ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ན༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

གསུང་ངག་ལམ་འབྲས་དོན་བསྡུས་མའི་རྣམ་བཤད་ཟབ་དོན་གནད་ཀྱི་སྒྲོན་མེ།

གསུང་ངག་ལམ་འབྲས་དོན་བསྡུས་མའི་རྣམ་བཤད་ཟབ་དོན་གནད་ཀྱི་སྒྲོན་མེ་ཞེས་བྱ་བ་བཞུགས་སོ།། གང་གི་རྨད་བྱུང་མཁྱེན་པའི་ཉི་འོད་ཀྱིས། །ཡང་དག་དོན་གྱི་སྣང་བ་རྒྱས་མཛད་པ། །བཀའ་དྲིན་མཉམ་མེད་རྗེ་བཙུན་ཡབ་སྲས་ཀྱི། །ཞབས་པད་དྲི་མ་མེད་ལ་ཐོག་མར་འདུད། །གྲུབ་པའི་དབང་ཕྱུག་སྟོབས་ཀྱི་མགོན་པོ་དང་། །དེ་ཡིས་རྗེས་བཟུང་རྗེ་བཙུན་ས་སྐྱ་པ། །བརྩེ་བ་ཆེན་པོའི་ཞབས་ལ་ཕྱག་འཚལ་ནས། །དེའི་གསུང་རྡོ་རྗེའི་ཚིག་གི་རྣམ་བཤད་བྲི། །རྣལ་འབྱོར་གྱི་དབང་ཕྱུག་བིརྺ་པའི་གསུང་རབ་མདོ་རྒྱུད་མ་ལུས་པའི་སྙིང་པོ། དགོས་འདོད་ཐམས་ཅད་འབྱུང་བ་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་རྩ་བ་རྡོ་རྗེའི་ཚིག་རྐང་འདིའི་རྣམ་པར་བཤད་པ་རྗེ་ཞང་དགོན་པ་བ་ཡན་ཆད་དུ་ནི་ཞལ་ནས་སྙན་དུ་བརྒྱུད་པ་འབའ་ཞིག་ཡིན་གྱི་ཡི་གེར་བཀོད་པ་མེད་ལ། རྗེ་དེ་ཉིད་ཀྱིས་མགོན་པོ་འཇམ་པའི་དབྱངས་ཀྱིས་རྗེས་སུ་བཟུང་ཞིང་། མདོ་རྒྱུད་བསྟན་བཅོས་མ་ལུས་པ་ལ་ཐུགས་བྱང་བ། ཏིང་ངེ་འཛིན་དང་རྟོགས་པ་མ་ལུས་པ་ལ་མངའ་བརྙེས་པ། མན་ངག་རྒྱ་མཚོ་ལྟ་བུ་ལ་དབང་འབྱོར་བ། ཐུགས་རྗེའི་འོད་ཟེར་གྱིས་འགྲོ་བ་མཐའ་དག་ལ་ཁྱབ་པ། དཔལ་ས་སྐྱ་པ་ཆེན་པོ་ལ་སྙན་བརྒྱུད་བཞིས་གདམས་ནས། ད་ཁྱོད་ཀྱི་ལོ་བཅོ་བརྒྱད་ཀྱི་བར་དུ་ཆོས་འདི་གཞན་ལ་བཤད་པ་ལྟ་ཞོག འདིའི་མིང་ཙམ་ཡང་གཞན་ལ་མ་བཤད་ཅེས་བཀའ་རྒྱས་བཏབ་ཅིང་། དེ་ནས་ནི་གཞན་ལ་བཤད་དམ་ཡི་གེར་འབྲིའམ། གང་ལྟར་ཡང་ཁྱེད་རང་ཆོས་ཀྱི་བདག་པོར་འགྱུར་བ་ཡིན་ནོ་ཞེས་ལུང་བསྟན་པར་མཛད་དོ། །དེ་ལྟར་ལོ་བཅོ་བརྒྱད་ཐིམ་ནས་བླ་མ་ཆེན་པོ་དེ་ཉིད་ཀྱིས་མན་ངག་རྣམས་ཀྱང་སྐལ་བ་དང་ལྡན་པའི་གདུལ་བྱ་རྣམས་ལ་རང་རང་གི་བློ་དང་འཚམས་པར་སྟོན་ཅིང་། རྡོ་རྗེའི་ཚིག་རྐང་གི་རྣམ་པར་བཤད་པའང་དགོངས་བཞེད་དང་ཞུ་བ་པོ་སོ་སོའི་ངོར་བཅུ་གཅིག་ཙམ་མཛད་པ་ལས། ཐམས་ཅད་ཀྱི་ཐོག་མར་བླ་མ་སྐྱུ་ར་ཨ་སྐྱབས་ཀྱི་དབོན་པོ་བྱང་ཆུབ་སེམས་དཔའ་ཨ་སེང་གིས་ཞུས་ནས་དོན་བསྡུས་པའི་ཚིགས་སུ་བཅད་པ་འདི་མཛད་པ་ནི། གང་བཤད་པར་བྱ་བའི་ཆོས་སོ། །འདི་ལ་དོན་གསུམ་སྟེ། གཞུང་རྩོམ་པའི་རྒྱུ། བརྩམ་པར་བྱ་བའི་གཞུང་དངོས། ཞུ་བ་པོ་གང་གི་ངོར་མཛད་པའོ། །དང་པོ་ལ་གཉིས་ཏེ། མཆོད་པར་བརྗོད་པ་དང་། བརྩམ་པར་དམ་བཅའ་བའོ། །དང་པོ་ནི། ན་མོ་གུ་རུ་བིརྣ་ནི། ཞེས་པ་སྟེ། དེའང་ཕྱག་འཚལ་བའི་སྐད་དོད་ལ་ན་མཿཞེས་པ་ཡོད་ལ། རྣམ་བཅད་ནི་གུའི་དབང་གིས་ཨ་ཡིག་དག་གི་བར་དུ་ཨུའོ། །ཨ་དང་སྒྲ་ལྡན་དག་གིའོ་ཞེས་པས་ཨུར་འགྱུར་ལ། དེས་ཨའི་ཡི་གེ་ཨུའི་ཡི་གེ་ལ་ཨོའོ། །མའི་སྲོག་ཡིག་ཨོར་འགྱུར་ལ། ཕ་རོལ་ཡང་དབྱིའོ་ཞེས་པས་ཨུ་ཕྱིས་ཏེ་མཚམས་སྦྱར་བས་ན་མོ་ཞེས་པ་ནི་ཕྱག་འཚལ་བ། གུ་རུ་ནི་བླ་མ། བིརྣ་ནི་ཁ་དོག་དང་། སྣ་ཚོགས་དང་། ཡོན་ཏན་དང་། རྒྱ་ཆེ་བ་རྣམས་ལ་འཇུག་པ་ལས་འདིར་ནི་ཡོན་ཏན་ཏེ། གང་གི་ཞབས་ལ་གཏུགས་ན་ལྟ་བ་བཞི་དང་གྲུབ་མཐའ་བཞིའི་ཡོན་ཏན་འབྱུང་བའི་བླ་མ་དེ་ལ་ཕྱག་འཚལ་ལོ་ཞེས་སོ། །གཉིས་པ་ལ་བཞི་སྟེ། གཞུང་རྩོམ་པའི་ནུས་པ་ཡོད་པར་བསྟན་པ། སྐུལ་བྱེད་ཀྱི་ཚིག་ལྗི་བར་བསྟན་པ། ནུས་པ་དེ་བརྒྱུད་པའི་མན་ངག་ལས་འབྱུང་བར་བསྟན་པ། དེས་ན་མདོར་བསྡུས་ཏེ་བརྩམ་པར་དམ་བཅའ་བའོ། །དང་པོ་ནི། རྗེ་བཙུན་རིན་ཆེན་དམ་པའི་གསུང་གང་ཞིག །མུན་བྲལ་ཟླ་ཤར་འོད་ཟེར་གང་ཞིག་གིས། །བདག་ལྟ་བློ་ཡི་མུན་པ་བྲལ་གྱུར་ནས། །རང་གི་སེམས་ལ་སྣང་བ་ཅུང་ཟད་ཐོབ། །ཞེས་པ་སྟེ། རྗེ་བཙུན་རྣལ་འབྱོར་གྱི་དབང་ཕྱུག་བིརྺ་པའི་གསུང་མུན་པ་དང་བྲལ་བའི་ཟླ་བའི་འོད་ཟེར་ཤར་བ་ལྟ་བུས་བདག་ཏུ་ལྟ་བའི་བློ་ཡི་མུན་པ་བྲལ་བར་གྱུར་ནས་རང་གི་སེམས་ལ་ཡང་དག་པའི་དོན་གྱི་སྣང་བ་ཅུང་ཞིག་ཐོབ་ཞེས་པ་སྟེ། རྡོ་རྗེའི་ཚིག་འདིའི་རྣམ་བཤད་རྩོམ་ན་དོན་མ་ནོར་བར་སྟོན་པའི་ནུས་པ་ཡོད་སྙམ་དུ་དགོངས་སོ། །གཉིས་པ་ནི། གྲོགས་མཆོག་དམ་པ་ཐོས་པས་རྒྱུད་སྦྱངས་ཤིང་། །བྱང་ཆུབ་ཆེད་དུ་བསྒྲུབ་པའི་གོ་བགོས་ནས། །དམ་པའི་སྤྱན་སྔར་ལུང་ནོས་དམ་བཅས་པ། །མི་མཆོག་ཁྱོད་ཀྱི་བཀའ་སྩལ་ལྕི་བར་གྱུར། །ཞེས་པ་སྟེ། ཚིག་རྐང་དང་པོ་གསུམ་གྱིས་བསྐུལ་བ་པོའི་ཡོན་ཏན་བསྟན་ནས། ཡོན་ཏན་དེ་དག་དང་ལྡན་པ་དེས་ན་མི་མཆོག་ཁྱེད་ཀྱི་རྩོམས་ཤིག་ཅེས་བཀའ་སྩལ་པའི་ཚིག་ནི་ལྗི་བར་གྱུར་པས་མདོར་བསྡུས་པ་ཙམ་ཞིག་བརྩམ་མོ། །གསུམ་པ་ལ་གསུམ་སྟེ། སྤྱིར་བཀའི་དགོངས་པ་རྟོགས་དཀའ་བར་བསྟན། བྱེ་བྲག་རྡོ་རྗེ་ཐེག་པ་རྟོགས་དཀའ་བར་བསྟན། འོན་ཀྱང་བརྒྱུད་པའི་མན་ངག་ལས་རྟོགས་ནུས་པར་བསྟན་པའོ། །དང་པོ་ནི། ཐམས་ཅད་མཁྱེན་པའི་བཀའ་ནི་རྒྱ་མཚོ་བཞིན། །ཟབ་ཅིང་གཏིང་དཔག་དཀའ་ལ་ཐུག་པ་མེད། །ཅེས་པ་སྟེ། འོ་ན་ཁྱོད་ཀྱིས་རྡོ་རྗེའི་ཚིག་འདིའི་དོན་མ་ནོར་བར་སྟོན་ནུས་ན། བཀའི་དགོངས་པ་ཕྱིན་ཅི་མ་ལོག་པར་རྟོགས་དགོས་པས་རང་དགར་རྟོགས་པ་ཡིན་ནམ་ཞེ་ན། མ་ཡིན་ཏེ། ཐམས་ཅད་མཁྱེན་པའི་བཀའ་ནི་ཤིན་ཏུ་རྟོགས་པར་དཀའ་བའི་ཕྱིར་ཏེ། དཔེར་ན་རྒྱ་མཚོ་ཆེན་པོ་བཞིན་ནོ། །ཇི་ལྟར་རྒྱ་མཚོ་དང་ཆོས་མཐུན་ཞེ་ན། རྒྱ་མཚོ་ཆེན་པོ་ལ་ཟབ་པ་དང་། གཏིང་དཔག་དཀའ་བ་དང་། མཐར་ཐུག་པ་མེད་པའི་ཆོས་གསུམ་ཡོད་པ་དེ་བཞིན་དུ། བདེ་བར་གཤེགས་པའི་བཀའ་ཡང་མཐར་ཐུག་དེ་ཁོ་ན་ཉིད་ལ་གཞོལ་བས་ཟབ་པ་དང་། ཚིག་རེ་རེ་ཡང་གདུལ་བྱའི་དབང་གིས་དགོངས་པ་དུ་མར་འགྱུར་བས་གཏིང་དཔག་དཀའ་བ་དང་། གདུལ་བྱའི་ཁམས་དང་། བག་ལ་ཉལ་ཇི་སྙེད་པ་དེ་སྙེད་ཀྱི་ཆོས་གསུངས་པས་མཐར་ཐུག་པ་མེད་པའི་ཕྱིར་རོ། །གཉིས་པ་ནི། རྡོ་རྗེ་ཐེག་པ་དགོངས་པ་དུ་མ་ཡིས། །གསུངས་ཤིང་རྡོ་རྗེའི་ཚིག་གིས་རྒྱས་བཏབ་པས། །ཞེས་ཏེ། རྡོ་རྗེ་ཐེག་པའི་རྒྱུད་སྡེ་རྣམས་ཀྱི་དགོངས་པ་ནི་ཤིན་ཏུའང་རྟོགས་པར་དཀའ་སྟེ། དྲང་དོན་དང་ངེས་དོན། སྒྲ་ཇི་བཞིན་པ་དང་སྒྲ་ཇི་བཞིན་མ་ཡིན་པ་ལ་སོགས་པ་དགོངས་པ་དུ་མས་གསུངས་ཤིང་། རྡོ་རྗེ་ལྟར་ཕྱེད་པར་དཀའ་བས་ན་རྡོ་རྗེའི་ཚིག་སྟེ་རྒྱུད་གསུམ་དང་། དག་པ་གསུམ་དང་། བདག་ཉིད་ཅན་གསུམ་དང་། གནས་པ་བཞི་དང་། གདམས་ངག་དྲུག་དང་། རྒྱན་བདུན་དང་། གསང་བ་བདུན་ལ་སོགས་པས་རྒྱས་བཏབ་པས་སོ། །གསུམ་པ་ནི། ལུང་བསྟན་གྱུར་པ་ཀླུ་སྒྲུབ་ལ་སོགས་སམ། །མཁའ་འགྲོས་བྱིན་བརླབས་བིརྺ་པ་ལ་སོགས། །གྲུབ་ཐོབ་རྣམས་ཀྱི་མན་ངག་ལ་བརྟེན་ནས། །རྗེས་འཇུག་སྐྱེ་བོས་བཀའ་རྣམས་རྟོགས་པར་འགྱུར། །ཞེས་པ་སྟེ། དེ་ལྟར་རྟོགས་པར་དཀའ་ན། རྗེས་འཇུག་གི་སྐྱེ་བོ་རྣམས་ཀྱིས་བཀའི་དགོངས་པ་རྟོགས་པར་བྱེད་པའི་ཐབས་མེད་དམ་ཞེ་ན། མ་ཡིན་ཏེ། ལང་ཀར་གཤེགས་པ་དང་རྔ་བོ་ཆེའི་མདོ་ལ་སོགས་པ་རྣམས་སུ་ཡོད་མེད་དང་། རྟག་ཆད་ལ་སོགས་པ་ལྟ་བ་ངན་པའི་མཐའ་འཇིག་པར་ལུང་བསྟན་པ་འཕགས་པ་ཀླུ་སྒྲུབ་དང་། འཇམ་དཔལ་རྩ་རྒྱུད་སོགས་སུ་ལུང་བསྟན་པ་འཕགས་པ་ཐོགས་མེད་དང་། དྷརྨཱ་ཀིརྟི་ལ་སོགས་པ་རྣམས་དང་། གཞན་ཡང་ཡེ་ཤེས་ཀྱི་མཁའ་འགྲོ་ལྷ་མོ་བཅོ་ལྔས་དངོས་སུ་བྱིན་གྱིས་བརླབས་ནས་ས་དྲུག་གི་རྟོགས་པ་བརྙེས་པ་བིརྺ་པ་དང་། མགོན་པོ་འཇམ་པའི་དབྱངས་ཀྱིས་བྱིན་གྱིས་བརླབས་པ་སངས་རྒྱས་ཡེ་ཤེས་ཞབས་དང་། འཕགས་མ་སྒྲོལ་མས་བྱིན་གྱིས་བརླབས་པ་གྲུབ་ཆེན་ཀུན་དགའ་སྙིང་པོ་ལ་སོགས་པ་རྣམས་ཀྱིས་བཀའི་དགོངས་པ་ཕྱིན་ཅི་མ་ལོག་པར་རྟོགས་པའི་གདམས་ངག་སྐྱོན་མེད་པའི་བླ་མ་རྣམས་ལས་རིམ་པ་བཞིན་དུ་བརྒྱུད་པ་ལ་བརྟེན་ནས། རྗེས་འཇུག་གི་སྐྱེ་བོ་རྣམས་ཀྱིས་ཀྱང་བཀའི་དགོངས་པ་ཕྱིན་ཅི་མ་ལོག་པར་རྟོགས་ནུས་སོ་ཞེས་པའོ། །དེང་སང་བོད་འདིར་གྲུབ་ཐོབ་རྣམས་ཀྱང་སེམས་ཅན་ཡིན་པས་བཀའི་དགོངས་པ་ལ་འཁྲུལ་པ་སྲིད་ལ། དེས་ན་མ་འཁྲུལ་བར་ཉམས་སུ་ལེན་ན་རྒྱུད་ཇི་ལྟ་བ་བཞིན་བྱེད་དགོས་པ་ཡིན་ཞེས་ཟེར་ནས་རྒྱུད་ཀྱི་སྒྲ་ཇི་བཞིན་པ་རྣམས་ལ་དྲང་དོན་ངེས་དོན་གྱི་སྐབས་སུ་འཆད། ངེས་དོན་རྣམས་དྲང་དོན་གྱི་སྐབས་སུ་འཆད། ལས་དང་པོ་པའི་ཉམས་ལེན་རྣམས་བརྟན་པ་ཐོབ་པའི་ཉམས་ལེན་ལ་སྦྱར། བརྟན་པ་ཐོབ་པའི་ཉམས་ལེན་རྣམས་ལས་དང་པོ་པའི་ཉམས་ལེན་ལ་སྦྱར་བ་སོགས་འབྲེལ་མེད་མང་དུ་བྱས་ཤིང་དེ་དག་གི་རྗེས་སུ་འཇུག་པའང་མང་བར་སྣང་ངོ་། །དེ་དག་གིས་ནི་རང་ཉིད་སེམས་ཅན་མ་ཡིན་པར་སྒྲུབ་དགོས་ཤིང་། དགོངས་པ་ལུང་སྟོན་པའི་རྒྱུད་ལས། གསང་བའི་བདག་པོ་དོན་རྒྱས་པའི། །ཚུལ་ཆེན་འདི་ནི་རྙེད་གྱུར་ནས། །ཇི་བཞིན་དོན་ནི་རྙེད་བཟུང་པས། །དེས་ན་ལམ་ངན་དག་ཏུ་ལྟུང་། །ཞེས་གསུངས་པའང་འདི་འདྲའི་རིགས་ཅན་ལ་དགོངས་སོ། །བླ་མའི་མན་ངག་མེད་པར་རྒྱུད་ལ་རང་དགར་ཞུགས་པ་ནི་རྒྱུད་སྡེ་རྣམས་ལས་སྨད་དེ། ཁ་སྦྱོར་ལས། ནང་གི་དབྱེ་བ་འདི་ཉིད་ནི། །བླ་མའི་ཞལ་ལས་རྙེད་པར་འགྱུར། །བླ་མ་དམན་པའི་སེམས་ཀྱིས་ནི། །སྔགས་དང་ཕྱག་རྒྱ་རྙེད་མི་འགྱུར། །ཞེས་སོགས་མང་དུ་གསུངས་སོ། །ཞལ་ལས་བྱུང་བའོ། །བཞི་པ་ནི། དོན་གྱི་གཙོ་བོ་བིརྺ་ལ་སོགས་པའི། །ལམ་གྱི་གསུང་ངག་ཁྱེད་ཀྱི་ཐུགས་ལ་མངའ། །འོན་ཀྱང་བཀའ་དྲིན་མི་འགོག་པ་ཡི་ཕྱིར། །རང་བློ་ལས་བྱུང་འདི་ཙམ་ཡི་གེར་བཀོད། །ཅེས་པ་སྟེ། ཕྱེད་སྔ་མས་ནི་རྒྱས་པར་བཀྲོལ་མི་དགོས་པའི་རྒྱུ་མཚན་བསྟན་ལ། ཕྱེད་ཕྱི་མས་ནི་མདོར་བསྡུས་པ་ཙམ་ཞིག་བརྩམས་པར་དམ་བཅའ་བ་བསྟན་ཏོ། །དེ་ལ་བཀའ་དྲིན་མི་འགོག་ཅེས་པའི་གཞུང་དུ་སྣང་ན་རྩོམས་ཤིག་ཅེས་བསྐུལ་བའི་བཀའི་ཕྲིན་ཡིག་མི་འགོག་པའི་ཕྱིར་ཞེས་པར་སྦྱར་ལ། བཀའ་དྲིན་ཞེས་པའི་གཞུང་དུ་སྣང་ན་བླ་མ་སྐྱུ་ར་ཨ་སྐྱབས་ཀྱི་དབོན་པོ་ཡིན་པས་བརྒྱུད་པའི་དམ་ཚིག་ལ་དགོངས་པ་སྟེ། འོན་ཀྱང་ཕྱི་མ་ལྟར་དག་གོ །གཉིས་པ་བརྩམ་པར་བྱ་བའི་གཞུང་དངོས་ལ་དོན་གཉིས་ཏེ། བརྗོད་བྱ་མདོར་བསྡུས་ཏེ་བསྟན་པ་དང་། རྒྱས་པར་མ་བཀྲོལ་བའི་རྒྱུ་མཚན་ནོ། །དང་པོ་ལ་གསུམ་སྟེ། འཁོར་འདས་ཐུན་མོང་གི་ལམ་བསྟན་པ། འཁོར་ལོ་འཆམ་པ་འཇིག་རྟེན་པའི་ལམ་བསྟན་པ། བརྩོན་པས་ཉམས་སུ་བླངས་ན་གྲུབ་མཐའ་སྙོགས་པར་བསྟན་པའོ། །དང་པོ་ལ་ལྔ་སྟེ། སྣང་བ་གསུམ་དུ་བསྟན་པའི་ལམ། རྒྱུད་གསུམ་དུ་བསྟན་པའི་ལམ། ཚད་མ་བཞིར་བསྟན་པའི་ལམ། སྙན་བརྒྱུད་བཞིར་བསྟན་པའི་ལམ། རྟེན་འབྲེལ་ལྔར་བསྟན་པའི་ལམ་མོ། །དང་པོ་ནི། སྣང་བ་གསུམ་གྱིས་ལམ་གྱི་གཞི་བཅས་ཏེ། །ཞེས་པ་སྟེ། དེ་ལ་སྣང་བ་གསུམ་ནི་མ་དག་པའི་སྣང་བ། ཉམས་ཀྱི་སྣང་བ། དག་པའི་སྣང་བའོ། །དེ་རེ་རེ་ལའང་སྣང་བ་དེའི་རྒྱུ་གང་ཡིན་པ། དེ་འཆར་བའི་གང་ཟག་གང་ཡིན་པ། སྣང་བ་རང་གི་ངོ་བོ་གང་ཡིན་པ་གསུམ་གྱི་སྒོ་ནས་བཤད་པར་བྱ་བ་ཡིན་མོད་ཀྱི། འདིར་ལམ་གྱི་གཞི་བཅའ་བའི་སྐབས་སུ་ནི་རྗེ་བཙུན་ཆེན་པོས་མ་དག་པའི་སྣང་བ་ལ་སེམས་ཅན་ལ་ཞེས་པས་འཁོར་བའི་ཉེས་དམིགས། ཉོན་མོངས་པ་ལ་ཞེས་པས་དལ་འབྱོར་རྙེད་དཀའ། མ་དག་པའི་སྣང་བ་ཞེས་པ་ལ་བརྟེན་ནས་ལས་རྒྱུ་འབྲས་ལ་ཡིད་ཆེས་བསྒོམ་པ་སྟེ། དེ་དག་གིས་ཉན་ཐོས་དང་ཐུན་མོང་བའི་ལམ་ཆོད་ནས། ཉམས་ཀྱི་སྣང་བ་ལ་རྣལ་འབྱོར་པ་ཞེས་པས་རྣལ་འབྱོར་པ་ལ་ཐུན་མོང་གི་རྣལ་འབྱོར་པ་དང་། ཐུན་མོང་མ་ཡིན་པའི་རྣལ་འབྱོར་པ་གཉིས་ལས། ཐུན་མོང་གི་རྣལ་འབྱོར་པས་ཐུན་མོང་གི་ཉམས་རྣམས་རྒྱུད་ལ་སྐྱེས་སྐྱེས་སུ་བསྒོམ་པ་ནི། བྱམས་པ་དང་། སྙིང་རྗེ་དང་བྱང་ཆུབ་ཀྱི་སེམས་བསྒོམ་པ་གསུམ་ཡིན་ལ། ཐུན་མོང་མ་ཡིན་པའི་རྣལ་འབྱོར་པས་སྐྱེ་འགྱུར་གྱི་ཉམས་ལ་ངེས་ཤེས་བསྒོམ་པ་ནི། རང་ཉིད་རྡོ་རྗེ་ཐེག་པའི་ལམ་ཟབ་མོ་ལ་ཞུགས་ནས་ཉམས་ཀྱི་སྣང་བ་བསམ་གྱིས་མི་ཁྱབ་པ་སྐྱེ་བ་ཐམས་ཅད་བཅོ་ལྔར་ཤེས་པར་བྱས་ནས་སྤྲོས་པ་ཆོད་པར་བྱས་ལ། ནམ་ཞིག་དེ་སྐྱེས་པའི་ཚེ་སོ་སོ་ངོ་ཤེས་པར་བྱས་ནས་བྱུང་རྒྱལ་གྱིས་བསྐྱང་བའོ། །དག་པའི་སྣང་བ་བསྒོམ་པ་ནི། སྐུ་མི་ཟད་པ་རྒྱན་གྱི་འཁོར་ལོ་ལ་སོགས་པ་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་དྲན་པར་བྱས་ནས། སྤྲོ་བ་ཁྱད་པར་ཅན་བསྒོམ་པར་གསུངས་པ་ལྟར་མདོར་ན་ཕ་རོལ་ཏུ་ཕྱིན་པའི་ཐེག་པས་རྒྱུད་ལེགས་པར་སྦྱངས་ནས་རྡོ་རྗེ་ཐེག་པའི་ལམ་གྱི་སྣོད་རུང་དུ་བྱ་བ་ནི་ལམ་གྱི་གཞི་བཅའ་བའི་དོན་ཏེ། ཞུས་ལན་གསལ་བར། ཕ་རོལ་ཕྱིན་པའི་གཞུང་ལུགས་མདོར་བསྡུ་ན། །སྙིང་པོ་དོན་གྱི་མན་ངག་འདི་དག་ཡིན། །དེ་དག་གིས་ནི་བློ་གྲོས་མ་འགགས་པའི། །བློ་ཆེན་སྦྱངས་པ་ཟབ་མོ་དག་ལ་མོས། །རྡོ་རྗེ་འཆང་ཆེན་མྱུར་དུ་ཐོབ་འདོད་ན། །དེ་ལ་རྡོ་རྗེ་ཐེག་པ་སྦྱིན་པར་བྱ། །ཞེས་གསུངས་པ་དང་དོན་གཅིག་གོ །གཉིས་པ་རྒྱུད་གསུམ་དུ་བསྟན་པའི་ལམ་ནི། ཉམས་བླང་མ་ལུས་རྒྱུད་གསུམ་དག་གིས་ཤེས། །ཞེས་པ་སྟེ། ཉམས་བླང་མ་ལུས་པ་ནི་རྡོ་རྗེ་ཐེག་པའི་ཉམས་ལེན་ཡིན་ལ། དེ་རྒྱུད་གསུམ་གྱིས་ཤེས་པའི་ཚུལ་ནི། རྒྱུ་རྒྱུད་ཀྱི་ཉམས་ལེན་ནི། ཕ་རོལ་ཏུ་ཕྱིན་པའི་ཐེག་པས་རྒྱུད་སྦྱངས་ནས་སྙིང་རྗེ་ཆེན་པོས་ཡིད་གཡོས་པ་དག་གིས་མྱུར་དུ་སངས་རྒྱས་པའི་ལམ་ནི་རྡོ་རྗེ་ཐེག་པ་ཡིན་པར་འདུག་ཀྱང་དེ་བདག་ལ་ཉམས་སུ་ལེན་པའི་སྐལ་བ་མེད་དམ་སྙམ་པ་ལ། སྐལ་བ་ཡོད་དེ། རྒྱུ་རིགས་སྤང་བྱ་རྐྱེན་ལ་ལྟོས། །གང་ཟག་རྣམ་པ་བཞིར་ནི་འདོད། །ཅེས་པ་ལྟར། སྤྱིར་སེམས་ཅན་ཐམས་ཅད་ལ་རྒྱུ་སངས་རྒྱས་ཀྱི་རིགས་ཡོད་པ་དང་། བྱེ་བྲག་ཏུ་འགྲུབ་ཉེ་བ་ལ་དགོངས་ནས་ཁ་དོག་དང་དབྱིབས་ཀྱི་སྒོ་ནས་དེ་བཞིན་གཤེགས་པ་རིགས་ལྔ་སོ་སོའི་རིགས་སུ་ངེས་པའི་ཕྱིར་དང་། སྤང་བྱ་ཉོན་མོངས་པ་གང་ཤས་ཆེ་བ་ཡང་དེ་བཞིན་གཤེགས་པ་དེའི་རིགས་སུ་ངེས་པའི་ཕྱིར་དང་། རྐྱེན་གྱི་སྒོ་ནས་ཀྱང་སྐལ་དམན་རིམ་འཇུག་པ་དང་སྐལ་ལྡན་ཅིག་ཆར་བ་གཉིས་སུ་ངེས་ལ། དེ་གཉིས་ཀའང་མཐར་རྡོ་རྗེ་ཐེག་པ་ཉམས་སུ་ལེན་རུང་ཡིན་པའི་ཕྱིར་སྙམ་དུ་ངེས་པར་བྱེད་པ་ནི་རྒྱུ་རྒྱུད་ཀྱི་ཉམས་ལེན་ཡིན་ལ། དེ་ནས་སྨིན་བྱེད་ཀྱི་དབང་དང་གྲོལ་བྱེད་ཀྱི་ལམ་བསྒོམ་པ་ནི་ཐབས་རྒྱུད་ཡིན་ལ། དེ་ལས་འབྲས་བུ་སྐུ་ལྔ་འབྱུང་བ་ནི་འབྲས་བུའི་རྒྱུད་དོ། །ཡང་ཐབས་རྒྱུད་ཀྱི་གཙོ་བོ་རིམ་གཉིས་ལ་བཞག་པ་ལྟར་ན། ཐོག་མར་སྨིན་བྱེད་ཀྱི་དབང་གིས་ལམ་བསྒོམ་པའི་སྣོད་རུང་དུ་བྱས་པ་ནི་རྒྱུ་རྒྱུད་དང་། ལམ་རིམ་པ་གཉིས་ནི་ཐབས་རྒྱུད། དེ་ལས་འབྲས་བུ་སྐུ་ལྔ་འབྱུང་བ་ནི་འབྲས་བུའི་རྒྱུད་དོ། །གསུམ་པ་ཚད་མ་བཞིར་བསྟན་པའི་ལམ་ནི། ཚད་མ་བཞི་ཡིས་སྤྲོས་པ་གཅོད། །ཅེས་པ་སྟེ། འདི་ལ་ཚད་མ་བཞིའི་གོ་རིམ། ཚད་མ་བཞིའི་ངོ་བོ། དེས་སྤྲོས་པ་གཅོད་པའི་ཚུལ་ལོ། །དང་པོ་ལ་བཞི་སྟེ། རྒྱུད་ལས་གསུངས་པའི་གོ་རིམ། ཐོག་མར་འབྱུང་བའི་གོ་རིམ། ཉམས་སུ་ལེན་པའི་གོ་རིམ། ཚད་མར་སོང་བའི་གོ་རིམ་མོ། །དང་པོ་ནི། ཁ་སྦྱོར་ལས། བསྟན་བཅོས་ཚད་མ་སློབ་དཔོན་དང་། །ལུང་གི་རྗེས་འབྲང་དེ་ཉིད་རིག །གསང་དོན་དེ་ཉིད་དངོས་པོ་ཡང་། །གཅིག་ནས་གཅིག་བརྒྱུད་ཤེས་པར་བྱ། །ཞེས་པ་སྟེ། རྟོག་གེ་པ་དག་རང་དགར་འཇུག་པ་དགག་པའི་ཕྱིར་དུ་དཀྲུགས་ནས་གསུངས་སོ། །གཉིས་པ་ནི། ཐོག་མར་བདེ་བར་གཤེགས་པའི་བཀའ་ཡང་དག་པའི་ལུང་གི་ཚད་མ་འབྱུང་བས་ལུང་ཚད་མ། དེ་ལ་བརྟེན་ནས་བསྟན་བཅོས་འབྱུང་བས་དངོས་པོའི་མཐའ་རྟེན་ཅིང་འབྲེལ་བར་འབྱུང་བ་ལོ་རྒྱུས་ཀྱི་ཚད་མ། དེ་དག་གི་གདམས་ངག་བླ་མས་སྟོན་པས་བླ་མ་རྡོ་རྗེ་སློབ་དཔོན་ཉམས་ཀྱི་མན་ངག་ཚད་མ། དེས་བསྟན་པ་ལྟར་ཉམས་སུ་བླང་དགོས་པས། གོང་གི་ཚད་མ་གསུམ་ཀ་གཏན་ལ་འབེབས་པར་བྱེད་པ་རྣལ་འབྱོར་པ་བདག་ཉིད་ཀྱི་ཉམས་མྱོང་རྗེས་སུ་དྲན་པའི་ཚད་མ་འབྱུང་ངོ་། །གསུམ་པ་ནི། ཐོག་མར་བླ་མ་ཚད་མ་ཉམས་སུ་བླང་དགོས་ཏེ། རྗེ་བཙུན་གྱིས་ཐོག་མར་བླ་མ་ཚད་མར་བྱ་བ། བླ་མ་ལ་མོས་གུས་ཚུད་ཚུད་དུ་བསྒོམས་ལ་ཞེས་གསུངས་པའི་ཕྱིར་རོ། །དེ་ནས་བླ་མ་དེས་བསྟན་པ་ལྟར་ཉམས་སུ་ལེན་དགོས་པས་ཉམས་མྱོང་ཚད་མ། དེ་དག་རྣལ་འབྱོར་དབང་ཕྱུག་གི་དགོངས་པར་སྒྲུབ་པ་བསྟན་བཅོས་ཚད་མ་ཡིན་ཅིང་། དེའང་ཚད་མ་ཐམས་ཅད་ཀྱི་མཆོག་སངས་རྒྱས་ཀྱི་དགོངས་པར་སྒྲུབ་པ་ལུང་ཚད་མའོ། །བཞི་པ་ནི། རང་རྒྱུད་ལ་ཉམས་བཅོ་ལྔ་པོ་གང་རུང་ཞིག་སྐྱེས་པ་ནི་ཉམས་མྱོང་ཚད་མ་སྟེ། ཚད་མ་འདི་མེད་ན་རྣལ་འབྱོར་པ་དེའི་བློ་ངོར་ཚད་མ་གཞན་གསུམ་མི་འབྱུང་བའི་ཕྱིར་རོ། །དེས་ན་ཐོག་མར་ཉམས་མྱོང་ཚད་མ་འབྱུང་ངོ་། །དེ་ནས་བླ་མ་ཚད་མ་འབྱུང་སྟེ། རང་རྒྱུད་ལ་ཉམས་སྐྱེས་པ་དེ་བླ་མས་ཁྱོད་ཀྱི་རྒྱུད་ལ་ཉམས་དེ་ལྟ་བུ་སྐྱེའོ་ཞེས་བསྟན་པ་དང་མཐུན་པས་བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེས་པ་ནི་བླ་མ་ཚད་མར་སོང་ངོ་། །དེ་ནས་ཚད་མ་ཕྱི་མ་གཉིས་ནི་སྔར་བསྟན་པ་བཞིན་ནོ། །གཉིས་པ་ལ་གཉིས་ཏེ། མཚན་ཉིད་དང་དབྱེ་བའོ། །དང་པོ་ནི། རང་ལ་ངེས་པའི་ཤེས་པ་ཁྱད་པར་ཅན་སྐྱེས་པས་གཞན་གྱིས་མོས་པ་དབྲོག་པར་མི་ནུས་པའོ། །གཉིས་པ་ནི། སྔར་བསྟན་པ་ལྟར་བཞིའོ། །གསུམ་པ་དེས་སྤྲོས་པ་གཅོད་པའི་ཚུལ་ལ་གསུམ་སྟེ། སྤྲོས་པ་གཅོད་བྱེད། བཅད་བྱ། ཇི་ལྟར་གཅོད་པའི་ཚུལ་ལོ། །དང་པོ་ནི། གོང་དུ་བསྟན་པའི་ཚད་མ་བཞིའོ། །གཉིས་པ་ནི། རྒྱུ་དང་། ལམ་དང་། འབྲས་བུ་གསུམ་མོ། །གསུམ་པ་ནི། རྒྱུད་གསུམ་གྱི་ནང་ནས་རྒྱུ་རྒྱུད་ལ་རིགས་དྲུག་གི་རྒྱུ་ཉོན་མོངས་པ་དང་། འབྲས་བུ་རིགས་དྲུག་གཉིས། གཞན་ཡང་ལམ་དང་། འབྲས་བུའི་ཉམས་ཐམས་ཅད་ཚད་མ་བཞིས་གཏན་ལ་འབེབས་པའི་ཚུལ་གཞུང་བཤད་རྣམས་ལས་ཤེས་པར་བྱ་སྟེ། འདིར་མང་བའི་འཇིགས་པས་མ་བྲིས་སོ། །བཞི་པ་སྙན་བརྒྱུད་བཞིར་བསྟན་པའི་ལམ་ནི། སྙན་བརྒྱུད་བཞི་ཡིས་སྤྲོས་པ་གཅོད། །ཅེས་པ་སྟེ། དེ་ལ་གསུམ། སྤྲོས་པ་གཅོད་བྱེད། གཅོད་བྱ། ཇི་ལྟར་གཅོད་པའི་ཚུལ་ལོ། །དང་པོ་ནི། སྙན་བརྒྱུད་བཞི་སྟེ། དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། གདམས་ངག་གི་སརྒ་མ་ལོག་པ། མོས་གུས་ཀྱི་བསམ་པ་ཚིམ་པར་ནུས་པའོ། །དང་པོ་ལ་རྒྱུ་དུས་དང་། ལམ་དུས་དང་། འབྲས་དུས་ཀྱི་དབང་གི་ཆུ་བོ་མ་ནུབ་པ་གསུམ་མོ། །གཉིས་པ་ནི། གསང་སྔགས་མཐའ་བཞིའི་བདག་ཉིད་ཅན་ཏེ། ཉམས་སུ་བླང་བའི་མཐའ། ཉམས་སུ་མྱོང་བའི་མཐའ། བྱིན་གྱིས་བརླབ་པའི་མཐའ། གྲུབ་པའི་མཐའ་ཅན་ནོ། །གསུམ་པ་ནི། འདུ་ལུགས་གསུམ་གྱི་ཁམས་འདུས་པའི་ཚེ། སྲིན་པོས་རྡེག་པ་ལ་སོགས་པ་བར་ཆད་ཀྱི་རྣམ་པ་དང་། འཇིགས་ཤིང་ཉམ་ང་བ་ལ་སོགས་པའི་ཉམས་སྐྱེས་པ་ན། ཟམ་འཕྲང་དོག་པོ་ལ་སོགས་པ་བགྲོད་པར་དཀའ་བའང་ལམ་ཡིན་པ་ལྟར་རང་གི་ལམ་དང་རྟེན་འབྲེལ་དུ་ཤེས་པའོ། །བཞི་པ་ནི། དེ་ལྟ་བུའི་ཉམས་དེ་དག་ཀྱང་བླ་མས་ཉམས་དེ་ལྟ་བུ་འབྱུང་ངོ་ཞེས་བསྟན་པ་ལྟར་ཐོག་ཏུ་བབས་པས་ངེས་ཤེས་ཁྱད་པར་ཅན་སྐྱེས་ཏེ། བླ་མ་ལ་སངས་རྒྱས་ཀྱི་འདུ་ཤེས་ཕྱིན་ཅི་མ་ལོག་པར་འཇུག་པའོ། །གཉིས་པ་སྤྲོས་པ་གཅད་པར་བྱ་བ་ནི། གོང་དུ་བསྟན་པའི་རྒྱུད་གསུམ་གྱི་ཉམས་ལེན་དེ་དག་གོ །གསུམ་པ་ཇི་ལྟར་གཅོད་པའི་ཚུལ་ནི། དེ་ལྟ་བུའི་ཉམས་ལེན་དེ་དག་ཀྱང་སྙན་བརྒྱུད་བཞི་དང་ལྡན་པ་དགོས་ཀྱི། བཞི་པོ་གང་རུང་གཅིག་མ་ཚང་ནའང་འདི་པའི་ལུགས་ཀྱི་གདམས་ངག་ཡོངས་སུ་རྫོགས་པར་མི་འགྱུར་ཞིང་། བཞི་པོ་དེ་དག་ཀྱང་བླ་མ་གོང་མའི་སྙན་བརྒྱུད་ལ་རག་ལས་པ་ཡིན་ནོ་ཞེས་ངེས་པར་བྱེད་པའི་ཚུལ་གྱིས་སོ། །ལྔ་པ་རྟེན་འབྲེལ་ལྔར་བསྟན་པའི་ལམ་ནི། རྟེན་འབྲེལ་ལྔ་ཡིས་ལམ་གྱི་ས་མཚམས་གཅད། །ཅེས་པ་སྟེ། དེ་ལ་གཉིས། རྟེན་འབྲེལ་ལྔ་ངོས་གཟུང་བ་དང་། དེས་ས་མཚམས་གཅད་པའི་ཚུལ་ལོ། །དང་པོ་ལ་ཕྱི་རྟེན་འབྲེལ་ནི། རླུང་ལོག་དང་མཐོང་སྣང་ལ་སོགས་པ་ཕྱི་རོལ་རགས་པར་སྣང་བའོ། །ནང་རྟེན་འབྲེལ་ནི། རྩ་ཡི་གེའི་ཕོ་བྲང་རྣམས་སུ་རླུང་སེམས་ཀྱི་འདུ་འཕྲོ་བྱས་པའོ། །གསང་བ་རྟེན་འབྲེལ་ནི། འཇིག་རྟེན་ལས་འདས་པའི་ལམ་དུ་ཁམས་བདུད་རྩིའི་དཀྱིལ་འཁོར་ལ་སོགས་པ་དཀྱིལ་འཁོར་བཞི་མངོན་དུ་གྱུར་པའོ། །དེ་ཁོ་ན་ཉིད་ཀྱི་རྟེན་འབྲེལ་ནི། ས་དང་པོ་ཡན་ཆད་ཀྱི་ཕྱི་རྟགས་ཐིག་ལེ་ལ་འཆར། ནང་རྟགས་རླུང་ལ་འཆར། དེ་ཁོ་ན་ཉིད་ཀྱི་རྟགས་ཡོན་ཏན་སེམས་ལ་འཆར་བའོ། །མཐར་ཐུག་རྟེན་འབྲེལ་ནི། ས་བཅུ་གསུམ་པར་འགྲོས་བཞི་ཐིམ་པའོ། །གཉིས་པ་ནི། རྟེན་འབྲེལ་དང་པོ་གཉིས་ཀྱིས་འཇིག་རྟེན་པའི་ལམ་གྱི་ས་མཚམས་གཅད། ཕྱི་མ་གསུམ་གྱིས་འདས་པའི་ལམ་གྱི་ས་མཚམས་བཅད་པའོ། །ཡང་ཕྱི་རྟེན་འབྲེལ་ཚོགས་ལམ། ནང་རྟེན་འབྲེལ་སྦྱོར་ལམ། གསང་བ་རྟེན་འབྲེལ་མཐོང་ལམ། དེ་ཁོ་ན་ཉིད་ཀྱི་རྟེན་འབྲེལ་བསྒོམ་ལམ། མཐར་ཐུག་རྟེན་འབྲེལ་མཐར་ཕྱིན་པའི་ལམ་ལ་བཞག་པའང་གསུང་ངོ་། །འདིར་རྣམ་པར་རྟོག་པ་བཞི་འབྱུང་ཏེ། གཞུང་དུ། འཁོར་འདས་ཐུན་མོང་གི་ལམ་ལ་གཞུང་ཚོམ་བུ་བདུན་དུ་གསུང་ན་འདིར་ལྔར་བསྡུས་ནས་གཉིས་པོ་འཇིག་རྟེན་པའི་ལམ་གྱི་སྐབས་སུ་བསྟན་པའི་རྒྱུ་མཚན་ཅི་ཡིན། སྣང་བ་གསུམ་ལ་སོགས་པ་ལྔ་པོ་རེ་རེས་ཀྱང་སངས་རྒྱ་བའི་ལམ་ཡོངས་སུ་རྫོགས་པ་རེ་སྟོན་པ་ཡིན་ནམ། ལྔ་ཆར་བསྡོམས་ནས་ལམ་གཅིག་སྟོན་པ་ཡིན། དང་པོ་ལྟར་ན་གང་རུང་གཅིག་བསྟན་པས་ཆོག་གི། གཞན་རྣམས་བསྟན་པ་ལ་དགོས་པ་མེད་པར་འགྱུར་རོ། །གཉིས་པ་ལྟར་ན་ཉམས་བླང་མ་ལུས་རྒྱུད་གསུམ་དག་གིས་ཤེས། །ཞེས་བཤད་པ་དང་འགལ་ལོ་སྙམ་ན། དྲི་བ་དང་པོའི་ལན་ནི་འོག་ཏུ་བཤད་པར་བྱའོ། །གཉིས་པའི་ལན་ནི། སྣང་བ་གསུམ་ལ་སོགས་པ་ལྔ་པོ་རེ་རེས་ཀྱང་འཚང་རྒྱ་བའི་ལམ་ཡོངས་སུ་རྫོགས་པ་རེ་སྟོན་ཏེ། རེ་རེས་ཀྱང་འཁོར་འདས་ཐུན་མོང་གི་ལམ་འབྲས་བུ་དང་བཅས་པ་རེ་སྟོན་པའི་ཕྱིར་རོ། །ཡང་ལྔ་ཆར་བསྡོམས་ནས་ཀྱང་ལམ་ཡོངས་སུ་རྫོགས་པ་གཅིག་སྟོན་ཏེ། གང་ཟག་གཅིག་འཚང་རྒྱ་བའི་ལམ་ལ་ལམ་གྱི་གཞི་བཅའ་བ་གཅིག་དང་། ལམ་གྱི་དངོས་གཞི་དང་། ལམ་གྱི་སྤྲོས་པ་གཅོད་བྱེད་དང་། ལམ་གྱི་ས་མཚམས་གཅོད་བྱེད་བཞི་དགོས་པ་རྣམས་འདི་དག་གིས་རིམ་པ་བཞིན་བསྟན་པའི་ཕྱིར་ཏེ། གོང་གཞུང་དོན་གྱི་སྐབས་སུ་བཤད་ཟིན་ཏོ། །དྲི་བ་གསུམ་པའི་ལན་ནི། དེ་ལྟར་ལྔ་པོ་རེ་རེས་ཀྱང་ལམ་ཡོངས་སུ་རྫོགས་པ་རེ་སྟོན་ན། ལྔ་ཆར་བསྟན་པ་ལ་དགོས་པ་ཅི་ཡོད་ཅེ་ན། དགོས་པ་འདི་དག་ཡོད་དེ། འཁོར་འདས་ཀྱི་ཆོས་ཐམས་ཅད་གནས་སྐབས་མི་འདྲ་བ་གསུམ་ལ་སྣང་བ་གསུམ་འཆར་བ་ལ་བཞག་པ་ཡིན་ནོ་ཞེས་ཤེས་པའི་ཕྱིར་དུ་སྣང་བ་གསུམ་དུ་བསྟན་པའི་ལམ་བསྟན། ཆོས་ཐམས་ཅད་རང་གི་སེམས་རྒྱུན་ཆགས་གཅིག་གིས་བསྡུས་པ་ཡིན་ནོ་ཞེས་ཤེས་པའི་ཕྱིར་དུ་རྒྱུད་གསུམ་དུ་བསྟན་པའི་ལམ། དེ་ལ་ངེས་པའི་ཤེས་པ་ཁྱད་པར་ཅན་སྐྱེས་པས་ལམ་མྱུར་དུ་བགྲོད་པའི་ཕྱིར་དུ་ཚད་མ་བཞིར་བསྟན་པའི་ལམ། དེས་གང་ཟག་གཅིག་འཚང་རྒྱ་བ་བླ་མ་གོང་མའི་སྙན་བརྒྱུད་ཁྱད་པར་ཅན་ལ་རག་ལས་པར་ཤེས་པའི་ཕྱིར་དུ་སྙན་བརྒྱུད་བཞིར་བསྟན་པའི་ལམ། རྡོ་རྗེ་ཐེག་པའི་ལམ་གྱིས་སངས་རྒྱས་ཀྱི་སར་བགྲོད་པ་ལ་རྟེན་འབྲེལ་ལྔ་ཚང་ཞིང་འགྲིག་པ་དགོས་སོ་ཞེས་ཤེས་པའི་ཕྱིར་དུ་རྟེན་འབྲེལ་ལྔར་བསྟན་པའི་ལམ་བསྟན་པ་ཡིན་ནོ། །དྲི་བ་བཞི་པའི་ལན་ནི། དེ་ལྟར་ཐམས་ཅད་ཀྱིས་ལམ་ཡོངས་སུ་རྫོགས་པ་གཅིག་བསྟན་ཀྱང་། ཉམས་བླང་མ་ལུས་རྒྱུད་གསུམ་དག་གིས་ཤེས། །ཞེས་པ་དང་མི་འགལ་ཏེ། རྒྱུད་གསུམ་ནི་ཉམས་ལེན་གྱི་དངོས་གཞི་ཡིན་ལ། དེའི་སྔོན་དུ་ཉམས་ལེན་གྱི་གཞི་བཅའ་བ་སྣང་བ་གསུམ་དང་། ཉམས་ལེན་གྱི་སྤྲོས་པ་གཅོད་བྱེད་ཚད་མ་བཞི་དང་། སྙན་བརྒྱུད་བཞི་དང་། དེ་ལྟར་ཉམས་སུ་བླངས་པས་ས་ལམ་བགྲོད་པའི་ཚེ་ས་མཚམས་གཅོད་བྱེད་རྟེན་འབྲེལ་ལྔ་དགོས་པས་སོ། །གཉིས་པ་འཁོར་ལོ་འཆམ་པ་འཇིག་རྟེན་པའི་ལམ་ལ་གཉིས་ཏེ། མན་ངག་གི་གནད་བདུན་དུ་བསྡུས་ཏེ་བསྟན་པ་དང་། ལམ་གྱི་གེགས་སེལ་བསྟན་པའོ། །དང་པོ་ལ་བདུན་ཏེ། ཁམས་འདུ་ལུགས་གསུམ་གྱིས་ལམ་ཕྱོགས་མེད་དུ་བསྲེལ་བའི་གནད། སེམས་གནས་ལུགས་གསུམ་གྱིས་ཏིང་ངེ་འཛིན་གྱི་ཉེ་རྒྱུ་ཤེས་པའི་གནད། ཉམས་གསུམ་གྱིས་གང་ཡང་ཏིང་ངེ་འཛིན་དུ་ཤེས་པའི་གནད། དྲོད་གསུམ་གྱིས་ཉམས་བྱུང་རྒྱལ་དུ་བསྐྱང་བའི་གནད། ལམ་ཁྲིད་ལུགས་གསུམ་གྱིས་ཏིང་ངེ་འཛིན་གྱི་བྱེ་བྲག་ཤེས་པའི་གནད། ཁམས་འདུས་པ་གསུམ་གྱིས་ལམ་གྱི་ས་མཚམས་ཤེས་པའི་གནད། རྟེན་འབྲེལ་གསུམ་གྱིས་རེ་དོགས་དང་བྲལ་བའི་གནད་དོ། །དང་པོ་ནི། འདུ་ལུགས་གསུམ་དང་ཕྱོགས་མེད་བདུན་དག་གིས། །རྣམ་པར་ཕྱེ་བས་སྒྲོ་སྐུར་བྲལ་བར་མཛོད། །ཅེས་པ་སྟེ། དེ་ལ་གཉིས། འདུ་ལུགས་གསུམ་དང་ཕྱོགས་མེད་བདུན་ངོས་གཟུང་བ། དེས་སྒྲོ་སྐུར་དང་བྲལ་བའི་ཚུལ་ལོ། །དང་པོ་ལ་འདུ་ལུགས་གསུམ་ནི། ལས་འཕྲོ་ཅན་རང་གི་ངང་གིས་ཁམས་འདུ། མོས་གུས་ཅན་བྱིན་རླབས་ཀྱིས་ཁམས་འདུ། བརྩོན་འགྲུས་ཅན་འབད་རྩོལ་གྱིས་ཁམས་འདུ་བའོ། །ཕྱོགས་མེད་བདུན་ནི། ལས་འཕྲོ་ལ་སྦྱར་ན། ལས་འཕྲོ་ཕྱོགས་མེད་དུ་སད་པས་རླུང་ཕྱོགས་མེད་དུ་ལོག དེས་གཏུམ་མོའི་མེ་ཕྱོགས་མེད་དུ་འབར། དེས་རྩ་ཕྱོགས་མེད་དུ་དྲལ། དེས་ཁམས་ཕྱོགས་མེད་དུ་འདུ། དེས་ཟག་བཅས་ཀྱི་མངོན་ཤེས་ཕྱོགས་མེད་དུ་འཆར། དེས་ཟག་མེད་ཀྱི་མངོན་ཤེས་ཕྱོགས་མེད་དུ་འཆར་བ་སྟེ་བདུན་ནོ། །དེ་བཞིན་དུ་མོས་གུས་དང་། བརྩོན་འགྲུས་ལའང་བདུན་བདུན་ཏེ་ཉི་ཤུ་རྩ་གཅིག་གོ །གཉིས་པ་ནི། གང་ཟག་ལམ་མ་བསྒོམས་པ་རྣམས་ལ་ཁམས་འདུས་བྱུང་བའི་ཚེ་མན་ངག་མེད་པ་དག་གིས་ཁམས་འདུས་པ་མ་ཡིན་ནོ་ཞེས་སྐུར་པ་འདེབས་པར་བྱེད་ཅིང་། གདོན་གྱིས་བྱས་པ་ཡིན་ནོ་ཞེས་སྒྲོ་འདོགས་པར་བྱེད་ལ། འདུ་ལུགས་གསུམ་པོ་འདི་དག་ཤེས་ན་སྒྲོ་སྐུར་མི་དགོས་ཏེ། བྱང་སེམས་ཟླ་རྒྱལ་གྱི་གྲྭ་པ་ལྟ་བུ་མོས་གུས་ཀྱིས་ཁམས་འདུ་བའང་ཡོད། དབུས་པ་ཇོ་གདན་ལྟ་བུ་ལས་འཕྲོས་ཁམས་འདུ་བའང་ཡོད་དོ་ཞེས་པའི་ཚུལ་གྱིས་སོ། །གཉིས་པ་ནི། སེམས་འཛིན་གནས་ལུགས་རྣམ་གསུམ་རྟོགས་པ་ཡིས། །ཏིང་ངེ་འཛིན་གྱི་ཉེ་རྒྱུར་རྟོགས་པར་བྱ། །ཞེས་པ་སྟེ། འདི་ལ་གཉིས། སེམས་གནས་ལུགས་གསུམ་ངོས་གཟུང་བ་དང་། དེ་ཏིང་ངེ་འཛིན་གྱི་ཉེ་རྒྱུར་འགྱུར་བའི་ཚུལ་ལོ། །དང་པོ་ནི། རླུང་ལོག་པས་སེམས་གནས། རླུང་སེམས་བདག་བྱིན་གྱིས་བརླབས་པས་སེམས་གནས། རྟེན་མཉམ་དུ་འདྲེས་པས་སེམས་གནས་པའོ། །གཉིས་པ་ནི་གོང་དུ་བསྟན་པའི་ལས་འཕྲོ་དང་། མོས་གུས་དང་། བརྩོན་འགྲུས་གསུམ་པོ་གང་ཡང་རུང་བ་ལས་རླུང་ལོག་སོགས་གསུམ་པོ་འདི་དག་འབྱུང་ལ། དེ་ལས་ལུས་ཉམས་དང་སེམས་ཉམས་ལ་སོགས་པའི་ཏིང་ངེ་འཛིན་བསམ་གྱིས་མི་ཁྱབ་པ་སྐྱེ་བས། རླུང་ལོག་ལ་སོགས་པ་ནི་ཏིང་ངེ་འཛིན་གྱི་དངོས་རྒྱུ་ཡིན་ལ། ལས་འཕྲོ་ལ་སོགས་པ་གསུམ་ནི་བརྒྱུད་པའི་རྒྱུ་ཡིན་ནོ་ཞེས་པའི་དོན་ཏོ། །གསུམ་པ་ནི། རང་ལུས་དག་ལ་ཉམས་གསུམ་སྐྱེས་པ་ཡི། །གང་ཡང་ཏིང་ངེ་འཛིན་དུ་མཁྱེན་པར་མཛོད། །ཅེས་ཏེ། འདི་ལ་གཉིས། ཉམས་གསུམ་ངོས་གཟུང་བ་དང་། དེས་གང་ཡང་ཏིང་ངེ་འཛིན་དུ་ཤེས་པའི་ཚུལ་ལོ། །དང་པོ་ལ་ལུས་ཉམས་ནི། བསྒོམས་པའི་སྟོབས་ཀྱིས་རླུང་ནང་དུ་ལོག་པས་ལུས་ལ་འཕར་གཡོ་དང་མཆོང་རྒྱུག་ལ་སོགས་པ་འབྱུང་ངོ་། །སེམས་ཉམས་ནི། རྩ་ཡི་གེ་ལ་གནད་དུ་བསྣུན་པས་ཉམས་ང་དང་། མྱ་ངན་དང་། ཆགས་སྡང་ལ་སོགས་པའི་ཉམས་འབྱུང་ངོ་། །རྨི་ཉམས་ནི། རླུང་ལ་གནད་དུ་བསྣུན་པས་རྨི་ལམ་དུའང་གཡོ་བའི་རང་བཞིན་རྟ་རྨི་བ་ལ་སོགས་པ་འབྱུང་བའོ། །གཉིས་པ་ནི། མན་ངག་མེད་པ་དག་གིས་ལུས་ལ་ན་ཟུག་སོགས་བྱུང་བ་ན་འབྱུང་བ་ལུས་འཁྲུགས་སུ་འཆད། སེམས་ལ་ཉོན་མོངས་སོགས་བྱུང་བ་ན་ཉོན་མོངས་རང་དགའ་བར་འཆད། རྨི་ཉམས་ནི་རྨི་ལམ་རང་དགའ་བར་འཆད་པ་ཏིང་ངེ་འཛིན་དུ་མི་ཤེས་ལ། འདི་པའི་ལུགས་ཀྱིས་རླུང་སེམས་ཀྱི་འདུ་འཕྲོད་ལས་བྱུང་བའི་ཉམས་གསུམ་དུ་ཤེས་པའོ། །བཞི་པ་ནི། དྲོད་གསུམ་རིམ་པ་ཡིན་མིན་སྐྱེ་བ་ཡིས། །གང་ཡང་བྱུང་རྒྱལ་དག་ཏུ་གཏང་བར་མཛོད། །ཅེས་ཏེ། འདི་ལ་གཉིས། དྲོད་གསུམ་ངོས་གཟུང་བ་དང་། བྱུང་རྒྱལ་དུ་བསྐྱང་བའི་ཚུལ་ལོ། །དང་པོ་ནི། རྣམ་རྟོག་སྔོན་དུ་སོང་བའི་དྲོད། ཁམས་དགུ་འདུས་པའི་དྲོད། ཐིག་ལེ་འབར་ཞིང་འདུས་པའི་དྲོད་དོ། །གཉིས་པ་ནི། དེ་ལྟ་བུའི་དྲོད་གསུམ་པོ་དེ་དག་ཀྱང་རྒྱུ་རླུང་སེམས་ཀྱིས་རྟེན་འབྲེལ་རིམ་པ་ཡིན་མིན་དུ་འགྲིག་པས་འབྲས་བུ་དྲོད་རྣམས་ཀྱང་རིམ་པ་ཡིན་མིན་དུ་སྐྱེ་ལ། གང་ལའང་ཞེན་པ་མི་བྱ་བར་ངོ་ཤེས་པར་བྱས་ནས་བསྐྱང་བ་ནི་བྱུང་རྒྱལ་དུ་བསྐྱང་བའི་དོན་ཏོ། །ལྔ་པ་ནི། དེད་དཔོན་ལྟ་བུའི་ཁྲིད་ལུགས་རྣམ་གསུམ་གྱིས། །ཏིང་འཛིན་ཉམས་ཀྱི་བྱེ་བྲག་རྟོགས་པར་མཛོད། །ཅེས་ཏེ། འདི་ལ་གསུམ། ལམ་ཁྲིད་ལུགས་གསུམ་ངོས་གཟུང་བ། དེད་དཔོན་ལྟ་བུར་འཇོག་པའི་རྒྱུ་མཚན། དེས་ཏིང་འཛིན་ཉམས་ཀྱི་བྱེ་བྲག་ཤེས་པའི་ཚུལ་ལོ། །དང་པོ་ནི། རླུང་གིས་ལམ་ཁྲིད། ཁམས་བདུད་རྩིས་ལམ་ཁྲིད། རྩ་ཡི་གེས་ལམ་ཁྲིད་པའོ། །གཉིས་པ་ནི། ལམ་ཁྲིད་ལུགས་གསུམ་པོ་དེ་དག་ལ་ཅིའི་ཕྱིར་དེད་དཔོན་ལྟ་བུར་འཇོག་ཅེ་ན། དཔེར་ན་དེད་དཔོན་དེས་རང་གིས་ཁྲིད་པར་བྱ་བའི་ཚོང་པ་ཐམས་ཅད་གཞན་ལ་རག་མ་ལས་པར་གང་དུ་འདོད་པའི་གནས་དེར་འཁྲིད་པར་བྱེད་པ་དེ་བཞིན་དུ། ལམ་ཁྲིད་ལུགས་གསུམ་པོ་དེ་དག་གིས་ཀྱང་ཁྲིད་པར་བྱ་བ་སེམས་ཀུན་གཞིའི་རྣམ་པར་ཤེས་པ་དེ་གཞན་ལ་རག་མ་ལས་པར་ཁྲིད་ལུགས་གསུམ་པོ་དེ་དག་གི་སྒོ་ནས་བཅུ་གསུམ་རྡོ་རྗེ་འཛིན་པའི་སར་འཁྲིད་པར་བྱེད་པས་ན་དེ་སྐད་ཅེས་བྱའོ། །གསུམ་པ་ནི། ཁམས་འདུས་པ་དང་པོ་ལ་རྩ་རླུང་གི་ཟུག་ཆེ་བ་དང་། འདུས་པ་བར་པ་ལ་རྩ་རླུང་གི་ཟུག་བྲི་བ་དང་། འདུས་པ་ཐ་མ་ལ་རྩ་རླུང་གི་ཟུག་བྲལ་བས་འབྱུང་བ་ལུས་འཁྲུགས་ལ་སོགས་པའི་གནོད་པ་སེལ་ནུས་འབྱུང་བ་རྣམས་ནི་རླུང་གིས་ལམ་ཁྲིད་པའི་ཉམས་ཀྱི་བྱེ་བྲག་ཡིན་ལ། འདུས་པ་དང་པོ་ལ་ཏིང་ངེ་འཛིན་མི་གསལ་ཞིང་མི་བརྟན་པ་དང་། འདུས་པ་བར་པ་ལ་ཏིང་ངེ་འཛིན་གསལ་ཞིང་ཆེར་བརྟན་པ་དང་། འདུས་པ་ཐ་མ་ལ་མཉམ་རྗེས་མེད་ཅིང་ཡུལ་རྐྱེན་གྱིས་མི་གནོད་པ་འབྱུང་བ་རྣམས་ནི་ཁམས་བདུད་རྩིས་ལམ་ཁྲིད་པའི་ཉམས་ཀྱི་བྱེ་བྲག་ཡིན་ཞིང་། འདུས་པ་དང་པོ་ལ་མ་ངེས་པ་འཁྲུལ་སྣང་དུ་འཆར་བ་ཉམ་ང་བ་དང་མྱ་ངན་ལ་སོགས་པ་རྣམས་དང་། འདུས་པ་བར་པ་ལ་ངེས་པ་མཐོང་སྣང་དུ་འཆར་བ་རིགས་དྲུག་གི་ཉམས་དང་། མཐོང་སྣང་རྣམས་དང་། འདུས་པ་ཐ་མ་ལ་ཤིན་ཏུ་ངེས་པ་གསལ་སྣང་དུ་འཆར་བ་སྲིད་པའི་རྩེ་མོ་མན་ཆད་ཏིང་ངེ་འཛིན་གྱི་ཉམས་སུ་འབྱུང་བ་སྙམ་བྱེད་པ་རྣམས་ནི་རྩ་ཡི་གེས་ལམ་ཁྲིད་པའི་ཉམས་ཀྱི་བྱེ་བྲག་སྟེ། དེ་ལྟར་ཉམས་མི་འདྲ་བ་གསུམ་པོ་དེ་དག་ལམ་ཁྲིད་ལུགས་གསུམ་པོ་སོ་སོ་ལས་འབྱུང་ཞེས་པའི་དོན་ཏོ། །ལམ་ཁྲིད་ལུགས་གསུམ་པོ་འདི་དག་ལ་འཇིག་རྟེན་པའི་ལམ་དུ་ཁམས་འདུས་པ་གསུམ་གྱིས་ས་མཚམས་བཅད། འདས་པའི་ལམ་དུ་གྲུབ་མཐའ་བཞིས་ས་མཚམས་བཅད་ནས་གསུངས་མོད་ཀྱི། འདིར་འདུས་པ་གསུམ་ལ་སྦྱར་བ་ཙམ་ཞིག་སྐབས་སུ་བབ་པས་དེ་བཞིན་དུ་བཤད་དོ། །དྲུག་པ་ནི། འདུས་པ་གསུམ་ལ་དཔེ་གསུམ་སྦྱར་བ་ཡིས། །ལམ་གྱི་ས་མཚམས་ཐེ་ཚོམ་མེད་པར་མཛོད། །ཅེས་ཏེ། འདི་ལ་གསུམ། ཁམས་འདུས་པ་གསུམ་ངོས་གཟུང་བ། དེ་ལ་དཔེ་གསུམ་སྦྱར་བའི་ཚུལ། དེས་ས་མཚམས་ཤེས་པའི་ཚུལ་ལོ། །དང་པོ་ནི། ཁམས་འདུས་པ་དང་པོ་དང་། བར་པ་དང་། ཐ་མའོ། །གཉིས་པ་ནི། ཁམས་འདུས་པ་དང་པོ་ལ་བསྒོམས་པའི་སྟོབས་ཀྱིས་རླུང་རྩ་གནས་ཐམས་ཅད་དུ་སོང་བས་རྩ་མདུད་གྲོལ་ནས་རྩ་རླུང་གི་ཟུག་འབྱུང་སྟེ། དཔེ་དགུན་གྱི་རླུང་པོ་ལག་ཆ་ཅན་དང་འདྲའོ། །འདུས་པ་བར་པ་ལ་བསྒོམས་པའི་སྟོབས་ཀྱིས་རྩ་མདུད་ཆེར་གྲོལ་ཞིང་རླུང་སེམས་ཅུང་ཟད་དྭངས་པས་རྩ་རླུང་གི་ཟུག་ཞི་སྟེ། དཔེ་དཔྱིད་ཀྱི་རླུང་པོ་ལག་ཆ་བྲི་བ་དང་འདྲའོ། །འདུས་པ་ཐ་མར་བསྒོམས་པ་བརྟན་པའི་སྟོབས་ཀྱིས་རྩ་མདུད་ཆེར་གྲོལ་ཞིང་རླུང་སེམས་ཤིན་དུ་དྭངས་པས་ཏིང་ངེ་འཛིན་གྱི་ཕན་ཡོན་དུ་མ་འབྱུང་སྟེ། དཔེ་དབྱར་གྱི་རླུང་པོ་ལག་ཆ་བྲལ་བ་དང་འདྲའོ། །གསུམ་པ་ནི། འོ་ན་དཔེ་གསུམ་པོ་དེ་དག་གིས་ས་མཚམས་ཤེས་པའི་ཚུལ་གང་ཡིན་ཞེ་ན། དགུན་གྱི་རླུང་པོ་ལག་ཆ་ཅན་དང་འདྲ་བར་རྩ་རླུང་གི་ཟུག་ཤིན་ཏུ་ཆེ་བ་ན་འདུས་པ་དང་པོར་སླེབ་པར་ཤེས་པར་བྱ། དཔྱིད་ཀྱི་རླུང་པོ་ལག་ཆ་བྲི་བ་དང་འདྲ་བར་རྩ་རླུང་གི་ཟུག་ཞི་བ་ན་འདུས་པ་བར་པར་སླེབ་པར་ཤེས་པར་བྱ། དབྱར་གྱི་རླུང་པོ་ལག་ཆ་བྲལ་བ་དང་འདྲ་བར་ཏིང་ངེ་འཛིན་གྱི་ཡོན་ཏན་བསམ་གྱིས་མི་ཁྱབ་པ་འབྱུང་བ་ན་འདུས་པ་ཐ་མར་སླེབ་པར་ཐེ་ཚོམ་མེད་པར་ཤེས་པར་བྱ་ཞེས་པའི་དོན་ཏོ། །བདུན་པ་ནི། རྟེན་འབྲེལ་རྣམ་གསུམ་རང་ལ་འཛོམ་པ་ཡིས། །རྒྱུ་རྐྱེན་གཞན་མེད་རེ་དོགས་བྲལ་བར་མཛོད། །ཅེས་པ་སྟེ། འདི་ལ་གསུམ། རྟེན་འབྲེལ་གསུམ་ངོས་གཟུང་བ། དེ་རང་ལ་ཇི་ལྟར་འཛོམ་པའི་ཚུལ། དེས་རེ་དོགས་དང་བྲལ་བའི་ཚུལ་ལོ། །དང་པོ་ནི། རླུང་ལོག་གི་རྟེན་འབྲེལ། མཐོང་སྣང་གི་རྟེན་འབྲེལ། རྨི་ལམ་གྱི་རྟེན་འབྲེལ་ལོ། །དང་པོ་ནི། བསྒོམས་པའི་སྟོབས་ཀྱིས་རླུང་ནང་དུ་ལོག་པས་ལུས་ལ་འཕར་གཡོ་དང་མཆོང་རྒྱུག་ལ་སོགས་པ་འབྱུང་བའོ། །གཉིས་པ་ནི། ལུས་རྩའི་མཐོང་སྣང་ནི། རོ་རྐྱང་གི་མདུད་པ་སོ་གཉིས་ཀྱི་དོག་སར་རླུང་སེམས་ཞུགས་པས་རི་བྲག་སོགས་མཐོང་བའོ། །རྩ་ཡི་གེའི་མཐོང་སྣང་ནི། རིགས་དྲུག་གི་ཡི་གེར་རླུང་སེམས་འདུས་པས་རིགས་དྲུག་གི་གནས་མཐོང་བ་ལ་སོགས་པའོ། །ཁམས་བདུད་རྩིའི་མཐོང་སྣང་ནི། སྙིང་གའི་བྷྲཱུྃ་ཡིག་ལ་སོགས་པར་བདུད་རྩི་ལྔའི་དྭངས་མ་མཉམ་དུ་འདུས་པས་རྒྱལ་བ་རིགས་ལྔ་མཐོང་བ་ལ་སོགས་པའོ། །རྨི་ལམ་གྱི་རྟེན་འབྲེལ་ནི། མཐོང་སྣང་དེ་དག་གི་རྒྱུས་གཉིད་ཀྱི་རྐྱེན་བྱས་ནས་མཐོང་སྣང་དེ་དག་རྨི་ལམ་དུ་འབྱུང་བའོ། །གཉིས་པ་ནི། རྟེན་འབྲེལ་གསུམ་པོ་དེ་དག་འབྱུང་བའི་རྒྱུ། ལུས་རྩ་དང་། རྩ་ཡི་གེ་དང་། ཁམས་བདུད་རྩི་དང་། རླུང་རྣམས་རང་གི་ལུས་ལ་རང་ཆས་སུ་ཡོད་པས་ཕྱི་རོལ་གྱི་རྒྱུ་རྐྱེན་གཞན་མེད་ཅེས་པའོ། །གསུམ་པ་ནི། མཐོང་སྣང་ལ་དེ་བཞིན་གཤེགས་པའི་སྐུ་མཐོང་བ་ལ་སོགས་པའང་དངོས་གྲུབ་ཀྱི་རེ་བ་མི་བྱ་ཞིང་། སྲིན་པོས་བརྡེག་པ་ལ་སོགས་པ་ལའང་བར་ཆད་ཀྱི་དོགས་པ་མི་བྱ་སྟེ། དེ་དག་གི་རྒྱུ་རླུང་སེམས་ཐམས་ཅད་རང་གི་ལུས་ལ་ཚང་བས་སོ་སྙམ་དུ་དགོངས་སོ། །བདུན་པོ་འདི་དག་ནི་གོ་རིམ་ཅུང་ཟད་ཙམ་མ་གཏོགས་རྗེ་བཙུན་ཆེན་པོས་འཇིག་རྟེན་པའི་ལམ་གྱི་སྐབས་སུ་ཤེས་པས་ཕན་འདོགས་པའི་མན་ངག་བདུན་གསུངས་པ་དང་དོན་གཅིག་ཏུ་ཤེས་པར་བྱའོ། །གཉིས་པ་ལམ་གྱི་གེགས་སེལ་བ་ལ་གཉིས་ཏེ། གེགས་སེལ་སོ་སོར་བསྟན་པ་དང་། བསྡུས་ཏེ་བསྟན་པའོ། །དང་པོ་ལ་བཞི་སྟེ། བསྲུང་བ་སུམ་ཅུའི་གེགས་སེལ་བསྟན་པ། མན་ངག་གི་གནད་བདུན་ཅུའི་གེགས་སེལ་བསྟན་པ། གདམས་ངག་དྲུག་གི་གེགས་སེལ་བསྟན་པ། དཀྱིལ་འཁོར་འཁོར་ལོའི་གེགས་སེལ་བསྟན་པའོ། །དང་པོ་ལ་གསུམ་སྟེ། གང་ཟག་གང་ལ་འབྱུང་བ། ཚུལ་ཇི་ལྟར་སེལ་བ། གནས་སྐབས་གང་དུ་སེལ་བའོ། །དང་པོ་ནི། ཐབས་དང་ཤེས་རབ་ཟུང་འཇུག་རྣལ་འབྱོར་པ། །གཉིས་ལ་བར་ཆད་འཇུག་སྟེ་གཅིག་ལ་མིན། །ཞེས་པ་སྟེ། ཐབས་ཀྱི་ཕྱོགས་སུ་ལྷུང་བའི་རྣལ་འབྱོར་པ་དང་། ཤེས་རབ་ཀྱི་ཕྱོགས་སུ་ལྷུང་བའི་རྣལ་འབྱོར་པ་དང་། ཟུང་འཇུག་གི་རྣལ་འབྱོར་པ་གསུམ་ལས། དང་པོ་གཉིས་ལ་བར་ཆད་འབྱུང་གི གཅིག་སྟེ་ཟུང་འཇུག་གི་རྣལ་འབྱོར་པ་ལ་མི་འབྱུང་ཞེས་པའི་དོན་ཏོ། །གཉིས་པ་ལ་གཉིས་ཏེ། སོ་སོའི་བསྲུང་བ་བསྟན་པ་དང་། ཐུན་མོང་གི་བསྲུང་བ་བསྟན་པའོ། །དང་པོ་ནི། བསྲུང་བ་བརྒྱད་བརྒྱད་བཅུ་དྲུག་དག་ཏུ་སྟེ། །ཐབས་ལ་དད་པ་ལ་སོགས་རྣམ་པ་བརྒྱད། །ཤེས་རབ་སད་པ་རྣམ་པ་བཞི་ཡིས་བསྲུང་། །ནང་གི་བདུད་ལ་དབང་བཞིའི་བརྡ་ཡིས་བཟློག །ཅེས་ཏེ། ཐབས་ཀྱི་ཕྱོགས་སུ་ལྷུང་བའི་རྣལ་འབྱོར་པ་ལ་བར་ཆད་བཞི་ལ་བསྲུང་བ་བརྒྱད་དེ། དེ་ལ་བར་ཆད་བཞི་ནི་ལམ་དུ་འཇུག་པ་ན་འཇིག་རྟེན་ཆོས་ཀྱི་བར་ཆད། ཞུགས་པ་ན་ཕྱི་རོལ་བདུད་ཀྱི་བར་ཆད། སེམས་ཅུང་ཟད་བརྟན་པ་ན་བདུད་སྟོབས་འཕེལ་བའི་བར་ཆད། སེམས་ཆེར་བརྟན་པ་ན་ཏིང་ངེ་འཛིན་ངོ་མི་ཤེས་པའི་བར་ཆད་དོ། །བསྲུང་བ་བརྒྱད་ནི། བར་ཆད་དང་པོ་ལ་དད་པ་བརྟན་པོས་བསྲུང་། གཉིས་པ་ལ་སྲུང་བའི་འཁོར་ལོ། སྔགས་ཟློས། བསྔགས་མདུད་གསུམ་གྱིས་བསྲུང་། གསུམ་པ་ལ། ཆོས་རྣམས་སེམས་ཉིད་སྣང་བ། གཟུགས་བརྙན་ཡིན་ཕྱིར། དེ་ཁོ་ན་ཉིད་རྒྱ་མཚོའི་དོན་དང་མ་བྲལ་བ་གསུམ་གྱིས་བསྲུང་། བཞི་པ་ལ། གཞན་དབང་རྟེན་འབྲེལ་ཤེས་པས་བསྲུང་བའོ། །ཤེས་རབ་ཀྱི་ཕྱོགས་སུ་ལྷུང་བའི་རྣལ་འབྱོར་པའི་བར་ཆད་བཞི་ནི། ཉམས་དང་སྡུག་བསྔལ་བསྐྱེད་པའི་བར་ཆད། གཟུགས་སྟོན་པའི་བར་ཆད། སྒྲ་བརྗོད་པའི་བར་ཆད། ལྟ་གྲུབ་སྒྱུར་བའི་བར་ཆད་དོ། །བསྲུང་བ་བརྒྱད་ནི། བཞི་པོ་དེ་དག་ཕྱིའི་བདུད་ཀྱིས་བྱས་པ་ལ། གཉེན་པོ་སད་པ་བཞིས་བསྲུང་། ནང་གི་བདུད་ཀྱིས་བྱས་པ་ལ་དབང་བཞིས་བརྡས་བཟློག་པའོ། །དེ་ལ་སད་པ་བཞི་ནི། བར་ཆད་དང་པོ་ལ་ཉམས་ཀྱིས་སད་པས་རྣམ་གསུམ་རིགས་དབྱེ། གཉིས་པ་ལ་ཏིང་ངེ་འཛིན་གྱིས་སད་པས་རྣམ་གསུམ་རིགས་དབྱེ། གསུམ་པ་ལ་སྔགས་ཀྱིས་སད་པས་རྣམ་གསུམ་རིགས་དབྱེ། བཞི་པ་ལ་ལྟ་གྲུབ་ཀྱིས་སད་པས་རྣམ་གསུམ་རིགས་དབྱེ་བས་ཉམས་ཡིན་ན་བྱུང་རྒྱལ་དུ་བསྐྱང་། ཡི་དམ་ཡིན་ན་དངོས་གྲུབ་ཞུ། བར་ཆད་ཡིན་ན་ངོ་ཤེས་པ་ཙམ་གྱིས་སྐྱེངས་ནས་འགྲོ། གལ་ཏེ་མ་སོང་ན་ནང་གི་བདུད་ཡིན་པས་དབང་བཞིའི་བརྡས་བཟློག་པར་བྱའོ། །གཉིས་པ་ཐུན་མོང་གི་བསྲུང་བ་ནི། གཉིས་ལ་ཐུན་མོང་བསྲུང་བ་བཅུ་བཞི་སྟེ། །ཞེས་པ་སྟེ། གྲིབ་མ་དྲུག ཐིག་ལེ་འཛག་པ་དྲུག སྒྲིབ་པ་གཉིས་བསྲུང་བའོ། །གསུམ་པ་ནི། དང་པོ་ལམ་དུ་འཇུག་དང་ཞུགས་པ་དང་། །སེམས་འཛིན་ཅུང་ཟད་བརྟན་དང་ཆེར་བརྟན་པའི། །བར་ཆད་རིམ་གྱིས་སེལ་བ་ཤེས་པར་བྱ། །ཞེས་པ་སྟེ། ཐབས་ཀྱི་ཕྱོགས་སུ་ལྷུང་བ་དང་། ཤེས་རབ་ཀྱི་ཕྱོགས་སུ་ལྷུང་བ་དང་། གཉིས་ཀའི་ཐུན་མོང་གི་བསྲུང་བ་གསུམ་ལས། དང་པོའི་བསྲུང་བ་ལ་དད་སོགས་བརྒྱད་ནི་གནས་སྐབས་བཞིར་འཇུག་ཅེས་པའི་དོན་ཏོ། །གཉིས་པ་མན་ངག་གི་གནད་བདུན་ཅུའི་གེགས་སེལ་ནི། རྩ་ཡི་ཟུག་ལ་ལ་དོར་ཤིན་ཏུ་གཅེས། །རླུང་གི་ཟུག་ལ་རྔན་དགས་བྱིན་ཏེ་བཟློག །རླུང་རེངས་པ་ལ་ལ་དོར་བྱིན་བརླབ་དང་། །བདེ་བ་བསྒོམ་དང་རྣམ་པ་གསུམ་དུ་གསུངས། །ཞེས་པ་སྟེ། རྩ་ཟུག་ལ་ལ་དོར་བ་ནི། གང་ན་སར་ཤེས་པ་གཏད་དེ། རིག་པ་སེམས་ཀྱིས་འཚིར་གནོན་བྱས་པས་ཞི་བའོ། །རླུང་ཟུག་ལ་རྔན་དགས་བྱིན་ཏེ་བཟློག་པ་ནི། རླུང་ནང་དུ་བརྔུབས་ཏེ་གང་ན་སར་མནན། མི་ཐུབ་པ་འདྲ་ན་སླར་རྔུབ་ཅིང་མནན་པའོ། །རླུང་རེངས་བཅོས་པའི་ཐབས་ལ་གསུམ་ལས། ལ་དོར་ནི་སྔ་མ་བཞིན་ནོ། །བྱིན་གྱིས་བརླབ་པ་ལ་དྲུག་སྟེ། བླ་མ་དམ་པའི་བྱིན་རླབས། ལྷག་པའི་ལྷའི་བྱིན་རླབས། ཕྱི་ནང་མཁའ་འགྲོའི་བྱིན་རླབས། ཐེག་པ་ཆེན་པོའི་མདོ་རྒྱུད་ཟབ་མོའི་བྱིན་རླབས། སྣང་བ་སྣ་ཚོགས་ཀྱི་བྱིན་རླབས། རྟེན་འབྲེལ་ཟབ་མོའི་བྱིན་རླབས་སོ། །གསུམ་པ་བདེ་བ་བསྒོམ་པ་ལ། སྟེང་ལོངས་སྤྱོད་ཀྱི་རླབས་ལ་བརྟེན་པ་དང་། འོག་གསང་བའི་སྙོམས་འཇུག་ལ་བརྟེན་པ་གཉིས་གསུངས་སོ། །གསུམ་པ་གདམས་ངག་དྲུག་གི་གེགས་སེལ་ནི། ལྟ་སྒོམ་གཉིས་ལ་དུག་དབྱུང་བདུད་རྩི་བསྟེན། །ལ་དོར་མན་ངག་དྲུག་ཏུ་ཤེས་པར་བྱ། །ཞེས་པ་སྟེ། ལྟ་བའི་དུག་དབྱུང་། བདུད་རྩི་བསྟེན། ལ་དོར་གསུམ། སྒོམ་པ་སྟེ་བསམ་གཏན་གྱི་དུག་དབྱུང་། བདུད་རྩི་བསྟེན། ལ་དོར་གསུམ་སྟེ་ཞིབ་པར་གདམས་ངག་དྲུག་གི་སྐབས་ཀྱི་གཞུང་བཤད་ལས་ཤེས་པར་བྱའོ། །འོ་ན་བསྲུང་བ་སུམ་ཅུ་དང་། གདམས་ངག་དྲུག་པོ་འདི་དག་རྡོ་རྗེའི་ཚིག་རྐང་ལས་འཁོར་འདས་ཐུན་མོང་བའི་ལམ་གྱི་སྐབས་སུ་བསྟན་ན། གཞུང་འདིར་འཇིག་རྟེན་པའི་ལམ་གྱི་སྐབས་སུ་བསྟན་པའི་རྒྱུ་མཚན་ཅི་ཡིན་སྙམ་ན། གོང་དུ་བཤད་པར་ཁས་བླངས་པ་དེ་འདིར་བཤད་པར་བྱ་སྟེ། རྡོ་རྗེའི་ཚིག་རྐང་ལས་ནི་འཁོར་འདས་ཐུན་མོང་བའི་ལམ་འབྲས་བུ་དང་བཅས་པ་ཡོངས་སུ་རྫོགས་པར་སྟོན་པ་ལ་གེགས་སེལ་རྣམས་ཀྱང་སྟོན་དགོས་པའི་དབང་དུ་བྱས་ལ། གཞུང་འདིར་ནི་ཉམས་སུ་ལེན་པའི་ཚེ་གེགས་སེལ་དེ་དག་ཐམས་ཅད་ཀྱང་འཇིག་རྟེན་པའི་ལམ་ཁོ་ནར་དགོས་ཀྱི། འདས་པའི་ལམ་ལ་དོན་མེད་དོ་སྙམ་དུ་དགོངས་ནས་སྐབས་འདིར་དྲངས་ཏེ་བཤད་པ་ཡིན་པས་དོན་གྱི་དགོངས་པ་གཅིག་ཏུ་ཤེས་པར་བྱའོ། །རྣམ་པ་གཅིག་ཏུ་ན་གེགས་སེལ་རྣམས་སྐབས་འདིར་ཕྱོགས་གཅིག་ཏུ་བསྟན་པར་བཞེད་ནས་གཉིས་པོའང་འདིར་གསུངས་པ་ཡིན་པས། རྡོ་རྗེའི་ཚིག་རྐང་ནས་བཤད་པའི་གེགས་སེལ་ཐམས་ཅད་སྐབས་འདིར་མ་འདུས་པ་མེད་པར་ཤེས་པར་བྱའོ། །བཞི་པ་དཀྱིལ་འཁོར་འཁོར་ལོའི་གེགས་སེལ་ནི། ཐིག་ལེ་འབར་དང་གཡོ་དང་བརྟན་པ་དང་། །རྣམ་གསུམ་དག་གིས་བདེ་སྟོང་མཆོག་ཏུ་འགྱུར། །འབར་བའི་ཚེ་ན་ཐིག་ལེའི་ཟུག་འབྱུང་སྟེ། །ཁ་སྦྱོར་དག་ལ་བརྟན་པར་གྱུར་པ་དང་། །དུད་འགྲོའི་འགྱུར་བ་བཞི་ཡིས་བཟློག་པ་ཡིས། །ལུས་ལ་ཐིག་ལེ་གཡོ་བ་མེད་པར་བྱ། །ཀུན་ཏུ་ཁྱབ་ཅིང་བརྟན་པར་བྱ་བའི་ཕྱིར། །ལུས་ལ་གཏུན་ཤིང་འཁོར་ལོ་བསྐོར་བ་དང་། །ཡན་ལག་བཞི་ཡིས་རླུང་གི་ཞགས་པ་འཕང་། །བུ་ཆུང་སྤྱོད་ལམ་དག་གིས་བརྟན་པར་འགྱུར། །ཞེས་པ་སྟེ། དཀྱིལ་འཁོར་འཁོར་ལོའི་ལམ་གྱི་ཚེ་ཐིག་ལེ་འབར་བ་དང་། གཡོ་བ་དང་། བརྟན་པ་དང་གསུམ་གྱིས་བདེ་སྟོང་མཆོག་ལ་སྦྱར་བར་འགྱུར་རོ། །ཇི་ལྟར་ཞེ་ན། ཕྱག་རྒྱའི་གཟུགས་ལ་བལྟ་བ་ནས་སྒྲ་ལ་བསླབ་པའི་བར་རྣམ་པ་སྣ་ཚོགས་པའི་སྐད་ཅིག་མ་དང་རྡོ་རྗེ་དང་པདྨ་མཉམ་པར་སྦྱོར་བ་རྣམ་པར་སྨིན་པའི་སྐད་ཅིག་མ་ཉིད་ཀྱི་ཚེ་ཐིག་ལེ་འབར་བའི་དྲོད་འབྱུང་སྟེ། དེའི་ཚེ་ཐིག་ལེའི་ཟུག་འབྱུང་། བསྲུབས་པ་ལ་སོགས་པའི་སྒོ་ནས་ཕྱག་རྒྱ་རྣམ་པར་ཉིད་པའི་སྐད་ཅིག་མ་ལ་ནི་ཐིག་ལེ་གཡོ་བའི་དྲོད་འབྱུང་ལ། དེའི་ཚེ་ཁ་སྦྱར་དག་ལ་བརྟན་པར་གྱུར་ནས། གླང་ཆེན་ཧིཾ་དང་སྟག་མོའི་ངུར། གཅན་གཟན་སྐྱུག་དང་ཝ་ལྟར་བསྣོམས་པ་སྟེ། དུད་འགྲོའི་འགྱུར་བ་བཞི་ཡིས་བཟློག་པ་ཡིས། ལུས་ལས་ཕྱི་རོལ་དུ་ཐིག་ལེ་གཡོ་བ་མེད་པར་བྱའོ། །སྐད་ཅིག་བཞི་པ་ལ་ཐིག་ལེ་ལུས་ཀུན་ལ་ཁྱབ་ཅིང་ཐིག་ལེ་བརྟན་པའི་དྲོད་སྐྱེ་བར་བྱ་བའི་ཕྱིར་ལུས་ལ་གཏུན་ཤིང་འཁོར་ལོ་བསྐོར་བ་སྟེ། ལག་པ་རྐེད་པར་འཇུས་ཏེ་སྐྱིལ་ཀྲུང་བཅས་ནས་རོ་སྟོད་སྒུལ་བའོ། །ཡན་ལག་བཞི་ཡིས་རླུང་གི་ཞགས་པ་འཕང་བ་ནི། བརྐྱང་བསྐུམ་དྲག་ཏུ་བྱེད་པའོ། །བུ་ཆུང་སྤྱོད་ལམ་ནི་ཕར་འགྱེལ་ཚུར་འགྱེལ་བྱེད་པ་སྟེ་དེ་དག་གི་སྒོ་ནས་ཐིག་ལེ་བརྟན་པར་བྱའོ། །གཉིས་པ་གེགས་སེལ་མདོར་བསྡུས་ཏེ་བསྟན་པ་ལ་གཉིས་ཏེ། ཉམས་ལེན་བསྡུས་ཏེ་བསྟན་པ་དང་། དེའི་གེགས་སེལ་ཚུལ་བསྡུས་ཏེ་བསྟན་པའོ། །དང་པོ་ནི། རྗེ་བཙུན་དཔལ་ལྡན་བིརྺ་པ་ཡི་གཞུང་། །དབང་བཞིའི་ལམ་ལ་ལྟ་གྲུབ་བརྒྱད་ཀྱིས་བསྡུས། །ཞེས་པ་སྟེ། རྗེ་བཙུན་བིརྺ་པའི་གཞུང་གི་དོན་མདོར་བསྡུས་ན་བུམ་དབང་ལ་སོགས་པའི་དབང་བཞིས་སྣོད་རུང་དུ་བྱས་ནས་བསྐྱེད་རིམ་ལ་སོགས་པའི་ལམ་བཞི་བསྒོམས་པ་ལས་འཇིག་རྟེན་པའི་ལམ་དུ་ངོ་བོ་ཉིད་གསུམ་ལ་སོགས་པའི་ལྟ་བ་བཞི་འཆར། འདས་པའི་ལམ་དུ་གྲུབ་མཐའ་བཞི་སྙོགས་པ་སྟེ། ལམ་བསྒོམ་པའི་དགོས་པ་ནི་ལྟ་གྲུབ་བརྒྱད་པོ་འདི་དག་གིས་བསྡུས་པ་ཡིན་ནོ། །གཉིས་པ་ནི། སྐྱོན་རྣམས་ཡོན་ཏན་དག་ཏུ་བླང་བ་དང་། །བར་ཆད་དངོས་གྲུབ་དག་ཏུ་བླང་བར་གྱིས། །གང་ཡང་ཉམས་ཀྱི་སྣང་བར་མཁྱེན་བགྱིས་ན། །བདུད་དང་གོལ་ས་རང་གྲོལ་དག་ཏུ་འགྱུར། །ཞེས་པ་སྟེ། གེགས་སེལ་མདོར་བསྡུས་པ་ནི། ཉོན་མོངས་ལ་སོགས་པའི་སྐྱོན་རྣམས་རང་གི་ལམ་དང་རྟེན་འབྲེལ་དུ་ཤེས་པས་ཡོན་ཏན་དག་ཏུ་བླང་བ་དང་། ལྟེ་བའི་ཀྵ་ཡིག་ཏུ་རླུང་སེམས་འདུས་པས་སྲིན་པོས་བརྡེག་པ་ལ་སོགས་པའི་བར་ཆད་ཀྱི་རྣམ་པ་རྣམས་དངོས་གྲུབ་དག་ཏུ་བླང་བར་གྱིས། དེ་ལྟ་བུའི་ཚུལ་གྱིས་དེ་བཞིན་གཤེགས་པའི་སྐུ་མཐོང་བ་ལ་སོགས་པ་ལ་ཡང་རེ་བ་མི་བྱ། འཇིགས་ཤིང་ཉ་མ་ང་བ་ལ་སོགས་པ་ལ་ཡང་དོགས་པ་མི་བྱ་བར་གང་ཡང་ཉམས་ཀྱི་སྣང་བར་ཤེས་པར་བྱས་ན་བདུད་དང་གོལ་ས་རང་གྲོལ་དུ་འགྱུར་རོ་ཞེས་པའོ། །གསུམ་པ་བརྩོན་པས་ཉམས་སུ་བླངས་ན་གྲུབ་མཐའ་སྙོགས་པར་བསྟན་པ་ནི། ཐེ་ཚོམ་མེད་པར་བརྩོན་པ་ཆེར་མཛད་ན། །གྲུབ་མཐའ་སྙོགས་པར་འགྱུར་རོ་མི་མཆོག་ཁྱོད། །ཅེས་ཏེ་གོ་སླའོ། །འོ་ན་གཞུང་འདིར་འཁོར་ལོ་བསྐོར་བ་འཇིག་རྟེན་ལས་འདས་པའི་ལམ་ཅིའི་ཕྱིར་མ་བསྟན་སྙམ་ན། དེ་ལ་སྤྱིར་བླ་མ་ན་མི་འཕོ་བ་དང་། འཕོ་བ་གཉིས་ལས། འཇིག་རྟེན་པའི་ལམ་དུ་ནི་བླ་མ་ན་མི་འཕོ་བ་སྟེ། ཐོག་མར་དབང་བཞི་བསྐུར་མཁན་གྱི་བླ་མས་ལམ་བཞི་གེགས་སེལ་དང་བཅས་པ་བསྟེན་པ་ཉམས་སུ་བླངས་པས་ཁམས་འདུས་པ་གསུམ་མཐར་ཕྱིན་ནས་གྲུབ་མཐའ་སྙོགས་པ་ཡིན་ལ། འདས་པའི་ལམ་དུ་ནི་བླ་མ་ན་འཕོ་བ་སྟེ། སྐུ་བཞི་སོ་སོས་ལམ་བཞི་སོ་སོར་བསྟན་པ་གཉིས་ལས་འདིར་ནི་དང་པོའི་དབང་དུ་བྱས་པ་སྟེ། རེ་ཞིག་འདི་ཙམ་གྱིས་དགོས་པ་འགྲུབ་བོ་སྙམ་དུ་དགོངས་སོ། །གཉིས་པ་རྒྱས་པར་མ་བཀྲོལ་བའི་རྒྱུ་མཚན་ནི། བདག་ལྟ་འདུ་བའི་ནང་ཞུགས་ནས། །སྒྲུབ་ལ་དད་ཀྱང་ལྷོད་པར་འགྱུར། །རྗེ་བཙུན་བིརྺ་པ་ཡི་གཞུང་། །ཡི་གེར་བཀོད་པ་དག་ཀྱང་མེད། །རང་གི་སེམས་ལ་སྣང་བ་ཙམ། །བཀོད་ན་དམ་པའི་བཀའ་ལས་འདས། །གྲོགས་ཀྱི་བཀའ་སྩལ་བཅག་གྱུར་ཀྱང་། །མཁའ་འགྲོས་དཔང་མཛོད་བཟོད་པར་གསོལ། །ཞེས་པ་སྟེ་གོ་སླའོ། །གསུམ་པ་ཞུ་བ་པོ་གང་གི་ངོར་མཛད་པ་ནི། རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོ་དཔལ་ས་སྐྱ་པ་ཆེན་པོ་ལ། མདོ་སྨད་ཀྱི་དགེ་སློང་རྡོ་རྗེ་འཛིན་པ་བྱང་ཆུབ་སེམས་དཔའ་ཆེན་པོ་ཨ་སེང་གིས་ཞུས་ཏེ་དོན་བསྡུས་པ་འདི་མཛད་དོ། །ཞེས་པའོ། །མདོར་ན་གཞུང་འདི་དག་གི་དོན་ནི། སྣང་བ་གསུམ་གྱིས་ཉམས་ལེན་གྱི་གཞི་བྱས། ཉམས་ལེན་གྱི་དངོས་གཞི་རྒྱུད་གསུམ་གྱིས་བྱས། ཚད་མ་བཞི་དང་སྙན་བརྒྱུད་བཞིས་ཉམས་ལེན་གྱི་སྒྲོ་འདོགས་གཅོད། རྟེན་འབྲེལ་ལྔས་ལམ་གྱི་ས་མཚམས་བཅད་དེ། དེ་ལྟར་ཉམས་སུ་ལེན་པའི་ཚེ། ཁམས་འདུས་པ་གསུམ་གྱི་སྐབས་སུ་ཤེས་པས་ཕན་འདོགས་པའི་མན་ངག་བདུན་དང་། གེགས་སེལ་གྱི་སྐོར་རྣམས་ལ་མཁས་པར་བྱས་ནས་ཉམས་སུ་བླངས་པས་གྲུབ་མཐའ་སྙོགས་པར་འགྱུར་རོ་ཞེས་པའི་དོན་ནོ།། །།རྣལ་འབྱོར་དབང་ཕྱུག་གསུང་ངག་གི །རྣམ་འགྲེལ་བསྡུས་པའི་རྣམ་བཤད་འདི། །རང་དང་གཞན་ལ་ཕན་པའི་ཕྱིར། །བློ་ལྡན་བསོད་རྣམས་སེང་གེས་སྦྱར། །དམ་པའི་གསུང་ལ་བརྟེན་པའི་ཕྱིར། །ཉེས་པ་མེད་སྙམ་དེ་ལྟ་ནའང་། །བདག་བློ་དམན་ཕྱིར་ཉེས་སྲིད་གང་། །བླ་མ་མཁའ་འགྲོས་བཟོད་པར་མཛོད། །འདི་བགྱིས་པ་ལས་བྱུང་བ་ཡི། །རབ་དཀར་དགེ་ཚོགས་གདྒཱའི་རྒྱུན། །མཁའ་མཉམ་འགྲོ་བའི་དོན་གྱི་ཕྱིར། །ཀུན་མཁྱེན་རྒྱ་མཚོ་ཆེན་པོར་བསྔོ།། ༈ །།དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་གནས་གྱུར་ཅིག །དགེའོ། །དགེའོ། །དགེའོ།། །། ༈ བལ་ཡུལ་མཆོད་རྟེན་ཉེ་འདབས་ནས་རྒྱལ་ཡོངས་ས་ཆེན་ཞེས་པ་ལས། སློབ་བུ་ཐ་ཤལ་པ་གུ་རུས་སྤེལ་བའོ།།

ལམ་འབྲས་བུ་དང་བཅས་པའི་མན་ངག་གི་བྱུང་ཚུལ་གསུང་ངག་བསྟན་པ་རྒྱས་པའི་ཉི་འོད་ཁ་སྐོང་དང་བཅས་པ།

