུལ་པའོ། །དེ་ལ་འདིའི་སྟོན་པ་ཧེ་རུ་ཀ་ནི་སྤྲུལ་པ་མཆོག་ཡིན་པས་འདི་ལ་གདུལ་བྱ་དབང་ཕྱུག་ཆེན་པོའི་བྱུང་ཚུལ་དང་། འདུལ་བྱེད་ཧེ་རུ་ཀའི་རྣམ་འཕྲུལ་གཉིས་ལས། དང་པོ་ནི། བསྐལ་པ་རྫོགས་ལྡན་དང་། གསུམ་ལྡན་དང་། གཉིས་ལྡན་གྱི་རྗེས་ལ་རྩོད་ལྡན་འགོ་བརྩམ་པའི་ཚེ་སྐྱེ་རྒུ་རྣམས་ཕན་ཚུན་རྩོད་པར་གྱུར་ཏེ། གཅིག་གིས་གཅིག་བསད་པའི་རོ་ཕྱོགས་མཚམས་སུ་བསྐྱལ་བས་དུར་ཁྲོད་བརྒྱད་དུ་ཆགས། དེའི་རླངས་པ་ལས་སྤྲིན་བརྒྱད། དེ་ལས་ཆར་བབས་པས་ཆུ་བརྒྱད། ཆུའི་བླངས་པ་ལས་ཤིང་བརྒྱད་སྐྱེས་ཤིང་དེ་བརྒྱད་ལ་ཕྱོགས་སྐྱོང་བརྒྱད་ཆགས། ཆུ་བརྒྱད་ལ་ཀླུ་བརྒྱད་ཆགས། སྐབས་དེར་རི་རབ་དང་འཛམ་བུའི་གླིང་དུ་གདུལ་བྱ་དབང་ཕྱུག་ཆེན་པོའི་རྣམ་འཕྲུལ་བྱུང་སྟེ། དེ་ཡང་འཛམ་བུའི་གླིང་གི་ཕྱོགས་མཚམས་ན་རང་བཞིན་གྱིས་གྲུབ་པའི་གནས་ཉི་ཤུ་རྩ་བཞི་ཡོད་པ་ལས། དབང་ཕྱུག་གིས་སྤྲུལ་པའི་འཇིགས་བྱེད་ཉི་ཤུ་རྩ་བཞི་ཆུང་མ་དང་བཅས་པ་བྱུང་སྟེ་ཡུལ་དེ་རྣམས་བཟུང་ངོ་། །དེའི་ཚེ་དེ་རྣམས་ཀྱིས་འོ་སྐོལ་རྣམས་ལ་དཔོན་ཅིག་དགོས་ཞེས་གླེང་བ་ན། རི་རབ་ཀྱི་སྟེང་དུ་ལྷ་དབང་ཕྱུག་ཆེན་པོ་སྐུ་མདོག་ནག་པོ་ཞལ་བཞི་ཕྱག་བཅུ་གཉིས་པ་གཅེར་བུ་རལ་པའི་ཅོད་པཎ་ཅན་ཡུམ་ལྷ་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མས་འཁྱུད་པ་ཐུན་མཚམས་ཀྱི་ཡུམ་སྒྲ་གཅན་མ་ལ་སོགས་པ་བཞི་དང་། ཁྭ་གདོང་མ་ལ་སོགས་པའི་མ་མོ་བརྒྱད་དང་བཅས་པ་སྤྲུལ་ལོ། །དེ་ནས་དབང་ཕྱུག་ཆེན་པོས་འཇིགས་བྱེད་རྣམས་ལ་མཆོད་པའི་རྟེན་དུ་རྡོའི་རང་བྱུང་གི་ཚུལ་དུ་ལིངྒ་ཉི་ཤུ་རྩ་བཞི་བྱིན་ཏེ། དེ་རྣམས་ཀྱིས་ཀྱང་དུས་གསུམ་དུ་མཆོད་པ་བྱེད་དོ། །དེའི་དུས་སུ་དབང་ཕྱུག་ཆེན་པོ་གཙོ་འཁོར་རྣམས་ཀྱིས་འཛམ་བུའི་གླིང་གི་སྐྱེ་རྒུ་རྣམས་མ་རུངས་པར་བྱས་ཏེ་ཟས་སུ་མི་ཤ་ཟ། སྐོམ་དུ་མི་ཁྲག་འཐུང་། མིའི་རུས་པ་ལ་རྒྱན་དྲུག་བྱས། མིའི་སྐྲ་ལ་ཚངས་སྐུད་བྱས། མགོ་བོ་ལ་དོ་ཤལ་བྱས་སོ། །གཉིས་པ་ནི་དེ་རྣམས་གང་གིས་ཀྱང་མ་ཐུལ་བ་ལ་སྔར་འོག་མིན་དུ་སངས་རྒྱས་པའི་རྒྱུའི་རྡོ་རྗེ་འཆང་ལོངས་སྤྱོད་རྫོགས་པའི་སྐུ་དེ་ལས་འབྲས་བུ་རྡོ་རྗེ་འཆང་སྤྲུལ་པའི་སྐུ་གཙོ་འཁོར་དྲུག་ཅུ་རྩ་གཉིས་སུ་སྤྲུལ་ནས་བཏུལ་ལོ། །དེ་ཡང་ལྷ་ཆེན་པོ་ཡབ་ཡུམ་གྱི་གཉེན་པོར་དཔལ་ཧེ་རུ་ཀ་ཡབ་ཡུམ། ཡུམ་བཞིའི་གཉེན་པོར་བདེ་ཆེན་གྱི་ལྷ་མོ་བཞི། འཇིགས་བྱེད་ཉི་ཤུ་རྩ་བཞི་ཆུང་མ་དང་བཅས་པའི་གཉེན་པོར་སྐུ་གསུང་ཐུགས་ཀྱི་དཔའ་བོ་དང་དཔའ་མོ་ཞལ་སྦྱོར་ཉི་ཤུ་རྩ་བཞི། མ་མོ་བརྒྱད་ཀྱི་གཉེན་པོར་དམ་ཚིག་གི་ལྷ་མོ་བརྒྱད་སྤྲུལ་ཏེ། དེ་རྣམས་ཀྱི་སྐུ་མདོག་དང་ཞལ་ཕྱག་གདུལ་བྱ་དྲུག་ཅུ་རྩ་གཉིས་དང་རྗེས་སུ་མཐུན་པའོ། །དེ་ལྟར་སྤྲུལ་ནས་ཇི་ལྟར་བཏུལ་ཞེ་ན། ལོངས་སྤྱད་པ་དང་། ཐིམ་པ་དང་། དབང་དུ་བྱས་པ་གསུམ་གྱིས་བཏུལ་བའོ། །དང་པོ་ནི། ཁ་ཟས་དང་རྒྱན་ཆ་གཉིས་ལ་ལོངས་སྤྱོད་ཁོང་རྣམས་ཀྱི་ཁ་ཟས་ཤ་དྲོན་ཁྲག་དྲོན་དུ་བྱས་པ་དེ་རྣམས་ཚོགས་ཀྱི་འཁོར་ལོར་ལོངས་སྤྱོད་པས་དཔལ་ཁྲག་འཐུང་གི་ལྷ་ཚོགས་ཞེས་བྱའོ། །གཞན་ཡང་རྒྱན་ཆ་ཕྲོགས་ནས་ཧེ་རུ་ཀ་གཙོ་འཁོར་གྱི་རྒྱན་ཆ་བྱས་པས། ཕྱག་རྒྱ་དྲུག་དང་། མི་མགོའི་དོ་ཤལ་དང་། སྟག་གི་ལྤགས་པའི་ཤམ་ཐབས་ལ་སོགས་པའི་རྒྱུ་མཚན་ཡང་དེ་ཡིན་ནོ། །གཉིས་པ་ཐིམ་པ་ནི། ལྷ་ཆེན་གཙོ་འཁོར་རྣམས་ཚར་བཅད་དེ། རྣམ་པར་ཤེས་པ་འོད་གསལ་དུ་བསྟིམས་ནས། མ་འོངས་པའི་དུས་སུ་དེ་བཞིན་གཤེགས་པ་ཐལ་བའི་དབང་པོ་ཞེས་བྱ་བར་སངས་རྒྱས་པར་ལུང་བསྟན་ནོ། །གསུམ་པ་དབང་དུ་བྱས་པ་ནི། འཇིགས་བྱེད་ཚོགས་ཀྱི་ལྷ་དྲུག་ཅུ་རྩ་གཉིས་བཅོམ་པའི་བརྡར། ལྷ་ཆེན་པོ་འཁོར་དང་བཅས་པའི་ལུས་གདན་དུ་བྱས་ཏེ། ཐམས་ཅད་ཀྱང་ཡི་དྭགས་ཀྱི་གདན་ལ་བཞུགས་པ་ཞེས་གསུངས་སོ། །དེ་ཡང་དཔལ་ཧེ་རུ་ཀ་ཡབ་ཡུམ་གྱིས་འཇིགས་བྱེད་དང་དུས་མཚན་གདན་དུ་བྱས། བདེ་ཆེན་གྱི་ལྷ་མོ་བཞིས་སྒྲ་གཅན་ལ་སོགས་པའི་ཡུམ་བཞི། སྐུ་གསུང་ཐུགས་ཀྱི་ལྷའི་འཁོར་ལོས་འཇིགས་བྱེད་ཉི་ཤུ་རྩ་བཞི་ཆུང་མ་དང་བཅས་པ། དམ་ཚིག་གི་ལྷ་མོ་བརྒྱད་ཀྱིས་མིའམ་ཅིའི་ལྷ་མོ་བརྒྱད་གདན་དུ་བྱས་པས་སོ། །དེ་ལྟར་ན་གདུལ་བྱ་འདུལ་བྱེད་ཀྱི་རྣམ་པར་འཕྲུལ་པ་དེ་ཐམས་ཅད་དྲང་བའི་དོན་ཡིན་གྱི། ངེས་པའི་དོན་དུ་ཐ་མི་དད་དོ། །དེ་ལྟར་ཡང་འདུས་པ་ལས། སྐུ་ཡི་རྡོ་རྗེ་ཚངས་པར་འགྱུར། །གསུང་གི་སྟོན་པ་དབང་ཕྱུག་ཆེ། །ཐུགས་ཀྱི་སྟོན་པ་ཁྱབ་འཇུག་ཡིན། །ཞེས་པས་འཇིག་བྱེད་འཁོར་དང་བཅས་པ་ནི་དབང་ཕྱུག་གི་སྤྲུལ་པ་ཡིན་ལ། དབང་ཕྱུག་ནི་རྡོ་རྗེ་འཆང་གི་སྤྲུལ་པའོ། །དེ་རྣམས་འདུལ་བར་བྱེད་པའི་ལྷ་རྣམས་ནི་དཔལ་ཧེ་རུ་ཀའི་སྤྲུལ་པ་ཡིན་ལ་དཔལ་ཧེ་རུ་ཀ་ནི་རྡོ་རྗེ་འཆང་གི་རྣམ་འཕྲུལ་ལོ། །དེ་ཐམས་ཅད་ཀྱང་ངེས་པའི་དོན་དུ་རྡོ་རྗེ་འཆང་ཆེན་པོའི་རང་བཞིན་ཡིན་ནོ། །དཔལ་ཧེ་རུ་ཀ་དེ་ཉིད་ཀྱིས་དབང་བསྐུར་ཞིང་རྒྱུད་བྱིན་གྱིས་བརླབས་པ་ནི་དྲང་དོན་དུ་ཕྱག་ན་རྡོ་རྗེ་ཡིན་ལ། ངེས་པའི་དོན་དུ་ཕྱག་ན་རྡོ་རྗེ་ཉིད་ཀྱང་རྡོ་རྗེ་འཆང་ཆེན་པོའི་ཐུགས་ཀྱི་རྣམ་པར་འཕྲུལ་བ་ཁོ་ན་ཡིན་ཏེ། རྡོ་རྗེ་འཆང་ཆེན་པོའི་ཡེ་ཤེས་གཅིག་ཉིད་འོག་མིན་དུ་ལོངས་སྤྱོད་རྫོགས་པའི་འཁོར་དུ་རྡོ་རྗེ་སེམས་དཔའ་དང་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པར་ཀུན་ཏུ་བཟང་པོ་དང་། མི་མཇེད་འཇིག་རྟེན་གྱི་ཁམས་སུ་ཕྱག་ན་རྡོ་རྗེའི་སྐུར་བསྟན་ནས་རྡོ་རྗེ་ཐེག་པའི་རྒྱུད་སྡེ་མཐའ་དག་བསྡུས་ནས་གདུལ་བྱ་སྐལ་ལྡན་རྣམས་ལ་སྟོན་པར་ཚད་ལྡན་གྱི་གཞུང་རྣམས་ལས་བཤད་དོ། །ཕྱག་ན་རྡོ་རྗེས་དབང་བསྐུར་ཞིང་རྒྱུད་བྱིན་གྱིས་བརླབས་ནས་ཡང་དག་པའི་གདམས་ངག་གནང་བ་ནི་སློབ་དཔོན་ཆེན་པོ་བྲམ་ཟེ་ས་ར་ཧ་ཞེས་པ་སྟེ། འདིའི་ལོ་རྒྱུས་ནི་ལྷོ་ཕྱོགས་ཀྱི་རྒྱུད་ན་བྲམ་ཟེའི་རིགས་མཆོག་ཏུ་སྐྱེས་པ་རིག་པའི་གནས་བཅོ་བརྒྱད་སྒྲ་ངེས་པར་སྦྱོར་བ་དང་བཅས་པ་རིགས་བྱེད་བཞིའི་ཕ་རོལ་ཏུ་སོན་པ་གཅིག་ཡིན་ལ། དེ་ལོ་བཅུ་བདུན་ལོན་པ་ན་མཁའ་ལས་བྲམ་ཟེའི་ཁྱེའུ་ཁྱོད་འདི་ན་ཅི་བྱེད་ཕྱག་རྒྱ་ཆེན་པོར་སོང་ཞེས་པའི་སྒྲ་ཐོས་མ་ཐག་རྟོགས་པ་མཆོག་ཏུ་གྱུར་ནས་བྲམ་ཟེའི་བྱ་བ་བཏང་སྟེ་དཔལ་གྱི་རི་ལ་སོང་ངོ་། །དེར་ཕྱག་ན་རྡོ་རྗེས་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་རྒྱུད་སྡེ་མཐའ་དག་གི་ལུང་བྱིན་པས་དངོས་གྲུབ་ཀྱི་མཆོག་ཐོབ་སྟེ་དཔལ་གྱི་རི་དེར་ལོ་བརྒྱ་ཕྲག་འགའ་བཞུགས་པའི་མཚན་ནི་ས་ར་ཧ་ཞེས་གྲགས་ཏེ། ས་ནི་བཅས་པ་ཡིན་ལ། ར་ནི་དགའ་བ་ཡིན་པས་དགའ་བ་དང་བཅས་པ་ཞེས་བྱའོ། །དེ་ནས་ལྷོ་ཕྱོགས་ཀྱི་རྒྱུད་དེར་སེམས་ཅན་གྱི་དོན་གྱི་ཕྱིར་མདའ་མཁན་གྱི་ཆ་ལུགས་ཀྱིས་ལོ་བརྒྱ་ཕྲག་འགའ་བཞུགས་ཏེ། ས་ར་ནི་མདའ་ཡིན་ལ། ཧ་ནི་བསྣུན་པ་སྟེ་མདའ་བསྣུན་ཞེས་བྱའོ། །དེ་ནས་ཡང་དཔལ་ན་ལེནྟྲར་འཕགས་པ་གནས་བརྟན་པའི་སྡེར་རབ་ཏུ་བྱུང་བའི་མཚན་ར་ཧུ་ལ་བྷ་ཏྲ་སྟེ། སྒྲ་གཅན་འཛིན་བཟང་པོ་ཞེས་བྱ་བ་ཡིན་ལ་དེས་པཎྜི་ཏའི་ཆ་ལུགས་བཟུང་ནས་མཁན་པོ་མཛད་ཅིང་ལོ་བརྒྱ་ཕྲག་འགའ་བཞུགས་སོ། །དེ་ནས་རབ་ཏུ་བྱུང་བའི་རྟགས་བོར་ནས་རྣལ་འབྱོར་པ་ཆེན་པོར་ཁས་བླངས་ཏེ་སེམས་ཅན་གྱི་དོན་མཛད་ཅིང་ལོ་བརྒྱ་ཕྲག་འགའ་བཞུགས་ཏེ་ཐམས་ཅད་དྲིལ་བས་འཛམ་བུའི་གླིང་དུ་ལོ་བརྒྱ་ཕྲག་བཅུ་གཉིས་བཞུགས་ཏེ་ཕྱག་རྒྱ་ཆེན་པོར་བཞུད་དོ་ཞེས་གྲག་གོ །བླ་མ་ཁ་ཅིག་གིས། ཡི་དྭགས་ཀྱི་དོན་དུ་ལུས་བོར་ནས་ཡི་དྭགས་ཀྱི་དོན་དུ་སྤུར་སྦྱངས་པའི་དུད་པས་ཡི་དྭགས་ཐམས་ཅད་གྲོང་སྟོངས་ཏེ་ལྷའི་འཇིག་རྟེན་དུ་སྐྱེས་སོ་ཞེས་ཀྱང་གྲག་གོ །དེས་བྱིན་གྱིས་བརླབས་ཤིང་གདམས་པ་གནང་བ་ནི་ཆོས་ཉིད་བདེན་པ་མཐོང་བ། མདོ་སྡེ་དུ་མ་ནས་ལུང་བསྟན་པ་སྟོང་ཉིད་སྨྲ་བའི་སེང་གེར་གྲགས་པ་སློབ་དཔོན་འཕགས་པ་ཀླུ་སྒྲུབ་ཞེས་བྱ་བ་ཡིན་ལ། འདིའི་ལོ་རྒྱུས་ནི་ལྷོ་ཕྱོགས་བཻ་ཏའི་ཡུལ་དུ་བྲམ་ཟེ་གཙུག་ཕུད་ཅན་ཞེས་བྱ་བ་ལ་བུ་མེད་པར་གྱུར་ནས་རྩིས་པ་རྣམས་ཀྱིས་རྩིས་བྱས་པས་དཀོན་མཆོག་ལ་མཆོད་པ་དང་དགེ་འདུན་ལ་བསྙེན་བཀུར་དང་། བྲམ་ཟེ་ལ་མཆོད་སྦྱིན་རྒྱ་ཆེན་པོ་བྱས་ན་བུ་གཅིག་འབྱུང་མོད་ཀྱི་དེ་ཡང་ཞག་དྲུག་ནས་འཆི་བར་འགྱུར་རོ་ཞེས་ཟེར་རོ། །དེས་དེ་བཞིན་དུ་བྱས་པས་བུ་གཅིག་བྱུང་བ་དང་། བྲམ་ཟེ་རྣམས་བསགས་ནས་རྩིས་བྱས་པས་སླར་ཡང་སྔར་བཞིན་བྱས་ན་ཟླ་བ་དྲུག་འཚོ་ཟེར། དེ་བཞིན་དུ་བྱས་པས་ཟླ་བ་དྲུག་དང་། ལོ་དྲུག་དང་། ཡང་ལོ་དྲུག་འཚོ་ནས་དེ་ནས་བྲམ་ཟེ་རྣམས་ཀྱིས་རྩིས་བྱས་པ་ན་ད་ནི་ཐབས་མེད་དོ་ཟེར། དེ་ནས་ཕ་མས་འདི་ལྟ་བུའི་རིགས་དང་། གཟུགས་དང་། ཤེས་རབ་དང་། ཡོན་ཏན་མཆོག་ཏུ་གྱུར་པ་འཇིག་རྟེན་ན་འགྲན་ཟླ་དང་བྲལ་བའི་བུ་རྙེད་ནས་འཆི་བ་ནི་མཐོང་བར་མི་ནུས་སོ་ཞེས་བསམ་ནས་ལོངས་སྤྱོད་དང་། འཁོར་མང་པོ་དང་བཅས་ཏེ་ཡུལ་གཞན་དུ་བཏང་ངོ་། །དེ་ནས་རིམ་གྱིས་དཔལ་ན་ལེནྟྲར་བྱོན་ཏེ། སློབ་དཔོན་བྲམ་ཟེ་ཆེན་པོས་བྲམ་ཟེའི་ཁྱེའུ་ཁྱོད་རབ་ཏུ་བྱུང་བར་སྤྲོའམ་ཞེས་གསུངས་པ་ལ་སྤྲོ་མོད་ཀྱི་བདག་གི་ཚེ་ནི་ཟླ་བ་འགའ་ཙམ་ཞིག་ལགས་པས་ལོང་མེད་དོ་ཞེས་ཞུས་པས། དེ་ལ་སློབ་དཔོན་གྱིས་རབ་ཏུ་བྱུང་ན་ཚེ་རིང་བའི་ཐབས་ཡོད་གསུངས་ནས་རབ་ཏུ་བྱུང་སྟེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་དཀྱིལ་འཁོར་དུ་བཅུག་ནས་དབང་བསྐུར་ཏེ། ལོ་དྲུག་བརྒྱ་འཚོ་བར་བྱིན་གྱིས་བརླབས་སོ། །དེ་ནས་ཤེས་བྱའི་དཀྱིལ་འཁོར་མཐའ་དག་ལ་མཁས་པར་མཛད་ཅིང་། ས་དང་པོ་མཐོང་བའི་ལམ་མངོན་སུམ་དུ་བྱས་ནས་སེམས་ཅན་གྱི་དོན་རྒྱ་ཆེན་པོ་མཛད་དེ། ན་ལེནྟྲའི་དགེ་སྐོས་ཀྱི་དུས་སུ་གསེར་འགྱུར་གྱི་རྩིས་དགེ་འདུན་གྱི་འཚོ་བ་ལོ་བཅུ་གཉིས་ཀྱི་བར་དུ་སྦྱར་བ་དང་། འོག་ཀླུའི་ཡུལ་ནས་ཤེར་ཕྱིན་འབུམ་པ་གདན་དྲངས་པ་དང་། འཆད་པའི་སྒོ་ནས་འཕགས་པ་ལྷ་ལ་སོགས་པའི་གྲུབ་པའི་སློབ་མ་མང་དུ་བསྐྲུན་པ་དང་། རྩོད་པའི་སྒོ་ནས་དགེ་སློང་བདེ་བྱེད་ཅེས་བྱ་བས་རིགས་པའི་རྒྱན་ཞེས་བྱ་བའི་བསྟན་བཅོས་འབུམ་ཕྲག་བཅུ་གཉིས་བརྩམས་ནས་རྒྱལ་བའི་བསྟན་པ་བསྣུབས་པར་བྱས་པ་དེ་ཡང་འདི་ཉིད་ཀྱིས་དངོས་སྟོབས་ཀྱི་རིགས་པས་སུན་ཕྱུང་བར་མཛད་པ་དང་། རྩོམ་པའི་སྒོ་ནས་རིགས་ཚོགས་ལྔ། བསྟོད་ཚོགས་བཅོ་བརྒྱད། གཏམ་ཚོགས་ལྔ་ལ་སོགས་པའི་སྒོ་ནས་ཕ་རོལ་ཏུ་ཕྱིན་པའི་ལུགས་གསལ་བར་བྱས། གསང་བ་འདུས་པའི་བསྐྱེད་རྫོགས་ལ་སོགས་པའི་སྒོ་ནས་རྡོ་རྗེ་ཐེག་པའི་བསྟན་པ་ཡང་གསལ་བར་མཛད་པ་དང་། གཞན་ཡང་ངོ་མཚར་བའི་སྤྱོད་པ་བསམ་ལས་འདས་པའི་སྒོ་ནས་སེམས་ཅན་གྱི་དོན་ལོ་དྲུག་བརྒྱའི་བར་དུ་མཛད་དོ། །དེ་ཡང་མགོན་པོ་མངོན་འབྱུང་ལས་ལྷོ་ཕྱོགས་བཻ་ཏའི་ཡུལ་དུ་སྐྱེས་ནས་དེའི་དབུ་སློང་བ་ལ་དབུ་སྟེར་བར་འགྱུར་བར་གསུངས་པ་དང་། ལང་ཀར་གཤེགས་པ་ལས་སྟོན་པ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ལྷོ་ཕྱོགས་བཻ་ཏའི་ཡུལ་དུ་སྐྱེས་ནས་རབ་ཏུ་དགའ་བའི་ས་བསྒྲུབས་ཏེ་བདེ་བ་ཅན་དུ་འགྲོ་བར་གསུངས་པ་དང་། འཇམ་དཔལ་རྩ་རྒྱུད་ལས། ལོ་དྲུག་བརྒྱ་འཚོ་བ་དང་། རྨ་བྱ་ཆེན་མོའི་རིག་སྔགས་གྲུབ་པར་ལུང་བསྟན་པ་རྣམས་དང་མཐུན་པ་ཡིན་ནོ། །འོ་ན་དབུ་ཇི་ལྟར་བྱིན་པ་ཡིན་སྙམ་ན་རྒྱལ་པོ་བདེ་སྤྱོད་བཟང་པོའི་བུས་རྒྱལ་སྲིད་ཐོབ་པའི་ཆེད་དུ་སློབ་དཔོན་ལ་དབུ་བསླངས་པ་ན་ཇི་ལྟར་འདོད་པར་ཁྱེར་ཅིག་ཅེས་གསུངས་པས། དེར་རྒྱལ་བུས་རལ་གྲིས་བཅད་པས་མ་ཆོད་ནས་སློབ་དཔོན་གྱིས་སྨྱུག་མའི་ཤུན་ལྤགས་ཀྱིས་ཆོད་ཅིག་ངས་དགེ་འདུན་གྱི་ཞལ་ཏ་བྱས་པའི་ཚེ་སྨྱུག་མ་ཞིག་བཅད་པས་སྐྱེ་བ་བཅད་པའི་ལྟུང་བྱེད་བྱུང་བའི་ལས་ཀྱི་ལྷག་མ་ཡོད་དོ་གསུངས་ནས་དེས་མྱུག་མའི་ཤུན་པས་དབུ་བཅད་ནས་ཁྱེར་ཏེ་སོང་ངོ་། །དེ་རྒྱང་གྲགས་ཅིག་སླེབ་པ་ན་མཁའ་འགྲོ་མ་རྣམས་ཀྱིས་བསད་དོ། །དེའི་ཚེ་མིའི་འགྲོ་བ་པ་ཞིག་ཡོད་ན་དབུ་འབྱོར་བ་ཡིན་པ་ལ་མིའི་འགྲོ་བ་པ་མ་རྙེད་ཅིང་མ་འོངས་པའི་དུས་ན་དབུ་འབྱར་ནས་སེམས་ཅན་གྱི་དོན་མཛད་དོ་ཞེས་གྲག་གོ །དེ་ཉིད་ཀྱིས་དབང་བསྐུར་ཞིང་རྒྱུད་བྱིན་གྱིས་བརླབས་པ་ནི་སློབ་དཔོན་ཤ་བ་རི་པ་སྟེ། འདིའི་ལོ་རྒྱུས་ནི་སློབ་དཔོན་འདི་བྲམ་ཟེའི་རིགས་ལྡོང་དར་ཞེས་བྱ་བ། སངས་རྒྱས་ཀྱི་བསྟན་པ་ལ་དད་པ་ཐོབ་ནས་སློབ་དཔོན་འཕགས་པའི་དྲུང་དུ་ཕྱིན། དབང་དང་དམ་ཚིག་ཐོབ་ནས་རྒྱུད་དང་གདམས་ངག་མ་ལུས་པ་ཐོབ་སྟེ། སྒྲུབ་པ་སྙིང་པོར་བྱས་པས་དངོས་གྲུབ་ཀྱི་མཆོག་ཐོབ་ནས་སྤྱོད་པ་མཛད་པའི་ཚེ་དུག་སྦྲུལ་གྱི་རིག་སྔགས་འཛིན་པའི་ས་ར་ཧ་ཞེས་པ་གཅིག་གིས་ན་ལེནྟྲའི་ཕྱི་སྒོ་ལ་ཤིང་བུ་གཅིག་བཏགས་ནས་འདི་སུས་ལེན་ནུས་པ་དང་། ནུས་པ་འགྲན་ནོ་ཞེས་ཟེར་ནས་སོང་སྐད་དོ། །དེ་ནས་སློབ་དཔོན་གྱིས་ཆང་གིས་བཟི་བའི་གཟུགས་སུ་བརྫུས་ཏེ་མི་རྣམས་འགྲོ་འདུག་བྱེད་པ་ལ་གནོད་པར་གཟིགས་ནས་ཐག་པ་བཅད་དེ་ཆུ་ལ་བསྐྱུར་རོ། །ནངས་པར་ས་ར་ཧ་འོངས་ནས་ངའི་ཤིང་བུ་སུས་བསྐྱུར་གཞན་གྱིས་བརྗོད་པ་ཆང་གིས་བཟི་བ་ཞིག་གིས་བསྐྱུར་རོ་དེ་ལྟར་ན་དེ་ཁྲིད་ཤོག མེད་ན་ཁྱོད་དང་ནུས་པ་འགྲན་ནོ་ཟེར་རོ། །དེར་དགེ་འདུན་གྱིས་བཙལ་བས་སྔར་བས་ཀྱང་བཟི་བ་ཞིག་གི་རྣམ་པ་རྙེད་ནས་ཁྲིད་དེ་འོངས་སོ། །ས་ར་ཧས་སྨྲས་པ་ཁྱོད་ཀྱིས་ཤིང་བུ་བསྐྱུར་རམ། སློབ་དཔོན་གྱིས་གསུངས་པ་བསྐྱུར་རོ། །དེ་ལྟར་ན་ནུས་པ་འགྲན་ནོ། །སློབ་དཔོན་གྱིས་ནུས་པ་མེད་ཀྱི་ཁྱོད་བཟོད་པར་མཛོད་ཅིག་ཅེས་གསུངས་ནས་བཞུད་དོ། །ཡང་ཁོས་ཤིང་བུ་བཏགས། སློབ་དཔོན་གྱིས་བསྐྱུར་ནས་སྔར་བཞིན་དུ་སྨྲས་པ་ཞག་གསུམ་གྱི་བར་དུ་བྱས་སོ། །དེ་ནས་ཁོ་ཤིན་ཏུ་ཁྲོས་ཏེ། ད་ནི་དུག་སྦྲུལ་བཏང་བས་བསྲུང་བ་གྱིས་ཤིག དེ་ནས་སློབ་དཔོན་གྱིས་སའི་རི་མོ་བདུན་བྲིས་པའི་ནང་དུ་བཞུགས་ནས་ད་ཐོང་ཤིག དེ་ནས་དུག་སྦྲུལ་བཏང་བ་དང་། རི་མོ་གཅིག་སོགས་བྲལ་ཏེ་སོང་ངོ་། །དེ་ནས་ཁོ་ན་རེ། ད་ནི་འཇོག་པའི་དུག་འཛིན་པའི་སྦྲུལ་དམར་པོ་ཞིག་ཡོད་དེ་སྔར་གྱི་ཀླུ་བདུན་ཀའི་དུག་བས་ཀྱང་འཇིགས་པ་ཞིག་ཡོད་པས་དེས་ཁྱོད་ཀྱང་ཟ། ང་ཡང་ཟ། གཞན་སེམས་ཅན་དུ་མའང་ཟ་བས་དེ་གཏོང་ངོ་། །སློབ་དཔོན་གྱིས་ཁྱེད་རང་ཟ་བའི་དུག་འདིས་ཅི་བྱེད་དམ་གཏོང་ཅིག ཁོས་སྨྲས་པ་ཅིས་ཀྱང་གཏང་ངོ་། །དེ་ལྟ་ན་ཐོང་ཤིག དེར་ཁོས་རིག་སྔགས་བཟླས་ནས་བཏང་ངོ་། །དེ་ནས་སློབ་དཔོན་གྱིས་ཕག་པའི་ཞལ་སྤྲུལ་ནས་དེ་གསོལ་ལོ། །དེ་ནས་ས་ར་ཧ་ལ་སོགས་པ་སེམས་ཅན་དུ་མ་རྡོ་རྗེ་ཐེག་པ་ལ་བཅུག་ནས་སངས་རྒྱས་ཀྱི་བསྟན་པ་རྒྱས་པར་མཛད་དེ་ལྷོ་ཕྱོགས་དཔལ་གྱི་རི་ལ་བཞུད་དོ། །དེར་རྔོན་པའི་ཆ་ལུགས་ཀྱིས་སེམས་ཅན་གྱི་དོན་མཛད་པས་ཤ་ཝ་རི་པ་ཞེས་གྲགས་ཏེ་ཤ་ཝ་རི་ནི་བོད་སྐད་དུ་རི་ཁྲོད་པ་སྟེ་རྔོན་པའི་མིང་ངོ་། །དེ་ལ་བྲམ་ཟེ་ས་ར་ཧ་ཆུང་ངུ་ཞེས་ཀྱང་བྱ། དཔལ་ཤ་ཝ་རི་དབང་ཕྱུག་ཅེས་ཀྱང་བྱ། རི་ཁྲོད་མགོན་པོ་ཞེས་ཀྱང་བྱའོ། །དེས་དབང་བསྐུར་ཞིང་རྒྱུད་བྱིན་གྱིས་བརླབས་པ་ནི་སློབ་དཔོན་ལཱུ་ཧི་པ་སྟེ་འདིའི་ལོ་རྒྱུས་ནི་སློབ་དཔོན་ཤ་ཝ་རི་པ། བྷ་རནྟྲ་ན་རྒྱལ་པོ་ཤྲི་དྷརྨཱ་ཕ་ལའི་གྲོང་ཁྱེར་དུ་བསོད་སྙོམས་ལ་གཤེགས་པའི་ཚེ་རྒྱལ་པོའི་ཡི་གེ་པ་ཚུར་བྱུང་བའི་ཡི་གེ་དང་། ཕར་བསྐུར་བའི་ཡི་གེའི་དོན་ལ་རྩེ་གཅིག་ཏུ་སེམས་པ་ཞིག་ཡོད་པ། དེ་ཡང་དག་པའི་གདམས་ངག་གི་སྣོད་དུ་རུང་བར་གཟིགས་ནས་ཡང་དག་པའི་གདམས་ངག་འདོད་དམ་གསུངས་པས་ཅི་སྟེ་མི་འདོད་དེ་འདོད་ཅེས་ཟེར་རོ། །འོ་ན་ཁྱོད་ལ་དབང་བསྐུར་དགོས་པས་དེའི་ཡོ་བྱད་ཚོལ་ཅིག་ཅེས་གསུངས་ཏེ། ཡོ་བྱད་ཚོགས་པ་དང་། དབང་བསྐུར་ནས་ཡང་དག་པའི་རྒྱུད་དང་གདམས་ངག་ཐམས་ཅད་བྱིན་ནས། གང་ལ་ཞེན་པ་ཡོད་ན་དེ་ཡང་ཐོངས། །རྟོགས་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་ཞིག་སུས་ཀྱང་བསྟན་རྒྱུ་མེད། །ཅེས་གསུངས་ཏེ་མི་སྣང་བར་གྱུར་ཏོ། །དེ་ནས་དེས་བསམ་པས་བདག་གི་རྒྱལ་པོའི་བྱ་བ་བྱས་ན་སྒྲུབ་པ་སྙིང་པོར་བྱ་བ་མི་འོང་། འཚོ་བ་ཤིང་ཐོགས་སོགས་ལ་བྱས་ན་དབྱར་དང་སྟོན་འབྱུང་ཡང་དགུན་དང་དཔྱིད་མི་འབྱུང་བསོད་སྙོམས་བྱས་ནས་བདག་ལས་དང་པོ་པ་བྱིན་པ་ལ་རྗེས་སུ་ཆགས་པ་དང་། མ་བྱིན་པ་ལ་ཁོང་ཁྲོ་སྐྱེ་བས་ཇི་ལྟར་བྱ་བསམ་པ་ནི། གངྒཱའི་འགྲམ་ཉ་པའི་གྲོང་ཁྱེར་ན་ཉ་མང་པོ་བསད་ནས་དེའི་རྒྱུ་ལྟོ་རྣམས་སྤུངས་པ་མཐོང་ནས་བདག་པོ་ཡོད་མེད་དྲིས་པས་མེད་པར་ཤེས་ཏེ། དེར་སྒྲུབ་པ་ལ་བཞུགས་སོ། །དེ་ཅུང་ཟད་མི་འཇུ་བ་བྱུང་བའི་ཚེ་བླ་མ་ཤ་ཝ་རི་བའི་གདམས་པ་ཐ་མལ་པའི་གཏུམ་མོ་དང་འོད་ཀྱི་གཏུམ་མོ་ཁ་སྦྱར་བ་བསྒོམས་པས་མཚན་མ་དང་རྣམ་པར་རྟོག་པ་ཡང་འཇུ་ན། འདི་ཅིའི་ཕྱིར་མི་འཇུ་སྙམ་སྟེ་ཟོས་པས་ཞུའོ། །དེ་ལྟར་འཚོ་བ་ཉའི་རྒྱུ་ལྟོ་ལ་བརྟེན་ཏེ་སྒྲུབ་པ་སྙིང་པོར་བྱས་པས་ཟག་པ་མེད་པའི་ཡེ་ཤེས་རྒྱུད་ལ་སྐྱེས་ཏེ་དངོས་གྲུབ་ཀྱི་མཆོག་ཐོབ་བོ། །དེ་ནས་སྔར་གྱི་རྒྱལ་པོ་དེ་འདུལ་བའི་དུས་ལ་བབ་པར་གཟིགས་ནས་རྒྱལ་པོའི་གྲོང་ཁྱེར་དུ་གཤེགས་སོ། །དེའི་ཚེ་རྒྱལ་པོ་དེ་ལ་རྒྱལ་ཕྲན་གཞན་ཞིག་དཔྱ་འབུལ་དུ་འོངས་པས་སྲང་ཐམས་ཅད་ཕྱག་དར་བྱས། དར་གྱི་ལྡ་ལྡིས་བརྒྱན་སྤོས་ཁང་དང་བཅས་གདུགས་དང་བླ་རེས་ཀྱིས་ཀྱང་བརྒྱན་ཅིང་སྐྱེད་མོས་ཚལ་དུ་རྒྱལ་པོའི་ཁྲི་བཤམས་པ་མཐོང་སྟེ། སློབ་དཔོན་གྱིས་ཁྲི་སྟེང་དུ་གཟིམས་ཏེ་བཞུགས་སོ། །དེ་ནས་རྒྱལ་པོའི་སྔོན་ལ་བྲམ་ཟེ་མདུན་ན་འདོན་བྱ་བ་བཀྲ་ཤིས་ཀྱི་ཚིགས་བཅད་བརྗོད་ཅིང་། ཀུ་ཤ་རྣ་ལྟག་ཏུ་གཟེར། རིལ་བ་སྤྱི་བླུགས་དང་། ཚངས་སྐུད་དང་བཅས་ཏེ་སྲང་ལ་སོགས་པའི་མི་གཙང་བ་རྣམས་དག་པར་བྱེད་ཅིང་འོངས་པས་མི་མདོག་སྔོ་བ་ཉི་ལྷག་ཀྱིས་ཁྱེར་བ་སྐྲ་འཛིངས་པ་གོས་མེད་པ་ཉའི་རྒྱུ་མ་ཟ་བ་ཅིག་རྒྱལ་པོའི་ཁྲི་ལ་འདུག་པ་མཐོང་ནས་སླར་ལོག་སྟེ། རྒྱལ་པོ་ལ་བསྙད་པས་དེ་ཐོན་ཅིག་ཟེར་ནས་བཏོན་པས་བྲམ་ཟེས་མ་ཐོན། མི་མང་པོས་བཏོན་ཀྱང་རི་བོ་ཆེན་པོ་ལ་འཇུས་པ་དང་འདྲ་བར་འདུག་སྟེ། བྲམ་ཟེ་ལ་སྡང་མིག་ཏུ་བལྟ་ཞིང་། འཇིག་རྟེན་གསུམ་ནི་རྒྱ་ཁྱོན་ཇི་ཙམ་ཡིན། །ཞི་བ་མ་ལུས་པ་ནི་ཇི་ཙམ་ཡིན། །དེ་ཆ་ཉིད་ཀྱི་ཆ་གཅིག་ནི་གཅིག་ཡིན། །མི་གཞན་དག་ནི་དེ་ཡི་གཡོག་ཡིན་ན། །བློ་བཟང་དེ་ཡང་དམ་པ་གཞན་དག་གིས། །སྤྱོད་པ་ལ་བཞད་གད་དུ་བྱེད་པ། །ཨེ་མ་ཧོ་ངོ་མཚར་རེ་ཆེ། །མང་སྨྲས་གཞན་གྱིས་ཅི་ཞིག་བྱ། །ཞེས་གླུ་བླངས་སོ། །དེ་ནས་བྲམ་ཟེས་དེ་དག་རྒྱལ་པོ་ལ་བསྙད་པས་རྒྱལ་པོ་དཔུང་དང་བཅས་ཏེ་བལྟར་ཕྱིན་པ་ལ། སློབ་དཔོན་གྱིས་སྡང་མིག་བལྟས་པས་ཐམས་ཅད་རེངས་སོ། །དེར་བློན་པོ་རིགས་པ་ཅན་ཞིག་གིས་དངོས་གྲུབ་ཐོབ་པར་ཤེས་ནས་གུས་པ་བྱས་པས་གྲོལ་ལོ། །དེས་རྒྱལ་པོ་ལ་བསྒོས་ནས་དེ་བཞིན་བྱས་པས་གྲོལ་ལོ། །གཞན་ཐམས་ཅད་ཀྱིས་ཀྱང་དེ་བཞིན་བྱས་པས་གྲོལ་ལོ། །དེ་ནས་རྒྱལ་པོས་ཁྱོད་སུ་ཡིན་བྱས་པས་ཁྱོད་ཀྱང་སུ་ཡིན་གསུང་། ང་རྒྱལ་པོ་ཡིན་བྱས་པས། ང་ཡང་རྒྱལ་པོ་ཡིན་གསུང་། ཁྱོད་ལ་རྒྱལ་པོའི་ལོངས་སྤྱོད་དང་། མལ་སྟན་དང་། ཆུང་མ་དང་། བསིལ་གཡབ་དང་། སྒྲོན་མ་ལ་སོགས་པ་མི་འདུག་བྱས་པས་སློབ་དཔོན་གྱིས་གླུ་བླངས་པ། ས་གཞི་མལ་སྟན་ཆེན་པོ་ལག་གཉིས་སྔས་དང་འབོལ་ལ་འཁྲིལ། །ཉི་ཟླ་སྒྲོན་མ་གསལ་ཞིང་བསིལ་གཡབ་རྗེས་སུ་མཐུན་པའི་རླུང་། །ནམ་མཁའི་བླ་རེས་ཆགས་པ་ལས་གྲོལ་སྟོང་པའི་བུད་མེད་ལ་སྤྱོད་དེ། །ཨེ་མ་རྒྱ་ལྟར་སྲིད་ན་འཇིགས་མེད་རྣལ་འབྱོར་བདེར་གནས་རྒྱལ་པོ་ཡིན། །ཞེས་གསུངས་པས་རྒྱལ་བློན་གཉིས་དད་དེ་ཞབས་ལ་འཇུས་ནས་ཡང་དག་པའི་གདམས་ངག་ཞུ་བྱས་པས། ཁྱོད་ནི་རིགས་སྙེམས་པའི་གང་ཟག་ཡིན་པས་སྣོད་དུ་མི་རུང་གསུངས་པ་ལ། རྒྱལ་བློན་གཉིས་ཀྱིས་རྒྱལ་སྲིད་ཀྱི་བྱ་བ་བཏང་སྟེ་ཞུས་པས། དཀྱིལ་འཁོར་དུ་བཅུག་སྟེ་དབང་བསྐུར་ནས་ཡང་དག་པའི་གདམས་ངག་གནང་སྟེ། ཁྱེད་གཉིས་ཟས་ཀྱི་བྱ་བ་ཅི་ལ་དགའ་གསུངས་པས་རྒྱལ་པོས་རྟག་ཏུ་ཆང་འཐུང་བ་དང་། བློན་པོས་རྟག་ཏུ་གོ་ལ་ལ་དགའོ་ཞེས་ཞུས་པས། རྒྱལ་པོ་ལ་ཁྱོད་ཤར་ལྷོ་ཨི་ཌི་བྷི་ཤའི་བྱེ་བྲག་ཙ་རི་ཏྲ་བ་ཏ་ཞེས་བྱ་བར་ཆང་མང་བས་དེར་སོང་ལ་འབྲས་རྡུངས་ཤིག་ཅེས་གསུངས་ཏེ་བཏང་ངོ་། །བློན་པོ་ལ་ཁྱོད་ལྷོ་ཕྱོགས་ཌ་ཀི་ན་པ་ཏའི་བྱེ་བྲག་ཀཉྩི་ནཱ་ག་རར་སྨད་འཚོང་མ་གཟུགས་བཟང་བ་ཡོད་པ་དེར་སྐྱེས་པ་བསུ་སྐྱེལ་བྱས་པ་ཐམས་ཅད་ཀྱིས་གོ་ལ་སྟེར་བས་སྨད་འཚོང་མའི་གཡོག་གྱིས་ཤིག་ཅེས་གསུངས་ཏེ། དེ་གཉིས་ལ་དཔལ་མངོན་པར་རྟོགས་པ་ཞེས་བྱ་བའི་མངོན་པར་རྟོགས་པ་མཛད་དེ་གནང་ནས་མི་སྣང་བར་གྱུར་ཏོ། །དེ་ནས་རྒྱལ་པོས་གྲོང་ཁྱེར་དེར་བྱོན་ནས་ཁྱིམ་བདག་གི་འབྲས་བརྡུངས་ཏེ། དེ་ལ་བལྟས་པས་འབྲས་ཀྱི་སྭོ་བ་དང་ཕུབ་མ་ཇེ་ཆུང་སོང་། འབྲས་མཁར་མ་ཇེ་གསལ་ལ་འགྲོ་བ་མཐོང་སྟེ། དེ་བཞིན་དུ་ཡང་དག་པའི་གདམས་ངག་གིས་མཚན་མ་དང་རྣམ་རྟོག་སྦྱངས་པས་ཇེ་ཉུང་སོང་། གཉུག་མའི་ཡེ་ཤེས་ཇེ་གསལ་ལ་འགྲོ་བར་རྟོགས་ནས་དེ་ལ་ཡེངས་པའི་བར་ལ། ཕུག་རོན་གྱིས་འབྲས་ཟོས་པས་ཉུང་དུ་སོང་བས་ཇོ་མོས་རྒོལ་གྱིས་དོགས་ནས། གཞན་གྱི་འབྲས་བརྐུས་པས་ནམ་མཁར་དངོས་གྲུབ་རིང་དུ་གྱུར་ཏོ་ཞེས་པའི་སྒྲ་བྱུང་ངོ་། །དེ་བཞིན་དུ་སྒྲུབ་པ་སྙིང་པོར་བྱས་ཏེ་ལན་ཅིག་སྒོ་འགྲམ་ན་འདུག་པ་ན་འོད་ཀོར་རེ་འདུག་པ་ཇོ་མོས་མཐོང་ནས་དད་པ་སྐྱེས་ཏེ། ཁྱེད་འབྲས་མ་བརྡུང་བར་སྒྲུབ་པ་སྙིང་པོར་གྱིས་ཤིག འཚོ་བ་ངས་སྦྱིན་གྱིས་ཟེར་བ་ལ་ང་ལ་ཡོན་ཏན་གྱི་ཁྱད་པར་འགའ་ཡང་མེད་གསུངས་ནས་ཞག་འགར་འོད་མེད་པར་བྱས་སོ། །དེ་ནས་སྐབས་སུ་གླུ་ལེན་པ་ནི། གང་ཞིག་ཡིད་ལ་མི་བྱེད་སྭོ་བ་ནི། །ཡིད་རྨོངས་བྱེད་པའི་སྭོ་བའི་ཕྱེ་མ་དག །དེ་ནི་དྲུས་པས་སྭོ་ཕྱེ་དེ་སེལ་བྱེད། །དེ་ཡིས་ལྷན་ཅིག་སྐྱེས་པའི་འདོད་པ་དག །ཇི་ལྟར་འཇུག་པ་གསལ་བར་བྱས་པ་སྟེ། །རིང་དུ་འགྲོ་འདོད་པ་ནི་འབྲས་བརྡུངས་པའོ། །ཕབས་མེད་ཆུ་ཡང་མེད་ཅིང་ཤིང་མེད་རྩ་བ་མེད། །ཡེ་ཤེས་ཆེན་པོ་འདིས་ནི་འགྲམ་གཉིས་ཐོབ་གྱུར་ཏེ། །ཡུལ་རྣམས་བསྡམས་ནས་ང་ཡིས་གཅིག་ཏུ་བྱས། །རླུང་གི་ཐག་པས་རོ་མཉམ་དྲང་བར་སླའོ། །སྭོ་བ་མེད་ཅིང་འབྲས་རྣམས་མེད་ཀྱང་ནི། །དུས་རྣམས་ཀུན་ཏུ་ང་ནི་འབྲས་བརྡུང་བའོ། །ཞེས་གསུངས་སོ། །དེས་ན་འབྲས་བརྡུངས་བའི་མི་ལ་ཌེཾ་ཀི་པ་ཟེར་བས་ན་འདི་ཡང་དཔལ་ཌིཾ་ཀི་པ་ཞེས་ཟེར་རོ། །དེ་ནས་ཀུན་གྱིས་གྲུབ་པ་ཐོབ་པར་ཤེས་ནས་རྒྱལ་པོ་ལ་སོགས་པ་ཐམས་ཅད་ཀྱིས་བསྙེན་བཀུར་བྱས་ཏེ། དེ་དག་ལ་ཡང་དག་པའི་གདམས་ངག་གནང་བས། ཙ་རི་ཏྲ་པ་ཏའི་མི་ཕྱུགས་དང་བཅས་པས་མཁའ་སྤྱོད་ཀྱི་དངོས་གྲུབ་ཐོབ་བོ། །བློན་པོས་ཀྱང་ཀཉྩི་ནཱ་ག་རར་ཕྱིན་ནས་སྨད་འཚོང་མའི་གྲོང་དུ་གོ་ལའི་འཚོ་བ་ལ་བརྟེན་ནས་སྒྲུབ་པ་སྙིང་པོར་བྱས་པས་མཆོག་གྲུབ་སྟེ། ཀཉྩི་ནཱ་ག་རའི་གྲོང་ཁྱེར་པ་རྣམས་ཀྱིས་ཀྱང་དངོས་གྲུབ་ཐོབ། སློབ་དཔོན་གྱིས་དངོས་གྲུབ་ཐོབ་པའི་རྟེན་འབྲེལ་དུ་གཟིགས་ནས་ལྷོ་ཕྱོགས་ཀྱི་རྒྱུད་དུ་སྨད་འཚོང་མ་གཅིག་ལ་བཙོངས་སོ། །སྨད་འཚོང་མ་དེས་སྐྱེས་པ་གཅིག་དང་དུས་བྱས་ནས་དེ་མ་བྱུང་བར་སླར་ལོག་པ་ན་འོད་ཆེན་པོ་གཅིག་གིས་ཡུལ་ཕྱོགས་དེ་སྣང་བར་བྱས་པ་མཐོང་ངོ་། །འོད་དེ་གར་འགྲོ་བལྟས་པས་མོ་རང་གི་ཁྱིམ་དུ་སོང་བ་མཐོང་ནས་ཁྱིམ་དུ་ཕྱིན་ཙ་ན་འོད་དེ་ཁོལ་པོའི་སྙིང་གར་ཐིམ་མོ། །དེ་ནས་འདི་ཁྱད་པར་ཅན་ཞིག་འདུག་པས་མཉེས་པར་བྱ་དགོས་བསམ་ནས་དེའི་གམ་དུ་ཕྱིན་ནས་ཕྱག་རྒྱ་མ་བྱས་པས་གཉིས་ཀས་མཁའ་སྤྱོད་ཀྱི་དངོས་གྲུབ་ཐོབ་བོ། །དེས་ན་སྨད་འཚོང་མའི་ཁྱོ་བྱས་པས་དྷ་རི་ཀ་པ་ཞེས་གྲགས་ཏེ་དྷ་རི་ཀ་པ་ནི་སྨད་འཚོང་མའི་ཁྱོའི་མིང་ངོ་། །དེར་མི་ཐམས་ཅད་ཀྱིས་ཁོང་གཉིས་ཀྱི་གཡོག་བྱས། ཟས་ཀྱི་ཕུད་ཀྱིས་མཆོད། བསྙེན་བཀུར་བྱས་པས་དེ་དག་གིས་ཀྱང་མཁའ་སྤྱོད་ཀྱི་དངོས་གྲུབ་ཐོབ་བོ། །དེས་རྗེས་སུ་བཟུང་ཞིང་བྱིན་གྱིས་བརླབས་པ་ནི་སློབ་དཔོན་རྡོ་རྗེ་དྲིལ་བུ་པ་སྟེ། འདི་ནི་ཤར་ཕྱོགས་བྷ་རེནྟྲར་འཁྲུངས་པ་ཡོངས་སུ་རྫོགས་པའི་དགེ་སློང་པཎྜི་ཏ་ཆེན་པོར་གྱུར་པ་ཡིན་ནོ། །འདི་ལ་བླ་མ་ཕམ་ཐིང་པའི་བཞེད་པས་རྡོ་རྗེ་རྣལ་འབྱོར་མ་ཉིད་ཀྱིས་དངོས་སུ་བྱིན་གྱིས་བརླབས་ནས་རྒྱུད་དང་གདམས་ངག་མ་ལུས་པ་གནང་ཞེས་དང་། བླ་མ་བྷ་ཌནྟ་ནི་སློབ་དཔོན་དྷ་རི་ཀ་པའི་མན་ངག་ལ་བརྟེན་ནས་ཅུང་ཞིག་སྒྲུབ་པ་བྱས་ནས་བཟོད་རྡོ་རྗེ་རྣལ་འབྱོར་མས་བྱིན་གྱིས་བརླབས་གསུངས་ཏེ་དོན་གཅིག་གོ །སློབ་དཔོན་འདི་བསྐྱེད་པའི་རིམ་པའི་དམིགས་པ་བརྟན། རྫོགས་པའི་རིམ་པ་ལྔའི་དང་པོ་ལ་བློ་སྦྱོང་ཞིང་རྡོ་རྗེ་གདན་གྱི་ཤར་ལྷོ་ཨོ་ཊི་བི་ཤ་ཞེས་བྱ་བའི་ནགས་ཁྲོད་གཅིག་ན་སྒྲུབ་པ་མཛད་པའི་ཚེ། ཡུལ་དེའི་རྒྱལ་པོ་སྐྱོ་བསངས་དང་རི་དྭགས་ལ་འཕོང་བསླབ་པའི་དོན་དུ་ནགས་མཐུག་པོ་དེར་བྱོན་པ་དང་། རྒྱལ་པོས་དགེ་སློང་གི་གཟུགས་ཤིན་ཏུ་རིད་པ་ལུས་ཉི་ལྷགས་ཀྱིས་གདུང་བ་འཚོ་བའི་ཡོ་བྱད་གང་ཡང་མེད་པ་མཐོང་ནས་སྙིང་རྗེ་སྐྱེས། འཚོ་བ་སྦྱིན་གྱིས་གྲོང་ཁྱེར་དུ་འདོང་ངོ་ཞེས་སྨྲས་སོ། །དེའི་ཚེ་སློབ་དཔོན་གྱིས་རིམ་པ་བཞི་པ་ལས་རྒྱ་བསྒྲུབ་པའི་སྐབས་སུ་སླེབས་ཏེ། མངོན་ཤེས་ཀྱིས་ལས་རྒྱ་འགྲུབ་པའི་རྟེན་འབྲེལ་དུ་གཟིགས་ཏེ་ཚིགས་སུ་བཅད་པ་སྨྲས་པ། དངོས་རྣམས་ཡོངས་སུ་ཤེས་པའི་མཁས་པ་རྣམས་ལ་བརྙས་པར་མི་བྱ་སྟེ། །དེ་ནི་རྩྭ་རྩེ་ཆུང་ངུ་བས་ཀྱང་ཆུང་བའི་འབྱོར་པས་འཁྱིག་པར་ནུས་མ་ཡིན། །རྒྱུན་མི་ཆད་པའི་ཆང་འཛག་པ་ཡི་འགྲམ་ལང་ནག་པོར་སོང་བ་ཡི། །གླང་ཆེན་རྣམས་ནི་པདྨའི་སྐུད་པ་ཕྲ་མོས་འཁྱིག་པར་མི་ནུས་བཞིན། །ཞེས་གསུངས་སོ། །དེའི་ཚེ་རྒྱལ་པོ་ཁྲོས་ནས་སྨ་དབབ་དགོས་སྙམ་པས་ནགས་གསེབ་ཀྱི་བཙུན་པ་འདི་གྲོང་ཁྱེར་གྱི་དབུས་སུ་སྨ་དབབ་སུས་ནུས་པ་དེ་ལ་བྱ་དགའ་སྟེར་རོ་ཞེས་དྲིལ་བསྒྲགས་སོ། །དེའི་ཚེ་ཆང་འཚོང་མ་ཅིག་ལ་བུ་མོ་མཛེས་མ་པདྨ་ཅན་གྱི་རིགས་སུ་གྱུར་པ་ཅིག་ཡོད་པས་ཁས་བླངས་ནས་དེའི་དགོས་པའི་ཡོ་བྱད་ཐམས་ཅད་ནི་རྒྱལ་པོས་སྦྱར། བུ་མོ་དེས་སློབ་དཔོན་གྱིས་ཞབས་ཐོག་བྱེད་པར་ཞུ་བ་ཕུལ་བས་གནང་སྟེ། དབང་དང་དམ་ཚིག་གི་སྣོད་རུང་དུ་བྱས་ནས་ལས་རྒྱ་བྱས་ཏེ། རིམ་པ་ལྔ་པ་མཐར་ཕྱིན་གྱི་བར་དུ་ལོ་བཅུ་གཉིས་སུ་སྒྲུབ་པ་མཛད་དོ། །དེ་ནས་ཨོ་ཊི་བྷི་ཤ་ན་གནས་པ་རྣམས་རྡོ་རྗེ་ཐེག་པ་ལ་གཞུག་པ་དང་། ཐུགས་རྗེ་ཆེན་པོའི་སྤྲུལ་པ་སྤྱན་དྲང་བ་དང་། བདག་ཉིད་ལ་མི་མོས་པ་རྣམས་བཟློག་པར་བྱ་བའི་དོན་དུ་གྲོང་ཁྱེར་དུ་བཞུད་པར་བཞེད་ནས་སྤྲུལ་པའི་བུ་དང་བུ་མོ་གཉིས་ཞིག་སྤྲུལ་ལོ། །དེ་ནས་རྒྱལ་པོས་ཆང་འཚོང་མ་ལ་དགེ་སློང་ཁྲིད་ལ་ཤོག་ཅེས་སྨྲས་ཏེ། གྲོང་ཁྱེར་གྱི་སྐྱེ་བོ་ཐམས་ཅད་སྒོ་དྲུང་དུ་བསྡུས་ནས་ཆང་གི་བུམ་པ་རིམ་པ་བཞིན་དུ་སྒྲིག་ཏུ་བཅུག་སྟེ་སྤྱན་དྲངས་པ་ན། སྤྲུལ་པའི་བུ་ནི་གཡས་ནས་རྒྱུག བུ་མོ་ནི་གཡོན་ནས་རྒྱུག སློབ་དཔོན་གྱིས་རྭའི་བཤོར་ཞལ་དུ་བཅུག་པ་ལ་ཇོ་མོས་ཆང་གི་བུམ་པ་བཏེག་ཅིང་རིམ་པ་བཞིན་བླུགས་ནས་གྲོང་ཁྱེར་དུ་སླེབ་པའི་ཚེ། རྒྱལ་པོས་དབུ་བྱས་པའི་གྲོང་ཁྱེར་པ་རྣམས་ཀྱིས་སྔར་སློབ་དཔོན་རང་ཉིད་ཀྱིས་གླུ་བླངས་པའི་ཚིག་དང་། རྒྱལ་པོས་སྤྱན་དྲངས་པའི་ཚེ་མི་ཡོང་བར་ཆང་འཚོང་མའི་བུ་མོས་བོས་པའི་ཚེ་འབབ་པ་ཞེས་ཐལ་མོ་བརྡབས་ཏེ། གད་མོའི་སྒྲ་བྱས་པས་སློབ་དཔོན་གྱིས་རྭའི་བཤོར་ས་ལ་བརྡབས་པས་ས་རིམ་པ་བདུན་ཕུག་སྟེ་ཆུ་ཆེན་པོ་བྱུང་། རང་ཉིད་ཧེ་རུ་ཀར་བྱས། བཙུན་མོ་རྡོ་རྗེ་ཕག་མོར་བྱས། སྤྲུལ་པའི་བུ་ནི་རྡོ་རྗེ་བུ་མོ་ནི་དྲིལ་བུར་བྱས་ཏེ་ནམ་མཁའ་ལ་གཤེགས་ནས་སོང་ངོ་། །རྒྱལ་པོ་ལ་སོགས་པའི་སྐྱེ་བོ་རྣམས་ཀྱིས་བཟོད་པར་གསོལ་ཞིང་གསོལ་བ་བཏབ་པས་ཐུགས་རྗེ་ཆེན་པོ་ལ་གསོལ་བ་ཐོབ་ཅེས་གསུངས་ནས། ཐམས་ཅད་ཀྱིས་ལོ་ཀི་ཤྭ་ར་ཞེས་གསོལ་བ་བཏབ་པས་ཆུའི་དབུས་ནས་ཐུགས་རྗེ་ཆེན་པོའི་སྐུ་རང་བྱུང་ཅིག་བྱུང་བ་ལ་ཆུ་རྣམས་བསྐོར་བ་ལན་བདུན་བྱས་ནས་འོག་ཏུ་སོང་ངོ་། །ཐུགས་རྗེ་ཆེན་པོའི་སྐུ་དེ་དེང་སང་ཡང་བྱིན་རླབས་ཆེ་བར་གྲགས་ཤིང་ཨོ་ཊི་བྷི་ཤ་བ་ཐམས་ཅད་ཀྱང་རྡོ་རྗེ་ཐེག་པ་ལ་བཙུད་དོ། །དེ་ཉིད་ཀྱིས་བྱིན་གྱིས་བརླབས་ཤིང་རྗེས་སུ་བཟུང་བ་ནི་རུས་སྦལ་ཞབས་ཏེ་རུས་སྦལ་ལྟར་ཞབས་མཐོ་བ་དང་། དལ་གྱིས་འགྲོ་བའི་ཕྱིར་རམ་སྤྱོད་པ་མཛད་པའི་ཚེ་རུས་སྦལ་གཅིག་ལ་ཆིབས་པས་དེ་ལྟར་གྲགས་སོ། །དེས་བྱིན་གྱིས་བརླབས་ཤིང་རྗེས་སུ་བཟུང་བ་ནི་ཤྲཱི་ཛཱ་ལན་དྷ་རི་པ་སྟེ། ཡུལ་ཛཱ་ལན་དྷ་རར་ཕྱག་རྒྱ་ཆེན་པོའི་དངོས་གྲུབ་ཐོབ་པའོ། །དེས་བྱིན་གྱིས་བརླབས་ཤིང་རྗེས་སུ་བཟུང་བ་ནི་སློབ་དཔོན་སྤྱོད་པའི་རྡོ་རྗེ་སྟེ། དེ་ཡང་ཡུལ་ལྷོ་ཕྱོགས་ཀརྞ་ཌའི་རྒྱལ་ཁམས་སུ་སྐྱེས་པས་ཀརྞ་པ་ཞེས་ཟེར། ཡང་ཀརྞ་ཞེས་པ་རྣ་བ་ལ་ཟེར་ཏེ་སྙན་རིང་བས་ཀྱང་ཀརྞ་པ་ཞེས་ཟེར། སྐུ་མདོག་ནག་པས་ཀྲྀཥྞ་པ་ཞེས་གྲགས་སོ། །འདིའི་སློབ་དཔོན་ཤྲཱི་ཛཱ་ལན་དྷ་ར་པ་ཞེས་བྱ་བ་ཡུལ་ཛཱ་ལན་དྷ་རར་ཙཀྲ་སཾ་བ་རའི་གྲུབ་པ་བརྙེས་པ་དེ་ཡིན་ཏེ། དེའི་གདམས་ངག་ལ་བརྟེན་ནས་སྒྲུབ་པ་མཛད་པས་ནུས་པ་ཅུང་ཟད་བརྙེས་ནས་འཁོར་རྣལ་འབྱོར་ཕོ་མོ་མང་པོས་བསྐོར་ནས་བཞུགས་པ་ལ་སྤྱོད་པ་བྱ་སྙམ་ནས་སློབ་དཔོན་ལ་ཞུས་པས་སློབ་དཔོན་ན་རེ། སྤྱོད་པ་ལ་ནུས་པ་ཐོབ་དགོས་ན་ཁྱོད་ལ་ནུས་པ་ཡོད་དམ་གསུང་བ་ལ་ང་ལ་ནུས་པ་ཡོད་གསུང་། འོ་ན་སྟོན་དང་གསུངས་པས། དང་པོ་ཀྲྀཥྞ་པས་རི་དྭགས་ཀྲྀཥྞ་སཱ་རི་ལ་དགུག་པའི་ལྟ་སྟངས་མཛད་པས་མདུན་དུ་ཁུགས། སྟག་ལ་རེངས་པའི་ལྟ་སྟངས་མཛད་པས་རེངས་སོ། །མ་ཧེ་ལ་དབང་གི་ལྟ་སྟངས་མཛད་པས་མདུན་དུ་འོངས་ནས་སྤྱི་བོས་བཏུད། ཤིང་ལྗོན་པའི་ཡལ་ག་ལ་མེ་ཏོག་ཡོད་པ་ལ་ལྷུང་བའི་ལྟ་སྟངས་མཛད་པས་ལྷུང་ནུས་པ་ལ། བླ་མའི་ཞལ་ནས་དེ་ནི་ཚར་བཅད་པར་བྱ་བ་རྣམ་པར་ཤེས་པའི་ལས་ཡིན་གྱི། ད་ཡེ་ཤེས་ཀྱི་ལས་ཀྱིས་རྗེས་སུ་བཟུང་བར་བྱ་དགོས་པས་དེ་རྣམས་ཁྲོལ་ཅིག་གསུང་བ་ལ་དགྲོལ་བར་མ་ནུས་སོ། །དེར་བླ་མའི་ཞལ་ནས་སྤྱོད་པ་བྱེད་པའི་དུས་བྱ་བ་རྣམ་ཤེས་དང་ཡེ་ཤེས་ཀྱི་རླུང་ཆ་མཉམ་པས་ཚར་བཅད་པ་དང་། རྗེས་སུ་བཟུང་བ་གཉིས་ཀར་ནུས་པའི་དུས་སུ་བྱེད་པ་ལ་ཁྱོད་ཀྱིས་རྗེས་སུ་བཟུང་མི་ནུས་པར་འདུག་པས་ད་དུང་སྤྱོད་པའི་དུས་ལ་མ་བབ་བོ་གསུངས་ནས་དུད་འགྲོ་དེ་རྣམས་སློབ་དཔོན་དེ་ཉིད་ཀྱིས་བཀྲོལ་ནས་བཏང་ངོ་། །དེ་ལྟར་སློབ་དཔོན་གྱིས་མ་གནང་བཞིན་དུ་སྤྱོད་པ་བྱེད་དོ་ཞེས་ང་རྒྱལ་སྐྱེས་པ་ལ་སློབ་དཔོན་ན་རེ། དེ་ཝི་ཀོ་ཊ་ལྷ་མོའི་མཁར་དུ་མ་འགྲོ་མཁའ་འགྲོས་བར་ཆད་བྱེད་དོ་གསུངས། དེ་ནས་ཀྲྀཥྞ་པ་འཁོར་དང་བཅས་པས་ཤར་ཕྱོགས་བྷཾ་ག་ལ་རུ་བྱོན་ནས་ཆུ་ཁ་ཅིག་ཏུ་བཞུགས་པ་ན་མཛེ་མོ་གཅིག་ང་སྒྲོལ་ཟེར་བ་ལ་འདི་ཁུར་ན་མཛེ་འགོས་པས་དངོས་གྲུབ་ཚེ་གཅིག་གིས་བསྒྲུབ་པའི་བར་ཆད་དུ་འགྲོ་སྙམ་ནས་མ་བསྒྲལ་ལོ། །འཁོར་ཀུ་སུ་ལུ་པ་ཅིག་གིས་བསྒྲལ་བས་ཀུ་སུ་ལུ་དེ་ཧེ་རུ་ཀར་བྱས་མཛེ་མོ་དེ་རྣལ་འབྱོར་མར་བྱས་ཏེ་མཁའ་སྤྱོད་དུ་སོང་ངོ་། །དེ་ནས་ཕར་ཕྱིན་པས་ཞིང་རྨོད་པ་ཅིག་དང་འཕྲད་པས་རྨོན་པ་དེས་ཐུག་ཆང་ས་འོག་ཏུ་སྦས་ནས་འདུག་པ་ལ་བསླངས་པས་མ་སྟེར། མ་ཚོད་ན་རྡོ་ཅིག་གི་བར་ནས་ཆུ་བག་ཙམ་འཛག་པ་ཅིག་འདུག་པ་ལ་འཐུང་ཟེར། དེས་ང་མི་ངོམས་བྱས་པས་འཐུང་ནུས་པར་གྱིས་ཤིག་ངོམས་པར་བྱ་ཡི་ཟེར། དེར་སློབ་དཔོན་གྱིས་འཐུངས་པས་ཆུ་ཟད་པར་མ་གྱུར་ཏོ། །དེར་ཆང་མ་བྱིན་པ་ལ་གླང་ལ་བསྡིགས་མཛུབ་བསྟན་པས་གླང་དེ་ཤི་བ་ལ་རྨོན་པ་བ་དེ་ན་རེ། ཁྱེད་ནང་པ་སངས་རྒྱས་པའི་རྣལ་འབྱོར་པར་འདུག་པས་ད་འདི་རྗེས་སུ་བཟུང་དགོས་ཀྱི་གསོས་ཤིག་ཟེར་བ་ལ་གསོ་བར་མ་ནུས་སོ། །དེར་གླང་དེ་རྨོན་པ་རང་གིས་གསོས་ཏེ་སློབ་དཔོན་སྐྱེངས་པར་གྱུར་ཏོ། །ཡང་དེ་ནས་ཕར་ཕྱིན་པ་དང་སྐྱེས་མོས་ཚལ་ཅིག་ན་ན་ཆུང་གཞོན་ནུ་ཅིག་འདུག་པ་ལ། ཤིང་ཐོག་སྐྱུར་མོ་འཛམ་བུ་ཞེས་བྱ་བ་ཆུ་འབྱུང་བ་ཅིག་ཡོད་པ་བླངས་པས་ཁྱོད་རང་ནུས་པ་དང་ལྡན་པར་རློམ་པ་ཅིག་འདུག་ན་ནུས་པས་ལོང་ཟེར། དེར་སློབ་དཔོན་གྱིས་ཤིང་ཐོག་ལ་ལྟུང་བའི་ལྟ་སྟངས་བྱས་པས་མར་ལྟུང་གིན་བྱུང་བ་ལ་མོས་རྫི་མ་བཏེག་བྱས་པས་སླར་ཡང་འབྱར་ཞིང་སོང་སྟེ་སློབ་དཔོན་སྐྱེངས་སོ། །ཡང་ཕར་ཕྱིན་པ་ན་ལྷ་ཁང་ཅིག་ན་མི་ཅིག་བརྒྱད་སྟོང་པ་ཅིག་ཀློག་གིན་འདུག་པ་ལ་ཁྱོད་པཎྜི་ཏའམ་རྣལ་འབྱོར་པའམ་རབ་ཏུ་བྱུང་བའམ་ཅིས་གནས་བྱས་པས་དེ་ན་རེ། རྣལ་འབྱོར་པའི་ཆ་ལུགས་ཀྱིས་གནས་སོ་ཟེར་བ་ལ། འོ་ན་ཁྱོད་རྣལ་འབྱོར་པ་ཀློག་བྱེད་པ་ཨཾ་གསུངས་པས། འོ་ན་ཁྱོད་ཀྱིས་ཀློག་དང་ཟེར། བཀླགས་པས་མ་ཤེས་པས་སློབ་དཔོན་ཕམ་མོ། །དེ་ནས་སློབ་དཔོན་གྱིས་ཤར་ཕྱོགས་བྷཾ་ག་ལར་རྒྱལ་པོ་ཤི་རི་སུ་ཙཎ་ཏྲ་དང་། བློན་པོ་ཀུ་ཤ་ལ་ན་ཐའི་གྲོང་དང་ཉེ་བར་བྱོན་པ་ན་རྒྱལ་པོ་མུ་སྟེགས་པ་ཡིན། བློན་པོ་སངས་རྒྱས་པ་ཡིན་པས། བློན་པོས་སློབ་དཔོན་ཀརྞ་པ་གྲོང་དུ་བྱོན་པ་ཐོས་ནས་བསུ་རུ་ཕྱིན་པས་སློབ་དཔོན་ན་རེ། ཁྱོད་ང་ལ་བསུ་བ་བསྙེན་བཀུར་བྱེད་པ་འདི་ཅི་དོན་དུ་གཉེར་བྱས་པས། གཞན་ཅི་ཡང་དོན་དུ་གཉེར་རྒྱུ་མེད། ལྷ་ཁང་གཅིག་ན་ལོ་ཀི་ཤྭ་རིའི་སྐུ་གཅིག་ཏིརྟི་ཀ་དང་མཐུན་པར་བྱས་ཡོད་པས་དེ་ལ་རབ་གནས་ཅིག་ཞུའོ་ཟེར། དེ་བཞིན་བྱ་གསུང་ནའང་ཡུན་རིང་པོ་བྱེད་དུ་མ་འདོད་ལན་ཅིག་གི་ཚེ་དེ་རིང་བྱའོ་གསུང་། འོ་ན་རབ་གནས་ལ་འཚོག་ཆས་སྒྲུབ་བོ་ཞུས་པས་ཅི་ཡང་མི་དགོས་གསུང་ནས་མེ་ཏོག་གཅིག་སྐུའི་སྤྱི་བོར་བཞག་སྟེ། ཏིཥྛ་བཛྲ་ཧོ་པྲ་ཏིཿཞེས་གསུངས་ནས་རབ་གནས་ཟིན་ནོ་གསུངས་པས་བློན་པོ་ཡིད་མ་ཆེས་སོ། །དེར་སློབ་དཔོན་གྱིས་སྐུའི་སྤྱི་བོའི་མེ་ཏོག་བསྡུས་ནས་སྐུ་དེ་སློབ་དཔོན་གར་འགྲོ་བའི་ཕྱི་ལ་ཁྲིད་པས་ད་བཟོད་བློན་པོ་ཡིད་ཆེས་ནས་ད་བདག་ཡིད་ཆེས་པས་བཞག་པར་ཞུ་ཞེས་ཞུ་བ་ཕུལ་བས་ཡང་མེ་ཏོག་སྐུའི་སྤྱི་བོར་བཞག་ལ། སུ་པྲ་ཏིཥྛ་བཛྲ་ཞེས་གསུངས་པས་དེ་རང་དུ་བཞུགས་ཏེ་མི་མང་པོས་ནང་དུ་གདན་དྲངས་ཀྱང་མ་འདྲོངས་པར་དེ་ཉིད་དུ་ལྷ་ཁང་གཅིག་བརྩིགས་སོ། །སྔར་གྱི་ལྷ་ཁང་གི་སྐུའི་ཤུལ་དུ་མཆོད་རྟེན་གཅིག་བཞེངས་སོ། །དེ་ནས་སློབ་དཔོན་ལ་ནང་པའི་རས་བྲིས་གཅིག་མཛད་པར་ཞུས་པས་གནང་ནས་སློབ་དཔོན། བློན་པོ། འབྲི་མཁན་དང་གསུམ་ལས་གཞན་ལ་གསང་སྟེ་རྒྱལ་པོའི་ལྷ་འཇིགས་བྱེད་དང་དུས་མཚན་གདན་དུ་བཏིང་པ་གཅིག་བྲིས་པ་ལ་གཅིག་ནས་གཅིག་ཏུ་གཏམ་འཛགས་ཏེ། རྒྱལ་པོས་བློན་པོ་གཞན་ལས་ཐོས་པས་བློན་པོ་འདི་ངའི་སྙིང་དང་འདྲ་བས་བདེན་མི་སྲིད་ཟེར་རོ། །དེ་ལྟར་ཟེར་ཀྱང་ཡང་ཡང་གྲགས་པས་རྒྱལ་པོའང་ཐེ་ཚོམ་དུ་གྱུར་འདུག་པ་ལ་བློན་པོ་ལ་གྲོགས་ཅིག་གིས་ཐང་སྐུ་འདི་སྤོངས། ཁྱོད་རང་འཁོར་དང་བཅས་པ་ལ་རྒྱལ་པོས་ཆད་པ་ཆེན་པོ་གཅོད་པ་འདུག་གོ་ཟེར། དེ་ལྟར་བྱའོ་ཟེར་ཏེ་རས་མང་པོས་དྲིལ། རྒྱ་ཡིས་བཏབ་ནས་ལྷོ་ཕྱོགས་ན་ཕར་བསྐུར་བཏང་བས་རྒྱལ་པོའི་ཁབ་ཀྱི་ཕྱོགས་བཞི་ན་སྒོ་བཞི་ཡོད་པའི་སྒོ་བ་ཀུན་ན་རེ། འདི་ཙམ་དུ་ངོ་མཚར་བའི་རྒྱས་འདེབས་པ་ཅི་ཡོད་ཟེར་ནས་གཡེངས་པས་བྲིས་སྐུ་དེ་བྱུང་བ་རྒྱལ་མཚན་གྱི་རྩེ་མོ་ལ་བཏགས་ནས་རྒྱལ་པོའི་ཕོ་བྲང་དུ་ཁྱེར་བས་རྒྱལ་པོའི་འཁོར་ཐམས་ཅད་ན་རེ། འདི་སྲོག་དང་ཕྲལ་ལ་ནོར་ཐམས་ཅད་བླང་ངོ་ཟེར་བ་ལ་རྒྱལ་པོ་ན་རེ། བྱ་བ་ཐམས་ཅད་བརྟགས་ཀྱིན་བྱེད་པས་ཅིག་ཏུ་ཆད་པས་མི་གཅོད་ཀྱིས་འུ་ཅག་ཀྱང་བདེ་མཆོག་གདན་དུ་བཏིང་བའི་འཇིགས་བྱེད་དུས་མཚན་བྲིས་ལ་བདེན་པའི་བྱིན་བརླབས་འགྲན་ནོ་ཟེར་ནས། མུ་སྟེགས་ཀྱི་སྡེ་པུ་ལའི་ནང་དུ་བཅུག་ནས་ཁྱོད་རང་གི་ལྷ་ཡང་མཆོད་ཅིག ངེད་ཀྱི་ལྷ་ཡང་མཆོད་ཟེར་ནས་ཞག་བདུན་ན་ཆོ་འབྱེད་པ་ལ། བློན་པོ་ཀུ་ཤ་ལ་ན་ཐས་སློབ་དཔོན་ལ་ད་ནི་ཞག་བདུན་ན་ཆོ་འབྱེད་པས་ནུས་པ་བསྟན་འཚལ་ལོ་བྱས་པས་ནུས་པ་བསྟན་ནོ་གསུང་། དེ་ནས་ནམ་ཕྱེད་ན་ཏིརྟ་ཀའི་མཚན་མ་འཛིན་པའི་མི་སྔོན་པོ་ཐོད་པ་ཅན་གཅིག་བྱུང་ནས་ངས་ཚོགས་དཔོན་བྱའོ་ཟེར་བ་ལ། སློབ་དཔོན་གྱིས་ཁྱོད་ཀྱིས་ཚོགས་དཔོན་མི་བྱེད་དོ་བྱས་པས་ཧེ་རུ་ཀར་བྱས་ཏེ་ནམ་མཁའ་ལ་འཕུར་ནས་སོང་བས་བདག་རྗེས་སུ་བཟུང་དུ་གསོལ་བྱས་པས། ཧེ་རུ་ཀའི་ཞལ་ནས། མཛེ་མོ་དེ་ཡང་མཛེ་མོ་མ་ཡིན་རྡོ་རྗེ་ཕག་མོའི་རྣམ་འཕྲུལ་ཡིན། ལ་སོགས་པའི་སྒོ་ནས་ཁྱོད་ལ་ཚེ་འདི་ལ་ཕྱག་རྒྱ་ཆེན་པོ་འགྲུབ་པའི་སྐལ་བ་མི་འདུག་པས་གཞུང་དྲུག་རྩོམས་ཤིག བར་དོར་མཆོག་གི་དངོས་གྲུབ་ཐོབ་བོ་ཞེས་གནང་བ་བྱིན་ཞིང་ལུང་བསྟན་ནས་གཞུང་དྲུག་མཛད་དེ། བཞི་ཐུན་མོང་མ་ཡིན་པ། གཉིས་ཐུན་མོང་བའོ། །དེ་ནས་སློབ་དཔོན་གྱིས། ཁྱོད་ཉིད་ཞབས་ཀྱི་ལྗིད་ཀྱིས་མནན་ན་འོག་གི་རླུང་ཡང་འཇིག་པར་འགྱུར་ལ་སོགས་པའི་བསྟོད་པ་མཛད་གསུང་། དེ་ནས་བློན་པོ་ན་རེ། འོ་སྐོལ་གྱི་ལྷ་འཇིག་རྟེན་པའི་ཞབས་ཀྱི་འོག་ན་ཡོད་ན་བྱས་པས། སློབ་དཔོན་ན་རེ། བཅོམ་ལྡན་འདས་རྣམ་པ་ཐམས་ཅད་དུ་འཇིག་རྟེན་པས་བརྫི་བར་མི་ནུས་ཀྱི་གསུང་ངོ་། །དེ་ནས་ཞག་བདུན་ནས་བལྟས་པས་འཇིགས་བྱེད་དུས་མཚན་མནན་པའི་བཅོམ་ལྡན་འདས་འོད་དང་བཅས་པར་སོང་འདུག་པ་མཐོང་བས་ཐམས་ཅད་ངོ་མཚར་དུ་གྱུར་ཏེ། སློབ་དཔོན་རྒྱལ་པོའི་ཕོ་བྲང་དུ་སྤྱན་དྲངས་ནས་དབང་བསྐུར་བ་ནོད་དེ་རྫས་ལ་སོགས་པ་མང་དུ་ཕུལ་ནས་རྒྱལ་པོའི་མངའ་འོག་ཏུ་བྷཾ་ག་ལ་ཙམ་སངས་རྒྱས་པའི་བསྟན་པ་ལ་བཀོད་དོ་གསུངས་སོ། །དེ་ནས་སློབ་དཔོན་གྱི་གཞུང་དྲུག་པོ་བརྩམས་གསུངས་སོ། །དེ་ནས་ཛཱ་ལན་དྷ་རར་དགོན་པ་བྱེད་གསུང་བ་ལ་སྙུང་བས་ཐེབས་ནས་གཡོག་པོ་རྣམས་ཡུལ་ཉི་ཤུ་རྩ་བཞིར་སྨན་ལེན་དུ་བཏང་སྟེ་བླ་མའི་བཀའ་བཅག་པ་ལ་བཤགས་པ་བྱ་དགོས་གསུངས། དེ་རྣམས་ཀྱིས་མེ་ཏོག་དང་སྨན་བླངས་ནས་འོངས་པའི་ལམ་ཁ་ན་ཁྲུས་ཀྱི་རྫིང་བུ་ཡོད་པ་ན་བུད་མེད་མང་པོ་ཁྲུས་བྱེད་ཀྱིན་འདུག་པས་ཁྱོད་ཀྱང་ཁྲུས་གྱིས་ཟེར་བ་ལ་ལོང་མེད་ཨ་ཙཱརྻ་ན་བས་ངེད་རིངས་བྱས་པས་སློབ་དཔོན་དྭངས་ཡོད་ཟེར། དེར་ཁྲུས་བྱེད་ཀྱིན་བསྡད་པས་སྨན་རྣམས་བུད་མེད་ཀྱིས་ཁྱེར་ནས་བུད་མེད་རྣམས་གར་སོང་ཆ་མེད། དེར་ཁྱིམ་དུ་ཕྱིན་ཙ་ན་སློབ་དཔོན་མ་དྭངས་པར་འདུག ལོ་རྒྱུས་བསྙད་པས་ངས་བླ་མའི་བཀའ་བཅག་པའི་ཉེས་པས་མཁའ་འགྲོའི་བར་ཆད་བྱུང་བ་ཡིན་ཏེ་འོང་། ད་ཚེ་འདི་ལ་ཕྱག་རྒྱ་ཆེན་པོ་ཐོབ་པའི་སྐལ་བ་མེད་པས་བར་དོར་རྟེན་འདི་ལ་ཞུགས་ནས་ཕྱག་རྒྱ་ཆེན་པོའི་དངོས་གྲུབ་མངོན་དུ་བྱེད་པས་ངའི་ལུས་འདི་ཞག་བདུན་གྱི་བར་དུ་མ་སྲེགས་ཅིག་གསུངས་ནས་སྐུ་འདས་སོ། །དེ་ནས་ཞག་བདུན་དུ་གསང་ཐུབ་ཏུ་རེ་བ་ལ་ཞག་ལྔ་ནས་རྒྱལ་པོའི་རྩིས་པས་ཚོར་ནས་ཡུལ་ཕྱོགས་ན་རོ་ཡོད་པས་ཡུལ་པ་ཐམས་ཅད་ཚོགས་ཤིག་ཅེས་དིང་དིང་དུ་གྲགས་ནས་བསྲེགས་པས་གདུགས་དང་། རྒྱལ་མཚན་དང་། མེ་ཏོག་གི་ཆར་ལ་སོགས་པ་ལུས་མི་སྣང་བའི་མཆོད་རྫས་དུ་མ་དང་། ཌཱ་མ་རུ་དང་། ཏིང་ཏིང་ཤགས་ལ་སོགས་པ་དཀྲོལ་མཁན་མེད་པའི་རོལ་མོའི་སྒྲ་དུ་མ་དང་། ལྷའི་བདུག་སྤོས་དྲི་ཞིམ་པོ་རྒྱ་ཆེར་བྱུང་ངོ་། །ལོ་རྒྱུས་ཁ་ཅིག་ལས་ནི་གྲངས་ནས་ཞག་བདུན་ན་གདུགས་དང་ཌཱ་མ་རུའི་སྒྲ་དང་བཅས་ཏེ་རྟེན་ལ་འཇུག་ཏུ་བྱུང་ཞེས་གྲག་གོ །དེ་ནས་གཞན་དུ་སྐུ་འཁྲུངས་པ་ན་ཡང་བླ་མས་མ་གནང་བཞིན་དུ་སྤྱོད་པ་མཛད་པ་དང་མཁའ་འགྲོའི་བར་ཆད་ཀྱིས་སྐུ་འགྱུར་བ་ལ་སོགས་དྲན་ཏེ། ད་ནི་སྤྱོད་པའི་དུས་ལ་བབ་པ་ན་ལུས་ལ་རུས་པའི་རྒྱན་རང་ཆས་སུ་ཤོག་ཅིག་ཅེས་སྨོན་ལམ་བཏབ་ནས་རྡོ་རྗེ་ཐེག་པའི་སྒྲུབ་པ་མཛད་ནས་དུས་ལ་བབ་པ་ན་རྒྱན་རང་ཆས་སུ་བྱུང་ནས་སྤྱོད་པ་མཛད་པས་སངས་རྒྱས་སོ་ཞེས་གྲགས་ལ། ཁ་ཅིག་ནི་བར་དོ་ཉིད་དུ་མྱ་ངན་ལས་འདས་སོ་ཞེས་གསུངས་ཏེ་ཧེ་རུ་ཀའི་ལུང་དང་ཡང་དེ་མཐུན་ནོ། །དེ་ལྟ་བུའི་སློབ་དཔོན་ཁྱད་པར་ཅན་དེ་ཧེ་རུ་ཀ་ཡིས་གནང་བ་བྱིན་ནས་གཞུང་དྲུག་བརྩམས་སོ། །གནང་བ་ཇི་ལྟར་ཐོབ་ཅེ་ན་དུར་ཁྲོད་ན་ཚོགས་འཁོར་བྱེད་པའི་དུས་སུ་ཏིརྟི་ཀའི་རྣལ་འབྱོར་པའི་ཆ་བྱད་དུ་བྱོན་པའི་ཚེ་སློབ་དཔོན་ལ་ཚིགས་སུ་བཅད་པ་གསུངས་པ། མཛེ་མོ་དེ་ཡང་མཛེ་མོ་མ་ཡིན་རྡོ་རྗེ་ཕག་མོའི་རྣམ་འཕྲུལ་ཡིན། །ཞིང་རྨོད་དེ་ཡང་ཞིང་རྨོད་མ་ཡིན་ཧེ་རུ་ཀ་ཡི་རྣམ་འཕྲུལ་ཡིན། །མཛེས་ལྡན་དེ་ཡང་བུ་མོ་མ་ཡིན་རྡོ་རྗེ་ཕག་མོའི་རྣམ་འཕྲུལ་ཡིན། །ཀློག་མཁན་དེ་ཡང་ཀློག་མཁན་མ་ཡིན་ཧེ་རུ་ཀ་ཡི་རྣམ་འཕྲུལ་ལོ། །འདི་རུ་མཆོག་མིན་དངོས་གྲུབ་གཞན་གྲུབ་གཞུང་རྣམས་རྩོམས་ཤིག་བར་དོར་ཡང་ནི་སངས་རྒྱས་འགྲུབ། །ཅེས་གསུངས་པ་ལ་སློབ་དཔོན་གྱིས། ཁྱོད་ཀྱི་ཞབས་ཀྱི་ལྗིད་ཀྱིས་མནན་ན་འོག་གི་རླུང་ཡང་འཇིག་འགྱུར་ཞེས་ཏེ་ཐུགས་རྗེས་ཞབས་གཡོན་བསྐུམ་པར་མཛད། ཁྱོད་ཀྱི་ཕྱག་རྣམས་དྲང་པོར་བསྲངས་ན་ཕྱོགས་སྐྱོང་རྣམས་ཀྱང་སྐྲག་འགྱུར་ཞེས་ཏེ་བྱམས་པས་ཕྱག་རྣམས་སྐུམ་པར་མཛད། །དབུ་ཡི་གཙུག་ཏོར་དྲང་པོར་བསྲངས་ན་ཚངས་པའི་འཇིག་རྟེན་འཇིགས་འགྱུར་ཞེས་ཏེ་ཐུགས་རྗེས་ཅུང་ཟད་ཡོ་བར་གནས། །རྗེ་བཙུན་ཁྱོད་ཀྱི་སྐུ་ཡི་གར་ནི་དགོས་པ་དང་ལྡན་མཐོང་བས་དད་དེ་མཆོག་ཏུ་གུས་པས་ཁྱོད་ལ་བསྟོད། །སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །འོད་ཟེར་སྔོན་པོ་སྟོང་འབར་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་དཔར་ལྡན། །ཧེ་རུ་ཀ་དཔལ་དེ་དང་སྔགས་པ་ལྷན་ཅིག་གར་བྱེད་ཤོག །ཅེས་བསྟོད་ཅིང་སྨོན་ལམ་བཏབ་པས་ཧེ་རུའི་ཞལ་ནས། ཧ་ཧ་ཧཱ་ཧོ་ཧོ་ཞེས་གསུངས་ནས་མི་སྣང་བར་གཤེགས་སོ། །དེ་ཉིད་ཀྱི་སློབ་མ་ལ་རྒྱལ་པོ་ཟླ་བའི་རོལ་པ་དང་། བློན་པོ་དགེ་བའི་མགོན་པོ་དང་། སློབ་དཔོན་གུ་ཧྱ་པ་གསུམ་ལས། བརྒྱུད་པ་འཛིན་པ་ནི་ཕྱི་མ་དེ་ཉིད་ཡིན་ཞིང་། ཕྱག་རྒྱ་ཆེན་པོའི་དངོས་གྲུབ་ཐོབ་སྟེ་སྔར་གྱི་བར་ཆད་བྱེད་པའི་མཁའ་འགྲོ་མ་རྣམས་འདིས་བཏུལ་བར་གྲག་གོ །དེའི་སློབ་མ་བི་ཛ་ཡ་སྟེ། བོད་སྐད་དུ་རྣམ་པར་རྒྱལ་བ་ཅེས་བྱ་བ་ཡིན་ལ། འདིས་ཀྱང་ཕྱག་རྒྱ་ཆེན་པོའི་དངོས་གྲུབ་ཐོབ་བོ། །བར་མའི་སློབ་དཔོན་ནི། ལོ་ཧི་པའི་ཐུན་མོང་མ་ཡིན་པའི་བརྒྱུད་པ་ཡིན་ལ་དེ་ཡང་དྷ་རི་ཀ་པའི་སློབ་མ་བར་མའི་སློབ་དཔོན། དེའི་སློབ་མ་ཏི་ལོ་པ་སྟེ་རྗེ་བཙུན་གྱིས། ལོ་ཧི་པ་དང་དྷ་རི་ཀ །ཨནྡྷ་པ་དང་ཏི་ལོ་པ། །ཞེས་གསུངས་སོ། །རྗེ་བཙུན་རྩེ་མོས་དྲིལ་བུ་པའི་གོང་དུ་འདི་གསུངས་པ་ནི་དྷ་རི་ཀ་པའི་དངོས་སློབ་ཡིན་པ་དང་། ལོ་ཧི་པའི་བརྒྱུད་པ་འདུས་པ་ལ་དགོངས་ལ་ནག་པོ་པ་དང་དྲིལ་བུ་པ་ལ་ནི་འདི་མི་དགོས་སོ། །ས་སྐྱ་པཎྜི་ཏས་སྐབས་འདིར་རྣམ་རྒྱལ་དང་བར་མ་གཉིས་ལ་བསྟོད་པ་རིམ་བཞིན་མཛད་པ་ནི་བར་མ་ཏི་ལོ་པའི་བླ་མ་ཡིན་པ་ལ་དགོངས་ཏེ་སྔ་མ་དང་དོན་གཅིག་པས་བར་མ་རྣམ་རྒྱལ་ཞེས་པ་གང་ཟག་གཅིག་ཏུ་འཆད་པར་ནོར་བར་ཤེས་པར་བྱའོ། །དེས་ན་ལོ་ཧི་པ་ལྟར་ན་བར་མ་དང་། གཞན་གཉིས་ལྟར་ན་རྣམ་རྒྱལ་གྱི་སློབ་མ་སློབ་དཔོན་ཏི་ལོ་པ་སྟེ། རྒྱལ་རིགས་ལས་རབ་ཏུ་བྱུང་བ་མཚན་ཤེས་རབ་བཟང་པོ་ཞེས་གྲགས་ཏེ་ཡོངས་སུ་རྫོགས་པའི་པཎྜི་ཏར་གྱུར་ནས་སྒྲུབ་པ་སྙིང་པོར་མཛད་པས་ཕྱག་རྒྱ་ཆེན་པོའི་དངོས་གྲུབ་ཐོབ་བོ། །དེ་ཡང་ཏིལ་བརྡུང་རིགས་ཕབ་པས་ཏི་ལོ་པ་ཞེས་གྲགས་སོ། །དེས་རྗེས་སུ་བཟུང་ཞིང་བྱིན་གྱིས་བརླབས་པ་ནི་དཔལ་ནཱ་རོ་པ་སྟེ། ཡབ་ཁ་ཆེ་བ་ཡིན་ཡང་ཁོང་ཉིད་མ་ག་དྷར་སྐུ་འཁྲུངས་ཏེ། བྲམ་ཟེའི་རིགས་བཅུ་དྲུག་ཡོད་པའི་ནང་ནས་བཟང་ཤོས་ནཱ་རོ་ཏ་ཞེས་བྱ་བའི་རིགས་ཡིན་པས་ནཱ་རོ་ཏ་པ་ཞེས་བྱའོ། །དེས་ནས་རིགས་བྱེད་ལ་སོགས་པ་ཕྱི་རོལ་པའི་གཞུང་རྣམས་ལ་མཁས་པར་གྱུར་ནས་ཕྱིས་བྲི་ཀ་མ་ལ་ཤཱི་ལར་རབ་ཏུ་བྱུང་སྟེ། རིག་པའི་གནས་ལྔ་ལ་མཁས་པར་གྱུར་པའི་མཚན་ཡེ་ཤེས་གྲུབ་ཅེས་བྱ་སྟེ་མཁས་པ་སྒོ་དྲུག་གི་ནང་ནས་བྱང་གི་སྒོ་སྲུང་བ་ཡིན་ནོ། །དེ་ནས་ཐུགས་དགོངས་ལ་བདག་ཤེས་བྱ་རིག་པའི་གནས་ལྔ་ལ་མཁས་ཀྱང་རང་གི་སེམས་བ་འཇོ་བ་ཙམ་དུ་ཡང་མི་གནས་པས། དེ་གནས་པའི་ཐབས་བཙལ་སྙམ་སྟེ། རྒྱ་གར་ཤར་ཕྱོགས་ན་ཏི་ལོ་པ་ཞེས་བྱ་བའི་གྲུབ་ཐོབ་ཡོད་པར་གྲགས་པས་དེར་འགྲོའོ་ཞེས་རིན་ཆེན་རྡོ་རྗེ་ལ་སྦྲན་པས་དེ་ན་རེ། ཁོ་བོ་ཡོངས་སུ་རྫོགས་པའི་པཎྜི་ཏར་གྱུར་ནས་ཀུ་སཱ་ལིའི་རྐང་པ་ལ་ཕྱག་མི་འཚལ་ཟེར་ནས་འགྲོར་མི་ཉན། སློབ་དཔོན་རང་ཉིད་ཀྱིས་བྱོན་པས་རྒྱ་གར་ཤར་ལྷོའི་ཕྱོགས་སུ་རིམས་ནད་འཕྲོག་པ་ཞེས་བྱ་བའི་གཙུག་ལག་ཁང་དུ་ཕྱིན་ཏེ། མི་ཐམས་ཅད་ལ་ཏི་ལོ་པ་གར་ཡོད་དྲིས་པས་ལ་ལ་ན་རེ། རེས་འདི་རུ་འོང་། རེས་པུ་ལ་ཧ་རིའི་གཙུག་ལག་ཁང་དུ་འགྲོ་ཞེས་མ་རྙེད་དོ། །ལན་ཅིག་རིམས་ནད་འཕྲོག་པའི་ལྷ་ཁང་ན་དགེ་འདུན་གྱི་ཆོས་སྟོན་བྱེད་པའི་ཕྱི་རོལ་ན་མེའི་ཕུང་པོ་ཡོད་པའི་གན་དུ་མི་སྔོ་བ། རིད་པ། ཉི་ལྷགས་ཀྱིས་ཁྱེར་བ། འདོམས་དཀྲིས་ཀྱི་རས་ཙམ་ལས་གོས་མེད་པ་ཞིག་གིས་ཉ་རློན་པ་མེ་གསེབ་ཏུ་བཅུག་ཅིང་བསྲེག་པ་མཐོང་ནས་དེར་ཕྱིན་ཏེ། འདི་ལྟར་མ་བྱེད་བྱས་པས་ཉ་བསྲེགས་པ་རྣམས་ཕུར་ཏེ་ཕུས་བཏབ་པས་མ་ཤི་བར་སོང་ངོ་། །དེར་འདི་ནུས་པ་ཐོན་པ་ཅིག་འདུག་པས་ཏི་ལོ་པ་ཡིན་ནམ་སྙམ་པ་དང་། ནཱ་རོ་པ་ཡིན་ཡིན་ཟེར། ཡང་རེས་ཕྱི་འགྲོས་བྱེད་པ་ལ་སོགས་པ་སྨྱོན་པ་དང་འདྲ་བར་མཐོང་ནས་འདི་ཏི་ལོ་པ་མ་ཡིན་སྙམ་པ་ན་མིན་མིན་གསུངས་པས་མངོན་ཤེས་མངའ་བར་ཤེས་ཏེ་ཕྱི་བཞིན་འབྲེངས་པས་མི་ཅིག་གིས་རྣལ་འབྱོར་པ་ལ་རས་ཀྱི་སྟོད་གཡོགས་ཅིག་ལྕགས་ཀྱི་ཐུར་མས་གཟེར་ཏེ་ཕུལ་ལོ། །དེར་ཐུར་མ་བཏོན་ནས་ནཱ་རོ་པའི་གསང་གནས་སུ་བཅུག་སྟེ་གར་སོང་ཆ་མེད་པར་གྱུར་ཏོ། །དེར་གསང་གནས་སྐྲངས་ཏེ་འགྲོ་མི་ཤེས་པར་ཡོད་པ་ལ་ཡང་བྱོན་ཏེ་མི་ནའམ་གསུངས་པ་ལ་སྡུག་བསྔལ་ལོ་བྱས་པས་ཐུར་མ་བཏོན་ཏེ་ཕྱག་གིས་རེག་ནས་ནད་མེད་དོ་གསུངས་པ་སྡུག་བསྔལ་ལས་གྲོལ་ལོ། །ཡང་ཕྱི་བཞིན་འབྲེངས་པས་ལམ་ཁ་ན་རྒྱལ་པོ་དང་། བཙུན་མོ་འཁོར་དང་བཅས་པ་བྱུང་བར་མཐོང་ནས་སློབ་དཔོན་གྱིས། སྐྱེས་བུ་སྙིང་སྟོབས་དང་ལྡན་པ་རྒྱལ་པོའི་བཙུན་མོ་ལ་སེན་མོ་འདེབས་ནུས་པ་དག་ཡོད་དམ་གསུངས་པས་ནཱ་རོ་པས་བྲམ་ཟེའི་ཆས་སུ་ཞུགས་ཏེ་ཕྱིན་ནས་སེན་མོ་བཏབ་པས་འཁོར་རྣམས་ཀྱིས་བརྡུངས་སོ། །དེའི་ཚེ་སློབ་དཔོན་གྱིས་བྱོན་ནས་མི་ནའམ་གསུངས་པ་སོགས་སྔར་བཞིན་ནོ། །ཡང་བློན་པོའི་ཆུང་མ་འཁོར་དང་བཅས་པ་བྱུང་བ་ལ་འོ་བྱེད་ནུས་པ་ཡོད་དམ་གསུང་བ་སོགས་སྔ་མ་བཞིན་ནོ། །ཡང་ཕྱི་བཞིན་འབྲེངས་ནས་གྲོང་ཁྱེར་ཞིག་ན་དགའ་སྟོན་བྱེད་པ་ལ་ཚོད་མ་བླངས་ཏེ་སློབ་དཔོན་ལ་ཕུལ་བས་དེ་གསོལ་ཏེ་ཤིན་ཏུ་ཞིམ་གསུངས་པ་ལ། ནཱ་རོ་པས་ད་དུང་གསོལ་བར་འདུག་སྙམ་ནས་ཡང་སློང་དུ་ཕྱིན་པས་མ་སྟེར་བས་ཁོང་གིས་ཁྱིམ་དུ་ཕྱིན་ཏེ། སྔར་གྱི་ཚོད་མ་དེ་འདྲ་འདུག་པའི་ཟངས་གཅིག་བྲང་ལ་བཀབ་ཏེ་བྲོས་འོངས་པ་ལ་མི་མང་པོས་བརྡུངས་པས་ཀྱང་ཟངས་མ་ཤོར་ཏེ། མི་རྣམས་ན་རེ། བརྐམ་ཆགས་ཅན་ཁྱོད་ཚོད་མ་ཁྱེར་ལ་ཟངས་བྱིན་ཅིག་ཟེར་བས་ཟངས་གཏད་དེ་ཚོད་མ་ཤིང་ལོའི་ཁུད་དུ་ཁྱེར་ནས་སློབ་དཔོན་ལ་ཕུལ་བས་དགྱེས་ཏེ་གསོལ་ལོ། །ཡང་ཕྱི་བཞིན་འབྲེངས་པས་སྔར་གྱི་དགེ་འདུན་གྱི་གཙུག་ལག་ཁང་སུམ་ཐོག་ཡོད་པའི་སྟེང་དུ་ཕྱིན་ཏེ་སྙིང་སྟོབས་དང་ལྡན་པ་སུས་འདི་ན་མར་མཆོང་ནུས་སམ་གསུངས་པ་ལ། ནཱ་རོ་པས་མཆོངས་པས་སློབ་དཔོན་གྱིས་ཞག་འགའ་མ་བྱོན་ནོ། །དེར་ཤིན་ཏུ་སྡུག་བསྔལ་བ་ལ་སློབ་དཔོན་གྱིས་བྱོན་ནས་སྡུག་བསྔལ་ལམ་ཞེས་སོགས་གསུང་ནས་སྡུག་བསྔལ་ལས་གྲོལ་བ་སྔར་བཞིན་ནོ། །ཡང་ཕྱི་བཞིན་དུ་འབྲེངས་པས་ནགས་འདབ་ཞིག་ཏུ་ཤིང་གདུགས་པ་ཅན་མང་པོ་ལ་མེ་སྦར་ཏེ་སྙིང་སྟོབས་དང་ལྡན་པ་སུས་འདིར་ལག་པ་འཇུག་ནུས་སམ་གསུངས་པ་ལ། ནཱ་རོ་པས་ལག་པ་བཅུག་པ་ལ་ཆུ་བུར་དུ་སོང་བ་ལ་ནད་ལས་གྲོལ་བ་སྔར་བཞིན་ནོ། །ཡང་ཕྱི་བཞིན་དུ་འབྲེངས་པས་ཐང་སྟོང་ཞིག་ཏུ་སླེབ་པ་ལ་ཅུང་ཞིག་མཉམ་པར་འཇོག་པས་དེར་ཁྱོད་ཡུན་རིང་པོར་ཚ་གྲང་ལ་སོགས་པ་གང་ཡང་ཡིད་ལ་མི་བྱེད་པ་དཀའ་བ་དོན་དུ་གཉེར་བ་ཅི་འདོད་པ་ཡིན་གསུངས་པ་ལ། ཁོ་བོ་ནི་ཡང་དག་པའི་གདམས་ངག་འདོད་དོ་ཞུས་པས། འོ་ན་ཡང་དག་པའི་གདམས་ངག་སྦྱིན་གྱིས་མཎྜལ་གྱིས་གསུངས་པ་ལ་ཆུ་མེད་བྱས་པས་དྲི་ཆུས་གྱིས་གསུངས་ཏེ། མཎྜལ་བྱས་ནས་མེ་ཏོག་བཀྲམ་པ་དང་། སློབ་དཔོན་གྱིས་མཎྜལ་གྱི་འཇིམ་པ་ཅིག་བླངས་ཏེ་ནཱ་རོ་པའི་ཞལ་ལ་བརྒྱབས་པས་མི་རྟོག་པ་སྐྱེས་ཏེ། དེ་ཡང་ལྷན་ཅིག་སྐྱེས་པའི་ཡེ་ཤེས་མཚོན་པར་བྱ་བའི་ཕྱིར་བྱིན་གྱིས་བརླབ་པར་མཛད་པ་ཡིན་ནོ། །དེ་ནས་དང་པོར་དབང་དང་རྒྱུད་དང་བསྟན་བཅོས་རྣམས་གསུངས། དེ་ནས་གདམས་ངག་བསྐྱེད་པའི་རིམ་པ་དང་། གཞི་འཁོར་བའི་གནད། རྩ་དང་རླུང་དང་བྱང་ཆུབ་ཀྱི་སེམས་ལ་སོགས་པས་མཚོན་བྱེད་ཐམས་ཅད་བསྟན་ནས་མཚོན་བྱ་དོན་ཞུས་པས། ཀྱེ་ཧོ་འདི་ནི་རང་རིག་སྟེ། །ངག་གི་ལམ་འདས་སྤྱོད་ཡུལ་མིན། །ཏི་ལོ་པ་ཡིས་ཅི་ཡང་བསྟན་དུ་མེད། །རང་ལ་རང་གིས་བརླན་ཏེ་ཤེས་པར་བྱོས། །ཞེས་གླུ་བླངས་པས་རྒྱ་མཚོ་དང་འདྲ་བའི་མཚོན་བྱ་བསྟན་ཏེ། ད་ཁྱོད་པཎྜི་ཏའི་ཆས་མ་འཛིན་པར་རྣལ་འབྱོར་པའི་ཆ་ལུགས་ཀྱིས་སྒྲུབ་པ་སྙིང་པོར་གྱིས་ཤིག སྐྱེ་བ་འདིར་མཆོག་གི་དངོས་གྲུབ་ཐོབ་པར་འགྱུར་རོ་ཞེས་དམ་ཚིག་ཕོག་ནས་མི་སྣང་བར་གྱུར་ཏོ། །དེ་ནས་ནཱ་རོ་པས་མེ་ཏོག་འཕྲོག་པའི་ལྷ་ཁང་ཞེས་བྱ་བའི་བྱང་ཕྱོགས་གྲོང་ཁྱེར་ཆུང་ངུ་ཅིག་ཡོད་པ་ན་རྒན་མོ་གཅིག་གིས་བཤོས་འདྲེན་ཅིང་སྒྲུབ་པ་སྙིང་པོར་མཛད་ཅིང་བཞུགས་པ་ལས། དུས་ནམ་ཞིག་ན་མུ་སྟེགས་གཅེར་བུ་པ་རྣམས་རྩོད་པ་རྒྱལ་ཏེ་སངས་རྒྱས་ཀྱི་བསྟན་པ་འཇིག་པར་ཉེ་བ་ན་རྒྱལ་པོས་པཎྜི་ཏ་ལྔ་བརྒྱ་བསགས་ཏེ། མེ་ཏོག་གི་ཕྲེང་བ་གཏད་པས་སུས་ཀྱང་ལེན་མ་ནུས་ནས་རྒྱལ་པོ་ན་རེ། ད་དུང་གྲོས་གྱིས་ལ་རྩོད་པ་གྱིས་ཤིག གལ་ཏེ་མི་ནུས་ན་གཙུག་ལག་ཁང་གཅེར་བུ་པ་ལ་ཕུལ་ལོ་བྱས་པས་པཎྜི་ཏ་རྣམས་གྲོས་བྱེད་པའི་ཚེ་རྒན་མོ་ན་རེ་ངའི་ཁྱིམ་ན་ནཱ་རོ་པ་བཞུགས་ཟེར། དེར་དགེ་འདུན་གྱིས་གསོལ་བ་བཏབ་པས་སྔར་ཏི་ལོ་པས་གསུངས་པ་མ་དྲན་ནས་ཞལ་གྱིས་བཞེས་སོ། །དེར་གཅེར་བུ་པ་འོང་དུ་མ་བཏུབ་པ་ལ་ཁོའི་ལྷ་ཁང་གི་གམ་དུ་རྒོལ་བ་དང་ཕྱིར་རྒོལ་བ་དང་། དཔང་པོ་རྒྱལ་པོ་གསུམ་གྱི་ཁྲི་བཤམས་ཏེ་རྩོད་པ་བྱས་པས་སློབ་དཔོན་ཅུང་ཞིག་ཞན་ཞན་འདྲ་ནས་སློབ་དཔོན་གྱི་ཐུགས་ལ་ང་ལྟ་བུའི་སྨྲ་བའི་དབང་ཕྱུག་ཞན་པ་ལྟར་འདུག་པ་འདི་ཅི་ཡིན་སྙམ་དུ་བསམ་པས་སྔར་སློབ་དཔོན་གྱི་གསུང་བཅག་པའི་ཉེས་པ་དྲན་ནས་བཟོད་གསོལ་བྱས་ཏེ། ཡིད་ཀྱིས་གསོལ་བ་བཏབ་པས་ཏི་ལོ་པ་ཕྱག་གཡོན་པར་མིའི་ཐོད་པ་བཅད་མ་ཁད་ཅིག་ཐོགས་ནས་བྱོན་པ་ལ་ཕྱག་འཚལ་བས་གཅེར་བུ་པ་ན་རེ། སྙིང་རྗེ་དང་བྲལ་བ་སྲིན་པོའི་གཟུགས་ཅན་འདི་ལྟ་བུ་ལ་ཕྱག་འཚལ་བ་དེ་ཉིད་ཀྱིས་ཕམ་པའི་གནས་སུ་གྱུར་ཏོ་ཞེས་ཟེར་རོ། །དེར་ཏི་ལོ་པའི་ཞལ་ནས་ཕམ་ཕམ་ཞེས་གསུངས་ཏེ། ཁོའི་ལྷ་ཁང་མཆོད་རྟེན་གྱི་གཟུགས་འདྲ་བ། ཟུར་བརྒྱད་དང་སུམ་ཐོག་ཡོད་པ་ལ་སྡིགས་མཛུབ་ལན་གསུམ་བྱས་པས་ཐོག་གསུམ་ཀ་འགྱེལ་བས་གཅེར་བུ་པ་རྣམས་སྐྲག་སྟེ། ཐམས་ཅད་ཀྱིས་སློབ་དཔོན་གྱི་ཞབས་ལ་ཕྱག་འཚལ་ཏེ་གཅེར་བུ་པ་ཐམས་ཅད་སངས་རྒྱས་ཀྱི་བསྟན་པ་ལ་བཙུད་དོ། །དེར་ཏི་ལོ་པའི་ཞལ་ནས་ད་ཁྱོད་ཀྱིས་སྐྱེ་བ་འདི་ལ་མཆོག་གི་དངོས་གྲུབ་ཐོབ་པའི་སྐལ་བ་མེད་ཀྱི་ཆོས་སྟོན་ཅིག་དང་འགྲོ་བ་མང་པོ་ལ་ཕན། ཁྱོད་པས་ཀྱང་སློབ་མ་དང་དེའི་སློབ་མ་ནས་མར་རིམ་པ་བཞིན་དུ་ཕན་ཇེ་ཆེར་འགྱུར་ལ་བར་དོར་ཕྱག་རྒྱ་ཆེན་པོ་འགྲུབ་པར་འགྱུར་ཞེས་གསུངས་ཏེ་མི་སྣང་བར་གྱུར་ཏོ། །དེ་ནས་ནཱ་རོ་པས་བཤད་སྒྲུབ་གཉིས་ཀ་མཛད་པས་རྟོགས་པ་སྐྱེས་ཏེ། འཆར་བ་མེད་ཅིང་ནུབ་པའང་མེད། །ཉིན་མོ་མེད་ཅིང་མཚན་མོའང་མེད། །ཅེས་སོགས་ཀྱི་གླུ་བླངས་ཏེ། ཕྱག་རྒྱ་ཆེན་པོའི་དངོས་གྲུབ་མ་ཐོབ་ཀྱང་རྒྱལ་པོ་དཔུང་དང་བཅས་པ་རེངས་པར་བྱེད་པ་དང་། ཚོགས་འཁོར་སོགས་ཀྱི་དུས་སུ་ཤིང་ཐོག་ལ་སོགས་པ་དགུག་ནུས་པ་དང་། སྦྱིན་སྲེག་གི་ཐབ་ཀྱི་ནང་དུ་ལྷ་སུམ་ཅུ་རྩ་བདུན་ཞལ་ལྟ་ནུས་པ་སོགས་ཏིང་ངེ་འཛིན་གྱི་རྟོགས་པ་བརྟན་པོར་ཐོབ་པས། པུར་སྦྱངས་པའི་ཤུལ་དུ་ཡང་ཟླ་བ་རེ་རེ་བཞིན་དུ་རོལ་མོའི་སྒྲ་དང་མེ་ཏོག་གི་ཆར་ལ་སོགས་པའི་ལྷའི་མཆོད་པ་ཡང་ཀུན་གྱིས་མཐོང་ཞིང་ཐོས་པ་ཡིན་ནོ། །དེ་ཉིད་ཀྱིས་རྗེས་སུ་བཟུང་ཞིང་བྱིན་གྱིས་བརླབས་པ་ནི་དཔལ་ཕམ་འཐིང་པ་སྐུ་མཆེད་བཞི་སྟེ། དེ་ཡང་རིགས་ནི་བ་རོ་ཞེས་བྱ་བ་ཡིན་ལ་ཆེ་ཤོས་དགེ་སློང་ཆོས་ཀྱི་བློ་གྲོས་ཀྱིས་ནཱ་རོ་པའི་སྤྱན་སྔར་ལོ་བཅུ་གཉིས་བཞུགས། དེ་གདན་འདྲེན་དུ་དེའི་གཅུང་པོ་དགེ་སློང་འཇིགས་མེད་གྲགས་པས་བྱོན་པ་ལ་ཁྱོད་ངའི་བླ་མའི་སྤྱན་སྔར་སྡོད་ཅིག ཁོ་བོ་ལ་བླ་མས་ཁྱོད་ཆོས་མ་བཤད་པར་རྒྱ་ནག་རི་བོ་རྩེ་ལྔ་ལ་ཕྱིན་ན་དངོས་གྲུབ་ཐོབ་གསུངས་པས་དེར་འགྲོ་གསུངས་ནས་བཞུད། ཕྱིས་གཏམ་མ་ཐོས་པས་ཇི་ལྟར་སོང་ཆ་མེད། དེ་ནས་འཇིགས་མེད་གྲགས་པས་ནཱ་རོ་པའི་སྤྱན་སྔར་ལོ་དགུ་བཞུགས། དཔལ་ལྡན་དགྱེས་པའི་རྡོ་རྗེ་དང་། གཤིན་རྗེའི་གཤེད་དང་། གསང་བ་འདུས་པ་སོགས་ལེགས་པར་བསླབས། ཁྱད་པར་འཁོར་ལོ་བདེ་མཆོག་གི་སྒོ་ནས་དམན་པ་དང་འབྲིང་གི་དངོས་གྲུབ་ཀྱང་ཐོབ་པར་མཛད་དོ། །དེ་ལ་བལ་ཡུལ་ན་ཨ་ཐས་པ་ཆེན་པོ་ཞེས་བྱ་བར་གྲགས། བོད་དུ་དཔལ་ཕམ་འཐིང་པ་ཞེས་བྱ་བར་གྲགས་སོ། །དེ་སྤྱན་འདྲེན་པ་ལ་དེའི་གཅུང་དུས་འཁོར་བ་ཡང་ཟེར། བལ་པོ་མི་ཏྲི་པ་ཡང་ཟེར་བ་དེ་བྱོན་པ་ལ་ཁྱོད་ཀྱིས་ངའི་བླ་མ་བསྟེན་གསུངས་ནས་དེས་ཀྱང་ནཱ་རོ་པའི་སྤྱན་སྔར་ལོ་ལྔ་བཞུགས་སོ། །དེ་སྤྱན་འདྲེན་པ་ལ་ཆུང་ཤོས་ཐང་ཆུང་པས་བྱོན་ཏེ། དེས་ཀྱང་དཔལ་ནཱ་རོ་པ་ལས་དབང་བསྐུར་བ་ཐོབ། རྒྱུད་དང་མན་ངག་ལ་སོགས་པ་མང་དུ་ཐོབ་ཀྱང་ཐམས་ཅད་ཚང་བར་ནི་མ་ཐོབ། དེ་ལ་གཅེན་འཇིགས་མེད་གྲགས་པའི་ཞལ་སྔ་ནས་ཁྱོད་ངག་གི་དབང་ཕྱུག་བསྒྲུབ་གསུངས་ནས་སྒྲུབ་གཡོག་དང་བཅས་ཏེ་ཕྱིན་ནས་མེ་ཏོག་བསྐྱུར་བས་མེ་ཏོག་ཡར་ལོག་བྱུང་བ་ཁོང་ཡེངས་ནས་མ་མཐོང་། སྒྲུབ་གཡོག་བལ་པོ་ཐུགས་རྗེ་ཆེན་པོས་མཐོང་སྟེ་རང་བཏུང་ངམ་སྙམ་པ་ལ་ཇོ་བོས་བསྐྱོན་དུ་དོགས་ནས་མ་འཐུངས་ཏེ་བྱུང་ངོ་བྱས་པས་ཚོར་ཏེ། མར་ལོག་པ་ལ་འཐུངས་པས་ངག་གི་དབང་ཕྱུག་ཆེན་པོ་མ་གྲུབ་ཀྱང་ཚིགས་བཅད་བརྩམ་པ་ལ་ཐོགས་པ་མེད་པ་གྲུབ་པས་ཕྱིས་ངག་གི་དབང་ཕྱུག་ཅེས་ཀྱང་གྲགས་སོ། །དེ་ལ་དཔལ་ཕམ་འཐིང་པའི་ཞལ་ནས་ཁྱོད་ཀློག་སྐྱ་ཤེས་རབ་བརྩེགས་དང་འགྲོགས་ལ་བོད་དུ་སོང་། འདིར་རྒྱུན་བཞག་གི་མེ་དང་ཚེས་བཅུའི་མཆོད་པ་མ་ཆག་པར་བྱེད་པའི་ནོར་ཚོལ་གསུངས་ནས་ཁོང་གཉིས་གྲོགས་ཏེ་གཉལ་ཡན་ཆད་དུ་བྱོན། དེའི་དུས་སུ་ཇོ་བོ་བྷ་ཌནྟ་གཡོག་པོར་ཡོད་པ་རོང་ངུར་སྨྲིག་ཏུ་རྟ་གསོ་ཡིན་བསྡད་བྲང་ཏི་ལ་ཆོས་གསན་པས་མཁས་པར་གྱུར་ཏེ་སློབ་དཔོན་ཡང་འགྲན་པར་བཟོད་དོ། །ཕྱིས་མྱུར་བར་ཐོས་པ་འཛིན་པའི་དངོས་གྲུབ་ཐོབ་སྟེ་པཎྜི་ཏར་གྱུར་ཏོ། །དེར་གསེར་སྲང་ལྔ་བརྒྱ་རྙེད་དེ་ལོག་ཕྱིན་ནས་རྒྱུན་བཞག་གི་མེ་དང་ཚོགས་ཀྱི་འཁོར་ལོ་ད་ལྟའི་བར་དུ་ཡང་མ་ཆད་པར་ཡོད་དོ། །དུས་ཕྱིས་ཇོ་བོ་ཐང་ཆུང་བ་ལ་ཤ་ཁྲའི་ནད་བྱུང་སྟེ་དེ་ཡང་ཀློག་སྐྱ་བ་དང་གཉིས་ཀྱིས་པདྨའི་རྫིང་བུ་ཅིག་ཏུ་རྐྱལ་བྱས་པས་ལན་ཡང་ཟེར། བོད་དུ་བྱོན་པའི་ཚེ་བདེ་མཆོག་གི་ཐང་སྐུ་ཁྱེར་བ་ལ་དེའི་དུར་ཁྲོད་བརྒྱད་ལ་ཀླུ་བརྒྱད་རིག་མ་དང་བཅས་པ་ཡོད་པ་ཞལ་ཁེབས་ཀྱིས་མ་ཁེབས་པས་སྣོད་མིན་གྱིས་མཐོང་བས་ལན་ཡང་ཟེར་ཏེ། གང་ལྟར་ཡང་སེང་གེ་སྒྲའི་གདོན་དགྲོལ་མཛད་པས་ནད་དེ་ལས་གྲོལ་ལོ། །དེ་ནས་ཕྱིས་རྣལ་འབྱོར་པའི་ཆ་ལུགས་བཟུང་ནས་ཅི་བདེར་སྒྲུབ་པ་བྱེད་ཅིང་ཡོད་པ་ལས་ལན་ཅིག་དེ་ཧི་ཐང་ལ་བསྡད་ཙ་ན། རྒྱལ་པོའི་བཙུན་མོ་ཤིང་ཀུན་ལ་མཆོད་པ་བྱེད་དུ་བྱུང་བ་ལ་ཞྭ་མ་ཕུད་པས་འཁོར་རྣམས་ཀྱིས་བརྡུངས་པས་འགྲོ་མ་ནུས་པས་ཐང་ལ་རོ་བཞིན་དུ་སོང་ངོ་། །དེ་མཚན་མོའི་བར་དུ་ཁྱིམ་དུ་མ་བྱུང་བས་བཙལ་བས་ཐང་སྟོང་ལ་རོ་བཞིན་དུ་འདུག་པས་ཁྱོགས་ལ་བཏེག་སྟེ་འོངས་སོ། །དེར་ཨ་ཐས་པའི་ཞལ་ནས་ཁྱོད་ཀྱང་འཇིག་རྟེན་ཡུལ་ཆོས་དང་འགལ་བ་བྱེད་དོན་མེད་བཙུན་མོའི་འཁོར་རྣམས་ཀྱང་རྣལ་འབྱོར་པ་མི་ཁོངས་སུ་མི་ཚུད་པ་ཡིན་པ་ལ་བརྡུང་དོན་མེད། ད་འདི་ལ་ནུས་པ་མ་བསྟན་ན་བསྟན་པ་ལ་གནོད་གསུངས་ནས། འཇིག་རྟེན་དང་འཇིག་རྟེན་ལས་འདས་པའི་གཏོར་མ་གཉིས་བཤམས་ནས་སྒོ་དམ་པར་བསྡམས་ཏེ་ང་ལ་སུས་ཀྱང་མ་འབོད་ཅིག་གསུངས་ནས་མཉམ་པར་གཞག་གོ །དེ་ནས་བཙུན་མོས་རང་གི་ཁང་པར་ཕྱིན་པ་ན་ལུས་ངག་རེངས་སེམས་སྨྱོ་བར་གྱུར་པས་འཁོར་རྣམས་ཀྱིས་སྔར་གྱི་དེས་ལན་ཟེར་བ་ལ་བརྟེན་ནས་མོས་གུས་བྱས་པས་བདེ་སྟེ། འབྲས་མི་ཁུར་བཞི་བཅུ་དང་། དེའི་ཆ་རྐྱེན་དང་བཅས་ཏེ་བཟོད་པར་གསོལ་བ་ལ་འོངས་པའི་མཚན་ཕྱེད་ན་རྔ་བརྡུང་བ་དང་དུང་འབུད་པ་སོགས་ཐོས་པས་ཐང་ཆུང་བསྐྲག་སྟེ། དེ་རིང་རྒྱལ་པོ་མེད་པས་བརྡུངས་པ་ཙམ་ཡིན། ད་རྒྱལ་པོས་ཐོས་ནས་ང་ལ་ཆད་པ་གཅོད་དུ་འོང་བ་ཡིན་པས་ཨ་ཐས་པ་ཅན་དུ་སྐྱོལ་གསུངས་ཏེ་བསྐྱེལ་བས་ཅི་ཡང་མི་ཡོང་། སྐྲག་མི་དགོས་སོ་གསུང་ངོ་། །དེར་རྒྱལ་པོ་དང་བཙུན་མོ་གཉིས་ཀས་ཞབས་ལ་འཇུས་ཏེ་དེ་གཉིས་ལ་དབང་བསྐུར། བཙུན་མོའི་དོན་དུ་གོ་ཆའི་དཔའ་བོ་དྲུག་གི་སྒྲུབ་ཐབས་དང་བསྟོད་པ་ཞིག་ཀྱང་མཛད། དེ་རྒྱ་གར་དུ་ཁྱེར་བས་སྒྲ་ཚད་པ་ཆེན་པོ་སུས་ཀྱང་སྐྱོན་མ་ཐོགས་ནས་ལན་ཅིག་ན་འཛམ་བུའི་གླིང་ན་ཁོང་ལས་ཆེ་བ་མི་བཞུགས་པར་གྲགས་སོ། །ཡང་བོད་རྣམས་ཀྱིས་ཁོང་དགྱེས་པས་ཕྱི་བའི་ཤ་ཁྱེར་གིན་འགྲོ་བས་ལན་ཅིག་དུས་ཀྱི་མཆོད་པའི་གཏོར་མ་ལ་ཕྱི་བའི་ཤ་ཕུལ་པ་དེ་གཏོར་སྐྱེལ་གྱིས་ཁར་བཅུག་པས་སྨྱོ་སྟེ། ཧ་ཧ་ཧི་ཧི་ཟེར་ཞིང་གཏོར་མ་ལག་པར་བཟུང་སྟེ་ལོག་བྱུང་བ་ལ་བལྟས་པས་ཁ་ན་ཕྱི་བའི་ཤ་འདུག་པ་ཕྱུང་བས་ཤིའོ། །ཡང་དེའི་དུས་སུ་གྲུ་ཤེ་ཤོར་པོ་དང་། འ་ཤ་རྒྱ་གར་བརྩེགས་གཉིས་ཀྱིས་ཕྱིན་ཏེ་ཇོ་བོ་ལ་བདེ་མཆོག་ཞུས་པས་ཇོ་བོ་ན་རེ། ཁྱེད་ང་ལ་དབང་བསྐུར་ཞུས་སློབ་མ་ལ་བཤད་པ་བྱེད་བྱས་པས་དབང་བསྐུར་ཞུ་བ་མ་ནུས་ནས་ཚོགས་བཤད་ལས་མ་མཛད་དོ། །དེར་ཡི་གེ་བཏུ་བའི་དུས་སུ་ཚོགས་འཁོར་བྱས་པའི་སར་ཁོང་གཉིས། སྒྲ་ཙམ་དོན་ལ་མེད་པ་དེ། །བལ་པོ་ཕམ་མཐིང་མ་ཡིན་ནམ། །གླེན་པ་ཁྱོད་ལ་ཅི་བྱར་ཡོད། །ངེད་རང་རྒྱ་གར་ཡུལ་དུ་འགྲོ། །ཞེས་གླུ་བླངས་པས་འཇིག་རྟེན་པའི་གཏོར་མ་ནམ་མཁའ་ལ་འཕར་ཞིང་འདུག་གོ །ཇོ་བོས་འདི་ཅི་ཡིན་གསུངས་པ་ལ་དེར་བལ་པོ་བོད་སྐད་ཤེས་པ་ཅིག་ཡོད་པས་འདི་སྐད་ཟེར་གིན་འདུག་བྱས་པས། བདེན་ཁ་སེང་ངས་དབང་བསྐུར་གྱིས་སློབ་བཤད་བྱེད་བྱས་པ་ལ་ཁྱེད་རང་གི་མ་ནུས་པ་ཡིན་པས་ད་ཁྱེད་རང་སོང་གསུངས་ཏེ། ཕྱིན་པས་གཉིས་ཀ་གངྒཱ་མ་བརྒལ་བར་ཉིན་ཞག་ཕྱེད་ཕྱེད་ཀྱི་ནད་ཀྱིས་བཏབ་ནས་ཤིའོ། །ཡང་བལ་ཡུལ་གྱི་བྱང་ཕྱོགས་དེར་ཙནྟི་ཀའི་སྐུ་རང་བྱུང་གཅིག་བྱུང་། དེ་ལ་རྩིས་མཁན་རྣམས་ན་རེ། འདི་ལ་སྲོག་ཆགས་བྱེ་བ་གཅིག་གི་མཆོད་སྦྱིན་མ་བྱས་ན་ལོ་གསུམ་ནས་བལ་པོའི་ཡུལ་སྟོངས་ནས་འགྲོ་ཟེར་བས་རྒྱལ་པོ་བྲེད་དེ་ཕམ་མཐིང་པ་ལ་ཞུས་པས་སྦྱིན་སྲེག་གི་ཡོ་བྱད་སྐྱོལ་ཅིག་གསུང་། རྒྱལ་པོས་ཏིལ་མི་ཁུར་བཅོ་བརྒྱད་དང་བཅས་པའི་ཚོགས་ཀྱི་འཁོར་ལོ་དང་སྦྱིན་སྲེག་གི་ཡོ་བྱད་བསྐྱལ་ནས་སྦྱིན་སྲེག་མཛད་པའི་དུས་སུ། སྒྲུབ་གཡོག་ཀུན་གྱིས་ཐུན་མོང་དུ་ཐབ་ཀྱི་ནང་ན་ཙནྟི་ཀའི་སྐུ་འདུག་པ་ལ་ཕྱག་ཏུ་ཏིལ་བཞག་པ་རྣམས་འབྲུ་རེ་རེ་ཡང་ར་ལུག་ལ་སོགས་པའི་སྲོག་ཆགས་སུ་སོང་ནས་དེའི་ཁར་སྟེར་བ་མཐོང་སྟེ་ཙནྟི་ཀའི་གནོད་པ་མེད་པར་གྱུར་ཏོ། །གཞན་ཡང་ཚོགས་ཀྱི་དུས་སུ་ཆང་དང་ཤིང་ཐོག་དགུག་ནུས་པ་ལ་སོགས་པ་དམན་པ་དང་འབྲིང་གི་དངོས་གྲུབ་བསམ་གྱིས་མི་ཁྱབ་པ་ཐོབ་པ་ཡིན་ནོ། །དཔལ་ཕམ་འཐིང་པའི་དྲུང་དུ་ཀློག་སྐྱ་ལོ་ཙཱ་བ་ལོ་བཅོ་བརྒྱད་ཀྱི་བར་དུ་བཞུགས་ནས་འཁོར་ལོ་བདེ་མཆོག་གི་ཆོས་སྐོར་ལ་སོགས་པའི་ཆོས་བསམ་གྱིས་མི་ཁྱབ་པ་གསན་ནོ། །དེ་ལ་བླ་ཆེན་མལ་གྱིས་དང་པོར་བདེ་མཆོག་གི་ཆོས་སྐོར་རྣམས་གསན། ཕྱིས་བླ་ཆེན་ཉིད་དཔལ་ཕམ་འཐིང་པ་ཅན་དུ་བྱོན་ཏེ། འཁོར་ལོ་བདེ་མཆོག་གི་ཆོས་སྐོར་རྣམས་གསན་ཅིང་གཞན་ཡང་ནཱ་རོ་པའི་དངོས་སློབ་ཁ་ཆེ་བྱང་ཆུབ་བཟང་པོ་དང་། ཨ་ཐས་པའི་གཅུང་པོ་དུས་འཁོར་བ་དང་། ངག་གི་དབང་ཕྱུག་གཉིས་ཏེ་གསུམ་ཀ་ལས་ནཱ་རོ་པའི་སྐོར་རྣམས་གསན། རིན་ཆེན་རྡོ་རྗེའི་ཆོས་སྐོར་རྣམས་དེའི་དབོན་པོ་མ་ཧཱ་ཛ་ན་ལས་གསན། སྤྱིར་བླ་མ་མལ་གྱིས་བདེ་མཆོག་རྩ་བའི་རྒྱུད་བདུན་ཅུ་རྩ་གསུམ་གསན་ཏེ་ཐམས་ཅད་ལ་ལེའུ་རེ་ལ་ཚོགས་འཁོར་རེ་མཛད་དེ། བླ་མ་འདིས་ཡི་གེ་བདུན་པའི་ལས་ཚོགས་ཐོགས་པ་མེད་པར་གྲུབ་ཅིང་བསྐྱེད་པའི་རིམ་པ་ལ་བརྟན་པ་ཐོབ། སྒྲུབ་པ་ལ་བརྩོན་པས་འགྲོངས་ཁའི་བར་དུ་ཐུན་བཞིའི་རྣལ་འབྱོར་མ་ཆག་པ་མཛད། འགྲོངས་པའི་ཚེ་རྒྱན་དྲུག་བཏགས་ནས་གར་མཛད་ཅིང་ནམ་མཁའ་ལ་སྒྲ་འོད་དང་བཅས་ཏེ་སྐུ་གཤེགས་པ་ཡིན་ནོ། །དེའི་སྤྱན་སྔར་དཔལ་ས་སྐྱ་པ་ཆེན་པོས་གསན་ཏེ། འདིའི་ལོ་རྒྱུས་ནི་འཁོན་སྒྱི་ཆུ་བའི་གཤེགས་བརྫོངས་ལ་ས་ཆེན་གྱིས་ཕེབས་པའི་ཚེ། སྒྱི་ཆུ་བ་མལ་གྱི་སློབ་མ་ཡིན་པས་བདེ་མཆོག་གི་ཕྱག་དཔེ་མང་དུ་འདུག་པ་རྣམས་བསྣམས་ཏེ་གུང་ཐང་ན་ལ་རྩེ་གནས་གསར་དུ་བྱོན་ཏེ་འཁོར་ལོ་བདེ་མཆོག་དང་གཤིན་རྗེའི་གཤེད་ལ་སོགས་པའི་ཆོས་སྐོར་ཅི་རིགས་པ་གསན། ཕྱིས་ས་སྐྱར་ཕེབས་ནས་གསེར་སྲང་བཅུ་བདུན་གྱི་འབུལ་བ་བསྐུར་བས་དམ་ཚིག་པ་ཆེན་པོར་དགོངས་ནས་སླར་ཡང་ཤོག་ཆོས་ཀྱི་ལྷག་མ་ཡོད་གསུངས་པས་ཕྱིས་གུང་ཐང་དུ་ཕེབས་ཏེ་འཁོར་ལོ་བདེ་མཆོག་གཤིན་རྗེའི་གཤེད་དང་། མ་ཧཱ་ཀཱ་ལ། ངན་སོང་སྦྱོང་རྒྱུད་ལ་སོགས་པའི་བླ་ཆེན་མལ་གྱི་ཆོས་ལུགས་རྣམས་རྫོགས་པར་གསན། ནག་པོ་ཆེན་པོའི་སྐུ་འབག་ཀྱང་བརྫོངས་ཏེ་ལུགས་འདིའི་བདག་པོར་གྱུར་པ་ཡིན་ནོ། །གཞན་ཡང་ཇོ་བོ་སུ་མ་ཏི་ཀིརྟིའི་སློབ་མ་པུ་ཧྲངས་ལོ་ཆུང་ལ་ཡང་བདེ་མཆོག་གི་ཆོས་སྐོར་འགའ་ཞིག་གསན་ནོ། །བླ་ཆེན་དེ་ཉིད་ཀྱིས་གདུལ་བྱ་དཔག་ཏུ་མེད་པ་སྨིན་པར་མཛད་པ་ལས་གཙོ་བོར་གྱུར་པ་ནི་རྗེ་བཙུན་སྐུ་མཆེད། གཉན་ཕུལ་བྱུང་བ། རྒྱ་སྒོམ་ཚུལ་ཁྲིམས་གྲགས་ལ་སོགས་པ་རྣམས་ཡིན་ལ་དེ་ནས་རིམ་པ་བཞིན་ཆོས་རྗེ་ཁུ་དབོན། ཞང་དཀོན་མཆོག་དཔལ། རྒྱལ་བ་བྲག་ཕུག་པ། དེ་ལ་བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོ་དང་། མཚུངས་མེད་བློ་གྲོས་བརྟན་པ་གཉིས་ཀྱིས་གསན། དེ་གཉིས་ཆར་ལ་བླ་མ་དཔལ་ལྡན་ཚུལ་ཁྲིམས་པས་གསན། དེ་ལ་རྗེ་བཙུན་དམ་པ་ཡེ་ཤེས་རྒྱལ་མཚན་དཔལ་བཟང་པོས་གསན་ཏེ། འདི་ཉིད་བདེ་བར་གཤེགས་པའི་གསུང་རབ་མདོ་སྔགས་མཐའ་དག་ལ་མི་འཇིགས་པའི་སྤོབས་པ་ཐོབ་ཅིང་འཆད་རྩོད་རྩོམ་གསུམ་གྱི་ཚུལ་ལ་བློ་གྲོས་ཕུལ་དུ་བྱུང་བ་དང་ལྡན་པའི་མཁས་པ་ཆེན་པོར་གྱུར་ཏེ། སྒྲུབ་པ་ལ་བརྩོན་པས་ཡི་དམ་གྱི་ལྷ་མང་པོའི་ཞལ་གཟིགས་པ་དང་། མནལ་ལམ་བཟུང་ནས་སྭ་བ་ན་ཐར་རྣལ་འབྱོར་དབང་ཕྱུག་ལ་ཆོས་གསན་པ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །བླ་མ་དེ་ཉིད་ཀྱི་སྤྱན་སྔར་མགོན་པོ་འཇམ་པའི་དབྱངས་དང་དབྱེར་མ་མཆིས་པ་རྗེ་བཙུན་ཀུན་དགའ་བཟང་པོས་དབང་། མན་ངག རྒྱུད། འགྲེལ་པ་དང་བཅས་པ་རྫོགས་པར་གསན་ཅིང་བླ་མ་དེ་ཉིད་ཀྱི་སྤྱན་སྔར་མཚན་བརྗོད་པར་དཀའ་བ་མཚུངས་མེད་དཀོན་མཆོག་རྒྱལ་མཚན་གྱིས་ཐོག་མར་དཔལ་ལྡན་ས་སྐྱར་བྱོན་ཏེ། སྨིན་བྱེད་ཀྱི་དབང་། རིམ་བཞི་མ་གཏོགས་པའི་བསྐྱེད་རྫོགས་ཀྱི་གདམས་ངག རྒྱུད་ཀྱི་བཤད་བཀའ་དང་བཅས་པ་ཚངས་བར་གསན་ཅིང་ཕྱིས་ཨེ་ཝཾ་ཆོས་ལྡན་དུ་རིམ་པ་བཞི་པ་ཡང་གསན་ནོ། །དཔལ་ས་སྐྱ་པ་ཆེན་པོ་ནས་འདིའི་བར་གྱི་ལོ་རྒྱུས་ཞིབ་པར་ནི་ལམ་འབྲས་བླ་མ་བརྒྱུད་པའི་རྣམ་ཐར་རྒྱས་པ་བཞིན་དུ་ཤེས་པར་བྱས་ལ། འདིར་བཤད་པའི་དོན་ཚན་དྲུག་པོ་ནི་གསང་མཐའི་ལུགས་ཀྱི་རྒྱུད་འཆད་པ་དང་བསྐྱེད་རྫོགས་ཀྱི་མན་ངག་འཆད་པ་ཐམས་ཅད་ཀྱི་ཐོག་མར་སྦྱར་ཏེ། དེ་ནས་རང་རང་གི་དོན་བཤད་པའི་སྒོ་ནས་སྐལ་ལྡན་གྱི་ཡིད་ལ་ཁྱབ་པར་བྱའོ། །མ་ཡི་མར་གྱུར་ཤེས་རབ་མ་ཡི་རྒྱུད། །གསང་བའི་གསང་བ་རྣལ་འབྱོར་གསང་མཐའ་ཡི། །དམ་པའི་དམ་ཆོས་བྱུང་ཚུལ་དམ་པ་ཡི། །རྣམ་ཐར་རྣམ་པར་སྤེལ་བའི་རྣམ་བཤད་འདི། །བླ་མའི་གསུང་དང་ཚད་ལྡན་གཞུང་རྣམས་ལ། །བརྟེན་ནས་བསོད་ནམས་སེང་གེས་ལེགས་པར་སྦྱར། །དགེ་ཚོགས་ཟླ་ལྟར་དཀར་བ་གང་ཐོབ་དེས། །མཁའ་མཉམ་འགྲོ་བས་བྱང་ཆུབ་ཐོབ་ཕྱིར་བསྔོ། །བདག་ཀྱང་ཚེ་འདིའི་སྣང་བ་ནུབ་མ་ཐག །རྒྱལ་བ་ཀུན་གྱིས་བསྔགས་པའི་ཞིང་མཆོག་དེར། །པདྨའི་སྙིང་པོར་བརྫུས་ཏེ་སྐྱེས་ནས་ཀྱང་། །འོད་དཔག་མེད་པ་མངོན་སུམ་མཐོང་བར་ཤོག །མངྒ་ལཾ་བྷ་ཝནྟུ་ཤུ་བྷཾ།། ༈ །རྒྱལ་བ་ཀུན་གྱི་གསང་ཆེན་མཛོད། །བླ་མེད་རྡོ་རྗེ་ཐེག་པ་ཡི། །བསྟེན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

དཔལ་འཁོར་ལོ་བདེ་མཆོག་ལཱུ་ནག་གཉིས་ཀྱི་སྒྲུབ་ཐབས་མངལ་སྒོང་སྦྱོང་བའི་ཚུལ།