ལམ་འབྲས་བུ་དང་བཅས་པའི་མན་ངག་གི་བྱུང་ཚུལ་གསུང་ངག་བསྟན་པ་རྒྱས་པའི་ཉི་འོད་ཁ་སྐོང་དང་བཅས་པ་བཞུགས་སོ། །ལམ་འབྲས་བུ་དང་བཅས་པའི་མན་ངག་གི་བྱུང་ཚུལ་གསུང་ངག་བསྟན་པ་རྒྱས་པའི་ཉི་འོད་ཅེས་བྱ་བ། བླ་མ་དམ་པའི་ཞབས་ལ་སྤྱི་བོས་གུས་པས་ཕྱག་འཚལ་ལོ། །དགེ་ལེགས་ཐུགས་རྗེའི་རིན་ཆེན་ཁམས་ལས་གྲུབ། །རྒྱ་ཆེན་མཁྱེན་པའི་དཀྱིལ་འཁོར་རབ་ཏུ་རྒྱས། །རྣམ་དག་ཕྲིན་ལས་འོད་ཟེར་སྟོང་འཕྲོ་བ། །རྗེ་བཙུན་བླ་མ་ནམ་མཁའི་ནོར་བུ་རྒྱལ། །ལམ་མཆོག་མཐར་ཐུག་གསུང་ངག་རིན་པོ་ཆེ། །འཕགས་པའི་ཡུལ་དང་གངས་རིའི་ཁྲོད་དག་ཏུ། །ཇི་ལྟར་བྱུང་དང་བརྒྱུད་པ་སོ་སོའི་སྲོལ། །མ་འདྲེས་གོ་བདེའི་ངག་གིས་བཤད་ཀྱིས་ཉོན། །འདིར་བདེ་བར་གཤེགས་པའི་གསུང་རབ་མདོ་སྡེ་དང་རྒྱུད་སྡེ་མཐའ་དག་གི་ཉམས་ལེན་གྱི་གནད་ཕྱོགས་གཅིག་ཏུ་བསྡུས་ནས། སྐལ་ལྡན་གྱི་འགྲོ་བ་ཐམས་ཅད་མཁྱེན་པའི་ས་ལ་འཁྲིད་པར་བྱེད་པའི་ཐབས་ལམ་དང་འབྲས་བུར་བཅས་པའི་མངོན་པར་རྟོགས་པ་མཐའ་དག་ཚང་ལ་མ་ནོར་བར་སྟོན་པ་ནི། རྗེ་བཙུན་བིརྺ་པས་རྣམ་པར་བཀྲལ་བའི་ལམ་རྒྱས་པ་འདི་ཡིན་ནོ། །འདི་འཆད་པ་ལ་གསུམ་སྟེ། ཐོག་མར་མན་ངག་གི་བྱུང་ཚུལ་དང་། བྱུང་བའི་ཆོས་ལ་བཤད་སྒྲུབ་བྱ་ཚུལ། བསྒྲུབ་པ་མཐར་ཕྱིན་ནས་གཞན་དོན་བྱ་ཚུལ་ལོ། །དང་པོ་ལ་གཉིས་ཏེ། རྒྱ་གར་དུ་བྱུང་ཚུལ། དེ་བོད་དུ་བྱུང་ཚུལ་ལོ། །དང་པོ་ལ་སྤྱིར་བསྟན་པ་དར་ཚུལ། ཁྱད་པར་ལམ་སྐོར་དགུ་བྱུང་ཚུལ། བྱེ་བྲག་ཏུ་གསུང་ངག་དར་ཚུལ་ལོ། །དང་པོ་ནི། འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འདི་བསྐལ་པ་དཔག་ཏུ་མེད་པའི་སྔོན་རོལ་དུ་སངས་རྒྱས་སུ་ཟིན་ཡང་། གདུལ་བྱའི་ངོར་འཛམ་བུའི་གླིང་དུ་ཚེ་ལོ་བརྒྱ་པ་ལ་སངས་རྒྱས་པའི་ཚུལ་བསྟན་ནས། གདུལ་བྱ་ཕར་ཕྱིན་ཐེག་པ་ལ་མོས་པ་རྣམས་ལ། བཀའ་དང་པོ་བདེན་པ་བཞི། གཉིས་པ་མཚན་ཉིད་མེད་པ། གསུམ་པ་དོན་དམ་རྣམ་ངེས་ལས་བརྩམས་ཏེ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ཞིང་། གདུལ་བྱ་ཟབ་མོ་རྡོ་རྗེ་ཐེག་པའི་ལམ་ལ་མོས་པ་རྣམས་ལ་བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་བླ་ན་མེད་པ་སྟེ། རྒྱུད་སྡེ་བཞིའི་ཆོས་འཁོར་བསྐོར་བས་གདུལ་བྱ་རྣམས་རང་རང་གི་ལམ་དང་འབྲས་བུ་ལ་བཀོད་ནས་མཐར་གྲོང་ཁྱེར་རྩྭ་མཆོག་གི་ཤིང་སཱ་ལ་ཟུང་གཅིག་གི་ཚལ་དུ་མྱ་ངན་ལས་འདས་པའི་ཚུལ་བསྟན་ནས། དེའི་རྗེས་སུ་དེ་ཉིད་ཀྱི་བསྟན་པ་ཡུན་དུ་གནས་ཏེ་སེམས་ཅན་ལ་ཕན་བདེ་འབྱུང་བ་ཡིན་ནོ། །དེ་ཡང་འབྲས་བུའི་དུས་ལྔ་བརྒྱ་པ་ཕྲག་གསུམ། སྒྲུབ་པའི་དུས་ལྔ་བརྒྱ་པ་ཕྲག་གསུམ། ལུང་གི་དུས་ལྔ་བརྒྱ་པ་ཕྲག་གསུམ་སྟེ་ལྔ་བརྒྱ་པ་ཕྲག་དགུ་རྟགས་ཙམ་འཛིན་པའི་ལྔ་བརྒྱ་པ་ཕྲག་གཅིག་སྟེ་ལྔ་བརྒྱ་པ་ཕྲག་བཅུར་གནས་པར་གསུངས་པ་ལས། འབྲས་བུའི་དུས་ལ་དགྲ་བཅོམ། ཕྱིར་མི་འོང་། ཕྱིར་འོང་། རྒྱུན་ཞུགས་ཐོབ་པ་མང་། སྒྲུབ་པའི་དུས་ལ་ཞི་ལྷག་བསྒོམ་པ་དང་ཚུལ་ཁྲིམས་དང་ལྡན་པ་མང་། ལུང་གི་དུས་ལ་སྡེ་སྣོད་གསུམ་སོ་སོར་སྤྱོད་པ་མང་བར་གསུངས། དེ་ལས་སྔོན་སྐྱེ་དགུའི་བདག་མོ་རབ་ཏུ་བྱུང་བས་ལོ་ལྔ་བརྒྱ་པ་ཕྲག་གཅིག་འགྲིབ་ཏེ། དེའི་ལྷག་མ་རྣམས་ཕལ་ཆེར་རྒྱ་གར་དུ་གནས་པས་སངས་རྒྱས་བྱོན། ཆོས་གསུང་། བཀའ་བསྡུས་པས་བསྟན་པ་དར་བའི་ཡུལ་རྒྱ་གར་དབུས་ཡིན་པས་དེས་ན་ཁྲིམས་གཉིས་ཀ་ཤིན་ཏུ་དར་བར་བྱུང་བ་ཡིན་ཞིང་། དགྲ་བཅོམ་པ་དང་། ཕྱིར་མི་འོང་། ཕྱིར་འོང་། རྒྱུན་ཞུགས་ཏེ་འབྲས་བུ་བཞི་ཐོབ་པ་དང་། བྱང་ཆུབ་སེམས་དཔའ་ཆེན་པོ་རྣམས་དང་། རྒྱན་དྲུག་མཆོག་བརྒྱད་དང་། རྒྱལ་པོ་ཨིནྡྲ་བྷཱུ་ཏི། བྲམ་ཟེ་ཆེན་པོ་ས་ར་ཧ། གྲུབ་ཆེན་ཀུ་ཀུ་རི་པ་ལ་སོགས་པ་མདོ་དང་སྔགས་ཀྱི་ཤིང་རྟའི་སྲོལ་འབྱེད་ཀྱི་མཁས་པ་རྣམས་དང་། གཞན་ཡང་མཁས་པ་དང་གྲུབ་པ་བརྙེས་པའི་སྐྱེས་བུ་དུ་མ་བྱོན་ནས་བསྟན་པ་ཡུན་དུ་གནས་པར་མཛད་པ་ཡིན་ནོ། །གཉིས་པ་ནི། འཕགས་པའི་ཡུལ་གྱི་པཎ་གྲུབ་རྣམས་རྣལ་འབྱོར་བླ་མེད་ཀྱི་གདམས་ངག་ལ་མཆོག་ཏུ་འཛིན་ཅིང་། ཉམས་ལེན་ཡང་བསྐྱེད་རྫོགས་གཉིས་ལ་མཛད་པ་ཤ་སྟག་གོ །རྣལ་འབྱོར་བླ་མེད་ཀྱི་གདམས་ངག་ལ་ཟབ་ཅིང་ཁུངས་ཐུབ་པ་ལམ་སྐོར་དགུ་ཞེས་གྲགས་ཏེ། དེའང་བླ་མ་རྡོ་རྗེ་གདན་པས། ཆུ་བོ་ཆེན་པོ་གྱེན་ལ་བཟློག །ཆང་ལ་ཉི་མ་གཏེང་པར་བཅུག །བིརྺ་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་པའི་སློབ་དཔོན་རྣལ་འབྱོར་དབང་ཕྱུག་གིས་རྩ་རྒྱུད་བརྟག་པ་གཉིས་པ་དང་། སཾ་བུ་ཊི་ལ་སོགས་པའི་རྒྱུད་ལ་བརྟེན་ནས་རྡོ་རྗེ་བདག་མེད་མའི་བཀའ་བཞིན་དུ་ལམ་འབྲས་བུ་དང་བཅས་པའི་མན་ངག་གསལ་བར་མཛད་དོ། །དེ་བཞིན་དུ། ཟླ་བའི་རིགས་ལས་དངོས་གྲུབ་བརྙེས། །པདྨ་ཅན་དང་ལྷན་ཅིག་བཞུགས། །མཚོ་སྐྱེས་རྡོ་རྗེ༞ །བླ་མ་དེ་ལ༞ །ཞེས་བསྟོད་པའི་སློབ་དཔོན་མཚོ་སྐྱེས་རྡོ་རྗེས་བརྟག་གཉིས་ལ་བརྟེན་ནས་སྒྲུབ་ཐབས་མཚོ་སྐྱེས་དང་། མར་མེའི་རྩེ་མོ་ལྟ་བུའི་རྫོགས་རིམ་བརྩམས། དེའི་མན་ངག་བསྐྱེད་རིམ་ཟབ་པའི་ཚུལ་དགུས་ཟབ་པ། བསྙེན་སྒྲུབ་བཞིའི་ཆོ་གའི་ཡན་ལག་ཆ་དབྲི་བ་དང་བཅས་པ་མཛད་དོ། །ཡང་། དགེ་སློང་ལུས་ལ་དངོས་གྲུབ་བརྙེས། །ནགས་ཀྱི་ལྷ་མོས་བདུད་རྩི་ཕུལ། །ཀླུ་སྒྲུབ་སྙིང་པོ༞ །བླ་མ་དེ་ལ༞ །ཞེས་བསྟོད་པའི་སློབ་དཔོན་འཕགས་པ་ཀླུ་སྒྲུབ་ཀྱིས་གསང་བ་འདུས་པའི་རྒྱུད་ཀྱི་རྣམ་སྣང་གི་བྱང་ཆུབ་ཀྱི་སེམས་ལ་བརྟེན་ནས་བྱང་ཆུབ་སེམས་འགྲེལ་བརྩམས། དེའི་དོན་མཆོད་རྟེན་གྱི་དྲུང་དུ་སེམས་ཐག་གཅོད་པའི་མན་ངག་མཛད་དོ། །ཡང་། གདིང་བ་བཏིང་ནས་གདྒཱ་བརྒལ། །སྟག་ལ་ཞོན་ནས་དངོས་གྲུབ་བརྙེས། །ཌོམྦི་ཧེ་རུ་ཀ༞ །བླ་མ་དེ་ལ༞ །ཞེས་བསྟོད་པའི་ཌོམྦི་ཧེ་རུ་ཀས་བརྟག་གཉིས་ལ་བརྟེན་ནས་ལྷན་ཅིག་སྐྱེས་གྲུབ་བརྩམས། དེའི་དོན་ལྷན་ཅིག་སྐྱེས་པ་གསུམ་གྱིས་ལམ་རྫོགས་པ་མཛད་དོ། །ཡང་། རྒྱལ་རིགས་ཨོ་རྒྱན་གནས་ན་བཞུགས། །ལྕམ་སྲིང་གཉིས་ཀྱིས་དངོས་གྲུབ་བརྙེས། །ཨིནྡྲ་བྷཱུ་ཏི༞ །བླ་མ་དེ་ལ༞ །ཞེས་བསྟོད་པའི་རྒྱལ་པོ་ཨིནྡྲ་བྷཱུ་ཏིས་ཡེ་ཤེས་ཐིག་ལེའི་རྒྱུད་ལ་བརྟེན་ནས་དབང་ཡོན་ཏན་རིམ་པ་བརྩམས། དེའི་དོན་ཕྱག་རྒྱས་ལམ་རྫོགས་པའི་རིམ་པ་མཛད་དོ། །ཡང་། ཐར་བུའི་ལུས་ལ་ཤིང་མཁན་རིགས། །མུ་དྲ་མ་དང་དངོས་གྲུབ་བརྙེས། །ཏོག་རྩེ་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་པའི་སློབ་དཔོན་ཏོག་རྩེ་པས་སཾ་བུ་ཊི་ལ་བརྟེན་ནས་བསམ་མི་ཁྱབ་བརྩམས། དེའི་དོན་བསམ་གྱིས་མི་ཁྱབ་པ་ལྔས་ལམ་རྫོགས་པ་མཛད་དོ། །ཡང་། བླ་མའི་བཀའ་བཅག་སྤྱོད་པ་མཛད། །སྲིད་པ་བར་དོར་རྫོགས་སངས་རྒྱས། །ནག་པོ་སྤྱོད་པ་ཞེས་བྱ་བའི། །བླ་མ༞ །ཞེས་བསྟོད་པའི་སློབ་དཔོན་ནག་པོ་སྤྱོད་པས། བདེ་མཆོག་ལ་བརྟེན་ནས་ཨོ་ལ་པ་ཏི་བརྩམས། དེའི་དོན་གཏུམ་མོས་ལམ་རྫོགས་པའི་མན་ངག་མཛད་དོ། །ཡང་། རྒྱལ་རིགས་ཉི་མའི་ཟེར་ལ་གཤེགས། །རིལ་བུ་ས་འོག་མིག་སྨན་སྤྱོད། །ངག་གི་དབང་ཕྱུག༞ །བླ་མ༞ །ཞེས་བསྟོད་པའི་སློབ་དཔོན་ངག་དབང་གྲགས་པས། གསང་འདུས་དང་བརྟག་གཉིས་གཉིས་ཀ་ལ་བརྟེན་ནས། བཞི་པ་སྣང་བ། ཡན་ལག་བདུན་ལྡན། དེ་ཁོ་ན་ཉིད་རིན་པོ་ཆེའི་ཕྲེང་བ་སྟེ་གཞུང་གསུམ་བརྩམས། དེའི་དོན་ཕྱག་རྒྱ་ཆེན་པོ་ཡི་གེ་མེད་པའི་གདམས་ངག་མཛད་དོ། །ཡང་། དཀའ་ཐུབ་བོར་ནས་སྤྱོད་པ་མཛད། །ལྟ་སྟངས་མཛད་ཅིང་དངོས་གྲུབ་བརྙེས། །ནག་པོ་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་པའི་རྣལ་འབྱོར་པ་ནག་པོ་ཨུ་ཙི་ཏྲ་འཆི་བ་མེད་པས་མ་རྒྱུད་མཐའ་དག་གི་མན་ངག རླུང་བཙན་ཐབས་སུ་དབུ་མར་འཇུག་པ་ཡོན་པོ་བསྲང་བའི་མན་ངག་མཛད་དོ། །འདི་དང་ཨོ་ལ་པ་ཏི་མཛད་མཁན་གྱི་ནག་པོ་པ་གཉིས་མི་གཅིག་པར་བརྒྱུད་པ་ལས་ཤེས་སོ། །དེ་ལྟར་མཛད་མཁན་བརྒྱད་ཀྱིས་ཟེར་ཡང་། དགུས་མཛད་པའི་གདམས་ངག་དགུ་ལ་ལམ་སྐོར་དགུར་གྲགས་སོ། །གསུམ་པ་ནི་དེ་ལྟར་ལམ་སྐོར་དགུའི་ནང་ནས་སློབ་དཔོན་བིརྺ་པའི་ལམ་འདི་དུས་ཇི་ཙམ་ན་བྱུང་སྙམ་ན། སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་ན་འཕགས་པ་ཀླུ་སྒྲུབ་བྱོན་ཏེ་ལོ་དྲུག་བརྒྱའི་བར་དུ་བཞུགས་སོ། །འཕགས་པའི་སྐུ་ཚེ་སྨད་ཀྱི་སློབ་མ་ནི། སློབ་དཔོན་ཨཱརྻ་དེ་བ་ཡིན་ལ། དེའི་སློབ་མ་བིརྺ་པ་ཡིན་ནོ་ཞེས་དམ་པ་རྒྱ་གར་གྱི་མན་ངག་ལས་འབྱུང་ཞིང་སྤྱན་རས་གཟིགས་བརྟུལ་ཞུགས་ཀྱི་དབུ་མའི་འགྲེལ་པར། སློབ་དཔོན་འཕགས་པ་ལྷའི་དབུ་མ་བཞི་བརྒྱ་པ་ལ། སློབ་དཔོན་འདིས་འགྲེལ་པ་མཛད་པར་བཤད་དོ། །ཡང་སངས་རྒྱས་མྱ་ངན་ལས་འདས་ནས་ལོ་དགུ་བརྒྱ་ན་འཕགས་པ་ཐོགས་མེད་བྱོན་པར་ཝན་བརྩེགས་ཀྱིས་བཤད་ལ། ལོ་ནི་བརྒྱ་དང་ལྔ་བཅུར་འཚོ། །ཞེས་འཇམ་དཔལ་རྩ་རྒྱུད་དུ་དགུང་ལོ་ཕྱེད་དང་ཉིས་བརྒྱ་བཞུགས་པར་བཤད། དེའི་སློབ་མ་སློབ་དཔོན་ཆོས་སྐྱོང་ཡིན་པར་མདོ་སྡེ་ས་བཅུ་པའི་བརྒྱུད་པ་ལས་འབྱུང་ངོ་། །དེས་ན་སྟོན་པ་མྱ་ངན་ལས་འདས་ནས་ལོ་སྟོང་དང་ཉི་ཤུ་ཙམ་ལོན་པ་ན་སློབ་དཔོན་འདི་བྱོན་པར་མངོན་ཏེ། དབུ་མ་རང་རྒྱུད་པ་རྣམས་ཀྱི་ལུགས་ལ། ཀླུ་སྒྲུབ་དང་ཡེ་ཤེས་སྙིང་པོ་གཉིས་ཀྱི་བར་ན་ལེགས་ལྡན་བྱེད་དང་། དཔལ་སྦས་གཉིས་ལས་མེད་ལ། ཡེ་ཤེས་སྙིང་པོས་སློབ་དཔོན་འདི་ཕྱོགས་སྔར་བཀོད་པའི་ཕྱིར་ན་སྔར་སྨོས་པའི་དུས་དེ་ཤིན་ཏུ་རིགས་པ་ཡིན་ནོ། །འཇམ་དཔལ་སངས་རྒྱས་ཡེ་ཤེས་དང་། །པདྨ་ཡན་ལག་མེད་པ་དང་། །སྒེག་པ་བཞད་པའི་རྡོ་རྗེ་དང་། །གསུང་གི་མྱུ་གུ་མགྲིན་གསུམ་དང་། །ཨིནྡྲ་བྷུ་ཏི་ལེགས་གསུང་དང་། །ཆོས་སྐྱོང་དང་ནི་དཔལ་སྦས་དང་། །ཡེ་ཤེས་གཤིན་རྗེ་ཡེ་ཤེས་གྲགས། །ཏྲི་པི་ཏྲ་མ་ཆོས་དབང་པོ། །དཔལ་ལྡན་དབང་ཕྱུག་ཟླ་བཟང་དཔལ། །འདི་དག་བརྒྱུད་པའི་རིམ་པ་བས། །བདག་གིས་འགྲེལ་པ་འདི་བརྩམས་པས། །འཇམ་དཔལ་གོ་འཕང་ཐོབ་པར་ཤོག །ཞེས་མཚན་བརྗོད་ཀྱི་འགྲེལ་པ་ཟླ་བ་བཟང་པོ་གྲགས་པའི་དཔལ་གྱིས་མཛད་པ་ལས་སོ། །གཟའ་ཡུམ་གྱི་མདོའི་རྒྱུད་པ་ལས་བིརྺ་པའི་དངོས་སློབ་སློབ་དཔོན་ཞི་བ་འཚོ་ཡིན་པར་བཤད་ལ། དེ་ལྟར་ན་ཞི་བ་འཚོས་ལོ་སྟོང་ལྔ་བརྒྱ་དང་གཅིག་ཐུབ་པར་གྲགས་ལ། སློབ་དཔོན་དེ་རྒྱལ་པོ་ཁྲི་སྲོང་ལྡེའུ་བཙན་གྱིས་བསམ་ཡས་ཀྱི་རབ་གནས་ལ་ལུག་གི་ལོར་སྤྱན་དྲངས་ལ། ལོ་དེ་ཉིད་ཀྱི་དཔྱིད་ཟླ་ར་བའི་ཡར་ངོ་ལ་འཁོན་ཀླུའི་དབང་པོ་སྲུང་བ་སོགས་སད་མི་མི་བདུན་རབ་ཏུ་བྱུང་བར་བཤད་པས་དུས་འགྲིགས་པར་སྣང་ངོ་། །དེ་ལྟ་བུའི་སློབ་དཔོན་གནས་བརྟན་ཆོས་སྐྱོང་ཤིང་རྟའི་སྲོལ་འབྱེད་ཆེན་པོ་དེ་ལ། སྤྲུལ་པའི་སྐུ་རྡོ་རྗེ་བདག་མེད་མས་དབང་བསྐུར་ཞིང་། རྒྱུད་སྡེ་རིན་པོ་ཆེ་གདམས་ངག་དང་བཅས་པ་བྱིན་པས་ས་དྲུག་པ་ལ་གནས་པའི་སེམས་དཔའ་ཆེན་པོར་གྱུར་ཏེ། ཕྱིས་སྤྱོད་པ་མཛད་པ་ན་དཔལ་བིརྺ་པར་གྲགས་སོ། །གྲུབ་ཆེན་འདི་ནི་འཕགས་ཡུལ་གྱི་སློབ་དཔོན་ཕྱི་མ་མང་པོས་དཔང་པོ་བྱེད་པ་ཞིག་སྟེ། སློབ་དཔོན་ཐུབ་པས་བྱིན་དང་། གྲུབ་ཐོབ་དཔའ་བོ་འོད་གསལ་དང་། པཎྜི་ཏ་དརྤན་ཨཱ་ཙརྻ་རྣམས་ཀྱིས་འདིའི་མན་ངག་རྣམས་ཁུངས་སུ་དྲངས་ནས་བཤད་པའི་ཕྱིར་རོ། །གྲུབ་ཆེན་དེས་དབང་བསྐུར། རྒྱུད་བཤད། མན་ངག་བྱིན་ཏེ་བྱིན་གྱིས་བརླབས་པ་ནི་ཚེའི་རིག་འཛིན་བརྙེས་པའི་སློབ་དཔོན་ནག་པོ་པ་སྟེ། སློབ་དཔོན་འདིའང་ཤིན་ཏུ་སྤྲོས་མེད་ཀྱི་སྤྱོད་པ་མཛད་པའི་ཚེ། ཤར་ཕྱོགས་ཀྱི་རྒྱལ་པོ་ཞིག་བཙུན་མོའི་ཚོགས་བདུན་ཅུ་རྩ་གཉིས་ལ་ཆགས་ནས་དེས་འཁོར་བར་འཆིང་བར་འདུག་པ་ལ། རྐྱེན་དགེ་བའི་བཤེས་གཉེན་ཞིག་དང་འཕྲད་ན་གྲོལ་བར་འདུག་པ་མཁྱེན་ནས། རྒྱལ་པོ་དེའི་བཙུན་མོའི་ཚོགས་སུ་ཞུགས་པ་དང་། དེ་ཉུག་རུམ་པ་དང་བློན་པོའི་ཚོགས་གཅིག་ནས་གཅིག་ཏུ་བསྲིངས་ཏེ་རྒྱལ་པོའི་སྙན་དུ་བྱུང་བ་དང་། རྒྱལ་པོ་ན་རེ། དེ་ལ་ཆད་པས་ཆོད་ཅིག་ཟེར། དེར་རྒྱལ་པོའི་འཁོར་མིས་ཕྱིན་པ་དང་། སློབ་དཔོན་གཟུང་ཡུལ་འགགས་པའི་སྟོབས་ཀྱིས་ནང་དུ་ཕྱིན་ཙ་ན་ཐོགས་པ་མེད་པར་ཕྱིར་སོང་ངོ་། །ཕྱིར་ཕྱིན་ཙ་ན་ནང་དུ་འོང་བ་ལ་ཕྱི་ནང་གཉིས་ཀ་དམག་གིས་བཀང་བས། སློབ་དཔོན་གཅིག་གཉིས་སུ་སོང་བ་ལས། ཐ་མ་བརྒྱ་ཉི་ཤུ་རྩ་བརྒྱད་དུ་སོང་སྟེ། གང་ལ་བརྡེག་ཆ་མེད་པར་སོང་བ་ལས། རྒྱལ་པོས་གསེར་གྱི་ཅོད་པཎ་ཕུད་དེ་ཞབས་ལ་སྤྱི་བོས་ཕྱག་འཚལ་ཏེ། རྗེས་སུ་གཟུང་བར་ཞུས་པས་ལུས་པོ་རིམ་གྱིས་བསྡུས་ཏེ། རྩ་བའི་སྐུ་ལུས་གཅིག་ཏུ་གྱུར་ནས་རྒྱལ་པོ་དེ་རྗེས་སུ་བཟུང་། རིག་པ་མཁས་པས་སེམས་མ་རྟོགས་པས་ཐ་སྙད་མཁན་ལ་ངོ་མཚར་མེད། །སྲིན་བྱས་རང་གི་གཟུགས་མ་མཐོང་བས་གཞན་མཐོང་བ་ལ་ངོ་མཚར་མེད། །ཨེ་མ་མཁའ་ལ་འགྲོ་བའི་བྱ་དེ་ལམ་དང་རྗེས་ལ་དམིགས་མི་འགྱུར། །བདེ་ཆེན་དེ་བཞིན་ཉིད་འདི་ཐ་སྙད་སྒྲས་མི་མཚོན། །ཨེ་མ་མཁས་པ་སྙིང་རེ་རྗེ། །རང་ལ་ཡོད་ནས་གཞན་དུ་འཚོལ། །བུ་ཤི་བ་ཡི་མྱ་ངན་བཞིན། །དཔག་མེད་བསྒྲུབས་ཀྱང་འགྲུབ་མི་འགྱུར། །ཕྱག་རྒྱ་ཆེན་པོ་རང་ལ་ལྷུན་གྱིས་གྲུབ་པ་སྟེ། །བདེ་ཆེན་མི་བསམ་འབད་མེད་རིག་པ་ངང་ལ་ཞོག །ཆད་པར་མི་འགྱུར་རིག་པ་ངང་གིས་ཉམས་སུ་མྱོང་། །རྟག་པར་མི་འགྱུར་མངོན་ཞེན་མེད་པར་ཟུང་དུ་ཆུད། །ཅེས་ཚིགས་བཅད་དེ་རྣམས་གསུངས་པས་རྒྱལ་པོ་ལ་རྟོགས་པ་ཁྱད་པར་ཅན་སྐྱེས་ནས། འཁོར་དང་བཅས་པ་གྲོལ་བར་བྱས་སོ་ཞེས་ཞ་མ་ལུགས་ཀྱི་གཞུང་བཤད་སྤང་རྗེ་ཉི་མ་གྲགས་ཀྱིས་མཛད་པ་ལས་འབྱུང་ངོ་། །དེས་གྲུབ་ཆེན་ཌཱ་མ་རུ་པ་ལ་བྱིན་གྱིས་བརླབས་ཤིང་གདམས་ཏེ། སློབ་དཔོན་འདིས་ཀྱང་མུ་སྟེགས་འདུལ་བའི་དོན་དུ་སྨྱོན་པའི་བརྟུལ་ཞུགས་མཛད་ནས་ཕྱག་གཡས་པས་སྟག་མི་བཟན་གྱི་མགྲིན་པ་ནས་བཟུང་། གཡོན་པས་མུ་སྟེགས་ཀྱི་རྒྱལ་པོའི་སྐྲ་ནས་བཟུང་སྟེ། ཁུར་དུ་ཁུར་ནས་བྱོན་པས་མུ་སྟེགས་ཀྱི་འཁོར་ལྔ་བརྒྱ་དང་བཅས་པ་ཕྱི་བཞིན་འབྲེང་ཞིང་གུས་འདུད་བྱས་ནས། དེ་ཐམས་ཅད་སངས་རྒྱས་པའི་བསྟན་པ་ལ་བཀོད་དོ་ཞེས་འབྲོམ་ལུགས་ལས་འབྱུང་ངོ་། །སློབ་དཔོན་དེས་གྲུབ་ཆེན་ཨ་ཝ་དྷཱུ་ཏཱི་པ་ལ་གདམས་ཏེ། སློབ་དཔོན་འདི་ཡང་བྷུ་སུ་ཀུ་བའི་སྤྱོད་པ་སྐྱོང་ཞིང་། སྐུ་གཅེར་བུར་བཞུགས་པ་ལ་ཝ་ར་ཎཱ་སཱིའི་བྱིས་པ་ལྔ་བརྒྱས་སྐུ་ལ་ཅོ་འདྲི་ཞིང་རྩེད་མོ་རྩེ་བས་འགྲོ་བ་མང་པོའི་དོན་མཛད་དོ། །དེ་ལྟར་ན་ནག་པོ་པ། ཌཱ་མ་རུ་པ། ཨ་ཝ་དྷཱུ་ཏཱི་པ་སྟེ་གསུམ་པོ་འདིས་དེ་ཁོ་ན་ཉིད་རྟོགས་པར་རྗེ་བཙུན་གྱིས་བཤད་པས། ས་དང་པོ་ཡན་ཆད་ལ་གནས་པའི་འཕགས་པར་གྲུབ་བོ། །དེས་གྲུབ་ཆེན་ག་ཡ་དྷ་ར་ལ་གདམས་ཏེ། ཀྱེ་རྡོ་རྗེའི་དཀྱིལ་འཁོར་དུ་དབང་བསྐུར་བ་ཐོབ་ནས་ནུབ་གསུམ་དུ་དབང་གི་ཡེ་ཤེས་བསྐྱངས་པས་སྦྱོར་ལམ་ཆོས་མཆོག་ཆེན་པོའི་ཏིང་ངེ་འཛིན་སྐྱེས། ཌཱ་མ་རུ་བར་སྣང་ལ་བཞག་པས་རང་འཁྲོལ་དུ་བྱུང་བ་དང་། གདུགས་ཡུ་བ་མེད་པ་ནམ་མཁའ་ལ་བཞག་པས་རང་འཁོར་དུ་བྱུང་བ་སོགས་ཀྱི་ཡོན་ཏན་དཔག་ཏུ་མེད་པ་ཡོད་དོ་ཞེས་འབྲོམ་ལུགས་སུ་འབྱུང་ངོ་། །གསང་འདུས་འགོས་ལུགས་པ་རྣམས་སློབ་དཔོན་འདི་དང་རྒྱལ་པོ་སྤྲིན་གྱི་ཤུགས་ཅན་གཉིས་གཅིག་པར་བཞེད་ལ། དེ་ལྟར་ན་བླ་མ་རྡོ་རྗེ་གདན་པས། རྒྱལ་རིགས་རིག་པའི་གནས་ལྔར་མཁས། །ནམ་མཁའི་ལྷ་ལས་ཐེ་ཚོམ་གཅོད། །སྤྲིན་གྱི་ཤུགས་ཅན་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་གྲུབ་ཆེན་བརྒྱད་ཅུ་རྩ་བཞིའི་ནང་དུ་བགྲངས་པས་ཕྱིས་ཏིང་ངེ་འཛིན་བསྒོམས་པས་བདེན་པ་མཐོང་བ་ཡན་ཆད་ཀྱི་རྟོགས་པ་སྐྱེས་པར་ཐེ་ཚོམ་མེད་དོ། །དེ་ལྟར་ན་འཕགས་ཡུལ་གྱི་གྲུབ་ཆེན་དེ་དག་གིས་བཤད་སྒྲུབ་གཉིས་ཀྱི་སྒོ་ནས་གསུང་ངག་རིན་པོ་ཆེ་དར་ཞིང་རྒྱས་པར་བྱས་སོ།། །།གཉིས་པ་བོད་དུ་བྱུང་བའི་ཚུལ་ལ་གསུམ་ལས། དང་པོ་བསྟན་པ་སྤྱིའི་བྱོན་ཚུལ་ལ་གསུམ་གྱི། དང་པོ་བསྟན་པ་སྔ་དར་གྱི་ལོ་རྒྱུས་ནི། འོ་ན་བསྟན་པ་དེ་བོད་དུ་ཇི་ཙམ་ན་བྱུང་སྙམ་ན། བོད་མཐའ་འཁོབ་ཡིན་པས་སྔོན་ཁྲིམས་གཉིས་ཀ་མེད་དེ། ཟས་སུ་རི་དྭགས་ཀྱི་ཤ་ཟ། པགས་པ་གོས་སུ་གོན། དགེ་སྡིག་གི་བྱེ་བྲག་གང་ཡང་མི་ཤེས་ཤིང་། རང་དགར་སིལ་བུར་གནས་པས་ཡུན་རིང་པོར་ཆོས་ཀྱི་མིང་ཙམ་ཡང་མ་བྱུང་ངོ་། །བོད་འདིར་གང་ལས་འཕེལ་སྙམ་ན། སྔོན་རྒྱ་གར་དུ་ཁྱབ་འཇུག་དང་འཐབ་དཀའ་འགྲས་ཏེ། ཁྱབ་འཇུག་གིས་སྐྱབས་སེང་གི་ཕྱོགས་བྱས་ཏེ་གཡུལ་བྱས་པ་ན། སྲིད་སྒྲུབ་ཀྱིས་ཁོ་བོས་ཉེ་དུའི་ཚོགས་གསོད་མི་ནུས་ཞེས་སྨྲས་པ་དང་། ཁྱབ་འཇུག་གིས། གང་གིས་མི་ནི་གསད་པ་དང་། །གང་ཞིག་གསོད་པར་བྱེད་པ་དག །དེ་དག་གཉིས་ཀར་མི་རིགས་ཏེ། །གསད་དང་གསོད་པ་ཡོད་མིན་ཏེ། །རིགས་དང་འདུལ་བ་ཕུན་སུམ་ཚོགས། །བྲམ་ཟེ་བ་གླང་གླང་པོ་དང་། །ཁྱི་དང་སྨེ་ཤ་ཅན་དག་དང་། །མཁས་པ་རྣམས་ནི་མཉམ་པར་བལྟ། །ཞེས་སོགས་མེད་ལྟའི་ཚིག་དང་། གཟུགས་སྣ་ཚོགས་པས་བསླུས་ནས། སྲིད་སྒྲུབ་ཀྱི་ཁ་ལོ་ཁྱབ་འཇུག་གིས་བྱས་ཏེ། གཡུལ་བཀྱེ་བས་འཐབ་དཀའ་རིགས་དཔུང་ཚོགས་བཅོ་བརྒྱད་དང་བཅས་པ་བརླག་པར་བྱས་སོ། །དེའི་ཚེ་རུ་པི་ནི་ཞེས་པ་རྒྱལ་པོ་དཔུང་ཚོགས་དང་བཅས་པ་བུད་མེད་ཀྱི་ཆས་སུ་བྱས་ཏེ་བྲོས་ནས། རི་ཁ་བ་ཅན་དུ་གནས་པའི་རིགས་ལ་དེང་སང་ཡང་བོད་ཅེས་གྲགས་པ་ཡིན་ནོ་ཞེས་ལྷ་ལས་ཕུལ་བྱུང་གི་འགྲེལ་བ་ཤེས་རབ་གོ་ཆས་བྱས་པ་ལས་བཤད་དོ། །དེ་ལྟ་བུའི་བོད་འདིར་ལྷ་མོ་དྲི་མ་མེད་པའི་འོད་ལུང་བསྟན་པའི་མདོར། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ་ཞེས་ལུང་བསྟན་པ་ལྟར། ལོ་དེ་ཙམ་ན་བསྟན་པའི་དབུ་བརྙེས་ནས། རྒྱལ་མེས་དབོན་རྣམ་གསུམ་གྱི་རིང་ལ་དམ་པའི་ཆོས་ཀྱི་དབུ་བརྙེས། སྲོལ་བཏོད། དར་ཞིང་རྒྱས་པར་མཛད་ཅེས་དེང་སང་གི་བར་དུ་གཏམ་དུ་གྲགས་པ་ཡིན་ནོ། །ཚུལ་ཇི་ལྟར་ན། ལྷ་ཐོ་ཐོ་རི་གཉན་བཙན་གྱི་ཕོ་བྲང་གི་སྟེང་དུ་མདོ་ཟ་མ་ཏོག་བཀོད་པ། གསེར་གྱིས་བྲིས་པའི་པང་ཀོང་ཕྱག་བརྒྱ་པ། གསེར་གྱི་མཆོད་རྟེན་ཁྲུ་གང་པ། ཙིནྡྷ་མ་ཎིའི་སྐོས་ཕོར་རྣམས་ཕྱག་ཏུ་བྱུང་བ་ལས་གང་ཡིན་ངོ་མ་ཤེས་ནས་ཡིད་དུ་འོང་བས་མིང་གཉན་པོ་གསང་བ་ཞེས་བཏགས་ཏེ། ཕྱག་མཆོད་བྱས་པས་རྒྱལ་སྲིད་མངའ་ཐང་ཆེར་རྒྱས་ཏེ་འཕེལ་བས་དམ་པའི་ཆོས་ཀྱི་དབུ་བརྙེས་སོ། །དེ་ནས་རྒྱལ་རབས་གཉིས་ན་སྲོང་བཙན་སྒམ་པོའི་རིང་ལ་རྒྱ་གར་གྱི་ཡི་གེ་པ་མཁས་པ་ལི་བྱིན་གདན་དྲངས་ནས། གླང་ཁམ་པ་གོ་ཆ་དང་ཐོན་མི་སཾ་བྷོ་ཊ་གཉིས་ཀྱིས་བོད་ཀྱི་ཡི་གེ་བརྩམས། སྐད་ལ་སྐད་དོད་བཙལ་ཏེ། དམ་པའི་ཆོས་བསྒྱུར་དུ་བཏུབ་མི་བཏུབ་བལྟ་བའི་ཕྱིར་དུ་སྒྲུང་ལ་སོགས་པ་བསྒྱུར་བས་བཏུབ་པར་གོ་ནས། མདོ་ཟ་མ་ཏོག པདྨ་དཀར་པོ། ཙིནྡྷ་མ་ཎི། འདུས་པ་རིན་པོ་ཆེའི་ཏོག་དང་། རྒྱལ་པོ་མདོ་ལྔ་ལ་སོགས་པ་མང་དུ་བསྒྱུར། ལྷ་ཁང་མང་དུ་བཞེངས། ཆོས་དགེ་བ་བཅུ་སྤེལ་ཞིང་གཏན་ཁྲིམས་རྣམ་པ་ལྔ་བཅས། བཤད་ཉན་གྱི་སྲོལ་དང་ཆོས་གྲྭ་མང་དུ་བཙུགས་ནས་དམ་པའི་ཆོས་ཀྱི་སྲོལ་བཏོད། ཕྱིས་གདུང་རབས་ལྔ་ན་ཆོས་དར་བར་ལུང་བསྟན་ཏོ། །དེ་ནས་གདུང་རབས་ལྔ་ལོན་པ་ནི་རྒྱལ་པོ་ཁྲི་སྲོང་ལྡེའུ་བཙན་བྱོན་ནས། དེའི་རིང་ལ་སློབ་དཔོན་ཞི་བ་འཚོ་དང་པདྨ་གདན་དྲངས་ནས། སློབ་དཔོན་པདྨས་བོད་ཀྱི་ལྷ་འདྲེ་གདུག་པ་ཅན་རྣམས་བཏུལ། བསམ་ཡས་བཞེངས་པའི་ས་ཆོག་མཛད། སློབ་དཔོན་ཞི་བ་འཚོས་རབ་གནས་མཛད། གཞན་ཡང་པཎྜི་ཏ་སངས་རྒྱས་གསང་བ་དང་། མཁན་པོ་དཱ་ན་ཤཱི་ལ་དང་། དྷརྨཱ་ཀཱིརྟི། ཀཱ་མ་ལ་ཤཱི་ལ། བི་མ་ལ་མི་ཏྲ་དང་། ཤི་ལེནྡྲ་བོ་དྷི་ལ་སོགས་པ་གདན་དྲངས་ནས། གཞོན་ནུ་བློ་གསལ་བ་རྣམས་ལ་སྒྲ་དང་ལོ་ཙཱ་སློབ་ཏུ་བཅུག་པ་ལས། ཐོག་མར་ལོ་ཙཱ་བ་སད་མི་མི་བདུན་བྱ་བ་བྱུང་སྟེ། དེ་ལས་རྒན་གསུམ་ནི། དབས་རཏྣ་རཀྵི་ཏ་རིན་ཆེན་སྲུང་བ་ཞེས་བྱ་བ་བོད་ཡུལ་དུ་བཙུན་པ་བྱུང་བ་ལ་སྔ་བ། མཁན་པོ་བོ་དྷི་ས་ཏྭ་སྐུ་གཤེགས་ནས་འདིས་མཁན་པོ་བྱས་པ་ཡིན་ནོ། །ཛྙཱ་ནཱིནྡྲ་རཀྵི་ཏ་ཡེ་ཤེས་དབང་པོ་སྲུང་བ་སྟེ། དམ་པའི་ཆོས་འབྱིན་པའི་མཁན་པོ་ཆེན་པོ་བོད་ལ་སྐུ་དྲིན་ཆེ་བ་ཡིན་ཞིང་། སངས་རྒྱས་ཀྱིས་ཀྱང་བྱང་ཆུབ་སེམས་དཔའ་རྟ་སྐད་ཅེས་པར་ལུང་བསྟན་པ་ཐོབ་པ་ཡིན་ནོ། །རཏྣཱིནྡྲ་རཀྵི་རིན་ཆེན་དབང་པོ་སྲུང་བ་སྟེ་གསུམ་མོ། །བར་མ་ནི། གླང་ཁམ་པ་སུ་ག་ཏ་ཝརྨ་རཀྵི་ཏ་བདེ་བར་གཤེགས་པའི་གོ་ཆ་སྲུང་བ་ཞེས་བྱའོ། །གཞོན་གསུམ་ནི། དཔའ་གོར་བཻ་རོ་ཙ་ན་རཀྵི་ཏ་རྣམ་པར་སྣང་མཛད་སྲུང་བ་ཞེས་བྱ་བ་དང་། འཁོན་ནཱ་ག་ཨིནྡྲ་རཀྵི་ཏ་ཀླུའི་དབང་པོ་སྲུང་བ་ཞེས་བྱ་བ་དང་། རྩངས་དེ་བཻནྡྲ་རཀྵི་ཏ་ལྷའི་དབང་པོ་སྲུང་བ་གསུམ་མོ། །སད་མི་མི་བདུན་ལ་སྐ་བ་ཤྲཱི་ཀཱུ་དི་རཀྵི་ཏ་དཔལ་བརྩེགས་སྲུང་བ་ལ་སོགས་པ་ལོ་ཙཱ་བ་ཆེ་བ་བརྒྱ་རྩ་བརྒྱད་ཀྱིས་བློ་སྦྱངས་ལ། དེ་དག་ལ་ཅོག་རོ་ཀླུའི་རྒྱལ་མཚན་ལ་སོགས་པ་ལོ་ཙཱ་བ་སྟོང་རྩ་བརྒྱད་ཀྱིས་བློ་སྦྱོང་མཛད་དོ་ཞེས་སྔོན་གྱི་བཀའ་ཆེམས་ཀྱི་ཡི་གེ་རྙིང་པ་ལས་བྱུང་ངོ་། །དེ་རྣམས་ཀྱིས་སྒྲ་སྒྱུར་དང་། ཞུ་ཆེན་དང་། མཆན་བུའི་ལོ་ཙཱ་བྱས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མདོ་སྡེ་མང་པོ་དང་། རྣམ་སྣང་མངོན་བྱང་ལ་སོགས་པ་བྱ་སྤྱོད་ཀྱི་རྒྱུད་དང་། དེ་ཉིད་འདུས་པ་ལ་སོགས་པ་རྣལ་འབྱོར་གྱི་རྒྱུད་ལ་སོགས་པ་སྔགས་ཅི་རིགས་པ་དང་། སྒྲུབ་ཐབས་མང་དུ་བསྒྱུར། དེ་ནས་བཟུང་སྟེ་དམ་པའི་ཆོས་དར་ཞིང་རྒྱས་པར་མཛད་དོ། །ཁྲི་སྲོང་ལྡེའུ་བཙན་ལ་སྲས་བཞི་བྱུང་བའི་ཆེ་བ་གསུམ་གྲོངས། ཆུང་ཤོས་ཁྲི་ལྡེ་སྲོང་བཙན་སད་ན་ལེགས་འཇིང་ཡོན་དུ་གྲགས་པ་དེས་དཀར་ཆུང་ལྷ་ཁང་བཞེངས། པཎྜི་ཏ་བི་མ་ལ་མི་ཏྲ། ཀཱ་མ་ལ་ཤཱི་ལ། ཛྙཱ་ན་སེ་ན། བལ་པོ་ཧཱུྃ་ཀ་ར་རྣམས་བཏེག་སྟེ། འཁོན་ཀླུའི་དབང་པོ་སྲུང་བ། རྨ་རིན་ཆེན་མཆོག ཡེ་ཤེས་སྡེ། བྲན་ཁ་ནམ་མཁའ། རྩངས་དེ་བྱིན་རྣམས་ཀྱིས་ལོ་ཙཱ་བྱས་ཏེ་ཆོས་སྔར་མ་བསྒྱུར་བ་མང་པོ་བསྒྱུར། བསྒྱུར་བ་རྣམས་སྐད་གསར་བཅད་ཀྱིས་བཅོས་ཏེ་གཏན་ལ་ཕབ། ཆོས་གྲྭ་དང་སྒོམ་གྲྭ་མང་དུ་བཙུགས། བོད་འབངས་རྣམས་བདེ་བ་ལ་བཀོད་དེ་དམ་པའི་ཆོས་རྒྱས་པར་བྱས་སོ། །དེ་ལ་སྲས་གཙང་མ། དར་མ། རལ་པ་ཅན་གསུམ་བྱུང་བའི་གཙང་མ་རབ་ཏུ་བྱུང་། དར་མ་རང་རྒྱུད་ངན་པས་སེམས་ཅན་ལ་གནོད་ཀྱིས་དོགས་ནས་རྒྱལ་སྲིད་མ་གཏད་པར། ཁྲི་སྡེ་གཙུག་བརྟན་རལ་པ་ཅན་དུ་གྲགས་པ་དེ་ལོ་བཅུ་གཅིག་པ་ལ་ཡབ་འདས་ནས་དེ་ལ་རྒྱལ་སྲིད་གཏད། དེའི་རིང་ལ་འོ་འཇང་རྡོ་བཞེངས། མཁན་པོ་པྲཛྙཱ་ཝརྨ་དང་། ཛི་ན་མི་ཏྲ་དང་། སུ་རེནྡྲ་བོ་དྷི་ལ་སོགས་པ་མང་པོ་དང་། ལོ་ཙཱ་བ་སྐ་བ་དཔལ་བརྩེགས་དང་། ཅོག་རོ་ཀླུའི་རྒྱལ་མཚན། ཞང་སྣ་ནམ་ཡེ་ཤེས་སྡེ་རྣམས་ཀྱིས་ཆོས་མང་པོ་བསྒྱུར་ཞིང་ཞུས་ཏེ་གཏན་ལ་ཕབ་ནས་དམ་པའི་ཆོས་ཤིན་ཏུ་དར་ཞིང་རྒྱས་པར་བྱས་སོ། །གཉིས་པ་བར་དུ་འགྲིབ་པའི་ཚུལ་ནི། རལ་པ་ཅན་གྲོངས་པའི་རྗེས་སུ་དར་མས་རྒྱལ་སྲིད་བཟུང་སྟེ། ཐོག་མར་རྒྱལ་སྲིད་ཆོས་བཞིན་དུ་བསྐྱངས་པ་ལས་བར་སྐབས་སུ་ཐུགས་སུ་གདོན་གསོལ། ཇོ་བོ་ཤཱཀྱ་མུ་ནེ་བྱེ་ཐེམས་སུ་སྦས། སྔགས་ཀྱི་རྒྱུད་སྡེ་རྣམས་རྒྱ་གར་དུ་བསྐྱལ། པོ་ཏི་མཆོད་ཆ་རྣམས་མུན་ཁུང་དུ་སྦས། པཎྜི་ཏ་རྣམས་རྒྱ་གར་དུ་ལོག རབ་ཏུ་བྱུང་བ་ལ་ལ་བཀྲོངས། ལ་ལ་རྟ་ཞོན་པའི་སྟེགས་བྱས། ལ་ལ་ཕབ་སྟེ་རྔ་གཤང་བསྐུར་ཏེ་རི་དྭགས་རྔོན་པ་ལ་བསྐོས་ནས་དབུས་གཙང་གི་བསྟན་པ་ཉམས་ཤིང་མིང་ཙམ་ཡང་མེད་པར་བྱས། དེའི་དུས་ན་འདུལ་བ་ལ་ལག་ལེན་ནི་ངལ་ཞིང་དུབ་པའི་ཐར་ལྷུང་བ་ཙམ་བྱུང་། བཤད་པའི་བཀའ་ནི་ཤིན་ཏུ་ངན་ཏེ། རྩ་བ་དམར་དམར་འདི་འགྲེལ་པ་ནག་ནག་འདིས་འཆད་པ་འདྲ་ཟེར་བ་ཙམ་ལས་མ་བྱུང་། བྱང་སེམས་ཀྱིའང་སེམས་བསྐྱེད་ཀྱི་བཀའ་ཚོ་ནུབ། གསང་སྔགས་ལའང་ཆགས་ལམ་དང་དྲག་པོ་མངོན་སྤྱོད་ཀྱི་ལག་ལེན་དར་བ་ཞིག་བྱུང་། དེའི་ཚེ་ཡབ་མེས་ཀྱི་ཆོས་ཁྲིམས་དང་རྒྱལ་ཁྲིམས་གཉིས་ཀ་བརླག་པར་བྱས་པས་ལྐོག་ཏུ་གསང་ནས་ཉམས་སུ་ལེན་པ་རེ་ཙམ་མ་ཡིན་པར་དངོས་སུ་ཆོས་བྱ་ས་མེད་ནས། བྲམ་པ་རྒྱང་ནས་བྲོས་པ་ཡིན་ནམ་ཟེར་བའི་གཙང་གཡོ་དམར་གསུམ་གྱིས་རེ་ཞིག་ཆུ་བོ་རིར་གབ་ནས་བཞུགས། དེ་ནས་ཁོང་རྣམས་ཀྱིས་འདུལ་བ་མདོ་རྩ། འོད་ལྡན། ལས་ཀརྨ་ཤ་ཏཾ། མངོན་པ་མཛོད་ལ་སོགས་པའི་དཔེ་དྲེའུའི་ཁལ་གཅིག་བཀལ། བཙུན་ཆས་བསྒྱུར་ཏེ་དྭགས་ཀོང་ནས་བརྒྱུད་དེ་བྲོས་པས་མདོ་སྨད་དུ་ཐར་རོ། །དེ་དུས་ན་ཡེར་པའི་བྲག་ལ་ལྷ་ལུང་དཔལ་གྱི་རྡོ་རྗེ་སྒྲུབ་པ་མཛད་ཅིང་ཡོད་པ་ལ། ཡེར་པའི་རི་ལ་རབ་ཏུ་བྱུང་བའི་གཟུགས་ཀྱིས་རྔ་དང་རོལ་མོ་ཁྱེར་ནས་རི་དྭགས་འདེད་པ་མཐོང་ནས་ཅི་ཡིན་དྲིས་པས་རྒྱུ་མཚན་བཤད་པ་དང་། ཆོས་ཀྱི་བསྟན་པ་ཉམས་པ་མ་བཟོད་ནས་འཕན་ཡུལ་ནས་བསྐོར་ཏེ་སྒོ་ལ་ལ་བྱོན་ནས་ལྷ་སར་སླེབ་པ་དང་། བྲན་མོ་ཆུ་ལེན་ཞིག་ལ་རྒྱལ་པོ་བཞུགས་སམ་མཇལ་བ་ཡིན་བྱས་པས། བཞུགས་ཡོད་དར་ཅིག་ན་གླ་བའི་ཚལ་གསེབ་ཏུ་སྐྱོ་སངས་ལ་འབྱོན་གྱི་ཟེར་བ་དང་། རྟ་དཀར་པོ། བེར་དཀར་པོ། མདུང་དཀར་པོ་ལ་སོལ་བས་བྱུགས་ནས་མི་ནག རྟ་ནག མདུང་ནག་ཅན་དུ་བྱས་ཏེ་ཕྱིན་པས། རྒྱལ་པོ་སྡོང་བསིལ་ལ་མིག་མང་རྩེ་ཡིན་ཡོད་པ་ལས་ཡིད་མ་བདེ་ནས་རྡོ་རིངས་ཀྱི་ཡི་གེ་ཀློག་གིན་ཡོད་པ་ལ། མགོན་པོ་ནག་པོ་བྱུང་ཟེར། རྩར་ཕྱིན་ནས་ཞེ་ས་བྱེད་པ་སྐད་བྱས་ཏེ། ལྕགས་མདའ་བརྒྱབས་ཀྱང་ཟེར། མདུང་བསྣུན་ཀྱང་ཟེར་ཏེ། གང་ལྟར་ཡང་མཚོན་བསྣུན་པས། རྒྱལ་པོ་ན་རེ། ཡང་ན་ལོ་གསུམ་གྱིས་སྔས། ཡང་ན་ལོ་གསུམ་གྱིས་འཕྱིས་ཟེར་ལོ། །དེ་ནས་ལྷ་ལུང་དཔལ་གྱི་རྡོ་རྗེས་གཙང་པོ་བརྒལ་ནས་བྱོན་པས་སོལ་བ་དག་སྟེ་མི་དཀར། རྟ་དཀར། མདུང་དཀར་ཞིག་ཏུ་བྱས་ཏེ། ང་གནམ་ཐེལ་དཀར་པོ་ཡིན་ཟེར་ཞིང་བྱོན་ཏེ། འོ་བརྒྱལ་ཐང་ལ་ནུབ་མོ་གཟིམས་ནས་ཐོ་རངས་ཡེར་པར་བྱོན། པེའུ་དམར་སེར་དུ་བྱ་རྒོད་ཀྱི་ཐུལ་པ་གསོལ། ཉེ་འཁོར་རྣམས་སུ་རྡུལ་དང་དུད་པ་གཏོར། དེའི་སྟེང་དུ་མུག་པ་མང་པོ་བཏང་བས་ཕོད་ཐུལ་ལེ། རྡུལ་ཁལ་ལེ། མུག་རྗེས་ལམ་མེ་བཞུགས་པས། མི་རྣམས་ན་རེ། རྒྱལ་པོ་སྡིག་ཅན་ལ་ལྷ་མ་སྲིན་རྣམས་ཀྱིས་ཆད་པ་ཕབ་ནས་བཀྲོངས་ཟེར་ལོ། །བློན་པོ་དང་རྗེས་གཅོད་རྣམས་ཀྱིས་འོངས་ཏེ་མཐོང་བས་རྒྱལ་པོ་བཀྲོངས་མཁན་ལྷ་ལུང་དཔལ་གྱི་རྡོ་རྗེ་བྱ་བའི་མི་མ་འཁྲུལ་འདི་ཡིན་པ་འདྲ་སྟེ་བསྙད་མ་རྙེད་ཟེར་ནས་ལོག་གིན་སོང་སྐད། དེ་ནས་ཁོང་རྒྱ་ནག་ཏུ་བྲོས་པས་ཐར། མདོར་ན་ཁོང་གི་ནུས་པ་དང་གཡོ་ཐབས་ཀྱིས་རྒྱལ་པོ་བཀྲོངས་ཀྱང་བསྟན་པ་ཉམས་ཆེས་པའི་ཤུགས་ཀྱིས་བསྟན་པ་འཕེལ་བ་དང་དར་བ་ནི་ཡུན་རིང་གི་བར་དུ་མ་བྱུང་ངོ་།། ༈ །གསུམ་པ་བསྟན་པ་ཕྱི་དར་གྱི་ལོ་རྒྱུས་ལ། སྟོད་ནས་དང་། སྨད་ནས་བསྟན་པ་ཇི་ལྟར་དར་བའི་ཚུལ་གཉིས་ཀྱི། དང་པོ་ནི། ལྷ་བླ་མ་ཡེ་ཤེས་འོད་དང་། ཇོ་བོ་རིན་ཆེན་བཟང་པོས་བསྟན་པའི་མེ་རོ་སྟོད་ནས་བསླངས་པ་ཡིན་ཏེ། ཚུལ་ཇི་ལྟར་ན། དར་མའི་སྲས་ཁྲི་དར་མ་འོད་སྲུང་དང་། ཁྲི་ལྡེ་ཡུམ་སྟན་གཉིས་བྱུང་། འོད་སྲུང་གི་སྲས་མངའ་བདག་དཔལ་འཁོར་བཙན། དེའི་སྲས་བཀྲ་ཤིས་བརྩེགས་པ་དཔལ་དང་། སྐྱེད་ལྡེ་ཉི་མ་མགོན་གཉིས། ཉི་མ་མགོན་མངའ་རིས་སུ་སྤྱུགས་པ་ལ་སྲས་དཔལ་གྱི་མགོན། ལྡེ་གཙུག་མགོན། བཀྲ་ཤིས་མགོན་གསུམ་བྱུང་བ་སྟོད་ཀྱི་མགོན་གསུམ་མོ། །སྨད་དུ་བཀྲ་ཤིས་བརྩེགས་པ་དཔལ་ལ་སྲས་དཔལ་ལྡེ། འོད་ལྡེ། སྐྱིད་ལྡེ་གསུམ་བྱུང་བ་སྨད་ཀྱི་ལྡེ་གསུམ་མོ། །དེ་རྣམས་ཀྱིས་སྟོད་སྨད་སོ་སོར་མངའ་རིས་བཟུང་བས་སྟོད་དུ་རྒྱལ་ཁྲིམས་ཞྭ་ཙམ་ཞིག་ཆགས་པས་མངའ་རིས་སྐོར་གསུམ། སྨད་དུ་རྒྱལ་ཁྲིམས་ལྷྭམ་ཙམ་ཞིག་ཆགས་པས་དབུས་གཙང་རུ་བཞིའོ། །བཀྲ་ཤིས་མགོན་གྱིས་སྐུ་མཁར་ཉི་ཟུང་བཟུང་ནས་པུ་ཧྲངས། ཞང་ཞུང་། གློ་བོ། དོལ་པོ། གུ་གེ ཡ་ཚེ་ལ་སོགས་པ་ལ་མངའ་མཛད། དེའི་སྲས་འོད་ཀྱི་རྒྱལ་མཚན། དེའི་སྲས་སྲོང་ངེ་དང་། འཁོར་རེ་གཉིས། སྲོང་ངེ་རབ་ཏུ་བྱུང་བ་ལྷ་བླ་མ་ཡེ་ཤེས་འོད་ཅེས་བྱ། ཁོང་གིས་ཡབ་མེས་ཀྱི་གདུང་གསོབ་ཅིང་སེམས་ཅན་ལ་ཕན་གདགས་པར་དགོངས་ནས་མངའ་རིས་སྟོད་ཀྱི་བྱིས་པ་ལོ་བཅུ་གསུམ་ལས་མི་གཞོན་མི་རྒན་པ་རྣམས་བསགས་ནས་ཆུ་ཚོད་དང་། དབྱུ་གུ་དང་། གཞུང་འཛིན་པ་དང་། གཞུང་གི་དོན་རྣམས་ལ་བློ་རྟོག་ཏུ་བཅུག་ནས། དེ་རྣམས་ཀྱི་ནང་ནས་བློ་རབ་ཏུ་གྱུར་པའི་ཤེས་རབ་ཅན་བདུན། དེའི་གཡོག་བདུན། ཡང་གཡོག་བློ་དང་གྲོས་ལ་སོགས་པ་ཡོད་པ་བདུན་ཏེ། ཉི་ཤུ་རྩ་གཅིག་ལ་གསེར་མང་པོ་བསྐུར་ནས་རྒྱ་གར་ཁ་ཆེར་སློབ་གཉེར་ལ་བརྫངས་པས་ལས་ཀྱི་དབང་གིས་བཅུ་དགུ་ཤི། བོད་ལ་ཕན་ཐོགས་པ་ལོ་ཙཱ་བ་རིན་ཆེན་བཟང་པོ་དང་། དེའི་གཡོག་ལོ་ཆུང་ལེགས་པའི་ཤེས་རབ་གཉིས་ལས་མ་བྱུང་། དེ་གཉིས་ཀྱིས་ཆོས་མང་པོ་བསླབས་ནས་འོངས་ཏེ། བོད་དུ་མདོ། བསྟན་བཅོས། སྡེ་སྣོད། མཚན་ཉིད། སྔགས་ཕྱི་ནང་གི་རྒྱུད་འགྲེལ་ལ་སོགས་པའི་ཆོས་མང་པོ་བསྒྱུར་ཅིང་ཞུས་ཏེ་གཏན་ལ་ཕབ་ནས་དམ་པའི་ཆོས་རྣམས་རིམ་གྱིས་འཕེལ་ཞིང་དར་བར་བྱས་སོ། །གཉིས་པ་ནི། དབུས་གཙང་གི་བསྟན་པ་ཉམས་དམས་ནས་ཡུན་རིང་ཞིག་ན་སྔར་དབུས་གཙང་ནས་བྲོས་པའི་གཡོ་དགེ་འབྱུང་གིས་མཁན་པོ། གཙང་རབ་གསལ་གྱིས་སློབ་དཔོན། དམར་ཤཱཀྱ་མུ་ནེས་གསང་སྟོན་པ། རྒྱའི་ཧ་ཤང་ཀོ་ཝཾ་དང་། ཀིཾ་བག་གཉིས་ཀྱིས་ཁ་སྐོང་མཛད་ནས་མདོ་སྨད་ཨན་ཆུང་གི་དགོན་པ་ཡང་ཟེར། དན་དིག་ཤེལ་གྱི་ཡང་དགོན་ཡང་ཟེར་བ་དེར་རབ་ཏུ་བྱུང་བ་ལ་བླ་ཆེན་མུ་ཐུར་དགོངས་པ་རབ་གསལ་བྱ་བ་བྱུང་སྟེ། དེ་ལས་ལོ་སྟོན་རྡོ་རྗེ་དབང་ཕྱུག ཚོང་ཚོ་ཤེས་རབ་སེང་གེ འབྲེ་བཙུན་རྒྱལ་བ་བྱང་ཆུབ་སྟེ་གཙང་པ་གསུམ། དབུས་པ་ཀླུ་མེས་འཕགས་པའི་ཤེས་རབ་སྟེ་བཞིའམ། སུམ་ཡེ་ཤེས་བློ་སྟེ་དབུས་གཙང་གི་མི་ལྔས་རབ་ཏུ་བྱུང་སྟེ་དབུས་གཙང་དུ་བྱོན་ནས་རབ་ཏུ་བྱུང་བ་མང་པོའི་མཁན་པོ་བྱས། དགེ་འདུན་གྱི་སྡེ་བཙུགས་ཏེ་བསྟན་པ་དར་བར་མཛད་དོ། །དེའི་ཚེ་ན་སྔ་མ་གཉིས་ལ་ལོ་ཚོང་གཉིས། ཕྱི་མ་གཉིས་ལ་འབྲིང་སྡེ་རྣམས་བྱུང་སྟེ་དེང་སང་གི་བར་དུ་སྡེ་པ་ཕལ་ཆེ་བ་ལོ་ཚོ། ཚོང་ཚོ། འབྲིང་ཚོ་གསུམ་ལས་གྱེས་པར་གྲགས་སོ། །གཉིས་པ་བྱེ་བྲག་ཏུ་ལམ་སྐོར་དགུ་འཕེལ་ཚུལ་ནི། བསྟན་པ་ཕྱི་དར་གྱི་ཚེ་ལོ་སྟོན་རྡོ་རྗེ་དབང་ཕྱུག་གི་མཁན་བུ་རྒྱ་ཤཱཀྱ་གཞོན་ནུ་དང་། སེ་ཡེ་ཤེས་བརྩོན་འགྲུས་གཉིས་ཀྱི་སློབ་མ་འབྲོག་མི་ལོ་ཙཱ་བ་ཆེན་པོ་ཤཱཀྱ་ཡེ་ཤེས་ཀྱིས་རྒྱ་གར་དུ་བྱོན་ནས་སློབ་དཔོན་ཤཱནྟི་པ་ལ་སོགས་པའི་མཁས་གྲུབ་མང་པོ་ལས་མདོ་སྔགས་ཀྱི་ཆོས་བསམ་གྱིས་མི་ཁྱབ་པ་ཞུས་ཤིང་བསྒྱུར། བྱེ་བྲག་ཏུ་བིརྺ་པའི་ལམ་འབྲས། པདྨའི་ལམ། མཆོད་རྟེན་དྲུང་ཐོབ། གཏུམ་མོ་ལམ་རྫོགས། ཡོན་པོ་བསྲང་བ། བསམ་མི་ཁྱབ་རྣམས་དགེ་སློང་དཔའ་བོ་རྡོ་རྗེ་དང་། རྗེ་ག་ཡ་དྷ་ར་ལས་རྒྱ་གར་ཤར་ཕྱོགས་དང་བོད་དུ་ཞུས་ཤིང་བསྒྱུར། ཡི་གེ་མེད་པ། ཨ་མོ་གྷ་བཛྲ་ལས་བོད་དུ་དར། ཨིནྟྲ་བྷུ་ཏིའི་ལམ་པཎྜི་ཏ་ཤེས་རབ་གསང་བ་ལས་བོད་དུ་ཞུས་ཤིང་བསྒྱུར་ཏེ་དར་བར་མཛད་དོ། །མདོར་ན་ལམ་སྐོར་རེ་རེའི་གཞུང་པ་ཚབ་ལོ་ཙཱ་བ་དང་། འགོས་ལ་སོགས་པ་ལོ་ཙཱ་བ་ཐ་དད་ཀྱིས་བསྒྱུར་བ་དུ་མ་ཡོད་ཀྱང་། ལམ་སྐོར་དགུའི་གཞུང་མན་ངག་དང་བཅས་པ་ཕྱོགས་གཅིག་ཏུ་བསྒྱུར་ནས་བོད་དུ་དར་བར་མཛད་པ་ནི། རྗེ་བཙུན་འབྲོག་མི་ལོ་ཙཱ་བ་ཁོ་ན་ཡིན་ནོ། །གསུམ་པ་སྒོས་སུ་གསུང་ངག་བྱུང་ཚུལ་ལ་གསུམ། དང་པོ་གྲུབ་ཆེན་ག་ཡ་དྷ་རས་སྲོལ་བཏོད་ཚུལ། བར་དུ་འབྲོག་མི་དཔོན་སློབ་ཀྱིས་སྤེལ་ཚུལ། མཐར་རྗེ་བཙུན་ས་སྐྱ་པ་རྣམས་ཀྱིས་དར་བར་བྱས་ཚུལ་ལོ། །དང་པོ་ནི། གྲུབ་ཆེན་ག་ཡ་དྷ་ར་བོད་དུ་ལན་གསུམ་བྱོན་པའི་དང་པོ་བླ་ཆེན་འབྲོག་མི་ལ། བིརྺ་པའི་ལམ་རྒྱས་པ་ལ་སོགས་པའི་མན་ངག་དང་རྒྱུད་དང་འགྲེལ་པ་དུ་མ་གདམས་ཏེ། འདིའི་ཚུལ་འོག་ཏུ་རྒྱས་པར་འཆད་དོ། །བར་པ་རྗེ་འགོས་ལོ་ཙཱ་བ་ཆེན་པོས་སྤྱན་དྲངས་པའི་ཚེ་ལམ་འབྲས་ནི་མ་གནང་མོད། འོན་ཀྱང་ཀྱཻ་རྡོ་རྗེའི་རྒྱུད་གསུམ་འགྲེལ་པ་དང་སྒྲུབ་ཐབས་ཀྱི་གཞུང་ཆེ་ཕྲ་མང་དུ་བསྒྱུར་ཞིང་བཤད་ནས། ཀྱཻ་རྡོར་འགོས་ལུགས་སུ་གྲགས་པར་དར་པོ་བྱུང་བར་སྣང་མོད། དེང་སང་དེ་ལས་བརྒྱུད་པ་ཆད་ནས་མི་སྣང་ངོ་། །ཐ་མ་གྱི་ཇོ་ལོ་ཙཱ་བས་སྤྱན་དྲངས་མ་རྒྱུད་ཀྱི་རྒྱུད་ཀྱི་འགྲེལ་པ་མང་པོ་བསྒྱུར་ཞིང་བཤད་ནས་དར་བར་བྱས། ལམ་འབྲས་ནི་མ་གསུངས་སོ་ཞེས་འབྲོམ་ལུགས་པ་དང་ཞ་མ་བ་རྣམས་ཟེར་ཡང་། གསུང་ངག་གི་གདམས་ངག་རྫོགས་པ་ཞིག་ཡོད་པར་སྣང་སྟེ། གྱི་ཇོས་བསྒྱུར་བའི་རྩ་བ་རྡོ་རྗེའི་ཚིག་རྐང་དང་། གྱི་ཇོའི་སློབ་བརྒྱུད་རྣམས་ཀྱིས་བྱས་པའི་བརྒྱུད་པའི་ལོ་རྒྱུས། རྡོ་རྗེའི་ཚིག་རྐང་གི་འགྲེལ་པ་རྒྱས་པ། བསྡུས་དོན། བྷ་གའི་ཡི་གེ་བཅུ་བཞིའི་མན་ངག་རྣམས་སྣང་བས། མན་ངག་རྫོགས་པའི་ཡིག་ཆ་ཡོད་པར་སྣང་ངོ་། །དེ་ལྟར་ན་གྱི་ཇོ་ཟླ་བའི་འོད་ཟེར། ཞུ་འཁོར་ལོ། ཞུ་དར་མ་རྒྱལ་མཚན། ཞུ་སྟོན་ཧོར་མོ། འོད་པ་དོན་ནེ། ཚུལ་ཁྲིམས་ཤེས་རབ་ཀྱི་བར་དུ་བརྒྱུད་ནས་མང་དུ་འཕེལ་མོད། དེང་སང་ཡིག་ཆ་ཙམ་ལས་བརྒྱུད་པ་འཛིན་པ་མི་འདུག་གོ །གཉིས་པ་ནི། རྗེ་བཙུན་འབྲོག་མི་ལ། གཞུང་ཚར་བ། མན་ངག་ཚར་བ། གྲུབ་པ་ཐོབ་པའི་སློབ་མ་རྣམས་ཡོད་པ་ལས། མན་ངག་ཚར་བའི་སློབ་མ་ནི། འབྲོམ་དེ་པ་སྟོན་ཆུང་། ལྷ་བཙུན་ཀ་ལི། རྗེ་སེ་མཁར་ཆུང་བ་དང་གསུམ་ལས་མེད་དོ། །དེ་ལ་ལམ་འབྲས་འབྲོམ་ལུགས་སུ་གྲགས་པ་ནི། འབྲོམ་ཙནྟྲ་ཝརྟི་ཞེས་བྱ་བ་མདོ་སྨད་ཀྱི་མི་ཆེན་གཅིག་ཡིན་ཟེར་བ་འབྲོམ་ལུགས་པ་རང་གི་ལོ་རྒྱུས་ན་སྣང་ལ། བླ་མ་དམར་ནི། འཕན་ཡུལ་བ་ཡིན་གསུང་གང་ལྟར་ཡང་རིགས་དང་སྐྱེ་བ་ཤིན་ཏུ་བཟང་། ལོངས་སྤྱོད་ཆེ། གདམས་ངག་མང་ཞིང་ཁྱད་པར་དུ་མ་མོ་སྲོག་ཐིག་ལ་མཁས་པ་གཅིག་ཡིན། ཁོང་གིས་བླ་ཆེན་གྱི་སྙན་པའི་གྲགས་པ་ཐོས་ནས་དད་དེ། ཡུལ་ནས་རྟ་བདུན་གྱི་ཁལ་དུ་ཡོན་མང་པོ་བཀལ་ནས་ཀླགས་པ་ལམ་གྱི་ཕུ་ནས་བསམ་ཡས་ལ་འཐོན་ཏེ་བྱོན་ནས་ལམ་དུ་ལྷ་མོའི་སྒྲུབ་ཐབས་ཞུ་བ་མང་དུ་བྱུང་། ནོར་མང་པོ་བྱུང་བ་ཁྱེར་ཏེ་འོངས་ནས་བླ་ཆེན་དྲུང་དུ་གདམས་ངག་ཞུ་ཚེ་ཆོས་ཐུན་རེ་ལ་གསེར་ཞོ་རེའི་མཎྜལ་ཞབས་དཀྲིས་ཀྱི་དར་ཞིང་ཆེན་ཁ་རེ་ཕུལ་ཏེ། དེ་དུས་ཀྱི་དར་བཟང་ཞིང་དཀོན་པས་ད་ལྟའི་ཟབ་ཆེན་ཡུག་པས་རིན་ཆེ་སྐད། དེ་བཞིན་དུ་གཏོར་མ་མི་གཉིས་ཀྱིས་ཐེག་ཚད་རེའི་ཚོགས་འཁོར་རེ་བྱས། འབྲོག་མིའི་གཡུ་ཞོ་སྤུངས་ཀྱང་ཟེར་བ་ཕུལ་བས་ཤིན་ཏུ་མཉེས། དེ་ལྟར་དུས་ཁྱད་པར་ཅན་དང་། ནར་མའི་བསྙེན་བཀུར་དཔག་ཏུ་མེད་པ་ཡུན་རིང་དུ་མཛད་དེ། ཞབས་ཏོག་ཤིན་ཏུ་ཆེ་བས་གདམས་ངག་རབ་ཏུ་ཐོབ་བོ་ཟེར། ནང་གཅིག་མཎྜལ་གྱི་གསེར་ཡང་ཟད། ཞབས་དཀྲིས་ཡང་མེད་པས། ཁོང་གི་ཇོ་མོའི་དར་ཤམ་ཕོག་ནས་བྱས་པས་ཅུང་ཟད་མ་མཉེས་སྐད། དེ་ལྟར་ལོངས་སྤྱོད་ཆེ་བ་ལ་དར་འབོག་དང་། ཇ་སིགས། མཛོ་རྟ་བསྒྲིགས་ན་མདོ་སྨད་ནས་མུ་གུ་ལུང་གི་བར་མ་ཆད་པ་ཙམ་ཡོད་སྐད། རྡོ་རྗེའི་ཚིག་རྐང་ལ་ཡང་རྒྱ་གར་སྐད་ལ་བསྒྱུར་ཞིང་། འགྲེལ་པ་རྒྱས་པར་བྱས། རྒྱ་བློ་གྲོས་གྲགས་ལ་སོགས་པའི་སློབ་མ་མང་པོ་ལ་བཤད་དོ། །སྐུ་ཚེའི་མཇུག་ཏུ་ལ་སྟོད་ལ་བྱོན་པའི་ལམ་ཀར་མུ་གུ་ལུང་དུ་བླ་ཆེན་ལ་མཇལ། འབུལ་བ་མང་དུ་བྱས་ནས་དཔེ་འགེལ་བའི་རྟ་གཅིག་གཡར་བ་ཞུས་པས་སློབ་དཔོན་གྱིས་སློབ་མ་ལ་འབུལ་བ་བྱེད་པའི་ལུགས་མེད་གསུངས་ནས་མ་གནང་བས། འབྲོམ་ཐུགས་ཆད་དེ་བཞུད་ཀར། མུ་གུ་ལུང་རྡོ་རྗེ་གདན་དུ་སོང་ཀྱང་རུང་། འབྲོག་མི་ཤཱཀྱ་ཐུབ་པར་སོང་ཡང་ད་ཕྱིན་ཆད་འདི་ཀུན་ཏུ་འོང་བཏུབ་པ་མི་འདུག་གསུངས་སྐད། དེ་ནས་ལྷོ་སྟོད་དིང་རི་ཤེད་ན་ཡར་བྱོན་པས་འབྲོག་མིའི་སློབ་མ་མཆོག་ཡིན་ཟེར་བས་བསོད་ནམས་ཆེན་པོ་བྱུང་ནས་ལམ་དུ་སློབ་མ་འགའ་ཞིག་ཡི་གེ་མེད་པའི་བྱིན་རླབས་ཞུ་བ་བྱུང་ནས་བྱས་པས་ཞལ་ནས་ཁྲག་སྐྱུགས་ཏེ་བསྙུན་ནད་ཀྱིས་ཟིན། འབྲོམ་ན་རེ་ངའི་བླ་མ་དེ་སངས་རྒྱས་དངོས་ཡིན་ཅིང་ངའི་སྣོད་བཏགས་པར་འདུག་པ་ལ་ངས་དེ་ལྟར་མ་ཤེས་པས་མ་དད་པ་ཅིག་སྐྱེས་པས་ལེན། འོན་ཀྱང་བླ་མས་རྗེས་སུ་འཛིན་པར་འདུག ངའི་དཔེ་ཆ་དང་ནོར་རྫས་རུས་པ་རྣམས་བླ་མའི་ཕྱག་ཏུ་ཕུལ། ཁྱེད་ཚོ་གདམས་ངག་ཞུ་ན་ངའི་དཀའ་ལས་ཙམ་མི་དགོས་པར་བླ་མས་གནང་བར་འདུག་གི་ཞུས་གསུངས་ནས་འདས། སློབ་མ་ཀུན་གྱིས་སྤུར་བཞུས། གདུང་། དཔེ་ཆ། ནོར་རྫས། རྟ་བདུན་བླ་ཁལ་འོག་ཁལ་ཁྱེར་ཕྱིན་པས་ལམ་ན་བགྲོད་དཀའ་ཡང་བདེ་བར་ཐོན། མུ་གུ་ལུང་གི་མདའ་ནས་ཡར་སླེབ་ཙ་ན་དུང་དཀར་ཅིག་འབུད་གིན་ཕྱིན་པས། བླ་ཆེན་རྒྱུན་གཏོར་མཛད་པས་གསན་ནས་ངའི་སྙིང་བཏོན་པ་སྙམ་བྱེད་ལྟོས་དང་གསུངས་བལྟས་པས་ཁོང་གིས་སླེབས་ནས་དེ་རྣམས་ཕུལ་བས་རུས་པ་པང་དུ་བླངས་ནས་བུ་ཕ་ཅན་སྙེགས་སམ་གསུངས་ནས་བཤུམ་སྐད། དེར་ཁྱེད་ཚོའི་ནང་ནས་གདམས་ངག་འདོད་པ་གང་ཡོད་པ་ལ་དཀའ་ལས་མེད་པར་སྦྱིན་གྱིས་གསུངས་པ་ལ་ཞུ་བ་མང་པོ་མ་བྱུང་། སྒྱེར་སྒོམ་སེ་བོ། གཤེན་སྒོམ་རོག་པོ། འཕགས་པ་ཆོས་སྣང་གསུམ་གྱིས་ཞུས་པས་རྫོགས་པར་གནང་སྟེ་བསྒོམས་པས་ཏིང་ངེ་འཛིན་བཟང་པོ་སྐྱེས། སེ་རོག་གཉིས་ཀྱིས་དངོས་གྲུབ་ཅུང་ཟད་རེ་ཐོབ་སྐད་དོ། །དེ་ནས་འབྲོམ་དེ་བ་སྟོན་ཆུང་། རྒྱ་ལྷོ་བྲག་པ། ཆབ་སྟོན་ཆོས་དཀའ། ཉང་ཁམ་ཁུང་བ། རོག་སྒོམ་པ། བྲག་པ་སྐུ་མཆེད། ཟླ་བ་རྒྱལ་མཚན། རྟོགས་ལྡན་རྣམ་གདིང་པའི་བར་དུ་བརྒྱུད་ནས། རྡོ་རྗེའི་ཚིག་རྐང་ཀྱཻ་རྡོར་མན་ངག་ལུགས་ཀྱི་དབང་ཆུ། མན་ངག་གི་ཡིག་ཆུང་དང་བཅས་པའི་པོ་ཏི་ཆུང་བ་གཅིག་སྣང་ངོ་། །ཡང་འབྲོམ་གྱིས་རྒྱ་བློ་གྲོས་གྲགས་ལ། དེས་རྒྱ་སྟོན་རྡོ་རྗེ་སེང་གེ་ལ། དེས་དར་མ་གྲགས་ལ། དེས་ཁམ་ཁུང་པ་ལ། དེས་སྒྲོ་སྟོན་ཤཱཀྱ་འོད་རྣམས་ལས་བརྒྱུད་ནས་གཞུང་བཤད་ཤིན་ཏུ་རྒྱས་པ་ཞིག་དང་། གསང་བཅུ་ལ་སོགས་པའི་མན་ངག་ཕྲ་མོ་པོ་ཏི་ཤིན་ཏུ་ཆེ་བ་གཅིག་འདུག་གོ །དེས་ན་ཞིབ་མོ་རྡོ་རྗེར། འབྲོམ་ལས་ལམ་འབྲས་འཕེལ་བ་མེད་ཟེར་བ་ནི་ཤིན་དུ་མ་དག་པར་སྣང་ངོ་། །རྗེ་སེ་མཁར་ཆུང་བ་ལ་ལམ་འབྲས་རབ་ཏུ་ཐོབ་པ་ཞང་སྟོན་སྐུ་མཆེད། འབྲིང་དུ་ཐོབ་པ་ཞ་མ་ལྕམ་སྲིང་། ཐ་མར་ཐོབ་པ་སེ་སྒོམ་བྱང་ཡེ་རྣམས་བྱུང་ངོ་། །དེ་ལ་ལམ་འབྲས་ཞང་ལུགས་སུ་གྲགས་པ་ནི་རྗེ་བཙུན་སེ་མཁར་ཆུང་བའི་སློབ་མ་ཞང་དགོན་པ་བ། ཞ་མ་དཀོན་མཆོག སློབ་དཔོན་ཉང་སྟོན། མཁན་པོ་སྨོན་མཁར་པའི་བར་དུ་བརྒྱུད་ཅིང་ཞ་མ་དཀོན་མཆོག་གིས། དགོན་པ་བ་དང་ས་སྐྱ་པ་ཆེན་པོ་གཉིས་ཀ་ལ་ཞུས་སོ། །དེ་ལས་བརྒྱུད་པའི་གཞུང་རྡོ་རྗེ་ཚིག་རྐང་འགྲེལ་པ་དང་བཅས་པ། ཞལ་བཞེས་ཉེར་བཞི་ཕལ་མོ་ཆེ་བརྒྱུད་པའི་ལོ་རྒྱུས་དང་བཅས་པ་སྣང་ངོ་། །ལམ་འབྲས་ཞ་མ་ལུགས་ལ་སྔར་བྱོན་པ་མོ་རྒྱུད་དང་། ཕོ་རྒྱུད་གཉིས་དང་། ཕྱིས་བྱུང་བ་བསྲེས་པའི་ལུགས་དང་གསུམ་ལས། དང་པོ་ལམ་འབྲས་ཞ་ལུགས་མོ་རྒྱུད་དུ་གྲགས་པ་ནི། མ་གཅིག་ཞ་མའི་ཡུལ་ལ་སྟོད་ཕ་དྲུག་གི་ཞ་མ་བརྒྱ་བཞིའི་ནང་ནས་ཞ་མ་མི་རེག་བྱ་བ་ཡིན། ལྕམ་སྲིང་དྲུག་ཡོད་པའི་གཉིས་འོག་ལྷ་རྗེ་ཞ་མ་མཚན་རྒྱལ་མོ་ལྕམ། དེའི་འོག་མ་མིང་པོ་ཞ་མ་ཆོས་ཀྱི་རྒྱལ་པོ་ཡུལ་ལ་སྨོན་ན་རྗེ་ཁུམ་བུ་པ་ཞེས་ཟེར། ལྕམ་མོས་ལོ་བཅུ་བདུན་པ་ལ་འབྲོམ་རམ་ཚ་པུ་ནི་བྱ་བ་ཅན་ཁྱིམ་སོ་ལ་བྱོན་དེ་དང་བྲལ་ནས་ལོ་ཙཱ་བ་རྨ་ཆོས་འབར་གྱི་ཇོ་མོ་མཛད། ཁོང་གྲོངས་ནས་དེས་རྐྱེན་བྱས་ཏེ། སྙིང་རླུང་བྱུང་ནས་མཐོང་སྣང་ལ་སོགས་པ་ཉམས་ཀྱི་མཐོ་དམན་མང་པོ་དང་། རྟག་ཏུ་བྱང་སེམས་འཛག་པའི་གེགས་བྱུང་བ་ལ། ཐམས་ཅད་དུ་གདམས་ངག་གང་ཆེ་དྲིས་པས། དིང་རི་གླང་འཁོར་ན་དམ་པ་རྒྱ་གར་གདམས་ངག་ཆེ་བར་དགོངས་ནས་དམ་པའི་སར་བྱོན་པས། དམ་པའི་ཞལ་ནས་ཁྱོད་ཀྱིས་དང་པོ་བླ་མ་ལ་དབང་བསྐུར་ཞུས་པའི་དུས་སུ་དབང་ཡོན་མ་ཕུལ་བས་ལན་འདུག་གསུངས་པས། ལྷ་རྗེས་ལུས་ལོངས་སྤྱོད་ཐམས་ཅད་ཕུལ། ཟས་ནོར་ཐམས་ཅད་བསྲེས། ང་ཁྱོད་མེད་པར་བྱས་པ་ལགས་མོད་བྱས་པས། དེར་ཁྱོད་ཀྱི་མིང་པོས་རྟ་གཅིག་རིན་དུ་ཟོས་འདུག་གསུངས། དེའང་ལྷ་རྗེ་མ་ལ་རྒྱུས་མེད་པར་མིང་པོ་ཀུན་གྱིས་རྟ་གཅིག་རིན་དུ་བླངས་འདུག དེར་ལྷ་རྗེ་མས་དམ་པ་ལ་བླ་མ་གྲོངས་ནས་མི་བདོག་པ་གང་ལྟར་བགྱི་ཞུས་པའི་དེས་བཞེངས་པའི་རྟེན་རྣམས་ལ་འབྲེལ་པ་མེད་དམ། ཞབས་ཏོག་གྱིས་གསུངས་ནས་མང་མཁར་མདའ་ན་རྨས་བཞེངས་པའི་གནས་གསར་ལྷ་ཁང་བྱ་བ་ཡོད་པ་ལ་རྟ་གཅིག་ཁལ་དང་བཅས་པ་དང་ཁྲབ་གཅིག་ཕུལ། རྨའི་སྲས་མོ་ཇོ་མོ་དཀར་ཡུ་བྱ་བ་ལ་གཡག་གཅིག རེ་ཐུལ་གཅིག རེ་དམར་ཟབ་དར་བཅས་པ་ཅིག་ཕུལ་ཡང་ཟེར། ཕྱི་རྟེན་ལ་བལ་པོ་ནས་གནྫིར་གཅིག་བླངས་ནས་བཙུགས་ཀྱང་ཟེར་ཏེ། དེ་ལྟར་བྱས་པས་ལོ་གཅིག་གི་བར་དུ་ནད་དེ་ཕན། དེ་ནས་སྔར་བས་ཀྱང་ཐུ་རུ་སོང་སྟེ་དམ་པ་ལ་ཞུས་པས། རྒྱལ་ཁམས་འདྲ་བསྐོར། མདོ་རྒྱུད་འདྲ་ལྟོས་གསུངས་ནས་ལོ་བདུན་དུ་མཚམས་བཅད་ནས་མདོ་རྒྱུད་རྙེད་ཚད་གཟིགས་ཀྱང་མ་ཕན་པར། གནུབས་ཡུལ་རང་ན་མར་ཕྱིན་པས་ལྷ་རྗེ་གནུབས་པའི་བན་ཆུང་ཁ་ཅིག་ཆུ་ཁ་ན་ཨེ་མ་ངོ་མཚར་ལ་སོགས་པ་དབྱངས་སུ་གྱེར་ཅིང་འདུག་སྟེ། ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལ་ཐམས་ཅད་སྐྱེས། །སྐྱེས་ཙམ་ཉིད་ལ་སྐྱེ་བ་མེད། །ཅེས་ཟེར་བ་ཐོས་ནས་དེ་ལ་ངེས་ཤེས་ཁྱད་པར་ཅན་སྐྱེས་པའི་སྟོབས་ཀྱིས་ཁམས་དྲག་དེ་ནས་ཐུར་སོང་སྟེ་དམ་པ་ལ་ཞུས་པས། རྔ་གཅིག་ལག་ཏུ་གཏད་ནས་བརྡུང་བྱ་བའི་བརྡ་ཅིག་མཛད། བརྡུངས་པས་སྐད་ཆེན་པོ་ཅིག་བྱུང་། གཞན་ཅི་ཡང་མ་བྱུང་སྟེ་གདམས་ངག་ཞུས་པས་སོང་ཅིག་པའི་བརྡ་མཛད་དེ་ཕན་པ་མ་བྱུང་བས་གདམས་ངག་རྡུགས་པར་ཐག་བཅད་གསུངས། དེ་དུས་བླ་མ་སེ་མཁར་ཆུང་བ་མདོ་མང་བཞེངས་ཀྱིན་ཡོད་པ་ཆོས་ཀྱི་གླེགས་ཤིང་བསྒྲུབ་པ་ལ་བྲིན་དུ་བྱོན་པའི་ཚུར་ལམ་དིང་རི་ཤར་ཕྱོགས་ཀྱི་མཁར་ཆུང་བ་ཅན་དུ་བྱོན། མཁར་ཆུང་བའི་སློབ་མ་དིང་རི་སྐྱེ་ཆགས་པ་ཁྱུང་པོ་ཧཱུྃ་ཀ་ར་ན་རེ། འབྲོག་མིའི་སློབ་མ་སེ་ཀུན་རིག་བྱ་བ་ལམ་འབྲས་ཀྱི་བདག་པོ་ཁམས་འདུས་དགྲོལ་བ་ལ་ཤིན་ཏུ་མཁས་པ་གཅིག་བྱོན་བདོག་པས་ཉིད་ཆོས་མི་ཞུའམ་ཟེར་བས། ལྕམ་སྲིང་གཉིས་ཀྱིས་རྟ་གཅིག་ལ་ཡོ་བྱད་མང་པོ་བཀལ་ནས་མཇལ་དུ་བྱོན། དང་པོ་ནས་ཁམས་ཀྱི་སྐྱོན་འདི་ལྟར་བྱུང་གི་ལོ་རྒྱུས་བླ་མའི་སྙན་དུ་ཕུལ་བས་ཁང་ལྷྭམ་འབུར་མ་ལ་ལྕག་གིས་ཏུག་ཏུག་མཛད་ཀྱིན་ཁྱོད་ལ་དང་པོ་འདི་ལྟར་མ་བྱུང་ངམ། དེ་ནས་འདི་ལྟར་མ་བྱུང་ངམ་གསུངས་པས། ཞ་མའི་ཉམས་ལ་བྱུང་བ་ཚོ་དང་མཐུན་ནས་རྗེ་སངས་རྒྱས་སམ་བྱ་བ་དེ་ཁྱེད་ལགས་སམ་ཟེར་ཅིང་ཤིན་ཏུ་ཡིད་ཆེས་ཏེ་ཕྱག་མང་དུ་བཙལ། བླ་མའི་ཞལ་ནས་ཞ་ཆུང་མ་ལ་སྒོམ་འདུག་སྟེ་གདམས་ངག་མི་འདུག སེ་མཁར་ཆུང་བ་ལ་གདམས་ངག་འདུག་སྟེ་སྒོམ་མི་འདུག སྤྲང་པོ་སེ་ཐེའུ་རང་འདིས་བར་ཆད་གཅིག་ཀྱང་བྱེད་དུ་མ་འདོད་གསུངས། དེར་གདམས་ངག་ཞུས་པས་དབང་བསྐུར་དགོས་གསུངས། སྔར་བླ་མ་རྨ་ལ་དབང་ཐོབ་བྱས་པས་ངའི་ཆོས་འདོད་ན་ང་རང་གི་དབང་བསྐུར་དགོས་གསུངས། འོ་ན་ཆ་རྐྱེན་འདྲ་བསྒྲུབས་ནས་བླ་མའི་དྲུང་དུ་འོང་བར་ཞུ། བདག་གི་མིང་པོ་སྟོན་པ་ཅིག་བདོག་པས་དེ་ཁྲིད་ནས་མཆིས་ན་ཞུས་པས་རུང་གསུངས་ནས་རྗེ་ཁུམ་བུ་པ་དང་ལྕམ་སྲིང་གཉིས་ཀྱིས་ནོར་མང་པོ་ཁྱེར་ནས་མཁར་ཆུང་དུ་བྱོན། འབུལ་བ་ལ་འཁོར་གསུམ་ཡང་དག་ལན་གསུམ་བྱས། བླ་མ་ཡང་མཉེས་ནས་དབང་བསྐུར། གེགས་སེལ་གྱི་གདམས་ངག་བསྟན་ནས་བསྒོམ་དུ་བཅུག་པས་ནད་དྲག་སྟེ་ཁྲིད་བཀའ་རྣམས་གནང་། གཞུང་ཚང་བ་ནི་མ་ཉན་གསུངས། ཞ་མ་བས་ནི་གསུང་ངག་རགས་རིམ་ཅིག་མཉན་པས་སེམས་ཚིམས་ནས་ཁོང་ལྕམ་སྲིང་འགྲོ་བར་འདུག་པ་ལ་བླ་མའི་ཞལ་ནས། ཞང་སྟོན་པ་གཉིས་ལ་ཞ་མ་ལྕམ་སྲིང་འདི་པ་མི་ཆེན་དུའང་འདུག གདམས་ངག་གི་སྣོད་དུའང་གདའ། ཁོང་ལ་གདམས་ངག་འདི་རྫོགས་པར་སྦྱིན་བསམ་སྟེ། ཁོང་མི་ཞུ་བར་འགྲོ་བར་འདུག གདམས་ངག་ནི་མ་ཚར་འོ་སྐོལ་གྱི་བརྒྱུད་པ་འདིའི་ལུགས་ལ་སློབ་མས་མ་ཞུས་པར་བླ་མས་མི་བཤད་པ་སྲོལ་དུ་གདའ་བས་ཁྱོད་ཀྱིས་གྲོས་ཐོབ་གསུངས་ཏེ། ཞང་སྟོན་པས་ཁྱོད་ཀྱིས་བླ་མ་ལ་ཞབས་ཏོག་ཀྱང་ཆེར་བྱས། བླ་མས་ཡང་ཐུགས་ལ་འདོགས་པར་འདུག ཁྱེད་ཀྱི་ཞོར་ལ་ངེད་རྣམས་ལ་ཡང་ཐུགས་ལ་བཏགས། ད་དུང་གདམས་ངག་ལྷག་མ་འདྲ་ཡང་ཡོད་པ་འདྲ། བཞུགས་ནས་ལྷག་མ་ཀུན་རྩད་གཅོད་པར་ཞུ་བྱས་པས་ཞ་མ་ལྕམ་སྲིང་ན་རེ། ཇོ་བོ་འདི་ཅི་གསུངས་ན། འབུལ་བ་ཡང་འཁོར་གསུམ་ཡང་དག་ལན་གསུམ་བྱས། བྱང་དང་ར་དང་དང་ཆུང་ཚུན་ཆད་བསྐོར། ཇག་དམར་གྱི་གོས་རྐྱང་པ་རེ་ལས་མེད་པར་གྲང་དྲགས་པས་ལམ་དུ་གནག་གི་སྐྱིབས་འཇོ་ཡིན་ཡང་ཅི་ཡོད་ཕུལ་ནས་ཞུས། མཉེས་ཀྱང་མཉེས། གདམས་ངག་ཀྱང་མ་ལུས་པར་གནང་། ལྷག་མ་མེད་པར་ཐག་ཆོད། དེས་ཚིམ་ཀྱང་ཚིམ་ལྷག་མ་ཡོད་པ་སྐད་གསུང་ཡང་རྗེ་ཞལ་རྫུན་གསུང་བ་ཡིན་གསུངས་ནས་སྡོད་དུ་མ་ཉན་པར་སོང་བས་ཅུང་ཟད་མ་རྫོགས་པས་ན་འབྲིང་དུ་ཐོབ་པ་ཡིན་གསུངས། འོན་ཀྱང་བསྒོམས་པས་ཡོན་ཏན་ཁྱད་པར་ཅན་སྐྱེས་ཏེ་ཡི་དམ་གྱི་ལྷ་དཔག་ཏུ་མེད་པ་ཞལ་གཟིགས། ཁྭ་གདོང་མ་ཆུ་ཆུས། འུག་གདོང་མ་མེ་ཐོང་བྱས་པ་ཙམ་གྱིས་ཐབ་ཏུ་མེ་ལྷབ་འབར། ཕྲུ་བར་ཆུ་མེར་གྱིས་འབྱུང་། ལུས་གཅིག་ལ་དུ་མར་བྱེད་པ་ལ་སོགས་པ་རྫུ་འཕྲུལ་གྱིས་ཞིང་གཞན་དུ་སྐད་ཅིག་གིས་བསྒྲོད་པར་ནུས་པ་ཡིན་ཏེ། རྡོ་རྗེ་གདན་དུ་བདེ་གཤེགས་ཀྱི་མཆོད་པ་ལ་ནམ་མཁའ་ལ་བྱོན་ནས་གྷནྡྷོ་ལི་ལ་བསྐོར་བ་བྱེད་པ་བོད་མོའི་ཆ་ལུགས་སུ་ཡོད་པ་ཁམས་པ་མེ་ཉག་ལོ་ཙཱ་བས་ངོ་ཤེས། འདི་ལ་སྟོད་དིང་རི་ན་ཡོད་པའི་ཇོ་མོ་ཞ་ཆུང་མ་བྱ་བར་འདུག་བྱས་པས། དེ་རྒྱ་གར་གྱི་མི་ཐམས་ཅད་ངོ་མཚར་སྐྱེས། བྲམ་ཟེ་རྣམས་ཀྱིས་ཤིས་པ་བརྗོད་པ་ཡང་བྱས་ཏེ། ཨ་ཙ་ར་གསུམ་བོད་དུ་ཆོས་ཞུར་བྱུང་བས་མ་ཇོའི་ཞལ་ནས་ངེད་མཐའ་འཁོབ་ཀྱི་མི་སྒོས་བུད་མེད་སྐྱེ་བ་དམན་པས་ཁྱེད་ཀྱི་སློབ་དཔོན་མི་འོངས་གསུངས་ནས་གསེར་སྲང་གསུམ་གནང་ནས་ཆོས་མ་གནང་སྐད། ཉིན་གཅིག་ཁོག་སྣ་ན་དགེ་བཤེས་སྟོད་སྟོན་པ་ཆོས་གསུང་གིན་ཡོད་པ་ལ་མ་ཇོ་ཞ་ཆུང་མས་ཕུག་རོན་གཅིག་ཏུ་བརྫུས་ནས་ཆོས་ཉན་པས་བྱིས་པས་རྡོ་བརྒྱབ་པས། དགོང་མོ་ཉེ་གནས་མ་ལ་དགེ་བཤེས་སྟོད་སྟོན་པས་ཆོས་ཟབ་མོ་ཅིག་བཤད་ཀྱིན་འདུག་ནས་མཉན་པས་ཕུང་བྱིས་ཁ་ཅིག་གིས་སོར་རྡོ་བརྡེག་གིས་ཉན་དུ་མ་སྟེར་གསུངས། ཉིན་གཅིག་འུ་ཅག་སང་ནི་སྒོག་པ་ཐུ་རུ་འདོང་ངོ་གསུངས་ནས། ཉེ་གནས་མས་སྔ་དྲོ་གཤེགས་བྱས་པས་ང་འོང་གིས་ཁྱོད་རང་སྔོན་ལ་སོང་ཅིག་གསུངས་ནས་བལྟས་པས་མ་བྱོན། ཉེ་གནས་མ་གར་ཕྱིན་སར་ཕུག་རོན་གཅིག་བྱུང་བས། ཉེ་གནས་མ་གྲོག་པོ་གཅིག་ལ་དེའུ་འགྲིལ་བས་ཁྱིམ་དུ་ལོག་ཙམ་ན་མ་ཇོའི་སྔུན་དུ་སྒོག་པ་སྤར་གང་ཡང་འདུག་གོ །མ་ཇོ་ལ་སུས་དྲངས་ཞུས་པས་ང་རང་གིས་བཏུས་ཁྱོད་གྲོག་པོར་དེའུ་འགྲིལ་བ་ངས་བཟུང་གསུངས་སྟེ། ཕུག་རོན་དུ་སྤྲུལ་ལོ། །གཞན་ཡང་ཕྱི་ནང་གསང་བའི་རྟེན་འབྲེལ་བསམ་གྱིས་མི་ཁྱབ་པ་གཟིགས་ཏེ། ཐབ་ཏུ་ནུབ་མོ་ནས་གཏོར་བ་ནངས་པར་སྲས་སུ་རེད་པ་བྱུང་བ་དང་། རྗེ་བཙུན་དམ་པ་རྒྱ་གར་བའི་ཞལ་ནས། དིང་རི་བའི་སློབ་མ་རྣམས་ལ་ཁྱེད་རྣམས་ཡོ་ལ་གསེར་ར་ཏི་གཅིག་ལས་མི་རི། བུད་མེད་འདི་ལ་གསེར་སྲང་བརྒྱ་རི་བ་ཡིན་གསུངས། རྔ་གཅིག་གཏད་ནས་ཞ་ཆུང་མ་རྔ་དྲག་ཏུ་བརྡུངས་གསུངས་སྐད། དེ་གྲགས་པ་ཆེན་པོ་འབྱུང་བའི་བརྡ་ཡིན། དེ་ལྟ་བུའི་རྗེ་བཙུན་མ་དེ་ལ་བླ་མ་ཉང་སྒོམ་ཆེན་གྱིས་ལོ་བཅུ་གཉིས་བསྟེན་ནས་ཞུས། དེས་བླ་མ་སྨོན་མཁར་བ་ཉང་རྒྱལ་པོ་གྲགས་ལ། དེས་ཁ་རག་གི་གཉོས་ཆོས་ཀྱི་གཟི་བརྗིད། དེས་བླ་མ་ཀོ་བྲག་པ། དེས་བླ་མ་ལྷ་སྲོ་ལུང་པ་སོགས་ལ་བརྒྱུད་དོ། །ཡང་ཉང་སྒོམ་ལ་གཡུང་སྟོན་གྱིས་ཞུས། དེ་ལ་ཞང་སྟོན་སེ་མིག་པས། དེ་ལ་ཀོ་བྲག་པས་སོ། །ཡང་བླ་མ་སྨོན་མཁར་ཇོ་སྲས་སམ། ཞ་མའི་དབོན་པོ་ཤེས་རབ་ཚུལ་ཁྲིམས་སུ་གྲགས་པ་ལ་བཤད། དེ་ལ་ཀོ་བྲག་པས་སོ། །འདི་དག་ནས་བརྒྱུད་པའི་ཡིག་ཆ་ཕྲན་ཚེགས་གང་ཟག་ཐ་དད་ཀྱིས་བྱས་པ་རབ་ཏུ་མང་པོ་སྣང་ལ་འདི་དག་ཕལ་ཆེ་བ་མན་ངག་བཟང་པོ་སྣང་ཞིང་། ཁ་ཅིག་སྦྱང་པ་མ་བྱས་པའི་སྒོམ་ཆེན་འགའ་ཡིས་བྱས་པ་ཅི་རིགས་པར་སྣང་ངོ་། །ལམ་འབྲས་ཀོ་བྲག་པའི་ལུགས་ནི། བླ་མ་དུམ་བུ་ཀོ་བྲག་པ་བསོད་ནམས་རྒྱལ་མཚན་ལམ་འབྲས་དང་། བི་བྷུ་ཏ་ཙིནྡྲའི་ལུགས་ཀྱི་སྦྱོར་དྲུག་བསྒོམ་པ་ལ་བརྟེན་ནས། རྩ་རླུང་གི་ཡོན་ཏན་བསམ་གྱིས་མི་ཁྱབ་པ་རྒྱུད་ལ་འཁྲུངས་པ་དེ་ཉིད་ཀྱིས། མཁན་པོ་སྨོན་མཁར་བ་ལ་ཞ་མ་མོ་རྒྱུད་ཀྱི་གདམས་ངག བརྒྱུད་པ་གསུམ་ལྡན་གྱི་གདམས་ངག་དང་། རྗེ་བཙུན་ཞང་དགོན་པ་ལ་ཞ་མ་དཀོན་མཆོག་གིས་ཞུས་པ་ལམ་འབྲས་ཞང་ལུགས་སུ་གྲགས་པའི་གདམས་ངག་རྣམས་ཞུས་ཤིང་ཐུགས་སུ་ཚུད་པར་བྱས། དབང་བཞིའི་ལམ་ཁྲིད་དང་གཞུང་བཤད་སོགས་མན་ངག་མང་དུ་ཡི་གེར་བཀོད། ལོ་ཉི་ཤུ་རྩ་བཞིར་ར་ས་ཆུ་ཕུག་ཏུ་ལམ་འབྲས་ཁོ་ན་བསྒོམས་པས་མངོན་ཤེས་དང་རྫུ་འཕྲུལ་མཐའ་ཡས་པ་ཐོབ། རྩ་རླུང་གི་གནད་གཟིགས་པས་གེགས་སེལ་གཞན་ལ་བརྟེན་མི་དགོས་པས་གེགས་སེལ་ཐུགས་ལ་རང་ཤར་དུ་འཁྲུངས་པ་རྣམས་ཡི་གེར་བཀོད་པ་ཧ་དམིགས་རྒྱ་མཚོ་སོགས་ཧ་དམིགས་རྒྱས་འབྲིང་བསྡུས་གསུམ་གྱི་མན་ངག ནད་གདོན་དབྱུང་བའི་མན་ངག ལམ་སྐོར་གྱི་མན་ངག བོགས་འབྱིན་གནད་དྲུག་གི་མན་ངག་སོགས་ལམ་འབྲས་གོང་མ་རྣམས་ལ་མ་གྲགས་པའི་གེགས་སེལ་གྱི་གདམས་ངག་མང་དུ་མཛད། དེ་ལ་ལྷ་སྲུ་ལུང་པ། མཁའ་འགྲོ་རྒྱ་གར་ཡེ་ཤེས། གཉོས་རྡོ་རྗེ་སེང་གེ་གསུམ་གྱིས་ཞུས་ནས་མང་དུ་འཕེལ་བ་ཡིན་ནོ། །གཉོས་ཆེན་རྡོ་རྗེ་སེང་གེས་ཀྱཻ་རྡོར་མན་ངག་ལུགས་ཀྱི་དབང་ཆུ་སོགས་ལམ་འབྲས་ཀྱི་ཡིག་ཆ་མང་དུ་བྱས་སོ། །གཉིས་པ་ཞ་མ་ཕོ་རྒྱུད་དུ་གྲགས་པ་ལ་ལམ་འབྲས་སྤང་རྗེ་ལུགས་ནི། རྗེ་བཙུན་སེ་མཁར་ཆུང་བ་ལ་མ་གཅིག་ཞ་མའི་མིང་པོ་རྗེ་ཁུམ་བུ་པ་ཞ་མ་ཆོས་ཀྱི་རྒྱལ་པོས་ཞུས། དེས་སེ་སྒོམ་བྲག་སྐྱབས་དང་། སྲས་ཞ་མ་ཙིནྟྲ་གཉིས་ལ་བཤད། དེ་གཉིས་ལ་སྤང་རྗེ་ཉི་མ་གྲགས་དང་། རྗེ་མ་གྲོ་བ་གཉིས་ཀྱིས་ཞུས། སྤང་རྗེས་བླ་མ་བརྒྱུད་པའི་རྣམ་ཐར། སྒྲུབ་ཐབས་མཚོ་སྐྱེས་ཀྱི་འགྲེལ་པ་དང་། མན་ངག་ལུགས་ཀྱི་དབང་ཆུ་བསྡུས་པ་སོགས་མཛད་ནས་བཤད་སྒྲུབ་ཀྱིས་གཏན་ལ་ཕབས་སོ། །དེ་ལྟར་ན་ལམ་འབྲས་གྱི་ཇོ་ལུགས། འབྲོམ་ལུགས། ཞ་མ་ལྕམ་སྲིང་གི་ལུགས་རྣམས་ལས་ཞ་མ་དང་ཀོ་བྲག་པའི་མན་ངག་ཕྲན་ཚེགས་རེ་རེ་ཙམ་གྱི་ལུང་མ་གཏོགས་གཞན་རྣམས་ཀྱི་ལུང་ཙམ་ཡང་ཆད་ནས་མི་སྣང་མོད། འོན་ཀྱང་ཞ་མ་ཕོ་རྒྱུད་པ་རྣམས་ལ་ལམ་འབྲས་ཀྱི་ཡིག་ཆ་བཟང་ལ་མང་བ་ཅིག་བྱུང་སྣང་ངོ་། །གསུམ་པ་མན་ངག་མང་པོ་བསྲེས་པའི་ལུགས་ལ་ལམ་འབྲས་བཀའ་རྒྱ་མར་གྲགས་པ་ནི། བླ་མ་ཆ་གན་དབང་ཕྱུག་རྒྱལ་མཚན་གྲུབ་ཐོབ་དཀར་པོར་གྲགས་པ་དེས་མཛད་པ་སྟེ། དེ་ཡང་ཆོས་རྗེ་ས་སྐྱ་པཎྜི་ཏ། ཀུན་མཁྱེན་པུ་ཧྲངས་པ་སངས་རྒྱས་གྲགས། དེ་ལ་ཆ་གན་གྱིས་ལམ་འབྲས་ས་ལུགས་རྣམས་ཞུས། སྤང་རྗེ། མ་གཅིག་ཞ་མ། ཕུ་དམར་མ། ཞང་རས། མང་ལམ་ཞིག་པོ། ཆོས་ལྡིང་པ་ཉང་རས། མ་གཅིག་ཉི་ཁྲི། དེ་ལ་ཆ་གན་གྱིས་ཞ་ལུགས་ཀྱི་ཆོས་སྐོར་ཐམས་ཅད་རྫོགས་པར་ཞུས་ནས། ག་ར་གོ་མང་གི་དགོན་པར་ལོ་མང་པོ་སྒྲུབ་པ་མཛད་པས་ཉམས་རྟོགས་བསམ་གྱིས་མི་ཁྱབ་པ་འཁྲུངས་ཤིང་། སློབ་དཔོན་རྣལ་འབྱོར་གྱི་དབང་ཕྱུག་བིརྺ་པ་སྐུ་དམར་མདངས་ཤས་ཆེ་བ་ཅིག་ཞལ་གཟིགས་ཅེས་གྲགས་ལ། ཕྲིན་ལས་དཔག་ཏུ་མེད་པ་བྱུང་ངོ་། །བླ་མ་དེས་རིན་ཆེན་སྒང་བླ་བྲང་གོང་མར་བཞུགས་ནས་ལམ་འབྲས་བརྒྱུད་པའི་རྣམ་ཐར་རྒྱས་པ། གོང་འོག་མང་པོ་བཅོས་པའི་རྩ་བ་རྡོ་རྗེའི་ཚིང་རྐང་། དེ་དང་བསྟུན་པའི་གཞུང་བཤད་རྒྱས་པ། ཚིག་རྐང་གི་ས་བཅད། སྣང་བ་གསུམ། གཞུང་ཇི་ལྟ་བ་བཞིན་དཀྲི་བ། གནད་དྲུག གནད་བཅུ་གཅིག དབང་པོ་རབ་འབྲིང་གསུམ་རྣམས་ལ་ཁྲིད་ཡིག་རེ་རེ། ལམ་ཟབ་བླ་མའི་རྣལ་འབྱོར། མངོན་རྟོགས་ལག་ལེན། ཚོམས་ཀྱི་ཉམས་མྱོང་། དོན་ཁྲིད་ལམ་རིམ། དབང་བཞི་དོན་དགྲོལ་བའི་མན་ངག ཡང་གསང་གཅེས་པ་ལྔ་ལྡན་པ། སྨིན་གྲོལ་ཚོམས་ཀྱི་སྤྱི་ཆིངས། ཟབ་ལམ་གྱི་བརྗེད་བྱང་། ཉམས་ཁྲིད་ཆེན་མོ། རྣལ་འབྱོར་དབང་ཕྱུག་གི་སྒྲུབ་ཐབས་རྗེས་གནང་དང་བཅས་པ། ཡི་གེ་མེད་པའི་བྱིན་རླབས་སོགས་ལམ་འབྲས་ཀྱི་པོ་ཏི་ཆུང་ངུ་གཅིག་མཛད། དེ་ཉིད་ལ་བླ་མ་མཉམ་མེད་གྲགས་པ་རྒྱལ་མཚན་ལ་སོགས་པ་མང་པོས་ཞུས་ནས་དར་བར་བྱས་སོ། །འདི་དང་ཆ་གན་གཉིས་ཀྱིས་རྡོ་རྗེའི་ཚིག་རྐང་རྒྱ་དཔེ་ལ་མ་གཏུགས་པར་འགྱུར་བཅོས་མཛད་པ་སོགས་རང་བཟོ་ཆེ་བར་མཛད་སྣང་ཞིང་། ཞ་མའི་ལུགས་ལྟར་འཆད་པའི་ངེས་པ་མི་སྣང་ཡང་། ཞ་ལུགས་ཤས་ཆེ་བས་དེའི་ཁོངས་སུ་བསྡུས་སོ། །ལམ་འབྲས་དབང་རྒྱལ་ལུགས་ནི། ཇོ་ནང་ཀུན་སྤང་ཆེན་པོའི་སློབ་མ་ལ་སྟོད་དབང་རྒྱལ་ལམ། གཉོས་དབང་རྒྱལ་དུ་གྲགས་པ་སྦྱོར་དྲུག་གི་གོ་མྱོང་བཟང་པོ་ཡོད་པའི་གང་ཟག་དེས་ལམ་འབྲས་ཀྱི་ཁྲིད་ཡིག་ཟབ་ལམ་ཁྱད་འཕགས་དང་། ལམ་བཞི་སྤྱིའི་རྣམ་པར་གཞག་པ་རྣམས་མཛད་ནས། འདི་ཉིད་གང་ཟག་སུས་རྙེད་པ། །ཚེ་གཅིག་སངས་རྒྱས་དེ་ཡིས་ཐོབ། །མི་རྟོག་ཏིང་འཛིན་བསྒོམ་པ་ཡིས། །སྣང་བ་ལྷ་རུ་འཆར་བ་ལ། །བསྐྱེད་རིམ་རྟོག་བསྒོམ་དགོས་རྒྱུ་ཆུང་། །རླུང་སེམས་དབུ་མར་འཇུག་པ་ལ། །སྔགས་ཀྱི་དམ་པར་བཤད་པ་ལ། །བསྙེན་པ་འདི་ཡིས་དགོས་རྒྱུ་ཆུང་། །རྩ་མདུད་རླུང་དང་མེ་དང་ནི། །བྱང་ཆུབ་སེམས་ཀྱིས་འགྲིམས་པ་ལ། །འཁྲུལ་འཁོར་འདི་ཡིས་དགོས་རྒྱུ་ཆུང་། །ཐོད་རྒལ་འཇུག་པས་མེ་འབར་ཕྱིར། །གཏུམ་མོ་དམིགས་པས་དགོས་རྒྱུ་ཆུང་། །བྱང་སེམས་མེ་ཡིས་འཇུ་བ་ལ། །ལས་ཀྱི་ཕྱག་རྒྱས་དགོས་རྒྱུ་ཆུང་། །བྱང་ཆུབ་སེམས་ཀྱི་དབང་བསྐུར་ལ། །བདག་འཇུག་འདི་ཡིས་དགོས་རྒྱུ་ཆུང་། །བྱང་སེམས་གསང་གནས་བརྟན་འགེངས་ལ། །བཟློག་འགྲེམས་འདི་ཡིས་དགོས་རྒྱུ་ཆུང་། །དགོས་པ་བདུན་དང་མི་དགོས་བདུན། །དགོས་པ་བདུན་གྱིས་སངས་རྒྱས་བསྒྲུབ། །མི་དགོས་བདུན་པོ་འདི་དག་ནི། །རྨོངས་པའི་ལྟོ་ཟོང་ཟོག་པོའི་ཆོས། །རང་ཕུང་གཞན་བསླུ་བྱེད་པར་གསུངས། །ཅེས་ལམ་འབྲས་པ་སྔ་མ་ཐམས་ཅད་བཀག་ནས་རང་ལུགས་ལ་ཐོག་མར་ལྟ་བ་འཁོར་འདས་དབྱེར་མེད་ཀྱི་ཁྲིད་བྱེད་དགོས་ལ། དེ་ཉིད་སྦྱོར་དྲུག་གི་སོར་སྡུད་དང་དོན་གཅིག་པས་མུན་ཁང་། ལུས་གནད། བྱེད་བཅིངས་སོགས་སྦྱོར་དྲུག་ལྟར་ཉམས་སུ་བླངས་པས་སྟོང་གཟུགས་ཀྱི་སྣང་བ་དཔག་ཏུ་མེད་པ་དང་ཉམས་མྱོང་འཆར་ལ། དེ་ཉིད་ལ་དཀྱིལ་འཁོར་དང་། ལྷ་དང་སྔགས་ཚང་བས་གཞན་ཟུར་པ་ཉམས་སུ་ལེན་པ་རྣམས་རྟོག་བསྒོམ་འབའ་ཞིག་ལམ་དུ་བྱེད་པ་ཡིན་པས་སངས་རྒྱས་ཀྱི་ལམ་དུ་མི་འགྱུར་རོ་ཞེས་འཆད་དོ། །འདི་ནི་ཏིང་ངེ་འཛིན་གཅིག་བསྒོམས་པས་དེ་ལ་ཡོན་ཏན་གཞན་མང་པོ་དང་ལྡན་པའི་ཕྱིར། གཞན་ཐབས་ཀྱི་ཆ་རྣམས་ཉམས་སུ་ལེན་མི་དགོས་ཞེས་རྒྱ་ནག་གི་མཁན་པོ་ཧ་ཤང་གི་འདོད་པ་ཇི་ལྟ་བ་བཞིན་དུ་སྣང་བས། དེ་ཉིད་མི་འཐད་པའི་ཚུལ་སློབ་དཔོན་བདག་ཉིད་ཆེན་པོ་ཀཱ་མ་ལ་ཤཱི་ལས་བསྒོམ་རིམ་ཐ་མར་ལེགས་པར་སུན་ཕྱུང་བ་ཉིད་ཀྱིས་ཤེས་སོ། །ལུགས་འདི་སྔར་གྱི་ལམ་འབྲས་པ་སུ་དང་ཡང་མི་མཐུན་མོད། འོན་ཀྱང་བརྒྱུད་པ་ཞ་མ་ལ་འདེད་པར་སྣང་བས་ཞ་ལུགས་ཀྱི་ཁོངས་སུ་གཞུག་གོ །ལམ་འབྲས་ཇོ་ནང་ལུགས་སུ་གྲགས་པ་ནི། སྦྱོར་བ་ཡན་ལག་དྲུག་པ་ལ་སོགས་པ་རྒྱུད་སྡེའི་མན་ངག་ཟབ་མོ་རྣམས་ལ་ཉམས་མྱོང་དང་མཁྱེན་པ་ཕྱོགས་མེད་དུ་རྒྱས་པ་ཀུན་སྤང་ཀུན་ཏུ་བཟང་པོ་དཔལ་མི་བསྐྱོད་རྡོ་རྗེར་གྲགས་པ་དེ་ཉིད་ཀྱིས་འཇམ་དབྱངས་གཞི་ཐོག་པ་ཆེན་པོ་ལ་ལམ་འབྲས་ས་ལུགས་ཀྱི་མན་ངག་རྣམས་ཞུས་ཤིང་། བླ་མ་ལྷ་སྲུ་ལུང་པའི་དངོས་སློབ་རབ་ཕྱར་བ་རིན་ཆེན་འོད་ལ་ཞ་ལུགས་ཕོ་རྒྱུད་མོ་རྒྱུད་གཉིས་ཀའི་མན་ངག་རྣམས་ཞུས་ནས་ཉམས་ལེན་མང་དུ་མཛད་པས་རྡོ་རྗེའི་ཚིག་རྐང་གི་གོ་རིམ་སྔར་དང་མི་འདྲ་བ་ཞིག་བྲིས་ན་གོ་བདེ་བ་ཅིག་འོང་བ་འདུག་སྙམ་དུ་དགོངས་ནས། བླ་མ་དང་མཁའ་འགྲོ་ལ་གསོལ་བ་བཏབ་པས་མནལ་ལམ་དུ་གྲུབ་པའི་དབང་ཕྱུག་སེ་སྟོན་ཀུན་རིག་གི་རྣམ་འཕྲུལ་བསྟན་ནས་གཞུང་རྩོམས་ཤིག་པའི་གནང་བ་ཐོབ་པ་ལ་བརྟེན་ནས། ཞ་ལུགས། འབྲོམ་ལུགས། ས་ལུགས་གསུམ་གྱི་རྡོ་རྗེའི་ཚིག་རྐང་ཐམས་ཅད་ཕྱོགས་གཅིག་ཏུ་བྲིས། གོ་རིམ་མང་པོ་བསྒྱུར་བའི་རྡོ་རྗེའི་ཚིག་རྐང་ཞིག་ཀྱང་མཛད། དེའི་འགྲེལ་པ་དཔལ་ས་སྐྱ་པ་ཆེན་པོ་དང་། ཞ་མ་ལྕམ་སྲིང་དབོན་སྲས་རྣམས་ཀྱི་འགྲེལ་པ་དང་། བཀའ་བརྒྱུད་གཉིས་ཀྱི་འགྲེལ་པའི་བཅུད་བསྡུས་ནས་རྡོ་རྗེའི་ཚིག་རྐང་དཀྲུགས་པ་སྡེབ་གབ་པ་མངོན་དུ་ཕྱུང་བའི་འགྲེལ་པ་ཚིག་དོན་གསལ་བྱེད་སྒྲོན་མ་དང་། དེའི་བསྡུས་དོན་བརྒྱུད་པའི་ལོ་རྒྱུས་རྣམས་མཛད་ནས། ལམ་འབྲས་རྩ་བ་རྡོ་རྗེའི་ཚིག་རྐང་འདི། དཀྲུགས་ཤིང་བཤད་དམ་གང་འགྲིགས་སྡེབས་བཤད་ཀུན། །མཐའ་དྲུག་བཤད་བཞིས་འཁྲིད་ཚུལ་ཡིན་ལགས་མོད། །ཚིག་དོན་འགྲིགས་བསྡེབས་རྩ་འགྲེལ་ངོ་མཚར་ཧེ། །དེ་ལྟར་ཚིག་དོན་བསྡེབས་ལེགས་རྩ་འགྲེལ་འདི། །སྣོད་ལྡན་ལ་བྱིན་སྣོད་མིན་བསྟན་མི་བྱ། །ཞེས་གདམས་སོ། །དེ་ལ་བྲག་ཁ་བ་གྲགས་པ་སེང་གེ བྱང་སེམས་རྒྱལ་ཡོ། ཀུན་མཁྱེན་འཕགས་འོད། སྐལ་ལྡན་སྒོམ་བཟང་སོགས་མང་པོས་ཞུས་ནས་ཤིན་ཏུ་དར་བར་བྱས་སོ། །ལམ་འབྲས་ལྕེ་སྒོམ་ལུགས་ནི། རྗེ་ས་སྐྱ་པ་ཆེན་པོའི་སློབ་མ་དཔལ་ཏལ་ཕུག་པ་ལ་ལྕེ་སྒོམ་གྱིས་ཞུས་སོ། །ཡང་རྗེ་ས་ཆེན་ལ། ཁམས་སྒོམ་ཆོས་ཀྱི་བླ་མས་ཞུས། དེ་ལ་སློབ་དཔོན་ཇོ་བོ། དེ་ལ་ལྕེ་སྒོམ་རིན་པོ་ཆེས་ཞུས་ནས་ཏིང་ངེ་འཛིན་བསྒོམས་ནས་ཉམས་མྱོང་བསམ་གྱིས་མི་ཁྱབ་པ་འཁྲུངས་ཏེ་རྒྱས་པར་དེ་ཉིད་ཀྱི་རྣམ་ཐར་ལས་ཤེས་སོ། །བླ་མ་དེ་ལ་ལམ་འབྲས་ཀྱི་གདམས་ངག་རྫོགས་པ་ཞིག་ཡོད་པར་སྣང་མོད། འོན་ཀྱང་དངོས་སུ་ཡི་གེར་བཀོད་པ་ལམ་འབྲིང་པོའི་ཡིག་ཆ་ཞིག་མཛད། འདི་ལ་ཆོས་ལྔའི་ཆོས་བཞིའི་སྐབས་སུ་བག་ཙམ་མི་འདྲ་བ་མ་གཏོགས་གཞན་རྗེ་བཙུན་ཆེན་པོའི་བཤད་པ་ཇི་ལྟ་བ་བཞིན་དུ་སྣང་ངོ་། །བླ་མ་ལྕེ་སྒོམ་གྱིས་སྤྲུལ་སྐུ་བརྩོན་འགྲུས་ལ་སྙན་བརྒྱུད་བཞིས་གདམས་ནས་ཅུང་ཟད་འཕེལ་ལོ། །ལམ་འབྲས་ཕག་གྲུ་ལུགས་ནི་རྗེ་ས་སྐྱ་པ་ཆེན་པོ་ལ་བདེ་གཤེགས་ཕག་མོ་གྲུབ་པ། རྗེ་ཁམས་པ་རྡོ་རྒྱལ། དཔལ་མཐར་རྩ་བ་སྟེ་མཚན་གྱི་རྣམ་གྲགས་གསུམ་དང་ལྡན་པའི་སྐྱེས་བུ་ཆེན་པོ་དེས་ཞུས་ཤིང་། ས་སྐྱར་ལོ་བཅུ་གཉིས་བཞུགས། དཀའ་བ་དཔག་ཏུ་མེད་པས་བླ་མ་མཉེས་པར་བྱས་ནས་མན་ངག་ཐོབ་པ་རྣམས་ཡི་གེར་བཀོད་པ་ལམ་འབྲས་བཤད་མཛོད་མ་ཅེས་པའི་གཞུང་བཤད་ཆེན་མོ་མཛད། ཁ་ཅིག་དཔེ་མཛོད་མ་ཟེར་བ་ནི་མ་དག་པར་སྣང་ངོ་། །དེའི་སློབ་མ་པྲཛྙཱ་ཀཱིརྟིས་བཤད་མཛོད་མའི་སྟེང་དུ་མཐར་རྩ་བའི་གསུང་སྒྲོས་རྣམས་བསྣན་ནས་ཅུང་ཟད་རྒྱས་སུ་བཏང་བ་ཞིག་བྱས་ཏེ་གཏན་ལ་ཕབས་སོ། །མདོར་ན་རྩོད་པའི་དུས་ཀྱི་རྡོ་རྗེ་འཆང་ཆེན་པོ་རྗེ་བཙུན་འབྲོག་མི་ལོ་ཙཱ་བ་ཆེན་པོ་རྗེས་འབྲང་དང་བཅས་པས་མན་ངག་འདི་སྤེལ་ཞིང་དར་བར་བྱས་པ་ཡིན་ནོ། །གསུམ་པ་རྗེ་བཙུན་ས་སྐྱ་པ་རྣམས་ཀྱིས་དར་བར་བྱས་ཚུལ་ནི། འདི་ཡན་ཆད་རྗེ་བླ་མས་མཛད། བླ་ཆེན་གྱི་ལོ་རྒྱུས་ནི། སྐྱེ་བ་མཉེས་པའི་ཁྱད་པར། ལུང་རྟོགས་ཀྱི་ཡོན་ཏན་ཇི་ལྟར་མངའ་བ། ཁྱད་པར་དུ་གསུང་ངག་གསན་པའི་ཚུལ། དེ་ལས་ཇི་ལྟར་དར་བའི་ཚུལ་དང་བཞིས་རྟོགས་པར་བྱའོ། །དང་པོ་ནི། བླ་མ་དཀོན་མཆོག་རྒྱལ་པོས་དགུང་ལོ་ལྔ་བཅུ་རྩ་དགུ་བཞེས་པ་ཆུ་ཕོ་སྤྲེའུའི་ལོ་ལ་གུར་བའི་སྲིང་མོ་ཇོ་མོ་ཞང་མོ་ལ་སྲས་གཅིག་འཁྲུངས་པའི་མཚན་ནི་ཀུན་དགའ་སྙིང་པོ་ཞེས་བྱ་སྟེ། དེ་ཡང་འགྲོ་བ་ཀུན་གྱི་ཡིད་དུ་འོང་ཞིང་མཛེས་ལ་སྐྱོན་མེད་པས་དགེ་བའི་བཤེས་གཉེན་གྱི་རིགས་སུ་གྱུར་པའོ། །དེ་དུས་རེ་ཤིག་ན་ཆེན་མོ་རྡོ་རྗེ་ཕྱུག་མོས་ཉིད་ཀྱི་གདུང་རྒྱུད་འདི་ཆད་དུ་འཕངས་པ་ཡིན། དེ་ཉིད་ལ་སྲས་ཡོད་པས་ཆོག་གསུངས་ནས་ས་སྐྱའི་མདུན་གྱི་མཆོད་ཞིང་མ་གཏོགས་པ་གཞན་ཚོ་ཞང་མོ་ཡུམ་སྲས་ལ་གཏད་དོ། །དེ་ནས་བཟུང་སྟེ་རིམ་གྱིས་ལོངས་སྤྱོད་དང་དབང་ཕྱུག་ཕུན་སུམ་ཚོགས་པར་གྱུར་ནས་མཐོ་རིས་ཀྱི་ཡོན་ཏན་བདུན་ལ་མངའ་མཛད་པ་ཡིན་ནོ། །གཉིས་པ་ནི། དང་པོ་ཉིད་ནས་ཀློག་ཡིག་དང་རྩིས་ལ་བྱང་ཞིང་། ལུགས་ཀྱི་བསྟན་བཅོས་རྣམས་དང་། སྐྱེས་པ་དང་། བུད་མེད་དང་། ནོར་བུ་བརྟག་པ་སོགས་ཐུན་མོང་བའི་ཡོན་ཏན་རྣམས་ལ་དབང་འབྱོར་ནས་ཐུན་མོང་མ་ཡིན་པའི་ཡོན་ཏན་ལ་ཐོག་མ་ཁོ་ནར་ཡབ་ལ་ཀྱཻ་རྡོ་རྗེའི་དབང་ཞུས་ཏེ། དེའི་ཐུགས་སུ་ཆུད་པའི་ཆོས་རྣམས་ཅི་རིགས་པར་གསན། དེ་ནས་དགུང་ལོ་བཅུ་གཅིག་ཙམ་བཞེས་པ་ན་ཡབ་སྐུ་གཤེགས་ཏེ་གདན་ས་བླ་མ་བ་རི་བ་ལ་གཏད་ནས་བ་རི་བས་གདན་ས་ལོ་བརྒྱད་བསྐྱངས། བླ་མའི་ཞལ་ནས་ཁྱོད་ཕ་ཇོ་སྲས་ཀྱི་བུ་བྱ་བ་སློབ་གཉེར་བྱ་དགོས། དེའི་ལྷ་འཕགས་པ་འཇམ་དཔལ་ཡིན་ཞིང་། ཨ་ར་པ་ཙ་ན་འདི་བསྒྲུབ་གསུངས་ནས་བསྒྲུབས་པས། ཟླ་བ་དྲུག་ན་འགྲུབ་སྟེ། འཇམ་པའི་དབྱངས་ཀྱི་ཞལ་ནས་ཞེན་པ་བཞི་བྲལ་གྱི་གདམས་པ་གནང་། མི་བརྗེད་པའི་གཟུངས་དང་གནས་ལུགས་རྟོགས་པའི་བློ་གྲོས་ཐོགས་པ་མེད་པར་གྱུར་ཏོ། །དེ་ནས་དགུང་ལོ་བཅུ་གཉིས་པའི་དུས་སུ་རོང་ངུར་སྨྲིག་ཏུ་མངོན་པ་སློབ་པ་ལ་བྱོན་པས། བྲང་ཏིའི་གྲྭ་པ་རྣམས་རྫོགས་ནས་སྒོ་ཁང་གི་སྲང་ཁ་ཕུག་རྡུགས་ཅིག་ཏུ་ཕྱར་བའི་ཡོལ་བས་བཅད་ནས་བཞུགས། དེའི་ཚེ་ཁང་ཚོའི་ཡར་འབྲོག་ཁོག་ལེ་བའི་གྲྭ་པ་གཅིག་ལ་འབྲུམ་བུ་རྨེ་བ་ནག་པོ་བྱུང་བ་ལ་ཐུགས་རྗེས་མ་བཟོད་ནས་ནད་གཡོག་མཛད་པས་དེ་ཕན། བླ་མ་ལ་འགོས་ནས་བསྙུང་བ་ན། ས་སྐྱ་ན་ཨ་ཕོ་ཕག་སྟོན་བྱ་བའི་མིག་མཐོང་མཁན་ཅིག་ཡོད་པས། སྔ་དྲོ་ཉི་མ་ལ་འཐོན་ནས་བསྡད་ཙ་ན། ཤར་ཕྱོགས་བྲ་ཆུང་ཁ་ན་ཚུར་རྟ་བྲ་བོ་ཞོན། ཞ་ཐང་ཞུ་ཕྱལ་ལྟབ་ཅན་ཕོད་ཁ་ཆེན་པོ་གྱོན་པ་ཅིག ལྕག་གཡོབ་གིན་ས་སྐྱའི་ཐད་ཀར་རྟ་ཁ་བསྒྱུར་ནས་ཀུན་དགའ་སྙིང་པོ་ན་ཡིན་ཡོད་ཁྱེད་ས་སྐྱ་པ་ཅི་མནོ་བ་ཡིན་ཟེར་བ་ཅིག་བྱུང་སྟེ། ཨ་ཕོ་ཟེར་བ་བཞིན་བདེན་ལས་ཆེ་ཟེར་དེའི་དགོང་མོ་བང་ཆེན་པས་སླེབ། མ་གཅིག་གིས་བཙལ་འཕྲུལ་འདྲ་བྱས་ཏེ་གསེར་ལ་སོགས་པའི་ཡོ་བྱད་མང་པོ་ཁྱེར་ནས་བྱོན་མཇལ་བ་ན། སྐུ་གཞོན་པ་དང་ཐག་རིངས་སུ་བསྙུང་བས་བཤུམ་པ་ལ། ཡུམ་ན་རེ་ཕ་ཇོ་སྲས་ཀྱི་བུའི་སྙིང་རུས་ཀྱི་ཚུགས་ཁའམ་ཁྱོད་དགེ་འདུན་རྒྱ་མཚོ་འདུས་པ་འདི་ལྟ་བུའི་གསེབ་ན་ཤི་ན་རང་ལེགས་པ་ཡིན་ཏེ་ཟེར་ནས་ཤ་བཅད་སྐད། དེ་དྭངས་ནས་ངུར་སྨྲིག་པ་བྲང་ཏི་དར་མ་སྙིང་པོ་ལ་མངོན་པ་ཚར་གཅིག་གསན་པས་ཐུགས་སུ་ཚུད། དེ་ནས་བྲང་ཏི་སྐུ་གཤེགས་ཏེ། ཟུར་ཆོས་པ་བྱམས་འཆད་པ་ཁྱུང་ལ་ས་སྡེ་དང་། སྡོམ་རྣམ་གཉིས་ལ་སོགས་པ་གསན། ཉང་སྟོད་དུ་ཁྱུང་རིན་ཆེན་གྲགས་ལ་རྣམ་ངེས་དང་རིག་ཐིག་ལ་སོགས་པ་གསན། ཟུར་ཆོས་པ་མེ་དིག་པ་ཡིན། དེ་ཙམ་ན་ས་སྐྱའི་གཞི་པས་ཕྲིན་བསྐུར་ཏེ་ཚད་མ་ཕྱིས་གསན་པས་ཆོག བླ་མ་བ་རི་བ་བསྒྲེས་ཕྱིས་གསན་པ་མི་ཡོང་ཡར་འབྱོན་པ་ཞུས་པས་ཡར་བྱོན་ནས་བླ་མ་བ་རི་བའི་ཆོས་སྐོར་ཐམས་ཅད་ཐུགས་སུ་ཆུད་པར་མཛད་དོ། །དེ་ནས་གྲོམ་པ་གཡུ་རྩེ་འབྱིང་ཕུར་མེ་ལྷང་ཚེ་བ་ལ་རྣམ་ངེས། རིག་ཐིག རང་རྒྱུད་ཤར་གསུམ་ལ་སོགས་པ་གསན་ནོ། །དེ་ནས་བླ་མ་བ་རི་ལོཙྪ་བས་གདན་ས་གཏད་དེ་ཡུན་མི་རིང་བ་ན་བར་ཕུག་ཏུ་སྐུ་གཤེགས་སོ། །དེ་རྗེས་བླ་མ་གནམ་ཁའུ་པའི་དྲུང་དུ་བྱོན་ནས་བྱ་སྤྱོད་ཡོ་གའི་སྐོར་ཕལ་ཆེ་བ་དང་། གསང་འདུས་འཕགས་སྐོར་དང་། ཡེ་ཤེས་ཞབས་ལུགས་གཞུང་ཕྲན་དང་བཅས་པ། མངོན་རྟོགས་རྒྱན་མ་གཏོགས་པའི་བྱམས་ཆོས་བཞི། བསླབ་བཏུས་སྤྱོད་འཇུག མདོ་ཀུན་ལས་བཏུས་དང་། སྤྱོད་ཕྱོགས་ཕྲ་མོ་མང་དུ་གསན་ནོ། །དེ་ནས་བགྲེས་པོ་རྣམས་གྲོས་བྱས་ཏེ། ང་ཕ་ཆོས་ཅིག་རྩད་བཅད་པ་འཐད་པར་འདུག་པ་ལ། པུ་ཧྲང་པ་གསལ་བའི་སྙིང་པོ་མཁས་ཏེ་ནི་གཤེགས། དེའི་སློབ་མ་འཁོན་སྒྱི་ཆུ་བ་མཁས་ཀྱང་ཟེར་གདུང་རུས་ཀྱང་གཅིག་པས་ཁོང་ཅན་འབྱོན་པ་དྲག་ཟེར་ནས་བྱོན། དབང་བསྐུར་ཞུས་པས་སྟ་གོན་གྱི་ནུབ་མོ་མནལ་ལམ་དུ་སྲིད་པའི་རྒྱ་མཚོ་ཡིན་ཟེར་བའི་ཆུ་བོ་ཆེན་པོ་དམར་མེར་བ་གཅིག་ལ་ཟམ་པ་གསུམ་འདུག་པའི་ཆུ་འགྲམས་ན་བསྒྲལ་རྒྱུའི་མི་མང་པོ་འདུག་པས་ང་སྒྲོལ་བར་ཞུ་ང་སྒྲོལ་བར་ཞུ་ཟེར་ནས་བསྒྲལ་བས་ཟམ་པ་ཕྱི་མ་ལ་གསུམ། བར་པ་ལ་བདུན། ཉེ་ཤོས་ལ་མང་པོ་གཅིག་བསྒྲལ་བ་རྨིས་ཅུང་ཟད་མཉེལ་ཏེ། ཉི་མ་གཅིག་ལ་བསྙེལ་གསོ་བ་སྙམ་བྱེད་ཙ་ན་མནལ་སད། ནངས་པར་རྨི་ལམ་དྲིས་པ་ན་འདི་ལྟར་བྱུང་ཞུས་པས། བླ་མའི་ཞལ་ནས་ཁྱེད་ཀྱི་མཁོས་ཀྱིས་མི་གསུམ་ལས་ག་ལ་སྒྲོལ་ཞེས་ཞལ་ཀྱལ་ཡང་གསུངས། དེ་ནས་ཀྱཻ་རྡོ་རྗེ་ཌོམ་བྷི་པ་དང་བྲམ་ཟེ་ནག་པོ་པའི་སྐོར། གྲུབ་པ་སྡེ་བཅོ་བརྒྱད་སྙིང་པོ་སྐོར། ཕྲ་མོ་ཉི་ཤུ་རྩ་ལྔ་ཡན་ལག་དང་བཅས་པ། འབྲོག་མི་ལུགས་ཀྱི་མ་ཧཱ་མཱ་ཡཱ། ཟླ་གསང་ཐིག་ལེ། སངས་རྒྱས་ཐོད་པ་འགྲེལ་པ་དང་བཅས་པ། མར་ལུགས་ཀྱི་གུར་བརྟག གདན་གཞི། མ་ཧཱ་མཱ་ཡཱ། དབུ་མ་རང་རྒྱུད་ཤར་གསུམ། བསླབ་བཏུས་སྤྱོད་འཇུག་རྣམས་གསན་ནོ། །དེ་ཡང་ཁོང་པ་ལ་གྲྭ་པ་བརྒྱད་ཅུ་ཙམ་ཡོད་པའི་ནང་ནས་ས་ཆེན་གྱིས་ལུང་རིགས་མཁྱེན་པ་དང་། འཇམ་དབྱངས་ཀྱིས་རྗེས་སུ་བཟུང་བས་ཚར་རེ་ལ་མཁྱེན་ཏེ། བླ་མས་ཀྱང་ཐུགས་རྩིས་ཆེ་སྐད། དེ་ཙ་ན་མདོག་སྟོད་དུ་ཆོས་འཁོར་གཅིག་ལ་བླ་མ་སེ་བྱོན་ཟེར་བླ་ཆེན་ལྟད་མོ་ལ་མི་དགེས་ཀྱང་། བླ་མ་སེ་བཟང་པོ་ཡིན་ཟེར་བ་དང་། ཆོས་བར་ཡིན་པས་སྒྱི་ཆུ་བའི་སློབ་མ་བན་ཆུང་འགའ་དང་འགྲོགས་ཏེ་བྱོན་པས། བླ་མ་གྲལ་མགོ་ན་བཞུགས་འུད་མང་པོ་གསུང་གིན་གདའ་འོ། །ཁོང་གིས་གྲོགས་པོ་ཚོ་ལ་རེ་རེ་ནས་ཇོ་སྲས་ཉིད་ཡུལ་གང་བ་ཡིན། ཡོན་ཏན་ཅི་ཤེས། ད་བཤད་པ་བྱ་མནོའམ། སྒྲུབ་པར་བྱ་མནོ་གསུངས། བླ་ཆེན་ལ་ཇོ་སྲས་ཉིད་གང་བ་ཡིན་གསུངས་པ་ལ་བདག་གྲོམ་ཕུག་ཕ་གི་བ་གཅིག་ལགས་ཞུས་པས། དེ་གང་ན་ཡོད་གསུངས། ས་སྐྱ་ན་བདོག་ཞུས་པས་འོ་ན་དེ་ན་ངའི་བླ་མ་ཅིག་ཡོད་པ་ཡིན་ཏེ་སྐུ་ནི་གཤེགས་འདུག ང་ལ་ཁྲལ་འདོད་པ་གཅིག་ཀྱང་མ་བྱུང་། དེ་ན་བ་རི་བའམ་བྱ་བ་གཅིག་གིས་གཟུང་འདུག་ཟེར་བས་འགྲོ་སྙིང་ཡང་མ་འདོད། ད་དེའི་ཤུལ་ན་ཅི་ལྟར་ཡོད་གསུང་བ་ལ་དེའི་བུའི་དོད་ཅིག་ཀ་བདག་ལགས་ཞུས་པས། བླ་མ་ན་རེ། ཉིད་བརྫུན་མ་ཟེར། ངའི་བླ་མ་ལ་སྲས་མི་མངའ་བ་ཡིན་གསུངས། རྡོ་རྗེ་ཕྱུག་མོ་ལ་མེད་པས་བླ་ཆེན་གྱིས་ལན་འདེབས་མ་ནུས་པ་ལ། གྲོགས་ཅིག་གིས་ལོགས་སུ་ཞང་མོ་བྱ་བ་ལ་འདི་ལྟར་བྱོན་པའི་རྒྱུ་མཚན་ཞུས་པ་ལ། བླ་མའི་ཞལ་ནས་མི་ཤི་གསོན་མི་འཕྲད་ཟེར་ཏེ་འཕྲད་པའི་དུས་བྱུང་ཟེར་ནས་བླ་ཆེན་པང་དུ་བཞེས་སྤྱན་ཆབ་ཕྱུང་ནས་རྒས་པོ་གོགས་པོ་འདིའི་ནང་ན་ཆོས་ཡོད་པས་ཁྱོད་ལ་སྟེར་བ་ཡིན་མྱུར་དུ་ཤོག ག་ལེ་ཡོང་སྙམ་ན་སང་ཕོད་ནི་ང་འཆི་བ་ཡིན་གསུངས་ནས་བླ་ཆེན་དེར་ཞག་གཅིག་བཞུགས་ཏེ། དེའི་བར་ལ་བླ་མས་ལམ་འབྲས་བུ་དང་བཅས་པ་འདི་ལ་དཀྱུས་སུ་གསུངས་པ་འདི་ཙམ་ཅིག་གི་རྐང་གྲངས་དང་བཅས་པ་ལམ་མེ་བ་གཅིག་གསུངས། དེ་ནས་ཡར་བྱོན་ནས་མཁར་ཆུང་དུ་བཞུད་དགོངས་ཏེ། བླ་མ་སྒྱི་ཆུ་བ་ལ་ཞུས་པས་མ་གནང་། སང་ཕོད་འགྲོ་སྙམ་ཙ་ན་སེས་གསུང་བ་ལྟར་བདེན་ཏེ། རང་གནོང་འགྱོད་ཀྱང་ཕན་པ་ནི་མེད། དེ་ནས་དུས་རིང་ཞིག་ནས་བླ་མ་སྒྱི་ཆུ་བ་ས་སྐྱར་གདན་དྲངས་ནས་ཆོས་འཁོར་བྱ་དགོངས་ནས་ཆ་རྐྱེན་མང་དུ་བསྒྲུབས་སློབ་མ་འགའ་ཡང་བསྡུས་ནས་ཡོད་ཙ་ན། བླ་མ་སྒྱི་ཆུ་བ་བསྙུང་ནས་བླ་ཆེན་ལ་ཤོག་གསུང་བ་བྱུང་ནས་བྱོན་པས་མ་སླེབ། ཁྱོད་རབ་ཏུ་བྱུང་ལ་འཁོན་ཚོའི་སྡེ་འདི་སྐྱོངས་གསུངས་པའི་ཞལ་ཆེམས་བཞག་ནས་སྐུ་གཤེགས་ཏེ། སྒྱི་ཆུ་བའི་གདན་ས་བླ་ཆེན་ལ་གཏད། དེའི་རྗེས་ཀྱི་བྱ་བ་རྣམས་ཚར་ནས་ས་སྐྱར་བྱོན་ཏེ། བླ་མའི་གསུང་བཞིན་དུ་རབ་ཏུ་བྱུང་དགོངས་ཏེ། ན་བཟའ་སེར་ཆས་བསྒྲུབ་པ་བླ་མ་གནམ་ཁའུ་པས་གསན་ཏེ། རབ་ཏུ་བྱུང་བ་མ་བྱེད། བླ་མ་མཉམ་པོ་ལ་ཁོང་གཤིན་པོའི་ཁ་ཆེམས་བས་ང་གསོན་པོའི་ངག་ལ་ཉོན། རབ་ཏུ་མ་བྱུང་ན་ཕན་ཆེ་བར་འོང་གསུངས་ནས་རབ་ཏུ་བྱུང་བར་མ་གནང་། འོན་ཀྱང་འཁོན་ཚོའི་དཔོན་ནི་མཛད། དེ་ནས་བླ་མ་སྒྱི་ཆུ་བ་བླ་མ་མལ་གྱི་སློབ་མ་ཡིན་པས་སྒྱི་ཆུ་བའི་བདེ་མཆོག་གི་ཕྱག་དཔེ་རྣམས་བསྣམས་ནས། གུང་ཐང་ན་ལ་རྩེ་གནས་གསར་དུ་བྱོན་ཏེ། བླ་མ་མལ་ལ་བདེ་མཆོག་གི་རྩ་བའི་རྒྱུད་ཆ་ལག་དང་བཅས་པ་ཕ་ན་ཕིཾ་གུ་པ་དང་། ལོ་ཆེན་རིན་བཟང་། ཇོ་བོ་རྗེ། མ་ཧཱ་ཛཱ་ན་དང་། པ་ར་ཧེ་ཏ་རྣམས་ནས་བརྒྱུད་པ་དང་། སེམས་འགྲེལ་སྐོར་གསུམ་དགྲ་ནག་འཇིགས་བྱེད་གདོང་དྲུག ནཱ་རོ་ཏ་པའི་གུར། རིགས་ཚོགས་བསྟོད་ཚོགས་རྣམས་གསན། དེ་ནས་ས་ཆེན་མར་འབྱོན་ཁར་བླ་མ་ན་རེ། ངའི་ཆོས་འདི་ངེས་པར་སངས་རྒྱ་བའི་ཆོས་ཡིན་པས། མི་ཉིད་ཀྱིས་རིགས་ཀྱི་དབང་བསྐུར་ཅིག་བྱེད་ཟེར་ནས་ར་ཚང་གཅིག་ཏུ་ཕུབ་ཁོག་གཅིག་གི་སྟེང་དུ་པདྨ་འདབ་བརྒྱད་ཅིག་བྱས། བླུག་གུ་གཅིག་གི་རྐེ་ལ་བལ་གཅིག་དཀྲིས་ཏེ་བྱེད་པའི་ཉན་ཡོད་པས་དེ་འདྲ་མ་བྱེད་གསུངས་པས། བླ་མའི་ཆོས་ལ་དེ་འདྲ་ག་ལ་བྱེད་གསུངས་ནས་མར་བྱོན། གཡས་རུ་ན་མར་བྱོན་དབང་བསྐུར་སེམས་བསྐྱེད་འདྲ་མཛད་པས། གསེར་སྲང་བཅུ་བདུན་ཙམ་འབུལ་བ་བྱུང་། དེ་རྣམས་སྔགས་པ་གཅིག་ལ་བསྐུར་ནས་བླ་མ་ལ་འབུལ་དུ་བཏང་བས། བླ་མ་སྟོན་མོ་ཅིག་བྱེད་པ་གཅིག་གི་གྲལ་མགོ་ན་བཞུགས་པ་ལ། ས་སྐྱ་ནས་འོངས་པ་ཅིག་མཇལ་ཁ་ཞུ་ཡིན་གདའ་འོ་བྱས་ཏེ་ཞུས་པས་བཟའ་བཏུང་འདོད་པ་ཡིན་ནམ་བྱིན་གསུངས་ནས་མ་མཇལ། ཡར་ལན་མར་ལན་མང་པོ་གཅིག་བྱས་ཏེ་ས་སྐྱ་ནས་འོངས་པའི་འབུལ་བ་ཅིག་བདོག་པས་མཇལ་བྱས་འཕྲལ་ཐུགས་ཅོལ་ཆུང་བ་འདྲ་ཅིག་ཡོད་པས་ཁོང་རང་བྱོན་ནས་འབུལ་བ་ཅི་ཡོད་གསུངས་གསེར་ཅིག་བདོག་བྱས་པས། ཞོ་དུ་ཡོད་གསུངས། སྲང་བཅུ་བདུན་ཙམ་བདོག་བྱས་པས་མཉེས་ནས་ཁོང་རང་གི་ཁུག་མ་ནས་སྲང་གང་བཏོན་འདི་ཡང་དེའི་སྟེང་དུ་བསྣོན་ལ། སྲང་བཅོ་བརྒྱད་ཡོད་གྱིས་ལ་ང་ལ་ཚོགས་སུ་ཕུལ་གསུངས། དེ་ལྟར་བྱས་པས་ཁོང་དམ་ཚིག་པ་བསམ་གྱིས་མི་ཁྱབ་པ་འདུག་པ་ལ་ངས་དེ་ལྟར་ཅུང་མ་ཤེས། ད་ངའི་གམ་དུ་ཤོག ཆོས་ཀྱི་ལྷག་མ་ད་དུང་ཡོད་པས་ཁྱོད་ལ་སྟེར་བ་ཡིན་གྱིས་གསུངས། དེར་བནྡེ་མར་འོངས་ནས་བླ་མ་ལ་ཕྲིན་བྱས་བླ་ཆེན་གྱིས་ཀྱང་ཡར་བྱོན་ཏེ། སྦྱོང་རྒྱུད། རབ་གནས་ཀྱི་རྒྱུད། ཡན་ལག་བརྒྱད་པ་ལ་སོགས་པའི་ཆོས་ལྷག་མ་རྣམས་གསན། ཁྱད་པར་དུ་མགོན་པོའི་སྒྲུབ་ཐབས་རྗེས་གནང་དང་བཅས་པ་གནང་ནས། དེའི་རྟེན་དར་ནག་དང་། ལྕགས་ཀྱི་རྡོ་རྗེ་རྩེ་དགུ་པ་གཅིག་དང་བཅས་ཏེ། མགོན་པོ་ལ་མི་ལ་ཟེར་བ་ལྟར་ད་ང་རྒས་པས་ཁྱོད་མི་དགོས། ཁྱེད་རང་འཁོན་ས་སྐྱ་པའི་རྗེས་ལ་སོང་ཅིག་ཟེར་ནས་སྐུ་འབག་ཀྱང་བརྫངས་སོ། །དེ་རྣམས་བསྣམས་ནས་མར་བྱོན། ལྷོ་སྟོད་དུ་པུ་ཧྲངས་ལོ་ཆུང་ལ་བདེ་མཆོག གསང་འདུས། དུས་འཁོར་ལ་སོགས་པ་གསན། གཞན་ཡང་སྐྱུ་ར་ཨ་སྐྱབས། བལ་པོ་པད་མ་ཤྲཱི། རྒྱ་གར་གྱི་རྣལ་འབྱོར་པ་བྷོ་ཊ་ར་ཧུ་ལ། བལ་པོ་ཛྙཱ་ན་བཛྲ་རྣམས་ལས་ཆོས་མང་དུ་གསན་ཏེ་ལུང་གི་ཡོན་ཏན་གྱིས་ཕྱུག་ནས་རྟོགས་པའི་ཡོན་ཏན་ནི་སྡོམ་པ་གསུམ་དང་འགལ་བའི་ཉེས་པ་ཕྲ་ཞིང་ཕྲ་བས་ཀྱང་མ་གོས་ཤིང་བྱམས་པ་དང་ཐུགས་རྗེས་རྒྱུད་བརླན། དངོས་པོ་གང་ལ་ཡང་མི་ཆགས་ལ་དད་པ་དང་སྒྲུབ་པའི་སྒོ་ནས་བླ་མ་རྣམས་མཉེས་པར་མཛད། ནང་དུ་རྟེན་འབྲེལ་འགྲིགས་པས་ཡི་དམ་གྱི་ལྷ་ཞལ་གཟིགས། སྐུའི་བཀོད་པ་དྲུག་གཅིག་ཆར་དུ་སྟོན་པ་སོགས་ཀྱི་རྫུ་འཕྲུལ་དང་མངོན་ཤེས་ལ་ཐོགས་པ་མི་མངའ་བ་ཡིན་ནོ། །གསུམ་པ་ཁྱད་པར་དུ་གསུང་ངག་གསན་པའི་ཚུལ་ནི། གུང་ཐང་ནས་ཆགས་ཕེབས་པ་དང་སེའི་སློབ་མ་སུ་དྲག་དྲིས་པས་ཞང་དགོན་པ་བ་རྩད་ཆོད་ནས་སག་ཐང་དུ་ཕེབས། ཐག་མཁན་ཚོ་གཅིག་འདུག་པ་ལ་ཞང་དགོན་པ་དང་མཇལ་གྱིས་དང་བྱས་པས་ཕ་ཀི་ཀ་ཡིན་ཟེར་བལྟས་པས་མི་མང་པོ་ཞིག་གི་གསེབ་ན་ཤམ་ཐབས་གཅིག་གསོལ། ཤ་འགག་མེད་པར་ར་ཐུལ་ཅིག་ཕྱིར་གློག་ཏུ་གྱོན་ནས་ཡོ་ག་བྱེད་ཀྱིན་གཏམ་མང་པོ་ཅལ་ཅོལ་གསུང་གིན་འདུག དེར་དྲུང་དུ་ཕྱིན་ནས་ཕྱག་བྱས་པ་ན་ཁྱེད་ནི་ག་ཤེད་ཀྱི་མི་ཆེན་ཅིག་འདྲ། དེའི་ནང་ནས་ཀྱང་གསར་མ་བ་ཅིག་འདྲ་ན་ནོར་བ་མིན་ནམ་གསུངས། མ་ནོར་ལགས་གསུང་ངག་རིན་པོ་ཆེ་ཞུ་བ་ལགས་བྱས་ཏེ། ཁྲབ་ཅིག་ཕྱག་རྟེན་དུ་ཕུལ་བས་ད་ཅི་ནས་ནོར་བྱས་ཏེ། ངས་དེ་འདྲ་ཚོ་མི་ཤེས་དེའི་མིང་ཡང་ད་རེས་ལས་མ་ཐོས། ང་ནི་རྫོགས་ཆེན་ཙ་མུནྟྲི་དང་། བྲམ་ཟེའི་ཆོས་སྐོར་འདྲ་འཆད་པ་ཡིན། དེ་ཀུན་ཉན་པ་ལ་ཁྱེད་གསར་མ་བ་བྱ་བ་རྟོག་པ་མི་བྱེད་དམ་གསུངས། བསྐྱར་ནས་ཞུས་ཀྱང་དེའི་གདམས་ངག་མེད་གསུངས། འོ་ན་སྤྱོད་ལམ་གྱི་ལུགས་འདི་ལ་དཔག་ན་ང་རང་ནོར་བ་ཀ་ཡིན་ནམ་སྙམ་ནས་ལོག་པ་དང་། ཇོ་སྲས་འོད་མཆོག་གི་ཕན་རེ་བླ་མ་ཞང་པ་ལ། འོ་སྐོལ་མཁར་ཆུང་ན་ཡོད་དུས་སྒྱི་ཆུ་བའི་གྲྭ་པ་གཅིག་ལ་ངའི་བླ་མའི་སྲས་པོ་ཡིན་གསུངས་ནས་པང་དུ་ལེན་པ་དེ་འདྲ་ན། བཟློག་པས་ཀྱང་མཆིའམ་ཞུས་པས། འོ་ན་དམ་ཚིག་གི་ཉེས་པར་འགྲོ་ཉེན་ཡོད་བོས་གསུངས་ནས་ཡར་བཟློག་སྟེ་ལོ་རྒྱུས་ཞིབ་ཏུ་མཛད་པས་ས་སྐྱ་པའི་སྲས་ཡིན་པར་ཐུགས་ཆེས་ནས། ངས་ད་ཅི་ངོ་མ་ཤེས་པར་བརྫུན་བྱས་མན་ངག་ཡོད་དེ་སྔར་མ་བཤད་པས་བསམ་མནོ་འདྲའང་བྱ་དགོས། སྤྱིར་ཡང་ད་ལྟ་དོར་ཀ་མདོ་བྱ་བའི་སྨད་འདི་ན་སེ་སྟོན་རྡོར་འབྱུང་གིས་པཎ་ཆེན་དང་། པཎ་ཆུང་། ལོ་པཎ་དཔོན་སློབ་མང་པོ་ལ་ཆོས་འཁོར་བྱེད་པའི་རྩར་རྣལ་འབྱོར་པ་རྒད་པོ་ཅིག་གིས་བཤད་པ་བྱས་ཀྱང་མི་མཛེས་པས་དཔྱིད་ཀ་འདིར་བྱོན། ཆོས་ཚོ་ཚར་བར་བགྱི་གསུངས། དཔྱིད་ཀ་བྱོན་ནས་སླེབ་པའི་ནུབ་མོ་ཆོས་ཀྱི་གླེང་བསླང་མཛད་པས་མཉེས་སྐད། དེ་ནས་སྔོན་འགྲོའི་ཁྲིད་ཚར་ནས་ནངས་པར་ཆོས་གསུང་བའི་ནུབ་མོ་ནས་རྗེའི་ལྗགས་སྐྲངས་ནས་བསྙུང་སྟེ་ཆོས་གསུང་བ་མ་བྱུང་བས་འོ་སྐོལ་གཉིས་ཀྱི་བར་ན་དམ་ཚིག་གི་ཉེས་པ་ཡོད་པར་འདུག་པས་མཎྜལ་ཕུལ། ཡི་གེ་བརྒྱ་པ་བགྲོངས་ཤིག་གསུངས་ནས་གཞན་ཡོང་ས་མེད། ཁ་སིང་གདམས་ངག་རང་མེད་པ་ཀ་ཡིན་ནམ་སྙམ་པ་ཅིག་བྱུང་བ་དེ་ཡིན་ནམ་སྙམ་ནས་དེ་ལ་དམིགས་ཏེ་མཎྜལ་ཕུལ་ཡི་གེ་བརྒྱ་པ་མང་དུ་གསུངས་པས་ཕན་གསུངས་ནས། དེ་ནས་གསུང་ངག་ཞུ་བའི་དུས་སུ་དཀའ་བའི་གནས་འགའ་ལ་ཕྱག་ལ་རྡེའུའི་རྩེ་མོས་ཟིན་བྲིས་བཏབ་པས་རྗེའི་ཞལ་ནས་དེ་ཙུག་མ་མཛད་རྗེའི་ཐུགས་དམ་ལ་གནོད་པ་ལགས་གསུངས་ནས་འབྲིར་མ་གནང་། མན་ངག་ཀྱང་ཁད་ཀྱིས་གནང་བ་ལ། ཇོ་མོས་ཁོང་ལ་གདམས་ངག་མྱུར་དུ་བྱིན་མཛོད་ཞུས་པས་ཅི་ཟེར་གདམས་ངག་ཟབ་མོ་ལ་ཁྱི་དང་གློ་བ་འཕྲད་པ་བཞིན་ཅི་ཐོད་ཐོད་དུ་བཏང་ངམ་གསུངས་ནས་རིམ་གྱིས་གནང་། དེ་ནས་དབྱར་དགུན་བཞི་ལྷག་ཙམ་བཞུགས་ནས་གདམས་ངག་རྣམས་རིམ་གྱིས་ཞུས་པས། བླ་མ་དཀོན་མཆོག་རྒྱལ་པོ་བླ་མ་སེའི་སློབ་དཔོན་ཡིན་པས་བརྒྱུད་པའི་དམ་ཚིག་ལ་དགོངས་ནས་གསུང་ངག་རིན་པོ་ཆེ་མ་ལུས་པར་གནང་ངོ་། །མདོར་ན་ལམ་སྐོར་དགུ་ཀྱཻ་རྡོ་རྗེའི་རྒྱུད་གསུམ་གྱི་བཤད་པ། གསང་བ་འདུས་པ། སངས་རྒྱས་མཉམ་སྦྱོར་ལ་སོགས་པ་རྒྱུད་སྡེ་དང་གདམས་ངག་མང་པོ་ལོ་བཞི་བཞུགས་ཏེ་ཞུས་སོ། །གདམས་ངག་རྫོགས་ཏེ་སྒྲུབ་པ་ལུང་སྦྱིན་པའི་སྐབས་སུ། ལོ་བཅོ་བརྒྱད་ཀྱི་བར་དུ་ཆོས་འདི་གཞན་ལ་སྟོན་པ་ལྟ་ཞོག་འདི་འདྲ་ཡོད་པ་དང་། ཤེས་པའི་མིང་ཙམ་ཡང་མ་འདོན། ཡི་གེར་ཡང་མ་འབྲི། དེ་ནས་གཞན་ལ་འཆད་དམ། ཡི་གེར་འབྲིའམ། གང་བྱེད་ཀྱང་ཉིད་རང་ཆོས་ཀྱི་བདག་པོར་འགྱུར་བ་ཡིན་གསུངས་ནས་བཀའ་རྒྱས་བཏབ། སྤྱིར་ཁྱེད་ཀྱིས་སྒྲུབ་པ་གཙོ་བོར་བྱས་ན་ཚེ་འདི་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། བཤད་ཉན་བྱས་ན་གདུལ་བྱ་དཔག་ཏུ་མེད་པའི་དོན་དུ་འགྱུར་ཞིང་། ཁྱད་པར་དུ་ལུས་མ་སྤངས་པར་ཕྱག་རྒྱ་ཆེན་པོ་འགྲུབ་པའི་སློབ་མ་གསུམ། བཟོད་པ་ཐོབ་པའི་རྣལ་འབྱོར་པ་བདུན། རྟོགས་པ་དང་ལྡན་པའི་རྣལ་འབྱོར་པ་བརྒྱད་ཅུ་ཙམ་འབྱུང་ཞེས་ལུང་བསྟན་ནོ། །དེར་ལོ་བཅོ་བརྒྱད་ཀྱི་བར་དུ་བསྙེལ་གྱིས་དོགས་ནས། ཟླ་རེ་ལ་གསུང་ངག་མ་ལུས་པ་བཤད་པའི་བསམ་མནོ་ཚར་རེ། ཉིན་ཞག་རེ་ལ་རྡོ་རྗེའི་ཚིག་རྐང་བདུན་རེ་འདོན་པའི་དམ་བཅའ་མཛད་ནས་བྱོན། དེ་ནས་ས་སྐྱར་བཞུགས་ཙ་ན། རྗེ་དགོན་པ་བ་བསྙུང་ནས་ཤོག་གསུངས་པའི་འཕྲིན་བྱུང་བས་བླ་ཆེན་གྱིས་ཀྱང་རིངས་པར་བྱོན་ཏེ། དིངས་ཀྱི་ཕུར་སླེབ་ཙ་ན་སྤང་དུག་གིས་དབུ་བསྙུང་བ་དང་། ས་འཕྱིས་པས་མ་ཐོན་པར་ནུབ་མོ་དེ་ཀར་གཟིམས། ནངས་པར་བྱོན་པས་ནུབ་མོ་སྐུ་གཤེགས་འདུག་ནས་མ་མཇལ། དེར་སྤུར་བཞུ་བ་ལ་སོགས་པ་རྗེས་ཀྱི་བྱ་བ་ཀུན་ཚར་ནས། ཇོ་མོ་ན་རེ། ཇོ་ཇོ་རང་དཔེ་ཆ་འདི་ཚོ་ལྟོས་ལ་དགོས་པ་འདུག་ན་ཚག་གྱིས་གསུངས་ནས། ཤོག་རིལ་རྐྱལ་པ་གང་བྱིན་པས་འདི་ཚོ་མི་འཁུམས་པར་ཞུ་བྱས་ནས་ཕྱི་རྟེན་གྱི་ནང་དུ་བཞུགས། རྗེའི་ཞལ་ནས་ཡི་གེ་མེད་གསུང་བ་ལ་ཡི་གེ་བྱུང་ནའང་མི་དགའ། རང་ལ་སྔར་མ་བྱུང་བའི་གདམས་ངག་འདྲ་བྱུང་ནའང་མི་དགའ་སྙམ་ནས་ཚགས་མ་མཛད། རེ་རེ་ཙམ་མཐོང་བ་ལ། ཡི་གེའི་གཟུགས་སམ། གདན་ནམ། འཁྲུལ་འཁོར་རེ་དང་། སྔགས་ཀྱི་ཡིག་འབྲུ་འདྲ་ལས་མི་འདུག་གསུངས། དེ་ལྟར་བླ་ཆེན་གྱི་སྐུ་ཚེའི་སྟོད་ཡན་ཆད་དུ་བཀའ་རྒྱ་མ་ཐེམས་པའི་སྟོབས་ཀྱིས་ཡི་གེ་ཡང་མེད་པས་སྙན་བརྒྱུད་འབའ་ཞིག་ཏུ་བཞུགས་པ་ཡིན་ནོ། །དེ་དག་ནི་རིང་བརྒྱུད་གསན་ཚུལ་ཡིན་ལ། ཉེ་བརྒྱུད་ཀྱི་གསན་ཚུལ་ནི་བླ་ཆེན་མལ་སྐུ་གཤེགས་པའི་ཚེ་གུང་ཐང་དུ་བྱོན་ནས་མར་ལམ་གཡས་རུའི་བྲང་ཆུང་དགོན་པར་བྱོན་པ་ན་དུག་རོ་ལངས་ཏེ་ཟླ་བ་གཉིས་ཙམ་བསྙུང་ནས་ཆོས་ཐམས་ཅད་བརྗེད་དེ་གཅིག་ཀྱང་མེད་པར་སོང་སྟེ་གྲོགས་གཅིག་ལ་དྲི་ས་ཡང་མེད། རྒྱ་གར་དུ་ཕྱིན་ཡང་ཅི་འདྲ་ཡོད་ཆ་མེད་སྙམ་ནས། ཐུགས་མ་བདེ་སྟེ་ས་སྐྱར་བྱོན་ནས་བྲང་ཁང་རྙིང་པར་སྐུ་མཚམས་བཅད་དེ་བླ་མ་དང་དཀོན་མཆོག་ལ་གསོལ་བ་བཏབ་པས་ཅུང་ཟད་རེ་དྲན་པ་བྱུང་། དེ་ནས་དགོན་པ་བ་མནལ་ལམ་དུ་བྱོན་ནས་ཆོས་གསུངས། དེ་ནས་དངོས་སུ་ཆོས་གསུངས་པས་མ་ལུས་པ་དྲན་པར་བྱུང་གསུངས། ཡང་དུས་གཞན་ཞིག་གི་ཚེ་ས་སྐྱར་བཞུགས་ཙ་ན། རྣལ་འབྱོར་དབང་ཕྱུག་བྱོན་ནས་ས་དཀར་པོ་རྒྱབ་ཡོལ་གྱི་ཚུལ་དུ་བྱས། མ་གི་འབལ་གྲོག་ནས། ཡ་གི་མོན་གྲོག་མན་ཆད་སྐྱིལ་ཀྲུང་གཅིག་གིས་ཁེབས་པར་མཛད་ནས་འདི་ཐམས་ཅད་ང་དབང་གསུངས་ད་ལྟར་གྱི་མཁར་ལས་ལ་ལྟ་གསུངས། དེ་དུས་རྒྱུད་སྡེ་བདུན་ཅུ་རྩ་གཉིས་དང་། སྒྲུབ་ཐབས། ལམ་སྦས་བཤད། བླ་མའི་རྣལ་འབྱོར། གེགས་སེལ་གྱི་གནད། གྲུབ་ཆེན་བཅུ། ཕྲ་མོ་བརྒྱད། རྣམ་འཇོམས། ཀྱཻ་རྡོ་རྗེའི་ལུས་དཀྱིལ། བིརྺ་པ་ཉིད་ཀྱི་སྒྲུབ་སྐོར་ལ་སོགས་པ་ཆོས་མང་དུ་གསུངས་ཤིང་བྱིན་གྱིས་བརླབས་པ་ཡིན་ནོ། །བཞི་པ་དེ་ལས་ཇི་ལྟར་དར་བའི་ཚུལ་ལ་བཞི་སྟེ། གསུང་ངག་ཇི་ལྟར་གསུངས་པའི་ཚུལ། རྣམ་འགྲེལ་ཇི་ལྟར་མཛད་པའི་ཚུལ། ལུང་བསྟན་པའི་སློབ་མ་ཇི་ལྟར་བྱུང་བའི་ཚུལ། བརྒྱུད་འཛིན་གྱི་གཙོ་བོ་ཇི་ལྟར་བྱུང་བའི་ཚུལ་ལོ། །དང་པོ་ནི། དེ་ནས་བཀའ་རྒྱ་ལོ་བཅོ་བརྒྱད་ཐེམ་པ་དང་། བླ་མ་ཨ་སེང་གིས་ལམ་འབྲས་ཁུངས་ཆོད་ནས་ཉིད་ལ་གསུང་ངག་རིན་པོ་ཆེ་མངའ་བར་གདའ་བ་ལ་ང་ལ་ཡོད་ཀྱང་མི་གསུང་བར་འདུག ད་ལན་ཚར་གཅིག་གསུང་བ་དང་། ཡི་གེ་ཞིབ་པ་ཅིག་ཀྱང་མཛད་པར་ཞུ་གསུངས་པས། དེར་བཀའ་རྒྱ་ཐིམ་པ་དང་། ཁོང་གིས་ཞུས་པ་འཛོམས་ནས་བླ་མས་རྟེན་འབྲེལ་འགྲིགས་པ་ཡིན་དགོངས་ནས་ཚར་གཅིག་གསུངས། དེ་ནས་ལོ་བཞིརཾ་གཾསུངས་པས་ཕྱིས་འགའ་ཞིག་གིས་གསོལ་བ་བཏབ་ནས་ལམ་རྒྱས་པ་འདི་མི་རེ་རེ་ཙམ་ལ་གསུངས། དེ་ནས་རིམ་གྱིས་གསུམ་དང་། བདུན་དང་དགུ་དང་ཉེར་ལྔ་དང་། སོ་བདུན་དང་། སྐུ་ཚེའི་མཇུག་ལ་མ་ངེས་པར་གསུངས། དེ་དུས་ཐོག་མར་རྡོ་རྗེའི་ཚིག་རྐང་གི་དབུ་ཞབས་སུ་ཚོགས་འཁོར་གཉིས་དང་། བར་དུ་གཉིས་ཏེ་བཞི་མཛད། ཕྱིས་དབུ་ཞབས་གཉིས་དང་། དམ་ཚིག་གི་ཉམས་ཆགས་བསྐང་བའི་སྐབས་དང་གསུམ་དུ་མཛད། ཕྱིས་གཉིས་དང་གཅིག་ཏུ་ཡང་མཛད་དོ། །གཉིས་པ་ནི། བླ་མ་ཨ་སེང་གི་དོན་དུ་གཞུང་བཤད་དོན་བསྡུས་མ་མཛད། དེ་ནས་ཞུ་བ་པོ་སོ་སོའི་ངོར། ཞུ་བྱས་མ་དང་། ཀློག་སྐྱ་མ་དང་། ཡུམ་དོན་མ། སྲས་དོན་མ་དང་། ཟླ་རྒྱལ་མ་དང་། ཟངས་རི་ཕུག་མ་དང་། མང་ཆུང་མ་དང་། རྒ་ཐེང་མ་དང་། འ་འུ་མའི་དོན་དུ་མཛད་པ་དང་། ཕྱིས་དགེ་བའི་བཤེས་གཉེན་གཉག་གིས་ཞུས་ནས་གཉག་མ་སྟེ་རྣམ་འགྲེལ་བཅུ་གཅིག་དང་། གཞན་ཡང་ལམ་རྒྱས་པའི་སྐོར་གྱི་ཡིག་ཆ་མང་དུ་མཛད་དོ། །གསུམ་པ་ནི་སྒྱི་ཆུ་བ་ལ་དབང་ཞུས་པའི་སྟ་གོན་གྱི་ནུབ་མོའི་མནལ་ལམ་དང་རྗེ་དགོན་པ་བས་ལུང་བསྟན་པ་དང་མཐུན་པར། ཟམ་པ་གསུམ་གྱི་དང་པོ་ལ་མི་གསུམ་བསྒྲལ་བ་ནི། ལུས་མ་སྤངས་པར་ཚེ་འདི་ཉིད་ལ་ཕྱག་རྒྱ་ཆེན་པོ་འགྲུབ་པ་གསུམ་སྟེ། སིང་ག་ལའི་གླིང་ཕྲན་ནས་འོངས་པའི་ཨ་ཙ་ར་གཅིག བྱང་ཆུབ་སེམས་དཔའ་སྟག སྒོམ་པ་སྐྱི་འབར་དང་གསུམ་མོ། །དང་པོ་ནི། སིང་ག་ལའི་གླིང་ནས་མཁན་པོ་ཉན་ཐོས་དགྲ་བཅོམ་པ་གཅིག་གིས་བོད་ན་རྣལ་འབྱོར་དབང་ཕྱུག་གི་སྤྲུལ་པ་ས་སྐྱ་པ་བྱ་བ་ཡོད་ཀྱི་དེ་ཙ་ན་སོང་གསུངས་ནས་ཨ་ཙ་ར་གཉིས་འོངས་པའི་གཅིག་བལ་པོ་ནས་ལོག གཅིག་གིས་བླ་ཆེན་གུང་ཐང་ན་ལ་རྩེར་བཞུགས་པའི་དུས་སུ་དབང་ཞུས། ག་གུ་ལི་ཞེས་པ་ཟབ་ཆེན་གྱི་བླ་རེ་བཟང་པོ་གཅིག་ཕུལ། ཁྲིད་ཕོག་ནས་བསྒོམས་པས་ཟླ་བ་གཅིག་ཙམ་ནས་མངོན་ཤེས་ལ་སོགས་པའི་ཡོན་ཏན་དཔག་ཏུ་མེད་པ་སྐྱེས་བདེན་པ་མཐོང་སྟེ་དཔལ་གྱི་རི་ལ་སོང་སྐད་དོ། །སྟག་ནི་བསྒོམས་པས་ཉམས་སྐྱོན་མེད་འབའ་ཞིག་སྐྱེས་པ་ཐོད་རྒལ་བའི་ལམ་བགྲོད་ནས་རེ་ཤིག་ལུས་བོར་བ་ལས་ཕྱིས་ལུས་དེ་ཉིད་ལ་ཞུགས་ནས་གྲུབ་པ་ཐོབ་ཅེས་གྲགས་སོ། །སྒོམ་པ་སྐྱི་འབར་ནི་ཡུལ་འཕྲང་འོག་པ་སྟེ། ཁོང་གིས་དབང་བསྐུར་གདམས་ངག་ཞུས་ནས་བསྒོམས་པས་ཏིང་ངེ་འཛིན་མང་པོ་སྐྱེས། མངོན་ཤེས་བརྟན་པོ་དང་རྫུ་འཕྲུལ་ཅི་རིགས་པ་ཡོད་པ་ལ། བླ་ཆེན་སྐུ་གཤེགས་ནས་ཁྲིད་འཕྲོ་དགེ་བཤེས་ཕུལ་བྱུང་བ་ལས་བསྐྱངས། ཕྱིས་ལྷོ་ཕྱོགས་དཔལ་གྱི་རི་ལ་སོང་སྐད་དོ། །ཟམ་པ་བར་པ་ལ་མི་བདུན་བསྒྲལ་བ་ནི་བཟོད་པ་ཐོབ་པ་བདུན་ཏེ། རྗེ་པ། ཞུ་བྱས། རྒ་སྟོན། ནགས་སྒོམ་བསོད་ནམས་རྒྱལ་མཚན། ཚར་ཁའི་རྣལ་འབྱོར་པ། སྒོམ་པ་འོད་གྲགས། མང་ཆུང་མའོ། །དང་པོའི་ལོ་རྒྱུས་ནི་འོག་ཏུ་སྟོན་ལ། གཉིས་པ་ནི། ཡུལ་ལ་སྟོད་ལྷོ་པ་ཞུ་སྟོན་རོག་པོ་བྱ་བ་ཕར་ཕྱིན་བཤད་ཤེས་པ་གཅིག་གི་དབོན་པོ་ཡིན། ཁོང་གིས་ས་སྐྱར་འོང་བླ་ཆེན་ལ་དབང་ཞུས་གདམས་ངག་གནང་སྟེ་བསྒོམས་པས་རྐང་མགྱོགས་དང་ལུས་ཀྱི་བཀོད་པ་ལ་སོགས་པ་དང་། ཏིང་ངེ་འཛིན་དཔག་ཏུ་མེད་པ་ལ་མངའ་མཉེས། ཁོང་བོད་འདི་སོ་མི་བསོད་ཟེར་ནས་རྒྱ་གར་དུ་གཤེགས། ལན་གཅིག་རྗེ་བཙུན་སྐུ་མཆེད་ནང་མཆོད་གཅིག་མཛད་པའི་ནུབ་མོ་བྱོན་ནས། ནམ་ཟླ་དགུན་ཡིན་པ་ལ་འོལ་མ་སེའི་ཕྲེང་བ་རློན་པ་ཚན་གཅིག་དང་འབྲས་ཀྱི་སྙེ་མ་ཚན་གཅིག་གིས་ཕྱག་རྟེན་བྱས། ད་ནངས་གང་ནས་འོངས་གསུངས་པས་ད་ཅི་ཉི་མ་ཟེར་བ་ན་རྡོ་རྗེ་གདན་ནས་འོངས་ཟེར་དེར་མཆོད་པ་མཛད་ནས། ཨ་ཕོ་ཞུ་བྱས་དོ་ནུབ་མི་ཉུང་རྫུ་འཕྲུལ་ཅིག་སྟོན་གསུངས་པས་དེ་སྐད་མི་གསུང་བར་ཞུ་ཟེར་ཙབ་ཙོབ་ལངས་པས། མི་སྟོ་ཡི་སྟོན་གསུངས་པས་མཆོད་ཁང་གཅིག་གི་ནང་དུ་སོང་ནས་དར་ཅིག་ན་ཞུ་བྱས་གཅིག་འཐོན་ནས་ཕྱག་གསུམ་བྱས་འདུད་པ་གཅིག་བྱས་ནས་གྲལ་ལ་བསྡད། དེ་བཞིན་དུ་བདུན་ཆ་གཅིག་འོངས་ནས་སྔར་བཞིན་ཕྱག་བྱས་གྲལ་ལ་བསྡད། དེ་ནས་ཡང་རིམ་པ་བཞིན་ལངས་ནས་སོང་ནས་དེ་ཙམ་དུ་གདའ་འོ་ཟེར་སྐད། རྒ་སྟོན་ནི་རྟེན་དགེ་སློང་། རུས་པ་རྒ་ཡིན་ལ། འདིས་ཀྱང་བླ་མ་ས་ཆེན་དང་། རྗེ་བཙུན་གཉིས་ཀ་ལ་དབང་དང་གསུང་ངག་རྣམས་ཞུས་ནས་ཡོན་ཏན་མང་པོ་བརྙེས་པ་ཡིན་པར་གསལ་ལོ། །ནགས་སྒོམ་ནི་རྟ་ནག་པ་སྟེ། བླ་ཆེན་ལ་དབང་དང་གདམས་ངག་ཞུས་ཏེ་བསྒོམས་པས་བྲལ་བའི་འབྲས་བུ་ཐོབ་པ་གཅིག་ཡོད་སྐད་དོ། །ཚར་ཁའི་རྣལ་འབྱོར་པ་ནི་དགེ་བཤེས་གཉག་གིས་བཟང་རྒྱུད་འབྲོག་པའི་གསེབ་ཏུ་བྱོན་ཙ་ན་མགྲིན་པ་མན་ཆད་ཐིག་ལེ་བརྟན་པའི་རྟགས་ཤར་བ་ཅིག་མཐོང་ནས། སུའི་སློབ་མ་ཡིན་དྲིས་པས་བླ་ཆེན་ཚར་ཁར་བྱོན་དུས་ཁྲིད་བསྐྱངས་ཟེར། བླ་ཆེན་གྱིས་ཚར་ཁར་ནམ་བྱོན་དྲིས་པས་གུང་ཐང་ཡན་ཆད་དུ་བྱོན་པ་ཡེ་མེད་ཟེར་ཏེ་སྐུའི་བཀོད་པ་བསྟན་པ་ཡིན་པར་འདུག་གོ །སྒོམ་པ་འོད་གྲགས་ནི་བླ་ཆེན་ལ་དབང་ཞུས་ཏེ་བསྒོམས་པས། མཐོང་སྣང་བརྟེན་པ་དང་། ཏིང་ངེ་འཛིན་གྱི་ཡོན་ཏན་མང་པོ་མངའ་བ་ཡིན་སྐད་དོ། །མང་ཆུང་མ་ནི་བླ་ཆེན་ལ་དབང་ཞུས་གདམས་ངག་བསྟན་ནས་བསྒོམས་པས་དུད་འགྲོའི་གནས་སྦྱོང་ཁོ་ན་བྱུང་བ་མང་གསུངས། ཕྱིས་ཡུན་རིང་དུ་བསྒོམས་པས་སྡུག་བསྔལ་གྱི་རྐྱེན་གྱིས་ཀྱང་བདེ་བ་སྐྱེས་ནས་ན་བཟའ་རེ་བ་གོན་ཀྱང་ལྷག་པར་བདེ་བའི་གྲོགས་བྱེད་པས་རྒྱུ་མཐུན་གྱི་འབྲས་བུ་ཐོབ་པ་ཡིན་སྐད་དོ། །བཞི་པ་བརྒྱུད་འཛིན་གྱི་གཙོ་བོ་ཇི་ལྟར་བྱུང་བའི་ཚུལ་ནི་རྗེ་བཙུན་སྐུ་མཆེད་གཉིས་ཏེ། འདི་དག་གི་ལོ་རྒྱུས་ལ་བླ་ཆེན་དེ་ལ་སྲས་བཞི་འཁྲུངས་པ་ལས། ཆེ་བ་ཀུན་དགའ་འབར་ཞེས་བྱ་བ། མ་ག་དྷར་སློབ་གཉེར་མཛད་རིག་པའི་གནས་ལྔ་ལ་མཁས་པར་གྱུར་ནས་བོད་དུ་འབྱོན་གྲབས་བྱས་པའི་ཐོག་ཏུ་དགུང་ལོ་ཉེར་གཉིས་པ་ལ་མ་ག་དྷ་དེ་ཉིད་དུ་སྐུ་འདས་སོ། །གཉིས་པ་སློབ་དཔོན་རིན་པོ་ཆེ་བསོད་ནམས་རྩེ་མོ་ནི་གཞོན་ནུའི་ས་ལ་གནས་པ་སྟེ། སྐུ་བལྟམས་མ་ཐག་ཏུ་སྐྱིལ་ཀྲུང་བཅས་ནས་བདག་ནི་བྱིས་པའི་སྤྱོད་པ་ལས་འདས་པའོ་ཞེས་ལན་གསུམ་གསུངས། དེ་ནས་ཡབ་ལ་རྡོ་རྗེ་ཐེག་པས་བསྡུས་པའི་རྒྱུད་འགྲེལ། དཀྱིལ་ཆོག སྒྲུབ་ཐབས། དབང་བྱིན་རླབས། གདམས་ངག་ཕྱག་བཞེས། ཁྲིད་དང་བཅས་པ་ལེགས་པར་ཞུས། རྗེ་པ་ལོ་བཅུ་གསུམ་པ་ལ་ངས་དབུས་སུ་ཕྱིན་ལ་ཕར་ཕྱིན་དང་དབུ་ཚད་ལ་སོགས་པ་ཉན་ལ་འོང་། ཁྱེད་ས་སྐྱར་སྡོད་ལ་བཤད་པ་གྱིས་གསུངས་ཏེ། གདན་ས་གཏད་ནས་གསང་ཕུར་ཕྱྭ་པ་ཆེན་པོ་ལ་ཆོས་གསན་པ་ལ་སྔ་ཕྱིར་ལོ་བཅུ་གཅིག་ཙམ་བཞུགས། མཁས་པ་ཆེན་པོར་གྱུར་ཏེ། སླར་ཡང་ས་སྐྱར་བྱོན། གཙོ་ཆེར་དབེན་པའི་གནས་སུ་བཞུགས་ནས་རྗེ་པ་སོགས་ལ་ཆོས་གསུངས་པ་དང་། བསྟན་བཅོས་རྩོམ་པ་ལ་སོགས་པས་དུས་འདའ། རྒྱ་གར་དུ་མི་ཐུབ་ཟླ་བ་ལ་སོགས་པའི་པཎྜི་ཏ་བཅུ་གཅིག་ཏུ་སྐྱེ་བ་བཞེས་པ་དྲན། དབུ་རྩེ་རྙིང་མར་གསུང་ངག་གི་ལྟ་བའི་སྐབས་སུ་རྗེ་པ། ཞུ་བྱས། རྨོག་སྟོན་གསུམ་ལ་འཇམ་དཔལ། བིརྺ་པ། སྤྱན་རས་གཟིགས་ཀྱི་མཐོང་སྣང་གསུམ་བསྟན་ནས་ཆོས་ཉན་པ་རྣམས་དག་པའི་སྣང་བ་ལ་བཀོད་པ་སོགས་ཡོན་ཏན་དཔག་ཏུ་མེད་པར་བརྙེས་པར་མཛད་ནས་དགུང་ལོ་ཞེ་གཅིག་པ་ཆུ་ཕོ་སྟག་གི་ལོ་སྨལ་པོ་ཟླ་བའི་ཚེས་བཅུ་གཅིག་ལ་བདེ་བ་ཅན་གྱི་འཇིག་རྟེན་གྱི་ཁམས་སུ་མངོན་པར་གཤེགས་པར་གྱུར་ཏོ། །གསུམ་པ་ནི། རྗེ་བཙུན་གྲགས་པ་རྒྱལ་མཚན་ཏེ། འདི་ལ་བསླབ་པ་གསུམ་གྱི་ཡོན་ཏན་བརྙེས་པའི་ཚུལ། ལུང་བསྟན་པ་དང་སྐྱེ་བ་དྲན་པའི་ཚུལ། སློབ་མའི་མཆོག་ཇི་ལྟར་བྱུང་བའི་ཚུལ་དང་གསུམ་ལས། དང་པོ་ནི། ཡུམ་ལ་བལྟམས་པ་ན་བཀྲ་ཤིས་པའི་ལྟས་དང་བཅས་པ་བལྟམས་ཏེ། སྨྲ་ཤེས་པ་ན་བརྐམ་ཆགས་མེད་པ། ཡོན་ཏན་བསྒྲུབ་པ་ལ་མངོན་པར་བརྩོན་པ། བྱིས་པའི་སྤྱོད་པ་ལས་འདས་པ་ཞིག་སྟེ། དགུང་ལོ་བརྒྱད་ལོན་པ་ན་བྱང་སེམས་ཟླ་བ་རྒྱལ་མཚན་ལས་ཚངས་སྤྱོད་ཀྱི་དགེ་བསྙེན་མནོས་ཏེ། དེ་ཕྱིན་ཆད་རབ་དུ་བྱུང་བ་བས་ཀྱང་བཙུན་པ་མཛད་ཅིང་། དགུང་ལོ་བཅུ་པ་ལ་སྡོམ་པ་ཉི་ཤུ་པ་དང་སྒྲུབ་ཐབས་མཚོ་སྐྱེས་གསན་ནས། བཅུ་གཅིག་པ་ལ་གསུངས་པས་ཚོགས་པ་ཐམས་ཅད་ངོ་མཚར་སྐྱེས་ཏེ་བློ་གྲོས་ཆེན་པོ་ཞེས་བྱ་བར་བཏགས་སོ། །བཅུ་གཉིས་པ་ལ་ཀྱེ་རྡོར་རྒྱུད་གསུམ་གྱི་པོ་ཏི་གསོལ་བའི་མནལ་ལམ་བྱུང་བ་དང་། ཆོས་ཐམས་ཅད་ཀྱི་དེ་ཁོ་ན་ཉིད་ཐུགས་སུ་ཆུད་དོ། །དེའི་ཚེ་ས་ཆེན་གཤེགས་ནས་ཆོས་འཁོར་ཆེན་པོ་མཛད་དེ། རང་གི་སློབ་མ་ལ་བརྟག་གཉིས་གསུངས་པས་ངོ་མཚར་བར་གྱུར་ཏོ། །དེ་ནས་གཅེན་དབུས་སུ་གཤེགས་པའི་ཚེ་གདན་ས་གཏད་པ་ནས་བཟུང་སྟེ། བདུན་ཅུའི་བར་ལ་སྔགས་ཀྱི་བཤད་པ་མཛད་ཅིང་གསུང་ངག་ཀྱང་བླ་མའི་བཀའ་རྒྱ་ལོ་དགུ་མཛད་པ་ལ་བཅུ་གསུམ་གྱི་བར་དུ་མ་གསུངས་ཤིང་། དེ་དག་གི་བར་ལ་སློབ་དཔོན་རིན་པོ་ཆེ་གཉན་གཙུག་ཏོར་རྒྱལ་པོ། ཞང་ཚུལ་ཁྲིམས་གྲགས་པ། གཉག་དབང་རྒྱལ། བལ་པོ་ཛ་ཡ་སེ་ན། ལོཙྪ་བ་དཔལ་མཆོག་དང་པོའི་རྡོ་རྗེ་རྣམས་ལས་རྒྱུད་སྡེ་བཞི་དང་། ཕར་ཕྱིན་ལ་སོགས་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་གསན། ཐུགས་དམ་ལ་བརྩོན་པ་ནི་ནམ་ཕྱེད་བར་ཐུགས་དམ་གྱིས་དུས་འདའ། དེ་ནས་ཐོ་རངས་སྔ་མོར་ན་བཟའི་ཚགས་མཛད། དགུན་ཡིན་ཀྱང་སྐུ་རེག་ལ་བུམ་པ་དྲིལ་ནས་ཐོ་རངས་ཁྲུས་མཛད་དེ་ཐུགས་དམ་ལ་འཇུག ཆོས་གསུང་བ་ལ་འབྱོན་པའི་དུས་སུ་ཀྱཻ་རྡོར་བསྒོམ་བཞིན་བྱོན་ནས་ཁྲི་ཐོག་ཏུ་སླེབས་པ་དང་དབུ་རྒྱན་ལ་རིགས་བདག་ཚར་ཡོང་། ཆོས་གཏོར་ལ་ཐུན་གཏོར་གྱི་དོད་མཛད། ཆོས་གསུངས་པ་ལ་བཟླས་པའི་དོད་མཛད། ཆོས་ཐོན་པ་དང་ཡང་བདེ་མཆོག་བསྒོམ་གྱིན་གཤེགས། མདོར་ན་ཉིན་ཞག་ཕྲུག་རེ་ལ་དཀྱིལ་འཁོར་མི་འདྲ་བ་བདུན་ཅུ་རེ་བསྒོམ། གཞན་ཡང་། ཡང་ན་ཐུགས་དམ། ཡང་ན་གཟིགས་རྟོག ཡང་ན་ཆོས་གསུང་བ་མ་གཏོགས་པ་སྐུ་གསུང་ཐུགས་ཐ་མལ་དུ་བཞུགས་པ་སུས་ཀྱང་མ་མཐོང་སྐད་དོ། །གཉིས་པ་ནི། དགུང་ལོ་ཉི་ཤུ་པ་དང་། ཉེར་གཉིས་པའི་དུས་སུ་མནལ་ལམ་དུ་མཚན་བརྗོད་སྐྱེ་བ་སྔ་མ་ལ་བཟུང་བ་ཡིན་བྱས་ནས་བཏོན་པ་དང་། ཉེར་གཉིས་པའི་དུས་སུ་རྒྱ་གར་དུ་སྒོ་མཐའ་ཡས་པའི་བློ་གྲོས་ནས་བོད་དུ་མེ་ལྷང་ཚེར་བའི་བར་སྐྱེ་བ་དྲུག་དྲན་པ་དང་། སློབ་དཔོན་རིན་པོ་ཆེ་སྐུ་གཤེགས་ནས་རིང་པོར་མ་ལོན་པའི་ཚེ་བྱང་ཕྱོགས་གསེར་མདོག་ཅན་གྱི་འཇིག་རྟེན་གྱི་ཁམས་ན་འཁོར་ལོས་སྒྱུར་བའི་རྒྱལ་པོ་ཡོན་ཏན་མཐའ་ཡས་སུ་སྐྱེ་བའི་ལུང་བསྟན་ཐོབ་པ་དང་། ཞེ་དགུ་པའི་དུས་སུ་མནལ་ལམ་དུ་ཞུ་བྱས་དང་རྟོགས་པ་མཉམ་པའི་སློབ་མ་དྲུག དེ་ལས་རྟོགས་པ་ཅུང་ཟད་དམའ་བ་སུམ་ཅུ་ཙམ། ཅུང་ཟད་རྟོགས་པ་རྙེད་པ་བརྒྱ་ཙམ། ལམ་ཅུང་ཟད་བསྒོམ་པ་རབ་ཏུ་མང་པོ་སྒྲོལ་བ་དང་། དགུང་ལོ་ང་དྲུག་པའི་མནལ་ལམ་ན་བླ་ཆེན་གྱིས་སྔར་གྱི་མན་ངག་གི་བརྗེད་ཐོ་བརྡའ་དོན་གསལ་བ་གནང་བ་སོགས་ལུང་བསྟན་པ་དང་དག་པའི་སྣང་བ་བསམ་གྱིས་མི་ཁྱབ་པ་བརྙེས་ཏེ། དགུང་ལོ་བདུན་ཅུ་པ་མེ་ཕོ་བྱི་བའི་ལོ་ཁྲའི་ཟླ་བའི་ཚེས་བཅུ་གཉིས་ལ་བདེ་བ་ཅན་དུ་གཤེགས་སོ། །ས་ཆེན་གྱི་སྲས་བཞི་པ་ནི་དཔལ་ཆེན་འོད་པོ་སྟེ་དེས་ཀྱང་ཡབ་མེས་ཀྱི་ཆོས་ལ་སྦྱངས་ཤིང་མན་ངག་མང་པོ་དང་། གསོ་བ་རིག་པ་ལ་སྦྱངས་ཏེ། བརྩེ་བའི་ཐུགས་རྗེས་འགྲོ་བ་མང་པོའི་དོན་མཛད་ནས་ལྕགས་ཕོ་རྟའི་ལོ་ལ་འཁྲུངས་ནས་ཆུ་མོ་ཕག་གི་ལོ་དགུང་ལོ་ང་བཞི་བཞེས་པའི་དུས་སུ་ཟླ་བ་ལྔ་པའི་ཉེར་བཞི་ལ་ཞི་བར་གཤེགས་སོ། །གསུམ་པ་དེ་ལ་སློབ་མའི་མཆོག་ཇི་ལྟར་བྱུང་བའི་ཚུལ་ནི་རྗེ་བཙུན་རིན་པོ་ཆེ་དེ་ཉིད་ཀྱིས་དགུང་ལོ་བརྒྱད་པ་ནས་བདུན་ཅུའི་བར་དུ་བཤད་སྒྲུབ་ཀྱི་བསྟན་པ་སྤེལ་བ་ལས་སྤྱིར་སློབ་མ། ཇོ་སྲས་ལྕགས་ཀྱི་རྡོ་རྗེ། བྲ་སྟོན་བློ་གྲོས། གུར་རྒྱན་ཞུས་པའི་མི་བཞི། གྲགས་པའི་མཐའ་ཅན་གྱི་བུ་ཆེན་བཞི་ལ་སོགས་པ་བསམ་གྱིས་མི་ཁྱབ་པ་བྱུང་བའི་ནང་ནས་དམ་པའི་ཆོས་ཀྱི་བརྒྱུད་པ་འཛིན་པའི་གཙོ་བོ་ནི། ཆོས་རྗེ་ས་སྐྱ་པཎྜི་ཏ་སྟེ། དེའི་རྣམ་པར་ཐར་པ་རྒྱས་པར་ནི་རྣམ་ཐར་གྱི་ཡི་གེ་བཞིན་ཤེས་པར་བྱ་ཞིང་། མདོར་བསྡུས་ན། ཆུ་ཕོ་སྟག་གི་ལོ་ལ་དཔལ་ལྡན་ས་སྐྱར་སྐུ་བལྟམས་པ་ནས་བཟུང་སྟེ་བྱིས་པའི་དུས་སུ་ཡང་རྒྱ་ཀློག་བོད་ཀློག་སོགས་མ་བསླབས་པར་མཁྱེན། དེ་ནས་གཙོ་ཆེར་རྗེ་བཙུན་རིན་པོ་ཆེའི་དྲུང་དུ་ས་སྐྱ་པའི་ཆོས་སྐོར་མཐའ་དག་གསན། བར་སྐབས་སུ་བརྩེགས་སྟོན་དབང་ཕྱུག་སེང་གེ་སོགས་ལ་ཚད་མ་ལ་སོགས་པ་ཕ་རོལ་ཏུ་ཕྱིན་པའི་སྡེ་སྣོད་མང་དུ་གསན། དེ་ནས་ཁ་ཆེ་པཎ་ཆེན་བོད་དུ་བྱོན་པའི་ཚེ་དཔོན་སློབ་བཞི་ལ་རིག་པའི་གནས་ལྔས་བསྡུས་པའི་གཙུག་ལག་ཐམས་ཅད་གསན་ནས་ཡོངས་སུ་རྫོགས་པའི་པཎྜི་ཏ་ཆེན་པོར་གྱུར་ཏོ། །དགུང་ལོ་སོ་ལྔ་བཞེས་པ་ན། རྗེ་བཙུན་རིན་པོ་ཆེ་སྐུ་གཤེགས་པ་ནས་དགུང་ལོ་རེ་གསུམ་པའི་བར་གཙོ་ཆེར་དཔལ་ལྡན་ས་སྐྱ་དང་། གཞན་ཡང་དབུས་གཙང་གི་ཕྱོགས་འདིར་སངས་རྒྱས་ཀྱི་བསྟན་པ་སྤེལ། དེ་ནས་དགུང་ལོ་རེ་གསུམ་པ་ལ་སྐུའི་དབོན་པོ་འཕགས་པ་སྐུ་མཆེད་གཉིས་དང་བཅས་ཏེ། རྒྱལ་པོ་གོ་དན་གྱིས་གདན་དྲངས་ནས་ཧོར་གྱི་རྒྱལ་ཁམས་སུ་ཕེབས། དགུང་ལོ་བདུན་ཅུའི་བར་བཞུགས་ནས། ཧོར་གྱི་རྒྱལ་ཁམས་སངས་རྒྱས་ཀྱི་བསྟན་པ་ལ་བཀོད། དགུང་ལོ་བདུན་ཅུ་པ་ལྕགས་མོ་ཕག་གི་ཐ་སྐར་ཟླ་བའི་ཉི་ཤུ་དགུའི་ནམ་ཕྱེད་ན་དེ་བཞིན་གཤེགས་པ་སྒྲ་དབྱངས་མི་ཟད་པ་དང་། ཐོ་རངས་སྤྱན་རས་གཟིགས་མངོན་སུམ་དུ་ཞལ་གཟིགས་སྨིན་དྲུག་ཟླ་བའི་བཅུ་གསུམ་གྱི་ཉིན་པར་ཐུབ་པ་ཉན་ཐོས་བརྒྱད་ཀྱིས་བསྐོར་བ་གཟིགས། བཅུ་བཞི་པ་ལ་ཀྱཻ་རྡོ་རྗེ་དང་། བཅོ་ལྔ་པ་ལ་འཇམ་དབྱངས་ལན་གསུམ་དང་སྒྲོལ་མ་ཡང་གཟིགས། དེའི་མར་ངོ་ལ་བབས་པའི་ཚེ་བདེ་མཆོག་ལ་སོགས་པའི་དཀྱིལ་འཁོར་མང་དུ་གཟིགས། ཐོ་རངས་ཀྱི་ཆ་ལ་རྗེ་བཙུན་པ། བིརྺ་པ། ནག་པོ་པ་གསུམ་མངོན་སུམ་དུ་བྱོན་ནས་ཁྱོད་སྐྱེ་བ་ཐོག་མ་མེད་པ་ནས་ལམ་ལ་སྦྱངས་ཤིང་ཁྱད་པར་དུ་སྐྱེ་བ་ཉི་ཤུ་རྩ་ལྔར་མི་ནས་མིར་གྱུར་ཏེ། འཇམ་པའི་དབྱངས་ཀྱིས་རྗེས་སུ་བཟུང་ནས་རིག་པའི་གནས་ལྔ་ལ་སྦྱངས་པ་ཡིན། ཚེ་འདི་ཉིད་ཀྱི་འོག་ཏུ་ཤར་ཕྱོགས་སུ་འཇིག་རྟེན་གྱི་ཁམས་དུ་མ་བརྒལ་བའི་ཕ་རོལ་ན་མཁའ་ལ་གནས་པའི་རིག་པ་འཛིན་པར་གྱུར་ནས་དེ་བཞིན་གཤེགས་པ་དུ་མ་མཉེས་པར་བྱས་ཏེ། སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་སྨིན་པར་བྱས་ནས་ས་དང་ལམ་རྣམས་ཕལ་ཆེར་བགྲོད་དེ། སྐྱེ་བ་གསུམ་པ་ལ་འཛམ་བུའི་གླིང་འདི་ཉིད་ཀྱི་ཤར་ཕྱོགས་ཀྱི་ལྷོ་ལ་ཉེ་བ་ན། མུ་མུ་ནི་ཞེས་བྱ་བར་རྒྱལ་པོ་ཉི་མའི་སྟོབས་འཕེལ་ཞེས་བྱ་བར་གྱུར་ནས་བདེ་བར་གཤེགས་པའི་བསྟན་པ་རྒྱས་པར་བྱས་ཏེ། སྐྱེ་བ་བཞི་པ་ལ་མངོན་པར་དགའ་བ་ཞེས་བྱ་བའི་ཞིང་དུ་དྲི་མ་མེད་པའི་དཔལ་ཞེས་བྱ་བར་འཚང་རྒྱ་བར་འགྱུར་རོ་ཞེས་ལུང་བསྟན་ཅིང་དབུགས་དབྱུང་བར་མཛད་དོ། །དེ་ལྟ་བུའི་བླ་མ་དེ་དགུང་ལོ་བདུན་ཅུ་བཞེས་པ་ལྕགས་མོ་ཕག་གི་ལོ་སྨལ་པོ་ཟླ་བའི་ཚེས་བཅུ་བཞིའི་དུས་སུ། ལྷ་དང་། རིག་པ་འཛིན་པ་དང་། དཔའ་བོ་དང་། མཁའ་འགྲོ་མའི་བསུ་བ་དང་། ངོ་མཚར་བའི་ལྟས་དཔག་ཏུ་མེད་པ་དང་བཅས་ཏེ་བདེ་བར་གཤེགས་པར་གྱུར་ཏོ། །དེ་ཉིད་ལ་སློབ་མའི་མཆོག་ཇི་ལྟ་བུ་ཞིག་བྱུང་ན་སྤྱིར་བསམ་གྱིས་མི་ཁྱབ་ཀྱང་། བཤད་པའི་སྲོལ་འཛིན་ཤར་ནུབ་གུང་གསུམ་དང་། ཁང་གཉན་ཞང་གསུམ་དུ་གྲགས་པ་རྣམས་དང་། མན་ངག་གི་བརྒྱུད་འཛིན་དམར་ཆོས་ཀྱི་རྒྱལ་པོ་དང་། ལྷོ་པ་ཀུན་མཁྱེན་རིན་ཆེན་དཔལ་ཏེ་ལྷོ་དམར་གཉིས་སུ་གྲགས་པ་དང་། སྒྲུབ་པའི་བརྒྱུད་འཛིན་གྲུབ་ཐོབ་ཡོན་ཏན་དཔལ་དང་། ཚོགས་སྒོམ་ཀུན་དགའ་དཔལ་ཏེ་གྲུབ་ཚོགས་གཉིས་སུ་གྲགས་པ་དང་། བཤད་པ་དང་། སྒྲུབ་པ་དང་། བཀའ་ལུང་མཐའ་དག་གི་བརྒྱུད་པ་འཛིན་པའི་སྐུའི་དབོན་པོ་བློ་གྲོས་རྒྱལ་མཚན་དཔལ་བཟང་པོའོ། །འདི་ཉིད་དགུང་ལོ་བཅུའི་བར་དཔལ་ལྡན་ས་སྐྱར་བཞུགས། ཆོས་རྗེ་པ་ལ་བཀའ་ལུང་མན་ངག་ལུང་དང་རིགས་པ་མང་དུ་གསན། དགུང་ལོ་བཅུ་པ་ལ་ཆོས་རྗེ་པའི་ཆགས་ཕྱིར་ཧོར་ཡུལ་ལ་བཏེགས་ཏེ་དགུང་ལོ་བཅུ་བདུན་པའི་བར་དུ་ཆོས་རྗེ་པ་ལ་མངའ་བའི་ཡོན་ཏན་ཕལ་ཆེར་གསན་ཅིང་རྫོགས་པར་མཛད། བཅུ་བདུན་པའི་ཚེ། ཆོས་རྗེ་པས་ཆོས་ཀྱི་དུང་དང་། སློབ་མའི་ཚོགས་རྣམས་གཏད་དེ་བསྟན་པའི་ཁུར་ཕོག་ནས་ཆོས་རྗེ་པ་གཤེགས་རྗེས། དགུང་ལོ་བཅུ་དགུ་པ་ལ་སེ་ཆེན་གན་གྱིས་གདན་དྲངས་ནས་རྒྱལ་པོ་ཉིད་ཀྱིས་ཐོགས་དྲངས་མི་ཉི་ཤུ་རྩ་ལྔ་ལ་ཀྱེ་རྡོ་རྗེའི་དབང་བསྐུར་མཛད་ནས་ཧོར་གྱི་རྒྱལ་ཁམས་སུ་རྡོ་རྗེ་ཐེག་པའི་དབུ་བརྙེས་སོ། །དེ་ནས་བར་སྐབས་སུ་ལྡོང་སྟོན་ཤེས་རབ་དཔལ་གདན་དྲངས་ནས་རི་བོ་རྩེ་ལྔར་མདོ་སྔགས་ཀྱིས་བསྡུས་པའི་ཆོས་མང་དུ་གསན། དགུང་ལོ་སོ་གཅིག་ལ་དབུས་གཙང་དུ་ཕེབས་ནས་གཉེན་འོད་སྲུང་། གྲུབ་ཐོབ་ཡོན་ཏན་དཔལ་ལ་སོགས་པའི་མཁས་གྲུབ་ཉི་ཤུ་ལྷག་པ་ལ་བཀའ་བསྟན་བཅོས། ལུང་མན་ངག རིག་པའི་གནས་ལྔ་ལ་སོགས་པ་བོད་དུ་བཤད་སྲོལ་ཡོད་པ་མཐའ་དག་གསན། ཆོས་འཁོར་རྒྱ་ཆེན་པོ་མཛད་དེ་བསྟན་པ་དར་རྒྱས་སུ་མཛད། སླར་སོ་གསུམ་པ་ལ་ཧོར་ཡུལ་དུ་ཕེབས་ཞེ་གཅིག་པའི་བར་བཞུགས་ནས་ཧོར་གྱི་རྒྱལ་ཁམས་སུ་སངས་རྒྱས་ཀྱི་བསྟན་པ་དར་རྒྱས་སུ་མཛད། དགུང་ལོ་ཞེ་གཅིག་པ་ལ་གདན་སར་ཆགས་ཕེབས་ཏེ། བོད་ན་ཡོད་པར་གྱུར་པའི་མདོ་རྒྱུད་མན་ངག་གི་སྐོར་ཕྲ་ཞིང་ཕྲ་བ་དང་བཅས་པ་ཐམས་ཅད་ང་ལ་ཡོད་པས་ཁྱོད་རང་སོ་སོ་གང་ལ་མོས་པའི་ཆོས་ང་ལ་ཞུས་ཤིག་གསུངས་ནས། ཤིན་ཏུ་ཟབ་པ་དང་རྒྱ་ཆེ་བའི་ཆོས་སྒོ་གྲངས་ལས་འདས་པ་དཔེ་མཁྱུད་མེད་པར་གནང་བའི་སྒོ་ནས་གདུལ་བྱ་སྨིན་གྲོལ་ལ་བཀོད་པར་མཛད་དོ། །བླ་མ་དེ་ཉིད་ཀྱིས་ཞང་དཀོན་མཆོག་དཔལ་ལ་སྙན་བརྒྱུད་བཞིས་གདམས། དེས་རྗེ་བཙུན་རྒྱལ་བ་བྲག་ཕུག་པ་ལ། དེས་རི་ཁྲོད་པ་བློ་གྲོས་བརྟན་པ་དང་། ཆོས་ཀྱི་རྗེ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གཉིས་ལ་གདམས། ཡང་ཆོས་ཀྱི་རྗེ་ས་སྐྱ་པཎྜི་ཏས་ཚོགས་སྒོམ་ཀུན་དགའ་དཔལ་ལ། དེས་ཉན་ཆེན་པ་བསོད་ནམས་བརྟན་པ་ལ། དེས་ཤངས་ཀྱི་དཀར་པོ་བྲག་པ་རིན་ཆེན་སེང་གེ་ལ་གདམས། རི་ཁྲོད་པ་དང་། བླ་མ་དམ་པ་དང་། དཀར་པོ་བྲག་པ་གསུམ་ཆར་ལ་བླ་མ་དམ་པ་དཔལ་ལྡན་ཚུལ་ཁྲིམས་པས་གསན་ནས་སྙན་བརྒྱུད་ཐམས་ཅད་ཀྱི་བདག་པོར་གྱུར་ཏོ། །དེའི་སློབ་མའི་མཆོག་ཏུ་གྱུར་པ་མི་ཉག་རིན་ཆེན་རྡོ་རྗེ། ཤར་པ་ཡེ་ཤེས་རྒྱལ་མཚན། གྲུབ་ཆེན་བུདྡྷ་ཤྲཱི་གསུམ་ལས། རྗེ་བཙུན་ཐམས་ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས་དགུང་ལོ་ཉི་ཤུ་རྩ་ལྔའི་བར་དུ་ཆོས་རྗེ་ཡེ་ཤེས་རྒྱལ་མཚན་པའི་ཞབས་དྲུང་དུ་རྒྱུད་སྡེ་བཞི་དང་འབྲེལ་བའི་དབང་ལུང་མན་ངག་རྒྱུད་ཀྱི་བཤད་བཀའ་རྣམས་གསན་ནས་ཆོས་རྗེ་ཡེ་ཤེས་རྒྱལ་མཚན་པ་སྐུ་གཤེགས། དེ་རྗེས་གསུང་ངག་གསན་པར་བཞེད་ནས། ཆོས་འཁོར་སྒང་དུ་ལོ་ཙཱ་བ་སྐྱབས་མཆོག་དཔལ་བའི་དྲུང་དུ་བྱོན་ནས་ཆོས་འགའ་ཞིག་གསན་པའི་ཚེ། གསུང་ངག་ཆོས་རྗེ་བུདྡྷ་བ་ལ་གསན་པའི་མནལ་ལྟས་ཁྱད་པར་ཅན་བྱུང་། དེ་རྗེས་ཆོས་རྗེ་བུདྡྷ་བའི་དྲུང་དུ་ལན་གཉིས་བྱོན། ས་སྐྱ་དང་ས་བཟང་གཉིས་སུ་ཡང་གདན་དྲངས་ནས་ལམ་འབྲས་ལམ་སྐོར་དང་བཅས་པ་དང་། གཞན་ཡང་བཀའ་ལུང་མང་དུ་གསན་ནས་སྙན་བརྒྱུད་བཞིས་གདམས་པར་མཛད་དོ། །དེའི་དྲུང་དུ་མཚན་བརྗོད་པར་དཀའ་བ་མཚུངས་མེད་དཀོན་མཆོག་རྒྱལ་མཚན་དཔལ་བཟང་པོས་དགུང་ལོ་སོ་བདུན་པ་ལ་ས་སྐྱར་བྱོན་ལོ་གཉིས་བཞུགས། བདེ་མཆོག་ལཱུ་ནག་དྲིལ་གསུམ་གྱི་དབང་རྒྱུད་མན་ངག་ཚང་མ་དང་། ཀྱཻ་རྡོར་རྒྱུད་གསུམ། གསང་བ་འདུས་པའི་རྒྱུད་ཀྱི་བཤད་བཀའ་སོགས་མང་དུ་གསན་ནས། འཁོར་ལོ་བདེ་མཆོག་གི་སྒྲུབ་པ་ལ་དྲིལ་བར་བཞེད་པའི་ཚེ། ཆོས་རྗེའི་ཞལ་ནས་ད་དུང་གསུང་ངག་ཞུས་གསུངས་ནས་གསུང་ངག་རིན་པོ་ཆེ་ཉམས་ཁྲིད་དུ་མཛད། ཆོས་རྗེ་བུདྡྷ་བ་ལ་གསན་པའི་ལམ་འབྲས། ལམ་སྐོར་ཞར་བྱུང་དང་བཅས་པ་བུམ་པ་གང་བྱོའི་ཚུལ་དུ་མཛད་དོ། །དེ་ནས་དགུང་ལོ་དྲུག་ཅུ་རེ་དགུའི་བར་དུ་གཙོ་བོར་སྒྲུབ་པ་ལ་གཞོལ། བར་སྐབས་སུ་གདུལ་བྱ་སྐལ་ལྡན་རྣམས་ལ་ཟབ་མོའི་ལམ་བསྟན། རེ་དགུ་པ་ཨེ་ཝཾ་ཆོས་ལྡན་གྱི་གདན་སར་ཕེབས་པ་ནས། དགུང་ལོ་བརྒྱད་ཅུ་གྱ་གསུམ་པའི་བར་དུ་ཐོས་བསམ་དང་བསྒྲུབ་པའི་འབྲས་བུས་བསྟན་པ་དང་སེམས་ཅན་ལ་ཕན་པ་ཉི་མ་དང་ཟླ་བ་ལྟར་གསལ་བ་འདི་ཉིད་དོ།། །།གཉིས་པ་བྱུང་བའི་ཆོས་ལ་བཤད་སྒྲུབ་བྱ་བའི་ཚུལ་ནི། ས་ཆེན་གྱིས། ཚད་མ་སྙན་བརྒྱུད་བཞི་ཡིས་སྤྲོས་པ་བཅད། །ཞེས་གསུངས་པ་ལྟར། གདམས་ངག་གི་སྤྲོས་པ་ཐམས་ཅད་ཚད་མ་བཞི་དང་། སྙན་བརྒྱུད་བཞིས་བཅད་དགོས་པས་འདི་ལ་གཉིས་ཏེ། སྤྲོས་པ་བཅད་བྱ་དང་། སྤྲོས་པ་གཅོད་བྱེད་དོ། །དང་པོ་ནི་ལམ་འབྲས་བུ་དང་བཅས་པའི་གདམས་ངག་ཡིན་ལ། ཅིའི་ཕྱིར་དེ་སྐད་བརྗོད་ཅེ་ན། འདི་ལ་རྗོད་བྱེད་གཞུང་གིས་བསྟན་ཚུལ་གྱི་དབང་དུ་བྱས་པ་དང་། བརྗོད་བྱ་ཉིད་ལ་གནས་ཚུལ་གྱི་དབང་དུ་བྱས་པ་གཉིས་ལས། དང་པོ་ནི། དམིགས་པར་བྱ་བའི་འབྲས་བུ་སྐུ་བཞིའམ་ལྔས་བསྡུས་པའི་སངས་རྒྱས་དང་། དེ་ཐོབ་པར་བྱེད་པའི་ལམ་གཉིས་ཀ་ཚང་བར་སྟོན་པས་ན་ལམ་འབྲས་བུ་དང་བཅས་པའམ། འབྲས་བུ་ལམ་དང་བཅས་པ་ཞེས་བྱའོ། །སེམས་ཀུན་གཞི་ལམ་ཟབ་མོས་འབྲས་བུ་སངས་རྒྱས་ཀྱི་སར་འཁྲིད་པར་བྱེད་པས་ན་ཁྲིད་ཅེས་ཀྱང་བྱའོ། །དེས་ན་དུས་འཁོར་གྱི་སྦྱོར་དྲུག་དང་། གསང་འདུས་དང་བདེ་མཆོག་གི་རིམ་ལྔ་སོགས་ནི་རྫོགས་རིམ་ཟབ་མོའི་ཁྲིད་ཡིན་གྱི། ལམ་འབྲས་ཀྱི་ཐ་སྙད་ནི་མི་འཐོབ་བོ། །འོ་ན་བཀའ་དང་བསྟན་བཅོས་གཞན་ལ་ཡང་ལམ་དང་འབྲས་བུ་ཚང་བར་བསྟན་པ་ཡོད་དོ་སྙམ་ན། དེ་ཉིད་ཀྱི་ཕྱིར་ལམ་འབྲས་བུ་དང་བཅས་པའི་ཐ་སྙད་ཀྱང་འབྱུང་སྟེ། ཐོགས་མེད་ཀྱིས་ཉན་སར། ཉན་ཐོས་ཀྱི་ལམ་འབྲས་བུ་དང་བཅས་པ་རབ་ཏུ་གསལ་བར་བསྟན་ཏོ་ཞེས་དང་། བྱང་སར་བྱང་ཆུབ་སེམས་དཔའི་ལམ་འབྲས་བུ་དང་བཅས་པ་མ་ཚང་བ་མེད་པར་བསྟན་ཏོ་ཞེས་དང་། སློབ་དཔོན་སངས་རྒྱས་གསང་བས་རྣམ་སྣང་མངོན་བྱང་གི་བསྡུས་འགྲེལ་དུ་བྱང་ཆུབ་སེམས་དཔའ་ཆེན་པོ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱོད་པ་སྤྱད་པར་འདོད་པ་རྣམས་ཀྱི་ལམ་འབྲས་བུ་དང་བཅས་པ་རྫོགས་པར་བསྟན་ཏོ་ཞེས་དང་། གྲུབ་ཆེན་ཀུན་སྙིང་གིས། དེ་ཉིད་སྣང་ཆེན་གྱི་བསྡུས་དོན་དང་། སློབ་དཔོན་སྡོང་པོས་བྱིན་གྱིས་སངས་རྒྱས་མཉམ་སྦྱོར་གྱི་འགྲེལ་པར། རྡོ་རྗེ་ཐེག་པའི་ལམ་འབྲས་བུ་དང་བཅས་པ་རྫོགས་པར་བསྟན་ཏོ་ཞེས་གསུངས་པ་ལྟ་བུའོ། །གཉིས་པ་ནི། ལམ་གྱི་དུས་སུ་འབྲས་བུ་དབྱེར་མེད་ལྷུན་གྲུབ་ཏུ་གནས་པས་ལམ་འབྲས་བུ་དང་བཅས་པ་ཞེས་བྱ་ལ་འབྲས་བུའི་དུས་སུ་ཡང་ལམ་དབྱེར་མེད་དུ་ཡོད་པས་འབྲས་བུ་ལམ་དང་བཅས་པ་ཞེས་བྱ་སྟེ། རྒྱས་པར་ན་ལམ་རྒྱུ་དང་བཅས་པ་དང་འབྲས་བུ་དང་བཅས་པ་གཉིས། འབྲས་བུ་ལམ་དང་བཅས་པ་དང་རྒྱུ་དང་བཅས་པ་གཉིས། རྒྱུ་ལམ་དང་བཅས་པ་དང་འབྲས་བུ་དང་བཅས་པ་གཉིས་ཏེ་དྲུག་ཏུ་འགྱུར་རོ། །བཤད་ཚུལ་འདི་ལྟར་ན་གསང་འདུས་རིམ་ལྔ་སོགས་རྫོགས་རིམ་ཟབ་མོ་སྣ་གཅིག་སྟོན་པ་ཡན་ཆད་ལ་ཡང་ལམ་འབྲས་བུ་དང་བཅས་པ་ཞེས་སོགས་ཀྱི་ཐ་སྙད་དོན་གྱིས་འཐོབ་བོ། །གཉིས་པ་ལ་གསུམ་སྟེ། ཚད་མ་བཞིའི་སྒོ་ནས་དང་། སྙན་བརྒྱུད་བཞིའི་སྒོ་ནས་སྤྲོས་པ་གཅོད་པ་དང་། ཚད་མ་བཞིའི་ཉམས་ལེན་བྱེ་བྲག་ཏུ་བཤད་པའོ། །དང་པོ་ནི། སཾ་བུ་ཊིར། བསྟན་བཅོས་ཚད་མ་སློབ་དཔོན་དང་། །ལུང་གི་རྗེས་འབྲང་དེ་ཉིད་རིག །གསང་དོན་དེ་ཉིད་དངོས་པོ་ཡང་། །གཅིག་ནས་གཅིག་བརྒྱུད་ཤེས་པར་བྱ། །ཞེས་དང་། རྡོ་རྗེའི་ཚིག་རྐང་དུ། ཚད་མ་བཞིས་འབྲས་བུ་གཏན་ལ་ཕབ་ནས་ཞེས་གསུངས་ཞིང་། དེས་རྒྱུ་དང་ལམ་གཏན་ལ་ཕབ་པ་ཡང་མཚོན་པར་གསུངས་སོ། །འདི་ལ་ཚད་མའི་ངོ་བོ། གྲངས་ངེས། གོ་རིམ་ངེས་པ་དང་གསུམ་ལས། དང་པོ་ནི། འཇིག་རྟེན་གྱི་ཐ་སྙད་དམ་རྟོག་གེ་དང་མཐུན་པར་མི་བསླུ་བ། ཡང་དག་པ། དོན་དམ་པ་ལ་འཇུག་པས་ན་ཚད་མ་སྟེ་དེའང་བླ་མ་ནི་མན་ངག་ཕྱིན་ཅི་མ་ལོག་པར་སྟོན་པ་ལ་མི་བསླུ་བས་ན་ཚད་མ། ཉམས་མྱོང་ནི་བླ་མས་བསྟན་པ་ལྟར་ཉམས་སུ་མྱོང་བ་ལ་མི་བསླུ་བས་ན་ཚད་མ། བསྟན་བཅོས་ནི་ལུང་གི་དགོངས་པ་ཕྱིན་ཅི་མ་ལོག་པ་འགྲེལ་པ་ལ་མི་བསླུ་བས་ནི་ཚད་མ། ལུང་ནི་རང་གི་བསྟན་བྱའི་དོན་ལ་མི་བསླུ་བས་ན་ཚད་མའོ། །དེ་ལ་བླ་མ་ནི་རྒྱལ་བས་ལུང་བསྟན་པའམ། མཁའ་འགྲོས་བྱིན་གྱིས་བརླབས་པའི་གྲུབ་ཐོབ་དངོས་སམ་དེའི་བརྒྱུད་པ་བར་མ་ཆད་པའི་མན་ངག་ཡོད་ཅིང་རྡོ་རྗེ་སློབ་དཔོན་སྤྱིའི་མཚན་ཉིད་ཚང་བ་གཅིག་དགོས་སོ། །ཉམས་མྱོང་ནི་སྙན་བརྒྱུད་བཞི་དང་ལྡན་པའི་གདམས་ངག་ཉམས་སུ་བླངས་པ་ལས་བྱུང་བའི་ཉམས་མྱོང་ངོ་། །བསྟན་བཅོས་ནི་རྒྱལ་བས་ལུང་བསྟན་པའམ་མཁའ་འགྲོས་བྱིན་གྱིས་བརླབས་པའི་ཀླུ་སྒྲུབ་དང་བིརྺ་པ་སོགས་ཀྱིས་བཀའི་དགོངས་པ་རང་དབང་དུ་འགྲེལ་བའི་བསྟན་བཅོས་ལ་བྱ་སྟེ། འདིར་ནི་རྡོ་རྗེའི་ཚིག་རྐང་ངོ་། །ལུང་ནི་རྒྱས་པར་ན་བདེ་བར་གཤེགས་པའི་གསུང་རབ་མཐའ་དག མདོར་བསྡུ་ན་ཀྱཻ་རྡོར་རྒྱུད་གསུམ་མོ། །གཉིས་པ་ནི། གྲུབ་ཐོབ་ཚད་ལྡན་ནས་རིམ་པ་བཞིན་དུ་བརྒྱུད་པའི་མན་ངག་དེང་སང་གི་སོ་སོའི་སྐྱེ་བོ་རྣམས་ཀྱིས་ཉམས་སུ་ལེན་པའི་ཚེ་ཚད་མ་བཞི་པོ་གང་རུང་གཅིག་མ་ཚང་ན་མན་ངག་དེ་ཕུན་སུམ་ཚོགས་པར་མི་འགྱུར་ཞིང་། བཞི་པོ་ཐམས་ཅད་ཚང་ན་ཕུན་སུམ་ཚོགས་པར་འགྱུར་བས་བཞིར་གྲངས་ངེས་སོ། །འོ་ན་དུས་ཀྱི་འཁོར་ལོ་ལས། དང་པོ་བླ་མ་ལ་ཡིད་ཆེས་པར་བྱའོ། །དེའི་རྗེས་སུ་རང་ཉིད་ལ་ཡིད་ཆེས་པར་བྱའོ། །དེའི་དུས་སུ་རྒྱུད་ཀྱི་རྒྱལ་པོ་ལ་ཡིད་ཆེས་པར་བྱའོ། །དེ་ལྟར་ན་ཡིད་ཆེས་པ་རྣམ་པ་གསུམ་གྱིས་རྒྱུད་ཀྱི་དོན་མ་ལུས་པ་རྟོགས་པར་འགྱུར་རོ་ཞེས་ཡིད་ཆེས་སམ་ཚད་མ་གསུམ་དུ་བཤད་པ་མ་ཡིན་ནམ་སྙམ་ན་དེ་ནི་གྲུབ་ཐོབ་ཚད་ལྡན་ལས་དངོས་སུ་མན་ངག་ཐོབ་པའི་དབང་དུ་བྱས་ལ་དེའི་ཚེ་བླ་མ་ཚད་མ་ལས་ལོགས་སུ་བསྟན་བཅོས་ཚད་མ་མི་དགོས་ཏེ། བསྟན་བཅོས་ཚད་མའི་དོན་ནི་རང་གིས་ཐོབ་པའི་མན་ངག་དེ་གྲུབ་ཐོབ་ཚད་ལྡན་གྱི་དགོངས་པར་བསྒྲུབ་པ་ཡིན་ལ། གྲུབ་ཐོབ་རང་ལས་གདམས་ངག་དངོས་སུ་ཐོབ་པ་དེ་ཀས་དགོངས་པར་གྲུབ་ཟིན་པའི་ཕྱིར་རོ། །འོ་ན་སློབ་དཔོན་ནག་པོ་པས་རྣལ་འབྱོར་དབང་ཕྱུག་ལས་དངོས་སུ་ཐོབ་པས་བསྟན་བཅོས་རྡོ་རྗེའི་ཚིག་རྐང་མི་དགོས་པར་འགྱུར་རོ་སྙམ་ན། དེ་ནི་ནག་པོ་པ་དབང་པོ་རྟུལ་བས་མན་ངག་གི་བརྗེད་ཐོར་གནང་བ་ཡིན་གྱི་རང་གི་མན་ངག་དེ་རྣལ་འབྱོར་དབང་ཕྱུག་གི་དགོངས་པར་བསྒྲུབ་པའི་ཆེད་དུ་གནང་བ་ནི་མ་ཡིན་ཏེ། ཌོཾ་བི་ཧེ་རུ་ཀ་བཞིན་ནོ། །གསུམ་པ་ལ་བཞི་སྟེ། རྒྱུད་ལས་གསུངས་པའི་གོ་རིམ། ཐོག་མར་འབྱུང་བའི་གོ་རིམ། ཉམས་སུ་ལེན་པའི་གོ་རིམ། ཚད་མར་སོང་བའི་གོ་རིམ་མོ། །དང་པོ་ནི། བསྟན་བཅོས་ཚད་མ་སློབ་དཔོན་དང་། །ལུང་གི་རྗེས་འབྲང་དེ་ཉིད་རིག །ཅེས་པ་སྟེ། དེ་ཉིད་རིག་པ་ནི་ཉམས་མྱོང་མཐར་ཐུག་པ་མཚོན་བྱ་དོན་གྱི་ཡེ་ཤེས་ཡིན་ལ། འདི་ནི་རྟོག་གེ་པ་རང་དགར་འཇུག་པ་དགག་པའི་ཕྱིར་དུ་གོ་རིམ་དཀྲུགས་ཏེ་གསུངས་པའོ། །གསང་དོན་དེ་ཉིད་དངོས་པོ་ཡང་ཞེས་པ་ནི་ཚད་མ་བཞིས་གཏན་ལ་ཕབ་པར་བྱ་བའི་མན་ངག་དངོས་སོ། །གཅིག་ནས་གཅིག་བརྒྱུད་ཤེས་པར་བྱ། །ཞེས་པ་ནི་ཚད་མ་བཞིས་གཏན་ལ་ཕབ་པར་བྱ་བ་དེ་ཡང་གྲུབ་ཐོབ་དེ་ལས་དངོས་སུ་ཐོབ་པ་མ་ཡིན་པར་རིམ་པ་བཞིན་དུ་བརྒྱུད་པའི་དབང་དུ་བྱས་པར་བསྟན་ཏོ། །བླ་མ་རབ་ཀྱི་ཞལ་ལས་བླངས། །ཞེས་པ་ནི་དེ་ལྟ་བུའི་མན་ངག་དེ་ཡང་། བརྒྱུད་པའི་མན་ངག་ཕྱིན་ཅི་མ་ལོག་པར་ཡོད་ཅིང་། རྡོ་རྗེ་སློབ་དཔོན་སྤྱིའི་མཚན་ཉིད་ཚང་བ་ལས་ཐོབ་དགོས་ཞེས་པ་སྟེ་བླ་མ་ཚད་མའི་ཁྱད་ཆོས་སྟོན་པའོ། །གཉིས་པ་ནི། ཐོག་མར་རྡོ་རྗེ་འཆང་གིས་གསུངས་པའི་ལུང་ཚད་མ་འབྱུང་། དེའི་རྗེས་སུ་ལུང་དེའི་དགོངས་པ་འགྲེལ་བའི་བསྟན་བཅོས་ཚད་མ་འབྱུང་། དེའི་རྗེས་སུ་བསྟན་བཅོས་དེ་ནས་གསུངས་པའི་མན་ངག་སྟོན་པའི་བླ་མ་ཚད་མ་འབྱུང་། དེའི་རྗེས་སུ་བླ་མས་ཇི་ལྟར་བསྟན་པ་ལྟར་ཉམས་སུ་བླངས་པས་རང་གི་རྒྱུད་ལ་ཉམས་མྱོང་སྐྱེ་བས་ན་ཉམས་མྱོང་ཚད་མ་འབྱུང་ངོ་། །གསུམ་པ་ནི། དང་པོར་བླ་མ་ཚད་མ་ཉམས་སུ་ལེན་དགོས་ཏེ། བླ་མ་ལ་མོས་གུས་ཚུད་པར་བྱས་ནས་དེས་བསྟན་པའི་མན་ངག་ཉམས་སུ་ལེན་དགོས་པའི་ཕྱིར་རོ། །དེ་ནས་ཉམས་མྱོང་ཚད་མ་ཉམས་སུ་ལེན་དགོས་ཏེ། བླ་མ་ལ་མོས་གུས་ཚུད་པའི་རྗེས་སུ། དེས་ཇི་ལྟར་བསྟན་པ་བཞིན་ཉམས་སུ་བླངས་པ་ལ་བརྟེན་ནས་ཉམས་མྱོང་ཚད་མ་བསྐྱེད་དགོས་པའི་ཕྱིར་རོ། །དེ་ནས་བསྟན་བཅོས་ཚད་མ་ཉམས་སུ་ལེན་དགོས་ཏེ། བླ་མས་བསྟན་པ་དང་རང་གིས་ཉམས་སུ་མྱོང་བ་དེ་ཡང་རྣལ་འབྱོར་དབང་ཕྱུག་གི་དགོངས་པར་བསྒྲུབ་དགོས་པའི་ཕྱིར་རོ། །དེ་ནས་ལུང་ཚད་མ་ཉམས་སུ་ལེན་དགོས་ཏེ། རྣལ་འབྱོར་དབང་ཕྱུག་གི་དགོངས་པ་དེ་ཡང་ཚད་མ་ཐམས་ཅད་ཀྱི་མཆོག་ཏུ་གྱུར་པ་སངས་རྒྱས་ཀྱི་དགོངས་པར་བསྒྲུབ་པའི་ཆེད་དུ་ལུང་ལ་ཐོས་བསམ་བྱ་དགོས་པའི་ཕྱིར་རོ། །བཞི་པ་ནི། དང་པོར་ཉམས་མྱོང་ཚད་མར་སོང་བ་དགོས་ཏེ། རང་རྒྱུད་ལ་ཉམས་བཅོ་ལྔ་པོ་གང་རུང་ཅིག་སྐྱེས་ཤིང་ཡིད་ཆེས་པ་ན་ཉམས་མྱོང་ཚད་མར་སོང་བར་འཇོག་ཅིང་། དེ་ལ་བརྟེན་ནས་ཚད་མ་གཞན་ཐམས་ཅད་ཚད་མར་སོང་བ་འབྱུང་བའི་ཕྱིར་རོ། །དེ་ནས་བླ་མ་ཚད་མར་སོང་བ་འབྱུང་སྟེ། རང་རྒྱུད་ལ་ཉམས་མྱོང་སྐྱེས་པ་ན་བླ་མས་སྔར་ཁྱོད་ཀྱི་རྒྱུད་ལ་ཉམས་མྱོང་འདི་དང་འདི་ལྟ་བུ་སྐྱེའོ་ཞེས་གསུངས་པ་དང་མཐུན་པར་གོ་བས་བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེས་པའི་ཚེ་བླ་མ་ཚད་མར་སོང་བའི་ཕྱིར། དེ་ནས་བསྟན་བཅོས་ཚད་མར་སོང་བ་འབྱུང་སྟེ། རང་རྒྱུད་ལ་ཉམས་སུ་མྱོང་ཞིང་བླ་མས་བསྟན་པ་དེ་ཡང་རྡོ་རྗེའི་ཚིག་རྐང་གི་དགོངས་པར་རྟོགས་པས་ན། མདོ་རྒྱུད་ཐམས་ཅད་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པ་ནི་རྣལ་འབྱོར་གྱི་དབང་ཕྱུག་ཉིད་དོ། །བསྟན་བཅོས་རྡོ་རྗེའི་ཚིག་རྐང་ནི་དྲང་སྲོང་གི་བཀའ་བཞིན་དུ་སྤྱི་བོར་བླང་བྱའོ་སྙམ་དུ་ངེས་པའི་ཚེ་བསྟན་བཅོས་ཚད་མར་སོང་བའི་ཕྱིར་རོ། །དེ་ནས་ལུང་ཚད་མར་སོང་བ་འབྱུང་སྟེ། དེ་ལྟ་བུའི་ཁྱད་པར་གསུམ་ལྡན་དེ་ཡང་སངས་རྒྱས་ཀྱི་ལུང་གི་དགོངས་པར་རྟོགས་པ་ན་ལུང་རང་གི་བསྟན་དོན་ལ་མི་བསླུ་བར་ངེས་པའི་ཚེ་ལུང་ཚད་མར་སོང་བའི་ཕྱིར་རོ། །དེ་དག་ཀྱང་རགས་པའི་རྣམ་བཞག་ཡིན་གྱི་ཞིབ་ཏུ་ན་གཞུང་བཤད་ལས་འབྱུང་བ་ལྟར་ཉམས་རེ་རེ་ཡང་ཚད་མ་བཞི་བཞིས་གཏན་ལ་དབབ་པར་ཤེས་པར་བྱའོ། །གཉིས་པ་སྙན་བརྒྱུད་བཞིས་སྤྲོས་པ་གཅོད་པ་ནི་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། གདམས་ངག་གི་སརྒ་མ་ལོག་པ། མོས་གུས་ཀྱི་བསམ་པ་ཚིམ་པར་ནུས་པའོ། །དང་པོ་ལ་རྒྱུ་དུས། ལམ་དུས། འབྲས་དུས་ཀྱི་དབང་གསུམ་ལས། དང་པོ་ནི། དབང་གི་མངོན་པར་རྟོགས་པ་བདུན་ལྡན་གྱི་སྨིན་བྱེད་ཀྱི་དབང་བཞི་ཐོབ་པའོ། །གཉིས་པ་ནི་ལམ་གྱི་ཐུན་བཞི་ལ་དབང་བཞི་བསྒོམ་པའོ། །གསུམ་པ་ནི་འབྲས་བུ་ལ་མཚམས་སྦྱར་བ་ཉེ་རྒྱུའི་དབང་སྟེ། མདོར་ན་སྨིན་བྱེད་ནས་བརྩམས་ཏེ་འབྲས་བུའི་བར་ཐམས་ཅད་དབང་གིས་བགྲོད་པའི་ལམ་མོ། །གཉིས་པ་ནི། གསང་སྔགས་མཐའ་བཞིའི་བདག་ཉིད་ཅན་ཏེ། ཉམས་སུ་བླངས་པའི་མཐའ། ཉམས་སུ་མྱོང་བའི་མཐའ། བྱིན་གྱིས་བརླབས་པའི་མཐའ། གྲུབ་པའི་མཐའ་ཅན་ཏེ། བརྩོན་འགྲུས་ཅན་སོ་སོར་བརྟགས་པའི་འགོག་པས་གྲུབ་མཐའ་སྙོགས་པའི་དབང་དུ་བྱས་པའོ། །གསུམ་པ་ནི་སྲིན་པོ་ལ་སོགས་པའི་བདུད་དང་བར་ཆད་རྣམས་སམ་འཇིགས་ཤིང་ཉམ་ང་བ་ལ་སོགས་པ་མི་འཚམ་པ་དུ་མ་བྱུང་བའི་ཚེ་དེ་ཉིད་ལམ་དུ་ཤེས་པ་ན་ཏིང་ངེ་འཛིན་ངོ་ཤེས་པས་བསམ་གཏན་གྱི་གེགས་སེལ། བར་ཆད་ངོ་ཤེས་པས་བདུད་ཀྱི་གེགས་སེལ། སྐྱོན་ཡོན་ཏན་དུ་སློང་ཤེས་པས་བར་ཆད་དངོས་གྲུབ་ཏུ་ལེན་ཤེས་པའི་གདམས་ངག་སྟེ། སྔར་གྱི་དེ་དག་གི་གེགས་སེལ་ལོ། །བཞི་པ་ནི་བར་ཆད་དང་དངོས་གྲུབ། དོགས་པ་དང་རེ་བ་ཐམས་ཅད། བདག་ཉིད་ཀྱི་ལུས་ལ་རྩ་རླུང་གི་རྟེན་འབྲེལ་འགྲིགས་པ་ལས་བྱུང་བར་བླ་མ་དམ་པས་བསྟན་པས་ཡིད་ཆེས་ཁྱད་པར་ཅན་སྐྱེས་ཏེ། བླ་མ་ལ་སངས་རྒྱས་ཀྱི་འདུ་ཤེས་འཇུག་པའོ། །མདོར་ན་དང་པོ་གསུམ་ཉམས་མྱོང་ཚད་མའི་ཁྱད་ཆོས་ཡིན་ལ། འདི་ནི་བླ་མ་ཚད་མར་སོང་བའི་ཚད་དེ། ཚད་མ་གཉིས་པོ་དེ་ཡང་སྙན་བརྒྱུད་བཞི་དང་ལྡན་པ་ཞིག་དགོས་ཞེས་སྤྲོས་པ་གཅོད་པའོ། །གསུམ་པ་ཚད་མ་བཞིའི་ཉམས་ལེན་བྱེ་བྲག་ཏུ་བཤད་པ་ལ་གསུམ་སྟེ། ཚད་མ་བཞི་པོ་ཆོས་སྣ་དྲུག་ཅུ་དང་སྦྱར་ཏེ་བཤད། མན་ངག་ཕྲ་མོའི་རྐང་གྲངས་ཚད་མ་བཞི་དང་སྦྱར་ཏེ་བཤད། ཉམས་མྱོང་ཚད་མ་བསྐྱེད་པའི་ཆེད་དུ་ཁྲིད་ཀྱི་གཞུང་ཤིང་བྱེ་བྲག་ཏུ་བཤད་པའོ། །དང་པོ་ལ་ཚད་མ་བཞི་ལས་དང་པོ་བླ་མ་ཚད་པ་ནི། བླ་མ་བརྒྱུད་པའི་རྣམ་ཐར་ཉན་ནས་མོས་གུས་ཚུད་ཚུད་དུ་བསྒོམ་པ་སྟེ། འདི་ལ་རྗེ་བཙུན་རྣལ་འབྱོར་གྱི་དབང་ཕྱུག་བརྒྱུད་པ་དང་བཅས་པའི་ལོ་རྒྱུས་ཀྱི་ཡི་གེ་གཉིས་ཡོད་དོ། །གཉིས་པ་ཉམས་མྱོང་ཚད་མ་ལ་ལམ་རྒྱས་འབྲིང་གསུམ་དུ་བསྟན་པ་དང་། ལམ་ཟབ་འབྲིང་དུ་བསྟན་པ་གཉིས་ལས། དང་པོ་ལ་གཞུང་ལས་འཕྲོས་པའི་ཆོས་སྣ་བཅུ་བདུན། ལམ་འབྲིང་པོ་དང་བསྡུས་པ་གཉིས་ཏེ་བཅུ་དགུ། ཕྱི་མ་ལ་ཁྲིད་ཀྱི་གཞུང་ཤིང་བཞི། རྟོགས་པ་བསྐྱེད་པའི་ཆོས་ལྔ། ལམ་ཟབ་མོ་བླ་མའི་རྣལ་འབྱོར་ཏེ་བཅུ་གསུངས་པ་རྣམས་བླ་མའི་མན་ངག་གིས་ཉམས་ལེན་གྱི་ཁོག་བསྒྲིགས་ཏེ་བཤད་ན། དང་པོ་ལམ་རྒྱས་པ་ནི་གཞུང་འཆད་པའི་ཚེ། གཞུང་རྡོ་རྗེའི་ཚིག་རྐང་ལ་གཞུང་ཚོམ་བུ་བཅོ་བརྒྱད་དུ་བཅད་ནས་ལམ་རྒྱས་པ་ཆོས་བཅོ་བརྒྱད་ཀྱིས་བསྡུས་པ་ཞེས་བཤད་པར་བྱ་བ་ཡིན་ལ། འདིར་ནི་ཉམས་མྱོང་མ་བསྐྱེད་པ་བསྐྱེད་པར་བྱེད་པ་ཁྲིད་ཀྱི་གཞུང་ཤིང་ཆེན་པོ་བཞི། སྐྱེས་པ་བོགས་འབྱིན་པ་རྟོགས་པ་བསྐྱེད་པའི་ཆོས་ལྔ། དེ་དག་གི་གེགས་སེལ་བ་ལ་གེགས་སེལ་གྱི་ཡི་གེ་བཞི། ཁྲིད་ཀྱི་གཞུང་ཤིང་དང་པོའི་གསེབ་ཚགས་སུ་སྦྱར་བར་བྱ་བའི་ཆོས་སྣ་བཅུ་གསུམ་སྟེ། དེ་ལྟར་ཚན་པ་བཞི་ལས། དང་པོ་ནི། གཞུང་ཇི་ལྟ་བ་བཞིན་དུ་དཀྲི་བའི་གཞུང་ཤིང་། མན་ངག་གི་གནད་དྲུག་གིས་དཀྲི་བའི་གཞུང་ཤིང་། བརྩོན་འགྲུས་ཅན་མན་ངག་གི་གནད་བཅུ་གཅིག་གིས་དཀྲི་བའི་གཞུང་ཤིང་། དབང་པོ་རབ་འབྲིང་གསུམ་དུ་དཀྲི་བའི་གཞུང་ཤིང་དང་བཞིའོ། །དང་པོ་ནི་གང་ཟག་དབང་པོ་ཐ་མ་ཐོག་མར་འཁོར་བའི་ཉེས་དམིགས་ནས་བརྩམས་ཏེ་ཕ་རོལ་ཏུ་ཕྱིན་པའི་ཐེག་པས་རྒྱུད་སྦྱངས་ནས། དེའི་འོག་ཏུ་སྨིན་བྱེད་ནས་བརྩམས་ཏེ་རྡོ་རྗེ་ཐེག་པའི་ལམ་མཐའ་དག་རིམ་གྱིས་བསྟན་པའི་སྒོ་ནས་བཀྲི་བའོ། །འདི་ལ་ཅིའི་ཕྱིར་གཞུང་ཇི་ལྟ་བ་བཞིན་དུ་བཀྲི་བ་ཞེས་བྱ་ཞེ་ན་གཞུང་རྡོ་རྗེའི་ཚིག་རྐང་གི་དགོངས་པ་ཅི་ལྟ་བ་བཞིན་ཞེས་པ་ཙམ་ནི་མ་ཡིན་ཏེ། གཞུང་ཤིང་གཞན་གསུམ་པོ་ཡང་རྡོ་རྗེའི་ཚིག་རྐང་གི་དགོངས་པ་ཇི་ལྟ་བ་བཞིན་ཡིན་པའི་ཕྱིར་རོ། །དེས་ན་གཞུང་རྡོ་རྗེའི་ཚིག་རྐང་གི་གོ་རིམ་ཅི་ལྟ་བ་བཞིན་ཞེས་པའི་དོན་ཏེ། གཞུང་ལས། དང་པོར་སྣང་བ་གསུམ་དང་། དེས་ནས་རྒྱུད་གསུམ་དུ་བསྟན་པའི་ལམ་གསུངས་པའི་གོ་རིམ་ཇི་ལྟ་བ་བཞིན་དུ་བཀྲི་བ་ཡིན་པའི་ཕྱིར་རོ། །གཞུང་ལས་དེ་ལྟར་འབྱུང་བའི་རྒྱུ་མཚན་ཡང་། རྩ་རྒྱུད་ཕྱི་མའི་བརྒྱད་པར། སྐལ་མེད་སེམས་ཅན་གདུལ་དཀའ་བ། །གང་གིས་འདུལ་བར་གྱུར་པ་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱཻ་ཡི་རྡོ་རྗེ་བསྟན། །སློབ་མས་གུས་པས་བླངས་ན་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པའི་གོ་རིམ་གྱི་དབང་དུ་བྱས་པའོ། །འདི་ལ་གཞུང་འཆད་པའི་གནས་སྐབས་ཀྱི་ལམ་གྱི་རིམ་པ་སྒྲིག་པའི་ཚེ། ལྗོན་ཤིང་ནས་འབྱུང་བ་ལྟར་འཆི་བ་མི་རྟག་པ་དང་དལ་འབྱོར་རྙེད་དཀའི་སྒོ་ནས་ཚེ་འདི་ལས་བློ་བཟློག་ནས་དཀོན་མཆོག་ལ་སྐྱབས་འགྲོ་དང་། དུས་ཚིགས་ཀྱི་གསོ་སྦྱོང་ནས་བརྩམས་ཏེ་རྣལ་འབྱོར་ཆེན་པོ་ཤེས་རབ་ཀྱི་རྒྱུད་ཀྱི་བར་རིམ་པ་ཅི་ལྟ་བ་བཞིན་བསླབ། དེ་ནས་ཀྱཻ་རྡོ་རྗེའི་སྨིན་བྱེད་ནས་བརྩམས་ཏེ་འཇུག་པར་གསུངས་ལ། འདིར་མན་ངག་ཐུན་མོང་མ་ཡིན་པའི་སྐབས་སུ། གསོ་སྦྱོང་ནས་སྔགས་ཀྱི་རིམ་པ་ཀུན་ཤེས་ཀྱི་བར་ཐམས་ཅད་སྣང་བ་གསུམ་གྱི་ཁྲིད་དུ་བསྡུས་ནས། དེ་རྗེས་ཀྱཻ་རྡོ་རྗེའི་སྨིན་བྱེད་ནས་བཀྲི་བར་མཛད་པ་ནི་ཁྱད་པར་ཏེ། འཁོར་བའི་ཉེས་དམིགས་ནས་འགོ་འཛིན་པ་དང་། འཆི་བ་མི་རྟག་པ་ནས་འགོ་འཛིན་པ་སོགས་ཀྱི་ཁྱད་པར་ཐམས་ཅད་ཀྱང་དེ་བཞིན་དུ་ཤེས་པར་བྱའོ། །གཉིས་པ་མན་ངག་གི་གནད་དྲུག་གིས་བཀྲི་བའི་གཞུང་ཤིང་ནི། སྐལ་དམན་རིམ་འཇུག་པའམ་སྐལ་ལྡན་ཅིག་ཆར་བ་གང་ཡིན་ཀྱང་རུང་རྒྱུད་གསུམ་པོ་རེ་རེ་ལ་ཡང་དོན་ཚན་དྲུག་དྲུག་ཏུ་གནས་ཞེས་པ་སྟེ། རེ་རེ་ལ་ཡང་རྒྱུ་ལ་གནས་པ། དབང་ལས་ཐོབ་པ། ལམ་ལ་གོམས་པ། ལྟ་བ་ཉམས་སུ་མྱོང་བ། གྲུབ་མཐའ་ལ་རྟགས་སུ་ཤར་བ། འབྲས་བུ་ལ་དོན་མ་ལུས་པ་མངོན་དུ་གྱུར་པ་སྟེ་དྲུག་དྲུག་ཏུ་ཕྱེ་ནས་བསྟན་པའོ། །འདི་ནི་སྔ་མ་ལས་དཀྲི་ཚུལ་ལོགས་སུ་ཡོད་པ་མ་ཡིན་གྱི། རྡོ་རྗེ་ཐེག་པའི་ལུགས་ལ་རྒྱུ་དང་། ལམ་དང་། འབྲས་བུ་ཐམས་ཅད་དབྱེར་མེད་ཡིན་པ་ཤེས་པའི་ཆེད་དུ་ཡིན་ཏེ། བཞི་ཚན་དང་པོ་ནི་རྒྱུ་རྒྱུད་དང་། བར་པ་བཞི་ནི་ཐབས་རྒྱུད་དང་། ཐ་མ་ནི་འབྲས་བུའི་རྒྱུད་ཡིན་པས་རྒྱུ་ལ་གནས་པ་དེ་ཉིད་དབང་ལས་ཐོབ། དབང་ལས་ཐོབ་པ་དེ་ནི་ལམ་ལ་གོམས་ཞེས་སོགས་ཀྱི་ཚུལ་གྱིས་དབྱེར་མེད་པར་ཤེས་པར་བྱའོ། །འདི་ལ་གཞུང་ཤིང་དང་པོ་སྐལ་དམན་རིམ་འཇུག་པ་དང་། གཞུང་ཤིང་གཉིས་པ་སྐལ་ལྡན་ཅིག་ཆར་བའི་བཀྲི་ཚུལ་ཞེས་པ་རུང་མོད་ཀྱི་དེའི་ཚེ་ན་ཡང་སྨིན་བྱེད་མན་ཆད་ཀྱི་བཀྲི་ཚུལ་ལ་ནི་ཁྱད་པར་མེད་དོ། །གསུམ་པ་བརྩོན་འགྲུས་ཅན་མན་ངག་གི་གནད་བཅུ་གཅིག་གིས་བཀྲི་བའི་གཞུང་ཤིང་ནི་གང་ཟག་བརྩོན་འགྲུས་རབ་ཏུ་གྱུར་པ་རྫོགས་རིམ་འབའ་ཞིག་གིས་བཀྲི་བ་སྟེ། དང་པོ་སྦྱོང་བ་ཁྱད་པར་ཅན་གྱི་གནད། འོག་རླུང་བསྐྱོད་པ་ལུས་ཀྱི་རྦ་རླབས་ཀྱི་གནད། ངག་འདྲེན་པ་ཞི་བའི་གནད། ངག་འདྲེན་པ་དྲག་པོའི་གནད་དེ་བཞིས་ཁམས་འདུས་པ་དང་པོའི་ལམ་ཆོད། དེ་ནས་ལྟ་བ་གསོ་བ་ཕྱག་རྒྱ་བརྟེན་པའི་གནད། བོགས་འབྱིན་རྣམ་པ་བརྒྱད་ཀྱི་གནད། སྤྱོད་པ་ཆུང་ངུ་དྲན་པ་ཉེར་བཞག་བཞིའི་གནད་དེ་གསུམ་གྱིས་ཁམས་འདུས་པ་བར་པའི་ལམ་ཆོད། དེ་ནས་སྤྱོད་པ་ཆེན་པོ་ཡང་དག་སྤང་བ་བཞིའི་གནད། ཏིང་ངེ་འཛིན་སེམས་ཀྱི་རྦ་རླབས་ཀྱི་གནད་དེ་གཉིས་ཀྱིས་ཁམས་འདུས་པ་ཐ་མའི་ལམ་ཆོད། དེ་ནས་འཇིག་རྟེན་ལས་འདས་པའི་ལམ་ས་བཅུ་གཉིས་ལ་ཕྱི་ནང་རྟེན་འབྲེལ་དབང་བཞི་དང་དཀྱིལ་འཁོར་གསུམ་གྱི་གནད། མཐར་ཕྱིན་གྱི་ལམ་ས་ཕྱེད་ལ་ཕྱི་ནང་རྟེན་འབྲེལ་འགྲོས་བཞི་ཐིམ་པའི་གནད་གཉིས་ཀྱིས་འཇིག་རྟེན་ལས་འདས་པའི་ལམ་མཐའ་དག་བགྲོད་པའོ། །བཞི་པ་དབང་པོ་རབ་འབྲིང་གསུམ་དུ་དཀྲི་བའི་གཞུང་ཤིང་ནི། ཉན་ཐོས་དང་ཐུན་མོང་བའི་ལམ་གྱིས་བཀྲི་དགོས་པ་རྣམས་ནི་འཁོར་བའི་ཉེས་དམིགས། དལ་འབྱོར་རྙེད་དཀའ། འཆི་བ་མི་རྟག་པ་བསྒོམ་པ་གསུམ་གྱིས་བཀྲི། ཐེག་པ་ཆེན་པོ་ཐུན་མོང་བའི་ལམ་གྱིས་བཀྲི་དགོས་པ་རྣམས་ནི། བྱམས་པ། སྙིང་རྗེ་བྱང་ཆུབ་ཀྱི་སེམས་བསྒོམ་པ་གསུམ་གྱིས་བཀྲི། འཁོར་འདས་དབྱེར་མེད་ལ་བསླབ་དགོས་པ་རྣམས་ནི་ཆོས་ཐམས་ཅད་སེམས། དེ་སྒྱུ་མར་བསྒྲུབ། དེ་སྤྲོས་བྲལ་དུ་ཐག་བཅད་པ་གསུམ་གྱིས་བཀྲི། ཐུན་མོང་མ་ཡིན་པའི་རྣལ་འབྱོར་པ་ལ་ཐབས་ཀྱི་ཕྱོགས་དང་། ཤེས་རབ་ཀྱི་ཕྱོགས་དང་། ཟུང་འཇུག་གི་རྣལ་འབྱོར་པ་གསུམ། དེ་རེ་རེ་ལ་ཡང་དབང་པོ་ཐ་མ་དང་། འབྲིང་དང་རབ་གསུམ་གསུམ་དུ་ཕྱེ་ནས་རང་རང་གི་ཅི་ལྟར་འདོད་པའི་ལམ་གྱིས་སོ་སོར་བཀྲི་བའོ། །མདོར་ན་འདི་ཉིད་ནི་ཉན་ཐོས་དང་ཐུན་མོང་བ་ལ་བསླབ་པར་འདོད་པ་ནས་བཟུང་སྟེ་ཟུང་འཇུག་གི་རྣལ་འབྱོར་པ་རབ་ཀྱི་བར་གང་ཟག་བཅུ་གཉིས་པོ་རང་རང་གི་བློ་དང་འཚམ་པའི་བཀྲི་ཚུལ་སོ་སོར་དགོས་པ་ཐམས་ཅད་མན་ངག་འདིས་བཀྲི་བར་ནུས་ཞེས་པའི་དོན་ཏེ། དཔེར་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཐེག་པ་གསུམ་གྱི་རྟོགས་རིགས་ཚང་བར་སྟོན་པས་ཐེག་པ་གསུམ་ཆར་གྱི་གང་ཟག་བཀྲི་ནུས་པ་བཞིན་ནོ། །གཉིས་པ་སྐྱེས་པ་བོགས་འབྱིན་པ་རྟོགས་པ་བསྐྱེད་པའི་ཆོས་ལྔ་ནི། ལམ་འཇུག་ལྡོག ཕྱག་རྒྱ་འཇུག་ལྡོག ཤེས་པས་ཕན་འདོགས་པའི་མན་ངག་བདུན། ལམ་བསྲེ་བ་འགྲོས་བཞི་དང་བཅས་པ། ཕྱི་ནང་གི་མཛད་པ་བཅུ་གཉིས་རྣམས་ཏེ། འདི་དག་གིས་སྔར་གྱི་ཉམས་མྱོང་དེ་དག་ལ་རྟོགས་པ་ཁྱད་པར་ཅན་བསྐྱེད་པའི་སྒོ་ནས་བོགས་དབྱུང་བའོ། །གསུམ་པ་གེགས་སེལ་གྱི་ཡི་གེ་ཆེན་པོ་བཞི་ནི། བསམ་གཏན་འདོར་བའི་འཕྲང་བདུན། བྱུང་རྒྱལ་དུ་མི་གཏོང་བའི་གནད་བཞི། འབྱུང་བ་ལུས་འཁྲུགས་རླུང་དང་སྤྱོད་ལམ་གྱིས་བསལ་བ། རྣལ་འབྱོར་གྱི་ཕྲིན་ལས་སུམ་ཅུ་རྩ་གཉིས་ཏེ། འདི་དག་ནི་སྔར་གྱི་ཉམས་མྱོང་དེ་དག་གི་གེགས་ནམ་བྱུང་བའི་ཚེ་སེལ་ཚུལ་ཤེས་དགོས་པ་ཡིན་ལ། ཁྱད་པར་དུ་གསང་དབང་གི་ལམ་རླུང་དང་། གཏུམ་མོའི་རྣལ་འབྱོར་གྱི་སྐབས་སུ་གཙོ་བོར་དགོས་པའོ། །བཞི་པ་ཁྲིད་ཀྱི་གཞུང་ཤིང་དང་པོའི་གསེབ་ཚགས་སུ་སྦྱར་བར་བྱ་བའི་ཆོས་སྣ་བཅུ་གསུམ་གྱི་སྦྱར་ཚུལ་ནི། དབང་གི་ཆུ་བོའི་ལག་ལེན་རྒྱས་པ། དབང་བཞིའི་ཆོ་ག་མཐའ་དག་མདོར་བསྡུས་པ་མན་ངག་གི་གནས། མཆོག་དབང་གསུམ་གྲོལ་ལམ་ལ་བརྟེན་ཏེ་བསྐུར་བ་གསུམ་ནི་སྨིན་བྱེད་ཀྱི་སྐབས་སུ་སྦྱར་བར་བྱ་བ་ཡིན་ནོ། །རྗེ་བླ་མའི་ཞལ་ནས། ཡབ་ཡུམ་གྱི་བསྐྱེད་རིམ་གསུམ། ཕྱི་བསྐྱེད་པའི་རིམ་པ་མདོར་བསྡུས་པ་དང་བཞི་ཡང་སྐབས་འདིར་སྦྱར་བར་གསུངས་པ་ནི་སྔོན་དུ་བསྙེན་པ་དང་། ས་ཆོག་དང་། སྟ་གོན་དང་། དངོས་གཞི་དཀྱིལ་འཁོར་བསྒྲུབ་པའི་སྐབས་ཐམས་ཅད་དུ་དགོས་པ་ལ་དགོངས་ལ། སློབ་མས་ཉམས་སུ་ལེན་པའི་ཚེ་འོག་ཕྱི་བསྐྱེད་པའི་རིམ་པའི་སྐབས་སུ་སྦྱར་བ་ཡང་རུང་སྟེ་གནད་གཅིག་གོ །སྦྱར་ཚུལ་འདིས་ཀྱང་ཡབ་ཀྱི་བསྐྱེད་རིམ་དང་། དབང་ཆུ་སོགས་ལ་བརྟེན་ནས་ཡབ་ཀྱི་དཀྱིལ་འཁོར་དུ་དབང་བསྐུར་བ་དང་། ཡུམ་ཀྱི་བསྐྱེད་རིམ་དང་དབང་ཆུ་སོགས་ལ་བརྟེན་ནས་ཡུམ་གྱི་དཀྱིལ་འཁོར་དུ་དབང་བསྐུར་བ་གཉིས་ཡོད་པ་དང་། ཕྱི་བསྐྱེད་རིམ་ལ་ཡང་དེ་ལྟར་གཉིས་ཡོད་པར་གྲུབ་ཅིང་། སྐབས་འདིའི་ཡབ་ཡུམ་གྱི་བསྐྱེད་རིམ་གསུམ་གྱི་མན་ངག་གི་གནད་བསྡུས་པ་ནི་ཕྱི་བསྐྱེད་པའི་རིམ་པ་མདོར་བསྡུས་པ་ཡིན་པས། སྐབས་དེར་མངོན་པར་རྟོགས་པ་བཅུ་བཞིའམ་བཅོ་ལྔ་སྣང་མོད་ཀྱི། ཞེས་གསུངས་པའི་བཅོ་ལྔ་པ་ནི་ཡུམ་གྱི་སྒྲུབ་ཐབས་ལས་འོས་མེད་དོ། །འོ་ན་འདི་ལ་ཡན་ལག་བཞི་དྲུག་གཉིས་ཡོད་པས་བཅུ་དྲུག་ཏུ་འགྱུར་རོ་སྙམ་ན། དེ་ནི་གནད་མི་འདྲ་སྟེ། ཡབ་ཀྱི་སྐབས་སུ་ཡན་ལག་བཞི་དྲུག་གཉིས་ལ་བསྐྱེད་ཆོག་མི་འདྲ་བ་ཡོད་པས་སོ་སོར་བགྲངས་ལ། འདིའི་ཡན་ལག་བཞི་དྲུག་གཉིས་ལ་བསྐྱེད་ཆོག་མི་འདྲ་བ་མེད་པས་སོ་སོར་བགྲང་བ་དོན་མེད་པའི་ཕྱིར་རོ། །ཡབ་ཡུམ་གཉིས་ཀྱི་དཀྱིལ་འཁོར་དུ་དབང་བསྐུར་བ་ཡང་གང་ཟག་གཅིག་ལ་གཉིས་ཀ་དགོས་པ་མ་ཡིན་གྱི། ཡབ་ལ་བརྟེན་ནས་ལམ་བསྒོམ་པ་དང་། ཡུམ་ལ་བརྟེན་ནས་ལམ་བསྒོམ་པ་གཉིས་ཀྱི་དབང་དུ་བྱས་པ་སྟེ། བདག་མེད་རྣལ་འབྱོར་ལྡན་པའམ། །ཞེས་སོགས་ཀྱི་རྒྱུད་ཀྱི་སྟེང་དུ་རྟོགས་པར་བྱའོ། །རྩ་བའི་ལྟུང་བའི་རྣམ་བཤད་འཁྲུལ་པ་སྤོང་བ་དང་། བདུད་རྩི་རིལ་བུ་བསྒྲུབ་པའི་ཆོ་ག་དང་། ཚོགས་ཀྱི་འཁོར་ལོའི་ཆོ་ག་གསུམ་ནི་དམ་ཚིག་གི་སྐབས་སུ་སྦྱར་བར་བྱ་བ་ཡིན་ནོ། །དམ་ཚིག་གི་རྗེས་དེ་ནས་ལྟ་བ་ལ་བློ་སྦྱངས་ནས། དེའི་འོག་ཏུ་བུམ་དབང་གི་ལམ་ལ་ཕྱི་བསྐྱེད་པའི་རིམ་པའི་བྱ་བ་དང་། བསྐྱེད་པའི་རིམ་པའི་སེམས་འཛིན་གཉིས་སུ་བྱས་ནས་བསྟན་པའི་ལུགས་དང་། དམ་ཚིག་གི་རྗེས་སུ་ཕྱི་བསྐྱེད་པའི་རིམ་པ་ཡན་ལག་དང་བཅས་པ་བསྟན་ནས། བཟླས་བརྗོད་དང་སྦྱིན་སྲེག་གིས་རྒྱུད་སྦྱངས་ནས་དེའི་འོག་ཏུ་ལྟ་བ་ལ་བློ་སྦྱོང་བའི་ལུགས་གཉིས་ལས། དང་པོ་ནི་ཁྲིད་ཀྱི་གཞུང་ཤིང་གི་དགོངས་པ་སྟེ། དེ་ཉིད་དུ། ལྟ་བ་བསྟན་ཟིན་པའི་རྗེས་སུ་གཉིས་པ་ལམ་གྱི་ངེས་ཤེས་བསྐྱེད་པའི་ཕྱིར་ལུས་ཐབས་རྒྱུད་བསྒོམ་པ་ནི། དེ་ནས་སྒྲུབ་པ་ལ་འཇུག་པའི་སྔོན་དུ་བླ་མ་ལ་ལམ་དུས་ཀྱི་དབང་བླངས་ཏེ། དམ་ཚིག་གསོ། བླ་མ་མི་བཞུགས་ན་བདག་ཉིད་ཀྱིས་བསྒྲུབ་པའི་དཀྱིལ་འཁོར་བྲིས་ལ་བདག་འཇུག་རྒྱས་པར་བྱ། མི་མཐུན་པའི་རྐྱེན་སྤངས་ནས། མཐུན་པའི་ཆས་འགྲིགས་པའི་ཚེ་སྒྲུབ་པ་ལ་འཇུག་སྟེ། དེ་ཡང་བསྐྱེད་པའི་རིམ་པའི་ལམ་ལ་བརྟེན་ནས་བསྙེན་པ་བཞི་འབུམ་ལ་སོགས་པ་ཅི་འགྲུབ་པ་བཟླ། དེའི་བཅུ་ཆའི་སྦྱིན་སྲེག་བྱ། དེ་ནས་བསྐྱེད་པའི་རིམ་པ་ལ་བརྟེན་ནས་སེམས་བཟུང་བར་བྱ་སྟེ། ལྷའི་སྤྱན་བསྒོམ་གསལ་ན་གསལ་ཏེ་འཕྲོ་བཅད། མི་གསལ་ན་མི་གསལ་སྟེ་འཕྲོ་བཅད་ཅེས་བྱ་བ་ལ་སོགས་པའི་ཚུལ་གྱིས་སེམས་བཟུང་ཞིང་ལམ་སྦྱངས། ནང་ནས་སྐྱེས་པའི་ལྟ་བ་ངོ་བོ་ཉིད་གསུམ་བསྐྱངས་ཏེ། སྣང་བ་དཀྱིལ་འཁོར་དུ་གསལ་བར་འདོད་ན་གསལ་བར་མ་གྱུར་པའི་བར་དུ་བསྐྱང་ངོ་ཞེས་གསུངས་པས་སོ། །ཕྱི་མ་ནི་ཞུས་ལན་གསལ་བའི་དགོངས་པ་སྟེ། དེ་ཉིད་དུ། དེ་ལྟར་སྣོད་དང་ལྡན་པའི་གང་ཟག་ལ། །བསྐྱེད་རིམ་ལམ་གྱི་ཡན་ལག་བཅས་བསྟན་ནས། །བཟླས་བརྗོད་སྦྱིན་སྲེག་དག་གིས་རྒྱུད་སྦྱངས་ལ། །དེ་ནས་ལྟ་བ་དག་ལ་བློ་སྦྱོང་ངོ་། །ཞེས་གསུངས་པའི་ཕྱིར་རོ། །འདི་དབང་རིམ་གྱིས་པའི་ལུགས་སོ་སྙམ་ན་མ་ཡིན་ཏེ། དེ་ཡིས་གནང་ནས་དཀྱིལ་འཁོར་ཆེན་པོ་རུ། །ཞུགས་ནས་དབང་བཞི་པོ་རྣམས་རྫོགས་པར་བླང་། །ཞེས་གསུངས་ཤིང་། དེ་ཡི་འོག་ཏུ་དམ་ཚིག་དང་། ཕྱི་བསྐྱེད་པའི་རིམ་པ་བསྟན་པར་གསུངས་པའི་ཕྱིར་རོ། །འདི་ལ་ཡང་བསྐྱེད་རིམ་གྱི་སེམས་འཛིན་ནི་ལྟ་བའི་འོག་ཏུ་བསྟན་པ་སྟེ། དེ་ཉིད་དུ། ལྟ་བ་ཡང་དག་བསམ་པས་བློ་སྦྱངས་ནས། །དེ་ནས་རིམ་གཉིས་བསམ་གཏན་བསྒོམ་པར་བྱ། །བསྐྱེད་པའི་རིམ་ནས་རིམ་གྱིས་བློ་སྦྱངས་སམ། །དེ་ཉིད་རྟེན་དུ་འཛིན་ཏམ་བློ་རིགས་གཉིས། །དང་པོའི་བསྐྱེད་པའི་རིམ་པ་ཉིད་ལ་ནི། །བློ་ཡི་སྣང་བ་ཐོབ་ཀྱི་བར་དུ་སྟེ། །ཞེས་གསུངས་པས་སོ། །ནང་བསྐྱེད་པའི་རིམ་པ་ནི། ཁྲིད་ཡིག་འདི་གཉིས་ཆར་དུ་མ་གསུངས་ཀྱང་། བརྡའ་དོན་གསལ་བར་གསུངས་པ་དེ་སྐབས་འདིར་སྦྱར་བ་ཕྱག་ལེན་ལ་མཛད་པ་ནི་མན་ངག་གི་གནད་དམ་པའོ། །གང་ལྟར་ཡང་། ལྟ་བའི་སྐབས་སུ་འཁོར་འདས་དབྱེར་མེད་རྩ་འགྲེལ་དང་། བསྐྱེད་རིམ་གྱི་བྱ་བའི་སྐབས་སུ་སྔར་བཤད་པའི་བསྐྱེད་རིམ་གྱི་གཞུང་བཞི་དང་། སྦྱིན་སྲེག་རྣམས་སྦྱར་བར་བྱ་བ་ཡིན་ནོ། །བྱིན་རླབས་ཀྱི་བརྒྱུད་པ་མ་ཉམས་པ་ནི། གསང་དབང་གི་མགོར་སྦྱར་བར་བྱ་བ་ཡིན་གསུང་ངོ་། །ལམ་འབྲིང་པོ་ནི་རྩ་བ་ལོགས་ན་མེད་ཀྱང་། སྔར་གྱི་ལམ་རྒྱས་པའི་དོན་འབྲིང་དུ་བསྡུས་ན། ཏིང་ངེ་འཛིན་སྐྱེ་བའི་རྒྱུ་གང་ཡིན་པ་དང་། ཏིང་ངེ་འཛིན་གང་ཡིན་པ་དང་། དེའི་ཕན་ཡོན་དང་། བར་ཆད་ཀྱི་ཆོས་བསལ་བ་དང་། ལམ་གྱི་ས་ཚོད་ཇི་ལྟར་ནོན་པ་དང་ལྔར་བསྡུས་ནས་སྟོན་པ་སྟེ་ཡི་གེ་གཅིག་ཡོད་དོ། །ལམ་བསྡུས་པ་ནི་རང་གི་གཞུང་ཅུངཾ་ཟདཾ་དང་བཅས་པ་སྒྲུབ་པའི་ལུང་སྦྱིན་པ་སྟེ་ཡི་གེ་གཅིག་ཡོད་དོ། །དེ་ལྟར་ལམ་རྒྱས་འབྲིང་གསུམ་བསྟན་ནས། ཟབ་འབྲིང་གསུམ་དུ་བསྟན་པ་ལ། ཐ་མ་ལུས་སོ་སོར་བརྟགས་པའི་འགོག་པ་ནི། སྔར་གྱི་ལམ་དེ་དག་ཐམས་ཅད། བརྩོན་འགྲུས་དྲག་པོས་བསྒོམས་ན་ཚེ་འདི་ཉིད་ལ་སངས་རྒྱ་སྟེ། ཡི་གེ་ལོགས་ན་མེད་དོ། །འབྲིང་དམ་ཚིག་དང་སྡོམ་པའི་ལམ་ནི། སྔར་གསེབ་ཚགས་སུ་བསྟན་པའི་དམ་ཚིག་གི་ཚོགས་ཉི་ཤུ་བསྐྱངས་པས་སྐྱེ་བ་བཅུ་དྲུག་ཕྱིན་ཆད་ནས་སངས་རྒྱ་བ་སྟེ། ཡི་གེ་ལོགས་ན་མེད་དོ། །རབ་ལམ་ཟབ་མོ་བླ་མའི་རྣལ་འབྱོར་ནི། མོས་གུས་ཅན་བླ་མའི་རྣལ་འབྱོར་ཁོ་ནས་གྲོལ་བ་སྟེ། ཡི་གེ་གཅིག་ཡོད་དོ། །དེས་ན་ཉམས་མྱོང་ཚད་མ་ལ་ཆོས་སྣ་ཉི་ཤུ་རྩ་དགུའོ། །གསུམ་པ་བསྟན་བཅོས་ཚད་མ་ལ། རྡོ་རྗེའི་ཚིག་རྐང་གི་འགྲེལ་པ་རྗེ་ས་སྐྱ་པ་ཆེན་པོས་ཞུ་བ་པོ་སོ་སོའི་ངོར་བཅུ་གཅིག་ཙམ་མཛད་པ་ལས། ཐམས་ཅད་ཀྱི་རྗེས་མ་བྱང་ཆུབ་སེམས་དཔའ་གཉག་གིས་ཞུས་ནས་མཛད་པ་འདི་དང་། དེ་དག་གི་སྐབས་སུ་ཞལ་ལས་ཤེས་པར་བྱའོ་ཞེས་པ་དགུ་ལས་མེད་ཀྱང་། གསལ་བར་བྱེད་པའི་ཡི་གེ་ཉི་ཤུ་རྩ་གཉིས་ཏེ། ཀུན་གཞི་རྒྱུ་རྒྱུད། གདན་སོགས། ལུས་ཀྱི་དཀྱིལ་འཁོར། བུམ་དབང་གི་འདའ་ཁ་མའི་སྐབས་སུ་འཆི་ལྟས་འཁྲུལ་འཁོར་འཆི་བསླུ་དང་བཅས་པ། བུམ་དབང་གི་སྣང་བ་བསྒྱུར་བའི་འདའ་ཁ་མ། གསང་དབང་གི་ཐིག་ལེའི་རྣལ་འབྱོར་བཞི། ཤེས་རབ་ཡེ་ཤེས་ཀྱི་ཕྱག་རྒྱའི་མཚན་ཉིད། བཞི་པའི་འདའ་ཀ་མ་བུམ་དབང་དང་ཐུན་མོང་དུ་ཡི་གེས་སྒོ་བཀག་པ་དང་བཅས་པ། བར་དོ་བཞིའི་གདམས་ངག ལམ་དུས་ཀྱི་དབང་། ཚད་མ་བཞི། གདམས་ངག་དྲུག རྟེན་འབྲེལ་ལྔ། གྲིབ་སེལ་གྱི་སྦྱིན་སྲེག་བསྡུས་པ། གྲིབ་མ་ཁྲུས་དང་སཙྪཱས་སེལ་བ། ཐིག་ལེ་བསྲུང་བ། ཡི་གེ་བརྒྱ་པའི་འདོན་ཐབས། རླུང་གི་སྦྱོར་བ་བདུན། བྷ་གའི་ཡི་གེ་བཅུ་བཞི། འཁོར་ལོ་བཞིའི་རྒྱ། དབང་ཕྱུག་གི་དོན་བརྒྱད། ས་བཅུ་གསུམ་པའི་ཕྱེད་ཀྱི་མངོན་རྟོགས་རྣམས་སོ། །དེ་ཐམས་ཅད་ཀྱི་དོན་བསྡུས་པའི་ཚིགས་སུ་བཅད་པ་རྣམ་འགྲེལ་བཅུ་གཅིག་གི་ཐོག་མ་བྱང་ཆུབ་སེམས་དཔའ་ཨ་སེང་གིས་ཞུས་པ་སྟེ། བསྟན་བཅོས་ཚད་མ་ལ་ཡི་གེ་ཉི་ཤུ་རྩ་བཞིའོ། །བཞི་པ་ལུང་ཚད་མ་ལ། ལུང་འདི་ཉིད་དང་མདོར་བསྡུས་ཏེ་སྦྱར་བ་དང་། ལུང་མཐའ་དག་དང་མདོར་བསྡུས་ཏེ་སྦྱར་བ་གཉིས་ནི། འདིར་དངོས་སུ་བཞུགས་ལ། ལུང་འདི་ཉིད་དང་ཞིབ་ཏུ་སྦྱར་བ་ལོགས་སུ་ཤེས་པར་བྱ་བར་གསུངས་པ་དང་། ལུང་མཐའ་དག་དང་ཞིབ་ཏུ་སྦྱར་བ་བརྗོད་པར་ག་ལ་ནུས་པས་བཞག་པར་གསུངས་པ་དང་བཞིའོ། །དེ་ལྟར་ཚད་མ་བཞི་ལ་ཆོས་སྣ་ལྔ་བཅུ་ང་དགུ་དང་། བཞི་ཆར་ལ་ཕན་འདོགས་པ་མན་ངག་ཕྲ་མོའི་རྐང་གྲངས་གཞན་དུ་ཁ་འཕངས་པ་དང་དྲུག་ཅུའོ། །གཉིས་པ་མན་ངག་ཕྲ་མོའི་རྐང་གྲངས་ཚད་མ་བཞི་དང་སྦྱར་བ་ནི། རྗེ་བཙུན་གྱིས་མན་ངག་ཕྲ་མོའི་རྐང་གྲངས་གཞན་ཀྱང་བརྗོད་པར་ག་ལ་ནུས་པས་འདིར་བྲི་བར་མི་བྱའོ་ཞེས་གསུངས་པའི་དོན། རྗེ་བླ་མས་ཕྱོགས་གཅིག་ཏུ་བསྒྲིགས་པ་པོད་དམར་མ་ཞེས་གྲགས་པ་འདི་ཡི་ནང་ན་བཞུགས་པ་རྣམས་ཡིན་ལ། འདི་ལ་གསུམ་སྟེ། རིང་བརྒྱུད་ཚད་མ་བཞི་ལ་སྦྱར་བར་བྱ་བ། ཉེ་བརྒྱུད་རིམ་པ་གཉིས་ཀྱི་བྱུང་ཚུལ། དེ་དག་གི་ཁ་སྐོང་རྗེ་བླ་མ་ཡབ་སྲས་ཀྱིས་མཛད་པའི་ཚུལ་ལོ། །དང་པོ་ལ་བཞི་ལས། དང་པོ་བླ་མ་ཚད་མའི་སྐབས་སུ། བླ་མ་བརྒྱུད་པའི་གསོལ་འདེབས། དེའི་ཁ་བསྐོང་། ས་ཆེན་དང་བིརྺ་པ་མཇལ་བའི་ལོ་རྒྱུས། རྒ་ཐེང་ལ་བསྐུར་བ་རྣམས་སོ། །གཉིས་པ་མཉམ་མྱོང་ཚད་མ་ལ་གཞུང་ཇི་ལྟ་བ་བཞིན་དུ་བཀྲི་བའི་ཁྲིད་ཀྱི་གཞུང་ཤིང་ཚིགས་བཅད་མ་བྲ་སྟོན་གྱིས་ཞུས་པ། དེ་དག་གི་སྨིན་བྱེད་ཀྱི་སྟ་གོན་གྱི་སྐབས་སུ་སངས་རྒྱས་སྤྱན་གྱི་རྣལ་འབྱོར། དངོས་གཞིའི་སྐབས་སུ་ཨཥྚའི་བཟླས་ལུང་། དེ་དང་འབྲེལ་བ་ཨཥྚའི་བཞི་བཤད། དམ་ཚིག་གི་སྐབས་སུ་བདུད་རྩི་རིལ་བུ་སྒྲུབ་པའི་ཕྱག་ལེན་བདུད་རྩི་འབྱུང་བ། ལུས་དཀྱིལ་གྱི་སྔོན་འགྲོ་ལམ་དུས་ཀྱི་དབང་གིས་སྐབས་སུ་དབང་གི་རབ་དབྱེ། རྒ་སྟོན་ལ་གདམས་པ། གསང་དབང་གི་སྐབས་སུ་སྔོན་འགྲོ་ལ་ཕྱི་ནང་གསང་གསུམ་གྱི་མཎྜལ། ལུས་སྦྱོང་ཉི་ཤུ་པ་ལུས་གནད་ཀྱི་མན་ངག བདག་མེད་མའི་བྱིན་རླབས། དངོས་གཞི་ལ་གཏུམ་མོ་འཁོར་ལོ་བཞིའི་དམིགས་པ་རྒྱས་པ། གཏུམ་མོའི་དམིགས་པ་ཉི་ཤུ་རྩ་དགུ། གེགས་སེལ་ལ་བར་ཆད་གསུམ་སེལ། བླ་མ་ཆེན་པོའི་ཉམས་ཆུང་བ། བླ་མ་ཆེན་པོའི་ཉམས་ཆེན་མོ། ཁྱད་པར་གྱི་རླུང་རེངས་ལྔ་བཅོས་པ་སོགས། གེགས་སེལ་གསང་བདུན་མ། གླེང་གཞི་མ། འབྱུང་བ་ལུས་འཁྲུགས་སོགས་སེལ་བ། བཀའ་རྒྱ་མ། གེགས་སེལ་གྱི་ཡི་གེ་བཞི་ཡི་གསལ་བྱེད། ཕྲིན་ལས་སོ་གཉིས་ཀྱི་སྡོམ་ཚིག དེའི་ཞལ་ཤེས། དབང་བཞི་ཆར་གྱི་ལྟ་བ་ལ་ཕན་འདོགས་པ་དབང་བཞིའི་ངོ་སྤྲོད་རྩ་འགྲེལ། དེ་དག་ནི་ལམ་རྒྱས་པའི་སྐབས་སུ་ཕན་འདོགས་ལ། ལམ་བསྡུས་པ་ནི་སྒྲུབ་པ་ལུང་སྦྱིན་དང་། དེ་ཐམས་ཅད་ཀྱི་མཇུག་ཏུ། གསང་བ་བཅུས་རྒྱས་གདབ་པ་རྣམས་སོ། །བསྟན་བཅོས་ཚད་མའི་སྐབས་སུ་གནད་དུ་ཆེ་བ་དྲུག རྟེན་འབྲེལ་ལྔ། ལམ་བསྡུས་པ་འདོད་པའི་ལྕགས་ཀྱུ། ཕྱག་རྒྱ་ཆེན་པོའི་དབྱེ་བ། འཁོར་ལོ་བཞིའི་རྒྱ། ཚོགས་སྦྱོར་གྱི་མངོན་རྟོགས། ལམ་བསྡུས་པའི་བཤད་པ་རྣམས་སོ། །ལུང་ཚད་མའི་སྐབས་སུ་ལུང་འདི་ཉིད་དང་ཞིབ་ཏུ་སྦྱར་བ་ལོགས་སུ་ཤེས་པར་བྱ་བ་གསུངས་པ་ལ། ཡི་གེ་གཉིས་འདུག་པ་འདིར་བཞུགས་ན་ལེགས་སམ་སྙམ་མོ། །གཉིས་པ་ལ་རྣལ་འབྱོར་དབང་ཕྱུག་གིས་རྗེ་ས་ཆེན་ལ་གནང་བ་དང་། ས་ཆེན་གྱིས་རྗེ་བཙུན་ལ་མནལ་ལམ་དུ་གནང་བ་གཉིས་ལས། དང་པོ་ལ་ལམ་ཟབ་མོ་བླ་མའི་ཁྲིད་ཡིག བླ་མ་རིན་འབྱུང་གི་མན་ངག ལམ་སྦས་བཤད། ཕོ་བྲང་ལྔའི་སྦས་བཤད། ཕོ་བྲང་ལྔའི་སྦས་བཤད་ཀྱི་འཁྲུལ་འཁོར་སོ་གཉིས་རྩ་འགྲེལ། གྲུབ་ཆེན་བཅུ་དང་ཕྲ་མོ་བརྒྱད་རྩ་འགྲེལ། དེ་དག་གི་གསལ་བྱེད། བིར་སྲུང་གི་མན་ངག་རྙིང་པ་གསུམ། བིར་སྲུང་གི་བྱིན་རླབས་བྱེད་ཚུལ་དང་བཅས་པ། ཞར་ལ་ཟབ་ཆོས་བཞི་པ་རྣམ་འཇོམས་བིར་ལུགས་ཀྱི་བྱིན་རླབས་བྱེད་ཚུལ། གཟུངས་ཀྱི་མཆན། དེའི་གསལ་བྱེད། དེའི་ལག་ལེན་རྣམས་སོ། །གཉིས་པ་ནི། བརྡའ་དོན་གསལ་བ་རྩ་འགྲེལ། དེའི་གསལ་བྱེད་ལྷོ་པའི་ཟིན་བྲིས་རྣམས་སོ། །མན་ངག་ཟུར་པ་ལ་ཚར་གསུམ་ཁུག་པ། ཡིག་བརྒྱའི་གདམས་ངག སྒོ་དྲུག་ཆོས་འབྲེལ་རྣམས་ལས། དང་པོ་ནི། ལམ་ཟབ་མོ་བླ་མའི་རྣལ་འབྱོར་དང་། གཉིས་པ་ནི་གསང་དབང་གི་སྔོན་འགྲོར་ཕན་འདོགས་ལ། གསུམ་པ་ནི་འབྲོག་མིའི་ཟབ་ཆོས་ཡིན་པས་མི་འཐོར་བར་བྱ་བའི་ཕྱིར་འདིར་བཞུགས་པའོ། །གསུམ་པ་ལ་གཉིས་ལས་རྡོ་རྗེ་འཆང་ཀུན་དགའ་བཟང་པོའི་ཞལ་སྔ་ནས་མཛད་པ་ལ། ལམ་འབྲས་བཤད་ཐབས་ཀྱི་མན་ངག་གསང་བའི་སྒོ་འབྱེད། རྒྱུད་གསུམ་ལམ་རིམ་གྱི་ས་བཅད། ལམ་ཟབ་ནང་གི་བླ་མའི་རྣལ་འབྱོར། དབང་བཞིའི་རྟོགས་པ་བསྐྱེད་པ། བིར་སྲུང་གི་མན་ངག་བར་ཆད་ཀུན་སེལ། ཐུན་མོང་མ་ཡིན་པའི་བིར་སྲུང་གི་བྱིན་རླབས་བྱ་ཚུལ། ཐུན་མོང་མ་ཡིན་པའི་བིར་སྲུང་ཉམས་སུ་ལེན་ཚུལ། མན་ངག་འདི་དང་ལམ་འབྲས་བུ་དང་བཅས་པའི་གདམས་ངག་མཚོན་བྱ་མཚོན་བྱེད་དུ་སྦྱར་བ་དང་། བིར་སྲུང་གསར་མ། ཞར་ལ་རྣལ་འབྱོར་པ་རིན་ཆེན་རྡོ་རྗེས་མཛད་པའི་བིརྺ་པའི་སྐུའི་རྣམ་འགྱུར་དྲུག་གི་ཟིན་བྲིས་རྣམས་སོ། །རྗེ་སེམས་དཔའ་ཆེན་པོ་དཀོན་མཆོག་རྒྱལ་མཚན་གྱི་ཞལ་སྔ་ནས་མཛད་པ་ལ། ལམ་འབྲས་ཁྲིད་ཀྱི་ཟིན་བྲིས་ཆེ་ཆུང་གཉིས། རས་བྲིས་ལ་བརྟེན་པའི་དཀྱིལ་འཁོར་ཆོ་ག དེའི་ཁ་སྐོང་བའི་ཆོ་ག སྒྲུབ་ཐབས་ཡན་ལག་དྲུག་པ། ལམ་དུས་ཀྱི་དབང་ལེན་པའི་ཆོ་ག གཏོར་མའི་ཆོ་ག ལམ་ཟབ་མོ་བླ་མའི་རྣལ་འབྱོར་རྣམས་སོ། །གསུམ་པ་ཉམས་མྱོང་ཚད་མ་བསྐྱེད་པའི་ཆེད་དུ་ཁྲིད་ཀྱི་གཞུང་ཤིང་བྱེ་བྲག་ཏུ་བཤད་པ་ལ། གང་ལ་བསྟན་པར་བྱ་བའི་སློབ་མ་ནི། ལམ་སྣ་གཅིག་ཀྱང་རྒྱུད་ལ་མ་སྐྱེས་ཀྱང་། འགྲོ་བ་བཞིའི་ཆོས་ལས་མི་འདའ་བའི་དད་པ་དང་ལྡན་ཞིང་བླ་མས་ཅི་སྐད་གསུངས་པ་ཉན་པ་གཅིག་ལའོ། །གང་བསྟན་པར་བྱ་བའི་ཁྲིད་ནི་ལམ་འབྲས་བུ་དང་བཅས་པའི་གཞུང་ཤིང་རྒྱས་པའི་ཁྲིད་གཞུང་ཇི་ལྟ་བ་བཞིན་དུ་བཀྲི་བའོ། །ཇི་ལྟར་བསྟན་པའི་ཚུལ་ལ་ཕ་རོལ་ཏུ་ཕྱིན་པའི་ལམ་ཐམས་ཅད་སྣང་བ་གསུམ་དུ་འདུས་པས་སྣང་བ་གསུམ་གྱི་སྒོ་ནས་བཀྲི་བ་དང་། སྔགས་ཀྱི་གཞུང་ཐམས་ཅད་རྒྱུད་གསུམ་དུ་འདུས་པས་རྒྱུད་གསུམ་གྱི་སྒོ་ནས་བཀྲི་བ་གཉིས་ལས། དང་པོ་ལ། ཐོག་མར་བླ་མ་ཚད་མར་བྱ་བ་བླ་མ་བརྒྱུད་པའི་རྣམ་ཐར་ཉན་ནས་མོས་གུས་བསྒོམ། དེ་ནས་ཉམས་མྱོང་ཚད་མ་བསྐྱེད་པ་ལ་ཡང་ཐུན་རེ་རེ་ལ་ཡང་སྔོན་འགྲོ། དངོས་གཞི། རྗེས་གསུམ་གསུམ་གྱིས་ཉམས་སུ་ལེན་ནོ། །འདིར་ཁ་ཅིག་སྔོན་འགྲོའི་སྐབས་སུ་ཁྲིད་ཀྱི་སྔོན་འགྲོ་བསག་སྦྱང་གཉིས་དང་། ཐུན་གྱི་སྔོན་འགྲོ་བསམ་གཏན་གྱི་ཡན་ལག་དགུ་བྱེད་པ་ནི་མི་འཐད་དེ། རྗེ་བཙུན་ཆེན་པོའི་ཁྲིད་ཡིག་གཉིས་དང་། ས་པཎ་གྱི་དངོས་སློབ་ཞང་བྱ་རུ་བ་དང་། ཚོགས་སྒོམ་རིན་པོ་ཆེའི་དངོས་སློབ་ཀླན་དཀར་བ་སེང་གེ་རྒྱལ་མཚན་གྱི་ཁྲིད་ཡིག་སོགས་ཚད་ལྡན་གང་ནས་ཀྱང་མ་བཤད་པའི་ཕྱིར་རོ། །རིགས་པས་ཀྱང་གནོད་དེ། འཁོར་བའི་ཉེས་དམིགས་སོགས་ནི། སྔར་ལམ་ལ་མ་ཞུགས་པའི་ལས་དང་པོ་པས་བསྒོམ་པར་བྱ་བ་ཡིན་པས། དེ་ལ་སྔོན་དུ་ཡི་གེ་བརྒྱ་པ་དང་། བསམ་གཏན་གྱི་ཡན་ལག་དགུ་བསྟན་ན། སྟོན་མཁན་ལ་གསང་སྔགས་ཀྱི་སྡོམ་པ་ཡོད་ན་གསང་སྔགས་ཀྱི་རྩ་ལྟུང་འབྱུང་བའི་ཕྱིར་རོ། །གལ་ཏེ་དང་པོ་དབང་བསྐུར་ནས་དེའི་རྗེས་སུ་སྣང་བ་གསུམ་གྱི་ཁྲིད་སྟོན་པས་སྐྱོན་མེད་དོ་ཞེ་ན། དེ་ནི་ཤིན་ཏུ་ཡང་མི་རིགས་ཏེ་བྱ་བའི་རྒྱུད་ལས་ཀྱང་བྱང་ཆུབ་ཏུ་སེམས་མ་བསྐྱེད་པ་ལ་གསང་སྔགས་བསྟན་ན་ཕུང་བར་གསུངས་པའི་ཕྱིར་དང་། དབང་ཆུ་ཆེན་མོར་ཡང་ལམ་དུ་མ་ཞུགས་པ་ཚེ་འདིའི་ནད་གདོན་ཞི་བའམ། སྐྱེ་བ་ཕྱི་མར་ལྷ་མིའི་གོ་འཕང་ཙམ་དོན་དུ་གཉེར་བ་ལ། ཐུན་མོང་གི་ལམ་གྱིས་སྦྱང་བར་བྱས་ནས། ཕྱིས་དབང་བསྐུར་བར་ཁས་བླངས་པར་གསུངས་པའི་ཕྱིར་དང་། ཁྱད་པར་དུ་རྩ་རྒྱུད་ལས། སྤྱོད་པ་རིམ་པ་ཅན་དང་། ལྟ་བ་རིམ་པ་ཅན་ལ་བསླབ་པའི་རྗེས་སུ། དེ་རྗེས་ཀྱཻ་ཡི་རྡོ་རྗེ་སྟོན། །ཞེས་པའི་དོན། ལྗོན་ཤིང་ལས། སྨིན་བྱེད་ནས་བརྩམ་སྟེ་སྟོན་པར་གསུངས་པའི་ཕྱིར་དང་། རྗེ་བཙུན་གྱིས་ཁྲིད་ཡིག་གཉིས་སུའང་སྣང་བ་གསུམ་གྱི་རྗེས་སུ་དབང་བསྐུར་ནས། དེའི་རྗེས་སུ་དམ་ཚིག་དང་། བསྐྱེད་རིམ་ལམ་གྱི་ཡན་ལག་དང་བཅས་པའམ་ལྟ་བ་སྟོན་པར་གསུངས་ཀྱི་དབང་གི་རྗེས་སུ་སྣང་བ་གསུམ་གྱི་ཁྲིད་སྟོན་པ་ནི་བཀའ་སྲོལ་འདིའི་ལམ་གྱི་བབས་དང་དངོས་བསྟན་གང་ལ་ཡང་མེད་པའི་ཕྱིར་རོ། །འོ་ན་བརྡའ་དོན་གསལ་བར། ཐོག་མར་སྔོན་འགྲོ་འདི་དག་གསུངས་པ་མ་ཡིན་ནམ་སྙམ་ན། དེ་ནི་སྨིན་བྱེད་དང་། ཕྱི་བསྐྱེད་པའི་རིམ་པ་སྔོན་དུ་སོང་ནས། ཐོག་མར་ལྟ་བ་ནས་སྟོན་པའི་དབང་དུ་བྱས་པ་ཡིན་པས་དེ་འཁྲུལ་གཞི་མ་བྱེད་ཅིག འོ་ན་འདི་དང་། རྗེ་བཙུན་གྱི་ཁྲིད་ཡིག་གཉིས་སུ། རྫོགས་རིམ་གྱི་སྔོན་དུ་བསྟན་པར་གསུངས་པ་འགལ་ལོ་སྙམ་ན། བརྡའ་དོན་གསལ་བར་ནི་ལྟ་བ་ཡང་དབང་གོང་མའི་ཡེ་ཤེས་ཀྱི་རྒྱུན་བསྒོམ་པ་ཡིན་པས་དོན་གྱིས་རྫོགས་རིམ་དང་འདྲ་བ་ལ་དགོངས་ལ། ཁྲིད་ཡིག་གཉིས་སུ་ནི་ལུས་ལ་གནད་དུ་བསྣུན་པའི་སྔོན་འགྲོ་ལ་དགོངས་པས་གང་ལ་སྦྱར་ཡང་འགལ་བ་མེད་དོ། །དེས་ན་འདིར་སྔོན་འགྲོ་ནི་ཐུན་མོང་གི་སྐྱབས་འགྲོ་ཞེ་ཐག་པ་ནས་བྱས་ཏེ། མཇུག་ཏུ་བློ་ཆོས་སུ་འགྲོ་བར་བྱིན་གྱིས་རློབས། །ཆོས་ལམ་དུ་འགྲོ་བར་བྱིན་གྱིས་རློབས། །ལམ་འཁྲུལ་པ་སེལ་བར་བྱིན་གྱིས་རློབས། །འཁྲུལ་པ་ཡེ་ཤེས་སུ་འཆར་བར་བྱིན་གྱིས་རློབས། །མྱུར་དུ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ཐོབ་པར་བྱིན་གྱིས་རློབས་ཞེས་ཞེན་པ་བཞི་བྲལ་གྱི་གསོལ་བཏབ་བྱའོ། །ཡང་ཐེག་ཆེན་སེམས་བསྐྱེད་སྐྱེས་པའི་གང་ཟག་གིས་ཁྲིད་ཀྱི་ཁ་ཚང་བའི་ཆེད་དུ་བསྒོམ་པ་ཡིན་ན། ཐུན་མོང་མ་ཡིན་པའི་སྐྱབས་འགྲོ་དང་སེམས་བསྐྱེད་བྱེད་ཀྱི། ཐུན་མོང་བའི་སྐྱབས་འགྲོ་ལ་ཕབ་དགོས་པ་ལྟ་བུ་ནི་མ་ཡིན་ནོ། །དེ་ནས་དངོས་གཞིའི་དམིགས་པ་ལ་གསུམ་སྟེ། མ་དག་པའི་སྣང་བ། ཉམས་ཀྱི་སྣང་བ། དག་པའི་སྣང་བའོ། །དང་པོ་ནི་གཞུང་དུ། སེམས་ཅན་ལ་ཉོན་མོངས་པ་ལ་མ་དག་པའི་སྣང་བ་ཞེས་པའི་སེམས་ཅན་ལ་ཞེས་པ་ལ་བརྟེན་ནས་འཁོར་བའི་ཉེས་དམིགས་བསྒོམ་པ་འབྱུང་སྟེ། སེམས་ཅན་ནི་འགྲོ་བ་རིགས་དྲུག་གམ་སྐྱེ་གནས་བཞིས་བསྡུས་ལ། དེ་ལ་བརྟགས་པའི་ཚེ་སྡུག་བསྔལ་གྱི་རང་བཞིན་ཅན་དུ་མཐོང་བའི་ཕྱིར་རོ། །ཉོན་མོངས་པ་ལ་ཞེས་པའི་ཚིག་ལ་བརྟེན་ནས་དལ་འབྱོར་རྙེད་དཀའ་བསྒོམ་པ་འབྱུང་སྟེ། ཉོན་མོངས་པའི་དབང་གིས་བསགས་པའི་ལས་ཕལ་ཆེར་མི་དགེ་བ་ཡིན་པས་ངན་སོང་དུ་འཕེན། གལ་ཏེ་དགེ་བའི་ལས་ཞིག་བསགས་ན་ཡང་ཕལ་ཆེར་མི་ཁོམ་པའི་གནས་གཞན་ལྔ་འཕེན་པས་དེའི་ནང་ནས་དལ་འབྱོར་གྱི་ཆོས་བཅོ་བརྒྱད་དང་ལྡན་པའི་ལུས་འཕེན་པའི་ལས་ནི་སྲིད་ཚོད་ཙམ་དུ་ཤེས་པ་འབྱུང་བའི་ཕྱིར་རོ། །མ་དག་པའི་སྣང་བ་ཞེས་པ་ལ་བརྟེན་ནས་ལས་རྒྱུ་འབྲས་ལ་ཡིད་ཆེས་བསྒོམ་པ་འབྱུང་སྟེ། མ་དག་པའི་སྣང་བ་འདི་བག་ཆགས་ཀྱིས་བསླད་པའི་དབང་གིས་འབྱུང་བའི་འཁྲུལ་སྣང་དང་། དེ་ཡང་སྐྱིད་སྡུག་དང་མཐོ་དམན་སྣ་ཚོགས་སུ་སྣང་བ་ལ་དཔག་ནས་ལས་བཟང་ངན་ལས་བྱུང་བར་ཤེས་པ་འབྱུང་བའི་ཕྱིར་རོ། །དེ་ལྟར་གསུམ་ལས་དང་པོ་འཁོར་བའི་ཉེས་དམིགས་བསྒོམ་པ་ལ་ཡང་གསུམ་སྟེ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། འདུ་བྱེད་ཀྱི་སྡུག་བསྔལ་བསྒོམ་པའོ། །དང་པོ་ལ་ངན་སོང་གསུམ་གྱི་སྡུག་བསྔལ་གསུམ་སྟེ། སེམས་ཅན་དམྱལ་བའི་སྡུག་བསྔལ། ཡི་དྭགས་ཀྱི་སྡུག་བསྔལ། དུད་འགྲོའི་སྡུག་བསྔལ་ལོ། །དང་པོ་ལ་གསུམ་སྟེ། གྲང་བའི་དམྱལ་བ། ཚ་བའི་དམྱལ་བ། ཉི་ཚེ་བ་དང་ཉེ་འཁོར་བའི་དམྱལ་བའི་སྡུག་བསྔལ་བསམ་པའོ། །དང་པོ་ལ་བརྒྱད་དེ། ཆུ་བུར་ཅན་ནི་ལས་ཀྱི་དབང་གིས་གངས་རིའི་ཕྲེང་བས་ཀུན་ནས་བསྐོར་བའི་ནང་དུ་ཁ་བ་བུ་ཡུག་འཚུབས་པས་གྲང་བའི་སྟོབས་ཀྱིས་ལུས་ལ་ཆུ་བུར་འབྱུང་བའོ། །ཆུ་བུར་རྡོལ་བ་ཅན་ནི་དེ་ལས་ཀྱང་གྲང་བའི་སྟོབས་ཀྱིས་ཆུ་བུར་རྡོལ་ཏེ། རྣག་ཁྲག་གིས་ལུས་ཀྱི་ཕྱི་གཡོགས་ཤིང་འཁྱག་པ་ཆགས་པས་སྡུག་བསྔལ་བའོ། །ཨ་ཆུ་ཟེར་བ་ནི་དེ་ལས་ཀྱང་གྲང་བའི་རླུང་གིས་བཏབ་པས་ཨ་ཆུ་ཨ་ཆུ་ཞེས་ངུད་མོའི་སྒྲ་འདོན་པའོ། །ཀྱི་ཧུད་ཟེར་བ་ནི་སྐད་ཀྱང་ཆེར་མི་ཐོན་པས་ཀྱི་ཧུད་ཀྱི་ཧུད་ཅེས་འདོན་པའོ། །སོ་ཐམ་ཐམ་པ་ནི་སྐད་ཀྱང་གཏན་མི་ཐོན་པར་ལུས་འདར་ཤིག་ཤིག་བྱེད་པའོ། །ཨུཏྤལ་ལྟར་གས་པ་ནི་ལུས་ཀྱི་ཕྱིའི་ཁ་དོག་སྔོན་པོར་སོང་ནས་དེ་ཡང་ཚལ་པ་བརྒྱད་དང་བཅུ་དྲུག་ལ་སོགས་པར་གས་པའོ། །པདྨ་ལྟར་གས་པ་ནི་དེ་བས་ཀྱང་གྲང་བའི་སྟོབས་ཀྱིས་ལུས་ཀྱི་ཕྱིའི་ལྤགས་པ་གས་པའི་སྟོབས་ཀྱི་ཁྲག་དང་ཞག་ལ་སོགས་པའང་འཁྱགས་ཏེ། དམར་བའི་རང་བཞིན་དུ་གྱུར་ཏེ། དེ་ཡང་ཚལ་པ་བརྒྱད་དང་བཅུ་དྲུག་ལ་སོགས་པར་གས་པའོ། །པདྨ་ལྟར་ཆེར་གས་པ་ནི་ལུས་ཀྱི་ནང་གི་གློ་སྙིང་དང་བཅས་པ་ཡང་གས་ཏེ་དུམ་བུ་བརྒྱ་དང་སྟོང་ལ་སོགས་པར་གས་པའོ། །གཉིས་པ་ལའང་བརྒྱད་དེ། ཡང་སོས་པ་ནི་ལྕགས་ཀྱི་ས་གཞི་ཕྱོགས་ཀུན་ཏུ་མེ་འབར་བའི་ནང་དུ་སྐྱེས་ཏེ་ལག་ཏུ་གང་བླངས་པ་ཐམས་ཅད་ཚོན་ཆར་གྱུར། གང་མཐོང་བ་ཐམས་ཅད་ཕན་ཚུན་དགྲ་མི་ཤ་བོར་གྱུར་ཏེ། གཅིག་གིས་གཅིག་གི་ལུས་གཅོད་པའི་མཐུས་བརྒྱལ་བ་ལྟ་བུར་གནས་སོ། །ཡང་རླུང་གྲང་མོ་ཅུང་ཟད་ཅིག་གམ་ཡངཾ་ནམ་མཁའ་ལས་ཡང་སོས་པར་གྱུར་ཅིག་ཅེས་པའི་སྒྲ་བྱུང་བ་ལ་བརྟེན་ནས་ལུས་སྔར་བཞིན་དུ་གྱུར་ཏེ་སྔ་མ་ལྟར་མྱོང་བའོ། །ཐིག་ནག་པ་ནི་ལུས་ལ་ཐིག་ནག་པོ་བརྒྱད་དང་བཅུ་དྲུག་ལ་སོགས་པ་བཏབ་སྟེ། ལྕགས་ཀྱི་སཏྭ་གྲི་དང་། སོག་ལེ་སོགས་མཚོན་ཆ་མེ་འབར་བ་དག་གིས་དྲས་ཏེ། སྨད་དྲས་པའི་ཚེ་སྟོད་འགྲིག སྟོད་དྲས་པའི་ཚེ་སྨད་འགྲིག་པའོ། །བསྡུས་འཇོམས་པ་ནི་ལུས་ར་ལུག་དང་གཡག་ལ་སོགས་པའི་གདོང་པ་ཅན་གྱི་རི་གཉིས་ཀྱི་བར་དུ་བརྡུངས་པས་ཕྱེ་མར་བྱས། ཡང་ཕྱིར་གྱེད་བྱས་པས་སྔར་བཞིན་དུ་ལུས་སོས་ཏེ་ཡང་བརྡུངས་པའོ། །ངུ་འབོད་པ་ནི་དམྱལ་སྲུང་རྣམས་ཀྱིས་བདས་པས་ཁང་བཟང་དཀར་པོ་ཞིག་མཐོང་སྟེ་དེར་བྲོས་པས་ནང་དུ་སླེབ་ཙམ་ན་སྒོ་རང་བཅད་དེ་ལྕགས་བསྲེགས་ཀྱི་ཁང་པར་གྱུར་ནས་ངུ་བའི་སྒྲ་ལྷང་ལྷང་འབྱུང་བའོ། །ངུ་འབོད་ཆེན་པོ་བ་ནི་དེ་ལྟ་བུ་ཉིས་རིམ་དུ་ཚུད་དེ་སྒྲ་སྔ་མ་ལས་ཀྱང་ཆེར་འདོན་པའོ། །ཚ་བ་ནི་དེའི་སྟེང་དུ་དམྱལ་སྲུང་རྣམས་ཀྱིས་ལྕགས་ཀྱི་མདུང་མེ་འབར་བས་བཤང་ལམ་ནས་སྤྱི་བོའི་བར་དུ་ཐལ་བྱུང་དུ་ཕུག་པས་ལུས་ཀྱི་ནང་ཐམས་ཅད་བསྲེག་ཅིང་འཚེད་པར་བྱེད་པའོ། །རབ་ཏུ་ཚ་བ་ནི་ལྕགས་ཀྱི་རྩེ་གསུམ་མེ་རབ་ཏུ་འབར་བས་འཕོངས་ཚོས་གཉིས་བཤང་ལམ་དང་གསུམ་ནས་ཕུག་པས་ནང་ཁྲོལ་ཐམས་ཅད་གཞོབ་དུ་བྱས་ཏེ་ཁ་སྣ་ནས་དུ་བ་དང་མེ་འབྱུང་བའོ། །མནར་མེད་པ་ནི་སྲེག་བྱེད་ཀྱི་མེ་དང་བསྲེག་བྱའི་ལུས་ཐ་དད་མེད་པར་གྱུར་ཏེ། ཉམ་ཐག་པའི་སྒྲ་གྲག་པ་ལ་བརྟེན་ནས་རྟོགས་པར་བྱེད་པའོ། །གསུམ་པ་ལ་ཉི་ཚེ་བ་ནི་མི་ཡུལ་གྱི་བྲག་དང་སྒྱེད་པུ་ལ་སོགས་པའི་དཀྱིལ་དང་། རྒྱ་མཚོའི་འགྲམ་ལ་སོགས་པ་ནའང་ཡོད་པར་བཤད་ལ། ཉེ་འཁོར་བ་ནི་སྔར་གྱི་ཚ་དམྱལ་བརྒྱད་ཀྱི་ཁོར་ཡུག་ཀུན་དུ་མེ་མ་མུར་གྱི་འོབས་དང་། རོ་མྱགས་མི་གཙང་བའི་འདམ་དེར་གནས་པའི་ལྕགས་ཀྱི་འབུ་མཆུ་རྣོན་གྱིས་ལུས་འབིགས་པར་བྱེད་པ་དང་། སྤུ་གྲི་བརྡལ་བའི་ཐང་ལ་ཕྱིན་པས་རྐང་པ་དུམ་བུར་གཅོད་པ་དང་། ཤལ་མ་རིའི་སྡོང་པོ་ལྕགས་ཀྱི་ཚེར་མ་སོར་བཅུ་དྲུག་པ་ཡར་འཛེག་ན་མར་ཁ་བལྟས། མར་བབས་ན་ཡར་ཁ་བལྟས་ཏེ་ལུས་གཤགས་པ་དང་། རལ་གྲི་ལོ་མའི་ནགས་ཚལ་ཤིང་དེའི་གྲིབ་བསལ་ན་ཕྱིན་པ་ན་ཤིང་གི་ཡལ་ག་དང་ལོ་འདབ་ཐམས་ཅད་རལ་གྲིའི་ཆར་དུ་གྱུར་ནས་ལུས་གཅོད་པ་སྟེ། གསུམ་པོ་མཚོན་ཆར་རིགས་གཅིག་པས་གཅིག་ཏུ་བགྲང་བ་དང་། ཐལ་ཚན་གྱི་ཆུ་བོ་རབ་མེད་པ་སྟེ་བཞི་བཞིས་བསྐོར་བའོ། །དེ་ཡང་ཚ་དམྱལ་བརྒྱད་ཀྱི་དངོས་གཞིའི་སྡུག་བསྔལ་ལས་ཐར་ནས་ཕྱོགས་བཞི་པོ་རེ་རེ་བཞི་ཆར་གྱི་སྡུག་བསྔལ་མྱོང་དགོས་པས། བརྒྱད་པོ་ཀུན་ལ་ལྷག་བཅུ་དྲུག །ཅེས་གསུངས་སོ། །གཉིས་པ་ཡི་དྭགས་ཀྱི་སྡུག་བསྔལ་བསམ་པ་ལ་གསུམ་སྟེ། ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། ཟས་སྐོམ་མམ་སྒྲིབ་པ་ཅན་གྱི་སྒྲིབ་པ་ཅན་ནོ། །དང་པོ་ནི། བཀྲེས་པ་དང་། སྐོམ་པ་དང་། གྲང་བ་དང་། ཚ་བ་དང་། ངལ་བ་དང་། འཇིགས་པའི་སྡུག་བསྔལ་བསམ་པའོ། །གཉིས་པ་ནི། དང་པོར་ཟས་མ་རྙེད་ནས་སྡུག་བསྔལ། ཅུང་ཟད་རྙེད་ན་གཞན་གྱིས་ཕྲོགས་ཀྱི་དོགས་པའི་སྡུག་བསྔལ། ཟོས་པའི་ཚེ་ཁ་ཁབ་མིག་ཙམ་ནས་མི་ཐར། མགྲིན་པ་རྟ་རྔ་ཙམ་དུ་མི་ཤོང་། ལྟོ་བ་རྒྱ་མཚོ་ཙམ་དུ་སོང་ཡང་མི་ཁེངས་པའི་སྡུག་བསྔལ་ལོ། །གསུམ་པ་ནི་ལྟོ་བར་སླེབ་ཙམ་ན་ལྕགས་ཀྱི་ཐུ་ལུམ་མེ་འབར་བར་གྱུར་ཏེ། ལྟོ་བ་ཐམས་ཅད་བསྲེག་ཅིང་འཚེད་པར་བྱེད་པའོ། །གསུམ་པ་དུད་འགྲོའི་སྡུག་བསྔལ་ལ། བྱིངས་ན་གནས་པ་དང་། ཁ་འཐོར་བ་གཉིས། དང་པོ་ལ་རྒྱ་མཚོར་གནས་པ་དང་། གླིང་བར་གྱི་མུན་པ་ན་གནས་པ་གཉིས། དང་པོ་ནི། སྤྱིར་དུད་འགྲོ་རྣམས་ལ་གླེན་ཅིང་ལྐུགས་པའི་སྡུག་བསྔལ་རིས་ནོན་པ་ཙམ་གྱི་སྟེང་དུ། གནས་གཅིག་ཏུ་མ་ངེས་པའི་སྡུག་བསྔལ་དང་། ཉ་མིད་ལ་སོགས་པ་ཆེ་བས་ཆུང་བ་ཟ་བའི་སྡུག་བསྔལ་དང་། དུང་ལ་སོགས་པ་ཆུང་བས་ཆེ་བའི་ལུས་ཕུག་པའི་སྡུག་བསྔལ་དང་། འཚུབ་ཅིང་དྲི་ང་བའི་སྡུག་བསྔལ་ལ་སོགས་པའོ། །གཉིས་པ་ནི། གླིང་བཞི་རེ་རེ་ལ་ཉི་ཟླ་རེ་རེས་ཁྱབ་ཀྱང་། ཉི་ཟླས་མ་ཁྱབ་པའི་གླིང་བར་གྱི་གནས་སུ་སྐྱེས་ཏེ་རང་གི་ལག་པ་བརྐྱང་བསྐུམ་བྱེད་པ་ཙམ་ཡང་མི་མཐོང་བའོ། །གཉིས་པ་ཁ་འཐོར་བ་ནི། མི་ཡུལ་དང་། ལྷ་ཡུལ་ན་དབང་མེད་དུ་བཀོལ་སྤྱད་བྱེད་པ་དང་། མུ་ཏིག་དང་། ལྤགས་པ་དང་། ཤ་དང་། བལ་དང་། རུས་པ་ལ་སོགས་པའི་ཆེད་དུ་འཆི་བའི་སྡུག་བསྔལ་རྣམས་སོ། །དེ་ལྟར་དེ་དག་གི་ཚེ་ཚད་དང་། སྡུག་བསྔལ་གྱི་བྱེ་བྲག་དུ་མ་ཡིད་ཆེས་པའི་ལུང་དང་། བླ་མའི་མན་ངག་ལ་བརྟེན་ནས་བསྒོམ་སྟེ་དེར་མི་སྐྱེ་བའི་གདེང་མི་འདུག དེར་མི་སྐྱེ་བའི་ཆེད་དུ་ཆོས་ཅིག་བྱ། ཆོས་ཀྱི་ནང་ནས་ཀྱང་གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཉམས་སུ་བླང་བསམ་མོ། །གཉིས་པ་འགྱུར་བའི་སྡུག་བསྔལ་བསམ་པ་ལ་གཉིས་ཏེ། སྤྱིར་ཐུན་མོང་དུ་འགྱུར་བའི་སྡུག་བསྔལ་བསམ་པ་དང་། བྱེ་བྲག་ཏུ་མིའི་འགྱུར་བའི་སྡུག་བསྔལ་བསམ་པའོ། །དང་པོ་ནི། ལྷ་བརྒྱ་བྱིན་དུ་སྐྱེས་ཀྱང་མི་ཕན་ཏེ། སེམས་ཅན་དམྱལ་བར་སྐྱེ་བའི་སྐབས་ཀྱང་སྲིད། འཁོར་ལོས་སྒྱུར་བའི་རྒྱལ་པོར་སྐྱེས་ཀྱང་མི་ཕན་ཏེ་བྲན་དུ་ཡང་སྐྱེ། ཉི་མ་དང་ཟླ་བར་སྐྱེས་ཀྱང་མི་ཕན་ཏེ་མུན་པར་འཇུག དེ་ལ་སོགས་པ་གང་ཐོབ་ཀྱང་མི་ཕན་ཏེ་སླར་འགྱུར་བའི་སྡུག་བསྔལ་བསམ། གཉིས་པ་ནི། སྒོས་ཀྱི་མི་ལ་ལེགས་པར་བརྟགས་ཏེ་ཕྱུག་པོ་སྤྲང་པོར་སོང་བའམ། ཁ་དྲག་པོ་ཁ་ཞན་པར་སོང་བ་ལ་སོགས་པ་ཡུལ་མི་ཁྱིམ་ཚེས་དང་ཉེ་འབྲེལ་དང་། རྒྱལ་ཁམས་ཀྱི་མི་ལ་བལྟས་ན་སྔར་གྱི་ས་ན་མི་འདུག་སྟེ། འགྱུར་བའི་སྡུག་བསྔལ་ལ་ངེས་ཤེས་སྐྱེས་སྐྱེས་བསྒོམ་མོ། །གསུམ་པ་འདུ་བྱེད་ཀྱི་སྡུག་བསྔལ་བསམ་པ་ནི། སྤྱིར་འདུ་བྱེད་ཀྱི་སྡུག་བསྔལ་གྱི་ངོས་འཛིན། མངོན་པ་ལས། ཟག་བཅས་ཀྱི་ཚོར་བ་བཏང་སྙོམས་ལ་བཤད་པ་དང་། ཚད་མའི་གཞུང་ལས། སྲེད་པའི་རྐྱེན་གྱིས་འཕངས་པའི་ཉེར་ལེན་གྱི་ཕུང་པོ་ཙམ་ལ་བཤད་པ་སོགས་ཡོད་ཀྱང་དེ་སྡུག་བསྔལ་དུ་བསམ་པའི་ཚུལ་ནི་བྱས་པའི་ལས་ལ་ཟིན་པ་མེད་པ་རྒས་རྒས་ཤི་ཤི་བྱས་ཀྱང་གྲབས་ལ་ཟིན་པ་མེད། ཚེ་འཕོས་ཀྱང་དེ་བཞིན་དུ་བྱས་པའི་ལས་ལ་ཟིན་པ་མེད་པར་བསམ་པའོ། །དེ་དག་གིས་ནི་སེམས་ཅན་གྱི་འགྲོ་བ་གང་དུ་སྐྱེས་ཀྱང་སྐྱིད་མེད་པའི་བསམ་བློ་ཐག་ཆོད་ན་ཅི་བྱས་པ་ཆོས་སུ་འགྲོ་བ་ཡིན། ཆོས་ཀྱང་ཚེ་ཕྱི་མའམ་ཚེ་འདི་ལའང་ཚེ་མཇུག་ཏུ་བྱས་པས་ཆོག་གོ་སྙམ་ན། གཉིས་པ་དལ་འབྱོར་རྙེད་པར་དཀའ་བ་བསྒོམ་པ་ལ་གསུམ་སྟེ། དལ་འབྱོར་རྙེད་པར་དཀའ་བ་དང་། ཕན་འདོགས་པ་ཆེ་བ་དང་། ཐོབ་པའི་དལ་བ་ཡུན་རིང་དུ་མི་གནས་པའོ། །དང་པོ་རྙེད་པར་དཀའ་བ་བསམ་པ་ནི། ལུས་མ་ཐོབ་པའི་སེམས་ཅན་བསམ་གྱིས་མི་ཁྱབ་པ་དང་། ལུས་ཐོབ་པ་ལ་ཡང་རིགས་དྲུག་གཞན་གྱི་ལུས་བསམ་གྱིས་མི་ཁྱབ་པ་དང་། མིའི་ལུས་ལ་ཡང་དལ་འབྱོར་གྱི་ལུས་ཐོབ་པར་དཀའ་བ་བསམ་པའོ། །ཕན་འདོགས་པ་ཆེ་བ་ལ་ཡང་གསུམ། དལ་འབྱོར་གྱི་ལུས་འདིས་ཚེ་ཕྱི་མའི་མཐོ་རིས་ཀྱང་བསྒྲུབ་པར་ནུས་པ་དང་། ཐེག་པ་འོག་མའི་མྱ་ངན་ལས་འདས་པའང་བསྒྲུབ་པར་ནུས་པ་དང་། རྣམ་པ་ཐམས་ཅད་མཁྱེན་པའི་སངས་རྒྱས་ཀྱང་འདིས་བསྒྲུབ་པར་ནུས་པ་ཡིན་པས་ན་ཤིན་ཏུ་ཕན་འདོགས་པ་ཆེ་བར་བསམ་མོ། །ཐོབ་པའི་དལ་བ་ཡུན་རིང་དུ་མི་གནས་པ་ནི། ངེས་པར་འཆི་བ་བསམ་པ་དང་། ནམ་འཆི་ཆ་མེད་པར་བསམ་པ་དང་། འཆི་བ་ལ་གཞན་ཅིས་ཀྱང་མི་ཕན་པ་བསམ་པའོ། །དང་པོ་ལ་གསུམ། ཕྱི་ནང་གི་འབྱུང་བ་འཁྲུགས་པས་འཆི། ལོག་འདྲེན་གྱི་བགེགས་འཁྲུགས་པས་འཆི། ཕོ་ལྷ་ལ་སོགས་པ་གདོན་གཞན་འཁྲུགས་པས་འཆི་བའོ། །ནམ་འཆི་ཆ་མེད་པ་ལ་གསུམ། ཚེ་ལ་ངེས་པ་མེད་པ་དང་། མི་མཐུན་པའི་ཕྱོགས་ཀྱི་རྐྱེན་མང་བ། མཐུན་པའི་རྐྱེན་དཀོན་པའོ། །འཆི་བ་ལ་ཅིས་ཀྱང་མི་ཕན་པ་ལ་གསུམ། གློ་བུར་གྱི་རྐྱེན་མ་གཏོགས་པར་ངེས་པར་འཆི་བའི་དུས་ལ་བབ་པའི་ཚེ། རྫས་ཀྱིས་མི་བཟློག སྔགས་ཀྱིས་མི་བཟློག རྟེན་འབྲེལ་གྱིས་མི་བཟློག་པའོ། །གསུམ་པ་ལས་ཀྱི་སྣང་བ་ལས་རྒྱུ་འབྲས་ལ་ཡིད་ཆེས་བསྒོམ་པ་ལ་གསུམ། མི་དགེ་བའི་ལས་དང་། དགེ་བའི་ལས་དང་། ལུང་དུ་མ་བསྟན་པའི་ལས་སོ། །དང་པོ་ལ་གསུམ་སྟེ། མི་དགེ་བའི་ལས་བསམ། ལས་ཀྱི་འབྲས་བུ་བསམ། དེ་སྤོང་བ་བསམ་པའོ། །དང་པོ་ནི། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་པ་ལྟར། དུག་གསུམ་གྱིས་ཀུན་ནས་བསླངས་པའི་ལུས་ཀྱི་ལས་གསུམ། ངག་གི་ལས་བཞི། ཡིད་ཀྱི་ལས་གསུམ་སྟེ་མི་དགེ་བ་བཅུ་ལ་བསམ་མནོ་ཞིབ་ཏུ་བཏང་བའོ། །གཉིས་པ་ངན་སོང་གསུམ་དང་། མཐོ་རིས་ཀྱི་ཡང་མི་མཐུན་པའི་ཕྱོགས་ཐམས་ཅད་མི་དགེ་བ་བཅུ་ལས་བྱུང་ངེས་སྙམ་དུ་བསམ་པ་སྟེ། འདི་ལ་རྣམ་སྨིན་དང་། རྒྱུ་མཐུན་དང་། བདག་པོའི་འབྲས་བུ་གསུམ་ལས། དང་པོ་ནི། མི་དགེ་བ་བཅུ་ཆེན་པོར་སྤྱད་པ་ལས་དམྱལ་བ། འབྲིང་དུ་སྤྱད་པ་ལས་ཡི་དྭགས། ཆུང་ངུར་སྤྱད་པ་ལས་དུད་འགྲོའི་སྐྱེ་བ་འཕེན་ཏེ། རིན་ཆེན་ཕྲེང་བར། མི་དགེ་བ་ལས་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་དོ། །ཞེས་སོ། །གཉིས་པ་ལ་བྱེད་པ་རྒྱུ་མཐུན་ནི། གོམས་པའི་དབང་གིས་སྲོག་གཅོད་སོགས་དེ་དང་དེ་བྱེད་འདོད་པའོ། །མྱོང་བ་རྒྱུ་མཐུན་ནི། རྣམ་སྨིན་ངན་འགྲོར་མྱོང་བའི་རྗེས་སུ་མིར་སྐྱེས་པ་ནའང་། གསོད་པ་ཡིས་ནི་ཚེ་ཐུང་འགྱུར། །རྣམ་པར་འཚེ་བས་གནོད་པ་མང་། །རྐུ་བ་ཡིས་ནི་ལོངས་སྤྱོད་ཕོངས། །བྱི་བོ་བྱེད་པ་དགྲ་དང་བཅས། །རྫུན་དུ་སྨྲ་བས་སྐུར་པ་སྟེ། །ཕྲ་མ་ཡིས་ནི་བཤེས་དང་དབྱེ། །རྩུབ་པོ་ཉིད་ཀྱིས་མི་སྙན་ཐོས། །མ་འབྲེལ་པ་ཡི་ཚིག་མི་བཙུན། །བརྣབ་སེམས་ཡིད་ལ་རེ་བ་འཇོམས། །གནོད་སེམས་འཇིགས་པ་སྦྱིན་པར་བཤད། །ལོག་པར་ལྟ་བས་ལྟ་ངན་ཉིད། །ཆང་འཐུངས་པ་ཡིས་བློ་འཁྲུལ་སྟེ། །མ་བྱིན་པས་ནི་དབུལ་བ་ཉིད། །ལོག་པར་འཚོ་བས་བསླུ་བ་སྟེ། །ཁེངས་པ་ཡིས་ཀྱང་རིགས་ངན་ཉིད། །ཕྲག་དོག་གིས་ནི་གཟི་ཆུང་ཉིད། །ཁྲོ་བས་ཁ་དོག་ངན་པ་ཉིད། །མཁས་ལ་མི་འདྲི་བླུན་པོ་ཉིད། །མི་ཉིད་ལ་ནི་འབྲས་བུ་འདི། །ཀུན་གྱིས་ངན་འགྲོར་དང་པོའོ། །ཞེས་རིན་ཆེན་ཕྲེང་བར་གསུངས་པ་ལྟར་བསམ་པའོ། །གསུམ་པ་ནི། མདོའི་དོན་མཛོད་འགྲེལ་ལས་འབྱུང་བ། སྔ་མ་དག་གིས་སྡོམ་དུ་བསྡེབས་པ་ནི། ཕྱི་རོལ་མཐུ་ཆུང་གནོད་མང་དང་། །རྡུལ་འཁྲིགས་དྲི་ང་མཐོ་དམན་ཅན། །ཚ་སྒོ་ཅན་སོགས་དུས་ལོག་དང་། །འབྲས་བུ་ཕྲ་ཁ་ཆུང་བའམ་མེད། །ཅེས་པ་རྣམས་རིམ་པ་ལྟར་མི་དགེ་བ་བཅུའི་བདག་འབྲས་སུ་གསུངས་པ་ལྟ་བུའོ། །གསུམ་པ་དེ་སྤང་བར་བསམ་པ་ནི། མི་དགེ་བ་ལས་འབྲས་བུ་དེ་དག་འབྱུང་བས་ན་བདག་གིས་མི་བྱ་སྙམ་དུ་བསམ་པའོ། །གཉིས་པ་དགེ་བ་ལ་གསུམ་སྟེ། དགེ་བའི་ལས་བསམ། ལས་འབྲས་བསམ། དེ་བསྒྲུབ་པར་བསམ་པའོ། །དང་པོ་ནི། རིན་ཆེན་ཕྲེང་བར། མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དགེ་བ་ཡིན། །ཞེས་པ་ལྟར་དུག་གསུམ་མེད་པས་ཀུན་ནས་བསླངས་པའི་ལུས་ཀྱི་ལས་དགེ་བ་གསུམ། ངག་གི་ལས་བཞི། ཡིད་ཀྱི་ལས་གསུམ་སྟེ། དགེ་བ་བཅུ་དང་། ཕ་རོལ་ཏུ་ཕྱིན་པ་བཅུ་ལ་བསམ་བློ་ཞིབ་ཏུ་བཏང་བའོ། །གཉིས་པ་ལ་རྣམ་སྨིན་གྱི་འབྲས་བུ་ནི་དགེ་བ་བཅུ་ཆུང་ངུར་སྤྱད་པས་མི་དང་། འབྲིང་དུ་སྤྱད་པས་ལྷ་མ་ཡིན་དང་། ཆེན་པོར་སྤྱད་པས་ལྷའི་སྐྱེ་བ་འཕེན་ཏེ། རིན་ཆེན་ཕྲེང་བར། དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་དུ་བདེ་བ་དག །ཅེས་སོ། །ཆོས་བསྒྲུབ་པའི་རྟེན་གྱི་སྒོ་ནས་མི་བཟང་ཡང་། འདིར་ནི་རྣམ་སྨིན་གྱི་ཕུང་པོ་བཟང་ངན་གྱི་དབང་དུ་བྱས་པའོ། །རྒྱུ་མཐུན་གྱི་འབྲས་བུ་ལ། བྱེད་པ་རྒྱུ་མཐུན་ནི། གོམས་པའི་དབང་གིས་སྲོག་གཅོད་སོགས་རང་གི་ངང་གིས་སྤང་འདོད་པའོ། །མྱོང་བ་རྒྱུ་མཐུན་ནི། སྲོག་གཅོད་སྤངས་པས་ཚེ་རིང་བ་སོགས་སྔ་མ་ལས་བཟློག་པའོ། །བདག་པོའི་འབྲས་བུ་ནི། ས་ཕྱོགས་གཟི་ཆེ་བར་སྐྱེ་བ་སོགས་སྔ་མ་ལས་བཟློག་པ་སྟེ། རིན་ཆེན་ཕྲེང་བར། མི་དགེ་ཞེས་བྱ་དེ་དག་གི །རྣམ་སྨིན་བསྒྲགས་པ་གང་ཡིན་པ། །དགེ་བ་དག་ནི་ཐམས་ཅད་ལ། །འབྲས་བུ་དེ་ནི་བཟློག་དེ་འབྱུང་། །ཞེས་པ་རྒྱུ་མཐུན་དང་། བདག་འབྲས་ལ་ཡང་མཚོན་པའོ། །གསུམ་པ་དེ་བསྒྲུབ་པ་བསམ་པ་ནི། ཕན་ཡོན་དེ་ལྟ་བུ་ཡོད་པའི་ཕྱིར་བདག་གིས་དགེ་བ་ཅི་འགྲུབ་ཏུ་བྱ་སྙམ་དུ་བསམ་མོ། །གསུམ་པ་ལུང་དུ་མ་བསྟན་པའི་ལས་ལ་གསུམ་སྟེ། ལུང་དུ་མ་བསྟན་པའི་ལས་བསམ། ལས་འབྲས་བསམ། །དེ་དགེ་བར་བསྒྱུར་བ་བསམ་པའོ། །དང་པོ་ནི། དགེ་བ་དང་མི་དགེ་བའི་བསམ་པས་མ་ཟིན་པའི་ཟས་ཟ་བ་དང་། གོས་གོན་པ་དང་། གཉིད་ལོག་པ་ལ་སོགས་པ་རྣམས་ཡིན་ནོ། །གཉིས་པ་དེའི་ལས་འབྲས་བསམ་སྟེ། དེ་ལས་ནི་འབྲས་བུ་གང་ཡང་སྐྱེ་བར་མི་འགྱུར་རོ། །གསུམ་པ་དེ་དགེ་བར་ཁ་ལོ་བསྒྱུར་ཏེ། བྱང་ཆུབ་ཀྱི་སེམས་སྔོན་དུ་སོང་བར་བྱས་ན། ཟས་ཟོས་པ་དང་གཉིད་ལོག་པ་ལ་སོགས་པ་ཐམས་ཅད་དགེ་བར་ཁ་ལོ་བསྒྱུར་ནས་འགྲོ་བ་ཡིན་ཏེ། སྤྱོད་ཡུལ་ཡོངས་སུ་དག་པའི་མདོའི་ཉམས་ལེན་སྦྱར་གསུང་ངོ་། །འདིར་འཁོར་བའི་ཉེས་དམིགས་ནས་འགོ་འཛིན་པ་ནི་གསུང་ངག་རིན་པོ་ཆེ་བསྟན་པ་ཡོངས་སུ་རྫོགས་པར་ཉམས་སུ་ལེན་པ་ཡིན་པས། དང་པོ་ཉིད་ནས་འཁོར་བ་མཐའ་དག་ལ་ངེས་འབྱུང་གི་བློ་བསྐྱེད། དེས་དལ་འབྱོར་རྙེད་དཀའ་སོགས་རང་ཤུགས་ཀྱིས་འདྲེན་པའི་དབང་དུ་བྱས་པ་ཡིན་ལ། དམ་པ་གཞན་དག་དལ་འབྱོར་རྙེད་དཀའ་ནས་འགོ་འཛིན་པ་ནི། སྐྱེས་བུ་གསུམ་གྱི་ལམ་རིམ་ལ་རིམ་གྱིས་འཇུག་པའི་དབང་དུ་བྱས་པ་ཡིན་གསུང་ངོ་། །དེ་ལྟར་དངོས་གཞིའི་དམིགས་པ་བསྒོམ་པའི་ཐུན་མཇུག་ཏུ། དགེ་བ་འདི་ཡིས་སྐྱེ་བོ་ཀུན། །ཞེས་སོགས་ཀྱི་བསྔོ་བ་བྱ་ཞིང་། སྤྱོད་ལམ་ཀུན་ཏུ། སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པ་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་པའི་ཚིག་ངག་ཏུ་ཡང་འདོན་ཅིང་། དོན་ཅི་ནུས་སུ་ཉམས་སུ་ལེན་པར་བྱའོ། །གཉིས་པ་ཉམས་ཀྱི་སྣང་བ་ནི། གཞུང་ལས། རྣལ་འབྱོར་པ་ལ་ཏིང་ངེ་འཛིན་ལ་ཉམས་ཀྱི་སྣང་བ་ཅེས་གསུངས་ཏེ། འདི་ལ་ཐུན་མོང་གི་རྣལ་འབྱོར་པས་ཐུན་མོང་གི་ཉམས་རྒྱུད་ལ་སྐྱེས་སྐྱེས་སུ་བསྒོམ་པ་དང་། ཐུན་མོང་མ་ཡིན་པའི་རྣལ་འབྱོར་པས་སྐྱེ་བར་འགྱུར་བའི་ཉམས་ལ་ངེས་ཤེས་སྐྱེས་སྐྱེས་སུ་བསྒོམ་པ་གཉིས་ལས། དང་པོ་ལ་རྣལ་འབྱོར་པ་ནི་ཕ་རོལ་ཏུ་ཕྱིན་པའི་ཐེག་པ་ཉམས་སུ་ལེན་པའི་གང་ཟག་གོ །ཏིང་ངེ་འཛིན་ནི་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པའི་བློའོ། །ཉམས་ཀྱི་སྣང་བ་ནི་དེ་དག་གི་ཉམས་མྱོང་ཚུལ་བཞིན་དུ་རྒྱུད་ལ་སྐྱེས་ཏེ། བདག་གཞན་མཉམ་པའམ་བདག་པས་གཞན་གཅེས་པར་སྣང་བའོ། །འདི་ལ་གསུམ་སྟེ། བྱམས་པ་བསྒོམ་པ། སྙིང་རྗེ་བསྒོམ་པ། བྱང་ཆུབ་ཀྱི་སེམས་བསྒོམ་པའོ། །དང་པོ་ལ་གསུམ། ཉེ་བ་ལ་བྱམས་པ་བསྒོམ་པ། དགྲ་ལ་བྱམས་པ་བསྒོམ་པ། དེ་ཐམས་ཅད་ལ་བསྲེ་བའོ། །དང་པོ་ནི་མ་ལ་བྱམས་པ་བསྒོམ་པ། དེ་དང་གཉེན་བསྲེ། དེ་དང་ཐ་མལ་པ་གཞན་བསྲེ་བའོ། །དེ་དག་གི་བསྒོམ་ཚུལ་ཀྱང་། མ་འདི་དྲིན་ཆེ་བས་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་སྙམ་དུ་བསམ། གཉིས་པ་དེ་བཞིན་དུ་གཉེན་རྣམས་ཀྱིས་ཀྱང་མ་མ་བྱས་པ་མེད་དོ། །གསུམ་པ་དགྲ་དང་ཐ་མལ་པ་རྣམས་ཀྱིས་ཀྱང་མ་མ་བྱས་པ་མེད་པས་སེམས་ཅན་ཐམས་ཅད་བདག་གི་མ་ཡིན་ནོ་སྙམ་དུ་བསམ། སྙིང་རྗེ་བསྒོམ་པ་ལ་གསུམ། ཡུལ་སེམས་ཅན་སྡུག་བསྔལ་གྱིས་ཉེན་པ་རྣམས་ལ། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་སྙམ་པའི་སེམས་ཅན་ལ་དམིགས་པའི་སྙིང་རྗེ་དང་། སྡུག་བསྔལ་གྱི་རྒྱུའང་མ་རིག་པ་ལས་བྱུང་བ་ཡིན་པས་མ་རིག་པ་དང་བྲལ་བར་འདོད་པ་ཆོས་ལ་དམིགས་པའི་སྙིང་རྗེ་དང་། སེམས་ཅན་ཐམས་ཅད་ངོ་བོ་ཉིད་ཀྱིས་ཡང་དག་པར་མ་གྲུབ་པ་ཡིན་ཡང་སེམས་ཅན་འཛིན་པ་དང་བཅས་པ་ལ་དེ་དང་བྲལ་བར་འདོད་པའི་དམིགས་པ་མེད་པའི་སྙིང་རྗེ་བསྒོམ་པར་བྱའོ། །བྱང་ཆུབ་ཀྱི་སེམས་བསྒོམ་པ་ལ་ཡང་གསུམ། སྨོན་པའི་བདག་ཉིད་དང་། འཇུག་པའི་བདག་ཉིད་ཅན་དང་། དོན་དམ་པའི་བྱང་ཆུབ་ཀྱི་སེམས་སོ། །དང་པོ་ལ་གསུམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པ་དང་། སེམས་ཅན་ཐམས་ཅད་ཐེག་པ་གསུམ་གྱི་སྒོ་ནས་མྱ་ངན་ལས་འདས་པའི་ས་ལ་བཞག་སྙམ་པ་དང་། རིགས་ཅན་གསུམ་ཀའང་རིམ་གྱིས་སྦྱངས་ལ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་ས་ལ་བཞག་སྙམ་དུ་བསམ་པའོ། །འཇུག་པ་བྱང་ཆུབ་ཀྱི་སེམས་ལའང་གསུམ། བདག་གཞན་མཉམ་པ་བསྒོམ་པ་དང་། བདག་གཞན་བརྗེ་བ་བསྒོམ་པ་དང་། དེ་དག་གི་སྤྱོད་པ་ལ་བསླབ་པའོ། །དང་པོ་བདག་སྡུག་བསྔལ་སྤང་བར་འདོད་པ་བཞིན་སེམས་ཅན་གཞན་གྱི་སྡུག་བསྔལ་ཡང་སྤངས། བདག་བདེ་བ་བསྒྲུབ་པ་བཞིན་སེམས་ཅན་ཐམས་ཅད་ཀྱང་བདེ་བ་ལ་འགོད་སྙམ་པ་ལ་སོགས་པ་བསམ་མོ། །བརྗེ་བ་བསྒོམ་པ་ནི། སེམས་ཅན་གྱི་ལས་ངན་པ་དང་མི་དགེ་བ་ཐམས་ཅད་བདག་ལ་སྨིན་པར་གྱུར་ཅིག བདག་གི་ལུས་དང་ལོངས་སྤྱོད་དང་དགེ་བ་སེམས་ཅན་ཐམས་ཅད་ལ་འབུལ་བས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བདེ་བར་གྱུར་ཅིག་སྙམ་དུ་བསམ། གསུམ་པ་ནི། དེས་ན་ལུས་དང་ལོངས་སྤྱོད་དང་དགེ་བ་ཐམས་ཅད་སེམས་ཅན་ལ་འབུལ་བར་བསམ་ཞིང་ཅི་འགྲུབ་པའི་ཚུལ་གྱིས་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་བསླབ་པར་བྱའོ། །གསུམ་པ་དོན་དམ་བྱང་ཆུབ་ཀྱི་སེམས་བསྒོམ་པ་ནི། རྗེ་བཙུན་གྱིས་འདིར་ས་བཅད་ཙམ་ལས་མ་གསུངས་ཞིང་། བྲ་སྟོན་ཞུས་ལན་དུ། དོན་དམ་བྱང་ཆུབ་སེམས་ཀྱང་བསྒོམ་པར་བྱ། །ཞེས་པ་ཙམ་ལས་བསྒོམ་ཚུལ་གསལ་བར་མ་གསུངས་པ་ལ་ཁ་ཅིག་ལྟ་བ་འཁོར་འདས་དབྱེར་མེད་དུ་འཆད་པར་འགྱུར་བ་ལ་དགོངས་པ་ཡིན་ནོ་ཞེས་ཟེར་བ་ནི་མི་འཐད་དེ། འཁོར་འདས་དབྱེར་མེད་ནི་རྡོ་རྗེ་ཐེག་པའི་ཐུན་མོང་མ་ཡིན་པའི་དབང་གི་ཡེ་ཤེས་དང་སྦྱར་ནས་ཉམས་སུ་ལེན་རྒྱུ་ཡིན་པས་འདིར་ནི་ཐུན་མོང་གི་རྣལ་འབྱོར་པས་རྒྱུད་ལ་སྐྱེས་སྐྱེས་བསྒོམ་དགོས་པའི་རྣལ་འབྱོར་དུ་གསུངས་པའི་ཕྱིར་རོ། །ཡང་བླ་མ་དག་གི་ཁྲིད་ཡིག་ཏུ། བདག་གཞན་བརྗེ་བའི་ཡུལ་སེམས་ཅན་དང་། བརྗེ་བྱ་བདེ་སྡུག་རྣམས་སེམས་སྣང་ཙམ་ལས་བདེན་པར་གྲུབ་པ་མེད་དོ་སྙམ་དུ་བསྒོམ་པ་ལ་དོན་དམ་བྱང་ཆུབ་ཀྱི་སེམས་བསྒོམ་པར་གསུངས་མོད། དེ་ནི་བདག་གཞན་བརྗེ་བའི་བྱང་སེམས་ལ་འཁོར་གསུམ་རྣམ་དག་གིས་རྒྱས་བཏབ་ནས་བསྒོམ་པར་སོང་གི དོན་དམ་བྱང་ཆུབ་ཀྱི་སེམས་བསྒོམ་པར་མ་སོང་བ་ཡིན་ནོ། །འདིར་ཆོས་རྗེ་ཉན་ཆེན་པས་མཛད་པར་གྲགས་པའི་ཁྲིད་ཡིག་དང་། གླན་དཀར་བ་སེང་གེ་རྒྱལ་མཚན་གྱིས་མཛད་པའི་ཁྲིད་ཡིག་ཏུ། བྱང་ཆུབ་སེམས་འགྲེལ་དུ། སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་པ། །རྟག་ཏུ་སྟོང་ཉིད་མཚན་ཉིད་ཅན། །ཞེས་གསུངས་པའི་དོན་བསྒོམ་པར་གསུངས་པས་དེ་ལྟར་དུ་འཆད་པ་ལ་གསུམ་སྟེ། དོན་དམ་བྱང་ཆུབ་སེམས་ཀྱི་མཚན་ཉིད། དེ་རྟོགས་པར་བྱེད་པའི་ཐབས། དེ་རྒྱུད་ལ་བསྐྱེད་པའོ། །དང་པོ་ནི། ཕྱི་རོལ་པས་བརྟགས་པའི་བདག་དང་ཉན་ཐོས་པས་བརྟགས་པའི་ཕུང་སོགས་དང་། སེམས་ཙམ་པས་བརྟགས་པའི་རྣམ་རིག་གི་རྟོགས་པ་རྣམས་ཀྱིས་མ་བསྒྲིབས་པ་སྟེ། དེ་དག་གང་གིའང་ངོ་བོར་མ་གྲུབ་པ། རྟག་ཏུ་མཐའ་བཞིའི་སྤྲོས་པས་སྟོང་པའི་སྟོང་ཉིད་ཀྱི་མཚན་ཉིད་ཅན་ནོ། །གཉིས་པ་ནི། ཡང་དག་གནས་པ་ལ་བརྟེན་ནས། །སེམས་ལ་སེམས་ནི་འཇོག་ཕྱིར་དང་། །ཆོས་རབ་རྣམ་པར་འབྱེད་པའི་ཕྱིར། །ཞི་གནས་དང་ནི་ལྷག་མཐོང་ཡིན། །ཞེས་པ་ལྟར་ཞི་གནས་དང་ལྷག་མཐོང་གཉིས་སོ། །གསུམ་པ་ལ་ཞི་གནས་རྒྱུད་ལ་བསྐྱེད་པ་དང་། ལྷག་མཐོང་རྒྱུད་ལ་བསྐྱེད་པ་གཉིས་ལས། དང་པོ་ལ་ཡང་གསུམ་སྟེ། དང་པོར་བསྒྲིམས། བར་དུ་ལྷོད། ཐ་མར་རེས་འཇོག་ཏུ་བསྒོམ་པའོ། །དང་པོ་ལུས་ཀྱི་གནད་རྐང་པ་རྡོ་རྗེའི་སྐྱིལ་ཀྲུང་ལ་སོགས་པ་རྣམ་སྣང་གི་ཆོས་དྲུག་དང་ལྡན་པར་བྱ། དམིགས་རྟེན་གྱི་གནད་མེ་ཏོག་སྔོན་པོ་ལ་སོགས་པའི་དམིགས་རྟེན་མཛེས་པ་ཞིག་མིག་གི་ཐད་དུ་ཉེ་རིང་རན་པར་བཞག་སྟེ་རླུང་ལ་སོགས་པས་མི་གཡོ་བར་བྱའོ། །སྒོམ་ཚུལ་གྱི་གནད་ལུས་མི་འགུལ། མིག་རྫི་མ་མི་འཁྲབ་པར་དམིགས་རྟེན་དེའི་རྣམ་པ་གསལ་ཞིང་ཡུལ་གཞན་ལ་རྟོག་པ་མི་འཕྲོ་བར་བྱེད་པའོ། །དེའི་ཚུལ་ནི་མདོ་ལས། སེམས་འཇོག་པར་བྱེད། ཀུན་ཏུ་འཇོག་པར་བྱེད། ངེས་པར་འཇོག་པར་བྱེད། ཉེ་བར་འཇོག་པར་བྱེད། འདུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད། མཉམ་པར་འཇོག་པར་བྱེད། ཅེས་པ་སྟེ། སེམས་གནས་པའི་ཐབས་དགུ་གསུངས་པའི་དང་པོ་ནི། སྔར་གྱི་དམིགས་རྟེན་ལ་སེམས་གཏོད་པའི་ཚུལ་དེ་ཉིད་དོ། །གཉིས་པ་ནི། དམིགས་པ་དེ་ཉིད་ལས་གཞན་དུ་མི་གཡེང་བར་ཡུན་རིང་དུ་འཇོག་པའོ། །གསུམ་པ་ནི། རྣམ་གཡེང་བྱུང་ན་དེ་མྱུར་དུ་རྟོགས་པར་བྱས་ནས་སྔར་གྱི་དམིགས་པ་དེ་ལ་སླར་བླན་པར་བྱ་བའོ། །བཞི་པ་ནི། སེམས་ཕྱི་རོལ་དུ་མི་འཕྲོ་བར་བྱ་བའི་ཕྱིར། དྲན་པས་སེམས་ཡང་ནས་ཡང་དུ་ནང་དུ་སྡུད་པར་བྱེད་པའོ། །ལྔ་པ་ནི། ཏིང་ངེ་འཛིན་གྱི་ཡོན་ཏན་མཐོང་བ་ལ་བརྟེན་ནས་གཟུགས་སྒྲ་སོགས་ལ་སེམས་འཕྲོར་མི་སྟེར་བའོ། །དྲུག་པ་ནི་རྣལ་འབྱོར་པའི་སེམས་རྣམ་པར་གཡེང་བ་དེའི་ཚེ་སེམས་འཁྲུགས་པར་བྱེད་པའི་རྒྱུ་ཉོན་མོངས་པ་དང་རྣམ་རྟོག་ལ་ཉེས་པར་བལྟས་ཏེ། གཉེན་པོས་ཞི་བར་བྱེད་པའོ། །བདུན་པ་ནི། བརྗེད་ནས་བསམ་གཏན་གྱི་མི་མཐུན་ཕྱོགས་བརྣབ་སེམས་དང་ཡིད་མི་བདེ་བ་སོགས་སྐྱེས་ན་དང་དུ་མི་ལེན་པར་ཞི་བར་བྱེད་པའོ། །བརྒྱད་པ་ནི། འབད་རྩོལ་དང་བཅས་པས་བྱིང་རྒོད་ཀྱི་མཚན་མ་མེད་ཅིང་ཏིང་ངེ་འཛིན་བར་མ་ཆད་པར་རྒྱུན་དུ་བསྒོམ་པའོ། །དགུ་པ་ནི། དེ་ལྟར་ཤིན་ཏུ་གོམས་པས་འབད་རྩོལ་མེད་པར་རང་གི་ངང་གིས་ཏིང་ངེ་འཛིན་གྱི་རྒྱུན་གཡེང་བ་མེད་པར་འབྱུང་བ་སྟེ། འདི་ནི་ཤིན་ཏུ་སྦྱངས་པའི་བདེ་བ་མ་སྐྱེས་ཀྱི་བར་དུ་འདོད་སེམས་རྩེ་གཅིག་པ་ཡིན་ལ། དེ་སྐྱེས་ནས་བསམ་གཏན་གྱི་སས་བསྡུས་ཀྱི་ཞི་གནས་མཚན་ཉིད་པའོ། །གཉིས་པ་ནི་དེ་ལྟར་ལེགས་པར་གོམས་པས་དམིགས་རྟེན་ལ་མ་དམིགས་ཀྱང་དེའི་རྣམ་པ་བློ་ལ་གསལ་བ་དེའི་ཚེ་དེའི་ངང་དུ་ཀློད་ནས་འཇོག་པའོ། །གསུམ་པ་ནི་དེ་ལྟར་བཞག་པས་ཅུང་ཟད་འཕྲོ་ན་སླར་ཡང་དམིགས་རྟེན་ལ་གཏད་ཅིང་བསྒོམ། ཡང་ཀློད་ཅིང་བསྒོམ་པའོ། །དེ་ལྟར་བསྒོམས་པས་གང་བློ་ཡུལ་དུ་བྱས་པ་དེ་ནི་ཤིན་ཏུ་གསལ་ལ་རྣམ་རྟོག་གཞན་དུ་མི་འཕྲོ་བ་ཇི་ཙམ་འདོད་ཀྱི་བར་དུ་གནས་པ་དེའི་ཚེ་ལྷག་མཐོང་བསྒོམ་པར་བྱའོ། །འདིར་ཁ་ཅིག་དམིགས་རྟེན་ཡང་མི་གསལ་བར་རྟོག་པ་གཞན་ལ་མི་འཕྲོ་བ་ཙམ་ལ་བསྒོམ་ཡང་དག་ཏུ་འདོད་པ་ནི་བསྒོམ་སྐྱོན་ངོས་མ་ཟིན་པ་ཡིན་ཞིང་། ཁ་ཅིག་མེ་ཏོག་ལ་སོགས་པའི་དམིགས་རྟེན་ལ་དམིགས་ནས་བསྒོམ་པ་ནི། ཧར་བསྒོམ་དུ་སོང་ཞིང་ལོ་ཙཱ་བ་ཆེན་པོ་ཡེ་ཤེས་སྡེས་བཀག་གོ་ཞེས་དང་། བསྒོམ་ཡིད་ཤེས་ཀྱི་སྟེང་དུ་བསྒོམ་རྒྱུ་ཡིན་པ་ལ་མིག་ཤེས་ཀྱི་སྟེང་དུ་བསྒྲུབ་པ་དོན་མེད་དོ་ཞེས་སྨྲ་བ་ནི། སྡོམ་འབྱུང་དང་། རྟོགས་བདུན་སོགས་སུ་སྒྲུབ་པ་པོའི་བསྐྱེད་རིམ་གྱི་དམིགས་པ་གསལ་བའི་ཆེད་དུ་ལྷ་སྐུ་བཞེངས་ཚུལ་དང་། རས་བྲིས་ཀྱི་ལྷ་ཞལ་མང་ཕྱག་མང་འབྲི་ཚུལ་གསུངས་པ་སུན་འབྱིན་པ་ཡིན་ཅིང་། གསུང་རབ་ཡིད་ཤེས་ཀྱི་སྟེང་དུ་ཤེས་རྒྱུ་ཡིན་པ་ལ་ཉན་ཤེས་ཀྱི་སྟེང་དུ་བསྒྲུབ་པ་དོན་མེད་དོ་ཞེས་ཉན་བཤད་ཐམས་ཅད་ཀྱང་འགོག་པར་བྱེད་པའི་ཚིག་གོ །གཉིས་པ་ལྷག་མཐོང་རྒྱུད་ལ་བསྐྱེད་པ་ལ་གསུམ་སྟེ། གསལ་བ་ངོས་བཟུང་། མཐའ་བྲལ་ལ་བློ་སྦྱོང་། བརྗོད་བྲལ་ལ་ངེས་ཤེས་བསྐྱེད་པའོ། །དང་པོ་ནི། སྣོད་བཅུད་ཀྱི་སྣང་བ་ཐམས་ཅད་སེམས་ཀྱིས་བྱས་ལ། བྱེད་པ་པོའི་སེམས་ཀྱང་གསལ་རིག་ཙམ་མོ་སྙམ་དུ་ངེས་པར་བྱས་ལ་དེའི་སྟེང་དུ་བློ་བཞག་གོ །གཉིས་པ་ནི། གསལ་རིག་ཙམ་དེ་ཡང་ཡང་དག་པར་ན་མཐའ་དབུས། རྟག་ཆད། སྐྱེ་འཇིག་ཐམས་ཅད་དང་བྲལ་བ་ནམ་མཁའ་ལྟ་བུར་ཤེས་པར་བྱས་ལ་དེའི་ངང་ལ་བློ་བཞག་གོ །གསུམ་པ་ནི། དེ་ལྟར་གསལ་བ་བཙལ་བས་མ་རྙེད་པ་དང་། འཚོལ་མཁན་གྱི་གསལ་ཙམ་ཉིད་མེ་དང་མེའི་ཚ་བ་ལྟར་དབྱེར་མེད་པར་ངེས་པར་བྱས་ལ་དེའི་སྟེང་དུ་བློ་བཞག་གོ །འདི་དག་ནི་ལམ་འབྲས་ལམ་སྐོར་དང་བཅས་པ་ནས་འབྱུང་ཚོད་ཙམ་མདོར་བསྡུས་ཏེ་གསུངས་པ་བཀོད་པ་ཡིན་ལ་རྒྱས་པར་དབུ་མའི་བསྟན་བཅོས་ལ་སྦྱངས་ནས་ཁོང་དུ་ཆུད་པར་བྱའོ། །གཉིས་པ་ཐུན་མོང་མ་ཡིན་པའི་རྣལ་འབྱོར་པས་སྐྱེ་བར་འགྱུར་བའི་ཉམས་ལ་ངེས་ཤེས་སྐྱེས་སྐྱེས་སུ་བསྒོམ་པ་ནི། ང་རྡོ་རྗེ་ཐེག་པའི་ལམ་ཟབ་མོ་ལ་ཞུགས་ནས་ཉམས་ཀྱི་སྣང་བ་བསམ་གྱིས་མི་ཁྱབ་པ་ཅིག་སྐྱེ་བར་འགྱུར་ཏེ། དེ་རྣམས་ཀྱི་མཐུན་པའི་ཕྱོགས་ལ་དགའ་བ་སྐྱེ་རྒྱུའང་མེད། མི་མཐུན་པའི་ཕྱོགས་དུ་མ་བྱུང་ཡང་མི་དགའ་བ་སྐྱེ་རྒྱུའང་མེད་དེ། རང་གི་རྩ་དང་རྩ་ཡི་གེ་དང་ཁམས་བདུད་རྩི་སྙིང་པོ་ཡེ་ཤེས་རླུང་གི་རྟེན་འབྲེལ་གྱིས་དབང་བྱས་པ་ལ་བརྟེན་ནས་ཉམས་སྣ་ཚོགས་འབྱུང་བའི་ཕྱིར་རོ། །དེ་ལྟར་ཉམས་བསམ་གྱིས་མི་ཁྱབ་པའང་བསྡུ་ན་བཅོ་ལྔར་འདུས་ཏེ་ལམ་གསུམ་དང་། དྲོད་གསུམ་དང་། རྟེན་འབྲེལ་གསུམ་དང་། ཉམས་གསུམ་དང་། ཏིང་ངེ་འཛིན་གསུམ་དུ་འདུའོ། །བཅོ་ལྔ་པོའང་ཏིང་ངེ་འཛིན་འབའ་ཞིག་ཏུ་འདུ་བ་ཡིན་ནོ་ཞེས་ཉམས་མ་སྐྱེས་པའི་གོང་ནས་ཉམས་ལ་སྤྲོས་པ་མཆོད་པར་བྱས་ལ། ལན་ཅིག་ཉམས་ནམ་སྐྱེས་པའི་ཚེ་འདི་ནི་ལུས་ཉམས་སོ། །འདི་ནི་སེམས་ཉམས་སོ། །ཞེས་བྱ་བ་ལ་སོགས་པ་ངོ་ཤེས་པར་བྱས་ལ་བྱུང་རྒྱལ་གྱིས་བསྐྱང་བར་བྱའོ། །གསུམ་པ་དག་པའི་སྣང་བ་བསྒོམ་པ་ནི། བདེ་བར་གཤེགས་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་དག་པའི་སྣང་བ་ཞེས་གསུངས་ཏེ། དག་པའི་སྣང་བ་འཆར་བའི་རྟེན་ནི་བདེ་བར་གཤེགས་པ་སྟེ། དེའི་སྐུ་མི་ཟད་པ་ནི་སྐུའི་གསང་བ་བསམ་གྱིས་མི་ཁྱབ་པ་དང་། སྐུ་ཐམས་ཅད་པའོ། །གསུང་མི་ཟད་པ་ནི། གསུང་གི་གསང་བ་བསམ་གྱིས་མི་ཁྱབ་པ་དང་། གསུང་ཐམས་ཅད་པའོ། །ཐུགས་མི་ཟད་པ་ནི། ཐུགས་ཀྱི་གསང་བ་བསམ་གྱིས་མི་ཁྱབ་པ་དང་། ཐུགས་ཐམས་ཅད་པའོ། །དེ་ལ་གསང་བ་བསམ་གྱིས་མི་ཁྱབ་པའི་དོན་ནི། དེ་དག་གི་མཐའ་སུས་ཀྱང་རྟོགས་པར་མི་ནུས་པ་ཡིན་ལ། ཐམས་ཅད་པ་ནི་སྐུ་གང་ལ་གང་འདུལ་སྟོན་པ་དང་། གསུང་རིགས་དྲུག་སོ་སོའི་སྐད་དུ་ཆོས་སྟོན་པ། ཐུགས་ཤེས་བྱ་ཇི་ལྟ་བ་དང་ཇི་སྙེད་པ་ཡེ་ཤེས་སྐད་ཅིག་མ་གཅིག་གིས་མཁྱེན་པའོ། །རྒྱན་ནི་རང་གཞན་གཉིས་ཀ་ལ་མཛེས་པས་ན་རྒྱན། འཁོར་ལོ་ནི་མཛད་པ་ཕྲིན་ལས་ཀྱི་འཁོར་ལོ་སྟེ་དོན་བྱེད་པ་དང་། བྱས་པ་གཉིས་ཀས་ཀྱང་འཁོར་བ་མ་སྟོང་གི་བར་དུ་སེམས་ཅན་གྱི་དོན་མཛད་པ་རྒྱུན་མི་ཆད་པར་བྱེད་པའོ། །དག་པའི་སྣང་བ་ནི་མདོར་ན་རང་གི་ཡེ་ཤེས་ཡོངས་སུ་དག་པ་ཉིད་ལས་མ་གཏོགས་པ་འཁོར་འདས་ཀྱི་སྣང་བ་ཐ་དད་མེད་པ་སྟེ། དེ་ལ་སོགས་པ་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་བསྒོམ་སྟེ་ནམ་ཞིག་ན་འདི་ལྟ་བུ་ཐོབ་པར་འགྱུར་སྙམ་དུ་སྤྲོ་བ་ཁྱད་པར་ཅན་བསྒོམ་པའོ། །སྣང་བ་གསུམ་གྱི་སྒོ་ནས་དཀྲི་བ་བསྟན་ཟིན་ཏོ། །གཉིས་པ་རྒྱུད་གསུམ་གྱི་སྒོ་ནས་དཀྲི་བ་ནི། ཞུས་ལན་གསལ་བར། དེ་ཙམ་གྱིས་ནི་བློ་གྲོས་མ་འགེངས་པའི། །བློ་ཆེན་སྦྱངས་པ་ཟབ་མོ་དག་ལ་མོས། །རྡོ་རྗེ་འཆང་ཆེན་མྱུར་དུ་ཐོབ་འདོད་ན། །དེ་ལ་སྔགས་ཀྱི་ཐེག་པ་སྦྱིན་པར་བྱ། །ཞེས་གསུངས་ཏེ། འདི་ལ་གང་ལ་སྦྱིན་པའི་སྣོད། གང་སྦྱིན་པའི་ལམ། ཅི་ལྟར་སྦྱིན་པའི་ཚུལ་གསུམ་ལས། དང་པོ་ནི། སྔར་གྱི་ཕ་རོལ་དུ་ཕྱིན་པའི་ལམ་དེ་ཙམ་གྱི་བློ་གྲོས་མ་འགེངས་པ་སྟེ་མ་ཚིམ་ཞིང་། དབང་པོ་རྣོན་པོའི་ངོར་བྱས་ཏེ་ཞེས་གསུངས་པ་ལྟར་བློ་ཆེན་ཏེ་ཉེ་ལམ་གྱི་སྣོད་དུ་གྱུར་པས་དབང་པོ་རྣོ་བ་དང་། ཕ་རོལ་ཏུ་ཕྱིན་པའི་ཐེག་པ་ལ་ལྟོས་ནས་སྦྱངས་པ་ཟབ་མོ་རྡོ་རྗེ་ཐེག་པ་ལ་མོས་པ་དང་། སྙིང་རྗེ་ཆེན་པོ་གཡོས་པའི་སྟོབས་ཀྱིས་སེམས་ཅན་གྱི་དོན་དུ་རྡོ་རྗེ་འཆང་གི་གོ་འཕང་མྱུར་དུ་ཐོབ་པར་འདོད་པ་དེ་ལའོ། །གཉིས་པ་ནི། སྔགས་ཀྱི་ཐེག་པ་ཞེས་ཏེ་སྔགས་ཀྱི་སྐད་དོད་མནྟྲ་ཞེས་པའི་མ་ནོ་ཡིད་དང་། ཏ་ར་སྐྱོབ་པ་སྟེ་ཡིད་མཚན་རྟོག་ལས་སྐྱོབ་པའོ། །དེ་ཡང་རྒྱུད་གསུམ་ཀ་ལ་འཇུག་སྟེ། རྒྱུ་རྒྱུད་རང་བཞིན་གྱིས་མཚན་རྟོག་ལས་སྐྱོབ། ཐབས་རྒྱུད་གློ་བུར་གྱི་མཚན་རྟོག་སྤོང་བར་བྱེད། འབྲས་རྒྱུད་གློ་བུར་གྱི་མཚན་རྟོག་ལས་ཀྱང་གྲོལ་བའི་ཕྱིར་ཏེ། རྒྱལ་པོ་ཞེས་པ་རྒྱུད་གསུམ་ཀ་ལ་སྒྲ་བཤད་པ་བཞིན་ནོ། །ཐེག་པ་ནི་རྒྱུད་གསུམ་པོ་དེ་ཉིད་ལམ་དུ་བྱས་ཏེ་འདིས་འདོང་བས་ན་རྒྱུའི་ཐེག་པ་དང་། འདིར་འདོང་བས་ན་འབྲས་བུའི་ཐེག་པ་གཉིས་ལ་འཇུག་གོ །གསུམ་པ་ལ་གསུམ་སྟེ། རྒྱུ་ཆོས་ཅན་འཁོར་བའི་གནས་ཚུལ། ལམ་བསྒོམ་པའི་ཚུལ། འབྲས་བུ་སངས་རྒྱས་ཀྱི་སའོ། །དང་པོ་ནི་འདིར་མི་འཆད་དེ། མ་དག་པའི་སྣང་བའི་སྐབས་སུ་བསྟན་ཟིན་ཏོ་ཞེས་གསུངས་ལ་དེའི་དོན་ནི་སྤྱིར་རྒྱུ་རྒྱུད་རྒྱུད་འདིར་འཇུག་ཏུ་རུང་བའི་རྟེན་གྱི་གང་ཟག་ཙམ་ལ་བཤད་པའི་དབང་དུ་བྱས་ན་སློབ་དཔོན་གརྦྷ་རི་པས། རྒྱུ་རིགས་སྤང་བྱ་རྐྱེན་ལ་ལྟོས། །གང་ཟག་རྣམ་པ་བཞིར་ནི་འདོད། །ཅེས་པའི་དོན་མངོན་རྟོགས་ལྗོན་ཤིང་ལས་གསུངས་པ་ལྟར། རྒྱུ་ལ་ལྟོས་པ་སེམས་ཅན་ཐམས་ཅད་ལ་སངས་རྒྱས་ཀྱི་རིགས་ཡོད་པ་དང་། རིགས་དང་སྤང་བྱ་ལ་ལྟོས་པ་བྱེ་བྲག་ཏུ་འགྲུབ་ཉེ་བ་ལ་དགོངས་ནས་ཁ་དོག་དང་དབྱིབས་ཀྱི་སྒོ་ནས་དང་། སྤང་བྱ་ཉོན་མོངས་པ་གང་ཤས་ཆེ་བའི་སྒོ་ནས་དེ་བཞིན་གཤེགས་པ་རིགས་ལྔ་སོ་སོའི་རིགས་སུ་ངེས་པ་དང་། རྐྱེན་ལ་ལྟོས་པ་སྐལ་དམན་རིམ་འཇུག་པ་དང་། སྐལ་ལྡན་ཅིག་ཆར་བ་སྟེ། རིགས་དྲུག་གི་སེམས་ཅན་ཐམས་ཅད་ཀྱང་རྒྱུད་འདིར་དངོས་སམ་བརྒྱུད་པའི་སྒོ་ནས་འཇུག་ཏུ་རུང་ཞེས་པ་ལ་བཤད་པར་བྱ་བ་ཡིན་ཀྱང་འདིར་ནི་རྒྱུ་རྒྱུད་ཀྱི་གནས་ཚུལ་དམིགས་པར་དྲིལ་ནས་བསྒོམ་པའི་སྐབས་ཡིན་ལ། དེ་ནི་སྔར་མ་དག་པའི་སྣང་བ་བསྒོམ་པ་ལས་གཞན་མེད་ཅེས་པའི་དོན་ཏོ། །གཉིས་པ་ལ་གསུམ་སྟེ། གཞི་དམ་ཚིག་ལ་གནས་པར་བྱ་བ་དང་། གང་ཟག་བཀྲི་བའི་ཚུལ་གང་ཡིན་པ་དང་། ངེས་ཤེས་ཁྱད་པར་ཅན་བསྐྱེད་ལ་ཏིང་ངེ་འཛིན་ངོ་ཤེས་པར་བྱ་ཞིང་ལམ་གྱི་ས་མཚམས་རྣམ་པར་གཞག་པའོ། །དང་པོ་ནི། ལམ་ཐམས་ཅད་ཀྱི་རྩ་བ་ཡིན་ཞིང་། གང་ཟག་འབྲིང་གི་ལམ་གྱི་གཙོ་བོ་ཡིན་པས་དམ་ཚིག་ཉི་ཤུ་བསྐྱང་བར་བྱ་སྟེ། དབང་དང་དམ་ཚིག་ལ་གནས་པ་ནི་ལམ་ཐམས་ཅད་ཀྱི་གཞི་ཡིན་ནོ། །དེ་ལ་གནས་པས་གང་ཟག་ཐམས་ཅད་དཀྲིར་རུང་ངོ་ཞེས་གསུངས་སྟེ་འདིའི་དོན་ལ་དམ་ཚིག་མ་ཐོབ་པ་ཐོབ་པར་བྱེད་པ་དབང་གི་ཆོ་ག་དང་། ཐོབ་པ་མི་ཉམས་པར་བསྲུང་བ་དམ་ཚིག་གི་ཚོགས་བསྐྱང་བ་གཉིས་ལས། དང་པོ་ལ། དབང་གི་སྔོན་དུ་འགྲོ་བའི་སེམས་བསྐྱེད་དང་། དབང་གི་ཆོ་ག་དངོས་གཉིས། དང་པོ་ནི། ཕ་རོལ་ཏུ་ཕྱིན་པའི་ལུགས་ཀྱི་དབུ་མ་ལུགས་དང་། སེམས་ཙམ་ལུགས་ཀྱི་ཆོ་གའི་སྲོལ་གཉིས་དང་། རྡོ་རྗེ་ཐེག་པའི་ལུགས་ཀྱི་བརྒྱུད་པ་གཉིས་ལས་འོངས་པའི་མཎྜལ་ཚོམ་བུ་ལྔ་པ་ལ་བརྟེན་པའི་སེམས་བསྐྱེད་ཀྱི་ཆོ་ག་དང་། ཤིན་ཏུ་བསྡུས་པ་མངོན་རྟོགས་ལྗོན་ཤིང་ནས་བཤད་པའི་དབང་གི་སྔོན་འགྲོའི་སེམས་བསྐྱེད་ལྟ་བུ་གང་གིས་ཀྱང་རུང་སྟེ། འདིར་སྨོན་འཇུག་གིས་བསྡུས་པའི་ཀུན་རྫོབ་སེམས་བསྐྱེད་ཀྱི་སྡོམ་པ་ཐོབ་པ་གཙོ་བོ་ཡིན་པའི་ཕྱིར་རོ། །འོན་ཀྱང་བརྒྱུད་པ་རང་ལུགས་ཀྱི་ཆོ་ག་སྦྱར་ན་མཎྜལ་ཚོམ་བུ་ལྔ་པ་ལ་བརྟེན་པའི་སེམས་བསྐྱེད་ཀྱི་ཆོ་གའི་ནང་གི་རྣལ་འབྱོར་དབང་ཕྱུག་ནས་བརྒྱུད་པའི་ཆོ་ག་དེ་ཉིད་སྦྱར་བར་བྱ་བ་ཡིན་ནོ། །སེམས་ཙམ་ལུགས་ཀྱི་སེམས་བསྐྱེད་ཀྱི་ཆོ་ག་སྐབས་འདིར་མི་རུང་ངོ་སྙམ་ན་དེ་མ་ཡིན་ཏེ། རྗེ་བཙུན་གྱིས་དབང་གི་སྔོན་འགྲོའི་སེམས་བསྐྱེད་དང་། སྟ་གོན་དང་འཇུག་པའི་སྐབས་སུ་ཐོབ་པའི་སེམས་བསྐྱེད་ཀྱི་བསླབ་བྱ་ཐམས་ཅད་བདེ་གཤེགས་བཀའ་འདས་ཀྱི་སྐབས་ཀྱི་བྱང་སེམས་དང་ཐུན་མོང་བའི་ཕམ་འདྲ་བཞི་བསྲུང་བ་ལ་བཤད་ཅིང་། བརྒྱུད་པ་གཉིས་ལྡན་གྱི་སེམས་བསྐྱེད་ཀྱི་ཆོ་གའི་སྐབས་སུ་ཡང་རྩ་བའི་ལྟུང་བ་བཞི་པོ་དེ་ཉིད་ལ་བཤད་པའི་ཕྱིར་རོ། །འོ་ན་དབུ་མ་ལུགས་ཀྱི་ཆོ་གས་ཐོབ་པའི་ཚེ་ན་ཡང་རྩ་བའི་ལྟུང་བ་བཞི་པོ་དེ་ཉིད་དུ་འདུས་པར་འགྱུར་རོ་སྙམ་ན། དེ་དག་ཏུ་འདུས་པའི་ཚུལ་ཡང་རྗེ་བཙུན་གྱིས་གསུངས་ཏེ་འདིར་མ་སྤྲོས་སོ། །དེ་ལྟར་ན། ལྟུང་བ་དང་ནི་ཕྱིར་བཅོས་དང་། །བསླབ་པར་བྱ་བའང་སོ་སོར་ཡོད། །ཅེས་པ་དང་འགལ་ལོ་སྙམ་ན། དེ་ནི་རྩ་བའི་ལྟུང་བའི་རྣམ་གྲངས་འཇོག་ཚུལ་བཞིར་འཇོག་པ་དང་། བཅུ་བཞིར་འཇོག་པའི་ཚུལ་ཐ་དད་དུ་ཡོད་ཅེས་པའི་དོན་ཡིན་གྱི་ངོ་བོ་ཐ་དད་པ་བཞེད་པ་ནི་མ་ཡིན་ཏེ། དཔེར་ན་དགེ་བསྙེན་གྱི་བསླབ་གཞི་ལྔ་དང་། མི་དགེ་བ་བཅུ་སྤོང་བཞིན་ནོ། །མདོར་ན་རྗེ་ས་པཎ་གྱིས་སེམས་བསྐྱེད་ཀྱི་ཆོ་ག་ཆེན་མོར་སེམས་ཙམ་པའི་གཞུང་ནས་བཤད་པའི་སྤྱོད་པ་དང་། དབུ་མའི་གཞུང་ནས་བཤད་པའི་ལྟ་བ་གཉིས་སྦྱར་བ་ནི་ལྟ་སྤྱོད་མ་ནོར་བ་ཡིན་པར་མཁས་པ་རྣམས་བཞེད་པར་གསུངས་པའི་དོན་གོ་ན་གནད་འདི་དག་རང་གྲོལ་དུ་འགྲོའོ། །གཉིས་པ་ལ་གཉིས་ཏེ། དབང་རིམ་གྱིས་པ་དང་། དབང་ཅིག་ཆར་བའོ། །དང་པོ་ལ་ཡང་ཐོག་མར་རྡོ་རྗེ་སློབ་མའི་དབང་ཙམ་བསྐུར་ནས་དྲན་པ་གཅིག་པའི་མངོན་རྟོགས་དང་། དེ་ལ་བརྟེན་ནས་དངོས་གྲུབ་ཕྲན་ཚེགས་སྒྲུབ་པའི་ཐབས་དང་། དམ་ཚིག་དང་སྡོམ་པའི་སྐོར་ལ་སློབ་ཏུ་འཇུག འོས་སུ་གྱུར་པ་ན་བུམ་དབང་གི་རྡོ་རྗེ་སློབ་དཔོན་གྱི་དབང་རྫོགས་པར་བསྐུར་ཏེ་དཀྱིལ་འཁོར་གྱི་འཁོར་ལོ་ཡོངས་རྫོགས་ཀྱི་བསྐྱེད་པའི་རིམ་པ་ལམ་གྱི་ཡན་ལག་དང་བཅས་པ་བསྟན་ནས་བཞི་འབུམ་ལ་སོགས་པའི་བསྙེན་པ་དང་། དེའི་བཅུ་ཆའི་སྦྱིན་སྲེག་བསྒྲུབ། འོས་སུ་གྱུར་པ་ན་དབང་གོང་མ་གསུམ་བསྐུར་ནས་ལྟ་བ་འཁོར་འདས་དབྱེར་མེད་མན་ཆད་ཀྱི་ལམ་བསྟན་པ་སྟེ་རིམ་པ་གསུམ་དུ་བྱས་པ་དང་། ཡང་དང་པོར་བུམ་དབང་རྫོགས་པར་བསྐུར་ནས་ལམ་སྔ་མ་ལྟར་བསྟན། དེ་ནས་མཆོག་དབང་གསུམ་བསྐུར་ནས་ལམ་སྔ་མ་ལྟར་བསྟན་པ་སྟེ་རིམ་པ་གཉིས་སུ་བྱས་པ་གཉིས་སུ་ཡོད་དོ། །གཉིས་པ་ནི། ནུབ་གཅིག་ལ་དབང་བཞི་རྫོགས་པར་བསྐུར་ནས་དམ་ཚིག་དང་སྡོམ་པའི་ཆོས་སྐོར་དང་། ལྟ་བ་འཁོར་འདས་དབྱེར་མེད་ནས་བརྩམས་ཏེ་ལམ་བསྒོམ་པའོ། །གང་ལྟར་ཡང་དབང་གི་ཆུ་བོ་ཆེན་མོ་དང་། མཆོག་དབང་གསུམ་གྲོལ་ལམ་ལ་བརྟེན་ནས་བསྐུར་བའི་མན་ངག་དང་། དབང་གི་ཆུ་བོ་མ་ནུབ་པར་བསྐུར་བའི་མན་ངག་གི་གནད་གསུམ་ལ་བརྟེན་ནས་ཡབ་ལ་བརྟེན་ནས་ལམ་བསྒོམ་ན། ཡབ་ཀྱི་རྡུལ་ཚོན་གྱི་དཀྱིལ་འཁོར་དུ་དབང་བསྐུར། ཡུམ་ལ་བརྟེན་ནས་ལམ་བསྒོམ་ན་ཡུམ་གྱི་རྡུལ་ཚོན་གྱི་དཀྱིལ་འཁོར་དུ་སྔར་གྱི་ཡིག་ཆ་གསུམ་པོ་དེའི་སྟེང་དུ་ཡུམ་གྱི་ཐུན་མོང་མ་ཡིན་པའི་ཁྱད་པར་རྣམས་ཕྱེད་པར་བྱས་ནས་དབང་བསྐུར་བ་ཡིན་ནོ། །གཉིས་པ་ཐོབ་པ་མི་ཉམས་པར་བསྲུང་བ་དམ་ཚིག་གི་ཚོགས་བསྐྱང་བ་ལ་གཉིས་ཏེ། དབང་བཞིའི་དམ་ཚིག་སྤྱིར་བསྟན་པ་དང་། བུམ་དབང་གི་དམ་ཚིག་བྱེ་བྲག་ཏུ་བཤད་པའོ། །དང་པོ་ལ་བཞི་སྟེ། དམ་ཚིག་ཉི་ཤུ་ངོས་བཟུང་། མི་ཉམས་པར་བསྐྱང་བའི་ཚུལ། ཉམས་པའི་རབ་ཏུ་དབྱེ་བ། ཉམས་ན་ཉམས་ཆག་བསྐང་བའི་ཚུལ་ལོ། །དང་པོ་ནི། དབང་བཞི་པོ་རེ་རེ་ལ་མཉམ་བཞག་གི། རྗེས་སྤྱོད་ཀྱི། བཟའ་བའི། བསྲུང་བའི། མི་འབྲལ་བའི་དམ་ཚིག་ལྔ་ལྔ་ཡོད་པ་ལས། བུམ་དབང་གི་མཉམ་བཞག་གི་དམ་ཚིག་བསྐྱེད་རིམ། རྗེས་སྤྱོད་ཀྱི་དམ་ཚིག་ངོ་བོ་ཉིད་གསུམ། བཟའ་བའི་དམ་ཚིག་ཤ་ལྔ་དང་བདུད་རྩི་ལྔའི་རིལ་བུ། བསྲུང་བའི་དམ་ཚིག་རྩ་བ་དང་ཡན་ལག་གི་ལྟུང་བ། མི་འབྲལ་བའི་དམ་ཚིག་རྡོ་རྗེ་དྲིལ་བུའོ། །གསང་དབང་གི་མཉམ་བཞག་གི་དམ་ཚིག་རྩ་རླུང་། རྗེས་སྤྱོད་རང་བྱུང་གི་ཡེ་ཤེས། བཟའ་བ་སྟོང་གསལ། བསྲུང་བ་རླུང་དང་རང་བྱུང་དང་འགལ་བ་མཐའ་དག མི་འབྲལ་བ་རླུང་ཞི་དྲག་གང་རུང་ངོ་། །ཤེས་རབ་ཡེ་ཤེས་ཀྱི་དབང་གི་མཉམ་གཞག་གི་དམ་ཚིག་དཀྱིལ་འཁོར་འཁོར་ལོ། རྗེས་སྤྱོད་ལྷན་སྐྱེས། བཟའ་བ་བདེ་བ། བསྲུང་བ་ཐིག་ལེ་འཛག་པ་དྲུག མི་འབྲལ་བ་དངོས་སམ་ཡེ་ཤེས་ཀྱི་ཕྱག་རྒྱའོ། །དབང་བཞི་པོའི་མཉམ་བཞག་གི་དམ་ཚིག་རྦ་རླབས་གསུམ། རྗེས་སྤྱོད་ཤིན་ཏུ་རྣམ་པར་དག་པའི་དེ་ཁོ་ན་ཉིད། བཟའ་བ་བདེ་ཆེན་བདེ་སྟོང་། བསྲུང་བ་སྒྲིབ་པ་གཉིས་ལས་ཤེས་བྱའི་སྒྲིབ་པ། མི་འབྲལ་བ་པདྨ་ཅན་དངོས་སམ་ཡེ་ཤེས་ཀྱི་ཕྱག་རྒྱའོ། །གཉིས་པ་ལ་བཞི་སྟེ། ཚུལ་ཇི་ལྟ་བ་བཞིན་རྒྱུད་ལ་སྐྱེས་པས་མི་ཉམས་པར་བསྲུང་བ་དང་། རྣམ་གྲངས་རྗེས་སུ་དྲན་པས་མི་ཉམས་པར་བསྲུང་བ་དང་། ཉམས་སུ་མྱོང་བ་གང་རུང་ཅིག་རྒྱུད་ལ་སྐྱེས་པས་མི་ཉམས་པར་བསྲུང་བ་དང་། བླ་མ་དམ་པ་ལ་མོས་གུས་ཁྱད་པར་ཅན་གྱིས་མི་ཉམས་པར་སྲུང་བའོ། །གསུམ་པ་ལ་གཉིས་ཏེ། སྲིད་པའི་སྡུག་བསྔལ་བསྐྱེད་པའི་དམ་ཚིག་ཉམས་པ་དང་། ལམ་བསྒྲོད་པ་ལ་ཡུན་རིང་དུ་འགོར་བའི་དམ་ཚིག་ཉམས་པའོ། །དང་པོ་ནི། བུམ་དབང་གི་བསྲུང་བའི་དམ་ཚིག་རྩ་ལྟུང་བཅུ་བཞི་སྤོང་བ་ལས་ཉམས་པ་ཡིན་ལ། གཉིས་པ་ནི་ཕྱི་མ་བཅུ་དགུ་པོ་ལས་ཉམས་པའོ། །བཞི་པ་ནི་རྡོ་རྗེ་མཁའ་འགྲོ་སོགས་ཀྱི་ཉམས་ཆགས་བསྐང་ཞེས་ཏེ་གཞུང་ཉིད་ཀྱི་སྟེང་དུ་རྟོགས་པར་བྱའོ། །གཉིས་པ་བུམ་དབང་གི་དམ་ཚིག་བྱེ་བྲག་ཏུ་བཤད་པ་ལ་ཕྱི་མ་གསུམ་ལས། དང་པོ་བསྲུང་བའི་དམ་ཚིག་ལ་སྤང་བྱ་སྤོང་བའི་དབང་དུ་བྱས་པ་དང་། བསྟེན་བྱ་བསྟེན་པའི་དབང་དུ་བྱས་པ་གཉིས་ལས། དང་པོ་ནི། རྩ་བ་དང་ཡན་ལག་གི་ལྟུང་བ་ཉི་ཤུ་རྩ་གཉིས་སྤོང་བ་སྟེ། རྩ་བའི་ལྟུང་བའི་རྒྱ་ཆེར་བཤད་པ་འཁྲུལ་པ་སྤོང་བ་ལ་ཐོས་བསམ་བྱས་པའི་སྒོ་ནས་བསྲུང་མཚམས་ཕྱེད་པར་བྱའོ། །གཉིས་པ་ནི། རྡོ་རྗེ་གུར་ལས། ཅི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་རྟག་ཏུ་བཟུང་། །ཞེས་སོགས་བརྒྱད་དང་། རྟག་པར་རྒྱུན་དུ་སྔགས་བཟླ་ཞིང་། །ཞེས་སོགས་དགུ་སྟེ་བཅུ་བདུན་ལ་བསླབ་པར་བྱའོ། །ཕྱག་རྒྱ་བཅིངས་པ་རྣམ་སྤངས་ཤིང་ཞེས་སོགས་ནི་བརྟན་པ་ཐོབ་པའི་དམ་ཚིག་ཡིན་ནོ། །གཉིས་པ་ལ་མན་ངག་གི་སྐབས་སུ་སྔར་ལྟར་བདུད་རྩི་རིལ་བུ་ཉིད་ལ་བཤད། ཚོགས་འཁོར་ནི་ཉམས་ཆགས་བསྐང་བའི་སྐབས་སུ་བཤད་ཅིང་། མངོན་རྟོགས་ལྗོན་ཤིང་ལས་འདི་གཉིས་ལ་དུས་རྒྱུན་གྱི་བཟའ་བའི་དམ་ཚིག་དང་ཁྱད་པར་གྱི་དམ་ཚིག་ཅེས་པའི་ཐ་སྙད་མཛད་ཀྱང་ཉམས་ལེན་ལ་ཁྱད་མི་སྣང་སྟེ། ཚོགས་འཁོར་ནི་བཟའ་བའི་དམ་ཚིག་གི་ཆེད་དང་། ཉམས་ཆགས་བསྐང་བ་གཉིས་ཀར་གྱི་ཆེད་དུ་ཉམས་སུ་བླང་དགོས་པས་སོ། །གསུམ་པ་ནི། གྲུབ་ན་དམ་ཚིག་གི་བྲིས་སྐུ་དང་། རྒྱུད་ཀྱི་གླེགས་བམ་དང་། རྡོ་རྗེ་དྲིལ་བུ་རྣམས་མཚན་ཉིད་དང་ལྡན་པ་ཚུལ་བཞིན་དུ་མི་འབྲལ་བར་འཆང་ཞིང་དེ་ཙམ་མ་གྲུབ་ན་དམ་ཚིག་གི་རྡོ་རྗེ་དང་དྲིལ་བུ་ཚད་དང་ལྡན་པ་རབ་གནས་ལེགས་པར་བྱས་པ་མི་འབྲལ་བར་བཅང་ངོ་། །འདི་ལ་ཁ་ཅིག་ཟླ་བ་གཅིག་བྲལ་ན་ལྟུང་བ་འབྱུང་གི ཞག་ཉི་ཤུ་ཙམ་བྲལ་ཡང་ལྟུང་བ་མི་འབྱུང་བར་འདོད་པ་ནི་ཧ་ཅང་ཐལ་ལོ། །འོ་ན་ཅི་ཙམ་ཞིག་བྲལ་ན་ལྟུང་བ་འབྱུང་ཞེ་ན། ཡན་ལག་གི་ལྟུང་བ་འཆད་པ་ན། ཉན་ཐོས་དག་ཏུ་རློམ་བྱེད་པའི། །ནང་དུ་ཞག་བདུན་གནས་པ་དང་། །ཞེས་གསུངས་པའི་རིགས་པས། དགོས་པ་ཁྱད་པར་ཅན་གྱི་ཕྱིར་ཞག་དྲུག་ཚུན་ལ་ལྟུང་བ་མེད་ལ། ཞག་བདུན་འདས་ན་ལྟུང་བ་འབྱུང་ལ་དགོས་པ་མེད་པར་ཞག་གཅིག་བྲལ་ནའང་ལྟུང་བ་འབྱུང་ངོ་། །བུམ་དབང་གི་རྩ་བའི་ལྟུང་བ་མི་འབྱུང་བར་བྱ་བའི་ཕྱིར་བསླབ་པ་དང་། བྱུང་བ་ཕྱིར་བཅོས་པའི་ཐབས་ནི་འཁྲུལ་སྤོང་ལས་ཤེས་པར་བྱའོ། །གཉིས་པ་གང་ཟག་བཀྲི་བའི་ཚུལ་གང་ཡིན་པ་ལ་གཉིས་ཏེ། ལྟ་བས་སྤྲོས་པ་བཅད་པའི་ཕྱིར་ཀུན་གཞི་རྒྱུ་རྒྱུད་ལ་འཁོར་འདས་དབྱེར་མེད་བསྒོམ་པ་དང་། ལམ་གྱི་ཉམས་བསྐྱེད་པའི་ཕྱིར་ལུས་ཐབས་རྒྱུད་ལ་དབང་བཞི་དང་རྗེས་སུ་འབྲེལ་བའི་ལམ་བསྒོམ་པའོ། །དང་པོ་ལ་ལྟ་བ་དབང་གི་རྗེས་སུ་བསྒོམ་པའི་རྒྱུ་མཚན། རིམ་གཉིས་ཀྱི་ཐོག་མར་བསྒོམ་པའི་དགོས་པ། གཞི་གང་ལ་བསྒོམ་པ། བསྒོམ་བྱ་ལྟ་བའི་ངོ་བོ། ཚུལ་ཇི་ལྟར་བསྒོམ་པ་དང་ལྔ་ལས། དང་པོ་ནི། དབང་གསུམ་པའི་སྐབས་སུ་སྐྱེས་པའི་ཡེ་ཤེས་དེ་ཉིད་ལ་གང་ཟག་གི་བདག་ཏུ་ལོག་པར་རྟོག་པ་དགག་པ་དང་། ཡེ་ཤེས་དེའི་རྒྱུན་གོམས་པའི་ཕྱིར། དབང་གི་ཡེ་ཤེས་ལ་ངོ་སྤྲོས་པའི་སྒོ་ནས་བསྒོམ་དགོས་པས་དབང་གོང་མའི་རྗེས་སུ་བསྒོམ་པ་སྟེ། རྩ་རྒྱུད་དང་པོའི་བཅུ་པར། ཕྱི་ནས་དེ་ཉིད་ཡང་དག་བཤད། །རྣམ་དག་ཡེ་ཤེས་གཟུགས་ཅན་དང་། །འཁོར་བ་རྣམ་པར་རྟོག་པ་ལ། །ཁྱད་པར་ཅུང་ཟད་ཡོད་མ་ཡིན། །ཞེས་གསུངས་ཤིང་། འདི་ནི་དབང་བཞི་པ་ཚིག་ཙམ་གྱིས་བསྐུར་བ་སྟོན་པའི་སྐབས་ཡིན་ཀྱང་། གསུམ་པའི་ཡེ་ཤེས་ལ་སངས་རྒྱས་ཀྱི་ཡེ་ཤེས་ཚིག་གིས་ངོ་སྤྲོད་པ་ཚིག་གི་བཞི་པ་དང་། ཡེ་ཤེས་དེ་ཉིད་ལམ་གྱི་སྐབས་སུ་སྐྱོང་བར་བྱེད་པ་ལམ་དུ་བྱེད་པའི་བཞི་པ་ཡིན་པས་གནད་གཅིག་པའི་ཕྱིར་རོ། །གཉིས་པ་ནི། འོག་ནས་འབྱུང་བའི་བསྐྱེད་རྫོགས་ཀྱི་ལམ་ཐམས་ཅད་རྣམ་པ་དེ་དང་དེའི་རྣམ་པར་སྣང་ཡང་། རང་གི་ངོ་བོའམ་གོ་ཡུལ་དུ་ལྷན་ཅིག་སྐྱེས་པའི་ཡེ་ཤེས་ལས་མ་འདས་པར་ཤེས་པའི་ཆེད་དུ་ཐོག་མར་ལྟ་བ་བསྒོམ་དགོས་ཏེ། སམྦུ་ཊི་ལས། དང་པོར་སྟོང་ཉིད་བསམ་ནས་ནི། །ལུས་ཅན་རྣམས་ཀྱི་དྲི་མ་བཀྲུ། །ཞེས་དང་། མདོ་སྡུད་པ་ལས། སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དེ་བཞིན་ནོ། །དགེ་ཆོས་ཆུད་མི་གསན་ཕྱིར་ཡོངས་སུ་འཛིན་པ་ཡིན། །འདིས་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། །ཅེས་སོ། །གསུམ་པ་ནི་ཀུན་གཞི་རྒྱུ་རྒྱུད་ལ་ཞེས་པ་སྟེ། འདིར་ལུས་སེམས་གཉིས་ཀྱི་ནང་ནས་སེམས་ལ་གནད་དུ་བསྣུན་ནས་བསྒོམ་ཞེས་པའི་དོན་ནོ། །འོ་ན་ཕ་རོལ་ཏུ་ཕྱིན་པའི་བསྒོམ་ཚུལ་དང་ཁྱད་པར་མེད་པར་འགྱུར་རོ་སྙམ་ན། དབང་རབ་དང་འབྲིང་དུ་ཐོབ་པ་ལ་ནི་འདི་བསྒོམ་པའི་དུས་ཉིད་ན་དབང་གི་སྐབས་སུ་སྐྱེས་པའི་མཚོན་བྱེད་དཔེའི་ཡེ་ཤེས་དང་བསྲེས་ནས་བསྒོམས་པས་བསྒོམས་ཚུལ་ཁྱད་ཆེ་ལ། དབང་ཐ་མར་ཐོབ་པ་ལ་ནི་འདི་བསྒོམས་པས་ནམ་ཞིག་ན་མཚོན་བྱེད་དཔེའི་ཡེ་ཤེས་རྟོགས་བྲལ་སྐྱེ་ཞིང་དེ་བསྒོམས་པས་མཚོན་བྱ་དོན་གྱི་ཡེ་ཤེས་མྱུར་དུ་འདྲེན་ལ། ཕ་རོལ་ཏུ་ཕྱིན་པའི་བསྒོམ་པ་ལ་ནི་ཇི་སྲིད་མཐོང་ལམ་མ་སྐྱེས་ཀྱི་བར་དུ་སེམས་རྟོག་བྲལ་ཏུ་འགྱུར་བ་མི་སྲིད་པས་ཁྱད་པར་ཤིན་ཏུ་ཆེའོ། །འོ་ན་ཀུན་གཞི་རྒྱུ་རྒྱུད་ཀྱི་དོན་གང་ཞེ་ན། རྫོགས་པའི་སངས་རྒྱས་ཀྱི་རྒྱན་སྟུག་པོ་བཀོད་པ་དང་། ལང་ཀར་གཤེགས་པའི་མདོ་ལ་སོགས་པ་མདོ་སྡེ་དུ་མར། ཀུན་གཞིའི་རྣམ་པར་ཤེས་པ་ཞེས་མང་དུ་གསུངས་པའི་དོན་ལ་སེམས་ཙམ་པ་རྣམས། རྣམ་ཤེས་ཚོགས་བདུན་ལས་དོན་གཞན་དུ་གྱུར་པའི་ཤེས་པ་བདེན་གྲུབ་པ་བག་ཆགས་བདེན་གྲུབ་བསྒོ་བའི་གཞིར་གྱུར་པ། ཀུན་ནས་ཉོན་མོངས་པ་དང་། རྣམ་བྱང་གི་ཆོས་ཀུན་གྱི་རྒྱུར་གྱུར་པ། ས་བོན་གྱི་ཆ་ཉན་ཐོས་དགྲ་བཅོམ་ནས་ལྡོག་ཀྱང་། རྣམ་སྨིན་གྱི་ཆ་སངས་རྒྱས་ཀྱི་སའི་བར་ལ་རྒྱུན་མ་ཆད་པར་ཡོད་པ་ཞིག་ལ་འཆད་ཀྱང་། རྣལ་འབྱོར་དབང་ཕྱུག་གི་བཞེད་པས་སེམས་མྱོང་རིག་བྱེ་བྲག་ཏུ་མ་ཕྱེ་བ། རིས་སམ་ཕྱོགས་སུ་མ་ལྷུང་བ། ཐབས་རིག་པ་གསལ་ལ་མ་འགགས་པ། ངོ་བོ་སྟོང་པ་ཉིད་ལ་ཀུན་གཞིའི་སྒྲས་བསྟན་པར་གསུངས་སོ། །དེའི་དོན་ཐོག་མ་མེད་པ་ནས་སངས་རྒྱས་ཀྱི་སའི་བར་ལ་རྒྱུན་མ་ཆད་པའི་སེམས་གསལ་བ་ཙམ་འདི་ཉིད་གནས་སྐབས་སུ་རྐྱེན་དབང་གིས་དགེ་མི་དགེ་དང་། རྣམ་ཤེས་ཚོགས་བདུན་དང་། སེམས་སེམས་བྱུང་གི་ཆོས་དུ་མར་འགྱུར་ཡང་དེ་དག་གི་སྒོ་ནས་མི་འཇོག་པར་གསལ་ཙམ་རྒྱུན་མ་ཆད་པའི་སྒོ་ནས་འཇོག་པས་ན་རིས་སམ་ཕྱོགས་སུ་མ་ལྷུང་བ། སེམས་ཅན་ནས་སངས་རྒྱས་ཀྱི་སའི་བར་དུ་གསལ་ཙམ་རྒྱུན་མ་ཆད་པར་ཡོད་པས་ན་ཐབས་རིག་པ་གསལ་ལ་མ་འགགས་པ། དེའི་ངོ་བོ་ལ་དཔྱད་ན། མཐའ་བཞིའི་སྤྲོས་པས་སྟོང་པས་ན་ངོ་བོ་སྟོང་པ་ཉིད་དོ། །དེས་ན་སེམས་ཙམ་པས་བདེན་པར་གྲུབ་པའི་རྒྱུ་མཚན་གྱིས་འཁོར་འདས་ཀུན་གྱི་གཞིར་རུང་བར་འདོད་ཅིང་། འདིར་ནི། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་མི་རུང་ཉིད། །ཅེས་པའི་ཚུལ་གྱིས་བདེན་པས་སྟོང་པའི་རྒྱུ་མཚན་གྱིས་བྱ་བྱེད་རུང་བར་བཤད་པ་ནི་ཁྱད་པར་རོ། །ཀླུ་སྒྲུབ་ཡབ་སྲས་ཀྱང་དོན་འདི་ཉིད་བཞེད་དེ། བྱང་ཆུབ་སེམས་འགྲེལ་ལས། དཔེར་ན་ཁབ་ལེན་མཐོང་བ་ན། །ལྕགས་ནི་ཡོངས་སུ་མྱུར་དུ་འགུལ། །འདི་ལ་སེམས་ཡོད་མིན་ནའང་། །སེམས་དང་བཅས་པ་བཞིན་དུ་སྣང་། །དེ་བཞིན་ཀུན་གཞིའི་རྣམ་པར་ཤེས། །སེམས་མེད་སེམས་དང་བཅས་པ་བཞིན། །འགྲོ་དང་འོང་བ་རྣམ་གཡོ་ཞིང་། །རྟག་ཏུ་སྲིད་པ་གསུམ་པོ་ལེན། །དཔེར་ན་རྒྱ་མཚོའི་མཐའ་མ་ལས། །ངེས་པར་རླབས་ནི་རྣམ་པར་གཡོ། །དེ་བཞིན་ཀུན་གཞིའི་རྣམ་པར་ཤེས། །ལུས་ལ་བརྟེན་ཏེ་གཡོ་བར་བྱེད། །ཞེས་ཀུན་གཞི་གསུངས་ཤིང་ཟླ་བས་འཇུག་འགྲེལ་དུ། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར་སྟོང་པ་ཉིད་ཁོ་ན་ཀུན་གཞིའི་རྣམ་པར་ཤེས་པའི་སྒྲས་བསྟན་པར་རིག་པར་བྱའོ། །ཀུན་གཞིའི་རྣམ་པར་ཤེས་པ་འབའ་ཞིག་ཡོད་པར་མ་ཟད་ཀྱི་གང་ཟག་ཀྱང་ཡོད་དེ། དེས་གདུལ་བའི་སྐྱེ་བོ་ལ་དེ་ཡོད་པ་ཉིད་དུ་བསྟན་པས་རྗེས་སུ་འཛིན་པའི་ཕྱིར་རོ་ཞེས་གསུངས་སོ། །གཞིའི་སྐབས་སུ་ཀུན་གཞི་ཁས་ལེན་པས་སེམས་ཙམ་པ་ཡིན་ཞེས་པ་དང་། དབུ་མ་ཐལ་འགྱུར་བས་ཀུན་གཞི་ཐ་སྙད་དུ་ཡང་ཁས་མི་ལེན་ཞེས་སྨྲ་བ་ནི་གསུང་རབ་གོང་འོག་གི་བབས་དང་གྲུབ་མཐའི་རྣམ་དབྱེ་ཡེ་མ་ཕྱེད་པའོ། །རྗེ་བཙུན་གོང་མས་འདི་དང་ཆོས་དབྱིངས་ཀྱི་སྒྲ་དོན་འདྲ་བར་བཤད་དེ། ཆོས་ནི་འཁོར་བའི་ཆོས་ཕུང་ཁམས་སྐྱེ་མཆེད་དང་། མྱ་ངན་ལས་འདས་པའི་ཆོས་སྟོབས་ལ་སོགས་པ་ཡིན་ལ། དབྱིངས་ནི་དྷ་ཏུ་ཞེས་པ་རྒྱུ་སྟེ། དེ་ཡང་ས་བོན་མྱུ་གུའི་རྒྱུ་ཡིན་པ་ལྟར་སྐྱེས་བྱེད་ཀྱི་རྒྱུ་མ་ཡིན་གྱི། རང་བཞིན་ལྷུན་གྲུབ་ཀྱི་རྒྱུ་ཡིན་པས་དབྱིངས་སུ་བསྒྱུར་བ་སྟེ། ཐབས་ཀྱིས་མ་ཟིན་ན་འཁོར་བའི་ཆོས་ཀྱི་རྒྱུ་བྱེད། ཐབས་ཀྱི་ཟིན་ན་མྱང་འདས་ཀྱི་ཆོས་ཀྱི་རྒྱུ་བྱེད་པར་དག་ལྡན་ལས་གསུངས་སོ། །འོན་ཀྱང་ཀུན་གཞིར་འཇོག་པ་ནི་གསལ་བའི་ཆ་ནས་འཇོག་པ་གཙོ་ཆེ་ཞིང་ཆོས་དབྱིངས་སུ་འཇོག་པ་ནི་སྟོང་པའི་ཆ་ནས་འཇོག་པ་གཙོ་ཆེ་ལ་ངོ་བོ་ཟུང་འཇུག་ཡིན་པ་ལ་ནི་ཁྱད་པར་མེད་དོ། །རྒྱུ་རྒྱུད་དུ་འཇོག་པ་སོགས་ནི་ཀུན་གཞིའི་ཡིག་ཆུང་བཞིན་ཤེས་པར་བྱའོ། །བཞི་པ་ནི། འཁོར་འདས་དབྱེར་མེད་ཅེས་པ་སྟེ། འཁོར་བ་ནི་ཀུན་རྫོབ་ཀྱིས་བསྡུས་པའི་ཆོས་ཐམས་ཅད་དང་། མྱ་ངན་ལས་འདས་པ་ནི་དེའི་ཆོས་ཉིད་ཡིན་ལ་དབྱེར་མེད་པ་ནི་ཟུང་དུ་འཇུག་པའོ། །དེ་སྐད་དུ་ཡང་། རྩ་རྒྱུད་ཕྱི་མའི་བཞི་པར། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤང་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །འཁོར་བ་གཟུགས་དང་སྒྲ་ལ་སོགས། །འཁོར་བ་ཚོར་བ་ལ་སོགས་པ། །འཁོར་བ་དབང་པོ་རྣམས་ཉིད་དེ། །འཁོར་བ་ཞེ་སྡང་ལ་སོགས་པ། །འདི་རྣམས་ཆོས་ནི་མྱ་ངན་འདས། །རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་འཁོར་བ་དག་པ་ནི། །འཁོར་བ་མྱ་ངན་འདས་པར་འགྱུར། །བྱང་ཆུབ་སེམས་ནི་མྱ་ངན་འདས། །ཀུན་རྫོབ་དོན་དམ་ཚུལ་ཅན་ནོ། །ཞེས་སོ། །ཞིབ་ཏུ་ཕྱེ་ན་ལྷན་ཅིག་སྐྱེས་པའི་ཆོས་གསུམ་གྱི་སྐབས་སུ་གསལ་བ་འཁོར་བ། སྟོང་པ་མྱང་འདས། ཟུང་འཇུག་དབྱེར་མེད་པ། ཉམས་སུ་བླང་བའི་གནད་གསུམ་གྱི་སྐབས་སུ་སེམས་དང་སྒྱུ་མ་གཉིས་གསལ་བ་ཉམས་སུ་ལེན་པ་ཡིན་པས་འཁོར་བ། རྟེན་འབྲེལ་སྟོང་པ་ཉམས་སུ་ལེན་པ་ཡིན་པས་མྱང་འདས། བརྗོད་བྲལ་དབྱེར་མེད་དོ། །ཡང་དང་པོའི་སྐབས་སུ་སྣང་བ་འཁོར་བ། སེམས་མྱང་འདས། ཟུང་འཇུག་དབྱེར་མེད་པ། གཉིས་པའི་སྐབས་སུ་སེམས་འཁོར་བ། སྒྱུ་མ་མྱང་འདས། ཟུང་འཇུག་དབྱེར་མེད། གསུམ་པའི་སྐབས་སུ་སྒྱུ་མ་འཁོར་བ་སོགས་སྦྱར་བར་བྱའོ། །རྒྱུད་གསུམ་གྱི་སྐབས་སུ་རྒྱུ་རྒྱུད་ནི་སྔར་དང་འདྲ་ལ། ཐབས་རྒྱུད་ལ་སྦྱང་གཞི་འཁོར་བ། སྦྱོང་བྱེད་མྱང་འདས། དབྱེར་མེད་དུ་སྦྱར་བ་དབྱེར་མེད། འབྲས་རྒྱུད་ཀྱི་སྐབས་སུ་ལྷུན་གྲུབ་འཁོར་བ། གནས་འགྱུར་མྱང་འདས། མི་འགལ་བ་དབྱེར་མེད་སོགས་ཞིབ་ཏུ་བླ་མའི་མན་ངག་དང་། ཡིད་བཞིན་གྱི་ནོར་བུ་ལྟ་བུའི་གཞུང་རྩ་འགྲེལ་གྱི་སྟེང་དུ་རྟོགས་པར་བྱའོ། །ལྔ་པ་ནི་བསྒོམ་པ་ཞེས་པ་སྟེ། ལྷན་ཅིག་སྐྱེས་པའི་ཆོས་གསུམ་གྱི་སྒོ་ནས་མདོར་བསྟན་པ་དང་། ཉམས་སུ་བླང་བའི་གནད་གསུམ་གྱི་སྒོ་ནས་རྒྱས་པར་བཤད་པ་དང་། རྒྱུད་གསུམ་གྱི་སྒོ་ནས་ཤིན་ཏུ་རྒྱས་པར་བཤད་པ་རྣམས་འཁོར་འདས་དབྱེར་མེད་རྩ་འགྲེལ་བཞིན་དུ་ཞིབ་ཏུ་བསྒོམ་པར་བྱའོ། །གཉིས་པ་ལམ་གྱི་ཉམས་བསྐྱེད་པའི་ཕྱིར་ལུས་ཐབས་རྒྱུད་ལ་དབང་བཞི་དང་རྗེས་སུ་འབྲེལ་བའི་ལམ་བསྒོམ་པ་ལ། རིམ་པ་གཉིས་སུ་བསྡུ་བའི་ཚུལ་དང་། ལམ་བཞིར་བསྡུ་བའི་ཚུལ་གཉིས་གསུངས་པ་ལས། དང་པོ་ནི། རྩ་རྒྱུད་ལས། བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ཡང་རིམ་པ་ཉིད། །རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་དང་། འདུས་པའི་རྒྱུད་ཕྱི་མར། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པའི་རིམ་པ་ཉིད་དང་ནི། །དེ་བཞིན་རྫོགས་པའི་རིམ་ཉིད་དོ། །ཞེས་བླ་མེད་ཀྱི་ལམ་ཐམས་ཅད་རིམ་པ་གཉིས་སུ་འདུས་པར་བཞེད་པ་ལྟར་འདིར་ཡང་རིམ་པ་གཉིས་སུ་བསྡུ་བའི་ཚུལ་གསུངས་ཏེ། ཞུས་ལན་གསལ་བར། ལྟ་བ་ཡང་དག་བསམ་པས་རྒྱུད་སྦྱངས་ནས། །དེ་ནས་རིམ་གཉིས་བསམ་གཏན་བསྒོམ་པར་བྱ། །ཞེས་སོ། །འདི་ལ་མངོན་རྟོགས་ལྗོན་ཤིང་ལས། བསྐྱེད་རྫོགས་ཐུན་མོང་གི་ཆོས་དྲུག་གིས་ངེས་ཤེས་བསྐྱེད་པར་གསུངས་པ་ལྟར་འདིར་ཡང་འདྲ་སྟེ། བསྐྱེད་རྫོགས་ཐུན་མོང་ཆོས་དྲུག་དྲན་བྱ་ཞིང་། །ཞེས་གསུངས་པ་ལྟར་རོ། །དེ་ལྟར་རིམ་པ་གཉིས་ལས། བསྐྱེད་རིམ་ལ་ཡང་གདུལ་བྱའི་བློ་རིགས་ལ་ལྟོས་ནས་འོག་ནས་འཆད་པར་འགྱུར་བ་ལྟར། སྤྱན་དབུ་མ་ལ་སེམས་འཛིན་པ་ནས་སྣོད་བཅུད་ལྷའི་འཁོར་ལོར་ཤར་ཤར་གྱི་བར་དུ་བསྐྱེད་རིམ་བསྟན་པར་བྱས་ནས། རྫོགས་རིམ་བསྒོམ་པའི་ཚུལ་དང་། ཐུན་སྟོད་ལ་དཀྱིལ་འཁོར་གྱི་འཁོར་ལོ་ཡོངས་རྫོགས་སམ། ལྷན་ཅིག་སྐྱེས་པ་གང་རུང་རྟེན་དུ་བྱས་ནས་གཙོ་བོར་རྫོགས་རིམ་བསྒོམ་པའི་ཚུལ་གཉིས་གསུངས་ཏེ། ཞུས་ལན་གསལ་བར། བསྐྱེད་པའི་རིམ་ནས་རིམ་གྱིས་བློ་སྦྱངས་སམ། །དེ་ཉིད་རྟེན་དུ་འཛིན་ཏམ་བློ་རིགས་གཉིས། །དང་པོ་བསྐྱེད་པའི་རིམ་པ་ཉིད་ལ་ནི། །བློ་ཡིས་སྣང་བ་ཐོབ་ཀྱི་བར་དུ་སྟེ། །གཉིས་པ་དཀྱིལ་འཁོར་རྫོགས་པའམ་ལྷན་ཅིག་སྐྱེས། །གང་རུང་སྔོན་དུ་སོང་ནས་རྫོགས་རིམ་བསྒོམ། །ཞེས་གསུངས་སོ། །གཉིས་པ་རྫོགས་རིམ་ལ། ཁམས་འདུས་པ་དང་པོར་རླུང་གཏུམ་མོ་དྲོད་རྟགས་ཀྱི་ལམ་ཁྲིད་པ། འདུས་པ་བར་པ་ལ་ཐིག་ལེ་བདེ་སྟོང་གི་ལམ་ཁྲིད་པ། འདུས་པ་ཐ་མ་ལ་སྐྱོན་མེད་གཉུག་མ་ཡེ་ཤེས་ཀྱི་ལམ་ཁྲིད་པ་དང་གསུམ་ལས་དང་པོ་ནི། གསང་དབང་གི་ལམ། གཉིས་པ་ནི་ཤེས་རབ་ཡེ་ཤེས་ཀྱི་ལམ། གསུམ་པ་ནི་དབང་བཞི་པའི་ལམ་སྟེ། དེས་ཁམས་འདུས་པ་གསུམ་ཆོད་ནས་འདུས་པ་ཐ་མར་ལུང་བསྟན་པའི་བུ་མོ་པདྨ་ཅན་ལ་བརྟེན་ནས་གྲུབ་མཐའ་སྙོགས་པར་བཞེད་དོ། །གཉིས་པ་ལ་བཞི་སྟེ། བུམ་དབང་གི་ལམ་བསྐྱེད་པའི་རིམ་པ། གསང་དབང་གི་ལམ་བདག་བྱིན་གྱིས་བརླབས་པའི་རིམ་པ། ཤེས་རབ་ཡེ་ཤེས་ཀྱི་ལམ་དཀྱིལ་འཁོར་འཁོར་ལོ། དབང་བཞི་པའི་ལམ་རྡོ་རྗེ་རྦ་རླབས་སོ། །དང་པོ་ལ་གཉིས་ཏེ། ཕྱི་བསྐྱེད་པའི་རིམ་པ་དང་། ནང་བསྐྱེད་པའི་རིམ་པའོ། །དང་པོ་ལ་གཉིས་ཏེ། བསྐྱེད་རིམ་གྱི་བྱ་བ་དང་། བསྐྱེད་རིམ་གྱི་སེམས་འཛིན་ནོ། །དང་པོ་ནི། དེ་ནས་བསྒྲུབ་པ་ལ་འཇུག་པའི་སྔོན་དུ་བླ་མ་ལ་ལམ་དུས་ཀྱི་དབང་བླངས་ཏེ་དམ་ཚིག་གསོ། བླ་མ་མི་བཞུགས་ན་བདག་ཉིད་ཀྱིས་བསྒྲུབ་པའི་དཀྱིལ་འཁོར་བྲིས་ལ་བདག་འཇུག་རྒྱས་པར་བྱ། མི་མཐུན་པའི་རྐྱེན་སྤངས་ནས་མཐུན་པའི་ཆས་འགྲིག་པའི་ཚེ་བསྒྲུབ་པ་ལ་འཇུག དེའང་བསྐྱེད་པའི་རིམ་པའི་ལམ་ལ་བརྟེན་ནས་བསྙེན་པ་བཞི་འབུམ་ལ་སོགས་པ་ཅི་འགྲུབ་པ་བཟླ། དེའི་བཅུ་ཆའི་སྦྱིན་སྲེག་བྱ་ཞེས་གསུང་ལ། སྐབས་འདིར་ཕྱི་བསྐྱེད་པའི་རིམ་པའི་རྣམ་གཞག བདག་མེད་རྣལ་འབྱོར་ལྡན་པའམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང་། །དངོས་གྲུབ་འདོད་པས་མི་གནས་སོ། །ཞེས་པ་ལ་བརྟེན་ནས་མཆོག་གི་དངོས་གྲུབ་སྒྲུབ་པའི་མངོན་རྟོགས་ཀྱི་གཙོ་བོའི་སྒོ་ནས་ཡབ་ཀྱི་བསྐྱེད་རིམ་དང་། ཡུམ་གྱི་བསྐྱེད་རིམ་གཉིས་སུ་དབྱེ་བ་དང་། རྩ་རྒྱུད་ལས། བསྙེན་སྒྲུབ་ཡན་ལག་བཞིའི་ཆིངས་དང་། གུར་ལས་ཡན་ལག་དྲུག་གི་ཆིངས་གསུངས་པ་ལ་བརྟེན་ནས་འཆིང་བྱེད་མངོན་རྟོགས་ཀྱི་སྒོ་ནས་ཡན་ལག་བཞི་པའི་ཕྱོགས་དང་། ཡན་ལག་དྲུག་པའི་ཕྱོགས་གཉིས་སུ་དབྱེ་བ་དང་། རྩ་རྒྱུད་དང་པོའི་བརྒྱད་པར། མངོན་བྱང་མི་མཉམ་སྦྱོར་ཨཱ་ལི་ཀཱ་ལི་སྤང་མ་སྤང་གཉིས། མཉམ་སྦྱོར་གཅིག་སྟེ་གསུམ་དང་། ཕྱི་མའི་ལྔ་པར་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་གསུངས་པ་ལ་བརྟེན་ནས་བསྐྱེད་ཆོག་གི་སྒོ་ནས་མངོན་བྱང་ལས་བསྐྱེད་པ་དང་། ས་བོན་ལས་བསྐྱེད་པ་དང་། སྐད་ཅིག་གིས་བསྐྱེད་པ་སྟེ་གསུམ། དང་པོ་ལ་ཡང་ཨཱ་ལི་ཀཱ་ལི་ལ་ལྟོས་པ་དང་མི་ལྟོས་པ་གཉིས། དང་པོ་ལ་མི་མཉམ་སྦྱོར་དང་། མཉམ་སྦྱོར་གཉིས་སུ་ཕྱེ་བའི་ཚུལ་དང་། གང་ཟག་གི་རྟོགས་པའི་རིམ་པས་བསྐྱེད་ཆོག་ཆད་བྲི་བའི་སྒོ་ནས་སྔར་གྱི་མངོན་པར་རྟོགས་པ་དེ་དག་ལ་བཅུ་བཞིར་ཕྱེ་བའི་ཚུལ་དང་། དེ་དག་ཀྱང་སྦྱང་གཞི་སྤྱིར་མ་དག་པའི་སྣང་བ་མཐའ་དག་སྦྱོང་བ་དང་། བྱེ་བྲག་ཏུ་སྔོན་འགྲོས་ལས་ཉོན། གཞལ་ཡས་ཁང་གིས་མ་དག་པའི་སྣོད། བསྐྱེད་ཆོག་གིས་སྐྱེ་གནས་བཞི། ཁ་དོག་དང་ཕྱག་མཚན་གྱིས་ཉོན་མོངས་པ་ལྔ་སྦྱོང་བ་དང་། ཕྱག་དང་ཞབས་ཀྱི་རྣམ་འགྱུར་གྱིས་ཟུང་འཇུག་བསྒྲུབ་པ་དང་། དེ་ཐམས་ཅད་ཀྱང་ལམ་བྱེད་བཞིས་ལམ་དུ་བྱེད་པའི་ཚུལ་དང་། ལམ་གྱི་ཡན་ལག་མཆོད་གཏོར་གྱི་རྣལ་འབྱོར་ལ་སོགས་པ་མཉམ་པར་མ་བཞག་པའི་རྣལ་འབྱོར་བརྒྱད་དང་། སྦྱིན་སྲེག་གི་ཚུལ་རྣམས་བརྒྱུད་པའི་མན་ངག་ཇི་ལྟ་བ་བཞིན་ལེགས་པར་བསྟན་ནས། ཉམས་སུ་ལེན་པ་པོས་ཀྱང་ཚུལ་བཞིན་དུ་ཤེས་པར་བྱས་ཏེ། སྔར་གསུངས་པ་ལྟར་བསྙེན་པ་དང་། སྦྱིན་སྲེག་གི་སྒྲུབ་པ་ལ་འཇུག་པར་བྱའོ། །གཉིས་པ་བསྐྱེད་རིམ་གྱི་སེམས་འཛིན་ནི། སྒྲུབ་པའི་རྗེས་ནས་ཐུན་བཞིའི་ཚུལ་གྱིས་ཉམས་སུ་བླངས་ཏེ། རེ་རེ་ལ་ཡང་འཇུག་པའི་རིམ་པ་དང་། གནས་པའི་རིམ་པ་དང་། ལྡང་བའི་རིམ་པ་གསུམ་གསུམ་ལས། དང་པོ་ནི། སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་ནས་བརྩམ་སྟེ། ཡན་ལག་བཞི་པ་ལྟར་ན་དབུ་རྒྱན་ལ་རིགས་བདག་ཚར་བའི་བར་རམ། ཡན་ལག་དྲུག་པ་ལྟར་ན་བསྟོད་པ་རིན་འབྱུང་གི་ཡན་ལག་གི་བར་རྣམ་རྟོག་གཞན་དུ་མི་འཕྲོ་བར་དྲག་ལ་གསལ་བ་ཡུན་ཐུང་བའི་ཚུལ་གྱིས་ཚིག་གིས་བརྗོད་པའི་རྗེས་སུ་ཤེས་པ་ཁྲི་ལི་ལི་འགྲོ་བའི་སྒོ་ནས་བསྒོམ་པའོ། །གཉིས་པ་ནི། དཀྱིལ་འཁོར་བསྡུས་ལ་གཙོ་བོའི་ང་རྒྱལ་ལ་གནས་པའམ་དཀྱིལ་འཁོར་མ་བསྡུས་ཀྱང་རུང་སྟེ། ཐོག་མར་སྤྱན་དབུ་མ་ལ་སེམས་བཟུང་སྟེ། དེའང་གསལ་ན་གསལ་ཏེ་འཕྲོ་བཅད་དེ་བསམ་གཏན་གྱི་དུག་དབྱུང་། མི་གསལ་ན་མི་གསལ་ཏེ་འཕྲོ་བཅད་དེ་བསམ་གཏན་གྱི་དུག་དབྱུང་། འཕྲོ་བཅད་ཀྱང་རྣམ་པ་ཝལ་ཝལ་བྱུང་ན་བསམ་གཏན་གྱི་དུག་ཡིན་པས་བུམ་པའམ་སྣམ་བུ་ལ་སོགས་པ་དངོས་པོ་གཞན་ལ་ཤེས་པ་ཡེངས་སུ་བཅུག ཡང་བསྒོམ་སྟེ་གསལ་ན་གསལ་ཏེ་འཕྲོ་བཅད་ཅིང་ཡེངས་སུ་བཅུག་ཏེ་བསྒོམ་པས་གསལ་གདབ་པའོ། །དེ་ལྟ་བུའི་ཚུལ་གྱིས་བསམ་གཏན་གྱི་དུག་དབྱུང་ཞིང་ཡང་ནས་ཡང་དུ་གོམས་པར་བྱས་ཀྱང་དམིགས་པ་གསལ་བ་མ་བྱུང་ན་བརྗོད་ནས་གསལ་གདབ་པ་ཞེས་བྱ་བ་བསྒོམ། དེ་ལ་ཡང་གཉིས་ལས། རང་གིས་བརྗོད་པས་གསལ་གདབ་པ་ནི། སྤྱན་དབུ་མ་སྤྱན་རྩ་ཁྲོ་ཞིང་དམར་བ་ཞེས་བརྗོད་ལ་སྔ་མ་བཞིན་དུ་བསམ་གཏན་གྱི་དུག་དབྱུང་ཞིང་བསྒོམ། དེས་ཀྱང་གསལ་བ་མ་བྱུང་ན་གཞན་དག་ཅིག་སྤྱན་དབུ་མ་ཞེས་བརྗོད་དུ་བཅུག་ལ་ཡང་བསམ་གཏན་གྱི་དུག་དབྱུང་ཞིང་བསྒོམ། དེས་ཀྱང་མི་གསལ་ན་བལྟས་པས་གསལ་གདབ་པ་ཞེས་བྱ་བ་སྤྱན་དབུ་མ་ཤིན་ཏུ་མཛེས་པ་ཅིག་བྲིས་ལ་བལྟས་ཤིང་བསམ་གཏན་གྱི་དུག་དབྱུང་ཞིང་བསྒོམ། དེ་དག་གི་དུས་སུ་ཡང་མ་བསྒོམ་ཙ་ན་རྣམ་པ་ཝལ་ཝལ་བྱུང་ན་བསམ་གཏན་གྱི་དུག་ཡིན་པས་གཞན་ལ་ཤེས་པ་ཡེངས་སུ་བཅུག དེ་ལྟར་བསྒོམས་པས་གང་ལ་གསལ་བར་འདོད་པ་དེ་ལ་གསལ་བར་བྱུང་ན་ལྷ་སོ་སོའི་དག་པ་པོ་རུ་སླེབ་པ་ཡིན། གསལ་འཕྲོ་ལ་མེད་པར་འདོད་ན་མེད་པར་བྱ་བར་ནུས་ན་དེ་བཞིན་ཉིད་ཀྱི་དག་པ་པོ་རུ་སླེབ། དེ་དག་ལ་བརྟེན་ནས་ཞི་གནས་ཀྱི་ཉམས་ཁྱད་པར་ཅན་སྐྱེས་པ་ནི་རང་རིག་པའི་དག་པ་པོ་རུ་སླེབ་པའོ། །དེ་ལྟར་བསྐྱེད་པའི་རིམ་པའི་སྐུའི་ཕྱོགས་གཅིག་ལ་སེམས་བརྟན་པར་ཟིན་ནས། སྐུའི་ཕྱོགས་གཞན་ལ་དམིགས་པ་སྤོ་བར་བྱ་སྟེ། ཐུན་དང་པོ་ལ་སྤྱན་དབུ་མ་བསྒོམ། གཉིས་པ་ལ་སྤྱན་གསུམ་གསལ་གདབ། གསུམ་པ་ལ་ཁྲོ་གཉེར། བཞི་པ་ལ་ཤངས། དེ་ཙམ་གསལ་བར་མ་ནུས་ན་ཡང་ཐུན་བཞི་ཀ་ལ་སྤྱན་གསུམ་གསལ་བཏབ་པའམ། འོག་མ་རྣམས་ལ་ཡང་དེ་བཞིན་དུ་དམིགས་པ་བརྟན་བརྟན་གྱི་བར་དུ་བསྒོམ་པར་བྱའོ། །བློ་མྱུར་ན་ཉི་མ་གཉིས་པའི་ཐུན་དང་པོ་ལ་ཞལ་གྱི་མཆེ་བ་གསལ་གདབ། གཉིས་པ་ལ་སྙན། གསུམ་པ་ལ་རྩ་ཞལ། བཞི་པ་ལ་གཡས་དཀར་བ། ཉི་མ་གསུམ་པའི་ཐུན་དང་པོ་ལ་རྩ་ཞལ་དང་གཡས་དཀར་བ། གཉིས་པ་ལ་གཡོན་དམར་བ། གསུམ་པ་ལ་གཡས་པའི་ཞལ་གཉིས་གནག་པ། བཞི་པ་ལ་གཡོན་པའི་ཞལ་གཉིས་གནག་པ་དང་སྟེང་གི་ཞལ་གསལ་གདབ། ཉི་མ་བཞི་པའི་ཐུན་དང་པོ་ལ་ཞལ་བརྒྱད། ཐུན་གཉིས་པ་ལ་དབུའི་གཙུག་ཏོར་དང་དབུ་སྐྲ་དམར་སེར་སྣ་ཚོགས་རྡོ་རྗེ་དང་། ཐུན་གསུམ་པ་ལ་རུས་པའི་འཁོར་ལོ་དང་རྣ་རྒྱན་ལ་སོགས་པའི་དབུ་རྒྱན་རྣམས། ཐུན་བཞི་པ་ལ་སྐུ་བྱིན་པོ་མགུལ་རྒྱན་ལ་སོགས་པ་དང་བཅས་པ་གསལ་གདབ། ཉི་མ་ལྔ་པའི་ཐུན་དང་པོ་ལ་དབུ་དང་སྐུ་བྱིན་པོ་གསལ་གདབ། གཉིས་པ་ལ་ཕྱག་གཡས་པ་བརྒྱད་ཕྱག་མཚན་དང་བཅས་པ། གསུམ་པ་ལ་གཡོན་པའི་ཕྱག་བརྒྱད་ཕྱག་མཚན་དང་བཅས་པ་དང་། མི་མགོ་ལ་སོགས་པ་སྐུའི་རྒྱན་མེ་རི་དང་བཅས་པ་གསལ་གདབ། བཞི་པ་ལ་བདུད་བཞི་མནན་པའི་ཞབས་གསལ་གདབ། ཉི་མ་དྲུག་པའི་ཐུན་དང་པོ་ལ་གཙོ་བོ་ཡབ་ཡུམ་དང་གཽ་རཱི། གཉིས་པ་ལ་ཙཽ་རཱི། གསུམ་པ་ལ་བཻ་ཏ་ལཱི། བཞི་པ་ལ་གྷསྨ་རཱི། ཉི་མ་བདུན་པའི་ཐུན་དང་པོ་ལ་གཙོ་འཁོར་ལྔའི་སྟེང་དུ་པུཀྐ་སཱི། གཉིས་པ་ལ་ཤ་བ་རཱི། གསུམ་པ་ལ་ཙཎྜ་ལཱི། བཞི་པ་ལ་གཡུང་མོ་གསལ་གདབ། ཉི་མ་བརྒྱད་པའི་ཐུན་དང་པོ་ལ་ལྷ་དགུ་གཞལ་ཡས་ཁང་དང་བཅས་པ། གཉིས་པ་ལ་དུར་ཁྲོད། གསུམ་པ་ལ་སྲུང་འཁོར། བཞི་པ་ལ་ཁམས་གསུམ་སྣོད་བཅུད་དཀྱིལ་འཁོར་གྱི་འཁོར་ལོར་གསལ་གདབ་པའོ། །གསུམ་པ་ནི། དེ་ལྟར་ཐུན་རེ་རེའི་དམིགས་པ་དེ་ཙམ་གྱིས་རྫོགས་པའི་རྗེས་སུ་དག་པ་དྲན་པ་དང་། སྔགས་ཀྱི་བཟླས་པ་རྣམས་བྱས་ནས་དཀྱིལ་འཁོར་མ་བསྡུས་ན། སྐབས་འདིར་དཀྱིལ་འཁོར་བསྡུས་ཏེ། གཙོ་བོའི་ང་རྒྱལ་གྱིས། ཐུན་གཏོར་བཏང་བའམ་མི་བཏང་ན་རྡོ་རྗེའི་གླུ། བཀྲ་ཤིས་ཀྱི་ཚིགས་བཅད། སྨོན་ལམ་བཏབ་པ་རྣམས་བྱས་ནས་སྐྱེ་མཆེད་སྐུ་གསུང་ཐུགས་བྱིན་གྱིས་བརླབ་པ་རྣམས་བྱའོ།། །།དེ་ལྟར་ཕྱི་བསྐྱེད་པའི་རིམ་པའི་དམིགས་པ་བརྟན་ནས། རྫོགས་རིམ་རླུང་དང་། གཏུམ་མོའི་རྣལ་འབྱོར་བསྒོམ་པ་ལ་འཇུག་པ་ཁྲིད་ཡིག་གཉིས་སུ་གསུངས་ལ། ལམ་སོགས་ཉི་ཤུའི་སྐབས་སུ། བུམ་དབང་གི་ལམ་ནང་བསྐྱེད་པའི་རིམ་པ་ལ་གསུངས་པ་དང་། བརྡའ་དོན་གསལ་བའི་འགྲེལ་པར་ཡང་དེ་ལྟར་གསུངས་པ་ལྟར་སྐབས་འདིར་ནང་བསྐྱེད་པའི་རིམ་པ་བསྒོམ་པ་ཕྱག་ལེན་ལ་མཛད་དོ། །འདི་ལ་སྔོན་འགྲོ་ལམ་དུས་ཀྱི་དབང་ཕྱག་ལེན་བཞིན་བསྐུར་ནས། དེའི་འོག་ཏུ་དམིགས་པ་གསལ་བ་བསྟན་པར་བྱ་སྟེ། སྤྱིར་ལུས་དཀྱིལ་རྒྱུད་ལས་ཇི་ལྟར་གསུངས་པའི་ཚུལ། མན་ངག་གིས་ཅི་ལྟར་བཀྲལ་བའི་ཚུལ། ཕྱི་དཀྱིལ་ལས་ལུས་དཀྱིལ་ཟབ་པའི་རྒྱུ་མཚན། གནས་གང་དུ་རྣམ་པ་ཇི་ལྟར་བསྒོམ་པ་སོགས་ལ་རྟོག་གེས་བརྟག་པའི་རང་བཟོ་ཐམས་ཅད་བསལ་ནས། ལུང་རིགས་མན་ངག་གི་སྒོ་ནས་ཕྱིན་ཅི་མ་ལོག་པར་བཤད་ནས་དམིགས་པ་རང་གི་ངོ་བོ་ལ་རྒྱས་པར་ན་བདུན། འབྲིང་དུ་ན་ལྔ། བསྡུས་པ་ན་གསུམ་བྱ་བར་གསུངས་པས། དང་པོ་ནི་རྟེན་ལུས་དཀྱིལ་ལ་གཅིག ཕོ་བྲང་ལྔ་ལ་རེ་རེ། ཡན་ལག་གི་ལྷ་རྣམས་ལ་གཅིག་གོ །གཉིས་པ་ནི། རྟེན་ལུས་དཀྱིལ་དང་ཐུགས་ཀའི་ཕོ་བྲང་ལ་གཅིག ཕོ་བྲང་བར་པ་གསུམ་ལ་རེ་རེ། སྤྱི་བོའི་ཕོ་བྲང་དང་ཡན་ལག་གི་ལྷ་རྣམས་ལ་གཅིག་གོ །གསུམ་པ་ནི་ཐོག་མཐའ་གཉིས་འདི་དང་འདྲ་བ་ལ། ཕོ་བྲང་བར་པ་གསུམ་ལ་དམིགས་པ་གཅིག་གོ །གང་ལྟར་ཡང་བརྟེན་པ་ལྷ་གསལ་འདེབས་པའི་ཚེ་ལྟེ་བའི་ཕོ་བྲང་ནས་གསལ་འདེབས་ཏེ། ལུས་གྲུབ་པའི་ཚེ་ཐོག་མར་ལྟེ་བ་གྲུབ་པའི་གནད་ཀྱིས་སོ། །སེམས་འཛིན་པའི་ཚེ་ཐོག་མར་སྙིང་ཁ་ནས་འཛིན་ཏེ། སེམས་གཙོ་བོ་སྙིང་ཁར་གནས་པས་འཛིན་སླ་བའི་གནད་ཀྱིས་སོ་ཞེས་གསུང་ངོ་། །དེ་ལྟར་བསྐྱེད་པའི་རིམ་པ་དབྱིབས་ཀྱི་ལམ་བསྒོམ་པས་ལྟ་བ་ངོ་བོ་ཉིད་གསུམ་ནི། སྣང་ཕྱོགས་ཀྱི་ངོ་བོ་ཉིད། སྟོང་ཕྱོགས་ཀྱི་ངོ་བོ་ཉིད། ཟུང་འཇུག་གི་ངོ་བོ་ཉིད་འཆར་རོ། །དེ་གོམས་པས་གྲུབ་མཐའ་འཁོར་འདས་དབྱེར་མེད་ནི། འཇིག་རྟེན་ལས་འདས་པའི་ས་དྲུག་ལ་སྟོང་གསུམ་ཡུངས་འབྲུར་ཚུད་པ་ལ་ཆེ་ཆུང་མེད། རྩིག་པ་དང་རི་ལ་སོགས་པ་ལ་ཐོགས་པ་མེད། ཆུ་བོ་གྱེན་ལ་བཟློག ཉི་ཟླ་གཏེང་པར་འཛིན། གཅིག་ལས་མང་པོར་བྱེད་ཅིང་། མང་པོ་ལས་གཅིག་ཏུ་བྱེད་པ་ལ་སོགས་པ་འབྱུང་ངོ་། །གྲུབ་མཐའ་མ་སྙོགས་ན་འདའ་ཀ་མ་གོང་དུ་འཕོ་བ་ལ་གསུམ་སྟེ། སྣང་བ་བསྒྱུར་བའི་འདའ་ཀ་མ། འོད་ཀྱི་གོང་བུས་འཕོ་བའི་འདའ་ཀ་མ། སྒྲས་འཕོ་བའི་འདའ་ཀ་མ་གསུམ་མོ། །འབྲས་བུ་སྤྲུལ་པའི་སྐུ་རང་བཞིན་ལྷུན་གྲུབ་ནི་འབྲས་བུའི་སྐབས་ཉིད་དུ་འཆད་པར་འགྱུར་བས་འདིར་མ་བརྗོད་དོ། །དེ་ལྟར་ན་གཙོ་བོ་བུམ་དབང་གི་ལམ་དང་ཞར་ལས་བྱུང་བ་ལྟ་བ་སོགས་བཞི་སྟེ་བུམ་དབང་གི་ལྔ་བཤད་ཟིན་ཏོ།། །།གཉིས་པ་གསང་དབང་གི་ལམ་རང་བྱིན་གྱིས་བརླབས་པའི་རིམ་པ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་གཉིས་ལས། ཁྲིད་ཀྱི་སྔོན་འགྲོ་ནི། དེ་ནས་ཡང་གྲུབ་ན་བླ་མ་ལ་དབང་བླང་། འདི་དང་བསྐྱེད་རིམ་གྱིས་བསྒྲུབ་པའི་སྔོན་གྱི་ལམ་དུས་ཀྱི་དབང་གཉིས་ཀ་ཡང་རྒྱུ་དབང་ལམ་དུ་བྱེད་པའོ། །མ་གྲུབ་ན་བདག་འཇུག་བྱ། དེའང་མ་གྲུབ་ན། མཐུན་རྐྱེན་ཚོགས་བསག་པ་མཎྜལ་དང་། འགལ་རྐྱེན་སྒྲིབ་པ་སྦྱོང་བ་ཡི་གེ་བརྒྱ་པའི་བསྒོམ་བཟླས་བྱ་སྟེ། འདིར་ཐོག་མར་སྙིམ་པ་མེ་ཏོག་དང་བཅས་ཏེ་གསོལ་བ་གདབ་པ་དང་། བླ་མས་རླུང་ལྟས་བརྟག་པ་དང་། ཁྲིད་ཀྱི་སྔོན་འགྲོ་བསག་སྦྱང་གི་རྣལ་འབྱོར་གཉིས་བྱེད་དུ་བཅུག་ནས་གྲངས་ལ་བརྟག་པ་དང་། ཐུན་གྱི་སྔོན་འགྲོ་བསམ་གཏན་གྱི་ཡན་ལག་དགུ་པོ་རྣམས་རྗེ་བཙུན་གྱི་རླུང་གི་སྦྱོར་བ་བདུན་ལ་ཕྱག་ལེན་གྱིས་བརྒྱན་པ་བཞིན་བསྟེན་ཅིང་ཉམས་སུ་བླང་བར་བྱའོ། །ལུས་སྦྱོང་གི་སྐབས་སུ། ཡན་ལག་ལྔ་སྦྱོང་གསུངས་པ་ནི་བསྡུས་པ་ཡིན་ལ། རྒྱས་པར་ན་ལུས་སྦྱོང་ཉི་ཤུ་པ་བྱ་སྟེ་གཞུང་བཤད་ཟླ་རྒྱལ་མ་ལ་སོགས་པ་རང་ལུགས་ཀྱི་གཞུང་དུ་འབྱུང་བས་འདི་དང་། བདེ་མཆོག་པ་དང་། དུས་འཁོར་ཙ་མི་ལུགས་གསུམ་ཀའི་སྤྱི་མ་ལྟ་བུ་ཡིན་ནོ། །ཁ་ཅིག་ལུས་སྦྱོང་རྒྱས་པ་ཕྲིན་ལས་སོ་གཉིས་ལ་བྱེད་པ་ནི་ལུས་སྦྱོང་དང་འཁྲུལ་འཁོར་གྱི་ཁྱད་པར་མ་ཕྱེད་པའོ། །བླ་མ་ཕྱི་མ་ཁ་ཅིག ས་ར་ཧ་བརྒྱད། སྲོན་པའི་དྲུག གླན་གྱི་ཉེར་གཅིག་རྣམས་བྱེད་པ་ཡོད་ཀྱང་། དང་པོ་ནི། དེ་ཉིད་ཀྱིས་མཛད་པའི་དོ་ཧ་ལས་ཀྱང་། གཏུམ་མོའི་དམིགས་པ་ཅུང་ཟད་འབྱུང་བས་དེ་དུས་སམ། ཕྱག་རྒྱ་ཆེན་པོ་བརྡའ་རྩ་བདུན་སོགས་ལ་རིགས་ནའང་འདིར་མི་སྦྱོར་རོ། །གཉིས་པ་ནི་དུས་འཁོར་སྲོན་ལུགས་ལ་རིགས་ཀྱང་འདིར་འབྲེལ་མེད་དོ། །གསུམ་པ་ནི་ཁ་ཅིག་དམར་གྱི་སློབ་མ་གླན་རིན་ཆེན་འབར་ཡིན་ཞིང་། དེ་ནས་བརྒྱུད་པའི་མན་ངག་ཡིན་པས་ས་སྐྱ་པ་རང་ལུགས་ཡིན་ཟེར་ཀྱང་འདི་རྩ་བའི་ཐུག་ས་གླན་སྒོམ་ཤེས་རབ་བཟང་པོ་སོགས་ཡིན་པར་སྣང་བས་རང་ལུགས་ཀྱི་དོན་མེད་དོ་གསུངས་ངོ་། །གཉིས་པ་དངོས་གཞི་ལ་རླུང་དང་། གཏུམ་མོ་གཉིས་ལས། དང་པོ་ནི། བསམ་གཏན་གྱི་དངོས་གཞི་ལ་དམིགས་པའི་ལུགས་མང་ན་ཡང་རྣལ་འབྱོར་གྱི་དབང་ཕྱུག་འདི་ནི་ཁམས་འདུས་པ་དང་པོ་རླུང་གཏུམ་མོ་དྲོད་རྟགས་ཀྱི་ལམ་ཁྲིད་པ་ཞེས་བྱ་བ་ཡིན་པས་རླུང་གི་རྣལ་འབྱོར་གཙོ་བོར་བཞེད་དེ། འདིའི་རྒྱུ་མཚན་ཞིབ་ཏུ་བླ་མས་འཆད་པར་འགྱུར་རོ་ཞེས་གསུང་། དེ་ཡང་གནད་ཀྱི་གསལ་བྱེད་ལས། སྤྱིར་རླུང་གི་རྣམ་པར་གཞག་པ་ཤེས་པར་འདོད་ན་ལྔས་རིགས་པར་བྱ་སྟེ། སྤྱིར་རླུང་ཞེས་བྱ་བ་རང་གི་ངོ་བོ་གང་ཡིན་པ་དང་། རླུང་དེའི་རབ་ཏུ་དབྱེ་བ་དང་། བྱེད་པའི་ལས་དང་། རླུང་རྒྱུ་བའི་ཚུལ་རྣམ་པར་གཞག་པ་དང་། ལམ་དུ་བྱས་པ་ན་ཇི་ལྟར་འགྱུར་བའོ། །དང་པོ་རླུང་གི་ངོ་བོ་ནི་འབྱུང་བ་ཆེན་པོའི་ཁོངས་སུ་འདུ་བའི་རླུང་ཉིད་ཡིན་ལ་དེའང་ཕྱིའི་འབྱུང་བ་མ་ཡིན་ཏེ་ནང་གི་འབྱུང་བའོ། །དེ་སྣ་ཚོགས་བྱེད་པ་ཐམས་ཅད་ཀྱི་རྩ་བར་གྱུར་པ་ཡིན་སྟེ། དེ་ཡིས་མགོན་པོར་བརྗོད་པའི་རླུང་། །ཧ་ནི་ཀུན་ཏུ་འགྲོ་བར་བརྗོད། །ཅེས་བཤད་དོ། །ཡང་དེ་རྣམ་པར་ཤེས་པའི་རྟེན་དུ་གྱུར་པའང་ཡིན་ནོ། །གཉིས་པ་རླུང་དེ་ལ་དབྱེ་ན་གསུམ་སྟེ། རླུང་གི་ངོ་བོའི་སྒོ་ནས་དབྱེ་བ་དང་། རྒྱུ་ཚུལ་གྱི་སྒོ་ནས་དབྱེ་བ་དང་། བྱེད་ལས་ཀྱི་སྒོ་ནས་དབྱེ་བའོ། །དང་པོ་ནི་དྲུག་སྟེ། ས་དང་ཆུ་དང་མེ་དང་རླུང་དང་ནམ་མཁའ་དང་རྣམ་པར་ཤེས་པའི་རླུང་ཞེས་བྱ་སྟེ། འདི་ཉིད་ལས། དབང་ཆེན་དང་ནི་དེ་བཞིན་ཆུ། །མེ་ཉིད་དང་ནི་རླུང་ཉིད་དང་། །འཁོར་ལོ་སེམས་ཀྱི་ཀུན་སྤྱོད་པ། །ཞེས་པ་དང་། རྣམ་སྣང་ལ་སོགས་སངས་རྒྱས་རྣམས། །ཞེས་སོ། །གཉིས་པ་རྒྱུ་ཚུལ་གྱི་སྒོ་ནས་དབྱེ་ན་གཉིས་ཏེ། རྣམ་ཤེས་ཀྱི་རླུང་ཞེས་བྱ་བ་གནས་པ་རྒྱུ་བ་མེད་པའི་བདག་ཉིད་ཅན་དང་། ལས་ཀྱི་རླུང་ཞེས་བྱ་བ་ལྡང་འཇུག་གནས་པའི་བདག་ཉིད་ཅན་དེ། རྟག་ཏུ་ནུབ་དང་རབ་རྒྱུ་བ། །སེམས་ཅན་ཀུན་ལ་ཀུན་འགྲོ་བའོ། །ཞེའོ། །གསུམ་པ་བྱེད་པའི་ལས་ཀྱི་སྒོ་ནས་བཅུར་འགྱུར་ཏེ། སྲོག་དང་ཐུར་སེར་གྱེན་རྒྱུ་དང་། །ཁྱབ་དང་མཉམ་གནས་ཞེས་བྱ་དང་། །ཀླུ་དང་རུས་སྦལ་རྩངས་པ་དང་། །ལྷས་བྱིན་དང་ནི་གཞུ་ལས་རྒྱལ། །ཞེས་བྱ་སྟེ། སྟེང་གི་སྒོར་ནི་སྦྱོར་བ་གསུམ། །སྒོ་དགུ་རྣམས་ཀྱིས་ཡོངས་སུ་བསྐོར། །ཞེས་བྱ་བའི་དོན་ཡིན་ནོ། །རླུང་དེ་རྣམས་ལས་ཕན་ཚུན་གང་དང་གང་འབྲེལ་བ་ནི་གཞན་དུ་ཤེས་པར་བྱའོ། །གསུམ་པ་རླུང་དེ་དག་གིས་བྱེད་པའི་ལས་ནི་སྤྱིའི་ལས་དང་། སོ་སོའི་ལས་སོ། །དེ་ལ་སྤྱིའི་ལས་རྣམ་པར་ཤེས་པའི་རྟེན་བྱེད་པ་ཡིན་ཏེ། ཧ་ནི་དབྱངས་ཀྱི་དྲུག་ལྡན་པ། །རྣམ་པར་ཤེས་པ་ཡོངས་སུ་གྲགས། །ཞེས་སོ། །རྒྱུད་གཞན་ལས། འདི་ནི་རླུང་ཁམས་ཆེན་པོ་སྟེ། །རྣམ་ཤེས་གསུམ་གྱི་བཞོན་པ་ཡིན། །ཞེས་སོ། །ཡང་འདིས་ལུས་བསྐྱེད་པ་དང་འཕེལ་བ་ལ་སོགས་པ་ཐམས་ཅད་ཀྱི་བྱ་བའང་བྱེད་དེ། ཧ་ཡིས་རྣམ་པ་ཐམས་ཅད་དུ། །སངས་རྒྱས་ཀུན་དང་མཉམ་པར་སྦྱོར། །ཞེས་འབྱུང་བས། དེ་ལ་དང་པོ་ལུས་སྐྱེ་བའི་དུས་སུ་མའི་མངལ་དུ་རྣམ་པར་ཤེས་པ་རླུང་ལ་ཞོན་ཏེ་ཞུགས་པས་རླུང་གནས་པ་ལ་བརྟེན་ནས་རྣམ་པར་ཤེས་པ་བརྒྱལ་ལོ། །དེ་ཡེ་ཤེས་ཀྱི་རླུང་གི་བདག་ཉིད་ལ་གནས་སོ། །དེ་ནས་སྲོག་རླུང་ནས་བརྩམས་ཏེ་རླུང་བཅུ་རིམ་གྱིས་སྐྱེས་པས་ལུས་རྒྱས་པར་བྱེད་དོ། །དེ་བཞིན་དུ་གསོན་པའི་དུས་སུ་རླུང་རྒྱུས་པས་ལུས་མི་རུལ་བར་འཛིན་པར་བྱེད། ལྡང་བ་དང་འཇུག་པའི་སྒོ་ནས་སེམས་རྣམ་པར་རྟོག་པ་སྣ་ཚོགས་སུ་སྐྱེད་པར་བྱེད་དོ། །ཡང་ལམ་དུ་བྱས་པ་ནའང་རྣལ་འབྱོར་གྱི་ལས་བྱེད་དོ། །དེ་བཞིན་དུ་འཆི་བའི་དུས་སུའང་རླུང་རྣམས་རིམ་གྱི་འགགས་ཏེ་འཆི་བར་འགྱུར་ཞེས་བྱ་བའི་དོན་ཏོ། །དེས་ན། བདེ་དང་སྡུག་བསྔལ་རང་བཞིན་གྱིས། །ལྷན་ཅིག་སྐྱེས་པ་འགྲུབ་པའི་གནས། །ཞེས་གསུངས་སོ། །བཞི་པ་རླུང་རྒྱུ་བའི་ཚུལ་ལ་དྲུག་སྟེ། རླུང་རྒྱུ་བ་ཞེས་བྱ་བ་གང་ཡིན་པ་དང་། དེ་རླུང་གང་ཡིན་པ་དང་། ཚུལ་ལམ་རྣམ་པ་ཇི་ལྟར་རྒྱུ་བ་དང་། གནས་དང་ལམ་གང་ནས་རྒྱུ་བ་དང་། གྲངས་དུ་ཞིག་རྒྱུ་བ་དང་། གྲངས་དེ་ལྟར་འོང་བའི་རྒྱུ་མཚན་བསྟན་པའོ། །དང་པོ་ནི། སྤྱིར་རླུང་རྣམས་རང་རང་གི་གནས་ན་རང་རང་གི་ལས་བྱེད་པ་ཉིད་ཀྱང་རླུང་རྒྱུ་བ་ཞེས་བྱ་བ་ཡིན་ཡང་། འདིར་རེ་ཤིག་སྲོག་གི་ནུས་པས་སྲོག་དང་རྩོལ་བ་རྒྱུ་བའི་དབྱེ་བས་འཇུག་པ་དང་གནས་པ་དང་ལྡང་བར་རྒྱུ་བར་བྱ་སྟེ། གསུམ་ཉིད་སྦྱོར་བ་རྣམ་པ་གསུམ། །རྣམ་གསུམ་དབྱེ་བས་རྣམ་པར་གནས། །ཞེས་སོ། །གཉིས་པ་དེ་ལྟར་རྒྱུ་བ་དེ་ཉིད་གོང་གི་དབྱེ་བ་གསུམ་ལས་གང་ཡིན་ཞེ་ན། རང་གི་ངོ་བོའི་སྒོ་ནས་དབྱེ་བ་དྲུག་དང་། རྒྱུ་བའི་སྒོ་ནས་དབྱེ་བ་གཉིས་པོ་དང་། ལས་ཀྱི་སྒོ་ནས་དབྱེ་བ་བཅུ་ལས་སྲོག་གི་རླུང་ཁོ་ན་ཡིན་ནོ། །གལ་ཏེ་དམ་པ་ཁ་ཅིག་ཐུར་སེལ་ལ་སོགས་པའང་རྒྱུའོ་ཞེས་གསུང་ངོ་སྙམ་ན། དེ་རྣམས་རང་གི་གནས་ནས་རང་རང་གི་ལས་བྱེད་པ་ཉིད་ལ་རྒྱུ་བ་ཞེས་བྱའི་སྣའི་སྒོར་རྒྱུ་བ་ནི་སྲོག་ཁོ་ན་ཡིན་ཏེ། སྣ་ཡི་སྒོ་ཡི་རྒྱུན་ལས་ནི། །སྲོག་དང་རྩོལ་བའི་རྒྱུ་བ་དག །དུས་ཀུན་ཏུ་ནི་རྒྱུ་བ་ནི། །སྲོག་ཅེས་བྱ་བ་ཡིན་པར་བཤད། །ཅེས་པ་དང་། སྨིན་མའི་དབུས་སུ་སྲོག་གི་རླུང་། །དེ་ལྟར་གཅིག་པུའང་གསུམ་དུ་བཤད། །ཅེས་པའོ། །དེས་ན་སྣ་སྒོ་ལས་རླུང་གི་རླུང་རྒྱུ་བ་ཞེས་བྱ་བ་དང་ཐུར་སེལ་ཡང་རླུང་གི་རླུང་ཡིན་ཞེས་བྱ་བ་འདི་ནོར་བ་ཡིན་གྱི་དེ་ལྟ་མ་ཡིན་ན་ལས་སོ་སོར་བསྟན་པ་དོན་མེད་པ་དང་། ཐུར་སེལ་ཡང་གྱེན་སེལ་དུ་འགྱུར་བའི་སྐྱོན་ཡོད་དོ། །གསུམ་པ་རླུང་དྲུག་པོ་རྒྱུ་ཚུལ་ཇི་ལྟར་རྒྱུ་ཞེ་ན་དེ་ལ་རྣམ་ཤེས་ཀྱི་རླུང་ནི་ཡེ་ཤེས་ཀྱི་རླུང་ཡིན་ལ། དེ་ཡང་ཡེ་ཤེས་ཀྱི་རླུང་ནི་ཁ་ཅིག་ལས་མི་རྒྱུ་བར་བཤད། དུས་ཀྱི་འཁོར་ལོ་ལས་ཆ་རེ་རྒྱུ་བར་བཤད་ཀྱང་། རྡོ་རྗེ་ཕྲེང་བ་ལས་ཐུན་བཞིའི་མཚམས་སུ་རྒྱུ་བར་བཤད་པས་འདིའང་དེ་དང་མཐུན་ཏེ། འཁོར་ལོ་བཞི་ཡི་རབ་ཕྱེ་བས། །ཐུན་བཞིར་བྱིན་གྱིས་བརླབས་པ་དང་། །རྡོ་རྗེ་སེམས་དཔའི་གཟུགས་ཀྱིས་ནི། །འདིར་ནི་ཇི་ལྟར་བདེ་བར་རོལ། །ཞེས་འབྱུང་བས་སོ། །ཡང་ནམ་མཁའི་རླུང་ཡང་དུས་ཀྱི་འཁོར་ལོ་ལས་ཆ་རེ་རྒྱུ་བར་བཤད། རྡོ་རྗེ་ཕྲེང་བ་ལས། ད་ལྟ་ཁྱབ་པའི་ཚུལ་གྱིས་རྒྱུ། །དངོས་སུ་འཆི་བའི་དུས་སུ་རྒྱུ་བར་བཤད། རྒྱུད་འདིའང་དེ་དང་དགོངས་པ་མཐུན་ནོ། །རྣམ་སྣང་ལ་སོགས་སངས་རྒྱས་རྣམས། །སྟེང་གི་སྒོར་ནི་གཡོ་ཞིང་གནས། །ཞེས་གསུངས་པས་ལྔ་ཀ་རྒྱུ་བ་ཡིན་ལ། ཡང་། རླུང་ལ་སོགས་པའི་དབྱེ་བ་ཡིས། །རྟག་ཏུ་འགྲོ་བ་རླུང་རྣམས་བཞི། །ཞེས་གསུངས་པས་བཞིའང་ཡིན་ནོ། །དེས་ན་ལས་ཀྱི་རླུང་གི་རྒྱུ་བ་ནི་བཞི་ཁོ་ན་ཡིན་ནོ། །དེའང་ཁ་དོག་རྣམ་པ་ལྔ་རྒྱུ་ཚུལ་བཞིའི་སྒོ་ནས་རྒྱུ་སྟེ། སྟེང་དང་ངོས་དང་དྲང་འོག་འགྲོ། །ཞེས་འཆད་པར་འགྱུར་རོ། །བཞི་པ་གནས་དང་ལམ་གང་ནས་རྒྱུ་ཞེ་ན། སྤྱིར་ཡེ་ཤེས་ཀྱི་རླུང་རྩ་ཨ་ཝ་དྷཱུ་ཏིའི་མ་སྣའི་ཨ་ཐུང་བྷ་གའི་དཀྱིལ་འཁོར་གྱི་དབུས་ལ་གནས་ལ། དེ་རྩ་གཉིས་ཀྱི་དབང་གིས་སྲོག་དང་རྩོལ་བ་འབྱུང་། དེ་འཁོར་ལོ་བཞི་ལས། དེ་སྙིང་ཁའི་རྩ་འདབ་བཞི་ལས། དེ་འཁོར་ལོ་བཞིའི་རྩ་འདབ་རྣམས་ལས་རིམ་པ་བཞིན་དང་། ཡུལ་ཉི་ཤུ་རྩ་བཞི་ལ་སོགས་པ་ནས་བྱུང་སྟེ། སྲོག་གི་རླུང་གིས་དབང་བྱས་སྣའི་བུ་ག་ལས་རྒྱུ་བ་ཡིན་ནོ། །ལྔ་པ་སྣ་བུག་ལས་གྲངས་དུ་ཞིག་རྒྱུ་ཞེ་ན། ཉི་ཁྲི་ཆིག་སྟོང་དྲུག་བརྒྱ་སྟེ། ཐོག་མར་འབྱུང་བ་རྔུབ་པའི་གྲངས། །ཉི་ཁྲི་དང་ནི་ཆིག་སྟོང་དང་། །དེ་བཞིན་གྲངས་ནི་བརྒྱ་ཕྲག་དྲུག །ཉིན་དང་མཚན་མོར་ངེས་པར་རྒྱུ། །ཞེས་གསུངས་པ་ལྟ་བུའོ། །དྲུག་པ་གྲངས་དེ་ལྟར་འོང་བའི་རྒྱུ་མཚན་ཕྱི་རོལ་ཇི་ལྟ་བར་ནང་ལུས་ལ་གནས་པ་སྟེ། ཕྱི་རོལ་ཏུ་དབྱུག་པ་དང་ཆུ་ཚོད་བྱེད་པ་དང་འཕོ་བ་དང་། ཉིན་ཞག་ལ་སོགས་པའི་དབྱེ་བ་ཡོད་པ་ལྟར་ནང་ལའང་གནས་པའི་དབང་གིས་བྱུང་ངོ་། །དེའང་ཡུལ་ཉི་ཤུ་རྩ་བཞིའི་དབང་གིས་མགོན་པོའི་རླུང་ཉི་ཤུ་རྩ་བཞིར་ཞག་གཅིག་རྒྱུ་ལ། མགོན་པོ་རེ་རེའང་འཁོར་ལོ་བཞིའི་དབང་གིས་ལྷ་མོ་བཞི་བཞི་དང་ལྡན་པ་སྟེ། ས་རླུང་ཉིས་བརྒྱ་ཉི་ཤུ་རྩ་ལྔ། དེ་བཞིན་ཆུ་དང་མེ་དང་རླུང་གི་རླུང་རྒྱུ་བས་དགུ་བརྒྱ་པ་རེ་མགོན་པོའོ། །མགོན་པོ་བཞི་བཞིའང་ལྟེ་བའི་རྩ་འདབ་དང་སྣ་སྒོའི་དབྱེ་བས་འཕོ་བ་གཉིས་གཉིས་དང་ལྡན་ཏེ། གཡོན་དང་གཡས་དང་གཉིས་ཀ་དང་། །དལ་བར་རྒྱུ་དང་རྣམ་བཞིར་འགྱུར། །ཐུན་ཕྱེད་ཀྱིས་ནི་དུས་དག་ཏུ། །ལས་ནི་གཉིས་གཉིས་ཉེ་བར་གནས། །ཞེས་པས་ཐུན་ཕྱེད་ནི་འཕོ་བ་གཅིག་གོ །དགུ་བརྒྱ་པ་ཕྲག་གཅིག་གཡས་ཁོ་ན་ནས་རྒྱུ་བ་ནི་མེ་རླུང་། གཡོན་ཁོ་ན་ནས་རྒྱུ་བ་ནི་རླུང་གི་རླུང་། གཉིས་ཀ་ནས་རྒྱུ་བའི་རླུང་དལ་ཞིང་རྒྱུ་བ་མི་ཚོར་བ་ནི་ཆུ་རླུང་སྟེ། དེ་ལྟར་བཞི་ནི་འཕོ་བ་གཉིས་སོ། །དེ་ལ་རླུང་སུམ་སྟོང་དྲུག་བརྒྱའོ། །དེ་ལྟ་བུ་ལན་དྲུག་གིས་ཉི་ཁྲི་ཆིག་སྟོང་དྲུག་བརྒྱའོ། །ཞེས་རྡོ་རྗེ་ཕྲེང་བ་དང་། དུས་འཁོར་དང་། རྡོ་རྗེ་མཁའ་འགྲོའི་ལུགས་སོ། །ཧེ་བཛྲ་གྱི་ལུགས་ཀྱི་ལྟེ་བའི་རྩ་འདབ་ཀྱི་དབང་གིས་དབྱུག་གུ་དྲུག་ཅུ་རྩ་བཞི་ཡིན་ལ། དབྱུག་གུ་རེ་རེ་ལ་རླུང་སུམ་བརྒྱ་སུམ་ཅུ་རྩ་ཕྱེད་དང་བརྒྱད་བརྒྱད་དེས་ཉིན་ཞག་འདའོ། །དབྱུག་གུ་གཉིས་ལ་ཆུ་ཚོད་གཅིག་སྟེ་སྤྱི་བོའི་རྩ་འདབ་ཀྱི་དབང་གིས་སོ། །དེ་རེ་རེ་ལ་ལྷ་མོའི་རླུང་དྲུག་བརྒྱ་བདུན་ཅུ་རྩ་བརྒྱད་དང་བཞི་ཆ་བ་ཚན་པ་བཞིཾ་རྒྱུ་སྟེ། འཁོར་ལོ་བཞིའི་དབང་གིས་སོ། །དེ་དྲུག་བརྒྱ་བདུན་ཅུ་རྩ་ལྔ་མགོན་པོའི་རླུང་ངོ་། །མགོན་པོའི་རླུང་ཆུ་ཚོད་གཉིས་གཉིས་ལ་འཕོ་བ་རེ་རེ་མགྲིན་པའི་རྩ་འདབ་ཀྱི་དབང་གིས་སོ། །དེ་གཉིས་གཉིས་ཐུན་ཕྱེད་པ་རེ་རེ་སྟེ་སྙིང་གའི་རྩ་འདབ་ཀྱི་དབང་གིས་སོ། །དེ་གཉིས་གཉིས་ཐུན་ཆེ་བ་རེ་རེ་སྙིང་ཁའི་ནང་གི་འདབ་མའི་དབང་གིས་ཏེ། དེ་ལྟར་ན་ཉི་ཁྲི་ཆིག་སྟོང་དྲུག་བརྒྱའོ། །སྤྱི་དོན་ལྔ་པ་ལམ་དུ་བྱས་ན་ཇི་ལྟར་འགྱུར་ཞེ་ན། དང་པོ་ཁོ་ནར་རླུང་བཟུང་བས་རྣམ་པར་ཤེས་པ་ཟིན་ཏེ་དེའི་རྟ་ཡིན་པའི་ཕྱིར་རོ། །ཡང་དེ་ཉིད་བགྲངས་པས་བཟླས་པར་འགྱུར་བས་སྒྲིབ་པ་ཟད་པར་བྱེད། སེམས་ཟིན་པའི་དབང་གིས་ཏིང་ངེ་འཛིན་སྣ་ཚོགས་སྐྱེད་པར་ཡང་བྱེད་དོ། །ཡང་རླུང་རྣམ་པ་བཞི་གསལ་བའི་ཚེ་ཕྲིན་ལས་བཞི་འགྲུབ་པར་ཡང་བྱེད། མཐར་ལས་ཀྱི་རླུང་འགགས་ཏེ་ཡེ་ཤེས་ཀྱི་རླུང་མངོན་དུ་འགྱུར་བར་བྱེད་དེ། སེམས་མེད་སྐྱེས་བུ་མེད་ཞེས་བྱ་བ་ལ་སོགས་པ་འཆད་པར་འགྱུར་རོ་ཞེས་གསུངས་པའི་དོན་ལེགས་པར་བཤད་ནས་ཉམས་སུ་ལེན་པའི་ཚེ་རླུང་གི་རྣལ་འབྱོར་ཡང་ཡང་དག་པར་རྫོགས་པའི་སངས་རྒྱས་ཀྱིས་བསམ་གྱིས་མི་ཁྱབ་པ་གསུངས་ཀྱང་མན་ངག་ཉི་ཁྲི་ཆིག་སྟོང་དྲུག་བརྒྱར་འདུ་ལ། དེའང་མན་ངག་དགུ་བརྒྱ་ཕྲག་གཅིག་ཏུ་འདུས་ཤིང་དེའང་ཉིས་བརྒྱ་ཉི་ཤུ་རྩ་ལྔར་འདུས་ལ། དེའང་བཅུར་འདུས་ཤིང་། དེའང་ལྡང་བ་དང་། འཇུག་པ་དང་། གནས་པ་དང་། ཐམས་ཅད་སྡོམ་པ་དང་བཞིར་འདུ་བ་ཡིན་ནོ། །དེ་ལ་རྣལ་འབྱོར་གྱི་དབང་ཕྱུག་འདིས་མན་ངག་བཞི་པོ་ཐམས་ཅད་ལམ་དུ་བྱེད་པ་ལ་སྲོག་རྩོལ་ལམ་རྡོ་རྗེའི་བཟླས་པ་ཞེས་བྱ། ལྡང་བ་ལམ་དུ་བྱེད་པ་ཕྱིར་བཏང་བའི་མན་ངག་གསུམ་ནི་རྩོལ་བ་བཀག་སྟེ་སྲོག་ནས་བཏང་བ། ཤུགས་བསྐྱེད་དེ་གཉིས་ཀ་ནས་བཏང་བ། ཁ་ནས་སྒྲ་བཅས་སུ་བཏང་བའོ། །འཇུག་པ་ལམ་དུ་བྱེད་པ་ནང་དུ་དགང་བའི་མན་ངག་གཉིས་ནི་རྩོལ་བ་བཀག་སྟེ་སྲོག་ནས་དགང་བ། ཁ་ནས་སྒྲ་མེད་དུ་དགང་བའོ། །གནས་པ་ལམ་དུ་བྱེད་པ་ནི་ཁ་སྦྱར་ཞེས་བྱ་སྟེ། བདུན་པོ་དེ་དག་གནད་བཞི་བཞིའི་སྒོ་ནས་སྒོམ་པར་བྱའོ། །གཉིས་པ་གཏུམ་མོའི་རྣལ་འབྱོར་ནི། སྤྱིར་ཐམས་ཅད་མཁྱེན་པས་བསམ་གྱིས་མི་ཁྱབ་པ་ཞིག་གསུངས་ན་ཡང་། དེ་དག་གི་གནད་དགུ་བརྒྱ་པ་ཕྲག་གཅིག་ཏུ་འདུས། དེའི་གནད་ཀྱང་བདུན་ཅུ་རྩ་ལྔར་འདུས། དེའི་ཉམས་སུ་བླང་བའི་མན་ངག་མདོར་བསྡུ་ན་དགུར་འདུས་ཏེ། འཁོར་ལོ་ལ་མ་བརྟེན་པ་ལྔ། འཁོར་ལོ་ལ་བརྟེན་པ་གསུམ། གཞན་མན་ངག་གི་གནད་ལ་བརྟེན་པའི་མྱུར་བའོ། །དང་པོ་ནི་མར་མེ་གསོ་བ། ཚངས་པའི་ཐོག རྩའི་རྣལ་འབྱོར། སྲུབ་ཤིང་གི་འཁོར་ལོ། ཐིག་ལེའི་རྣལ་འབྱོར་རོ། །ཐིག་ལེའི་རྣལ་འབྱོར་ལ་ཡང་བཞི་སྟེ། སྙིང་ཁའི་ཉི་ཟླ་ཁ་སྦྱར། ལྟེ་བའི་དཔའ་བོ་འབའ་ཞིག གསང་གནས་བདེ་བའི་ཐིག་ལེ། མཛོད་སྤུ་སྐྲ་དཀར་གྱི་ས་བོན་ནོ། །འཁོར་ལོ་ལ་བརྟེན་པ་གསུམ་ནི་གཅིག་ལ་བརྟེན་པ། གཉིས་ལ་བརྟེན་པ། བཞི་ལ་བརྟེན་པའོ། །མན་ངག་གི་གནད་ལ་བརྟེན་པའི་མྱུར་བ་ལ་བདུན་ཏེ། མེ་དམར་སྐྱ། མེ་འབར་བ། ཐིག་ལེའི་འཐབ་མོ། །མེའི་འཁོར་ལོ། །མེ་དྲག་ཏུ་འབར་བ། མེ་ཆེར་འབར་བ། ཐམས་ཅད་མེར་འབར་བའོ། །དེ་ལྟར་བཅོ་བརྒྱད་པོ་དེ་དག་ལ་ལམ་སྦྱང་བ་ལ་སོགས་པ་གནད་བརྒྱད་བརྒྱད་ཀྱི་སྒོ་ནས་ཉམས་སུ་བླང་བར་བྱའོ། །ཆོས་རྗེ་པཎྜི་ཏས། རླུང་དང་གཏུམ་མོ་འཁྲུལ་འཁོར་ལས། །བྱུང་བའི་རང་བྱུང་ཡེ་ཤེས་དང་། །ཞེས་གསུངས་པ་ལྟར། འཁྲུལ་འཁོར་ཡང་འདིའི་ལམ་གྱི་དངོས་གཞི་སྟེ། དང་པོར་རླུང་གིས་རྩ་མདུད་གྲོལ། དེ་ནས་གཏུམ་མོས་བྱང་སེམས་བཞུས། དེ་ནས་འཁྲུལ་འཁོར་གྱིས་བྱང་སེམས་རྩ་གནས་ཐམས་ཅད་དུ་འདྲེན་པའི་སྒོ་ནས་ཡེ་ཤེས་སྐྱེ་བའི་དབང་དུ་བྱས་པའོ། །རྗེ་བཙུན་གྱིས་གེགས་སེལ་གྱི་སྐབས་སུ་གསུངས་ཀྱང་། འདི་ཉིད་མི་བཞེད་པ་མ་ཡིན་ཏེ། འཁྲུལ་འཁོར་འབའ་ཞིག་བསྒོམ་པར་འདོད་གྱུར་ན། །རིམ་དང་རིམ་མིན་དཀྲུགས་པ་དགུ་བཅུ་དྲུག །གཅིག་དང་གཉིས་དང་གསུམ་དང་བཞི་ཡི་བར། །ཅི་ལྟར་ནུས་པས་སྦྱངས་ན་སངས་རྒྱས་འགྲུབ། །ཅེས་གསུངས་པས་སོ། །དེ་ལས་བྱུང་བའི་ལྟ་བ་རང་བྱུང་གི་ཡེ་ཤེས་བཞི་ནི། ཉོན་མོངས་རང་བྱུང་གི་ཏིང་ངེ་འཛིན། རྣམ་རྟོག་རང་བྱུང་གི་ཏིང་ངེ་འཛིན། སྣྲེལ་ཞི་རང་བྱུང་གི་ཏིང་ངེ་འཛིན། གསལ་ཞིང་ཡང་ལ་མི་རྟོག་པའི་རང་བྱུང་གི་ཡེ་ཤེས་ཆེན་པོའི་ཏིང་ངེ་འཛིན་ནོ། །གྲུབ་མཐའ་མ་འདྲེས་ལ་ཡོངས་སུ་རྫོགས་པ་ནི་ས་བདུན་པ་ནས་བཅུ་པའི་བར་བཞི་ལ་རིགས་དྲུག་གི་སྐད་ཤེས། དེ་དག་གི་སྐད་དུ་ཆོས་སྟོན། ཨཱ་ལི་ཀཱ་ལི་ལ་དབང་ཐོབ། ཚིག་གི་མཆོག་འགྲུབ། ཐ་སྙད་ལ་སད། སོ་སོ་ཡང་དག་པར་རིག་པ་བཞི་ལ་དབང་ཐོབ། ཚངས་པའི་དབྱངས་སུ་གྱུར་པ་ལ་སོགས་པའི་ཡོན་ཏན་རྒྱུད་ལ་འཆར་རོ། །གྲུབ་མཐའ་མ་སྙོགས་ན་འདའ་ཀ་མ་འོད་གསལ་བ་ནི་འཆི་ཀ་མའི་རླུང་གི་རྐྱེན་བྱས་ནས་རླུང་ཐམས་ཅད་དབུ་མར་ཞུགས་ཏེ་སྟོང་གསལ་མཆོག་གི་ཏིང་ངེ་འཛིན་སྐྱེའོ། །འབྲས་བུ་ལོངས་སྤྱོད་རྫོགས་པའི་སྐུ་རང་བཞིན་ལྷུན་གྲུབ་ནི་འབྲས་བུའི་སྐབས་ཉིད་དུ་འཆད་པར་འགྱུར་བས་འདིར་མ་བརྗོད་དོ། །དེ་ལྟར་ན་གཙོ་བོ་གསང་དབང་གི་ལམ་དང་། ཞར་ལས་བྱུང་བ་གཞན་བཞི་སྟེ་ལྔ་བཤད་ཟིན་ཏོ།། ༈ །དེ་དག་གིས་ཁམས་འདུས་པ་དང་པོ་ཆོད་པར་བྱས་ནས་འདུས་པ་བར་པ་ཐིག་ལེ་བདེ་སྟོང་གི་ལམ་འཁྲིད་པ་ནི། ཤེས་རབ་ཡེ་ཤེས་ཀྱི་ལམ་དཀྱིལ་འཁོར་འཁོར་ལོ་སྟེ། འདི་ལ་ལམ་རྒྱས་པ་དང་། བསྡུས་པ་གཉིས་ལས། དང་པོ་ནི་ལུས་ངག་མཉམ་པ། འདོད་པ་མཉམ་པ། བྱིན་རླབས་མཉམ་པ། རིག་མ་དག་པ། མན་ངག་གི་གནད་ཀྱིས་ཟིན་པ་སྟེ་རྣམ་པ་ལྔའི་སྒོ་ནས་བསྒོམ་པའོ། །ལམ་བསྡུས་པ་ནི། ལུས་ཀྱི་སྤྱོད་ལམ་ལྡན་བྱས་ནས། །ཞེས་སོགས་སྦྱོར་བ་དང་། བྱིན་གྱིས་བརླབས་སོགས་བྱས་ནས་ནི། །ཞེས་སོགས་དངོས་གཞི་དང་། གླང་ཆེན་ཧིཾ་དང་སྟག་མོའི་ངུར། །ཞེས་སོགས་རྗེས་བཅད་པ་སྟེ་རྣམ་པ་གསུམ་གྱི་སྒོ་ནས་མན་ངག་བཞིན་བསྒོམ་པའོ། །དེ་ལས་བྱུང་བའི་ལྟ་བ་ལྷན་ཅིག་སྐྱེས་པའི་ཡེ་ཤེས་དགའ་བ་བཞི་ནི། གོ་རིམ་ལ་ལྟོས་པའི་དགའ་བ་བཞི། གནས་ལ་ལྟོས་པའི་དགའ་བ་བཞི། སྤང་བྱ་ལ་ལྟོས་པའི་དགའ་བ་བཞི། རང་གི་ངོ་བོ་ལ་ལྟོས་པའི་དགའ་བ་བཞིའོ། །གྲུབ་མཐའ་བདེ་སྟོང་རྒྱ་ཆུང་བ་ནི་མྱ་ངན་ལས་འདས་པའི་ཆོས་ལ་སོགས་པ་ཅི་རིགས་པ་རྣམས་བདེ་སྟོང་དུ་རྟོགས་པ་འབྱུང་སྟེ། ས་བཅུ་གཅིག་པ་དང་བཅུ་གཉིས་པ་ལའོ། །གྲུབ་མཐའ་མ་སྙོགས་ན་འདའ་ཁ་མ་ནམ་འཆི་བའི་ཚེ་རྡོ་རྗེ་སེམས་དཔའ་བྱོན་པར་འགྱུར་བ་ནི་འཆི་བའི་རླུང་གིས་རྐྱེན་བྱས་ནས་རྩ་མདུད་རྣམས་དྲལ་ཏེ་སེམས་ཀྱི་རྟེན་ཁམས་ཐིག་ལེ་རིམ་གྱིས་ལྷན་ཅིག་ཏུ་འཚོགས་ཏེ། དབུ་མར་ཡང་ཅུང་ཟད་ཞུགས་པས་འཆི་ཀར་བདེ་སྟོང་མཆོག་གི་ཏིང་ངེ་འཛིན་སྐྱེ་སྟེ། རྡོ་རྗེ་ནི་སྟོང་པ། སེམས་དཔའ་ནི་བདེ་བ། དེ་སྔར་གྱི་བདེ་སྟོང་གི་ལྟ་བ་དང་འདྲེས་ནས་བར་དོ་མེད་པར་གྲུབ་མཐའ་སྙོགས་པ་ལ་སོགས་པར་འགྱུར་རོ། །འབྲས་བུ་ཆོས་ཀྱི་སྐུ་ནི་འབྲས་བུའི་སྐབས་ཉིད་དུ་འཆད་པར་འགྱུར་བས་འདིར་མ་བརྗོད་དོ། །དེ་ལྟར་ན་གཙོ་བོ་ཤེས་རབ་ཡེ་ཤེས་ཀྱི་ལམ་དང་། ཞར་ལས་བྱུང་བ་གཞན་བཞི་སྟེ་ཤེས་རབ་ཡེ་ཤེས་ཀྱི་ལྔ་བསྟན་ཟིན་ཏོ།། །།དེ་དག་གིས་ཁམས་འདུས་པ་བར་པ་ཆོད་པར་བྱས་ནས་འདུས་པ་ཐ་མ་སྐྱོན་མེད་གཉུག་མ་ཡེ་ཤེས་ཀྱི་ལམ་ཁྲིད་པ་ནི་རྡོ་རྗེ་རྦ་རླབས་ཏེ། ལུས་སྦྱང་བ་ལ་སོགས་པ་སྔོན་དུ་སོང་ནས་བསམ་གཏན་གྱི་ཡན་ལག་རྣམས་ཚང་བར་བྱས་ཏེ། འོག་རླུང་བསྐྱོད་པ་ལུས་ཀྱི་རྦ་རླབས། ངག་འདྲེན་པ་ཞི་དྲག་ངག་གི་རྦ་རླབས། ཏིང་ངེ་འཛིན་སེམས་ཀྱི་རྦ་རླབས་གསུམ། ཕྱི་མ་ལ་ཐབས་ཀྱི་རྒྱུད་དག་པར་བྱ་བ། ཤེས་རབ་ཀྱི་རྒྱུད་དག་པར་བྱ་བ། གཉིས་ཀའི་རྒྱུད་སོ་སོར་དག་པར་བྱ་བ་གསུམ། དང་པོ་གཉིས་ལ་གཡས་གཟུང་བའི་རྦ་རླབས་རེངས་པ། གཡོན་འཛིན་པའི་རྦ་རླབས་རེངས་པ། དབུ་མར་གཟུང་འཛིན་གཉིས་ཀའི་རྦ་རླབས་རེངས་པ་གསུམ་གསུམ་དང་། ཕྱི་མ་ལ་ཁམས་དྭངས་མ་གཙུག་ཏོར་མཆོག་ཏུ་ཐིམ་པ་རྣམས་མན་ངག་བཞིན་བསྒོམ་པར་བྱའོ། །དེ་ལས་བྱུང་བའི་ལྟ་བ་ཆོས་ཐམས་ཅད་ཤིན་ཏུ་རྣམ་པར་དག་པའི་དེ་ཁོ་ན་ཉིད་མས་བརྟན་པའི་དགའ་བ་བཞི་སྟེ། དེ་ཡང་རྒྱུ་མཐུན་པས་ནི་སྐྲ་དཀར་འཇོམས། །རྣམ་པར་སྨིན་པས་སྟོབས་སྟེར་བྱེད། །སྐྱེས་བུ་བྱེད་པས་རྣམ་པར་འཕེལ། །དྲི་མ་མེད་པས་འཆི་མེད་འགྱུར། །ཞེས་བྱའོ། །དང་པོ་ལ་འགྲོ་བ་ཐམས་ཅད་ཀྱི་སྙིང་དུ་སྡུག་ཅིང་ཡིད་དུ་འོང་བར་འགྱུར། གཉིས་པ་ལ་མངོན་པར་ཤེས་པ་ཅུང་ཟད་འཆར། གསུམ་པ་ལ་འཇིག་རྟེན་གྱི་ཁམས་ཀྱི་རོ་ཐམས་ཅད་ལ་ལོངས་སྤྱོད་ནུས། བཞི་པ་ལ་རྫུ་འཕྲུལ་ཅུང་ཟད་སྟོན་ཏོ། །ཡང་དང་པོ་ལ་བདེ་སྟོང་གི་ཏིང་ངེ་འཛིན་ཆུང་། གཉིས་པ་ལ་འབྲིང་། གསུམ་པ་ལ་ཆེན་པོ། བཞི་པ་ལ་ཆེན་པོའི་ཡང་ཆེན་པོར་འགྱུར་རོ། །གྲུབ་མཐའ་བདེ་སྟོང་རྒྱ་ཆེ་བ་ནི། བཅུ་གསུམ་གྱི་ས་ཕྱེད་ལ་འཁོར་འདས་ཐམས་ཅད་བདེ་སྟོང་གཅིག་གི་སྟེང་དུ་རྟོགས་ཏེ་བླང་དོར་མེད། སྤང་ཐོབ་མེད་པར་འགྱུར་བའོ། །གྲུབ་མཐའ་མ་སྙོགས་ན་འདའ་ཁ་མ་ལམ་ཕྱག་རྒྱ་ཆེན་པོ་ནས་འཕོ་བ་ལ་གསུམ། སྤང་བ། གོམས་པ། ལས་ལ་སྦྱར་བའོ། །འབྲས་བུ་ངོ་བོ་ཉིད་ཀྱི་སྐུ་ནི་འབྲས་བུའི་སྐབས་ཉིད་དུ་འཆད་པས་འདིར་མ་བརྗོད་དོ། །དེ་ལྟར་ན་དངོས་གཞི་རྡོ་རྗེ་རྦ་རླབས་དང་། ཞར་ལས་བྱུང་བ་གཞན་བཞི་སྟེ་དབང་བཞི་པའི་ལྔ་བསྟན་ཟིན་ཏོ།། །།དེས་ན་འདི་དག་ནི་གང་ཟག་བློ་ཐ་མ་རིམ་གྱིས་བཀྲི་བ་ལ་དགོངས་པ་ཡིན་གྱི། ཁ་ཅིག་ལ་སྣང་བ་གསུམ་གྱི་ཁྲིད་བོར་ཏེ་ལྟ་བ་ནས་སྐྱོང་བ་ཡང་ཡོད་དོ། །འདི་མན་ཆད་གང་ལྟར་ཡང་ལྟ་བ་ལ་ངེས་ཤེས་སྐྱེས་སྐྱེས་ནི་བསྒོམ་དུ་ཅིས་ཀྱང་འཇུག་ལ། དེ་ཡན་ཆད་གང་ཟག་གི་རིམ་པ་ལ་ངེས་པ་མེད་དེ། ཁ་ཅིག་བསྐྱེད་རིམ་ཁོ་ན་སྐྱོང་བ་ཡང་ཡོད་མོད་ཀྱི་སློབ་དཔོན་རྣལ་འབྱོར་གྱི་དབང་ཕྱུག་འདི་ཉིད་ཀྱི་བཞེད་པ་ནི་བསྐྱེད་པའི་རིམ་པ་ཅུང་ཟད་ཅིག་བརྟན་པར་བྱས་ནས་ལུས་སྦྱོང་དང་རླུང་ཁོ་ན་གཙོ་བོར་བྱེད་པ་ཡིན་ནོ། །རླུང་དང་གཏུམ་མོའི་དམིགས་པ་རྣམས་ལ་ཏིང་ངེ་འཛིན་སྐྱེ་བའི་རྒྱུའམ་ལམ་ཞེས་བྱ། ལྟ་བ་རང་བྱུང་གི་ཡེ་ཤེས་ལ་ཏིང་ངེ་འཛིན་ཉིད་ཅེས་བྱ་བས་ན་དེ་ནམ་སྐྱེས་པ་གཅིག་སྐྱོང་བ་ཡིན་ནོ། །སྔར་ཐོས་བསམ་གྱིས་གཏན་ལ་ཕབ་པའི་ལྟ་བ་དེ་ནི་སྐྱོན་ཅན་ཡིན་ལ། འདི་ནི་ལྟ་བ་སྐྱོན་མེད་དམ་དཔེའི་ཡེ་ཤེས་ཞེས་བྱ་བའམ་ལམ་ཕྱག་རྒྱ་ཆེན་པོ་ཞེས་བྱ་བ་ཡིན་ནོ། །དེས་ན་རྒྱུ་མེད་པར་འབྲས་བུ་མི་འབྱུང་བས་ན་རྒྱུ་རླུང་དང་། གཏུམ་མོའི་དམིགས་པ་ལ་བརྟེན་ནས་ལྟ་བ་རང་བྱུང་གི་ཡེ་ཤེས་ཕྱག་རྒྱ་ཆེན་པོ་སྐྱེ་བར་འགྱུར་བས་ན་རྒྱུ་ལ་ནན་ཏན་བྱའོ། །ཡང་གང་ཟག་གི་རིགས་ཁ་ཅིག་སྔར་བསྟན་པའི་ཁྲིད་ཐམས་ཅད་ལོ་གཅིག་ཙམ་གྱིས་སྦྱངས་ནས། ངག་འདྲེན་པ་ཞི་བ་ལོ་གཅིག་ཙམ་གྱིས་སྦྱངས། དེ་ནས་ངག་འདྲེན་པ་དྲག་པོ་རླུང་ཁ་སྦྱར་ལ་བརྟེན་ནས་ཏིང་ངེ་འཛིན་སེམས་ཀྱི་རྦ་རླབས་འབའ་ཞིག་བསྒོམ་པའང་ཡོད་དོ། །འདི་ནི་བརྩོན་འགྲུས་མཆོག་གི་འཇུག་པ་ཞེས་བྱ་བ་ཡིན་ནོ། །གང་ཟག་བཀྲི་བའི་ཚུལ་བསྟན་ཟིན་ཏོ།། །།གསུམ་པ་ངེས་ཤེས་ཁྱད་པར་ཅན་བསྐྱེད་ལ་ཏིང་ངེ་འཛིན་ངོ་ཤེས་པར་བྱ་ཞིང་ལམ་གྱི་ས་མཚམས་རྣམ་པར་བཞག་པ་ལ་གསུམ། ཚད་མ་བཞི་དང་སྙན་བརྒྱུད་བཞིས་ངེས་ཤེས་བསྐྱེད་པ་དང་། ཏིང་ངེ་འཛིན་ངོ་ཤེས་ཤིང་ས་མཚམས་བཞག་པ་དང་། འཁོར་ལོ་བསྐོར་བ་གྲུབ་པའི་རྟགས་དང་བཅས་པའོ། །དང་པོ་ནི་སྔར་བཤད་ཟིན་ཏོ། །གཉིས་པ་ནི། རྗེ་ས་ཆེན་གྱིས། འདུས་པ་གསུམ་ལ་དཔེ་གསུམ་སྦྱར་བ་ཡིས། །ལམ་གྱི་ས་མཚམས་ཐེ་ཚོམ་མེད་པར་བྱ། །ཞེས་གསུངས་པ་ལྟར་དཔེ་གསུམ་གྱི་སྒོ་ནས་ཏིང་ངེ་འཛིན་ངོ་ཤེས་པར་བྱ་བ་དང་། དེས་ཁམས་འདུས་པ་གསུམ་གྱི་ས་མཚམས་རྣམ་པར་བཞག་པ་གཉིས་ལས། དང་པོ་ནི། དགུན་གྱི་རླུང་པོ་ལག་ཆ་ཅན་དང་འདྲ་བར་རྩ་རླུང་གི་ཟུག་ཆེ་བ་དང་། དཔྱིད་ཀྱི་རླུང་པོ་ལག་ཆ་བྲི་བ་དང་འདྲ་བར་རྩ་རླུང་གི་ཟུག་ཞི་བ་དང་། དབྱར་གྱི་རླུང་པོ་ལག་ཆ་བྲལ་བ་དང་འདྲ་བར་རླུང་གིས་བསྐྱེད་པའི་ཡོན་ཏན་འབྱུང་བ་ལུས་འཁྲུགས་སེལ་བ་སོགས་འབྱུང་བའོ། །གཉིས་པ་ནི། དེ་གསུམ་གྱིས་རིམ་པ་ལྟར་ཁམས་འདུས་པ་གསུམ་དུ་སླེབ་པར་ངོ་ཤེས་པར་བྱེད་པ་དེ། ལམ་ཁྲིད་ཚུལ་གསུམ་གྱི་སྒོ་ནས་ཞིབ་ཏུ་བཤད་ན། འདུས་པ་དང་པོ་ལ་གནོད་པ་བསྐྱེལ་བའི་རླུང་གི་ལམ་ཁྲིད་དེ་བསྒོམ་པའི་སྟོབས་ཀྱིས་རླུང་རྩ་གནས་ཐམས་ཅད་དུ་སོང་བས་རྩ་མདུད་ཅུང་ཟད་གྲོལ་ཏེ་རྩ་རླུང་གི་ཟུག་འབྱུང་ལ། དེ་ནི་དཔེ་དགུན་གྱི་རླུང་པོ་ལག་ཆ་ཅན་དང་འདྲའོ། །འདུས་པ་བར་པ་ལ་ཕན་གནོད་མེད་པའི་རླུང་གིས་ལམ་ཁྲིད་དེ་བསྒོམ་པ་གོམས་པའི་སྟོབས་ཀྱིས་རྩ་མདུད་ཆེར་གྲོལ་ཞིང་རླུང་སེམས་ཅུང་ཟད་དྭངས་པས་རླུང་ཟུག་ཞི་སྟེ། དཔེ་དཔྱིད་ཀྱི་རླུང་པོ་ལག་ཆ་བྲི་བ་དང་འདྲའོ། །འདུས་པ་ཐ་མ་ལ་ཕན་འདོགས་པའི་རླུང་གིས་ལམ་ཁྲིད་དེ་གོམས་པ་བརྟན་པའི་སྟོབས་ཀྱིས་རྩ་མདུད་ཕལ་ཆེར་གྲོལ་ཞིང་རླུང་སེམས་ཤིན་ཏུ་དྭངས་པས་ཏིང་ངེ་འཛིན་གྱི་ཕན་ཡོན་དུ་མ་འབྱུང་ཞིང་། རླུང་གིས་འབྱུང་བ་ལུས་འཁྲུགས་ལ་སོགས་པ་གནོད་པ་ཐམས་ཅད་སེལ་ནུས་པས་ན་དཔེ་དབྱར་གྱི་རླུང་པོ་ལག་ཆ་བྲལ་བ་དང་འདྲ་སྟེ། དེས་འཇིག་རྟེན་པའི་ལམ་ཆོད་དོ། །དེ་དག་ནི་རླུང་གི་ལམ་ཁྲིད་པའོ། །རླུང་གིས་ཁམས་བདུད་རྩི་ལ་བསྣུན་པས་གཉིས་པ་ཁམས་བདུད་རྩིའི་ལམ་ཁྲིད་པ་ནི། ཁམས་འདུས་པ་དང་པོ་ལ་ཁམས་དྭངས་སྙིགས་མ་ཕྱེ་བས་ལམ་ཁྲིད་པས་ཉམས་ཏིང་ངེ་འཛིན་མི་གསལ་ཞིང་མི་བརྟན་པའི་དུས་ཏེ། མེ་ལོང་གཡའ་དང་བཅས་པ་བཞིན་ནོ། །བར་པ་ལ་ཅུང་ཟད་དྭངས་པས་ལམ་ཁྲིད་དེ་ཏིང་ངེ་འཛིན་གསལ་ཞིང་ཆེར་བརྟན་ཏེ། མེ་ལོང་གཡའ་དང་ཅུང་ཟད་བྲལ་བ་བཞིན་ནོ། །ཐ་མ་ལ་ཕལ་ཆེར་དྭངས་པས་ལམ་ཁྲིད་དེ། ཏིང་ངེ་འཛིན་མཉམ་རྗེས་མེད་ཅིང་ཡུལ་རྐྱེན་གྱིས་མི་གནོད་པ་དང་། གསལ་ཞིང་བརྟན་པ་འབྱུང་སྟེ། མེ་ལོང་གཡའ་དང་བྲལ་བ་བཞིན་ནོ། །དེ་ནས་རླུང་དང་བདུད་རྩི་གཉིས་ཀྱིས་རྩ་དང་ཡི་གེ་ལ་གནད་དུ་བསྣུན་པས་ན་གསུམ་པ་རྩ་ཡི་གེའི་ལམ་ཁྲིད་པ་ནི། ཁམས་འདུས་པ་དང་པོ་ལ་རྩ་དང་ཡི་གེའི་རྟེན་འབྲེལ་གྱིས་མ་ངེས་པ་འཁྲུལ་སྣང་དུ་འཆར་བའི་ཡི་གེ་ཕལ་པས་ལམ་ཁྲིད་པས་ཉམས་ཀྱི་སྣང་བ་ལ་འཆར་བ་ཐམས་ཅད་མི་བདེན་པ་འཁྲུལ་སྣང་དུ་འཆར་རོ། །བར་པ་ལ་ངེས་པ་མཐོང་སྣང་དུ་འཆར་བའི་ཡི་གེ་བཅུ་བཞིས་ལམ་ཁྲིད་པས་མཐོང་སྣང་ལ་སོགས་པ་གསལ་ཞིང་བརྟན་པ་འབྱུང་ངོ་། །ཐ་མ་ལ་ཤིན་ཏུ་ངེས་པ་གསལ་སྣང་དུ་འཆར་བའི་ཡི་གེ་བསམ་གྱིས་མི་ཁྱབ་པས་ལམ་ཁྲིད་དེ་མཉེན་ལྕུག་མཆོག་ཏུ་གྱུར་པས་མིག་གིས་གཟུགས་ཉེ་རིང་མེད་པ་ཐམས་ཅད་མཐོང་བ་ལ་སོགས་པ་འབྱུང་ངོ་། །དེས་འཇིག་རྟེན་པའི་ལམ་ཆོད་དོ།། །།གསུམ་པ་ནི། དེ་ནས་འཇིག་རྟེན་ལས་འདས་པའི་ལམ་ལ། སྤྱིར་ལམ་ནི་གསུམ་སྟེ། མཐོང་ལམ། བསྒོམ་ལམ། མཐར་ཕྱིན་པའི་ལམ་མོ། །ས་ཕྱེད་དང་བཅུ་གསུམ་སྟེ། དེ་ལ་ལུང་ཐུན་མོང་ལ་གྲགས་པའི་ས་བཅུ། སྦས་པ་ཐུན་མོང་མ་ཡིན་པ་ལ་གྲགས་པའི་ས་ཕྱེད་དང་བཅུ་གསུམ་པ་སྟེ། རེ་ཤིག་དོན་བསྡུས་པའོ། །དེ་ལ་དབང་བཞིའི་ས་ཚད་བཞག་ན། ས་དྲུག་བུམ་དབང་གི་ས། ས་བཞི་གསང་དབང་གི་ས། ས་གཉིས་ཤེས་རབ་ཡེ་ཤེས་ཀྱི་ས། ས་ཕྱེད་དབང་བཞི་པའི་སའོ། །ས་དང་པོ་ལ་བསྐྱེད་རིམ་བརྟན། གཉིས་པ་ལ་བདག་བྱིན་གྱིས་བརླབས་པ་བརྟན། གསུམ་པ་ལ་ལམ་དཀྱིལ་འཁོར་འཁོར་ལོ་བརྟན། བཞི་པ་ལ་རྡོ་རྗེ་རྦ་རླབས་བརྟན་ནོ། །ཡང་དང་པོ་ལ་ལུས་ཀྱི་དཀྱིལ་འཁོར་ཤར། གཉིས་པ་ལ་བྷ་གའི་དཀྱིལ་འཁོར། གསུམ་པ་ལ་བྱང་ཆུབ་སེམས་ཀྱི་དཀྱིལ་འཁོར། བཞི་པ་ལ་དཀྱིལ་འཁོར་གསུམ་ལམ་དུ་བྱེད་པའི་རླུང་ཇི་ལྟར་གནས་པ་ཤར་རོ། །ཡང་དང་པོ་ལ་སྤྲུལ་སྐུའི་ཞིང་ཁམས་ལ་དབང་། གཉིས་པ་ལ་ལོངས་སྐུའི་ཞིང་ཁམས་ལ་དབང་། གསུམ་པ་ལ་ཆོས་སྐུའི་ཞིང་ཁམས་ལ་དབང་། བཞི་པ་ངོ་བོ་ཉིད་ཀྱི་སྐུའི་ཞིང་ཁམས་ལ་དབང་ངོ་། །རྟགས་ནི་ཕྱི་རྟགས་ཐིག་ལེ་ལ་འཆར། ནང་རྟགས་རླུང་ལ་འཆར། དེ་ཁོ་ན་ཉིད་ཀྱི་རྟགས་སེམས་ལ་འཆར་བ་སྟེ་གཞུང་གི་སྐབས་སུ་འབྱུང་ངོ་། །གསུམ་པ་འབྲས་བུ་སངས་རྒྱས་ཀྱི་ས་ལ། རང་དོན་གྱི་ཆེ་བ་རྟེན་དང་བརྟེན་པ་གནས་གྱུར་གྱི་སྐུ་ལྔ། གཞན་དོན་གྱི་ཆེ་བ་ལོང་བ་རྣམས་ཀྱིས་གཟུགས་མཐོང་བ་སོགས་དུ་མ། རང་གཞན་གཉིས་ཀའི་ཆེ་བ་འཁོར་ཚོམ་བུ་གཅིག་དང་བཅས་ཏེ་འཚང་རྒྱ་བ་རྣམས་ནི་འབྲས་བུའི་སྐབས་ཉིད་དུ་འཆད་པར་འགྱུར་བས་འདིར་མ་བརྗོད་དོ། །དེ་དག་གིས་ནི་བྱུང་བའི་ཆོས་ལ་བཤད་སྒྲུབ་བྱ་བའི་ཚུལ་བཤད་ཟིན་ཏོ།། །།གསུམ་པ་སྒྲུབ་པ་མཐར་ཕྱིན་ནས་གཞན་དོན་བྱ་བའི་ཚུལ་ལ་གཉིས་ཏེ། གཞན་དོན་ལ་འཇུག་པའི་དུས། གཞན་དོན་ཇི་ལྟར་བྱ་བའི་ཚུལ་ལོ། །དང་པོ་ནི་སྒྲུབ་པ་མཐར་ཕྱིན་པ་སྟེ། སྙན་བརྒྱུད་བཞིའི་གདམས་པ་ཐོབ་ནས་བླ་མས་བཀའ་རྒྱས་བཏབ་པ་ཐིམ་པའི་དུས་ཚོད་ལ་སླེབ་པའོ། །གཉིས་པ་ནི་རྣལ་འབྱོར་གྱི་དབང་ཕྱུག་བིརྺ་པའི་དགོངས་པ། དམ་དུ་སྦ་ཞིང་དམ་དུ་སྤེལ་ཞེས་བྱ་བ་ཡིན་པས། དམ་དུ་སྦ་བ་ནི་སློབ་མ་འབྲེལ་མ་བརྟགས་པར་དབང་མི་བསྐུར། དབང་མ་བསྐུར་བར་ཁྲིད་མི་བྱ། ཁྲིད་མ་བྱས་པར་གདམས་ངག་མི་བཤད། གདམས་ངག་མ་ཚང་བར་ལུང་མི་སྦྱིན། ལུང་མ་བྱས་པར་བཀའ་རྒྱས་མི་གདབ་ཅེས་གསུངས་པ་ལྟར་རོ། །དམ་དུ་སྤེལ་བ་ནི་སློབ་མ་འབྲེལ་བརྟགས་ལ་དབང་བསྐུར་བ་ལ་སོགས་པ་སྟེ། རང་ལ་བླ་མས་སྒྲུབ་པའི་ལུང་སྦྱིན་པའི་དུས་སུ་ལུང་པ་འདི་ལྟ་བུ་དང་། གང་ཟག་འདི་ལྟ་བུ་དང་། དུས་ཚོད་འདི་ལྟ་བུ་ལ་ཁྱོད་ཀྱིས་ལེགས་པར་སྟོན་ཅེས་པའི་ལུང་བསྟན་ཡོད་ན་དེའི་དུས་ལ་བབ་པའམ། མེད་ན་དབང་དང་དམ་ཚིག་ཐོབ་ཅིང་སྐལ་བ་དང་ལྡན་པའི་སློབ་མ་ལ་ལེགས་པར་ཤོད་ཅེས་པའི་ལུང་བསྟན་ལྟར་བྱ་བ་སྟེ། བཤད་པའི་ཚུལ་ནི་དབང་པོ་རབ་འབྲིང་གསུམ་དུ་བཀྲི་བའི་ཡིག་ཆ་ནས་འབྱུང་བ་ལྟར། གདུལ་བྱ་གང་དང་གང་ལ་དད་པ་དེ་དང་དེའི་འདོད་པ་བཞིན་དུ་བཤད་པའི་སྒོ་ནས་གདུལ་བྱ་མ་ལུས་པའི་དོན་བྱེད་པའོ། །བླ་མའི་གསུང་རབ་གསེར་གྱི་ཅོད་པཎ་དྲུང་། །བདག་ཚིག་མགལ་དུམ་བསྒྲིགས་པ་འོས་མིན་ཡང་། །དོན་བཟང་ལྷག་པའི་ལྷ་ཡི་གཙུག་རྒྱན་དུ། །ལེགས་གསུང་རིགས་ཀྱི་བདག་པོས་རྒྱས་གདབ་པས། །རྒྱལ་མཚན་རྩེར་མཆོད་ནོར་བུ་ཇི་བཞིན་དུ། །སྒྲུབ་པ་པོ་དང་འཆད་ཅིང་ཉན་རྣམས་ལ། །གནས་སྐབས་མཐར་ཐུག་དགོས་འདོད་འབྱུང་བ་ཡི། །རྟེན་འབྲེལ་བསྒྲིག་ཕྱིར་ཕྱོགས་གཅིག་བསྡེབས་པ་ཡིན། །སྙན་བརྒྱུད་བཞི་ལྡན་གདམས་པའི་རྒྱལ་པོ་ནི། །བདག་འདྲས་ཡི་གེར་འབྲི་བར་འོས་མིན་ཡང་། །དོན་གྱི་ཁོག་བསྒྲིགས་གནད་ཀྱི་གསུང་སྒྲོས་རྣམས། །རང་གི་བློ་ལ་བརྗེད་པ་སྤང་ཕྱིར་བྲིས། །སྣང་བ་གསུམ་དང་བསྐྱེད་རིམ་སེམས་འཛིན་ལས། །གཞན་པའི་དམིགས་པ་བཀླགས་ཆོག་མ་བྱས་པ། །མཁའ་འགྲོ་གཉན་ལ་བདག་ཉིད་གུས་པ་དང་། །གོང་མའི་གསུང་ལ་དོན་གཉེར་འཇུག་ཕྱིར་ཡིན། །འདི་སྦྱར་དགེ་བ་བདུད་རྩིའི་རོལ་མཚོ་དེས། །མར་གྱུར་མཁའ་མཉམ་འགྲོ་བ་མ་ལུས་པ། །མན་ངག་བདུད་རྩིའི་རོ་མཆོག་ལ་བརྟེན་ནས། །འཆི་མེད་གོ་འཕང་མྱུར་དུ་ཐོབ་པར་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །སྐྱོན་མེད་བླ་མ་དམ་པས་རྗེས་བཟུང་ནས། །སྙན་བརྒྱུད་བཞི་དང་རྟག་ཏུ་མི་འབྲལ་ཞིང་། །སྐུ་བཞིའི་གོ་འཕང་མྱུར་དུ་ཐོབ་པར་ཤོག །ལམ་འབྲས་བུ་དང་བཅས་པའི་མན་ངག་གི་བྱུང་ཚུལ་གསུང་ངག་བསྟན་པ་རྒྱས་པའི་ཉི་འོད་ཀྱི་ཁ་སྐོང་འདི་ནི་ལེགས་བཤད་དེའི་ས་ཁོངས། རྗེ་བཙུན་བླ་མ་དེའི་ཐུགས་ཀྱི་དགོངས་པ་འདི་ཙམ་མོ་ཞེས་མཐའ་དཔོག་པར་མི་ནུས་ཀྱང་རང་གི་བློ་ལ་ཤར་བ་ཙམ་ཞིག་རྗེ་བཙུན་བླ་མ་ཡབ་སྲས་ཀྱི་དྲུང་དུ། ཁྲིད་ཡོངས་སུ་རྫོགས་པ་ལན་བདུན་གྱི་བར་དུ་ཞུས་པའི་གནད་ཀྱི་གསུང་སྒྲོས་རྣམས་ཀྱང་བཟུང་། རྗེ་བཙུན་གོང་མའི་གསུང་རབ་རྣམས་ལ་ཡང་འདྲིས་པར་བྱས་ནས། བླ་མ་རྣམས་ཀྱི་བྲན་དུ་གྱུར་པ་དགེ་སློང་བསོད་ནམས་སེང་གེས་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།ཤུ་བྷཾ། དཔལ་ལྡན་བླ་མ་དམ་པའི་ཐུགས་སྲས་མཆོག །དབོན་ཆེན་ལྷ་མཆོག་སེང་གེའི་ཕྱག་དཔེ་རུ། །རིག་གནས་འདི་ལ་སྦྱངས་པའི་བཟོད་ལྡན་པ། །ཤེས་རབ་རྒྱ་མཚོས་ཨེ་ཝཾ་དགོན་པར་བྲིས། །འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །ཇི་ལྟར་མཁའ་ལ་ཉི་ཤར་བཞིན། །རྒྱལ་ཁམས་ཡོངས་ལ་དར་རྒྱས་ཤོག །དགེའོ། །དགེའོ། །དགེའོ།། །།

དཔལ་ཀྱཻ་རྡོ་རྗེའི་མངོན་པར་རྟོགས་པ་མན་ངག་གི་སྣང་བ།

དཔལ་ཀྱཻ་རྡོ་རྗེའི་མངོན་པར་རྟོགས་པ་མན་ངག་གི་སྣང་བ་ཞེས་བྱ་བ་བཞུགས།། དཔལ་ཀྱཻ་རྡོ་རྗེའི་མངོན་པར་རྟོགས་པ་ཚུལ་བཅུ་བཞི་རྣལ་འབྱོར་བཅུས་ཉམས་སུ་ལེན་པའི་ཐབས་གསལ་བར་བཤད་པ་མན་ངག་གི་སྣང་བ་ཞེས་བྱ་བ། རྗེ་བཙུན་བླ་མ་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་གུས་པས་ཕྱག་འཚལ་ལོ། །ཤེས་རབ་ཉི་མས་འཁྱུད་པ་ཡི། །ཐུགས་རྗེའི་ས་འཛིན་ཆེར་མཐོ་བ། །དཔལ་ལྡན་ཀྱཻ་ཡི་རྡོ་རྗེ་དང་། །དབྱེར་མེད་བླ་མ་ལ་བཏུད་ནས། །བཀའ་སྲོལ་རྣམ་བཞིའི་མཆོག་གྱུར་པ། །རྟོགས་པའི་རིམ་པས་བསྐྱེད་རིམ་ཚུལ། །བཅུ་བཞི་རྣལ་འབྱོར་རྣམ་བཅུ་ཡིས། །ཉམས་སུ་ལེན་ཚུལ་གསལ་བར་བྱ། །དེ་ལ་ཀྱཻ་ཡི་རྡོ་རྗེ་ཡི། །མངོན་པར་རྟོགས་པ་རྣམ་གཉིས་ཏེ། །མཉམ་པར་བཞག་པའི་རྣལ་འབྱོར་དང་། །མཉམ་པར་མ་བཞག་རྣལ་འབྱོར་རོ། །མཉམ་བཞག་བསྐྱེད་རྫོགས་གཉིས་ཡིན་ཏེ། །མ་བཞག་ཉལ་དང་ལྡང་དང་ཁྲུས། །མཆོད་གཏོར་བཟླས་དང་ཁ་ཟས་དང་། །སྤྱོད་ལམ་རྗེས་ཆགས་རྣམ་པ་བརྒྱད། །དེ་དག་བཤད་པའི་རིམ་པ་སྟེ། །དོན་གྱི་རིམ་པ་ཉལ་དང་ལྡང་། །ཁྲུས་དང་མཆོད་གཏོར་སྔོན་སོང་ནས། །མཉམ་བཞག་བསྐྱེད་རྫོགས་རྣམ་གཉིས་བསྒོམ། །བསྐྱེད་རིམ་གང་ཟག་རྣམ་བཞི་ལ། །བསྐྱེད་ཆོག་དབྱེ་བས་ཚུལ་བཅུ་བཞི། །རྩ་བཤད་ལས་བྱུང་ཡན་ལག་ནི། །བཞི་དང་དྲུག་གིས་སོ་སོར་འཆིང་། །དེ་ལ་དང་པོའི་ལས་ཅན་གྱིས། །བསྒོམ་བྱ་ཨཱ་ལི་ཀཱ་ལི་ལས། །བྱུང་བའི་མི་མཉམ་སྦྱོར་དང་ནི། །མཉམ་སྦྱོར་གཉིས་ལ་འཁོར་རྣམས་དང་། །འབྲས་བུའི་རྣལ་འབྱོར་ཡོད་མེད་ཀྱི། །དབྱེ་བས་རྒྱས་འབྲིང་གཉིས་གཉིས་བཞི། །འཁོར་གྱི་ལྷ་མོ་འབྱིན་ཚུལ་གྱིས། །བཞི་པོའང་གཉིས་གཉིས་རྣམ་པ་བརྒྱད། །བདེ་བ་ཐོབ་པའི་གང་ཟག་གིས། །བསྒོམ་བྱའི་མངོན་པར་རྟོགས་པ་ནི། །ཨཱ་ལི་ཀཱ་ལི་སྤངས་པ་ཡི། །མི་མཉམ་སྦྱོར་ལ་རྒྱས་འབྲིང་གཉིས། །འཁོར་གྱི་ལྷ་མོ་འབྱིན་ཚུལ་གྱིས། །རེ་རེའང་གཉིས་གཉིས་རྣམ་པ་བཞི། །བདེ་སྟོང་ཉམས་སྐྱེས་གང་ཟག་གིས། །བསྒོམ་བྱ་ས་བོན་ཙམ་ལས་ནི། །རྒྱུ་འབྲས་འཁོར་བཅས་བསྐྱེད་པ་སྟེ། །བདེ་སྟོང་ཆེར་སྐྱེས་གང་ཟག་གིས། །བསྒོམ་བྱའི་མངོན་པར་རྟོགས་པ་ནི། །སྐད་ཅིག་ཙམ་གྱིས་བསྐྱེད་པའོ། །བསྐྱེད་རིམ་བསྒོམ་པའི་ཐུན་སྨད་དུ། །རྫོགས་རིམ་འབྲེལ་མར་བསྒོམ་པ་ནི། །སྔོན་བྱུང་རྣམ་འཕྲུལ་རྗེས་འཇུག་ལ། །སྦྱར་བར་ག་ཡ་དྷ་ར་བཞེད། །དེར་རྗེས་བཟླས་དང་ཁ་ཟས་དང་། །སྤྱོད་ལམ་རྗེས་ཆགས་རྣམ་པ་བཞི། །སྐབས་དང་བསྟུན་ནས་བླང་བྱ་སྟེ། །བཅུ་པོས་ཉིན་མཚན་འདའ་བར་བྱ། །ད་ནི་བཅུ་པོ་རིམ་པ་བཞིན་དུ་བཤད་པར་བྱ་སྟེ། དང་པོ་ཉལ་བའི་རྣལ་འབྱོར་ལ། རང་བཞིན་ལྷན་སྐྱེས་སྟོང་པའི་ངང་ལ་ཉལ་བ་དང་། ཞུ་བདེ་ལྷན་སྐྱེས་བདེ་བའི་ངང་ལ་ཉལ་བ་གཉིས་ལས། དང་པོ་ནི། སྲོད་ཐུན་གྱི་མཇུག་ཏུ་སྙིང་གའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ་བ་ནས་ལྷ་མོ་བརྒྱད་ཞལ་བརྒྱད་ལ་བསྡུ་བའི་བར་བྱས་ལ་ཡུམ་ཡང་ཡབ་ལ་བསྡུ། ཡབ་ཀྱི་ཞལ་ཕྱག་ལྷག་མ་རྣམས་ཀྱང་རྩ་བའི་ཞལ་ཕྱག་ལ་བསྡུ། སྐུ་སྟོད་སྐུ་སྨད་ཀྱང་རིམ་གྱིས་སྙིང་གའི་ཧཱུྃ་ལ་བསྡུ། ཧཱུྃ་ཡང་ཞབས་ཀྱུ་ནས་རིམ་གྱིས་ནཱ་དའི་བར་དུ་བསྡུས་ཏེ། དེ་ཡང་ཇེ་ཕྲ་ཇེ་ཕྲར་བྱས་ནས་མཐར་མི་དམིགས་པའི་ངང་ལ་ཉལ་བར་བྱའོ། །གཉིས་པ་ནི། ལྷ་མོ་བརྒྱད་ཞལ་བརྒྱད་ལ་བསྡུ་བའི་བར་སྔར་དང་འདྲ་ལ། དེ་ནས་ཡབ་ཡུམ་སྙོམས་པར་ཞུགས་པའི་རྐྱེན་གྱིས་འོད་དུ་ཞུ་ནས་ཐིག་ལེའི་གོང་བུར་གྱུར་པ་ལ་བློ་གཏད་དེ་ཉལ་བར་བྱའོ། །འདི་ལ་བར་ཆད་བསྲུང་བའི་ཆེད་དུ་སྲུང་བའི་འཁོར་ལོ་མི་བསྡུ་ཞེས་གསུང་ངོ་། །གཉིས་པ་ལྡང་བའི་རྣལ་འབྱོར་ལ་གཉིས་ལས། ཉལ་ལུགས་དང་པོ་ལྟར་ན་ཐོ་རངས་ཆུ་ལས་ཉ་འཕར་གྱི་ཚུལ་དུ་སྐད་ཅིག་ཙམ་གྱིས་ལྷག་པའི་ལྷར་བཞེངས་པར་བྱའོ། །ཉལ་ལུགས་གཉིས་པ་ལྟར་ན། རང་བཞིན་གྱི་གནས་ནས་འོངས་པའི་ལྷ་མོ་བཞིས། རྗེ་བཙུན་སྙིང་རྗེའི་ཡིད་བཞེངས་ཤིག །ཞེས་སོགས་ཀྱིས་བསྐུལ་བས་ཐིག་ལེ་ལས་ཐིག་ལེ་ཆ་གཉིས་སུ་ཆད་དེ་ཧཱུྃ་དང་ཨཾ་ལས་ལྷག་པའི་ལྷར་བཞེངས་ཏེ་སྣོད་བཅུད་དག་པའི་སྣང་བར་བལྟ་བར་བྱའོ། །དེ་ནས་རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད། བསྔོ་བ་སྨོན་ལམ་བྱ་སྟེ་འདིས་སྲོད་ཐུན་རྫོགས་སོ།། །།གསུམ་པ་ཁྲུས་ཀྱི་རྣལ་འབྱོར་ནི། བསམ་གཏན་གྱི་གྲོགས་སུ་འགྲོ་ན་བྱ། མི་འགྲོ་ན་མི་དགོས་ཤིང་བྱེད་ན་ཐོ་རངས་སམ་གནས་སྐབས་གཞན་དུ་ཡང་རུང་སྟེ་རང་གི་སྙིང་གའི་ས་བོན་གྱི་འོད་ཀྱིས་གདན་གསུམ་ཚང་བའི་ལྷ་ཚོགས་མདུན་གྱི་ནམ་མཁར་སྤྱན་དྲངས་ཏེ་མཆོད་པ་དང་། བསྟོད་པ་དང་། གསོལ་བ་གདབ་པ་འོག་དབང་གི་སྐབས་ལྟར་བྱས་ནས་རིགས་ལྔས་བུམ་པའི་ཆུས་སྤྱི་བོ་ནས་དབང་བསྐུར། རིག་མ་རྣམས་ཀྱིས་རྡོ་རྗེའི་གླུ་ལེན། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། ཁྲོ་བོ་རྣམས་ཀྱིས་བགེགས་བསྐྲད། ལྷ་མོ་དྲུག་གིས་མཆོད་པར་བསམ་ཞིང་དངོས་སུ་ཁྲུས་བྱ། དེའི་ཚེ་དབང་གི་ཆུ་རྒྱུན་གཅིག་ལ་དབང་བཞི་ཐོབ་པར་བསམ་ཞིང་། སྒྲུབ་པའི་ཆོ་ག་བསྲེ་བ་དང་རིགས་བདག་བསམ་པ་ནི་མི་དགོས་སོ།། །།བཞི་པ་མཆོད་གཏོར་གྱི་རྣལ་འབྱོར་ནི་བསོད་ནམ་ཀྱི་ཚོགས་བསག་རྒྱས་པ་སྟེ་གཞན་དུ་བཤད་པ་ལས་ཤེས་པར་བྱའོ།། །།ལྔ་པ་བསྐྱེད་པའི་རིམ་པ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་གཉིས་ཏེ། ཐུན་མོང་གི་སྔོན་འགྲོ་དང་། ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། ཐོ་རངས་ཀྱི་ཐུན་ལ་མཆོད་གཏོར་གྱི་རྗེས་སུ་ནི་ཚོགས་ཞིང་སྤྱན་འདྲེན་པ་ནས་འཇུག་པས་ཆོག་ལ། ཐུན་གཞན་དུ་ནི་འདི་དག་ངེས་པར་བྱ་སྟེ། སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་ཁ་ཤར་ཕྱོགས་སུ་བལྟས་ཏེ་འདུག་ལ། སྐྱབས་འགྲོའི་ཡུལ་རྣམས་མངོན་སུམ་དུ་དམིགས་ཏེ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་ཅི་ནུས་སུ་བྱ། བླ་མ་དང་དཀོན་མཆོག་རིན་པོ་ཆེ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་དཀོན་མཆོག་གསུམ་འོད་དུ་ཞུ་ནས་རང་ལ་ཐིམ་པར་བསམ་མོ། །དེ་ནས། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ཞེས་ལན་གསུམ་བརྗོད་དོ། །དེ་ནས་རང་གི་སྤྱི་བོར་པདྨ་དང་ཟླ་བའི་སྟེང་དུ། སྐད་ཅིག་གིས་བཅོམ་ལྡན་འདས་རྡོ་རྗེ་སེམས་དཔའ་ཧེ་རུ་ཀ་སྐུ་མདོག་དཀར་པོ། ཞལ་གཅིག་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། རུས་པའི་རྒྱན་དྲུག་གིས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་པང་དུ་ཡུམ་རྡོ་རྗེ་སྙེམས་མ་སྐུ་མདོག་དཀར་མོ་གྲི་གུག་དང་ཐོད་པ་འཛིན་པ། ཕྱག་རྒྱ་ལྔས་བརྒྱན་པ་དང་སྙོམས་པར་སྦྱོར་བ་བསྒོམས་ལ། ཡབ་ཀྱི་ཐུགས་ཀར་ཟླ་བའི་སྟེང་དུ་ཧཱུྃ་དཀར་པོ་དེ་ལས་འོད་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ནས་ཧཱུྃ་ལ་ཐིམ། བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱི་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས་ཧཱུྃ་ལས་བདུད་རྩི་བབས། ཧེ་རུ་ཀའི་སྐུ་གང་། དེ་ནས་དབྱིབས་བརྒྱུད། ཡུམ་གྱི་སྐུ་གང་། ཡབ་ཡུམ་གྱི་སྦྱོར་མཚམས་ནས་བདུད་རྩི་བབས། བདག་གི་སྤྱི་གཙུག་ནས་ཞུགས་པས་ནད་གདོན་སྡིག་སྒྲིབ་ཐམས་ཅད་དུད་ཁུའམ་རྣག་ཁྲག་གི་རྣམ་པས་བཤང་གཅི་གཉིས་དང་། རྐང་མཐིལ་གཉིས་ནས་ཐོན་ནས་ཤུལ་ཐམས་ཅད་བདུད་རྩིས་གང་བར་བསམས་ལ་ངག་ཏུ། ཨོཾ་ཤྲཱི་བཛྲ་ཧེ་རུ་ཀ་ས་མཱ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ་དྲི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ན། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾ་ཀུ་རུ་ཧཱུྃ་ཧ་ཧ་ཧ་ཧ་ཧོཿབྷ་ག་ཝཱན་བཛྲ་ཧེ་རུ་ཀ མཱ་མེ་མུཉྩ་ཧེ་རུ་ཀོ྅་བྷ་ཝ་མ་ཧཱ་ས་མ་ཡ་སཏྭ་ཨཱཿཧཱུྃ་ཕཊ། ཞེས་ལན་ཉི་ཤུ་རྩ་གཅིག་ཡན་ཆད་ཅི་ནུས་བཟླས་ལ་རྡོ་རྗེ་ཐལ་མོ་སྙིང་གར་སྦྱར་ལ། བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་པ་དང་ལྟུང་བ་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་གདབ། དེ་ནས་བཅོམ་ལྡན་འདས་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་སྤྱི་བོ་ནས་རང་ལ་ཐིམ་པས་རང་གི་ལུས་ཤེལ་སྒོང་དག་པ་ལྟར་གྱུར་པར་བསམ། གཉིས་པ་ལ་གསུམ་སྟེ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ལ་གཉིས་ཏེ། ཡུལ་དག་པ་ལ་བརྟེན་པའི་ཚོགས་བསག མ་དག་པ་ལ་བརྟེན་པའི་ཚོགས་བསག་གོ། །།དང་པོ་ནི། རང་སྐད་ཅིག་གིས་ཀྱཻ་རྡོ་རྗེར་གསལ་བའི་ཐུགས་ཀར་ཡན་ལག་དྲུག་པ་ལྟར་ན་པཾ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་སྟེང་དུ་སེམས་གཟུང་འཛིན་གཉིས་དང་བྲལ་བའི་ཧཱུྃ་སྔོན་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཀྱཻ་རྡོ་རྗེ་ལྷ་དགུའི་དཀྱིལ་འཁོར་གྱི་ལྷ་ཚོགས་ལ། བླ་མ་མི་བསྐྱོད་པའི་རྣམ་པས་གཙོ་བོའི་དབུ་ལ་བརྒྱན་པ་ཞེས་དང་། ཡན་ལག་བཞི་པ་ལྟར་ན། རཾ་ལས་ཉི་མའི་དཀྱིལ་འཁོར་གྱི་སྟེང་དུ་སེམས་གཟུང་འཛིན་གཉིས་དང་བྲལ་བའི་ཧཱུྃ་སྔོན་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཀྱཻ་རྡོ་རྗེ་ལྷ་དགུའི་དཀྱིལ་འཁོར་བླ་མ་དང་དཀྱིལ་འཁོར་གྱི་གཙོ་བོ་ཐ་དད་མེད་པ་ཨོཾ་བཛྲ་ས་མཱ་ཛཿ ཞེས་བརྗོད་པས་སྤྱན་དྲངས། ན་མོ་གུ་རུ་བྷྱཿཞེས་པས་བླ་མ་དང་། ན་མཿཤྲཱི་ཧེ་བཛྲ་མཎྜལ་ས་པ་རི་ཝཱ་ར་བྷྱཿཞེས་པས་ཡི་དམ་ལ་ཕྱག་བྱ། དེ་ནས་རང་གི་སྙིང་གའི་ཧཱུྃ་ལས་ལྷ་མོ་རྣམས་སྤྲོས་ཏེ་མཆོད་པར་བསམས་ལ། རྡོ་རྗེ་ཐལ་མོ་སྙིང་གར་སྦྱར་ཏེ་ངག་ཏུ། ནམ་མཁར་རྗེ་བཙུན་བལྟས་ནས་ནི། །རྡོ་རྗེ་སྐྱེ་བ་སྙིང་རྗེ་ཆེ། །རྒྱན་རྣམས་ཐམས་ཅད་འཛིན་པ་ཡི། །ལྷ་མོ་བརྒྱད་པོ་རྣམས་ཀྱིས་མཆོད། །དཀར་མོ་རི་དྭགས་མཚན་མ་འཛིན། །ཆོམ་རྐུན་བདུད་ལས་རྒྱལ་བའི་སྣོད། །རོ་ལངས་མ་ནི་ཆུ་ལག་མ། །གྷསྨ་རཱི་ནི་སྨན་འཛིན་ཅིང་། །པུཀྐ་སཱི་ནི་རྡོ་རྗེའི་ལག །དེ་བཞིན་རི་ཁྲོད་མ་རོ་འཛིན། །གདོལ་པ་མོ་ནི་ཅང་ཏེའུ་བརྡུང་། །འདི་རྣམས་ཀྱིས་ནི་གཙོ་བོར་མཆོད། །འདོད་ཆགས་ཆེན་པོས་རྗེས་ཆགས་པ། །གཡུང་མོས་སྐུ་ལ་འཁྱུད་པ་ཉིད། །ཅེས་བརྗོད། དེ་ནས་ཡན་ལག་དྲུག་པ་ལྟར་ན། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཞེས་ལན་གསུམ་བརྗོད། བཞི་པ་ལྟར་ན། བདག་གིས་ཐོག་མ་མེད་པའི་འཁོར་བ་ནས་སྡིག་པ་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བ་དེ་དག་ཐམས་ཅད་སོ་སོར་བཅོམ་ལྡན་འདས་ཀྱི་སྤྱན་སྔར་བཤགས་ཤིང་ཡང་མི་བགྱིད་དོ། །སོ་སོའི་སྐྱེ་བོ་དང་། འཕགས་པ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་དགེ་བ་དེ་རྣམས་ལ་དགའ་ཞིང་རྗེས་སུ་ཡི་རང་བར་བགྱིའོ། །བདག་གིས་དེ་ལྟར་བགྱིས་པའི་དགེ་བའི་རྩ་བ་འདིས་བདག་དང་སེམས་ཅན་ཐམས་ཅད་རྫོགས་པའི་བྱང་ཆུབ་ཕྱག་རྒྱ་ཆེན་པོ་མཆོག་གི་དངོས་གྲུབ་སྙིང་པོ་ཀྱཻ་རྡོ་རྗེའི་གོ་འཕང་ཐོབ་པར་གྱུར་ཅིག བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་ཀྱཻ་རྡོ་རྗེའི་གོ་འཕང་མ་ཐོབ་ཀྱི་བར་དུ་ཡུལ་ཐུན་མོང་མ་ཡིན་པ་དཀོན་མཆོག་གསུམ་ལ་སྐྱབས་སུ་མཆིའོ། །སྣང་གྲགས་ཀྱི་ཆོས་ཐམས་ཅད་རང་བཞིན་གྱིས་མ་གྲུབ་པ་ཡིན་པ་ལ་དེ་ལྟར་མ་རྟོགས་པའི་སེམས་ཅན་རྣམས་སྙིང་རེ་རྗེ། དེ་ཐམས་ཅད་ཀྱི་དོན་དུ་མཚན་མ་ཐམས་ཅད་དང་བྲལ་བའི་དོན་དམ་པ་བྱང་ཆུབ་ཀྱི་སེམས་བསྒོམ་པར་བགྱིའོ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །ཞེས་ལན་གསུམ་བརྗོད། དེ་ནས་མཆོད་གཏོར་གྱི་རྣལ་འབྱོར་སྔོན་དུ་མ་སོང་ན་སྐབས་འདིར་རིགས་ལྔའི་སྡོམ་གཟུང་བྱ་ཞིང་སྔོན་དུ་སོང་ན་མི་དགོས་སོ། །གཉིས་པ་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཚད་མེད་པ་བཞི་བསྒོམ་མོ། །གཉིས་པ་ནི་ཆོས་ཐམས་ཅད་རང་བཞིན་གྱིས་མ་གྲུབ་པའི་སྟོང་པ་ཉིད་བསྒོམས་ནས་སྔགས་འདིས་བྱིན་གྱིས་བརླབ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དོ། །གསུམ་པ་སྲུང་འཁོར་བསྒོམ་པ་ནི། སྟོང་པའི་ངང་ལས་པཾ་ལས་པདྨ། རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ནག་ལ་ཧཱུྃ་གིས་མཚན་པ། ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་འོག་རྡོ་རྗེའི་ས་གཞི། ཁོར་ཡུག་རྡོ་རྗེའི་རྭ་བ། སྟེང་རྡོ་རྗེའི་གུར། ཕྱི་རོལ་ཐམས་ཅད་ཡེ་ཤེས་ཀྱི་མེ་རབ་ཏུ་འབར་བས་གང་བར་གྱུར། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ལན་གསུམ་བརྗོད་དོ། །དེ་ནས་སྣ་ཚོགས་རྡོ་རྗེའི་ལྟེ་བར་པཾ་ལས་པདྨ་དང་། རཾ་ལས་ཉི་མའི་དཀྱིལ་འཁོར་གྱི་སྟེང་དུ་བྷཱུྃ་སེར་པོ་ལས་འཁོར་ལོ་སེར་པོ་རྩིབས་བཅུ་པ། རྩེ་མོ་རྣོ་བ། ཁོག་པ་སྟོང་པ། ཡངས་ཤིང་རྒྱ་ཆེ་བ་གོ་སྐབས་མེད་པར་གྱུར། ཨོཾ་བཛྲ་ཙཀྲ་རཀྵ་ཧཱུྃ་བྷྲཱུྃ་ཧཱུྃ། ལན་གསུམ་གྱིས་བྱིན་གྱིས་བརླབས། འཁོར་ལོའི་ནང་གི་དབུས་དང་ཕྱོགས་བཅུར་པདྨ་དང་ཉི་མའི་དཀྱིལ་འཁོར་རེ་རེ། དེ་རྣམས་ཀྱི་སྟེང་དུ་ཧཱུྃ་རེ་རེ། དེ་ཡང་ལྷོའི་དཀར་པོ། ནུབ་ཀྱི་དམར་པོ། སྟེང་གི་སེར་པོ། གཞན་ཐམས་ཅད་སྔོན་པོ། དེ་ཐམས་ཅད་སོ་སོའི་གནས་སུ་ཡོངས་སུ་གྱུར་པ་ལས། དབུས་སུ་རང་ཉིད་ཧཱུྃ་མཛད་སྔོན་པོ་རྡོ་རྗེ་དང་དྲིལ་བུ་རང་གི་ཕྱག་རྒྱས་ཐུགས་ཀར་བསྣོལ་ནས་འཛིན་པ། ཤར་དུ་གཤིན་རྗེའི་གཤེད་སྔོན་པོ་ཐོ་བ་འཛིན་པ། ལྷོར་ཤེས་རབ་མཐར་བྱེད་དཀར་པོ་བེ་ཅོན་འཛིན་པ། ནུབ་ཏུ་པདྨ་མཐར་བྱེད་དམར་པོ་པདྨ་འཛིན་པ། བྱང་དུ་བགེགས་མཐར་བྱེད་སྔོན་པོ་རྡོ་རྗེ་འཛིན་པ། བྱང་ཤར་དུ་མི་གཡོ་བ་སྔོན་པོ་རལ་གྲི་འཛིན་པ། ཤར་ལྷོར་འདོད་པའི་རྒྱལ་པོ་སྔོན་པོ་ལྕགས་ཀྱུ་འཛིན་པ། ལྷོ་ནུབ་ཏུ་དབྱུག་སྔོན་ཅན་སྔོན་པོ་དབྱུག་པ་འཛིན་པ། ནུབ་བྱང་དུ་སྟོབས་པོ་ཆེ་སྔོན་པོ་རྩེ་གསུམ་འཛིན་པ། སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་འཁོར་ལོ་འཛིན་པ། འོག་ཏུ་གནོད་མཛེས་སྔོན་པོ་གཏུན་ཤིང་འཛིན་པ། ཧཱུྃ་མཛད་མ་ཡིན་པ་གཞན་ཐམས་ཅད་ཕྱག་གཡས་པས་རང་རང་གི་ཕྱག་མཚན་འཕྱར་བའི་ཚུལ་གྱིས་འཛིན་ཅིང་གཡོན་པས་ཐུགས་ཀར་སྡིགས་མཛུབ་མཛད་པ། སྟེང་དང་ཕྱོགས་བཞིའི་ཁྲོ་བོ་རྣམས་བརྗིད་པའི་ཁྲོ་བོ་སྟེ། སྤྱན་གསུམ་དམར་ལ་ཟླུམ་ཞིང་བགྲད་པ། གསུས་ཁྱིམ་ཆེ་བ། སྟག་གི་པགས་པའི་ཤམ་ཐབས་ཅན། སྦྲུལ་གྱིས་བརྒྱན་པ། སྨ་ར་དང་སྨིན་མ་དང་། དབུ་སྐྲ་སེར་པོ་གྱེན་དུ་བརྫེས་པ་ཁྲོ་བོ་གཞན་རྣམས་ནི་མཛེས་པའི་ཁྲོ་བོ་སྟེ། ཅུང་ཟད་སྒེག་པ། ཡིད་ཙམ་ཁྲོས་པ། སྐུ་སྐེམས་ཤིང་གྲིམ་པ། དབུ་སྐྲ་ནག་པོ་དར་སྣ་ཚོགས་ཀྱི་ཤམ་ཐབས་ཅན། རིན་པོ་ཆེའི་རྒྱན་གྱིས་བརྒྱན་པ་ཐམས་ཅད་ཀྱང་ཡེ་ཤེས་ཀྱི་མེ་འབར་བའི་དབུས་ན་ཞབས་གཡོན་བརྐྱང་གི་སྟབས་ཀྱིས་བཞུགས་པའི་མིག་ཏུ་གཏི་མུག་རྡོ་རྗེ་མ་ཞེས་སོགས་སྐྱེ་མཆེད་དང་སྐུ་གསུང་ཐུགས་བྱིན་གྱིས་རླབས། རང་གི་སྙིང་གའི་ཧཱུྃ་ལས་འོད་འཕྲོས་པས་རང་བཞིན་གྱི་གནས་ནས་ཁྲོ་བོ་བཅུ་གཅིག་སྲུང་བའི་འཁོར་ལོ་དང་བཅས་པ་ལ་ཡེ་ཤེས་ཀྱི་ཁྲོ་བོའི་ཚོགས་དཔག་ཏུ་མེད་པས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས། ཆུ་བཞི་སྔོན་དུ་འགྲོ་བའི་ཉེར་སྤྱོད་དམ། ལྷ་མོ་བརྒྱད་ཀྱིས་མཆོད། ལྷ་མོ་བཞིའི་སྔགས་རྒྱས་དགུག་བཅིང་དབང་དུ་བྱའོ། །ཡང་སྙིང་གའི་ཧཱུྃ་ལས་འོད་འཕྲོས་པས་དབང་གི་ལྷ་རིགས་ལྔ་འཁོར་བཅས་སྤྱན་དྲངས་སྔར་བཞིན་མཆོད། ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས་ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག ཆུ་ལྷག་མ་ཡར་ལུད་པ་ལས། གཤིན་རྗེའི་གཤེད་ལ་རྣམ་པར་སྣང་མཛད། པདྨ་མཐར་བྱེད་ལ་འོད་དཔག་མེད། གཞན་ཐམས་ཅད་ལ་མི་བསྐྱོད་པས་དབུར་བརྒྱན། དེ་ནས་འཁོར་ལོ་གཡས་སུ་འཁོར་བར་བསམ་ཞིང་། ཁྲོ་བོ་དང་སྲུང་བའི་འཁོར་ལོ་ལས་མེ་འོད་ཕྱོགས་བཅུར་འཕྲོས་པས་རྣལ་འབྱོར་བསྒོམ་པ་ལ་བར་དུ་གཅོད་པར་བྱེད་པའི་བགེགས་དང་ལོག་པར་འདྲེན་པ་ཐམས་ཅད་རྒྱང་རིང་དུ་བསྐྲད་ཅིང་ཤུལ་ཐམས་ཅད་མེ་ལྕེས་ཁྱབ་པར་བསམས་ལ་ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ལན་གསུམ་གྱིས་བརྟན་པར་བྱའོ། །འདི་ནི་སྒྲུབ་ཐབས་ཀྱི་སྔོན་འགྲོ་རང་བསྲུང་བའི་སྲུང་འཁོར་ཡིན་ལ། གནོད་པ་ཕྱིར་བཟློག་བསྒོམ་པར་འདོད་ན་གཙུག་ཏོར་འཁོར་ལོས་སྒྱུར་བ་དབུས་སུ་བསྒོམ་པ་གཙོ་བོ་གོ་འཕོའི་གནད་ལ་སོགས་པ་གནད་ལྔའི་སྒོ་ནས་ཉམས་སུ་ལེན་དགོས་པས་གཞན་དུ་ཤེས་པར་བྱའོ། །ཐུན་མོང་མ་ཡིན་པའི་སྲུང་འཁོར་ནི་སྤྲོ་ན་བསྒོམ་པ་ཡིན་གྱི་མ་བསྒོམས་ཀྱང་ཆོ་ག་ཆད་པའི་སྐྱོན་ནི་མེད་དོ། །གཉིས་པ་དངོས་གཞི་ལ་ཡན་ལག་དྲུག་པ་ལྟར་ན་དྲུག་སྟེ། གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག དབང་བསྐུར་བ་མི་བསྐྱོད་པའི་ཡན་ལག བདུད་རྩི་མྱང་བ་འོད་དཔག་མེད་ཀྱི་ཡན་ལག མཆོད་པ་དོན་ཡོད་གྲུབ་པའི་ཡན་ལག བསྟོད་པ་རིན་ཆེན་འབྱུང་ལྡན་གྱི་ཡན་ལག ཡན་ལག་བཞི་པ་ལྟར་ན་རྟེན་བསྐྱེད་པ་དང་། བརྟེན་པ་བསྐྱེད་པ་གཉིས་ལས། གང་ལྟར་ཡང་དང་པོ་ནི། རང་ཉིད་ཧཱུྃ་མཛད་འོད་དུ་ཞུ་བ་ལས་གཞིའི་ཡན་ལག་ཨེ་ལས་ཆོས་ཀྱི་འབྱུང་གནས་གྲུ་གསུམ་པ་ཕྱི་དཀར་ལ་ནང་དམར་བ་གདེངས་ཀ་ཆེ་བ་གྱེན་དུ་བསྟན་པ། རྩ་བ་ཕྲ་བ་ཐུར་དུ་ཟུག་པ། ཡན་ལག་དྲུག་པ་ལྟར་ན་དེའི་ནང་དུ་རྒྱུའི་ཡན་ལག ཡཾ་ལས་རླུང་གི་དཀྱིལ་འཁོར་སྔོན་པོ་གཞུ་བདུངས་པ་ལྟ་བུ། ཆང་ཟུང་དང་མཆོག་མ་ལ་ཡཾ་དང་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རཾ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པ་ལ་ཨཱཿས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་ཕྱེད་པ་དང་ལྟེ་བ་ལ་ལཾ་གྱིས་མཚན་པ། དེའི་སྟེང་དུ་བྷཱུྃ་ལས་འཁོར་ལོ་སེར་པོ་རྩིབས་བཅུ་པ་བྷཱུྃ་གྱིས་མཚན་པ། དེའི་སྟེང་གི་བར་སྣང་དུ་རྐྱེན་གྱི་ཡན་ལག་ཨོཾ་ཨཱཿཧཱུྃ་ཧོཿདམར་པོ་གཉིས་ཀྱིས་མཐའ་བརྟན་པའི་བར་དོའི་རྣམ་པར་ཤེས་པ། དེ་ལས་དེ་འདྲ་བའི་སེམས་ཀྱི་སྣང་བ་ཆ་གཅིག་ཆད་པ་འབྱུང་བཞི་འཁོར་ལོ་དང་བཅས་པ་ལ་ཐིམ། དེ་རྣམས་རོ་གཅིག་ཏུ་འདྲེས་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་ཞེས་སོགས་གསལ་གདབ། མངོན་བྱང་གི་ཡན་ལག་བཞི་པ་ལྟར་ན་དེའི་ནང་དུ་རྒྱུའི་ཡན་ལག་ལཾ་ལས་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་ཕྱེད་པ་དང་ལྟེ་བ་ལ་ལཾ་གྱིས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པ་ལ་ཨས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རཾ་གྱིས་མཚན་པ། དེའི་སྟེང་དུ་ཡཾ་ལས་རླུང་གི་དཀྱིལ་འཁོར་སྔོན་པོ་གཞུ་བདུངས་པ་ལྟ་བུ་ཆང་ཟུང་དང་མཆོག་མ་ལ་ཡཾ་དང་བ་དན་གྱིས་མཚན་པ། དེ་རྣམས་དང་རང་གི་སེམས་སྣང་རོ་གཅིག་ཏུ་འདྲེས་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་ཞེས་སོགས་གསལ་གདབ། ས་བོན་ལས་བསྐྱེད་པ་དང་སྐད་ཅིག་གིས་བསྐྱེད་པའི་ཡན་ལག་བཞི་པ་ལྟར་ན། དེའི་ནང་དུ་སྐད་ཅིག་གིས་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་ནག་པོ། ལྗང་གུ། དམར་པོ། སེར་པོ། དཀར་པོའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་སེར་པོ་ལ་དྲྭ་བ་དང་དྲྭ་བ་ཕྱེད་པ་འཕྱང་བ། དེའི་སྟེང་དུ་རིན་པོ་ཆེའི་མདའ་ཡབ་དང་པུ་ཤུས་བརྒྱན་པ། རྩིག་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་མཆོད་པའི་ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་བཅོམ་ལྡན་འདས་ལ་མཆོད་པ། ནང་ཀ་བ་བརྒྱད་དང་ལྡན་པ། སྟེང་རྡོ་རྗེའི་གདུང་བཞིས་མིག་མང་རིས་སུ་བྲེས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་པའི་སྟེང་དུ་རྡོ་རྗེ་དང་རིན་པོ་ཆེའི་རྟོག་གིས་བརྒྱན་པ། སྒོ་བཞིའི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་ལྡན་པའི་སྟེང་དུ་པདྨ་ལ་གནས་པའི་ཆོས་ཀྱི་འཁོར་ལོ་དང་། གདུགས་དང་། རི་དྭགས་དང་བཅས་པ་གཞན་ཡང་གོས་དང་། འཕན་དང་། མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་བརྒྱན་པའི་གཞལ་ཡས་ཁང་དུ་གྱུར། དེའི་ཕྱི་རོལ་དུ་དུར་ཁྲོད་ཆེན་པོ་བརྒྱད་ནི། ཤར་དུ་གཏུམ་དྲག་གི་དུར་ཁྲོད། ལྷོར་འཇིགས་བྱེད་ཐོད་པ་ཅན། ནུབ་ཏུ་འབར་བའི་ཕྲེང་བས་བརྒྱན་པ། བྱང་དུ་ཚང་ཚིང་འཁྲིགས་པ། བྱང་ཤར་དུ་དྲག་ཏུ་དགོད་པ། ཤར་ལྷོར་དབང་ཕྱུག་ནགས་ཚལ། ལྷོ་ནུབ་ཏུ་འཇིགས་བྱེད་མུན་པ། ནུབ་བྱང་དུ་ཀི་ལི་ཀི་ལའི་སྒྲ་སྒྲོགས་པ། དེ་དག་ལ་གནས་པའི་ཤིང་ཆེན་པོ་བརྒྱད་ནི་ཤར་དུ་ཤི་རི་ཤ ལྷོར་ཙུ་ཏ། ནུབ་ཏུ་ཀཾ་ཀ་ལ། བྱང་དུ་ཨ་ཤྭཏྠ། བྱང་ཤར་དུ་ཤིང་ཆེན་པོ། ཤར་ལྷོར་ཀ་རན་ཛ། ལྷོ་ནུབ་ཏུ་འཁྲི་ཤིང་ཅན། ནུབ་བྱང་དུ་ཨརྫུ་ན་རྣམས་སོ། །ཤིང་དེ་དག་གི་རྩ་བ་ན་གནས་པའི་ཕྱོགས་སྐྱོང་བརྒྱད་ནི། ཤར་དུ་བརྒྱ་བྱིན་སེར་པོ་གླང་པོ་ཆེ་ལ་ཞོན་པ་ཕྱག་གཡོན་ན་རྡོ་རྗེས་མཚན་པའི་ཐོད་པ་འཛིན་པ། ལྷོར་གཤིན་རྗེ་སྔོན་པོ་མ་ཧེ་ལ་ཞོན་པ་གཡོན་ཐོད་པ་དང་བེ་ཅོན་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་པ་གཡོན་ཐོད་པ་དང་ཞགས་པ་འཛིན་པ། བྱང་དུ་གནོད་སྦྱིན་སེར་པོ་རྟ་ལ་ཞོན་པ་གཡོན་ཐོད་པ་དང་དབྱུག་པ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ་གཡོན་ཐོད་པ་དང་མདུང་འཛིན་པ། ཤར་ལྷོར་མེ་ལྷ་དམར་པོ་ར་སྐྱེས་ལ་ཞོན་པ་ཞལ་གཅིག་པ་ཕྱག་བཞིའི་གཡས་གཉིས་ན་དབྱུག་གུ་དང་ཐོད་པ། གཡོན་གཉིས་ན་སྤྱི་བླུགས་དང་ཕྲེང་བ་འཛིན་པ། ལྷོ་ནུབ་ཏུ་སྲིན་པོ་ནག་པོ་རོ་ལངས་ལ་ཞོན་པ་གཡོན་ན་ཐོད་པ་དང་རལ་གྲི་འཛིན་པ། ནུབ་བྱང་དུ་རླུང་ལྷ་སྔོན་པོ་རི་དྭགས་ལ་ཞོན་པ་གཡོན་ཐོད་པ་དང་བ་དན་འཛིན་པ། ཐམས་ཅད་ཀྱང་ཕྱག་གཡས་ཀྱིས་བཅོམ་ལྡན་འདས་ལ་ཕྱག་འཚལ་བའོ། །དེ་དག་གི་ནམ་མཁར་གནས་པའི་སྤྲིན་ཆེན་པོ་བརྒྱད་ནི་ཤར་དུ་སྒྲོགས་བྱེད་སེར་པོ། ལྷོར་ལྡོག་བྱེད་སྔོན་པོ། ནུབ་ཏུ་འཇིགས་བྱེད་དཀར་པོ། བྱང་དུ་འཁོར་བྱེད་སེར་པོ། བྱང་ཤར་དུ་མཐུག་པོ་དཀར་པོ། ཤར་ལྷོར་འགེངས་བྱེད་དམར་པོ། ལྷོ་ནུབ་ཏུ་ཆར་འབེབས་སྔོན་པོ། ནུབ་བྱང་དུ་གཏུམ་པོ་སྔོན་པོའོ། །དེ་དག་ལ་གནས་པའི་ཀླུ་ཆེན་པོ་བརྒྱད་ནི། ཤར་དུ་ནོར་རྒྱས་སེར་པོ། ལྷོར་པདྨ་དཀར་པོ། ནུབ་ཏུ་ཀརྐོ་ཊ་ནག་པོ། བྱང་དུ་འཇོག་པོ་དམར་པོ། བྱང་ཤར་དུ་པདྨ་ཆེན་པོ་དཀར་པོ། ཤར་ལྷོར་ཧུ་ལུན་ཏ་སྔོན་པོ། ལྷོ་ནུབ་ཏུ་རིགས་ལྡན་ལྗང་གུ། ནུབ་བྱང་དུ་དུང་སྐྱོང་སེར་པོ། ཐམས་ཅད་ཀྱང་སྦྲུལ་མགོའི་གདེངས་ཀ་བདུན་བདུན་དང་ལྡན་ཞིང་། སྨད་སྦྲུལ་མཇུག་འཁྱིལ་བ། སྟོད་ལྷའི་ལུས་ཅན་ཐལ་མོ་སྦྱར་བའོ། །ཤིང་གི་ཡལ་ག་ལ་གནས་པའི་ཞིང་སྐྱོང་བ་བརྒྱད་ནི། ཤར་དུ་ལྷའི་དགེ་འདུན་དཀར་པོ་གླང་པོ་ཆེའི་གདོང་པ་ཅན། ལྷོར་གཤིན་རྗེ་སྔོན་པོ་མ་ཧེའི་གདོང་པ་ཅན། ནུབ་ཏུ་སྤྲིན་གྱི་རྒྱལ་པོ་དམར་པོ་ཆུ་སྲིན་གྱི་གདོང་པ་ཅན། བྱང་དུ་གནོད་སྦྱིན་གྱི་སྡེ་དཔོན་སེར་པོ་རྟའི་གདོང་པ་ཅན། བྱང་ཤར་དུ་ཡི་དྭགས་འདུས་པ་དུད་ཁ་གླང་གི་གདོང་པ་ཅན། ཤར་ལྷོར་དྲང་སྲོང་འདུས་པ་དམར་པོ་ར་སྐྱེས་ཀྱི་གདོང་པ་ཅན། ལྷོ་ནུབ་ཏུ་སྲིན་པོའི་ཚོགས་ཅན་ནག་པོ་རོ་ལངས་ཀྱི་གདོང་པ་ཅན། ནུབ་བྱང་དུ་རླུང་གི་རྒྱལ་པོ་ལྗང་གུ་རི་དྭགས་ཀྱི་གདོང་པ་ཅན། ཐམས་ཅད་ཀྱང་ཤིང་ལོའི་གསེབ་ནས་སྙིང་ཁ་ཡན་ཆད་འཐོན་པ། གྲི་གུག་དང་ཐོད་པ་འཛིན་པའོ། །གཞན་ཡང་རོ་མགོ་བོ་བཅད་པ་དང་། དཔྱངས་པ་དང་། བསྙལ་བ་དང་། གསལ་ཤིང་གིས་ཕུག་པ་དང་། མགོ་བོ་དང་། ཀེང་རུས་དང་། ལྕེ་སྤྱང་དང་། ཁྭ་དང་། འུག་པ་དང་། བྱ་རྒོད་དང་། རོ་ལངས་རྣམས་ཕཻཾ་ཞེས་པའི་སྒྲ་སྒྲོགས་པར་བྱེད་པ། མ་ལུས་པ་རྣམས་ཀྱང་སྔོན་གྱི་གྲུབ་པ་ཐོབ་པ་རྣམས་ཀྱིས་མངོན་པར་བརྟགཾས་པ་སྟེ། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། སྨྱོ་བྱེད་དང་། རྗེད་བྱེད་དང་། མཁའ་འགྲོ་དང་། མཁའ་འགྲོ་མ་རྣམས་དང་། ཆུ་དང་། མེ་དང་། མཆོད་རྟེན་དང་། སྒྲུབ་པ་པོ་རྣམས་དང་བཅས་པའི་དུར་ཁྲོད་ཀྱིས་ཡོངས་སུ་བསྐོར་བའི་གཞལ་ཡས་ཁང་གི་ནང་དུ། ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོན་པོའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར། ཉི་མའི་དཀྱིལ་འཁོར་གྱི་སྟེང་དུ་ཉོན་མོངས་པ་ལ་སོགས་པ་བདུད་བཞིའི་ངོ་བོ། ཚངས་པ་སེར་པོ། དབང་པོ་དཀར་པོ། ཉེ་དབང་སྔོན་པོ། དྲག་པོ་ནག་པོ་རྣམས་སྟེང་ནས་སྟེང་དུ་བརྩེགས་པ། འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ་ཤར་དུ་ཚངས་པ་སེར་པོ། ལྷོར་དབང་པོ་དཀར་པོ། ནུབ་ཏུ་ཉེ་དབང་སྔོན་པོ། བྱང་དུ་དྲག་པོ་ནག་པོ། བྱང་ཤར་དུ་གཤིན་རྗེ་སྔོན་པོ། ཤར་ལྷོར་ནོར་བདག་སེར་པོ། ལྷོ་ནུབ་ཏུ་སྲིན་པོ་ནག་པོ། ནུབ་བྱང་དུ་ཐགས་བཟངས་རིས་དུད་ཁ་རྣམས་འགྱེལ་ཞིང་གདོང་གྱེན་དུ་ཕྱོགས་པའི་གདན་དང་བཅས་པར་གྱུར། ཡན་ལག་དྲུག་པ་ལྟར་ན། ཨོཾ་སརྦ་ཏ་ཐཱ་ག་ཏ་ནཱི་ལ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་ང་རྒྱལ་གཟུང་། བཞི་པ་ལ་ནི་མི་དགོས་སོ། །གཉིས་པ་ཡན་ལག་དྲུག་པ་ལྟར་ན་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ལ། བསྙེན་པ། ཉེར་སྒྲུབ། སྒྲུབ་པ་དང་གསུམ། བཞི་པ་ལྟར་ན། གཉིས་པ་བརྟེན་པ་བསྐྱེད་པ་ལ་གསུམ་པོ་དེའི་སྟེང་དུ་སྒྲུབ་པ་ཆེན་པོ་དང་བཞིའོ། །དང་པོ་ལ་བཞི་སྟེ། རྒྱུའི་རྡོ་རྗེ་འཛིན་པ་བསྐྱེད་པ། འཁོར་གྱི་ལྷ་མོ་དབྱུང་བ། རྒྱུའི་རྡོ་རྗེ་འཛིན་པ་བཞུ་བ། འབྲས་བུའི་རྡོ་རྗེ་འཛིན་པར་བཞེངས་པའོ། །དང་པོ་ལ་རྟོགས་པ་ཐ་མ་དང་། འབྲིང་དང་། རབ་འོག་དང་། རབ་ཀྱི་ཉམས་ལེན་བཞི། དེ་ཉིད་ལ་བློ་གྲོས་ཀྱི་རིམ་པས། བློ་གྲོས་རབ་དང་། འབྲིང་དང་། ཐ་ལྟག་དང་། ཐ་མའི་ཉམས་ལེན་བཞི་ཞེས་ཀྱང་གསུང་ངོ་། །དང་པོ་ལ་གཉིས་ཏེ། མངོན་པར་བྱང་ཆུབ་པ་མི་མཉམ་པར་སྦྱོར་བ་དང་། མཉམ་པར་སྦྱོར་བའོ། །དང་པོ་ལ་གཉིས་ཏེ། ཡན་ལག་བཞི་པའི་ཕྱོགས་དང་། ཡན་ལག་དྲུག་པའི་ཕྱོགས་སོ། །དང་པོ་ནི། གདན་དགུའི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་སྐར་མའི་རྣམ་པ་ལྟ་བུ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཕྲག་གཉིས་གཡས་སྐོར་གཡོན་སྐོར་རམ། སྟེང་འོག་མགོ་སྤྲོད་དུ་བསྒོམས་ལ་ཞུ་བ་ལས་བྱུང་བའི་ཟླའི་དཀྱིལ་འཁོར་དགུར་གྱུར་པ་མེ་ལོང་ལྟ་བུའི་ཡེ་ཤེས་སུ་མོས་པ་བྱའོ། །དེ་རྣམས་ཀྱི་སྟེང་དུ་དཔེ་བྱད་བཟང་པོ་བརྒྱད་བཅུའི་ངོ་བོ་མར་མེའི་ཕྲེང་བ་ལྟ་བུ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་གཡས་སྐོར་གཡོན་སྐོར་རམ། སྟེང་འོག་མགོ་སྤྲོད་དུ་བསྒོམས་ལ། ཞུ་བ་ལས་བྱུང་བའི་ཉི་མའི་དཀྱིལ་འཁོར་དགུར་གྱུར་པ་མཉམ་པ་ཉིད་ཀྱི་ཡེ་ཤེས་སུ་མོས་པ་བྱ། དབུས་ཀྱི་ཉི་ཟླ་ཁ་སྦྱོར་གྱི་བར་དུ་ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། ཨཾ་ལས་གྲི་གུག་སྔོ་ནག་ཡུ་བ་ལ་ཨཾ་གིས་མཚན་པས་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་སྔོན་པོ་གསལ་གདབ། གཉིས་པ་ནི། དབུས་ཀྱི་གདན་གྱི་སྟེང་དུ་སངས་རྒྱས་ཀྱི་མཚན་བཟང་པོ་སོ་གཉིས་ཀྱི་ངོ་བོ་སྐར་མའི་རྣམ་པ་ལྟ་བུའི་ཨ་ཨཱ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་བདག་ཉིད་མར་མེའི་རྣམ་པ་ལྟ་བུའི་ཀ་ཁ་སོགས་ཕྲག་གཉིས་བརྗོད་དེ་ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་ཡུ་བ་ལ་ཨཾ་གིས་མཚན་པ་སོ་སོར་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ངོ་བོ། བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་དཀར་པོ་གསལ་གདབ། གཉིས་པ་ལ་གཉིས་ཏེ། ཡན་ལག་བཞི་པའི་ཕྱོགས་དང་། ཡན་ལག་དྲུག་པའི་ཕྱོགས་སོ། །དང་པོ་ནི། གདན་དགུའི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཤེལ་གྱི་ཕྲེང་བ་ལྟ་བུའི་ཨ་ཨཱ་སོགས་ཕྲག་གཉིས་བརྗོད། ཞུ་བ་ལས་དབུས་སུ་ཟླ་བའི་དཀྱིལ་འཁོར་ཟུར་གསུམ་པ་ཨཱ་ལིས་མཚན་པ། ཕྱོགས་མཚམས་བརྒྱད་དུ་ཟླ་བའི་དཀྱིལ་འཁོར་ཟླུམ་པོ་རེ་རེར་གྱུར་པ་མེ་ལོང་ལྟ་བུའི་ཡེ་ཤེས། དེ་རྣམས་ཀྱི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ་མུ་ཏིག་གི་ཕྲེང་བ་ལྟ་བུའི་ཀ་ཁ་སོགས་ཕྲག་གཉིས་བརྗོད། ཞུ་བ་ལས་དབུས་སུ་ཟླ་བའི་དཀྱིལ་འཁོར་ཟུར་གསུམ་པ་ཀཱ་ལིས་མཚན་པ། ཕྱོགས་མཚམས་བརྒྱད་དུ་ཉི་མའི་དཀྱིལ་འཁོར་རེ་རེར་གྱུར་པ་མཉམ་པ་ཉིད་ཀྱི་ཡེ་ཤེས། དབུས་ཀྱི་ཟླ་བ་ཉིས་བརྩེགས་ཀྱི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་སོ་སོར་ཀུན་ཏུ་རྟོག་པའི་ཡེ་ཤེས། དེ་ལས་འོད་ཟེར་འཕྲོས་སེམས་ཅན་ཐམས་ཅད་ཀྱཻ་རྡོ་རྗེའི་གོ་འཕང་ལ་བཀོད། ཚུར་འདུས་ཟླ་བ་རྡོ་རྗེ་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་གྱུར་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་དཀར་པོ་གསལ་གདབ། གཉིས་པ་ནི་དབུས་ཀྱི་གདན་གྱི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཤེལ་གྱི་ཕྲེང་བ་ལྟ་བུའི་ཨ་ཨཱ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་ཟུར་གསུམ་ཨཱ་ལིས་མཚན་པ་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ་མུ་ཏིག་གི་ཕྲེང་བ་ལྟ་བུའི་ཀ་ཁ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་ཟུར་གསུམ་ཀཱ་ལིས་མཚན་པ་མཉམ་པ་ཉིད་ཀྱི་ཡེ་ཤེས། དེའི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་སོ་སོར་ཀུན་ཏུ་རྟོག་པའི་ཡེ་ཤེས། དེ་ལས་འོད་ཟེར་འཕྲོས་སེམས་ཅན་ཐམས་ཅད་ཀྱཻ་རྡོ་རྗེའི་གོ་འཕང་ལ་བཀོད། ཚུར་འདུས་ཟླ་བ་རྡོ་རྗེ་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་དཀར་པོ་གསལ་གདབ། གཉིས་པ་གང་ཟག་རྟོགས་པ་དང་བློ་གྲོས་འབྲིང་གིས་བསྒོམ་པར་བྱ་བ་ལ་གཉིས་ཏེ་ཡན་ལག་བཞི་པའི་ཕྱོགས་དང་། ཡན་ལག་དྲུག་པའི་ཕྱོགས་སོ། །དང་པོ་ནི་གདན་དགུའི་སྟེང་དུ་ཟླ་བའི་དཀྱིལ་འཁོར་དགུར་གྱུར་པ་མེ་ལོང་ལྟ་བུའི་ཡེ་ཤེས། དེ་རྣམས་ཀྱི་སྟེང་དུ་ཉི་མའི་དཀྱིལ་འཁོར་དགུར་གྱུར་པ་མཉམ་པ་ཉིད་ཀྱི་ཡེ་ཤེས། དབུས་ཀྱི་ཉི་ཟླ་ཁ་སྦྱོར་གྱི་བར་དུ། ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་ཡུ་བ་ལ་ཨཾ་གིས་མཚན་པ་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་ནག་པོ་གསལ་གདབ། གཉིས་པ་ནི་དབུས་ཀྱི་གདན་གྱི་སྟེང་དུ་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེའི་སྟེང་དུ་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་ཡུ་བ་ལ་ཨཾ་གིས་མཚན་པ་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་དཀར་པོ་གསལ་གདབ། གསུམ་པ་གང་ཟག་རྟོགས་པ་རབ་འོག་དང་བློ་གྲོས་ཐ་ལྟག་གིས་བསྒོམ་པར་བྱ་བ་ནི། དབུས་ཀྱི་གདན་གྱི་སྟེང་དུ་ཧཱུྃ་དང་ཨཾ་ལས་བདག་ཉིད་བཅོམ་ལྡན་འདས་རྒྱུའི་རྡོ་རྗེ་འཛིན་པ་སྐུ་མདོག་ནག་པོ་གསལ་གདབ། བཞི་པ་གང་ཟག་རྟོགས་པ་རབ་དང་བློ་གྲོས་ཐ་མས་བསྒོམ་པར་བྱ་བ་ནི། དབུས་ཀྱི་གདན་གྱི་སྟེང་དུ་བདག་ཉིད་སྐད་ཅིག་གིས་རྒྱུའི་རྡོ་རྗེ་འཛིན་པ་ནག་པོ་གསལ་གདབ་སྟེ་ཕྱི་མ་གཉིས་པོ་འདི་ཡན་ལག་བཞིས་འཆིང་ངོ་། །དེ་ལྟར་ན་རྒྱུའི་རྡོ་རྗེ་འཛིན་པ་བསྐྱེད་པའི་སྐབས་འདིར་མངོན་པར་རྟོགས་པ་བརྒྱད་དོ། །དེ་ལ་རྒྱུའི་རྡོ་རྗེ་འཛིན་པ་ནག་པོ་རྣམས་གསལ་གདབ་པའི་ཚེ་ན་ཞལ་བརྒྱད་ཕྱག་བཅུ་དྲུག་ཞབས་བཞི་པ་རྩ་བའི་ཞལ་སྔོ་བ་གཡས་དཀར་གཡོན་དམར་ཞེས་སོགས་དང་། དཀར་པོ་རྣམས་གསལ་གདབ་པའི་ཚེ་རྩ་བའི་ཞལ་དཀར་བ། གཡས་སྔོ། གཡོན་དམར། སྟེང་ཞལ་དུད་ཁ། ཞལ་ལྷག་མ་གཉིས་གཉིས་གནག་པ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། སྤྱི་བོར་སྣ་ཚོགས་རྡོ་རྗེས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་ཀྱི་དང་པོ་ན་གླང་པོ་ཆེ་དཀར་པོ། གཡོན་གྱི་དང་པོ་ན་སའི་ལྷ་སེར་པོ། དེ་གཉིས་ཀྱིས་ཡུམ་ལ་འཁྱུད་པ། གཡས་ཀྱི་གཉིས་པ་ན་རྟ་སྔོན་པོ། གསུམ་པ་ན་བོང་བུ་གྭ་པ། བཞི་པ་ན་གླང་སེར་པོ། ལྔ་པ་ན་རྔ་མོ་ཐལ་ཁ། དྲུག་པ་ན་མི་དམར་པོ། བདུན་པ་ན་ཤ་ར་བྷ་སྔོན་པོ། བརྒྱད་པ་ན་བྱི་ལ་གྭ་པ། གཡོན་གྱི་གཉིས་པ་ན་ཆུའི་ལྷ་དཀར་པོ། གསུམ་པ་ན་མེའི་ལྷ་དམར་པོ། བཞི་པ་ན་རླུང་གི་ལྷ་ལྗང་གུ། ལྔ་པ་ན་ཟླ་བའི་ལྷ་དཀར་པོ། དྲུག་པ་ན་ཉི་མའི་ལྷ་དམར་པོ། བདུན་པ་ན་གཤིན་རྗེ་སྔོན་པོ། བརྒྱད་པ་ན་ནོར་འཛིན་སེར་པོ། དབུ་རེ་རེ་ལ་མི་མགོ་སྐམ་པོ་ལྔ་ལྔས་དབུ་བརྒྱན་ཅིང་། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་ལྡན་པ། ཞབས་གཡས་གཉིས་བརྐྱངས་པའི་བརླ་ལ་གཡོན་གཉིས་བསྐུམས་པའི་སོར་མོ་རྣམས་གཏད་པའི་གར་སྟབས་ཀྱིས་བཞུགས་པ། སྒེག་ཅིང་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་རོ་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་བདག་མེད་མ། སྐུ་མདོག་སྔོན་མོ་ཞལ་གཅིག་ཕྱག་གཉིས་སྤྱན་གསུམ་པ། སྐྲ་སེར་པོ་གྱེན་དུ་བརྫེས་པ། གཡས་གྲི་གུག་དང་གཡོན་ཐོད་པ་འཛིན་པས་ཡབ་ལ་འཁྱུད་པ། མི་མགོ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། རུས་པའི་རྒྱན་ལྔ་དང་ལྡན་པ། ཞབས་གཡོན་བརྐྱང་ཞིང་གཡས་བསྐུམས་པས་ཡབ་ལ་འཁྱུད་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །གཉིས་པ་འཁོར་གྱི་ལྷ་མོ་དབྱུང་ཚུལ་ནི། ཡུམ་གྱི་མཁའ་མི་དམིགས་ཏེ་སྟོང་པའི་ངང་ལས་ཨཱཿལས་པདྨ་དམར་པོ་འདབ་མ་བརྒྱད་པ་ཟེའུ་བྲུ་ལ་ཨཱཿས་མཚན་པ། ཨོཾ་པདྨ་སུ་ཁ་དྷ་ར་མ་ཧཱ་རཱ་ག་སུ་ཁཾ་ད་ད་ཙ་ཏུར་ཨཱ་ནནྟ་བྷ་ག་བི་ཤྭ་ཧཱུྃ་ཧཱུྃ་ཧཱུྃ་ཀརྻཾ་ཀུ་རུ་ཥོ་མེ། ཡབ་ཀྱི་གསང་བའི་གནས་མི་དམིགས་ཏེ་སྟོང་པའི་ངང་ལས་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ། ཨོཾ་བཛྲ་མ་ཧཱ་དྭེ་ཥ་ཙ་ཏུར་ཨཱ་ནན་ད་ད་ཡ་ཀ་ཁ་ག་མུ་ཁ་ཨེ་ཀ་ར་སོ་ནཱ་ཐ་ཧཱུྃ་ཧཱུྃ་ཧཱུྃ་ཀརྻཾ་ཀུ་རུ་ཥོ་མེ། ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོའི་སྒྲ་ཧ་ཧ་སི་སི་ཀུན་དུ་རུ་བཛྲ་དྷྲྀཀ་ཅེས་པའི་སྒྲས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས་ཐུགས་ཀར་རྗེས་སུ་ཆགས་པའི་མེས་འོད་དུ་ཞུ། སྐུའི་དབྱིབས་བརྒྱུད། རྡོ་རྗེའི་ལམ་ནས་ཡུམ་གྱི་མཁར་བབས་པས་ཐིག་ལེ་བརྒྱད་དུ་གྱུར་ཞེས་པ་ནི་ཐམས་ཅད་ལ་འདྲ་ལ། དེ་ནས་མངོན་བྱང་གི་ཡན་ལག་བཞི་པ་གསུམ་ལ་ཐིག་ལེ་སྤྲོ་བ་དང་ས་བོན་སྤྲོ་བ་གཉིས་གཉིས་ལས་དང་པོ་ནི་དེ་རྣམས་ཡུམ་གྱི་བྷ་ག་ནས་ཕྱིར་འཐོན་ཏེ་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པ་ལས། གཾ་ཙཾ་བཾ་གྷཾ་པཾ་ཤཾ་ལཾ་ཌཾ་ཞེས་པའི་ས་བོན་བརྒྱད་དུ་གྱུར། དེ་རྣམས་ཡོངས་སུ་གྱུར་པ་ལས་ཤར་གྱི་ཉི་ཟླ་ཁ་སྦྱོར་གྱི་བར་དུ། གཾ་ལས་གྲི་གུག་སྔོ་ནག་གི་ཡུ་བ་ལ་གཾ་གིས་མཚན་པ། ལྷོའི་ཉི་ཟླ་ཁ་སྦྱོར་གྱི་བར་དུ་ཙཾ་ལས་ཌཱ་མ་རུ་དམར་པོའི་རྐེད་པར་ཙཾ་གྱིས་མཚན་པ། ནུབ་ཀྱི་ཉི་ཟླ་ཁ་སྦྱོར་གྱི་བར་དུ་བཾ་ལས་རུས་སྦལ་སེར་པོའི་དཔྲལ་བར་བཾ་གྱིས་མཚན་པ། བྱང་གི་ཉི་ཟླ་ཁ་སྦྱོར་གྱི་བར་དུ་གྷཾ་ལས་སྦྲུལ་ལྗང་གུའི་དཔྲལ་བར་གྷཾ་གིས་མཚན་པ། བྱང་ཤར་གྱི་ཉི་ཟླ་ཁ་སྦྱོར་གྱི་བར་དུ་པཾ་ལས་སེང་གེ་སྔོན་པོའི་དཔྲལ་བར་པཾ་གྱིས་མཚན་པ། ཤར་ལྷོའི་ཉི་ཟླ་ཁ་སྦྱོར་གྱི་བར་དུ་ཤཾ་ལས་དགེ་སློང་དཀར་པོའི་ཐུགས་ཀར་ཤཾ་གྱིས་མཚན་པ། ལྷོ་ནུབ་ཀྱི་ཉི་ཟླ་ཁ་སྦྱོར་གྱི་བར་དུ་ལཾ་ལས་འཁོར་ལོ་སྔོན་པོའི་ལྟེ་བར་ལཾ་གྱིས་མཚན་པ། ནུབ་བྱང་གི་ཉི་ཟླ་ཁ་སྦྱོར་གྱི་བར་དུ་ཌཾ་ལས་རྡོ་རྗེ་ཁྲ་བོའི་ལྟེ་བར་ཌཾ་གྱིས་མཚན་པ་སོ་སོར་ཀུན་ཏུ་རྟོགས་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་ལྷ་མོ་བརྒྱད་ཀྱི་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་ཤར་དུ་གཽ་རཱི་ནག་མོ་ཞེས་སོགས་གསལ་གདབ། གཉིས་པ་ནི་དེ་རྣམས་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་ཞེས་པའི་ས་བོན་བརྒྱད་དུ་གྱུར། དེ་རྣམས་ཡུམ་གྱི་མཁའ་ནས་ཕྱིར་འཐོན་ཏེ་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པ་ལས། ཤར་གྱི་ཉི་ཟླ་ཁ་སྦྱོར་གྱི་བར་དུ་གཾ་ལས་གྲི་གུག་སྔོ་ནག་གི་ཡུ་བ་ལ་གཾ་གིས་མཚན་པ་ཞེས་སོགས་སྔར་དང་འདྲའོ། །ཡན་ལག་དྲུག་པའི་ཕྱོགས་གསུམ་ལ་ས་བོན་སྤྲོ་བ་དང་ལྷ་མོ་སྤྲོ་བ་གཉིས་གཉིས་ལས། དང་པོ་ནི་དེ་རྣམས་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་ཞེས་པའི་ས་བོན་བརྒྱད་དུ་གྱུར། དེ་རྣམས་ཡུམ་གྱི་མཁའ་ནས་ཕྱིར་འཐོན་ཏེ་སོ་སོའི་གདན་གྱི་སྟེང་དུ་འཁོད་པ་ལས་ཤར་དུ་གཾ་ལས་གཽ་རཱི་ནག་མོ་ཞེས་པ་ནས། ནུབ་བྱང་དུ་ཌཾ་ལས་གཡུང་མོ་ཁ་དོག་སྣ་ཚོགས་པ་ཞེས་པའི་བར་གསལ་གདབ། གཉིས་པ་ནི་དེ་རྣམས་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་ཞེས་པའི་ས་བོན་བརྒྱད་དུ་གྱུར། དེ་རྣམས་ལྷ་མོ་བརྒྱད་དུ་གྱུར་ནས་ཡུམ་གྱི་མཁའ་ནས་ཕྱིར་འཐོན་ཏེ། སོ་སོའི་གདན་གྱི་སྟེང་དུ་རིམ་པ་བཞིན་དུ་འཁོད་པ་ནི། ཤར་དུ་གཽ་རཱི་ནག་མོ་ཞེས་སོགས་གསལ་གདབ། ས་བོན་ལས་བསྐྱེད་པ་ལ་ནི་འཁོར་གྱི་ལྷ་མོ་སྤྲོ་ཚུལ་སྔར་གྱི་ཡན་ལག་དྲུག་པའི་ལྷ་མོ་སྤྲོ་བའི་སྐབས་དང་ཁྱད་པར་མེད་དོ། །སྐད་ཅིག་གིས་བསྐྱེད་པ་ལ་ནི་ཐིག་ལེ་བརྒྱད་དུ་གྱུར་ཞེས་པའི་རྗེས་སུ། དེ་རྣམས་ལྷ་མོ་བརྒྱད་དུ་གྱུར་ནས་གདན་སོ་སོའི་སྟེང་དུ་རིམ་པ་བཞིན་དུ་འཁོད་པ་ནི་ཤར་དུ་གཽ་རཱི་ནག་མོ་ཞེས་སོགས་གསལ་གདབ། དེ་ལྟར་ན་མངོན་བྱང་གི་མངོན་པར་རྟོགས་པ་དྲུག་ལ་འཁོར་སྤྲོ་ཚུལ་གཉིས་གཉིས་སུ་ཕྱེ་བས་བཅུ་གཉིས་སུ་འགྱུར་ལ། ས་བོན་ལས་བསྐྱེད་པ་དང་སྐད་ཅིག་ལས་བསྐྱེད་པ་གཉིས་ལ་འཁོར་སྤྲོ་ཚུལ་རེ་རེར་ངེས་པས་བཅུ་བཞིའོ། །ཐུན་མོང་དུ་ལྷ་མོ་གསལ་གདབ་པ་ནི་ཤར་དུ་གཽ་རཱི་ནག་མོ་གཡས་གྲི་གུག གཡོན་ཉ་རོ་ཧི་ཏ་འཛིན་པ། ལྷོར་ཙཽ་རཱི་དམར་པོ་གཡས་ཅང་ཏེའུ་གཡོན་ཕག་པ་འཛིན་པ། ནུབ་ཏུ་བཻ་ཏཱ་ལཱི་སེར་མོ་གཡས་རུས་སྦལ། གཡོན་ཐོད་པ་འཛིན་པ། བྱང་དུ་གྷསྨ་རཱི་ལྗང་གུ་གཡས་སྦྲུལ། གཡོན་ཐོད་པ་འཛིན་པ། བྱང་ཤར་དུ་པུཀྐ་སཱི་སྔོན་མོ་གཡས་སེང་གེ གཡོན་དགྲ་སཏྭ་འཛིན་པ། ཤར་ལྷོར་རི་ཁྲོད་མ་དཀར་མོ་གཡས་དགེ་སློང་། གཡོན་གསིལ་བྱེད་འཛིན་པ། ལྷོ་ནུབ་ཏུ་གདོལ་པ་མོ་སྔོན་མོ་གཡས་འཁོར་ལོ། གཡོན་ཐོང་གཤོལ་འཛིན་པ། ནུབ་བྱང་དུ་གཡུང་མོ་ཁ་དོག་སྣ་ཚོགས་པ་གཡས་རྡོ་རྗེ། གཡོན་སྡིགས་མཛུབ་མཛད་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། སྐྲ་སེར་པོ་གྱེན་དུ་བརྫེས་པ་གཅེར་བུ་རུས་པའི་རྒྱན་ལྔས་བརྒྱན་པ། མི་མགོ་སྐམ་པོ་ལྔ་ལྔས་དབུ་ལ་བརྒྱན་ཅིང་། སྐམ་པོ་ལྔ་བཅུས་དོ་ཤལ་བྱས་པ། ཞབས་གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །གསུམ་པ་རྒྱུའི་རྡོ་རྗེ་འཛིན་པ་འོད་དུ་ཞུ་བ་ནི་ཡན་ལག་བཞི་པ་རྣམས་ལ་ཡབ་ཡུམ་ཐབས་ཤེས་རབ་སྙོམས་པར་ཞུགས་པས་ཡབ་ཡུམ་གཉིས་ཀྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས། བ་སྤུ་བྱེ་བ་ཕྲག་ཕྱེད་དང་བཞིའི་བུ་གའི་ཁམས་བྱང་ཆུབ་སེམས་ཀྱི་དྭངས་མ་རྣམས་ཞུ་བས་ཟག་པ་མེད་པའི་བདེ་བས་རྒྱུད་གང་། དེའི་སྐད་ཅིག་ལ་ཡབ་ཡུམ་གྱི་ཕུང་པོ་དང་ཁམས་དང་སྐྱེ་མཆེད་རྣམས་འོད་དུ་ཞུ་ནས། བདུད་བཞིའི་སྟེང་དུ་བྱང་ཆུབ་ཀྱི་སེམས་ཀྱི་རང་བཞིན་གྱི་ཐིག་ལེར་གྱུར་ཞེས་བརྗོད། ང་རྒྱལ་འཛིན་པའི་སྔགས་བརྗོད་མི་དགོས་སོ། །ཡན་ལག་དྲུག་པ་རྣམས་ལ་སླར་ཡང་ཡབ་ཡུམ་སྙོམས་པར་ཞུགས་པས་བར་སྣང་གི་ཨོཾ་ཨཱཿཧཱུྃ་ཧོཿདམར་པོ་གཉིས་ཀྱིས་མཐའ་བརྟེན་པའི་བར་དོའི་རྣམ་པར་ཤེས་པ་བཀུག ཡབ་ཀྱི་ཞལ་དུ་ཞུགས་ཐུགས་ཀར་རྗེས་སུ་ཆགས་པའི་མེས་འོད་དུ་ཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་མཁར་བབས་པའི་རྐྱེན་གྱིས་ཡབ་ཡུམ་གཉིས་རྗེས་སུ་ཆགས་པའི་མེས་འོད་དུ་ཞུ་ནས། བདུད་བཞིའི་སྟེང་དུ་བདེ་བ་ཆེན་པོའི་ངོ་བོ་རྡོ་རྗེ་སེམས་དཔའི་རང་བཞིན་གྱི་ཐེག་ལེར་གྱུར། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་ང་རྒྱལ་གཟུང་ངོ་། །བཞི་པ་འབྲས་བུའི་རྡོ་རྗེ་འཛིན་པ་བཞེངས་པ་ལ། ཐོག་མར་གླུས་བསྐུལ་བ་ནི་རང་གི་ཤེས་པ་མཚམས་ཀྱི་ལྷ་མོ་བཞིར་འཕོས་ལ་གླུས་བསྐུལ་བར་བསམས་ཏེ། རྗེ་བཙུན་སྙིང་རྗེའི་ཡིད་བཞེངས་ཤིག །པུཀྐ་སཱི་ནི་བདག་ལ་སྐྱོབས། །སྟོང་པའི་རང་བཞིན་ཉིད་སྤོངས་ལ། །བདག་ལ་བདེ་ཆེན་སྦྱོར་བཞེད་མཛོད། །ཁྱོད་མེད་ན་ནི་བདག་འགུམས་པས། །ཀྱཻ་ཡི་རྡོ་རྗེ་ཁྱོད་བཞེངས་ཤིག །སྟོང་པའི་རང་བཞིན་ཉིད་སྤོངས་ལ། །རི་ཁྲོད་མ་འབྲས་གྲུབ་པར་མཛོད། །དགའ་གཙོ་འཇིག་རྟེན་དོན་གཉེར་བ། །སྟོང་པ་ཉིད་ལ་ཞུགས་སམ་ཅི། །ཁྱོད་མེད་ཕྱོགས་ནི་མི་འཚལ་བས། །གདོལ་པ་མོ་བདག་ཞུ་བ་བགྱིད། །བདག་གིས་ཁྱོད་ཀྱི་ཐུགས་འཚལ་གྱིས། །མིག་འཕྲུལ་མངའ་བ་ཁྱོད་བཞེངས་ཤིག །གཡུང་མོ་བདག་ཉིད་དྲན་ཉམས་པས། །སྙིང་རྗེ་རྒྱུན་ཆད་མ་མཛད་ཅིག །ཅེས་བསྐུལ་བ་ནི་ཐམས་ཅད་ལ་འདྲ་ལ། དེ་ནས་ཨཱ་ལི་ཀཱ་ལི་ལ་ལྟོས་པའི་མངོན་བྱང་གི་ཡན་ལག་བཞི་པ་རྣམས་ལ་ཞེས་བསྐུལ་བས། ཐིག་ལེ་དེ་ཐིག་ལེ་ཆ་གསུམ་དུ་ཆད་དེ་འོག་གི་ཐིག་ལེ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་སྐར་མའི་རྣམ་པ་ལྟ་བུའི་ཨ་ཨཱ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། སྟེང་གི་ཐིག་ལེ་དཔེ་བྱད་བཟང་པོ་བརྒྱད་ཅུའི་ངོ་བོ་མར་མེའི་རྣམ་པ་ལྟ་བུ་ཀ་ཁ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། བར་གྱི་ཐིག་ལེ་ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་ཡུ་བ་ལ་ཨཾ་གིས་མཚན་པ་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པ་ལས་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་འབྲས་བུའི་རྡོ་རྗེ་འཛིན་པ་སྐུ་མདོག་སྔོན་པོ་གསལ་གདབ། ཨཱ་ལི་ཀཱ་ལི་ལ་ལྟོས་པའི་མངོན་བྱང་གི་ཡན་ལག་དྲུག་པ་རྣམས་ལ། ཞེས་བསྐུལ་བས། ཐིག་ལེ་དེ་ཨཾ་ཧཱུྃ་སྔོན་པོ་འོད་འབར་ཞིང་འཇིགས་པར་གྱུར། དེ་འོད་དུ་ཞུ་བ་ལས་བདག་ཉིད་བཅོམ་ལྡན་འདས་འབྲས་བུའི་རྡོ་རྗེ་འཛིན་པ་སྐུ་མདོག་སྔོན་པོ་གསལ་གདབ། ཨཱ་ལི་ཀཱ་ལི་ལ་མི་ལྟོས་པའི་ཡན་ལག་བཞི་པ་གཉིས་ལ་ཞེས་བསྐུལ་བས་ཐིག་ལེ་དེ་ཐིག་ལེ་ཆ་གསུམ་དུ་ཆད་དེ་འོག་གི་ཐིག་ལེ་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། སྟེང་གི་ཐིག་ལེ་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། བར་གྱི་ཐིག་ལེ་ཧཱུྃ་ལས་ཐོད་པ་དཀར་པོ་སོགས་སྔར་དང་འདྲའོ། །ཨཱ་ལི་ཀཱ་ལི་ལ་མ་ལྟོས་པའི་ཡན་ལག་དྲུག་པ་གཉིས་དང་ས་བོན་ལས་བསྐྱེད་པའི་ཡན་ལག་བཞི་པ་རྣམས་ལ་ནི་སྔར་གྱི་ཡན་ལག་དྲུག་པའི་བཞེངས་ཚུལ་དེ་ཉིད་དོ། །སྐད་ཅིག་གིས་བསྐྱེད་པ་ལ་ནི་ཞེས་བསྐུལ་བས་ཐིག་ལེ་དེ་སྐད་ཅིག་གིས་བཅོམ་ལྡན་འདས་འབྲས་བུ་རྡོ་རྗེ་འཛིན་པ་སྐུ་མདོག་སྔོན་པོ་གསལ་གདབ། ཐམས་ཅད་ཀྱང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ་ཞེས་པའི་བར་སྔར་བཞིན་ནོ། །དེ་ནས་སྣོད་བཅུད་སྦྱང་བའི་ཕྱིར་ཡན་ལག་བཞི་པ་རྣམས་ལ་ཡབ་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ་དེའི་སྟེང་དུ་ཟླ་བའི་དཀྱིལ་འཁོར། ལྷ་མོ་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨཾ་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་དེ་རྣམས་ཀྱི་སྟེང་དུ་ཉི་མའི་དཀྱིལ་འཁོར་རེ་རེ། ཡན་ལག་དྲུག་པ་ལྟར་ན་ཡབ་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ། ལྷ་མོ་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨཾ་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་དེ་རྣམས་ལས་འོད་འཕྲོས་ཕྱི་སྣོད་ཀྱི་འཇིག་རྟེན་ལ་ཕོག་གཞལ་ཡས་ཁང་དུ་གྱུར། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་ལྷ་དགུའི་ངོ་བོར་གྱུར་ཞེས་བརྗོད། གཉིས་པ་ཉེ་བར་སྒྲུབ་པ་ནི་དེ་ཐམས་ཅད་ཀྱི་མིག་ཏུ་མཾ་ལས་གཏི་མུག་རྡོ་རྗེ་མ་དཀར་མོ། རྣ་བར་དཾ་ལས་ཞེ་སྡང་རྡོ་རྗེ་མ་སྔོན་མོ། སྣར་པཾ་ལས་སེར་སྣ་རྡོ་རྗེ་མ་སེར་མོ། ཁར་རཾ་ལས་འདོད་ཆགས་རྡོ་རྗེ་མ་དམར་མོ། དཔྲལ་བར་ཨཾ་ལས་ཕྲག་དོག་རྡོ་རྗེ་མ་ལྗང་གུ། སྙིང་གར་ནཾ་ལས་བདག་མེད་རྣལ་འབྱོར་མ་ནག་མོ། སྤྱི་བོར་ཨོཾ་ལས་སྐུ་རྡོ་རྗེ་མ་དཀར་མོ། མགྲིན་པར་ཨཱཿལས་གསུང་རྡོ་རྗེ་མ་དམར་མོ། ཐུགས་ཀར་ཧཱུྃ་ལས་ཐུགས་རྡོ་རྗེ་མ་ནག་མོ། ཐམས་ཅད་ཀྱང་ཞལ་གཅིག་ཕྱག་གཉིས་མ། གྲི་གུག་དང་ཐོད་པ་ཁ་ཊྭཱཾ་ག་འཛིན་པ། གཅེར་བུ་རུས་པའི་རྒྱན་ལྔ་དང་མགོ་བོ་སྐམ་པོའི་ཕྲེང་བས་བརྒྱན་ཅིང་། རོའི་གདན་ལ་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའོ། །གསུམ་པ་སྒྲུབ་པ་ནི་རང་གི་སྙིང་གའི་ཧཱུྃ་ལས་འོད་འཕྲོས་པས། རང་བཞིན་གྱི་གནས་ནས་ཀྱཻ་རྡོ་རྗེ་ལྷ་དགུའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་སྤྱན་དྲངས་པར་མོས་ལ། ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ཨོཾ་བཛྲ་ས་མཱ་ཛཿ ཞེས་བརྗོད་ཅིང་སེ་གོལ་བརྡབ། དཀར་མོ་རི་དྭགས་སོགས་ཀྱིས་མཆོད། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་ནས། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཞེས་པས་གཽ་རཱི་ནག་མོ་ལྕགས་ཀྱུ་ཐོགས་པས་སྲུང་བའི་འཁོར་ལོའི་ནང་དུ་སྤྱན་དྲངས། ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ་ཞེས་པས་ཙཽ་རཱི་དམར་མོ་ཞགས་པ་ཐོགས་པས་མགྲིན་པ་ལ་རེག་པས་ཡེ་ཤེས་པ་རྣམས་སྨིན་མཚམས་ནས་ཐིམ། ཨོཾ་བཛྲ་བཻ་ཏཱ་ལཱི་བྷན་དྷ་བཾ་ཞེས་པས་བཻ་ཏཱ་ལཱི་སེར་མོ་ལྕགས་སྒྲོག་ཐོགས་པས་ཞབས་ལ་རེག་པས་དམ་ཚིག་པ་ལ་ཡེ་ཤེས་པ་ཆུ་ལ་ཆུ་འདྲེས་པ་བཞིན་དུ་བསམ། ཨོཾ་བཛྲ་གྷསྨ་རཱི་ཝ་ཤཾ་ཀུ་རུ་ཧོཿ ཞེས་པས་གྷསྨ་རཱི་ལྗང་གུ་དྲིལ་བུ་ཐོགས་པས་ཕྱི་ནང་ཀུན་ཏུ་དྲིལ་བུའི་སྒྲ་བྱུང་བས་དམ་ཚིག་པ་རྣམས་ཡེ་ཤེས་པའི་ངོ་བོར་གྱུར་པར་བསམ་མོ། །བཞི་པ་སྒྲུབ་པ་ཆེན་པོའམ་ཡན་ལག་དྲུག་པ་ལྟར་ན་དབང་བསྐུར་བ་མི་བསྐྱོད་པའི་ཡན་ལག་ནི། སླར་ཡང་རང་གི་སྙིང་གའི་ཧཱུྃ་ལས་འོད་འཕྲོས་པས་དབང་གི་ལྷ་དེ་བཞིན་གཤེགས་པ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་སྤྱན་དྲངས། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་པཉྩ་ཀུ་ལ་ས་པ་རི་ཝཱ་ར་ཨོཾ་བཛྲ་ས་མཱ་ཛཿ ཞེས་བརྗོད། སྔར་བཞིན་ལྷ་མོ་བརྒྱད་ཀྱིས་མཆོད། ཞེ་སྡང་རྡོ་རྗེར་ཕྱག་འཚལ་བསྟོད། །གཏི་མུག་རྡོ་རྗེར་ཕྱག་འཚལ་བསྟོད། །སེར་སྣ་རྡོ་རྗེ་བདག་ལ་གསོལ། །འདོད་ཆགས་རྡོ་རྗེ་བདག་ལ་སྐྱོབས། །ཡིད་དང་ཕྲག་དོག་ཆེན་པོ་ཀུན། །རྡོ་རྗེ་ཀུན་གྱི་དམ་ཚིག་མགོན། །ལས་རྣམས་ཐམས་ཅད་སྒྲུབ་བྱེད་པ། །རྡོ་རྗེ་ཅན་ཀུན་བདག་དགྱེས་མཛོད། །ཅེས་པས་བསྟོད། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་བདག་ཉིད་ཅན་རྣམས་ཀྱི། །ཁྱེད་ཀྱིས་བདག་ལ་དབང་བསྐུར་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཞེས་གསོལ་བ་བཏབ་པས་དེ་བཞིན་གཤེགས་པ་དེ་དག་ཧེ་རུ་ཀའི་གཟུགས་སུ་གྱུར་པས་རིན་པོ་ཆེ་སྣ་ཚོགས་ཀྱི་བུམ་པ་ཡེ་ཤེས་ཀྱི་བདུད་རྩིས་གང་བས་སྤྱི་བོ་ནས་དབང་བསྐུར་བར་བསམ་ཞིང་། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་། སངས་རྒྱས་རྣམས་ཀྱིས་དབང་བསྐུར། རིག་མ་རྣམས་ཀྱིས་རྡོ་རྗེའི་གླུ་ལེན། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། ཁྲོ་བོ་རྣམས་ཀྱིས་བགེགས་བསྐྲད། ལྷ་མོ་རྣམས་ཀྱིས་མཆོད། དབང་གི་ཆུ་རྒྱུན་གྱིས་སྨིན་མཚམས་ཡན་ཆད་གང་། བུམ་པའི་དབང་ཐོབ། ལུས་ཀྱི་དྲི་མ་དག སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །ལག་པར་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་མགོན། །ཞེས་བརྗོད། དབང་གི་ཆུ་རྒྱུན་གྱིས་མགྲིན་པ་ཡན་ཆད་གང་། གསང་བའི་དབང་ཐོབ། ངག་གི་དྲི་མ་དག ལྟེ་བ་སྤྲུལ་པའི་འཁོར་ལོ་ཨཾ་ལས་ཀྱི་ཕྱག་རྒྱ། སྙིང་ག་ཆོས་ཀྱི་འཁོར་ལོ་ཧཱུྃ་ཆོས་ཀྱི་ཕྱག་རྒྱ། མགྲིན་པ་ལོངས་སྤྱོད་ཀྱི་འཁོར་ལོ་ཨོཾ་ཕྱག་རྒྱ་ཆེན་པོ། སྤྱི་བོ་བདེ་ཆེན་གྱི་འཁོར་ལོ་ཧཾ་དམ་ཚིག་གི་ཕྱག་རྒྱ། ཞེས་བརྗོད། དབང་གི་ཆུ་རྒྱུན་གྱིས་སྙིང་ག་ཡན་ཆད་གང་། ཤེས་རབ་ཡེ་ཤེས་ཀྱི་དབང་ཐོབ། སེམས་ཀྱི་དྲི་མ་དག མིག་ཏུ་གཏི་མུག་རྡོ་རྗེ་མ། །རྣ་བར་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །སྤྱི་བོར་སྐུ་རྡོ་རྗེ་མ། །མགྲིན་པར་གསུང་རྡོ་རྗེ་མ། །ཐུགས་ཀར་ཐུགས་རྗེ་མ། །ཞེས་བརྗོད། དབང་གི་ཆུ་རྒྱུན་གྱིས་རྐང་མཐིལ་ཡན་ཆད་གང་། དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་དག ཆུའི་ལྷག་མ་ཡར་ལུད་པ་ལས། གཙོ་བོ་ཡབ་ཡུམ་གཽ་རཱི་དང་པུཀྐ་སཱི་ལ་མི་བསྐྱོད་པ། ཙཽ་རཱི་དང་ཤ་ཝ་རཱི་ལ་རྣམ་པར་སྣང་མཛད། བཻ་ཏཱ་ལཱི་དང་ཙཎྜ་ལཱི་ལ་རིན་ཆེན་འབྱུང་ལྡན། གྷསྨ་རཱི་དང་ཌོམ་བྷི་ནཱི་ལ་འོད་དཔག་མེད་ཀྱིས་དབུ་བརྒྱན་པའོ། །དེ་ནས་ཡན་ལག་དྲུག་པ་རྣམས་ལ་ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་དེ་ང་རྒྱལ་གཟུང་། ཡན་ལག་བཞི་པ་རྣམས་ལ་མི་དགོས་སོ།། །།བཞི་པ་བདུད་རྩི་མྱང་བ་འོད་དཔག་མེད་ཀྱི་ཡན་ལག་ནི། ནང་མཆོད་དངོས་སུ་ཡོད་པའམ་མེད་ན་བསམ་པས་ཀྱང་རུང་སྟེ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་གཞུ་བདུངས་པ་ལྟ་བུ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་འབར་བས་མཚན་པ། དེའི་སྟེང་དུ་ཨ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བ་རང་ལ་བསྟན་པ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཤར་དུ་གོ་ལས་བ་གླང་གི་ཤ ལྷོར་ཀུ་ལས་ཁྱིའི་ཤ ནུབ་ཏུ་ད་ལས་རྟའི་ཤ བྱང་དུ་ཧ་ལས་གླང་པོ་ཆེའི་ཤ དབུས་སུ་ན་ལས་མིའི་ཤ ཤ་དེ་རྣམས་རེ་རེའི་སྟེང་དུ་བདུད་རྩི་ལྔ་ལྔ་ཡོད་པར་བསམས་ལ། ཤར་དུ་བྷྲཱུྃ་ལས་དྲི་ཆེན། ལྷོར་ཨཱཾ་ལས་རཀྟ། ནུབ་ཏུ་ཛྲཱི་ཾལས་བྱང་སེམས། བྱང་དུ་ཁཾ་ལས་ཤ་ཆེན་གྱི་དྭངས་མ། དབུས་སུ་ཧཱུྃ་ལས་དྲི་ཆུ། དེ་རྣམས་ཀྱི་སྟེང་དུ་ཤར་དུ་བྷྲཱུྃ་མེ་ལོང་ལྟ་བུའི་ཡེ་ཤེས། ལྷོར་ཨཱྃ་མཉམ་པ་ཉིད་ཀྱི་ཡེ་ཤེས། ནུབ་ཏུ་ཛྲཱིཾ་སོ་སོར་རྟོག་པའི་ཡེ་ཤེས། བྱང་དུ་ཁཾ་བྱ་བ་གྲུབ་པའི་ཡེ་ཤེས། དབུས་སུ་ཧཱུྃ་ཆོས་ཀྱི་དབྱིངས་ཀྱི་ཡེ་ཤེས། ཟླ་བའི་མཐར་གཡོན་སྐོར་གྱི་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ གཡས་སྐོར་གྱི་ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། དེ་རྣམས་ཀྱི་སྟེང་གི་ནམ་མཁའ་ལ། ཨོཾ་དཀར་པོ་མགོ་ཐུར་དུ་བལྟས་པ། དེའི་སྟེང་དུ་རཾ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ། རྡོ་རྗེའི་ལྟེ་བའི་ཧཱུྃ་ལས་འོད་ཟེར་འོག་ཏུ་འཕྲོས། རླུང་གི་བ་དན་ལ་ཕོག་པས་རླུང་གཡོས། མེ་སྦར་བས་ཤ་ལྔ་བདུད་རྩི་ལྔ་རྣམས་བསྐོལ་བས་འོད་དུ་ཞུ་བའི་རླངས་པ་གྱེན་ལ་སོང་བས། ཨོཾ་དང་རྡོ་རྗེའི་ལྟེ་བའི་ཧཱུྃ་ལ་ཕོག་པས་བདུད་རྩིའི་རྒྱུན་འཛག ཡང་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡང་དག་པའི་ཡེ་ཤེས་ཀྱི་བདུད་རྩི་རྣམས་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པར་བྱོན་ནས་རྡོ་རྗེའི་ལྟེ་བའི་ཧཱུྃ་ལ་ཐིམ་པས་རྡོ་རྗེ་ལྗིད་དང་ལྡན་པར་གྱུར། རྡོ་རྗེ་ཉི་མ་ཨོཾ་དང་བཅས་པ་ཐོད་པའི་ནང་དུ་ལྷུང་བས་འོད་དུ་ཞུ་ནས། སྔར་གྱི་བདུད་རྩི་རྣམས་དང་གཉིས་སུ་མེད་པར་གྱུར་ཏེ། ཁ་དོག་དང་དྲི་དང་རོ་དང་ནུས་པ་ཕུན་སུམ་ཚོགས་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་མམ་ལྔའམ་བདུན་བརྗོད། དེ་ནས་གཡོན་པའི་མཐེབ་སྲིན་གྱིས་དབུས་ནས་བླངས་ཏེ་རང་གི་ལྕེ་ལ་བཞག་ཅིང་ལྷ་རྣམས་ཀྱི་ལྗགས་ལ་རྡོ་རྗེ་ནས་འབྲས་ཙམ་གྱིས་མཚན་པ་ལས་འོད་ཟེར་གྱི་སྦུ་གུ་བྱུང་སྟེ་བདུད་རྩི་ལ་ཟུག་ནས་མྱངས་པས་བདེ་བས་ཚིམ་པར་བསམས་ལ་ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་ད་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་ང་རྒྱལ་གཟུང་ངོ་།། །།ལྔ་པ་མཆོད་པ་དོན་ཡོད་གྲུབ་པའི་ཡན་ལག་ནི། རང་གི་སྙིང་ག་ནས་སྤྲོས་པའི་ལྷ་མོ་རྣམས་ཀྱིས་མཆོད་པར་བསམ་ཞིང་། དཀར་མོ་རི་དྭགས་ཚན་མ་འཛིན། །ཞེས་སོགས་བརྗོད་ལ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་ང་རྒྱལ་གཟུང་ངོ་།། །།དྲུག་པ་བསྟོད་པ་རིན་ཆེན་འབྱུང་ལྡན་གྱི་ཡན་ལག་ནི་སླར་ཡང་ལྷ་མོ་དེ་རྣམས་ཀྱིས་བསྟོད་པར་བསམ་ཞིང་། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱི་མཆོག་བརྙེས་པ། །ཁྱོད་ཀྱིས་རྒྱུ་དང་མི་རྒྱུའི་འགྲོ་བ་ཀུན་བརྒྱན་ཏེ། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲོས་པ་རྡོ་རྗེ་བསྒྲུབ་པའི་ཡིད། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་ང་རྒྱལ་བཟུང་ལ་མཆོད་བསྟོད་བྱེད་མཁན་གྱི་ལྷ་མོ་རྣམས་རང་གི་སྙིང་གར་བསྡུའོ། །མཆོད་བསྟོད་བདུད་རྩི་མྱང་བའི་ཡན་ལག་གསུམ་པོ་འདི་ཡན་ལག་དྲུག་པ་ལ་ནི་ཆོ་གའི་དངོས་གཞི་ཡིན་པས་ངེས་པར་དགོས་ལ། ཡན་ལག་བཞི་པ་ལ་ནི་འདི་མ་སྦྱར་ན་དངོས་གཞིའི་ཆིངས་འབྲིང་པོར་འགྱུར་ཞིང་། སྦྱར་ན་དངོས་གཞིའི་ཆིངས་རྒྱས་པར་འགྱུར་མོད་ཀྱི། དེའི་ཚེའང་ང་རྒྱལ་འཛིན་པའི་སྔགས་གསུམ་ནི་བརྗོད་མི་དགོས་སོ། །དྲུག་པ་རྫོགས་པའི་རིམ་པ་ནི། རང་དཀྱིལ་འཁོར་གྱི་གཙོ་བོར་བསྒོམས་པའི་ལུས་ཀྱི་དབུས་སུ་སྤྱི་གཙུག་ནས་ལྟེ་བའི་བར་ལ་རྩ་ཨ་ཝ་དྷཱུ་ཏཱི་ཤིན་ཏུ་ཕྲ་ཞིང་གསལ་བ། ཐིག་ལེའི་དྭངས་མས་གང་བ། དེའི་གཡས་སུ་རོ་མ་མེའི་རང་བཞིན་རཀྟས་གང་བ་དམར་པོ། གཡོན་དུ་རྐྱང་མ་ཆུའི་རང་བཞིན་བྱང་ཆུབ་ཀྱི་སེམས་ཀྱིས་གང་བ་དཀར་པོ་སྟེ། རྩ་གསུམ་གསལ་གདབ། དེ་ནས་ཨ་ཝ་དྷཱུ་ཏཱི་ལ་བརྟེན་པའི་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པའི་ལྟེ་བར་ཨཾ་དམར་པོ་མེའི་རང་བཞིན་མགོ་གྱེན་དུ་བལྟ་བ། ནང་སྐོར་གྱི་འདབ་མ་བརྒྱད་ལ་ཨ་ཀ་ཙ་ཊ་ཏ་པ་ཡ་ཤ ཕྱིའི་འདབ་མ་ལ་ཨཱ་ལི་ཕྲག་གཉིས་གཡོན་སྐོར་དང་། གཡས་སྐོར་དུ་ཀཱ་ལི་ཕྲག་གཅིག་ལ་ཧ་དང་ཀྵ་སྤངས་པ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པའི་ལྟེ་བར་ཧཱུྃ་ནག་པོ་མགོ་ཐུར་དུ་བལྟ་བ་ཕྱོགས་བཞིར་བྷྲཱུྃ་ཨཱཾ་ཛྲཱིཾ་ཁཾ། མཚམས་བཞིར་ལཾ་མཱཾ་པཱཾ་ཏཱཾ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་ལྟེ་བར་ཨོཾ་དམར་པོ་མགོ་གྱེན་དུ་བལྟ་བ། འདབ་མ་ལ་ཨཱ་ལི་ཕྲག་གཅིག་གཡོན་སྐོར། སྤྱི་བོ་བདེ་བ་ཆེན་པོའི་འཁོར་ལོ་རྩ་འདབ་སུམ་ཅུ་རྩ་གཉིས་པའི་ལྟེ་བར་ཧཾ་དཀར་པོ་མགོ་ཐུར་དུ་བལྟ་བ། འདབ་མ་ལ་ཨཱ་ལི་ཕྲག་གཉིས་བསམ་མོ། །བཤང་སྒོར་རླུང་གི་དཀྱིལ་འཁོར་དང་། སུམ་མདོར་མེའི་དཀྱིལ་འཁོར་ཡང་བསྒོམས་ནས། འོག་སྒོ་འབྱེད་འཛུམ་གྱི་སྦྱོར་བ་བྱས་པས་འོག་རླུང་བསྐྱོད་པས་སུམ་མདོའི་མེ་སྦར། དེས་ལྟེ་བའི་ཨཾ་འབར། མེ་དེ་གཡས་རོ་མ་ན་ཡར་སོང་། སྙིང་ག་དང་མགྲིན་པའི་རྩ་འདབ་ཀྱི་ཡིག་འབྲུ་རྣམས་བསྲེགས་སྤྱི་གཙུག་གི་ཧཾ་ལ་ཕོག ཧཾ་ཞུ་བའི་བྱང་ཆུབ་ཀྱི་སེམས་གཡོན་རྐྱང་མ་ནས་བབས། དེས་མགྲིན་པ་དང་སྙིང་གའི་ཡིག་འབྲུ་རྣམས་གསོས་ཏེ། མར་བྱོན་ནས་ཐིག་པ་གཅིག་ལྟེ་བའི་ཨཾ་ལ་ཕོག་པས་ཨཾ་ལས་མེའི་འོད་ཟེར་ཤིན་ཏུ་ཕྲ་བ་ཨ་ཝ་དྷཱུ་ཏཱི་ནས་ཡར་བྱོན་སྙིང་གའི་ཧཱུྃ་དང་མགྲིན་པའི་ཨོཾ་བཅོམ། སྤྱི་གཙུག་གི་ཧཾ་ལ་ཕོག་ཧཾ་ཞུ་བའི་བྱང་ཆུབ་ཀྱི་སེམས་མུ་ཏིག་གི་ཕྲེང་བའམ། འོ་མའི་རྒྱུན་ལྟར་བབས། མགྲིན་པའི་ཨོཾ་དང་སྙིང་གའི་ཧཱུྃ་གསལ་གདབ། མར་བྱོན་ལྟེ་བའི་ཨཾ་ལ་ཕོག ཨཾ་འབར་བའི་འབར་འཛག་ལ་སེམས་གཏད་ལ་རླུང་ཁ་སྦྱར་བསྒོམ་མོ། །བདུན་པ་བཟླས་པའི་རྣལ་འབྱོར་ལ། ཐོག་མར་དག་པ་དྲན་པ་ནི། སྙིང་རྗེའི་སྤྱན་ནི་དམར་པོ་ལ། །བྱམས་པའི་ཐུགས་ལ་ཡན་ལག་གནག །བསྡུ་བའི་དངོས་པོ་བཞི་ཡིས་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་བརྒྱད། །ཕྱག་ནི་སྟོང་པ་བཅུ་དྲུག་ཉིད། །གུག་སྐྱེད་ཀྱིས་ནི་སངས་རྒྱས་ལྔ། །གདུག་པ་འདུལ་ཕྱིར་ཁྲོ་བོ་ཉིད། །དེ་ཉིད་གསུམ་ནི་སྤྱན་གསུམ་པོ། །ཤ་ནི་པུཀྐ་སཱི་རུ་བརྗོད། །དེ་བཞིན་ཁྲག་ནི་རི་ཁྲོད་མ། །གདོལ་པ་མོ་ནི་ཁུ་བར་བརྗོད། །གཡུང་མོ་རྐང་དང་ཚིལ་བུ་དག །པགས་པ་བྱང་ཆུབ་ཡན་ལག་བདུན། །རུས་པ་བདེན་པ་བཞི་པོ་ཉིད། །ཅེས་བརྗོད། །བསྡུ་ན་དེ་ཙམ་གྱིས་ཆོག རྒྱས་པར་ན། གློ་དང་དབུགས་དང་དེ་བཞིན་སྨྱོ། །ཁོང་སྐམ་མཛེ་དང་བིར་ཙི་ཀ །མཆིན་པ་མཚེར་པའི་ནད་རྣམས་ལ། །གླང་པོ་ལ་སོགས་རིམ་ཤེས་བྱ། །ས་ནི་དང་པོ་ནོར་སྦྱིན་མཐར། །དབང་ཕྱུག་བརྒྱད་ནི་སྩོལ་བར་མཛད། །ཅེས་ཕྱག་མཚན་གྱི་དག་པ་དང་། སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །ལག་པར་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་མགོན། །ཞེས་རྒྱན་ཆའི་དག་པ་དང་། བཅོམ་ལྡན་འདས་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །གཽ་རཱི་ནི་མེ་ལོང་ལྟ་བུའི་ཡེ་ཤེས། ཙཽ་རཱི་ནི་མཉམ་པ་ཉིད་ཀྱི་ཡེ་ཤེས། བེ་ཏཱ་ལཱི་ནི་སོ་སོར་རྟོག་པའི་ཡེ་ཤེས། གྷསྨ་རཱི་ནི་བྱ་བ་ནན་ཏན་གྱི་ཡེ་ཤེས། པུཀྐ་སཱི་ནི་བྱམས་པ་ཚད་མེད་པ། ཤཱ་ཝ་རཱི་ནི་སྙིང་རྗེ་ཚད་མེད་པ། གདོལ་པ་མོ་ནི་དགའ་བ་ཚད་མེད་པ། གཡུང་མོ་ནི་བཏང་སྙོམས་ཚད་མེད་པ། གཞལ་ཡས་ཁང་པ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའོ། །ཞེས་རྟེན་དང་བརྟེན་པའི་དག་པ་དང་། གཟུགས་ཕུང་རྡོ་རྗེ་མ་ཡིན་ཏེ་ཞེས་སོགས་འོག་ནས་འབྱུང་བའི་ཕུང་པོ་དང་། ཁམས་དང་། སྐྱེ་མཆེད་ཀྱི་དག་པ་རྣམས་ཀྱང་དྲན་པར་བྱའོ། །ཡན་ལག་བཞི་པ་ལ་ནི་བཟླས་པའི་རྗེས་སུ་དག་པ་དྲན་པ་ཡིན་ལ། སྐབས་འདིར་བྱས་ཀྱང་འགལ་བ་མེད་གསུང་ངོ་། །དེ་ནས་བཟླས་པ་ནི་བསྙེན་པའི་དུས་སམ། ཚོགས་ཀྱི་འཁོར་ལོའི་དུས་སུ་ལྷ་དགུ་མ་བསྡུས་པའི་སྐབས་འདིར་བྱེད་པ་ཡིན་ལ་དུས་རྒྱུན་དུ་ནི་དཀྱིལ་འཁོར་གྱི་འཁོར་ལོ་བསྡུས་ཏེ་གཙོ་བོ་ཡབ་ཡུམ་གྱི་ང་རྒྱལ་གྱིས་བཟླས་པ་བྱའོ། །བསྡུ་བའི་རིམ་པ་ནི་གཙོ་བོའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་སྲུང་བའི་འཁོར་ལོ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་ལྷ་མོ་བརྒྱད་ལ། དེ་ཞལ་བརྒྱད་ལ་བསྡུའོ། །བཟླས་པའི་དམིགས་པ་ནི་ཡུམ་གྱི་ཐུགས་ཀའི་ཨཾ་ལས་སྔགས་ཀྱི་ཕྲེང་བ་བྱུང་། ཡུམ་གྱི་ཞལ་ནས་འཐོན། ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་སྟེ། ཡུམ་གྱི་པདྨར་ཞུགས་ནས་སྐུའི་དབྱིབས་བརྒྱུད་དེ། ཡང་ཡུམ་གྱི་ཞལ་ནས་བྱུང་། ཡབ་ཀྱི་ཞལ་དུ་ཞུགས་ནས་རྒྱུན་མི་ཆད་པར་འཁོར་བ་ལ་དམིགས་ལ་བཟླས་པ་བྱའོ། །དེ་ཡང་སྔགས་ཀྱི་ཁ་དོག་ཞི་བ་ལ་དཀར་པོ། རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོར་བསྒོམ། དེ་ལ་རྒྱུན་གྱི་བཟླས་པ་དཀར་པོར་བྱའོ། །བསྙེན་པ་ལ་སོགས་པའི་དུས་སུ་འཁོར་གྱི་སྔགས་བཟླ་ན་འཁོར་བའི་དམིགས་པ་སྔར་བཞིན་བྱས་ལ། སྔགས་ཀྱི་འོད་ཟེར་དེས་ལྷ་མོ་གང་གི་སྔགས་བཟླས་པའི་ལྷ་མོ་དེ་ལ་ཕོག་པས། དེ་དབང་དུ་འདུ་ཞིང་ཕྲིན་ལས་ལ་བསྐུལ་བར་བསྒོམ། བཟླས་པའི་དུས་སུ་རང་གི་ཞལ་ཐམས་ཅད་དང་། ཡུམ་གྱི་ཞལ་དང་། འཁོར་རྣམས་ཀྱི་ཞལ་ནས་ཀྱང་སྔགས་ཟློས་པར་བསམས་ལ་བཟླས་པ་བྱའོ། །བཟླས་པའི་སྔགས་ནི། ཨོཾ་ཨཱཥྚ་ན་ནཱ་ཡ། པིཾ་གཽརྡྷ་ཀེ་ཤ་ཝརྟ་མ་ནེ། ཙ་ཏུར་བིཾ་ཤ་ཏི་ནཻ་ཏྲ་ཡ། ཥོ་ཌ་ཤ་བྷཱུ་ཛཱ་ཡ། ཀྲྀཥྞ་ཛི་མཱུ་ཏ་ཝ་པུ་ཥེ། ཀ་པཱ་ལ་མཱ་ལ། ཨ་ནེ་ཀཱན་དྷ་རི་ཎེ། ཨཱད་མ་ཏ་ཀྲུ་ར་ཙིཏྟཱ་ཡ། ཨརྡྷེན་དུ་དཾ་ཥྚི་ཎེ། ཨོཾ་མཱ་ར་ཡ། མཱ་ར་ཡ། ཀཱ་ར་ཡ། ཀཱ་ར་ཡ། གརྫ་ཡ། གརྫ་ཡ། ཏརྫ་ཡ། ཏརྫ་ཡ། ཤོ་ཥ་ཡ། ཤོ་ཥ་ཡ། སཔྟ་ས་ག་རན། བྷནྡྷ་བྷནྡྷ། ནཱ་ག་ཨཱཥྚ་ཀཱན། གྲྀཧྣ་གྲྀནྷ། ཤ་ཏྲུན། ཧ་ཧཱ། ཧི་ཧཱི། ཧུ་ཧཱུ། ཧེ་ཧཻ། ཧོ་ཧཽ། ཧཾ་ཧཿཕཊ་སྭཱ་ཧཱ། ཡབ་ཀྱི་རྩ་སྔགས་སོ། །ཨོཾ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། སྙིང་པོའོ། །ཨོཾ་བཛྲ་ཀརྟཱ་རི་ཧེ་བཛྲ་ཡ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཉེ་བའི་སྙིང་པོའོ། །ཨོཾ་ཨཱཿ ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཧཱུྃ་ཕཊ་སྭཱ་ཧཱ། རྣལ་འབྱོར་མ་རྣམས་ཀྱི་ཕྲེང་སྔགས་སོ། །ཨོཾ་ཨཱཿཨཾ་ཧཱུྃ་ཕཊ་སྭཱ་ཧཱ། ཨོཾ་ཨཱཿནཾ་བཛྲ་ནཻ་རཱད་མ་ཧཱུྃ་ཕཊ་སྭཱ་ཧཱ། བདག་མེད་མའི་འོ། །ཨོཾ་ཨཱཿགཾ་ཧཱུྃ་ཕཊ་སྭཱ་ཧཱ། གཽ་རཱིའི་འོ། །ཨོཾ་ཨཱཿཙཾ་ཧཱུྃ་ཕཊ་སྭཱ་ཧཱ། ཙཽ་རཱིའི་འོ། །ཨོཾ་ཨཱཿབཾ་ཧཱུྃ་ཕཊ་སྭཱ་ཧཱ། བཻ་ཏཱ་ལཱིའི་འོ། །ཨོཾ་ཨཱཿགྷཾ་ཧཱུྃ་ཕཊ་སྭཱ་ཧཱ། གྷསྨ་རཱིའི་འོ། །ཨོཾ་ཨཱཿཔཾ་ཧཱུྃ་ཕཊ་སྭཱ་ཧཱ། པུཀྐ་སཱིའི་འོ། །ཨོཾ་ཨཱཿཤཾ་ཧཱུྃ་ཕཊ་སྭཱ་ཧཱ། ཤ་བ་རཱིའི་འོ། །ཨོཾ་ཨཱཿལཾ་ཧཱུྃ་ཕཊ་སྭཱ་ཧཱ། ཙཎྜ་ལཱིའི་འོ། །ཨོཾ་ཨཱཿཌཾ་ཧཱུྃ་ཕཊ་སྭཱ་ཧཱ། ཌོམ་བྷི་ནཱིའི་འོ། །རྒྱས་པར་བྱེད་ན། ཨོཾ་ཨཱཿགཾ་བཛྲ་གཽ་རཱི་ཧཱུྃ་ཕཊ་སྭཱ་ཧཱ། ཞེས་བྱ་བ་ལ་སོགས་པ་ས་བོན་གྱི་རྩར་མིང་བཅུག་པར་བྱས་ལ་བཟླའོ། །མཇུག་ཏུ་ཡི་གེ་བརྒྱ་པ་ཚར་གསུམ་བརྗོད་ནས། བདེ་བར་གཤེགས་པ་འཁོར་དང་བཅས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་རློབས་ཤིག མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་སྙིང་པོ་ཀྱཻ་རྡོ་རྗེའི་གོ་འཕང་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། ཞེས་པའང་ཕྱག་ལེན་ལ་མཛད་དོ། །བརྒྱད་པ་ཁ་ཟས་ཀྱི་རྣལ་འབྱོར་ལ་གསུམ་ལས། རྒྱས་པ་ནི་ཁ་ཟས་མདུན་དུ་འདུས་བྱས་ལ། གཏོར་མ་ལྟར་བྱིན་གྱིས་བརླབས་ནས་རང་ཀྱཻ་རྡོ་རྗེར་གསལ་བའི་སྙིང་གར་ལྷ་དགུའི་དཀྱིལ་འཁོར། ལྟེ་བར་འབྱུང་པོ་བརྒྱད་གསུམ་ཉི་ཤུ་རྩ་བཞི། བཤང་སྒོར་རླུང་། སུམ་མདོར་མེ། ཁ་ཧོམ་ཁུང་། ལག་པ་གཉིས་དགང་བྱུགས་གཟར་དུ་དམིགས་ལ། ནང་གི་སྦྱིན་སྲེག་གི་ཚུལ་གྱིས་བཟའོ། །འབྲིང་ནི་ཁ་ཟས་གཏོར་མ་ལྟར་བྱིན་གྱིས་རླབས་ཏེ། རང་ཀྱཻ་རྡོ་རྗེར་གསལ་བའི་ཐུགས་ཀར་ལྷ་དགུའི་དཀྱིལ་འཁོར་བསམས་ལ་ལྟེ་བ་ནས་མེ་སྦར་ཏེ་ལྷ་མཆོད་པའི་བསམ་པས་བཟའོ། །བསྡུས་པ་ནི་ཁ་ཟས་ལ་ལག་པ་གཡོན་པའི་མཐེབ་སྲིན་གྱིས་རེག་སྟེ་སྙིང་གའི་ཧཱུྃ་མཆོད་པའི་བསམ་པས་བཟའོ། །ལྷག་མ་ཨོཾ་ཨུཙྪིཥྚ་བ་ལིཾ་ཏ་བཀྵ་སཱི་སྭཱ་ཧཱས་ལྷག་མ་ལ་དབང་བའི་འབྱུང་པོ་རྣམས་ལ་སྦྱིན་ནོ།། །།དགུ་པ་སྤྱོད་ལམ་གྱི་རྣལ་འབྱོར་ལ་ལྷག་པའི་ལྷའི་ཐབས་ལ་མཁས་པ་དང་། ལྷ་སོ་སོའི་ཐབས་ལ་མཁས་པ་གཉིས་ལས། དང་པོ་ནི་སྤྱོད་ལམ་ལ་འཇུག་པའི་ཚེ། རང་དང་སྣང་བའི་དངོས་པོ་ཐམས་ཅད་ཀྱཻ་རྡོ་རྗེའི་ངོ་བོར་བལྟ་བའོ། །གཉིས་པ་ནི་སྦྱང་གཞིའི་དབྱེ་བས་ལྷ་སོ་སོར་ཕྱེ་ནས་ལྟ་བ་སྟེ། གཟུགས་ཕུང་རྡོ་རྗེ་མ་ཡིན་ཏེ། །ཚོར་བ་ལ་ཡང་དཀར་མོར་བརྗོད། །འདུ་ཤེས་ཆུ་ཡི་རྣལ་འབྱོར་མ། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ཞེ་སྡང་ཞེས་བཤད་རྡོ་རྗེ་མ། །འདོད་ཆགས་ཆུ་ཡི་རྣལ་འབྱོར་མ། ཕྲག་དོག་རྡོ་རྗེ་མཁའ་འགྲོ་མ། སེར་སྣ་གསང་བའི་དཀར་མོ་ཉིད། །གཏི་མུག་དེ་བཞིན་རྡོ་རྗེར་བརྗོད། །ཞེས་ཕུང་པོ་ལྔ་དང་ཉོན་མོངས་ལྔ་བདག་མེད་མའི་འཁོར་ལོའི་ནང་གི་རྣལ་འབྱོར་མ་ལྔ་དང་། ས་ནི་པུཀྐ་སཱི་ཞེས་བཤད། །ཆུ་ཁམས་རྔོན་པ་མ་ཞེས་བརྗོད། །མེ་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲགས། །ཞེས་ཁམས་བཞི་མཚམས་མ་བཞི་དང་། མིག་ཏུ་གཏི་མུག་རྡོ་རྗེ་མ། །རྣ་བར་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །ཞེས་དབང་པོ་དྲུག་རྣལ་འབྱོར་མ་དྲུག་དང་། གཟུགས་ལ་གཽ་རཱིར་རྟག་ཏུ་བཤད། །སྒྲ་ལ་ཆོམ་རྐུན་མར་རབ་གྲགས། །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་རབ་གྲགས། །རེག་ལ་ས་སྤྱོད་མ་ཞེས་བཤད། །ཆོས་ཀྱི་ཁམས་ལ་མཁའ་སྤྱོད་མ། །ཞེས་ཡུལ་དྲུག་ལྷ་མོ་དྲུག་ཏུ་སོ་སོར་བསྒོམ་པའོ། །འོ་ན་མཉམ་བཞག་གི་གནས་སྐབས་སུ་བསྒོམ་པ་དང་ཁྱད་པར་ཅི་ཡོད་སྙམ་ན། མཉམ་བཞག་གི་སྐབས་སུ་ནི་དཀྱིལ་འཁོར་གྱི་གནས་དེ་དང་དེར་ལྷ་ཞལ་ཕྱག་གི་རྣམ་པ་ཅན་བསྒོམས་ནས་དེ་ཉིད་སྦྱང་གཞིའི་ངོ་བོར་བསྒོམ་པ་ཡིན་ལ། རྗེས་སྤྱོད་ཀྱི་སྐབས་སུ་ནི་སྦྱང་གཞི་གང་ཡོད་པ་དེར་ཐ་མལ་གྱི་རྣམ་རྟོག་བཀག་ནས་ལྷའི་ངོ་བོར་བསྒོམ་པ་ཡིན་པས་ཁྱད་ཆེ་ལ། འདི་ལ་ཞལ་ཕྱག་གི་རྣམ་པ་མི་གསལ་ཡང་ལྷ་འདི་ཡིན་ནོ་སྙམ་དུ་བསྒོམ་པས་ཀྱང་ཆོག་ཅིང་ཞལ་ཕྱག་གི་རྣམ་པ་ཅན་དུ་བསྒོམ་ནུས་ན་ནི་མཆོག་ཏུ་གྱུར་པའོ།། །།བཅུ་པ་རྗེས་ཆགས་ཀྱི་རྣལ་འབྱོར་ནི་ཁྱིམ་པ་རྡོ་རྗེ་འཛིན་པས་ཕྱག་རྒྱ་བསྟེན་པའི་ཚེ་སྦྱོར་བ་འདུ་ཤེས་གསུམ་ལྡན་སོགས་ཀྱིས་ལྷ་མཆོད་པའི་བསམ་པས་བསྟེན་པ་སྟེ། རྒྱས་པར་གཞན་དུ་ཤེས་པར་བྱའོ། །དེ་ལྟར་རྣལ་འབྱོར་དགུའམ་བཅུས་སྒྲུབ་ཐབས་བཅུ་བཞི་རྟོགས་པའི་རིམ་པས་ཉམས་སུ་བླངས་ན་གནས་སྐབས་སུ་གྲུབ་མཐའ་སྙོགས་ཤིང་། མཐར་ཐུག་ཀྱཻ་རྡོ་རྗེའི་གོ་འཕང་ཐོབ་པར་འགྱུར་བ་ནི་ངེས་པའོ། །ལམ་བཟང་བཞི་ཡི་བླ་མ་བིརྺ་པ་ཡི་མན་ངག་བསྙེན་སྒྲུབ་ཡན་ལག་བཞིས་ཁྱབ་པ། །སྐྱེ་གནས་རྣམ་བཞི་སྦྱོང་ཚེ་རེ་རེའང་གཉེན་པོར་ཆེ་བ་བཞི་ཡིས་ངེས་ཤེས་བསྐྱེད། །སྐུ་བཞི་ལམ་དུ་བྱེད་ཚེ་རེ་རེའང་ལམ་བྱེད་བཞི་ཡིས་བྱིན་རླབས་མྱུར་དུ་སྡུད། །ཀུན་ཀྱང་དབང་བཞིའི་ལམ་གྱིས་བསྡུས་འདི་རྒྱུད་བཞིའི་ཉམས་ལེན་གཞན་དང་ཐུན་མོང་མིན། །འདིར་ནི་བསྒྲུབ་བྱ་བཅུ་བཞི་སྒྲུབ་བྱེད་ཀྱི། །ཐབས་མཆོག་བཅུ་ཡིས་ཉམས་སུ་ལེན་པའི་ཚུལ། །ཁྱད་ཆོས་སོ་སོ་མ་འདྲེས་ཐུན་མོང་བ། །མི་འགལ་ཉུང་ངུའི་ངག་གིས་གོ་བདེར་བཤད། །དེ་ལའང་སྔོན་འགྲོ་དངོས་གཞིའི་རྒྱས་བསྡུས་དང་། །བསྐྱེད་ཆོག་རྒྱས་བསྡུས་དབྱེ་བའི་ཁྱད་པར་དང་། །རྒྱུ་ལམ་འབྲས་བུ་མངོན་བྱང་དུ་གནས་དང་། །རྟོགས་པའི་རིམ་པས་བསྐྱེད་ཆོག་དབྲི་ཚུལ་དང་། །མཆོག་སྒྲུབ་རྩ་བའི་རྒྱུད་ལས་དྲུག་གསུངས་ཀྱང་། །གཉིས་པོ་ཁོ་ནས་འགྲུབ་པའི་རྒྱུ་མཚན་དང་། །དེ་ལའང་ཉེ་རྒྱུའི་ཚེ་ནའང་ཐབས་ཤེས་གཉིས། །གང་གི་རྐྱེན་གྱིས་གང་ཞིག་གྲོལ་བ་དང་། །རྩ་བཤད་གཉིས་ཀྱི་བསྐྱེད་ཆོག་སོ་སོ་ལ། །སོ་སོའི་དངོས་གཞིའི་ཆིངས་ཀྱིས་འཆིང་བ་ཡིས། །མི་མཉམ་སྦྱོར་ལ་རྒྱུ་ཡི་རྡོར་འཛིན་གྱི། །ཁ་དོག་དབྱེ་བ་སོ་སོར་བྱུང་ཚུལ་དང་། །ཡན་ལག་བཞི་པ་པདྨ་བཛྲ་དང་། །ཡན་ལག་དྲུག་པ་མི་ཐུབ་ཟླ་བ་ཡི། །དགོངས་པའི་ཚུལ་དང་ཕལ་ཆེར་མཚུངས་གྱུར་ཀྱང་། །མི་འདྲའི་ཁྱད་པར་ཅི་ཙམ་ཡོད་པ་དང་། །གཉིས་ལ་མེད་པའི་མངོན་བྱང་མཉམ་སྦྱོར་ལ། །མངོན་པར་རྟོགས་པ་རྣམ་བཞིར་འགྱུར་བ་དང་། །གཞན་ལའང་འཁོར་གྱི་སྤྲོ་ཚུལ་གཉིས་གཉིས་སུ། །དབྱེ་བས་བཅུ་བཞིར་འགྱུར་བའི་རྣམ་གཞག་སོགས། །འཁྲུལ་ཟད་གོང་མའི་ལེགས་བཤད་རྒྱ་མཚོ་དང་། །རྗེ་བཙུན་བླ་མའི་གནད་ཀྱི་ཟླ་ཟེར་སོགས། །ལུགས་བཟང་འདི་ཡི་སྲོལ་འཛིན་མཁས་པ་ལས། །ལེགས་པར་མཉན་ཏེ་སྒྲོ་འདོགས་གཅད་པར་བྱ། །ཅི་སླད་ཅེ་ན་དལ་འབྱོར་རྙེད་དཀའ་ཞིང་། །དེར་ཡང་ཆོས་ཚུལ་འདི་འདྲ་རྙེད་དཀའ་བས། །རྙེད་པའི་དུས་འདིར་སྙིང་པོ་ལེན་པ་ནི། །སྐལ་ལྡན་རྣམས་ཀྱི་ལས་སུ་ཆེ་ཕྱིར་རོ། །དེ་འདྲའི་ཚུལ་ལ་ངེས་པ་རྙེད་གྱུར་ཀྱང་། །བསྒོམ་པའི་རོ་མཆོག་མྱང་བར་མ་གྱུར་པ། །དམན་པ་དག་ལ་རྗེ་བཙུན་བླ་མ་ཡི། །ཐུགས་རྗེའི་སྙིམ་པས་ཉམས་རྟོགས་སྩལ་དུ་གསོལ། །འདི་སྦྱར་དགེ་བ་དྲི་མེད་གང་ཐོབ་དེས། །མཁའ་མཉམ་འགྲོ་བའི་སྡུག་བསྔལ་སེལ་བ་དང་། །བདག་ཀྱང་དེང་ནས་ཚེ་རབས་ཐམས་ཅད་དུ། །རྣལ་འབྱོར་དབང་ཕྱུག་གསུང་གི་མཛོད་འཛིན་ཤོག། །།དཔལ་ཀྱཻ་རྡོ་རྗེའི་མངོན་པར་རྟོགས་པ་ཚུལ་བཅུ་བཞི་རྣལ་འབྱོར་བཅུས་ཉམས་སུ་ལེན་པའི་ཚུལ་གསལ་བར་བཤད་པ་མན་ངག་གི་སྣང་བ་ཞེས་བྱ་བ་འདི་ནི། བདེ་བར་གཤེགས་པའི་རིང་ལུགས་པ་མཐའ་དག་གི་གཙུག་གི་ནོར་བུ་ཐམས་ཅད་མཁྱེན་པ་ཀུན་དགའ་བཟང་པོ་ཡབ་སྲས་ཀྱི་གསུང་གི་བདུད་རྩི་མྱངས་པ་རྒྱལ་ཁམས་པ་བསོད་ནམས་སེང་གེས་ཆུ་མོ་སྦྲུལ་གྱི་ལོ་ཐ་སྐར་གྱི་ཟླ་བ་ལ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་དུ་བཟང་པོའོ།། །།དགེའོ།། །།