དཔལ་འཁོར་ལོ་བདེ་མཆོག་ལཱུ་ནག་གཉིས་ཀྱི་སྒྲུབ་ཐབས་མངལ་སྒོང་སྦྱོང་བའི་ཚུལ་བཞུགས་སོ།། ན་མོ་གུ་རུ། ཤྲཱི་ཙཀྲ་སཾ་བྷ་ར་མཎྜ་ལེ་བྷྱ། སྔགས་དང་ཞིང་དང་ལྷན་ཅིག་སྐྱེས་པ་ཡི། །སྣང་བའི་འཁོར་ལོ་སྐུ་གསུམ་ངོ་བོར་ནི། །ལེགས་པར་སྡོམ་པའི་བདེ་བ་མཆོག་བརྙེས་པ། །བླ་མ་འཁོར་ལོའི་དབང་ཕྱུག་ལ་བཏུད་ནས། །གང་དེའི་སྒྲུབ་ཐབས་མངལ་སྒོང་སྦྱོང་བའི་ཚུལ། །གྲུབ་པའི་དབང་ཕྱུག་ཟུང་གིས་བཀྲལ་པའི་ལམ། །འཁྲུལ་མེད་བརྒྱུད་པའི་མན་ངག་ལ་བརྟེན་ནས། །དང་པོའི་ལས་ཅན་དོན་དུ་གསལ་བར་བྲི། །དེ་ལ་ཐོག་མར་གྲུབ་པའི་དབང་ཕྱུག་ལཱུ་ཧི་པས་མཛད་པའི་སྒོང་སྐྱེས་སྦྱོང་བྱེད་ཀྱི་མངོན་པར་རྟོགས་པ་ལ་བཞི་སྟེ། མཉམ་པར་བཞག་པའི་དང་། སྤྱོད་ལམ་གྱི་དང་། གཏོར་མའི་དང་། ཁ་ཟས་ཀྱི་རྣལ་འབྱོར་རོ། །དང་པོ་ལ་གཉིས། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་རྒྱས་འབྲིང་བསྡུས་པ་གསུམ་ཡོད་པ་ལས། འདིར་རྒྱས་པའི་དབང་དུ་བྱས་པ་ལ་གཉིས། རྒྱུ་ཚོགས་གཉིས་བསག་པ་དང་། འབྲས་བུ་ལྷར་བསྐྱེད་པའོ། །དང་པོ་ལ་གཉིས། བསོད་ནམས་ཀྱི་ཚོགས་འཁོར་དང་བཅས་པ་དང་། དོན་ཆེན་པོ་ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི། སོག་པར་འགྱུར་བའི་དགེ་བའི་རྩ་བ་ཐམས་ཅད་གཞན་དོན་དུ་འགྱུར་བར་བྱ་བའི་ཕྱིར་ཚངས་པའི་གནས་བཞི་བསྒོམ་པ་དང་། ཚོགས་གསོག་པ་ལ་རྟེན་ཁྱད་པར་ཅན་ཞིག་དགོས་པས་ཕུང་ཁམས་དང་སྐྱེ་མཆེད་གཞི་སྦྱང་བསྒྱུར་དང་། ཚོགས་བསག་དངོས་དང་འབྲེལ་བས་ཚོགས་བསག་བཅུ་གསུམ་གྱིས་ཚོགས་བསག་པ་དང་། དོན་ཆེན་པོ་ཡེ་ཤེས་ཀྱི་ཚོགས་ལ་བར་ཆད་མི་འབྱུང་བའི་ཕྱིར་སྲུང་བའི་འཁོར་ལོ་བསྒོམ་པའོ། །དང་པོ་ནི། མདང་ནུབ་མོ་རྡོ་རྗེ་སེམས་དཔའ་བསྡུ་བའི་རྫོགས་རིམ་གྱི་ངང་ལ་ཉལ། ནངས་པར་ལྡང་བའི་ཚེ་ནམ་མཁའ་ནས་ཌཱ་མ་རུའི་སྒྲ་ཀ་ར་ཀ་ར་ལ་སོགས་པ་དཔའ་བོ་ཉེར་བཞིའི་སྔགས་སུ་གྲགས་པས་གཉིད་བསླངས་ནས། རང་སྐད་ཅིག་གིས་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་དང་མཉམ་པར་སྦྱོར་བའི་སྐུ་ཅན་དུ་བསྒོམས་པ་ནི་ལུས་ལྷར་བྱིན་གྱིས་བརླབ་པ་སྐུའི་དགའ་བ་ཡིན་ལ། ཐུན་གཞན་ལ་ནི་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་སྔོན་དུ་སོང་ནས་སྐུའི་དགའ་བ་ལ་འཇུག་གོ །དེ་ནས་ངག་ཏུ། ཤྲཱི་ཧེ་རུ་ཀ་ཨ་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བརྗོད་པ་ནི་ངག་སྔགས་སུ་བྱིན་གྱིས་བརླབ་པ་གསུང་གི་དགའ་བའོ། །དེ་ནས་རང་གི་སྙིང་ཁར་ཨ་དཀར་པོ་རྣམ་པར་མི་རྟོག་པའི་ཡེ་ཤེས་ལས་བྱུང་བའི་ཟླ་བའི་དཀྱིལ་འཁོར་དག་པ་འཇིག་རྟེན་པའི་ཡེ་ཤེས་ཀྱི་ངོ་བོའི་སྟེང་དུ་གཟུང་འཛིན་དང་བྲལ་བའི་སེམས་ཧཱུྃ་དུ་གྱུར་པའི་ཞབས་ཀྱུ་བྱ་བ་གྲུབ་པ། ཁོག་པ་སོ་སོར་རྟོག་པ། མགོ་མཉམ་པ་ཉིད། ཟླ་ཚེས་མེ་ལོང་ལྟ་བུ། ཐིག་ལེ་ཆོས་ཀྱི་དབྱིངས་ཀྱི་ཡེ་ཤེས་སུ་བསྒོམ་པ་ནི་སེམས་ཡེ་ཤེས་ལྔར་བྱིན་གྱིས་བརླབ་པ་ཐུགས་ཀྱི་དགའ་བའོ། །རྗེ་བཙུན་གྱིས་འདི་ཡན་ཆད་ལྡང་བའི་རྣལ་འབྱོར་དུ་བྱས་ནས། སྐབས་འདིར་བསམ་གཏན་གྱི་གྲོགས་སུ་འགྲོ་ན་ཁྲུས་བྱ། སྟན་བདེ་བ་ལ་བསྡད་ནས་བདུད་རྩི་རིལ་བུ་མྱང་བར་གསུངས་ལ། ཕྱག་ལེན་ལ་དྲིལ་བུ་པ་ལྟར་སྐུའི་དགའ་བའི་རྗེས་སུ་ཡོད་ན་བདུད་རྩི་རིལ་བུ་མྱང་། མེད་ན་ཆང་བདུད་རྩིར་བྱིན་གྱིས་བརླབས་ལ་མྱང་། དེའང་མེད་ན་འོག་གཏོར་མའི་སྐབས་ལྟར་བྱིན་གྱིས་བརླབས་ནས་མྱང་བར་བསམ་ལ་གསུང་གི་དགའ་བ་ལ་འཇུག་པར་གསུངས་སོ། །དེ་ནས་སྙིང་ཁའི་ཧཱུྃ་ལས་འོད་ཟེར་སྔོན་པོ་བྱུང་སྟེ། རྩ་བའི་ཞལ་སྔོན་པོ་ནས་ཕར་སོང་དང་པོ་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཁྱབ། དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ། འགྲོ་བ་རིགས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་པར་བསྒོམས་ལ། སླར་འོད་ཟེར་ཧཱུྃ་ལ་བསྡུས་ལ་བཞག་སྟེ་ཐུགས་ཀྱིས་བྱིན་གྱིས་བརླབ་པའོ། །ངག་དུ་སུ་ཁེ་བྷ་ཝན་ཏུ། ཞེས་བརྗོད་དེ་གསུང་གིས་བྱིན་གྱིས་བརླབ་པའོ། །ལུས་ཀྱིས་གཡོན་པའི་བསྡིགས་མཛུབ་ཕྱོགས་བཅུར་བསྐོར་ཞིང་སེ་གོལ་བརྡབ་སྟེ་སྐུ་ཡིས་བྱིན་གྱིས་བརླབ་པའོ། །ཡང་སྙིང་ཁའི་ཧཱུྃ་ལས་འོད་ཟེར་ལྗང་ཁུ་བྱུང་སྟེ་གཡོན་ཞལ་ལྗང་ཁུ་ནས་ཕར་སོང་། དང་པོར་བྱང་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཁྱབ་དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ་འགྲོ་བ་རིགས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་པར་བསམས་ལ་འོད་ཟེར་སླར་བསྡུ་བ་དང་བྱིན་བརླབ་གཞན་གཉིས་ནི་འདྲའོ། །ཡང་སྙིང་ཁའི་ཧཱུྃ་ལས་འོད་ཟེར་དམར་པོ་བྱུང་སྟེ་རྒྱབ་ཞལ་དམར་པོ་ནས་ཕར་སོང་དང་པོར་ནུབ་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཁྱབ། དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ། འགྲོ་བ་རིས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་ལྡན་པའི་དགའ་བ་ཁྱད་པར་ཅན་དང་ལྡན་པར་གྱུར་པར་བསམ་པ་སོགས་འདྲའོ། །ཡང་སྙིང་ཁའི་ཧཱུྃ་ལས་འོད་ཟེར་སེར་པོ་བྱུང་སྟེ་གཡས་ཞལ་སེར་པོ་ནས་ཕར་སོང་དང་པོར་ལྷོ་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཁྱབ། དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ་འགྲོ་བ་རིགས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་པར་བསམ་པ་སོགས་འདྲ་ལ་སྔགས་དང་ཕྱག་རྒྱ་རྣམས་ནི་ལན་གསུམ་གསུམ་བྱའོ། །གཉིས་པ་ནི། སླར་ཡང་ཐུགས་ཁའི་ཧཱུྃ་ལས་འོད་འཕྲོས་པས་བདག་གི་ལུས་ཐམས་ཅད་གང་བས་བདག་ཉིད་ཀྱི་ཚེ་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་དག་པར་བསྒོམ་པ་ནི་བདག་གི་གཞི་སྦྱང་བ་ཡིན་ལ་དེ་ནས་འོད་ཟེར་རྣམས་བ་སྤུའི་བུ་ག་ནས་ཕྱིར་འཕྲོས་པས་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་བག་ཆགས་དང་བཅས་པ་སྦྱངས་པར་བསྒོམ་པ་ནི་གཞན་གྱི་གཞི་སྦྱང་བ་ཡིན་ལ། དེ་ནས་ཐམས་ཅད་ཀྱང་འཁོར་ལོ་བདེ་མཆོག་ཏུ་གྱུར་པར་བསྒོམ་པ་ནི་སྔོན་ལ་གཞན་གྱི་གཞི་བསྒྱུར་བའོ། །དེ་ནས་བདག་གི་གཞི་བསྒྱུར་བ་ནི། དེ་རྣམས་འོད་ཟེར་གྱི་རྣམ་པར་བསྡུས་ཏེ་བདག་གི་བ་སྤུའི་བུ་ག་ནས་ཞུགས་པས་ཕུང་ཁམས་སྐྱེ་མཆེད་ལྷའི་ང་རྒྱལ་དུ་བྱས་ཏེ། དེ་ཡང་རང་གི་གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བ་རྡོ་རྗེ་ཉི་མ། འདུ་ཤེས་པདྨ་གར་གྱི་དབང་ཕྱུག འདུ་བྱེད་རྡོ་རྗེ་རྒྱལ་པོ། རྣམ་པར་ཤེས་པ་རྡོ་རྗེ་སེམས་དཔའ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་དུ་གྱུར་པ་ནི་དཔལ་ཧེ་རུ་ཀ མིག་གཏི་མུག་རྡོ་རྗེ། རྣ་བ་ཞེ་སྡང་རྡོ་རྗེ། སྣ་སེར་སྣ་རྡོ་རྗེ། ཁ་འདོད་ཆགས་རྡོ་རྗེ། ལུས་ཕྲག་དོག་རྡོ་རྗེ། སྐྱེ་མཆེད་ཐམས་ཅད་དབང་ཕྱུག་རྡོ་རྗེ། སའི་ཁམས་ལྟུང་བར་བྱེད་མ། ཆུའི་ཁམས་གསོད་པར་བྱེད་མ། མེའི་ཁམས་འགུགས་པར་བྱེད་མ། རླུང་གི་ཁམས་གར་གྱི་དབང་ཕྱུག ནམ་མཁའི་ཁམས་པདྨ་དྲྭ་བ་ཅན་དུ་གྱུར་པར་བསམ་མོ། །གསུམ་པ་ལ་བཅུ་གསུམ་ལས། དང་པོ་ཕྱག་འཚལ་བ་ནི། སླར་ཡང་སྙིང་ཁའི་ཧཱུྃ་ལས་འོད་ཟེར་འཕྲོས་པས་མདུན་གྱི་ནམ་མཁར་སྟེང་གི་ཆ་ལ་རྩ་བའི་བླ་མ་རྡོ་རྗེ་ཆོས་ཀྱི་རྣམ་པ་ཅན་སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པ་ལ་ཕྱག་ན་རྡོ་རྗེ་ལ་སོགས་པ་བརྒྱུད་པའི་བླ་མ་ཐམས་ཅད་ཀྱིས་བསྐོར་བ་དང་། འོག་གི་ཆ་ལ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲང་ངོ་། །དེ་ནས་ན་མོ་གུ་རུ་བྷྱཿ ཞེས་པས་བླ་མ་དང་། ན་མ་ཤྲཱི་ཙཀྲ་སཾ་བཱ་ར་མཎྜ་ལ་བྷྱཿ ཞེས་པས་དཀྱིལ་འཁོར་ལ་ཕྱག་བྱའོ། །གཉིས་པ་མཆོད་པ་དབུལ་བ་ནི། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བཱ་ར་མཎྜ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཡེ་སྭཱ་ཧཱས་མཆོད་ཡོན་ཕུལ། དེ་བཞིན་དུ་པཱ་དྱཾ་པྲ་ཏཱིཙྪ་སྭཱ་ཧཱས་ཞབས་བསིལ། བཛྲ་པུཥྤེ་ཨཱཿཧཱུྃ་གིས་མེ་ཏོག བཛྲ་དྷཱུ་པེ་ཨཱཿཧཱུྃ་གིས་བདུག་སྦོས། བཛྲ་ཨཱ་ལོ་ཀེ་ཨཱཿཧཱུྃ་གིས་མར་མེ། བཛྲ་གནྡྷེ་ཨཱཿཧཱུྃ་གིས་དྲི་ཆབ། བཛྲ་ནཻ་ཝི་དྱ་ཨཱཿཧཱུྃ་གིས་ཞལ་ཟས། བཛྲ་ཤབྡ་ཨཱཿཧཱུྃ་གིས་རོལ་མོ་དབུལ་ལོ། །དེ་ནས་དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ལ། ན་མོ་ཆོས་ཀྱི་དབྱིངས་ཀྱི་བྱིན་གྱིས་རླབས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་གྱིས་རླབས་དང་། གསང་སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་། ཏིང་ངེ་འཛིན་དང་། སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་འཁོར་ལོའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག ཅེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིད་པཱུ་ར་པཱུ་ར་སུ་ར་སུ་ར། ཨཱ་ཝརྟ་ཡ་ཨཱ་ཝརྟ་ཡ་ཧོ། ན་མཿས་མནྟ་བུདྡྷ་ནཾ། ཨ་བྷི་སྨ་ར་ཡེ་སྥ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཾ། སརྦ་ཏ་ཐཱ་ག་ཏ་ཨ་པ་རི་ཤ་དྷ་ཡེ། མཎྜ་ལེ་མ་མ་པྲ་ཎི་དྷི། པུཎྱ་ཛྙ་ན་བ་ལེན། སརྦ་ཏ་ཐཱ་ག་ཏ་བ་ལེན་དྷ་བནྡྷ་སསྡྱཱ་ན་ལེན་ན་ཙ་ཡེ་སྭཱ་ཧཱ། ཞེས་བརྗོད་ནས་ཕྱག་རྒྱ་བཀྲོལ་ཏེ་སེ་གོལ་ལན་གཉིས་བརྡབ་པར་བྱའོ། །གསུམ་པ་སྡིག་པ་བཤགས་པ་ནི། བདག་གི་ཚེ་ཐོག་མ་མེད་པ་ནས་འདོད་ཆགས་དང་ཞེ་སྡང་དང་། གཏི་མུག་གི་དབང་གིས་ལུས་དང་། ངག་དང་། ཡིད་ཀྱི་སྒོ་ནས་སྡིག་པའི་ལས་བགྱིས་པ་དང་། བགྱིད་དུ་བསྩལ་བ་དང་། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་བླ་མ་དང་དཀྱིལ་འཁོར་གྱི་སྤྱན་སྔར་སོ་སོར་བཤགས་ཤིང་ཡང་མི་བགྱིད་དོ། །བཞི་པ་སྐྱབས་སུ་འགྲོ་བ་ནི། བདག་མིང་འདི་ཞེས་བགྱི་བས་དུས་འདི་ནས་བཟུང་ནས་ཇི་སྲིད་འཁོར་ལོ་བདེ་མཆོག་གི་གོ་འཕང་མ་ཐོབ་ཀྱི་བར་དུ་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུལ་ལ་སྐྱབས་སུ་མཆིའོ། །ལྔ་པ་སྡོམ་པ་བཟུང་བ་ནི། བདག་གིས་དཔལ་འཁོར་ལོ་བདེ་མཆོག་གི་དམ་ཚིག་དང་སྡོམ་པའི་ཚོགས་ཐམས་ཅད་བླང་ཞིང་བསྐྱང་བར་བགྱིའོ། །དྲུག་པ་རྗེས་སུ་ཡིད་རང་བ་ནི། སོ་སོ་སྐྱེ་བོ་དང་འཕགས་པ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་དགེ་བའི་རྩ་བ་ཐམས་ཅད་ལ་དགའ་ཞིང་རྗེས་སུ་ཡི་རང་བར་བགྱིའོ། །བདུན་པ་སེམས་བསྐྱེད་པ་ནི། བདག་གི་སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱིའོ། །བརྒྱད་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི། ཕྱོགས་བཅུའི་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བར་མི་མཛད་པ་དེ་དག་ཐམས་ཅད་ལ་ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །དགུ་པ་མྱ་ངན་ལས་མི་འདའ་བར་གསོལ་བ་གདབ་པ་ནི། ཕྱོགས་བཅུའི་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་བཞེད་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་གསོལ་བ་འདེབས་སོ། །བཅུ་པ་ལམ་ལ་གནས་པ་ནི། བདག་གིས་དཔལ་འཁོར་ལོ་བདེ་མཆོག་གི་ལམ་རིམ་པ་གཉིས་ལ་ཡང་དག་པར་གནས་པར་བགྱིའོ། །བཅུ་གཅིག་པ་དགེ་བའི་རྩ་བ་བསྔོ་བ་ནི། བདག་གི་དེ་ལྟར་བགྱིས་པའི་དགེ་བའི་རྩ་བ་དེ་དག་གིས་བདག་དང་སེམས་ཅན་ཐམས་ཅད་ཀྱིས་འཁོར་ལོ་བདེ་མཆོག་གི་གོ་འཕང་མྱུར་དུ་ཐོབ་པར་གྱུར་ཅིག བཅུ་གཉིས་པ་གནང་བ་ནོད་པ་ནི་ཚོགས་ཞིང་དེ་དག་གི་ཞལ་ནས། རིགས་ཀྱི་བུ་ཁྱོད་ཀྱིས་གནས་པ་འདི་ནི་ལེགས་པར་གནས་པ་ཡིན་གྱི་གནས་པ་འདིས་གནས་ན་མཆོག་འགྲུབ་པར་འགྱུར་རོ་ཞེས་གསུང་བར་བསམ་མོ། །བཅུ་གསུམ་པ་གཤེགས་སུ་གསོལ་བ་ནི། ཨོཾ་བཛྲ་པུཥྤེ་ཨཱཿཧཱུྃ། ཞེས་སོགས་མཆོད་པ་ལྔས་མཆོད་ལ། ཨོཾ་བཛྲ་མུཿཞེས་པས་གཤེགས་སུ་གསོལ་ལོ། །བཞི་པ་ལ་གསུམ་སྟེ། ས་ཕྱོགས་བགེགས་དང་བྲལ་བར་བྱ་བ། སྲུང་བའི་འཁོར་ལོ་བརྟན་པར་བྱ་བ། བགེགས་ཚར་བཅད་པའོ། །དང་པོ་ནི། རང་གི་སྙིང་ཁའི་ཧཱུྃ་ལས་ཤར་དུ་ཁྭ་གདོང་མ་སྔོན་མོ། སྟེང་དུ་ཁཎྜ་རོ་ཧི་དམར་མོ། བྱང་དུ་འུག་གདོང་མ་ལྗང་ཁུ། ནུབ་ཏུ་ཁྱི་གདོང་མ་དམར་མོ། འོག་ཏུ་ཁཎྜ་རོ་ཧི་དམར་མོ། ལྷོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ། གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར། གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར། གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་། གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་བཞི་མ་གཡས་ཌཱ་མ་རུ་དང་གྲི་གུག གཡོན་ཁ་ཊྭཱཾ་ག་དང་ཐོད་པ་འཛིན་པ། དྲག་མོ་ཤིན་ཏུ་ཁྲོས་པའི་གཟུགས་ཅན་རྣམས་སྤྲོས་ཏེ་བགེགས་ཚར་བཅད་པའི་ལས་མཛད་པར་བསམས་ལ། ལུས་ཀྱིས་གཡོན་པའི་སྡིགས་མཛུབ་ཕྱོགས་བཅུར་བསྐོར་ཞིང་ཕྱོགས་དེ་དང་དེར་སེ་གོལ་བརྡབས་ཏེ་དེ་ཡང་། ཨོཾ་སུམྦྷ་ཞེས་པས་ཤར་དང་། ནི་སུམྦྷ་ཧཱུྃ་ཧཱུྃ་ཕཊ་ཞེས་པས་སྟེང་དང་། ཨོཾ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ་ཞེས་པས་བྱང་དང་། ཨོཾ་གྲྀཧྣ་པ་ཡ་ཞེས་པས་ནུབ་དང་། གྲྀཧྣ་པ་ཡ་ཧཱུྃ་ཧཱུྃ་ཕཊ་ཞེས་པས་འོག་དང་། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་རཱ་ཛ་ཧཱུྃ་ཧཱུྃ་ཕཊ་ཞེས་པས་ལྷོར་སེ་གོལ་བརྡབ། དེ་བཞིན་དུ་ཤར་ལྷོ་ནས་བརྩམས་ཏེ་སྔགས་ཚན་པ་བཞི་རིམ་པ་བཞིན་བརྗོད་ཅིང་སེ་གོལ་བརྡབས་ཏེ། སེམས་ཀྱིས་ཕོ་ཉ་སྤྲོ་བ་དང་། ངག་དུ་སྔགས་བརྗོད་པ་དང་། ལུས་ཀྱིས་སེ་གོལ་བརྡབ་པ་གསུམ་དུས་མཉམ་པར་བྱའོ། །གཉིས་པ་ནི། ས་ཕྱོགས་དེར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ། ཤར་གྱི་རྭ་སྔོ་བ། ལྷོ་སེར། ནུབ་དམར། བྱང་ལྗང་བ། ལྟེ་བ་ལ་ཧཱུྃ་གིས་མཚན་པ་ལས་འོད་འཕྲོས་པས་འོག་ཐམས་ཅད་རྡོ་རྗེའི་ས་གཞིར་གྱུར་པར་བསྒོམས་ལ་ངག་ཏུ། ཨོྃ་མེ་དཱི་ནི་བཛྲཱི་བྷ་ཝ་བནྡྷ་ཧཱུྃ་ཧཱུྃ་ཕཊ་ཞེས་པས་བྱིན་གྱིས་བརླབ། ཡང་འོད་ཟེར་ཁོར་ཡུག་དུ་འཕྲོས་པས་རྡོ་རྗེ་ནག་པོ་གདེངས་པ་འགྲེང་བུར་གྱུར་པའི་རྭ་བ་དང་། རྡོ་རྗེ་འཕྲེད་ལ་སོང་བའི་དྲྭ་བར་གྱུར་པར་བསྒོམས་ལ། ངག་དུ་ཨོཾ་བཛྲ་པྲ་ཀ་ར་ཧཱུྃ་བྃ་ཧཱུྃ། ཞེས་པས་བྱིན་གྱིས་བརླབ། ཡང་འོད་ཟེར་སྟེང་དུ་འཕྲོས་པས་རྡོ་རྗེའི་རྭ་བ་དང་དྲྭ་བའི་ནང་དུ་རྡོ་རྗེའི་གུར་དུ་གྱུར་པར་བསྒོམས་ལ། ངག་དུ་ཨོཾ་བཛྲ་པཉྩ་ར་ཧཱུྃ་ཡཾ་ཧཱུྃ། ཞེས་པས་བྱིན་གྱིས་བརླབ། ཡང་དེའི་འོག་དུ་རྡོ་རྗེའི་བླ་རེར་གྱུར་པར་བསྒོམས་ལ། ངག་ཏུ། ཨོཾ་བཛྲ་བཱི་ཏ་ན་ཧཱུྃ་ཁཾ་ཧཱུྃ། ཞེས་པས་བྱིན་གྱིས་བརླབ། ཡང་འོད་ཟེར་ཕྱིར་འཕྲོས་པས་དེ་དག་གི་ཕྱི་རོལ་དུ་མདའི་དྲྭ་བ་མདའ་རྩེ་བསྣོལ་བ་ཕྱིར་བསྟན་པ་སྲིད་པའི་རྩེ་མོ་ལ་ཐུག་པར་གྱུར་པར་བསྒོམས་ལ་ངག་ཏུ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཞེས་པས་བྱིན་གྱིས་བརླབ། ཡང་འོད་ཟེར་ཕྱིར་འཕྲོས་པས་དེ་དག་གི་ཕྱི་རོལ་དུ་བསྐལ་པའི་མེ་ལྟ་བུའི་མེ་རི་རབ་དུ་འབར་བར་གྱུར་པར་བསྒོམས་ལ། ངག་དུ་ཨོཾ་བཛྲ་ཛྭ་ལ་ཨ་ན་ལཱ་ཀ་ཧཱུྃ་རཾ་ཧཱུྃ། ཞེས་པས་བྱིན་གྱིས་བརླབས་ཏེ་སྔགས་དེ་དག་ལན་གསུམ་གསུམ་བརྗོད་ཅིང་དེའི་ཚེ་གཡོན་པའི་སྡིགས་མཛུབ་ཕྱོགས་བཅུར་བསྐོར་ནས་སེ་གོལ་བརྡབ་པར་བྱའོ། །གསུམ་པ་ནི། སྔར་གྱི་ཕོ་ཉ་རྣམས་ཀྱིས་བགེགས་ཁ་ཅིག་ནི་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ལ་བཀོད། ནག་པོའི་རིགས་ཁ་ཅིག་བསྒྲལ་ཏེ་བདེ་བ་ཅན་ལ་སོགས་པའི་ཞིང་དུ་གནས་སྤར། བགེགས་ཀྱི་གཙོ་བོ་ཕྱོགས་སྐྱོང་བཅུ་ནི་བཀུག་སྟེ་འོངས་ནས་མེ་རིའི་ནང་རྡོ་རྗེ་རྭ་བའི་ཕྱི་རོལ་མདའི་དྲྭ་བའི་འོག་ནས་འོབས་ཀྱི་ཁ་ཁྱེར་ལ་བཀོད་པར་བསམས་ལ། བདག་གི་སྙིང་ཁ་ནས་ཕུར་བུ་བཅུ་སྤྲོས་ཏེ། ཕོ་ཉ་རྣམས་ཀྱི་ལག་ཏུ་གཏད་པས་ཕྱོགས་སྐྱོང་བཅུའི་སྤྱི་བོར་བཏབ་པར་བསམས་ལ། ངག་དུ་ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཧཱུྃ་ཕཊ་བཛྲ་ཀཱི་ལ་ཡ་བཛྲ་དྷ་རཨཱ་ཛྙཱ་པ་ཡ་ཏི་སརྦ་བིགྷན་ན་ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཞེས་བརྗོད་དེ་ལུས་ཀྱིས་ཕུར་བུ་བསྒྲིལ་བའི་ཚུལ་བྱ། ཡང་བདག་གི་སྙིང་ཁ་ནས་ཐོ་བ་བཅུ་སྤྲོས་ཏེ་ཕོ་ཉ་རྣམས་ཀྱི་ལག་པ་གཡས་པར་གཏད་པར་བསམས་ལ་ངག་ཏུ། ཨོཾ་བཛྲ་མུད་ཀཱ་ར་བཛྲ་ཀཱི་ལ་ཡ་ཨ་ཀོ་ཌ་ཡ་ཧཱུྃ་ཕཊ། ཞེས་བརྗོད་དེ་ཕུར་བུས་སྤྱི་བོ་ནས་བརྡུངས་པར་བསམ། དེ་ནས་དེ་དག་གི་རྣམ་པར་ཤེས་པ་མི་བསྐྱོད་པའི་ཞིང་དུ་སྐྱེ་བར་གྱུར་ཅིག ཅེས་བརྗོད་དེ་རོ་རྣམས་འོབས་ཀྱི་ནང་དུ་བསྐྱུར་བར་བསམ་མོ། །དེ་ནས་ཕོ་ཉ་རྣམས་ལས་རང་དང་འདྲ་བའི་སྤྲུལ་པ་དཔག་ཏུ་མེད་པ་སྤྲུལ་ཏེ་མཚོན་ཆ་སྣ་ཚོགས་ཐོགས་ནས་རྡོ་རྗེའི་དྲྭ་མིག་ནས་རོ་སྟོད་འཐོན་ཏེ་སྒྲུབ་པ་པོས་ཇི་སྲིད་བྱང་ཆུབ་མ་ཐོབ་ཀྱི་བར་དུ་བར་ཆད་བསྲུང་བར་བསམ། གཉིས་པ་དོན་ཆེན་པོ་ཡེ་ཤེས་ཀྱི་ཚོགས་ནི་ཕྱི་ནང་གི་ཆོས་ཐམས་ཅད་སྒྱུ་མ་ཙམ་དུ་བསྒོམས་ལ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་པས་བྱིན་གྱིས་བརླབ། སྒྱུ་མ་ཡང་མི་དམིགས་ཏེ་སྟོང་པ་ཉིད་དུ་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་བྱིན་གྱིས་བརླབ་བོ། །གཉིས་པ་དངོས་གཞི་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་བཞི་སྟེ། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ། གོ་ཆ་བཅིང་བ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའོ། །དང་པོ་ལ་གཉིས་ཏེ། ཕྱིའི་དཀྱིལ་འཁོར་དག་པ་དང་བཅས་པ་བསྒོམ་པ། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་པ་བསྒོམ་པའོ། །དང་པོ་ནི། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་གཞུ་བདུངས་པ་ལྟ་བུ་བ་དན་གྱི་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་གྲུ་བཞི་སེར་པོ་གྲྭ་བཞིར་རྡོ་རྗེ་རྩེ་གསུམ་པས་མཚན་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ། ཤར་ཤེལ། ལྷོ་བཻ་ཌཱུརྻ། ནུབ་པདྨ་རཱ་ག བྱང་གསེར་གྱི་རང་བཞིན་ཅན། གྲུ་བཞི་པ། ཅོག་བརྒྱད་དང་ལྡན་པ། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ། ཤར་སྔོ། ལྷོ་སེར། ནུབ་དམར། བྱང་ལྗང་བའི་སྟེང་དུ་པཾ་ལས་སྣ་ཚོགས་པདྨ་འདབ་མ་བརྒྱད་པའི་དབུས་སུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་གཡོན་སྐོར་གྱིས་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས་སུ་མོས་པ་བྱའོ། །དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ་གཡས་སྐོར་གྱིས་ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་བརྗོད། ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས་སུ་མོས་པར་བྱའོ། །དེ་གཉིས་ཀྱི་བར་དུ་ཧཱུྃ་དཀར་པོ་སོ་སོར་རྟོག་པའི་ཡེ་ཤེས་སུ་མོས་པ་བྱ། ཉི་མའི་མཐོ་གང་ཙམ་གྱིས་མ་རེག་པར། སྟེང་དུ་ཐ་མལ་པའི་ལུས་ངག་ཡིད་གསུམ་གྱི་ངོ་བོ་ཨོཾ་ཨཱཿཧཱུྃ་ཡུམ་གྱི་མཁའ་དག་པའི་ངོ་བོ་པདྨ། ཡབ་ཀྱི་བྱང་ཆུབ་སེམས་ཀྱི་ངོ་བོ་ཟླ་བ། སེམས་ཀྱི་རང་བཞིན་འོད་གསལ་བའི་ངོ་བོ་ཧཱུྃ་ཡིག་རྣམས་སྟེང་ནས་སྟེང་དུ་བརྩེགས་པའི་ཨོཾ་ཨཱཿལ་ཐིམ། ཨཿཧཱུྃ་ལ་ཐིམ། ཧཱུྃ་པདྨ་ལ་ཐིམ། པདྨ་ཟླ་བ་ལ་ཐིམ། ཟླ་བ་ཧཱུྃ་གི་ཞབས་ཀྱུ་ལ་ཐིམ། ཞབས་ཀྱུ་ཁོག་པ་ལ་ཐིམ། ཁོག་པ་མགོ་བོ་ལ་ཐིམ། མགོ་ཟླ་ཚེས་ལ་ཐིམ། ཟླ་ཚེ་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། ནཱ་ད་དམར་སྐྱ་ཤིན་ཏུ་ཕྲ་ཞིང་བརྗིད་པ། ཀ་ར་ཀ་ར་ལ་སོགས་པའི་སྔགས་ཀྱི་སྒྲ་སྒྲོག་པ། འཁྱོག་ཅིང་འཁྱོག་ཅིང་མྱུར་དུ་འབབ་པ་ནི་སྒྲ་ཡིན་ལ། དེས་ཉི་མའི་དཀྱིལ་འཁོར་ཕུག་ནས་ཧཱུྃ་གི་ཡི་གེའི་ཚུལ་ལ་ཐིམ་པའི་རྐྱེན་གྱིས་ཉི་ཟླ་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས་སུ་མོས་པར་བྱ། དེ་ལས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་ཅིག་ཆར་དུ་གྱུར་པར་བསྒོམ་ཞིང་། རིམ་གྱིས་གསལ་གདབ་པར་བྱ་སྟེ། དེ་ཡང་གཙོ་བོ་ནས་དུར་ཁྲོད་ཀྱི་བར་ཕར་རིམ་པ་བཞིན་གསལ་གདབ་ཀྱང་ཆོ་ག་འདིར་ཐོག་མར་རྟེན་གསལ་གདབ་པ་ནི། རི་རབ་ཀྱི་སྟེང་སྲུང་བའི་འཁོར་ལོའི་ནང་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་ནག་པོ། དཀར་པོ། སེར་པོ། དམར་པོ། ལྗང་ཁུའི་རྩིག་པ་རིམ་པ་ལྔ་དང་ལྡན་པ་དེའི་སྟེང་དུ་རིན་པོ་ཆེའི་ཕ་གུ་སེར་པོའི་ཁ་ཁྱེར་དང་། དེའི་སྟེང་དུ་མདའ་ཡབ་ལ་ཟླ་བ་རླུང་གིས་བསྐྱོད་པ་དང་། དྲིལ་བུ་གཡེར་ཁ་དང་བཅས་པའི་དྲྭ་བ་དང་དྲྭ་བ་ཕྱེད་པ་འཕྱང་བ། མདའ་ཡབ་ཀྱི་སྟེང་དུ་རིན་པོ་ཆེའི་དྲྭ་བ་སེང་མའི་པུ་ཤུས་བསྐོར་བ། དེའི་ཕྱི་རོལ་འདོད་ཡོན་གྱི་སྣམ་བུ་དམར་པོའི་སྟེང་དུ་ཕྱོགས་རེར་རབ་ཏུ་མཛེས་ཤིང་ཡིད་དུ་འོང་བའི་ལྷ་མོ་བཞིས་མཆོད་རྫས་དཔག་དུ་མེད་པ་ཐོགས་ནས་མཆོད་པ་བྱེད་པ། སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེགས་པའི་རྟ་བབས་བང་རིམ་བཞི་པའི་སྟེང་དུ་ཆོས་ཀྱི་འཁོར་ལོ་དང་། རི་དྭགས་དང་། གདུགས་དང་ལྡན་པ། གཞན་ཡང་རྔ་གཡབ་ནོར་བུའི་ཡུ་བ་ཅན་དང་། རིན་པོ་ཆེ་དང་། མེ་ཏོག་གི་ཕྲེང་བ་དང་། གོས་དང་འཕན་ལ་སོགས་པའི་རྒྱན་རྣམས་ཀྱིས་མཛེས་པར་བྱས་པ། ནང་གི་ལྷ་སྣམ་ཤར་སྔོ། བྱང་ལྗང་། ནུབ་དམར། ལྷོ་སེར་བ། མཚམས་བཞིར་སྨན་དང་བཅུད་སྣ་ཚོགས་དང་། བདུད་རྩིས་གང་ཞིང་། ལྷ་རྫས་ཀྱི་གོས་ཀྱིས་མགུལ་པ་གཡོགས་པ། མེ་ཏོག་དང་། འབྲས་བུས་སྤུད་པའི་དཔག་བསམ་གྱི་ཤིང་གིས་ཁ་བརྒྱན་པའི་རིན་པོ་ཆེའི་བུམ་པ་གཉིས་གཉིས་ཏེ་བརྒྱད་དང་ལྡན་པའི་སྟེང་ཐོག་སྐུ་འཁོར་གྱི་ཀ་བ་ལ་བརྟེན་ནས་ཕུབ་པ། དེའི་ནང་དུ་ཨིནྡྲ་ནི་ལའི་ས་གཞི་ལ་འཁོར་ལོ་རིམ་པ་བཞི། མཆོད་རྟེན་ཟླུམ་པོ་བང་རིམ་བཞི་པ་ལྟ་བུའི་ཚུལ་དུ་གནས་པའི་ཕྱི་རོལ་སྐུའི་འཁོར་ལོ་དཀར་པོ་འཁོར་ལོས་མཚན་པའི་རྭ་བ་དང་། ཀ་བ་དང་། གདུང་དང་། ཐོག་ཕུབ་ཅན། བར་པ་གསུང་གི་འཁོར་ལོ་དམར་པོ་པདྨས་མཚན་པའི་རྭ་བ་དང་། ཀ་བ་དང་། གདུང་དང་། ཐོག་ཕུབ་ཅན། ནང་མ་ཐུགས་ཀྱི་འཁོར་ལོ་སྔོན་པོ་རྡོ་རྗེས་མཚན་པའི་རྭ་བ་དང་། ཀ་བ་དང་། གདུང་དང་། ཐོག་ཕུབ་ཅན། ལྟེ་བ་བདེ་ཆེན་གྱི་འཁོར་ལོ་པདྨ་འདབ་མ་བརྒྱད་པ་གྲི་གུག་གིས་མཚན་པའི་རྭ་བ་དང་། ཀ་བ་དང་། གདུང་དང་། ཐོག་ཕུབ་དང་བཅས་པའི་སྟེང་རྡོ་རྗེའི་གདུང་བཞིས་མིག་མངས་རིས་སུ་བྲེས་པ། དབུས་ཕྱུར་བུར་ཕུབ་པའི་རྩེ་མོར་རྡོ་རྗེ་ཕྱེད་པའི་ཏོག་གིས་སྤྲས་པ། དྭངས་ཤིང་སྒྲིབ་པ་མེད་པ་འོད་ཟེར་སྣ་ཚོགས་ཀུན་ཏུ་འཁྲུགས་པའོ། །གཞལ་ཡས་ཁང་གི་ཕྱི་རོལ་དུ། ཤར་ཕྱོགས་སུ་གཏུམ་དྲག བྱང་དུ་ཚང་ཚིང་འཁྲིགས་པ། ནུབ་དུ་འུར་འུར་འབར་བ། ལྷོར་འཇིགས་སུ་རུང་བ། ཤར་ལྷོར་ནགས་ཚལ་ཕུན་སུམ་ཚོགས་པ། ལྷོ་ནུབ་ཏུ་མུན་པ་མི་བཟད་པ། ནུབ་བྱང་དུ་ཀི་ལི་ཀི་ལིའི་སྒྲ་སྒྲོགས་པ། བྱང་ཤར་དུ་ཧ་ཧ་དགོད་པའི་དུར་ཁྲོད་རྣམས་སུ་རིམ་པ་དེ་ཉིད་ཀྱིས་བརྒྱ་བྱིན་སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ། གནོད་སྦྱིན་སེར་པོ་རྟ་ལ་ཞོན་པ་དབྱུག་ཐོ་འཛིན་པ། ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་ཞགས་འཛིན་པ། གཤིན་རྗེ་སྔོན་པོ་མ་ཧེ་ལ་ཞོན་པ་བེ་ཅོན་འཛིན་པ། མེ་ལྷ་དམར་པོ་ར་སྐྱེས་ལ་ཞོན་པ། ཕྱག་བཞི་པ་གཡས་པ་གཉིས་ཀྱིས་མཆོག་སྦྱིན་དང་དབྱུག་གུ་གསུམ་པ། གཡོན་པ་གཉིས་ཀྱིས་བགྲང་ཕྲེང་དང་རིལ་བ་སྤྱི་བླུགས་འཛིན་པ། སྲིན་པོ་ནག་པོ་རོ་ལངས་ལ་ཞོན་པ་རལ་གྲི་དང་ཐོད་པ་འཛིན་པ། རླུང་ལྷ་ལྗང་ཁུ་ཤྭ་བ་ལ་ཞོན་པ་བ་དན་འཛིན་པ། དབང་ལྡན་དཀར་པོ་གླང་ལ་ཞོན་པ་རྡོ་རྗེ་རྩེ་གསུམ་འཛིན་པ། ཐམས་ཅད་ཀྱང་རྒྱན་གྱིས་བརྒྱན་ཅིང་རང་དང་འདྲ་བའི་རིག་མས་གཡོན་ནས་བརྟེན་པ། སྤྱི་བོས་བཅོམ་ལྡན་འདས་ལ་འདུད་པའོ། །དེ་བཞིན་དུ་ཤྲཱི་ཤ ཨ་ཤྭད་ཐ། ཨཾ་ཀོ་ལ། ཙུ་ཏ། ཀ་རན་ཛ། ལད་པར་ཀ་ཏི། བར་ཏི་པ་ཏཱ། བྷ་ཌ་སྟེ་ཤིང་ཆེན་པོ་བརྒྱད་དང་། དེ་རྣམས་ལ་བརྟེན་པའི་སྒོ་མཚམས་མ་རྣམས་ཀྱི་གཟུགས་འཛིན་པའི་དྲག་གཏུམ་སྐྱོང་བ་ལ་སོགས་པའི་ཞིང་སྐྱོང་བརྒྱད་དང་། ནོར་རྒྱས། འཇོག་པོ། སྟོབས་ཀྱི་རྒྱུ། པདྨ། ཧུ་ལུནྟ། རིགས་ལྡན། དུང་སྐྱོང་། པདྨ་ཆེན་པོ་སྟེ་ཀླུ་བརྒྱད་དང་། སྒྲ་གྲག་པ། རྨུགས་པ། མུན་པ་ཅན། ཀུན་ཏུ་འཁྱིལ་བ། གང་བ། འབབ་པ། དྲག་པོ། འཁྲིགས་པ་སྟེ། སྤྲིན་ཆེན་པོ་བརྒྱད་དང་། གཞན་ཡང་ཆུ་བོ་ཆེན་པོ་བརྒྱད། མེ་ཆེན་པོ་བརྒྱད། མཆོད་རྟེན་ཆེན་པོ་བརྒྱད་གནས་ཤིང་། སྤྲུལ་པ་དང་། རང་རྒྱུད་པའི་དཔའ་བོ་དང་། རྣལ་འབྱོར་མ་དང་། གྲུབ་པ་དང་། རིགས་པ་འཛིན་པ་དང་། མཁའ་འགྲོ་དང་། མཁའ་འགྲོ་མ་དང་། འདྲེ་དང་། སྲིན་པོ་དང་། གནོད་སྦྱིན་དང་། ཤ་ཟ་དང་། འབྱུང་པོ་དང་། ལྕེ་སྤྱང་ལ་སོགས་པས་ཡོངས་སུ་གང་བའི་དུར་ཁྲོད་ཀྱིས་བསྐོར་བའོ། །གཞལ་ཡས་ཁང་གི་ནང་དུ་འཁོར་ལོའི་དབུས་སུ་པདྨ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་རང་ཉིད་འཁོར་ལོ་བདེ་མཆོག་འབྱུང་བ་བཞི་དག་ཅིང་ཚད་མེད་པ་བཞི་དང་། རྣམ་པར་ཐར་པ་བཞི་དང་། ཕྲིན་ལས་བཞིའི་ངོ་བོ་ཞལ་བཞི་པ། རྩ་བའི་ཞལ་སྔོ། གཡོན་ལྗང་། རྒྱབ་དམར། གཡས་སེར་བ། ཆོས་ཀྱི་དབྱིངས་ལས་མི་འགྱུར་བས་སྐུ་མདོག་སྔོན་པོ་ཁམས་གསུམ་གྱི་སེམས་ཅན་ལ་གཟིགས་ཤིང་དུས་གསུམ་གྱི་དངོས་པོ་མཁྱེན་པས་ཞལ་རེ་རེ་ཞིང་སྤྱན་གསུམ་གསུམ་པ། རྟེན་ཅིང་འབྲེལ་བར་འབྱུང་བ་བཅུ་གཉིས་ལུགས་འབྱུང་དང་ལུགས་ལས་བཟློག་པ་ཐུགས་སུ་ཆུད་ཅིང་འཕོ་བ་བཅུ་གཉིས་རྣམ་པར་དག་པས་ཕྱག་བཅུ་གཉིས་ཀྱིས་ཡེ་ཤེས་ལྔ་རོ་གཅིག་པས་རྡོ་རྗེ་དང་། སྟོང་པ་ཉིད་ཀྱི་སྒྲ་སྒྲོགས་པས་དྲིལ་བུ་འཛིན་པའི་ཕྱག་དང་པོ་གཉིས་ཀྱིས་ཐབས་དང་ཤེས་རབ་གཉིས་སུ་མེད་པས་རྡོ་རྗེ་ཕག་མོ་ལ་འཁྱུད་པ། གཏི་མུག་སྤངས་པས་དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་བསྐུལ་བར་མཛད་པས་གཡས་ཀྱི་གསུམ་པ་ན་ཌཱ་མ་རུ། ཉེས་པ་ཐམས་ཅད་གཅོད་པས་བཞི་པ་ན་དགྲ་སཏྭ། དངོས་པོ་དང་དངོས་པོ་མེད་པའི་རྣམ་པར་རྟོག་པ་ཐམས་ཅད་གཅོད་པས་ལྔ་པ་ན་གྲི་གུག སྲིད་པ་གསུམ་གྱི་ཉེས་པ་འཇོམས་པས་དྲུག་པ་ན་མདུང་རྩེ་གསུམ་པ། བྱང་ཆུབ་ཀྱི་སེམས་བདེ་བ་ཆེན་པོ་དང་མི་འབྲལ་བས་གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག བདེ་བ་ཆེན་པོ་སྐྱོང་བས་བཞི་པ་ན་ཁྲག་གིས་གང་བའི་ཐོད་པ། ཡང་དག་པའི་ཡེ་ཤེས་སེམས་ཅན་གྱི་རྒྱུད་ལ་འཆིང་བས་ལྔ་པ་ན་རྡོ་རྗེའི་ཞགས་པ། རྣམ་པར་རྟོག་པ་ཐམས་ཅད་གཅོད་པས་དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་པ། ཐུགས་རྗེ་ཆེན་པོས་སེམས་ཅན་གྱི་ཁམས་ལ་བཞུགས་པའི་ཕྱིར་ཞབས་གཡས་པ་ཐབས་ཀྱི་རང་བཞིན་བརྐྱངས་པས་མྱ་ངན་ལས་འདས་པའི་མཐའ་དུས་མཚན་མ་དམར་མོ་ཤིན་དུ་རིད་པ་གྲི་གུག་དང་ཐོད་པ་འཛིན་པ་གན་རྒྱལ་དུ་མནན་པ། ཤེས་རབ་ཆེན་པོས་གང་ཟག་དང་ཆོས་སུ་མི་འཛིན་པའི་ཕྱིར་ཞབས་གཡོན་པ་ཤེས་རབ་ཀྱི་རང་བཞིན་བསྐུམས་པས་འཁོར་བའི་མཐའ་འཇིགས་བྱེད་ནག་པོ་ལག་པ་བཞི་པ་གཡས་ཌཱ་མ་རུ་དང་གྲི་གུག གཡོན་པས་ཁ་ཊྭཱཾ་ག་དང་ཐོད་པ་འཛིན་པ་ཁ་བུབ་དུ་མནན་པ། ཚོགས་ཡོངས་སུ་རྫོགས་པས་རལ་པའི་ཐོར་ཚུགས་སྤྱི་བོར་བཅིངས་པའི་རྩེར་དགོས་འདོད་ཐམས་ཅད་ཡིད་བཞིན་དུ་སྩོལ་བས་ཡིད་བཞིན་གྱི་ནོར་བུ་རིན་པོ་ཆེས་བརྒྱན་པ། བྱང་ཆུབ་ཀྱི་སེམས་གོང་ནས་གོང་དུ་འཕེལ་བས་གཡོན་ན་ཚེས་གཅིག་གི་ཟླ་བ་དང་། ཕྲིན་ལས་སྣ་ཚོགས་པས་སེམས་ཅན་གྱི་དོན་མཛད་པས་མཚོག་མའི་སྟེང་ན་སྣ་ཚོགས་རྡོ་རྗེས་མཚན་པ། ཡེ་ཤེས་ལྔའི་ཡོན་ཏན་ཡོངས་སུ་རྒྱས་པས་དབུ་རེ་རེ་ལ་མི་མགོ་སྐམ་པོ་ལྔའི་དབུ་རྒྱན་དང་། ཨཱ་ལི་ཀཱ་ལི་ལྔ་བཅུ་དག་པས་མི་མགོ་རློན་པ་ལྔ་བཅུའི་དོ་ཤལ་ཅན། ལོག་པར་ལྟ་བ་འཇོམས་པས་ཞལ་རྣམ་པར་འགྱུར་ཞིང་བདུད་བཞི་སྤངས་པས་མཆེ་བ་གཙིགས་པ། རྣ་རྒྱན་བཟོད་པ། མགུལ་རྒྱན་སྦྱིན་པ། གདུ་བུ་ཚུལ་ཁྲིམས། སྐ་རགས་བརྩོན་འགྲུས། སྤྱི་བོར་རུས་པའི་འཁོར་ལོ་བསམ་གཏན། ཐལ་ཆེན་གྱི་རྒྱ་དང་མཆོད་ཕྱིར་ཐོགས་ཤེས་རབ་སྟེ། ཕ་རོལ་ཏུ་ཕྱིན་པ་དྲུག་གི་ངོ་བོ་རུས་པའི་རྒྱན་དྲུག་གིས་བརྒྱན་པ། བདུད་འཇོམས་པ་ལ་དཔའ་ཞིང་གཟུང་འཛིན་སྤངས་པས་སྟག་གི་པགས་པའི་ཤམ་ཐབས་གྲོལ་བ། སྐུ་གསུང་ཐུགས་ཀྱི་ཡོན་ཏན་རྒྱས་ཤིང་ཉོན་མོངས་པས་གཟིར་བའི་གདུལ་བྱ་རྣམས་རྗེས་སུ་འཛིན་པ་ལ་མཁས་པས། སྒེག་པ་དཔའ་བ་མི་སྡུག་པ། །དགོད་པ་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་རོ་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ། སེམས་ཅན་གྱི་དོན་ལ་རྗེས་སུ་ཆགས་པས་སྐུ་མདོག་དམར་མོ། ཆོས་ཐམས་ཅད་དེ་བཞིན་ཉིད་དུ་རོ་གཅིག་པས་ཞལ་གཅིག་པ། བདེན་པ་གཉིས་ཐུགས་སུ་ཆུད་པས་ཕྱག་གཉིས་ཀྱི་གཡོན་པས་བདེ་བ་ཆེན་པོ་ཡོངས་སུ་སྐྱོང་བའི་ཐོད་པ་ཁྲག་གིས་གང་བ་འཛིན་པས་ཡབ་ལ་འཁྱུད་པ། གཡས་པས་རྟོག་པ་ཐམས་ཅད་གཅོད་པའི་ཡེ་ཤེས་ཀྱིས་བདུད་དང་ཉོན་མོངས་པ་ཐམས་ཅད་འཇིག་པར་བྱེད་པས་རྡོ་རྗེས་མཚན་པའི་གྲི་གུག་དང་བཅས་པའི་བསྡིགས་མཛུབ་ཀྱིས་ཕྱོགས་ཐམས་ཅད་དུ་བསྡིགས་པར་བྱེད་པ། ཀུན་ཏུ་འཛིན་པའི་མདུད་པ་གྲོལ་བས་སྐྲ་གྲོལ་བ། ཉོན་མོངས་པའི་སྒྲིབ་གཡོགས་དང་བྲལ་བས་གཅེར་བུ་སྤྱན་གསུམ་པ། མི་མགོ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔ་དང་ལྡན་པ་བདུད་ཐམས་ཅད་སྐྲག་པར་བྱེད་པས་བསྐལ་པའི་མེ་ལྟ་བུའི་གཟི་བརྗིད་ཅན། བདེ་བ་གསོལ་བས་ཁྲག་གསོལ་བ། དགྱེས་ཤིང་བྷ་ག་ནས་ཁྲག་འཛག་པ། ཐབས་དང་མི་འབྲལ་བས་བྱིན་པ་གཉིས་ཀྱིས་བཅོམ་ལྡན་འདས་ལ་འཁྱུད་པ། སྣང་བ་དང་། ཐབས་དང་། ལྷག་མཐོང་དང་། སྙིང་རྗེ་ཆེན་པོའི་ངོ་བོ་ནི་ཡབ་ཡིན་ལ། སྟོང་པ་དང་། ཤེས་རབ་དང་། ཞི་གནས་དང་། བདེ་བ་ཆེན་པོའི་ངོ་བོ་ཡུམ་ཡིན་ཅིང་། ཟུང་དུ་འཇུག་པའི་ཕྱིར་ཀུན་ཏུ་ཁ་སྦྱོར་བ། ཡེ་ཤེས་ཆེན་པོའི་མེས་ཕྱི་ནང་གི་གདོན་ཐམས་ཅད་སྲེག་པར་བྱེད་པས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །པདྨའི་འདབ་མ་བཞི་ལ། ཤར་དུ་མཁའ་འགྲོ་མ་སྔོན་མོ། བྱང་དུ་ལཱ་མ་ལྗང་ཁུ། ནུབ་ཏུ་ཁཎྜ་རོ་ཧི་དམར་མོ། ལྷོར་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་སྤྱན་གསུམ་མ། ཚད་མེད་པ་བཞིའི་རང་བཞིན་གྱི་ཕྱག་བཞི་ན་གཡས་ཌཱ་མ་རུ་དང་གྲི་གུག གཡོན་ཁ་ཊྭཱཾ་ག་དང་ཐོད་པ་འཛིན་པ། འདི་ནི་རྒྱབ་ཕྱོགས་ནས་ཚུར་བགྲང་བའི་དབང་དུ་བྱས་ཏེ་མདུན་མ་གཉིས་ན་གྲི་གུག་དང་ཐོད་པ་བཟུང་བའོ། །སྐྲ་གྲོལ་པ་གཅེར་བུ་གཡས་བརྐྱང་བས་ཞུགས་པ། ཕྱག་རྒྱ་ལྔས་བརྒྱན་པའོ། །མཚམས་ཀྱི་འདབ་མ་བཞི་ལ་བདུད་རྩི་ལྔས་ཡོངས་སུ་གང་བའི་བུམ་པའི་སྟེང་ན་ཐོད་པ་གནས་པ་ནི་བདེ་བ་ཆེན་པོའི་འཁོར་ལོའོ། །དེའི་ཕྱི་རོལ་ཐུགས་ཀྱི་འཁོར་ལོ་རྩིབས་བརྒྱད་པའི་ཤར་རྩིབས་པུ་ལཱི་ར་མ་ལ་ཡར་ཁཎྜ་ཀ་པཱ་ལི་དང་རབ་ཏུ་གཏུམ་མོ། །བྱང་རྩིབས་ཛཱ་ལན་དྷ་རར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མ། ནུབ་རྩིབས་ཨུ་དྷྱེ་ནན་དུ་ཀཾ་ཀ་ལ་དང་འོད་ལྡན་མ། ལྷོ་རྩིབས་ཨར་བུ་དར་མཆེ་བ་རྣམ་པར་གཙིགས་པ་དང་སྣ་ཆེན་མ། ཤར་ལྷོ་གོ་དཱ་ཝ་རིར་སུ་ར་ཝེ་རི་དང་བརྟེན་པའི་བློ་ཅན་མ། ལྷོ་ནུབ་རཱ་མེ་ཤྭ་རར་འོད་དཔག་མེད་དང་མིའུ་ཐུང་མ། ནུབ་བྱང་དཱེ་ཝི་ཀོ་ཊར་རྡོ་རྗེའི་འོད་དང་ལང་ཀའི་དབང་ཕྱུག་མ། བྱང་ཤར་མ་ལ་ཝར་རྡོ་རྗེའི་སྐུ་དང་ཤིང་གྲིབ་མ་སྟེ། ཐུགས་ཀྱི་འཁོར་ལོའི་ལྷ་རྣམས་ཁ་དོག་སྔོན་པོ་ནམ་མཁའ་ལ་སྤྱོད་པའི་ཚུལ་གྱིས་བཞུགས་ཤིང་ས་བླ་སྦྱོང་བ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་གསུང་གི་འཁོར་ལོ་རྩིབས་བརྒྱད་པའི་ཤར་རྩིབས་ཀཱ་མ་རུ་པར་ཨཾ་ཀུ་རི་དང་ཨཻ་ར་ཝ་ཏི། བྱང་རྩིབས་ཨོཾ་ཏྲེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ནུབ་རྩིབས་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོ་རྩིབས་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ། ཤར་ལྷོ་ཀ་ལིཾ་གར་རབ་ཏུ་བཟང་པོ་དང་ཤྱཱ་མ་དེ་ཝཱི། ལྷོ་ནུབ་ལཾ་པཱ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། བྱང་ཤར་ཧི་མ་ལར་མིག་མི་བཟང་དང་ཁ་ག་ན་ན་སྟེ། གསུང་གི་འཁོར་ལོའི་ལྷ་རྣམས་ཁ་དོག་དམར་པོ་ས་ལ་སྤྱོད་པའི་ཚུལ་གྱིས་བཞུགས་ཤིང་ས་སྟེང་སྦྱོང་བ་གསུང་གི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་སྐུའི་འཁོར་ལོ་རྩིབས་བརྒྱད་པའི་ཤར་རྩིབས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བྱང་རྩིབས་གྲི་ཧ་དཱེ་ཝར་རིན་ཆེན་རྡོ་རྗེ་དང་ཁཎྜ་རོ་ཧ། ནུབ་རྩིབས་སཱཽ་རཥྚར་རྟ་མགྲིན་དང་ཤཽཎྜི་ནི། ལྷོ་རྩིབས་སུ་ཝརྞ་དྭི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། ཤར་ལྷོ་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། ལྷོ་ནུབ་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ། ནུབ་བྱང་མ་རུར་རྣམ་པར་སྣང་མཛད་དང་འཁོར་ལོས་བསྒྱུར་མ། བྱང་ཤར་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ། སྐུའི་འཁོར་ལོའི་ལྷ་རྣམས་ཁ་དོག་དཀར་པོ་ས་འོག་ན་སྤྱོད་པའི་ཚུལ་གྱིས་བཞུགས་ཤིང་ས་འོག་སྦྱོང་བ། སྐུའི་གསང་བ་བསམ་གྱིས་མི་ཁྱབ་པའི་ངོ་བོའོ། །ཁཎྜ་ཀ་པཱ་ལི་ལ་སོགས་པའི་དཔའ་བོ་རྣམས་ནི་ཞལ་གཅིག་ཕྱག་བཞི་པ་རལ་པའི་ཐོར་ཚུགས་ཀྱིས་མཚན་པའི་ཅོད་པཎ་ཅན། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཡས་འོག་མས་ཌཱ་མ་རུ་དང་། གཡོན་འོག་མས་ཁ་ཊྭཱཾ་ག་འཛིན་པ། སྐུ་ལ་ཕྱག་རྒྱ་དྲུག་གིས་བརྒྱན་པ། གཡས་བརྐྱང་བའི་གནས་པས་བཞུགས་པའོ། །རབ་ཏུ་གཏུམ་མོ་ལ་སོགས་པའི་དཔའ་མོ་རྣམས་ནི་ཞལ་གཅིག་ཕྱག་གཉིས་པ། གཡོན་ཐོད་པ་བསྣམས་པས་ཡབ་ལ་འཁྱུད་པ། གཡས་སྡིགས་མཛུབ་དང་བཅས་པས་གྲི་གུག་བསྣམས་པ། སྤྱན་གསུམ་པ། དྲག་མོའི་གཟུགས་ཅན་མ། སྐྲ་གྲོལ་བས་རྣམ་པར་མཛེས་པ། གཉིས་སུ་མེད་པའི་སྦྱོར་བ་ལ་བརྩོན་པ། གཅེར་བུའི་མཆོག་རྒྱན་ལྔ་དང་ཚངས་པའི་སྐུད་པས་བརྒྱན་པ་མི་མགོའི་དོ་ཤལ་དང་། སྐ་རགས་སིལ་སིལ་གྱི་སྒྲ་སྒྲོགས་པའོ། །དེའི་ཕྱི་རོལ་དམ་ཚིག་གི་འཁོར་ལོ་ལྷ་སྣམ་གྱི་གཞིའི་ཤར་སྒོར་ཁྭ་གདོང་མ་སྔོན་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ། གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར། གཡོན་དམར། ནུབ་བྱང་དུ་གཤིན་རྗེ་མཆེ་བ་མ་གཡས་དམར། གཡོན་ལྗང་། བྱང་ཤར་དུ་གཤིན་རྗེ་འཇོམས་མ་གཡས་ལྗང་། གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་བཞི་པ་གཡས་གཉིས་ན་ཌཱ་མ་རུ་དང་གྲི་གུག གཡོན་གཉིས་ན་ཁ་ཊྭཱཾ་ག་དང་ཐོད་པ་འཛིན་པ། གཅེར་བུ་ཕྱག་རྒྱ་ལྔས་བརྒྱན་པ། ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་། སེམས་ཅན་གྱི་དོན་ལ་མངོན་པར་བརྩོན་པ། དཔའ་བོ་དང་། རྣལ་འབྱོར་མ་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བས་བརྒྱན་པའོ། །དེ་ནས་རང་གིས་བསྒོམས་པའི་ལྷ་དང་། རང་བཞིན་གྱིས་གྲུབ་པའི་ལྷ་ལ་མཆོག་དམན་དུ་ལྟ་བ་སྤངས་པ་དང་། དངོས་གྲུབ་མྱུར་དུ་འགུགས་པའི་ཕྱིར་ཕོ་ཉ་བསྲེ་བ་ནི། བདག་གི་བློ་ལ་སྣང་བའི་གཞལ་ཡས་ཁང་སྲུང་འཁོར་དུར་ཁྲོད་དང་བཅས་པ་འདི་ནི་ཕྱི་རོལ་འཛམ་བུའི་གླིང་ན་བཞུགས་པའི་ཞིང་སྐྱེས་ཀྱི་ཡུལ་རྣམས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་གཞལ་ཡས་ཁང་པ་ཡིན་ཞིང་། དེ་ཡང་ཆོས་ཀྱི་སྐུ་ལས་བྱུང་བ་ཡིན་ནོ་ཞེས་ཡུལ་ལ་ཡུལ་གྱི་ཞེན་པ་དང་། ཡང་བདག་གི་བློ་ལ་སྣང་བའི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྔགས་སྐྱེས་འདི་ཉིད་འཛམ་བུའི་གླིང་ན་བཞུགས་པའི་ཞིང་སྐྱེས་ཀྱི་སྤྲུལ་པའི་སྐུ་རྣམས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་ལྷ་དྲུག་ཅུ་རྩ་གཉིས་ཡིན་ཞིང་དེ་ཡང་ཆོས་ཀྱི་སྐུ་ལས་བྱུང་བ་ཡིན་ནོ། །ཞེས་ལྷ་ལ་ལྷའི་ཞེན་པ་བྱའོ། །འདི་ནི་བློ་མཆོག་གི་དབང་དུ་བྱས་ལ། བློ་འབྲིང་གིས་འཁོར་ལོ་རེ་རེ་ནས་བསྲེ་བ་དང་། བློ་ཐ་མས་རྩིབས་རེ་རེ་ནས་བསྲེ་བའི་ཚུལ་ཡང་ཤེས་པར་བྱའོ། །དེ་ནས་ལམ་ལ་སོམ་ཉི་སྤང་བའི་ཕྱིར་བྱང་ཆུབ་ཀྱི་ཕྱོགས་ཀྱི་དག་པ་དྲན་པ་ནི། ལུས་རྗེས་སུ་དྲན་པ་ནི་མཁའ་འགྲོ་མའོ། །ཚོར་བ་རྗེས་སུ་དྲན་པ་ནི་ལཱ་མའོ། །ཆོས་རྗེས་སུ་དྲན་པ་ནི་ཁཎྜ་རོ་ཧིའོ། །སེམས་རྗེས་སུ་དྲན་པ་ནི་གཟུགས་ཅན་མའོ། །འདུན་པའི་རྫུ་འཕྲུལ་གྱི་རྐང་པ་ནི་ཁཎྜ་ཀ་པཱ་ལི་དང་རབ་ཏུ་གཏུམ་མོའོ། །བརྩོན་འགྲུས་ཀྱི་རྫུ་འཕྲུལ་གྱི་རྐང་པ་ནི་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མའོ། །སྤྱོད་པའི་རྫུ་འཕྲུལ་གྱི་རྐང་པ་ནི་ཀཾ་ཀ་ལ་དང་འོད་ལྡན་མའོ། །སེམས་ཀྱི་རྫུ་འཕྲུལ་གྱི་རྐང་པ་ནི་མཆེ་བ་རྣམ་པར་གཙིགས་པ་དང་སྣ་ཆེན་མའོ། །དད་པའི་དབང་པོ་ནི་སུ་ར་ཝཻ་རི་དང་བརྟན་པའི་བློ་ཅན་མའོ། །བརྩོན་འགྲུས་ཀྱི་དབང་པོ་ནི་འོད་དཔག་མེད་དང་མིའུ་ཐུང་མའོ། །དྲན་པའི་དབང་པོ་ནི་རྡོ་རྗེའི་འོད་དང་ལཾ་ཀའི་དབང་ཕྱུག་མའོ། །ཏིང་ངེ་འཛིན་གྱི་དབང་པོ་ནི་རྡོ་རྗེའི་སྐུ་དང་ཤིང་གྲིབ་མའོ། །ཤེས་རབ་ཀྱི་དབང་པོ་ནི་ཨཾ་ཀུ་རི་དང་ཨཻ་ར་བ་ཏིའོ། །དད་པའི་སྟོབས་ནི་རྡོ་རྗེ་རལ་པ་ཅན་དང་འཇིགས་བྱེད་ཆེན་མོའོ། །བརྩོན་འགྲུས་ཀྱི་སྟོབས་ནི་དཔའ་བོ་ཆེན་པོ་དང་རླུང་གི་ཤུགས་ཅན་མའོ། །དྲན་པའི་སྟོབས་ནི་རྡོ་རྗེ་ཧཱུྃ་མཛད་དང་ཆང་འཐུང་མའོ། །ཏིང་ངེ་འཛིན་གྱི་སྟོབས་ནི་རབ་ཏུ་བཟང་པོ་དང་ཤྱཱ་མ་དེ་ཝིའོ། །ཤེས་རབ་ཀྱི་སྟོབས་ནི་རྡོ་རྗེ་བཟང་པོ་དང་ཤིན་ཏུ་བཟང་མོའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་འཇིགས་བྱེད་ཆེན་པོ་དང་རྟ་རྣ་མའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་མིག་མི་བཟང་དང་ཁ་གཱ་ན་ནའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་སྟོབས་པོ་ཆེ་དང་འཁོར་ལོའི་ཤུགས་ཅན་མའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་རིན་ཆེན་རྡོ་རྗེ་དང་ཁཎྜ་རོ་ཧའོ། །ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་ནི་རྟ་མགྲིན་དང་ཤཽན་ཌི་ནིའོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་ནམ་མཁའི་སྙིང་པོ་དང་འཁོར་ལོའི་གོ་ཆའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་དཔལ་ཧེ་རུ་ཀ་དང་ཤིན་ཏུ་དཔའ་མོའོ། །ཡང་དག་པའི་ལྟ་བ་ནི་པདྨ་གར་གྱི་དབང་ཕྱུག་དང་སྟོབས་ཆེན་མའོ། །ཡང་དག་པའི་རྟོག་པ་ནི་རྣམ་པར་སྣང་མཛད་དང་འཁོར་ལོས་བསྒྱུར་མའོ། །ཡང་དག་པའི་ངག་ནི་རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཡང་དག་པའི་ལས་ཀྱི་མཐའ་ནི་ཁྭ་ཡི་གདོང་ཅན་མའོ། །ཡང་དག་པའི་འཚོ་བ་ནི་འུག་པའི་གདོང་ཅན་མའོ། །ཡང་དག་པའི་རྩོལ་བ་ནི་ཁྱིའི་གདོན་ཅན་མའོ། །ཡང་དག་པའི་དྲན་པ་ནི་ཕག་གི་གདོང་ཅན་མའོ། །ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀ་དང་རྡོ་རྗེ་ཕག་མོའོ། །དགེ་བའི་ཆོས་མ་སྐྱེས་པ་རྣམས་བསྐྱེད་པ་ནི་ཡ་མ་དཱ་དྷིའོ། །དགེ་བའི་ཆོས་སྐྱེས་པ་རྣམས་ཡང་དག་པར་སྲུང་བ་ནི་གཤིན་རྗེ་ཕོ་ཉ་མའོ། །མི་དགེ་བའི་ཆོས་སྐྱེས་པ་རྣམས་ཡང་དག་པར་སྤོང་བ་ནི་གཤིན་རྗེ་མཆེ་བ་མའོ། །མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པ་ནི་གཤིན་རྗེ་འཇོམས་མའོ། །ཞེས་བརྗོད་ཅིང་དྲན་པར་བྱའོ། །དེ་དག་ནི་ཕ་རོལ་ཏུ་ཕྱིན་པའི་ལམ་ལ་ལམ་དམན་པར་གོ་ན་དེའི་གཉེན་པོར་ཕར་དག་ཏུ་སྦྱོར་བའི་དབང་དུ་བྱས་པ་ཡིན་ལ། ཡང་ལྷའི་སྐུ་གདོན་པའི་རྣམ་པ་ལྟ་བུར་ཞེན་པ་སྐྱེ་ན་མཁའ་འགྲོ་མ་ནི་ལུས་རྗེས་སུ་དྲན་པའོ། །ཞེས་སོགས་ཚུར་དག་ཏུ་སྦྱོར་བ་ཡང་ཤེས་པར་བྱའོ། །དེ་གཉིས་ཀའང་བློ་ཐ་མའི་དབང་དུ་བྱས་པ་ཡིན་གྱི། བློ་མཆོག་གིས་ནི་བདག་གི་བློ་ལ་སྣང་བའི་ལྷ་སུམ་ཅུ་སོ་བདུན་པོ་འདི་ཉིད་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ངོ་བོ་ཡིན་ལ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་ལྷ་སུམ་ཅུ་སོ་བདུན་གྱི་ངོ་བོར་རྣམ་པར་དག་པ་ཡིན་ནོ་ཞེས་མདོར་བསྡུས་པས་ཀྱང་ཆོག་གོ །གཉིས་པ་ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་བསྒོམ་པ་ནི། འོག་རླུང་གིས་ལྟེ་བའི་ཨཾ་མས་ཡར་འཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧཾ་ཡས་མར་འཕུལ་བ་ནི་སྒྲ་སྟེ། དེ་ལྟར་སྒྲ་ཚུལ་གཉིས་སྙིང་ཁར་འདྲེས་པའི་རྐྱེན་གྱིས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་གཅིག་ཆར་དུ་གྱུར་པ་ནི། རིམ་གྱིས་གསལ་གདབ་པར་བྱ་སྟེ། དེ་ཡང་རྐང་མཐིལ་རླུང་གི་དཀྱིལ་འཁོར་སུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད་ཀྱི་ཆ། དཔྲལ་བ་དང་ལྟག་པ་རྣ་བ་གཉིས་སྣ་ཚོགས་རྡོ་རྗེ། ཀླད་པ་དཀར་པོ་ཟླ་བ། ཀླད་ཁྱིམ་དམར་པོ་ཉི་མ། དེ་གཉིས་ཀྱི་བར་ན་གནས་པའི་ཧཾ་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན། ལུས་འདོམ་གང་གྲུ་བཞི་ནི་གཞལ་ཡས་ཁང་པ་གྲུ་བཞི། སྙིང་ཁ་ཆོས་ཀྱི་འཁོར་ལོ་ན་འབྱུང་བ་བཞིའི་རླུང་རྒྱུ་བ་ནི་སྒོ་བཞི་དང་། རྐང་བརྒྱད་ནི་ཀ་བ་བརྒྱད། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན་ཡིན་ཏེ། དེ་ལྟར་རྟེན་གྱི་དཀྱིལ་འཁོར་གསལ་གདབ། དེ་ནས། སྙིང་ཁའི་ནང་གི་ཧཱུྃ་ཉིད་བཅོམ་ལྡན་འདས་ནང་གི་ཧེ་རུ་ཀ་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ། རྩ་བའི་ཞལ་སྔོན་པོ། གཡོན་ལྗང་། རྒྱབ་དམར། གཡས་སེར་བ། ཞལ་རེ་རེ་ཞིང་སྤྱན་གསུམ་གསུམ་དང་ལྡན་ཞིང་མཆེ་བ་བཞི་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སཏྭ། ལྔ་པ་ན་གྲི་གུག དྲུག་པ་ན་མདུང་རྩེ་གསུམ་པ་བསྒྲེང་བ། གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ། པདྨ་དང་ཉི་མའི་སྟེང་ན་ཞབས་གཡས་བརྐྱངས་པས་དུས་མཚན་མ་དམར་མོ་དང་། གཡོན་བསྐུམས་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་སྤྱི་བོར་བཅིངས་པའི་རྩེར་ཡིད་བཞིན་གྱི་ནོར་བུས་སྤྲས་ཤིང་། གཡོན་ན་ཚེས་གཅིག་གི་ཟླ་བ་དང་། མཚོག་མའི་སྟེང་ན་སྣ་ཚོགས་རྡོ་རྗེས་མཚན་པ་དབུ་རེ་རེ་ལ་མི་མགོ་སྐམ་པོ་ལྔ་ལྔས་བརྒྱན་ཅིང་། རློན་པ་ལྔ་བཅུའི་དོ་ཤལ་ཅན་སྟག་གི་པགས་པའི་ཤམ་ཐབས་གྲོལ་བ། སྒེག་པ་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་རོ་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། ཕྱག་གཡོན་པས་བདུད་དང་གདུག་པའི་ཁྲག་གིས་གང་བའི་ཐོད་པ་འཛིན་པས་ཡབ་ལ་འཁྱུད་པ། གཡས་པས་བསྡིགས་མཛུབ་དང་བཅས་པའི་གྲི་གུག་གིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། བྱིན་པ་གཉིས་ཀྱིས་བཅོམ་ལྡན་འདས་ལ་ལེགས་པར་འཁྱུད་ཅིང་གཅེར་བུའི་མཆོག་མི་མགོ་སྐམ་པོ་ལྔས་དབུ་བརྒྱན་པ། མི་མགོ་སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔས་བརྒྱན་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཕྱིའི་ཧེ་རུ་ཀའི་ཕྱག་གཡས་ཀྱི་དང་པོ་ལ་མཁའ་འགྲོ་མ་ནག་མོ། གཉིས་པ་ལ་ལཱ་མ་ལྗང་གུ། གཡོན་གྱི་དང་པོ་ལ་ཁཎྜ་རོ་ཧི་དམར་མོ། གཉིས་པ་ལ་གཟུགས་ཅན་མ་སེར་མོ། གཡས་ཀྱི་གསུམ་པ་ན་ཁྭ་གདོང་མ་སྔོན་མོ། བཞི་པ་ན་འུག་གདོང་མ་ལྗང་ཁུ། ལྔ་པ་ན་ཁྱི་གདོང་མ་དམར་མོ། དྲུག་པ་ན་ཕག་གདོང་མ་སེར་མོ། གཡོན་གྱི་གསུམ་པ་ན་གཤིན་རྗེ་བརྟན་མ་གཡས་སྔོ་གཡོན་སེར་བ། བཞི་པ་ན་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ལྔ་པ་ན་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དྲུག་པ་ན་གཤིན་རྗེ་འཇོམས་མ་གཡས་ལྗང་གཡོན་སྔོ་བ་སྟེ་ཐམས་ཅད་ཀྱང་ཞལ་ཕྱག་སྔར་བཞིན་གསལ་གདབ། དེ་ནས་སྤྱི་བོ་ལ་སོགས་པའི་གནས་རྣམས་སུ་པུ་ཛཱ་ཨཽ་ཨ་གོ་ར་དེ་མཱ། ཀ་ཨོ་ཏི་ཀོ་ཀ་ལ་ཀ་ཧི། པྲེ་གྲྀ་སཽ་སུ་ན་སི་མ་ཀུའི་དབྱིབས་ཅན་དུ་གནས་པའི་ཁམས་དང་རྩ་རྣམས་དཔའ་བོ་དང་རྣལ་འབྱོར་མ་རྣམས་སུ་གྱུར་པ་ནི་སྤྱི་བོ་པུ་ལི་ར་མ་ལ་ཡར་ཁཎྜ་ཀ་པཱ་ལི་དང་རབ་ཏུ་གཏུམ་མོ། སྤྱི་གཙུག་ཛཱ་ལན་དྷ་རར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་ཨུདྷྱན་དུ་ཀཾ་ཀ་ལ་དང་འོད་ལྡན་མ། ལྟག་པ་ཨར་བུ་དར་མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས། རྣ་བ་གཡོན་པ་གོ་དཱ་བཱ་རིར་སུ་ར་ཝ་རི་དང་བརྟན་པའི་བློ་ཅན་མ། སྨིན་མའི་དབུས་རཱ་མེ་ཤཱ་རར་འོད་དཔག་མེད་དང་མིའུ་ཐུང་མ། མིག་གཉིས་དེ་ཝཱི་ཀོ་ཊར་རྡོ་རྗེ་འོད་དང་ལཾ་ཀའི་དབང་ཕྱུག་མ། ཕྲག་པ་གཉིས་མ་ལཱ་ཝར་རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་རྣམས་ཐུགས་ཀྱི་འཁོར་ལོ་སྔོན་པོ་ནམ་མཁའ་ལ་སྤྱོད་པའོ། །མཆན་ཁུང་གཉིས་ཀཱ་མ་རུ་པར་ཨཾ་ཀུ་རཱི་དང་ཨེ་རཱ་བ་ཏི། ནུ་མ་གཉིས་ཨོ་ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་། ལྟེ་བ་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ་སྟེ་ཉེ་བའི་ཞིང་དང་། ཁ་ཀ་ལིཾ་གར་རབ་ཏུ་བཟང་པོ་དང་ཤྱཱ་མ་དེ་ཝི། མགྲིན་པ་ལཾ་པཱ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚན་དྷོ། སྙིང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། འདོམས་བར་ཧི་མཱ་ལ་ཡར་མིག་མི་བཟང་དང་ཁ་གཱ་ན་ན་སྟེ་ཉེ་བའི་ཚན་དྷོ་རྣམས་གསུམ་གི་འཁོར་ལོ་ཁ་དོག་དམར་པོ་ས་ལ་སྤྱོད་པའོ། །མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲྀ་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧ་སྟེ་འདུ་བ། བརླ་གཉིས་སཽ་རཥྚྲ་རྟ་མགྲིན་དང་ཤཽན་ཌི་ནི། བྱིན་པ་གཉིས་སུ་ཝརྞ་དཱི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་ཉེ་བའི་འདུ་བ། སོར་མོ་བཅུ་དྲུག་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་གཉིས་སིནྡྷཱུར་པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད། མཐེ་བོང་བཞི་མ་རུར་རྣམ་པར་སྣང་མཛད་དང་འཁོར་ལོས་བསྒྱུར་མ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་རྣམས་སྐུའི་འཁོར་ལོ་ཁ་དོག་དཀར་པོ་ས་འོག་ན་སྤྱོད་པའོ། །ཁཎྜ་ཀ་པཱ་ལི་ལ་སོགས་པའི་དཔའ་བོ་ཐམས་ཅད་ཞེས་སོགས་ཞལ་ཕྱག་སྔར་བཞིན་གསལ་གདབ། དེ་ནས་སྔགས་ཀྱིས་བྱིན་གྱིས་བརླབ་པ་ནི། ངག་དུ་ཨོཾ་ཞེས་བརྗོད་པའི་ཚེ་བདག་གིས་བསྒོམས་པའི་ལུས་དཀྱིལ་དང་། ཕྱི་དཀྱིལ་གྱི་སྐུ་འཁོར་གཉིས་དང་། འཛམ་བུའི་གླིང་ན་བཞུགས་པའི་སྐུ་འཁོར་དང་། འོག་མིན་ན་བཞུགས་པའི་སྐུའི་འཁོར་ལོ་སྟེ། སྐུའི་འཁོར་ལོ་བཞི་དྲན་པར་བྱ། དེ་བཞིན་དུ་ཨཱཿཞེས་བརྗོད་པས་གསུང་གི་འཁོར་ལོ་བཞི་དང་། ཧཱུྃ་ཞེས་བརྗོད་པས་ཐུགས་ཀྱི་འཁོར་ལོ་བཞི་དང་། སརྦ་ཝཱི་ར་ཡོ་གི་ནི་ཞེས་བརྗོད་པས་དཔའ་བོ་ཉི་ཤུ་རྩ་བཞི་དང་། དཔའ་མོ་སུམ་ཅུ་རྩ་བདུན་དྲན་པར་བྱ། ཀཱ་ཡ་ཞེས་བརྗོད་པས་ཐམས་ཅད་ཀྱི་སྐུ་དང་། ཝཱཀ་ཞེས་བརྗོད་པས་ཐམས་ཅད་ཀྱི་གསུང་དང་། ཙིཏྟ་ཞེས་བརྗོད་པས་ཐམས་ཅད་ཀྱི་ཐུགས་དབྱེར་མི་ཕྱེད་སྙམ་དུ་དྲན་པར་བྱ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པས་གཉིས་སུ་དབྱེར་མི་ཕྱེད་པའི་རྡོ་རྗེའི་རང་བཞིན་དེ་ཉིད་ང་ཡིན་ནོ་སྙམ་དུ་བསམས་ལ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ྅ཧཾ། ཞེས་བརྗོད་པས་ཆོས་ཐམས་ཅད་སྟོང་པ་ཉིད་རྡོ་རྗེའི་རང་བཞིན་དུ་རྣམ་པར་དག་པའི་ངོ་བོ་བདག་ཡིན་ནོ་སྙམ་པ་ལན་གསུམ་དུ་བྱའོ། །གཉིས་པ་ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི་ལུས་ཀྱིས་ལག་པའི་མཛུབ་མོ་གཉིས་ལུ་གུ་རྒྱུད་དུ་སྦྲེལ། གུང་མོ་གཉིས་དང་མཐེ་བོང་གཉིས་སོ་སོར་སྦྱར། སོར་མོ་ལྷག་མ་རྣམས་འབར་བའི་ཚུལ་དུ་བྱས་པའི་ཕྱག་རྒྱ་དཔྲལ་བར་གཡོན་དུ་བསྐོར། མིག་གྱེན་དུ་བལྟ་བ་དང་བཅས་པས་གདོང་བསྒྱུར། རྐང་པ་གཡས་པའི་མཐིལ་གྱིས་གཡོན་པའི་བོལ་གོང་མནན་ལ་ངག་དུ་ཕཻཾ་ཞེས་བརྗོད་དེ། སེམས་ཀྱིས་སྙིང་ཁའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་དཔྲལ་བ་ནས་སྤྲོས་ཏེ་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲངས་ལ། ཚོགས་ཞིང་གི་སྐབས་ལྟར་ཕྱི་མཆོད་དང་ཡིད་མཆོད་གཉིས་ཀྱིས་མཆོད། ཛཿཞེས་བརྗོད་པས་ཉེ་བར་བྱོན། ཧཱུྃ་ཞེས་བརྗོད་པས་རྟེན་དང་བརྟེན་པ་སོ་སོ་ལ་ཐིམ། བཾ་ཞེས་བརྗོད་པས་ཡེ་ཤེས་པ་དང་དམ་ཚིག་པ་འདྲེས། ཧོཿཞེས་བརྗོད་པས་དམ་ཚིག་སེམས་དཔའ་ཡེ་ཤེས་སེམས་དཔའི་ངོ་བོར་གྱུར་པར་བསམས་ནས་ངག་ཏུ་ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧཾ། ཞེས་བརྗོད་དེ་ཡེ་ཤེས་ཀྱི་རྣལ་འབྱོར་གྱི་ངོ་བོར་ཆོས་ཐམས་ཅད་དག་ལ་བདག་ཀྱང་དེའི་ངོ་བོར་དག་གོ་ཞེས་བསམ་ཞིང་ལུས་ཀྱི་སྙིང་ཁར་རྣམ་ལྔ་འདོད་པའི་བསྐོར་བ་བྱས་ནས་མཐར་འཁྱུད་པའི་ཚུལ་བྱའོ། །གསུམ་པ་གོ་ཆ་བཅིང་བ་ནི། རྒྱུད་དང་ལཱུ་ཧི་པའི་གཞུང་ལས་སྔོན་ལ་གོ་ཆ་བཅིངས་ནས་དེའི་རྗེས་སུ་ཡེ་ཤེས་ཀྱི་འཁོར་ལོ་དགུག་གཞུག་གསུངས་པས་དེ་བཞིན་བྱས་ཀྱང་ཆོག་པར་གསུངས་ལ། ནཱ་རོ་ཏ་པས་ཤིང་གཉིས་གཟེར་གྱིས་བསྡམས་པ་དང་འདྲ་བར་སྐབས་འདིར་གསུངས་པས་ངག་ཏུ། གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ཡབ་ཀྱི་སྙིང་ཁར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱ་ཧཱ་ཧུ་དམར་པོ་པདྨ་གར་གྱི་དབང་ཕྱུག ཕྲག་པ་གཉིས་སུ་བོ་ཥ་ཊ་ཧེ་ནག་པོ་ཧེ་རུ་ཀ མིག་གཉིས་སུ་ཧཱུྃ་ཧཱུྃ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་ཁུ་རྟ་མཆོག་ཏུ་མོས་པ་བྱ། དེ་བཞིན་དུ་ཡུམ་ལ་ཡང་བསམ་ཞིང་ལྷ་ཐམས་ཅད་ལ་ཡང་ཡོད་པར་མོས་པ་བྱའོ། །ཡུམ་གྱི་ལྟེ་བར་ཨོཾ་བཾ་དམར་མོ་རྡོ་རྗེ་ཕག་མོ། སྙིང་ཁར་ཧཾ་ཡོཾ་སྔོན་མོ་གཤིན་རྗེ་མ། ཁར་ཧྲིཾ་མོཾ་དཀར་མོ་རྨོངས་བྱེད་མ། སྤྱི་བོར་ཧྲེཾ་ཧྲིཾ་སེར་མོ་བསྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་ལྗང་ཁུ་ཙན་ཏི་ཀ་སྟེ་དེ་བཞིན་དུ་ཡབ་ལ་ཡང་ཡོད་པར་བསམ་ཞིང་ལྷ་ཐམས་ཅད་ལ་ཡང་ཡོད་པར་མོས་པ་བྱའོ། །དེ་ཡང་ཡབ་ཡུམ་གཉིས་སུ་མེད་པ་ཡིན་པས་ན་ཡབ་ཀྱི་གནས་སུ་ཡུམ་དང་། ཡུམ་གྱི་གནས་སུ་ཡབ་རྣམས་གཉིས་སུ་མེད་པར་གྱུར། བཞི་པ་དབང་བསྐུར་ཞིང་རིགས་ཀྱིས་བདག་པོས་རྒྱས་གདབ་པ་ནི་གོང་གི་ཡེ་ཤེས་ཀྱི་དཀྱིལ་འཁོར་སྤྱན་དྲང་བའི་སྐབས་ཀྱི་ཕྱག་རྒྱ་དང་སྔགས་དང་ཏིང་ངེ་འཛིན་གྱིས་དབང་བསྐུར་གྱི་ལྷ་དྲུག་ཅུ་རྩ་གཉིས་མདུན་གྱི་ནམ་མཁར་སྤྱན་དྲངས། ཕྱི་དང་ཡིད་ཀྱི་མཆོད་པས་མཆོད། ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་བཞིན་གཤེགས་པ་དེ་རྣམས་ཀྱིས་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བས་སྤྱི་གཙུག་ན་མར་ལ་དབང་བསྐུར་ཞིང་ངག་ཏུ། ཇི་ལྟར་བལྟམས་པ་ཙམ་གྱིས་ཀྱང་། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཤིང་། བུམ་པའི་ཆུས་སྤྱི་བོ་ནས་དབང་བསྐུར་བས་ལུས་ཐམས་ཅད་གང་། དྲི་མ་ཐམས་ཅད་དག ཆུ་ལྷག་མ་ཡར་ལུད་པ་ལས་བདེ་བ་ཆེན་པོའི་ལྷ་རྣམས་དང་། དམ་ཚིག་གི་འཁོར་ལོའི་ལྷ་རྣམས་ལ་གཙོ་བོ་ཉིད་ཀྱིས་དབུ་བརྒྱན། ཐུགས་ཀྱི་འཁོར་ལོའི་ལྷ་རྣམས་ལ་མི་བསྐྱོད་པ། གསུང་གི་འཁོར་ལོའི་ལྷ་རྣམས་ལ་འོད་དཔག་མེད། སྐུའི་འཁོར་ལོའི་ལྷ་རྣམས་ལ་རྣམ་པར་སྣང་མཛད་ཀྱིས་དབུ་བརྒྱན་པར་བསམ་སྟེ། བདག་ཉིད་སངས་རྒྱས་སུ་བསྐྱེད་པའོ། །གཉིས་པ་དེ་ལ་མཆོད་པ་ནི། བདག་བསྐྱེད་ནར་མའི་སྐབས་སུ་སྔགས་དང་། ཕྱི་དང་། བདུད་རྩི་དང་། མཉེས་པ་དང་། ཡིད་ལས་བྱུང་བ་དང་། བསྟོད་པའི་མཆོད་པ་སྟེ་དྲུག་པོ་འདི་འབའ་ཞིག་བྱེད་པ་ཡིན་ལ། ཚེས་བཅུའི་མཆོད་པ་ལ་སོགས་པའི་དུས་སུ་ནི་ཕྱི་མཆོད་ཀྱི་རྗེས་ལ་རིག་མ་བཅུ་དྲུག་དང་། རིན་ཆེན་སྣ་བདུན་དང་། འདོད་ཡོན་ལྔའི་མཆོད་པ་སྟེ་དགུ་བྱེད་པ་ཡིན་ནོ། །དེ་ལ་དང་པོ་ནི། ལྷ་དེ་དང་དེ་གསལ་གདབ་པའི་ཚུལ་གྱིས་མཆོད་དེ། ངག་ཏུ། ཨོཾ་ན་མོ་བྷ་ག་ཝ་ཏཻ་ཝཱི་རེ་ཤཱ་ཡ། མ་ཧཱ་ཀལྤ་ཨགྣི་སཾ་ནི་བྷ་ཡ་ཛ་ཊ་མ་ཀུ་ཊོཏྐ་ཊཱ་ཡ། དཾ་ཥྚཱ་ཀ་རཱ་ལོ་གྲ་བྷཱི་ཥ་ན་མུ་ཁཱ་ཡ་ས་ཧ་སྲ་བྷཱུ་ཛ་བྷ་སུ་རཱ་ཡ། པ་ར་ཤུ་པཱ་ཤོ་དྱ་ཏ་ཤུ་ལ་ཁ་ཊཱཾ་ག་དྷཱ་རི་ཎེ། བྱཱ་གྲཱ་ཛི་ནཾ་ཨམྦ་ར་དྷ་རཱ་ཡ། མ་ཧཱ་དྷུམྤྲ་ཨནྡྷ་ཀ་ར་ཝ་པུ་ཥ་ཡ། ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ། ཀྵོ་བྷ་ཡ། ཧྲཽཾ་ཧྲཽཾ། ཧྲཿཧྲཿཕཻཾཕཻཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་བྷ་ཀྵ། བ་ས་རུ་དྷི་ར་ཨནྟྲ་མ་ལ། ཨ་བ་ལཾ་བི་ནེ། གྲྀཧྞ་གྲྀཧྞ། སཔྟ་པ་ཏ་ལ་ག་ཏ་བྷུ་ཛཾ་ག་ས་ར་བཾ་པཱ། ཏརྫ་ཡ། ཏརྫ་ཡ། ཨཱ་ཀ་ཌ་དྷ། ཧྲཱིཾ་ཧྲཱི་ཾ། ཛཎཽཾ་ཛཎཽཾ། ཀྵྨཾ་ཀྵྨཾ། ཧཾ་ཧཾ། ཧི་ཾཧིཾ། ཧཱུྃ་ཧཱུྃ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་ན་མོ་བྷ་ག་ཝཱ་ཏི་བཛྲ་བཱ་ར་ཧི་བཾ། ཨཱརྻ་ཨ་པ་རཱ་ཛི་ཏེ་ཏྲཻ་ལོ་ཀྱ་མཱ་ཏེ་མ་ཧཱ། བཱི་དྱེ་ཤྭ་རི། སརྦ་བྷུ་ཏ་བྷ་ཡ་བཱ་ཧེ་མཧཱ་བཛྲེ། བཛྲ་ཨ་ས་ནེ། ཨ་ཛི་ཏེ་ཨ་བ་རཱ་ཛི་ཏེ། བཱ་ཤྱཱཾ་ཀ་རི་ནེ་ཏྲ་བྷྲཱ་མ་ཎི། ཤོ་ཥ་ཎི་རོ་ཥ་ཎི་ཀྲོ་དྷ་ཀ་ར་ལེ་ནི་ཏྲཱ་ས་ནི། མཱ་ར་ཎི་པྲ་བྷེ་ད་ནི་ཨ་པ་ར་ཛ་ཡེ། བི་ཛ་ཡེ་ཛམྦྷ་ནི་ཏམྦྷ་ནི། མོ་ཧ་ནི་བཛྲ་བཱ་ར་ཧི་མ་ཧཱ་ཡོ་གི་ནི། ཀཱ་མེ་ཤྭ་རི་ཁ་གེ ཏངྱ་ཐཱ། པྲོ་ཏཾ་གེ་པྲོ་ཏཾ་གེ ཧ་ན་ཧ་ན། པྲཱ་ཎཱན་ཀིཾ་ཀི་ནི་ཁིཾ་ཁི་ནི། དྷུ་ན་དྷུ་ན་བཛྲ་ཧ་ཏེ། ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་ག་ཀ་པཱ་ལ་དྷ་རི་ཎི། མཧཱ་བི་སི་ཏ་མཱ་ན་སཱ་ཤ་ནི། མཱ་ནུ་ཥ་ཨནྟྲ་པྲ་བྲི་ཏི། ས་ནི་དྷྱཾ་ན་ར་སི་རོ། མཱ་ལ་གྲན་ཐི་ཏ། དྷཱ་རི་ཎེ། སུམྦྷ་ནི་སུམྦྷེ། ཧ་ན་ཧ་ན་པྲཱ་ཎཱན་སརྦ་པ་ཤུ་པཱ་ནཱན། མ་ཧཱ་མཱན་སཙྪེ་ད་ནི། ཀྲོ་དྷ་མུརྟེ། དཾ་ཥྚཱ་ཀ་རཱ་ལི་ནི་མ་ཧཱ་མུ་ཏྲེ་ཤྲཱི་ཧེ་རུ་ཀ དེ་ཝ་སྱ། ཨ་གྲ་མ། ཧི་ཥི་ས་ཧ་སྲ་པྲ་ཤི་རེ། ས་ཧ་སྲ་བཱ་ཧ་བེ། ཤ་ཏ་ས་ཧ་སྲ་ཨཱ་ན་ནེ། ཛྭ་ལི་ཏ་ཏེ་ཛ་སེ། ཛྭ་ལ་མུ་ཁི་པིཾ་ག་ལ་ལོ་ཙ་ནི། བཛྲ་ཤི་རཱི་རེ། བཛྲ་ཨཱ་ས་ནེ། མི་ལི་ཏེ། ཧེ་ཧེ་ཧ་ཧ་ཧཱུྃ་ཧཱུྃ། ཁ་ཁ། དྷུ་དྷུ། དྷུ་རུ་དྷུ་རུ། མུ་རུ་མུ་རུ། མུཉྩ་མུཉྩ། ཨ་དྭཻ་ཏེ་མ་ཧཱ། ཡོ་གི་ནི། ས་ཐི་ཏ། སི་དྷེ། ཏྲཻཾ་དྷཾ་ཏྲཻཾ་དྷཾ། གྲཾ་གྲཾ། ཧེ་ཧེ། ཧཱ་ཧཱ། བྷཱཾ་མེ་ཧ་ས་ཧ་ས། བཱི་རེ་ཧཱ་ཧཱ་ཧོ་ཧོ། ཧཱུྃ་ཧཱུྃ། ཏྲཻ་ལོ་ཀྱ་བི་ན་ས་ནི། ཤ་ཏ་ས་ཧ། པྲ་ཀོ་ཊེ། ཏ་ཐཱ་ག་ཏ་པ་རི་ཝཱ་རེ་ཧཱུྃ་ཧཱུྃ་ཕཊ། སིཾ་ཧ་རུ་པེ་ཥ་ག་ཛ་རུ་པེ་གཿ ཏྲཻ་ལོ་ཀྱ་ཨུ་ད་རེ་ས་མུ་ཏྲ་མེ་ཁ་ལེ། གྲ་ས་གྲ་ས་ཧཱུྃ་ཧཱུྃ་ཕཊ། བཱི་རཱ་དྭཻ་ཏེ་ཧཱུྃ་ཧཱུྃ། ཧ་ཧ། མཧཱ་པ་ཤུ་མོ་ཧ་ནི། མ་ཧཱ་ཡོ་གི་ཤྭ་རི་ཏྲཾ་ཌཱ་ཀི་ནཱི། སརྦ་ལོ་ཀཱ་ནཾ་བནྡྷ་ནི་སདྱཿ པྲ་ཏྱ་ཡ་ཀཱ་རི་ཎི་ཧཱུྃ་ཧཱུྃ་ཕཊ། བྷུ་ཏ་ཏྲཱ་ས་ནི། མ་ཧཱ་བཱི་རེ་པ་ར་མ་སིདྷི་ཡོ་གཱི་ཤྭ་རི་ཕཊ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་རྩ་སྔགས་གཉིས་གཉིས་སུ་མེད་པ་དང་། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནཱི་ཛཱ་ལ་སཾ་པ་རཾ་སྭཱ་ཧཱ། ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ་སྭཱ་ཧཱ། ཞེས་སྙིང་པོ་གཉིས་གཉིས་སུ་མེད་པ་དང་། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ཎི་ཡེ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པས་ཉེ་སྙིང་གཉིས་སུ་མེད་པ་དང་། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ཨོཾ་ཌཱ་ཀི་ནི་ཡེ་ཧཱུྃ་ཧཱུྃ་ཕཊ། ཨོཾ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ། ཨོཾ་ལཱ་མ་ཡེ་ཧཱུྃ་ཧཱུྃ་ཕཊ། ཨོཾ་གྲྀཧྣ་པ་ཡ་གྲྀཧྣ་པ་ཡ་ཧཱུྃ་ཧཱུྃ་ཕཊ། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་རཱ་ཛ་ཧཱུྃ་ཧཱུྃ་ཕཊ། ཨོཾ་རཱུ་པེ་ནཱི་ཡེ་ཧཱུྃ་ཧཱུྃ་ཕཊ། ཞེས་ཞལ་བཞི་པ་དང་སྙིང་པོའི་རྣལ་འབྱོར་མ་བཞི་སྤེལ་བ་དང་། ཨོཾ་ཀ་ར་ཀ་ར་ཧཱུྃ་ཧཱུྃ་ཕཊ། ཨོཾ་པྲ་ཙཎྜེ་ཧཱུྃ་ཧཱུྃ་ཕཊ། ཨོཾ་ཀུ་རུ་ཀུ་རུ་ཧཱུྃ་ཧཱུྃ་ཕཊ། ཨོཾ་ཙཎྜ་ཨཀྵི་ཡེ་ཧཱུྃ་ཧཱུྃ་ཕཊ། ཨོཾ་བྷནྡྷ་བྷནྡྷ་ཧཱུྃ་ཧཱུྃ་ཕཊ། ཨོཾ་པྲ་བྷ་ཝ་ཏཱི་ཡེ་ཧཱུྃ་ཧཱུྃ་ཕཊ། ཨོཾ་ཏྲཱ་ས་ཡ་ཏྲཱ་ས་ཡ་ཧཱུྃ་ཧཱུྃ་ཕཊ། ཨོཾ་མ་ཧཱ་ནཱ་སེ་ཧཱུྃ་ཧཱུྃ་ཕཊ། ཨོཾ་ཀྵོ་བྷ་ཡ་ཀྵོ་བྷ་ཡ་ཧཱུྃ་ཧཱུྃ་ཕཊ། ཨོཾ་བཱི་ར་མ་ཏཱི་ཡེ་ཧཱུྃ་ཧཱུྃ་ཕཊ། ཨོཾ་ཧྲཽཾ་ཧྲཽཾ་ཧཱུྃ་ཧཱུྃ་ཕཊ། ཨོཾ་ཁ་ར་ཝ་རི་ཡེ་ཧཱུྃ་ཧཱུྃ་ཕཊ། ཨོཾ་ཧྲཿཧྲཿཧཱུྃ་ཧཱུྃ་ཕཊ། ཨོཾ་ལཾ་ཀེ་ཤྭ་རི་ཡེ་ཧཱུྃ་ཧཱུྃ་ཕཊ། ཨོཾ་ཕཻཾ་ཕཻཾ་ཧཱུྃ་ཧཱུྃ་ཕཊ། ཨོཾ་དྲུ་མཙྪ་ཡེ་ཧཱུྃ་ཧཱུྃ་ཕཊ། ཨོཾ་ཕཊ་ཕཊ་ཧཱུྃ་ཧཱུྃ་ཕཊ། ཨོཾ་ཨཻ་རེ་ཝ་ཏི་ཡེ་ཧཱུྃ་ཧཱུྃ་ཕཊ། ཨོཾ་ད་ཧ་ད་ཧ་ཧཱུྃ་ཧཱུྃ་ཕཊ། ཨོཾ་མ་ཧཱ་བྷཻ་ར་ཝཱི་ཡེ་ཧཱུྃ་ཧཱུྃ་ཕཊ། ཨོཾ་པ་ཙ་པ་ཙ་ཧཱུྃ་ཧཱུྃ་ཕཊ། ཨོཾ་ཝཱ་ཡུ་བེ་གེ་ཧཱུྃ་ཧཱུྃ་ཕཊ། ཨོཾ་བྷཀྵ་བྷཀྵ་བ་ས་རུ་དྷི་ར་ཨནྟྲ་མཱ་ལ་ཨ་བ་ལཾ་བི་ནི་ཧཱུྃ་ཧཱུྃ་ཕཊ། ཨོཾ་སུ་ར་བྷ་ཀྵི་ཡེ་ཧཱུྃ་ཧཱུྃ་ཕཊ། ཨོཾ་གྲྀཧྞ་གྲྀཧྞ་སཔྟ་པཱ་ཏ་ལ་ག་ཏ་བྷུ་ཛཾ་ག་སར་པཾ་པཱ་ཏརྫ་ཡ་ཏརྫ་ཡ་ཧཱུྃ་ཧཱུྃ་ཕཊ། ཨོཾ་ཤྱཱ་མ་དེ་ཝཱི་ཡེ་ཧཱུྃ་ཧཱུྃ་ཕཊ། ཨོཾ་ཨ་ཀ་ཊ་དྷ་ཨ་ཀ་ཊ་དྷ་ཧཱུྃ་ཧཱུྃ་ཕཊ། ཨོཾ་སུམྦྷ་ཏྲེ་ཧཱུྃ་ཧཱུྃ་ཕཊ། ཨོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ། ཨོཾ་ཧ་ཡ་ཀརྞེ་ཧཱུྃ་ཧཱུྃ་ཕཊ། ཨོཾ་ཛཎཽཾ་ཛཎཽཾ་ཧཱུྃ་ཧཱུྃ་ཕཊ། ཨོཾ་ཁ་གཱ་ན་ནེ་ཧཱུྃ་ཧཱུྃ་ཕཊ། ཨོཾ་ཀྵྨཾ་ཀྵྨཾ་ཧཱུྃ་ཧཱུྃ་ཕཊ། ཨོཾ་ཙཀྲ་བེ་གེ་ཧཱུྃ་ཧཱུྃ་ཕཊ། ཨོཾ་ཧཾ་ཧཾ་ཧཱུྃ་ཧཱུྃ་ཕཊ། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཨོཾ་ཧིཾ་ཧིཾ་ཧཱུྃ་ཧཱུྃ་ཕཊ། ཨོཾ་ཤཽཎྜི་ནཱི་ཡེ་ཧཱུྃ་ཧཱུྃ་ཕཊ། ཨོཾ་ཧཱུྃ་ཧཱུྃ་ཧཱུྃ་ཧཱུྃ་ཕཊ། ཨོཾ་ཙཀྲ་ཝརྨི་ཎཱི་ཡེ་ཧཱུྃ་ཧཱུྃ་ཕཊ། ཨོཾ་ཀི་ལི་ཀི་ལི་ཧཱུྃ་ཧཱུྃ་ཕཊ། ཨོཾ་སུ་བཱི་རེ་ཧཱུྃ་ཧཱུྃ་ཕཊ། ཨོཾ་སི་ལི་སི་ལི་ཧཱུྃ་ཧཱུྃ་ཕཊ། ཨོཾ་མཧཱ་བ་ལེ་ཧཱུྃ་ཧཱུྃ་ཕཊ། ཨོཾ་ཧི་ལི་ཧི་ལི་ཧཱུྃ་ཧཱུྃ་ཕཊ། ཨོཾ་ཙཀྲ་ཝརྟི་ནཱི་ཡེ་ཧཱུྃ་ཧཱུྃ་ཕཊ། ཨོཾ་དྷི་ལི་དྷི་ལི་ཧཱུྃ་ཧཱུྃ་ཕཊ། ཨོཾ་མཧཱ་བཱིདྱེ་ཧཱུྃ་ཧཱུྃ་ཕཊ། ཞེས་དཔའ་བོ་ཉི་ཤུ་རྩ་བཞི་དང་དཔའ་མོ་ཉི་ཤུ་རྩ་བཞི་སྤེལ་བ་དང་། ཨོཾ་ན་མོ་བྷ་ག་ཝ་ཏེ་ཝི་རེ་ཤཱ་ཡ་ཧཱུྃ་ཧཱུྃ་ཕཊ། ཨོཾ་ཀཱ་ཀཱ་སྱེ་ཧཱུྃ་ཧཱུྃ་ཕཊ། ཨོཾ་མཧཱ་ཀལྤ་ཨགྣི་སཾ་ནི་བྷཱ་ཡ་ཧཱུྃ་ཧཱུྃ་ཕཊ། ཨོཾ་ཨུ་ལུ་ཀཱ་སྱེ་ཧཱུྃ་ཧཱུྃ་ཕཊ། ཨོཾ་ཛ་ཌ་མ་ཀུ་ཌོ་ཌ་ཀྭ་ཊ་ཡ་ཧཱུྃ་ཧཱུྃ་ཕཊ། ཨོཾ་ཤྭ་ན་སྱེ་ཧཱུྃ་ཧཱུྃ་ཕཊ། ཨོཾ་དཾཥྜཱ་ཀ་ར་ལོ་གྲ་བྷི་ཥ་ཎ་མུ་ཁཱ་ཡ་ཧཱུྃ་ཧཱུྃ་ཕཊ། ཨོཾ་སཱུ་ཀཱ་ར་སྱེ་ཧཱུྃ་ཧཱུྃ་ཕཊ། ཨོཾ་ས་ཧ་སྲ་བྷུ་ཛ་བྷཱ་སུ་རཱ་ཡ་ཧཱུྃ་ཧཱུྃ་ཕཊ། ཨོཾ་ཡ་མ་དཱ་དྷི་ཡེ་ཧཱུྃ་ཧཱུྃ་ཕཊ། ཨོཾ་པ་ར་ཤུ་པ་ཤོ་དྱེ་ཏ་ཤུ་ལ་ཁ་ཊྭཱཾ་ག་དྷ་རི་ཎེ་ཧཱུྃ་ཧཱུྃ་ཕཊ། ཨོཾ་ཡ་མ་དུ་ཏཱི་ཡེ་ཧཱུྃ་ཧཱུྃ་ཕཊ། ཨོཾ་བྱ་གྷྲ་ཛི་ན་ཨམྦ་ར་དྷ་ཡ་ར་ཧཱུྃ་ཧཱུྃ་ཕཊ། ཨོཾ་ཡ་མ་དཾ་ཥྚཱི་ཎི་ཡེ་ཧཱུྃ་ཧཱུྃ་ཕཊ། ཨོཾ་མཧཱ་དྷུམྤྲ་རཨནྟ་ཀཱ་ར་ཝ་པུ་ཥཱ་ཡ་ཧཱུྃ་ཧཱུྃ་ཕཊ། ཨོཾ་ཡ་མ་མ་ཐ་ཎཱི་ཡེ་ཧཱུྃ་ཧཱུྃ་ཕཊ། ཞེས་ཡབ་ཀྱི་རྐང་བརྒྱད་དང་སྒོ་མཚམས་མ་བརྒྱད་སྤེལ་བ་བརྗོད་པར་བྱའོ། །གཉིས་པ་ནི་དངོས་སུ་བཤམས་པའམ། ཡིད་ཀྱིས་བསམས་ཀྱང་རུང་སྟེ་ཞལ་བཞི་པའི་སྔགས་ཀྱིས་བསང་། སྭ་བྷཱ་ཝས་སྟོང་པར་སྦྱང་། སྟོང་བའི་ངང་ལས་ཨ་བདུན་ལས་ཐོད་པའི་སྣོད་བདུན་གྱི་ནང་དུ་ཧཱུྃ་བདུན་ཞུ་བ་ལས་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི། ཞལ་ཟས། གཞན་ཡང་རོལ་མོ་ལ་སོགས་པ་དྭངས་ཤིང་ཐོགས་པ་མེད་པ་ནམ་མཁའི་ཁམས་གང་བར་གྱུར་པར་བསམས་ལ། ཨོཾ་བཛྲ་ཨརྒྷཾ་ཨཱཿཧཱུྃ། ཞེས་བྱ་བ་ལ་སོགས་པ་རང་རང་གི་སྔགས་ཀྱིས་བྱིན་གྱིས་བརླབ། དེ་ནས་རང་རང་གི་ཕྱག་རྒྱ་དང་བཅས་ཏེ་ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བ་ར་མཎྜ་ལ་ཙཀྲ་སརྦ་ཝཱི་ར་ཡོ་གི་ནཱི་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་པས་མཆོད་ཡོན་ཕྱག་ཏུ་དབུལ། དེ་བཞིན་དུ་སྔགས་ཀྱི་དབུ་ཐམས་ཅད་འདྲ་བར་བྱས་ནས། པཱ་ཏྱཾ་པྲ་ཏཱིཙྪ་ཡེ་སྭཱ་ཧཱ། ཞེས་པ་ནས། ཨོཾ་བཛྲ་ནི་ཝི་ཏེ་ཨཱཿཧཱུྃ། ཞེས་པས་ཞལ་ཟས་ཀྱི་བར་དུ་དབུལ། དེ་ནས་དྲིལ་བུ་གསིལ་ཞིང་། ཨོཾ་བཛྲ་གྷཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཊ། པྲ་ཙ་ལི་ཏེ། པྲ་ཛྙཱ་པཱ་ར་མི་ཏ་ནཱ་ད་སཾ་བྷ་ཝེ་ཏ། བཛྲ་དྷརྨཱ་ཧྲྀ་ད་ཡ་སན་ཏོ་ཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་པས་རོལ་མོ་སྙན་ལམ་དུ་དབུལ། གསུམ་པ་ནི་བདུད་རྩི་དངོས་སུ་འབྱོར་པའམ་བསམས་ཀྱང་རུང་སྟེ། འོག་ནས་འབྱུང་བའི་གཏོར་མ་བཞིན་བྱིན་གྱིས་བརླབས་ལ་ལག་པ་གཡོན་པའི་མཐེབ་སྲིན་གྱིས་གཏོར་ཏེ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་དྲིན་ཅན་རྩ་བའི་བླ་མ་གང་ཡིན་པ་དེའི་མཚན་ནས་བརྗོད་དེ་ཞལ་དུ་ཨོཾ་ཨཱཿཧཱུྃ། ཧེ་རུ་ཀ་དཔལ་དཀྱིལ་འཁོར་དང་། །གསང་བའི་བདག་པོ་རྡོ་རྗེ་འཆང་། །དཔལ་ལྡན་སློབ་དཔོན་ས་ར་ཧ། །ཀླུ་སྒྲུབ་རི་ཁྲོད་མགོན་པོ་དང་། །ལོ་ཧི་པ་དང་དཱ་རི་ཀ །ཨནྡྷར་པ་དང་ཏི་ལོ་པ། །ནཱ་རོ་པ་དང་ཕམ་འཐིང་པ། །བློ་གྲོས་གྲགས་པ་ས་ཆེན་མཆོད། །ཨོཾ་ཨཱཿཧཱུྃ། བསོད་ནམས་རྩེ་མོ་གྲགས་པའི་མཚན། །ས་སྐྱ་པཎ་ཆེན་འཕགས་པའི་ཞབས། །དཀོན་མཆོག་དཔལ་དང་བསོད་ནམས་དཔལ། །བློ་གྲོས་བརྟན་པ་དཔལ་ལྡན་པ། །ཡེ་ཤེས་རྒྱལ་མཚན་ཀུན་དགའི་མཚན། །དཀོན་མཆོག་རྒྱལ་མཚན་བླ་མ་མཆོད། །ཨོཾ་ཨཱཿཧཱུྃ་ཞེས་བརྗོད་ཅིང་མཆོད། དེ་ནས་དཀྱིལ་འཁོར་གྱི་འཁོར་ལོ་རྣམས་ལ་སྔགས་མཆོད་ཀྱི་སྔགས་དང་མཐུན་པས་མཆོད་པ་བྱ་ཞིང་། ཡི་གེ་གསུམ་བརྗོད་པས་གནས་གསུམ་དུ་ཐིག་ལེ་བྱ་སྟེ། ཕུང་ཁམས་སྐྱེ་མཆེད་ལྷའི་ངོ་བོར་གསལ་བའང་མཆོད། དེ་ནས་ཆོས་སྐྱོང་སྲུང་མ་རྣམས་ལ་ཡང་སོ་སོའི་སྔགས་ཀྱི་མཇུག་ཏུ་ཡི་གེ་གསུམ་བརྗོད་པས་མཆོད་དོ། །བཞི་པ་ནི་དེ་ནས་བདག་གི་ལྕེ་ལ་བདུད་རྩི་མྱངས་ཏེ། ཕྱི་ནང་གི་ལྷ་ཐམས་ཅད་དགེས་པར་བསམས་ནས། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། ཅེས་ལྷ་ཐམས་ཅད་ཀྱི་ཞལ་ནས་གསུང་བར་བསམ་ལ། བདག་གིས་ཀྱང་མཆོད་ཅིང་སྙིང་ཁར་རྣམ་ལྔ་འདོད་སྐོར་བྱ་སྟེ་མཐར་འཁྱུད་པའི་སྟངས་ཀ་བྱའོ། །ལྔ་པ་ནི་ཚོགས་ཞིང་གིས་སྐབས་ལྟར་ཡིད་བྱུང་གིས་མཆོད་དོ། །དྲུག་པ་ནི་རྡོ་རྗེ་དྲིལ་བུ་གསིལ་ཞིང་ཡབ་ཀྱི་རྐང་པ་བརྒྱད་པ་སྔར་སྔགས་མཆོད་ཀྱི་སྐབས་སུ་སྒོ་མཚམས་མ་བརྒྱད་དང་སྤེལ་བ་དེ་ཉིད་ལོགས་སུ་ཕྱེ་ནས་བརྗོད། ཡུམ་གྱི་རྐང་པ་བརྒྱད་པ་ནི། ཨོཾ་ན་མོ་བྷ་ག་ཝ་ཏི་བཛྲ་ཝཱ་ར་ཧི་བཾ་ཧཱུྃ་ཧཱུྃ་ཕཊ། ཨོཾ་ན་མ་ཨཱརྻ་ཨ་པ་རཱ་ཛི་ཏེ་ཏྲཻ་ལོ་ཀྱ་མཱ་ཏེ་མ་ཧཱ་བི་དྱེ་ཤྭ་རི་ཧཱུྃ་ཧཱུྃ་ཕཊ། ཨོཾ་ན་མཿསརྦ་བྷུ་ཏ་བྷ་ཡ་བ་ཧེ་མཧཱ་བཛྲེ་ཧཱུྃ་ཧཱུྃ་ཕཊ། ཨོཾ་ན་མོ་བཛྲ་ཨཱ་ས་ནེ་ཨ་ཛི་ཏེ་ཨ་པ་ར་ཛི་ཏེ་ཝ་ཤཾ་ཀ་རི་ནཻ་ཏྲ་བྷྲ་མ་ཎཱི་ཧཱུྃ་ཧཱུྃ་ཕཊ། ཨོཾ་ན་མཿཤོ་ཥ་ཎི་རོ་ཥ་ནི་ཀྲོ་དྷ་ཀ་ར་ལི་ཧཱུྃ་ཧཱུྃ་ཕཊ། ཨོཾ་ན་མཿསཏྲ་ས་ནི་མཱ་ར་ཎི་པྲ་བྷེ་ད་ནི་ཨ་པ་ར་ཛ་ཡེ་ཧཱུྃ་ཧཱུྃ་ཕཊ། ཨོཾ་ན་མོ་བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི་ཧཱུྃ་ཧཱུྃ་ཕཊ། ཨོཾ་ན་མོ་བཛྲ་ཝ་ར་ཧེ་མ་ཧཱ་ཡོ་གི་ནི་ཀ་མི་ཤྭ་རི་ཁ་གེ་ཧཱུྃ་ཧཱུྃ་ཕཊ། ཅེས་བརྗོད་ཅིང་། སྤྲོས་པ་ལ་དགའ་ན། ཆོས་དབྱིངས་རྣམ་དག་སོགས་དང་། རྒྱལ་བ་སྤྲུལ་པ་སོགས་ཀྱིས་ཀྱང་བསྟོད་པར་བྱའོ། །གཉིས་པ་སྔགས་ཀྱི་བཟླས་པ་ནི། གསང་སྔགས་གང་བཟླས་པ་ཡབ་ཀྱི་ཐུགས་ཁའི་ཧཱུྃ་ལས་བྱུང་ནས་ཡབ་ཀྱི་ཞལ་ནས་འཐོན་ཏེ། ཡུམ་གྱི་ཞལ་དུ་ཞུགས། ཡུམ་གྱི་སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསང་བའི་རྡོ་རྗེའི་བུ་གར་ཞུགས་སྐུའི་དབྱིབས་བརྒྱུད་དེ། ཐུགས་ཁའི་ཧཱུྃ་ལ་ཐིམ་པའི་ཚུལ་གྱིས་ཏེ། དེའང་ཞི་བ་ལ་ཁ་དོག་དཀར་པོ་སྔགས་གཅིག་གི་རྟིང་ལ་གཅིག་འབྲེངས་བ་མདའི་ཤུགས་ཀྱིས་འགྲོ་བ་ཞེས་བྱ་བ་དང་། དབང་ལ་ནི་ཁ་དོག་དམར་པོ་སྔགས་གཅིག་གི་མཇུག་ལ་གཅིག་གི་མགོ་འཁྱུད་ནས་འགྲོ་བ་སྟེ། ལྕགས་སྒྲོག་ལྟ་བུ་ཞེས་བྱ་བ་དང་། རྒྱས་པ་ལ་ཁ་དོག་སེར་པོ་སྔགས་བུངས་བསྐྱེད་ནས་སྒྲོའི་ཆུན་པོ་ལྟ་བུའི་ཚུལ་གྱིས་འགྲོ་བ་ཞེས་བྱ་བ་དང་། དྲག་པོ་ལ་ནི་ཁ་དོག་ནག་པོ་ཡབ་ཡུམ་གྱི་སྔགས་སྲད་བུ་བསྒྲིལ་བའི་ཚུལ་གྱིས་བཟླས་ཏེ། དེ་ཡང་མཆོག་བསྒྲུབ་པ་ལ་རིན་ཆེན་བཞི་ཞེས་བྱ་བ་རྩ་སྔགས་གཉིས། སྙིང་པོ་གཉིས། ཉེ་སྙིང་གཉིས་དང་། གོ་ཆ་གཉིས་ཏེ་བཞི་པོ་དེ་དག་མོས་པ་གཉིས་སུ་མེད་པ་ཟློས་པ་ཡིན་ལ། འཁོར་རྣམས་ཀྱི་སྔགས་ནི་ཐུན་མཇུག་ལ་ཅི་རིགས་པ་རེ་ཟློས་པ་ཡིན་ནོ། །དབང་བསྐུར་རམ་རབ་གནས་སམ་སྦྱིན་སྲེག་གི་སྔོན་དུ་བསྙེན་པ་བྱེད་ན་ཡབ་ཡུམ་གྱི་སྙིང་པོའི་སྔགས་གཉིས་ལ་ཁྲི་ཕྲག་གསུམ་དང་། སྙིང་པོའི་རྣལ་འབྱོར་མ་བཞི་དང་། སྒོ་མཚམས་མ་བརྒྱད་ལ་རང་རང་གི་སྔགས་སྟོང་ཕྲག་ལྔ་དང་ལྔ་བརྒྱ་རེ་བཟླས། འཁོར་ལོ་གསུམ་གྱི་ལྷ་རྣམས་ནི་ལྷ་རེ་རེ་ལ་རང་རང་གི་ཡབ་ཡུམ་གྱི་སྔགས་ཁྲི་ཕྲག་གཉིས་གཉིས་བཟླས་པ་བྱས་ནས་དབང་བསྐུར་ལ་སོགས་པ་གང་ཡིན་པ་ལ་འཇུག་པ་ཡིན་ནོ། །གཉིས་པ་རྫོགས་རིམ་ནི་སྲོད་ཐུན་ལ་བར་འདིར་གཏོར་མ་ལ་ཞུགས་ནས་རྫོགས་རིམ་བསྒོམ་པ་དང་མཉམ་དུ་ཉལ་བའི་རྣལ་འབྱོར་བྱེད་པ་ཡིན་ཀྱང་། དེ་བརྗོད་ན་རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བ་གསུམ་ཡོད་པ་ལས། དང་པོ་ནི། ཡབ་ཀྱི་ལྟེ་བར་པདྨ་དང་ཟླ་བའི་གདན་ལ་ཧཱུྃ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་རུས་པའི་རྒྱན་ཆ་ལྔས་བརྒྱན་པའི་ཐུགས་ཁར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུྃ་བསམ། ཧཱུྃ་དེ་ལས་འོད་ཟེར་འཕྲོས་ཏེ་རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་ནས་ཕར་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་ཤིན་ཏུ་གསལ་བར་བྱས་ལ་དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོ་བར་བསམ་ལ་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བ་ཡིན་ནོ། །དེ་ནས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། དེ་བཞིན་དུ་སྲུང་བའི་འཁོར་ལོ་དུར་ཁྲོད་བརྒྱད་ལ། དུར་ཁྲོད་བརྒྱད་གཞལ་ཡས་ཁང་ལ། གཞལ་ཡས་ཁང་དམ་ཚིག་གི་འཁོར་ལོ་ལ། དེ་སྐུའི་འཁོར་ལོ་ལ། དེ་གསུང་གི་འཁོར་ལོ་ལ། དེ་ཐུགས་ཀྱི་འཁོར་ལོ་ལ། དེ་སྙིང་པོའི་རྣལ་འབྱོར་མ་བཞི་ལ། དེ་བཅོམ་ལྡན་འདས་ཀྱི་ཞལ་བཞི་ལ་བསྡུས་ཏེ། དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་བསྡུ་བ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི་ཞལ་གཅིག་ཕྱག་གཉིས་པར་བསྡུས་ཏེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡབ་ཡུམ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ། རྡོ་རྗེ་སྙེམས་མའང་ཡབ་ལ། ཡབ་སྙིང་ཁའི་ཧཱུྃ་ལ། ཧཱུྃ་གི་གདན་ཟླ་བ། དེ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུས་ཏེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེ་དེའང་ཇེ་ཕྲ་ཇེ་ཕྲ་མི་དམིགས་པར་བསམ་གྱིས་མི་ཁྱབ་པའི་ངང་ལ་བཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚྭ་ཆུ་ལ་ཐིམ་པ་ཞེས་བྱ་བ་ཡིན་ཏེ། དེའི་ངང་ལ་བློ་ཇི་ཙམ་གནས་པ་ཅིག་བཞག་ལ་ལྡང་བར་འདོད་ན་གོང་དུ་བསྟན་པའི་ཧེ་རུ་ཀའི་སྐུར་ལངས་ཏེ་ཐུན་མཇུག་ཏུ་གཏོར་མ་ཡོད་ན་སྐབས་འདིར་བཏང་ལ་དེའི་རྗེས་སུ་དག་པ་དྲན་པར་བྱ་ཞིང་མེད་ན་སྐབས་འདིར་དག་པ་དྲན་པར་བྱ་སྟེ། ལུས་ཀྱིས་ཌཱ་མ་རུའི་སྒྲ་དང་བཅས་པའམ་མེད་ཀྱང་རུང་སྟེ་ངག་ཏུ་འོག་ནས་འབྱུང་བ་རྣམས་གསལ་བར་བརྗོད་ཅིང་སེམས་ཀྱིས་མ་དག་པའི་ཁམས་དང་རྒྱན་ཆ་ལ་སོགས་པ་དེ་དང་དེ་ལྷ་དང་སྔགས་དེ་དང་དེའི་ངོ་བོ་ཡིན་ནོ་སྙམ་དུ་བསམ་པ་ལས། ལྷ་དང་སྔགས་ཀྱི་རྣམ་པར་བསྒོམ་པ་ནི་མི་དགོས་སོ། །དེའང་བརྗོད་པར་བྱ་སྟེ། སོ་དང་སེན་མོ་དག་ལ་ནི་ཁཎྜ་ཀ་པཱ་ལིའོ། །སྐྲ་དང་བ་སྤུ་དག་ལ་ནི་མཧཱ་ཀཾ་ཀཱ་ལའོ། །པགས་པ་དང་དྲི་མ་དག་ལ་ནི་ཀཾ་ཀ་ལའོ། །ཤ་ལ་ནི་མཆེ་བ་རྣམ་པར་གཙིགས་པའོ། །རྩ་རྒྱུས་ལ་ནི་སུ་རཱ་ཝཻ་རིའོ། །རུས་པ་ལ་ནི་འོད་དཔག་ཏུ་མེད་པའོ། །མཁལ་མ་ལ་ནི་རྡོ་རྗེའི་འོད་དོ། །སྙིང་ལ་ནི་རྡོ་རྗེའི་སྐུའོ། །མིག་དག་ལ་ནི་ཨཾ་ཀུ་རིའོ། །མཁྲིས་པ་ལ་ནི་རྡོ་རྗེ་རལ་པ་ཅན་ནོ། །གློ་བ་ལ་ནི་དཔའ་བོ་ཆེན་པོའོ། །རྒྱུ་མ་ལ་ནི་རྡོ་རྗེ་ཧཱུྃ་མཛད་དོ། །གཉེ་མ་ལ་ནི་རབ་ཏུ་བཟང་པོའོ། །ལྟོ་བ་ལ་ནི་རྡོ་རྗེ་བཟང་པོའོ། །ལྒང་པ་ལ་ནི་འཇིགས་བྱེད་ཆེན་པོའོ། །འདོམས་བར་ལ་ནི་མིག་མི་བཟང་ངོ་། །བད་ཀན་ལ་ནི་སྟོབས་པོ་ཆེའོ། །རྣག་ལ་ནི་རིན་ཆེན་རྡོ་རྗེའོ། །ཁྲག་ལ་ནི་རྟ་མགྲིན་ནོ། །རྔུལ་ལ་ནི་ནམ་མཁའི་སྙིང་པོའོ། །ཚིལ་ལ་ནི་དཔལ་ཧེ་རུ་ཀའོ། །མཆི་མ་ལ་ནི་པདྨ་གར་གྱི་དབང་ཕྱུག་གོ །མཆིལ་མ་ནི་རྣམ་པར་སྣང་མཛད་དོ། །སྣབས་ལ་ནི་རྡོ་རྗེ་སེམས་དཔའ་འོ་ཞེས་བརྗོད། དེ་དག་ནི་ཁམས་རྣམས་ལྷའི་ངོ་བོར་དག་པའོ། །ཁམས་རྣམས་སྔགས་སུ་དག་པ་ནི་འདི་སྐད་བརྗོད་པར་བྱ་སྟེ། སོ་དང་སེན་པོ་དག་ལ་ནི་ཨོཾ་ཀ་ར་ཀ་ར་ཧཱུྃ་ཧཱུྃ་ཕཊ། སྐྲ་དང་བ་སྤུ་དག་ལ་ནི་ཨོཾ་ཀུ་རུ་ཀུ་རུ་ཧཱུྃ་ཧཱུྃ་ཕཊ། པགས་པ་དང་དྲི་མ་དག་ལ་ནི་ཨོཾ་བནྡྷ་བནྡྷ་ཧཱུྃ་ཧཱུྃ་ཕཊ། ཤ་ལ་ནི་ཨོཾ་ཏྲཱ་ས་ཡ་ཏྲཱ་ས་ཡ་ཧཱུྃ་ཧཱུྃ་ཕཊ། རྩ་རྒྱུས་ལ་ནི་ཨོཾ་ཀྵོ་བྷ་ཡ་ཀྵོ་བྷ་ཡ་ཧཱུྃ་ཧཱུྃ་ཕཊ། རུས་པ་ལ་ནི་ཨོཾ་ཧྲཽཾ་ཧྲཽཾ་ཧཱུྃ་ཧཱུྃ་ཕཊ། མཁལ་མ་ལ་ནི་ཨོཾ་ཧྲ་ཧྲ་ཧཱུྃ་ཧཱུྃ་ཕཊ། སྙིང་ལ་ནི་ཨོཾ་ཕཻཾ་ཕཻཾ་ཧཱུྃ་ཧཱུྃ་ཕཊ། མིག་དག་ལ་ནི་ཨོཾ་ཕཊ་ཕཊ་ཧཱུྃ་ཧཱུྃ་ཕཊ། མཁྲིས་པ་ལ་ནི་ཨོཾ་ད་ཧ་ད་ཧ་ཧཱུྃ་ཧཱུྃ་ཕཊ། གློ་བ་ལ་ནི་ཨོཾ་པ་ཙ་པ་ཙ་ཧཱུྃ་ཧཱུྃ་ཕཊ། རྒྱུ་མ་ལ་ནི་ཨོཾ་བྷཀྵ་བྷཀྵ་བྷ་ས་རུ་དྷི་ར་ཨནྟྲ་མཱ་ལ་ཨ་ཝ་ལཾ་བི་ནི་ཧཱུྃ་ཧཱུྃ་ཕཊ། གཉེ་མ་ལ་ནི་ཨོཾ་གྲྀཧྞ་གྲྀཧྞ་སཔྟ་པཱ་ཏ་ལ་ག་ཏ་བྷུ་ཛཾ་ག་སརྦཾ་བཱ་ཏརྫ་ཡ་ཏརྫ་ཡ་ཧཱུྃ་ཧཱུྃ་ཕཊ། ལྟོ་བ་ལ་ནི་ཨོཾ་ཨཱ་ཀཊ་དྷ་ཨཱ་ཀཊ་དྷ་ཧཱུྃ་ཧཱུྃ་ཕཊ། ལྒང་པ་ལ་ནི་ཨོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ། འདོམས་བར་ལ་ནི་ཨོཾ་ཛྣཽཾ་ཛྣཽཾ་ཧཱུྃ་ཧཱུྃ་ཕཊ། བད་ཀན་ལ་ནི་ཨོཾ་ཀྵྨཾ་ཀྵྨཾ་ཧཱུྃ་ཧཱུྃ་ཕཊ། རྣག་ལ་ནི་ཨོཾ་ཧཾ་ཧཾ་ཧཱུྃ་ཧཱུྃ་ཕཊ། ཁྲག་ལ་ནི་ཨོཾ་ཧཱིཾ་ཧཱིཾ་ཧཱུྃ་ཧཱུྃ་ཕཊ། རྔུལ་ལ་ནི་ཨོཾ་ཧཱུྃ་ཧཱུྃ་ཧཱུྃ་ཧཱུྃ་ཕཊ། ཚིལ་ལ་ནི་ཨོཾ་ཀི་ལི་ཀི་ལི་ཧཱུྃ་ཧཱུྃ་ཕཊ། མཆི་མ་ལ་ནི་ཨོཾ་སི་ལི་སི་ལི་ཧཱུྃ་ཧཱུྃ་ཕཊ། མཆིལ་མ་ལ་ནི་ཨོཾ་ཧི་ལི་ཧི་ལི་ཧཱུྃ་ཧཱུྃ་ཕཊ། སྣབས་ལ་ནི་ཨོཾ་དྷི་ལི་དྷི་ལི་ཧཱུྃ་ཧཱུྃ་ཕཊ། ཅེས་བརྗོད་པར་བྱའོ། །རྒྱན་ཆའི་དག་པ་ནི་རྒྱན་དྲུག་སོ་སོ་ལ་དམིགས་ནས་རྩ་སྔགས་རེ་རེ་བཟླས་པའམ་དེ་ཙམ་མི་ནུས་ན། རུས་པའི་རྒྱན་དྲུག་ནི་ཨོཾ་ན་མོ་བྷ་ག་ཝཱ་ཏི། ཞེས་སོགས་རྩ་སྔགས་ཚར་གཅིག་བརྗོད། དེ་ཡང་རྒྱན་དྲུག་རེ་རེའི་སྟེང་དུ་གོ་ཆའི་སྔགས་དྲུག་བཟླས་པའོ། །དེ་ཙམ་མ་ནུས་ན་འཁོར་ལོ་ལ་ཨོཾ་ཧ། རྣ་རྒྱན་ལ་ན་མ་ཧི། མགུལ་རྒྱན་ལ་སྭཱ་ཧཱ་ཧུ། གདུ་བུ་དྲུག་ལ་བོ་ཥ་ཊ་ཧེ། སྐ་རགས་ལ་ཧཱུྃ་ཧཱུྃ་ཧོ། ཐལ་བ་དང་མཆོད་ཕྱིར་ཐོགས་ལ་ཕཊ་ཧཾ། ཞེས་བརྗོད་དོ། །མགྲིན་པའི་མགུལ་རྒྱན་ནི། ཨོཾ་ན་མོ་བྷ་ག་ཝཱ་ཏི་བཛྲ་ཝཱ་ར་ཧི་ཞེས་སོགས་ཡུམ་གྱི་རྩ་སྔགས་ཚར་གཅིག་བརྗོད་དོ། །མི་མགོ་ལྔ་བཅུ་ཐམ་པའི་དོ་ཤལ་ནི་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ་ཌཱ་ཀི་ནཱི་ཛཱ་ལ་སཾ་བཱ་ར་སྭཱ་ཧཱ། རྣ་རྒྱན་ལ་ཨོཾ་ཧ་ཧ་ཧཱུྃ་ཧཱུྃ་ཕཊ། གླང་པོ་ཆེའི་པགས་པ་དང་། སྟག་གི་པགས་པ་ལ་ནི་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུྃ་ཧཱུྃ་ཕཊ། སྐ་རགས་ལ་ནི་ཨོཾ་བཾ་ཧཾ་ཡོཾ་ཧྲིཾ་མོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ་ཕཊ། བཅོམ་ལྡན་འདས་ཀྱི་ཕྱག་གི་ཐོད་པ་ནི། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུྃ་ཧཱུྃ་ཕཊ། ཨོཾ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ། ཅེས་བྱ་བ་ནས་བརྩམས་ཏེ། ཨོཾ་ཡ་མ་མ་ཐ་ནཱི་ཡེ་ཧཱུྃ་ཧཱུྃ་ཕཊ། ཅེས་བྱ་བའི་བར་དཔའ་བོ་ཉེར་བཞིའི་སྔགས་མ་ཡིན་པ་རྣལ་འབྱོར་མ་སུམ་ཅུ་སོ་བདུན་འབའ་ཞིག་གི་སྔགས་རྫོགས་པར་འདོན་ནོ། །ཐོད་པ་སྐམ་པོ་ལྔའི་དབུ་བརྒྱན་ནི། ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ། ཅེས་བརྗོད་ཅིང་། དེའི་ངོ་བོར་དྲན་པར་བྱ་སྟེ་བཅོམ་ལྡན་འདས་ཀྱི་དག་པ་རེ་ཟིན་པའི་རྗེས་ཁོ་ན་ལ་ཡུམ་རྡོ་རྗེ་ཕག་མོ་ལ་སོགས་པ་ལྷ་ཐམས་ཅད་ཀྱི་དག་པའང་དེ་བཞིན་ཡིན་ནོ་སྙམ་དུ་དྲན་པར་བྱ་ཞིང་། གཞན་ཡང་། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་རྡོ་རྗེ་ཅན། །མཚན་མོ་ཤེས་རབ་བརྟག་པར་བྱ། །ཞེས་བརྗོད་ཅིང་དྲན་པར་བྱའོ། །དེ་ལྟར་དག་པ་དྲན་པ་ནི་གཏོར་མའི་རྗེས་ལ་བྱེད་ན། སྤྱོད་ལམ་གྱི་རྣལ་འབྱོར་དུ་འདུ་ཞིང་། མཉམ་བཞག་གི་རྗེས་ཁོ་ན་ལ་བྱེད་ན་མཉམ་བཞག་གི་རྣལ་འབྱོར་དུ་འདུ་གསུང་ངོ་། །གཉིས་པ་སྤྱོད་ལམ་གྱི་རྣལ་འབྱོར་ནི། དེ་ལྟར་དག་པ་དྲན་པའི་རྗེས་སུ་གོང་དུ་བསྟན་པ་ལྟར། ཨོཾ་ཧ་ཞེས་སོགས་དཔའ་བོའི་གོ་ཆ་དང་། ཨོཾ་བཾ་ཞེས་སོགས་དཔའ་མོའི་གོ་ཆ་དང་། པུ་ཛཱ་ཞེས་སོགས་ཡི་གེ་ཉི་ཤུ་རྩ་བཞི་ངག་ཏུ་བརྗོད་པས་ལྷ་ཐམས་ཅད་རང་རང་གནས་སུ་ཐིམ་པ་གོ་ཆ་ཆེན་པོས་བསྲུངས་ལ། སྲུང་འཁོར་གྱི་སྐབས་སུ་བཤད་པ་ལྟར་ཨོཾ་སུམྦྷ་ལ་སོགས་པ་ཞལ་བཞི་པའི་སྔགས་ཀྱིས་ཕྱོགས་གཡོན་སྐོར་དང་། མཚམས་གཡས་སྐོར་གྱིས་སེ་གོལ་དང་བཅས་པས་ཚམ་རྔམ་སྔགས་ཀྱིས་བསྲུངས་ལ་ཧཱུྃ་ཞེས་བརྗོད་པས་བདག་རང་ཡང་འཁོར་ལོ་བདེ་མཆོག་སྣང་བའི་དངོས་པོ་ཐམས་ཅད་ཀྱང་འཁོར་ལོ་བདེ་མཆོག་ཏུ་བསམས་ལ། ཨོཾ་ན་མོ་ཞེས་སོགས་ཡབ་ཀྱི་རྐང་པ་བརྒྱད་པ་བརྗོད་པས་སྒྲ་ཅི་གྲག་པ་ཐམས་ཅད་སྔགས་སུ་བསམ། ཡང་ཧཱུྃ་ཞེས་བརྗོད་པས་སེམས་ཀྱི་འདུ་འཕྲོ་ཐམས་ཅད་ཡེ་ཤེས་ཆེན་པོའི་ཆོ་འཕྲུལ་དུ་བསམ་སྟེ། ཆོས་བཤད་པ་དང་ཉན་པ་ལ་སོགས་པའི་ཀུན་སྤྱོད་ལ་འཇུག་པར་བྱའོ། །གསུམ་པ་གཏོར་མའི་རྣལ་འབྱོར་ནི། ཐུན་བཞིར་སྦྱིན་པའམ་སྲོད་ཐུན་གྱི་མཇུག་ཁོ་ནར་སྦྱིན་པ་ཡང་རུང་སྟེ་འཇིག་རྟེན་དང་འཇིག་རྟེན་ལས་འདས་པའི་གཏོར་མ་གཉིས་སམ། མ་འབྱོར་ན་གཅིག་ཀྱང་རུང་། མདུན་དུ་བཤམས་པ་ནང་མཆོད་ཆུ་ཆང་གིས་སྦྱངས་ལ། ཨོཾ་སུམྦྷ་ལ་སོགས་པ་ཞལ་བཞི་པའི་སྔགས་ཀྱིས་བདུད་རྩི་གཏོར་བས་བགེགས་བསང་། ཨོཾ་སྭ་བྷཱ་ཝ་ཞེས་སོགས་བརྗོད་པས་སྟོང་པ་ཉིད་དུ་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་ཟླ་བ་ཕྱེད་པ་ལྟ་བུ་ཁ་དོག་སྔོན་པོ་ཡཾ་དང་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རཾ་གྱིས་མཚན་པ། དེའི་སྟེང་དུ་ཨ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བ་རང་ལ་བསྟན་པ་ཤིན་ཏུ་རྒྱ་ཆེ་བ་ཨས་མཚན་པ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་དབུས་སུ་གོ་ལས་བ་གླང་གི་ཤ ཤར་དུ་ཀུ་ལས་ཁྱིའི་ཤ བྱང་དུ་ད་ལས་གླང་པོ་ཆེའི་ཤ ནུབ་ཏུ་ཧ་ལས་རྟའི་ཤ ལྷོར་ན་ལས་མིའི་ཤ ཤ་དེ་རྣམས་རེ་རེའི་སྟེང་དུ་བདུད་རྩི་ལྔ་ལྔ་ཡོད་པར་བསམ་སྟེ། དབུས་སུ་བི་ལས་དྲི་ཆེན། ཤར་དུ་མུ་ལས་དྲི་ཆུ། བྱང་དུ་ཤུ་ལས་བྱང་ཆུབ་ཀྱི་སེམས། ནུབ་ཏུ་མ་ལས་ཤ་ཆེན་པོ། ལྷོར་ར་ལས་རཀྟ། འདི་ནི་ཅུང་ཟད་འཁྲུགས་པར་སྣང་ཡང་ཇོ་བོ་ནཱ་རོ་ཏ་པའི་གསུང་ཡིན་པས་བླ་མ་གོང་མ་རྣམས་ཀྱི་ཕྱག་ལེན་ཡིན་གསུང་ངོ་། །དེ་རྣམས་ཀྱི་སྟེང་དུ་དབུས་སུ་ཧཱུྃ་ཆོས་ཀྱི་དབྱིངས་ཀྱི་ཡེ་ཤེས། ཤར་དུ་བྷྲཱུྃ་མེ་ལོང་ལྟ་བུའི་ཡེ་ཤེས། བྱང་དུ་ཁྃ་བྱ་བ་གྲུབ་པའི་ཡེ་ཤེས། ནུབ་ཏུ་ཛྲཱིཾ་སོ་སོར་རྟོག་པའི་ཡེ་ཤེས། ལྷོར་ཨཱྃ་མཉམ་པ་ཉིད་ཀྱི་ཡེ་ཤེས། དེ་དག་གི་སྟེང་དུ་མཐོ་གང་ཙམ་གྱི་ནམ་མཁའ་ལ་ཨོཾ་དཀར་པོ་མགོ་ཐུར་དུ་བལྟས་པ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ལྟེ་བ་ལ་ཧཱུྃ་གིས་མཚན་པ། ཧཱུྃ་ལས་འོད་ཟེར་འོག་ཏུ་འཕྲོས་པས་རླུང་གི་བ་དན་ལ་ཕོག་པས་རླུང་གཡོས་མེ་སྦར་ཏེ། ཤ་ལྔ། བདུད་རྩི་ལྔ། ཡེ་ཤེས་ལྔ་རྣམས་འོད་དུ་ཞུ་ཞིང་བསྐོལ་བའི་རླངས་པའི་འོད་ཟེར་སྟེང་དུ་འཕྲོས་པས་ཨོཾ་དང་ཟླ་བ་སྣ་ཚོགས་རྡོ་རྗེ་ཡང་བསྐུལ་ཏེ། དེ་དག་ལས་ཀྱང་བདུད་རྩིའི་རྒྱུན་འཛག་པར་བསམ། སྣ་ཚོགས་རྡོ་རྗེའི་ལྟེ་བའི་ཧཱུྃ་ལས་འོད་ཟེར་སྟེང་དུ་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཁ་ནས་ཡེ་ཤེས་ཀྱི་རང་བཞིན་ཐོད་པ་བདུད་རྩིས་གང་བ་དཔག་དུ་མེད་པ་སྤྱན་དྲངས་ལ་མདུན་གྱི་ཐོད་པ་ལ་ཐོད་པ་ཐིམ་བདུད་རྩི་ལ་བདུད་རྩི་ཐིམ་སྟེ་ཡེ་ཤེས་ཀྱི་བདུད་རྩི་དང་གཉིས་སུ་མེད་པར་གྱུར་པར་བསམ། སྣ་ཚོགས་རྡོ་རྗེ་ཟླ་བ་ཨོཾ་དང་བཅས་པ་ལྷུང་བས་གཉིས་སུ་མེད་པར་གྱུར་ནས་ཁ་དོག་དང་དྲི་རོ་དང་ནུས་པ་ཕུན་སུམ་ཚོགས་པར་གྱུར་པར་བསམ་ཞིང་ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་ལན་གསུམ་བཟླས་ཏེ་རྫས་སྦྱང་བའོ། །དེ་ནས་མགྲོན་བསྐྱེད་པ་ནི་སྲོད་ཐུན་ལྟ་བུ་བདག་གི་དཀྱིལ་འཁོར་མ་བསྡུས་པའི་སྐབས་ཡིན་ན། གསལ་བར་བལྟས་པ་ཙམ་གྱིས་བཏུབ། དཀྱིལ་འཁོར་བསྡུས་པའམ་འབྲིང་བསྡུས་ལྟ་བུ་དཀྱིལ་འཁོར་མ་བསྒོམས་པའི་སྐབས་ཡིན་ན། མདུན་གྱི་ནམ་མཁར་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དུར་ཁྲོད་ཆེན་པོ་བརྒྱད་དང་བཅས་པ་གསལ་བར་དམིགས་ལ། བདག་གི་སྙིང་གའི་ཧཱུྃ་ལས་འོད་ཟེར་འཕྲོས་ཏེ་དུར་ཁྲོད་བརྒྱད་ལ་ཕོག་པས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཆ་བརྒྱད་དུ་གྱུར་པར་བསམས་ལ་སྔར་གྱི་ཕྱག་རྒྱ་དང་ལྡན་པས་ངག་ཏུ་ཕཻཾ་ཞེས་བརྗོད་ཅིང་། སེམས་ཀྱི་སྙིང་གའི་ཧཱུྃ་གི་འོད་ཀྱི་ཡེ་ཤེས་ཀྱི་དཀྱིལ་འཁོར་ཆ་དགུ་སྤྱན་དྲངས་ལ། ཛཿཧཱུྃ་བཾ་ཧོཿ ཞེས་བརྗོད་པས་དཀྱིལ་འཁོར་ཆ་དགུ་ལ་དགུག་གཞུག་བཅིང་དབང་དུ་བྱས་ལ། ཨོཾ་ཡོ་ག་ཞེས་སོགས་བརྗོད་ཅིང་རྣམ་ལྔ་འདོད་སྐོར་བྱ་སྟེ་བརྟན་པར་བྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཧཱུྃ་ལས་རྡོ་རྗེ་སྦུ་གུ་ཅན་ཧཱུྃ་གིས་མཚན་པ་བསམ་ཞིང་གཏོར་མ་ལས་ཐོད་པ་བདུད་རྩིས་གང་བ་དུ་མ་ཆད་དེ་ཐམས་ཅད་ཀྱི་ཕྱག་དུ་བཞག་པས་གསོལ་བ་བསམ་ཞིང་ལག་པ་རྡོ་རྗེ་ཐལ་མོ་ཁ་ཕྱེ་ལ་ངག་ཏུ། ཨོཾ་བཛྲ་ཨཱ་རལླི་ཧོཿཛཿཧཱུྃ་བཾ་ཧོཿབཛྲ་ཌཱ་ཀི་ནཱི་ས་མ་ཡ་སཏྭཾ་ཏྲྀ་ཤྱ་ཧོ་ཨོཾ་ཨཱཿཧཱུྃ། ཞེས་ལན་ལྔ་བརྗོད་པས་འཁོར་ལོ་དགུ་ཚན་ལྔ་རིམ་པ་བཞིན་ཚིམ་པར་བསམ་སྟེ། ཨོཾ་ཀ་ར་ཀ་ར་ལ་སོགས་ཕྲིང་སྔགས་བཟླས་པས་ཀྱང་མཉེས་པར་བྱའོ། །དེ་ནས་ཕྱི་མཆོད་དང་ནང་མཆོད་ཀྱིས་མཆོད་དེ། རྐང་པ་བརྒྱད་པ་གཉིས་ཀྱིས་བསྟོད་ནས་འདོད་པའི་དོན་ལ་གསོལ་བ་གདབ་པར་བྱའོ། །དེ་ནས་བར་འདིར་མགོན་པོ་ནག་པོ་སོགས་ལ་གཏོར་མ་བཏང་ན་ཡང་འདི་ཉིད་དུ་བཏང་ལ། དེ་ནས་འཇིག་རྟེན་པའི་གཏོར་མ་ནི་ལག་པ་གཡས་གཡོན་དབུས་གསུམ་བསྟན་ཏེ་བྱ་ཁྱུང་གི་ཕྱག་རྒྱ་བཅས་ནས། ཨོཾ་ཨཱཿཧཱུྃ་ཧོཿ ཅེས་དང་། ཧ་ཧོ་ཧྲིཿ ཞེས་པས་བྱིན་གྱིས་བརླབས་ནས་མགྲོན་སྤྱན་དྲང་པ་ནི། ཕཻཾ་གྱི་སྒྲ་དང་འབར་བའི་ཕྱག་རྒྱ་སྔར་བཞིན་བྱས་ལ། ཨོཾ་བཛྲ་ཨཱ་ར་ལི་ཧོ་ཛཿཧཱུྃ་བཾ་ཧོཿབཛྲ་ཌཱ་ཀི་ནཱི་ས་མ་ཡ་སཏྭཾ་ཏྲྀ་ཤྱཱ་ཧོཿ ཞེས་བརྗོད་ཅིང་སེམས་ཀྱིས་སྙིང་ཁའི་ས་བོན་གྱི་འོད་ཀྱིས་འཛམ་བུའི་གླིང་ན་གདོད་ནས་གྲུབ་པའི་དུར་ཁྲོད་བརྒྱད་སྤྱན་དྲངས་ལ་སྔར་གྱི་དུར་ཁྲོད་བརྒྱད་ལ་གཉིས་སུ་མེད་པར་བསྟིམ་པར་བྱའོ། །དེ་ནས་སྔར་གྱི་ཏིང་ངེ་འཛིན་དང་ལྡན་པས་རྡོ་རྗེ་ཐལ་མོ་ཁ་གྱེན་དུ་ཕྱེ་ལ་ངག་ཏུ། ཨོཾ་ཁ་ཁ། ཁཱ་ཧི་ཁཱ་ཧི་སརྦ་ཡཀྵ་རཀྵ་ས་བྷུ་ཏ་པྲེ་ཏ་པི་ཤཱ་ཙ་ཨུདྨཱན་ད་ཨ་པསྨཱ་ཌཱ་ཀ་ཌཱ་ཀི་ནྱཱ་ད་ཡ་ཨི་དཾ་བ་ལིཾ་གྲིཧྣན་ས་མ་ཡ་རཀྵན་དུ་མ་མ་སརྦ་སིདྡྷཾ་མེ་པྲ་ཡཙྪན་ཏུ་ཡ་ཐཻ་ཝཱཾ་ཡ་ཐེཥྚཾ་བྷུཉྫ་ཐ་ཛི་གྷྲ་ཐ། པི་པ་ཐ། མཱ་ཏི་ཀྲ་མ་ཐཱ། མ་མ་སརྦཱ་ཀརྠ་ཡ་སད་སུ་ཁཾ་བི་ཤུད་དྷ་ཡེ་ས་ཧ་ཡི་ཀ་བྷ་ཝཱནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ལན་གསུམ་བརྗོད་པས་དུར་ཁྲོད་ཀྱི་བདག་པོ་རྣམས་མཉེས་པར་བསམ་པར་བྱའོ། །དེ་ནས་ཕྱི་མཆོད་དང་ནང་མཆོད་ཀྱིས་མཆོད་ནས་རྡོ་རྗེ་གསོར། དྲིལ་བུ་དཀྲོལ་ཞིང་། ལྷ་ཡི་ཚོགས་རྣམས་མ་ལུས་དང་། །ཀླུ་ཡི་ཚོགས་རྣམས་མ་ལུས་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའི་ཚོགས་རྣམས་མ་ལུས་དང་། །འབྱུང་པོའི་ཚོགས་རྣམས་མ་ལུས་དང་། །ཡི་དྭགས་ཚོགས་རྣམས་མ་ལུས་དང་། །ཤ་ཟའི་ཚོགས་རྣམས་མ་ལུས་དང་། །སྨྱོ་བྱེད་ཚོགས་རྣམས་མ་ལུས་དང་། །བརྗེད་བྱེད་ཚོགས་རྣམས་མ་ལུས་དང་། །མཁའ་འགྲོའི་ཚོགས་རྣམས་མ་ལུས་དང་། །མ་མོའི་ཚོགས་རྣམས་མ་ལུས་དང་། །མ་ལུས་པ་ནི་ཐམས་ཅད་དག །འདིར་གཤེགས་བདག་ལ་དགོངས་སུ་གསོལ། །བསྟན་པ་བསྲུང་དང་འགྲོ་བའི་དོན་མཛད་པ། །ཐུགས་དམ་བཅས་ཤིང་ཞལ་གྱིས་འཆེས་པ་རྣམས། །དཔལ་ཆེན་བཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་བཟད་པ། །གདུག་པ་འདུལ་མཛད་ནག་པོའི་ཕྱོགས་རྣམས་འཇོམས། །རྣལ་འབྱོར་ལས་ལ་འབྲས་བུ་སྟེར་མཛད་ཅིང་། །མཐུ་སྟོབས་བྱིན་རླབས་བསམ་གྱིས་མི་ཁྱབ་པའི། །གནོད་སྦྱིན་ཚོགས་སོགས་བརྒྱད་ལ་ཕྱག་འཚལ་བསྟོད། །སྡེ་བརྒྱད་བཙུན་མོ་སྲས་དང་གཡོག་བཅས་པ། །དངོས་གྲུབ་ཀུན་གྱི་བཀའ་དྲིན་བདག་ལ་སྩོལ། །རྣལ་འབྱོར་འདི་ཞེས་བྱ་བ་འཁོར་དང་བཅས་པ་ལ། །ནད་མེད་ཚེ་རིང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །སྲུང་མས་རྟག་ཏུ་གྲོགས་མཛོད་ཅིག །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་ཞི་བ་དང་། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་རྒྱས་ཞིང་ཆོས་འཕེལ་དང་། །དགེ་ལེགས་ཐམས་ཅད་འགྲུབ་པ་དང་། །ཡིད་ལ་འདོད་པ་ཀུན་འགྲུབ་ཤོག །ཅེས་བརྗོད་པར་བྱའོ། །དེ་ནས་ཡི་གེ་བརྒྱ་པས་བཟོད་པར་གསོལ་ཏེ། འཇིག་རྟེན་དང་འཇིག་རྟེན་ལས་འདས་པའི་མགྲོན་རྣམས་རང་བཞིན་གྱི་གནས་སུ་གཤེགས་སུ་གསོལ། མདུན་དུ་སྤྲུལ་པ་རྣམས་བདག་གི་ལུས་ལ་བསྡུ་བར་བྱའོ། །བཞི་པ་ཁ་ཟས་ཀྱི་རྣལ་འབྱོར་ནི། ཁ་ཟས་གཏོར་མ་བཞིན་བྱིན་གྱིས་བརླབ་པའམ། ལག་པ་གཡོན་པའི་མཐེབ་སྲིན་རེག་ལ། ཨོཾ་ཨཱཿཧཱུྃ་ཞེས་བརྗོད་དེ་བདུད་རྩིའི་རང་བཞིན་དུ་བྱིན་གྱིས་བརླབ། སྐབས་འདིར་ལག་པའི་མཆོད་པ་བྱེད་པར་འདོད་ན། ལག་པའི་མཆོད་པ་ཇི་ལྟ་བ་བཞིན་བྱས་ཏེ། ཆོ་ག་ནི་གཞན་དུ་ཤེས་པར་བྱ་སྟེ། དཀོན་མཆོག་དང་འབྱུང་པོའི་ཕུད་ཀྱི་བྱ་བ་གཞན་ནས་འབྱུང་བ་བཞིན་བྱས་ལ། དེ་ནས་བདག་གི་ལུས་ཕྱིའི་ཧེ་རུ་ཀ་ལ་ལུས་ཀྱི་དཀྱིལ་འཁོར་ལྷ་དྲུག་ཅུ་རྩ་གཉིས་ཀྱི་རང་བཞིན་ཡིན་པར་མོས་པ་དང་། ཁྱད་པར་དུ་ལྟེ་བ་ནས་མེ་སྙིང་ཁ་ན་ཡར་འབར་སྟེ་སྙིང་ཁའི་མེའི་དབུས་ན་བཅོམ་ལྡན་འདས་ཧེ་རུ་ཀ་ཡབ་ཡུམ་ཙམ་མམ་དཀྱིལ་འཁོར་གྱི་འཁོར་ལོ་ཐམས་ཅད་རྫོགས་པ་གང་རུང་དམིགས་ལ་ཁ་ནི་སྦྱིན་སྲེག་གི་ཐབ་ཁུང་། ལུས་ནི་ལྷའི་དཀྱིལ་འཁོར། ལག་པ་ནི་གཟར་བུ། ཁ་ཟས་ནི་བསྲེག་རྫས་སུ་བསམས་ལ་ལྷ་མཆོད་པའི་བསམས་པས་ཐོག་མར་ལག་པ་གཡོན་པས་ལོངས་སྤྱོད་པར་བྱའོ། །ལག་པ་གཡོན་པས་རྟག་ཏུ་མི་བྱེད་ན་ཡང་གཡོན་གྱི་ཀུན་དུ་སྤྱོད་པ་ཡིན་པའི་ཕྱིར་ཁམས་དང་པོ་ལག་པ་གཡོན་པས་ལོངས་སྤྱོད་ལ་དེ་ནས་ཅི་བདེ་བས་སྤྱད་དོ། །ཁ་ཟས་ཀྱི་རྗེས་ལ་ལྷག་མའི་གཏོར་མས་འབྱུང་པོ་ཚིམ་པར་བྱ་བ་དང་། སྦྱིན་སྲེག་གི་རྗེས་དང་མཐུན་པར་བདག་མེད་པ་དྲན་པར་བྱས་པས་ངལ་བསོ་བར་བྱའོ། །འདི་དག་ནི་མངོན་པར་རྟོགས་པ་རྒྱས་པ་བསྒོམས་པའི་ཚུལ་ལམ་གྱི་ཡན་ལག་དང་བཅས་པ་བྲིས་པ་ཡིན་ལ། འབྲིང་པོ་དང་བསྡུས་པ་ཇི་ལྟར་བསྒོམ་པའི་ཚུལ་དང་། དེ་དག་ཀྱང་སྐུ་གསུམ་ལམ་བྱེད་དུ་ཇི་ལྟར་འགྱུར་བའི་ཚུལ་དང་། སྤྱོད་པ་གསུམ་གྱིས་མཚམས་སྦྱར་ནས་འབྲས་བུ་མངོན་དུ་བྱེད་པའི་ཚུལ་རྣམས་རྗེ་བཙུན་རིན་པོ་ཆེའི་གསུང་རབ་ཞིབ་ཏུ་བལྟས་ནས་བློ་ལ་ངེས་པར་བྱའོ། །ལྷ་སྒོང་སྐྱེས་ལྟར་བསྐྱེད་ཅིང་སྒོང་སྐྱེས་སྦྱང་བ་རྣལ་འབྱོར་གྱི་དབང་ཕྱུག་ལཱུ་ཧི་པའི་ལུགས་བསྟན་ཟིན་ཏོ།། །།ད་ནི་རྣལ་འབྱོར་གྱི་དབང་ཕྱུག་སྤྱོད་པ་པའི་ལུགས་ཀྱི་ལྷ་མངལ་སྐྱེས་ལྟར་བསྐྱེད་པ་མངལ་སྐྱེས་སྦྱོང་བྱེད་ཀྱི་མངོན་པར་རྟོགས་པ་ཐུན་མོང་བ་རྣམས་སྔ་མ་ལ་ལྟོས་པར་བྱ་ཞིང་འདིར་ཐུན་མོང་མ་ཡིན་པའི་ཁྱད་པར་རྣམས་བྲི་བར་བྱ་སྟེ། ཐོག་མར་ཉལ་བའི་རྣལ་འབྱོར་དང་། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་ནི་འདྲ་ལ། དེ་ནས་དག་པ་གསུམ་གྱི་གོ་རིམ་ནི་བདུད་རྩི་རིལ་བུ་མྱང་བའམ། འོག་ནས་འབྱུང་བའི་ཆོ་གས་ཆང་བདུད་རྩིར་བྱིན་གྱིས་བརླབས་ནས་མྱང་སྟེ། ངག་ཏུ་ཤྲཱི་ཧེ་རུ་ཀ་ཞེས་སོགས་སྔ་མ་ལྟར་བརྗོད་པ་ནི་ངག་དག་པའོ། །རང་གི་སྙིང་གར་ཟླ་བའི་སྟེང་དུ་ཧཱུྃ་སྔ་མ་ལྟར་བསམ་པ་ནི་སེམས་དག་པའོ། །ཧཱུྃ་དེ་ལས་འོད་འཕྲོས་རང་གི་ལུས་ལ་ཕོག་པས་རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་དང་མཉམ་པར་སྦྱོར་བའི་སྐུ་ཅན་དུ་བསྒོམ་པ་ནི་ལུས་དག་པའོ། །ཐུན་གཞན་ལ་དག་པ་གསུམ་གྱི་སྔོན་དུ་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་དགོས་པ་ཡང་སྔར་དང་འདྲའོ། །དེ་ནས་མཉམ་པར་བཞག་པའི་རྣལ་འབྱོར་ལ་བསྐྱེད་རྫོགས་གཉིས་ལས། དང་པོ་ལ་གསུམ་སྟེ། དང་པོ་སྦྱོར་བ། དཀྱིལ་འཁོར་རྒྱལ་མཆོག ལས་རྒྱལ་མཆོག་གོ །དང་པོ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་བསོད་ནམས་ཀྱི་ཚོགས་བསག་པ་ནི་ཚོགས་ཞིང་སྤྱན་དྲངས་ནས་མཆོད་པ་གཉིས་ཀྱིས་མཆོད་པ་ནི་སྔར་དང་འདྲ་ལ། རྒྱུན་བཤགས་ནི་གུར་ནས་འབྱུང་བའི་དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་བྱའོ། །ཚད་མེད་བཞི་འདིར་མི་བཞེད་པར་གསུངས་ཤིང་། དེའི་དགོངས་པ་ཁ་ཅིག སྐྱབས་འགྲོའི་རྗེས་ལ་བྱེད་པ་དང་། ལ་ལ་ཚོགས་ཞིང་སྤྱན་དྲངས་པའི་རྗེས་ལ་བྱེད་པ་སོགས་ནི་དགོངས་པ་མ་ཡིན་ཏེ། འདིར་སེམས་བསྐྱེད་ལ་ཚད་མེད་ཚང་བས་ལོགས་སུ་མི་བྱེད་པའི་ལུགས་ཡིན་པའི་ཕྱིར། ནཱ་རོ་མཁའ་སྤྱོད་ཀྱི་མན་ངག་བཞིན་ནོ། །དེ་ནས་ཡེ་ཤེས་ཚོགས་བསག་ནི་སྔར་དང་འདྲ་ལ། གཉིས་པ་ལ་གཉིས་ཏེ། རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ལ་སྲུང་བའི་འཁོར་ལོ་ནི། སྟོང་པའི་ངང་ལས། ནམ་མཁར་སེམས་ཉིད་ཀྱི་ངོ་བོ་ནཱ་ད། དེ་ལས་ཐིག་ལེ། དེ་ལས་ཟླ་ཚེས། དེ་ལས་ཧའི་མགོ དེ་ལས་ཁོག་པ། དེ་ལས་ཞབས་ཀྱུ་སྟེ་ཧཱུྃ་དུ་གྱུར་པར་བསམ། དེ་ལས་པཾ་འཕྲོས་པ་ལས་པདྨ། དེའི་སྟེང་དུ་རྃ་འཕྲོས་པ་ལས་ཉི་མ། དེའི་སྟེང་དུ་ཧཱུྃ་དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེ་ཧཱུྃ་ཡིག་འབར་བས་མཚན་པ། རྡོ་རྗེའི་ལྟེ་བའི་ཧཱུྃ་ལས་ཤར་དང་སྟེང་དུ་ཁྭ་གདོང་མ་སྔོ་སྐྱ། བྱང་དུ་འུག་གདོང་མ་ལྗང་སེར། ནུབ་དང་འོག་ཏུ་ཁྱི་དགོང་མ་དམར་སེར། ལྷོར་ཕག་གདོང་མ་དཀར་སེར། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་གཉིས། གཡས་ལྕགས་ཀྱུ་དང་གཡོན་ཞགས་པ་འཛིན་པ། དྲག་མོ་ཤིན་ཏུ་ཁྲོས་པའི་གཟུགས་ཅན་རྣམས་སྤྲོས་པར་བསམས་ལ། ཞལ་བཞི་པའི་སྔགས་ཚན་པ་གཉིས། ཕྱག་རྒྱ་དང་བཅས་པ་སྔར་བཞིན་བྱའོ། །ཕོ་ཉ་རྣམས་ཀྱིས་བགེགས་ཀྱི་གཙོ་བོ་ཕྱོགས་སྐྱོང་བཅུའི་སྙིང་ཁ་ནས་ལྕགས་ཀྱུས་བཏབ། མགྲིན་པ་ནས་ཞགས་པས་བཅིངས་ཏེ་བཀུག་ནས། སྟེང་འོག་ཕྱོགས་མཚམས་རྣམས་སུ་འཁོད་པར་བསམ། ཡང་རྡོ་རྗེའི་ལྟེ་བའི་ཧཱུྃ་ལས་རྡོ་རྗེ་ཕུར་བུ་བཅུ་སྤྲོས་ཏེ་ཕོ་ཉ་རྣམས་ཀྱི་ལག་པ་གཡོན་པར་གཏད། རྡོ་རྗེ་ཐོ་བ་བཅུ་སྤྲོས་ཏེ་ལག་པ་གཡས་པར་གཏད་པས། ཕྱོགས་སྐྱོང་བཅུའི་སྤྱི་བོར་ཕུར་བུས་བཏབ་པར་བསམ་ལ། ཨོཾ་གྷ་གྷ་སོགས་བརྗོད་ཅིང་ཕུར་བུ་བསྒྲིལ་བའི་ཚུལ་བྱ། ཨོཾ་བཛྲ་མུངྐ་ར་སོགས་བརྗོད་ཅིང་ཕུར་བུ་བརྡུང་བའི་ཚུལ་བྱས་ནས། སྤྱི་གཙུག་ནས་རྐང་མཐིལ་གྱི་བར་ཕུར་བུས་བཏབ་པར་བསམ་མོ། །དེ་ནས་དེ་དག་གི་རྣམ་པར་ཤེས་པ་མི་བསྐྱོད་པའི་ཞིང་དུ་སྐྱེ་བར་གྱུར་ཅིང་། ཕྱོགས་སྐྱོང་གི་ཕྱོགས་ཀྱི་རོ་རྣམས་ཞུ་བ་ལས་རྡོ་རྗེའི་རྭ་བ། མཚམས་ཀྱི་ལས་རྡོ་རྗེའི་དྲྭ་བ། སྟེང་གི་ལས་རྡོ་རྗེའི་གུར་དང་བླ་རེ། འོག་གི་ལས་རྡོ་རྗེའི་ས་གཞི། དེའི་ཕྱི་རོལ་དུ་མདའི་དྲྭ་བ་དང་། ཡེ་ཤེས་ཀྱི་མེ་རི་རབ་ཏུ་འབར་བར་གྱུར་ཞེས་བརྗོད་ལ་སྔར་གྱི་སྔགས་དྲུག་ཕྱག་རྒྱ་དང་བཅས་པ་ལན་གསུམ་གསུམ་བྱའོ། །དེ་ནས་ཕོ་ཉ་རྣམས་རྡོ་རྗེའི་དྲྭ་མིག་ནས་རོ་སྟོད་འཐོན་ཏེ། སྒྲུབ་པ་པོ་ཇི་སྲིད་སངས་རྒྱས་མ་ཐོབ་ཀྱི་བར་དུ་བར་དུ་གཅོད་པ་ཐམས་ཅད་ལས་བསྲུང་བར་བསམ་མོ། །འདིར་ཁ་ཅིག་ཐོག་མར་ཕོ་ཉ་གྲི་གུག་དང་ཐོད་པ་ཐོགས་པ་སྤྲོས་ནས་བགེགས་བསྐྲད། དེའི་སྤྲུལ་པ་སྤྲོས་ནས་བགེགས་བཀུག་པ་སོགས་ལོ་ཧི་པ་ལྟར་བྱེད་པ་ནི་གཞུང་དང་ས་ཆེན་གྱི་དགོངས་པ་མ་ཡིན་ཏེ། གཞུང་ལས། ཧཱུྃ་བྱུང་མཁའ་འགྲོའི་ཚོགས་སྤྲོས་ཏེ། །བློ་དང་ལྡན་པས་ཕུར་སོགས་བྱ། །ཞེས་དང་། ས་ཆེན་གྱིས་རྡོ་རྗེ་ལྟེ་བའི་ཧཱུྃ་ལས་འོད་ཟེར་འབར་བ་ལས་འཕྲོས་པའི་ཁྭ་གདོང་མ་ལ་སོགས་པ་བརྒྱད་ཀྱི་ཁྭ་གདོང་ལས་ཁྭ་གདོང་གཅིག་སྟེང་དུ་སྤྲོས། ཁྱི་གདོང་ལས་ཁྱི་གདོང་གཅིག་འོག་ཏུ་སྤྲོས་ལ། དེ་དག་གིས་ཕྱོགས་བཅུའི་བགེགས་རྣམས་བཀུག་པར་བསམ། ཡང་ཧཱུྃ་ལས་ཕུར་བུ་དང་ཐོ་བ་སྤྲོས་ཏེ། ཕྱག་གཡས་གཡོན་དུ་གཏད་ལ་གྷ་གྷ་ལ་སོགས་པ་བརྗོད་ཅིང་ཕུར་བུ་གདབ་ཞེས་གསུངས་པས་སོ། །དེ་ལྟ་བུའི་སྲུང་བའི་འཁོར་ལོའི་དབུས་སུ་ཨེ་ལས་ཆོས་ཀྱི་འབྱུང་གནས་གྲུ་གསུམ་པ་ཕྱི་དཀར་ལ་ནང་དམར་བ་གདེངས་ཀ་ཆེ་བ་གྱེན་དུ་བསྟན་པ། རྩ་བ་ཕྲ་བ་ཐུར་དུ་ཟུག་པ། དེའི་ནང་དུ་ལཾ་ལས་སའི་དཀྱིལ་འཁོར་གྲུ་བཞི་སེར་པོ་ལཾ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རཾ་གྱིས་མཚན་པ། དེའི་སྟེང་དུ་ཡཾ་ལས་རླུང་གི་དཀྱིལ་འཁོར་ཟླ་གམ་ལྗང་ཁུ་ཡཾ་གྱིས་མཚན་པ། དེའི་སྟེང་དུ་སུྃ་ལས་རི་རབ་སེར་པོ་ཐིག་ལེ་སེར་པོ་དང་བཅས་པ། དེ་རྣམས་དང་རང་གི་སེམས་སྣང་རོ་གཅིག་དུ་འདྲེས་པས་རྐྱེན་བྱས་ནས་འོག་ཏུ་རླུང་གི་དཀྱིལ་འཁོར་ཟླ་གམ་ལྗང་ཁུ། དེའི་སྟེང་དུ་མེའི་དཀྱིལ་འཁོར་གྲུ་གསུམ་དམར་པོ། དེའི་སྟེང་དུ་ཆུའི་དཀྱིལ་འཁོར་ཟླུམ་པོ་དཀར་པོ། དེའི་སྟེང་དུ་སའི་དཀྱིལ་འཁོར་གྲུ་བཞི་སེར་པོ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ། ཤར་ཤེལ། ལྷོ་བཻ་ཌཱུརྻ། ནུབ་པདྨ་རཱ་ག བྱང་གསེར་གྱི་རང་བཞིན་ལས་གྲུབ་པ། ཟུར་བཞི་པ། ཅོག་བརྒྱད་དང་ལྡན་པའི་སྟེང་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ། གྲུ་བཞི་སྒོ་བཞི་པ་ཞེས་པ་ནས་དུར་ཁྲོད་ཀྱིས་བསྐོར་བའོ་ཞེས་པའི་བར་སྔར་དང་འདྲ་ལ། ཁྱད་པར་ནི་འོད་ཟེར་སྣ་ཚོགས་ཀུན་དུ་འཁྲུགས་པའོ་ཞེས་པའི་རྗེས་སུ་ལྷའི་གནས་རྣམས་སུ་པདྨ་དང་ཉི་མའི་དཀྱིལ་འཁོར་རེ་རེའི་སྟེང་དུ་དབུས་སུ་འཇིགས་བྱེད་ཕོ་མོ་དང་། འཁོར་རྣམས་ལ་ཡི་དྭགས་ཀྱི་གདན་བརྗོད། གཉིས་པ་བརྟེན་པ་ལྷ་བསྐྱེད་པ་ལ་བཞི་སྟེ། བསྙེན་པ། ཉེར་སྒྲུབ། སྒྲུབ་པ། སྒྲུབ་པ་ཆེན་པོའོ། །དང་པོ་ལ་གཉིས་ཏེ། རྒྱུ་རྡོ་རྗེ་འཛིན་པ་བསྐྱེད་པ་དང་། འབྲས་བུ་རྡོ་རྗེ་འཛིན་པ་བསྐྱེད་པའོ། །དང་པོ་ནི། དབུས་ཀྱི་གདན་གྱི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཞེས་སོགས་མངོན་བྱང་དང་པོ་གཉིས་སྔར་དང་འདྲ། དེ་གཉིས་ཀྱི་བར་དུ་ཧཱུྃ་དང་ཨཱྃ་ལས་རྡོ་རྗེ་དང་གྲི་གུག་ཧཱུྃ་དང་ཨཱྃ་གིས་མཚན་པ་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་བདག་ཉིད་རྒྱུའི་རྡོ་རྗེ་འཆང་སྐུ་མདོག་དཀར་པོ་ཞལ་བཞི་ཕྱག་བཅུ་གཉིས་པ། རྩ་བའི་ཞལ་དཀར་པོ། གཡོན་ཞལ་དམར་བ། རྒྱབ་ཞལ་སེར་བ། གཡས་ཞལ་སྔོ་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང་། མཆེ་བ་བཞི་བཞི་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་བསྣམས་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སཏྭ། ལྔ་པ་ན་མདུང་རྩེ་གསུམ་པ། དྲུག་པ་ན་གྲི་གུག གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག བཞི་པ་ན་རྡོ་རྗེའི་ཞགས་པ། ལྔ་པ་ན་ཁྲག་གིས་གང་བའི་ཐོད་པ། དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་པ། ཞབས་གཡས་བརྐྱངས་པས་དུས་མཚན་མ་དམར་མོ་ནུ་མའི་སྟེང་། གཡོན་བསྐུམས་པས་འཇིགས་བྱེད་ནག་པོ་མགོ་བོ་ལྟབ་ནས་མནན་པ། རལ་པའི་ཐོར་ཅོག་སྤྱི་བོར་བཅིངས་པའི་རྩེར་ཡིད་བཞིན་གྱི་ནོར་བུས་སྤྲས་ཤིང་། གཡོན་ན་ཚེས་གཅིག་གིས་ཟླ་བ་དང་མཚོག་མའི་སྟེང་ན་སྣ་ཚོགས་རྡོ་རྗེས་མཚན་པ། དབུ་རེ་རེ་ལ་མི་མགོ་སྐམ་པོ་ལྔ་ལྔས་དབུ་བརྒྱན་ཅིང་། རློན་པ་ལྔ་བཅུའི་དོ་ཤལ་ཅན་རུས་པའི་རྒྱན་དྲུག་དང་ལྡན་པ། སྟག་གི་པགས་པའི་ཤམ་ཐབས་གྲོལ་བ། སྒེག་པ་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་རོ་དང་ལྡན་པ་ཉིད། །དེའི་པང་ན་ཤེས་རབ་རྡོ་རྗེ་ཕག་མོ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། གཡོན་པས་ཐོད་པ་ཁྲག་གིས་གང་བ་འཛིན་པས་ཡབ་ལ་འཁྱུད་ཅིང་། གཡས་པས་བསྡིགས་མཛུབ་དང་བཅས་པའི་གྲི་གུག་གིས་ཕྱོགས་ཐམས་ཅད་དུ་བསྡིགས་པར་མཛད་པ་གཅེར་བུ་སྐྲ་གྲོལ་བ། མི་མགོ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔ་དང་ལྡན་པ། ཞབས་གཡས་བསྐུམ་ཞིང་ཡོན་བརྐྱངས་པས་ཡབ་ལ་འཁྱུད་པ། ཡབ་ཡུམ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །གཉིས་པ་ནི་ཡབ་ཀྱི་གསང་བའི་གནས་མི་དམིགས་ཏེ། སྟོང་པའི་ངང་ལས་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ཧཱུྃ་གིས་མཚན་ཅིང་བུ་གར་བྷྱཾ་གིས་མཚན་པ། ཡུམ་གྱི་མཁའ་མི་དམིགས་ཏེ་སྟོང་པའི་ངང་ལས་ཨཱཿལས་པདྨ་དམར་པོ་འདབ་མ་གསུམ་པ་ཟེའུ་འབྲུ་ལ་ཨཱཿས་མཚན་ཅིང་། བུ་གར་བྷྱཾ་གིས་མཚན་པ། ཡབ་ཡུམ་གཉིས་སྙོམས་པར་ཞུགས་པའི་བདེ་བ་ཆེན་པོའི་སྒྲས་དེ་བཞིན་གཤེགས་པ་རྣམས་སྤྱན་དྲངས་བདག་གི་ཞལ་དུ་ཞུགས་སྙིང་ཁར་འོད་དུ་ཞུ་རྡོ་རྗེའི་ལམ་ནས་ཡུམ་གྱི་པདྨར་བབས་པ་ལས། ཡབ་ཡུམ་གཉིས་འོད་དུ་ཞུ་སྟེ། བྱང་ཆུབ་ཀྱི་སེམས་ཀྱི་རང་བཞིན་གྱི་ཐིག་ལེར་གྱུར་པར་བསམ་མོ། །བུ་སྟོན་གྱིས་ས་སྐྱ་པ་ཡེ་ཤེས་ཚོགས་བསག་གི་རྗེས་ཀྱི་ཧཱུྃ་སྣ་ཚོགས་རྡོ་རྗེར་བསྒྱུར་ནས་འདིར་རྒྱུའི་རྡོ་རྗེ་འཆང་གི་ཞལ་དུ་མ་བཅུག་པས་བར་དོའི་སྦྱོང་བྱེད་ཆད་དོ་གསུང་བ་ནི་མི་འཐད་དེ། སྤྱིར་བར་དོའི་སྦྱོང་བྱེད་དེ་བཞིན་གཤེགས་པ་ཞལ་དུ་ཞུགས་པ་དང་། མངོན་བྱང་གསུམ་པ་དང་། ཡི་གེ་ལྔ་དང་། ཡི་གེ་གསུམ་དང་། ཨ་ཧཾ་གི་རྣམ་པ་སོགས་དུ་མ་ཡོད་པ་ལས་འདི་ནི་དང་པོའི་དབང་དུ་བྱས་པ་ཡིན་པའི་ཕྱིར་རོ། །ཡེ་ཤེས་ཚོགས་བསག་གི་རྗེས་སུ་ཧཱུྃ་ཡིག་ནམ་མཁར་མ་བཞག་པས་བར་དོའི་སྦྱོང་བྱེད་ཆད་ན་གསང་འདུས་དང་། ཀྱཻ་རྡོར་སོགས་ཕལ་ཆེར་ལ་ཆད་པར་འགྱུར་རོ། །གཞུང་ལས་ཀྱང་། ཐམས་ཅད་སྟོང་པར་རྣམ་བསྒོམས་ཏེ། །སྣ་ཚོགས་པད་ཉིར་ཧཱུྃ་རྡོ་རྗེ། །ཞེས་ཡེ་ཤེས་ཚོགས་བསག་གི་རྗེས་སུ་ཧཱུྃ་ཡིག་ནམ་མཁར་འཇོག་པར་མ་གསུངས་ལ། ནཱ་རོ་པའི་མན་ངག་ལས། ཧཱུྃ་བསྒྲུབ་ཚུལ་དེ་ལྟར་བྱུང་བ་ནི་སྲུང་འཁོར་སོགས་སེམས་ཀྱི་རྣམ་འཕྲུལ་དུ་ཤེས་པའི་ཆེད་ཡིན་ནོ། །འདིའི་ཡུམ་མུ་ཏིག་ཕྲེང་བར་དམར་པོར་གསུངས་ཀྱང་། རྒྱུད་ཀྱི་སྟེང་དུ་མན་ངག་གི་ཁ་བསྐང་བ་དང་། ཚུལ་མི་འདྲ་བ་འགའ་ཞིག་ཡོད་པར་གསུངས་ལ། འདིར་ནི་གཞུང་ལས། ཐོད་པ་ཤིན་ཏུ་གང་བ་དང་། །དེ་ཡི་ཁ་དོག་ལག་ཆར་འཛིན། །ཞེས་དང་། རྒྱུད་ལས་ཀྱང་། སྐུ་མདོག་དཀར་པོ་ཁྲོ་བོ་ཆེ། །ཞེས་པའི་རྗེས་སུ། རྡོ་རྗེ་ཕག་མོ་དེ་ཡིས་ནི། །ཞལ་མདོག་མཚོན་ཆ་འཆང་ལ་གཟིགས། །ཞེས་གསུངས་ཤིང་། དེའི་དོན་ས་ཆེན་གྱིས། དེ་དག་ཡོངས་སུ་གྱུར་པ་ལས་རྒྱུའི་རྡོ་རྗེ་འཆང་སྐུ་མདོག་དཀར་པོ་ཡབ་ཡུམ་ཞལ་བཞི་ཕྱག་བཅུ་གཉིས་པའོ་ཞེས་གསུངས་པས་དཀར་མོའོ། །འོ་ན་ཡུམ་ཡང་ཕྱག་བཅུ་གཉིས་པར་འགྱུར་རོ་ཞེ་ན། མ་ཡིན་ཏེ། ཐོད་པ་ཤིན་ཏུ་གང་བ་དང་། །ཞེས་དེའི་ཕྱག་མཚན་དམིགས་བསལ་དུ་གསུངས་པའི་ཕྱིར་རོ། །དེ་ནས་ཐིག་ལེ་ལས་བྱུང་བའི་སངས་རྒྱས་རྣམས་ཀྱིས། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུྃ་བཾ་ཧོཿསུ་ར་ཏ་སཏྭཾ་ཏྲྀ་ཤྱ་ཧོ། ཞེས་པའི་སྔགས་ཀྱིས་བསྐུལ་བས་ཐིག་ལེ་དེ་ཧཱུྃ་དང་ཨཱཾ་དུ་གྱུར། དེ་ཡོངས་སུ་གྱུར་པ་ལས་འབྲས་བུའི་རྡོ་རྗེ་འཛིན་པ་སྐུ་མདོག་སྔོན་པོ་ཞལ་བཞི་པ། ཕྱག་བཅུ་གཉིས་པ། རྩ་བའི་ཞལ་སྔོ་བ། གཡོན་ཞལ་དམར་བ། རྒྱབ་ཞལ་སེར་བ། གཡས་ཞལ་དཀར་བ། ཞལ་རེ་རེ་ཞིང་སྤྱན་གསུམ་གསུམ་དང་ལྡན་ཞིང་ཞེས་པ་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་བར་རྒྱུའི་རྡོ་རྗེ་འཛིན་པ་དང་འདྲ་བ་ལས་འདིར་ཡུམ་ནི་དམར་མོའོ། །དེ་ནས་ཞལ་བཞི་ལ་གཡོན་སྐོར་དུ་རིམ་པ་བཞིན་དམིགས་ནས་ཨོཾ་སུཾ་བྷ་སོགས་ཞལ་བཞི་པའི་སྔགས་ཚན་པ་གཅིག་གིས་ཕྲིན་ལས་བཞི་དང་། དགའ་བ་བཞིའི་ངོ་བོར་བྱིན་གྱིས་བརླབ། སྐུ་རིལ་པོ་ལ་དམིགས་ཏེ་ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་ཆོས་ཀྱི་དབྱིངས་ཀྱི་ཡེ་ཤེས་སུ་བྱིན་གྱིས་བརླབ་བོ། །གཉིས་པ་ཉེར་སྒྲུབ་ནི། གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ཡབ་ཀྱི་སྙིང་ཁར་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ་ཞེས་པ་ནས་ཚིགས་ཆེན་བརྒྱད་ལ་ཨོཾ་ཨོཾ་ཕཊ་ཕཊ་དུད་ཁ་ཙནྟི་ཀ་སྟེ་ཡབ་ཀྱི་གནས་སུ་ཡུམ་དང་། ཡུམ་གྱི་གནས་སུ་ཡབ་རྣམས་གཉིས་སུ་མེད་པར་གྱུར་ཞེས་པའི་བར་སྔར་དང་འདྲ་བ་ལས་འདིར་ཨོཾ་རེ་རེ་ལྷག་པོར་བསྣན་པའོ། །གསུམ་པ་སྒྲུབ་པ་ནི། ཡབ་ཀྱི་སྙིང་ཁར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ་ཐུགས་རྡོ་རྗེ། མགྲིན་པར་ཨོཾ་ཧྲིཿཧ་ཧ་ཧཱུྃ་ཧཱུྃ་ཕཊ་དམར་པོ་གསུང་རྡོ་རྗེ། དཔྲལ་བར་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནཱི་ཛཱ་ལ་སཾ་བཱ་ར་སྭཱ་ཧཱ་དཀར་པོ་སྐུ་རྡོ་རྗེ། ཡུམ་གྱི་སྙིང་གར་ཨོཾ་སརྦ་བུདྡྷ་ཌཱ་ཀི་ནཱི་བཛྲ་ཝརྞ་ནཱི་ཧཱུྃ་ཧཱུྃ་ཕཊ་སྭཱ་ཧཱ་སྔོན་པོ་ཐུགས་རྡོ་རྗེ། མགྲིན་པར་ཨོཾ་ཙཽ་རཱི་ཧཱུྃ་ཧཱུྃ་ཕཊ་དམར་པོ་གསུང་རྡོ་རྗེ། དཔྲལ་བར་ཨོཾ་བཛྲ་བཻ་རོ་ཙ་ན་ཡེ་སྭཱ་ཧཱ་དཀར་པོ་སྐུ་རྡོ་རྗེ། ཡབ་ཡུམ་གཉིས་ཀའི་སྤྱི་བོར་ཨོཾ་དཀར་པོ་རྣམ་པར་སྣང་མཛད། མགྲིན་པར་ཨཱཿདམར་པོ་འོད་དཔག་མེད། སྙིང་ཁར་ཧཱུྃ་སྔོན་པོ་མི་བསྐྱོད་པ། ལྟེ་བར་སྭཱ་སེར་པོ་རིན་ཆེན་འབྱུང་ལྡན། བརླ་རྩར་ཧཱ་ལྗང་ཁུ་དོན་གྲུབ་དུ་བསམ་མོ། །བཞི་པ་སྒྲུབ་པ་ཆེན་པོ་ནི་འབར་བའི་ཕྱག་རྒྱ་དང་། ཕཻཾ་གྱི་སྒྲས་ཡབ་ཡུམ་སྤྱན་དྲངས་ལ་ཕྱི་མཆོད་ཀྱིས་མཆོད་ནས་ཛཿཧཱུྃ་བཾ་ཧོཿགཉིས་སུ་མེད་པར་བསྟིམས་པ་ལ། ཨོཾ་ཡོ་ག་ཤུདྡྷཿསོགས་བརྗོད། ཡང་འབར་བའི་ཕྱག་རྒྱ་དང་ཕཻཾ་གྱི་སྒྲས་དབང་ལྷ་སྤྱན་དྲངས་ལ་ཕྱི་མཆོད་ཀྱིས་མཆོད། དབང་བསྐུར་བར་གསོལ་བ་གདབ་ཅིང་དབང་བསྐུར་བས་ཡབ་ཡུམ་གཉིས་ཀ་ལ་མི་བསྐྱོད་པས་དབུ་བརྒྱན་པར་བསམ་མོ། །དེ་ནས་ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་ཕྱི་མཆོད་དང་། གཙོ་བོ་ཡབ་ཡུམ་གྱི་སྙིང་པོ་གཉིས་ཀྱིས་ནང་མཆོད་དབུལ། རྒྱུ་རྡོ་རྗེ་འཛིན་པའི་སྐབས་ལྟར་མཁའ་གསང་བྱིན་གྱིས་བརླབ་པར་བྱའོ། །གཉིས་པ་དཀྱིལ་འཁོར་རྒྱལ་མཆོག་ནི་ཡབ་ཡུམ་གཉིས་སྙོམས་པར་ཞུགས་པས་ཟག་པ་མེད་པའི་བདེ་བས་རྒྱུད་གང་བར་བསམས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ་སྙོམས་པར་ཞུགས་པའི་སྒྲ་དང་། གཙོ་བོའི་སྙིང་ཁའི་ས་བོན་གྱི་འོད་ཟེར་གྱིས་བདེ་བར་གཤེགས་པའི་ཚོགས་རྣམས་སྤྱན་དྲངས་ཏེ། ཡབ་ཡུམ་གཉིས་ཀྱི་སྨིན་མཚམས་ནས་ཞུགས། ཨ་ཝ་དྷཱུ་ཏཱིའི་ལམ་ནས་བརྒྱུད་སྙིང་གར་བབས་པ་ལྟེ་བའི་ཨཾ་ཡིག་གི་མེས་འོད་དུ་ཞུ་ནས་སྐུའི་དབྱིབས་བརྒྱུད་ལྷ་མོའི་པདྨར་ཡབ་ཀྱི་ཐིག་ལེ་དང་། ཡུམ་གྱི་རཀྟ་རོ་གཅིག་ཏུ་འདྲེས་པ་ལས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་ཅིག་ཆར་དུ་གྱུར་པ་ནི་འབྱུང་བཞི་རི་རབ་དང་བཅས་པའི་སྟེང་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་སྒོ་བཞི་པ། རྟ་བབས་བཞིས་མཛེས་པ། རྒྱན་ཐམས་ཅད་ཀྱིས་བརྒྱན་ཅིང་མཚན་ཉིད་ཐམས་ཅད་ཡོངས་སུ་རྫོགས་པ་སྟེང་ཐོག་རིམ་པར་ཕུབ་ཅིང་ལྷའི་གདན་དང་བཅས་པའི་དབུས་སུ་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་དང་མཉམ་པར་སྦྱོར་བའི་སྐུ་ཅན། པདྨའི་འདབ་མ་བཞི་ལ་ཤར་དུ་མཁའ་འགྲོ་མ་སྔོ་སྐྱ། བྱང་དུ་ལཱ་མ་ལྗང་སེར། ནུབ་ཏུ་ཁཎྜ་རོ་ཧ་དམར་སེར། ལྷོར་གཟུགས་ཅན་མ་དཀར་སེར། མཚམས་བཞིར་བུམ་པ་ལ་གནས་པའི་ཐོད་པ་བདུད་རྩིས་གང་བ་བཞི། དེའི་ཕྱི་རོལ་ཐུགས་ཀྱི་འཁོར་ལོའི་ལྷ་རྣམས་ཁ་དོག་སྔོན་པོ། དེའི་ཕྱི་རོལ་གསུང་གི་འཁོར་ལོའི་ལྷ་རྣམས་ཁ་དོག་དམར་པོ། དེའི་ཕྱི་རོལ་སྐུའི་འཁོར་ལོའི་ལྷ་རྣམས་ཁ་དོག་དཀར་པོ། དེའི་ཕྱི་རོལ་དམ་ཚིག་གི་འཁོར་ལོའི་ཤར་སྒོར་ཁྭ་གདོང་མ་སྔོ་སྐྱ། བྱང་སྒོར་འུག་གདོང་མ་ལྗང་སེར། ནུབ་སྒོར་ཁྱི་གདོང་མ་དམར་སེར། ལྷོ་སྒོར་ཕག་གདོང་མ་དཀར་སེར། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ་ཞེས་པ་ཙམ་མམ། རྒྱས་པར་སྤྲོ་ན་འོག་ནས་འབྱུང་བ་ལྟར་ཞལ་ཕྱག་ཚང་མར་གསལ་བཏབ་བོ། །དེ་ནས་རང་གི་སྙིང་གར་ཨ་ཝ་དྷཱུ་ཏཱི་ལ་བརྟེན་པའི་རྩ་ཧཱུྃ་གི་དབྱིབས་ཅན་སྤྱི་བོ་ལ་སོགས་པའི་གནས་རྣམས་སུ། པུ་ཛ་ཨུ་ཨ་ག་ར་དེ་མ། ཀ་ཨོ་ཏྲི་ཀོ་ཀ་ལ་ཀ་ཧི། པྲེ་གྲྀ་སཽ་སུ་ན་སི་མ་ཀུའི་དབྱིབས་ཅན་གྱི་ཁམས་དང་། རྩ་རྣམས་རང་བཞིན་གྱིས་ལྷུན་གྱིས་གྲུབ་པར་བསམ་མོ། །དེ་ནས་ཡུམ་གྱི་བྷ་གའི་གཙོ་བོ་རྡོ་རྗེའི་ལམ་ནས་ཡར་དྲངས་ལ་རང་ལ་ཐིམ། དེ་དང་དུས་མཉམ་དུ་སྙིང་ཁའི་རྩ་ཧཱུྃ་གི་དབྱིབས་ཅན་གྱི་ཁམས་བཅོམ་ལྡན་འདས་ཧེ་རུ་ཀ་དང་། རྩ་རྡོ་རྗེ་ཕག་མོར་གྱུར་པ་ནི་སྙིང་ཁར་བཅོམ་ལྡན་འདས་ཧེ་རུ་ཀ་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ་ཞེས་སོགས་ཡབ་ཡུམ་གཉིས་ཀ་ཞལ་ཕྱག་རྫོགས་པར་གསལ་བཏབ། ཡུམ་གྱི་བྷ་གའི་གཙོ་མོ་པདྨའི་ལམ་ནས་ཡར་དྲངས་ཡུམ་ལ་ཐིམ། ཡུམ་གྱི་བྷ་གའི་རྟེན་དང་བརྟེན་པར་བཅས་པའི་དཀྱིལ་འཁོར་ལྷག་མ་རྡོ་རྗེའི་ལམ་ནས་ཡབ་ཀྱི་སྙིང་གར་དྲངས། སྙིང་ག་ནས་སྙིང་པོའི་རྣལ་འབྱོར་མ་བཞི་རང་རང་གི་གནས་ནས་ཕྱིར་སྤྲོས་ཏེ་ཕྱིའི་བདེ་ཆེན་གྱི་འཁོར་ལོའི་ཕྱོགས་བཞིར་འཁོད། དེ་དང་དུས་མཉམ་དུ་ཕྱིའི་ཧེ་རུ་ཀའི་ཕྱག་དང་པོ་བཞི་ལ་ནང་གི་སྙིང་པོའི་རྣལ་འབྱོར་མ་བཞིར་གྱུར་པ་ནི་ཕྱག་གཡས་ཀྱི་དང་པོ་དང་ཤར་དུ་མཁའ་འགྲོ་མ་སྔོ་སྐྱ། གཡོན་གྱི་དང་པོ་དང་བྱང་དུ་ལཱ་མ་ལྗང་སེར། གཡས་ཀྱི་གཉིས་པ་དང་ནུབ་ཏུ་ཁཎྜ་རོ་ཧི་དམར་སེར། གཡོན་གྱི་གཉིས་པ་དང་ལྷོར་གཟུགས་ཅན་མ་དཀར་སེར། ཐམས་ཅད་ཀྱང་ཞལ་གཅིག་ཕྱག་གཉིས་གཡས་པ་རྣམས་ན་གྲི་གུག་དང་། གཡོན་པ་རྣམས་ན་གླང་པོ་ཆེ་དང་། ལྕེ་སྤྱང་དང་། མི་དང་། བ་ལང་དང་བཅས་པའི་ཐོད་པ་བསྣམས་པ། སྐྲ་གྱེན་དུ་བརྫེས་པ། རྒྱན་ཐམས་ཅད་ཀྱིས་བརྒྱན་པ། དབུ་ལ་སངས་རྒྱས་ཀྱི་གཟུགས་བརྙན་གྱིས་མཚན་ཅིང་། ཞབས་གཡས་བརྐྱང་བའི་སྟབས་ཀྱིས་རོའི་གདན་ལ་བཞུགས་པའོ། །སྙིང་ཁ་ནས་བུམ་པ་ལ་གནས་པའི་ཐོད་པ་བདུད་རྩིས་གང་བ་བཞི་རང་རང་གི་གནས་ནས་ཕྱིར་སྤྲོས་ཕྱིའི་བདེ་ཆེན་གྱི་འཁོར་ལོའི་མཚམས་བཞིར་འཁོད། སྙིང་ཁ་ནས་ཐུགས་ཀྱི་འཁོར་ལོའི་ལྷ་རྣམས་རང་རང་གི་གནས་ནས་ཕྱིར་སྤྲོས་ཏེ། ཕྱིའི་ཐུགས་ཀྱི་འཁོར་ལོའི་རྩིབས་བརྒྱད་ལ་འཁོད། དེ་དང་དུས་མཉམ་དུ་སྤྱི་བོ་ལ་སོགས་པའི་གནས་རྣམས་སུ་པུ་ཛ་ཨུ་ཨ་གོ་ར་དེ་མ་ཞེས་པའི་དབྱིབས་ཅན་གྱི་ཁམས་རྣམས་ནང་གི་ཐུགས་ཀྱི་འཁོར་ལོའི་དཔའ་བོ་དང་། རྩ་རྣམས་རྣལ་འབྱོར་མ་རྣམས་སུ་གྱུར་པ་ནི་སྤྱི་བོ་དང་ཐུགས་ཀྱི་འཁོར་ལོའི་ཤར་རྩིབས་པུ་ལི་ར་མ་ལ་ཡར་ཁཎྜ་ཀ་པཱ་ལི་དང་རབ་ཏུ་གཏུམ་མོ། སྤྱི་གཙུག་དང་བྱང་རྩིབས་ཛཱ་ལནྡྷ་རར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་དང་ནུབ་རྩིབས་ཨུནྡྷ་ར་ཀཾ་ཀཱ་ལ་དང་འོད་ལྡན་མ། ལྟག་པ་དང་ལྷོ་རྩིབས་ཨརྦུ་དར་མཆེ་བ་རྣམ་པར་གཙིགས་པ་དང་སྣ་ཆེན་མ། རྣ་བ་གཡོན་པ་དང་ཤར་ལྷོ་གོ་ད་ཝ་རིར་སུ་ར་ཝི་རི་དང་བརྟན་པའི་བློ་ཅན་མ། སྨིན་མའི་དབུས་དང་ལྷོ་ནུབ་རསྨི་ཤྭ་རིར་འོད་དཔག་མེད་དང་མིའུ་ཐུང་མ། མིག་གཉིས་དང་ནུབ་བྱང་དེ་ཝི་ཀོ་ཊར་རྡོ་རྗེའི་འོད་དང་ལཾ་ཀའི་དབང་ཕྱུག་མ། ཕྲག་པ་གཉིས་དང་བྱང་ཤར་མཱ་ལ་ཝར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་འཁོར་ལོའི་ལྷ་རྣམས་ཁ་དོག་སྔོན་པོ་ནམ་མཁའ་ལ་སྤྱོད་པའི་ཚུལ་གྱིས་བཞུགས་པའོ། །སྙིང་ཁ་ནས་གསུང་གི་འཁོར་ལོའི་ལྷ་རྣམས་རང་རང་གི་གནས་ནས་ཕྱིར་སྤྲོས་ཏེ་ཕྱིའི་གསུང་གི་འཁོར་ལོའི་རྩིབས་བརྒྱད་ལ་འཁོད། དེ་དང་དུས་མཉམ་དུ་མཆན་ཁུང་ལ་སོགས་པའི་གནས་རྣམས་སུ་ཀ་ཨོ་ཏྲི་ཀོ་ཀ་ལ་ཀ་ཧིའི་དབྱིབས་ཅན་གྱི་ཁམས་རྣམས་ནང་གི་གསུང་གི་འཁོར་ལོའི་དཔའ་བོ་དང་རྩ་རྣམས་རྣལ་འབྱོར་མ་རྣམས་སུ་གྱུར་པ་ནི་མཆན་ཁུང་དང་གསུང་གི་འཁོར་ལོའི་ཤར་རྩིབས་ཀ་མ་རུ་པར་ཨཾ་ཀུ་རི་དང་ཨེ་ར་ཝ་ཏི། ནུ་མ་གཉིས་དང་བྱང་རྩིབས་ཨོ་ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ལྟེ་བ་དང་ནུབ་རྩིབས་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་དང་ལྷོ་རྩིབས་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ། ཁ་དང་ཤར་ལྷོ་ཀ་ལིཾ་ཁར་རབ་ཏུ་བཟང་པོ་དང་ཤྱ་མ་དེ་ཝཱི། མགྲིན་པ་དང་ལྷོ་ནུབ་ལཾ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། སྙིང་དང་ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། འདོམས་བར་དང་བྱང་ཤར་ཧི་མཱ་ལ་ཡར་མིག་མི་བཟང་དང་ཁ་ག་ན་སྟེ་གསུང་གི་འཁོར་ལོའི་ལྷ་རྣམས་ཁ་དོག་དམར་པོ་ས་སྟེང་ན་སྤྱོད་པའི་ཚུལ་གྱིས་བཞུགས་པའོ། །སྙིང་ཁ་ནས་སྐུའི་འཁོར་ལོའི་ལྷ་རྣམས་རང་རང་གི་གནས་ནས་ཕྱིར་སྤྲོས་ཏེ། ཕྱིའི་སྐུའི་འཁོར་ལོའི་རྩིབས་བརྒྱད་ལ་འཁོད། དེ་དང་དུས་མཉམ་དུ་མཚན་མ་ལ་སོགས་པའི་གནས་རྣམས་སུ་པྲེ་གྲྀ་སཽ་སུ་ན་སི་མ་ཀུའི་དབྱིབས་ཅན་གྱི་ཁམས་རྣམས་ནང་གི་སྐུའི་འཁོར་ལོའི་དཔའ་བོ་དང་རྩ་རྣམས་རྣལ་འབྱོར་མ་རྣམས་སུ་གྱུར་པ་ནི། མཚན་མ་དང་ཤར་རྩིབས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་དང་བྱང་རྩིབས་གྲྀ་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧི། བརླ་གཉིས་དང་ནུབ་རྩིབས་སཽའུ་རཥྚར་རྟ་མགྲིན་དང་ཤཽཎྜི་ནི། བྱིན་པ་གཉིས་དང་ལྷོ་རྩིབས་སུ་ཝརྞ་དེ་ཝར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། སོར་མོ་བཅུ་དྲུག་དང་ཤར་ལྷོ་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་གཉིས་དང་ལྷོ་ནུབ་སིནྡྷཱུར་པདྨ་གར་གྱི་དབང་ཕྱུག་དང་སྟོབས་ཆེན་མ། མཐེ་བོང་བཞི་དང་ནུབ་བྱང་མ་རུར་རྣམ་པར་སྣང་མཛད་དང་འཁོར་ལོས་བསྒྱུར་མ། པུས་མོ་གཉིས་དང་བྱང་ཤར་ཀུ་ལུནྟར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་སྐུའི་འཁོར་ལོའི་ལྷ་རྣམས་ཁ་དོག་དཀར་པོ་ས་འོག་ན་སྤྱོད་པའི་ཚུལ་གྱིས་བཞུགས་པའོ། །ཁཎྜ་ཀ་པཱ་ལི་ལ་སོགས་པའི་དཔའ་བོ་རྣམས་ནི་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རལ་པའི་ཐོར་ཅོག་དང་མི་མགོ་སྐམ་པོ་ལྔའི་དབུ་རྒྱན་དང་རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། རོའི་གདན་ལ་གཡས་བརྐྱང་གི་སྟབས་ཀྱིས་བཞུགས་པ། རབ་ཏུ་གཏུམ་མོ་ལ་སོགས་པའི་དཔའ་མོ་རྣམས་ནི་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། གཅེར་བུ་རུས་པའི་རྒྱན་ལྔས་བརྒྱན་ཅིང་ཞབས་གཡོན་བརྐྱང་ཞིང་གཡས་བསྐུམས་པས་ཡབ་ལ་འཁྱུད་པ། ཐམས་ཅད་ཀྱང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །སྙིང་ཁ་ནས་སྒོ་མཚམས་མ་བརྒྱད་རང་རང་གི་གནས་ནས་ཕྱིར་སྤྲོས་ཏེ། ཕྱིའི་དམ་ཚིག་གི་འཁོར་ལོའི་སྒོ་མཚམས་བརྒྱད་དུ་འཁོད་དེ་དང་དུས་མཉམ་དུ་ཕྱིའི་ཧེ་རུ་ཀའི་ཕྱག་ལྷག་མ་བརྒྱད་ལ་ནང་གི་སྒོ་མཚམས་མ་བརྒྱད་དུ་གྱུར་པ་ནི་ཕྱག་གཡས་ཀྱི་གསུམ་པ་དང་། ཤར་སྒོར་ཁྭ་གདོང་མ་སྔོ་སྐྱ། བཞི་པ་དང་བྱང་སྒོར་འུག་གདོང་མ་ལྗང་སེར། ལྔ་པ་དང་ནུབ་སྒོར་ཁྱི་གདོང་མ་དམར་སེར། དྲུག་པ་དང་ལྷོ་སྒོར་ཕག་གདོང་མ་དཀར་སེར། གཡོན་གྱི་གསུམ་པ་དང་ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར། བཞི་པ་དང་ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར། ལྔ་པ་དང་ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་། དྲུག་པ་དང་བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་གཉིས་གཡས་གྲི་གུག་དང་གཡོན་ཐོད་པ་འཛིན་པ་མི་མགོ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔས་བརྒྱན་པ། ཞབས་གཡས་བརྐྱང་བའི་སྟབས་ཀྱིས་རོའི་གདན་ལ་བཞུགས་པའོ། །སྙིང་ཁ་ནས་གཞལ་ཡས་ཁང་ཕྱིར་སྤྲོས་ཏེ་ཕྱིའི་གཞལ་ཡས་ཁང་ལ་ཐིམ་པར་བསམ་ལ། རྐང་མཐིལ་རླུང་། སུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིགས་རི་རབ། མགོ་བོ་རི་རབ་ཀྱི་སྟོད་ཀྱི་ཆ། ལུས་མི་མཉམ་པ་མེད་པ་གཞལ་ཡས་ཁང་གྲུ་བཞི། སྙིང་ཁའི་རྩ་བཞི་པོ་སྒོ་བཞི། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་མ་ལ་སོགས་པ་ནི་གཞལ་ཡས་ཁང་གི་རྒྱན་ཞེས་གསལ་གདབ་བོ། །མ་མོ་བཅུ་གཉིས་ལུས་ལ་འགོད་པའི་ཚུལ་ལ། ཨ་བྷི་དྷ་ནའི་དགོངས་པས་ཕྱག་བཅུ་གཉིས་ལ་འགོད་པ་དང་། རྡོ་རྗེ་མཁའ་འགྲོའི་དགོངས་པས་སྙིང་ཁའི་རྩ་འདབ་ལ་འགོད་པ་གཉིས་ལས་ལཱུ་ནག་གཉིས་ཀྱི་གཞུང་དུ་གང་ཡང་མི་གསལ་ཡང་ནཱ་རོ་པའི་མན་ངག་གིས་ཕྱག་བཅུ་གཉིས་ལ་འགོད་པར་མཛད་ལ། དྲིལ་བུ་པའི་གཞུང་དུ་ནི་སྙིང་ཁའི་རྩ་འདབ་བཅུ་གཉིས་ལ་འགོད་པར་གསལ་ལོ། །དེས་ན་འདིར་རྗེ་ས་ཆེན་གྱིས་མ་མོ་བཅུ་གཉིས་ཕྱག་བཅུ་གཉིས་ལ་འགོད་པར་དངོས་སུ་གསུངས་ཤིང་། སྙིང་པོའི་རྣལ་འབྱོར་མ་བཞི་ནས་དམ་ཚིག་གི་འཁོར་ལོའི་བར་དུ་རང་རང་གི་གནས་ནས་སྤྲོས་ཏེ་ཞར་ལ་ནང་གི་དཀྱིལ་འཁོར་གསལ་གདབ་པ་ཡིན་གསུངས་ཞེས་དང་། དེ་ཡང་ཕྱིར་སྤྲོས་པ་དང་ནང་དུ་ལུས་ལ་བསྒོམ་པ་དུས་མཉམ་པ་ཡིན་གསུངས་ཞེས་པ་འདི་རྣམས་ཀྱི་དགོངས་པ་འདི་ལས་འོས་མེད་ལ་དེའི་ཚེ་ཕྱག་བཅུ་གཉིས་ལ་འགོད་པ་སྦྱང་གཞི་ལུས་རྒྱུར་བྱས་པའི་ལུས་དཀྱིལ་མཚན་ཉིད་པ་མ་ཡིན་ཡང་གཙོ་བོའི་ལུས་ལ་བཀོད་པའི་ཆ་ནས་ལུས་དཀྱིལ་དང་། ནང་ལུས་ལ་འགོད་པ་ཞེས་པའི་ཐ་སྙད་འཇུག་ཏུ་རུང་སྟེ་ལཱུ་ཧི་པ་བཞིན་ནོ། །ཡང་དཔྱིད་ཀྱི་ཐིག་ལེར་སྙིང་ཁའི་རྩ་འདབ་ཕྱི་ནང་ལ་འགོད་པ་དྲིལ་བུ་པ་བཞིན་དུ་གསུངས་པ་ལྟར་འཕགས་པས་ཀྱང་དེ་བཞིན་དུ་མཛད་ལ། དེའི་ཚེ་ཕྱག་བཅུ་གཉིས་ལ་འགོད་པ་མེད་པས་རྒྱུད་ཀྱི་དགོངས་པ་ཕྱོགས་གཅིག་སྟེ་མ་འདྲེས་པར་སོ་སོར་ཤེས་པར་བྱའོ། །དེ་ནས་སྐབས་འདིར་སྔགས་ཀྱིས་བྱིན་གྱིས་བརླབ་པ་དང་། གོ་ཆ་བཅིང་བ་གཞུང་དང་། རྗེ་ས་ཆེན་གྱི་བསྡུས་དོན་དང་ཐོ་ཡིག་རྣམས་སུ་མ་གསུངས་ཡང་ཕྱག་ལེན་ལ་མཛད་པར་སྣང་སྟེ། དང་པོ་སྦྱོར་བའི་སྐབས་བཞིན་དུ་ཤེས་པར་བྱའོ། །གསུམ་པ་ལས་རྒྱལ་མཆོག་ལ་བཞི་སྟེ། ཡེ་ཤེས་པ་གཞུག་པ། དབང་བསྐུར་བ། མཆོད་པ། དག་པ་དྲན་པའོ། །དང་པོ་ནི། སྔར་ལཱུ་ཧི་པའི་སྐབས་དང་འདྲའོ། །གཉིས་པ་ནི་དབང་ལྷ་སྤྱན་དྲངས་ནས་མཆོད་པ་དང་། གསོལ་བ་གདབ་པ་དང་། དབང་བསྐུར་བ་རྣམས་སྔ་མ་དང་འདྲ་བ་ལས། རིགས་བདག་གི་རྒྱས་གདབ་པའི་སྐབས་སུ་གཙོ་བོ་དང་། ཤར་ཕྱོགས་པ་རྣམས་ལ་མི་བསྐྱོད་པ། བྱང་ཕྱོགས་པ་རྣམས་ལ་དོན་ཡོད་གྲུབ་པ། ནུབ་ཕྱོགས་པ་རྣམས་ལ་འོད་དཔག་མེད། ལྷོ་ཕྱོགས་པ་རྣམས་ལ་རིན་ཆེན་འབྱུང་ལྡན། ཤར་ལྷོ་པ་རྣམས་ལ་མི་བསྐྱོད་པ། ལྷོ་ནུབ་པ་རྣམས་ལ་རིན་ཆེན་འབྱུང་ལྡན། ནུབ་བྱང་པ་རྣམས་ལ་འོད་དཔག་མེད། བྱང་ཤར་བ་རྣམས་ལ་དོན་ཡོད་གྲུབ་པས་དབུ་བརྒྱན་པར་བསམ་མོ། །གསུམ་པ་མཆོད་པ་ལ་དྲུག་ཡོད་པ་ཕལ་ཆེར་སྔ་མ་དང་འདྲ་བ་ལས་སྔགས་མཆོད་ཀྱི་སྐབས་སུ། ཨོཾ་སརྦ་བུདྡྷ་སོགས་ཡུམ་གྱི་སྙིང་པོ་དང་། བཛྲ་བེ་རོ་ཙ་ན་སོགས་ཉེ་སྙིང་དུ་བྱའོ། །སྙིང་པོའི་རྣལ་འབྱོར་མ་བཞི་དང་། ཞལ་བཞི་པའི་སྔགས་སྤེལ་བ་དང་། སྒོ་མཚམས་མ་བརྒྱད་དང་ཡབ་ཀྱི་རྐང་བརྒྱད་སྤེལ་བ་དང་མ་སྤེལ་བར་རྐྱང་པ་བཟླ་བ་གང་རུང་བྱ་བར་གསུངས་སོ། །ནང་མཆོད་ཀྱི་སྐབས་སུ། ལཱུ་ཧི་པ་དང་དྷ་རི་ཀ ཞེས་པའི་རྗེས་སུ། རྡོ་རྗེ་དྲིལ་བུ་རུས་སྦལ་ཞབས། །འབར་འཛིན་སྤྱོད་འཆང་གུ་ཧྱ་བ། །རྣམ་རྒྱལ་ཞབས་དང་ཏི་ལོ་པ། །ཞེས་སོགས་སྦྲེལ་བར་བྱའོ། །ས་ཆེན་གྱི་བསྡུས་དོན་དུ། ཡེ་ཤེས་པ་གཞུག་པ་དང་། དབང་བསྐུར་བ་དཀྱིལ་འཁོར་རྒྱལ་མཆོག་བསྡུས་ནས་ལས་རྒྱལ་མཆོག་ལ་ཕྱི་མ་གཉིས་ཁོ་ན་གསུངས་ཀྱང་འདིར་ནི་ཐོ་ཡིག་ཏུ་གསུངས་པ་ལྟར་བྲིས་པའོ། །བཞི་པ་ནི་བྱང་ཕྱོགས་སོ་བདུན་གྱི་དག་པ་རྒྱས་བསྡུས་ཅི་ལྟར་དྲན་པ་དང་། ཕར་དག་ཚུར་དག་གང་དུ་དྲན་ན་ཡང་སྔ་མ་དང་འདྲའོ། །གཉིས་པ་རྫོགས་པའི་རིམ་པ་ནི། དཔྱིད་ཐིག་གི་མན་ངག་ལྟར་ཤེས་པར་བྱའོ། །གཉིས་པ་མཉམ་པར་མ་བཞག་པའི་རྣལ་འབྱོར་ལ་གསུམ་སྟེ། སྔགས་ཀྱི་བཟླས་པ་དང་། གཏོར་མ་དང་། སྤྱོད་ལམ་གྱི་རྣལ་འབྱོར་རོ། །དང་པོ་ནི་རྩ་སྔགས་སྙིང་པོ་སོགས་སོ་སོར་བཟླས་པའམ། ལཱུ་ཧི་པ་ལྟར་གཉིས་སུ་མེད་པར་བཟླས་པ་ཡང་རུང་གསུངས་ཏེ། དམིགས་པ་སོགས་སྔར་བཞིན་ནོ། །ཡུམ་གྱི་སྙིང་པོ་དང་ཉེ་སྙིང་གོ་སྣོར་བ་དང་། ཨོཾ་ཙཽ་རཱི་ཧཱུྃ་ཧཱུྃ་ཕཊ་ཞེས་པ་ཉེ་བའི་སྙིང་པོའི་སྙིང་པོར་བྱེད་པ་ནི་ཁྱད་པར་རོ། །གཉིས་པ་ནི་གཏོར་མ་ཞལ་བཞི་པའི་སྔགས་ཀྱིས་བསང་། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་རཾ་ལས་མེའི་དཀྱིལ་འཁོར། དེའི་སྟེང་དུ་ཨཱཿལས་ཐོད་པ་དཀར་པོ་དུམ་བུ་གསུམ་པ་དཔྲལ་བ་རང་ལ་བསྟན་པ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཤར་དུ་གོ་ལས་བ་ལང་གི་ཤ ལྷོར་ཀུ་ལས་ཁྱིའི་ཤ ནུབ་ཏུ་ད་ལས་རྟའི་ཤ བྱང་དུ་ཧ་ལས་གླང་པོ་ཆེའི་ཤ དབུས་སུ་ན་ལས་མིའི་ཤ ཤ་དེ་རྣམས་རེ་རེའི་སྟེང་དུ་ཤར་དུ་བི་ལས་དྲི་ཆེན། དབུས་སུ་མུ་ལས་དྲི་ཆུ། བྱང་དུ་ཤུ་ལས་བྱང་ཆུབ་ཀྱི་སེམས། ནུབ་ཏུ་མ་ལས་ཀླད་པ། ལྷོར་ར་ལས་རཀྟ། དེ་རྣམས་ཀྱི་སྟེང་དུ་དབུས་སུ་ཧཱུྃ་ཆོས་ཀྱི་དབྱིངས་ཀྱི་ཡེ་ཤེས། ཤར་དུ་བྷྲཱུཾ་མེ་ལོང་ལྟ་བུའི་ཡེ་ཤེས། བྱང་དུ་ཁཾ་བྱ་བ་གྲུབ་པའི་ཡེ་ཤེས། ནུབ་ཏུ་ཛྲཱིཾ་སོ་སོར་རྟོག་པའི་ཡེ་ཤེས། ལྷོར་ཨཱཾ་མཉམ་པ་ཉིད་ཀྱི་ཡེ་ཤེས། དེ་རྣམས་ཀྱི་སྟེང་གི་ནམ་མཁའ་ལ་བདུད་རྩི་ལྔའི་རང་བཞིན་ཨོཾ་ཡིག་དཀར་པོ་མགོ་ཐུར་དུ་བསྟན་པ། དེའི་སྟེང་དུ་བྱང་ཆུབ་ཀྱི་སེམས་ཀྱི་རང་བཞིན་ཁ་ཊྭཱཾ་ག་དཀར་པོ་མགོ་བོ་ཐུར་དུ་བལྟས་པ་ཧཱུྃ་གིས་མཚན་པ། ཧཱུྃ་ལས་འོད་ཟེར་འོག་ཏུ་འཕྲོས་རླུང་གཡོས་མེ་སྦར་བས་རྫས་རྣམས་བསྐོལ་ནས་འོད་དུ་ཞུ་བའི་རླངས་པ་གྱེན་དུ་སོང་བས་ཨོཾ་དང་ཁ་ཊྭཱཾ་ག་ལས་བདུད་རྩིའི་རྒྱུན་འཛག ཡང་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཁ་ནས་ཡེ་ཤེས་ཀྱི་རང་བཞིན་གྱི་ཐོད་པ་བདུད་རྩིས་གང་བ་དཔག་ཏུ་མེད་པ་སྤྱན་དྲངས་མདུན་གྱི་ཐོད་པ་ལ་ཐོད་པ་ཐིམ། བདུད་རྩི་ལ་བདུད་རྩི་ཐིམ་ཁ་ཊྭཱཾ་ག་ཨོཾ་དང་བཅས་པ་ལྷུང་བས་གཉིས་སུ་མེད་པར་གྱུར་ནས་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿཞེས་བརྗོད་པས་བྱིན་གྱིས་བརླབ་བོ། །ཡང་ན་ལཱུ་ཧི་པ་ལྟར་བྱེད་པ་ཡང་རུང་བར་མངོན་ནོ། །དེ་ནས་ཆོ་ག་གཞན་རྣམས་འདྲ་བ་ལ་གཏོར་མའི་སྔགས་ནི། ཨོཾ་བཛྲ་ཨ་ར་ལི་ཧོཿཛ་ཧཱུྃ་བཾ་ཧོ་ས་མ་ཡ་སཏྭཾ། ཨོཾ་བཛྲ་ཌཱ་ཀི་ནཱི་ཁ་ཁ། ཁཱ་ཧི་ཁཱ་ཧི། ཨི་དཾ་བ་ལིཾ་བྷུཉྫ་ཐ། པི་པ་ཐ། མཱ་མ་ཀརྻཾ་སདྱ་ཨོཾ་ཨཱཿཧཱུྃ་ཕཻཾ་ཕཻཾ་སྭཱ་ཧཱ། ཞེས་པ་ལན་ལྔས་དབུལ་ལོ། །གསུམ་པ་ནི་རྫོགས་རིམ་དཔྱིད་ཐིག་ལྟར་བསྒོམ་ན་དེའི་སྔོན་དུ་དཀྱིལ་འཁོར་བསྡུས་ཟིན་པས་འདིར་མི་དགོས་པས་བསྐྱེད་རིམ་བསྒོམས་པའི་རྗེས་ལ་དཀྱིལ་འཁོར་བསྡུ་བར་འདོད་ན་རང་གི་སྙིང་ཁའི་ས་བོན་ལས་འོད་འཕྲོས་པས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་། དེ་འཁོར་གྱི་ལྷ་ལ་བསྡུས་ལ་འཁོར་གྱི་ལྷ་རྣམས་ཕྱོགས་གཡོན་སྐོར་གྱིས་སྣ་བུག་གཡོན་དང་། མཚམས་གཡས་སྐོར་གྱིས་སྣ་བུག་གཡས་སུ་བསྡུས་ལ་གོ་ཆ་གསུམ་སྔར་བཞིན་བྱས་ནས་དག་པ་གསུམ་ལ་གནས་ཏེ་སྤྱོད་ལམ་ལ་འཇུག་པར་བྱའོ། །དེ་ལྟར་རིམ་གཉིས་བསྒོམས་ནས་སྤྱོད་པ་གསུམ་གྱིས་མཚམས་སྦྱར་ཏེ། རྡོ་རྗེ་འཆང་ཆེན་པོའི་གོ་འཕང་ཚེ་འདིར་མངོན་དུ་འགྱུར་བ་ནི་བརྩོན་འགྲུས་རབ་ལ་ངེས་པའོ། །རྒྱུད་ཀྱི་མཐར་ཐུག་རྣལ་འབྱོར་གསང་བའི་མཐའ། །གྲུབ་པ་མཐར་ཕྱིན་ལཱུ་ནག་རྣམ་གཉིས་ཀྱི། །ལེགས་པར་བཀྲལ་བའི་མན་ངག་ས་སྐྱ་པའི། །གསུང་གི་རྗེས་འབྲངས་བླ་མ་ལས་རྙེད་འདི། །མཁའ་འགྲོ་གཉན་ཅིང་གསང་བའི་འོས་ཡིན་ཀྱང་། །རང་ཉིད་དྲན་པ་གསོ་བར་བྱ་ཕྱིར་དང་། །དོན་གཉེར་སྐལ་ལྡན་འགའ་ཡིས་བསྐུལ་བའི་ངོར། །གསལ་བར་བྲིས་ལ་མཁའ་འགྲོས་བཟོད་པར་མཛོད། །འདི་སྦྱར་དགེ་བ་དྲི་མེད་གང་ཐོབ་དེས། །མར་གྱུར་འགྲོ་བ་ནམ་མཁའི་མཐའ་ཀླས་པ། །འོད་དཔག་མེད་པའི་དྲུང་དུ་སྐྱེས་ནས་ཀྱང་། །བྱང་ཆུབ་སྤྱོད་པ་མྱུར་དུ་མཐར་ཕྱིན་ཤོག །འཁོར་ལོ་བདེ་མཆོག་གི་སྒྲུབ་པའི་ཐབས་མངལ་སྒོང་སྦྱོང་བའི་ཚུལ་གྲུབ་པའི་དབང་ཕྱུག་གཉིས་ཀྱི་དགོངས་པ་རྗེ་བཙུན་གོང་མའི་གསུང་རབ་ལས་ཇི་ལྟར་བཀྲལ་བའི་ཚུལ་ཉམས་ལེན་གྱི་རིམ་པ་གསལ་བར་བཤད་པ་འདི་ནི་ཁམས་གསུམ་འགྲོ་བའི་འདྲེན་པ་དམ་པ་དཀོན་མཆོག་རྒྱལ་མཚན་དཔལ་བཟང་པོའི་ཞབས་རྡུལ་སྤྱི་བོས་བླངས་པ་མང་དུ་ཐོས་པའི་དགེ་སློང་བསོད་ནམས་སེང་གེས་སྦྱར་པའི་ཡི་གེ་པ་ནི་གཞོན་ནུ་བཟང་པོའོ།། །།ཤུ་བྷཾ།། །།

མཁའ་སྤྱོད་སྒོ་འབྱེད།

མཁའ་སྤྱོད་སྒོ་འབྱེད་ཅེས་བྱ་བ་བཞུགས་སོ།། ན་མོ་བཛྲ་ཡོ་གི་ནཱི། ཐུགས་རྗེས་འགྲོ་ལ་རྗེས་ཆགས་མཛེས་པའི་སྐུ། །གང་གིས་བསྒོམས་ཤིང་གསང་སྔགས་ཚོགས་བཟླས་པའི། །སྒྲུབ་པོ་མཁའ་སྤྱོད་གནས་སུ་འཁྲིད་མཛད་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །བསྐྱེད་རིམ་རྣལ་འབྱོར་བཅུ་གཅིག་བསྒོམ་ཚུལ་དང་། །ཚེས་བཅུ་སྦྱིན་སྲེག་མར་མེའི་སྦྱིན་སྲེག་རྣམས། །དད་ལྡན་སློབ་མས་གསོལ་བ་བཏབ་པའི་ངོར། །དམ་པའི་གསུང་བཞིན་གསལ་བར་བྲི་བར་བྱ། །རྗེ་བཙུན་ནཱ་རོ་ཏ་པས་གཞན་ལ་མ་གནང་བའི་མན་ངག་ཕམ་མཐིང་སྐུ་མཆེད་ནས་བརྒྱུད་པའི་རྗེ་བཙུན་རྡོ་རྗེ་རྣལ་འབྱོར་མའི་བསྒོམ་བཟླས་འདི་ལ་དཔལ་ས་སྐྱ་པ་ཆེན་པོའི་ཞལ་ནས་རྣལ་འབྱོར་བཅུ་གཅིག་གིས་བསྡུས་པར་གསུངས་ཏེ། ཉལ་དང་ལྡང་དང་བདུད་རྩི་མྱང་། །ཚད་མེད་བླ་མ་བདག་ལྷར་བསྐྱེད། །འགྲོ་བ་དག་པའི་རྣལ་འབྱོར་དང་། །དཔའ་བོ་དཔའ་མོས་བྱིན་གྱིས་བརླབ། །ངག་བཟླས་ཡིད་བཟླས་གཉིས་གཅིག་ཡིན། །བསམ་གྱིས་མི་ཁྱབ་རྣལ་འབྱོར་དང་། །སྤྱོད་ལམ་གྱི་ནི་རྣལ་འབྱོར་ཏེ། །དེ་ལྟར་རྣལ་འབྱོར་བཅུ་གཅིག་གོ །ཞེས་སོ། །དེ་ལ་དང་པོ་ཉལ་བའི་རྣལ་འབྱོར་ནི། སྲོད་ཐུན་ལ་བསྒོམ་བཟླས་བྱས་ནས་ཐུན་མཇུག་ཏུ་བསམ་གྱིས་མི་ཁྱབ་པའི་རྣལ་འབྱོར་བསྒོམས་པའི་ངང་ལ་ཉལ། མ་བསྒོམས་ན་སྐད་ཅིག་གིས་སྟོང་པ་ཉིད་དུ་བསྒོམས་པའི་ངང་ལ་ཉལ། བསྐྱེད་རིམ་ལ་མོས་པ་ཆེ་ན་རིན་པོ་ཆེའི་ཁྲིའི་སྟེང་དུ་རྗེ་བཙུན་མ་ཤ་རུས་སོགས་རྡོས་བཅས་མ་ཡིན་པར་འོད་ཀྱི་རང་བཞིན་ཅན་དུ་བསྒོམས་པའི་སྤྱི་བོར་བླ་མ་བཞུགས་པར་བསྒོམས་ནས་དེ་ལ་ཕྱག་འཚལ་བར་བསྒོམས་ཏེ་ཉལ་བར་མན་ངག་ཁ་ཅིག་ལས་འབྱུང་བས་དེའང་ལེགས་པ་ཡིན་ནོ། །གཉིས་པ་ལྡང་བའི་རྣལ་འབྱོར་ནི། ནམ་མཁར་ཌཱ་མ་རུའི་སྒྲ་ཉེ་བའི་སྙིང་པོར་གྲག་པ་ཙམ་གྱིས་བསྐུལ་ནས་རྗེ་བཙུན་མ་ཕྱག་མཚན་མེད་པའི་སྐུར་ལྡང་བར་བྱའོ། །ལས་དང་པོ་པས་གཉིད་ཀྱི་ངང་དུ་དེ་དྲན་པ་མི་ཡོང་ནའང་གཉིད་སད་མ་ཐག་ཏུ་དེས་བསྐུལ་ནས་ལྡང་བ་ཡིན་ནོ་སྙམ་དུ་མོས་པ་བྱས་ནས་གཉིད་སད་ཁར་དེ་དྲན་པ་འབྱུང་ངོ་། །གསུམ་པ་བདུད་རྩི་མྱོང་བ་ནི། བདུད་རྩི་རིལ་བུ་ཡོད་ན་སྙིང་གའི་བྃ་ཡིག་མཆོད་པའི་བསམ་པས་འབྲུ་གསུམ་བརྗོད་ཅིང་མྱོང་ངོ་། །མེད་ན་ཆང་བདུད་རྩིར་བྱིན་གྱིས་བརླབས་ལ་ཧུབ་གསུམ་འཐུང་ངོ་། །བཞི་པ་ཚད་མེད་བསྒོམ་པ་ནི། ཐོག་མར་སྐྱབས་སུ་འགྲོ་བ་བྱས་ནས་བདག་གིས་རྫོགས་པའི་བྱང་ཆུབ་ཀྱི་གོ་འཕང་ཐོབ་པར་བྱས་ལ་སེམས་ཅན་ཐམས་ཅད་སྲིད་པའི་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་བདག་གིས་ལམ་ཟབ་མོ་བསྒོམ་པར་བྱའོ། །ཞེས་ལན་གསུམ་བརྗོད་ཅིང་བསམས་ཏེ་དེ་ལ་ཚད་མེད་བཞི་ཚང་གསུང་ངོ་། །ལྔ་པ་བླ་མའི་རྣལ་འབྱོར་ནི། མདུན་གྱི་ནམ་མཁར་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན་སྐུ་མདོག་དམར་པོ་ཞལ་གཅིག་ཕྱག་གཉིས་ཀྱི་གཡས་པས་བདེ་སྟོང་གི་སྒྲ་སྒྲོགས་པའི་ཌཱ་མ་རུ་འཁྲོལ་བ། གཡོན་པས་ཐོད་པ་བདུད་རྩིས་གང་བ་ཐུགས་ཀར་འཛིན་ཅིང་། གཡོན་པའི་གྲུ་མོ་ན་ཁ་ཊྭཱཾ་ག་བསྣམས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། སྐུ་ལ་རུས་པའི་རྒྱན་དྲུག་གིས་བརྒྱན་ཅིང་། གཞོན་ནུ་ལང་ཚོ་དར་ལ་བབ་པའི་སྐུ་ཅན་ཞེས་བརྗོད་ཅིང་བསམས་ལ། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་བླ་མ་དང་རྡོ་རྗེ་རྣལ་འབྱོར་མ་གཉིས་སུ་མེད་པ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ་ཞེས་ལན་བདུན་གསོལ་བ་བཏབ་སྟེ། བླ་མ་འོད་དུ་ཞུ་ནས་རང་གི་སྨིན་མཚམས་ནས་ཐིམ་པར་བསམ་མོ། །དྲུག་པ་བདག་ལྷར་བསྐྱེད་པ་ནི། རང་གི་སྙིང་གར་ཨེ་ལས་ཆོས་ཀྱི་འབྱུང་གནས་གྲུ་གསུམ་ཉིས་བརྩེགས་ཀྱི་ནང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་བྃ་ཡིག་དམར་པོའི་མཐའ་མར་གཡོན་སྐོར་དུ། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ་ཞེས་པའི་སྔགས་ཀྱིས་བསྐོར་བ་ལས་འོད་ཟེར་བྱུང་བས་ལུས་ཕྱི་ནང་ཐམས་ཅད་གང་སྟེ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་པས་ལུས་འོད་ཀྱི་གོང་བུར་གྱུར། དེ་ཡོངས་སུ་གྱུར་པ་ལས་རང་ཉིད་རྗེ་བཙུན་རྡོ་རྗེ་རྣལ་འབྱོར་མ་པདྨ་དང་ཉི་མའི་གདན་ལ་ཞབས་གཡས་བརྐྱངས་པས་དུས་མཚན་མ་དམར་མོ་དང་། གཡོན་བསྐུམས་པས་འཇིགས་བྱེད་ནག་པོ་མནན་པ། སྐུ་མདོག་དམར་མོ་ཞལ་གཅིག་ཕྱག་གཉིས། སྤྱན་གསུམ་མ། ཕྱག་གཡས་པས་རྡོ་རྗེས་མཚན་པའི་གྲི་གུག་ཐུར་དུ་འཕྱང་ཞིང་། གཡོན་པས་ཐོད་པ་ཁྲག་གིས་གང་བ་སྟེང་གི་ཕྱོགས་སུ་བཟུང་ནས་ཞལ་གྱེན་དུ་ཕྱོགས་པས་གསོལ་བ། ཕྲག་པ་གཡོན་པར་རྡོ་རྗེས་མཚན་པའི་ཁ་ཊྭཱཾ་ག་ལ་དྲིལ་བུ་དང་། ཌཱ་མ་རུ་དང་། འཕན་རྩེ་གསུམ་པ་འཕྱང་བཞིན་པ་བསྣམས་པ། དབུ་སྐྲ་ནག་པོ་སིལ་བུར་གྱུར་པ། མི་མགོ་སྐམ་པོ་ལྔས་དབུར་བརྒྱན་ཅིང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ཆ་ལྔས་བརྒྱན་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསམས་ལ། དེའི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ། ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧྃ་ཡོཾ་སྔོན་མོ་གཤིན་རྗེ་མ། ཁར་ཧྲིཾ་མོཾ་དཀར་མོ་རྨོངས་བྱེད་མ། སྤྱི་བོར་ཧྲིཾ་ཧྲིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་ལ་ཕཊ་ཕཊ་དུད་ཀ་ཙཎྜི་ཀ་སྟེ། དཔའ་མོའི་གོ་ཆ་ཙམ་དགོད་པར་བྱའོ། །བདུན་པ་འགྲོ་བ་དག་པའི་རྣལ་འབྱོར་ནི། ཡང་སྙིང་ཁའི་སྔགས་ཕྲེང་རྣམས་ལས་འོད་ཟེར་བྱུང་སྟེ། བ་སྤུའི་བུ་ག་ནས་སོང་། རིགས་དྲུག་གི་སེམས་ཅན་རྣམས་ལ་ཕོག་པས་དེ་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་དག་ནས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པར་བསམ་མོ། །བརྒྱད་པ་དཔའ་བོ་དཔའ་མོས་བྱིན་གྱིས་བརླབ་པ་ནི། ལུས་ཀྱིས་འབར་བའི་ཕྱག་རྒྱ་དཔྲལ་བའི་དབྱེས་སུ་གཡོན་དུ་བསྐོར་བ་ལན་གསུམ་བསྐོར། ངག་ཏུ་ཕཻཾ་ཞེས་བརྗོད། སེམས་ཀྱིས་སྙིང་གའི་བྃ་ཡིག་ལས་འོད་འཕྲོས་ཏེ་འོག་མིན་ནས་རྡོ་རྗེ་རྣལ་འབྱོར་མ་ལ་ཕྱོགས་བཅུའི་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བསྐོར་བ་དང་འགྲོ་བ་རྣལ་འབྱོར་མར་བསྐྱེད་པ་ཐམས་ཅད་ཀྱང་བདག་གི་བ་སྤུའི་བུ་ག་ནས་ཐིམ་པར་བསམ་ཞིང་ཛཿཧཱུྃ་བྃ་ཧོཿཞེས་དང་། པད་སྐོར་གྱི་མཐར་འཁྱུད་པའི་ཕྱག་རྒྱ་བྱས་ནས། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧཾ། ཞེས་བརྗོད་དོ། །དགུ་པ་བཟླས་པ་ལ་གཉིས་ལས། དང་པོ་ངག་གི་བཟླས་པ་ནི། སྙིང་གར་ཆོས་འབྱུང་གྲུ་གསུམ་ཉིས་བརྩེགས་ཀྱི་ནང་དུ་ཟླ་བའི་དཀྱིལ་འཁོར་གྱི་དབུས་སུ་བྃ་ཡིག་དམར་པོ་ལ་སྔགས་ཀྱི་ཕྲེང་བ་གཡོན་སྐོར་དུ་བཀོད་པ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་ཐམས་ཅད་མཆོད། དེ་དག་གི་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་འོད་ཟེར་དམར་པོའི་རྣམ་པར་སྤྱན་དྲངས། སྙིང་གའི་སྔགས་ཕྲེང་རྣམས་ལ་ཐིམ་པས་རང་གིས་རྒྱུད་བྱིན་གྱིས་བརླབས་པར་བསམས་ལ། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་ཅི་ནུས་བཟླའོ། །གཉིས་པ་ཡིད་བཟླས་ནི། འོག་རླུང་བསྐུམ། སྟེང་རླུང་མནན་ཏེ། སྙིང་གའི་ཆོས་འབྱུང་ཟླ་བ་ཡིག་འབྲུ་དང་བཅས་པ་བདེ་བ་སྐྱེ་བར་འདོད་ན་གསང་གནས། མི་རྟོག་པ་སྐྱེ་བར་འདོད་ན་ལྟེ་བར་ཕབ་སྟེ། རླུང་ཁ་སྦྱར་ནས་གྲྭ་བཞིར་དགའ་བ་འཁྱིལ་བ་གཡོན་སྐོར་དུ་འཁོར་བ་དང་། ཡིག་འབྲུ་རྣམས་ལ་གཡོན་སྐོར་དུ་དམིགས་ཏེ་ཡིད་ཀྱིས་བདུན་བཟླའོ། །ཡིད་བཟླས་འདི་རྫོགས་རིམ་མཚན་བཅས་ཡིན་པས་དྲོད་དང་བདེ་བ་སྐྱེ་ཞིང་འཕར་གཡོ་དྲག་ཏུ་འབྱུང་ལ། དེ་བྱུང་ན་ཡང་རིམ་གྱིས་གློད། དུ་བ་ལ་སོགས་པའི་རྟགས་ཐམས་ཅད་ཀྱང་འདི་ཉིད་ལས་འབྱུང་ངོ་། །བཅུ་པ་བསམ་གྱིས་མི་ཁྱབ་པའི་རྣལ་འབྱོར་ནི་ལྟེ་བའི་སྔགས་ཕྲེང་ལས་འོད་འཕྲོས་པས་ཁམས་གསུམ་ཐམས་ཅད་འོད་ཟེར་གྱིས་གང་། གཟུགས་མེད་ཁམས་ཐམས་ཅད་འོད་ཟེར་གྱི་རྣམ་པར་བྱས་ནས་ལུས་ཀྱི་སྟོད་ཀྱི་ཆ་ལ། གཟུགས་ཁམས་བར་གྱི་ཆ་ལ། འདོད་ཁམས་སྨད་ཀྱི་ཆ་ལ་བསྡུ། རང་ཡང་སྐུ་སྟོད་སྐུ་སྨད་ནས་རིམ་གྱིས་བསྡུས་ཏེ་ཆོས་འབྱུང་ལ། དེ་ཟླ་བ་ལ། དེ་ཡིག་འབྲུ་རྣམས་ལ། དེ་བྃ་ཡིག་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་ཡང་ཇེ་ཕྲ་ཇེ་ཕྲར་མི་དམིགས་ཏེ་སྟོང་པའི་ངང་ལ་སེམས་གློད་དེ་ཅི་ཙམ་གནས་ཚད་དུ་གཞག་གོ །ཞི་གནས་ཤས་ཆེ་ན་ལྷར་ལྡང་། གསལ་བ་དང་བདེ་ཤས་ཆེ་ན་སྟོང་པར་གཞག ལྷར་ལྡང་བ་ནི་སྔར་ལྟར་རྗེ་བཙུན་མ་ཕྱག་མཚན་མེད་པའི་སྐུར་ལྡང་ངོ་། །བཅུ་གཅིག་པ་སྤྱོད་ལམ་གྱི་རྣལ་འབྱོར་ནི། དེ་ནས་སྤྱོད་ལམ་ལ་འཇུག་པའི་ཚེ་རང་དང་སྣང་བ་ཐམས་ཅད་རྡོ་རྗེ་རྣལ་འབྱོར་མའི་སྐུར་དམིགས་ལ་བྱ་བྱེད་ཀྱི་ཚེ་ལྷ་ལ་ལྷས་མཆོད་པའི་བསམ་པ་སྐུའི་དགའ་བ། དེའང་སྒྱུ་མ་ལྟ་བུ་དང་། བསམ་གྱིས་མི་ཁྱབ་པའི་ངང་ལས་མ་གཡོས་པར་དྲན་པར་བྱ་བ་ཐུགས་ཀྱི་དགའ་བ། སྒྲ་ཅི་གྲག་པ་ཐམས་ཅད་སྔགས་སུ་དྲན་པ་གསུང་གི་དགའ་བ་སྟེ་དགའ་བ་གསུམ་གྱི་ངང་ལས་བྱ་བ་ཐམས་ཅད་བྱའོ། །རྣལ་འབྱོར་བཅུ་གཅིག་བསྟན་ཟིན་ཏོ། །གཉིས་པ་ཚེས་བཅུ་གཉིས་ལ་སོགས་པའི་དུས་སུ་ཚོགས་མཆོད་བྱ་བ་ལ། མདོར་བསྡུས་པའི་ཚུལ་དང་། སྤྲོས་པ་ལ་དགའ་ན་རྒྱས་པར་བྱ་བའི་ཚུལ་གཉིས་ལས། དང་པོ་ལ་གཉིས་སྔོན་འགྲོ་དང་། དངོས་གཞིའོ། །དང་པོ་ལ་བཞི་སྟེ། གནས། དུས། རྟེན་བཤམས་པ། མཆོད་རྫས་སོ། །དང་པོ་ནི། གནས་ཁང་ཕྱག་དར་བྱ། ཆག་ཆག་གདབ། བྲིས་སྐུ་ལ་སོགས་པའི་རྟེན་རྣམས་ཇི་ལྟར་འཚམས་པར་བཞུགས་སུ་གསོལ་ལོ། །གཉིས་པ་ནི། ཚོགས་གསོག་པར་འདོད་ན་ཡར་གྱི་ཚེས་བཅུ། སྒྲིབ་པ་འདག་པར་འདོད་ན་མར་གྱི་ཚེས་བཅུ་ནི་དུས་ཁྱད་པར་ཅན་ཡིན་ལ། དུས་རྒྱུན་དུའམ། ནམ་སྤྲོ་བའི་དུས་སུ་བྱའོ། །གསུམ་པ་ནི། མཎྜལ་ལ་ཙནྡན་དམར་པོ་བརྡར་བའི་ཆུས་སྲིན་ལག་གཡོན་པས་ཆོས་འབྱུང་གྲུ་གསུམ་ཉིས་བརྩེགས་གཡོན་སྐོར་དུ་བྲི་ཞིང་། དེའི་ནང་ཐམས་ཅད་ཙནྡན་དམར་པོའི་ཆུས་བྱུག ཙནྡན་དམར་པོའི་ཆུ་མེད་ན་ཆང་བདུད་རྩིར་བྱིན་གྱིས་བརླབས་པས་དེ་ལྟར་བྱ། དབུས་སུ་མེ་ཏོག་གི་ཚོམ་བུ་བཀོད་པ་རས་དམར་པོའི་གཞིའི་སྟེང་དུ་གཞག ཁ་བསྟན་ཕྱོགས་རྣལ་འབྱོར་པ་རང་ཉིད་ཀྱི་འདུག་ས་དང་ཁང་པ་དང་བསྟུན་པས་ཆོག མཐའ་གཅིག་ཏུ་ངེས་པ་མེད་དོ། །བཞི་པ་ནི། རང་གི་གཡོན་མཎྜལ་གྱི་གཡས་སུ་མེ་ཏོག བདུག་སྤོས། མར་མེ་གསུམ་མདུན་ནས་བརྩམས་ཏེ་ཕར་རིམ་བཞིན་བཤམ། རང་གི་གཡས་མཎྜལ་གྱི་གཡོན་དུ་དྲི་ཆབ། གཏོར་མ་དང་ལྷ་བཤོས་གསུམ་ཡང་མདུན་ནས་ཕར་རིམ་པ་བཞིན་བཤམ། མདུན་དུ་ཆང་ཕུད་དང་ཚོགས་ཀྱི་ཡོ་བྱད་ཅི་འབྱོར་པ་བཤམ། རྣལ་འབྱོར་པ་སོ་སོའི་མདུན་དུ་ནང་མཆོད། རྡོ་རྗེ་དྲིལ་བུ་རྣམས་ཀྱང་བཤམ་མོ། །གཉིས་པ་ནི། དུ་མ་ཡོད་ན་ལས་ཀྱི་སློབ་མས་མཎྜལ་ཕུལ་ཏེ་ལྷའི་རྣལ་འབྱོར་ལ་གནས་པར་གསོལ་བ་གདབ། དེ་ནས་ཚད་མེད་ནས་བཟུང་སྟེ་བསམ་གྱིས་མི་ཁྱབ་པའི་ངང་ལས་རྗེ་བཙུན་མ་ཕྱག་མཚན་མེད་པའི་སྐུར་ལངས་པའི་བར་སྒྲུབ་ཐབས་སུ་བསྟན་པ་བཞིན་བྱས་ནས། རང་གི་ལྟེ་བའི་བྃ་ཡིག་ལས་བྃ་ཡིག་གཅིག་ཆད་དེ་མཎྜལ་གྱི་དབུས་སུ་གནས་པ་ཡོངས་སུ་གྱུར་པ་ལས་རྗེ་བཙུན་མ་བསྐྱེད་དེ། ཞལ་ཕྱག་གསལ་གདབ་པ་དང་། གོ་ཆ་བགོ་བ་དང་། ཡེ་ཤེས་པ་གཞུག་པ་རྣམས་སྒྲུབ་ཐབས་བཞིན་བྱའོ། །དེ་ནས་ནང་མཆོད་སུམྦྷས་བསང་། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཡཾ་ལས་རླུང་། རཾ་ལས་མེའི་སྟེང་དུ་ཨ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ། འོག་གི་རླུང་གཡོས། མེ་སྦར་བས་རྫས་རྣམས་བསྐོལ་ནས་འོད་དུ་ཞུ་སྟེ་བདུད་རྩིའི་རྒྱ་མཚོར་གྱུར་པར་བསམས་ལ། གཡོན་པའི་མཐེབ་སྲིན་སྦྱར་བས་ཆོས་འབྱུང་གཡོན་སྐོར་དུ་བྲི་སྟེ། ཨོཾ་ཨཱཿཧཱུྃ་ཧོཿཞེས་བརྗོད་པས་བྱིན་གྱིས་བརླབ། ནང་མཆོད་དེ་ནས་མཆོད་རྫས་རྣམས་ལ་གཏོར་ཏེ། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག བདུག་སྤོས། མར་མེ། དྲི། ཞལ་ཟས། གཞན་ཡང་རོལ་མོ་ལ་སོགས་པའི་མཆོད་རྫས་རྣམས་དྭངས་ཤིང་ཐོགས་པ་མེད་པར་བསམས་ལ། ཨོཾ་བཛྲ་པུཥྤེ་ཨཱཿཧཱུྃ་ཞེས་སོགས་ཀྱིས་བྱིན་གྱིས་བརླབ། འབུལ་བའི་ཚེ་ཨོཾ་སརྦ་ཏ་ཐཱ་ག་ཏ་ཤྲཱི་བཛྲ་ཡོ་གི་ནཱི་ས་པ་རི་ཝཱ་ར་ཞེས་པ་ཀུན་ལ་སྦྱར་ལ་ཨོཾ་བཛྲ་པུཥྤེ་ཨཱཿཧཱུྃ་ནས་ཨོཾ་བཛྲ་ཤབྡ་ཨཱཿཧཱུྃ་གི་བར་གྱིས་མཆོད། དྷརྨཱ་ར་ཎི་ཏས་རོལ་མོ་ཡང་བྱའོ། །ཨོཾ་གསུམ་མའི་རྗེས་སུ་འབྲུ་གསུམ་བཏགས་པས་ནང་མཆོད་གཏོར། དེ་ནས་གཏོར་མ་ནང་མཆོད་ཆུ་ཆང་གིས་སྦྱང་ནས་སུམྦྷས་བསང་། སྭ་བྷཱ་ཝས་སྦྱངས། ལག་པ་གཡས་གཡོན་གཉིས་ཀ་བསྟན་པ་དང་། བྱ་ཁྱུང་གི་ཕྱག་རྒྱ་བཅས་ཏེ། ཨོཾ་ཨཱཿཧཱུྃ་ཧོཿཧ་ཧོ་ཧྲཱིཿས་བྱིན་གྱིས་བརླབ། ཕཻཾ་གྱི་སྒྲ་དང་འབར་བའི་ཕྱག་རྒྱས་དུར་ཁྲོད་བརྒྱད་པོ་སྤྱན་དྲངས་ནས་མདུན་བསྐྱེད་ཀྱི་མཐའ་སྐོར་དུ་འཁོད་པར་བསམས་ལ། མཁའ་འགྲོ་སྤྱི་གཏོར་གྱི་སྔགས་དང་། གསོལ་གདབ་ཀྱིས་དབུལ། འདི་ལ་གཏོར་མ་གཞན་མེད། དེ་ནས་མདུན་གྱི་ཚོགས་རྣམས་བདུད་རྩི་ལྟར་བྱིན་གྱིས་བརླབས་ནས་ཕུད་སྣོད་གཙང་མའི་ནང་དུ་བླུགས་ལ་མཎྜལ་གྱི་མདུན་དུ་བཞག་སྟེ། གང་གི་དྲིན་གྱིས་བདེ་ཆེན་ཉིད། །ཅེས་སོགས་ཚིགས་བཅད་གཅིག་གིས་བླ་མ་ལ་ཕྱག་འཚལ་བ་སྔོན་དུ་འགྲོ་བས། རྗེ་བཙུན་མའི་སྔགས་ལན་གསུམ་གྱིས་རྗེ་བཙུན་མ་ལ་དབུལ། ཡང་གཏོར་མ་ལས་ཆ་གཅིག་བཞག་ནས་མཁའ་འགྲོ་སྤྱི་གཏོར་གྱི་སྔགས་ལན་གསུམ་གྱིས་འཇིག་རྟེན་པ་ལ་དབུལ། དེ་ནས་སྙིང་གའི་བྃ་ཡིག་མཆོད་པའི་བསམ་པས་ནང་གི་སྦྱིན་སྲེག་གསལ་བཏབ་ནས་རྣལ་འབྱོར་པ་རྣམས་ཚིམ་པར་བཟའ། ལྷག་མ་བསྡུས་ཏེ་འབར་བའི་ཕྱག་རྒྱ་ཕལ་པ་དང་། ཕཻཾ་གྱི་སྒྲས་ཆང་ཕལ་པའི་ཁ་ཕྲུ་བཏབ་སྟེ་ཨ་ཀཱ་རོ་ལན་གསུམ་གྱིས་ཕྱི་རོལ་ན་གནས་པའི་འབྱུང་པོ་ལ་བྱིན་ནས། རྡོ་རྗེའི་གླུ་དང་བཀྲ་ཤིས་ཀྱི་ཚིགས་བཅད་ཀྱཻ་རྡོར་བཞིན་དང་། འཆི་ཚེ་མགོན་དང་དཔའ་བོ་མ་ཚོགས་ཀྱིས། །ཞེས་སོགས་དང་། ལྷ་མོ་ཚད་མ་དམ་ཚིག་ཚད་མ་དང་། །ཞེས་སོགས་ཀྱིས་སྨོན་ལམ་གདབ། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐངས་ནས། མདུན་བསྐྱེད་ཀྱི་ཡེ་ཤེས་པ་གཤེགས། དམ་ཚིག་པ་རང་ལ་བསྡུས་ནས། མཎྜལ་དང་མཆོད་རྫས་དམན་མ་རྣམས་བསྡུས་ཏེ་ལས་ཀྱི་རྗེས་མི་མངོན་པར་བྱའོ། །གཉིས་པ་སྤྲོས་པ་ལ་དགའ་བས་རྒྱས་པར་བྱ་བའི་ཚུལ་ནི། རྟེན་བཤམ་པའི་སྐབས་སུ་སྔར་གྱི་མཎྜལ་ཇི་ལྟ་བ་བཞིན་བཤམས་པའི་སྟེང་དུ་མཉྫི་ལ་སོགས་པ་བཞག་ནས། དེའི་སྟེང་དུ་མེ་ལོང་ལ་སིནྡྷཱུ་ར་དར་ཚགས་ལ་བཙགས་པ་བཏབ་པ་ལ་ཆོས་འབྱུང་གྲུ་གསུམ་ཉིས་བརྩེགས་བྲིས་པའི་དབུས་སུ་བྃ་ཡིག་དང་། དེའི་མཐར་ཤར་ནས་བརྩམས་ཏེ་ཡི་གེ་སུམ་ཅུ་རྩ་གཉིས་གཡོན་སྐོར་དུ་མགོ་ཕྱིར་བསྟན་པ་བྲི། དེའི་འབྲི་ཚུལ་ཡང་ཤར་ནས་བརྩམས་ཏེ་ཨོཾ་གསུམ། གཡོན་སྐོར་དུ་སརྦ་དང་། བུདྡྷ་དང་། ཊཱ་ཀི་དང་། ནཱི་ཡེ་དང་། བཛྲ་དང་། ཝརྞ་དང་། ནཱི་ཡེ་དང་། བཛྲ་དང་། བཻ་རོ་དང་། ཙ་ནཱི་ཡེ་རྣམས་རིམ་པ་བཞིན་གཡོན་ནས་བསྐོར་བ་ཡིན་གྱི། ནང་སེལ་གྱི་ཡི་གེ་རེ་རེ་བཞིན་གཡོན་ནས་བསྐོར་བ་ནི་མ་ཡིན་ནོ། །དེའང་ཤར་དྲང་པོར་ཨོཾ་དང་། བྱང་དྲང་པོར་ཌཱ་དང་། ནུབ་དྲང་པོར་ནཱི་དང་། ལྷོར་དྲང་པོར་ནཱི་བྱུང་ན་མ་འཁྲུལ་པ་ཡིན་ནོ། །དེ་ནས་ཧཱུྃ་གསུམ་དང་། ཕཊ་གསུམ་རིམ་པ་བཞིན་བྲིའོ། །འོག་ཏུ་བདུད་རྩི་དང་ཏིང་ལོ་རྣམས་ནི་དམ་ཚིག་གསོ་བའི་བདག་འཇུག་དང་། སློབ་མ་ལ་བྱིན་རླབས་ཀྱི་ཚེ་དགོས་པ་ཡིན་གྱི། འདིར་མི་དགོས་སོ། །མཆོད་རྫས་ཀྱི་སྐབས་སུ་མཎྜལ་གྱི་ཤར་ལྷོར་གནས་སྲུང་བའི་མེ་ཏོག ཤར་དྲང་པོར་མཆོད་ཡོན་ནས་ཆུ་གཉིས་སྔོན་དུ་འགྲོ་བའི་ཉེར་སྤྱོད་གཡོན་སྐོར་དུ་བཤམ། དེའི་མདུན་གྱི་ཤར་ཕྱོགས་སུ་འདས་པའི་གཏོར་མ་དང་། ཆོས་སྐྱོང་གི་གཏོར་མ་དང་། འཇིག་རྟེན་པའི་གཏོར་མ་གསུམ་ཡང་གཡོན་སྐོར་དུ་བཤམ། ཆང་ཕུད་ཚོགས་རྫས་སྔ་མ་བཞིན་བཤམ། དེ་ནས་མཎྜལ་ཞུ་འབུལ་ནས་བརྩམས་ཏེ་ཆོ་ག་གཞན་ཐམས་ཅད་སྔ་མ་དང་འདྲ་བ་ལ་ལྷ་བསྐྱེད་པའི་ཚེ་སིནྡྷཱུ་རའི་དཀྱིལ་འཁོར་ལ་ལྷ་བསྐྱེད། མཆོད་པ་བྱིན་རླབས་དང་འབུལ་བའི་ཚེ་ཆུ་གཉིས་བྱིན་གྱིས་བརླབ་པ་དང་འབུལ་བ་བསྣན། ཕྱི་མཆོད་ཀྱི་རྗེས་སུ་ནང་མཆོད་ཀྱི་དབུས་ནས་མཐེབ་སྲིན་གྱིས་རླངས་ནས་ཐོག་མར་རྩ་བའི་བླ་མའི་མཚན་ལ་འབྲུ་གསུམ་བཏགས་པ་དང་། དེ་ནས། རྡོ་རྗེ་འཆང་། རྡོ་རྗེ་རྣལ་འབྱོར་མ། ནཱ་རོ་པ། ཕམ་མཐིང་པ་སྐུ་མཆེད། ཀློག་སྐྱ་ཤེས་རབ་བརྩེགས། མལ་གྱོ་ལོ་ཙཱ་བ། ས་སྐྱ་པ་ཆེན་པོ། སློབ་དཔོན་རིན་པོ་ཆེ་བསོད་ནམས་རྩེ་མོ། རྗེ་བཙུན་རིན་པོ་ཆེ་གྲགས་པ་རྒྱལ་མཚན། ཆོས་རྗེ་ས་སྐྱ་པཎྜི་ཏ། འགྲོ་བའི་མགོན་པོ་ཆོས་རྒྱལ་འཕགས་པ། ཞང་དཀོན་མཆོག་དཔལ། ན་བཟའ་བྲག་ཕུག་པ། བླ་མ་དམ་པ་བསོད་ནམས་རྒྱལ་མཚན། དཔལ་ལྡན་ཚུལ་ཁྲིམས་པ། ཆོས་རྗེ་ཡེ་ཤེས་རྒྱལ་མཚན་པ། རྗེ་བཙུན་ཀུན་དགའ་བཟང་པོ། མུས་ཆེན་དཀོན་མཆོག་རྒྱལ་མཚན་རྣམས་ཀྱི་ཞལ་དུ་ཨོཾ་ཨཱཿཧཱུྃ། དེ་ནས་རྩ་སྔགས་ཀྱི་རྗེས་སུ་འབྲུ་གསུམ་བཏགས་པས་རྗེ་བཙུན་མ་ལ་དབུལ། དེ་ནས་ཡི་དམ་གཞན་ལ་འབུལ་བ་སོགས་མ་རྒྱུད་སྤྱི་དང་མཐུན་པའི་ནང་མཆོད་རྒྱས་པར་དབུལ་ལོ། །དེ་ནས། དཔལ་ལྡན་རྡོ་རྗེ་མཁའ་འགྲོ་མ། སོགས་ཤླཽ་ཀ་གཉིས་ཀྱིས་བསྟོད་ནས་འདོད་པའི་དོན་ལ་གསོལ་བ་གདབ། གཏོར་མ་བྱིན་རླབས་སྔ་མ་བཞིན་བྱས་ནས་དང་པོ་རྗེ་བཙུན་མའི་སྔགས་ལན་གསུམ་དང་། ཨ་ཀཱ་རོ་ལན་གསུམ་གྱིས་རྗེ་བཙུན་མ་ལ་དབུལ། ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་མཆོད། ནང་མཆོད་སྔགས་ཀྱི་རྗེས་སུ་འབྲུ་གསུམ་གྱིས་དབུལ། བསྟོད་པ་སྔར་བཞིན་ནོ། །གཉིས་པ་རང་གི་ཆོས་སྐྱོང་གང་ཡིན་ལ་དབུལ། གསུམ་པ་མཁའ་འགྲོ་སྤྱི་གཏོར་གྱིས་འཇིག་རྟེན་པ་ལ་དབུལ། དེ་ནས་གུར་ནས་འབྱུང་བའི་རྒྱུན་བཤགས་ལན་གསུམ་དང་། རིགས་ལྔའི་སྡོམ་གཟུང་ལན་གསུམ་དང་། དམ་ཚིག་ཉི་ཤུ་རྩ་གཉིས་འཛིན་པ་ལན་གསུམ་བྱས་ནས། ཚོགས་བྱིན་གྱིས་བརླབ་པ་མན་ཆད་སྔ་མ་བཞིན་དུ་སྤྱད་པར་བྱའོ། །ཚེས་བཅུ་ལ་སོགས་པའི་ཚོགས་ཀྱི་མཆོད་པ་བསྟན་ཟིན་ཏོ།། །།སྔགས་ཀྱི་ནུས་པ་དབྱུང་བའི་ཕྱིར་སྦྱིན་སྲེག་བྱ་བར་འདོད་པས། རྒྱས་པར་བྱ་བའི་ཚུལ་དང་། བསྡུས་ཏེ་བྱ་བའི་ཚུལ་གཉིས་ལས། དང་པོ་ཞི་བའི་ཐབ་ཁུང་སྤྱི་དང་མཐུན་པར་ཐིག་གདབ་པའི་ནང་དུ་ཆོས་འབྱུང་གྲུ་གསུམ་ཉིས་བརྩེགས་ཀྱི་ཐིག་གདབ། ཆོས་འབྱུང་གི་རི་མོ་རྡུལ་ཚོན་དཀར་པོས་གཅད། ནང་ཐམས་ཅད་རྡུལ་ཚོན་དམར་པོས་བཀང་སྟེ་མདུན་རྒྱབ་ཀྱི་གྲྭ་སྤངས་པའི་གྲྭ་བཞིར་དགའ་བ་འཁྱིལ་པ་གཡོན་སྐོར་དུ་བྲི། དབུས་སུ་ཉི་མའི་གདན་ལ་ཚོམ་བུ་དམར་པོ་དགོད། རང་གི་གཡོན་ཐབ་ཁུང་གི་གཡས་སུ་ཆུ་གཉིས་སྔོན་དུ་འགྲོ་བའི་མཆོད་པ་ལྔ་དང་གཏོར་མ་གཉིས་བཤམ། རང་གི་གཡས་ཐབ་ཀྱི་གཡོན་དུ་ཡམ་ཤིང་དང་། མར་ཁུ་དང་། ཏིལ་ནག་པོ་དང་། ཞོ་དང་མར་ཙམ་པ་ལ་སྦྱར་བའི་ཟས་མཆོད་དང་། ཀ་ར་བུ་རམ་སྦྲང་རྩི་གསུམ་གྱི་རིལ་བུ་དང་། དཱུརྦ་དང་། ཀུ་ཤ་རྣམས་བཤམ་མོ། །རང་ཉིད་ཁ་ཤར་དུ་བལྟས་ནས་འདུག་པའི་མདུན་དུ་ནང་མཆོད། རྡོ་རྗེ་དྲིལ་བུ། དགང་གཟར་བླུགས་དང་བཅས་པ་བཞག་ལ། བདག་བསྐྱེད་བསྒོམ་བཟླས་བསམ་གྱིས་མི་ཁྱབ་པའི་ངང་ལས་རྗེ་བཙུན་མའི་སྐུར་ལངས་པའི་བར་སྒྲུབ་ཐབས་བཞིན་བྱའོ། །དེ་ནས་ཐབ་དང་། མཆོད་རྫས། བསྲེག་རྫས་རྣམས་ལ་ནང་མཆོད་ནས་གཏོར་ཞིང་སུམྦྷས་བསང་། སྭ་བྷ་ཝས་སྟོང་པར་སྦྱངས་པའི་ངང་ལས་ཧཱུྃ་ལས་རིན་པོ་ཆེ་ལས་གྲུབ་པའི་ཐབ་ཁུང་ཡངས་ཤིང་རྒྱ་ཆེ་བའི་ནང་དུ་བུད་ཤིང་བརྩིགས་པ་དང་བཅས་པ་དྭངས་ཤིང་ཐོགས་པ་མེད་པར་གྱུར། ཧཱུྃ་ཞེས་ཡང་ཡང་བརྗོད་པས་བྱིན་གྱིས་བརླབ། མཆོད་རྫས་དང་བསྲེག་རྫས་རྣམས་ཀྱང་ཨོཾ་ཨཱཿཧཱུྃ་ལས་བྱུང་བའི་མཆོད་རྫས་དང་། བསྲེག་རྫས་དྭངས་ཤིང་ཐོགས་པ་མེད་པར་བསམས་ལ། ཨོཾ་ཨཱཿཧཱུྃ་ཞེས་པ་དང་། སོ་སོའི་སྔགས་ཀྱིས་བྱིན་གྱིས་བརླབ་བོ། །དེ་ནས་ཨོཾ་བཛྲ་ཛྭ་ལ་རཾ་ཞེས་པས་མེ་སྦར་ནས། དེའི་དབུས་སུ་པདྨ་དཀར་པོ་དང་ཟླ་བའི་སྟེང་དུ་རྃ་ལས་མེ་ལྷ་ར་སྐྱེས་ལ་ཞོན་པ་སྐུ་མདོག་དམར་པོ། ཞལ་གཅིག་ཕྱག་བཞི་པ། ཕྱག་གཡས་ཀྱི་དང་པོ་མཆོག་སྦྱིན། གཉིས་པས་བགྲང་ཕྲེང་། གཡོན་གྱི་དང་པོས་དབྱུ་གུ་རྩེ་གསུམ་པ། གཉིས་པས་གྷུནྡྷེ་འཛིན་པ། རལ་པའི་ཐོར་ཚུགས་དང་ལྡན་ཞིང་། ཚངས་པའི་སྐུད་པ་དང་། ཀྲྀཥྞ་ས་རིའི་པགས་པས་སྟོད་གཡོགས་དང་། དར་དམར་པོའི་ཤམ་ཐབས་ཅན་དུ་བསྐྱེད་པའི་གནས་གསུམ་དུ་ཡི་གེ་གསུམ་བཀོད་ནས། རང་གི་སྙིང་གའི་ས་བོན་ལས་འོད་འཕྲོས། ཤར་ལྷོ་ནས་མེ་ལྷ་སྤྱན་དྲངས་པར་བསམ་ཞིང་། ཨོཾ་ཨགྣ་ཡེ་ཨེ་ཧྱེ་ཧི་ཞེས་བརྗོད་ནས། ཛཿཧཱུྃ་བཾ་ཧོཿས་གཉིས་སུ་མེད་པར་བསྟིམ། ཡང་འོད་འཕྲོས་པས་དབང་གི་ལྷ་རིགས་ལྔ་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཨཱཿཧཱུྃཿཞེས་གསུང་ཞིང་དབང་བསྐུར། སྐུ་གང་དྲི་མ་དག ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན་པར་བསམ་མོ། །དེའི་ལྗགས་ལས་འོད་ཟེར་བྱུང་བས་བྱོན་ཟན་གསོལ་བར་བསམ་ཞིང་། ཨོཾ་ཨགྣེ་ཡེ་སྭཱ་ཧཱ། ཞེས་བརྗོད་ཅིང་བླུགས་གཟར་བདུན་གྱིས་དགང་གཟར་དགང་བ་ལན་གསུམ་གྱིས་བྱོན་ཟན་དབུལ། ཨོཾ་ཨགྣེ་ཡེ་ཞེས་པ་ཀུན་ལ་སྦྱར་བའི་ཨརྒྷཾ་ནས་ཤབྡའི་བར་གྱིས་མཆོད། ཨོཾ་ཨགྣེ་ཡེ་ཨོཾ་ཨཱཿཧཱུྃ་ཞེས་པས་ནང་མཆོད་དབུལ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོར་ཌཱ་ཀིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཇིགས་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། དེ་ནས་ཨོཾ་ཨགྣེ་ཡེ་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་པའི་སྔགས་འདི་འབའ་ཞིག་གིས་བསྲེག་རྫས་རྣམས་ལྔ་ལྔའམ་བདུན་བདུན་ཙམ་དབུལ། སླར་ཡང་སྔར་ལྟར་མཆོད་བསྟོད་བྱས་ནས། ཨོཾ་ཨགྣེ་ཛྭ་ལ་རཾ་ཞེས་པས་མེ་ལྷ་འབར་བའི་རྣམ་པར་གྱུར་པར་བསམ་མོ། །དེས་ནས་འབར་བའི་དབུས་སུ་རྡོ་རྗེ་རྣལ་འབྱོར་མ་བདག་བསྐྱེད་ཇི་ལྟ་བ་བཞིན་ཡེ་ཤེས་པ་གཞུག་པའི་བར་བསྐྱེད་ནས། ཨོཾ་བཛྲ་ཡོ་གི་ནཱི་ཞེས་པ་སྦྱར་བའི་བྱོན་ཟན་དང་ཕྱི་མཆོད་ནང་མཆོད་རྣམས་སྔ་མ་བཞིན་བྱ། དཔལ་ལྡན་རྡོ་རྗེ་མཁའ་འགྲོ་མ། །སོགས་ཤླཽ་ཀ་གཉིས་ཀྱིས་བསྟོད། དེ་ནས་རྫས་རྣམས་ཨོཾ་གསུམ་མའི་སྭཱ་ཧཱའི་གོང་དུ་སརྦ་པཱ་པཾ་ཤཱནྟིཾ་ཀུ་རུ་ཡེ་ཞེས་པ་ལ་སྭཱ་ཧཱ་སྦྱར་བའི་སྔགས་འདི་འབའ་ཞིག་གིས་བསྲེག་རྫས་རྣམས་བརྒྱ་རྩ་བརྒྱད་ལ་སོགས་པ་ཅི་ཙམ་ནུས་པས་དབུལ། སླར་ཡང་མཆོད་བསྟོད་སྔ་མ་བཞིན་བྱས་ནས་ཚོགས་མཆོད་ཀྱི་སྐབས་སུ་བསྟན་པ་ལྟར་གཏོར་མའང་དབུལ། རྗེ་བཙུན་རྡོ་རྗེ་རྣལ་འབྱོར་མས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཞེས་སོགས་འདོད་པའི་དོན་ལ་གསོལ་བ་གདབ། ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་ཉམས་པ་དང་། །སོགས་ཀྱིས་ནོངས་པ་བཟོད་པར་གསོལ་ནས། ཨོཾ་ཨཱཿཧཱུྃ་བཛྲ་མུཿཞེས་པས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་བར་བྱའོ། །སླར་ཡང་མེའི་ནང་དུ་ཨོཾ་བཛྲ་ཛྭ་ལ་རཾ་ཞེས་པས། མེ་ལྷ་གསལ་བཏབ་ནས་སྲེག་རྫས་ལྷག་མ་རྣམས་ལན་གསུམ་ཕུལ་ནས་སྔར་ལྟར་མཆོད་བསྟོད་བྱ་སྟེ། གཏོར་མ་མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་ལ་ཨོཾ་ཨགྣ་ཡེ་ན་མཿསརྦ་ཏ་ཐཱ་ག་ཏེ་བྷྱོ་ཞེས་པ་ལན་གསུམ་གྱིས་དབུལ། ཨོཾ་ཨགྣེ་ཡེ་བཛྲ་མུཿཞེས་པས་ཡེ་ཤེས་པ་གཤེགས། དམ་ཚིག་པ་བདག་ལ་བསྡུའོ། །གཉིས་པ་བསྡུས་ཏེ་བྱ་བའི་ཚུལ་ནི། ཆོ་ག་གཞན་རྣམས་སྔ་མ་དང་འདྲ་བ་ལས་ཐབ་འབྲི་བའི་ཚེ་རེ་ཁཱ་ཟླུམ་པོ་ཉིས་སྐོར་གྱི་ནང་དུ་ཆོས་འབྱུང་ཉིས་བརྩེགས་སྔ་མ་བཞིན་བྲི། གཞན་རྒྱས་པ་མི་དགོས། རང་གི་གཡས་སུ་བསྲེག་རྫས་མར་ཁུ་དང་ཏིལ་འབའ་ཞིག་བཤམ། གཡོན་དུ་མཆོད་པ་ལྔ་དང་། གཏོར་མ་གཅིག་བཤམ། བདག་བསྐྱེད་དང་། ཐབ་དང་། རྫས་རྣམས་བྱིན་གྱིས་བརླབ་པ་སྔ་མ་བཞིན་བྱས་ནས་མེ་སྦར་ཏེ། འཇིག་རྟེན་པའི་མེ་ལྷ་མི་བསྐྱེད་པར་རྗེ་བཙུན་མ་བསྐྱེད་དེ། ཕྱི་མཆོད་ཉེར་སྤྱོད་ལྔ་དང་། ནང་མཆོད་དང་། བསྟོད་པ་རྣམས་བྱའོ། །ཕྱི་མཆོད་ཀྱི་གོང་དུ་བྱོན་ཟན་སྔ་མ་ལྟར་ཕུལ་ནའང་རུང་ཞིང་། མ་ཕུལ་ནའང་ཉེས་པ་མེད། དེ་ནས་བསྲེག་རྫས་ཏིལ་འབའ་ཞིག་སྔར་གྱི་སྔགས་ཀྱིས་ཅི་ནུས་དབུལ། སྐབས་སྐབས་སུ་མར་གྱིས་མེ་གསོ། མཐར་མཆོད་བསྟོད་སྔ་མ་བཞིན་བྱས་ནས་འདོད་པའི་དོན་ལ་གསོལ་བ་གདབ། གཏོར་མ་མཁའ་འགྲོ་སྤྱི་གཏོར་གྱིས་དབུལ། མེ་ལྷའི་རྗེ་བཙུན་མའི་ཞབས་ཀྱི་དྲུང་ནས་བླངས་པར་དམིགས་ཏེ། ལག་པ་གཡོན་པའི་སྲིན་ལག་གིས་སྦྱིན་སྲེག་གི་ཐལ་བ་ཞིག་བླངས་ལ་རང་གི་མཛོད་སྤུར་བསྐུ། ཡང་ན་དཔྲལ་བ། མགྲིན་པ། སྙིང་ག་གསུམ་དུ་བསྐུའོ། །འདི་ནི་སྲུང་བའི་མཆོག་སྟེ། སྔར་གྱི་རྒྱས་པའི་སྐབས་སུའང་བྱའོ། །དེ་ནས་མདུན་བསྐྱེད་ཀྱི་ཡེ་ཤེས་པ་གཤེགས། དམ་ཚིག་པ་རང་ལ་བསྡུའོ། །བཞི་པ་རྣལ་འབྱོར་པ་གང་ཞིག་མར་མེའི་སྦྱིན་སྲེག་བྱེད་པར་འདོད་ན། མར་མེའི་ཀོང་བུ་ཡངས་པ་ལ་མར་དཀར་གྱི་ཁུ་བ་དང་། རས་དམར་པོའི་སྡོང་བུ་སྦོམ་པོ་བཙུགས་ལ་མེ་སྦར། འབྱོར་ན་མཆོད་པ་ལྔ་དང་། གཏོར་མའང་བཤམ། རང་ཉིད་ཐུན་མཚམས་ཀྱི་རྗེ་བཙུན་མ་དྲན་པ་ཙམ་གྱིས་གསལ་བཏབ་སྟེ། མར་མེ་བདག་བསྐྱེད་ཀྱི་སྐབས་ལྟར་རྗེ་བཙུན་མར་བསྐྱེད། མདུན་དུ་ཏིལ་བཞག་ལ། བདག་གིས་ཚེ་ཐོག་མ་མེད་པ་ནས་བསགས་པའི་ལས་ཀྱི་སྒྲིབ་པ་ཐམས་ཅད་སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་ནས་མདུན་གྱི་ཏིལ་ལ་ཐིམ་པར་བསམས་ལ། ངག་ཏུ་ཨོཾ་བཛྲ་ཌཱ་ཀ ཁ་ཁ། ཁཱ་ཧི་ཁཱ་ཧི། སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་པས་ཏིལ་བསྲེག མཆོད་པ་ལྔ་དང་གཏོར་མ་ཡོད་ན་ཨོཾ་བཛྲ་ཡོ་གི་ནཱི་བཛྲ་པུཥྤེ་ཨཱཿཧཱུྃ་ཞེས་སོགས་ཀྱིས་དབུལ། གཏོར་མ་མཁའ་འགྲོ་སྤྱི་གཏོར་གྱི་ཆོ་གས་དབུལ་ལོ། །འདི་ནི་སྡིག་པ་ཐམས་ཅད་འདག་པ་དང་། རྗེ་བཙུན་མའི་བྱིན་རླབས་འཇུག་པའི་ཐབས་ཡིན་པར་གསུངས་སོ། །གདམས་པ་རྒྱ་མཚོའི་གཏིང་མཐའ་མི་དཔོག་ཀྱང་། །དཀོན་མཆོག་རྒྱལ་མཚན་གསུང་གི་མན་ངག་ལས། །ཅུང་ཟད་རྙེད་འདི་ཀུན་དགའ་བདེ་ལེགས་ཀྱིས། །བསྐུལ་བའི་ངོར་ནི་བསོད་ནམས་སེང་གེས་སྦྱར། །འདིར་འབད་དགེ་ཚོགས་གང་ཞིག་ཐོབ་པ་དེས། །བདག་དང་མཁའ་མཉམ་འགྲོ་བ་མ་ལུས་པ། །རྒྱལ་བའི་ཡུམ་མཆོག་དེ་ཡིས་རྗེས་བཟུང་ནས། །མཁའ་ལ་སྤྱོད་པའི་གནས་སུ་སྐྱེ་བར་ཤོག །དགེའོ།། །།

དཔལ་འཁོར་ལོ་བདེ་མཆོག་ལཱུ་ཧི་པའི་རྣམ་བཤད་དཔག་བསམ་ལྗོན་པ།

དཔལ་འཁོར་ལོ་བདེ་མཆོག་ལཱུ་ཧི་པའི་རྣམ་བཤད་དཔག་བསམ་ལྗོན་པ་བཞུགས་སོ།། དཔལ་འཁོར་ལོ་བདེ་མཆོག་ལཱུ་ཧི་པའི་ལུགས་ཀྱི་བསྐྱེད་པའི་རིམ་པའི་རྣམ་པར་བཤད་པ་འདོད་དགུ་སྦྱིན་པའི་དཔག་བསམ་ལྗོན་པ་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །སྨྲ་བ་ཀུན་གྱི་གཙུག་གི་རྒྱན་གྱུར་ཅིང་། །འགྲོ་ལ་དགའ་བདེའི་དཔལ་འབྱོར་འབྱུང་བའི་གཞི། །དགོས་འདོད་བཟང་པོ་འབད་མེད་སྩོལ་མཛད་པ། །འདྲེན་མཆོག་དབང་གི་རྒྱལ་པོ་ལ་ཕྱག་འཚལ། །རྒྱུད་སྡེ་དྲུག་པའི་རྩ་བཤད་གཞུང་འགྲེལ་བཅས། །ཕ་ན་ཕིམ་གུའི་མན་ངག་ལས་བྱུང་བའི། །སྨིན་ལམ་བཟང་པོ་གཏམས་མཛད་དྲིན་ཅན་རྗེ། །སེམས་དཔའ་ཆེན་པོར་གྲགས་ལ་མགོས་ཕྱག་འཚལ། །ཆུ་ཀླུང་སྟོང་གི་མདངས་འོད་ཆགས་པའི་སྐུ་མཆོག་ཡོན་ཏན་རིན་ཆེན་བྱེ་བས་གཏམས། །ཐུགས་རྗེའི་རླུང་གིས་བསྐུལ་བས་ཟེགས་མ་འཐོར་བའི་རུས་ཕྲེང་དཀར་པོའི་ཆལ་ཆིལ་ཅན། །རྦ་རླབས་དུ་མ་ཕྱོགས་སུ་འཁྲིགས་པའི་ཕྱག་དང་ཞབས་ཀྱིས་རྣམ་འགྱུར་ཅི་ཡང་སྟོན། །དྲེགས་ལྡན་ཕོ་མོའི་དབང་ཆེན་ལས་བྱུང་དངོས་གྲུབ་རྒྱ་མཚོ་ཧེ་རུ་ཀས་སྐྱོངས་ཤིག །བདུད་དཔུང་བྱེ་བས་ལྟ་བར་མི་བཟོད་པའི། །ཡེ་ཤེས་མེ་དཔུང་མཆོག་གི་ས་བརྙེས་ནས། །ས་བདག་དཔུང་བཅས་རེངས་པའི་ལྟ་སྟངས་ཀྱིས། །རྗེས་སུ་འཛིན་མཛད་གྲུབ་པའི་དབང་ཕྱུག་རྒྱལ། །གང་ཞིག་རྡོ་རྗེ་རྣལ་འབྱོར་མས་བཟུང་བས། །གསང་ཆེན་བསྟན་པ་རྒྱས་མཛད་ནཱ་རོ་པ། །སློབ་བཤད་འཛིན་པའི་སློབ་མའི་ཚོགས་བཅས་ལ། །སྙིང་པོ་མཆོག་གི་བར་དུ་བདག་སྐྱབས་མཆི། །འཛམ་བུ་ལྗོན་པའི་ངོས་ལ་འཕྱངས་བ་ཡི། །འབྲས་བུའི་མཆོག་ལྟར་དམ་ཆོས་མངར་བའི་རོས། །སྙིགས་དུས་སྐལ་ལྡན་འགྲོ་རྣམས་ཚིམ་མཛད་པ། །ས་སྐྱའི་རྗེ་བཙུན་མཆོག་རྣམས་སྤྱི་བོས་མཆོད། །རྒྱུད་སྡེའི་རྩ་བ་རབ་བརྟན་དཔལ་ལྡན་མངོན་པར་རྟོགས་པའི་རིན་ཆེན་ལྗོན། །ཡང་དག་བརྒྱུད་པའི་མན་ངག་པད་དཀར་ཕྲེང་བས་ལེགས་མཛེས་གཞུང་འགྲེལ་གྱི། །སྣ་ཚོགས་ཡལ་ག་ལམ་བཟང་འབྲས་བུས་སྤུད་པའི་རྣམ་རོལ་དུ་མ་ཡི། །ཐུན་མོང་མཆོག་གི་འདོད་དགུ་སྦྱིན་པའི་དཔག་བསམ་ལྗོན་པ་བྲི་བར་བྱ། ༈ །འདིར་དཔྱོད་པ་དང་ལྡན་པའི་སྐྱེས་བུ་གང་དག་བྱ་བ་གང་ཞིག་ལ་འཇུག་པ་ན། ཐོག་མར་བྱ་བའི་འབྲས་བུ་ངེས་པར་བྱས་ནས་འཇུག་པ་ཡིན་པའི་ཕྱིར་ན་འདིར་ཡང་བྱ་བའི་འབྲས་བུ་གང་ཞེ་ན། ཨ་བྷི་དྷ་ན་ལས། རྡོ་རྗེའི་ས་ནི་བཅུ་གསུམ་པ། །ཞེས་གསུངས་པ་ལྟར། ས་བཅུ་གསུམ་པས་བསྡུས་པའི་ཕྱག་ཆེན་མཆོག་གི་དངོས་གྲུབ་ནི་མཐར་ཐུག་གི་འབྲས་བུ་ཡིན་ཞིང་། འདི་སྒྲུབ་པར་བྱེད་པའི་ཐབས། རྣལ་འབྱོར་ཆེན་པོའི་རྒྱུད་སྡེ་རྣམས་ལས། དབང་བཞི་དང་རིམ་པ་གཉིས་སུ་གསུངས་པར་འདྲ་ཡང་ནང་སེལ་གྱི་དབྱེ་བ། གདུལ་བྱ་སོ་སོའི་བློ་ལ་ལྟོས་ནས། རྒྱུད་སྡེ་སོ་སོའི་དགོངས་པ་མི་འདྲ་བ་བསམ་གྱིས་མི་ཁྱབ་པ་ཞིག་འབྱུང་བ་ལས། འདིར་བདེ་མཆོག་གསང་མཐའི་ལུགས་ཀྱི་རིམ་པ་གཉིས་ཡན་ལག་དང་བཅས་པ་སྟོན་པ། རྣལ་འབྱོར་དབང་ཕྱུག་ལཱུ་ཧི་པས་མཛད་པའི་དཔལ་མངོན་པར་རྟོགས་པ་ཞེས་བྱ་བ་ནི་གང་བཤད་པར་བྱ་བའི་ཆོས་སོ། །འདི་ལ་བཤད་པའི་སྔོན་དུ་འགྲོ་བ་རྣམ་པ་དྲུག་དགོས་པ་ནི་འཁོར་ལོ་བདེ་མཆོག་གི་ཆོས་འབྱུང་དུ་རྒྱས་པར་བཤད་ཟིན་པས་དེར་བལྟ་བར་བྱ་ཞིང་། འདིར་ཉེ་བར་མཁོ་བའི་སྔོན་འགྲོ་དང་བཅས་པ་ནི། དོན་ཚན་བཞིས་རྟོགས་པར་བྱ་སྟེ། མཛད་པ་པོ་སློབ་དཔོན་གྱི་ཆེ་བ་བརྒྱུད་པ་དང་བཅས་པ། དེས་མངོན་རྟོགས་ཇི་ལྟར་མཛད་པའི་ཚུལ་ཞར་བྱུང་དང་བཅས་པ། བརྩམ་བྱའི་བསྟན་བཅོས་འཕྲོས་དོན་དང་བཅས་པ། བསྟན་བཅོས་ཀྱི་བརྗོད་བྱ་མངོན་རྟོགས་ཉིད་བཤད་པའོ། །དང་པོ་ནི། ཡང་དག་པར་རྫོགས་པའི་སངས་རྒྱས་ཀྱིས། དྲང་དོན་དུ་དབང་བསྐུར་ཞིང་། གསང་སྔགས་ཀྱི་ཐེག་པ་རྣམས་ཇི་ལྟ་བ་བཞིན་དུ་རྗེས་སུ་གཏད་པ་ཕྱག་ན་རྡོ་རྗེ་ཡིན་ལ། དེས་དབང་བསྐུར་ཞིང་རྒྱུད་བྱིན་གྱིས་བརླབ་ཏེ། ཡང་དག་པའི་གདམས་ངག་གནང་བ་ནི་སློབ་དཔོན་བྲམ་ཟེ་ཆེན་པོ་ས་ར་ཧ་པ་ཞེས་བྱ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ། འཛམ་བུའི་གླིང་དུ་ལོ་བརྒྱ་ཕྲག་བཅོ་བརྒྱད་དུ་བཞུགས་པར་གྲགས་པ་དེ་ཉིད་ཡིན་ནོ། །དེས་དེ་བཞིན་དུ་བྱིན་གྱིས་བརླབས་ཤིང་གདམས་པ་ནི། སློབ་དཔོན་འཕགས་པ་ཀླུ་སྒྲུབ་ཅེས་བྱ་བ། ས་དང་པོ་ཆོས་ཉིད་བདེན་པ་མཐོང་བ། མདོ་སྡེ་དུ་མ་ནས་ལུང་བསྟན་པ། སྟོང་ཉིད་སྨྲ་བའི་སེང་གེར་གྲགས་པ་དེ་ཉིད་ཡིན་ལ། དེས་སློབ་དཔོན་བྲམ་ཟེ་ས་ར་ཧ་པ་ཆུང་ངུ་ཞེས་བྱ་བ་ལུས་དེ་ཉིད་ཀྱིས་མཆོག་གི་དངོས་གྲུབ་ཐོབ་པར་གྲགས་པ་དེ་ལ་གདམས་ཏེ། དེ་གྲོང་དང་གྲོང་ཁྱེར་རྣམས་སུ་བསོད་སྙོམས་ལ་གཤེགས་པའི་དུས་སུ། མཐར་གྱིས་འཛམ་བུའི་གླིང་ན་རྒྱལ་པོ་ཆེ་བར་གྲགས་པ། ཤྲཱི་དྷརྨཱ་ཕཱ་ལ་ཞེས་བྱ་བའི་གྲོང་ཁྱེར་དུ་བསོད་སྙོམས་ལ་གཤེགས་པའི་ཚེ། དེ་ན་རྒྱལ་པོའི་ཡི་གེ་པ་ཞེས་བྱ་བ། རྒྱལ་པོ་གཞན་ལ་ཕར་ཕྲིན་བསྐུར་བ། ཡི་གེ་རེ་རེའི་ནང་དུ་ཚིགས་སུ་བཅད་པ་རེ་རེའི་དོན་འདུས་པ་དང་། གཉིས་གཉིས་ཀྱི་དོན་འདུས་པ་བསྐུར་བ་ལ་སོགས་པ་དང་། སླར་ཚུར་ཡང་དེ་ལྟ་བུ་བསྐུར་བ་རྣམས་ཀློག་པའི་མི་གཅིག་དེ་ལྟ་བུ་ལ་ཡིད་རྩེ་གཅིག་ཏུ་བྱེད་པ་གཅིག་གཟིགས་ཏེ། དེ་ཡང་དག་པའི་གདམས་ངག་གི་སྣོད་དུ་རུང་བར་གཟིགས་ནས། སློབ་དཔོན་གྱིས་ཁྱོད་ཡང་དག་པའི་གདམས་ངག་འདོད་དམ་གསུངས་པས། ཁོ་བོ་ཅི་སྟེ་མི་འདོད་དེ་འདོད་ཅེས་བརྗོད་དོ། །འོ་ན་ཁྱོད་ལ་དབང་བསྐུར་དགོས་པས་དེའི་ཡོ་བྱད་ཚོལ་ཅིག་ཅེས་གསུངས་ཏེ། བཙལ་ནས་དབང་བསྐུར་ཏེ་ཡང་དག་པའི་གདམས་ངག་བྱིན་ཏེ། གང་ལ་ཞེན་པ་བྱུང་ན་དེ་ཡང་ཐོང་། །རྟོག་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་ཞིག་སུས་ཀྱང་བསྟན་དུ་མེད། །གསུངས་ནས་མི་སྣང་བར་གྱུར་ཏོ། །དེ་ནས་དེས་བསམས་པ། བདག་གིས་རྒྱལ་པོའི་བྱ་བ་བྱས་ན། སྒྲུབ་པ་སྙིང་པོའི་བྱ་བ་མི་འོང་། མ་བྱས་ན་བདག་གི་འཚོ་བ་གཞན་ཤིང་ཐོག་ལ་སོགས་པས་བྱས་ན་དབྱར་དང་། སྟོན་འབྱུང་ཡང་། དགུན་དང་དཔྱིད་མི་འབྱུང་། སློབ་དཔོན་བཞིན་བསོད་སྙོམས་བྱས་ན། བདག་ལྟ་བུ་ལས་དང་པོ་པ་བྱིན་པ་ལ་རྗེས་སུ་ཆགས་པ་སྐྱེ་ལ། མ་བྱིན་པ་ལ་ཁོང་ཁྲོ་སྐྱེ་བས་ཇི་ལྟར་བྱ་བསམ་ཞིང་ཕྱིན་པས། མཐར་གྱིས་བྷ་ལེན་ཏྲ་ཞེས་བྱ་བ། གངྒཱའི་འགྲམ་ན་ཉ་པའི་གྲོང་ཁྱེར་ཡོད་པ་དེ་བས་ཉ་མང་པོ་བསད་པ། དེའི་རྒྱུ་ལྟོ་རྣམས་སྤུངས་པ་མཐོང་ནས། ཁོ་བོས་འདི་བཟློག་པའི་ནུས་པ་ནི་མེད་སྙམ་སྟེ། བཟའ་བར་ཚད་པས་མི་འཇུ་བར་བྱུང་ནས་ས་ར་ཧ་པའི་གདམས་པ། ཐ་མལ་པའི་གཏུམ་མོ་དང་། འོད་ཀྱི་གཏུམ་མོ་ཁ་སྦྱར་བ་བསྒོམས་ཏེ། མེའི་ནུས་པ་བསྐྱེད་ནས། ངས་ནི་མཚན་མ་དང་རྣམ་པར་རྟོག་པའང་འཇུ་ནུས་ན། འདི་ལྟ་བུ་ཅིའི་ཕྱིར་འཇུ་མི་ནུས་སྙམ་ནས། ཁྲོས་པའི་བསམས་པ་དང་བཅས་པས་ཟོས་པས་ཞུའོ། །དེ་ནས་ཡུལ་དེ་བཏང་སྟེ། ཡུལ་གཞན་ཞིག་ཏུ་ཕྱིན་ནས་འཚོ་བ་ཉའི་རྒྱུ་ལྟོ་ལ་བརྟེན་ཏེ། སྒྲུབ་པ་སྙིང་པོར་བྱས་པས། ཟག་པ་མེད་པའི་ཡེ་ཤེས་རྒྱུད་ལ་སྐྱེས་པས་ཡུལ་ཀུན་དུ། སྔར་གྱི་ཡི་གེ་པ་དེ་ལཱུ་ཧི་པ་ཞེས་བྱ་བའི་རྣལ་འབྱོར་པ་དངོས་གྲུབ་ཐོབ་བོ་ཞེས་གྲགས་ཏེ། རྒྱལ་པོས་ཀྱང་ཐོས་ཏེ། ཡུལ་ཁམས་ཐམས་ཅད་དུ་བཙལ་བས་ཀྱང་མ་རྙེད་དོ། །དེ་ནས་སློབ་དཔོན་གྱིས་སྔར་གྱི་རྒྱལ་པོ་དེ་འདུལ་བའི་དུས་ལ་བབ་པར་གཟིགས་ནས། དེ་ཆོས་ལ་གཟུད་པར་དགོངས་ནས། རྒྱལ་པོའི་གྲོང་དུ་གཤེགས་སོ། །དེའི་དུས་སུ་རྒྱལ་པོ་དེ་ལ་རྒྱལ་ཕྲན་ཞིག་ཕྱག་འབུལ་དུ་འོངས་པས་སྲང་ཐམས་ཅད་ཕྱག་དར་བྱས། དར་གྱི་ལྡ་ལྡིས་བརྒྱན། སྤོས་ཁང་དང་བཅས། གདུགས་དང་བླ་རེས་བརྒྱན་ཅིང་། སྐྱེད་མོས་ཚལ་དུ་རྒྱལ་པོའི་ཁྲི་བཤམས་པ་མཐོང་སྟེ། སློབ་དཔོན་གྱིས་རྒྱལ་པོའི་ཁྲིའི་སྟེང་དུ་གཟིམས་ཏེ་བཞུགས་སོ། །དེར་རྒྱལ་པོ་འོངས་པའི་དུས་སུ་སྔོན་ལ་བྲམ་ཟེ་མདུན་ན་འདོན་བྱ་བ་ཤིས་པ་བརྗོད་པའི་ཚིགས་སུ་བཅད་པ་བརྗོད་ཅིང་། ཀུ་ཤ་རྣ་ལྟག་ཏུ་གཟེར། རིལ་བ་སྤྱི་བླུགས་དང་ཚངས་སྐུད་དང་བཅས་པ་འོངས་ཏེ། སྲང་ལ་སོགས་པ་ན་མི་གཙང་བ་ལ་སོགས་པ་རྣམས་དག་པར་བྱེད་པ་དེ་སྔོན་ལ་འོངས་པས། མི་མདོག་སྔོ་བ་ཉི་ལྷགས་ཀྱིས་ཁྱེར་བ་སྐྲ་འཛིངས་པ་གོས་མེད་པ། ཉའི་རྒྱུ་མ་ཟ་བ་ཞིག