ཀྱཻ་རྡོ་རྗེ་མན་ངག་ལུགས་ཀྱི་མཆོད་གཏོར་གྱི་རྣལ་འབྱོར།

ཀྱཻ་རྡོ་རྗེ་མན་ངག་ལུགས་ཀྱི་མཆོད་གཏོར་གྱི་རྣལ་འབྱོར་བཞུགས།། ༈ བླ་མ་དང་དཔལ་ཀྱཻ་རྡོ་རྗེ་ལ་ཕྱག་འཚལ་ལོ། །འདིར་མཉམ་པར་མ་བཞག་པའི་རྣལ་འབྱོར་བརྒྱད་ལས་མཆོད་གཏོར་གྱི་རྣལ་འབྱོར་བྱེ་བྲག་ཏུ་བཤད་པ་ལ་དོན་བརྒྱད་དེ། དཀྱིལ་འཁོར་གྱི་བྱ་བ། མཆོད་པ་བཤམ་པའི་བྱ་བ། ཚོགས་ཞིང་སྤྱན་དྲང་བའི་བྱ་བ། ཕྱག་འཚལ་བ། མཆོད་པ་དབུལ་བ། རྒྱུན་བཤགས་བྱ་བ། སྡོམ་པ་གཟུང་བ། གཏོར་མ་གཏང་བའོ། །དང་པོ་ནི། ཐུན་བཞི་ལ་སོགས་པར་བྱེད་ན་ཐོ་རངས་ཀྱི་དུས་སུ་ཐུན་འགོར་བྱས་ཏེ། བསམ་གཏན་གྱི་ཁང་པ་དབེན་ཞིང་ཉམས་དགའ་བར་བྱི་དོར་ལེགས་པར་བྱས་ལ། སའི་ཕྱོགས་གང་འོས་པ་དེར་མཎྜལ་ཁྲུ་གང་ཙམ་གྱི་དབུས་ནས་དྲི་བཟང་གི་ཆུས་དབང་ལྡན་དུ་ཅུང་ཟད་འཐེན་ཏེ་གྲུ་བཞིར་བྱུག་ཅིང་ཨོཾ་མེ་དཱི་ནི་བཛྲཱི་བྷ་ཝ་བནྡྷ་ཧཱུྃ་ཧཱུྃ་ཧཱུྃ་ཕཊ། འོག་ཐམས་ཅད་རྡོ་རྗེའི་ས་གཞིར་གྱུར་ཞེས་བརྗོད། ཡང་མཐའ་སྐོར་དུ་བྱུག་ཅིང་ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་ཕྱོགས་དང་སྟེང་ཐམས་ཅད་རྡོ་རྗེའི་རྭ་བ་དང་། གུར་དང་། བླ་རེས་བསྐོར་བར་གྱུར་ཞེས་བརྗོད་དེ། དབུས་སུ་མེ་ཏོག་བཞག་ནས་ལག་པ་བཏེག་སྟེ། དེ་ལྟ་བུའི་སྲུང་བའི་འཁོར་ལོའི་དབུས་སུ་སྐད་ཅིག་གིས་གཞལ་ཡས་ཁང་པ་གྲུ་བཞི་པ་སྒོ་བཞི་པ་ཞེས་པ་ནས། རྒྱན་དུ་མས་བརྒྱན་པའི་གཞལ་ཡས་ཁང་པར་གྱུར་ཞེས་པའི་བར་དང་། དེའི་ཕྱི་རོལ་དུ་དུར་ཁྲོད་ཆེན་པོ་བརྒྱད། དེ་དག་ལ་གནས་པའི་ཤིང་ཆེན་པོ་བརྒྱད། ཤིང་གི་རྩ་བ་ལ་གནས་པའི་ཕྱོགས་སྐྱོང་བ་བརྒྱད། སྟེང་གི་ནམ་མཁའ་ལ་གནས་པའི་སྤྲིན་ཆེན་པོ་བརྒྱད། དེ་དག་ལ་གནས་པའི་ཀླུ་ཆེན་པོ་བརྒྱད། ཤིང་གི་ཡལ་ག་ལ་གནས་པའི་ཞིང་སྐྱོང་བརྒྱད། གཞན་ཡང་རོ་མགོ་བོ་བཅད་པ་དང་ཞེས་པ་ནས། འགྱེལ་ཞིང་གདོང་གྱེན་དུ་ཕྱོགས་པའི་གདན་དང་བཅས་པར་གྱུར་ཞེས་པའི་བར་སྒྲུབ་ཐབས་བཞིན་བསྒོམ་མོ། །དེ་ནས་དབུས་སུ་མེ་ཏོག་གི་ཚོམ་བུ་སྤུངས་ལ། དབུས་ཀྱི་གདན་གྱི་སྟེང་དུ་ཨོཾ་ཧཱུྃ་ཤྲཱི་ཧེ་བཛྲ་ཡ་ན་མཿསྙིང་པོ་ཀྱཻ་རྡོ་རྗེ་སྐུ་མདོག་སྔོན་པོ་ཞལ་བརྒྱད་ཕྱག་བཅུ་དྲུག་ཞེས་པ་ནས། གར་དགུའི་རོ་དང་ལྡན་པ་ཉིད་ཅེས་པའི་བར་བརྗོད། ཡང་དེ་ཉིད་དུ་མེ་ཏོག་གཅིག་བཞག་ལ། དེའི་པང་ན་ནྃ་ནཻ་རཱཏྨ་ན་མཿཡུམ་རྡོ་རྗེ་བདག་མེད་མ་སྐུ་མདོག་སྔོན་མོ་ཞལ་གཅིག་ཕྱག་གཉིས་མ་ཞེས་པ་ནས། ཡབ་ཡུམ་གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ་ཞེས་པའི་བར་གསལ་གདབ། དེ་ནས་ཕྱོགས་མཚམས་བརྒྱད་དུ་མེ་ཏོག་གི་ཚོམ་བུ་བཞག་ལ་རིམ་པ་བཞིན་དུ་ཤར་དུ་གྃ་གཽ་རཱི་ན་མཿགོ་རཱི་ནག་མོ་གཡས་གྲི་གུག་གཡོན་ཉ་རོ་ཧི་ཏ་འཛིན་པ། ལྷོར་ཙྃ་ཙཽ་རཱི་ན་མཿཙཽ་རཱི་དམར་མོ། ནུབ་ཏུ་བྃ་བཻ་ཏཱ་ལཱི་ན་མ་ཿབཻ་ཏཱ་ལཱི་སེར་མོ། བྱང་དུ་གྷྃ་གྷསྨ་རཱི་ན་མཿགྷསྨ་རཱི་ལྗང་གུ། བྱང་ཤར་དུ་པཾ་པུཀྐ་སཱི་ན་མཿཔུཀྐ་སཱི་སྔོན་མོ། ཤར་ལྷོར་ཤྃ་ཤ་བ་རཱི་ན་མཿརི་ཁྲོད་མ་དཀར་མོ། ལྷོ་ནུབ་ཏུ་ལཾ་ཙཎྜ་ལཱི་ན་མཿགདོལ་པ་མོ་སྔོན་མོ། ནུབ་བྱང་དུ་ཌྃ་ཌོམ་བྷི་ནཱི་ན་མཿགཡུང་མོ་ཁ་དོག་སྣ་ཚོགས་པ་གཡས་རྡོ་རྗེ་གཡོན་སྡིག་མཛུབ་མཛད་པ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ་ཞེས་པ་ནས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ་ཞེས་པའི་བར་ཞལ་ཕྱག་རྫོགས་པར་གསལ་བཏབ་བོ། །གཉིས་པ་ནི། དཀྱིལ་འཁོར་དེའི་གཡས་རང་གི་གཡོན་ཕྱོགས་ནས་བརྩམས་ཏེ་ཞབས་བསིལ་དྲི་ཞིམ་པོའི་ཆུ་དང་། ཞལ་བསིལ་འོ་མའམ་མངར་གསུམ་བླུག་པ་དང་། འཐོར་འཐུང་ཆུ་གཙང་དང་། མཆོད་ཡོན་ཆུ་གཙང་ལ་མེ་ཏོག་དཀར་པོ་བླུག་པ་རྣམས་རིམ་པ་བཞིན་བཤམ། དེའི་གཡོན་རང་གི་གཡས་ནས་མེ་ཏོག བདུག་སྤོས། མར་མེ། དྲི་ཆབ། ཞལ་ཟས་རྣམས་རིམ་པ་བཞིན་བཤམ། དཀྱིལ་འཁོར་གྱི་བྱང་ཤར་ལ་ཉེ་བར་འཇིག་རྟེན་ལས་འདས་པའི་གཏོར་མ་ཕུད་ལས་ཆུང་བར་བྱས་པ་གཞག དེའི་གཡས་སུ་འཇིག་རྟེན་པའི་གཏོར་མ་ལྷག་མ་ལས་ཆེ་བར་བྱས་པ་གཞག ཆོས་སྐྱོང་གི་གཏོར་མ་བྱེད་ན་དེ་གཉིས་ཀྱི་བར་དུ་རིམ་པ་བཞིན་གཞག་གོ །རང་གི་མདུན་དུ་རྡོ་རྗེ་དང་། དྲིལ་བུ་དང་། ནང་མཆོད་གསུམ་གཡས་ནས་རིམ་པ་བཞིན་གཞག གཞན་ཡང་རོལ་མོ་ལ་སོགས་པ་མཆོད་པའི་ཡོ་བྱད་གང་འབྱོར་པ་རྣམས་ཀྱང་ཇི་ལྟར་འཚམས་པའི་གནས་སུ་གཞག་གོ །གསུམ་པ་ནི། རང་ཀྱཻ་རྡོ་རྗེ་ཕྱག་གཉིས་པའི་ང་རྒྱལ་དུ་དྲན་པར་བྱས་ལ་སྟན་ལ་འདུག་སྟེ། རང་གི་ལག་པ་གཡས་པ་ཧཱུྃ་ལས་རྡོ་རྗེ་རྩེ་ལྔ་པ་ལྟེ་བར་རཾ་ལས་ཉི་མའི་དཀྱིལ་འཁོར་ལ་ཧཱུྃ། ལག་པ་གཡོན་པ་ཨཱཿལས་པདྨ་འདབ་མ་ལྔ་པ་ལྟེ་བར་ཟླ་བ་ལ་ཨཱཿ དེ་རྣམས་ཞུ་བ་ལས་བྱུང་བའི་རྡོ་རྗེའི་ལག་པར་གྱུར་ཞེས་བརྗོད། དེ་ནས་ལག་པ་གཉིས་རྣམ་ལྔ་འདོད་པའི་སྐོར་བ་བྱས་ཏེ། ལག་པ་གཡས་པར་རྡོ་རྗེ་བླངས་ནས་ཨོཾ་མ་ཧཱ་བཛྲ་ཧཱུྃ་ཞེས་བརྗོད་ཅིང་། སྨིན་མཚམས་ཀྱི་བར་དུ་ལན་གསུམ་གསོར་ལ་ཐུགས་ཀར་བཟུང་སྟེ། ཐོག་མ་དང་ཐ་མ་མེད་པའི་བྱང་ཆུབ་ཀྱི་སེམས་ཐུགས་ཀྱི་དམ་ཚིག་ཞེས་བརྗོད་ཅིང་དྲན་པར་བྱ། ཡང་ལག་པ་གཡོན་པས་དྲིལ་བུ་བླངས་ཤིང་ཨོཾ་བཛྲ་གྷཎྜེ་ཨཿཞེས་བརྗོད་དེ་ལན་གསུམ་དཀྲོལ་ལ་དཀུར་ཁ་གྱེན་ལ་བསྟན་ཏེ་བཟུང་ལ། སྲིད་པ་ཐམས་ཅད་རང་བཞིན་གྱིས་དག་པ་སྟོན་པར་བྱེད་པའི་གསུང་། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་ངོ་བོ་གསུང་གི་དམ་ཚིག་ཞེས་བརྗོད་ཅིང་དྲན་པར་བྱ། རང་དཔལ་ཀྱཻ་རྡོ་རྗེ་ཕྱག་གཉིས་པ་རྡོ་རྗེ་སེམས་དཔའི་ངོ་བོ་སྐུ་ཕྱག་རྒྱའི་དམ་ཚིག་ཅེས་བརྗོད་ཅིང་དྲན་པར་བྱ། དེ་ནས་དྲིལ་བུ་ཕྱོགས་མཚམས་བརྒྱད་དུ་དཀྲོལ་ཞིང་། ཨོཾ་བཛྲ་གྷཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུད་དྷ་ཀྵེ་ཊ་པྲ་ཙ་ལི་ཏེ་པྲཛྙཱ་པ་ར་མི་ཏ་ནཱ་ད་སམྦྷ་ཝེ་ཏ་བཛྲ་དྷརྨ་ཧྲྀ་ད་ཡ་ནི། སནྟོ་ཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། ཨོཾ་ཨེ་ཧྱེ་ཧི་བྷ་ག་ཝཱན་མཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ས་མ་ཡེ་ཛཿཧཱུྃ་བྃ་ཧོཿཞེས་བརྗོད་དེ། སེམས་ཀྱིས་རང་གི་སྙིང་གའི་ས་བོན་གྱི་འོད་ཀྱིས་སངས་རྒྱས། བྱང་སེམས། བླ་མ་དང་བཅས་པ་ཐམས་ཅད་ཀྱཻ་རྡོ་རྗེ་ལྷ་དགུའི་རྣམ་པར་སྤྱན་དྲངས་ནས་མདུན་དུ་བསྐྱེད་པ་ལ་གཉིས་སུ་མེད་པར་ཐིམ་པར་བསམ་མོ། །བཞི་པ་ནི། དཀྱིལ་འཁོར་གྱི་གཙོ་བོ་དེ་ཉིད་བླ་མ་ཡིན་པར་མོས་ནས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །འཁོར་བའི་འདམ་ཚོགས་ནང་གནས་པ། །ཐུགས་རྗེའི་ཕྱག་གིས་འདྲེན་མཛད་ཅིང་། །ཡེ་ཤེས་བདུད་རྩིས་ཚིམ་མཛད་པ། །བླ་མའི་ཞབས་ཀྱི་པདྨོར་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དང་པོར་མེ་ཏོག་ཕོག་པ་ཡི། །དཀྱིལ་འཁོར་ལྷ་ཚོགས་རྣམས་ལ་འདུད། །ཅེས་བྱ་བ་ལ་སོགས་པ་བརྗོད་ཅིང་ཕྱག་འཚལ་ལོ། །དེ་ནས་ཡང་དཀྱིལ་འཁོར་གྱི་འཁོར་ལོའི་རྣམ་པར་མོས་ནས། ཐམས་ཅད་དངོས་པོའི་རང་བཞིན་མཆོག །ཅེས་སོགས་ཀྱཻ་རྡོ་རྗེའི་བསྟོད་པ་དང་། གཞན་ཡང་སངས་རྒྱས་དང་བྱང་སེམས་ཀྱི་བསྟོད་པ་ཅི་ཤེས་ཀྱིས་བསྟོད་པར་བྱའོ། །ལྔ་པ་ལ། ཕྱི་དང་། ནང་དང་། ཡིད་ལས་བྱུང་བ་དང་། བསྟོད་པའི་མཆོད་པ་བཞི་ལས། དང་པོ་ནི། མཆོད་པ་རྣམས་ལ་ནང་མཆོད་གཏོར་ཞིང་། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་པས་བགེགས་བསྐྲད། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭབྷཱ་ཝ་ཤུདྡྷོ྅ཧཾ། ཞེས་པས་སྟོང་པར་སྦྱངས། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་ཞབས་བསིལ། ཞལ་བསིལ། འཐོར་ཐུང་། མཆོད་ཡོན། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་བསམས་ལ། ཨོཾ་བཛྲ་ནཱི་རཱི་ཏི་ཧཱུྃ་ཁཾ་སྭཱ་ཧཱ་ཞེས་པ་ནས། ཨོཾ་བཛྲ་ཤབྡ་ཨཱཿཧཱུྃ་ཞེས་པའི་བར་སྔགས་དང་ཕྱག་རྒྱས་བྱིན་གྱིས་བརླབ། དེ་ནས་རྡོ་རྗེ་ཁུ་ཚུར་གཉིས་དཀུ་གཡོན་པར་ཁ་སྤྲད་ལ། མཚན་སྔགས་བརྗོད་པའི་ཚེ་རྣམ་ལྔ་འདོད་སྐོར་བྱས་ལ་མཆོད་སྔགས་ཀྱི་ཚེ་སོ་སོའི་ཕྱག་རྒྱ་བཅས་ནས། སེ་གོལ་ཕར་གཏོག་པའི་ཚེ་སྙིང་ག་ནས་མཆོད་པའི་ལྷ་མོ་སྤྲོས་ཏེ་མཆོད་པར་བསམ། ཚུར་གཏོག་པའི་ཚེ་སྙིང་གར་བསྡུས་ནས་ངག་ཏུ། དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་ཞབས་བསིལ་འདི། །བཅོམ་ལྡན་འཁོར་དང་བཅས་ལ་འབུལ། །བཞེས་ནས་བདག་ལ་དགྱེས་པར་མཛོད། །ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ཨོཾ་བཛྲ་ནཱི་རཱི་ཏི་ཧཱུྃ་ཁཾ་སྭཱ་ཧཱ། དེ་བཞིན་དུ་ཚིགས་བཅད་དང་། སྔགས་གཞན་རྣམས་འདྲ་བར་བྱས་ནས་ཞལ་བསིལ་དང་། ནི་ཝི་ཏི་ཧཱུྃ་ཁྃ། འཐོར་འཐུང་དང་། སརྦ་སཾ་ཤོ་དྷ་ནི། མཆོད་ཡོན་དང་། ཛཿཧཱུྃ་བཾ་ཧོཿཁཾ་རཾ་མ་ཧཱ་ཨརྒྷཾ་པྲ་ཏཱིཙྪ་ཞེས་པ་རྣམས་སྦྱར་རོ། །དེ་ནས། མེ་ཏོག་འདི་ནི་བཟང་ཞིང་དགེ །དག་པའི་སྐྱེ་གནས་ལས་དག་པ། །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །སྔགས་གཞན་རྣམས་འདྲ་བ་ལས། ཨོཾ་བཛྲ་པུཥྤེ་ཨཱཿཧཱུྃ། ཚལ་དག་རོ་ནི་ཕན་པ་དང་། །གང་ཞིག་དྲི་དང་བདུག་སྤོས་མཆོག །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨོཾ་བཛྲ་དྷཱུ་པེ་ཨཱཿཧཱུྃ། སྲིན་པོ་འཇོམས་ཤིང་དག་བྱེད་ལ། །དགེ་ཞིང་མུན་པ་རྣམས་སེལ་བ། །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨོཾ་བཛྲ་ཨཱ་ལོ་ཀེ་ཨཱཿཧཱུྃ། འདི་ནི་དྲི་བཟང་དགེ་བ་སྟེ། །དག་པའི་སྐྱེ་གནས་ལས་དག་པ། །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨོཾ་བཛྲ་གནྡྷེ་ཨཱཿཧཱུྃ། སྨན་རྣམས་བཅུད་གཙང་ཡི་གར་འོང་། །སྔགས་ཀྱི་ཞལ་ཟས་ཤོས་འདི་དག །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨོཾ་བཛྲ་ནཻ་ཝི་དྱཱ་ཨཱཿཧཱུྃ། དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་རོལ་མོ་འདི། །བདག་གི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨོཾ་བཛྲ་ཤབྡ་ཨཱཿཧཱུྃ་དང་། གྷཎྜེ་ར་ཎི་སོགས་བརྗོད་ཅིང་རོལ་མོ་དབུལ་ལོ། །གཉིས་པ་ནི། བདུད་རྩི་གཏོར་མ་བཞིན་བྱིན་གྱིས་བརླབས་ལ། ལག་པ་གཡོན་པའི་མཐེབ་སྲིན་གྱིས་གཡོན་སྐོར་དུ་ལན་གསུམ་བསྐོར་ནས་དབུས་ནས་བླངས་ཏེ་སྤྱི་བོར་གཏོར་ཞིང་ངག་ཏུ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་པ། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱི་མི་ཁྱབ་པ་མངའ་བ་དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། རྡོ་རྗེ་འཆང་། བདག་མེད་མ། བིརྺ་པ། ནག་པོ་པ། ཌཱ་མ་རུ་པ། ཨ་ཝ་དྷཱུ་ཏི་པ། ག་ཡ་དྷ་ར། འབྲོག་མི་ཤཱཀྱ་ཡེ་ཤེས། བླ་མ་སེ་མཁར་ཆུང་བ། ཞང་དགོན་པ་བ། བླ་མ་ས་སྐྱ་པ་ཆེན་པོ། སློབ་དཔོན་རིན་པོ་ཆེ། རྗེ་བཙུན་རིན་པོ་ཆེ། ཆོས་རྗེ་ས་སྐྱ་པཎྜི་ཏ། འགྲོ་བའི་མགོན་པོ་ཆོས་རྒྱལ་འཕགས་པ། ཞང་དཀོན་མཆོག་དཔལ། ན་བཟའ་བྲག་ཕུག་པ། བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོ། བླ་མ་དཔལ་ལྡན་ཚུལ་ཁྲིམས། གྲུབ་པའི་དབང་ཕྱུག་བུདྡྷ་ཤྲཱི། ཐམས་ཅད་མཁྱེན་པ་ཀུན་དགའ་བཟང་པོ། རྗེ་བཙུན་དམ་པ་དཀོན་མཆོག་རྒྱལ་མཚན་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞན་ཡང་། དབང་བསྐུར། རྒྱུད་བཤད། མན་ངག་གནང་། ཆོས་ཀྱི་འབྲེལ་པ་ཐོབ་པའི་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞེས་བརྗོད། དེ་ནས་དཀྱིལ་འཁོར་གྱི་ལྷ་ལ་རྩ་སྔགས་དང་། སྙིང་པོ་དང་། ཡུམ་གྱི་ཕྲེང་སྔགས་ཀྱི་མཐར་ཨོཾ་ཨཱཿཧཱུྃ་བཏགས་ལ་གཙོ་བོ་ཡབ་ཡུམ་ལ་དབུལ། དེ་ནས་ཨོཾ་ཨཱཿགཾ་ཧཱུྃ་ཕཊ་སྭཱ་ཧཱ། ཞེས་སོགས་ལྷ་མོ་བརྒྱད་ཀྱི་སྔགས་ཀྱི་མཐར་ཨོཾ་ཨཱཿཧཱུྃ་བཏགས་ལ་དབུལ་ཞིང་། བྱ་བའི་རྒྱུད། སྤྱོད་པ། རྣལ་འབྱོར། རྣལ་འབྱོར་བླ་ན་མེད་པའི་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ་ཞེས་བརྗོད་ཅིང་དབུལ་ལོ། །དེ་ནས་སྲིན་ལག་གིས་ལྕེ་རྩེ། སྨིན་མཚམས། སྤྱི་གཙུག་ཏུ་ཐིག་ལེ་བྱས་པས། ལུས་ཀྱི་ལྷ་ཐམས་ཅད་ཚིམ་པར་བསམས་ལ་ཨོཾ་ཨཱཿཧཱུྃ་བརྗོད། དེ་ནས་ཨོཾ་ཤྲཱི་མ་ཧཱ་ཀཱ་ལ་ཡེ་ཨོཾ་ཨཱཿཧཱུྃ། ཞེས་པས་གུར་མགོན་དང་། ཨོཾ་ཤྲཱི་དྷརྨཱ་པཱ་ལ་ཙ་ཏུར་མུ་ཁ་ཨོཾ་ཨཱཿཧཱུྃ། ཞེས་པས་གདོང་བཞི་པ་ལ་སོགས་པ་སྒོས་ཀྱི་ཆོས་སྐྱོང་གང་བྱེད་ལ་དབུལ། གཞན་ཡང་ཆོས་འཁོར་བསྲུང་ཞིང་བསྟན་པ་སྐྱོང་བར་ཞལ་གྱིས་བཞེས་པའི་ཆོས་སྐྱོང་སྲུང་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གནས་དང་ཉེ་བའི་གནས། ཞིང་དང་ཉེ་བའི་ཞིང་། ཚནྡོ་དང་ཉེ་བའི་ཚནྡོ། འདུ་བ་དང་ཉེ་བའི་འདུ་བ། འཐུང་གཅོད་དང་ཉེ་བའི་འཐུང་གཅོད། དུར་ཁྲོད་དང་ཉེ་བའི་དུར་ཁྲོད། ཡུལ་སུམ་ཅུ་སོ་གཉིས། གནས་ཉི་ཤུ་རྩ་བཞི། དུར་ཁྲོད་བརྒྱད་ན་བཞུགས་པའི་དཔའ་བོ་དང་རྣལ་འབྱོར་མ་བསམ་གྱིས་མི་ཁྱབ་པ། སྤྲུལ་པའི་སྐུས་འགྲོ་བ་སེམས་ཅན་གྱི་དོན་མཛད་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞིང་སྐྱོང་བཞི་བཅུ་རྩ་བརྒྱད། ཕོ་ཉ་གནས་ལས་སྐྱེས་པ། རིགས་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པའི་མཁའ་འགྲོའི་ཚོགས་དང་། གནས་གསུམ་གྱི་རྡོ་རྗེ་མཁའ་འགྲོ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞན་ཡང་གནོད་སྤྱིན། སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗེད་བྱེད། མ་མོ། ཞིང་སྐྱོང་། ཕོ་ཉ། འཕྲོག་མ། གྲུབ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། བོད་ཁམས་སྐྱོང་བར་བྱེད་པའི་བསྟན་མ་བཅུ་གཉིས་འཁོར་དང་བཅས་པ་དང་། གནས་བདག གཞི་བདག གྲོང་བདག ཡུལ་བདག གཉུག་མར་གནས་པ་རྣམས་དང་། འགྲོ་བ་རིགས་དྲུག ལམ་རྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སེམས་ཅན་ཐམས་ཅད་ཚིམ་ཞིང་། ཟག་པ་མེད་པའི་བདེ་བས་རྒྱུད་གང་ནས། མྱུར་དུ་བླ་ན་མེད་པའི་གོ་འཕང་ཐོབ་པའི་སྐལ་བ་དང་ལྡན་པར་གྱུར་ཅིག་ཅེས་པའི་མཐར་ཨོཾ་ཨཱཿཧཱུྃ་བཏགས་ལ་དབུལ། དེ་ནས་ཨོཾ་ཨཱཿཧཱུྃ་ཞེས་པས་རང་གི་ལྕེ་ལ་མྱངས་ཏེ་ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་དཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད། གསུམ་པ་ནི། རང་གི་སྙིང་ག་ནས་སྤྲུལ་པའི་ལྷ་མོ་རྣམས་ཀྱིས་མཆོད་པར་བསམ་ཞིང་རྡོ་རྗེ་གསོར་དྲིལ་བུ་གསིལ་ཏེ། ངག་ཏུ། ནམ་མཁར་རྗེ་བཙུན་བལྟས་ནས་ནི། །ཞེས་པ་ནས། གཡུང་མོས་སྐུ་ལ་འཁྱུད་པ་ཉིད། །ཅེས་པའི་བར་བརྗོད་དོ། །བཞི་པ་ནི། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཞེས་སོགས་དང་། ཐམས་ཅད་དངོས་པོའི་རང་བཞིན་མཆོག །ཞེས་སོགས་བསྟོད་པ་ཉི་ཤུ་པས་བསྟོད་པར་བྱའོ། །དྲུག་པ་ནི། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་རྒྱུན་བཤགས་ལན་གསུམ་བྱའོ། །བདུན་པ་ལ། རིགས་ལྔ་སྤྱི་དང་བྱེ་བྲག་གི་དམ་ཚིག་གཟུང་བ་ནི། སྲས་བཅས་སངས་རྒྱས་ཐམས་ཅད་དང་། །ཞེས་སོགས་ལན་གསུམ་བྱའོ། །རྩ་བ་དང་ཡན་ལག་གི་དམ་ཚིག་གི་ཚོགས་རྗེས་སུ་དྲན་པ་ལ། སྤང་བྱ་དྲན་པ་ནི། ཀུན་ནས་དྭང་བས་བླ་མ་ཡི། །ཞེས་པ་ནས། ཉིན་རེ་བཞིན་ནི་བཟླ་བར་བྱ། །ཞེས་པའི་བར་རྩ་བའི་ལྟུང་བ་ཡན་ལག་དང་བཅས་པའི་གཞུང་ལན་གཅིག་བརྗོད་དོ། །བསྟེན་བྱ་དྲན་པ་ནི། ཇི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་རྟག་ཏུ་གཟུང་། །རྟག་ཏུ་དམ་ཚིག་བསྲུང་བར་བྱ། །རྡོ་རྗེ་དྲིལ་བུའང་གཟུང་བར་བྱ། །གཙུག་ཏོར་རྟག་ཏུ་བཅང་བར་བྱ། །རྟག་ཏུ་སྦྱིན་སྲེག་དགང་བར་བྱ། །རྟག་ཏུ་དཀྱིལ་འཁོར་བཞེངས་པར་བྱ། །རྟག་ཏུ་བདེ་གཤེགས་རབ་གནས་བྱ། །འབྱུང་པོ་ཆེ་ལ་གཏོར་མ་སྦྱིན། །ཕྱག་རྒྱ་བཅིང་བ་རྣམ་སྤངས་ཤིང་། མཆོད་རྟེན་ལས་ནི་མི་བྱ་སྟེ། །རྡོ་རྗེ་གསུམ་མཆོག་ཕྱག་མི་བྱ། །དཀྱིལ་འཁོར་ལ་སོགས་ལུས་ཀྱི་ལས། །རྨི་ལམ་དུ་ཡང་མི་བྱའོ། །སློབ་དཔོན་གཞན་ལ་ཕྱག་མི་བྱ། །བླ་མའི་རྒན་རབས་ཕྱག་འཚལ་ལོ། །རྟག་པར་རྒྱུན་དུ་སྔགས་བཟླ་ཞིང་། །བསམ་གཏན་ཉིད་ཀྱང་འབྲལ་མི་བྱ། །རྟག་ཏུ་སློབ་མ་བསྡུ་བྱ་ཞིང་། །རྟག་པ་རུ་ནི་བཤད་པར་གྱིས། །རྟག་ཏུ་སེམས་ཅན་བསྐྱང་བར་བྱ། །རྟག་ཏུ་སངས་རྒྱས་ཆེར་མཉེས་བྱ། །ཛམ་བྷ་ལ་ལ་ཆུ་སྦྱིན་ཞིང་། །ལས་རྣམས་ཐམས་ཅད་ཡང་དག་སྤྱད། །བྱེ་མའི་ལས་ལ་མཆོད་རྟེན་ཡང་། །མཁས་པས་ཆོ་ག་བཞིན་དུ་བྱ། །ཞེས་ལན་གཅིག་བརྗོད་དེ། རྒྱུན་བཤགས་ནས་འདིའི་བར་ཐལ་མོ་སྙིང་གར་སྦྱར་ཏེ་དོན་དྲན་བཞིན་དུ་བྱའོ། །བརྒྱད་པ་ནི། གཏོར་མ་ནང་མཆོད་ཆུ་ཆང་གིས་སྦྱངས་ཏེ་སྒྲུབ་ཐབས་ལྟར་བྱིན་གྱིས་བརླབས་ནས་མགྲོན་བསྐྱེད་པའི་ཚེ། མདུན་བསྐྱེད་ཀྱི་དུར་ཁྲོད་ཆེན་པོ་བརྒྱད་དུ་ཧཱུྃ་བརྒྱད་ཡོངས་སུ་གྱུར་པ་ལས་ཤར་དུ་བརྒྱ་བྱིན་ཞེས་སོགས་ཕྱོགས་སྐྱོང་བརྒྱད་གསལ་གདབ། མདུན་བསྐྱེད་ཀྱི་དབང་ལྡན་གྱི་དུར་ཁྲོད་ཀྱི་སྟེང་གི་ཆ་ལ་ཨེ་ལས་ཆོས་ཀྱི་འབྱུང་གནས་གྲུ་གསུམ་པའི་ནང་དུ་པྃ་ལས་པདྨ་འདབ་མ་བརྒྱད་པའི་ལྟེ་བ་དང་། འདབ་མ་བརྒྱད་ལ་ཨོཾ་དགུ་ཡོངས་སུ་གྱུར་པ་ལས་དབུས་སུ་སྐུ་རྡོ་རྗེ་ཞེས་སོགས་དང་། མདུན་བསྐྱེད་ཀྱི་སྲིན་པོའི་དུར་ཁྲོད་ཀྱི་འོག་གི་ཆ་ལ་ཨེ་ལས་ཆོས་ཀྱི་འབྱུང་གནས་གྲུ་གསུམ་པའི་ནང་དུ་པྃ་ལས་པདྨ་འདབ་མ་བརྒྱད་པའི་ལྟེ་བ་དང་། འདབ་མ་བརྒྱད་ལ་ཨཱཿདགུ་ཡོངས་སུ་གྱུར་པ་ལས་དབུས་སུ་གསུང་རྡོ་རྗེ་ཞེས་སོགས་གསལ་གདབ། གཞན་རྣམས་སྒྲུབ་ཐབས་དང་འདྲ་བ་ལས་ཡེ་ཤེས་པ་སྤྱན་འདྲེན་པའི་ཚེ་རང་གི་སྙིང་གའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས་ནས་དགུག་གཞུག་བྱ། རིགས་བདག་གིས་རྒྱས་གདབ་པའི་ཚེ་ཕྱོགས་སྐྱོང་བརྒྱད་ལ་མི་བསྐྱོད་པ། སྐུ་རྡོ་རྗེ་ལྷ་ཆེན་བརྒྱད་དང་བཅས་པ་ལ་རྣམ་པར་སྣང་མཛད། གསུང་རྡོ་རྗེ་ཀླུ་ཆེན་བརྒྱད་དང་བཅས་པ་ལ་འོད་དཔག་ཏུ་མེད་པས་དབུར་བརྒྱན་ཞེས་བརྗོད། གཞན་རྣམས་སྒྲུབ་ཐབས་ལྟར་རོ། །དེ་ནས་ཆོས་སྐྱོང་རྣམས་ལའང་གཏོར་མ་འབུལ་ནའང་སྐབས་འདིར་ཕུལ་ལ། དེ་ནས་འཇིག་རྟེན་པའི་གཏོར་མ་ལ། ལག་པ་གཡས་གཡོན་དབུས་གསུམ་བསྟན་ཏེ། ཨོཾ་ཨཱཿཧཱུྃ་ཧ་ཧོ་ཧྲཱིཿཞེས་པས་སྔར་གྱི་བྱིན་རླབས་དྲན་པས་བྱ་སྟེ། དེ་ནས་འཇིག་རྟེན་པའི་མགྲོན་སྤྱན་དྲངས་པ་ནི་ཕཻཾ་གྱི་སྒྲ་དང་འབར་བའི་ཕྱག་རྒྱ་བྱས་ལ་ཨོཾ་བཛྲ་ཨཱ་རལླི་ཧོ་ཛཿཧཱུྃ་བཾ་ཧོཿ བཛྲ་ཌཱ་ཀི་ནྱཿས་མ་ཡ་སཏྭཾ་དྲྀ་ཤྱ་ཧོཿཞེས་བརྗོད་ཅིང་། སེམས་ཀྱིས་སྙིང་གའི་ས་བོན་གྱི་འོད་ཀྱིས་འཛམ་བུའི་གླིང་ན་གདོད་ནས་གྲུབ་པའི་དུར་ཁྲོད་བརྒྱད་སྤྱན་དྲངས་ལ། སྔར་གྱི་དུར་ཁྲོད་བརྒྱད་ལ་གཉིས་སུ་མེད་པར་བསྟིམ་པར་བྱའོ། །དེ་ནས་རྡོ་རྗེ་ཐལ་མོ་ཁ་གྱེན་དུ་ཕྱེ་ལ། ངག་ཏུ། ཨོཾ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ་རཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུནྨཱ་ད། ཨ་པསྨཱ་ར་ཌཱ་ཀ་ཌཱ་ཀི་ནྱ་ད་ཡ། ཨི་མཾ་བ་ལིཾ་གྲྀ་ཧནྟུ་ས་མ་ཡ་རཀྵནྟུ་མ་མཱ་སརྦ་སིདྡྷི་མེ་པྲ་ཡཙྪནྟུ། ཡ་ཐཻ་ཝཾ་ཡ་ཐཻསྚཾ་བུཉྫ་ཐ་ཛི་ག་ཐ། པི་པ་ཐ། མ་ཏི་ཀྲ་མ་ཐ། མཱ་མ་སརྦ་ཀརྟ་ཡ་སད་སུ་ཁཾ་བི་ཤུདྡྷ་ཡི་ས་ཧ་ཡི་ཀ བྷ་ཝནྟུ་ཧཱུྃ་ཧཱུྃ་ཕཊ། ཞེས་ལན་གསུམ་བརྗོད་པས་དུར་ཁྲོད་ཀྱི་བདག་པོ་རྣམས་མཉེས་པར་བསམ་པར་བྱའོ། །དེ་ནས་ཕྱི་དང་ནང་མཆོད་ཀྱིས་མཆོད་ནས་དྲིལ་བུ་དཀྲོལ་ཞིང་། ལྷ་ཡི་ཚོགས་རྣམས་མ་ལུས་དང་། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་བརྗོད་ནས་རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་དང་། བསྔོ་བ་སྨོན་ལམ་རྣམས་སྒྲུབ་ཐབས་ལྟར་བྱ། དེ་ནས་གུར་ནས་འབྱུང་བའི་ཡི་གེ་བརྒྱ་པའི་མཐར་མུཿ ཞེས་བརྗོད་དེ་མཐེབ་སྲིན་གྱིས་སེ་གོལ་གཏོག་ལ་ཡེ་ཤེས་པ་གཤེགས་སུ་གསོལ། དམ་ཚིག་པ་རྣམས་ཛཿཧཱུྃ་བཾ་ཧོཿ ཞེས་པས་རང་གི་སྙིང་གར་བསྡུས་ལ། དཀྱིལ་འཁོར་གྱི་ཚོམ་བུ་རྣམས་དབུས་སུ་བསྡུ། མཆོད་པ་དམན་མ་རྣམས་ཆུ་བོར་དོར་བའམ་གནས་དབེན་པར་བཞག་ལ་ལས་ཀྱི་རྗེས་མི་མངོན་པར་བྱའོ། །འདི་དག་ནི་ཐུན་བཞིའི་རྣལ་འབྱོར་བསྒོམ་པའི་ཚེ་ཐུན་གྱི་ཐོག་མར་བྱ་བ་ཡིན་པས་ཐུན་མཚམས་ཀྱི་བྱ་བ་ཞེས་ཀྱང་བྱ། མཆོད་གཏོར་གྱི་རྣལ་འབྱོར་ཞེས་ཀྱང་བྱ། ལས་དང་པོ་པའི་བྱ་བ་ཞེས་ཀྱང་བྱ། ཕྱི་རོལ་ཚོགས་བསག་གི་རྣལ་འབྱོར་ཞེས་ཀྱང་བྱ་སྟེ་རྣལ་འབྱོར་དབང་ཕྱུག་གི་མན་ངག་རིན་པོ་ཆེ་བསོད་ནམས་རྩེ་མོའི་གསུང་རབ་ལས་འབྱུང་བ་ལྟར་དག་པར་བྲིས་པ་ཡིན་ལ། དེང་སང་དགུ་གཏོར་ལ་སོགས་པའི་དུས་སུ་བདག་བསྐྱེད་སྔོན་དུ་བཏང་ནས་ཆོས་སྐྱོང་གི་གཏོར་མ་དང་ཕྱོགས་གཅིག་ཏུ་བྱེད་པའི་ལག་ལེན་གྱི་ཚུལ་ནི། སའི་ཕྱོགས་གང་འོས་པ་དེར་མཎྜལ་གྱི་དབུས་སུ་དྲི་བཟང་གི་ཆུས་ཐིག་ལེ་བྱས་ནས་ཚོམ་བུ་དགུ་བཀོད། དེའི་མཐར་བྱང་ཤར་དུ་མཚམས་འཛིན་གྱི་མེ་ཏོག ཤར་དུ་ཞབས་བསིལ་དང་ཞལ་བསིལ། ཤར་ལྷོར་འཐོར་འཐུང་། ལྷོར་མཆོད་ཡོན། ལྷོ་ནུབ་ཏུ་མེ་ཏོག ནུབ་ཏུ་བདུག་སྤོས་དང་མར་མེ། ནུབ་བྱང་དུ་དྲི་ཆབ། བྱང་དུ་ཞལ་ཟས་རྣམས་ཀྱིས་བསྐོར་བའམ། ཡང་ན་མཎྜལ་གྱི་མདུན་དུ་བྱང་ཤར་ནས་བརྩམས་ཏེ་ཤར་ལྷོའི་བར་དུ་གཏོར་མ་ལྔ་རིམ་པ་བཞིན་དུ་བཤམས་ནས་དེའི་མདུན་དུ་སྔར་གྱི་མཆོད་པ་རྣམས་ཕྲེང་ཚར་དུ་བཤམ་པ་ཡང་མཛད་དོ། །དེ་ནས་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་ནས་བརྩམས་ཏེ། བདག་བསྐྱེད་བཟླས་པ་དང་བཅས་པའི་བར་བྱས་ནས་དཀྱིལ་འཁོར་བསྡུས་ཏེ། རང་གཙོ་བོ་ཡབ་ཡུམ་གྱི་ང་རྒྱལ་དུ་གནས་ནས་མཆོད་པ་རྣམས་སྔར་བཤད་པ་ལྟར་བྱིན་གྱིས་བརླབ་པར་བྱའོ། །དེ་ནས་མཎྜལ་ལ་རྡོ་རྗེའི་རྩེས་ནང་མཆོད་གཏོར་ནས། ཨ་མྲྀ་ཏས་བསང་། སྭ་བྷཱ་ཝས་སྟོང་པར་སྦྱངས་ཏེ་སྟོང་པའི་ངང་ལས་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་སྣ་ཚོགས་རྡོ་རྗེ་ཤར་དཀར་ཞེས་སོགས་སྒྲུབ་ཐབས་ལྟར་གསལ་བཏབ་ནས། ཨོཾ་མེ་དཱི་ནི་ཞེས་སོགས་ལན་གསུམ་དང་། ཨོཾ་རཀྵ་ཞེས་སོགས་ལན་གསུམ་གྱིས་བྱིན་གྱིས་བརླབ་བོ། །དེ་ལྟ་བུའི་སྲུང་བའི་འཁོར་ལོའི་དབུས་སུ་ཨེ་ལས་ཆོས་ཀྱི་འབྱུང་གནས་ཞེས་པ་ནས་འབྱུང་བཞི་འཁོར་ལོ་དང་བཅས་པའི་བར་སྒྲུབ་ཐབས་ལྟར་གསལ་བཏབ་ནས། དེ་རྣམས་དང་རང་གི་སེམས་སྣང་རོ་གཅིག་ཏུ་འདྲེས་པ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ། གྲུ་བཞི་པ་སྒོ་བཞི་པ་ཞེས་སོགས་རྟེན་དང་བརྟེན་པའི་དམ་ཚིག་པ་བསྐྱེད་པ་ནི་སྔར་དང་འདྲའོ། །དེ་ནས་མིག་ཏུ་གཏི་མུག་རྡོ་རྗེ་མ་ཞེས་པ་ནས་ཐུགས་ཀར་ཐུགས་རྡོ་རྗེ་མ་ཞེས་པའི་བར་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་ནས་ལག་པ་བྱིན་གྱིས་བརླབ་པ་ནས་བཟུང་སྟེ། ཡེ་ཤེས་ཀྱི་འཁོར་ལོ་སྤྱན་འདྲེན་པའི་བར་སྔ་མ་ལྟར་བྱས་ལ། ཆུ་བཞི་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་ནས་ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཞེས་སོགས་ཀྱིས་དགུག་གཞུག་བྱའོ། །དེ་ནས་སྒྲུབ་ཐབས་ལྟར་དབང་ལྷ་སྤྱན་དྲངས་ཏེ། ཆུ་བཞི་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་ནས། བཅོམ་ལྡན་དེ་བཞིན་གཤེགས་པ་ཀུན་ཞེས་སོགས་ཀྱིས་གསོལ་བ་བཏབ། སངས་རྒྱས་རྣམས་ནི་ཐམས་ཅད་ཀྱི་ཞེས་སོགས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། ལུས་ཐམས་ཅད་གང་དྲི་མ་ཐམས་ཅད་དག ཆུ་ལྷག་མ་ཡར་ལུད་པ་ལས་གཙོ་བོ་ཡབ་ཡུམ་གཽ་རཱི་དང་པུཀྐ་སཱི་ལ་མི་བསྐྱོད་པ་ཞེས་སོགས་སྒྲུབ་ཐབས་ལྟར་རྒྱས་བཏབ། དེ་ནས་རང་གི་སྙིང་གའི་ས་བོན་ལས་འོད་ཟེར་འཕྲོས་པས་མདུན་གྱི་ནམ་མཁར་རྩ་བའི་བླ་མ་རྡོ་རྗེ་འཆང་གི་རྣམ་པ་ཅན་ལ་བརྒྱུད་པའི་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་བྱང་ཆུབ་སེམས་དཔའ་དམ་པ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿཞེས་པས་ཚོགས་ཞིང་ཁྱད་པར་བ་སྤྱན་དྲངས་ལ་ཕྱག་འཚལ་ནས། གཏོར་མ་དང་པོ་འདས་པ་ལ་འབུལ་བའི་བར་སྔ་མ་ལྟར་བྱས་ལ། གཏོར་མ་གཉིས་པ་ནག་པོ་ཆེན་པོ་ལྕམ་དྲལ། གསུམ་པ་ཞལ་བཞི་པ། བཞི་པ་ལས་མགོན། ལྔ་པ་མཁའ་འགྲོ་སྤྱི་གཏོར་གྱིས་ཕུལ་ནས་ཆོས་སྐྱོང་གི་བཤགས་པ་དང་། བསྟོད་པ་སོགས་སྐབས་དང་བསྟུན་ནས་བྱ། དེ་ནས་འདས་པའི་གཏོར་མ་བར་ཆད་ཞི་བའི་ཆེད་དུ་གཞག གཞན་བཞི་པོ་སྤྱི་བསྟབ་བརྗོད་ཅིང་ས་གཙང་སར་བསྐྱལ། ནང་དུ་ལོག་ནས་མཆོད་པ་རྣམས་བསང་སྦྱང་བྱིན་གྱིས་བརླབས་ནས་སྔགས་ཙམ་གྱིས་ཕྱི་མཆོད་དང་ནང་མཆོད་དབུལ། དཀར་མོ་རི་དྭགས་སོགས་དང་། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་ནས་ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་ཉམས་པ་དང་ཞེས་སོགས་ཀྱིས་ནོངས་པ་བཟོད་པར་གསོལ་ནས་ཡེ་ཤེས་པ་གཤེགས། དམ་ཚིག་པ་རྣམས་བདག་ལ་བསྡུས་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པར་བྱའོ། །འདིར་སྒྲུབ་ཐབས་སུ་ཁ་འཕངས་པ་རྣམས་ནི་རྗེ་བླ་མ་མུས་པ་ཆེན་པོའི་སྒྲུབ་ཐབས་ཡིན་ལ། རང་གི་གཞུང་མན་ངག་གི་སྣང་བའི་ཁ་བསྐང་དུ་ཡང་འགྱུར་བ་འདི་ནི་མང་དུ་ཐོས་པའི་དགེ་སློང་བསོད་ནམས་སེང་གེས་བྲིས་པའོ།། ༈ །མཚོ་སྐྱེས་ལུགས་ཀྱི་ཕྲ་མིག་བཞུགས་ལགས། བླ་མ་དང་དཔལ་ཀྱཻ་རྡོ་རྗེ་ལ་ཕྱག་འཚལ་ལོ། །སློབ་དཔོན་ཆེན་པོ་མཚོ་སྐྱེས་ཀྱི་ལུགས་ཀྱི་ཀྱཻ་རྡོ་རྗེའི་མངོན་པར་རྟོགས་པ་མན་ངག་ལུགས་ཀྱི་ཡན་ལག་བཞི་པ་དང་། ཐུན་མོང་བ་རྣམས་དེར་ཁ་འཕངས་ཤིང་མི་འདྲ་བ་རྣམས་འདིར་བརྗོད་ན། ཚོགས་ཞིང་སྤྱན་དྲངས་ནས། ལྷ་མོ་བརྒྱད་ཀྱིས་མཆོད་པ་འདྲ། རྒྱུན་བཤགས་ནི་གང་ཞིག་ཐོག་མ་མེད་པའི་འཁོར་བར་ངན་པའི་རྣམ་པར་རྟོག་པ་ལས་སྐྱེས་པ་བདག་གིས་སྡིག་པའི་ལས་བགྱིས་པ་དེ་ཐམས་ཅད་བཅོམ་ལྡན་འདས་ཀྱི་སྤྱན་སྔར་བཤགས་ཤིང་ཡང་མི་བགྱིད་དོ། །སོ་སོའི་སྐྱེ་བོ་དང་། འཕགས་པ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། རྫོགས་པའི་བྱང་ཆུབ་ཀྱི་དགེ་བ་དེ་ཐམས་ཅད་ལ་ཡི་རང་བར་བགྱིའོ། །རྫོགས་པའི་བྱང་ཆུབ་ཀྱི་དགེ་བ་དེ་ཐམས་ཅད་ཅེས་པ་ཡན་ཆད་སྔ་མ་བཞིན་བརྗོད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །བདག་མིང་འདི་ཞེས་བགྱི་བ་བླ་མ་དང་། གཙོ་བོ་སངས་རྒྱས་དང་། སྔགས་ལ་སོགས་པ་ཆོས་དང་། འཁོར་དགེ་འདུན་ལ་བདག་ཀྱཻ་རྡོ་རྗེའི་གོ་འཕང་མ་ཐོབ་ཀྱི་བར་དུ་སྐྱབས་སུ་མཆིའོ། །སྣང་གྲག་གི་ཆོས་ཐམས་ཅད་རང་བཞིན་གྱིས་མ་གྲུབ་པ་ཡིན་པ་ལ་དེ་ལྟར་མ་རྟོགས་པའི་སེམས་ཅན་ཐམས་ཅད་ཀྱི་དོན་དུ་བདག་གིས་མཚན་མ་མེད་པའི་བྱང་ཆུབ་ཀྱི་སེམས་བསྒོམ་པར་བགྱིའོ། །ཇི་ལྟར་དུས་གསུམ་མགོན་པོ་རྣམས་ཞེས་སོགས་ཚིགས་བཅད་གཉིས་དང་བཅས་པ་ལན་གསུམ་བརྗོད། དེ་ནས་ཚད་མེད་བཞི་དང་། ཡེ་ཤེས་ཀྱི་ཚོགས་དང་། ཐུན་མོང་བའི་སྲུང་འཁོར་འདྲ། དེའི་ནང་དུ་ཆོས་ཀྱི་འབྱུང་གནས་ཁ་དོག་དཀར་པོར་བསྒོམས་པའི་ནང་དུ་འབྱུང་བཞི་ལུགས་བཟློག་ལ་རང་སེམས་འདྲེས་པ་ལས་གཞལ་ཡས་ཁང་བསྐྱེད་པ་འདྲ། གདན་བསྐྱེད་པའི་སྐབས་སུ་དབུས་དང་ཕྱོགས་མཚམས་བརྒྱད་དུ་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་རེ་རེ། དབུས་ཀྱི་ཉི་མའི་དཀྱིལ་འཁོར་གྱི་སྟེང་དུ། ཕུང་པོ་དང་། ཉོན་མོངས་པ་དང་། འཆི་བདག་དང་། ལྷའི་བུའི་བདུད་ཀྱི་ངོ་བོ་ཚངས་པ་དང་། ཉེ་དབང་དང་། དབང་པོ་དང་། དྲག་པོ་རྣམས་མཉམ་པར་བརྩེགས་པ། ཕྱོགས་མཚམས་བརྒྱད་དུ་ཤར་དུ་ཚངས་པ་སོགས་འདྲ། དེ་ནས་གདན་དགུའི་སྟེང་དུ་ཨཱ་ལི་ཕྲག་གཉིས་ལས་ཟླ་བའི་དཀྱིལ་འཁོར་བསྒོམས་ནས་སྣོད་བཅུད་སྦྱང་བའི་བར་ཕལ་ཆེར་འདྲ་ལ། ལྷ་མོ་དབྱུང་བ་ནི་ས་བོན་འགྲོས་ཡིན། གཙོ་བོའི་ཕྱག་གཡས་ཀྱི་བདུན་པ་ན་ཁྱི། བརྒྱད་པ་ན་མ་ཧེ་ནི་བདག་མདུན་ཐམས་ཅད་དུ་ཁྱད་པར་རོ། །དེ་ནས་སྐྱེ་མཆེད་དང་སྐུ་གསུང་ཐུགས་བྱིན་བརླབ་མི་བྱེད་པར། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་རིགས་བདག་གི་རྒྱས་གདབ་ཕལ་ཆེར་འདྲ་བ་ལས། དབང་གི་ཆུ་རྒྱུན་གཅིག་ལ་དབང་བཞི་བླངས་པ་ཙམ་ཡིན་གྱི་མཐར་རྟེན་གྱི་རྒྱན་ཆའི་དག་པ་སོགས་གསུམ་པོ་འདིར་མི་བཞེད། དེ་ནས་བསྐྱེད་རིམ་གྱི་སེམས་འཛིན་ཚུལ་ལྷ་དགུ་ལ་སེམས་འཛིན་པ་དང་། གཙོ་བོ་ཡབ་ཡུམ་ཙམ་ལ་སེམས་འཛིན་པ་དང་། ཡབ་ཙམ་ལ་སེམས་འཛིན་པའི་གང་ཟག་གི་བློ་རིགས་གསུམ་ལས། དང་པོ་སྐབས་འདིར་སེམས་འཛིན་བྱེད། གཉིས་པ་ཁམས་གསུམ་སྣོད་བཅུད་ནས་གཙོ་བོ་ཡབ་ཡུམ་གྱི་བར་བསྡུས་ནས་སེམས་འཛིན་བྱེད། གསུམ་པ་ཡུམ་དང་ཡུམ་རང་གི་སྙིང་གའི་ཟླ་ཉི་ཨྃ་གསུམ་ལ་བསྡུ། དེ་ཡང་འོད་ཀྱི་གོང་བུར་བྱས་ནས་སྣ་བུག་གཡོན་ནས་རང་གི་སྙིང་གའི་ཧཱུྃ་ལ་བསྡུས་ཏེ་ཡབ་རྐྱང་ལ་སེམས་འཛིན་བྱེད། དེ་ནས་རྫོགས་རིམ་ལ་ཡང་ཧཱུྃ་ཙམ་ལ་སེམས་གནས་པ་དང་། ནཱ་ད་ཙམ་ལ་སེམས་གནས་པ་དང་། དེ་ཡང་མི་དམིགས་པའི་སྟོང་ཉིད་ལ་སེམས་གནས་པ་གསུམ་པོ་གང་རུང་བསྒོམས་ནས་སླར་ཡང་གཙོ་བོ་ཡབ་ཡུམ་གྱི་སྐུར་ལངས་ཏེ། ཐུན་གཏོར་གཏོང་བའམ། སྤྱོད་ལམ་ལ་འཇུག་པའམ། མདུན་བསྐྱེད་ལ་འཇུག་པ་གང་རུང་བྱའོ། །དེ་དག་གང་ལྟར་ཡང་གཙོ་བོ་ཡབ་ཡུམ་ཙམ་དུ་གནས་པའི་དུས་དེར། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པའི་ལྟེ་བའི་ཨཾ་ལས་ཀྱི་ཕྱག་རྒྱ་ཞེས་སོགས་ཕྱག་རྒྱ་བཞིས་རྒྱས་གདབ། སྤྲོ་ན་གཏུམ་མོ་འཁོར་ལོ་བཞིའི་དམིགས་པ་རྒྱས་གདབ་པ་བསྒོམ་པ་ཡང་གསུངས། དེ་ནས་སྤྱི་བོའི་འཁོར་ལོ་མི་བསྐྱོད་པ་ཞེས་སོགས་རྒྱན་དྲུག་གི་དག་པ་དང་། དབང་པོའི་གནས་རྣམས་སུ་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་རེ་རེའི་སྟེང་དུ། མིག་ཏུ་མཾ་ལས་གཏི་མུག་རྡོ་རྗེ་མ་དཀར་མོ་ཞེས་སོགས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། དེ་ནས་བཟླས་པའི་རྣལ་འབྱོར་འདྲ། དེ་ནས་ཡུམ་བསྡུ་བ་ནས་ཐུན་མཚམས་ཀྱི་ལྷར་ལངས་པའི་བར་སྔ་མ་བཞིན་བྱས་ནས། སྙིང་རྗེའི་སྤྱན་ནི་དམར་པོ་ལ། །ཞེས་སོགས་དང་། གཟུགས་ཀྱི་ཕུང་པོ་ནི་གཽ་རཱིའོ། །གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་དང་། ཞེ་སྡང་ཞེས་བཤད་རྡོ་རྗེ་མ། །ཞེས་སོགས་དང་། གཟུགས་ལ་གཽ་རཱིར་རྟག་ཏུ་བཤད། །ཅེས་སོགས་དང་། གློ་དང་དབུགས་དང་དེ་བཞིན་སྨྱོ། །ཞེས་སོགས་ཀྱིས་དག་པ་དྲན་པར་བྱ། སྤྱོད་ལམ་ལ་འཇུག་ན་རྡོ་རྗེའི་གླུ་དང་སྨོན་ལམ་བྱ་སྟེ་ཐུན་གཏོར་སོགས་ལ་འཇུག་གོ །སྒྲུབ་ཐབས་ཀྱི་ཕྲ་མིག་གོ། །།རས་བྲིས་ལ་བརྟེན་པའི་དཀྱིལ་འཁོར་གྱི་ཆོ་ག་ལ་སྤྱི་འགྲོ་ནི་ཆུ་གསུམ་གྱི་མཆོད་ཡོན་བྱང་ཤར་དུ་བཤམ་པ་ནས་མཆོད་པ་བརྒྱད་ཕྱོགས་མཚམས་བརྒྱད་དུ་བཤམ། མཆོད་ཡོན་གྱི་སྔགས་ཨོཾ་པྲ་ཝ་ར་སད་ཀ་ར་ཛཿཧཱུྃ་བཾ་ཧོཿཁཾ་རཾ་མ་ཧཱ་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་དང་། ཞབས་བསིལ་ཞལ་བསིལ་སོགས་ཀྱི་སྔགས་འདྲ། ཡན་ལག་བཞི་རྫོགས་རྣམས་ལ་ཡེ་ཤེས་ཀྱི་འཁོར་ལོ་དགུག་གཞུག་གི་རྗེས་སུ་སྐྱེ་མཆེད་དང་སྐུ་གསུང་ཐུགས་བྱིན་བརླབ་བྱ། ཆོ་ག་ལ་སྟ་གོན་དང་། དངོས་གཞི་གཉིས་ལས། དང་པོ་ས་ལྷ་སྟ་གོན་ནི། སྔོན་འགྲོ་རྣམ་གསུམ་འདྲ། པདྨ་དང་ཟླ་བའི་སྟེང་དུ་བྃ་ལས་སའི་ལྷ་མོ་ཞལ་གཅིག་ཕྱག་གཉིས་ཀྱིས་རིན་པོ་ཆེའི་བུམ་པ་འཛིན་པ་ཡན་ལག་བཞི་རྫོགས་སུ་བསྐྱེད་ནས་མཆོད་གཏོར་འདྲ། སྐྱོབ་པ་སངས་རྒྱས་སོགས་དང་། སྐྱོབ་པ་ཤཱཀྱ་སོགས་ཚིགས་བཅད་གཉིས་ཀྱིས་གསོལ་བ་གདབ། སའི་ལྷ་མོ་ནམ་མཁར་བཏེག་སྟེ་དཔང་པོའི་ཚུལ་གྱིས་བཞུགས་པར་བསམ། སྟ་གོན་གྱི་དུས་སུ་སྲུང་འཁོར་དང་། ཆོས་འབྱུང་གི་ནང་དུ་གཞལ་ཡས་ཁང་སྐད་ཅིག་གིས་བསྐྱེད་པའི་ནང་དུ་པྃ་ལས་པདྨ་དང་། ཨོཾ་ལས་ཉི་མའི་དཀྱིལ་འཁོར་དགུའི་སྟེང་དུ་སྒྲུབ་ཐབས་ལྟར་གྱི་གདན་བསྐྱེད། དེ་རྣམས་ཀྱི་སྟེང་དུ་ལྷ་དགུ་ས་བོན་ལས་བསྐྱེད་ཡེ་ཤེས་པ་སྤྱན་དྲངས་ནས་ཕྱི་མཆོད་དང་ལྷ་མོ་བརྒྱད་ཀྱིས་མཆོད། ལྷ་མོ་བཞིས་དགུག་གཞུག་བྱ། ཡན་ལག་ལྷག་མ་གཉིས་འདྲ། མཆོད་པ་ལ་དྲི་མེད་ཡིད་འོང་སོགས་ཆུ་གསུམ་ལ་འདོན་པ་བསྒྱུར། ནང་མཆོད་ཀྱི་སྐབས་སུ། རྡོ་རྗེ་འཆང་། བི་ལ་སྱ། ཡན་ལག་མེད་པའི་རྡོ་རྗེ། གྲུབ་ཆེན་མཚོ་སྐྱེས། ཨིནྡྲ་བྷཱུ་ཏི། ལྕམ་ལཀྵིམཱ། ནག་པོ་སྤྱོད་པ་བ་དང་། བྲམ་ཟེ་དཔལ་འཛིན། ག་ཡ་དྷ་ར། འབྲོག་མི། སེ་སྟོན། ཞང་དགོན་པ་བ། ས་ཆེན། རྟ་སྟག་སོ་བ་ཁུ་དབོན། དཔལ་ཆུ་བོ་རི་པ། ཞང་དཀོན་མཆོག་དཔལ། ན་བཟའ་བྲག་ཕུག་པ། རི་ཁྲོད་པ་དཔལ་ལྡན་པ། རྗེ་ངོར་པ། རྗེ་མུས་པ་རྣམས་ཀྱི་མཚན་ནས་བརྗོད། གཞན་ཕྱི་མཆོད། ནང་མཆོད། ན་བཟའི་མཆོད་པ་རྣམས་འདྲ། བསྟོད་པ་ལ་དཀར་མོ་རི་དྭགས་སོགས་ཀྱི་རྗེས་སུ། སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་པ་རྣམས། །དམ་པའི་སྲིད་པ་བྱེད་པར་ཤོག །ཅེས་དང་། བསྟོད་ཐུང་དང་། བསྟོད་རིང་གིས་བསྟོད། གཏོར་མ་འདྲ། དེ་ནས་བདུག་སྤོས་ཐོགས་ཏེ་རྡོ་རྗེ་དྲིལ་བུ་འཛིན་པས། གཉིས་མེད་ཡེ་ཤེས་ལས་བྱུང་བ། །ཁྱབ་བདག་དངོས་ཀུན་བདག་ཉིད་ཅན། །སྟོན་པའི་གཙོ་བོ་ཁྲག་འཐུང་དཔལ། །བདག་མེད་མ་དང་ཡང་དག་ལྡན། །ཕྱོགས་དང་མཚམས་ཀྱི་མཁའ་འགྲོ་དང་། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པས། །ནངས་པར་དཀྱིལ་འཁོར་འབྲི་བར་བགྱིད། །རྗེས་སུ་བརྩེ་བར་ཉེར་དགོངས་ཏེ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་གྱིས་གསོལ་བ་གདབ་བོ། །སློབ་མ་སྟ་གོན་ལ། ལུས་ཀྱི་བྱ་བ་འདྲ། མྱ་ངན་ལས་འདས་པའི་བསམ་པ་བསྐྱེད་པ་ནི། གསང་སྔགས་སྤྱོད་པའི་སྐལ་ལྡན་ཞིང་། །སྔགས་ཀྱི་དངོས་གྲུབ་དོན་གཉེར་གང་། །ཞེས་སོགས་བརྗོད། ནང་དབང་བསྐུར་བའི་སྐབས་སུ། ཡུམ་གྱི་མཁར་སྐུ་རྡོ་རྗེ་རྣམ་སྣང་འབའ་ཞིག་ཏུ་བསྐྱེད་ནས་དབང་བསྐུར་བའི་རྗེས་སུ་ཧེ་རུ་ཀ་ཞལ་གཅིག་ཕྱག་གཉིས་པར་གྱུར་པར་བསམ་སྟེ་སྦྱོར་མཚམས་ནས་ཕྱུང་སྟེ་གྲལ་ལ་བཞག ཁྱད་པར་ཅན་གྱི་དོན་ཞུ་བ་དང་། གསང་སྔགས་ལ་སྤྲོ་བ་བསྐྱེད་པ་འདྲ། དེ་ནས་ནང་གི་སེམས་བསྐྱེད་པ་ནི་བདེ་མཆོག་བཞིན་དམ་ཚིག་ཉེར་གཉིས་འཛིན་པ་ཚིག་ཐ་མ་ལ་བདག་གིས་སྡོམ་པ་ལེགས་པར་གཟུང་ཞེས་སྦྱར་བ་ལན་གསུམ་བཟླས་ནས། བདག་གིས་སྡིག་པ་བགྱིས་པ་དང་། །བགྱིད་དུ་སྩལ་དང་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །དེ་དག་ཐམས་ཅད་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་དགྲ་བཅོམ་འགྲོ་རྣམས་ཀྱིས། །བསྒོམས་དང་བཟླས་བརྗོད་བསོད་ནམས་ཚོགས། །དེ་ལ་བདག་ནི་ཡི་རང་ངོ་། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་བསྐོར་བ་དང་། །བྱང་ཆུབ་སེམས་དཔའི་ཚོགས་སྤྱོད་པ། །དེ་དག་ལ་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་སེམས་ནི་བསྐྱེད་པ་ལྟར། །འདི་ཉིད་དུ་ནི་སེམས་བསྐྱེད་དོ། །མགོན་པོ་བདག་ལ་དགོངས་སུ་གསོལ། །མ་ལུས་བཞུགས་ཤིང་སངས་རྒྱས་རྣམས། །དུས་འདི་ཉིད་ནས་སངས་རྒྱས་བར། །བླ་མེད་བདག་ལ་གཟིགས་སུ་གསོལ། །སངས་རྒྱས་ཆོས་དང་དགེ་འདུན་ཏེ། །ཞེས་སོགས་ཚིགས་བཅད་ལྔ་དང་། ཚུལ་ཁྲིམས་ཀྱི་ནི་བསླབ་པ་དང་། །ཞེས་སོགས་ཚིགས་བཅད་གཅིག་དང་། བདག་གི་དགེ་བའི་ལས་རྣམས་འདི་དག་གིས། །འཇིགས་རྟེན་མི་རིང་སངས་རྒྱས་མྱུར་བསྒྲུབས་ནས། །སེམས་ཅན་འཁོར་བའི་རྒྱ་མཚོར་བྱིང་བ་རྣམས། །བླ་མེད་བྱང་ཆུབ་ཉིད་དུ་བསྒྲལ་བར་བགྱི། །ཞེས་ལན་གསུམ་བརྗོད། བསྲུང་བ་ནི་དཔྲལ་བར་ཨོཾ་ལས་འཁོར་ལོ་ཨོཾ་གྱིས་མཚན་པ་སོགས་བསྒོམས་ནས་ཡས་རིམ་གྱིས་རེག་པ་ཁོ་ན་བྱ། མཆོད་པ་ཞལ་ཟས་མེད་གཞན་འདྲ། དེ་ནས་སོ་ཤིང་། ཁྱོར་ཆུ། ཀུ་ཤ། དཔུང་སྐུད་རྣམས་འདྲ། བསང་གཏོར་གྱི་ཚེ་འབྲུ་གསུམ་བརྗོད་ཅིང་བདུད་རྩི་གཏོར། དེ་ནས་ཆོས་ཟབ་མོ་བཤད་པ་དང་། རྨི་ལམ་བརྟག་ཅིང་ངན་ན་བསྲུང་བ་འདྲ། བུམ་པ་སྟ་གོན་ནི། བྷྲཱུྃ་ལས་བུམ་པར་བསྐྱེད་པའི་ནང་དུ། ལྷ་སྟ་གོན་གྱི་སྐབས་ལྟར་གདན་དང་ཡན་ལག་བཞི་རྫོགས་བྱ། གཞན་འདྲ། རྗེས་ཆོག་བྱའོ། །གཉིས་པ་དངོས་གཞི་ལ། རས་རིས་བཀྲམ་པའི་མཐར་མཆོད་གཏོར་སྟ་གོན་གྱི་སྐབས་ལྟར་བཤམས་ནས་སྔོན་འགྲོ་རྣམ་གསུམ་དང་། ཡི་གེ་བརྒྱ་པས་དམ་ཚིག་བཤགས་པ་སྔོན་དུ་འགྲོ་བས་ཚོགས་གཉིས་བསགས་པ་ཇི་ལྟ་བ་བཞིན་དུ་བསྒོམ། སྲུང་བའི་འཁོར་ལོ་བསྒོམ་པ་ན་རྡུལ་ཚོན་གྱི་སྲུང་འཁོར་དང་ཐ་མི་དད་ཅིང་ཡན་ལག་བཞིས་གཞལ་ཡས་ཁང་བསྐྱེད་པའང་རྡུལ་ཚོན་དང་ཐ་མི་དད་དུ་མོས། མངོན་བྱང་ལྔས་གཙོ་བོ་བསྐྱེད་པ་དབུས་ཀྱི་མཚན་མ་དང་ཐ་མི་དད་དུ་བྱ་ཞིང་གསལ་གདབ་ཅིང་མཁའ་གསང་བྱིན་གྱིས་བརླབ། སྙོམས་པར་ཞུགས་པའི་སྟོབས་ཀྱིས་དཀྱིལ་འཁོར་བསྒྲུབས་ཏེ། འདུ་ཤེས་གསུམ་དང་ལྡན་པས་སྙོམས་པར་ཞུགས་པའི་སྒྲས་ཕྱོགས་བཅུའི་དེ་བཞིན་གཤེགས་པ་ཐམས་ཅད་གཡོན་ནས་ཞུགས། རྗེས་ཆགས་ཀྱི་མེས་སྙིང་གའི་ཐད་ཀར་ཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་མཁར་ཐིག་ལེའི་གཟུགས་ཀྱིས་བབ་པ་ལས་ལྷ་དགུ་གཞལ་ཡས་ཁང་དང་བཅས་པ་རྫོགས་པར་བསྐྱེད། དེ་ནས་གཙོ་བོ་ཡབ་ཡུམ་ལས་ཡབ་ཡུམ་དཔག་ཏུ་མེད་པར་གྱུར་ཏེ་སྤྲོས་པས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པས། སེམས་ཅན་ཐམས་ཅད་ཀྱི་ཉོན་མོངས་པ་ཞེ་སྡང་དང་རྣམ་པར་ཤེས་པའི་ཕུང་པོ་སྦྱངས་ནས་ཆོས་ཀྱི་དབྱིངས་ཀྱི་ཡེ་ཤེས་རྒྱུད་ལ་སྐྱེས། རྣམ་པ་ཡབ་ཡུམ་འབའ་ཞིག་ཏུ་གྱུར་ནས་དོན་བྱེད་པ་དང་བྱས་པ་གཉིས་ཀ་ཚུར་འདུས་ཏེ་བདག་ཉིད་ལ་ཐིམ། གཽ་རཱི་དཔག་ཏུ་མེད་པར་གྱུར་ཏེ་སྤྲོས་པས། སེམས་ཅན་ཐམས་ཅད་ཀྱི་གཟུགས་ཀྱི་ཕུང་པོ་དང་ཉོན་མོངས་པ་གཏི་མུག་སྦྱངས་ནས་མེ་ལོང་ལྟ་བུའི་ཡེ་ཤེས་ཀྱི་རྟོགས་པ་རྒྱུད་ལ་སྐྱེས། རྣམ་པ་གཽ་རཱི་འབའ་ཞིག་ཏུ་གྱུར་ཏེ་གཉིས་ཀ་ཚུར་འདུས་ནས་གཽ་རཱིའི་མཚན་མ་ལ་ཐིམ་པས་གཽ་རཱི་གཅིག་ཏུ་གྱུར་ཏེ། རྣམ་པ་གསལ་གདབ་པ་ལ་སོགས་པའོ། །མཚམས་ཀྱི་བཞི་ལ་པུཀྐ་སཱི་ལས་པུཀྐ་སཱི་དཔག་ཏུ་མེད་པར་གྱུར་ཏེ་འཕྲོས་པས་སེམས་ཅན་ཐམས་ཅད་ཀྱི་འབྱུང་བ་སའི་རྟོག་པ་སྦྱངས་ནས་བྱམས་པ་ཚད་མེད་པ་རྒྱུད་ལ་བསྐྱེད་ནས་པུཀྐ་སཱིའི་རྣམ་པར་གྱུར་ནས་གཉིས་ཀ་འདུས་ཏེ་པུཀྐ་སཱིའི་མཚན་མ་ལ་ཐིམ་པས་པུཀྐ་སཱི་གཅིག་ཏུ་གྱུར་པ་ལ་སོགས་པ་སྦྱར་རོ། །གཞལ་ཡས་ཁང་སྤྲོས་ཏེ། གཞལ་ཡས་ཁང་ཉིད་ལ་ཐིམ་པས་གཞལ་ཡས་ཁང་ཉིད་ཀྱང་སྣོད་ཀྱི་འཇིག་རྟེན་དང་རོ་གཅིག་ཏུ་གྱུར་པར་བསྒོམ་པར་བྱའོ། །དེ་ནས་ཡེ་ཤེས་སེམས་དཔའ་སྟ་གོན་གྱི་དུས་སུ་ནམ་མཁའ་ལ་བཏེག་ནས་ཡོད་པ་དེ་ཉིད་ལ་ལྷ་མོ་བརྒྱད་ཀྱིས་མཆོད། བསྟོད་པ་ཐུང་ངུས་བསྟོད། རྩ་བའི་སྔགས་བརྗོད་པས་བགེགས་བསྐྲད་ལ་གཽ་རཱི་ལ་སོགས་པའི་ཏིང་ངེ་འཛིན་དང་། སྔགས་དང་ཕྱག་རྒྱས་དགུག་གཞུག་བཅིང་དབང་དུ་བྱས་ལ་ཡི་གེ་བརྒྱ་པས་བརྟན་པར་བྱ། གཙོ་བོ་ལ་སྐྱེ་མཆེད་དྲུག་དང་། སྐུ་གསུང་ཐུགས་བྱིན་གྱིས་བརླབ། དབང་བསྐུར་རིགས་ཀྱི་བདག་པོས་རྒྱས་གདབ་བོ། །དེ་ནས་སྐབས་འདིར་མ་བཤད་ཀྱང་བདག་བསྐྱེད་ཀྱི་བཟླས་པ་ཕྱག་ལེན་ལ་མཛད་དོ། །དེ་ནས་གཙོ་བོ་ལས་བདག་ཉིད་ཕྱག་གཉིས་པའི་རྣམ་པར་ཕྱེ་ལ་མཆོད་པ་བྱིན་གྱིས་བརླབ་པ་ནས་འཇིག་རྟེན་པའི་གཏོར་མ་གཤེགས་སུ་གསོལ་བའི་བར་སྟ་གོན་གྱི་སྐབས་ཇི་ལྟ་བ་བཞིན་དུ་ཤེས་པར་བྱའོ། །ཕྱི་རོལ་གྱི་གཏོར་མ་མི་དགོས། སློབ་མ་ལ་དབང་ཅི་ལྟར་བསྐུར་བ་ལྟར་རང་ཉིད་བདག་འཇུག་གི་ཚུལ་དུ་བླངས་ནས་སློབ་མ་འཇུག་པ་ནི་སློབ་མ་རྣམས་ཁྲུས་བྱས། ཡོན་དང་མཎྜལ་ཕུལ། སློབ་དཔོན་གྱིས་ཆོས་རྣམས་གཟུགས་བརྙན་ལྟ་བུ་ཞེས་སོགས་ཚིགས་བཅད་གཉིས་ལན་གསུམ་གྱིས་བདེན་པའི་སྟོབས་བརྗོད། སློབ་མ་སྐུ་རྡོ་རྗེ་རྣམ་སྣང་དུ་དྲན་པར་བྱས་ལ། གདོང་བཅིང་བ་དང་། མེ་ཏོག་གི་ཕྲེང་བ་གཏད་པ་དང་། བུམ་ཆུས་བསང་བ་དང་། འདོད་པ་དྲི་ཞིང་ལན་གདབ་པ་དང་། སློབ་མ་ཧེ་རུ་ཀ་ཕྱག་གཉིས་པར་བསྒོམས་པའི་སྙིང་གར་ཟླ་བ་རྡོ་རྗེ་སེམས་བསྐྱེད་པ་རྣམས་འདྲ་ལ། བརྟན་བྱེད་ཀྱི་སྔགས་ཀྱི་རྗེས་སུ་རང་གི་སེམས་ཉིད་རིག་པ་བྱང་ཆུབ་ཀྱི་སེམས་བདེ་བ་ཆེན་པོ་ཐབས་དང་། ཤེས་རབ་གཉིས་སུ་མེད་པར་རྟོགས་པར་གྱིས་ཤིག་ཅེས་བརྡ་སྤྲད། དེ་ནས་གསང་བར་གདམས་པ་དང་། ནང་དུ་གཞུག་པ་འདྲ། ནང་འཇུག་ནི། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་འཚལ། །དོན་དམ་སྨྲ་བའི་སེང་གེ་ཞེས་སོགས་ཚིགས་བཅད་གཅིག་དང་བཅས་པ་ལན་གསུམ་གྱིས་སློབ་མས་བླ་མ་ལ་གསོལ་བ་གདབ། དེ་བཞིན་གཤེགས་པ་ཀུན་གྱི་གནས། །ཞེས་སོགས་ཚིགས་བཅད་ལན་གསུམ་གྱིས་བླ་མས་དཀྱིལ་འཁོར་གྱི་ལྷ་ལ་གསོལ་བ་གདབ། སློབ་མས་ཨོཾ་ན་མ་ཏེ་ཧཱུྃ་ཞེས་སོགས་ཀྱིས་དཀྱིལ་འཁོར་གི་ལྷ་ལ་ཕྱག་བྱ། དེ་ནས་སངས་རྒྱས་ཆོས་དང་དགེ་འདུན་ཏེ། །ཞེས་པ་ནས། མཆོད་པའི་ལས་ཀྱང་ཅི་ནུས་བྱོས། །ཞེས་པའི་བར་གྱིས་སྡོམ་པ་བསྒྲགས་ནས། གཙོ་བོས་ཇི་ལྟར་སོགས་ལན་གསུམ་གྱིས་གཟུང་། དེ་ནས་དམ་ལ་གཞག་པ་བཞི་འདྲ། འདི་ནི་ཁྱོད་ཀྱི་ཞེས་སོགས་མི་དགོས། ཡེ་ཤེས་དབབ་བརྟན་དང་། ཁ་དོག་དྲི་བ་དང་། མེ་ཏོག་དོར་འཆིང་དང་། མིག་ཕྱེ་བ་རྣམས་འདྲ་ལ། མིག་ཕྱེ་བའི་ཚིགས་བཅད་ཀྱི་རྗེས་སུ་ཨོཾ་བཛྲ་ནཻ་ཏྲ་སོགས་བརྗོད་དེ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བའི་ཕུན་ཚོགས་དངོས་གྲུབ་དང་། །དངོས་གྲུབ་ཀུན་ཁྱོད་ཀུན་ཏུ་འགྱུར། །དམ་ཚིག་ཐམས་ཅད་བསྐྱང་བྱ་དང་། །གསང་སྔགས་ལ་ཡང་བརྩོན་པར་གྱིས། །ཞེས་བརྗོད་པས་སྤྱིར་བསྟན་ལ་གང་ལ་མེ་ཏོག་ཕོག་པ་དེ་ཉིད་ཁྱད་པར་དུ་བསྟན་ནོ། །དེ་ནས་ལྷ་གཞན་ཡང་ཐུན་མོང་དུ་མིང་དང་སྐུ་མདོག་ཕྱག་མཚན་གྱི་སྒོ་ནས་གཙོ་བོ་དང་། གཡུང་མོའི་བར་དུ་རིམ་པ་བཞིན་བསྟན་ནོ། །དེ་ནས་དཀྱིལ་འཁོར་གྱི་དེ་ཁོ་ན་ཉིད་བསྟན་པ་ནི་གཞལ་ཡས་ཁང་གྲུ་བཞི་པར་བྱུང་བ་ནི་ཚད་མེད་པ་བཞི་རྣམ་པར་དག་པའི་རང་བཞིན་ནོ། །སྒོ་བཞི་ནི་དྲན་པ་ཉེ་བར་གཞག་པ་བཞི་རྣམ་པར་དག་པའི་རང་བཞིན་ནོ། །རྟ་བབས་བཞི་ནི་ཡང་དག་པར་སྤོང་བ་བཞི་རྣམ་པར་དག་པའི་རང་བཞིན་ཡིན་ནོ། །དྲྭ་བ་ནི་ཉོན་མོངས་པ་ཆེན་པོ་རྣམ་པར་དག་པའི་རང་བཞིན་ནོ། །དྲྭ་བ་ཕྱེད་པ་ནི་ཉེ་བའི་ཉོན་མོངས་པ་ཆུང་ངུ་རྣམ་པར་དག་པའོ། །ཀ་བ་བརྒྱད་ནི་འཕགས་པའི་ལམ་ཡན་ལག་བརྒྱད་རྣམ་པར་དག་པའོ། །དར་ན་པ་ཏི་ལ་སོགས་པ་རྣམས་ནི་ཚུལ་ཁྲིམས་རྣམ་པར་དག་པའི་མཚན་ཉིད་དོ། །འདོད་པའི་ཡོན་ཏན་ནི་གཟུགས་སྒྲ་ལ་སོགས་པ་རྣམ་པར་དག་པའི་རང་བཞིན་ནོ། །རྡོ་རྗེ་རྭ་བ་ནི་ཟབ་མོའི་ཆོས་ཀྱི་འཁོར་ལོ་བསྐོར་བའི་རྟགས་སོ། །མེ་འོད་ནི་ཕྱིན་ཅི་ལོག་གི་བགེགས་ལ་སོགས་པས་མི་ཚུགས་པའི་རྟགས་སོ། །བུམ་པ་བརྒྱད་ནི་ཆེ་བའི་ཡོན་ཏན་གྱིས་རྒྱས་ཤིང་ཐུགས་རྗེ་ཆེན་པོའི་རོས་ཡོངས་སུ་གང་བའི་རྟགས་སོ། །ལྷའི་དེ་ཁོ་ན་ཉིད་བཅོམ་ལྡན་འདས་ཀྱཻ་རྡོ་རྗེ་ནི་རྣམ་པར་ཤེས་པའི་ཕུང་པོ་དང་ཞེ་སྡང་རྣམ་པར་དག་པའི་རང་བཞིན་ནོ། །གཽ་རཱི་ནི་ཞེ་སྡང་དང་གཟུགས་རྣམ་པར་དག་པའི་རང་བཞིན་ནོ། །ཆོམ་རྐུན་མ་ནི་གཏི་མུག་དང་སྒྲ་རྣམ་པར་དག་པའི་རང་བཞིན་ནོ། །རོ་ལངས་མ་ནི་ང་རྒྱལ་དང་དྲི་རྣམ་པར་དག་པའི་རང་བཞིན་ནོ། །གྷསྨ་རཱི་ནི་འདོད་ཆགས་དང་རོ་རྣམ་པར་དག་པའི་རང་བཞིན་ནོ། །པུཀྐ་སཱི་ནི་ཞེ་སྡང་དང་ས་རྣམ་པར་དག་པའི་རང་བཞིན་ནོ། །རི་ཁྲོད་མ་ནི་གཏི་མུག་དང་ཆུ་རྣམ་པར་དག་པའི་རང་བཞིན་ནོ། །གཏུམ་མོ་ནི་ང་རྒྱལ་དང་མེ་རྣམ་པར་དག་པའི་རང་བཞིན་ནོ། །གཡུང་མོ་ནི་འདོད་ཆགས་དང་རླུང་རྣམ་པར་དག་པའི་རང་བཞིན་ནོ། །བདག་མེད་རྣལ་འབྱོར་མ་ནི་ཡབ་དང་མཐུན་ནོ། །དེ་ནས་དངོས་གཞི་ནི་མཎྜལ་ཕུལ་ནས། ཧེ་རུ་ཀ་དཔལ་དབང་བསྐུར་བ། །ཞེས་སོགས་ལན་གསུམ་གྱིས་གསོལ་བ་གདབ། སློབ་དཔོན་ལྷ་ཡི་ང་རྒྱལ་བརྟན་པོ་དང་ལྡན་པས་བདུད་རྩི་འཁྱིལ་པའི་སྔགས་བརྗོད་ཅིང་ཡུངས་ཀར་གྱིས་བརྡེག གུ་གུལ་གྱིས་བདུག བདུད་རྩི་གཏོར་བས་བགེགས་བསྐྲད། རྡོ་རྗེའི་རྭ་བ་ལ་སོགས་པའི་སྲུང་བའི་འཁོར་ལོ་ཡང་བསྒོམ། རྣམ་པར་རྒྱལ་བའི་བུམ་པ་བཏེག་སྟེ་རོལ་མོ་དང་བཅས་པས་ཕུན་སུམ་ཚོགས་པ་མངའ་བ་ནས། ལྔ་པོ་དེས་ཀྱང་དེང་འདིར་བདེ་ལེགས་ཤོག །ཞེས་པའི་བར་དང་། ཛ་ཡ་ཛ་ཡ་སིདྡྷི་སིདྡྷི་རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་བཀྲ་ཤིས་ཀྱི་ཚིགས་བཅད་བརྗོད་དོ། །དེ་ནས་ཨོཾ་པྲ་ཏཱིཙྪ་བཛྲ་ཧོཿཞེས་བརྗོད་ལ། མེ་ཏོག་གི་ཕྲེང་བ་མེ་ཏོག་ཕོག་པའི་ལྷ་དེ་ཉིད་ལ་འབུལ། མེ་ཏོག་ལྷུང་བ་བླངས་ལ་མགོ་ལ་བཅིངས་ཤིང་ཨོཾ་དྷརྨཱ་ཀུཎྜ་ལི་ཨ་བྷི་ཥིཉྩཞེས་བརྗོད། དེ་ནས་བདག་དང་སློབ་མ་དང་བུམ་པའི་ཆུ་གསུམ་ཀ་སྭ་བྷཱ་ཝའི་སྔགས་ཀྱིས་སྟོང་པར་སྦྱངས་པའི་ངང་ལས། ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་མི་བསྐྱོད་པ་ཞལ་བརྒྱད་ཕྱག་བཅུ་དྲུག་པ་གཡས་བརྒྱད་རྡོ་རྗེ་དང་། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པ་ཡུམ་མཱ་མ་ཀཱིས་འཁྱུད་པ་བསྐྱེད་གསུམ་ཀ་ལ་ཡེ་ཤེས་པ་དགུག་གཞུག་བྱ། སྐུ་གསུང་ཐུགས་བྱིན་གྱིས་བརླབ། ཐུགས་ཀའི་ཧཱུྃ་གི་འོད་ཟེར་གྱིས་དབང་བསྐུར་གྱི་ལྷ་གདན་གསུམ་ཚང་བ་སྤྱན་དྲངས་ནས་ནམ་མཁར་བཞུགས་པ་ལ་ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐ་ག་ཏ་ཞེས་གསོལ་བ་བཏབ་པས་ཁྲོ་བོའི་གཟུགས་སུ་གྱུར་ཏེ། ཨོཾ་བཛྲ་ཨ་བྷི་ཥིཉྩ་མི་ཏཾ་ཞེས་གསུངས་ནས་བདག་དང་བུམ་པའི་ལྷ་གཉིས་ལ་དབང་བསྐུར་བས་ལུས་ཐམས་ཅད་ཁེངས་པས་ཟག་པ་མེད་པའི་བདེ་བས་གང་། ཆུ་ལྷག་མ་ཡར་ལུད་པས་མི་བསྐྱོད་པས་དབུར་བརྒྱན་པར་བསམས་ལ་མཆོད་པ་ལྔས་མཆོད། ཨོཾ་ཨཱཿཧཱུྃ་ཧཱུྃ་ཕཊ་སྭཱ་ཧཱ། ཞེས་པ་ཅི་རིགས་པ་བཟླས། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་སོགས་ཚིགས་བཅད་གཅིག་དང་། སྲིད་པ་ངོ་བོ་ཉིད་ཀྱིས་དག །ཅེས་སོགས་ཚིགས་བཅད་གཅིག་བརྗོད་ལ་བུམ་པའི་ནང་གི་མི་བསྐྱོད་པ་ཡབ་ཡུམ་སྙོམས་པར་ཞུགས་པ་ཞུ་བ་ལས་བུམ་པའི་ཆུར་གྱུར་པར་བསམ་པ་ལག་ཏུ་བཟུང་སྟེ་སློབ་མའི་སྤྱི་བོར་དབང་བསྐུར། སེམས་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་བུམ་པ་བྱང་ཆུབ་ཀྱི་སེམས་ཀྱིས་གང་བས་དབང་བསྐུར་བས་ལུས་མཐའ་དག་ཁེངས་ཏེ། ཟག་པ་མེད་པའི་བདེ་བས་རྒྱུད་གང་ནས་ཆུ་ལྷག་མ་ཡར་ལུད་པ་ལས་མི་བསྐྱོད་པ་ཞི་བས་དབུར་བརྒྱན་པར་བསམ། མི་བསྐྱོད་པའི་སྒོ་ནས་ཆུའི་དབང་བསྐུར་བ་ཐོབ། རྣམ་པར་ཤེས་པའི་ཕུང་པོ་དང་ཞེ་སྡང་གནས་གྱུར་ཏེ་ཆོས་ཀྱི་དབྱིངས་ཀྱི་ཡེ་ཤེས་དང་། མི་བསྐྱོད་པའི་ངོ་བོ་ཉིད་དུ་གྱུར་པར་མོས་ལ་མཆོད་པ་ལྔས་མཆོད་དོ། །ཆོ་གའི་འགྲོས་འདི་འོག་མ་རྣམས་ལ་ཡང་སྦྱར། དེ་ནས་བདག་དང་ཅོད་པཎ་དང་། སློབ་མ་གསུམ་ཨཱཾ་ལས་རིན་པོ་ཆེ་ཨཱཾ་གིས་མཚན་པ་ལས་རིན་འབྱུང་སེར་པོ་རྩ་བའི་ཞལ་སེར། གཡས་སྔོ། གཡོན་དཀར། ཞལ་ལྷག་མ་རྣམས་ནག་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན་རིམ་པ་བཞིན། བྱ་ཀ་རཎྜ། ངུར་པ། ལུག བྱེའུ་ཙ་ཀོ་ར། བྱེ་ཁྲ། ཧོར་ཁྲ། འོལ་བ། ཉ་ཁྲ། གཡོན་པ་རྣམས་ན་སྟོབས་ཀྱི་རྒྱུ། དུང་སྐྱོང་། རིགས་ལྡན། པདྨ། པདྨ་ཆེན་པོ། འཇོག་པོ། ནོར་རྒྱས། མཐའ་ཡས་རྣམས་འཛིན་པ། ཡུམ་རིན་ཆེན་སྒྲོལ་མ་དང་མཉམ་པར་སྦྱོར་བ། པདྨ་དང་ཉི་མའི་དཀྱིལ་འཁོར་གྱི་སྟེང་ན་བདུད་བཞི་བརྩེགས་པའི་གདན་ལ་ཞབས་གཡས་གཉིས་བརྐྱང་། གཡོན་གཉིས་བསྐུམ་པའི་གར་སྟབས་ཀྱིས་བཞུགས་པ། ཐོད་རློན་ལྔ་བཅུའི་དོ་ཤལ་དང་། ཕྱག་རྒྱ་དྲུག་གི་རྒྱན་དང་ལྡན་པ་བསྐྱེད། ཡེ་ཤེས་པ་གཞུག་པ་དང་སྐུ་གསུང་ཐུགས་བྱིན་གྱིས་བརླབ་པ་འདྲ། དབང་ལྷ་རེ་རེ་ནས་སྤྱན་འདྲེན་པར་གསུངས་ཀྱང་སྔར་ནམ་མཁར་བཞག་པ་དེ་ཉིད་ཀྱིས་ཆོག་པས། དེ་ལ་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་འོག་ནས་འབྱུང་བའི་ཚིགས་བཅད་དང་སྔགས་ཀྱིས་བདག་དང་དབང་རྫས་ཀྱི་ལྷ་གཉིས་ལ་རིན་པོ་ཆེའི་ཅོད་པཎ་བཅིངས་པས་ཟག་པ་མེད་པའི་བདེ་བ་ཆེན་པོ་མངོན་དུ་བྱས་ཤིང་སྤྱི་བོར་རིན་ཆེན་འབྱུང་ལྡན་གྱིས་དབུར་བརྒྱན་པ་ལ་མཆོད་པ་ལྔས་མཆོད། ཨོཾ་ཨཱཿཨཱཾ་ཧཱུྃ་ཕཊ་སྭཱ་ཧཱ་ཞེས་ཅི་རིགས་བཟླས། རིན་ཆེན་རྒྱལ་པོ་རབ་ཏུ་ཟབ། །སོགས་དང་། སྲིད་པ་ངོ་བོ་ཉིད་ཀྱིས་དག །སོགས་བརྗོད། དབང་རྫས་ཀྱི་རིན་ཆེན་འབྱུང་ལྡན་ཡབ་ཡུམ་སྙོམས་པར་ཞུགས་པ་ལས་ཅོད་པཎ་དུ་གྱུར་པ་དེ་ལག་ཏུ་བཟུང་ལ། ཐོར་ཚུགས་ཅོད་པཎ་གྱིས་བརྒྱན་པ། །སངས་རྒྱས་ཀུན་གྱིས་བསྔགས་པའོ། །རིན་པོ་ཆེ་ཡི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། །ཨོཾ་བཛྲ་བ་ར་ཏ་ཀ་ཧཱུྃ་བཛྲ་ཨ་ར་ལི་ཧོ་ཞེས་དང་། ཨོཾ་བཛྲ་རཏྣ་ཨ་བྷི་ཥིཉྩ་ཞེས་བརྗོད་ལ་ཏིང་ངེ་འཛིན་སྔ་མ་དང་འདྲ་བས་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ། བཤད་པ་ལྔ་སྔ་མས་འགྲེ། མཆོད་པ་ལྔས་མཆོད་དོ། །འོད་དཔག་མེད་རྡོ་རྗེའི་དབང་ལ་གསུམ་ཀ་ཛྲཱིཾ་ལས་པདྨ་ཛྲཱིཾ་གིས་མཚན་པ་ལས་སྣང་བ་མཐའ་ཡས་རྩ་བའི་ཞལ་དམར། གཡས་ནག་གཡོན་དཀར་བ། གཡས་པ་རྣམས་ན་དོམ། བྱ་རྒོད། བསེ། བ་མེན། སྟག སྤྲེའུ། ཆུ་སྲིན་ན་ཀྲ། ལྕེ་སྤྱང་། གཡོན་པ་རྣམས་ན་ཁ། འུག་པ། བྱ་དཀར། སེང་གེ མཚོ་གནས། ར། ཀྲྀཥྞ་ས་ར། ཕག་རྣམས་འཛིན་པ། ཡུམ་གོས་དཀར་མོ་དང་མཉམ་པར་སྦྱོར་བ་བསྐྱེད། ཡན་ལག་གཉིས་འདྲ། དབང་ལྷ་ལ་གསོལ་བ་བཏབ་པས་དེ་དག་གིས་རྡོ་རྗེ་རྩེ་དགུ་པ་བདག་དང་དབང་རྫས་འོད་དཔག་མེད་དུ་བསྐྱེད་པའི་ལག་པ་གཡས་སུ་གཏད་པས་ཟག་པ་མེད་པའི་བདེ་བ་ཆེན་པོ་མངོན་དུ་བྱས་ཏེ་འོད་དཔག་མེད་ཀྱིས་དབུར་བརྒྱན་པ་ལ། མཆོད་པ། སྔགས། བསྟོད་པ། དབང་རྫས་ཞུ་བའི་བར་འགྲེ། དེ་ནས་རྡོ་རྗེ་སློབ་མའི་ལག་ཏུ་གཏད་དེ། སངས་རྒྱས་རྡོ་རྗེའི་དབང་གིས་ནི། །དེ་རིང་ཁྱོད་ལ་དབང་བསྐུར་འགྱུར། །འདི་དེ་སངས་རྒྱས་ཐམས་ཅད་ཉིད། །བཟང་གྲུབ་ཕྱིར་ནི་རྡོ་རྗེ་གཟུང་། །ཞེས་དང་། ཐོག་མཐའ་མེད་པའི་སེམས་དཔའ་ནི། །ཞེས་སོགས་ཚིགས་བཅད་གཅིག་གིས་སྦྱིན་ཏེ། ཏིང་ངེ་འཛིན་སྔ་མ་དང་འདྲ་བས་འོད་དཔག་མེད་ཀྱིས་དབུར་བརྒྱན་བཤད་པ་ལྔ་འགྲེ། མཆོད་པ་ལྔས་མཆོད་དོ། །དེ་ནས་གསུམ་ཀ་ཁཾ་ལས་དོན་ཡོད་གྲུབ་པ་ལྗང་གུ་རྩ་ཞལ་ལྗང་། གཡས་གནག གཡོན་དཀར། གཡས་པ་རྣམས་ན་གཟའ་ལྷག ཕུར་བུ། མཇུག་རིངས། སྒྲ་གཅན། མིག་དམར། པ་སངས། སྤེན་པ། ཁྱབ་འཇུག གཡོན་པ་རྣམས་ན་དབང་པོ། ཚངས་པ། དྲག་པོ། བདུད་སྡིག་ཅན། ལྷ་མ་ཡིན་གྱི་བུ་མོ་གཤོལ་མདའ་འཛིན། ལྷ་རྒྱལ་བ་དམ་པ། ཐགས་བཟངས་རིས། ལྷ་མ་ཡིན་སྟོབས་ལྡན་རྣམས་འཛིན་པ། ཡུམ་དམ་ཚིག་སྒྲོལ་མས་འཁྱུད་པ་བསྐྱེད། ཡན་ལག་གཉིས་འགྲེ། དབང་བསྐུར་གྱི་ལྷ་ལ་གསོལ་བ་བཏབ་པས། དེ་དག་གིས་བདག་དང་དབང་རྫས་ཀྱི་ལག་པ་གཡོན་དུ་དྲིལ་བུ་གཏད་པས་བདེ་བ་ཆེན་པོ་མངོན་དུ་བྱས་ཤིང་དོན་ཡོད་གྲུབ་པས་དབུར་བརྒྱན་པ་ལ་མཆོད་པ། སྔགས། བསྟོད་པ། དབང་རྫས་ཞུ་བའི་བར་འགྲེ། དེ་ནས་གསོལ་བ་བཏབ་པས། འདི་ནི་རྣལ་འབྱོར་མ་ཀུན་གྱིས་སོགས་དང་། སྲིད་པ་ངོ་བོ་ཉིད་ཀྱིས་དག་སོགས་དང་། ཨོཾ་བཛྲ་ཨ་དྷི་སོགས་ཀྱིས་དྲིལ་བུ་ལག་པ་གཡོན་དུ་གཏད་འཁྱུད་པའི་ཚུལ་གྱིས་འཛིན་དུ་གཞུག དེས་ཟག་པ་མེད་པའི་བདེ་བ་མངོན་དུ་བྱས་ནས་སྤྱི་བོར་དོན་གྲུབ་ཀྱིས་དབུར་བརྒྱན་པར་བསྒོམ། བཤད་པ་ལྔ་དང་། མཆོད་པ་འགྲེ། དེ་ནས་བདག་དང་སློབ་མ་གཉིས་བྷྲཱུྃ་ལས་རྣམ་སྣང་དཀར་པོ་གཡས་ནག་གཡོན་དམར། གཡས་ན་རྨ་བྱ། མ་ཧེ། ཆུ་སྲིན་མ་ཀ་ར། ཉ་རོ་ཧི་ཏ། རུས་སྦལ། འོག་གི་ཀླུ། ངང་སྐྱ། རི་བོང་། གཡོན་པ་རྣམས་ན་སྦལ་པ་ཐུ་བོ། སྤྲིན་ཤུགས། སྦྲུལ་ཧ་ལ། རྩངས་པ་ནག་པོ། བྱི་བ། གཡག གླ་བ། བྱ་བཞད་རྣམས་འཛིན་པ། སངས་རྒྱས་སྤྱན་མས་འཁྱུད་པ་བསྐྱེད། ཡན་ལག་གཉིས་དང་། བདག་ཉིད་ལ་མཆོད་པ་སོགས་འགྲེ། མིང་གི་དབང་འདྲ། བཤད་པ་ལྔ་དང་མཆོད་པ་འགྲེ། དེ་ནས་སློབ་མ་མི་བསྐྱོད་པའི་ང་རྒྱལ་འཛིན་དུ་བཅུག་ལ། ཐུན་མོང་གི་བརྟུལ་ཞུགས་འདྲ། ཚིགས་བཅད་ལ་ཧེ་རུ་ཀ་དཔལ་སྦྱར། ཐུན་མོང་མ་ཡིན་པའི་བརྟུལ་ཞུགས་ནི་སློབ་མ་ཧེ་རུ་ཀའི་ང་རྒྱལ་འཛིན་དུ་བཅུག་ལ། ཀ་པཱ་ལ་མི་དམིགས་པ་ལས་ཀ་པཱ་ལ་ཉིད་དུ་བསྐྱེད་པ་སྙིང་ཁར་འཛིན་དུ་བཅུག་ལ་ཟག་པ་མེད་པའི་བདེ་བ་ཆེན་པོའི་ཡེ་ཤེས་སྐྱོང་བའི་མཚོན་བྱེད་དུ་བསྟན། ཁ་ཊཱཾ་ག་གྲུ་མོར་འཛིན་དུ་བཅུག ཚངས་པའི་སྐུད་པ་ཉིས་རིམ་སེ་རལ་ཁར་བཅིངས་ལ། རིག་པ་བྱང་ཆུབ་ཀྱི་སེམས་དེ་ཡང་ཐབས་ཤེས་རབ་གཉིས་མེད་ཡིན་པའི་ཚོན་བྱེད་དུ་བསྟན། གཡས་སུ་ཨོཾ་ལས་བསྐྱེད་པའི་གྲི་གུག་དང་ཌཱ་མ་རུ་བྱིན་ལ་ཆོས་ཐམས་ཅད་སྟོང་པ་ཉིད་སྟོན་པའི་ཆོས་ཀྱི་སྒྲའི་མཚོན་བྱེད་དང་ང་རྒྱལ་ལ་སོགས་པའི་སྐྱོན་དྲུག་གཅོད་པའི་མཚོན་བྱེད་ཡིན་ནོ་ཞེས་བརྡ་སྤྲད་དེ། ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌཱ་མ་རུ། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང་། །ཚངས་པའི་སྐུད་ཐོགས་རྣལ་འབྱོར་བདག །གྲི་གུག་དང་ནི་ཀ་པཱ་ལ། །དཔའ་བོ་ཆེན་པོས་བླང་བར་གྱིས། །དཔལ་ཧེ་རུ་ཀའི་སྐུ་གསུང་ཐུགས་རྡོ་རྗེ་དང་མི་འབྲལ་བར་གྱིས་ཤིག་པའི་བརྡ་ཡིན་ནོ་ཞེས་བརྗོད། དེ་ནས་མཎྜལ་ཕུལ་ནས། དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་བགྱིད། །ཞེས་ལན་གསུམ་གྱིས་གསོལ་བ་གདབ། སློབ་མ་སེང་གེའི་ཁྲིའི་སྟེང་དུ་པད་ཟླའི་གདན་ལ་རྡོ་རྗེ་སྐྱིལ་ཀྲུང་གིས་བཞག་པ་ལ་བཀྲ་ཤིས་ཀྱི་ཚིགས་བཅད་སྔོན་དུ་འགྲོ་བས་རྡོ་རྗེའི་དམ་ཚིག་དང་། དེ་ཁོ་ན་ཉིད་འདྲ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་བརྗོད་བྱ་རང་གི་སེམས་ཉིད་རིག་པ་བྱང་ཆུབ་ཀྱི་སེམས་ཉིད་ཡིན་པ་མཚོན་བྱེད་དུ་བསྟན། དྲིལ་བུའི་དམ་ཚིག འདི་དེ་སངས་རྒྱས་ཐམས་ཅད་སོགས་དང་། སྲིད་པ་ངོ་བོ་ཉིད་ཀྱིས་དག་སོགས་ཀྱི་མཐར། ཨོཾ་བཛྲ་གྷཎྜེ་ཨཿཞེས་བརྗོད་ལ་སྟེང་འོག་ཏུ་བསྣོལ་ཏེ་འཁྱུད་པའི་སྟངས་ཀ་བྱས་ལ་སེམས་ཉིད་གཉིས་སུ་མེད་པའི་རྗོད་བྱེད་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་མཚོན་བྱེད་དུ་བསྟན། དེ་ནས་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པས་ཡུམ་རྡོ་རྗེ་སྙེམས་མ་ལོ་བཅུ་དྲུག་མ་ལྟ་བུ་གྲི་གུག་དང་ཐོད་པ་འཛིན་པས་འཁྱུད་པ། པད་ཟླའི་སྟེང་ན་རྡོ་རྗེའི་སྐྱིལ་ཀྲུང་གིས་བཞུགས་པར་བསྒོམས་ལ། རྡོ་རྗེ་རབ་གནས་རྡོ་རྗེ་ཉིད་སོགས་ཚིགས་བཅད་གཅིག་དང་། དེ་རིང་རྡོ་རྗེ་སློབ་དཔོན་གྱུར། །སྔགས་དང་རྒྱུད་རྣམས་འཛིན་གྱུར་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀྱིས་ཀྱང་མཐུན་པར་གསུངས། །དཀྱིལ་འཁོར་ཆོ་ག་བཞིན་དུ་ནི། །ཁྱེད་ཀྱིས་ནན་ཏན་བསྐྱེད་ལ་བྲིས། །སྒྲུབ་པ་པོ་རྣམས་སྔགས་ལ་སྦྱོར། །ཞེས་བརྗོད་དེ་ཉོན་མོངས་པ་དང་ཕུང་པོ་ཐམས་ཅད་དག་པས་དབྱིངས་དང་ཡེ་ཤེས་དབྱེར་མེད་པའི་ངོ་བོ་རྣམ་པ་རྡོ་རྗེ་སེམས་དཔར་གྱུར་པར་བསམ་མོ། །བརྟན་བྱེད་ཀྱི་ཆུས་དབང་བསྐུར་མི་བསྐྱོད་པས་རྒྱས་བཏབ་ནས། དེས་ལུས་ཀྱི་དྲི་མ་དག་པའི་རྟགས་ལུས་རྣམ་སྣང་དུ་གྱུར་པར་དྲན་པར་བྱའོ། །མཐའ་བརྟེན་རྗེས་གནང་ལ་བཞི་ལས། ལྷ་མཆོད་པའི་རྗེས་གནང་དང་། སེམས་ཅན་གྱི་དོན་བྱེད་པ་ལ་མིག་ཐུར་མེ་ལོང་གཉིས་འདྲ། ཆོས་ཀྱི་འཁོར་ལོ་བསྐོར་བའི་རྗེས་གནང་ནི། སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་ཀུན་དུ་ཐམས་ཅད་དུ། །བྱ་བ་སྤྱོད་ཚུལ་གསང་བ་ཡི། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བརྗོད་ལ་འཁོར་ལོ་རྐང་པའི་བར་དུ་སྦྱིན། ཁྱོད་ཀྱིས་ཐེ་ཚོམ་དོགས་མེད་པར། །ཞེས་སོགས་ཚིགས་བཅད་གཅིག་གིས་དུང་བྱིན་ལ་འབུད་དོ། །དངོས་གྲུབ་བསྒྲུབ་པའི་རྗེས་གནང་ནི། །ཞི་དང་རྒྱས་དང་དབང་དང་དགུག །སྡང་བར་བྱ་དང་གནོད་སོགས་དང་། །གསོད་དང་བསྐྲད་པ་ཐམས་ཅད་དེ། །ལས་དེ་རྣམས་ནི་བསྒྲུབ་པར་གྱིས། །རལ་གྲི་མིག་སྨན་ས་འོག་དང་། །མཆིལ་ལྷྭམ་དེ་བཞིན་རིལ་བུ་སྟེ། །རྣལ་འབྱོར་མ་ཡི་དངོས་གྲུབ་སྒྲུབ། །དེ་ནི་ཅི་དགར་བསྒྲུབ་པར་གྱིས། །ཞེས་བརྗོད་དོ། །དེ་ལྟར་ན་རས་བྲིས་ཀྱི་དཀྱིལ་འཁོར་དུ་ཞུགས་ནས་བུམ་པའི་དབང་བཅུ་གཅིག་ཐོབ་པས་ལུས་ཀྱི་དྲི་མ་དག རྩ་བ་དང་ཡན་ལག་གི་དམ་ཚིག་བསྲུང་བ་ལ་དབང་། རྡོ་རྗེ་སློབ་དཔོན་གྱི་དབང་ཐོབ་ནས་ཐེག་པ་དམན་པར་མི་ལྡོག་པའི་ཆ་ནས་ས་བརྒྱད་པའི་བྱང་ཆུབ་སེམས་དཔའ་དང་སྐལ་བ་མཉམ་པ་ཞེས་བྱའོ་ཞེས་བརྡ་སྤྲད་དོ། །དེ་ནས་གསང་དབང་གི་ཡོན་དུ་ཕྱག་དང་མཎྜལ་ཕུལ་ཏེ། ཁྱོད་ནི་ཧེ་རུ་ཀ་དཔལ་ཏེ། །བདེ་གཤེགས་རྣམས་ཀྱི་བདེ་སྤེལ་མཛད། །བྱང་ཆུབ་སེམས་དཔའ་ཆེ་རྣམས་ཀྱིས། །ཡང་དག་དོན་མཆོག་རྣམ་དག་པ། །ཅི་ལྟར་དེ་ཉིད་བདུད་རྩི་ཡི། །དབང་གི་མཆོག་ནི་བསྐུར་བ་བཞིན། །དེ་བཞིན་བདག་ལ་འཁོར་བ་ཡི། །སྡུག་བསྔལ་རྣམས་ནི་སེལ་བར་མཛོད། །རྣལ་འབྱོར་བདུད་རྩི་དྲི་མེད་མཆོག །མ་རིག་ཉེས་པའི་རབ་རིབ་འཇོམས། །གང་ཕྱིར་བྱང་ཆུབ་བླ་མེད་པ། །དེ་རིང་བདག་གིས་ཐོབ་པར་མཛོད། །ཞེས་ལན་གསུམ་གྱིས་གསོལ་བ་གདབ། དེ་ནས་བླ་མས་ཤེས་རབ་མ་བདག་མེད་མར་བསྐྱེད་དེ་ཡན་ལག་བཞི་རྫོགས་སུ་བྱ། མཁའ་གསང་བྱིན་གྱིས་བརླབས་ནས་སྙོམས་འཇུག་བྱ་སྟེ། རང་གི་ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བའི་ཧཱུྃ་ལས་འོད་འཕྲོས་ཏེ། ཕྱོགས་བཅུ་ན་བཞུགས་པའི་དཔའ་བོ་དང་རྣལ་འབྱོར་མ་རྣམས་སྤྱན་དྲངས་ཏེ། ཐུགས་ཀར་ཐིམ་པས་རྗེས་ཆགས་ཀྱི་མེས་བཞུ་ནས་བྱང་ཆུབ་ཀྱི་སེམས་ནོར་བུའི་རྐེ་རུ་ཕྱིན་པ་དང་། ཨ་ནུ་རཱ་ག་སོགས་བརྗོད་ནས་རྗེས་སུ་ཆགས་པའི་རྡོ་རྗེའི་རང་བཞིན་ང་ཡིན་ནོ་ཞེས་ང་རྒྱལ་བྱ། དེ་ནས་བྱང་ཆུབ་ཀྱི་སེམས་བོ་ལའི་ཁ་རྐེར་མཐེབ་སྲིན་གྱིས་མནན་ལ་སློབ་མའི་ཁར་དྲངས་ཏེ། ཉེ་བར་ལོངས་སྤྱོད་ལ་བདེ་བར་མནོས་ཤིག་ཅེས་བསྒོ། དེས་ཀྱང་ཨེ་མ་རེ་བདེ་ཞེས་བརྗོད་ལ་འཐུངས་པའི་རྗེས་ལ་བདེ་བ་ཆེན་པོ་དཔལ་ཧེ་རུ་ཀའི་བདག་ཉིད་ནི་བདག་གོ་ཞེས་བརྗོད། དེ་ནས་དཀྱིལ་འཁོར་དང་། དབང་དང་། དྲི་མ་དང་། དམ་ཚིག་སྔ་མའི་རིགས་བསྒྲེས་ནས་ས་བཅུ་པའི་བྱང་ཆུབ་སེམས་དཔའ་དང་སྐལ་བ་མཉམ་པར་འགྱུར་རོ་ཞེས་བརྗོད། མཐའ་བརྟེན་ལུང་བསྟན་ནི་སློབ་དཔོན་གྱིས་གཡོན་པས་ཆོས་གོས་ཀྱི་གྲྭ་རྟའི་རྣ་བ་ལྟར་བཟུང་། གཡས་པས་མི་འཇིགས་པའི་ཕྱག་རྒྱ་བྱས་ཏེ། འདི་ལྟར་ང་ཡིས་ལུང་བསྟན་ཏེ། །ཧེ་རུ་ཀ་དཔལ་དེ་བཞིན་གཤེགས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཤྲཱི་ཤེ་རུ་ཀ་ནཱ་མ་སརྦ་ཏ་ཐཱ་ག་ཏ་སིདྡྷི་ས་མ་ཡ་སཏྭཾ་བྷུར་བྷུ་ཝཿསྭཿཞེས་པའི་མཐར་ཆེ་གེ་མོ་ཞེས་བྱ་བའི་དེ་བཞིན་གཤེགས་པར་འགྱུར་རོ་ཞེས་ལུང་བསྟན་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པར་འགྱུར་རོ་ཞེས་ངེས་པའི་ཤེས་པ་བསྐྱེད་དོ། །དེ་ལ་དགའ་བ་བསྐྱེད་པ་ནི་གཟེངས་བསྟོད་པའོ། །དེ་ནས་དབུགས་དབྱུང་བ་ནི་ཁམས་གསུམ་གྱི་ནི་རྒྱལ་སྲིད་ཆེ། །ཞེས་པ་ནས་ཐོབ་འགྱུར་འདི་ལ་ཐེ་ཚོམ་མེད་ཞེས་པའི་བར་ཚིགས་རྐང་དྲུག་དང་། དབང་འདི་བསྐུར་བ་ཙམ་གྱིས་ནི། །སློབ་མ་ཡོན་ཏན་བདག་པོར་འགྱུར། །སློབ་དཔོན་ཉིད་ཀྱང་བདེ་བ་ཡི། །བརྟན་གཡོ་ཀུན་གྱི་དམ་ཚིག་ཡིན། །ཞེས་བརྗོད་དེ་དེའི་དོན་ཡང་བཤད་དོ། །དེ་ལ་དགའ་བ་སྐྱེས་པས་གཟེངས་བསྟོད་པ་སྟེ་དབུགས་དབྱུང་ཞིང་གཟེངས་བསྟོད་པའོ། །དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ་ཕྱག་དང་མཎྜལ་ཕུལ་བ་དང་། གསོལ་བ་གདབ་པ་སྔར་བཞིན་བྱས་ཏེ། བླ་མས་ཤེས་རབ་མ་སྔར་ལྟར་ཡན་ལག་བཞི་རྫོགས་སུ་བྱས་ནས་ཤེས་རབ་མ་དང་སློབ་མ་ལ་བཀའ་བསྒོ་བར་བྱ་སྟེ། ཁྱོད་ཀྱིས་འདོད་ཆགས་སྤང་དུ་མི་རུང་གི་དུས་གསུམ་གྱི་བདེ་བར་གཤེགས་པ་རྣམས་ཀྱིས་ཀྱང་ཐབས་དང་ཤེས་རབ་གཉིས་སུ་མེད་པའི་རོལ་པ་མཛད་པ་ལས་ཡེ་ཤེས་ཆེར་སྐྱེས་ཏེ་མངོན་པར་རྫོགས་པར་སངས་རྒྱས་པ་ཡིན་པས། ཁྱོད་ཀྱིས་ཀྱང་འདོད་ཆགས་སྤང་དུ་མི་རུང་སྟེ་གཉིས་སུ་མེད་པའི་རོལ་པ་བྱོས་ཤིག་ཡེ་ཤེས་སྐྱེ་བར་འགྱུར་གྱི་ཞེས་བརྗོད་ནས་ཤེས་རབ་མས། ཁྱོད་ཀྱིས་ནུས་སམ་རྡོ་རྗེ་ཅན། །དྲི་ཆེན་དྲི་ཆུའི་བཟའ་བཏུང་དང་། །རཀྟ་ག་པུར་མཱཾ་ས་དང་། །བུད་མེད་མོས་པས་དད་ནུས་སམ། །བྷ་གར་འོ་བྱེད་མི་རྟོག་གམ། །སྨྲོས་ཤིག་རྡོ་རྗེ་བདེ་བ་ཅན། །ཞེས་དྲིས། སློབ་མས། ལྷ་མོ་ཅི་ཕྱིར་བདག་མི་དད། །དྲི་ཆེན་ས་བོན་སོགས་ཟ་ཞིང་། །ཤེས་རབ་ཡང་དག་དད་པར་བགྱིད། །བྷ་ག་ལ་ཡང་འོ་བགྱིད་དོ། །ཞེས་ལན་བརྗོད། དེ་ནས་ཤེས་རབ་མ་གཅེར་བུར་ཕྱུང་ལ། ཁྲུས་བྱས་ནས་དྲི་ཞིམ་པོས་བྱུགས་ཏེ་གཅེར་བུར་མེ་ཏོག་གི་ཕྲེང་བ་མགོ་ལ་བཅིངས་ལ་ལག་པ་གཉིས་ཀྱིས་དྲིལ་བུ་གཉིས་བཟུང་ནས་ཁ་ཕྱེ་ལ་འདི་སྐད་བརྗོད་དོ། །རྨད་བྱུང་ང་ཡི་པདྨ་འདི། །ཐམས་ཅད་བདེ་བ་ཡང་དག་ལྡན། །རྟག་ཏུ་རིམ་བཞིན་འདི་ལ་སྤྱོད། །འདི་དང་ནམ་ཡང་མི་འབྲལ་ལོ། །ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་ནི་རྣམ་པར་གྲོལ། །ཁྲག་འཐུང་རྒྱལ་པོ་འདི་ཉིད་ནི། །རང་བཞིན་ཐམས་ཅད་འདི་ལ་གནས། །ནང་གི་རྩ་ཡི་འཁོར་ལོ་ལ། །པདྨ་ལ་ཞུགས་རབ་ཏུ་ཟུང་། །བྷ་གའི་ནང་དུ་ནམ་མཁའ་བཞིན། །འབྱུང་བ་ལྔ་པོ་རྒྱས་ཤིང་འཆང་། །ལྟེ་བ་ལ་ནི་གེ་སར་བཅས། །འདབ་མ་བརྒྱད་ཀྱིས་རྣམ་པར་བརྒྱན། །དེ་ཡི་དབུས་ནས་འབྱུང་བ་ཡིན། །དེ་ཉིད་བདུད་རྩི་ཤུ་ཀྲའི་གཟུགས། །བྷཉྫཱ་མོཀྵ་ཧོ། །ཞེས་བརྗོད་ཅིང་པང་དུ་བྱོན་པར་བསམ། དེ་ནས་འདུ་ཤེས་གསུམ་ལྡན་སྔོན་དུ་སོང་བའི་སྒོ་ནས་སྙོམས་པར་ཞུགས་པས་བྱང་ཆུབ་ཀྱི་སེམས་བོ་ལའི་རྐེར་ཕྱིན་པ་ལས་མི་རྟོག་པའི་ཡེ་ཤེས་སྐྱེ་བར་འགྱུར་བས་ཇི་ལྟར་གནས་པའི་བར་དུ་བསྒོམ་མོ། །དེས་མ་ཐུབ་ན་ཀཀྐོ་ལར་ཕྱུང་ལ་དེ་ཉིད་ལྕེས་བླངས་ཏེ་མྱངས་པས་དེ་ལས་ཡེ་ཤེས་སྐྱེ་བས་ན་ཤེས་རབ་ཡེ་ཤེས་ཀྱི་དབང་ཞེས་བྱའོ། །དེ་ལ་དགའ་བ་རྣམ་པ་བཞི་ནི། དགའ་བ་དང་། ཡང་དག་པའི་དགའ་བ་དང་། རང་བཞིན་གྱི་དགའ་བ་དང་། ཁྱད་པར་གྱི་དགའ་བ་དང་བཞིའོ། །དེ་ལ་དགའ་བ་ནི་བི་ཙ་ཡ་ན་བྱ་བ་ནས་བོ་ལའི་རྩར་ཕྱིན་པའི་བར་རོ། །ཡང་དག་པའི་དགའ་བ་ནི་དཀྱིལ་དུ་ཕྱིན་པ་ཙམ་མོ། །རང་བཞིན་གྱི་དགའ་བ་ནི་བོ་ལའི་རྐེར་ཕྱིན་པ་ལ་བྱ་སྟེ། དེ་ནི་མི་རྟོག་པ་བསྐྱེད་པར་བྱེད་པའོ། །འོ་ན་དེ་གར་གཏོགས་པ་ཡིན་ཞེ་ན། སྨྲས་པ་འཁོར་ལོ་བཞིའི་རང་བཞིན་དང་མཉམ་པར་བྱ་བར་རོ། །འོ་ན་ཁྱད་པར་དགའ་བའི་གྲངས་སུ་མི་འགྲོ་ན་དགའ་བ་ནི་གསུམ་ལས་མེད་པས་འཁོར་ལོ་བཞི་དང་དགའ་བ་བཞི་ཇི་ལྟར་སྦྱར་ཞེ་ན། སྨྲས་པ་ཁྱད་པར་ཡང་དགའ་བའི་གྲངས་སུ་འགྲོ་སྟེ། གང་གི་ཕྱིར་དགའ་བ་ཆེན་པོ་མེད་ཀྱང་སྐད་ཅིག་མའི་དགའ་བའི་གྲངས་ཙམ་ཡོད་པས་ཀྱང་མི་འགལ་ལོ། །རྒྱུད་ལས་ཀྱང་དགའ་བ་བཞི་ཆར་བསྟན་པས་འཁོར་ལོ་བཞི་དང་སྦྱར་བ་མི་འགལ་ལོ་ཞེས་བྱ་བ་ལ་སོགས་པས་ནི་ཤེས་རབ་ཡེ་ཤེས་ཀྱི་དབང་བསྐུར་བ་ཡིན་ནོ། །དེས་ནི་ཡིད་ཀྱི་ཉེས་པ་ཐམས་ཅད་དག་པར་བྱེད་པས་ཐུགས་ཀྱི་དབང་ཞེས་བྱའོ། །དེ་ལྟ་བུའི་དབང་ཐོབ་པའི་རྣལ་འབྱོར་པ་ནི་རིགས་ལྔའི་སངས་རྒྱས་དང་སྐལ་བ་མཉམ་པར་འགྱུར་རོ། །དབང་བཞི་པ་ནི་གཞུང་ན་མེད་ཀྱང་ཕྱག་ལེན་ལ་མན་ངག་ལུགས་ལྟར་མཛད་དོ། །རྗེས་ཀྱི་ཆོ་ག་འདྲའོ། །མཚོ་སྐྱེས་ལུགས་ཀྱི་ཕྲ་མིག་ལ། །མན་ངག་ལུགས་ཀྱི་ཕྲ་བཏབ་པའི། །ཆོ་གའི་དབུ་རྒྱན་གོན་འདོད་པ། །དག་གི་དོན་དུ་འདི་སྦྱར་རོ། །རྒྱུས་མེད་རྣམས་ཀྱིས་འདི་མཐོང་ན། །ལྷག་ཆད་ཉེས་པས་གོས་ཉེན་ཡོད། །རྒྱུས་ཅན་གཅིག་ལ་ཚེགས་མེད་པར། །ཆོ་ག་དག་ཅིང་ཚང་བ་འབྱུང་། །ཨྀཐི། ཀ་རནྟ་དང་ངུར་པ་དང་། །ལུགས་དང་བྱིའུ་ཙ་ཀོ་ར། །བྱེ་ཁྲ་ཧོར་ཁྲ་འོལ་པ་ཉ། །སྟོབས་ཀྱི་རྒྱུ་དང་རིགས་ལྡན་དང་། །དུང་སྐྱོང་པདྨ་པད་ཆེན་དང་། །འཇོག་པོ་ནོར་རྒྱས་མཐའ་ཡས་འཛིན། །རིན་ཆེན་སྒྲོལ་མས་ལེགས་པར་འཁྱུད། །ཐོར་ཚུགས་ཅོད་པཎ་གྱིས་བརྒྱན་པ། །སངས་རྒྱས་ཀུན་གྱིས་རབ་བསྔགས་པའི། །རིན་ཆེན་དག་གི་ཅོད་པཎ་དང་། །དར་དཔྱངས་དབང་བསྐུར་སྦྱིན་པར་བྱ། །དོམ་དང་བྱ་རྒོད་དེ་བཞིན་བསེ། །བ་མེན་སྟག་དང་སྤྲེའུ་དང་། །ཆུ་སྲིན་ལྕེ་སྤྱང་གཡས་པ་ན། །ཁྭ་ཏ་འུག་པ་བྱ་དཀར་དང་། །སེང་གེ་ས་ར་ས་དང་ར། །ཀྲིཥྞ་ས་ར་ཕག་རྣམས་འཛིན། །གོས་དཀར་མོ་དང་གཉིས་མེད་སྦྱོར། །སངས་རྒྱས་ཀུན་གྱི་རྡོ་རྗེའི་དབང་། །གཟའ་ལྷག་ཕུར་བུ་མཇུག་རིངས་དང་། །སྒྲ་གཅན་མིག་དམར་པ་སངས་དང་། །སྤེན་པ་ཁྱབ་འཇུག་གཡས་པ་ན། །དབང་པོ་ཚངས་པ་དྲག་པོ་བདུད། །གཤོལ་མདའ་འཛིན་དང་ལྷ་དམ་པ། །ཐགས་བཟངས་རིས་དང་སྟོབས་ལྡན་འཛིན། །སྒྲོལ་མ་དང་ནི་གཉིས་མེད་སྦྱོར། །རྨ་བྱ་མ་ཧེ་ཆུ་སྲིན་ཉ། །རུས་སྦལ་ཀླུ་དང་ངང་སྐྱ་དང་། །རི་བོང་གཡས་ཀྱི་ཐོད་པ་ན། །སྦལ་པ་ཐུ་བོ་སྤྲིན་ཤུགས་དང་། །སྦྲུལ་དང་རྩངས་པ་བྱི་བ་གཡག །གླ་བ་བྱ་བཞད་གཡོན་ན་འཛིན། །སངས་རྒྱས་སྤྱན་དང་གཉིས་མེད་སྦྱོར། །ཤུ་བྷཾ།། ༄། །སམྦུ་ཊའི་ཆོ་གའི་གསལ་བྱེད་བཞུགས།། བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བསྡུས་པའི་དཀྱིལ་འཁོར་རྡོ་རྗེ་དབྱིངས་ཀྱི་སྒྲུབ་པའི་ཐབས་ཀྱི་སྐབས་སུ་ཐུགས་ཀར་ཡིག་འབྲུའི་དཀྱིལ་འཁོར་རྫོགས་པར་གྱུར་པའི་རྗེས་སུ་ས་བོན་ཙམ་ལས་ལྷ་སུམ་ཅུ་རྩ་བདུན་བསྐྱེད་པའམ་རྡོ་རྗེ་ཆོ་ག་གསུམ་ལས་བསྐྱེད་པ་འདམ་ཁ་ཅན་དུ་གནད་ཀྱི་གསལ་བྱེད་ལས་གསུངས་པས། དེ་གཉིས་གང་རུང་གིས་ཕྱོགས་གཅིག་ཏུ་བསྐྱེད། དེ་ནས་འབྱིན་སྔགས་ཀྱིས་ཕྱིར་ཕྱུང་སྟེ་མཛད་པ་མཛད་ནས་སོ་སོའི་གདན་གྱི་སྟེང་དུ་འཁོད་པ་ལས་ཞལ་ཕྱག་གསལ་གདབ་བོ། །རྡུལ་ཚོན་གྱི་དཀྱིལ་འཁོར་སྒྲུབ་པའི་སྐབས་སུ་གནད་ཀྱི་གསལ་བྱེད་ལས་དེ་ནས་ཞེས་བྱ་བ་ལ་སོགས་པ་སྟེ། དེ་ནས་ནི་ཚོགས་གཉིས་ཡོངས་སུ་རྫོགས་པའི་རྗེས་ལ་ཞེས་བྱ་སྟེ། ཚོགས་ཡོངས་སུ་རྫོགས་པ་དེས་འོག་མིན་གྱི་གནས་སུ་བདག་ཉིད་མངོན་པར་རྫོགས་པར་སངས་རྒྱས་ནས་དེའི་རྗེས་ལ་རི་རབ་ལ་སོགས་པར་སྤྲུལ་བཤད་བྱེད་པས་ན་བརྟེན་བསྐྱེད་པ་དེའི་ཕྱི་ནས་སོ། །ཡང་ན་ཚོགས་ཡོངས་སུ་རྫོགས་པས་ས་བཅུ་པའི་དུས་སུ་ཞིང་ཡོངས་སུ་དག་པ་འབྱུང་བས་དང་པོར་རྟེན་བསྐྱེད་ལ་དེ་ནས་བདག་ཉིད་འཚང་རྒྱ་བ་འབྱུང་། དེ་ནས་དཀྱིལ་འཁོར་དུ་ལྷ་སྤྲུལ་པ་འབྱུང་ངོ་། །དེ་ལྟར་ཚུལ་གཉིས་སུ་སློབ་དཔོན་བྷ་བིའི་ལྷས་ཀྱང་གསུངས་སོ། །དེ་ལ་ལུགས་ཕྱི་མ་ནི་གོང་དུ་བསྙེན་པའི་སྐབས་སུ་བསྟན་ཟིན་ལ། འདིར་རྟེན་བསྐྱེད་པ་ཕྱིའི་རྡུལ་ཚོན་བྱིན་གྱིས་བརླབས་པ་དང་འབྲེལ་བས་ཕྱིས་བྱས་ན་བདེའོ། །སྤྱིར་དུ་ན་གང་བྱས་ཀྱང་འགལ་བ་མེད་དོ། །དེ་བས་ན་དེ་ནས་ཞེས་བྱ་བ་ནི་ཚོགས་གཉིས་ཡོངས་སུ་རྫོགས་པ་དེ་ནས་སོ། །འདི་ལ་ལྔ་སྟེ་རང་གི་སེམས་སོ་སོར་རྟོག་པ་ཞེས་པ་ནས་མངོན་བྱང་ལྔའི་ཆོ་ག་རྒྱས་པར་གསུངས་ཏེ་མཇུག་ཏུ། དེ་ལྟར་དེ་ཡན་ཆད་ནི་དང་པོ་རྣལ་འབྱོར་གྱི་ཏིང་ངེ་འཛིན་ཏེ་ངོ་བོ་ཉིད་ཀྱི་སྐུའོ། །དཀྱིལ་འཁོར་རྒྱལ་མཆོག་བསྟན་པའི་ཕྱིར་ཐབས་དང་ཤེས་རབ་ཀྱི་སྦྱོར་བ་བྱས་པས་དེ་བཞིན་གཤེགས་པ་ཐམས་ཅད་འབྱུང་བར་བསྟན་པ་ནི་དེ་ནས་ཡང་བྱང་ཆུབ་སེམས་དཔའ་ཞེས་བྱ་བ་ལ་སོགས་པ་སྟེ་དོན་ནི་འདི་ཡིན་ཏེ། རྡོ་རྗེ་དང་པདྨ་བྱིན་གྱིས་བརླབ་པར་བྱས་ཏེ་སྙོམས་པར་ཞུགས་པ་ལས་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ། ཞལ་ནས་ཞུགས་ཏེ་ཐུགས་ཀར་འོད་དུ་ཞུ་སྟེ། བྱང་ཆུབ་སེམས་ཀྱི་ཐིག་ལེ་ཡུམ་གྱི་བྷ་གར་ཕབ་ལ། དེ་ལས་སོ་སོའི་ས་བོན་དུ་བསྐྱེད་ཞེས་བྱ་བའི་དོན་ཏོ། །འདི་ནི་གནས་བསྐྱེད་པའི་རྗེས་ལ་སྦྱར་རོ་ཞེས་དང་། བརྟེན་པ་ལྷ་བསྐྱེད་པ་ནི་ཧཱུྃ་གི་སྔགས་ཞེས་བྱ་བ་ལ་སོགས་པ་སྟེ། སྔར་བསྟན་པ་བཞིན་ཡི་གེའི་དཀྱིལ་འཁོར་བསྐྱེད་ལ་དེ་ནས་གཙོ་བོའི་ས་བོན་ཡི་གེ་ཧཱུྃ་རང་གི་ཐུགས་ཀ་ནས་ཕྱུང་སྟེ་དཀྱིལ་འཁོར་གྱི་དབུས་སུ་བཀོད་ལ། དེར་མངོན་པར་བྱང་ཆུབ་པ་ལྔ་ལས་གཙོ་བོ་བསྐྱེད་པར་བྱའོ། །དེ་ནས་འཁོར་བསྐྱེད་པ་ནི་ཤར་དུ་ནི་རྣམ་པར་སྣང་མཛད་དོ་ཞེས་བྱ་བ་ལ་སོགས་པ་སྟེ། ས་བོན་ཙམ་ལས་བསྐྱེད་པའམ་ཡང་ན་ཆོ་ག་གསུམ་ལས་བསྐྱེད་པར་བྱའོ་ཞེས་གསུངས། འདི་དག་གི་དོན་སྔོན་འགྲོ་རྣམ་གསུམ་སྔོན་དུ་སོང་ནས་ཡི་གེ་བརྒྱ་པའི་བསྒོམ་བཟླས་ནས་བཟུང་སྟེ། ཡེ་ཤེས་ཚོགས་བསག་གི་བར་བྱས་ནས་སྟོང་པའི་ངང་ལས་མངོན་པར་བྱང་ཆུབ་པ་ལྔ་ལས་བདག་ཉིད་གཙོ་བོ་ཡབ་ཡུམ་གྱི་སྐུར་བསྐྱེད། དེ་ནས་རྡུལ་ཚོན་གྱི་དཀྱིལ་འཁོར་བསང་སྦྱངས། སྟོང་པའི་ངང་ལས་ཧཱུྃ་ཡཾ་ཧཱུྃ་ནས་གདན་བསྐྱེད་པའི་བར་སྒྲུབ་ཐབས་ལྟར་བྱས་པའི་རྗེས་སུ། རང་གཙོ་བོ་ཡབ་ཡུམ་གྱི་མཁའ་གསང་བྱིན་གྱིས་བརླབ་པ་ནས་ཐུགས་ཀར་ཡིག་འབྲུའི་དཀྱིལ་འཁོར་རྫོགས་པའི་བར་བྱས་ལ། དེའི་དབུས་ཀྱི་ཡི་གེ་ཧཱུྃ་བཏོན་ནས་མདུན་བསྐྱེད་ཀྱི་དབུས་ཀྱི་གདན་གྱི་སྟེང་དུ་བཀོད་པ་རང་གི་སེམས་སོ་སོར་རྟོག་པར་བསམ་པ་ནས་མངོན་བྱང་ལྔས་གཙོ་བོ་ཡབ་ཡུམ་གྱི་སྐུར་བསྐྱེད། དེ་ནས་རྣམ་སྣང་ལ་སོགས་པའི་འཁོར་རྣམས་ཐུགས་ཀར་ས་བོན་ལས་བསྐྱེད་པའམ་ཆོ་ག་གསུམ་ལས་བསྐྱེད་པ་གང་རུང་བྱས་ནས་ཕྱིར་སྤྲོས་ཏེ་མཛད་པ་མཛད་པའམ་མ་མཛད་ཀྱང་རུང་སྟེ། སོ་སོའི་གདན་གྱི་སྟེང་དུ་བཀོད་ནས་ཞལ་ཕྱག་གསལ་གདབ། དེ་ནས་སྟ་གོན་གྱི་ལྷ་གཞུག་པ་སོགས་དཀྱུས་བཞིན་ནོ། །འདི་ནི་འོག་མིན་གྱི་གནས་སུ་བདག་ཉིད་མངོན་པར་རྫོགས་པར་སངས་རྒྱས་ནས་དེའི་རྗེས་སུ་རི་རབ་ལ་སོགས་པར་སྤྲུལ་བཤད་བྱེད་པའི་དོན་ཡིན་ལ། ཡང་ཚོགས་ཡོངས་སུ་རྫོགས་པས་ས་བཅུ་པའི་དུས་སུ་ཞིང་དག་པ་འབྱུང་བའི་དབང་དུ་བྱས་ནས་ཚོགས་གཉིས་བསགས་པའི་རྗེས་སུ་རྡུལ་ཚོན་གྱི་དཀྱིལ་འཁོར་གདན་བཅས་བསྐྱེད་ནས། བདག་ཉིད་མངོན་བྱང་ལྔ་ལས་གཙོ་བོ་ཡབ་ཡུམ་དུ་བསྐྱེད། དེ་ནས་མཁའ་གསང་བྱིན་གྱིས་བརླབ་པ་ནས་བཟུང་སྟེ་མདུན་གྱི་ལྷ་བསྐྱེད་པ་སྔ་མ་དང་འདྲའོ། །བདག་མདུན་ཐ་མི་དད་མ་ཡིན་ཀྱང་བསྲེས་ཤིང་འབྱུང་བའི་བསྒྲུབ་ཚུལ་འདི་ནི་རྒྱུད་འགྲེལ་ཁྱད་པར་ཅན་འདིའི་ལུགས་ཐུན་མོང་མ་ཡིན་པར་སྣང་ངོ་། །རྗེ་བླ་མས་ཐོག་མར་བདག་བསྐྱེད་དག་པ་དྲན་པའི་དབང་དུ་བྱས་ནས་མདུན་བསྐྱེད་ཀྱི་དཀྱིལ་འཁོར་བསྒྲུབ་པར་གསུངས་པ་ནི་ལས་དང་པོ་པ་ཆོ་ག་རྒྱས་ཤིང་དམིགས་པ་གསལ་བའི་དབང་དུ་མཛད་པ་ཡིན་ལ་དེའི་ལྟར་ན་ཡང་མདུན་བསྐྱེད་ཀྱི་ལྷ་བསྒྲུབ་པའི་ཚུལ་ནི་སྔ་མ་དེ་བཞིན་དུ་བྱ་བ་དགོངས་པ་ཡིན་ལ། ས་ཆོག་དང་མ་འབྲེལ་བའི་ལྷ་སྟ་གོན་དང་། བུམ་པ་སྟ་གོན་གྱི་སྐབས་སུ་ཡང་གཙོ་བོ་བདག་བསྐྱེད་ཀྱི་སྙིང་གའི་ཧཱུྃ་ཕྱིར་ཕྱུང་སྟེ་མངོན་བྱང་ལྔ་ལས་བསྐྱེད་པ་དང་། འཁོར་རྣམས་བདག་བསྐྱེད་ཀྱི་ཐུགས་ཀར་རྡོ་རྗེ་ཆོ་ག་གསུམ་མམ་ས་བོན་ལས་བསྐྱེད་པ་གང་རུང་བྱས་ནས་ཕྱིར་སྤྲོས་ཏེ་འཁོད་པ་འདི་ཁོ་ན་བཞིན་དགོངས་པ་ཡིན་ནོ། །དེང་སང་གི་ལག་ལེན་པ་དག་མདུན་བསྐྱེད་གསུམ་ཆར་ལ་གཙོ་བོ་མངོན་བྱང་ལྔས་བསྐྱེད། འཁོར་རྣམས་དེའི་ཐུགས་ཀ་ནས་འབྱིན་པར་བྱེད་པ་ནི་རྒྱུད་འགྲེལ་གྱི་དགོངས་པ་ཡང་མ་ཡིན་ཅིང་། རྗེ་བླ་མའི་དགོངས་པ་ཡང་མ་ཡིན་ཏེ། ཚོགས་གཉིས་སྙེ་མར་དེ་ནས་ཚོམ་བུ་དབུས་མའི་སྟེང་དུ་རང་གི་སེམས་སོ་སོར་རྟོག་པ་ཞེས་སོགས་ནས་མངོན་བྱང་ལྔས་གཙོ་བོ་བསྐྱེད། འཁོར་རྣམས་དཀྱིལ་འཁོར་རྒྱལ་མཆོག་གི་ཚུལ་གྱིས་བསྐྱེད་པ་ནས་བརྩམ་ཏེ་ཞེས་དང་། དབང་གི་སྙེ་མར་བུམ་པ་སྟ་གོན་གྱིས་སྐབས་སུ་རྣམ་རྒྱལ་བུམ་པར་མངོན་བྱང་ལྔས་གཙོ་བོ་ཡབ་ཡུམ་བུམ་པ་གཞན་རྣམས་སུ་འཁོར་རྣམས་འབྱིན་པའི་ཚུལ་དུ་བསྐྱེད་དེ་ཞེས་དང་། མདུན་བསྐྱེད་བསྒྲུབ་པའི་སྐབས་སུ་རང་ཤར་ཕྱོགས་ཀྱི་སྒོ་ཁང་ན་གནས་པའི་ཐུགས་ཀ་ནས་ཡི་གེ་ཧཱུྃ་སྤྲོས་ལ་དེ་དཀྱིལ་འཁོར་གྱི་དབུས་ཀྱི་མཚན་མ་ལ་ཐིམ་པས་དེ་རང་གི་སེམས་སོ་སོར་རྟོག་པར་མོས་ལ། དང་པོ་སྦྱོར་བའི་ཚུལ་གྱིས་གཙོ་བོ་བསྐྱེད། དེ་ནས་དཀྱིལ་འཁོར་རྒྱལ་མཆོག་གི་ཚུལ་གྱིས་འཁོར་རྣམས་ཐུགས་ཀ་ནས་སྤྲོས་མཛད་པ་མཛད། སླར་འདུས་སོ་སོའི་མཚན་མ་དང་རོ་གཅིག་ཏུ་གྱུར་པ་ལས་འཁོར་རྣམས་བསྐྱེད་དོ་ཞེས་གསུངས་པའི་ཐུགས་ཀ་ནས་སྤྲོ་བ་བདག་བསྐྱེད་ཁོ་ན་ལ་དགོངས་པར་ཚིག་འགྲོས་དེ་ཉིད་ཀྱིས་ཀྱང་ཤེས་པའི་ཕྱིར་དང་། རྒྱུད་འགྲེལ་ཆེན་པོའི་དགོངས་པ་ལྟར་མཛད་པ་ཡིན་པའི་ཕྱིར་རོ། །ཞེས་པ་འདི་ནི་རང་ཉིད་དྲན་པ་གསོ་བ་དང་། རྣམ་དཔྱོད་དང་ལྡན་ཞིང་བློ་གཟུ་བོར་གནས་པ་འགའ་ཞིག་ལ་ཕན་པའི་ཕྱིར་དུ་རྒྱུད་གསུམ་སྨྲ་བ་བསོད་ནམས་སེང་གེས་བྲིས་པའོ།། ༄། །དབང་ཆུ་ཆེན་མོའི་ས་ཆོག་གི་གསལ་བྱེད་བཞུགས།། ༈ །དཀྱིལ་འཁོར་རྒྱ་མཚོའི་རིགས་བདག་རྡོ་རྗེ་འཆང་། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །བདུད་དཔུང་ཚར་གཅོད་ས་གཞི་བྱིན་བརླབ་པའི། །ཆོ་གའི་རིམ་པ་གསལ་པོར་བྲི་བར་བྱ། །ཐོག་མར་ས་བསླང་ཕྱོགས་སྐྱོང་རྣམ་གཉིས་ལ། །ཞི་བས་བསླང་ཞིང་བགེགས་རྣམས་དྲག་པོས་བསྐྲད། །བགེགས་སྦྱང་དབུས་དང་ཕྱོགས་བཞིར་སློབ་དཔོན་ལྔ། །ཕྱི་ནང་མཆོད་པ་དང་བཅས་འདུག་ནས་ནི། །གནས་མཆོད་བྱིན་བརླབས་ཕྱོགས་བཞིའི་སློབ་དཔོན་གྱིས། །དགའ་ཆེན་ཁྱོད་བདག་སོགས་ཀྱིས་གསོལ་བ་གདབ། །ཀུན་གྱིས་རྣལ་འབྱོར་རྫོགས་པར་བསྒོམས་རྗེས་སུ། །ཕྱོགས་བཞིར་གནས་པས་ཕྱི་ནང་མཆོད་པས་མཆོད། །སྤྲུལ་ཕྱིར་ཚིགས་བཅད་བཞི་ཡིས་གསོལ་བ་གདབ། །དཀྱིལ་འཁོར་བཏེག་སྟེ་རྣམ་ལྔ་འདོད་སྐོར་གྱིས། །རྡོ་རྗེ་དྲིལ་འཛིན་ལངས་ནས་མིག་རྐང་རྣམས། །བྱིན་བརླབས་བགེགས་རྣམས་ཚར་བཅད་རྗེས་གཟུང་བྱ། །རྡོ་རྗེའི་འགྲོས་ཀྱིས་དབང་ལྡན་མཚམས་གནས་ནས། །གར་བསླང་འགྱིང་བཙལ་བསྡིག་པ་རྣམ་གསུམ་བྱ། །དེ་རྗེས་ཞི་འགྲོས་གསུམ་དང་ཁྲོ་འགྲོས་ཀྱིས། །དཀྱིལ་འཁོར་ས་གཞི་གཡས་སྐོར་དག་ཏུ་བཅག །ཤར་ནས་བརྩམས་ཏེ་ཕྱོགས་བཞིར་གཡས་བརྐྱང་དང་། །གཡོན་བརྐྱང་ས་ག་ཟླུམ་པོ་རིམ་བཞིན་བྱ། །དབང་ལྡན་ནས་བརྩམས་མཚམས་བཞིར་རྡོ་རྗེ་དང་། །མཉམ་དང་རུས་སྦལ་བུང་བ་རིམ་བཞིན་བྱ། །སླར་ཡང་དབུས་དང་ཕྱོགས་བཞིར་རྡོ་རྗེ་དང་། །འཁོར་ལོ་རིན་ཆེན་པདྨ་རལ་གྲི་བྱ། །དེ་རྗེས་དབུས་སུ་མདུང་ཚུལ་ལན་གསུམ་དང་། །ཤར་དུ་གཞུ་དབྱིག་ཐོ་བའི་ཚུལ་གསུམ་བྱ། །གཏུན་ཤིང་རྡོ་རྗེ་རྩེ་གཅིག་ཁ་བཅུ་ལྷོར། །ཆུ་གྲི་སྣ་ཚོགས་དབྱིག་པ་མདུང་ཐུང་ནུབ། །མཚོན་རྩེ་གཅིག་དང་བ་དན་གཉིས་གསུམ་བྱང་། །ཚུལ་བཅུ་དྲུག་དང་མཆོད་པ་གཉིས་བྱས་ནས། །དབང་ལྡན་མེ་ཏོག་སྒེག་དང་གླིང་བུ་གསུམ། །མེར་ནི་བདུག་སྤོས་ཕྲེང་བ་པི་ཝང་གསུམ། །སྲིན་པོར་མར་མེ་གླུ་དང་རྫ་རྔ་གསུམ། །རླུང་དུ་དྲི་དང་གར་མ་རྔ་ཟླུམ་གསུམ། །སླར་ཡང་དབུས་སུ་འདུག་སྟངས་བཅུ་བྱ་སྟེ། །རྡོ་རྗེ་སེམས་དཔའི་པདྨའི་སྐྱིལ་ཀྲུང་དང་། །སྐྱིལ་ཀྲུང་ཕྱེད་པ་བཟང་པོ་བཀྲ་ཤིས་དཔའ། །རོལ་པ་མདུན་དང་ཕྱིར་བལྟ་འདུག་སྟངས་བཅུ། །སྒེག་སོགས་སྐུ་གསུང་ཐུགས་ཀྱི་ཉམས་དགུ་དང་། །དྲུག་གི་རྗེས་སུ་སྐྱེས་སོགས་གླུ་ཡི་རིགས། །བཅུ་དགུ་བྱས་ཏེ་འདི་དག་གོམ་སྟབས་དང་། །ལག་སྟབས་འདུག་སྟངས་ངག་གི་འདྲེན་པའོ། །སླར་ཡང་དབང་ལྡན་མཚམས་ནས་བགེགས་ཚོགས་ལ། །བཀའ་བསྒོ་བྱ་སྟེ་རྡོ་རྗེ་ཕུར་བུའི་ཚོགས། །ཐུགས་ཀ་ནས་སྤྲུལ་ཕྱོགས་སྐྱོང་བཅུ་བཀུག་ནས། །ཕུར་བུས་གདབ་པ་ས་ཡི་ཆོ་གའོ།། །།ད་ནི་དེ་དག་གི་དོན་ཞིབ་ཏུ་བཤད་པར་བྱ་སྟེ། དབང་ཆུ་ཆེན་མོར་སའི་ཆོ་ག་ལ་དོན་དྲུག་ཏུ་གསུངས་པའི་དང་པོ་གཉིས་དང་། སྣང་བ་ལ་བསླང་བ་ལ་སའི་ཆོ་ག་མེད་པས། མི་སྣང་བ་ལ་བསླང་བ་ནས་བརྩམས་ཏེ། གང་དུ་དཀྱིལ་འཁོར་བྱེད་པའི་ས་ཕྱོགས་དེར། དབུས་སུ་མཎྜལ་གྱི་སྟེང་དུ་སའི་ལྷ་མོའི་ཚོམ་བུ་དགོད། དེའི་གཡས་སུ་ཆུ་བཞི། གཡོན་དུ་ཉེར་སྤྱོད་ལྔ། མདུན་དུ་གཏོར་མ་གཉིས་བཤམ། སློབ་དཔོན་དཔོན་སློབ་རྣམས་ཀྱི་མདུན་དུ་ནང་མཆོད་རྡོ་རྗེ་དྲིལ་བུ་བཤམས་ཏེ། སྐྱབས་འགྲོ་སེམས་བསྐྱེད། ཚད་མེད་བཞི། ཡེ་ཤེས་ཚོགས་བསག་སྔོན་དུ་སོང་ནས། གཙོ་བོ་ཡབ་ཡུམ་རྡོ་རྗེ་ཆོ་ག་གསུམ་ལས་བསྐྱེད་པ་ཡན་ལག་བཞི་རྫོགས་སུ་བྱས་ནས་རྩ་བའི་སྔགས་ཉི་ཤུ་རྩ་གཅིག་བཟླས་ཏེ། ཐོག་མར་སའི་ལྷ་མོ་ལ་བསླང་བ་ནི། ས་ལྷ་སྟ་གོན་གྱི་སྐབས་ཇི་ལྟ་བ་བཞིན་དུ་བྱ་སྟེ། སའི་ལྷ་མོ་དཔང་པོའི་ཚུལ་གྱིས་ནམ་མཁའ་ལ་འདེགས་པར་བྱའོ། །དེ་ནས་གཏོར་མ་གཉིས་པ་མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་ནས། རང་གི་སྙིང་ག་ནས་འོད་ཟེར་འཕྲོས་ཏེ། ཕྱོགས་སྐྱོང་འཁོར་དང་བཅས་པ་བཀུག་པར་བསམ་ཞིང་། ལུས་ཀྱིས་ལྕགས་ཀྱུའི་ཕྱག་རྒྱ་བཅའ། ངག་ཏུ་ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨཱ་ཀརྵ་ཡ་ཛཿ ཞེས་པས་སྤྱན་དྲང་། ས་པ་རི་ཝཱ་ར་ཞེས་པའི་རྗེས་ལ་ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་ཕུལ་ཏེ། ནང་མཆོད་ཀྱིས་ཀྱང་མཆོད་ནས། སའི་ལྷ་མོ་ལ་བསླང་བའི་སྐབས་ཀྱི་ཚིག་ལྷུག་པ་བརྗོད་དེ་དྲིལ་བུ་གསིལ་བར་བྱའོ། །དེ་ནས་གཏོར་མ་དེ་ཉིད་ཀྱི་ལྷག་མ་བྱིན་བརླབ་མི་དགོས་པར། ཨོཾ་སརྦ་བིགྣན་ན་མཿསརྦ་ཏ་ཐཱ་ག་ཏེ་བྷྱོ་ཞེས་སོགས་ལན་གསུམ་གྱིས་བགེགས་ལ་བྱིན་ནས། ས་ཕྱོགས་འདིར་ནི་སློབ་དཔོན་བདག །ཅེས་སོགས་བརྗོད་དེ། གུ་གུལ་གྱི་དུད་པ་དང་། ཉུངས་ཀར་གྱི་ཐུན་དང་། རོལ་མོའི་སྒྲ་དྲག་ཏུ་བྱའོ། །དེ་ནས་དཀྱིལ་འཁོར་གསར་དུ་བྱ་བའི་སར་ལས་དང་བྱ་བས་སྐྱོན་སྦྱང་བ་བྱ་དགོས་ནའང་། དཀྱིལ་འཁོར་གྱི་ཁང་པ་གྲུབ་པའི་སར་དེའི་ཚབ་ཏུ། ལག་པ་གཡས་པ་ས་ལ་བཞག་སྟེ། ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཅེས་པ་མང་དུ་བཟླ། ཨོཾ་བྷུ་ཁྃ་སྭཱ་ཧཱ། ཞེས་བཟླས་ཏེ། ས་ཕྱོགས་ནམ་མཁའི་རང་བཞིན་དུ་བསམ་མོ། །དེ་ནས་ཏིང་ངེ་འཛིན་གྱིས་བགེགས་སྦྱང་བའི་ཕྱིར། དཀྱིལ་འཁོར་གྱི་ས་གཞི་དེར་ཐུན་མོང་བའི་སྲུང་བའི་འཁོར་ལོ་དང་། ཐུན་མོང་མ་ཡིན་པའི་སྲུང་བའི་འཁོར་ལོ་ཧཱུྃ་མཛད་དབུས་སུ་བྱས་པ་གཉིས་བསྒོམ་པར་བྱའོ། །དེ་ནས་དཀྱིལ་འཁོར་གྱི་ས་གཞིའི་དབུས་སུ་སྟན་ནང་ཚངས་ཅན་ལ་སློབ་དཔོན་ཁ་ཤར་དུ་ཕྱོགས་ཏེ་འདུག ཕྱོགས་བཞིར་སློབ་དཔོན་བཞི་འདུག་སྟེ། མདུན་དུ་ཆུ་བཞི་སྔོན་དུ་འགྲོ་བའི་ཉེར་སྤྱོད་ལྔ་དང་། ནང་མཆོད་རྡོ་རྗེ་དྲིལ་བུ་བཤམ། ཐོག་མར་གནས་དང་མཆོད་པའི་ཡོ་བྱད་བྱིན་བརླབ་བྱ་སྟེ། ཕྱོགས་བཞིའི་སློབ་དཔོན་གྱིས་དགའ་ཆེན་ཁྱོད་བདག་ལན་གསུམ་གྱིས་གཙོ་བོ་ལ་གསོལ་བ་གདབ། དཔོན་སློབ་ཀུན་གྱིས་བདག་བསྐྱེད་ཡོངས་སུ་རྫོགས་པ་བཟླས་པ་དང་བཅས་པ་བྱས་ཏེ། ཕྱོགས་བཞིའི་སློབ་དཔོན་གྱིས་ལྷ་སྟ་གོན་ལ་མི་འཇུག་ན་དཀྱིལ་འཁོར་གྱི་འཁོར་ལོ་བསྡུས། འཇུག་ན་འོག་ཏུ་གཙོ་བོ་དང་མཉམ་དུ་དཀྱིལ་འཁོར་ནམ་མཁར་འདེགས་པར་བྱ་བ་ཡིན་པས། མཆོད་པ་བྱིན་རླབས་སྔོན་དུ་འགྲོ་བའི་ཕྱི་མཆོད་དང་ནང་མཆོད་ཀྱིས་མཆོད། དེ་བཞིན་གཤེགས་པ་ཀུན་ཞི་བ། །ཞེས་སོགས་ཚིགས་བཅད་བཞིས་རིམ་པ་བཞིན་གསོལ་བ་གདབ། དེ་ནས་གཙོ་བོའམ་སློབ་དཔོན་ལྔ་ཆར་གྱིས་རྡོ་རྗེ་ཁུ་ཚུར་གྱི་མཐེབ་ཆུང་གཉིས་སྦྲེལ། མཛུབ་མོ་གཉིས་རྩེ་སྤྲད་པའི་ཕྱག་རྒྱ་སྤྱི་བོར་བཟློག་སྟེ། ཧཱུྃ་བཛྲ་ཨུཏྟིཥྛ། རང་གིས་བསྒོམས་པའི་རྟེན་དང་བརྟེན་པར་བཅས་པའི་དཀྱིལ་འཁོར་ནམ་མཁར་བཞུགས་ཏེ། རང་གཙོ་བོ་ལས་བྱེ་བའི་ཧེ་རུ་ཀ་ཞལ་གཅིག་ཕྱག་གཉིས་པར་གྱུར་ཞེས་བརྗོད་ལ། རྣམ་ལྔ་འདོད་སྐོར་སྔོན་དུ་འགྲོ་བས། ཨོཾ་མ་ཧཱ་བཛྲ་ཧཱུྃ་ཞེས་པས་རྡོ་རྗེ་བླང་། ཨོཾ་བཛྲ་གྷཎྜེ་ཨཿཞེས་པས་དྲིལ་བུ་བླང་སྟེ། རྡོ་རྗེ་གསོར་ཏེ་སྐྱིལ་ཀྲུང་གཡས་པ་བཤིག དྲིལ་བུ་གསིལ་ཏེ་སྐྱིལ་ཀྲུང་གཡོན་པ་བཤིག རྣམ་ལྔ་འདོད་སྐོར་གྱིས་ལངས་ཏེ། མིག་རྐང་བྱིན་གྱིས་བརླབ་པ་དང་། བགེགས་ཚར་གཅད་པ་དང་། གསོས་པར་བྱས་ནས་གཡས་སྔོན་འགྲོའི་གཞི་བཅའ་སྔོན་དུ་འགྲོ་བས། དགའ་བ་ཡོངས་གྱུར་གྱི་འགྲོས་ཀྱིས་དབང་ལྡན་དུ་སོང་སྟེ། ཁ་ནང་དུ་ཕྱོགས་ནས་གར་བསླང་བ་དང་། གར་གྱི་འགྱིང་བཙལ་བ་དང་། གར་བསྡིག་པ་ལན་གསུམ་གསུམ་བྱའོ། །དགའ་བ་ཡོངས་གྱུར་ནི། ངག་དུ་ཨོཾ་ཞེས་དང་། རྐང་པ་གཡོན་པ་གཡས་པའི་མགོར་རྐང་མགོ་གཡས་སུ་བསྟེན་ཏེ་གཞག ནི་ཞེས་དང་། རྐང་པ་གཡས་པའི་མགོ་གཡོན་པའི་རྒྱབ་ཕྱོགས་སུ་གཞག སུམྦྷ་ཞེས་དང་། གཡོན་པའི་དཀྱིལ་གཡས་པའི་རྟིང་པ་ལ་གཞག བཛྲ་ཞེས་དང་། གཡས་པ་གཡོན་པའི་མདུན་དུ་མགོ་གཡོན་དུ་རྟེན་ཏེ་གཞག ཧཱུྃ་ཞེས་དང་། གཡོན་པའི་མགོ་གཡས་པའི་རྒྱབ་ཏུ་གཞག ཕཊ་ཅེས་དང་། གཡས་པའི་དཀྱིལ་གཡོན་པའི་རྟིང་པར་གཞག་པའོ། །གར་བསླང་བ་ནི་ལུས་གཡོ་བ་དང་བཅས་ཏེ། གར་སྐོར་གྱི་རྗེས་སུ་རྡོ་རྗེ་གསོར། དྲིལ་བུ་གསིལ་བའོ། །བགྱིང་བཙལ་བ་ནི་རྐང་པ་གཡས་པ་གཡོན་པའི་མདུན་ནས་བསྐོར་ཏེ་སྔར་ཤུལ་དུ་གཞག་པ་དང་། གར་སྐོར་གྱི་རྗེས་སུ་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་དཀུར་གཞག་པའམ། ཁུ་ཚུར་གཉིས་ཁ་གྱེན་དུ་བསྟན་ནས་རྐེད་པར་འཇོག་པ་གང་རུང་བྱའོ། །བསྡིག་པ་ནི་རྐང་པ་གཡས་པ་མདུན་ནས་བསྐོར་ཏེ་ས་ལ་བརྡབ་པ་དང་། གར་སྐོར་བྱ་རྗེས་སུ་ལག་གཡས་རྡོ་རྗེ་དང་བཅས་ཏེ་བསྣུན་པ་དུས་མཉམ་དུ་བྱ་བའོ། །ཞི་འགྲོས་གསུམ་ལ་རྒྱ་མཚོ་བསྐྱོད་པ་ནི། ལག་པ་གར་སྐོར་དང་། རྐང་པ་གཉིས་རེས་མོས་ཀྱིས་མདུན་ནས་བསྐོར་ཏེ་གཡབ་ཀྱིན་འགྲོ་བའོ། །རི་བོ་འདེགས་པ་ནི་གོམ་པ་གཡོན་པ་མདུན་དུ་གཡབ་ཀྱིན་སྤོ་བའི་ཚེ་ལག་པ་གར་སྐོར་གྱི་རྗེས་སུ། གཡས་ཕྱོགས་སུ་རི་བོ་འདེགས་པའི་ཚུལ་བྱ་ཞིང་། གཡས་པ་སྤོ་བའི་ཚེ་གཡོན་ཕྱོགས་སུ་བྱ་བ་རེས་མོས་སུ་བྱ་བའོ། །མཛེས་པའི་གོམ་པ་ནི་མདུན་དུ་སྤོ་བ་ངོས་མདུན་ནས་གཡབ་ཅིང་མི་སྤོ་བ་ངོས་ཀྱི་བརླ་ལ་བཙུགས་ནས་ཁྱིམ་བྱའི་གོམ་པ་ལྟར་བྱས་ཏེ་འགྲོ་བའོ། །ཁྲོ་བོའི་གོམ་པ་ནི་རྐང་པ་གཡོན་མདུན་དུ་བརྡབ་པའི་ཚེ་ལག་གཡས་རྡོ་རྗེ་དང་བཅས་ཏེ་བརྐྱངས་ནས་གཡོན་དྲིལ་བུ་སྙིང་གར་གསིལ། རྐང་པ་གཡས་པ་མདུན་དུ་བརྡབ་པའི་ཚེ་ལག་པ་གཡས་རྡོ་རྗེ་སྙིང་གར་གཟུང་ཞིང་། གཡོན་དྲིལ་བུ་དང་བཅས་པ་བརྐྱངས་ཏེ་གསིལ་བ་རེས་མོས་ཀྱིས་འགྲོ་བའོ། །གོམ་སྟབས་བཞི་པོ་འདི་དག་ལ་ཧུྃ་ཐུང་རེ་རེ་བརྗོད་པར་བྱའོ། །འདི་མན་ཆད་ཀྱི་སྤྱི་འགྲོ་ནི་དབུས་ནས་ཕྱིར་འགྲོ་བའི་ཚེ་ནའང་དབང་ལྡན་དུ་འགྲོ། ཕྱི་ནས་དབུས་སུ་འགྲོ་བ་ནའང་དབང་ལྡན་ནས་འགྲོ། འགྲོས་ཐམས་ཅད་ནི་དགའ་བ་ཡོངས་གྱུར་གྱིས་འགྲོ། ཕྱོགས་རེ་རེ་ལ་གར་བཅའ་བ་གསུམ། སྒྲུབ་པ་གསུམ། བསྡུ་བ་གསུམ་སྟེ་དགུ་དགུ་བྱ། རྐང་སྟབས་བརྒྱད་ལ་སྒྲུབ་པའི་ཚེ་ཕྱག་རྒྱ་གཅིག་ལ་གནས་ནས་གཡས་གཡོན་དབུས་གསུམ་དུ་བལྟ། ཚུལ་དང་པོ་ལྔ་ལ་ཕྱག་རྒྱ་རེ་རེའང་བཅའ་ཐེབས་ལན་གསུམ་གསུམ་བྱ། དབུས་སུ་མདུང་གི་ཚུལ་ཡང་དེ་དང་འདྲ། ཕྱོགས་བཞིའི་ཚུལ་གསུམ་གསུམ་དང་། མཚམས་བཞིའི་མཆོད་པ་གསུམ་གསུམ་ནི་སྒྲུབ་པའི་ཚེ་ཕྱག་རྒྱ་རེ་རེ་སོ་སོར་འཆའ་བའོ། །ཚུལ་བཅུ་དྲུག་མན་ཆད་ཀྱི་རྐང་སྟབས་ནི་དབུས་དང་མཚམས་བཞིར་མཉམ་པ་དང་། ཕྱོགས་བཞིར་གཡས་བརྐྱང་སོགས་རྩ་བའི་རྐང་སྟབས་བྱ། བཅའ་བའི་ཚེ་གང་སྔོན་དུ་འགྲོ་བའི་རྐང་པ་མདུན་ནས་སྐོར་གཅིག་བསྐོར་ཏེ་ཅིག་ཤོས་ཀྱི་མདུན་དུ་མགོ་ཕྱིར་བསྟན་ནས་གཞག དེ་ནས་ཅིག་ཤོས་མདུན་ནས་བསྐོར་ཏེ་རྐང་སྟབས་གང་ཡིན་པ་དེའི་ཚུལ་དུ་གཞག དེ་ནས་སྔ་མ་མདུན་ནས་བསྐོར་ཏེ་རྐང་སྟབས་དེ་ཉིད་ལ་གནས་དེ་ལྟ་བུའི་བཅའ་བ་གསུམ་དང་། སྒྲུབ་པ་གསུམ་དང་། བསྡུ་བ་དང་པོ་གཉིས་ལ། ཧཱུྃ་ངར་སྒྲ་དང་བཅས་པ་རིང་བར་བརྗོད། བསྡུ་བ་ཕྱི་མ་ལ་ཧུྃ་ཐུང་བརྗོད། བསྡུ་བའི་ཚེ་སྔོན་ལ་གང་འགྲོ་དང་པོར་བསྡུས་ཏེ་སྔར་ཤུལ་དུ་གཞག དེ་ནས་ཅིག་ཤོས་མདུན་ནས་བསྐོར་ཏེ་སྔར་ཤུལ་དུ་གཞག སླར་ཡང་སྔ་མ་མདུན་ནས་བསྐོར་ཏེ་སྔར་ཤུལ་དུ་གཞག་པའོ། །ད་ནི་སོ་སོའི་ངོ་བོ་བཤད་པར་བྱ་སྟེ། གཡས་བརྐྱང་ནི་གཡས་སྔོན་འགྲོའི་མཐོ་ལྔ་རྣམ་པར་བརྐྱངས་པའི་གཡས་བརྐྱང་དང་། ལག་པ་གཉིས་རྒྱབ་སྦྱར་བའི་མཛུབ་མོ་གཉིས་དང་། མཐེའུ་ཆུང་གཉིས་སྦྲེལ་ནས་བཞིན་ཁྲོས་པའི་ཚུལ་ལོ། །གཡོན་བརྐྱང་ནི་གཡོན་སྔོན་འགྲོའི་མཐོ་ལྔ་རྣམ་པར་བརྐྱངས་པའི་གཡོན་བརྐྱང་དང་། ཕྱག་རྒྱ་སྔར་གྱི་ལ་མཛུབ་མོ་གཉིས་བསྒྲེང་བ་དང་བཞིན་ཁྲོས་པའོ། །ས་ག་ནི་གཡོན་སྔོན་འགྲོའི་རྐང་པ་གཉིས་ཅུང་ཟད་བགྲད་པའི་བར་ཁྲུ་གང་དང་སོར་གཉིས་སུ་བྱས་ཏེ་པུས་མོ་དྲང་པོར་བསྲང་། གཡས་རྡོ་རྗེ་སྙིང་ག་དང་། གཡོན་དྲིལ་བུ་དཀུར་བཟུང་ནས་བཞིན་ཞི་བའོ། །ཟླུམ་པོ་ནི་གཡས་སྔོན་འགྲོའི་རྐང་པ་བགྲད་པའི་པུས་མོ་གཉིས་ཀྱི་བར་ཁྲུ་དོར་བྱས་ཏེ་ངང་པའི་གཤོག་པ་ལྟ་བུ་དང་། ལག་པ་གཉིས་ཕྱོགས་མཚམས་ཐམས་ཅད་དུ་གར་བྱེད་ཅིང་བཞིན་སྐྲག་པའི་ཚུལ་ལོ། །རྡོ་རྗེ་ནི་གཡས་སྔོན་འགྲོའི་རྐང་པ་གཡས་ཀྱི་རྟིང་པ་གཡོན་གྱི་མཐིལ་དུ་བཙུགས་པ་དང་། ཕྱག་རྒྱ་ས་ག་དང་འདྲའོ། །མཉམ་པ་ནི་གཡས་སྔོན་འགྲོའི་རྐང་པ་གཉིས་གཤིབས་ཏེ་བསྲང་བ་དང་། ལག་གཉིས་རྡོ་རྗེ་དྲིལ་བུ་དཀུར་བཟུང་བའོ། །རུས་སྦལ་ནི་གཡས་སྔོན་འགྲོའི་རྐང་པ་གཡོན་པའི་བོལ་གོང་དུ་གཡས་པའི་མཐིལ་བཞག་ནས་ལག་གཉིས་དཔུང་པའི་ཐད་ཀར་བསྐུམ་མེ་བྱས་པའོ། །བུང་བ་ནི་གཡས་སྔོན་འགྲོའི་བརླ་གཡོན་པར་གཡས་པའི་མཐིལ་གཏད་ནས་ལག་གཉིས་མཐིལ་གདེངས་པ་དང་སྒེག་པའི་བཞིན་ནོ། །རྡོ་རྗེ་ནི་ལག་གཡོན་སྙིང་གར་སྡིགས་མཛུབ་དང་གཡས་པ་རྡོ་རྗེ་འཕྱར་བའི་ཚུལ་ལོ། །འཁོར་ལོ་ནི་སྙིང་གར་རྡོ་རྗེ་ཁུ་ཚུར་གཉིས་ཁ་གྱེན་ལ་བསྟན། མཐེའུ་ཆུང་དང་མཛུབ་མོ་གཉིས་ཕན་ཚུན་སྦྲེལ་བ་འཁོར་ལོ་བསྐོར་བ་ལྟར་བྱས་ནས་གཡས་ཕྱོགས་སུ་གྱེན་ལ་འཕྱར་བའི་ཚུལ་ལོ། །རིན་པོ་ཆེ་ནི་རིན་པོ་ཆེའི་ཕྱག་རྒྱ་ཁུ་ཚུར་གཉིས་སྦྱར་བའི་གུང་མོ་གཉིས་བསྒྲེངས་ནས་མཐེབ་མཛུབ་སྦྱར་ཏེ་དཔྲལ་བར་འཇོག་པའོ། །པདྨ་ནི་སྙིམ་པ་པདྨ་ཁ་ཕྱེ་བའི་ཚུལ་ལོ། །རལ་གྲི་ནི་གཡས་པའི་མཐེ་བོང་སྲིན་ལག་དང་མཐེའུ་ཆུང་གིས་མནན་ནས་གཡོན་པའི་རྡོ་རྗེ་ཁུ་ཚུར་གྱིས་ཤུབས་ནས་ཕྱུང་ནས་འཕྱར་བའོ། །མདུང་ནི་རྡོ་རྗེ་ཁུ་ཚུར་གྱི་མཛུབ་མོ་གཉིས་བསྒྲེངས་ནས་གཡས་གཡོན་དབུས་གསུམ་དུ་བསྣུན་པའི་ཚུལ་ལོ། །གཞུ་ནི་གཞུ་འགེངས་པའི་ཚུལ་ལོ། །དབྱུག་པ་ནི་གཡོན་སྡིགས་མཛུབ། གཡས་པ་དབྱུག་པ་འཕྱར་བའི་ཚུལ་ལོ། །ཐོ་བ་ནི་ལག་པ་གཉིས་ཐོ་བ་འདེགས་པའི་ཚུལ་ལོ། །གཏུན་ཤིང་ནི་གཏུན་ཤིང་གིས་འབྲས་དྲུ་བའི་ཚུལ་ལོ། །རྡོ་རྗེ་རྩེ་གཅིག་པ་ནི་རྡོ་རྗེ་བསྡམས་པའི་གུང་མོ་གཉིས་བསྒྲེང་བའོ། །ཁ་བཅུ་པ་ནི་སྙིམ་པའི་སོར་མོ་བཅུ་ཕྱོགས་བཅུར་གདེངས་ནས་བསྐྱོད་པའོ། །ཆུ་གྲི་ནི་གཡས་པས་ཆུ་གྲིས་གཅོད་པ་ལྟ་བུའོ། །སྣ་ཚོགས་དབྱིག་པ་ནི་ཕྱོགས་ཀུན་ཏུ་དབྱིག་པ་བསྐོར་ཏེ་བརྡེག་པའི་ཚུལ་ལོ། །མདུང་ཐུང་ནི་གཡོན་སྡིགས་མཛུབ་གཡས་ཁུ་ཚུར་གྱིས་མདུང་ཐུང་གཡས་སུ་བསྣུན་པའི་ཚུལ་ལོ། །མཚོན་རྩེ་གཅིག་ནི་གསོར་མདུང་འཕེན་པའི་ཚུལ་ཏེ་ཚུལ་བཅུ་དྲུག་གོ །བ་དན་གཉིས་དང་གསུམ་ནི་གཡས་པའི་སོར་མོ་གཉིས་དང་གསུམ་སྟོན་པའོ། །མཆོད་པ་བཅུ་གཉིས་ནི་རྡོ་རྗེ་ཁུ་ཚུར་གཉིས་ཁ་གྱེན་དུ་འཐོར་བ་དང་། ཐུར་དུ་དབུབ་པ་དང་། མཐེ་བོང་གཉིས་བསྒྲེང་བ་དང་། བྱུག་པའི་ཚུལ་ལོ། །ཡང་རྡོ་རྗེ་ཁུ་ཚུར་གཉིས་དཀུར་བཞག་ནས་མགོ་གཡོན་དུ་འདུད་པ་དང་། ཕྲེང་བ་འབུལ་བ་དང་། ཁུ་ཚུར་གཉིས་སྦྱར་ནས་ཁ་ནས་འདྲེན་པ་དང་། སྤྱི་བོར་གར་བྱེད་པའི་ཚུལ་ལོ། །ཡང་ལག་པ་གཉིས་ཀྱིས་གླིང་བུ་བསྒྱུར་བ་དང་། པི་ཝང་བསྒྲེང་བ་དང་། རྫ་རྔ་བརྡུང་བ་དང་། མུ་ཀུན་ཏ་བརྡུང་བའི་ཚུལ་ལོ། །ལུས་ཀྱི་འདུག་སྟངས་བཅུ་ནི་ངག་ཏུ་ཧཱུྃ་བརྗོད་ཅིང་། སེམས་ཀྱིས་རྡོ་རྗེའི་ས་གཞིར་བསྒོམ་མོ། །རྡོ་རྗེའི་སྐྱིལ་ཀྲུང་ནི་གཡས་པའི་བྱིན་པ་དང་བརླ་སྦྱར་བའི་སྟེང་དུ་གཡོན་པའི་བོལ་བཞག་ནས་ཕྱི་ནས་གཡས་པ་གཡོན་གྱི་སྟེང་དུ་གཞག་ཅིང་ལག་པ་གཉིས་ཀ་ས་གནོན་གྱི་ཕྱག་རྒྱ་དང་ཞི་བའི་བཞིན་ནོ། །སེམས་དཔའི་ནི་བརླ་གཡོན་གྱི་སྟེང་དུ་གཡས་ཀྱི་བོལ་བཞག་ནས་གཡོན་གྱི་བྱིན་པ་རྐང་འོག་ཏུ་བཞག་ནས་མཆོག་སྦྱིན་གྱི་ཕྱག་རྒྱ་དང་སྙིང་རྗེའི་བཞིན་ནོ། །པདྨའི་ནི་ལོང་བུ་གཉིས་བསྣོལ་ནས་བོལ་གཉིས་མ་རེག་པར་མཐེ་བོང་གཉིས་རྩེ་སྤྲད་དེ། པུས་མོ་གཉིས་ས་ལ་སྦྱར་བའམ་ཅུང་ཟད་བཏེག་ཅིང་ཏིང་ངེ་འཛིན་གྱི་ཕྱག་རྒྱ་དང་སྙིང་རྗེའི་བཞིན་ནོ། །ཕྱེད་པ་ནི་གཡོན་གྱི་བརླ་ལ་གཡས་པའི་བོལ་བཞག་ནས་གཡོན་བརྐྱངས་ཏེ་གཉིས་ཀ་མཆོག་སྦྱིན་གྱི་ཕྱག་རྒྱ་དང་སྙིང་རྗེའི་བཞིན་ནོ། །བཟང་པོ་ནི་རྐང་པ་གཉིས་སྟན་མཐོ་བའི་སྟེང་ནས་བརྐྱངས་ནས་མཐིལ་ཕབ་ནས་གཉིས་ཀ་སྐྱབས་སྦྱིན་གྱི་ཕྱག་རྒྱ་དང་སྙིང་རྗེའི་བཞིན་ནོ། །བཀྲ་ཤིས་ནི་རྐང་པ་གཉིས་བར་མཐོ་གང་ཙམ་དུ་བྱས་ཏེ་ཙོག་པུ་བ་འཇོ་བའི་ཚུལ་དུ་འདུག་ནས་ལག་པ་གཉིས་པུས་མོ་སོ་སོའི་སྟེང་དུ་རྐྱལཾ་བ་དང་རྨད་དུ་བྱུང་བའི་ཞལ་ལོ། །དཔའ་བོ་ནི་གཡས་པ་ས་ལ་བཙུགས་པའི་ལོང་བུ་ལ་གཡོན་པའི་མཐིལ་གཏད་དེ། ལག་པ་སོ་སོའི་སྟེང་དུ་བཞག་པ་དང་དཔའ་བའི་བཞིན་ནོ། །རོལ་པའི་ནི་རྐང་པ་གཡས་ཕྱེད་སྐྱིལ་དུ་བྱས་ཏེ་གཡོན་ཅུང་ཟད་ཅིག་མདུན་དུ་བརྐྱངས་ནས་ལག་པ་གཡོན་པའི་མཐིལ་རྒྱབ་གཡོན་དུ་ས་ལ་བཙུགས་ཏེ། གཡས་པས་ཕྱག་མཚན་འཛིན་པའི་ཚུལ་དུ་པུས་མོ་གཡས་ཀྱི་སྟེང་དུ་གཞག་པ་དང་རྨད་དུ་བྱུང་བའི་ཞལ་ལོ། །མདུན་དུ་ལྟ་བ་ནི་འདུག་སྟངས་དེ་ཉིད་ལ་གནས་པས་ལག་པ་གཉིས་སླར་བཅས་ཏེ་མིག་མདུན་དུ་བལྟས་ཏེ་རྡོ་རྗེའི་ས་གཞིར་བསྒོམས་ཏེ་ཁྲོ་བོའི་བཞིན་ནོ། །ཕྱིར་བལྟས་ཀྱང་ལག་པ་གཉིས་བརླར་བཅས་ཏེ་གཞན་འདྲ་བ་ལས་མིག་གཡས་གཡོན་ནས་རྒྱབ་ཏུ་བལྟ་བའོ། །རྒྱུད་དང་དཀྱིལ་ཆོག་གཉིས་ལས་འདུག་སྟངས་དང་པོ་དྲུག་ལས་མ་གསུངས་ཀྱང་། ཤར་པ་རྡོ་རྗེ་འོད་ཟེར་གྱིས་ཕྱི་མ་བཞི་རྒྱུད་གཞན་ནས་ཁ་བསྐང་བ་ནི་སྤྲོས་པ་ལ་དགའ་བའི་དབང་དུ་བྱས་པ་ཡིན་ནོ། །རྒྱུད་འདིར་དང་པོ་དྲུག་གིས་ཀྱང་ཆོག་གོ །ཉམས་དགུ་ལ་སྒེག་པ་ནི་ཡ་སོས་མ་མཆུ་ཅུང་ཟད་མནན་ཅིང་འཛུམ་པའོ། །དཔའ་བ་ནི་མིག་དཔངས་སྟོད་དེ་ཉམ་ང་བ་དང་བག་ཚ་བ་མེད་པའོ། །མི་སྡུག་པ་ནི་བཞིན་ཤིན་ཏུ་བསྡུས་པའོ། །དགོད་པ་ནི་ཁ་གདངས་ནས་ཧ་ཧའི་སྒྲ་སྒྲོགས་པའོ། །དྲག་ཤུལ་ནི་བརྡེག་པའམ་ཤིན་ཏུ་ཁྲོས་པའོ། །འཇིགས་སུ་རུང་བ་ནི་འཇིགས་པའི་རྣམ་པ་ཅན་ནོ། །སྙིང་རྗེ་དང་རྔམ་པ་ནི་བྱམས་པ་སྟེ་མིག་ཟིམ་པ་དང་བཅས་པའོ། །ཞི་བ་ནི་བཞིན་དྲང་པོར་འཇོག་པའོ། །གླུའི་བཀོད་པ་རྣམས་ཀྱང་རང་རང་གི་ཉམས་ཅི་ལྟ་བ་བཞིན་དུ་བྱའོ། །སླར་ཡང་དབང་ལྡན་གྱི་མཚམས་སུ་གནས་ཏེ་ཁ་ནང་དུ་བལྟས་ནས། ཧཱུྃ། ལུས་ངག་སེམས་ལ་གནས་པ་ཡི། །ཞེས་སོགས་ལན་གསུམ་གྱིས་བགེགས་ལ་བཀའ་བསྒོས་ཏེ་རེ་རེའི་མཚམས་སུའང་རོལ་མོ་དྲག་ཏུ་བྱའོ། །དེ་ནས་ཕུར་བུ་བཅུ་མདུན་དུ་ནས་ཀྱི་ཚོམ་བུའི་སྟེང་དུ་གཞག རེ་རེ་ལའང་ཉུངས་ཀར་གྱི་ཐུམ་བུ་དང་དར་དམར་པོའི་ཅོན་པཎ་གྱིས་བརྒྱན། རང་གི་སྙིང་ག་ནས་རྡོ་རྗེ་ཕུར་བུ་སྟོད་ཁྲོ་བོ་བདུད་རྩི་འཁྱིལ་པའི་རྣམ་པ་ཅན། ལྟེ་བ་མན་ཆད་མདུང་རྩེ་གཅིག་པའི་དབྱིབས་ཅན་བཅུ་སྤྲོས་པར་བསམ། སྤྲོས་པ་ལ་དགའ་ན་གནས་གསུམ་བྱིན་རླབས་དང་ཡེ་ཤེས་པ་བཅུག སླར་ཡང་སྙིང་ག་ནས་འོད་ཟེར་འཕྲོས་པས་བགེགས་ཀྱི་གཙོ་བོ་ཕྱོགས་སྐྱོང་བཅུ་བཀུག་ནས་ཕྱོགས་མཚམས་བརྒྱད། ཤར་གྱི་གཡས་དང་། ནུབ་ཀྱི་གཡོན་དུ་བཀོད་པར་བསམས་ལ། གནས་དེ་དག་ཏུ་ཕུར་ཁུང་བཀོད་པ་ལ་ཤར་ནས་བརྩམས་ཏེ། ནུབ་ཀྱི་གཡོན་གྱི་བར་དུ་ཕུར་བུ་བཏབ་སྟེ། རྐང་པ་གཡས་པའི་མཐིལ་དང་། གཡོན་པའི་པུས་མོ་ས་ལ་བཙུགས། ལག་པ་གཡོན་པས་ཕུར་བུ་གཟུང་། གཡས་པས་ཐོ་བའམ། རྡོ་རྗེས་བརྡུངས་ཏེ། ཨོཾ་གྷ་གྷ་སོགས་བརྗོད། དེའི་ཚེ་རོལ་མོའི་སྒྲ་དྲག་ཏུ་བྱའོ། །དེ་ནས་ཕུར་བུ་དང་བགེགས་ཀྱི་རོ་ལས་འོད་བྱུང་བའི་ཚུལ་གྱིས་རྡོ་རྗེའི་ས་གཞི་སོགས་ཐུན་མོང་བའི་སྲུང་འཁོར་བསྒོམ་པར་བྱའོ། །དཀྱིལ་འཁོར་ཆེན་པོའི་ས་གཞི་བྱིན་རློབ་པའི། །ཆོ་གའི་ཚུལ་འདི་རྒྱུད་དང་གཞུང་བཟང་གི །དགོངས་པ་ཇི་བཞིན་བླ་མའི་ཕྱག་ལེན་གྱིས། གསལ་བར་བརྒྱན་ཏེ་རྒྱུད་གསུམ་སྨྲ་བས་བཀོད། །དེ་ལས་བྱུང་བའི་རབ་དཀར་དགེ་བའི་ཚོགས། །ཇི་སྙེད་ཐོབ་དེས་མཁའ་མཉམ་འགྲོ་བ་ཡི། །བདུད་དང་ལོག་འདྲེན་ཚོགས་རྣམས་རབ་བཅོམ་ནས། །ཕན་བདེ་རྒྱ་མཚོའི་དཔལ་ལ་སྤྱོད་པར་ཤོག། །།དགེའོ།། ༄༅། །བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྟེན་རྙིང་པ་ལ་བྱ་བའི་ཨརྒྷའི་ཆོ་ག་ནི། ངན་པ་བཟང་པོར་སྤོ་བ་དང་། དམའ་བ་ནས་མཐོ་བར་སྤོ་བ་དང་། རྙིང་པ་གསོ་བ་རྣམས་ལ་རུང་གི གཞན་ལ་ནི་མི་རུང་ངོ་། །ཇི་ལྟར་བྱ་བ་ནི་རྟེན་དེའི་དྲུང་དུ། ཆུ་གཉིས་སྔོན་དུ་འགྲོ་བའི་ཉེར་སྤྱོད་དང་། གཏོར་མ་གཅིག་བཤམ། རང་ཡི་དམ་གང་འདོད་ཀྱི་བསྒོམ་བཟླས་རྫོགས་པར་བྱ་སྟེ། མཆོད་པ་བསང་སྦྱང་བྱིན་རླབས་བྱས་ནས། ཚིགས་བཅད་དང་སྔགས་གང་ཡང་རུང་བས་མཆོད། རྟེན་དེ་ཉིད་ཀྱི་བསྟོད་པའམ་རིགས་ལྔའི་བསྟོད་པས་བསྟོད། གཏོར་མའང་བསང་སྦྱང་བྱིན་རླབས་བྱས་ནས། ཨ་ཀཱ་རོའི་སྔགས་ཀྱིས་ཆོས་སྐྱོང་ལ་དབུལ། བདག་གིས་སེམས་ཅན་ཐམས་ཅད་ཀྱི་དོན་དུ་བདེ་བར་གཤེགས་པའི་རྟེན་རྙིང་པ་སྤོ་བའམ། གསོ་བར་འཚལ་ཞིང་། དེའང་སང་ནངས་པར་བགྱིད་པར་འཚལ་ཞེས་པའམ། ད་ནི་བགྱིད་པར་འཚལ་ཞེས་པ་སྐབས་ཐོབ་དང་སྦྱར་ཏེ་གསོལ་བ་གདབ། དེ་ནས་མེ་ལོང་གཡའ་ཡོངས་སུ་དག་པ་གཅིག་སྨྱུག་མ་ལ་བཏགས་པ་རྟེན་དེའི་དྲུང་དུ་བཙུགས་ཏེ་གཟུགས་བརྙན་འཆར་དུ་བཅུག་ལ་འདི་ལྟར་བསམས་ཏེ། རྟེན་འདི་གང་ཟག་ཁྱད་པར་ཅན་གྱིས་རབ་ཏུ་གནས་པར་བྱས་པ་ཡིན་ནའང་། མེ་ལོང་གི་གཟུགས་བརྙན་ལ་སྤོ་བར་རུང་སྟེ། དེའི་རྒྱུ་མཚན་རྟེན་འདི་བདེན་ན་མེ་ལོང་གི་ནང་གི་གཟུགས་བརྙན་ཡང་བདེན། མེ་ལོང་གི་ནང་གི་གཟུགས་བརྙན་ཡང་མི་བདེན་ན་རྟེན་འདིའང་མི་བདེན་པའི་ཕྱིར་ཏེ། བཅོམ་ལྡན་འདས་ཀྱིས་ཆོས་ཐམས་ཅད་མེ་ལོང་ནང་གི་གཟུགས་བརྙན་ལྟར་མི་བདེན་པར་གསུངས་པའི་ཕྱིར་རོ་སྙམ་དུ་ཡུན་རིང་དུ་བསམ། དེ་ནས་མེ་ལོང་ནང་གི་གཟུགས་བརྙན་དེའི་ནང་དུ་རྟེན་དེའི་དམ་ཚིག་པ་བསྐྱེད། པོ་ཏི་སོགས་ཡིན་ན་བསྒྱུར་གཞི་གང་ཡིན་པ་དེ་བསྐྱེད། གནས་གསུམ་བྱིན་གྱིས་བརླབ། ཡེ་ཤེས་པ་བཅུག་པའི་ཚབ་ཏུ་རྟེན་རྙིང་པ་དེའི་ཡེ་ཤེས་པ་བཅུག་ལ་མཆོད་བསྟོད་བསྡུས་པ་བྱས་ནས་སྟེང་འོག་མི་འཁྲུལ་པའི་མཚན་མ་བྱས་ཏེ། དར་སེར་པོས་གཡོགས་པའི་རྒྱབ་ངོས་སུ་རྒྱས་བཏབ་ལ། རྟེན་གསར་པ་དེའི་རབ་གནས་བྱེད་བྱེད་དུ་ཁ་མི་དབྱེ་བར་མཆོད་པ་དང་བཅས་ཏེ་དབེན་པར་གཞག་གོ །དེ་ནས་རྟེན་གསར་པའི་རབ་གནས་ཀྱི་ཡེ་ཤེས་པ་གཞུག་པའི་ཚེ་མེ་ལོང་ཁ་ཕྱེ་སྟེ་དེའི་ནང་གི་ལྷའང་རྟེན་གསར་པ་ལ་གཞུག ཆོ་ག་གཞན་རྣམས་རབ་གནས་ཀྱི་དཀྱུས་བཞིན་དུ་བྱའོ། །རྟེན་རྙིང་པའི་ས་རྡོ་རྣམས་གསར་པ་ལ་བསྲེ་བའམ། ཆུའི་སྐྱེ་བོ་ལ་ཕན་པའི་ཕྱིར་དུ་ཆུ་ནང་དུ་བླུག་པའམ་མཆོད་རྟེན་ལྟ་བུར་བྱས་ཏེ་རབ་གནས་བྱེད་པ་གང་རུང་བྱའོ། །རྟེན་རྙིང་པ་ལ་བྱ་བའི་ཨརྒྷའི་ཆོ་ག་སྔགས་འཆང་དགེ་འདུན་བློ་གྲོས་ཀྱིས་བསྐུལ་བའི་ངོར། རྗེ་བཙུན་ཆེན་པོའི་དགོངས་པ་བཞིན་བསོད་ནམས་སེང་གེས་བྲིས་ནས་མདོ་ཁམས་སུ་ཕུལ་བའོ།། ༈ །།དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་གནས་གྱུར་ཅིག །དགེའོ། །དགེའོ། །དགེའོ།། །།

རྗེ་བཙུན་རྡོ་རྗེ་བདག་མེད་མའི་མངོན་དཀྱིལ་གྱི་ཐོ་ཡིག

རྗེ་བཙུན་རྡོ་རྗེ་བདག་མེད་མའི་མངོན་དཀྱིལ་གྱི་ཐོ་ཡིག་བཞུགས་སོ།། གང་གི་རང་བཞིན་མཁའ་ལྟར་དག་ཅིང་གློ་བུར་སྤྲོས་པའི་དྲི་བྲལ་ཡང་། །ཟག་མེད་བདེ་བའི་དཔལ་གྱིས་རྒྱལ་བ་དུ་མའི་སྤྲུལ་པ་རྣམ་སྤྲོ་བ། །དཔལ་ལྡན་ཡེ་ཤེས་མཁའ་འགྲོ་ལྔ་ཕྲག་གསུམ་གྱི་ཚོགས་ལ་གུས་བཏུད་ནས། །གང་དེའི་སྒྲུབ་པའི་ཐབས་དང་དཀྱིལ་འཁོར་ཆོ་ག་གསལ་བར་འདིར་བཤད་བྱ། །དེ་ལ་རྩ་བའི་རྒྱུད་ཀྱི་བརྟག་པ་དང་པོའི་ལེའུ་དང་པོ་ལས་ལྷ་མོ་བཅོ་ལྔའི་རང་བཞིན་གྱི་རྩ་སུམ་ཅུ་རྩ་གཉིས་གསུངས། གཉིས་པར་རྣལ་འབྱོར་མ་རྣམས་ཀྱི་ཕྲེང་སྔགས་གསུངས། ལྔ་པར་རྫོགས་རིམ་གྱི་རྟེན་ལས་ཀྱི་ཕྱག་རྒྱའི་ཚུལ་དུ་གསུངས། དྲུག་པར་རྣལ་འབྱོར་མ་རྣམས་དང་སྤྱོད་པ་སྤྱད་པའི་ཚུལ་གསུངས། བདུན་པར་རྣལ་འབྱོར་མ་རྣམས་དང་འདུ་བའི་ཕྱག་རྒྱ་དང་། འདུ་བའི་གནས་དང་། འདུ་བའི་དུས་དང་། ནང་རྡོ་རྗེའི་ལུས་ལ་ལྷ་མོ་རྣམས་བསྒོམ་པའི་གནས་དང་། དེ་དག་གིས་རླུང་སེམས་དབུ་མར་ཞུགས་པ་ལས་ལམ་བགྲོད་པའི་ཚུལ་རྣམས་གསུངས། བརྒྱད་པར་སྦས་པ་ལྟར་ན་ཉེ་རྒྱུ་སྟོན་མོད་ཀྱི། སྤྱི་དོན་ལྟར་ན་ལྷ་མོ་བཅོ་ལྔའི་རྟེན་དང་བརྟེན་པར་བཅས་པའི་བསྐྱེད་རིམ་གསུངས། དགུ་པར་དེའི་རྣམ་དག་གསུངས། བཅུ་པར་སྨིན་བྱེད་ཀྱི་དབང་གསུངས། ཕྱི་མའི་གཉིས་པར། བདག་མེད་རྣལ་འབྱོར་ལྡན་པའམ། །ཡང་ན་ཧེ་རུ་ཀ་དཔལ་བརྩོན། །ཞེས་རྒྱུད་འདིའི་ལུགས་ཀྱི་ཚེ་འདི་ལ་ཕྱག་ཆེན་མཆོག་གི་དངོས་གྲུབ་སྒྲུབ་པའི་རྟེན་ལ་ཧེ་རུ་ཀ་ཕྱག་བཅུ་དྲུག་པའམ། བདག་མེད་མ་གང་རུང་གི་རྣལ་འབྱོར་དགོས་པ་ཙམ་ཞིག་བསྟན། གསུམ་པར་ཡུལ་དྲུག་དང་དབང་པོ་དྲུག་ལྷ་མོར་བསྒོམ་ཚུལ་གསུངས། བཞི་པར་ལྷ་མོ་བཅོ་ལྔ་ལ་ཕྱག་རྒྱ་གང་གིས་རྒྱས་འདེབས་པ་དང་། ས་བོན་གང་ལས་བསྐྱེད་པ་དང་། རྩ་སོ་གཉིས་ལྷ་མོ་གང་ཡིན་པ་སོགས་གསུངས་སོ། །དེ་དག་གི་དགོངས་པ་རྣལ་འབྱོར་དབང་ཕྱུག་གིས་སྨིན་བྱེད་ཀྱི་དབང་དང་གྲོལ་བྱེད་ཀྱི་ལམ་གཉིས་ལས། དང་པོ་ནི། ལེའུ་བཅུ་པ་ལས་གསུངས་པ་ལྟར་བདག་མེད་མའི་དཀྱིལ་འཁོར་དུ་དབང་གི་མངོན་པར་རྟོགས་པ་བདུན་གྱིས་དབང་བསྐུར་བར་བཞེད་ཅིང་། ཡབ་ཀྱི་དཀྱིལ་འཁོར་གྱི་ཆོ་ག་ཕལ་ཆེར་འདི་དང་འདྲ་ཞིང་། མི་འདྲ་བའི་ཁྱད་པར་རྣམས་ཕྱི་མའི་ལྔ་པ་ལས་གསུངས་ཏེ། བཅོ་ལྔས་ཡོངས་སུ་བསྐོར་བ་ཡི། །བདག་གི་འཁོར་ལོ་ཁྱོད་བཤད་ན། །ཁྱོད་ཀྱི་འཁོར་ལོ་ཇི་ལྟར་ལགས། །ཞེས་ཞུས་པའི་ལན་དུ། བསྐྱེད་རིམ་གྱི་ཁྱད་པར་སྐུ་མངོན་བྱུང་། སྔགས་ཀྱི་ཁྱད་པར་གསུང་མངོན་བྱུང་། དབང་ཆོག་གི་ཁྱད་པར་ཐུགས་མངོན་བྱུང་རྣམས་གསུངས་པའི་ཕྱིར་རོ། །ད་ལྟ་ཡབ་ཀྱི་དཀྱིལ་འཁོར་ཆོ་ག་གཞིར་བཞག་ནས། དེ་ལས་ཡུམ་གྱི་མི་འདྲ་བའི་ཁྱད་པར་རྣམས་ལེན་པ་ནི་རྗེ་བཙུན་རྩེ་མོས་ཡབ་ཀྱི་ཕྱོགས་ལ་ཆོ་ག་རྒྱས་པར་མཛད་པས་དེའི་དབང་དུ་བྱས་པའོ། །གཉིས་པ་གྲོལ་བྱེད་ཀྱི་ལམ་ལ་ནང་བསྐྱེད་པའི་རིམ་པ་དང་། ཕྱི་བསྐྱེད་པའི་རིམ་པ་གཉིས་ལས། དང་པོ་ནི། ལུས་ཀྱི་གནས་གང་དུ། རྩ་གང་། ལྷ་མོ་གང་དུ་བསྒོམ་པ། བྱང་ཕྱོགས་སོ་བདུན་གང་གི་ངོ་བོ་ཡིན་པ། ས་གང་གི་རྟོགས་པ་བསྐྱེད་པ་དང་རྣམ་པ་ལྔ་ལྔར་གནས་པ་ནི་དང་པོའི་དང་པོ་དང་། ཕྱི་མའི་བཞི་པ་སྦྱར་ཏེ་ཤེས་པར་བྱའོ། །འཕོ་བའི་རིམ་པ་དང་སྦྱར་ན། ཚེས་བཅུ་དྲུག་ཕྱིའི་འཕོ་བ་བཅུ་དྲུག རྩ་བཅུ་དྲུག་དང་ཡི་གེ་བཅུ་དྲུག་ནང་གི་འཕོ་བ་བཅུ་དྲུག དགའ་བ་བཅུ་དྲུག་རྣམས་སུ་ཡོད་པ་ལས། བཅོ་ལྔ་པ་རྣམས་ལྷ་མོས་སྦྱོང་ཞིང་། བཅུ་དྲུག་པ་ལྷ་མོས་མི་སྦྱོང་བའི་རྒྱུ་མཚན་དང་བཅས་ཏེ་ཕྱི་མའི་བཞི་པར་གསུངས་ལ། འདི་ནི་སྦྱང་གཞི་སྦྱོང་བྱེད་སྦྱར་བ་ཙམ་ཡིན་གྱི། འཕོ་བའི་གནས་དེ་དང་དེར་ལྷ་མོ་ཞལ་ཕྱག་གི་རྣམ་པ་ཅན་བསྒོམ་པ་ནི་མེད་དོ། །ཕྱི་བསྐྱེད་པའི་རིམ་པ་ལ་དཀྱིལ་འཁོར་གྱི་ཕྱོགས་གང་དུ། ལྷ་མོ་གང་། ཨཱ་ལི་གང་ལས་བསྐྱེད་པ་དང་། སྦྱང་གཞི་ཕུང་ཁམས་སྐྱེ་མཆེད་གང་སྦྱོང་བ་དང་། ཉོན་མོངས་པ་གང་སྦྱོང་བ་དང་རྣམ་པ་ལྔར་གནས་ཤིང་། སྦྱང་གཞི་སྦྱོང་ཚུལ་དང་བྱང་ཆུབ་ཀྱི་ཕྱོགས་ལ་སྦྱར་བ་ནི་ཕྱི་ནང་གཉིས་ཐུན་མོང་བ་ཡིན་ནོ། །ཕྱི་ནང་གི་བསྐྱེད་པའི་རིམ་པ་དེ་དག་ནི་བདག་མེད་མའི་བསྟོད་པ་རྩ་འགྲེལ་གྱི་སྟེང་དུ་རྟོགས་པར་བྱ་ཞིང་། འདིར་ཕྱི་བསྐྱེད་པའི་རིམ་པ་བསྒོམ་ཚུལ་རྗེ་བཙུན་གྲགས་པ་རྒྱལ་མཚན་གྱིས་བདག་མེད་མའི་མངོན་རྟོགས་ཡན་ལག་བཞི་དྲུག་གཉིས་ཆར་སྟོན་པར་མཛད་པ་ལས། ངག་འདོན་གྱི་རིམ་པ་ཕལ་ཆེར་ཡབ་ཀྱི་དང་འདྲ་ལ། མི་འདྲ་བའི་ཁྱད་པར་རྣམས་བརྗོད་ན། འདིའི་ཡན་ལག་བཞི་དྲུག་གི་ཁྱད་པར་ནི། རྩ་རྒྱུད་ཀྱི་དགོངས་པས་ཡན་ལག་བཞིས་འཆིང་བ་དང་། རྡོ་རྗེ་གུར་གྱི་དགོངས་པས་ཡན་ལག་དྲུག་གིས་འཆིང་བ་མ་གཏོགས་པ་བསྐྱེད་ཆོག་མངོན་རྟོགས་ལ་ནི་ཁྱད་པར་མེད་དེ། གཉིས་ཀའང་མངོན་བྱང་ཚན་པ་བཅོ་ལྔ་ལས་ལྷ་མོ་ཅིག་ཅར་བསྐྱེད་པར་མཚུངས་པའི་ཕྱིར་རོ། །དེས་ན་འདིའི་ཡན་ལག་དྲུག་པའི་གནས་སྐབས་སུ་བར་དོའི་མཚོན་བྱེད་ཡིག་འབྲུ་ལྔ་པོ་རྫོགས་པར་གཞལ་ཡས་ཁང་ལ་བསྲེ་བ་ཡིན་གྱི། ནམ་མཁར་བཞག་ནས་ལྷ་ལ་བསྲེ་བ་ནི་མེད་དོ། །ཁ་ཅིག་འདིར་ཡང་ལྷ་ལ་བསྲེ་དགོས་པར་དགོངས་ནས་གཙོ་མོའི་མངོན་བྱང་གསུམ་པ་ལ་བསྲེ་བ་ལ་མི་འཐད་དེ། མངོན་བྱང་གསུམ་པ་དེ་ཉིད་བར་དོའི་སྦྱོང་བྱེད་ཡིན་ན་ཡིག་འབྲུ་བསྲེ་བ་དོན་མེད་པའི་ཕྱིར་དང་། དེ་བར་དོའི་སྦྱོང་བྱེད་མ་ཡིན་ན་ཡན་ལག་བཞི་པའི་གནས་སྐབས་སུ་བསྲེ་དགོས་པར་འགྱུར་བའི་ཕྱིར་རོ། །ཡབ་ལ་ནི་མི་མཚུངས་ཏེ། ཡན་ལག་དྲུག་པའི་གནས་སྐབས་སུ་རྒྱུ་རྡོ་རྗེ་འཆང་གི་མངོན་བྱང་གསུམ་པ་དེ་ཕ་མའི་བར་དོའི་སྦྱོང་བྱེད་ཡིན་པས། རང་ཉིད་ཀྱི་བར་དོ་རྒྱུ་རྡོ་རྗེ་འཆང་སྙོམས་པར་ཞུགས་པའི་ཚེ་བསྲེ་དགོས་པའི་ཕྱིར་རོ། །ཡན་ལག་བཞི་པའི་རྒྱུ་རྡོ་རྗེ་འཆང་གི་མངོན་བྱང་གསུམ་པ་རང་ཉིད་ཀྱི་བར་དོའི་སྦྱོང་བྱེད་ཡིན་པས་ཡིག་འབྲུ་བསྲེ་མི་དགོས་པའི་གནད་ཀྱང་འདི་དང་དོན་གཅིག་གོ །ཁ་ཅིག ཡིག་འབྲུ་ནམ་མཁར་བཞག་ནས་ཡེ་ཤེས་ཀྱི་འཁོར་ལོ་དགུག་གཞུག་བྱེད་པ་དང་མཉམ་དུ་བསྲེ་བ་ནི་ཤིན་ཏུ་མི་འཐད་དེ། མངལ་ནས་ཕྱིར་འཐོན་ཏེ་ལུས་རྫོགས་ནས་བར་དོ་འཇུག་པ་ནི་བཞད་གད་ཀྱི་གནས་ཡིན་པའི་ཕྱིར་རོ། །ཁ་ཅིག འདིར་བར་དོ་ངེས་པར་འཇུག་དགོས་ཏེ། རྡོ་རྗེ་གུར་ལས། ཡན་ལག་དྲུག་གིས་འཆིང་བའི་སྐབས་སུ། དྲི་ཟ་སྙོམས་པར་ཞུགས་ནས་ནི། །ཞེས་གསུངས་པས་སོ་སྙམ་ན། དེ་ལྟར་ན་ཞུ་བ་གླུས་བསྐུལ་དང་། འཁོར་གྱི་ལྷ་མོ་མངལ་ནས་དབྱུང་བ་དང་། འབྲས་བུ་རྡོ་རྗེ་འཛིན་པའང་དགོས་པར་འགྱུར་ཏེ། དེ་ཉིད་ལས། མཁའ་འགྲོ་མ་བདེའི་འཁོར་ལོ་སྤྲོ། །ཞེས་དང་། ཁུ་བར་རྗེས་སུ་དྲན་པར་བྱ། །མཚམས་ཀྱི་ལྷ་མོས་བསྐུལ་ནས་ནི། །འཁོར་ལོའི་འདྲེན་པ་བཞེངས་པར་བྱ། །ཞེས་གསུངས་པས་སོ། །དེ་ནི་ཡབ་ཀྱི་དབང་དུ་བྱས་སོ་སྙམ་ན། ཤིན་ཏུ་བདེན་མོད་ཀྱི། སྔ་མའང་ཡབ་ཀྱི་དབང་དུ་བྱས་པར་བཤད་ཟིན་ཏོ། །དེ་ན་འདིའི་ཡན་ལག་དྲུག་པ་བསྒོམ་པའི་ཚུལ་ནི། སྐྱབས་འགྲོ་སེམས་བསྐྱེད། རྡོ་རྗེ་སེམས་དཔའི་བསྒོམ་བཟླས་སྔོན་དུ་སོང་ནས། རང་སྐད་ཅིག་གིས་རྡོ་རྗེ་བདག་མེད་མར་གསལ་བའི་སྙིང་གར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཨྃ་སྔོན་པོ། དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་ལྷ་མོ་བཅོ་ལྔའི་དཀྱིལ་འཁོར་བླ་མ་མི་བསྐྱོད་པའི་རྣམ་པ་ཅན་སྟེང་གི་ཆ་ལ་བཞུགས་པ་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿན་མ་ཿཤྲཱི་ནཻ་རཱཏྨ་མཎྜ་ལེ་བྷྱཿ ཞེས་པས་ཕྱག་བྱ། དེ་ནས་མཆོད་པ་དང་། རྒྱུན་བཤགས་ནས་འབྱུང་བ་བཞི་འཁོར་ལོ་དང་བཅས་པ་བསྐྱེད་པའི་བར་ཡབ་དང་འདྲ་ལ། དེ་དག་གི་སྟེང་གི་བར་སྣང་ལ་ཨོཾ་ཨཱཿཧཱུྃ་ཧོཿདམར་པོ་གཉིས་ཀྱིས་མཐའ་བརྟེན་པའི་རང་གི་བར་དོའི་རྣམ་པར་ཤེས་པ་དེ་རྣམས་འབྱུང་བཞི་འཁོར་ལོ་དང་བཅས་པ་ལ་རོ་གཅིག་ཏུ་འདྲེས་པ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཞེས་པ་ནས། ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བའི་དབུས་སུ་སྣ་ཚོགས་པདྨ་འདབ་མ་བརྒྱད་པ། རྡོ་རྗེའི་རྭ་བ་དང་འོད་ཟེར་ཕྲེང་བས་བསྐོར་བའི་དབུས་དང་ཕྱོགས་བཞིར་ཉི་མ་དང་རོའི་གདན་རེ་རེ། ཕྱིའི་ཕྱོགས་མཚམས་བརྒྱད། འོག་དང་སྟེང་རྣམས་སུ་པདྨ་དང་ཉི་མ་རོའི་གདན་རེ་རེ། ཨོཾ་སརྦ་ཏ་ཐཱ་ག་ཏ་ནཱི་ལ་ཡ་སོགས་བརྗོད། གདན་བཅོ་ལྔའི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་སྐར་མའི་རྣམ་པ་ལྟ་བུ་ཨ་ཨཱ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་བཅོ་ལྔར་གྱུར་པ་མེ་ལོང་ལྟ་བུའི་ཡེ་ཤེས། དེ་རྣམས་ཀྱི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ་མར་མེའི་ཕྲེང་བ་ལྟ་བུའི་ཀ་ཁ་སོགས་ཕྲག་གཉིས་བརྗོད། ཞུ་བ་ལས་བྱུང་བའི་ཉི་མའི་དཀྱིལ་འཁོར་བཅོ་ལྔར་གྱུར་པ་མཉམ་པ་ཉིད་ཀྱི་ཡེ་ཤེས། དེ་རྣམས་ཀྱི་བར་དུ་ཨྃ་ཨཱྃ། ཨིཾ་ཨཱིྃ། ཨུྃ་ཨཱུྃ། རིཾ་རཱིྃ། ལྀཾ་ལཱྀྃ། ཨེཾ་ཨཻྃ། ཨཽཾ་ཨཽཾ། ཨྃ་རྣམས་ལས་གྲི་གུག་སྔོ་ནག་བཅོ་ལྔའི་ཡུ་བ་ལ་ཨྃ་ཨཱྃ། ཨིྃ་ཨཱིྃ། ཨུྃ་ཨཱུྃ། རྀཾ་རཱྀཾ། ལྀཾ་ལཱིཾ། ཨེཾ་ཨཻཾ། ཨཽཾ་ཨཽཾ། ཨྃ་རྣམས་ཀྱི་མཚན་པ་སོ་སོར་ཀུན་ཏུ་རྟོག་པའི་ཡེ་ཤེས། ཉི་ཟླ་ཕྱག་མཚན་ས་བོན་དང་བཅས་པར་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་ལྷ་མོ་བཅོ་ལྔའི་སྐུ་ཡོངས་སུ་རྫོགས་པར་གྱུར་པ་ནི། དབུས་སུ་རྡོ་རྗེ་བདག་མེད་མ། ཤར་དུ་རྡོ་རྗེ་མ། ལྷོར་གསང་བའི་དཀར་མོ། ནུབ་ཏུ་ཆུའི་རྣལ་འབྱོར་མ། བྱང་དུ་རྡོ་རྗེ་མཁའ་འགྲོ་མ། ཕྱིའི་འཕར་མ་ལ་བྱང་ཤར་དུ་པུཀྐ་སཱི། ཤར་ལྷོར་རི་ཁྲོད་མ། ལྷོ་ནུབ་ཏུ་གདོལ་པ་མོ། ནུབ་བྱང་དུ་གཡུང་མོ། ཤར་དུ་གཽ་རཱི། ལྷོར་ཙཽ་རཱི། ནུབ་ཏུ་བེ་ཏཱ་ལཱི། བྱང་དུ་གྷསྨ་རཱི། འོག་ཏུ་ས་སྤྱོད་མ། སྟེང་དུ་མཁའ་སྤྱོད་མ་སྟེ། ལྷ་མོ་ཐམས་ཅད་ཀྱང་སྐུ་མདོག་ནག་མོ། མཁྲང་ཞིང་མཐོ་བའི་ནུ་མ་བརྗིད་པའི་འབུར་བ་དང་ལྡན་པ། རབ་ཏུ་གཞོན་ཞིང་ཤ་རྒྱས་པ། དབུ་སྐྲ་དམར་སེར་གྱེན་དུ་ལངས་པ། དམར་ཞིང་ཟླུམ་པའི་སྤྱན་གསུམ་པ། སྨིན་མ་དཔྲལ་བར་བསྡུས་པའི་ཁྲོ་གཉེར་དང་ལྡན་པ། ཅུང་ཟད་འཛུམ་ཞིང་མཆེ་བ་གཙིགས་པའི་ཞལ་ཅན། ཕྱག་གཡས་པས་རྡོ་རྗེ་གྲི་གུག་ཕྱར་ཏེ་འཛིན་པ། གཡོན་པས་རབ་ཏུ་དཀར་བའི་ཐོད་པ་བདུད་བཞིའི་ཁྲག་གིས་བཀང་བ་ཐུགས་ཀར་བཟུང་བ་ལ་གཡོན་དུ་འགྱིང་བའི་སྤྱན་གྱིས་ཅུང་ཟད་གཟིགས་པ། གཡོན་གྱི་གྲུ་མོར་རྡོ་རྗེ་ཁ་ཊྭཱཾ་ག་ལ་དྲིལ་བུ་དང་བ་དན་གྱིས་བརྒྱན་པ་འཛིན་པ། རུས་པའི་རྒྱན་ཆ་ལྔས་བརྒྱན་ཅིང་། སྟག་གི་པགས་པས་སྨད་དཀྲིས་བྱས་པ། ཞབས་གཡོན་པའི་མཐིལ་གྱིས་རོའི་སྟེང་དུ་མནན་ཅིང་། སྐྱིལ་ཀྲུང་ཕྱེད་པའི་གར་གྱིས་བཞུགས་པ། མེ་རི་འབར་བའི་དབུས་ན་བདེ་བ་ཆེན་པོ་དང་ཟག་པ་མེད་པའི་ཐུགས་རྗེ་ཆེན་པོས་སེམས་ཅན་གྱི་དོན་མཛད་ཅིང་བཞུགས་པར་བསྒོམ་པར་བྱའོ། །དེ་རྣམས་ཀྱི་ཐུགས་ཀར་པདྨ་དང་ཉི་མའི་སྟེང་དུ་ཨྃ་ཨཱྃ་སོགས་ལས་གྲི་གུག་སྔོ་ནག་བཅོ་ལྔའི་ཡུ་བར་ཨྃ་ཨཱྃ་སོགས་ཀྱིས་མཚན་པ། དེ་དག་ལས་འོད་ཟེར་འཕྲོས། སྣོད་ཀྱི་འཇིག་རྟེན་ཐམས་ཅད་ལ་ཕོག གཞལ་ཡས་ཁང་པར་གྱུར། ཡང་འོད་འཕྲོས། བཅུད་ཀྱི་སེམས་ཅན་ཐམས་ཅད་ལ་ཕོག ལྷ་མོ་བཅོ་ལྔའི་ངོ་བོར་གྱུར། དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་ནི་ཡབ་དང་འདྲ་ལ། ཡེ་ཤེས་ཀྱི་འཁོར་ལོ་ལྷ་མོ་བཅོ་ལྔའི་དཀྱིལ་འཁོར་ལ་སངས་རྒྱས་བྱང་སེམས་ཀྱིས་བསྐོར་བ་སྤྱན་དྲངས་ནས། ལྷ་མོ་བརྒྱད་ཀྱིས་མཆོད། འགྲོ་བ་བུད་མེད་འདུལ་གཟིགས་ནས། །བདག་མེད་རྣལ་འབྱོར་མར་གྱུར་གང་། །ཕྱག་འཚལ་ཕ་རོལ་ཕྱིན་ཐུབ་ལ། །སྒྱུ་མའི་ཕྱག་རྒྱར་ཕྱག་འཚལ་བསྟོད། །ཅེས་པས་བསྟོད་ལ། ལྷ་མོ་བཞིས་དགུག་གཞུག་བྱས་པའི་རྗེས་སུ་ཨ་ནུ་རཱ་ག་སོགས་ཀྱི་སྔགས་བརྗོད་ལ་ང་རྒྱལ་གཟུང་། དེ་ནས་དབང་ལྷ་སྤྱན་དྲངས་ནས་ཆུ་ལྷག་མ་ཡར་ལུད་པའི་བར་ཡབ་དང་འདྲ་ལ། གཙོ་མོ་ལ་མི་བསྐྱོད་པ། རྡོ་རྗེ་མ་ལ་རྣམ་སྣང་། གསང་བའི་དཀར་མོ་ལ་རིན་འབྱུང་། ཆུའི་རྣལ་འབྱོར་མ་ལ་འོད་དཔག་མེད། རྡོ་རྗེ་མཁའ་འགྲོ་མ་ལ་དོན་གྲུབ། གཽ་རཱི་དང་པུཀྐ་སཱི་ལ་མི་བསྐྱོད་པ། ཙཽ་རཱི་དང་ཤ་བ་རཱི་ལ་རྣམ་པར་སྣང་མཛད། བེ་ཏཱ་ལཱི་དང་ཙཎྜ་ལཱི་ལ་རིན་འབྱུང་། གྷསྨ་རཱི་དང་ཌོམྦི་ནཱི་ལ་འོད་དཔག་མེད། ས་སྤྱོད་མ་ལ་རྣམ་སྣང་། མཁའ་སྤྱོད་མ་ལ་འོད་དཔག་མེད་ཀྱིས་དབུར་བརྒྱན། ཨ་བྷི་ཥེ་ཀ་ཏ་སོགས་ཀྱིས་སྔགས་བརྗོད། དེ་ནས་བདུད་རྩི་མྱང་བ་དང་། མཆོད་པའི་ཡན་ལག་གཉིས་ཡབ་དང་འདྲ་ལ། བསྟོད་པའི་ཡན་ལག་ནི། འགྲོ་བ་བུད་མེད་སོགས་ཀྱིས་བསྟོད་ནས་སྟུ་ཏི་བཛྲ་སོགས་ཀྱི་སྔགས་བརྗོད། དེ་ནས་ཁ་དོག་གི་སྒོ་ནས་ཞེན་པ་སྤོང་བའི་ཕྱིར་ལྷ་མོ་ཐམས་ཅད་དང་པོར་ནག་པོ་དང་། གཉིས་པར་དམར་པོ་དང་། གསུམ་པར་སེར་པོ་དང་། བཞི་པར་ལྗང་གུ་དང་། ལྔ་པར་སྔོན་པོ་དང་། དྲུག་པར་དཀར་པོར་བསྒོམ་པར་བྱའོ། །དེའི་རྗེས་སུ་དག་པ་དྲན་པ་ནི། གཞལ་ཡས་ཁང་པ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡིན་ལ། དེའང་རང་གི་སེམས་རྣམ་པར་དག་པའོ་ཞེས་རྟེན་གྱི་དག་པ་དང་། གཟུགས་ཕུང་རྡོ་རྗེ་མ་ཡིན་ཏེ། །ཚོར་བ་ལ་ཡང་དཀར་མོར་བརྗོད། །འདུ་ཤེས་ཆུ་ཡི་རྣལ་འབྱོར་མ། །འདུ་བྱེད་རྡོ་རྗེ་རྣལ་འབྱོར་མ། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ཞེ་སྡང་ཞེས་བཤད་རྡོ་རྗེ་མ། །འདོད་ཆགས་ཆུ་ཡི་རྣལ་འབྱོར་མ། །ཕྲག་དོག་རྡོ་རྗེ་མཁའ་འགྲོ་མ། །སེར་སྣ་གསང་བའི་དཀར་མོ་ཉིད། །གཏི་མུག་དེ་བཞིན་རྡོ་རྗེར་བཤད། །ས་ནི་པུཀྐ་སཱི་ཞེས་བཤད། །ཆུ་ཁམས་རྔོན་པ་མ་ཞེས་བརྗོད། །མེ་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲགས། །གཟུགས་ལ་གཽ་རཱིར་རྟག་ཏུ་བཤད། །སྒྲ་ལ་ཆོམ་རྐུན་མ་རབ་གྲགས། །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་རབ་གྲགས། །རེག་ལ་ས་སྤྱོད་མ་ཞེས་བརྗོད། །ཆོས་ཀྱི་དབྱིངས་ལ་མཁའ་སྤྱོད་མ། །ཞེས་ལྷའི་རྣམ་དག་དང་། མིག་ཏུ་གཏི་མུག་རྡོ་རྗེ་མ། །རྣ་བར་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །ཞེས་དབང་པོའི་རྣམ་དག་དང་། ང་རྒྱལ་ལ་སོགས་སྐྱོན་དྲུག་རྣམས། །གཅོད་ཕྱིར་གྲི་གུག་རྣམ་པར་འཛིན། །དངོས་དང་དངོས་མེད་རྣམ་རྟོག་གི །མགོ་བོ་པདྨའི་སྣོད་དུ་ནི། །འདུད་རྣམས་རྣམ་པ་བཞི་ཡི་ཁྲག །དངོས་གྲུབ་ཕྱིར་ནི་བཏུང་བར་བྱ། །སྟོང་པའི་རྣམ་པས་ཁ་ཊྭཱཾ་ག །ཐབས་ཀྱི་རོ་ནི་རྣམ་པར་བརྟག །ཅེས་ཕྱག་མཚན་གྱི་དག་པ་དང་། སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །ལག་པར་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་མགོན། །ཞེས་རྒྱན་ཆའི་དག་པ་རྣམས་བརྗོད་པར་བྱའོ། །དེ་ནས་རྫོགས་རིམ་གཏུམ་མོ་འཁོར་ལོ་བཞིའི་དམིགས་པ་བསྒོམ་པར་བྱའོ། །དེ་ནས་བཟླས་པ་བྱ་བ་ནི། རང་གི་སྙིང་གར་ཉི་མའི་སྟེང་དུ་ཨྃ་སྔོན་པོ་ལས་སྔགས་ཀྱི་ཕྲེང་བ་བྱུང་། ཞལ་ནས་འཐོན། སྙིང་གར་ཐིམ་པའི་ཚུལ་གྱིས་འཁོར་བ་ལ་དམིགས་ཏེ། ཨོཾ་ཨཱཿཨྃ་ཧཱུྃ་ཕཊ་སྭཱ་ཧཱ། ཞེས་བཟླའོ། །འཁོར་རྣམས་ཀྱི་རང་རང་གི་ས་བོན་དེ་ཉིད་ལྔས་སྤེལ་བ་བཟླ་སྟེ། དམིགས་པ་ནི་སྔ་མ་བཞིན་ནོ། །འཁོར་བའི་ཚེ་དེ་དག་ལས་འོད་ཟེར་འཕྲོས་པས་སེམས་ཅན་གྱི་དོན་བྱས། འཕགས་པ་རྣམས་མཆོད་ནས། དེ་དག་གི་བྱིན་རླབས་དང་ནུས་པ་རྣམས་རང་གི་སྙིང་གར་ཐིམ་པས་རང་གི་རྒྱུད་བྱིན་གྱིས་བརླབས་པར་བསམ་མོ། །བཟླས་པའི་མཇུག་ཏུ་གསོལ་བ་བཏབ་ནས། སྙིང་གའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་ཐིམ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་འཁོར་གྱི་ལྷ་མོ་རྣམས་ལ། དེ་གཙོ་མོ་ལ་བསྡུས་ལ་ཐུན་དང་པོ་གསུམ་ལ་གཙོ་མོའི་ང་རྒྱལ་གྱིས་གནས་ཤིང་། ཉལ་བའི་རྣལ་འབྱོར་གྱི་ཚེ། དེ་ཐུགས་ཀའི་ཨྃ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེའང་མི་དམིགས་ཏེ་སྟོང་པའི་ངང་ལ་བཞག་སྟེ་ཉལ། ལྡང་བའི་ཚེ་བདག་མེད་མའི་སྐུར་ལྡང་བར་བྱའོ། །མདུན་བསྐྱེད་དང་འབྲེལ་ན། སྟོང་པའི་ངང་ལས་ཧཱུྃ་ཧཱུྃ་ཞེས་པས་ཧེ་རུ་ཀ་ཞལ་གཅིག་ཕྱག་གཉིས་པས་རྣམ་པར་ལངས་ལ། ཧི་ཧི་ཞེས་པས་བགེགས་བསྐྲད་པར་བྱའོ། །དེ་ནས་དཀྱིལ་འཁོར་སྒྲུབ་པ་སོགས་ལ་མི་འཇུག་ན། རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་དང་། སྨོན་ལམ་སོགས་བྱའོ། །གཉིས་པ་ཡན་ལག་བཞི་པ་བསྒོམ་པའི་ཚུལ་ནི། རྒྱུན་བཤགས་ཀྱི་སྐབས་སུ་རྗེ་བཙུན་རིན་པོ་ཆེས་མཛད་པའི་ཚིགས་ལྷུག་པ་བྱ་བའམ། ཡང་ན་སྔ་མ་ལྟར་བྱའོ། །གཞལ་ཡས་ཁང་པའི་སྐབས་སུ་ཆོས་འབྱུང་བསྐྱེད་ཟིན་ནས། ལྃ་ལས་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་ཕྱེད་པ་དང་ལྟེ་བ་ལ་ལྃ་གྱིས་མཚན་པ། དེའི་སྟེང་དུ་བྃ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པ་ལ་ཨཱཿས་མཚན་པ། དེའི་སྟེང་དུ་རྃ་ལས་མེའི་དཀྱིལ་འཁོར་གྲུ་གསུམ་དམར་པོ་རྃ་གྱིས་མཚན་པ། དེའི་སྟེང་དུ་ཡྃ་ལས་རླུང་གི་དཀྱིལ་འཁོར་སྔོན་པོ་གཞུ་བདུངས་པ་ལྟ་བུ་ཆང་ཟུང་དང་མཆོག་མ་ལ་ཡྃ་དང་བ་དན་གྱིས་མཚན་པ། དེ་རྣམས་དང་རང་གི་སེམས་སྣང་རོ་གཅིག་ཏུ་འདྲེས་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཞེས་སོགས་བརྗོད། གདན་བསྐྱེད་པའི་རྗེས་སུ་ནཱི་ལ་ཡ་སོགས་དང་། ཡེ་ཤེས་ཀྱི་འཁོར་ལོ་དགུག་གཞུག་གིས་རྗེས་སུ་ཨ་ནུ་རཱ་ག་སོགས་ཀྱི་སྔགས་དང་། དབང་བསྐུར་བའི་རྗེས་སུ་ཨ་བྷི་ཥེ་ཀ་སོགས་ཀྱི་སྔགས་མི་བརྗོད། ཡན་ལག་ལྷག་མ་གསུམ་ནི་མི་དགོས། གཞན་ཐམས་ཅད་ནི་སྔ་མ་བཞིན་དུ་ཉམས་སུ་བླང་བར་བྱའོ། །དེ་དག་གིས་ནི་སྒྲུབ་པའི་ཐབས་བཤད་ཟིན་ནས། འདིའི་དཀྱིལ་འཁོར་དུ་དབང་བསྐུར་བའི་ཆོ་ག་ལ་རས་བྲིས་ལ་བརྟེན་པ་དང་། རྡུལ་ཚོན་ལ་བརྟེན་པ་གཉིས་ལས། དང་པོ་ལ་སྟ་གོན་དང་། དངོས་གཞི་གཉིས། དང་པོ་ལ་སའི་ལྷ་མོ་སྟ་གོན། ལྷ་སྟ་གོན། བུམ་པ་སྟ་གོན། སློབ་མ་སྟ་གོན་དང་བཞི། དང་པོ་ནི། གནས་དབེན་པར་རས་ལ་སོགས་པ་གཞི་བཟང་པོའི་སྟེང་དུ་འཁར་བ་ལ་སོགས་པའི་མཎྜལ་བཞག་པའི་དབུས་སུ་གནས་སྲུང་གི་མེ་ཏོག་དགོད། དེའི་མཐར་སྤྱི་མཆོད་དང་། གཏོར་མ་ནི་ཡབ་དང་འདྲ་ལ། སྤྱི་མཆོད་ཀྱི་ནང་དུ་སྒོས་མཆོད་སྤོས། མར་མེ། ལྷ་བཤོས་གསུམ་ཚན་པ་ཤར་དུ་བཞི། ནུབ་ཏུ་གསུམ། ལྷོ་བྱང་དུ་གཉིས་གཉིས། མཚམས་བཞིར་རེ་རེ་བཤམ། བྱང་ཤར་དུ་ས་ལྷའི་གཏོར་མ་དང་། དེའི་གཡོན་དུ་སྒོས་མཆོད་ཚན་པ་གཅིག་བཤམ། བུམ་པ་གཉིས་ཀྱི་རྣམ་རྒྱལ་ལ་གྲི་གུག་གདགས། གཞན་རྣམས་ནི་ཡབ་ཀྱི་གནས་སྐབས་ཇི་ལྟ་བ་བཞིན་དུ་བཤམ་མོ། །དེ་ནས་སྔོན་འགྲོ་གཏོར་མ་ནས་བརྩམས་ཏེ་བདག་མེད་མའི་མངོན་པར་རྟོགས་པ་ཡན་ལག་དྲུག་པ་བསྒོམས་ཏེ་ཧེ་རུ་ཀར་བསྒྱུར་བའི་བར་བྱས་ལ། སའི་ལྷ་མོ་སྟ་གོན་ནི། ཀྱཻ་རྡོ་རྗེའི་དཀྱིལ་འཁོར་བཞེངས་ཞེས་པ་བདག་མེད་མའི་དཀྱིལ་འཁོར་བཞེངས་པར་བསྒྱུར་བ་ཙམ་མ་གཏོགས་ཡབ་དང་འདྲའོ། །གཉིས་པ་ལྷ་སྟ་གོན་ནི། གདན་གྱི་ཁྱད་པར་མ་གཏོགས་པ་གཞལ་ཡས་ཁང་བསྐྱེད་པ་ཡབ་ཀྱི་གནས་སྐབས་དང་འདྲ་བར་བྱས་ནས། ལྷའི་གནས་བཅོ་ལྔར་དྲི་བཟང་གི་ཐིག་ལེ་རེ་དང་མེ་ཏོག་གི་ཚོམ་བུ་རེ་བཀོད་དེ། དབུས་སུ་ཨྃ་བཛྲ་ནཻ་རཱཏྨ་ཡེ་ན་མཿ རྡོ་རྗེ་བདག་མེད་མ། ཤར་དུ་ཨཱྃ་བཛྲ་ཡེ་ན་མཿ རྡོ་རྗེ་མ། ལྷོར་ཨྀཾ་བཛྲ་གཽ་རཱི་ཡེ་ན་མཿ གསང་བའི་དཀར་མོ། ནུབ་ཏུ་ཨཱིཾ་བཛྲ་ཝ་རཱི་ཡེ་ན་མཿ ཆུའི་རྣལ་འབྱོར་མ། བྱང་དུ་ཨུྃ་བཛྲ་ཌཱ་ཀི་ཡེ་ན་མཿ རྡོ་རྗེ་མཁའ་འགྲོ་མ། ཕྱིའི་བྱང་ཤར་དུ་ཨཱུྃ་བཛྲ་པུཀྐ་སཱི་ཡེ་ན་མཿ པུཀྐ་སཱི། ཤར་ལྷོར་རྀཾ་བཛྲ་ཤ་ཝ་རཱེ་ཡེ་ན་མཿ རི་ཁྲོད་མ། ལྷོ་ནུབ་ཏུ་རཱྀཾ་བཛྲ་ཙཎྜ་ལཱི་ཡེ་ན་མཿ གདོལ་པ་མོ། ནུབ་བྱང་དུ་ལྀཾ་བཛྲ་ཌོམྦི་ནཱི་ཡེ་ན་མཿ གཡུང་མོ། ཤར་དུ་ལཱྀཾ་བཛྲ་གཽ་རཱི་ཡེ་ན་མཿ གཽ་རཱི། ལྷོར་ཨྃ་བཛྲ་ཙཽ་རཱི་ཡེ་ན་མཿ ཙཽ་རཱི། ནུབ་ཏུ་ཨཻཾ་བཛྲ་བེ་ཏཱ་ལཱི་ཡེ་ན་མཿ བེ་ཏཱ་ལཱི། བྱང་དུ་ཨོཾ་བཛྲ་གྷསྨ་རཱི་ཡེ་ན་མཿ གྷསྨ་རཱི། འོག་ཏུ་ཨཽཾ་བཛྲ་བྷཱུ་ཙ་རཱི་ཡེ་ན་མཿ ས་སྤྱོད་མ། སྟེང་དུ་ཨྃ་བཛྲ་ཁེ་ཙ་རཱི་ཡེ་ན་མཿ མཁའ་སྤྱོད་མ་སྟེ། ལྷ་མོ་ཐམས་ཅད་ཀྱང་སྐུ་མདོག་ནག་མོ་ཞེས་པ་ནས་ཐུགས་རྗེ་ཆེན་པོས་སེམས་ཅན་གྱི་དོན་མཛད་ཅིང་བཞུགས་པ་ཞེས་པའི་བར་གསལ་གདབ། དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་ཀྱི་འཁོར་ལོ་དགུག་གཞུག་སྒྲུབ་ཐབས་ལྟར་བྱས་ནས། དབང་ལྷ་སྤྱན་དྲངས་པ་ནས་ཞེས་གསུང་ཞིང་བུམ་པའི་ཆུས་དབང་བསྐུར་ཞེས་པའི་བར་སྒྲུབ་ཐབས་དང་འདྲ་ལ། སྐུ་གང་། དྲི་མ་དག ཆུ་ལྷག་མ་ཡར་ལུད་པ་ལས་གཙོ་མོ་ལ་མི་བསྐྱོད་པ་ཞེས་སོགས་ཀྱིས་རྒྱས་གདབ། དེ་ནས་མཆོད་ཡུལ་སྤྱན་དྲང་བ་ནས། མཆོད་པ། བསྟོད་པ། སྙན་གསན་དབབ་པ་འདྲ་ལ། མཆོད་སྔགས་ཀྱི་སྐབས་སུ་ཨོཾ་བྷ་ག་ཝ་ཏེ་ནྃ་ནཻ་རཱཏྨ་ས་པ་རི་ཝཱ་ར་ཞེས་སོགས་དང་། ནང་མཆོད་ཀྱི་སྐབས་སུ་ལྷ་མོ་བཅོ་ལྔའི་སྔགས་ཀྱིས་འབུལ་བ་དང་། སྙན་གསན་དབབ་པའི་སྐབས་སུ། བཅོམ་ལྡན་རྡོ་རྗེ་བདག་མེད་མ། །རིག་སྔགས་རྒྱལ་ལ་ཕྱག་འཚལ་བསྟོད། །ཅེས་དང་། བདག་མེད་མ་དཔལ་དཀྱིལ་འཁོར་ནི། །ཞེས་འདོན་པ་བསྒྱུར་བ་དང་། བསྟོད་པའི་སྐབས་སུ་འགྲོ་བ་བུད་མེད་སོགས་ཀྱིས་བསྟོད་པ་ནི་ཁྱད་པར་རོ། །གསུམ་པ་བུམ་པ་སྟ་གོན་ནི། བུམ་པ་བསྐྱེད་ཟིན་ནས། ལྷ་བསྐྱེད་པ་ནི། རྣམ་རྒྱལ་བུམ་པའི་དབུས་སུ་སྣ་ཚོགས་པདྨ་འདབ་མ་བརྒྱད་པ། རྡོ་རྗེའི་རྭ་བ་དང་འོད་ཟེར་ཕྲེང་བས་བསྐོར་བའི་ཞེས་པ་ནས་རོའི་གདན་རེ་རེ་ཞེས་པའི་བར་སྒྲུབ་ཐབས་ལྟར་དང་། ལས་ཐམས་ཅད་པའི་བུམ་པར་པདྨ་དང་ཉི་མའི་གདན། གདན་དེ་རྣམས་ཀྱི་སྟེང་དུ་སངས་རྒྱས་ཀྱི་མཚན་བཟང་པོ་སོ་གཉིས་ཀྱི་ངོ་བོ་ཨ་ཨ་ཞེས་སོགས་མངོན་བྱང་ཚན་པ་བཅུ་དྲུག་ལས་ལྷ་རྣམས་བསྐྱེད་ནས་ཞལ་ཕྱག་གསལ་འདེབས་པའམ། ཡང་ན་བདུད་རྩི་འཁྱིལ་བ་རྡོ་རྗེ་ཆོ་ག་གསུམ་བསྐྱེད་གང་རུང་བྱའོ། །དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པ་རྣམས་བྱས་ནས། ཕྱི་ནང་གི་མཆོད་པས་མཆོད། འགྲོ་བ་བུད་མེད་སོགས་ཀྱིས་བསྟོད་ནས། གཟུངས་ཐག་བླངས་ཏེ། རྣམ་རྒྱལ་ལ་ཡུམ་གྱི་ཕྲེང་སྔགས་བརྒྱ་རྩ་བརྒྱད། ལས་བུམ་ལ་ཨ་མྲྀ་ཏ་ཉི་ཤུ་རྩ་གཅིག་བཟླས་ནས། སླར་ཡང་སྔ་མ་བཞིན་མཆོད་བསྟོད་བྱས་ཏེ། དུང་ཆོས་ཀྱི་ཆུ་བུམ་པ་གཉིས་སུ་བླུགས་པས་ལྷ་རྣམས་འོད་དུ་ཞུ་བར་བསམ་མོ། །དེ་ནས་གཏོར་མ་རྣམས་བསྔོས་ཏེ་ཚོགས་ཡོད་ན་ལོངས་སྤྱད་དོ། །འཇིག་རྟེན་པའི་གཏོར་མ་གཏང་། འདས་པའི་གཏོར་མ་བར་ཆད་བསྲུང་བའི་ཆེད་དུ་གཞག་གོ །བཞི་པ་སློབ་མ་སྟ་གོན་ནི། ནང་དབང་གི་སྐབས་སུ་བདག་མེད་མར་བསྐྱེད་ལ་དབྱུང་བ་དང་། རྩ་སྔགས་ཟློས་པའི་དོན་དུ་ཡུམ་གྱི་ཕྲེང་སྔགས་ཟློས་པ་མ་གཏོགས་གཞན་ཐམས་ཅད་ཡབ་ཀྱི་གནས་སྐབས་དང་འདྲའོ། །དེ་ནས་རྗེས་ཆོག་བྱ་སྟེ། མཆོད་པའི་མཚན་སྔགས་དང་། བསྟོད་པའི་ཁྱད་པར་མ་གཏོགས་པ་ཡབ་དང་འདྲའོ། །དེ་ནས་སྟ་གོན་གྱི་དཀྱིལ་འཁོར་ནམ་མཁར་བཏེག་སྟེ་ཚོམ་བུ་དང་མཆོད་པ་དམན་མ་རྣམས་བསྡུས་ཏེ་ཅི་བདེར་གནས་པར་བྱའོ། །གཉིས་པ་དངོས་གཞི་ནི། སང་ནངས་མོར་སྔར་གྱི་མཎྜལ་གྱི་ཤུལ་དུ་འདིའི་བྲིས་སྐུ་རབ་གནས་ཅན་ཞལ་ཤར་དུ་ཕྱོགས་པར་དགྲམ། དེའི་མཐར་མཆོད་གཏོར་ལ་སོགས་པ་ཐམས་ཅད་སྟ་གོན་གྱི་སྐབས་ཇི་ལྟ་བ་བཞིན་དུ་བཤམས་ཏེ་སྔོན་འགྲོ་རྣམ་གསུམ་སྔོན་དུ་སོང་ནས། བདག་མེད་མའི་མངོན་རྟོགས་ཡན་ལག་དྲུག་པ་བསྒོམ། བཟླས་པ་བྱས་ནས་དཀྱིལ་འཁོར་བསྡུས་ཏེ་ཧེ་རུ་ཀར་བསྒྱུར་བའི་བར་སྒྲུབ་ཐབས་ལྟར་བྱའོ། །དེ་ནས་མདུན་བསྐྱེད་བསྒྲུབ་པ་ནི། དགེ་བའི་བཤེས་གཉེན་ཁ་ཅིག བདག་བསྐྱེད་ཀྱི་དཀྱིལ་འཁོར་མ་བསྡུས་པའི་ངང་ནས་ཐོག་མར་མདུན་གྱི་རྟེན་གཞལ་ཡས་ཁང་བསྐྱེད་པའི་ནང་དུ་ལྷ་མོ་བཅོ་ལྔ་མངོན་བྱང་ལས་བསྐྱེད་པ་ལ་བདག་བསྐྱེད་ཀྱི་རྟེན་དང་བརྟེན་པར་བཅས་པ་བསྲེས་ཏེ། རང་གཙོ་མོའི་ཐུགས་ཀ་ནས་གཙོ་མོ་གཉིས་པ་ཞིག་བྱེ་ནས་ཤར་སྒོར་གནས་པ་སྐད་ཅིག་གིས་ཧེ་རུ་ཀ་ཡབ་ཡུམ་དུ་གྱུར་པའི་མཁའ་ནང་དུ་དཀྱིལ་འཁོར་བསྐྱེད་ནས་མངལ་འབྱིན་བྱས་ཏེ་མདུན་བསྐྱེད་ལ་བསྲེ་བར་འདོད་པ་ནི་གོང་མའི་དགོངས་པ་མ་ཡིན་ཏེ། རྗེ་བཙུན་རྩེ་མོས། དཀྱིལ་འཁོར་སྒྲུབ་པའི་དུས་སུ་ཡུམ་གྱི་ང་རྒྱལ་བསྡུས་ནས་ཧེ་རུ་ཀ་ཕྱག་གཉིས་པའི་ང་རྒྱལ་གྱིས་འཇུག་སྟེ། བརྟག་པ་གཉིས་པའི་ཡུམ་གྱི་སྐབས་ཀྱི་ལེའུ་བཅུ་པ་ལས། རྡོ་རྗེ་སེམས་དཔར་སྙེམས་བྱས་ནས། །རྐང་པ་གཡས་པ་བརྐྱང་བྱས་ཏེ། །ཕྱག་གཉིས་ཀྱཻ་རྡོར་སྦྱོར་བ་ཡིས། །སློབ་དཔོན་དཀྱིལ་འཁོར་འཇུག་པ་ཉིད། །ཅེས་གསུངས་པས་སོ། །བླ་མའི་མན་ངག་ཀྱང་དེའི་རྗེས་སུ་འབྲངས་ནས་ཡུམ་གྱི་དཀྱིལ་འཁོར་ཡིན་ཀྱང་བྱ་བ་དེ་ཡབ་ཀྱི་ང་རྒྱལ་གྱིས་མཛད། སྒྲུབ་མཆོད་ཀྱི་འབྱིན་པའི་དཀྱིལ་འཁོར་ཡང་ཧེ་རུ་ཀ་ཕྱག་གཉིས་པའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཐུགས་ཀར་བཀུག་ནས། ཐུགས་ཀ་ནས་དཀྱིལ་འཁོར་གྱི་འཁོར་ལོ་རྫོགས་པར་སྤྲུལ་ཏེ། རྐང་ཐོན་ནམ་བྱུང་རྫོགས་སུ་སྤྲོ། བཤད་པའི་རྒྱུད་ལས་ཀྱང་འདི་ལྟར་བཤད། བླ་མའི་མན་ངག་གི་ཕྱག་ལེན་ཡང་འདི་ལྟར་དུ་མཛད་ལགས་ཞེས་གསུངས་པས་སོ། །དེས་ན་འདིའི་མདུན་བསྐྱེད་བསྒྲུབ་ཚུལ་ནི་བདག་བསྐྱེད་བསྡུས་ནས་ཧེ་རུ་ཀའི་ང་རྒྱལ་གྱིས་མཆོད་པ་བསང་སྦྱང་བྱིན་གྱིས་བརླབ། རས་རིས་ཀྱི་དཀྱིལ་འཁོར་བསང་སྦྱང་ནས་གདན་བསྐྱེད་པའི་བར་ལྷ་སྟ་གོན་ལྟར་བྱས་ལ། རང་ཉིད་ཧེ་རུ་ཀ་ཕྱག་གཉིས་པའི་སྙིང་གའི་ས་བོན་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཀུག་སྟེ་སྙིང་གར་ཐིམ་པ་ལས་ལྷ་མོ་བཅོ་ལྔའི་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་གྱུར། ཨོཾ་ཨཱཿཧཱུྃ། རང་གི་སྙིང་ག་ནས་བདག་མེད་མ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ཞེ་སྡང་དང་རྣམ་པར་ཤེས་པའི་ཕུང་པོ་སྦྱངས། ཆོས་དབྱིངས་ཡེ་ཤེས་ཀྱི་གོ་འཕང་ལ་བཀོད། ཚུར་འདུས་དབུས་ཀྱི་མཚན་མ་དང་རོ་གཅིག་ཏུ་འདྲེས་པ་ལས་བདག་མེད་མར་གྱུར། རྡོ་རྗེ་མ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་གཏི་མུག་དང་གཟུགས་ཀྱི་ཕུང་པོ་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། ཚུར་འདུས་ནང་གི་ཤར་གྱི་མཚན་མ་དང་རོ་གཅིག་ཏུ་འདྲེས་པ་ལས་རྡོ་རྗེ་མར་གྱུར། དེ་བཞིན་དུ་ལྷ་མོ་གཞན་གསུམ་ལ་འགྲེའོ། །པུཀྐ་སཱི་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་སའི་ཁམས་སྦྱངས། བྱམས་པ་ཚད་མེད་པ་ལ་བཀོད། ཚུར་འདུས་ཕྱིའི་བྱང་ཤར་གྱི་མཚན་མ་དང་རོ་གཅིག་ཏུ་འདྲེས་པ་ལས་པུཀྐ་སཱིར་གྱུར། དེ་བཞིན་དུ་མཚམས་མ་གཞན་གསུམ་ལའང་འགྲེའོ། །གཽ་རཱི་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ཡུལ་གཟུགས་ཀྱི་སྐྱེ་མཆེད་སྦྱངས། སངས་རྒྱས་ཐམས་ཅད་གཟུགས་ཀྱི་བདེ་བས་མཆོད། ཚུར་འདུས་ཤར་གྱི་མཚན་མ་དང་རོ་གཅིག་ཏུ་འདྲེས་པ་ལས་གཽ་རཱིར་གྱུར། དེ་བཞིན་དུ་ལྷ་མོ་གཞན་རྣམས་ལའང་ཆོས་ཀྱི་སྐྱེ་མཆེད་ཀྱི་བར་དུ་སྦྱར་ཏེ་འགྲེའོ། །གཞལ་ཡས་ཁང་དཔག་ཏུ་མེད་པ་སྤྲོས། མ་དག་པའི་སྣོད་ཀྱི་འཇིག་རྟེན་སྦྱངས། དག་པ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་བཀོད། ཚུར་འདུས་གཞལ་ཡས་ཁང་ལ་ཐིམ། དུར་ཁྲོད་བརྒྱད་དཔག་ཏུ་མེད་པ་སྤྲོས། ལུས་དང་འཇིག་རྟེན་གྱི་ཆོས་བརྒྱད་སྦྱངས། སྒྱུ་མ་ལ་སོགས་པའི་དཔེ་བརྒྱད་རྟོགས་པ་ལ་བཀོད། ཚུར་འདུས་དུར་ཁྲོད་བརྒྱད་ལ་ཐིམ། སྲུང་འཁོར་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་མི་མཐུན་པའི་ཕྱོགས་ཐམས་ཅད་བཅོམ། སྐུ་གསུང་ཐུགས་རྡོ་རྗེའི་གོ་འཕང་ལ་བཀོད། ཚུར་འདུས་སྲུང་འཁོར་ལ་ཐིམ། དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། ཕྲེང་སྔགས་བརྗོད་ཅིང་འགེགས་བསྐྲད་དེ། སྟ་གོན་གྱི་དཀྱིལ་འཁོར་གཞུག་པ་དང་། རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཏེ་གཞུག་པ་དང་། དབང་བསྐུར་ཞིང་རིགས་ཀྱི་བདག་པོས་རྒྱས་བཏབ་ལ། ཨོཾ་བཛྲ་ནཻ་རཱཏྨ། ཨོཾ་བཛྲོ་ཧེ་རུ་ཀ་ཞེས་སོགས་སྔར་ཚོམ་བུའི་སྐབས་སུ་བཤད་པའི་སོ་སོའི་སྔགས་མགོ་བོར་སྦྱར་བའི་ཡི་གེ་བརྒྱ་པ་རེ་རེ་བརྗོད་དེ་བརྟན་པར་བྱའོ། །དེ་ནས་མཆོད་བསྟོད་དང་། ཕྱི་རོལ་པའི་གཏོར་མ་ནས་བདག་ཉིད་འཇུག་ཅིང་དབང་བླང་བའི་བར་ཕལ་ཆེར་ཡབ་ཀྱི་གནས་སྐབས་དང་འདྲ་བར་བྱས་ལ། མི་འདྲ་བའི་ཁྱད་པར་ནི་འོག་ཏུ་འཆད་དོ། །དེ་ནས་དམ་ཚིག་གསུམ་གྱི་གླུ་བླངས་ཏེ། གཏོར་མ་རྣམས་བསྔོས་ནས་སློབ་མར་དབང་བསྐུར་བ་ལ་འཇུག་གོ །ཁ་ཅིག འདིའི་གཏོར་བསྔོས་ཀྱི་སྐབས་སུ་སྐུ་རྡོ་རྗེ་མ་ལ་ལྷ་ཆེན་བརྒྱད་ཀྱིས་བསྐོར་བ་དང་། གསུང་རྡོ་རྗེ་མ་ལ་ཀླུ་ཆེན་བརྒྱད་ཀྱིས་བསྐོར་བ་བསྐྱེད་ཅིང་། ཕྱི་རོལ་པའི་གཏོར་མའི་སྐབས་སུའང་དེ་ལྟར་དུ་བསྐྱེད་པ་ནི་མི་འཐད་དེ། སྐུ་རྡོ་རྗེ་མ་ས་སྤྱོད་མ་དང་། གསུང་རྡོ་རྗེ་མ་མཁའ་སྤྱོད་མ་ཡིན་པར་རྩ་རྒྱུད་ལས་དངོས་སུ་བཤད་པས་ས་སྤྱོད་མ་སྟེང་དང་། མཁའ་སྤྱོད་མ་འོག་ཏུ་བསྒོམ་དགོས་པའི་སྐྱོན་ཡོད་པའི་ཕྱིར་རོ། །དེས་ན་མདུན་བསྐྱེད་དང་འབྲེལ་བའི་སྐབས་སུ་དབུས་ཀྱི་དཀྱིལ་འཁོར་མ་གཏོགས་པ་གཞན་ཐམས་ཅད་ཡབ་དང་འདྲ་བ་དང་། ཕྱི་རོལ་པའི་གནས་སྐབས་སུ་ནི་ཡབ་ཀྱི་གནས་སྐབས་ཇི་ལྟར་བ་བཞིན་དུ་བྱ་དགོས་ཏེ། རྗེ་བཙུན་རིན་པོ་ཆེས། གཏོར་མ་དང་མཆོད་པའི་རྣལ་འབྱོར་རྒྱས་པར་ནི་རྗེ་བཙུན་ཡབ་ཀྱི་ཕྱོགས་དང་འདྲ་ལ་ཞེས་གསུངས་ཤིང་། སྲུ་ལུང་པས་ཀྱང་འདི་བཞིན་དུ་བཤད་དོ། །སློབ་མ་འཇུག་ཅིང་དབང་བསྐུར་བ་ལ་བདེན་པའི་སྟོབས་བརྗོད་པའི་སྐབས་སུ། དེ་བཞིན་གཤེགས་པ་ཀུན་གྱི་གནས། །བདག་མེད་མ་དཔལ་གྲོང་ཁྱེར་མཆོག །ཅེས་འདོན་པ་བསྒྱུར་བ་དང་། དཀྱིལ་འཁོར་སྟོན་པའི་ཚེ་ལྷ་མོ་བཅོ་ལྔའི་དཀྱིལ་འཁོར་སྟོན་པ་དང་། རིག་པའི་དབང་ལྔ། བརྟུལ་ཞུགས་ཀྱི་དབང་། རྡོ་རྗེ་སློབ་དཔོན་གྱི་དབང་དང་བདུན་ལ་མི་བསྐྱོད་པ་དགྱེས་པ་རྡོ་རྗེ་ལ་སོགས་པ་ཞལ་གཅིག་ཕྱག་གཉིས་པ་ཡབ་ཡུམ་དུ་བསྐྱེད་པ་དང་། ལྷའི་རྣམ་དག་སྟོན་པའི་ཚེ། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་སྟོན་པ་མ་གཏོགས་པ་གཞན་རྣམས་ནི་ཡབ་ཀྱི་གནས་སྐབས་དང་འདྲ་ལ། དབང་གོང་མ་གསུམ་ནི་ཁྱད་པར་མེད་དོ། །མཇུག་གི་ཆོ་གའང་མཆོད་པའི་མཚན་སྔགས་དང་། བསྟོད་པ་ཙམ་མ་གཏོགས་པ་གཞན་འདྲའོ། །གཉིས་པ་རྡུལ་ཚོན་ལ་བརྟེན་པ་ནི། ས་སློང་བའི་སྐབས་སུ་བདག་མེད་མ་དཔའ་མོ་གཅིག་པ་ཆོ་ག་གསུམ་ལས་བསྐྱེད་ནས་ཧེ་རུ་ཀར་བསྒྱུར་བ་དང་། ས་གཟུང་བའི་སྐབས་སུ་སློབ་དཔོན་ལྔ་ཀས་བདག་མེད་མའི་དཀྱིལ་འཁོར་བསྒོམ། དཀྱིལ་འཁོར་བཏེག་སྟེ་གཙོ་མོའི་ཐུགས་ཀ་ནས་རང་ཧེ་རུ་ཀར་བྱེ་སྟེ། སྟངས་སྟབས་ཀྱི་བཀོད་པ་བྱེད་པ་དང་། ཐིག་ཚོན་བྱིན་རླབས་ཀྱི་སྐབས་སུ་རིགས་ལྔ་ཞལ་གཅིག་ཕྱག་གཉིས་པར་བསྐྱེད་པ་དང་། དཀྱིལ་འཁོར་བྲི་བའི་སྐབས་སུ་འདིའི་ཐུན་མོང་མ་ཡིན་པའི་དཀྱིལ་འཁོར་འབྲི་བ་མ་གཏོགས་པ་གཞན་རྣམས་དབང་ཆུ་བཞིན་དུ་བྱས་པས་འདོད་པའི་དོན་འགྲུབ་བོ། །གྲངས་མེད་མཁའ་འགྲོའི་བྱིན་རླབས་འདུ་བའི་གཞི། །བདག་མེད་རྣལ་འབྱོར་ལྡན་པའི་སྒྲུབ་ཐབས་དང་། །འཁྲུལ་མེད་དཀྱིལ་འཁོར་ཆོ་ག་བཤད་པ་ཡི། །དཔག་མེད་དགེ་བ་བྱང་ཆུབ་ཆེན་པོར་བསྔོ། །ཞེས་པ་འདི་ནི་རྗེ་བཙུན་གྲགས་པ་རྒྱལ་མཚན་གྱིས་མཛད་པའི་བདག་མེད་མའི་སྒྲུབ་ཐབས་དང་། རྗེ་བཙུན་རྩེ་མོས་ནེ་ཚོ་སྦལ་སྟོན་ལ་སྤྲིངས་པའི་དབང་གི་ཐོ་ཡིག་དང་། དེ་ཉིད་སྲུ་ལུང་པས་ཅུང་ཟད་གསལ་བར་བྱས་པ་དང་། རྗེ་བཙུན་བླ་མའི་གསུང་རྣམས་ལ་བརྟེན་ནས་མང་དུ་ཐོས་པའི་དགེ་སློང་བསོད་ནམས་སེང་གེས་གླིང་ཁ་བདེ་བ་ཅན་དུ་སྦྱར་བའི་ཡི་གེ་པ་ནི་སངས་རྒྱས་བློ་གྲོས་སོ།། །།འདིའི་བརྒྱུད་པ་ནི། ས་ཆེན་ཡན་ཆད་ཡབ་དང་འདྲ། དེ་ནས་ནེ་ཚོ་སྦལ་སྟོན། བླ་མ་ཤེས་རབ་གྲགས། སྣམ་པ་རྭ་ཆོས་ཤེར། མངོན་པ་བ་དབང་ཕྱུག་བརྩོན་འགྲུས། པཎྜི་ཏ་རྡོར་ཤེར། བྲག་ཕུག་པ། བསོད་རྒྱལ་བ། དཔལ་ཚུལ་བ། ཤར་པ། ངོར་པ། མུས་པ། དེས་བདག་ལའོ། །དགེའོ། །དགེའོ། དགེའོ།། །།