རྒྱལ་པོའི་ཁྲི་ཁ་ན་འདུག་པ་མཐོང་ནས་སླར་ལོག་སྟེ་རྒྱལ་པོ་ལ་བསྙད་པས། དེ་ཐོན་ཅིག་ཟེར་ནས་བཏོན་པས་བྲམ་ཟེས་མ་ཐོན། མི་གཞན་མང་པོས་ཀྱང་གྲོགས་བྱས་ཏེ་བཏོན་པས་ཀྱང་རི་ཆེན་པོ་ལ་འཇུས་པ་དང་འདྲ་བར་འདུག་སྟེ་མ་ཐོན། སླར་བྲམ་ཟེ་ལ་སྡང་མིག་བལྟ་ཞིང་གླུ་བླངས་པ། འཇིག་རྟེན་གསུམ་འདི་རྒྱ་ཁྱོན་ཇི་ཙམ་ཡིན། །ཞི་བ་མ་ལུས་པ་འདི་ཇི་ཙམ་ཡིན། །རྒྱལ་པོ་དེ་ཉིད་གཅིག་གཅིག་མི་བདག་ཡིན། །མི་བདག་གཞན་ནི་དེ་ཡི་གཡོག་ཡིན་ན། །བློ་བཟང་དམ་པ་གཞན་གྱི་སྤྱོད་པ་ལ། །བཞད་གད་དག་ཏུ་བྱེད་པ་ངོ་མཚར་ཆེ། །ཨེ་མ་འཁོར་བ་ངོ་མཚར་རེ་ཆེ་ཨང་། །མང་དུ་སྨྲས་པ་གཞན་གྱིས་ཅི་ཞིག་བྱ། །ཞེས་གླུ་བླངས་སོ། །དེ་ནས་བྲམ་ཟེ་དེ་དག་གིས་རྒྱལ་པོ་ལ་བསྙད་དེ་མ་ཐོན་བྱས་པས། རྒྱལ་པོ་ན་རེ། དེ་ཉིད་བལྟ་བའི་ཕྱིར་འདོང་ངོ་ཞེས་ཟེར་ཏེ། དཔུང་དང་བཅས་པས་ཕྱིན་པས། སློབ་དཔོན་གྱིས་སྡང་མིག་བལྟས་པས་ཐམས་ཅད་རེངས་སོ། །དེར་བློན་པོ་རིགས་པ་ཅན་ཞིག་གིས་དངོས་གྲུབ་ཐོབ་པར་ཤེས་ནས་གུས་པར་བྱས་པས་གྲོལ་ལོ། །དེས་རྒྱལ་པོ་ལ་གུས་པ་གྱིས་ཤིག་ཅེས་བྱས་པས། དེ་བཞིན་དུ་བྱས་པས་རྒྱལ་པོ་གྲོལ་ལོ། །གཞན་ཐམས་ཅད་ཀྱིས་ཀྱང་དེ་བཞིན་དུ་བྱས་པས། ལུས་ངག་རེངས་པ་དང་སེམས་མྱོས་པ་ལས་གྲོལ་ལོ། །དེ་ནས་རྒྱལ་པོས་ཁྱོད་སུ་ཡིན་བྱས་པས། སློབ་དཔོན་ན་རེ། ཁྱོད་ཀྱང་སུ་ཡིན་གསུངས་སོ། །རྒྱལ་པོས་ང་རྒྱལ་པོ་ཡིན་བྱས་པས། སློབ་དཔོན་ན་རེ་ངའང་རྒྱལ་པོ་ཡིན་གསུངས་སོ། །རྒྱལ་པོ་ན་རེ་ཁྱོད་ལ་རྒྱལ་པོའི་ལོངས་སྤྱོད་མལ་སྟན་དང་། ཆུང་མ་དང་། བསིལ་ཡབ་དང་། སྒྲོན་མ་ལ་སོགས་པ་མི་འདུག་པ་བྱས་པས། སློབ་དཔོན་གྱིས་གླུ་བླངས་པ། ས་གཞི་མལ་སྟན་ཆེན་པོ་ལག་ངར་སྔས་ནི་འབོལ་ལ་འཁྲིལ། །ཉི་ཟླའི་སྒྲོན་མ་བསིལ་ཡབ་རྗེས་སུ་མཐུན་པའི་རླུང་། །ནམ་མཁའི་བླ་རེ་ཆགས་པ་ལས་གྲོལ་སྟོང་པའི་བུད་མེད་ལ་སྤྱོད་དེ། །ཨེ་མ་རྒྱལ་ལྟར་སྲིད་ལ་མི་འཇིགས་རྣལ་འབྱོར་བདེ་གནས་རྒྱལ་པོ་ཡིན། །ཞེས་གསུངས་པས་རྒྱལ་བློན་གཉིས་དད་ནས་ཞབས་ལ་འཇུས་ཏེ། ཡང་དག་པའི་གདམས་ངག་ཞུ་བྱས་པས། ཁྱེད་ནི་རིགས་སྙེམས་པའི་གང་ཟག་ཡིན་པས་ཁྱེད་སྣོད་དུ་མི་རུང་ངོ་གསུངས་པས། རྒྱལ་བློན་གཉིས་ཀྱིས་རྒྱལ་སྲིད་ཀྱི་བྱ་བ་བཏང་སྟེ། ཞབས་ལ་འཇུས་པས། དཀྱིལ་འཁོར་དུ་བཅུག་ནས་དབང་བསྐུར་ཏེ། ཡང་དག་པའི་གདམས་ངག་གནང་སྟེ། རྒྱལ་པོ་ལ་ཁྱོད་ཟས་ཀྱི་བྱ་བ་ཅི་ལ་དགའ་གསུངས་པ་ལ། བྱ་བ་རྣམས་ནི་བློན་པོས་བྱེད་པས། ཁོ་བོ་ནི་རྟག་ཏུ་ཆང་འཐུང་བས་ཆང་ལ་དགའ་འོ་ཞེས་བྱས་པས། འོ་ན་ཤར་ལྷོ་ན་ཨོ་ཊི་བི་ཤ་ཞེས་བྱ་བ་དེའི་བྱེ་བྲག་ཙ་རི་ཊ་པ་ཏ་ཞེས་བྱ་བ་ན་ཤིན་ཏུ་ཆང་མང་བས་དེར་སོང་ལ་འབྲས་བརྡུང་གྱིས་ཤིག་ཅེས་གསུངས་ཏེ་བཏང་ངོ་། །དེས་ན་འབྲས་བརྡུང་བ་ལ་ཌེམ་གི་ཞེས་ཟེར་བས་ཌེམ་གི་པར་གྲགས་སོ། །བློན་པོ་ལ་ཁྱོད་ཅི་ལ་དགའ་བྱས་པས། ཁོ་བོ་ནི་རྟག་ཏུ་རྒྱལ་པོའི་བྱ་བ་བྱེད་དགོས་པས་དེ་ལ་ཆང་འཐུངས་ན་བྱ་བ་མི་འགྲུབ་པས། གོ་ལ་ལ་དགའ་འོ་བྱས་པས། འོ་ན་ལྷོ་ཕྱོགས་ཌཱ་ཀི་ནཱི་པཱ་ཏ་ཞེས་བྱ་བའི་བྱེ་བྲག་ཀཉྩི་ན་གར་ཞེས་བྱ་བར་སོང་ལ། སྨད་འཚོང་མའི་གཡོག་གྱིས་ཤིག་གསུང་སྟེ་བཏང་། དེས་ན་སྨད་འཚོང་མ་ལ་དཱ་རི་ཟེར་བས་དེའི་གཡོག་བྱས་པས་དཱ་རི་ཀ་པར་གྲགས་སོ། །དེའི་ཚེ་རྒྱལ་བློན་གཉིས་ཀྱི་དོན་དུ་དཔལ་མངོན་པར་རྟོགས་པ་མཛད་དོ། །རྒྱལ་པོ་ཨོ་ཊི་བི་ཤ་བ་དང་བཅས་པ་མཁའ་སྤྱོད་དུ་གཤེགས་པས་དེའི་བརྒྱུད་པ་མེད། བློན་པོ་དཱ་རི་ཀ་པ་ནས། རྡོ་རྗེ་དྲིལ་བུ་པ། རུས་སྦལ་ཞབས་ཅན། ཛ་ལེན་དྷ་རི་པ། ནག་པོ་སྤྱོད་པ་བ། གུ་ཧེ་པ། རྣམ་པར་རྒྱལ་བའི་ཞབས་ཅན། ཏཻ་ལོ་པ་རྣམས་ལ་རིམ་པ་བཞིན་དུ་བརྒྱུད་པ་ཡིན་ལ། ལཱུ་ཧི་པ་འདི་ནི་ཉེ་བརྒྱུད་དཱ་རི་ཀ་པ་ནས། ཨནྟར་པ་སྟེ་བར་མའི་སློབ་དཔོན། དེ་ནས་ཏཻ་ལོ་པ་ལ་བརྒྱུད་པ་ཡིན་ནོ། །དེའི་སློབ་མ་ནཱ་རོ་པ། དེ་ལ་སློབ་མ་བསམ་གྱིས་མི་ཁྱབ་པའི་ནང་ནས་གཙོ་བོར་གྱུར་པ་གཉིས་སྐྱེས་མཆོག་གསུམ་སྟེ་བཞིར་གྲགས་སོ། །གཉིས་སྐྱེས་ནི་རིགས་བྲམ་ཟེ་ཡིན་པས་གཉིས་སྐྱེས་ཞེས་བྱ་ལ། རྟེན་དགེ་སློང་ཡིན་ནོ། །མཆོག་གསུམ་ནི་མཱ་ན་ཀ་ཤྲཱི་ཛྙཱ་ན་དང་། པྲཛྙཱ་རཀྵི་ཏ་དང་། བལ་པོ་ཕམ་འཐིང་པ་དང་གསུམ་ཡིན་པར་བཤད་ཅིང་། དང་པོ་གཉིས་ཀྱི་སློབ་མ་ནི་ཀ་ན་ཀ་ཤྲཱི་ཛྙཱ་ནའོ། །ཀ་ན་ཀ་ཤྲཱི་དང་། ཕམ་འཐིང་པ་གཉིས་ཀའི་སློབ་མ། ཇོ་བོ་བྷ་ཌཎ་ཏ་ཡིན། འདིའི་ཡུལ་བལ་པོ། མཚན་དངོས་ནི་སུ་མཱ་ཏི་ཀིརྟི་ཞེས་བྱ་སྟེ། སྒྲ་ཚད་ལ་ཤིན་ཏུ་མཁས། ཕྱིས་རྒྱ་ནག་ཏུ་བྱོན་ནས་དེར་སྐུ་གཤེགས། འདིའི་སློབ་མ་རྔོག་ལོ་ཙྪ་བ། ཟངས་དཀར་ལོ་ཙྪ་བ། ཀློག་སྐྱ། མལ་གྱོ། མར་པ་དོ་པ། རྗེ་བཙུན་པུ་ཧྲངས་ལོ་ཆུང་རྣམས་ཡིན་པ་ལས། ཕྱི་མ་གཉིས་ཀྱི་སློབ་མ་དངོས་གྲུབ་ཤེས་རབ། དེ་ནས་རིམ་བཞིན་བྲོག་ར་བ་ཤེར་རྒྱལ། ཞིང་རིངས་པ། བླ་མ་ལྷ་རྗེ། གློ་བོ་ལོ་ཙྪ་བ་ཤེས་རབ་རིན་ཆེན་གྱི་བར་དུ་བརྒྱུད་དེ། དེ་ལ་ཡང་དམར་ཆོས་ཀྱི་རྒྱལ་པོས་གསན་ནོ། །ཡང་རྗེ་བཙུན་པུ་ཧྲངས་ལོ་ཆུང་གྲགས་མཆོག་ཤེས་རབ་ལ། རྗེ་ས་ཆེན་དང་། དམར་བརྩོན་འགྲུས་རྒྱལ་མཚན་གྱིས་གསན། དམར་ཆེན་པོ་འདིས་ལ་སྟོད་ཀྱི་ཤྲཱིའི་དགོན་པ་མཁན་དམར་ཞེས་བྱ་བར་གད་ལོགས་ལ་ཕུག་པ་སུམ་བརྩེགས་བྲུས་ནས་གོང་མར་རྗེ་བཙུན་པུ་ཧྲངས་པ་བཞུགས། བར་མར་དམར་ཆེན་པོ་བཞུགས། འོག་མར་གཡོས་ཁང་བྱས་ནས་རྗེ་བཙུན་པུ་ཧྲངས་པ་མཁའ་སྤྱོད་དུ་གཤེགས་པའི་ཚེ་འདིས་སློབ་མ་རྣམས་ལ་ཁྲིད་བསྐྱངས། ལཱུ་ནག་དྲིལ་གསུམ་གྱི་བསྐྱེད་རྫོགས་ལ་མན་ངག་ཡི་གེར་བྲིས་པའི་ཡིག་ཆ་ཡང་མང་དུ་མཛད་དོ། །དེའི་དབོན་པོ་དམར་བརྩོན་འགྲུས་རྡོ་རྗེ། དེའི་དབོན་པོ་དམར་ཆོས་ཀྱི་རྒྱལ་པོ་སྟེ། འདིས་རང་གི་བླ་མ་བརྩོན་འགྲུས་རྡོ་རྗེ་དང་། རྗེ་བཙུན་དང་། ནུབ་པ་རིགས་འཛིན་གྲགས་དང་། ས་སྐྱ་པཎྜི་ཏ་ཡུན་རིང་དུ་བསྟེན་ཏེ། བདེ་དགྱེས་ཀྱི་མན་ངག་ཐམས་ཅད་ཀྱི་བདག་པོ་ལྟ་བུར་བཞུགས་སོ། །ཡང་ཕམ་འཐིང་པ་སྐུ་མཆེད་བཞི་ལས། གཅེན་ཆོས་ཀྱི་བློ་གྲོས་ཀྱིས་ནཱ་རོ་པ་ལོ་བཅུ་གཉིས་བསྟེན། དེ་གདན་འདྲེན་པ་ལ་གཅེན་འཇིགས་མེད་གྲགས་པ་བྱོན། ཆོས་ཀྱི་བློ་གྲོས་ཀྱི་ཞལ་ནས། ཁྱོད་ཀྱིས་ངའི་བླ་མའི་ཞབས་ཐོག་གྱིས། ང་རྒྱ་ནག་རི་བོ་རྩེ་ལྔར་འགྲོ་ཟེར་ནས་གར་སོང་ཆ་མེད་དུ་གཤེགས། འཇིགས་མེད་གྲགས་པས་ནཱ་རོ་པ་ལོ་དགུ་བསྟེན། འདི་ལ་བལ་ཡུལ་ན་ཨ་དེས་པར་གྲགས། བོད་དུ་ཕམ་འཐིང་པ་ཆེན་པོར་གྲགས། དེ་གདན་འདྲེན་པ་ལ་གཅུང་དུས་འཁོར་བ་བྱོན། དེས་ནཱ་རོ་པ་ལོ་ལྔ་བསྟེན། འདི་ལ་བལ་པོ་མཻ་ཏྲི་པ་ཡང་ཟེར། དེ་གདན་འདྲེན་པ་ལ་ཐང་ཆུང་བས་བྱོན། དེས་ཀྱང་ནཱ་རོ་པ་ལས་དབང་བསྐུར་ཐོབ། ངག་གི་དབང་ཕྱུག་ཆུང་ངུ་གྲུབ་པས། བལ་པོ་ངག་གི་དབང་ཕྱུག་ཏུ་ཡང་གྲགས་སོ། །ཕམ་འཐིང་པ་སྐུ་མཆེད་ཀྱི་དྲུང་དུ་ཀློག་སྐྱ་ཤེས་རབ་བརྩེགས་ཀྱིས་ལོ་མང་དུ་བཞུགས་ནས་གདམས་པ་ཞུས། དེ་ལ་ཐོག་མར་མལ་གྱོ་ལོ་ཙྪ་བས་ཞུས། ཕྱིས་མལ་གྱོ་ཉིད་ཀྱིས་ཕམ་འཐིང་པ་ཆེན་པོ་ལ། དབང་དང་གདམས་པ་ཅུང་ཟད་ཐོབ་ཅིང་། དུས་འཁོར་བ་དང་། ཐང་ཆུང་བ་དང་། སུ་མཱ་ཏི་ཀིརྟིའི་དྲུང་དུ་ལེགས་པར་སྦྱངས་སོ། །དེའི་དྲུང་དུ་མཚན་བརྗོད་པར་དཀའ་བ་རྗེ་ས་སྐྱ་པ་ཆེན་པོས་བྱོན་ནས་དབང་དང་གདམས་པ་མ་ལུས་པར་གསན་ཏེ། དེ་ནས་རིམ་པ་བཞིན། རྗེ་བཙུན་དམ་པ་མུས་ཆེན་དཀོན་མཆོག་རྒྱལ་མཚན་དཔལ་བཟང་པོའི་བར་དུ་བརྒྱུད་དེ། དེའི་དྲུང་དུ་བདག་གིས། གསང་མཐའི་རྩ་བཤད་ཀྱི་རྒྱུད་དང་། གཞུང་ཕྲན་རྣམས་ཀྱི་བཤད་པ་དང་ལུང་། ལཱུ་ནག་དྲིལ་གསུམ་གྱི་སྨིན་བྱེད་ཀྱི་དབང་། བསྐྱེད་རྫོགས་ཀྱི་མན་ངག་རྣམས་ཚང་བར་ཞུས་སོ། །གཉིས་པ་ལ་གསུམ་སྟེ། རྩ་བཤད་ཀྱི་རྒྱུད་གང་ལ་བརྟེན་པ། དེ་ལ་བརྟེན་པའི་མངོན་རྟོགས་ཀྱི་སྐོར་ཇི་ཙམ་བྱུང་བ། དེ་དག་གི་བརྗོད་བྱ་ལམ་མངོན་པར་རྟོགས་པའི་རྣམ་པར་གཞག་པའོ། །དང་པོ་ནི། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། ཇི་སྲིད་མདོ་བྱ་སྤྱོད་པ་དང་། །རྣལ་འབྱོར་གསང་མཐའི་དབྱེ་བ་ཡིས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། །ཞེས་དང་། ཀུན་སྤྱོད་ལེའུ་བཅུ་དྲུག་པ་ལས་ཀྱང་། མདོ་དང་བྱ་བ་སྤྱོད་པ་རྣམས། །རྣལ་འབྱོར་གསང་སོགས་དབྱེ་བ་ཉིད། །ཅེས་གསུངས་པའི་དོན་རྗེ་བཙུན་རྩེ་མོས། མདོ་སྡེ་རྟོག་པའི་རྒྱུད། བྱ་བའི་རྒྱུད་ཅེས་བྱ་རྒྱུད་ལ་གཉིས་སུ་བྱས་ནས་སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོ་གསང་བའི་རྒྱུད་དང་། གསང་བའི་མཐའི་རྒྱུད་དེ་རྒྱུད་སྡེ་དྲུག་ཏུ་མཛད་ལ། གཉན་ཕུལ་བྱུང་བ་དང་། རྗེ་བཙུན་གྱིས་མདོ་ཞེས་པས། ཕ་རོལ་ཏུ་ཕྱིན་པའི་སྡེ་སྣོད་ལོགས་སུ་བསྟན་པས། རིག་པ་འཛིན་པའི་སྡེ་སྣོད་ལ་བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་ཆེན་པོ་དང་། གསང་བ་དང་། གསང་བའི་མཐའ་དང་དྲུག་ཏུ་མཛད་དེ་གང་ལྟར་ཡང་དྲུག་པ་གསང་བའི་མཐའ་ལ། རྩ་བའི་རྒྱུད་དང་། བཤད་པའི་རྒྱུད་གཉིས་ལས། དང་པོ་ལ་རྒྱུད་རྒྱས་པ་ལེའུ་འབུམ་པ། དེ་རྩོད་དུས་སུ་བཤད་ཉན་མ་ནུས་པས། དེ་ལས་བསྡུས་པ་ཤླཽ་ཀ་འབུམ་པ། དེ་ཡང་རྩོད་དུས་སུ་མི་འགྲུབ་པས། དེ་ལས་བསྡུས་པ་ཡི་གེ་འབུམ་པ་ལེའུ་ལྔ་བཅུ་རྩ་གཅིག་པ་འདི་གསུངས་ཞེས་རྗེ་བཙུན་གྱིས་ཧེ་རུ་ཀའི་བྱུང་ཚུལ་ལས་བཤད་ཅིང་། ཀུན་སྤྱོད་ཀྱི་ཊཱི་ཀ་དང་། གཉན་ཕུལ་བྱུང་བས་རྒྱུད་རྒྱས་པ་ནམ་མཁའ་དང་མཉམ་པ་འབུམ་ཕྲག་གསུམ་པ་བསྡུས་པ་ལེའུ་ལྔ་བཅུ་རྩ་གཅིག་པ་འདི་ཉིད་ཡིན་པར་གསུངས་ལ། ཀུན་སྤྱོད་ལས། ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ན་ཡང་འདི་བཤད་དེ། །ཞེས་དང་། ཕྱག་རྡོར་བསྟོད་འགྲེལ་ལས་ཀྱང་། རྒྱུད་རྒྱས་པ་ནམ་མཁའ་དང་མཉམ་པ་འབུམ་ཕྲག་གཅིག་ཡིན་པར་བཤད་དེ། གདུལ་བྱའི་བློའི་བྱེ་བྲག་གིས་རྒྱས་བསྡུས་སྣ་ཚོགས་སུ་སྣང་བ་མི་འགལ་བར་སེམས་སོ། །དེ་ལྟར་ན་བཤད་བྱ་རྩ་བའི་རྒྱུད་བསྡུས་པ་ལེའུ་ལྔ་བཅུ་རྩ་གཅིག་པ་འདི་ཉིད་ལ། འཆད་བྱེད་བཤད་རྒྱུད་ཀྱི་ཚུལ་རྣམ་པ་བཞི་ཡོད་དེ། མ་རྒྱུད་སྤྱི་དང་མཐུན་པར་བཤད་པ། གསང་འདུས་འཕགས་ལུགས་དང་མཐུན་པར་བཤད་པ། དུས་ཀྱི་འཁོར་ལོ་དང་མཐུན་པར་བཤད་པ། གསང་མཐའ་ལྟར་བཤད་པའོ། །དང་པོ་ནི་བདེ་མཆོག་སངས་རྒྱས་མཉམ་སྦྱོར་ལྟ་བུ་སྟེ། མ་རྒྱུད་སྤྱི་དང་མཐུན་པའི་སྨིན་གྲོལ་སྟོན་པའོ། །གཉིས་པ་ནི་སྡོམ་འབྱུང་སྟེ། འདི་ཉིད་ཀྱི་ལེའུ་གཉིས་པར། སྲིད་པ་སྐྱེ་བའི་རིམ་པ་རྒྱས་པར་བཤད་ནས། དེ་ཉིད་ལ་བསྐྱེད་རིམ་ཞེས་པའི་ཐ་སྙད་མཛད་ཅིང་། རྣམ་གཞག་རིམ་པའི་སྦྱང་གཞི་སྦྱོང་ཚུལ་གྱི་རྣམ་གཞག་འདི་ཁོ་ན་ལྟར་སྣང་བའི་ཕྱིར་དང་། དཀྱིལ་འཁོར་གྱི་གཙོ་བོ་ཞལ་གསུམ་ཕྱག་དྲུག་པའི་རྣམ་གཞག་ཀྱང་འཕགས་ལུགས་དང་མཐུན་པར་སྣང་བའི་ཕྱིར་དང་། རྫོགས་རིམ་ལ་ཡང་དབེན་གསུམ་དང་། འོད་གསལ་དང་། ཟུང་འཇུག་གི་རྣམ་གཞག་མཛད་པའི་ཕྱིར་རོ། །གསུམ་པ་ནི་བཤད་རྒྱུད་མཁའ་འགྲོ་རྒྱ་མཚོ་སྟེ། བསྐྱེད་པའི་རིམ་པ་ལ་ས་དུམ་བུ་བཅུ་གཉིས་དང་བསྟུན་ནས། འཁོར་ལོ་བཅུ་གཉིས་ཀྱི་རྣམ་གཞག་མཛད་པ་དང་། རྫོགས་རིམ་ལ་སྦྱོར་བ་ཡན་ལག་དྲུག་གི་རྣམ་གཞག་མཛད་པའི་ཕྱིར་རོ། །བཞི་པ་ནི་སློབ་དཔོན་སྐར་རྒྱལ་ཟླ་བས། རྩ་རྒྱུད་ཀྱི་འགྲེལ་པ་རིན་པོ་ཆེའི་ཚོགས་ལས། འབྱུང་དང་མཁའ་འགྲོ་ཀུན་སྤྱོད་དང་། །ཁ་སྦྱོར་རྒྱུད་དང་བླ་མ་སྟེ། །བཤད་རྒྱུད་རྣམ་པ་ལྔ་རུ་འདོད། །ཅེས་གསུངས་པ་ལྟར། བཤད་རྒྱུད་རྣམ་པ་ལྔའི་སྒོ་ནས་རྩ་རྒྱུད་འཆད་པ་སྟེ། དེ་ཡང་རྩ་བའི་རྒྱུད་ཀྱི་ལེའུ་དང་པོ་ལས། གསང་བ་མཆོག་གི་དགྱེས་པ་ན། །ཞེས་བྱ་བ་ལ་སོགས་པས་བསྐྱེད་པའི་རིམ་པ་མདོར་བསྟན། ལེའུ་བཞི་པར་བསྐྱེད་པའི་རིམ་པའི་དེ་ཁོ་ན་ཉིད་བཞི་བསྟན། ལེའུ་སུམ་ཅུ་རྩ་གཉིས་པར་རྟེན་འབྱུང་བ་རིམ་བརྩེགས་བསྒོམ་པ་བརྡའི་སྐད་ཀྱིས་བཤད་པ་དང་། བརྟེན་པ་ལྷ་གཙོ་བོ་ཧེ་རུ་ཀ་ཕྱག་བཞི་པ་ནས་ཕྱག་འབུམ་པའི་བར་དུ་བསྒོམ་པ་བསྟན། ལེའུ་བཞི་བཅུ་རྩ་བརྒྱད་པར་བསྐྱེད་པའི་རིམ་པ་བསྒོམ་པའི་གནས་དང་། དཀྱིལ་འཁོར་གྱི་ལྷ་རྫོགས་པར་བསྒོམ་པ་བསྟན། ལེའུ་ལྔ་བཅུ་པའི་ཞབས་སུ་གནས་ལ་སོགས་པའི་སྒོ་ནས་རྟེན་དང་བརྟེན་པའི་དཀྱིལ་འཁོར་བསྒོམ་པ་བསྟན། ལེའུ་ལྔ་བཅུ་རྩ་གཅིག་པ་ནས། རི་སྟེང་སྣ་ཚོགས་པདྨ་ཡི། །ཞེས་པ་ལ་སོགས་པ་ལྷ་སུམ་ཅུ་རྩ་བདུན་བསྐྱེད་པའི་ཆོ་ག་དང་བཅས་པ་གསུངས་ཀྱང་བསྐྱེད་པའི་རིམ་པ་གསལ་བར་མ་གསུངས་པས་བཤད་པའི་རྒྱུད་རྣམས་ཀྱི་ཐོག་མ་ཁོ་ནར། གཙོ་བོར་བསྐྱེད་པའི་རིམ་པ་གསལ་བར་སྟོན་པའི་རྒྱུད་མངོན་པར་རྟོགས་པའི་རྒྱུད་བླ་མ་གསུངས་པས། དེ་ལ་ཐོག་མར་གླེང་གཞི་བསྟན་པ་ཡིན་ནོ། །ཡང་རྩ་བའི་རྒྱུད་ཀྱི་ལེའུ་དང་པོའི་ཞབས་སུ། རི་བོ་ཚང་ཚིང་རི་སུལ་ལམ། །ཞེས་པ་ལ་སོགས་པས་དཀྱིལ་འཁོར་བྲི་བའི་གནས་གསུངས། ལེའུ་གཉིས་པར་དཀྱིལ་འཁོར་བསྟན། ལེའུ་གསུམ་པར་དཀྱིལ་འཁོར་དུ་འཇུག་པ་དང་། དབང་བསྐུར་བའི་ཆོ་ག་གསུངས་ཀྱང་། སློབ་དཔོན་གྱི་ལས་ལ་སོགས་པ་གསལ་བར་མ་གསུངས་པས། སློབ་དཔོན་གྱི་ལས་ལ་སོགས་པ་གསལ་བར་སྟོན་པ་ཧེ་རུ་ཀ་མངོན་པར་འབྱུང་བའི་རྒྱུད་གསུངས། ཡང་རྩ་བའི་རྒྱུད་ལས། ལས་དང་པོ་པའི་ཆོ་གའི་ཡན་ལག་ལེའུ་སུམ་ཅུ་རྩ་གཅིག་པ་ལས་ལག་པའི་མཆོད་པ་བསྟན། ལེའུ་ཉི་ཤུ་རྩ་བདུན་པ་ལས་གཏོར་མའི་མཆོད་པ་བསྟན་ཀྱང་། ལག་པའི་མཆོད་པ་དང་། ཕྱིའི་མཆོད་པ་དང་། གཏོར་མའི་མཆོད་པ་ལ་སོགས་པ་གསལ་བར་མ་གསུངས་པས། རྩ་བའི་རྒྱུད་ཀྱི་ཆོ་གའི་ཡན་ལག་གསལ་བར་སྟོན་པའི་བཤད་པའི་རྒྱུད་མཁའ་འགྲོ་མ་ཀུན་ཏུ་སྤྱོད་པ་རྟོག་པ་དྲུག་ཅུ་རྩ་བཞི་པ་གསུངས། ཡང་རྩ་བའི་རྒྱུད་ཀྱི་ལེའུ་བཞི་བཅུ་རྩ་གཅིག་པ་ལས། ལས་ཆེན་བཅུ་གཉིས་འདི་དག་ནི། །ཞེས་གསུངས་པས་ཞལ་བཞི་པའི་སྔགས་ལ་བརྟེན་ནས། ལས་བཅུ་གཉིས་བསྒྲུབ་པ་ཙམ་གསུངས་ཀྱང་ལས་བཅུ་གཉིས་པོ་བསྒྲུབ་པ་གསལ་བར་མ་གསུངས་པས་དེ་གསལ་བར་བྱ་བའི་ཕྱིར། རྩ་བའི་རྒྱུད་ཀྱི་ལས་ཚོགས་གསལ་བར་སྟོན་པའི་བཤད་པའི་རྒྱུད་རྡོ་རྗེ་མཁའ་འགྲོ་གསུངས། ཡང་རྩ་བའི་རྒྱུད་ཀྱི་ལེའུ་དང་པོར། གསང་བ་མཆོག་གི་དགྱེས་པ་ན། །ལ་སོགས་པ་དང་། མཆོད་གཞི་དཔའ་བོ་ཆེན་པོ་ནི། །ཞེས་པ་ལ་སོགས་པས་རྫོགས་པའི་རིམ་པ་མདོར་བསྟན། ལེའུ་བཞི་པ་དང་། སུམ་ཅུ་རྩ་བཞི་པ། རྩ་ལྔ་པ། རྩ་དྲུག་པ། སུམ་ཅུ་རྩ་བདུན་པ་རྣམས་ཀྱིས། ཕྱག་རྒྱ་བཞིའི་རྫོགས་པའི་རིམ་པ་ལ་སོགས་རྒྱས་པར་བཤད་པ་བྱས་ནས་གསུངས་ཀྱང་། རྫོགས་པའི་རིམ་པ་གསལ་བར་མ་གསུངས་པས་རྫོགས་པའི་རིམ་པ་གསལ་བར་སྟོན་པའི་བཤད་པའི་རྒྱུད་ཀུན་ཏུ་ཁ་སྦྱོར་གསུངས་ཏེ། འདི་ནི་ཐུན་མོང་གི་བཤད་པའི་རྒྱུད་ཡིན་པས་འདི་ལ་གླེང་གཞི་བསྟན་པ་ཡིན་ཞེས་གསུངས་སོ། །བླ་མ་ཕམ་འཐིང་པ་ལ་སོགས་པ་རྣམས་ནི་འཁོར་ལོ་བདེ་མཆོག་གི་བཤད་པའི་རྒྱུད་ལྔ་པོ་དེ་ལ་བཞེད། ནཱ་རོ་པའི་སློབ་མ་རྒྱ་གར་དཱ་རི་ཀ་པ་ནི་ལྔ་པོ་དེའི་སྟེང་དུ། རྣལ་འབྱོར་མ་བཞི་ཁ་སྦྱོར་གྱི་རྒྱུད་ཅེས་བྱ་བ་དང་། མཁའ་འགྲོ་རྒྱ་མཚོ་དང་བདུན་དུ་བཞེད་ཅིང་། བདེ་མཆོག་སྡོམ་འབྱུང་ནི་བཤད་རྒྱུད་ཡིན་ཀྱང་། ནཱ་རོ་པ་ལ་བཤད་བཀའ་མི་བཞུགས་པ་ཡིན་ནོ་ཞེས་བཞེད་དོ། །གཉིས་པ་ནི་རྗེ་བཙུན་གྱིས་མངོན་པར་རྟོགས་པའི་དབང་དུ་བྱས་ན་སྐོར་བཞི་ཞེས་གྲགས་ཏེ། ལཱུ་ཧི་པའི་སྐོར། དྲིལ་བུ་པའི་སྐོར། ནག་པོ་པའི་སྐོར། རི་ཁྲོད་མགོན་པོའི་བསྐོར་རོ་ཞེས་གསུངས་ཤིང་གཞན་དག དང་པོ་གསུམ་གྱི་སྟེང་དུ་ཀོང་ཀ་ན་རྒྱལ་བ་བཟང་པོའི་སྐོར་དང་བཞིར་བྱས་པ་ཡང་ཡོད་དོ། །དང་པོ་ནི་སློབ་དཔོན་ལཱུ་ཧི་པས་དཔལ་མངོན་པར་རྟོགས་པ་མཛད་པ་ནི་མ་ལྟ་བུ་ཡིན་ལ། པྲཛྙཱ་རཀྵི་ཏས། དེའི་འགྲེལ་པ་དང་། ཕྱི་རོལ་མཆོད་པའི་ཆོ་ག་དང་། ལག་མཆོད་དང་། གཏོར་མའི་ཆོ་ག་སྟེ་བཞི་མཛད་པ་ནི་བུ་ལྟ་བུ་སྟེ། ལཱུ་ཧི་པ་སྨད་ལྔར་གྲགས་སོ། །གཉིས་པ་ནི་གྲུབ་ཆེན་དྲིལ་བུ་པས། ལུས་དཀྱིལ་ལ་བརྟེན་པའི་གཞུང་གསུམ་མཛད་དེ། འདི་ལ་སྨིན་པར་བྱེད་པ་དང་། གྲོལ་བར་བྱེད་པ་གཉིས། དང་པོ་ནི། གདུལ་བྱ་དབང་རྟུལ་དང་། དབང་འབྲིང་ལ་ཕྱིའི་དཀྱིལ་འཁོར་དུ་རྒྱུད་སྨིན་ནས་ལུས་དཀྱིལ་བསྒོམ་རུང་གི་དབང་བསྐུར་བ་དང་། དབང་རྣོན་ལ་དང་པོ་ཉིད་ནས་སྨིན་བྱེད་དུ་རུང་བའི་དབང་དུ་བྱས་ནས་དཀྱིལ་འཁོར་གྱི་ཆོ་ག་མཛད། གཉིས་པ་ལ། ཕྱི་རོལ་གྱི་རྣམ་རྟོག་སྤངས་ནས་ལུས་དཀྱིལ་འབའ་ཞིག་བསྒོམ་པའི་བསྐྱེད་པའི་རིམ་པའི་གཞུང་དང་། རྫོགས་རིམ་རིམ་པ་ལྔ་པའི་གཞུང་གཉིས་མཛད་དོ། །གསུམ་པ་ནི། ནག་པོ་སྤྱོད་པ་བས་ཧེ་རུ་ཀའི་བཀའ་ལ་བརྟེན་ནས་བསྐྱེད་རྫོགས་ཀྱི་གཞུང་དྲུག་མཛད་དེ། འདི་ལའང་སྨིན་པར་བྱེད་པ་དང་། གྲོལ་བར་བྱེད་པ་གཉིས་ལས། དང་པོ་ནི་རྩ་རྒྱུད་དང་། རྡོ་རྗེ་མཁའ་འགྲོ་དང་། ཧེ་རུ་ཀ་མངོན་འབྱུང་ལ་བརྟེན་ནས་དཀྱིལ་འཁོར་གྱི་ཆོ་ག་མཛད་དོ། །གཉིས་པ་ལ་བསྐྱེད་རྫོགས་གཉིས་ལས། དང་པོ་ལའང་ལྷ་མ་གྲུབ་པ་གྲུབ་པར་བྱེད་པ་དང་། སྔགས་མ་གྲུབ་པ་གྲུབ་པར་བྱེད་པ་དང་། ཐུན་མོང་གི་དངོས་གྲུབ་སྒྲུབ་པ་དང་གསུམ་ལས། དང་པོ་ནི་བསྐྱེད་པའི་རིམ་པའི་སྒྲུབ་ཐབས་ཏེ། འདི་ཏིང་ངེ་འཛིན་གསུམ་གྱིས་འཆིང་ཞིང་། རྩ་རྒྱུད་དང་། རྡོ་རྗེ་མཁའ་འགྲོ་དང་། ཨ་བྷི་དྷ་ན་ལ་བརྟེན་པའོ། །གཉིས་པ་ནི་མཆོག་སྒྲུབ་པ་རིན་ཆེན་བཞི་དང་། བར་ཆད་ཞི་བར་བྱེད་པ་ཞལ་བཞི་པའི་སྔགས་ཏེ། འདི་ལ་གཞུང་ལོགས་སུ་མེད་དོ། །གསུམ་པ་ནི་རྩ་བའི་རྒྱུད་དང་། སཾ་བུ་ཊི་དང་། མངོན་བརྗོད་བླ་མ་སོགས་ལ་བརྟེན་ནས་སྦྱིན་སྲེག་གི་གཞུང་མཛད་དེ། འདི་མར་དོས་སློབ་དཔོན་གྱི་གཞུང་མ་ཡིན་པར་འདོད་ཀྱང་། མལ་གྱོས་སློབ་དཔོན་གྱིས་མཛད་པར་བཞེད་པ་ཉིད་ལེགས་ཏེ། གཞན་དུ་ན། འདི་རུ་མཆོག་མིན་དངོས་གྲུབ་གཞན་འགྲུབ་གཞུང་དྲུག་རྩོམས་ཤིག་བར་དོར་སངས་རྒྱས་འགྲུབ། །ཅེས་གསུངས་པའི་གཞུང་དྲུག་མ་ཚང་བར་ཐལ་བའི་ཕྱིར་རོ། །གཉིས་པ་རྫོགས་པའི་རིམ་པ་ལ་ཐབས་རྒྱུད་དང་། ཤེས་རབ་ཀྱི་རྒྱུད་གཉིས། རྗོད་བྱེད་གླེང་གཞིའི་ཡི་གེ་ཐ་དད་དུ་ཡོད་ཀྱང་། བརྗོད་བྱ་རིམ་པ་བཞི་ལས་མ་འདས་པར་བསྟན་པའི་ཕྱིར་དུ་གསང་བའི་དེ་ཁོ་ན་ཉིད་རབ་ཏུ་གསལ་བ་མཛད། ཤེས་རབ་ཀྱི་རྒྱུད་ལའང་ཀྱེ་རྡོ་རྗེ་དང་། འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་དུ་ཡོད་ཀྱང་། བརྗོད་བྱ་རིམ་པ་བཞི་ལས་མ་འདས་པར་བསྟན་པའི་ཕྱིར་དུ་ཨོ་ལ་པ་ཏི་མཛད། འཁོར་ལོ་བདེ་མཆོག་ཉིད་ཀྱི་བརྗོད་བྱ་རིམ་པ་བཞིར་འདུས་པར་ཤེས་པར་བྱ་བའི་ཕྱིར་དུ་དཔྱིད་ཀྱི་ཐིག་ལེ་མཛད་ཅེས་པ་ནི་ཕམ་འཐིང་པ་ནས་བརྒྱུད་པའི་ལུགས་ཡིན་ལ། ག་ཡ་དྷ་ར་ནས་འབྲོག་མི་ལ་བརྒྱུད་པའི་ལུགས་ལ། སློབ་དཔོན་འདིས་སྔར་གྱི་བསྐྱེད་རིམ་གྱི་གཞུང་གསུམ་གྱི་སྟེང་དུ། རྫོགས་རིམ་སྡོམ་དྲུག་སྟེ་གཞུང་དགུ་མཛད་པར་བཞེད་དེ། སྡོམ་དྲུག་ནི། དཔྱིད་ཀྱི་ཐིག་ལེ་རྩ་ཡི་སྡོམ། གསང་བའི་དེ་ཉིད་ཚིག་གི་སྡོམ། ཨོ་ལ་པ་ཏི་མངོན་རྟོགས་སྡོམ། སྙིང་པོ་བསྡུས་པ་དོན་གྱི་སྡོམ། སྡོམ་པ་བཤད་པ་རྣལ་འབྱོར་གྱི་སྡོམ། ཕྱག་རྒྱ་ཆེན་པོ་ཐིག་ལེ་ཕྱག་རྒྱ་བསྟེན་པའི་སྡོམ་སྟེ་དྲུག་གོ །སྡོམ་པ་བཤད་པའི་ནང་དུ་བརྟུལ་ཞུགས་ཞལ་སྔ་ནས་ཀྱི་གཞུང་། །ཕྱག་གཉིས་དང་ནི་ཞལ་གཅིག་མ། །ཞེས་བཤད་པས། ནག་པོ་པ་ཞེས་མི་མཐུན་པ་ཅིག་གིས་བྱས་པ་ཡིན་གྱི། སྤྱོད་པའི་རྡོ་རྗེས་མཛད་པ་མ་ཡིན་པར་ཕྱི་མ་དག་བཞེད་དོ། །བཞི་པ་ནི། རི་ཁྲོད་པའི་ཞལ་སྔ་ནས་བརྒྱུད་དེ་ཨ་པཱུ་ཛཱུ་ག་ཏས་ཞལ་གཉིས་མ་མཛད། རི་ཁྲོད་པའི་སློབ་མ་མཻ་ཏྲི་པས་དབང་པོ་དང་སྦྱར་ནས་ལྷ་བཅུ་གསུམ་མ། ལྷ་བདུན་མ། ལྷ་ལྔ་མ། ཕྲིན་ལས་ཀྱི་སྒྲུབ་ཐབས་དང་། ཚོགས་འཁོར་ཏེ་གཞུང་དྲུག་མཛད་དོ། །ཀོང་ཀ་ན་རྒྱལ་བ་བཟང་པོའི་སྐོར་ལ་རྩ་རྒྱུད་ཀྱི་འགྲེལ་པ། དེའི་འགྲེལ་བཤད་སྐལ་ལྡན་གྲགས་པས་མཛད་པ། དེ་གཉིས་ཆར་གྱི་བཤད་སྦྱར་ཏ་ཐཱ་ག་ཏ་རཀྵི་ཏས་མཛད་པ་དང་། རྒྱལ་བ་བཟང་པོ་ཉིད་ཀྱིས་སྒྲུབ་པའི་ཐབས་དང་། དཀྱིལ་འཁོར་གྱི་ཆོ་ག་དགུ་བརྒྱ་པ་རྣམས་མཛད་དོ། །གསུམ་པ་དེ་དག་གི་བརྗོད་བྱ་འཁོར་ལོ་བདེ་མཆོག་གི་ལམ་གྱི་རིམ་པ་ལ་གསུམ་སྟེ། རྩ་རྒྱུད་ཀྱི་གླེང་གཞིའི་གསང་བ་ཅེས་པའི་ཚིག་གིས་བསྟན་པའི་ལམ་གྱི་རིམ་པ་དང་། ལེའུ་ལྔ་བཅུ་རྩ་གཅིག་པའི་དེ་ཁོ་ན་ཉིད་བཅུ་བཞིས་བསྟན་པའི་ལམ་གྱི་རིམ་པ་དང་། བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པའོ། །དང་པོ་ནི་རྩ་རྒྱུད་ཀྱི་ཐོག་མར། དེ་ནས་གསང་བ་བཤད་བྱ་བ། །ཞེས་པའི་གསང་བ་ཞེས་པའི་ཚིག་ངེས་དོན་དུ་བཤད་ན། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེ་དག་གིས་བསྒྲུབས་པའི་འབྲས་བུ་གསུམ་བསྟན་པ་ལས། དང་པོ་ནི། གསང་བ་མཆོག་གི་དགྱེས་པ་ན། །ཞེས་སོགས་ཚིགས་བཅད་གཉིས་ཀྱིས་སྟོན་ཏེ། འདི་ལ་རྟེན་ལ་སྦྱར་བ་དང་། བརྟེན་པ་ལ་སྦྱར་བ་གཉིས་ལས་དང་པོ་ནི། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྣལ་འབྱོར་པའི་རྟེན་རི་བོ་ཚང་ཚིང་རི་སུལ་ལ་སོགས་པ་སྟོན་ཅིང་། ལྷའི་རྟེན་ལྷ་མངལ་སྐྱེས་དང་། སྒོང་སྐྱེས་གང་བསྒོམ་ཡང་། རླུང་གི་དཀྱིལ་འཁོར་ནས་རི་རབ་ཀྱི་བར་སྟོན་ནོ། །ཡང་ལྷའི་རྟེན་ཐུན་མོང་མ་ཡིན་པ་ཆོས་འབྱུང་ནས་གཞལ་ཡས་ཁང་གི་བར་ཡང་སྟོན་ཏེ། ཞིབ་དུ་མ་སྤྲོས་སོ། །བརྟེན་པ་ལྷ་བསྐྱེད་པ་ལ། ངེས་བརྗོད་བླ་མར། བསྐྱེད་རིམ་གྱི་སྒྲུབ་ཐབས་བདུན་ཅུ་རྩ་ལྔ་སྒོང་སྐྱེས་གཙོ་བོར་བྱས་པའི་སྐྱེ་གནས་བཞི་ཀ་དང་སྦྱར་བ་སྟོན་པ་ནི། འདིར་མཁའ་འགྲོ་ཀུན་དངོས་སེམས་དཔའ་ནི། །ཞེས་པ་ནས། དམ་ཚིག་སྤྱོད་པའི་སྤྱོད་ཡུལ་ཡིན། །ཞེས་པའི་བར་ཚིག་རྐང་དྲུག་མངལ་སྐྱེས་ལ་སྦྱར་བ་དང་། སྒོང་སྐྱེས་ལ་སྦྱར་བ་གཉིས་ཀྱིས་བསྐྱེད་པའི་རིམ་པ་ཡོངས་སུ་རྫོགས་པར་བསྟན་ནོ། །གཉིས་པ་རྫོགས་པའི་རིམ་པ་ལ་སྦྱར་ན། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་དུ་བཞུགས་ཞེས་པས། རྫོགས་རིམ་རིམ་པ་བཞིའི་དང་པོ་ཤེས་བྱ་རྒྱུད་ཀྱི་རིམ་པ་བསྟན། སྒྲ་ཡི་ཚུལ་ལས་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཡིན། །ཞེས་པས་སྔགས་ཀྱི་རིམ་པ་བསྟན། མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པས་ཡེ་ཤེས་ཀྱི་རིམ་པ་བསྟན། འདི་ནི་རང་བྱུང་བཅོམ་ལྡན་དཔའ། །མཁའ་འགྲོ་དྲྭ་བའི་སྡོམ་པ་ཡིན། །ཞེས་པས་གསང་བའི་རིམ་པ་བསྟན་ཏེ། དེ་ལྟར་ན་གསང་བ་ཅེས་དང་། དེའི་དོན་ཚིགས་སུ་བཅད་པ་གཉིས་ཀྱིས་ལམ་གྱི་གསང་བ་བསྐྱེད་རྫོགས་གཉིས་ཀ་བསྟན་པས། འཁོར་ལོ་བདེ་མཆོག་གི་ལམ་གྱི་རིམ་པ་མ་ལུས་པ་བསྟན་ནོ། །གསུམ་པ་དེ་དག་གིས་བསྒྲུབས་པའི་འབྲས་བུའི་གསང་བ་ནི། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་གཉིས་ཏེ། སྔགས་བཟླས་བསམ་གཏན་ལ་སོགས་ལྡན། །ཆོ་གའི་སྦྱོར་ཉིད་ཡེ་ཤེས་ཀྱང་། །ཞེས་པས་བསྟན་ནོ། །གཉིས་པ་ནི་རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲྭ། །ཨཱ་ལི་ཀཱ་ལི་ཞེས་བརྗོད་པ། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་ཞིང་། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོ་ཡང་དག་བསྲུང་། །སྔགས་རྣམས་ཀུན་གྱི་མཆོད་པ་ཡིན། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་ཏེ། འདི་ཉིད་ལྷ་མངལ་སྐྱེས་ལྟར་ན། བསྐྱེད་པའི་རིམ་པ་འབའ་ཞིག་གི་མཉམ་བཞག་དང་། རྗེས་སྤྱོད་དང་བཅས་པ་ལ་སྦྱར་བ་དང་། ལྷ་སྒོང་སྐྱེས་ལྟར་ན་བསྐྱེད་རྫོགས་མ་ལུས་པ་ལ་སྦྱར་བ་གཉིས་ལས། འདིར་སྐབས་སུ་བབ་པ་ཕྱི་མ་ལྟར་བཤད་ན། གོས་ནི་ཕན་འདོགས་པས་ན་གོས་ཞེས་བྱ་སྟེ། བསྐྱེད་རིམ་གྱི་སྔོན་འགྲོ་ཚངས་པའི་གནས་བཞི་བསྒོམ་པ་ལ་སོགས་པའོ། །ཕྱག་རྒྱ་ལྔ་ལ་སོགས་པ་ནི་མཉམ་བཞག་གི་དུས་ཀྱི་དཔའ་བོ་དང་དཔའ་མོ་རྣམས་ཀྱི་སྐུ་ལ་ཡོད་པའི་རྒྱན་ནོ། །ཤེས་རབ་ཡན་ལག་ནི་ཕུང་པོ་དང་ཁམས་དང་སྐྱེ་མཆེད་ཀྱི་དག་པ་དྲན་པ་བསྒོམ་པའོ། །ཕུར་བུ་དྲྭ་བ་ནི་རྗེས་སྤྱོད་ཀྱི་དུས་སུ་ཚམ་རྔམ་སྔགས་ཀྱིས་བསྲུང་བ་བྱེད་པའོ། །ཨཱ་ལི་ཀཱ་ལི་ཞེས་བརྗོད་པ་ནི་ངག་དག་པར་བྱེད་པ་སྟེ། དེས་མཚོན་ནས་ཐོག་མ་ཉིད་དུ་ལུས་ངག་ཡིད་གསུམ་དག་པར་བྱའོ། །རྒྱུ་སོགས་བསོད་ནམས་ཀྱི་ཚོགས། སྟོང་པ་སྔོན་དུ་འགྲོ་བ་ཡེ་ཤེས་ཀྱི་ཚོགས་སོ། །འཇུག་པ་ནི་སེམས་ཅན་གྱི་དོན་ལ་འཇུག་ཅིང་སྤྲོ་བ་ཡིན་ལ། སྒྲ་ལ་སོགས་པ་ནས་ནི་དཔལ་མངོན་པར་རྟོགས་པར་ལྷ་བསྐྱེད་པ་ལྟར་སྟོང་པའི་ངང་ལས་འབྱུང་བ་རིམ་བརྩེགས་སྣ་ཚོགས་པདྨའི་བར་དུ་བསྐྱེད་པ་དང་། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེའི་བར་དུ་ཧཱུྃ་ཉི་མའི་སྟེང་དུ་ཡི་གེ་གསུམ་རིམ་པ་བཞིན་དུ་བསམས་ལ། དེའི་སྟེང་དུ་པདྨ་དང་ཟླ་བའི་སྟེང་དུ་ཧཱུྃ་བསམ་སྟེ། ཡི་གེ་གསུམ་ནས་མས་རིམ་གྱིས་གཅིག་ལ་གཅིག་ཐིམ་ནས་ཧཱུྃ་གི་ཐིག་ལེ་ཡང་། ནཱ་དར་གྱུར་པ་ནི་སྒྲ་ཡིན་ལ། སོགས་པ་ཞེས་པ་ནི་ནཱ་ད་སྒྲ་དེ་ཉི་མ་ཟླ་བའི་བར་གྱི་ཚུལ་ཧཱུྃ་ལ་ཐིམ་སྟེ། དེ་ཐམས་ཅད་གྱུར་པ་ལས་རྟེན་དང་བརྟེན་པ་ཐམས་ཅད་དུས་གཅིག་ལ་རྫོགས་པར་བསྐྱེད་པའོ། །དེ་ནས་བརྩམས་ནས་ཇི་སྲིད་བསྡུས་པའི་སྦྱོར་ལྡན་ཞིང་ནི་སྤྲུལ་སྐུ་ལ་དམིགས་པའི་རྗེས་ལ་ལུས་ཀྱི་དཀྱིལ་འཁོར་བསྒོམ་པ་ལོངས་སྤྱོད་རྫོགས་པའི་སྐུ་ལ་དམིགས་པ་དང་། བྱང་ཆུབ་ཀྱི་ཕྱོགས་ཀྱི་དག་པ་དྲན་པ་ཆོས་ཀྱི་སྐུ་ལ་དམིགས་པའི་བར་དང་། ཡེ་ཤེས་སེམས་དཔའ་སྤྱན་དྲང་བའི་བར་བསྡུ་བའོ། །བདུད་རྩི་ཚིམ་བྱེད་ནི་མཆོད་པ་བྱེད་པའི་དུས་སུ་ཆོ་ག་བཞིན་བདུད་རྩི་མྱོང་བའོ། །མྱ་ངན་འདས་ནི་ཕྱག་རྒྱ་བཞི་དང་། རྡོ་རྗེ་སེམས་དཔའ་བསྡུ་བ་ལ་སོགས་པ་རྫོགས་པའི་རིམ་པ་བསྒོམ་པ་སྟེ། དེ་ལྟར་དེ་ཁོ་ན་ཉིད་བཅུ་པོ་དེས་ནི་མཉམ་བཞག་ཁོ་ན་བསྟན་ཏོ། །ལག་པའི་མཆོད་པ་ལ་སོགས་པ་བཞི་ནི་རྗེས་སྤྱོད་ཁོ་ན་སྟེ། རྗེས་སྤྱོད་ཀྱི་དུས་སུ་ལག་པའི་མཆོད་པ་བྱ་བ་དང་། དབང་བསྐུར་བ་ཁྲུས་ཀྱི་རྣལ་འབྱོར་བྱ་བ་དང་། རྗེས་ཀྱི་དུས་སུ་གོ་ཆ་ཆེན་པོས་བདག་ཉིད་ཡང་དག་པར་བསྲུང་བ་དང་། རྩ་བའི་སྔགས་བརྗོད་པ་ལ་སོགས་པའི་སྔགས་རྣམས་ཀུན་གྱི་མཆོད་པ་བྱ་བ་སྟེ། དེ་ལྟར་ན་འབྲས་བུ་འགྲུབ་པ་ལ་མི་བསླུ་ཞིང་། སྒྲུབ་པ་པོ་ལ་ཕན་འདོགས་པར་བྱེད་པ་དེ་ཁོ་ན་ཉིད་བཅུ་བཞི་པོ་དེ་ནི་བདེ་མཆོག་ཉུང་ངུའི་རྒྱུད་འདིར། འབུམ་ཕྲག་གསུམ་པའི་རྒྱུད་ལས་མདོར་བསྡུས་ནས་བཤད་པ་ཡིན་ནོ། །གསུམ་པ་བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པ་ལ་གཉིས་ཏེ། རྒྱུད་ཀྱི་བརྗོད་བྱ་མ་ལུས་པ་འཁྲུགས་སྡེབས་པའི་ལམ་གྱི་རིམ་པ་དང་། ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བའོ། །དང་པོ་ནི་རྣལ་འབྱོར་མ་ཀུན་ཏུ་སྤྱོད་པའི་བརྗོད་བྱ་ཐམས་ཅད་བསྡུ་ན། གཉིས་སུ་བསྡུ་བ་དང་། གསུམ་དུ་བསྡུ་བ་དང་། བཞིར་བསྡུ་བ་གསུམ་ལས། དང་པོ་ནི། དེ་བཞིན་གཤེགས་པའི་དབུགས་དབྱུང་དང་། རྡོ་རྗེ་འཛིན་པའི་དབུགས་དབྱུང་གཉིས་ཏེ། དེ་ཉིད་རྒྱུའི་དབང་དུ་བྱས་ན་ཀུན་རྫོབ་ཀྱི་བདེན་པ་ནི་དེ་བཞིན་གཤེགས་པའི་དབུགས་དབྱུང་། དོན་དམ་པའི་བདེན་པ་ནི་རྡོ་རྗེ་འཛིན་པའི་དབུགས་དབྱུང་། ལམ་གྱི་དབང་དུ་བྱས་ན་བསྐྱེད་རིམ་དང་རྫོགས་རིམ་གཉིས། འབྲས་བུའི་དབང་དུ་བྱས་ན་གཟུགས་སྐུ་དང་། ཆོས་སྐུ་གཉིས་ལ་དབུགས་དབྱུང་གཉིས་སྦྱར་དགོས་ཏེ། ཀུན་སྤྱོད་ལེའུ་བཅུ་གསུམ་པ་ལས། བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་བརྟེན་པ་ཡིན། །ཞེས་དང་། ལེའུ་བཅུ་གཅིག་པ་ལས། བདེ་གཤེགས་དབུགས་དབྱུང་གསུངས་པ་ནི། །དག་པའི་ལུས་ནི་སྐྱོན་མེད་པ། །ཞེས་གསུངས་པས་སོ། །གཉིས་པ་ནི་ལམ་གྱི་ཀུན་ཏུ་སྤྱོད་པ་དང་། དེ་རྫོགས་པར་བྱེད་པའི་ཡན་ལག་གི་ཀུན་ཏུ་སྤྱོད་པ་དང་། འབྲས་བུའི་ཀུན་ཏུ་སྤྱོད་པ་གསུམ་དུ་འདུས་སོ། །གསུམ་པ་ནི་དེའི་སྔོན་དུ་རྒྱུའི་ཀུན་སྤྱོད་སྔོན་དུ་སོང་བ་ཉམས་སུ་ལེན་པའི་རྟེན་གྱི་གང་ཟག་བགྲངས་ན་བཞིར་འགྱུར་རོ། །དེ་ལྟར་བཤད་ན་ཆོས་ཐམས་ཅད་ཀྱི་རང་བཞིན་སེམས་ཀྱི་རང་བཞིན་སེམས་ཀྱི་ཆོས་ཉིད་སྤྲོས་བྲལ་སྔོན་དུ་འགྲོ་བའི་རྟེན་གྱི་གང་ཟག་ལ་རིགས་གཉིས་ཏེ། ལམ་ལ་འཇུག་པ་དང་། ཞུགས་པའོ། །ལམ་ལ་འཇུག་པ་ལ་གསུམ། སྔར་མི་དགེ་བ་འབའ་ཞིག་སྤྱོད་པ་མ་དག་པ་དང་། སྔར་ཕ་རོལ་ཏུ་ཕྱིན་པས་ཅི་རིགས་རྒྱུད་སྦྱངས་པ་དག་པ་དང་། རེས་སྡིག་པ་སྤྱོད་ཅིང་རེས་དགེ་བ་སྤྱོད་པ་འདྲེས་པ་སྟེ། དེ་སྐད་དུ། དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །ཞེས་གསུངས་པས་སོ། །ལམ་ལ་ཞུགས་པ་ལ་ཡང་གསུམ་སྟེ། བསྐྱེད་པའི་རིམ་པ་འབའ་ཞིག་ལ་དགའ་བ་མཉེས་པར་བྱེད་པའི་སྒྲུབ་པ་པོ་དང་། རྫོགས་པའི་རིམ་པ་འབའ་ཞིག་བསྒོམས་པའི་རྣམ་པར་དག་པའི་སྒྲུབ་པ་པོ་དང་། ཟུང་དུ་འཇུག་པ་ལ་དགའ་བ་གསལ་བྱེད་ཡོན་ཏན་ལྡན་པ་ཞེས་བྱ་བ་སྟེ། དེ་ཡང་། མཉེས་བྱ་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མི། །ཞེས་གསུངས་པ་ཡིན་ནོ། །ཡང་རྒྱུད་འདི་ནི་གང་ཟག་གཉིས་ཏེ། སྤང་བར་བྱ་བ་དང་། བསྒྲུབ་བར་བྱ་བའི་གང་ཟག་གོ །དང་པོ་ནི། ལེའུ་བཅུ་གཅིག་པ་ལས། ལྐུགས་ཅིང་གླེན་པ་སྡིག་དང་ལྡན། །བྱིས་པའི་ཤེས་པས་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་པ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང་། །ཁེངས་པ་ལ་ནི་རྟག་དགའ་བ། །ང་རྒྱལ་ལ་སོགས་བདུན་སེམས་ལྡན། །དེ་དག་ཀུན་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཞེས་པའི་ཡན་ལག་གསུངས་པ་དང་། སྒྲུབ་པའི་མཚན་ཉིད་ཀྱང་དེ་ཉིད་ལས། བླ་མའི་རིམ་པས་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བ་བྱེ་བ་སྟོང་ཕྲག་ཏུ། །ང་ཡིས་ཡེ་ཤེས་ཀྱིས་བསྐུལ་ཡིན། །དད་པ་ཡང་དག་ལྡན་པ་དང་། །རྣལ་འབྱོར་སྤྱོད་ཚུལ་ལ་གནས་ཡིན། །ཞེས་གསུངས་ལ། ལེའུ་དང་པོ་ལ་རྣལ་འབྱོར་གྱི་དབང་ཕྱུག་ཅེས་གསུངས་སོ། །གཉིས་པ་ལམ་གྱི་ཀུན་ཏུ་སྤྱོད་པ་ལ་གསུམ། རྟེན་དང་བརྟེན་པར་བཅས་པ་བསྐྱེད་པ་ཕྱིའི་ཀུན་སྤྱོད་སྤྲུལ་པའི་སྐུ་ལམ་དུ་བྱེད་པ་དང་། ལུས་ལ་ལྷ་རྣམས་རྫོགས་པར་བསྒོམ་པ་ནང་གི་ཀུན་སྤྱོད་ལོངས་སྐུ་ལམ་དུ་བྱེད་པ་དང་། རྫོགས་པའི་རིམ་པ་ཉམས་མྱོང་དང་བཅས་པ་ནི་རྫོགས་པའི་ཀུན་སྤྱོད་ཆོས་སྐུ་ལམ་དུ་བྱེད་པའོ། །གསུམ་པ་དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་ལ་གསུམ་སྟེ། དང་པོ་གཉིས་རྫོགས་པར་བྱེད་པའི་ཡན་ལག་དང་། གསུམ་ཀ་རྫོགས་པར་བྱེད་པའི་ཡན་ལག་དང་། དེ་དག་བརྟན་པར་བྱེད་པའི་སྤྱོད་པའོ། །དང་པོ་ལ་ལྔ་སྟེ། ཕུང་པོ་ཁམས་དང་སྐྱེ་མཆེད་སྦྱང་བསྒྱུར་དང་། ཚོགས་གཉིས་བསག་པ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་དང་། དབང་བསྐུར་བའོ། །གཉིས་པ་ལ་ལྔ་སྟེ། སྔགས་མཆོད་དང་། གསང་བའི་མཆོད་པ་དང་། དམ་ཚིག་ཅན་ལ་གཏོར་མ་སྦྱིན་པ་དང་། དམ་ཚིག་དང་སྡོམ་པ་དང་། ཐུན་མོང་གི་བྱ་བ་བྱང་ཆུབ་ཀྱི་ཕྱོགས་ཀྱི་དག་པ་དང་། ཐུན་མཚམས་ཀྱི་བྱ་བའོ། །འདི་ལ་ཡང་ལྔ་སྟེ། ཁམས་དང་རྒྱན་ཆའི་དག་པ། སུམ་བྷ་ནིས་བསྲུང་བ། སྤྱོད་ལམ་གྱི་རྣལ་འབྱོར། ཁ་ཟས་ཀྱི་རྣལ་འབྱོར། ཉལ་བ་དང་ལྡང་བའི་རྣལ་འབྱོར་རོ། །གསུམ་པ་ལ་རང་དོན་གྱི་སྤྱོད་པ་དང་། གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་གཉིས་ལས། དང་པོ་ལ་གསུམ་སྟེ། བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ། གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པའོ། །གསུམ་པ་འབྲས་བུའི་ཀུན་ཏུ་སྤྱོད་པ་ལ་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་གསུམ་སྟེ། དེ་ལྟར་ན་ཀུན་ཏུ་སྤྱོད་པ་ཞེས་པའི་ཚིག་དེ་ཉིད་ཀྱིས། འཁོར་ལོ་བདེ་མཆོག་གི་ལམ་དང་འབྲས་བུ་མ་ལུས་པ་བསྟན་ཅིང་། ལེའུ་གང་ནས་གང་འབྱུང་ནི་རྒྱུད་ཉིད་ཀྱི་སྟེང་དུ་རྟོགས་པར་བྱའོ། །གཉིས་པ་ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བ་ནི། ཀུན་སྤྱོད་ལེའུ་བཅུ་གཉིས་པ་ལས། འདུག་དང་ལྡང་བ་ཉིད་དང་ནི། །འཇུག་དང་རྫོགས་པ་ཉིད་དག་དང་། །བྱིན་གྱིས་བརླབ་དང་དབང་བསྐུར་དང་། །ཏིང་འཛིན་མཆོད་པ་བསྡུ་བ་ཡིན། །ཞེས་བྱ་བ་དེ་ཁོ་ན་ཉིད་བཅུ་སྟེ། དེ་ལ་འདུག་པ་ཞེས་བྱ་བ་ནི། ཚངས་པའི་གནས་བཞི་དང་། གཞི་སྦྱང་བསྒྱུར་དང་། སྲུང་བའི་འཁོར་ལོ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་ནས་བདག་མེད་པ་ལ་བློ་ཅུང་ཟད་འདུག་པ་ཡིན་ནོ། །གཉིས་པ་ལྡང་བ་ནི། བྱང་ཆུབ་ཀྱི་སེམས་ཀྱི་རྒྱུན་གྱིས་སེམས་ཅན་གྱི་དོན་བྱའོ་སྙམ་པའི་བསམ་པས་འབྱུང་བ་རིམ་བརྩེགས་རི་རབ་དང་བཅས་པ་བསྒོམ་པའོ། །གསུམ་པ་འཇུག་པ་ནི་རི་རབ་ཀྱི་སྟེང་དུ་མངོན་པར་བྱང་ཆུབ་པ་ལྔ་ལས་རྟེན་དང་བརྟེན་པ་དུས་གཅིག་ཏུ་ཤིན་ཏུ་གསལ་བར་ཕྱིའི་དཀྱིལ་འཁོར་བསྒོམ་པ་ཡིན་ནོ། །བཞི་པ་རྫོགས་པ་ནི་ལུས་ཀྱི་དཀྱིལ་འཁོར་རྫོགས་པར་བསྒོམས་པ་སྔགས་ཀྱིས་བྱིན་གྱིས་བརླབ་པའོ། །ལྔ་པ་བྱིན་གྱིས་བརླབ་པ་ནི་ཕོ་ཉ་བསྲེ་བ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་ཡིན་ནོ། །དྲུག་པ་དབང་བསྐུར་བ་ནི་རིགས་ཀྱི་བདག་པོས་རྒྱས་གདབ་པ་དང་བཅས་པའོ། །བདུན་པ་ཏིང་ངེ་འཛིན་ནི་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱས་ལ་ལྷའི་སྐུ་མདོག་དང་ཕྱག་མཚན་ལ་སེམས་ཅུང་ཟད་འཛིན་པ་ཡིན་ནོ། །བརྒྱད་པ་མཆོད་པ་ནི་སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་དང་། གསང་བའི་མཆོད་པ་སྟེ། དེ་ལ་བཟླས་པ་སྔགས་མཆོད་ཀྱི་ཁོངས་སུ་འདུས་ལ། གསང་བའི་མཆོད་པ་ནི་རྫོགས་པའི་རིམ་པར་འགྲོ་བའི་སྐབས་ཀྱང་ཡོད་དོ། །གཏོར་མའང་མཆོད་པའི་སྐབས་སུ་འདུ་བ་ཡིན་ཏེ། ཐུན་གོང་མ་རྣམས་ལ་གཏོར་མ་ནི་ཐུན་མཇུག་བསྡུ་བའི་རྗེས་ལ་བཏང་ལ། ཐུན་ཐ་མ་ལ་ནི་གཏོར་མ་དང་དག་པའི་རྗེས་ལ་བསྡུ་བ་བསྒོམ་པ་ཡིན་ནོ། །ཐུན་མཚམས་ཀྱི་བྱ་བ་ལ་ཁ་ཟས་དང་། སྤྱོད་ལམ་དང་། ཕྱི་མཆོད་དང་། ལག་མཆོད་ཀྱང་མཆོད་པའི་ཁོངས་སུ་བསྡུ་ལ། གནས་སྐབས་ཀྱི་མཆོད་པའི་ཚེས་བཅུའི་མཆོད་པའང་མཆོད་པའི་ཕྱིར་འདུའོ། །དགུ་པ་བསྡུ་བ་ཞེས་བྱ་བ་ནི་རྫོགས་པའི་རིམ་པ་སྟེ་རྡོ་རྗེ་སེམས་དཔའ་བསྡུ་བ་ལྟ་བུས་དཀྱིལ་འཁོར་རིམ་པས་བསྡུས་ལ། ཐུན་གོང་མ་རྣམས་ལ་ནི་དེ་ལས་ལངས་ནས་དག་པ་རྗེས་སུ་དྲན་པར་བྱེད་པ་ཡིན་ལ། ཐུན་ཐ་མ་ལ་ནི་དག་པ་རྗེས་དྲན་གྱི་རྗེས་ལ་རྡོ་རྗེ་སེམས་དཔའ་བསྡུ་བར་བྱས་ནས་དེའི་ངང་ལ་ཉལ་བའི་རྣལ་འབྱོར་བྱེད་པ་ཡིན་ནོ། །བཅུ་པ་ཡིན་ཞེས་པ་ངེས་པ་སྟེ། དག་པ་ནི་ཁམས་ཀྱི་དག་པ་དང་། རྒྱན་ཆེའི་དག་པ་བྱས་ལ། དཀྱིལ་འཁོར་གྱི་འཁོར་ལོ་བསྡུས་ཏེ་ཚམ་རྔམ་སྔགས་ཀྱིས་བསྲུངས་ལ། སྤྱོད་ལམ་གྱི་རྣལ་འབྱོར་བྱེད་པ་ཡིན་ནོ་ཞེས་རྗེ་བཙུན་གསུང་ངོ་། །གསུམ་པ་བརྩམ་བྱའི་བསྟན་བཅོས་འཕྲོས་དོན་དང་བཅས་པ་ནི། དེ་ལྟར་ན་སློབ་དཔོན་འདིས་མངོན་པར་རྟོགས་པའི་གཞུང་ཆོ་གའི་ཡན་ལག་ཕལ་ཆེར་ཀུན་ཏུ་སྤྱོད་པའི་རྒྱུད་ལ་བརྟེན་ནས་བརྩམ་པ་ཡིན་ནོ། །དེའི་རྒྱུ་མཚན་གྱིས། འདིའི་རྒྱུད་རྒྱས་པའི་ནང་ནས། རྒྱུད་བསྡུས་པ་འདི་རང་གཞུང་གི་ཤེས་བྱེད་དུ། སློབ་དཔོན་ཉིད་ཀྱིས་ཕྱུང་སྟེ། ཐོག་མར། གང་གི་དྲིན་གྱིས་བདེ་ཆེན་ཉིད། །ཅེས་སོགས་ཚིགས་བཅད་གཅིག་གི་མཆོད་བརྗོད་ཀྱང་མཛད་པ་ཡིན་ལ། གང་ཞིག་ཕྱུང་ན་རྗེ་བཙུན་གྱིས་རྒྱུད་རྒྱས་པ་ལ་རྟོག་པ་དྲུག་ཅུ་རྩ་བཞི་བཞུགས་ཤིང་། རྟོག་པ་རེ་རེ་ལ་ལེའུ་བཅུ་བདུན་བཅུ་བདུན་དུ་བཞུགས་པ་ལས། རྒྱུད་ཉུང་ངུ་འདི་ནི་ཉི་ཤུ་པ་རིག་འཛིན་གྲུབ་པའི་རྟོག་པ་སོང་བའི་རྗེས་ལ་ཉེར་གཅིག་པ་འཁོར་ལོ་གསུམ་བཀོད་པའི་རྟོག་པ་ཡིན་པར་བཞེད་ཅིང་། པུ་ཧྲངས་པའི་རྗེས་སུ་འབྲངས་པ་དག་རྟོག་པ་ཉི་ཤུ་རྩ་ལྔ་པ་ཡིན་པར་བཞེད་དོ། །དེས་ན་སློབ་དཔོན་གྱི་གཞུང་འདི་རྒྱ་བོད་ཀུན་ཏུ་ཉི་ཟླ་ལྟར་དུ་གྲགས་པས། རྒྱ་གར་དུ་ཡང་ལྭ་བ་པ་དང་། པྲཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེ་དང་། ཀུ་མཱ་ར་བོ་དྷི་དང་། ཇོ་བོ་རྗེའི་འགྲེལ་པ་རྣམས་ཡོད་ཅིང་། བོད་དུ་ཡང་ཇོ་བོའི་གསུང་སྒྲོས་བྲིས་པ་ལོ་ཆེན་རིན་བཟང་གི་ཊཱི་ཀ་དང་། མར་དོའི་རྗེས་འབྲངས་ལ་གློ་བོ་ལོ་ཙྪ་བ་དང་། བནྡེ་རྒྱ་མཚོ་གྲགས་ཀྱི་ཊཱི་ཀ་གཉིས་དང་། པུ་ཧྲངས་པའི་རྗེས་འབྲངས་ལ་དམར་ཆོས་ཀྱི་རྒྱལ་པོའི་ཊཱི་ཀ་དང་། མལ་གྱོའི་རྗེས་འབྲང་ལ་གཉན་ཕུལ་བྱུང་བའི་འབྲུ་འབུམ་དང་། རྗེ་བཙུན་གྱི་དོན་འགྲེལ་དང་། དགའ་ལྡན་པ་ཆོས་ཀྱི་རྒྱལ་མཚན་གྱི་ཊཱི་ཀ་རྣམས་ཡོད་དོ། །བཞི་པ་བསྟན་བཅོས་ཀྱི་བརྗོད་བྱ་མངོན་རྟོགས་ཉིད་བཤད་པ་ལ་བཞི་སྟེ། གང་དུ་བསྒོམ་པའི་གནས། གང་གིས་སྒོམ་པའི་གང་ཟག གང་བསྒོམ་པའི་རྣལ་འབྱོར། དེ་ལྟར་བསྒོམས་པའི་འབྲས་བུའོ། །དང་པོ་ནི། མངོན་བརྗོད་བླ་མ་ལས། རི་སུལ་དང་ནི་རི་རྩེ་དང་། །ཆུ་བོའི་ངོགས་དང་འདུས་པ་དང་། །རྒྱ་མཚོ་ཆེན་པོའི་འགྲམ་དག་དང་། །ཤིང་གཅིག་དང་ནི་ཞི་བའི་གནས། །མ་མོའི་ཁྱིམ་མམ་དུར་ཁྲོད་དམ། །སྣ་ཚོགས་སྐྱེད་མོས་ཚལ་མཆོག་གམ། །ལྷ་ཁང་དང་ནི་མཆོད་རྟེན་ནམ། །ཁྱིམ་མམ་བཞི་མདོ་དག་ཏུ་ནི། །སྒྲུབ་པ་པོ་ཡིས་སྦྱོར་བསྒྲུབ་ན། །འདོད་པ་ཀུན་གྱིས་འབྲས་བུ་གསོལ། །གནས་ནི་བརྟག་པར་བྱས་པའམ། །ཡིད་ནི་གང་དུ་དགའ་བ་དེར། །སྣ་ཚོགས་བདེ་མཆོག་དམ་པ་དེར། །དེ་རུ་བསྒྲུབས་ན་དངོས་གྲུབ་འགྱུར། །དབྱེ་བ་དུ་མས་བསྒོམ་པ་ནི། །གདུལ་བྱའི་བསམ་པའི་དབང་གིས་སོ། །ཞེས་གསུངས་པའི་རི་སུལ་ནས་བཞི་མདོའི་བར་རྣམས་གདུལ་བྱའི་བསམ་པའི་དབང་གིས་རྒྱས་པར་དབྱེ་བ་ཡིན་ལ། མདོར་བསྡུ་ན། ཡིད་ནི་གང་དུ་དགའ་བ་དེར། །ཞེས་པ་སྟེ། ཀྱཻ་རྡོ་རྗེར། དང་པོར་གོམས་པར་བྱེད་དུས་ཀྱི། །གནས་ནི་གང་དུ་སྔགས་པའི་སེམས། །གཅིག་ཏུ་མཉམ་གཞག་འགྲུབ་འགྱུར་བའི། །གནས་ནི་བཟང་པོ་ངེས་པར་བརྟག །རང་གི་ཁྱིམ་དུ་ཞེས་གསུངས་པ་དང་མཐུན་ནོ། །གཉིས་པ་ནི་གཞུང་ལས། དང་པོར་རེ་ཤིག་རྣལ་འབྱོར་པའི་དབང་ཕྱུག་གིས་ཞེས་གསུངས་ཏེ། འདི་ལ་བཤད་པ་གསུམ་དུ་གསུངས་པ་ལས། དང་པོ་ནི་རྣལ་འབྱོར་པའི་ཞེས་པ་ནི། སློབ་པའི་རྣལ་འབྱོར་པ་དང་། མི་སློབ་པའི་རྣལ་འབྱོར་པ་གཉིས་སོ། །དེ་ལ་དང་པོ་ནི་རྣལ་འབྱོར་ཏེ། དང་པོ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་ཐོབ་ནས་མཉམ་པར་བཞག་པའི་རྣལ་འབྱོར་བསྐྱེད་རྫོགས་གཉིས་ལ་སྐུ་གསུམ་ལམ་དུ་བྱེད་པ་བསྒོམ་པ་དང་། ཐུན་མཚམས་སུ་གཏོར་མ་གཏོང་བ་གཏོར་མའི་རྣལ་འབྱོར་དང་། ཁ་ཟས་ཀྱི་རྣལ་འབྱོར། ནང་གི་སྦྱིན་སྲེག་དང་། དུས་ཐམས་ཅད་དུ་ལྷའི་ང་རྒྱལ་དང་མི་འབྲལ་བའི་སྤྱོད་ལམ་གྱི་རྣལ་འབྱོར་ཏེ་རྣལ་འབྱོར་བཞི་ཡིན་ལ། པའི་ཞེས་པ་ནི་བཞི་པོ་དེ་དག་ལྡན་པའི་རྣལ་འབྱོར་པའོ། །དབང་ཕྱུག་ནི་བཞི་པོ་དེ་ལ་ཐུན་བཞི་ཡི་རིམ་གྱིས་གོམས་པར་བྱས་པས་དེ་ལ་དབང་དུ་གྱུར་པའོ། །ཡང་བཤད་པ་གཉིས་པ་ནི་མི་སློབ་པའི་རྣལ་འབྱོར་པའི་དབང་དུ་བྱས་ན། རྣལ་འབྱོར་ནི་ཆོས་ཐམས་ཅད་བསམ་གྱིས་མི་ཁྱབ་པ་ཐབས་ཤེས་རབ་གཉིས་སུ་མེད་པ་ཡིན་ལ། པ་ནི་དེ་དང་ལྡན་པའོ། །དབང་ཕྱུག་ནི་མཚོན་བྱེད་ཀྱི་རྫོགས་པའི་རིམ་པ་ལ་མི་ལྟོས་པར་བསམ་གྱིས་མི་ཁྱབ་པ་ལ་དབང་ཐོབ་པ་སྟེ། དེ་ཡང་དང་པོ་དཀྱིལ་འཁོར་དུ་ཞུགས་ཏེ་ལྷ་དང་སྐལ་བ་མཉམ་པར་བྱས་པའི་རྣལ་འབྱོར་པས་ཞག་གཅིག་ལ་ཐུན་བརྒྱད་དུ་བསྒོམས་པའི་བཞི་ཆའམ་བརྒྱད་ཆ་གཅིག་གིས་བར་དུ་ཆོས་ཐམས་ཅད་བསམ་གྱིས་མི་ཁྱབ་པ་ལ་རང་གི་ངང་གིས་མཉམ་པར་འཇོག་པར་ནུས་པ་ནི་རབ་ཀྱི་ཡང་རབ་སྟེ་དེ་ནི་མི་སློབ་པའི་རྣལ་འབྱོར་ཞེས་བྱའོ། །གང་ཟག་དེའི་བསྐྱེད་པའི་རིམ་པའི་དོད་ནི། བླ་མའི་ཆགས་ལྷྭམ་གཉིས་རང་གི་སྤྱི་བོར་བསམས་ནས། བླ་མ་སངས་རྒྱས་བླ་མ་ཆོས། །ཞེས་པ་ལ་སོགས་པས་མོས་གུས་བྱེད་པའོ། །དེས་བསྐྱེད་པའི་རིམ་པར་ཅིས་ཏེ་འགྲོ་སྙམ་ན་བསྐྱེད་རིམ་བསྒོམས་པས་ཀྱང་རང་གི་རྒྱུད་ལ་ཚོགས་གསོག་ཅིང་སྒྲིབ་པ་སྦྱོང་བར་བྱེད་པ་བཞིན་དུ་སྔ་མས་ཀྱང་རང་གི་རྒྱུད་ལ་ཚོགས་གསོག་ཅིང་སྒྲིབ་པ་སྦྱོང་བར་བྱེད་པའི་ཕྱིར་རོ། །འདིའི་རྫོགས་པའི་རིམ་པ་ནི་སྔར་སློབ་པའི་རྣལ་འབྱོར་པ་སློབ་པའི་དུས་སུ་མཚོན་བྱེད་ལ་ལྟོས་པའི་རྫོགས་པའི་རིམ་པ་རྡོ་རྗེ་སེམས་དཔའ་བསྡུས་པ་ལ་སོགས་པ་ལ་གོམས་པར་བྱས་ཟིན་པ་ཡིན་པས་མི་སློབ་པའི་རྣལ་འབྱོར་བསྒོམ་པའི་དུས་སུ་མཚོན་བྱེད་ལ་མི་ལྟོས་པར་ཆོས་ཐམས་ཅད་བསམ་གྱིས་མི་ཁྱབ་པ་གསལ་ལ་མི་རྟོག་པ་དེ་བསྒོམ་པའོ། །ཡང་བཤད་པ་གསུམ་པ་ནི་བདེ་མཆོག་ཉུང་ངུ་དང་། རྣལ་འབྱོར་མ་ཀུན་ཏུ་སྤྱོད་པའི་རྒྱུད་ཀྱི་དགོངས་པས་རྒྱུད་སྡེ་དྲུག་ཏུ་གནས་པ་ཡིན་པས་ན། དེ་ཡང་རྣལ་འབྱོར་པའི་ཞེས་པ་ནི་བྱ་བའི་རྒྱུད་ལ་སོགས་པའི་ཆོ་ག་ཉམས་སུ་ལེན་པའི་གང་ཟག་ལ་བྱ་བའི་རྒྱུད་ཀྱི་རྣལ་འབྱོར་པ་ཞེས་པ་ལ་སོགས་པར་མིང་འདོགས་པ་ཡིན་ལ། རྒྱུད་འདི་རྒྱུད་སྡེ་དྲུག་པ་མའི་ཡང་མ་བླ་ན་མེད་པའི་རྒྱུད་ཡིན་པས་རྒྱུད་འདིའི་ལམ་ཉམས་སུ་ལེན་པའི་སྒྲུབ་པ་པོ་ལ་ཡང་མིང་རྣལ་འབྱོར་པའི་དབང་ཕྱུག་ཞེས་བྱ་སྟེ། དཔེར་ན་འཇིག་རྟེན་ན་བཙུན་མོ་རྣམས་ཀྱི་ཁྱོ་གྲལ་གྱི་གོ་རིམ་མམ། ག་བུར་ལ་སོགས་པའི་སྨན་གྱི་སྣོད་ཀྱི་གོ་རིམ་བཞིན་ནོ། །དེས་ན་འདིར་རྟེན་གྱི་གང་ཟག་ཁྱད་པར་དུ་བསྟན་པ་འདིས་ནི་གང་ཟག་བཞི་ལས་ཡང་རབ་ཀྱི་ཉམས་སུ་བླང་བྱ་ཡིན་པར་ཤུགས་ལ་བསྟན་ནོ། །དེའི་ཕྱིར་བླ་མ་ཕམ་འཐིང་པ་ནི་སྒྲུབ་པའི་ཐབས་འདི་ཉམས་སུ་ལེན་པའི་གང་ཟག་ཡང་རབ་བཞིར་བཞེད་ལ། བླ་མ་དུས་འཁོར་བ་དང་། ཁ་ཆེ་བྱང་ཆུབ་བཟང་པོ་ནི་འདིར་རབ་ཀྱི་རབ་མི་སློབ་པའི་རྣལ་འབྱོར་པའི་ཉམས་བླང་ཕར་བོར་ནས་སློབ་པའི་རྣལ་འབྱོར་ཉམས་སུ་ལེན་པ་ལ་སྒྲུབ་ཐབས་རྒྱས་འབྲིང་བསྡུས་པ་གསུམ་དུ་བཞེད་དོ། །གསུམ་དུ་ཕྱེ་བ་ནི་གཉན་ཕུལ་བྱུང་བས་བཤད་ལ། རྗེ་བཙུན་རྩེ་མོས་ནི་དེ་དག་གི་དོན་བསྡུས་ནས། སེམས་ཅན་ཐམས་ཅད་ལ་གཅིག་ཏུ་བརྩེ་བའི་བློ་དང་ལྡན་པས་ཡང་དག་པའི་བླ་མ་བསྙེན་བཀུར་བས། དཔལ་སྡོམ་པའི་དཀྱིལ་འཁོར་དུ་དབང་བསྐུར་ཞིང་རྗེས་སུ་གནང་བ་ཐོབ་པ་སྤྱི་དང་ཁྱད་པར་གྱི་དམ་ཚིག་ལ་གནས་ཤིང་། བླ་མའི་མན་ངག་གི་ལུང་ཡང་དག་པ་དང་ལྡན་པའི་རྣལ་འབྱོར་པའི་དབང་ཕྱུག་གིས་ཞེས་གསུངས་ཤིང་། རྗེ་བཙུན་ཡང་འདི་བཞིན་དུ་བཞེད་དོ། །དམར་གྱིས་རྣལ་འབྱོར་ནི་ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་ལ་བྱ། དབང་ཕྱུག་ནི་དེ་ཉིད་ལ་དབང་བསྒྱུར་ཞིང་ཕྱུག་པ་སྟེ། མཐར་ཐུག་སངས་རྒྱས་སོ། །ད་ལྟའི་རྣལ་འབྱོར་པ་ལ་དེ་ལྟར་དུ་མིང་འདོགས་པ་ནི་རྒྱུ་ལ་འབྲས་བུའི་མིང་གིས་བཏགས་པའོ་ཞེས་བཞེད་དེ། མིང་གི་འདོགས་ཚུལ་འདི་ནི་སྔར་གྱི་བཤད་ཚུལ་ཐམས་ཅད་ལ་ཡང་ཉེ་བར་མཁོ་བ་ཞིག་སྣང་ངོ་། །གསུམ་པ་ལ་གཉིས་ཏེ། ཇོ་བོ་བྷ་ཌནྟ་ནས་བརྒྱུད་པའི་མངོན་རྟོགས་ཀྱི་ཆིངས་བཤད་པ། ཕམ་འཐིང་པ་ནས་བརྒྱུད་པའི་ཉམས་ལེན་ཞིབ་ཏུ་བཤད་པའོ། །དང་པོ་ནི་རྗེ་བཙུན་པུ་ཧྲངས་ལོ་ཆུང་པ་ནས་རིམ་པ་བཞིན་དུ་བརྒྱུད་པའི་མན་ངག་དམར་ཆོས་ཀྱི་རྒྱལ་པོས་འདི་ལྟར་བཤད་དེ། རྟེན་བསྐྱེད་པའི་རིམ་པ་ལ་མཉམ་པར་བཞག་པའི་རྣལ་འབྱོར་ནི། མཉམ་པར་བཞག་པའི་ཆོས་བཅུ་བཞིས་བསྡུས་པ་ཡིན་ནོ། །ཅི་ལྟར་ན་འདི་ལ་རྒྱུའི་ལྷག་མོས་དང་། འབྲས་བུའི་ལྷག་མོས་གཉིས་ལས། དང་པོ་ལ་ཡང་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་ཉོན་མོངས་པའི་སྒྲིབ་པ་ལས་བསྲུང་བའི་དོན་དུ་རྣལ་འབྱོར་བསྲུང་བ་དང་། ཤེས་བྱའི་སྒྲིབ་པ་ལས་བསྲུང་བའི་དོན་དུ་བདག་བསྲུང་བ་དང་། ཕྱིའི་བགེགས་ལས་བསྲུང་བའི་ཕྱིར་གནས་བསྲུང་བ་སྟེ། ཚད་མེད་བཞི་བསྒོམ་པ་དང་། ཕུང་ཁམས་སྐྱེ་མཆེད་བྱིན་གྱིས་བརླབ་པ་དང་། སྲུང་བའི་འཁོར་ལོ་བསྒོམ་པ་གསུམ་ལ་བཞེད་དོ། །གཉིས་པ་ལ་གཉིས་ཏེ། ཀུན་རྫོབ་ཀྱི་བདེན་པ་རྟོགས་པར་བྱ་བའི་ཕྱིར་བསོད་ནམས་ཀྱི་ཚོགས་བསག་པ་དང་། དོན་དམ་པའི་བདེན་པ་ལ་རྨོངས་པ་སྤང་བའི་ཕྱིར་ཡེ་ཤེས་ཀྱི་ཚོགས་བསག་པའོ། །གཉིས་པ་འབྲས་བུའི་ལྷག་མོས་ལ་གཉིས་ཏེ། རྟེན་དང་བརྟེན་པར་བཅས་པའི་སངས་རྒྱས་ཀྱི་ཞིང་སྦྱང་བའི་ཕྱིར་བདེ་བ་ཆེན་པོ་འབྲས་བུ་སྤྱིའི་ལྷག་མོས་དང་། སྐུ་གསུམ་ལམ་དུ་བྱ་བའི་ཕྱིར་འབྲས་བུ་བྱེ་བྲག་གི་ལྷག་མོས་སོ། །འདི་ལ་གསུམ་སྟེ། ཆོས་སྐུ་ལམ་དུ་བྱ་ཞིང་ལམ་དང་ལྷ་ལ་ཐེ་ཚོམ་སྤང་བའི་ཕྱིར་ཆོས་སྐུའི་ལྷག་མོས་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་དང་། ལོངས་སྐུ་ལམ་དུ་བྱ་ཞིང་གཙོ་བོའི་ལུས་ལ་ཞེན་པ་སྤང་བའི་ཕྱིར་ལོངས་སྐུའི་ལྷག་མོས་ལུས་ལ་སྐུའི་དཀྱིལ་འཁོར་འགོད་པ་དང་། སྤྲུལ་སྐུ་ལམ་དུ་བྱ་ཞིང་ཆོས་ཐམས་ཅད་སྤྲོ་བ་དང་བསྡུ་བའི་སྒོ་ནས་ཏིང་ངེ་འཛིན་དུ་མ་ལ་དབང་འབྱོར་པར་བྱ་བའི་ཕྱིར་སྤྲུལ་སྐུའི་ལྷག་མོས་སོ། །འདི་ལ་དྲུག་སྟེ། ཏིང་ངེ་འཛིན་བརྟན་པར་བྱ་བའི་ཕྱིར་གོ་ཆ་བགོ་བ་དང་། བཟང་ངན་ནམ་ཐ་དད་ཀྱི་རྟོག་པ་སྤོང་བའི་ཕྱིར་ཡེ་ཤེས་པ་གཞུག་པ་དང་། ཆོས་ཐམས་ཅད་གདོད་མ་ནས་རྣམ་པར་དག་པ་མཚོན་པའི་ཕྱིར་དབང་བསྐུར་བ་དང་། ལྷན་ཅིག་སྐྱེས་པའི་ཡེ་ཤེས་བདེ་བ་ཆེན་པོ་རྟོགས་པར་བྱ་བའི་ཕྱིར་མཆོད་པ་བྱ་བ་དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་མྱུར་དུ་འགྲུབ་པར་བྱ་བའི་ཕྱིར་བཟླས་པ་བྱ་བ་དང་། ཐུན་མཚམས་ཤེས་ཤིང་མཁའ་འགྲོ་མའི་བྱིན་རླབས་འབྱུང་བའི་ཕྱིར་དུ་བདུད་རྩི་མྱང་བའོ། །དེ་ལྟར་མཉམ་བཞག་གི་ཆོས་བཅུ་བཞི་པོ་དེ་རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་པས་བསྟན་པ་ཡིན་ནོ། །ཞེས་བཤད་དོ། །གཉིས་པ་ནི། རྗེ་བཙུན་ཕམ་འཐིང་པའི་མན་ངག་མལ་གྱོ་ནས་བརྒྱུད་པ་རྗེ་བཙུན་རིན་པོ་ཆེ་འདི་ལྟར་བཞེད་དེ། ལམ་མངོན་པར་རྟོགས་པ་ནི་བཞིས་བཅིངས་པ་སྟེ། མཉམ་པར་བཞག་པའི་རྣལ་འབྱོར། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། །ཉལ་བའི་རྣལ་འབྱོར་ནི་རྫོགས་པའི་རིམ་པའི་ཁོངས་སུ་འདུ་ལ། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་གཉིས་ནི་བསྐྱེད་རིམ་གྱི་སྔོན་འགྲོ་ཡིན་ཅིང་། དག་པ་རྗེས་སུ་དྲན་པ་ནི་ཁ་ཅིག་སྤྱོད་ལམ་གྱི་ཁོངས་སུ་ཡང་སྡུད་མོད་ཀྱི། འདིར་བསྐྱེད་རིམ་བརྟན་པར་བྱེད་པ་ཡིན་པས་མཉམ་གཞག་གི་ཁོངས་སུ་བསྡུའོ། །དང་པོ་མཉམ་པར་བཞག་པའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་གསུམ་སྟེ། རྒྱས་པ་ལ་དགའ་བས་ཅི་སྙེད་ཡོད་པའི་ཆོས་ཇི་ལྟ་བ་བཞིན་དུ་བསྒོམ་པ་དང་། འབྲིང་ལ་དགའ་བས་ཇི་ལྟ་བ་བཞིན་བསྒོམ་པ་དང་། བསྡུས་པ་ལ་དགའ་བས་རང་གི་ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་གཉིས་ཏེ། རྒྱུ་ཚོགས་གཉིས་བསག་པ་དང་། འབྲས་བུ་ལྷར་བསྐྱེད་པའོ། །དང་པོ་ལ་གཉིས་ཏེ། བསོད་ནམས་ཀྱི་ཚོགས་འཁོར་དང་བཅས་པ་དང་། དོན་ཆེན་པོ་ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི་སྟེ། སོག་པར་གྱུར་པའི་དགེ་བའི་རྩ་བ་ཐམས་ཅད་གཞན་དོན་དུ་འགྱུར་བར་བྱ་བའི་ཕྱིར་ཚངས་པའི་གནས་བཞི་བསྒོམ་པ་དང་། ཚོགས་སོག་པའི་རྟེན་ཁྱད་པར་ཅན་གཅིག་དགོས་པས་ཕུང་ཁམས་སྐྱེ་མཆེད་གཞི་སྦྱང་བསྒྱུར་དང་། ཚོགས་བསག་དངོས་དང་འབྲེལ་བས་ཚོགས་བསག་བཅུ་གསུམ་གྱིས་ཚོགས་བསག་པ་དང་། དོན་ཆེན་པོ་ཡེ་ཤེས་ཀྱི་ཚོགས་ལ་འཇུག་པ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པའོ། །དང་པོ་ལ་གཉིས་ཏེ། སྔོན་དུ་བྱ་བའི་རིམ་པ་དང་། རྣལ་འབྱོར་བསྒོམ་པ་དངོས་སོ། །དང་པོ་ནི། ཐོ་རངས་ཀྱི་དུས་སུ་ཚངས་པའི་གནས་བཞི་བསྒོམ་པའི་སྔོན་དུ་ལྡང་བའི་རྣལ་འབྱོར་འཇུག་ལ། དེའི་ཡང་སྔོན་དུ་ཉལ་བའི་རྣལ་འབྱོར་འཇུག་པའི་རིམ་པ་བཞིན་དུ་བརྗོད་ན། མདང་ནུབ་མོ་ཉལ་བའི་རྣལ་འབྱོར་ཆོས་ཐམས་ཅད་བསམ་གྱིས་མི་ཁྱབ་པ་རྡོ་རྗེ་སེམས་དཔའ་བསྡུ་བའི་རྫོགས་པའི་རིམ་པ་སྟོང་པ་ཉིད་ཀྱི་ངང་ལ་ཉལ་བར་བྱ་སྟེ། ཉལ་བའི་རྣལ་འབྱོར་རོ། །དེ་ནས་ལྡང་བའི་རྣལ་འབྱོར་ནས་ཚངས་པའི་གནས་བཞི་བསྒོམ་པ་ལ་ཐུག་གི་བར་དུ་སྔོན་དུ་བྱ་བའི་རིམ་པ་ལ་མན་ངག་ལས་འབྱུང་བའི་ལུགས་དང་། འགྲེལ་པ་དག་ལས་འབྱུང་བའི་ལུགས་དང་། དེས་ལུགས་སྔ་མ་འགོག་པ་མི་འཐད་པར་བསྟན་པ་དང་གསུམ་ལས། དང་པོ་ནི། ནམ་གྱི་བཞི་ཆའམ་བརྒྱད་ཆ་ནས་ལྡང་བར་འདོད་པས། ནམ་མཁའ་ལ་ཌཱ་མ་རུའི་སྒྲ་ཀ་ར་ཀ་ར་ཀུ་རུ་ཀུ་རུ་ཞེས་བྱ་བ་ལ་སོགས་པ་དཔའ་བོ་ཉི་ཤུ་རྩ་བཞིའི་སྔགས་སུ་གྲག་པས་བདག་གི་གཉིད་བསྐུལ་ནས་སད་པ་དང་མཉམ་དུ་དཔལ་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པ་ཡུམ་རྡོ་རྗེ་ཕག་མོ་དང་མཉམ་པར་སྦྱོར་བའི་སྐུ་ཅན་དུ་ལྡང་བར་བྱ་སྟེ། ལུས་ལྷར་བྱིན་གྱིས་བརླབ་པ་སྐུའི་དགའ་བའོ། །སྤྱིར་ལྡང་བའི་རྣལ་འབྱོར་ཙམ་ལ་ཞལ་གཅིག་ཕྱག་གཉིས་པའི་རྣམ་པར་ལངས་ཀྱང་དགོས་པ་འགྲུབ་མོད་ཀྱི་འདིར་ནི་ཚངས་པའི་གནས་བཞི་བསྒོམ་ཚུལ་ཐུན་མོང་མ་ཡིན་པ་ལ་ཞལ་བཞི་པར་ལྡང་དགོས་པས་དེའི་དབང་དུ་བྱས་པའོ། །འདི་ནི་གྲུབ་ཆེན་རྡོ་རྗེ་དྲིལ་བུ་པའི་དགོངས་པ་ཡང་ཡིན་ཏེ། དྲིལ་བུ་པའི་གཞུང་ལས། ནངས་པར་སད་པ་དང་མལ་ནས་ལངས་ལ་ཞེས་གསུངས་ལ། ལངས་ཚུལ་ཡང་། དྲིལ་བུ་གཞུང་ཆུང་ལས། ཉེར་བཞིས་བསྐུལ་ནས་ཞལ་བཞི་ཡི། །དཔའ་བོའི་དབང་པོ་བཞེངས་པར་བྱ། །ཞེས་གསུངས་པས་སོ། །དེ་ནས་ངག་ཏུ་ཤྲཱི་ཧེ་རུ་ཀ་ཨ་ཧཾ་ཞེས་བརྗོད་ལ། དེའི་དོན་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་གསུངས་པ་དྲན་པར་བྱ་བ་ནི་ངག་སྔགས་སུ་བྱིན་གྱིས་བརླབ་པ་གསུང་གི་དགའ་བའོ། །གསུང་གི་དགའ་བ་ཙམ་ལ་མངོན་བརྗོད་ལས་གསུངས་པ་ལྟར་རྐང་པ་བརྒྱད་པ་བརྗོད་པ་དང་། ཀུན་སྤྱོད་ལས་གསུངས་པ་ལྟར་ཨཱ་ལི་ཀཱ་ལི་བརྗོད་པས་ཀྱང་འགྲུབ་མོད་ཀྱི། འདིར་དེ་ལྟར་བརྗོད་པ་ཡང་རྡོ་རྗེ་དྲིལ་བུ་པའི་དགོངས་པ་ཡིན་ཏེ། སྒྲུབ་ཐབས་ལས། རྣལ་འབྱོར་དང་རྗེས་སུ་མཐུན་པའི་གནས་སུ་སྟན་བདེ་བ་ལ་འདུག་སྟེ། བདུད་རྩིའི་རིལ་བུ་ཁར་བཅུག་ལ། ཤྲཱི་ཧེ་རུ་ཀ་ཞེས་བྱ་བའི་དོན་དྲན་པར་བྱ་སྟེ། ཞེས་གསུངས་ཤིང་། སྐུའི་དགའ་བ་སྔོན་དུ་སོང་། ཐུགས་ཀྱི་དགའ་བ་རྗེས་ལ་འབྱུང་བས་གསུང་གི་དགའ་བ་ལས་མ་འདས་པའི་ཕྱིར་རོ། །དེ་ལ་རྣལ་འབྱོར་དང་རྗེས་སུ་མཐུན་པའི་གནས་ནི་བཤད་ཟིན་ལ། ཕྱི་མ་གཉིས་ཀྱི་དོན་ལྭ་བ་པ་དང་། པྲཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེའི་འགྲེལ་པ་རྣམས་སུ་རོ་ལ་ཉེ་བར་གནས་པ་ལ་སྐྲ་བཀྲོལ་ཏེ་བདུད་རྩི་ལྔའི་རིལ་བུ་ཁར་བཅུག་ལ། ཁ་ལྷོ་ཕྱོགས་སུ་བལྟས་པའམ་མོས་ཏེ་ཞེས་གསུངས་ཏེ། རོ་ལ་ཉེ་བར་གནས་པའི་དོན། ཧེ་རུ་ཀའི་ཆས་དྲུག་ནས་གསུངས་པ་ལྟར་རོ་གདན་དངོས་སམ་རས་ལ་སོགས་པ་ལ་རོའི་གཟུགས་བརྙན་བྲིས་པའམ་རོའི་གདན་ཡོད་པར་མོས་པ་ཡང་རུང་སྟེ། བདག་མེད་པ་ལ་གནས་པ་མཚོན་པའོ། །སྐྲ་གྲོལ་བ་ནི་ཁྱིམ་པའི་རྟེན་ཅན་ཡིན་ན། ཐོར་ཅོག་མི་བྱ་བར་བཀྲོལ་ཞེས་པའི་དོན་ཡིན་གྱི། སྐྲ་དངོས་སུ་མེད་ན་བཅོས་མའི་སྐྲས་བརྒྱན་ཞེས་པ་ནི་དོན་མིན་ནོ། །བདུད་རྩི་ལྔའི་རིལ་བུ་ཁར་བཅུག་པ་ནི་བཟའ་བའི་དམ་ཚིག་ཏུ་འགྱུར་པ་དང་། མཁའ་འགྲོས་བྱིན་གྱིས་བརླབ་པ་དང་། ཁ་དག་པས་གསུང་གི་དགའ་བ་དང་རྗེས་སུ་མཐུན་པའོ། །བདུད་རྩི་རིལ་བུ་མེད་ན་ཆང་བདུད་རྩིར་བྱིན་གྱིས་བརླབས་ལ་མྱང་། དེའང་མེད་ན་ཡོད་པར་བསམས་ནས་བྱིན་རླབས་ཀྱི་ཆོ་ག་བྱས་ནས་མྱངས་པར་བསམས་ཏེ། ཆོས་རྗེ་བྲག་ཕུག་པ་སྐབས་འདིར་བདུད་རྩི་བྱིན་རླབས་མཛད་པར་གྲག་གོ །ཁ་ལྷོ་ཕྱོགས་སུ་བལྟས་པའམ། མོས་པ་ནི་བྱ་བའི་རྒྱུད་དང་དུས་འཁོར་བ་དག ཤར་དང་བྱང་གཉིས་ཐབས་ཀྱི་ཕྱོགས་དང་། ནུབ་དང་ལྷོ་གཉིས་ཤེས་རབ་ཀྱི་ཕྱོགས་ཡིན་པས་འདིར་ཤེས་རབ་ཀྱི་རྒྱུད་གཙོ་ཆེ་བ་ལ་དགོངས་པའོ། །འོ་ན་ནུབ་ཀྱི་ཕྱོགས་སུ་ཡང་བལྟ་བར་འགྱུར་རོ་སྙམ་ན་དགོས་པ་གཉིས་པ་ནི། གདུལ་བྱ་དྲག་པོ་དབང་ཕྱུག་ཆེན་པོ་ལྷོ་ཕྱོགས་ན་ཡོད་པས། གདུལ་བྱ་གང་ན་ཡོད་པ་དེར་གཟིགས་པའོ། །མོས་པ་ནི་འཇིག་རྟེན་པའི་ལྷོ་ཕྱོགས་སུ་མོས་པ་ཡིན་གྱི། རྣལ་འབྱོར་པས་ནི་ཁ་གང་བསྟན་ཤར་ཡིན་པའོ། །དེ་ནས་སྙིང་ཁར་ཨ་དཀར་པོ་བསྒོམ་པ་མཉམ་བཞག་རྣམ་པར་མི་རྟོག་པའི་ཡེ་ཤེས་སུ་མོས་པ་བྱ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྗེས་ཐོབ་དག་པ་འཇིག་རྟེན་པའི་ཡེ་ཤེས་སུ་མོས་པ་བྱ། དེའི་སྟེང་དུ་ཡི་གེ་ཧཱུྃ་གཟུང་འཛིན་དང་བྲལ་བའི་སེམས་སུ་མོས་ཤིང་དེ་ཡང་ཡེ་ཤེས་ལྔའི་བདག་ཉིད་ཅན་དུ་མོས་པ་ནི་སེམས་ཡེ་ཤེས་སུ་བྱིན་གྱིས་བརླབ་པ་ཐུགས་ཀྱི་དགའ་བའོ། །འདི་ཡང་གྲུབ་ཆེན་དྲིལ་བུ་པའི་དགོངས་པ་ཡིན་ཏེ་སྒྲུབ་ཐབས་ལས། སྔར་གྱི་གསུང་གི་དགའ་བའི་རྗེས་སུ་སྙིང་གར་ཟླ་བ་ལ་དཔལ་མཆོག་དང་པོའི་ཡི་གེ་ཡེ་ཤེས་ལྔ་ཡི་རང་བཞིན་ཅན་འོད་ཟེར་དང་བཅས་པའོ། །དེས་སྒོ་གསུམ་གྱི་དྲི་མ་སྦྱོང་ངོ་ཞེས་གསུངས་པས་སོ། །འདི་དག་ལ་སྦྱང་གཞི་ཐ་མལ་པའི་ལུས་དང་ངག་དང་ཡིད་དག་པའི་ཆ་ནས་དག་པ་གསུམ་གྱི་ཐ་སྙད་ཀྱང་རུང་སྟེ། རྗེ་བཙུན་རྩེ་མོས། དང་པོ་ཁོ་ནར་བདག་གི་ལུས་དང་ངག་དང་ཡིད་ཡོངས་སུ་དག་པར་བྱ་བའི་ཕྱིར་ཞེས་གསུང་ཞིང་། ས་ཆེན་གྱིས་ཀྱང་ནག་པོ་པའི་ཐོ་ཡིག་ཏུ་དེ་ལྟར་གསུངས་སོ། །དེ་ལྟར་དག་པ་གསུམ་གྱི་རྗེས་སུ་ཅི་ཞིག་བྱ་སྙམ་ན་རྣལ་འབྱོར་གྱི་གྲོགས་སུ་འགྲོ་ན་ཆུ་གཙང་མའམ་རྡོ་རྗེའི་ཆུས་འོག་དབང་བསྐུར་གྱི་སྐབས་ནས་འབྱུང་བ་ལྟར་ཁྲུས་བྱ། རྣལ་འབྱོར་ལ་མི་ཕན་ན་མི་དགོས་སོ། །དེ་ནས་བསོད་ནམས་ཀྱི་ཚོགས་བསག་པ་རྒྱས་པར་འདོད་པས་ཕྱི་རོལ་མཆོད་པའི་ཆོ་ག་བྱ་སྟེ། པྲཛྙཱ་རཀྵི་ཏས། འདིར་དཔལ་འཁོར་ལོ་སྡོམ་པའི་དཀྱིལ་འཁོར་དུ་མཆོད་པ་འདོད་པའི་རྣལ་འབྱོར་པས་ཐོ་རངས་ལངས་པའམ་སྐབས་ཇི་ལྟ་བ་བཞིན་དུ་ཞེས་དང་། རྗེ་བཙུན་རྩེ་མོས། ནངས་པར་སྔར་ལངས་པའམ་མཚན་ཕྱེད་དམ། སྐབས་ཇི་ལྟར་ཡང་རུང་སྟེ། མཉམ་པར་བཞག་པ་ལས་ལངས་ལ་དཔལ་སྡོམ་པའི་དཀྱིལ་འཁོར་ལ་མཆོད་པ་ལ་སོགས་པ་རྗེས་སུ་སྤྱད་པར་བྱའོ་ཞེས་གསུངས་པས་སོ། །འོ་ན་འདིར་ཡང་མཉམ་པར་བཞག་པ་ལས་ལངས་ལ་ཞེས་དང་། ལུང་སྔ་མའི་མཇུག་ཏུ། དཔལ་བདེ་མཆོག་གི་རྣལ་འབྱོར་དང་ལྡན་པས་ཞེས་གསུངས་པས་བདག་བསྐྱེད་སྔོན་དུ་འགྲོ་དགོས་པ་མ་ཡིན་ནམ་སྙམ་ན། ཐོ་རངས་ཀྱི་ཐུན་ལ་མཉམ་པར་བཞག་པ་ལས་ལངས་པ་ནི་ཉལ་བའི་རྣལ་འབྱོར་ལས་ལངས་པའི་དོན་ཡིན་ལ། ལུང་སྔ་མར་ལྷའི་རྣལ་འབྱོར་དང་ལྡན་པས་བྱ་བར་གསུངས་པ་ནི་ལྡང་བའི་རྣལ་འབྱོར་གྱི་ཚེ་སྐུའི་དགའ་བ་དང་ལྡན་པའི་དོན་ཡིན་པས་ཐོ་རངས་ཀྱི་ཐུན་ལ་ནི་སྐབས་འདིར་བྱ་དགོས་ཏེ། ཀྱཻ་རྡོ་རྗེའི་སྒྲུབ་ཐབས་རྣམས་ལས་སྐབས་འདིར་བྱ་བར་གསུངས་པ་དང་མཐུན་ནོ། །ཐུན་གཞན་ལ་ནི་ཐུན་གྱི་མགོ་མཇུག་གང་དུ་བྱས་ཀྱང་འདྲ་ལ། སྲོད་ཐུན་ལ་ནི་ཐུན་གཞུག་ཏུ་གཏོར་མ་གཏོང་བ་དང་བསྟུན་ལ་བྱ་སྟེ། མཚན་ཕྱེད་ཀྱི་དུས་སུ་བྱ་བར་གསུང་པའི་དོན་ནོ། །རྡོ་རྗེ་སེམས་དཔའི་བསྒོམ་བཟླས་ནི་ཉལ་བའི་རྣལ་འབྱོར་ཚུལ་བཞིན་བྱས་ནས་ལྡང་བའི་རྣལ་འབྱོར་གྱི་བར་དུ་ཐུན་མཚམས་ཀྱི་ཉེས་ལྟུང་མ་བྱུང་བ་ལ་དགོངས་ནས་འདི་དང་ཀྱཻ་རྡོ་རྗེ་གཉིས་ཆར་ལས་ཐོ་རངས་ཀྱི་ཐུན་ལ་བྱ་བར་མ་གསུངས་ལ། ཐུན་གཞན་ལ་ནི་དགའ་བ་གསུམ་གྱི་སྔོན་དུའམ་རྗེས་སུ་ངེས་པར་བྱ་དགོས་ཏེ། སྙིང་པོ་རྒྱན་ལས། སངས་རྒྱས་ཀུན་གྱི་སྐུ་གཅིག་པུ། །པད་དཀར་ཟླ་བའི་དབུས་གནས་ཤིང་། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང་། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་པས་སོ། །གཉིས་པ་ནི་པྲཛྙཱ་རཀྵི་ཏའི་འགྲེལ་པ་དང་། དེ་བཞིན་གཤེགས་པའི་རྡོ་རྗེའི་འགྲེལ་པར་ཐོག་མར་ཤྲཱི་ཧེ་རུ་ཀ་ཞེས་བྱ་བའི་ཡི་གེ་བཞིའི་དོན་མངོན་དུ་བྱས་ཏེ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་ཡིས་སྟོང་པའོ། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་པའོ། །སེམས་ཅན་ཐམས་ཅད་ལ་ཕན་པ་དང་བདེ་བའི་རྒྱུ་ཤྲཱི་ཧེ་རུ་ཀ་ཨ་ཧཾ་ཞེས་ལན་གསུམ་བརྗོད་ལ་ཉི་མའི་གདན་ལ་བདེ་མཆོག་ཕྱག་གཉིས་པ་རྡོ་རྗེ་དང་དྲིལ་བུ་བསྣམས་པར་བདག་ཉིད་མོས་པ་བྱས་ནས། དེའི་རྗེས་ལ་ཨོཾ་གྱི་ཡི་གེའི་དང་པོ་ཅན་དང་ཧུཾ་ཧཱུྃ་ཕཊ་ཀྱི་ཡི་གེའི་མཐའ་ཅན་གྱི་ཨཱ་ལི་ཀཱ་ལིའི་ཕྲེང་བ་འོད་ཟེར་ལྔ་དང་ལྡན་པ་ལན་གསུམ་དུ་བརྗོད་པས་ཡོངས་སུ་བསྐོར་ནས་གནས་པ་ལས་འཁོར་ལོ་གསུམ་གྱི་ལྷ་ཚོགས་སྤྲོས་ཏེ་བགེགས་ཀྱི་ཚོགས་རྣམས་འཇོམས་པར་བྱེད་པ་བསྒོམས་ལ་ཞེས་ཡི་གེ་བཞིའི་དོན་རྣམ་ཐར་སྒོ་གསུམ་གྱི་སྟོང་ཉིད་བསྒོམ་པ་སེམས་དག་དང་། དེའི་ངང་ལས་ལྷ་སྐུ་ཞལ་གཅིག་ཕྱག་གཉིས་པའི་རྣམ་པར་ལངས་པ་ལུས་དག་དང་། མགོ་བོར་ཨོཾ་དང་། མཐར་ཧུཾ་ཧཱུྃ་ཕཊ་སྦྱར་བའི་ཨཱ་ལི་ཀཱ་ལི་བརྗོད་པ་ངག་དག་ཏུ་བཤད་དོ། །གསུམ་པ་ནི། འདོད་འཇོ་མཁན་པོས་འགྲེལ་པའི་བཤད་པ་དེ་ཉིད་དང་མི་མཐུན་པས་སྔར་གྱི་དགའ་བ་གསུམ་གྱི་ངོ་བོ་དང་། གོ་རིམ་གཉིས་ཀ་མི་འཐད་པར་སྨྲའོ། །དེ་ནི་དོན་མ་རྟོགས་པ་སྟེ། ཕམ་འཐིང་པའི་བཞེད་པས། པྲཛྙཱ་རཀྵི་ཏ་ནི་ནཱ་རོ་པ་ལོ་བཅུ་གཉིས་ཀྱི་བར་དུ་བསྟེན་ཀྱང་ཚོགས་བཤད་ལས། སློབ་བཤད་མ་ཐོབ་པར་གསུངས་པས་ནཱ་རོ་པའི་ཚོགས་བཤད་ཀྱིས་སློབ་བཤད་འགོག་པ་མི་རིགས་པའི་ཕྱིར་རོ། །དེ་ལ་ཡང་འདོད་འཇོ་མཁན་པོས་དེ་སྐད་ཟེར་མོད་ཀྱི་སློབ་བཤད་ཡོད་པར་འདོད་པ་རྣམས་ལ་ཡོད་ཅིང་འདི་ལ་མེད་པ་ཅི་ཡང་མེད་པས། པྲཛྙཱ་རཀྵི་ཏ་ལ་ཡང་ནཱ་རོ་པའི་སློབ་བཤད་ཡོད་པ་ཡིན་ནོ་ཞེས་ཕོ་ཚོད་ཀྱིས་སྨྲའོ། །འདིའང་མ་བརྟགས་པ་སྟེ། ཚད་མེད་བཞི་བསྒོམ་ཚུལ་དང་། ཚོགས་བསག་བཅུ་གསུམ་དང་། སྒྲ་ཚུལ་གྱི་རྟེན་འབྲེལ་དང་། ཕོ་ཉ་གསུམ་བསྲེ་སོགས་མང་དུ་ཡོད་པ་དངོས་སུ་མཐོང་བཞིན་དུ་སྙོན་འདིང་བར་མི་བྱའོ། །འོ་ན་དགའ་བ་གསུམ་གྱི་ངོ་བོ་དང་། གོ་རིམ་སྔར་བཤད་པ་རྣམས་སློབ་བཤད་དུ་ཇི་ལྟར་འགྱུར་ན། གྲུབ་ཆེན་དྲིལ་བུ་པའི་དགོངས་པར་བསྒྲུབས་ཟིན་ཅིང་སྐུའི་དགའ་བ་ཡང་ཚོགས་བཤད་ལས་ཁྱད་པར་དུ་འཕགས་ཏེ། སྤྱིར་ཐུན་མཚམས་ཀྱི་ལྷའི་རྣལ་འབྱོར་དྲན་པ་ཙམ་གྱིས་ལུས་དག་ཕྱག་གཉིས་པས་རུང་ཡང་འདིར་ཚད་མེད་བཞི་བསྒོམ་ཚུལ་ཐུན་མོང་མ་ཡིན་པ་ལ་ཞལ་བཞི་པ་ངེས་པར་དགོས་པའི་ཕྱིར་རོ། །གསུང་གི་དགའ་བ་ཡང་ཚོགས་བཤད་ལས་ཁྱད་པར་འཕགས་ཏེ། ཐ་མལ་པའི་ངག་དག་ནས་ངག་སྔགས་སུ་བྱིན་གྱིས་བརླབ་པ་ཙམ་ཨཱ་ལི་ཀཱ་ལི་དང་རྐང་པ་བརྒྱད་པ་བརྗོད་པས་འགྲུབ་ཀྱང་འདིར་སྔ་མ་ལྟར་བྱས་པས་དགོས་པ་གཉིས་པོ་དེའི་སྟེང་དུ་ཡང་ངེས་དོན་གྱི་ཧེ་རུ་ཀ་དང་། དྲང་དོན་གྱི་ཧེ་རུ་ཀ་དྲན་པ་ལྷག་པོར་འབྱུང་བའི་ཕྱིར་རོ། །ཐུགས་ཀྱི་དགའ་བ་ཡང་ཚོགས་བཤད་ལས་ཁྱད་པར་འཕགས་ཏེ། ཡི་གེ་བཞིའི་དོན་དྲན་པས་སེམས་ལ་བདག་གཉིས་སུ་འཛིན་པའི་རྣམ་རྟོག་དག་ནུས་ཀྱང་ཐ་མལ་དུ་འཛིན་པའི་རྣམ་རྟོག་འདག་པར་མི་ནུས་ལ། འདིར་ནི་ཨ་ལས་ཟླ་བའི་དཀྱིལ་འཁོར་བསྒོམས་པས་དགོས་པ་སྔ་མ་དེ་ཉིད་གྲུབ་ཅིང་། དེའི་སྟེང་དུ་ཧཱུྃ་ཡེ་ཤེས་ལྔའི་བདག་ཉིད་ཅན་བསྒོམས་པས་སེམས་ལ་ཐ་མལ་དུ་འཛིན་པའི་རྣམ་པར་རྟོག་པ་ཡང་འདག་པར་བྱེད་ལ། ཚད་མེད་བཞི་བསྒོམ་པ་དང་། གཞི་སྦྱང་བསྒྱུར་དང་། ཚོགས་ཞིང་སྤྱན་འདྲེན་པའི་རྟེན་ཡང་འདིས་འགྲུབ་པའི་ཕྱིར་རོ། །ཇི་ལྟར་ན་ཨ་ནི་ཆོས་ཉིད་སྐྱེ་བ་མེད་པའི་དོན་ཡིན་པས་ཡུལ་དེ་དང་ཡུལ་ཅན་རྣམ་པར་མི་རྟོག་པའི་ཡེ་ཤེས་མཚོན་ལ། དེ་ལས་ཟླ་བའི་དཀྱིལ་འཁོར་དུ་གྱུར་པས་ནི་རྗེས་ཐོབ་ཀྱི་གནས་སྐབས་སུ་ཡང་མཉམ་གཞག་དང་རྟོགས་པ་མཐུན་པའི་དག་པ་འཇིག་རྟེན་པའི་ཡེ་ཤེས་མཚོན་ནོ། །དེའི་སྟེང་དུ་ཧཱུྃ་བསྒོམས་པས་ནི་སེམས་ཉིད་ཡེ་ཤེས་ལྔའི་རང་བཞིན་གྱི་ཧཱུྃ་གི་གཟུགས་སུ་གྲུབ་པས་ཐ་མལ་གྱི་རྣམ་རྟོག་དག་པའོ། །འདི་ལ་བུ་སྟོན་གྱིས། ཐབས་དང་ཤེས་རབ་རང་བཞིན་ཅན། །ཧཱུྃ་ལས་བྱུང་བའི་རྡོ་རྗེ་ནི། །ཞེས་བཤད་པས་ཐབས་ཤེས་གཉིས་མེད་ཀྱི་རང་བཞིན་ཡིན་པ་དང་། ཧཱུྃ་ནི་སྐུ་དང་གསུང་དང་ཐུགས། །རྡོ་རྗེ་མི་བྱེད་གསུམ་འབྱུང་བ། །ཞེས་ཧ་སྐུ་རྡོ་རྗེ་རྣམ་སྣང་གི་ས་བོན། ཨཱཿགསུང་རྡོ་རྗེ་འོད་དཔག་མེད་ཀྱི་ས་བོན་དུ་བཤད་པ་ཡོད་ཀྱི་ཧཱུྃ་ཆ་ལྔ་ཡེ་ཤེས་ལྔ་ལ་སོ་སོར་སྦྱར་བ་ནི་ཐིམ་རིམ་ཙམ་ལ་དཔགས་པ་ཡིན་པ་འདྲ། རྒྱུད་དང་རྒྱ་གཞུང་གང་ན་ཡང་བཤད་པ་མ་མཐོང་ངོ་ཞེས་གསུང་། དེ་ཡང་མི་འཐད་དེ། སཾ་བུ་ཊི་ལས། ཆ་ལྔ་པ་ཡི་རང་བཞིན་དུ། །སྙིང་གི་དབུས་སུ་རྣམ་པར་གནས། །ཞེས་དང་། མངོན་བརྗོད་ལས། དེ་སྟེང་དེ་ཉིད་མཆོག་དམ་པ། །ཡེ་ཤེས་ལྔ་པོ་ཞི་བ་ཡིན། །སྣ་ཚོགས་འོད་ཟེར་གསལ་བ་ཡིས། །རྣམ་པར་འཕྲོ་བས་ཀུན་དུ་ཁྱབ། །སྔོན་འགྲུབ་པ་ནི་བསྐུལ་ནས་ནི། །བྱིན་གྱིས་བརླབ་པར་བྱེད་པ་ཡིན། །ཞེས་དང་། དེའི་དོན་སློབ་དཔོན་དྲིལ་བུ་པས་སྙིང་གར་ཟླ་བ་ལ་དཔལ་མཆོག་དང་པོའི་ཡི་གེ་ཡེ་ཤེས་ལྔའི་རང་བཞིན་ཅན་འོད་ཟེར་དང་བཅས་པའོ། །ཞེས་གསུངས་པས་སོ། །དེས་ཧཱུྃ་ཡེ་ཤེས་ལྔའི་རང་བཞིན་ཅན་དུ་གྲུབ་མོད་ཆ་ལྔ་པོ་ཡེ་ཤེས་ལྔ་ལ་སོ་སོར་སྦྱར་བ་མི་གྲུབ་བོ་སྙམ་ན། དེ་ཡང་མ་ཡིན་ཏེ། སཾ་བུ་ཊིའི་ལུང་དེ་ཉིད་ཀྱིས་ཧཱུྃ་ཆ་ལྔ་པར་གསུང་ཤིང་། ལུང་གཞན་རྣམས་ཀྱིས་ཡེ་ཤེས་ལྔའི་རང་བཞིན་དུ་གསུངས་པས་ལེགས་པར་གྲུབ་བོ། །རྒྱ་གཞུང་ལས་མ་བཤད་པ་ཡང་མ་ཡིན་ཏེ། ཨ་བྷྱ་ཀ་རས་བདེ་མཆོག་ལྷན་སྐྱེས་ཀྱི་སྒྲུབ་ཐབས་སུ། ཞབས་ཀྱུ་དོན་ཡོད་གྲུབ་པ་དང་། ཧ་འོད་དཔག་མེད། མགོ་བོ་རིན་འབྱུང་། ཟླ་ཚེས་རྣམ་སྣང་། ཐིག་ལེ་ནཱ་ད་དང་བཅས་པ་མི་བསྐྱོད་པར་བཤད་ཅིང་། རིགས་ལྔ་དང་ཡེ་ཤེས་ལྔ་དོན་གཅིག་པའི་ཕྱིར་རོ། །གོ་རིམ་ཀྱང་ཚོགས་བཤད་ལས་ཁྱད་པར་དུ་འཕགས་ཏེ། སྤྱིར་ཐུན་ཕྱི་མ་རྣམས་ལ་ལུས་ངག་ཡིད་གསུམ་ཐོག་མར་གང་བློ་ཡུལ་དུ་འཆར་བ་ནས་དག་པ་བསྒོམ་དགོས་པས་གོ་རིམ་གཙོ་བོ་མ་ཡིན་ཡང་། ཐོ་རངས་ཀྱི་ཐུན་ལ་ལྡང་བའི་རྣལ་འབྱོར་དང་། སྐུའི་དགའ་བ་བསྟུན་དགོས་པ་དྲིལ་བུ་ཞབས་ཀྱི་གཞུང་གིས་གྲུབ་པའི་ཕྱིར་རོ། །འདོད་འཇོ་མཁན་པོས། སྐབས་འདིར། སྔོན་འགྲོའི་གཏོར་མ་བཏང་ནས། སྒྲུབ་པའི་བར་ཆད་ཞི་བའི་ཕྲིན་ལས་བཅོལ་བ་ནི་ཐུན་བཞི་ཀའམ་ཐུན་དང་པོའི་འགོར་བྱའོ། །སྐབས་འདིའི་གཏོར་མ་ནི་ཞིང་སྐྱོང་ལ་སྟེར་བར་མཁའ་འགྲོ་རྒྱ་མཚོ་ལས་གསུངས་པས། འཇིག་རྟེན་པའི་གཏོར་མའོ་ཞེས་སྒྲུབ་ཐབས་རྐྱང་པ་བསྒོམ་པའི་འགོར་སྔོན་འགྲོ་གཏོར་མ་གཏང་བ་ནི་མཐོང་བ་བརྒྱུད་པའི་ལག་ལེན་མེད་པའི་སྐྱོན་ཏེ། སྒྲུབ་ཐབས་དག་ལས། མཆོད་པ་དང་གཏོར་མའི་རྣལ་འབྱོར་བྱ་བར་གསུངས་པ་ནི་སྔར་བཤད་པ་ལྟར། བསོད་ནམས་ཚོགས་བསག་རྒྱས་པ་ཕྱི་རོལ་མཆོད་པའི་ཆོ་ག་བྱ་བའི་དོན་ཡིན་ཅིང་། དེའི་ཚེ་ཞིང་སྐྱོང་གི་གཏོར་མའམ། འཇིག་རྟེན་པའི་གཏོར་མ་ཡང་མཁའ་འགྲོ་སྤྱི་གཏོར་ཡིན་གྱི། དེ་ལས་གཞན་དུ་སྒྲུབ་ཐབས་རྐྱང་པའི་མགོར་སྔོན་འགྲོ་གཏོར་མ་གཏོང་བ་ནི་རྒྱ་བོད་སུའི་ལུགས་ལ་ཡང་མེད་པའི་ཕྱིར་རོ། །གཉིས་པ་རྣལ་འབྱོར་བསྒོམ་པ་དངོས་ནི་གཞུང་ལས། ཚངས་པའི་གནས་བཞི་བསྒོམ་པར་བྱའོ་ཞེས་གསུངས་ཏེ། འགྱུར་ཁ་ཅིག་ལས། དེའི་ཐོག་མར། དང་པོ་ཁོ་ནར་ཞེས་འབྱུང་བ་ལྟར་ན། སྒྲུབ་ཐབས་གཞན་ལས། ཡུལ་དག་པ་ལ་བརྟེན་པའི་ཚོགས་བསག་གི་རྗེས་སུ་འདི་འབྱུང་བ་ལྟར། རྒྱུན་བཤགས་ཀྱི་རྗེས་སུ་མ་ཡིན་གྱི་དང་པོ་ཁོ་ནར་བསྒོམ་ཞེས་གསུངས་པའི་དོན་ནོ། །དེའི་དགོས་པ་ཡང་། ཇོ་བོ་རྗེ་ནས་བརྒྱུད་པ་ལོ་ཆེན་དང་། པུ་ཧྲངས་པ་ནས་བརྒྱུད་པ་དམར་གྱི་འགྲེལ་པ་གཉིས་ལས། རྣལ་འབྱོར་བསྲུང་བ་ཞེས་གསུངས་ཏེ། རྣལ་འབྱོར་ནི་ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་ཡིན་ལ། ལྷག་མཐོང་གི་རྒྱུ་ཞི་གནས་ཡིན་ཅིང་དེའི་འགལ་རྐྱེན་ཉོན་མོངས་པ་ཞེ་སྡང་དང་། རྣམ་པར་འཚེ་བ་དང་། ཕྲག་དོག་དང་། ཆགས་ཞེན་ནོ། །དེ་དག་གི་གཉེན་པོར་རིམ་པ་ལྟར་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བསྒོམས་པས་བསྲུང་ཞེས་བཤད་དོ། །རྗེ་བཙུན་གྱིས་ནི་འོག་ནས་བསྒོམ་པར་འགྱུར་བའི་ཕུང་ཁམས་སྐྱེ་མཆེད་ལྷའི་ང་རྒྱལ་བྱེད་པ་སོགས་ཀྱི་མངོན་རྟོགས་མཐའ་དག་གཞན་དོན་དུ་འགྱུར་བར་བྱ་བའི་ཕྱིར་ཐོག་མར་བསྒོམ་ཞེས་གསུངས་ཏེ་དགོས་པ་གཉིས་ཀ་ཡང་མི་འགལ་ལོ། །དེ་རྣམས་ལ་ཅིའི་ཕྱིར་ཚད་མེད་ཅེས་བྱ་ཞེ་ན་ཡུལ་སེམས་ཅན་ཚད་མེད་ལ། བློ་ཚད་མེད་སྔོན་དུ་གཏོང་བས་སོ། །བསྒོམ་བྱའི་རྣལ་འབྱོར་ནི་ཚངས་པའི་གནས་ཞེས་པ་སྟེ། གནས་སྐབས་ཀྱི་ཚངས་པ་གཟུགས་ཁམས་ཀྱི་ལྷ་དང་། གནས་ནི་དེ་ཐོབ་བྱེད་ཀྱི་རྒྱུ་སྟེ། བཤེས་སྤྲིང་ལས། བྱམས་པ་དང་ནི་དེ་བཞིན་སྙིང་རྗེ་དང་། །དགའ་བ་དང་ནི་བཏང་སྙོམས་སྒོམས་མཛོད་ཅིག །གོང་མ་བརྙེས་པར་མ་གྱུར་དེ་ལྟ་ནའང་། །ཚངས་པའི་འཇིག་རྟེན་དུ་ནི་སྐྱེ་བར་འགྱུར། །ཞེས་སོ། །མཐར་ཐུག་གི་ཚངས་པ་ནི་སྒྲིབ་པའི་དྲི་མ་མ་ལུས་པ་དང་བྲལ་ཞིང་ཚངས་པས་ན་ཚངས་པ་སྟེ། བརྟག་གཉིས་ལས། ཚངས་པ་སྒྲིབ་བྲལ་སངས་རྒྱས་ཉིད། །ཅེས་དང་། སྦྱོང་རྒྱུད་ལས། ཚངས་པ་ཆེན་པོ་པདྨའི་གདན་ལ་བཞུགས་ཏེ། ཞེས་དང་། མ་རིག་འཇོམས་པའི་ཚངས་པ་སྟེ་ཞེས་སོ། །གནས་ནི་དེ་ཐོབ་བྱེད་ཀྱི་རྒྱུ་སྟེ། ཚད་མེད་བཞི་ལས་བྱང་ཆུབ་ཀྱི་སེམས་འབྱུང་། དེ་ལས་སྦྱིན་སོགས་ཕ་རོལ་ཏུ་ཕྱིན་པའི་སྤྱོད་པ་འབྱུང་། དེས་མཐར་ཐུག་ཚངས་པ་ཐོབ་པར་བྱེད་པས་སོ། །བཞི་ཞེས་པ་ནི་གྲངས་ངེས་པ་སྟེ། མི་མཐུན་པའི་ཕྱོགས་ཉོན་མོངས་པ་བཞིའི་གཉེན་པོར་བྱམས་པ་སོགས་བཞིར་ངེས་པའོ། །བསྒོམ་ཚུལ་ནི་བསྒོམ་པར་བྱའོ། །ཞེས་པ་སྟེ། འདི་ལ་གཉིས་ཏེ། ཐུན་མོང་གི་བསྒོམ་ཚུལ་དང་། ཐུན་མོང་མ་ཡིན་པའི་བསྒོམ་ཚུལ་ལོ། །དང་པོ་ལ་རྒྱས་པར་བསྒོམ་པ་དང་། བསྡུས་ཏེ་བསྒོམ་པ་གཉིས་ལས། དང་པོ་ནི་བྱམས་སོགས་བཞི་པོ་དམ་བཅའ་དང་འབྲེལ་པའམ། སྨོན་ལམ་དང་འབྲེལ་པའམ། འདུན་པ་དང་འབྲེལ་པ་གང་རུང་གི་སྒོ་ནས་ཕ་རོལ་ཏུ་ཕྱིན་པའི་ལུགས་དང་ཐུན་མོང་དུ་སོ་སོར་བསྒོམ་པ་སྟེ། མངོན་བརྗོད་དུ། ཚངས་པའི་གནས་ནི་བཞི་པོ་དང་། །བསྡུ་བའི་དངོས་པོ་བཞི་རྣམས་དང་། །དགེ་བ་བཅུ་ཡང་དམིགས་ནས་ནི། །སེམས་ཅན་ཀུན་གྱི་དོན་ཡང་བྱ། །ཞེས་དང་། བརྟག་གཉིས་ལས། དང་པོར་བྱམས་པ་བསྒོམ་པར་བྱ། །གཉིས་པར་སྙིང་རྗེ་རྣམ་བསྒོམ་ཞིང་། །གསུམ་པར་དགའ་བ་བསྒོམ་པ་དང་། །ཀུན་གྱི་མཐའ་ན་བཏང་སྙོམས་སོ། །ཞེས་སོ། །གཉིས་པ་ནི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་ལམ་ཟབ་མོ་བསྒོམ་སྙམ་པའི་བྱང་ཆུབ་ཀྱི་སེམས་བསྒོམ་པ་འདི་ཉིད་ལ་ཚད་མེད་བཞི་ཚང་བར་རྗེ་བཙུན་གྱི་ལཱུ་ཧི་པའི་མངོན་རྟོགས་འབྲིང་པོའི་སྐབས་དང་། ནཱ་རོ་མཁའ་སྤྱོད་ཀྱི་མན་ངག་རྣམས་ལས་འབྱུང་ཞིང་། འགྲེལ་པ་མཁན་པོ་དག་གིས་ཀྱང་འདི་ལྟར་བཤད་པར་སྣང་ངོ་། །པྲཛྙཱ་རཀྵི་ཏའི་འགྲེལ་པ་སོགས་ཚོགས་བཤད་རྣམས་དང་། ཇོ་བོ་རྗེ་དང་། པུ་ཧྲངས་པ་ནས་བརྒྱུད་པ་རྣམས་ལའང་བསྒོམ་ཚུལ་འདི་ཉིད་ལས་གཞན་མི་སྣང་ངོ་། །གཉིས་པ་ནི་རྗེ་བཙུན་གྱིས་སྙིང་ཁའི་ཧཱུྃ་ལས་འོད་ཟེར་སྔོན་པོ་གཅིག་བྱུང་སྟེ། རྩ་བའི་ཞལ་སྔོན་པོ་ནས་ཕར་ལ་སོང་། དང་པོ་ཤར་ཕྱོགས་ཀྱི་ལོ་ཀའི་ཁམས་ཐམས་ཅད་ཁྱབ། དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ་འགྲོ་བ་རིས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་བསྒོམས་ལ། སླར་འོད་ཟེར་ཧཱུྃ་ལ་བསྡུས་ལ་བཞག་སྟེ་ཐུགས་ཀྱིས་བྱིན་གྱིས་བརླབ་པའོ། །ངག་ཏུ་སུ་ཁེ་བྷ་ཝན་ཏུ་ཞེས་བརྗོད་དེ་གསུང་གིས་བྱིན་གྱིས་བརླབ་པའོ། །ལུས་གཡོན་པའི་སྡིགས་མཛུབ་ཕྱོགས་བཅུར་བསྐོར་ཞིང་བརྡབས་ཏེ་སྐུ་ཡིས་བྱིན་གྱིས་བརླབ་པའོ། །དེ་ལྟར་སྐུ་གསུང་ཐུགས་བྱིན་རླབས་གསུམ་དང་ལྡན་པའི་བྱམས་པ་ཚད་མེད་པ་ནི་ཕ་རོལ་ཏུ་ཕྱིན་པའི་ཐེག་པའི་བྱམས་པ་ཚད་མེད་པ་ལས་ཁྱད་པར་དུ་འཕགས་པ་ཡིན་གསུང་སྟེ། དེ་ལྟ་བུའི་བྱིན་རླབས་གསུམ་ལྡན་གྱི་བྱམས་པ་བསྒོམ་ཚུལ་ཕ་རོལ་ཏུ་ཕྱིན་པའི་ལུགས་ལ་མེད་པའི་ཕྱིར་རོ། །དེ་བཞིན་དུ་སྙིང་ཁའི་ཧཱུྃ་ལས་འོད་ཟེར་ལྗང་གུ་དང་། དམར་པོ་དང་སེར་པོ་རྣམས་རིམ་པ་བཞིན་སྤྲོས་ཏེ། ཞལ་གཞན་གསུམ་པོ་ནས་གཡོན་སྐོར་གྱིས་སོང་སྟེ། དང་པོར་རང་རང་གི་ཕྱོགས་ཁྱབ། དེ་ནས་ཕྱོགས་བཅུ་ཁམས་གསུམ་གྱི་གནས་ཐམས་ཅད་ཁྱབ་སྟེ། ཚད་མེད་གཞན་གསུམ་ལ་བཀོད་ནས་གསུང་གིས་བྱིན་བརླབ་དང་། ཐུགས་ཀྱིས་བྱིན་བརླབ་སྔ་མ་བཞིན་བྱའོ། །གཉིས་པ་ཚོགས་བསག་པ་ལ་རྟེན་ཁྱད་པར་ཅན་དགོས་པས། ཕུང་པོ་དང་། ཁམས་དང་། སྐྱེ་མཆེད་གཞི་སྦྱང་ཞིང་བསྒྱུར་བ་ནི། ཀུན་སྤྱོད་དང་པོ་ལས། དེ་ལ་ཐོག་མར་ཕུང་པོ་ལྔའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་པ་ནས། ནམ་མཁའི་ཁམས་པདྨ་དྲྭ་བ་ཅན་ནོ་ཞེས་པའི་བར་གསུངས་ཤིང་། ལཱུ་ཧི་པའི་གཞུང་ལས་ཀྱང་དེ་ཁོ་ན་ལྟར་གསུངས་ཤིང་། མཇུག་ཏུ། དེ་དག་ནི་ཕུང་པོ་དང་ཁམས་དང་། སྐྱེ་མཆེད་རྣམས་ཀྱི་ལྷའི་རྣམ་པར་དག་པའོ། །ཞེས་གསུངས་སོ། །འདི་འཆད་པ་ལ། གང་ལ་བསྒོམ་པའི་གཞི། གང་བསྒོམ་པའི་ལྷ། ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ་དང་བཞི་ལས། དང་པོ་ནི། རང་གི་བློ་ལ་ཐ་མལ་དུ་སྣང་བའི་ཕུང་པོ་ལྔ། སྐྱེ་མཆེད་དྲུག ཁམས་ལྔ་སྟེ་ཆོས་བཅུ་བདུན་ཡིན་ལ། དེ་ཡང་རང་རྒྱུད་ཀྱིས་བསྡུས་པ་སྟེ། འོག་ནས་འཆད་པར་འགྱུར་བའི་དགོས་པ་ལས་ཤེས་སོ། །འདི་དག་གི་མཚན་ཉིད་དང་། མཚན་གཞི་ནི་མངོན་པ་ལས་གསུངས་པ་ལྟར། ཞིབ་ཏུ་གཏན་ལ་དབབ་ཀྱང་འགལ་བ་མེད་ལ། བསྒོམ་པའི་ཚེ་ནི་རང་གི་བློ་ལ་དེ་དང་དེར་སྣང་བ་ཙམ་སྟེ། ཐ་མལ་དུ་སྣང་བ་ལ་ཐ་མལ་གྱི་རྣམ་རྟོག་བཟློག་པ་ཙམ་ཡིན་པའི་ཕྱིར་རོ། །གཉིས་པ་ནི། རྣམ་པར་སྣང་མཛད་ལ་སོགས་པའི་ལྷ་བཅུ་བདུན་ཏེ། མིང་གི་ཐ་སྙད་ནི་ཀུན་སྤྱོད་ལས་དངོས་སུ་གསུངས་ཤིང་། ཨ་བྷི་དྷ་ན་ལས། མི་འཁྲུགས་པ་དང་རྟག་པའི་རིགས། །རྡོ་རྗེ་ཉི་མ་དེ་བཞིན་ཏེ། །འོད་དཔག་མེད་དང་དོན་ཡོད་གྲུབ། །རྡོ་རྗེ་སེམས་དཔའ་བདེ་བ་ཆེ། །ཞེས་གསུངས་སོ། །འདིར་ཨ་བྷྱ་དང་། བི་བྷུ་ཏ་ཙནྟྲ་དང་། བརྩོན་འགྲུས་དཔལ་བཤེས་གཉེན་ལ་སོགས་པ་རྣམས། ཧེ་རུ་ཀ་མི་བསྐྱོད་པ་དང་། རྡོ་རྗེ་སེམས་དཔའ་དྲུག་པར་བཞེད་པ་ལ། བུ་སྟོན་རིན་པོ་ཆེས། དེ་མི་འཐད་པར་སྔར་གྱི་ལུང་དེས་གྲུབ་བོ་ཞེས་གསུངས་ཀྱང་། རྒྱུད་གཉིས་པོ་གོ་རིམ་མི་འདྲ་བར་སྣང་བས། ཨ་བྷི་དྷ་ནའི་རྡོ་རྗེ་སེམས་དཔའ་ནི་རིགས་དྲུག་པ་ཡིན་པར་གསལ་ལོ། །སྐྱེ་མཆེད་ལ་བསྒོམ་པའི་གཏི་མུག་རྡོ་རྗེ་སོགས་དྲུག་ནི་རིམ་པ་ལྟར། ས་སྙིང་དང་། ཕྱག་རྡོར་དང་། ནམ་སྙིང་དང་། འཇིག་རྟེན་དབང་ཕྱུག་དང་། སྒྲིབ་སེལ་དང་། ཀུན་བཟང་ཡིན་པར་མཁས་པ་དག་གིས་བཤད་ཅིང་། ཁམས་ལྔ་ལ་བསྒོམ་པའི་ལྟུང་བྱེད་མ་ལ་སོགས་པ་ནི་རིམ་པ་ལྟར། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་། ཆོས་དབྱིངས་རྡོ་རྗེ་མ་རྣམས་ཡིན་པར་བཤད་དོ། །མུ་ཏིག་ཕྲེང་བར། དང་པོ་བཞི་རིམ་པ་ལྟར། མཁའ་འགྲོ་མ་དང་། ལཱ་མ་དང་། ཁཎྜ་རོ་ཧི་དང་། གཟུགས་ཅན་མ་ཡིན་པར་བཤད་པས་དྲིལ་བུ་ལུས་དཀྱིལ་གྱིས་སྐབས་སུ་སྙིང་ཁའི་ནང་སྐོར་ལ། ལཾ་མཱཾ་པཱཾ་ཏཱཾ་བཞི་གཡོན་སྐོར་དུ་བཀོད་པ་ལ་མ་འཁྲུགས་པར་ཤེས་པར་བྱའོ། །གསུམ་པ་ལ། ཨ་བྷི་དྷ་ནའི་དགོངས་པ་ལྷ་ཞལ་ཕྱག་གི་རྣམ་པ་ཅན་བསྒོམ་པ་དང་། ཀུན་སྤྱོད་ཀྱི་དགོངས་པ་ལྷའི་ངོ་བོ་ཙམ་དུ་བསྒོམ་པ་གཉིས་ལས། དང་པོ་ནི། དེ་ཉིད་ལས། རང་གི་གདན་ལ་ལེགས་པར་བཞུགས། །གླང་པོ་སེང་གེ་རྟ་དང་ནི། །རྨ་བྱ་དང་ནི་མཁའ་ལྡིང་དང་། །དེ་སྟེང་ཡི་དྭགས་གདན་ལ་ནི། །དངོས་གྲུབ་ཀུན་གསོལ་བསྒོམ་པར་བྱ། །རྡོ་རྗེ་ལག་པ་ས་ལ་རེག །རྡོ་རྗེ་དྲིལ་བུ་དཀུར་བརྟེན་ཅིང་། །ཞལ་ནི་རྣམ་པར་འགྱུར་བའོ། །འཁོར་ལོ་དྲིལ་བུ་འགྱིང་དང་བཅས། །རིན་ཆེན་དྲིལ་བུའང་དེ་བཞིན་ཏེ། །པདྨའི་དྲིལ་བུའི་རིམ་པ་དང་། །དྲིལ་བུའི་སྣ་ཚོགས་རྡོ་རྗེ་ཉིད། །ཐམས་ཅད་སྙེམས་པར་རྣམ་བསྒོམ་སྟེ། །ཞེས་སོགས་བཤད་ཅིང་། འདིའི་དགོངས་པར་བྱས་ནས། པྲ་ཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེ་དང་། ཛ་ཡ་སེ་ན་སོགས་ཀྱིས་ཞལ་ཕྱག་གི་རྣམ་པ་ཅན་བསྒོམ་པར་བཤད་དོ། །བསྒོམ་ཚུལ་ནི། གཟུགས་ཀྱི་ཕུང་པོ་ཐམས་ཅད་མགོ་བོའི་མཛོད་སྤུའི་ནང་དུ། ས་བོན་བྷྲཱུཾ་མམ་ཨོཾ་དུ་བསྒོམས་པས། དེ་ཡོངས་སུ་གྱུར་པ་ལས་རྣམ་སྣང་ཞལ་ཕྱག་གི་རྣམ་པ་ཅན་དུ་བསྒོམ་པ་སོགས་མཛད་དེ། གསང་འདུས་འཕགས་ལུགས་ཀྱི་ལུས་དཀྱིལ་བསྒོམ་ཚུལ་ཙམ་ཞིག་སྔོན་འགྲོའི་སྐབས་འདིར་ཡང་ཡོད་པས། རྒྱུད་སྡེ་གཞན་ལས་ཁྱད་པར་དུ་འཕགས་པར་གྲུབ་བོ། །གཉིས་པ་ནི། ཀུན་སྤྱོད་ཀྱི་དགོངས་པ། རྗེ་བཙུན་རིན་པོ་ཆེས། ལྷའི་ངོ་བོ་ཙམ་དུ་བསྒོམ་པར་གསུངས་ཏེ། ཐོག་མར་ཕམ་འཐིང་པའི་མན་ངག་ལས་འབྱུང་བ། སྙིང་ཁའི་ས་བོན་ལས་འོད་ཟེར་འཕྲོས་པས་བདག་གི་སྤྱི་གཙུག་ནས་རྐང་མཐིལ་གྱི་བར་དུ་འོད་ཟེར་གྱིས་ཁྱབ་པས། བདག་གི་ཚེ་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་དག་པར་བསྒོམ་སྟེ་བདག་གི་གཞི་སྦྱང་བའོ། །དེ་ནས་འོད་ཟེར་དེ་བདག་གི་བ་སྤུའི་བུ་ག་ནས་ཕར་སོང་ནས་འགྲོ་བ་རིས་དྲུག་གིས་བསྡུས་པའི་སེམས་ཅན་ཐམས་ཅད་ལ་ཕོག་ནས་དེ་དག་གི་རྒྱུད་ལ་ཡོད་པའི་སྡིག་པ་ཐམས་ཅད་དག་པར་བསྒོམ་སྟེ་དེ་ནི་གཞན་གྱི་གཞི་སྦྱང་བའོ། །དེ་ནས་གཞི་བསྒྱུར་བ་ནི་སྔོན་ལ་གཞན་གྱི་གཞི་བསྒྱུར་བར་བྱ་སྟེ། དེ་ཡང་རིས་དྲུག་གིས་བསྡུས་པའི་སེམས་ཅན་ཐམས་ཅད་འཁོར་ལོ་བདེ་མཆོག་དཔག་ཏུ་མེད་པ་བསྒོམ་པར་བྱའོ། །དེ་ནས་བདག་གི་གཞི་བསྒྱུར་བ་ནི། རིས་དྲུག་འཁོར་ལོ་བདེ་མཆོག་གི་རྣམ་པར་བྱས་པ་དེ་དག་འོད་ཟེར་གྱི་རྣམ་པར་བསྡུས་ཏེ། བདག་གི་བ་སྤུའི་བུ་ག་ནས་ཞུགས་ནས། བདག་གི་ཕུང་པོ་དང་། ཁམས་དང་། སྐྱེ་མཆེད། ལྷའི་ང་རྒྱལ་དུ་བསྒོམ་པར་བྱ་སྟེ། དེ་ཡང་བདག་གི་མ་དག་པའི་གཟུགས་ཀྱི་ཕུང་པོ་ནི། གཟུགས་ཀྱི་ཕུང་པོ་མ་ཡིན་ལ། བཅོམ་ལྡན་འདས་རྣམ་པར་སྣང་མཛད་ཡིན་སྙམ་དུ་བསམ་པ་ནས། མ་དག་པའི་ནམ་མཁའི་ཁམས་ནི་ནམ་མཁའི་ཁམས་མ་ཡིན་ལ། པདྨའི་དྲྭ་བ་ཅན་ཡིན་ནོ། །ཞེས་བྱ་བའི་བར་དུ་བསམ་ཞིང་། ངག་དུ་གཟུགས་ཀྱི་ཕུང་པོ་ནི་རྣམ་པར་སྣང་མཛད་དོ་ཞེས་པ་ནས། ནམ་མཁའི་ཁམས་ནི་པདྨ་དྲྭ་བ་ཅན་ནོ་ཞེས་པའི་བར་བརྗོད་པར་གསུངས་སོ། །འདི་ནི་རྣལ་འབྱོར་མ་རྒྱུད་ཀྱི་སྤྱོད་ལམ་གྱི་རྣལ་འབྱོར་དང་བསྒོམ་ཚུལ་སྤྱིར་འདྲ་ཞིང་། རང་གི་ཕུང་ཁམས་སྐྱེ་མཆེད་སོ་སོར་ཕྱེ་ནས་བསྒོམ་པའི་ཆ་ནས་བསྒོམ་ཚུལ་ཞིབ་པའི་ཁྱད་པར་ཡོད་དོ། །འོ་ན་བཤད་རྒྱུད་གཉིས་ཀྱི་དགོངས་པ་གང་ཉམས་སུ་ལེན་ན། ཇོ་བོ་བྷ་ཌནྟའི་བཞེད་པས། གང་ཟག་སྤྲོས་པ་ལ་དགའ་བས་ཨ་བྷི་དྷ་ན་ལས་འབྱུང་བ་ལྟར། ཞལ་ཕྱག་གི་རྣམ་པ་ཅན་བསྒོམ་ལ། ཉུང་ངུའི་རྣལ་འབྱོར་ལ་དགའ་བས་ཀུན་སྤྱོད་ལྟར། ལྷའི་ངོ་བོ་ཙམ་བསྒོམ་པར་གསུངས་པ་འདི་ཉིད་ལེགས་པར་སྣང་སྟེ། རྗེ་བཙུན་གྱིས་ཀྱང་། ཇོ་བོ་བྷ་ཌནྟས་ཨ་བྷི་དྷ་ན་ལྟར། ཞལ་ཕྱག་གི་རྣམ་པ་ཅན་བསྒོམ་པ་དང་། ཕམ་འཐིང་པའི་དགོངས་པ། ང་རྒྱལ་ལམ་མོས་པ་དྲན་པ་ཙམ་ཡིན་པར་གསུངས་པས། ལུགས་གཉིས་ཀ་ལ་ཡང་གང་ཟག་གི་བློའི་བྱེ་བྲག་གིས་གཉིས་ཀ་ཡོད་པར་བཞེད་པའི་ཕྱིར་རོ། །བཞི་པ་ལ་རྗེ་བཙུན་གྱིས། རིགས་ངན་གྱི་ཁང་པ་མེས་སྲེག་པ་བཞིན། ཚོགས་བསག་པའི་རྟེན་ཁྱད་པར་ཅན་དུ་བྱས་པ་ཡིན་པར་གསུངས་ཏེ། དེའི་དོན་ཡང་། རིགས་ངན་གྱིས་རྒྱལ་པོ་ལ་བསྙེན་བཀུར་བྱེད་པའི་ཚེ། ཐོག་མར་ཁང་པ་མེས་བསྲེགས། དེའི་དུས་སུ་རང་ཉིད་རིག་བྱེད་ནས་འབྱུང་བའི་ཆོ་གས་ཁྲུས་བྱས་ཏེ། བསྙེན་བཀུར་བྱས་ན་རྒྱལ་པོ་མཉེས། གཞན་དུ་མ་ཡིན་པ་ལྟར་འདིར་ཡང་། ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལ། ཐ་མལ་གྱི་རྣམ་རྟོག་སྤངས་ནས་ལྷའི་ངོ་བོར་བསྒོམས་ནས་ཚོགས་བསག་དགོས་པའི་དགོས་པ་ཁྱད་པར་ཅན་ཡོད་དོ། །དེ་ཉིད་ཐོག་མའི་སྐུའི་དགའ་བ་ཙམ་གྱིས་འགྲུབ་པ་མ་ཡིན་ནམ་སྙམ་ན། བདེན་མོད་ཀྱི་དེ་ཙམ་ནི་བླ་མེད་ཀྱི་བསྐྱེད་པའི་རིམ་པའི་རྣལ་འབྱོར་གཞན་རྣམས་ལ་ཡང་ཡོད་ཅིང་། འདིར་ནི་ཕུང་ཁམས་སྐྱེ་མཆེད་ཀྱི་ཆོས་སོ་སོར་ཕྱེ་ནས་ལྷར་བསྒོམས་པས། ཚོགས་བསག་པའི་རྟེན་ཡང་གཞན་ལས་ཁྱད་པར་དུ་འཕགས་པར་གྲུབ་པའོ། །ཇོ་བོ་བྷ་ཌནྟའི་བཞེད་པས། ཤེས་བྱའི་སྒྲིབ་པ་ལས་བསྲུང་བའི་ཕྱིར་བདག་བསྲུང་བ་ཞེས་པའི་ཐ་སྙད་མཛད་ཅིང་། འདིར་ཤེས་བྱ་ནི་བདག་མེད་གཉིས་ཡིན་ལ། དེ་ལ་སྒྲིབ་པ་ནི་གང་ཟག་དང་། ཆོས་ཀྱི་བདག་ཏུ་འཛིན་པའོ། །དེ་ལ་གང་ཟག་གི་བདག་ཡན་ལག་ཕུང་ཁམས་སྐྱེ་མཆེད་ཐ་མལ་དུ་འཛིན་ཅིང་། ཡན་ལག་ཅན་རིལ་པོའི་རྫས་གཅིག་ཏུ་འདོད་པའོ། །དེ་སྤོང་བ་ལ་ཐ་མལ་དུ་འཛིན་པའི་གཉེན་པོར་ལྷ་བསྒོམ་ཞིང་། རིལ་པོ་གཅིག་ཏུ་འཛིན་པའི་གཉེན་པོར་ལྷ་ཡང་དུ་མར་བསྒོམས་པས་སྤོང་ངོ་། །ཆོས་ཀྱི་བདག་དོན་དམ་དུ་བཟུང་བའི་ཡུལ་ཆ་མེད་རྡུལ་ཕྲན་དང་། འཛིན་པའི་ཤེས་པ་ཆ་མེད་ཀྱི་སྐད་ཅིག་ཏུ་བདེན་པར་འདོད་པའོ། །དེའི་གཉེན་པོར་སྣོད་བཅུད་གཞལ་ཡས་ཁང་དང་། ལྷར་མོས་པས་དེ་རྣམས་ཀྱང་སྣང་ཡང་རང་བཞིན་མེད་པ་སྒྱུ་མ་ལྟ་བུར་བསྒོམས་པས་སྤོང་ངོ་། །ཞེས་བཞེད་དོ། །གསུམ་པ་ཚོགས་བསག་དངོས་དང་འབྲེལ་པས་ཚོགས་བསག་པ་བཅུ་གསུམ་གྱིས་ཚོགས་བསག་པ་ནི་གཞུང་ལས། སྐབས་འདིར་སྲུང་བའི་འཁོར་ལོ་བསྒོམ། དེ་ནས་ཚོགས་གཉིས་བསག་པ་འབྲེལ་པ་ཅན་དུ་འབྱུང་བས། དེ་བཞིན་བྱས་ན་ཡང་ལེགས་པ་ཡིན་ནོ་ཞེས་རྗེ་བཙུན་གསུང་ལ། ཕམ་འཐིང་པའི་བཞེད་པས། སྐབས་འདིར་བསོད་ནམས་ཀྱི་ཚོགས་བསགས། དེ་ནས་སྲུང་བའི་འཁོར་ལོ་བསྒོམས་ནས། ཡེ་ཤེས་ཀྱི་ཚོགས་བསག་པ་གཞུང་འཁྲུགས་སྡེབས་པའི་མན་ངག་ལས་འབྱུང་བ་ལྟར་བཤད་ན། བསོད་ནམས་ཀྱི་ཚོགས་བསག་པ་ནི་གཞུང་ལས། དེ་ནས་རང་གི་སྙིང་ཁར། ཡི་གེ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུྃ་འོད་ཟེར་སྣ་ཚོགས་པ་འཕྲོ་བ་བསམ་པར་བྱས་ལ། དེའི་སྣང་བས་མདུན་དུ་ཡང་དག་པར་རྫོགས་པའི་སངས་རྒྱས་དང་། བླ་མ་ལ་སོགས་པ་བལྟས་ལ་ཕྱག་བྱས་ཏེ། མཆོད་པར་བྱའོ། །དེ་ནས་དཀོན་མཆོག་གསུམ་ལ་སྐྱབས་སུ་འགྲོ་བར་བྱའོ། །ཞེས་ཚོགས་ཞིང་སྤྱན་དྲངས་ནས། ཕྱག་དང་། མཆོད་པ་དང་། སྐྱབས་འགྲོ་གསུམ་ལས་གཞན་མ་གསུངས་སོ། །འདི་ལ་ནཱ་རོ་པའི་མན་ངག་ཕམ་འཐིང་པ་ནས་བརྒྱུད་པ་ལས་ཚོགས་བསག་བཅུ་གསུམ་མཛད་དེ། ཕྱག་དང་། མཆོད་པ་དང་། སྡིག་པ་བཤགས་པ་དང་། སྐྱབས་སུ་འགྲོ་བ་དང་། དམ་ཚིག་དང་སྡོམ་པ་བཟུང་བ་དང་། རྗེས་སུ་ཡི་རང་བ་དང་། བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། ལམ་ལ་གནས་པ་དང་། དགེ་བའི་རྩ་བ་བསྔོ་བ་དང་། གནང་བ་ནོད་པ་དང་། གཤེགས་སུ་གསོལ་བའོ། །དང་པོ་ཕྱག་འཚལ་བ་ལ་དེའི་ཡུལ་སྤྱན་འདྲེན་དགོས་པས། བདག་གི་སྙིང་ཁའི་ཧཱུྃ་ལས་འོད་ཟེར་འཕྲོས་པས་མདུན་གྱི་ནམ་མཁར་རྩ་བའི་བླ་མ་ནི་རྡོ་རྗེ་ཆོས་ཀྱི་རྣམ་པ་སྟེ། སྐུ་མདོག་དམར་པོ་གཡས་རྡོ་རྗེ། གཡོན་དྲིལ་བུ་འཛིན་པ་ལ། ཕྱག་ན་རྡོ་རྗེ་ལ་སོགས་པ་བརྒྱུད་པའི་བླ་མ་རྣམས་ཀྱིས་བསྐོར་བ་སྟེ། སློབ་དཔོན་ཀླུ་སྒྲུབ་རབ་ཏུ་བྱུང་བའི་ཆ་ལུགས་ཅན་ཡིན་ལ། གཞན་ཐམས་ཅད་ཀྱང་གཡས་ཌཱ་མ་རུ། གཡོན་ཐོད་པ། གྲུ་མོ་ན་ཁ་ཊྭཱ་ཾག་འཛིན་པ། རུས་པའི་རྒྱན་ཆ་ལྔ་དང་ལྡན་པ། རྣལ་འབྱོར་པའི་ཆ་ལུགས་ཅན་སྟེང་གི་ཆ་ལ་སྤྱན་དྲང་། འོག་གྱི་ཆ་ལ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲང་ངོ་། །འདིར་གཙུག་ནོར་ལས་ཤར་ཕྱོགས་ཀྱི་དུར་ཁྲོད་དུ་དབང་པོའི་མདུན་ན། བླ་མ་སེང་གེའི་ཁྲི་ལ་བཞུགས་པར་བསྒོམ་ཞེས་གསུངས་པ་ལ་བརྟེན་ནས། མར་དོ་རྗེས་འབྲང་དང་བཅས་པས་འདི་བཞིན་བཞེད་པ་ལ། མཁས་པ་བུས་དེ་ཤིན་ཏུ་མི་རིགས་ཏེ། མངོན་བརྗོད་ལས། བླ་མ་བྱང་སེམས་རྡོ་རྗེ་རིགས་དྲུག་པར་བཤད་པ་དང་། བརྩོན་འགྲུས་དཔལ་གྱིས་ཀྱང་། རྡོ་རྗེ་འཆང་བདག་རྣམ་པ་ཅན། །བླ་མ་ཞེས་བཤད་པ་དང་འགལ་བས། སྔགས་ཀྱི་རྣམ་གཞག་ལས་ཆེས་ཆེར་འཁྱམས་པའོ། །ཞེས་གསུངས་ལ། དེ་ལ་འདོད་འཇོ་མཁན་པོས། དེ་ནི་མ་ངེས་བཞིན་དུ་བཀག་པས་ཤིན་ཏུ་མི་རིགས་ཏེ། སྒྲུབ་ཐབས་དེ་ལས་ཀྱང་། བླ་མ་རྡོ་རྗེ་སེམས་དཔའ་ལྟར་འགྱིང་བག་ཅན། རྒྱན་ཐམས་ཅད་ཀྱིས་བརྒྱན་ནས་བཞུགས་པ་གསལ་བར་བལྟས་ལ་ཞེས་གསལ་བར་གསུངས་པས། བླ་མ་རྡོ་རྗེ་འཆང་དུ་ལྟ་བར་གསུངས་པ་རྣམས་ལུགས་དེ་ལ་ཇི་ལྟར་གནོད། གལ་ཏེ་རྡོ་རྗེ་འཆང་དུ་གསུངས་པས་དུར་ཁྲོད་དུ་བཞུགས་པ་མི་རིགས་སོ་སྙམ་ན། དེ་ལ་འགལ་བ་མེད་དེ། དུར་ཁྲོད་ན་གནས་པ་བཤད་པའི་སྐབས་སུ། དཔའ་བོ་འདུས་པའི་མཆོག་དག་དང་། །རྣལ་འབྱོར་མ་ནི་མཆོག་སྣ་ཚོགས། །ཞེས་དཔའ་བོ་དང་རྣལ་འབྱོར་མ་མཆོག་རྣམས་ཀྱང་དེ་ན་གནས་པར་བཤད་པའི་ཕྱིར་དང་། སྡོམ་འབྱུང་ལས། གྲུབ་ཆེན་རྫུ་འཕྲུལ་ཡང་དག་ཐོབ། །ཚོགས་ནི་དུར་ཁྲོད་དབུས་སུ་བལྟ་བར་བྱ། །ཞེས་གསུངས་ལ། བླ་མ་དེར་བཞུགས་པར་བསྒོམ་པ་ལ་འགལ་བ་ཅུང་ཟད་ཀྱང་མ་མཐོང་ངོ་ཞེས་སུན་འབྱིན་སྨྲའོ། །འདི་ནི་ཤིན་ཏུ་མི་འཐད་དེ། རྣལ་འབྱོར་པ་རང་གི་བློ་ངོར། གཞལ་ཡས་ཁང་དང་། དུར་ཁྲོད་གཉིས་ལ་གནས་མཆོག་དམན་གྱི་རྣམ་པ་ཡོད་པས་དམན་པའི་གནས་དེར་བླ་མ་བསྒོམ་དུ་མི་རུང་བའི་ཕྱིར་རོ། །གལ་ཏེ་དུར་ཁྲོད་དུ་དཔའ་བོ་དང་། རྣལ་འབྱོར་མའི་མཆོག་བཞུགས་པར་བཤད་པས། དེར་བླ་མ་བཞུགས་པ་བསྒོམ་པ་མི་འགལ་ན། རང་གི་བཤང་ལམ་དང་རྐང་མཐིལ་དུ་བསྒོམ་པ་ཡང་མི་འགལ་བར་འགྱུར་ཏེ། བདེ་མཆོག་གི་ལུས་དཀྱིལ་དུ་བཤང་ལམ་དུ་རིན་ཆེན་རྡོ་རྗེ་དང་། ཁཎྜ་རོ་ཧི་བཞུགས་པ་དང་། འདུས་པའི་ལུས་དཀྱིལ་དུ་རྐང་མཐིལ་གཉིས་སུ་གནོད་མཛེས་རྒྱལ་པོ་བཞུགས་པར་བཤད་པའི་ཕྱིར་རོ། །ཡང་ཁྱོད་ཀྱི་རྡོ་རྗེ་འཆང་དུ་གསུངས་པ་ནི་བསྒོམ་པའི་དབང་དུ་མཛད་ལ། རྡོ་རྗེ་འཆང་ཡིན་དུ་ཆུག་ཀྱང་འགལ་བ་མེད་དེ་ཞེས་སྨྲས་པ་ནི་རྡོ་རྗེ་འཆང་མ་ཡིན་པ་གཞིར་བཞག་པའི་གཏམ་དུ་སྣང་ངོ་། །དེས་ན་ཚོགས་ཞིང་གི་སྐབས་འདིར་བླ་མ་གཙོ་བོ་དང་དབྱེར་མེད་དུ་སྤྱན་འདྲེན་པ་དང་། དེའི་རིགས་བདག་གི་ཚུལ་དང་། ལོགས་ཤིག་ཏུ་སྤྱན་འདྲེན་པ་གསུམ་ལས། ཕྱི་མ་འདི་ལ་སྟེང་གི་ཆར་བསྒོམ་པ་ངེས་པར་དགོས་སོ། །དེ་རྣམས་ཀྱི་ཞབས་ལ་ཕྱག་བྱེད་པར་བསམ་ཞིང་། ངག་ཏུ་ན་མོ་གུ་རུ་བྷྱཿ ཞེས་པས་བླ་མའི་ཚོགས་ལ་ཕྱག་བྱ། ན་མཿཤྲཱི་ཙཀྲ་སཾ་བཱ་ར་མཎྜ་ལ་བྷྱཿ ཞེས་བྱ་བས་དཀྱིལ་འཁོར་གྱི་འཁོར་ལོ་ལ་ཕྱག་བྱའོ་ཞེས་རྗེ་བཙུན་གསུང་ངོ་། །བུ་སྟོན་གྱིས་རྣལ་འབྱོར་རོ་གཅིག་བདུད་རྩི་འཐུངས་པས་རྣམ་པར་དག་པའི་ཐུགས། །ཞེས་སོགས་ཚིགས་བཅད་ཕྱེད་དང་དགུས་ཕྱག་འཚལ་བ་ནི་སྔོན་འགྲོའི་སྐབས་སུ་ཧ་ཅང་ཡང་སྤྲོས་པ་ཆེ་བར་སྣང་ངོ་། །གཉིས་པ་མཆོད་པ་ལ། རྗེ་བཙུན་གྱིས་ཕྱིའི་མཆོད་པ་དང་། ཡིད་ལས་བྱུང་བའི་མཆོད་པ་གཉིས་ལས། དང་པོ་ནི། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད་པའོ། །གཉིས་པ་ནི། ཡིད་ལས་བྱུང་བའི་མཆོད་པ་དང་། ཀུན་ཏུ་བཟང་པོའི་མཆོད་པ་དང་། བླ་ན་མེད་པའི་མཆོད་པ་རྣམས་དོན་གཅིག་པས། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ནས། ན་མོ་ཆོས་ཀྱི་དབྱིངས་ཀྱི་བྱིན་གྱིས་རླབས་དང་། ཞེས་པ་ནས། འབྱུང་བར་གྱུར་ཅིག་ཅེས་པའི་བར་བརྗོད་ནས། སེ་གོལ་གཅིག་གཏོག ཡང་ཕྱག་རྒྱ་བཅས་ཏེ། ཨོཾ་སརྦ་བིད་ནས། སྭཱ་ཧཱའི་བར་བརྗོད་ནས། སེ་གོལ་གཉིས་ཏེ་གསུམ་གཏོག་པའོ། །འདི་ལ་མཆོད་པའི་རྒྱུ། ངོ་བོ། ཡུལ་དང་གསུམ་ལས། དང་པོ་ནི། ན་མོ་ཆོས་ཀྱི་དབྱིངས་ཀྱི་ཞེས་པ་ནས། ཏིང་ངེ་འཛིན་དང་སྨོན་ལམ་གྱི་དབང་གིས་ཞེས་པའི་བར་གྱིས་བསྟན། གཉིས་པ་ནི་འཇིག་རྟེན་གྱི་ཁམས་ན་ཞེས་པ་ནས། བསམ་གྱིས་མི་ཁྱབ་པ་ཞིག་ཞེས་པའི་བར་གྱིས་བསྟན། གསུམ་པ་ནི་བླ་མ་དང་ཞེས་པ་མན་ཆད་ཀྱིས་བསྟན་ནོ། །སྔགས་དོན་ལ། ཨོཾ་སརྦ་བིད་ནི་ཐམས་ཅད་རིག་པའོ། །པུ་ར་པུ་ར་ནི་གང་བ་གཉིས། སུ་ར་སུ་ར་ནི་མཛེས་པ་གཉིས་ཏེ། བཀོད་པའི་ཁྱད་པར་ཕུན་སུམ་ཚོགས་པའོ། །ཨཱ་ཝརྟ་ཨཱ་ཝརྟ་ནི་འཕེལ་བ་གཉིས། ཧོ་ནི་རྒྱས་པ། ན་མཿས་མནྟ་བུདྡྷ་ནཱན་ནི་ཀུན་ནས་སངས་རྒྱས་ལ་ཕྱག་འཚལ་བའོ། །ཨ་བྷི་སྨ་ཡ་ནི་ངོ་མཚར་བ། སྥ་ར་ཎ་ནི་འཕྲོ་བ། ཨི་མཾ་ནི་འདི། ག་ག་ན་ཁཾ་ནི་ནམ་མཁའ། དྷརྨཱ་དྷཱ་ཏུ་ནི་ཆོས་ཀྱི་དབྱིངས། ཨ་ཀ་ཤ་ནི་ནམ་མཁའ་ས་མཱ་པ་ཏི་ནི་མཉམ་པར་ཁྱབ་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། པརྵན་མཎྜ་ལེ་ནི་འཁོར་གྱི་དཀྱིལ་འཁོར། མ་མ་ནི་བདག པྲ་ཎི་དྷི་ནི་སྨོན་ལམ། པུཎྱེ་ནི་བསོད་ནམས། ཛྙཱ་ན་ནི་ཡེ་ཤེས། ཝ་ལེ་ན་ནི་སྟོབས། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཨ་དྷིཥྛ་ན་ནི་བྱིན་རླབས། ཝ་ལེ་ན་ནི་སྟོབས། དྷརྨཱ་དྷཱ་ཏྭཱ་དྷིཥྛ་ན་ནི་ཆོས་ཀྱི་དབྱིངས་ཀྱི་བྱིན་རླབས། བ་ལེ་ན་ནི་སྟོབས། ཙ་ནི་འབྱེད་པ། སྭཱ་ཧཱ་ནི་གཞི་ཚུགས་ཤིག་པའོ། །འདི་ལ་བུ་སྟོན་གྱིས། བླ་མ་ས་སྐྱ་པས། ཕྱི་མཆོད་དང་། ཡིད་མཆོད་གཉིས་ཀྱིས་མཆོད་ལ། ཡིད་མཆོད་ནི་དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བྱས་ནས། ན་མོ་ཆོས་ཀྱི་དབྱིངས་ཀྱི་བྱིན་རླབས་དང་། ཞེས་སོགས་ཚིག་ལྷུག་པ་དང་། ཨོཾ་སརྦ་བིད་པུ་ར་སོགས་ཀྱི་སྔགས་བརྗོད་པ་ལ་ཡིད་མཆོད་དུ་བཞེད་དེ། ལང་ཀ་རྒྱལ་བཟངས་ཀྱིས། སརྦ་བིད་ནས་ཧོའི་བར་གོས་ཟུང་འབུལ་བའི་སྔགས་སུ་བཤད་པ་མ་གཏོགས། བོད་དུ་འགྱུར་བའི་བདེ་མཆོག་གི་སྒྲུབ་དཀྱིལ་རྣམས་ནས་དེ་ལ་ཡིད་མཆོད་དུ་བཤད་པ་མེད་པས། དེ་མ་བྱས་ཀྱང་ཆོ་ག་ཆད་པའི་ཉེས་པ་མེད་དོ། །ཕྱག་རྒྱ་དང་སྔགས་སརྦ་ཨཱ་ཝརྟ་ཡ་ཧོའི་བར་ཡོ་གའི་འགྲེལ་ཆེན་རྣམས་ནས་བཤད། སྔགས་ན་མཿས་མནྟ་མན་ཆད་རྣམ་སྣང་མངོན་བྱང་གི་རྒྱུད་ནས་བཤད་པས། དེ་དག་འདིར་མ་སྦྱར་ནའང་ཉེས་པ་མེད་ཅིང་། སྦྱར་བ་ལ་ལྷག་པའི་ཉེས་པའང་མེད་དོ་ཞེས་བཤད་པ་ནི། ས་སྐྱ་པའི་ཕྱག་ལེན་དགག་པ་ཡིན་ནམ། སྒྲུབ་པ་ཡིན། དང་པོ་ལྟར་ན་སྔགས་ཀྱི་ལུང་ཁུངས་བསྟན་པ་དང་། འདིར་སྦྱར་ན་ཡང་ཉེས་པ་མེད་པར་བཤད་པ་དང་འགལ་ལོ། །ཕྱི་མ་ལྟར་ན་རང་ཉིད་ཀྱང་སྐབས་འདིར་འདོད་དགོས་པས། དེ་མ་བྱས་ཀྱང་ཆོ་ག་ཆད་པའི་ཉེས་པ་མེད་པར་བཤད་པ་དང་འགལ་ལོ། །དེས་ན་རྗེ་བཙུན་གྱིས་དེ་ལྟར་གསུངས་པ་ནི། བྷཱུ་རི་བས་རྒྱུན་བཤགས་ཀྱི་སྐབས་སུ། ཀུན་ཏུ་བཟང་པོའི་མཆོད་སྤྲིན་རྒྱ་ཆེན་དང་། ཞེས་གསུངས་པ་ལྟར་འདིར་ཡང་རིགས་པས། ཅི་ལྟར་བྱ་བའི་ཚུལ་བོད་སྐད་དང་རྒྱ་སྐད་གཉིས་ཀྱིས་དོན་ལས་ཤེས་པས་ཉེས་པ་མེད་ཅིང་འཐད་པ་ཁོ་ནའོ། །འདིར་མཆོད་པའི་རྣམ་གྲངས་ལ་དམར་གྱིས། ཕྱི་དང་། གསང་བ་དང་། དེ་ཁོ་ན་ཉིད་དང་། ལུས་ཀྱི་མཆོད་པ་བཞི་བྱ་བར་བཤད་ཅིང་། བུ་སྟོན་གྱིས་ཆུ་གཉིས་སྔོན་དུ་འགྲོ་བའི་ཉེར་སྤྱོད་དང་། རིག་མ་བཅུ་དྲུག་དང་། རྐང་བརྒྱད་ཀྱི་བསྟོད་པ་རྣམས་བྱ་བར་བཤད་པ་ནི་ལུགས་གཞན་ནོ། །དེ་ནས་རྒྱུན་བཤགས་ལ་རྗེ་བཙུན་གྱིས་སྡིག་པ་བཤགས་པ་ནས་དགེ་བའི་རྩ་བ་བསྔོ་བའི་བར་དགུ་གསུངས་ཤིང་། དམར་གྱིས་སྡིག་པ་བཤགས་པ། རྗེས་སུ་ཡི་རང་བ། བསྔོ་བ། སྐྱབས་འགྲོ། སྨོན་པ་སེམས་བསྐྱེད། འཇུག་པ་སེམས་བསྐྱེད་དང་བརྒྱད་དུ་བཤད་ལ། བུ་སྟོན་གྱིས་ནི་གུར་ནས་འབྱུང་བའི་རྒྱུན་བཤགས་བྱ་བར་བཤད་དོ། །དགུར་མཛད་པའི་བྱང་ཆུབ་ཀྱི་སེམས་བསྐྱེད་པའི་སྐབས་སུ། རྗེ་བཙུན་གྱིས། དེ་ཡང་སེམས་ཅན་མ་བསྒྲལ་བ་བསྒྲལ་ཞེས་བྱ་བ་ནི། སྲིད་པའི་རྒྱ་མཚོར་གནས་པ་ཐམས་ཅད་འཁོར་བ་ལས་སྒྲོལ་བར་འདོད་པའོ། །མ་གྲོལ་བ་ནི་ཉན་ཐོས་དང་རང་སངས་རྒྱས་རྣམས་རང་རང་མྱ་ངན་ལས་འདས་པའི་འཆིང་བ་དམ་པོས་བཅིངས་པ་རྣམས་དགྲོལ་བར་འདོད་པའོ། །དབུགས་མ་ཕྱུང་བ་རྣམས་དབུགས་དབྱུང་བ་ནི་ངན་སོང་གསུམ་གྱིས་བསྡུས་པའི་སེམས་ཅན་བསྲན་ཐབས་མེད་པའི་སྡུག་བསྔལ་ལས་དབུགས་མ་ཕྱིན་པ་རྣམས་དབུགས་དབྱུང་བའོ། །མྱ་ངན་ལས་མ་འདས་པ་མྱ་ངན་ལས་འདའ་བ་ནི། ས་ལ་གནས་པའི་བྱང་ཆུབ་སེམས་དཔའ་མྱ་ངན་ལས་འདས་པ་ལ་འདོད་པ་མེ་འབར་བ་ལྟ་བུ་ཡོད་པ་རྣམས་མྱ་ངན་ལས་འདའ་བར་འདོད་པ་སྟེ། བསམས་པ་དེ་དག་དང་ལྡན་པས་ཐམས་ཅད་ངག་ཏུ་བརྗོད་པར་བྱའོ་ཞེས་གསུངས་ལ། གཞན་རྣམས་ནི་གོ་སླའོ། །འདི་དག་ནི་ཕ་རོལ་དུ་ཕྱིན་པའི་རྒྱུན་བཤགས་དང་། རྡོ་རྗེ་ཐེག་པའི་ཐུན་མོང་མ་ཡིན་པའི་རྒྱུན་བཤགས་གཉིས་ཀ་ཚང་ཞིང་། གྲངས་དང་གོ་རིམ་ཡང་ཕ་རོལ་ཏུ་ཕྱིན་པ་དང་སྒོ་བསྟུན་པ་མི་མཛད་པའི་ལུགས་སུ་སྣང་ངོ་། །བཅུ་གཉིས་པ་གནང་བ་ནོད་པ་ནི་རྗེ་བཙུན་གྱིས། དེ་ནས་ཚོགས་ཞིང་དེ་དག་གི་ཞལ་ནས། རིགས་ཀྱི་བུ་ཁྱོད་ཀྱིས་གནས་པ་འདི་ནི་ལེགས་པར་གནས་པ་ཡིན་གྱི། གནས་པ་འདིས་གནས་ན་མཆོག་གྲུབ་པར་འགྱུར་རོ། །ཞེས་གསུངས་པར་བསམ་མོ་ཞེས་གསུངས་སོ། །བཅུ་གསུམ་པ་གཤེགས་སུ་གསོལ་བ་ནི། དེ་ནས་ཐུན་མཚམས་ཀྱི་གོ་རིམ་མི་འཁྲུག་པར་བྱ་བའི་ཕྱིར། མེ་ཏོག་ལ་སོགས་པ་མཆོད་པ་ལྔ་ཙམ་གྱིས་མཆོད་ལ་གཤེགས་སུ་གསོལ་བར་བྱའོ་ཞེས་གསུངས་སོ། །བཞི་པ་དོན་ཆེན་པོ་ཡེ་ཤེས་ཀྱི་ཚོགས་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པ་ལ་བཞི་སྟེ། རྒྱུད་གཞུང་ལས་ཇི་ལྟར་གསུངས་པའི་ཚུལ། འགྲེལ་བྱེད་གཞན་གྱིས་ཇི་ལྟར་བཀྲལ་བའི་ཚུལ། མན་ངག་ཐུན་མོང་མ་ཡིན་པའི་ལུགས་བཤད་པ། དེ་ལྟར་བསྒོམ་པའི་དགོས་པའོ། །དང་པོ་ནི་རྩ་རྒྱུད་ལེའུ་གསུམ་པ་ལས། དེ་ལྟར་བདག་ཉིད་གོ་བགོས་ནས། །རྭ་བ་རྣམས་ནི་ཕྱོགས་སུ་དགོད། །འོག་ཏུ་མཚོན་ཆ་དགོད་པར་བྱ། །འཁོར་ལོ་གནས་པའི་བདག་ཉིད་མཉམ། །སྟེང་དུ་མདའ་ཡི་དྲྭ་བ་བྱ། །མཁའ་སྤྱོད་དུ་ནི་གུར་བྱ་སྟེ། །དེ་དག་གིས་ནི་གོ་ཆར་འགྱུར། །དེ་ལྟར་གོ་བགོས་སུམ་ཅུ་ནི། །རྩ་གསུམ་པས་ཀྱང་བཤིག་མི་ནུས། །ཞེས་རྭ་བ་དང་ས་གཞི་དང་། མདའི་དྲྭ་བ་དང་། གུར་ཏེ་བཞི་གསུངས་སོ། །སློབ་དཔོན་གྱི་གཞུང་ལས། དེ་ནས་རྡོ་རྗེའི་དྲྭ་བ་བསམ་པར་བྱ་སྟེ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ཨོཾ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ། ཨོཾ་གྲྀཧྣ་པ་ཡ་གྲྀཧྣ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་ཧཱུྃ་ཧཱུྃ་ཕཊ། ཞེས་བྱ་བའི་སྔགས་ཀྱིས་ཤར་ཕྱོགས་ལ་སོགས་པར་ངེས་པར་བཞག་པར་བྱའོ། །སྟེང་དུ་ནི་མདའི་དྲྭ་བའོ། །ས་གཞི་ནི་ཡི་གེ་ཧཱུྃ་ལས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབས་ལ། དེའི་འོད་ཀྱི་སྣང་བ་ལས་རྡོ་རྗེའི་རྭ་བ་དང་། རྡོ་རྗེའི་བླ་རེ་སྟེ། ཨོཾ་གྷ་གྷ་ནི་བརྡུང་གཉིས། གྷ་ཏ་ཡ་གྷ་ཏ་ཡ་ནི་བརྡུང་དུ་ཆུག་གཉིས། སརྦ་ནི་ཐམས་ཅད། དུཥྚན་ནི་གདུག་པ་རྣམས། ཕཊ་ཕཊ་ནི་ཁོས་གཉིས། ཀཱི་ལ་ཡ་ཀཱི་ལ་ཡ་ནི་ཕུར་བུས་ཐོབ་གཉིས། སརྦ་པཱ་པཾ་ཕཊ་ཕཊ་ནི་ཁོས་གཉིས། ཧཱུྃ་ཧཱུྃ་ཧཱུྃ། བཛྲ་ཀཱི་ལ་ནི་རྡོ་རྗེ་ཕུར་བུ། བཛྲ་དྷ་རོ་ནི་རྡོ་རྗེ་འཆང་གི ཨཱ་ཛྙཱ་པ་ཡ་ཏི་ནི་བཀའ་ལས་མ་འདའ་ཤིག སརྦ་ནི་ཐམས་ཅད། བིགྣན་བགེགས་རྣམས་ཀྱི། ཀཱ་ཡ་ཝཱཀྐ་ཙིཏྟ་ལུས་ངག་ཡིད། ཀཱི་ལ་ཡ་ཀཱི་ལ་ཡ་ནི་ཕུར་བུས་ཐོབ་གཉིས། ཧཱུྃ་ཧཱུྃ་ཕཊ་ཕཊ། ཕུར་བུས་བཏབ་པའི་སྔགས་སོ། །ཨོཾ་བཛྲ་མུད་ཀ་ར་ནི་རྡོ་རྗེ་ཐོ་བས། ཨ་ཀཱོ་ཊ་ཡ་ནི་རྡུངས་ཤིག ཧཱུྃ་ཕཊ། ཕུར་བུ་བརྡུང་བའི་སྔགས་སོ། །ཞེས་རྡོ་རྗེའི་རྭ་བ་དང་། མདའི་དྲྭ་བ་དང་། རྡོ་རྗེའི་ས་གཞི་དང་། དྲྭ་བ་དང་། བླ་རེ་དང་། ཕུར་བུ་བཏབ་པ་སྟེ་དྲུག་གསུངས་སོ། །གཉིས་པ་ནི་པྲཛྙཱ་རཀྵི་ཏའི་འགྲེལ་པ་ལས། དེ་ནས་ཞེས་བྱ་བ་ནི་ཕུང་པོ་ལ་སོགས་པ་རྣམ་པར་དག་པའི་རྗེས་ཐོགས་སུའོ། །རྡོ་རྗེའི་གུར་བསམ་པར་བྱ་སྟེ། ཤར་ལ་སོགས་པའི་ཕྱོགས་སུ་ངེས་པར་དགོད་པར་བྱའོ། །སྟེང་དུ་ནི་མདའི་དྲྭ་བའོ། །ས་གཞི་ནི་ཡི་གེ་ཧཱུྃ་ལས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེའི་འོད་ཀྱི་སྣང་བ་ལས། རྡོ་རྗེའི་རྭ་བ་དང་། རྡོ་རྗེའི་བླ་རེའོ། །ཞེས་བྱ་བའི་ཚིགས་བདུན་པོ་འདི་རྣམས་ནི་མན་ངག་ཇི་ལྟ་བ་བཞིན་དུ་བྲིའོ། །གཡོན་པའི་མཛུབ་མོ་དང་། མཐེ་བོང་བརྡབ་པ་སྔོན་དུ་འགྲོ་བས། ཨོཾ་སུམྦྷ་ནི་སུམྦྷ་ཞེས་བྱ་བའི་སྔགས་བརྗོད་ཅིང་། ནག་པོ་དང་། ལྗང་གུ་དང་། དམར་པོ་དང་། སེར་པོའི་ཁ་དོག་ཚངས་པའི་འཇིག་རྟེན་ནས་གསེར་གྱི་ས་གཞི་ལ་ཐུག་པར་ཁྱབ་ཅིང་འབར་བའི་ལུས་ཆེན་པོ་ཤར་དང་། བྱང་དང་། ནུབ་དང་། ལྷོའི་ཕྱོགས་རྣམས་སུ་རིམ་གྱིས་དགོད་པར་བྱའོ། །སུམྦྷ་ལ་སོགས་པའི་སྔགས་ཀྱི་འོད་ཟེར་གྱི་ཁ་དོག་ལས་དེ་དང་མཐུན་པའི་རྭ་བ་བཞིའོ། །དེ་དང་དུས་མཉམ་པ་ཉིད་དུ་ཧཱུྃ་གི་ཡི་གེ་ལས་སྐྱེས་ཤིང་དེ་ཉིད་ཀྱིས་བྱིན་གྱིས་བརླབས་པའི་སྣ་ཚོགས་རྡོ་རྗེའི་རང་བཞིན་གྱི་ས་གཞིའོ། །དེའི་འོད་ཟེར་གྱིས་སྟེང་དུ་རྡོ་རྗེ་རྩེ་ལྔ་པའི་རྣམ་པའི་མདའི་དྲྭ་བའོ། །དེའི་འོག་དུ་རྡོ་རྗེའི་གུར་དང་། རྡོ་རྗེའི་བླ་རེ་ནི་གནས་ཇི་ལྟ་བ་བཞིན་དུ་བསམ་པའོ། །དེ་ནས་སུམ་བྷ་ལ་སོགས་པའི་སྔགས་བཞི་ལས་གྲུབ་པའི་ཁྭ་གདོང་མ་ལ་སོགས་པའི་ལྷ་མོ་བཞི་དང་། དེ་ཉིད་ཀྱི་ཚེ་གཉིས་གཉིས་ཀྱི་འོད་ཟེར་ལས་བྱུང་བའི་གཤིན་རྗེ་བརྟན་མ་ལ་སོགས་པའི་ལྷ་མོ་བཞི་སྟེ། འདི་བརྒྱད་ནི་ཞལ་གཅིག་པ་ཕྱག་གཉིས་པ་ལྟེ་བ་མན་ཆད་རྩེ་གཅིག་པའི་རྣམ་པའོ། །གཡས་པ་ནི་རྡོ་རྗེ་ཐོ་བ་འཛིན་པ། གཡོན་པ་བདག་ཉིད་ཀྱི་ཕུར་བུའི་ཕྱག་རྒྱ་ཅན་སྤྲོས་ཏེ། ཕྱོགས་བཅུ་ན་གནས་པའི་བགེགས་ཀྱི་ཚོགས་བཀུག་ནས་སྒྲ་རིང་པོར་བརྗོད་པའི་ཧཱུྃ་གི་ཡི་གེ་ལས་གྲུབ་པའི་ཕྱོགས་བརྒྱད་ཀྱི་རྭ་བ་དང་ཉེ་བའི་དོང་རྣམས་སུ་བཅུག་ལ། ཕུར་བུས་གདབ་པའི་སྔགས་སྔོན་དུ་འགྲོ་བས་བགེགས་ཀྱི་ཚོགས་ཕུར་བུས་གདབ་པ་དང་། བརྡུང་བའི་སྔགས་སྔོན་དུ་འགྲོ་བས་བརྡུང་བར་བྱའོ། །ཕུར་བུས་གདབ་པ་དང་བརྡུང་བ་དག་གིས་བགེགས་ཀྱི་ཚོགས་རྣམས་བདེ་བ་ཆེན་པོའི་དེ་བཞིན་ཉིད་དུ་རང་བཞིན་གཅིག་པར་རྣམ་པར་བསམ་པར་བྱའོ། །ཡང་བགེགས་ལྷག་མ་རྣམས་བསྐྲད་ནས་དེ་དག་རྭ་བ་ལ་ཐིམ་པ་ན། ཆུ་ལ་ཆུ་ཐིམ་པ་ལས་ཐིགས་པ་བྱུང་བའི་ཚུལ་གྱིས་མཚམས་བཅིང་བའི་དོན་དུ་ཟླུམ་པོའི་རྡོ་རྗེ་དང་། པདྨ་དང་འཁོར་ལོའི་རྭ་བ་རྣམས་བསམ་པར་བྱའོ། །རྡོ་རྗེའི་རྭ་བ་ལ་སོགས་པ་དེ་ཉིད་མཚམས་མེད་ཅིང་དུམ་བུ་གཅིག་ཏུ་གྱུར་པས་རྣམ་པ་ཐམས་ཅད་དུ་འགྲོ་བ་ལ་བགེགས་མེད་པར་མོས་པ་བྱའོ། །ཞེས་གསུངས་སོ། །པུ་ཧྲངས་པ་ནས་བརྒྱུད་པ། བྲོག་རྭ་བ་དང་། དམར་གྱིས་འདི་ཇི་ལྟ་བ་བཞིན་བཞེད་དེ། འདི་ལ་ལུས་དང་། ཡན་ལག་གཉིས་ལས། ལུས་ལ་སྔགས་ཀྱི་རྭ་བ་དང་། དེ་ལས་རྡོ་རྗེའི་རྭ་བ་དང་། དེ་ལས་འོད་ཟེར་སྣང་བ་དང་། རྡོ་རྗེའི་ས་གཞི་དང་། རྡོ་རྗེའི་གུར་དང་། རྡོ་རྗེའི་བླ་རེ་དང་། མདའི་དྲྭ་བ་སྟེ་བདུན། ཡན་ལག་ལ་ཕུར་བུས་བཏབ་པ་དང་། བརྡུང་བ་གཉིས་ཏེ་དགུར་བཤད་དོ། །བུ་སྟོན་གྱིས་གཞན་རྣམས་འདྲ་བ་ལས། སྔགས་ཀྱི་རྭ་བ་ལོགས་སུ་མི་བྱེད་པར། སྔགས་བརྗོད་པས་སྒོ་མཚམས་མ་བརྒྱད། གསེར་གྱི་ས་གཞི་ནས་ཚངས་པའི་འཇིག་རྟེན་གྱི་བར་དུ་ཁྱབ་པའི་ལུས་ཆེན་པོ་འབར་བ་བཀོད་ནས། དེའི་རྗེས་སུ་སྔགས་དྲུག་དང་། ཕྱག་རྒྱ་དྲུག་གིས་རྡོ་རྗེའི་ས་གཞི་སོགས་དྲུག་བསྒོམ་པ་ཨ་བྷི་དྷ་ན་ལྟར་མཛད་ཅིང་། དེ་ནས་ཕུར་སྟབས་མཛད་དོ། །གསུམ་པ་ནི་རྗེ་བཙུན་ནཱ་རོ་ཏ་པའི་མན་ངག་ཕམ་འཐིང་པ་ནས་བརྒྱུད་པ་རྗེ་བཙུན་གྱིས་འདི་ལྟར་གསུངས་ཏེ། ས་ཕྱོགས་བགེགས་དང་བྲལ་བར་བྱ་བ་དང་། སྲུང་བའི་འཁོར་ལོ་བརྟན་པར་བསྒོམ་པ་དང་། བགེགས་ཚར་བཅད་པ་གསུམ་ལས། དང་པོ་ནི་རང་གི་སྙིང་ཁའི་ཧཱུྃ་ལས་གཤིན་རྗེ་གཤེད་བཅུའམ། ཁཎྜ་རོ་ཧི་བཅུའམ། སྒོ་མཚམས་མ་བརྒྱད། ཁཎྜ་རོ་ཧི་གཉིས་ཏེ་བཅུ་གང་བློ་ལ་མོས་པ་སྤྲོ་གསུང་ནའང་། ཕྱི་མ་གཙོ་བོ་སྟེ། ལུས་ཀྱིས་གཡོན་པའི་སྡིགས་མཛུབ་ཕྱོགས་བཅུར་བསྟན་ཅིང་སེ་གོལ་བརྡབ། ངག་དུ་ཞལ་བཞི་པའི་སྔགས་བརྗོད་དེ། ཕྱོགས་ཤར་ནས་བཟུང་སྟེ། གཡོན་སྐོར་དུ་སྤྲོ་བའི་ཚེ་ཤར་དང་སྟེང་གི་དུས་གཅིག ནུབ་དང་འོག་གི་དུས་གཅིག་ཏུ་སྤྲོ་བ་ལ་སྔགས་ཚན་གཅིག མཚམས་རྣམས་མེ་ནས་བཟུང་སྟེ། གཡས་སྐོར་དུ་སྤྲོ་བ་ལ་སྔགས་ཚན་གཅིག་སྟེ། དེས་བགེགས་ཐམས་ཅད་བསྐྲད་པར་བསམ་མོ། །གཉིས་པ་ནི་ས་ཕྱོགས་དེར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་བསྒོམས་ནས། དེ་ལས་འོད་བྱུང་བས། འོག་རྡོ་རྗེའི་ས་གཞི་དང་། ཁོར་ཡུག་ཏུ་རྡོ་རྗེ་ནག་པོ་གདེངས་པ་འགྲེངས་བུར་གྱུར་པའི་རྭ་བ་དང་། ཡང་རྡོ་རྗེ་འཕྲེད་ལ་སོང་བའི་དྲྭ་བ་གཉིས་གཅིག་ཏུ་བྱས་པ་དང་། སྟེང་དུ་རྡོ་རྗེའི་གུར་དང་། དེའི་འོག་ཏུ་རྡོ་རྗེའི་བླ་རེ་དང་། དེ་དག་གི་ཕྱི་རོལ་དུ་མདའི་དྲྭ་བ་དང་། དེའི་ཕྱི་རོལ་དུ་མེ་རི་འབར་བ་རྣམས་བསྒོམས་ལ། སྔར་གྱི་ཕྱག་རྒྱ་དང་། ཨ་བྷི་དྷ་ན་ནས་འབྱུང་བའི་སྔགས་དྲུག་པོ་ལན་གསུམ་གསུམ་བརྗོད་པས་བྱིན་གྱིས་བརླབ་བོ། །གསུམ་པ་ནི། དེ་ནས་སྔར་ཕོ་ཉ་བཅུ་པོས། བགེགས་ཁ་ཅིག་ནི་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ལ་བཀོད། ནག་པོའི་རིགས་ཁ་ཅིག་ནི་བསྒྲལ་ཏེ་བདེ་བ་ཅན་ལ་སོགས་པའི་ཞིང་དུ་གནས་སྤར། བགེགས་ཀྱི་གཙོ་བོ་ཕྱོགས་སྐྱོང་བཅུ་ནི་བཀུག་སྟེ་འོངས་ནས་མེ་རིའི་ནང་རྡོ་རྗེ་རྭ་བའི་ཕྱི་རོལ་མདའི་དྲྭ་བའི་འོག་ཏུ་འོབས་གཅིག་ཡོད་པར་བསམ་དེའི་ཁ་ཁྱེར་ལ་ཕྱོགས་སྐྱོང་བཅུ་པོ་ཡོད་པར་བསྒོམ་ལ་དེ་ནས་ཕུར་གདབ་བྱ་བར་གསུངས་སོ། །དེའི་རྗེས་སུ་ཕོ་ཉ་བཅུ་པོ་རྣམས་ལས་རང་དང་འདྲ་བའི་སྤྲུལ་པ་དཔག་ཏུ་མེད་པ་སྤྲོས་ཏེ། མཚོན་ཆ་སྣ་ཚོགས་ཐོགས་ནས་རྡོ་རྗེའི་དྲྭ་མིག་ནས་རོ་སྟོད་འཐོན་ཏེ། སྒྲུབ་པ་པོ་ཇི་སྲིད་བྱང་ཆུབ་མ་ཐོབ་ཀྱི་བར་དུ་བར་ཆད་ཐམས་ཅད་བསྲུང་བར་བསམ་མོ། །ཞེས་གསུངས་སོ། །གཞུང་དང་སྦྱར་ན། དེ་ནས་རྡོ་རྗེའི་དྲྭ་བ་བསམ་པར་བྱ་སྟེ། ཞེས་པས་མདོར་བསྟན་ཏེ། དྲྭ་བ་ནི་འགྲེལ་པས་གུར་དུ་བཤད་ཅིང་། སྐད་དོད་ཀྱང་གཅིག་པས་སྲུང་འཁོར་སྤྱིའི་མིང་ངོ་། །ཨོཾ་སུམ་བྷ་ཞེས་པ་ནས། ངེས་པར་བཞག་པར་བྱའོ་ཞེས་པའི་བར་གྱིས་ས་ཕྱོགས་བགེགས་དང་བྲལ་བ་བསྟན། སྟེང་དུ་ནི་ཞེས་པ་ནས་བླ་རེ་སྟེ་ཞེས་པའི་བར་གྱིས་སྲུང་བའི་འཁོར་ལོ་བརྟན་པར་བསྒོམས་པ་ཨོཾ་གྷ་གྷ་ཞེས་པ་མན་གྱིས་བགེགས་ཚར་གཅོད་པ་བསྟན་ཏེ། བསྒོམ་ཚུལ་རྒྱས་པ་ནི་མན་ངག་ལས་བྱུང་བའོ། །བཞི་པ་ནི། དམར་གྱིས་ཕྱིའི་བགེགས་ལས་བསྲུང་བའི་ཕྱིར་གནས་བསྲུང་བ་ཞེས་དང་། རྗེ་བཙུན་གྱིས་དོན་ཆེན་པོ་ཡེ་ཤེས་ཀྱི་ཚོགས་གསོག་པ་ལ་བར་ཆད་མི་འབྱུང་བར་བྱ་བའི་ཕྱིར་ཡིན་པར་གསུངས་སོ། །པྲ་ཛྙཱ་རཀྵི་ཏས། འདིར་ཅིའི་ཕྱིར་སྲུང་བའི་རྡོ་རྗེའི་དྲྭ་བ་ལ་སོགས་པའི་རྗེས་ཐོགས་སུ་སྟོང་པ་ཉིད་བསྒོམ་ཞེས་རྩོད་པར་མི་བྱ་སྟེ། གང་གི་ཕྱིར་རྒྱུད་འདི་ནི་དབང་པོ་རྣོན་པོའི་དབང་དུ་བྱས་པ་ཡིན་ལ། དེ་ལ་སྟོང་པ་ཉིད་ཁོ་ན་དོན་དམ་པའི་སྲུང་བ་ཡིན་ནོ། །འོ་ན་ཇི་ལྟར་ཕྱི་རོལ་དུ་བྲིས་པའི་དཀྱིལ་འཁོར་དུ་རྡོ་རྗེའི་རྭ་བ་ཡིན་ཞེ་ན་མ་ཡིན་ཏེ། གང་གི་ཚེ་བཅོམ་ལྡན་འདས་རྫོགས་པ་དེ་ཉིད་ཀྱི་ཚེ་དམ་ཚིག་གི་འཁོར་ལོ་ཡོངས་སུ་གཅོད་པའི་སྣ་ཚོགས་རྡོ་རྗེའི་རྭ་བ་རྫོགས་པའི་ཕྱིར་རོ། །ཞེས་གསུངས་ཏེ། འདིའི་དོན། སྲུང་བའི་འཁོར་ལོའི་རྗེས་ཐོགས་སུ་ཡེ་ཤེས་ཀྱི་ཚོགས་བསག་བསྒོམ་ན། སྲུང་འཁོར་དོན་མེད་པར་འགྱུར་ཏེ། ཡེ་ཤེས་ཀྱི་ཚོགས་ཀྱིས་སྟོང་ཉིད་དུ་སྦྱངས་པས་དངོས་གཞི་ལ་མི་ཕན་པའི་ཕྱིར་རོ་སྙམ་ན་མ་ཡིན་ཏེ། ཡེ་ཤེས་ཀྱི་ཚོགས་དེ་ཉིད་དོན་དམ་པའི་སྲུང་བ་ཡིན་པས་དངོས་གཞི་ལ་ཕན་པའི་ཕྱིར་རོ། །འོ་ན་བྲིས་པའི་དཀྱིལ་འཁོར་ལ་སྟོང་པ་ཉིད་དུ་སྦྱངས་པའི་རྗེས་སུ་རྡོ་རྗེའི་རྭ་བ་སོགས་མེད་པར་འགྱུར་རོ་སྙམ་ན། མ་ཡིན་ཏེ། རྟེན་བརྟེན་པ་གཅིག་ཆར་དུ་གྲུབ་པའི་ཚེ་རྡོ་རྗེའི་རྭ་བ་སོགས་ཀྱང་གྲུབ་པའི་ཕྱིར་ཞེས་པའི་དོན་ཏོ། །རྗེ་བཙུན་ནཱ་རོ་པའི་དགོངས་པ་ནི། ཡེ་ཤེས་ཀྱི་ཚོགས་ནི་དོན་དམ་པའི་བྱང་ཆུབ་ཀྱི་སེམས་དངོས་སུ་བསྒོམ་པ་ཡིན་པས། དོན་ཆེན་པོ་ཡིན་ལ། དེ་ལ་བར་ཆད་མི་འབྱུང་བའི་ཕྱིར་ཐོག་མར་སྲུང་བའི་འཁོར་ལོ་བསྒོམ་མོ། །འོ་ན་དངོས་གཞི་ལ་མི་ཕན་པར་འགྱུར་རོ་སྙམ་ན་མ་ཡིན་ཏེ། དོན་དམ་པའི་བྱང་ཆུབ་ཀྱི་སེམས་བསྒོམ་པ་དེ་ལས་ལངས་ནས། དེ་རྟོགས་པའི་ཕྱིར་ཀུན་རྫོབ་བྱང་ཆུབ་ཀྱི་སེམས་བསྒོམ་པ་ནི་དངོས་གཞི་ཡིན་པས། གཉིས་ཀའི་བར་ཆད་བསྲུང་བར་འགྱུར་བའི་ཕྱིར་སྙམ་དུ་དགོངས་ཏེ་ཚུལ་འདི་ནི་ཡེ་ཤེས་ཞབས་ལུགས་ལས་རྒྱས་པར་འབྱུང་ངོ་། །འོ་ན་སྤྱིར་བགེགས་ཞེས་བྱ་བ་རང་གང་ཡིན། དེ་དོན་དམ་པར་ཡོད་དམ་ཀུན་རྫོབ་དུ་ཡོད། བསྲུང་ན་ཅི་ལྟར་བསྲུང་ཞེ་ན། སྤྱིར་སྣ་ཚོགས་སུ་སྣང་བ་ཐམས་ཅད་རང་སེམས་གཅིག་གི་ཆོ་འཕྲུལ་ཡིན་ཅིང་། དེ་སྐྱེ་འགག་གནས་གསུམ་གྱིས་སྟོང་པ་ཡིན་ཀྱང་། དེ་ལྟར་མ་རྟོགས་པའི་དབང་གིས། རྣམ་པར་རྟོག་པ་ཕྱིན་ཅི་ལོག་གིས་བསླད་པས་སྡིག་པའི་སེམས་ཉིད་ཕྱི་རོལ་གྱི་བདུད་དུ་སྣང་བ་གང་ཡིན་པ་དེ་ཉིད་ཡིན་ཏེ། ཞི་བ་ལྷས། འདི་ལྟར་འཇིགས་པ་ཐམས་ཅད་དང་། །སྡུག་བསྔལ་དཔག་ཏུ་མེད་པ་ཡང་། །སེམས་ལས་བྱུང་བ་ཡིན་ནོ་ཞེས། །ཡང་དག་གསུང་བ་ཉིད་ཀྱིས་བསྟན། །ཞེས་སོ། །དེ་དོན་དམ་པར་སྤྲོས་པ་ལས་གྲོལ་ཀྱང་། ཐ་སྙད་ཀུན་རྫོབ་ཙམ་དུ་རང་སེམས་མ་ཐུལ་གྱི་བར་དུ་འབྱུང་ལ་ཐུལ་བ་ལས་མི་འབྱུང་སྟེ། ངེས་བརྗོད་ལེའུ་གསུམ་པ་ལས། བདུད་མིན་བདུད་མིན་པ་ཡང་མིན། །རང་གི་སེམས་ནི་བཅིང་བར་བྱ། །རང་གི་སེམས་ནི་ཐུལ་བ་ལ། །བགེགས་ཀྱི་འཇུག་པ་ག་ལ་ཡོད། །ཅེས་གསུངས་པས་ན། གང་དུ་རང་སེམས་གཟུང་འཛིན་གྱི་རྣམ་པར་རྟོག་པ་མི་འཆོར་བར་བཅིངས་པ་དང་། བདག་ལ་གཅེས་པར་འཛིན་པའི་བློ་ལོག་ནས། བདག་གཞན་མཉམ་པར་རྟོག་པའི་བྱང་ཆུབ་ཀྱི་སེམས་དང་ལྡན་པ་དང་། སྣང་བ་གདོན་མི་ཟ་བར་རང་བཞིན་མེད་པར་རྟོགས་པའི་གང་ཟག་གསུམ་ལ་བདུད་མི་འབྱུང་ལ། དེ་རྣམས་དང་མི་ལྡན་ན་བགེགས་ཀྱང་ཡོད་ལ། བསྲུངས་པས་ཀྱང་ཐུབ་སྟེ། དཔེར་ན་རྒྱ་གར་གྱི་ལྷོ་ཕྱོགས་ཀྱི་རྒྱུད་ན། རྒྱལ་པོ་ཕྱི་རོལ་པའི་གྲུབ་མཐའ་འཛིན་པ་གཅིག་ལ་མཆོད་གནས་མུ་སྟེགས་ཞི་བའི་གྲུབ་མཐའ་འཛིན་པ་གཅིག་ཡོད་པ་ལ། དེ་ལ་རཱ་ཛས་ཁོ་རང་གི་ལུགས་ཀྱི་དབང་བསྐུར་ཞུས་པས། དེས་ཀྱང་དཀྱིལ་འཁོར་གྱི་ཁང་པ་བརྩིགས། རྒྱལ་མཚན་དང་བ་དན་ལ་སོགས་པ་ལྔ་བསྒྲེང་། རྡུལ་ཚོན་གྱི་དཀྱིལ་འཁོར་བཞེངས། མཆོད་པ་རྒྱ་ཆེན་པོ་ཡང་བཤམས་ནས་དབང་བསྐུར་བྱེད་ལ། དེ་ལྟ་བའི་ཕྱིར་སྐྱེ་བོའི་ཚོགས་དུ་མ་འདུས་པའི་ཚེ། དེ་ནས་ཐག་མི་རིང་བ་གཅིག་ན། སངས་རྒྱས་པའི་རྣལ་འབྱོར་པ་བྷོ་ཛ་དེ་ཝ་ཞེས་པ་བདེ་མཆོག་བསྒོམ་པ་གཅིག་གི་བསམ་པ་ལ། འདིས་སངས་རྒྱས་ཀྱི་བསྟན་པ་ལ་གནོད་སྙམ་ནས་རླུང་ལྷ་བཀུག་སྟེ། གཏོར་མ་བྱིན་པས། ཁོ་ན་རེ་ད་ཅི་བྱ་ཟེར་བ་ལ། དབང་བསྐུར་གྱི་བྱ་བ་བྱེད་པ་ཕ་གི་ཚོ་རླུང་ལ་བསྐུར་གཅིག་བྱས་པས། དེ་འདྲ་བ་སླ་ཡིས་ཟེར་ཏེ། རི་དྭགས་ཤྭ་བ་ལ་ཞོན་རླུང་གི་བ་དན་ཁྱེར་ཏེ། འཚུབ་མའི་རྣམ་པར་སོང་ནས་ཡུད་ཙམ་གཅིག་གིས་དེ་རྣམས་རྗེས་མེད་པར་བྱས་སོ། །དེར་མུ་སྟེགས་ཀྱི་རྣལ་འབྱོར་པ་དེས་བསམ་པས་ཁོ་བོ་ནི་ཤིན་ཏུ་སྨ་ཕབ་ལ། འདི་ངེས་པར་རི་སུལ་གྱི་སྤྱིལ་པོའི་སངས་རྒྱས་པའི་རྣལ་འབྱོར་པའི་ཆོ་འཕྲུལ་ཡིན་སྙམ་ནས། ལན་དུ་སླར་མེ་ལྷ་བསྐུག་ནས་སྦྱིན་སྲེག་དགང་བླུགས་བདུན་བྱིན་ནས། སངས་རྒྱས་པའི་རྣལ་འབྱོར་པ་ཕ་ཀི་ཟོ་ཞིག་བྱས་པས། མེ་ལྷ་འཁོར་དང་བཅས་པ་སྐད་ཅིག་གིས་འོངས་པ་དང་། རྣལ་འབྱོར་པས་ཀྱང་བར་ཆད་བྱེད་པར་ཤེས་ནས་མོད་ལ་སྲུང་བའི་འཁོར་ལོ་ཕྱོགས་མཚམས་བདུན་རིམ། སྟེང་བཞི་རིམ། འོག་རྡོ་རྗེའི་ས་གཞིར་བསྒོམས་ནས། དེའི་ནང་དུ་རང་ལྷ་སུམ་ཅུ་རྩ་བདུན་རྟེན་དང་བརྟེན་པར་བཅས་པའི་དབུས་སུ། གཙོ་བོའི་ང་རྒྱལ་གྱིས་སྔགས་ཟློས་ཤིང་ཡོད་པའི་ཚེ། མེ་ལྷའི་འཁོར་རྣམས་མེ་རི་ལ་བརྡུགས་ནས་སླར་ལོག་པ་དང་། མེ་ལྷ་ན་རེ་ང་མེའི་རང་བཞིན་ཡིན་པས་དེ་ལ་ཚེགས་མེད་ཀྱིས་ཟེར་ནས། མེ་རི་དང་འོབས་གསུམ་ལས་བརྒལ་ནས་བྱུང་ནས། མདའི་དྲྭ་བ་ལ་རྡུགས་ནས་ལོག་སྟེ། མུ་སྟེགས་ཀྱི་དྲུང་དུ་འོངས་ནས། ངས་ཁོ་ལ་གནོད་པ་མི་འཁྱོལ་བར་འདུག་མར་དགང་བླུགས་བདུན་བླང་ཟེར་ནས་སོང་སྐད་དོ་ཞེས་དམར་གྱིས་བཤད་དེ། སྤྱིར་སྲུང་འཁོར་བསྒོམ་པའི་དགོས་པ་དང་། བྱེ་བྲག་རིམ་པ་མང་པོ་བསྒོམ་པའི་དགོས་པ་ཡང་ལེགས་པར་གྲུབ་པའོ། །གཉིས་པ་དོན་ཆེན་པོ་ཡེ་ཤེས་ཀྱི་ཚོགས་བསྒོམ་པ་ལ་བཞི་སྟེ། གཞུང་ལས་བཤད་པའི་ཚུལ། འགྲེལ་པ་མཁན་པོས་བཀྲལ་བའི་ཚུལ། མན་ངག་གིས་ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ་བཤད་པའོ། །དང་པོ་ནི་སློབ་དཔོན་གྱི་གཞུང་ལས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ། ཡང་སྟོང་པ་ཉིད་དུ་བསམ་པར་བྱ་སྟེ། བྱང་ཆུབ་ཀྱི་ཚོགས་བསྒོམས་པས། རང་གི་སེམས་ཙམ་ཉིད་ལ་གནས་ཤིང་། མིག་ཡོར་ཙམ་གྱི་ཡེ་ཤེས་དག་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །ཞེས་གསུངས་སོ། །གཉིས་པ་ནི་འདིའི་དོན། པྲ་ཛྙཱ་རཀྵི་ཏའི་འགྲེལ་པ་སོགས་འགྲེལ་པ་གསུམ་ལས། མཆོད་པ་ལ་སོགས་པའི་རྗེས་ལ་མཆོད་པ་ལ་སོགས་པ་རྟེན་ཅིང་འབྲེལ་བར་འབྱུང་བ་སེམས་ཙམ་དུ་མོས་པ་བྱས་པ་ལ་བདག་ཉིད་ཀྱི་སྤྱི་བོ་དང་མགྲིན་པ་དང་། སྙིང་ཁ་རྣམས་སུ་ཧེ་རུ་ཀ་ཞེས་བྱ་བའི་ཡི་གེ་གསུམ་བསྒོམ་ཞིང་། ཧེ་ནི་ཆོས་ཐམས་ཅད་རྒྱུ་དང་བྲལ་བ་དང་། དེ་བཞིན་དུ་རྟོགས་པ་དང་བྲལ་བ་དང་། གང་དུ་ཡང་མི་གནས་པ་ཞེས་བརྟགས་ནས། དེ་ལྟ་བུར་ཆོས་ཐམས་ཅད་ཀྱི་རང་བཞིན་མི་ཤེས་པས་སེམས་ཅན་རྣམས་བདག་དང་བདག་གི་བ་ལ་སོགས་པར་བཟུང་བས་འཁོར་བར་འགྱུར་ཏེ། དེ་བས་ན་བདག་ཉིད་ཧེ་རུ་ཀར་གྱུར་ནས། ཇི་ལྟར་དེ་ལྟ་བུའི་རང་བཞིན་དུ་ཆོས་ཐམས་ཅད་ཤེས་པར་གྱུར་པ་དེ་ལྟར་བདག་གིས་བྱའོ་ཞེས་ཆོས་ལ་དམིགས་པའི་སྙིང་རྗེ་བསྐྱེད་ལ། ཨོཾ་སྭ་བྷཱ་ཝ་ལ་སོགས་པའི་སྔགས་བརྗོད་ཅིང་ཁམས་གསུམ་པོ་ཐམས་ཅད་སྟོང་པ་ཉིད་དུ་བལྟ་བར་བྱའོ། །སྨོན་ལམ་གྱི་དབང་གིས་སེམས་དེ་གོང་ནས་གོང་དུ་གནས་པ་དཀར་པོ་དང་། དམར་པོ་དང་། སྔོན་པོའི་ཡི་གེ་ཨོཾ་ཨཱཿཧཱུྃ་གི་རང་བཞིན་དུ་རྣམ་པར་བསམ་པར་བྱའོ། །དེ་ནས་ཡི་གེ་ཨོཾ་ལས་སྐུའི་འཁོར་ལོའི་ལྷ་རྣམས་ཡང་དག་པར་སྤྲོས་ཏེ་འགྲོ་བའི་དོན་བྱས་ནས་སྙོམས་པར་འཇུག་པ་སྔོན་དུ་བྱས་ཏེ་ཞུ་བར་བྱས་ནས་དེ་ཉིད་ལ་ཞུགས་པར་བྱས་ལ། དེ་ནས་ཡི་གེ་ཨཱཿལས་གསུང་གི་འཁོར་ལོའི་ལྷ་རྣམས་དང་། ཡི་གེ་ཧཱུྃ་ལས་ཐུགས་ཀྱི་འཁོར་ལོའི་ལྷ་རྣམས་སོ། །དེ་ནས་ཨོཾ་ནི་ཨཱཿལའོ། །ཨཱཿནི་ཧཱུྃ་ལའོ། །ཨུ་ནི་ཧ་ལའོ། །ཧ་ནི་མགོ་བོ་ལའོ། །མགོ་བོ་ནི་ཟླ་བ་ཕྱེད་པ་ལའོ། །ཟླ་བ་ཕྱེད་པ་ནི་ཐིག་ལེ་ལའོ། །ཐིག་ལེ་ནི་ནཱ་ད་ལ་བསྡུས་ནས་སྐྲའི་རྩེ་མོ་བརྒྱ་སྟོང་དུ་གཤགས་པའི་ཚད་ཙམ་དུ་བཞག་ནས་སེམས་ཅན་རྣམས་ཆོས་ཉིད་མི་ཤེས་པས་འཁོར་བར་འཁོར་ཏེ། དེ་བས་ན་བདག་གིས་ཆོས་ཉིད་ཤེས་པར་བྱས་ནས་དེ་རྣམས་ཀྱིས་རྟོགས་པར་བྱའོ་ཞེས་བྱ་བའི་སྙིང་རྗེ་ཆེན་པོ་དམིགས་པ་མེད་པའི་སྙིང་རྗེའི་ས་བོན་དུ་གྱུར་པར་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་ཞེས་བྱ་བ་ལ་སོགས་པའི་སྔགས་བརྗོད་པས་ནཱ་ད་ཙམ་གྱི་རྟོག་པ་ཡོངས་སུ་སྤང་བར་བྱའོ་ཞེས་གསུངས་ཤིང་། ལུགས་འདིའི་རྗེས་སུ་འབྲང་བ་མར་དོ་སོགས་དང་། ཕྱིས་ཀྱི་བུ་དགེ་གཉིས་ཀྱང་འདི་བཞིན་དུ་བསྒོམ་པར་སྣང་ངོ་། །དེ་ལ་གཞུང་གི་དོན་སྔགས་དང་པོ་བརྗོད་པས་སྟོང་ཉིད་དུ་བསམ་པ་ནི། གནས་གསུམ་དུ་ཡི་གེ་གསུམ་བཀོད་ནས། སེམས་ཅན་གཟུང་འཛིན་གྱི་དབང་གིས་འཁོར་བར་གྱུར་པ་རྣམས་ལ་ཆོས་ལ་དམིགས་པའི་སྙིང་རྗེ་བསྒོམས་ནས། སྔགས་བརྗོད་དེ་ཁམས་གསུམ་སྟོང་ཉིད་དུ་བལྟའོ། །དེ་ནས་ཨོཾ་ཨཱཿཧཱུྃ་ཡི་གེ་གསུམ་དུ་ལངས་པ་ནས། ནཱ་དའི་བར་ནི་རང་གི་སེམས་ཙམ་ཉིད་ལ་གནས་པའི་དོན་དང་། སྔགས་ཕྱི་མ་བརྗོད་དེ་ནཱ་ད་ཡང་མི་དམིགས་པར་བསྒོམས་པ་ནི་མིག་ཡོར་ཙམ་གྱི་ཞེས་པ་མན་ཆད་ཀྱི་དོན་དུ་འཆད་པར་སྣང་ངོ་། །འདོད་འཇོ་མཁན་པོས། སྐབས་འདིར་སྣོད་བཅུད་ཀྱི་སྣང་བ་དོན་ལ་མ་དག་བཞིན་དུ་སྡུད་པ་ཡང་ཆད་སྟོང་བསྒོམ་པ་མ་ཡིན་ཏེ་ཞེས་དང་། རང་བཞིན་གྱིས་གྲུབ་པས་སྟོང་པ་ལ། བྱ་བྱེད་ཐམས་ཅད་འཐད་པར་རྟོག་ན་ནི་སྣང་བ་སྡུད་པ་བསྒོམས་པ་ལ་ཆད་ལྟའི་དོན་མེད་དེ། དགོས་པའི་དབང་གིས་དེ་ལྟར་བྱེད་པ་ཡིན་གྱི། སྣང་བ་མེད་པར་ཁས་མི་ལེན་པའི་ཕྱིར་ཞེས་དང་། འགྲེལ་པར་བཤད་པའི་ཐིམ་རིམ་རྣམས། འཆི་བའི་ཚེ་སྣང་མཆེད་ཐོབ་གསུམ་གྱི་ཐིམ་རིམ་ལ་བཤད་པ་ནི། རང་ཉིད་ཡེ་ཤེས་ཚོགས་བསག་གི་ཚེ། སྣང་བ་མེད་པར་མི་བསྒོམ་པ་དང་འགལ་གྱིས་དོགས་ནས། དེའི་སྐྱོན་སྤོང་བ་དང་། ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་བའི་རང་གི་གྲུབ་མཐའི་རྒྱབ་རྟེན་དུ་འཆད་པར་སྣང་ངོ་། །དེ་ལའང་འགལ་བའི་སྐྱོན་སྤོང་ནི་མི་ནུས་ཏེ། གཞན་གྱིས་དེའི་ཚེ་སྣང་བ་མེད་པར་བསྒོམས་པས། སྤྱིར་སྣང་བ་མེད་པར་ཁས་ལེན་དགོས་ན། ཁྱེད་ཀྱིས་ཀྱང་དེའི་ཚེ་སྣང་བ་སྡུད་པར་བསྒོམས་པས། སྤྱིར་སྣང་བ་སྡུད་པར་ཁས་ལེན་དགོས་པའི་ཕྱིར་རོ། །སྐབས་དེར་སྣང་བ་མེད་པར་སྒོམ་པ་ཙམ་གྱིས་ཆད་ལྟར་འགྱུར་ན། སྣང་བ་སྡུད་པར་བསྒོམ་པ་ལ་ཡང་མཚུངས་ཏེ། སྣང་བ་མེད་པར་བསྒོམ་པར་མཚུངས་པའི་ཕྱིར་དང་། མེད་པར་མི་བསྒོམ་ན། རང་གི་གོས་ལ་སོགས་པའི་སྣང་བ་འདི་གཞལ་ཡས་ཁང་གི་ནང་ན་ཡོད་དམ་ཕྱི་ན་ཡོད་སོགས་ཀྱི་དཔྱད་པ་གཞན་དུ་བཤད་ཟིན་ཏོ། །མངོན་རྟོགས་ཀྱི་དངོས་གཞིས་སྐྱེ་འཆི་བར་དོ་གསུམ་སྦྱོང་བའི་ཚེ་ཡེ་ཤེས་ཚོགས་བསག་འཆི་སྲིད་སྦྱོང་བ་ལ་སྦྱར་བ་ནི་འགྲོ་བའི་རིས་གཅིག་གིས་ཆོས་གསུམ་འཆི་སྲིད་ཐོག་མར་འོང་བ་ནི་གསུང་རབ་མཐའ་དག་དང་འགལ་བ་སོགས་གཞན་དུ་རྒྱས་པར་བཤད་ཟིན་ཏོ། །གསུམ་པ་ནི། རྗེ་བཙུན་གྱིས། དེ་ནས་བསྲུང་བའི་རྣམ་པ་སེམས་སུ་ཤེས་པར་བྱ་བའི་ཕྱིར་དོན་ཆེན་པོ་ཡེ་ཤེས་ཀྱི་ཚོགས་བསྒོམ་པ་ནི་ཕྱི་དང་ནང་གིས་བསྡུས་པའི་ཆོས་ཐམས་ཅད་རང་གི་སེམས་ཙམ་དང་། སྒྱུ་མ་དང་། སྨིག་རྒྱུ་དང་། མིག་ཡོར་ལྟ་བུར་བསྒོམས་ལ། ངག་དུ་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་ལ་བརྟན་པར་བྱ། ཡང་སྒྱུ་མ་ཡང་རང་བཞིན་མེད་པར་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ལ་བརྟན་པར་བྱའོ། །ཞེས་གསུངས་པ་འདི་ཙམ་ཞིག་སྔར་གྱི་གྲུབ་ཆེན་གྱི་གཞུང་གི་དོན་དུ་སྣང་ཞིང་། འདི་སྟོང་ཉིད་ཀྱི་ལྟ་བ་སྣང་བ་ཙམ་ཡང་མི་དམིགས་པ་བསྒོམ་པ་གཙོ་བོ་ཡིན་པས། སྣང་བ་སེམས་སུ་བསྡུ་བ་དང་། སེམས་ཉིད་ཀྱང་མི་དམིགས་པར་བསྒོམ་པ་ཙམ་ཞིག་སྐབས་སུ་བབ་ལ། སྔགས་གཉིས་ཀྱིས་བརྟན་པར་བྱེད་པ་ཡང་འདི་གཉིས་བརྟན་པར་བྱེད་པ་ཡིན་པའི་ཕྱིར་རོ། །འདི་ཉིད་ཇོ་བོའི་ལུགས་ལོ་ཆེན་གྱི་འགྲེལ་ཆུང་ལས། རང་གི་སྙིང་ཁའི་ཧཱུྃ་ལས་འོད་ཟེར་འཕྲོས་པས། རང་གི་ལུས་མི་སྣང་སྟེ། ཟླ་བ་དང་ཡི་གེ་ཧཱུྃ་ལུས་པར་བསམ། དེ་ནས་ཟླ་བ་ཞུ་ནས་ཧཱུྃ་འབའ་ཞིག་ལུས། དེ་ནས་ཧཱུྃ་ཞུ་ནས་ཐིག་ལེ་འོད་ཟེར་དང་བཅས་པ་འབའ་ཞིག་ལུས། དེ་ཡང་རིམ་གྱིས་ཇེ་ཕྲར་གྱུར་ནས་ཐིག་ལེ་ཡང་མི་སྣང་སྟེ། ཕྱི་ནང་གི་ཆོས་ཐམས་ཅད་སྟོང་པ་ཉིད་དུ་བསྒོམས་ནས་དེ་བརྟན་པར་བྱ་བའི་ཕྱིར་སྔགས་དང་པོ་བརྗོད། དེའི་རྗེས་ལ་དེའི་དོན་དྲན་པའི་སྒོ་ནས་སྟོང་ཉིད་བསྒོམ་པ་ནི་གཅིག་དུ་བྲལ་ལ་སོགས་པའི་གཏན་ཚིགས་ཀྱིས་ཆོས་ཐམས་ཅད་སྟོང་པ་ཉིད་དུ་བསྒོམས་ཏེ། སྟོང་པ་ཉིད་ཀྱི་རང་བཞིན་གྱི་ཡེ་ཤེས་དང་། བདག་དབྱེར་མེད་པ་བརྟན་པའི་ཕྱིར་སྔགས་ཕྱི་མ་བརྗོད་པར་གསུངས་པ་དང་ཡང་མཐུན་ཏེ། བསྡུ་རིམ་གྱི་སྒོ་ནས་བསྒོམ་པ་འདི་ནི་གཤིན་རྗེ་གཤེད་ལ་སོགས་པའི་སྒྲུབ་ཐབས་གཞན་རྣམས་ལས་ཀྱང་འབྱུང་ཞིང་། རྒྱས་པར་ན་ལུགས་འདིར་ཡང་རུང་པར་སྣང་ངོ་། །བཞི་པ་ནི་ཇོ་བོའི་འགྲེལ་པར་དགོས་པ་དྲུག་གསུངས་ཏེ། དེ་ལྟར་སྔགས་རྣམ་པ་གཉིས་ལན་གསུམ་དུ་བརྗོད་པ་ནི། སྟོང་པ་ཉིད་རྟོགས་ནུས་པ་དང་། སྟོང་པ་ཉིད་ཀྱི་དྲན་པ་གསོ་བ་དང་། གནས་པ་བརྟན་པ་དང་། ཡེ་ཤེས་ཀྱི་ཚོགས་རྫོགས་པ་དང་། ཐ་མལ་གྱི་ལུས་ངག་ཡིད་གསུམ་གྱི་རྟོག་པ་སྤོང་བ་དང་། རྟེན་དང་བརྟེན་པ་ཐམས་ཅད་སྟོང་པའི་རྣམ་འཕྲུལ་དུ་རྟོགས་པའི་ཕྱིར་ཞེས་བཤད་ལ། འདིའི་དོན་ལོ་ཆེན་གྱི་འགྲེལ་ཆུང་ནས། དང་པོ་གཉིས་དབང་རྟུལ་དང་། དེ་ནས་གཉིས་དབང་རྣོན་དང་། ཕྱི་མ་གཉིས་དབང་འབྲིང་གི་དབང་དུ་བྱས་པར་བཤད་དོ། །འདོད་འཇོ་མཁན་པོས་འགྲེལ་ཆུང་ནས་དང་པོ་དབང་རྟུལ་དང་། གཉིས་པ་དབང་འབྲིང་དང་། ཕྱི་མ་བཞི་དབང་རྣོན་གྱི་དབང་དུ་བྱས་པར་བཤད་ཅེས་བྲིས་འདུག་པ་ནི་འགྲེལ་པ་དེ་ན་མི་སྣང་ངོ་། །སྐབས་འདིར་རྗེ་བཙུན་གྱིས་དངོས་ཀྱི་དགོས་པ། རྣམ་ཀུན་མཆོག་ལྡན་གྱི་སྟོང་པ་ཉིད་བསྒོམ་པ་ཡིན་པས་དོན་ཆེན་པོའོ་ཞེས་དང་། ཆེད་དུ་བྱ་བའི་དགོས་པ་བསྲུང་བའི་རྣམ་པ་སེམས་སུ་ཤེས་པར་བྱ་བའི་ཕྱིར་ཞེས་པ་ཙམ་ཞིག་གསུངས་ལ། རྗེ་བཙུན་རྩེ་མོས་ཡེ་ཤེས་ཚོགས་བསག་གི་དགོས་པ་བཞི་གསུངས་ཏེ། ཡེ་ཤེས་ཚོགས་བསག་དགོས་པ་ཡང་། །རྣམ་པ་བཞི་རུ་ཤེས་བྱ་སྟེ། །ཀུན་ཏུ་བརྟགས་པའི་དྲི་མ་ལས། །དག་པར་བྱ་བའི་དགོས་པ་དང་། །གཉིས་པ་ཐམས་ཅད་མཁྱེན་པ་ཡི། །ལྷ་ཡི་མྱུ་གུ་བསྐྱེད་པ་དང་། །གསུམ་པ་བསོད་ནམས་ཚོགས་དང་ནི། །ཡེ་ཤེས་ཚོགས་སུ་འབྲེལ་ཕྱིར་དང་། །བཞི་པ་ཆོས་ཀྱི་སྐུ་ལས་ནི། །གཟུགས་སྐུ་འགྲུབ་པར་བྱ་ཕྱིར་རོ། །ཞེས་གསུངས་པ་འདི་ནི་ཡེ་ཤེས་ཀྱི་ཚོགས་ཀུན་གྱི་དགོས་པ་ལ་སྦྱར་བར་བྱའོ། །དམར་གྱིས་ཡེ་ཤེས་ཀྱི་ཚོགས་ནི་དམིགས་པ་མེད་པའི་ཤེས་རབ་སྟེ། དེས་རྟག་པ་འཁོར་བའི་མཐའ་མནན་པས་སོ་སོ་སྐྱེ་བོ་ལས་ཁྱད་པར་དུ་བྱས་ལ། གང་གི་བསོད་ནམས་ཀྱི་ཚོགས་ནི་ལྷན་ཅིག་བྱེད་པའི་རྐྱེན་དམིགས་པ་མེད་པའི་སྙིང་རྗེ་སྟེ། ཆད་པ་མྱ་ངན་ལས་འདས་པའི་མཐའ་མནན་ཅིང་གཞན་དོན་འབྱུང་བས་འཕགས་པ་ཉན་རང་ལས་ཁྱད་པར་དུ་བྱས་སོ་ཞེས་གསུངས་པ་ཡང་བཤད་མ་ཐག་པའི་དགོས་པ་ཕྱི་མ་གཉིས་དང་མཐུན་ནོ། །རྒྱུ་ཚོགས་གཉིས་བསག་པ་བཤད་ཟིན་ཏོ། །གཉིས་པ་འབྲས་བུ་ལྷར་བསྐྱེད་པ་ལ་བཞི་སྟེ། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ། གོ་ཆ་བཅིང་བ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའོ། །དང་པོ་ལ་གཉིས་ཏེ། ཕྱིའི་དཀྱིལ་འཁོར་དག་པ་དང་བཅས་པ་བསྒོམ་པ། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་བསྒོམས་པའོ། །དང་པོ་ལ་གསུམ་སྟེ། ཕྱིའི་དཀྱིལ་འཁོར་བསྒོམ་པ་དངོས། ཕོ་ཉ་གསུམ་བསྲེ་བ། བྱང་ཆུབ་ཀྱི་ཕྱོགས་ཀྱི་དག་པ་དྲན་པའོ། །དང་པོ་ལ་གཉིས་ཏེ། རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ནི་སློབ་དཔོན་གྱི་གཞུང་ལས། དེ་ལས་ལངས་ནས་རྟེན་དང་བརྟེན་པའི་ཚུལ་དུ་གནས་པར་བེ་རཾ་པ་ལ་སོགས་པར་གནས་པ་ལ། ཡི་གེ་ཡྃ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ་ལ་རྒྱལ་མཚན་གྱིས་མཚན་པ་མདོག་སྔོན་པོར་རྣམ་པར་བསམ་སྟེ། དེའི་སྟེང་དུ་ཡི་གེ་རྃ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་འབར་བས་མཚན་པ་ཁ་དོག་དམར་པོའོ། །དེའི་སྟེང་དུ་ཝྃ་ཡོངས་སུ་གྱུར་པ་ལས་ཆུའི་དཀྱིལ་འཁོར་ཁ་དོག་དཀར་པོ་བུམ་པས་མཚན་པའོ། །དེའི་སྟེང་དུ་ཡི་གེ་ལྃ་ཡོངས་སུ་གྱུར་པ་ལས་སའི་དཀྱིལ་འཁོར་གྲུ་བཞི་པ་ལ་ཁ་དོག་སེར་པོ་གྲྭར་རྡོ་རྗེ་རྩེ་གསུམ་པས་མཚན་པའོ། །དེའི་སྟེང་དུ་ཡི་གེ་སུྃ་ཡོངས་སུ་གྱུར་པ་ལས་རིའི་རྒྱལ་པོ་རི་རབ་ཟུར་བཞི་པ། རིན་པོ་ཆེ་སྣ་བཞིའི་རང་བཞིན་ཅན་རྩེ་མོ་ལྕོགས་བརྒྱད་ཀྱིས་ཉེ་བར་མཛེས་པར་བྱས་པའོ། །དེའི་སྟེང་དུ་ཡི་གེ་ཧཱུྃ་ལས་བྱུང་བའི་སྣ་ཚོགས་རྡོ་རྗེ། དེའི་སྟེང་དུ་པྃ་ལས་བྱུང་བའི་སྣ་ཚོགས་པདྨ་འདབ་མ་བརྒྱད་པ་ལྟེ་བ་དང་གེ་སར་དུ་བཅས་པ་ཞེས་གསུངས་ལ། འདིའི་དོན་བཤད་པ་ལ་ཡེ་ཤེས་ཚོགས་བསག་གི་རྗེས་སུ། ནམ་མཁར་ནཱ་ད་འཇོག་པ་དང་མི་འཇོག་པའི་ཁྱད་པར། དཀྱིལ་འཁོར་བཞི་དང་རི་རབ་ཀྱི་ས་བོན་གྱི་ཁྱད་པར། རི་རབ་ཀྱི་སྟེང་དུ་པདྨ་འདོད་པ་དང་མི་འདོད་པའི་ཁྱད་པར་གསུམ་ལས། དང་པོ་ནི། པྲ་ཛྙཱ་རཀྵི་ཏའི་འགྲེལ་པ་དང་། དེ་བཞིན་གཤེགས་པའི་རྡོ་རྗེ་དང་། འཁྲུལ་སྤོང་མཁན་པོས། སྟོང་ཉིད་ལས་ལངས་པའི་ཐོག་མར། རང་གི་སེམས་ཉིད་ནཱ་དའི་གཟུགས་སུ་ནམ་མཁའ་ལ་འཇོག་པར་བཤད་དེ། དེ་ཡང་ལྭ་བ་པའི་འགྲེལ་པར་བཤད་པའི་རྗེས་སུ་འབྲང་བའོ། །འདི་དག་གི་རྗེས་སུ་འབྲངས་ནས་བོད་ཀྱི་མར་དོ་དང་། དམར་དང་། བུ་དགེ་གཉིས་ཀྱང་འདི་བཞིན་དུ་འདོད་དོ། །འདིར་རྗེ་བཙུན་གྱིས། ནམ་མཁར་ནཱ་དཱ་འཇོག་པ་མི་བཞེད་པར། སྟོང་པའི་ངང་ལས་རང་གི་སེམས་ཉིད་ཡྃ་ཡིག་ཏུ་ལངས་ནས། དེ་ལས་རླུང་གི་དཀྱིལ་འཁོར་བསྒོམ་པ་སོགས་ལ་འཇུག་པར་མཛད་དོ། །འདི་གཉིས་ཀྱི་ཁྱད་པར་ནི། རྒྱ་གར་གྱི་ལྭ་བ་པ་སོགས་ཚད་ལྡན་དང་། རྗེ་བཙུན་གྱི་བཞེད་པ། ཡེ་ཤེས་ཚོགས་བསག་གིས་ཐམས་ཅད་སྟོང་ཉིད་དུ་སྦྱངས་པའི་ངང་ལས་རང་གི་སེམས་གསལ་བ་ཙམ། ནཱ་དའམ་ཡྃ་ལ་སོགས་པའི་ས་བོན་དུ་ལངས་ནས་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམས་པས། ཐམས་ཅད་རང་གི་སེམས་ཀྱི་རྣམ་འཕྲུལ་དུ་བསྒྲུབ་པའི་ཆེད་ཡིན་ལ། དེ་ལ་ནཱ་ད་དང་། ས་བོན་སོགས་གང་ནས་ལངས་ཀྱང་ཁྱད་པར་མེད་པར་བཞེད་དོ། །ས་ཆེན་གྱིས་ནག་པོ་པའི་སྐབས་སུ་ནཱ་དར་ལངས་པ་དང་། རྗེ་བཙུན་གྱིས་སྐབས་འདིར་ཡྃ་ཡིག་ཏུ་ལངས་པར་གསུངས་པའི་ཁྱད་པར་ཡང་འདི་ཡིན་ཅིང་། འདུས་པ་ཡེ་ཤེས་ཞབས་ལུགས་ལ་ཡེ་ཤེས་ཀྱི་ཚོགས་ཀྱི་རྗེས་སུ་ནམ་མཁར་ཡིག་འབྲུ་ལྔ་འཇོག་པ་དང་མི་འཇོག་པའི་ལུགས་གཉིས་འབྱུང་བའི་གནད་ཀྱང་འདི་ཉིད་ཡིན་ནོ། །དོན་འདི་མ་རྟོག་པར་འདོད་འཇོ་མཁན་པོས་ཡེ་ཤེས་ཚོགས་བསག་གི་རྗེས་སུ། ནམ་མཁར་ནཱ་ད་འཇོག་པ་མེད་ན་བར་དོ་སྦྱོང་བྱེད་ཆད་པས་མངོན་རྟོགས་ཀྱི་དངོས་གཞི་ཆད་པའི་སྐྱོན་ཡོད་དོ་ཞེས་སྨྲ་བ་ནི་རང་ཉིད་ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་ནས། སྦྱང་གཞིའི་ཆོས་གསུམ་ལས་འཕེན་གཅིག་གིས་འཕངས་པའི་ཆོས་གསུམ་ལ་འཇོག་དགོས་པའི་གནད་ཙམ་ཡང་བློ་ཡུལ་དུ་མ་ཤར་བའི་གཏམ་སྟེ། གཞན་དུ་རྒྱས་པར་བཀག་ཟིན་ཏོ། །ནཱ་ད་འཇོག་པའི་ཚེ་ན་ཡང་། དེའི་འོད་ལས་ཡཾ་ལས་རླུང་གི་དཀྱིལ་འཁོར་ནས་གྲུབ་པར་འདོད་པ་བུ་སྟོན་གྱི་ལུགས་དང་། རྟེན་པདྨ་མན་ཆད་བསྐྱེད་ཟིན་ནས། ནཱ་ད་ལས་ཨཱ་ལི་ཀཱ་ལི་འཕྲོ་བར་འདོད་པ་འདོད་འཇོ་མཁན་པོའི་ལུགས་གཉིས་ལས། དང་པོ་ཉིད་ལེགས་པར་སྣང་སྟེ། དེ་ནས་བཟུང་སྟེ་ཐམས་ཅད་སེམས་ཀྱི་རྣམ་འཕྲུལ་དུ་བསྒྲུབ་དགོས་པའི་ཕྱིར་རོ། །དེས་ན་སྐབས་འདིར་ནཱ་ད་མ་བཞག་ཀྱང་ཆད་པའི་ཉེས་པ་མེད་ཅིང་། བཞག་ཀྱང་ལྷག་པའི་ཉེས་པ་མེད་པར་ཤེས་པར་བྱའོ། །གཉིས་པ་ནི་གཞུང་འདིར་བེ་རཾ་པ་ལ་སོགས་པ་ཞེས་གསུངས་པའི་བེ་ནི། བེ་ཝ་ཡུ་རླུང་གི་མིང་ཡིན་པས་རླུང་གི་ས་བོན་དང་། རཾ་ནི་མེའི་ས་བོན་ཏེ། གཉིས་དངོས་སུ་བསྟན་ཅིང་ལྷག་མ་གསུམ་པོ་སོགས་ཁོངས་ནས་སྡུད་པར་དམར་གྱིས་བཤད་ཀྱང་བུ་སྟོན་གྱིས་བྷཻ་རམྦྷ་ནི་འོག་གཞིའི་རླུང་གི་མིང་སྟེ་རྩོམ་ཆེན་ཞེས་བསྒྱུར་རོ་ཞེས་གསུངས་པ་ལྟར་ལེགས་པས། ཡཾ་རཾ་བཾ་ལཾ་སུཾ་དང་ལྔ་ལས། འབྱུང་བཞི་དང་རི་རབ་བསྐྱེད་པར་ཐམས་ཅད་མཐུན་ལ། འབྱུང་བཞིའི་རིམ་པ་དེ་ལྟར་འོང་བའི་རྒྱུ་མཚན་ཡང་ཕྱི་རོལ་གྱི་འབྱུང་བ་རླུང་ནས་ཆགས་པའི་རིམ་པའོ། །མེའི་དཀྱིལ་འཁོར་ལོགས་སུ་མེད་ཀྱང་དཀྱིལ་འཁོར་གཞན་གསུམ་ལ་མེ་རྡུལ་ཡོད་པས་སྦྱང་གཞི་ཆད་པའི་སྐྱོན་མེད་པར་ཀླུའི་བྱང་ཆུབ་ཀྱིས་གསུངས་པ་ཉིད་དུས་འཁོར་མ་གཏོགས་པའི་སྔགས་ཀྱི་གཞུང་ཐམས་ཅད་དུ་ཁས་བླང་བར་བྱ་བ་ཡིན་ནོ། །འདི་དག་ཀྱང་རྩ་རྒྱུད་ལེའུ་སུམ་ཅུ་སོ་གཉིས་པར། བ་ལང་ལྷས་ཀྱི་མི་འབྱིང་དང་། །ལྷག་མ་སྐེམས་བྱེད་རྩ་གནས་སོ། །བྲག་ཆེན་པོ་ཡི་ངོ་བོ་རུ། །ཡང་ན་རུས་སྦལ་དག་གིས་སོ། །ཞེས་གསུངས་པའི་དོན་ཏེ། བ་ལང་ནི་རྒྱ་སྐད་ལ་གོ་ཞེས་པ་ས་ཡིན་ལ། ལྷས་ནི་རྟེན་ཉིད་ཡིན་པས་སོ། །མི་འབྱིང་དང་ཞེས་པ་ནི། དེའི་སྟེང་དུ་དངོས་པོ་གཞན་མི་འབྱིང་ཞིང་ལྡིང་བར་བྱེད་པས་ཆུ་བོ། ལྷག་མ་ནི་ཚིག་ཕྲད་དེ་དོན་ལོགས་པ་མེད་དོ། །སྐེམ་བྱེད་ནི་དེས་ཆུ་སྐེམ་པར་བྱེད་པའི་ཕྱིར་ན་མེའོ། །རྩ་གནས་ནི་དང་པོ་ཆགས་པའི་ཚེ་འོག་དག་ཏུ་ཆགས་པས་རླུང་ངོ་། །བྲག་ཆེན་པོ་ནི་རི་རབ་སྟེ། དེའི་སྟེང་དུ་ཐིག་ལེ་སེར་པོ་ཡང་བསྒོམས་ནས་ལྷ་མངལ་སྐྱེས་ལྟར་ན། དེ་དག་ཞུ་བ་ལས། རླུང་ནས་བརྩམས་ཏེ། འབྱུང་བཞི་ལུགས་འབྱུང་གི་སྟེང་དུ་རི་རབ་ཐིག་ལེ་སེར་པོ་དང་བཅས་པ་བསྒོམས་ནས། དེའི་སྟེང་དུ་གཞལ་ཡས་ཁང་བསྐྱེད་པ་སྟེ། ལུགས་འབྱུང་ལུགས་བཟློག་གཉིས་ཀ་ཡང་གཞུང་འདིས་བསྟན་ཏོ། །ཡང་ན་ཞེས་པ་ནི་ལྷ་སྒོང་སྐྱེས་ལྟར་ན། དང་པོར་རྩ་གནས། དེ་ནས་མེ་འབྱིང་། དེ་ནས་སྐེམས་བྱེད། དེ་ནས་བ་ལང་ལྷས། དེ་ནས་བྲག་ཆེན་བསྒོམས་ཏེ། རུས་སྦལ་དག་གིས་སོ་ཞེས་པ་ནི། མུ་ཏིག་ཕྲེང་བར། སའི་ཁྱད་ཆོས་སུ་འཆད་ཀྱང་། བླ་མའི་གསུང་ལས། རུས་སྦལ་གྱི་ཕྱིའི་ལྐོགས་ཤུན་དང་། ནང་སེམས་ཅན་གཅིག་ཆར་དུ་སྐྱེ་བ་ལྟར། དེའི་སྟེང་དུ་ལྷ་སྒོང་སྐྱེས་ཀྱི་སྐྱེད་ཆོག་བསྟན་པར་བཞེད་དོ། །འབྱུང་བཞི་དང་། རི་རབ་ཀྱི་ཁ་དོག་དང་། དབྱིབས་ནི་གཞུང་ཉིད་ན་གསལ་ལོ། །གསུམ་པ་ལ། སྣ་ཚོགས་རྡོ་རྗེའི་འོག་གཞིར་པདྨ་མི་འདོད་པའི་ལུགས་དང་། དེ་འདོད་པའི་ལུགས་དང་། འཐད་མི་འཐད་ཀྱི་ཁྱད་པར་དཔྱད་པ་དང་གསུམ་ལས། དང་པོ་ནི། ལོ་ཆེན་གྱི་འགྲེལ་ཆུང་དང་། དམར་གྱི་ཊཱི་ཀ་དང་། རྗེ་བཙུན་གྱི་སྒྲུབ་ཐབས་རྣམས་ལས། སློབ་དཔོན་གྱི་གཞུང་ཇི་ལྟ་བ་བཞིན་རི་རབ་ཀྱི་སྟེང་དུ་སྣ་ཚོགས་རྡོ་རྗེ། དེའི་སྟེང་དུ་པདྨ་བཤད་ཀྱི། སྣ་ཚོགས་རྡོ་རྗེའི་འོག་ཏུ་པདྨ་མི་འདོད་དོ། །མར་དོ་དང་། དེའི་རྗེས་འབྲང་བྲོག་རྭ་བ་དང་། ཕྱིས་ཀྱི་བུ་དགེ་གཉིས་ཀྱིས་སྣ་ཚོགས་རྡོ་རྗེའི་འོག་ཏུ་ཡང་པདྨ་འདོད་ཅིང་། དེ་ལ་པད་ཆེན་དང་། སྟེང་གི་པདྨ་ལ་པད་ཆུང་ཞེས་པའི་ཐ་སྙད་བྱས་སོ། །འདིར་འདོད་འཇོ་མཁན་པོས། མངོན་བརྗོད་ལས། སྣ་ཚོགས་རྡོ་རྗེ་དང་། པདྨ་གང་ཡང་མ་བཤད་པར། རི་རབ་ཀྱི་སྟེང་དུ་གཞལ་ཡས་ཁང་བསྐྱེད་པའི་ཚུལ་དང་། རྩ་རྒྱུད་དང་། ཀུན་སྤྱོད་ལས། རི་སྟེང་སྣ་ཚོགས་པདྨ་ཡི། །ཞེས་སྣ་ཚོགས་རྡོ་རྗེ་མེད་པར་པདྨ་རྐྱང་པ་བཤད་པའི་ཚུལ་དང་། སྡོམ་འབྱུང་ལས། རི་རབ་ཀྱི་དེ་མ་ཐག་ཏུ། དེ་ཡི་སྟེང་དུ་ཧཱུྃ་བྱུང་བའི། །སྣ་ཚོགས་རྡོ་རྗེ་རྣམ་པར་བསྒོམ། །དེ་ཡི་སྟེང་དུ་པདྨ་ནི། །ལྟེ་བ་གེ་སར་ལྡན་པར་བསྒོམ། །ཞེས་སྣ་ཚོགས་རྡོ་རྗེ་དང་། པདྨ་གཉིས་བཤད་པའི་ཚུལ་གསུམ་གསུངས་པ་ལས། སློབ་དཔོན་འདིས་ཕྱི་མ་ལ་བརྟེན་པ་ཡིན་ནོ་ཞེས་སྨྲའོ། །འདི་ནི་རྣམ་པར་འཁྱམ་སྟེ། ཚུལ་གཉིས་པ་དང་། གསུམ་པ་དོན་མི་གཅིག་ན། གསང་མཐའི་རྩ་བཤད་ཀྱི་ཚུལ་དོར་ནས་བཤད་རྒྱུད་གཞན་ལ་བརྟེན་པ་ལུགས་འདི་ལ་ཤིན་ཏུ་མི་འོས་པའི་ཕྱིར་རོ། །འོ་ན་ཇི་ལྟར་སྙམ་ན། རི་རབ་ཀྱི་སྟེང་དུ་དེ་གཉིས་མེད་པའི་ཕྱོགས་དང་། ཡོད་པའི་ཕྱོགས་གཉིས་ལས། དང་པོ་ནི། མངོན་བརྗོད་ཀྱི་དགོངས་པ་སྔར་བཤད་པ་ཉིད་ཡིན་པས། ནག་པོ་པའི་སྒྲུབ་ཐབས་སུ་འབྱུང་ཞིང་། ཕྱི་མ་ནི་ཐུན་མོང་མ་ཡིན་པའི་རྩ་བཤད་གཉིས་དང་། སྡོམ་འབྱུང་ཚིག་རྒྱས་བསྡུས་ཙམ་ཡིན་གྱི། དོན་ལ་ཁྱད་པར་མེད་པ་ནི་སྒྲུབ་ཐབས་འདིར་འབྱུང་བའོ། །ཚིག་རྒྱས་བསྡུས་ཇི་ལྟར་སྙམ་ན། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། ཚིག་དེ་ཉིད་འབྱུང་བའི་འགྲེལ་པ་མུ་ཏིག་ཕྲེང་བ་ལས། སྣ་ཚོགས་ཞེས་པས་སྣ་ཚོགས་རྡོ་རྗེ་དང་། པདྨ་ཞེས་པས་དེའི་སྟེང་དུ་པདྨ་བསྟན་པར་གསལ་བར་གསུངས་པ་ལས་ཤེས་སོ། །གསུམ་པ་ནི། པདྨ་གཉིས་འདོད་པ་དེ་དག་གིས་ནི་བཤད་རྒྱུད་སོ་སོ་ནས་གསུངས་པའི་བསྐྱེད་ཆོག་གི་ཁྱད་པར་ཡིན་པ་མ་རྟོགས་པར། སྣ་ཚོགས་རྡོ་རྗེ་དེ་གཞལ་ཡས་ཁང་གི་འོག་གཞིའི་སྣ་ཚོགས་རྡོ་རྗེ་ཡིན་པར་བསམས་ནས། དེའི་གདན་ལ་པདྨ་བསྣན་ཅིང་། སྟེང་གི་པདྨ་ལ་པད་ཆུང་ཟེར་བའི་རྒྱུ་མཚན། གཞལ་ཡས་ཁང་གི་ནང་དུ་སོང་ནས། བདེ་ཆེན་འཁོར་ལོའི་པདྨ་ཡིན་པར་སྒྲུབ་པར་སྣང་ངོ་། །འདི་དག་ནི་དོན་མ་རྟོགས་པ་སྟེ། འོག་གཞིའི་སྣ་ཚོགས་རྡོ་རྗེ་ཡིན་ན། པདྨར་མ་ཟད་ཉི་མ་ཡང་དགོས་ཀྱང་། དེའི་དཔྱད་པ་ཅུང་ཟད་ཀྱང་མ་བྱས་འདུག་པའི་ཕྱིར་དང་། བཅོམ་ལྡན་འདས་གྲུབ་པའི་ཚེ་རྡོ་རྗེའི་རྭ་བ་སོགས་ཀྱང་གྲུབ་པར་པྲ་ཛྙཱ་རཀྵི་ཏས་བཤད་པ་དེ་ཉིད་ཀུན་གྱིས་ཚད་མར་བྱེད་པར་སྣང་བས། འོག་གཞིའི་སྣ་ཚོགས་རྡོ་རྗེ་ཡང་དེའི་ཚེ་གྲུབ་པར་ཁས་བླངས་དགོས་པའི་ཕྱིར་རོ། །པད་ཆུང་བདེ་ཆེན་འཁོར་ལོའི་པདྨར་འདོད་པ་ནི་རྣམ་པར་མ་བརྟགས་པ་སྟེ། འཁོར་ལོ་གཞན་རྣམས་བཅོམ་ལྡན་འདས་དང་ལྷན་ཅིག་དུ་གྲུབ་ནས་འཁོར་ལོ་གོང་མ་དེའི་སྔོན་དུ་བསྐྱེད་པ་འགལ་བའི་ཕྱིར་དང་། བསྐྱེད་ཚུལ་ཡང་བདེ་ཆེན་འཁོར་ལོ་མ་གཏོགས་པའི་གཞལ་ཡས་ཁང་གྲུབ་པའི་ཚེ། བདེ་ཆེན་འཁོར་ལོ་ལ་མར་བཀོན་པ་ཡིན་ནམ། གཞལ་ཡས་ཁང་གྲུབ་ཟིན་ནས་བདེ་ཆེན་འཁོར་ལོ་ཡར་འབིགས་པའི་ཚུལ་གྱིས་བྱུང་བ་ཡིན་ཞེས་བརྟགས་ན་ངོས་བཟུང་གང་ཡང་མི་སྣང་བའི་ཕྱིར་རོ། །མདོར་ན་སྒྲུབ་ཐབས་འདིའི་སྐབས་སུ། རི་རབ་ཀྱི་སྟེང་དུ་སྣ་ཚོགས་རྡོ་རྗེ་དང་། པདྨ་ཐོག་མར་བསྐྱེད་ནས། དེའི་སྟེང་དུ་མངོན་བྱང་ལས། ཉི་མ་ཡན་ཆད་ཀྱི་རྟེན་བརྟེན་པ་གཅིག་ཆར་དུ་གྲུབ་པ་ནི་མ་འཁྲུལ་པའི་གནད་དུ་ཤེས་པར་བྱའོ། །པདྨའི་ཁ་དོག་ལྭ་བ་པ་དང་། པྲ་ཛྙཱ་རཀྵི་ཏས་ཕྱོགས་བཞི་དམར། མེ་རླུང་སེར། བདེན་བྲལ་ལྗང་། དབང་ལྡན་གནག་པར་གསུངས་པ་དང་། ནག་པོ་པས་ཕྱོགས་བཞི་དམར། མཚམས་བཞི་མཛེས་ཚོན་དུ་གསུངས་པ་དང་། རྒྱུད་ཁ་ཅིག་ལས། ཕྱོགས་བཞི་ཕྱོགས་མདོག མཚམས་བཞི་མཛེས་ཚོན་དུ་གསུངས་པ་རྣམས་ལས། རྗེ་བཙུན་གྱིས་ནི་གསུམ་པོ་གང་བྱས་ཀྱང་འདྲ་བར་བཞེད་དོ། །གཉིས་པ་བརྟེན་པ་བསྐྱེད་པ་ལ་གཉིས་ཏེ། བསྐྱེད་ཆོག་གི་སྒོ་ནས་སྤྱིར་བསྟན། རྟེན་དང་བརྟེན་པའི་གནས་ཚུལ་སོ་སོར་བཤད་པའོ། །དང་པོ་ནི། སློབ་དཔོན་གྱི་གཞུང་ལས། དེའི་དབུས་སུ་ཨཱ་ལི་ཀཱ་ལིའི་སྦྱོར་བ། དེའི་དབུས་སུ་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན་ཅན། འོད་ཟེར་སྣ་ཚོགས་རྣམ་པར་འཕྲོ་བར་བསམས་ལ། དེ་ཡོངས་སུ་གྱུར་པ་ལས་དཔལ་ཧེ་རུ་ཀ་ཉི་མ་ལ་བཞུགས་ཤིང་དཀྱིལ་འཁོར་གྱི་འཁོར་ལོ་དང་བཅས་པ་བྱུང་བ། དུར་ཁྲོད་བརྒྱད་ཀྱིས་བརྒྱན་པའོ། །ཞེས་གསུངས་སོ། །འདིའི་དོན་འཆད་པ་ལ། བསྐྱེད་རིམ་མངལ་སྒོང་གི་ཁྱད་པར། སྒོང་སྐྱེས་ཀྱི་མངོན་བྱང་བྱེ་བྲག་ཏུ་བཤད་པ། ཤིན་ཏུ་ཟབ་པའི་མན་ངག་གིས་གཉིས་ཀ་ལ་སྦྱར་ཚུལ། དེ་ཉིད་ཀྱིས་སྦྱང་གཞི་སྦྱོང་བའི་ཚུལ་དང་བཞི་ལས། དང་པོ་ནི། ཨ་བྷི་དྷ་ན་ལས། མངལ་སྐྱེས་གླུ་ཡི་སྦྱོར་བ་ཡིས། །སྒོམ་པ་རྣམས་ནི་ཡོངས་སུ་བརྟག །སྒོང་སྐྱེས་གླུ་ནི་མེད་པ་ཡིས། །སྒྲ་དང་སྒྲ་མིན་སྤངས་པའོ། །ཞེས་མངལ་སྐྱེས་ཀྱི་བསྐྱེད་ཆོག་ལ་སྒྲ་སྟེ་སཾ་ཀྲྀ་ཏའི་སྐད་དང་། སྒྲ་མིན་ཏེ་པྲ་ཀྲྀ་ཏ་ལ་སོགས་པའི་སྐད་ཀྱིས་གླུས་བསྐུལ་བ་ཡོད་པ་དང་། སྒོང་སྐྱེས་ཀྱི་བསྐྱེད་ཆོག་ལ་དེ་མེད་པར་གསུངས་སོ། །དེས་ན་འདིར་ཡང་གཞུང་གི་དངོས་བསྟན་དང་། འགྲེལ་པ་རྣམས་ཀྱི་བཤད་ཚུལ་གླུས་བསྐུལ་མེད་པར། རོ་གཅིག་དུ་འདྲེས་པའི་ཐིག་ལེའི་གོང་བུ་ཙམ་ལས་རྟེན་བརྟེན་པ་གཅིག་ཆར་དུ་བསྐྱེད་པས་སྒོང་སྐྱེས་ཀྱི་བསྐྱེད་ཆོག་ཡིན་པར་བདེ་མཆོག་ལ་སྦྱངས་པའི་སྔོན་གྱི་མཁས་པ་དག་མགྲིན་གཅིག་ཏུ་གསུངས་སོ། །འོན་ཀྱང་སྒོང་སྐྱེས་སྦྱོང་བ་གཙོ་བོ་ཡིན་གྱི། སྐྱེ་གནས་བཞི་ཆར་སྦྱོང་བའི་ཚུལ་ནི་འོག་ཏུ་འཆད་དོ། །འདིར་འདོད་འཇོ་མཁན་པོས། མངོན་བརྗོད་ཀྱི་ལུང་དེས། མངལ་སྒོང་གཉིས་ཀྱི་བསྐྱེད་ཆོག་བསྟན་པར་འཆད་ཅིང་། ལཱུ་ཧི་པའི་སྒྲུབ་ཐབས་འདི་སྔ་རབས་པ་དག་སྒོང་སྐྱེས་ཡིན་པས་མངལ་སྐྱེས་དང་མི་སྦྱོར་བ་འདོད་པ་ནི་མི་རིགས་ཏེ། དེ་ལྟར་ཡིན་ན་ནི། སྡོམ་འབྱུང་ལེའུ་གཉིས་པ་བསྐྱེད་རིམ་གྱི་ལེའུ་ལས། མངལ་སྐྱེས་ཀྱི་དབང་དུ་བྱས་ནས་བཤད་པ་དང་། ལེའུ་བཅུ་གསུམ་པར། གླུས་བསྐུལ་མེད་པར་མངོན་བྱང་ལྔ་ལས་བསྐྱེད་པ་ལཱུ་ཧི་པ་བཞིན་དུ་བཤད་པ་གཉིས་འགལ་བར་འགྱུར་བའི་ཕྱིར་ཏེ། ལེའུ་བཅུ་གསུམ་པ་ལས་བཤད་པའི་བསྐྱེད་རིམ་ནི། སྔར་སྦྱང་གཞི་མངལ་སྐྱེས་ལ་བཤད་པ་དང་སྦྱར་དགོས་པའི་ཕྱིར་རོ། །མངལ་སྐྱེས་བཤད་ཚུལ་ནི་སྦྱང་གཞི་ལ་སྐྱེ་འཆི་བར་དོ་གསུམ་བཤད་ནས། བར་དོ་སྐྱེ་བ་ལེན་ཚུལ་སྟོན་པ་ན། དང་པོར་ཕ་མའི་ཀུན་སྤྱོད་མཐོང་བ་དང་། དེ་ནས་ཕའི་ཁ་ནས་ཞུགས་ཏེ། ཕ་མའི་ཁུ་ཁྲག་གི་དབུས་སུ་ཞུགས་ནས་གནས་པར་བཤད་པའི་ཕྱིར་དང་། སྒོང་སྐྱེས་ལ་དེ་མེད་པའི་ཕྱིར་རོ། །དྲིལ་བུ་ཞབས་ཀྱིས། སེམས་ཅན་བརྫུས་ཏེ་འབྱུང་བ་བཞིན། །ས་བོན་མེད་པར་རྣམ་པར་བསྒོམ། །ཞེས་གསུངས་པ་ནི། རྫོགས་རིམ་གྱི་ཡེ་ཤེས་ཀྱི་སྐུ་ཡིན་གྱི། བསྐྱེད་རིམ་གྱི་མ་ཡིན་ཞེས་པ་དང་། འོ་ན་མངོན་བརྗོད་ལས་གླུས་བསྐུལ་མེད་པ་ལཱུ་ཧི་པ་ལྟ་བུའི་བསྐྱེད་ཆོག་རྣམས་སྒོང་སྐྱེས་སུ་བཤད་པ་དང་། འགལ་བ་ཇི་ལྟར་སྤང་སྙམ་ན་བཤད་པར་བྱ་སྟེ། མངོན་བརྗོད་ལས་གླུས་བསྐུལ་མེད་པ་རྣམས་མངལ་སྐྱེས་སུ་མ་གསུངས་པ་ནི། མངལ་དུ་ས་བོན་འདེབས་པ་ཕ་ལྟ་བུའི་ལྷ་ཡབ་དང་། མངལ་དུ་ས་བོན་འཛིན་པའི་མ་ལྟ་བུའི་ལྷ་ཡུམ་མེད་པ་ལ་དགོངས་ལ། དེ་མེད་ཀྱང་ཕ་མའི་ཁུ་ཁྲག་གི་དོད་ཟླ་ཉིའམ། ཟླ་བ་དཀར་དམར་ཡོད་ལ། ཕ་མའི་ཁུ་ཁྲག་ལ་འཇུག་པའི་བར་དོའི་དོད། ནཱ་ད་སོགས་ཡོད་པས་མངལ་སྐྱེས་དང་སྦྱོར་བ་ནི་ཤིན་ཏུ་དགོས་སོ་ཞེས་སྤྲོས་པ་དང་བཅས་ཏེ་སྨྲའོ། །འདི་དག་ནི་བསྐྱེད་རིམ་གྱི་སྦྱང་གཞི་སྦྱོང་བའི་གནད་ཆེས་ཆེར་འཆུག་པར་སྣང་བས་དགག་པར་བྱ་བ་ཡིན་ཏེ། སྤྱིར་མངལ་སྐྱེས་ཁོ་ན་སྦྱང་གཞི་ཡིན་གྱི། སྐྱེ་གནས་གཞན་གསུམ་པོ་སྦྱང་གཞི་མ་ཡིན་པར་འདོད་པ་ནི་ཤིན་ཏུ་མི་འཐད་དེ། རྡོ་རྗེ་གུར་ལས། ཕལ་པའི་རྣམ་རྟོག་གཞོམ་པའི་ཕྱིར། །བསྒོམ་པ་ཡང་དག་རབ་དུ་གྲགས། །ཞེས་གསུངས་ཤིང་། སྐྱེ་གནས་བཞི་ཆར་ལ་ཕལ་པའི་རྣམ་རྟོག་ཡོད་པར་ཁྱད་པར་མེད་པའི་ཕྱིར་དང་། སྒྲུབ་ཐབས་མདོར་བྱས་ལས། རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་རྨོངས་ལ། །བློ་དང་ལྡན་པས་ལེགས་བལྟས་ནས། །རྣལ་འབྱོར་རྒྱུད་ཀྱིས་སྦྱང་བར་བྱ། །ཞེས་གསུངས་པའི་སྦྱང་གཞི་སྐྱེ་གནས་བཞི་ཆར་ལ་ཡོད་པ་ཁྱད་པར་མེད་པའི་ཕྱིར་རོ། །རིགས་པས་ཀྱང་གནོད་དེ། ལམ་མ་བསྒོམས་ན་སྐྱེ་གནས་གཞན་གསུམ་དུ་སྐྱེ་བར་འགྱུར་བའི་གང་ཟག་གིས་རྣལ་འབྱོར་ཆེན་པོའི་བསྐྱེད་རིམ་བསྒོམས་པ་དོན་མེད་པར་འགྱུར་ཏེ། སྦྱང་གཞི་མེད་པའི་ཕྱིར་རོ། །ཁྱད་པར་དུ་མངོན་བརྗོད་ཀྱི་ལུང་གི་དོན། ཚིག་རྐང་སྔ་མ་གཉིས་ཀྱིས། མངལ་སྐྱེས་སྦྱང་གཞིར་སྟོན་པ་མ་ཡིན་པར་འགྱུར་ཏེ། ཕྱི་མ་གཉིས་ཀྱིས་སྒོང་སྐྱེས་སྦྱང་གཞིར་སྟོན་པ་མ་ཡིན་པ་གང་ཞིག རྒྱུ་མཚན་ཀུན་ཏུ་མཚུངས་པའི་ཕྱིར་རོ། །སྡོམ་འབྱུང་གི་ལུང་གིས་ཀྱང་མི་གནོད་དེ། ཕ་མའི་ཀུན་སྦྱོར་མཐོང་ནས། བར་དོ་ཕའི་ཁ་ནས་ཞུགས་ཏེ། ཕ་མའི་ཁུ་ཁྲག་གིས་དབུས་སུ་ཞུགས་པ་སྒོང་སྐྱེས་ལ་མེད་པ་མ་ཡིན་པའི་ཕྱིར་དང་། དེ་མངལ་སྐྱེས་ཡིན་དུ་ཆུག་ན་ཡང་། སྒོང་སྐྱེས་སྦྱོང་ན་མངལ་སྐྱེས་མི་སྦྱོང་བས་ཁྱབ་པར་འདོད་པའི་ལུགས་ལ་གནོད་པ་ཡིན་གྱི། འདིར་སྒོང་སྐྱེས་གཙོ་བོར་གྱུར་པའི་སྐྱེ་གནས་བཞི་ཆར་སྦྱོང་བའི་ལུགས་ལ་གནོད་པ་ཅུང་ཟད་ཀྱང་མེད་པའི་ཕྱིར་ཏེ། སྡོམ་འབྱུང་ལས། དེ་ནས་འདི་ལ་བསྐྱེད་པའི་རིམ། །བསྒོམ་པ་ཡང་དག་རབ་བཤད་བྱ། །སྣ་ཚོགས་ལས་ཀྱི་རང་བཞིན་ལས། །སྐྱེ་གནས་བཞི་པོ་རྣམས་སུ་འགྱུར། །སྒོང་སྐྱེས་དང་ནི་མངལ་སྐྱེས་དང་། །དྲོད་གཤེར་སྐྱེས་དང་རྫུས་སྐྱེས་སོ། །ཞེས་གསུངས་པའི་སྐྱེ་གནས་བཞི་པོ་འདི་སྦྱང་གཞི་སྦྱོང་བྱེད་གང་རུང་གཅིག་ལ་མི་སྦྱོར་བའི་ཐབས་མེད་པའི་ཕྱིར་རོ། །སྡོན་འབྱུང་གི་འགྲེལ་པར་དེ་ལ་ཟླ་བ་དང་ཉི་མ་དང་ས་བོན་དང་མཚན་མའི་རིམ་པས་རྫོགས་པའི་ལྷ་ནི་སྐྱེ་གནས་སྒོ་ང་ལས་སྐྱེས་པའོ། །ཡབ་དང་ཡུམ་གྱི་རྡོ་རྗེ་དང་པདྨ་བསྲུབས་པས་ཞུ་བའི་བྱང་ཆུབ་ཀྱི་སེམས་ལས་ཐོན་པ་ནི་སྐྱེ་གནས་མངལ་ནས་སྐྱེས་སོ། །ཟླ་བ་དང་ས་བོན་ལས་སྐྱེས་པ་ནི་སྐྱེ་གནས་དྲོད་གཤེར་ལས་སྐྱེས་པའོ། །སྤྲོ་བ་ནི་སྐྱེ་གནས་དྲོད་གཤེར་ལས་སྐྱེས་པའོ་ཞེས་ཁ་ཅིག་གོ །ས་བོན་ལ་སོགས་པ་དང་བྲལ་བས་སྐད་ཅིག་ལ་འོད་གསལ་ལས་སྐྱེས་པ་ནི་སྐྱེ་གནས་རྫུས་ཏེ་སྐྱེས་པའོ། །སྐྱེ་གནས་རྫུས་ཏེ་སྐྱེས་པ་ཉིད་ཟབ་མོ་བསྐྱེད་པའི་རིམ་པ་དང་། བརྟག་པ་རྫོགས་པའི་རིམ་པར་ཡང་རྣམ་པར་བཞག་པར་བྱའོ་ཞེས་གསུངས་པ་འདིས་ལེའུ་བཅུ་གསུམ་པའི་བསྐྱེད་རིམ་གྱི་ལེའུ་གཉིས་པ་ནས་གསུངས་པའི་སྐྱེ་གནས་བཞི་མི་སྦྱོང་བ་ལ་དངོས་སུ་གནོད་ཅིང་། སྐྱེ་གནས་བཞི་བཤད་པ་ནི་ལྷའི་བསྐྱེད་ཆོག་བཞི་སྟོན་པར་བཤད་པས། དྲིལ་བུ་ཞབས་ཀྱིས། སེམས་ཅན་རྫུས་ཏེ་འབྱུང་བ་བཞིན། །ས་བོན་མེད་པར་རྣམ་པར་བསྒོམ། །ཞེས་པའི་དོན། བསྐྱེད་རིམ་གྱི་དབང་དུ་བྱས་པ་མ་ཡིན་པར་འདོད་པ་ལ་ཡང་དངོས་སུ་གནོད་པ་ཡིན་ནོ། །མངོན་བརྗོད་ལས། འདིའི་བསྐྱེད་ཆོག་སྒོང་སྐྱེས་སུ་བཤད་པ་དང་། འགལ་བ་སྤོང་བའི་ཚུལ་ཡང་བཞད་གད་ཀྱི་གནས་ཏེ། འདིར་རྒྱུ་རྡོ་རྗེ་འཆང་ཡབ་ཡུམ་མེད་པས་སྒོང་སྐྱེས་སུ་བཤད་ནས་མངལ་སྐྱེས་སུ་མ་བཤད་པ་ཡིན་ན། སྒོང་སྐྱེས་ལ་ཕ་མ་མེད་པར་ཁས་ལེན་དགོས་པའི་ཕྱིར་དང་། ཕ་མའི་སྦྱོང་བྱེད་མེད་པས་རང་ཉིད་མངལ་སྐྱེས་ལ་སྦྱོར་བ་དང་ཡང་འགལ་བའི་ཕྱིར་རོ། །དེས་ན་འདི་དག་ནི་འདུས་པའི་སྐབས་སུ། རྣལ་འབྱོར་ཆེན་པོའི་བསྐྱེད་རིམ་གྱི་སྦྱང་གཞི་ཡིན་ན། འབྱུང་འགྱུར་གྱི་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཡིན་པས་ཁྱབ་པའི་གྲུབ་མཐའ་བཅའ་ཉེས་པའི་སྟོབས་ཀྱིས་མངོན་བརྗོད་ལས་བསྐྱེད་ཆོག་འདི་སྒོང་སྐྱེས་སྦྱོང་བྱེད་དུ་གསུངས་པ་བཅོས་དཀའ་བའི་གཏམ་འབའ་ཞིག་ཏུ་སྣང་གི མཁས་པའི་རྣ་བར་འོང་བའི་གཏམ་དུ་མི་སྣང་ངོ་། །གཉིས་པ་ནི། སློབ་དཔོན་གྱི་གཞུང་ལས། ཨཱ་ལི་ཀཱ་ལིའི་སྦྱོར་བ་ཞེས་པ་ཙམ་ལས། ཟླ་བ་དང་ཉི་མ་གང་ཡང་མི་གསལ་བས། འདིའི་དོན། ཟླ་བ་གཅིག་ཏུ་འཆད་པ་དང་། ཟླ་བ་གཉིས་སུ་འཆད་པ་དང་། ཉི་ཟླ་གཉིས་སུ་འཆད་པའི་ཚུལ་དང་གསུམ་ལས། དང་པོ་ནི་པྲ་ཛྙཱ་རཀྵི་ཏའི་འགྲེལ་པར། ཨཱ་ལི་ཀཱ་ལིའི་སྦྱོར་བའོ་ཞེས་བྱ་བ་ལ། གཡོན་སྐོར་དང་གཡས་སྐོར་དུ་གནས་པའི་ཨཱ་ལི་དང་ཀཱ་ལིའི་ཕྲེང་བ་ཡོངས་སུ་གྱུར་པ་ལས་དེས་བྱིན་གྱིས་བརླབས་པའི་གཟུགས་ཅན་གྱི་རྣམ་པའི་ཟླ་བའི་དཀྱིལ་འཁོར་བསམ་པར་བྱ་བ་ནི་འདིའི་རྣལ་འབྱོར་རོ། །དེའི་དབུས་སུ་ཞེས་བྱ་བ་ནི་ཟླ་བའི་དབུས་སུའོ། །ཡི་གེ་ཧཱུྃ་ཞེས་བྱ་བ་ནི་སྔར་བཞག་པའི་ནཱ་ད་ལས་རིམ་པ་རྫོགས་པའོ། །རྡོ་རྗེ་སེམས་དཔའི་རང་བཞིན་ཞེས་བྱ་བ་ནི་རྒྱུའི་རྡོ་རྗེ་འཆང་གི་རང་བཞིན་ནོ། །འོད་ཟེར་སྣ་ཚོགས་རྣམ་པར་འཕྲོ་བ་ཞེས་བྱ་བ་ནི་སྤྲོ་བ་ན་ཁ་དོག་ལྔའི་འོད་ཟེར་གྱི་སྒོ་ནས་བྱུང་བའི་འཁོར་ལོ་ལྔའི་ལྷ་རྣམས་ཀྱིས་འགྲོ་བ་དེའི་རང་བཞིན་དུ་བྱས་ནས་ཡང་བསྡུས་པས་ཕྱོགས་བཅུར་གནས་པའི་གྲུབ་པའི་དཔའ་བོ་དང་རྣལ་འབྱོར་མ་ལ་སོགས་པ་ཐབས་དང་ཤེས་རབ་རོ་མཉམ་པ་སྔོན་དུ་འགྲོ་བའི་སྦྱོར་བས་ཞུ་བར་བྱས་ནས་ནཱ་ད་ལ་ཞུགས་པར་བསམ་པར་བྱའོ་ཞེས་ཟླ་བ་གཅིག་ཏུ་གསུངས་ཤིང་། ལྭ་བ་པའི་འགྲེལ་པར་ཡང་འདི་བཞིན་དུ་བཤད་ལ། བོད་ཀྱི་མར་དོ་རྗེས་འབྲང་དང་བཅས་པ་ཡང་འདིའི་རྗེས་སུ་འབྲང་ངོ་། །དེ་ཡང་མངོན་བརྗོད་དགུ་པའི་བསྐྱེད་ཆོག་གི་དངོས་བསྟན་དུ་སྣང་ངོ་། །གཉིས་པ་ནི་མཁས་པ་བུས། སྒྲུབ་ཐབས་རྣལ་འབྱོར་བཞི་ལྡན་ལས། ཨཱ་ལི་བཅུ་དྲུག་གཡས་སྐོར་གཡོན་སྐོར། མཚན་སོ་གཉིས་ཀྱི་ངོ་བོར་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དཀར་པོ་མེ་ལོང་ལྟ་བུའི་ཡེ་ཤེས། དེའི་སྟེང་དུ་ཀཱ་ལི་སོ་བཞི་ལ་ཌ་ཌྷ། ད་དྷ། ཡ་ལ་དྲུག་བསྣན་པས་བཞི་བཅུ་གཡས་སྐོར་གཡོན་སྐོར། དཔེ་བྱད་བརྒྱད་ཅུའི་ངོ་བོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དམར་པོ་མཉམ་པ་ཉིད་ཀྱི་ཡེ་ཤེས་བསྒོམ་པ་ནི་རྣལ་འབྱོར་རོ། །དེ་གཉིས་ཀྱི་དབུས་སུ་སྔར་གྱི་ནཱ་ད་ཞུགས་པ་སོགས་བཤད་ཅིང་། བོད་ཁ་ཅིག་ཟླ་བ་གཅིག་བསྒོམ་པ་ཡོད་པ་ནི་རྒྱུད་དང་། རྣལ་འབྱོར་དབང་ཕྱུག་གི་དགོངས་པ་མ་ཡིན་ཏེ། སཾ་བུ་ཊི་ལས། ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་ཟླ་བ་གཉིས་པ་ཅན། །འདིར་ཡང་སྐར་མའི་རྣམ་པས་ནི། །སངས་རྒྱས་ཡོན་ཏན་ཀ་སོགས་ཀྱི། །གཟུགས་ཀྱི་གཟུགས་བརྙན་ལྟ་བུ་ཡི། །རྣལ་འབྱོར་གྱིས་ནི་འཇུག་པར་འགྱུར། །ཞེས་གསུངས་པས་སོ། །བི་བྷུ་ཏི་དང་། ཨ་ཏི་ཤ་དང་། བོད་ཁ་ཅིག ཀཱ་ལི་ལས་ཉི་མ་བསྐྱེད་པར་འདོད་དེ། དེ་ནི་རྒྱུད་གཞན་གྱི་དགོངས་པའོ། །ཟླ་བའི་དཀྱིལ་འཁོར་བསྒོམ་པ་ནི་རྣལ་འབྱོར་ཡིན་ཏེ། སྡོམ་འབྱུང་ལས། དེ་དབུས་རྣལ་འབྱོར་བསྒོམ་པར་བྱ། །ཞེས་གསུངས་སོ་ཞེས་བཤད་པ་ནི། སཾ་བུ་ཊིའི་རྡོ་རྗེ་སེམས་དཔའ་ལ། ཨ་བྷྱས། བདེ་མཆོག་རྡོ་རྗེ་སེམས་དཔའ་ཞེས་པའི་ཐ་སྙད་མཛད་པས། དེ་དང་འདི་བསྐྱེད་ཆོག་གཅིག་པར་མཛད་པར་སྣང་གི གཞན་རྒྱ་གར་བའི་གཞུང་ནས་འདིའི་སྐབས་སུ་ཟླ་བ་ཉིས་བརྩེགས་བྱས་པ་མི་སྣང་ངོ་། །འོན་ཀྱང་ཀྱཻ་རྡོ་རྗེར་ཡང་མན་ངག་གི་སྐབས་སུ་མཉམ་སྦྱོར་མི་མཉམ་སྦྱོར་གཉིས་ཀ་ཡོད་པ་ལྟར། འདིར་ཡང་མན་ངག་གིས་མི་མཉམ་སྦྱོར་མཛད་པའི་ཚེ་མཉམ་སྦྱོར་ཡང་འགལ་བ་མེད་པ་འདྲ་སྟེ། དེ་ལྟར་ན་བཤད་རྒྱུད་སམ་བུ་ཊི་ལ་བརྟེན་དགོས་པར་སྣང་ངོ་། །གསུམ་པ་ནི་རྒྱ་གར་གྱི་ཀུ་མཱ་ར་བོ་དྷིའི་འགྲེལ་པ་དང་། དེ་བཞིན་གཤེགས་པའི་རྡོ་རྗེ་དང་། བོད་ཀྱི་རྗེ་བཙུན་དང་། དམར་རྣམས་ཀྱི་ཟླ་ཉི་གཉིས་སུ་བཞེད་དོ། །དེ་ལ་རྗེ་བཙུན་གྱི་བཞེད་པ་ནི་འོག་ཏུ་འཆད་ཅིང་། དམར་གྱིས་ཨཱ་ལི་ཀཱ་ལི་རབ་ཏུ་སྦྱོར་བའོ་ཞེས་པ་ནི་སྒྲ་ནཱ་ད་ལས་ཚུལ་ཨཱ་ལི་བཅུ་དྲུག་ཁ་དོག་དཀར་པོ་ཕྲག་གཉིས་གཡོན་སྐོར་དུ་བསམ་པ་ནི་རྣམ་པ་ཡིན་ལ། ངོ་བོ་ནི་འབྲས་བུ་སངས་རྒྱས་ལ་མངའ་བའི་མཚན་བཟང་པོ་སུམ་ཅུ་རྩ་གཉིས་སུ་མོས་པ་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ནི་རྣམ་པ་ཡིན་ལ། ངོ་བོ་མེ་ལོང་ལྟ་བུའི་ཡེ་ཤེས་སུ་མོས་པ་བྱའོ། །དེའི་སྟེང་དུ་ནཱ་ད་ལས་ཀཱ་ལི་སུམ་ཅུ་རྩ་བཞིའི་སྟེང་དུ་ཡ་ར་ལ་ཝ་ཌ་ཌྷ་ཞེས་པ་དྲུག་བསྣན་པས་བཞི་བཅུ། དེ་ཕྲག་གཉིས་ཁ་དོག་དམར་པོ་གཡས་སྐོར་ནི་རྣམ་པ་ཡིན་ལ། ངོ་བོ་དཔེ་བྱད་བཟང་པོ་བརྒྱད་ཅུར་མོས་པ་བྱའོ། །དེ་གྱུར་པ་ལས་ཉི་མའི་དཀྱིལ་འཁོར་ནི་རྣམ་པ། ངོ་བོ་མཉམ་པ་ཉིད་ཀྱི་ཡེ་ཤེས་སུ་མོས་པ་བྱའོ། །དེ་གཉིས་ཁ་སྦྱར་བས་ན་རབ་ཏུ་སྦྱོར་བའོ། །དེའི་དབུས་སུ་ནི་ཞེས་པ་ནི་སྒོང་སྐྱེས་དག་པའི་དབང་དུ་བྱས་ནས། སྟེང་གི་ནཱ་ད་དེ་ཉིད་ཀ་ར་ཀ་ར་ལ་སོགས་པ་རྩ་སྔགས་ཟློ་བཞིན་དུ་ཉི་ཟླའི་དབུས་སུ་ཞུགས་ནས་རིམ་གྱིས་ཡི་གེ་ཧཱུྃ་དངུལ་ཆུའི་མདོག་ཅན། རྡོ་རྗེ་སེམས་དཔའི་ངོ་བོ་ཞེས་པ་ནི་རྒྱུ་རྡོ་རྗེ་འཆང་གི་རང་བཞིན་ཏེ། སོ་སོར་རྟོག་པའི་ཡེ་ཤེས་སུ་མོས་པ་བྱ། དེ་ལས་འོད་ཟེར་སྣ་ཚོགས་པ་ལྕགས་ཀྱུ་ལྟ་བུ་འཕྲོ་བ་རྣམ་པར་བསམ་པས། ཕྱོགས་བཅུའི་སྔོན་གྲུབ་པའི་དཔའ་བོ་དང་མཁའ་འགྲོ་མ་དཔག་ཏུ་མེད་པ་བཀུག་ནས་ཧཱུྃ་ལ་ཞུགས་ཏེ། འདྲེས་པ་ནི་བྱ་བ་གྲུབ་པའི་ཡེ་ཤེས་སུ་མོས་པ་བྱ། དེ་དག་ཡོངས་སུ་གྱུར་པ་ལས་འབྲས་བུ་རྡོ་རྗེ་འཆང་རྟེན་དང་བརྟེན་པར་བཅས་པའི་དཀྱིལ་འཁོར་མེ་ལོང་ལ་གཟུགས་བརྙན་ཤར་བ་བཞིན་དུ་དུས་གཅིག་ཏུ་ཝལ་གྱིས་རྫོགས་པར་བསྒོམ་པ་ནི། ཆོས་ཀྱི་དབྱིངས་ཀྱི་ཡེ་ཤེས་སུ་མོས་པ་བྱ་སྟེ། རྫུས་སྐྱེས་དག་པའི་དབང་དུ་བྱས་པའོ་ཞེས་གསུངས་ཏེ། འདི་ནི་ཉི་ཟླ་གཉིས་ཀྱི་སྒོམ་ཚུལ་རྗེ་བཙུན་དང་འདྲ་བར་སྣང་ཞིང་། མངོན་བྱང་གསུམ་པ་ལ་ནི། ནཱ་ད་སྐབས་འདིར་འཇུག་པ་དང་། དེ་ཡང་ཀ་ར་ཀ་ར་ལ་སོགས་པའི་སྒྲ་དང་བཅས་པའི་ཆ་ནས། ལུགས་སྔ་མ་རྣམས་ལས་ཁྱད་པར་དུ་འཕགས་པར་སྣང་ལ། རྗེ་བཙུན་གྱི་དགོངས་པ་དང་ཡང་ཁྱད་པར་ཆེ་བར་སྣང་ངོ་། །གསུམ་པ་ཤིན་ཏུ་ཟབ་པའི་མན་ངག་གིས་གཉིས་ཀ་ལ་སྦྱར་ཚུལ་ནི། ནཱ་རོ་པའི་མན་ངག་ཕམ་འཐིང་པ་ནས་བརྒྱུད་པ་རྗེ་བཙུན་གྱིས་འདི་ལྟར་བཞེད་དེ། པདྨའི་ལྟེ་བར་ཉི་ཟླ་གཉིས་ཀྱི་བསྒོམ་ཚུལ་ནི་སྔ་མ་དང་འདྲ་ལ། དེ་གཉིས་ཀྱི་བར་དུ་སྒོང་སྐྱེས་ཀྱི་དབང་དུ་བྱས་ནས་རིགས་དྲུག་པ་རྡོ་རྗེ་འཆང་གི་ངོ་བོ་ཡིན་པས། ཡི་གེ་ཧཱུྃ་ཁ་དོག་དཀར་པོ་གཅིག་བསྒོམས་ཏེ། སོ་སོར་ཀུན་ཏུ་རྟོག་པའི་ཡེ་ཤེས་སུ་མོས་པ་བྱ། དེ་ནས་འོག་ནས་འབྱུང་བའི་སྒྲ་ཚུལ་གྱི་རྟེན་འབྲེལ་གྱིས་གཅིག་ཏུ་འདྲེས་པ་ནི་བྱ་བ་ནན་ཏན་གྱི་ཡེ་ཤེས། རྟེན་དང་བརྟེན་པ་སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཡིན་པ་ལ། སྒྲ་ཚུལ་གྱི་རྟེན་འབྲེལ་ནི་ཉི་ཟླ་ཁ་སྦྱར་གྱི་སྟེང་མཐོ་གང་ཙམ་གྱིས་མ་རེག་པར་ཐ་མལ་པའི་ལུས་ངག་ཡིད་གསུམ་གྱི་རང་བཞིན་མས་རིམ་གྱིས་ཨོཾ་ཨཱཿཧཱུྃ། དེའི་སྟེང་དུ་ཡུམ་གྱི་མཁའ་དག་པའི་རྟགས་སུ་པདྨ། ཡབ་ཀྱི་བྱང་ཆུབ་ཀྱི་སེམས་མཚོན་པ་ཟླ་བ། དེའི་སྟེང་དུ་རང་བཞིན་གྱིས་འོད་གསལ་བ་མཚོན་པ་ཡི་གེ་ཧཱུྃ་བསམ། དེ་ནས་མས་ཡས་རིམ་གྱིས་ཨོཾ་ཨཱཿལ། ཨཱཿཧཱུྃ་ལ། ཧཱུྃ་པདྨ་ལ། པདྨ་ཟླ་བ་ལ། ཟླ་བ་ཧཱུྃ་གི་ཞབས་ཀྱུ་ལ། དེ་ཁོག་པ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། ཐིག་ལེ་ནཱ་ད་ལ། ནཱ་ད་ཁ་དོག་དམར་སྐྱ་ཀ་ར་ཀ་ར་ལ་སོགས་པ་ཡབ་ཀྱི་ཕྲེང་སྔགས་ཟློས་ཤིང་ཡས་མར་བྱོན་པ་ལ་ནི་སྒྲ་ཞེས་བྱ། ཉི་ཟླའི་བར་གྱི་ཡི་གེ་ཧཱུྃ་ལ་ནི་ཚུལ་ཞེས་བྱ་སྟེ། རྩ་བའི་རྒྱུད་ལས། སྒྲ་ཡི་ཚུལ་ལས་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཅན། །ཞེས་བྱ་བའི་དགོངས་པ་ཡང་དེ་ཉིད་ཡིན་ནོ། །དེ་ལྟ་བུའི་སྒྲ་དེས་སྟེང་གི་ཉི་མ་ཕུག་ནས་བར་གྱི་ཚུལ་ལ་ཐིམ་པས་རྐྱེན་བྱས་ནས་ཉི་ཟླ་དང་བཅས་པ་ཐམས་ཅད་གཅིག་ཏུ་འདྲེས་པ་ལས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་མེ་ལོང་ལ་བཞིན་གྱི་དཀྱིལ་འཁོར་བཏེག་པ་བཞིན་དུས་གཅིག་ལ་ཝལ་གྱིས་བསྐྱེད་ལ་དབུས་ཀྱི་གཙོ་བོ་ནས་བཟུང་སྟེ། སྲུང་བའི་འཁོར་ལོའི་བར་དུ་རིམ་གྱིས་གསལ་གདབ་པར་བྱའོ། །ཞེས་གསུངས་སོ། །བཀའ་སྲོལ་འདིའི་ལུགས་ལ་ཡང་རྒྱུད་འཆད་པའི་སྐབས་སུ་སྒོང་སྐྱེས་ཀྱི་སྐབས་སུ། ནམ་མཁར་ནཱ་ད་བཞག་ནས་དེ་ལས་ཨཱ་ལི་ཚར་གཉིས་བྱུང་སྟེ། སྣ་ཚོགས་པདྨའི་ལྟེ་བར་བསམ་པ་ལས་ཟླ་བ། ཡང་ཀཱ་ལི་དམར་པོ་བཞི་བཅུ་པོ་ཚར་གཉིས་བྱུང་བ་ཟླ་བའི་སྟེང་དུ་འཕྲོས་ཏེ། ཟླ་བ་དེ་འོད་དམར་པོ་དང་བཅས་པ་བསྒོམ། དེ་ནས་ནམ་མཁའི་ནཱ་ད་དེ་ལས་ཐིག་ལེ་ནས་རིམ་གྱིས་ཧཱུྃ་རྫོགས་པ་གཅིག་ཏུ་གྲུབ་པ་དེ་ཟླ་བའི་སྟེང་དུ་བབ་པར་བསམ་པ་དང་། ཟླ་བ་ཧཱུྃ་དུ་གྱུར་པ་ལས་རྟེན་དང་བརྟེན་པ་ཐམས་ཅད་དུས་གཅིག་ལ་བསྐྱེད་པ་དང་། མངལ་སྐྱེས་ཀྱི་སྐབས་སུ། ཐོག་མར་ཡེ་ཤེས་ཀྱི་ཚོགས་སྟོང་པར་བསྒོམ་པའི་བར་དུ་བྱས་ལ། དེ་ནས་རྟེན་རི་རབ་དང་། པདྨའི་བར་དུ་བསྐྱེད་པ་དང་། དེར་བརྟེན་པ་ལྷ་མངོན་པར་བྱང་ཆུབ་པ་ལྔས་གཙོ་བོ་བསྐྱེད་པ་ནི། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེ་གཉིས་ཀྱི་བར་དུ་ཧཱུྃ་བསམ་སྟེ། དེ་ལས་འོད་འཕྲོས་པས་ཉི་མའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གསུམ་རིམ་པ་བཞིན་དུ་བསམ། དེའི་སྟེང་དུ་སྣ་ཚོགས་པདྨ། དེར་ཉི་མ་ལ་ཡི་གེ་ཧཱུྃ་ནཱ་ད་ཁ་དོག་དམར་པོ་ཆ་ཕྲ་བ་དང་ལྡན་པ་བསམ་སྟེ། དེ་ནས་ཨོཾ་ནས་རིམ་གྱིས་ཡར་ལ་གཅིག་ལ་གཅིག་ཐིམ་ནས་ཧཱུྃ་གི་ནཱ་ད་ཙམ་དུ་འདུས་ནས། དེ་ཀ་ར་ཀ་ར་ལ་སོགས་པའི་སྒྲ་དང་བཅས་ཏེ། ཉི་ཟླའི་བར་གྱི་ཧཱུྃ་ལ་ཞུགས་པས། གཙོ་བོ་ཡབ་ཡུམ་དང་གཞལ་ཡས་ཁང་དུས་གཅིག་ལ་བསྐྱེད་ནས། དེའི་རྗེས་སུ་འཁོར་མངལ་འབྱིན་དང་། ཞུ་བ་གླུས་བསྐུལ་བྱེད་པར་གསུངས་ཤིང་། སྒོང་སྐྱེས་ལ་ལཱུ་ཧི་པའི་སྟེང་དུ་དགོངས་པ་བསྐང་བ་དང་། རྒྱུད་འདི་ཉིད་ཀྱི་སྟེང་དུ་གསུངས་པ་གཉིས་མི་འདྲ་བ་ནཱ་རོ་པའི་དགོངས་པ་ཡིན་ནོ་ཞེས་མུ་ཏིག་ཕྲེང་བ་ལས་གསུངས་སོ། །བཞི་པ་དེ་ཉིད་ཀྱི་སྦྱངས་གཞི་སྦྱོང་བའི་ཚུལ་ནི། མུ་ཏིག་ཕྲེང་བ་ལས། ཨ་བྷི་དྷ་ནར་བསྐྱེད་རིམ་གྱི་སྒྲུབ་ཐབས་བདུན་ཅུ་རྩ་ལྔ་གསུངས་པ་ཐམས་ཅད་སྒོང་སྐྱེས་གཙོ་བོར་གྱུར་པའི་སྐྱེ་གནས་བཞི་ཆར་སྦྱོང་བ་ཡིན་པར་གསུངས་པ་ལྟར་བཤད་ན། མངོན་བྱང་གི་གཙོ་བོ་སྒོང་སྐྱེས་དང་སྦྱར་བ། ཡན་ལག་མངལ་སྐྱེས་དང་སྦྱར་བ། སྐྱེ་གནས་བཞི་ཆར་སྦྱོང་བའི་ཚུལ་དང་གསུམ་ལས། དང་པོ་ནི། འོག་གི་ཟླ་བ་ནི་སྒོང་སྐྱེས་ཀྱི་ཕའི་ཁུ་བ་དང་། ཉི་མ་ནི་མའི་རཀྟ་དང་། བར་གྱི་ཧཱུྃ་ཡིག་ནི་འདིར་ཞུ་བ་གླུས་བསྐུལ་མེད་པས། རྒྱུ་རྡོ་རྗེ་འཆང་གི་ངོ་བོ་ཡིན་པར་གསུངས་པ་ནི་འབྲས་བུའི་རྣམ་པ་ཡིན་ལ། སྦྱང་གཞི་ལ་ནི་ཕ་མ་གཉིས་ཡིན་པར་དེ་ཉིད་ཀྱིས་གྲུབ་བོ། །གཉིས་པ་ནི། དེའི་སྟེང་གི་མཐོ་གང་ཙམ་གྱི་སར། ཨོཾ་ཨཱཿཧཱུྃ་སྟེང་ནས་སྟེང་དུ་བརྩེགས་པ་ནི་ཚེ་སྔ་མའི་མངལ་སྐྱེས་ཀྱི་བར་དོའི་ལུས་ངག་ཡིད་གསུམ། དེ་པདྨ་ལ་ཐིམ་པ་ནི་བར་དོ་མངལ་སྒོ་ནས་ཞུགས་པ་སྟེ། བར་དོ་འཇུག་ཚུལ་ལ། རྣམ་གཞག་རིམ་པར་སྤྱི་གཙུག་རྣམ་སྣང་གི་སྒོ་ནས་འཇུག་པ་དང་། སྡོམ་འབྱུང་དུ་ཁ་ནས་འཇུག་པ་དང་། མངོན་པར་མངལ་སྒོ་ནས་འཇུག་པར་གསུངས་པ་གསུམ་ཡོད་པའི་ནང་ནས། འདི་ཕྱི་མའི་དབང་དུ་བྱས་པའོ། །པདྨ་ཟླ་བ་ལ་ཐིམ་པ་ནི་མའི་མངལ་དུ་ཁུ་ཁྲག་གི་དབུས་སུ་བར་དོ་ཞུགས་ཏེ། མེར་མེར་པོར་གྱུར་པ་ནས། མངལ་གྱི་གནས་སྐབས་དང་། བཙས་ནས་མ་ཤིའི་བར་སྐྱེ་སྲིད་ཐམས་ཅད་བསྡུས་ཏེ་བསྒོམ་པའོ། །ཟླ་བ་ཧཱུྃ་གི་ཞབས་ཀྱུ་ལ་ཐིམ་པ་ནི་དེ་ཉིད་འཆི་བ་སྟེ་སྔར་གྱི་ཧཱུྃ་ཡིག་ལ་ཐ་མལ་པའི་ཡིད་ཅེས་དང་། ཧཱུྃ་ཡིག་འདི་ལ་སེམས་ཀྱི་རང་བཞིན་འོད་གསལ་བ་ཅེས་གསུངས་པས། འཆི་བ་འོད་གསལ་ཡིན་པར་གྲུབ་པའོ། །དེ་ཡང་ཞབས་ཀྱུ་ནས་ནཱ་ད་ལ་ཐིམ་པའི་བར་ནི་ལུགས་འབྱུང་གི་སྣང་བ་གསུམ་གྱི་ཐིམ་རིམ་མཚོན་ལ། ནཱ་ད་དམར་སྐྱ་ཕྲ་ཞིང་བརྗིད་པ། ཀ་ར་ཀ་ར་ལ་སོགས་པའི་སྒྲ་སྒྲོགས་བཞིན་པ་འབབ་པ་ནི་ལུགས་བཟློག་གི་སྣང་བ་གསུམ་གྱིས་འཆི་སྲིད་ལས་ལྡང་བ་མཚོན། དེས་ཉི་མའི་དཀྱིལ་འཁོར་ཕུག་ནས་ཧཱུྃ་གི་ཡི་གེའི་ཚུལ་ལ་ཐིམ་པ་ནི། མངལ་སྐྱེས་ཀྱི་འཆི་སྲིད་ལས་ལངས་ནས་སྒོང་སྐྱེས་ཀྱི་བར་སྲིད་མའི་མངལ་དུ་ཞུགས་པའོ། །རོ་གཅིག་དུ་འདྲེས་པ་ནི་མངལ་དུ་སེམས་ཅན་དང་བཅས་པའི་སྒོ་ངར་གྱུར་པའོ། །དེ་ལས་སྐད་ཅིག་གིས་རྟེན་བརྟེན་པ་གཅིག་ཆར་དུ་གྲུབ་པ་ནི་སྒོ་ང་ཕྱིར་བཙས་ཏེ། སྒོ་ང་བཅག་ནས་སེམས་ཅན་དུ་གྱུར་པའོ། །དེས་ན་མངོན་བྱང་གི་གཙོ་བོ་སྒོང་སྐྱེས་དང་། དེའི་ཡན་ལག་དུ་ཚེ་སྔ་མའི་མངལ་སྐྱེས་ཀྱི་ཆོས་གསུམ་བསྒོམ་པ་འདི་ནི་སྒོང་སྐྱེས་གཙོ་བོ་དང་། མངལ་སྐྱེས་ཡན་ལག་ཏུ་སྦྱར་བ་སྟེ། བསྐྱེད་ཆོག་གཅིག་པོ་འདི་ཉིད་ལ། །མངལ་སྐྱེས་གླུ་ཡི་སྦྱོར་བ་ཡི། །ཞེས་སོགས་ཚིགས་བཅད་གཅིག་གིས་བསྟན་པའི་བསྐྱེད་ཆོག་གཉིས་ཀ་ཚང་བའི་དབང་དུ་བྱས་པ་སྟེ། རྒྱུད་ཀྱི་ཚིག་ལ་ཤིན་ཏུ་ཟབ་པའི་མན་ངག་གི་སྙན་བརྒྱུད་འབའ་ཞིག་གིས་བསྟན་པའི་དོན་ལ་ངེས་པ་བསྐྱེད་པའི་རྒྱུ་རུའང་འགྲོའོ། །སྟེང་གི་བསྐྱེད་ཆོག་མངལ་སྐྱེས་སྦྱོང་བྱེད་ཡིན་ན། གླུའི་སྦྱོར་བ་ཅི་ལྟར་སྙམ་ན། ཀ་ར་ཀ་ར་ལ་སོགས་པ་སྟེ། མངལ་སྐྱེས་གཙོ་བོར་བྱས་པའི་ཚེ། ཞུ་བ་ལས་གླུས་བསྐུལ་བའི་ཚིག་དགོས་ཀྱང་། ཡན་ལག་ཏུ་བྱས་པའི་ཚེ་ཚིག་འདི་ཙམ་གྱིས་ཆོག་པའོ། །འདི་ཉིད་ཀྱིས་རྒྱུད་འཆད་པའི་གནས་སྐབས་ཀྱི་མངལ་སྐྱེས་ཀྱི་སྦྱང་གཞི་སྦྱོང་ཚུལ་ཡང་ལེགས་པར་གྲུབ་སྟེ། མངོན་བྱང་གི་གཙོ་བོ་ཡང་མངལ་སྐྱེས་དང་སྦྱར། དེའི་ཡན་ལག་ཀྱང་ཚེ་སྔ་མའི་མངལ་སྐྱེས་དང་སྦྱར་བར་གྲུབ་པས། མངོན་པར་རྟོགས་པ་དེ་ཉིད་ལ། ཞུ་བ་ལས་གླུས་བསྐུལ་བའི་ཚིག་དང་། ནཱ་དའི་གླུ་ཚིག་གཉིས་ཀ་ཚང་བའི་གནད་ཀྱང་འདི་ཉིད་ཡིན་པའི་ཕྱིར་རོ། །གསུམ་པ་ནི་སྐྱེ་གནས་གཞན་གཉིས་ཀྱི་སྦྱོང་བྱེད་ཇི་ལྟར་ཚང་ན་ཉི་མ་ནི་དྲོད་དང་། ཟླ་བ་ནི་གཤེར་ཡིན་པས། དྲོད་གཤེར་སྐྱེས་སྦྱོང་། འདྲེས་པ་ལས་རྟེན་བརྟེན་པ་གཅིག་ཆར་དུ་གྲུབ་པས་རྫུས་སྐྱེས་སྦྱོང་བར་དམར་གྱིས་བཤད་པ་ལྟར་ཡང་དོན་ལ་གནས་ཤིང་། ཡང་དག་པར་ན་མངོན་བྱང་གཅིག་པོ་དེ་ཉིད་ཀྱིས་སྐྱེ་གནས་བཞི་ཆར་སྦྱོང་བའི་ཚུལ་ཤིན་ཏུ་ཟབ་པའི་མན་ངག་གཞན་ལས་འབྱུང་བ་ཡང་སྐབས་འདིར་ཤེས་པར་བྱའོ། །གཉིས་པ་རྟེན་དང་བརྟེན་པའི་གནས་ཚུལ་སོ་སོར་བཤད་པ་ལ་གཉིས་ཏེ། རྟེན་བཤད་པ་དང་། བརྟེན་པ་བཤད་པའོ། །དང་པོ་ནི། རྗེ་བཙུན་གྱིས་གསལ་གདབ་པའི་ཚེ་གཙོ་བོ་ནས་མེ་རིའི་བར་རིམ་གྱིས་གསལ་གདབ་པར་གསུངས་པ་ནི་ཐོག་མར་རང་གི་སེམས་གང་དུ་གནས་པའི་ས་ནས། ཕར་རིམ་གྱིས་གསལ་གདབ་པའི་དབང་དུ་བྱས་ལ། འཕགས་པས། ཐོག་མར་རྟེན་གསལ་གདབ་པར་གསུངས་པ་ནི་སྤྱི་དང་མཐུན་པའི་དབང་དུ་བྱས་པས། གང་ལྟར་ཡང་འགལ་བ་མེད་མོད་ཀྱི། འདིར་བཤད་པའི་གནས་སྐབས་སུ་ཐོག་མར་རྟེན་བཤད་པ་བདེ་བས། འདི་ལ་བཤད་བྱ་ཁུངས་ཐུབ་ཀྱི་ལུང་འགོད་པ། དེའི་དོན་བཤད་པས་རྣམ་པ་བློ་ཡུལ་དུ་ཤར་བར་བྱ་བ་དང་གཉིས་ལས། དང་པོ་ནི། སྡོམ་འབྱུང་ལས། ཐིག་གི་མཚན་མ་དྲུག་ཅུ་བཞི། །ཀུན་ཏུ་འཁོར་ལོའི་མཐར་ཐུག་བར། །ཞེས་ཐིག་སྐུད་ཆ་ཕྲན་དྲུག་ཅུ་རྩ་བཞི་པའི་ཕྱོགས་གསུངས་པ་དང་། ནག་པོ་དཀྱིལ་ཆོག་ལས། ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲྭ་བ་དྲྭ་ཕྱེད་འཕྱང་བས་མཛེས། །གཡེར་ཁའི་ཕྲེང་བའི་དྲྭ་བ་ཅན། །མཚམས་ཀྱི་ཆ་ནི་ཐམས་ཅད་དང་། །སྒོ་ཁྱུད་ཀྱི་ནི་ནང་རྣམས་སུ། །རྡོ་རྗེ་རིན་ཆེན་གྱིས་སྤྲས་པར། །ཕྱི་ཡི་དཀྱིལ་འཁོར་ཐིག་གདབ་བོ། །དེ་ཡི་ནང་དུ་པདྨ་སྟེ། །པདྨའི་རྒྱབ་ཏུ་འཁོར་ལོ་བྱ། །འཁོར་ལོ་གཉིས་པོ་དེ་ཡི་རྒྱབ། །རྡོ་རྗེ་ཕྲེང་བས་བསྐོར་བར་བྱ། །འཁོར་ལོ་གསུམ་ནི་ཆ་ཆེན་པོར། །རྡོ་རྗེའི་ཐེག་གིས་བསྐོར་བར་བྱ། །གེ་སར་དང་ནི་པདྨར་བཅས། །འདབ་མ་བཅུ་དྲུག་དག་ཏུ་གནས། །མན་ངག་དག་ནི་ཐོབ་པ་ལས། །དཀྱིལ་འཁོར་ཐིག་གདབ་ཀུན་ཤེས་ནས། །སྒོ་ནི་འཁོར་ལོའི་བརྒྱད་ཆ་སྟེ། །ཁྱམས་ནི་དེ་ཡི་ཕྱེད་དུ་བྱ། །སྒོ་ཁྱུད་དག་ནི་སྒོ་ཡི་ཚད། །ལྷ་ཡི་སྣམ་བུ་ཚད་དེ་བཞིན། །མཚམས་ཀྱི་ཐིག་ནི་བསྐོར་བ་དག །རྟ་བབས་ཀྱི་ནི་གནས་སུ་བཤད། །བ་དན་དྲིལ་བུ་འོད་ཟེར་གྱིས། །བརྒྱན་པར་ཐམས་ཅད་ཐིག་གདབ་ཅིང་། །ལྕགས་རི་མཐར་ཐུག་པ་ཡི་བར། །རྡོ་རྗེ་ཕྲེང་བས་མངོན་བསྐོར་ཅིང་། །འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། །ཞེས་དང་། ལྷ་སྟ་གོན་གྱི་སྐབས་སུ། ཨིནྡྲ་ནཱི་ལའི་ས་གཞི་ལ། །འཁོར་ལོ་གསུམ་གྱི་བདག་ཉིད་བསམ། །ཞེས་གསུངས་ཤིང་། དེ་དག་གི་དོན། རྗེ་བཙུན་རིན་པོ་ཆེས། དེ་ལ་འཁོར་ལོ་བཞི་ཡི་ས་གཞི་ནི་སྔོན་པོ་ཡིན་ལ། ས་གཞིའི་སྟེང་ནས་ཡར་རྩིབས་ཀྱི་ངོ་བོ་ཅུང་ཟད་ཙམ་འཕགས་པ་ཡིན་ལ། འཁོར་ལོ་སོ་སོའི་མཐོ་དམན་གྱི་ཁྱད་པར་ནི་ལྷ་རྣམས་ཀྱི་པུས་མོའི་ཚད་ཙམ་རེས་འཕགས་པ་ཡིན་ལ། རྡོ་རྗེ་ལ་སོགས་པའི་དཔངས་ནི་ལྷ་དེ་དག་གི་སྐེད་པར་སླེབས་པ་ཡིན་ཞིང་། ཀ་བའི་དཔངས་ནི་དབུའི་སྟེང་ནས་ཡར་ཁྲུ་གང་ཙམ་གྱིས་འཕགས་པ་ཡིན་ལ། སྟེང་གི་ཕུབ་ཀྱིས་ནི་འོག་མའི་ཕུབ་ནོན་པ་སྟེ། བློའི་སྣང་བ་ལ་ཆར་གྱི་ཆུ་ལྟ་བུ་ཡང་གཅིག་གི་སྟེང་དུ་གཅིག་གི་ཆུ་བབས་ནས། དམ་ཚིག་གི་འཁོར་ལོའི་ཕུབ་ཀྱི་འདོད་ཡོན་གྱི་ས་སྟེགས་ཀྱི་ཐད་སོ་ནོན་པ་ཙམ་སྟེ་ཆུའང་འདོད་ཡོན་གྱི་ཕྱི་སོར་འགྲོ་བ་ལྟ་བུའོ། །དམ་ཚིག་གི་འཁོར་ལོ་ནི་ས་སྟེགས་ལ་ཕེབས་པ་སྟེ། ཁ་དོག་ནི་ཤར་སྔོ་བ། ལྷོ་སེར་བ། ནུབ་དམར་བ། བྱང་ལྗང་བའོ། །སྒོ་ནི་ས་གཞི་ལ་བྲིས་པ་བཞིན་བརྩིགས་ནས་ཡོད་པར་འདོད་དེ། ཡ་ཕུབ་ནི་སྒོའི་དངོས་གཞི་ཡིན་པའི་ཕྱིར་ཡ་ཕུབ་ཀྱི་རྩིག་པ་ནི་མེད་པར་འདོད་ལ། སྒོ་ཁང་གི་སྟེང་བཀབ་པ་ནི་རྟ་བབས་ཡིན་པས་ཀ་བ་བཞིས་མཐོ་བར་བཏེག་པ། རྩིག་པའི་དངོས་གཞི་དང་། རྟ་བབས་ཀྱིས་སྟེང་ན་ནམ་མཁའ་སྟོང་པ་དང་བཅས་པའོ། །ཕ་གུ་དང་མདའ་ཡབ་ཀྱི་བར་ན་དྲྭ་ཕྱེད་ཡོད་ལ། མདའ་ཡབ་ཀྱི་སྟེང་ན་ཡར་ལ་པུ་ཤུ་ཞེས་བྱ་བ། རིན་པོ་ཆེའི་དྲྭ་བ་སེང་མ། ནང་ནས་ཕྱིར་མཐོང་བ། མདའ་ཡབ་ཀྱི་དཔངས་དང་མཉམ་པ་ཡོད་དོ། །འདོད་ཡོན་གྱི་སྣམ་བུའི་སྟེང་ན། ཕྱོགས་རེ་ན་རིག་མའི་ལྷ་མོ་བཞི་བཞི་སྟེ། བཅུ་དྲུག་གིས་ཡོངས་སུ་བསྐོར་བ་ཡིན་ནོ། །རྩིག་པ་ལྔ་ནི་ཡེ་ཤེས་ཀྱི་རིམ་པས་ནང་ནས། ནག་པོ་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་རྣམས་ཡིན་ལ། འབྲི་བའི་དུས་སུ་ནི་ནག་པོ་དང་། ལྗང་ཁུ་ནས་བརྩམས་ཏེ། དཀར་པོ་ཕྱི་རོལ་ཏུ་བཏོན་ཡང་། ཕྱོགས་ཀྱི་རིམ་པ་ཡིན་པའི་ཕྱིར་ཉེས་པ་མེད་དོ་ཞེས་གསུངས་པ་རྣམས་སོ། །གཉིས་པ་ནི། འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །ཞེས་པ་ལྟར་ལྔ་ལས། དང་པོ་འོག་ལ་སྣ་ཚོགས་རྡོ་རྗེ་དང་། །ཉི་མ་པདྨ་ཁོར་ཡུག་གོ །ཞེས་བཞི་ལས། དང་པོ་སྣ་ཚོགས་རྡོ་རྗེ་ནི་གཞལ་ཡས་ཁང་གནས་པའི་གཞི་སྟེ། ལྟེ་བ་གྲུ་བཞི་པའི་རྒྱར་ཆ་ཆེན་བཅུ་གཉིས་ཡིན་ལ། དེའི་སྟེང་འོག་གི་དཔངས་ནི་ཆ་ཆེན་གཅིག་གོ །དེ་ལས་འཐོན་པའི་ཕྱོགས་བཞིའི་རྭ་ནི་འདིར་སྡོམ་འབྱུང་ལས། རྭ་རྩེ་ནས་རྭ་རྩེའི་བར་ཆ་ཕྲན་དྲུག་ཅུ་རེ་བཞིར་བཤད་པའི་ལུགས་ཡིན་པས། རྭའི་སྲིད་ལ་ཆ་ཆེན་གཉིས་སོ། །དཔངས་ཚད་ནི་རྭ་དབུས་མའི་རྩ་བ་དང་། རྩེ་མོའི་དཔངས་ཆ་ཕྲན་གཉིས་དབུས་ཀྱི་སྦོམ་སའི་དཔངས་ཆ་ཆེན་གཅིག་སྟེ། གཡས་གཡོན་གཉིས་ཕྱོགས་གཉིས་ཀ་ཡང་ཅུང་ཟད་ཙམ་གྱི་ཕྲ་བ་ཆུ་སྲིན་གྱི་ཁ་ནས་བྱུང་བའོ། །ཁ་དོག་ནི་ཤར་སྔོན་པོར་བྱས་པའི་ཕྱོགས་མདོག་སྟེ། ལྟེ་བ་ནི་རྒྱ་གར་བ་ཁ་ཅིག་གི་དཀར་པོར་བཤད་པ་ལྟར་ན། ཡུམ་གྱི་རིགས་བདག་གི་དབང་དུ་བྱས་པ་ཡིན་ཀྱང་འདིར་ནི་ཡབ་ཀྱི་དབང་དུ་བྱས་ནས་མཐིང་ནག་དུ་བཞེད་དོ། །རྭའི་གྲངས་ཕྱོགས་རེ་རེར་གསུམ་གསུམ་སྟེ། བཅུ་གཉིས་སུ་བྱེད་པ་དང་། ཕྱོགས་རེ་རེར་ལྔ་ལྔ་སྟེ་ཉི་ཤུར་བྱེད་པའི་ལུགས་གང་ལྟར་ཡང་འགལ་བ་མེད་དེ། སྔ་མ་ནི་རྟེན་འབྲེལ་ཡན་ལག་བཅུ་གཉིས་རྣམ་པར་དག་པ་དང་། ཕྱི་མ་ནི་འཇིག་ཚོགས་ལ་ལྟ་བའི་རི་བོ་ཉི་ཤུ་དག་པ་མཚོན་པའི་ཕྱིར་རོ། །རྩེ་མོ་ལྔ་པར་བྱེད་པའི་ཚེ་ན། གཡས་གཡོན་གྱི་རྭ་གཉིས་ཀྱི་གཡས་གཡོན་དུ་ཡང་། དེ་དང་འདྲ་བ་གཉིས་གཉིས་བྱེད་པ་ཡིན་གྱི། སྟེང་རྭ་འོག་རྭ་ཡིན་པར་ནི་མི་བཞེད་དོ། །གཉིས་པ་ཉི་མ་ནི་སྣ་ཚོགས་རྡོ་རྗེ་གནས་པའི་གཞི་སྟེ། མེ་ཤེལ་གྱི་རང་བཞིན་ཅན་ཁ་དོག་དམར་པོ། དབྱིབས་ཟླུམ་པོ། རྒྱར་ཆ་ཆུང་དྲུག་ཅུ་རེ་བཞིའོ། །གལ་ཏེ་ཉི་མ་དམར་པོ་ཡིན་ན། བྲི་བྱ་ལ་ཁ་དོག་ལྗང་ཁུར་བྱེད་པ་དང་འགལ་སྙམ་ན། ཉི་མའི་ཁ་དོག་དམར་པོ་ཡིན་ཀྱང་། དེའི་འོག་ན་པདྨ་ཡོད་ལ། དེའི་ལྟེ་བ་ལྗང་གུ་ཡིན་པར་ཨ་བྷྱས་བཤད་པས། དེའི་ཁ་དོག་ཏུ་གྱུར་པ་སྟེ། དཔེར་ན་དར་ལྗང་ཁུའི་སྟེང་དུ་ཤེལ་དམར་པོ་བཞག་པ་ལྟ་བུའོ་ཞེས་བོད་ཀྱི་ཕྲེང་བ་མཁན་པོ་རྣམས་གསུངས་སོ། །འདི་ཡན་ཆད་མངོན་བྱང་ལས་གཅིག་ཆར་དུ་གྲུབ་པའོ། །གསུམ་པ་པདྨ་ནི། སྣ་ཚོགས་རྡོ་རྗེ་གནས་པའི་རྟེན་ཏེ། ལྟེ་བའི་ཚད་ཉི་དཀྱིལ་དང་མཉམ་ལ། འདབ་མའི་རྒྱ་ཆ་ཆུང་གཉིས་པར་ཐིག་གི་རིགས་པས་ཤེས་ཤིང་། གྲངས་ནི་ལ་ལི་ཏ་བཛྲས། འདབ་མ་འབུམ་ལྡན་དེ་དབུས་སུ། །ཞེས་བཤད་ལ། བླ་མ་རྔོག་པ་རྣམས་ཀྱིས། སུམ་ཅུ་སོ་གཉིས་པར་འདོད་ཀྱང་། འདིར་ནི་སྔར་རྟེན་བསྐྱེད་པའི་སྐབས་སུ་བཤད་པ་དེ་ཉིད་ཡིན་པས་འདབ་མ་བརྒྱད་པའོ། །ཁ་དོག་ནི་སྔར་བཤད་པ་ལྟར་རོ། །བཞི་པ་ཁོར་ཡུག་ནི། རྡོ་རྭ་མེ་རི་དང་། དུར་ཁྲོད་གཉིས་ལས། བསྒོམ་བྱའི་སྐབས་སུ་བསྐྱེད་ཆོག་ལས་རྟེན་བརྟེན་པ་གྲུབ་པའི་ཚེ་སྲུང་འཁོར་དྲུག་ཆར་ཡང་གྲུབ་པའི་ཚུལ་དང་། དེ་དག་གི་བསྒོམ་ཚུལ་རྣམས་ནི་སྔར་བཤད་ཟིན་ལ། བྲི་བྱའི་སྐབས་སུ་རྡོ་རྗེའི་རྭ་བ་ཆ་ཕྲན་གཉིས་དང་། མེ་རི་ཆ་ཆེན་གཅིག་ལ་ཐམས་ཅད་བསྡུས་ནས་བྲི་བ་ཡིན་གྱི། གཞན་བྲི་བའི་ལུགས་ནི་མེད་དོ། །དུར་ཁྲོད་ནི་རྡོ་རྗེ་མཁའ་འགྲོའི་དགོངས་པ་སྲུང་འཁོར་གྱི་ཕྱི་རོལ་དུ་ཡོད་པར་རྗེ་བཙུན་བཞེད་དེ། དེ་ཉིད་ལས། རྡོ་རྗེ་རྭ་བའི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པོ་ཡིན། །ཞེས་གསུངས་པས་སོ། །སྡོམ་འབྱུང་གི་དགོངས་པ་རྡོ་རྗེ་རྭ་བའི་ནང་དུ་ཡོད་དེ། དེ་ཉིད་ལས། རྡོ་རྗེ་རྭ་བའི་ནང་དུ་ནི། །དུར་ཁྲོད་བརྒྱད་ཀྱིས་བརྒྱན་པའོ། །ཞེས་བཤད་པས་སོ། །དེ་ལ་ཕྱིས་ཀྱིས་མཁས་པ་དག དེ་ནི་འགྱུར་ཉེས་པ་ཡིན་ཏེ། རྒྱུད་དུ། ཐིག་གི་མཚན་མ་དྲུག་ཅུ་བཞི། །ཀུན་ཏུ་འཁོར་ལོའི་མཐར་ཐུག་བར། །ཞེས་ཆ་ཕྲན་དྲུག་ཅུ་རྩ་བཞི་པས་རྡོ་རྗེ་རྭ་བ་ལ་ཐུག་པར་བཤད་པའི་ཕྱིར་དུར་ཁྲོད་ནང་དུ་འོང་ས་མེད་དོ། །དེས་ན་འགྲེལ་པ་དང་བསྟུན་ནས། འགྱུར་གསར་ལས། རྡོ་རྗེ་རྭ་བ་ནང་དུ་སྟེ། །དུར་ཁྲོད་བརྒྱད་ཀྱིས་བརྒྱན་པའོ། །ཞེས་པ་ཉིད་འགྱུར་ལེགས་སོ་ཞེས་བཤད་ཀྱང་། ལུང་དེས་སྔ་མ་ལ་མི་གནོད་དེ། འཁོར་ལོའི་མཐར་ཐུག་བར། །ཞེས་གསུངས་ཀྱི། རྡོ་རྗེ་རྭ་བ་ཞེས་མ་གསུངས་པས་ཟུར་ཐིག་ནས་བཟུང་བའི་ཟླུམ་སྐོར་ཐོག་མར་གང་འོང་བ་དེ་ཉིད་འཁོར་ལོ་ཡིན་པའི་ཕྱིར་རོ། །དེས་ན་ནག་པོ་དཀྱིལ་ཆོག་ལས། །ལྕགས་རིའི་མཐར་ཐུག་པ་ཡི་བར། །རྡོ་རྗེ་ཕྲེང་བས་མངོན་བསྐོར་ཞིང་། །འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། །ཞེས་གསུངས་པ་ནི་སྡོམ་འབྱུང་ལྟར། དུར་ཁྲོད་ནང་དུ་འོངས་པའི་ལུགས་སུ་སྣང་སྟེ། ལྕགས་རི་ཐམས་ཅད་ཀྱི་ཕྱི་རོལ་དུ་འབྱུང་བ་ལྟར། རྡོ་རྗེ་རྭ་བའི་ཕྱི་ཐིག་ཟླུམ་ཐིག་ཐམས་ཅད་ཀྱི་ཕྱི་མ་ཡིན་པར་བསྟན་པའི་ཕྱིར་རོ། །མཁས་པ་བུས་ལུང་དེའི་དོན་ལཱུ་ཧི་པའི་འགྲེལ་པར། སྒོ་མཚམས་མ་བརྒྱད་རྡོ་རྗེ་རྭ་བ་ལ་ཐིམ་པས། ཆུ་ལ་ཆུ་ཐིམ་པའི་ཟེགས་མ་ཕྱིར་འཕྲོས་པ་ལྟར། ཕྱི་རུ་རྡོ་རྗེ་དང་། པདྨ་དང་། འཁོར་ལོའི་རྭ་བ་གསུམ་གྲུབ་པའི་ཕྱི་མ་གཉིས་ཀྱི་ཐིག་ལ། རིམ་གཉིས་ཀྱི་ཐིག་ཞེས་བཞེད་པ་ནི་མི་འཐད་དེ། རྡོ་རྗེའི་རྭ་བ་དང་། འོད་ཕྲེང་གི་བར་རྭ་བ་གཞན་གྱིས་ཆོད་པ་མི་རིགས་པའི་ཕྱིར་རོ། །དེས་ན། རིམ་གཉིས་ཐིག་ཅེས་པས། རྡོ་རྗེ་ཕྲེང་བས་མངོན་པར་བསྐོར་བའི་ཕྱི་ཐིག་ནང་ཐིག་གཉིས་སྟོན་པ་ལུང་དེའི་དོན་དུ་སྣང་ངོ་། །མདོར་ན་རྗེ་བཙུན་གྱིས། རྡོ་རྗེ་རྭ་བའི་ནང་དུ་དུར་ཁྲོད་བརྒྱད་བསྒོམ་པ་དང་། ཕྱི་རུ་བསྒོམ་པ་གཉིས་གང་ལྟར་ཡང་རུང་སྟེ། འཁོར་འདས་དབྱེར་མེད་ཡིན་པའི་ཕྱིར་ཞེས་གསུངས་པའི་གནད་ཤེས་ན་མཐའ་གཅིག་པའི་དགག་སྒྲུབ་གང་ཡང་མི་དགོས་པར་སྣང་ངོ་། །དེ་ལ་དུར་ཁྲོད་ནི་སློབ་དཔོན་གྱི་གཞུང་ལས། དེ་ནས་དུར་ཁྲོད་རྣམ་པར་བཤད་དེ་རྡོ་རྗེ་རྭ་བའི་ནང་དུ་གཡོན་སྐོར་གྱིས་ཕྱོགས་ཐམས་ཅད་དང་དབང་ལྡན་ལ་སོགས་པའི་མཚམས་རྣམས་སུ་བཞི་བཞིར་བརྗོད་པར་བྱ་སྟེ། དྲག་དུ་གཏུམ་པ་དང་། ཚང་ཚིང་འཁྲིགས་པ་དང་། འུར་འུར་འབར་བས་ཁྱབ་པ་དང་། འཇིགས་སུ་རུང་བ་རྣམས་ཤར་ལ་སོགས་པའི་ཕྱོགས་སུ་གཡོན་སྐོར་གྱིས་ལེགས་པར་གནས་སོ། །དབང་ལྡན་གྱི་མཚམས་སུ་ནི་ཧ་ཧར་དགོད་པའོ། །བྱིན་ཟའི་མཚམས་སུ་ནི་ནགས་ཚལ་ཕུན་སུམ་ཚོགས་པའོ། །སྲིན་པོའི་གནས་སུ་ནི་མུན་པ་མི་ཟད་པའོ། །རླུང་གི་མཚམས་སུ་ནི་ཀི་ལི་ཀི་ལ་སྒྲ་སྒྲོགས་པ་སྟེ། རྡོ་རྗེ་རྭ་བའི་དུར་ཁྲོད་དེ་རྣམས་ནི། འཇིགས་པའི་གཟུགས་ཀྱི་རོ་ལངས་དང་། འབྱུང་པོ་འདུས་པ་ཅེ་སྤྱང་གི་སྒྲ་སྒྲོགས་པའོ། །རིམ་པ་དེ་ལྟར་གནས་པའི་དུར་ཁྲོད་བརྒྱད་པོ་དེར་ཤིང་དང་། ཕྱོགས་སྐྱོང་བ་དང་། ཀླུའི་དབང་པོ་དང་། སྤྲིན་གྱི་དབང་པོ་རྣམས་ལས། ཤི་རི་ར་དང་། ཨ་ཤྭ་ཐཱ་དང་། ཀ་ཀོ་ལ་དང་། ཙུན་དྷའི་ཤིང་སྟེ་ཤར་ལ་སོགས་པའོ། །ཁ་ཏ་ཀ་དང་། ཀ་ར་ན་ཙ་པ་དང་། ལ་ཏ་པ་ར་ཀ་ཏི་དང་། པ་ཏི་པའོ། །དེ་བཞིན་དུ་དབང་པོ་དང་། སྦྱིན་བདག་དང་། ཀླུའི་དབང་པོ་དང་། གཤིན་རྗེ་དང་། དབང་ལྡན་དང་། བྱིན་ཟ་དང་། སྲིན་པོའི་དབང་པོ་དང་། རླུང་བདག་གོ །དེ་བཞིན་དུ་ནོར་རྒྱས་དང་། འཇོག་པོ་དང་། སྟོབས་ཀྱི་རྒྱུ་དང་། པདྨ་དང་། དེ་བཞིན་དུ་པདྨ་ཆེན་པོ་དང་། ཧུ་ལུནྜ་དང་། རིགས་ལྡན་དང་། དུང་སྐྱོང་ངོ་། །དེ་བཞིན་དུ་སྒྲ་གྲག་དང་། སྨུགས་པ་དང་། མུན་པ་ཅན་དང་། ཀུན་ཏུ་འཁྱིལ་དང་། འཁྲིགས་པ་དང་། གང་བ་དང་། འབབ་པ་དང་། དྲག་པོའི་སྤྲིན་གྱི་བདག་པོ་སྟེ། དེ་རྣམས་དེ་བཞིན་དུ་བསམས་ནས་ཞེས་གསུངས་ཏེ། དུར་ཁྲོད་ཀྱི་གཞུང་འདི་དག་ལཱུ་ཧི་པའི་གཞུང་ན་མེད་ཀྱང་། རྗེ་བཙུན་ནཱ་རོ་པས་ཁ་བསྐང་བ་ཡིན་པར་རྗེ་བཙུན་གསུངས་ཏེ། ཕམ་འཐིང་པའི་སློབ་མ་རྣམས་ཀྱི་རྒྱ་དཔེ་ལ་ཡང་འདི་དག་ཡོད་པ་དང་། མེད་པ་གཉིས་ཡོད་པར་གྲག་གོ །གཉིས་པ་ནི། ལོགས་ལ་རྩིག་པ་ཕ་གུ་དང་། །དྲྭ་ཕྱེད་མདའ་ཡབ་པུ་ཤུའོ། །ཞེས་པ་ལྟར་ལྔ་ལས། དང་པོ་རྩིག་པ་ནི། སྔར་གྱི་སྣ་ཚོགས་རྡོ་རྗེའི་སྟེང་དུ། ཆ་ཆེན་བཅུ་གཉིས་མཉམ་པར་བགོས་པའི་དབུས་ནས་བགྲངས་པའི་ཆ་ཆེན་ལྔ་པ་ལ་དབུས་དོར་མཐའ་གཉིས་གདབ་པའི་མཐའ་ནང་མ་ནི་རྩིག་པའི་ས་ཡིན་པས། དེའི་རྒྱ་ནི་ཐིག་ན་ཇི་ལྟར་ཡོད་པ་བཞིན་ཡིན་ལ། ཆུར་ནི་ཕྱོགས་བཞི་ཆར་ལ་སྒོའི་བུག་པའི་ཐད་དུ། སྒོ་ལོགས་ནས་སྒོ་ལོགས་ཀྱི་བར་རྒྱུན་ཆགས་སུ་སོང་བ་དང་། སྒོའི་སྟེང་གི་ཐད་དུ་ནི་ཕྱོགས་མཐའ་དག་ཏུ་རྒྱུན་ཆགས་སུ་སོང་བའོ། །དཔངས་ནི་ནོར་བུ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ལས། འཕངས་སུ་དཔག་ཚད་གསུམ་ཡོད་པ། རྒྱར་དཔག་ཚད་ལྔ་ཡོད་པ་ཞེས་གསུངས་པས། ཤར་ནུབ་ཏུ་ཆ་ཆེན་བརྒྱད། ཆ་ཕྲན་སུམ་ཅུ་སོ་གཉིས་ཡོད་པ་དེ་ཉིད་དུམ་བུ་ལྔར་བགོས་པའི་དུམ་བུ་རེ་རེ་ནི་དཔག་ཚད་རེ་རེར་བྱས་པས་འདིར་དཔག་ཚད་རེ་ལ་ཆ་ཕྲན་དྲུག་རེ་དང་། ཆ་ཕྲན་གཅིག་གི་ཆ་གཉིས་རེ་ཐོབ་སྟེ། དེ་ལྟར་ན་རྒྱར་དཔག་ཚད་ལྔ་ཞེས་པའི་དོན་ཏོ། །དཔངས་སུ་དཔག་ཚད་གསུམ་ནི་གྲུ་བཞི་པའི་ཐོག་མན་ཆད་ཀྱི་དཔངས་ཡིན་པས་ཆ་ཕྲན་བཅུ་དགུ་དང་། ཆ་ཕྲན་གཅིག་གི་ལྔ་ཆ་སྟེ། མདོར་ན་རྩིག་པའི་དཔངས་ཆ་ཆེན་བཞི། ཕ་གུ་ལ་ཆ་ཕྲན་གཅིག དྲྭ་ཕྱེད་ལ་ཆ་ཕྲན་གཉིས། གསེར་གྱི་སྐ་རགས་ལ་ཆ་ཕྲན་གཅིག་གི་ལྔ་ཆ་སྟེ། འདི་མན་ཆད་དཔག་ཚད་གསུམ་ཡིན་ལ། སྐ་རགས་དང་ནང་གི་གདུང་དཔངས་མཉམ་པའི་སྟེང་ནས་ཐོག་འབུབས་པ་ཡིན་ནོ། །དེ་ལ་རྩིག་པ་ལྔ་ནི། རྗེ་བཙུན་གྱིས། ཡེ་ཤེས་ཀྱི་རིམ་པ་དང་། ཕྱོགས་ཀྱི་རིམ་པ་གཉིས་གསུངས་པ་བསྒོམ་པ་དང་། བྲི་བའི་གནས་སྐབས་སོ་སོར་སྦྱར་བར་བྱའོ། །གཉིས་པ་ཕ་གུ་ནི། སློབ་དཔོན་ཤྲདྡྷས། འགྲམ་རྒྱབ་རིན་ཆེན་ཕ་གུ་སྟེ། །ཆ་ཆུང་གཅིག་གི་ཚད་དུ་བྱ། །ཞེས་གསུངས་པས། དཔངས་སུ་ཆ་ཆུང་གཅིག་ཡིན་ལ། རྒྱར་ནི་རྩིག་པ་ལས་ཆ་ཆུང་ཕྱེད་ཀྱིས་འཕྱར་དུ་ཡོད་པར་ཡོ་ག་པའི་བླ་མ་རྣམས་བཞེད་དོ། །ཁ་དོག་ནི་ཨ་བྷྱས། རྩིག་པ་ལྔ་ཕྱི་ནང་སྦྲག་པར་འདོད་པའི་ལུགས་ལ་ཁ་དོག་དམར་པོ་དང་། བརྩེགས་པར་འདོད་པའི་ལུགས་ལ་རྩིག་པ་དང་པོའི་ཁ་དོག་ཏུ་འདོད་ཀྱང་། ཤྲདྡྷ་ནས་བརྒྱུད་པའི་མན་ངག་ལས་གཞི་སེར་པོར་བཤད་པས། གསེར་གྱི་རང་བཞིན་ཟུར་གསུམ་དང་། གྲུ་བཞི་དང་། ཟླུམ་པོའི་དབྱིབས་ཀྱི་རིན་པོ་ཆེའི་ཕྲས་སྤྲས་པའོ། །གསུམ་པ་དྲྭ་ཕྱེད་ནི། ཕ་གུའི་སྟེང་དུ་ཆ་ཕྲན་གཉིས་ཀྱི་གཞི་ནག་པོར་བཤད་པ་ནི་བར་སྟོང་གི་དོན་ཡིན་པས། སྟོང་པའི་རང་བཞིན་ལ་བར་སྐབས་སུ་རིན་པོ་ཆེའི་བྲེ་ཕུལ་བཞི། སྟེང་འོག་ཏུ་བརྩེགས་པ་རེ་རེའི་དཔངས་ལ་ཆ་ཕྲན་ཕྱེད་ཡོད་ཅིང་། རྒྱར་ནི་བྲེ་ཕུལ་འོག་མ་ལ་ཆ་ཕྲན་གཅིག གོང་མ་རྣམས་ཆ་ཕྲན་ཕྱེད་ཕྱེད་ཀྱིས་རྒྱ་ཆེ་བར་གྱུར་པའོ། །དེའི་སྟེང་དུ་གསེར་གྱི་སྐ་རགས་ནི་དོན་གསེར་གྱི་གདུང་ལེབ་སྟེ། དཔངས་སུ་ཐིག་སྐུད་གང་ལས་མེད་པས་ཆ་ཕྲན་གཅིག་གི་ལྔ་ཆ་ཡིན་ལ། རྒྱར་བྲེ་ཕུལ་གོང་མ་དང་མཉམ་པའོ། །དེའི་ཕྱི་ངོས་སུ་ཆུ་སྲིན་མ་ཀ་རའི་ཁ་ནས་བྱུང་བའི་དྲྭ་བ་དང་། དྲྭ་བ་ཕྱེད་པ་འཕྱང་བ་སྟེ། དེ་ལ་སློབ་དཔོན་ཤཱཀྱ་བཤེས་གཉེན་གྱིས། དྲྭ་བ་ནི་མུ་ཏིག་གི་ཆུན་འཕྱང་སྟེ། མཆོག་དབུས་ན་ཡོད་པའོ། །དྲྭ་བ་ཕྱེད་པ་ནི་མཆོག་མཐའ་ན་ཡོད་པའོ། །ཞེས་དང་། སློབ་དཔོན་དཔལ་འབྲས་རྡོ་རྗེས། མུ་ཏིག་གི་ཆུན་འཕྱང་དབུས་ན་ནོར་བུས་མཛེས་པ་ལ་ནི་དྲྭ་བ་ཞེས་བྱ་ལ། དབུས་ན་རྒྱན་མེད་པ་ལ་ནི་དྲྭ་བ་ཕྱེད་པ་ཞེས་བྱའོ་ཞེས་གསུངས་པ་ལྟར་རོ། །བཞི་པ་མདའ་ཡབ་ནི་གསེར་གྱི་སྐ་རགས་དང་། ནང་གི་གདུང་མཉམ་པོར་བྱས་པའི་སྟེང་ནས་ཐོག་ཕུབ་པའི་ཕྱམ་གྱི་བྱ་འདབ་འོག་གི་འདོད་སྣམ་དང་ཐད་མཉམ་པོར་ཡོད་པའི་མཐའ་སྐོར་ལ་རིན་པོ་ཆེའི་མདའ་ཡབ་ཐུར་དུ་འཕྱང་བ་སྟེ། འདི་ལ་རྣམ་པ་འདི་ལྟར་ཡིན་གཞུང་རྣམས་ནས་བཤད་པ་མི་སྣང་ཡང་བླ་མ་གོང་མ་རྣམས་ཀྱི་མཐོང་བ་བརྒྱུད་པའི་ཕྱག་བཞེས་ཀྱིས། མཆུ་མེད་པའི་སྤྱི་བླུགས་མགོ་མཇུག་བཟློག་པ་ལྟ་བུའམ། རུས་རྒྱན་རྙིང་པའི་ཟ་ར་ཚགས་ཀྱི་སྣེ་མོའི་རྣམ་པ་ཅན་དུ་བཞེད་དེ། རྒྱ་གར་དང་བལ་པོར་བྲིས་པའི་ཐང་སྐུ་རྙིང་པ་ལ་བྲིས་པ་དང་མཐུན་པར་སྣང་ངོ་། །ཞེས་བླ་མ་དག་གསུང་ངོ་། །ལྔ་པ་པུ་ཤུ་ནི་མདའ་ཡབ་ཀྱི་སྟེང་གི་ཐད་དུ་གྱེན་དུ་འགྲེང་བའི་ཚུལ་གྱིས་གནས་པ་སྟེ། དབྱིབས་ནི་རྗེ་བཙུན་དང་། འཕགས་པ་རིན་པོ་ཆེས་དྲྭ་མིག་གསེང་མའི་པུ་ཤུ་ཞེས་གསུངས་ཏེ། པུ་ཤུའི་རྣམ་པ་ཆ་ཕྲན་གཉིས་པ་ཁོར་ཡུག་ཏུ་ཡོད་པ་ལ་དྲྭ་མིག་གི་ནང་དུ་རིན་པོ་ཆེ་མིག་གསུམ་པ་ཡོད་པའོ། །འདིར་ཨ་བྷྱས་འོག་ཏུ་འཕྱང་བ་ལ་ཤར་བུ་དང་། སྟེང་དུ་བརྩེགས་པ་ལ་མདའ་ཡབ་ཀྱི་ཐ་སྙད་མཛད་ཅིང་། དབྱིབས་ཀྱང་པདྨ་འདབ་མ་ཕྱེད་པའི་དབྱིབས་ཅན་དུ་བཞེད་དོ། །གསུམ་པ་ནི། སྟེང་ཐོག་ཀ་བ་ཤིང་བརྩེགས་དང་། །གདུང་དང་ཐོག་ཕུབ་རིམ་པ་དྲུག །ཞེས་པ་ལྟར་བཞི་ལས། ཀ་བ་ནི་འདིར་འཁོར་ལོ་གོང་མ་བཞི་པོ་རེ་རེ་ལ་བརྒྱད་བརྒྱད་གསུངས་པས་སུམ་ཅུ་རྩ་གཉིས་སོ། །ཤིང་བརྩེགས་ཀྱང་དེའི་རིགས་པས་སུམ་ཅུ་རྩ་གཉིས་སོ། །གདུང་ནི་ཟླུམ་པོ་བཞི་དང་། ཐལ་གདུང་མིག་མངས་རིས་སུ་བྲིས་པ་རྣམས་སོ། །བཞི་པ་ཐོག་ཕུབ་རིམ་པ་དྲུག་ལས། ཐོག་ཕུབ་དང་པོ་ནི་ནག་པོ་དཀྱིལ་ཆོག་ལས། ཨིནྡྲ་ནཱི་ལའི་ས་གཞི་ལ། །འཁོར་ལོ་གསུམ་གྱི་བདག་ཉིད་བསམ། །ཞེས་དང་། རྗེ་བཙུན་གྱིས། འཁོར་ལོ་ཐམས་ཅད་ཀྱི་ས་གཞི་ནི་སྔོན་པོ་ཡིན་ལ་ཞེས་གསུངས་པའི་དོན། རྩིག་པའི་ནང་དུ་རྒྱར་ཆ་ཆེན་གཅིག་པ། དཔངས་སུ་ཆ་ཕྲན་གཅིག་ཡོད་པའི་ལྷ་སྣམ་གྲུ་བཞི་པ་ཕྱོགས་མདོག་ཅན་ནི་དམ་ཚིག་གི་འཁོར་ལོ་ཡིན་ལ། དེའི་དབུས་ཀྱི་ཆ་ཆེན་དྲུག་སྔོན་པོར་བྱེད་པ་ནི། ཨིནྡྲ་ནཱི་ལའི་ས་གཞི་ཡིན་ཅིང་། དེའི་དཔངས་གཞུང་ལས་དངོས་སུ་མ་བཤད་ཀྱང་། སྐུ་འཁོར་གྱི་གདུང་དང་། ཕྱིའི་གསེར་གྱི་གདུང་ལེབ་མཉམ་པོར་འོང་དགོས་པའི་རིགས་པས་ཆ་ཕྲན་ཕྱེད་དང་དགུའོ། །དེའི་སྟེང་དུ་སྐུའི་འཁོར་ལོ་དཀར་པོ་ལྟེ་བའི་རྒྱར་ཆ་ཆེན་ལྔ་ལ་ཆ་ཕྲན་གཅིག་གིས་མ་ཆོགས་པ། དཔངས་ཆ་ཕྲན་གཉིས། དེའི་སྐེད་པར་རྩིབས་ཀྱི་དཔངས་ཆ་ཕྲན་གཅིག ཞེང་ལ་ཆ་ཕྲན་གཉིས་ཡོད་པས་བསྐོར་བ་ནི། རྗེ་བཙུན་གྱིས། ས་གཞིའི་སྟེང་དུ་རྩིབས་ཀྱི་ངོ་བོ་ཡར་ལ་ཅུང་ཟད་འཕགས་པ་ཡིན་ལ། རྩིབས་སོ་སོའི་མཐོ་དམན་གྱི་ཚད་ནི། ལྷ་སོ་སོའི་པུས་མོར་སླེབ་པ་ཙམ་ཡིན་ཅིང་ཞེས་པའི་དོན་ཏོ། །རྩིབ་ཀྱི་རྩེ་མོར་མུ་ཁྱུད་ཆ་ཕྲན་ཕྱེད་ཀྱིས་བསྐོར་བའི་སྟེང་དུ་རྭ་བ་དཔངས་སུ་ཆ་ཕྲན་གཉིས་པས་བསྐོར་བ་ནི། རྭ་བའི་ཚད་ལྷ་སོ་སོའི་སྐེད་པར་སླེབ་པ་ཞེས་གསུངས་པའི་དོན་ནོ། །ཨིནྡྲ་ནཱི་ལའི་ས་གཞིར། རྩིབས་བརྒྱད་ཀྱི་བར་མཚམས་སུ། རྭ་བ་དང་མཉམ་པའི་ཀ་རྟེན་བཙུགས་ནས། དེའི་སྟེང་དུ་ཀ་བ་ཆ་ཕྲན་ལྔ་པ་རེ་རེ་འཛུགས་པ་ནི། ཀ་བའི་ཚད་ལྷ་སོ་སོའི་དབུའི་སྟེང་ནས་ཡར་ཁྲུ་གང་འཕགས་པ་ཞེས་པའི་དོན་ཏོ། །དེ་དག་གི་སྟེང་དུ་ཤིང་བརྩེགས་ཆ་ཕྲན་གཅིག་དང་ཆ་ཕྲན་གཅིག་གི་ལྔ་ཆ་གཅིག དེའི་སྟེང་དུ་གདུང་ཟླུམ་པོ་ཆ་ཕྲན་གཅིག་ཡོད་པས་བསྐོར་ཏེ། དེ་དང་ཕྱིའི་གསེར་གྱི་གདུང་ལེབ་ཐད་མཉམ་པའི་སྟེང་དུ། ཕྱམ་བཏང་ནས་ཐོག་ཕུབ་སྟེ། གསེར་གྱི་གདུང་ལེབ་ཀྱི་ཕྱིར་བྱ་འདབ་ཆ་ཕྲན་གཉིས་འཕྱར་བའི་འོག་ཕྱོགས་སུ་རིལ་བ་སྤྱི་བླུགས་མཆུ་བཅད་པ་ཐུར་དུ་བསྒྲིགས་པ་ལྟ་བུའི་མདའ་ཡབ་ཆ་ཕྲན་གཉིས་དང་། སྟེང་དུ་རིན་པོ་ཆེའི་དྲྭ་མིག་གསེང་མའི་པུ་ཤུ་ཆ་ཕྲན་གཉིས་པས་བསྐོར་བ་ལ། གོས་དང་། འཕན་དང་། མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་ལ་སོགས་པའི་རྒྱན་དུ་མས་བསྐོར་བ་ནི། དམ་ཚིག་གི་འཁོར་ལོའི་ཐོག་ཕུབ་ཡིན་ལ། འདིའི་དྲྭ་བ་དང་། ཀ་བ་དང་། གདུང་རྣམས་ནི། སྐུ་འཁོར་གྱི་ཡིན་པས། འཁོར་ལོས་མཚན་པར་བྱའོ། །ཐོག་ཕུབ་གཉིས་པ་ནི་སྐུ་འཁོར་གྱི་ལྟེ་བའི་སྟེང་དུ། གསུང་འཁོར་དམར་པོ། ལྟེ་བའི་རྒྱར་ཆ་ཆེན་ཕྱེད་དང་བཞི། དཔངས་སྔ་མ་དང་འདྲ་བ་ལ། ལྟེ་བའི་སྐེད་པར་རྩིབས་དང་མུ་ཁྱུད། རྒྱ་དཔངས་སྔ་མ་དང་འདྲ། མུ་ཁྱུད་ཀྱི་སྟེང་དུ་རྭ་བ་དང་། ཀ་བའི་དཔངས་ཡང་སྔ་མ་དང་འདྲ་ཞིང་། དེའི་སྟེང་དུ་ཤིང་བརྩེགས་ཆ་ཕྲན་རེ་རེའི་སྟེང་དུ་གདུང་ཟླུམ་ཆ་ཕྲན་གཅིག་པ་བཀོད་དོ། །ཡང་སྐུ་འཁོར་གྱི་གདུང་ཟླུམ་གྱི་སྟེང་དུ། རྩིག་པ་དཔངས་སུ་ཆ་ཕྲན་གཅིག ཕ་གུ་དང་། དྲྭ་ཕྱེད་དང་། གསེར་གྱི་གདུང་ལེབ་ཟླུམ་པོ་གསུམ་ཆར་ལ་དཔངས་སུ་ཆ་ཕྲན་གཅིག་བྱས་པ་དང་། ནང་གི་གདུང་ཟླུམ་མཉམ་པའི་སྟེང་དུ། ཐོག་ཕུབ་སྟེ། འདིའི་ཐོག་ནི་སྐུ་འཁོར་གྱི་ཡིན་པས་འཁོར་ལོས་མཚན་པ་དང་། རྭ་བ་སོགས་ནི་གསུང་འཁོར་གྱི་ཡིན་པས་པདྨས་མཚན་པར་བྱའོ། །ཐོག་ཕུབ་གསུམ་པ་ནི་གསུང་འཁོར་གྱི་ལྟེ་བའི་སྟེང་དུ། ཐུགས་ཀྱི་འཁོར་ལོ་སྔོན་པོ། ལྟེ་བའི་རྒྱར་ཆ་ཆེན་གཉིས་དང་། ཆ་ཕྲན་གཅིག དཔངས་ཚད་སྔ་མ་དང་འདྲ། དེའི་སྐེད་པར། རྩིབས་དང་། མུ་ཁྱུད་དང་། རྒྱ་དཔངས་སྔ་མ་དང་འདྲ་བའི་མུ་ཁྱུད་ཀྱི་སྟེང་དུ། རྭ་བ་དང་། ཀ་བ་དང་། ཤིང་བརྩེགས་དང་། གདུང་ཟླུམ་རྣམས་ཀྱང་ཚད་སྔ་མ་བཞིན་དུ་བྱའོ། །ཡང་གསུང་འཁོར་གྱི་གདུང་ཟླུམ་གྱི་སྟེང་དུ། རྩིག་པ་ཆ་ཕྲན་གཅིག ཕ་གུ་དྲྭ་ཕྱེད། གདུང་ལེབ་གསུམ་ལ་ཆ་ཕྲན་གཅིག་སྟེ། དེ་དང་ནང་གི་གདུང་ཟླུམ་ཐད་མཉམ་པའི་སྟེང་དུ་ཐོག་ཕུབ་པ་ནི་གསུང་འཁོར་གྱི་ཡིན་པས། པདྨས་མཚན་པ་བྱ་ལ། རྭ་བ་སོགས་ནི་ཐུགས་འཁོར་གྱི་ཡིན་པས་རྡོ་རྗེས་མཚན་པར་བྱའོ། །ཐོག་ཕུབ་བཞི་པ་ནི། ཐུགས་འཁོར་གྱི་ལྟེ་བའི་སྟེང་དུ། སྣ་ཚོགས་པདྨ་ཡུ་བ་དང་ལྟེ་བའི་རྒྱར་ཆ་ཆེན་གཅིག་པ་ཡུ་བའི་དཔངས་ལ་ཆ་ཕྲན་ཕྱེད་ཡོད་པའི་སྟེང་དུ་འདབ་མ་རྒྱ་དཔངས་སྔར་གྱི་རྩིབས་དང་འདྲ་བའི་རྩེ་མོར་མུ་ཁྱུད་ཆ་ཕྲན་ཕྱེད་པའི་སྟེང་དུ། རྭ་བ་དང་། ཀ་བ་དང་། ཤིང་བརྩེགས་དང་། གདུང་ཟླུམ་རྣམས་སྔ་མ་དང་ཚད་མཉམ་པའོ། །ཡང་ཐུགས་འཁོར་གྱི་གདུང་གི་སྟེང་དུ་རྩིགས་པ་ནས་གདུང་ལེབ་ཀྱི་བར། སྔ་མ་ལྟ་བུ་བྱས་པ་ཐད་མཉམ་པའི་སྟེང་དུ་ཐོག་ཕུབ་པ་ནི། ཐུགས་འཁོར་གྱི་ཡིན་པས། རྡོ་རྗེས་མཚན་པ་བྱ་ལ། རྭ་བ་སོགས་ནི་བདེ་ཆེན་གྱི་འཁོར་ལོའི་ཡིན་པས་གྲི་གུག་གིས་མཚན་པ་བྱའོ། །ཐོག་ཕུབ་ལྔ་པ་ནི་བདེ་ཆེན་འཁོར་ལོའི་གདུང་ཟླུམ་གྱི་སྟེང་དུ་རྩིག་པ་ཆ་ཕྲན་ཕྱེད་དང་གཉིས་ལ། ལྔ་ཆ་གཅིག་གིས་མ་ཆོགས་པ། དེའི་སྟེང་དུ་ཕ་གུ། དྲྭ་ཕྱེད། གདུང་ལེབ་གསུམ་ལ་ཆ་ཕྲན་ཕྱེད་དང་གཉིས་བྱས་པའི་སྟེང་དུ་ཐལ་གདུང་བཞི། མིག་མངས་རིས་སུ་བྲིས་པའི་དཔངས་ལ་ཆ་ཕྲན་གཅིག དེའི་རེ་མིག་བརྒྱད་ཕུབ་པ་ནི། བདེ་ཆེན་འཁོར་ལོའི་ཐོག་ཕུབ་ཡིན་ནོ། །ཐོག་ཕུབ་དྲུག་པ་ནི། དེའི་དབུས་ཀྱི་གདུང་གྲུ་བཞིའི་སྟེང་དུ། རྩིག་པ་ཆ་ཕྲན་ཕྱེད་དང་གཉིས། དེའི་སྟེང་དུ་དྲྭ་ཕྱེད་ཕ་གུ་གསེར་གྱི་གདུང་ལེབ་རྣམས་ལ་ཆ་ཕྲན་ཕྱེད་དང་གཉིས་བྱས་པའི་སྟེང་དུ། ཐོག་གྲུ་བཞིར་ཕུབ་པ་ནི་གཙོ་བོའི་ཐོག་ཕུབ་སྟེ། རྡོ་རྗེ་ནོར་བུ་རིན་པོ་ཆེ་ཆ་ཆེན་གཅིག་པའི་ཏོག་གིས་སྤྲས་པའོ། །ཐོག་ཕུབ་གོང་མ་རྣམས་ལ་ཡང་། བྱ་འདབ་དང་། མདའ་ཡབ་དང་། པུ་ཤུ་རྣམས་ཀྱང་། ཇི་ལྟར་འཚམས་པ་བྱ་ཞིང་། གདུགས་དང་རྒྱལ་མཚན་ལ་སོགས་པའི་རྒྱན་སྣ་ཚོགས་ཀྱིས་སྤྲས་པར་བྱའོ། །ཡང་ཀ་བ་རྣམས་ཀྱི་ཕྱི་སོ་དང་། རྭ་བ་རྣམས་ཕྱི་སོ་མཉམ་པོར་བྱས་པའི་ཀ་བའི་བར་མཚམས་སུ་རྭ་བས་བསྐོར་བ་འབྱུང་ཞིང་། ཀ་བའི་ཐད་དུ་ཀ་གདན་རང་རང་གི་འོག་མའི་ལྟེ་བའི་ཐད་དུ་འཛུགས་པ་ཡང་ཐམས་ཅད་ལ་འདྲ་འོ། །འདིའི་ཐོག་གོང་མ་ནས་སྣ་ཚོགས་རྡོ་རྗེའི་ལྟེ་བའི་བར་དང་། རྩིག་པའི་ནང་ངོས་ཀྱི་རྒྱ་མཉམ་པ་ནི་ལུས་མི་མཉམ་པ་མེད་པ་རྣམ་པར་དག་པ་མཚོན་ལ། འཁོར་ལོ་སོ་སོའི་ལྟེ་བ་སོགས་ཀྱི་གཅོད་ཚུལ་ནི། རྗེ་བཙུན་གྱིས་ནག་པོ་དཀྱིལ་ཆོག་ལས། ཕྱིའི་དཀྱིལ་འཁོར་གྱི་དབྱིབས་ནི་དཀྱིལ་འཁོར་གཞན་དང་མཐུན་ནོ། །ནང་མ་ཆ་ཆེན་བཞི་གནས་པ་ལས། ཆ་ཆེན་དང་པོ་གཅིག་བདེ་ཆེན་འཁོར་ལོ་ལ་བཏང་སྟེ། དེ་ཡི་ཡང་ཕྱེད་ལྟེ་བ་ལ། ཕྱེད་འདབ་མ་ལ། དེ་ནས་ཆ་ཆེན་གཉིས་ལ་ཐག་པ་བརྐྱང་བ་ཆ་གསུམ་མཉམ་དུ་བྱས་ལ། དབུས་སུ་ཕུར་བུ་བཏབ་ལ། དེ་ལ་སྲད་བུ་སྲ་བ་ཉིས་ལྟབ་ཏུ་བྱས་ལ། རྡོ་རྒྱུས་ལ་སོགས་པས་འཁོར་ལོ་རེ་བསྐོར། དེ་ནས་རང་རང་གི་གནས་ཀྱི་ནང་དུ་པན་རེག་གི་ཕྱེད་ཚད་ཙམ་རེ་བསྐོར་ལ། ལྟེ་བའི་གེ་སར་དང་། གྲི་གུག་ལ་སོགས་པའི་རྭ་བ་བྱའོ། །རྡོ་རྒྱུས་ལ་སོགས་པས་པདྨ་འཁོར་ལོའི་རྩིབས་དང་། རྐང་པའི་རི་མོ་བྲིའོ། །ཆ་ཆེན་གཅིག་དམ་ཚིག་གི་འཁོར་ལོ་སྟེ་ལྷ་སྣམ་ལ་བཞག་གོ །སྤྱོད་པ་བ་ཉིད་ཀྱི་དགོངས་པའོ་ཞེས་གསུངས་པའི་དོན་ཏེ། བདེ་ཆེན་འཁོར་ལོའི་ནང་དུ་པན་རེག་གི་ཕྱེད་ཚད་བསྐོར་རྒྱུ་མེད་པས་དེ་ཉིད་ཕྱི་ནས་བསྐོར་ཏེ། ལྷག་མ་ཆ་ཕྲན་ཕྱེད་དང་བརྒྱད་ལ་དུམ་བུ་གསུམ་དུ་བྱས་ནས་བསྐོར་བའི་ཚེ་ཇི་ལྟ་བ་བཞིན་འགྲིག་པའོ། །ཡང་དཱ་རི་ཀ་པས། ཚངས་པའི་ཐིག་གི་ངོས་དེ་རུ། །རེ་རེ་ལྔར་བྱ་ཉི་ཤུ་གདབ། །ཕོ་བྲང་ལ་གཉིས་གེ་སར་གཅིག །གསུམ་གསུམ་གྱི་ནི་འཁོར་ལོ་རྣམས། །ཀ་བ་རྡོ་རྗེ་གྲི་གུག་ཕྲེང་། །པདྨ་འཁོར་ལོ་རེ་རེ་བྱ། །གཅིག་གིས་ཕྱི་ཡི་ཁྱམས་ཡིན་ཏེ། །ཞེས་གསུངས་པ་ལྟར་གཅོད་ན་ཡང་། དཔངས་ཚད་ནི་སྔ་མ་ལས་མ་འདས་སོ། །ཕྱིའི་རྩིག་པའི་རྩ་བར་འདོད་ཡོན་གྱི་སྣམ་བུ་ཞེས་ཀྱང་བྱ། ཁྱམས་ཞེས་ཀྱང་བྱ་བ་ཁ་དོག་དམར་པོ། རྒྱ་དཔངས་ཆ་ཕྲན་གཉིས་པ། དཀྱུས་སུ་སྒོ་ཁྱུད་ཀྱི་རྒྱབ་ནས། གཅིག་ཤོས་ཀྱི་སྒོ་ཁྱུད་ཀྱི་རྒྱབ་ཀྱི་བར་དུ་སོང་བའི་སྟེང་དུ། རིག་མ་བཅུ་དྲུག་ཕྱོགས་རེ་རེར་བཞི་བཞི་སྟེ། ཐམས་ཅད་ཀྱང་འཛུམ་པའི་བཞིན་ལ་མཛེས་པའི་རྒྱན་དང་ལྡན་པ་རྣམས་ལག་ན་རང་རང་གི་མཆོད་རྫས་འཛིན་པ་ཞལ་ནང་དུ་བལྟས་ནས་བཅོམ་ལྡན་འདས་ལ་མཆོད་པ་འབུལ་བའོ། །བཞི་པ་སྒོ་ལ། དརྤན་གྱིས་སྒོ་ཆེ་བ་ལ་དཔངས་སུ་ཆ་ཆེན་གསུམ་དང་། ཆུང་བ་ལ་དཔངས་སུ་ཆ་ཆེན་གཉིས་ཡོད་པར་གསུངས་པ་ལས། འདིར་རྟ་བབས་དཔངས་སུ་སྒོ་ཚད་གཅིག་མའི་ཚེ། ཕྱི་མ་ཉིད་ཁས་ལེན་དགོས་པས། རྩིག་པའི་དཀྱིལ་དུ་རྒྱར་ཆ་ཆེན་གཅིག་པ། དཔངས་སུ་ཆ་ཆེན་གཉིས་པ་བཅད་པའི་སྒོའི་བུག་པ་བྱས་ནས། གཡས་གཡོན་གྱི་རྩིག་པ་ལྔ་ཆར་གྱི་རྒྱུན་མདུན་ཕྱོགས་སུ་ཆ་ཆེན་གཅིག་སོང་བ་ནི་སྒོ་ཁྱུད། དེ་ནས་གཡས་གཡོན་དུ་ནང་ངོས་ཀྱི་ཆ་ཕྲན་གཉིས་གཉིས་སོང་བ་ནི་སྒོ་འགྲམ། དེ་ནས་མདུན་ཕྱོགས་སུ་ནང་ངོས་ཀྱི་ཆ་ཕྲན་གསུམ་གསུམ་སོང་བ་ནི་སྒོ་ལོགས་ཡིན་ནོ། །རྗེ་བཙུན་གྱིས། སྒོ་ནི་ས་ལ་བྲིས་པ་བཞིན་བརྩེགས་ནས་ཀྱང་ཡོད་པར་འདོད་དོ་ཞེས་སོགས་ཀྱི་དོན། སྤྱིར་སྒོ་ཁང་བྲིས་པ་བཞིན་བརྩེགས་ནས་ཀྱང་ཡོད་པར་འདོད་ལ། དམིགས་བསལ་བྲི་བྱའི་ཡ་ཕུབས་ནི་སྒོའི་དངོས་གཞིའི་ཐད་ཀྱི་རྩིག་རྒྱུན་མ་ཆད་པར་མཚོན་པའི་ཕྱིར། དེར་བྲིས་པ་ཡིན་གྱི། བསྒོམ་བྱ་ལ་ཡ་ཕུབས་ཀྱི་ཐད་ཀྱི་རྩིག་པ་མེད་པར་འདོད་དོ། །འོ་ན་བསྒོམ་བྱ་ལ་རྩིག་རྒྱུན་ཆད་པར་འགྱུར་རོ་སྙམ་ན་མ་ཡིན་ཏེ། སྒོའི་སྟེང་དུ་ཡང་ཆ་ཆེན་གཉིས་ཀྱི་རྩིག་རྒྱུན་མ་ཆད་པར་ཡོད་པའི་ཕྱིར་རོ། །དེས་ན་སྒོ་ཁང་གི་རྩིག་པའི་དཔངས་ནི་ཆ་ཆེན་གཉིས་པ་ཡིན་ལ། སྒོ་ལོགས་ཀྱི་རྩིག་གདོང་ནི་མཉམ་པར་བཅད་པ་ཡིན་གྱི། གསེགས་དྲས་ནི་མི་དགོས་སོ། །ལྔ་པ་རྟ་བབས་ནི། རྗེ་བཙུན་གྱིས་སྒོ་ཁང་གི་སྟེང་འགེབས་པ་ནི་རྟ་བབས་ཡིན་པས་ཞེས་སོགས་ཀྱི་དོན། རྟ་བབས་ཀྱིས་སྒོ་ཁང་གི་སྟེང་འགེབས་དགོས་པས། སྒོ་ལོགས་ཀྱི་ཕྱི་མཐའ་ཆ་ཕྲན་རེ་རེ་སོང་བའི་སར་ནང་ངོས་འདོད་སྣམ་ལ་རེག་པ་དང་། ཕྱི་ངོས་སྣ་ཚོགས་རྡོ་རྗེའི་ལྟེ་བ་ཟད་མཚམས་སུ་སྟེགས་བུ་གྲུ་བཞི་དཔངས་སུ་ཆ་ཕྲན་གཅིག དེའི་སྟེང་དུ་བུམ་པ་ཆ་ཕྲན་གཅིག དེའི་སྟེང་དུ་ཀ་བ་ཆ་ཕྲན་ལྔ་པ་བཞི་འཛུགས་སོ། །དེ་དག་གི་སྟེང་དུ་ཞུ་རིང་ཐུང་གཉིས་ལ། དཔངས་སུ་ཆ་ཕྲན་གཅིག སྲིད་དུ་ཞུ་རིང་ཆ་ཕྲན་གཉིས་ཡོད་པ། རྩེ་མོ་ཀ་རྒྱན་དང་། མུན་པའི་ཕྱེད་ནོན་པའི་ཚུལ་གྱིས་ཡོད་པའོ། །དེའི་སྟེང་དུ་མདུན་ངོས་ལ་གདུང་དཀྱུས་སུ་ཆ་ཆེན་བཞི། དཔངས་སུ་ཆ་ཕྲན་གཅིག་ཡོད་པ་དང་། ཀ་བ་ནང་མ་གཉིས་ཀྱི་སྟེང་དུ་ཡང་དེ་དང་མཉམ་པའི་གདུང་འགོད་དོ། །དེའི་སྟེང་དུ་རྟ་བབས་སྣམ་བུ་འོག་མ་དཀྱུས་སུ་ཆ་ཆེན་བཞི། ཞེང་དུ་ཆ་ཕྲན་ལྔ་ཡོད་པས་བཀབ། དེའི་སྟེང་དུ་སྣམ་བུ་གོང་མ་གསུམ་གཡས་གཡོན་དང་། མདུན་ངོས་གསུམ་ཆ་ཕྲན་རེ་རེ་ཐུང་བ་བརྩེགས་ཏེ། མཆོད་རྟེན་གྱི་བང་རིམ་ལྟར་ཡོད་པའི་སྟེང་མ་ལ་དཀྱུས་སུ་ཆ་ཕྲན་བཅུ་དང་། ཞེང་དུ་ཆ་ཕྲན་གཉིས་ཡོད་པའོ། །དེའི་དབུས་སུ་པདྨ་འཁོར་ལོ་གདུགས་གསུམ་ཆ་ཆེན་གཅིག་གི་ཚད་དང་། གཡས་གཡོན་དུ་རི་དྭགས་ཕོ་མོ་གཉིས་དང་། མཇུག་མའི་ངོས་སུ་གདུགས་འཛིན་པའི་སྤྲེའུ་གཉིས་དང་། སྣམ་བུའི་རིམ་པ་རྣམས་ལ་རྒྱལ་མཚན་དང་། བ་དན་ལ་སོགས་པའི་རྒྱན་སྣ་ཚོགས་ཀྱིས་བརྒྱན་པའོ། །སྣམ་བུ་བཞི་ཆར་གྱི་ནང་ངོས་མཉམ་པ་དང་། སྒོའི་སྟེང་གི་ལོགས་ཀྱི་རྩིག་པའི་བར་ན་ཆ་ཕྲན་གཉིས་སྟོང་པར་ཡོད་པ་ནི་རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའི་དོན་ཡིན་ཞིང་། སྒོ་ཁང་གི་རྩིག་པ་དང་། རྟ་བབས་ཀྱི་བར་ན་ཆ་ཕྲན་གཅིག་ཡོད་པ་ནི་ཀ་བ་བཞིས་མཐོ་བར་བཏེག་པ་ཞེས་དང་། ཀ་བ་བཞི་དགོས་པའི་དོན་ཀྱང་ཡིན་ནོ། །ཀ་བའི་གདན་ལ་སྟེགས་བུ་དང་། བུམ་པ་ཡོད་པ་ནི་ཀླུའི་བློས། བུམ་པ་ཀ་བའི་སྟེང་གནས་པའི། །སྒོ་ལ་སུམ་འགྱུར་རྟ་བབས་ཏེ། །ཞེས་དང་། ཕྲེང་བར། སྟེགས་བུ་བུམ་པ་ལ་གནས་པའི། །རྟ་བབས་ཀ་བ་དྲང་པོར་བྱ། །ཞེས་པས་འགྲུབ་ཅིང་། རྟ་བབས་འདེགས་པའི་གདུང་དགོས་པ་ནི། རིན་ཆེན་འབར་བར། ཡ་ཕུབ་ཐ་མ་རྡོ་རྗེའི་གདུང་། །ཞེས་པས་འགྲུབ་བོ། །འདི་ཉིད་བྲི་བྱ་ལ་མེད་དོ་སྙམ་ན། ཡ་ཕུབ་དང་། རྟ་བབས་ཀྱི་བར་གྱི་ཆ་ཕྲན་གཅིག་པོ་དེ་ཉིད། སློབ་དཔོན་འདིས་གདུང་གི་ཐིག་ཏུ་འདོད་དེ། ཡ་ཕུབ་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །ཞེས་པ་བྲི་བྱའི་སྐབས་སུ་བཤད་པའི་ཕྱིར་རོ། །ཤྲ་དྡྷས་གདུང་ཐིག་དང་། མུན་སྣམ་གང་གི་ཡང་གསལ་ཁ་མེད་ཅིང་། དབང་ཆུར་ནམ་མཁའ་ཞེས་བཤད་པས་མུན་སྣམ་དུ་བཞེད་པ་གདམ་ཁ་ཅན་དེ་གང་ལྟར་ཡང་བསྒོམ་པ་ལ་ནི་ཁྱད་མེད་དོ། །གུན་དྷ་རི་ནི། སྣམ་བུ་འོག་མའི་ནང་ངོས་དཔངས་སུ་ཆ་ཕྲན་ཕྱེད་ཙམ་གྲུས་པའི་དབྱིབས་མཛེས་པོ་འབྱུང་ལ། དྲྭ་བ་དང་དྲྭ་བ་ཕྱེད་པ་ལ་སོགས་པའི་གནམ་རྒྱན་སྣ་ཚོགས་པ་འདོགས་པའོ་ཞེས་པ་འདི་རྗེ་བཙུན་གྱི་དགོངས་པའོ་སྙམ་དུ་ཁོ་བོ་སེམས་སོ། གཞལ་ཡས་ཁང་དེར་ལྷ་སུམ་ཅུ་སོ་བདུན་ལ། པདྨ་དང་ཉི་མའི་གདན་རེ་རེ་ནི་འདྲ་ལ། ཁྱད་པར་གཙོ་བོ་ལ་འཇིགས་བྱེད་དང་། དུས་མཚན་གྱི་གདན་དང་། སྒོ་མཚམས་མ་བརྒྱད་ལ་ཡི་དྭགས་ཀྱི་གདན་ཏེ། སློབ་དཔོན་གྱི་གཞུང་ལས། སྒོ་མཚམས་མ་བརྒྱད་བཤད་མ་ཐག་ཏུ། ཐམས་ཅད་ཀྱང་ཡི་དྭགས་ཀྱི་གདན་ལ་བཞུགས་པ། སེམས་ཅན་གྱི་དོན་མཛད་པ་ལ་བརྩོན་པ་ཞེས་གསུངས་པའི་དོན། འཁོར་གྱི་ལྷ་ཐམས་ཅད་ལ་སྦྱར་ན། སྔོན་བྱུང་གི་རྣམ་འཕྲུལ་དང་འགྲིག་པར་སྣང་ཡང་། འདིའི་འགྲེལ་པར། ཡི་དྭགས་ཀྱི་གདན་ལ་གནས་ཤིང་། འཇིགས་པ་ཆེན་མོ་ཞེས་བྱ་བ་ནི་བརྒྱད་ཆར་ལ་ཡང་རིག་པར་བྱའོ། །དུར་ཁྲོད་དུ་གནས་པ་ཅན་ཉིད་ཀྱི་ཕྱིར་འདི་རྣམས་ཀྱི་གདན་རོ་ཉིད་དོ་ཞེས་གསུངས་པ་ལ་བརྟེན་ནས། རྗེ་བཙུན་དང་། འཕགས་པས་ཀྱང་སྒོ་མཚམས་མ་བརྒྱད་ཁོ་ན་ལ་སྦྱར་བར་མཛད་དོ། །གཉིས་པ་བརྟེན་པ་བཤད་པ་ལ་གཉིས་ཏེ། གཙོ་བོ་ཡབ་ཡུམ་གྱི་རྣམ་པ། འཁོར་གྱི་ལྷ་རྣམས་ཀྱི་རྣམ་པ་བཤད་པའོ། །དང་པོ་ནི། སློབ་དཔོན་གྱི་གཞུང་ལས། བཅོམ་ལྡན་འདས་ཞལ་བཞི་པ། སྤྱན་གསུམ་པ། ཕྱག་བཅུ་གཉིས་པ། སྐུ་མདོག་མཐིང་ག གཡས་བརྐྱང་བས་བཞུགས་པ། འཇིགས་བྱེད་དང་དུས་མཚན་མནན་པ། རྡོ་རྗེ་ཕག་མོ་ལ་འཁྱུད་པའི་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པ། ཕྱག་གཞན་གཉིས་ཀྱིས་གླང་པོ་ཆེའི་ལྤགས་པའི་ན་བཟའ་བསྣམས་པ། གཡས་པའི་ཕྱག་གསུམ་པ་ལ་ཌཱ་མ་རུ། བཞི་པ་ལ་དགྲ་སཏྭ། ལྔ་པ་ལ་གྲི་གུག དྲུག་པ་ལ་མདུང་རྩེ་གསུམ་པ་བསྒྲེང་བ། གཡོན་པའི་ཕྱག་གསུམ་པ་ལ་ཁ་ཊྭཱཾ་ག་རྡོ་རྗེས་མཚན་པ། བཞི་པ་ལ་ཁྲག་གིས་བཀང་བའི་ཐོད་པ་དང་། ལྔ་པ་ལ་རྡོ་རྗེ་ཞགས་པ། དྲུག་པ་ལ་ཚངས་པའི་མགོ་བོ་བསྣམས་པ། རལ་པ་དང་ཅོད་པཎ་གྱིས་བརྒྱན་པ། ཐོད་པའི་ཕྲེང་བའི་ཐོད་ཅན། ཟླ་བ་ཕྱེད་པར་འཇོག་པ། སྣ་ཚོགས་རྡོ་རྗེས་མཚན་པའི་དབུ་རྒྱན་ཅན། ཞལ་རྣམ་པར་འགྱུར་བ། མཆེ་བ་གཙིགས་ཤིང་འཇིགས་པར་བྱེད་པ། སྒེག་པ་ལ་སོགས་པའི་ཉམས་དང་ལྡན་པ། སྐུ་མདོག་མཐིང་ཁར་བསམ་པར་བྱའོ། །ཞལ་གཡས་པ་ཤིན་ཏུ་སེར་བ། རྒྱབ་ཞལ་པདྨ་རཱ་ག་ལྟ་བུའི་མདོག་ཅན། གཡོན་པ་མརྒད་ལྟ་བུའི་མདོག་ཅན། སྟག་གི་ལྤགས་པའི་ན་བཟའ་བསྣམས་པའོ། །མི་མགོ་རློན་པའི་ཕྲེང་བ་འཕྱང་བ། རྣ་ཆ་དང་། གདུ་བུ་དང་། མགུལ་རྒྱན་དང་། སྤྱི་གཙུག་ནོར་བུས་བརྒྱན་པ། མཆོད་ཕྱིར་ཐོགས་འཆང་བ། ཐལ་བ་དང་ཕྱག་རྒྱ་དྲུག་སྟེ། ཕ་རོལ་ཏུ་ཕྱིན་པ་དྲུག་རྣམ་པར་དག་པའི་ཕྱིར། ཕྱག་རྒྱ་དྲུག་གིས་རྒྱས་བཏབ་པའོ། །དེའི་སྤྱན་སྔར་བཅོམ་ལྡན་འདས་མ་ཡུམ་སྐུ་མདོག་དམར་མོ། ཞལ་གཅིག་པ། སྤྱན་གསུམ་པ། ཕྱག་གཉིས་པ། སྐྲ་གྲོལ་བ། གཅེར་བུ། དུམ་བུའི་སྐ་རགས་ཀྱིས་བརྒྱན་པ། ཕྱག་གཡོན་པས་འཁྱུད་ནས་གདུག་པ་དང་། བདུད་ལ་སོགས་པའི་ཁྲག་གིས་བཀང་བའི་ཐོད་པ་བསྣམས་པའོ། །གཡས་པས་ཕྱོགས་ཐམས་ཅད་དུ་གདུག་པ་ཅན་རྣམས་ལ་སྡིགས་མཛུབ་བྱེད་པའི་རྡོ་རྗེ་བསྣམས་པ། བསྐལ་པའི་མེ་ལྟ་བུའི་གཟི་བརྗིད་ཆེན་པོ་དང་ལྡན་པའོ། །ཁྲག་ལ་དགྱེས་ཤིང་ཁྲག་འཛག་པ་བྱིན་པ་གཉིས་འཁྱུད་པ། བདེ་བ་ཆེན་པོ་ཐུགས་རྗེའི་བདག་ཉིད་ཅན་ནོ། །ཞེས་གསུངས་སོ། །འདིའི་དོན་ལ་སྐུ་མདོག་དང་ཕྱག་མཚན་བཤད་པ། རྒྱན་ཆ་དང་གདན་བཤད་པ། དེ་དག་གི་རྣམ་དག་བཤད་པ་དང་གསུམ་ལས། དང་པོ་ནི། སྐུ་བྱིན་པོ་མཐིང་ག་ཡིན་ལ། དེའི་སྟོབས་ཀྱིས་རྩ་བའི་ཞལ་ཡང་དེ་དང་འདྲ་ཞིང་། ཞལ་གཞན་གསུམ་ནི་འདིར་ཕྱོགས་མདོག་སྟེ། རྗེ་ས་ཆེན་གྱིས། ནག་པོ་པའི་སྐབས་སུ་བཅོམ་ལྡན་འདས་ཀྱི་ཞལ་ལ་སོགས་པ་འདི་རྡོ་རྗེ་མཁའ་འགྲོའི་རྗེས་སུ་འབྲང་། ལཱུ་ཧི་པ་ཨ་བྷི་དྷ་ནའི་རྗེས་སུ་འབྲང་ཞེས་གསུངས་ཤིང་། རྡོ་རྗེ་མཁའ་འགྲོར་གཡོན་ཞལ་དམར་བ། རྒྱབ་ཞལ་སེར་བ། གཡས་ཞལ་དཀར་བ་གསུངས་ལ། ཨ་བྷི་དྷ་ན་ནས་སྔ་མ་ལྟར་གསུངས་པའི་ཕྱིར་རོ། །ཕྱག་བཅུ་གཉིས་ཀྱི་གྱེས་ཚུལ་ལ། གཡས་གཡོན་གྱི་དྲུག་དྲུག་མདུན་ནས་རྒྱབ་དུ་བསྒྲིགས་པའི་ཚུལ་གྱིས་ཡོད་པ་ལས། དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་ལྤགས་པ་རློན་པའི་ལག་པ་གཡོན་པ་དང་། རྐང་པ་གཡོན་པ་གཉིས་ནས་བཟུང་སྟེ་སྤུ་ཕྱིར་བསྟན་པ། མཐོ་དམན་གཙོ་བོའི་སྨིན་མཚམས་ཀྱི་ཐད་དང་མཉམ་པར། ཕྱག་མཚན་ཐམས་ཅད་ཀྱི་ཕྱི་རོལ་དུ་བརྒྱངས་ཏེ་འཛིན་པའོ། །གཡས་ཀྱི་གསུམ་པ་ན་ཌཱ་མ་རུ་ནི་རྔེའུ་ཆུང་སྐེད་པ་ཉག་པའོ། །བཞི་པ་ན་དགྲ་སཏྭ་ནི་ཡུ་བ་ཁྲུ་གང་ཡོད་པའི་རྩ་བ་དང་རྩེ་མོར་རྡོ་རྗེ་ཕྱེད་པས་མཚན་པ་སྟེང་གི་རྡོ་རྗེ་ཕྱེད་པའི་འོག་ཏུ་དགྲ་སཏྭ་ཁ་བོ་ཆེ་མེ་ལོང་ཕྱེ་བཀས་པ་ལྟ་བུའི་ཟླུམ་པོའི་ཕྱོགས་སུ་ཡུ་བ་འདོགས་པའོ། །ལྔ་པ་ན་གྲི་གུག་ནི་རྡོ་རྗེ་ཕྱེད་པའི་འོག་ཏུ་ཆུ་སྲིན་གྱི་ཁ་ནས་བྱུང་བའི་གྲི་གུག་ཁ་ལ་སོར་བཅུ་གཉིས་ཡོད་པའོ། །དྲུག་པ་ན་མདུང་རྩེ་གསུམ་པ་ནི་ཡུ་བ་ཁྲུ་གང་ཡོད་པའི་རྩ་བ་དང་། རྩེ་མོར་རྡོ་རྗེ་ཕྱེད་པའི་སྟེང་དུ་པདྨ། དེའི་སྟེང་དུ་རལ་གྲིའི་སོ་ལྟ་བུ་གསུམ་ལ་དབུས་རིང་ཞིང་། གཡས་གཡོན་ཅུང་ཟད་ཐུང་བའོ། །གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག་ནི་མངོན་བརྗོད་ལས། མཆོད་ཕྱིར་ཐོགས་དང་འབྲེལ་བའི་རྡོ་རྗེ་ཁ་ཊྭཱཾ་ག སྟེང་དུ་རྩེ་མོ་ལྔ་པའི་རྡོ་རྗེ་རབ་ཏུ་འཇིགས་པར་རྡོ་རྗེ་དྲིལ་བུ་རབ་ཏུ་འཕྱང་ཞིང་སྣ་ཚོགས་པའི་བ་དན་རབ་ཏུ་དཔྱངས་པ། དབུས་སུ་སྣ་ཚོགས་རྡོ་རྗེས་མཚན་པ། འོག་ཏུ་རྡོ་རྗེ་རྩེ་གཅིག་པ་ཞེས་གསུངས་ཤིང་། ཨུ་མཱ་པ་ཏི་ཏ་ཏྲས་མཛད་པའི་ཕག་མོའི་སྒྲུབ་ཐབས་སུ་ཐུར་དུ་རྩེ་གཅིག་པ། གྱེན་དུ་རྩེ་ལྔར་ཡོད་པ་ནག་པོ་ཡུ་བ་དང་བཅས་པ། སྐམ་པོ་དང་། རློན་པའི་མགོ་བོ་དང་། སྣ་ཚོགས་རྡོ་རྗེ་དང་། གསེར་གྱི་བུམ་པའི་རྩ་བ་ནས་འཐོན་པ་གཡེར་ཁའི་སྒྲ་དང་བཅས་པའི་སྣ་ཚོགས་ཀྱི་བ་དན་དང་ལྡན་པས་མཛེས་པར་བྱས་པའི་ཁ་ཊྭཱཾ་ག་ཞེས་བཤད། ཕག་མོ་ཤེས་རབ་སྣང་བའི་སྒྲུབ་ཐབས་སུ། དབྱུག་པ་དཀར་པོ་རྩེ་མོར་རྡོ་རྗེ་རྩེ་ལྔ་པ། དེའི་འོག་ཏུ་མི་མགོ་སྐམ་པོ་དང་། རྙིང་པ་དང་། གསར་པ་རློན་པ་དང་། དེའི་འོག་ཏུ་སྣ་ཚོགས་རྡོ་རྗེ། དེའི་འོག་ཏུ་གསེར་གྱི་བུམ་པ། དེ་མན་ཆད་དབྱུག་པ་སྒྲ་དང་བཅས་པའི་དྲིལ་བུ་གཡེར་ཁས་བརྒྱན་པ། བ་དན་སྣ་ཚོགས་ཀྱིས་མཛེས་པར་བྱས་པ་ཞེས་བཤད་དོ། །འདིར་ཕམ་འཐིང་བའི་མན་ངག་བརྒྱུད་པ་ལས། འོག་ཏུ་རྡོ་རྗེ་རྩེ་ལྔ་པ་ཕྱེད་པའི་སྟེང་དུ། ཡུ་བ་བརྒྱད་གཞོགས་སུ་བྱས་པ་ལ་གྱེན་དུ་འཕེལ་ཁ་ཆེ་བའི་རྣམ་པ་ཅན། དེའི་སྟེང་དུ་སྣ་ཚོགས་རྡོ་རྗེ། དེའི་སྟེང་དུ་བུམ་པ། དེའི་སྟེང་དུ་ཐོད་པ་སྐམ་པོ་གསུམ། དེའི་སྟེང་དུ་རྡོ་རྗེ་རྩེ་ལྔ་པ་ཕྱེད་པས་མཚན་པ། བུམ་པའི་འོག་དུ་དྲིལ་བུ་དང་། ཌཱ་མ་རུ་དང་། འཕན་འཕྱང་བ་སྟེ། དེ་ཡང་འོག་གི་རྡོ་རྗེ་རྩེ་ལྔ་པ་ནི་འགྲོ་བ་རྒྱུད་ལྔ་མཚོན་ཅིང་། ཡུ་བ་བརྒྱད་གཞོགས་ནི་འཕགས་ལམ་ཡན་ལག་བརྒྱད་མཚོན་ལ། གྱེན་དུ་འཕེལ་ཁ་ཆེ་བ་ནི་ཡོན་ཏན་གོང་ནས་གོང་དུ་འཕེལ་བ་དེ་མཚོན་ཞིང་། དེས་འགྲོ་བ་རྒྱུད་ལྔ་འདྲེན་པར་བྱེད་པའོ། །གང་དུ་ཞེ་ན་སྐུ་གསུམ་གྱི་སར་འདྲེན་པར་བྱེད་པའོ། །དེ་ཡང་སྣ་ཚོགས་རྡོ་རྗེ་ནི་ཕྲིན་ལས་སྣ་ཚོགས་པས་སེམས་ཅན་གྱི་དོན་བྱེད་པས་སྤྲུལ་སྐུ་མཚོན་ཞིང་། བུམ་པས་ནི་བདེ་བ་ཆེན་པོ་སྟེ་ལོངས་སྐུ་མཚོན་པར་བྱེད་ལ། ཐོད་པ་སྐམ་པོ་གསུམ་གྱིས་ནི་རྣམ་ཐར་སྒོ་གསུམ་གྱི་རང་བཞིན་གྱི་ཆོས་སྐུ་མཚོན་པར་བྱེད་དོ། །དེའི་སྟེང་གི་རྡོ་རྗེ་རྩེ་ལྔ་པས་ནི་སྐུ་གསུམ་པོ་རེ་རེ་ཡང་ཡེ་ཤེས་ལྔ་ལྔའི་བདག་ཉིད་ཅན་དུ་མཚོན་པར་བྱེད་དོ། །དེ་དག་ནི་ཐུགས་ཀྱི་གསང་བ་མཚོན་ལ། དྲིལ་བུ་དང་། ཌཱ་མ་རུ་ནི་གསུང་གི་གསང་བ་བསམ་གྱིས་མི་ཁྱབ་པ་དང་། འཕན་གྱིས་ནི་སྐུའི་གསང་བ་བསམ་གྱིས་མི་ཁྱབ་པ་མཚོན་པ་ཡིན་ནོ་ཞེས་འབྱུང་ངོ་། །བཞི་པ་ན་ཁྲག་གིས་གང་བའི་ཐོད་པ་ནི། ལྷ་དང་ལྷ་མ་ཡིན་གྱི་མགོ་བོའི་ནང་དུ་བདུད་བཞིའི་ཁྲག་བླུགས་པའོ། །ལྔ་པ་ན་རྡོ་རྗེ་ཞགས་པ་ནི་རྩ་བ་དང་། རྩེ་མོར་རྡོ་རྗེ་ཕྱེད་པས་མཚན་པའི་ཞགས་པ་སེར་པོ་གསུམ་ལྟབ་ཏུ་བྱས་ནས་འཛིན་པའོ། །དྲུག་པ་ན་ཚངས་པའི་མགོ་བོ་ནི། མགོ་བོ་གདོང་བཞི་པའི་སྐྲ་ནས་འཛིན་པའོ། །ཕྱག་གི་གྱེས་ཚུལ་དང་། ཕྱག་མཚན་གྱི་འཛིན་ཚུལ་འདི་ལྟ་བུ་ནི། གཞུང་འགྲེལ་དང་། རྗེ་བཙུན་མཆོག་གིས་གསུངས་ཀྱང་། དེང་སང་གི་ཟིན་བྲིས་འགའ་ཞིག་ལས། གཡས་ཀྱི་གསུམ་པ་ན་ཌཱ་མ་རུ་དང་། གཡོན་གྱི་གསུམ་པ་ན་ཚངས་པའི་མགོ་བོ་འཛིན་པ་ནི། ཌཱ་མ་རུའི་སྒྲས་ཚངས་པ་གཏི་མུག་གི་རང་བཞིན་ཡིན་པས། དེ་ལས་སད་པར་བྱེད་པ་མཚོན་ནོ། །གཡས་ཀྱི་བཞི་པ་ན་དགྲ་སཏྭ་དང་། གཡོན་གྱི་བཞི་པ་ན་ཞགས་པ་འཛིན་པས་ནི་ཞགས་པས་བདུད་དང་ཉོན་མོངས་འཆིང་བར་བྱེད་ཅིང་། དེ་དགྲ་སཏྭས་གཅོད་པ་མཚོན། གཡས་ཀྱི་ལྔ་པས་གྲི་གུག་དང་། གཡོན་གྱི་ལྔ་པས་ཐོད་པ་ཁྲག་གིས་གང་བ་འཛིན་པས་ནི། གྲི་གུག་གིས་ལྷ་དང་ལྷ་མ་ཡིན་གྱི་མགོ་བཅད་ནས། དེའི་ནང་དུ་ཁྲག་བླུགས་པ་མཚོན། གཡས་ཀྱི་དྲུག་པས་མདུང་རྩེ་གསུམ་འཛིན་པ་དང་། གཡོན་གྱི་དྲུག་པས་ཁ་ཊྭཱཾ་ག་འཛིན་པ་ནི་ཚར་བཅད་དང་། རྗེས་འཛིན་མཚོན་པ་ཡིན་ནོ་ཞེས་བྲིས་ཤིང་། དེ་ལ་གཡས་ཡས་འགྱེད་དང་། གཡོན་མས་འགྱེད་ཀྱི་ཐ་སྙད་བྱེད་དོ། །འདི་ལྟ་བུ་ནི་བདེ་མཆོག་གི་རྒྱུད་འགྲེལ། གཞུང་ཕྲན། རྗེ་བཙུན་མཆོག་གི་གསུང་རབ་རྣམས་ལས་མི་འབྱུང་ཞིང་། རྗེ་བླ་མ་རྣམས་ཀྱིས་གསུངས་པ་ཡང་མེད་ལ། རྗེ་བཙུན་གྱིས་གསུངས་པའི་རྣམ་དག་དང་ཡང་འགལ་བས་དོར་བར་བྱ་བ་ཡིན་ནོ། །ཁ་ཅིག་དེ་ཨ་བྷྱའི་བཞེད་པ་ཡིན་ཞེས་ཟེར་བར་སྣང་ཡང་། དེས་མཛད་པའི་སྒྲུབ་ཐབས་འཁྲུལ་སྤོང་དང་། རྡོ་རྗེ་ཕྲེང་བའི་བདེ་མཆོག་གི་སྐབས་རྣམས་སུ་ལཱུ་ཧི་པའི་གཞུང་ཇི་ལྟ་བ་བཞིན་མཛད་པར་སྣང་གི འདི་ལྟ་བུའི་ཕྱག་མཚན་འཛིན་ཚུལ་བྱས་པ་གཏན་མི་སྣང་ངོ་། །དེས་ན་ཡས་འགྱེད་མས་འགྱེད་ཀྱི་འཁྲུལ་གཞི་ནི། སློབ་དཔོན་སྤྱོད་པའི་རྡོ་རྗེས། སྒྲུབ་ཐབས་ཀྱི་མཆོད་བརྗོད་དུ། ཡི་དྭགས་གདན་ལ་བཞུགས་ཤིང་ཞལ་རྣམས་ཀུན་ལ་སྤྱན་གསུམ་དང་ནི་ཕག་མོ་དམར་ལུས་ལ། །རྩ་བའི་ཕྱག་གཉིས་ཀྱིས་འཁྱུད་གཉིས་ཀྱིས་མྱུར་དུ་གླང་ཆེན་གཙོ་བོ་རྒྱངས། །ལྷག་མ་གཡོན་པ་ཕྱག་བཞི་ཡིས་ནི་ཁ་ཊྭཱཾ་ཞགས་པ་མི་ཐོད་ཚངས་པའི་མགོ་བོ་འཆང་། །གཡས་པ་གྲི་གུག་རྩེ་གསུམ་དགྲ་སཏྭ་རྔ་ཆུང་འཆང་བའི་ཧེ་རུ་ཀ་ལ་ཕྱག་འཚལ་ཏེ། །ཞེས་གསུངས་པའི་གཞུང་གི་འབྲུ་གནོན་པ་ན། གཡོན་གྱི་བཞི་མདུན་ནས་ཕར་བགྲངས་པ་དང་། གཡས་ཀྱི་བཞི་རྒྱབ་ནས་ཚུར་བགྲང་དགོས་པ་ལ་འཁྲུལ་གཞི་བྱས་པར་སྣང་ཡང་། དེ་ལྟར་བགྲངས་པ་ཉིད་ཀྱིས་འཛིན་ཚུལ་སྔ་མ་ལས་མ་འདས་པར་གྲུབ་བོ། །བླ་ཆེན་འཕགས་པས་གཞུང་འདིའི་དོན་གཡོན་པ་མདུན་ནས་བགྲངས་པ་དང་། གཡས་པ་རྒྱབ་ནས་བགྲངས་པའི་འཛིན་ཚུལ་མཛད་པ་ལ། མཁས་པ་བུས། དེ་ནི་དགོངས་པ་མ་ཡིན་ཏེ། ལང་ཀ་རྒྱལ་བ་བཟང་པོའི་དཀའ་འགྲེལ་ལས་ཀྱང་། གཡས་ཀྱི་གསུམ་པ་དང་། བཞི་པ་དང་། ལྔ་པ་དང་། དྲུག་པ་ན་རྩེ་གསུམ་པ་དང་། དགྲ་སཏྭ་དང་། གྲི་གུག་དང་། ཌཱ་མ་རུ་བསྣམས་པ། གཡོན་གྱི་བཞི་པ་ན་ཁ་ཊྭཱཾ་ག་དང་། ཐོད་པ་དང་། ཞགས་པ་དང་། ཚངས་པའི་མགོ་བོ་བསྣམས་པ་ཞེས་བཤད་དོ། །ཀུན་སྤྱོད་ལས་ཀྱང་། ཕྱག་གཉིས་ཡང་དག་འཁྱུད་པ་དང་། །གཉིས་ཀྱིས་གླང་པོའི་ལྤགས་པ་འཛིན། །དགྲ་སཏྭ་མདུང་རྩེ་གསུམ་གྲི་གུག །ཌཱ་མ་རུ་ནི་གཡས་པས་འཕྱར། །ཁ་ཊྭཱཾ་ག་དང་ཐོད་པའི་ཁྲག །ཞགས་པ་མགོ་བོ་འཕྱར་བ་སྟེ། །གཡོན་པ་རུ་ནི་ཡང་དག་བཤད། །ཞེས་གསུངས་པས་སོ། །ཞེས་དགག་པ་མཛད་པས་ནི། འཕགས་པའི་དགོངས་པ་ལ་ནི་མི་གནོད་དེ། འགྲེལ་པ་དེས་ནི་རྩ་བའི་ཚིག་རིས་བཞིན་དུ་བགྲངས་པར་སྣང་བས། རྩ་བའི་དགོངས་པ། ཕྱག་ལྷག་མ་བརྒྱད་གཡོན་སྐོར་དུ་བགྲངས་པར་གྲུབ་པའི་ཚེ། འགྲེལ་པའི་དགོངས་པ་ཡང་དེ་བཞིན་དུ་གྲུབ་པའི་ཕྱིར་དང་། ནག་པོ་པའི་ལུགས་ཀྱི་ཞལ་ཕྱག་རྡོ་རྗེ་མཁའ་འགྲོ་ལ་བརྟེན་པ་དང་། ལཱུ་ཧི་པའི་ལུགས་ཀྱི་ཞལ་ཕྱག་མངོན་བརྗོད་དགུ་པ་ལ་བརྟེན་པ་ཡིན་གྱི། ཀུན་སྤྱོད་ནས་གསུངས་པ་དེ་གཉིས་གང་ཡང་མ་ཡིན་པར་སྣང་བའི་ཕྱིར་རོ། །ཡུམ་རྡོ་རྗེ་ཕག་མོ་ནི། དེའི་སྤྱན་སྔར་ཞེས་པ་ནས། ཐུགས་རྗེ་ཆེན་པོའི་བདག་ཉིད་ཅན་ནོ་ཞེས་པའི་བར་ཏེ། གཞན་རྣམས་ནི་གོ་སླ་ལ། འདིར་ཕྱག་གཡས་ཀྱིས་རྡོ་རྗེ་བསྣམས་པར་གསུངས་ཤིང་། མན་ངག་གིས་རྡོ་རྗེས་མཚན་པའི་གྲི་གུག་བསྣམས་པར་མཛད་པར་སྣང་བ་ནི། ཀུན་སྤྱོད་ལེའུ་དྲུག་པ་ལས། མདུན་ན་བཞུགས་པའི་བཅོམ་ལྡན་ཡུམ། །ཞལ་གཅིག་འབར་བ་ཆེན་པོ་སྟེ། །འཁྱུད་པ་ཡི་ནི་ཐོད་པ་དག །གདུག་པ་བདུད་ཀྱི་ཁྲག་གང་བསྣམས། །གཡས་པས་རྟག་ཏུ་སྡིགས་མཛུབ་དང་། །མ་རུངས་པ་ཡི་གྲི་གུག་བསྣམས། །ཞེས་གསུངས་པ་ལ་བརྟེན་པ་སྟེ། ནཱ་རོ་པས་མཛད་པའི་རྡོ་རྗེ་རྣལ་འབྱོར་མའི་སྒྲུབ་ཐབས་ལས། ཕྱག་མཚན་རྡོ་རྗེ་གསུངས་ཀྱང་མན་ངག་གིས་རྡོ་རྗེས་མཚན་པའི་གྲི་གུག་དུ་མཛད་པ་ལྟ་བུའོ། །བྱིན་པ་གཉིས་ཀྱིས་འཁྱུད་པ་ནི། སྡོམ་འབྱུང་དང་ཀུན་སྤྱོད་ལས་དངོས་སུ་གསུངས་ཤིང་། འགྲེལ་པར། བྱིན་པས་འཁྱུད་པ་ནི་ཤིང་ལ་འཛེགས་པའི་འཁྱུད་ཐབས་ཀྱིས་གནས་པའོ། །གཉིས་པ་རྒྱན་ཆ་དང་གདན་བཤད་པ་ནི། རལ་པ་དང་ཅོད་པཎ་གྱིས་བརྒྱན་པ་ཞེས་སོགས་དང་། གང་གིས་གཡས་བརྐྱངས་པས་བཞུགས་པས། འཇིགས་བྱེད་དང་དུས་མཚན་མནན་པ་ཞེས་པ་སྟེ། རལ་པ་ནི་ཐོར་ཅོག་ཏུ་བྱས་པའོ། །ཅོད་པཎ་ནི། ཐོད་པ་སྐམ་པོ་ལྔའི་སྟེང་གི་རྩེ་ཕྲན་ནོ། །ཐོད་པའི་ཕྲེང་བའི་ཐོད་ཅན་ནི་ཐོད་པ་སྐམ་པོ་ལྔ་ལྔའོ། །ཟླ་བ་ཕྱེད་པ་འཇོག་པ་ནི་གཡོན་ཕྱོགས་སུ་ཚེས་གཅིག་གི་ཟླ་བ་འཇོག་པའོ། །སྣ་ཚོགས་རྡོ་རྗེས་མཚན་པའི་དབུ་རྒྱན་ཅན་ནི། སྣ་ཚོགས་རྡོ་རྗེ་ཉིད་དབུ་རྒྱན་དུ་བྱས་པ་སྟེ། མཚོག་མའི་སྟེང་གི་རལ་པ་ལ་འཇོག་པའོ། །འདིར་འདོད་འཇོ་མཁན་པོས། འཁྲུལ་སྤོང་ལས་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན་ཞེས་བཤད་པས། སྣ་ཚོགས་རྡོ་རྗེས་མཚོག་མ་ནོན་པར་འདོད་པ་ནི་རྒྱུད་ཀྱི་དོན་མ་ཡིན་ནོ་ཞེས་དང་། མངོན་སྤྱོད་ལས་ཀྱང་། ལན་དུ་མར་ཟླ་ཕྱེད་དུ་གསུངས་པས་ཚེས་གཅིག་གི་ཟླ་བར་འཆད་པ་དོན་མ་ཡིན་ནོ་ཞེས་སྨྲ་བ་ནི་མི་འཐད་དེ། སྡོམ་འབྱུང་ལས། སྤྱི་བོར་སྣ་ཚོགས་རྡོ་རྗེས་མཚན། །ཞེས་གསུངས་པས་སྐྲ་མཚམས་ནས། སོར་བཞི་གཞལ་བ་མཚོག་མ། དེ་ནས་སོར་བཞི་གཞལ་བ་སྤྱི་བོ་ཡིན་པས། དེ་གཉིས་ཀྱི་མཚམས་སུ་སྣ་ཚོགས་རྡོ་རྗེ་བཞག་པ་ན། རེས་མཚོག་མ་དང་། རེས་སྤྱི་བོ་མཚན་པ་ཞེས་པའི་ཐ་སྙད་ཀྱིས་གསུངས་པའི་ཕྱིར་དང་ཟླ་བ་ཕྱེད་པ་ཞེས་པ་ནི། ཟླ་བ་མ་རངས་པ་སྤྱིའི་མིང་ཡིན་གྱི། ཕྱེད་བཀས་ཚེས་བརྒྱད་ཀྱི་ཟླ་བ་ལྟ་བུ་ཁོ་ན་ལ་འཇུག་པ་མ་ཡིན་པའི་ཕྱིར་ཏེ། ཀྱེ་རྡོར་རྩ་སྔགས་ཀྱི་སྔགས་དོན་འཆད་པ་ན། མཆེ་བ་ཟླ་བ་ཕྱེད་པ་ལྟ་བུ་ཞེས་གསུངས་པ་མཆེ་བ་ཚེས་གཅིག་གི་ཟླ་བ་ལྟ་བུ་ཡོད་པའི་དོན་ཡིན་གྱི། ཚེས་བརྒྱད་ཀྱི་ཟླ་བ་ལྟ་བུའི་མཆེ་བ་མི་རིགས་པའི་ཕྱིར་དང་། སྔོན་བྱུང་ལའང་ལྷ་དང་ལྷ་མ་ཡིན་གྱིས་རྒྱ་མཚོ་བསྲུབས་པ་ལས། ཟླ་ཚེས་བྱུང་བ་དབང་ཕྱུག་གི་མགོ་རྒྱན་དུ་བྱས་པ་དེ་ཕྲོགས་ནས། འདིར་བཅོམ་ལྡན་འདས་ཀྱི་དབུར་བརྒྱན་པ་ཡིན་ལ། དེ་ཉིད་གཡོན་ངོས་སུ་འཇོག་པ་ནི་གཡོན་ཕྱོགས་སུ་བྱང་སེམས་འབབ་པ་མཚོན། ཚེས་གཅིག་གི་ཟླ་བ་དཔེར་བྱས་པ་ནི་ཚེས་གཅིག་ནས་བཅོ་ལྔའི་བར་གྱི་ཟླ་བ་གོང་དུ་འཕེལ་བ་ལྟར་བྱང་སེམས་གོང་ནས་གོང་དུ་འཕེལ་བ་མཚོན་དགོས་པའི་ཕྱིར་རོ། །སྡོམ་འབྱུང་ལས་ཀྱང་། ཟླ་བ་ཕྱེད་པས་རྣམ་པར་བརྒྱན། །ཅེས་པ་དང་། སྙིང་པོར་ཟླ་བའི་དཀྱིལ་འཁོར་སྟེ། །ཞེས་པའི་དོན་འགྲེལ་པས། ཟླ་བ་ཚེས་པས་བརྒྱན་པའི་རལ་པའི་ཅོད་པཎ་ནོ་ཞེས་གསུངས་པ་རྣམས་ལ་ཡང་། ཟླ་བའི་དཀྱིལ་འཁོར་རངས་པ་དང་། ཟླ་བ་ཕྱེད་བཀས་གཉིས་ཀ་ལ་འཆད་དགོས་པར་ཐལ་བའི་སྐྱོན་ཡོད་ཅིང་། དེ་ལྟར་འདོད་ན། ཟླ་བ་ཚེས་པ་ཞེས་གསུངས་པ་དང་འགལ་ལོ། །དེས་ན་ཟླ་བ་ཕྱེད་པའི་དོན། ཚེས་བརྒྱད་ཀྱི་ཟླ་བ་ལྟ་བུ་ལ་འདོད་པ་ནི་མན་ངག་མེད་པར་ཚིག་ཙམ་ལ་བརྟེན་པའི་མཚོན་བྱེད་དུ་སྣང་ཞིང་འཇིག་རྟེན་གྱི་ཐ་སྙད་ལ་ཡང་དངོས་པོ་གཅིག་དུམ་བུར་སོང་བའི་ཚེ་ཆེ་ཆུང་གི་ཁྱད་པར་ཡོད་ཀྱང་། ཕྱེད་མར་སོང་ཞེས་པ་ཙམ་ལ་ཡང་མ་དཔྱད་པར་སྣང་ངོ་། །སྟག་གི་ལྤགས་པའི་ན་བཟའ་ནི། རྒྱབ་ཕྱོགས་ནས་གཡོགས་པ་སྟག་གི་ལྤགས་པའི་ཤམ་ཐབས་འཕྱང་བ་དང་། མདུན་ཕྱོགས་ནས་བཅིངས་པ་སྟག་གི་ལྤགས་པའི་ཤམ་ཐབས་བཅིངས་པ་དང་། རྒྱབ་ཕྱོགས་སུ་ལག་པ་དང་། རྐང་པ་མདུད་དེ། མདུན་ཕྱོགས་སུ་གསང་གནས་ཀྱི་འོག་ཏུ་ལྷུག་གེ་ཡོད་པ། སྟག་གི་ལྦགས་པའི་ཤམ་ཐབས་གྲོལ་བ་དང་གསུམ་ལས། ཡུམ་དང་ཞལ་སྦྱོར་གྱི་ཚེ་ཕྱི་མ་ཉིད་ཡིན་གསུང་ངོ་། །རྣ་ཆ་དང་སོགས་ནི་ཕྱག་རྒྱ་དྲུག་སྟོན་ཏེ། དེ་དག་ཀྱང་གང་ཞེ་ན། བརྟག་པ་གཉིས་པའི་ལེའུ་དྲུག་པ་ལས། སྒོམ་པ་པོ་ཡིས་རྣམ་འཛིན་པ། །རྣ་བ་དག་ལ་རྣ་ཆ་བཟང་། །སྤྱི་བོར་འཁོར་ལོ་རྣམ་པར་འཛིན། །ལག་པ་དག་ལ་ལག་གདུབ་གཉིས། །སྐེད་པ་ལ་ཡང་སྐ་རགས་ཉིད། །རྐང་པར་དེ་བཞིན་རྐང་གདུབ་བོ། །ལག་པའི་རྩ་བར་དཔུང་རྒྱན་ཉིད། །མགྲིན་པར་རུས་པའི་ཕྲེང་བ་སྟེ། །ཞེས་པ་དང་། རྐུན་མའི་སྐྲ་ལས་ཅོད་པཎ་བྱས། །དེ་ལས་ཧཱུྃ་བྱུང་སྦྱར་བར་བྱ། །སངས་རྒྱས་ལྔ་ཡི་ཐོད་པ་རྣམས། །རྣལ་འབྱོར་སྤྱོད་པས་རྣམ་པར་འཛིན། །ཐོད་པ་སོར་ལྔ་པ་ཡི་ཚད། །བྱས་པའི་ཅོད་པཎ་འཛིན་པར་བྱེད། །ཅེས་བྱ་བ་དང་། ཐལ་བ་སྐྲ་ཡི་མཆོད་ཕྱིར་ཐོགས། །ཞེས་པ་དང་། དེ་ཉིད་ཀྱི་དོན་གསལ་བར་བྱ་བའི་ཕྱིར། ཀུན་ཏུ་སྤྱོད་པའི་ལེའུ་བཅུ་བདུན་པ་ལས། ཀུན་ཏུ་མི་དབུག་བཅིང་བ་དང་། །གཞུག་དང་དེ་བཞིན་བསྐྱོད་པ་དང་། །འབེབས་པ་དང་ནི་འཁྱིལ་བའོ། །དང་པོ་འདིར་ནི་བརྒྱན་པ་དང་། །རྣམ་པ་ཀུན་ཏུ་བཅིང་བ་དང་། །དཔུང་རྒྱན་དག་དང་དེ་བཞིན་དུ། །ལག་པའི་རྒྱ་ནི་ཉིད་དག་དང་། །རྐང་གདུབ་རབ་ཏུ་གཞུག་པའོ། །འོག་པགས་དང་ནི་བརྒྱད་པའོ། །རོ་ལྡན་བཅུ་དྲུག་ཤེས་པར་བྱ། །ཚངས་སྐུད་སྐུད་པ་གཅིག་ཏུ་འགྱུར། །ཕྲེང་བ་ཉི་ཤུ་རྩ་ལྔ་ཡིན། །ཞེས་འབྱུང་ངོ་། །དེ་ལྟར་དེ་དག་གི་ཚིག་དོན་ཡང་ཀུན་ཏུ་མི་དབུག་ནི་བུ་ག་མེད་པ་སྟེ་མགོ་རྒྱན་ཡིན་པས་མགོ་ལ་བཀོན་པ་སྟེ། དང་པོ་འདིར་ནི་བརྒྱན་པ་དང་། །ཞེས་པའི་དོན་ཏོ། །བཅིང་བ་ནི་རྣ་རྒྱན་ཏེ། རྣམ་པ་ཀུན་དུ་བཅིང་བ་དང་གི་དོན་ཡིན་ནོ། །གཞུག་པ་ནི་གདུ་བུ་དྲུག་སྟེ། དཔུང་རྒྱན་དག་ལ་སོགས་པ་ཚིག་རྐང་གསུམ་གྱིས་བསྟན་ཏོ། །དེ་བཞིན་བསྐྱོད་པ་ནི་སྐ་རགས་ཏེ། འོག་པག་ནི་བརྒྱད་པ་ཡིན་ཞེས་པས་ཕྲེང་བ་རིམ་པ་བརྒྱད་ཡོད་དོ། །འབེབས་པ་ནི་མགུལ་རྒྱན་ཏེ། མགྲིན་པ་ནས་སྒྲ་འབེབས་པ་ཡིན་ལ། དེ་ཉིད་རོ་ལྡན་བཅུ་དྲུག་ཤེས་པར་བྱ། །ཞེས་པ་སྟེ། རོ་ལྡན་ནི་མགྲིན་པ་ཡིན་ལ། དེར་ཕྲེང་བ་བརྒྱད་དང་། དོ་ཤལ་བརྒྱད་དེ་བཅུ་དྲུག་ཡིན་ནོ། །འདི་ལ་ཨ་བྷྱ་ཀ་ར་ན་རེ། རོ་ལྡན་ནི་བུད་མེད་ཡིན་ལ། དེའི་སྐ་རགས་ནི་རིམ་པ་བཅུ་དྲུག་ཡིན་ནོ་ཞེས་ཀྱང་ཟེར་རོ། །ཀུན་དུ་འཁྱིལ་བ་ནི་སེ་རལ་ཁ་རྒྱ་གྲམ་དུ་འཁྱིལ་པ་དང་། ཐོད་པའི་དོ་ཤལ་ཡིན་ཏེ། དེའང་དང་པོ་ནི་ཚངས་སྐུད་སྐུད་པ་གཅིག་ཏུ་འགྱུར་ཞེས་པ་རྒྱ་གྲམ་དུ་འཁྱིལ་པ་ལས་སྲད་བུ་རེ་རེ་ལས་མེད་པ་ལ་བྱའོ། །གཉིས་པ་དོ་ཤལ་ནི་ཕྲེང་བ་ཉི་ཤུ་རྩ་ལྔ་ཉིད། །ཅེས་བྱ་བ་ཉི་ཤུ་རྩ་ལྔ་ཉིད་དམ། ཉིས་ལྟབ་ཏུ་བྱས་ན་ལྔ་བཅུ་ཐམ་པ་ཡིན་ནོ། །དེ་ལྟར་ལུང་དེ་དག་གི་དོན་བླ་མའི་གསུང་དང་མི་འགལ་བར་བརྗོད་ན། ཐོག་མར་མགོ་རྒྱན་གྱི་སྤྱི་བོར་རུས་པའི་འཁོར་ལོ་ལ་བུ་ག་བརྒྱད་ཕུག་སྟེ། རུས་པའི་ཕྲེང་བ་འཁོར་ལོའི་རྩིབས་ལྟ་བུར་གྱུར་པ་བརྒྱད་བྱ། དེ་ལ་བརྒྱད་ཀྱི་རྩིབས་གསུམ་མ་གཏོགས་པ་རྩིབས་ལྔའི་ཐད་ཀར་མིའི་ཐོད་པ་སོར་ལྔ་པའི་ཚད་མི་མགོའི་རི་མོ་བྲིས་པ་རེ་བཞག དེ་དག་གི་སྟེང་འོག་གཉིས་ན་ཕར་རུས་པའི་ཕྲེང་བ་ཐོད་པ་ལྟ་བུར་འཁོར་བ་རེ་བྱ། ཐོད་པའི་བར་མཚམས་སྡེབ་པའི་ཕྲེང་བ་ཐོད་ལྟར་འཁོར་བ་གསུམ་གསུམ་བྱ། དཔྲལ་བའི་ཐད་ཀར་སོར་གསུམ་གྱིས་དྲྭ་བ་དྲྭ་ཕྱེད་བྱ། གཞན་རྣམས་སུ་རྣ་བ་ཕྱེད་ནོན་ཙམ་གྱི་དྲྭ་བ་དྲྭ་ཕྱེད་བྱ། འཁོར་ལོའི་རྒྱབ་ངོས་ཀྱི་ཐད་ཀར་སྣ་ཚོགས་རྡོ་རྗེ་དང་། དེའི་གཡོན་ངོས་སུ་ཚེས་གཅིག་གི་ཟླ་བ་བྱས་ལ་སྐྲའི་ཐོར་ཚུགས་ཀྱི་ཅོད་པཎ་ལ་བརྟེན་པར་བྱ། སྐྲ་མེད་ན་བཅོས་མའི་སྐྲ་བྱས་ལ། བྲིས་སྐུའམ་གླེགས་བམ་བཅུག་ལ། སྤྱི་གཙུག་དབུ་རྒྱན་གྱི་ནང་ན་ཡར་ལ་ཐོར་ཚུགས་སུ་རྐུན་པོ་བསད་པའི་སྐྲ་ལ་བཅིངས་ཏེ། ཐག་པའི་མཐའ་གཉིས་སུ་ན་རེས་འཇོག་པ་ནི་ཅོད་པཎ་ཞེས་བྱའོ། །རྣ་རྒྱན་ནི་རུས་པའི་འཁོར་ལོ་ལ་ཁུག་པ་གསུམ་དང་། ཁུག་ཕྱེད་གཉིས་ཏེ་ལྔ་ཡིས་བརྒྱན་པ་ཡིན་ནོ། །མགུལ་རྒྱན་ནི་གཞུང་གཡས་གཡོན་གཉིས་དབུས་དང་གསུམ་ལ་ཕྲེང་བ་བརྒྱད་ཀྱིས་བར་བསྡམས་པ་དང་། དེ་ལ་དོ་ཤལ་གྱི་ཚུལ་དུ་འཕྱང་བ་རུས་པའི་མདུང་རྩེ་དུ་མས་མཛེས་པར་བྱས་པའི་བརྒྱད་དེ་བཅུ་དྲུག་ཡིན་ནོ། །དཔུང་རྒྱན་གཉིས་དང་། ལག་རྒྱན་གཉིས་དང་། རྐང་རྒྱན་གཉིས་ཏེ་གདུ་བུ་དྲུག་སྟེ་ཕ་ད་ཚུ་ད་གཉིས་དབུས་དང་། རུས་པའི་གཞུང་གསུམ་ལས་ཕྲེང་བ་ལྔ་ལྔ་ཡིས་བར་བསྡམས་པ་སྨད་ངོས་སུ་མདུང་རྩེ་དང་གཡེར་ཁ་དུ་མས་མཛེས་པར་བྱས་པ་ཡིན་ནོ། །དེའང་དཔུང་རྒྱན་གཉིས་རིང་། དེ་བས་རྐང་གདུབ་ཐུང་། དེ་བས་ཀྱང་ལག་གདུབ་ཐུང་ངོ་། །སྐ་རགས་ཀྱི་གཞུང་གསུམ་ཕ་ད་ཚུ་ད་སྟེ་ལྔའི་བར་ཕྲེང་བ་བརྒྱད་རིམ་མམ་བཅུ་དྲུག་རིམ་གྱིས་བར་བསྡམས་ལ་དེ་ལ་དྲྭ་བ་དྲྭ་ཕྱེད་གཡེར་ཁ་དང་རུས་པའི་མདུང་རྩེ་དུ་མས་མཛེས་པར་བྱས་པ་མཐེབ་སོར་བརྒྱད་ཀྱི་ཚད་དང་མཉམ་པ་དྲྭ་བ་ལྔ་དང་དྲྭ་ཕྱེད་བཅོ་བརྒྱད་ཀྱིས་མཛེས་པར་བྱས་པ་ཡིན་ལ། གཡས་གཡོན་གྱི་དྲྭ་ཕྱེད་གསུམ་གསུམ་ལ་གཉིས་ཀྱིས་པུས་མོའི་ཐད་ཀར་སླེབ་པ་དབུས་མས་ནི་བྱིན་པའི་དཀྱིལ་ཙམ་སླེབ་པ་ཡིན་ཏེ། དེ་དག་ལ་དྲིལ་བུ་ཆུང་ངུ་མཛེས་པ་རེ་གདགས་པར་བྱའོ། །རུས་པའི་ཚངས་སྐུད་ནི། རུས་པའི་འཁོར་ལོ་རྩིབས་བརྒྱད་ལ་བུ་ག་ཕུག་སྟེ། རྒྱ་གྲམ་དུ་བསྡམས་ལ་འཁོར་ལོ་མདུན་དང་རྒྱབ་ཏུ་འོང་བར་བྱ་སྟེ། རྒྱ་གྲམ་དུ་བཅིང་བར་བྱའོ། །རུས་པའི་ཚངས་སྐུད་འདི་ཡོད་ཀྱང་རུང་མེད་ཀྱང་ཆོག་སྟེ། རྐུན་པོ་བསད་པའི་སྐྲ་ལས་སྐུད་པ་སུམ་སྒྲིལ་བྱས་པ་དེའང་བསྐོར་ལྔའམ་གསུམ་གསུམ་དུ་བྱ་སྟེ་རྡོ་རྗེའི་མདུད་པ་གསུམ་གྱིས་བར་འཚམས་པར་བསྡམས་ལ། དེ་ལྟ་བུའི་སེ་རལ་ཁར་ལག་པ་གཡས་པ་བཏོན་ལ། གོན་པ་ནི་ཚངས་པའི་སྐུད་པ་ཞེས་བྱ་བ་དངོས་ཡིན་ནོ། །དགུ་བསྒྲིལ་དུ་བྱས་པའི་སྐུད་པ་གཅིག་ལ་སྔ་མ་བཞིན་རྡོ་རྗེའི་མདུད་པ་བྱས་པས་ཀྱང་བཏུབ་བོ། །ཐོད་པའི་ཚལ་བུ་སོར་ལྔ་པའི་ཚད་དང་མཉམ་པ་བྱ་སྟེ། དེའང་སྐྱེས་པ་ལ་གཞོན་ནུ་མའི་ཐོད་པ་ཡིན་ཞིང་། བུད་མེད་ལ་སྐྱེས་པ་ཡིན་ནོ། །སྟག་གི་ལྤགས་པའི་ཤམ་ཐབས་ཀྱི་སྟེང་དུ་རྐུན་པོ་བསད་པའི་སྐྲ་ལས་བྱས་པའི་སྐ་རགས་ཉིས་སྐོར་གྱིས་བསྡམས་ལ་དེའི་སྟེང་དུ་རུས་རྒྱན་གྱིས་སྐ་རགས་བཅིང་བར་བྱའོ། །ཁ་ཅིག་ནི་ཕོ་རྒྱན་མོ་རྒྱན་བྱ་བ་ཡོད་ཞེས་ཟེར་ན། ཨ་བྷྱ་ཀ་རས་བྱས་པའི་སྐ་རགས་དང་མི་མགོའི་དོ་ཤལ་གཉིས་མིན་པ་ཁྱད་པར་མ་མཐོང་ལ། ལུས་ཀྱི་ཚད་དང་མཉམ་པར་བྱེད་ན་སྐྱེས་པ་རྣམས་མགོ་ཆེ་ལ། ཡན་ལག་གཞན་དང་སྐེད་པ་ཕྲ་བས་མགོ་རྒྱན་ཆེ་ལ། གཞན་ཕྲ་བར་བྱ། བུད་མེད་རྣམས་ནི་མགོ་ཆུང་ལ་ཡན་ལག་གཞན་སྦོམ་པས། མགོ་རྒྱན་ཆུང་ལ་གཞན་ཆེ་བར་བྱའོ། །རྒྱན་དྲུག་གི་མཚན་ཉིད་དོ། །ཞེས་རྗེ་བཙུན་རིན་པོ་ཆེས་གསུང་ངོ་། །ཞབས་ཀྱིས་འཇིགས་བྱེད་དང་། དུས་མཚན་གནོན་པའི་ཚུལ་ལ། རྩ་འགྲེལ་གཉིས་ལས་ཞབས་གཡས་བརྐྱང་བས་འཇིགས་བྱེད་དང་། དུས་མཚན་གནོན་ཞེས་པ་དང་། གཡས་བརྐྱང་བ་དང་། གཡོན་བསྐུམ་པས་འཇིགས་བྱེད་དང་དུས་མཚན་གནོན་ཞེས་པ་ཙམ་ལས་གསལ་ཁ་མ་བྱུང་ཞིང་། ཁྱད་པར་གསལ་བྱེད་ལས། འདིའི་གོ་རིམ་དང་བསྟུན་ནས་གཡས་པས་འཇིགས་བྱེད་དང་། གཡོན་པས་དུས་མཚན་མནན་པ་དང་། ཇོ་བོ་རྗེས་ལྷན་སྐྱེས་ཀྱི་སྒྲུབ་ཐབས་ལས། དེ་ལས་བཟློག་སྟེ་གསུངས་པ་སོགས་དུ་མ་སྣང་བ་ལས། རྗེ་བཙུན་གྱིས་ཕྱི་མ་ལྟར་མཛད་པ་ནི། མངོན་བརྗོད་ལས། འཇིགས་བྱེད་དང་ནི་དུས་མཚན་དག །སྲེད་དང་སྡང་བ་ཞབས་ཀྱིས་གནོན། །ཞེས་དང་། རྟག་དང་ཆད་པའི་རྣམ་རྟོག་གིས། །འཇིགས་བྱེད་དུས་མཚན་འོག་དུ་བྱས། །ཞེས་གསུངས་པའི་དོན་དུ་མཛད་པ་སྟེ། འཇིགས་བྱེད་རྟག་པ་འཁོར་བའི་མཐའ་སྲེད་པའི་ངོ་བོ་ཞབས་གཡོན་པ་ཤེས་རབ་ཀྱི་རང་བཞིན་གྱིས་མནན་པས་ཟུང་འཇུག་ཏུ་འགྱུར་ལ། དུས་མཚན་ཆད་པ་མྱ་ངན་ལས་འདས་པའི་མཐའ་སྤང་བའི་ངོ་བོ་ཞབས་གཡས་པ་ཐབས་ཀྱི་རང་བཞིན་གྱིས་མནན་པས་ཟུང་འཇུག་ཏུ་འགྱུར་བའོ། །རྗེ་བཙུན་གྱིས་འཇིགས་བྱེད་ནག་པོ་ལག་པ་བཞི་པ། གཡས་ཌཱ་མ་རུ་དང་གྲི་གུག གཡོན་ཁ་ཊྭཱཾ་ག་དང་ཐོད་པ་བསྣམས་པ། དུས་མཚན་མ་དམར་མོ་གྲི་གུག་དང་ཐོད་པ་འཛིན་པ་ཞེས་གསུངས་པ་ལ། མཁས་པ་བུས། དེ་འདྲ་བའི་ཕྱག་མཚན་ནི་རྒྱུད་འགྲེལ། སྒྲུབ་ཐབས་སོགས་ན་འདུག་པ་མ་མཐོང་ཞེས་གསུངས་པ་ནི། མ་གཟིགས་པ་ཐུགས་མེད་ན་ཡང་། འདི་ནི་ཕམ་འཐིང་པའི་མན་ངག་སྟེ། མན་ངག་ཏུ་འགྲོ་ཚུལ་ནི། རྩ་རྒྱུད་ལས། ཧེ་རུ་ཀ་ཞལ་བཞི་ཕྱག་བཞི་པ་ནས། ཕྱག་འབུམ་པའི་བར་གསུངས་པའི་ཕྱག་བཞི་པ་དང་། སངས་རྒྱས་ཐོད་པའི་གཙོ་བོ་དང་། རྡོ་རྗེ་མཁའ་འགྲོ་ནས་གསུངས་པའི་གཙོ་བོ་མང་པོ་ཕྱག་མཚན་དེ་ལྟར་དུ་གསུངས་ལ། འདིར་སངས་རྒྱས་ཀྱི་ཡེ་ཤེས་གཅིག་ཉིད། གདུལ་བྱ་དབང་ཕྱུག་ཆེན་པོར་སྤྲུལ་ནས་བཏུལ་བའི་ཚེ། དེའི་ཕྱག་མཚན་བཅོམ་ལྡན་འདས་ཀྱི་ཕྱག་མཚན་དུ་བཟུང་བར་གསུངས་པས། འདིར་གདུལ་བྱ་ལ་ཕྱག་མཚན་ཉུང་ཤོས་དེ་ཉིད་སྦྱར་བའི་སྐབས་ཡིན་པའི་ཕྱིར་དང་། དེ་ཉིད་ཀྱིས་དུས་མཚན་མའི་ཕྱག་མཚན་ཡང་དེ་ལྟར་དུ་གྲུབ་པའི་ཕྱིར་རོ། །གསུམ་པ་དེ་དག་གི་རྣམ་དག་ནི། ལྭ་བ་པས། ཞལ་བཞིར་གསུངས་པ་གང་ཡིན་པ། །དགའ་བ་བཞི་ཡི་རང་བཞིན་གསུངས། །དགའ་ཀུན་རྫོགས་པའི་བྱང་ཆུབ་གཅིག །སྟོང་པའི་རང་བཞིན་ཉིད་ཀྱི་ཕྱིར། །ཞལ་གཅིག་ཏུ་ནི་རབ་ཏུ་གྲགས། །སྤྱན་གསུམ་སྲིད་པ་གསུམ་དུ་ཤར། །ཐོག་མཐའ་མེད་པའི་ཆོས་རྣམས་ནི། །བེམ་པོའི་རང་བཞིན་ལས་བཟློག་པ། །རལ་པའི་དོན་དུ་རབ་ཏུ་གསུངས། །སྣ་ཚོགས་སེམས་ཅན་དོན་མཛད་པས། །སྣ་ཚོགས་རྡོ་རྗེས་མཚན་པ་ཡིན། །ཟླ་བ་བྱང་ཆུབ་སེམས་འགྱུར་བ། །བདེ་ཆེན་རང་བཞིན་འོད་གསལ་བའོ། །སྲིད་པའི་ཡན་ལག་བཅུ་གཉིས་ཕྱིར། །བཅུ་གཉིས་ཕྱག་དང་མངོན་དུ་ལྡན། །ཡུལ་རྣམས་དང་ནི་དབང་པོ་རྣམས། །གཉིས་མེད་རྣམ་པའི་སྤྱོད་ཡུལ་གྱི། །ཕྱག་རྣམས་མཚན་མས་མཚན་པ་ཡིན། །བྱང་ཆུབ་སེམས་ནི་རྡོ་རྗེར་གྱུར། །ཤེས་རབ་དྲིལ་བུར་རབ་ཏུ་བརྗོད། །སྐུ་གསུམ་དག་ཕྱིར་མདུང་རྩེ་གསུམ། །གླང་པོ་གཏི་མུག་བྲལ་བ་སྟེ། །དགྲ་སཏྭ་ཞེ་སྡང་གཅོད་བྱེད་པ། །ལུས་ངག་སེམས་ལས་ཡང་དག་བྱུང་། །ཞགས་པས་ཉེས་པ་འཆིང་བ་སྟེ། །ལུས་ཅན་མ་ལུས་མི་མཐུན་ཕྱོགས། །སེམས་ཅན་དོན་བྱེད་རྩོམ་པས་ན། །ཟངས་གྲི་ཤིན་ཏུ་རྣོ་བའོ། །མགོ་བོ་ཚངས་པའི་རང་བཞིན་གྱིས། །ཁ་ཊྭཱཾ་སྟོང་པའི་རྣམ་པ་སྟེ། །ཅང་ཏེའུ་ཐབས་རྣམ་དག་པའོ། །རྟག་ཏུ་དགའ་བའི་རང་བཞིན་གྱིས། །ཆོས་ཀྱི་དབྱངས་སྒྲ་ཧཱུྃ་མཛད་པའོ། །ཐོད་པ་ནམ་མཁའི་དཀྱིལ་འཁོར་ཏེ། །སྙིང་རྗེ་རོ་ཡིས་ཡོངས་བཀང་བའོ། །གསོལ་བ་དངོས་གྲུབ་རྒྱུ་ཡིན་ནོ། །མཆེ་བ་བཞི་ནི་མངོན་གྱུར་པ། །བདུད་བཞི་འཇོམས་པར་མཛད་པའོ། །འོད་ཟེར་འཁྲིགས་པས་འཁྲུགས་ལྡན་པའི། །རྟག་ཏུ་ཚེམས་ཀྱི་ཕྲེང་བ་གཉིས། །རྡོ་རྗེ་རོ་ཡིས་ཡོངས་བཀང་བས། །ཧ་ཧ་བཞད་པས་གསོལ་མཛད་ཞལ། །ཉོན་མོངས་བདུད་བཞི་དག་ཉིད་པས། །མགོ་བོ་དོ་ཤལ་གྱིས་བརྒྱན་བྱས། །སྟོང་ཉིད་དག་པས་སྡིགས་མཛུབ་བོ། །ཞེས་སོ། །རྗེ་བཙུན་གྱིས། བཅོམ་ལྡན་འདས་སྐུ་མདོག་སྔོན་པོ་ཞལ་བཞི་པ། རྩ་བའི་ཞལ་ནི་ལུས་མདོག་མཚུངས་པ། གཡས་ཞལ་ནི་ཤིན་ཏུ་སེར་བ། རྒྱབ་མ་དམར་བ། གཡོན་པ་ལྗང་བ་སྟེ། ཚད་མེད་པ་བཞིའམ། འབྱུང་བ་བཞིའམ། རྣམ་ཐར་བཞིའམ། ཕྲིན་ལས་བཞི་འགྲུབ་པའི་རྟགས་ཡིན་ནོ། །ཁམས་གསུམ་ལ་གཟིགས་ཤིང་། དུས་གསུམ་གྱི་དངོས་པོ་མཁྱེན་པའི་བརྡར་ཞལ་རེ་རེ་ལ་སྤྱན་གསུམ་གསུམ་མོ། །རྟེན་ཅིང་འབྲེལ་བར་འབྱུང་བ་བཅུ་གཉིས་ལུགས་འབྱུང་དང་། ལུགས་ལས་ཟློག་པ་ཐུགས་སུ་ཆུད་པའི་བརྡར་ཕྱག་བཅུ་གཉིས་པ། ཐབས་དང་ཤེས་རབ་གཉིས་སུ་མེད་པའི་བརྡར་རྡོ་རྗེ་ཕག་མོ་ལ་འཁྱུད་པའི་ཕྱག་གཉིས་ཀྱིས་ཡེ་ཤེས་ལྔ་རོ་གཅིག་པའི་བརྡར་རྡོ་རྗེ་དང་། སྟོང་པ་ཉིད་ཀྱི་སྒྲ་སྒྲོགས་པའི་བརྡར་དྲིལ་བུ་བསྣམས་པ། འོག་མ་གཉིས་ཀྱིས་གཏི་མུག་སྤངས་པའི་བརྡར་གླང་པོ་ཆེའི་པགས་པ་མགོ་གཡས་སུ་བསྟན་ཏེ་བརྒྱངས་པའི་ཚུལ་གྱིས་བསྣམས་པ། མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་བསྐུལ་བའི་རྟགས་སུ། གཡས་ཀྱི་གསུམ་པ་ན་ཌཱ་མ་རུ། ཉེས་པ་ཐམས་ཅད་གཅོད་པའི་བརྡར་བཞི་པ་ན་དགྲ་སཏྭ། དངོས་པོ་དང་དངོས་པོ་མེད་པའི་རྣམ་པར་རྟོག་པ་ཐམས་ཅད་གཅོད་པའི་བརྡར་ལྔ་པ་ན་གྲི་གུག སྲིད་པ་གསུམ་གྱི་ཉེས་པ་འཇོམས་པའི་རྟགས་སུ་དྲུག་པ་ན་མདུང་རྩེ་གསུམ་པ་བསྒྲེང་བའོ། །བྱང་ཆུབ་ཀྱི་སེམས་དང་མི་འབྲལ་བ་མཚོན་པས་ན་གཡོན་གྱི་གསུམ་པ་ན་ཁ་ཊྭཱཾ་ག་རྡོ་རྗེས་མཚན་པ། བདེ་བ་ཆེན་པོ་སྐྱོང་བའི་རྟགས་སུ་བཞི་པ་ན་ཁྲག་གིས་གང་བའི་ཐོད་པ། ཡང་དག་པའི་ཡེ་ཤེས་སེམས་ཅན་གྱི་རྒྱུད་ལ་འཆིང་བ་ནི་ལྔ་པ་ན་རྡོ་རྗེ་ཞགས་པ། རྣམ་པར་རྟོག་པ་ཐམས་ཅད་བཅོམ་པའི་བརྡར་དྲུག་པ་ན་ཚངས་པའི་མགོ་བོ། པདྨ་དང་ཉི་མའི་གདན་གྱི་སྟེང་ན་ཞབས་གཡས་པ་ཐུགས་རྗེ་ཆེན་པོའི་རང་བཞིན་བརྐྱངས་པས་དུས་མཚན་དམར་མོ་མྱ་ངན་ལས་འདས་པའི་མཐའ་མནན་པ། ཞབས་གཡོན་པ་ཤེས་རབ་ཀྱི་རང་བཞིན་བསྐུམས་པས་འཇིགས་བྱེད་ནག་པོ་འཁོར་བའི་མཐའ་མནན་པའོ། །ཚོགས་གཉིས་ཡོངས་སུ་རྫོགས་པ་ནི་རལ་པའི་ཐོར་ཚུགས་ཀྱིས་བརྒྱན་པ། ཡེ་ཤེས་ལྔའི་རང་བཞིན་གྱི་དབུ་རེ་རེ་ལ་ཐོད་པ་སྐམ་པོ་ལྔ་ལྔའི་ཅོད་པཎ། ཚོགས་རིམ་གྱིས་རྫོགས་ཤིང་བྱང་ཆུབ་ཀྱི་སེམས་མཚོན་པ་ནི་དབུའི་གཙུག་གི་གཡོན་ལ་ཟླ་བ་ཕྱེད་པ་འཇོག་པ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་མཛད་པ་ནི་སྣ་ཚོགས་རྡོ་རྗེས་སྤྱི་བོར་བརྒྱན་པ། ཞལ་རྣམ་པར་འགྱུར་བ་ནི་ལོག་པར་ལྟ་བ་སྤངས་པ། མཆེ་བ་རྣམ་པར་གཙིགས་པ་ནི་བདུད་བཞི་འཇོམས་པ། སྟག་གི་པགས་པའི་ཤམ་ཐབས་ཀྱིས་ནི་གཟུང་འཛིན་སྤངས་པ། མི་མགོ་རློན་པ་ཁྲག་འཛག་པ་ལྔ་བཅུ་ཐམ་པའི་དོ་ཤལ་གྱིས་ནི་ཡི་གེ་ཨཱ་ལི་ཀཱ་ལི་ལྔ་བཅུ་དག་པ། རྣ་རྒྱན་གཉིས་ནི་བཟོད་པའི་ཕ་རོལ་ཏུ་ཕྱིན་པ། གདུ་བུ་དྲུག་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། མགུལ་གྱི་ཕྲེང་བ་དང་དོ་ཤལ་ནི་སྦྱིན་པའི་ཕ་རོལ་ཏུ་ཕྱིན་པ། སྐ་རགས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ། སྤྱི་བོའི་རྒྱན་རྣམས་ནི་བསམ་གཏན་གྱི་ཕ་རོལ་ཏུ་ཕྱིན་པ། ཐལ་བ་དང་མཆོད་ཕྱིར་ཐོགས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ཕ་རོལ་ཏུ་ཕྱིན་པ་དྲུག་རྣམ་པར་དག་པའི་ཕྱག་རྒྱ་དྲུག་གིས་རྒྱས་བཏབ་པའོ། །སྒེག་པ་དང་། དཔའ་བ་དང་། མི་སྡུག་པ་དང་། དགོད་པ་དང་། དྲག་ཤུལ་དང་། འཇིགས་སུ་རུང་བ་དང་། སྙིང་རྗེ་དང་། རྔམ་པ་དང་། ཞི་བ་དང་ལྡན་པ་སྟེ། གར་གྱི་ཉམས་དགུ་དང་ལྡན་པའོ། །ཡུམ་རྡོ་རྗེ་ཕག་མོ་ནི་སྐུ་མདོག་དམར་ཞིང་སྐྲ་གྲོལ་བ་ནི་སེམས་ཅན་ལ་རྗེས་སུ་ཆགས་པ། ཞལ་གཅིག་པ་ནི་དེ་བཞིན་ཉིད་དུ་རོ་གཅིག་པ། སྤྱན་གསུམ་པ་ནི་སྔར་བརྗོད་དོ། །གཅེར་བུ་ནི་ཉོན་མོངས་པའི་སྒྲིབ་གཡོགས་དང་བྲལ་བ། ཕྱག་གཡོན་པས་འཁྱུད་ནས། གདུག་པ་དང་བདུད་ལ་སོགས་པའི་ཁྲག་གིས་བཀང་བའི་ཐོད་པ་བསྣམས་པ་ནི་གདུག་པ་ལ་སོགས་པ་ཉིད་འདུལ་བ། གཡས་པས་ཕྱོགས་ཐམས་ཅད་དུ་གདུག་པ་ཅན་རྣམས་ལ་སྡིགས་མཛུབ་བྱེད་ཅིང་གྲི་གུག་རྡོ་རྗེས་མཚན་པ་བསྣམས་པ་ནི་ཉོན་མོངས་པ་ཚར་གཅོད་པ། ཐལ་བ་དང་མཆོད་ཕྱིར་ཐོགས་མ་གཏོགས་པའི་རྒྱན་ལྔ་ནི་ཕ་རོལ་ཏུ་ཕྱིན་པ་ལྔ་སྟེ། ཤེས་རབ་ནི་ལྷ་མོ་ཉིད་ཡིན་པའི་ཕྱིར་རོ། །ལྷ་མོ་འོག་ནས་འབྱུང་བ་རྣམས་ཀྱི་རྒྱན་ཡང་དེ་བཞིན་དུ་ཤེས་པར་བྱའོ། །བསྐལ་པའི་མེ་ལྟ་བུའི་གཟི་བརྗིད་དང་ལྡན་པ་ནི་བདུད་ཐམས་ཅད་སྐྲག་པར་བྱེད་པ། བདེ་བ་གསོལ་བའི་བརྡར་ཁྲག་གསོལ་བ་ལ་དགྱེས་ཤིང་བྷ་ག་ནས་ཁྲག་འཛག་པ། ཐབས་ཤེས་རབ་ཟུང་དུ་འཇུག་པ་མཚོན་པ་ནི་བྱིན་པ་གཉིས་ཀྱིས་ལེགས་པར་འཁྱུད་པ་སྟེ། བཅོམ་ལྡན་འདས་ནི་ལྷག་མཐོང་དང་ཐུགས་རྗེ་ཆེན་པོའི་བརྡ་ཡིན་ལ། ཡུམ་ནི་ཞི་གནས་དང་བདེ་བ་ཆེན་པོའི་བརྡའི་རང་བཞིན་ཡིན་ནོ་ཞེས་གསུངས་ཏེ། འདི་དག་ནི་ཕལ་ཆེར། པྲ་ཛྙཱ་རཀྵི་ཏའི་འགྲེལ་པ་ལ་བརྟེན་པར་སྣང་ངོ་། །གཙོ་བོ་ཡབ་ཡུམ་གསལ་བཏབ་ནས་འཁོར་རྣམས་གསལ་མ་བཏབ་པའི་བར་འདིར་པྲ་ཛྙཱ་རཀྵི་དང་། ལྭ་བ་པས་མཁའ་གསང་བྱིན་རླབས་དང་། ལྟེ་བ། སྙིང་ག མགྲིན་པ། སྤྱི་བོ་རྣམས་སུ་ཕན་ཚུན་གྱི་སྙིང་པོ་དང་ཉེ་སྙིང་བཀོད་དེ། ཕན་ཚུན་ཙུམྦ་ན་དང་། ཡི་གེ་གསུམ་གྱི་དགའ་བ་བརྩམ་པར་བཤད་ཅིང་། འཁྲུལ་སྤོང་དང་ཁྱད་པར་གསལ་བྱེད་ལས། འཁོར་གྱི་ལྷ་རྣམས་གསལ་བཏབ་པའི་རྗེས་སུ་དེ་ལྟར་བཤད་པ་ནི་སློབ་དཔོན་གྱི་གཞུང་དང་། ནཱ་རོ་པའི་མན་ངག་གཉིས་ཀ་ལས་མི་འབྱུང་ཞིང་། ཀུན་སྤྱོད་བརྒྱད་པར། ཡི་གེ་དྱཾ་ནི་སྣ་རྩེར་ཡང་དག་སྦྱར། །བྱཾ་ནི་མཚམས་ཀྱི་ལྟེ་བར་ཡང་དག་དགོད། །ལྟེ་བ་སྙིང་ག་དཔྲལ་བ་རུ། །སྔགས་ཀྱི་ཚོགས་དང་བཅས་པས་བྱིན་གྱིས་བརླབ། །ལྟེ་བ་སྙིང་ག་དག་ཏུ་རྣལ་འབྱོར་མ། །སངས་རྒྱས་མཁའ་འགྲོ་མ་ཡི་སྔགས་ཀྱིས་ནི། །ཨ་ཝ་དྷཱུ་ཏཱི་གཉིས་ཀྱི་དཔའ་བྱིན་བརླབ། །རྣལ་འབྱོར་མ་དང་དཔའ་བོ་གཉིས་མེད་ཡིན། །ཞེས་ཡེ་ཤེས་ཀྱི་འཁོར་ལོ་དགུག་གཞུག་གི་རྗེས་སུ་གསུངས་པ་ནི། ཡེ་ཤེས་པ་དང་དམ་ཚིག་པ་དབྱེར་མེད་པའི་དགའ་བ་སྐྱོང་བ་རྒྱས་པ་ཡིན་ལ། མདོར་བསྡུ་ན་ལག་པ་གཉིས་ཀྱིས་པད་སྐོར་དང་འཁྱུད་རྒྱ་བྱས་ཏེ། ཡོ་ག་ཤུདྡྷཿའི་སྔགས་བརྗོད་པས་ཆོག་པའི་དོན་ཡིན་པར་སྣང་གི སྔ་མ་རྣམས་སྟོན་པ་མ་ཡིན་ཏེ། སྔར་གྱི་ལུང་དེའི་དེ་མ་ཐག་ཏུ། དང་པོར་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །དེ་བདེའི་ཐབས་ནི་ཀུན་རིག་པའོ། །ལྷ་ཡུལ་ས་སྟེང་ས་འོག་ཏུ། །སྐད་ཅིག་གིས་ནི་གཟུགས་གཅིག་འགྱུར། །བསྒོམ་པ་བདག་ཉིད་བཤད་པའོ། །བསྡུ་བའི་ཆོ་ག་དྲན་པ་ནི། །གཡས་དང་གཡོན་ནི་ལག་གཉིས་ཀྱིས། །བསྐོར་བ་མཁའ་འགྲོ་བདེ་དེ་ཡིན། །ཞེས་གསུངས་པས་སོ། །རྒྱ་གར་བ་རྣམས་ཀྱང་ཐུགས་དགྱེས་པར་གྱུར་ཅིག གཉིས་པ་འཁོར་གྱི་ལྷ་རྣམས་བཤད་པ་ནི། སློབ་དཔོན་གྱི་གཞུང་ལས། མཁའ་འགྲོ་མ་དང་། ལཱ་མ་དང་ཞེས་པ་ནས། དཔའ་བོ་དང་རྣལ་འབྱོར་མ་འདི་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བའོ། །ཞེས་པའི་བར་གྱིས་བསྟེན་ཏེ། བདེ་ཆེན་འཁོར་ལོའི་པདྨའི་འདབ་མ་བཞི་ལ། ཤར་དུ་ཌཱ་ཀི་ནཱི་སྟེ་མཁའ་འགྲོ་མ་ནག་མོ། བྱང་དུ་ལཱ་མ་སྟེ་མཛེས་མ་ལྗང་གུ། ནུབ་ཏུ་ཁཎྜ་རོ་ཧ་སྟེ་དུམ་སྐྱེས་མ་དམར་མོ། ལྷོར་རཱུ་བི་ནི་སྟེ་གཟུགས་ཅན་མ་སེར་མོ་རྣམས་ཞལ་གཅིག་ཕྱག་བཞི་མ། གཡས་གཉིས་ན་ཌཱ་མ་རུ་དང་གྲི་གུག གཡོན་གཉིས་ན་ཁ་ཊྭཱཾ་ག་དང་ཐོད་པ་སྟེ་འདི་དག་ནི་རྒྱབ་ནས་ཚུར་བགྲངས་པའོ། །གཅེར་བུ་སྐྲ་གྲོལ་བ་སྤྱན་གསུམ་པ། གཡས་བརྐྱངས་པས་བཞུགས་པ། ཞལ་མཆེ་བ་རྣམ་པར་གཙིགས་པ། ཕྱག་རྒྱ་ལྔས་བརྒྱན་པ་བསམ་པར་བྱའོ། །འདི་དག་གི་སྐུ་མདོག་ཕྱག་མཚན་རྒྱན་ཆ་རྣམས་མངོན་བརྗོད་ཀྱི་ལེའུ་བཞི་པ་ལས་གསུངས་པས། ནག་པོ་ཞབས་ཀྱི་འཁོར་ལོ་གཞན་རྣམས་ཀྱི་ལྷ་ཞལ་གཅིག་ཕྱག་གཉིས་པར་བྱེད་པའི་ཚེ་ན་ཡང་། བཞི་པོ་ཞལ་གཅིག་ཕྱག་བཞི་པར་རྡུལ་ཚོན་བྲི་བའི་སྐབས་སུ་གསུངས་ཤིང་། རྗེ་བཙུན་རྩེ་མོས་དྲིལ་བུ་པའི་སྒྲུབ་ཐབས་སུ་ཡང་འདི་བཞིན་དུ་གསུངས་སོ། །མཚམས་བཞིར་བདུད་རྩི་ལྔས་ཡོངས་སུ་གང་བའི་བུམ་པའི་སྟེང་དུ་བྱང་སེམས་དཀར་པོས་གང་བའི་ཐོད་པ་བཞི་འཇོག་པར་མངོན་བརྗོད་ལས་གསུངས་ཤིང་། ཀུན་སྤྱོད་ལས་ཀྱང་། ཕྱོགས་བྲལ་གྱི་ནི་བཞི་པོ་དག །ལྔ་ཡིས་གང་བའི་ཐོད་པ་ཉིད། །ཅེས་གསུངས་སོ། །སྔར་བཤད་པའི་ཐུགས་འཁོར་དེའི་ཤར་རྩིབས་པུལླཱི་ར་མ་ལ་ཡར་དཔའ་བོ་ཁཎྜ་ཀ་པཱ་ལི་སྟེ་ཐོད་པའི་དུམ་བུ་དང་། དཔའ་མོ་པྲ་ཙཎྜི་སྟེ་རབ་གཏུམ་མ་ཞལ་སྦྱོར་གྱི་ཚུལ་ལོ། །དེ་བཞིན་དུ་བྱང་རྩིབས་ཛཱ་ལེན་དྷ་ར་སྟེ། འབར་བ་འཛིན་པར་མ་ཧཱ་ཀཾ་ཀཱ་ལ་སྟེ་ཀེཾ་རུས་ཆེན་པོ་དང་། ཙཎྜ་ཨཀྵི་སྟེ་གཏུམ་པའི་མིག་ཅན་མའོ། །འདིར་བུ་དགེ་གཉིས་ཀྱིས་དྲྭ་བ་འཛིན་པར་བསྒྱུར་བ་ནི། སྔོན་གྱི་སྒྱུར་བྱེད་དམ་པ་འབྲོག་མི་སོགས་ལ་ཟུར་ཟ་བར་སྣང་ཡང་ཛྭ་ལ་ཆུ་ལ་འཇུག་པ་ལ། དེ་ལས་བཟློག་པའི་དོན་ལ། ཨ་ནཱིའི་འཕེལ་བ་བྱས་པས། ཛྭ་ལ་འབར་བའམ་མེ་ལ་འཇུག་པའི་དོན་མ་རྟོགས་པའོ། །ནུབ་རྩིབས་ཨོ་ཌི་ཡ་ནཱ་སྟེ་འཇིག་རྟེན་ན་གྲགས་པའི་ཨུ་རྒྱན་དུ་ཀཾ་ཀ་ལ་སྟེ་ཀེང་རུས་དང་། བྲ་བྷཱ་ཝ་ཏི་སྟེ་འོད་ལྡན་མའོ། །ལྷོ་རྩིབས་ཨརྦུ་ད་ར་བི་ཀ་དཾཥྚི་ཎ་སྟེ་མཆེ་བ་རྣམ་པར་གཙིགས་པ་དང་། མ་ཧཱ་ནཱ་སཱི་སྟེ་སྣ་ཆེན་མ་གཉིས་སོ། །ཤར་ལྷོའི་རྩིབས་གོ་ད་ཝ་རཱི་སྟེ་མཆོག་སྦྱིན་དུ་སུ་རཱ་ལྷའམ་ཆང་ལ་འཇུག བཻ་རཱི་སྟེ་ཆང་སྒྲའམ་ལྷ་སྒྲ་དང་། ཝི་རཱ་མ་ཏཱི་སྟེ་དཔའ་བོའི་བློ་ཆེན་མའོ། །ལྷོ་ནུབ་ཀྱི་རྩིབས་རཱ་མེ་ཤྭ་རར་ཨ་མི་ཏཱ་བྷ་བ་སྟེ་འོད་དཔག་མེད་དང་། ཁར་ཝ་རཱི་སྟེ་མིའུ་ཐུང་མའོ། །ནུབ་བྱང་གི་རྩིབས་དེ་ཝཱི་ཀོ་ཊི་སྟེ་ལྷ་མོའི་མཁར་དུ་བཛྲ་པྲ་བྷ་བ་སྟེ་རྡོ་རྗེའི་འོད་དང་། ལང་ཀ་ཤྭ་རཱི་སྟེ་ལང་ཀའི་དབང་ཕྱུག་མའོ། །བྱང་ཤར་གྱི་རྩིབས་མཱ་ལ་བ་སྟེ་ཕྲེང་བ་ཅན་མར་བཛྲ་དེ་ཧ་སྟེ་རྡོ་རྗེའི་སྐུ་དང་། དྲུ་མཙྪ་ཡཱ་ཏ་ཤིང་གྲིང་མའོ། །འདི་དག་ནི་ཐུགས་ཀྱི་འཁོར་ལོའི་ལྷ་སྟེ་སྐུ་མདོག་སྔོན་པོ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་གསུང་གི་འཁོར་ལོའི་ཤར་རྩིབས་ཀཱ་མ་རཱུ་པ་སྟེ་འདོད་པའི་གཟུགས་སུ་ཨཾ་གུ་རཱི་སྟེ་མྱུ་གུ་ཅན་དང་། ཨེ་རཱ་ཝ་ཏྭི་སྟེ་ས་སྲུང་མའོ། །བྱང་རྩིབས་ཨོ་དྲར་བཛྲ་ཛ་ཊཱི་སྟེ་རྡོ་རྗེ་རལ་པ་ཅན་དང་། མཧཱ་བྷཻ་ར་ཝཱ་སྟེ་འཇིགས་བྱེད་ཆེན་མོའོ། །ནུབ་རྩིབས་ཏྲི་ཤ་ཀུ་ནི་སྟེ་དགེ་མཚན་གསུམ་པར་མ་ཧཱ་བཱི་ར་སྟེ་དཔའ་བོ་ཆེན་པོ་དང་བཱ་ཡུ་བེ་གཱ་སྟེ་རླུང་གི་ཤུགས་ཅན་མའོ། །ལྷོ་རྩིབས་ཀོ་ས་ལ་སྟེ་དགེ་བ་ཅན་དུ་བཛྲ་ཧཱུྃ་ཀཱ་ར་སྟེ་རྡོ་རྗེ་ཧཱུྃ་མཛད་དང་། སུ་རཱ་བྷཀྵི་སྟེ་ཆང་འཐུང་མའོ། །ཤར་ལྷོའི་རྩིབས་ཀ་ལིཾ་ཀར་སུ་བྷ་ཏྲ་སྟེ་རབ་ཏུ་བཟང་པོ་དང་། ཤྱཱ་མ་དེ་ཝཱི་སྟེ་སྔོ་བསངས་ལྷ་མོའམ་ལྗང་ལྷ་མོའོ། །ལྷོ་ནུབ་ཀྱི་རྩིབས་ལཾ་པཱ་ཀ་སྟེ་འཕྱང་བ་ཅན་དུ་བཛྲ་བྷ་ཏྲ་སྟེ་རྡོ་རྗེ་བཟང་པོ་དང་། སུ་བྷ་ཏྲ་སྟེ་ཤིན་ཏུ་བཟང་མོའོ། །ནུབ་བྱང་གི་རྩིབས་ཀཉྩིར་མ་ཧཱ་བྷཻ་ར་ཝ་སྟེ་འཇིགས་བྱེད་ཆེན་པོ་དང་། ཧ་ཡ་ཀརྞ་སྟེ་རྟ་རྣ་མའོ། །བྱང་ཤར་གྱི་རྩིབས་ཧི་མཱ་ལ་ཡ་སྟེ་གངས་ཅན་དུ་བི་རུ་པཀྵ་སྟེ་མིག་མི་བཟང་དང་། ཁ་ག་ན་ནཱི་སྟེ་བྱ་གདོང་མའོ། །འདི་དག་ནི་གསུང་གི་འཁོར་ལོའི་ལྷ་སྟེ་སྐུ་མདོག་དམར་པོ་གསུང་གི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་སྐུའི་འཁོར་ལོའི་ཤར་རྩིབས་པྲེ་ཏ་པུ་རཱི་སྟེ་ཡི་དྭགས་ཀྱི་གྲོང་དུ་མཧཱ་བ་ལ་སྟེ་སྟོབས་པོ་ཆེ་དང་། ཙཀྲ་ཝཻ་ར་སྟེ་འཁོར་ལོའི་ཤུགས་ཅན་མའོ། །བྱང་རྩིབས་གྲྀ་ཧ་དེ་ཝ་སྟེ་ཁྱིམ་གྱི་ལྷར་རཏྣ་བཛྲ་སྟེ་རིན་ཆེན་རྡོ་རྗེ་དང་། ཁཎྜ་རོ་ཧཱ་སྟེ་དུམ་སྐྱེས་མའོ། །ནུབ་རྩིབས་སཽ་རཱཥྚར་སྟེ་ཡུལ་འཁོར་བཟང་པོར་ཧ་ཡ་གྲཱྀ་ཝ་སྟེ་རྟ་མགྲིན་དང་། ཤཽཎྜི་ནི་སྟེ་ཆང་འཚོང་མའོ། །ལྷོ་རྩིབས་སུ་ཝརྞ་དྭི་སྟེ་གསེར་གླིང་དུ་ཨཱ་ཀཱ་ཤ་གརྦྷ་སྟེ་ནམ་མཁའི་སྙིང་པོ་དང་། ཙཀྲ་ཝརྨི་ཎི་སྟེ་འཁོར་ལོའི་གོ་ཆ་མའོ། །ཤར་ལྷོའི་རྩིབས་ན་ག་ར་སྟེ་གྲོང་ཁྱེར་དུ་ཤྲཱི་ཧེ་རུ་ཀ་སྟེ་དཔལ་ཧེ་རུ་ཀ་དང་། སུ་ཝཱི་ར་སྟེ་ཤིན་ཏུ་དཔའ་མོའོ། །ལྷོ་ནུབ་ཀྱི་རྩིབས་སིནྡྷཱུར་པདྨ་ནི་ཤྭ་ར་སྟེ་པདྨ་གར་གི་དབང་ཕྱུག་དང་། མ་ཧཱ་བ་ལི་སྟེ་སྟོབས་ཆེན་མའོ། །ནུབ་བྱང་གི་རྩིབས་མ་རུ་སྟེ་མྱ་ངམ་དུ་བཻ་རོ་ཙ་ན་སྟེ་རྣམ་པར་སྣང་མཛད་དང་། ཙཀྲ་ཝརྟི་ནཱི་སྟེ་འཁོར་ལོས་སྒྱུར་མའོ། །བྱང་ཤར་གྱི་རྩིབས་ཀུ་ལ་ཏར་བཛྲ་སཏྭ་སྟེ་རྡོ་རྗེ་སེམས་དཔའ་དང་། མ་ཧཱ་བཱིརྻ་སྟེ་བརྩོན་འགྲུས་ཆེན་མོའོ། །འདི་དག་ནི་སྐུའི་འཁོར་ལོའི་ལྷ་སྟེ་སྐུ་མདོག་དཀར་པོ་སྐུའི་གསང་བ་བསམ་གྱིས་མི་ཁྱབ་པའི་ངོ་བོའོ། །དཔའ་བོ་ཉི་ཤུ་རྩ་བཞི་ནི་ཞལ་གཅིག་ཕྱག་བཞིའི་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་རང་གི་ཡུམ་ལ་འཁྱུད་པ། གཡས་འོག་མས་ཌཱ་མ་རུ། གཡོན་འོག་མས་ཁ་ཊྭཱཾ་ག་འཛིན་པར་གཞུང་ལས་གསུངས་ཤིང་། རྗེ་བཙུན་གྱིས། ཕམ་འཐིང་པའི་དགོངས་པས་ཁ་ཊྭཱཾ་ག་ནི་གྲུ་མོར་འོང་ལ། གཡོན་པ་དངོས་སུ་ནི་ཐོད་པ་འོང་སྟེ། རྩ་བའི་རྒྱུད་ཀྱི་ལེའུ་དང་པོ་ལས། མཆོད་གཞི་དཔའ་བོ་ཆེན་པོ་ནི། །ཞེས་བྱ་བའི་གཞུང་གི་དགོངས་པ་ཡིན་ནོ་ཞེས་གསུངས་ཏེ། བསྒོམ་པའི་ཚེ་ནི་ཐོད་པ་བསྒོམ་ལ། འབྲི་བ་ལྟ་བུའི་ཚེ་ནི་མི་འབྲི་སྟེ། གཞུང་ན་སྦས་པ་ཡིན་པའི་ཕྱིར་རོ། །གཞན་རྒྱན་ཆ་ལུགས་དང་། བཞུགས་ཚུལ་རྣམས་ནི་གཙོ་བོ་དང་འདྲ་ཞིང་། དཔའ་མོ་ཉི་ཤུ་རྩ་བཞིའི་ཕྱག་མཚན་རྒྱན་ཆ་ལུགས། འཁྱུད་པའི་ཚུལ་ཐམས་ཅད་རྡོ་རྗེ་ཕག་མོ་དང་འདྲ་བར་བཞེད་དོ། །དེ་ནས་དམ་ཚིག་གི་འཁོར་ལོའི་ཤར་སྒོར་ཁྭའི་གདོང་ཅན་མ་ནག་མོ། བྱང་སྒོར་འུག་པའི་གདོང་ཅན་ལྗང་གུ། ནུབ་སྒོར་ཁྱིའི་གདོང་ཅན་དམར་མོ། ལྷོ་སྒོར་ཕག་གི་གདོང་ཅན་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་ལ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་ལ་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་ལ་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་ལ་གཡོན་སྔོ་བའོ། །དེ་དག་གི་ཕྱག་གི་གྲངས་དང་། ཕྱག་མཚན་ནི་སྙིང་པོའི་རྣལ་འབྱོར་མ་བཞི་དང་མཚུངས་ཤིང་། གཞུང་ལས་ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་། སེམས་ཅན་གྱི་དོན་ལ་མངོན་པར་བརྩོན་པའོ། །ཞེས་གསུངས་སོ། །འདིར་ལོ་ཆེན་གྱི་འགྲེལ་ཆུང་ལས། རྡོ་རྗེ་ཕག་མོའི་ངེས་ཚིག་ནི་བྱི་བ་དང་ཆོས་མཐུན་ཏེ། བྱི་བས་རྫས་འཕྲོག་པར་བྱེད་པ་བཞིན་དུ་ཧེ་རུ་ཀའི་ཞེ་སྡང་འཕྲོག་པར་བྱེད་པས་ན་ཕག་མོའོ། །ཧེ་རུ་ཀས་ཕག་མོའི་འདོད་ཆགས་འཕྲོག་པར་བྱེད་པ་སྟེ། དེའི་ཕྱིར་འདོད་ཆགས་དང་། ཞེ་སྡང་དང་འགལ་བའི་ཆོས་དང་ལྡན་པར་བསྟན་པ་ནི། དེ་དག་སྤང་བར་བྱ་བའི་ཕྱིར་རོ། །མཚམས་རྣམས་སུ་བྱང་ཆུབ་ཀྱི་སེམས་ཀྱི་བཀང་བའི་སྣོད་བཞི་ཞེས་བྱ་བ་ནི་མཚམས་བཞིར་བུམ་པ་བཞིའི་སྟེང་དུ་ཐོད་པ་བཞི་བདུད་རྩི་ལྔས་བཀང་བ་བསམ་མོ། །དེ་ཡང་བུམ་པ་ནི་གཞལ་ཡས་ཁང་སྟེ་ཆོས་ཀྱི་དབྱིངས་ཡིན་ལ། ཐོད་པ་ནི་ཐབས་ཏེ་སྙིང་རྗེ་ཆེན་པོའོ། །དང་པོར་ཐུགས་ཀྱི་འཁོར་ལོ་ཞེས་བྱ་བ་ལ་སོགས་པ་སྨོས་ཏེ། དེ་ཡང་གནས་ཉི་ཤུ་རྩ་བཞི་ན་གནས་པའི་འཇིག་རྟེན་གྱི་མཁའ་འགྲོ་མ་རྣམས་གདུལ་བའི་ཕྱིར་རོ། །དེ་རྣམས་དང་མཐུན་པར་བྱ་བའི་ཕྱིར་ཐོད་པའི་དུམ་བུ་དང་། རབ་ཏུ་གཏུམ་མོ་ལ་སོགས་པར་མིང་དུ་བཏགས་ཀྱི་ངེས་པའི་ཚིག་ནི་མེད་དོ། །སྒོ་རྣམས་སུ་ཞེས་བྱ་བ་ནི་ཁྭ་གདོང་མ་ནི་བྱ་རོག་གིས་རྒྱང་རིང་པོ་མཐོང་བ་ལྟར་དུས་གསུམ་མཁྱེན་པའི་ཕྱིར་རོ། །འུག་གདོང་མ་ནི་འུག་པས་ཉིན་མོ་མི་མཐོང་བ་ལ་མཚན་མོ་མཐོང་བ་དང་འདྲ་བར་གཟུང་འཛིན་དུ་མི་མཐོང་ལ་གཉིས་སུ་མེད་པར་མཐོང་བའི་ཕྱིར་རོ། །ཁྱི་གདོང་མ་ནི་ཁྱི་ནི་ཟན་ཟ་བ་ལ་མ་ཡེངས་པར་བལྟ་བ་བཞིན་དུ་དེ་བཞིན་ཉིད་ལ་ལྷུན་གྱིས་གྲུབ་པར་དམིགས་པའི་ཕྱིར་རོ། །ཕག་གདོང་མ་ནི་ཕག་ནི་རྣམ་པར་རྟོག་པ་མེད་པ་བཞིན་དུ་ཆོས་ཀྱི་དབྱིངས་ཀྱང་རྟོག་པ་མེད་པའོ། །མཚམས་རྣམས་ན་གནས་པའི་ལྷ་མོ་ནི་ཡིད་འཕྲོག་པའི་གཟུགས་གཉིས་ཏེ་ཞེས་པ་ནི་འགྲོ་བ་རྣམས་འཁོར་བ་ལས་འདྲེན་པར་མཛད་པ་དང་། མྱ་ངན་ལས་འདས་པར་འཇོག་པར་མཛད་པའི་ཕྱིར་གཟུགས་གཉིས་སུ་བསྟན་ནོ། །དེ་ལ་གཤིན་རྗེ་སྲེག་མ་ནི་འཆི་བ་སྲེག་པའོ། །གཤིན་རྗེའི་ཕོ་ཉ་མོ་ནི་འཆི་བ་མི་སྟེར་བའོ། །གཤིན་རྗེ་མཆེ་བ་མ་ནི་འཆི་བ་ཟོས་པའོ། །གཤིན་རྗེ་འཇོམས་མ་ནི་འཆི་བ་བརླག་པ་སྟེ་གཏན་བཅོམ་པའོ། །ཐམས་ཅད་ཀྱང་ཡི་དྭགས་ཀྱི་གདན་ལ་བཞུགས་ཤིང་ཞེས་པ་ནི་ལྷ་ཐམས་ཅད་ཀྱང་མི་རོའི་གདན་ལ་བཞུགས་པ་སྟེ། དེ་ནི་ཆོས་ཐམས་ཅད་བདག་མེད་པར་བསྟན་པའི་ཕྱིར་དང་། ལྷ་དེ་ཉིད་ཀྱང་ཆོས་ཉིད་དང་ཡེ་ཤེས་དབྱེར་མེད་པའི་ངོ་བོར་བསྟན་པའི་ཕྱིར་དང་། ཆོས་ཐམས་ཅད་ཀྱང་མི་རྟག་པ་ཡིན་ནོ་ཞེས་བསྟན་པའི་ཕྱིར་དང་། རྣལ་འབྱོར་པ་རྣམས་སྐྱོ་བ་བསྐྱེད་པས་བསྒོམ་པ་ལ་བརྩོན་འགྲུས་སྐྱེ་བའི་ཕྱིར་རོ། །དཔྲལ་བར་རྡོ་རྗེ་ཕྲེང་བ་ནི་རིགས་དྲན་པའི་ཕྱིར་དང་། གཉིས་སུ་མེད་པའི་ཡེ་ཤེས་ཀྱི་རང་བཞིན་ཡིན་པར་བསྟན་པའི་ཕྱིར་ཞེས་གསུངས་སོ། །དཔྲལ་བར་རྡོ་རྗེའི་ཕྲེང་བས་བསྐོར་བ་རིགས་དྲན་པའི་ཕྱིར་ཡིན་ཞེས་པའི་དོན་འདིར་མི་བསྐྱོད་པ་གཙོ་བོར་གྱུར་པའི་རིགས་དྲུག་པའི་དཀྱིལ་འཁོར་ཡིན་པར་བསྟན་པའི་ཆེད་ཡིན་ཏེ། མངོན་བརྗོད་དུ། ཐུགས་འཁོར་གྱི་ལྷ་རྣམས་ཀྱི་དཔྲལ་བར་རྡོ་རྗེའི་ཕྲེང་བ། གསུང་འཁོར་གྱི་ལ་པདྨ། སྐུ་འཁོར་གྱི་ལ་འཁོར་ལོའི་ཕྲེང་བ་བཤད་པའི་རིགས་ལས་ཁྱད་པར་དུ་བྱས་པའོ། །འདིར་འཁོར་གྱི་ལྷ་ཞལ་གཅིག་ཕྱག་བཞི་པར་མཛད་པ་ནི་ཨ་བྷི་དྷ་ན་ལ་བརྟེན་ལ། དྲིལ་བུ་པ་དང་། ནག་པོ་པའི་སྒྲུབ་ཐབས་སུ་ཞལ་གཅིག་ཕྱག་གཉིས་པར་མཛད་པ་ནི་ཀུན་སྤྱོད་ལ་བརྟེན་པར་སྣང་ངོ་། །གཉིས་པ་ཕོ་ཉ་གསུམ་བསྲེ་བ་ནི། སློབ་དཔོན་གྱི་གཞུང་ལས། སྐབས་འདིར་མ་བྱུང་ཡང་། རྗེ་བཙུན་ནཱ་རོ་པའི་སློབ་བཤད། ཕམ་འཐིང་པ་ནས་བརྒྱུད་པ། རྗེ་བཙུན་ཆེན་པོས་འདི་ལྟར་གསུངས་ཏེ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་བསྐྱེད་ནས་ཕོ་ཉ་བསྲེ་བ་ལས། སྤྱིར་ཕོ་ཉ་བསྲེ་བ་ཞེས་བྱ་བ་ནི་རྒྱལ་པོའི་ཕོ་ཉ་དང་འདྲ་སྟེ། དངོས་གྲུབ་འགྲུབ་པ་ལ་ཤིན་དུ་མྱུར་བའི་ཕྱིར་ཕོ་ཉ་ཞེས་བྱའོ། །དེའང་རྣམ་པ་གསུམ་སྟེ། ཕོ་ཉ་སྔགས་སྐྱེས་དང་། ཞིང་སྐྱེས་དང་། ལྷན་སྐྱེས་སོ། །དེ་སྐད་དུ་རྩ་བའི་རྒྱུད་ལས། ཕོ་ཉ་རྣམ་གསུམ་ལེགས་འདྲེས་ནས། །སྒྲུབ་པ་པོ་ལ་དངོས་གྲུབ་སྟེར། །ཞེས་འབྱུང་ངོ་། །དེ་ལ་བསྒོམ་པ་དང་སྤྲོས་པ་གཅད་པ་གཉིས་ལས། དང་པོ་བརྗོད་ན་བློ་རྒྱ་ཆེ་ཆུང་གི་རིམ་པས། རྩིབས་དང་ལྷ་རེ་རེའི་སྟེང་ནས་བསྲེ་བ་དང་། འཁོར་ལོ་རེ་རེའི་སྟེང་དུ་བསྲེ་བ་དང་། དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ལ་བསྲེ་བའོ། །དེ་རེ་རེ་ལ་ཡང་ཡུལ་ལ་ཡུལ་གྱི་ཞེན་པ་དང་། ལྷ་ལ་ལྷའི་ཞེན་པ་བྱ་སྟེ། དེ་ལ་བདག་གིས་བསྒོམས་པའི་བློ་ལ་སྣང་བ་ནི་ཕོ་ཉ་སྔགས་སྐྱེས། འཛམ་བུ་གླིང་གི་ཡུལ་རྣམས་ན་སྤྲུལ་པའི་སྐུ་ཉིད་དུ་དངོས་སུ་བཞུགས་པ་རྣམས་ནི་ཕོ་ཉ་ཞིང་སྐྱེས། འོག་མིན་ལོངས་སྤྱོད་རྫོགས་པའི་གནས་ན་བཞུགས་པ་རྣམས་ནི་ཕོ་ཉ་ལྷན་སྐྱེས་སོ། །དེ་གསུམ་བསྲེ་བ་བློ་ཐ་མའི་དབང་དུ་བྱས་ནས་བརྗོད་ན། བདག་གི་བློ་ལ་སྣང་བའི་ཐུགས་ཀྱི་འཁོར་ལོའི་ཤར་ཕྱོགས་ཀྱི་རྩིབས་པུལླཱི་ར་མ་ལ་ཡ་འདི་འཛམ་བུའི་གླིང་ན་བཞུགས་པའི་ཡུལ་དེ་ཉིད་ཡིན་ལ། དེ་ཉིད་འོག་མིན་ན་བཞུགས་པའི་ཡུལ་དེ་ཉིད་ཡིན་ཞིང་། དེའང་ཆོས་ཀྱི་སྐུ་ལས་བྱུང་བ་ཡིན་ནོ་སྙམ་དུ་ཡུལ་ལ་ཡུལ་གྱི་ཞེན་པ་བྱ། ཡང་བློ་སྣང་གི་ཐུགས་ཀྱི་འཁོར་ལོའི་ཤར་རྩིབས་ལ་བཞུགས་པའི་ཁཎྜ་ཀ་པཱ་ལི་དང་། རབ་ཏུ་གཏུམ་མོ་འདི་འཛམ་བུའི་གླིང་ན་བཞུགས་པའི་སྤྲུལ་པའི་སྐུའི་བཅོམ་ལྡན་འདས་དེ་ཉིད་ཡིན་ལ། དེ་ཉིད་འོག་མིན་ན་བཞུགས་པའི་ལོངས་སྐུའི་བཅོམ་ལྡན་འདས་ཡིན་ཞིང་། དེ་ཉིད་ཆོས་ཀྱི་སྐུ་ལས་བྱུང་བའོ་སྙམ་དུ་ལྷ་ལ་ལྷའི་ཞེན་པ་བྱའོ། །དེ་བཞིན་དུ་ཡུལ་སོ་སོ་དང་། ལྷ་སོ་སོ་ཡོངས་སུ་རྫོགས་ཀྱི་བར་དུ་བསྲེ་བར་བྱའོ། །དེ་དག་ཀྱང་བསྒོམས་པ་དང་བསྟུན་ནས་ལྷ་རེ་རེ་གསལ་བཏབ་པ་དང་བསྲེ་ཞིང་བསྒོམ་པ་ཡིན་ནོ། །བློ་འབྲིང་གིས་འཁོར་ལོ་རེ་རེ་ནས་བསྲེ་ན་ཐུགས་ཀྱི་འཁོར་ལོའི་རྩིབས་བརྒྱད་པོ་འདི་ཉིད་འཛམ་བུའི་གླིང་ན་བཞུགས་པའི་ཡུལ་བརྒྱད་པོ་ཡིན་ལ། དེ་ཉིད་འོག་མིན་ན་བཞུགས་པའི་ཡུལ་བརྒྱད་པོ་ཡིན་ཞིང་དེ་ཆོས་ཀྱི་སྐུ་ལས་བྱུང་བ་ཡིན་ནོ་ཞེས་ཡུལ་ལ་ཡུལ་གྱི་ཞེན་པའོ། །རྩིབས་བརྒྱད་པོའི་དཔའ་བོ་དང་དཔའ་མོ་དེ་དག་འཛམ་བུའི་གླིང་ན་བཞུགས་པའི་སྤྲུལ་པའི་སྐུའི་དཔའ་བོ་དང་རྣལ་འབྱོར་མ་ཡིན་ལ། དེ་ཉིད་འོག་མིན་ན་བཞུགས་པའི་སྤྲུལ་པའི་སྐུའི་དཔའ་བོ་དང་རྣལ་འབྱོར་མ་ཡིན་ཞིང་། དེ་ཆོས་ཀྱི་སྐུ་ལས་བྱུང་བ་ཡིན་སྙམ་དུ་ལྷ་ལ་ལྷའི་ཞེན་པ་བྱའོ། །དེ་བཞིན་དུ་འཁོར་ལོ་སོ་སོ་དང་། ལྷ་རྣམས་སོ་སོ་ཡོངས་སུ་རྫོགས་ཀྱི་བར་དུ་བསྲེ་བར་བྱའོ། །བློ་རྒྱ་ཆེན་པོས་ཐམས་ཅད་ཀྱང་དུས་གཅིག་ཏུ་བསྲེ་ན། བློ་ལ་སྣང་བའི་གཞལ་ཡས་ཁང་སྲུང་བའི་འཁོར་ལོ་དང་། དུར་ཁྲོད་བརྒྱད་དང་བཅས་པ་འདི་ནི་ཕྱི་རོལ་སྣོད་ལ་བཞུགས་པའི་ཞིང་སྐྱེས་ཀྱི་ཡུལ་རྣམས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་གཞལ་ཡས་ཁང་ཡིན་ཞིང་། དེ་ཆོས་ཀྱི་སྐུ་ལས་བྱུང་བ་ཡིན་སྙམ་དུ་ཡུལ་ལ་ཡུལ་གྱི་ཞེན་པ་དང་། ཡང་བློ་ལ་སྣང་བའི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྔགས་སྐྱེས་འདི་ཉིད་འཛམ་བུའི་གླིང་ན་བཞུགས་པའི་སྤྲུལ་པའི་སྐུ་ཞིང་སྐྱེས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་ལྷ་དྲུག་ཅུ་རྩ་གཉིས་ཡིན་ཞིང་། དེ་ཆོས་ཀྱི་སྐུ་ལས་བྱུང་བའོ་སྙམ་དུ་ལྷ་ལ་ལྷའི་ཞེན་པ་བྱའོ། །བསྒོམ་པའི་རིམ་པའི་དབང་དུ་བྱས་ན་དེ་ཙམ་ཞིག་གིས་བཏུབ་བོ། །གལ་ཏེ་སྤྲོས་པ་གཅོད་པར་འདོད་ན། དེ་ལྟར་ཕོ་ཉ་བསྲེས་པས་འདྲེས་པར་ག་ལ་འགྱུར་སྙམ་ན། འདྲེ་བར་འགྱུར་ཏེ། ཞེན་པས་འཇུག་ཅིང་འབྲེལ་པས་མི་བསླུ་བའི་ལམ་ཡིན་པའི་ཕྱིར་རོ། །དེའང་ཇི་ལྟར་ཞེ་ན། ལམ་བསྒོམ་པའི་དུས་སུ་ཞེན་པ་ནི་ཞིང་སྐྱེས་དང་ལྷན་སྐྱེས་ལ་ཞེན་ཅིང་འཇུག་པ་ནི་སྔགས་སྐྱེས་ལ་འཇུག་པར་འབྲེལ་བས་མི་བསླུ་བ་སྟེ། དཔེར་ན་ནམ་མཁའ་ལ་ཟླ་བ་བྱུང་ན་ཆུ་ནང་དུ་འཆར་བ་བཞིན་དུ། ཆོས་སྐུའི་བྱིན་རླབས་ཀྱིས་འོག་མིན་དུ་ལོངས་སྐུ་འབྱུང་ལ། དེའི་མཐུས་འཛམ་བུ་གླིང་དུ་སྤྲུལ་སྐུ་འབྱུང་ལ། དེའི་མཐུས་སྒྲུབ་པ་པོའི་བློ་ལ་སྣང་བ་ཡིན་ནོ། །ཡང་འདིར་བསྒོམ་པ་མས་སྒོམ། བྱིན་གྱིས་ཡས་རློབ་ཅེས་བྱ་བ་དང་། བསྒོམ་པ་མས་སྒོམ་ལ་རྟོགས་པ་ཡས་འཆར་ཞེས་བྱ་བ་ཡིན་ཏེ། བསྒོམ་པ་མས་སྒོམ་པ་ནི་སྔགས་སྐྱེས་ཁོ་ན་ལ་འཇུག་པ་ཡིན་ལ། བྱིན་གྱིས་ཡས་རློབ་པ་ནི་སྔགས་སྐྱེས་ཞིང་སྐྱེས་ཀྱིས་བྱིན་གྱིས་རློབ་ལ། ཞིང་སྐྱེས་ལ་ལྷན་སྐྱེས་ཀྱིས་བྱིན་གྱིས་རློབ་ལ། དེ་ལ་ཆོས་སྐུས་བྱིན་གྱིས་རློབ་པ་ཡིན་པའི་ཕྱིར་རོ། །རྟོགས་པ་ཡས་འཆར་བ་ནི་སྔགས་སྐྱེས་བསྒོམས་པས་སྔོན་ལ་ཞིང་སྐྱེས་ཀྱི་རྟོགས་པ་སྐྱེ་བ་ལྟ་བུ་ནི་མ་ཡིན་ཏེ། ཐོག་མ་ཁོ་ནར་ཆོས་ཐམས་ཅད་རང་བཞིན་ཆོས་ཀྱི་སྐུའི་རྟོགས་པ་སྐྱེ་ལ། དེས་ལྷན་སྐྱེས་ལོངས་སྤྱོད་རྫོགས་པའི་སྐུ་འགྲུབ་ཅིང་། དེའི་ཐུགས་རྗེ་ཆེན་པོས་འཇིག་རྟེན་དུ་སྤྲུལ་པའི་སྐུ་ཞིང་སྐྱེས་འབྱུང་ལ། དེ་དག་གིས་སྒྲུབ་པ་པོའི་རྒྱུད་བྱིན་གྱིས་རློབ་པ་ན་སྔགས་སྐྱེས་ཀྱི་སྣང་བ་འབྱུང་བ་ཡིན་ནོ། །ཡང་འདིར་ཕོ་ཉ་འདྲི་བར་ནི་རྟོགས་ན། བསྲེ་བའི་ཡུལ་མ་ཚང་སྟེ། བློ་སྣང་སྔགས་སྐྱེས་ལ་ལྷ་ཐམས་ཅད་ཚང་ཡང་འཛམ་བུའི་གླིང་ན་བདེ་བ་ཆེན་པོའི་འཁོར་ལོ་མི་བཞུགས་སོ་ཞེས་བྱ་བ་དང་། འོག་མིན་ན་ནི་བདེ་བ་ཆེན་པོའི་འཁོར་ལོ་ཁོ་ན་ལས་གཞན་པ་མི་བཞུགས་པར་གྲག་གོ་ཞེས་སྨྲ་ན། དེ་ལྟར་ནི་མ་ཡིན་ཏེ་འཛམ་བུའི་གླིང་ལ་སོགས་པ་ཕྱི་རོལ་ནའང་རྟེན་དང་བརྟེན་པར་བཅས་པ་ཐམས་ཅད་ཚང་བར་བཞུགས་ལ། འོག་མིན་ན་ཡང་ཐམས་ཅད་བཞུགས་པ་ཉིད་ཡིན་ཏེ། རྒྱུ་ལ་ཆོས་ཐམས་ཅད་ཚང་བར་ཉམས་སུ་བླངས་པས་འབྲས་བུ་ནི་གནས་གྱུར་གྱི་ཚུལ་དུ་འབྱུང་བ་ཉིད་ཡིན་པས་ན་འདི་ལ་མ་ཚང་བ་ག་ལ་སྲིད། ཡང་ཁྱོད་སྨྲ་བ་བཞིན་ཡིན་དུ་ཆུག་ནའང་འཛམ་བུ་གླིང་ན་བཞུགས་པ་ནི་བསྡུ་བྱ་འཁོར་ཡིན་ལ། འོག་མིན་ན་བཞུགས་པ་ནི་བསྡུ་བྱེད་གཙོ་བོ་ཡིན་པས་ན། འཁོར་ལ་བསྲེས་པས་ཀྱང་གཙོ་བོ་ཚང་ལ་གཙོ་བོ་ལ་བསྲེས་པས་ཀྱང་འཁོར་ཚང་སྟེ། དཔེར་ན་འཇིག་རྟེན་ན་འཁོར་མཉེས་ན་གཙོ་བོ་ཡང་མཉེས་ལ། གཙོ་བོ་མཉེས་ན་འཁོར་ཡང་མཉེས་པར་འགྱུར་བ་བཞིན་ནོ། །གཞན་ཡང་ལྷ་རེ་རེའི་ལུས་ལ་ཡང་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཚང་བར་ཡོད་པས་ན་ལྷ་རེ་རེ་ལ་བསྲེས་པས་ཀྱང་ཐམས་ཅད་ཚང་བར་འགྱུར་བ་ཡིན་ནོ། །དེ་ལྟར་དེ་དག་ཐམས་ཅད་ཀྱི་མིང་ནི་བློའི་སྤྱོད་ཡུལ་གཅིག་ལ་ཕོ་ཉ་གསུམ་བསྲེ་བ་ཞེས་བྱ་བ་ཡིན་ནོ། །ཡང་མངོན་པར་རྟོགས་པ་གཅིག་ལ་ཕོ་ཉ་གསུམ་བསྲེ་བ་ཞེས་བྱ་བ་ནི། ཕྱིའི་དཀྱིལ་འཁོར་དག་པ་དང་བཅས་པ་ཕྱི་རོལ་ན་ཡོད་པ་དང་མཐུན་པས་ན་ཕོ་ཉ་ཞིང་སྐྱེས། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་པ་སྔགས་ལས་བྱུང་བས་ན་ཕོ་ཉ་སྔགས་སྐྱེས། རྫོགས་པའི་རིམ་པ་སྤྱོད་པ་དང་བཅས་པ་རང་བཞིན་མེད་པའི་ངོ་བོ་ཡིན་པའི་ཕྱིར་ཕོ་ཉ་ལྷན་སྐྱེས་ཏེ་མངོན་པར་རྟོགས་པ་རྫོགས་པ་གཅིག་ལ་ཕོ་ཉ་གསུམ་བསྲེ་བ་ཞེས་བྱའོ། །ཡང་དཀྱིལ་འཁོར་གྱི་འཁོར་ལོ་གཅིག་ལ་ཕོ་ཉ་གསུམ་བསྲེ་ན་བདེ་བ་ཆེན་པོའི་འཁོར་ལོ་ནི་ཕོ་ཉ་ལྷན་སྐྱེས། འཁོར་ལོ་གསུམ་ནི་ཕོ་ཉ་ཞིང་སྐྱེས། སྒོ་མཚམས་མ་བརྒྱད་ནི་ཕོ་ཉ་སྔགས་སྐྱེས་ཡིན་ནོ་ཞེས་ཤེས་པར་བྱའོ། །དེ་ལྟར་བློའི་རིམ་པས་རིམ་གྱིས་བསྲེ་བའམ་ཅིག་ཆར་དུ་བསྲེ་བའང་རུང་སྟེ། ཕོ་ཉ་བསྲེ་བ་ལ་བློ་དད་པས་བརྟན་པར་བསྒོམ་པར་བྱའོ་ཞེས་གསུངས་པ་འདིའི་དོན་ལ་ལེགས་པར་དཔྱད་ན་དོན་དེ་ཚུལ་བཞིན་དུ་ངེས་པར་འགྱུར་རོ། །འདི་ལ་བླ་མ་ཕྱི་མ་དག །ཕོ་ཉ་རྣམ་གསུམ་ལེགས་འདྲེས་ན། །སྒྲུབ་པ་པོ་ལ་དངོས་གྲུབ་སྟེར། །ཞེས་པ་འདི་རྩ་རྒྱུད་ན་མི་སྣང་ཞིང་། གཞུང་འགྲེལ་རྣམས་ལས། སྐབས་འདིར་ཕོ་ཉ་བསྲེ་བ་མི་སྣང་བས་མ་དག་པ་ཡིན་ནོ་ཞེས་ཀྱང་སྨྲ་ཞིང་། སྔར་པྲ་ཛྙཱ་རཀྵི་ཏ་ནི། ནཱ་རོ་པ་ལོ་བཅུ་གཉིས་བསྟེན་ཀྱང་། ཚོགས་བཤད་ལས་སློབ་བཤད་མ་ཐོབ་པར་མལ་གྱོའི་རྗེས་འབྲང་དག་སྨྲ་ཡང་། སློབ་བཤད་ཡོད་པར་འདོད་པ་རྣམས་ལ་ཡོད་ཅིང་། ཁོ་ལ་མེད་པའི་བཤད་པ་ཁྱད་པར་ཅན་ཅིའང་མི་འདུག་ལ་ཞེས་ཀྱང་སྨྲ་བ་ནི། བ་ལང་ལ་རྟ་ལ་མེད་པའི་ཁྱད་ཆོས་ཅིའང་མི་འདུག་ཅེས་ཀྱང་སྨྲ། ནོག་ལྐོག་ཤལ་སོགས་ཡིན་ནོ་བྱས་པ་ལ། དེ་དག་ནི་རྟ་ལ་མེད་པས་བ་ལང་གི་ཁྱད་ཆོས་སུ་མི་འཐད་དོ་ཞེས་ཀྱང་སྨྲ་བ་དང་མཚུངས་སོ། །འོ་ན་སློབ་བཤད་ཡིན་ན། གཞུང་འགྲེལ་ན་མེད་ཀྱང་། རྒྱུད་ལ་བརྟེན་དགོས་པས། རྒྱུད་གང་ལ་བརྟེན་ཅེ་ན་བཤད་པར་བྱ་སྟེ། རྩ་རྒྱུད་ལེའུ་དང་པོ་ལས། ཕོ་ཉ་ལྷན་ཅིག་སྐྱེས་གྲུབ་ནི། །མཆོག་དང་འབྲིང་དང་ཐ་མ་སྟེ། །ཞེས་ཕོ་ཉ་གསུམ་དུ་གསུངས་ཤིང་། ལེའུ་ཉི་ཤུ་རྩ་དྲུག་པ་ལས། རིམ་དང་རིམ་ལས་བཟློག་པ་ཡིས། །ཕོ་ཉ་རྣམས་ནི་ཡང་དག་གནས། །འོག་དང་སྟེང་གྲུབ་རྟག་ཏུ་སྟེར། །བདག་གི་ཕོ་ཉ་མ་ཀུན་འགྲོ། །ཕོ་ཉ་མ་སྟེ་ཀུན་གྲུབ་སྟེར། །ཞེས་དང་། ཉི་ཤུ་རྩ་བདུན་པ་ལས། དེ་བཞིན་ཕོ་ཉ་ལེགས་འདྲེས་པ། །སྒྲུབ་པ་པོ་ཡིས་དངོས་གྲུབ་འཐོབ། །ཅེས་གསུངས་པ་རྣམས་ཀྱི་དོན་བསྡུས་ནས། རྗེ་བཙུན་གྱི་ཚིག་རྐང་གཉིས་གསུངས་པ་དོན་བསྡུས་པའི་ལུང་ངོ་། །དེ་དག་གི་དོན་ནི། རིམ་པ་ནི། རབ་གཏུམ་མ་ནས་བཟུང་སྟེ། ལྷ་རྣམས་ཡས་རིམ་མམ། ཕྱོགས་གཡོན་སྐོར་དུ་འགོད་པ་དང་། རིམ་པ་ལས་བཟློག་པ་ནི། བརྩོན་འགྲུས་ཆེན་མོ་ནས་བཟུང་སྟེ་མས་རིམ་མམ། མཚམས་གཡས་སྐོར་དུ་འགོད་པའི་ཕོ་ཉ་རྣམས་དཀྱིལ་འཁོར་ལ་གནས་པ་ནི། ཕོ་ཉ་སྔགས་སྐྱེས་ཏེ། ཐ་མའི་དོན་ནོ། །འོག་གྲུབ་ཅེས་པ་ནི། འཛམ་བུའི་གླིང་ན་བཞུགས་པའི་ཕོ་ཉ་ཞིང་སྐྱེས་ཏེ། འབྲིང་གི་དོན་ཏོ། །སྟེང་གྲུབ་ཅེས་པ་ནི་འོག་མིན་ན་བཞུགས་པའི་ལྷན་སྐྱེས་ཏེ། མཆོག་གི་དོན་ཏོ། །དེས་ན་བདག་གི་ཕོ་ཉ་མ་ནི་སྔགས་སྐྱེས་ཡིན་ལ། དེ་ཉིད་ཞིང་སྐྱེས་དང་། ལྷན་སྐྱེས་ཀུན་དུ་འགྲོ་བས། དངོས་གྲུབ་སྟེར་ཅེས་པའོ། །ཉམས་ལེན་གང་གིས་ན། དེ་བཞིན་ཕོ་ཉ་ལེགས་འདྲེས་པ། །ཞེས་སོགས་ཏེ། འདྲེས་པས་སྟེར་ཅེས་པའི་དོན་ཏེ། རྒྱུད་ཀྱི་སྟེང་གི་ཉམས་ལེན་གྱི་རིམ་པ་འདི་ལྟ་བུ་གང་ལ་མེད་པ་ནི་ཚོགས་བཤད་དང་། ཡོད་པ་ནི་སློབ་བཤད་དུ་ངེས་པར་བྱའོ། །གསུམ་པ་བྱང་ཆུབ་ཀྱི་ཕྱོགས་ཀྱི་དག་པ་དྲན་པ་ལ་དྲུག་སྟེ། གང་དུ་བསྒོམ་པའི་གནས་སྐབས་ཀྱི་ངེས་པ། གང་བསྒོམ་པ་བྱང་ཆུབ་ཀྱི་ཕྱོགས་ངོས་གཟུང་། གང་ལ་བསྒོམ་པའི་གཞི་ངོས་གཟུང་། དེ་ལ་དེ་ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ། གོ་རིམ་ལ་རྩོད་པ་སྤོང་བའོ། །དང་པོ་ནི། ཀུན་སྤྱོད་ལེའུ་གསུམ་པར། ལྷ་དང་སྦྱར་ནས་བསྒོམ་ཚུལ་ཙམ་ལས། གནས་སྐབས་གང་དུ་བསྒོམ་པ་གསལ་བར་མ་གསུངས་ལ། གྲུབ་ཆེན་འདིས། གནས་སྐབས་འདིར་བསྒོམ་པར་གསུངས། སློབ་དཔོན་དྲིལ་བུ་པས། ལུས་དཀྱིལ་གྱི་ལྷ་རྣམས་གསལ་གདབ་ཟིན་པའི་རྗེས་སུ་བསྒོམ་པའང་གསུངས་ཤིང་། ནག་པོ་སྤྱོད་པ་བས། སངས་རྒྱས་སུ་བསྐྱེད་པ་དང་། དེ་ལ་མཆོད་པ་གཉིས་རྫོགས་ནས་བཟླས་པའི་གོང་དུ་བསྒོམ་པར་གསུངས་སོ། །དེ་དག་གི་དོན་ཡང་བསྒོམ་གཞི་ལྷ་གསལ་གདབ་པ་ཙམ་ནི་སྔོན་དུ་འགྲོ་དགོས་ཤིང་། དེའི་རྗེས་སུ་གང་དུ་བསྒོམས་ཀྱང་འདྲ་བར་བཞེད་དོ། །གཉིས་པ་ནི། སྤྱིར་བྱང་ཕྱོགས་སོ་བདུན་ལ་ཕ་རོལ་ཏུ་ཕྱིན་པའི་ཐེག་པ་ལས། མངོན་པ་གོང་འོག་གཉིས་ནས། སྡེ་ཚན་བདུན་གྱི་ས་མཚམས་ཅུང་ཟད་མི་འདྲ་བ་དང་། མངོན་རྟོགས་རྒྱན་ལས་སོ་བདུན་པོ་ཐམས་ཅད་རྣམ་མཁྱེན་གྱི་རྣམ་པར་བཤད་པ་དང་། རྡོ་རྗེ་ཐེག་པ་ལས་རྡོ་རྗེ་རྩེ་མོར་གཞལ་ཡས་ཁང་གི་ཆ་ཤས་ལ་སྦྱར་བ་དང་། ཀུན་སྤྱོད་ལས་ལྷ་སུམ་ཅུ་སོ་བདུན་ལ་སྦྱར་བ་དང་། སཾ་བུ་ཊིར། རབ་དགའ་ལ་སོགས་པའི་ས་བཅུ་གསུམ་ལ་སྦྱར་བ་སོགས་དུ་མ་ཡོད་པའི་ནང་ནས། སྐབས་འདིར་སངས་རྒྱས་ཀྱི་ཡེ་ཤེས་གཅིག་ཉིད་ལ་བྱང་ཕྱོགས་སོ་བདུན་ལྡོག་པའི་སྒོ་ནས་ཕྱེ་བའོ། །དེ་ཡང་སཾ་བུ་ཊིར། ཕ་རོལ་ཏུ་ཕྱིན་པའི་ལུགས་ཇི་ལྟ་བ་བཞིན་གྱི་བསྒོམ་ཚུལ་དང་གོ་རིམ་བཤད་ལ། ཀུན་སྤྱོད་གཉིས་པ་ལས། རྒྱས་བཤད་ཀྱི་སྐབས་སུ་སྐབས་འདི་ནས་བསྟན་པའི་ལྷའི་གོ་རིམ་བཞིན་དུ་བཤད་ཅིང་། དོན་བསྡུའི་སྐབས་སུ་སྡེ་ཚན་བདུན་པོ་ཕ་རོལ་ཏུ་ཕྱིན་པའི་གོ་རིམ་བཞིན་དུ་བཤད་དོ། །གསུམ་པ་ནི་ཀུན་སྤྱོད་གསུམ་པ་ལས། དེ་ལ་དེ་རྣམས་ཀྱི་ལྷའི་རྣལ་འབྱོར་པ་གྲངས་ཇི་ལྟ་བར་མདོར་བསྡུས་པ་སྟེ། ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ་ཞེས་པ་ནས། མི་དགེ་བའི་ཆོས་རྣམས་མ་སྐྱེས་པ་རྣམས་མི་བསྐྱེད་པ་ནི་གཤིན་རྗེ་འཇོམས་མའོ་ཞེས་པའི་བར་གསུངས་ཤིང་། སློབ་དཔོན་གྱི་གཞུང་ལས་ཀྱང་། དེས་ནས་གཞན་ཡང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལྷའི་སྦྱོར་བར་བྱ་སྟེ། དེ་དག་ཀྱང་གང་ཞེ་ན། ལུས་རྗེས་སུ་དྲན་པ་ནི་ཞེས་སོགས་རྒྱུད་ཀྱི་ཚིག་ཇི་ལྟ་བ་བཞིན་གསུངས་སོ། །རྒྱུད་གཞུང་འདི་གཉིས་ཆར་ལས། འཁོར་ལོ་གསུམ་གྱི་ཡུམ་འབའ་ཞིག་སྨོས་པ་ནི། ཤེས་རབ་ཀྱི་རྒྱུད་གཙོ་བོར་གྱུར་པ་དང་། རྩ་རྣམས་ལྷ་མོ་ཡིན་པ་ལ་དགོངས་ལ། ཡབ་ཧེ་རུ་ཀ་ཙམ་ཞིག་སྨོས་པས་ནི། ཡུམ་བཞིན་དུ་ཡབ་དཔའ་བོ་རྣམས་ཀྱང་དག་གོ །ཞེས་བྱ་བ་ལ་དགོངས་ལ། དེས་ན་བསྒོམ་པ་དང་བརྗོད་པ་གཉིས་ཀའི་དུས་སུ་ཟུང་འཇུག་ཏུ་ཤེས་པར་བྱ་བའི་ཕྱིར། འདིར་བསྡེབས་ཏེ་བྲིས་པ་ཡིན་ནོ་ཞེས་རྗེ་བཙུན་གྱིས་གསུངས་པས། གང་ལ་བསྒོམ་པར་བྱ་བའི་གཞི་ནི་ལྷ་སུམ་ཅུ་སོ་བདུན་པོ་ཐམས་ཅད་དོ། །བཞི་པ་ནི་རྗེ་བཙུན་དང་། དམར་གྱིས་དེ་ཡང་ལྷའི་སྐུ་རྡོས་པའི་རྣམ་པ་ལྟ་བུར་མཐོང་སྟེ། ལྷ་ལ་མངོན་པར་ཞེན་པ་སྐྱེས་ན་ཚུར་དག་ཏུ་སྦྱར་བར་བྱ་སྟེ་ཡང་དག་པར་ན་མཁའ་འགྲོ་མ་ནི་ལུས་རྗེས་སུ་དྲན་པའོ། །ཞེས་བྱ་བ་ལ་སོགས་པར་ཤེས་པར་བྱའོ། །ལམ་ལ་སོམ་ཉི་ཟ་ན་སྟེ། ཕ་རོལ་དུ་ཕྱིན་པའི་ཐེག་པ་ལ་ལམ་དམན་པའམ་ལོག་པ་ཞིག་ཏུ་གོ་ན་དེ་ནི་མ་ཡིན་ཏེ། ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ། །ཞེས་བྱ་བ་ལ་སོགས་པ་སྟེ། དག་བྱ་བྱང་ཆུབ་ཀྱི་སེམས་ཀྱི་ཆོས་སུ་བྱས་ནས་དག་བྱེད་ལྷས་དག་པར་བྱེད་པ་སྟེ། ལམ་དམན་པའམ་གུད་དུ་མ་ལས་པར་ཤེས་པར་བྱའོ། །དེ་ལྟར་ལྷ་ལ་ཞེན་པ་མི་སྐྱེ་ཞིང་། ལམ་ལ་སོམ་ཉི་མི་ཟ་ན་ནི་བྱང་ཆུབ་ཀྱི་ཕྱོགས་ཀྱི་དག་པ་ངག་ཏུ་བརྗོད་མི་དགོས་སོ་ཞེས་གསུངས་ལ་བླ་མ་གོང་མ་རྣམས་ནི་ཅིས་ཀྱང་ལག་ལེན་ལ་མཛད་དོ། །ཞེས་གསུངས་སོ། །ལྔ་པ་ནི་རྗེ་བཙུན་དང་། དམར་གྱི་བཞེད་པ་ནི་བསྒོམ་ཚུལ་གྱི་སྐབས་སུ་བསྟན་པ་དེ་ཉིད་ཡིན་ལ། དམར་གྱིས་དགོས་དོན་གྱི་སྐབས་སུ། ལྷ་ལ་ཞེན་པ་སྤང་བའི་ཕྱིར་ཡིན་ནོ། །སྤང་བྱ་ཞེན་པ་ལ་གསུམ་སྟེ། ལྷ་ལ་རྒྱུད་ཐ་དད་དུ་ཞེན་པ་དང་། ཡང་དག་ཏུ་ཞེན་པ་དང་། བེམ་པོར་ཞེན་པའོ། །དེ་ལ་ཞེན་པ་དང་པོའི་གཉེན་པོར། ལྷ་ཐམས་ཅད་གཙོ་བོའི་ཐུགས་གཉིས་སུ་མེད་པ། ཆོས་ཀྱི་སྐུར་རོ་གཅིག་ཏུ་གོ་བས་རྒྱུད་ཐ་དད་དུ་ཞེན་པ་སྤོང་ངོ་། །གསལ་བ་ལྟར་སྣང་ཡང་དེ་ལ་རང་བཞིན་མེད་པ་སྒྱུ་མ་ལྟ་བུར་བསྒོམས་པས་ཡང་དག་ཏུ་ཞེན་པ་སྤོང་ངོ་། །དེ་ཉིད་ཉམས་མྱོང་གསལ་བ་དང་མ་བྲལ་བས་བེམ་པོར་ཞེན་པ་སྤོང་ངོ་། །ཞེས་གསུངས་པས་ནི་རྡོ་རྗེ་ཐེག་པའི་བསྐྱེད་རིམ་གྱི་གནད་མཐའ་དག་ལ་མཁོ་བར་སྣང་ཞིང་། སྐབས་འདིར་ཕར་དག་གི་དགོས་པའི་དགོས་པ་དང་པོ་བསྟན་ཏེ། གཙོ་བོའི་ཐུགས་གཉིས་སུ་མེད་པའི་ཡེ་ཤེས། བྱང་ཕྱོགས་སོ་བདུན་ཉིད་ལྟར་ཤར་བར་བསྟན་པའི་ཕྱིར་རོ། །ཚུར་དག་གི་དགོས་པས་དགོས་པ་ཕྱི་མ་གཉིས་བསྟན་ཏེ། ལྷ་སུམ་ཅུ་སོ་བདུན་བྱང་ཕྱོགས་སོ་བདུན་དུ་ཤེས་པས་ཡང་དག་ཏུ་འཛིན་པ་དང་། བེམ་པོར་འཛིན་པ་གཉིས་ཀ་སྤོང་ནུས་པའི་ཕྱིར་རོ། །ཇོ་བོའི་འགྲེལ་པར་དགོས་པ་བཞི་གསུངས་ཏེ། ཧེ་རུ་ཀའི་ལྷ་ཚོགས་རྣམས་ཆོས་སྐུའི་རང་བཞིན་དུ་བསྟན་པ་དང་། ལྷར་ཞེན་པ་བཟློག་པ་དང་། སྒྱུ་མ་དང་སྟོང་པ་གཉིས་སུ་མེད་པར་མཚོན་པ་དང་། །ཅིག་ཆར་ལམ་དུ་བྱས་པ་ཐེག་པའི་ཁྱད་པར་རོ་ཞེས་གསུངས་པའི་དང་པོ་གསུམ་ནི་ཚུར་དག་གི་དགོས་པ་དང་། ཕྱི་མ་ནི་ཕར་དག་གི་དགོས་པ་ཡིན་པས་དོན་གཅིག་པར་སྣང་ངོ་། །འགྲེལ་པ་གསུམ་ལས། ལྷ་ལ་མངོན་པར་ཞེན་པ་དོར་བ་དང་། ཐམས་ཅད་ཤེས་པ་ཉིད་ཐོབ་པར་བྱ་བའི་ཕྱིར་དུ་བསྒོམ་པར་བཤད་པ་ཡང་རིམ་པ་ལྟར། ཕར་དག་དང་ཚུར་དག་གི་དགོས་པར་སྣང་སྟེ། མངོན་པར་ཞེན་པ་དོར་ཚུལ་ནི་བཤད་ཟིན་ལ། སརྦ་ཛྙཱ་ན་ཞེས་པ་གཅིག་ཉིད་ཐམས་ཅད་ཤེས་པ་དང་། ཐམས་ཅད་མཁྱེན་པ་གཉིས་ཀ་ལ་འཇུག་པས་བྱང་ཕྱོགས་སོ་བདུན་གཟུགས་ཀྱི་རྣམ་པ་ལྷ་སོ་བདུན་དུ་བསྒོམས་པས། ཕ་རོལ་ཏུ་ཕྱིན་པའི་ཐེག་པ་ལས་བསྒོམ་ཚུལ་ཁྱད་པར་འཕགས་པའི་སྒོ་ནས་བྱང་ཕྱོགས་སོ་བདུན་གྱིས་བསྡུས་པའི་ཐམས་ཅད་མཁྱེན་པའི་ཡེ་ཤེས་ཐོབ་ཅེས་པའི་དོན་ཡིན་པའི་ཕྱིར་རོ། །འདི་ལ་འདོད་འཇོ་མཁན་པོས། དེ་ལྟར་བཤད་པའི་དང་པོ་ནི། འབྲས་བུའི་སྐབས་ན་གཉིས་མེད་བདེ་ཆེན་གྱི་ཡེ་ཤེས་ཉིད་ལྷར་ཤར་བ་ཡིན་ལ། དེ་དང་རྗེས་སུ་མཐུན་པར་འབྲས་བུ་ལམ་དུ་བྱེད་པའི་དོན་ཡིན་གྱི། སོ་བདུན་པོ་ཐེག་ཆེན་གཞན་དང་ཐུན་མོང་བ་ཉིད་ལྷར་སྟོན་པ་དང་། ལྷ་སྐུ་ཤ་རུས་ལ་སོགས་པའི་རྡོས་ཅན་མ་ཡིན་པར་འཇའ་ཚོན་ལྟར་བསྒོམ་པ་ཙམ་གྱི་དོན་མ་ཡིན་ནོ་ཞེས་བཤད་པ་འདི་རྗེ་བཙུན་དང་། དམར་གྱི་བཞེད་པ་ལ་ཟུར་ཟ་བར་སྣང་ན་ཡང་། འབྲས་བུ་ལམ་བྱེད་དེ་ཉིད་ལ་ལྷའི་རྣམ་པར་ཞེན་པ་སྤངས་ནས། ཡེ་ཤེས་ཀྱི་ངོ་བོར་བསྒོམ་པའི་ཚུལ་དག་བསྒོམ་དགོས་པས་སྔ་མ་ནི་སུན་འབྱིན་མི་ནུས་ལ། ལྷ་སྐུ་ཤ་རུས་ལ་སོགས་པའི་རྡོས་ཅན་མ་ཡིན་པར་འཇའ་ཚོན་ལྟར་བསྒོམས་པ་ཙམ་གྱི་དོན་དུ་མི་འདོད་པས། ཕྱོགས་སྔ་ཡང་མ་ལོངས་པར་སྣང་ངོ་། །སོ་བདུན་པོ་ཐེག་ཆེན་གཞན་དང་ཐུན་མོང་བ་ཉིད་ལྷར་སྟོན་པ་མ་ཡིན་པ་དང་། ཁྱེད་རང་གིས་དགོས་པ་གཉིས་པ་བཤད་པའི་ཚེ། ཕུང་ཁམས་སྐྱེ་མཆེད་ཀྱི་གཞི་ཐམས་ཅད་རང་བཞིན་མེད་པར་ཤེས་པའི་རྟོགས་པ་དམ་པ་རྒྱུད་ལ་བསྐྱེད་པའི་དོན་ཡིན་ཅེས་འཆད་པ་གཉིས་ནང་འགལ་ཏེ། ཐམས་ཅད་ཤེས་པ་ཅེས་པའི་དོན་གཞི་ཤེས་ལ་བྱས་འདུག་པའི་ཕྱིར་རོ། །དྲུག་པ་ནི་རྗེ་བཙུན་གྱིས། གཞུང་ནས་ཡང་དག་སྤོང་བ་ཞེས་མཇུག་དུ་སྨོས་པ་ནི། ལྷའི་གོ་རིམ་མི་འཁྲུག་པར་བྱ་བའི་ཕྱིར་ཡིན་ལ། དཔལ་ཧེ་རུ་ཀ་མཇུག་ཏུ་སྨོས་པ་ནི་བྱང་ཆུབ་ཀྱི་ཕྱོགས་ཀྱི་འཕགས་པའི་ལམ་ཡན་ལག་བརྒྱད་ཀྱི་གོ་རིམ་མི་འཁྲུག་པར་བྱ་བའི་དགོས་པ་ཡིན་ནོ་ཞེས་གསུངས་ལ། གཞན་ཡང་ཀུན་སྤྱོད་ལས་གསུངས་པའི་ས་དང་ལྷའི་གོ་རིམ་ལ་སྦྱར་བ་དང་། སཾ་བུ་ཊི་ནས་གསུངས་པའི་སྦྱར་ཚུལ་གོ་རིམ་མི་འདྲ་བར་སྣང་བ་ནི། སངས་རྒྱས་ཀྱི་ཡེ་ཤེས་གཅིག་ཉིད་ལ་བྱང་ཕྱོགས་སོ་བདུན་ལྡོག་པའི་སྒོ་ནས་ཕྱེ་བ་ཡིན་པས། གང་ལྟར་སྦྱར་ཡང་འགལ་བ་མེད་པར་རྟོགས་པའི་ཆེད་ཡིན་ནོ། །གཉིས་པ་ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་ལ་གཉིས་ཏེ། ལུས་ཀྱི་དཀྱིལ་འཁོར་བསྒོམ་ཚུལ། སྔགས་ཀྱི་བྱིན་གྱིས་བརླབ་པའི་ཚུལ་ལོ། །དང་པོ་ནི་སློབ་དཔོན་གྱི་གཞུང་ལས། དེ་ནས་གཞན་ཡང་སྐུའི་དཀྱིལ་འཁོར་མཆོག །ཅེས་པ་ནས། འདི་དག་ནི་སྐུའི་འཁོར་ལོ་སྟེ། ས་འོག་ན་གནས་པའོ་ཞེས་པའི་བར་གྱིས་བསྟན་ཏེ། འདི་འཆད་པ་ལ་གཞུང་ལས་བཤད་པའི་ལུས་དཀྱིལ་ངོས་གཟུང་། མ་བཤད་པའི་ལུས་དཀྱིལ་ཁ་བསྐང་བའི་ཚུལ། དེ་དག་གི་བསྒོམ་ཚུལ་ཞིབ་ཏུ་བཤད་པ། དེ་ལྟར་བསྒོམ་པའི་དགོས་པ། རྟོག་པས་བརྟགས་པའི་ལུགས་དགག་པ་དང་ལྔ་ལས། དང་པོ་ནི། ལཱུ་ནག་གཉིས་ཀྱི་གཞུང་ལས། འཁོར་ལོ་གསུམ་གྱི་ལུས་དཀྱིལ་ཁོ་ན་བཤད་ཀྱི། གཞན་ལྷ་བཅུ་གསུམ་དང་། རྟེན་ལུས་དཀྱིལ་མ་བཤད་པ་ནི་ཨ་བྷི་དྷ་ནའི་དགུ་པ་མ་གཏོགས་པའི་ལུས་དཀྱིལ་སྟོན་པའི་སྐབས་ཕལ་ཆེར་དང་། རྡོ་རྗེ་མཁའ་འགྲོ་དང་། ཀུན་སྤྱོད་ཀྱི་ལུས་དཀྱིལ་སྟོན་པའི་སྐབས་རྣམས་སུ། འཁོར་ལོ་གསུམ་གྱི་ལུས་དཀྱིལ་ལས་གཞན་མ་བཤད་པའི་དབང་དུ་བྱས་པའོ། །དེ་དག་ལས་དེ་ལྟར་བཤད་པའི་རྒྱུ་མཚན་ཡང་། ཕ་རོལ་ཏུ་ཕྱིན་པ་བ་དག་དེ་དང་མི་མཐུན་པའི་སའི་རྣམ་གཞག་མཐོང་ན། འགྱོད་པ་སྐྱེ་བར་འགྱུར་བས་དེ་བཟློག་ནས། དེ་དང་ལུང་སྒོ་བསྟུན་གྱི་དབང་དུ་བྱས་པ་སྟེ། རྩ་རྒྱུད་དང་། སཾ་བུ་ཊ་གཉིས་ཀ་ལས། གནས་དེ་རབ་ཏུ་དགའ་བའི་ས། །དེ་བཞིན་ཉེར་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་དེ་འོད་འཕྲོ་ཅན། །ཚནྡོ་མངོན་དུ་གྱུར་པ་སྟེ། །ཉེ་བའི་ཚནྡོ་སྦྱང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །པུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཞེས་གསུངས་པས་སོ། །དེ་ལྟར་ཕ་རོལ་ཏུ་ཕྱིན་པ་དང་ལུང་སྒོ་བསྟུན་ན། སློབ་ལམ་ས་བཅུ་ལས་མེད་པས། རྒྱུད་གཞུང་རྣམས་ཀྱི་དངོས་བསྟན་འཁོར་ལོ་གསུམ་གྱི་ལུས་དཀྱིལ་ལས་མ་གསུངས་ཀྱང་། དོན་ལ་ས་བཅུ་གསུམ་མི་བཞེད་པ་མ་ཡིན་པས། ལུས་དཀྱིལ་ལ་ཡང་དེ་དང་མཐུན་པར་འབྱུང་དགོས་ཏེ། མངོན་བརྗོད་ལས། དཔེ་མེད་པ་དང་ཡེ་ཤེས་ལྡན། །རྡོ་རྗེའི་ས་ནི་བཅུ་གསུམ་པ། །ཞེས་གསུངས་ཤིང་། རྩ་རྒྱུད་ལས། རྣལ་འབྱོར་མ་ཡི་ས་དང་གནས། །ཧེ་རུ་ཀ་དཔལ་སྐུའི་ཡན་ལག །ཐམས་ཅད་བརྟན་གཡོའི་བདག་ཉིད་ཅན། །ཞེས་རྣལ་འབྱོར་མ་རྒྱུད་ཀྱི་ས་དང་། གནས་ཐམས་ཅད་ལུས་ལ་ཚང་དགོས་པར་གསུངས་པའི་ཕྱིར་རོ། །གཉིས་པ་ལ་གཉིས་ཏེ། ལྷ་བཅུ་གསུམ་ཁ་བསྐང་བའི་ཚུལ། རྟེན་གྱི་དཀྱིལ་འཁོར་ཁ་བསྐང་བའི་ཚུལ་ལོ། །དང་པོ་ནི། དེ་ལྟར་འཁོར་ལོ་གསུམ་གྱི་སྟེང་དུ། ས་ལྷག་མ་རྣམས་བགྲོད་པའི་ལུས་དཀྱིལ་ཁ་བསྐང་དགོས་ན། དཀྱིལ་འཁོར་གང་ཞིག་ཁ་བསྐང་སྙམ་ན། འདིར་རྫོགས་པའི་རིམ་པ་དང་ཐུན་མོང་གི་དབང་དུ་བྱས་ནས། སཾ་བུ་ཊི་ལས། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་བརྗོད་པ་ཉིད། །དཀྱིལ་འཁོར་བྱང་ཆུབ་སེམས་ཉིད་དེ། །དཀྱིལ་འཁོར་གསུམ་ནི་ཡོངས་སུ་བརྟག །ཅེས་ལུས་རྩའི་དཀྱིལ་འཁོར་ལ། རྩ་ཉི་ཤུ་རྩ་བཞི་དང་། བུ་ག་བརྒྱད་དང་འབྲེལ་བའི་རྩ་བརྒྱད། སྙིང་ག་སྦས་པའི་རྩ་ལྔ་སྟེ། སུམ་ཅུ་རྩ་བདུན། རྩ་ཡི་གེའི་དཀྱིལ་འཁོར་ལ། པུ་ཛཱ་ལ་སོགས་པ་ཉེར་བཞི་དང་། ཧཱུྃ་རིང་པོ་བརྒྱད་དང་། ཀྱཻ་རྡོར་ལྟར་ན། བྷྲཱུྃ་ཨཱྃ་ཛྲཱིྃ་ཁྃ་ཧཱུྃ་ངམ། བདེ་མཆོག་ལྟར་ན། ལྃ་མཱྃ་པཱྃ་ཏཱྃ་ཧཱུྃ་སྟེ་སུམ་ཅུ་རྩ་བདུན། བྱང་ཆུབ་སེམས་ཀྱི་དཀྱིལ་འཁོར་ལ། སོ་དང་སེན་མོ་བསྐྱེད་པ་ལ་སོགས་པའི་ཁམས་ཉི་ཤུ་རྩ་བཞི། རྣམ་ཤེས་བརྒྱད་དང་འབྲེལ་བའི་ཁམས་བརྒྱད། དེ་དག་གི་རྩ་བ་བདུད་རྩི་ལྔ་སྟེ་སུམ་ཅུ་རྩ་བདུན་ཏེ། ཚན་པ་གསུམ་དང་། དེ་དག་གི་ཁྱབ་བྱེད་དུ་གྱུར་པའི་རླུང་རྣམས་ཀྱིས་ས་བཅུ་གསུམ་བགྲོད་དགོས་པས། ལྷ་ལྷག་མ་བཅུ་གསུམ་ངེས་པར་ཁ་བསྐང་དགོས་པའོ། །འོ་ན་ལྷ་གང་། ལུས་ཀྱི་གནས་གང་དུ་ཁ་བསྐང་ན། དམར་གྱིས་ཡེ་ཤེས་ཀྱི་འཁོར་ལོའི་ལྷ་ལྔ་སྙིང་གར་བསྒོམ་པ་དང་། དམ་ཚིག་གི་འཁོར་ལོའི་སྒོ་མཚམས་མ་བརྒྱད། སྣ་བུག་གཉིས་གཅིག་ཏུ་བྱས་པའི་བུ་ག་བརྒྱད་དུ་བསྒོམ་པ་ནི། བཤད་རྒྱུད་སཾ་བུ་ཊའི་རྗེས་སུ་འབྲངས་ནས་བྷ་དན་ཏ་བཞེད། སློབ་དཔོན་རྡོ་རྗེ་དྲིལ་བུ་པས་ངེས་བརྗོད་ཀྱི་རྗེས་སུ་འབྲངས་ནས་སྙིང་གའི་བདེ་ཆེན་འཁོར་ལོའི་ཕྱི་རོལ་དུ་རྩ་འདབ་མ་བརྒྱད་ལ་བསྒོམ་གསུང་ངོ་། །བླ་མ་ཕམ་འཐིང་པ་རྡོ་རྗེ་མཁའ་འགྲོའི་རྗེས་སུ་འབྲངས་ནས། ལྷ་མོ་བཅུ་གཉིས་གཙོ་བོའི་ཕྱག་བཅུ་གཉིས་ལ་འགོད་པ་ཡིན་ནོ་ཞེས་གསུངས་ཀྱང་། སྙིང་གའི་རྩ་འདབ་ལ་འགོད་པ་ངེས་བརྗོད་ན་གསལ་བར་མི་སྣང་ཞིང་། ཕྱག་བཅུ་གཉིས་ལ་འགོད་པ་ངེས་བརྗོད་ན་གསལ་བར་སྣང་ངོ་། །འོ་ན་ཅི་ལྟར་སྙམ་ན། འདི་ལ་ཕ་རོལ་ཏུ་ཕྱིན་པ་དང་ལུང་སྒོ་བསྟུན་དབང་བཙན་པར་བྱས་ནས། ཇོ་བོ་ནཱ་རོ་ཏ་པ་དོན་ལ་ས་བཅུ་གཅིག་ལས་མི་བཞེད་པར་རྒྱ་གར་ན་གྲགས་ཤིང་། མུ་ཏིག་ཕྲེང་བ་ལས་ཀྱང་། ས་བཅུ་གསུམ་དུ་བཤད་པ་ནི་གདུལ་བྱ་སྤྲོ་བ་བསྐྱེད་པའི་ཆེད་ཡིན་གྱི། དོན་ལ་ས་བཅུ་གཅིག་ལས་མེད་གསུང་ཞེས་པ་ཡང་། ནཱ་རོ་པའི་གསུང་སྒྲོས་ཀྱི་དབང་དུ་བྱས་པ་ཡིན་པས་དེའི་མན་ངག་འཛིན་པའི་ཕམ་འཐིང་པའི་བརྒྱུད་པ་འདི་ལ། མ་མོ་བཅུ་གཉིས་ཕྱག་བཅུ་གཉིས་ལ་འགོད་པར་སྣང་སྟེ། ས་ཆེན་གྱིས། ནག་པོ་པའི་སྐབས་དང་རྗེ་བཙུན་གྱིས་ལཱུ་ཧི་པའི་སྐབས་སུ་དེ་ལྟར་གསུངས་པས་སོ། །ཕྱག་བཅུ་གཉིས་ལ་འགོད་པ་འདི་ཡང་ངེས་བརྗོད་ཀྱི་དགོངས་པར་སྣང་སྟེ། དེ་ཉིད་ལས། མཁའ་འགྲོ་མ་ནི་རྡོ་རྗེ། ལཱ་མ་ནི་དྲིལ་བུ། དུམ་སྐྱེས་མ་དང་གཟུགས་ཅན་མ་ནི་གླང་པོ་ཆེའི་པགས་པ་འཛིན་པའི་ཁུ་ཚུར། ཁྭ་གདོང་མ་ནི་རྡོ་རྗེ་མདུང་། འུག་གདོང་མ་ནི་ལྕགས་ཀྱུ། ཁྱི་གདོང་མ་ནི་གྲི་གུག ཕག་གདོང་མ་ནི་ཅང་ཏེའུ། གཤིན་རྗེ་སྲེག་མ་ནི་ཐོད་པའི་ཁ་ཊྭཱཾ་ག གཤིན་རྗེ་ཕོ་ཉ་མ་ནི་ཞགས་པ། གཤིན་རྗེ་མཆེ་བ་མ་ནི་ཚངས་པའི་མགོ་བོ། གཤིན་རྗེ་འཇོམས་པ་ནི་དགྲ་སཏྭ། བྱང་ཆུབ་ཀྱི་སེམས་ཀྱི་སྣོད་ནི་ཞལ་བཞིའི་ངོ་བོ་ཞེས་གསུངས་པ་འདི། གཙོ་བོའི་ཕྱག་མཚན་དང་ཅུང་ཟད་མི་འདྲ་ཡང་། ཕྱག་ལ་འགོད་ཚུལ་འདྲ་བའི་ཕྱིར་རོ། །དེའི་ཚེ་གཙོ་བོ་གང་དུ་འགོད་ན། སྤྱིར་མངོན་བརྗོད་དགུ་པའི་ལུགས་འདི། ཕྱིའི་ཧེ་རུ་ཀའི་ལུས་ལ། ལྷ་སུམ་ཅུ་སོ་དྲུག་དང་། ཕུང་ཁམས་སྐྱེ་མཆེད་ཀྱི་ལྷ་བཅུ་བདུན་དང་། སྐུ་གསུང་ཐུགས་ཀྱི་རྡོ་རྗེ་གསུམ་སྟེ། ལྷ་ལྔ་བཅུ་ང་དྲུག་འགོད་པ་ལས་གཙོ་བོ་འགོད་པ་མ་གསུངས་ཀྱང་། སཾ་བུ་ཊ་ལས། ལུས་ཀྱི་སྙིང་གི་ནང་དུ་ཡང་། །རྩ་རྣམས་ལྔ་ནི་རྣམ་པར་གནས། །ཞེས་དང་། རྡོ་རྗེ་དྲིལ་བུ་པས། ཐུགས་སུ་ཨ་ཝ་དྷཱུ་ཏཱི་ཧཱུྃ། །མ་བཅོས་ནང་གི་བདག་ཉིད་དོ། །ཞེས་གསུངས་པས། སྙིང་གར་འགོད་པ་ལས་འོས་མེད་པས། རྗེ་བཙུན་གྱིས་ཀྱང་དེ་ལྟར་གསུངས་སོ། །འོ་ན་ས་བཅུ་གསུམ་བགྲོད་པའི་ལུས་དཀྱིལ་ཇི་ལྟར་བསྒོམ་སྙམ་ན། འདི་ལ་ལཱུ་ནག་གཉིས་ཀྱི་སྐབས་སུ་ཡང་། དྲིལ་བུ་པའི་གཞུང་ལས་གསུངས་པ་ལྟར། སྙིང་གའི་རྩ་འདབ་ཕྱི་ནང་ལ་འགོད་པ་འདི་ཉིད་དགོས་པ་ལ་དགོངས་ནས། གཞུང་དུ་གསལ་བར་མ་གསུངས་པར་མན་ངག་གི་ཁ་བསྐང་དགོས་པའི་གནད་ཀྱང་འདི་ཉིད་ཡིན་ནོ། །སྡོམ་འབྱུང་ལས། བུ་ག་བརྒྱད་ལ་འགོད་པར་གསུངས་ཀྱང་འདི་དང་གནད་འདྲ་སྟེ། བུ་ག་བརྒྱད་དང་འབྲེལ་བའི་རྩ་བརྒྱད་ནི་སྙིང་གའི་ཕྱི་སྐོར་གྱི་རྩ་བརྒྱད་པོ་དེ་ཉིད་ཡིན་པས། རྩའི་ངོ་བོ་ལ་འགོད་པ་དང་། རྩའི་འབྲས་བུ་ལ་འགོད་པའི་ཁྱད་པར་ཙམ་ཡིན་པའི་ཕྱིར་དང་། བུ་ག་བརྒྱད་དུ་དུར་ཁྲོད་བརྒྱད་འགོད་པར་གསུངས་ཤིང་། སྒོ་མཚམས་མ་བརྒྱད་ཀྱང་དུར་ཁྲོད་བརྒྱད་ན་བཞུགས་པའི་དབང་དུ་བྱས་པ་ཡིན་པའི་ཕྱིར་རོ། །གཉིས་པ་ནི་རྟེན་ལུས་དཀྱིལ་ལཱུ་ནག་གཉིས་ཀྱི་གཞུང་ལས་དངོས་སུ་མ་གསུངས་ཀྱང་མན་ངག་གིས་ངེས་པར་ཁ་བསྐང་དགོས་ཏེ། སཾ་བུ་ཊི་ལས། ལུས་ནི་དཀྱིལ་འཁོར་ཉམས་དགའ་བ། །སྒོ་བཞི་ཇི་སྐད་གསུངས་པའོ། །རང་གི་ཡན་ལག་བརྒྱད་བྱུང་བས། །ཀ་བ་དེ་ཡིས་བསྐོར་ནས་གནས། །དངོས་པོ་ཀུན་གྱིས་མཉམ་པའི་ཕྱིར། །གྲུ་བཞི་པར་ནི་རབ་ཏུ་གྲགས། །སྐུ་གསུང་ཐུགས་ཀྱི་ངོ་བོ་ནི། །འཁོར་ལོ་གསུམ་ནི་གཅིག་ཏུ་གསུངས། །རི་ནི་མགོ་བོའི་ཟེའུ་འབྲུ་ལ། །ཇི་ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །དེ་ནི་རྫོགས་པར་དཀྱིལ་འཁོར་གནས། །རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ཟླུམ་པོའི་རྣམ་པའི་གཟུགས་ཀྱིས་ནི། །ཆུ་ནི་ལྟོ་བར་རྣམ་པར་གནས། །སྙིང་ཁར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱིག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །ཞེས་གསུངས་པའི་དོན་གྲུབ་ཆེན་དྲིལ་བུ་པས། རྐང་མཐིལ་སུམ་མདོ་ལྟོ་སྙིང་ག །རླུང་དང་མེ་ཆུ་ས་ཡིན་ནོ། །སྒལ་ཚིགས་རི་རྒྱལ་དེ་བཞིན་ཏེ། །ལུས་ནི་མཉམ་པ་སྒོ་བཞི་རླུང་། །རྒྱན་རྣམས་རབ་མཛེས་ཧེ་རུ་ཀའི། །ལུས་ནི་དཀྱིལ་འཁོར་དུ་འདོད་དོ། །ཞེས་དངོས་སུ་གསུངས་པས་ལཱུ་ནག་གཉིས་ཀྱི་སྐབས་སུ་ཡང་དེ་དག་བསྒོམ་དགོས་པར་གྲུབ་པའི་ཕྱིར་རོ། །དེར་མ་ཟད་ལཱུ་ཧི་པའི་སྐབས་སུ། དེར་ནི་སྤྱི་བོའི་ཆར་གནས་པ། །འདམ་སྐྱེས་འདབ་མ་སུམ་ཅུ་གཉིས། །དབྱངས་དང་གསལ་བྱེད་མཛེས་པར་གནས། །སུམ་ཅུ་རྩ་གཉིས་བྱང་ཆུབ་འདོད། །པདྨའི་ནང་དུ་སོན་པ་གང་། །དེ་ནི་ཟླ་བའི་དཀྱིལ་འཁོར་བརྗོད། །སྤྱི་བོའི་ནང་དུ་ཀླད་པ་ནི། །གང་ཞིག་གནས་པ་དེ་རུ་གསུངས། །དེ་ནང་ཧཾ་གི་རྣམ་པ་ནི། །ཐིག་ལེའི་གཟུགས་ཅན་མི་ཤིགས་པ། །འཇིག་རྟེན་ཀུན་གྱི་རྩ་བ་དེ། །བརྟེན་པའི་བདག་ཉིད་གཡོ་བའི་བདག །གསལ་དང་མི་གསལ་གཟུགས་ལས་ནི། །ས་བོན་གཟུགས་ཀྱིས་ཡང་དག་གནས། །ཞེས་གསུངས་པའི་དོན་རྣམས་ཀྱང་བསྒོམ་དགོས་པར་གྲུབ་བོ། །རིན་པོ་ཆེ་བུས། སཾ་བུ་ཊི་ནས་གསུངས་པའི་རྟེན་ལུས་དཀྱིལ་བསྒོམ་པ་དང་། བཤད་རྒྱུད་རྡོ་རྗེ་ཕྲེང་བ་ནས་གསུངས་པའི་རྟེན་ལུས་དཀྱིལ་བསྒོམ་པར་འདམ་ཁ་ཅན་དུ་གསུངས་པ་མི་འཐད་དེ། སྐབས་འདིར་གསང་མཐའ་རང་གི་བཤད་རྒྱུད་ནས་བཤད་པའི་རྟེན་ལུས་དཀྱིལ་ཡོད་བཞིན་དུ། ཕ་རྒྱུད་ནས་གསུངས་པའི་རྟེན་ལུས་དཀྱིལ་དང་གདམ་ཁ་ཅན་བྱེད་དོན་མེད་པའི་ཕྱིར་རོ། །གསུམ་པ་དེ་དག་གི་བསྒོམ་ཚུལ་ཞིབ་ཏུ་བཤད་པ་ལ་གཉིས་ཏེ། བསྐྱེད་ཆོག་ཡོད་མེད་ཀྱི་ཚུལ་ལ་དཔྱད་པ། གནས་དང་རྣམ་པ་སོགས་བཤད་པའོ། །དང་པོ་ནི། སྤྱིར་ལུས་དཀྱིལ་ལ་བསྐྱེད་ཆོག་ཡོད་པའི་ལུགས་དང་། དེ་མེད་པར་རྐྱེན་ཙམ་གྱིས་གསལ་གདབ་པའི་ལུགས་གཉིས་ལས། དང་པོ་ནི། ཕ་རྒྱུད་གསང་བ་འདུས་པའི་ལུས་དཀྱིལ་ཏེ། སྤྱི་བོ་ལ་སོགས་པར་ཨོཾ་ལ་སོགས་པ་རྩ་ཁམས་ཀྱི་རང་བཞིན་གྲུབ་པ་མེད་ཀྱང་། གཟུགས་ཕུང་ལ་སོགས་པའི་ངོ་བོ་ཨོཾ་ལ་སོགས་པ་གསར་དུ་བསྐྱེད་ནས། དེ་ཡོངས་སུ་གྱུར་པ་ལས་རྣམ་སྣང་ལ་སོགས་པའི་ལྷ་གསལ་འདེབས་པའམ། ཡི་གེའི་རྣམ་པ་ཉིད་ལྷའི་ངོ་བོར་བསྒོམ་པ་གང་རུང་བྱ་བར་གསུངས་ཏེ། གསང་འདུས་རྩ་རྒྱུད་ལས། རིག་པ་ཆེན་པོའི་སྐྱེས་བུའི་གཟུགས་འདི་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱིས་བྱིན་གྱིས་བརླབ་བོ་ཞེས་གསུངས་པའི་དོན། འགྲེལ་པས། སྔགས་ནི་ཨོཾ་ལ་སོགས་པ་དང་། བྱིན་གྱིས་བརླབ་པ་ནི་བཀོད་པ་ལ་བཤད་པའི་ཕྱིར་དང་། མདོར་བྱས་ལས་ཀྱང་། རྣམ་སྣང་མཛད་ཀྱི་ཡི་གེ་ཨོཾ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་དགོད། །ཅེས་གསུངས་པའི་ཕྱིར་རོ། །འདི་དང་ཕྱི་ལ་ཨོཾ་ཡོངས་སུ་གྱུར་པ་ལས། རྣམ་སྣང་བསྒོམ་པ་བསྐྱེད་ཆོག་ཡིན་མིན་གྱི་ཁྱད་པར་མེད་པས་བསྐྱེད་ཆོག་ལས་བསྐྱེད་པའི་ལུགས་ཏེ། མ་རྒྱུད་ལ་ལྟོས་ནས་མི་ཟབ་བོ། །གཉིས་པ་ནི་སྐབས་འདིར་གཞུང་འགྲེལ་རྣམས་ལས་ལུས་དཀྱིལ་གསལ་གདབ་པ་ཙམ་མ་གཏོགས། བསྐྱེད་ཆོག་དང་རྐྱེན་གང་ཡང་མ་གསུངས་ཀྱང་ནཱ་རོ་པའི་མན་ངག་རྗེ་བཙུན་དང་། དམར་གྱིས་སྒྲ་ཚུལ་གྱི་རྐྱེན་གྱིས་གསལ་གདབ་པར་གསུངས་ཏེ། དེ་ནས་འོག་རླུང་གིས་ལྟེ་བའི་ཨཾ་མས་འཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧཾ་ཡས་ཕུལ་བ་ནི་སྒྲ་སྟེ་དེ་ལྟར་སྒྲ་ཚུལ་གཉིས་སྙིང་གའི་གནས་སུ་དཀྲུག་གིས་འདྲེས་པས་རྐྱེན་བྱས་ནས་རྟེན་དང་བརྟེན་པ་ཕྱིའི་ཧེ་རུ་ཀ་དང་བཅས་པ་དུས་གཅིག་ཏུ་ཝལ་གྱིས་བསྐྱེད་ལ་རིམ་གྱིས་གསལ་གདབ་པར་བྱ་སྟེ། ཞེས་གསུངས་ཤིང་། དམར་གྱིས་སྒྲ་ཚུལ་དེ་ལྟར་གསུངས་པའི་རྗེས་སུ། སྒྲ་ཚུལ་ལས་བྱུང་བ་ཞེས་གསུངས་ཀྱང་རྐྱེན་ལས་འོས་མ་འདས་སོ། །འོ་ན་ཕྱིའི་སྒྲ་ཚུལ་ཡང་བསྐྱེད་ཆོག་མ་ཡིན་པར་རྐྱེན་ཙམ་དུ་གསུངས་སོ་སྙམ་ན། བློ་གྲོས་རྩིང་པོས་བརྟགས་ན་དེ་ལྟར་ཡིན་ཡང་། རྣམ་དཔྱོད་ཞིབ་མོས་དཔྱད་ན་ཡེ་མི་མཚུངས་ཏེ། ཕྱིའི་སྒྲ་ཚུལ་ལ་ནི་སྒྲ་ཚུལ་དེ་ཉིད་རོ་གཅིག་ཏུ་འདྲེས་པ་ལས། རྟེན་བརྟེན་པ་ཅིག་ཆར་དུ་བྱུང་བ་ཡིན་པས་ཉེར་ལེན་གྱི་རྒྱུ་གཞན་མེད་ལ། འདིར་ནི་ཉེར་ལེན་གྱི་རྒྱུ་རྐང་མཐིལ་ལ་སོགས་པའི་ལུས་རགས་པ་དང་། པུ་ཛཱ་ལ་སོགས་པའི་ཕྲ་བ་རྩ་ཁམས་རྣམས་རང་རང་གི་གནས་སུ་རྟེན་དང་བརྟེན་པའི་ངོ་བོར་རང་བཞིན་གྱིས་གྲུབ་ནས་ཡོད་པ་སྙིང་གའི་སྒྲ་ཚུལ་གྱི་རྐྱེན་གྱིས་རྣམ་པ་བློ་ངོར་གསལ་བ་ཙམ་ཡིན་པའི་ཕྱིར་རོ། །དེ་བཞིན་དུ་པུ་ཛཱ་ལ་སོགས་པ་ལུས་དཀྱིལ་གྱི་ལྷར་བསྐྱེད་པ་ཡང་། ཕྱིའི་ས་བོན་ལས་བསྐྱེད་པ་དང་ཡེ་མི་འདྲ་སྟེ། འདི་ནི་པུ་ཛཱ་ལ་སོགས་པ་ངོ་བོ་ལྷ་ཡིན་ཀྱང་། རྣམ་པ་ཡི་གེའི་དབྱིབས་སུ་གནས་པ་དེ་ཉིད་ལྷའི་རྣམ་པར་ཤར་བ་ཙམ་ཡིན་ལ། ཕྱི་ལ་ནི་ཨོཾ་ལ་སོགས་པ་སྔར་མེད་གསར་དུ་བསྐྱེད་ནས། དེ་འོད་དུ་ཞུ་བ་ལས་ལྷ་ཞལ་ཕྱག་གི་རྣམ་པ་ཅན་གྲུབ་པ་ལ་འཇོག་དགོས་པའི་ཕྱིར་རོ། །དེ་བཞིན་དུ་ནག་པོ་པའི་སྒྲུབ་ཐབས་ལས། བསྐྱེད་ཆོག་དང་རྐྱེན་གང་ཡང་མ་གསུངས་ཀྱང་། ནཱ་རོ་པའི་མན་ངག་གིས། དཀྱིལ་འཁོར་རྒྱལ་མཆོག་གི་ལྷ་རང་གནས་སུ་འཁོད་པས་རྐྱེན་བྱས་ནས་ལུས་ཀྱི་གནས་དེ་དང་དེར་ལྷ་ཞལ་ཕྱག་གི་རྣམ་པ་ཅན་བསྒོམ་པར་གསུངས་པ་དང་། རྡོ་རྗེ་དྲིལ་བུ་པས། འོད་ཟེར་སྤྲོས་པས་སྔོན་འགྲུབ་པ། །བསྐུལ་ནས་ཕྱག་འཚལ་རང་ལུས་གཞུག །རྐང་མཐིལ་སུམ་མདོ་ལྟོ་སྙིང་ག །རླུང་དང་མེ་ཆུ་ས་ཡིན་ནོ། །ཞེས་དང་། དྲིལ་བུ་གཞུང་ཆུང་ལས། མཛོད་སྤུའི་ནང་ནས་རང་ལུས་གཞུག །ལུས་ལ་རྟེན་དང་བརྟེན་པ་ཡི། །འཁོར་ལོ་གསལ་གདབ་ཉེ་བར་དམིགས། །ཞེས་ཚོགས་ཞིང་བསྟིམས་པའི་རྐྱེན་གྱིས་གསལ་གདབ་པར་གསུངས་པ་དང་། དེ་བཞིན་དུ་ཀྱེ་རྡོ་རྗེའི་མན་ངག་ལས། ཚོགས་ཞིང་བསྟིམས་པའི་རྐྱེན་དང་། ཡེ་ཤེས་ཀྱི་འཁོར་ལོ་དགུག་གཞུག་གི་རྐྱེན་གྱིས་གསལ་གདབ་པར་གསུངས་པ་རྣམས་ཀྱང་། ལུས་ལ་རང་བཞིན་གྱིས་གྲུབ་པ་རྐྱེན་གྱིས་གསལ་གདབ་པའི་ལུགས་ཏེ། མ་རྒྱུད་ཀྱི་ཟབ་ཁྱད་ཡིན་པར་སྐལ་བ་དང་ལྡན་པ་དག་གིས་ཤེས་པར་གྱིས་ཤིག གསུམ་པ་དེ་དག་གི་བསྒོམ་ཚུལ་ཞིབ་ཏུ་བཤད་པ་ནི། དེ་ལྟར་སྒྲ་ཚུལ་གྱི་རྐྱེན་གྱིས་ཅིག་ཆར་དུ་རྣམ་པར་གྲུབ་པ་རིམ་གྱིས་གསལ་གདབ་པའི་ཚེ་ཐོག་མར་རྟེན་གསལ་གདབ་པ་ནི་རྐང་མཐིལ་གཉིས་སུ་རླུང་གི་དཀྱིལ་འཁོར་སྦྱང་གཞི་དང་ཚད་མཉམ་པ་རེ་རེ་བསྒོམས་ནས། འདི་ཕྱིའི་གཞལ་ཡས་ཁང་གི་རྟེན་དུ་གྱུར་པའི་རླུང་གི་དཀྱིལ་འཁོར་ཉིད་ཡིན་སྙམ་དུ་ཞེན་པ་བྱ་ཞིང་། ཕྱིའི་གཞལ་ཡས་ཁང་གི་རྟེན་དུ་གྱུར་པའི་རླུང་གི་དཀྱིལ་འཁོར་ཡང་འདི་ཉིད་ཡིན་སྙམ་དུ་ཞེན་ན་ཡང་ཁྱད་པར་མེད་དེ། གནས་རྐང་མཐིལ་དེར་དེ་གཉིས་དབྱེར་མེད་གཅིག་དུ་བསྒོམ་དགོས་པའི་ཕྱིར་རོ། །དེ་བཞིན་དུ་གཞན་རྣམས་ལ་ཡང་འགྲེའོ། །སུམ་མདོ་གྲུ་གསུམ་ནི་མེའི་དཀྱིལ་འཁོར་གྲུ་གསུམ། ལྟོ་བ་ཟླུམ་པོ་ནི་ཆུའི་དཀྱིལ་འཁོར་ཟླུམ་པོ་དང་། བྲང་གྲུ་བཞི་ནི་སའི་དཀྱིལ་འཁོར་གྲུ་བཞི་དང་། སྒལ་ཚིགས་བརྩེགས་པ་དབྱུ་གུའི་གཟུགས་སུ་ཡོད་པ་ནི་རི་རབ་དང་། མགོ་བོའི་ཟུར་བཞི་པོ་རི་རབ་ཀྱི་སྟོད་ཀྱི་ཆ་སྟེ་མཚམས་བཞིའི་ལྕོག་དང་། དཔྲལ་བ་དང་། ལྟག་པ་དང་། རྣ་བ་གཉིས་ནི་རི་རབ་ཀྱི་སྟེང་གི་སྣ་ཚོགས་རྡོ་རྗེ་དང་། ཀླད་པ་དཀར་པོ་ནི་མངོན་བྱང་ལྔའི་ཟླ་བ་དང་། ཀླད་ཁྱིམ་དམར་པོ་ནི་ཉི་མ་དང་། དེ་གཉིས་ཀྱི་བར་གྱི་ཧཾ་ཡིག་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན་དང་། ལུས་འདོམ་གང་གྲུ་བཞི་ནི་གཞལ་ཡས་ཁང་གྲུ་བཞི་དང་། སྙིང་ཁ་ཆོས་ཀྱི་འཁོར་ལོ་ནས་འབྱུང་བ་བཞིའི་རླུང་རྒྱུ་བ་ནི་སྒོ་བཞི་དང་། རྐང་བརྒྱད་ནི་ཀ་བ་བརྒྱད་དང་། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན་ཅེས་པ་ཙམ་ལས་མ་གསུངས་ཀྱང་། མིག་པཉྩ་རེ་ཁཱའི་རྩིག་པ་སོགས་ཀྱཻ་རྡོར་ནས་འབྱུང་བ་བཞིན་བསྒོམ་པར་འཕགས་པས་བཤད་པ་ལྟར་བསྒོམས་ན་ཡང་ཤིན་ཏུ་ལེགས་པ་ཡིན་ཏེ། རྒྱན་གྱི་རྣམ་པ་ཞིག་ནི་བསྒོམ་དགོས་ཤིང་། གྲུབ་ཆེན་གྱི་མན་ངག་ལས་བྱུང་བ་དེ་ཉིད་རྒྱུད་ཀྱི་དགོངས་པ་ཡིན་པའི་ཕྱིར་དང་། རྗེ་བཙུན་རྩེ་མོས་དཀྱིལ་འཁོར་སྟོན་པའི་སྐབས་སུ་རྐང་མཐིལ་རླུང་ནས་ལྕེ་དང་མཆུ་འདོད་ཡོན་གྱི་སྣམ་བུའི་བར་སྟོན་པར་གསུངས་པས་ཀྱང་འདི་ཉིད་བཞེད་པར་གསལ་བའི་ཕྱིར་རོ། །དེ་དག་ཀྱང་གནས་དེ་དང་དེར་སྦྱང་གཞི་དང་འཚམས་པའི་ཁ་དོག་དང་། དབྱིབས་ཀྱི་རྣམ་པ་བསྒོམ་པ་ནི་རྒྱས་པའི་ལུགས་ཡིན་ལ། དེ་ཙམ་བསྒོམ་མི་ནུས་ན་དོད་ཙམ་དུ་བསྒོམས་པས་ཀྱང་རུང་སྟེ། དེའི་དོན་ཡང་ཕྱིའི་རླུང་གི་དཀྱིལ་འཁོར་གྱི་དོད་རྐང་མཐིལ་ཡིན་སྙམ་དུ་བསྒོམ་པ་མ་ཡིན་གྱི། ཕྱིའི་རླུང་གི་དཀྱིལ་འཁོར་ཡང་རྐང་མཐིལ་གཉིས་པོ་འདི་ཉིད་ཡིན་སྙམ་དུ་དབྱེར་མེད་དུ་བསྒོམ་པ་ཡིན་ལ། དེ་ཙམ་གྱིས་ཕྱིའི་གཞལ་ཡས་ཁང་ནང་རྡོ་རྗེའི་ལུས་ལ་བསྒོམ་པའི་དོན་ལེགས་པར་ཚང་བའི་ཕྱིར་རོ། །དེ་ནས་བརྟེན་པ་གསལ་གདབ་པ་ལ་ཐོག་མར་གཙོ་བོ་ཡབ་ཡུམ་གསལ་གདབ་པ་ནི། སྙིང་ག་ཆོས་ཀྱི་འཁོར་ལོའི་དབུས་ཀྱི་རྩ་ཨ་ཝ་དྷཱུ་ཏཱི་ཧཱུྃ་གི་དབྱིབས་སུ་གནས་པའི་ནང་གི་ཁམས་བྱང་ཆུབ་ཀྱི་སེམས་ཡབ་དང་། ཕྱི་ཤུན་གྱི་རྩ་ཡུམ་དུ་རང་བཞིན་གྱིས་གྲུབ་པ་འདིར་སྒྲ་ཚུལ་གྱི་རྐྱེན་གྱིས། ཞལ་ཕྱག་གི་རྣམ་པ་ཅན་དུ་གསལ་བ་བློ་ངོར་གསལ་གདབ་པ་སྟེ། གྲུབ་ཆེན་དྲིལ་བུ་པས། འདི་དག་གནས་སུ་རྣལ་འབྱོར་མ། །རྩ་ཡིན་དཔའ་བོ་ཉི་ཤུ་བཞི། །ལུས་ཀྱི་ཁམས་སུ་བརྟག་པར་བྱ། །ཞེས་གསུངས་པ་དེ་ཉིད། ཐུགས་སུ་ཨ་ཝ་དྷཱུ་ཏཱི་ཧཱུྃ། །མ་བཅོས་ནང་གི་བདག་ཉིད་དོ། །ཞེས་གསུངས་པ་གཙོ་བོ་ཡབ་ཡུམ་དུ་བསྒོམ་པ་ལ་ཡང་ངེས་པར་སྦྱར་དགོས་པའི་ཕྱིར། སྙིང་པོའི་རྣལ་འབྱོར་མ་བཞི་ནི། འདིར་ཕྱག་དང་པོ་བཞི་ལ་བཀོད་ཅིང་། དེ་ཉིད་ཀྱང་ཕྱག་མཚན་དང་ཐབས་དང་ཤེས་རབ་སྦྱར་བའི་ཚུལ་དུ་བསྒོམ་པའོ། །བུམ་ཐོད་བཞི་སྐབས་འདིར་བསྒོམ་ཚུལ་མི་སྣང་ལ། མངོན་བརྗོད་དགུ་པར། ཞལ་བཞིའི་ངོ་བོར་འདུག་པའོ། །ཞེས་གསུངས་པའི་དོན་ནི། ཕྱིའི་བུམ་ཐོད་བཞི་ཡང་བཅོམ་ལྡན་འདས་ཀྱི་ཞལ་བཞི་ལ་ཚང་ཞེས་པ་ཙམ་དུ་འདུག་གོ །དེ་ནས་འཁོར་ལོ་གསུམ་གྱི་ལུས་དཀྱིལ་ལ། སྤྱི་བོ་ལ་སོགས་པའི་གནས་དེ་དག པུལླཱི་ར་མ་ལ་སོགས་པའི་ཡུལ་ཉི་ཤུ་རྩ་བཞིར་བསྒོམ་ཞིང་། པུ་ལ་སོགས་པའི་རྩ་ཡི་གེའི་དབྱིབས་སུ་གནས་པ་རྣམས་ལ། ནང་གི་ཁམས་དཔའ་བོ་དང་། ཕྱི་ཤུན་གྱི་རྩ་དཔའ་མོར་བསྒོམ་པ་ནི་སྔར་གྱི་དྲིལ་བུ་པའི་གཞུང་གིས་དངོས་སུ་བསྟན་པས། དེ་དང་དེའི་ངོ་བོར་གདོད་མ་ནས་གྲུབ་པ། སྐབས་འདིར་སྒྲ་ཚུལ་གྱི་རྐྱེན་གྱིས་ཞལ་ཕྱག་གི་རྣམ་པ་ཅན་བསྐྱེད་པ་བློ་ངོར་རིམ་གྱིས་གསལ་གདབ་པ་ནི། སྔར་གྱི་གཙོ་བོ་ཡབ་ཡུམ་དང་ཁྱད་པར་མེད་དོ། །སློབ་དཔོན་གྱི་གཞུང་འདིར། མགོ་བོ་ལ་ནི་རབ་ཏུ་གཏུམ་མོའོ་ཞེས་སོགས་ཡུམ་རྐྱང་ལས་མ་སྨོས་པ་ནི། ཤེས་རབ་ཀྱི་རྒྱུད་གཙོ་ཆེ་བར་བསྟན་པའི་ཆེད་ཡིན་ལ། བསྒོམ་པའི་ཚེ་ཡབ་ཡུམ་གཉིས་ཀ་ངེས་པར་བསྒོམ་དགོས་ཏེ། དྲིལ་བུ་པས། སྤྱི་བོར་ཁཎྜ་ཀ་པཱ་ལི་དང་། རབ་ཏུ་གཏུམ་མོའོ་ཞེས་སོགས་ཡབ་ཡུམ་གཉིས་ཀ་སྦྱར་ནས་གསུངས་པའི་ཕྱིར་རོ། །འདི་དག་རེ་རེའི་སྟེང་དུ་ཡང་། ཕྱི་རོལ་གྱི་ཡུལ་ངོས་གཟུང་བ། ནང་གི་གནས་ངོས་གཟུང་བ། དེར་ལྷ་གང་བསྒོམ་པའི་ཚུལ། དེ་དག་ས་དང་སྦྱར་བ་བཞི་བཞིའི་སྒོ་ནས་རྟོགས་པར་བྱ་དགོས་ཏེ། དང་པོ་ཕྱི་རོལ་གྱི་ཡུལ་རྣམས་ནི། སྟེང་ཚངས་པའི་འཇིག་རྟེན་ནས། འོག་གཞི་རླུང་གི་དཀྱིལ་འཁོར་ཡན་ཆད་གྲུབ་པ་དང་ལྷན་ཅིག་ཏུ་ཡུལ་ཉི་ཤུ་རྩ་བཞི་གྲུབ་ཅིང་། བྱེ་བྲག་འཛམ་བུའི་གླིང་གྲུབ་པ་དང་དུས་མཉམ་དུ། དེར་ཡང་ཡུལ་ཉི་ཤུ་རྩ་བཞི་གྲུབ་པས། དེ་ཉིད་འདིར་ཡང་བཤད་ན་པུལླཱི་ར་མ་ལ་ཡ་ནི་ཕྱི་རོལ་དུ་རྡོ་རྗེ་གདན་ལྟེ་བར་བྱས་པ་དེའི་ལྷོ་ནུབ་ན་ཡོད་ལ། དེ་ཉིད་ནང་ལུས་ལ་མགོ་བོ་ཅེས་དང་། མཚོག་མ་ཞེས་དང་། སྤྱི་བོ་ལ་ཞེས་པ་རྣམས་འབྱུང་བ་དོན་གཅིག་པས། སྤྱི་གཙུག་ནས་སྐྲ་མཚམས་ཀྱི་བར་ཕྱེད་མར་བྱས་པའི་དཀྱིལ་ལོ། །དེར་ཁཎྜ་ཀ་པཱ་ལི་དང་རབ་ཏུ་གཏུམ་མོ་བཞུགས་པ་ནི། ཕྱི་རོལ་དུ་སྤྲུལ་པའི་སྐུ་ས་དང་པོ་ཐོབ་པའི་ཚུལ་བཟུང་བ་དངོས་སུ་བཞུགས་ལ། ནང་དུ་རྩ་ཁམས་ཀྱི་ཚུལ་དུ་བཞུགས་ཏེ་ཀུན་ལ་འགྲེའོ། །ཛཱ་ལེན་དྷ་ར་ནི་ཕྱིའི་ཡུལ་ནུབ་བྱང་ན་རྡོ་ལ་མེ་འབར་བ་སྟེ། ནང་དུ་སྤྱི་གཙུག་ཚངས་པའི་བུ་གའོ། །འདིར་དམར་དང་བུས། དྲྭ་བ་འཛིན་དུ་བསྒྱུར་པ་མི་འཐད་པའི་ཚུལ་སྔར་བཤད་ཟིན། ལོ་ཆེན་དང་། འབྲོག་མི། མལ་གྱོ་རྣམས་ཀྱིས་དོན་འདི་ཉིད་ཐུགས་ལ་བཞག་ནས་འབར་བ་འཛིན་དུ་བསྒྱུར་བ་རྗེ་བཙུན་གོང་མས་ཚད་མར་འཛིན་པ་འདིའི་རྗེས་སུ་འབྲང་བར་བྱའོ། །དེར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མའོ། །ཨཽ་ཌི་ཡ་ན་ནི་ཕྱི་རུ་འཕུར་འགྲོ་སྟེ་ནུབ་ཕྱོགས་ན་ཡོད་ལ། ནང་ལུས་ལ་རྣ་བ་གཡས་པའི་བུ་གའི་ནང་དུ་ཀཾ་ཀཱ་ལ་དང་འོད་ལྡན་མའོ། །ཨར་བུ་ད་ནི་རྒྱ་གར་ལྷོ་ནུབ་ལ་ཡོད་ལ། ནང་ལུས་ཀྱི་ལྟག་པ་ན་མཆེ་བ་རྣམ་པར་གཙིགས་པ་དང་། སྣ་ཆེན་མའོ། །བཞི་པོ་ལ་གནས་ཞེས་པ་ཐུན་མོང་གི་མིང་སྟེ། ཡུལ་དེ་བཞིའི་རླུང་སེམས་དབུ་མར་ཞུགས་པས་ས་དང་པོ་རབ་ཏུ་དགའ་བའི་རྟོགས་པ་སྐྱེ་ཞིང་། ས་དེ་ལ་རྒྱུའི་སྒོ་ནས་གནས་ཞེས་པ་རྣལ་འབྱོར་མ་རྒྱུད་ཀྱི་ཐུན་མོང་མ་ཡིན་པའི་ཐ་སྙད་ཡིན་ལ། དེས་ནང་རྟེན་འབྲེལ་བྱས་ནས། ཕྱིའི་ཡུལ་དེ་རྣམས་ལ་གནས་པའི་དཔའ་བོ་དང་རྣལ་འབྱོར་མ་རྣམས། ངོ་བོ་སངས་རྒྱས་ཡིན་ཀྱང་རྣམ་པ་ས་དང་པོ་ཐོབ་པའི་ཚུལ་དུ་བཞུགས་པ་རྣམས་བདག་གི་དབང་དུ་འདུས། ཡང་ཐོག་མར་དེ་རྣམས་སྤྱོད་པའི་སྒོ་ནས་བདག་གི་དབང་དུ་འདུས་ན། དེས་ཕྱི་རྟེན་འབྲེལ་བྱས་ནས་ནང་དུ་གནས་གཞིའི་རླུང་སེམས་དབུ་མར་ཞུགས་ཏེ་ས་དང་པོའི་རྟོགས་པ་སྐྱེའོ། །དེས་ས་ལྷག་མ་རྣམས་ལ་བསྒྲེ་བར་བྱའོ། །གོ་ད་ཝ་རཱི་ནི་ཕྱི་རྒྱ་གར་ལྷོ་ཕྱོགས་དཔལ་གྱི་རིའི་རྩ་ན། ཆུ་བོ་གོ་ད་ཝ་རཱི་འབབ་པའི་འགྲམ་མོ། །དེ་ཉིད་ནང་ལུས་ལ་རྣ་བ་གཡོན་པའི་ནང་སྟེ། དེར་སུ་རཱ་ཝི་རི་དང་བརྟན་པའི་བློ་ཅན་མའོ། །རཱ་མེ་ཤྭ་ར་ནི་ཕྱི་ལྷོ་ནུབ་ན་དགའ་བྱེད་དབང་ཕྱུག་གིས་བྱས་པའི་དབང་ཕྱུག་གི་རྟེན་ཡོད་པ། ནང་ལུས་ལ་སྨིན་མའི་དབུས་ཏེ། དེར་འོད་དཔག་མེད་དང་མིའུ་ཐུང་མའོ། །དེ་ཝཱི་ཀོ་ཊི་ནི་ཕྱི་ཤར་ཕྱོགས་ཀྱི་ལྷ་མོའི་མཁར། ནང་ལུས་ཀྱི་མིག་གཉིས། དེར་རྡོ་རྗེའི་འོད་དང་ལང་ཀའི་དབང་ཕྱུག་མའོ། །མཱ་ལ་ཝ་ནི་ཕྱིའི་ལྷོ་ཕྱོགས་ན་ཡོད་དོ། །ནང་ལུས་ཀྱི་ཕྲག་པ་གཉིས་ཏེ། དེར་རྡོ་རྗེའི་སྐུ་དང་ཤིང་གྲིབ་མའོ། །ཉེ་བའི་གནས་ཞེས་པ་ས་གཉིས་པ་སྟེ་སྔ་མ་བཞིན་སྦྱར་རོ། །ཐུགས་ཀྱི་འཁོར་ལོའོ། །ཀཱ་མ་རཱུ་པ་ནི་ཕྱི་ཆགས་པ་ཤས་ཆེ་བའི་ཡུལ་ལྷོ་ཕྱོགས་ན་ཡོད། ནང་ལུས་ཀྱི་མཆན་ཁུང་གཉིས་ཏེ། དེར་ཨཾ་ཀུ་རི་དང་ཨེ་རཱ་ཝ་ཏིའོ། །ཨོ་ཏྲེ་བི་ཤ་ནི་ཕྱི་ཤར་ཕྱོགས་ན་ཡོད། ནང་ལུས་ཀྱི་ནུ་མ་གཉིས་ཏེ། དེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོའོ། །ཞིང་ཞེས་པ་ས་གསུམ་པ་སྟེ་སྔ་མ་བཞིན་དུ་སྦྱར་རོ། །ཏྲི་ཤ་ཀུ་ནེ་ནི་ཕྱི་ལྷོ་ནུབ་ཀྱི་ཡུལ། ནང་ལུས་ཀྱི་ལྟེ་བ་སྟེ་དེར་དཔའ་བོ་ཆེན་པོ་དང་རླུང་གི་ཤུགས་ཅན་མའོ། །ཀོ་ས་ལ་ནི་ཕྱི་རྒྱལ་པོ་གསལ་རྒྱལ་གྱི་ཡུལ་ཏེ་ནུབ། ནང་ལུས་ཀྱི་སྣ་རྩེ་སྟེ། དེར་རྡོ་རྗེ་ཧཱུྃ་མཛད་དང་ཆང་འཐུང་མའོ། །ཉེ་བའི་ཞིང་ཞེས་པ་ས་བཞི་པ་སྟེ་སྔ་མ་བཞིན་སྦྱར་རོ། །ཀ་ལིཾ་ཀ་ནི་ཕྱི་ལྷོ་ཕྱོགས་རྒྱལ་པོའི་ཁབ། ནང་ལུས་ཀྱི་ལྕེའི་རྩ་བ་སྟེ། དེར་རབ་ཏུ་བཟང་པོ་དང་ཤྱཱེ་མ་དེ་ཝཱིའོ། །ལཾ་པ་ཀ་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་མགྲིན་པ་སྟེ། དེར་རྡོ་རྗེ་བཟང་པོ་དང་ཤིན་ཏུ་བཟང་མོའོ། །ཚནྡོ་ཧ་ཞེས་པ་ས་ལྔ་པ་སྟེ་སྔ་མ་བཞིན་སྦྱར་རོ། །ཀཱཉྩི་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་སྙིང་ག་སྟེ། དེར་འཇིགས་བྱེད་ཆེན་པོ་དང་རྟ་རྣ་མའོ། །ཧི་མ་ལ་ཡ་ནི་ཕྱི་ཁ་བའི་རི་བྱང་ཕྱོགས་ན་ཡོད། ནང་ལུས་ཀྱི་འདོམས་བར་སྟེ་ཕོའི་འབྲས་བུ་གཉིས་ན་མིག་མི་བཟང་དང་ཁ་གཱ་ན་ནའོ། །ཉེ་བའི་ཚནྡོ་ཧ་ཞེས་པ་ས་དྲུག་པ་སྟེ་སྔ་མ་བཞིན་སྦྱར་རོ། །གསུང་གི་འཁོར་ལོའོ། །པྲེ་ཏ་པུ་རཱི་ནི་ཕྱི་ཡི་དྭགས་གྲོང་ཞེས་པ་བྱང་ཕྱོགས་ན་ཡོད། ནང་ལུས་ཀྱི་མཚན་མའི་རྩ་བ་སྟེ་དེར་སྟོབས་པོ་ཆེ་དང་འཁོར་ལོའི་ཤུགས་ཅན་མའོ། །གྲྀ་ཧ་དེ་ཝ་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་བཤང་ལམ་སྟེ། དེར་རིན་ཆེན་རྡོ་རྗེ་དང་ཁཎྜ་རོ་ཧའོ། །འདུ་བ་ཞེས་པ་ས་བདུན་པ་སྟེ་སྔ་མ་བཞིན་སྦྱར་རོ། །སཽ་རཱཥྚ་ནི་ཕྱི་ལྷོ་ནུབ་ན་སྭ་ཝ་ནཱ་ཐའི་རྟེན་ཡོད་ལ། ནང་ལུས་ཀྱི་བརླ་རྩ་གཉིས་ཏེ། དེར་རྟ་མགྲིན་དང་ཤཽཎྜི་ནིའོ། །སུ་ཝ་ར་ན་དྭི་པ་ནི་ཕྱི་ལྷོ་ནུབ་ན་སྲིན་པོས་བཟུང་བའི་གསེར་གྱིས་གང་བའི་གླིང་ཕྲན། ནང་ལུས་ཀྱི་བྱིན་པ་གཉིས་ཏེ། དེར་ནམ་མཁའི་སྙིང་པོ་དང་འཁོར་ལོའི་གོ་ཆའོ། །ཉེ་བའི་འདུ་བ་ནི་ས་བརྒྱད་པ་སྟེ་སྔ་མ་བཞིན་སྦྱར་རོ། །ན་ག་རར་ནི་ཕྱི་ལྷོ་ཕྱོགས་ན་པ་ཏྲ་ན་ག་ར་ལ་སོགས་པ་ཡུལ་ཆེན་པོ་བཅུ་དྲུག་ཡོད་པས་ནང་ལུས་ལ་མཐེ་བོང་བཞི་མ་གཏོགས་པའི་སོར་མོ་བཅུ་དྲུག་སྟེ། དེར་དཔལ་ཧེ་རུ་ཀ་དང་ཤིན་ཏུ་དཔའ་མོའོ། །འདིར་རྒྱུད་གཞུང་རྣམས་ལས། སོར་མོ་ཞེས་པ་ཙམ་དང་། རྐང་སོར་བརྒྱད་ཅེས་པ་ལས་མི་འབྱུང་ཡང་། ནཱ་རོ་པའི་མན་ངག་གིས་ལག་སོར་བརྒྱད་ཀྱང་བསྣན་པ་རྒྱུད་ཚིག་དེ་དག་གིས་ཐོན་པ་སྟེ། གཞན་དུ་ན་རྐང་སོར་ལ་ལུས་དཀྱིལ་གྱི་ལྷ་བཀོད་ནས་ལག་སོར་ལ་མི་འགོད་པའི་རྒྱུ་མཚན་མི་རྙེད་པའི་ཕྱིར་རོ། །སིནྡྷུ་ནི་ཕྱི་ལྷོ་ཕྱོགས་ན་ཆུ་བོ་སིནྡྷུ་འབབ་པའི་འགྲམ། ནང་ལུས་ཀྱི་རྐང་པའི་བོལ་གཉིས་ཏེ། དེར་པདྨ་གར་གྱི་དབང་ཕྱུག་དང་སྟོབས་ཆེན་མའོ། །དུར་ཁྲོད་ཅེས་པ་ས་དགུ་པ་སྟེ་སྔ་མ་བཞིན་སྦྱར་རོ། །མ་རུ་ནི་ཕྱི་ལྷོ་ཕྱོགས་ན་མྱ་ངམ་གྱི་གྲོང་ཁྱེར་ཞེས་ཀྱང་ཟེར། བུད་མེད་གཞོན་ནུ་མ་གཟུགས་བཟང་བ་ཡོད་པས་ན་གཞོན་ནུའི་གྲོང་ཁྱེར་ཟེར་ལ། ནང་ལུས་ཀྱི་རྐང་ལག་གི་མཐེ་བོང་བཞི་སྟེ། དེར་རྣམ་པ་སྣང་མཛད་དང་འཁོར་ལོས་སྒྱུར་མའོ། །ཀུ་ལ་ཏཱ་ནི་ཕྱི་ལྷོ་ནུབ་ན་རྡོ་པུས་མོ་འདྲ་བ་ཡོད་པའི་ས་ནང་ལུས་ཀྱི་པུས་མོ་གཉིས་ཏེ། དེར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཉེ་བའི་དུར་ཁྲོད་ཅེས་པ་ནི་ས་བཅུ་པ་སྟེ་སྔ་མ་བཞིན་སྦྱར་རོ། །སྐུའི་འཁོར་ལོའོ། །འཁོར་ལོ་གསུམ་གྱི་ལུས་དཀྱིལ་གྱི་ལྷ་འདི་དག ལུས་ཀྱི་རྒྱབ་ཕྱོགས་ན་ཡོད་པ་རྣམས་མདུན་ཕྱོགས་དང་། མདུན་མ་རྣམས་རྒྱབ་ཕྱོགས་སུ་ཞལ་གཟིགས་ཤིང་། གཡས་གཡོན་རྣམས་ཀྱང་དེས་འགྲེ་ཞིང་། སྟེང་མ་རྣམས་འོག་ཏུ་དང་། འོག་མ་རྣམས་སྟེང་དུ་སྟེ་ཐམས་ཅད་ཀྱང་གཙོ་བོ་ལ་ཞལ་གཟིགས་པའོ། །དེ་ནས་སྒོ་མ་བཞི་ནི་གཡས་ཀྱི་ཕྱག་ལྷག་མ་བཞི་དང་། མཚམས་མ་བཞི་ནི་གཡོན་གྱི་ཕྱག་ལྷག་མ་བཞི་ལ་འགོད་ཅིང་། འགོད་ཚུལ་ཡང་ལྷ་དེ་དག་ཞལ་ནང་བསྟན་གྱི་ཚུལ་གྱིས་ཕྱག་མཚན་མདུན་ཕྱོགས་སུ་ཡོད་པར་འགོད་དགོས་ཏེ། ཕྱག་མཚན་རྣམས་དེ་དག་གི་ཐབས་སུ་གསུངས་པའི་ཕྱིར། དཔེར་ན་ཕག་མོ་ཡུམ་རྐྱང་དུ་བྱེད་པའི་ཚེ་ཁ་ཊྭཱཾ་ག་འཛིན་པ་བཞིན་ནོ། །ཕྱག་ལ་འགོད་པའི་ཚེ་ལུས་དཀྱིལ་དུ་འགྱུར་རམ་མི་འགྱུར་སྙམ་ན། འདི་འདོད་འཇོ་མཁན་པོས་དུམ་སྐྱེས་མ་དང་། གཟུགས་ཅན་མ་གཉིས་ཁུ་ཚུར་གཉིས་སུ་བཤད་པ་ནི། ལྷག་མ་བཅུ་ལ་ཡང་མཚུངས་ལ། དེའི་ཚུལ་ཡང་ཕྱག་མཚན་དང་ངོ་བོ་དབྱེར་མེད་པའི་ཕྱག་མགོ་བཅུ་གཉིས་ལས་དེ་རྣམས་བསྐྱེད་ནས་གནས་ཀྱང་ཕྱག་མགོའི་ནང་དུ་གཟུགས་བརྙན་ཤར་བ་བཞིན་བྱེད་དེ། དེ་ནི་ཐོད་པ་བཞི་ལ་ཡང་ཤེས་པར་བྱའོ་ཞེས་སྨྲའོ། །འདི་ནི་རང་ཉིད་མངོན་བརྗོད་དགུ་པར་ལུས་ལ་ལྷ་དྲུག་ཅུ་འགོད་པ་ལུས་དཀྱིལ་དུ་ཡང་སྨྲ། ལུས་དཀྱིལ་ཡིན་ན་ལུས་རྒྱུར་སོང་བ་གཅིག་དགོས་ཞེས་ཀྱང་སྨྲས་པའི་འགལ་བ་སྤོང་བར་འདོད་པར་སྣང་ན་ཡང་། དེས་འགལ་བ་སྤོང་མི་ནུས་ཏེ། ཕྱག་ལྷག་མ་བཅུ་པོ་བློས་བཏགས་ཡིན་པའི་ཕྱིར་རོ། །དེའི་རྗེས་འབྲང་ཁ་ཅིག རྩ་ཕྱག་གཉིས་བཞུ་ནས་ཕྱག་བཅུ་གཉིས་སུ་སོང་བས་སྦྱང་གཞི་ལ་མེད་པའི་སྐྱོན་མེད་དོ་ཞེས་སྨྲ་བ་ནི་རང་ཉིད་གསང་བ་འདུས་པའི་ཞལ་ལྷག་མ་གཉིས་ལ་ས་སྙིང་སོགས་སྦྱང་གཞི་མེད་པས་མི་འགོད་ཅེས་སྨྲ་བ་དང་འགལ་ཏེ། རྩ་ཞལ་བཞུ་ན་ཞལ་གསུམ་དུ་འགྱུར་བར་མཚུངས་པའི་ཕྱིར་རོ། །དེས་ན་གནད་ཀྱི་དོན་ནི། རྗེ་བཙུན་གྱི་ཀུན་སྤྱོད་ཀྱི་ཊཱི་ཀར། མ་མོ་བཅུ་གཉིས་ཕྱག་ལ་འགོད་པའི་ཚེ་ན་ཡང་ལུས་དཀྱིལ་ལྷ་སུམ་ཅུ་རྩ་བདུན་གྱི་ཐ་སྙད་གསུངས་ཤིང་། ལཱུ་ཧི་པའི་སྒྲུབ་ཐབས་ཀྱི་སྐབས་སུ་དཀྱིལ་འཁོར་གྱི་ལྷ་རེ་རེ་ལ་ཡང་ལྷ་སུམ་ཅུ་རྩ་བདུན་ཚང་བར་གསུངས་པ་རྣམས་ནི་ལྷ་དེ་དང་དེའི་ལུས་ལ་བཀོད་པའི་དཀྱིལ་འཁོར་གྱི་ལྷ་ཡིན་པའི་རྒྱུ་མཚན་གྱིས་ལུས་དཀྱིལ་གྱི་ཐ་སྙད་གསུངས་པ་སྟེ་གཞན་དུ་རྒྱས་པར་བཤད་ཟིན་ཏོ། །རྡོ་རྗེའི་ལུས་ལ་བཀོད་པས་ས་ལམ་བགྲོད་པའི་ཚུལ་ཇི་ལྟར་སྙམ་ན། ཕྱིའི་གནས་ཕྱོགས་ཀྱི་དུར་ཁྲོད་བཞི། ནང་གི་ཁ་དང་། སྣ་དང་། ཆུ་ལམ་དང་། བཤང་ལམ་སྟེ་བཞིའམ། སྙིང་གའི་ཕྱི་སྐོར་གྱི་ཕྱོགས་ཀྱི་རྩ་བཞི་ནི་སྒོ་མ་བཞི་སྟེ། དེ་དག་གི་རླུང་སེམས་དབུ་མར་ཞུགས་པས་ཐུན་མོང་བའི་མིང་ཀུན་ཏུ་འོད་བྱེད་པའམ། ཐུན་མོང་མ་ཡིན་པའི་མིང་དཔེ་མེད་པ་ཐོབ་སྟེ། དགོངས་པ་ལུང་སྟོན་པ་ལས། འཇིག་རྟེན་དང་ནི་འཕགས་པའི་ཆོས། །སྔ་མ་ཀུན་གྱིས་བསྐྲུན་མེད་ཅིང་། །དེ་ཕྱིར་ཀུན་ཏུ་འོད་བྱེད་པ། །དཔེ་མེད་ཡེ་ཤེས་ཞེས་སུ་བཤད། །ཅེས་སོ། །ཕྱིའི་ཡུལ་མཚམས་ཀྱི་དུར་ཁྲོད་བཞི་དང་། ནང་གི་རྣ་བ་གཉིས་དང་། མིག་གཉིས་སམ། སྙིང་གའི་ཕྱི་སྐོར་གྱི་མཚམས་ཀྱི་རྩ་བཞི་ནི་མཚམས་མ་བཞི་སྟེ་དེ་དག་གི་རླུང་སེམས་དབུ་མར་ཞུགས་པས། བཅུ་གཉིས་པ་ཡེ་ཤེས་ཆེན་པོ་ཐོབ་སྟེ། དགོངས་པ་ལུང་སྟོན་ལས། ཐུབ་པའི་སྤྱོད་ཡུལ་མ་གཏོགས་པ། །རྒྱལ་སྲས་ཀུན་གྱི་ས་ལས་བརྒལ། །ཤེས་བྱ་ཀུན་ལ་འཇུག་ཆོས་ཅན། །ས་དེ་ཡེ་ཤེས་ཆེན་པོར་བཞེད། །ཅེས་སོ། །ཕྱི་གླིང་བཞི་དང་གླིང་བཞི་གཅིག་ཏུ་བསྡོམས་པ་སྟེ་ལྔ། ནང་སྙིང་གི་ནང་དུ་སྦས་པའི་རྩ་ལྔ་ནི་དེ་དག་གི་རླུང་སེམས་དབུ་མར་ཞུགས་པས་བཅུ་གསུམ་རྡོ་རྗེ་འཛིན་པའི་ས་ཐོབ་སྟེ། ངེས་བརྗོད་ལས། རྡོ་རྗེའི་ས་ནི་བཅུ་གསུམ་པ། །ཞེས་དང་། དགོངས་པ་ལུང་སྟོན་ལས། སངས་རྒྱས་རྣམས་ཀྱིས་གང་བསྟན་པའི། །སར་གྱུར་དེ་ནི་བཅུ་གསུམ་པ། །ཞེས་གསུངས་པས་སོ། བཞི་པ་དེ་ལྟར་བསྒོམ་པའི་དགོས་པ་ནི་ལོངས་སྐུ་ལམ་དུ་བྱ་བར་རྗེ་བཙུན་དང་། དམར་གྱིས་གསུངས་ཏེ། ལུས་འདི་ཉིད་ལ་ཕྱག་ཆེན་མཆོག་གི་དངོས་གྲུབ་ཐོབ་པའི་ཚེ། ལུས་དཀྱིལ་གྱི་རྟེན་དང་བརྟེན་པའི་དབང་རྟེན་རགས་པ་དང་། རྩ་ཁམས་འདི་དག་འཁོར་ལོ་བདེ་མཆོག་གི་རྟེན་དང་བརྟེན་པར་གནས་གྱུར་པ་དེ་ཉིད་ལོངས་སྤྱོད་རྫོགས་པའི་སྐུ་ཡིན་པའི་ཕྱིར་རོ་སྙམ་དུ་དགོངས་སོ། །དམར་གྱིས་གཙོ་བོའི་ལུས་ལ་ཞེན་པ་སྤང་བའི་ཕྱིར་ཞེས་དགོས་པ་ལྷག་པོ་གསུངས་པ་ནི་ཤིན་ཏུ་ལེགས་ཏེ། ལུས་ཀྱི་ཆ་ཤས་སོ་སོར་ཕྱེ་ནས། རྟེན་དང་བརྟེན་པའི་ཆ་ཤས་སོ་སོར་བསྒོམས་པས། གཙོ་བོའི་ལུས་སུ་མངོན་པར་ཞེན་པ་སྤང་བའི་ཕྱིར་རོ། །འདིས་ནི་གྱ་ནོམ་ལྷར་ཞེན་གྱི་རྣམ་རྟོག་ཕྱོགས་ཅིག་སྤོང་བར་བསྟན་ནོ། །དེང་སང་གི་སྐྱེ་བོ་འགའ་ཞིག་ཞེན་པ་འདི་སྤོང་གིས་དོགས་ནས། མིག་པཉྩ་རེ་ཁཱ་སོགས་བསྒོམས་ན། ལྷའི་མིག་དང་། སྣ་ལ་སོགས་པའི་རྣམ་པ་མི་ཡོང་ཞེས་སྨྲ་བ་ནི་མན་ངག་གི་ཕུ་ཐག་མ་ཆོད་པའོ། །གཞན་ས་བགྲོད་པའི་དགོས་པ་ནི་གསེབ་ཚགས་སུ་བསྟན་ཅིང་། ནང་གི་རྩ་ཁམས་ལྷར་ཤར་བའི་སྟོབས་ཀྱིས། ཕྱི་རོལ་གྱི་ཡུལ་སྣང་ཐམས་ཅད་ལྷར་འཆར་བའི་དགོས་པ་ཡང་། ལུས་དཀྱིལ་གྱི་རྣམ་བཤད་བདེ་ཆེན་བཅུད་ཀྱི་སྙིང་པོར་བསྟན་ཟིན་པས་དེར་བལྟ་བར་བྱའོ། །ལྔ་པ་རྟོག་པས་བཏགས་པའི་ལུགས་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི་འདོད་འཇོ་མཁན་པོས་དཀྱིལ་འཁོར་གཉིས་ཀ་བསྒོམ་པ་ལཱུ་ནག་ལྟ་བུ་དང་། ལུས་དཀྱིལ་གཅིག་བུ་བསྒོམ་པ་མངོན་བརྗོད་དགུ་པ་ལྟ་བུ་ཡིན་ན། སྔོན་དུ་རྟེན་གྱི་དཀྱིལ་འཁོར་བསྐྱེད་ཟིན་པ་དེ་ལ། ལུས་རྟེན་གྱི་དཀྱིལ་འཁོར་དུ་བསྒོམ་ལུགས་སྔར་བྱས་པ་མེད་པས། ལུས་དཀྱིལ་བསྒོམ་རན་པ་ན། སྔར་བསྐྱེད་པའི་གཞལ་ཡས་ཁང་དེ་ཉིད་ཀྱི་སྟེང་ནས་བྱེད་ཀྱིས། སྔ་མ་དེ་བསྡུས་ནས་བསྐྱེད་པ་མ་ཡིན་ཏེ། ཞེས་དང་། སྔར་བསྐྱེད་པའི་གཞལ་ཡས་ཁང་དེ་ཉིད་ཀྱི་ནང་དུ་གཞལ་ཡས་ཁང་གཉིས་པ་ཅིག་བསྐྱེད་པ་ཡང་མ་ཡིན་ནོ། །འོ་ན་གཞལ་ཡས་ཁང་སྔ་མའི་སྟེང་ནས་ཇི་ལྟར་བསྒོམ་སྙམ་ན། རྡོ་རྗེ་ཕྲེང་བར་ལུས་ཀྱི་ཆ་དུ་མ་ཞིག་གཞལ་ཡས་ཁང་གི་ཆ་སོ་སོར་བསྐྱེད་པར་གསུངས་པ་ནི་རྒྱས་པའི་ལུགས་ཡིན་ལ། འདིར་ནི་དཔེར་ན། བྷྲཱུྃ་ཡིག་གཅིག་པུ་ལས་ཕྱིའི་གཞལ་ཡས་ཁང་ཐམས་ཅད་བསྐྱེད་པ་བཞིན་དུ། དྲིལ་བུ་པས། ལུས་ནི་མཉམ་པ་གྲུ་བཞི་པ། །རྒྱན་རྣམས་རབ་མཛེས་ཧེ་རུ་ཀའི། །ལུས་ཀྱི་དཀྱིལ་འཁོར་ཉིད་དུ་འདོད། །ཅེས་པས། ལུས་འདོམ་གང་ཡན་མན་དང་ཕན་ཚུན་དུ་མཉམ་པ་ལས། ངོས་བཞི་མཉམ་པའི་གཞལ་ཡས་ཁང་གྲུ་བཞི་པ་བསྐྱེད་པ་དང་། ཕ་གུ་དང་དྲྭ་ཕྱེད་སོགས་རྒྱན་གྱིས་རབ་ཏུ་མཛེས་པའི་ཧེ་རུ་ཀའི་རྟེན་གྱི་ལུས་དཀྱིལ་བསྒོམ་པར་བཤད་པ་ནི་བསྡུས་པའོ། །ཞེས་དང་། ལུས་རྟེན་གྱི་དཀྱིལ་འཁོར་དུ་བསྒོམས་པའི་མཚམས་ནས། རང་གི་རིགས་འདྲ་སྔ་མ་དང་། ལུས་ཀྱི་ཆ་རེ་ལ་བརྟེན་ནས་རིགས་འདྲ་ཕྱི་མ་སྐྱེས་པར་བསྒོམ་པ་ཡིན་ནོ། །དེའང་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས། འབྱུང་བཞིའི་རླུང་གཞུའི་དབྱིབས་ཅན་སོགས་སུ་བསྒོམ་པ་ཡིན་ལ། སྔར་བསྐྱེད་པ་ད་དུང་གནས་པའི་དཀྱིལ་འཁོར་བཞི། དེ་རྣམས་ཀྱི་དབྱིབས་ཅན་གྱི་ལུས་ཀྱི་ཆ་བཞི་ལས་བསྐྱེད་པ་ཡིན་གྱི། རྐང་མཐིལ་གྱི་རླུང་དེར་བསྐྱེད་པ་མ་ཡིན་ནོ་ཞེས་དང་། བརྟེན་པ་ལྷའི་སྐབས་སུ་དྲིལ་བུ་པའི་དབང་ཆོག་ལས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་གསུངས་པའི་དོན། ལུས་དཀྱིལ་གྱི་ལྷའི་དཀྱིལ་འཁོར་གང་ལས་བསྒྲུབ་པའི་སྒྲུབ་གཞི་ནི། རྡུལ་ཚོན་དང་། རས་བྲིས་ཀྱི་དཀྱིལ་འཁོར་ལ་ལྷ་བསྒྲུབ་པའི་སྒྲུབ་གཞི་ཕྱག་མཚན་དང་སྐུ་མདོག་ལ་སོགས་པ་གསར་དུ་བསྒྲུབ་དགོས་པ་བཞིན་དུ། འབྲི་མཁན་གྱིས་གསར་དུ་བསྒྲུབ་མི་དགོས་པར། རྩ་དང་ཁམས་རྣམས་རང་བཞིན་གྱིས་ཏེ་གདོད་མ་ནས་གནས་ལ། དེ་ཡང་དེའི་སྒྲུབ་གཞི་ཡིན་པའི་དོན་ཡིན་གྱི། ལུས་ཀྱི་རྩ་དང་ཁམས་ལ་སོགས་པ་ཧེ་རུ་ཀའི་དཀྱིལ་འཁོར་དུ་གདོད་ནས་གནས་པ་མ་ཡིན་ཏེ། ཡིན་ན་དེ་ཉིད་ལས། དེ་ཡི་རང་བཞིན་མི་ཤེས་རྣམས། །སྣོད་དུ་བྱ་བར་བཞེད་པ་སྟེ། །ཞེས་གསུངས་པ་དང་ནང་འགལ་བར་འགྱུར་པའི་ཕྱིར་ཏེ། བདེ་མཆོག་གི་དཀྱིལ་འཁོར་གྱི་དེ་ཉིད་མི་ཤེས་པ་འགལ་བའི་ཕྱིར་ཞེས་བྲིས་སོ། །གཉིས་པ་ནི། འདི་དག་རིམ་པ་བཞིན་མི་འཐད་པར་སྟོན་ཏེ། ལཱུ་ནག་གཉིས་ཕྱི་ནང་གཉིས་ཀ་བསྒོམ་པ་དང་། མངོན་བརྗོད་དགུ་པ་ལུས་དཀྱིལ་གཅིག་པུ་བསྒོམ་པ་ཡིན་ཞེས་པའི་ཁྱད་པར་ནི། སུས་ཀྱང་བསྒྲུབ་པར་མི་ནུས་ཏེ། མངོན་བརྗོད་དགུ་པར་ཐོག་མར་མངོན་བྱང་ལས་རྟེན་གཞལ་ཡས་ཁང་དང་། བརྟེན་པ་གཙོ་བོ་ཡབ་ཡུམ་ཅིག་ཆར་བསྐྱེད་ནས། དེའི་རྗེས་སུ་གཙོ་བོའི་ལུས་ལ་ལུས་དཀྱིལ་འགོད་པར་གསུངས་ཤིང་། ཁྱེད་རང་གིས་ཀྱང་དེ་ལྟར་བྱས་པའི་ཕྱིར་རོ། །དེ་ལྟར་ན་ཡང་ལུས་དཀྱིལ་འབའ་ཞིག་ཡིན་ན། སྔོན་དུ་རྟེན་གྱི་དཀྱིལ་འཁོར་བསྐྱེད་ཟིན་པ་དེ་ལ་ལུས་དཀྱིལ་བསྒོམ་རན་པ་ན། ལུས་ཀྱི་ཆ་ཤས་ཡོངས་སུ་གྱུར་པ་ལས་ལུས་ཀྱི་ཆ་ཤས་རེ་རེ་དང་། རང་རང་གི་རིགས་འདྲ་སྔ་མ་ལས་རིགས་འདྲ་ཕྱི་མ་སྐྱེས་པ་ལུས་དཀྱིལ་དུ་འདོད་པ་དང་འགལ་ཏེ། ཆ་ཤས་མ་བསྲེས་པའི་གོང་ནས་ལུས་དཀྱིལ་ཡིན་པའི་ཕྱིར་རོ། །བྷྲཱུྃ་ཡིག་གཅིག་པོ་ལས་ཕྱིའི་གཞལ་ཡས་ཁང་ཐམས་ཅད་བསྐྱེད་པ་བཞིན་དུ་ལུས་འདོམ་གང་མཉམ་པ་ལས་ཧེ་རུ་ཀའི་ལུས་དཀྱིལ་ཅིག་ཆར་དུ་བསྐྱེད་པ་ཡང་ཡེ་མ་བརྟགས་པ་སྟེ། བྷྲཱུྃ་ལས་གཞལ་ཡས་ཁང་བསྐྱེད་པ་ནི། གནས་དེ་ཉིད་དུ་བསྐྱེད་པ་ཡིན་ལ། འདི་གནས་དེ་ཉིད་དུ་བསྐྱེད་པར་ནི་ཁྱེད་མི་འདོད་ཅིང་། ཕྱིའི་གཞལ་ཡས་ཁང་ལ་ཐིམ་པར་བསྒོམ་པ་ནི་བློས་སྒྲོ་བཏགས་པ་ཙམ་ཡིན་པའི་ཕྱིར་རོ། །གཞན་ཡང་རྐང་མཐིལ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས་ཞེས་པའི་དོན། ཐོག་མར་རྐང་མཐིལ་གཉིས་སུ་རླུང་རེ་བསྒོམས་ནས་དེ་ཕྱིར་སྤྲོ་བ་ཡིན་ནམ། རྐང་མཐིལ་གཉིས་ཕྱིར་སྤྲོས་ཏེ་རླུང་དང་ཕྲད་པའི་ཚེ་རླུང་དུ་བསྒོམ་པ་ཡིན། དང་པོ་ལྟར་ན་རྐང་མཐིལ་གཉིས་སུ་རླུང་བསྒོམས་ཟིན་ནས་དེ་གནས་དེར་བཞག་པ་ལ་ཉེས་པ་ཅི་ཞིག་ཡོད། ཕྱི་མ་ལྟར་ན་རྐང་མཐིལ་ཕར་སོང་ནས་ཕྲད་མཚམས་སུ་ཡོངས་སུ་གྱུར་པའི་ཚུལ་འདི་འདྲ་ཡང་ལུང་རིགས་གང་ནས་བཤད། བློ་ལ་ཇི་ལྟར་འཆར་ལེགས་པར་སོམས་ཤིག ལུས་ཀྱི་རྐང་མཐིལ་གྱི་ཆ་འབྱུང་བཞིའི་རླུང་དུ་བསྐྱེད་པ་ཡིན་གྱི། རྐང་མཐིལ་གྱི་རླུང་དེར་བསྐྱེད་པ་མ་ཡིན་ན། སཾ་བུ་ཊི་ལས། རྐང་པའི་མཐིལ་དུ་རྩོམ་ཆེན་རླུང་། །ཞེས་པའི་རླུང་འདི་བསྐྱེད་གཞིའི་ལུས་ཀྱི་ཆ་ཡིན་ནམ། བསྐྱེད་ཟིན་པའི་འབྱུང་བཞིའི་རླུང་ཡིན། དང་པོ་ལྟར་ན། རྐང་མཐིལ་གྱི་རླུང་དེར་བསྐྱེད་པ་མ་ཡིན་པ་དང་འགལ། ཕྱི་མ་ལྟར་ན། བསྐྱེད་ཟིན་པའི་རླུང་གཞལ་ཡས་ཁང་གི་འོག་ཏུ་ཡོད་པ་དང་འགལ་ལོ། །མངོན་བརྗོད་དགུ་པའི་ལུས་དཀྱིལ་མ་བསྒོམས་པའི་གོང་གི་གཞལ་ཡས་ཁང་དེ་ཕྱི་དཀྱིལ་ཡིན་ན། ལཱུ་ནག་གཉིས་ཕྱི་ནང་གཉིས་ཀ་བསྒོམ་པ་དང་། འདི་ལུས་དཀྱིལ་ཁོ་ན་ཡིན་པ་དང་འགལ། ཕྱི་དཀྱིལ་མ་ཡིན་ན་ནི། ལཱུ་ཧི་པའི་སྔར་གྱི་གཞལ་ཡས་ཁང་དེ་ཕྱི་དཀྱིལ་མ་ཡིན་པ་དང་རྣམ་པ་ཐམས་ཅད་དུ་མཚུངས་སོ། །དྲིལ་བུ་ལུས་དཀྱིལ་ལ་མངོན་བྱང་ལས་གཞལ་ཡས་ཁང་དང་། གཙོ་བོ་ཅིག་ཆར་དུ་བསྐྱེད་པའི་ཚུལ་ཁ་བསྐང་བ་ནི་གནད་མ་ལུས་པ་བཅོས་པ་སྟེ། དེ་ལྟར་བསྐང་བའི་ཚུལ་མལ་གྱོ་ནས་བརྒྱུད་པ་དང་། པུ་ཧྲངས་པ་ནས་བརྒྱུད་པ་དང་། པཎ་ཆེན་ཤཱཀྱ་ཤྲཱི་ནས་བརྒྱུད་པ་གང་ལ་ཡང་མི་སྣང་བས་གསར་དུ་བཟོས་པ་ལས་མ་འདས་ལ། བཟོས་པ་དེ་ཡང་རང་ཉིད་ལུས་དཀྱིལ་བསྒོམ་པའི་གཞི་ལ་སྔར་ཕྱི་དཀྱིལ་བསྐྱེད་དགོས་པར་དམ་བཅས་པའི་གྲུབ་མཐའི་སྟོབས་ཀྱིས་འདི་མི་བྱེད་ཁ་མེད་བྱུང་བ་ཡིན་གྱི། འདི་མ་བཅོས་པའི་དཀྱིལ་འཁོར་ཡིན་པར་གསུངས་པས་ཕྱི་དཀྱིལ་བཅོས་མ་བསྐྱེད་པར་འགལ་བའི་ཕྱིར་རོ། །བརྟེན་ལྷའི་སྐབས་སུ་རང་བཞིན་གྱིས་གྲུབ་པའི་དོན་བཅོས་མ་གཉིས་གསར་དུ་བསྒྲུབ་དགོས་པ་བཞིན་དུ་འབྲི་མཁན་གྱིས་གསར་དུ་བསྒྲུབ་མི་དགོས་པར། དང་པོ་ནས་གནས་པའི་དོན་ཡིན་ན་བྲིས་ཟིན་པའི་བཅོས་མ་གཉིས་ཀྱིས་དཀྱིལ་འཁོར་དེ་ཡང་རང་བཞིན་གྱིས་གྲུབ་པའི་དཀྱིལ་འཁོར་དུ་འགྱུར་ཏེ། ལུས་དཀྱིལ་གྱི་རྩ་ཁམས་ཕ་མའི་ཁུ་ཁྲག་ལས་གསར་དུ་བསྒྲུབ་དགོས་པ་བཞིན་དུ་ཕ་མ་གཉིས་ཀྱིས་གསར་དུ་བསྒྲུབ་མི་དགོས་པར་བྲིས་ཟིན་པ་ཕྱིན་ཆད་དང་པོ་ནས་གནས་པར་མཚུངས་པའི་ཕྱིར་རོ། །ལུས་ཀྱི་རྩ་ཁམས་ཧེ་རུ་ཀའི་དཀྱིལ་འཁོར་དུ་གདོད་མ་ནས་གནས་པ་ཡིན་ན། དེའི་རང་བཞིན་མི་ཤེས་པ་འགལ་ཞེས་པ་ནི་རྒྱུད་བླར། ལུས་ཅན་ལ་སངས་རྒྱས་གདོད་མ་ནས་གནས་ཀྱང་། མི་ཤེས་པའི་ཚུལ་དཔེ་དགུས་བསྟན་པ་ལ་འཕངས་པར་སྣང་སྟེ། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །ཞེས་གསུངས་པས་སོ། །གཉིས་པ་དེ་སྔགས་ཀྱིས་བྱིན་གྱིས་བརླབ་པ་ནི་སློབ་དཔོན་གྱི་གཞུང་ལས། དེ་ཡང་སྐུ་གསུང་ཐུགས་ཀྱི་དབྱེ་བས་ཡི་གེ་གསུམ་གྱི་ངོ་བོ་ཉིད་དེ། མཐོ་རིས་དང་ནི་མི་ཡུལ་དང་། །ས་འོག་དག་ཏུ་སྐད་ཅིག་མ། །གཅིག་གིས་སྐུ་གཅིག་ཏུ་འགྱུར་རོ། །སྐད་ཅིག་ཙམ་གྱིས་རྣལ་འབྱོར་བདག །སྐད་ཅིག་སྔགས་དང་ཕྱག་རྒྱ་ཅན། །ཀུན་ནས་ཀུན་ཏུ་སྐད་ཅིག་སྟེ། །སྐད་ཅིག་གིས་ནི་གསང་སྔགས་འདོན། །ཨོཾ་ཨཱཿཧཱུྃ་ཨོཾ་སརྦ་ཝཱི་ར་ཡོ་གི་ནཱི། ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ྅ཧཾ། ཞེས་གསུངས་ཏེ། བདེ་ཆེན་གྱི་འཁོར་ལོ་ལུས་ལ་འདུས། དམ་ཚིག་གི་འཁོར་ལོ་སྐུ་ལ་འདུས་ཏེ། འཁོར་ལོ་གསུམ་གྱི་སེམས་ཅན་གྱིས་དོན་མཛད་པ་ནི། སྐུ་དང་གསུང་དང་ཐུགས་ཀྱི་དབྱེ་བས་ཞེས་པའོ། །ཡི་གེ་གསུམ་གྱི་ངོ་བོ་ཉིད་ཅེས་པ་ནི་འོག་གི་ཡི་གེ་གསུམ་བརྗོད་པའི་ཚེ། ཐམས་ཅད་དྲན་པའི་ཤེས་བྱེད་དུ། དེ་ཉིད་གོང་ལ་གནས་ན་ལུས་ཀྱི་སྟོད་དང་། བར་ལ་གནས་པ་ནི་མཐོ་རིས་སོགས་སོ། །སྐད་ཅིག་མ་གཅིག་གིས་སྐུ་གཅིག་ཏུ་འདུས་པ་ནི་སྐད་ཅིག་གིས་ལུས་ལ་ཚང་བར་བསྒོམ་པའོ། །ཡེ་ཤེས་ཞབས་ལུགས་ཀྱི་འདུས་པ་ན་ཡབ་སྔོན་ལ་བསྐྱེད་ནས་ཡུམ་ཕྱིས་བསྐྱེད་པ་ཡོད་པ་ལྟ་བུ་ནི་མ་ཡིན་ཏེ། སྐད་ཅིག་རྣམ་པའི་རྣལ་འབྱོར་བདག །ཅེས་པ་དུས་མཉམ་དུའོ། །ཡང་ངེས་བརྗོད་ནས་ལྷ་སྔོན་ལ་གྲུབ་ནས་རྒྱན་ཕྱིས་འདོགས་པ་ཡོད་པ་དེ་ལྟ་བུ་ཡང་མ་ཡིན་ཏེ། སྐད་ཅིག་རྣམ་པའི་ཕྱག་རྒྱ་ཅན། །ཞེས་པ་རྒྱན་དང་བཅས་པར་རོ། །ཡང་ཀྱཻ་རྡོ་རྗེ་ནས་རྟེན་སྔོན་ལ་བསྐྱེད་ནས། བརྟེན་པ་ཕྱིས་བསྐྱེད་པ་ཡོད་དེ། དེ་ལྟ་བུ་ཡང་མ་ཡིན་ཏེ། ཀུན་ནས་ཀུན་ཏུ་སྐད་ཅིག་སྟེ། །ཞེས་པ་རྟེན་དང་བརྟེན་པ་དུས་གཅིག་ཏུ་བསྐྱེད་པས་སོ། །རྒྱུད་སྡེ་གཞན་ནས་སྔགས་ཀྱིས་བྱིན་གྱིས་བརླབ་པའི་གནད་ཟབ་མོ་མ་བཤད་ལ། འདི་ནས་བཤད་པས་ན། སྐད་ཅིག་གིས་ནི་གསང་སྔགས་འདོན། །ཅེས་པ་སྔགས་ཀྱིས་བྱིན་གྱིས་བརླབ་པའོ། །ཅི་ལྟར་བྱིན་གྱིས་བརླབ་ན། ཨོཾ་ཨཱཿཧཱུྃ། ཞེས་པ་ལ་སོགས་པ་སྨོས་ཏེ། དེའི་དོན་ཨོཾ་ཞེས་བརྗོད་པའི་ཚེ་ལུས་ཀྱི་སྐུའི་འཁོར་ལོ་དང་། ཕྱིའི་སྐུའི་འཁོར་ལོ་དང་། འཛམ་བུ་གླིང་ན་བཞུགས་པའི་སྐུའི་འཁོར་ལོ། འོག་མིན་ལོངས་སྐུའི་འཁོར་ལོ་བཞི་དྲན་པར་བྱ། དེ་བཞིན་དུ་ཨཱཿཞེས་བརྗོད་པས་གསུང་གི་འཁོར་ལོ་བཞི་དྲན་པར་བྱ། ཧཱུྃ་ཞེས་བརྗོད་པས་ཐུགས་ཀྱི་འཁོར་ལོ་བཞི་དྲན་པར་བྱ། སརྦ་བཱི་ར་ཡོ་གི་ནི་དཔའ་བོ་དང་རྣལ་འབྱོར་མ་ཐམས་ཅད་ཅེས་བྱ་བ་ཡིན་ཏེ། རྟེན་དང་བརྟེན་པར་བཅས་པའི་ལྷ་དྲུག་ཅུ་རྩ་གཉིས་པོ་ཐམས་ཅད་དྲན་པར་བྱའོ། །ཀཱ་ཡ་ཞེས་པ་སྐུ་སྟེ་སྐུ་བཞི་དབྱེར་མི་ཕྱེད་སྙམ་དུ་བསམ། ཝཱཀ་ཞེས་པ་གསུང་སྟེ་གསུང་བཞི་དབྱེར་མི་ཕྱེད། ཙིཏྟ་ཞེས་པ་ཐུགས་ཏེ་ཐུགས་བཞི་དབྱེར་མི་ཕྱེད་སྙམ་དུ་དྲན་པར་བྱའོ། །བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པ་གཉིས་སུ་མེད་པ་དབྱེར་མི་ཕྱེད་པ་རྡོ་རྗེའི་རང་བཞིན་ང་ཡིན་སྙམ་དུ་བསམས་ལ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ་ནི་རྡོ་རྗེའི་དག་པ་ཆོས་ཐམས་ཅད་རྡོ་རྗེར་དག་པའི་རང་བཞིན་ནོ། །ཞེས་པ་དངོས་པོ་ཐམས་ཅད་ལྷའི་རང་བཞིན་ལ་དེ་དང་བདག་གིས་ལུས་ཀྱང་སངས་རྒྱས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་དག་ལ། ཆོས་ཐམས་ཅད་བརྗོད་པ་དང་བྲལ་བ་རྡོ་རྗེའི་རང་བཞིན་དུ་དག་གོ་ཞེས་དྲན་པར་བྱའོ། །པྲ་ཛྙཱ་རཀྵི་ཏས་སྔར་བཤད་པའི་ཚིགས་བཅད་དེ་དག་ལུས་དཀྱིལ་གྱི་དོན་བསྡུར་བྱས་ནས། སྔགས་གཉིས་པོ་སྔར་མངོན་བྱང་ལས་རྟེན་བརྟེན་པ་ཅིག་ཆར་དུ་བསྐྱེད་མ་ཐག་ཏུ་བརྗོད་པར་བཤད་དོ། །དམར་གྱིས་སྔགས་དོན་སྔ་མ་དང་འདྲ་བ་ལ་ཕོ་ཉ་གསུམ་བསྲེའི་ཐ་སྙད་མཛད་ཀྱང་། རྗེ་བཙུན་གྱིས་ཕོ་ཉ་གསུམ་བསྲེ་བ་སྔར་མཛད་ཅིང་། ཕོ་ཉ་གསུམ་བསྲེའི་དོན་སྔགས་སྐྱེས་གཞིར་བྱས་ནས། དེ་ལ་ཞིང་སྐྱེས་བསྲེ། ཞིང་སྐྱེས་གཞིར་བྱས་ནས། དེ་ལ་སྔགས་སྐྱེས་བསྲེ་བ་ནི་རྟོགས་པ་མས་འཆར་དང་། དེ་ལྟར་བསྒོམས་པས་ལྷན་སྐྱེས་ཀྱིས་ཞིང་སྐྱེས་བྱིན་གྱིས་རློབ། ཞིང་སྐྱེས་ཀྱིས་སྔགས་སྐྱེས་བྱིན་གྱིས་རློབ། དེས་རྣལ་འབྱོར་པའི་སེམས་རྒྱུད་བྱིན་གྱིས་རློབ་པ་ནི་བྱིན་གྱིས་ཡས་རློབ་སྟེ་དེ་ཉིད་ལ་བཞེད། སྔགས་ཀྱིས་བྱིན་གྱིས་བརླབ་པ་ནི་ཕོ་ཉ་གསུམ་ངོ་བོ་གཅིག་ཏུ་དྲན་པ་ཙམ་ལ་བཞེད་པ་ནི་མན་ངག་གི་མཆོག་རབ་ཏུ་སྣང་ངོ་། །གཉིས་པ་ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི་སློབ་དཔོན་གྱི་གཞུང་ལས། དེ་ནས་གོ་ཆ་གཉིས་ཤེས་ནས། །ཡེ་ཤེས་འཁོར་ལོ་རྣམ་པར་བསྒོམ། །སྔགས་དང་ཕྱག་རྒྱའི་སྦྱོར་ཤེས་པས། །དམ་ཚིག་འཁོར་ལོ་ལ་མྱུར་གཞུག །ཅེས་གསུངས་ཤིང་། འདི་ཉིད་མངོན་བརྗོད་དང་། ཀུན་སྤྱོད་གཉིས་ལས་ཀྱང་འབྱུང་ངོ་། །རྒྱུད་གཞུང་དེ་དག་ལས། སྔོན་ལ་གོ་ཆ་བགོས་ནས། ཡེ་ཤེས་ཀྱི་འཁོར་ལོ་གཞུག་པ་རྗེས་ལ་གསུངས་པ་ལྟར་བྱས་ན་ཡང་ལེགས་ཞེས་གསུངས་ཤིང་། འགྲེལ་པ་རྣམས་ཀྱིས་ཀྱང་དེ་ལྟར་མཛད་དོ། །འདིར་ནཱ་རོ་པའི་མན་ངག་གིས་འཁྲུགས་ཀྱི་ཚུལ་དུ་སྔོན་ལ་ཡེ་ཤེས་པ་བཅུག་ནས། གོ་ཆ་བཅིང་བ་རྗེས་ལ་མཛད་པ་ནི། ཤིང་གཉིས་གཟེར་གྱིས་བསྡམས་ནས་མི་འབྲལ་བར་བྱེད་པ་བཞིན། དམ་ཚིག་པ་དང་ཡེ་ཤེས་པ་མི་འབྲལ་བར་བྱེད་པ་ཡིན་ཞེས་གསུངས་པ་ལྟར་བཤད་ན། ལུས་ཀྱི་མཛུབ་མོ་མདུད་བྱས་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པོར་རབ་དུ་སྦྱར། །འདི་ནི་དཔྲལ་བའི་དབྱེས་སུ་རབ་བཞག་ནས། །བསྐོར་ཞིང་བསྐོར་བས་ཀུན་ནས་བསྐོར་བར་བྱ། །རྐང་པ་མནན་ཅིང་སྟེང་དུ་བལྟ། །གྱེན་དུ་ཕཻཾ་གྱི་སྒྲ་སྒྲོགས་ཤིང་། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་དགུག །ཞེས་རྒྱུད་གཞུང་གསུམ་ལས་གསུངས་པ་ལྟར། ལུས་དང་། ངག་དང་། སེམས་ཀྱི་སྦྱོར་བས་ཡེ་ཤེས་པ་སྤྱན་དྲངས་ནས། ཕྱི་མཆོད་དང་། ཡིད་ལས་བྱུང་བའི་མཆོད་པ་གཉིས་ཀྱིས་མཆོད་དེ། ངེས་བརྗོད་བཅུ་བཞི་པ་ལས། ཛཿཧཱུྃ་བྃ་ཧོའི་སྦྱོར་བ་ཡིས། །དགུག་དང་དེ་བཞིན་གཞུག་པ་དང་། །བཅིངས་ནས་དབང་དུ་བྱ་བ་ཡིན། །ཞེས་གསུངས་པ་ལྟར་དགུག་གཞུག་བྱས་ལ། གཞུང་ལས། ཨོཾ་ཡོ་ག་ཤུདྡྷཿསརྦ་དྷ་རྨཱཿཡོ་ག་ཤུདྡྷོ྅ཧཾ། དེ་ནས་སྙིང་པོའི་ཕྱག་རྒྱ་བསྟན་པར་བྱ་སྟེ། ལག་པ་གཡས་པ་དང་གཡོན་པ་དག་བསྐོར་ཞིང་། མཁའ་འགྲོ་མའི་བདེ་བའི་དམ་པར་གཞུག་པར་བྱའོ། །ཞེས་གསུངས་པ་ལྟར་གཉིས་སུ་མེད་པའི་བདེ་བ་དམ་པ་དྲན་པར་བྱའོ། །གསུམ་པ་གོ་ཆ་དགོད་པ་ནི། སློབ་དཔོན་གྱི་གཞུང་ལས། དེ་ནས་གོ་ཆ་གཉིས་བཤད་པར་བྱ་སྟེ། སྙིང་གར་ནི་ཨོཾ་ཧའོ། །མགོ་བོར་ནི་ན་མ་ཧིའོ། །སྤྱི་གཙུག་ལ་ནི་སྭཱ་ཧཱ་ཧུ། ཕྲག་པ་གཉིས་ལ་ནི་བཽ་ཥ་ཊ་ཧེ། མིག་གཉིས་ལ་ནི་ཧཱུྃ་ཧཱུྃ་ཧོཿ ཡན་ལག་ཐམས་ཅད་ལ་མཚོན་ཆ་ཕཊ་ཧཾ། དང་པོ་རྡོ་རྗེ་སེམས་དཔའ་སྟེ། །གཉིས་པ་རྣམ་པར་སྣང་མཛད་གཞུག །གསུམ་པ་པདྨ་གར་དབང་ཕྱུག །བཞི་པ་དཔལ་ལྡན་ཧེ་རུ་ཀ །རྡོ་རྗེ་ཉི་མ་རྟ་མཆོག་སྟེ། །དྲུག་པ་གོ་ཆ་རྣམས་ཀྱིས་བསྲུང་། །ཨོཾ་ཨོཾ་བྃ་ནི་རྡོ་རྗེ་ཕག་མོ་ཉིད། ཨོཾ་ཧྃ་ཡོཾ་ནི་ཡཱ་མི་ནི། ཨོཾ་ཧྲཱིཾ་མོཾ་ནི་རྨོངས་བྱེད་མའོ། །ཨོཾ་ཧྲིཾ་ཧྲིཾ་ནི་སྦྱིན་བྱེད་མའོ། །ཨོཾ་ཧཱུྃ་ཧཱུྃ་ནི་སྐྱོད་བྱེད་མའོ། །ཨོཾ་ཕཊ་ཕཊ་ནི་ཙཎྜཱི་ཀ་སྟེ། །ཡན་ལག་ཐམས་ཅད་ལ་མཚོན་ཆ་ཡིན་ཏེ། ལྟེ་བ་དང་། སྙིང་ག་དང་། མགོ་བོ་དང་། སྤྱི་གཙུག་དག་གི་མཚོན་ཆ་ཉིད་དོ། །ཞེས་གསུངས་ཏེ་འདི་དག་གི་དོན་ལ་ལྷ་གང་ལ་འགོད་པ། རྣམ་པ་གང་འགོད་པ་གཉིས་ལས། དང་པོ་ནི་བུ་སྟོན་གྱིས། རྣལ་འབྱོར་མ་ཀུན་སྤྱོད་ཀྱི་ཊཱི་ཀར། འདིར་ཁ་ཅིག་ཡབ་དྲུག་ལའང་ཡུམ་གྱིས་འཁྱུད། ཡུམ་དྲུག་ལའང་ཡབ་ཀྱིས་འཁྱུད་པ། ཡི་གེ་འགོད་ནའང་ཡབ་ཀྱི་ཡི་གེའི་གནས་སུ་ཡུམ་གྱི་ཡི་གེ་དང་། ཡུམ་གྱི་ཡི་གེའི་གནས་སུ་ཡབ་ཀྱི་ཡི་གེ་འགོད་པར་བཤད་པ་ནི་མི་འཐད་དེ། མཁའ་འགྲོ་རྒྱ་མཚོར། དེ་ཕྱིར་བསྲུང་བ་ཨོཾ་ཧ་ཡིན། །མི་རྣམས་ཀྱི་ནི་སྙིང་དབུས་སུ། །སུམ་ཅུ་བདུན་དག་ཉིད་དཀྱིལ་འཁོར། །རྡོ་རྗེ་ཕག་མོས་འཁྱུད་པ་ཡང་། །ཞེས་ཡབ་ཡུམ་གྱིས་འཁྱུད་པར་བཤད་ཅིང་། གང་ཚེ་རྡོ་རྗེ་ཕག་མོ་ནི། །གཙོ་མོ་རྣམ་པར་གནས་པ་ན། །ཨོཾ་བཾ་ཞེས་བྱ་ལ་སོགས་པའི། །སྔགས་ཀྱི་ཡི་གེ་སྦྱིན་པར་བྱ། །ཞེས་ཡུམ་གཙོ་བོར་བྱེད་པ་ན། ཡུམ་རྐྱང་པའི་ས་བོན་འགོད་པར་བཤད་པའི་ཕྱིར་དང་། ལྭ་བ་པས་ཀྱང་དེ་བཞིན་དུ་བཤད་པའི་ཕྱིར་རོ། །ཞེས་བཀག་ནས། འདིར་བླ་མ་མལ་གྱོའི་རྗེས་སུ་འབྲང་བ་རྣམས་ཡབ་ལའང་གོ་ཆ་གཉིས་ཆར་དགོད། དེ་བཞིན་དུ་ཡུམ་དང་ལྷ་ཐམས་ཅད་ལའང་གོ་ཆ་གཉིས་ཆར་འགོད་པར་བཞེད་དོ། །པུ་ཧྲངས་ལོ་ཆུང་གི་རྗེས་སུ་འབྲང་བ་རྣམས་ཡབ་ལ་ཡབ་ཀྱི་གོ་ཆ་དང་། དཔའ་མོ་རྣམས་ལ་ཡུམ་གྱི་གོ་ཆ་འགོད་པར་བཞེད་དོ། །ཛ་ཡ་སེ་ན་དང་། བ་རེག་ལོ་ཙཱ་བ་དང་། རྨ་བན་ལོ་ཙཱ་བའི་རྗེས་སུ་འབྲང་བ་རྣམས་གཙོ་བོ་ཡབ་ལ་དཔའ་བོའི་གོ་ཆ་དང་། ཡུམ་ལ་དཔའ་མོའི་གོ་ཆ་འགོད་ཀྱི་འཁོར་ལ་གོ་ཆ་མི་འགོད་པར་བཞེད་དོ། །འདི་གསུམ་ལས་ཕྱོགས་གཉིས་པ་ལེགས་ཏེ། ཡུམ་ལའང་གོ་ཆ་གཉིས་ཀ་དགོས་ན། ཡུམ་རྐྱང་པ་ལའང་གོ་ཆ་གཉིས་ཀ་ཡོད་པར་འགྱུར་བ་ལས། བོད་དུ་འགྱུར་བའི་ཕག་མོའི་སྒྲུབ་ཐབས་ལྷ་སོ་བདུན་མ་སོགས་གང་ལས་ཀྱང་དཔའ་མོའི་གོ་ཆ་ལས་གཞན་མ་བཤད་པའི་ཕྱིར་ཞེས་བཞེད་དོ། །འདི་ནི་གཞན་ལུགས་དགག་པ་དང་ནང་འགལ་ཏེ། མཁའ་འགྲོ་རྒྱ་མཚོ་དང་ལྭ་བ་པས་ཡབ་ཀྱི་དཔའ་བོའི་གོ་ཆ་ལ་ཡུམ་གྱིས་འཁྱུད་པར་གསུངས་པ་དེ་ཉིད་ཀྱིས། དཔའ་བོ་རྣམས་ལ་ཡབ་ཀྱི་གོ་ཆ་ཁོ་ན་འགོད་པ་ལ་དངོས་སུ་གནོད་པའི་ཕྱིར་རོ། །གཞུང་དེས་དཔའ་བོ་རྣམས་ལ་ཡབ་ཡུམ་གྱི་གོ་ཆ་གཉིས་ཀ་འགོད་པར་གྲུབ་ན། མངོན་བརྗོད་ལས། གོ་ཆ་གཉིས་པོ་ཉིད་དག་ཀྱང་། །འཁོར་ལོ་ཀུན་ལ་རྣམ་བསྒོམས་ནས། །ཞེས་པས་ཀྱང་འཁོར་ལོ་ཀུན་ལ་གོ་ཆ་གཉིས་ཀ་ཡོད་པར་གྲུབ་ཅིང་། དེའི་དོན་ལྷ་ཕོ་ལ་དཔའ་བོའི་གོ་ཆ་དང་། མོ་ལ་དཔའ་མོའི་གོ་ཆ་བྱས་པ་ནི་འཁྱོག་པོའི་བཤད་པ་སྟེ། དེ་ལྟར་ན་འཁོར་ལོ་བར་པ་གསུམ་ལ་བཤད་དུ་རུང་ཡང་། འཁོར་ལོ་གོང་འོག་གཉིས་ལ་བཤད་དུ་མི་རུང་བའི་ཕྱིར་རོ། །ནག་པོ་དཀྱིལ་ཆོག་ལས། དཔའ་བོ་ཀུན་དང་རྣལ་འབྱོར་མར། །གོ་ཆ་གསུམ་གྱིས་བརྒྱན་པ་ཡིན། །ཞེས་པའི་དོན། ལྷ་ཕོ་ལ་དཔའ་བོ་དང་། མོ་ལ་དཔའ་མོ་དང་། གཙོ་བོ་ལ་གོ་ཆ་ཆེན་པོས་བརྒྱན་པས་སྤྱིར་བསྡུས་ནས་དེ་སྐད་གསུངས་ཀྱི་ལྷ་རེ་རེ་ལ་གོ་ཆ་གསུམ་གསུམ་ཡོད་པ་ལ་དགོངས་པ་མ་ཡིན་ནོ། །ཞེས་པ་ཡང་སྔ་མ་དང་མཚུངས་ཏེ། དེ་འདྲ་བའི་བཤད་པ་ནི། དཔའ་བོ་ཀུན་དང་རྣལ་འབྱོར་མར། །གོ་ཆ་གསུམ་གྱིས་བརྒྱན་པ་ཡིན། །ཞེས་པའི་ཡི་གེའི་དོན་ལ་མ་ཞུགས་པའི་ཕྱིར། དེས་ན་ལུང་འདི་གཉིས་ཀྱི་དོན། ལྷ་རེ་རེ་ཡང་གོ་ཆ་གཉིས་གཉིས་ཀྱིས་བརྒྱན་པ་དམིགས་པ་རྒྱ་ཆེ་བས་བསྒོམ་ཚུལ་སྟོན་ཀྱང་། དཔའ་བོ་ལ་ཡབ་ཀྱི་གོ་ཆ་དང་། དཔའ་མོ་ལ་ཡུམ་གྱི་གོ་ཆ་གསུངས་པ་དང་། ཡང་སྐབས་འགའ་ཞིག་ཏུ་གཙོ་བོ་ལ་གསུངས་ནས་འཁོར་ལ་མ་གསུངས་པ་སོགས་ནི་དམིགས་པ་རྒྱ་ཆུང་བས། དངོས་སུ་དེ་ཙམ་བསྒོམས་ནས། གཞན་རྣམས་མོས་པ་བྱེད་པ་ཙམ་གྱི་དབང་དུ་བྱས་པ་ནི་རྒྱུད་གཞུང་རྣམས་ཀྱི་དགོངས་པ་རྗེ་བཙུན་མཆོག་གིས་བཀྲལ་བའི་ལུགས་སོ། །གཉིས་པ་ནི་རྩ་རྒྱུད་ལེའུ་དྲུག་པ་ལས། ཡན་ལག་དྲུག་ནི་ཧེ་རུ་ཀ །དབང་པོ་དྲུག་དང་མཉམ་སྦྱོར་བ། །ཡི་གེ་རེ་རེར་ཡང་དག་གནས། །ཞེས་འབྱུང་བས། ཧ་ཧི་ཧུ་ཧེ་ཧོ་ཧཾ་སྟེ་ཐུང་ངུ་དྲུག་ལ་རྐྱེན་རྩ་རྒྱུད་ཀྱི་ལེའུ་དེ་ཉིད་ལས། ཨོཾ་ན་མཿསྭཱ་ཧཱ་བཽ་ཥ་ཊ། ཧུཾ་ཧཱུྃ་ཕཊ་དང་ཡང་དག་ལྡན། །ཞེས་འབྱུང་བ་ཡན་ལག་ཏུ་སྦྱར་ན། རིམ་པ་བཞིན་དུ་ཨོཾ་ཧ་ལ་སོགས་པར་འགྱུར་བའོ། །ཡང་རྩ་རྒྱུད་ལེའུ་བརྒྱད་པ་ལས། ཡི་གེ་བྃ་དང་ཡོཾ་དང་ནི། །ཡི་གེ་མོཾ་དང་ཧྲཱིཾ་ཉིད་དང་། །ཧཱུྃ་དང་ཕཊ་ཅེས་བཤད་པ་ནི། །རྣལ་འབྱོར་མ་ནི་དྲུག་ཏུ་བཤད། །ཅེས་དང་། ཡང་ལེའུ་དེ་ཉིད་ལས། ཨོཾ་ཧཱྃ་ཧྲིཾ་ཧྲིཾ་ཧཱུྃ་ཕཊ། ཅེས་པ་དྲུག་དང་རིམ་པ་བཞིན་དུ་སྦྱར་ན་ཨོཾ་བཾ་ཞེས་པ་ལ་སོགས་པར་འགྱུར་བའོ། །འདི་དག་ལ་ཇོ་བོ་བྷ་དན་ཏ་ནི་མངོན་བརྗོད་བླ་མའི་ལེའུ་སུམ་ཅུ་རྩ་བདུན་པའི་རྗེས་སུ་འབྲངས་ནས། ཡི་གེ་དེ་རྣམས་ཡོངས་སུ་གྱུར་པ་ལས། ལྷ་ཡབ་ཀྱི་སྐབས་སུ་ཡུམ་དང་གཉིས་སུ་མེད་པར་བཞུགས་པ་དང་། ཡུམ་གྱི་སྐབས་སུ་ཡབ་དང་གཉིས་སུ་མེད་པར་བཞུགས་པར་བཞེད་དོ། །ཕམ་འཐིང་པ་རྗེས་འབྲང་དང་བཅས་པ་ཀུན་སྤྱོད་དང་། ལཱུ་ཧི་པའི་དགོངས་པས་རང་རང་གི་གནས་སུ་ཟླ་བ་ལ་སྔགས་བསམས་ནས་ལྷར་མོས་པ་ཉིད་ཀྱིས་ཆོག་ཅེས་གསུངས་ཏེ། སྔ་མ་ནི་སྤྲོས་པ་ལ་དགའ་བའི་དབང་དུ་བྱས་པ་དང་། ཕྱི་མ་ནི་ཉུང་ངུའི་རྣལ་འབྱོར་ལ་དགའ་བའི་དབང་དུ་བྱས་པ་ཡིན་པས་གཉིས་ཀ་ཡང་རུང་ངོ་། །དམར་གྱིས། མཁའ་འགྲོ་རྒྱ་མཚོ་ལས། གལ་ཏེ་དངོས་གྲུབ་མཆོག་འདོད་ན། །སྔགས་དང་ལྷ་ལ་ཐ་དད་མེད། །ཅེས་གསུངས་པས་ཁོ་བོ་ནི་ཕྱི་མ་འཐད་དོ་སྙམ་དུ་སེམས་སོ་ཞེས་བཤད་དོ། །བཞི་པ་དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པ་ནི། སློབ་དཔོན་གྱི་གཞུང་ལས། སྔགས་ཕྲེང་གི་འོག ཇི་ལྟར་བལྟམས་པ་ཙམ་གྱིས་ཀྱང་། །ཞེས་པ་ནས། དབང་བསྐུར་བའི་སྔགས་སོ་ཞེས་པའི་བར་གསུངས་ཏེ། འདི་ལ་བཞི་སྟེ། དབང་ལྷ་སྤྱན་དྲང་བ། མཆོད་ཅིང་གསོལ་བ་གདབ་པ། དབང་བསྐུར་བའི་ཚུལ། རིགས་བདག་གི་རྒྱས་གདབ་པའོ། །དང་པོ་ནི། རྗེ་བཙུན་གྱིས། དེ་ནས་དབང་བསྐུར་བ་བརྗོད་པར་བྱ་སྟེ། གང་གི་ཡེ་ཤེས་ཀྱི་དཀྱིལ་འཁོར་སྤྱན་དྲང་བའི་སྐབས་ཀྱི་ལུས་ཀྱི་ཕྱག་རྒྱ་དང་། སྔགས་དང་། ཏིང་ངེ་འཛིན་གྱིས་དབང་བསྐུར་གྱི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་མདུན་གྱི་ནམ་མཁར་སྤྱན་དྲངས་ཞེས་གསུངས་པ་ལྟར་བྱའོ། །པྲ་ཛྙཱ་རཀྵི་ཏའི་འགྲེལ་པ་ལས་ནི་ཡེ་ཤེས་ཀྱི་འཁོར་ལོ་དགུག་པ་དང་དུས་མཉམ་པའི་རྡོ་རྗེ་རྣལ་འབྱོར་མ་ཡེ་ཤེས་ཀྱི་བདུད་རྩིས་བཀང་བའི་ཐོད་པ་དང་། ཌཱ་མ་རུ་འཛིན་པ་དབང་ལྷ་ཡིན་པར་བཤད་དོ། །གཉིས་པ་ནི་ཡེ་ཤེས་ཀྱི་འཁོར་ལོའི་སྐབས་ལྟར་ཕྱི་དང་། ཡིད་ཀྱི་མཆོད་པས་མཆོད། དེ་བཞིན་གཤེགས་པ་ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་གདབ་པའོ། །གསུམ་པ་ནི་དེ་བཞིན་གཤེགས་པ་རྣམས་ཀྱི་ཕྱག་ན་ཡེ་ཤེས་ཀྱི་བདུད་རྩིས་གང་བའི་བུམ་པས་སྤྱི་གཙུག་ནས་མར་ལ་དབང་བསྐུར་ཞིང་། ངག་ཏུ། ཇི་ལྟར་བལྟམས་པ་ཙམ་གྱིས་ཀྱང་། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ་ཞེས་བརྗོད་ཅིང་དབང་བསྐུར་བས་ལུས་ཐམས་ཅད་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་གང་སྟེ། ལུས་ངག་ཡིད་གསུམ་གྱི་དྲི་མ་སྦྱངས་ཞེས་རྗེ་བཙུན་གསུང་སྟེ། ལུས་ཐམས་ཅད་ནི་སྨིན་མཚམས་ཡན་ཆད་དང་། མགྲིན་པ་ཡན་ཆད་དང་། སྙིང་ག་ཡན་ཆད་དང་། རྐང་མཐིལ་ཡན་ཆད་གང་སྟེ། དེས་བུམ་པ་དང་། གསང་བ་དང་། ཤེས་རབ་ཡེ་ཤེས་དང་། དབང་བཞི་པ་ཐོབ་པ་སྟེ། གྲུབ་ཆེན་མཚོ་སྐྱེས་ཀྱིས་ཀྱཻ་རྡོ་རྗེའི་སྐབས་སུ་ཡང་དེ་ལྟར་གསུངས་ཤིང་། སངས་རྒྱས་ཐོད་པའི་ལེའུ་གསུམ་པ་ལས། བརྩེ་དང་ལྡན་པའི་གྲགས་ཆེན་མོ། །འཁོར་བའི་འདམ་དུ་བྱིང་བ་བདག །དབང་བསྐུར་བ་ཡིས་བདག་བསྒྲལ་ཕྱིར། །རྡོ་རྗེ་རྣལ་འབྱོར་མས་ཁྲུས་ཤིག །དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པི་ཝཾ་སྦྱོར་ཀུན་ཚོགས། །རྒྱུད་དང་བྲལ་ན་བརྡུང་མི་རུང་། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །དེ་ལྟར་ཤེས་བྱ་རྣལ་འབྱོར་མ། །སླར་ཡང་བདག་ལ་དབང་བསྐུར་ཅིག །ཅེས་གསོལ་བ་གདབ་པ་འདི་སྒྲུབ་ཐབས་ཀྱི་དབང་ལྷ་སྤྱན་དྲངས་པ་ལ་གསོལ་བ་གདབ་པའི་སྐབས་སུ་གསུངས་ཤིང་། ཚིགས་བཅད་གཉིས་པས་གསང་དབང་དང་། གསུམ་པས་ཤེས་རབ་ཡེ་ཤེས་དང་། བཞི་པས་དབང་བཞི་པ་བསྟན་པར་དཀའ་འགྲེལ་ཡེ་ཤེས་ལྡན་ལས་བཤད་པས། སྐབས་འདིར་དབང་བཞི་ཐོབ་དགོས་པ། བླ་མེད་ཀུན་གྱི་དགོངས་པར་སྣང་བའི་ཕྱིར་རོ། །དེས་དྲི་མ་གང་དག་པ་ནི། ལུས་དང་། ངག་དང་། ཡིད་དང་། དེ་གསུམ་ཆར་གྱི་དྲི་མ་དག་པའོ། །དབང་བསྐུར་བ་དེ་དག་གི་དུས་སུ། དཀྱིལ་འཁོར་གྱི་འཁོར་ལོ་དེ་དག་གི་ཐུགས་ཀ་ནས་སྒོ་མཚམས་མ་བརྒྱད་དཔག་ཏུ་མེད་པ་སྤྲོས་ཏེ། དེས་བདག་གི་དཀྱིལ་འཁོར་མཆོད་པ་དང་། བཀྲ་ཤིས་ཀྱི་གླུ་དང་། བགེགས་བསྐྲད་པས་ནམ་མཁའི་ཁམས་ཐམས་ཅད་གང་བར་བསམ་པར་བྱའོ་ཞེས་གསུངས་སོ། །བཞི་པ་ནི་རྗེ་བཙུན་གྱིས་ཆུ་ལྷག་མ་ཡར་ལུད་པ་ལས། རིགས་ཀྱི་བདག་པོས་དབུར་བརྒྱན་པར་བསམས་ཏེ། དེ་ཡང་བདེ་བ་ཆེན་པོའི་འཁོར་ལོ་ལྷ་ལྔ་དང་། སྒོ་མཚམས་མ་བརྒྱད་དེ་བཅུ་གསུམ་ལ་ནི། བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ཉིད་ཀྱིས་དབུ་བརྒྱན་པ་ཡིན་ལ། ཐུགས་ཀྱི་འཁོར་ལོ་རྣམས་ལ་ནི་མི་བསྐྱོད་པ། གསུང་གི་འཁོར་ལོ་རྣམས་ལ་ནི་འོད་དཔག་ཏུ་མེད་པ། སྐུའི་འཁོར་ལོ་རྣམས་ལ་ནི་རྣམ་པར་སྣང་མཛད་ཀྱིས་དབུ་བརྒྱན་པར་བྱའོ་ཞེས་གསུངས་ལ། འགྲེལ་པར་ནི་ཆུའི་ལྷག་མ་ལས་སྐྱེས་པའི་དེ་བཞིན་གཤེགས་པ་རྣམས་སྤྱི་བོར་བལྟས་ཏེ། ཨོཾ་སརྦ་ཏ་ཐཱ་ག་ཏ་ཞེས་བྱ་བ་ལ་སོགས་པའི་སྔགས་བརྗོད་པར་བྱའོ། །དེ་ལ་བཅོམ་ལྡན་འདས་ལ་ནི་མི་བསྐྱོད་པའོ། །ཡུམ་ལ་ནི་རྣམ་པར་སྣང་མཛད་ཀྱིས་སོ། །མཁའ་འགྲོ་མ་ལ་སོགས་པ་ལ་རིན་ཆེན་འབྱུང་ལྡན་ནོ། །ཐུགས་དང་། གསུང་དང་། སྐུའི་འཁོར་ལོར་སོན་པ་རྣམས་ལ་མི་བསྐྱོད་པ་དང་། འོད་དཔག་མེད་དང་། རྣམ་པར་སྣང་མཛད་དོ། །དམ་ཚིག་གི་འཁོར་ལོར་སོན་པ་རྣམས་ལ་ནི་དོན་ཡོད་གྲུབ་པས་སོ་ཞེས་གསུངས་པས་འདི་ཡང་འགལ་བ་མེད་ལ། དྲིལ་བུ་པའི་སྒྲུབ་ཐབས་སུ་རྗེ་བཙུན་གྱིས་ཀྱང་འདི་བཞིན་མཛད་དོ། །རིགས་ཀྱི་བདག་པོས་རྒྱས་གདབ་པའི་རྗེས་ལ། དབང་བསྐུར་གྱི་ལྷ་དེ་དག་གཤེགས་སུ་གསོལ་བའམ། མི་དམིགས་པར་བྱ་བའམ། བདག་གི་ལུས་ལ་བསྡུ་བ་སྟེ་རང་གི་བློ་ལ་གང་བདེ་བ་ཡིན་ནོ་ཞེས་རྗེ་བཙུན་གསུང་ངོ་། །བདག་ཉིད་སངས་རྒྱས་སུ་བསྐྱེད་པ་བསྟན་ཟིན་ཏོ། །གཉིས་པ་དེ་ལ་མཆོད་པ་ནི་སློབ་དཔོན་གྱི་གཞུང་ལས། ཨོཾ་ཤྲཱི་བཛྲ་ཧེ་ཧེ་ཞེས་པ་ནས། དེ་དག་ནི་མཆོད་པའི་སྔགས་སོ་ཞེས་པའི་བར་ཡབ་ཀྱི་སྙིང་པོ་དང་ཉེ་སྙིང་གཉིས། ཡུམ་གྱི་སྙིང་པོ་དང་ཉེ་སྙིང་གཉིས། དཔའ་བོ་ཉི་ཤུ་རྩ་བཞི་དང་། དཔའ་མོ་ཉི་ཤུ་བཞིའི་སྔགས། སྒོ་མཚམས་མ་བརྒྱད་ཀྱི་སྔགས། སྙིང་པོའི་རྣལ་འབྱོར་མ་བཞིའི་སྔགས། ཡབ་ཀྱི་རྐང་པ་བརྒྱད་པ་ཙམ་ཞིག་གསུངས་ལ། འགྲེལ་པར་དེ་ནས་མཆོད་པ་སྔོན་དུ་འགྲོ་བས་རོ་མ་ཞེས་བྱ་བའི་ལྷ་མོས་ཉེ་བར་བཏབ་པའི་བདུད་རྩི་མྱངས་ཏེ། སྙིང་པོ་ནས་བཟུང་ནས་རྐང་པ་བརྒྱད་པའི་མཐར་ཐུག་པའི་སྔགས་ཀྱིས་བསྟོད་པར་བྱའོ་ཞེས་སྔགས་འདི་དག་གིས་བསྟོད་པར་བྱས་ནས། དེའི་སྔོན་དུ་ཕྱི་མཆོད་ནང་མཆོད་གཉིས་ཏེ། གསུམ་ཙམ་ཞིག་བཞེད་དོ། །རྗེ་བཙུན་གྱིས་བདག་གི་མངོན་པར་རྟོགས་པ་ནར་མའི་སྐབས་སུ། གསང་སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་སྟེ་དྲུག་པོ་འབའ་ཞིག་བྱེད་པ་ཡིན་ལ། ཚེས་བཅུའི་མཆོད་པ་ལ་སོགས་པའི་དུས་སུ་ནི་ཕྱི་མཆོད་ཀྱི་རྗེས་སུ་རིག་མ་བཅུ་དྲུག་དང་། རིན་ཆེན་སྣ་བདུན་དང་། འདོད་ཡོན་ལྔའི་མཆོད་པ་སྟེ་གསུམ་བསྣན་པས་དགུའི་མཆོད་པ་བྱེད་པ་ཡིན་ནོ་ཞེས་གསུངས། དམར་གྱིས་གསང་སྔགས་ཀྱི་མཆོད་པ་མི་བྱེད་པར། ཕྱི་དང་ནང་དང་མཉེས་མཆོད། ཡིད་ལས་བྱུང་བའི་མཆོད་པ་དང་། དེ་ཁོ་ན་ཉིད་དང་། བསྟོད་པའི་མཆོད་པ་སྟེ་དྲུག་མཛད་དོ། །དེ་ལ་སྔགས་ཀྱི་མཆོད་པ་ནི། རྩ་སྔགས་གཉིས་སུ་མེད་པ་དང་། སྙིང་པོ་གཉིས་སུ་མེད་པ་དང་། ཉེ་སྙིང་གཉིས་སུ་མེད་པས་གཙོ་བོ་ཡབ་ཡུམ་གསལ་གདབ་པའི་ཚུལ་གྱིས་མཆོད། ཞལ་བཞི་པའི་སྔགས་དང་སྙིང་པོའི་རྣལ་འབྱོར་མ་བཞི་གཉིས་སུ་མེད་པ་དང་། འཁོར་ལོ་གསུམ་ཡབ་ཡུམ་རྣམས་ཀྱི་སྔགས་གཉིས་སུ་མེད་པ་དང་། རྐང་པ་བརྒྱད་པ་དང་སྒོ་མཚམས་མ་བརྒྱད་གཉིས་སུ་མེད་པས་ལྷ་ཐམས་ཅད་གསལ་གདབ་པའི་ཚུལ་གྱིས་མཆོད་པར་བྱ་བ་ནི་སྔགས་ཀྱི་མཆོད་པའོ་ཞེས་རྗེ་བཙུན་གསུངས་སོ། །སྔགས་མཆོད་ཀྱི་དམིགས་པ་དེ་ལྟར་ཡིན་པ་ལ་ཁ་ཅིག སྔགས་མཆོད་ཀྱི་ཚེ་རང་གི་སྙིང་ག་ནས་མཆོད་ཡོན་ལ་སོགས་པའི་མཆོད་རྫས་དུ་མ་སྤྲོས་ཏེ། དཀྱིལ་འཁོར་གྱི་མཐའ་བསྐོར་ནས་རང་ལ་མཆོད་པར་བསམ་ཞེས་པ་ནི་སྔགས་མཆོད་དང་ཕྱི་མཆོད་ཀྱི་དམིགས་པའི་ཁྱད་པར་མ་ཕྱེད་པའོ། །དེ་ལ་བུ་སྟོན་གྱིས། དེ་ཉིད་བཅུ་བཞིའི་སྔགས་རྣམས་ཀུན་གྱིས་མཆོད་པའོ། །ཞེས་པ་ལ་བརྟེན་ནས་ལྷ་ཐམས་ཅད་གསལ་འདེབས་པའི་ཚུལ་གྱིས་སྔགས་ཚང་བར་བཟླས་པ་སྔགས་ཀྱི་མཆོད་པ་ཞེས་ལག་ལེན་ལ་མཛད་དེ། བྱས་ཀྱང་འགལ་བ་མེད་དོ། །སྒྲུབ་ཐབས་ཀྱི་གཞུང་གང་ནས་ཀྱང་མ་བཤད་པས་མ་བྱས་ཀྱང་སྐྱོན་མེད་དོ་ཞེས་གསུངས་པ་ནི། སྒྲུབ་ཐབས་ཀྱི་རྒྱལ་པོ་གཞུང་འདིའི་རྩ་བར། སྔགས་རྣམས་རྫོགས་པའི་མཐར་དེ་དག་ནི་སྔགས་ཀྱི་མཆོད་པའོ་ཞེས་པ་འདི་ཉིད་ཀྱིས་ཆོག་ཅིང་། རང་ཉིད་ཀྱང་སྒྲུབ་ཐབས་རྣལ་འབྱོར་བཞི་ལྡན་དུ་དེ་ལ་བརྟེན་ནས་སྔགས་མཆོད་དངོས་སུ་མཛད་པ་ལ་ཡང་སྔར་གྱི་དཔྱད་པ་དེ་དག་མཚུངས་སོ། །གཉིས་པ་ཕྱིའི་མཆོད་པ་ནི་དངོས་སུ་བཤམས་ན་ལེགས། མ་བཤམས་ཀྱང་ཡིད་ཀྱིས་སྤྲུལ་པ་ལ་ཡང་ཕྱི་མཆོད་དུ་མིང་འདོགས་ཏེ། མདུན་དུ་བཤམས་པའམ་ཡིད་ཀྱིས་བསམ་པ་དེ་ཞལ་བཞི་པའི་སྔགས་ཀྱིས་བསང་། སྭ་བྷཱ་ཝའི་སྔགས་ཀྱིས་སྟོང་པར་བསྒོམ། ཨ་བདུན་ལས་ཐོད་པའི་སྣོད་བདུན། དེའི་ནང་དུ་ཧཱུྃ་ལས་མཆོད་ཡོན་ལ་སོགས་པ་དྭངས་ཤིང་ཐོགས་པ་མེད་པའི་ཡེ་ཤེས་ཀྱི་བདུད་རྩིའི་རང་བཞིན་གྱིས་གང་བར་བསམ། བཛྲ་ཨརྒྷཾ་ཞེས་བྱ་བ་ལ་སོགས་པ་རང་རང་གི་སྔགས་ཀྱིས་བྱིན་གྱིས་བརླབས་ལ། འབུལ་བའི་ཚུལ་ནི་ཚོགས་ཞིང་གི་སྐབས་དང་འདྲ་ཞིང་། ཁྱད་པར་སྐབས་འདིར་གྷཎྜེ་ར་ཎིའི་སྐབས་སུ་རྡོ་རྗེ་དྲིལ་བུ་གསིལ་བ་ཡང་རྗེ་བཙུན་གསུང་ངོ་། །གསུམ་པ་ནང་བདུད་རྩིའི་མཆོད་པ་ནི། བདུད་རྩི་དངོས་སུ་འབྱོར་རམ་བསམས་ཀྱང་རུང་སྟེ། འོག་ནས་འབྱུང་བའི་གཏོར་མ་བཞིན་བྱིན་གྱིས་བརླབས་ལ་ལག་པ་གཡོན་པའི་མཐེ་བོང་དང་སྲིན་ལག་གིས་འཐོར་ནས། དང་པོར་བདག་གི་རྩ་བའི་བླ་མ་གང་ཡིན་པའི་མཚན་བརྗོད་པ་སྔོན་དུ་འགྲོ་བས་ཨོཾ་ཨཱཿཧཱུྃ་ཞེས་བརྗོད་ཅིང་མཆོད། དེ་ནས་བླ་མ་བརྒྱུད་པ་རྣམས་ཀྱི་མཚན་བརྗོད་པ་སྔོན་དུ་འགྲོ་བས་མཆོད་དེ། ཧེ་རུ་ཀ་དཔལ་དཀྱིལ་འཁོར་དང་། །གསང་བའི་བདག་པོ་རྡོ་རྗེ་འཆང་། །དཔལ་ལྡན་སློབ་དཔོན་ས་ར་ཧ། །ཀླུ་སྒྲུབ་རི་ཁྲོད་མགོན་པོ་དང་། །ལཱུ་ཧི་པ་དང་དྷ་རི་ཀ །རྡོ་རྗེ་དྲིལ་བུ་རུས་སྦལ་ཞབས། །འབར་འཛིན་སྤྱོད་འཆང་གུ་ཧྱེ་པ། །བར་མ་རྣམ་རྒྱལ་ཏཻ་ལོ་པ། །ནཱ་རོ་པ་དང་ཕམ་འཐིང་པ། །བློ་གྲོས་གྲགས་པ་རྗེ་བཙུན་མཆོད། །ཨོཾ་ཨཱཿཧཱུྃ་ཞེས་བརྗོད་ཅིང་མཆོད། བསོད་ནམས་རྩེ་མོ་གྲགས་པའི་མཚན། །ས་སྐྱ་པཎ་ཆེན་འཕགས་པའི་ཞབས། །དཀོན་མཆོག་དཔལ་དང་བསོད་ནམས་དཔལ། །བློ་གྲོས་བརྟན་པ་དཔལ་ལྡན་པ། །ཡེ་ཤེས་རྒྱལ་མཚན་ཀུན་དགའི་མཚན། །དཀོན་མཆོག་རྒྱལ་མཚན་བླ་མ་མཆོད། །ཨོཾ་ཨཱཿཧཱུྃ་ཞེས་བརྗོད། ལཱུ་ཧི་པ་ཉིད་ལ་ནི། ལཱུ་ཧི་པ་དང་དྷ་རི་ཀ །ཞེས་པའི་རྗེས་སུ། ཨན་དྷར་པ་དང་ཏཻ་ལོ་པ། །ཞེས་པ་སྒྲེལ་བས་ཆོག་གོ །དེ་ནས་ཡང་དཀྱིལ་འཁོར་རྣམས་ལ་སྔགས་མཆོད་ཀྱི་སྔགས་དང་མཐུན་པར་མཆོད་པར་བྱ་ཞིང་། ཡི་གེ་གསུམ་བརྗོད་པས་ཆོས་སྐྱོང་སྲུང་མ་རྣམས་ལའང་མཆོད་དོ། །དེ་དག་གི་དུས་སུ་མདུན་དུ་བསྐྱེད་པ་དེ་ལས་ཐོད་པ་བདུད་རྩིས་བཀང་བ་དུ་མ་ཆད་ཅིང་གཙོ་བོ་ནས་བཟུང་ནས། ལྷ་ཐམས་ཅད་དང་དུར་ཁྲོད་ཆེན་པོ་རྣམས་ལ་ཕྱག་གཡོན་པར་ཐོད་པ་བདུད་རྩིས་བཀང་བ་རེ་ཕུལ་བར་བསམ། ཐོད་པ་བཞི་པོ་དེ་བྱང་ཤར་གྱི་གཤིན་རྗེ་འཇོམས་མའི་ཕྱག་དུ་ཕུལ་བར་བསམ། གཏོར་མ་དང་བདུད་རྩི་གཉིས་ཀ་བྱང་ཤར་གྱི་དུར་ཁྲོད་དུ་བསྐྱེད་པར་བྱ་བ་ནི་མན་ངག་གོ །བཞི་པ་མཉེས་པའི་མཆོད་པ་ནི། དེ་ནས་བདག་གི་ལྕེ་ལ་བདུད་རྩི་མྱངས་བར་བྱས་པས་ཕྱི་ནང་གི་ལྷ་ཐམས་ཅད་དགྱེས་པར་གྱུར་ནས་ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་ལྷ་ཐམས་ཅད་ཀྱི་ཞལ་ནས་གསུངས་པར་བསམས་ལ། བདག་གིས་ཀྱང་བརྗོད་ཅིང་ལག་པ་གཉིས་སྙིང་ཁར་རྣམ་ལྔ་འདོད་པའི་བསྐོར་བ་བྱ་སྟེ། མཐར་འཁྱུད་པའི་སྟངས་ཀ་བྱས་ལ་བདེ་བ་ཆེན་པོས་མཉེས་པའི་མཆོད་པ་བྱའོ། །ལྔ་པ་ཡིད་ལས་བྱུང་བའི་མཆོད་པ་ནི་ཚོགས་ཞིང་གི་སྐབས་སུ་བཤད་པ་ལྟར་རོ། །དྲུག་པ་བསྟོད་པའི་མཆོད་པ་ནི་པྲ་ཛྙཱ་རཀྵི་ཏས། གཞུང་ནས་འབྱུང་བའི་སྔགས་ཐམས་ཅད་བསྟོད་པའི་མཆོད་པར་བཞེད་ཀྱང་། རྗེ་བཙུན་གྱིས་བདེ་ཆེན་གྱི་ལྷ་མོ་བཞིའི་སྔགས་ཡན་ཆད་ལ་མན་ངག་གིས་འཁྲུགས་སྡེབས་པ་དང་སྤེལ་ཚུལ་སྦྱར་ནས་སྔགས་ཀྱི་མཆོད་པ་དང་། རྐང་པ་བརྒྱད་པས་བསྟོད་པའི་མཆོད་པ་བསྟན་པར་བཞེད་པས། དེ་ལྟར་ན་རྡོ་རྗེ་དྲིལ་བུ་གསིལ་ཞིང་། ཡབ་ཡུམ་གྱི་རྐང་པ་བརྒྱད་པ་གཉིས་ཀྱིས་བསྟོད་དོ། །སྤྲོས་པ་ལ་དགའ་ན། རྒྱལ་བ་སྤྲུལ་པ་དུས་མཐའི་མེ་ལྟར་རབ་ཏུ་འཇིགས་མཛད་ཅིང་། །ཞེས་སོགས་དང་། ཆོས་དབྱིངས་རྣམ་དག་དབྱིངས་ལས་མ་གཡོས་ཤིང་། །ཞེས་སོགས་ཀྱིས་བསྟོད་པར་རྗེ་བཙུན་དང་བུ་སྟོན་གསུང་ངོ་། །དེ་ལྟར་བདག་ཉིད་སངས་རྒྱས་སུ་བསྐྱེད་པ་ལ་མཆོད་ནས་བཟླས་པ་བྱ། དེའི་རྗེས་ལ་ཐུན་གོང་མ་གསུམ་ལ་ནི་རྡོ་རྗེ་སེམས་དཔའ་བསྡུ་བའི་ཚུལ་གྱིས་རྫོགས་པའི་རིམ་པ་བསྒོམ་པ་དང་། དེ་ལས་ལྷའི་སྐུར་ལངས་ནས་དག་པ་རྗེས་སུ་དྲན་པར་བྱ་སྟེ། དེ་དག་ནི་མཉམ་པར་བཞག་པའི་རྣལ་འབྱོར་ཞེས་བྱ་བ་ཡིན་ནོ། །དེ་ནས་སྤྱོད་ལམ་གྱི་རྣལ་འབྱོར་དང་། ཁ་ཟས་ཀྱི་རྣལ་འབྱོར་གཉིས་འབྲེལ་ཞིང་འབྱུང་བ་ཡིན་ལ། བླ་མ་ཁ་ཅིག་ནི་དག་པ་རྗེས་སུ་དྲན་པ་སྤྱོད་ལམ་གྱི་ཁོངས་སུ་འདུའོ་ཞེས་གསུང་ངོ་། །སྲོད་ཀྱི་ཐུན་ལ་ནི་ལཱུ་ཧི་པའི་གཞུང་ཇི་ལྟ་བ་བཞིན་དུ་བཟླས་པའི་རྗེས་ལ་གཏོར་མ་བཏང་ལ། དེ་ནས་དག་པ་རྗེས་སུ་དྲན་པར་བྱ་སྟེ། དེ་ནས་སྐབས་ཁ་ཅིག་ཏུ་འབྲེལ་པར་བྱུང་ན། སྤྱོད་ལམ་དང་ཁ་ཟས་ཀྱི་རྣལ་འབྱོར་བྱས་ལ་རྡོ་རྗེ་སེམས་དཔའ་བསྡུ་བའི་རྫོགས་པའི་རིམ་པ་བསྒོམ་པའི་ཚུལ་གྱིས་ཉལ་བའི་རྣལ་འབྱོར་བྱ་སྟེ། གཉིད་ལོག་པར་བྱའོ། །ནངས་པར་ལྡང་བའི་རྣལ་འབྱོར་བྱ་སྟེ་ལངས་ལ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །ཐུན་བཞི་ཀ་ལ་གཏོར་མ་གཏོང་བར་འདོད་ན། ཟླས་པའི་རྗེས་ལ་རྫོགས་པའི་རིམ་པ་བསྒོམས་ལ། དེ་ལས་ལངས་ཏེ་གཏོར་མ་བཏང་ནས་དག་པ་རྗེས་སུ་དྲན་པ་དང་། སྤྱོད་ལམ་དང་ཁ་ཟས་ཀྱི་རྣལ་འབྱོར་ལ་འཇུག་པ་ཡིན་ཏེ། དེ་ལྟར་ན་ནི་དག་པ་རྗེས་སུ་དྲན་པ་སྤྱོད་ལམ་གྱི་ཁོངས་སུ་མཛེས་སོ། །ཡང་ལུགས་གཞན་སྲོད་ཐུན་གྱི་སྐབས་སུ་བཟླས་པའི་རྗེས་ལ་གཏོར་མ་བཏང་ནས་རྫོགས་པའི་རིམ་པའི་ངང་ལ་ཉལ་ཏེ། ནངས་པར་ལྡང་བའི་རྣལ་འབྱོར་གྱི་རྗེས་ལ་དག་པ་རྗེས་སུ་དྲན་པ་བྱས་ནས་དེའི་རྗེས་ལ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྒྲུབ་པར་བྱའོ་ཞེས་ཀྱང་གསུང་ངོ་། །རྒྱས་པ་ལ་དགའ་བས་ཇི་སྙེད་ཡོད་པའི་ཆོས་ཐམས་ཅད་ཇི་ལྟ་བ་བཞིན་དུ་བསྒོམ་པའི་མངོན་པར་རྟོགས་པ་བསྟན་ཟིན་ཏོ། །གཉིས་པ་འབྲིང་ལ་དགའ་བས་ཅི་ལྟ་བ་བཞིན་དུ་བསྒོམ་པ་ནི་ཉལ་བའི་རྣལ་འབྱོར་དང་། ལྡང་བའི་རྣལ་འབྱོར་དང་། དེ་དང་འབྲེལ་པ་དགའ་བ་གསུམ་ནི་རྒྱས་པའི་སྐབས་དང་འདྲའོ། །བསམ་གཏན་གྱི་གྲོགས་སུ་འགྲོ་ན་ཁྲུས་བྱས། སྟན་བདེ་བ་ལ་བསྡད་ནས་མངོན་པར་རྟོགས་པ་བསྒོམ་པ་ནི། བདག་གིས་སྟན་བདེ་བ་འདི་ལ་བསྡད་ལ་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པའི་སངས་རྒྱས་བདེ་མཆོག་འཁོར་ལོའི་གོ་འཕང་ཐོབ་པར་བྱའོ་སྙམ་པའི་བྱང་ཆུབ་ཀྱི་སེམས་བསྒོམ་པ་ནི་ཚད་མེད་པ་བཞིའི་དོད་ཡིན་ནོ། །དེ་ནས་བདག་བླ་མ་དམ་པའི་དཀྱིལ་འཁོར་དུ་བཙུད་ཚུན་ཆད་བདག་གི་ལུས་ནི་རྟེན་གཞལ་ཡས་ཁང་པ་ཡིན་ལ། དེ་ལ་བརྟེན་པ་ལྷ་བཅུ་བདུན་དང་དྲུག་ཅུ་རྩ་གཉིས་ཀྱི་དཀྱིལ་འཁོར་ནི་ངོ་བོ་ཉིད་ཀྱིས་གནས་པ་ཡིན་སྙམ་པ་ནི་ཕུང་པོ་ཁམས་དང་སྐྱེ་མཆེད་གཞི་སྦྱང་བསྒྱུར་གྱི་དོད་ཡིན་ནོ། །དེ་ནས་བླ་མའི་ཆགས་ལྷྭམ་གཉིས་སྤྱི་བོར་བསྒོམས་ལ། འདི་ཉིད་ན་སངས་རྒྱས་དང་ཆོས་དང་དགེ་འདུན་ཐམས་ཅད་ཀྱི་ངོ་བོ་ཡིན་བདག་གི་རྒྱུད་ལ་ཡོན་ཏན་རིན་པོ་ཆེ་བསྐྱེད་པར་བྱེད་པའང་འདི་ཡིན་སྙམ་དུ་བསམས་ལ། གུས་འདུད་དྲག་པོ་བྱས་ལ་སྤྱི་བོ་ནས་མར་བསྟིམས་ཏེ་ཚོགས་གསག་བཅུ་གསུམ་གྱི་དོད་ཡིན་ནོ། །དེ་ནས་ལས་དང་པོ་པ་ལ་བར་ཆད་འབྱུང་བར་འདྲ་བས་ན་སྲུང་བའི་འཁོར་ལོ་རྒྱས་པ་བཞིན་བསྒོམས་ཏེ་ཡེ་ཤེས་ཀྱི་ཚོགས་མི་དགོས་པར་སྲུང་འཁོར་གྱི་དབུས་སུ་སྒྲ་ཚུལ་གྱི་རྐྱེན་གྱིས་ལུས་དཀྱིལ་གྱི་ཐོག་མར་རྟེན་དང་། དེ་ནས་ཕྱིའི་ཧེ་རུ་ཀ་དང་། དེ་ནས་སྙིང་གའི་ཧེ་རུ་ཀ་ནས་བཟུང་སྟེ། བརྟེན་པ་ལྷ་ཐམས་ཅད་གསལ་གདབ། སྔགས་ཀྱིས་བྱིན་གྱིས་བརླབ་པ་ནི་འདྲ། དེ་ནས་སྐབས་འདིར་ལྷ་ལ་ཞེན་པ་སྐྱེ་བ་དང་། ལམ་ལ་སོམ་ཉི་ཟ་ན་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་སྔར་རྒྱས་པའི་སྐབས་སུ་བསྟན་པ་ལྟར་བྱ། ལྷ་ལ་ཞེན་པ་དང་། ལམ་ལ་སོམ་ཉི་མེད་ན་མ་བྱས་ཀྱང་བཏུབ་ཞེས་ཀྱང་གསུང་ངོ་། །དེ་ནས་ཡན་ལག་ལྷག་མ་གསུམ་དང་། མཆོད་པ་དྲུག་ནི་རྒྱས་པའི་གནས་སྐབས་སུ་བསྟན་པ་ལྟར་སྟེ། འབྲིང་ལ་དགའ་བས་ཅི་ལྟ་བ་བཞིན་དུ་བསྒོམ་པ་ཞེས་བྱ་བའི་མངོན་པར་རྟོགས་པ་བསྟན་ཟིན་ཏོ། །གསུམ་པ་བསྡུས་པ་ལ་དགའ་བས། ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པ་ནི་ཉལ་བ་དང་། ལྡང་བ་དང་། ཁྲུས་ཀྱི་རྣལ་འབྱོར་ནི་གོང་དུ་བསྟན་པ་ཉིད་དང་འདྲ་ལ། དེ་ནས་སྟན་བདེ་བ་ལ་བསྡད་ནས་བདག་གིས་སེམས་ཅན་ཐམས་ཅད་ཀྱི་དོན་དུ་བཅོམ་ལྡན་འདས་འཁོར་ལོ་བདེ་མཆོག་གི་གོ་འཕང་ཐོབ་པར་བྱའོ་ཞེས་བྱང་ཆུབ་ཀྱི་སེམས་ཡུན་རིང་དུ་བསྒོམ། བླ་མའི་ཆགས་ལྷྭམ་གཉིས་སྤྱི་བོར་བསྒོམས་ལ། མོས་གུས་དྲག་པོ་བྱས་ལ་བསྟིམ། སྤྱི་གཙུག་གི་ཧཾ་དང་། ལྟེ་བའི་ཨཾ་གཉིས་སྒྲ་ཚུལ་གྱིས་རང་གི་སྙིང་གར་འདྲེས་པར་གྱུར་པའི་རྟེན་འབྲེལ་གྱིས་རྟེན་དང་བརྟེན་པར་བཅས་པའི་དཀྱིལ་འཁོར་ལུས་ཀྱི་དཀྱིལ་འཁོར་འབྲིང་གི་རྣལ་འབྱོར་བཞིན་གསལ་བཏབ་ལ་སྔགས་ཀྱིས་བྱིན་གྱིས་བརླབ་པ་དང་བརྟན་པར་བྱ་བ་སྔར་དང་འདྲ། ལྷ་ལ་ཞེན་པ་སྐྱེ་བ་དང་། ལམ་ལ་སོམ་ཉི་ཟ་ན་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་སྐབས་འདིར་བྱ། མི་སྐྱེ་ན་མི་དགོས། འདི་རང་བྱུང་གི་དཀྱིལ་འཁོར་ཡིན་པའི་ཕྱིར་ཡེ་ཤེས་པ་གཞུག་པ་དང་། གོ་ཆ་བཅིང་བ་དང་དབང་བསྐུར་བ་ནི་མི་དགོས། མཆོད་པ་ལ་སོགས་པ་མན་ཆད་ཀྱི་ཆོ་ག་རྣམས་འདྲ་བ་ཉིད་ཡིན་ཏེ། གོང་དུ་བསྟན་པ་བཞིན་འདིར་ཡང་ཉམས་སུ་བླང་བར་བྱའོ། །བསྡུས་པ་ལ་དགའ་བས་ཇི་ལྟར་གྲུབ་པ་ཙམ་ཞིག་བསྒོམ་པ་ཞེས་བྱ་བའང་བསྟན་ཟིན་ཏོ། །གཉིས་པ་བཟླས་པའི་རྣལ་འབྱོར་ལ་བདུན་ཏེ། གང་དུ་བཟླས་པའི་གནས་སྐབས་གང་བཟླ་བའི་སྔགས་ཀྱི་དབྱེ་བ། བཟླས་པའི་དུས་ཀྱི་དམིགས་པ། ཇི་ཙམ་བཟླས་པའི་གྲངས། གང་ལ་བརྟེན་པའི་ཡུལ་ཕྲེང་བ། ཇི་ལྟར་བཟླས་པའི་མན་ངག དེ་ལྟར་བཟླས་པའི་དགོས་པའོ། །དང་པོ་ནི་མངོན་པར་རྟོགས་པ་རྒྱས་འབྲིང་བསྡུས་པ་གསུམ་པོ་གང་བསྒོམས་ཀྱང་ཚེས་བཅུའི་མཆོད་པ་ལ་སོགས་པའི་དུས་སུ་ནི་མཆོད་པའི་རྗེས་ལ་གཏོར་མ་འབྱུང་ལ་མངོན་པར་རྟོགས་པ་ནར་མའི་སྐབས་སུ་མཆོད་པའི་རྗེས་ལ་བཟླས་པ་འབྱུང་སྟེ། རྩ་རྒྱུད་ལེའུ་སོ་ལྔ་པ་ལས། མཆོད་པ་གཉིས་མེད་སྦྱོར་བ་བདག །གང་དག་རབ་སྒྲུབ་བྱེད་པའི་སྔགས། །ལས་ནི་སོ་སོར་སྦྱར་བར་བྱ། །ཞེས་གསུངས་པས་སོ། །གཉིས་པ་ལ་གསུམ་སྟེ། བསྙེན་པའི་སྔགས། སྒྲུབ་པའི་སྔགས། ལས་སྦྱོར་གྱི་སྔགས་སོ། །དང་པོ་ནི། རྩ་རྒྱུད་ལེའུ་བརྒྱད་པ་ལས། ས་སྟེང་ན་ནི་རིན་ཆེན་བཞི། །ཕྲེང་བའི་སྔགས་ནི་དམ་པ་ཡིན། །ཞེས་པ་ཡབ་ཡུམ་གྱི་རྩ་སྔགས་གཉིས་གཉིས་སུ་མེད་པ་དང་། སྙིང་པོ་གཉིས་གཉིས་སུ་མེད་པ་དང་། ཉེ་སྙིང་གཉིས་གཉིས་སུ་མེད་པ་དང་། གོ་ཆ་གཉིས་གཉིས་སུ་མེད་པ་སྟེ། དེ་རྣམས་གང་བཟླས་ཀྱང་ཆོག་གོ་ཞེས་གསུངས། དེ་ལ་རྩ་སྔགས་སམ་ཕྲེང་སྔགས་ཞེས་པ་ནི་རྐང་པ་བརྒྱད་པའི་རྐང་པ་དང་པོའི་འགོར་ནི་ཨོཾ་ནི་ངེས་པར་དགོས་ལ། དེ་ཉིད་ཀྱི་གཤམ་གྱི་ཧུཾ་ཧཱུྃ་ཕཊ་དང་། རྐང་པ་ལྷག་མ་རྣམས་ཀྱི་ཨོཾ་དང་ཧུཾ་ཧཱུྃ་ཕཊ་མེད་པར་བྱ་སྟེ། དེའི་རྗེས་ལ་འཁོར་ལོ་གསུམ་གྱི་དཔའ་བོའི་སྔགས་ཀ་ར་ཀ་ར་ལ་སོགས་པ་སྦྲེལ་ནས་མཐར་ཧུཾ་ཧཱུྃ་ཕཊ་བཏགས་པ་ནི་ཡབ་ཀྱི་རྩ་བའི་སྔགས་སོ། །ཡུམ་གྱི་རྩ་སྔགས་ཀྱང་ཧེ་རུ་ཀ་མངོན་འབྱུང་དང་ཕག་མོ་མངོན་འབྱུང་གཉིས་ལས་འབྱུང་སྟེ། སློབ་དཔོན་གྱི་གཞུང་འདིར་ནི་མ་བཤད་དོ། །གཉིས་པ་སྒྲུབ་པའི་སྔགས་ནི་རྒྱུད་ནས་བཤད་པའི་ལས་ཚོགས་སྒྲུབ་པའི་དུས་སུ་མདུན་དུ་རྡུལ་ཚོན་ནམ། མེ་ཏོག་ཚོམ་བུ་ལ་སོགས་པའི་དཀྱིལ་འཁོར་ལ་བརྟེན་ནས། དཀྱིལ་འཁོར་གྱི་ལྷ་གྲངས་དང་མཐུན་པའི་རང་རང་གི་སྔགས་ཟློས་ཤིང་། རྫས་ལ་མཚན་མ་མ་མཐོང་གི་བར་དུ་བསྒྲུབ་པའོ། །གསུམ་པ་ལས་སྦྱོར་གྱི་སྔགས་ནི་ལས་བཞིའི་བྱེ་བྲག་གིས། སྔགས་ཀྱི་ཁ་དོག་དང་། དམིགས་པ་དང་། སྤེལ་ཚིག་རྣམས་བཞི་བཞིར་འགྱུར་ཏེ། ཞི་བའི་ལས་བསྒྲུབ་ན་མཉེས་མཆོད་ཀྱི་དུས་ཀྱི་བྱང་སེམས་ནོར་བུའི་རྩེ་མོ་ན་ཡོད་པ་དེ་ཁ་དོག་དཀར་པོར་དྲངས་ལ་སྙིང་གར་ཉི་མའི་སྟེང་དུ་ཧཱུྃ་ཁ་དོག་དཀར་པོ་འོད་ཁ་དོག་དཀར་པོ་འཕྲོ་བ། འོད་ཀྱི་སྒོ་ནས་འཁོར་ལོ་ལྔའི་ལྷ་དཀར་པོ་འཕྲོས་ནས་རང་གཞན་གྱི་ནད་དང་གདོན་ལ་སོགས་པ་ཞི་བར་བསམ་ཞིང་། མཐའ་རྟེན་ལ་ཤཱནྟིཾ་ཀུ་རུ་སྭཱ་ཧཱ་ཞེས་པ་བཏགས་ལ་བཟླ། དེ་བཞིན་དུ་གཞན་གསུམ་གྱི་དམིགས་པ་ནི་སྔགས་ཀྱི་འོད་ལས་འཁོར་ལོ་ལྔའི་ལྷ་ཚོགས་རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོ་འཕྲོས་ནས། རང་རང་གི་ལས་རང་གཞན་གྱི་ལུས་དང་། ལོངས་སྤྱོད་ལ་སོགས་པ་རྒྱས་པ་དང་། ཆེ་གེ་བཏགས་ལ་ཆགས་ཤིང་འདུན་པ་དང་འགའ་ཞིག་བདག་གི་མདུན་དུ་འོངས་པ་དང་། ལུས་སེམས་རེངས་པ་དང་། ལུས་སེམས་ཕྲལ་པ་ལ་སོགས་པ་གང་འདོད་པ་བྱས་པར་བསམ་ཞིང་། སྔགས་ཀྱི་མཐའ་རྟེན་རྒྱས་པ་ལ་པུཥྚིཾ་ཀུ་རུ་སྭཱ་ཧཱ། དབང་ལ་ཝཱ་ཤཾ་ཀུ་རུ་སྭཱ་ཧཱ། དགུག་པ་ལ་ཨཱ་ཀརྵ་ཡ་ཧྲི་ཛ་ཞེས་པ་དང་། རྨོངས་པ་ལ་མོ་ཧ་དང་། མནན་པ་ལ་ཛམྦྷ་ཡ་དང་། གསད་པ་ལ་མཱ་ར་ཡ་ཕཊ་ཅེས་བཏགས་ལ་བཟླའོ། །གསུམ་པ་ནི་རྗེ་བཙུན་ཆེན་པོས། གསང་སྔགས་གང་བཟླ་བ་ཡབ་ཀྱི་ཐུགས་ཀའི་ཧཱུྃ་ལས་བྱུང་ནས། ཡབ་ཀྱི་ཞལ་ནས་འཐོན་ཏེ་ཡུམ་གྱི་ཞལ་དུ་ཞུགས། ཡུམ་གྱི་སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསང་བའི་རྡོ་རྗེའི་བུ་གར་ཞུགས། སྐུའི་དབྱིབས་བརྒྱུད་དེ། ཐུགས་ཀའི་ཧཱུྃ་ལ་ཐིམ་པའི་ཚུལ་གྱིས་ཏེ། དེའང་ཞི་བ་ལ་ཁ་དོག་དཀར་པོ་སྔགས་གཅིག་གི་རྟིང་ལ་གཅིག་འབྲེང་བ་མདའི་ཤུགས་ཀྱིས་རབ་ཏུ་འགྲོ་བ་ཞེས་པ་དང་། རྒྱས་པ་ལ་ཁ་དོག་སེར་པོ་གསང་སྔགས་རྣམས་བུངས་བསྐྱེད་ནས་སྒྲོའི་ཆུན་པོ་ལྟ་བུའི་ཚུལ་གྱིས་འགྲོ་བ་ཞེས་བྱ་བ་དང་། དབང་ལ་ནི་ཁ་དོག་དམར་པོ་སྔགས་གཅིག་གི་མཇུག་མ་ལ་གཅིག་གི་མགོ་འཁྱུད་ནས་འགྲོ་བ་སྟེ་ལྕགས་སྒྲོག་ལྟ་བུ་ཞེས་བྱ་བ་དང་། དྲག་པོ་ལ་ནི་ཁ་དོག་ནག་པོ་ཡབ་ཡུམ་གྱི་སྔགས་སྒྲིལ་བ་སྲད་བུ་ལྟ་བུ་ཞེས་བྱ་བའི་ཚུལ་གྱིས་བཟླ་སྟེ། དེའང་མཆོག་བསྒྲུབ་པ་ལ་ནི་རིན་ཆེན་བཞི་ཞེས་བྱ་བ་རྩ་སྔགས་གཉིས་དང་། སྙིང་པོ་གཉིས་དང་། ཉེ་སྙིང་གཉིས་དང་། གོ་ཆ་གཉིས་ཏེ། བཞི་པོ་དེ་གང་མོས་པ་གཉིས་སུ་མེད་པར་བཟླ་བ་ཡིན་ལ། འཁོར་ལོ་རྣམས་ཀྱི་སྔགས་ནི་ཐུན་མཇུག་ལ་ཅི་རིགས་པར་བཟླ་བ་ཡིན་ནོ་ཞེས་གསུངས་སོ། །བཞི་པ་ནི་བརྟག་གཉིས་ལས། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གསུངས་ཤིང་། དེ་ཉིད་དུས་བཞིའི་བྱེ་བྲག་གིས་བཞིར་འགྱུར་བ་སྟེ། སྡོམ་འབྱུང་ལེའུ་བཅུ་གཅིག་པ་ལས། རྫོགས་ལྡན་དུས་སུ་གཅིག་བཟླས་ཏེ། །གསུམ་ལྡན་དུས་སུ་ཉིས་འགྱུར་བཟླ། །གཉིས་ལྡན་དུས་སུ་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླ། །ཞེས་སོ། །དབང་བསྐུར་གྱི་དུས་ཀྱི་བསྙེན་པའི་སྔགས་དང་། གྲངས་ནི་ནག་པོ་སྤྱོད་པ་བས། དཔའ་བོའི་སྙིང་པོའི་གསང་སྔགས་ནི། །ཁྲི་ཕྲག་གསུམ་དུ་བཟླས་བརྗོད་བྱ། །དཔའ་བོ་རྣལ་འབྱོར་མ་འཁོར་ལོའི། །ཁྲི་ཕྲག་གཉིས་ནི་བསྙེན་པར་བྱ། །ཀ་ཁྭའི་གདོང་སོགས་བརྒྱད་པོ་དང་། །སྙིང་པོའི་རྣལ་འབྱོར་མ་བཞི་ནི། །སྟོང་ཕྲག་ལྔ་དང་ལྔ་བརྒྱ་ནི། །སྔོན་དུ་བསྙེན་པས་འགྲུབ་པར་འགྱུར། །ཞེས་གསུངས་སོ། །ལྔ་པ་ནི་ལས་བཞིའི་ཕྲེང་བ་རྒྱས་པར་སྡོམ་འབྱུང་དུ་ཤེས་པར་བྱས་ལ། ཁྱད་པར་དུ་བདེ་མཆོག་གི་སྐབས་འདིར། མིའི་རུས་པའི་ཕྲེང་བ་བསྔགས་ཏེ་མངོན་བརྗོད་ལེའུ་ལྔ་པ་ལས། དུང་ཆེན་ཕྲེང་བ་བླངས་ནས་ནི། །སྡོམ་པ་མཆོག་གིས་བཟླས་པ་བྱ། །ཞེས་སོ། །དྲུག་པ་ལ་ལྔ་སྟེ། འགྲོ་བ་དག་པ་དང་། རྡོ་རྗེའི་བཟླས་པ་དང་། འགོག་པའི་བཟླས་པ་དང་། ཁྲོ་བོའི་བཟླས་པ་དང་། མདོ་ལིའི་བཟླས་པའོ། །དང་པོ་ནི་ཐུགས་ཀའི་ཧཱུྃ་གི་འོད་ཟེར་གྱིས་ས་གསུམ་གྱི་འགྲོ་བ་ལྷར་བྱས་ནས་འོད་སླར་ཧཱུྃ་ལ་བསྡུ་བའོ། །གཉིས་པ་ནི་ཧཱུྃ་ལས་སྔགས་ཕྲེང་རྩོལ་བའི་རླུང་ཧཱུྃ་དང་འགྲོགས་ཏེ། སྣ་གཡས་ནས་འཐོན་ནས། འགྲོ་བ་ལྷར་བྱས་པའི་སྣ་གཡོན་ནས་སྲོག་གིས་རླུང་ཨོཾ་དང་འགྲོགས་ཏེ་ཐུགས་ཀར་སླེབ་པ་ནི་གནས་པ། དེ་མ་ཐག་ཏུ་དེ་དག་གི་སྣ་གཡས་ནས་རྩོལ་བའི་རླུང་ཧཱུྃ་དང་ལྷན་ཅིག་ཏུ་འཐོན། སླར་བདག་གི་སྲོག་གི་རླུང་ཨོཾ་དང་འགྲོགས་ནས་ཐུགས་ཀའི་ཧཱུྃ་ལ་ཐིམ་སྟེ་གནས་པ་ནི་ཨཱཿའོ། །དེ་སྐད་དུ་མངོན་བརྗོད་ལེའུ་བཅུ་གསུམ་པ་ལས། སྲོག་དང་རྩོལ་བ་ལེགས་བསྡམས་ནས། །ཨོཾ་ཨཱཿཧཱུྃ་གསུམ་བརྗོད་བྱ་ཞིང་། །ས་གསུམ་རྒྱུ་དང་མི་རྒྱུ་བ། །སྐུ་གསུང་ཐུགས་ལ་གནས་པར་བྱ། །ཞེས་སོ། །གསུམ་པ་ནི། རྣམ་རྟོག་བཀག་ལ་ཡིད་ཀྱིས་བཟླས་པ་བྱ་སྟེ། མངོན་བརྗོད་ལེའུ་སོ་གསུམ་པ་ལས། འགོག་པ་ཁྲོ་བོ་རྣམ་པར་བསྒོམ། །ཞེས་སོ། །བཞི་པ་ནི་སྣོད་མ་ཡིན་པའི་སྐྱེ་བོ་མེད་པའི་ས་དང་། བྱིང་བ་གསེང་བ་དང་། གདོན་གྱི་བར་གཅོད་བཟློག་པའི་ཕྱིར། ལེའུ་དེ་ཉིད་ལས། ཡེ་ཤེས་ཁྲོ་བོ་ལྷན་ཅིག་ཏུ། །སྤྲིན་གྱི་འབྲུག་སྒྲ་ལྟ་བུར་བཟླ། །ཞེས་སོ། །ལྔ་པ་ནི་ཡབ་ཀྱི་ཞལ་ནས་སྔགས་ཕྲེང་འཐོན་ནས་ཡུམ་གྱི་ཞལ་དུ་ཞུགས་ཏེ། སྐུའི་དབྱིབས་བརྒྱུད་པར་བསམ་ཞིང་བཟླས་ཏེ། དེ་སྐད་དུ་མངོན་བརྗོད་ལེའུ་ཉེར་བཞི་པ་ལས། གཉིས་མེད་འཁྱུད་པའི་སྦྱོར་བ་ཡིས། །གསང་སྔགས་བཟླས་ན་དངོས་གྲུབ་འགྱུར། །ཞེས་སོ། །དེ་ལྟར་ན་གང་གིས་སྔགས་གང་ཟློས་ཀྱང་སྣོད་མ་ཡིན་པའི་སྐྱེ་བོ་ཡོད་སར་ཤིབ་བུར་བཟླས་ཏེ། གལ་ཏེ་ཐོས་པར་གྱུར་ན་རྩ་རྒྱུད་ལེའུ་སོ་བརྒྱད་པ་ལས། སྔགས་རྣམས་བག་མེད་པས་འདོན་ན། །དེ་ལ་ང་ནི་མི་བལྟ་སྟེ། །མཁའ་འགྲོ་སྟོང་ཕྲག་དུ་མ་ཡིས། །ངན་པའི་བདག་ཉིད་ཅན་དེ་ཟ། །ཞེས་སོ། །བདུན་པ་ནི་མངོན་བརྗོད་སོ་གཉིས་པ་ལས། སྔགས་པས་འདི་དག་བཟླས་ན་ནི། །མཁའ་འགྲོ་མ་ཡི་དྲྭ་བ་ཡི། །སྡོམ་པའི་དངོས་གྲུབ་ཐོབ་པ་སྟེ། །ཟླ་བ་དྲུག་གིས་དེ་དབང་འགྱུར། །ཞེས་སོ། །དེ་དག་གིས་ནི་མཉམ་པར་བཞག་པའི་རྣལ་འབྱོར་བསྐྱེད་པའི་རིམ་པ་བསྟན་ཟིན་ནས། གཉིས་པ་རྫོགས་པའི་རིམ་པ་ནི། ཉིན་མོའི་ཐུན་གསུམ་གྱི་སྐབས་སུ་བར་འདིར་རྫོགས་པའི་རིམ་པ་བསྒོམ་པར་བྱ་བ་ཡིན་ལ། གཞུང་ལས་ནི་འོག་ཏུ་འབྱུང་སྟེ། ཨཱ་ལི་ཀཱ་ལི་མདུན་བསམས་ནས། །ཞེས་པ་ནས། དེ་ལས་གཟུངས་ནི་འཐོབ་པར་འགྱུར། །ཞེས་པའི་བར་རོ། །འདི་ཉིད་ཀུན་སྤྱོད་ལེའུ་བཅུ་གཉིས་པ་ལས། ཨཱ་ལི་ཀཱ་ལི་མདུན་བསམས་ཏེ། །རྣལ་འབྱོར་ཆེན་པོ་རྣམ་གནས་ལ། །ཟླ་བའི་དཀྱིལ་འཁོར་ལེགས་རྫོགས་པ། །ལྟེ་བའི་རྩ་བ་ལ་གནས་བསྒོམ། །དེ་ཡི་དབུས་གནས་བསམ་པ་ནི། །དམ་པའི་གནས་མཆོག་ཡི་གེ་སྟེ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་སེམས་ཉིད་ཡིན། །བསམ་མི་ཁྱབ་པ་ཉིད་བསམ་སྟེ། །བསམ་དེའང་མཚན་མར་བརྟག་མི་བྱ། །ཡང་ན་བདག་ཉིད་སེམས་བསམ་པ། །དེ་ལས་གཟུངས་ནི་ཐོབ་པར་འགྱུར། །ཞེས་གསུངས་ཏེ། །འདི་དག་གི་དོན་རྗེ་བཙུན་གྱིས། འདི་ལ་དོན་གསུམ་སྟེ། རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བའོ། །དང་པོ་ནི་རྩ་བའི་དཔེ་ལྔ་དང་། ཡན་ལག་གི་དཔེ་དུ་མས་མཚོན་པ་སྟེ། དེའང་བསྐྱེད་པའི་རིམ་པའི་ཐུན་གྱི་མཇུག་ཏུ། བཅོམ་ལྡན་འདས་ཀྱི་ལྟེ་བར་པདྨ་འདབ་མ་བརྒྱད་པ་ལ་ལྟེ་བར་ཟླ་བས་བརྒྱན་པར་བསྒོམ། དེར་ཧཱུྃ་ལས་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་ཚུལ་དུ་བཞུགས་པ། གཉིས་ཀའང་རུས་པའི་རྒྱན་ཆ་ལྔ་ཡིས་བརྒྱན་པའི་ཐུགས་ཀར་ཟླ་བའི་སྟེང་དུ་ཡི་གེ་ཧཱུྃ་བསྒོམ། ཧཱུྃ་དེ་ལས་འོད་ཟེར་འཕྲོས་པས་རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་ནས་ཕར་རིམ་གྱིས་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་གསལ་བར་བྱས་ལ། དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོ་བར་བསམ་སྟེ། དེ་ནི་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བའི་དཔེ་དང་པོ་ཡིན་ནོ། །དེ་ནས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ། དེ་བཞིན་དུ་སྲུང་བའི་འཁོར་ལོ་དུར་ཁྲོད་བརྒྱད་ལ། དུར་ཁྲོད་བརྒྱད་གཞལ་ཡས་ཁང་ལ། གཞལ་ཡས་ཁང་དམ་ཚིག་གི་འཁོར་ལོ་ལ། དེ་སྐུའི་འཁོར་ལོ་ལ། དེ་གསུང་གི་འཁོར་ལོ་ལ། དེ་ཐུགས་ཀྱི་འཁོར་ལོ་ལ། དེ་སྙིང་པོའི་རྣལ་འབྱོར་མ་བཞི་ལ། དེ་བཅོམ་ལྡན་འདས་ཀྱི་ཞལ་བཞི་ལ་བསྡུ་སྟེ་དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་བསྡུ་བ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི་ཞལ་གཅིག་ཕྱག་གཉིས་པར་བསྡུ་སྟེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡུམ་ཡབ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ་བསྡུ། རྡོ་རྗེ་སྙེམས་མའང་ཡབ་ལ། ཡབ་ཧཱུྃ་ལ། ཧཱུྃ་གི་གདན་ཟླ་བ་ལ། དེ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུ་སྟེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེ་དེའང་ཇེ་ཕྲ་ཇེ་ཕྲ་མི་དམིགས་པ་བསམ་གྱིས་མི་ཁྱབ་པའི་ངང་ལ་གཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚཱ་ཆུ་ལ་ཐིམ་པ་ཞེས་བྱ་བ་ཡིན་ནོ། །དེ་ནས་ཡན་ལག་གི་དཔེ་ནི་ངོ་བོ་ཉིད་ཀྱི་སྟེང་དུ་དབབ་སྟེ་གོང་གི་སྤྲོས་པ་རྣམས་ནི་ཆ་ལུགས་སམ། འོད་ཟེར་རམ། མཚོ་དང་རླབས་ཞེས་བྱ་བ་ཡིན་ལ། བསམ་གྱིས་མི་ཁྱབ་པའི་ངོ་བོ་འདི་ནི་གར་མཁན་དངོས་སམ། ཉི་མའམ་རྒྱ་མཚོ་ཉིད་དང་འདྲ་བ་ཡིན་པས་ན། གར་མཁན་དང་། ཆ་ལུགས་དང་། ཉི་མ་དང་། འོད་ཟེར་དང་། མཚོ་དང་། རླབས་དང་། ངོ་བོ་ཉིད་ཀྱི་སྟེང་དུ་ནི་ཆུ་ལ་ཆུ་བཞག་པའམ། མར་ལ་མར་བཞག་པ་སྟེ་ཡན་ལག་གི་དཔེ་ལྔས་མཚོན་པ་ཡིན་ནོ། །དེའི་ངང་ལ་བློ་ཇི་ཙམ་གནས་པ་ཅིག་བཞག་ལ། ལྡང་བར་འདོད་ན་གོང་དུ་བསྟན་པའི་ལྡང་བའི་རྣལ་འབྱོར་བྱིན་རླབས་གསུམ་དང་ལྡན་པའི་ཧེ་རུ་ཀར་ལངས་ཏེ། ཐུན་བཞི་ཀ་ལ་གཏོར་མ་ཡོད་ན་སྐབས་འདིར་བཏང་སྟེ་དག་པ་རྗེས་སུ་དྲན་པ་བྱ། གཏོར་མ་མེད་ན་ལངས་པའི་རྗེས་ཁོ་ན་ལ་དག་པ་རྗེས་དྲན་བྱ་བ་ཡིན་ནོ། །རྡོ་རྗེ་སེམས་དཔའ་བསྡུ་བ་ཞེས་བྱ་བའི་རིམ་པ་འདི་ནི་བསྐྱེད་པའི་རིམ་པའི་རྗེས་ལ་ཅིས་ཀྱང་བསྒོམ་པ་ཡིན་ནོ། །རྡོ་རྗེ་སེམས་དཔའ་བསྡུ་བའོ། །ཡི་གེ་བསྡུ་བ་དང་ཐིག་ལེ་བསྡུ་བ་འདི་གཉིས་ནི་བསྐྱེད་རིམ་གྱི་རྗེས་ལ་ཅིས་ཀྱང་འབྱུང་བའི་རྫོགས་རིམ་ནི་མ་ཡིན་ཏེ། རྣལ་འབྱོར་པ་བསྐྱེད་རིམ་ལ་བརྟན་པའམ། ཡང་ན་ལས་དང་པོ་པ་ཉིད་ནས་ཀྱང་རུང་སྟེ། རླུང་དང་། སེམས་ཀྱི་དམིགས་པ་ལ་བརྟེན་ནས་ཏིང་ངེ་འཛིན་གྱི་ཡེ་ཤེས་མྱུར་དུ་ཚོལ་བར་འདོད་པའི་རྟེན་འབྲེལ་ཡིན་པས་བསྐྱེད་པའི་རིམ་པ་རྒྱས་པར་བསྒོམས་པའི་རྗེས་སམ། འདི་ཉིད་གཙོ་བོར་བྱེད་པའི་དུས་སུ་སྐད་ཅིག་གིས་ཧེ་རུ་ཀ་ཡབ་ཡུམ་དུ་དྲན་པར་བྱས་པའི་ལྟེ་བར་པདྨ་འདབ་མ་བཞི་པའི་ཤར་དུ་ས་རླུང་གི་རང་བཞིན་ལ་སེར་པོ། གཡོན་དུ་ཆུ་རླུང་གི་རང་བཞིན་ཝ་དཀར་པོ། རྒྱབ་ཏུ་མེ་རླུང་གི་རང་བཞིན་ར་དམར་པོ། གཡས་སུ་རླུང་གི་རླུང་གི་རང་བཞིན་ཡ་ལྗང་གུ། དབུས་སུ་ནམ་མཁའི་རླུང་གི་རང་བཞིན་ཐིག་ལེ་ཁ་དོག་སྔོན་པོ་གཅིག་བསམས་ལ། རིམ་གྱིས་བློ་སྦྱང་བའི་ཕྱིར་དབུགས་ཕྱིར་རྒྱུ་བའི་དུས་སུ་མདུན་གྱི་ལ་སེར་པོ་ལས་འོད་ཟེར་ཁ་དོག་སེར་པོ་སྦོམ་ཕྲ་སྐུད་པ་འབྲིང་པོ་ཙམ་ལངས་ཏེ་གྱེན་དུ་ཕྱུང་ནས། སྣ་སྒོ་གཡོན་པ་ནས་བྱུང་སྟེ། མདུན་དུ་སོར་བཅུ་དྲུག་ཙམ་གྱི་ཚད་དུ་བྱུང་བར་བསམ། རླུང་ནང་དུ་འཇུག་པ་དང་བསྟུན་ལ་འོད་ཟེར་དེ་ནང་དུ་ལྡོག་སྟེ། ལ་སེར་པོ་དེ་ལ་བསྟིམས་ལ་ཡིད་ཀྱིས་ལ་སེར་པོ་དེ་ལ་བལྟ་ཞིང་རླུང་ཁ་སྦྱར་གྱི་དམིགས་པ་བྱའོ། །དེས་དུ་བ་ལྟ་བུའི་རྟགས་མཐོང་བ་དེའི་ཚེ་ས་རླུང་དབང་དུ་གྱུར་པའི་རྟགས་ཡིན་པས་ལ་སེར་པོ་དེ་གཡོན་གྱི་ཝ་དཀར་པོ་ལ་བསྟིམ། ཝ་དཀར་པོ་ལས་འོད་ཟེར་དཀར་པོ་སྣ་བུག་གཡོན་པ་ནས་འབྱུང་བ་དང་། འཇུག་པ་དང་རླུང་གི་རྣལ་འབྱོར་དང་བཅས་པ་སྔ་མ་བཞིན་བསྒོམས་པས་སྨིག་རྒྱུ་ལྟ་བུ་མཐོང་བ་དེའི་ཚེ་ཆུ་རླུང་དབང་དུ་འདུས་པས་ཝ་དཀར་པོ་དེ་རྒྱབ་ཀྱི་ར་དམར་པོ་ལ་བསྟིམ། ར་དམར་པོ་ལས་འོད་ཟེར་དམར་པོ་སྣ་གཡོན་ནས་འབྱུང་བ་དང་འཇུག་པ་དང་རླུང་གི་རྣལ་འབྱོར་སྔ་མ་བཞིན་དུ་བསྒོམས་པས། སྲིན་བུ་མེ་ཁྱེར་ལྟ་བུའི་རྟགས་མཐོང་བ་དེའི་ཚེ་མེ་རླུང་དབང་དུ་འདུས་པ་ཡིན་པས་ར་དམར་པོ་དེ་གཡས་ཀྱི་ཡ་ལྗང་གུ་ལ་བསྟིམས་ལ་གཞག ཡ་དེ་ལས་འོད་ཟེར་ལྗང་གུ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་མར་མེ་འབར་བ་ལྟ་བུའི་རྟགས་མཐོང་བ་དེའི་ཚེ་རླུང་གི་རླུང་དབང་དུ་འདུས་པའི་རྟགས་ཡིན་པས་ཡི་གེ་ཡ་ལྗང་གུ་དེ་དབུས་ཀྱི་ཐིག་ལེ་སྔོན་པོ་ལ་བསྟིམས་ལ་གཞག དེ་ནས་ཐིག་ལེ་སྔོན་པོ་ལས་འོད་ཟེར་འབྱུང་འཇུག་མེད་པར་ཐིག་ལེ་ལ་ཡིད་ཀྱིས་བལྟ་ཞིང་རླུང་ཁ་སྦྱར་གྱི་རྣལ་འབྱོར་བསྒོམས་པས། ནམ་མཁའ་སྤྲིན་མེད་ལྟ་བུ་མཐོང་བ་དེའི་ཚེ་ནམ་མཁའི་རླུང་དབང་དུ་འདུས་པ་ཡིན་པས་འདིའི་མཇུག་ཏུ་མཐོང་བའི་ལམ་གྱི་ཡེ་ཤེས་སྐྱེ་ཞེས་གསུང་ངོ་། །ཡི་གེ་བསྡུ་བའོ། །ཐིག་ལེ་བསྡུ་བ་ནི་ཡི་གེ་རྣམས་ཀྱི་ཤུལ་དུ་ཐིག་ལེར་བསྒོམ་པ་སྟེ། ཤར་དུ་ཐིག་ལེ་སེར་པོ། གཡོན་དུ་དཀར་པོ། རྒྱབ་ཏུ་དམར་པོ། གཡས་སུ་ལྗང་གུ་རྣམས་བསྒོམས་ལ། འོད་ཟེར་གྱི་སྐུད་པའི་འབྱུང་འཇུག་དང་རླུང་དང་རླུང་གི་རྣལ་འབྱོར་ལ་སོགས་པ་སྔ་མའི་ཚུལ་དུ་བསྒོམས་པས་མཐར་ཕྱིན་པའི་ཚད་སྔ་མ་བཞིན་དུ་འབྱུང་བར་འགྱུར་རོ། །དེས་ན་འདི་གཉིས་ཀྱང་རྣལ་འབྱོར་པ་རང་གི་བློ་ལ་གང་བདེ་བ་བསྒོམ་པ་ཡིན་ལ། གཅིག་གི་རྗེས་ལ་གཅིག་བསྒོམ་པ་ནི་མ་ཡིན་ནོ། །རྫོགས་པའི་རིམ་པ་བསྟན་ཟིན་ཏེ་རིམ་པ་གཉིས་ཀྱི་སྔོན་པར་རྟོགས་པ་གཙོ་བོ་རྣམས་བསྟན་ཟིན་ཏོ་ཞེས་གསུངས་སོ། །གཉིས་པ་དག་པ་རྗེས་སུ་དྲན་པ་ནི། སློབ་དཔོན་གྱི་གཞུང་ལས། སོ་དང་སེན་མོ་དག་ལ་ནི་ཁཎྜ་ཀ་པཱ་ལིའོ་ཞེས་པ་ནས། དཔའ་བོ་སེང་གེ་བཞིན་དུ་སྤྱོད། །ཅེས་པའི་བར་གསུངས་ཏེ། འདིའང་ཀུན་སྤྱོད་ཀྱི་ལེའུ་བཅོ་ལྔ་པ་ལས། རྩ་བའི་སྔགས་ཀྱི་དཔའ་བོ་གང་། །ཚངས་པའི་སྐུད་པ་ལ་སོགས་བརྟག །ལྷ་ཡི་སྙིང་པོའི་གསང་སྔགས་ཀྱི། །བརྒྱ་ཕྱེད་ཕྲེང་བས་བརྒྱན་པ་ཡིན། །དཔའ་བོའི་གོ་ཆ་དྲུག་གི་ནི། །རྒྱ་འདིས་ལུས་ནི་མཛེས་པ་ཡིན། །རྡོ་རྗེ་ཕག་མོ་སོགས་སྔགས་གང་། །མགུལ་ཆུས་རྐེ་ལ་མཛེས་པ་ཡིན། །སངས་རྒྱས་ཀུན་གྱི་མཁའ་འགྲོ་མ། །པགས་པའི་གོས་ནི་འཛིན་པའི་མཆོག །ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག །ཐོད་པའི་དུམ་བུ་ལ་སོགས་ཀུན། །ལུས་ཀྱི་ཁམས་ལ་རྣམ་པར་བརྟག །ཡི་གེ་བདུན་ནི་གསང་སྔགས་ཀྱི། །རྣ་ཆས་སྙན་ནི་མཛེས་པ་ཡིན། །རྣལ་འབྱོར་མ་དྲུག་གསང་སྔགས་གང་། །སྐེ་རགས་བྱས་པ་བརྒྱན་པ་ཡིན། །འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་ལག་པའི་ཐོད་པ་ཡིན། །རྣམ་པར་སྣང་མཛད་ཡུམ་སྔགས་གང་། །ཐོད་པ་མགོ་བོ་བརྒྱན་པ་ཡིན། །དེ་ལྟར་བདག་ཉིད་རྣམ་གནས་ནས། །ཚམ་རྔམ་སྔགས་ཀྱིས་ལེགས་པར་བསྲུང་། །རྟག་ཏུ་ཚངས་པར་སྤྱོད་འགྱུར་བ། །རྐང་པ་བརྒྱད་པའི་སྔགས་ཀྱིས་མཆོད། །ཉིན་མོ་བཅོམ་ལྡན་དཔའ་བོ་སྟེ། །མཚན་མོ་བཅོམ་ལྡན་མ་བརྟག་བྱ། །མི་བྱ་ཅི་ཡང་ཡོད་མིན་ཏེ། །རྟག་ཏུ་མི་བསམ་ཡོད་མ་ཡིན། །མི་བཟའ་ཅི་ཡང་ཡོད་མིན་ལ། །དགེ་དང་མི་དགེ་མི་སྨྲ་མེད། །བདག་ཉིད་ཇི་བཞིན་འགྲོ་ཇི་བཞིན། །བདག་ཅི་འདྲ་བ་གཞན་དེ་བཞིན། །དེ་ལྟར་རྣམ་བསམ་རྣལ་འབྱོར་བདག །འཇིགས་པ་ཐམས་ཅད་ཡོངས་སྤངས་ཏེ། །དཔའ་བོ་སེང་གེ་བཞིན་དུ་སྤྱོད། །བསམ་པ་ཐམས་ཅད་རྫོགས་བྱེད་ཡིན། །ཞེས་པས་བསྟན་ཏེ། འདི་དག་གི་དོན་རྗེ་བཙུན་གྱིས། དེ་ཡང་གཏོར་མའི་རྗེས་ལ་འབྱུང་ན་ནི་རྗེས་སྤྱོད་ཀྱི་རྣལ་འབྱོར་དུ་ཡང་འགྲོ་ལ། རིམ་པ་གཉིས་ཁོ་ནའི་རྗེས་ལ་འབྱུང་ན་ནི་སྟན་གཅིག་གི་སྟེང་དུ་བརྗོད་པ་ཡིན་པའི་ཕྱིར་མཉམ་གཞག་གི་ཁོངས་སུ་འདུས་པ་ཡིན་ནོ། །དེ་ཡང་ལག་ཏུ་ལེན་པར་འདོད་ན། གཏོར་མ་གཏང་བའམ། མ་བཏང་ཡང་རུང་སྟེ། མཉམ་གཞག་བསྒོམ་པའི་སྟན་དེ་ལས་མ་ལངས་པར་ལུས་ཀྱི་ཌཱ་མ་རུའི་སྒྲ་དང་བཅས་པའམ། མེད་ཀྱང་བཏུབ་སྟེ། ངག་ཏུ་འོག་ནས་འབྱུང་བ་རྣམས་གསལ་བར་བརྗོད་ཅིང་། སེམས་ཀྱིས་མ་དག་པའི་ཁམས་དང་། རྒྱན་ཆ་ལ་སོགས་པ་དེ་དང་དེ་དག་དག་པའི་ལྷ་དང་། སྔགས་དེ་དང་དེའི་ངོ་བོ་ཡིན་ནོ་སྙམ་དུ་མོས་པ་བྱ་བ་ཡིན་གྱི་ལྷ་དང་སྔགས་ཀྱི་རྣམ་པར་བསྒོམ་ནི་མི་དགོས་སོ། །ཞེས་གསུངས་ཏེ། ཇི་ལྟར་བརྗོད་པའི་ཚུལ་ནི་མངོན་པར་རྟོགས་པར་བསྟན་ཟིན་ཏོ། །འོག་གི་ཁ་ཊྭཱཾ་ག་ནི་ལྷ་ཡི་སྐུ། །ཞེས་སོགས་ཚིགས་བཅད་གཅིག་ནི་སྤྱོད་ལམ་གྱི་རྣལ་འབྱོར་དང་། སྤྲུལ་པ་ལས་བྱུང་དཔའ་བོ་རྣམས། །ཞེས་པ་ནས། ཀ་ནི་གང་དུའང་མི་གནས་པའོ། །ཞེས་པའི་བར་ནི་དེ་དག་གི་རྒྱུ་མཚན་སྟོན་པར་འགྲེལ་པས་བཤད་དོ། །གསུམ་པ་གཏོར་མའི་རྣལ་འབྱོར་ནི། གཞུང་ལས་རྡོ་རྗེ་ཐལ་མོ་ཁ་གྱེན་དུ་ཕྱེ་ལ་ཞེས་པ་ནས། ས་ཧ་ཡི་ཀ་བྷ་ཝནྟུ་ཧཱུྃ་ཕཊ། ཅེས་པའི་བར་འདས་པའི་གཏོར་སྔགས་དང་། དེ་ཉིད་ལན་ལྔ་བརྗོད་པས་འབུལ་ཚུལ་དང་། འཇིག་རྟེན་པའི་གཏོར་སྔགས་ཙམ་ཞིག་གསུངས་ལ། དེ་ཉིད་ཀུན་སྤྱོད་ཀྱི་ལེའུ་བཅུ་པ་ལས་ཀྱང་གསུངས་སོ། །འདི་དག་གི་དོན་ལ་ལྔ་སྟེ། གཏོར་མ་གཏང་བ་དང་། ཡོ་བྱད་དང་། ཆོ་ག་དང་། གཏོང་ཚུལ་དང་། དགོས་པའོ། །དང་པོ་ལ་གཉིས་ལས། རྒྱུན་གྱི་དུས་ནི་མངོན་བརྗོད་ལས། ཆོ་ག་འདི་ཡི་རིམ་པ་ཡིས། །ཐུན་མཚམས་བཞི་རུ་སྦྱིན་པར་བྱ། །ཞེས་གསུངས་སོ། །གཉིས་པ་ཁྱད་པར་གྱི་དུས་ནི་ཀུན་སྤྱོད་ལེའུ་བཅུ་པ་ལས། ཟླ་བ་མར་ངོའི་ཚེས་བཅུ་དང་། །ཟླ་བ་ཡར་ངོའི་དེ་ཉིད་ལ། །ཞེས་དང་། དགུན་ཟླ་འབྲིང་པོ་ལ་སོགས་པའི། །ཚེས་བཅུ་ལ་ནི་དད་པས་མཆོད། །ཅེས་གསུངས་པ་ལྟར་རོ། །གཉིས་པ་ཡོ་བྱད་ནི་ལེའུ་དེ་ཉིད་ལས། མྱུར་དུ་འབད་པས་ཤ་དང་ཆང་དག་གིས། །རྡོ་རྗེ་ལྷ་མོ་རབ་ཏུ་མཆོད་པར་བྱ། །ཞེས་དང་། འགྱུར་ཁ་ཅིག་ལས། འབད་པས་དཔའ་བོ་ཆང་སོགས་དང་། །རྡོ་རྗེ་ལྷ་མོ་རབ་མཆོད་ཅིང་། །ཞེས་གསུངས་པ་ལྟར་རོ། །གསུམ་པ་ཆོ་ག་ལ་མདུན་བསྐྱེད་དང་མ་འབྲེལ་བའི་འདས་པ་དང་། འཇིག་རྟེན་པའི་གཏོར་མ་གཉིས་ཀ་ཡང་མངོན་པར་རྟོགས་པར་བསྟན་ཟིན་ཅིང་། མདུན་བསྐྱེད་དང་འབྲེལ་ན་གནས་སྐབས་དེར་རང་གི་སྙིང་གའི་ས་བོན་ལས་འོད་ཟེར་འཕྲོས་ཏེ། དུར་ཁྲོད་ཆེན་པོ་བརྒྱད་ལ་ཕོག་པས། དཀྱིལ་འཁོར་གྱི་འཁོར་ལོ་ཆ་བརྒྱད་དུ་གྱུར་པར་བསམས་ལ། ཡེ་ཤེས་ཀྱི་འཁོར་ལོ་ཆ་བརྒྱད་སྤྱན་དྲངས་ནས་བསྟིམས་ལ་ཆོ་ག་གཞན་ཐམས་ཅད་ནི་འདྲ་བ་ཉིད་དོ། །བཞི་པ་གཏོང་ཚུལ་ནི་ལེའུ་དེ་ཉིད་ལས། ལྷོ་ཕྱོགས་ཁ་བལྟས་རྣལ་འབྱོར་པས། །གནས་ནི་མཐོན་པོར་རབ་ཏུ་མཆོད། །མཚན་མོ་སྐྲ་ནི་གྲོལ་གྱུར་པས། །བརྟུལ་ཞུགས་གོས་མེད་གཏོར་མ་སྤྱིན། །ཞེས་གསུངས་པ་ལྟར་རོ། །ལྔ་པ་དགོས་པ་ནི་ལེའུ་དེ་ཉིད་ལས། དེ་ཡི་ལག་ཏུ་འོངས་པའི་དཔལ། །གང་གིས་ཀྱང་ནི་གཞོམ་མི་ནུས། །དེ་ནི་སྐྱེ་བོ་དད་ལྡན་རྣམས་ཀྱིས་མཆོད། །ཧེ་རུ་ཀ་དཔལ་མངོན་པར་རྒྱས་གྱུར་ནས། །ཀུན་ཏུ་དགྱེས་པས་མཆོག་ནི་གསོལ་འགྱུར་ཏེ། །གང་ཕྱིར་མཆོག་ནི་དེ་ཡི་ལག་ན་གནས། །ཞེས་གསུངས་སོ། །དེ་ལྟར་གཏོར་མ་བཏང་ནས། འཇིག་རྟེན་དང་འཇིག་རྟེན་ལས་འདས་པའི་གཏོར་མགྲོན་རྣམས་རང་བཞིན་གྱི་གནས་སུ་གཤེགས་སུ་གསོལ། མདུན་དུ་སྤྲུལ་པ་རྣམས་བདག་གི་ལུས་ལ་བསྡུ་བར་བྱའོ། །ཡང་ན་གཏོར་མ་ཕྱི་རོལ་དུ་གཏོང་བའི་ཚེ་གོང་གི་ཕྲིན་ལས་བཅོལ་བའི་ཚིགས་སུ་བཅད་པ་རྣམས་བརྗོད་ཅིང་བཏང་ལ་ལོག་ནས་བཟོད་པར་གསོལ་བ་དང་སྤྲུལ་པ་བདག་གི་ལུས་ལ་བསྡུ་བར་བྱ་སྟེ། དེ་ལྟར་ནའང་འགལ་བ་མེད་དོ། །དེ་ལྟར་གཏོར་མ་བཏང་བ་རྫོགས་ནས་སྟན་བདེ་བ་ལ་འདུག་སྟེ་དག་པ་རྗེས་སུ་དྲན་པར་བྱ། དེ་ནས་དཔའ་བོའི་གོ་ཆ་དང་། དཔའ་མོའི་གོ་ཆ་དང་། གོ་ཆ་ཆེན་པོ་དང་། ཞལ་བཞི་པའི་ཚམ་རྔམ་སྔགས་ཀྱིས་བསྲུངས་ལ་སྤྱོད་ལམ་གྱི་རྣལ་འབྱོར་དྲན་པ་ཙམ་བྱའོ། །བཞི་པ་ཁ་ཟས་ཀྱི་རྣལ་འབྱོར་ནི་གནས་སྐབས་འགའ་ཞིག་ཏུ་ཁ་ཟས་དང་འབྲེལ་བའི་ཚེ་ཁ་ཟས་གཏོར་མ་བཞིན་བྱིན་གྱིས་བརླབ་པའམ། ལག་པ་གཡོན་པའི་མཐེབ་སྲིན་རེག་ནས་ཨོཾ་ཨཱཿཧཱུྃ་ཞེས་བརྗོད་ནས་དེ་བདུད་རྩིའི་རང་བཞིན་དུ་བྱིན་གྱིས་བརླབས་ལ་སྐབས་འདིར་ལག་པའི་མཆོད་པ་བྱེད་པར་སྤྲོ་ན་རྗེ་བཙུན་བསོད་ནམས་རྩེ་མོས། དང་པོ་ཁོ་ནར་ལུས་དང་ངག་ཡིད་ཡོངས་སུ་དག་པ་དང་ལྡན་པས། མཆོད་པའི་ཡོ་བྱད་མེ་ཏོག་ལ་སོགས་པ་ལྔ་དང་། གོང་བུ་དང་ཞུ་བའི་རྫས་ཅི་འབྱོར་བ་མདུན་དུ་བྱས་ལ། དེ་དག་ཆོ་ག་བཞིན་དུ་བསང་སྦྱང་བ་དང་བྱིན་གྱིས་བརླབ་པར་བྱའོ། །དེ་ནས་བདུད་རྩི་ལྔ་དང་སྦྱར་བའི་ཆང་བྱིན་གྱིས་བརླབས་པས། ཨོཾ་ཨཱཿཧཱུྃ་ཞེས་བརྗོད་ཅིང་། ལག་པ་གཡོན་པ་ལ་གཏོར་ལ་མཉེ་བར་བྱའོ། །དེ་ནས་ལག་པ་གཡོན་པའི་སོར་མོ་ལྔ་བསྡུས་པ་དང་དྲུག་ལ་མེ་ཏོག་རེ་རེ་བཞག་པས་ཟླ་བའི་དཀྱིལ་འཁོར་དྲུག་བཀོད་པ་ལ། མཐེ་བོང་ལ་ཨོཾ་ཧ་དཀར་པོ། མཛུབ་མོ་ལ་ན་མ་ཧིཿསེར་པོ། གུང་མོ་ལ་སྭཱ་ཧཱ་ཧུ་དམར་པོའོ། །མིང་མེད་ལ་བཽ་ཥ་ཊ་ཧེ་ནག་པོའོ། །མཐེའུ་ཆུང་ལ་ཧུཾ་ཧཱུྃ་ཧོཿདམར་སེར་རོ། །བསྡུས་པའི་སེན་མོ་ལ་ཕཊ་ཧྃ་ལྗང་གུ་བསམས་ལ། དེ་དག་ཡོངས་སུ་གྱུར་པ་ལས་གོ་རིམ་ཇི་ལྟ་བར། རྡོ་རྗེ་དང་། འཁོར་ལོ་དང་། པདྨ་དང་། རྡོ་རྗེ་གདེངས་པ་དང་། རིན་པོ་ཆེ་དང་། རལ་གྲི་རྣམས་ཇི་ལྟར་བརྗོད་པའི་ཁ་དོག་དང་། ཡི་གེ་རྣམས་ཀྱིས་མཚན་པའོ། །དེ་དག་ལས་འོད་ཟེར་སྤྲོ་བ་དང་བསྡུ་བ་དང་གཅིག་ཏུ་གྱུར་པ་ལས། རྡོ་རྗེ་སེམས་དཔའ་དང་། རྣམ་པར་སྣང་མཛད་དང་། པདྨ་གར་དབང་དང་། དཔལ་ཧེ་རུ་ཀ་དང་། རྡོ་རྗེ་ཉི་མ་དང་། རྟ་མཆོག་རྣམས་ཇི་སྐད་བཤད་པའི་སྐུ་མདོག་དང་ལྡན་པ། རྡོ་རྗེ་སེམས་དཔའ་ནི་ཞལ་གསུམ་པ། རྩ་བ་དཀར་བ། གཡས་སྔོ་བ། གཡོན་དམར་བའོ། །ཕྱག་དྲུག་པ་སྟེ། རྡོ་རྗེ་དང་། དྲིལ་ཐོད། ཁ་ཊྭཱཾ་ག ཅང་ཏེའུ་དང་། མགོ་བོ་འཆང་། རྣམ་པར་སྣང་མཛད་ལ་སོགས་པ་ནི་ཞལ་གཅིག་པ། ཕྱག་བཞི་པ། གཡས་ཀྱི་དང་པོ་འཁོར་ལོ་ལ་སོགས་པ་རང་གི་མཚན་མ་འཛིན་པ། གཡོན་དང་པོ་དེས་མཚན་པའི་དྲིལ་བུ། གཡས་ཀྱི་གཉིས་པ་ན་ཌཱ་མ་རུ། གཡོན་གྱི་གཉིས་པ་ལ་ཐོད་པ་དང་གྲུ་མོར་ཁ་ཊྭཱཾ་གའོ། །ཐམས་ཅད་ཀྱང་རང་དང་མཚུངས་པའི་ཤེས་རབ་དང་གཉིས་སུ་མེད་པ་ཕྱག་རྒྱ་དྲུག་གིས་བརྒྱན་པ། གཡས་བརྐྱང་བས་བཞུགས་པར་བསམ་མོ། །ལག་པའི་མཐིལ་དུ་ཡང་གྲུབ་པའི་པདྨ་འདབ་མ་ལྔ་པ་བསམ་སྟེ་དེའི་ལྟེ་བ་ནས་བརྩམས་ཏེ་གཡོན་སྐོར་གྱིས་མེ་ཏོག་རེ་རེ་བཞག་པས་ཟླ་བའི་གདན་བསམས་པར་བྱས་ལ། ལྟེ་བར་ཨོཾ་བྃ་དམར་པོའོ། །འདབ་མ་རྣམས་ལ་ཤར་ནས་གཡོན་སྐོར་གྱི་རིམ་པས་ཧྃ་ཡོཾ་ནག་པོའོ། །ཧྲིཾ་མོཾ་དཀར་པོ་དང་། ཧྲིཾ་ཧྲིཾ་སེར་མོ་དང་། ཧཱུྃ་ཧཱུྃ་ལྗང་གུ་དང་། ཕཊ་ཕཊ་དུད་ཀའི་མདོག་ཅན་རྣམས་ཡོངས་སུ་གྱུར་པ་ལས་བྱུང་བའི་གྲི་གུག་སྟེ་རང་རང་གི་མདོག་དང་ས་བོན་གྱིས་མཚན་པའོ། །དེ་དག་ལས་སྤྲོ་བ་དང་། བསྡུ་བ་དང་གཅིག་དུ་གྱུར་པ་ལས། རྡོ་རྗེ་ཕག་མོ་དང་། གཤིན་རྗེ་མ་དང་། རྨོངས་བྱེད་མ་དང་། སྐྱོད་བྱེད་མ་དང་། སྐྲག་བྱེད་མ་དང་། གཏུམ་མོ་རྣམས་ཏེ། ཇི་སྐད་བཤད་པའི་སྐུ་མདོག་དང་ལྡན་པའོ། །རྡོ་རྗེ་ཕག་མོ་ནི་ཞལ་གསུམ་ཕྱག་དྲུག་མ་སྟེ། དབུས་མ་དམར་ཞིང་། གཡས་སྔོ་བ། གཡོན་ལྗང་བ། ཕྱག་དྲུག་ན། ཐོད་པ་དང་ནི་ཁ་ཊྭཱཾ་འཛིན། །ཞགས་པ་ལྕགས་ཀྱུ་ཕྱག་ན་བསྣམས། །ཚངས་པའི་མགོ་དང་གྲི་གུག་བསྣམས། །དངོས་གྲུབ་ཐམས་ཅད་རབ་གསོལ་བའོ། །གཞན་རྣམས་ནི་ཞལ་གཅིག་ཕྱག་བཞི་མ་སྟེ། ཐོད་པ་དང་ཁ་ཊྭཱཾ་ག་དང་། དྲིལ་བུ་གཡོན་ནའོ། །གཡས་ཌཱ་མ་རུ་དང་གྲི་གུག་འཛིན་པའོ། །ཐམས་ཅད་ཀྱང་རང་དང་མཚུངས་པའི་ཐབས་དང་གཉིས་སུ་མེད་པ། རྡོ་རྗེ་ཕག་མོ་ནི་ཕྱག་རྒྱ་དྲུག་གིས་བརྒྱན་པ། གཞན་ནི་ཕྱག་རྒྱ་ལྔས་བརྒྱན་པའོ། །ཐམས་ཅད་ནི་གཡོན་བརྐྱང་པས་བཞུགས་པའོ། །དཔའ་བོ་རྣམས་ནི་སྟག་གི་པགས་པའི་ཤམ་ཐབས་ཅན་ནོ། །རྣལ་འབྱོར་མ་ཐམས་ཅད་ནི་ཕྱོགས་ཀྱི་གོས་ཅན་ནོ། །རྡོ་རྗེ་སེམས་དཔའ་ཕག་མོ་དང་། །ཡཱ་མཱི་ན་དང་རྣམ་སྣང་མཛད། །པདྨ་གར་དབང་རྨོངས་བྱེད་བཅས། །སྐྱོད་བྱེད་མ་དང་ཧེ་རུ་ཀ །རྡོ་རྗེ་ཉི་མ་སྐྲག་བྱེད་མ། །ཙཎྜི་ཀ་དང་རྟ་མཆོག་སྟེ། །གཉིས་མེད་སྦྱོར་བས་ཡང་དག་འཁྱུད། །ཡང་ན་སོ་སོར་བསྒོམ་པར་བྱ། །ཞེས་འབྱུང་ངོ་། །དེ་ལྟར་ལྷའི་རྣམ་པར་མི་ནུས་པ་རྣམས་ཀྱིས་ཡི་གེའི་རྣམ་པ་ཉིད་ལྷའི་རྣམ་པར་མོས་པར་བྱའོ། །ལག་པའི་ས་དང་ཆུ་དང་མེ་དང་རླུང་དང་ནམ་མཁའི་ཁམས་རྣམས་ཀྱང་། ལྟུང་བྱེད་མ་དང་། གསོད་བྱེད་མ་དང་། འགུགས་བྱེད་མ་དང་། གར་གྱི་དབང་ཕྱུག་མ་དང་། པདྨའི་དྲྭ་བ་ཅན་ཏེ་སྙིང་པོའི་རྣལ་འབྱོར་མ་ལྔར་མོས་པར་བྱའོ། །ལག་པའི་རྒྱབ་ཏུ་ནི་འཁོར་ལོ་གསུམ་པོ་གསལ་བར་བལྟ་བར་བྱའོ། །གལ་ཏེ་ཕྱིའི་མཆོད་པ་དང་འབྲེལ་བར་དེའི་རྗེས་ལ་བྱེད་ན་ནི་ཕྱིའི་དཀྱིལ་འཁོར་གྱི་གཟུགས་བརྙན་ཉིད་བལྟ་བར་བྱའོ། །དེ་ལྟར་ཐམས་ཅད་རྫོགས་པར་བྱས་ནས་ཐམས་ཅད་ཀྱང་ཕོ་ཉ་གསུམ་དབྱེར་མི་ཕྱེད་པའི་ངོ་བོར་མོས་པར་བྱའོ། །དེ་ནས་རང་རང་གི་སྔགས་ཀྱིས་མེ་ཏོག་ལ་སོགས་པས་མཆོད་པར་བྱ་སྟེ། ཨོཾ་ཧཿན་མ་ཧཱིཿསྭཱ་ཧཱ་ཧུ། བཽ་ཥ་ཊ་ཧེ་ཧུཾ་ཧཱུྃ་ཧོ་ཕཊ་ཧཾ་ཞེས་བྱ་བས་སོར་མོ་རྣམས་ཀྱི་རྡོ་རྗེ་སེམས་དཔའ་ལ་སོགས་པ་མཆོད་པར་བྱའོ། །ཨོཾ་བྃ་ཧྃ་ཡོཾ་ཧྲིཾ་མོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ་ཕཊ་ཅེས་བྱ་བས་ནི་ལག་པའི་མཐིལ་དུ་རྡོ་རྗེ་ཕག་མོ་ལ་སོགས་པ་མཆོད་པར་བྱའོ། །ལྷག་མ་རྣམས་ལ་ནི་ཕྱིའི་མཆོད་པའི་སྐབས་སུ་བསྟན་པ་ལྟར་སྔར་རྒྱས་པར་སོ་སོར་དབུལ་བའམ། ཡང་ན་ནི་ཐམས་ཅད་ལ་རྩ་བའི་སྔགས་དང་། སྙིང་པོ་དང་ཉེ་བའི་སྙིང་པོ་རྣམས་ཀྱིས་དབུལ་བར་བྱའོ། །དེ་ལ་དང་པོ་ནི་མེ་ཏོག་གིས་སོ། །དེ་ནས་བདུག་པ་ལ་སོགས་པ་བཞིའོ། །དེ་ནས་ཞུ་བའི་རྫས་ཀྱིས་སོ། །མཐར་གོང་བུའི་རྫས་ཀྱི་མཆོད་ལ། གང་ཡང་རུང་བས་བསྟོད་ལ། ཆོ་ག་ལྷག་པ་དང་མ་ཚང་བ་ཁ་བསྐང་བའི་དོན་དུ་ཡི་གེ་བརྒྱ་པ་བཟླས་ཏེ། འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་གདབ་པར་བྱའོ། །ཕྱེད་ནི་སྣོད་གཞན་དུ་བཞག ཕྱེད་ནི་ཙཱ་རུའི་བཟའ་བར་བྱས་ལ་བསྲེ་བར་བྱའོ། །དེ་ནས་ཡང་ལག་པའི་མཐིལ་དུ་འབྱར་བའི་རྫས་གཡས་པའི་སྲིན་ལག་གིས་བླངས་ལ་སྙིང་ག་དང་། ལྐོག་མ་དང་། སྤྱི་བོ་རྣམས་སུ་ཧཱུྃ་ཨཱཿཨོཾ་ཞེས་བརྗོད་ནས་བྱུག་པར་བྱའོ། །དེ་ནས་ཡང་ལག་པ་ལ་ཆང་གིས་ཨོཾ་ཨཱཿཧཱུྃ་ཞེས་བརྗོད་ཅིང་གཏོར་ལ་ཕན་ཚུན་མཉེས་ཏེ་ལུས་ཐམས་ཅད་ལ་བྱུགས་ལ་ལྷའི་འཁོར་ལོ་དེ་བདག་ཉིད་ལ་གཞུག་པར་བྱའོ། །སྔགས་ཀྱང་བརྗོད་དོ། །དེ་ནས་ཡོངས་སུ་སྦྱངས་པའི་ཁ་ཟས་རྣམས་ནང་གི་སྦྱིན་སྲེག་གི་ཚུལ་གྱིས་གཡོན་གྱིས་ཀུན་དུ་སྤྱོད་པས་ལོངས་སྤྱོད་པར་བྱའོ། །ལག་པ་ལ་མཆོད་པའི་ཆོ་ག་རྒྱས་པར་བྱས་པའོ། །ཞེས་གསུངས་པ་ལྟར་ཉམས་སུ་བླང་བར་བྱའོ། །དེ་ལྟར་ལག་པ་མཆོད་པར་བྱས་པ་དེས། དཀོན་མཆོག་དང་། འབྱུང་པོའི་ཕུད་ཀྱི་བྱ་བ་གཞན་ནས་འབྱུང་བ་བཞིན་བྱས་ལ། དེ་ནས་བདག་གི་ལུས་ཕྱིའི་ཧེ་རུ་ཀ་ལ། ལུས་ཀྱི་དཀྱིལ་འཁོར་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཡིན་པར་མོས་པ་དང་། ཁྱད་པར་དུ་མེ་ལྟེ་བ་ནས་སྙིང་ག་ལ་ཡར་འབར་ཏེ། སྙིང་གའི་མེའི་དབུས་ན་བཅོམ་ལྡན་འདས་ཧེ་རུ་ཀ་ཡབ་ཡུམ་ཙམ་མམ། ལྷ་བཅུ་གསུམ་ཙམ་མམ། དཀྱིལ་འཁོར་གྱི་འཁོར་ལོ་ཐམས་ཅད་རྫོགས་པ་གང་རུང་གསལ་པོར་དམིགས་ལ། ཁ་ནི་སྦྱིན་སྲེག་གི་ཐབ་ཁུང་། ལུས་ནི་ལྷའི་དཀྱིལ་འཁོར། ལག་པ་ནི་གཟར་བུ། ཁ་ཟས་ནི་བསྲེག་རྫས་སུ་བསམས་ལ། ལྷ་མཆོད་པའི་བསམ་པས་ཐོག་མར་ལག་པ་གཡོན་པས་ལོངས་སྤྱད་པར་བྱའོ། །ལག་པ་གཡོན་པས་རྟག་ཏུ་མི་བྱེད་ནའང་། གཡོན་གྱི་ཀུན་དུ་སྤྱོད་པ་ཡིན་པའི་ཕྱིར། ཁམ་དང་པོ་ལག་པ་གཡོན་པས་ལོངས་སྤྱད་ལ་དེ་ནས་ཅི་བདེར་སྤྱད་དོ། །ཁ་ཟས་ཀྱི་རྣལ་འབྱོར་གྱི་དུས་སུ་ལས་བཞིའི་མཐའ་རྟེན་གྱི་སྔགས་དང་། སྙིང་གའི་ཧེ་རུ་ཀའི་ཞལ་གྱི་ཁ་དོག ཞི་བ་ལ་དཀར་པོ་ཞེས་བྱ་བ་ལ་སོགས་པར་བསྒྱུར་ཞིང་། ཁ་ཟས་ཀྱི་མཆོད་པ་བྱས་ན་ལས་བཞི་པོ་གང་ལ་དམིགས་པ་འགྲུབ་པར་འགྱུར་རོ་ཞེས་གསུངས་སོ། །ཁ་ཟས་ཀྱི་རྗེས་ལ་ལྷག་མའི་གཏོར་མས་འབྱུང་པོ་ཚིམ་པར་བྱ་བ་དང་། སྦྱིན་སྲེག་གི་རྗེས་དང་མཐུན་པར། བདག་མེད་པར་དྲན་པར་བྱས་ལ་ངལ་བསོ་བར་བྱའོ། །དེ་ལྟར་རིམ་པ་གཉིས་བརྟན་པར་བྱེད་པའི་སྤྱོད་པ་ནི། རྣལ་འབྱོར་མ་ཀུན་སྤྱོད་དང་། སློབ་དཔོན་གྱི་གཞུང་གཉིས་ཀ་ལས། དག་པ་དྲན་པའི་རྗེས་སུ་གཞུང་ཅུང་ཟད་ཅིག་འབྱུང་བས། དེ་བརྗོད་ན་རང་དོན་གྱི་སྤྱོད་པ་དང་། གཞན་དོན་གྱི་སྤྱོད་པ་གཉིས། དང་པོ་ལ་བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ་དང་། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ་གཉིས། དང་པོ་ནི་འབྱོར་པ་དང་བཅས་པས་ཀུན་ཏུ་སྤྱོད་ན་བསྐྱེད་པའི་རིམ་པ་ཅུང་ཟད་བརྟན་པ་དེས་ཚོགས་ཀྱི་ཁང་པ་སུམ་རིམ་བརྩིགས་ལ། ནང་མའི་ནང་དུ་ལྷ་དྲུག་ཅུ་རྩ་གཉིས་ཀྱི་འབག་དང་། ང་རྒྱལ་འཛིན་པའི་དཔའ་བོ་དང་། དཔའ་མོ་དྲུག་ཅུ་རྩ་གཉིས། དཀྱིལ་འཁོར་གྱི་རྣམ་པའི་ཚུལ་དུ་བཀོད་པ་ཐམས་ཅད་ཀྱིས་ཀྱང་མངོན་པར་རྟོགས་པ་ཚུལ་གཅིག་ཏུ་བསྒོམ། རིམ་པ་གཉིས་པ་ལ་རྡོ་རྗེ་མའི་ང་རྒྱལ་འཛིན་པ་གྲངས་ཅི་རིགས་པ་བཀོད་ལ་ཚོགས་ཀྱི་འཁོར་ལོའི་ཁ་ཟས་ཀྱི་གཡོས་བྱ་ཞིང་། ཐུན་མཚམས་རྣམས་སུ་ཕྱི་ནང་ན་གནས་པ་རྣམས་ལ་ཚོགས་ཀྱི་འཁོར་ལོའི་སྟོན་མོ་དྲང་བར་བྱའོ། །རིམ་པ་ཐ་མར་གླུ་ལེན་པ་དང་གར་བྱེད་པ་ལ་སོགས་པའི་རྣལ་འབྱོར་རིག་མ་བཅུ་དྲུག་གི་ང་རྒྱལ་འཛིན་ཅིང་དཀྱིལ་འཁོར་མཆོད་པའི་བསམ་པ་དང་ལྡན་པ་དགོད་དོ། །དེ་ལྟ་བུའི་ཚུལ་གྱིས་ཐུན་བཞིའམ་དྲུག་ཏུ་ཚོགས་ཀྱི་འཁོར་ལོ་བྱ་ཞིང་། ལོའམ་ཟླ་བ་དུ་མར་བསྒྲུབས་ནས་བསྐྱེད་པའི་རིམ་པའི་དམིགས་པ་ཤིན་ཏུ་བརྟན་པར་བྱེད་པ་ཡིན་ནོ། །ཡོ་བྱད་འབྱོར་པ་དེ་ཙམ་མེད་པས་རང་ཉིད་ཧེ་རུ་ཀའི་ང་རྒྱལ་དང་ལྡན་པ། རྒྱན་དྲུག་བགོས་ལ་ཌཱ་མ་རུ་དང་ཁ་ཊྭཱཾ་ག་དང་ཐོད་པ་འཛིན་པས་ཐུན་དྲུག་གམ་གསུམ་དུ་བསྐྱེད་རིམ་བརྟན་པར་བྱ་ཞིང་བསྒོམ་པ་ཡིན་ནོ། །རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ་ནི་མཉམ་གཞག་གི་དུས་སུ་འཇིག་རྟེན་གྱི་ཆོས་བརྒྱད་མགོ་སྙོམས་པ་སྙམ་བྱེད་ན་དེ་བརྟན་ནམ་མི་བརྟན་བརྟག་པའི་དོན་དུ་མཚན་མོ་ལམ་ཀའི་གཞི་མདོ་ལ་སོགས་པར་ཕྱིན་ཏེ་ཡུལ་རྣམས་ཉེ་བར་ལོངས་སྤྱོད་ནས་རྣམ་པར་རྟོག་པ་སྐྱེའམ་མི་སྐྱེ་རྟོག་ཅིང་བརྟན་པར་བྱེད་པ་ཡིན་ནོ། །ཉིན་མོའི་དུས་སུ་ནི་བྲམ་ཟེ་ལ་སོགས་པ་རང་གི་རིགས་དང་མཐུན་པའི་སྤྱོད་པས་གནས་པར་བྱ་བ་ཡིན་ནོ། །གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པ་ནི། སྤྲོས་མེད་ཀྱི་སྤྱོད་པས་ཐ་མལ་གྱི་རྣམ་རྟོག་མི་སྐྱེ་བར་ངེས་པར་བརྟན་པ་དང་། རང་གི་ཡུལ་འཁོར་ཡོངས་སུ་སྤངས་ཏེ་རང་གི་རིགས་དང་རུས་དང་ཆོ་འབྲང་ལ་སོགས་པ་ཐམས་ཅད་གསང་ནས་སྨྱོན་པར་བརྫུས་ཏེ། སྨྱོན་པའི་སྦྱོར་བས་རང་གི་རྟོགས་པའི་ཡེ་ཤེས་ཀུན་ཏུ་སྐྱོང་ཞིང་བརྟན་པར་བྱེད་པ་ཡིན་ནོ། །གཞན་གྱི་དོན་གྱི་སྤྱོད་པ་ནི་ཤིན་དུ་སྤྲོས་མེད་ཀྱི་སྤྱོད་པས་ཡེ་ཤེས་ཤིན་དུ་བརྟན་ནས་ནུས་པ་ཆེན་པོ་སྐྱེས་པ་དེའི་ཚེ་སེམས་ཅན་ཐམས་ཅད་རྗེས་སུ་གཟུང་བའི་སྤྱོད་པས་རྣལ་འབྱོར་པར་ཁས་བླངས་ནས་སློབ་དཔོན་བིརྺ་པའམ། སློབ་དཔོན་ལཱུ་ཧི་པ་བཞིན་དུ་གཞན་དོན་གྱི་སྤྱོད་པ་བྱེད་པ་ཡིན་ནོ། །དེ་ལ་སློབ་དཔོན་ལཱུ་ཧི་པའི་དགོངས་པ་ཇོ་བོ་ནཱ་རོ་ཏ་པས་བསྐང་བས་མངོན་པར་རྟོགས་པ་འདི་སྐུ་གསུམ་ལམ་དུ་བྱེད་པའི་སྒྲུབ་ཐབས་ཡིན་ཏེ། དེ་ཡང་བློའི་སྤྱོད་ཡུལ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། མངོན་པར་རྟོགས་པ་གཅིག་ལ་སྐུ་གསུམ་དུ་བཞག་པའོ། །དང་པོ་ནི་བདག་གི་བློ་སྣང་གི་དཀྱིལ་འཁོར་ནི་ཞིང་སྐྱེས་ཀྱིས་སྤྲུལ་ལ། ཞིང་སྐྱེས་ཉིད་ཀྱང་ལྷན་སྐྱེས་ཀྱིས་སྤྲུལ་པའི་ཕྱིར་དེ་གཉིས་ཀའང་སྤྲུལ་པའི་སྐུའོ། །ལྷན་སྐྱེས་ནི་གནས་འཕོ་བ་མེད་པའི་ཚུལ་གྱིས་ཟག་པ་མེད་པའི་བདེ་བ་དང་། ཆོས་ལ་ལོངས་སྤྱོད་པའི་ཕྱིར་ལོངས་སྤྱོད་རྫོགས་པའི་སྐུའོ། །ཆོས་ཀྱི་སྐུ་ནི་ཆོས་ཀྱི་སྐུ་ཉིད་དོ། །གཉིས་པ་དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་འཇོག་ན། བདེ་བ་ཆེན་པོའི་འཁོར་ལོ་ནི་ཆོས་ཀྱི་སྐུ། འཁོར་ལོ་གསུམ་ནི་ལོངས་སྐུ། སྒོ་མཚམས་མ་བརྒྱད་ནི་སྤྲུལ་པའི་སྐུའོ། །མངོན་པར་རྟོགས་པ་རྫོགས་པ་གཅིག་ལ་སྐུ་གསུམ་དུ་འཇོག་ན། ཕྱིའི་དཀྱིལ་འཁོར་དག་པ་དང་བཅས་པ་སྤྲུལ་པའི་སྐུ་ལམ་དུ་བྱེད་པའི་སྒྲུབ་ཐབས། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབས་པ་དང་བཅས་པ་ལོངས་སྤྱོད་རྫོགས་པའི་སྐུ་ལམ་དུ་བྱེད་པའི་སྒྲུབ་ཐབས། རྫོགས་པའི་རིམ་པ་སྤྱོད་པ་དང་བཅས་པ་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །དེ་ལ་འབྲིང་བསྡུས་ཀྱི་དབང་དུ་བྱས་ན་ཕྱིའི་དཀྱིལ་འཁོར་མེད་པས་ལུས་ལ་ལྷ་རྣམས་རྫོགས་པར་བསྐྱེད་པ་ཙམ་ནི་སྤྲུལ་པའི་སྐུ་ཡིན་ལ། བསྐྱེད་པ་གསལ་གདབ་པ་དང་། ཐིམ་པའི་ཚུལ་གྱིས་ལོངས་སྤྱོད་པ་ནི་ལོངས་སྤྱོད་རྫོགས་པའི་སྐུ་ཡིན་ལ། རྫོགས་པའི་རིམ་པ་སྤྱོད་པ་དང་བཅས་པ་ནི་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་ཡིན་ནོ། །བཞི་པ་དེ་ལྟར་བསྒོམས་པའི་འབྲས་བུ་ལ་གསུམ་སྟེ། ཞི་སོགས་བྱ་བ་དམན་པའི་དངོས་གྲུབ་དང་། འབྲིང་གྲུབ་པ་ཆེན་པོ་བརྒྱད་དང་མཁའ་སྤྱོད་ཀྱི་དངོས་གྲུབ་དང་། རབ་ཕྱག་རྒྱ་ཆེན་པོ་མཆོག་གི་དངོས་གྲུབ་སྐུ་གསུམ་གྱི་རང་བཞིན་སངས་རྒྱས་ཀྱི་ས་རྡོ་རྗེ་འཛིན་པ་ཉིད་འགྲུབ་པ་ཡིན་ནོ། །དེ་ལ་མཁའ་སྤྱོད་ཀྱི་དངོས་གྲུབ་ནི་གཞུང་ལས། འཕོ་བའི་ཚེ་ན་རྣལ་འབྱོར་པ། །ཞེས་པ་ནས། མཁའ་སྤྱོད་གནས་སུ་འཁྲིད་པར་བྱེད། །ཅེས་པའི་བར་ཏེ། ཀུན་སྤྱོད་ལེའུ་བཅུ་བདུན་པ་ལས། རྣལ་འབྱོར་པ་ནི་འཕོ་བའི་ཚེ། །དཔལ་ལྡན་ཧེ་རུ་ཀ་ལ་སོགས། །དཔའ་བོ་དག་ནི་ཐམས་ཅད་དང་། །རྣལ་འབྱོར་མ་ནི་ཇི་སྙེད་པ། །ལག་ན་མེ་ཏོག་སྣ་ཚོགས་བསྣམས། །བ་དན་རྒྱལ་མཚན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །སྣ་ཚོགས་གླུས་ནི་ཉེ་བར་མཆོད། །འཆི་བ་ཞེས་པ་རྣམ་རྟོག་སྟེ། །མཁའ་ལ་སྤྱོད་པའི་གནས་སུ་ཁྱེར། །དེ་ལྟར་དཔའ་བོ་ཆེན་པོ་དང་། །རྣལ་འབྱོར་མ་ནི་ས་སྟེང་དཀོན། །ཞེས་གསུངས་པའི་དོན་དུ་སྣང་ངོ་། །གལ་ཏེ་མཁའ་སྤྱོད་ཀྱི་གོ་འཕང་འཆི་ཁར་མ་ཐོབ་ན། འཁོར་ལོས་སྒྱུར་བ་ལ་སོགས་པ་མཐོ་རིས་ཀྱི་རྟེན་ལ་ལམ་ལྷག་མ་རྣམས་བགྲོད་པར་བྱེད་དེ། དེ་ཉིད་ལས། བསམ་གཏན་གྱི་ནི་བསམ་ཙམ་མམ། །འདོན་ཅིང་ཀློག་གམ་བྲིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་ཏེ། །ཡང་ན་འཁོར་ལོས་སྒྱུར་ཉིད་འགྱུར། །ཞེས་གསུངས་སོ། །རབ་ཕྱག་རྒྱ་ཆེན་པོ་མཆོག་གི་དངོས་གྲུབ་ནི། གློ་བོ་ལོ་ཙཱ་བ་དང་། དམར་གྱིས། རྫོགས་རིམ་གྱི་གཤམ་དུ། བསམ་གྱིས་མི་ཁྱབ་དེ་བསམ་ན། །དེ་ལས་གཟུངས་ནི་ཐོབ་པར་འགྱུར། །ཞེས་པས་བསྟན་པར་བཞེད་དེ་བསྐྱེད་རིམ་གྱི་མཐར། རྫོགས་རིམ་བསམ་གྱིས་མི་ཁྱབ་པ་ལྔ་བསམ་ན། ཕན་ཡོན་འབྲས་བུ་ནི་གཟུངས་ཀྱི་སྐད་དོད། དྷ་ར་ཅེས་པ་འཛིན་པ་སྟེ། སངས་རྒྱས་ཀྱི་ཡོན་ཏན་སྟོབས་དང་། མི་འཇིགས་པ་ལ་སོགས་པའི་རྒྱན་མ་ལུས་པ་འཛིན་ཅིང་ཐོབ་པར་འགྱུར་ཞེས་བྱ་བའི་ཐ་ཚིག་གོ་ཞེས་བཤད་ཅིང་། རྗེ་བཙུན་གྱིས་ནི་ཀུན་སྤྱོད་ལེའུ་བཅུ་གསུམ་པ་ལས། བསྟན་པ་ཡིས་ནི་སྤྲུལ་པ་ཡིན། །བཤད་པས་ལོངས་སྤྱོད་རྫོགས་པར་འདོད། །སོ་སོ་བསྟན་པ་མ་ལུས་ཉིད། །མྱ་ངན་འདས་པ་དེ་ཉིད་བསྟན། །སྐུ་གསུམ་འཁོར་ལོ་གསུམ་དུ་བཤད། །ཆོས་དང་ལོངས་སྤྱོད་སྤྲུལ་མཚན་ཉིད། །ཅེས་གསུངས་པ་ལྟར་སྐུ་གསུམ་ཉིད་ལ་བཞེད་དེ། བཅུ་གསུམ་རྡོ་རྗེ་འཛིན་པའི་སར། །གློ་བུར་གྱི་དྲི་མ་མ་ལུས་པ་དང་བྲལ་བའི་ཚེ་སྣང་བའི་དངོས་པོ་ཐམས་ཅད་བདེ་བ་ཆེན་པོ་ལྷན་ཅིག་སྐྱེས་པའི་ངོ་བོར་སྡོམ་པ་ནི་ཆོས་ཀྱི་སྐུ་དང་། དེ་ཉིད་འོག་མིན་དུ་གདུལ་བྱ་དག་པ་རྣམས་ལ་ལྷ་དྲུག་ཅུ་རྩ་གཉིས་ཀྱི་རྟེན་དང་བརྟེན་པར་བཅས་པའི་དཀྱིལ་འཁོར་དུ་ཤར་བ་ནི་ལོངས་སྤྱོད་རྫོགས་པའི་སྐུ་དང་། དེ་ཉིད་གདུལ་བྱ་གྲུབ་པའི་ས་ལ་གནས་པ་རྣམས་ལ་སྤྲུལ་པ་མཆོག་གི་དཀྱིལ་འཁོར་དུ་ཤར་བ་ནས། རིགས་ཅན་གསུམ་ལ་ཤཱཀྱ་ཐུབ་པ་ལ་སོགས་པ་དང་། རི་བོང་དང་། སྟག་དང་། སེང་གེ་དང་། གཟིངས་དང་ཟམ་པ་ལ་སོགས་པའི་རྣམ་འཕྲུལ་མཐའ་ཡས་པས་སེམས་ཅན་གྱི་དོན་བསམ་གྱིས་མི་ཁྱབ་པ་མཛད་པ་ནི་སྤྲུལ་པའི་སྐུར་བཞེད་ཅིང་། དེ་དག་གི་ཕྲིན་ལས་ཐམས་ཅད་ཀྱང་སྐུ་གསུམ་གྱི་ཕྲིན་ལས་ཡིན་པར་བཞེད་དོ།། །།དགེ་ལེགས་ཐར་པའི་ཡོན་ཏན་མ་ལུས་པ། །གང་ལ་བརྟེན་ནས་བདེ་བླག་བསྒྲུབ་ནུས་པའི། །ལུས་རྟེན་ཕུན་ཚོགས་དལ་བ་ཐོབ་དུས་འདིར། །རིན་ཆེན་སངས་རྒྱས་བསྟན་ལ་འཇུག་པར་རིགས། །དེ་ལའང་ཕ་རོལ་ཕྱིན་པའི་སྡེ་སྣོད་ལས། །བསྒྲུབ་བྱའི་དོན་གཅིག་སྒྲུབ་བྱེད་རྣམ་བཞི་ཡིས། །བསྒྲུབ་པའི་ཚུལ་གྱིས་ཁྱད་པར་ཆེས་འཕགས་པའི། །རྡོ་རྗེ་ཐེག་པ་སྙིང་པོར་བླང་བྱ་ཡིན། །ཟབ་མོའི་རྒྱུད་ལའང་བྱ་སྤྱོད་རྣལ་འབྱོར་དང་། །རྣལ་འབྱོར་ཆེ་དང་གསང་དང་གསང་བའི་མཐའི། །རྒྱུད་སྡེ་དྲུག་གི་རྩེར་སོན་སྡོམ་པའི་རྒྱུད། །སྐལ་བཟང་སྐྱེ་བོའི་འཇུག་ངོགས་དམ་པ་ཡིན། །ཚུལ་འདི་ཕྱེ་ལ་འགྲན་པའི་ཟླ་མེད་པ། །གྲུབ་པའི་འཁོར་ལོས་སྒྱུར་བ་ལཱུ་ཧི་པས། །ལེགས་པར་བཀྲལ་བའི་མངོན་པར་རྟོགས་པའི་གཞུང་། །ཇི་བཞིན་བཤད་པའི་བསྟན་བཅོས་འདི་བྱས་སོ། །ཐོག་མར་སྐུལ་བྱེད་ཐར་པའི་ལམ་ཞུགས་པ། །དད་ལྡན་བསོད་ནམས་རིན་ཆེན་བསམ་པ་ཚིམ། །བར་དུ་སྐུལ་བྱེད་བློ་གསལ་འདུས་པའི་ཚོགས། །ཀུན་ཀྱང་འདི་ལ་དགའ་བས་རྗེས་ཡི་རང་། །ཐ་མར་རྩེ་གཅིག་གསོལ་བ་འདེབས་བྱེད་པ། །འཇིག་རྟེན་བྱ་བ་བཏང་ནས་དམ་པའི་ཆོས། །བརྩོན་པས་སྒྲུབ་བྱེད་ཀུན་དགའ་མཆོག་ལྡན་གྱི། །དགོངས་པ་དབྱར་གྱི་མཚོ་བཞིན་གང་བར་གྱུར། །སྦས་པའི་སྙན་བརྒྱུད་ཧ་ཅང་གསལ་སྟོན་དང་། །བྱིས་བློ་གནས་ལུགས་དོན་ལས་གོལ་བ་དང་། །མ་འབྲེལ་འགལ་བའི་ཚིག་སྦྱོར་ཅི་མཆིས་པ། །བླ་མ་མཁའ་འགྲོའི་ཚོགས་ཀྱིས་བཟོད་པར་མཛོད། །འདི་བགྱིས་པ་ལས་ངལ་བར་གྱུར་པའི་དགེ་ཚོགས་དྲི་མེད་སྟོན་ཀའི་ཟླ་ལྟར་དཀར་བའམ། །སེམས་ཀྱི་མཚོ་ལ་པདྨོས་ཁེབས་པ་ལྟ་བུ་གང་ཞིག་ཐོབ་པ་དེ་ཡིས་ལུས་ཅན་ཀུན། །གནས་གསུམ་མཁའ་འགྲོའི་ཚོགས་ཀྱིས་བརྩེ་བའི་གླང་ཆེན་ཁུར་གྱིས་མཁའ་སྤྱོད་གནས་སུ་ལེགས་ཁྲིད་ནས། །སྤྲུལ་པའི་ལུས་ཀྱིས་སངས་རྒྱས་ཞིང་སྦྱངས་སེམས་ཅན་སྨིན་བྱས་རྡོ་རྗེ་འཛིན་པའི་ས་ཐོབ་ཤོག །བདག་ཀྱང་དེང་ནས་བྱང་ཆུབ་མ་ཐོབ་བར། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་དུ་གྲགས་པ་དེར་སྐྱེས་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །ཆོས་ཚུལ་འདི་ཡང་སྲིད་པའི་མཐར་ཐུག་བར། །བླ་མ་ལ་གུས་དད་དང་སྙིང་རྗེར་བཅས། །དམ་ཚིག་སྡོམ་ལྡན་འགྲོ་བ་མ་ལུས་པ། །རྟག་ཏུ་བརྟེན་པའི་ཕྲིན་ལས་དབང་བསྒྱུར་ཤོག །དཔལ་འཁོར་ལོ་བདེ་མཆོག་ལཱུ་ཧི་པའི་ལུགས་ཀྱི་བསྐྱེད་པའི་རིམ་པའི་རྣམ་པར་བཤད་པ་འདོད་དགུ་སྦྱིན་པའི་དཔག་བསམ་ལྗོན་པ་ཞེས་བྱ་བ་འདི་ནི་སྒོམ་སྡེའི་ཡུལ་དུ་སྐྱེས་པའི་དགེ་སློང་བློ་གསལ་ཞིང་དད་པ་དང་ལྡན་པ་བསོད་ནམས་རིན་ཆེན་གྱིས། བདེ་མཆོག་ལཱུ་ཧི་པའི་རྣམ་བཤད་གསང་མཐའི་ཟབ་དོན་འདུས་པ་ཞིག་གྱིས་ཤིག་ཅེས་རྒྱང་རིང་པོ་ནས་གསོལ་བ་བཏབ་པ་དང་། བར་དུ་དོན་གཉེར་དུ་མས་བསྐུལ་ཞིང་། མཐར་སྐྱེས་བུ་དུ་མས་འཕྲལ་དུ་བསྐུལ་བའི་ངོར། རྡོ་རྗེ་འཛིན་པ་མཆོག་གི་ས་བརྙེས་པ་རྗེ་བཙུན་ཀུན་དགའ་བཟང་པོའི་ཞལ་སྔ་ནས་དང་། འཇིག་རྟེན་དབང་ཕྱུག་དང་མི་གཉིས་པའི་ཐུགས་མངའ་བ་མུས་ཆེན་དཀོན་མཆོག་རྒྱལ་མཚན་དཔལ་བཟང་པོའི་གསུང་ལས་སྐྱེས་པ་མང་དུ་ཐོས་པའི་དགེ་སློང་བསོད་ནམས་སེང་གེས་གསང་མཐའི་རྒྱུད་འགྲེལ་གཞུང་ཕྲན། མན་ངག་རྣམས་ལ་ཡུན་རིང་དུ་འདྲིས་པར་བྱས་ནས་མེ་ཕོ་རྟའི་ལོ་ལ་དཔལ་ཨེ་ཝཾ་ཆོས་ལྡན་གྱི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།བཀྲ་ཤིས་པར་གྱུར་ཅིག །དགེའོ།། །།

རིམ་པ་བཞི་པའི་ཁྲིད་ཡིག་གསུང་སྒྲོས་མ།

རིམ་པ་བཞི་པའི་ཁྲིད་ཡིག་གསུང་སྒྲོས་མ་བཞུགས་སོ།། །།སྐུ་གསུམ་ལྷུན་གྲུབ་གཞིར་གནས་རྩ་ཁམས་ལ། །ཨཾ་ཡིག་འོད་ཀྱིས་བྱང་སེམས་བཞུས་པ་ལས། །ཡས་འབབ་མས་བརྟན་དགའ་བཞིའི་རིམ་གྱིས་ནི། །གསང་བ་སྒྲུབ་མཛད་རྗེ་བཙུན་བླ་མ་རྒྱལ། །གང་གི་ཞབས་པད་བསྟེན་པའི་བཀའ་དྲིན་ལས། །ཚུལ་བཞིན་རྙེད་པ་ཤེས་བྱ་རྒྱུད་ཀྱི་རིམ། །ཉམས་ལེན་སྔགས་དང་སྐྱེ་བ་ཡེ་ཤེས་དང་། །འབྲས་བུ་གསང་བའི་རིམ་པ་འདིར་བརྗོད་བྱ།། །།རྣལ་འབྱོར་གྱི་དབང་ཕྱུག་ཆེན་པོ་སྤྱོད་པའི་རྡོ་རྗེའི་དགོངས་པས་འཁོར་ལོ་བདེ་མཆོག་གི་ལམ་གྱི་རིམ་པ་ནི། སྐལ་བ་དང་ལྡན་པའི་རྟེན་གྱི་གང་ཟག་ལ། སྦྱིན་བྱ་བཞི་བྱིན་ནས་བསླབ་བྱ་གཉིས་ལ་བསླབས་ཏེ། གྲོགས་སྤྱོད་པ་གསུམ་གྱིས་མཚམས་སྦྱར་བས། འབྲས་བུ་སྐུ་གསུམ་ཡེ་ཤེས་ལྔ་འགྲུབ་པ་ཞིག་ཡིན་པར་བཞེད་དོ། །དེ་ལ་སྐལ་བ་དང་ལྡན་པའི་རྟེན་གྱི་གང་ཟག་ནི་ཕ་རོལ་ཏུ་ཕྱིན་པའི་ཐེག་པས་རིམ་པ་བཞིན་བློ་སྦྱངས་ནས། རྡོ་རྗེ་ཐེག་པའི་སྣོད་རུང་དུ་བྱས་པའི་སྐལ་དམན་རིམ་གྱིས་འཇུག་པའམ། སྐྱེ་བ་སྔ་མ་ནས་ཐེག་པ་ཆེན་པོའི་ལམ་ལ་གོམས་པའི་སྟོབས་ཀྱིས་ཚེ་འདིར་དང་པོ་ཉིད་ནས་སེམས་ཅན་ཀྱི་དོན་དུ་ཕྱག་ཆེན་མཆོག་གི་དངོས་གྲུབ་ཐོབ་པར་འདོད་པའི་སྐལ་ལྡན་ཅིག་ཆར་བ་གང་ཡང་རུང་བའོ། །དེ་ལ་སྦྱིན་བྱ་བཞི་བྱིན་པ་ནི་འཁོར་ལོ་བདེ་མཆོག་ལྷ་མངལ་སྐྱེས་ལྟར་བསྐྱེད་པའི་དཀྱིལ་འཁོར་དུ་མངོན་པར་དབང་བསྐུར་བ་བཞི་ཚུལ་བཞིན་ཐོབ་པའོ། །དེས་བསླབ་བྱ་གཉིས་ལ་བསླབ་པ་ནི། རིམ་པ་གཉིས་ལ་བསླབ་པ་སྟེ། འདི་ལ་སྔོན་འགྲོ་དང་དངོས་གཞི་གཉིས་ལས། དང་པོ་ལ་ཚོགས་གསོག་པར་བྱེད་པར་མཎྜལ་གྱི་ཁྲིད། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར། སྡིག་པ་སྦྱོང་བར་བྱེད་པ་རྡོ་རྗེ་སེམས་དཔའི་བསྒོམ་བཟླས་གསུམ་གྱི་དང་པོ་གཉིས་ཕྱོགས་གཅིག་ཏུ་ཉམས་སུ་ལེན་པ་ནི། གནས་དབེན་པར་མཎྜལ་དང་། ཚོམ་བུའི་རྒྱུ་རྣམས་འདུས་བྱས་ཏེ། སྐྱབས་འགྲོ་སེམས་བསྐྱེད་སྔོན་དུ་སོང་ནས་མདུན་གྱི་ནམ་མཁའི་སྟེང་གི་ཆ་ལ་སེང་གེས་བཏེག་པའི་རིན་པོ་ཆེའི་ཁྲི། སྣ་ཚོགས་པདྨ་དང་། ཟླ་བའི་གདན་གྱི་སྟེང་དུ། རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་ཞལ་གཅིག་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། རུས་པའི་རྒྱན་དྲུག་གིས་བརྒྱན་པ། ཕྱག་ན་རྡོ་རྗེ་ལ་སོགས་པ་བརྒྱུད་པའི་བླ་མ་ཐམས་ཅད་ཀྱིས་བསྐོར་བ་དང་། འོག་གི་ཆ་ལ་འཁོར་ལོ་བདེ་མཆོག་ལྷ་སུམ་ཅུ་སོ་བདུན་གྱི་དཀྱིལ་འཁོར་མངོན་སུམ་ལྟར་དམིགས་ནས་མཎྜལ་ཚོམ་བུ་བདུན་པ་དབུལ་ཏེ། ཚར་བདུན་བདུན་གྱི་རྗེས་སུ་རིམ་པ་གཉིས་ཀྱི་ཏིང་ངེ་འཛིན་བཟང་པོ་སྐྱེ་བར་གསོལ་བ་གདབ་པ་ཡུན་རིང་དུ་བྱའོ། །གསུམ་པ་ནི། ཨ་བྷི་དྷ་ན་ནས་གསུངས་པའི་རྡོ་རྗེ་སེམས་དཔའི་བསྒོམ་བཟླས་སྡིག་པ་དག་པའི་མཚན་མ་ནམ་བྱུང་གི་བར་དུ་བྱའོ། །གཉིས་པ་ལ་བསྐྱེད་རིམ་ལ་བསླབ་པ་དང་། རྫོགས་རིམ་ལ་བསླབ་པ་གཉིས་ལས། དང་པོ་ནི། སྐྱབས་འགྲོ་སེམས་བསྐྱེད་ནས་བྱང་ཆུབ་ཀྱི་ཕྱོགས་ཀྱི་དག་པ་དྲན་པའི་བར་འཁོར་ལོ་བདེ་མཆོག་མངལ་སྐྱེས་ཀྱི་མངོན་པར་རྟོགས་པ་ཚང་བར་བསྒོམས་ནས། དེ་ནས་གཙོ་བོའི་ཞལ་དང་། སྤྱན་དང་། ཕྱག་མཚན་དང་། འཁོར་གྱི་ལྷ་དང་། གཞལ་ཡས་ཁང་པ་དང་། སྣོད་བཅུད་ཐམས་ཅད་ཀྱང་རྟེན་དང་བརྟེན་པར་བསྒོམས་ཏེ་བསྐྱེད་རིམ་ལ་སེམས་འཛིན་ནོ། །མཇུག་ཏུ་སྔགས་ཀྱི་བཟླས་པ་ཅུང་ཟད་དང་། དཀྱིལ་འཁོར་གྱི་འཁོར་ལོ་སྣ་བུག་གཉིས་ནས་སྙིང་གར་བསྡུས་ཏེ། གོ་ཆ་གསུམ་དང་། ཚམ་རྔམ་སྔགས་ཀྱི་བསྲུང་བ་བྱས་ནས་རྗེས་སྤྱོད་ལམ་ལ་འཇུག་གོ །དེ་ལྟ་བུའི་ཚུལ་གྱིས་སྣང་བའི་དངོས་པོ་ཐམས་ཅད་ལྷར་མ་ཤར་གྱི་བར་དུ་བསྒོམ་པར་བྱའོ། །གཉིས་པ་ནི། སློབ་དཔོན་འདིས་བླ་མེད་སྤྱིའི་རྫོགས་པའི་རིམ་པ་གསང་བའི་དེ་ཁོ་ན་ཉིད་རབ་ཏུ་གསལ་བ་མཛད་དེ། ཕ་རྒྱུད་གསང་བ་འདུས་པ་དང་མ་རྒྱུད་འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་ཀྱང་བརྗོད་བྱ་རིམ་པ་བཞི་སྟོན་པར་མཚུངས་པའོ། །མ་རྒྱུད་སྤྱིའི་རྫོགས་པའི་རིམ་པ་རིམ་པ་བཞི་པ་མཛད་དེ། ཀྱེ་རྡོ་རྗེ་དང་འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་ཀྱང་བརྗོད་བྱ་རིམ་པ་བཞི་སྟོན་པར་མཚུངས་པའོ། །འཁོར་ལོ་བདེ་མཆོག་གི་ཐུན་མོང་མ་ཡིན་པའི་རྫོགས་པའི་རིམ་པ་དཔྱིད་ཀྱི་ཐིག་ལེ་མཛད་དེ། སཾ་བུ་ཊིའི་བརྟག་པ་དྲུག་པ་ནས་སྙིང་གའི་ཧཱུྃ་གི་ནང་གི་བྱང་ཆུབ་ཀྱི་སེམས་དཔྱིད་དང་། ལྟེ་བའི་ཨཾ་ཐིག་ལེ་གཉིས་སྙོམས་པར་འཇུག་པའི་རྫོགས་རིམ་བསྒོམ་ཚུལ་གསུངས་པ་དེ་སྟོན་པའོ། །རིམ་པ་བཞི་པ་འདི་ལའང་འབྲོག་མི་ནས་བརྒྱུད་པ་ལམ་སྐོར་དགུའི་ཁོངས་སུ་གཏོགས་པ་དང་། ནཱ་རོ་ཏ་པ་ནས་བརྒྱུད་པ་གསང་མཐའ་བའི་ལུགས་གཉིས་ལས། ཕྱི་མ་ལ་རྗེ་ས་ཆེན་གྱིས་ནག་འབུམ་དུ་རིམ་བཞིའི་བསྡུས་དོན་དང་། ཐོ་ཡིག་གཉིས། ལོགས་སུ་རིམ་བཞི་ལམ་སློང་དང་གསུམ་མཛད་ཅིང་འདི་དང་པུ་ཧྲངས་ལོ་ཆུང་གི་དངོས་སློབ་དམར་བརྩོན་འགྲུས་རྒྱལ་མཚན་གྱིས་མཛད་པའི་རིམ་བཞི་གཉིས་ལ་ཁྱད་པར་མི་འདུག་པས། ནཱ་རོ་པའི་མན་ངག་ཏུ་ཡིད་ཆེས་བསྐྱེད་པའི་རྒྱུར་འགྱུར་བ་ཡིན་ནོ་གསུང་ངོ་། །དེ་དག་གི་དོན་ཉམས་སུ་ལེན་པ་ལ། རིམ་པ་བཞི་ལས། དང་པོ་ཤེས་བྱ་རྒྱུད་ཀྱི་རིམ་པ་ནི། སྤྱིར་ཐ་མལ་པ་འཆི་བའི་དུས་སུ་འབྱུང་བ་བཞིའི་རིམ་གྱིས་རགས་པ་ལུས་ཐིམ་ཚུལ་དང་། སྣང་མཆེད་ཐོབ་གསུམ་གྱི་རིམ་གྱིས་སེམས་ཐིམ་ཚུལ་དང་། དེ་ནས་ལུགས་ལྡོག་གི་སྣང་བ་གསུམ་ལས་བར་དོ་གྲུབ་ཚུལ་དང་། དེ་ཉིད་མངལ་དུ་སྐྱེ་བ་བླངས་པ་ན་ཕ་མའི་ཁུ་ཁྲག་ལས་ལུས་གྲུབ་ཚུལ་དང་། དེ་ལས་ཐོག་མར་རྩ་ཁམས་ཇི་ལྟར་གྲུབ་པ། བར་དུ་ཇི་ལྟར་འཕེལ་བ། མཐར་ཇི་ལྟར་གནས་པའི་ཚུལ་རྣམས་རྒྱས་པར་ཤེས་པར་བྱ་བ་ཡིན་ཞིང་། འདིར་སྐབས་སུ་བབ་པའི་ཉམས་ལེན་ནི། སྔར་བཞིན་དག་པ་དྲན་པའི་བར་མངོན་པར་རྟོགས་པ་ཚང་བར་བསྒོམས་ནས། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས། སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་འཁོར་གྱི་ལྷ་རྣམས་ལ། འཁོར་གྱི་ལྷ་རྣམས་ཕྱོགས་གཡོན་སྐོར་གྱིས་སྣ་བུག་གཡོན་དང་། མཚམས་གཡས་སྐོར་གྱིས་སྣ་བུག་གཡས་ནས་སྙིང་གའི་ཧཱུྃ་ལ་བསྡུ། ཡུམ་ཡང་འོད་ཀྱི་རྣམ་པས་སྣ་བུག་གཡོན་ནས་ལྟེ་བའི་ཨཾ་ལ་བསྟིམས་པས་ཨཾ་གི་འོད་ཀྱིས་མུན་ཁུང་དུ་སྒྲོན་མེ་བཏེག་པ་ལྟར་ལྟེ་བ་སྤྲུལ་པའི་འཁོར་ལོ་གསལ་གདབ་སྟེ། ནང་སྐོར་འདབ་མ་བརྒྱད་ལ་ཨ་ཀ་ཙ་ཊ་ཏ་པ་ཡ་ཤ་བརྒྱད། དེ་རེ་རེ་ལ་འདབ་ཆུང་བདུན་བདུན་གྱེས་པས་ཕྱི་སྐོར་ང་དྲུག་ལ་མདུན་ནས་གཡོན་སྐོར་དུ་ཨཱ་ལི་བཅུ་དྲུག གཡས་སྐོར་དུ་ཀཱ་ལི་སོ་བཞི། ཨཱ་ཨཱི་ཨཱུ་ཨཻ་ཨཽ་ཨཾ་སྟེ་རིང་པོ་དྲུག་བཀོད། ཐམས་ཅད་ཀྱང་ཁ་དོག་དམར་པོ་མགོ་གྱེན་བསྟན་ནོ། །ཡང་དེའི་འོད་ཀྱིས་སྙིང་ག་ཆོས་ཀྱི་འཁོར་ལོ་གསལ་གདབ་སྟེ། འདི་ལ་རིམ་བཞིའི་གཞུང་དང་ཐོ་ཡིག་ལས་དབུས་སུ་ཧཱུྃ་དང་། ཕྱོགས་བཞིར་ཨོཾ་ཏྲཱཾ་ཧྲཱིཿཨཱཿམཚམས་བཞིར་ལྃ་མཱྃ་པཱྃ་ཏཱྃ་བཞི་བཀོད་པར་བཤད་ཀྱང་། འདིར་དཔྱིད་ཀྱི་ཐིག་ལེ་ལྟར་དབུས་སུ་ཧཱུྃ། ཕྱོགས་བཞིར་ཨ་ཨི་ཨེ་ཨོ་སྟེ་ཐུང་ངུ་བཞི། མཚམས་བཞིར་ཡ་ར་ལ་ཝ་བཞི་ཁ་དོག་སྔོན་པོ་མགོ་ཐུར་བསྟན་བཀོད་གསུངས། ཡང་དེའི་འོད་ཀྱིས་མགྲིན་པ་ལོངས་སྤྱོད་ཀྱི་འཁོར་ལོ་གསལ་གདབ་སྟེ། གཞུང་དང་ཐོ་ཡིག་ལས་ཕྱོགས་བཞིར་ཐུང་ངུ་བཞི་བཀོད་པར་གསུངས་ཀྱང་། འདིར་དཔྱིད་ཐིག་ལྟར་དབུས་སུ་ཨོཾ། ཕྱོགས་བཞིར་ནང་སྐོར་ལ་ཨཱ་ཨཱི་ཨཱུ་ཨཻ་སྟེ་རིང་པོ་བཞི། དེ་རེ་རེ་ལ་འདབ་ཆུང་གསུམ་གསུམ་དུ་གྱེས་པའི་ཕྱི་སྐོར་བཅུ་གཉིས་ལ་དབྱངས་མ་ནིང་དང་བྲལ་བ་བཅུ་གཉིས་ཁ་དོག་དམར་པོ་མོག་གྱེན་བསྟན་འགོད་གསུང་། འཁོར་ལོ་འདི་གཉིས་དཔྱིད་ཐིག་ལྟར་ན་གཡོན་སྐོར་རོ། །ཡང་དེའི་འོད་ཀྱིས་སྤྱི་བོ་བདེ་ཆེན་གྱི་འཁོར་ལོ་གསལ་གདབ་སྟེ། དབུས་སུ་ཧཾ། འདབ་མ་སོ་གཉིས་ལ་ཨཱ་ལི་བཅུ་དྲུག་གཡས་སྐོར་དང་གཡོན་སྐོར་དུ་ཁ་དོག་དཀར་པོ་མགོ་ཐུར་བསྟན་འགོད་དོ། །དེ་དག་གི་དབུས་སུ་རྩ་གསུམ་ཡང་གསལ་གདབ་སྟེ། དབུས་སུ་ཨ་ཝ་དྷཱུ་ཏཱི། གཡས་སུ་མེ་མ་དམར་པོ་ཁ་གྱེན་བསྟན། དེའི་ནང་དུ་ཀཱ་ལི་གཉིས་གཉིས་ལ་ཨཱ་ལི་རེ་རེས་སྤེལ་བ། མགོ་བོར་ཨོཾ་དང་མཐར་ཧཱུྃ་ཕཊ་དང་ལྡན་པ་ཁ་གྱེན་བསྟན། གཉིད་མ་དཀར་པོ་ཁ་ཐུར་བསྟན། དེའི་ནང་དུ་ཡི་གེ་སྔ་མ་དང་འདྲ་བ་ཁ་ཐུར་བསྟན་ནོ། །བཤང་སྒོར་རླུང་དང་སུམ་མདོར་མེ་སྟེ། དེ་ལྟར་རྩ་གསུམ་འཁོར་ལོ་དྲུག་ཡི་གེ་དང་བཅས་པ་ཡུན་རིང་དུ་གསལ་གདབ་ཅིང་བསྒོམ་མོ། །དེ་དག་ནི་རྒྱུད་ཀྱི་རིམ་པ་སྟེ། རྒྱུད་ནི་འཁོར་ལོ་བཞི་ལ་སོགས་པ་ལུས་ལ་ཡེ་ནས་གནས་པ་ཡིན་ལ། རིམ་པ་ནི་དེ་རིམ་གྱིས་གསལ་འདེབས་པ། མཐར་ཕྱིན་པའི་ཚད་ནི་རྩ་གསུམ་དང་འཁོར་ལོ་དྲུག་ཡིད་ལ་གསལ་བར་སྣང་བའོ། །གཉིས་པ་ཉམས་ལེན་སྔགས་ཀྱི་རིམ་པ་ལ་སྔོན་འགྲོ་ནི། རླུང་འབྱུང་འཇུག་དང་བསྟུན་ཏེ། རླུང་ཕྱིར་འབྱུང་བའི་ཚེ་གཡས་མེ་མ་ཡི་གེ་དང་བཅས་པ་གསལ་གདབ། ནང་དུ་འཇུག་པའི་ཚེ་གཡོན་གཉིད་མ་ཡི་གེ་དང་བཅས་པ་གསལ་གདབ། ཅུང་ཟད་གནས་པའི་ཚེ་ཨཾ་འབར་བ་ལ་སེམས་གཏད་དེ་ཡུན་རིང་དུ་བསྒོམ། དེ་ལ་གོམས་ནས་ནང་དུ་འཇུག་པ་དང་བསྟུན་ཏེ། རླུང་ལྟེ་བའི་ཨཾ་ལ་བསྟིམ་ཞིང་ཤེས་པ་ཨཾ་ལ་གཏད་དེ་སྟེང་རླུང་ཐུབ་ཚད་དུ་མནན། དེ་ལྟར་དྲག་ལ་ཡུན་ཐུང་བ་ཡང་ཡང་དུ་བསྒོམས་པས་ལྟེ་བའི་གནས་སུ་དུ་བ་ལ་སོགས་པའི་རྟགས་ལྔ་སྐྱེས་ཞིང་ཨཾ་གི་མེ་ཡང་སོར་གཉིས་ལ་སོགས་པ་ནས་མགྲིན་པའི་བར་དུ་འབར་བ་སྙམ་བྱེད་པ་འབྱུང་ངོ་། །དེ་ནས་སྔགས་རིམ་དངོས་ནི་འོག་རླུང་དྲག་ཏུ་བསྐུམས་པས་ཨཾ་གིས་མེ་སྦར་ཏེ། ཡར་རོ་མ་ནས་སོང་སྟེ་འཁོར་ལོ་གོང་མ་གསུམ་གྱི་ཡིག་འབྲུ་རྣམས་རིམ་པ་བཞིན་དུ་བསྲེགས་ནས་སྨིན་མཚམས་གནས་ཀྱི་སྒོ་ཕྱེ་ནས། སྣ་བུག་གཡས་ནས་བྱུང་སྟེ། མདུན་གྱི་ནམ་མཁར་དེ་བཞིན་གཤེགས་པ་དཔག་ཏུ་མེད་པ་བསྒོམས་ལ། དང་པོར་གཅིག་དང་དེ་ནས་ཇེ་མང་། མཐར་ཐམས་ཅད་ཀྱི་ཤངས་བུག་གཡས་ནས་ཞུགས། དེ་དག་གི་སྤྱི་བོ་ལ་སོགས་པའི་འཁོར་ལོ་བཞི་རིམ་པ་བཞིན་བཞུ་བཏུལ་བྱས་ནས་ལྟེ་བའི་གནས་སུ་མེ་དང་བྱང་ཆུབ་ཀྱི་སེམས་འདྲེས་པ་དེ་རྩ་གཡས་ནས་བྱུང་བ་ཤངས་བུག་གཡས་ནས་རང་གི་སྣ་བུག་གཡོན་དུ་ཞུགས། སྤྱི་བོ་གསེར་གྱི་སྒོ་ཕྱེ་སྟེ་སྤྱི་བོའི་འཁོར་ལོ་བྱང་ཆུབ་སེམས་ཀྱིས་ཁེངས། ཡང་གཡོན་རྐྱང་མ་ནས་ཞུགས་ཏེ། འཁོར་ལོ་འོག་མ་རིམ་པ་གསུམ་རིམ་པ་བཞིན་ཁེངས་པས་འཁོར་ལོ་བཞིའི་གནས་སུ་ཡས་འབབ་ཀྱི་དགའ་བ་བཞི་སྐྱེས་པར་བསམ། བྱང་ཆུབ་ཀྱི་སེམས་ཨཾ་ལ་ཕོག་པས་ཨཾ་དྲག་ཏུ་འབར་ཏེ་དབུ་མ་ཁ་བྱེ་ནས་སྙིང་ཁའི་ཧཱུྃ་དང་། མགྲིན་པའི་ཨོཾ་ཞེན་ཐོགས་མེད་པར་བཅོམ་ནས་སྤྱི་བོའི་ཧཾ་ལ་ཕོག་པས། དེ་ལས་བྱང་ཆུབ་ཀྱི་སེམས་འཛག་པའི་འབར་འཛག་ལ་སེམས་གཏད་དེ་སྟེང་རླུང་མནན་ལ་བསྒོམ་མོ། །དེའི་ཚེ་ལུས་འཕར་གཡོ་དང་། ངག་ཏུ་ཀུ་ཅོ་འདོན་པ་སོགས་བྱུང་ན་ཧཾ་མགོ་གཅད་པ་ཞེས་བྱ་བ། རླུང་རྔུབ་ཅིང་དྲག་ཏུ་འབུད་པ་ལན་གསུམ་བྱས་ནས་སྤྱི་བོའི་ཧཾ་མི་དམིགས་པར་བྱ། དེས་ཀྱང་མ་ཞི་ན་སྙིང་ག་ཡན་ཆད་ཀྱི་ལུས་ཁ་ཡེད་དུ་བྱ། དེས་ཀྱང་མ་ཞི་ན་ཐམས་ཅད་སེམས་སུ་ཤེས་པར་བྱའོ། །དེ་དག་ནི་སྔགས་ཀྱི་རིམ་པ་སྟེ། སྔགས་ནི་ལྟེ་བའི་ཨཾ། རིམ་པ་ནི་རིམ་གྱིས་སྦར་ཏེ། རང་གི་འཁོར་ལོ་དང་དེ་བཞིན་གཤེགས་པའི་འཁོར་ལོ་རྣམས་བསྲེག་པ་ནས་འབར་འཛག་ལ་སེམས་གཏད་པའི་བར་རོ། །མཐར་ཕྱིན་པའི་ཚད་ནི་འཕར་གཡོ་ལ་སོགས་པའོ། །གསུམ་པ་སྐྱེ་བ་ཡེ་ཤེས་ཀྱི་རིམ་པ་ནི། ཨཾ་གི་མེས་སྤྱི་བོའི་ཧཾ་ལས་བྱང་ཆུབ་ཀྱི་སེམས་དབུ་མའི་ལམ་ནས་རྡོ་རྗེ་ནོར་བུའི་བར་དུ་ཕབ་ནས་བདེ་བ་ལ་སེམས་གཏད་དེ་རླུང་ཁ་སྦྱར་བསྒོམ་མོ། །དེ་ལྟར་གཏད་པས་བདེ་བ་མི་བཟོད་ཅིང་ནོར་བུ་འགས་པ་སྙམ་བྱེད་ན་མས་བརྟན་གྱི་དགའ་བ་བཅུ་དྲུག་བསྒོམ་པ་ནི། རྡོ་རྗེ་ནོར་བུའི་རྐེད་པར་བདེ་བ་ལ་སེམས་གཏད་པས་དགའ་བའི་དགའ་བ། དེར་ཡང་མི་བཟོད་ན་རྩ་བར་བདེ་བ་ལ་སེམས་གཏད་པས་དགའ་བའི་མཆོག་དགའ། དེར་ཡང་མི་བཟོད་ན་དེ་ནས་ལྟེ་བའི་བར་གྱི་བཞི་ཆ་གཅིག་ལ་བདེ་བ་ལ་སེམས་གཏད་པས་དགའ་བའི་དགའ་བྲལ། དེར་མི་བཟོད་ན་ལྟེ་བར་བདེ་བ་ལ་སེམས་གཏད་པས་དགའ་བའི་ལྷན་སྐྱེས། དེ་བཞིན་དུ་ལྟེ་བ་ནས་སྙིང་གའི་བར་ལ་མཆོག་དགའི་བཞི། སྙིང་ག་ནས་མགྲིན་པའི་བར་ལ་དགའ་བྲལ་གྱི་བཞི། མགྲིན་པ་ནས་སྤྱི་བོའི་བར་དུ་ལྷན་སྐྱེས་ཀྱི་བཞི་སྐྱེས་པར་བསམས་ལ་རིམ་པ་བཞིན་བདེ་བ་ལ་སེམས་གཏད་དོ། །དེ་དག་ནི་ཡེ་ཤེས་ཀྱི་རིམ་པ་སྟེ། ཡེ་ཤེས་ནི་དགའ་བ་བཅུ་དྲུག་གི་མཐར་ལྷན་སྐྱེས་མྱོང་བ། རིམ་པ་ནི་རྡོ་རྗེ་ནོར་བུར་བདེ་བ་བསྒོམ་པ་ནས་མཛོད་སྤུར་བདེ་བ་བསྒོམ་པའི་བར་རོ། །མཐར་ཕྱིན་པའི་ཚད་ནི་བདག་གི་རྒྱུད་བདེ་བས་མྱོས་པ་ལ་སོགས་པའོ། །བཞི་པ་འབྲས་བུ་གསང་བའི་རིམ་པ་ནི། སྣའི་བར་གྱི་ཀ་བ་མེད་པ་སྒོ་ང་སྟོང་པ་ལྟ་བུར་བསྒོམས་ལ། དེ་ནས་སྲོག་རྩོལ་གྱི་རླུང་ཆ་མཉམ་སྟེ་སྤོས་དུད་བཞིན་ལུས་ཀྱི་ནང་ནས་བྱུང་། སྣའི་ཕུག་ཏུ་ཆི་ལི་ལི་འཆིལ་ནས་ཕར་མི་འགྲོ་བར་བསམ་མོ། །དེ་དག་ནི་གསང་བའི་རིམ་པ་སྟེ། གསང་བ་ནི་སྲོག་འཛིན་པའི་རླུང་། རིམ་པ་ནི་རླུང་སྐྱོན་རྣམས་རིམ་གྱིས་སེལ་བ། མཐར་ཕྱིན་པའི་ཚད་ནི་ལུས་རས་བལ་གྱི་ཟེགས་མ་ལྟར་ཡང་བ་དང་། སྨིག་རྒྱུ་ལ་སོགས་པའི་རྟགས་ལྔ་མཐོང་བའོ། །དེའི་ཚེ་ཆོས་ཐམས་ཅད་རང་གི་སེམས་སུ་འདུས་པས་ཕྱི་རོལ་གྱི་ཡུལ་ལ་མི་རྟོག་པར་བསྒོམ། སེམས་ཀྱི་རྟོག་པ་བྱུང་ཚོར་ཐམས་ཅད་མི་དམིགས་པར་བསྒོམ། དེ་ནས་ནང་གི་སེམས་དང་ཕྱི་རོལ་གྱི་ཡུལ་ཐམས་ཅད་གཉིས་སུ་མེད་པར་མི་དམིགས་པར་བསྒོམ་མོ། །དེ་ལྟར་བསྒོམས་པས་མངོན་པར་ཤེས་པ་ལྔ་རིམ་གྱིས་འཐོབ་པ་འབྱུང་སྟེ། དེ་ལ་གཉིས་སུ་མེད་པའི་རིམ་པ་ཞེས་ཀྱང་གསུང་ངོ་། །དེ་ལྟར་བསྒོམས་པས་ཆོས་མཆོག་མན་ཆད་ཀྱི་ལམ་ཆོད་ནས་ཕྱག་རྒྱ་ལུང་སྟོན་པ་འབྱུང་ལ། དེ་ལ་བརྟེན་ནས་འཇིག་རྟེན་ལས་འདས་པའི་ཡེ་ཤེས་མངོན་དུ་བྱེད་དེ། གནས་ལ་སོགས་པའི་ས་བཅུ་གཉིས་རིམ་གྱིས་བགྲོད་ནས་འབྲས་བུ་སྐུ་གསུམ་ཡན་ལག་བདུན་ལྡན་འཐོབ་པར་འགྱུར་རོ། །འདི་དག་ནི་ཉམས་སུ་ལེན་པའི་རིམ་པ་ས་མཚམས་དང་བཅས་པ་ཙམ་ཞིག་བྲིས་པ་ཡིན་ལ། རྒྱུད་རིམ་གྱི་སྐབས་སུ་རྩ་ཁམས་ལ་སོགས་པ་ཐོས་བསམ་གྱིས་ཇི་ལྟར་གཏན་ལ་དབབ་པའི་ཚུལ་དང་། རིམ་པ་ཕྱི་མ་རྣམས་ཀྱི་སྐབས་སུ་ཉམས་སྐྱེ་ཚུལ་ངོ་སྤྲོད་དང་བཅས་པ་དང་། གེགས་འབྱུང་ཚུལ་སེལ་ཚུལ་དང་བཅས་པ་དང་། ཡོན་ཏན་ཇི་ལྟར་འབྱུང་བའི་ཚུལ་རྣམས་ནི་རྣལ་འབྱོར་གྱི་དབང་ཕྱུག་ས་སྐྱ་པ་ཆེན་པོའི་རིམ་བཞི་ལམ་སློང་ལས་རྒྱས་པར་ཤེས་པར་བྱའོ། །ཉན་ཐོས་རང་རྒྱལ་ཕ་རོལ་ཕྱིན་པ་དང་། །བྱ་སྤྱོད་རྣལ་འབྱོར་རྒྱུད་དང་བླ་མེད་ཀྱིའང་། །ཐབས་ཀྱི་རྒྱུད་ལས་ཁྱད་པར་ཆེས་འཕགས་པའི། །གདམས་པའི་མཆོག་འདི་འདོམས་པར་བྱེད་པོ་ཉིད། །དབུ་སྐྱེས་ལྷག་བསམ་གངས་རིའི་རྩེ་ལྟར་དཀར། །བཞིན་རས་ཐུགས་རྗེ་བྱེ་རུའི་མདོག་ལྟར་དམར། །གསུང་དབྱངས་གོམ་སྟབས་ངང་པའི་འགྲོས་ལྟར་དལ། །དོན་བརྒྱད་བཞེས་ཚེ་བདེ་བ་ཅན་དུ་གསུངས། །དེ་ཚེ་དད་དང་བརྩོན་པའི་མགོ་དཀར་ཞིང་། །རྣམ་དཔྱོད་ལྟོ་བར་གསུང་རབ་ཤ་རུས་ཚོགས། །འབད་རྩོལ་མེད་པར་འཇུ་བར་ནུས་པ་ཡི། །གོ་བོའི་མིང་ཅན་རབ་འབྱམས་སྨྲ་བས་བསྡེབས། །ཉེས་ཚོགས་མཆིས་གང་བདག་གིས་ཉེས་པ་སྟེ། །བླ་མ་མཁའ་འགྲོའི་ཚོགས་ལ་བཟོད་པར་གསོལ། །དགེ་ཚོགས་ཅི་མཆིས་བླ་མའི་དྲིན་ལས་ཏེ། །འགྲོ་བ་ཀུན་ལ་ཕན་བདེའི་རྒྱུར་སྦྱིན་ནོ། །ཟབ་མོའི་གདམས་པ་རིམ་པ་བཞི་ཉམས་སུ་བླང་བའི་ཚུལ་འདི་ནི། ས་གསུམ་འགྲོ་བའི་རེ་བ་སྐོང་བར་མཛད་པའི་བདག་ཉིད་འདྲེན་པ་ཆེན་པོ་རྗེ་བཙུན་མུས་པའི་ཞལ་ནས་བྱུང་བ་བཞིན་སྟག་བྱང་ཆུབ་སེམས་དཔས་བསྐུལ་བའི་ངོར་མང་དུ་ཐོས་པའི་དགེ་སློང་བསོད་ནམས་སེང་གེ་གླིང་ཁ་བདེ་བ་ཅན་དུ་བྲིས་པ་འདི་ལ་མཁའ་འགྲོ་སྲུང་མའི་ཚོགས་རྣམས་བཟོད་པར་མཛད་དུ་གསོལ། འདིས་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་འབར་གྱུར་གཅིག །དགེའོ། །དགེའོ། །དགེའོ།། །