གུར་རིགས་བསྡུས་པའི་སྒྲུབ་ཐབས་དངོས་གྲུབ་རྒྱ་མཚོ།

གུར་རིགས་བསྡུས་པའི་སྒྲུབ་ཐབས་དངོས་གྲུབ་རྒྱ་མཚོ་བཞུགས་སོ།།

ཨོཾ་སྭསྟི། བཤད་པའི་རྒྱུད་རྡོ་རྗེ་གུར་ནས་གསུངས་པའི་མཁའ་འགྲོ་ལྔ་རིགས་བསྡུས་པའི་སྒྲུབ་པའི་ཐབས་དངོས་གྲུབ་རྒྱ་མཚོ་ཞེས་བྱ་བ། བླ་མ་དང་རྡོ་རྗེ་མཁའ་འགྲོ་ལ་ཕྱག་འཚལ་ལོ། །བདེ་ཆེན་འཁོར་ལོར་རིགས་རྣམས་ཀུན་གྱི་བདག །སྙིང་དབུས་པདྨར་ནང་གི་དཀྱིལ་འཁོར་གཙོ། །སྲིད་ཞི་ཀུན་ཁྱབ་ཟུང་འཇུག་ཆོས་ཀྱི་སྐུ། །རྗེ་བཙུན་བླ་མས་མཆོག་ཐོབ་བར་དུ་སྐྱོངས། །གང་གི་ཡེ་ཤེས་སྒྱུ་མའི་རྣམ་རོལ་ཉིད། །ཁྲོ་ཆགས་རིགས་ལྔའི་རྣམ་འཕྲུལ་དུ་བསྟན་ནས། །དུག་ལྔས་གཟིར་བའི་འགྲོ་བ་འདུལ་མཛད་པ། །འཁོར་ལོའི་དབང་ཕྱུག་མཁའ་འགྲོ་ལྔ་ལ་འདུད། །དེ་ཡི་སྒྲུབ་ཐབས་འབུམ་ལྔའི་དོན་བསྡུས་པའི། །བཤད་པའི་རྒྱུད་ཀྱི་རྒྱལ་པོ་ལས་གསུངས་པ། །ཟླ་བའི་འོད་ཀྱིས་གསལ་བར་བྱས་པ་གང་། །དང་པོའི་ལས་ཅན་དོན་དུ་བྲི་བར་བྱ།། ༈ །།འདིར་སྐལ་བ་དང་ལྡན་པའི་གང་ཟག་མཁའ་འགྲོ་ལྔ་རིགས་བསྡུས་པའི་དཀྱིལ་འཁོར་དུ་དབང་བསྐུར་བ་ཐོབ་ཅིང་དམ་ཚིག་དང་སྡོམ་པར་ལྡན་པ་ལུང་དང་མན་ངག་ཐོབ་པས་བསྒོམ་པར་བྱ་བ་ནི། མདང་ནུབ་མོ་ཉལ་བའི་རྣལ་འབྱོར་དང་། ཐོ་རངས་ལྡང་བའི་རྣལ་འབྱོར་དང་། ཁྲུས་དང་མཆོད་གཏོར་གྱི་རྣལ་འབྱོར་སྔོན་དུ་སོང་ནས་བསྐྱེད་རྫོགས་གཉིས་གཙོ་བོར་གྱུར་པའི་ལམ་གྱི་ཡན་ལག་དང་བཅས་པ་ཡིན་ལ། འདི་ལ་གསུམ་སྟེ། ལྷའི་རྣལ་འབྱོར་གྱི་སྔོན་འགྲོ། དངོས་གཞི་ལྷའི་རྣལ་འབྱོར། རྗེས་རྫོགས་པར་བྱེད་པ་ལམ་གྱི་ཡན་ལག་གོ །དང་པོ་ལ་གསུམ་སྟེ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ནི། སྟན་བདེ་བ་ལ་རྡོ་རྗེའི་སྐྱིལ་ཀྲུང་གིས་འདུག་ལ། སྐྱབས་འགྲོ་སེམས་བསྐྱེད། རྡོ་རྗེ་སེམས་དཔའི་བསྒོམ་བཟླས་སྔོན་དུ་སོང་ནས་ཚོགས་ཞིང་སྤྱན་དྲང་བ་ནི། རང་སྐད་ཅིག་གིས་རྡོ་རྗེ་མཁའ་འགྲོར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ། ཧཱུྃ། ཨོཾ། ཏྲཱྃ། ཨཱྃ། ཁཾ་གི་ཡི་གེ་རྣམས་དྲི་མ་མེད་པའི་འོད་ཟེར་ལྔ་འཕྲོ་བ། དེ་ལས་འོད་ཟེར་སྣ་བུག་གཡས་པ་ནས་རླུང་ཕྱིར་རྒྱུ་བའི་དུས་སུ་ནམ་མཁར་འཕྲོས་པས་རང་བཞིན་གྱི་གནས་ནས་མཁའ་འགྲོ་ལྔའི་དཀྱིལ་འཁོར་ལ་བླ་མ་མི་བསྐྱོད་པའི་རྣམ་པས་རྡོ་རྗེ་ཅན་གྱི་དཀྱིལ་འཁོར་གྱི་གཙོ་བོའི་དབུ་བརྒྱན་པ་ལ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་སྤྱན་དྲངས་པར་མོས་ཏེ། ལག་པ་གཉིས་རྡོ་རྗེ་བསྡུ་བའི་ཕྱག་རྒྱ་བཅས་ལ་ཨོཾ་བཛྲ་ས་མཱ་ཛཿ ཞེས་བརྗོད། དེ་ནས་ཕྱག་འཚལ་བ་ནི་རྡོ་རྗེ་ཐལ་མོ་སྙིང་གར་བཞག་སྟེ། ན་མོ་གུ་རུ་བྷྱཿཞེས་པས་བླ་མ་དང་། ན་མ་པཉྩ་ཌཱ་ཀི་ནཱི་མཎྜ་ལ་ས་པ་རི་ཝ་ར་བྷྱཿ ཞེས་པས་དཀྱིལ་འཁོར་ལ་ཕྱག་བྱས་ནས་མཆོད་པ་འབུལ་བ་ནི། རང་གི་སྙིང་གའི་ཧཱུྃ་ལས་ལྷ་མོ་བརྒྱད་རང་རང་གི་མཆོད་རྫས་འཛིན་པ་སྤྲོས་ཏེ། ནང་དང་། ཕྱི་དང་། གསང་བའི་མཆོད་པས་མཆོད་པར་བསམ་ཞིང་། ངག་ཏུ། གུར་རྒྱན་དུ་མཆོད་པ་ནི། རྩ་བའི་རྒྱུད་ལས་གསུངས་པའམ་རྒྱུད་འདིར་འབྱུང་བའི་རིགས་དང་རྗེས་སུ་མཐུན་པའི་མཆོད་པ་གང་རུང་བྱ་ཞེས་གསུངས་པའི་དང་པའོ།།་་་་་དཀར་མོ་རི་དྭགས་མཚན་མ་འཛིན། །ཆོམ་རྐུན་བདུད་ལས་རྒྱལ་བའི་སྣོད། །རོ་ལངས་མ་ནི་ཆུ་ལག་མ། །གྷསྨ་རཱི་ནི་སྨན་འཛིན་ཅིང་། །པུཀྐ་སཱི་ནི་རྡོ་རྗེའི་ལག །དེ་བཞིན་རི་ཁྲོད་མ་རོ་འཛིན། །གདོལ་པ་མོ་ནི་ཅང་ཏེའུ་བརྡུང་། །འདི་རྣམས་ཀྱིས་ནི་གཙོ་བོར་མཆོད། །འདོད་ཆགས་ཆེན་པོའི་རྗེས་ཆགས་པས། །གཡུང་མོས་སྐུ་ལ་འཁྱུད་པ་ཉིད། །ཅེས་བརྗོད། དེ་ནས་རྒྱུན་བཤགས་བྱ་བ་ནི། དོན་དྲན་བཞིན་པས། ངག་ཏུ། བདག་་་་་་རིན་ཆེན་འབར་བ་ནས་གསུངས་པའི་རྒྱུན་བཤགས་དགོས་གསུངས་པ་ལྟར་བྲིས་པའོ།། གི་ཐོག་མ་མེད་དུས་ནས། །ལོག་རྟོག་དབང་གིས་སྡིག་བགྱིས་གང་། །ཐུགས་རྗེའི་མངའ་བདག་ཁྱེད་རྣམས་ཀྱི། །སྤྱན་སྔར་བཤགས་བགྱི་སླན་ཆད་བསྡམ། །རྒྱལ་་་་་་བཟང་པོ་ཡོངས་བཟུང་ལས་ཚིགས་བཅད་དང་པོའི་རྗེས་སུ། རྒྱལ་དང་དེ་ཡི་སྲས་རྣམས་དང་། །རང་སངས་རྒྱས་དང་དགྲ་བཅོམ་དང་། །འགྲོ་བའི་བསོད་ནམས་མ་ལུས་པ། །དེ་དག་ཀུན་ལ་ཡི་རང་ངོ་། །ཀུན་འདོད་དབུགས་འབྱིན་གསོལ་མཛད་པའི། །སངས་རྒྱས་ཀུན་ལ་བདག་བསྐུལ་བས། །བསྟན་པ་ནམ་མཁའི་མཐའ་མཉམ་པས། །འཇིག་རྟེན་ཀུན་སྡིག་མེད་སྣང་མཛོད། །འགྲོ་ཀུན་སངས་རྒྱས་གྱུར་གྱི་བར། །དེ་སྲིད་མགོན་པོ་བཞུགས་ནས་ནི། །ནམ་ཡང་མྱ་ངན་མི་འདའ་བར། །ཐལ་མོ་སྦྱར་ནས་གསོལ་བ་འདེབས། །ལུས་ངག་ཡིད་ཀྱིས་བསོད་ནམས་ནི། །བགྱིས་སམ་བགྱིད་དུ་སྩལ་བ་དང་། །རྗེས་སུ་ཡི་རང་གང་ཅི་ཡང་རུང་། །དེས་ནི་འཇིག་རྟེན་ཀུན་མཁྱེན་ཤོག །གང་དང་གང་གིས་འདུལ་གྱུར་པ། །ཞེས་སོགས་གསུངས་སོ། དང་དེ་ཡི་སྲས་རྣམས་དང་། །འགྲོ་བའི་བསོད་ནམས་མ་ལུས་པ། །དེ་ལ་ཡང་དག་ཡི་རང་ཞིང་། །བྱང་ཆུབ་དམ་པར་བསྔོ་བར་བགྱི། །གང་དང་གང་གིས་འདུལ་འགྱུར་བ། །དེ་དང་དེ་ཡི་སྐུར་སྟོན་པ། །སྣ་ཚོགས་གཟུགས་ནོར་ཇི་ལྟ་བུའི། །རྫོགས་སངས་རྒྱས་ལ་སྐྱབས་སུ་མཆི། །ཀུན་རྟོག་མ་ལུས་དག་གྱུར་པ། །རང་རིག་ཡང་དག་ཡེ་ཤེས་བསྐྱེད། །ལྷན་ཅིག་སྐྱེད་དགའི་ངོ་བོ་ཉིད། །དམ་པའི་ཆོས་ལའང་སྐྱབས་སུ་མཆི། །གོ་རིམ་ཇི་བཞིན་དབང་བསྐུར་ཐོབ། །མ་ལོག་ལམ་ལ་ངེས་གནས་དང་། །སྲས་མཆོག་འཁོར་འདུས་ཚོགས་མཆོག་ལ། །རྟག་ཏུ་བདག་ནི་སྐྱབས་སུ་མཆི། །ཡང་དག་ཡེ་ཤེས་མེ་བོ་ཆེས། །གཏི་མུག་མུན་པ་བསལ་བ་དང་། །སྒྲིབ་པ་མ་ལུས་སྦྱང་བའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །རྒྱལ་སྲས་དཔའ་བོ་རྣམས་ཀྱི་ལམ། །སྤྱོད་པ་དཔག་ཡས་གང་ཡིན་དང་། །མ་བཅོས་ཇི་བཞིན་གནས་ལམ་ལ། །ད་ནི་ཡང་དག་གནས་པར་བགྱི། །ཞེས་ལན་གསུམ་བརྗོད། མཆོད་གཏོར་གྱི་རྣལ་འབྱོར་སྔོན་དུ་མ་སོང་ན། སྐབས་འདིར་རིགས་ལྔའི་སྡོམ་པ་གཟུང་བའང་ལན་གསུམ་བྱའོ། །དེ་ནས་ཚད་མེད་པ་བཞི་བསྒོམ་པ་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དང་དུས་རྟག་ཏུ་མི་འབྲལ་བར་གྱུར་ཅིག ཉེ་རིང་ཆགས་སྡང་ཐམས་ཅད་དང་བྲལ་བའི་བཏང་སྙོམས་ལ་གནས་པར་གྱུར་ཅིག ཅེས་བརྗོད་དོ། །གཉིས་པ་ནི། ཕྱི་ནང་གི་ཆོས་ཐམས་ཅད་སེམས་ཙམ་དང་། སེམས་དེ་ཡང་སྣང་ལ་རང་བཞིན་མེད་པ་སྒྱུ་མ་དང་། སྒྱུ་མ་དེ་ཡང་མི་དམིགས་པར་བསམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དོ། །གསུམ་པ་ནི། སྟོང་པའི་ངང་ལས་སྐད་ཅིག་གིས་ནམ་མཁའི་དབྱིངས་སུ་སེམས་ཀྱི་སྣང་བ་ལས་བྱུང་བའི་པྃ་ལས་པདྨ་རྃ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་མཐིང་ནག་ལས་བྱུང་བའི་སྣ་ཚོགས་རྡོ་རྗེ་རྩེ་མོ་ཉི་ཤུ་པ་རྭ་རྣམས་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ནག་ལ་ཧཱུྃ་གིས་མཚན་པ། ཧཱུྃ་དེ་ལས་འོད་ཟེར་ཕྱོགས་བཅུར་འཕྲོས་པས་འོག་རྡོ་རྗེའི་ས་གཞི། ཁོར་ཡུག་རྡོ་རྗེ་ནག་པོ་གདེངས་པ་འགྲེང་བུར་གྱུར་པས་བར་མཚམས་མེད་པའི་རྭ་བ། སྟེང་རྡོ་རྗེའི་གུར་དང་བླ་རེ། རྭ་བའི་ཕྱི་རོལ་དུ་བསྐལ་པ་འཇིག་པའི་དུས་ཀྱི་མེ་དང་མཚུངས་པའི་ཡེ་ཤེས་ཀྱི་མེ་ཁ་དོག་ལྔ་འབར་བས་བསྐོར་བར་བསམས་ལ་ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ། ཅེས་བརྗོད་ལ་བྱིན་གྱིས་བརླབ། དེ་ལྟ་བུའི་ཐུན་མོང་བའི་སྲུང་བའི་འཁོར་ལོའི་དབུས་སུ་པྃ་ལས་པདྨ་རྃ་ལས་ཉི་མའི་དཀྱིལ་འཁོར་གྱི་སྟེང་དུ་བྷྲཱུྃ་སེར་པོ་ཡོངས་སུ་གྱུར་པ་ལས་འཁོར་ལོ་སེར་པོ་རྩིབས་བཅུ་པ། རྩེ་མོ་རྣོ་བ། ཁོག་པ་སྟོང་པ། ཡངས་ཤིང་རྒྱ་ཆེ་བ། བརྟན་ཞིང་གོ་སྐབས་མེད་པ། གཡས་ཕྱོགས་སུ་མྱུར་དུ་འཁོར་བར་བསམས་ལ་ཨོཾ་བཛྲ་ཙཀྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྗོད་པས་བྱིན་གྱིས་བརླབ། དེ་ལྟ་བུའི་སྲུང་བའི་འཁོར་ལོའི་ནང་གི་དབུས་དང་ཕྱོགས་བཅུར་པདྨ་དང་ཉི་མའི་དཀྱིལ་འཁོར་རེ་རེ། དེ་རྣམས་ཀྱི་སྟེང་དུ་ཧཱུྃ་རེ་རེ། དེ་ཡང་ལྷོའི་དཀར་པོ། ནུབ་ཀྱི་དམར་པོ། སྟེང་གི་སེར་པོ། གཞན་ཐམས་ཅད་སྔོན་པོ། དེ་རྣམས་ཡོངས་སུ་གྱུར་པ་ལས། དབུས་སུ་རང་ཉིད་ཧཱུྃ་མཛད་ནག་པོ་ཕྱག་གཉིས་ཀྱིས་རྡོ་རྗེ་དང་དྲིལ་བུ་རང་གི་ཕྱག་རྒྱས་ཐུགས་ཀར་བསྣོལ་ནས་འཛིན་པ། ཤར་དུ་གཤིན་རྗེའི་གཤེད་སྔོན་པོ་ཐོ་བ་འཛིན་པ། ལྷོར་ཤེས་རབ་མཐར་བྱེད་དཀར་པོ་བེ་ཅོན་འཛིན་པ། ནུབ་ཏུ་པདྨ་མཐར་བྱེད་དམར་པོ་པདྨ་འཛིན་པ། བྱང་དུ་བགེགས་མཐར་བྱེད་ནག་པོ་རྡོ་རྗེ་འཛིན་པ། དབང་ལྡན་དུ་འདོད་པའི་རྒྱལ་པོ་ནག་པོ་ལྕགས་ཀྱུ་འཛིན་པ། མེར་དབྱུག་སྔོན་ཅན་སྔོན་པོ་དབྱུག་པ་འཛིན་པ། བདེན་བྲལ་དུ་མི་་་་་་གཞུང་འདིར་འདི་བཞིན་དུ་བཤད་ལ། དེ་ཉིད་བཅུ་པར་ནུབ་བྱང་དུ་བཤད། ས་ཆེན་གྱིས་བྱང་ཤར་དུ་བཤད་དོ།། གཡོ་བ་སྔོན་པོ་རལ་གྲི་འཛིན་པ། རླུང་དུ་སྟོབས་པོ་ཆེ་ནག་པོ་རྩེ་གསུམ་འཛིན་པ། སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་འཁོར་ལོ་འཛིན་པ། འོག་ཏུ་གནོད་མཛེས་ནག་པོ་གཏུན་ཤིང་འཛིན་པ། ཧཱུྃ་མཛད་མ་གཏོགས་པ་གཞན་ཐམས་ཅད་ཕྱག་གཡས་པས་རང་རང་གི་ཕྱག་མཚན་འཕྱར་བའི་ཚུལ་དུ་འཛིན་ཅིང་། གཡོན་པས་ཐུགས་ཀར་སྡིགས་མཛུབ་མཛད་པ། དབུས་དང་ཕྱོགས་བཞིའི་ཁྲོ་བོ་རྣམས་བརྗིད་པའི་ཁྲོ་བོ་སྟེ། ཞལ་མཆེ་བ་གཙིགས་ཤིང་དམར་ལ་ཟླུམ་པའི་སྤྱན་གསུམ་དང་ལྡན་པ་སྐུ་སྦོམ་ཞིང་ཐུང་ལ་གསུས་ཁྱིམ་ཆེ་བ། དབུ་སྐྲ་དང་། སྨིན་མ་དང་། སྨ་ར་དམར་སེར་གྱེན་དུ་འབར་བ། སྟག་གི་པགས་པའི་ཤམ་ཐབས་ཅན། ཀླུ་ཆེན་པོ་བརྒྱད་ཀྱིས་བརྒྱན་པ། གཞན་རྣམས་ནི་མཛེས་པའི་ཁྲོ་བོ་སྟེ། ཅུང་ཟད་སྒེག་ཅིང་ཡིད་ཙམ་ཁྲོས་པ། སྐུ་སྐེམ་ཞིང་གྲིམས་པ། དབུ་སྐྲ་ནག་པོའི་ཐོར་ཅོག་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་དར་སྣ་ཚོགས་ཀྱི་ཤམ་ཐབས་ཅན། ཐམས་ཅད་ཀྱང་ཞབས་གཡོན་བརྐྱངས་པའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསམ་མོ། །དེ་ལྟར་དམ་ཚིག་པ་བསྐྱེད་ནས་སྒྲུབ་པའི་ཡན་ལག་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས། རང་བཞིན་གྱི་གནས་ནས་སྲུང་བའི་འཁོར་ལོ་ཡེ་ཤེས་ཀྱི་ཁྲོ་བོ་དཔག་ཏུ་མེད་པ་དང་བཅས་པ་མདུན་གྱི་ནམ་མཁར་སྤྱན་དྲངས་ནས། ཨོཾ་ཨེ་ཧྱེ་ཧི་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མཱ་ཛཿ ཞེས་བརྗོད་ཅིང་། ཨོཾ་ནཱི་རཱི་ཏི་ཧཱུྃ་ཁཾ་ཞེས་བྱ་བ་ལ་སོགས་པ་ཆུ་བཞི་སྔོན་དུ་འགྲོ་བའི་རོལ་མོའི་བར་གྱིས་མཆོད་ནས་འཆད་པར་འགྱུར་བའི་གཽ་རཱི་ལ་སོགས་པའི་སྔགས་དང་ཕྱག་རྒྱས་དགུག་གཞུག་བཅིང་དབང་དུ་བྱའོ། །དེ་ནས་ཉེར་སྒྲུབ་ནི། མིག་ཏུ་གཏི་མུག་རྡོ་རྗེ་མ་ཞེས་སོགས་ཀྱིས་སྐྱེ་མཆེད་སྐུ་གསུང་ཐུགས་བྱིན་གྱིས་བརླབ་བོ། །སྒྲུབ་པ་ཆེན་པོ་ནི། སླར་ཡང་སྙིང་གའི་ས་བོན་ལས་འོད་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས་ལ་ཆུ་བཞི་སྔོན་དུ་འགྲོ་བས་མཆོད་ཅིང་། བཅོམ་ལྡན་དེ་བཞིན་གཤེགས་པ་ཀུན། །ཞེས་སོགས་ཀྱིས་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་ཀྱི་ཚིགས་བཅད་དང་སྔགས་ཀྱིས་དབང་བསྐུར། ལུས་ངག་ཡིད་གསུམ་གྱི་དྲི་མ་དག ཆུའི་ལྷག་མ་ཡར་ལུད་པ་ལས་ཧཱུྃ་མཛད་དང་། ཤེས་རབ་མཐར་བྱེད། འདོད་རྒྱལ། གནོད་མཛེས་རྣམས་ལ་མི་བསྐྱོད་པ། གཤིན་རྗེའི་གཤེད། དབྱུག་སྔོན་ཅན། གཙུག་ཏོར་འཁོར་ལོས་སྒྱུར་བ་རྣམས་ལ་རྣམ་པར་སྣང་མཛད། པདྨ་མཐར་བྱེད་དང་སྟོབས་པོ་ཆེ་ལ་འོད་དཔག་མེད། བགེགས་མཐར་བྱེད་དང་མི་གཡོ་བ་ལ་དོན་ཡོད་གྲུབ་པས་དབུར་བརྒྱན་པར་བསམས་ཏེ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའོ། །དེ་ནས་ཁྲོ་བོའི་དབང་པོ་རྣམས་ཀྱི་གཟི་བརྗིད་ཀྱིས་བར་དུ་གཅོད་པའི་བགེགས་ཐམས་ཅད་བསྐྲད་དེ། དཔག་ཚད་བརྒྱའི་ཚད་ཚུན་ཆད་བསྲུང་བར་བསམས་ཏེ་ཨོཾ་རཀྵ་རཀྵ་སོགས་བརྗོད་པ་ནི་སྲུང་བའི་འཁོར་ལོའོ།་་་་་མདུན་བསྐྱེད་དང་འབྲེལ་བའི་ཚེ་གནོད་པ་ཕྱིར་བཟློག་བསྒོམ་དགོས་པར་རྗེ་བཙུན་གོང་མ་བཞེད་དེ། དེ་ལྟར་ན་གནད་ལྔས་རྟོགས་པར་བྱའོ། །གཉིས་པ་དངོས་གཞི་ལྷའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་ཡན་ལག་དྲུག་ལས། དང་པོ་གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་ནི། རང་ཉིད་ཧཱུྃ་མཛད་འོད་དུ་ཞུ་བ་ལས་ཆོས་འབྱུང་བསྒོམ་པའམ། ཡང་ན་ལྟོ་བ་ཡངས་པའི་ནང་དུ་གཞིའི་ཡན་ལག་ཆོས་ཀྱི་འབྱུང་གནས་ཕྱོགས་ཀུན་ནས་གྲུ་གསུམ་པ་གདེངས་ཀ་ཆེ་བ་གྱེན་དུ་ཕྱོགས་པ། ཕྱི་དཀར་ལ་ནང་དམར་བ། རྩ་བ་ཕྲ་བ་ཐུར་དུ་ཟུག་པ་ཡངས་ཤིང་རྒྱ་ཆེ་བ། དེའི་ནང་དུ་རྒྱུའི་ཡན་ལག་ཡྃ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་མཆོག་མ་གཉིས་ཀྱི་ངོས་སུ་གཡོ་བའི་བ་དན་གྱིས་མཚན་པ། དེའི་སྟེང་དུ་རྃ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་བྃ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པ་ཆུས་གང་བས་མཚན་པ། དེའི་སྟེང་དུ་ལྃ་ལས་སའི་དཀྱིལ་འཁོར་སེར་པོ་གྲུ་བཞི་ཟུར་བཞིར་རྡོ་རྗེ་རྩེ་གསུམ་པས་མཚན་པ། དེའི་སྟེང་དུ་བྷྲཱུྃ་ལས་འཁོར་ལོ་སེར་པོ་རྩིབས་བཅུ་པ་བྷྲཱུྃ་གྱིས་མཚན་པ། དེ་རྣམས་ཀྱི་སྟེང་དུ་རྐྱེན་གྱི་ཡན་ལག་ཨོཾ་ཨཱཿཧཱུྃ་ཧོཿདམར་པོ་གཉིས་ཀྱིས་སྟེང་འོག་ནས་མཐའ་བརྟེན་པའི་རང་གི་བར་དོའི་རྣམ་པར་ཤེས་པ་འདྲེས་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ་སྒོ་བཞི་པ། ཕྱི་ནས་རིམ་པ་བཞིན་དཀར་པོ། སེར་པོ། དམར་པོ། ལྗང་གུ། ནག་པོའི་རྩིག་པ་རིམ་པ་ལྔ་དང་ལྡན་པ། རྩིག་པའི་སྟེང་ན་རིན་པོ་ཆེའི་ཕ་གུ་སེར་པོ་ལ་དྲྭ་བ་དང་། དྲྭ་བ་ཕྱེད་པ་འཕྱང་བ། དེའི་སྟེང་ན་བྱ་འདབ་ལས་ཐུར་དུ་འཕྱང་བའི་མདའ་ཡབ་དང་། སྟེང་དུ་རིན་པོ་ཆེའི་དྲྭ་མིག་སེང་མའི་པུ་ཤུས་མཛེས་པར་བྱས་པ། ནང་ཀ་བ་བརྒྱད་དང་ལྡན་ཞིང་སྟེང་རྡོ་རྗེའི་གདུང་ཟླུམ་པོ་དང་། དེའི་སྟེང་དུ་རྡོ་རྗེའི་གདུང་བཞིས་མིག་མངས་རིས་སུ་བྲེས་ནས་མཛེས་པར་ཕུབ་པའི་དབུས་ཕྱུར་བུར་གྱུར་པའི་སྟེང་དུ་རྡོ་རྗེ་དང་རིན་པོ་ཆེའི་ཏོག་གིས་སྤྲས་པ། ཆེས་མཐོ་ཞིང་ཡངས་པའི་སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་དང་ལྡན་པའི་རྩེ་མོར་དབུས་སུ་ཆོས་ཀྱི་འཁོར་ལོ་དང་། སྟེང་དུ་གདུགས། གཡས་དང་གཡོན་དུ་རི་དྭགས། གཞན་ཡང་གོས་དང་། འཕན་དང་། མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་བརྒྱན་པ། རྩིག་པའི་རྩ་བའི་ཕྱི་རོལ་ནས་འདོད་ཡོན་གྱི་སྣམ་བུ་དམར་པོ་ལ་མཆོད་པའི་ལྷ་མོ་བཅུ་དྲུག་ཕྱོགས་རེ་ནས་བཞི་བཞི་འཛུམ་པའི་བཞིན་ལ་མཛེས་པའི་རྒྱན་གྱིས་བརྒྱན་ཅིང་ལག་ན་མཆོད་རྫས་དུ་མ་ཐོགས་པས་མཆོད་པ་བྱེད་པ། སྒོ་དང་སྒོ་ཁྱུད་དང་གྲྭ་རྣམས་སུ་ཟླ་བ་ཕྱེད་པ་ལ་གནས་པའི་རྡོ་རྗེ་རིན་པོ་ཆེས་སྤྲས་པ་རྒྱ་དང་ཚད་ཡོངས་སུ་མ་ཆད་པ་ཡེ་ཤེས་ཀྱི་སྣང་བ་ལས་གྲུབ་ཅིང་རང་བཞིན་གྱིས་འོད་གསལ་བའི་གཞལ་ཡས་ཁང་པར་བསམ་མོ། །གཞལ་ཡས་ཁང་པའི་ཕྱི་རོལ་རྡོ་རྗེའི་རྭ་བའི་ནང་དུ་དུར་ཁྲོད་ཆེན་པོ་བརྒྱད་གནས་པ་ནི་ཤར་དུ་གཏུམ་དྲག་གི་དུར་ཁྲོད། ལྷོར་འཇིགས་བྱེད་ཐོད་པ་ཅན། ནུབ་ཏུ་འབར་བའི་ཕྲེང་བ་འཁྲུགས་པ། བྱང་དུ་ཚང་ཚིང་འཁྲིགས་པ། བྱང་ཤར་དུ་དྲག་ཏུ་དགོད་པ། ཤར་ལྷོར་དབང་ཕྱུག་ནགས་ཚལ། ལྷོ་ནུབ་ཏུ་འཇིགས་བྱེད་མུན་པ། ནུབ་བྱང་དུ་ཀི་ལི་ཀི་ལའི་སྒྲ་སྒྲོགས་པའི་དུར་ཁྲོད་དོ། །དེ་དག་ན་ཡོད་པའི་ཤིང་ཆེན་པོ་བརྒྱད་ནི། ཤར་དུ་ཤི་རི་ཤའི་ཤིང་། ལྷོར་ཙུ་ཏ། ནུབ་ཏུ་ཀཾ་ཀ་ལ། བྱང་དུ་ཨ་ཤྭཏྠ། བྱང་ཤར་དུ་ཤིང་ཆེན་པོ། ཤར་ལྷོར་ཀ་རན་ཛ། ལྷོ་ནུབ་ཏུ་འཁྲི་ཤིང་ཅན། ནུབ་བྱང་དུ་ཨརྫུ་ནའོ། །ཤིང་དེ་དག་གི་རྩ་བར་གནས་པའི་ཕྱོགས་སྐྱོང་བ་ཆེན་པོ་བརྒྱད་ནི། ཤར་དུ་བརྒྱ་བྱིན་སེར་པོ་གླང་པོ་ཆེ་ལ་ཞོན་པ་ཤིན་ཏུ་བརྗིད་པ་ཕྱག་གཡོན་ན་རྡོ་རྗེས་མཚན་པའི་ཐོད་པ། ལྷོར་གཤིན་སྔོན་པོ་མ་ཧེ་ལ་ཞོན་པ་མིའུ་ཐུང་ལྟ་བུ་ལྟོ་བ་འཕྱང་ཞིང་སྐྲ་སེར་པོ་གྱེན་དུ་བརྫེས་པ་གཡོན་ཐོད་པ་དང་དབྱུག་པ་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་གྱིས་བརྒྱན་ཞིང་ཐོད་པ་དང་ཞགས་པ་ཐོགས་པ། བྱང་དུ་གནོད་སྦྱིན་གྱི་སྡེ་དཔོན་སེར་པོ་རྟ་ལ་ཞོན་པ་མིའུ་ཐུང་ལྟ་བུ་གསུས་པ་འཕྱང་བ་གཡོན་ན་ཐོད་པ་དང་རིན་པོ་ཆེས་མཚན་པའི་དབྱུག་པ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ་མིག་གསུམ་པ་ཅན་གཡོན་ཐོད་པ་དང་མདུང་འཛིན་པ། ཤར་ལྷོར་མེ་ལྷ་དམར་སེར་ར་སྐྱེས་ལ་ཞོན་པ་ཕྱག་བཞིའི་གཡས་དབྱུག་གུ་དང་ཐོད་པ། གཡོན་གྱིས་སྤྱི་བླུགས་དང་ཕྲེང་བ་འཛིན་པ། ལྷོ་ནུབ་ཏུ་སྲིན་པོ་སྔོན་པོ་རོ་ལངས་ལ་ཞོན་པ་མིའུ་ཐུང་གི་གཟུགས་ཅན་གསུས་པ་འཕྱང་བ་སྐྲ་སེར་པོ་གྱེན་དུ་བརྫེས་པ། གཡོན་ཐོད་པ་དང་རལ་གྲི་འཛིན་པ། ནུབ་བྱང་དུ་རླུང་ལྷ་སྔོན་པོ་རི་དྭགས་ལ་ཞོན་པ་ཞི་བའི་གདོང་པ་ཅན་གཡོན་ཐོད་པ་དང་བ་དན་འཛིན་པ་རང་རང་གི་རྒྱན་གྱིས་བརྒྱན་ཅིང་། ཐམས་ཅད་ཀྱི་ཕྱག་གཡས་པས་བཅོམ་ལྡན་འདས་ལ་ཕྱག་འཚལ་བའི་ཚུལ་བྱེད་པའོ། །ཤིང་གི་ཡལ་ག་ལ་གནས་པའི་ཞིང་སྐྱོང་ཆེན་པོ་བརྒྱད་ནི། ཤར་དུ་ལྷའི་དགེ་འདུན་དཀར་པོ་གླང་པོ་ཆེའི་གདོང་པ་ཅན། ལྷོར་གཤིན་རྗེ་སྔོན་པོ་མ་ཧེའི་གདོང་པ་ཅན། ནུབ་ཏུ་ཆུ་སྲིན་གྱི་རྒྱལ་པོ་དམར་པོ་ཆུ་སྲིན་གྱི་གདོང་པ་ཅན། བྱང་དུ་གནོད་སྦྱིན་གྱི་སྡེ་དཔོན་སེར་པོ་རྟའི་གདོང་པ་ཅན། བྱང་ཤར་དུ་ཡི་དྭགས་འདུས་པ་དུད་ཀ་གླང་གི་གདོང་པ་ཅན། ཤར་ལྷོར་དྲང་སྲོང་འདུས་པ་དམར་པོ་ར་སྐྱེས་ཀྱི་གདོང་པ་ཅན། ལྷོ་ནུབ་ཏུ་སྲིན་པོའི་ཚོགས་ཅན་སྔོན་པོ་རོ་ལངས་ཀྱི་གདོང་པ་ཅན། ནུབ་བྱང་དུ་རླུང་ལྷ་སྔོན་པོ་རི་དྭགས་ཀྱི་གདོང་པ་ཅན། ཐམས་ཅད་ཀྱང་ཤིང་ལོའི་གསེབ་ནས་ལུས་ཕྱེད་ཙམ་འཐོན་པ། གྲི་གུག་དང་ཐོད་པ་འཛིན་པ་བཞིན་འགྱུར་བ་སྐྲ་དམར་སེར་གྱེན་དུ་བརྫེས་པའོ། །སྤྲིན་ཆེན་པོ་བརྒྱད་ནི། ཤར་དུ་སྒྲོགས་བྱེད་སེར་པོ། ལྷོར་ལྡོག་བྱེད་སྔོན་པོ། ནུབ་ཏུ་འཇིགས་བྱེད་དཀར་པོ། བྱང་དུ་འཁོར་བྱེད་སེར་པོ། བྱང་ཤར་དུ་མཐུག་པོ་དཀར་པོ། ཤར་ལྷོར་འགེངས་བྱེད་དམར་སེར། ལྷོ་ནུབ་ཏུ་ཆར་འབེབས་སྔོན་པོ། ནུབ་བྱང་དུ་གཏུམ་པོ་སྔོན་པོ། སྤྲིན་དེ་དག་ལ་གནས་པའི་ཀླུ་ཆེན་པོ་བརྒྱད་ནི། ཤར་དུ་ནོར་རྒྱས་སེར་པོ། ལྷོར་པདྨ་དཀར་པོ། ནུབ་ཏུ་ཀརྐོ་ཊ་ནག་པོ། བྱང་དུ་འཇོག་པོ་དམར་པོ། བྱང་ཤར་དུ་པདྨ་ཆེན་པོ་དཀར་པོ། ཤར་ལྷོར་ཧུ་ལུན་ཏ་སྔོན་པོ། ལྷོ་ནུབ་ཏུ་རིགས་ལྡན་ལྗང་གུ། ནུབ་བྱང་དུ་དུང་སྐྱོང་སེར་པོ་སྟེ། ཐམས་ཅད་ཀྱང་སྦྲུལ་མགོའི་གདེངས་ཀ་བདུན་བདུན་དང་ལྡན་ཞིང་། སྟོད་ལྷའི་གཟུགས་ཅན་ཐལ་མོ་སྦྱར་བ། སྨད་སྦྲུལ་མཇུག་འཁྱིལ་བའོ། །གཞན་ཡང་དེ་བཞིན་གཤེགས་པའི་མཆོད་རྟེན་བརྒྱད། ཐུགས་རྗེའི་ཆུ་བརྒྱད། ཡེ་ཤེས་ཀྱི་མེ་བརྒྱད། གྲུབ་པ་ཐོབ་པའི་དཔའ་བོ་དང་། རྣལ་འབྱོར་མ་དང་། རོ་མགོ་བོ་བཅད་པ་དང་། དཔྱངས་པ་དང་། བསྙལ་བ་དང་། གསལ་ཤིང་གིས་ཕུག་པ་དང་། མགོ་བོ་དང་། ཀེང་རུས་དང་། ལྕེ་སྤྱང་དང་། ཁྭ་དང་། འུག་པ་དང་། བྱ་རྒོད་དང་། རོ་ལངས་རྣམས་ཕཻཾ་ཞེས་བྱ་བའི་སྒྲ་སྒྲོགས་པར་བྱེད་པ་དང་། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། སྨྱོ་བྱེད་དང་། རྗེད་བྱེད་དང་། གདོན་དང་། མཁའ་འགྲོ་དང་། མཁའ་འགྲོ་མ་དང་། སྒྲུབ་པ་པོ་རྣམས་དང་བཅས་པས་ཡོངས་སུ་གང་བའི་དུར་ཁྲོད་བརྒྱད་ཀྱིས་བསྐོར་བའི་གཞལ་ཡས་ཁང་གི་ཕྱོགས་མདོག་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། དེའི་དབུས་སུ་རྡོ་རྗེ་ཅན་གྱི་དཀྱིལ་འཁོར་ལ་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པ། ཤར་དུ་ཕན་པའི་དཀྱིལ་འཁོར་ལ་སྔོ་སེར་དམར་ལྗང་དཀར་བ། ལྷོར་རྡོ་རྗེ་ཉི་མའི་དཀྱིལ་འཁོར་ལ་དཀར་སྔོ་དམར་ལྗང་སེར་བ། ནུབ་ཏུ་པདྨ་གར་དབང་གི་དཀྱིལ་འཁོར་ལ་དཀར་སེར་སྔོ་ལྗང་དམར་བ། བྱང་དུ་རྟའི་རྒྱལ་པོའི་དཀྱིལ་འཁོར་ལ་དཀར་སེར་དམར་སྔོ་ལྗང་བའི་རྩིག་པ་རིམ་པ་ལྔ་དང་ལྡན་པ། ཐམས་ཅད་ཀྱི་ཕྱིའི་དབྱིབས་ནི་གྲུ་བཞི་སྒོ་བཞི་འདོད་ཡོན་གྱི་སྣམ་བུ་དང་། ཕ་གུ་དང་། དྲྭ་བ་དང་། དྲྭ་བ་ཕྱེད་པ་དང་། མདའ་ཡབ་དང་། པུ་ཤུ་ལ་སོགས་པས་བརྒྱན་ཅིང་། ནང་ཀ་བ་བརྒྱད་དང་ལྡན་ཞིང་། སྟེང་རྡོ་རྗེའི་གདུང་བཞིས་མིག་མངས་རིས་སུ་བྲེས་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་དང་རིན་པོ་ཆེའི་ཏོག་གིས་མཛེས་པར་བྱས་པ། མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་དབྱིབས་ནི་རྡོ་རྗེ་ཅན་གྱི་ཟླ་བ་ཕྱེད་པ། ཕན་པའི་ཟླུམ་པོ། ཉི་མའི་རིན་པོ་ཆེ་ཟུར་བརྒྱད་པ། གར་དབང་གི་པདྨ། རྟ་མཆོག་གི་ཆོས་འབྱུང་གི་དབྱིབས་ལྟ་བུ་རྩིག་པའི་རིམ་པ་དང་མཐུན་པའི་ཕྱོགས་མདོག་ཅན་ནོ། །དེ་ལྟ་བུའི་གཞལ་ཡས་ཁང་རྣམས་ཀྱི་དབུས་སུ་པདྨ་དཀར་དམར་འདབ་མ་བརྒྱད་པ་རེ་རེའི་ལྟེ་བར་ཚངས་པ་སེར་པོ། དབང་པོ་དཀར་པོ། ཉེ་དབང་སྔོན་པོ། དྲག་པོ་ནག་པོ་སྟེ་བདུད་བཞི་བརྩེགས་པའི་གདན་གྱི་སྙིང་གར་ཉི་མའི་དཀྱིལ་འཁོར། ཤར་དུ་ཟླ་བ། ཕྱོགས་གཞན་གསུམ་ལ་ཡང་ཉི་མའི་གདན། འདབ་མ་བརྒྱད་པོ་རྣམས་དང་། ཕྱིའི་དཀྱིལ་འཁོར་གྱི་སྒོ་བཞིར་ཟླ་བ་དང་། ཉི་མ་དང་། རོའི་གདན་བསྒོམས་ལ། ཨོཾ་སརྦ་ཏ་ཐཱ་ག་ཏ་ནཱི་ལ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་བྱིན་གྱིས་བརླབ་བོ།། །།གཉིས་པ་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ལ་གསུམ་སྟེ། དམ་ཚིག་པ་བསྐྱེད་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའོ། །དང་པོ་ལ་བཞི་སྟེ། རྒྱུ་རྡོ་རྗེ་འཛིན་པ་བསྐྱེད་པ། འཁོར་གྱི་ལྷ་མོ་དབྱུང་བ། ཞུ་བ་ལས་གླུས་བསྐུལ་བ། འབྲས་བུ་རྡོ་རྗེ་འཛིན་པར་བཞེངས་པའོ། །དང་པོ་ནི། གཙོ་བོ་ལྔའི་གདན་གྱི་སྟེང་དུ་སངས་རྒྱས་ཀྱི་མཚན་སུམ་ཅུ་སུ་གཉིས་ཀྱི་ངོ་བོ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་ལྷ་མོའི་གཟུགས་ཀྱི་ཡན་ལག་མཚོན་པའི་དབྱིབས་གྲུ་གསུམ་པ་ཨཱ་ལིས་མཚན་པ་ལྔར་གྱུར་པ་ནི་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡ་ར་ལ་ཝ་ཌ་ཌྷ། ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་གྲུ་གསུམ་པ་ཀཱ་ལིས་མཚན་པ་ལྔར་གྱུར་པ་མཉམ་པ་ཉིད་ཀྱི་ཡེ་ཤེས། དེ་དག་གི་སྟེང་དུ་ཧཱུྃ།་་་་་མི་ཐུབ་ཟླ་བས། ཧཱུྃ་བྱུང་རྡོ་རྗེ་བསྒོམ་པར་བྱ། །འོད་ཟེར་དཀར་པོའི་ཕྲེང་བའོ། །དེ་ལྟར་སོ་སོར་ངེས་པར་ནི། །ས་བོན་ལྔ་ལས་ཕྱག་མཚན་ལྔ། །ཞེས་གསུངས་པ་ལ་བརྟེན་ནས་བླ་མ་དག་ཐོག་མར་རྡོ་རྗེ་ལྔ་དེ་ཡོངས་སུ་གྱུར་པ་ལས་སོ་སོའི་ཕྱག་མཚན་ལྔ་བསྒོམ་པར་བཞེད་མོད་གཞུང་གི་དགོངས་པ་སྔ་མ་རྡོ་རྗེ་ཅན་གྱི་དབང་དུ་བྱས་ཤིང་ཕྱི་མ་དེ་བཞིན་དུ་རིགས་ལྔ་ཆར་ཡིན་པར་མངོན་ནོ།། ཨོཾ། ཏྲཱྃ། ཨཱྃ། ཁྃ་རྣམས་ལས་རྡོ་རྗེ་དཀར་པོ་རྩེ་ལྔ་པ། འཁོར་ལོ། རིན་པོ་ཆེ། པདྨ། རལ་གྲི་རྣམས་འོད་ཟེར་འཕྲོ་བ་དང་བཅས་པ་སོ་སོར་ཀུན་ཏུ་རྟོག་པའི་ཡེ་ཤེས། དེ་དག་ལས་འོད་ཟེར་འཕྲོས། སེམས་ཅན་ཐམས་ཅད་མཁའ་འགྲོ་ལྔའི་གོ་འཕང་ལ་བཀོད། ཚུར་འདུས་ཟླ་བ་ཉིས་བརྩེགས་ཕྱག་མཚན་དང་བཅས་པ་རོ་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་དག་ལས་མཁའ་འགྲོ་ལྔའི་རྒྱུ་རྡོ་རྗེ་འཛིན་པའི་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་སུ་མོས་པར་བྱས་ལ་རིམ་གྱིས་གསལ་གདབ་པ་ནི། དབུས་སུ་རྡོ་རྗེ་ཅན་གྱི་རྒྱུ་རྡོ་རྗེ་འཛིན་པ། ཤར་དུ་ཕན་པའི། ལྷོར་རྡོ་རྗེ་ཉི་མའི། ནུབ་ཏུ་པདྨ་གར་དབང་གི བྱང་དུ་རྟའི་རྒྱལ་པོའི་རྒྱུ་རྡོ་རྗེ་འཛིན་པ་སྟེ། ཐམས་ཅད་ཀྱང་ཟླ་བ་ལྟར་དཀར་ཞིང་། ཆུ་ཤེལ་ལྟར་དྭངས་པ། ནོར་བུ་ལྟར་འོད་འཕྲོ་བ། ཞལ་བརྒྱད་པ། ཕྱག་བཅུ་དྲུག་གིས་ཐོད་པ་བཅུ་དྲུག་འཛིན་པ། ཞབས་བཞི་པ། རྡོ་རྗེ་ཅན་གྱི་རྒྱུ་རྡོ་རྗེ་འཛིན་པའི་རྩ་བའི་ཞལ་དཀར། གཡས་གནག གཡོན་དམར་བ། ཕྱག་བཅུ་དྲུག་གི་གཡས་པ་རྣམས་ན་གླང་པོ་ཆེ། རྟ། བོང་བུ། གླང་། རྔ་མོ། མི། ཤ་ར་བྷ། བྱི་ལ། གཡོན་པ་རྣམས་ན་སའི་ལྷ། ཆུའི་ལྷ། མེའི་ལྷ། རླུང་གི་ལྷ། ཟླ་བའི་ལྷ། ཉི་མའི་ལྷ། གཤིན་རྗེ། ནོར་སྦྱིན་རྣམས་འཛིན་པ། སྤྱི་བོར་རྡོ་རྗེ་ནག་པོས་མཚན་ཅིང་། ཡུམ་མཱ་མ་ཀཱི་སྔོན་མོ་དང་མཉམ་པར་སྦྱོར་བ། ཕན་པའི་རྒྱུ་རྡོ་རྗེ་འཛིན་པའི་ཞལ་མདོག་རྡོ་རྗེ་ཅན་དང་མཚུངས་ཤིང་། ཕྱག་བཅུ་དྲུག་གི་གཡས་པ་རྣམས་ན་རྨ་བྱ། མ་ཧེ། ཆུ་སྲིན་མ་ཀ་ར། ཉ་རོ་ཧི་ཏ། རུས་སྦལ། འོག་གི་ཀླུ། ངང་སྐྱ། རི་བོང་། གཡོན་པ་རྣམས་ན་སྦལ་པ་ཐུའུ། སྤྲིན་ཤུགས། སྦྲུལ་ཧ་ལ། རྩངས་པ་ནག་པོ། བྱི་བ། གཡག གླ་བ། བྱ་བཞད་རྣམས་འཛིན་པ། རྩ་ཞལ་གྱི་སྤྱི་བོར་འཁོར་ལོ་དཀར་པོས་མཚན་ཅིང་། ཡུམ་སངས་རྒྱས་སྤྱན་མ་སྐུ་མདོག་དཀར་མོ་དང་མཉམ་པར་སྦྱོར་བ། རྡོ་རྗེ་ཉི་མའི་རྒྱུ་རྡོ་རྗེ་འཛིན་པའི་རྩ་བའི་ཞལ་དཀར། གཡས་སེར། གཡོན་དམར་བ། ཕྱག་བཅུ་དྲུག་གི་གཡས་པ་རྣམས་ན་བྱ་ཀ་རནྟ། ངུར་པ། ལུག བྱེའུ་ཙ་ཀོ་ར། བྱེ་ཁྲ། ཧོར་ཁྲ། འོལ་བ། ཉ་ཁྲ། གཡོན་པ་རྣམས་ན་སྟོབས་ཀྱི་རྒྱུ། དུང་སྐྱོང་། རིགས་ལྡན། པདྨ། པདྨ་ཆེན་པོ། འཇོག་པོ། ནོར་རྒྱས། མཐའ་ཡས་རྣམས་འཛིན་པ། སྤྱི་བོར་རིན་པོ་ཆེ་སེར་པོ་ཟུར་བརྒྱད་པས་མཚན་ཅིང་། ཡུམ་རིན་ཆེན་སྒྲོལ་མ་སྐུ་མདོག་སེར་མོ་དང་མཉམ་པར་སྦྱོར་བ། པདྨ་གར་དབང་གི་རྒྱུ་རྡོ་རྗེ་འཛིན་པའི་རྩ་བའི་ཞལ་དཀར། གཡས་གནག གཡོན་དམར་བ། ཕྱག་བཅུ་དྲུག་གི་གཡས་པ་རྣམས་ན་དོམ། བྱ་རྒོད། བསེ། བ་མེན། སྟག སྤྲེའུ། ཆུ་སྲིན་ན་ཀྲ། ལྕེ་སྤྱང་། གཡོན་པ་རྣམས་ན་ཁྭ། འུག་པ། བྱ་དཀར། ནེ་ཙོ། སེང་གེ ས་ར་ས། ཀྲིཥྞ་ས་རི། ཕག་རྣམས་འཛིན་པ། སྤྱི་བོར་པདྨ་དམར་པོས་མཚན་ཅིང་། ཡུམ་གོས་དཀར་མོ་སྐུ་མདོག་དམར་མོ་དང་མཉམ་པར་སྦྱོར་བ། རྟའི་རྒྱལ་པོའི་རྒྱུ་རྡོ་རྗེ་འཛིན་པའི་རྩ་བའི་ཞལ་རྟའི་གདོང་པ་ཅན་དཀར་པོ། གཡས་གནག གཡོན་ལྗང་། ཕྱག་བཅུ་དྲུག་གི་གཡས་པ་རྣམས་ན་གཟའ་ལྷག ཕུར་བུ། མཇུག་རིང་། སྒྲ་གཅན། མིག་དམར། པ་སངས། སྤེན་པ། ཁྱབ་འཇུག གཡོན་པ་རྣམས་ན་དབང་པོ། ཚངས་པ། དྲག་པོ། བདུད་སྡིག་ཅན། ཁྱབ་འཇུག་གི་བུ་མོ་གཤོལ་མདའ་འཛིན། ལྷ་རྒྱལ་བ་དམ་པ། ཐགས་བཟངས་རིས། ལྷ་མ་ཡིན་སྟོབས་ལྡན་རྣམས་འཛིན་པ། སྤྱི་བོར་རལ་གྲི་དཀར་པོས་མཚན་ཅིང་། ཡུམ་དམ་ཚིག་སྒྲོལ་མ་སྐུ་མདོག་ལྗང་གུ་དང་མཉམ་པར་སྦྱོར་བ། ཐམས་ཅད་ཀྱི་སྟེང་ཞལ་དུད་ཀ རྒྱབ་ཞལ་བཞི་ནག་པ། ཞལ་མཆེ་བ་གཙིགས་པ། སྤྱན་ཉི་ཤུ་རྩ་བཞིས་མཛེས་པ། དབུ་སྐྲ་སེར་པོ་གྱེན་དུ་བརྫེས་པ། མི་མགོ་སྐམ་པོ་རྫོགས་པ་ལྔ་ལྔས་དབུ་ལ་བརྒྱན་པ། རློན་པ་ལྔ་བཅུའི་དོ་ཤལ་ཅན། སྤྱི་བོར་རུས་པའི་འཁོར་ལོ། རྣ་བ་ལ་རྣ་ཆ། མགུལ་པ་ལ་མགུལ་རྒྱན། ལག་པ་དང་རྐང་པ་ལ་གདུ་བུ། རྐེད་པ་ལ་སྐེ་རགས། སེ་རལ་ཁར་མཆོད་ཕྱིར་ཐོགས། ལུས་ཐམས་ཅད་ལ་ཐལ་ཆེན་གྱི་ཕྱག་རྒྱ་སྟེ་ཕྱག་རྒྱ་དྲུག་གིས་བརྒྱན་པ། ཞབས་གཡས་གཉིས་བརྐྱངས་པའི་བརླ་ལ། གཡོན་གཉིས་བསྐུམས་པའི་སོར་མོ་གཏད་པའི་སྐྱིལ་ཀྲུང་ཕྱེད་པའི་གར་གྱིས་བཞུགས་པ། སྒེག་པ་དཔའ་བ་མི་སྡུག་པ། །དགོད་པ་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་གྱི་ཉམས་དགུ་དང་ལྡན་པ། །འདི་དག་གི་པང་ན་གནས་པའི་ཡུམ་རྣམས་ཀྱང་། ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་ཞིང་ཞལ་མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། ཕྱག་གཡས་པས་གྲི་གུག་སྡིགས་མཛུབ་དང་བཅས་པ་ནམ་མཁའ་ལ་འཕྱར་ཞིང་། གཡོན་པ་བདུད་བཞིའི་ཁྲག་གིས་གང་བའི་ཐོད་པ་འཛིན་པས་ཡབ་ཀྱི་མགུལ་ནས་འཁྱུད་པ། མི་མགོ་སྐམ་པོ་ལྔས་དབུར་བརྒྱན་ཅིང་། སྐམ་པོ་ལྔ་བཅུའི་དོ་ཤལ་ཅན། ཐལ་ཆེན་མ་གཏོགས་པའི་ཕྱག་རྒྱ་ལྔས་བརྒྱན་པ། གཅེར་བུ་ཞབས་གཡོན་བརྐྱང་ཞིང་གཡས་བསྐུམས་པས་ཡབ་ལ་འཁྲིལ་བ། ཡབ་ཡུམ་ཐམས་ཅད་ཀྱང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །གཉིས་པ་འཁོར་གྱི་ལྷ་མོ་དབྱུང་བ་ལ་གཉིས་ལས། དང་པོ་མཁའ་གསང་བྱིན་གྱིས་བརླབ་པ་ནི། ཡུམ་རྣམས་ཀྱི་མཁའ་མི་དམིགས་ཏེ་སྟོང་པའི་ངང་ལས་ཨཱཿལས་པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལ་ཨཱཿས་མཚན་པ། ཡབ་ཀྱི་གསང་གནས་མི་དམིགས་ཏེ་སྟོང་པའི་ངང་ལས་ཧཱུྃ་ལས་རྡོ་རྗེ་ཧཱུྃ་གིས་མཚན་པར་བསམས་ལ། ཨོཾ་པདྨ་སུ་ཁ་དྷ་ར་མ་ཧཱ་རཱ་ག་སུ་ཁནྡཱ་ད་ཙ་ཏུར་ཨཱ་ནན་ད་བྷ་ག་བི་ཤྭ་ཧཱུྃ་ཧཱུྃ་ཧཱུྃ་ཀརྻཾ་ཀུ་རུ་ཥྭ་མེ། ཨོཾ་བཛྲ་མ་ཧཱ་དྭེ་ཥ་ཙ་ཏུར་ཨཱ་ནནྡ་དཱ་ཡ་ཀ་ཁ་ག་མུ་ཁ་ཨེ་ཀཱ་ར་སོ་ནཱ་ཐ་ཧཱུྃ་ཧཱུྃ་ཧཱུྃ་ཀརྻཾ་ཀུ་རུ་ཥ་མེ་ཞེས་བརྗོད་ཅིང་བྱིན་གྱིས་བརླབ། གཉིས་པ་འཁོར་གྱི་ལྷ་མོ་དབྱུང་བ་དངོས་ནི། དེ་ནས་ཐབས་ཤེས་རབ་སྙོམས་པར་ཞུགས་ལ་འཁོར་གྱི་ལྷ་མོ་དབྱུང་སྙམ་དུ་དྲན་པས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་སྙོམས་པར་ཞུགས་པའི་སྒྱུ་མ་བདེ་བའི་སྒྲས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས། རིགས་ལྔ་སོ་སོའི་ཞལ་དུ་ཞུགས། སྐུའི་དབྱིབས་བརྒྱུད། རྡོ་རྗེའི་ལམ་ནས་སོ་སོའི་ཡུམ་གྱི་མཁར་ཐིག་ལེ་བརྒྱད་བརྒྱད་དང་། རྡོ་རྗེ་མཁའ་འགྲོའི་ཡུམ་གྱི་མཁར་སླར་ཡང་ཐིག་ལེ་བཞི་རྣམས་སུ་གྱུར། དེ་རྣམས་་་་་་མངལ་དུ་ས་བོན་ལས་ལྷ་མོར་གྱུར་ནས་སྤྲོ་བ་འདི་ནི་གུར་རྒྱན་ལས་བཤད་དོ།། གྃ་ཙྃ་བྃ་གྷྃ་པྃ་ཤྃ་ལྃ་ཌྃ། སྃ་པཱྃ་བྃ་ཨྃ་པྃ་དྷཱྃ་དཱྃ་གྃ སྃ་དཱྃ་རྃ་ཏྃ་ལཱྃ་ཧཱྃ་གཱྃ་ནྃ། བྃ་དྷྃ་སྥྃ་ཤྃ་ཝྃ་བཱྃ་མྃ་མྃ། ཏྃ་ཀྃ་ཀྃ་པྃ་ལྃ་མཱྃ་བྃ་ཏཱྃ་ཛཿཧཱུྃ་བྃ་ཧོཿ ཞེས་པའི་ས་བོན་རྣམས་སུ་གྱུར། དེ་རྣམས་སོ་སོའི་ཡུམ་གྱི་མཁར་ལྷ་མོ་བརྒྱད་བརྒྱད་དང་། རྡོ་རྗེ་ཅན་གྱི་ཡུམ་གྱི་མཁར་སླར་ཡང་ལྷ་མོ་བཞི་རྣམས་སུ་གྱུར། དེ་རྣམས་ཡུམ་གྱི་མཁའ་ནས་ཕྱིར་འཕྲོས་ཏེ་སོ་སོའི་ཕྱོགས་མཚམས་ཀྱི་གདན་རྣམས་དང་། ཕྱིའི་སྒོ་བཞིར་འཁོད་པ་ནི། རྡོ་རྗེ་ཅན་གྱི་དཀྱིལ་འཁོར་གྱི་ཤར་གྱི་འདབ་མ་ལ་གཽ་རཱི་དཀར་མོ་གཡས་ལྕགས་ཀྱུ་འཛིན་པ། ལྷོར་ཙཽ་རཱི་སེར་མོ་རྡོ་རྗེ་ཞགས་པ། ནུབ་ཏུ་བེ་ཏཱ་ལཱི་དམར་མོ་རྡོ་རྗེ་ལྕགས་སྒྲོག བྱང་དུ་གྷསྨ་རཱི་ལྗང་གུ་རྡོ་རྗེས་མཚན་པའི་དྲིལ་བུ། བྱང་ཤར་དུ་པུཀྐ་སཱི་ནག་མོ་རི་རབ། ཤར་ལྷོར་ཤ་བ་རཱི་དཀར་མོ་བྱང་ཆུབ་ཀྱི་སེམས་ཀྱིས་གང་བའི་བུམ་པ། ལྷོ་ནུབ་ཏུ་གདོལ་པ་མོ་སྔོན་མོ་མེ་ཐབ། ནུབ་བྱང་དུ་གཡུང་མོ་ལྗང་གུ་རླུང་གིས་བསྐྱོད་པའི་རྒྱལ་མཚན་འཛིན་པ། ཕན་པའི་དཀྱིལ་འཁོར་གྱི་ཤར་གྱི་འདབ་མ་ལ་སྐམ་པ་མོ་ནག་མོ་གཡས་སྐམ་པ། ལྷོར་ཞགས་པ་མོ་སེར་མོ་གཡས་ཞགས་པ། ནུབ་ཏུ་དོལ་ཟླུམ་མ་དམར་མོ་ཉ་རྒྱ། བྱང་དུ་ལྕགས་ཀྱུ་མ་ལྗང་གུ་ལྕགས་ཀྱུ། བྱང་ཤར་དུ་མེ་ཏོག་མ་དཀར་མོ་མེ་ཏོག ཤར་ལྷོར་བདུག་སྤོས་མ་དུད་ཀ་སྤོས་སྣོད། ལྷོ་ནུབ་ཏུ་མར་མེ་མ་སེར་མོ་མར་མེ། ནུབ་བྱང་དུ་བྱུག་པ་མོ་དམར་མོ་དྲིའི་དུང་ཆོས་འཛིན་པ། རྡོ་རྗེ་ཉི་མའི་དཀྱིལ་འཁོར་གྱི་ཤར་གྱི་འདབ་མ་ལ་ཉི་ལག་མ་དཀར་པོ་གཡས་ཉི་མའི་དཀྱིལ་འཁོར། ལྷོར་མར་མེ་མ་སྔོ་དམར་མར་མེའི་མཆོད་སྡོང་། ནུབ་ཏུ་རིན་ཆེན་སྐར་མདའ་མ་སེར་མོ་རིན་པོ་ཆེ། བྱང་དུ་གློག་ལག་མ་ལྗང་གུ་གློག་གི་ཕྲེང་བ་འཛིན་པ། བྱང་ཤར་དུ་སྒེག་མོ་དཀར་མོ་གཡས་ཁུ་ཚུར་རྐེད་པར་འཇོག་པ། ཤར་ལྷོར་བཞད་པ་མོ་དམར་མོ་གཡས་སོའི་ཕྲེང་བ་ཁ་འགྲམ་གཡས་སུ་འཛིན་པ། ལྷོ་ནུབ་ཏུ་གླུ་མ་སེར་མོ་གཡས་ཁ་ནས་ཚིགས་འབྱིན་པའི་ཚུལ་བྱེད་པ། ནུབ་བྱང་དུ་གར་མ་ལྗང་གུ་གཡས་གར་གྱི་ཚུལ་བྱེད་པ། པདྨ་གར་དབང་གི་དཀྱིལ་འཁོར་གྱི་ཤར་གྱི་འདབ་མ་ལ་པདྨ་དཀར་མོ་གཡས་པདྨ། ལྷོར་ཆོས་འབྱུང་མ་སེར་མོ་གཡས་ཆོས་འབྱུང་། ནུབ་ཏུ་ལྕགས་སྒྲོག་མ་ནག་མོ་ལྕགས་སྒྲོག བྱང་དུ་འཁྱུད་མ་ལྗང་གུ་གཡས་འཁྱུད་པའི་ཚུལ་བྱེད་པ། བྱང་ཤར་དུ་གླིང་བུ་མ་སེར་མོ་གླིང་བུ། ཤར་ལྷོར་པི་ཝང་མ་དཀར་མོ་པི་ཝང་། ལྷོ་ནུབ་ཏུ་རྔ་ཟླུམ་མ་ལྗང་གུ་རྔ་ཟླུམ། ནུབ་བྱང་དུ་རྫ་རྔ་མ་དཀར་མོ་རྫ་རྔ་འཛིན་པ། རྟ་མཆོག་གི་དཀྱིལ་འཁོར་གྱི་ཤར་གྱི་འདབ་མ་ལ་སྒོ་ལྕགས་མ་དཀར་མོ་གཡས་སྒོ་ལྕགས། ལྷོར་ལྡེ་ཀྱོག་མ་སེར་མོ་ལྡེ་ཀྱོག ནུབ་ཏུ་སྒོ་གླེགས་མ་དམར་པོ་སྒོ་གླེགས། བྱང་དུ་གོས་འཛིན་མ་སྔོན་མོ་གོས། བྱང་ཤར་དུ་སྤྱན་མ་དཀར་མོ་འཁོར་ལོའི་ལྟེ་བར་སྤྱན་གྱིས་མཚན་པ། ཤར་ལྷོར་མཱ་མ་ཀཱི་སྔོན་མོ་རྡོ་རྗེ། ལྷོ་ནུབ་ཏུ་གོས་དཀར་མོ་དམར་མོ་པདྨ། ནུབ་བྱང་དུ་སྒྲོལ་མ་ལྗང་གུ་ཨུཏྤལ་འཛིན་པ། ཕྱིའི་ཤར་སྒོར་ལྕགས་ཀྱུ་མ་དཀར་མོ་གཡས་ལྕགས་ཀྱུ། ལྷོ་སྒོར་ཞགས་པ་མ་སེར་མོ་ཞགས་པ། ནུབ་སྒོར་ལྕགས་སྒྲོག་མ་དམར་མོ་ལྕགས་སྒྲོག བྱང་སྒོར་དྲིལ་བུ་མ་ལྗང་གུ་དྲིལ་བུ་འཛིན་པ། དེ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་དང་ལྡན་པ། དབུ་སྐྲ་སེར་པོ་གྱེན་དུ་འབར་བ། གཡས་པས་རང་རང་གི་ཕྱག་མཚན་འཛིན་ཅིང་། གཡོན་པས་ཐུགས་ཀར་སྡིགས་མཛུབ་མཛད་པའོ། །མི་མགོ་སྐམ་པོ་ལྔ་ལྔས་དབུ་ལ་བརྒྱན་ཅིང་། སྐམ་པོ་ལྔ་བཅུའི་དོ་ཤལ་ཅན། གཅེར་བུ་ཕྱག་རྒྱ་ལྔས་བརྒྱན་པ། ཞབས་གཡོན་བརྐྱང་ཞིང་གཡས་བསྐུམས་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའོ། །གསུམ་པ་ལ་གཉིས་ཏེ། རྒྱུ་རྡོ་རྗེ་འཛིན་པ་འོད་དུ་ཞུ་བ། ཞུ་བ་ལ་གླུས་བསྐུལ་བའོ། །དང་པོ་ནི། དེ་ནས་གཙོ་བོ་ཡབ་ཡུམ་ལྔ་པོ་སྙོམས་པར་ཞུགས་པས། ནམ་མཁའ་ནས་ཨོཾ་ཨཱཿཧཱུྃ་ཧོཿདམར་པོ་གཉིས་དང་བཅས་པའི་རང་གི་བར་དོའི་ཤེས་པ་རིགས་ལྔ་སོ་སོའི་ཞལ་དུ་ཞུགས། ཡུམ་གྱི་མཁར་སླེབ་པའི་རྐྱེན་གྱིས་ཡབ་ཡུམ་རྣམས་རྗེས་ཆགས་ཀྱི་མེས་ཞུ་ནས་བྱང་ཆུབ་ཀྱི་སེམས་ཀྱི་རང་བཞིན་བདེ་བ་ཆེན་པོ་རྡོ་རྗེ་སེམས་དཔའི་ངོ་བོ་ཐིག་ལེ་ལྔར་གྱུར་པར་བསམ་མོ། །གཉིས་པ་ནི། དེ་ནས་རང་གི་ཤེས་པ་མཚམས་ཀྱི་ལྷ་མོ་བཞིའི་ང་རྒྱལ་དུ་འཕོས་ཏེ། ཐོག་མར་པུཀྐ་སཱིས་མི་བསྐྱོད་པ་ལ་བསྐུལ་བ་ནི། ཁྱོད་ནི་ཞེ་སྡང་རྡོ་རྗེ་ཡོངས་སྐྱོང་བ། །ཐུགས་དག་ཆོས་ནི་ཤིན་ཏུ་ཡོངས་དག་པ། །ལྷ་ཡི་ལུས་ནི་ཡང་དག་རྒྱས་མཛད་པ། །པུཀྐ་་་་་་གཞུང་དུ། སྦོས་མོ་སོགས་ཀྱི་གནས་ལུགས་པའི། །མེ་ཏོག་ལ་སོགས་རང་གི་གླུས། །དེ་ལྟར་གཙོ་བོ་གཞན་དག་ལའང་། །མཚམས་ཀྱི་ལྷ་མོ་རྣམས་ཀྱི་གླུས། །ཞེས་གསུངས་པ་ནི་དབུས་སུ་གཙོ་བོ་གང་ཡོད་པའི་མཚམས་མ་བཞིས་བསྐུལ་བའི་དོན་ཡིན་ལ། དེའི་ཚེ་མེ་ཏོག་མ་ནི་བདག་ལ་མྱུར་དུ་གཟིགས་ཞེས་སོགས་འདོན་པ་བསྒྱུར་དགོས་སོ།། སཱི་ནི་བདག་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་སྨན་སླད་དུ། །སྟོང་པ་ཉིད་སྤོངས་སྐྱེ་བ་བཞེས་པར་མཛོད། །དེ་བཞིན་དུ་རི་ཁྲོད་མས་རྣམ་སྣང་ལ། ཁྱོད་ནི་གཏི་མུག་རྡོ་རྗེ་ཡོངས་སྐྱོང་བ། །སྐུ་ཡི་དག་པ་ཆོས་ཀྱི་གཟུགས་བརྙན་གྱིས། །ལྷ་ཡི་ལུས་ནི་ཡང་དག་རྒྱས་མཛད་པ། །རི་ཁྲོད་མ་ནི་བདག་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་སྨན་སླད་དུ། །སྟོང་པ་ཉིད་སྤོངས་སྐྱེ་བ་བཞེས་པར་མཛོད། །ཙཎྜ་ལཱིས་འོད་དཔག་མེད་ལ། ཁྱོད་ནི་འདོད་ཆགས་རྡོ་རྗེ་ཡོངས་སྐྱོང་བ། །གསུང་ངག་ལེགས་པར་སོ་སོར་རྟོག་པ་ཡིས། །ལྷ་ཡི་ལུས་ནི་ཡང་དག་རྒྱས་མཛད་པ། །གཏུམ་པར་ལྡན་པ་བདག་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་དོན་གྱི་ཕྱིར། །སྟོང་པ་ཉིད་སྤོངས་སྐྱེ་བ་བཞེས་པར་མཛོད། །གཡུང་མོས་རྡོ་རྗེ་ཉི་མ་དང་། དོན་ཡོད་གྲུབ་པ་གཉིས་ལ། ཁྱོད་ནི་སངས་རྒྱས་ཐམས་ཅད་ཡོངས་སྐྱོང་བ། །གཟུགས་ཀུན་ནན་ཏན་ཐམས་ཅད་མཉམ་ཉིད་ཀྱིས། །ལྷ་ཡི་ལུས་ནི་ཡང་དག་རྒྱས་མཛད་པ། །ཌོམྦི་ནཱི་ནི་བདག་ལ་མྱུར་དུ་གཟིགས། །རྣམ་པར་འདྲེན་པ་འཇིག་རྟེན་དོན་གྱི་ཕྱིར། །སྟོང་པ་ཉིད་སྤོངས་སྐྱེ་བ་བཞེས་པར་མཛོད། །ཅེས་བསྐུལ་ལོ། །བཞི་པ་ནི། དེ་ལྟར་བསྐུལ་བའི་རྐྱེན་དང་། སྔོན་གྱི་སྨོན་ལམ་གྱི་འཕེན་པས་ཐིག་ལེ་དེ་རྣམས་ཆ་གཉིས་སུ་གྱུར་པ་ལས། དབུས་ཀྱི་ཐིག་ལེ་ཧཱུྃ་མཱྃ། ཤར་གྱི་ཐིག་ལེ་ཨོཾ་ལྃ། ལྷོའི་ཐིག་ལེ་ཏྲཱྃ་ཏཱྃ། ནུབ་ཀྱི་ཐིག་ལེ་ཨཱྃ་པཱྃ། བྱང་གི་ཐིག་ལེ་ཁྃ་ཏཱྃ་གི་ས་བོན་འོད་འབར་ཞིང་འཇིགས་པར་གྱུར། དེ་རྣམས་ཡོངས་སུ་གྱུར་པ་ལས་མཁའ་འགྲོ་ལྔའི་སྐུར་བཞེངས་པ་ནི། དབུས་སུ་ཐུགས་ཀྱི་མཁའ་འགྲོ་སྐུ་མདོག་དབང་པོ་སྔོན་པོ་ལྟ་བུ་ཞལ་བརྒྱད་ཕྱག་བཅུ་དྲུག་ཞབས་བཞི་པ། རྩ་བའི་ཞལ་སྔོ། གཡས་དཀར། གཡོན་དམར། གཞན་ཡུམ་ལ་སོགས་པ་རྒྱུའི་རྡོ་རྗེ་འཆང་དང་འདྲ། ཤར་དུ་རྟག་པ་སྐུ་མདོག་ཟླ་བ་ལྟར་དཀར་ཞིང་རྩ་བའི་ཞལ་དཀར་བ། གཡས་གནག གཡོན་དམར་བ། ལྷོར་རིན་ཆེན་རྒྱལ་པོ་སྐུ་མདོག་གསེར་བཙོ་མ་ལྟ་བུ་རྩ་བའི་ཞལ་སེར། གཡས་གནག གཡོན་དམར་བ། ནུབ་ཏུ་རྟ་མགྲིན་སྐུ་མདོག་པདྨ་རཱ་ག་ལྟར་དམར་བ་རྩ་བའི་ཞལ་དམར། གཡས་གནག གཡོན་དཀར་བ། བྱང་དུ་རྟ་མཆོག་སྐུ་མདོག་ཨིནྡྲ་ནཱི་ལ་མརྒད་ཟེར་ལྟར་ལྗང་བ། རྩ་ཞལ་རྟའི་གདོང་པ་ཅན་ལྗང་གུ། གཡས་གནག གཡོན་དཀར་བ། ཞལ་ཕྱག་ལྷག་མ་རྣམས་དང་ཡུམ་རྣམས་རྒྱུའི་རྡོ་རྗེ་འཆང་གི་སྐབས་ལྟར་གསལ་གདབ་བོ། །དེ་ནས་གཙོ་བོ་ལྔའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་སྔར་བཤད་པའི་རང་རང་གི་ས་བོན་རྣམས་ཡོངས་སུ་གྱུར་པ་ལས། རྡོ་རྗེ། འཁོར་ལོ། རིན་པོ་ཆེ། པདྨ། རལ་གྲི་རྣམས་རང་རང་གི་ས་བོན་གྱིས་མཚན་པ། དེ་ལས་འོད་ཟེར་འཕྲོས། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། ཡེ་ཤེས་སེམས་དཔའ་རང་རང་དང་འདྲ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཏིང་ངེ་འཛིན་སེམས་དཔའ་སོ་སོའི་ཕྱག་མཚན་ས་བོན་གྱིས་མཚན་པ། དེ་ལྟར་གཙོ་བོ་སེམས་དཔའ་སུམ་བརྩེགས་སུ་བསྒོམས་ནས། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་བྱིན་གྱིས་བརླབ་བོ། །དེ་་་་་་སྣོད་བཅུད་སྦྱང་བ་འདི་གུར་རྒྱན་དུ་གསུངས་པས་བྲིས་པ་ཡིན་ལ། མི་ཐུབ་ཟླ་བའི་གཞུང་དུ་མ་བཤད་ཅིང་། རྗེ་བཙུན་གོང་མས་མན་ངག་ལུགས་དང་འགྲེལ་པ་ལུགས་ལ་འདི་ཡོད་མེད་ཀྱི་ཁྱད་པར་གསུངས་པས་གུར་རྒྱན་ནས་གསུངས་པ་མན་ངག་ལུགས་ཀྱི་དབང་དུ་བྱས་སམ་སྙམ། ནས་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་གྱིས་སྣོད་ཐམས་ཅད་གཞལ་ཡས་ཁང་དང་། བཅུད་ཐམས་ཅད་མཁའ་འགྲོ་ལྔའི་ལྷ་ཚོགས་སུ་བྱས་པར་བསམ་མོ།། །།གཉིས་པ་ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་མཁའ་འགྲོ་ལྔའི་དཀྱིལ་འཁོར་གྱི་ལྷ་ཚོགས་རྟེན་དང་བརྟེན་པར་བཅས་པ་ལ་སངས་རྒྱས་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས། ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎཱི་ཀ་པཉྩ་ཌཱ་ཀི་ནཱི་བཛྲ་ས་མཱ་ཛཿ ཞེས་བརྗོད། ཚོགས་ཞིང་གི་སྐབས་ལྟར་ལྷ་མོ་བརྒྱད་ཀྱིས་མཆོད་ནས། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད། ཐུགས་ཀའི་ས་བོན་ལས་གཽ་རཱི་ལྕགས་ཀྱུ་ཐོགས་པ་དཔག་ཏུ་མེད་པ་སྤྲོས་ཏེ། ཡེ་ཤེས་པ་རྣམས་ཀྱི་ཐུགས་ཀར་རེག་པའི་ཚུལ་དུ་བྱས་པས་ཡེ་ཤེས་པ་རྣམས་སྲུང་བའི་འཁོར་ལོའི་ནང་དུ་དགུག་པར་བསམས་ལ་ལུས་ཀྱིས་ལྕགས་ཀྱུའི་ཕྱག་རྒྱ་བཅས་ཏེ། ངག་ཏུ་ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎཱི་ཀ་པཉྩ་ཌཱ་ཀི་ནཱི་ས་པ་རི་ཝཱ་ར་ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཞེས་བརྗོད་དེ། དེ་བཞིན་དུ་ཙཽ་རཱི་སེར་མོ་ཞགས་པ་ཐོགས་པ་དཔག་ཏུ་མེད་པ་སྤྲོས་ཏེ་ཡེ་ཤེས་པ་རྣམས་ཀྱི་མགྲིན་པར་རེག་པའི་ཚུལ་དུ་བྱས་པས། ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་རང་གི་དམ་ཚིག་གི་འཁོར་ལོ་ལ་བཅུག་པར་བསམས་ལ་ཞགས་པའི་ཕྱག་རྒྱ་དང་། ཨོཾ་བཛྲ་ཙཽ་རཱི་པྲ་བེ་ཤཱ་ཡ་ཧཱུྃ། བེ་ཏཱ་ལཱི་དམར་མོ་ལྕགས་སྒྲོག་ཐོགས་པ་དཔག་ཏུ་མེད་པ་སྤྲོས་ནས་དཀྱིལ་འཁོར་པ་ཐམས་ཅད་ཀྱི་ཞབས་ལ་ལྕགས་སྒྲོག་གིས་རེག་པའི་ཚུལ་དུ་བྱས་པས་ཡེ་ཤེས་པ་དང་དམ་ཚིག་པ་དབྱེར་མེད་གཅིག་ཏུ་གྱུར་པར་མོས་ལ་ལྕགས་སྒྲོག་གི་ཕྱག་རྒྱ་དང་། ཨོཾ་བཛྲ་བེ་ཏཱ་ལཱི་བནྡྷ་བྃ། གྷསྨ་རཱི་དྲིལ་བུ་ཐོགས་པ་དཔག་ཏུ་མེད་པ་སྤྲོས་ཏེ་གཞལ་ཡས་ཁང་གི་ཕྱི་ནང་ཐམས་ཅད་གང་བས་ལྷ་རྣམས་དགྱེས་པ་ཁྱད་པར་ཅན་བསྐྱེད་ཅིང་། རང་ཡེ་ཤེས་ཀྱི་འཁོར་ལོའི་ངོ་བོར་ང་རྒྱལ་བརྟན་པོ་བསྐྱེད་ནས་དྲིལ་བུའི་ཕྱག་རྒྱ་དང་། ཨོཾ་བཛྲ་གྷསྨ་རཱི་ཝ་ཤཾ་ཀུ་རུ་ཧོཿ ཞེས་བརྗོད་དེ་ཕྱག་རྒྱ་རྣམས་ནི་དེ་ཉིད་བསྡུས་པ་ནས་འབྱུང་བ་བཞིན་བྱ་སྟེ་སྒྲུབ་པའོ། །གསུམ་པ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་ནི། དེ་ནས་ལྷ་ཐམས་ཅད་ཀྱི་མིག་ཏུ་མྃ་ལས་གཏི་མུག་རྡོ་རྗེ་མ་དཀར་མོ། རྣ་བར་དྃ་ལས་ཞེ་སྡང་རྡོ་རྗེ་མ་སྔོན་མོ། སྣར་པྃ་ལས་སེར་སྣ་རྡོ་རྗེ་མ་སེར་མོ། ལྕེ་ལ་རྃ་ལས་འདོད་ཆགས་རྡོ་རྗེ་མ་དམར་མོ། དཔྲལ་བར་ཨོཾ་ལས་ཕྲག་དོག་རྡོ་རྗེ་མ་ལྗང་གུ། སྙིང་གར་ནྃ་ལས་བདག་མེད་རྣལ་འབྱོར་མ་ནག་མོ། སྤྱི་བོར་ཨྃ་ལས་སྐུ་རྡོ་རྗེ་མ་དཀར་མོ། མགྲིན་པར་ཨཱཿལས་གསུང་རྡོ་རྗེ་མ་དམར་མོ། སྙིང་གར་ཧཱུྃ་ལས་ཐུགས་རྡོ་རྗེ་མ་ནག་མོ། དེ་ཐམས་ཅད་ཀྱང་ཞལ་གཅིག་ཕྱག་གཉིས་མ་གཡས་གྲི་གུག་གཡོན་ཐོད་པ། གྲུ་མོ་ན་ཁ་ཊྭཱཾ་ག་འཛིན་ཅིང་རོའི་སྟེང་ན་སྐྱིལ་ཀྲུང་ཕྱེད་པའི་གར་གྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་བསམས་ལ། ཨོཾ་ཁེ་ཙ་རཱི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བྷཱུ་ཙ་རཱི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་པཱ་ཏཱ་ལ་བ་སཱི་ནི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་བྱིན་གྱིས་བརླབ་བོ།། །།གསུམ་པ་དབང་བསྐུར་བ་མི་བསྐྱོད་པའི་ཡན་ལག་ནི། ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་དེ་བཞིན་གཤེགས་པ་རིགས་ལྔ་ཡུམ་བཞི་སེམས་དཔའ་བརྒྱད་ལྷ་མོ་དྲུག་ཁྲོ་བོ་བཅུ། འཁོར་དཔག་ཏུ་མེད་པ་དང་བཅས་པ་སྤྱན་དྲངས་པར་བསམས་ལ། ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་པཉྩ་ཀུ་ལ་ས་པ་རི་ཝཱ་ར་བཛྲ་ས་མཱ་ཛཿཞེས་བརྗོད་ལ་ལྷ་མོ་བརྒྱད་ཀྱིས་མཆོད་ཅིང་། ཞེ་སྡང་རྡོ་རྗེར་ཕྱག་འཚལ་བསྟོད། །གཏི་མུག་རྡོ་རྗེར་ཕྱག་འཚལ་བསྟོད། །སེར་སྣ་རྡོ་རྗེ་བདག་ལ་སྩོལ། །འདོད་ཆགས་རྡོ་རྗེ་བདག་ལ་སྐྱོབས། །ཡིད་དང་ཕྲག་དོག་ཆེན་པོ་ཀུན། །རྡོ་རྗེ་ཅན་གྱི་དམ་ཚིག་མགོན། །ལས་རྣམས་ཐམས་ཅད་སྒྲུབ་མཛད་པ། །རྡོ་རྗེ་ཅན་ཀུན་བདག་དགྱེས་མཛོད། །ཅེས་པས་བསྟོད་ལ། བཅོམ་ལྡན་དེ་བཞིན་གཤེགས་པ་ཀུན། །ཞེས་སོགས་ཀྱིས་གསོལ་བ་བཏབ་པས། སངས་རྒྱས་དེ་རྣམས་ཁྲོ་ཆགས་ཀྱི་རྣམ་པ་ཧེ་རུ་ཀ་ཞལ་བརྒྱད་ཕྱག་བཅུ་དྲུག་པར་གྱུར་ནས། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་དང་། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ་ཞེས་གསུངས་ཞིང་། གཙོ་བོའི་ཐུགས་ཀ་ནས་སྐུ་གསུང་ཐུགས་ཀྱི་རྡོ་རྗེ་མ་གསུམ། གཟུགས་རྡོ་རྗེ་མ་ལ་སོགས་པ་ལྔ་སྟེ། རིག་མ་བརྒྱད་ཀྱིས་བུམ་པ་ཡེ་ཤེས་ཀྱི་བདུད་རྩི་ལྔས་གང་བས་ལྷ་ཐམས་ཅད་ཀྱི་སྤྱི་གཙུག་ཚངས་པའི་བུ་ག་ནས་དབང་བསྐུར། རིག་མ་རྣམས་ཀྱིས་རྡོ་རྗེའི་གླུ་ལེན། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། རིག་མ་རྣམས་ཀྱིས་མཆོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་པར་བསམ་ཞིང་། དབང་བསྐུར་བའི་ཆུ་རྒྱུན་དེས་ལུས་ཐམས་ཅད་གང་། སྒོ་གསུམ་གྱི་དྲི་མ་དག ཆུ་ལྷག་མ་ཡར་ལུད་པ་ལས་རྡོ་རྗེ་ཅན་ཡབ་ཡུམ་ལ་མི་བསྐྱོད་པ་གཙོ་བོར་གྱུར་པའི་རིགས་རྣམ་པ་ལྔས་དབུར་བརྒྱན་པའི་མི་བསྐྱོད་པའི་སྤྱི་བོར་རྡོ་རྗེ་ནག་པོ། གཙོ་བོ་ཡབ་ཡུམ་གཞན་བཞི་ལ་རང་རང་གི་རིགས་ཀྱི་བདག་པོས་དབུར་བརྒྱན་པའི་རྣམ་སྣང་གྱི་སྤྱི་བོར་འཁོར་ལོ་དཀར་པོ། རིན་ཆེན་འབྱུང་ལྡན་གྱི་སྤྱི་བོར་རིན་པོ་ཆེ་སེར་པོ་ཟུར་བརྒྱད་པ། འོད་དཔག་མེད་ཀྱི་སྤྱི་བོར་པདྨ་དམར་པོ། དོན་ཡོད་གྲུབ་པའི་སྤྱི་བོར་རལ་གྲི་ལྗང་གུ་རྣམས་ཀྱིས་རྒྱས་གདབ། འཁོར་གྱི་ལྷ་མོ་བྱང་ཤར་བ་དང་ཤར་ཕྱོགས་པ་རྣམས་ལ་མི་བསྐྱོད་པ། ཤར་ལྷོ་པ་དང་ལྷོ་ཕྱོགས་པ་རྣམས་ལ་རྣམ་སྣང་ཞེས་སོགས་མཛད་པ་ཡོད་ན་ཡང་། རང་རང་གི་གཙོ་བོས་དབུར་བརྒྱན་པ་འདི་ཉིད་གུར་ལེའུ་དང་པོའི་དག་པའི་སྐབས་དང་། མི་ཐུབ་ཟླ་བའི་གཞུང་གི་དགོངས་པ་ཡིན་ནོ།་་་་་།འཁོར་གྱི་ལྷ་མོ་རྣམས་ལ་རང་རང་གི་གཙོ་བོས་དབུར་བརྒྱན། ཕྱིའི་དཀྱིལ་འཁོར་གྱི་སྒོ་མ་བཞིའི་ལྕགས་ཀྱུ་མ་ལ་རྣམ་པར་སྣང་མཛད། ཞགས་པ་མ་ལ་རིན་ཆེན་འབྱུང་ལྡན། ལྕགས་སྒྲོག་མ་ལ་འོད་དཔག་མེད། དྲིལ་བུ་མ་ལ་དོན་ཡོད་གྲུབ་པས་དབུར་བརྒྱན་པར་བསམས་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་ང་རྒྱལ་གཟུང་ངོ་།། །།བཞི་པ་བདུད་རྩི་མྱང་བ་འོད་དཔག་ཏུ་མེད་པའི་ཡན་ལག་ནི། མདུན་དུ་བདུད་རྩི་དངོས་སུ་བཤམས་པ་ཡོད་དམ། མེད་ན་བསམས་པས་ཀྱང་རུང་སྟེ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ། ཅེས་པས་བགེགས་བསང་། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དེ་སྟོང་པར་བསམ་པས་སྦྱངས་ལ། རྫས་རྣམས་བསྐྱེད་པ་ནི། སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར་གཞུ་བདུངས་པ་ལྟ་བུ་གཡོ་བའི་བ་དན་གྱིས་མཚན་པ། དེའི་སྟེང་དུ་རྃ་ལས་མེའི་དཀྱིལ་འཁོར་གྲུ་གསུམ་འབར་བས་མཚན་པ། དེའི་སྟེང་དུ་ཨ་ལས་ཐོད་པ་དུམ་བུ་གསུམ་པ། མདོག་དཀར་བ། དཔྲལ་བ་རང་ལ་བསྟན་པ། དེའི་སྟེང་དུ་ཡང་ཨ་ལས་ཟླ་བའི་དཀྱིལ་འཁོར་ཉ་གང་བ། ཟླ་བའི་སྟེང་དུ་ཤར་དུ་གོ་ལས་བ་གླང་གི་ཤ ལྷོར་ཀུ་ལས་ཁྱིའི་ཤ ནུབ་ཏུ་ད་ལས་རྟའི་ཤ བྱང་དུ་ཧ་ལས་གླང་པོ་ཆེའི་ཤ དབུས་སུ་ན་ལས་མིའི་ཤ ཤ་ལྔ་པོ་རེ་རེའི་སྟེང་དུ་ཤར་དུ་བྷྲཱུྃ་ལས་དྲི་ཆེན། ལྷོར་ཨཱྃ་ལས་རཀྟ། ནུབ་ཏུ་ཛྲཱིཾ་ལས་བྱང་ཆུབ་ཀྱི་སེམས། བྱང་དུ་ཁྃ་ལས་ཤ་ཆེན་གྱི་དྭངས་མ། དབུས་སུ་ཧཱུྃ་ལས་དྲི་ཆུ། དེ་དག་གི་སྟེང་དུ་ཤར་དུ་བྷྲཱུྃ་མེ་ལོང་ལྟ་བུའི་ཡེ་ཤེས། ལྷོར་ཨཱྃ་མཉམ་པ་ཉིད་ཀྱི་ཡེ་ཤེས། ནུབ་ཏུ་ཛྲཱིཾ་སོ་སོར་རྟོག་པའི་ཡེ་ཤེས། བྱང་དུ་ཁྃ་བྱ་བ་གྲུབ་པའི་ཡེ་ཤེས། དབུས་སུ་ཧཱུྃ་ཆོས་ཀྱི་དབྱིངས་ཀྱི་ཡེ་ཤེས་སུ་མོས་པར་བྱ། ཡང་དེ་ཐམས་ཅད་ཐབས་ཤེས་ལས་བྱུང་བར་མཚོན་པའི་ཕྱིར་སྔར་གྱི་ཟླ་བའི་དཀྱིལ་འཁོར་གྱི་མཐའ་སྐོར་དུ་ཨཱ་ལི་བཅུ་དྲུག་གཡོན་སྐོར། ཀཱ་ལི་སོ་བཞི་གཡས་སྐོར་དུ་དགོད། དེ་ཐམས་ཅད་ཀྱི་སྟེང་གི་ནམ་མཁའ་ལ་ཨོཾ་ཡིག་དཀར་པོ་མགོ་ཐུར་དུ་ལྟ་བ། དེའི་སྟེང་དུ་རྃ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་བསམ་པར་བྱའོ། །དེ་ནས་བྱིན་གྱིས་བརླབ་པར་བྱ་སྟེ། སྟེང་གི་རྡོ་རྗེའི་ལྟེ་བའི་ཧཱུྃ་ལས་འོད་ཟེར་འོག་ཏུ་འཕྲོས་པས་རླུང་གི་དཀྱིལ་འཁོར་ལ་ཕོག དེ་གཡོས་པས་མེ་འབར། དེས་ཐོད་པའི་ནང་གི་ཤ་ལྔ་དང་བདུད་རྩི་ལྔ་པོ་ཐམས་ཅད་བསྐོལ་ཞིང་ཞུ་བའི་རླངས་པ་གྱེན་དུ་སོང་བ་ཨོཾ་དང་རྡོ་རྗེའི་ལྟེ་བའི་ཧཱུྃ་ལ་ཕོག དེ་གཉིས་ལས་བདུད་རྩིའི་རྒྱུན་འཛག ཡང་ཧཱུྃ་ལས་འོད་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པ་ཅན་དཔག་ཏུ་མེད་པ་སྤྱན་དྲངས་ཏེ། རྡོ་རྗེའི་ལྟེ་བའི་ཧཱུྃ་ལ་ཐིམ་པས་རྡོ་རྗེ་ལྗིད་དང་ལྡན་པར་གྱུར། རྡོ་རྗེ་ཉི་མ་ཨོཾ་དང་བཅས་པ་ཐོད་པའི་ནང་དུ་ལྷུང་སྟེ་འོད་དུ་ཞུ་ནས་དམ་ཚིག་གི་བདུད་རྩི་དང་གཉིས་སུ་མེད་པར་གྱུར་ཏེ། ཁ་དོག་དྲི་རོ་ནུས་པ་ཕུན་སུམ་ཚོགས་པའི་བདུད་རྩིའི་རྒྱ་མཚོ་ཆེན་པོར་བསམས་ལ་ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་ལན་གསུམ་བརྗོད་ལ་བྱིན་གྱིས་བརླབ། དེ་ནས་རང་དང་ལྷ་ཐམས་ཅད་ཀྱི་ལྕེ་ལ་རྡོ་རྗེ་ནས་འབྲས་ཙམ་རེ་བསམས་ལ་དེ་ལས་འོད་བྱུང་ནས་བདུད་རྩི་གསོལ་བས་ཚིམ་ཞིང་དགེས་པར་མོས་ཏེ། དངོས་སུ་བདུད་རྩི་ཡོད་ན་མཐེབ་སྲིན་གྱིས་ལྕེ་ལ་མྱངས་ཤིང་། ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་དཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་ང་རྒྱལ་གཟུང་ངོ་། །ལྔ་པ་མཆོད་པ་དོན་ཡོད་གྲུབ་པའི་ཡན་ལག་ནི། ཡེ་ཤེས་སེམས་དཔའི་ཐུགས་ཀ་ནས་སྤྲུལ་པའི་ལྷ་མོ་བརྒྱད་ཀྱིས་བདག་དང་དཀྱིལ་འཁོར་པ་ཐམས་ཅད་ལ་མཆོད་པར་མོས་ཏེ། དཀར་མོ་རི་དྭགས་སོགས་དང་། ཨོཾ་སརྦ་ཏ་ཐཱ་ག་ཏ་པུ་ཙ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་ང་རྒྱལ་གཟུང་ངོ་། །དྲུག་པ་བསྟོད་པ་རིན་ཆེན་འབྱུང་ལྡན་གྱི་ཡན་ལག་ནི། ལྷ་མོ་དེ་རྣམས་ཀྱིས་བདག་དང་དཀྱིལ་འཁོར་པ་ལ་བསྟོད་པར་བསམ་ཞིང་། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱིས་མཆོག་བརྙེས་ཏེ། །ཁྱོད་ཀྱིས་རྒྱུ་དང་མི་རྒྱུའི་འགྲོ་བ་ཀུན་བརྒྱན་ཅིང་། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲོས་པ་རྡོ་རྗེ་བསྒྲུབ་པའི་ཡིད། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཅིང་ང་རྒྱལ་གཟུང་ངོ་། །གཉིས་པ་རྫོགས་པའི་རིམ་པ་ནི་མན་ངག་ཐོབ་པ་རྣམས་ཀྱིས་གཏུམ་མོ་འཁོར་ལོ་བཞིའི་དམིགས་པ་རྒྱས་པར་བསྒོམས་ཏེ། མན་ངག་ལས་འབྱུང་བ་ལྟར་རོ། །ཏིང་ངེ་འཛིན་གསུམ་གྱིས་འཆིང་བའི་ཚེ་རྒྱུ་རྡོ་རྗེ་འཛིན་པ་བསྐྱེད་པ་ཡན་ཆད་དང་པོ་སྦྱོར་བ། འཁོར་གྱི་ལྷ་མོ་དབྱུང་བ་ནས་ཡན་ལག་དྲུག་རྫོགས་པའི་བར་དཀྱིལ་འཁོར་རྒྱལ་མཆོག་ཏུ་བྱས་ནས། ཕྲ་མོའི་རྣལ་འབྱོར་མན་ཆད་ལས་རྒྱལ་མཆོག་སྟེ། དེ་བསྒོམ་པར་འདོད་ན་ལུས་རྡོ་རྗེའི་སྐྱིལ་ཀྲུང་སོགས་རྣམ་སྣང་གི་ཆོས་བདུན་དང་ལྡན་པར་བྱས་ནས། དམིགས་པའི་རིམ་པ་ནི་དབུས་ཀྱི་གཙོ་བོ་གང་ཡིན་པའི་ཐུགས་ཀར་ཟླ་བའི་སྟེང་དུ་ཧཱུྃ་ལས་རྡོ་རྗེ་སྔོན་པོ་ནས་འབྲས་ཙམ་ལྟེ་བ་ལ་ཧཱུྃ་གིས་མཚན་པ་དེ་ལས་འོད་ཐུར་དུ་འཕྲོས་པས་ལྟེ་བའི་ཨྃ་མེ་འབར་བས་སྔར་གྱི་ཧཱུྃ་ཞུ་ནས་ཐིག་ལེར་བྱས་པ་ཡུམ་གྱི་ཀུནྡ་སྣ་རྩེར་ཕབ་ལ་ཡུངས་ཀར་གྱི་ཆ་ཙམ་དུ་བསམ། དེའི་ནང་དུ་རྡོ་རྗེའམ་འཁོར་ལོ་ལ་སོགས་པ་ཕྱག་མཚན་ཕྲ་མོ་དེའི་ལྟེ་བར་བསྡུས་པའི་དཀྱིལ་འཁོར་རྟེན་དང་བརྟེན་པར་བཅས་པ་ཤིན་ཏུ་ཕྲ་བ། དེའི་ཡུམ་མཛེས་སྤྱིར་རྩེར་ཡང་ཐིག་ལེ་སྐྲའི་རྩེ་མོ་བརྒྱ་སྟོང་གི་ཚད་ཙམ་དེར་ཡང་ཕྱག་མཚན་ས་བོན་གྱིས་མཚན་པ་ཤིན་ཏུ་ཕྲ་བ་བསྒོམས་ལ། ས་བོན་ལས་འོད་འཕྲོས་པས་ནང་ནས་རིམ་གྱིས་གསལ་བཏབ་ལ། སྣོད་བཅུད་ཀྱི་བར་དུ་གསལ་བར་བྱས། དེ་དག་འོད་ཕུང་དུ་བྱས་ནས་རིམ་གྱིས་བསྡུས། ས་བོན་ཕྲ་མོ་ལ་སེམས་གཟུང་། དེ་ལ་སྐྱོ་བའམ་འཕྲོ་ན། དེའང་མི་དམིགས་པར་བྱས་ཏེ་སྟོང་པའི་ངང་དུ་གཞག དེ་ལ་མི་གནས་ན་ཡང་ས་བོན་ལས་རིམ་གྱིས་ལངས་ཏེ་སྣོད་བཅུད་ཀྱི་བར་དུ་གསལ་གདབ། དེ་བཞིན་དུ་ལངས་ནས་ཡང་ཡང་དུ་བསྒོམས་པས་གཞུང་ནས་བཤད་པའི་རྟགས་རྣམས་འབྱུང་བར་འགྱུར་རོ། །འདི་ནི་དམིགས་པ་ཕྲ་བ་ལ་རྫོགས་རིམ་དུ་བཏགས་པ་སྟེ་ཟབ་མོ་བསྐྱེད་པའི་རིམ་པ་ཡིན་ནོ། །རྗེས་རྫོགས་པར་བྱེད་པ་ལམ་གྱི་ཡན་ལག་ལ། དང་པོ་བཟླས་པའི་རྣལ་འབྱོར་ནི། དེ་ལྟར་རིམ་པ་གཉིས་བསྒོམས་པས་སྐྱོ་ན་སྔགས་བཟླ་བར་བྱ་སྟེ། ཤེལ་ལམ་ཉ་ཕྱིས་ལ་སོགས་པ་ལས་དང་རྗེས་སུ་མཐུན་པའི་ཕྲེང་བ་མཚན་ཉིད་དང་ལྡན་པ་བཟུང་ལ། རང་ལྷའི་ང་རྒྱལ་གྱིས་རང་གི་ལག་པ་གཡོན་པ་ཨཱཿལས་པདྨ་འདབ་མ་ལྔ་པ། དེའི་ལྟེ་བར་ཟླ་བའི་དཀྱིལ་འཁོར་ལ་ཨ་སོགས་དབྱངས་ཡིག་བཅུ་དྲུག་གིས་བསྐོར་བའི་དབུས་སུ་ཨཱཿས་མཚན་པ། ལག་པ་གཡས་པ་ཧཱུྃ་ལས་རྡོ་རྗེ་རྩེ་ལྔ་པ། ལག་པའི་མཐིལ་དུ་ཉི་མའི་དཀྱིལ་འཁོར་ལ་ཀ་སོགས་གསལ་བྱེད་སོ་བཞིས་གཡས་སུ་བསྐོར་བའི་ལྟེ་བ་ལ་ཡི་གེ་ཧཱུྃ་བསམས་ལ། བསང་སྦྱང་བྱས་པའི་ཕྲེང་བ་པད་སྐོར་སྔོན་དུ་འགྲོ་བས་བླངས་ཏེ་ལག་པ་གཉིས་ཁ་སྦྱར་གྱི་བར་དུ་གཞག དེ་གཉིས་ཀྱི་བར་དུ་བདུད་རྩིའི་ཡི་གེ་སུྃ་དཀར་པོ་འོད་ཟེར་འཕྲོ་བ་དམིགས་ཤིང་། རྡོ་རྗེ་དང་པདྨ་སྙོམས་པར་ཞུགས་པའི་བྱང་ཆུབ་ཀྱི་སེམས་སུྃ་ལ་ཁྱབ། དེས་ཨཱ་ལི་དང་ཀཱ་ལི་ལ་ཁྱབ། དེ་དག་དང་ཕྲེང་བ་གཉིས་སུ་མེད་པར་བསམས་ལ། ཨོཾ་པ་དེ་པ་དེ་མ་ཧཱ་ཛྙཱ་ན། སརྦ་བུདྡྷ་མ་ཡཾ་བྷ་ཝེ་ཏ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱ་ཁཾ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབས་ཏེ། འདི་དང་པོ་བྱིན་གྱིས་བརློབ་པའི་དུས་སུ་ཕྲེང་སྐོར་གཅིག་བཟླས་ཤིང་། ཕྱིས་བཟླས་པ་ནམ་བྱེད་དུས་ཀྱང་གསུམ་ལ་སོགས་པས་བསྔགས་ན་མཐུ་དང་ལྡན་པར་འགྱུར་རོ། །བཟླས་པའི་དམིགས་པ་ནི་གཙོ་བོ་རྣམས་ཀྱི་སྔགས་བཟླ་བའི་དུས་སུ། རང་རང་གི་ཡུམ་གྱི་ཐུགས་ཀའི་ས་བོན་ལས་སྔགས་ཀྱི་ཕྲེང་བ་བྱུང་། ཡུམ་གྱི་ཞལ་ནས་འཐོན། ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད། རྡོ་རྗེའི་ལམ་ནས་བྱུང་སྟེ་ཡུམ་གྱི་པདྨར་ཞུགས། སྐུའི་དབྱིབས་བརྒྱུད་དེ་ཡང་སྔར་བཞིན་དུ་འཁོར། སྔགས་ཀྱི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ་བར་བསྒོམ་ཞིང་བཟླ། འཁོར་གྱི་སྔགས་ཟློས་པའི་དུས་སུ་སྔར་བཞིན་འཁོར་བ་ལ་དམིགས་ནས་བཟླས་པའི་སྔགས་ཀྱི་འོད་ཟེར་ལྷ་གང་ལ་ཕོག་པ་དེ་བདག་གི་དབང་དུ་འདུས་པར་བསམ་ཞིང་ཕྲིན་ལས་ལ་བསྐུལ་བར་བསྒོམ། སྔགས་ཀྱི་འོད་ཟེར་ཞི་བ་ལ་དཀར་པོ་ལ་སོགས་པ་ལས་དང་རྗེས་སུ་མཐུན་པ་སྟེ། བཟླས་པའི་སྔགས་ནི། ཨོཾ་དྷ་ར་དྷ་ར། དྷ་ར་ཡ་དྷ་ར་ཡ། མར་དྷ་མར་དྷ་བཛྲ་དྷྲྀཀ་ཕཊ་སྭཱ་ཧཱ། ཨོཾ་ཤཱ་ཤྭ་ཏ་པ་ར་མ་ཤཱ་ཤྭ་ཏ། ཨེ་ཧྱེ་ཧི། ཛི་ན་ཛིཀ་ཕཊ་སྭཱ་ཧཱ། ཨོཾ་བཛྲ་སཱུརྻ་ཏ་མོ་བི་དྷ་མ་ཧཱ་ས་མ་ཡ་སཏྭཾ་ཨ་ཧཾ་རཏྣ་དྷྲྀཀ་ཕཊ་སྭཱ་ཧཱ། ཨོཾ་བཛྲ་དྷརྨཱ་ས་མ་ཡ་སཏྭཾ། ཧུ་ལུ་ཧུ་ལུ་ཨ་རོ་ལྀཀ་ཕཊ་སྭཱ་ཧཱ། ཨོཾ་ཕུ་ཕུ་ཕུ་ཧི་ཧི་ཧི། པྲཛྙཱ་དྷྲྀཀ་ཕཊ་སྭཱ་ཧཱ། ཡབ་ལྔའི་སྔགས་སོ། །ཨོཾ་ཨཱཿདྭེ་ཥ་ར་ཏཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿམོ་ཧ་ར་ཏཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿརཏྣ་ར་ཏཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿརཱ་ག་ར་ཏཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ར་ཏཱི་ཧཱུྃ་ཕཊ་སྭཱ་ཧཱ། ཡུམ་ལྔའི་འོ། །ཨོཾ་ཨཱཿགྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿགྃ་བཛྲ་གཽ་རཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿཙྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿཙྃ་བཛྲ་ཙཽ་རཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿབྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿབྃ་བཛྲ་བེ་ཏཱ་ལཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿགྷཾ་ཧཱུྃ་ཕཊ་སྭཱ་ཧཱ། ཨོཾ་ཨཱཿགྷཾ་བཛྲ་གྷསྨ་རཱི་ཧཱུྃ་ཕཊ་སྭཱ་ཧཱ། དེ་བཞིན་དུ་ཐོག་མཐའ་རྣམས་དང་བཛྲ་ཐམས་ཅད་ལ་སྦྱར་ཏེ། པྃ་པུཀྐ་སཱི། ཤྃ་ཤ་བ་རཱི། ལྃ་ཙཎྜ་ལཱི། ཌཾ་ཌོམྦི་ནཱི། རྡོ་རྗེ་ཅན་གྱི་ལྷ་མོ་རྣམས་ཀྱི་མཚན་གྱི་སྔགས་སོ། །སྃ་སནྟ་ཤེ པྃ་པཱ་ཤ་ནི། བྃ་བ་གུ་རེ། ཨྃ་ཨཾ་གུ་ཤ པྃ་པུཥྤཾ། དྷཱྃ་དྷཱུྃ་པྃ། དཱྃ་དཱི་པྃ། གྃ་གནྡྷྃ། ཕན་པའི་ལྷ་མོ་རྣམས་ཀྱིའོ། །སྃ་སཱུརྻ་ཧསྟ། དཱྃ་དཱི་པྃ། རྃ་རཏྣ་ཨཱ་ལོ་ཀེ ཏྃ་ཏེ་ཊི་ཀ་རེ། ལཱྃ་ལཱ་སྱེ། ཧྃ་ཧ་སྱེ། གཱྃ་གཱིརྟི། ནཱྃ་ནྲྀ་ཏྱེ། རྡོ་རྗེ་ཉི་མའི་ལྷ་མོ་རྣམས་ཀྱིའོ། །པྃ་པདྨེ། དྷཱྃ་དྷརྨོ་ད་ཡ། སྥྃ་སྥོ་ཊེ། ཤཱྃ་ཤཱི་ཤེ། ཝྃ་ཝཾ་སྱེ། བཱྃ་བཱི་ནི། མྃ་མུརྫི། མྃ་མྲྀ་ཏངྒེ། པདྨ་གར་དབང་གི་ལྷ་མོ་རྣམས་ཀྱིའོ། །ཏྃ་ཏ་ལ། ཀྃ་ཀྲྀཉྩ། ཀྃ་ཀི་པ་ཊ། པྃ་པ་ཊ་དྷ་རི་ནི། ལྃ་ལོ་ཙ་ནི། མཱྃ་མཱ་མ་ཀཱི། པྃྃ་པཎྜ་ལི་ཝཱ་སི་ནི། ཏཱྃ་ཏཱ་རེ། རྟའི་རྒྱལ་པོའི་ལྷ་མོ་རྣམས་ཀྱིའོ། །ཨྃ་ཨཾ་ཀུ་ཤ པཱྃ་པཱ་ཤ སྥྃ་སྥོ་ཊ། གྷྃ་གྷཎྜེ། སྒོ་མ་བཞིའི་ས་བོན་དང་མཚན་གྱི་སྔགས་ཏེ་དེ་ནི་ཅི་རིགས་པ་བཟླ་བར་བྱའོ། །དེ་ནས་མཆོག་བསྒྲུབ་པ་ལ་ནི་དག་པ་རྗེས་སུ་དྲན་པ་གལ་ཆེ་བས་དག་པ་རྗེས་སུ་དྲན་པ་ནི། སྙིང་རྗེ་ཡི་ནི་སྤྱན་དག་དམར། །སྤྱན་གྱི་རྣམ་དག་རྡོ་རྗེ་གསུམ། །ཞལ་རྣམས་རྣམ་ཐར་བརྒྱད་པོ་ཡིན། །ཕྱག་ནི་སྟོང་པ་བཅུ་དྲུག་ཡིན། །བསྡུ་བའི་དངོས་པོ་བཞི་ཡིས་ནི། །ཞབས་ནི་བཞི་པར་བརྗོད་པའོ། །ཕྱག་རྒྱ་ཡི་ནི་སངས་རྒྱས་ལྔ། །ཁྲོ་བོ་གདུག་པ་འདུལ་བའོ། །བདེན་པ་རྣམ་པ་བཞི་པོ་ནི། །རུས་པ་རུ་ནི་ཡོངས་གྱུར་པའོ། །གཟུགས་ཕུང་རྡོ་རྗེ་མ་རུ་གྱུར། །ཚོར་བ་གསང་བའི་གཽ་རཱི་མ། །འདུ་ཤེས་དེ་བཞིན་ཆུ་མ་སྟེ། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་ཉིད་ནི་བདག་མེད་མ། །ཕུང་པོ་དོན་དམ་པར་ན་མེད། །སྐྱེ་མཆེད་དྲུག་ནི་རྣམ་དག་ཕྱིར། །དེ་རྣམས་ཡན་ལག་དྲུག་ཏུ་འགྱུར། །ཞེ་སྡང་རྡོ་རྗེ་འཁོར་ལོ་མ། །ཆུ་མ་རོ་ཡི་རྡོ་རྗེ་ཡིན། །ཕྲག་དོག་རྡོ་རྗེ་གཏི་མུག་མ། །རྡོ་རྗེ་རྡོ་རྗེ་མཁའ་འགྲོ་མ། །སེར་སྣ་གསང་བའི་གཽ་རཱི་མ། །ཡིད་ལ་བདག་མེད་རྣལ་འབྱོར་མ། །ས་ནི་པུཀྐ་སཱི་རུ་བཤད། །ཆུ་ཁམས་རི་ཁྲོད་མ་རུ་བརྗོད། །མེ་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲགས། །གཟུགས་ལ་དཀར་མོར་རྟག་ཏུ་བཤད། །སྒྲ་ལ་ཆོམ་རྐུན་མ་རབ་གྲགས། །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་ཡི་གཟུགས། །རེག་ལ་ས་སྤྱོད་མ་རུ་བརྗོད། །ཆོས་ཀྱི་ཁམས་ལ་མཁའ་སྤྱོད་མའོ། །གཙོ་བོ་ལྔའི་ཕྱག་མཚན་གྱི་དག་པ་ནི། གློ་དང་དབུགས་དང་དེ་བཞིན་སྨྱོ། །ཁོང་སྐམ་མཛེ་དང་རྐང་ཤུ་དང་། །མཚེར་པ་མཆིན་པའི་རང་བཞིན་ཀྱང་། །གླང་པོ་ལ་སོགས་རབ་ཏུ་གྲགས། །རྫི་མ་བྱི་དང་སོ་ནད་དང་། །མཁྲིས་པ་ཁྲག་དང་དེ་བཞིན་རླུང་། །བད་ཀན་འཛག་དང་ལུས་གས་དང་། །སྐྱ་རྦབ་འབྲས་ནི་རྨ་བྱ་སོགས། །རྐང་བབ་ཚིལ་ནད་རླིག་སྐྲངས་དང་། །རྒྱུ་མ་འཕེལ་དང་ལྷོག་པ་དང་། །འཁྲུ་དང་རིམས་ནད་རབ་གས་ནི། །ཀ་རན་ཏ་སོགས་རབ་ཏུ་གྲགས། །རྗེད་བྱེད་དང་ནི་ཕོ་མཚན་ལུག །ཆུ་སྲི་བ་དང་རྡོ་ཆུ་ཅན། །གཞང་ནད་སྐྲན་དང་བཀྲེས་ནད་དང་། །མིག་སེར་དོམ་ལ་སོགས་པའོ། །རླུང་དང་མཁྲིས་པ་མ་ཞུ་བའོ། །སྒྲིབ་གཡོགས་རབ་རིབ་གཅིན་བསྲི་བ། །གཞོག་ཕྱེད་ན་དང་ལྐོག་འབྲས་དང་། །རླུང་རྒྱས་གཟའ་ལྷག་ལ་སོགས་པའོ། །ཞེས་པ་དང་། རྒྱས་པར་ན་རྒྱུད་ནས་གསུངས་པའི་ལྷ་སོ་སོའི་ཕྱག་མཚན་གྱི་དག་པ་དང་། དེ་བཞིན་དུ་གཞལ་ཡས་ཁང་གི་དག་པ་ཡང་དྲན་པར་བྱ། མདོར་ན་གཞལ་ཡས་ཁང་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། དུར་ཁྲོད་བརྒྱད་ནི་ལུས་ཀྱི་བུ་ག་བརྒྱད་དང་། བསྟོད་པ་དང་སྨད་པ་ལ་སོགས་པ་འཇིག་རྟེན་གྱི་ཆོས་བརྒྱད་དག་པ་ཡིན་ནོ་ཞེས་མོས་པ་ཙམ་བྱའོ། །དེ་ནས་སྤྱོད་ལམ་གྱི་རྣལ་འབྱོར་ལ་སོགས་པ་ལ་འཇུག་པ་ན་རང་གིས་བསྒོམས་པའི་དཀྱིལ་འཁོར་བསྡུ་བར་བྱ་སྟེ། དེའང་རང་གི་ཐུགས་ཀའི་ས་བོན་ལས་འོད་འཕྲོས་པས་ཁམས་གསུམ་སྣོད་བཅུད་ཐམས་ཅད་དཀྱིལ་འཁོར་འཁོར་ལོའི་རྣམ་པར་གནས་པ་ལ་ཕོག དེ་ཐམས་ཅད་འོད་ཟེར་གྱི་རྣམ་པར་གྱུར་ཏེ་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ་བསྡུ། དེ་ཕྱིའི་གཞལ་ཡས་ཁང་ལ་བསྡུ། ཕྱིའི་གཞལ་ཡས་ཁང་ནང་གི་གཞལ་ཡས་ཁང་ལ་བསྡུ། ནང་གི་གཞལ་ཡས་ཁང་ལྔ་པོ་རང་རང་གི་འཁོར་གྱི་ལྷ་མོ་བརྒྱད་ལ་བསྡུ། ལྷ་མོ་རྣམས་རང་རང་གི་གཙོ་བོའི་ཞལ་ལ་བསྡུ། ཕྱོགས་ཀྱི་མཁའ་འགྲོ་བཞིའི་ཡུམ་ཡབ་ལ་བསྡུ། ཡབ་བཞི་པོ་དབུས་ཀྱི་གཙོ་བོ་ལ་བསྡུས་ཏེ། རང་གཙོ་བོ་ཡབ་ཡུམ་གྱི་ང་རྒྱལ་གྱིས་གནས་པར་བྱའོ།། །།མཆོད་གཏོར་གྱི་རྣལ་འབྱོར་ལ་མཆོད་པའི་རྣལ་འབྱོར་ནི་བླ་མ་དག་གིས་མཛད་པ་ལས་ཤེས་པར་བྱས་ལ། གཏོར་མའི་རྣལ་འབྱོར་བརྗོད་ན། ཡོ་བྱད་ནི་ཅི་འབྱོར་པ་ཡིན་ན་ཡང་། ཁྱད་པར་དུ་དཀུ་བག་ཅན་དང་འབྲེལ་པ་ཡིན་ལ། དེའང་འཇིག་རྟེན་དང་འཇིག་རྟེན་ལས་འདས་པའི་ཇི་ལྟར་དགོས་པ་བཤམ། བདུད་རྩི་རིལ་བུ་ཡོད་ན་སྦགས། མེད་ན་ནང་མཆོད་བྱིན་གྱིས་བརླབས་པས་བྲན། ཆུ་དང་ཆང་གིས་སྦྱངས་ལ་ཆོ་ག་ནི་ལྷ་དང་འབྱུང་པོ་ཐ་མི་དད་དུ་གཏོང་བའི་ལུགས་སུ་བརྗོད་ན། རྫས་ཀྱི་ཏིང་ངེ་འཛིན་དང་། མགྲོན་གྱི་ཏིང་ངེ་འཛིན་དང་། གཏོར་མ་དབུལ་བ་ལ་སོགས་པ་དང་། མཇུག་གི་ཆོ་ག་སྟེ་བཞིས་ཤེས་པར་བྱའོ། །དེ་ལ་དང་པོ་ནི་བདུད་རྩི་མྱང་བའི་སྐབས་སུ་ཤེས་པར་བྱའོ། །གཉིས་པ་ལ་མགྲོན་བསྐྱེད་པ་ནི། མདུན་བསྐྱེད་དང་འབྲེལ་ན་དུར་ཁྲོད་བརྒྱད་དུ་ཕྱོགས་སྐྱོང་བརྒྱད་དང་། དབང་ལྡན་གྱི་དུར་ཁྲོད་ཀྱི་སྟེང་གི་ཆ་ལ་ཆོས་འབྱུང་གི་ནང་དུ་སྐུ་རྡོ་རྗེ་ལྷ་ཆེན་བརྒྱད་དང་བཅས་པ་དང་། སྲིན་པོའི་དུར་ཁྲོད་ཀྱི་འོག་གི་ཆ་ལ་ཆོས་འབྱུང་གི་ནང་དུ་གསུང་རྡོ་རྗེ་ཀླུ་ཆེན་བརྒྱད་དང་བཅས་པ་བསྐྱེད་པ་ཡིན་ལ། མདུན་བསྐྱེད་དང་མ་འབྲེལ་ན་མདུན་གྱི་ནམ་མཁར་སྐད་ཅིག་གིས་ཨེ་ལས་ཆོས་ཀྱི་འབྱུང་གནས་སུམ་བརྩེགས་བསྒོམ། དེའི་ནང་དུ་པྃ་སུམ་བརྩེགས་ལས་པདྨ་འདབ་བརྒྱད་སུམ་བརྩིགས་བསྒོམས་ནས། སྟེང་གི་ཆོས་འབྱུང་ལ་གནས་པའི་པདྨའི་ལྟེ་བ་དང་འདབ་མ་བརྒྱད་ལ། ཨོཾ་དགུ་ཡོངས་སུ་གྱུར་པ་ལས། དབུས་སུ་སྐུ་རྡོ་རྗེ། ཤར་དུ་དབང་ཕྱུག་ཆེན་པོ། ལྷོར་ལྷའི་དབང་པོ། ནུབ་ཏུ་ཚངས་པ། བྱང་དུ་ཁྱབ་འཇུག ཤར་ལྷོར་འདོད་པའི་དབང་ཕྱུག ལྷོ་ནུབ་ཏུ་ཚོགས་ཀྱི་བདག་པོ། ནུབ་བྱང་དུ་བྷྲྀང་གི་རི་ཏི། བྱང་ཤར་དུ་གཞོན་ནུ་ཀཱརྟི་ཀ་སྟེ། ཐམས་ཅད་ཀྱང་སྐུ་མདོག་དཀར་པོ། ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་དྲིལ་བུ་འཛིན་པ། རང་དང་འདྲ་བའི་རིག་མས་འཁྱུད་པ། ཞབས་གཡས་བརྐྱང་བས་བཞུགས་པར་བསམ། བར་གྱི་པདྨ་འདབ་མ་བརྒྱད་པའི་ལྟེ་བར་མཁའ་འགྲོ་ལྔའི་དཀྱིལ་འཁོར་སྐད་ཅིག་གིས་བསམ། འདབ་མའི་ཧཱུྃ་བརྒྱད་ཡོངས་སུ་གྱུར་པ་ལས། ཤར་དུ་བརྒྱ་བྱིན། ལྷོར་གཤིན་རྗེ། ནུབ་ཏུ་ཆུ་ལྷ། བྱང་དུ་གནོད་སྦྱིན། ཤར་ལྷོར་མེ་ལྷ། ལྷོ་ནུབ་ཏུ་སྲིན་པོ། ནུབ་བྱང་དུ་རླུང་ལྷ། བྱང་ཤར་དུ་དབང་ལྡན་ཏེ། ཐམས་ཅད་ཀྱང་སྐུ་མདོག་སྔོན་པོ། གཞན་རྣམས་སྔ་མ་བཞིན་ནོ། །འོག་གི་པདྨ་འདབ་བརྒྱད་ལྟེ་བ་དང་བཅས་པ་ལ་ཨཱཿདགུ་ཡོངས་སུ་གྱུར་པ་ལས། དབུས་སུ་གསུང་རྡོ་རྗེ། ཤར་དུ་སྟོབས་ཀྱི་རྒྱུ། ལྷོར་དུང་སྐྱོང་། ནུབ་ཏུ་མཐའ་ཡས། བྱང་དུ་ནོར་རྒྱས། ཤར་ལྷོར་འཇོག་པོ། ལྷོ་ནུབ་ཏུ་རིགས་ལྡན། ནུབ་བྱང་དུ་པདྨ། བྱང་ཤར་དུ་པདྨ་ཆེན་པོ་སྟེ་ཐམས་ཅད་ཀྱང་སྐུ་མདོག་དམར་པོ། གཞན་རྣམས་སྐུ་རྡོ་རྗེ་དང་འདྲ་བར་བསྐྱེད། དེ་ནས་མགྲོན་དགུག་པ་ནི་སྟེང་གི་ལྷ་ཐམས་ཅད་ལྷ་ཆེན་བརྒྱད་ལ་དགུག ས་སྟེང་ན་རྒྱུ་བ་ཐམས་ཅད་ཕྱོགས་སྐྱོང་བརྒྱད་ལ་དགུག ས་འོག་ན་གནས་པ་ཐམས་ཅད་ཀླུ་ཆེན་བརྒྱད་ལ་དགུག་སྟེ་དེ་དག་དང་གཉིས་སུ་མེད་པར་བསམ། དེ་ནས་མགྲོན་བྱིན་གྱིས་བརླབ་པ་ནི་རང་གི་ཐུགས་ཀའི་ས་བོན་གྱི་འོད་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་མཁའ་འགྲོ་ལྔའི་དཀྱིལ་འཁོར་སྐུ་གསུང་ཐུགས་ཀྱི་རྡོ་རྗེ་འཁོར་དང་བཅས་པའི་རྣམ་པར་སྤྱན་དྲངས་ཏེ། ལྕགས་ཀྱུ་ལ་སོགས་པའི་ཕྱག་རྒྱ་རྣམས་བྱ་ཞིང་། ངག་ཏུ། ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་ཀཱ་ཡ་ཝཱཀྐ་ཙིཏྟ། གཽ་རཱི་ཨཱ་ཀརྵ་ཡ་ཛཿ ཞེས་སོགས་བརྗོད་པས་དགུག་གཞུག་བཅིང་དབང་དུ་བྱས་ནས། འཇིག་རྟེན་པའི་མགྲོན་ཐམས་ཅད་ཡེ་ཤེས་པར་བསྒྱུར། ཡང་དེ་ཐམས་ཅད་ཀྱི་མིག་ཏུ་གཏི་མུག་རྡོ་རྗེ་མ། ཞེས་བྱ་བ་ལ་སོགས་པ་མདོར་བསྡུས་པའི་ཚུལ་གྱིས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་བོ། །མགྲོན་ལ་དབང་བསྐུར་བ་ནི་སླར་ཡང་རང་གི་ཐུགས་ཀའི་ས་བོན་གྱི་འོད་ཀྱིས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས་ལ་ཡིད་ལས་བྱུང་བའི་མཆོད་པས་མཆོད། དབང་བསྐུར་བར་གསོལ་བ་འདེབས་པ་དང་། དབང་བསྐུར་གྱི་ཚིགས་བཅད་དང་སྔགས་བརྗོད་པས་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་ལུས་ཐམས་ཅད་གང་། ཆུ་ལྷག་མ་ཡར་ལུད་པ་ལས། སྐུ་རྡོ་རྗེ་ལྷ་ཆེན་བརྒྱད་དང་བཅས་པ་ལ་རྣམ་པར་སྣང་མཛད། མདུན་བསྐྱེད་དང་འབྲེལ་ན་མཁའ་འགྲོ་ལྔའི་ལྷ་ཚོགས་ཀྱིས་རྒྱས་གདབ་སྔར་སོང་བས་འདིར་མི་དགོས་ལ། མ་སོང་ན་མཁའ་འགྲོ་ལྔའི་གཙོ་བོ་ཡབ་ཡུམ་ལྔ་ལ་རིགས་ལྔ་སོ་སོ། འཁོར་རྣམས་ལ་རང་རང་གི་གཙོ་བོ། ཕྱོགས་སྐྱོང་བརྒྱད་ལ་མི་བསྐྱོད་པ། གསུང་རྡོ་རྗེ་ཀླུ་ཆེན་བརྒྱད་དང་བཅས་པ་ལ་འོད་དཔག་མེད་ཀྱིས་དབུར་བརྒྱན་པར་བྱའོ། །གཏོར་མ་འབུལ་བ་ལ་བཞི་ལས། གཏོར་མ་དབུལ་བ་དངོས་ནི། རྡོ་རྗེ་ཐལ་མོ་ཁ་གྱེན་དུ་ཕྱེ་ལ། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་པཉྩ་ཌཱ་ཀི་ནཱི་ས་པ་རི་ཝཱ་ར། ཀཱ་ཡ་ཝཱཀྐ་ཙིཏྟ་ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བཱ་ཨུ། རཀྑ། ཙནྡ། སུཛྫ། མཱ་ད། པཔྤ། ཏ་ལ། པཱ་ཏ་ལཾ། ཨཥྛ་སཔྤ་སྭཱ་ཧཱ། ཞེས་ལན་གཅིག་བརྗོད་པས་མགྲོན་རྣམས་གསལ་གདབ་བོ། །དེ་ནས་མགྲོན་དེ་དག་གི་ལྗགས་ལ། རྡོ་རྗེ་ནས་འབྲས་ཙམ་གྱི་ལྟེ་བ་ལ་ཧཱུྃ་གིས་མཚན་པར་བསམ་ཏེ། དེའི་འོད་ཟེར་གྱི་སྦུ་གུས་གཏོར་མ་གསོལ་བར་བསམ་ཞིང་། སྔར་གྱི་སྔགས་ཀྱི་མཇུག་ཏུ། ཨི་དཾ་བ་ལིཾ། བྷུཉྫ། ཛི་གྷ། ཕུལླ། དྷཱུ་པྤ། མཱྃ་ས། པིཾ་གྷ། ཨམྦྷ། སཔྤ། ཀཛྫ། སཱ་དྭ། ཁནྟི། ཁུ་ཎི། ཕེ་ཌ། གཱ་ད། ཨོཾ་ཨ་ཀཱ་རོ་མུ་ཁཾ། སརྦ་དྷརྨཱ་ཎཱཾ། ཨཱ་དྱ་ནུཏྤན་ན་ཏྭཱཏ། ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་ལན་གསུམ་མམ་ལྔ་ལ་སོགས་པ་བརྗོད་པས། མགྲོན་རྣམས་མཉེས་ཤིང་ཚིམ་ནས་ཅི་འདོད་པའི་དངོས་གྲུབ་སྩོལ་བར་བསམ། དེ་ནས་མཆོད་པ་ནི་མེ་ཏོག་ལ་སོགས་པ་ཕྱིའི་མཆོད་པ་དང་། ནང་བདུད་རྩིས་ཀྱང་མཆོད། དེ་ནས་དྲིལ་བུ་གསིལ་ཞིང་། ཡིད་ལས་བྱུང་བའི་མཆོད་པས་ཀྱང་མཆོད་ལ། བསྟོད་པ་བྱ་བ་ནི། ཁྱོད་ནི་རྣལ་འབྱོར་མ་ཚོགས་ཞེས་སོགས་དང་། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོར་ཕྱག་འཚལ་བསྟོད། །རྣམ་པར་སྣང་མཛད་དག་པ་སྟེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱིས་ནི་འོད་གསལ་མཆོག །སངས་རྒྱས་མཁའ་འགྲོར་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པས་གོས་པ་མེད། །རིན་ཆེན་མཁའ་འགྲོར་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་རྡོ་རྗེ་ནམ་མཁའ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོར་ཕྱག་འཚལ་བསྟོད། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང་། །སྣ་ཚོགས་མཁའ་འགྲོར་ཕྱག་འཚལ་བསྟོད། །ཅེས་པས་བསྟོད་ལ། ཕྲིན་ལས་གཞོལ་བ་ནི། ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་པོ་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའིྎ འབྱུང་པོའིྎ ཡི་དྭགསྎ ཤ་ཟའིྎ སྨྱོ་བྱེདྎ བརྗེད་བྱེདྎ མཁའ་འགྲོའི་ཚོགས་རྣམས་མ་ལུས་དང་། །དེ་ལ་སོགས་ཏེ་འབྱུང་པོའི་ཚོགས། །མ་ལུས་ཇི་སྙེད་ཡོད་པ་རྣམས། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་སྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱིས་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཐམས་ཅད་འགྲུབ་པ་དང་། །ཡིད་ལ་འདོད་པ་ཀུན་གྲུབ་ཤོག །ཅེས་ཕྲིན་ལས་བཅོལ་ལོ། །མཇུག་གི་བྱ་བ་ལ་བཞི་ལས། དང་པོ་རྡོ་རྗེའི་གླུ་བླང་བ་ནི། ཀོལླ་ཨི་རེ་ཊིཋ་ཨ་བོ་ལཱ། མུམྨུ་ཎི་རེ་ཀཀྐོ་ལཱ། གྷ་ཎེ་ཀྲྀ་པི་ཊ་ཧོ་བཱཛྫ་ཨི། ཀཱ་རུ་ཎ་ཀི་ཨ་ཨི་ན་རོ་ལཱ། ཏ་ཧིཾ་བ་ལ་ཁཱཛྫ་ཨི། གཱཌྷེཾ་མ་ཨ་ཎཱ་བིཛྫ་ཨ་ཨི། ཧ་ལེ་ཀཱ་ལིཉྫ་ར་པ་ནི་ཨ་ཨི། དུནྡུ་ར་བཱཉྫི་ཨ་ཨི། ཙ་ཨུ་ས་མ་ཀཙྪུ་རཱི་སིཧླ། ཀཱ་པུ་ར་ལཱ་ཨི་ཨ་ཨི། མཱ་ལ་ཨིནྡྷ་ཎ་སཱ་ལིཉྫ། ཏ་ཧིཾ་བྷ་རུ་ཁཱ་ཨི་ཨ་ཨི། ཕྲེཾ་ཁ་ཎ་ཁ་ཊ་ཀ་རནྟེ། ཤུདྡྷ་ཨ་ཤུདྡྷ་ན་མུ་ཎི་ཨ་ཨི། ནི་རཾ་སུ་ཨཾ་གེ་ཙ་ཌཱ་ཝི། ཏ་ཧིཾ་ཛ་སཱ་ར་ཝ་པ་ཎི་ཨ་ཨི། མ་ལ་ཨ་ཛེ་ཀུན་དུ་རུ་བཱ་ཊ་ཨི། ཌིཎྜཾ་མ་ཏ་ཧིནྣ་བཱཛྫི་ཨ་ཨི། གཉིས་པ་བཀྲ་ཤིས་ཀྱི་ཚིགས་སུ་བཅད་པ་ནི། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་སྤྱན་མངའ་བ། །འདི་ནི་འཇིག་རྟེན་དགེ་བའི་བཀྲ་ཤིས་དང་པོའོ། །ཞེས་སོགས་ཚིགས་བཅད་གསུམ་བརྗོད། དེ་ནས་སྨོན་ལམ་གདབ་པ་ནི། རིགས་སུ་སྐྱེ་དང་དམ་ཚིག་ཅན། །ཞེས་སོགས་ཚིགས་བཅད་གསུམ་བརྗོད། གུར་གྱི་མགོན་པོ་དང་། གདོང་བཞི་པ་དང་། ལས་མགོན་རྣམས་དང་། མཁའ་འགྲོ་སྤྱི་གཏོར་རྣམས་བསྔོ་ན་རྡོ་རྗེའི་གླུའི་གོང་དུ་བསྔོས་ནས་མཇུག་ཆོག་འདི་རྣམས་ཕྱོགས་གཅིག་ཏུ་བྱེད་པ་ཡིན་ནོ། །དེ་ནས་མགྲོན་གཤེགས་སུ་གསོལ་བ་ནི་གུར་ནས་འབྱུང་བའི་ཡི་གེ་བརྒྱ་པའི་མཐར་མུཿ ཞེས་བརྗོད་ལ་མིང་མེད་དང་མཐེ་བོང་གིས་སེ་གོལ་གཏོགས་པས་ཡེ་ཤེས་པ་རྣམས་རང་གནས་གཤེགས། དམ་ཚིག་པ་རང་གི་སྙིང་གར་བསྡུས་ཏེ། གཏོར་མ་ས་གཙང་སར་གཏོང་བ་རྣམས་སྤྱིའི་ལུགས་བཞིན་བྱའོ། །དེ་དག་གི་རྗེས་སུ་ཁ་ཟས་དང་འབྲེལ་ན་དེའི་རྣལ་འབྱོར་བྱ་སྟེ། དེའང་ཁ་ཟས་རྣམས་གཏོར་མ་ལྟར་བྱིན་གྱིས་བརླབ་པའམ་བསྡུ་ན་ཡི་གེ་གསུམ་གྱིས་བདུད་རྩིར་བྱིན་གྱིས་བརླབས་ནས་རང་ཉིད་ལྷར་གསལ་བའི་སྙིང་གར་བླ་མ་དང་རིགས་བསྡུས་པའི་དཀྱིལ་འཁོར། ལྟེ་བར་གཏུམ་མོ་འབར་བའི་ཁྲོད་ན་འབྱུང་པོ་བརྒྱད་གསུམ་ཉི་ཤུ་རྩ་བཞི་ལ་སོགས་པ་འཇིག་རྟེན་པའི་མགྲོན་བསམ་གྱིས་མི་ཁྱབ་པ་དམིགས་ཏེ། རང་གི་ཁ་ཐབ་ཁུང་། ལག་པ་དགང་བླུགས། ཁ་ཟས་བསྲེག་རྗེས་སུ་བསམས་ནས། ཐོག་མར་ཕུད་ལྷ་བཤོས་དང་། ཆང་བུ་ལ་སོགས་པ་ཐུན་མོང་བའི་ལུགས་བཞིན་བྱས་ཏེ། ཁ་ཟས་རྣམས་ལ་ཆགས་ཞེན་མེད་པར་ལྷ་མཆོད་པའི་བསམ་པས་ཚིམ་ཞིང་རན་པར་བཟའོ། །ཟོས་ཚར་བ་དང་ལྷག་མ་རྣམས་མདུན་དུ་བཞག་སྟེ། ཡོད་ན་མ་ད་ན་ཅུང་ཟད་འཐུངས་ཏེ། ལག་པ་གཉིས་འབར་བའི་ཕྱག་རྒྱ་བཅས་པའི་ནང་ནས་བྷྲཱུྃ་ཞེས་པའམ། ཡང་ན་ཕེཾ་ཞེས་པ་དང་བསྟུན་ནས་གཏོར་མ་ལ་ཁ་ཕྲུ་བཏབ་སྟེ། ཡི་གེ་གསུམ་དང་ཨ་ཀཱ་རོའི་སྔགས་ཀྱིས་བྱིན་གྱིས་བརླབས་ལ། ཨོཾ་ཨུ་ཙྪིཥྚི་བ་ལིནྟ་བཀྵ་སཱི་སྭཱ་ཧཱ། ཞེས་པའི་སྔགས་ལན་གསུམ་བརྗོད་པས་ལྷག་མ་ལ་དབང་བའི་འབྱུང་པོ་ཐམས་ཅད་ཚིམ་པར་བསམས་ལ་དོར་རོ། །དེ་དག་ནི་མེད་དུ་མི་རུང་བའི་ཁ་ཟས་ཀྱི་རྣལ་འབྱོར་མདོར་བསྡུས་པ་སྟེ། རྒྱས་པར་ནི་ཚོགས་ཀྱི་འཁོར་ལོའི་གཞུང་བཞིན་དུ་ཤེས་པར་བྱའོ། །དེ་ནས་ཐུན་གྱི་བྱ་བ་རྣམས་ཟིན་ནས་གཉིད་ལོག་ཁའམ་མདང་ནུབ་མོ་ལྟ་བུ་ཉལ་བའི་རྣལ་འབྱོར་ནི་རང་བཞིན་ལྷན་སྐྱེས་སྟོང་པའི་ངང་ལ་ཉལ་ན་སྔར་ལྷ་མ་བསྡུས་ན་གཙོ་བོ་ཡབ་ཡུམ་གྱི་བར་བསྡུས་ལ། ཡུམ་ཡབ་ལ། ཡབ་སྙིང་གའི་ཧཱུྃ་ལ། དེ་ཡང་ཞབས་ཀྱུ་ནས་ནཱ་དའི་བར་རིམ་གྱིས་བསྡུས་ཏེ། ནཱ་ད་ཡང་མི་དམིགས་པར་བྱས་ལ་བསམ་གྱིས་མི་ཁྱབ་བའི་ངང་ལ་ཉལ་ལོ། །ཞུ་བདེ་ལྷན་སྐྱེས་བདེ་བའི་ངང་ལ་ཉལ་ན་གཙོ་བོ་ཡབ་ཡུམ་བར་སྔར་ལྟར་བསྡུས་ནས་ཡབ་ཡུམ་སྙོམས་པར་ཞུགས། རྗེས་སུ་ཆགས་པའི་མེས་ཕུང་ཁམས་སྐྱེ་མཆེད་ཐམས་ཅད་འོད་དུ་ཞུ་ནས་བྱང་ཆུབ་ཀྱི་སེམས་ཀྱི་ཐིག་ལེར་གྱུར་པར་བསམས་ལ་དེའི་ངང་ལ་ཉལ་ལོ། །ལྡང་བའི་རྣལ་འབྱོར་ནི་ཉལ་ལུགས་དང་པོ་ལྟར་ན་སྐད་ཅིག་གིས་ཆུ་ལས་ཉ་འཕར་གྱི་ཚུལ་གྱིས་གཙོ་བོ་ཡབ་ཡུམ་གྱི་སྐུར་ལྡང་། ཕྱི་མ་ལྟར་ན་རང་བཞིན་གྱི་གནས་ནས་འོངས་པའི་ལྷ་མོ་བཞིས་གླུས་བསྐུལ་ཏེ། ཐིག་ལེ་དེ་ཧཱུྃ་དང་ཨྃ་ལས་གཙོ་བོ་ཡབ་ཡུམ་གྱི་སྐུར་ལངས་ཏེ། སྣོད་བཅུད་ཐམས་ཅད་གཞལ་ཡས་ཁང་དང་ལྷར་བལྟའོ། །ཁྲུས་ཀྱི་རྣལ་འབྱོར་ནི་ལྡང་བའི་རྣལ་འབྱོར་གྱི་རྗེས་སམ་གནས་སྐབས་གཞན་དུའང་རུང་སྟེ་ཁྲུས་བྱེད་ན་རང་གི་སྙིང་གའི་ས་བོན་ལས་འོད་ཟེར་འཕྲོས་ཏེ་མདུན་གྱི་ནམ་མཁར་དབང་ལྷ་སྤྱན་དྲངས་ཏེ་དབང་བསྐུར་གྱི་སྐབས་བཞིན་དུ་དབང་བླངས་ལ་རིགས་བདག་གིས་རྒྱས་གདབ་ནི་མི་དགོས་སོ། །རྗེས་ཆགས་ཀྱི་རྣལ་འབྱོར་ནི་ཁྱིམ་པ་རྡོ་རྗེ་འཛིན་པས་ཕྱག་རྒྱ་རྟེན་པའི་ཚེ་ཐ་མལ་གྱི་འདུ་ཤེས་བཟློག་ནས་ལམ་དུ་བསྒྱུར་བ་སྟེ། སྦྱོར་བ་འདུ་ཤེས་གསུམ་ལྡན་དང་། དངོས་གཞི་ལྷ་མཆོད་པའི་བསམ་པས་སྙོམས་འཇུག་བྱའོ། །སྤྱོད་ལམ་གྱི་རྣལ་འབྱོར་ནི་ཐུན་མཚམས་ཀྱི་གནས་སྐབས་སུ་སྣང་བ་ཐམས་ཅད་ལ་ཐ་མལ་གྱི་ཞེན་པ་བཟློག་ནས་དག་པའི་སྣང་བར་བལྟ་བ་སྟེ། འདི་ལ་གཉིས། ལྷག་པའི་ལྷའི་ཐབས་ལ་མཁས་པ་ནི་སྣང་བ་ཐམས་ཅད་དཀྱིལ་འཁོར་གྱི་གཙོ་བོའི་ངོ་བོ་ཉིད་དུ་བལྟ་བའོ། །ལྷ་སོ་སོའི་ཐབས་ལ་མཁས་པ་ནི་ཕུང་པོ་ལྔ་སངས་རྒྱས་ལྔ། ཁམས་ལྔ་ལྷ་མོ་ལྔ། ནང་གི་སྐྱེ་མཆེད་དྲུག་གཏི་མུག་རྡོ་རྗེ་མ་ལ་སོགས་པ་དྲུག ཕྱིའི་ཡུལ་དྲུག་གཽ་རཱི་ལ་སོགས་པ་དྲུག་ཏུ་ཤེས་པར་བྱ་སྟེ། གནས་སྐབས་ཀྱི་བྱ་བ་ཐམས་ཅད་ལྷ་ལ་ལྷ་ཐིམ་པའི་ཚུལ་དུ་ལོངས་སྤྱད་དོ། །དེ་ལྟར་རྣལ་འབྱོར་བཅུས་ཉིན་མཚན་འདའ་བར་བྱས་ན་རྡོ་རྗེ་འཆང་ཆེན་པོའི་གོ་འཕང་འཐོབ་པར་འགྱུར་བ་ནི་ངེས་པའོ། །མི་ཐུབ་ཟླ་བའི་གསུང་ཟེར་དྲི་མེད་ཀྱིས། །རྒྱུད་དོན་ཀུ་མུད་ཕྱེ་བ་ལས་བྱུང་བའི། །བདུད་རྩི་བཅུད་འདྲའི་སྒྲུབ་ཐབས་རྨད་བྱུང་འདི། །དོན་གཉེར་གཟུ་བོར་གནས་རྣམས་གུས་པས་ལོངས། །རབ་དཀར་དགེ་ཚོགས་གངས་ཅན་རི་བོའི་རྩེར། །ཆུ་ཤེལ་འོད་ཟེར་ཕོག་འདྲ་གང་ཐོབ་དེས། །མཁའ་མཉམ་འགྲོ་བའི་སྙིང་མུན་ཀུན་བསལ་ནས། །ལམ་བཟང་སྣང་བ་ཕྱོགས་བཅུར་གསལ་བར་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །སྐྱོན་མེད་བླ་མ་དམ་པས་རྗེས་བཟུང་ནས། །རྣལ་འབྱོར་དབང་ཕྱུག་གསུང་དང་མི་འབྲལ་ཞིང་། །རྡོ་རྗེ་འཛིན་ས་མྱུར་དུ་བགྲོད་པར་ཤོག། །།བཤད་པའི་རྒྱུད་རྡོ་རྗེ་གུར་ནས་གསུངས་པའི་མཁའ་འགྲོ་ལྔ་རིགས་བསྡུས་པའི་སྒྲུབ་པའི་ཐབས་དངོས་གྲུབ་རྒྱ་མཚོ་ཞེས་བྱ་བ་འདི་ནི་རྗེ་བཙུན་དམ་པ་ཡེ་ཤེས་རྒྱལ་མཚན་དཔལ་བཟང་པོས་བསྡེབས་པའི་ལེགས་བཤད་ལ་གཞི་བྱས་ཏེ། མི་ཐུབ་ཟླ་བའི་གཞུང་དང་། གུར་རྒྱན་ལ་བརྟེན་ནས་ཅུང་ཟད་ཞུས་དག་གི་ཚུལ་དུ་རྗེ་བཙུན་བླ་མ་རྣམས་ཀྱི་བྲན་དུ་གྱུར་པ་ཤཱཀྱའི་དགེ་སློང་བསོད་ནམས་སེང་གེས་བྲིས་པའི་ཡི་གེ་པ་ནི་གཞོན་ནུ་བཟང་པོའོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། ༄། །རྡོ་རྗེ་གུར་གྱི་དཀྱིལ་ཆོག་བདེ་ཆེན་རྒྱ་མཚོ་ཞེས་བྱ་བ་བཞུགས་སོ།། ༈ །བཤད་པའི་རྒྱུད་རྡོ་རྗེ་གུར་ནས་གསུངས་པའི་མཁའ་འགྲོ་ལྔ་རིགས་བསྡུས་པའི་དཀྱིལ་འཁོར་དུ་སློབ་མར་དབང་བསྐུར་བའི་ཆོ་ག་བདེ་ཆེན་རྒྱ་མཚོ་ཞེས་བྱ་བ། བླ་མ་དང་དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །ཡེ་ཤེས་ལྔ་ལྡན་ལྷན་སྐྱེས་གཅིག་པུ་ཉིད། །མཁའ་འགྲོ་ལྔ་ཡི་རྣམ་རོལ་དུ་བསྟན་ནས། །དུག་ལྔས་བསྒྲིབས་པའི་རང་བཞིན་སྦྱོང་མཛད་པ། །རིགས་ལྔའི་ཁྱབ་བདག་རྗེ་བཙུན་བླ་མ་རྒྱལ། །རྡོ་རྗེ་ཅན་རྟག་ཉི་མ་གར་དབང་རྟ་མཆོག་དབང་གི་ཏིང་འཛིན་དང་། །འཁོར་ལོ་རྡོ་རྗེ་པདྨ་ཨུཏྤལ་འཛིན་པའི་ལྷ་མོའི་གླུ་དབྱངས་སྙན། །སེམས་དཔའ་སེམས་མས་ཤིས་བརྗོད་ཚིགས་དང་མེ་ཏོག་སིལ་མའི་ཆར་ཆེན་ཕབ། །བགེགས་འཇོམས་ཁྲོ་བོས་བར་ཆད་ཀུན་བསྲུང་ཡང་དག་ལྡན་པའི་ཆོ་ག་ཡིས། །སྐལ་ལྡན་སློབ་མའི་ཕུང་ཁམས་སྐྱེ་མཆེད་ཀུན་ལ་བདེ་གཤེགས་ཡུམ་བཅས་དང་། །དཔའ་བོ་དཔའ་མོ་ཁྲོ་ཆེན་ཀུན་གྱི་ས་བོན་ཐོག་མར་ལེགས་བཏབ་ནས། །ཚེ་འདིར་སངས་རྒྱས་ཀུན་དངོས་རྡོ་རྗེ་འཆང་ཆེན་སྒྲུབ་བྱེད་ཆོ་ག་ནི། །རྒྱུད་དང་གྲུབ་པའི་གཞུང་བཟང་ཡང་དག་བརྒྱུད་པའི་མན་ངག་འདིར་བཤད་བྱ།། །།འདིར་ཅི་སྐད་བཤད་པའི་མཚན་ཉིད་དང་ལྡན་པའི་རྡོ་རྗེ་སློབ་དཔོན་ལ་སློབ་མ་འགའ་ཞིག་གིས་དབང་བསྐུར་བར་གསོལ་བ་བཏབ་ན་རིམ་གྱིས་རྒྱུད་སྦྱང་བར་བྱ་བའམ། དང་པོ་ནས་འཇུག་པའི་སྐལ་བ་དང་ལྡན་པ་གང་ཡིན་བརྟག་པར་བྱ་སྟེ། འོས་སུ་གྱུར་པ་ན་དབང་བསྐུར་བའི་ཆོ་ག་ལ་རྡུལ་ཚོན་གྱི་ཕྱོགས་ལ་བརྟེན་པ་ནི་གཞན་དུ་ཤེས་པར་བྱ་ཞིང་། རས་བྲིས་ལ་བརྟེན་པའི་ཕྱོགས་ལ་གཉིས་ཏེ། སྟ་གོན་དང་། དངོས་གཞིའོ། །དང་པོ་ལ་དྲུག་སྟེ། ཐོ་རངས་ཀྱི་བྱ་བ་དང་། སའི་ལྷ་མོ་ལྷག་པར་གནས་པ་དང་། སྔོན་དུ་འགྲོ་བའི་ཏིང་ངེ་འཛིན་གྱི་དཀྱིལ་འཁོར་བསྒོམ་པ་དང་། བུམ་པ་སྟ་གོན་དང་། ལྷ་སྟ་གོན་དང་། སློབ་མ་སྟ་གོན་ནོ། །དང་པོ་ནི། ཐོ་རངས་རྣལ་འབྱོར་པ་བདག་ཉིད་ལྡང་བའི་རྣལ་འབྱོར་གྱིས་ལངས་ལ་བདག་མེད་པ་ལྷག་པར་མོས་པས་དག་པ་གསུམ་གྱི་སྔགས་བརྗོད་པས་ནང་གི་ཁྲུས་བྱས་ལ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་ཅེས་བྱ་བས་བདག་དང་གནས་དང་རྣལ་འབྱོར་བསྲུངས་ལ། ཁྲུས་ཀྱི་རྣལ་འབྱོར་གྱི་ཕྱིའི་ཁྲུས་ཀྱང་བྱ་སྟེ། ས་ཕྱོགས་གཙང་ཞིང་དབེན་པར་ཕྱག་དར་དང་། སྐྱང་ནུལ་བྱ། བླ་རེ་དང་ཡོལ་བ་ལ་སོགས་པའི་རྒྱན་དགྲམ། བྲིས་སྐུ་དང་། ལུགས་མ་ལ་སོགས་པའི་རྟེན་རྣམས་ཇི་ལྟར་བདེ་བར་བཞུགས་སུ་གསོལ། རས་ལ་སོགས་པའི་གཞི་གཙང་མའི་སྟེང་དུ་མཎྜལ་ཁྲུ་གང་ལས་མི་ཆུང་བའི་དབུས་སུ་གནས་སྲུང་གི་མེ་ཏོག་གཞག དེའི་གཡས་བདག་གི་གཡོན་ནས་གཡས་སྐོར་གྱིས་ཞབས་བསིལ་ལ་སོགས་པའི་ཆུ་བཞི་དང་། དེའི་གཡོན་རང་གི་གཡས་ནས་མེ་ཏོག་ལ་སོགས་པའི་ཉེར་སྤྱོད་ལྔ་གཡོན་སྐོར་གྱིས་བཤམ། མདུན་ཕྱོགས་སུ་བཟེད་ཞལ་གསུམ་དང་། དེ་དག་གི་ནང་དུ་སྤོས། མར་མེ། ལྷ་བཤོས་ཏེ་སྒོས་མཆོད་ལྷའི་གྲངས་དང་མཉམ་པའམ། མ་འབྱོར་ན་དཀྱིལ་འཁོར་གྱི་གྲངས་དང་མཉམ་པ་གཙོ་བོ་ལ་གཅིག་ལྷག་པོ་དང་། སྒོ་མ་བཞི་ལ་གཅིག་དང་། བྱང་ཤར་དུ་སའི་ལྷ་མོའི་གཅིག་སྟེ། སའི་ལྷ་མོའི་གཏོར་མ་དང་བཅས་པ་བཤམ། གཞན་ཡང་བའི་རྣམ་ལྔ་དང་། དྲི་བཟང་པོའི་འདེ་གུ་དང་། མེ་ཏོག་དང་། གོས་ཟུང་དང་། བུམ་པ་སྟ་གོན་གྱི་ཕྱིར་མཚན་ཉིད་དང་ལྡན་པའི་བུམ་པ་གཉིས་རྡོ་རྒྱུས་ལ་སོགས་པས་དཀར་པོར་བྱུགས་ལ་ལྷའི་ཁ་དོག་དང་མཐུན་པར་དར་རམ་རས་ཁ་ཚར་མ་ཉམས་པས་མགུལ་ཆིང་པྲོག་ལྔ་པའམ་བདུན་པ་བྱས་ལ་ལས་ཐམས་ཅད་པ་བཟླས་པའི་སྲད་བུ་དཀར་པོས་བཅིང་། རྣམ་རྒྱལ་ལ་རིགས་ལྔའི་མཚན་མ་དང་། ལས་ཐམས་ཅད་པ་ལ་སྣ་ཚོགས་རྡོ་རྗེ་ཉི་མ་ལ་གནས་པ་བྲིས་ནས་ལས་ཐམས་ཅད་པ་བཟླས་པས་བུམ་པ་རྣམས་ལ་ཡུངས་ཀར་གྱིས་བྲབ་ཅིང་གུ་གུལ་གྱིས་བདུགས་ནས་བགེགས་བསང་། ནས། གྲོ། སྲན་མ། འབྲས། ཏིལ་ཏེ་འབྲུ་ལྔ། གསེར། དངུལ། བྱེ་རུ། མུ་ཏིག དུང་སྟེ་རིན་པོ་ཆེ་ལྔ། ལན་ཚྭ། བུ་རམ། འོ་མ། མར། སྦྲང་རྩི་སྟེ་སྙིང་པོ་ལྔ། ཙནྡན་དཀར་དམར། གུར་གུམ། ཛཱ་ཏི། ག་པུར་ཏེ་དྲི་ལྔ། བྲི་ཧསྟི། ཀཎྜ་ཀ་རི། ཨ་བ་ར་ཙི་ཏ་དཀར་པོ། ཧ་ས། ཧ་ས་དེ་ཝ་སྟེ་སྨན་ལྔ་དང་། ཤ་ལྔ་བདུད་རྩི་ལྔ་སྟེ་ཅི་འབྱོར་པ་བླུགས། རང་གི་སྙིང་གའི་ས་བོན་ལས་ལྷ་མོ་མདོག་སྣ་ཚོགས་པ་སྤྲོས་ཏེ། ཆུ་བོ་གདྒཱ་ནས་ཆུ་བླངས་ཏེ་འགེངས་པར་བསམས་ལ། ཨོཾ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་ལན་བདུན་བདུན་བཟླས་ལ། བུམ་པའི་སུམ་ཆ་དྲི་བཟང་པོའི་ཆུས་དགང་། ཨོཾ་ཧཱུྃ་སྭཱ་ཧཱས་ཤིང་རློན་པས་ཁ་བརྒྱན་ལ་དཀྱིལ་འཁོར་གྱི་ལྷོ་ཕྱོགས་སུ་ཀུ་ཤའི་གདན་ལ་གཞག སློབ་མ་སྟ་གོན་གྱི་ཕྱིར་མེ་ཏོག་ལ་སོགས་པའི་མཆོད་པ་ལྔ་དང་། སོ་ཤིང་དང་། ཀུ་ཤ་ཆེ་ཆུང་དང་། སྲུང་སྐུད་སློབ་མ་དུ་ཡོད་ཀྱི་གྲངས་དང་མཉམ་པ་དང་། ཁ་བཤལ་གྱི་ཆུ་རྣམས་ཀྱང་སྟ་གོན་བྱའོ། །དཀྱིལ་འཁོར་གྱི་ཤར་ཕྱོགས་སུ་འདས་པའི་གཏོར་མ་དང་། གུར་མགོན་དང་། ཞལ་བཞི་པ་དང་། ལས་མགོན་དང་། མཁའ་འགྲོ་སྤྱི་གཏོར་རྣམས་གཡས་སྐོར་དུ་བཤམ། གཞན་ཡང་སྔོན་འགྲོའི་གཏོར་མ་དང་། སྦྱིན་སྲེག་བྱེད་ན་དེའི་ཡོ་བྱད་དང་། ཚོགས་འཁོར་གྱི་ཡོ་བྱད་ལ་སོགས་པ་འོག་ནས་འབྱུང་བའི་རྫས་ཐམས་ཅད་འཚོགས་པར་བྱའོ། །གཉིས་པ་ནི། སློབ་དཔོན་དཔོན་སློབ་རྣམས་གྲལ་ལ་འཁོད། མདུན་དུ་ནང་མཆོད་རྡོ་རྗེ་དྲིལ་བུ་རྣམས་བཞག་སྟེ་ལས་ཀྱི་རྡོ་རྗེ་སློབ་མས་མཎྜལ་ཕུལ་ཏེ། ལྷའི་རྣལ་འབྱོར་ལ་གནས་པར་གསོལ་བ་གདབ་པ་དང་། འབྱུང་པོའི་ཚོགས་རྣམས་ལ་མདོར་བསྡུས་པའི་ཆོ་གས་གཏོར་མ་སྦྱིན་པ་དང་། གནས་དང་མཆོད་པའི་ཡོ་བྱད་བྱིན་གྱིས་བརླབས་ཏེ་སྣ་ཚོགས་རོལ་མོ་བྱ་ཞིང་། སྒྲུབ་མཆོད་གཞན་དང་བསྟུན་པའི་ཚེ་ལྷའི་རྣལ་འབྱོར་ལ་གནས་པར་གསོལ་བ་གདབ་པ་རྗེས་ལ་བྱས་ཀྱང་རུང་ངོ་། །དེ་ནས་སའི་ལྷ་མོ་ལྷག་པར་གནས་པར་བྱ་བའི་ཕྱིར་རང་ལྷའི་ང་རྒྱལ་དང་ལྡན་པས་དཀྱིལ་འཁོར་གྱི་དབུས་སུ་དྲིས་བྱུགས་ལ་མེ་ཏོག་གི་ཚོམ་བུ་གཅིག་དགོད་དེ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་སྟེང་དུ་བྃ་ལས་སའི་ལྷ་མོ་སྐུ་མདོག་སེར་མོ་ཞལ་གཅིག་ཕྱག་གཉིས་ཀྱིས་རིན་པོ་ཆེའི་བུམ་པ་ཐུགས་ཀར་འཛིན་པ་རིན་པོ་ཆེ་སྣ་ཚོགས་ཀྱིས་བརྒྱན་པར་བསྐྱེད་ལ། རང་གི་སྙིང་གའི་ས་བོན་གྱི་འོད་ཀྱིས་ས་འོག་ནས་སའི་ལྷ་མོ་ཡེ་ཤེས་པ་སྤྱན་དྲངས་ཏེ་མཚན་སྔགས་སྔོན་དུ་འགྲོ་བའི་ཞབས་བསིལ་ལ་སོགས་པ་བཞི་ཕུལ་ནས། གཽ་རཱི་ལ་སོགས་པའི་སྔགས་དང་ཕྱག་རྒྱ་དང་ཏིང་ངེ་འཛིན་གྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱའོ། །དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། དབང་ལྷ་སྤྱན་དྲངས་ཏེ། དབང་བསྐུར་ནས་རིན་ཆེན་འབྱུང་ལྡན་གྱིས་དབུར་བརྒྱན་པ་ལ་ཨོཾ་པྲྀ་ཐཱི་ཝཱི་དེ་ཝཱི་ཨོཾ་བཛྲ་པུཥྤེ་ཨཱཿཧཱུྃ། ཞེས་པ་ནས་རོལ་མོའི་བར་གྱིས་མཆོད། ཨོཾ་ཨཱཿཧཱུྃ་ཞེས་པས་ནང་མཆོད་ཕུལ་ལ། གཏོར་མ་མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་ཏེ། ལག་པ་གཡས་མཆོག་སྦྱིན་དུ་བྱས་ལ་ཨོཾ་པྲྀ་ཐཱི་ཝཱི་དེ་ཝཱི་ཨོཾ་ཨ་ཀཱ་རོ་ཞེས་སོགས་ལན་གསུམ་གྱིས་ཕུལ། དྲིལ་བུ་དཀྲོལ་ཞིང་། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །དངོས་གྲུབ་ཐམས་ཅད་ཐོབ་བྱའི་ཕྱིར། །བདག་གིས་དཀྱིལ་འཁོར་བྲི་བར་བྱ། །ཞེས་བྱ་བའི་ཚིགས་སུ་བཅད་པ་རྩ་བ་དྲུག་པ་ལན་གསུམ་བརྗོད། སླར་ཡང་དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་དང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་མཁའ་འགྲོ་ལྔའི་གོ་འཕང་ཐོབ་པར་བྱ་བའི་ཕྱིར་དུ་སའི་ཕྱོགས་འདིར་དཀྱིལ་འཁོར་ཆེན་པོ་བཞེངས་ཏེ་སྒྲུབ་ཅིང་མཆོད་པ་དང་། བདག་ཉིད་འཇུག་ཅིང་དབང་བླང་བ་དང་། སློབ་མ་གཞུག་ཅིང་དབང་བསྐུར་བར་འཚལ་ན་སའི་ཕྱོགས་འདི་བདག་ལ་གནང་ཞིང་ལས་ཀྱི་དངོས་གྲུབ་ཀྱང་སྩོལ་བར་མཛད་དུ་གསོལ་ཞེས་གསོལ་བ་བཏབ་ལ། ཨོཾ་བཛྲ་མུཿ ཞེས་བརྗོད་པས་ས་དེ་ཉིད་ལ་ཐིམ་པར་བསམ་མོ། །གསུམ་པ་ནི། དེ་ནས་ཕྱི་དྲོའི་དུས་ལ་བབ་པ་ན་སློབ་དཔོན་བདག་ཉིད་ཁྲུས་ཀྱི་རྣལ་འབྱོར་གྱིས་ལུས་མཐའ་དག་ཁྲུས་བྱས་ལ། དྲི་ཞིམ་པོས་བྱུག རྒྱན་བཟང་པོ་གདགས་པ་དང་། གོས་སེར་པོ་གྱོན་ཏེ་སྒྲུབ་པའི་ཐབས་ཀྱི་རིམ་པས་དཀྱིལ་འཁོར་གྱི་འཁོར་ལོ་བསྒོམ་པ་ནས་བརྩམས་ཏེ་བཟླས་པའི་བར་བྱས་ནས་མཆོད་པ་བསང་སྦྱང་བྱིན་གྱིས་བརླབས་ལ། ཕྱི་མཆོད་ནང་མཆོད་དང་ཡིད་བྱུང་དང་། བསྟོད་པས་བདག་བསྐྱེད་ལ་མཆོད་བསྟོད་བྱས་ཏེ་དཀྱིལ་འཁོར་བསྡུས་ལ་གཙོ་བོའི་ང་རྒྱལ་གྱིས་གནས་པར་བྱའོ། །སྐབས་འདིར་དབུས་དང་ཕྱོགས་བཞིར་སློབ་དཔོན་ལྔ་འདུག་ནས་ཏིང་ངེ་འཛིན་གྱི་དཀྱིལ་འཁོར་བསྒོམས་ཏེ་སྤྲོ་བ་བསྐྱེད་པ་སོགས་གསུངས་པ་ནི་རྡུལ་ཚོན་གྱི་ཕྱོགས་ལ་ཡིན་གྱི། རས་བྲིས་ཀྱི་ཕྱོགས་ལ་སྔ་མ་དེ་ཙམ་གྱིས་ཆོག་གོ །བཞི་པ་ནི། བུམ་པ་གཉིས་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་གཉིས་ལས་རིན་པོ་ཆེའི་བུམ་པ་གཉིས། ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷའི་གོས་ཀྱི་མགུལ་ཆིང་དང་། དཔག་བསམ་གྱི་ཡལ་གས་ཁ་བརྒྱན་པ། དྲི་ཞིམ་པོའི་ཆུ་དང་བཅུད་རྣམས་ཀྱིས་ཡོངས་སུ་གང་བའི་རྣམ་པར་རྒྱལ་བའི་བུམ་པའི་ནང་གི་དབུས་དང་ཕྱོགས་བཞིར་པྃ་ལས་པདྨ་དཀར་དམར་འདབ་མ་བརྒྱད་པ་རེ་རེ། དེ་རྣམས་ཀྱི་ལྟེ་བར་ཉོན་མོངས་པ་ལ་སོགས་པ་བདུད་བཞིའི་ངོ་བོ་ཚངས་པ་སེར་པོ། དབང་པོ་དཀར་པོ། ཉེ་དབང་སྔོན་པོ། དྲག་པོ་ནག་པོ་རྣམས་གོང་ནས་གོང་དུ་བཀན་པའི་སྙིང་གར་དབུས་དང་ཕྱོགས་གཞན་གསུམ་དུ་ཉི་མ། ཤར་དུ་ཟླ་བ། འདབ་མ་རྣམས་དང་ཕྱིའི་ཕྱོགས་བཞིའི་སྣ་ཚོགས་པདྨའི་གདན་གྱི་སྟེང་དུ་ཟླ་བ་དང་། ཉི་མ་དང་། རོའི་གདན། ལས་ཐམས་ཅད་པའི་བུམ་པར་སྣ་ཚོགས་པདྨ་དང་ཉི་མའི་གདན་དང་བཅས་པར་གྱུར། གཙོ་བོ་ལྔའི་གདན་གྱི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་མར་མེའི་ཕྲེང་བ་ལྟ་བུ་ཨ་ཨཱ་ནས་ཨཾ་ཨཿབར་ལན་གཉིས་བརྗོད། ཞུ་བ་ལས་བྱུང་བའི་ཟླ་བའི་དཀྱིལ་འཁོར་ལྔར་གྱུར་པ་ནི་མེ་ལོང་ལྟ་བུའི་ཡེ་ཤེས། དེ་རྣམས་ཀྱི་སྟེང་དུ་སངས་རྒྱས་ཀྱི་དཔེ་བྱད་བཟང་པོ་བརྒྱད་ཅུའི་ངོ་བོ་སྐར་མའི་རྣམ་པ་ལྟ་བུ་ཀ་ཁ་ནས་ཌ་ཌྷའི་བར་ལན་གཉིས་བརྗོད། ཞུ་བ་ལས་ཉི་མའི་དཀྱིལ་འཁོར་ལྔ་མཉམ་པ་ཉིད་ཀྱི་ཡེ་ཤེས། དབུས་ཀྱི་ཉི་ཟླ་ཁ་སྦྱོར་གྱི་བར་དུ་ཧཱུྃ་དང་མཱྃ་ལས་རྡོ་རྗེ་དང་གྲི་གུག་ཧཱུྃ་དང་མཱྃ་གྱིས་མཚན་པ། ཤར་གྱི་ཉི་ཟླ་ཁ་སྦྱོར་གྱི་བར་དུ་ཨོཾ་དང་ལྃ་ལས་འཁོར་ལོ་དང་གྲི་གུག་ཨོཾ་དང་ལྃ་གྱིས་མཚན་པ། ལྷོའི་ཉི་ཟླ་ཁ་སྦྱོར་གྱི་བར་དུ་ཏྲཱྃ་དང་ཏཱྃ་ལས་རིན་པོ་ཆེ་དང་གྲི་གུག་ཏྲཱྃ་དང་ཏཱྃ་གྱིས་མཚན་པ། ནུབ་ཀྱི་ཉི་ཟླ་ཁ་སྦྱོར་ཀྱི་བར་དུ་ཨཱྃ་དང་པཱྃ་ལས་པདྨ་དང་གྲི་གུག་ཨཱྃ་དང་པཱྃ་གྱིས་མཚན་པ། བྱང་གི་ཉི་ཟླ་ཁ་སྦྱོར་གྱི་བར་དུ་ཁྃ་དང་ཏཱྃ་ལས་རལ་གྲི་དང་གྲི་གུག་ཁྃ་དང་ཏཱྃ་གྱིས་མཚན་པ་རྣམས་སོ་སོར་རྟོག་པའི་ཡེ་ཤེས། དེ་རྣམས་རོ་གཅིག་ཏུ་འདྲེས་པ་བྱ་བ་གྲུབ་པའི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་དབུས་སུ་རྡོ་རྗེ་མཁའ་འགྲོ་ནས། བྱང་དུ་རྟའི་རྒྱལ་པོ་ཐམས་ཅད་ཀྱང་ཞལ་བརྒྱད་པ་ནས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་བར་འབྲས་བུ་རྡོ་རྗེ་འཛིན་པ་ལྟར་གསལ་གདབ། སྒྲུབ་ཐབས་ལྟར་མཁའ་གསང་བྱིན་གྱིས་བརླབ། ཡབ་ཡུམ་ཐབས་ཤེས་རབ་སྙོམས་པར་ཞུགས་པའི་སྒྱུ་མ་བདེ་བའི་སྒྲས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཞེས་པ་ནས་མཁའ་ནང་ནས་སྤྲོ་བའི་བར་སྒྲུབ་ཐབས་བཞིན་ལ་སླར་ཡང་མཱ་མ་ཀཱིའི་མཁར་ཐིག་ལེ་ལྔ་དང་བཅས་པར་གྱུར་ཅེས་དང་། ཛཿཧཱུྃ་བྃ་ཧོཿཧཱུྃ་རྣམས་སུ་གྱུར། དེ་རྣམས་སོ་སོའི་འཁོར་གྱི་ལྷ་མོ་བདུད་རྩི་འཁྱིལ་པ་དང་བཅས་པ་རྣམས་སུ་གྱུར་ཏེ། དེ་རྣམས་ཡུམ་གྱི་མཁའ་ནས་ཕྱིར་སྤྲོས་ཏེ་རྣམ་རྒྱལ་བུམ་པའི་གདན་རྣམས་དང་། ལས་ཐམས་ཅད་པའི་བུམ་པའི་གདན་གྱི་སྟེང་དུ་འཁོད་པ་ནི་རྣམ་རྒྱལ་བུམ་པའི་རྡོ་རྗེ་ཅན་གྱི་དཀྱིལ་འཁོར་གྱི་ཤར་གྱི་འདབ་མ་ལ། གཽ་རཱི་དཀར་མོ་ནས་སྒྲོམ་ལ་ལྗང་གུ་ཨུཏྤལ་འཛིན་པ། ཕྱིའི་ཕྱོགས་བཞིའི་ཤར་དུ་ལྕགས་ཀྱུ་མ་སོགས་སྒྲུབ་ཐབས་བཞིན་བསྐྱེད། ལས་བུམ་དུ་བདུད་རྩི་འཁྱིལ་པ་སྐུ་མདོག་ལྗང་གུ་ཞལ་གཅིག་ཕྱག་གཉིས་གཡས་སྣ་ཚོགས་རྡོ་རྗེ་གཡོན་དེས་ཡུ་བ་བྱས་པའི་དྲིལ་བུ་འཛིན་པ། སྟག་དང་སྦྲུལ་དང་མི་སྡུག་པའི་རྒྱན་གྱིས་བརྒྱན་པ། གཡས་བསྐུམ་གཡོན་བརྐྱང་གིས་བཞུགས་པ་བསྐྱེད། རང་གི་ཐུགས་ཀ་ནས་མཁའ་འགྲོ་ལྔའི་དཀྱིལ་འཁོར་གྱི་ལྷ་ཚོགས་བདུད་རྩི་འཁྱིལ་པ་དང་བཅས་པ་སྤྱན་དྲངས། ཆུ་བཞི་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་ནས་བསྟིམ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། དབང་ལྷ་སྤྱན་དྲང་། སྔ་མ་ལྟར་མཆོད་ནས་གསོལ་བ་གདབ། དབང་བསྐུར་ནས་ལྷ་རྣམས་ལ་སྒྲུབ་ཐབས་ལྟར་དང་། བདུད་རྩི་འཁྱིལ་པ་ལ་དོན་ཡོད་གྲུབ་པས་རྒྱས་གདབ། ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་དང་། ས་བོན་སོ་སོའི་གཤམ་དུ་འབྲུ་གསུམ་བཏགས་པས་ནང་བདུད་རྩིས་མཆོད། དཀར་མོ་རི་དྭགས་དང་། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་པ་བྱས་ལ་གཟུངས་ཐག་ནས་བཟུང་སྟེ། གཙོ་བོའི་སྔགས་བརྒྱ་རྩ་བརྒྱད་དང་། གཞན་རྣམས་ཀྱི་ཇི་ལྟར་ནུས་པ་དང་། ལས་བུམ་ལ་ཨ་མྲྀ་ཏ་བརྒྱ་རྩ་བརྒྱད་བཟླས་ཏེ་དུང་ཆོས་ཀྱི་ཆུ་བུམ་པ་གཉིས་སུ་བླུགས་ཏེ། ཨོཾ་ཨཱཿཧཱུྃ། བུམ་པའི་ལྷ་རྣམས་འོད་དུ་ཞུ་བ་ལས་བྱང་ཆུབ་ཀྱི་སེམས་ཀྱི་རང་བཞིན་གྱི་ཆུར་གྱུར་ཅེས་བརྗོད་ལ་སླར་ཡང་སྔར་ལྟར་མཆོད་བསྟོད་བྱ། ཡི་གེ་བརྒྱ་པ་ལན་གསུམ་བརྗོད་པས་ལྷག་ཆད་ཁ་བསྐང་ངོ་།། །།ལྔ་པ་ནི། མཎྜལ་གྱི་དབུས་སུ་བའི་རྣམ་ལྔ་དང་། དྲི་ལྔ་དང་བདུད་རྩི་ལྔ་གཡས་སྐོར་དུ་བྱུག་ཅིང་མཎྜལ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་རྩེ་མོ་ཉི་ཤུ་པ་རྭ་རྣམས་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ནག་ལ་ཧཱུྃ་གིས་མཚན་པ་ལས་འོད་ཟེར་འོག་ཏུ་འཕྲོས་པས་འོག་ཐམས་ཅད་རྡོ་རྗེའི་ས་གཞིར་གྱུར་པར་བསམས་ལ། ཨོཾ་མེ་དཱི་ནི་བཛྲཱི་བྷ་ཝ་བྷན་དྷ་ཧཱུྃ་ཧཱུྃ་ཧཱུྃ་ཕཊ་ཅེས་བརྗོད། ཡང་མཐའ་མ་བསྐོར་ཞིང་བྱུགས་ཏེ། ཁོར་ཡུག་རྡོ་རྗེའི་རྭ་བ་དང་། སྟེང་རྡོ་རྗེའི་གུར་དང་བླ་རེ་དང་། ཕྱི་རོལ་ཡེ་ཤེས་ཀྱི་མེ་འབར་བར་བསམས་ལ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་ཅེས་བརྗོད་ལ་ལག་པ་མ་བཏེགས་པར་དབུས་སུ་མེ་ཏོག་དོར། དེ་ལྟ་བུའི་སྲུང་བའི་འཁོར་ལོའི་དབུས་སུ་ཨེ་ལས་ཆོས་ཀྱི་འབྱུང་གནས་ཀྱི་ནང་དུ་སྐད་ཅིག་གིས་གཞལ་ཡས་ཁང་དུར་ཁྲོད་གདན་དང་བཅས་པ་སྒྲུབ་པའི་ཐབས་ནས་འབྱུང་བ་ལྟར་བསྒོམས་ནས་གཙོ་བོ་ལྔའི་གནས་སུ་དྲིའི་ཐིག་ལེ་གྲུ་བཞི་པ་དང་། ལྷ་གཞན་རྣམས་ཀྱི་གནས་སུ་ཟླུམ་པོ་རེ་བྱ། དེ་ནས་རྡོ་རྗེ་ཅན་གྱི་དཀྱིལ་འཁོར་གྱི་དབུས་སུ་མེ་ཏོག་གི་ཚོམ་བུ་བཀོད་དེ། ཧཱུྃ་ཤྲཱི་ཧེ་རུ་ཀ་ཡ་ན་མཿ རྡོ་རྗེ་ཅན་སྐུ་མདོག་སྔོན་པོ་ཞེས་སོགས་དང་། དེའི་མདུན་དུ་ཚོམ་བུ་སྤུངས་ཏེ། མཱྃ་མཱ་མ་ཀཱི་ན་མཿ དེའི་པང་ན་ཡུམ་མཱ་མ་ཀཱི་སྔོན་མོ་ཞེས་སོགས་དང་། འདབ་མ་བརྒྱད་ལ་ཚོམ་བུ་བཀོད་དེ་གྃ་གཽ་རཱི་ན་མཿ ཤར་དུ་གཽ་རཱི་དཀར་མོ་ཞེས་སོགས་ཞལ་ཕྱག་རྫོགས་པར་གསལ་གདབ་བོ། །དེ་བཞིན་དུ་དཀྱིལ་འཁོར་གཞན་བཞི་དང་སྒོ་བ་བཞིའི་བར་དུ་སྙིང་པོ་ཚིག་ཙམ་གྱིས་བསྐྱེད་དེ། གཙོ་བོ་བཞི་ལ་སྔར་གྱི་ཧཱུྃ་གི་ཚབ་ཏུ། ཨོཾ་ཏྲཱྃ་ཨཱྃ་ཁཾ་རྣམས་བཅུག ཡུམ་བཞི་ལ་ལྃ་ལོ་ཙཱ་ནི། རྃ་རནྟ་ཏཱ་རེ། པཱྃ་པཱཎྜར། ཏཱྃ་ཏཱ་རེ་ན་མཿ ཞེས་དང་། འཁོར་རྣམས་ལ་རང་རང་གི་ས་བོན་དང་། མཚན་སྔགས་རྣམས་ལ་ན་མཿ ཞེས་བཏགས་པ་བརྗོད་པ་ཙམ་གྱིས་བསྐྱེད་ནས་ཞལ་ཕྱག་གསལ་གདབ་བོ།། །།དེ་ནས་གཙོ་བོ་ལྔ་སེམས་དཔའ་སུམ་བརྩེགས་སུ་བྱས་ནས་ཡེ་ཤེས་པ་སྤྱན་དྲངས་ཏེ་ཆུ་བཞི་ཕུལ་ནས་ལྷ་མོ་བཞིའི་སྔགས་དང་ཕྱག་རྒྱས་དགུག་གཞུག་བྱས་ལ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་ནས་རིགས་ཀྱི་བདག་པོས་རྒྱས་གདབ་པའི་བར་སྒྲུབ་ཐབས་ལྟར་བྱའོ། །དེ་ནས་མཆོད་པ་རྣམས་བསང་སྦྱང་བྱིན་གྱིས་བརླབས་ནས། མེ་ཏོག་འདི་ནི་བཟང་ཞིང་དགེ །ཞེས་བྱ་བ་ལ་སོགས་པའི་ཚིགས་བཅད་དང་། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་པཉྩ་ཌཱ་ཀི་ནཱི་ས་པ་རི་ཝཱ་ར་ཨོཾ་བཛྲ་པུཥྤེ་ཨཱཿཧཱུྃ་ཞེས་དང་། དེ་བཞིན་དུ་རོལ་མོའི་བར་སྦྱར་བར་བྱའོ། །ཆུ་བཞི་ཡེ་ཤེས་པ་སྤྱན་དྲངས་ལ་ཕུལ་ནས་འདིར་མེ་ཏོག་སོགས་ཀྱིས་མཆོད་པ་ནི་ལུགས་འདིའི་ཁྱད་ཆོས་སོ། །དེ་ནས་གོས་ཟུང་བླངས་ཏེ། བསང་སྦྱང་སྟོང་པའི་ངང་ལས་ཧཱུྃ་ལས་བྱུང་བའི་ལྷ་རྫས་ལས་གྲུབ་པའི་གོས་ཟུང་སྲབ་ལ་འཇམ་པ་དྭངས་ཤིང་ཐོགས་པ་མེད་པར་བྱིན་གྱིས་བརླབས་ལ། སྲབ་འཇམ་ཡང་བ་ལྷ་ཡི་གོས། །མི་ཕྱེད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ཨོཾ་བྷ་ག་ཝཱན་སོགས་ཀྱི་རྗེས་སུ་ཨོཾ་བཛྲ་ཝཱསཏྲ་ཡེ་ཨཱཿཧཱུྃ། དེ་ནས་ལག་པ་གཡོན་པའི་མཐེབ་སྲིན་རྩེ་མོ་སྦྱར་ཏེ། ནང་མཆོད་ཀྱི་དབུས་ནས་ལན་གསུམ་བསྐོར་ཞིང་དཀྲུགས་ལ་དབུས་ནས་བླངས་ཏེ་སྟེང་གི་ཕྱོགས་སུ་གཏོར་ཞིང་། ཨོཾ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། རྡོ་རྗེ་འཆང་། བདག་མེད་མ། བིརྺ་པ། ཌོམྦི་ཧེ་རུ་ཀ ཨ་ལ་ལ་བཛྲ། ནགས་ཁྲོད་པ། གརྦྷ་རི་པ། བསོད་སྙོམས་པ་ཛ་ཡ་ཤྲཱི། མི་ཐུབ་ཟླ་བ། དཔའ་བོ་རྡོ་རྗེ། འབྲོག་མི་ཤཱཀྱ་ཡེ་ཤེས། མངའ་རིས་པ་གསལ་བའི་སྙིང་པོ། མཁོན་སྒྱི་ཆུ་བ། རྗེ་ས་སྐྱ་པ་ཆེན་པོ། ནེ་ཚོ་སྦལ་སྟོན། རྟ་སྟག་སོ་བ་རིན་ཆེན་དོན་གྲུབ། གན་པ་སྟོན་དར། གན་པ་སོ་སྟོན། གན་པ་ཆོས་རྒྱལ། གན་པ་དབང་རིན། གན་པ་རིན་རྒྱལ། ཆོས་རྗེ་བསོད་ནམས་རྒྱལ་མཚན། བླ་མ་དཔལ་ལྡན་ཚུལ་ཁྲིམས། ཆོས་རྗེ་ཡེ་ཤེས་རྒྱལ་མཚན། རྡོ་རྗེ་འཆང་ཀུན་དགའ་བཟང་པོ། ཁྭ་ཆར་བ་བསོད་ནམས་རྒྱལ་མཚན་རྣམས་ཀྱི་ཞལ་དུ་ཨོཾ་ཨཱཿཧཱུྃ། གཞན་ཡང་དབང་བསྐུར། རྒྱུད་བཤད། མན་ངག་གནང་། ཆོས་ཀྱི་འབྲེལ་པ་ཐོབ་པའི་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ་ཞེས་བརྗོད། དེ་ནས་དཀྱིལ་འཁོར་ལ་གཙོ་བོ་ལྔའི་སྔགས་དང་། ཡུམ་ལྔ་མན་ཆད་མཚན་སྔགས་སམ་ས་བོན་ཕྱོགས་གཅིག་སྦྲེལ་ནས་མཇུག་ཏུ། ཨོཾ་ཨཱཿཧཱུྃ་ཞེས་པས་དབུལ། དེ་ནས་ཡི་དམ་གཞན་ལ་དབུལ་བ་ནས་རིགས་དྲུག་གི་སེམས་ཅན་ཚིམ་པའི་བར་མ་རྒྱུད་སྤྱི་ལྟར་བྱས་ནས་མཐར་རང་གི་ལྕེ་རྩེ་ལ་བཞག་ནས། ཨ་མྲྀ་ཏ་སཱ་ད་ན་སོགས་བརྗོད་དོ། །དེ་ནས་ཡིད་ལས་བྱུང་བའི་མཆོད་པ་ཉི་ཤུ་ནི་ལག་གཉིས་རྡོ་རྗེ་ཁུ་ཚུར་དཀུར་ཁ་གྱེན་དུ་བསྟན་པའི་ཕྱག་རྒྱ་དང་། གཟུགས་མཛེས་མཐོང་བས་མི་ངོམས་རེག་ན་བདེ། །ཡིད་འཕྲོག་སྙེམས་པའི་ཚུལ་འཛིན་སྒེག་མོ་ཡིས། །ནམ་མཁའ་རབ་འབྱམས་ཁམས་ཀྱི་མཐའ་ཀླས་རྣམས། །བཀང་སྟེ་དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བྷ་ག་ཝཱན་སོགས་ཀྱི་མཇུག་ཏུ་བཛྲ་ལཱ་སྱེ་པཱུ་ཛི་ཏེ་ཨཱཿཧཱུྃ། གིས་སྒེག་མོ་དང་། པཱུ་ཛི་ཏེ་ཨཱཿཧཱུྃ་འོག་མ་རྣམས་ལའང་སྦྱར་ཏེ། ལག་པ་གཉིས་རྡོ་རྗེ་ཁུ་ཚུར་གྱིས་ཕྲེང་བ་འཛིན་པའི་ཚུལ་བྱ་ཞིང་། ཨིནྡྲ་ནཱི་ལ་ལ་སོགས་འཇིག་རྟེན་ན། །ཤིན་ཏུ་དཀོན་པའི་རིན་ཆེན་ཕྲེང་འཛིན་གྱིས། བཛྲ་མཱ་ལེ། རྡོ་རྗེ་ཁུ་ཚུར་གཉིས་ཀྱིས་ཁ་ནས་ཚིགས་འབྱིན་པའི་ཚུལ་དང་། དྲུག་གི་རྗེས་སུ་སྐྱེས་སོགས་སྙན་པའི་དབྱངས། །ཐོས་ན་ཚིམ་པ་ལེན་བྱེད་གླུ་མ་ཡིས། །བཛྲ་གཱི་ཏཱི། ལག་གཉིས་གར་སྐོར་གཡོན་དང་གཡས་སུ་བསྐོར་ནས་སྤྱི་བོར་རྡོ་རྗེ་ཐལ་མོ་སྦྱར་བ་དང་། གཅིག་ཉིད་དུ་མའི་ཚུལ་དུ་རབ་བསྟན་ནས། །འགྲོ་བ་དགའ་སྐྱེད་གར་གྱི་མཆོད་པ་ཡིས། །བཛྲ་ནྲི་ཏྱེ། གཡོན་པའི་ཐལ་མོ་གྱེན་དུ་བསླང་། གཡས་པའི་རྡོ་རྗེ་ཁུ་ཚུར་གྱིས་པི་ཝང་བསྒྲེང་བའི་ཚུལ་དང་། རྒྱུད་དང་པགས་པ་སྐྱེད་བུའི་རྩོལ་བ་སོགས། །དུ་མའི་རྟེན་འབྲེལ་ལས་བྱུང་པི་ཝང་སྒྲས། །བཛྲ་བཱི་ཎཱི། ལག་པ་གཉིས་ཀྱི་སོར་མོས་གཡས་ཕྱོགས་སུ་གླིང་བུ་བསྒྱུར་བའི་ཚུལ་དང་། གང་གིས་ལག་པ་བསྐྱེད་པའི་ཁྱད་པར་ལས། །སྣ་ཚོགས་རྣར་སྙན་སྐྱེད་བྱེད་གླིང་བུ་ཡིས། །བཛྲ་བྃ་སྱེ། ལག་པ་གཉིས་ཀྱི་ཐལ་མོས་མདུན་དུ་རྫ་རྔ་བརྡུང་བའི་ཚུལ་དང་། མཛེས་པའི་གཟུགས་ལྡན་སྐད་སྙན་དུ་མ་ཡིས། །མ་ལུས་འགྲོ་བ་ཚིམ་བྱེད་རྫ་རྔའི་སྒྲས། །བཛྲ་མྲྀ་ཏཾ་གེ ལག་པ་གཡས་གཡོན་དུ་གདེངས་ཏེ་རྔ་པ་ཌ་ཧ་བརྡུང་བའི་ཚུལ་དང་། དབྱིབས་ལེགས་དྲྭ་བས་ལེགས་སྤྲས་ཡིད་དུ་འོང་། །ཤིན་ཏུ་བརྗིད་པའི་སྒྲ་འབྱིན་རྔ་ཟླུམ་གྱིས། །བཛྲ་པ་ཌ་ཧ། མེ་ཏོག་གི་ཕྱག་རྒྱ་དང་། གསེར་སོགས་རིན་ཆེན་ལས་གྲུབ་འདབ་སྟོང་ལྡན། །མདངས་བཀྲ་ཡིད་འོང་དྲི་ལྡན་མེ་ཏོག་གིས། །བཛྲ་པུཥྤེ། བདུག་པའི་ཕྱག་རྒྱ་དང་། ཨ་ཀར་ནག་སོགས་ལྷན་ཅིག་སྐྱེས་པ་དང་། །སྦྱར་བ་ལས་བྱུང་བདུག་པའི་སྤྲིན་ཚོགས་ཀྱིས། །བཛྲ་དྷཱུ་པེ། མར་མེའི་ཕྱག་རྒྱ་དང་། ཉི་ཟླ་ནོར་བུ་སྒྲོན་མེའི་འོད་ལ་སོགས། །མུན་པ་སེལ་བྱེད་སྣང་བའི་ཚོགས་རྣམས་ཀྱིས། །བཛྲ་ཨཱ་ལོ་ཀེ དྲིའི་ཕྱག་རྒྱ་དང་། རེག་ན་སིམ་བྱེད་ཞིམ་པའི་དྲི་ངད་ལྡང་། །ག་བུར་ལ་སོགས་ལེགས་པར་སྦྱར་བའི་ཆུས། །བཛྲ་གནྡྷེ། གོས་ཟུང་འབུལ་བའི་ཕྱག་རྒྱ་དང་། ལྷ་རྫས་ལས་གྲུབ་ཡང་འཇམ་རེག་ན་བདེ། །ཁ་དོག་ལྔ་ལྡན་ཟུང་དུ་སྦྱར་བ་ཡིས། །བཛྲ་ཝཱསཏྲ། ལག་པ་གཡོན་པ་མཉམ་བཞག གཡས་ནམ་མཁའ་ལ་བླ་རེ་བྲེས་པའི་ཚུལ་བྱ་ཞིང་། ཤིན་ཏུ་ཐགས་བཟངས་སྣ་ཚོགས་རི་མོས་མཛེས། །རིན་ཆེན་དྲྭ་བས་བརྒྱན་པའི་བླ་རེ་ཡིས། །བཛྲ་བི་ཏཱ་ནཾ། ལག་པ་གཡོན་པའི་ཁུ་ཚུར་ཁ་ནང་དུ་བསྟན་པའི་སྟེང་དུ་གཡས་པའི་ཁུ་ཚུར་ཡང་དེ་བཞིན་བྱས་ནས་བཞག་པ་དྲིལ་བུའི་ཕྱག་རྒྱ་དང་། ཚོགས་པ་ལས་བྱུང་སྟོང་ཉིད་སྒྲ་སྙན་སྒྲོགས། །ཆོས་རྣམས་སྟོང་ཉིད་མཚོན་བྱེད་དྲིལ་བུའི་སྒྲས། །བཛྲ་གྷཎྜེ། རྡོ་རྗེ་ཁུ་ཚུར་གཉིས་ཀྱིས་རྔ་ཡབ་གཡོབ་པའི་ཚུལ་བྱ་ཞིང་། རྔུལ་དང་ཚད་པའི་གདུང་བ་ལ་སོགས་པ། །སེལ་བྱེད་རྔུལ་ཡབ་བསིལ་ཡབ་སྦྲང་ཡབ་ཀྱིས། །ཙཱ་མ་ར། ལག་པ་གཉིས་འདུད་པའི་ཚུལ་དང་། བསྒོ་བ་ཉན་ཅིང་བྱ་བའི་ལས་ལ་མཁས། །བརྩོན་པས་འདོད་དོན་སྒྲུབ་བྱེད་བྲན་ཚོགས་ཀྱིས། །དཱ་ས་དཱ་སེ། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅའ་ཞིང་། བསམ་པ་ཙམ་གྱིས་འདོད་དགུ་འབྱུང་བ་ཡི། །མཛེས་པའི་གཟུགས་ལྡན་འདོད་འཇོའི་བ་ཚོགས་ཀྱིས། །ཀ་རི་ཎི། རྟ་མཆོག་གི་ཕྱག་རྒྱ་དང་། མདོག་སྔོ་རྟ་ལྗང་བརྒྱད་ཁྲིས་རབ་བསྐོར་ཞིང་། །ཤིན་ཏུ་བརླིང་ཞིང་རླུང་ལྟར་མགྱོགས་པའི་རྟས། །ཨ་ཤྭ། གླང་པོའི་ཕྱག་རྒྱ་དང་། ཐལ་ཀར་མཆེ་བ་དྲུག་ལྡན་རིན་ཆེན་གྱི། །དྲྭ་བས་སྤྲས་པའི་སྟོབས་ལྡན་གླང་པོ་ཡིས། །ག་ཛ་ཞེས་པས་དབུལ་ལོ། །དེ་ནས་བསྟོད་པའི་མཆོད་པ་ནི། རྡོ་རྗེ་དྲིལ་བུ་གསིལ་ཞིང་། ཧཱུྃ་ཧཱུྃ་ཧཱུྃ་དེ་ཧ་དྷ་རུ་སཾ་སཱ་ར་དྷ་རུ། དྲནྡཱ་ལིཾ་ག་ན། ཛོའུ་དྷ་རུ་ཧེ་བཛྲ་ཏུ་ཧཱུྃ། ཏེ་ན་ཧཱུྃ། ཏེ་ན་ཧཱུྃ། ཏེ་ན་ཏེ་ཏེ་ཧཱུྃ། སུ་ར་ན་ར་བནྡི་ཏ་ཙ་ར་ཎ། དྷ་རུ་ཀུ་སུ་མ་བི་མནྨ་ན་ཐ་རོ་ཥ་ཀ་རུ། ཧེ་བཛྲ་ཏུ་ཧཱུྃ། ཏེ་ན་ཧཱུྃ། ཏེ་ན་ཧཱུྃ། ཏེ་ན་ཏེ་ཏེ་ཧཱུྃ། བྷ་ཝ་བི་མུཀྟི་བི་ཤེ་ཥོ། གུ་ཧྱ་ནི་གུ་ཛི། ཨ་ཨེ་ར་མ་ར་མ་ཧེ་བཛྲ་ཏུ་ཧཱུྃ། གུ་ཧྱ་ནི་བཌྷི། ཨ་ཀོ་ཛུ་ཏུ་ཧཱུྃ། ཞེས་པས་བསྟོད་ལ། པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཡས་པར་སྤོས་ཕོར་བཟུང་ལ། གཡོན་པས་དྲིལ་བུ་གསིལ་ཞིང་། ཐུགས་བརྩེ་ཕན་པའི་དགོངས་པ་ཅན། །སངས་རྒྱས་བདག་ལ་དགོངས་སུ་གསོལ། །རྡོ་རྗེ་འཆང་ཆེན་བདག་མིང་འདིས། །དཀྱིལ་འཁོར་ཆེ་གེ་མོ་བསྐྱེད་ཕྱིར། །ཅི་ནུས་པ་ཡི་ཉེར་སྤྱོད་ཀྱིས། །སློབ་མ་རྗེས་སུ་གཟུང་བ་དང་། །ཁྱེད་རྣམས་ལ་ཡང་མཆོད་བགྱིད་ན། །རྗེས་སུ་བརྩེ་བ་བསྐྱེད་ནས་ནི། །བསྙེན་ཏེ་བཞུགས་པར་མཛད་པའི་རིགས། །ཞེས་བྱ་བ་ལན་གསུམ་དང་། སྔར་སའི་ལྷ་མོའི་སྐབས་སུ་བཤད་པ་ལྟར་སྙན་གསན་དབབ་བོ། །དེ་ནས་ལྷ་དང་འབྱུང་པོ་ཐ་མི་དད་ཀྱི་ཆོ་གས་གཏོར་མ་དང་པོ་དང་། སྲུང་མའི་གཏོར་མ་གསུམ་དང་། མཁའ་འགྲོ་སྤྱི་གཏོར་རྣམས་ཆོ་ག་བཞིན་བསྔོས་ནས་ཚོགས་ཀྱི་འཁོར་ལོའམ་དཔའ་བོའི་སྟོན་མོ་ཚུལ་བཞིན་དུ་བྱའོ།། །།དྲུག་པ་སློབ་མ་སྟ་གོན་ལ་དོན་བཅུ་གསུམ་སྟེ། ལུས་ཀྱི་བྱ་བ་དང་། གསོལ་བ་གདབ་པ་དང་། གསང་སྔགས་ཀྱི་ཐེག་པ་གཟུང་བར་གདམས་པ་དང་། རྒྱུན་བཤགས་བྱ་བ་དང་། སྡོམ་པ་གཟུང་བ་དང་། གནས་གསུམ་བསྲུང་བ་དང་། མཆོད་པས་མཆོད་པ་དང་། ཁྱོར་ཆུ་བླུད་པ་དང་། སོ་ཤིང་དོར་བ་དང་། སྲུང་སྐུད་གདགས་པ་དང་། ཆོས་ཟབ་མོས་སྤྲོ་བ་བསྐྱེད་པར་བྱ་བ་དང་། ཉལ་དུ་གཞུག་པའི་བྱ་བ་དང་། རྨི་ལམ་བརྟག་ཅིང་ངན་ན་བསྲུང་བའོ། །དང་པོ་ནི། ཁྲུས་བྱས་ཏེ་གོས་གཙང་མ་གྱོན་ནས་ཕྱག་འཚལ་ཏེ་མཎྜལ་ཕུལ་ནས་མེ་ཏོག་སྙིམ་པར་བཟུང་ལ་ཙོག་ཙོག་པུར་འདུག་པའོ། །གཉིས་པ་ནི། སྐྱེ་རྒ་ན་དང་འཆི་བ་ཡི། །ཆུ་སྲིན་ལ་སོགས་འཇིགས་དང་བཅས། །སྲིད་པའི་རྒྱ་མཚོར་བྱིང་བ་ལས། །འདོན་པར་མཛད་པ་ཁྱོད་འབའ་ཞིག །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་བྱ་བའི་ཚིགས་སུ་བཅད་པ་ཕྱེད་དང་བཞི་པས་ལན་གསུམ་གྱི་བར་དུ་སློབ་མས་གསོལ་བ་གདབ་པ་བརྗོད་པར་བྱའོ། །གསུམ་པ་ནི། ཁྱོད་ནི་ཚུལ་ཆེན་སྣོད་ཡིན་གྱི། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྤྱོད་པ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བྱ་བའི་ཚིགས་སུ་བཅད་པ་ལྔ་སློབ་དཔོན་གྱིས་ངག་ཏུ་བརྗོད་ལ་དེའི་དོན་རྣམས་བཤད་པར་བྱའོ། །བཞི་པ་ནི། སློབ་མས་སློབ་དཔོན་གྱིས་རྗེས་སུ། བདག་གིས་ཐོག་མ་མེད་དུས་ནས། །ཞེས་སོགས་བཟང་པོ་ཡོངས་གཟུང་ལས་འབྱུང་བའི་རྒྱུན་བཤགས་སྒྲུབ་ཐབས་ལྟར་ལན་གསུམ་བྱའོ། །ལྔ་པ་ནི། གཞུང་ལས་སྡོམ་པ་གཟུང་བ་ཙམ་ལས་མེད་ཀྱང་། སྡོམ་པ་བསྒྲག་པ་སྔོན་དུ་སོང་ན་ངེས་པའི་ཤེས་པ་སྐྱེ་བའི་ཕྱིར་བསྒྲག་པའི་ཆོ་ག་རྒྱས་པར་བྱའོ། །དེ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །སྡོམ་པ་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་ཁྱོད་ཀྱིས་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་དང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ཀྱང་ཅི་ནུས་བྱ། །དེ་ལས་གཞན་ཡང་བཅུ་བཞི་ནི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དོ། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གལ་ཏེ་ཉམས་གྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པས་ལོག་པར་མི་སྤྱད་ཅིང་། །རྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་འབྱོར་པ་ཀུན་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་སྐྱོངས། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །རྗེས་མཐུན་སྡོམ་པ་རྒྱ་ཆེར་ནི། །གསང་བའི་རྒྱུད་ལས་རབ་ཏུ་བཤད། །ཅེས་ལན་གཅིག་བསྒྲགས་ལ་དོན་བཤད་པར་བྱའོ། །དེ་ནས་སློབ་མས་འདི་སྐད་བརྗོད་པར་བྱའོ། །གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་སྡོམ། །དེང་ནས་བརྩམས་ཏེ་བརྟན་པོར་གཟུང་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །དེ་ཉིད་ཡང་དག་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་པོ་ཆེ་ཡི་རིགས་སྦྱོར་བའི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་སོ་སོར་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་བྱ་བ་ལན་གསུམ་གྱི་བར་དུ་བརྗོད་པས་སྡོམ་པ་གཟུང་བའོ། །དྲུག་པ་ནི། སློབ་དཔོན་གྱི་དྲི་ཞིམ་པོའི་ཆུ་ལ་ཧཱུྃ་ཞེས་བརྗོད་པས་ལུས་ཐམས་ཅད་ལ་གཏོར་ལ། ཡང་རྡོ་རྗེ་དང་བཅས་པའི་ལག་པས་སློབ་མའི་སྙིང་གར་དྲིས་བྱུགས་ལ་ཧཱུྃ་ཞེས་བརྗོད་པས་དེར་རྡོ་རྗེ་རྩེ་ལྔ་པ་ལ་ཧཱུྃ་བསམ། ཡང་མགྲིན་པར་ཐིག་ལེ་བྱས་ལ་ཨཱཿཞེས་བརྗོད་པས་པདྨ་ལ་ཨཱཿདམར་པོ་བསམ། ཡང་སྤྱི་བོར་ཐིག་ལེ་བྱས་ལ་ཨོཾ་ཞེས་བརྗོད་པས་སྣ་ཚོགས་རྡོ་རྗེའི་ལྟེ་བ་ལ་ཨོཾ་བསམས་ལ། ཡང་སྙིང་ག་དང་། སྤྱི་བོ་དང་། མགྲིན་པར་རེག་ཅིང་རིམ་པ་བཞིན་དུ་ཧཱུྃ་ཨོཾ་ཨཱཿཞེས་བརྗོད། ཡང་ཡས་རིམ་བཞིན་ཨོཾ་ཨཱཿཧཱུྃ་ཞེས་བརྗོད་དོ། །བདུན་པ་ནི། དེ་ནས་རང་རང་གི་སྔགས་ཀྱིས་མཆོད་པར་བྱ་སྟེ། མེ་ཏོག་མགོ་ལ། བདུག་སྤོས་ཤངས་ལ། མར་མེ་མདུན་ལ། དྲི་སྙིང་གར། ལྷ་བཤོས་ཞལ་དུའོ། །བརྒྱད་པ་ནི། སོ་ཤིང་སོར་བཅུ་གཉིས་པའི་རྩེ་མོར་མེ་ཏོག་བཅིངས་ལ་དྲིའི་ཆུས་གཏོར་ཏེ། ཨོཾ་ཨཱཿཛི་ཧྭཱ་སཾ་བ་ར་ད་ནི་སྭཱ་ཧཱ། ཞེས་ལན་བདུན་བཟླས་ཏེ་སློབ་མ་ལ་བྱིན་ལ་དེས་རྩེ་མོ་ནས་འཆོས་ཏེ་སོ་ཤིང་དེ་རིན་པོ་ཆེ་གསེར་རམ་དངུལ་ལས་བྱས་པ་དེ་ཟོས་པས་ཐོག་མ་མེད་པ་ནས་བསགས་པའི་སྡིག་པ་ཀུན་སྐྱུགས་སྨན་བཏང་བ་བཞིན་དག་པར་བསམས་ལ། བའི་ཀོ་བ་ཙམ་གྱི་དཀྱིལ་འཁོར་གྱི་དབུས་སུ་དོར་ལ་ལྟས་བརྟག་གོ། །།དགུ་པ་ནི། ཡང་དྲིའི་ཆུ་ལ་ཨོཾ་ཧྲཱིཿབི་ཤུདྡྷཿསརྦ་དྷརྨཱཿསརྦ་པཱ་པྃ་ནིཥ་ཙསྱ་སཾ་ཤོ་དྷ་ཡ་སརྦ་བི་ཀལྤ་ཨཱ་པ་ན་ཡ་ཧཱུྃ། ཞེས་ལན་བདུན་བཟླས་ལ་སློབ་མ་ལ་བླུད་དོ། །བཅུ་པ་ནི། སྐུད་པ་དམར་པོ་རང་གི་ལུས་ཚད་ཙམ་སུམ་ལྟབ་ཏུ་བྱས་ལ་དེ་ལ་ཧཱུྃ་བཟླས་པའི་མདུད་པ་སུམ་བརྩེགས་པ་གསུམ་བྱས་ཏེ། དེ་ཐལ་མོར་བཅུག་ལ་སྟོང་པའི་ངང་ལས་སྲུང་སྐུད་བསྐྱེད་ལ་ཡེ་ཤེས་ཀྱི་སྲུང་སྐུད་བཅུག་སྟེ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཅེས་བརྗོད་ལ་སློབ་མའི་དཔུང་པ་གཡོན་པར་བཅིང་བར་བྱའོ། །བཅུ་གཅིག་པ་ནི། ཕྱིར་མི་ལྡོག་པར་བྱ་བའི་ཕྱིར་ཆོས་ཟབ་མོ་བཤད་པས་སྤྲོ་བ་བསྐྱེད་པར་བྱ་སྟེ། བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །དེ་བཞིན་གཤེགས་པ་རྣམས་སུ་འགྱུར། །རང་བྱུང་བསྐལ་པ་ཆེན་པོ་ལ། །འཇིག་རྟེན་ཀུན་གྱི་མཆོད་ཆེན་ཏེ། ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱིས། །རབ་ཏུ་མི་རྟོགས་གནས་མེད་པ། །སྤྲོས་པ་ཀུན་དང་བྲལ་བ་སྟེ། །སྤྲོས་པ་ཀུན་གྱིས་རྣམ་པར་སྤྲོས། །ལས་དང་བྱ་བ་ལ་སོགས་བྲལ། །བདེན་པ་གཉིས་ལ་གནས་པ་ཡིས། །ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་ན་འཐོབ་པར་འགྱུར། །ཞེས་བྱ་བ་ལ་སོགས་པ་བརྗོད་ཅིང་དེའི་དོན་རྒྱས་པར་བཤད་དོ། །བཅུ་གཉིས་པ་ནི། སློབ་མ་སྐད་ཅིག་གིས་ལྷག་པའི་ལྷར་མོས་པར་བྱས་ལ་ཀུ་ཤའི་ཆུན་པོ་གཉིས་ལ་དྷིཿཞེས་བྱ་བ་བཟླས་ཏེ། གཅིག་ནི་སྔས་སུ་སྦྱིན། གཅིག་སྟན་དུ་བྱིན་ལ་དཀྱིལ་འཁོར་གྱི་ཁང་པ་དེ་ཉིད་དམ་གཞན་དུའང་རུང་སྟེ་ཉལ་དུ་བཅུག་ལ་རྨི་ལམ་ཅི་མཐོང་བ་ང་ལ་སྨྲོས་ཤིག་ཅེས་བསྒོ། ཀུ་ཤ་སྦྱིན་པ་འདི་གཞན་དང་མཐུན་པར་ཟབ་མོའི་ཆོས་བཤད་པའི་གོང་དུ་ཕྱག་ལེན་མཛད་དོ། །བཅུ་གསུམ་པ་ནི། སང་ནངས་པར་སློབ་མ་དག་གི་རྨི་ལམ་དྲིས་ཏེ། དེ་ལ་དགེ་བའི་རྨི་ལམ་ནི་སངས་རྒྱས་དང་། དེའི་སྐུ་གཟུགས་དང་། མཆོད་རྟེན་རྣམས་མཐོང་ཞིང་། དེ་དག་ལ་མཆོད་པ་བྱེད་པ་དང་། དགེ་སློང་ལས་ཆོས་ཉན་པ་ལ་སོགས་པ་དང་། གླེགས་བམ་ཀླག་པ་དང་། རྒྱལ་པོར་དབང་བསྐུར་བ་དང་། བཞོན་པ་ལ་ཞོན་པ་དང་། ནས་དང་། འབྲུ་དང་། ཟས་ཐོབ་པ་ལ་སོགས་པ་དང་། མི་དགེ་བའི་ལྟས་ནི་རྒྱ་སྐྱེགས་ཀྱི་རི་ལ་འཛེགས་པ་དང་། ཀཱ་ར་བཱི་རའི་མེ་ཏོག་རྒྱས་པ་འཐུ་བ་དང་། བྱེ་མའམ་ཐལ་ཆེན་ལ་འཛེགས་པ་དང་། བོང་བུ་ལ་ཞོན་ཏེ་ལྷོ་ཕྱོགས་སུ་སོང་ནས་མ་ལོག་པ་དང་། སྤྲེའུ་ལ་ཞོན་ནས་ཤར་ལྷོ་དང་། ཤར་ཕྱོགས་སུ་འགྲོ་བ་ལ་སོགས་པ་རྣམས་ཡིན་ལ། དེ་ལྟར་དགེ་བའི་ལྟས་རྣམས་ལ་སྔགས་ཀྱི་དངོས་གྲུབ་རབ་འབྲིང་གསུམ་འགྲུབ་པར་བསྟན་ཅིང་། མི་དགེ་བའི་ལྟས་མཐོང་བ་རྣམས་ལ་ནི་ཆོས་ཐམས་ཅད་སྒྱུ་མ་དང་རྨི་ལམ་ལྟ་བུའི་རང་བཞིན་དུ་བསྟན་ལ། གཙོ་བོའི་སྔགས་བརྒྱ་རྩ་བརྒྱད་ཀྱིས་བསྲུངས་ཏེ། སངས་རྒྱས་སྤྱན་གྱི་རྣལ་འབྱོར་མན་ངག་ཇི་ལྟ་བ་བཞིན་བྱིན་ལ། བསྲེག་བླུགས་བརྒྱ་རྩ་བརྒྱད་ཕུལ་ལ་ཞི་བའི་སྦྱིན་སྲེག་བྱའོ། །དེ་ནས་སྐབས་འདིའམ་སློབ་མ་དཀྱིལ་འཁོར་གྱི་ཁང་པ་དེ་ཉིད་དུ་ཉལ་དུ་གཞུག་ན་ཆོ་ག་བཅུ་གཉིས་པའི་གོང་དུའང་རུང་རྗེས་ཆོག་བྱ་སྟེ། མཆོད་པ་རྣམས་བསང་སྦྱང་བྱིན་གྱིས་བརླབས་ནས་ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་ཕྱི་མཆོད་དང་། ལྷ་རྣམས་ཀྱི་ས་བོན་གྱི་རྗེས་སུ་ཨོཾ་ཨཱཿཧཱུྃ་བཏགས་པས་ནང་མཆོད་དང་། དཀར་མོ་རི་དྭགས་སོགས་ཀྱིས་ཡིད་བྱུང་དང་། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་པའི་མཆོད་པ་བྱས་ནས་ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ་བར་བྱའོ། །དེ་ནས་ཧཱུྃ་བཛྲ་ཨུཏྟིཥྛ་ཞེས་པའི་སྔགས་དང་ཕྱག་རྒྱས་སྟ་གོན་གྱི་ལྷ་ནམ་མཁར་བཏེག་སྟེ། སླར་ཡང་མཆོད་བསྟོད་བྱས་ལ་མཆོད་གཏོར་དང་ཚོམ་བུ་དམན་མ་རྣམས་བསལ་བར་བྱའོ། །གཉིས་པ་དངོས་གཞི་ལ་ལྔ་སྟེ། བྲིས་སྐུ་དགྲམ་ཞིང་མཆོད་པ་བཤམ་པ་དང་། དཀྱིལ་འཁོར་སྒྲུབ་ཅིང་མཆོད་པ་དང་། སློབ་དཔོན་དུ་དབང་ཐོབ་པར་བྱ་བ་དང་། སློབ་མ་གཞུག་ཅིང་དབང་བསྐུར་བ་དང་། དཀྱིལ་འཁོར་གྱི་མཇུག་གི་ཆོ་གའོ། །དང་པོ་ནི། སྟ་གོན་བྱས་པའི་སར་འདིའི་བྲིས་སྐུ་རབ་གནས་ཅན་ཞལ་ཤར་དུ་ཕྱོགས་པར་དགྲམ། དེའི་མཐར་མཆོད་པ་དང་། གཏོར་མ་སྟ་གོན་གྱི་གནས་སྐབས་ལས་མི་ཉུང་བར་བཤམ། སྔོན་འགྲོ་གཏོར་མ་དང་། ཕྱི་རོལ་པའི་གཏོར་མ་གཉིས་ཀྱང་བཤམ། ཁྱད་པར་དུ་སྐབས་འདིར་བདུད་རྩིའི་ཆུ་ཞེས་བྱ་བ་དམ་གཞག་དང་། གསང་དབང་གི་རྫས་སུ་དགོས་པ་ཆང་ལ་སོགས་པ་ལ་བདུད་རྩིའི་རིལ་བུ་བཏབ་པ་དང་། དམ་ཚིག་གི་ཆུ་ཞེས་བྱ་བ་བུམ་པ་སོ་སོར་བཅས་ན་དེ་དག་གི་ཆུ་བསྡུས་པའམ། གཉིས་ལས་མེད་ན་རྣམ་རྒྱལ་བུམ་པའི་ཆུ་དུང་ཆོས་ལ་སོགས་པར་བླུགས་པ་དང་། མདུན་བསྐྱེད་ཀྱི་མཆོད་པ་ལ་དགོས་པ་འབྲས་བུ་དང་། ལྕགས་ཀྱུ་ལྔ་ཡང་བཤམ་མོ། །གཞན་ཡང་བླ་རེ་དང་། གདུགས་དང་། རྒྱལ་མཚན་དང་། བ་དན་དང་། གོས་ཟུང་ལ་སོགས་པས་བརྒྱན། སློབ་མར་དབང་བསྐུར་བའི་ཕྱིར། གདོང་གཡོགས་དང་། མེ་ཏོག་ཕྲེང་བ་དང་། དབུ་རྒྱན་དང་། རྡོ་རྗེ་དྲིལ་བུ་རྣམས་སློབ་མ་དུ་ཡོད་ཀྱི་གྲངས་དང་མཉམ་པ། ཐུན་མོང་དུ་མེ་ལོང་། མདའ་གཞུ། པོ་ཏི། དུང་། འཁོར་ལོ་རྣམས་དང་། མཆོད་པ་ལྔ་ཚན་དྲུག་དང་། ལས་ཐམས་ཅད་པའི་མཆོད་པ་རྣམས་ཀྱང་བཤམ། གཉིས་པ་ལ་བརྒྱད་དེ། ཆོ་ག་ལ་འཇུག་པའི་སྔོན་དུ་འགྲོ་བ་དང་། བདག་ཉིད་ཀྱི་རྣལ་འབྱོར་དང་། མཆོད་པ་བསང་ཞིང་བྱིན་གྱིས་བརླབ་པ་དང་། དཀྱིལ་འཁོར་སྒྲུབ་པ་དངོས་དང་། མཆོད་པ་འབུལ་བ་དང་། བདག་གིས་བདུད་རྩི་མྱང་བ་དང་། ཕྱོགས་སྐྱོང་ལ་གཏོར་མ་སྦྱིན་པ་དང་། ལྷག་ཆད་ཁ་བསྐང་བའོ། །དང་པོ་ནི། སློབ་དཔོན་དཔོན་སློབ་རྣམས་འཁོར་ལོས་སྒྱུར་བའི་ཆ་ལུགས་དང་ལྡན་པས་དཀྱིལ་འཁོར་གྱི་ཤར་ཕྱོགས་སུ་འདུག སོ་སོའི་མདུན་དུ་ནང་མཆོད་རྡོ་རྗེ་དྲིལ་བུ་རྣམས་བཤམས་ཏེ། སྟ་གོན་གྱི་སྐབས་ལྟར་སྔོན་འགྲོ་རྣམ་གསུམ་སྔོན་དུ་སོང་ནས་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་ཀྱིས་རྒྱུད་སྦྱང་བར་བྱའོ། །གཉིས་པ་ནི། ཚོགས་ཞིང་སྤྱན་དྲང་བ་ནས་བཟུང་སྟེ། བདག་གི་རྣལ་འབྱོར་ཡན་ལག་དྲུག་རྫོགས་པར་བསྒོམ། བཟླས་པ་ཅུང་ཟད་བྱས་ནས་བདག་གིས་བསྒོམས་པའི་འཁོར་ལོ་ལ་ཕྱི་མཆོད་ནང་མཆོད་ཡིད་ལས་བྱུང་བའི་མཆོད་པ་དང་བསྟོད་པ་རྣམས་བྱས་ཏེ་དཀྱིལ་འཁོར་བསྡུས་ལ། རྡོ་རྗེ་ཅན་གྱི་ང་རྒྱལ་གྱིས་གནས་པར་བྱའོ། །གསུམ་པ་ནི། མདུན་དུ་བཤམས་པའི་མཆོད་པ་རྣམས་བསང་སྦྱངས། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་ཞབས་བསིལ་ནས་རོལ་མོའི་བར་རྣམས་དྭངས་ཤིང་ཐོགས་པ་མེད་པར་བྱིན་གྱིས་བརླབས་ལ་མཆོད་ཡོན་གྱི་ཕྱག་རྒྱ་དང་། ཨོཾ་བཛྲ་ནཱི་རཱི་ཏི་ཧཱུྃ་ཁྃ་ཞེས་པས་ཞབས་བསིལ་དང་། ཨོཾ་དྷྭྃ་དྷྭྃ་གྱིས་ཞལ་བསིལ་དང་། ཨོཾ་ཛཿཧཱུྃ་བྃ་ཧོཿཁྃ་རྃ་ལན་གཉིས་ཀྱིས་འཐོར་འཐུང་དང་། མཆོད་ཡོན་བྱིན་གྱིས་བརླབ། མེ་ཏོག་ལ་སོགས་པ་རང་རང་གི་སྔགས་ཀྱིས་བྱིན་གྱིས་བརླབ་བོ། །སྐབས་འདི་མ་གཏོགས་པ་གོང་འོག་གཞན་དུ་ཆུ་བཞི་ཡང་རང་མིང་གིས་བྱིན་གྱིས་བརླབ་བོ། །དེ་བཞིན་དུ་བདུད་རྩི་དང་། དམ་ཚིག་གི་ཆུ་དང་། ལྕགས་ཀྱུ་ཡང་གཡོན་པའི་སྲིན་ལག་དང་མཐེ་བོང་སྦྱར་བའི་ཕྱག་རྒྱ་དང་བཅས་ཏེ། ཨོཾ་ཨཱཿསྭཱ་ཧཱ། ཨོཾ་ཨཱཿཧཱུྃ་སྭཱ་ཧཱ། ཨོཾ་ཤྲཱི་ཧཱུྃ་གྷུྃ་ཛྃ་སྭཱ་ཧཱས་བྱིན་གྱིས་བརླབ་བོ། །བཞི་པ་ནི། མདུན་གྱི་དཀྱིལ་འཁོར་བསང་སྦྱངས། སྟོང་པའི་ངང་ལས་ཐུན་མོང་གི་སྲུང་འཁོར་གྱི་དབུས་སུ་ཆོས་འབྱུང་བསྒོམ་པ་ནས་གཞལ་ཡས་ཁང་གདན་དང་བཅས་པའི་བར་སྒྲུབ་ཐབས་ལྟར་བསྐྱེད་ལ། དེ་ནས་རང་ཉིད་ཤར་ཕྱོགས་ཀྱི་སྒོ་ཁང་དུ་གཙོ་བོ་ཡབ་ཡུམ་དུ་གསལ་བའི་མཁའ་གསང་བྱིན་གྱིས་བརླབས། ཡབ་ཡུམ་ཐབས་ཤེས་རབ་སྙོམས་པར་ཞུགས་པའི་སྒྱུ་མ་བདེ་བའི་སྒྲ་དང་། སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཡབ་ཀྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་བཞུ། བྱང་ཆུབ་ཀྱི་སེམས་སུ་གྱུར་པ་ཡབ་ཀྱི་རྡོ་རྗེའི་ལམ་ནས་ཡུམ་གྱི་མཁར་བབས་པ་ལས་ཐིག་ལེ་ཆ་བཞི་བཅུ་རྩ་དགུར་གྱུར། དེ་རྣམས་མི་བསྐྱོད་པ་གཙོ་བོར་གྱུར་པའི་མཁའ་འགྲོ་ལྔ་རིགས་བསྡུས་པའི་དཀྱིལ་འཁོར་གྱི་ལྷ་ཚོགས་སུ་གྱུར་པ་ནི། མཁའ་འགྲོ་ལྔའི་དཀྱིལ་འཁོར་གྱི་དབུས་སུ་རྡོ་རྗེ་མཁའ་འགྲོ། ཤར་དུ་ཕན་པ། ལྷོར་རྡོ་རྗེ་ཉི་མ། ནུབ་ཏུ་པདྨ་གར་དབང་། བྱང་ཏུ་རྟའི་རྒྱལ་པོ་རྣམས་རང་རང་གི་ཡུམ་དང་བཅས་པ། རྡོ་རྗེ་ཅན་གྱི་དཀྱིལ་འཁོར་གྱི་ཤར་དུ་གཽ་རཱི་སོགས། ཕན་པའི་དཀྱིལ་འཁོར་གྱི་ཤར་དུ་སྐམ་པ་མ་སོགས་དང་། རྡོ་རྗེ་ཉི་མའི་དཀྱིལ་འཁོར་གྱི་ཤར་དུ་ཉི་ལག་མ་སོགས། པདྨ་གར་དབང་གི་དཀྱིལ་འཁོར་གྱི་ཤར་དུ་པདྨ་སོགས། རྟའི་རྒྱལ་པོའི་དཀྱིལ་འཁོར་གྱི་ཤར་དུ་སྒོ་ལྕགས་མ་སོགས། དེ་རྣམས་ཀྱི་ཕྱིའི་ཤར་དུ་ལྕགས་ཀྱུ་མ་ནས། བྱང་དུ་དྲིལ་བུ་མ་ཞེས་ནང་དུ་ལྷ་རྣམས་མཚན་ཙམ་བརྗོད་པས་གསལ་གདབ། དེ་རྣམས་ཡུམ་གྱི་མཁའ་ནང་ནས་ཕྱིར་སྤྲོས་ཏེ་དཀྱིལ་འཁོར་གྱི་སོ་སོའི་གདན་རྣམས་ཀྱི་སྟེང་དུ་འཁོད་པ་ནི། དབུས་སུ་རྡོ་རྗེ་མཁའ་འགྲོ་ནས་བྱང་དུ་རྟའི་རྒྱལ་པོ་ཐམས་ཅད་ཀྱང་ཞལ་བརྒྱད་པ་སོགས་ཡབ་ཡུམ་ཐམས་ཅད་འབྲས་བུ་རྡོ་རྗེ་འཛིན་པར་གསལ་གདབ། རྡོ་རྗེ་ཅན་གྱི་འདབ་མ་ལ་གཽ་རཱི་དཀར་མོ་གཡས་ལྕགས་ཀྱུ་འཛིན་པ་ནས། བྱང་སྒོར་དྲིལ་བུ་མ་ལྗང་གུ་དྲིལ་བུ་འཛིན་པ། ལྷ་མོ་དེ་ཐམས་ཅད་ཀྱང་ཞལ་གཅིག་ནས་མེ་འབར་བའི་དབུས་ན་བཞུགས་པའོ། །དེ་ནས་སྙིང་གའི་ས་བོན་གྱི་འོད་ཀྱིས་སྟ་གོན་གྱི་ལྷ་ནམ་མཁར་གནས་པ་རྣམས་བསྐུལ་ཞེས་བརྗོད་ཅིང་ཕྱི་འབྲང་གི་བགེགས་རྣམས་བསྐྲད་པར་བསམས་ལ་རྡོ་རྗེ་གསོར་ཞིང་། ཨོཾ་དྷ་ར་སོགས་གཙོ་བོའི་སྔགས་ལན་གསུམ་བརྗོད། མཚན་སྔགས་རེ་རེ་སྦྱར་བའི་ཆུ་བཞི་དབུལ། ཨོཾ་ཨེ་ཧྱེ་ཧི་བྷ་ག་ཝཱན་ནས་ས་པ་རི་ཝཱ་ར་ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿསོགས་ཀྱིས་དགུག་གཞུག་བཅིང་དབང་དུ་བྱའོ། །དེ་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་རྣམས་སྒྲུབ་ཐབས་བཞིན་དུ་བྱ་སྟེ། ཡན་ལག་བཞི་རྫོགས་པ་ཡིན་ལ། འདི་ལ་རང་བཞིན་གྱི་གནས་ནས་ཡེ་ཤེས་པ་སྤྱན་འདྲེན་པ་ནི་མ་བཤད་དོ། །ལྔ་པ་ནི། དཀྱིལ་ཆོག་ལས་གོས་དང་མེ་ཏོག་ལ་སོགས་པ་དངོས་སུ་འབྱོར་པའི་ཕྱིའི་མཆོད་པ་བརྒྱད་དང་ཞེས་གསུངས་པའི་དོན་གོས་དངོས་སུ་སྨོས་ནས་མེ་ཏོག་ནས་རོལ་མོའི་བར་དྲུག་དང་། འབྲས་བུ་དང་ལྕགས་ཀྱུ་གཉིས་ཏེ་བརྒྱད་ཡིན་པས། གོ་རིམ་ནི་མེ་ཏོག་ནས་རོལ་མོའི་བར་དང་། གོས་ཟུང་གི་མཆོད་པ་སྟ་གོན་ལྟར་བྱས་པའི་རྗེས་སུ། བསོད་ནམས་དཔག་བསམ་ལྗོན་པ་ལས་བྱུང་བའི། །མངར་བའི་རོ་ལྡན་འཛམ་བུའི་འབྲས་སོགས་ཀྱིས། །ཞིང་ཁམས་འདི་དང་རབ་འབྱམས་ཞིང་ཁམས་རྣམས། །བཀང་སྟེ་དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་ཛཾ་སྭཱ་ཧཱ་ཞེས་དང་། ལག་པ་གཉིས་ནམ་མཁའ་མཛོད་ཀྱི་ཕྱག་རྒྱས་འབྲས་བུ་སྣ་ཚོགས་དབུལ་ལོ། །དེ་ནས་ལྕགས་ཀྱུ་ལྔ་དངོས་སུ་བཤམས་པ་ཡོད་དམ་མེད་ན་ནང་མཆོད་ཀྱི་དབུས་ནས་མཐེབ་སྲིན་གྱིས་བླངས་ཏེ་གཏོར་ཞིང་། དངོས་གྲུབ་འགུགས་ཤིང་མཁའ་འགྲོ་འདུ་བའི་རྫས། །ཁ་ན་མ་ཐོ་མེད་པའི་ལྕགས་ཀྱུ་ལྔས། །སོགས་དང་། ཨོཾ་ཤྲཱི་ཧཱུྃ་གྷཱུྃ་ཛཾ་སྭཱ་ཧཱ་ཞེས་པས་ལྕགས་ཀྱུ་ལྔ་དབུལ། དེ་ནས་མཆོད་པ་ཉི་ཤུ་པ་དང་། བསྟོད་པའི་མཆོད་པ་སྟ་གོན་བཞིན་བྱ་སྟེ། འདི་ནི་དཀྱིལ་ཆོག་ལས་འབྱུང་བ་བསྡུས་པའི་ལུགས་ཡིན་ལ། རྒྱས་པ་ལ་སྤྲོ་ན་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་མཛད་པའི་མཆོད་ཕྲེང་ལྟར་བྱའོ། །དྲུག་པ་ནི། སྔར་བཤམས་པའི་བདུད་རྩིའི་ཆུ་བྱིན་གྱིས་བརླབས་ནས་ཨོཾ་ཨཱཿཧཱུྃ་ཞེས་པས་བདག་གི་ལྕེ་ལ་མྱང་བར་བྱའོ། །འདི་ནི་འོག་གི་གསང་དབང་གི་རྫས་བྱིན་གྱིས་བརླབ་པ་དང་། སྐབས་འདི་བདག་ཉིད་ཀྱི་བདུད་རྩི་མྱང་བ་གཉིས་ཀའི་དགོས་པའོ། །བདུན་པ་ནི། སྒྲུབ་གཡོག་དཀྱིལ་འཁོར་བསྲུང་དུ་བཅུག་ལ་རང་ཉིད་རྡོ་རྗེ་དྲིལ་བུ་དང་བཅས་ཏེ་ཕྱིར་བྱུང་ནས་དཀྱིལ་འཁོར་གྱི་ཁང་པའི་སྒོ་དྲུང་དུ་སྟེགས་ཀྱི་སྟེང་དུ་རབ་ཏུ་རྒྱ་ཆེ་བའི་གཏོར་མ་བ་དན་གྱིས་བརྒྱན་པ་བཞག དེའི་གཡས་སུ་ཆུ་བཞི་དང་། གཡོན་དུ་ཉེར་སྤྱོད་ལྔ་དང་། མདུན་དུ་སྣོད་གཞན་གྱི་ནང་དུ་ནང་མཆོད་བཤམ། གཏོར་མ་ནང་མཆོད་ཆུ་ཆང་གིས་སྦྱངས་ཏེ་མཆོད་པ་དང་གཏོར་མ་གཉིས་ཀ་ཆོ་ག་ལྟར་བྱིན་གྱིས་བརླབ། གཏོར་མའི་མདུན་གྱི་ནམ་མཁར་ཆོས་འབྱུང་སུམ་བརྩེགས་ཀྱི་ནང་དུ་འབྱུང་པོ་བརྒྱད་གསུམ་ཉི་ཤུ་རྩ་བཞི་རྡོ་རྗེ་གསུམ་དང་བཅས་པ་ཡན་ལག་བཞི་རྫོགས་སུ་བསྐྱེད་ནས་ཐོག་མར་ཆུ་བཞི་དང་། ཨོཾ་ཨིནྡ་མན་ཆད་ཀྱི་གཏོར་སྔགས་ལན་གསུམ་གྱིས་གཏོར་མ་དབུལ། མེ་ཏོག་ལ་སོགས་པའི་ཕྱི་མཆོད་དང་ནང་མཆོད་ཀྱིས་མཆོད་ནས། དཀར་མོ་རི་དྭགས་སོགས་དང་། མི་བསྐྱོད་རྡོ་རྗེ་ཡེ་ཤེས་ཆེ་ནས། ཡིད་ལ་འདོད་པ་ཀུན་འགྲུབ་ཤོག་གི་བར་དང་། སྔར་གྱི་སློབ་མ་གཞུག་ཅིང་དབང་བསྐུར་བར་འཚལ་ན་ཞེས་པའི་མཇུག་ཏུ་སྲུང་མ་ཁྱད་པར་ཅན་ཁྱེད་རྣམས་ཀྱིས་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བར་དུ་གཅོད་པ་ཐམས་ཅད་ལས་བསྲུང་དུ་གསོལ། དེ་ནས་ཀྱང་བྱང་ཆུབ་མ་ཐོབ་ཀྱི་བར་དུ་བསྲུང་བ་དང་། བསྐྱབ་པ་དང་། སྦ་བར་མཛད་དུ་གསོལ། ཞེས་དང་། རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་དང་། བསྔོ་བ་སྨོན་ལམ་རྣམས་བྱ་སྟེ་དེའི་བར་དུ་མཆོད་པ་རྣམས་མཆོད་ཡོན་མ་གཏོགས་པ་མཐའ་ནས་རིམ་པ་བཞིན་བསྡུས་ཏེ་གཏོར་མར་བླུག དེ་ནས་མཆོད་ཡོན་གྱི་ཕྱག་རྒྱ་དང་། ཧྲཱིཿབི་ཤུདྡྷཿསོགས་བརྗོད་ཅིང་དེའི་ཚེ་སྒྲུབ་གཡོག་པས་མཆོད་ཡོན་གཏོར་མ་ལ་བསྐོར་ནས་གང་དུ་བསྐྱེལ་བའི་སར་གཏོར། གུར་ནས་གསུངས་པའི་ཡི་གེ་བརྒྱ་པའི་རྗེས་སུ་མུཿ ཞེས་བརྗོད་པས་གཏོར་མགྲོན་གྱི་ཡེ་ཤེས་པ་རྣམས་དཀྱིལ་འཁོར་གྱི་ཁང་པའི་ཕྱི་རོལ་དུ་འཁོད། དམ་ཚིག་པ་རྣམས་རང་ལ་བསྡུས་ནས་རང་དང་སྒྲུབ་པའི་གྲོགས་རྣམས་ཀྱི་གནས་གསུམ་དུ་ཡི་གེ་གསུམ་གྱིས་བསྲུང་ཞིང་། གཏོར་མ་རོལ་མོས་སྣ་དྲངས་ཏེ་ས་གཙང་སར་བསྐྱལ་ལོ། །བརྒྱད་པ་ནི། དེ་ནས་གཙོ་བོའི་སྔགས་བཟླ་ཞིང་ནང་དུ་ལོག་ལ་སྒྲུབ་པའི་གྲོགས་དང་ལྷན་ཅིག་དཀྱིལ་འཁོར་ལ་ལན་གསུམ་བསྐོར་ཞིང་ཡི་གེ་བརྒྱ་པ་བརྗོད་ལ། དཀྱིལ་འཁོར་གྱི་ཤར་ཕྱོགས་སུ་ལངས་ཏེ་བདག་ཅག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས། ཏིང་ངེ་འཛིན་མི་གསལ་བ་དང་། བྱིང་བ་དང་། རྒོད་པའི་དབང་དུ་གྱུར་པ་ཐམས་ཅད་དང་། ཆོ་ག་ལྷག་པ་དང་། མ་ཚང་བར་གྱུར་པ་དང་། མཆོད་པའི་ཡོ་བྱད་མ་འབྱོར་པ་དང་། ཉམས་པ་དང་། དཀྱིལ་འཁོར་འབྲི་བ་ལ་སོགས་པའི་སྐྱོན་དུ་གྱུར་པ་ལ་སོགས་པ་དེ་དག་ཐམས་ཅད་བཟོད་པར་མཛད་དེ་ལྷག་ཆད་ཁ་བསྐང་བར་མཛད་དུ་གསོལ། ཞེས་གསོལ་བ་གདབ་སྟེ་ཕྱག་བྱའོ། །གསུམ་པ་སློབ་དཔོན་དུ་དབང་ཐོབ་པར་བྱ་བ་ནི། དཀྱིལ་འཁོར་མངོན་སུམ་ལྟར་དམིགས་ལ་དཀྱིལ་འཁོར་གྱི་བདག་པོ་ལ་གསོལ་བ་གདབ་པ་ནས་བརྩམས་ཏེ་འཇུག་པ་དང་། དབང་ཡོངས་སུ་རྫོགས་པ་བདག་འཇུག་གི་ཚུལ་དུ་བླང་བར་བྱ་སྟེ། དེའི་ཚེ་ལས་ཀྱི་བྱ་བ་ཐམས་ཅད་ནི་གཙོ་བོའི་ཐུགས་ཀ་ནས་སྤྲུལ་པའི་ཧེ་རུ་ཀ་ཞལ་གཅིག་ཕྱག་གཉིས་པ་ཞིག་གིས་མཛད་པར་བསྒོམ་མོ། །དེ་ལྟར་བདག་འཇུག་རྫོགས་པ་དང་། སློབ་མ་གཞུག་པའི་ཕྱིར་དཀྱིལ་འཁོར་གྱི་འཁོར་ལོ་དང་། སློབ་དཔོན་དང་སློབ་མ་ཐམས་ཅད་སྣང་ལ་རང་བཞིན་མེད་པར་ཤེས་པར་བྱས་ཏེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །དེ་བཞིན་ཉིད་ལས་ངེས་པར་སྐྱེས། །བདེན་པ་དེ་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག །ཅེས་བྱ་བའི་ཚིགས་སུ་བཅད་པ་གཉིས་བརྗོད་ལ། ཡང་དོན་དེ་ཉིད་གསལ་བར་བྱ་བའི་ཕྱིར། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པ་ཡི། །སེམས་དཔའ་རྡོ་རྗེ་ཆེ་རང་བཞིན། །མི་བསྐྱོད་རྡོ་རྗེར་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པའང་ཁྱོད། །འདོད་ཆགས་ཀུན་གྱིས་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ཕྱག་རྒྱའི་མཆོག །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་བདག་བདག་གྲུབ་མཛོད། །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་བཞུགས། །སེམས་ཅན་ཀུན་གྱི་ཡབ་གྱུར་ཉིད། །འདོད་མཆོག་དམ་ཚིག་མཆོག་གྱུར་པའོ། །བདེན་པ་གང་གིས་ཡེ་ཤེས་མཆོག །ཤེས་རབ་ཐབས་དག་དཀྱིལ་འཁོར་ཡིན། །བདེན་པ་དེ་ཡིས་མགོན་བདག་ལ། །ཁྱོད་ཀྱི་འདོད་པ་རབ་རྫོགས་མཛོད། །ཅེས་བྱ་བས་བསྟོད་དོ། །དེ་ནས། བདག་ནི་གཙོ་བོའི་དཀྱིལ་འཁོར་དུ། །སློབ་མ་རབ་ཏུ་གཞུག་པར་བགྱིད། །སེམས་ཅན་དོན་དུ་བདག་གསོལ་འདེབས། །བཟོད་པར་མཛད་དེ་དགོངས་སུ་གསོལ། །ཞེས་པས་གསོལ་བ་གདབ་བོ། །འདི་དག་ཀྱང་ཆོ་ག་གཞན་དང་བསྟུན་པའི་ཚེ་མན་ངག་ལུགས་བཞིན་དུ་བྱས་པས་རུང་ངོ་།། །།བཞི་པ་སློབ་མ་གཞུག་ཅིང་དབང་བསྐུར་བ་ལ་གསུམ་སྟེ། དཀྱིལ་འཁོར་དུ་གཞུག་པ་དང་། དཀྱིལ་འཁོར་བསྟན་པ་དང་། དབང་བསྐུར་བའོ། །དེ་ལ་དང་པོ་ལ་གསུམ་སྟེ། ཕྱི་རོལ་དུ་བྱ་བའི་ཆོ་ག་དང་། ནང་དུ་གཞུག་པ་དང་། ནང་དུ་བྱ་བའི་ཆོ་གའོ། །དང་པོ་ལ་བདུན་ཏེ། སློབ་མས་སློབ་དཔོན་ལ་གསོལ་བ་གདབ་པ་དང་། སློབ་དཔོན་གྱིས་ལྷ་ལ་གསོལ་བ་གདབ་པ་དང་། དམ་ཚིག་གཟུང་བར་གདམས་པ་དང་། གདོང་བཅིང་བ་དང་། བསྲུང་བ་དང་། ཕྲེང་བ་གཏད་པ་དང་། སྦྱང་བ་བྱ་བའོ། །དང་པོ་ནི། དེ་ལྟར་སློབ་དཔོན་དུ་དབང་ཐོབ་པའི་རྗེས་ལ་གདོང་གཡོགས་དང་། ཕྲེང་བ་དང་། རྡོ་རྗེ་དང་། ལས་ཐམས་ཅད་པའི་བུམ་པ་ལ་སོགས་པ་ཉེ་བར་མཁོ་བའི་ཡོ་བྱད་རྣམས་ཉེ་བར་བསགས་ནས་དཀྱིལ་འཁོར་གྱི་སྒོ་དྲུང་དུ་སོང་ལ་སློབ་མ་བོས་ཏེ། སློབ་མ་རྣམས་ཁྲུས་བྱེད་དུ་བཅུག་ལ་སློབ་དཔོན་གྱི་ཞབས་ལ་ཕྱག་བྱས་ལ་སྟ་གོན་གྱི་རིམ་པ་བཞིན་གྲལ་དུ་བཀོད་ལ་མཎྜལ་བྱས་ཏེ་མེ་ཏོག་གི་ཕྲེང་བས་སྙིམ་པ་བཀང་སྟེ། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་རོལ་མོ་ལས་བྱུང་བ། །མི་ལྡོག་འཁོར་ལོའི་འབྱོར་པར་ལྡན། །ཐར་པ་ཆེན་པོའི་གྲོང་མཆོག་ཏུ། །གསང་བ་ཆེན་པོར་འཇུག་པར་བགྱི། །གསང་བའི་རིགས་མཐོ་ཐམས་ཅད་དུ། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོས་བདག་ལ་སྩོལ། །དབང་བསྐུར་བ་ནི་རྨད་བྱུང་ཆེ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་གྱུར། །སློབ་དཔོན་ཆེན་པོ་བདག་ལ་སྩོལ། །ཞེས་བྱ་བའི་ཚིགས་སུ་བཅད་པ་ཕྱེད་དང་དྲུག་གིས་ལན་གསུམ་གྱི་བར་དུ་གསོལ་བ་གདབ་བོ། །གཉིས་པ་ནི། སློབ་དཔོན་གྱིས་ལྷ་རྣམས་མངོན་སུམ་ལྟ་བུར་དམིགས་ལ། རྣམ་དག་ཆེ་གེ་མོ་ཞེས་པ། །བྱང་ཆུབ་སེམས་ནི་ཡོངས་འཛིན་ཅིང་། །གསང་བའི་དཀྱིལ་འཁོར་འདིར་ཞུགས་ནས། །དམ་ཚིག་དང་ནི་སྡོམ་པར་འཚལ། །ཞེས་བྱ་བ་ལན་གསུམ་གྱི་བར་དུ་ཞུ་བར་བྱའོ། །གསུམ་པ་ནི། དེ་ལྟར་གནང་བ་ཐོབ་ནས། གསང་བ་ཆེན་པོའི་རིགས་དག་པ། །གསང་བ་ཡོངས་སུ་འཛིན་པ་རུ། །བདག་ཉིད་ཆེན་པོ་ཁྱོད་འདོད་དམ། །ཞེས་དྲི་བར་བྱའོ། །དེས་ཀྱང་། གསང་བ་ཆེན་པོའི་རིགས་དག་པ། །གསང་བ་ཡོངས་སུ་འཛིན་པ་རུ། །སེམས་དཔའ་ཆེན་པོ་བདག་འཚལ་ལོ། །ཞེས་ལན་གསུམ་བརྗོད་པ་ནི་དམ་ཚིག་དང་སྡོམ་པ་མ་ལུས་པར་གཟུང་བ་ཡིན་ནོ། །བཞི་པ་ནི། སློབ་དཔོན་གྱིས་རྡོ་རྗེ་དང་བཅས་ཏེ་གོས་དམར་པོ་བཟུང་ནས། ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨ་ལཾ་ཀཱ་ར་ཝསཏྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པས་སྨད་གཡོགས་གོས་དམར་པོ་སྦྱིན། ཨཱ་ཁཾ་ཝཱི་ར་ཧཱུྃ་ཞེས་བྱ་བས་གོས་དམར་པོའི་གདོང་གཡོགས་བཅིང་ངོ་། །ལྔ་པ་ནི། ལས་ཐམས་ཅད་པའི་བུམ་པ་ལ་ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ་ཅེས་བཟླས་ཏེ། སྔགས་དེ་ཉིད་བཟླ་ཞིང་ཆུ་དེས་སློབ་མ་ལ་གཏོར་བར་བྱའོ། །དྲུག་པ་ནི། མེ་ཏོག་གི་ཕྲེང་བ་གཏད་པ་སྟེ། མེ་ཏོག་ལྔའང་དགུའི་ཕྲེང་བ་ལག་པར་གཟུང་དུ་གཞུག་པའོ། །བདུན་པ་ནི། སློབ་མའི་དཔྲལ་བར་ཨོཾ། མགྲིན་པར་ཨཱཿ སྙིང་གར་ཧཱུྃ་ནག་པོ་བསྒོམས་ཏེ། ཡི་གེ་གསུམ་གྱི་བཟླས་པ་བྱ་བ་ཉིད་དོ། །གཉིས་པ་ནང་དུ་གཞུག་པ་ནི་སློབ་དཔོན་གྱིས། ཁྱོད་སུ་ཡིན་ཅི་ལ་དགའ། ཞེས་དྲི་བར་བྱའོ། །དེས་ཀྱང་སྐལ་བཟང་བདག་བདེ་བ་ཆེན་པོ་ལའོ། །དེ་ནས་ཨོཾ་ཀི་ལི་ཀི་ལི་མི་ལི་གྷཱུརྞི་སཏྭཾ་བཛྲ་ས་ཏྭ་ཙ་ལེ་ཡུྃ་ཡུྃ་ཡུྃ་སྭཱ་ཧཱ། ཞེས་བྱ་བ་བཟླ་ཞིང་ལག་པ་ནས་བཟུང་སྟེ་དཀྱིལ་འཁོར་གྱི་ཁང་པའི་ནང་དུ་གཞུག་པར་བྱའོ། །གསུམ་པ་ནང་དུ་གཞུག་པའི་ཆོ་ག་ལ་གསུམ་སྟེ། སྔོན་འགྲོ་ལུས་དབུལ་ཞིང་བྱིན་གྱིས་བརླབ་པ་དང་། ཡེ་ཤེས་དབབ་པ་དང་འབྲེལ་པ་དང་། དཀྱིལ་འཁོར་དུ་གཞུག་པའི་བྱ་བའོ། །དང་པོ་སློབ་མ་རྣམ་པར་སྣང་མཛད་དུ་མོས་སུ་བཅུག་ལ་སློབ་དཔོན་གྱིས་ཀྱང་སློབ་མ་དེ་བདག་མེད་པའི་ངང་ལ་རྣམ་པར་སྣང་མཛད་དུ་བསྐྱེད་དོ། །དེ་ནས་སློབ་མས་ཨོཾ་སརྦ་བུདྡྷཿཔཱུ་ཛོ་པསྡྱཱ་ནཱ་ཡ་ཨཱཏྨ་ནཾ་ནིརྻཱ་ཏ་ཡཱ་མི། ཨོཾ་ཨཱ་ཙརྻ་པཱུ་ཛོ་པསྡྱཱ་ནཱ་ཡ་ཨཱཏྨ་ནཾ་ནིརྻཱ་ཏ་ཡཱ་མི། ཨོཾ་ས་ཀ་ལ་ས་ཏྭ་པ་རི་ཏྲ་ཎརྠཱ་ཡ་ཨཱཏྨ་ནཾ་ནིརྻཱ་ཏ་ཡཱ་མི་ཞེས་བྱ་བའི་སྔགས་གསུམ་པོ་བརྗོད་དོ། །ཡེ་ཤེས་དབབ་པ་དང་འབྲེལ་པ་ལ་གསུམ་སྟེ། དམ་ལ་གཞག་པ་དང་། ཡེ་ཤེས་དབབ་པ་དང་། བརྟན་པར་བྱ་བའོ། །སྔ་མ་ལ་ལྔ་སྟེ། དམ་ཚིག་སྤྱི་སྦྱིན་པ་དང་། ཕན་ཡོན་ཡོད་པས་མི་སྨྲ་བར་གདམས་པ་དང་། ཉེས་པ་ཡོད་པས་མི་སྨྲ་བར་གདམས་པ་དང་། གཉིས་ཀའི་སྒོ་ནས་བསྲུང་བར་གདམས་པ་དང་། བླ་མའི་བཀའ་ཉན་པར་གདམས་པའོ། །དང་པོ་ནི། རྡོ་རྗེ་དང་དྲིལ་བུ་འཛིན་པས་སློབ་མའི་སྙིང་གར་རྡོ་རྗེ་བཟུང་སྟེ། དེའི་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་བསྒོམས་ལ། ས་མ་ཡ་སཏྭཾ། ས་མ་ཡ་ཨ་ཧཾ། ཞེས་བརྗོད་པར་བྱའོ། །གཉིས་པ་ནི། སློབ་མའི་སྤྱི་བོར་རྡོ་རྗེ་གཟུང་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་གྲུབ་པ་ཡང་ཐོབ་ན་དངོས་གྲུབ་གཞན་ལྟ་ཅི་སྨོས། དེ་ལྟ་བུའི་རྡོ་རྗེའི་ཡེ་ཤེས་བསྐྱེད་པར་བྱ་ཡི། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག དམ་ཚིག་ཉམས་པར་གྱུར་ཏ་རེ་ཞེས་བརྗོད་པར་བྱའོ། །གསུམ་པ་ནི། སློབ་མའི་སྙིང་གར་རྡོ་རྗེ་བཟུང་ལ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བྱ་བ་བརྗོད་པར་བྱའོ། །བཞི་པ་ནི། སྔོན་དུ་བསྒྲུབས་པའི་བདུད་རྩི་ལྔའི་ཆུ་ལ་སྔོན་དུ་བསྟན་པའི་སྔགས་བདུན་བཟླས་ལ་བླུད་ཅིང་། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འཐུངས་ཤིག །ཨོཾ་ཨཱཿསྭཱ་ཧཱ། ཞེས་བྱ་བ་བརྗོད་དོ། །ལྔ་པ་ནི། སློབ་མའི་སྤྱི་བོར་ཡང་རྡོ་རྗེ་བཟུང་ལ། དེང་ཕྱིན་ཆད་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ངས་ཁྱོད་ལ་འདི་བྱོས་ཤིག་ཅེས་གང་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། ཞེས་བྱ་བ་བརྗོད་པར་བྱའོ། །གཉིས་པ་ཡེ་ཤེས་དབབ་པ་དངོས་ནི། སློབ་མས་དེ་བཞིན་གཤེགས་པ་རྣམས་ཀྱིས་བདག་ལ་བྱིན་གྱིས་རློབས་ཤིག དཔལ་རྡོ་རྗེ་སེམས་དཔའ་བདག་ལ་དབབ་པར་མཛད་དུ་གསོལ། ཞེས་ལན་གསུམ་སྨྲས་ལ་ལུས་ཀྱི་སྤྱོད་ལམ་ཙོག་པུ་ལོང་བུ་སྤྲད་པ་མ་བསྙེས་པར་འདུག་ཏུ་བཅུག་སྟེ། དེའི་དམིགས་པ་ནི་ལངས་ནས་འདུག་པར་བསྒོམས་ལ། དེའི་སྙིང་གར་ལྃ་ལས་སའི་དཀྱིལ་འཁོར་གྲུ་བཞི་པ་རྡོ་རྗེ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ། མགྲིན་པར་ཆུའི་དཀྱིལ་འཁོར་ཟླུམ་པོ་བུམ་པ་ལ་ཨཱཿ སྤྱི་བོར་ཡྃ་ལས་རླུང་གི་དཀྱིལ་འཁོར་ལ་ཧ་བསྒོམས། ཡང་རྐང་པའི་འོག་ཏུ་རླུང་གི་དཀྱིལ་འཁོར་ཡྃ་ལས་བྱུང་བ་ཡྃ་གིས་མཚན་པ་གཞུ་བདུངས་པ་ལྟ་བུ་ཆང་ཟུང་ཐུར་ལ་བསྟན་པ་དེའི་མཆོག་མ་གཉིས་ལ་རྐང་པ་བཞག་པར་བསྒོམས་ལ། རྐང་པ་གཉིས་བགྲད་པའི་བར་དུ་མེའི་དཀྱིལ་འཁོར་རབ་ཏུ་འབར་བའི་གསེབ་ཏུ་ཛྷཻཾ་ཞེས་བྱ་བ་ལྗང་གུ་བསྒོམས་ཏེ་དེ་ནས་རླུང་འགུལ་བས་མེ་སྦར་ཏེ། དེས་ལོང་བུའི་རྩ་ནང་ནས་ཞུགས་ནས་ལྟེ་བའི་རབ་དུ་འབར་བས་དེའི་དྲོད་ཀྱིས་སྙིང་གའི་ས་བསྲེགས་ཏེ་མགྲིན་པའི་ཆུ་བསྐོལ་ལ། རྐང་པའི་རླུང་གིས་མས་ཡར་འདེགས་ཤིང་སྤྱི་བོའི་རླུང་གིས་ཡས་མར་མནན་ནས་གནས་པ་ལ་ཕྱོགས་བཅུའི་དེ་བཞིན་གཤེགས་ཐམས་ཅད་ཀྱིས་ཡེ་ཤེས་དང་པོའི་རྡོ་རྗེའི་རྣམ་པར་བ་སྤུའི་བུ་ག་ནས་དཔག་ཏུ་མེད་པ་འཇུག་པར་དཔོན་སློབ་གཉིས་ཀས་བསྒོམས་ལ། སློབ་དཔོན་ལྷའི་ང་རྒྱལ་དང་ལྡན་པས་ཧཱུྃ་ཨ་ཧ་ཛྷཻཾ་ཞེས་བརྗོད་ཅིང་། ཡང་དང་ཡང་དུ་གསལ་བར་བྱས་ལ་རྡོ་རྗེའི་རྐང་སྟབས་ཀྱིས་འདུག་སྟེ། རྡོ་རྗེ་དྲིལ་བུ་དཀྲོལ་ཞིང་གདན་བཞི་ལས་འབྱུང་བ། ཨོཾ་ལོ་ལེ་ལོ་ལེ་ཧཱུྃ་ཨཱཿཞེས་བྱ་བའི་སྔགས་སམ། གསང་བ་འདུས་པ་ལས་འབྱུང་བའི་ཨཱ་བེ་ཤ་ཡ་སཏྭྃ་བྷ་ཡ། ར་ར་ར་ར། ཙཱ་ལ་ཡ་ཙཱ་ལ་ཡ་ཧཱུྃ་ཨ་ཧ་ཛྷཻཾ། ཞེས་བྱ་བ་བཟླ་བར་བྱའོ། །དེ་ལ་བབས་པ་ནི་སྐུ་བབས་པས་འཕར་གཡོ་ལ་སོགས་པ་འབྱུང་ངོ་། །གསུང་བབས་པས་ནི་སྔགས་སྨྲ་བར་འགྱུར་རོ། །ཐུགས་བབས་པས་ནི་ཡོངས་སུ་ཤེས་པ་སྐྱེའོ། །གསུང་བབས་པ་ན་ལྕེ་ལ་ཨཱཿདམར་པོ་བསམས་ལ། གསུངས་ཤིག་རྡོ་རྗེ་དགེའོ་དགེ །ཞེས་བརྗོད་ལ་དགེ་བ་དང་མི་དགེ་བའི་དོན་དྲིས་ན་སྟོན་པར་འགྱུར་རོ། །བབས་པ་དེ་བརྟན་པར་བྱ་བའི་ཕྱིར། །སྤྱི་བོར་རྡོ་རྗེ་བཞག་ལ་ཨོཾ་ཏིཥྛ་བཛྲ་ས་མ་ཡ་པྲ་ཏི་པཱ་ལི་ཏ་ཧཱུྃ་ཧཱུྃ་ཧཱུྃ་ཧོ་ཧོ་ཧོཿསྭཱ་ཧཱ། ཞེས་བྱ་བ་བརྗོད་ལ་དམིགས་པ་གཏོད་དུ་གཞུག་གོ །དེ་ནས་དཀྱིལ་འཁོར་དུ་གཞུག་པ་ལ་བདུན་ཏེ། ཁ་དོག་བརྟག་པ་དང་། ཕྲེང་བ་འདོར་བ་དང་། ཕྲེང་བ་བཅིངས་ཏེ་ལྷའི་རྣལ་འབྱོར་སྦྱིན་པ་དང་། གདོང་དབྱེ་བ་དང་། དཀྱིལ་འཁོར་བལྟར་གཞུག་པ་དང་། སྤྲོ་བ་བསྐྱེད་པ་དང་། དམ་ཚིག་བརྗོད་པའོ། །དང་པོ་ནི་དེ་ལྟར་ཡེ་ཤེས་བབས་པའི་དམིགས་པ་བཏང་ལ། དཀྱིལ་འཁོར་གྱི་དྲུང་དུ་དཀྱིལ་འཁོར་ལ་ཕྱོགས་པར་བྱས་ཏེ་ལངས་སུ་བཅུག་ལ་མགོ་རྒུ་བར་བྱས་ལ། ཁྱོད་ཀྱི་མིག་ལམ་ན་འོད་ཀྱི་ཁ་དོག་ཅི་ལྟ་བུ་སྣང་ཞེས་དྲི་བར་བྱའོ། །དེའང་དཀར་པོ་དང་། སེར་པོ་དང་། དམར་པོ་དང་། ནག་པོ་དང་། སྔོན་པོ་དང་། ལྗང་གུ་དང་། སྣ་ཚོགས་པ་རྣམས་སྨྲ་ན། ཞི་བ་དང་། རྒྱས་པ་དང་། དབང་དང་། གསད་པ་དང་། བསྐྲད་པ་དང་། རེངས་པ་དང་། སྣ་ཚོགས་པ་རྣམས་འགྲུབ་པར་བསྟན་ཏོ། །གཉིས་པ་ནི། དཀྱིལ་འཁོར་གྱི་ལྷ་ཐམས་ཅད་ལ་བཟང་ངན་མེད་པར་ཡེ་ཤེས་གཅིག་གི་སྣང་བར་བསྟན་ཏེ། མེ་ཏོག་གི་ཕྲེང་བ་ཐལ་མོའི་བར་དུ་བཅུག་ལ་ལག་པ་བརྐྱངས་ཏེ། ཨོཾ་པྲ་ཏཱིཙྪ་བཛྲ་ཧོཿཞེས་བརྗོད་དུ་བཅུག་ལ། མེ་ཏོག་གི་ཕྲེང་བ་འདོར་དུ་གཞུག་གོ །དེའང་རི་མོ་ལྔའི་ཕྱི་རོལ་དུ་ལྷུང་ན་ལན་གསུམ་གྱི་བར་དུ་བསྐྱར་ནས་འདོར་དུ་གཞུག་གོ །གསུམ་པ་ནི། དེ་ནས་ཕྲེང་བ་དེ་བླངས་ལ་སློབ་མའི་སྤྱི་བོར་བཅིངས་ཏེ། སྟོབས་པོ་ཆེན་པོ་སེམས་དཔའ་ཆེ། །འདི་ནི་སོ་སོར་གཟུང་བར་བྱ། །ཞེས་བརྗོད་དེ། ཕྲེང་བ་གང་ལ་ཕོག་པའི་ལྷ་དེའི་རྣལ་འབྱོར་སྦྱིན་པར་བྱའོ། །བཞི་པ་ནི། སློབ་མའི་མིག་གཉིས་སུ་ཨོཾ་རབ་ཏུ་འབར་བ་རེ་བསྒོམས་ཏེ། ཨོཾ། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །ཨོཾ་ཛྙཱ་ན་ཙ་ཀྵུཿཧཱུྃ་ཨཱཿསྭཱ་ཧཱ། ཞེས་བྱ་བའི་ཚིགས་སུ་བཅད་པ་དང་སྔགས་བརྗོད་ལ་མིག་དབྱེའོ། །ལྔ་པ་ནི། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ཀྱང་སངས་རྒྱས་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །ཞེས་བྱ་བའི་ཚིགས་བཅད་བརྗོད་དེ་བལྟར་གཞུག་གོ །དྲུག་པ་ནི། དེ་ལྟར་དཀྱིལ་འཁོར་མཐོང་བའི་ཚེ་ན་དེ་བཞིན་གཤེགས་པའི་སྐུ་དངོས་སུ་མཐོང་བའམ་ཐ་ནའང་དཀྱིལ་འཁོར་གསལ་བར་མཐོང་བས་རབ་ཏུ་སྤྲོ་བ་སྐྱེས་པ་དེས་བླ་མ་ལ་ཕྱག་བྱས་ལ། ཨོཾ། རྡོ་རྗེའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །ཨོཾ་རྣལ་འབྱོར་དཀྱིལ་འཁོར་ཆེན་པོ་ཡི། །དཀྱིལ་འཁོར་དེ་རིང་བདག་གིས་མཐོང་། །ཨོཾ་གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །ཞེས་བྱ་བའི་ཚིག་གསུམ་བརྗོད་དོ། །བདུན་པ་ནི། དེ་ལྟ་བུའི་དཀྱིལ་འཁོར་གྱི་དམ་ཚིག་མ་ལུས་པ་གཟུང་བར་མོས་པར་བྱས་ལ། ས་མ་ཡ་ཧོ་ཧོ་ཧོ། ཞེས་བརྗོད་དུ་གཞུག་གོ །དེ་ནས་དཀྱིལ་འཁོར་བསྟན་པ་ནི་ཕྱི་རོལ་གྱི་རྡོ་རྗེའི་རྭ་བ་དང་། དུར་ཁྲོད་ནས་གཞལ་ཡས་ཁང་པ་དང་། ཤར་ཕྱོགས་ཀྱི་སྒོ་སྲུང་ནས་བརྩམས་ཏེ་དཀྱིལ་འཁོར་གྱི་གཙོ་བོའི་བར་དུ་རྟེན་དང་བརྟེན་པར་བཅས་པའི་དཀྱིལ་འཁོར་གྱི་མིང་རྒྱས་པར་བརྗོད་པས་བསྟན་པར་བྱའོ། །འདི་དག་ནི་སློབ་མ་དཀྱིལ་འཁོར་དུ་གཞུག་པའི་མིང་བརྗོད་པ་སྔོན་དུ་འགྲོ་བས་དཀྱིལ་འཁོར་བསྟན་པའོ། །དེའི་རྗེས་ལ་དབང་བསྐུར་བའི་ཆོ་ག་ལ་གསུམ། ཕྱག་འཚལ་བ་སྔོན་དུ་འགྲོ་བས་གསོལ་བ་གདབ་པ་དང་། ཤེས་པར་བྱ་བའི་ཆོ་ག་དང་། དབང་བསྐུར་བ་དངོས་སོ། །དང་པོ་ནི། སློབ་མས་སློབ་དཔོན་གྱི་ཞབས་ལ་ཕྱག་བྱས་ཏེ་མཎྜལ་ཕུལ། ཁྱོད་ནི་ཧེ་རུ་ཀ་དཔལ་ཏེ། །བདེ་གཤེགས་རྣམས་ཀྱིས་བདེ་སྩོལ་མཛད། །བྱང་ཆུབ་སེམས་དཔའ་ཆེ་རྣམས་ཀྱི། །ཡང་དག་དོན་མཆོག་རྣམ་དག་པ། །ཇི་ལྟར་དེ་ཉིད་བདུད་རྩི་ཡི། །དབང་གི་མཆོག་ནི་བསྐུར་བ་བཞིན། །དེ་བཞིན་བདག་ལ་འཁོར་བ་ཡི། །སྡུག་བསྔལ་རྣམས་ནི་བསལ་བར་མཛོད། །རྣལ་འབྱོར་བདུད་རྩི་དྲི་མེད་མཆོག །མ་རིག་པ་ཡི་རབ་རིབ་འཇོམས། །གང་གི་བྱང་ཆུབ་བླ་ན་མེད། །དེ་རིང་བདག་གིས་ཐོབ་པར་མཛོད། །ཅེས་བྱ་བ་ལན་གསུམ་གྱིས་གསོལ་བ་གདབ་བོ། །གཉིས་པ་ལ་གསུམ་སྟེ། དབང་སྟེགས་སུ་སློབ་མ་གཞག་པ་དང་། སྦྱང་བ་ལ་སོགས་པའི་ཆོ་ག་དང་། བཀྲ་ཤིས་ཀྱི་གླུ་བླང་བའི་ཆོ་གའོ། །དང་པོ་ནི། རྩ་བའི་དཀྱིལ་འཁོར་ལས་ཤར་ཕྱོགས་སུ་ཁྲུ་གསུམ་གྱི་སར་དཀྱིལ་འཁོར་གྱི་ཕྱེད་ཀྱི་ཚད་ལ་དཀྱིལ་འཁོར་མཚན་ཉིད་དང་ལྡན་པར་བྱས་ལ། དེར་ཤིང་ལ་སོགས་པའི་ཁྲི་ལ་དར་ལ་སོགས་པའི་གདན་བྱས་ཏེ། དེའི་སྟེང་དུ་སློབ་མ་གོས་གཙང་མ་བགོས་པ་རང་གི་ལྷའི་རྣལ་འབྱོར་ཞེས་བྱ་བ་ཕྲེང་བ་ཕོག་པའི་ལྷའི་རྣལ་འབྱོར་གྱིས་གཞག་པའམ། སྔར་རས་བྲིས་ཀྱི་སྐབས་ལྟར་བྲི་བ་མ་གྲུབ་ན་དེ་ལྟར་བསམ་པར་བྱས་ལ་སློབ་མའི་གཡས་བདག་གི་གཡོན་ཕྱོགས་ནས་ཞབས་བཀྲུ་བའི་ཆུ་དྲི་ཞིམ་པོ་དང་། ཞལ་བཀྲུ་བའི་ཆུ་འོ་མ་དང་སྦྱར་བ་དང་། བསང་གཏོར་གི་ཆུ་གཙང་མ་དང་། མཆོད་ཡོན་གྱི་ཆུ་གཙང་མ་ལ་མེ་ཏོག་དཀར་པོ་བཅུག་པ་སྟེ་བཞི་དང་། ཡུངས་ཀར་དང་ཆུ་གཙང་མ་སྟེ་སྦྱང་བའི་ཡོ་བྱད་གཉིས་བཤམ་མོ། །བདག་གི་གཡས་ཕྱོགས་ནས་མེ་ཏོག་དང་། སྤོས་དང་། མར་མེ་དང་། དྲི་དང་། ལྷ་བཤོས་ཏེ་མཆོད་པའི་ཡོ་བྱད་ལྔ་བཤམ་མོ། །མདུན་དུ་བཟེད་ཞལ་གྱི་སྣོད་གཉིས་དང་། མེས་བཀང་བའི་ཁམ་ཕོར་གཞག སྟེང་དུ་བླ་རེ་བྲེ་བ་དང་། གཡས་སུ་གདུགས་དཀར་པོ་དང་། གཡོན་དུ་རྒྱལ་མཚན་བསྒྲེང་བ་དང་། དུང་ལ་སོགས་པ་མཆོད་པའི་ཡོ་བྱད་རྣམས་ཀྱང་ཇི་ལྟར་འཚམས་པའི་གནས་སུ་སྟ་གོན་བྱས་ལ་གཞག་གོ། །།གཉིས་པ་སྦྱང་བའི་ཆོ་ག་དངོས་ནི། དང་པོར་སློབ་མ་རབ་ཏུ་གནས་པའི་ཆོ་ག་བཞིན་བའི་རྣམ་ལྔ་དང་། དྲི་ལྔ་དང་། མར་ཁུ་དང་། ཤུན་པ་ལྔ་དང་། དྲི་ཞིམ་པོའི་ཆུས་ཀྱང་ཁྲུས་བྱ་བའམ། མ་གྲུབ་ཀྱང་འགལ་བ་མེད། དེ་ནས་སློབ་དཔོན་ལྷའི་ང་རྒྱལ་དང་ལྡན་པས་སློབ་མ་རྣམས་མེ་ཏོག་ཕོག་པའི་ལྷར་ཡན་ལག་བཞིས་བསྐྱེད་ལ། གོ་རིམ་བཞིན་དུ་དང་པོར་ཨོཾ་ནཱི་རཱི་ཧཱུྃ་ཁྃ་གིས་ཞབས་བཀྲུ་བ་དང་། ཨོཾ་བཛྲ་ནཱི་ཝི་ཏི་ཧཱུྃ་ཁྃ་གིས་ཞལ་བཀྲུ་བ་དང་། ཨོཾ་སརྦ་སཾ་ཤོ་དྷ་ནིས་འཐོར་འཐུང་ཀུ་ཤའི་ཆུན་པོས་ལུས་ཐམས་ཅད་ལ་གཏོར། ཨོྃ་པྲ་ཏཱིཙྪ་ཨརྒྷཾ་ཧཱུྃ་ཞེས་བརྗོད་ལ་མཆོད་ཡོན་ཕྱག་ཏུ་གཏད། དེ་ནས་ཁུ་ཚུར་གཉིས་ཀྱིས་ཡུངས་ཀར་བླངས་ལ་ཨོཾ་སརྦ་པཱ་པཾ་ད་ཧ་ན་བཛྲཱ་ཡ་བཛྲ་ས་ཏྭ་སྱ་སརྦ་པཱ་པཾ་ད་ཧ་ད་ཧ་སྭཱ་ཧཱ། ཞེས་བཟླ་ཞིང་གཡས་དང་གཡོན་གྱིས་བསྐོར་ལ་ཁམ་ཕོར་གྱི་མེར་བླུག དེ་བཞིན་དུ་ཁུ་ཚུར་གྱིས་ཆུ་བླངས་ལ་ཨོཾ་ཧཱུྃ་ཌ་ཌི་ཏ་ཕཊ་ཅེས་བརྗོད་ཅིང་བསྐོར་ལ་མེར་བླུག་པར་བྱའོ།། །།གསུམ་པ་བཀྲ་ཤིས་ཀྱི་ཆོ་ག་ནི་མེ་ཏོག་ལ་སོགས་པའི་མཆོད་པ་ལྔས་མཆོད་ལ། བུམ་པ་ལག་ཏུ་བླངས་ཏེ་རོལ་མོའི་སྒྲ་དང་བཅས་པས་སྒྲུབ་གཡོག་དང་བཅས་ཏེ། དབྱངས་ཀྱིས་འདྲེན་པ་དང་བཅས་པས། ཕུན་སུམ་ཚོགས་འཛིན་སེར་གྱི་རི་བོ་ལྟ་བུའི་མདོག །འཇིག་རྟེན་གསུམ་གྱི་མགོན་པོ་དྲི་མ་གསུམ་ནི་རབ་ཏུ་སྤངས། །སངས་རྒྱས་ཆུ་སྐྱེས་འདབ་རྒྱས་ལྟ་བུའི་སྤྱན་མངའ་བ། །བཀྲ་ཤིས་དེས་ཀྱང་དེང་འདིར་ཁྱོད་ལ་བཀྲ་ཤིས་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །དམ་ཆོས་རབ་མཆོག་སྐྱེ་དགུ་རྣམས་ལ་ཞི་བྱེད་པ། །འཇིག་རྟེན་བཀྲ་ཤིས་གཉིས་པ་དེང་འདིར་ཁྱོད་ལ་ཤོག །དམ་པའི་ཆོས་དང་ལྡན་ཞིང་ཐོས་པའི་བཀྲ་ཤིས་ཕྱུག །དགེ་འདུན་ལྷ་དང་ལྷ་མ་ཡིན་དང་མིས་མཆོད་པ། །ངོ་ཚ་དཔལ་གནས་ཚོགས་ཀྱི་ནང་ན་རབ་ཀྱི་མཆོག །འཇིག་རྟེན་བཀྲ་ཤིས་གསུམ་པ་དེང་འདིར་ཁྱེད་ལ་ཤོག །དགའ་ལྡན་ལྷ་ཡི་གཞལ་མེད་ཁང་ནི་སྙིང་པོར་བཅས། །འགྲོ་ལ་ཕན་ཕྱིར་འདིར་གཤེགས་དབང་པོར་བཅས་པའི་ལྷ། །རྗེས་སུ་འབྲང་བ་དེ་བཞིན་གཤེགས་པའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །འདབ་གསར་འཚེར་བའི་མེ་ཏོག་ཆར་འབབ་ལུམྦིའི་ཚལ། །མང་པོའི་ལྷ་ཡིས་བསྟེན་པར་མགོན་པོ་བལྟམས་པ་ན། །སྲིད་པའི་མཐར་གྱུར་པ་ཡི་བཀྲ་ཤིས་གང་ལགས་པ། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །སྣ་ཚོགས་སྐྱོན་རྣམས་རྣམ་པར་གཞོམ་པར་བྱ་བའི་ཕྱིར། །དགེས་པས་དཀའ་ཐུབ་ཚལ་དུ་ནམ་ཕྱེད་མངོན་པར་བྱུང་། །དབང་བཅས་ལྷ་རྣམས་རྗེས་སུ་འབྲང་བའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །ཆུ་བོའི་འགྲམ་དུ་མཆོད་ཡོན་ཕྲེང་བས་ཡོངས་སུ་བསྐོར། །ཞི་ཕྱིར་ངོ་མཚར་གྱུར་པ་སྲིད་པ་དག་བྱེད་པ། །ཀླུ་ཡི་རྒྱལ་པོས་ལེགས་པར་བསྟོད་པའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །གྲོང་ཁྱེར་མཆོག་གྱུར་སེར་སྐྱ་ཞེས་ནི་བྱ་བ་དེར། །རྨད་དུ་གྲགས་པ་ཆེན་པོའི་ལྷ་ཡིས་མངོན་བསྟོད་པ། །བསམ་ཡས་དགེ་སྒྲུབ་དེ་བཞིན་གཤེགས་པའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །སེམས་ཅན་ཐམས་ཅད་ལ་ནི་ཕན་ཕྱིར་བྱང་ཆུབ་པ། །དམ་ཆོས་རིན་ཆེན་ཚོགས་ནི་ཐུབ་པ་ལས་བྱུང་བ། །སེམས་ཅན་དོན་གྲུབ་རབ་རྒྱས་བརྩོན་པའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །རབ་ཏུ་འོད་འབར་གསེར་མདོག་ལྟ་བུའི་སྐུ་མངའ་བ། །བཻ་ཌཱུརྻ་མདོག་ལྟ་བུའི་རྩ་གདན་སྟེང་དུ་བཞུགས། །སྐྱིལ་ཀྲུང་ལེགས་བཅས་མི་གཡོ་སྐུ་མངའི་བཀྲ་ཤིས་དང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །ཤིང་གི་རྒྱལ་པོའི་རྩ་བར་བཅོམ་ལྡན་བྱམས་སྟོབས་ཀྱིས། །བདུད་ཚོགས་ཀུན་ལས་རྣམ་པར་རྒྱལ་ཚེ་ས་དང་མཁར། །རྣམ་པ་སྣ་ཚོགས་ངོ་མཚར་གྱུར་པའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །ཝཱ་ར་ཎཱ་སིར་བཞུགས་ནས་བདེ་བར་གཤེགས་སྟོན་པས། །ས་དང་མཁའ་ལ་ངོ་མཚར་ཤིན་ཏུ་གསལ་བྱུང་བས། །ཆོས་ཀྱི་འཁོར་ལོ་དམ་པ་བསྐོར་བའི་བཀྲ་ཤིས་གང་། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །བཀྲ་ཤིས་གང་ཞིག་ཕན་བྱེད་དམ་པ་མཆོད་ཕྱིར་ཐོགས། །བསོད་ནམས་བྱ་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཐུབ་པ་ཤཱཀྱ་སེང་གེས་གང་གསུངས་པའི། །བཀྲ་ཤིས་དེས་ནི་དེང་འདིར་ཁྱོད་ལ་ཞི་བྱེད་ཤོག །ཅེས་བརྗོད་ཅིང་མེ་ཏོག་གཏོར་ལ་ཤིས་པ་བརྗོད་པར་བྱའོ།། །།གསུམ་པ་དབང་བསྐུར་བའི་ཆོ་ག་དངོས་ལ་གཉིས་ཏེ། རྡོ་རྗེའི་སློབ་མའི་དབང་བསྐུར་བའི་ཆོ་ག་དང་། རྡོ་རྗེ་སློབ་དཔོན་གྱི་དབང་བསྐུར་བའི་ཆོ་གའོ། །དང་པོ་ལ་གཉིས་ཏེ། རང་གི་ལྷག་པའི་ལྷའི་རྟེན་ལ་དེ་བཞིན་གཤེགས་པ་ལྔའི་རང་བཞིན་རིག་པའི་དབང་བསྐུར་བ་དང་། རྡོ་རྗེ་འཆང་ཆེན་པོའི་རྟེན་ལ་སྐུ་གསུང་ཐུགས་བྱིན་གྱིས་བརླབ་པའི་དབང་ངོ་། །དང་པོ་ནི། ཆུ་ལ་སོགས་པ་རེ་རེ་ལའང་འཁོར་གསུམ་པོ་ཡོངས་སུ་དག་པ་བཞིས་དབང་བསྐུར་ཏེ་མཆོད་པ་བྱས་ནས་དོན་ལྔའི་རྟོགས་པ་བསྐྱེད་པ་ཡིན་ནོ། །དེ་ལ་འཁོར་གསུམ་ནི་བདག་དང་སློབ་མ་དང་། དབང་རྫས་གསུམ་ཡིན་ལ། ཡོངས་སུ་དག་པ་བཞི་ནི་ཡན་ལག་བཞི་རྫོགས་ཡིན་ཏེ། ཆུའི་དབང་བསྐུར་བའི་དུས་སུ་སྭ་བྷཱ་ཝའི་སྔགས་ཀྱི་བདག་དང་། སློབ་མ་དང་། དབང་རྫས་གསུམ་པོ་མི་དམིགས་ཏེ་སྟོང་པའི་ངང་ལས། པྃ་ལས་པདྨ་དང་རྃ་ལས་ཉི་མའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ། དེ་ལས་འོད་འཕྲོས་འདུས་གཅིག་ཏུ་གྱུར་པ་ལས་མི་བསྐྱོད་པ་སྐུ་མདོག་སྔོན་པོ། ཞལ་བརྒྱད་ཕྱག་བཅུ་དྲུག་པ། ཞབས་བཞི་པ། ཡུམ་མཱ་མ་ཀཱིས་འཁྱུད་པ་སྒྲུབ་ཐབས་བཞིན་བསྐྱེད་པ་ནི་ཡན་ལག་དང་པོ་བསྙེན་པའི་ཡན་ལག་གོ། །།དེ་ནས་སྙིང་གའི་ས་བོན་གྱི་འོད་ཀྱིས་ཡེ་ཤེས་སེམས་དཔའ་སྤྱན་དྲངས་ཏེ། གཽ་རཱི་ལ་སོགས་པའི་ལྷ་མོ་བཞིས་དགུག་གཞུག་བཅིང་དབང་དུ་བྱ་སྟེ་ཡན་ལག་གཉིས་པའོ། །སྐྱེ་མཆེད་དྲུག་དང་སྐུ་གསུང་ཐུགས་བྱིན་གྱིས་བརླབས་ཏེ་ཡན་ལག་གསུམ་པའོ། །ཡང་སྙིང་གའི་ས་བོན་གྱི་འོད་ཀྱིས་དེ་བཞིན་གཤེགས་པ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ཏེ། ཨོཾ་ཨ་བྷི་ཥིཉྩ་ཏུ་མཱྃ་སརྦ་ཏ་ཐཱ་ག་ཏ་ཞེས་བརྗོད་ནས་དབང་བསྐུར་བར་གསོལ་བ་གདབ་བོ། །དེ་བཞིན་གཤེགས་པ་དེ་དག་ཧེ་རུ་ཀའི་གཟུགས་སུ་གྱུར་པས་བདག་དང་བུམ་པའི་ལྷ་གཉིས་ལ་དབང་བསྐུར་ཏེ་དེས་ལུས་ཐམས་ཅད་ཁེངས་ནས་ཆུ་ལུད་པ་ལས་སྤྱི་བོར་མི་བསྐྱོད་པ་དེ་བཞིན་གཤེགས་པས་དབུར་བརྒྱན་པར་བསམ་མོ། །དེ་ནས་བུམ་པའི་ནང་གི་མི་བསྐྱོད་པ་ཡབ་ཡུམ་སྙོམས་པར་ཞུགས་པས་འོད་དུ་ཞུ་སྟེ་ཆུར་གྱུར་པར་བསམ་མོ། །སློབ་དཔོན་དང་དབང་རྫས་ཀྱི་ཡན་ལག་བཞི་པའོ། །ཡང་དབང་བསྐུར་གྱི་ལྷ་རྣམས་ལ། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་བདག་ཉིད་ཅན་རྣམས་ཀྱི། །ཁྱེད་ཀྱིས་བདག་ལ་དབང་བསྐུར་ཅིག །ཅེས་སློབ་དཔོན་དང་སློབ་མ་གཉིས་ཀས་གསོལ་བ་གདབ་པ་དང་། དེ་བཞིན་གཤེགས་པ་ཐམས་ཅད་ཀྱིས་རིན་པོ་ཆེ་ལས་གྲུབ་པའི་བུམ་པ་བྱང་ཆུབ་ཀྱི་སེམས་ཀྱིས་གང་བས་དབང་བསྐུར་བར་བསམས་ལ། དངོས་སུ་སློབ་དཔོན་གྱིས་ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ་ཞེས་བརྗོད་ཅིང་བུམ་པའི་ཆུས་སྤྱི་བོ་ནས་གཏོར་ཞིང་བླུག་པར་བྱའོ། །དེ་ལྟར་དབང་བསྐུར་ནས་ཆུ་ལྷག་མ་ཡར་ལུད་པ་ལས་སྤྱི་བོར་དེ་བཞིན་གཤེགས་པ་མི་བསྐྱོད་པས་དབུར་བརྒྱན་པར་བསམ་སྟེ། སློབ་མའི་ཡན་ལག་བཞི་པའོ། །དེ་ལྟར་དེ་བཞིན་གཤེགས་པའི་སྐུར་གནས་པ་ལ་ཨོཾ་བཛྲ་པུཥྤེ་ཨཱཿཧཱུྃ་ཞེས་བྱ་བ་ལ་སོགས་པའི་མཆོད་པ་ལྔས་མཆོད་ནས་དོན་ལྔའི་རྟོགས་པ་བསྐྱེད་པར་བྱ་སྟེ། དེ་ལྟར་ན་བུམ་པ་ཆུའི་དབང་ཐོབ། ཉོན་མོངས་པ་ཞེ་སྡང་དག རྣམ་པར་ཤེས་པའི་ཕུང་པོའི་དྲི་མ་སྦྱངས། དེ་བཞིན་གཤེགས་པ་མི་བསྐྱོད་པར་བྱིན་གྱིས་བརླབས། ཆོས་དབྱིངས་ཡེ་ཤེས་ཀྱི་བག་ཆགས་རྒྱུད་ལ་བཞག་གོ །ཞེས་བརྗོད་པར་བྱའོ། །དབང་དང་པོའོ།། །།གཉིས་པ་ཅོད་པཎ་གྱི་དབང་བསྐུར་བ་ནི། བདག་དང་དབང་རྫས་སློབ་མ་གསུམ་ཀ་སྟོང་པའི་ངང་ལས་པདྨ་དང་ཉི་མའི་སྟེང་དུ་ཨཱྃ་ལས་རིན་པོ་ཆེ་ཨཱྃ་གིས་མཚན་པ་སྟེ། དེ་སྤྲོས་བསྡུས་གཅིག་ཏུ་གྱུར་པ་ལས་རིན་ཆེན་འབྱུང་ལྡན་ཞལ་བརྒྱད་ཕྱག་བཅུ་དྲུག་པ་ཡུམ་རིན་ཆེན་སྒྲོལ་མས་འཁྱུད་པ་སྒྲུབ་ཐབས་བཞིན་བསྐྱེད་པར་བྱའོ། །ཡན་ལག་དང་པའོ། །གཉིས་པ་དང་གསུམ་པ་སྔ་མ་དང་འདྲ་བར་བྱའོ། །ཡན་ལག་བཞི་པ་ལ་དང་པོ་བདག་དང་དབང་རྫས་ཀྱི་ཡན་ལག་བཞི་པ་བྱ་སྟེ་སྙིང་གའི་ཏྲཱྃ་ལས་འོད་འཕྲོས་པས་དབང་བསྐུར་གྱི་ལྷ་སྤྱན་དྲངས་ཏེ་གསོལ་བ་བཏབ་པ་དང་། དེ་བཞིན་གཤེགས་པ་ཐམས་ཅད་ཀྱི་བདག་དང་ཅོད་པཎ་གྱི་ལྷ་ལ་ཅོད་པཎ་བཅིངས་པས་རྒྱུད་ལ་བདེ་བ་ཆེན་པོ་མངོན་དུ་བྱས་ཏེ། སྤྱི་བོར་དེ་བཞིན་གཤེགས་པ་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ་མོ། །དེ་ནས་ཅོད་པཎ་གྱི་རིན་འབྱུང་ཡབ་ཡུམ་སྙོམས་པར་ཞུགས་པས་འོད་དུ་ཞུ་སྟེ་ཅོད་པཎ་དུ་གྱུར་པར་བསམ་མོ།། །།དེ་ནས་སློབ་མའི་ཡན་ལག་བཞི་པ་བྱ་བ་ནི་དེ་བཞིན་གཤེགས་པ་ཐམས་ཅད་ལ་སློབ་དཔོན་དང་སློབ་མ་གཉིས་ཀས་གསོལ་བ་གདབ་པ་དང་། དེ་བཞིན་གཤེགས་པ་ཐམས་ཅད་ཀྱིས་སློབ་མའི་སྤྱི་བོར་ཅོན་པཎ་བཅིངས་པར་བསམས་ལ་དངོས་སུ་སློབ་དཔོན་གྱིས་ལག་ཏུ་བཟུང་སྟེ། རིན་པོ་ཆེ་ཡི་དབུ་རྒྱན་དང་། །དར་དཔྱངས་ཅོད་པཎ་དག་གི་དབང་། །དེ་རིང་ཁྱོད་ལ་དབང་བསྐུར་རོ། །ཁྱོད་ཀྱིས་ཀྱང་ནི་རྟག་ཏུ་གཟུང་། །ཨོཾ་མུ་ཀུ་ཊ་ཨ་བྷི་ཥིཉྩ་མཱི། ཞེས་བརྗོད་དེ་སློབ་མའི་སྤྱི་བོར་བཅིང་། སྤྱི་བོར་ཡང་དེ་བཞིན་གཤེགས་པ་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ་མོ། །དེ་ནས་མཆོད་པ་ལྔས་མཆོད་པར་བྱའོ། །དོན་ལྔའི་རྟོགས་པ་བསྐྱེད་པ་ནི། དབང་བསྐུར་བ་ལྔ་ལས་ཅོད་པཎ་གྱི་དབང་ཐོབ། ཉོན་མོངས་པ་ལས་སེར་སྣ་དག ཕུང་པོ་ལས་ཚོར་བའི་ཕུང་པོ་སྦྱངས། དེ་བཞིན་གཤེགས་པ་ལས་རིན་ཆེན་འབྱུང་ལྡན་དུ་བྱིན་གྱིས་བརླབས། ཡེ་ཤེས་ལས་མཉམ་པ་ཉིད་ཀྱི་ཡེ་ཤེས་ཀྱི་བག་ཆགས་སམ་ས་བོན་རྒྱུད་ལ་བཞག་གོ །ཞེས་རྟོགས་པ་བསྐྱེད་པར་བྱའོ། །དབང་གཉིས་པའོ།། །།གསུམ་པ་རྡོ་རྗེའི་དབང་བསྐུར་བ་ནི། བདག་དང་སློབ་མ་དབང་རྫས་གསུམ་ཀ་སྟོང་པར་བསྒོམ། དེའི་ངང་ལས་པདྨ་དང་ཉི་མའི་སྟེང་དུ་ཛྲཱིཾ་ལས་པདྨ་ཛྲཱིཾ་གིས་མཚན་པ་དེ་ལས་འཕྲོས་འདུས་གཅིག་ཏུ་གྱུར་པ་ལས་འོད་དཔག་ཏུ་མེད་པ་ཞལ་བརྒྱད་ཕྱག་བཅུ་དྲུག་པ་སྐུ་མདོག་དམར་པོ་ཡུམ་ན་བཟའ་དཀར་མོས་འཁྱུད་པ་སྒྲུབ་ཐབས་བཞིན་བསྐྱེད་པར་བྱའོ། །ཡན་ལག་དང་པོའོ། །ཡན་ལག་གཉིས་པ་དང་གསུམ་པ་སྔ་མ་དང་འདྲ་བར་བྱས་ལ། ཡན་ལག་བཞི་པ་བྱ་བའི་ཕྱིར་སྙིང་གའི་ས་བོན་གྱི་འོད་ཟེར་གྱིས་དབང་བསྐུར་གྱི་ལྷ་སྤྱན་དྲངས་ལ་གསོལ་བ་བཏབ་པ་དང་། དེ་བཞིན་གཤེགས་པ་དེ་དག་གིས་བདག་དང་དབང་རྫས་ཀྱི་ལྷའི་ཕྱག་གཡས་པར་རྡོ་རྗེ་རྩེ་དགུ་པ་གཏད་པས་རྒྱུད་ལ་བདེ་བ་ཆེན་པོ་བསྐྱེད་པར་བསམ་མོ། །སྤྱི་བོར་ཡང་འོད་དཔག་མེད་ཀྱིས་མཚན་པར་བསྒོམ་མོ། །དབང་རྫས་ཀྱི་འོད་དཔག་མེད་ཡབ་ཡུམ་སྙོམས་པར་ཞུགས་པས་འོད་དུ་ཞུ་སྟེ་རྡོ་རྗེར་གྱུར་པར་བསམས་ལ། སློབ་མའི་ཡན་ལག་བཞི་པ་བྱ་བའི་ཕྱིར། དེ་བཞིན་གཤེགས་པ་རྣམས་ལ་བདག་དང་སློབ་མ་གཉིས་ཀས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་སློབ་མའི་ལག་པ་གཡས་པར་རྡོ་རྗེ་གཏད་པར་བསྒོམ་ཞིང་དངོས་སུ་སློབ་དཔོན་གྱིས་ལག་པ་གཡས་པར་བཟུང་ལ། སངས་རྒྱས་རྡོ་རྗེའི་དབང་གིས་ནི། །དེ་རིང་ཁྱོད་ལ་དབང་བསྐུར་བྱ། །འདི་དེ་སངས་རྒྱས་ཐམས་ཅད་ཉིད། །ཤིན་ཏུ་གྲུབ་ཕྱིར་རྡོ་རྗེ་གཟུང་། །ཞེས་བྱ་བ་དང་། ཨོཾ་བཛྲ་ཨཱ་རལླི་ཧོཿབཛྲ་ཝ་ར་ཏ་ཀ་ཧཱུྃ། ཞེས་བརྗོད་ལ་སློབ་མའི་ལག་པ་གཡས་པར་རྡོ་རྗེ་གཏད། རྒྱུད་ལ་བདེ་བ་ཆེན་པོ་མངོན་དུ་བྱས། སྤྱི་བོར་འོད་དཔག་མེད་ཀྱིས་དབུར་བརྒྱན་པར་བསམ་མོ། །དེ་ནས་མཆོད་པ་ལྔས་ཀྱང་མཆོད་ལ། དོན་ལྔའི་རྟོགས་པ་བསྐྱེད་པར་བྱ་སྟེ། དབང་བསྐུར་བ་ལྔ་ལས་རྡོ་རྗེའི་དབང་ཐོབ། ཉོན་མོངས་པ་ལས་འདོད་ཆགས་ཀྱི་དྲི་མ་དག་པར་བྱས། ཕུང་པོ་ལས་འདུ་ཤེས་ཀྱི་ཕུང་པོའི་དྲི་མ་སྦྱངས། དེ་བཞིན་གཤེགས་པ་ལས་འོད་དཔག་ཏུ་མེད་པར་བྱིན་གྱིས་བརླབས། ཡེ་ཤེས་ལས་སོ་སོར་རྟོག་པའི་ཡེ་ཤེས་ཀྱི་ས་བོན་ནམ་བག་ཆགས་རྒྱུད་ལ་བཞག་གོ །ཞེས་རྟོགས་པ་བསྐྱེད་པར་བྱའོ། །དབང་གསུམ་པའོ།། །།བཞི་པ་དྲིལ་བུའི་དབང་བསྐུར་བ་ནི། བདག་དང་སློབ་མ་དབང་རྫས་གསུམ་ཀ་མི་དམིགས་པ་ལས་པདྨ་དང་ཉི་མའི་སྟེང་དུ་ཁཾ་ལས་རལ་གྲི་ཁྃ་གིས་མཚན་པ་དེ་སྤྲོས་བསྡུས་གཅིག་ཏུ་གྱུར་པ་ལས་དོན་ཡོད་གྲུབ་པ་ཞལ་བརྒྱད་ཕྱག་བཅུ་དྲུག་པ་སྐུ་མདོག་ལྗང་གུ་ཡུམ་དམ་ཚིག་སྒྲོལ་མས་འཁྱུད་པ་སྒྲུབ་ཐབས་བཞིན་བསྐྱེད་དེ། ཡན་ལག་དང་པོའོ། །ཡན་ལག་གཉིས་པ་དང་གསུམ་པ་སྔ་མ་དང་འདྲ་བར་བྱས་ལ། ཡན་ལག་བཞི་པ་བྱ་བའི་ཕྱིར་སྙིང་གའི་ཁྃ་གི་འོད་ཟེར་གྱིས་དབང་བསྐུར་གྱི་ལྷ་སྤྱན་དྲངས་ཏེ། གསོལ་བ་བཏབ་པ་དང་དེ་བཞིན་གཤེགས་པས་ཤེས་རབ་ཕ་རོལ་ཕྱིན་པའི་ངོ་བོ་དྲིལ་བུ་ལག་པ་གཡོན་པར་གཏད་པས་རྒྱུད་ལ་བདེ་བ་ཆེན་པོ་མངོན་དུ་བྱས་ཏེ་སྤྱི་བོར་དོན་ཡོད་གྲུབ་པས་དབུར་བརྒྱན་པར་བསམ་མོ། །དེ་ནས་དྲིལ་བུའི་དོན་གྲུབ་ཡབ་ཡུམ་སྙོམས་པར་ཞུགས་པས་འོད་དུ་ཞུ་སྟེ་དྲིལ་བུར་གྱུར་པར་བསམས་ལ། བདག་དང་སློབ་མ་གཉིས་ཀས་དེ་བཞིན་གཤེགས་པ་ལ་གསོལ་བ་གདབ་པ་དང་། དེ་བཞིན་གཤེགས་པ་རྣམས་ཀྱིས་སློབ་མའི་ལག་པ་གཡོན་པར་དྲིལ་བུ་གཏད་པར་བསམ་ཞིང་དངོས་སུ་སློབ་དཔོན་གྱིས་དྲིལ་བུ་བཟུང་སྟེ། ཨོཾ་བཛྲ་ཨ་དྷི་པ་ཏི་སཏྭཾ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་སཏྭཾ། ཞེས་བརྗོད་ལ་སློབ་མའི་ལག་པ་གཡོན་པར་གཏད། རྒྱུད་ལ་བདེ་བ་ཆེན་པོ་མངོན་དུ་བྱས་ཏེ། སྤྱི་བོར་དོན་གྲུབ་ཀྱིས་དབུར་བརྒྱན་པར་བསམ་མོ། །དེ་ནས་མཆོད་པ་ལྔས་མཆོད་ལ་དོན་ལྔའི་རྟོགས་པ་བསྐྱེད་པར་བྱ་སྟེ། དབང་བསྐུར་བ་ལྔ་ལས་དྲིལ་བུའི་དབང་ཐོབ། ཉོན་མོངས་པ་ལྔ་ལས་ཕྲག་དོག་རྣམ་པར་དག ཕུང་པོ་ལྔ་ལས་འདུ་བྱེད་ཀྱི་དྲི་མ་སྦྱངས། དེ་བཞིན་གཤེགས་པ་ལྔ་ལས་དོན་གྲུབ་ཏུ་བྱིན་གྱིས་བརླབས། ཡེ་ཤེས་ལྔ་ལས་བྱ་བ་གྲུབ་པའི་ཡེ་ཤེས་ཀྱི་བག་ཆགས་སམ་ས་བོན་རྒྱུད་ལ་བཞག་གོ །ཞེས་རྟོགས་པ་བསྐྱེད་དེ་དབང་བཞི་པའོ། །ལྔ་པ་མིང་གི་དབང་བསྐུར་བར་བྱ་བའི་ཕྱིར། བདག་དང་སློབ་མ་གཉིས་ཀ་སྟོང་པའི་ངང་ལས་པདྨ་དང་ཉི་མའི་སྟེང་དུ་བྷྲཱུྃ་ལས་འཁོར་ལོ་བྷྲཱུྃ་གྱིས་མཚན་པ། དེ་སྤྲོས་བསྡུས་གཅིག་ཏུ་གྱུར་པ་ལས་རྣམ་པར་སྣང་མཛད་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ་ཡུམ་སྤྱན་མ་ལ་འཁྱུད་པ་སྒྲུབ་ཐབས་བཞིན་བསྐྱེད་དེ་ཡན་ལག་དང་པོའོ། །ཡན་ལག་གཉིས་པ་དང་གསུམ་པ་ཡང་སྔ་མ་དང་འདྲ་བར་བྱས་ལ། ཡན་ལག་བཞི་པ་བྱ་བའི་ཕྱིར་སྙིང་གའི་བྷྲཱུྃ་གྱི་འོད་ཟེར་གྱིས་དབང་བསྐུར་གྱི་ལྷ་རྣམས་སྤྱན་དྲངས་ནས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་བདག་ལ་མིང་བཏགས་པས་རྒྱུད་ལ་བདེ་བ་ཆེན་པོ་མངོན་དུ་བྱས་ཏེ། སྤྱི་བོར་རྣམ་སྣང་གིས་དབུར་བརྒྱད་པར་བསམ་མོ། །སློབ་མའི་ཡན་ལག་བཞི་པ་བྱ་བའི་ཕྱིར། དེ་བཞིན་གཤེགས་པ་རྣམས་ལ་བདག་དང་སློབ་མ་གཉིས་ཀས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་སློབ་མ་ལ་མེ་ཏོག་ཕོག་པའི་ལྷ་ལས་དྲས་ཏེ་མིང་འདོགས་པར་བསམས་ལ་དངོས་སུ་སློབ་དཔོན་གྱིས་སློབ་མའི་སྤྱི་བོར་ལག་པ་བཞག་སྟེ། ཨོཾ་བཛྲ་ས་ཏྭ་སཏྭཾ་ཨ་བྷི་ཥིཉྩཱ་མི། བཛྲ་ནཱ་མ་ཨ་བྷི་ཥེ་ཀ་ཏ། ཀྱཻ་དཔལ་ཆེ་གེ་མོ་རྡོ་རྗེ་ཞེས་བྱ་བའོ། །ཞེས་བརྗོད་ལ། དེ་བཞིན་གཤེགས་པ་ལྔ་དང་། དེའི་རིགས་ཀྱི་མིང་བཏགས་ཏེ། བཞད་པའི་རྡོ་རྗེ། སྒེག་པའི་རྡོ་རྗེ། རོལ་པའི་རྡོ་རྗེ། ཨ་ལ་ལའི་རྡོ་རྗེ། ཤིན་ཏུ་དགའ་བའི་རྡོ་རྗེ། མྱུ་གུ་རྡོ་རྗེ། ཀྱེ་རྡོ་རྗེ། རྡོ་རྗེ་སེམས་དཔའ། རྣམ་སྣང་ཆེན་པོ། རང་བྱུང་རྡོ་རྗེ། རྡོ་རྗེ་ཨ་ར་ལི། སྙེམས་པའི་རྡོ་རྗེ། རྡོ་རྗེ་བདུད་རྩི། བདུད་རྩི་ཐབས་སྦྱོར། རྡོ་རྗེ་ཁྲོ་བོ། སྙིང་རྗེའི་སྟོབས། ཧེ་རུ་ཀའི་རྡོ་རྗེ་སྟེ་མི་བསྐྱོད་པའི་རིགས་ཀྱི་མིང་བཅུ་བདུན་ནོ། །རྣམ་པར་སྣང་མཛད། མཛེས་པའི་རྡོ་རྗེ། ཡེ་ཤེས་རྡོ་རྗེ། ཕ་རོལ་ཕྱིན་པའི་རྡོ་རྗེ། རྟག་པའི་རྡོ་རྗེ། གཏི་མུག་རྡོ་རྗེ། ཐམས་ཅད་སྐྱོབ། སྒྱུ་འཕྲུལ་རྡོ་རྗེ། ཨོཾ་མཛད་རྡོ་རྗེ། སྐུ་རྡོ་རྗེ། སའི་སྙིང་པོ། གཏི་མུག་ཆེན་པོ་རྡོ་རྗེ། གཤིན་རྗེའི་གཤེད། ཐོ་བའི་དབང་ཕྱུག དེ་བཞིན་གཤེགས་པ། ཤཱཀྱ་ཐུབ་པ། སངས་རྒྱས་ཏེ་རྣམ་སྣང་གི་རིགས་ཀྱི་མིང་བཅུ་བདུན་དང་། ཤིན་ཏུ་དགའ་བའི་རྡོ་རྗེ། ཡན་ལག་མེད་པའི་རྡོ་རྗེ། ཡིད་བཞིན་ནོར་བུ། དམ་པ་དགའ་བའི་རྡོ་རྗེ། ཤིན་ཏུ་བདེ་བ་དགའ་བའི་རྡོ་རྗེ། ཉི་མ། རིན་ཆེན་བདག་པོ། རིན་ཆེན་རྒྱལ་པོ། རྡོ་རྗེ་གཟི་བརྗིད། རྡོ་རྗེ་རྒྱལ་པོ། རྡོ་རྗེ་བདུད་རྩི་ཟིལ་གནོན། སྣང་བྱེད་རྡོ་རྗེ་སྟེ་རིན་ཆེན་རིགས་ཀྱི་མིང་བཅུ་གཉིས་དང་། འོད་དཔག་ཏུ་མེད་པ། པདྨ་རྡོ་རྗེ། པདྨ་མྱུ་གུ་རྡོ་རྗེ། པདྨ་ལྕགས་ཀྱུ་རྡོ་རྗེ། འདོད་ཆགས་རྡོ་རྗེ། སྤྱན་རས་གཟིགས་ཀྱི་རྡོ་རྗེ། རྟ་མགྲིན། རིན་ཆེན་བདག་པོ། རྡོ་རྗེ་ཆོས། སྤྱན་རས་གཟིགས། པདྨ་གར་དབང་སྟེ་འོད་དཔག་མེད་ཀྱི་རིགས་ཀྱི་མིང་བཅུ་གཅིག་གོ །ནམ་མཁའ་རྡོ་རྗེ། འཇུག་པའི་རྡོ་རྗེ། ཤེས་རབ་མྱུ་གུ། ཤེས་རབ་རྡོ་རྗེ། སྙིང་རྗེའི་མྱུ་གུ། དམ་པའི་རྟ། རྟའི་རྒྱལ་པོ། བདུན་གྱི་རྒྱལ་པོ། ལྕགས་རྒྱལ། དམ་ཚིག་རྡོ་རྗེ། རྟ་མཆོག དོན་ཡོད་རྡོ་རྗེ། དོན་ཡོད་གྲུབ་པ། ལས་ཀྱི་རྡོ་རྗེ། མགྱོགས་འགྲོ་རྡོ་རྗེ་སྟེ་དོན་ཡོད་གྲུབ་པའི་རིགས་ཀྱི་མིང་བཅོ་ལྔའོ། །རྡོ་རྗེ་སེམས་དཔའ། རྡོ་རྗེ་ཅན། རྣམ་པར་རྒྱལ་བའི་རྡོ་རྗེ། ཕྱག་ན་རྡོ་རྗེ། དཔེ་མེད་རྡོ་རྗེ། རོ་མཉམ་རྡོ་རྗེ། ཤིན་ཏུ་དགའ་བའི་རྡོ་རྗེ། དམ་པ་དང་པོའི་རྡོ་རྗེ། བདེ་བའི་རྡོ་རྗེ་སྟེ་དྲུག་པ་རྡོ་རྗེ་འཆང་གི་རིགས་ཀྱི་མིང་དགུའོ། །དེ་ལྟར་མིང་བཏགས་པས་རྒྱུད་ལ་བདེ་བ་ཆེན་པོ་མངོན་དུ་བྱས་ཏེ། སྤྱི་བོར་རྣམ་པར་སྣང་མཛད་ཀྱིས་དབུར་བརྒྱན་པར་བསམ་མོ། །དེ་ནས་མཆོད་པ་ལྔས་མཆོད་ལ། ཁྱོད་ཀྱི་དབང་བསྐུར་བ་ལྔ་ལས་མིང་གི་དབང་ཐོབ། ཉོན་མོངས་པ་གཏི་མུག་དག གཟུགས་ཀྱི་ཕུང་པོའི་དྲི་མ་སྦྱངས། དེ་བཞིན་གཤེགས་པ་རྣམ་པར་སྣང་མཛད་ཀྱི་ངོ་བོར་བྱིན་གྱིས་བརླབས། མེ་ལོང་ལྟ་བུའི་ཡེ་ཤེས་ཀྱི་བག་ཆགས་སམ་ས་བོན་རྒྱུད་ལ་བཞག་གོ །ཞེས་རྟོགས་པ་བསྐྱེད་ལ། སླར་ཡང་། དངོས་ཀུན་གང་དང་གང་སྣང་བ། །གཙོ་དེ་རང་གི་ལྷག་པའི་ལྷ། །ཆོས་རྣམས་རང་བཞིན་རྙོག་མེད་དག །སངས་རྒྱས་ཡེ་ཤེས་བལྟ་བར་གྱིས། །ཞེས་བརྗོད་ལ་དེའི་དོན་བཤད་དོ། །རིག་པའི་དབང་འདི་རྣམས་ལ་སློབ་དཔོན་བདག་ཉིད་མི་བསྐྱོད་པའི་རྣལ་འབྱོར་ཁོ་ན་ལ་གནས་ནས་སློབ་མ་དང་དབང་རྫས་ཀྱི་བསྐྱེད་ཆོག་སོ་སོར་བྱས་པས་ཀྱང་རུང་གསུང་ངོ་། །རིགས་ལྔ་པོ་འདི་དག་ལ་མི་བསྐྱོད་པ་སོགས་ཇི་སྐད་བཤད་པའམ། རྡོ་རྗེ་ཅན་དང་རྟག་པ་སོགས་ཀྱི་ཐ་སྙད་ཀྱང་རུང་སྟེ་ཁྱད་པར་མེད་དོ། །དབང་ལྷ་མི་བསྐྱོད་པ་ཆུ་དབང་གི་སྐབས་སུ་ལན་གཅིག་སྤྱན་དྲངས་ནས་སོ་སོར་སྤྱན་འདྲེན་མི་དགོས་པ་ཕྱག་ལེན་ལ་མཛད་དེ། ཤིན་ཏུ་ལེགས་ཤིང་དབང་རྫས་ཀྱི་ལྷ་ལ་དབང་རྫས་རིགས་མཐུན་གཏད་ནས་རྒྱས་གདབ་པ་དང་། སློབ་མ་ལ་ཡང་དབང་རྫས་གཏད་པ་དེ་ཉིད་ཀྱིས་རྒྱུད་ལ་བདེ་བ་ཆེན་པོ་སྐྱེས་ནས་རྒྱས་གདབ་པ་ནི། འདི་དང་མཚོ་སྐྱེས་ལུགས་གཉིས་ཀྱི་ལུགས་མཆོག་ཏུ་སྣང་བས་མཐར་རྟེན་ཆུ་དབང་མི་དགོས་པ་འདྲའོ། །ཆོས་རྗེ་ཤར་པའི་ཕྱག་ལེན་ལ་དབང་རྫས་ལ་ཡང་ཆུ་དབང་བསྐུར་བ་དང་། སློབ་མ་ལ་ཡང་དབང་རྫས་ཀྱི་རྗེས་སུ་ཆུ་དབང་བསྐུར་བ་ཡོད་པར་སྣང་བས་གང་བདེར་བྱའོ། །གཉིས་པ་རྡོ་རྗེ་འཆང་ཆེན་པོའི་རྟེན་ལ་སྐུ་གསུང་ཐུགས་བྱིན་གྱིས་བརླབ་པའི་དབང་ནི། སློབ་དཔོན་ཀྱཻ་རྡོ་རྗེར་བསམས་ལ། སློབ་མ་སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་རྡོ་རྗེ་དཀར་པོ་ཧཱུྃ་གིས་མཚན་པ་དེ་ལས་འོད་སྤྲོས་བསྡུས་གཅིག་ཏུ་གྱུར་པ་ལས་རྡོ་རྗེ་འཆང་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ། ཡུམ་རྡོ་རྗེ་སྙེམས་མ་དང་བཅས་པ། ཕྱག་མཚན་མི་བསྐྱོད་པ་ལྟ་བུའམ་ཡང་ན་གཡས་བརྒྱད་རྡོ་རྗེ་དང་། གཡོན་བརྒྱད་དྲིལ་བུ་འཛིན་པར་བསྐྱེད། ཡན་ལག་གཉིས་པ་དང་གསུམ་པའང་བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་བུམ་པའི་ཆུས་དབང་བསྐུར། ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་པར་བསྒོམ་མོ། །དེ་ནས་རྡོ་རྗེ་མི་དམིགས་ཏེ་སྟོང་པའི་ངང་ལས་ཧཱུྃ་ལས་གསེར་ལ་སོགས་པ་ལས་གྲུབ་པའི་རྡོ་རྗེ་ཚད་དང་མཚན་ཉིད་ཡོངས་སུ་རྫོགས་པའི་ལྟེ་བར་རྡོ་རྗེ་སེམས་དཔའ་ཡབ་ཡུམ། སྟེང་གི་རྭ་ལྔ་ལ་དབུས་སུ་རྣམ་པར་སྣང་མཛད། ཤར་དུ་མི་བསྐྱོད་པ། ལྷོར་རིན་འབྱུང་། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པ། རྭའི་འོག་གི་པདྨ་འདབ་མ་བརྒྱད་ལ་ཤར་དུ་སྤྱན་རས་གཟིགས། ལྷོར་བྱམས་པ། ནུབ་ཏུ་ནམ་མཁའ་མཛོད། བྱང་དུ་ཀུན་ཏུ་བཟང་པོ། བྱང་ཤར་དུ་ཕྱག་ན་རྡོ་རྗེ། ཤར་ལྷོར་འཇམ་པའི་དབྱངས། ལྷོ་ནུབ་ཏུ་སྒྲིབ་པ་རྣམ་སེལ། ནུབ་བྱང་དུ་སའི་སྙིང་པོ། འོག་གི་པདྨ་འདབ་མ་བརྒྱད་ལ་ཤར་དུ་རྡོ་རྗེ་ལྕགས་ཀྱུ་མ། ལྷོར་རྡོ་རྗེ་ཞགས་པ་མ། ནུབ་ཏུ་རྡོ་རྗེ་ལྕགས་སྒྲོག་མ། བྱང་དུ་རྡོ་རྗེ་སྒྲོལ་མ། བྱང་ཤར་དུ་སྐུལ་བྱེད་མ། ཤར་ལྷོར་རིན་ཆེན་གློག་མ། ལྷོ་ནུབ་ཏུ་ལུ་གུ་རྒྱུད་མ། ནུབ་བྱང་དུ་གཞན་གྱིས་མི་ཐུབ་མ། འོག་གི་རྭ་ལྔ་ལ་དབུས་སུ་ཡེ་ཤེས་མཁའ་འགྲོ་མ། ཤར་དུ་རྡོ་རྗེ་མཁའ་འགྲོ་མ། ལྷོར་གཏུམ་མོ། ནུབ་ཏུ་རོ་ལངས་མ། བྱང་དུ་འཇིགས་པའི་མཁའ་འགྲོ་མ་བསྐྱེད་ལ། ཡེ་ཤེས་པ་དགུག་གཞུག་དང་། སྐྱེ་མཆེད་དང་སྐུ་གསུང་ཐུགས་བྱིན་རླབས་བྱ། དབང་བསྐུར་ཏེ་ལྷ་ཐམས་ཅད་ལ་མི་བསྐྱོད་པས་རྒྱས་བཏབ་ལ། དེ་སློབ་དཔོན་གྱིས་ལག་པ་གཡས་པར་བཟུང་སྟེ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་གཟུང་། །རྡོ་རྗེ་སྙིང་པོའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་བཛྲ་ས་མ་ཡ་སཏྭཾ་དྷ་ར་ཡཱ་མི་ཧི་ཧི་ཧི་ཧི་ཧཱུྃ་ཞེས་བརྗོད་ལ་སློབ་མའི་ལག་པ་གཡས་པར་གཏད་པ་ནི་བརྟུལ་ཞུགས་ཀྱི་དབང་ངོ་། །དེ་ནས་འདི་སྐད་བརྗོད་པར་བྱ་སྟེ། ཁྱོད་ཀྱིས་ཕྱིའི་འཇུག་པ་དང་ནང་གི་འཇུག་པ་བྱས་པས་ནི་ལྷ་དང་སྐལ་བ་མཉམ་པར་བྱས་པ་ཡིན་ནོ། །དེ་ནས་ཁྱོད་ལ་རིག་པའི་དབང་ལྔ་བསྐུར་བས་ཁྱོད་ཀྱི་ཉོན་མོངས་པ་ལྔ་དང་། ཕུང་པོ་ལྔ་དང་། འབྱུང་བ་ལྔའི་དྲི་མ་ཐམས་ཅད་སྦྱངས་ཏེ་དེ་བཞིན་གཤེགས་པ་ལྔ་དང་། ཡེ་ཤེས་ལྔར་བྱིན་གྱིས་བརླབས་པ་ཡིན། དེ་ནས་རྡོ་རྗེའི་བརྟུལ་ཞུགས་བྱིན་པ་ནི་ཁྱོད་ཐ་མལ་པའི་ལུས་ངག་ཡིད་གསུམ་གྱི་སྤྱོད་པ་བརྟུལ་ལ་དེ་བཞིན་གཤེགས་པ་རིགས་ལྔའི་བདག་ཉིད་རྡོ་རྗེ་འཆང་ཆེན་པོའི་སྐུ་གསུང་ཐུགས་རྡོ་རྗེ་ལ་གནས་པར་གྱིས་ཤིག ཅེས་བྱ་བའི་དོན་ཡིན་ནོ། །དེ་ལྟ་བུའི་རིག་པའི་དབང་ཐོབ་ཕྱིན་ཆད་ཁྱོད་ཀྱིས་དེ་བཞིན་གཤེགས་པ་སྤྱི་དང་ཁྱད་པར་གྱི་དམ་ཚིག་ཚུལ་ཁྲིམས་ཀྱི་བསླབ་པ་ལ་སོགས་བསྲུང་བ་དང་། བསྟེན་པ་ལ་བསླབ་པར་བྱའོ། །དབང་འདིའི་བརྡ་ནི། སོར་མོ་ལྔ་ནི་ཕྲལ་ཏེ་བསྟན། །ཞེས་བྱ་བ་ཡིན་ནོ། །དབང་འདི་ཐོབ་པས་ཁྱོད་ཀྱིས་རྟོག་པ་དང་། བྱ་བ་དང་སྤྱོད་པའི་རྒྱུད་མཐའ་དག་ཉན་པ་དང་། བཤད་དུ་ཡང་རུང་བ་ཡིན་ནོ། །རྣལ་འབྱོར་དང་། རྣལ་འབྱོར་བླ་མ་དང་། རྣལ་འབྱོར་བླ་ན་མེད་པའི་རྒྱུད་མཐའ་དག་ཉན་པའི་སྐལ་བ་དང་ལྡན་པ་མ་ཡིན་མོད་ཀྱང་། དེ་ནས་གསུངས་པའི་དངོས་གྲུབ་ཀྱི་སྒྲུབ་ཐབས་དང་། དྲན་པ་གཅིག་པའི་སྒྲུབ་ཐབས་ཉམས་སུ་བླང་དུ་རུང་བ་ཡིན་ནོ། །ཞེས་བརྗོད་ལ་རྡོ་རྗེ་སློབ་མའི་དབང་ཙམ་ལས་མི་བསྐུར་ན་མེ་ཏོག་གང་ཕོག་གི་ལྷའི་བཟླས་ལུང་བྱིན་ལ་དམ་ཚིག་བསྲུང་བར་ཁས་བླངས་ཤིང་ཡོན་འབུལ་དུ་བཅུག་ལ་གཏང་ངོ་། །རྡོ་རྗེ་སློབ་དཔོན་གྱི་དབང་བསྐུར་ན་སྐབས་འདིར་གཙོ་བོ་ཡབ་ཡུམ་ལྔའམ་ལྷ་ཐམས་ཅད་ཀྱི་བཟླས་ལུང་སྦྱིན་ནོ།། །།གཉིས་པ་རྡོ་རྗེ་སློབ་དཔོན་གྱི་དབང་བསྐུར་བ་ལ་བཞི་སྟེ། བུམ་པའི་དབང་། གསང་བའི་དབང་། ཤེས་རབ་ཡེ་ཤེས་ཀྱི་དབང་། དབང་བཞི་པའོ། །དང་པོ་ལ་གསུམ་སྟེ། སྔོན་འགྲོ་ཡོན་དབུལ་ཞིང་གསོལ་བ་གདབ་པ། དངོས་གཞི་སློབ་དཔོན་དུ་དབང་བསྐུར་བ། མཇུག་མཐར་རྟེན་སྦྱིན་པའོ། །དང་པོ་ནི། རྡོ་རྗེ་སློབ་དཔོན་དུ་འོས་པ་དེས་ཕྱག་དང་མཎྜལ་ཕུལ་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་ལན་གསུམ་གྱིས་གསོལ་བ་གདབ་བོ། །གཉིས་པ་ནི་དབང་སྟེགས་ཀྱི་སྟེང་དུ་སློབ་མ་སྔར་བརྟུལ་ཞུགས་ཀྱི་དབང་གི་སྐབས་ཀྱི་རྡོ་རྗེ་སེམས་དཔའི་ཕྱག་རྒྱ་ཆེན་པོས་བཞག་ལ། སློབ་དཔོན་རང་ཉིད་ཀྱི་སྙིང་གའི་ས་བོན་ལས་དེ་བཞིན་གཤེགས་པ་རིགས་ལྔའི་དཀྱིལ་འཁོར་གྱི་འཁོར་ལོ་དཔག་ཏུ་མེད་པ་ནམ་མཁའ་གང་བར་སྤྲུལ་ནས་དེ་དག་གིས་ཀྱང་མཆོད་པའི་ཡོ་བྱད་སྣ་ཚོགས་པ་དང་། ཡེ་ཤེས་ཀྱི་ཆུས་གང་བའི་བུམ་པ་བསྣམས་ནས་བཀྲ་ཤིས་ཀྱི་ཚིགས་སུ་བཅད་པ་བརྗོད་ཅིང་དབང་བསྐུར་བར་བསམས་ལ་དངོས་སུ་ཡང་རྒྱལ་མཚན་ལ་སོགས་པས་མཛེས་པ་དང་། བཀྲ་ཤིས་ཀྱི་གླུ་དང་རོལ་མོ་བྱ་ཞིང་། དབང་བསྐུར་རྡོ་རྗེ་ཆེན་པོ་ཆེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཞེས་སོགས་ཀྱིས་རིགས་པའི་དབང་ལྔ་མདོར་བསྡུས་པའི་ཚུལ་གྱིས་བསྐུར་ནས་དམ་ཚིག་གསུམ་སྦྱིན་པར་བྱ་སྟེ། རྡོ་རྗེ་ཧཱུྃ་ལས་ཇི་སྐད་བཤད་པའི་རྣམ་པ་ལྟར་བསྐྱེད་ལ། འདི་དེ་ཞེས་བྱ་བ་ལ་སོགས་པས་སློབ་མའི་ལག་པ་གཡས་པར་བྱིན་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་མའི་བདག་པོའི་བདག །ཅེས་དེ་ཁོ་ན་ཉིད་བསྟན་པ་རྡོ་རྗེའི་དམ་ཚིག་གོ །དེ་ནས་དྲིལ་བུ་ཨཿལས་འཁར་བ་ལ་སོགས་པ་ལས་གྲུབ་པ་ཚད་དང་མཚན་ཉིད་ཡོངས་སུ་རྫོགས་པའི་བུམ་པར་ཤེས་རབ་ཀྱི་ཕ་རོལ་ཏུ་ཕྱིན་མ་ཡབ་དང་བཅས་པ། ཁོག་པའི་སྟེང་གི་ཨུཏྤ་ལའི་འདབ་མ་ལ་ཤར་དུ་ལྷ་མོ་སྒྲོལ་མ། ལྷོར་སྤྱན་མ། ནུབ་ཏུ་མཱ་མ་ཀཱི། བྱང་དུ་གོས་དཀར་མོ། བྱང་ཤར་དུ་ནོར་རྒྱུན་མ། ཤར་ལྷོར་ཙུནྡྷ། ལྷོ་ནུབ་ཏུ་ཁྲོ་གཉེར་ཅན་མ། ནུབ་བྱང་དུ་རྡོ་རྗེ་ཕྲེང་བ་མ། སྟེང་གི་རྭ་ལྔ་ལ་སྔར་རྡོ་རྗེའི་སྐབས་སུ་བཤད་པ་བཞིན་རིགས་ལྔ་དང་། དེའི་འོག་གི་པདྨའི་འདབ་མ་བརྒྱད་ལ་བྱང་སེམས་བརྒྱད་སྐད་ཅིག་ཙམ་གྱིས་བསྐྱེད། ཡེ་ཤེས་པ་དགུག་གཞུག་བྱ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། དབང་བསྐུར་ནས་ལྷ་ཐམས་ཅད་ལ་དོན་ཡོད་གྲུབ་པས་རྒྱས་བཏབ་ལ། འདི་དེ་སངས་རྒྱས་ཐམས་ཅད་ཀྱིས། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་གཟུང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་པས་སློབ་མའི་ལག་པ་གཡོན་པར་བྱིན་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ནི་བྱེད་པ་ཡིན། །ཞེས་པས་དེ་ཁོ་ན་ཉིད་བརྗོད་པ་ནི་དྲིལ་བུ་གསུང་གི་དམ་ཚིག་གོ །དེ་ནས། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་འདོད། །རྡོ་རྗེ་ཆེ་དང་དྲིལ་བུ་ཆེ། །ཟུང་ཤིག་རྡོ་རྗེར་བྱིན་གྱིས་བརླབས། །དེ་རིང་རྡོ་རྗེ་སློབ་དཔོན་གྱུར། །སློབ་མ་བསྡུ་བ་ཉིད་དུ་གྱིས། །ཞེས་བརྗོད་པས་སློབ་མ་ཡུམ་དང་བཅས་པར་བསམ། དེ་ནས་སློབ་མ་རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་སྙེམས་མ་དཀར་མོ་ལོ་གྲངས་བཅུ་དྲུག་ལོན་པའི་ན་ཚོད་ཅན་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ་གཉིས་ཀས་བསྐྱེད་ལ་ཡེ་ཤེས་པ་གཞུག་པ་དང་། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་ནས་མི་བསྐྱོད་པས་རྒྱས་གདབ་པའི་བར་བྱས་ནས། དེ་ཁོ་ན་ཉིད་བསྟན་པར་བྱ་སྟེ། སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ལ། །ཅི་འདོད་པར་ནི་བསྟེན་བཞིན་དུ། །རང་གི་ལྷག་པའི་ལྷར་སྦྱོར་བས། །བདག་དང་གཞན་ལ་མཆོད་པར་གྱིས། །དེ་བཞིན་གཤེགས་པ་ཐམས་ཅད་ཀྱིས། །འདའ་བ་རུ་ནི་མི་མཛད་པའི། །ཕྱག་རྒྱའི་དམ་ཚིག་ཅེས་སུ་བསྒྲགས། །ཡིད་ཀྱི་ལུས་ནི་བརྟན་ཕྱིར་རོ། །ཞེས་པ་ནི་ཕྱག་རྒྱའི་དམ་ཚིག་གོ །དེ་ནས་བརྟན་པའི་ཡན་ལག་ཏུ་བུམ་པའི་ཆུས་དབང་བསྐུར་ཏེ། ནམ་མཁར་གདན་གསུམ་ཚང་བའི་དཀྱིལ་འཁོར་གྱིས་རྣམ་པར་རྒྱལ་བའི་བུམ་པ། གླུ་དང་། རོལ་མོ་དང་། བཀྲ་ཤིས་དང་བཅས་པས་སྤྱི་བོ་ནས་དབང་བསྐུར་བར་བསམ་ཞིང་། དབང་བསྐུར་རྡོ་རྗེ་ཆེན་པོ་ཆེ་སོགས་དང་། བཅོམ་ལྡན་རྡོ་རྗེ་ཅན་གྱི་ཆུས། །དེ་རིང་ཁྱོད་ལ་དབང་བསྐུར་བས། །རྣམ་ཤེས་ཕུང་པོའི་སྒྲིབ་སྦྱངས་ནས། །རྡོ་རྗེ་མཁའ་འགྲོ་གྲུབ་པར་མཛོད། །ཨོྃ་ཧཱུྃ་ཤྲཱི་ཧེ་རུ་ཀ་བཛྲ་ཨུ་ད་ཀ་ཨ་བྷི་ཥིཉྩ། གཽ་རཱི་ལ་སོགས་བརྒྱད་རྣམས་ཀྱིས། །ཆུ་ཡིས་ཁྱོད་ལ་དབང་བསྐུར་བས། །ཕུང་པོ་བཞི་དང་འབྱུང་བ་བཞི། །ལྷ་མོ་བརྒྱད་དུ་འགྲུབ་པར་ཤོག །ཨོཾ་བཛྲ་གཽ་རཱི་ཨུ་ད་ཀ་ཨ་བྷི་ཥིཉྩ། དེ་བཞིན་དུ་རྟག་པའི་རྡོ་རྗེ་དང་། རྡོ་རྗེ་ཉི་མ་དང་། པདྨ་གར་དབང་དང་། རྟའི་རྒྱལ་པོ་རྣམས་ལ་ཕུང་པོ་གཞན་བཞི་ལ་འདོན་པ་བསྒྱུར་ནས། སྔར་གྱི་ཧཱུྃ་གི་ཚབ་ཏུ་ཨོཾ་དང་། ཏྲཱྃ་དང་། ཨཱྃ་དང་། ཁྃ་རྣམས་བཅུག་སྟེ། སོ་སོའི་གཤམ་དུ། སྐམ་པ་མ་སོགས་བརྒྱད་རྣམས་ཀྱིས། །ཞེས་སོགས་ལྷ་མོ་རྣམས་ཀྱི་མཚན་དང་སྔགས་སྦྱར་བ་དང་། རྟའི་རྒྱལ་པོའི་ལྷ་མོ་བརྒྱད་ཀྱི་རྗེས་སུ་སྒོ་མ་བཞིའི་སྔགས་ཀྱིས་ཀྱང་དབང་བསྐུར་བ་ནི་ཆུ་དབང་རྒྱས་པའོ། །དེ་ཙམ་མ་ནུས་ན། བཅོམ་ལྡན་མཁའ་འགྲོ་ལྔ་ཡི་ཆུས། །དེ་རིང་ཁྱོད་ལ་དབང་བསྐུར་བས། །ཕུང་པོ་ལྔ་ཡི་སྒྲིབ་སྦྱངས་ཏེ། །མཁའ་འགྲོ་ལྔ་པོ་འགྲུབ་པར་ཤོག །ཨོཾ་ཧཱུྃ་ཤྲཱི་ཧེ་རུ་ཀ་སོགས་གཙོ་བོ་ལྔའི་སྔགས་ཀྱིས་ཆུ་དབང་བསྐུར་བས་ཀྱང་རུང་སྟེ། གང་ལྟར་ཡང་ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་པར་བསམས་ནས་དབང་ལྷ་རྣམས་ཀྱང་བསྟིམས་ཏེ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་པས་སྤྱི་བོར་མེ་ཏོག་བཞག་ནས་མཆོད་པ་ལྔས་མཆོད་པར་བྱའོ། །དེ་ནས་དཀྱིལ་འཁོར་དང་ལྷའི་དེ་ཁོ་ན་ཉིད་བསྟན་པ་ནི། དེ་ལྟར་ཁྱོད་ལ་རྡོ་རྗེ་སློབ་དཔོན་གྱི་དབང་བསྐུར་བར་བྱས་པས་ཕུང་པོ་དང་ཁམས་དང་སྐྱེ་མཆེད་ཀྱི་དྲི་མ་དག་ནས་རང་སེམས་མི་བསྐྱོད་པའི་ངོ་བོར་གྱུར་པ་ཡིན་ལ། རང་གི་སེམས་རྣམ་པར་དག་པ་འདི་ཉིད་དཀྱིལ་འཁོར་གྱི་འཁོར་ལོ་ཡིན་གྱི། དེ་ལས་ལོགས་སུ་དཀྱིལ་འཁོར་བཙལ་དུ་མེད་དེ། དཀྱིལ་འཁོར་ཞེས་ནི་གང་བཤད་པ། །ཡིད་ཀྱི་དཀྱིལ་འཁོར་དམ་པ་ཡིན། །གཞལ་མེད་ཁང་ཞེས་བཤད་པ་ནི། །སེམས་ནི་གཞལ་མེད་ཁང་བརྩེགས་ཉིད། །དེ་ཡི་ཕྱི་རོལ་གྲུ་བཞི་པའི། །ཚད་ནི་མཉམ་པར་གྱུར་པའོ། །གང་ཞིག་བྱམས་པ་ལ་སོགས་སེམས། །ཐིག་སྐུད་བཞིར་ནི་བརྗོད་པའོ། །ཐིག་གང་ཡང་དག་བཤད་པ་ནི། །སྦྱོར་བས་ཆོས་ཀྱི་རྗེས་དྲན་པའོ། །ལྟ་བ་ཀུན་ལས་རྣམ་གྲོལ་བ། །ཡེ་ཤེས་ཐིག་ཏུ་བརྗོད་པ་ཡིན། །རྒྱན་གང་ཡང་དག་བཤད་པ་ཉིད། །ཚུལ་ཁྲིམས་སོགས་ཀྱི་སྡོམ་པ་མཆོག །དབང་པོ་གཉིས་ལ་སོགས་པའི་སེམས། །རྭ་བ་ལྔར་ནི་འབྱུང་བ་ཉིད། །གང་ཞིག་སྒོ་ཞེས་བཤད་པ་ནི། །རྣམ་པར་ཐར་པ་རྣམ་པ་བཞི། །རྟ་བབས་ཀ་བ་བཞི་པོ་ནི། །ཡང་དག་སྤོང་བ་བཞི་ཞེས་བརྗོད། །དྲན་པ་ཉེ་བར་གཞག་པ་བཞི། །ཁ་ཁྱེར་བཞིར་ནི་བརྗོད་པ་ཉིད། །སྒོ་ཁང་བཞི་ནི་གང་ཡིན་པ། །རྫུ་འཕྲུལ་རྐང་པ་རྣམ་པ་བཞི། །དེ་བཞིན་མེ་ཏོག་ཕྲེང་བརྒྱན་པ། །བྱང་ཆུབ་ཡན་ལག་བདུན་པོ་ཡིན། །འཕགས་ལམ་ཡན་ལག་བརྒྱད་པོ་ནི། །ཀ་བ་བརྒྱད་པོ་ཞེས་བརྗོད་དོ། །ལམ་གྱི་ཡེ་ཤེས་ཁྱད་པར་ནི། །རྔ་ཡབ་ཏུ་ནི་ཡོངས་སུ་གྲགས། །གང་ཞིག་དོ་ཤལ་བཤད་པ་ནི། །ཉོན་མོངས་ཐམས་ཅད་གཅོད་པ་སྟེ། །ཀུན་ཏུ་གཅོད་པའི་ངོ་བོ་ཡིས། །ཉོན་མོངས་འཕྲོག་པས་དྲྭ་བ་ཉིད། །ཚོགས་གཉིས་དག་གིས་སྦྱོར་བ་ལས། །འཁོར་ལོ་བསྐོར་བ་གང་ཡིན་པས། །ཉོན་མོངས་ཕྱེད་ནི་གཅོད་པས་ན། །དོ་ཤལ་ཕྱེད་པ་ཉིད་དུ་བརྗོད། །ཅེས་སོ། །དེ་ལྟར་རང་སེམས་དེ་ཉིད་མ་རྟོགས་པའི་དབང་གིས་ཕུང་ཁམས་སྐྱེ་མཆེད་སྣ་ཚོགས་སུ་སྣང་ཡང་དེ་ཉིད་དཀྱིལ་འཁོར་གྱི་ལྷའི་ངོ་བོར་དག་པ་ནི། རྒྱལ་བ་མགོན་པོ་ཕན་པ་ནི། །གཏི་མུག་ཐམས་ཅད་ཟད་པར་མཛད། །རྡོ་རྗེ་ཉི་མ་རྒྱལ་པོ་ཆེ། །རྣམ་པར་རྟོག་པའི་རབ་རིབ་འཕྲོག །རྟ་མགྲིན་འདོད་པ་ཆེན་པོ་ནི། །འདོད་ཆགས་ཅན་གྱི་བྱང་ཆུབ་སྟེར། །རྡོ་རྗེ་མགྱོགས་འགྲོ་ཕྲག་དོག་ཆེ། །ཐེག་པ་གཞན་ནི་རྣམ་པར་སྤངས། །རྡོ་རྗེ་སེམས་དཔའ་རྒྱལ་པོ་ཆེ། །མི་བསྐྱོད་ཡེ་ཤེས་འབྱུང་བའི་གནས། །སྐྱེ་འགྲོ་མི་ཟད་མགྲོན་གཉེར་ཕྱིར། །སྒྲིབ་པ་ལྔ་ནི་འཇོམས་པའོ། །ཕུང་པོ་ལྔ་ནི་མདོར་བསྡུ་ན། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེ་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་པ་གཤིན་རྗེ་མཐར། །དེ་ནི་ཕུང་པོ་མཐར་བྱེད་དེ། །དེས་ནི་ཤེས་བྱ་མཐར་བྱེད་པའོ། །ཞེ་སྡང་ཞེ་སྡང་ལོངས་སྤྱོད་པས། །ཉེས་པ་ཟད་པས་ཤེས་རབ་མཐར། །དེས་ན་སེམས་ཀྱི་མཐར་བྱེད་དེ། །དེས་ནི་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པ་པད་མཐར་བྱེད། །དེས་ནི་ངག་གི་མཐར་བྱེད་འགྱུར། །དེ་བཞིན་སྙོམས་འཇུག་མཐར་བྱེད་དོ། །ཉོན་མོངས་ཀུན་ཟད་གང་ཡིན་དང་། །དེ་བཞིན་ལས་ཀུན་ཟད་པ་ཉིད། །སྒྲིབ་པ་ཀུན་ཟད་ཡེ་ཤེས་ནི། །བགེགས་ནི་མཐར་བྱེད་ཅེས་བྱར་བཤད། །ཅེས་བརྗོད་དོ། །གསུམ་པ་ནི། སློབ་མ་རྣམས་རང་རང་གི་ཕྱག་རྒྱ་འཆིང་དུ་བཅུག་ལ། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་པ་རྣམ་རོལ་ཕྱིར། །རྡོ་རྗེ་སྙེམས་མའི་རྣལ་འབྱོར་གྱིས། །དགའ་སྟོན་བདེ་བས་མཆོད་པར་གྱིས། །ཨཱཿ སྒེག་དང་བཅས་པས་ཕྲེང་བ་འཕང་། །སངས་རྒྱས་ཐམས་ཅད་མཆོད་པར་བྱ། །དེས་ནི་བཅོམ་ལྡན་འབྲལ་མི་འགྱུར། །ཕྲེང་བ་དེ་ཡི་རྒྱན་ཡིན་ནོ། །ཨོཾ། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེ་ཡིས་བདེ་གཤེགས་དངོས་གྲུབ་ནི། །མྱུར་དུ་བདེ་བ་མྱོང་བར་འགྱུར། །གཱི། དེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུ་བའི་ཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་གྱིས། །ཧོཿ རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་ལེགས་བགོས་པས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཧཱུྃ། སངས་རྒྱས་རྣམས་ལ་མེ་ཏོག་དོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་གྱིས། །བྷྲཱུྃ། ཆོས་ཀྱི་མེ་ནི་ལེགས་སྦར་བས། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་མདོངས་པ་ལ། །ཡེ་ཤེས་སྒྲོན་མེས་གསལ་བར་གྱིས། །པྲ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཤེས་རབ་ཏིང་འཛིན་དང་། །རྣམ་གྲོལ་ཡེ་ཤེས་མཐོང་བ་ཡིས། །བྱང་ཆུབ་ལུས་ཅན་རྣམས་ལ་བསྒོས། །ག ཞེས་པ་ལྷ་མཆོད་པའི་རྗེས་གནང་དང་། གསེར་གྱི་ཐུར་མའམ་མེད་ན་རྡོ་རྗེ་ལ་བཅོམ་ལྡན་འདས་ཀྱི་སྔགས་བཟླས་ཏེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཐོག་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲི་པྲཾ། ཞེས་མིག་ལ་བྱུག་པའི་ཚུལ་བྱས་ནས་མེ་ལོང་བསྟན་ཏེ། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། །ཞེས་བརྗོད་ལ། ཨཿལས་སྐྱེས་པའི་དྲིལ་བུ་བྱིན་ལ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །ཞེས་བརྗོད་ཅིང་དཀྲོལ་དུ་གཞུག་གོ །དེ་ནས་ཧོཿཞེས་བྱ་བས་མདའ་གཞུ་བྱིན་ལ། དེ་བཞིན་གཤེགས་པ་ཐམས་ཅད་དང་རྗེས་སུ་ཆགས་པར་བྱོས་ཤིག །ཅེས་བརྗོད་དེ། ཕྱོགས་བཞི་དང་། སྟེང་འོག་ཏུ་མདའ་རེ་འཕེན་པའི་ཚུལ་བྱེད་དུ་གཞུག་གོ །ཡང་མེ་ལོང་བསྟན་ལ་ཨ་བཛྲ་སཏྭ། རྡོ་རྗེ་སེམས་དཔའ་མེ་ལོང་ལྟར། །གསལ་ཞིང་དག་ལ་རྙོག་པ་མེད། །བུ་ཁྱོད་ཀྱི་ནི་སྙིང་ལ་ཞུགས། །རྡོ་རྗེ་སེམས་དཔའི་རང་བཞིན་གཙོ། །ཞེས་དང་། གང་ཡང་སངས་རྒྱས་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་འདི་ཉིད་ཡིན་པར་ཤེས་པར་གྱིས་ཤིག ཅེས་བརྗོད་དོ། །དེ་ནས་ཆོས་བཤད་པའི་རྗེས་གནང་སྦྱིན་པའི་ཕྱིར། སློབ་མ་རེ་རེ་ནས་དབང་སྟེགས་ཀྱི་སྟེང་དུ་བཞག་ལ། ཨོཾ་བཛྲ་ཧེ་ཏུ་མཾ། ཞེས་པས་འཁོར་ལོ་རྐང་པའི་འོག་ཏུ་གཞུག ཨོཾ་བཛྲ་བྷཱ་ཥ་རཾ་ཞེས་པས་ལག་པ་གཡས་སུ་དུང་དང་། ཨོཾ་བཛྲ་གྷཎྜེ་ཨཿཞེས་པས་གཡོན་དུ་དྲིལ་བུ་དང་། ཨས་ལག་པ་གཉིས་ཀྱི་སྟེང་དུ་རྒྱུད་ཀྱིས་པོ་ཏི་བྱིན་ལ། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །ཁྱོད་ཀྱིས་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་ཏུ་གང་བར་གྱིས། །སྔགས་ཀྱི་ཚུལ་གྱི་ཆོ་ག་ཡིས། །སྐྱེ་བོ་རྣམས་ལ་རྟག་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་བཏགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཁྱེད་ལ་རྟག་ཏུ་བསྲུང་བར་མཛད། །ཅེས་བརྗོད་ནས་སོ་སོའི་འཁོར་ལོས་སྒྱུར་བའི་རྣལ་འབྱོར་དུ་བྱས་ནས། ཇི་ལྟ་ཇི་ལྟར་འདུལ་འགྱུར་པ། །དེ་ལྟ་དེ་ལྟར་སེམས་ཅན་དོན། །འདོད་ཆགས་ལ་སོགས་གཙང་བ་ཡིས། །སེམས་ཅན་རྣམས་ལ་ཉེ་བར་སྦྱོར། །ཞེས་དང་། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་དུ་ཆོས་ཀྱི་གནས་སུ་རྡོ་རྗེ་དང་། རིན་ཆེན་དང་། པདྨ་དང་། སྣ་ཚོགས་ཀྱི་སྒྲ་བཅུག་སྟེ་ཚིགས་སུ་བཅད་པ་ལྔས་རྗེས་སུ་གནང་བ་བྱིན་ནས། བྱང་ཆུབ་སྙིང་པོའི་བར་དུ་ནི། །ཕྱོགས་ཀུན་ཏུ་ནི་འཁོར་ལོ་ནི། །ཆོས་ཀྱི་འཁོར་ལོ་བླ་ན་མེད། །ཀུན་ཏུ་མཆོག་ཏུ་རབ་ཏུ་བསྐོར། །ཐབས་དང་ཤེས་རབ་རང་བཞིན་དག །ཡིད་བཞིན་ནོར་བུ་ལྟར་མཐོང་ནས། །སྦྱོར་མེད་བྲལ་ཞིང་མ་ཞུམ་པར། །སེམས་ཅན་དོན་ནི་ད་ལྟ་གྱིས། །ཞེས་ཆོས་བཤད་པའི་རྗེས་སུ་གནང་བ་སྦྱིན་ནོ། །དེ་ལྟར་ན་ཕྱི་དབྱིབས་ཀྱི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་ཀྱི་དྲི་མ་དག ལམ་བསྐྱེད་པའི་རིམ་པ་བསྒོམ་པ་ལ་དབང་། སྡོམ་པ་དང་དམ་ཚིག་ཉི་ཤུ་རྩ་གཉིས་བསྲུང་བ་ལ་དབང་། ས་དང་པོ་ནས་དྲུག་པའི་བར་ཐོབ། བརྡ་ལྔ་བསྡུས་རྩེ་མོས་མནན་པ། འབྲས་བུ་སྤྲུལ་པའི་སྐུ་རང་བཞིན་ལྷུན་གྲུབ་ཀྱི་རྟེན་འབྲེལ་མངོན་དུ་བྱས། ཞེས་སོགས་རྟོགས་པ་བསྐྱེད་དེ་བུམ་པའི་དབང་བསྐུར་བ་འཁོར་དང་བཅས་པའོ།། །།གཉིས་པ་གསང་བའི་དབང་ནི། སློབ་མས་ཕྱག་དང་མཎྜལ་ཕུལ་ནས། བྱང་ཆུབ་རྡོ་རྗེས་སངས་རྒྱས་ལ། །ཞེས་སོགས་དང་། བཅོམ་ལྡན་ཞི་བ་ཆེན་པོ་ཀྱེ། །ཞེས་བྱ་བ་ལ་སོགས་པ་ལན་གསུམ་གྱིས་གསོལ་བ་བཏབ་ལ། སློབ་དཔོན་གྱིས་གདོང་བཅིངས་ཏེ། སློབ་དཔོན་རང་རྣམ་པར་སྣང་མཛད་དང་། སྤྱན་མ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་དུང་དང་ཀུནྡ་ལྟར་དཀར་བ་སློབ་མའི་ལྕེ་ལ་བཞག་པར་དཔོན་སློབ་གཉིས་ཀས་བསྒོམས་ལ། སྔོན་དུ་བསྒྲུབས་པའི་བདུད་རྩི་རིལ་བུ་ཆང་ངམ། ཞོའམ། སྦྲང་རྩི་ལ་སྦྱར་བ་ལྕེ་ལ་གཞག་ཅིང་། ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་ལ་དབང་བསྐུར་བཞིན། །བདག་གིས་གསང་བའི་དབང་གིས་ནི། །སེམས་ཀྱི་རྒྱུན་གྱིས་དབང་བསྐུར་རོ། །ཞེས་བརྗོད་ཅིང་། བདུད་རྩིས་དབང་བསྐུར་ནས། དེ་ནས་དེ་ཁོ་ན་ཉིད་ཀྱང་བརྗོད་པར་བྱ་སྟེ། འདི་ནི་དེ་ཉིད་བླ་ན་མེད། །གཉིས་མེད་ཡི་གེ་བརྗོད་མི་ནུས། །ཆོས་དབྱིངས་རྣམ་པ་ལྟ་བུ་ཡིས། །དམ་པའི་བདེ་བ་ཡང་དག་མྱང་། །ཞེས་བརྗོད་ཅིང་རང་བཞིན་བརྒྱད་ཅུའི་རྟོག་པ་འགགས་པར་བསམ་མོ། །དེ་ནས་གདོང་གཡོགས་ཕྱེ་ནས་སློབ་དཔོན་ཆོས་གོས་གྱོན་ཏེ། ལག་པ་གཡོན་པས་ཆོས་གོས་ཀྱི་སྣ་སེང་གེའི་རྣ་བ་ལྟ་བུ་བྱས་ལ་གཟུང་། གཡས་པས་རྡོ་རྗེ་དྲིལ་བུ་བཟུང་སྟེ། སྐྱེ་དང་རྒ་དང་འཆི་མི་འགྱུར། །འཇིགས་དང་མྱ་ངན་ནད་མི་འབྱུང་། །བདེ་ཆེན་ཐེག་པ་འདི་ལ་ནི། །བུ་ཁྱོད་ང་ཡིས་ལུང་བསྟན་བྱ། །འདི་ལྟར་ང་ཡིས་ལུང་བསྟན་ཁྱོད། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་གྲུབ་པའི་ཕྱིར། །སྲིད་པའི་ངན་འགྲོ་ལས་བསྒྲལ་ཏེ། །ཀྱཻ། ཆེ་གེ་མོ་ཞེས་བྱ་བ་ཡིས། །དེ་བཞིན་གཤེགས་པ་ས་འོག་དང་། །མི་ཡུལ་མཐོ་རིས་ཉིད་དུ་འགྲུབ། །གང་ཡང་ངས་ལུང་བསྟན་པ་འདི་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དཀྱིལ་འཁོར་གྱི་འཁོར་ལོ་དང་བཅས་པ་ཐམས་ཅད་ཀྱིས་མགྲིན་གཅིག་ཏུ་བྱང་ཆུབ་ཆེན་པོར་ལུང་སྟོན་པར་མཛད་དེ། སྔགས་འདི་དང་ཕྱག་རྒྱ་འདིའི་མཐུ་ཡིན་ནོ། །ཞེས་བརྗོད་ལ། ཆེ་གེ་མོའི་གནས་སུ་སློབ་མ་སོ་སོའི་མིང་བཅུག་ལ་ལུང་བསྟན་པར་བྱའོ། །ཨཱ་ལི་བརྗོད་པ་དང་། མིང་གི་དབང་བསྐུར་བ་ནི་གྲོལ་ལམ་ལ་བརྟེན་པ་ཡིན་པས་སྐབས་འདིར་མི་དགོས་སོ། །དེ་ལྟར་ན་བླ་མའི་ལུས་དང་། བྷ་ག་དང་། བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ། ངག་གི་དྲི་མ་དག ས་བརྒྱད་པ་ཐོབ། དམ་ཚིག་ཏུ་ཤ་ལྔ་དང་བདུད་རྩི་ལྔ་བསྟེན་པ། བརྡ་མཐེབ་སྲིན་ཨེ་ལ་རིག་བྱེད་གཅིག ལམ་ཙཎྜ་ལཱི་སྔགས་ཀྱི་རྣལ་འབྱོར་བསྒོམ་པ་ལ་དབང་། དཔེ་ཞིང་ས་ཤིན་ཏུ་གཤིན་པ་ལ་ས་བོན་བཏབ་པ་དང་འདྲ། ཞེས་རྟོགས་པ་བསྐྱེད་དེ་གསང་བའི་དབང་ངོ་།། །།གསུམ་པ་ཤེས་རབ་ཡེ་ཤེས་ཀྱི་དབང་ནི། ཡང་སློབ་མས་ཕྱག་དང་མཎྜལ་ཕུལ་ནས། སྔར་ལྟར་གསོལ་བ་བཏབ་ལ། དཔོན་སློབ་གཉིས་ཀ་འོད་དཔག་མེད་དུ་བསྒོམས་ལ་གདོང་བཅིངས་ནས། རང་གི་སེམས་ལ་མངོན་པར་འཚམས་པ་ཇི་སྐད་བཤད་པའི་མཚན་ཉིད་ཅན་ལོ་བཅུ་དྲུག་ལོན་པའི་མིའི་བུ་མོ་མངོན་པར་བསམས་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོར་མོས་ཏེ། དེའི་ལག་པ་གཡས་པ་ཐབས་ཀྱི་གཡོན་པར་གཏད་དེ། ལྷ་མོ་མཐར་བྱེད་དགའ་སྟེར་མ། །སྣ་ཚོགས་གཟུགས་ཅན་བརྩེར་ལྡན་མ། །ཟུང་ཤིག་ཟུང་ཤིག་སེམས་དཔའ་ཆེ། །བཟུང་བར་བྱས་ནས་མཆོད་པར་གྱིས། །ཞེས་བརྗོད་ལ་གཏད་པ་དང་། ཕྱག་རྒྱ་དེས། བཤང་གཅི་དག་ནི་ཟ་བ་དང་། །ཁྲག་དང་ཁུ་བ་དེ་བཞིན་ཏེ། །ཤ་ཆེན་བསྟེན་པར་བུ་སྤྲོའམ། །བུད་མེད་རྣམས་ལ་རྟག་གུས་དང་། །བྷ་གའི་པདྨར་འོ་བྱེད་པར། །བུ་ཁྱོད་ཅི་དགར་སྤྲོ་གྱུར་ཏམ། །ཞེས་དྲི་བར་བྱའོ། །སློབ་མས་ཀྱང་དེ་ལྟར་ནུས་པར་དངོས་སུ་ལན་བྱ་སྟེ། བུ་ཁྱོད་ཅེས་པའི་གནས་སུ་བདག་ནི་ཞེས་དང་། ཏམ་ཞེས་བྱ་བའི་གནས་སུ་ཏོ་ཞེས་བྱའོ། །དེ་ནས་སློབ་མ་འོད་དཔག་མེད་དང་། ཕྱག་རྒྱ་གོས་དཀར་མོར་བསྐྱེད། མཁའ་གསང་བྱིན་གྱིས་བརླབ། གཉིས་ཀའི་སྤྱི་བོར་ནི་ཨོཾ་དཀར་པོ། མགྲིན་པར་ནི་ཨཱཿདམར་པོ། སྙིང་གར་ནི་ཧཱུྃ་ནག་པོ། ལྟེ་བར་ནི་སྭཱ་སེར་པོ། བརླ་གཉིས་ལ་ནི་ཧཱ་ལྗང་གུ་སྟེ་དེ་དག་ནི་དེ་བཞིན་གཤེགས་པ་ལྔ་དང་ཡུམ་ལྔའི་བདག་ཉིད་དུ་བྱིན་གྱིས་བརླབ་པར་བྱེད། ཐབས་འདི་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་སྙམ་པའི་འདུ་ཤེས་གསུམ་དྲན་པར་བྱས་ལ་ཕྱག་རྒྱ་དེ་ཉིད་གཅེས་བུར་ཕྱུང་ནས་པདྨ་བལྟར་གཞུག་ཅིང་། ཨེ་མ་ང་ཡི་པདྨ་འདི། །བདེ་བ་ཐམས་ཅད་ཀྱི་ནི་གནས། །གལ་ཏེ་ཆོ་ག་བཞིན་བསྟེན་ན། །སངས་རྒྱས་བསྙེན་པ་ལ་སོགས་པ། །བྱ་བ་པདྨར་ཇི་བཞིན་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་བཞུགས། །བླུན་པོ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ཅིང་། རང་དང་ལྷན་ཅིག་ཏུ་གནས་པས་ཐོག་མར་ཕྱག་རྒྱའི་གཟུགས་ལ་བལྟ་ཞིང་སྒྲ་ལ་ཉན་པ་ལ་སོགས་པའི་ཆོས་དྲུག་ཉམས་སུ་མྱོང་བས་དེའི་བདེ་བ་དང་མི་རྟོག་པར་འགྱུར་བ་དགའ་བའི་ཡེ་ཤེས། རྡོ་རྗེ་དང་པདྨ་མཉམ་པར་སྦྱོར་བ་མཆོག་ཏུ་དགའ་བའི་ཡེ་ཤེས། ཕན་ཚུན་དྲུད་པ་ལ་སོགས་པ་དགའ་བྲལ་གྱི་དགའ་བའི་ཡེ་ཤེས། དལ་བར་རྒྱུ་བའི་རླུང་གིས་གཉིས་ཀའི་རྩ་གནས་རྣམས་ནས་ཐིག་ལེ་དཀར་དམར་ཕབ་པ་དེ་ཉིད་རླུང་གིས་འདྲེས་པའི་སྟོབས་ཀྱིས་བཟུང་བས་བདེ་བ་མི་རྟོག་པས་བརྒྱན་པར་གྱུར་པ་ནི་ལྷན་ཅིག་སྐྱེས་པའི་ཡེ་ཤེས་ཡིན་ལ། དེ་ཉིད་དཀྱིལ་འཁོར་དང་། ལྷ་དང་། ཕྱག་རྒྱ་དང་། དེ་ཁོ་ནའི་དབང་དང་། སྦྱིན་སྲེག་ལ་སོགས་པ་ཡིན་ཏེ། ཇི་སྐད་དུ། ཕ་རོལ་ཕྱིན་བཅུ་རྫོགས་པ་དང་། །སྟོབས་རྣམས་དང་ནི་དབང་རྣམས་དང་། །ས་བཅུ་པོ་ནི་ལ་གནས་པ། །རྡོ་རྗེའི་མཚན་མར་དེར་འགྱུར་རོ། །ཞེས་གསུངས་པའི་ཕྱིར་རོ། །དེ་ལྟར་བདེ་བ་དང་མི་རྟོག་པའི་ངང་ལ་མཉམ་པར་འཇོག་ཏུ་བཅུག་ལ། གདོང་གཡོགས་བཀྲོལ་ནས། མཐར་རྟེན་དུ་དབུགས་དབྱུང་བ་སྦྱིན་ཏེ། འདི་ལ་འབྲས་བུའི་དབུགས་དབྱུང་དང་། ལམ་གྱི་དབུགས་དབྱུང་གཉིས་ལས། འབྲས་བུའི་དབུགས་དབྱུང་ནི། མཆོག་ཏུ་གསང་བ་དམ་པ་ཡི། །དཀྱིལ་འཁོར་མཐོང་དང་རབ་ཞུགས་པས། །སྡིག་པ་ཀུན་ལས་ངེས་གྲོལ་བར། །ཁྱེད་རྣམས་དེང་ནས་ལེགས་པར་གནས། །བདེ་ཆེན་ཐེག་པ་འདི་ལ་ནི། སླར་ཡང་འཆི་བར་འགྱུར་མ་ཡིན། །མི་ཚུགས་པ་དང་མི་འཆི་བས། །ཅིས་ཀྱང་མི་འཇིག་རོལ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པ་མཆོག་ཏུ་གྱུར་པ་ཡིན། །ཞེས་བརྗོད་དོ། །ལམ་གྱི་དབུགས་དབྱུང་ནི། དམ་ཚིག་སྡོམ་པ་གྲུབ་པ་འདི། །ཁྱོད་ཀྱིས་རྟག་ཏུ་སྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །མཆོག་ཏུ་རྟག་པའི་བཀའ་ཡིན་ནོ། །ཞེས་དང་། སློབ་དཔོན་སྨད་པར་མི་བྱ་ཞིང་། །བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པར་མི་བྱ་ཞིང་། །སེམས་ཅན་རྣམས་ལ་གདུག་བྱམས་དང་། །བྱང་ཆུབ་སེམས་ནི་སྤང་མི་བྱ། །བདག་གཞན་ཆོས་ལ་སྨད་མི་བྱ། །སྐལ་མེད་དེ་ཉིད་གཏམ་མི་བྱ། །བདག་གི་ལུས་ལ་ངེས་མི་སྨད། །ཆོས་ལ་ཡིད་གཉིས་སྤང་བྱ་ཞིང་། །གདུག་ལ་བྱམས་པ་ཉིད་མི་བྱ། །ཆོས་ཉིད་ཚད་ནི་གཟུང་མི་བྱ། །སྐལ་ལྡན་སེམས་ཅན་སྤང་མི་བྱ། །དམ་ཚིག་རྟག་ཏུ་བསྐྱང་བར་བྱ། །བུད་མེད་ཉིད་ལ་སྨད་མི་བྱ། །ཇི་སྲིད་བྱང་ཆུབ་སྙིང་པོའི་བར། །དཀོན་མཆོག་གསུམ་ནི་སྤང་མི་བྱ། །རྟག་ཏུ་དམ་ཚིག་བསྲུང་བར་བྱ། །རྡོ་རྗེ་དྲིལ་བུའང་གཟུང་བར་བྱ། །གཙུག་ཏོར་རྟག་ཏུ་གཟུང་བར་བྱ། །རྟག་ཏུ་སྦྱིན་སྲེག་དགང་བར་བྱ། །རྟག་ཏུ་དཀྱིལ་འཁོར་བཞེངས་པར་བྱ། །རྟག་ཏུ་བདེ་གཤེགས་རབ་གནས་བྱ། །འབྱུང་པོ་ཆེ་ལ་གཏོར་མ་སྦྱིན། །ཞེས་དང་། བླ་མའི་རྒན་རབས་ཕྱག་འཚལ་ལོ། །རྟག་པར་རྒྱུན་དུ་སྔགས་བཟླ་ཞིང་། །བསམ་གཏན་ཉིད་ཀྱང་རྣམ་པར་སྤྱད། །རྟག་ཏུ་སློབ་མ་བསྡུ་བྱ་ཞིང་། །རྟག་པ་རུ་ནི་བཤད་པར་གྱིས། །རྟག་ཏུ་སེམས་ཅན་བསྐྱང་བར་བྱ། །རྟག་ཏུ་སངས་རྒྱས་ཆེར་མཉེས་བྱ། །ཛམྦྷ་ལ་ལ་ཆུ་སྦྱིན་ཅིང་། །ལས་རྣམས་ཐམས་ཅད་ཡང་དག་སྤྱད། །བྱེ་མའི་ལས་ལ་མཆོད་རྟེན་ཡང་། །མཁས་པས་ཆོ་ག་བཞིན་དུ་བྱ། །ཞེས་བརྗོད་དེ། དེ་དག་གི་དོན་ཀྱང་བཤད་པར་བྱའོ། །དེ་ལྟར་ན་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག ལམ་དབང་ཆོས་ཀྱི་རྣལ་འབྱོར་བསྒོམ་པ་དང་། དམ་ཚིག་ཏུ་བཟའ་བསྲུང་དང་། ཕྱག་རྒྱ་ལ་མི་སྨོད་ཅིང་མི་འབྲལ་བའི་དམ་ཚིག་བསྲུང་བ་ལ་དབང་། ས་བཅུ་གཉིས་པ་ཐོབ། བརྡ་བྱང་ཆུབ་མཆོག་གི་ཕྱག་རྒྱ། འབྲས་བུ་ཆོས་ཀྱི་སྐུ་རང་བཞིན་ལྷུན་གྲུབ་ཀྱི་རྟེན་འབྲེལ་མངོན་དུ་བྱས། ཞེས་རྟོགས་པ་བསྐྱེད་དེ་དབང་གསུམ་པའོ།། །།བཞི་པ་དབང་བཞི་པ་ནི། སློབ་མས་ལུས་བཏུད་དེ་ཕྱག་འཚལ་ལ་མཎྜལ་ཕུལ་ཏེ། བྱང་ཆུབ་རྡོ་རྗེས་ཞེས་བྱ་བ་ལ་སོགས་པས་གསོལ་བ་གདབ་པར་བྱའོ། །དེ་ནས་དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་ལ། ཤེས་རབ་ཡེ་ཤེས་ཀྱིས་སེམས་ཀྱི་དྲི་མ་དག་པས་ཆོས་ཀྱི་སྐུ་མངོན་དུ་གྱུར་པའི་བརྡར་སློབ་དཔོན་དང་སློབ་མ་གཉིས་ཀས་རྡོ་རྗེ་འཆང་ཆེན་པོའི་རྣལ་འབྱོར་བྱའོ། །དེ་ནས་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་མཐར་སྟེར་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་བྱ་སྟེ། ཀྱཻ་ཁྱོད་ཀྱི་ཐབས་དང་ཤེས་རབ་རྡོ་རྗེ་དང་དྲིལ་བུའི་རང་བཞིན་ལས་ལྷན་ཅིག་སྐྱེས་པའི་ཡེ་ཤེས་མྱོང་བ་དེ་ཇི་ལྟ་བུ་ཡིན། དེ་ནི་ཡོད་པ་དང་། མེད་པ་དང་། གཉིས་ཀ་དང་། གཉིས་ཀ་མ་ཡིན་པའི་མཐའ་ཐམས་ཅད་ལས་གྲོལ་ལ་བརྗོད་པར་མི་ནུས་པས་སྣང་བ་དང་སྟོང་པ་གཉིས་སུ་མེད་པ། བདེ་བ་དང་སྟོང་པ་གཉིས་སུ་མེད་པ། གསལ་བ་དང་སྟོང་པ་གཉིས་སུ་མེད་པ། འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་བདག་ཉིད་དེ། དེ་ནི་ཟབ་ཅིང་རྟོགས་པར་དཀའ་བས་ན་ཕྲ་བའོ། །མི་ཕྱེད་པས་ན་རྡོ་རྗེའོ། །ཐམས་ཅད་འབྱུང་བས་ན་སྙིང་པོའོ། །གང་དུའང་མ་གྲུབ་པས་ན་ནམ་མཁའོ། །མི་རྟོག་པས་ན་རྡུལ་བྲལ་ལོ། །དེ་མྱ་ངན་ལས་འདས་པས་ན་མཐར་སྟེར་རོ། །རྟོག་པ་ཞི་བས་ན་ཞི་བའོ། །དེ་ལྟ་བུ་དེ་ངས་ཁྱོད་ལ་བརྗོད་པས་ཁྱོད་ཀྱིས་ཇི་ལྟར་རྟོགས་ཀྱིས་ཁྱོད་རང་གིས་རང་ཉིད་ལ་བསྐྱེད་པར་བྱའོ། །དེ་ལྟ་བུའི་དོན་དེ་མངོན་དུ་གྱུར་ན་ཆོས་ཀྱི་སྐུ་ནི་དེ་ཉིད་ཡིན་གྱི་ལམ་གཞན་དང་གཞན་དུ་བཙལ་བས་ཅི་ཞིག་བྱ། སངས་རྒྱས་གཞན་ནས་འབྱུང་བ་མ་ཡིན་ནོ་ཞེས་བསྐྱེད་ལ། དེ་ཁོ་ན་ཉིད་ལ་བློ་གཞག་པར་བྱའོ། །དེ་ནས་གདོང་ཕྱེ་ལ་འདི་སྐད་དོ། །ཞེས་གཟེངས་བསྟོད་པར་བྱ་སྟེ། དེ་བས་ན་ཁྱོད་ཀྱིས་དེ་ཁོ་ན་ཉིད་རྟོགས་པར་གྱུར་གྱིས་སྲིད་ཞི་མཉམ་པའི་ལམ་གྱི་དམ་པ་རྟོགས་ན་དེ་ལྟ་བུ་མངོན་པར་མ་རྟོགས་པ་རྣམས་ལ་སྙིང་རྗེ་ཆེན་པོ་བསྐྱེད་ལ། རང་ཉིད་འདམ་ལས་ཐོན་པ་དེས་གཞན་འདམ་ལས་འདོན་པ་ལ་སྤྲོ་བར་གྱིས་ཤིག དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་ཙམ་གྱི་སྒོ་ནས་ཐོབ། སྒོ་གསུམ་གྱི་དྲི་མ་དག ལམ་མཐར་ཐུག་གི་རྣལ་འབྱོར་བསྒོམ་པ་ལ་དབང་། དམ་ཚིག་ཏུ་དགོངས་ཏེ་གསུངས་པ་བཞི་བསྲུང་བ་ལ་དབང་། ས་བཅུ་གསུམ་པ་མངོན་དུ་བྱས། བརྡ་མཛུབ་མོས་ནམ་མཁའ་མཚོན་པ། འབྲས་བུ་ངོ་བོ་ཉིད་ཀྱི་སྐུའི་རྟེན་འབྲེལ་རང་བཞིན་ལྷུན་གྲུབ་མངོན་དུ་བྱས་སོ། །ཞེས་བརྡ་སྤྲོད་དེ་དབང་བཞི་པའོ། །ལྔ་པ་མཇུག་གི་བྱ་བ་ལ་གཉིས་ཏེ། སློབ་མའི་བྱ་བ་དང་། སློབ་དཔོན་གྱི་བྱ་བའོ། །དང་པོ་ནི། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །ཞེས་ལན་གསུམ་གྱིས་དམ་ཚིག་དང་སྡོམ་པ་བསྲུང་བར་ཁས་བླངས་ནས་ཡོན་དང་མཎྜལ་ཕུལ་ལ། དེང་ནས་བརྩམས་ཏེ་བདག་བྲན་དུ། །ཞེས་སོགས་ཀྱིས་ལུས་ལོངས་སྤྱོད་ཐམས་ཅད་བློས་ཕུལ་ལོ། །གཉིས་པ་ནི། སློབ་དཔོན་གྱིས་མདུན་བསྐྱེད་ཀྱི་དཀྱིལ་འཁོར་ལ་མཆོད་བསྟོད་སྟ་གོན་གྱི་སྐབས་བཞིན་བྱས་ནས་འདོད་པའི་དོན་ལ་གསོལ་བ་གདབ། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་ཉམས་པ་དང་། །ཞེས་སོགས་ཀྱིས་ནོངས་པ་བཟོད་པར་གསོལ་ནས་རས་བྲིས་ལ་བརྟན་བཞུགས་བྱ། རྟེན་ལ་མ་བསྟིམས་པའི་གཏོར་མགྲོན་གྱི་ཡེ་ཤེས་པ་གཤེགས། དམ་ཚིག་པ་བདག་ལ་བསྡུས་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་ཏེ་རྒྱུད་བཤད་པ་ལ་སོགས་པའི་ཕྲིན་ལས་ལ་འཇུག་པར་བྱའོ། །ཌོམྦིའི་ཞལ་ནས་རིམ་རྙེད་རྒྱུད་དོན་ཀུནྡའི་ཚལ། །སྦྱང་དཀའ་ཟླ་བའི་འོད་ཀྱིས་ཕྱེ་བའི་བདུད་རྩིའི་བཅུད། །དཔལ་ལྡན་རྩེ་མོའི་གསུང་གི་བུམ་པ་ལས་འོངས་པ། །རྣམ་དག་ཆོ་གའི་རིམ་པ་འདིར་ནི་གསལ་བར་བཤད། །ཐུན་མོང་རྣམ་གཞག་སྤྱི་དང་མི་འགལ་ཞིང་། །ཁྱད་པར་ཕྲ་མོ་གཞན་དང་མ་འདྲེས་པར། །གསལ་བར་བསྟན་ཅིང་གནད་རྣམས་མ་འཁྲུལ་བ། །བསོད་ནམས་སེང་གེས་སྨྲ་བའི་ཁྱད་ཆོས་ཡིན། །རྒྱུད་འགྲེལ་ཆེ་དང་གྲུབ་པའི་གཞུང་བཟང་ལ། །ཞིབ་ཏུ་དཔྱད་ཅིང་དམ་པའི་མན་ངག་གིས། །བརྒྱན་ཕྱིར་ཉེས་པ་མེད་སྙམ་མཆིས་སྲིད་ན། །བླ་མ་མཁའ་འགྲོའི་ཚོགས་ལ་བཟོད་པར་གསོལ། །འདི་སྦྱར་དགེ་བ་དྲི་མེད་གངྒཱའི་རྒྱུན། །དབང་ལས་བྱུང་བའི་བདེ་ཆེན་ཆུ་གཙང་དང་། །མཉམ་དུ་འདྲེས་ནས་འགྲོ་ཀུན་ཕན་བདེའི་རྒྱུར། །ཀུན་མཁྱེན་རྒྱ་མཚོ་ཆེན་པོར་འཇུག་གྱུར་ཅིག །གནས་སྐབས་ཀུན་ཏུ་རྗེ་བཙུན་ས་སྐྱ་པའི། །བསྟན་ལ་གནོད་བྱེད་ལོག་སྨྲ་འདུལ་བ་དང་། །ཇི་བཞིན་དད་པའི་སྐལ་ལྡན་རྗེས་བཟུང་བའི། །ཕྲིན་ལས་ཕུན་ཚོགས་ཀུན་ལ་དབང་འབྱོར་ཤོག །བཤད་པའི་རྒྱུད་རྡོ་རྗེ་གུར་ནས་གསུངས་པའི་མཁའ་འགྲོ་ལྔ་རིགས་བསྡུས་པའི་དཀྱིལ་འཁོར་དུ་དབང་བསྐུར་བའི་ཆོ་ག་བདེ་ཆེན་རྒྱ་མཚོ་ཞེས་བྱ་བ་འདི་ནི་དད་བརྩོན་དང་ལྡན་པའི་སློབ་མ་དཀོན་མཆོག་རྒྱལ་མཚན་གྱིས་རྒྱང་རིང་པོ་ནས་ཞུས་པའི་ངོར་ཁྱབ་བདག་རྡོ་རྗེ་འཆང་དང་དབྱེར་མ་མཆིས་པ་རྗེ་བཙུན་ཀུན་དགའ་བཟང་པོ་ཡབ་སྲས་ཀྱི་གསུང་ལ་བརྟེན་ནས་རྒྱུད་སྡེའི་དོན་ལ་བློ་ཁ་ཅུང་ཟད་ཕྱོགས་པ་མང་དུ་ཐོས་པའི་དགེ་སློང་བསོད་ནམས་སེང་གེས་རྒྱུད་འགྲེལ་ཆེན་དང་བཅས་པ་དང་དེའི་རྗེས་འབྲང་རྒྱ་བོད་ཀྱི་གཞུང་བཟང་རྣམས་ལ་ཞིབ་ཏུ་དཔྱད་ནས་ཤིང་མོ་སྦྲུལ་གྱི་ལོ་སྣྲོན་གྱི་ཟླ་བའི་དཀར་ཕྱོགས་ཀྱི་ཆ་ལ་དཔལ་ཨེ་ཝཾ་ཆོས་ལྡན་གྱི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།ཀྱཻ་རྡོར་འགྲེལ་པ་ལུགས་ཀྱི་བརྒྱུད་པ་ནི། ས་སྐྱ་པཎྜི་ཏ། རོང་པ་རྒྭ་ལོ། རོང་པ་ཤེས་རབ་སེང་གེ ཞང་གྲགས་འབྱོར། བླ་མ་བསོད་ནམས་ལྷུན་གྲུབ། བླ་མ་ངག་གི་དབང་ཕྱུག་གྲགས་པ། བླ་མ་ཆེན་པོ་ཀུན་དགའ་རྒྱལ་མཚན། མཁྱེན་རབ་གྱི་དབང་ཕྱུག་ཀུན་དགའ་བཟང་པོ། རྗེ་བཙུན་དམ་པ་དཀོན་མཆོག་རྒྱལ་མཚན། དེ་གཉིས་ཆར་གྱིས་བདག་བསོད་ནམས་སེང་གེ་ལའོ།། ༈ །།དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་གནས་གྱུར་ཅིག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

རབ་གནས་ཆོ་ག་དགེ་ལེགས་རྒྱ་མཚོ།

རབ་གནས་ཆོ་ག་དགེ་ལེགས་རྒྱ་མཚོ་ཞེས་བྱ་བ་བཞུགས་སོ།། དཔལ་ཀྱཻའི་རྡོ་རྗེའི་རྣལ་འབྱོར་གྱི་སྒོ་ནས་རྟེན་ལ་རབ་ཏུ་གནས་པར་བྱ་བའི་ཆོ་ག་དགེ་ལེགས་རྒྱ་མཚོ་ཞེས་བྱ་བ། བླ་མ་དམ་པའི་ཞབས་ལ་གུས་པར་ཕྱག་འཚལ་ལོ། །མཁྱེན་རབ་ཁྱོན་ཡངས་འཇིག་རྟེན་ཀུན་གྱི་མིག །ཐུགས་རྗེའི་ཟུར་གྱི་བལྟ་བའི་རྣམ་རོལ་གྱིས། །སྲིད་གསུམ་སྐྱོང་མཛད་རྗེ་བཙུན་བླ་མ་དང་། །དབྱེར་མེད་ཡི་དམ་ལྷ་ཡི་ཚོགས་ལ་འདུད། །དོན་དམ་དབྱིངས་ལ་སྤྲོས་པ་མི་མངའ་ཡང་། །ཀུན་རྫོབ་རབ་ཏུ་གནས་པའི་ཆོ་ག་ཡིས། །བསྟན་དང་འགྲོ་བའི་དགེ་ལེགས་སྤེལ་བྱེད་པའི། །རབ་གནས་ཆོ་ག་ཇི་བཞིན་བཤད་ཀྱིས་ཉོན། །འདི་ལ། རྟེན་གྱི་བྱ་བ་ཡོངས་རྫོགས་ནས། །སློབ་དཔོན་མཚན་ཉིད་གནས་དང་དུས། །ཡོ་བྱད་ཡོངས་སུ་ཚང་ནས་ནི། །ཆོ་ག་དག་ལ་འཇུག་པར་བྱ། །ཞེས་པ་ལྟར་དོན་དྲུག་ལས། དང་པོ་གང་ལ་རབ་ཏུ་གནས་པར་བྱ་བའི་རྟེན་ནི། སྐུ་གསུང་ཐུགས་ཀྱི་རྟེན་ལུགས་མ་དང་། བྲིས་པ་དང་། འབུར་དུ་བྱས་པ་ལ་སོགས་པ་མཚན་ཉིད་དང་ལྡན་པ་དང་། གཙུག་ལག་ཁང་ལ་སོགས་པ་བཟོ་བོའི་བྱ་བ་རྣམས་མཐར་ཕྱིན་པའོ། །གཉིས་པ་གང་གིས་རབ་ཏུ་གནས་པར་བྱེད་པའི་སློབ་དཔོན་ནི། དེ་ཉིད་བཅུ་ཤེས་ཤིང་བྱང་ཆུབ་ཀྱི་སེམས་དང་ལྡན་པ་བསྙེན་པ་ལས་སུ་རུང་ཞིང་ཆོ་ག་ལ་མཁས་པ། རྙེད་པ་དང་བཀུར་སྟི་ལ་མི་ལྟ་བ་ལ་སོགས་པའི་མཚན་ཉིད་ཅན་ནོ། །གསུམ་པ་གང་དུ་རབ་ཏུ་གནས་པར་བྱ་བའི་གནས་ནི། བཀྲ་ཤིས་ཤིང་ཉམས་དགའ་བའི་གཙུག་ལག་ཁང་ལ་སོགས་པ་ཤིན་དུ་ཡངས་པའི་ས་ཕྱོགས་སུའོ། །བཞི་པ་ནམ་བྱ་བའི་དུས་ནི། ཚེས་དང་གཟའ་སྐར་ཁྱད་པར་ཅན་འཛོམ་པའི་ཡར་གྱི་ངོ་ལ། གཟའ་སྐར་ལྷག་པར་བཟང་ན་མར་གྱི་ངོ་ལའང་རུང་ཞིང་། དཔྱིད་ཟླ་འབྲིང་པོ་སངས་རྒྱས་དབང་བསྐུར་བའི་དུས་དང་། དགུན་ཟླ་འབྲིང་པོ་འཁོར་ལོས་སྒྱུར་རྒྱལ་གྱི་དུས་གཉིས་ནི་གཞན་ལས་ཁྱད་པར་དུ་འཕགས་པར་བཤད་དོ། །ལྔ་པ་ཡོ་བྱད་ནི། འོག་ཏུ་དགོས་པའི་ཡོ་བྱད་རྣམས་མ་ཚང་བ་མེད་ཅིང་གྱ་ནོམ་པ་རྣམས་གསག་གོ །དྲུག་པ་ཆོ་ག་ལ་དངོས་དང་། དེའི་ཕན་ཡོན་གཉིས་ཀྱི་དང་པོ་ལ་རྒྱས་འབྲིང་བསྡུས་གསུམ་འབྱུང་བ་ལས། འབྲིང་པོའི་ཚུལ་བརྗོད་ན་དོན་གསུམ་སྟེ། སྟ་གོན་དང་། དངོས་གཞི་དང་། རྗེས་སོ། །དང་པོ་ནི། ལེགས་བཤམས་ཚུལ་བཞིན་བྱ་བ་ནི། །འབྲིང་པོའི་སྟ་གོན་ཉིད་ཡིན་ནོ། །ཞེས་ཏེ། རྟེན་སྤྱན་དྲངས་དུ་མི་བཏུབ་ན་དེའི་མདུན་དུ་དང་། སྤྱན་དྲངས་དུ་བཏུབ་ན་སྟེགས་བུ་མཐོན་པོའི་སྟེང་དུ་ཤར་ལ་སོགས་པར་ཞལ་གཟིགས་པར་བྱས་ལ་དར་རམ་རས་ལ་སོགས་པས་གཡོགས་ཏེ། ལས་ཐམས་ཅད་པའི་སྔགས་བཟླས་པས་བསྲུང་ངོ་། །དེའི་མདུན་དུ་ཆུ་བཞིའམ་ཆུ་གཉིས་སྔོན་དུ་འགྲོ་བའི་ཉེར་སྤྱོད་རེ་རེ་ལའང་ཅི་ཙམ་འབྱོར་པ་བྲེང་ཚར་དུ་བཤམ། དེའི་མདུན་དུ་ཁྲུས་སའི་སྟེགས་བུ་གྲུ་བཞི་པ། རྒྱར་ཁྲུ་བཞི་དཔངས་སུ་ཁྲུ་གཅིག་གམ་གཉིས་ཡོད་པ་བྱ། རྩིག་པ་མ་གྲུབ་ན་རྡུལ་ཚོན་སེར་པོས་ཁྲུ་བཞི་པའི་གྲུ་བཞི་པ་བྲིས་ཏེ། དེའི་དབུས་སུ་པདྨ་འདབ་མ་བརྒྱད་པ་བྲིས་ལ། དེར་དབུས་དང་ཕྱོགས་བཞིར་རིགས་ལྔའི་མཚན་མ་དང་། མཚམས་བཞིར་ཡུམ་བཞིའི་མཚན་མ་འབྲི་བའམ། ཡང་ན་བླ་མ་དག་དབུས་སུ་རིན་པོ་ཆེ་ཆ་དགུ་པ། འདབ་མ་བརྒྱད་ལ་བཀྲ་ཤིས་རྟགས་བརྒྱད་འབྲི་བ་མཛད་པས་དེ་ལྟར་བྱས་ཀྱང་རུང་ངོ་། །དེའི་དབུས་སུ་མཉྫི་ལ་སོགས་པའི་སྟེང་དུ་གསེར་དངུལ་ལམ་ཟངས་ཀྱི་ཁྲུས་གཞོང་བུ་ག་དང་བྲལ་བ་བཞག་ལ། དེར་སྔར་རབ་གནས་བྱས་པའི་རྟེན་ཆུང་ངུ་ཞིག་གམ། སངས་རྒྱས་ཀྱི་རིང་བསྲེལ་ལམ། རྡོ་རྗེ་ལ་སོགས་པ་གཞག དེ་དང་ཉེ་བར་མཎྜལ་ལམ། གྲོ་ག་ལ་གུར་གུམ་མམ། གི་ཝཾ་གིས་ཡི་གེ་གསུམ་དང་། ཨོཾ་སརྦ་བིདྱཱ་སྭཱ་ཧཱ་ཞེས་པ་དང་། རྟེན་འབྲེལ་སྙིང་པོ་རྣམས་བྲིས་ལ་གཞག་གོ །འདབ་བརྒྱད་སོ་སོའི་སྟེང་དུ་མཚན་ཉིད་དང་ལྡན་པའི་བུམ་པ་བརྒྱད་དུ་དྲི་བཟང་པོའི་ཆུ་དང་། འོག་ནས་བཤད་པ་ལྟར་སོ་སོའི་རྫས་ཀྱིས་བཀང་། ཁ་རྒྱན་དང་མགུལ་ཆིངས་སོགས་ཀྱིས་བརྒྱན་པ་བཤམ། འབྲིང་པོའི་སྐབས་འདིར་དེ་ལྟ་བུའི་ཁྲུས་སྟེགས་དང་ཁྲུས་བུམ་བརྒྱད་མ་འབྱོར་ན་རྣམ་རྒྱལ་དང་། ལས་བུམ་དང་། ཁྲུས་རྫས་བརྒྱད་ཆར་བུམ་པ་གཅིག་ཏུ་བླུགས་པའི་ཁྲུས་བུམ་དང་གསུམ་སྟེགས་གང་ཡང་རུང་བའི་སྟེང་དུ་བཤམ། ཁྲུས་སྟེགས་དེའི་མདུན་དུ་དཱུརྦའི་པིར་དང་། དྲི་བཟང་བཏབ་པའི་ཏིལ་མར་དང་། སྲན་དཀར་གྱི་ཕྱེ་མ་དང་། མེ་ལོང་དང་། རས་དཀར་པོའི་སྐུ་ཕྱི་བ་དང་། བགེགས་དང་དྲི་མ་སྦྱོང་བའི་ཡོ་བྱད་རྣམས་ཀྱང་བཤམ། ཁྲུས་སྟེགས་ཀྱི་གཡས་ཕྱོགས་སུ་ཡི་དམ་དང་། ཆོས་སྐྱོང་ཆེ་ཆུང་དང་། ལས་མགོན་གྱི་གཏོར་མ་དང་། མཁའ་འགྲོ་སྤྱི་གཏོར་རྣམས་བཤམ། ཁྲུས་སྟེགས་ཀྱི་གཡོན་ཕྱོགས་སུ་རབ་གནས་ཀྱི་ལྷ་ལ་མཆོད་པའི་མཎྜལ་གླིང་བཞི་རི་རབ་དང་བཅས་པ་བྲིས་ཏེ། དེའང་ཕྱོགས་རེ་ལ་ཆ་ལྔ་ལྔ་སྟེ་བཅུ་པར་བྱས་ལ་དབུས་ཀྱི་ཆ་གཉིས་ལ་པདྨ་འདབ་བརྒྱད་བྲི། ཕྱི་རོལ་གྱི་ཟུར་ནས་བསྐོར་ལ་ལྕགས་རི་བྱ། ཕྱོགས་བཞི་ནས་མཆོད་རྟེན་ལྟར་ཇེ་ཆུང་དུ་བཏང་ལ། རི་རབ་བང་རིམ་བཞི་པ། ཤར་དཀར། ལྷོ་སྔོ། ནུབ་དམར། བྱང་སེར་པོ། ཟུར་བཞིའི་རེ་མིག་རྣམས་སྔོན་པོ་བྱ། དེའི་ཕྱི་རོལ་དུ་ཤར་དུ་ཟླ་གམ། ལྷོར་སོག་ཁ། ནུབ་ཏུ་ཟླུམ་པོ། བྱང་དུ་གྲུ་བཞི་སྟེ་གླིང་བཞི་དང་། དེ་དག་གི་གཡས་གཡོན་དུ་གླིང་ཕྲན་གཉིས་གཉིས། དབྱིབས་སྔར་དང་འདྲ་བར་བྱས་པ་བྲི། གླིང་ཕྲན་གྱི་ཁྱམས་གཡས་གཡོན་ལ་ཤར་དུ་དཔལ་བེའུ། འཁོར་ལོ། ལྷོར་པདྨ། རྒྱལ་མཚན། ནུབ་ཏུ་གདུགས། བུམ་པ། བྱང་དུ་དུང་དང་ཉ་བྲི་ཞིང་། མཐའི་ལྕགས་རི་སྔོན་པོ་བྱའོ། །དབུས་ཀྱི་པདྨའི་སྟེང་དུ་རིན་པོ་ཆེ་སྣ་བདུན་གྱི་གཟུགས་དགོད། གཞན་ཡང་བླ་རེ་དང་། དར་གྱི་ལྡ་ལྡི་དང་། རོལ་མོ་ལ་སོགས་པ་འོག་ཏུ་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་གསག་གོ །སློབ་དཔོན་དཔོན་སློབ་རྣམས་ཀྱི་གདན་རྟེན་ལ་ཁ་ཕྱོགས་པར་བཤམས་པའི་མདུན་དུ་ནང་མཆོད་རྡོ་རྗེ་དྲིལ་བུ་རྣམས་ཀྱང་བཤམ་མོ། །གཉིས་པ་དངོས་གཞི་ལ། ཐོ་རངས་བདག་བསྐྱེད་བུམ་པ་བཟླ། །རྟེན་སྦྱང་བཀྲུ་ཞིང་ཕྱི་བ་དང་། །རིང་བསྲེལ་གཞུག་ཅིང་གསོལ་བ་གདབ། །རྟེན་བསྐྱེད་སྤྱན་དྲངས་དགུག་རྒྱས་གདབ། །དབང་བསྐུར་མཆོད་བསྟོད་སྤྱན་དབྱེ་བྱ། །གསོལ་གདབ་མངའ་དབུལ་རྒྱས་པར་བྱ། །དེ་ཡང་མཆོད་བསྟོད་བྱེ་བྲག་དང་། །སྦྱིན་སྲེག་སྔགས་ཏེ་དངོས་གཞིའོ། །ཞེས་ཚིག་རྐང་དང་པོ་འདོན་པ་ཅུང་ཟད་བསྒྱུར་ཏེ། དོན་བཅུ་གསུམ་ལས་དང་པོ་བདག་བསྐྱེད་ཅིང་བུམ་པ་བཟླས་པ་ནི། སང་ཐོ་རངས་ལྡང་བའི་རྣལ་འབྱོར་གྱིས་ལངས་ལ། གོས་སེར་པོ་གྱོན། སྟན་ལ་འདུག་སྟེ། གནས་ཡོ་བྱད་བྱིན་དབབ་པ་དང་། ལྷའི་རྣལ་འབྱོར་ལ་གསོལ་བ་གདབ་པ་དབང་ཆུ་ནས་འབྱུང་བ་ལྟར་བྱས་ནས་སྐྱབས་འགྲོ་ནས་བརྩམས་ཏེ་ཀྱཻ་རྡོ་རྗེའི་བདག་བསྐྱེད་བཟླས་པ་དང་བཅས་པ་བྱས་ཏེ། དཀྱིལ་འཁོར་བསྡུས་ལ་གཙོ་བོའི་ང་རྒྱལ་གྱིས་གནས་པར་བྱའོ། །དེ་ནས་རྣམ་རྒྱལ་དང་ལས་བུམ་གཉིས་བསྐྱེད་ཆོག་དབང་ཆུ་ལྟར་བྱས་ནས་ལས་བུམ་གྱི་ཆུས་ཁྲུས་བུམ་བརྒྱད་དམ་གཅིག་ལ་གཏོར་ཏེ་ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་བྱུང་བའི་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་ཞིང་མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷའི་གོས་ཀྱིས་མགུལ་པ་དཀྲིས་ཤིང་། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་སོ་སོའི་རྫས་ཀྱིས་ཡོངས་སུ་གང་བར་བསམ་ལ། གཟུངས་ཐག་བཏགས་པ་ལ་བཟུང་སྟེ། དྲི་ལྔ་བླུགས་པའི་བུམ་པ་ལ། ཨོཾ་སརྦ་ཏ་ཐཱ་ག་ཏ་གནྡྷེ་སྣ་ནཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཧཱུྃ། ཞེས་བརྒྱ་རྩ་བརྒྱད་བཟླ། དེ་བཞིན་དུ་གནྡྷེའི་གནས་སུ་སོ་སོའི་སྔགས་རྣམས་སྦྱར་ལ་མངར་གསུམ་གྱི་བུམ་པ་ལ་ཏྲི་མ་དུ་དང་། ཞོའི་བུམ་པ་ལ་མ་ལ་དང་། འབྲས་བུའི་ལ་སྥ་ལ་དང་། འབྲུའི་ལ་བྲུ་ཧི་དང་། འབྲས་ཡོས་ཀྱི་ལ་ལརྫ་དང་། སྨན་གྱི་ལ་ཤེ་ཏ་དང་། རིན་པོ་ཆེའི་བུམ་པ་ལ་མ་ཎི་སྣ་ནཱ་ཞེས་སྦྱར་ལ་བརྒྱ་རྩ་རེ་བཟླ། ཐུན་མོང་དུ་གཙུག་ཏོར་རྣམ་རྒྱལ་གྱི་གཟུངས་དང་། ལས་ཐམས་ཅད་པའི་སྔགས་ཅི་ནུས་སུ་བཟླས་ལ། ནང་རྫས་རྣམས་ཞུ་བ་ལས་བྱུང་བའི་སོ་སོའི་བུམ་པ་རྟེན་གྱི་དྲི་མ་སྦྱོང་བའི་ནུས་པ་དང་ལྡན་པར་བལྟའོ། །གཉིས་པ་རྟེན་སྦྱང་བ་ནི། རྟེན་དགབ་པ་ཡོད་ན་བསལ་ལ། ཐོག་མར་བགེགས་སྦྱང་བའི་ཕྱིར། ཅི་འབྱོར་པའི་གཏོར་མ་གསུམ་བཤམས་ལ། ཆུས་བྲན་ནས་ལན་གསུམ་དུ་རྟེན་ལ་བསྐོར་ཞིང་ཨོཾ་སརྦ་བིགྣཱན་ན་མཿསརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱ། སརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་བ་ལིཾ་ཏ་སྭཱ་ཧཱ། ཞེས་བརྗོད་ཅིང་། བདེ་བར་གཤེགས་པའི་རྟེན་ལ་རབ་ཏུ་གནས་པར་བྱེད་པ་ལ་མི་མཐུན་པར་བྱེད་པའི་གདོན་བགེགས་གང་ཡིན་པ་ཐམས་ཅད་གཏོར་མ་འདིས་ཚིམ་པར་གྱིས་ཤིག ཅེས་ཞི་བས་སྦྱང་བ་དང་། ཏིང་ལོ་དང་ཆང་བུ་རྟེན་ལ་བསྐོར་ཞིང་རྡོ་རྗེ་གསོར། སུམྦྷ་ནི་བཟླས་པ་ལན་གསུམ་བྱས་ནས་སྔར་གྱི་ཚིག་གི་རྗེས་ལ་གདོན་བགེགས་གང་ཡིན་པ་ཐམས་ཅད་གཏོར་མ་ལམ་རྔན། ཏིང་ལོ་ལམ་སྒྲོན། ཆང་བུ་ལམ་རྒྱགས་ཀྱི་ཚུལ་དུ་ཁྱེར་ལ་སའི་ཕྱོགས་འདིར་མ་གནས་པར་གཞན་དུ་སོང་ཤིག ཅེས་བརྗོད་ལ་གཏོར་མ་ཕྱིར་དོར་བ་ཞི་དྲག་ཕྱེད་མས་སྦྱང་བ་དང་། དེ་ནས་རང་ཁྲོ་བོའི་ང་རྒྱལ་གྱིས་རྡོ་རྗེ་དྲིལ་བུ་དང་སྤོས་ཐོགས་ཏེ། ཨོཾ་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མཱ་ཛཿ ཞེས་བསྡུ་བའི་ཕྱག་རྒྱ་དང་བཅས་པས། ཧཱུྃ། ཡེ་ཤེས་བསྐལ་པ་མེ་ལྟར་འབར་བའི་འོད། །ཅེས་སོགས་ཚིགས་བཅད་གཉིས་ཀྱིས་ཁྲོ་བོ་སྤྱན་དྲངས། གདན་དང་མཆོད་པ་མདོར་བསྡུས་ཕུལ་ནས། ཧཱུྃ། ཆོས་ཉིད་སྟོང་པ་གཉིས་མེད་ངང་ཉིད་ལས། །ཞེས་པ་ནས། བགེགས་ཀྱི་དགྲ་ལ་ཕྱག་འཚལ་བསྟོད། །ཅེས་པའི་བར་གྱིས་བསྟོད་ལ། ཀྱཻ་རྡོ་རྗེའི་ང་རྒྱལ་གྱིས་བགེགས་ལ་བཀའ་བསྒོ་སྟེ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། དཔལ་ཀྱཻ་རྡོ་རྗེའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། དཔལ་མགོན་ཆོས་སྐྱོང་བའི་སྲུང་མ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས་དེང་འདིར་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་རབ་ཏུ་གནས་པར་བྱེད་པ་ལ་བར་དུ་གཅོད་པར་རྩོམ་པའི་བགེགས་ཀྱི་ཚོགས་གང་ཡིན་པ་དེ་ཐམས་ཅད་མཆོད་སྦྱིན་གྱི་གཏོར་མ་རྒྱ་ཆེན་པོ་འདིས་ཚིམ་པར་གྱིས་ལ་ཞི་བའི་སེམས་དང་ལྡན་པས་ས་ཕྱོགས་འདིར་མ་གནས་པར་རང་རང་གི་གནས་སུ་སོང་ཤིག གལ་ཏེ་མི་འགྲོ་ན་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོའི་རྡོ་རྗེ་ཡེ་ཤེས་ཀྱི་མེ་འབར་ཞིང་རབ་ཏུ་འབར་བ་འདིས། ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་རོ། །ཞེས་དྲག་ཏུ་བརྗོད་ལ་རྟེན་ལ་གུ་གུལ་གྱིས་བདུག ཡུངས་ཀར་གྱིས་བྲབ། མཚོན་ཆས་བསྡིག སྣ་ཚོགས་པའི་རོལ་མོ་དྲག་ཏུ་བྱ་ཞིང་། རྩ་སྔགས་དང་བདུད་རྩི་འཁྱིལ་བའི་སྔགས་སོགས་དྲག་སྔགས་མང་དུ་བཟླ། སེམས་ཀྱིས་བགེགས་ཐམས་ཅད་ཕྱི་རོལ་དུ་བྲོས་པར་བསམ་པ་ནི་དྲག་པོའི་སྦྱང་བའོ། །དེ་ནས་སྡིག་པ་སྦྱང་བའི་ཕྱིར། རང་གི་མདུན་དུ་ཏིལ། གཡས་སུ་མེ། གཡོན་དུ་ཆུ་བཞག་ལ། བདག་དང་ཡོན་བདག་གིས་གཙོར་བྱས་པའི་སེམས་ཅན་ཐམས་ཅད་ཀྱི་སྡིག་སྒྲིབ་རྣམས་སྙིང་ག་ནས་ཡི་གེ་ཀྃ་ནག་པོའི་རྣམ་པར་འཐོན་ནས། སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་མདུན་གྱི་ཏིལ་ལ་ཐིམ། དེ་གཡས་ཀྱི་ཡེ་ཤེས་ཀྱི་མེས་བསྲེགས། གཡོན་གྱི་རྒྱ་མཚོས་བཀྲུས་པར་བསམས་ལ། ཨོཾ་སརྦ་པཱ་པཾ་ད་ཧ་ན་བྷསྨིཾ་ཀུ་རུ་སྭཱ་ཧཱ། ཞེས་བརྗོད་དོ། །གསུམ་པ་བཀྲུ་ཞིང་ཕྱི་བ་ནི། རྟེན་གསར་པ་ལ་ཁྲུས་བྱ་བའི་སྔོན་དུ་ཁྲུས་སྟེགས་ཀྱི་སྟེང་གི་རྟེན་དང་ཡིག་འབྲུ་རྣམས་ལ་ལས་བུམ་གྱི་ཆུས་ཁྲུས་བྱ་ཞིང་། ཇི་ལྟར་བལྟམས་པ་སོགས་དང་། འདི་ནི་ཁྲུས་མཆོག་སོགས་དང་། དེ་བཞིན་གཤེགས་པ་རྣམས་དང་དེ་སྲས་ལ། །ཞེས་སོགས་དང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད། དེ་དག་སྐུ་ལ་སོགས་པའི་ཚིགས་བཅད་དང་སྔགས་ཀྱིས་སྐུ་ཕྱིའོ། །དེ་ནས་ཆུ་དེ་ཁྲུས་བུམ་བརྒྱད་པོར་ཅུང་ཟད་རེ་བླུགས་ལ་ལུགས་མ་ལ་སོགས་པ་བཀྲུར་རུང་བ་རྣམས་རོལ་མོ་དང་བཅས་པས་ཁྲུས་སྟེགས་སུ་སྤྱན་དྲངས་ལ་དངོས་སུ་བཀྲུ། དེ་ལྟར་མི་རུང་བ་རྣམས་ལ་མེ་ལོང་གི་ནང་དུ་རྟེན་གྱི་གཟུགས་བརྙན་ཤར་བ་བྱས་ལ། རྒྱལ་བའི་སྐུ་ལ་ཉོན་མོངས་མི་མངའ་ཡང་། །འགྲོ་བའི་ལུས་སེམས་སྡུག་བསྔལ་བསལ་སླད་དུ། །ཆུ་གཙང་སྨན་སྤོས་འདག་ཆལ་འདིས་བཀྲུས་པས། །བདག་ཅག་དམ་པའི་སྐུ་མཆོག་ཐོབ་པར་ཤོག །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། ཞེས་བརྗོད་ཅིང་། ཐོག་མར་ཏིལ་མར་ལ་དྲི་བཟང་བཏབ་པས་མེ་ལོང་ལ་བྱུག དེ་ནས་ཡང་སྔགས་བརྗོད་ཅིང་སྲན་དཀར་གྱི་འདག་ཆལ་གྱིས་མཉེ། ཡང་སྔགས་བརྗོད་ཅིང་དཱུརྦའི་པིར་གྱིས་དྲུད། ཆུ་གཙང་མས་ཀྱང་བཀྲུའོ། །དེ་ནས་དྲིའི་བུམ་པས་བཀྲུ་ཞིང་། འདི་ནི་ཁྲུས་མཆོག་དཔལ་དང་ལྡན། །སོགས་དང་། ཨོཾ་སརྦ་ཏ་ཐཱ་ག་ཏ་གནྡྷེ་སྣ་ནཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲཱི་ཡེ་ཧཱུྃ་ཞེས་བརྗོད། དེ་ནས་རས་དཀར་པོ་ལ་གུར་གུམ་གྱི་ཆུས་དབུས་དང་ཕྱོགས་བཞིར། ཨོཾ་ཧཱུྃ་ཏྲཱྃ་ཧྲཱིཿཨཱཿཞེས་བྲིས་པའམ། མ་འབྱོར་ན་དེ་དག་བརྗོད་བཞིན་དུ་ཐིག་ལེ་ལྔ་བྱས་ལ་དེ་ལས་ཀྱི་རྡོ་རྗེའི་ཕྲག་པ་གཡོན་པ་ལ་བཀལ་ཏེ་དེས་དངོས་སུ་ཕྱི་བའམ་མེ་ལོང་གི་གཟུགས་བརྙན་ལ་ཕྱི་ཞིང་། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱི་འོ། །ཨོཾ་ཧཱུྃ་ཏྲཱྃ་ཧྲཱིཿཨཱཿཀཱ་ཡ་བི་ཤོ་དྷ་ནི་སྭཱ་ཧཱ་ཞེས་བརྗོད། དེ་བཞིན་དུ་བུམ་པ་འོག་མ་རྣམས་ཀྱིས་བཀྲུ་བའི་ཚེའང་སྔོན་དུ་རྫས་གསུམ་གྱིས་བྱུག་པ་དང་། བར་དུ་རང་རང་གི་བུམ་པས་བཀྲུ་བ་དང་། མཐར་སྐུ་ཕྱི་བ་རྣམས་ཐམས་ཅད་ལ་ཤེས་པར་བྱའོ། །དེ་ནས་རྫས་གསུམ་གྱིས་སྔར་ལྟར་བྱུགས་ལ། མངར་གསུམ་གྱི་བུམ་པས་བཀྲུ་ཞིང་། ཇི་ལྟར་བལྟམས་པ་ཙམ་གྱིས་ནི། །སོགས་དང་། ཏྲི་མ་དུ་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་ཞོའི་བུམ་པས། འདི་ནི་སྦྱིན་པའི་རང་བཞིན་ཆུ། །སོགས་དང་། མ་ལ་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་འབྲས་བུ་སྣ་ཚོགས་ཀྱི་བུམ་པས། འདི་ནི་ཚུལ་ཁྲིམས་རང་བཞིན་ཆུ། །སོགས་དང་། སྥ་ལ་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་འབྲུ་སྣ་ཚོགས་ཀྱི་བུམ་པས། འདི་ནི་བཟོད་པའི་རང་བཞིན་ཆུ། །སོགས་དང་། བྲུ་ཧི་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་འབྲས་ཡོས་ཀྱི་བུམ་པས། འདི་ནི་བརྩོན་འགྲུས་རང་བཞིན་ཆུ། །སོགས་དང་། ལརྫ་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་སྨན་གྱི་བུམ་པས། འདི་ནི་བསམ་གཏན་རང་བཞིན་ཆུ། །སོགས་དང་། ཤེ་ཏ་སྣ་ནཱ་སོགས་ཀྱིས་བཀྲུ་ཞིང་སྐུ་ཕྱིའོ། །ཡང་བྱུག་ཅིང་རིན་པོ་ཆེའི་བུམ་པས། འདི་ནི་ཤེས་རབ་རང་བཞིན་ཆུ། །སོགས་དང་། །ཨོཾ་སརྦ་ཏ་ཐཱ་ག་ཏ་མ་ཎི་སྣ་ནཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད་ཅིང་བཀྲུ། དེ་དག་སྐུ་ལ་སོགས་བརྗོད་ཅིང་རས་ཀྱིས་ཕྱིའོ། །དེས་ནས་དྲིའི་བུམ་པ་ཐོགས་ཏེ། ཆུ་བོ་དྲུག་གིས་ཁྲུས་བྱས་པས། །སོགས་ཚིགས་བཅད་གསུམ་བརྗོད་ཅིང་བཀྲུའོ། །དེས་ནས་རྡོ་རྗེ་དྲིལ་བུ་འཛིན་པས། གང་ལ་སེར་སྣ་རྣམ་ཆགས་པ། །ཞེས་པ་ནས། ཁྱེད་ཅག་སྡིག་པར་མ་གྱུར་ཅིག །ཅེས་པའི་བར་ཚིགས་བཅད་བཅོ་ལྔ་བརྗོད་ཅིང་མེ་ཏོག་གཏོར། དེ་ནས་དྲིའི་བུམ་པས་བཀྲུ་ཞིང་། ཇི་ལྟར་བལྟམས་པ་སོགས་དང་། དེ་བཞིན་གཤེགས་པ་རྣམས་དང་དེ་སྲས་ལ། །སོགས་སྔགས་དང་བཅས་པ་བརྗོད་ཅིང་། དེ་དག་སྐུ་ལ་ཞེས་སོགས་ཀྱིས་སྐུ་ཕྱིའོ། །ཁྲུས་བུམ་གཅིག་ལས་མེད་ན་རྟེན་གསར་པ་བཀྲུ་བ་རྣམས་དེ་ཉིད་ཀྱིས་བྱ་བ་ཡིན་ནོ། །བཞི་པ་རིང་བསྲེལ་གཞུག་པ་ནི། སྐུ་གཟུགས་རྣམས་ཀྱི་དབུའི་རྒྱབ་ཕྱོགས་སུ་བུག་པ་ཡོད་ན། སངས་རྒྱས་ཀྱི་རིང་བསྲེལ་ལམ་རིག་སྔགས་ཆེན་མོ་དང་། རྟེན་འབྲེལ་སྙིང་པོ་དང་། སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡི། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །སེམས་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ཡང་སྡོམ་པ་ལེགས། །ཞེས་པའི་སོ་སོར་ཐར་པ་རྣམས་གཞུག བུ་ག་མེད་པའམ། མཆོད་རྟེན་དང་སྐུ་གཟུགས་སྔར་གཞུག་ཟིན་པ་ཡིན་ན་རིང་བསྲེལ་མི་དགོས་ལ། གཟུངས་དང་སོ་སོར་ཐར་པ་བྲིས་པ་དབུའམ་བྲེ་ལ་གདགས་སོ། །ལྔ་པ་གསོལ་བ་གདབ་པ་ནི། དཔོན་སློབ་རྣམས་ལངས་ལ། ལག་ཏུ་མེ་ཏོག་དང་རོལ་མོ་ཐོགས་ནས་ཡོན་ཏན་རྗེས་སུ་དྲན་པའི་སྒོ་ནས། གང་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཏེ། རྒྱུ་དང་འབྲས་བུའི་དགོས་པ་ཕུན་སུམ་ཚོགས་པ་དང་ལྡན་པས། ཆོས་ཐམས་ཅད་ཐུགས་སུ་ཆུད་པའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱི་བྱང་ཆུབ་ཀྱི་ཆོས་སུམ་ཅུ་རྩ་བདུན་དང་ཡང་དག་པར་ལྡན་པ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་ལ་སོགས་པ་མདོར་ན་སློབ་པ་དང་། མི་སློབ་པའི་སངས་རྒྱས་སུ་བྱེད་པའི་ཆོས་རྣམས་དང་ལྡན་པ་དེའི་སྐྱོན་གྱི་ཉེས་པ་ཐམས་ཅད་དང་བྲལ་ཞིང་བདེ་བར་གཤེགས་པའི་ཡོན་ཏན་གྱི་ཆོས་ཚད་མེད་པ་དང་ལྡན་པའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱི་བླ་ན་མེད་པའི་ཚུལ་ཁྲིམས་ལ་སོགས་པ་ཕུང་པོ་ལྔ་དང་ཡང་དག་པར་ལྡན་པ་དང་། ཆོ་འཕྲུལ་གསུམ་དང་། ཏིང་ངེ་འཛིན་གསུམ་དང་། བསླབ་པ་གསུམ་དང་། ཚངས་པའི་གནས་བཞི་དང་། བསམ་གཏན་བཞི་དང་། འཕགས་པའི་བདེན་པ་བཞི་དང་ཡང་དག་པར་ལྡན་པས་དེའི་ཡང་དག་པ་ཕྱིན་ཅི་མ་ལོག་པའི་ཡེ་ཤེས། ཤེས་བྱའི་ཡུལ་ཐམས་ཅད་ལ་མངའ་བརྙེས་ཤིང་ཉོན་མོངས་པ་མ་ལུས་པ་ལ་སོགས་པ་རྣམས་སྤོང་བ་དང་། བདུད་བཞི་ལས་རབ་ཏུ་རྒྱལ་བའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་དང་། བསོད་ནམས་དང་ཡེ་ཤེས་ཀྱི་ཚོགས་ཡང་དག་པར་བསགས་པ་དང་། སྐྱེས་བུ་ཆེན་པོའི་མཚན་སུམ་ཅུ་སོ་གཉིས་ཀྱིས་ཡང་དག་པར་བརྒྱན་པ་དང་། དཔེ་བྱད་བཟང་པོ་བརྒྱད་ཅུས་ཡང་དག་པར་མཛེས་པ་དང་། སྐྱེས་བུ་ཆེན་པོའི་སྐུ་བལྟ་བས་ཆོག་མི་ཤེས་པ་དང་། མཐོང་ན་མི་མཐུན་པ་མེད་པ་སྟེ། དེའི་གཟུགས་ཀྱི་སྐུའི་འབྱོར་པ་མཐར་ཐུག་པ་འགྲོ་བ་མ་ལུས་པའི་རྩ་ལག་ཏུ་གྱུར་པའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །ཞེས་བརྗོད་ཅིང་། རབ་ཏུ་གནས་པར་བགྱིའོ་ཞེས་པའི་སྐབས་སུ་ཐམས་ཅད་ཀྱིས་ཚིག་མཐུན་པར་བརྗོད་ལ། རྟེན་ལ་མེ་ཏོག་གི་ཆར་དབབ། སྤོས་ཀྱིས་བདུག རོལ་མོ་དབུལ་ཞིང་། ཨོཾ་ན་མོ་བྷ་ག་ཝ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶྃ་བུདྡྷཱ་ཡ། ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཞེས་པ་དང་། རབ་ཏུ་གནས་བྱའི་ལྷ་གང་ཡིན་གྱི་སྔགས་དང་། རང་གི་ཡི་དམ་གྱི་ལྷའི་སྔགས་བཟླ་བ་རྣམས་ནི་སྡེ་ཚན་རེ་རེའི་མཐར་བྱའོ། །རྗེས་དྲན་བཞི་པོ་གཅིག་དང་གསུམ་དུ་བརྗོད་པའི་གསལ་ཁ་མི་སྣང་ཡང་། སེམས་བསྐྱེད་ཀྱི་ཚིག་ཡིན་པས་ལན་གསུམ་བརྗོད་པར་གསུང་ངོ་། །དེ་ནས་སྟན་ལ་འདུག་ནས་ཀུན་རྫོབ་བྱང་ཆུབ་ཀྱི་སེམས་ཅུང་ཟད་བསྒོམས་ལ་འདི་སྐད་བརྗོད་དེ། ངོ་མཚར་ཆེན་པོ་གྲངས་མེད་པ་བསམ་གྱིས་མི་ཁྱབ་པ་དང་ལྡན་པའི་སངས་རྒྱས་བཅོམ་ལྡན་འདས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སེམས་ཅན་ཐམས་ཅད་ཀྱི་དོན་དུ་དཀོན་མཆོག་གསུམ་གྱི་རྟེན་རབ་ཏུ་གནས་པར་བགྱི་བ་དེའི་མཐུས་བདག་གིས་སེམས་ཅན་ཐམས་ཅད་དབུགས་དབྱུང་ངོ་། །འཁོར་བའི་གཅོང་རོང་ཆེན་པོ་ལས་བསྒྲལ་བར་བགྱིའོ། །ཕས་ཀྱི་རྒོལ་བ་བདུད་དང་ལོག་འདྲེན་ཐམས་ཅད་ཕམ་པར་བགྱིའོ། །སེམས་ཅན་རྣམས་ཀྱི་བག་ཆགས་ཀྱི་མཚམས་སྦྱོར་བའི་ཉོན་མོངས་པའི་རྙོག་པ་ཐམས་ཅད་བསལ་བར་བགྱིའོ། །སེམས་ཅན་རྣམས་ཀྱི་ང་རྒྱལ་གྱི་རི་བོ་བསྙིལ་བར་བགྱིའོ། །སེམས་ཅན་རྣམས་ཀྱི་སྐྱེ་བའི་ལྗོན་ཤིང་རྩད་ནས་གཅད་དོ། །འཆི་བདག་གི་ཉི་མ་ཕྱེ་མར་བརླག་གོ །མ་རིག་པའི་མུན་པ་བསལ་བར་བགྱིའོ། །མ་དད་པ་དང་ཕྱིར་རྒོལ་བ་དག་དང་། ལྟ་བ་ཕྱིན་ཅི་ལོག་པ་དག་ཡང་དག་པའི་ལྟ་བ་ལ་གཟུད་ཅིང་དད་པར་བསྒྱུར་རོ། །ལས་ཀྱི་ཆུ་བོ་བཟློག་པར་བགྱིའོ། །སྲིད་པའི་ཆུ་བོ་སྐེམས་པར་བགྱིའོ། །ཆོས་ཀྱི་སྒྲོན་མ་སྦར་བར་བགྱིའོ། །བྱང་ཆུབ་ཀྱི་ལམ་བསྟེན་པར་བགྱིའོ། །བཟོད་པ་དང་དེས་པ་ལ་བཙུད་དོ། །བསམ་གཏན་གྱི་བདེ་བ་ལ་རྩེར་སྩལ་ཏོ། །འདོད་ཆགས་ཀྱི་མེ་དཔུང་གཞིལ་བར་བགྱིའོ། །ཞེ་སྡང་གི་མཚོན་རྣོན་པོ་གཞོམ་པར་བགྱིའོ། །བདེན་པ་ལ་གཟུད་དོ། །ཕྲག་དོག་གི་འཚུབས་མ་ཞི་བར་བགྱིའོ། །སེར་སྣའི་མདུད་པ་དགྲོལ་བར་བགྱིའོ། །སྡུག་བསྔལ་ཐམས་ཅད་རབ་ཏུ་ཞི་བར་བགྱིའོ། །འཇིགས་པ་མ་མཆིས་པ་དང་བདེ་བ་ཆེན་པོའི་གྲོང་ཁྱེར་དུ་འཇུག་ཅིང་གནས་པར་བགྱིའོ། །དེ་བས་ན་བདག་ལ་ལས་ཀྱི་དངོས་གྲུབ་ཀྱི་མཆོག་སྩལ་ཞིང་གནང་བར་མཛད་དུ་གསོལ། ཞེས་གསོལ་བ་བཏབ་ལ། ཚོགས་པ་ཐམས་ཅད་ཀྱིས་ཀྱང་གནང་བར་མཛད་དུ་གསོལ། ཞེས་བརྗོད་ཅིང་མེ་ཏོག་གཏོར་རོ། །དྲུག་པ་རྟེན་བསྐྱེད་པ་ནི། རྟེན་རྣམས་ལས་ཐམས་ཅད་པས་བསང་། ཤཱུ་ནྱ་ཏཱས་སྟོང་པར་སྦྱངས་ཏེ། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའམ། ཁྲོ་བོ་ཡིན་ན་རྃ་ལས་ཉི་མའི་གདན་གྱི་སྟེང་དུ་རྟེན་ངོ་ཤེས་པ་རྣམས་རང་རང་གི་ས་བོན་དང་ཕྱག་མཚན་ལས་སོ་སོར་བསྐྱེད། མི་ཤེས་པ་རྣམས་ཨོཾ་ཨཱཿཧཱུྃ་ལས་བྱུང་བའི་རྡོ་རྗེ། དེ་ལས་རྒྱུ་རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ། གཡས་པ་བརྒྱད་ཀྱིས་རྡོ་རྗེ་དང་། གཡོན་པ་བརྒྱད་ཀྱིས་དེས་ཡུ་བ་བྱས་པའི་དྲིལ་བུ་འཛིན་པ། ཞལ་རྣམས་རྒྱུ་རྡོ་རྗེ་འཆང་དང་འདྲ་བ་ཡུམ་དང་བཅས་པ་བསྒོམ། མཆོད་རྟེན་དང་ལྷ་ཁང་ནི་བྷྲཱུྃ་ལས་འཁོར་ལོ། དེ་ལས་རྣམ་སྣང་དུ་བསྐྱེད། དེ་ཞུ་བ་ལས་བྱུང་བའི་མཆོད་རྟེན་དང་ལྷ་ཁང་གི་ནང་དུ་ཆོ་ག་གསུམ་གྱིས་རིགས་ལྔ་བསྐྱེད་ལ་སངས་རྒྱས་དང་བྱང་ཆུབ་སེམས་དཔའ་བསམ་གྱིས་མི་ཁྱབ་པས་གང་བར་བསྒོམ། པོ་ཏི་རྣམས་ནི་ཨཱཿདང་པདྨ་ལས་འོད་དཔག་མེད། རྡོ་རྗེ་དང་དྲིལ་བུ་ལ་སོགས་པ་ཕྱག་མཚན་རྣམས་ནི་ཧཱུྃ་དང་རྡོ་རྗེ་ལས་མི་བསྐྱོད་པར་བསྐྱེད། ཁང་བཟང་དང་། རྟ་བབས་དང་། ལྗོན་ཤིང་དང་། རྡོ་རིང་དང་། ཆུ་མིག་དང་། ཁྲོན་པ་རྣམས་ནི་བྷྲཱུྃ་དང་འཁོར་ལོ་ལས་རྣམ་པར་སྣང་མཛད་དུ་བསམ་མོ། །འདི་དག་གི་རིགས་ལྔ་ནི་གུར་ལས་འབྱུང་བ་ལྟར་ཞལ་ཕྱག་རྫོགས་པར་བསྐྱེད་པའམ། དབང་ཆུ་ནས་འབྱུང་བ་ལྟར་གཡས་བརྒྱད་ཀྱིས་འཁོར་ལོ་ཞེས་སོགས་སམ། དེ་ཙམ་མ་ནུས་ན་ཞལ་གཅིག་ཕྱག་གཉིས་པ་ཡུམ་དང་བཅས་པ་བསྐྱེད་པས་ཀྱང་རུང་ངོ་། །དེ་རྣམས་ཀྱི་དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་དཀར་པོ། མགྲིན་པར་པདྨའི་དཀྱིལ་འཁོར་གྱི་སྟེང་དུ་ཨཱཿདམར་པོ། ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོ་བསམས་ལ་བྱིན་གྱིས་བརླབ་བོ། །བདུན་པ་ཡེ་ཤེས་པ་སྤྱན་དྲང་ཞིང་དགུག་པ་ལ་གསུམ། སྤྱན་དྲང་པ་དངོས། བགེགས་བསྐྲད་ཅིང་མཆོད་པ། དགུག་གཞུག་བྱ་བའོ། །དང་པོ་ནི་རང་གི་སྙིང་ག་ནས་འོད་ཟེར་འཕྲོས་པས་འོག་མིན་གྱི་གནས་ནས་ཡེ་ཤེས་ཀྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་བསམ་གྱིས་མི་ཁྱབ་པས་བསྐོར་བ་སྤྱན་དྲངས་པར་བསམས་ལ། རྡོ་རྗེ་བསྡུ་བའི་ཕྱག་རྒྱ་དང་། ཨོཾ་བཛྲ་ས་མཱ་ཛཿ ཞེས་བརྗོད་ལ། སྤོས་དང་བཅས་པའི་རྡོ་རྗེ་དྲིལ་བུ་འཛིན་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །ཞེས་པ་ནས། ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་པའི་བར་ཚིགས་སུ་བཅད་པ་གསུམ་དང་། ཆོས་རྣམས་ཀུན་གྱི་དབང་ཕྱུག་གཙོ། །ཞེས་པ་ནས། མཆོག་རྣམས་ལེགས་པར་སྩལ་དུ་གསོལ། །ཞེས་པའི་བར་ཚིགས་སུ་བཅད་པ་བཞི་དང་། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་སཏྭཾ། ཞེས་བརྗོད་དོ། །གཉིས་པ་ནི། ཡེ་ཤེས་སེམས་དཔའི་ཕྱི་བཞིན་དུ་འབྲངས་ནས། བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་རབ་ཏུ་གནས་པར་བྱེད་པ་ལ་བར་དུ་གཅོད་པར་བྱེད་པའི་བགེགས་ཀྱི་ཚོགས་གང་ཡིན་པ་ཐམས་ཅད་འདིར་མ་གནས་པར་གཞན་དུ་དེངས་ཤིག ཅེས་བརྗོད་ལ་ལས་ཐམས་ཅད་པའི་སྔགས་བརྗོད། ཡུངས་ཀར་གྱིས་བྲབ། གུ་གུལ་གྱིས་བདུག་ཅིང་རོལ་མོ་དྲག་ཏུ་བྱའོ། །དེ་ནས། བཅོམ་ལྡན་ཐུགས་རྗེས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །ཞེས་སོགས་དང་། ཨོཾ་བཛྲ་ག་ག་ན་ས་མ་ཡེ་ཧཱུྃ། ཞེས་པས་མཆོད་ཡོན་དང་། ཇི་ལྟར་བལྟམས་པ་སོགས་ཀྱིས་ཁྲུས་བྱ་ཞིང་། བདག་དང་འགྲོ་ལ་ཐུགས་བརྩེའི་ཕྱིར། །ཞེས་སོགས་དང་། པདྨ་ཀ་མ་ལཱ་ཡ་སཏྭཾ་ཞེས་པས་གདན་དབུལ། ལྷ་ལ་སོགས་པ་དྲི་ཡི་རྫས། །ཞེས་སོགས་ཚིགས་བཅད་ལྔ་སྔགས་དང་བཅས་པ་དང་། དེ་ལས་གཞན་ཡང་མཆོད་པའི་ཚོགས། །ཞེས་སོགས་དང་། ཨོཾ་བཛྲ་ཤབྡ་ཨཱཿཧཱུྃ། ཞེས་པས་རོལ་མོ་རྣམས་དབུལ་ལོ། །གསུམ་པ་ལ་གཉིས་ལས། དང་པོ་རང་འདྲའི་ཡེ་ཤེས་པ་དགུག་པ་ནི། དེ་ལྟར་མཆོད་པའི་ཡེ་ཤེས་པ་རྣམས། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཞེས་པས་དམ་ཚིག་པ་དང་ཉེ་བར་སྤྱན་དྲངས། ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ། ཞེས་པས་དམ་ཚིག་པ་ལ་ཡེ་ཤེས་པ་རྣམས་གཞུག ཨོཾ་བཛྲ་བེ་ཏཱ་ལཱི་བནྡྷ་བཾ། ཞེས་པས་རོ་གཅིག་ཏུ་འདྲེས། ཨོཾ་བཛྲ་གྷསྨ་རཱི་ཝ་ཤཾ་ཀུ་རུ་ཧོཿ ཞེས་པས་དམ་ཚིག་པ་རྣམས་ཡེ་ཤེས་པའི་ངོ་བོར་གྱུར་པར་བསམས་ལ། ཛཿཧཱུྃ་བྃ་ཧོཿ ཞེས་ཡང་ཡང་བརྗོད་ཅིང་བསྟིམ་མོ། །གཉིས་པ་ནི། སླར་ཡང་རང་གི་སྙིང་གའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པ་སྤྱན་དྲངས་ལ། ཨོཾ་བཛྲ་ས་མཱ་ཛཿཞེས་དང་། ཇི་ལྟར་སངས་རྒྱས་ཐམས་ཅད་ནི། །དགའ་ལྡན་དུ་ནི་གནས་པ་ན། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་ལྷན་ཅིག་ཏུ། །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང་། །ཆེ་གེ་མོ་ཡི་དོན་སླད་དུ། །བདག་གི་འབྱོར་པ་ཉིད་ཀྱིས་ནི། །ཅི་འབྱོར་པ་ཡི་མཆོད་པ་རྣམས། །མེ་ཏོག་ལ་སོགས་འདི་བཞེས་ཤིག །བདག་དང་སློབ་མར་བཅས་པ་ལ། །རྗེས་སུ་བརྩེ་བར་དགོངས་སུ་གསོལ། །ཀུན་གྱིས་འདི་ལ་བྱིན་བརླབས་ཤིང་། །འདི་ཉིད་དུ་ནི་བཞུགས་པར་རིགས། །ཞེས་ལན་གསུམ་བརྗོད་ལ། སྔར་ལྟར་དགུག་གཞུག་བྱའོ། །བརྒྱད་པ་རྒྱས་གདབ་པ་ནི། ལྷ་ཐམས་ཅད་ཀྱི་དཔྲལ་བར་ཨོཾ་ལས་འཁོར་ལོ་དཀར་པོ་ཨོཾ་གྱིས་མཚན་པ། མགྲིན་པར་ཨཱཿལས་པདྨ་དམར་པོ་ཨཱཿཡིས་མཚན་པ། སྙིང་གར་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པར་བསམ་མོ། །དགུ་པ་དབང་བསྐུར་བ་ནི། ཐུགས་ཀའི་ས་བོན་ལས་འོད་འཕྲོས་པས་དབང་གི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་དང་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་སྤྱན་དྲང་། དཀར་མོ་རི་དྭགས་སོགས་ཀྱིས་མཆོད། ཞེ་སྡང་རྡོ་རྗེ་ཕྱག་འཚལ་བསྟོད། །ཞེས་སོགས་ཀྱིས་བསྟོད། བྱང་ཆུབ་རྡོ་རྗེ་སངས་རྒྱས་ལ། །ཞེས་སོགས་ཀྱིས་དབང་བསྐུར་བར་གསོལ་བ་བཏབ་ནས། རང་གི་མདུན་དུ་སྟེགས་ཀྱི་སྟེང་དུ་དབང་རྫས་རྣམ་རྒྱལ་བུམ་པ། དབུ་རྒྱན། རྡོ་རྗེ། དྲིལ་བུ་རྣམས་བཞག་སྟེ། དབང་ཆུ་ལྟར་ཡན་ལག་བཞི་རྫོགས་སུ་བསྐྱེད་ནས་ཞུ་བ་ལས་བྱུང་བའི་དབང་རྫས་དེ་དང་དེར་གྱུར་པར་བསམ་མོ། །དེ་ནས་ནམ་མཁའི་དཀྱིལ་འཁོར་གྱིས་རྟེན་ལ་དབང་བསྐུར་བར་བསམས་ལ། རིག་པའི་དབང་ལྔ། བརྟུལ་ཞུགས། རྡོ་རྗེ་སློབ་དཔོན་གྱི་དབང་རྣམས་སློབ་མ་ལ་ཇི་ལྟར་བསྐུར་བར་ལྟར་བྱ་སྟེ། དེ་ཡི་ཚེ་བུམ་ཆུ་རྣམས་ཀྱིས་རྟེན་ལ་དངོས་སུ་གཏོར་བའམ། མེ་ལོང་གི་ནང་དུ་གཟུགས་བརྙན་ཤར་བ་ལ་ཆུ་དབང་བསྐུར། དབུ་རྒྱན་མགོ་ལ་བཅིང་བའམ། བྲིས་སྐུ་སོགས་ཡིན་ན་འཆིང་བའི་ཚུལ་བྱ། རྡོ་རྗེ་དང་དྲིལ་བུ་རྣམས་ཕྱག་ཏུ་གཏད་པར་བསམས་ལ་མདུན་དུ་གཞག་པ་སོགས་བྱ། དེ་ནས་ནམ་མཁའི་དཀྱིལ་འཁོར་གྱི་གཙོ་བོས་བྱང་ཆུབ་ཀྱི་སེམས་རྟེན་གྱི་ལྕེ་ལ་གཞག་པ་དང་། ཡེ་ཤེས་ཀྱི་ཕྱག་རྒྱ་གཏད་པས་ཟུང་འཇུག་གི་ཡེ་ཤེས་སྐྱེས་པར་བསམས་ལ་གསང་བ་དང་། ཤེས་རབ་ཡེ་ཤེས་དང་། དབང་བཞི་པ་རྣམས་ཀྱང་ལམ་དུས་ཀྱི་དབང་འབྲིང་གི་སྐབས་ལྟར་བསྐུར་རོ། །དེ་ལྟར་དབང་བཞི་བསྐུར་བས་དྲི་མ་ཐམས་ཅད་དག ཆུ་ལྷག་མ་ཡར་ལུད་པ་ལས་རྟེན་ངོ་ཤེས་པ་རྣམས་ལ་རང་རང་གི་རིགས་བདག་དང་། ངོ་མི་ཤེས་པ་རྣམས་ལ་མི་བསྐྱོད་པའམ་རྡོ་རྗེ་སེམས་དཔས་དབུར་བརྒྱན་པར་བསམ་མོ། །བཅུ་པ་མཆོད་ཅིང་བསྟོད་པ་ནི། མཆོད་པ་རྣམས་བསང་སྦྱང་བྱིན་གྱིས་བརླབས་ལ། ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད་དེ། ཚིགས་བཅད་རྣམས་ནི་དཀྱིལ་ཆོག་ལྟར་བྱ་བའམ། ཞིང་ཁམས་རྒྱ་མཚོ་མ་ལ་སོགས་པ་གང་ཡང་རུང་བ་འདོན་པ་བསྒྱུར་ལ་བྱ། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་སོགས་དེ་ཉིད་ལྔ་པས་བསྟོད་དོ། །བཅུ་གཅིག་པ་སྤྱན་དབྱེ་བ་ནི། གསེར་དྲུག་མཉམ་ལས་མི་ཆུང་བའི་ཐུར་མས་དངུལ་གྱི་ཀོང་བུར་བཞག་པའི་མར་དང་སྦྲང་རྩི་བླངས་པས་སྤྱན་གྱི་ཐད་ཀར་བྱུག་ཅིང་། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང་། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐའ་གཏུགས་གྱུར་པའི་སེམས་ཅན་རྣམས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་ཙཀྵུཿཙཀྵུཿས་མནྟ་ཙཀྵུཿབི་ཤོ་དྷ་ནི་སྭཱ་ཧཱ་ཞེས་བརྗོད་པས། ཡེ་ཤེས་ཀྱི་སྤྱན་རྣམ་པར་དག་པ་དང་ལྡན་ཞིང་སེམས་ཅན་གྱི་དོན་ལ་འཇུག་པའི་མཐུ་ཕུན་སུམ་ཚོགས་པ་དང་ལྡན་པར་བསམ་མོ། །བཅུ་གཉིས་པ་གསོལ་བ་གདབ་པ་ནི། རྟེན་དེ་ལ་མཆོད་ཡོན་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་སྔགས་ཙམ་གྱིས་དབུལ། དེ་ཉིད་ལྔ་པས་བསྟོད་ལ། སྔར་གྱི་རྡོ་རྗེ་འཆང་ཞུ་བ་ལས་བྱུང་བའི་རྟེན་སོ་སོའི་རྣམ་པ་ཇི་ལྟ་བ་བཞིན་དུ་གྱུར་པར་བསམ། དེ་བཞིན་དུ་པོ་ཏི་ནི་འོད་དཔག་མེད་ཞུ་བ་ལས་ལུང་དང་རྟོགས་པའི་ཆོས་དཀོན་མཆོག དབྱངས་དང་གསལ་བྱེད་ཀྱི་ཡི་གེའི་རྣམ་པ་གླེགས་བམ་གྱི་གཟུགས་སུ་གྱུར་པར་བལྟ། ཕྱག་མཚན་རྣམས་ནི་མི་བསྐྱོད་པ་ཞུ་བ་ལས་ཕྱག་མཚན་སོ་སོའི་དབྱིབས་དང་ཁ་དོག་ཇི་ལྟ་བ་བཞིན་དུ་བསམ། ཁང་བཟང་དང་རྟ་བབས་སོགས་ནི་རྣམ་པར་སྣང་མཛད་ཞུ་བ་ལས་ལྷ་རྫས་ལས་གྲུབ་པའི་ཁང་བཟང་སོགས་རང་རང་གི་རྣམ་པ་ཇི་ལྟ་བ་བཞིན་དུ་བསམ་མོ། །དེ་དག་བརྟན་པར་བྱ་བའི་ཕྱིར་དུ་དཔོན་སློབ་ཐམས་ཅད་ཀྱིས་མགྲིན་གཅིག་ཏུ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། བྱེ་བྲག་ཏུ་སྐུ་གསུང་ཐུགས་ཀྱི་རྟེན་འདི་དག་ལ་ས་དང་། ཆུ་དང་། མེ་དང་། རླུང་གི་གནོད་པས་མ་ཞིག་གི་བར་དུ་སེམས་ཅན་གྱི་དོན་དཔག་ཏུ་མེད་པ་མཛད་ཅིང་བརྟན་པར་བཞུགས་སུ་གསོལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྗོད་ཅིང་མེ་ཏོག་གི་ཆར་དབབ། རོལ་མོ་དབུལ། རྟེན་འབྲེལ་སྙིང་པོ་བཟླའོ། །འདི་ནི་ཕྱག་ལེན་ལྟར་བྲིས་པ་ཡིན་ལ། རབ་གནས་དོན་གསལ་གྱི་དཔེ་ཀུན་ལས། ཐོག་མར་བརྟན་བཞུགས་བྱས་ནས། དེ་ནས་ཞལ་བསྒྱུར་བ་འབྱུང་སྟེ། བརྟེན་བཞུགས་འདི་རབ་གནས་ཀྱི་དངོས་གཞི་ཡིན་པས་འདི་མ་ཚར་གྱི་བར་དུ་ཞལ་བསྒྱུར་དུ་མི་རུང་བ་ལ་དགོངས་སམ་སྙམ་མོ། །དེས་ན་བརྟན་བཞུགས་ཀྱི་དམ་ཚིག་པ་བསྐྱེད་པ་ལ་ཡེ་ཤེས་པ་སྤྱན་དྲངས་པ་བརྟན་པར་བྱས་ནས་མངའ་དབུལ་གྱི་གོང་དུ་རང་རང་གི་རྣམ་པར་བསྒྱུར་བ་འདི་དགོངས་པ་ཡིན་པ་འདྲའོ། །བཅུ་གསུམ་པ་མངའ་དབུལ་རྒྱས་པར་བྱ་བ་ལ་བཞི་ལས། དང་པོ་མཆོད་བསྟོད་རྒྱས་པས་མངའ་དབུལ་བ་ནི། རྟེན་གསར་པའི་མདུན་དུ་ཅི་འབྱོར་པའི་མཆོད་པ་བཤམ། བསང་སྦྱང་བྱིན་གྱིས་བརླབ། དཔག་ཏུ་མེད་པར་སྤྲུལ་ལ་དབྱངས་དང་བཅས་པའམ་མེད་ཀྱང་རུང་སྟེ། སྟོང་གསུམ་འདིའམ་སྟོང་གསུམ་གཞན་དག་ན། །ལྷ་རྫས་མཆོད་ཡོན་ཇི་སྙེད་ཡོད་པ་ཀུན། །བླ་མ་རྒྱལ་བ་སྲས་དང་བཅས་ལ་འབུལ། །ཐུགས་རྗེས་འགྲོ་བའི་དོན་ཕྱིར་བཞེས་སུ་གསོལ། །ཞེས་པ་དང་། པད་སྐོར་སྔོན་དུ་འགྲོ་བས། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པཱུ་ཛ་མ་ེགྷ་ས་མུ་དྲ་སྥ་ར་ཎ་ས་མ་ཡ་ཤྲཱི་ཡེ་ཧཱུྃ། ཞེས་ཕྱག་རྒྱ་དང་བཅས་པས་མཆོད་ཡོན་དབུལ། དེ་བཞིན་དུ་ཚིགས་བཅད་ཀྱི་མཆོད་ཡོན་དང་། སྔགས་ཀྱི་ཨརྒྷཾ་རྣམས་ཀྱི་གནས་སུ་ལྷ་རྫས་མེ་ཏོག་དང་། པུཥྤཾ། བདུག་སྤོས་དང་། དྷཱུ་པཾ། སྣང་གསལ་དང་། དཱི་པཾ། དྲི་མཆོག་དང་། གནྡྷཾ། ཞལ་ཟས་དང་། ནཻ་ཝི་དྱཱཾ། སིལ་སྙན་དང་། ཤབྡ་ཞེས་པ་རྣམས་བཅུག་ཅིང་། གཞན་རྣམས་སྔར་དང་འདྲ་བར་བྱས་ལ། དྷརྨཱ་ར་ཎི་ཏའི་སྔགས་ཀྱིས་རོལ་མོ་རྒྱ་ཆེར་དབུལ་ལོ། །མཆོད་ཡོན་གྱི་སྐབས་སུ་ཆུ་བཞི་ཆར་གྱི་འདོན་པ་བསྒྱུར་ཡང་རུང་ལ། ཡང་ན་འདི་ཙམ་གྱིས་ཀྱང་རུང་ངོ་། །དེ་ནས་ཤེས་ཤིང་སྤྲོ་ན། གུར་ནས་འབྱུང་བའི་མཆོད་ཕྲེང་རྒྱས་པར་བྱ་ཞིང་། དེ་ཙམ་མ་ནུས་ན། རྒྱལ་སྲིད་སྣ་བདུན་དང་། འདོད་ཡོན་ལྔའི་མཆོད་པ་གཞན་ནས་འབྱུང་བ་ལྟར་བྱའོ། །དེ་ནས་བསྟོད་པ་བྱ་བའི་ཕྱིར། ལྷ་སོ་སོའི་སྒོས་བསྟོད་ཅི་ཤེས་པས་བསྟོད། དེ་ཙམ་མ་ཤེས་ན། དེ་ཉིད་ལྔ་པས་བསྟོད། པོ་ཏི་ཡོད་ན། དག་པས་འདོད་ཆགས་བྲལ་བར་གྱུར། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །ཞེས་དང་། མཆོད་རྟེན་ལ། སྣ་ཚོགས་པདྨ་ཟླ་བའི་གདན་སྟེང་དུ། །སྣ་ཚོགས་རིན་ཆེན་ཁམས་ལས་གྲུབ་པ་ཡི། །སྤྲུལ་པའི་མཆོད་རྟེན་སྣ་ཚོགས་རྒྱན་གྱིས་མཛེས། །ཆོས་སྐུ་རང་བཞིན་ཁྱོད་ལ་ཕྱག་འཚལ་ལོ། །ཞེས་པ་དང་། གཙུག་ལག་ཁང་ཡིན་ན། དེའི་ནང་དུ་བསྐྱེད་པའི་རིགས་ལྔ་པོ་ལ། ཧཱུྃ། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་ཅན། །ཕྱག་འཚལ་རྣམ་པར་སྣང་མཛད་ལ། །གཟུགས་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་རྡོ་རྗེའི་སྐུ། །བདུད་འདུལ་ཆེན་པོའི་ཕྱག་རྒྱ་ཅན། །ཕྱག་འཚལ་མི་བསྐྱོད་རྡོ་རྗེ་ལ། །རིན་ཆེན་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་རྡོ་རྗེའི་སྐུ། །མཆོག་སྦྱིན་ཆེན་པོའི་ཕྱག་རྒྱ་ཅན། །ཕྱག་འཚལ་རིན་ཆེན་འབྱུང་ལྡན་ལ། །འདོད་ཆགས་རྡོ་རྗེ་ཆོས་ཀྱི་ཆུ། །ཀུན་རྟོག་ཡེ་ཤེས་རྡོ་རྗེའི་སྐུ། །ཏིང་འཛིན་ཆེན་པོའི་ཕྱག་རྒྱ་ཅན། །ཕྱག་འཚལ་སྣང་བ་མཐའ་ཡས་ལ། །ཕྲག་དོག་རྡོ་རྗེ་བསྐྱོད་པའི་རླུང་། །བྱ་གྲུབ་ཡེ་ཤེས་རྡོ་རྗེའི་སྐུ། །སྐྱབས་སྦྱིན་ཆེན་པོའི་ཕྱག་རྒྱ་ཅན། །ཕྱག་འཚལ་དོན་ཡོད་གྲུབ་པ་ལའོ། །ཞེས་པས་བསྟོད། ཐུན་མོང་དུ། མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་ཉིད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྐྲུན་དུ་ཡོད་མ་ཡིན། །དངོས་གྲུབ་མཐའ་ཡས་དཔག་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་གྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་རྣམས་སྩོལ་མཛད་པའི། །ཐུགས་རྗེའི་སྤྱོད་པ་མི་གཡོ་འགག་པར་ཡོང་མི་འགྱུར། །ཨེ་མ་ཧོཿཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །འདི་ནི་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱ་ཆེ་སྟེ། །ལན་གཅིག་ཙམ་ཞིག་བརྗོད་པས་ཀྱང་། །སངས་རྒྱས་ཐམས་ཅད་འགྲུབ་པར་འགྱུར། །ཞེས་པས་བསྟོད་དོ། །གཉིས་པ་བྱེ་བྲག་ཏུ་ཉེ་བར་མཁོ་བས་མངའ་དབུལ་བ་ལ་གཉིས་ཀྱི། དང་པོ་རྟེན་ཐམས་ཅད་ལ་མངའ་དབུལ་བ་ནི། དཀྱིལ་འཁོར་ཁྲུས་དང་ན་བཟའ་བརྒྱན། །རྣམ་ལྔ་རིན་ཆེན་བདུན་དང་བཅུད། །གདུགས་སོགས་དག་ནི་སྤྱི་ཡི་འོ། །ཞེས་པ་ལྟར་བརྒྱད་ལས། དང་པོ་དཀྱིལ་འཁོར་ནི། གླིང་བཞི་རི་རབ་དང་བཅས་པའི་མཎྜལ་བྲིས་ཏེ་ཕུལ་བར་བསམས་ལ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ལེགས་པར་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨོཾ་བཛྲ་རེ་ཁེ་ཨཱཿཧཱུྃ། གཉིས་པ་ཁྲུས་ནི། དྲི་ཞིམ་པོའི་ཆུས་བཀྲུ་ཞིང་། སྟོང་གསུམ་ཀུན་ཏུ་དྲི་ངད་འབྱུང་འགྱུར་བའི། །སྤོས་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཨོཾ་བཛྲ་གནྡྷེ་ཨཱཿཧཱུྃ་སྭཱ་ཧཱ། གསུམ་པ་ན་བཟའ་ནི། རྟེན་རབ་ཏུ་བྱུང་བའི་ཆ་ལུགས་ཅན་རྣམས་ལ་ངུར་སྨྲིག་གི་རྒྱལ་མཚན་ཕུལ་བར་བསམས་ལ། དྲི་མེད་མཚན་ལ་སྒྲིབ་བསལ་མི་མངའ་ཡང་། །དད་པས་ངུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་དང་མཉམ་པའི་སེམས་ཅན་རྣམས། །སངས་རྒྱས་བརྟུལ་ཞུགས་མཆོག་ལ་སྤྱོད་པར་ཤོག །ཨོཾ་བཛྲ་ཝསཏྲ་ཡེ་ཨཱཿཧཱུྃ་སྭཱ་ཧཱ། ཞེས་དང་། སངས་རྒྱས་ལོངས་སྐུ་དང་། བྱང་སེམས་ཁྱིམ་པའི་ཆ་ལུགས་ཀྱི་རྟེན་དང་། མཆོད་རྟེན་དང་། གླེགས་བམ་རྣམས་ལ་དར་སྣ་ཚོགས་ཀྱི་ན་བཟའ་རྣམས་དབུལ་ཞིང་། ཁ་དོག་བཟང་ཞིང་དྲི་ཞིམ་རེག་ན་བདེ། །སྲབ་འཇམ་ཡངས་མཛེས་ལྷ་ལས་བྱུང་བ་ཡི། །ན་བཟའི་མཆོག་འདི་རྡོ་རྗེའི་སྐུ་ལ་འབུལ། །བགྲེས་པ་མེད་པ་རྡོ་རྗེའི་སྐུ་ཐོབ་ཤོག །ཨོཾ་བཛྲ་ཝ་ས་སྱེ་ཨཱཿཧཱུྃ་སྭཱ་ཧཱ། བཞི་པ་རྒྱན་ནི། རིན་པོ་ཆེའི་རྒྱན་མང་པོ་དབུལ་ཞིང་། རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །ཨོཾ་བཛྲ་ཨཱ་ལཾ་ཀ་ར་ཝ་པཱུ་ཁ་ནི་ཨཱཿཧཱུྃ་སྭཱ་ཧཱ། ལྔ་པ་འདོད་ཡོན་ལྔ་ནི། གཟུགས་སོགས་འདོད་ཡོན་ཅི་འབྱོར་བ་དབུལ་ཞིང་། རྒྱལ་བ་ཟག་མེད་འབྱོར་ལ་མངའ་བསྒྱུར་ཡང་། །འགྲོ་བའི་དོན་དུ་འདོད་ཡོན་རྣམ་ལྔ་ཡི། །མཆོད་པས་མཁའ་མཉམ་སེམས་ཅན་ཐམས་ཅད་ཀྱིས། །བསོད་ནམས་མི་ཟད་གཏེར་ལ་སྤྱོད་པར་ཤོག །ཨོཾ་བཛྲ་ས་མནྡྷ་བྷ་དྲ་པཱུ་ཛ་མེ་གྷ་ཨཱཿཧཱུྃ་སྭཱ་ཧཱ། དྲུག་པ་རིན་ཆེན་བདུན་ནི། རྒྱལ་སྲིད་སྣ་བདུན་གྱི་གཟུགས་དབུལ་ཞིང་། མི་དབང་རིན་ཆེན་སྣ་བདུན་འདི་དག་ནི། །སངས་རྒྱས་སྲས་དང་བཅས་པ་མ་ལུས་ལ། །བསམ་ཞིང་ཡིད་ཀྱིས་སྤྲུལ་ཏེ་ཕུལ་བ་ཡིས། །འགྲོ་བས་མི་ཟད་གཏེར་ལ་ལོངས་སྤྱོད་ཤོག །ཨོཾ་བཛྲ་སཔྟ་རཏྣ་པཱུ་ཛ་མེ་གྷ་ཨཱཿཧཱུྃ་སྭཱ་ཧཱ། བདུན་པ་བཅུད་ནི། རིན་པོ་ཆེའི་སྣོད་གཅིག་གམ་སྔར་སྨན་ལྔ། འབྲུ་ལྔ། དྲི་ལྔ། རིན་པོ་ཆེ་ལྔ། སྙིང་པོ་ལྔ་རྣམས་བླུགས་པ་དབུལ་ཞིང་། རྒྱལ་བ་མགོན་པོ་དཔལ་གྱིས་ལྷམ་མེར་བཞུགས། །བསོད་ནམས་ཡེ་ཤེས་སྐུ་ལྔ་བརྙེས་པ་ལ། །ལྔ་ཕྲག་ལྔ་ལྡན་སྙིང་པོ་དམ་པ་འབུལ། །འགྲོ་བས་བདེ་གཤེགས་སྙིང་པོ་ཐོབ་པར་ཤོག །ཨོཾ་བཛྲ་པཉྩ་པཉྩ་བི་མ་ལ་པཱུ་ཛ་མེ་གྷ་ཨཱཿཧཱུྃ་སྭཱ་ཧཱ། བརྒྱད་པ་གདུགས་སོགས་ནི། གདུགས་དང་། བ་དན་དང་། བླ་རེ་དང་། རོལ་མོ་ལ་སོགས་པ་དབུལ་ཞིང་། བརྩེ་བའི་ཁོར་ཡུག་སྙན་པའི་བ་དན་དང་། །ཏིང་འཛིན་བླ་རེ་སྤོབས་པའི་འོད་གསལ་བ། །མཆོག་རྐྱེན་འོས་པའི་ཉེར་མཁོ་འདི་དག་འབུལ། །སྐྱེ་བོས་རྣམ་དག་ཡེ་ཤེས་ཐོབ་པར་ཤོག །ཨོཾ་མ་ཧཱ་པཱུ་ཛ་མེ་གྷ་ཨཱཿཧཱུྃ་སྭཱ་ཧཱ། ཞེས་པ་རྣམས་ཐུན་མོང་དུ་དབུལ་ལོ། །གཉིས་པ་རྟེན་སོ་སོ་ལ་མངའ་དབུལ་བ་ལ་གསུམ་ལས། དང་པོ་སྐུ་གཟུགས་ལ་མངའ་དབུལ་བ་ནི། སྤུ་གྲི་འདྲེག་སྤྱད་སོ་མང་དང་། །རྨང་གཟེར་ཚེམས་ཤིང་སྤབས་བཞར་རོ། །ཞེས་པ་ལྟར་དྲུག་ལས། དང་པོ་ནི། རྟེན་རབ་བྱུང་གི་ཆ་ལུགས་ཅན་རྣམས་ལ། གསེར་གྱི་སྤུ་གྲིས་དབུ་སྐྲ་དང་ཞལ་སྤུ་འདྲེག་པའི་ཚུལ་བྱ་ཞིང་། རྒྱལ་བའི་དབུ་སྐྲ་མཐོན་མཐིང་སྐྱོན་བྲལ་ཡང་། །གཞན་དོན་བསྒྲུབ་ཕྱིར་ཁྱིམ་པའི་རྟགས་སྤང་ཕྱིར། །དད་པས་གསེར་གྱི་འདྲེག་སྤྱད་ཕུལ་བ་ཡིས། །འགྲོ་ཀུན་སྡུག་བསྔལ་ཀུན་ལས་གྲོལ་བར་ཤོག །ཨོཾ་བཛྲ་ཀ་ཙ་མུ་ལ་ཨཱཿཧཱུྃ་སྭཱ་ཧཱ། གཉིས་པ་ནི། གསེར་གྱི་འདྲེག་སྤྱད་ཀྱིས་སེན་མོ་འདྲེག་པའི་ཚུལ་བྱ་ཞིང་། ཟངས་མདོག་ལྟར་མཛད་ཡིད་འོང་སྐྱོན་བྲལ་ཡང་། །བདག་ཅག་དད་པས་ཕྱག་དང་ཞབས་རྣམས་ཀྱིས། །སེན་མོའི་འདྲེག་སྤྱད་ཕུལ་བས་འགྲོ་ཀུན་གྱིས། །སངས་རྒྱས་དཔེ་བྱད་བཟང་པོ་ཐོབ་པར་ཤོག །ཨོཾ་བཛྲ་ན་ག་ཚེ་ད་ཛི་ན་ཨཱཿཧཱུྃ་སྭཱ་ཧཱ། གསུམ་པ་ནི། རྟེན་ལོངས་སྐུའི་ཆ་ལུགས་ཅན་རྣམས་དང་། བྱང་སེམས་ཁྱིམ་པའི་ཆ་ལུགས་ཅན་རྣམས་ལ་གསེར་གྱི་སོ་མང་གིས་དབུ་སྐྲ་བཤད་པའི་ཚུལ་བྱ་ཞིང་། དབུ་སྐྲ་རིན་ཆེན་ལྕང་ལོ་མི་འཁྲུག་ཅིང་། །མཛེས་ཤིང་བལྟ་བས་མི་ངོམས་སྐྱོན་བྲལ་ཡང་། །བདག་བློ་སྦྱང་ཕྱིར་རྐྱེན་དང་འཚམས་པ་འདི། །ཕུལ་བས་འགྲོ་ཀུན་དུག་གསུམ་བྲལ་བར་ཤོག །ཨོཾ་བཛྲ་བཱ་ལ་ཤོ་དྷ་ཡ་ཨཱཿཧཱུྃ་སྭཱ་ཧཱ། བཞི་པ་ནི། གསེར་གྱི་རྨང་གཟེར་དབུལ་ཞིང་། དྲི་འཛིན་རྣམ་དག་ཚུལ་ཁྲིམས་ལས་འཁྲུངས་པ། །དགེ་བ་བསྒྲུབ་ཕྱིར་སྐྱོན་ལས་ངེས་གྲོལ་ཡང་། །མོས་པས་འཛིན་སྤྱད་དམ་པ་ཕུལ་བ་ཡིས། །འགྲོ་བས་བླ་མེད་བྱང་ཆུབ་ཐོབ་པར་ཤོག །ཨོཾ་བཛྲ་རོ་མ་དྷ་ར་ཨཱཿཧཱུྃ་སྭཱ་ཧཱ། ལྔ་པ་ནི། གསེར་དངུལ་ལས་བྱས་པའི་ཚེམས་ཤིང་དབུལ་ཞིང་། དཀར་ལ་ཐགས་བཟངས་བཞི་བཅུ་ཚང་བའི་ཚེམས། །བརྒྱད་ཁྲི་བཞི་སྟོང་ཆོས་ལ་མངའ་བསྒྱུར་ཡང་། །བདག་ཅག་དད་པས་ཚེམས་ཤིང་འབུལ་ལགས་ཀྱི། །འགྲོ་བས་སངས་རྒྱས་གསུང་དབྱངས་ཐོབ་པར་ཤོག །ཨོཾ་བཛྲ་དནྟ་ཤོ་དྷ་ཡ་ཨཱཿཧཱུྃ་སྭཱ་ཧཱ། དྲུག་པ་ནི། གསེར་གྱི་སྤབས་བཞར་དབུལ་ཞིང་། སྙན་བསྲིང་མི་མངའ་ཀུན་ཏུ་གསལ་བར་ལྡན། །ཐུབ་པའི་སྒྲ་འཛིན་ངོ་བོས་དག་ན་ཡང་། །དག་བྱེད་འདི་ནི་བདག་གིས་འབུལ་ལགས་ཀྱི། །སྐྱེ་བོས་རྟག་ཏུ་དམ་ཆོས་ཐོས་པར་ཤོག །ཨོཾ་བཛྲ་ཀརྞ་ཤོ་ངྷ་ཡ་ཨཱཿཧཱུྃ་སྭཱ་ཧཱ། ཞེས་བརྗོད་ཅིང་དབུལ་ལོ། །དེའང་གསང་འདུས་ལ་སོགས་པའི་ཞལ་སྦྱོར་གྱིས་སྐུ་ལ་ནི་སྤུ་གྲི་དང་འདྲེག་སྤྱད་མི་དབུལ་ཞིང་། ཚེ་དཔག་མེད་ལ་སོགས་པ་ལོངས་སྐུའི་རྣམ་པ་ཅན་ལ་ནི་སྤུ་གྲི་མ་གཏོགས་པ་གཞན་ལྔ་ཀ་དབུལ་ཞིང་། ཐུབ་དབང་ལ་སོགས་པ་སྤྲུལ་སྐུ་རྣམས་ལ་སོ་མང་མི་དབུལ་བར་གཞན་ལྔ་ཀ་དབུལ་ལོ། །གཉིས་པ་མཆོད་རྟེན་ལ་མངའ་དབུལ་བ་ནི། སྲོག་ཤིང་འཁོར་ལོ་ཅོད་པཎ་འཕན། །རྒྱལ་མཚན་གདུགས་དང་ཕྲེང་བ་གདན། །ཞེས་པ་ལྟར་བརྒྱད་ལས། དང་པོ་སྲོག་ཤིང་དབུལ་ཞིང་། ཨོཾ་བཛྲ་ཨཱ་ཡུཿཥེ་སྭཱ་ཧཱ། སེམས་ཅན་ཐམས་ཅད་ཤེས་པ་བཅུ་དང་ལྡན་པར་གྱུར་ཅིག བདེ་བར་གཤེགས་པའི་བསྟན་པའི་དམ་ཆོས་ཡུན་རིང་དུ་མི་ནུབ་ཅིང་གནས་པར་གྱུར་ཅིག སེམས་ཅན་ཐམས་ཅད་ལྷག་པའི་བསམ་པ་རྣམ་པར་དག་པས་ཀུན་ཏུ་བཟང་པོའི་སྨོན་ལམ་ལ་འཇུག་པར་གྱུར་ཅིག གཉིས་པ་འཁོར་ལོ་དབུལ་ཞིང་། ཨོཾ་པྲ་མརྡཱ་ན་ཡ་སྭཱ་ཧཱ། སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བཅུ་དང་མ་འདྲེས་པའི་དྲན་པ་ཉེ་བར་གཞག་པ་གསུམ་ཐོབ་པར་གྱུར་ཅིག རྣམ་པར་ཐར་པ་བརྒྱད་ཐོབ་པར་གྱུར་ཅིག ཡེ་ཤེས་ལྔ་ཐོབ་པར་གྱུར་ཅིག གསུམ་པ་དར་གྱི་ཅོད་པཎ་དབུལ་ཞིང་། ཨོཾ་པ་ཏཾ་ཀཱ་ལཾ་པ་ཡ་སྭཱ་ཧཱ། སེམས་ཅན་ཐམས་ཅད་དུས་ཐམས་ཅད་དུ་དར་གྱི་ཅོད་པཎ་དང་ལྷབ་ལྷུབ་ལ་སོགས་པ་མཆོད་པ་དང་། བསྙེན་བཀུར་གྱི་རྣམ་པ་མང་པོས་དེ་བཞིན་གཤེགས་པ་འཁོར་དང་བཅས་པ་ཐམས་ཅད་དང་། དེ་དག་གི་མཆོད་རྟེན་དང་། སྐུ་གཟུགས་དང་། གསུང་རབ་ལ་སོགས་པ་དག་ལ་མཆོད་པ་བྱེད་པར་གྱུར་ཅིག བཞི་པ་འཕན་དབུལ་ཞིང་། ཨོཾ་པ་ཏཾ་ཀེ་སྭཱ་ཧཱ། སེམས་ཅན་ཐམས་ཅད་ཆོས་ཀྱི་གྲགས་པའི་སྙན་པ་བསམ་གྱིས་མི་ཁྱབ་པ་ཐོབ་པར་གྱུར་ཅིག ལྔ་པ་ཆུ་སྲིན་གྱིས་རྒྱལ་མཚན་དབུལ་ཞིང་། ཨོཾ་ཀུ་བི་ར་དྷྭ་ཛ་སྭཱ་ཧཱ། སེམས་ཅན་ཐམས་ཅད་འཁོར་བ་མི་འཛིན་མི་གཏོང་བས་བདུད་བཞི་ལས་རྒྱལ་ཞིང་ཆོས་མི་ནུབ་པའི་རྒྱལ་མཚན་དུ་གྱུར་ཅིག དྲུག་པ་གདུགས་དབུལ་ཞིང་། ཨོཾ་བྷྲ་མ་ན་ཡེ་སྭཱ་ཧཱ། སེམས་ཅན་ཐམས་ཅད་བླ་ན་མེད་པའི་སྐྱབས་དང་ལྡན་ཞིང་ཆོས་ཀྱི་རྒྱལ་པོ་ཆེན་པོར་གྱུར་ཅིག བདུན་པ་མེ་ཏོག་གི་ཕྲེང་བ་དབུལ་ཞིང་། ཨོཾ་རཏྣ་མཱ་ལ་ཏྲཱྃ་ཞེས་བྱ་བ་དང་། ན་མཿསཏྲཻ་ཡ་དྷཱ། ཨ་ནུ་ག་ཏ་པྲ་ཏིཥྛ་ཏ་པུཥྤེ་ཀེ་ཏུ་རཱ་ཛ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲ་པུཥྤེ་ཨཱཿཧཱུྃ་སྭཱ་ཧཱ། སེམས་ཅན་ཐམས་ཅད་མཚན་དང་དཔེ་བྱད་དང་ལྡན་ཏེ། སྐུ་བལྟ་བས་ཆོག་མི་ཤེས་པ་ཐོབ་པར་གྱུར་ཅིག བརྒྱད་པ་རིན་པོ་ཆེ་ལ་སོགས་པའི་གདན་དབུལ་བར་བསམ་ཞིང་། ཨོཾ་པུཎྱ་དྷ་རི་ཛ་ཡེ་སྭཱ་ཧཱ། སེམས་ཅན་ཐམས་ཅད་གདན་གྱི་ཁྱད་པར་སྟོབས་བཅུ་དང་ལྡན་པ་གླང་པོ་ཆེའི་གདན་དང་། མི་འཇིགས་པ་བཞི་དང་ལྡན་པ་སེང་གེའི་གདན་དང་། རྫུ་འཕྲུལ་གྱི་རྐང་པ་བཞི་དང་ལྡན་པ་རྟའི་གདན་དང་། དབང་བཅུ་དང་ལྡན་པ་རྨ་བྱའི་གདན་དང་། ཐམས་ཅད་དུ་ཐོགས་པ་མེད་པའི་སྟོབས་ཀྱི་ཤུགས་དང་ལྡན་པ་ནམ་མཁའ་ལྡིང་གི་གདན་དང་། འགྲོ་བའི་རེ་འདོད་ཡིད་བཞིན་དུ་སྐོང་བ་ནོར་བུ་རིན་པོ་ཆེའི་གདན་དང་། ཆགས་པའི་སྐྱོན་སྤངས་པ་པདྨའི་གདན་དང་། རང་བཞིན་གྱིས་འོད་གསལ་བ་ཉི་ཟླའི་གདན་ཐོབ་པར་གྱུར་ཅིག ཅེས་བརྗོད་ཅིང་དབུལ་ལོ། །གསུམ་པ་གླེགས་བམ་ལ་མངའ་དབུལ་བ་ནི། བཞུགས་ཁྲི་དང་ནི་ན་བཟའ་དང་། །གླེགས་ཤིང་དང་ནི་གླེགས་ཐག་གོ །ཞེས་པ་ལྟར་བཞི་ལས། དང་པོ་རིན་པོ་ཆེའི་ཁྲི་དབུལ་ཞིང་། རིན་ཆེན་དུ་མ་ལས་གྲུབ་སེང་གེའི་ཁྲི། །ཡི་འཕྲོག་སྣ་ཚོགས་གོས་ཀྱིས་བཀབ་པ་འདི། །སྤྲོས་བྲལ་གསུང་རབ་མཆོག་ལ་ཕུལ་བ་ཡིས། །འགྲོ་ཀུན་རྡོ་རྗེའི་གདན་ལ་བཞུགས་པར་ཤོག །ཨོཾ་བཛྲ་ཨཱ་ས་ན་ཡ་ཨཱཿཧཱུྃ་སྭཱ་ཧཱ། གཉིས་པ་ན་བཟའ་དབུལ་ཞིང་། སྣ་ཚོགས་དབང་པོའི་གཞུ་བཞིན་རབ་བཀྲ་ཡང་། །གང་ལ་རེག་ན་བདེ་བའི་རྒྱུར་གྱུར་པའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝསཏྲ་ཨཱཿཧཱུྃ་སྭཱ་ཧཱ། གསུམ་པ་གླེགས་ཤིང་དབུལ་ཞིང་། ཟུང་འཇུག་དམ་ཆོས་འཛིན་པ་ཀུན་བྲལ་ལ། །ཐབས་དང་ཤེས་རབ་རྗེས་སུ་འབྲེལ་གྱུར་པའི། །ཉི་ཟླ་ལྟ་བུའི་རྟེན་འབྲེལ་དགབ་བྱ་བ། །ཕུལ་བས་སྐྱེ་བོས་ཟུང་འཇུག་རྟོགས་པར་ཤོག །ཨོཾ་བཛྲ་པྲ་ཛྙཱ་ཨུ་པ་ཡ་ཨ་དཱ་ཡ་ཨཱཿཧཱུྃ་སྭཱ་ཧཱ། བཞི་པ་གླེགས་ཐག་དབུལ་ཞིང་། སྤྲོས་པ་དུ་མ་རབ་ཏུ་རྒྱས་གྱུར་ཀྱང་། །ཡེ་ཤེས་ཆེན་པོར་རོ་གཅིག་གྱུར་པ་ལྟར། །གླེགས་བམ་གཅིག་གྱུར་ཡོ་བྱད་ཕུལ་བ་ཡིས། །འགྲོ་བས་ཡེ་ཤེས་ཆེན་པོ་རྟོགས་པར་ཤོག །ཨོཾ་བཛྲ་སྥོ་ཏ་ཀ་བྷནྡྷ་ཨཱཿཧཱུྃ་སྭཱ་ཧཱ། ཞེས་བརྗོད་ཅིང་དབུལ་ལོ། །གསུམ་པ་སྦྱིན་སྲེག་གི་མངའ་དབུལ་བ་ནི། རྒྱས་པའི་སྦྱིན་སྲེག་གི་ཆོ་གས་རབ་ཏུ་གནས་བྱའི་ལྷ་དང་། གླེགས་བམ་ཡིན་ན་འོད་དཔག་མེད་དང་། ལྷ་ཁང་ཡིན་ན་རྣམ་སྣང་ཐབ་ཏུ་སྤྱན་དྲངས་ལ། མངར་གསུམ་གྱིས་སྦགས་པའི་འབྲུས་གཙོར་བྱས་པའི་བསྲེག་བླུགས་བརྒྱ་རྩ་བརྒྱད་དབུལ། བདག་དང་ཡོན་བདག་གི་ཚེ་དང་བསོད་ནམས་འཕེལ་བའི་ཕྱིར་དུ་དཱུརྦ་དང་འབྲས་ཀྱི་སྦྱིན་སྲེག་ཅི་གྲུབ་བྱ། དེའི་རྗེས་སུ་ཐབ་ཁུང་གི་མེ་ལ་མཉྫིའི་སྟེང་དུ་ཚོན་དཀར་པོའམ་སེར་པོས་བྱུགས་པའི་སྣོད་བཞག་ལ། དེའི་ནང་དུ་འབྲས་དང་། སྦྲང་རྩི་དང་། ཀ་ར་བསྲེས་པའི་འོ་མ་བླུགས་ལ་གཙོ་བོའི་སྔགས་ཟློས་བཞིན་དུ་འོ་ཐུག་བསྒྲུབས་ལ་འོག་ནས་འབྱུང་བའི་ཚིགས་བཅད་དང་། སྔགས་ཀྱིས་རྟེན་ལ་དབུལ་ལོ། །གལ་ཏེ་འོ་ཐུག་མ་གྲུབ་ན་སྣོད་བཟང་པོར་ལྷ་བཤོས་ཆེན་པོ་རྒྱན་སྣ་ཚོགས་ཀྱིས་བརྒྱན་པ་ཞིག་གི་མཐར། བཟའ་བ་དང་། བཅའ་བ་དང་། བཏུང་བ་སྣ་ཚོགས་བཤམས་ལ། ནམ་མཁའ་མཛོད་ཀྱི་ཕྱག་རྒྱ་དང་། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ། ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་པས་འདོད་རྒུའི་རྒྱ་མཚོར་བྱིན་གྱིས་བརླབས་ནས་རྟེན་ལ་ཕུལ་བར་བསམ་ཞིང་། ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །ཨོཾ་དཱི་བྱ་ཨ་ནེ་ས་མཱ་དྷཱིནྡཱ་ཡཱ་ན་པྲྀ་ཎ་ནེ་སྭཱ་ཧཱ། ཞེས་བརྗོད་དོ། །བཞི་པ་སྔགས་ཀྱི་མངའ་དབུལ་བ་ནི། རྟེན་ལ་གཟུངས་ཐག་བཏགས་པར་ཀུན་གྱིས་བཟུང་ལ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཨོཾ་ཧཱུྃ་ཧྲཱིཿབྷཱུ་ཁཾ་བཛྲཱི་བྷ་ཝ་ཌི་ཌ་ཏིཥྛ་བྷཱུ་ཁཾ་སྭཱ་ཧཱ། ཞེས་པ་བརྒྱ་རྩ་བརྒྱད་དམ་ཉེར་གཅིག་བཟླས་ལ། ཐམས་ཅད་ཀྱིས་ལག་ཏུ་མེ་ཏོག་ཐོགས་ནས། བཀྲ་ཤིས་ཀྱི་ཚིགས་བཅད་འདོན་ཅིང་། རྟེན་ལ་མེ་ཏོག་གི་ཆར་ཕབ་པས་བཀྲ་ཤིས་པར་བསམས་ལ་མཆོད་བསྟོད་བསྡུས་པ་ཞིག་བྱའོ། །གསུམ་པ་ལ་མཇུག་གི་ཆོ་ག་ནི། གཏོར་མ་སྦྱིན་དང་ཆོས་སྐྱོང་བསྒོ། །ཡོན་བདག་བསྒོ་ཞིང་ཤིས་པ་བརྗོད། །རྟེན་མཆོད་བསོད་ནམས་ཡོངས་སུ་བསྔོ། །སློབ་དཔོན་མཆོད་དེ་དགའ་སྟོན་བྱ། །སླར་ཡང་ཤིས་པ་རྒྱས་པར་བརྗོད། །རྗེས་བསྡུ་སྦྱིན་སྲེག་མཇུག་དོན་ནོ། །ཞེས་པ་ལྟར་བཅུ་གཅིག་ལས། དང་པོ་གཏོར་མ་སྦྱིན་པ་ནི། གཏོར་མ་རྣམས་བསང་སྦྱང་བྱིན་གྱིས་བརླབས་ལ། དང་པོ་ལྷ་དང་འབྱུང་པོ་ཐ་མི་དད་ཀྱི་ཆོ་གས་འདས་པ་དང་། གཉིས་པ་ནག་པོ་ཆེན་པོ་ལྕམ་དྲལ་དང་། གསུམ་པ་གདོང་བཞི་པ་དང་། བཞི་པ་ལས་མགོན་དང་། ལྔ་པ་མཁའ་འགྲོ་སྤྱི་གཏོར་གྱིས་དབུལ་ལོ། །གཉིས་པ་ཆོས་སྐྱོང་བསྒོ་བ་ནི། གཙུག་ལག་ཁང་ངམ་མཆོད་རྟེན་གང་ལ་གཏད་པར་འདོད་པའི་ཆོས་སྐྱོང་ལ་གཏོར་མ་རྒྱ་ཆེན་པོ་ཕུལ་ལ། ཁྱེད་ཀྱིས་རབ་ཏུ་གནས་པ་ལེགས་པར་བྱས་པའི་རྟེན་འདི་ལ་བསྲུང་བ་དང་། སྐྱོང་བར་གྱིས་ཤིག་ཅེས་བརྗོད། དེ་ནུས་པ་བསྐྱེད་པའི་ཕྱིར་རྡོ་རྗེའི་གོ་ཆའི་ཕྱག་རྒྱ་དང་། ཨོཾ་བཛྲ་རཀྵ་ཧཾ། ཞེས་བརྗོད་པས་རྡོ་རྗེའི་གོ་བསྐོན་པས་ནུས་པ་བསམ་གྱིས་མི་ཁྱབ་པ་དང་ལྡན་པར་བསམས་ལ། དེ་བདག་གིས་བཀའ་ལས་མི་འདའ་བའི་ཕྱིར་རྡོ་རྗེ་ཐོགས་ནས། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་གྱིས་བརླབས། །གལ་ཏེ་དམ་ལས་འདས་གྱུར་ན། །ཞིག་འགྱུར་འདི་ལ་ཐེ་ཚོམ་མེད། །ཨོཾ་མ་ཧཱ་ས་མ་ཡ་ཧ་ན་ཧཱུྃ་ཕཊ། ཅེས་བརྗོད། ཡང་དེའི་མགོ་བོར་རྡོ་རྗེ་བཞག་པར་བསམས་ལ། བདག་དང་ཡོན་བདག་འཁོར་དང་བཅས་པ་ལ་བསྲུང་བ་དང་། བསམས་པ་ཐམས་ཅད་འགྲུབ་པ་དང་། རྟེན་འདི་ལ་མཆོད་པ་བསམ་གྱིས་མི་ཁྱབ་པ་རྒྱུན་མི་ཆད་པར་གྱིས་ཤིག ཅེས་དམ་ལ་གཞག་གོ། །།གསུམ་པ་ཡོན་བདག་བསྒོ་བ་ནི། མདུན་དུ་སྟན་སེར་པོའི་སྟེང་དུ་སྦྱིན་བདག་ཐལ་མོ་སྦྱར་ནས་འདུག་ཏུ་བཅུག་ལ། ཁྱོད་ཀྱིས་ང་ལ་གང་གསོལ་བའི། །སྐུ་གཟུགས་དག་ནི་ཁྱད་པར་དུ། །ཇི་ལྟར་གསུངས་པ་ཇི་བཞིན་དུ། །དེ་དག་དོན་ནི་ངས་བྱས་ཏེ། །དེ་རྣམས་དོན་ནི་གྲུབ་ཟིན་གྱི། །ཅི་བདེ་བར་ནི་མཆོད་པར་བྱོས། །ཞེས་དང་། ཁྱོད་ཀྱིས་ང་ལ་གསོལ་བ་བཏབ་པའི་རབ་ཏུ་གནས་པ་དེ་ལེགས་པར་ཚར་བར་བྱས་ཀྱི། རྟེན་འདི་ལ་ཞག་བདུན་དུ་མཆོད་པ་རྒྱ་ཆེན་པོ་གྱིས་ཤིག དེ་ནས་ཀྱང་ཅི་འབྱོར་བའི་མཆོད་པས་རྒྱུན་མི་ཆད་པར་མཆོད་པ་གྱིས་ཤིག་ཅེས་བསྒོའོ། །བཞི་པ་ཤིས་པ་བརྗོད་པ་ནི། ལས་ཐམས་ཅད་པའི་བུམ་པ་དང་སྔགས་ཀྱིས་ཡོན་བདག་བསང་ལ། དེ་སྐད་ཅིག་གིས་ཡི་དམ་གྱི་ལྷར་བསམས་ཏེ། མེ་ཏོག་གི་ཕྲེང་བ་འཛིན་དུ་བཅུག་ནས། སློབ་དཔོན་གྱིས་ཁྲོ་བོ་སྤྱན་དྲངས་ཞིང་། བསྟོད་པ་དང་བདེན་པ་བརྡར་ནས། སྦྱིན་བདག་འཁོར་བཅས་བཀྲ་ཤིས་པར་བྱེད་པ་ལ་བར་དུ་གཅོད་པར་རྩོམ་པའི་བགེགས་ཀྱི་ཚོགས་ཐམས་ཅད་སའི་ཕྱོགས་འདིར་མ་གནས་པར་གཞན་དུ་སོང་ཤིག ཅེས་བརྗོད་ལ། ལས་ཐམས་ཅད་པ་བཟློས་ཤིང་རོལ་མོ་དྲག་ཏུ་བྱས་ལ་བགེགས་བསལ་ལོ། །དེ་ནས་བཀྲ་ཤིས་ཀྱི་རྫས་བརྒྱད་མདུན་དུ་འདུས་བྱས་ལ་བསང་སྦྱངས་ཏེ། སྟོང་པའི་ངང་ལས་མྃ་ལས་བྱུང་བའི་བཀྲ་ཤིས་པའི་རྫས་བརྒྱད་སྦྱིན་བདག་ལ་སོགས་པའི་སེམས་ཅན་ཐམས་ཅད་ཀྱི་ཚེ་དང་། བསོད་ནམས་དང་། དཔལ་དང་འབྱོར་པ་ཐམས་ཅད་རྒྱས་པའི་ནུས་པ་དང་ལྡན་པར་བསམས་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས་ལ་དཔོན་སློབ་ཐམས་ཅད་ཀྱིས་མགྲིན་གཅིག་ཏུ། མེ་ལོང་ཡེ་ཤེས་རྒྱ་མཚོ་ཆེན་པོ་ཡི། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཐོགས་མེད་ཆོས་ལ་ལོངས་སྤྱོད་པའི། །བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །སྔོན་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕྱག་ཏུ་ཕུལ་བ་ན་བཀྲ་ཤིས་པའི་རྫས་སུ་བྱིན་གྱིས་བརླབ་པ་དེ་བཞིན་དུ། དེང་འདིར་ཡང་རབ་ཏུ་གནས་པ་ལེགས་པར་བྱས་པའི་རྟེན་འདི་དང་། སྦྱིན་བདག་གིས་ཐོག་དྲངས་པའི་སེམས་ཅན་ཐམས་ཅད་མེ་ལོང་གི་རྫས་ལ་བརྟེན་ནས་ཤིན་ཏུ་བཀྲ་ཤིས་པར་གྱུར་ཅིག ཅེས་བརྗོད་དོ། །དེ་བཞིན་དུ་འོག་མ་རྣམས་ལའང་འདྲ་བར་སྦྱར་ལ། གི་ཝང་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ཏེ། །ཉོན་མོངས་ཟུང་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་དག་གྱུར་ཅིག །སྔོན་བཅོམ་ལྡན་འདས་ལ་གླང་པོ་ཆེ་ས་སྲུང་གིས་གི་ཝང་ཕྱག་ཏུ་ཕུལ་བ་ན་ཞེས་སོགས་སྦྱར། ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་རྣམ་རྟོགས་ནས། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་བར་ཤོག །སྔོན་བཅོམ་ལྡན་འདས་ལ་ཞིང་པའི་བུ་མོ་ལེགས་སྐྱེས་མས་ཞོ་ཕྱག་ཏུ་ཕུལ་བ་ན་ཞེས་སོགས་སྦྱར། དཱུརྦས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་བསྒྲུབས་ནས། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ཀྱང་ཚེ་ནི་འཕེལ་གྱུར་ཅིག །སྔོན་བཅོམ་ལྡན་འདས་ལ་རྩ་འཚོང་བཀྲ་ཤིས་ཀྱིས་རྩ་དཱུརྦ་ཕྱག་ཏུ་ཕུལ་བ་ན་ཞེས་སོགས་སྦྱར། བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་འདི་འགྲུབ་པར་ཤོག །སྔོན་བཅོམ་ལྡན་འདས་ལ་ལྷ་ཚངས་པས་ཤིང་ཐོག་བིལ་བ་ཕྱག་ཏུ་ཕུལ་བ་ན་ཞེས་སོགས་སྦྱར། དུང་ནི་ཆོས་ཀྱི་སྒྲ་རྣམས་སྒྲོགས་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིགས་ལ་དབང་ཐོབ་ཤོག །སྔོན་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕྱག་ཏུ་ཕུལ་བ་ན་ཞེས་སོགས་སྦྱར། ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ནོར་དབང་དུ་འདུས་ནས་ཀྱང་། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་ཁྱེད་སྲིད་བརྟན་གྱུར་ཅིག །སྔོན་བཅོམ་ལྡན་འདས་ལ་བྲམ་ཟེ་སྐར་རྒྱལ་གྱི་བུས་ལི་ཁྲི་ཕྱག་ཏུ་ཕུལ་བ་ན་ཞེས་སོགས་སྦྱར། ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་རབ་བྱེད་ཅིང་། །མཐུ་སྟོབས་ཡོན་ཏན་ཕུན་སུམ་ཚོགས་པ་ཡི། །བཀྲ་ཤིས་དེས་ཀྱང་བགེགས་རྣམས་ཞི་བར་ཤོག །སྔོན་བཅོམ་ལྡན་འདས་ལ་གསང་བའི་བདག་པོ་ཕྱག་ན་རྡོ་རྗེས་ཡུངས་ཀར་ཕྱག་ཏུ་ཕུལ་བ་ན་ཞེས་སོགས་སྦྱར་བའི་བཀྲ་ཤིས་བརྗོད་ཅིང་། བཀྲ་ཤིས་ཀྱི་རྫས་རྣམས་རྟེན་ལ་དབུལ་ཞིང་། ཡོན་བདག་རྣམས་ཀྱང་རེག་ཏུ་གཞུག་གོ། །།ལྔ་པ་རྟེན་ལ་མཆོད་པ་ནི། རབ་ཏུ་གནས་པའི་ལྷའི་མདུན་དུ་མཆོད་པ་གསར་པ་ཅི་འབྱོར་པ་བཤམས་ལ། ཇི་ལྟར་འབྱོར་པའི་ཚིགས་སུ་བཅད་པས་མཆོད་ཅིང་། བསྟོད་པ་དང་། ཕྱག་དང་། བསྐོར་བ་ཅི་ནུས་སུ་བྱའོ།། །།དྲུག་པ་བསོད་ནམས་བསྔོ་བ་ནི། སློབ་དཔོན་དཔོན་སློབ་ཀྱིས་ཡན་ལག་བདུན་པ་རྒྱས་བསྡུས་གང་རུང་སྔོན་དུ་འགྲོ་བས་བསྔོ་བ་སྨོན་ལམ་རྣམ་པར་དག་པ་བྱའོ།། །།བདུན་པ་སློབ་དཔོན་མཆོད་པ་ནི། སྦྱིན་བདག་གིས་སློབ་དཔོན་དང་དགེ་འདུན་ལ་བསྙེན་བཀུར་དང་ཡོན་དབུལ་བར་བྱའོ།། །།བརྒྱད་པ་དགའ་སྟོན་བྱ་བ་ནི། རབ་གནས་རྒྱས་པར་བྱ་བའི་དོན་དུ་གནས་ཁང་དེ་ཉིད་དམ་གཞན་དུའང་རུང་སྟེ་སློབ་དཔོན་དང་། དགེ་འདུན་དང་། བཟོ་བོ་དང་། གྲོགས་བྱེད་པ་དང་། ཞལ་ཏ་བ་རྣམས་ལ་དགའ་སྟོན་གྱི་བསྙེན་བཀུར་རྒྱས་པར་བྱ་ཞིང་། སྔར་གྱི་ཙཱ་རུའི་བཟའ་བ་ལྷ་ལ་ཕུལ་བའི་ལྷག་མ་རྣམས་ཚོགས་པ་ཐམས་ཅད་ལ་དྲང་ཞིང་། བདེ་གཤེགས་ལྷག་མ་འདི་དག་ནི། །ཟོ་ཞིག་སྡིག་པ་བྱང་བར་འགྱུར། །ཞེས་བརྗོད་དོ།། །།དགུ་པ་སླར་ཡང་ཤིས་པར་བྱ་བ་ནི། བཀྲ་ཤིས་ཀྱི་ཚིགས་སུ་བཅད་པ་ཅི་ཤེས་པས་དེར་ཚོགས་པ་རྣམས་བཀྲ་ཤིས་པར་བྱ་ཞིང་། རྟེན་མཆོད་པའི་བསམ་པས་གླུ་དང་། གར་དང་། རོལ་མོ་ལ་སོགས་པ་ཅི་ནུས་པར་བྱའོ།། །།བཅུ་པ་ལས་ཀྱི་རྗེས་བསྡུ་བ་ནི། སློབ་དཔོན་དཔོན་སློབ་རྣམས་ཀྱིས་རབ་གནས་ཀྱི་མངའ་དབུལ་དང་། ཁྲུས་སྟེགས་ལ་སོགས་པ་རྣམས་བསྡུ་ཞིང་། ལས་ཀྱི་རྗེས་མི་མངོན་པར་བྱས་ལ། རྙེད་པ་རྣམས་ཀྱང་བགོས་ཏེ། གོས་ཟུང་ལ་སོགས་པ་རྣམས་ནི་འཕན་དང་རྒྱལ་མཚན་དུ་བྱས་ཏེ་མཆོད་རྟེན་ནམ་གཙུག་ལག་ཁང་དུ་དབུལ། དཀྱིལ་འཁོར་མཆོད་པའི་ཡོ་བྱད་དམན་མ་རྣམས་ཕོངས་པ་དང་མགོན་མེད་པ་རྣམས་ལ་སྦྱིན་ཞིང་། ཁྱི་དང་། བྱ་རོག་སོགས་ལ་ནི་ལྷག་པར་དཀོར་དུ་འགྱུར་བས་མི་སྦྱིན་པར་བཤད་དོ།། །།བཅུ་གཅིག་པ་སྦྱིན་སྲེག་བྱ་བ་ནི། ཆོ་གའི་ལྷག་ཆད་ཁ་བསྐང་བའི་ཕྱིར་མཚན་མོ་ཞི་བའི་སྦྱིན་སྲེག་བྱ་ཞིང་མ་གྲུབ་ན་ཡི་གེ་བརྒྱ་པ་མང་དུ་བཟླའོ། །ཡོན་བདག་གིས་ཀྱང་ཞག་བདུན་དུ་རྟེན་ལ་མཆོད་པ་བར་མ་ཆད་དུ་དབུལ་ཞིང་། དེ་ནས་ཀྱང་ཅི་ནུས་པའི་མཆོད་པ་བྱ་སྟེ་ཆོ་ག་འབྲིང་གི་རིམ་པའོ། །བསྡུས་པ་དང་། རྒྱས་པ་ནི་རབ་གནས་དོན་གསལ་ལྟར་ཤེས་པར་བྱའོ།། །།དགེ་ལེགས་རྒྱ་མཚོའི་དཔལ་གནས་ཆོ་ག་འདི། །འདུན་ལྡན་སློབ་མས་ཡང་ཡང་བསྐུལ་བའི་ངོར། །དཔལ་ལྡན་ས་སྐྱའི་རྗེ་བཙུན་མཆོག་དག་གིས། །ལེགས་པར་བཀྲལ་ཤིང་བླ་མའི་ཕྱག་ལེན་ལྟར། །ཇི་ལྟའི་གནས་ལུགས་འབྱེད་པའི་བཞིན་རས་གསལ། །ཇི་བཞིན་མཐོང་བ་བརྒྱུད་པའི་མིག་ལྡན་ཞིང་། །ཇི་སྙེད་གཞུང་བཟང་ཐོས་པའི་རྣ་བ་ཅན། །ཇི་ཙམ་སྨྲ་ལ་འཇིགས་མེད་སེང་གེས་སྦྱར། །དགེ་ཚོགས་རིན་ཆེན་གང་ཞིག་ཐོབ་པ་དེས། །མཁའ་མཉམ་འགྲོ་བའི་དབུལ་བ་ཀུན་སེལ་ཞིང་། །རྒྱལ་བའི་བསྟན་དང་བསྟན་འཛིན་སྐྱེས་བུ་རྣམས། །འཕེལ་ཞིང་རྒྱས་པའི་དཔལ་དུ་འགྱུར་བར་ཤོག། །།དཔལ་ཀྱཻ་རྡོ་རྗེའི་རྣལ་འབྱོར་གྱིས་རྟེན་ལ་རབ་ཏུ་གནས་པར་བྱ་བའི་ཆོ་ག་དགེ་ལེགས་རྒྱ་མཚོ་ཞེས་བྱ་བ་འདི་ནི། དོན་གཉེར་གྱི་སློབ་མ་དགེ་འདུན་དཔལ་གྱིས་བསྐུལ་བའི་ངོར་རྩོད་པའི་དུས་ཀྱི་རྡོ་རྗེ་འཆང་ཀུན་དགའ་བཟང་པོ་ཡབ་སྲས་ཀྱི་ཞབས་རྡུལ་སྤྱི་བོས་བླངས་པ་མང་དུ་ཐོས་པའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོས་བགྱིས་སོ།། །།འདི་བསྒྲུབས་པ་ལས་བྱུང་བ་ཡི། །དགེ་བ་དེ་ནི་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ།། །།

མགོན་པོའི་སྲུང་འཁོར།

མགོན་པོའི་སྲུང་འཁོར་བཞུགས་སོ།། བླ་མ་དང་དཔལ་ནག་པོ་ཆེན་པོ་ལ་ཕྱག་འཚལ་ལོ། །ནག་པོ་ཆེན་པོ་ལ་བརྟེན་པའི་སྲུང་འཁོར་ལ། རང་བསྲུང་བ་དང་། གནོད་པ་ཕྱིར་བཟློག་གཉིས་ལས། དང་པོ་ནི་སྐྱབས་འགྲོ་སེམས་བསྐྱེད་སྔོན་དུ་སོང་ནས། རང་སྐད་ཅིག་གིས་དཔལ་རྡོ་རྗེ་ནག་པོ་ཆེན་པོར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་སེམས་གཟུང་འཛིན་དང་བྲལ་བའི་ཡི་གེ་ཧཱུྃ་སྔོན་པོ། དེ་ལས་འོད་ཟེར་འཕྲོས་པས། རང་བཞིན་གྱི་གནས་ནས་དཔལ་ནག་པོ་ཆེན་པོ་སྲུང་བའི་འཁོར་ལོ་དང་བཅས་པ་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿཞེས་པས་བླ་མ་དང་། ན་མཿཤྲཱི་མ་ཧཱ་ཀཱ་ལ་མཎྜ་ལ་བྷྱཿཞེས་པས་ནག་པོ་ཆེན་པོ་ལ་ཕྱག་བྱ། ཨོཾ་ཤྲཱི་མཎྜ་ལ་ས་པ་རི་ཝཱ་ར་ཞེས་པ་ཀུན་ལ་སྦྱར་བའི་ཨརྒྷཾ་ནས་ཤབྡའི་བར་གྱིས་མཆོད། གུར་ནས་འབྱུང་བའི་རྒྱུན་བཤགས་ལན་གསུམ་དང་། ཚད་མེད་བཞི་བསྒོམ་པ་ནི་བསོད་ནམས་ཀྱི་ཚོགས་སོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་སྣང་བ་ཐམས་ཅད་སྟོང་པར་བསྒོམས་པ་ནི་ཡེ་ཤེས་ཀྱི་ཚོགས་སོ། །སྟོང་པའི་ངང་ལས་ཧཱུྃ་ཡིག་ལས་བྱུང་བའི་རྡོ་རྗེའི་དྲག་རྫོང་ཟུར་གསུམ་པ་ཡངས་ཤིང་རྒྱ་ཆེ་བའི་དབུས་སུ་ཨེ་ལས་ཆོས་ཀྱི་འབྱུང་གནས་གྲུ་གསུམ་མཐིང་ནག་གི་ནང་དུ་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཞེས་སོགས་ཐུན་མོང་གི་སྲུང་འཁོར་ཀྱཻ་རྡོར་ལྟར་བསྒོམས་ལ། དེ་ལྟ་བུའི་སྲུང་བའི་འཁོར་ལོའི་དབུས་སུ་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་བྷྲཱུྃ་མཐིང་ནག་འོད་དུ་ཞུ་བ་ལས་སྲུང་བའི་འཁོར་ལོ་མཐིང་ནག་རྩིབས་བཅུ་པ། རྩེ་མོ་རྣོ་བ། ཁོག་པ་སྟོང་པ། ཡངས་ཤིང་རྒྱ་ཆེ་བའི་ནང་གི་དབུས་དང་། ཕྱོགས་བཅུར་པདྨ་དང་ཉི་མའི་དཀྱིལ་འཁོར་རེ་རེ། དེ་རྣམས་ཀྱི་སྟེང་དུ་རོ་མགོ་བོ་གཡས་སུ་བསྟན་པ་རེ་རེ། དེ་རྣམས་ཀྱི་སྟེང་དུ་ཧཱུྃ་ལས་གྲི་གུག་ཧཱུྃ་གིས་མཚན་པ་རེ་རེ། དེ་དག་ལས་འོད་ཟེར་འཕྲོས། དགྲ་བགེགས་གདུག་པ་ཅན་རྣམས་ཚར་བཅད། ཚུར་འདུས་ཡོངས་སུ་གྱུར་པ་ལས་ཁྲོ་བོ་བཅུ་གཅིག་ཏུ་གྱུར་པ་ནི། དབུས་སུ་རང་ཉིད་དཔལ་རྡོ་རྗེ་ནག་པོ་ཆེན་པོ་ཆེར་འབར་བ་ཞེས་པ་ནས་མིའུ་ཐུང་གེལ་བའི་འདུག་སྟངས་ཀྱིས་རོའི་གདན་ལ་འདུག་པ་ཞེས་པའི་བར་གཏོར་ཆོག་ལྟར་གསལ་གདབ། ཕྱོགས་བཅུའི་མགོན་པོ་རྣམས་ནི་ཞལ་གཅིག་ཕྱག་གཉིས། གཡས་གྲི་གུག་ནམ་མཁའ་ལ་འཕྱར་ཞིང་། གཡོན་ཐོད་པ་ཁྲག་གིས་གང་བ་ཐུགས་ཀར་འཛིན་པ། སྤྱན་གསུམ་དང་ལྡན་པ་ཞེས་པ་ནས་ལྷབ་ལྷུབ་ཀྱིས་བཀླུབས་པ་ཞེས་པའི་བར་སྔ་མ་དང་འདྲ། དེ་ནས་ཞབས་གཡས་བསྐུམ་ཞིང་གཡོན་བརྐྱངས་པ། ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པར་བསྒོམ། གཙོ་བོ་ལ་གཎྜི་ཡོད་ལ། གཞན་རྣམས་ལ་གཎྜི་མེད་དོ། །དེ་ནས་གཙོ་བོའི་སྟེང་གི་ཕྱོགས་སུ་རིགས་ལྔའི་ངོ་བོ་ཁྱུང་ཆེན་ལྔ་ལྡིང་བ། གཡས་སུ་བྱ་ནག་གཤོག་སྐོར་བྱེད་པ། རྒྱབ་ཏུ་ཁྱི་ནག་འཁང་ཞིང་ཟུག་པ། གཡོན་དུ་ལྕེ་སྤྱང་འབྲོས་འདེད་བྱེད་པ། མདུན་དུ་མི་ནག་གནམ་དུ་འོ་དོད་འབོད་པ། སྲུང་བའི་འཁོར་ལོའི་ཕྱི་རོལ་རྡོ་རྗེའི་རྭ་གུར་གྱི་ནང་དུ་དུར་ཁྲོད་ཆེན་པོ་བརྒྱད། དེ་དག་ལ་གནས་པའི་ཕྱོགས་སྐྱོང་བཅུ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་བརྒྱད། རྒྱུ་སྐར་ཉི་ཤུ་རྩ་བརྒྱད། རྒྱལ་པོ་བཞི། འཇིགས་བྱེད་ཆེན་པོ་དགུ། གནོད་བྱིན་གྱི་སྡེ་དཔོན་བཅུ་གཉིས། གཞན་ཡང་ཞིང་སྐྱོང་དང་། ཤིང་དང་། ཆུ་དང་། མེ་དང་། མཆོད་རྟེན་དང་། གྲུབ་པ་ཐོབ་པའི་དཔའ་བོ་དང་། རྣལ་འབྱོར་མ་དང་། འདྲེ་དང་། སྲིན་པོ་དང་། རོ་ལངས་ལ་སོགས་པས་ཡོངས་སུ་བསྐོར་བའི་དུར་ཁྲོད་བསམ་མོ། །ལྷ་ཐམས་ཅད་ཀྱི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གའི་སྟོད་དུ་ཉི་མ་ལ་ཧཱུྃ་སྔོན་པོ། རང་གི་སྙིང་གའི་ས་བོན་ལས་འོད་ཟེར་འཕྲོས་པས་ཡེ་ཤེས་པ་ཚོགས་ཞིང་གི་སྐབས་ལྟར་སྤྱན་དྲངས། ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་མཆོད་ནས་ཛཿཧཱུྃ་བྃ་ཧོཿ གཉིས་སུ་མེད་པར་ཐིམ་པར་བསམ་མོ། །སླར་ཡང་སྙིང་གའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། སྔ་མ་བཞིན་མཆོད། བཅོམ་ལྡན་དེ་བཞིན་གཤེགས་པ་ཀུན། །ཞེས་སོགས་ཀྱིས་གསོལ་བ་བཏབ་པས། སངས་རྒྱས་རྣམས་ནི་ཞེས་སོགས་གསུང་ཞིང་བུམ་པའི་ཆུས་དབང་བསྐུར། སྐུ་གང་། དྲི་མ་དག ཆུ་ལྷག་མ་ཡར་ལུད་པ་ལས་ལྷ་ཐམས་ཅད་ལ་མི་བསྐྱོད་པ་རེ་རེས་དབུར་བརྒྱན་པར་བསམ་མོ། །དེ་ནས་འཁོར་ལོ་གཡས་སུ་འཁོར་བ་མི་མངོན་པར་མྱུར་དུ་འཁོར་བར་བསམ་ཞིང་། ཐོག་མར་སྔགས་ཐུང་དང་། དེ་ནས་སྔགས་རིང་ཅི་ནུས་བཟླ། སྔགས་རིང་བཟླ་བའི་ཚེ་མཱ་ར་ཡ་ཞེས་པའི་ཚིག་མི་འཇུག་གོ །གཉིས་པ་གནོད་པ་ཕྱིར་བཟློག་བསྒོམ་པའི་ཚུལ་ནི་བར་ཆད་ཀྱི་མཚན་མ་བྱུང་བའི་ཚེ་བཟློག་པར་འདོད་ན། ཡན་ལག་བཞི་རྫོགས་སུ་བསྒོམ་པ་ཡན་ཆད་སྔར་དང་འདྲ། དེ་ནས་རང་གི་སྙིང་གར་ཉི་མའི་སྟེང་དུ་ཧཱུྃ་ལས་གྲི་གུག་བསྒོམ། དེའི་ཡུ་བའི་ནང་དུ་ཉི་མའི་དཀྱིལ་འཁོར་གྱི་སྟེང་དུ་དབུས་སུ་རང་གི་རྣམ་པར་ཤེས་པ་ཧཱུྃ་ཡིག་སྔོན་པོར་བསྒོམ། གཞན་བསྲུང་བར་འདོད་ན་ཀྱཻ་རྡོར་བཞིན་བསྒོམ། དེ་དག་གི་མཐའ་མར་ནང་སྐོར་དུ་སྔགས་ཐུང་དང་། ཕྱི་སྐོར་དུ་སྔགས་རིང་གཡས་སྐོར་དུ་འཁོར་བར་བསམ། འཁོར་ལོའི་འོག་གི་རྩིབས་ཀྱི་འོག་ཏུ་གནོད་བྱེད་བསྒོམས་ནས་དེའི་སྤྱི་བོར་རྩེ་མོ་ཟུག་པར་བསམ། ཕྱོགས་མཚམས་ཀྱི་རྩིབས་རྣམས་ཀྱི་བར་དུ་རླུང་མེའི་དཀྱིལ་འཁོར་གྱི་སྟེང་དུ་གནོད་བྱེད་ལུས་རིད་པ། སྐྲ་འཛིངས་པ། ཁ་ནས་ཁྲག་འཛག་པ། སྤྱིའུ་ཚུགས་སུ་འདུག་པར་བསམ། དེ་ནས་རང་གི་སྙིང་ག་ནས་ཁྲོ་བོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས། གནོད་བྱེད་རྣམས་བཀུག་ནས་སྔར་གྱི་དེ་དག་ལ་བསྟིམ། སྔགས་བཟླ་བའི་ཚེ་འཁོར་ལོ་གཡོན་དུ་འཁོར། ཁྲོ་བོ་བཅུ་པོ་ཞལ་ཕྱིར་གཟིགས་པས་དེ་དག་གི་ལུས་དུམ་བུར་གཏུབས། ཀླད་པ་ཐར་ཐོར་དུ་ཐོར་བར་བསམ། ཡང་རང་གི་སྙིང་གའི་ཧཱུྃ་ལས་འོད་ཟེར་འཕྲོས། ཕྱི་རིགས་འཇིག་རྟེན་སྐྱོང་བ་རྣམས་ལ་ཕོག་པས། དེ་དག་གིས་སྲོག་སྙིང་འོད་ཟེར་གྱི་རྣམ་པར་རང་ལ་ཕུལ་ནས་སྤྲུལ་པ་ཕྱོགས་བཅུར་སོང་སྟེ་གནོད་བྱེད་ཚར་བཅད་པར་བསམས་ནས་ཐོག་མར་སྔགས་ཐུང་དང་། དེ་ནས་སྔགས་རིང་བཟླས་པའི་ཚེ་ཏ་དཱ་ཡན་ཆད་དཀྱུས་བཞིན་བཟླ། དེ་ནས་བྱད་མ་ཨི་དཾ་དུཥྚཾ། བྱད་མ་ཁ་ཁ་ཁཱ་ཧི་ཁཱ་ཧི། བྱད་མ་མཱ་ར་མཱ་ར། བྱ་མ་གྲྀཧྞ་གྲྀཧྞ། བྱད་མ་བནྡྷ་བནྡྷ། བྱད་མ་ཧ་ན་ཧ་ན། བྱད་མ་ད་ཧ་ད་ཧ། བྱད་མ་པ་ཙ་པ་ཙ། བྱད་མ་དཱི་ན་མེ་ཀེ་ན་མཱ་ར་ཡ་ཧཱུྃ་ཧཱུྃ་ཕཊ། ཅེས་པ་དྲུག་ཅུ་རེའི་མཚམས་ནས་གང་དག་བདག་ཅག་ཅེས་སོགས་དམོད་པ་བོར་བ་ཀྱཻ་རྡོར་བཞིན་བྱ། ཐུན་འཇོག་ཁར་འཁོར་ལོ་གཡས་སུ་འཁོར། ཁྲོ་བོ་རྣམས་ཞལ་ནང་དུ་གཟིགས་པའི་དབུས་སུ་རང་ཉིད་ཡོད་པར་བསམས་ཏེ་བསྔོ་བ་སྨོན་ལམ་བྱའོ། །ནན་ཆེས་པས་བྲིས་པ་ཡིན་གྱི། ཅི་ཡིན་ལ་མ་སྟོན་ཅིག །དགེའོ།། །།

ལམ་དུས་ཀྱི་དབང་བསྐུར་བ་དང་། གསོ་བ་དང་། བིར་སྲུང་ཐུན་མོང་མ་ཡིན་པའི་ཕྱག་ལེན་རྣམས།

ལམ་དུས་ཀྱི་དབང་བསྐུར་བ་དང་། གསོ་བ་དང་། བིར་སྲུང་ཐུན་མོང་མ་ཡིན་པའི་ཕྱག་ལེན་རྣམས་བཞུགས་སོ།། བླ་མ་དང་དཔལ་ཀྱཻ་རྡོ་རྗེ་ལ་ཕྱག་འཚལ་ལོ། །ཀྱཻ་རྡོ་རྗེའི་ལུས་ཀྱི་དཀྱིལ་འཁོར་དུ་དབང་གི་ཆུ་བོ་མ་ནུབ་པར་བསྐུར་བའི་ཚུལ་ལ་དོན་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་ཕྱག་དར་བྱས་ཏེ། བླ་མ་ལ་སོགས་པའི་རྟེན་ཇི་ལྟར་འོས་པའི་སར་བཞུགས་སུ་གསོལ་བའི་དྲུང་དུ། ཆུ་བཞི་སྔོན་དུ་འགྲོ་བའི་ཉེར་སྤྱོད་ལྔ་དང་། གཏོར་མ་ལྔ་ཚུལ་བཞིན་དུ་བཤམ། བླ་རེ་ལ་སོགས་པའི་རྒྱན་གྱིས་མཛེས་པར་བྱ། རྣམ་པར་རྒྱལ་པའི་བུམ་པ་ཆོ་ག་བཞིན་དུ་བཤམ། འོག་ཏུ་སློབ་མ་ལ་དགོས་པའི་གདོང་གཡོགས་དང་། མེ་ཏོག་གི་ཕྲེང་བ་དང་། དབུ་རྒྱན་དང་། རྡོ་རྗེ་དྲིལ་བུ་རྣམས་སློབ་མའི་གྲངས་དང་མཉམ་པའམ། ཇི་ཙམ་འབྱོར་པ་བཤམ་མོ། །སློབ་དཔོན་རང་ཉིད་ཀྱི་མདུན་དུ་ནང་མཆོད། རྡོ་རྗེ་དྲིལ་བུ་རྣམས་ཀྱང་བཤམ། དེ་ལས་གཞན་ཚོམ་བུའི་དཀྱིལ་འཁོར་དང་། རས་བྲིས་ལ་སོགས་པ་རྣམས་ནི་འདིར་མི་དགོས་གསུང་ངོ་། །གཉིས་པ་ལ་གཉིས་ཏེ། སློབ་དཔོན་རང་ཉིད་ཀྱི་བྱ་བ་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ལ་བཞི་སྟེ། བདག་ཉིད་སངས་རྒྱས་སུ་བསྐྱེད་པ། བུམ་པ་བཟླས་པ། བདག་ཉིད་འཇུག་ཅིང་དབང་བླང་བ། དམ་ཚིག་ཅན་ལ་གཏོར་མ་དབུལ་བའོ། །དང་པོ་ནི། སྐྱབས་འགྲོ་ནས་བརྩམས་ཏེ་ཀྱཻ་རྡོ་རྗེའི་བསྐྱེད་རིམ་ཡན་ལག་དྲུག་པ་ལུས་དཀྱིལ་དང་བཅས་པ་བསྒོམས་ནས། ལམ་དུས་ཀྱི་དབང་བླངས་ཏེ་བཟླས་པ་ཅུང་ཟད་བྱས་ནས་དཀྱིལ་འཁོར་བསྡུས་ལ་རང་གཙོ་བོ་ཡབ་ཡུམ་གྱི་ང་རྒྱལ་གྱིས་གནས་པར་བྱའོ། །གཉིས་པ་ནི། རྣམ་རྒྱལ་བུམ་པའི་ནང་དུ་ལྷ་དགུ་བསྐྱེད་པ་ནས་ལྷ་ཞུ་བའི་བར་དབང་གི་ཆུ་བོ་ཇི་ལྟ་བ་བཞིན་བྱའོ། །གསུམ་པ་ནི། རང་གི་མདུན་དུ་སྟེགས་ཀྱི་སྟེང་དུ་རྣམ་རྒྱལ་བུམ་པ་དང་། དབུ་རྒྱན་དང་། རྡོ་རྗེ་དྲིལ་བུ་དང་། མཎྜལ་མེ་ཏོག་དང་བཅས་པ་རྣམས་བཞག་སྟེ། ཡིད་ཀྱིས་མདུན་གྱི་ནམ་མཁར་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཉི་མ་བདུད་བཞི་བརྩེགས་པའི་སྟེང་དུ་རང་གི་རྩ་བའི་བླ་མ་དེ་ཉིད་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པའི་ལུས་ལ་ལུས་དཀྱིལ་གྱི་ལྷ་རྣམས་ཚང་བར་བཞུགས་པ་མངོན་སུམ་ལྟར་དམིགས་ནས། དེའི་མདུན་དུ་མཎྜལ་ཕུལ་ཏེ་དགའ་ཆེན་ཁྱོད་བདག་གིས་གསོལ་བ་གདབ་པ་ནས་དབང་བཞི་པ་རྫོགས་ཀྱི་བར་འོག་ཏུ་སློབ་མ་ལ་ཇི་ལྟར་བསྐུར་བ་ལྟར་རང་ཉིད་ཀྱིས་བདག་འཇུག་གི་ཚུལ་དུ་བླང་ངོ་། །བཞི་པ་ནི། གཏོར་མ་དང་པོ་མདུན་བསྐྱེད་དང་མ་འབྲེལ་བའི་ལྷ་དང་འབྱུང་པོ་ཐ་མི་དད་ཀྱི་ཚོགས་འདས་པ་ལ་དབུལ། གཉིས་པ་ནག་པོ་ཆེན་པོ་ལྕམ་དྲལ། གསུམ་པ་གདོང་བཞི་པ། བཞི་པ་པུ་ཏྲ་མིང་སྲིང་། ལྔ་པ་མཁའ་འགྲོ་སྤྱི་གཏོར་གྱིས་དབུལ་ལ། རྡོ་རྗེའི་གླུ་བཀྲ་ཤིས་ཀྱི་ཚིགས་བཅད་བསྔོ་བ་སྨོན་ལམ་གྱི་བར་བྱའོ། །གཉིས་པ་ནི། སློབ་མ་རང་ཉིད་ཀྱིས་རྒྱུ་དུས་ཀྱི་དབང་གིས་སྨིན་པར་བྱས་པ་རྣམས་བོས་ཏེ། ཁྲུས་བྱས་གྲལ་དུ་འཁོད་པ་ལ་མེ་ཏོག་བཀྲམ་པ་བསྡུས་ནས། རྒྱུ་དུས་དང་། ལམ་དུས་དང་། འབྲས་དུས་ཀྱི་དབང་རྣམས་གང་གིས་བསྐུར་བའི་སློབ་དཔོན། གང་ལ་བསྐུར་བའི་སློབ་མ། ཇི་ལྟར་བསྐུར་བའི་ཆོ་ག གང་ལས་བསྐུར་བའི་དཀྱིལ་འཁོར་རྣམས་ཀྱི་གོ་བ་ལེགས་པར་བཤད་ནས། དེ་རྣམས་ཀྱི་ནང་ནས་འདིར་ལམ་དུས་ཀྱི་དབང་ཞུ་བའི་ཡོན་དུ་མཎྜལ་ཕུལ་ཞེས་བརྗོད་ལ་འབུལ་དུ་གཞུག དེ་ནས་དགའ་ཆེན་ཁྱོད་བདག་སོགས་ལན་གསུམ་གྱིས་གསོལ་བ་གདབ། དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་གྱིས་རྒྱུན་བཤགས་བྱ། སྲས་བཅས་སངས་རྒྱས་སོགས་ལན་གསུམ་གྱིས་རིགས་ལྔའི་སྡོམ་པ་བཟུང་ནས། སྔོན་ཆད་ལུས་ཀྱི་དཀྱིལ་འཁོར་མ་མཐོང་བའི་བརྡར་རས་ཡུག་དམར་པོས་གདོང་བཅིང་། ལུས་དཀྱིལ་གྱི་གཙོ་བོ་ཐུགས་རྡོ་རྗེ་དང་མཇལ་བ་ལ་ལག་སྟོང་དུ་མཇལ་མི་ཉན་པས་མེ་ཏོག་གི་ཕྲེང་བ་རེ་ལག་ཏུ་གཏད། ལུས་དཀྱིལ་གྱི་ཐུགས་རྡོ་རྗེའི་ཐུགས་ཀ་ནས་བདུད་རྩི་འཁྱིལ་བ་དཔག་ཏུ་མེད་པ་སྤྲོས་ཏེ་དབང་བསྐུར་བ་ཟབ་མོ་ཞུ་བ་ལ་བར་དུ་གཅོད་པར་བྱེད་པའི་བགེགས་དང་ལོག་འདྲེན་ཐམས་ཅད་བསྐྲད་པར་བསམས་ལ། བདུད་རྩི་འཁྱིལ་པའི་སྔགས་བརྗོད། བུམ་ཆུ་གཏོར་བ་འདིར་མི་མཛད། དེ་ནས་འདོད་པ་དྲི་ཞིང་ལན་གདབ་པ་དང་། སེམས་བསྐྱེད་པ་དང་། གསང་བར་གདམས་པ་གསུམ་ནི་དབང་ཆུ་ལྟར་བྱའོ། །དེ་ནས་བླ་མའི་ལུས་ལ་གདན་གསུམ་ཚང་བའི་དཀྱིལ་འཁོར་གྱི་ལྷ་ཚོགས་བཞུགས་པའི་མདུན་དུ་ཕྱིན་པར་མོས་ལ་འདིའི་རྗེས་ཟློས་མཛོད། ཧཱུྃ་ཛཿཧཱུྃ་ཞེས་བརྗོད་པ་ནི་ཕྱིའི་འཇུག་པའོ། །ནང་གི་འཇུག་པ་ལ་སྔོན་འགྲོ་དམ་ལ་གཞག་པ་བཞི་ནི་དབང་ཆུ་བཞིན་བྱའོ། །དངོས་གཞི་བྱིན་རླབས་ཀྱི་རིམ་པ་ཞུ་བའི་ཡོན་དུ་མཎྜལ་ཕུལ་ཞིང་གསོལ་བ་བཏབ་ནས། བྱིན་རླབས་ཀྱི་རིམ་པ་ལ་ལྔ་ཡོད་པའི་དང་པོ་བརྒྱུད་པའི་རིམ་པ་ནི། ཁྱེད་རང་རྣམས་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པའི་སྤྱི་བོར་པད་ཟླའི་སྟེང་དུ་རྩ་བའི་བླ་མ་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པ། སྐུ་ལ་ལུས་དཀྱིལ་གྱི་ལྷ་ཚང་བར་བཞུགས་པའི་སྤྱི་བོར་བླ་མ་དམ་པ་དཀོན་མཆོག་རྒྱལ་མཚན་ནས་བིརྺ་པའི་བར་དང་། དེའི་སྤྱི་བོར་སངས་རྒྱས་རྡོ་རྗེ་འཆང་། དེ་ཐམས་ཅད་ཀྱང་ཀྱཻ་རྡོ་རྗེ་ནས་ཚང་བར་བཞུགས་པའི་བར་སྔ་མ་ལྟར་བརྗོད་ལ། རང་རང་གི་ཐུགས་ཀ་ནས་འོད་ཟེར་འཕྲོས་པས་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། བླ་མ་སོ་སོའི་སྐུ་ལ་གཉིས་སུ་མེད་པར་ཐིམ་པས། བླ་མ་སངས་རྒྱས་བྱང་སེམས་ཐམས་ཅད་འདུས་པའི་ངོ་བོར་མོས་ཤིང་། གུས་འདུད་དྲག་པོས་གསོལ་བ་བཏབ་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། དེ་ལྟར་གསོལ་བ་བཏབ་པས། རྡོ་རྗེ་འཆང་ཡབ་ཡུམ་སྙོམས་པར་ཞུགས། བདེ་བ་ཆེན་པོའི་རང་བཞིན་དུ་ཞུ་བའི་བྱང་ཆུབ་ཀྱི་སེམས། རླུང་སེམས་མཁའ་འགྲོ་ཡབ་ཡུམ་བཅུའི་དྭངས་མ། གདན་གསུམ་ཚང་བའི་དཀྱིལ་འཁོར་གྱི་ལྷའི་ངོ་བོ། སྐུ་བཞིའི་ས་བོན་དགའ་བ་བཞིའི་རང་བཞིན། དབང་བཞིའི་ཆུ་བོ་ཐམས་ཅད་འདུས་པའི་བདག་ཉིད་དེ་དབང་བཞི་བསྐུར་བའི་ཚུལ་གྱིས་རྣལ་འབྱོར་དབང་ཕྱུག་ཡབ་ཡུམ་ལ་ཐིམ། རྣལ་འབྱོར་དབང་ཕྱུག་ཡབ་ཡུམ་སྙོམས་པར་ཞུགས། བྱང་ཆུབ་ཀྱི་སེམས་སུ་ཞུ་ནས་དབང་བཞི་བསྐུར་བའི་ཚུལ་གྱིས་ནག་པོ་པ་ལ་ཐིམ་པ་ནས། རྩ་བའི་བླ་མ་ལ་ཐིམ་པའི་བར་དུ་དམིགས་པ་བྱེད་དུ་བཅུག་ལ། རྩ་བའི་བླ་མ་དེ་བླ་མ་བརྒྱུད་པ་ཐམས་ཅད་ཀྱི་བྱིན་རླབས་ནུས་མཐུ་དབང་གི་ཆུ་བོ་རྣམས་འདུས་པའི་ངོ་བོར་མོས་ལ་གུས་འདུད་དྲག་པོས་གསོལ་བ་གདབ་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པས་བདག་གི་རྒྱུད་བྱིན་གྱིས་བརླབ་ཏུ་གསོལ། དེ་ལྟར་གསོལ་བ་བཏབ་པས་རྩ་བའི་བླ་མ་ཀྱཻ་རྡོ་རྗེ་ཡབ་ཡུམ་སྙོམས་པར་ཞུགས་ནས་དབང་བཞི་བསྐུར་བའི་ཚུལ་གྱིས་ཁྱེད་རང་རྣམས་ལ་ཐིམ་པས། བླ་མའི་སྐུ་གསུང་ཐུགས་མཛད་པ་ཕྲིན་ལས་དང་ཁྱེད་རྣམས་ཀྱི་ལུས་ངག་ཡིད་གསུམ་བྱེད་ལས་རྣམས་དབྱེར་མེད་ཅིང་བླ་མ་ཐམས་ཅད་ཀྱི་བྱིན་རླབས་ནུས་མཐུ་དབང་གི་ཆུ་བོ་རྣམས་འདུས་པའི་ངོ་བོར་བསྒོམས་ལ། དེའི་ཚེ་རྩ་བརྒྱུད་ཀྱི་བླ་མ་ཡི་དམ་ལྷ་ཚོགས། སངས་རྒྱས་བྱང་སེམས་ཐམས་ཅད་ལུས་ལ་སིབ་སིབ་ཐིམ་པར་མོས་པ་མཛོད། ཅེས་བརྗོད། དེའི་ཚེ་སློབ་མ་གུ་གུལ་གྱི་དུད་པས་བདུག བླ་མས་ལུས་ཀྱིས་དྲིལ་བུ་དཀྲོལ་ཞིང་། ངག་ཏུ་སངས་རྒྱས་རྡོ་རྗེ་འཆང་ནས་རྩ་བའི་བླ་མའི་བར་གྱི་མཚན་ནས་བརྗོད་དེ། བདག་གི་སློབ་མ་འདི་རྣམས་ཀྱི་རྒྱུད་བྱིན་གྱིས་བརླབ་ཏུ་གསོལ། ལྷན་ཅིག་སྐྱེས་པའི་ཡེ་ཤེས་མ་སྐྱེས་པ་བསྐྱེད་པ་དང་། སྐྱེས་པ་གོང་ནས་གོང་དུ་འཕེལ་ཞིང་རྒྱས་པར་བྱིན་གྱིས་བརླབ་ཏུ་གསོལ། དེས་བླ་མ་བརྒྱུད་པ་རྣམས་ཀྱི་ཡོན་ཏན་ཕྲིན་ལས་བྱིན་རླབས་ནུས་མཐུ་ཐམས་ཅད་དང་མཉམ་པར་བྱས་པ་ནི་བླ་མ་བརྒྱུད་པའི་རིམ་པས་བྱིན་གྱིས་བརླབ་པའོ། །ཞེས་བརྗོད་དོ། །གཉིས་པ་ལྷའི་རིམ་པས་བྱིན་གྱིས་བརླབ་པ་ནི། ཁྱེད་རྣམས་དངོས་པོ་དང་མཚན་མ་གང་ལའང་མ་ཞེན་པའི་ངང་ནས། ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པ་ལངས་ནས་ཡོད་པའི་རྐང་པ་གཉིས་བགྲད་པའི་འོག་ཏུ་ནས། ཧས་མཚན་པའི་བར་དབང་ཆུ་ལྟར་གསལ་གདབ་ལ། དེ་ནས་བླ་མ་ལ་གུས་འདུད་དྲག་པོ་བྱས་ཏེ། བླ་མའི་ཐུགས་ཀ་ནས་འོད་ཟེར་འཕྲོས། ཁྱེད་རྣམས་ཀྱི་རྐང་འོག་གི་རླུང་ལ་ཕོག་པས་རླུང་གཡོས་པས་ཛྷཻཾ་མེར་གྱུར་པ་དེ་ལོང་བུའི་རྩ་ནས་ཡར་ཞུགས། སུམ་མདོའི་མེ་དང་འདྲེས་པས་རྐྱེན་བྱས་ནས་མུན་ཁུང་དུ་སྒྲོན་མེ་བཏེག་པ་ལྟར་ལུས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་སྐད་ཅིག་གིས་ཡོངས་སུ་རྫོགས་པ་ནི། སྤྱི་བོ་སྣ་ཚོགས་རྡོ་རྗེ་ནས། སྙིང་པོ་ཡེ་ཤེས་རླུང་ངོ་བོ་ཉིད་ཀྱི་སྐུར་གྱུར་ཅེས་པའི་བར་གསལ་གདབ། སླར་ཡང་སུམ་མདོའི་མེ་ལ་སེམས་གཏད་པས་མེ་ཆེར་འབར་ཏེ། སྙིང་གའི་ས་ཡང་ཚ་ལམ་གྱིས་བསྲེགས་པས་མགྲིན་པའི་ཆུ་སྐྱ་ཐོལ་གྱིས་བསྐོལ། དེའི་དྲོད་ཀྱིས་སྤྱི་བོའི་ཧཾ་བཞུས་ཏེ་རྩ་སྦུབས་ནས་བདུད་རྩིའི་རྒྱུན་འཛག་པ་མགྲིན་པའི་ཆུ་ལ་ཐིམ། དེ་ལས་བདུད་རྩི་འཛག་པ་སྙིང་གའི་ས་ལ་ཐིམ། དེ་ལྟར་ན་ཡས་མར་བདུད་རྩི་འཛག་པས་བདེ་བ། མས་ཡར་མེ་འབར་བས་དྲོད་སྐྱེས་ཏེ་སྙིང་གར་བདེ་དྲོད་འཛོམ་པ་ལ་སེམས་མཉམ་པར་བཞག་ལ། དེ་ལྟར་ལུས་དྲོད་དང་བདེ་བའི་རང་བཞིན་ཀྱཻ་རྡོ་རྗེ་ཡབ་ཡུམ་དུ་ལངས་ནས་ཡོད་པའི་རྐང་འོག་གི་རླུང་གིས་གྱེན་ལ་བཏེག་སོགས་ནས། ཧཱུྃ་ཨཱ་ཧ་ཛྷཻཾ་བར་བརྗོད་ཅིང་དྲིལ་བུ་དཀྲོལ་རྫས་ཀྱིས་བདུག་པ་དབང་ཆུ་བཞིན་བྱ་བ་ནི་ལྷའི་རིམ་པས་བྱིན་གྱིས་བརླབ་པའོ། །གསུམ་པ་སྔགས་ཀྱི་རིམ་པ་ནི། ཁྱེད་རང་རྣམས་ཀྱཻ་རྡོ་རྗེར་གསལ་བའི་ལུས་ཀྱི་དབུས་ཀྱི་ལྟེ་བ་ནས་སྤྱི་གཙུག་གི་བར་དུ་རྩ་དབུ་མ་ཁ་དོག་དམར་པོ། དེའི་གཡས་སུ་རོ་མ་དམར་མོ་བྱང་སེམས་དམར་པོས་གང་བ། གཡོན་དུ་རྐྱང་མ་དཀར་མོ་བྱང་སེམས་དཀར་པོས་གང་བ་གསུམ་གཤིབས་ནས་ཡོད་པ་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞིའི་ལྟེ་བར་ཨཾ་དམར་པོ་མགོ་གྱེན་བསྟན། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པའི་ལྟེ་བར་ཧཱུྃ་སྔོན་པོ་མགོ་ཐུར་བསྟན། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་ལྟེ་བར་ཨོཾ་དམར་པོ་མགོ་གྱེན་བསྟན། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་པའི་ལྟེ་བར་ཧཾ་དཀར་པོ་མགོ་ཐུར་བསྟན་རྣམས་གསལ་བཏབ་ཅིང་། བླ་མ་ལ་གུས་འདུད་དྲག་པོ་བྱས་པས་བླ་མའི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་རྐང་འོག་གི་རླུང་ལ་ཕོག་པས་སྤྱི་བོ་ནས་བཤང་སྒོའི་རླུང་དང་འདྲེས་ཤིང་གཡོས་པས་ལྟེ་བའི་ཨཾ་བསྐུལ་བས་མེ་འབར། དེ་ལས་མེ་ཤིན་ཏུ་ཕྲ་བ་དབུ་མ་ནས་ཡར་སོང་། སྙིང་གའི་ཧཱུྃ་དང་མགྲིན་པའི་ཨོཾ་བཅོམ། སྤྱི་བོའི་ཧཾ་ལ་བསྣུན། ཧཾ་ལས་བདུད་རྩིའི་རྒྱུན་བབས། མགྲིན་པའི་ཨོཾ་གསལ་བཏབ་པས་དགའ་བ། དེ་ལས་རྒྱུན་བབས་སྙིང་གའི་ཧཱུྃ་གསལ་བཏབ་པས་མཆོག་དགའ། དེ་ལས་བདུད་རྩིའི་རྒྱུན་ལྟེ་བར་བབས་པས་དགའ་བྲལ་གྱི་དགའ་བ། དེ་ལྟར་བདུད་རྩིའི་རྒྱུན་བབས་པ་དང་ལྟེ་བའི་ཨཾ་གིས་མེ་འབར་བ། འབར་འཛག་སྐྲ་ཤད་འཛིངས་པ་ལྟ་བུ་ལ་སེམས་གཏད་པས་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས། དེའི་ཚེ་སངས་རྒྱས་བྱང་སེམས་ཐམས་ཅད་ལུས་ལ་སིབ་ཀྱིས་ཐིམ་ཞིང་རང་བྱུང་གི་ཡེ་ཤེས་བདེ་བ་ཆེན་པོའི་ངོ་བོར་བྱིན་གྱིས་བརླབས་པར་མོས། ཨོཾ་ཨཱཿཨ་ཨཱ་ནས། ཨྃ་ཧཱུྃ་ཕཊ་སྭཱ་ཧཱ་ཞེས་བརྗོད་ཅིང་དྲིལ་བུ་དཀྲོལ་ལོ། །དེ་ནི་སྔགས་ཀྱི་རིམ་པས་བྱིན་གྱིས་བརླབ་པའོ་ཞེས་བརྗོད་དོ། །བཞི་པ་ཡེ་ཤེས་ཀྱི་རིམ་པ་ནི་ཁྱེད་རང་རྣམས་ཕྱིའི་ཧེ་རུ་ཀ་ཡབ་ཡུམ་དང་ནང་གི་འཁོར་ལོ་ལྔའི་གཙོ་བོ་ཡབ་ཡུམ་ལྔ་སྙོམས་པར་ཞུགས། གཏུམ་མོའི་མེས་སྤྱི་བོའི་ཧཾ་བཞུས་པའི་བྱང་སེམས་ཀྱི་ཆུ་རྒྱུན་གྱིས་ལུས་ཐམས་ཅད་ཁྱབ་པས་ཡན་ལག་གི་ལྷ་ཐམས་ཅད་ཀྱང་བདེ་བའི་རང་བཞིན་དུ་བྱས། རྒྱུད་ལ་བདེ་བ་ཆེན་པོའི་རྟོགས་པ་ཁྱད་པར་ཅན་སྐྱེས། དེའི་ཚེ་སངས་རྒྱས་བྱང་སེམས་ཐམས་ཅད་ཀྱཻ་རྡོ་རྗེའི་རྣམ་པས་ལུས་ལ་སིབ་ཀྱིས་ཐིམ་ཞིང་བདེ་བ་ཆེན་པོའི་རང་བཞིན་བྱིན་གྱིས་བརླབ་པར་མོས། ཨོཾ་དེ་ཝཱ་ནས་ཕཊ་སྭཱ་ཧཱ། ཞེས་བརྗོད་ཅིང་དྲིལ་བུ་དཀྲོལ། དེ་ནི་སེམས་བདེ་བ་ཆེན་པོའི་རིམ་པས་བྱིན་གྱིས་བརླབ་པའོ་ཞེས་བརྗོད་དོ། །ལྔ་པ་དེ་ཁོ་ན་ཉིད་ཀྱི་རིམ་པ་ནི། ཁྱེད་རང་རྣམས་ཀྱི་སེམས་ཉིད་བདེ་བ་ཆེན་པོའི་ངར་དང་ལྡན་པ་དེ་སྙིང་གར་ཧཱུྃ་གི་རྣམ་པར་བསྒོམས་པ་ལ་སེམས་གཏད་པས་ཧཱུྃ་གིས་ཞབས་ཀྱུ་ཧ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་ཡང་བདེ་ཆེན་དེ་ཁོ་ན་ཉིད་ཀྱི་ངང་དུ་ཐིམ་པའི་དུས་སུ་ཕྱོགས་བཅུའི་སངས་རྒྱས་བྱང་སེམས་ཐམས་ཅད་སིབ་ཀྱིས་ཐིམ་ཞིང་། བདེ་ཆེན་དེ་ཁོ་ན་ཉིད་དུ་བྱིན་གྱིས་བརླབས་པར་མོས། ཨོཾ་ཨཱཿཨ་ཨཱ་ནས་ཕཊ་སྭཱ་ཧཱ། ཞེས་བརྗོད་ཅིང་དྲིལ་བུ་དཀྲོལ། དེ་ནི་དེ་ཁོ་ན་ཉིད་ཀྱི་རིམ་པས་བྱིན་གྱིས་བརླབ་པའོ། །ཞེས་བརྗོད་དེ་ཐམས་ཅད་ལ་གུ་གུལ་གྱི་དུད་པས་བདུག་གོ །དེ་ལྟར་བྱིན་རླབས་ཀྱི་རིམ་པ་ལྔ་ལས་རིམ་པ་དང་པོ་ནི་སྤྱིར་བཏང་བ་ཡིན་ལ། ཕྱི་མ་བཞི་ནི་རིམ་པ་ལྟར་རྒྱུ་དུས་ཀྱི་དབང་བཞིའི་ཡེ་ཤེས་བཞི་པོ་དེ་འབེབས་པའི་མན་ངག་གོ །ཞེས་གསུངས་ཏེ། འདིས་ལམ་དུས་ཀྱི་དབང་ལ་རྒྱུ་དུས་ཀྱི་དབང་བཞི་ཆར་སྔོན་དུ་འགྲོ་དགོས་པར་གྲུབ་ཅིང་། དེ་ལྟར་ན་རིམ་པ་དང་པོ་ནི་རྒྱུ་དུས་ཀྱི་དབང་གི་ཆུ་བོ་དེ་ཉིད་ལམ་དུས་ཀྱི་དབང་གི་ཆུ་བོར་བསྒྱུར་བའི་མན་ངག་ཡིན་ནམ་སྙམ་མོ། །དེ་བརྟན་པར་བྱ་བའི་ཕྱིར་སློབ་མའི་སྤྱི་བོར་རྡོ་རྗེ་རྒྱ་གྲམ་དུ་བཞག་ནས། ཏིཥྛ་བཛྲ་བརྗོད་ཅིང་། བླ་མའི་སྐུ་ལ་གདན་གསུམ་ཚང་བའི་ལྷ་རྣམས་བཞུགས་པའི་ཐུགས་ཀའི་ཐུགས་རྡོ་རྗེ་མི་བསྐྱོད་པ་ཡབ་ཡུམ་སྔར་ཕྱི་དཀྱིལ་དུ་མེ་ཏོག་ཕུལ་བའི་གཙོ་བོ་དང་དབྱེར་མེད་དུ་དམིགས་པའི་དབུ་ལ་ཕུལ་བར་མོས་ལ་མེ་ཏོག་ཕུལ་ཞིང་ཨོཾ་པྲ་ཏཱིཙྪ་བཛྲ་ཧོཿ ཞེས་བརྗོད་ཅིང་བླ་མའི་ཕྱག་ཏུ་མེ་ཏོག་གཏད། བླ་མས་ཀྱང་མེ་ཏོག་གནང་བའི་ཚུལ་གྱིས་ཁྱེད་རང་རྣམས་ཀྱི་སྤྱི་བོར་བཞག་པར་མོས་ལ། ཨོཾ་པྲ་ཏཱི་གྲྀཧྞ་སྭ་མི་མཾ་སཏྭ་མ་ཧཱ་བཱ་ལ། ཞེས་བརྗོད་ཅིང་མེ་ཏོག་མགོར་བཞག་ཅིང་། ཨོཾ་རྡོ་རྗེ་ནས་བླ་ན་མེད་ཀྱིས་གདོང་རས་བསལ་ལ་དེས་སྣོད་རུང་དུ་བྱས་ནས། ཐར་པ་ཆེན་པོའི་ནས་བརྩོན་པར་གྱིས་ཞེས་པའི་བར་བརྗོད་ཅིང་བླ་མའི་རྟེན་ལུས་དཀྱིལ་དང་། བརྟེན་པ་ལུས་རྩ་ལ་གདན་གསུམ་ཚང་བའི་ལྷ་ཚོགས་ཅི་ལྟར་བཞུགས་པའི་ཚུལ་དང་། དཀྱིལ་འཁོར་གཞན་གསུམ་ལའང་གདན་གསུམ་ཚང་བའི་ལྷ་ཚོགས་ཅི་ལྟར་བཞུགས་པའི་ཚུལ་རྒྱས་པར་བཤད་ནས་དེ་ལྟར་ཁྱེད་རྣམས་ཀྱིས་བླ་མའི་སྐུ་ལ་རྟེན་དང་བརྟེན་པར་བཅས་པའི་ལུས་ཀྱི་དཀྱིལ་འཁོར་མཐོང་བར་མ་ཟད། ཁྱེད་རང་རྣམས་ཀྱི་ལུས་ལའང་རྟེན་དང་བརྟེན་པར་བཅས་པའི་ལུས་ཀྱི་དཀྱིལ་འཁོར་ཡོད་པར་མཐོང་བ་ཡིན་པས། དེང་ཕྱིན་ཆད་ཞག་གཅིག་ལ་རབ་ཐུན་བཞི། འབྲིང་ཐུན་གསུམ། ཐ་མ་ཐུན་གཉིས། ཤིན་ཏུ་ཐ་ཤལ་གྱིས་ཀྱང་ཐུན་གཅིག་ལ་ཕྱི་ནང་གི་རྟེན་དང་བརྟེན་པའི་དཀྱིལ་འཁོར་བསྒོམ་ཞིང་མཆོད་བསྟོད་ལ་བརྩོན་པར་གྱིས་ཤིག དེ་རྣམས་ནི་འཇུག་པའི་ཆོ་གའོ། །དེ་ནས་དབང་བསྐུར་བ་ལ་བཞིའི་དང་པོ་བུམ་དབང་ལ་གཉིས་ཀྱི་དང་པོ་རྡོ་རྗེ་སློབ་མའི་དབང་ཞུ་བའི་ཡོན་དུ་མཎྜལ་ཕུལ་ཅིག དེ་ལྟར་མཎྜལ་ཕུལ་ནས་གསོལ་བ་གདབ་པ་འདིའི་རྗེས་ཟློས་ལན་གསུམ་མཛོད། བྱང་ཆུབ་རྡོ་རྗེས་ནས་བདག་ལ་སྩོལ་བར་དེ་ལྟར་གསོལ་བ་བཏབ་ནས། ཁྱེད་རང་རྣམས་བླ་མའི་མདུན་དུ་དབང་སྟེགས་རིན་པོ་ཆེའི་ཁྲིར་གནས་པའི་སྟེང་དུ་གདུགས། གཡས་སུ་རྒྱལ་མཚན། གཡོན་དུ་བ་དན། མཆོད་པའི་ཚོགས་ཀྱིས་བསྐོར་བ། བླ་མའི་ཐུགས་ཀའི་འོད་ཟེར་གྱིས་དབང་གི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ལྷ་མོ་དྲུག ཁྲོ་བོ་བཅུ། འཁོར་དཔག་ཏུ་མེད་པ་མདུན་གྱི་ནམ་མཁར་སྤྱན་དྲངས་ནས་བཞུགས། ཨོཾ་སྭ་བྷཱ་ཝ་སོགས། ཁྱེད་རང་རྣམས་ཀྱི་རྣམ་པར་ཤེས་པའི་ཕུང་པོ་དང་། བུམ་ཆུ་མི་དམིགས་ཏེ་སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུྃ་ལས་ཞེས་སོགས་རིག་པའི་དབང་ལྔ་དང་། ཐུན་མོང་རྡོ་རྗེ་བརྟུལ་ཞུགས། རྡོ་རྗེ་སློབ་དཔོན་གྱི་དབང་རྣམས་དབང་ཆུ་བཞིན་དུ་བསྐུར་ལ། འོན་ཀྱང་ཁྱད་པར་ནི་དབང་རྫས་དང་སློབ་མ་ལྷར་བསྐྱེད་པ་རྣམས་ཞལ་གཅིག་ཕྱག་གཉིས་པར་བསྐྱེད། མི་བསྐྱོད་པའི་ཆུ་དབང་མ་གཏོགས་པར་མཐའ་རྟེན་གྱི་ཆུ་དབང་གཞན་རྣམས་ལ་བུམ་ཆུ་ཀུ་ཤའི་རྩེ་མོས་འཐོར་བ་ཙམ་མཛད། རྗེས་གནང་ལ་སོགས་པའི་མཐའ་རྟེན་ནི་གང་ཡང་མི་དགོས་སོ། །དེ་ནས་དབང་གོང་མ་གསུམ་ནི་མཆོག་དབང་གསུམ་གྲོལ་ལམ་ལ་བརྟེན་ནས་བསྐུར་བའི་ཡིག་ཆ་ཇི་ལྟ་བ་བཞིན་དུ་བསྐུར་ལ། གཙོ་བོས་ཇི་ལྟར་སོགས་ཀྱིས་དམ་ཚིག་དང་སྡོམ་པ་འཛིན་པར་ཁས་བླང་དུ་གཞུག སློབ་མས་ཡོན་དང་མཎྜལ་ཕུལ་ལ། དེང་ནས་བརྩམས་ཏེ་སོགས་ཀྱིས་ལུས་དང་ལོངས་སྤྱོད་ཐམས་ཅད་ཆ་ཤས་ཀྱིས་དབུལ། སློབ་མ་རྣམས་ལ་ལམ་དུས་ཀྱི་དབང་ཐུན་བཞི་ལ་སོགས་པ་ལེན་དགོས་ཚུལ་དང་། རྒྱས་འབྲིང་བསྡུས་གསུམ་གྱི་དབྱེ་བ་བརྗོད་དེ་རང་གནས་སུ་གཏང་ངོ་། །གསུམ་པ་རྗེས་ནི། དེ་ནས་སློབ་དཔོན་གྱིས་ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། གཏོར་མགྲོན་གྱི་ཡེ་ཤེས་པ་བཛྲ་མུཿས་གཤེགས་སུ་གསོལ། དམ་ཚིག་པ་རྣམས་ཛཿཧཱུྃ་བྃ་ཧོཿས་བདག་ལ་བསྡུས་ལ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་ནས་ཆོས་འཆད་པ་ལ་སོགས་པའི་བྱ་བ་གཞན་ལ་འཇུག་པར་བྱའོ། །འདི་འདྲའི་ཆོས་ཚུལ་འདོམས་པར་བྱེད་པ་པོ། །དཀོན་མཆོག་བསྟན་པའི་རྒྱལ་མཚན་འཛིན་པ་སྟེ། །རང་སེམས་དཔལ་གྱི་དོན་དང་འདྲེས་གྱུར་ནས། །ཡོན་ཏན་བཟང་པོའི་གཏེར་ལ་སྤྱོད་པར་ཤོག །ཅེས་པ་འདི་ནི་རྗེ་བཙུན་བླ་མ་མུས་པ་ཆེན་པོའི་གསུང་ལས་ཇི་ལྟར་ཟིན་པ་དང་། ཕྱག་ལེན་ཇི་ལྟར་མཛད་པ་ལྟར། རང་ཉིད་དྲན་པ་གསོ་བའི་ཆེད་དུ། ཤཱཀྱའི་དགེ་སློང་བསོད་ནམས་སེང་གེས་བྲིས་པའོ།། །།དགེའོ།། །། ༄༅། །ན་མོ་བཛྲ་ཌཱ་ཀཱ་ཡ། ལམ་དུས་ཀྱི་དབང་གསོ་བའི་ཕྱག་ལེན་ནི། གནས་དབེན་པར་མཆོད་པ་དང་གཏོར་མ་བཤམ། སློབ་དཔོན་བདག་ཉིད་སངས་རྒྱས་སུ་བསྐྱེད། དམ་ཚིག་ཅན་ལ་གཏོར་མ་སྟེར་བའི་བར་དུ་བྱས་ནས། སློབ་མ་རྒྱུ་དུས་དང་ལམ་དུས་ཀྱི་དབང་སྔར་ཐོབ་ཟིན་པ་རྣམས་བོས་ཏེ། གྲལ་དུ་འཁོད་པ་ལ་འདིར་སྙན་བརྒྱུད་བཞིའི་ནང་ནས་དབང་གི་ཆུ་བོ་མ་ནུབ་པ་ལ། རྒྱུ་དུས་ཀྱི་དབང་གི་ཆུ་བོ་མ་ནུབ་པ་དང་། ལམ་དུས་ཀྱི་དབང་གི་ཆུ་བོ་མ་ནུབ་པ་གཉིས་ལས། ལམ་དུས་ཀྱི་དབང་གི་ཆུ་བོ་སྔར་ཐོབ་ཟིན་ནས། ཅུང་ཟད་ཆག་པ་རྣམས་ལ་གསོ་བའི་ཆོ་ག་རྗེ་བཙུན་གྱིས་དབང་གི་རབ་དབྱེ་ནས་འཇུག་པ་ཡན་ཆད་དོར་ཏེ། དེའི་ཚབ་ཏུ་རིགས་ལྔའི་སྡོམ་གཟུང་བྱས་ནས། དངོས་གཞི་རིག་པའི་དབང་ལྔ་མན་ཆད་བསྐུར་བར་གསུངས་པ་ལྟར་སྒྲུབ་པ་ལགས། དེ་ལ་སློབ་དཔོན་གྱི་བྱ་བ་དང་། སློབ་མ་ལ་བྱ་བ་གཉིས་ཡོད་པ་ལས། དང་པོ་ཚར་ནས་གཉིས་པའི་དོན་དུ་མཎྜལ་ཕུལ་ཞེས་བརྗོད་ལ། མཎྜལ་འབུལ་དུ་བཅུག་ནས། དགའ་ཆེན་ཁྱོད་བདག་སོགས་ལན་གསུམ་གྱིས་གསོལ་བ་གདབ་ཏུ་གཞུག དེ་ནས་བླ་མ་རྡོ་རྗེ་མཁའ་འགྲོ་དང་། ཡི་དམ་དཀྱིལ་འཁོར་གྱི་ལྷ་ཚོགས་རྣམས་དང་། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་རིག་པ་འཛིན་པ་མིང་འདི་ཞེས་བགྱི་བས། ཐོག་མ་མ་མཆིས་པའི་འཁོར་བ་ནས་ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས། ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དང་། སོ་སོར་ཐར་པའི་སྡོམ་པ་དང་འགལ་བ་དང་། བྱང་ཆུབ་སེམས་དཔའི་སེམས་བསྐྱེད་དང་འགལ་བ་དང་། རིག་པ་འཛིན་པའི་དམ་ཚིག་དང་འགལ་བ་དང་། བླ་མ་དང་ཡི་དམ་ལ་མ་གུས་པ་དང་། བསྙེན་པ་དང་སྒྲུབ་པ་ལ་གཡེལ་བ་དང་། མཆོད་པ་དང་གཏོར་མ་ལ་མ་བརྩོན་པ་ལ་སོགས་པ་སྡིག་པ། སྒྲིབ་པ། ཉེས་པ། ལྟུང་བ། དྲི་མའི་ཚོགས་ཐམས་ཅད་བླ་མ་རྡོ་རྗེ་མཁའ་འགྲོ་དང་། ཡི་དམ་དཀྱིལ་འཁོར་གྱི་ལྷ་ཚོགས་རྣམས་དང་། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་སྡོམ་པར་བགྱིད་ལགས་སོ། །ཞེས་པ་ལན་གསུམ་དང་། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་རྒྱུན་བཤགས་ལན་གསུམ་དང་། སྲས་བཅས་སངས་རྒྱས་སོགས་རིགས་ལྔའི་སྡོམ་གཟུང་ལན་གསུམ་རྣམས་ཀྱི་རྗེས་ཟློས་བྱེད་དུ་བཅུག་ལ། དེ་ནས་མདུན་གྱི་ནམ་མཁར་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་། ཟླ་བ། ཉི་མ། བདུད་བཞི་བརྩེགས་པའི་སྟེང་དུ་བླ་མ་རྣམས་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ། ཡུམ་དང་བཅས་པ་སྟེང་ནས་སྟེང་དུ་བརྩེགས་པར་བསྒོམས་པའི་ཐུགས་ཀ་ནས་འོད་ཟེར་འཕྲོས་པས། རྩ་བརྒྱུད་ཀྱི་བླ་མ་རྣམས་དང་ཡི་དམ་ལྷ་ཚོགས། སངས་རྒྱས་བྱང་སེམས་རྣམས་སྤྱན་དྲངས་ནས་བླ་མ་སོ་སོ་ལ་ཐིམ་པར་བསྒོམས་ལ། གསོལ་བ་འདེབས་པ་འདིའི་རྗེས་ཟློས་གྱིས་ཞེས་བརྗོད་དེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ། རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་པ་ལན་གསུམ་བྱའོ། །དེ་ནས་བླ་མ་གོང་མ་རྣམས་སྙོམས་པར་ཞུགས་ཏེ། བྱང་ཆུབ་ཀྱི་སེམས་སུ་ཞུ་བའི་ཆུ་རྒྱུན་གྱིས་འོག་མ་འོག་མ་རྣམས་ལ་དབང་བཞི་བསྐུར་བའི་ཚུལ་གྱིས་ཐིམ་པའི་དམིགས་པ་རྩ་བའི་བླ་མའི་བར་དུ་བྱེད་དུ་བཅུག་ནས། རྩ་བའི་བླ་མ་དབང་གི་ཆུ་བོ་ཐམས་ཅད་འདུས་པའི་བདག་ཉིད་ལ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པས་བདག་ལ་མངོན་པར་དབང་བསྐུར་དུ་གསོལ། ཞེས་པ་ལན་གསུམ་གྱིས་གསོལ་བ་གདབ་ཏུ་གཞུག་གོ །དེ་ནས་རྩ་བའི་བླ་མ་ཡབ་ཡུམ་སྙོམས་པར་ཞུགས་ཏེ་བྱང་ཆུབ་ཀྱི་སེམས་སུ་ཞུ་བའི་ཆུ་རྒྱུན་གྱིས། སློབ་མ་ལ་དབང་བཞི་བསྐུར་བའི་ཚུལ་གྱིས་ཐིམ་པའི་དམིགས་པ་བྱེད་དུ་གཞུག་ལ། སློབ་དཔོན་གྱིས་དྲིལ་བུ་དཀྲོལ་ཏེ། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཞེས་སོགས་བླ་མ་རྣམས་ཀྱི་མཚན་ནས་བརྗོད་པ་སྔོན་དུ་འགྲོ་བས་རྡོ་རྗེ་སློབ་མ་འདི་རྣམས་ཀྱི་རྒྱུད་ལ་བྱིན་གྱིས་བརླབས་ཀྱིས་བྱིན་གྱིས་བརླབ་ཏུ་གསོལ། ལྷན་ཅིག་སྐྱེས་པའི་ཡེ་ཤེས་མ་སྐྱེས་པ་སྐྱེ་བ་དང་། སྐྱེས་པ་བརྟན་པ་དང་། གོང་ནས་གོང་དུ་འཕེལ་ཞིང་རྒྱས་པར་མཛད་དུ་གསོལ། ཞེས་ལན་མང་དུ་བརྗོད། དེའི་རྐྱེན་གྱིས་རྟེན་དང་བརྟེན་པའི་ལུས་དཀྱིལ་གསལ་བཏབ་ལ། དེ་ནས་དངོས་གཞི་རིག་པའི་དབང་ལྔ་བསྐུར་བ་མན་ཆད་ཀྱི་དམིགས་པ་རྣམས་བླ་མས་སྤོད། སློབ་མ་རྣམས་ཀྱིས་འཛིན་ཅིང་། གསོལ་བ་གདབ་པའི་ཚིག་རྣམས་དང་ཤེས་རབ་ཡེ་ཤེས་ཀྱི་སྐབས་སུ་རིག་མ་ལ་ལན་གདབ་པ་རྣམས་ནི་རྗེས་ཟློས་དངོས་སུ་བྱེད། མཎྜལ་རྣམས་ནི་དངོས་སུ་འབུལ། དབང་རྫས་དངོས་སུ་འགྲིམ་པ་ནི་མེད། དེ་ནས་མཇུག་ཡོན་འབུལ་བ་ཡན་ཆད་བྱས་ལ་སློབ་མ་རྣམས་དགའ་བ་བསྐྱེད་དེ་རང་གནས་སུ་གཏང་། དེ་ནས་སློབ་དཔོན་གྱིས་གཏོར་མགྲོན་ལ་ནོངས་པ་བཟོད་པར་གསོལ་བ་དང་། ཡེ་ཤེས་པ་གཤེགས། དམ་ཚིག་པ་བདག་ལ་བསྡུས་ཏེ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་རྣམས་བྱའོ། །ཞེས་པ་འདི་ནི་རྗེ་བླ་མ་མུས་པ་ཆེན་པོའི་གསུང་ལས་ཅི་ལྟར་ཟིན་པ་བཞིན་དུ་རབ་འབྱམས་པ་པུཎྱེ་སིཾ་ཧས་བྲིས་པ། ཨེ་ཝཾ་ཆོས་ལྡན་དུ་ས་སྟག་ནག་པའི་ཉེར་གསུམ་ལའོ།། །།དགེའོ།། ༈ །ན་མོ་གུ་རུ། རྣལ་འབྱོར་དབང་ཕྱུག་གི་སྲུང་བ་ཐུན་མོང་མ་ཡིན་པའི་བྱིན་རླབས་ཀྱི་ཚུལ་ལ་དོན་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། དུས་ཁྱད་པར་ཅན་ཉི་ཤུ་དགུའམ། གནམ་སྟོང་གང་རུང་ལ་གནས་དབེན་པར་རྟེན་གྱི་དྲུང་དུ། ཆུ་བཞི་སྔོན་དུ་འགྲོ་བའི་ཉེར་སྤྱོད་ལྔ་དང་། གཏོར་མ་ལྔ་ཚུལ་བཞིན་དུ་བཤམ། སློབ་དཔོན་རང་ཉིད་ཀྱི་མདུན་དུ་ནང་མཆོད་དང་། རྡོ་རྗེ་དྲིལ་བུའང་བཤམ་མོ། །གཉིས་པ་ལ་གཉིས་ཏེ། སློབ་དཔོན་གྱི་བྱ་བ་དང་། སློབ་མ་ལ་བྱིན་རླབས་བྱ་བའོ། །དང་པོ་ནི། སྐྱབས་འགྲོ་ནས་བརྩམས་ཏེ་ཀྱཻ་རྡོ་རྗེའི་བདག་བསྐྱེད་བཟླས་པ་དང་བཅས་པ་རྫོགས་པར་བྱས་ནས། གཏོར་མ་དང་པོ་ལྷ་དང་འབྱུང་པོ་ཐ་མི་དད་ཀྱི་ཆོ་གས་འདས་པ་ལ་འབུལ། གཉིས་པ་ནག་པོ་ཆེན་པོ་ལྕམ་དྲལ། གསུམ་པ་གདོང་བཞི་པ། བཞི་པ་པུ་ཏྲ། ལྔ་པ་མཁའ་འགྲོ་སྤྱི་གཏོར་གྱིས་དབུལ་ལོ། །དེ་ནས་རྣལ་འབྱོར་དབང་ཕྱུག་གི་སྲུང་བ་ཐུན་མོང་མ་ཡིན་པ་བསྒོམ་ཞིང་། བསྲུང་བ་རྣམས་ཀྱང་བྱའོ། །གཉིས་པ་ནི་སློབ་མ་ལམ་འབྲས་བུ་དང་བཅས་པའི་ཁྲིད་རྫོགས་པར་ཐོབ་པ་བོས་ཏེ། ཁྲུས་བྱས། མཎྜལ་ཕུལ་ནས་གྲལ་དུ་འདུག་པ་ལ། འདིའི་རྗེས་ཟློས་བྱེད་དུ་བཅུག་སྟེ། གང་གི་དྲིན་གྱིས་སོགས་དང་། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །ལན་གསུམ། ཀུན་མཁྱེན་ཡེ་ཤེས་ཕུང་པོ་ཅན། །སོགས་ལན་གསུམ་གྱིས་གསོལ་བ་གདབ། དེ་ནས་རྒྱུན་བཤགས་ལན་གསུམ། རིགས་ལྔའི་སྡོམ་གཟུང་ལན་གསུམ་བྱའོ། །དེ་ནས་བྱིན་རླབས་དངོས་གཞི་ནི། བླ་མ་རྣལ་འབྱོར་གྱི་དབང་ཕྱུག་ཞལ་ཕྱག་འོག་ནས་འབྱུང་བ་བཞིན་བསྒོམ་དུ་བཅུག་ལ། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ལྟེ་བར་སྭཱ་སེར་པོ། བརླ་རྩར་ཧཱ་ལྗང་གུ་རྣམས་བསྒོམས་ལ། དེ་ནས་དཔྲལ་བའི་ཨོཾ་ལས་འོད་ཟེར་དཔག་ཏུ་མེད་པ་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱི་སྐུའི་བྱིན་རླབས་དང་ནུས་མཐུ་ཐམས་ཅད་བཀུག་ནས་ཨོཾ་ལ་ཐིམ་པས། ཨོཾ་དེ་སངས་རྒྱས་ཐམས་ཅད་ཀྱི་སྐུའི་བྱིན་རླབས་འདུས་པའི་བདག་ཉིད་དུ་བསྒོམས་ནས་གསོལ་བ་འདེབས་པ་འདིའི་རྗེས་ཟློས་བྱེད་དུ་བཅུག་སྟེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ། བླ་མ་རྣལ་འབྱོར་དབང་ཕྱུག་གིས་བདག་ལ་བུམ་པའི་དབང་བསྐུར་བ་སྩལ་དུ་གསོལ། ཞེས་ལན་གསུམ་གྱིས་གསོལ་བ་བཏབ་པས་བླ་མའི་དཔྲལ་བའི་ཨོཾ་ལས་བདུད་རྩིའི་རྒྱུན་ཨོཾ་གྱི་རྣམ་པ་དཔག་ཏུ་མེད་པ་བྱུང་སྟེ་སློབ་མའི་སྤྱི་བོར་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་ཐམས་ཅད་དག དུས་གསུམ་སངས་རྒྱས་ཐམས་ཅད་ཀྱི་སྐུའི་བྱིན་རླབས་ཐམས་ཅད་ཐོབ་པར་བསམ་མོ། །དེ་བཞིན་དུ་མགྲིན་པའི་ཨཱཿལས་གསང་བའི་དབང་ཐོབ་པ་དང་། ཐུགས་ཀའི་ཧཱུྃ་ལས་ཤེས་རབ་ཡེ་ཤེས་ཀྱི་དབང་ཐོབ་པའང་དེས་རིགས་འགྲེའོ། །ཡང་བླ་མའི་ལྟེ་བའི་སྭཱ་དང་། བརླའི་ཧཱ་ལས་འོད་ཟེར་དཔག་ཏུ་མེད་པ་འཕྲོས། སངས་རྒྱས་ཐམས་ཅད་ཀྱི་ཡོན་ཏན་དང་ཕྲིན་ལས་ཐམས་ཅད་བཀུག་ནས་ཡི་གེ་གཉིས་ལ་ཐིམ་པས་ཡི་གེ་གཉིས་པོ་དེ་སངས་རྒྱས་ཐམས་ཅད་ཀྱི་ཡོན་ཏན་ཕྲིན་ལས་ཐམས་ཅད་འདུས་པའི་བདག་ཉིད་དུ་བསྒོམས་ལ། གསོལ་བ་འདེབས་པ་འདིའི་རྗེས་ཟློས་བྱེད་དུ་བཅུག་སྟེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རྣལ་འབྱོར་དབང་ཕྱུག་གིས་བདག་ལ་དབང་བཞི་པ་སྩལ་དུ་གསོལ་ཞེས་གསོལ་བ་ལན་གསུམ་བཏབ་པས། ཡི་གེ་གཉིས་ལས་བདུད་རྩིའི་རྒྱུན་ཡི་གེ་གཉིས་ཀྱི་རྣམ་པ་དཔག་ཏུ་མེད་པ་བྱུང་སྟེ་སློབ་མའི་ལུས་ཐམས་ཅད་ལ་ཐིམ་པས་དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་དག སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་ཐོབ་པར་བསམ་མོ། །དེ་ནས་བླ་མ་འོད་དུ་ཞུ་ནས་སློབ་མའི་ལུས་ལ་ཐིམ་པས་སློབ་མ་དེ་པདྨ་དང་ཟླ་བ་ཉི་མ་ཀྲྀཥྞ་སཱ་རའི་པགས་པའི་གདན་གྱི་སྟེང་ན། རྣལ་འབྱོར་གྱི་དབང་ཕྱུག་སྐུ་མདོག་དམར་ནག ཞལ་གཅིག་ཕྱག་གཉིས་པ། གཡས་སྡིགས་མཛུབ་གྱེན་དུ་བསྟན་པའི་རྩེ་མོ་བཀུག་པས་ཉི་མ་མནན་པ། གཡོན་ཐོད་པ་བདུད་རྩིས་གང་བ་ཐུགས་ཀར་འཛིན་པ། རྒྱབ་ཏུ་དཔག་བསམ་གྱི་ཤིང་བཟང་པོ་ལ་སྐུ་རྒྱབ་བརྟེན་པ། ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ། སྐུ་ཤིན་ཏུ་གྲིམས་པ། ཞལ་དང་སྤྱན་གཉིས་བགྲད་པ། ལྗགས་འདྲིལ་བ། རུས་པའི་རྒྱན་དྲུག་གིས་སྤྲས་ཤིང་། མེ་ཏོག་སྣ་ཚོགས་ཀྱིས་ཐོད་བཅིངས་པ་ཞིག་ཏུ་བསྒོམ་དུ་གཞུག་གོ །དེ་ནས་སྲུང་བ་གཉིས་ཐུན་མོང་བ་ནས་བཤད་པ་ལྟར་སྐྱེད་དེ། དེ་དག་ནི་བྱིན་རླབས་ཀྱི་དངོས་གཞིའོ། །དེའི་རྗེས་སུ་རྣལ་འབྱོར་མ་ཆག་པར་བསྒོམ་པའི་ཚུལ་ཆོས་ཀྱི་རྗེས་མཛད་པའི་ཡིག་ཆ་ལས་འབྱུང་བ་ལྟར་བཤད་ནས། ཡོན་དང་མཎྜལ་འབུལ་དུ་བཅུག་སྟེ་རང་གནས་སུ་གཏང་ངོ་། །གསུམ་པ་རྗེས་ནི། དེ་ནས་བླ་མས་གཏོར་མགྲོན་ལ་ལྷག་ཆད་ཁ་བསྐང་བ་དང་། ནོངས་པ་བཟོད་པར་གསོལ་ཏེ་ཡེ་ཤེས་པ་གཤེགས། དམ་ཚིག་པ་རང་ལ་བསྡུས་ནས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་རྣམས་བྱའོ། །ཞེས་པ་འདི་ནི་རྗེ་བླ་མ་མུས་པའི་གསུང་ལས་ཇི་ལྟར་ཟིན་པ་བཞིན་དུ་སྤྲང་བཙུན་བསོད་ནམས་སེང་གེས་བྲིས་པའོ།། །།དགེའོ།། ༈ །རྣམ་འཇོམས་བིར་ལུགས་ཀྱི་བྱིན་རླབས་བཞུགས།། ༈ །བླ་མ་དམ་པའི་ཞབས་ལ་གུས་པར་ཕྱག་འཚལ་ལོ། །རྣལ་འབྱོར་གྱི་དབང་ཕྱུག་བིརྺ་པའི་ལུགས་ཀྱི་རྡོ་རྗེ་རྣམ་པར་འཇོམས་པའི་བྱིན་རླབས་བྱ་ཚུལ་ལ། སྔོན་འགྲོ། དངོས་གཞི། རྗེས་གསུམ་ལས། དང་པོ་ནི། གནས་དབེན་པར་སྐྱང་ནུལ་རེ་ཁཱས་ཟླུམ་པོར་བསྐོར་བའམ། འཁར་བ་ལ་སོགས་པའི་མཎྜལ་ཁྲུ་གང་ལས་མི་ཆུང་བའི་དབུས་དང་ཕྱོགས་མཚམས་བརྒྱད། ཤར་གྱི་ཤར་དང་། ནུབ་ཀྱི་ནུབ་རྣམས་སུ་གཙོ་བོ་དང་། ཁྲོ་བཅུའི་ཚོམ་བུ་བཅུ་གཅིག་དགོད། དེའི་ཕྱི་རོལ་དུ་རྡོ་རྗེ་ཕོ་ཉ་མོ་དྲུག་ཅུ་རྩ་བཞིའི་ཚོམ་བུ་ཚང་བར་འགོད་དེ། མ་ཤོང་ན་ནས་རྡོག་རེ་རེས་ཀྱང་འགོད་དོ། །དེའི་མཐའ་སྐོར་དུ་ཆུ་བཞི་སྔོན་དུ་འགྲོ་བའི་ཉེར་སྤྱོད་ཀྱཻ་རྡོར་བཞིན་དང་། བྱང་ཤར་དུ་གཏོར་མ་བཤམ། བུམ་པ་གཅིག་སྤྱི་དང་མཐུན་པར་བཤམ། སློབ་དཔོན་རང་གི་མདུན་དུ་ནང་མཆོད་རྡོ་རྗེ་དྲིལ་བུ་རྣམས་བཤམ། དེ་ནས་མཆོད་པ་བསང་སྦྱང་ཀྱཻ་རྡོར་དང་འདྲ་བར་བྱས་ནས་འདིའི་བདག་བསྐྱེད་བཟླས་པ་དང་བཅས་པ་བྱ་སྟེ་དཀྱིལ་འཁོར་བསྡུས་ལ་རང་གཙོ་བོའི་ང་རྒྱལ་གྱིས་མདུན་གྱི་མཎྜལ་བསང་སྦྱང་བྱས་ནས་ལྷ་བདུན་ཅུ་རྩ་ལྔ་བདག་བསྐྱེད་བཞིན་ཡན་ལག་བཞི་རྫོགས་སུ་བསྐྱེད། མཚན་སྔགས་སྔོན་དུ་འགྲོ་བའི་ཆུ་བཞི་ཉེར་སྤྱོད་རོལ་མོ་དང་བཅས་པས་མཆོད། ནང་བདུད་རྩིས་ཀྱང་མཆོད་ནས། གང་ཐུགས་གཉིས་སུ་མེད་པའི་ཡེ་ཤེས་ཀྱི། །ཞེས་སོགས་ཀྱིས་བསྟོད་པ་བྱའོ། །དེ་ནས་གཏོར་མ་ཨ་མྲྀ་ཏས་བསང་། སྭ་བྷཱ་ཝས་སྦྱང་། ཨ་ཀཱ་རོས་བྱིན་གྱིས་བརླབས་ནས་སྔགས་རིང་ཚར་གསུམ་གྱིས་དབུལ། ཕྱི་མཆོད། ནང་མཆོད། བསྟོད་པ་རྣམས་བྱའོ། །དེ་ནས་བུམ་པའི་བསྐྱེད་ཆོག་དང་བཟླས་པ་སྒྲུབ་ཐབས་ལྟར་བྱའོ། །གཉིས་པ་དངོས་གཞི་ནི། སློབ་མ་ཀྱཻ་རྡོར་མན་ངག་ལུགས་ཀྱི་དབང་གིས་སྨིན་པ་རྣམས་ཁྲུས་བྱས། ཡོན་དང་མཎྜལ་ཕུལ་ཏེ་གྲལ་ལ་འཁོད་པ་ལ། གང་གི་དྲིན་གྱིས་བདེ་ཆེན་ཉིད། །ཅེས་སོགས་ཚིགས་རྐང་དྲུག་དང་། ཀུན་མཁྱེན་ཡེ་ཤེས་ཕུང་པོ་ཅན། །ཞེས་སོགས་ཀྱིས་གསོལ་བ་ལན་གསུམ་དུ་གདབ་ཏུ་གཞུག གུར་ནས་འབྱུང་བའི་རྒྱུན་བཤགས་བྱས་ནས་བླ་མ་རྡོ་རྗེ་རྣམ་པར་འཇོམས་པར་གསལ་བའི་ཐུགས་ཀར་རྡོ་རྗེ་ཧཱུྃ་གིས་མཚན་པ་ལས་རླུང་ཕྱིར་རྒྱུ་བ་དང་མཐུན་པའི་ཧཱུྃ་བསམ་གྱིས་མི་ཁྱབ་པ་འཕྲོས། སློབ་མའི་རླུང་ནང་དུ་འཇུག་པ་དང་མཐུན་པར་སྙིང་གའི་ཧཱུྃ་ལ་ཐིམ། ལུས་ཀྱི་ནང་གང་བས་པ་སྤུའི་བུ་ག་ནས་ཕྱིར་འཕྲོས་གནས་ཁང་དང་ཡུལ་ལ་སོགས་པ་འཇིག་རྟེན་གྱི་ཁམས་ཐམས་ཅད་གང་བར་བསྒོམས། ཡང་ཐུགས་ཀ་ནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་བསམ་གྱིས་མི་ཁྱབ་པ་འཕྲོས། སྔ་མ་ལྟར་བྱིན་གྱིས་བརླབ། གུ་གུལ་གྱི་དུད་པ་དང་། ཧཱུྃ་ཉི་ཤུ་རྩ་གཅིག་བརྗོད་ཅིང་། དྲིལ་བུའི་སྒྲ་དང་བཅས་ཏེ། མི་ཆོད་པ། མི་ཤིག་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཞེས་བརྗོད་པའི་སྒོ་ནས་བྱིན་གྱིས་བརླབས་ནས། སྤྱི་བོར་རྡོ་རྗེ་རྒྱ་གྲམ་དུ་བཞག་ལ་ཏིཥྛ་བཛྲ་གྱིས་བརྟན་པར་བྱའོ། །དེ་ནས་མཎྜལ་ཕུལ་ཏེ། བྱང་ཆུབ་རྡོ་རྗེས་སོགས་ཀྱིས་གསོལ་བ་བཏབ་ནས། སློབ་མ་རྡོ་རྗེ་ཆོ་ག་གསུམ་ལས་རྡོ་རྗེ་རྣམ་པར་འཇོམས་པར་བསྐྱེད། སྐུ་གསུང་ཐུགས་བྱིན་གྱིས་བརླབ། ཡེ་ཤེས་པ་བཅུག་ནས་སློབ་དཔོན་གྱིས་བུམ་པ་བཟུང་སྟེ། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་སྔགས་དང་བཅས་པས་བུམ་པའི་ཆུས་དབང་བསྐུར་བས། ལུས་ཐམས་ཅད་གང་། དྲི་མ་ཐམས་ཅད་དག ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་པར་བྱའོ། །དེ་ནས་དབང་གི་ལྷ་རྣམས་བསྟིམས་ཏེ། སུ་པྲ་ཏིཥྛ་ཞེས་སོགས་ཀྱིས་རབ་ཏུ་གནས་པར་བྱའོ། །དེ་ནས་གོང་འོག་གི་ཚིག་རྣམས་ལན་རེ་བཀླག གཟུངས་རིང་ཚར་གསུམ་གྱི་རྗེས་ཟློས་བྱེད་དུ་བཅུག་ནས་སྤྱི་བོར་མེ་ཏོག་གཞག་གོ །དེ་ནས་བླ་མ་རང་འོད་ཀྱི་རིག་མ་དང་མཉམ་པར་སྦྱོར་བའི་མཁའ་ནས་ཐིག་ལེ་དཀར་དམར་སློབ་མའི་མགྲིན་པའི་ནང་དུ་ཐིམ། ལུས་ཐམས་ཅད་གང་བས་གསང་བའི་དབང་ཐོབ་པར་བསྒོམ་དུ་གཞུག ཡང་སློབ་མ་རང་འོད་ཀྱི་རིག་མ་དང་། ཐབས་ཤེས་རབ་གཉིས་མེད་ཀྱི་སྦྱོར་བ་བྱས་པར་བསྒོམས་ལ་པད་སྐོར་དང་བཅས་པའི་འཁྱུད་པའི་ཕྱག་རྒྱ་བྱས་པས་ཤེས་རབ་ཡེ་ཤེས་ཀྱི་དབང་ཐོབ་པར་བསྒོམ། དེ་ནས་ཟག་བཅས་ཀྱི་བདེ་བ་དེ་ཟག་མེད་སྟོང་པ་གཟུང་འཛིན་དང་བྲལ་བ་ཆུ་ཟླ་ལྟ་བུར་བསྒོམས་པས་དབང་བཞི་པ་ཐོབ་པར་བསམ་མོ། །དེ་ནས་གཏང་རག་གི་མཎྜལ་དབུལ་དུ་གཞུག་གོ །གསུམ་པ་རྗེས་ནི་ཀྱཻ་རྡོར་དང་མཐུན་ནོ། །ཞེས་པ་འདི་ནི་གོང་མའི་ཐོ་ཡིག་གི་སྟེང་དུ་བླ་མའི་ཕྱག་ལེན་བཞིན་བསོད་ནམས་སེང་གེས་བྲིས་པའོ།། །།དགེའོ།།

ག་ཡ་དྷ་ར་ནས་བརྒྱུད་པའི་མགོན་པོ་དཔའ་གཅིག་གི་རྗེས་གནང་བྱ་ཚུལ།

༈ །ག་ཡ་དྷ་ར་ནས་བརྒྱུད་པའི་མགོན་པོ་དཔའ་གཅིག་གི་རྗེས་གནང་བྱ་ཚུལ་བཞུགས་སོ།། ༈ བླ་མ་དང་དཔལ་རྡོ་རྗེ་ནག་པོ་ཆེན་པོ་ལ་ཕྱག་འཚལ་ལོ། །རྗེ་བཙུན་ག་ཡ་དྷ་ར་ནས་བརྒྱུད་པའི་གུར་གྱི་མགོན་པོའི་རྗེས་སུ་གནང་བ་བྱ་ཚུལ་ནི། མདུན་དུ་མཎྜལ་དྲི་བཟང་གིས་བྱུག་པའི་སྟེང་དུ་ནས་ནག་པོའི་ཚོམ་བུ་གཅིག་དགོད། དེའི་མདུན་དུ་ཆུ་བཞི་སྔོན་དུ་འགྲོ་བའི་ཉེར་སྤྱོད་དང་གཏོར་མ་ཆེ་བ་རྒྱན་གྱིས་བརྒྱན་པ་གཅིག་བཤམ། རང་གི་མདུན་དུ་ནང་མཆོད་རྡོ་རྗེ་དྲིལ་བུ་བཤམ། མཆོད་པ་བྱིན་རླབས་ཀྱཻ་རྡོ་རྗེ་དང་འདྲ། བདག་བསྐྱེད་གུར་རྒྱན་ནས་འབྱུང་བ་ལྟར་གྱི་ནག་པོ་ཆེན་པོ་ཡན་ལག་བཞི་རྫོགས་སུ་བསྐྱེད་ནས་བཟླས་པ་བྱ། མདུན་གྱི་མཎྜལ་བསང་སྦྱང་། སྟོང་པའི་ངང་ལས་ནག་པོ་ཆེན་པོ་བདག་བསྐྱེད་ལྟར་ཡན་ལག་བཞི་རྫོགས་སུ་བསྐྱེད་ནས། ཆུ་བཞི་སྔོན་དུ་འགྲོ་བའི་ཉེར་སྤྱོད། ནང་བདུད་རྩིས་མཆོད། བསྟོད་པས་ཀྱང་བསྟོད། གཏོར་མ་ཀྱཻ་རྡོར་ལྟར་བྱིན་གྱིས་བརླབས་ནས། ནམ་མཁའ་མཛོད་ཀྱི་སྔགས་ལན་གསུམ་དང་། སྔགས་རིང་ལན་གསུམ་གྱིས་དབུལ། སླར་ཡང་ཕྱི་མཆོད་དང་། ནང་མཆོད། བསྟོད་པ་རྣམས་བྱའོ། །དེ་ནས་སློབ་མ་གསུང་ངག་གི་ཁྲིད་ཀྱིས་སྨིན་པ་ཅིག་བོས་ལ་ཁྲུས་བྱས། ཡོན་དང་མཎྜལ་ཕུལ་ནས། གང་གི་དྲིན་གྱིས་བདེ་ཆེན་ཉིད། །སོགས་ཚིགས་རྐང་དྲུག་དང་། ཀུན་མཁྱེན་ཡེ་ཤེས་ཕུང་པོ་ཅན། །སོགས་ལན་གསུམ་གྱིས་གསོལ་བ་གདབ། གུར་ནས་འབྱུང་བའི་རྒྱུན་བཤགས་ལན་གསུམ་བྱ། དེ་ནས་སློབ་མ་བསང་སྦྱངས། སྟོང་བའི་ངང་ལས་པདྨ་དང་། ཉི་མ་དང་། རོའི་གདན་གྱི་སྟེང་དུ་ཧཱུྃ་ལས་གྲི་གུག་ཧཱུྃ་གིས་མཚན་པ་ལས་འོད་ཟེར་སྤྲོས་བསྡུས་ཡོངས་སུ་གྱུར་པ་ལས། ནག་པོ་ཆེན་པོར་བསྐྱེད་པ་དཔོན་སློབ་གཉིས་ཆར་གྱིས་དམིགས་པ་བྱ། དེའི་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། ཡེ་ཤེས་ཀྱི་འཁོར་ལོ་དགུག་གཞུག་གི་ཚེ་རྗེས་གནང་སྤྱི་དང་མཐུན་པར། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ནག་པོ་ཆེན་པོ་སྤྱན་དྲངས་ནས་སློབ་མ་ལ་བསྟིམ་པར་དམིགས་ནས་རོལ་མོ་བྱ། སླར་ཡང་དབང་ལྷ་སྤྱན་དྲངས། དབང་བསྐུར་ནས་ཆུ་ལྷག་མ་ཡར་ལུད་པ་ལས། མི་བསྐྱོད་པས་རྒྱས་བཏབ་ནས། དབང་གི་ལྷ་རྣམས་བསྟིམ་ཏེ་སྤྱི་བོར་མེ་ཏོག་ཞག་ནས་རབ་ཏུ་གནས་པར་བྱ་སྟེ། དེ་ལྟར་སློབ་མ་ཡན་ལག་བཞི་རྫོགས་སུ་བྱ་བ་ནི་སྐུའི་རྗེས་གནང་ངོ་། །དེ་ནས་སྔགས་ཐུང་དང་སྔགས་རིང་གཉིས་ཀྱི་བཟླས་པའི་ལུང་སྦྱིན་པ་ནི་སྤྱི་དང་མཐུན། ཐུགས་ཀྱི་རྗེས་གནང་ནི། ལྟ་བ་འཁོར་འདས་དབྱེར་མེད་ངོ་སྤྲོད་ནས། དེའི་ངང་ལ་གཞག་པའོ། །དེ་ནས་སློབ་མའི་མགོར་གཏོར་མ་གཞག སློབ་དཔོན་གྱིས་ཕྲེང་བ་སློབ་མའི་མགུལ་དུ་བསྐོན་པ་ལ་སློབ་དཔོན་གྱི་ཕྱག་གིས་འཇུས་ནས། བླ་མ་བརྒྱུད་པའི་མཚན་ནས་བརྗོད་དེ། དེ་དག་གི་བཀའ་དང་དམ་ལས་མ་འདའ་བར་ཞེས་སོགས་རྗེས་གནང་སྤྱིའི་བཀའ་བསྒོ་དང་། ཁྱད་པར་གསུང་ངག་རིན་པོ་ཆེ་ཉམས་སུ་ལེན་པ་ལ་འཇིག་རྟེན་ཆོས་ཀྱི་བར་ཆད། ཕྱི་རོལ་བདུད་ཀྱི་བར་ཆད། བདུད་སྟོབས་འཕེལ་བའི་བར་ཆད་རྣམས་མི་འབྱུང་ཞིང་། ཁམས་འདུས་པ་གསུམ་མཐར་ཕྱིན་ནས། ཚེ་འདི་ཉིད་ལ་གྲུབ་མཐའ་སྙོགས་པའི་མཐུན་རྐྱེན་ཕུན་སུམ་ཚོགས་པ་བསྒྲུབ་ཏུ་གསོལ། རང་སྒྲུབ་པ་མཐར་ཕྱིན་ནས་སྣོད་ལྡན་གྱི་གདུལ་བྱ་ལ་དབང་གི་སྨིན་པར་བྱས་ནས། ཁྲིད་དང་གདམས་པ་ཚུལ་བཞིན་དུ་བསྟན་པའི་སྒོ་ནས། གསུང་ངག་རིན་པོ་ཆེའི་བསྟན་པ་དར་ཞིང་རྒྱས་པར་མཛད་དུ་གསོལ། ཞེས་པའི་བཀའ་བསྒོ་བྱ། རྗེས་ཀྱི་བྱ་བ་རྣམས་སྤྱི་དང་མཐུན་ནོ།། །།འདིའི་བརྒྱུད་པ་ནི། རྗེ་བཙུན་བླ་མ་ཀུན་དགའ་བཟང་པོ་ཡན་ཆད་གསུང་ངག་བརྒྱུད་པ་དང་མཐུན་ལ། དེ་ནས་ཆོས་ཀྱི་རྗེ་ཀུན་དགའ་དབང་ཕྱུག དེས་བདག་བསོད་ནམས་སེང་གེ་ལའོ། །འདིའི་སྒྲུབ་པ་དང་། ལས་སྦྱོར་རྣམས་གུར་རྒྱན་ན་བཞུགས་པ་དེ་ཉིད་ཡིན་ཅིང་། ཕྱག་མཚན་ལ་གཎྜི་མེད་པར་གསུངས་ལ། ཞབས་ཀྱི་བཞུགས་ཚུལ་ཞི་བ་ལ་གཡས་བརྐྱང་། དྲག་པོ་ལ་གཡོན་བརྐྱང་། དབང་ལ་ས་ག རྒྱས་པ་ལ་ཟླུམ་པོ་བྱ་བར་གསུངས་སོ། །བདག་མདུན་གང་ལའང་དམ་ཚིག་པ་བསྐྱེད་པའི་ཚེ་ས་བོན་ཙམ་ལས་བསྐྱེད་པའམ། རྡོ་རྗེ་ཆོ་ག་གསུམ་ལས་བསྐྱེད་པ་ནི་གང་བྱས་ཀྱང་འདྲ་བ་ཉིད་དོ། །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་འབར་གྱུར་ཅིག །དགེའོ།། །།

ལམ་འབྲས་བླ་མ་བརྒྱུད་པ་ལ་ཡན་ལག་བདུན་པ་འབུལ་ཞིང་གསོལ་བ་གདབ་པ།

ལམ་འབྲས་བླ་མ་བརྒྱུད་པ་ལ་ཡན་ལག་བདུན་པ་འབུལ་ཞིང་གསོལ་བ་གདབ་པ་བཞུགས་སོ།། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །ལམ་འབྲས་བླ་མ་བརྒྱུད་པ་ལ་གསོལ་བ་བཏབ་ཅིང་ཡན་ལག་བདུན་པ་བྱ་བའི་སྒོ་ནས་ཚོགས་གསག་པར་འདོད་པས། གནས་ཁང་ཕྱག་དར་སོགས་ཀྱིས་གཙང་བར་བྱས་པའི་སྟེགས་མཐོ་སར་བླ་མའི་སྐུ་ལ་སོགས་པའི་རྟེན་རྣམས་བཤམ། དེའི་མདུན་དུ་མཆོད་པ་ཅི་འབྱོར་པ་གཙང་ཞིང་བཀོད་པ་ལེགས་པ་དང་། མཎྜལ་གཅིག་ལ་ཚོམ་བུ་སུམ་ཅུ་སོ་བདུན་བཀོད་པའང་བཤམ། རྣལ་འབྱོར་པ་སོ་སོའི་མདུན་དུ་རྡོ་རྗེ་དྲིལ་བུ་ལ་སོགས་པའི་རོལ་མོའི་ཡོ་བྱད་རྣམས་ཀྱང་བཤམ། དེ་ནས་ཐོག་མར་ཀུན་རིག་ནས་འབྱུང་བ་ལྟར་མཆོད་པ་བྱིན་གྱིས་བརླབ་པ་དང་། སྣ་ཚོགས་རོལ་མོས་བྱིན་དབབ། སྐྱབས་སུ་འགྲོ་བ་མང་དུ་བྱས་ཏེ། སེམས་བསྐྱེད་པ་ལན་གསུམ་བྱའོ། །དེ་ནས་མདུན་གྱི་ནམ་མཁར་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བའི་བླ་མ་དམ་པ་སངས་རྒྱས་རྡོ་རྗེ་འཆང་གི་རྣམ་པ་ཅན་སྐུ་མདོག་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། རིན་པོ་ཆེའི་དབུ་རྒྱན་ལ་སོགས་པ་རིན་པོ་ཆེའི་རྒྱན་ཐམས་ཅད་ཀྱིས་སྤྲས་ཤིང་། དར་སྣ་ཚོགས་ཀྱི་ན་བཟས་མཛེས་པ། སྐུ་མཚན་དང་དཔེ་བྱད་ཀྱིས་སྤྲས་པ། གསུང་གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཤེས་བྱ་ཇི་ལྟ་བ་དང་ཇི་སྙེད་པ་མཁྱེན་པ། འོད་ཟེར་བྱེ་བ་འགྱེད་པ། ཞལ་འཛུམ་བག་དང་ལྡན་པས་བདག་ལ་དགེས་བཞིན་དུ་བཞུགས་པར་བསམས་ལ། དེའི་མཐའ་སྐོར་དུ་བླ་མ་བརྒྱུད་པ་དང་བཅས་པ། ཡི་དམ་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ། དམ་པ་ཆོས་སྐྱོང་སྲུང་མའི་ཚོགས་དང་བཅས་པས་བསྐོར་བར་བསམས་ལ། དེ་ནས་ཐུགས་ཀ་ནས་འོད་ཟེར་འཕྲོས་པས་བླ་མ་བརྒྱུད་པ། ཡི་དམ་ལྷ་ཚོགས། སངས་རྒྱས་བྱང་སེམས། ཆོས་སྐྱོང་སྲུང་མའི་ཚོགས་དང་བཅས་པ་སྤྱན་དྲངས་ནས། རྩ་བའི་བླ་མ་ལ་ཐིམ་པས་བླ་མ་སངས་རྒྱས་ཀུན་འདུས། དམ་ཆོས་ཀུན་འདུས། དགེ་འདུན་ཀུན་འདུས་ཀྱི་ངོ་བོར་གྱུར་པར་བསམ་མོ། །དེ་ལ་ཡན་ལག་བདུན་པ་དབུལ་བ་ལ། དང་པོ་ཕྱག་འཚལ་བ་ནི། གང་གི་དྲིན་གྱིས་བདེ་ཆེན་ཉིད། །ཅེས་པ་ནས། ཁྱོད་མཉེས་བགྱིད་པའང་འགྲུབ་པར་ཤོག །ཅེས་པའི་བར་གྱིས་ཕྱག་བྱ། དེ་ནས་མི་འཕྲོག་པའི་མཁྱེན་རབ་དང་ཞེས་པ་ནས། བསོད་ནམས་རྒྱལ་མཚན་ལ་ཕྱག་འཚལ་ཞེས་པའི་བར་དང་། དེ་ནས་བརྒྱུད་པའི་ཁ་སྐོང་རྩ་བའི་བླ་མ་ལ་ཐུག་གི་བར་དང་། ཕྱོགས་བཅུའི་འཇིག་རྟེན་ཞེས་པ་ནས། བདེ་བ་ཆེན་པོས་མཉེས་གྱུར་ཅིག །ཅེས་པའི་བར་གྱིས་ཕྱག་བྱའོ། །གཉིས་པ་མཆོད་པ་དབུལ་བ་ནི། སྔར་གྱི་མཆོད་པ་བྱིན་བརླབས་དྲན་པའི་ཕྱིར་དུ་སླར་ཡང་ལན་གཅིག་བྱས་ལ་མཆོད་ཡོན་ཕལ་ཆེར་མའམ། ཞིང་ཁམས་རྒྱ་མཚོ་མ་སོགས་མཆོད་འབུལ་གྱི་ཚིགས་བཅད་གང་ཡང་རུང་བ་ཆུ་གཉིས་སྔོན་དུ་འགྲོ་བའི་ཉེར་སྤྱོད་གདངས་དང་བཅས་ཏེ་རོལ་མོའང་དབུལ་ལོ། །དེ་ནས་གྲུབ་ན་རིག་མ་བཅུ་དྲུག་གི་མཆོད་པའང་བྱ་ཞིང་། དེ་ཙམ་མ་གྲུབ་ནའང་རྒྱལ་སྲིད་སྣ་བདུན་དང་། འདོད་ཡོན་ལྔའི་མཆོད་པ་ཀུན་རིག་ལྟར་བྱའོ། །དེ་ནས་མཎྜལ་སོ་བདུན་མ་དང་། གང་གི་མཆོད་རྫས་མ་བྱ་ཞིང་། དེང་ནས་བྱང་ཆུབ་སྙིང་པོའི་བར་ཞེས་སོགས་ཀྱི་ཚིགས་བཅད་གཉིས་ལ་ཚིག་རྐང་གསུམ་པའི་རྗེས་སུ། སེམས་ཅན་ཀུན་གྱི་དོན་གྱི་ཕྱིར་ཞེས་དང་། མཇུག་ཏུ་བཞེས་ནས་བྱིན་གྱིས་བརླབ་ཏུ་གསོལ་ཞེས་པ་སྦྱར་ནས། ས་གཞི་སྤོས་ཆུ་བྱུགས་ཤིང་ཞེས་སོགས་དང་། གུ་རུ་བུདྡྷ་བོདྷི་སཏྭ་ས་པ་རི་ཝཱ་ར་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཤྲི་ཡེ་ཧཱུྃ་ཞེས་པས་མཎྜལ་དབུལ་ལོ། །ཡན་ལག་ཕྱི་མ་ལྔ་ནི། བདག་ནི་ཐོག་མེད་དུས་ནས་སུ། །ཞེས་པ་ནས་ཇི་ལྟར་བསྔོས་པ་འགྲུབ་པར་ཤོག །ཅེས་པའི་བར་ལན་གཅིག་བརྗོད་པར་བྱའོ། །དེ་ནས་འདུན་པ་རྩེ་གཅིག་པའི་བསམ་པས་ཕྱོགས་བཅུ་དུས་གསུམ་མ་བརྗོད་པའི་སྒོ་ནས་གསོལ་བ་བཏབ་ལ་མཐའ་སྐོར་གྱི་ཆོས་སྐྱོང་སྲུང་མ་ནས་བརྒྱུད་པའི་བླ་མའི་བར་རྩ་བའི་བླ་མ་ལ་ཐིམ། རྩ་བའི་བླ་མ་རང་གི་སྤྱི་བོ་ནས་ཐིམ་སྟེ་སྙིང་པདྨ་འདབ་བརྒྱད་དུ་གྱེས་པའི་སྟེང་དུ་བྱང་སེམས་དཀར་པོ་ཟླ་བའི་དཀྱིལ་འཁོར་དུ་བྱས་པ་ལ་བཞུགས་པར་བསམ་ནས་གདངས་དང་བཅས་ཏེ་ཐོས་པ་རྒྱ་མཚོ་ལན་གཅིག་བྱའོ། །དེ་ནས་དགེ་བའི་རྩ་བ་རྫོགས་པའི་བྱང་ཆུབ་ཏུ་བསྔོ་བའི་ཕྱིར་བཟང་པོ་སྤྱོད་པ་ལ་སོགས་པའི་སྨོན་ལམ་རྒྱ་ཆེར་གདབ་བོ། །གང་གི་ཚེ་ཀྱཻ་རྡོ་རྗེའི་རྣལ་འབྱོར་པ་འབའ་ཞིག་འཚོགས་ནས་གསང་སྒྲོགས་ལ་སོགས་པ་མི་འབྱུང་བའི་གནས་དབེན་པ་ཡོད་པའི་ཚེ་གཞན་རྣམས་སྔར་དང་འདྲ་བ་ལས། མཆོད་པའི་སྐབས་སུ་ཆུ་བཞི་སྔོན་དུ་འགྲོ་བའི་ཉེར་སྤྱོད་གྲངས་མང་བར་བཤམ། མཆོད་པ་བྱིན་དབབ་པའང་ཀྱཻ་རྡོར་ལྟར་བྱ། མདུན་དུ་བསྐྱེད་པའི་ཚེ་སེང་གེས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་། ཟླ་བ་དང་། ཉི་མ་དང་། བདུད་བཞི་བརྩེགས་པའི་གདན་གྱི་སྟེང་དུ་བླ་མ་ཀྱཻ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པར་བསྐྱེད། ཕུང་ཁམས་སྐྱེ་མཆེད་ལྷའི་ངོ་བོར་བསྒོམ་པ་ལམ་ཟབ་ལྟར་བྱ། མཇུག་ཏུ་སྤྲོས་པ་གཅད་པ། དབང་བླང་བ། ལྟ་བ་བསྐྱང་བ་རྣམས་ལམ་ཟབ་ལྟར་བྱ་སྟེ། དེ་ནས་བླ་མ་སྤྱི་བོ་ནས་བསྟིམས་ནས་ཐོས་པ་རྒྱ་མཚོ་སོགས་བྱའོ། །ལམ་འབྲས་བླ་མ་བརྒྱུད་པ་ལ་ཡན་ལག་བདུན་པ་དབུལ་ཞིང་གསོལ་བ་གདབ་པའི་ཚུལ་འདི་ནི། དོན་གཉེར་གྱི་སློབ་མ་རིན་ཆེན་རྒྱལ་མཚན་ཁམས་ལ་འགྲོ་ཁའི་ནངས་པར་རང་དུ་བསྐུལ་ནས། ཇ་གྲལ་དེ་ཉིད་དུ་བླ་མ་དམ་པ་རྣམས་ཀྱི་བྲན་དུ་གྱུར་པ་མང་ཐོས་དགེ་སློང་བསོད་ནམས་སེང་གེས་སྦྱར་བའོ།། །།དགེའོ།། ༄༅། །བརྡ་དགྲོལ་ངེས་པའི་དཔལ་སྟེར་བཞུགས།། ༈ །བརྡ་དགྲོལ་ངེས་པའི་དཔལ་སྟེར་ཞེས་བྱ་བ། རྗེ་བཙུན་རྣལ་འབྱོར་གྱི་དབང་ཕྱུག་བརྒྱུད་པ་དང་བཅས་པའི་ཞབས་ཀྱི་པདྨོ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་རྗེས་སུ་གཟུང་དུ་གསོལ། འདིར་རྗེ་བཙུན་གྱི་རྒྱལ་པོ་འཁྲུལ་པའི་དྲི་མ་ཟད་པ་གྲགས་པ་རྒྱལ་མཚན་གྱི་ཞལ་སྔ་ནས། སྟོང་ཐུན་ས་བཅད་ཀྱི་མཇུག་ཏུ། བླ་མེད་ཕྱོགས་ནི་རིས་བསྒྱུར་མིག་བཅས་པ། །རིག་བྱེད་ཀྱིས་གསལ་ལག་པས་མེ་ལ་བགོས། །དེ་འོད་ཀུན་གསལ་ཆུ་གཏེར་འབྱུང་བར་བབས། །བློ་ལྡན་དོན་དེ་ཤེས་ན་སྨྲ་བར་གྱིས། །ལེགས་འོངས་མིག་གིས་ཡོན་ཏན་གསལ་བར་བྱས། །མེ་དང་ཆུ་བོས་འབྱུང་བ་རབ་ཏུ་བསྐྱེད། །ཟླ་བས་ཀུན་ཀྱང་གསལ་བར་བྱེད་མོད་ཀྱི། །མིག་གིས་ལེགས་པར་བལྟས་པས་བདག་བློ་དད། །གཟུགས་གཉིས་ཡོན་ཏན་ཟུང་ནི་ཐོག་མ་སྟེ། །གང་གིས་གང་སྟོན་ལོ་རྒྱུས་དང་བཅས་པ། །གཞུང་འདིར་ཀུན་ཏུ་བལྟས་པས་བློ་ལྡན་གྱིས། །ལེགས་རྟོགས་གཞན་ལ་སྟོན་ན་བདག་བློ་སྤྲོ། །ལེགས་འོངས་འཆད་པ་བཤད་གཞི་ལོ་རྒྱུས་ཅན། །རྣམ་འགྲེལ་བཅས་པ་སྡིག་འཇོམས་གཞན་མིན་ལྡན། །མཁས་མཚུངས་འཛིན་བཅས་དྲི་མ་ཀུན་སྤངས་ཏེ། །ཡི་གེ་བཞི་ལྡན་ཉིད་དུ་འགྱུར་བར་ཤོག །ཅེས་པའི་དོན་འགྲེལ་པ་ལ་བཞི་སྟེ། སྤྱིར་རྒྱུད་སྡེ་བདུན་ཅུ་རྩ་གཉིས་ཀྱི་བརྒྱུད་པ་སྨོས་པ། བྱེ་བྲག་རྒྱུད་གསུམ་གྱི་བརྒྱུད་པ་སྨོས་པ། བཤད་བྱ་འཆད་བྱེད་དང་བཅས་པའི་སྒོ་ནས་དོན་བསྡུ་བ། འཇུག་པ་པོ་འབྲས་བུ་ཕུན་སུམ་ཚོགས་པར་བསྔོ་བའོ། །དང་པོ་ནི་ཚིགས་སུ་བཅད་པ་དང་པོ་སྟེ། བླ་མེད་ཅེས་པ་ནི་བླ་མེད་ཀྱི་རྒྱུད་སྡེའོ། །ཕྱོགས་ནི་བཅུ་ཡིན་ལ། དེ་རི་སྟེ་བདུན་གྱིས་བསྒྱུར་བས་བདུན་ཅུར་འགྱུར། དེ་མིག་སྟེ་གཉིས་དང་བཅས་པས་བླ་མེད་ཀྱི་རྒྱུད་སྡེ་བདུན་ཅུ་དོན་གཉིས་ཞེས་པའོ། །དེ་གང་གིས་གསལ་བར་བྱེད་ན། རིག་བྱེད་ནི་བཞི་སྟེ། རྒྱུད་སྡེ་སྤྱིའི་རྣམ་གཞག་སོགས་ཚུལ་བཞིས་གསལ་བར་བྱེད་ཅེས་པའོ། །གཞན་དག་སྙན་བརྒྱུད་བཞིས་ཞེས་འཆད་པ་ནི་ནོར་ཏེ། སྙན་བརྒྱུད་མན་ངག་གི་སྟེང་དུ་བརྩི་བར་བྱ་བ་ཡིན་གྱི་རྒྱུད་ཀྱི་སྟེང་དུ་བརྩི་བར་བྱ་བ་མ་ཡིན་པའི་ཕྱིར་དང་། སྟོང་ཐུན་ས་བཅད་ཀྱི་དོན་བསྡུའི་སྐབས་ཡིན་པས། སྐབས་ཐོབ་ཀྱང་མ་ཡིན་པའི་ཕྱིར་རོ། །དེ་གང་ལས་བརྒྱུད་ན། ལག་པ་ནི་རྡོ་རྗེ་འཆང་ནས་བརྒྱུད་པ་གཉིས་པ་བིརྺ་པ་ཡིན་ལ། དེས་གསུམ་པ་མེ་སྟེ་ས་ཆེན་ལ་བགོས། དེའི་གསུང་གི་འོད་ཟེར་ཀུན་ཏུ་གསལ་བ་ལས་བཀའ་བབས་ནི་ཆུ་གཏེར་ཏེ་བཞི་པ་རྗེ་བཙུན་རྩེ་མོ། འབྱུང་བ་སྟེ་ལྔ་པ་རྗེ་བཙུན་གྲགས་པ་རྒྱལ་མཚན་ལ་བབས་ཞེས་པའོ། །འདི་བརྡ་ཚིག་གིས་སྟོན་དགོས་ཏེ། གཞན་དག་ཡིད་མ་ཆེས་ནས་བསོད་ནམས་མ་ཡིན་པ་བཟློག་པའི་ཆེད་དུ་གསང་བར་མཛད་པ་ལོ་རྒྱུས་ཀྱི་ཡི་གེ་ན་གསལ་ལོ། །དེའི་ཤན་གྱིས་འདིར་རིང་བརྒྱུད་ཀྱང་བརྡ་ཚིག་གིས་སྟོན་པ་ཡིན་ལ། འཇིག་རྟེན་ན་གྲགས་ཤིང་ཡིད་ཆེས་པའི་གནས་ཡིན་པས་དག་ལྗོན་སོགས་ལས་གསལ་བར་བཤད་དེ་འོག་ཏུ་འཆད་དོ། །གཉིས་པ་ནི། ལེགས་འོངས་ཞེས་སོགས་ཚིགས་བཅད་གཉིས་ཏེ། ལེགས་འོངས་ནི་ཡོངས་སུ་གྲགས་པའི་བརྒྱུད་པ་ཡིན་ལ། མིག་ནི་གཉིས་ཏེ། ནག་པོ་པ་ནས་བརྒྱུད་པ་དང་། ཌོམྦི་པ་ནས་བརྒྱུད་པ་གཉིས་སོ། །དེས་གང་གསལ་བར་བྱས་ན། ཡོན་ཏན་ནི་གསུམ་སྟེ་རྒྱུད་གསུམ་གསལ་བར་བྱས་པའོ། །དེ་གང་ལ་བཀའ་བབ་ན། མེ་དང་། ཆུ་བོ་དང་། འབྱུང་བ་ནི་སྔ་མའི་བརྡ་ཚིག་གཞིར་བཞག་ནས་ས་ཆེན་དང་། རྩེ་མོ། གྲགས་པ་གསུམ་མོ། །ཟླ་བ་ནི་གཅིག་སྟེ། སངས་རྒྱས་རྡོ་རྗེ་འཆང་། དེས་རྒྱུད་སྡེ་ཀུན་ཀྱང་གསལ་བར་བྱེད་མོད་ཀྱི་འདིར་མིག་ནི་སྔ་མ་ལྟར་བརྒྱུད་པ་གཉིས་ཀྱིས་ལེགས་པར་བལྟས་པས་བདག་གི་བློ་རྒྱུད་གསུམ་གྱི་བརྗོད་བྱ་ལ་དད་ཅེས་པའོ། །འོ་ན་མེ་ཡན་ཆད་ཀྱི་བརྒྱུད་པ་གང་སྙམ་ན། གཟུགས་གཉིས་ནི་ནག་པོ་པ་ནས་ག་ཡ་དྷ་རའི་བར་དང་། ཌོམྦི་པ་ནས་དཔའ་བོ་རྡོ་རྗེའི་བར་གཉིས་ཡིན་ལ། ཡོན་ཏན་ནི་གསུམ་སྟེ། དེ་ཟུང་ནི་བརྒྱུད་པ་དང་པོ་འབྲོག་མི། སེ་སྟོན། ཞང་དགོན་པ་བ་དང་གསུམ་དང་། བརྒྱུད་པ་གཉིས་པ་ནི་འབྲོག་མི། མངའ་རིས་པ་གསལ་བའི་སྙིང་པོ། འཁོན་སྒྱི་ཆུ་བ་ཤཱཀྱཾ་འབར་གསུམ་ཡིན་པས་དེ་སྔར་གྱི་མེའི་ཐོག་མར་སྦྱར་ཞེས་པའོ། །དེ་ལྟར་ཡང་ལྗོན་ཤིང་ལས། དེ་ལྟར་དེ་དག་ཀྱང་ཐོག་མར་བརྒྱུད་པའི་བླ་མ་གཉིས་ལས་ཇི་ལྟར་བརྒྱུད་དེ་འོངས་སྙམ་ན། འདིར་བརྗོད་པ། རྡོ་རྗེ་འཆང་དབང་དཔལ་ལྡན་ཡེ་ཤེས་མཁའ་འགྲོ་མ། །རྗེ་བཙུན་ཆོས་སྐྱོང་མཐུ་སྟོབས་དབང་ཕྱུག་བིརྺ་པ། །ནག་པོ་ཌཱ་མ་པ་དང་ཨ་ཝ་དྷཱུ་ཏཱི་དཔལ། །རྗེ་བཙུན་ག་ཡ་དྷ་ར་ཤཱཀྱ་ཡེ་ཤེས་མཆོག །ཅེས་བྱ་བས་བརྒྱུད་པ་དང་པོ་བརྗོད་ནས། གཞན་ཡང་གཉིས་པའང་བརྗོད་པར་བྱ་སྟེ། གཉིས་པ་ཌོམྦི་ཧེ་རུ་ཀ་དཔལ་དེ་རྗེས་སུ། །ཨ་ལ་ལ་དང་དཔལ་ལྡན་ནགས་ཁྲོད་གརྦྷ་རི། །རྒྱལ་བ་དཔལ་གྱི་ཡེ་ཤེས་སྦྱང་དཀའི་ཟླ་བ་དང་། །དཔའ་བོ་རྡོ་རྗེ་ཡེ་ཤེས་ཞབས་ལ་གདམས་པའོ། །བརྒྱུད་པ་གཉིས་པོ་འཛིན་པའི་རྗེ་བཙུན་ཤཱཀྱ་ཡེ་ཤེས་ལས། སུས་ཅི་ལྟར་ཐོས་ཤིང་། དེ་དག་ལས་ཀྱང་བླ་མ་ཆེན་པོས་ཇི་ལྟར་ཐོས་སྙམ་ན། དཔེ་དང་བསྟུན་ནས་བརྗོད་པ། མ་དྲོས་ཡེ་ཤེས་ཞབས་ལ་རྒྱུན་བཞིའི་བླ་མ་ནི། །རྒྱལ་པོ་རིག་དང་སྙིང་པོ་སྣང་བའི་མཐའ་ཅན་ཏེ། །རིག་དང་སྙིང་པོའི་ཞབས་ལས་འབར་བ་འབར་བའི་མཐའ། །རྒྱུན་བཞི་འཛིན་པའི་བླ་ཆེན་དེ་ལ་བདག་ཕྱག་འཚལ། །ཞེས་དང་། དག་ལྡན་ལས་ཀྱང་ཆ་འདྲ་བར་འབྱུང་སྟེ། བརྒྱུད་པ་གཉིས་ལས་ཞེས་དང་། སྙིང་པོ་རིག་ལས་འབར་བ་འབར་བའི་མཐའ། །ཞེས་པས། གཟུགས་གཉིས་དང་ཡོན་ཏན་ཟུང་བསྟན་ཅིང་། དེ་ས་ཆེན་གྱི་ཐོག་མར་སྦྱར་བས་ལོ་རྒྱུས་སྟོན་པ་གཞུང་ཀུན་གྱི་དགོངས་པར་སྣང་ངོ་། །ཚུལ་བཞི་པོ་གང་གིས་རྒྱུད་གསུམ་གང་སྟོན་པ་ལོ་རྒྱུས་བརྒྱུད་པ་གཉིས་པོ་དང་བཅས་པ། གཞུང་འདིར་ཞེས་སོགས་ནི་གོ་སླའོ། །གསུམ་པ་ནི། ལེགས་འོངས་ཞེས་སོགས་ཚིག་རྐང་གཉིས་ཏེ། ལེགས་འོངས་ནི་སྔ་མ་དང་འདྲའོ། །འཆད་པ་ནི་བཤད་ཐབས་ཀྱི་མན་ངག་ཚུལ་བཞི་སྟེ། འདི་ལ་ཡིག་ཆ་རྒྱུད་སྡེའི་དུམ་བུ། སྤྱི་རྣམས། ལྗོན་ཤིང་། སྟོང་ཐུན་ས་བཅད་དང་བཞི་ཡོད་དོ། །བཤད་གཞི་ནི་རྒྱུད་གསུམ་མོ། །ལོ་རྒྱུས་ཅན་ནི་སྔར་གྱི་བརྒྱུད་པ་གཉིས་སོ། །རྣམ་འགྲེལ་ནི་དག་ལྡན། གུར་རྒྱན། གནད་ཀྱི་གསལ་བྱེད་གསུམ་མོ། །བཅས་པ་ནི་བསྡུས་དོན་གསུམ་མོ། །སྡིག་འཇོམས་ནི་ཡབ་ཡུམ་གྱི་བསྟོད་པ་གཉིས་ཏེ། བདག་མེད་བསྟོད་པར། རང་བཞིན་དྲི་མེད་བློ་གྲོས་གློ་བུར་གྱི། །དྲི་མས་བསྒྲིབས་པ་གསལ་བར་མཛད་པ་ཡི། །ཞེས་གསུངས་པ་ལས་ཤེས་སོ། །དེ་ལས་གཞན་མིན་པར་ལྡན་པ་ནི་བདག་མེད་བསྟོད་འགྲེལ་ཏེ། དག་ལྡན་ལས། རྒྱུད་སྤྱི་ལ་དགོས་པའི་སྡོམ་པ། རྒྱུད་སྡེའི་དུམ་བུ་རྣམ་གཞག་མངོན་རྟོགས་ཏེ། །སྟོང་ཐུན་གཉིས་ཀྱི་དོན་བསྡུས་བསྟོད་པ་གཉིས། །བདག་མེད་བསྟོད་པའི་རྣམ་འགྲེལ་དང་བཅས་པ། །ཀུན་ཏུ་དགོས་པའི་གཞུང་བདུན་འཐོར་མི་བྱ། །རྒྱུད་སོ་སོ་ལ་དགོས་པ་ནི། རྒྱུད་དོན་སོ་སོའི་རྣམ་འགྲེལ་དོན་བསྡུས་བཅས། །གང་ལ་གང་དགོས་དེ་དེ་བླང་བྱ་སྟེ། །དེ་ལྟར་བཅུ་གསུམ་ལེགས་པར་བལྟས་བྱས་ནས། །རྣམ་པར་ཕྱེ་བས་རྒྱུད་དོན་ཤེས་པར་འགྱུར། །ཞེས་གསུངས་པས་ཆོས་སྣ་བཅུ་གསུམ་པོ་བཤད་གཞི་རྒྱུད་གསུམ་དང་བཅས་པ་སྟོན་པས་སོ། །བཞི་པ་ནི། མཁས་མཚུངས་ཞེས་སོགས་ཚིག་རྐང་གཉིས་ཏེ། དེ་དག་ལ་མཁས་པ་སྔ་མ་དང་མཚུངས་པ་ཉིད་དུ་སྙན་བརྒྱུད་ཀྱི་སྒོ་ནས་མཁས་པ་ནི་རྗེ་བཙུན་ཉིད་ཡིན་ལ། ཐོས་བསམ་གྱི་སྒོ་ནས་འཛིན་པ་དང་བཅས་པ་ནི་སློབ་མའི་ཚོགས་ཏེ། དེ་དག་སྤང་བྱ་གཉིས་ཀྱི་དྲི་མ་ཀུན་སྤངས་ཏེ། ཐོབ་བྱ་ཧེ་རུ་ཀ་ཞེས་པའི་ཡི་གེ་བཞིའི་དོན་དང་ལྡན་པར་ཤོག་ཅེས་པའོ། །འདིའི་ཚིགས་བཅད་དང་པོ་འགྲེལ་པ་དུ་མ་སྣང་ཞིང་། ཕྱི་མ་རྣམས་དགྲོལ་བ་མཐོང་ཞིང་ཐོས་པ་མེད་པས་སྤོབས་པ་ཞུམ་པར་གྱུར་པའི་ཚེ། སྐྱེས་ཆེན་དམ་པ་དག་གིས་དྲིས་པའི་རྐྱེན་བྱས་ནས་རྣ་རོའི་བནྡེ་གཤིན་རྗེ་གྲགས་ཀྱིས་བཞེངས་པའི་རྗེ་བཙུན་གྱི་སྐུ་འདྲའི་དྲུང་དུ་གསོལ་བ་བཏབ་པས། རྟོག་པ་ལ་རང་དགར་ཤར་བ་རྒྱུད་གསུམ་སྨྲ་བའི་དགེ་སློང་བསོད་ནམས་སེང་གེས་བྲིས་པའོ།། །།འདི་དག་དོན་དུ་མ་སོང་ན། །སེམས་ཀྱི་དྲི་མར་གྱུར་པ་ལ། །སངས་རྒྱས་རྣམས་ནི་སྨོད་མི་མཛད། །ཅེས་པའི་ཚུལ་གྱིས་བླ་མ་མཁའ་འགྲོའི་ཚོགས་ཀྱིས་བཟོད་པར་མཛད་ནས། ཐུགས་རྗེས་གཟུང་དུ་གསོལ། དོན་དུ་སོང་ན་དགེ་བའི་རྩ་བ་སེམས་ཅན་ཐམས་ཅད་ཀྱིས་སངས་རྒྱས་ཐོབ་པའི་ཆེད་དུ་བསྔོའོ། །དགེའོ།། ༄༅། །རྒྱུད་ཀྱི་ཚིག་དོན་ལ་དོགས་གཅོད་བཞུགས།། ༈ །བླ་མ་དང་དཔལ་ཀྱཻ་རྡོ་རྗེ་ལ་ཕྱག་འཚལ་ལོ། །རྩ་རྒྱུད་བརྟག་གཉིས་ཀྱི་ཕྱི་མའི་དགུ་པར། དང་པོ་རྣམ་སྣང་དེར་རྗེས་སུ། །རྡོ་རྗེ་མ་ཡི་མཐའ་རུ་ཧཱུྃ། །ཞེས་པའི་འགྲེལ་པ་མུ་ཏིག་ཕྲེང་བ་ལས། དེར་རྗེས་རྡོ་རྗེ་ཞེས་པ་ནི་ཡི་གེ་ཨ་སྟེ། འདིར་དེ་ཉིད་དྲག་ཅིང་དུའོ། །ཞེས་དང་། གཞུང་འགའ་ཞིག་ལས། དྲག་རིང་དུའོ་ཞེས་པའང་སྣང་ངོ་། །བྷ་བ་བྷ་དྲའི་འགྲེལ་པ་ལས། དེར་རྗེས་རྡོ་རྗེ་མ་ནི་དབྱངས་ཡིག་གཉིས་པ་སྟེ། དེ་ལ་ཐིག་ལེ་གཉིས་སྦྱར་བའོ། །དེ་ནས་ཡང་ཧཱུྃ་ཡི་གེ་ཨ་ཡིག་གི་ཕ་རོལ་དུ་ཐིག་ལེ་གཉིས་ནི་ཕྱིས་པའོ། །དེས་ན་རྡོ་རྗེ་ཧཱུྃ་ཞེས་པ་ནི་མཐའི་དྲག་པོའི་ཐིག་ལེ་དག་ཐིམ་ཞིང་སྦས་པའོ་ཞེས་གསུངས་སོ། །དཀའ་འགྲེལ་པདྨ་ཅན་ལས། རྡོ་རྗེ་མ་ནི་ཨའོ་ཞེས་བཤད་དོ། །ཌྷཾ་ཀ་ད་ཤའི་འགྲེལ་པ་ལས། དང་པོར་རྣམ་སྣང་ཞེས་པ་སྟེ་ཐོག་མར་ཨོཾ་ཡིག་གོ །དེའི་རྗེས་སུ་རྡོ་རྗེ་མ་ཨ་ཡིག་སྟེ་ཨཱ་དང་འདུས་པ་ལས་ཨཱའོ། །མཐའ་རུ་ཧཱུྃ་ཞེས་པ་རྡོ་རྗེ་གསུམ་གྱི་ཡི་གེ་ཨོཾ་ཨཱཿཧཱུྃ་ཞེས་པ་སྟེ་ཞེས་བཤད་དོ། །དེ་དག་གི་ནང་ནས་དཀའ་འགྲེལ་པདྨ་ཅན་གྱིས་ཨ་ཐུང་ལ་ངོས་འཛིན་པར་བཤད་སྣང་ཞིང་། མུ་ཏིག་ཕྲེང་བར་དྲག་ཅིང་དུའོ་ཞེས་པ་ལྟར་ན་ཨ་ཐུང་དང་། དྲག་རིང་དུའོ་ཞེས་པ་ལྟར་ན་ཨཱ་རིང་ལ་ངོས་འཛིན་པ་འདྲའོ། །བྷ་བ་བྷ་དྲ་དང་། ཌྷཾ་ཀ་ད་ཤ་གཉིས་ཀྱིས་ནི་དབྱངས་ཀྱི་གཉིས་པ་ལ་ངོས་འཛིན་པར་སྣང་སྟེ། ཕྱག་གཉིས་པའི་སྔགས་བཏུའི་སྐབས་སུ། རྡོ་རྗེ་མ་ཡིས་རྣམ་པར་བརྒྱན། །ཞེས་པ་དབྱངས་ཡིག་གཉིས་པ་ཡིན་པ་དང་ཁྱད་མེད་སྙམ་དུ་སེམས་སོ། །འཁྲུལ་པ་ཟད་པའི་གྲུབ་ཆེན་མི་ཐུབ་ཟླ་བའི་ཞལ་ནས་རྣམ་སྣང་ནི་ཨོཾ་སྟེ། དེ་དང་པོར་རོ། །རྡོ་རྗེ་མ་ནི་ཨའོ། །དབྱངས་ཀྱི་མཐའ་ཞེས་བྱ་བ་ནི་ཨ་སྟེ་དེ་དང་ལྡན་པའོ། །མཐར་ཧཱུྃ་ནི་བཟའ་བ་དང་། བཏུང་བ་བྱིན་གྱིས་བརླབ་པའི་སྔགས་སོ་ཞེས་གསུངས་ཏེ། འདིའི་དོན། རྡོ་རྗེ་མ་ཨཱ་ལི་གཉིས་པ་རྡོ་རྗེ་མ་ཞེས་པ་ལྟར་དབྱངས་ཡིག་གཉིས་པ་ལ་ངོས་འཛིན་པ་ཡང་དེའི་ཡ་མཐའ་ནི་དབྱངས་ཡིག་དང་པོ་ཡིན་ཞེས་པའམ། ཡང་རྡོ་རྗེ་མ་ཡང་ཡིན་དབྱངས་ཀྱི་མཐའ་ཡང་ཡིན་པའི་གཞི་མཐུན་ལྟར་ན་རྡོ་རྗེ་མ་ནི་ཞེ་སྡང་ཞེས་པ་ལྟར་གཙོ་མོ་བདག་མེད་མ་ལ་འཇུག་པས་གང་ལྟར་ཡང་ཨ་ཐུང་ཁོ་ན་ལ་ངོས་འཛིན་པར་མཛད་དོ། །དེས་ན་དཔལ་ལྡན་ས་སྐྱ་པཎྜི་ཏས། འབྲུ་གསུམ་ཨཿལ་ཚེག་དྲག་ཐོབ། །ང་རོ་རིང་ཆར་བཀླགས་པས་ནོར། །ཞེས་གསུངས་པའང་སྐྱོན་མེད་པར་གྲུབ་བོ། །ལེའུ་བརྒྱད་པའི་གྲུབ་མཐའ་བཞིའི་འགྲེལ་པར། ཤཱནྟི་པའི་མུ་ཏིག་ཕྲེང་བ་ལས་འདོད་ཆགས་དང་བྲལ་བར་སྨྲ་བའི་བྱེ་བྲག་སྨྲ་བ་སྟེ། དེ་ལྟ་བུ་དེ་ཉིད་ནི་བྱེ་བྲག་ཏུ་སྨྲ་བའོ། །དེ་ཉིད་ནི་ཉན་ཐོས་ཀྱི་ཐེག་པ་སྟེ། གདམས་ངག་བརྒྱ་པ་དང་། སྤེལ་མ་གསུམ་པའི་ཕྲེང་བ་ལ་སོགས་པའི་ལུང་ངོ་། །མདོ་སྡེ་ཞེས་པ་ནི་ཐེག་པ་ཆེན་པོའི་མདོ་སྡེ་ཤིན་ཏུ་ཟབ་པ་མ་ཡིན་པ་རྣམས་ཏེ། དེའང་ཚིགས་སུ་བཅད་པ་གཅིག་པ་ཞེས་བྱ་བ་དང་། ཚིགས་སུ་བཅད་པ་གཉིས་པའི་གཟུངས་ཞེས་བྱ་བ་དང་། སྒོ་དྲུག་པ་ཞེས་བྱ་བ་དང་། བཟང་པོ་སྤྱོད་པ་དང་། ཆོས་བཞི་པ་དང་། རྒྱ་ཆེར་རོལ་པ་དང་། ས་བཅུའི་མདོ་ལ་སོགས་པ་རྣམས་སོ། །རྣལ་འབྱོར་སྤྱོད་པ་ཞེས་པ་ནི་སྣ་ཚོགས་པ་འདི་དག་ནི་སེམས་ཙམ་སྟེ་དོན་དུ་སྣང་བ་རྣམས་ནི་བདེན་པ་མ་ཡིན་ཞིང་སེམས་ཉིད་བག་ཆགས་ཀྱི་སྟོབས་ལས་དེ་ལྟ་བུར་སྐྱེ་བ་ནི་རྨི་ལམ་ཇི་ལྟ་བ་བཞིན་ནོ་ཞེས་སོ། །དབུ་མ་ཞེས་པ་ལ་དབུ་མ་ནི་ལམ་སྟེ། དེ་ཡང་སེམས་གཉིས་ཀྱི་རང་བཞིན་གྱིས་ཡོད་པ་མ་ཡིན་ཞིང་། གཉིས་པོས་སྟོང་པའི་རང་བཞིན་གྱིས་མེད་པ་མ་ཡིན་ཞེས་པའི་དོན་ཏོ། །བསྟན་ཞེས་པ་ནི་རིམ་གྱིས་དེ་ལྟར་བསྟན་པར་བྱའོ། །རྒྱུད་ཀུན་གྱི་ཞེས་པ་ལ་སོགས་པ་ནི་དེའི་རྗེས་སུ་འདི་ཞེས་བྱ་བར་སྦྱར་རོ་ཞེས་བཤད་པ་ནི་རང་ཉིད་གཉིས་སྟོང་གི་ཤེས་པ་བདེན་པར་གྲུབ་པ་དབུ་མའི་ལུགས་སུ་བྱས་ནས་སེམས་ཙམ་པ་ལོགས་སུ་ངོས་འཛིན་པའི་ལུགས་སུ་སྣང་ངོ་། །དཀའ་འགྲེལ་པདྨ་ཅན་ལས། བྱེ་བྲག་སྨྲ་བ་དེ་ལ་བསྟན། །ཞེས་པ་ཕུང་པོ་ལྔ་ལ་སོགས་པའི་རང་བཞིན་བསྟན་པའོ། །མདོ་སྡེ་པ་ཞེས་པ་ནི་ཐེག་པ་ཆེན་པོའི་མདོའོ། །རྣལ་འབྱོར་པ་ཞེས་པ་ཐམས་ཅད་རྣམ་པར་ཤེས་པའོ། །དབུ་མ་པ་ཞེས་པ་ཡོད་པ་དང་མེད་པ་ཞེས་པ་ལ་སོགས་པའི་ཕྱོགས་སྟོང་པ་ཉིད་དོ། །ཐམས་ཅད་སྔགས་ཀྱི་ཚུལ་ཞེས་བྱ་བ་དང་། སྤྱོད་པ་དང་། རྣལ་འབྱོར་བླ་མའི་ཚུལ་དུའོ། །དེ་ལྟར་ན་གལ་ཏེ་བཟུང་ན་ཕན་ཡོན་ནི་བླངས་པས་སློབ་མ་དེའི་ཚེ་འགྲུབ་པར་འགྱུར་རོ་ཞེས་དང་། དཀའ་འགྲེལ་རིན་པོ་ཆེའི་སྦྱོར་ཕྲེང་ལས་བྱེ་བྲག་སྨྲ་བ་ཞེས་པ་ནི་འདོད་ཆགས་དང་བྲལ་བའི་ཕྱིར་བཤད་པ་སྟེ། དེའང་ཉན་ཐོས་ཀྱི་ཐེག་པ་གདམས་ངག་བརྒྱ་པ་དང་། རྒྱུན་ཆགས་གསུམ་པའི་ཕྲེང་བ་ལ་སོགས་པའོ། །མདོ་སྡེ་ཞེས་བྱ་བ་ནི་མདོ་རྒྱས་པ་དག་སྟེ། ཚིགས་བཅད་གཅིག་པ་དང་། གཉིས་པ་དང་། བཞི་པ་དང་། སྒོ་དྲུག་པའི་གཟུངས་དང་། བཟང་པོ་སྤྱོད་པའི་སྨོན་ལམ་དང་། རྒྱ་ཆེར་རོལ་པ་དང་། ས་བཅུ་པ་ལ་སོགས་པའོ། །རྣལ་འབྱོར་སྤྱོད་པ་ཞེས་བྱ་བ་ནི་སྣ་ཚོགས་འདི་དག་སེམས་ཙམ་སྟེ། རྨི་ལམ་ལྟར་འཁྲུལ་པའི་དབང་གིས་བརྫུན་པ་དག་གཅིག་ཁོ་ནར་སྣང་གི་ཁོ་ན་ཉིད་དུ་ནི་མ་ཡིན་ནོ། །དབུ་མ་ཞེས་བྱ་བ་ནི་ཆོས་ཐམས་ཅད་ཀྱི་སྐྱེ་བ་མེད་པ་ཉིད་དོ་ཞེས་དང་། ཌྷཾ་ཀ་ད་ཤའི་འགྲེལ་པ་ལས། དེ་ལ་བྱེ་བྲག་སྨྲ་བ་བསྟན། །ཞེས་པ་ཉན་ཐོས་དང་། རང་སངས་རྒྱས་ཀྱི་ཚུལ་ཏེ། ཉན་ཐོས་རྣམས་ཀྱི་བྱང་ཆུབ་ནི་ཉོན་མོངས་པའི་སྒྲིབ་པ་སྤངས་པའི་རང་བཞིན་ནོ། །རང་སངས་རྒྱས་རྣམས་ཀྱི་ནི་ཤེས་བྱའི་སྒྲིབ་པའི་ཕྱོགས་གཅིག་སྤངས་པའི་རང་བཞིན་ནོ། །མདོ་སྡེ་ཞེས་པ་མདོ་སྡེ་ཀློག་པར་བྱེད་པའོ། །རྣལ་འབྱོར་སྤྱད་པ་ཞེས་པ་རྣམ་པར་ཤེས་པ་ཙམ་བདེན་ཞེས་པ་རྣལ་འབྱོར་སྤྱོད་པའི་ལུགས་སོ། །དབུ་མ་ཞེས་པ་མཐའ་བཞི་ལས་རྣམ་པར་གྲོལ་བ་ཀུན་རྫོབ་ཐམས་ཅད་ཅེས་པ་དབུ་མ་པའི་ལུགས་སོ་ཞེས་གསུངས་པ་རྣམས་ནི་གྲུབ་མཐའ་བཞིའི་ལྟ་བའི་རིམ་པ་ཇི་ལྟ་བ་བཞིན་འགྲེལ་པའི་ལུགས་སུ་སྣང་སྟེ། འཇམ་དཔལ་གྱི་ཞལ་ལུང་དང་། ཡེ་ཤེས་སྙིང་པོ་ཀུན་ལས་བཏུས་གཉིས་ལས་གསུངས་པའི་གྲུབ་མཐའ་བཞིའི་ལྟ་བའི་རིམ་པ་ཇི་ལྟ་བ་བཞིན་དུ་སྣང་ངོ་། །འདི་ཡང་རྒྱུད་ཀྱི་ཚིག་དོན་ལ། །སྒྲོ་འདོགས་གཅོད་པར་འདོད་པ་ཡི། །དོན་དུ་བསོད་ནམས་སེང་གེས་སྦྱར། །དགེ་ཚོགས་བྱང་ཆུབ་ཆེན་པོར་བསྔོ། །དགེའོ།། ༄༅། །སཾ་བུ་ཊིའི་བསྡུས་དོན་ཚིགས་བཅད་མ་བཞུགས།། ༈ །ན་མོ་གུ་རུ་བྷ་དྲཱ་ཡ། ཐབས་དང་ཤེས་རབ་ཡང་དག་སྦྱོར། །གཉིས་འཛིན་འཁྲུལ་པའི་དྲི་མ་འཁྲུད། །དྲི་བྲལ་རྡོ་རྗེ་སེམས་དཔའ་དཔལ། །རྒྱུད་གསུམ་དབྱེར་མེད་ལ་བཏུད་ནས། །བླ་མེད་རྒྱུད་སྡེ་ཐམས་ཅད་ཀྱི། །གླེང་གཞི་གསང་བ་ཡང་དག་སྦྱོར། །ལས་བྱུང་དཔལ་ལྡན་རྒྱུད་རྒྱལ་གྱི། །སྤྱི་དོན་རྣམ་ལྔས་རྟོགས་བྱ་སྟེ། །རྒྱུད་སྡེ་སྤྱི་ཡི་རྣམ་གཞག་དང་། །མཚན་དོན་བཤད་ཐབས་མན་ངག་དང་། །རྒྱུད་ཀྱི་མངོན་པར་རྟོགས་པ་དང་། །གནས་ལུགས་ཇི་ལྟར་གནས་པའོ། །དང་པོ་བཞི་པོ་གཞན་དུ་གསལ། །ལྔ་པ་གནས་ལུགས་ལ་གཉིས་ཏེ། །བརྟག་པ་གང་ནས་གང་བྱུང་དང་། །མངོན་རྟོགས་བསྡེབས་ཏེ་བརྗོད་པའོ། །དང་པོ་གླེང་གཞིས་མདོར་བསྟན་ནས། །མཚན་གྱི་དོན་གྱིས་ཅུང་ཟད་བཤད། །བརྟག་པ་དང་པོས་རྒྱས་པར་བཤད། །བརྟག་པ་ཕྱི་མ་དགུ་ཡིས་ནི། །དེ་དོན་རབ་ཏུ་རྒྱས་པར་བཤད། །ཕྱི་མའི་རྒྱུད་ཀྱིས་ཚིག་དང་ནི། །དོན་རྣམས་སོ་སོར་ཕྱེ་བ་སྟེ། །མདོར་བསྟན་རྒྱས་བཤད་རིམ་པ་ལྔ། །གླེང་གཞི་གདམས་ངག་དྲུག་གིས་ནི། །བཤད་པས་རྒྱུད་དོན་མ་ལུས་བསྟན། །མཚན་དོན་ཉིད་ཀྱིས་གླེང་གཞིའི་དོན། །རྒྱུད་གསུམ་ཉིད་དུ་འདུས་པར་བསྟན། །བརྟག་པ་དང་པོའི་དང་པོ་ལས། །དོན་དམ་བྱང་སེམས་སྔོན་འགྲོ་བའི། །ཀུན་རྫོབ་བྱང་སེམས་ཀྱིས་བསྡུས་པ། །དེ་བཞིན་ཉིད་ཀྱི་དག་པ་དང་། །དོན་དམ་བྱང་སེམས་དེ་ཉིད་ཀྱང་། །བསྒོམས་པའི་སྟོབས་ཀྱིས་སྐྱེ་བ་ཡིས། །རང་རིག་བདག་ཉིད་དག་པ་སྟེ། །འཇུག་བྱ་གཉིས་པོ་རིམ་བཞིན་བསྟན། །དེ་ལ་ཐོས་བསམ་ལས་བྱུང་དང་། །བསྒོམས་པའི་སྟོབས་ཀྱིས་འཇུག་པ་སྟེ། །འཇུག་ཚུལ་གཉིས་པོ་རིམ་བཞིན་དུ། །རབ་བྱེད་གཉིས་པས་བསྟན་པ་ཡིན། །གསུམ་པས་རྣལ་འབྱོར་མ་རྒྱུད་ཀྱི། །གླེང་གཞིས་འབྲས་རྒྱུད་གཙོ་བོར་བསྟན། །བཞི་པས་ཕ་རྒྱུད་གླེང་གཞི་ཡིས། །ཐབས་དང་འབྲས་རྒྱུད་གཙོ་བོར་བསྟན། །མདོར་ན་བརྗོད་བྱ་རྣམ་གཉིས་དང་། །རྗོད་བྱེད་རྣམ་གཉིས་བསྡུས་པའི་ཕྱིར། །བརྟག་པ་དང་པོའི་རབ་བྱེད་བཞི། །རྒྱུད་རྣམས་ཀུན་གྱི་མདོར་བསྟན་ཡིན། །ལྷག་མ་མངོན་པར་རྟོགས་པ་ནི། །སྐྱེ་བའི་རིམ་བཞིན་གནས་པ་སྟེ། །བྱང་ཆུབ་སེམས་ཀྱིས་དབང་བསྐུར་བའི། །རྟེན་གྱི་དཀྱིལ་འཁོར་རྣམ་གཞག་དང་། །སློབ་དཔོན་བདག་འཇུག་ཆོ་གའི་རིམ། །དབང་རྟེན་རིག་མ་མཚན་ཉིད་བཅས། །མཆོད་ཅིང་གསོལ་གདབ་དཀྱིལ་འཁོར་མཆོད། །མཆོག་དབང་བསྐུར་ཚུལ་དམ་ཚིག་བཅས། །བདུན་གྱིས་བརྟག་པ་གཉིས་པ་ཡི། །རབ་བྱེད་དང་པོ་བསྡུས་པ་ཡིན། །གཉིས་པས་དབང་ཐོབ་བརྟན་ཕྱིར་དུ། །བསམ་གྱིས་མི་ཁྱབ་དོན་བསྒོམ་དང་། །དཀྱིལ་འཁོར་འཁོར་ལོའི་ཐབས་བསྒོམས་པས། །ཐབས་དང་ཤེས་རབ་དོན་བསྒོམ་བསྟན། །དེ་ནས་རབ་ཏུ་བྱེད་པ་ནི། །དྲུག་གིས་བསྐྱེད་པའི་རིམ་པ་སྟེ། །བསྐྱེད་རིམ་སྤྱི་ཡི་རྣམ་གཞག་དང་། །ཧེ་རུ་ཀ་གསུམ་སྒྲུབ་པའི་ཐབས། །སྤྱི་དང་སོ་སོའི་བྱེ་བྲག་གིས། །རབ་ཏུ་བྱེད་པ་གསུམ་པ་བསྡུས། །སྒྲོལ་མ་ཀུ་རུ་ཀུལླེ་དང་། །ཕ་རོལ་ཕྱིན་དང་རིགས་བཞི་དང་། །ཡུམ་བཞི་ལས་རྒྱས་རྣལ་འབྱོར་ནི། །བཅུ་གཅིག་གིས་ནི་བཞི་པ་བསྡུས། །གསུམ་པའི་དང་པོས་ཀྱཻ་རྡོ་རྗེ། །བཅུ་བདུན་ལྷ་ཡི་བདག་ཉིད་དང་། །གཉིས་པས་ཡེ་ཤེས་མཁའ་འགྲོ་མ། །ལྷ་མོ་བཅུ་གསུམ་དཀྱིལ་འཁོར་དང་། །གསུམ་པས་བདག་མེད་རྣལ་འབྱོར་མ། །ལྷ་མོ་བཅོ་ལྔའི་དཀྱིལ་འཁོར་དང་། །བཞི་པས་དཀྱིལ་འཁོར་རྒྱལ་པོ་མཆོག །རྡོ་རྗེ་དབྱིངས་ཀྱི་དཀྱིལ་འཁོར་དང་། །དྲག་པོའི་གདན་ཅན་ལྷ་བཅུ་བདུན། །དུར་ཁྲོད་བརྒྱད་དང་བཅས་པ་བསྟན། །དེ་ནས་རབ་ཏུ་བྱེད་པ་ལྔས། །ཚོགས་ཀྱི་འཁོར་ལོའི་སྤྱོད་པ་དང་། །བརྟུལ་ཞུགས་སྤྱོད་པའི་གྲོགས་དང་གནས། །དུས་ལ་སོགས་པ་ཤེས་ཕྱིར་དུ། །བཞི་པའི་དང་པོས་ངག་བརྡ་དང་། །གཉིས་པས་མཁའ་འགྲོ་མ་བདུན་གྱི། །མཚན་ཉིད་བསྟན་ཅིང་གསུམ་པ་ཡིས། །ལཱ་མ་རིགས་ལྔར་ཕྱེ་བ་དང་། །དེ་ལ་ཕྱག་རྒྱ་བསྟེན་ཚུལ་བསྟན། །བཞི་པས་ལུས་བརྡ་ལྔ་པ་ཡི། །དང་པོས་ཕྱི་ནང་མཐར་ཐུག་པའི། །འདུ་བའི་གནས་དང་དུས་སོགས་བསྟན། །གཉིས་པས་རྫོགས་རིམ་མཉམ་གཞག་དང་། །རྗེས་སྤྱོད་དག་པ་གསུམ་གསུམ་བསྟན། །ཕྱི་མ་གཉིས་ཀྱིས་དྲོད་ཐོབ་ནས། །བརྟུལ་ཞུགས་སྤྱོད་པ་སྤྱད་པའི་ཚུལ། །སྟོན་ཏེ་གསུམ་པས་གསང་སྤྱོད་ནི། །གཙོར་གྱུར་སྤྱོད་པའི་མཚན་ཉིད་བསྟན། །བཞི་པས་སྤྱོད་པའི་རབ་དབྱེ་བ། །སྒྲུབ་པའི་རིམ་པ་དང་བཅས་བསྟན། །བརྟག་པ་དྲུག་པས་ཉེ་རྒྱུའམ། །རྫོགས་རིམ་མཐའ་དག་རྒྱས་བཤད་དེ། །གཉིས་ཀ་ལུས་ལ་བརྟེན་པས་ན། །ལུས་ཉིད་གཏན་ལ་འབེབས་ཕྱིར་རོ། །དེ་ཡང་དྲུག་པ་མཐའ་དག་གིས། །མདོར་བསྟན་ལུས་འགྲུབ་གནས་པའི་རྒྱུ། །བྱང་ཆུབ་སེམས་དང་དེ་དག་ཀྱང་། །རྩ་སྒོ་གཉིས་ལ་བརྟེན་ནས་ནི། །ལུས་འགྲུབ་ཚུལ་དང་དེ་དག་ལ། །མངོན་དུ་བྱེད་པའི་རླུང་དང་ནི། །དཔྱིད་ཀྱི་ཐིག་ལེ་ཐབས་དང་བཅས། །ཡུལ་གྱི་དགོས་པས་དང་པོ་བསྡུས། །རྩ་གཉིས་དཔྱིད་དང་ཐིག་ལེར་བསྟན། །སྒོ་རྣམས་གསུམ་ལ་བརྟེན་པའི་རླུང་། །འཁོར་ལོ་བཞི་ཡི་གནས་ལུགས་ལུས། །སུམ་ཅུ་རྩ་བདུན་རྩ་རྣམས་ཀྱི། །གནས་དང་ལས་ལ་སོགས་པ་ཡི། །རབ་བྱེད་གཉིས་པ་བསྡུས་པ་ཡིན། །རྡོ་རྗེའི་ལུས་ཀྱི་གནས་ལུགས་ལ། །ཕྱི་རོལ་ཆོས་རྣམས་བསྡུ་ཕྱིར་དུ། །རབ་བྱེད་ལྷག་མ་གཉིས་གསུངས་ཏེ། །ནང་གི་དཀྱིལ་འཁོར་སྦྱིན་སྲེག་དང་། །མཆོད་དང་བཟླས་དང་སྐུ་གསུམ་གྱི། །རྣམ་དག་ཉིད་ནི་གསུམ་པས་བསྟན། །སྡོམ་པའི་རབ་ཏུ་དབྱེ་བ་དང་། །སེམས་ཅན་རང་བཞིན་སངས་རྒྱས་ཀྱང་། །གློ་བུར་དྲི་མ་སེལ་བ་ཡི། །ཐབས་ནི་འཐད་པ་དང་བཅས་དང་། །དཔྱིད་ཐིག་མངོན་དུ་བྱེད་པའི་ཐབས། །རབ་བྱེད་བཞི་པས་བསྟན་པ་ཡིན། །དེ་ནས་བརྟག་པ་བདུན་པ་དང་། །བརྒྱད་པ་དགུ་པའི་ཕྱི་མ་གསུམ། །བཅུ་པའི་ཐ་མ་རྣམས་ཀྱིས་ནི། །དངོས་གྲུབ་མཐའ་དག་སྒྲུབ་ཐབས་བསྟན། །དེ་ལ་ངག་བརྡའི་ཡེ་ཤེས་དང་། །ལྟ་སྟངས་སྒོ་ནས་ལས་སྒྲུབ་དང་། །རྣམ་ཤེས་དང་ནི་ཡེ་ཤེས་ཀྱི། །ལས་ནི་ཉི་ཤུ་རྩ་བཞི་དང་། །དབང་དུ་བྱེད་པའི་ལས་བརྒྱད་དང་། །མི་སྣང་ཡེ་ཤེས་བཅུ་གཉིས་དང་། །གྲུབ་པའི་མིག་སྨན་ཡེ་ཤེས་དང་། །བཅུད་ཀྱི་ལེན་གྱི་ཡེ་ཤེས་དང་། །བདུན་གྱིས་བསྡུས་པའི་དང་པོ་བསྡུས། །བསྙེན་པ་དང་ནི་ས་ཆོག་ལ། །རྐང་སྟབས་བཀོད་པ་སྔོན་སོང་བས། །སྦྱིན་སྲེག་ཆོ་ག་གཉིས་པས་བསྟན། །སྔགས་བཏུ་བ་དང་འཁྲུལ་འཁོར་ལ། །བརྟེན་པའི་ལས་ཀྱིས་གསུམ་པ་བསྡུས། །ཐོག་མར་ས་ཡོངས་གཟུང་བ་དང་། །ས་སློང་བ་དང་དཀྱིལ་འཁོར་སྒྲུབ། །སྦྱིན་སྲེག་ལས་ནི་སྔོན་སོང་བས། །རབ་གནས་བྱ་བར་བསྟན་པའི་ཕྱིར། །སྦྱིན་སྲེག་ཆོ་ག་རྒྱས་པ་དང་། །ལྷ་ཡི་རྣལ་འབྱོར་ཉེར་གཅིག་ལ། །བརྟེན་པའི་བསམ་གཏན་གྱི་ནི་ལས། །ཉེར་རྒྱུ་སྒྲུབ་ཐབས་བཞི་པས་བསྟན། །དེ་ཉིད་བཞི་ཞུས་མཉན་པར་གདམས། །རྡོ་རྗེ་དྲིལ་བུའི་མཚན་ཉིད་དང་། །དེ་ཉིད་གཟུང་ཐབས་དང་བཅས་པས། །བརྒྱད་པའི་དང་པོ་བསྡུས་པ་ཡིན། །བགྲང་ཕྲེང་དེ་ཉིད་གཉིས་པས་བསྟན། །འཕོ་བའི་རྣལ་འབྱོར་གྲོང་འཇུག་བཅས། །ཡེ་ཤེས་དེ་ཉིད་གསུམ་པས་བསྟན། །བཞི་པས་སྔགས་རྣམས་བསྟན་པའོ། །དགུ་པའི་དང་པོས་སྤྱོད་པའི་མཐར། །ཉེར་རྒྱུ་འབྲས་བུ་འགྲུབ་པའི་གནས། །འབྲས་བུ་ཉིད་དང་ཐབས་གང་གིས། །མངོན་དུ་བྱེད་པ་གསུམ་གྱིས་བསྟན། །གཉིས་པས་ཕྱི་ཡི་དཀྱིལ་འཁོར་དང་། །བདག་གིས་རྣལ་འབྱོར་རྫས་བྱིན་བརླབས། །མཆོད་པའི་དུས་དང་མགྲོན་སྤྱན་དྲངས། །གཏོར་མ་དབུལ་དང་བྱིན་རླབས་སྔགས། །རྟོག་པ་མེད་པར་བཀའ་བསྒོལ་ན། །བཀྲ་ཤིས་སྨོན་ལམ་གདབ་པ་དང་། །གཤེགས་སུ་གསོལ་བའི་བྱ་བ་སྟེ། །བཅུ་ཡིས་གཏོར་མའི་ཆོ་ག་བསྟན། །བྲིས་སྐུ་དང་ནི་གླེགས་བམ་གྱི། །བྲི་བའི་གཞི་དང་གང་ཟག་དང་། །ཚུལ་ནི་ཇི་ལྟར་བྲི་བ་དང་། །བཅང་བའི་ཚུལ་གྱིས་གསུམ་པ་བསྡུས། །བཞི་པས་རོལ་མོའི་བྱ་བ་དང་། །ཚོགས་ཀྱི་འཁོར་ལོའི་ཚུལ་སྟོན་ཏེ། །རོལ་མོའི་སྒྲ་སྐད་རྔ་ཡི་ཚུལ། །རྔ་ཡི་བྱ་བ་སྒོ་བ་ལ། །གསོལ་གདབ་ཚོགས་ཀྱིས་ཕན་ཡོན་དང་། །གང་དུ་བྱ་དང་ཡོ་བྱད་དང་། །གླུ་གར་ཚོགས་ཀྱི་དཀྱིལ་འཁོར་དང་། །དམ་ཚིག་སྦྱིན་པའི་ཚུལ་བཅུ་བསྟན། །བཅུ་པའི་དང་པོ་གསུམ་གྱིས་ནི། །མངོན་པར་རྟོགས་པ་བཅུ་གཅིག་གི །མཇུག་བསྡུ་དང་ནི་སྒྲུབ་པའི་མཐར། །ཉེར་རྒྱུའི་རྟེན་ནི་གང་ཞིག་ལ། །བརྟེན་ཏེ་འབྲས་བུ་འགྲུབ་པ་བསྟན། །དེ་ལ་ཐབས་རྒྱུད་བསྡུས་པ་དང་། །ཉེར་རྒྱུའི་རྟེན་གྱིས་དང་པོ་བསྡུས། །འབྲས་བུ་འགྲུབ་པའི་དུས་ཀྱིས་ནི། །ངོ་མཚར་ལྟས་ནི་གཉིས་པས་བསྟན། །ཕྱག་ཆེན་མཆོག་གི་དངོས་གྲུབ་ཀྱི། །འབྲས་བུ་སྐུ་གཉིས་བདག་ཉིད་ཅན། །རབ་བྱེད་གསུམ་པས་བསྟན་པ་ཡིན། །བཞི་པས་སྔར་གྱི་སྦྱིན་སྲེག་ལ། །རྩོད་པ་སྤོང་དང་ཚུལ་གཞན་ཡང་། །དམ་ཚིག་སྡོམ་པའི་སྒོ་ནས་ཀྱང་། །འབྲས་བུ་འགྲུབ་པར་བསྟན་པ་འོ། །རྩ་བའི་རྒྱུད་དུ་མི་གསལ་བར། །གསལ་དང་མ་ཚང་ཁ་བསྐང་ཕྱིར། །བཅུ་གཅིག་པ་ནི་ཕྱི་མའི་རྒྱུད། །དེ་ལྟར་མདོ་རྒྱས་རིམ་ལྔར་གནས། །མངོན་རྟོགས་བསྡེབས་ཏེ་བརྗོད་པ་ནི། །རགས་པའི་རིམ་པ་གཞུང་ལ་གནས། །ཞིབ་ཏུ་ཕྱེ་ན་འཁྲུགས་བསྡེབས་ཏེ། །རྒྱུ་རྒྱུད་སེམས་ཅན་གནས་ལུགས་དང་། །ཐབས་ལ་སྨིན་གྲོལ་རྣམ་པ་གཉིས། །ལམ་ལ་མངོན་རྟོགས་བཅུ་གཅིག་དང་། །འབྲས་བུ་སྐུ་ཡི་རྣམ་གཞག་སོགས། །བླ་མའི་ཞལ་ལས་བླང་བར་བྱ། །གྲགས་པ་རྒྱལ་མཚན་གསུང་གི་རྒྱུད་རྒྱལ་གཞན། །བསྡུས་དོན་ཚར་དུ་མངར་བའི་ཕྲེང་མཐོང་ནས། །བསོད་ནམས་རྩེ་མོའི་ལེགས་བཤད་རིན་ཆེན་ཕྲེང་། །བསོད་ནམས་སེངྒེས་ཚིག་གི་སྲད་བུར་བརྒྱུས། །འཁྲུལ་མེད་གོང་མའི་གསུང་གི་རྗེས་འབྲངས་ནས། །བློ་གྲོས་བསྒྲིམས་ཏེ་ཚིག་ཙམ་བསྒྲིགས་པའི་ཕྱིར། །ཉེས་པ་མེད་ཅིང་དགེ་ཚོགས་གང་ཐོབ་དེས། །ཚེ་རབས་ཀུན་ཏུ་ཆོས་ཚུལ་འདི་ཐོས་ཤོག །དགེའོ།། །། ༄༅། །གཞུང་ཇི་ལྟ་བ་བཞིན་དུ་བཀྲི་བའི་ལམ་སྤྱིའི་རྣམ་གཞག་བཞུགས།། ༈ །བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །རྡོ་རྗེའི་ཚིག་རྐང་ལ་ལམ་རྒྱས་འབྲིང་གསུམ་དུ་བསྟན་པ་དང་། ལམ་ཟབ་འབྲིང་གསུམ་དུ་བསྟན་པ་གཉིས་ལས། དང་པོ་ལ། ལམ་དང་འབྲས་བུ་གཉིས། ལམ་ལ་ལམ་རྒྱས་པ་ཆོས་བཅོ་བརྒྱད་ཀྱིས་བསྡུས་པ་ལས། འཁོར་འདས་ཐུན་མོང་གི་གཞུང་ཚོམ་བུ་བདུན། འཁོར་ལོ་འཆམ་པ་འཇིག་རྟེན་པའི་ལམ་ལ་གཞུང་ཚོམ་བུ་བདུན་ཏེ་བཅུ་བཞི་པོ་གང་ཟག་གཅིག་གི་ཉམས་ལེན། ལམ་རྒྱས་པའི་ཁྲིད་ཚུལ་ལྟར་སྦྱར་ན་ལམ་གྱི་གཞི་བཅའ་བ། ལམ་རང་གི་ངོ་བོ། ལམ་གྱི་སྤྲོས་པ་གཅོད་བྱེད། ལམ་གྱི་ས་མཚམས་རྣམ་པར་གཞག་པ། ལམ་གྱི་བོགས་དབྱུང་བ། ལམ་གྱི་གེགས་སེལ་བ་དང་རྣམ་པ་དྲུག་ཏུ་འདུས་པ་ལས། དང་པོ་ནི་སྣང་བ་གསུམ་དུ་བསྟན་པའི་ལམ་མོ། །གཉིས་པ་ནི་རྒྱུད་གསུམ་དུ་བསྟན་པའི་ལམ་སྟེ། འདི་ལ་རྒྱུ་རྒྱུད། ཐབས་རྒྱུད། འབྲས་རྒྱུད་གསུམ་ལས། དང་པོ་ནི་བསྒོམ་བྱ་འཁོར་འདས་དབྱེར་མེད་དང་པོ་ནས་ཡོད་པས་སྐབས་འདིར་བསྟན་ཀྱང་དེ་བསྒོམ་པ་ལ་ཚུལ་གཉིས་ལས། རྡོ་རྗེ་ཐེག་པས་ཐུན་མོང་མ་ཡིན་པའི་བསྒོམ་ཚུལ་དབང་གོང་མའི་ལྟ་བ་དང་སྦྱར་ནས་བསྒོམ་དགོས་པས་ཉམས་ལེན་ནི་དབང་གི་རྗེས་ལ་འབྱུང་ངོ་། །གཉིས་པ་ཐབས་རྒྱུད་ལ་ཐབས་རྒྱུད་ཀྱི་ཐོག་མ་རྒྱུའི་དབང་། ལམ་ལ་སོགས་པའི་ཆོས་ཉི་ཤུ། དམ་ཚིག་གི་ཚོགས་བསྟན་པ། ཐབས་རྒྱུད་ཀྱི་གཙོ་བོ་ལམ་དུས་ཀྱི་དབང་དང་བཞི་ལས། དང་པོ་ནི་སྨིན་བྱེད་ཀྱི་དབང་ངོ་། །གཞུང་ལས་དམ་ཚིག་འོག་ཏུ་གསུངས་ཀྱང་། ལུས་སོ་སོར་བཏགས་པའི་འགོག་པ་ལ་དབང་གི་རྗེས་སུ་དམ་ཚིག དེ་ནས་ལམ་སོགས་ཉི་ཤུ་འབྱུང་། འབྲིང་གི་ལམ་ལ་ནི་དབང་གི་རྗེས་སུ་ལམ་གྱི་ངོ་བོ་དམ་ཚིག་ཉི་ཤུའོ། །ཐབས་རྒྱུད་ཀྱི་གཙོ་བོ་ལམ་དུས་ཀྱི་དབང་ནི་ལམ་སོགས་ཉི་ཤུ་བརྩོན་པས་ཉམས་སུ་ལེན་པ་མ་བྱུང་ན་ཡང་རྒྱུ་དུས་ཀྱི་རྗེས་སུ་ལམ་དུས་ཀྱི་དབང་བཞི་པོ་ཐུན་བཞིར་བསྒོམས་པ་ཁོ་ནས་ལམ་ཐམས་ཅད་བགྲོད་ནས་འབྲས་བུ་ལ་མཚམས་སྦྱར་བ་སྟེ། ཐབས་རྒྱུད་ཀྱི་གཙོ་བོར་འཇོག་པའི་གནད་ཀྱང་འདི་ཉིད་ཡིན་ནོ། །གསུམ་པ་འབྲས་བུའི་རྒྱུད་འདིར་བསྟན་པ་ནི་ཉེ་རྒྱུ་འབྲས་དུས་ཀྱི་དབང་ནས་འབྲས་བུ་ཐོབ་ཅེས་རྒྱུ་འབྲས་ཀྱི་འབྲེལ་པའི་སྒོ་ནས་བསྟན་པ་ཡིན་ལ། འོག་ཏུ་ཆེ་བ་གསུམ་ལྡན་གྱི་སྒོ་ནས་བསྟན་པ་ནི་འབྲས་བུ་རང་གི་ངོ་བོ་བསྟན་པའོ། །གསུམ་པ་ལམ་གྱི་སྤྲོས་པ་གཅོད་བྱེད་ནི་ཚད་མ་བཞི་དང་སྙན་བརྒྱུད་བཞི་སྟེ། མན་ངག་གི་སྤྲོས་པ་ཐམས་ཅད་འདི་གཉིས་ཀྱི་སྒོ་ནས་བཅད་པས་ལམ་ལ་ངེས་ཤེས་ཁྱད་པར་ཅན་སྐྱེས་ཏེ་བོགས་དབྱུང་བའོ། །རྗེ་བཙུན་གྱི་ཁྲིད་ཀྱི་གཞུང་ཤིང་ལས། ཏིང་ངེ་འཛིན་ངོ་ཤེས་པར་བྱ་ཞིང་ངེས་ཤེས་ཁྱད་པར་ཅན་བསྐྱེད་ལ་ཞེས་གསུངས་པའི་ངེས་ཤེས་བསྐྱེད་ཚུལ་ནི་འདི་གཉིས་ལ་གསུངས་སོ། །བཞི་པ་ལམ་གྱི་ས་མཚམས་རྣམ་པར་གཞག་པ་ནི་རྟེན་འབྲེལ་ལྔར་བསྟན་པའི་ལམ་སྟེ། ཕྱི་ནང་གསང་བས་རྟེན་འབྲེལ་གསུམ་གྱིས་འཇིག་རྟེན་པའི་ལམ་གྱི་ས་མཚམས་རྣམ་པར་གཞག དེ་ཁོ་ན་ཉིད་དང་མཐར་ཐུག་རྟེན་འབྲེལ་གཉིས་ཀྱིས་འཇིག་རྟེན་ལས་འདས་པའི་ལམ་གྱི་ས་མཚམས་རྣམ་པར་གཞག་པའོ། །ལྔ་པ་ལམ་གྱི་བོགས་དབྱུང་བ་ནི་ས་ཆེན་གྱིས་འཇིག་རྟེན་པའི་ལམ་གྱི་གཞུང་ཚོམ་བུ་བདུན་པོ་ཐམས་ཅད་ཀྱི་དོན་ཤེས་པས་ཕན་འདོགས་པའི་མན་ངག་བདུན་དུ་བསྡུས་ནས་བསྟན་པ་སྟེ། གླེགས་བམ་དཀར་ཆག་ཏུ་རྟོགས་པ་བསྐྱེད་པའི་ཆོས་སུ་གསུངས་པ་དང་དོན་གཅིག་གོ །བདུན་པ་སོ་སོའི་དགོས་པ་ནི། འདུ་ལུགས་གསུམ་དང་ཕྱོགས་མེད་བདུན་དག་གིས། །རྣམ་པར་ཕྱེ་བས་སྒྲོ་སྐུར་བྲལ་བར་མཛོད། །ཅེས་སོགས་ཀྱིས་སྟོན་ཏེ་འདིར་མ་བྲིས་སོ། །དྲུག་པ་ལམ་གྱི་གེགས་སེལ་བ་ལ་སྲུང་བ་སུམ་ཅུའི་སྐབས་སུ་བསྟན་པའི་གེགས་སེལ། གདམས་ངག་དྲུག་གི་སྐབས་སུ་བསྟན་པའི་གེགས་སེལ། མན་ངག་གི་གནད་བདུན་ཅུའི་སྐབས་སུ་བསྟན་པའི་གེགས་སེལ། དཀྱིལ་འཁོར་འཁོར་ལོའི་ལམ་གྱི་གེགས་སེལ་དང་བཞི་ལས། དང་པོ་ནི། རྟེན་གྱི་གང་ཟག་ཐབས་ཀྱི་ཕྱོགས་སུ་ལྷུང་བ། ཤེས་རབ་ཀྱི་ཕྱོགས་སུ་ལྷུང་བ། ཟུང་འཇུག་གི་རྣལ་འབྱོར་པ་གསུམ་ལས། ཕྱི་མ་ལ་བར་ཆད་མི་འབྱུང་བས་དང་པོ་གཉིས་ལ་བར་ཆད་བཞི་བཞི་ལ་སྲུང་བ་བརྒྱད་བརྒྱད་དེ་བཅུ་དྲུག་དང་། ཐུན་མོང་གི་སྲུང་བ་བཅུ་བཞི་སྟེ་སུམ་ཅུའོ། །གཉིས་པ་ནི་བསྒོམ་བྱ་ལྟ་བ་དང་བསམ་གཏན་གཉིས་ལ་དུག་དབྱུང་། བདུད་རྩི་བསྟེན། ལ་དོར་བ་གསུམ་གསུམ་སྟེ། དུག་དབྱུང་བ་ནི་ཉམས་མྱོང་མ་སྐྱེས་པ་བསྐྱེད་པར་བྱེད་པ། བདུད་རྩི་བསྟེན་པ་ནི་སྐྱེས་པ་བོགས་དབྱུང་བ། ལ་དོར་བ་ནི་སྐྱོན་བྱུང་བ་སེལ་བ་ཡིན་ཀྱང་གེགས་སེལ་གཙོ་ཆེ་བས་ས་ཆེན་གྱིས་གེགས་སེལ་དུ་བསྡུས་སོ། །འདི་གཉིས་ནི་འཁོར་འདས་ཐུན་མོང་གི་ལམ་གྱི་སྐབས་སུ་འབྱུང་ངོ་། །གསུམ་པ་ནི་བསལ་བྱ་རྩ་ཟུག རླུང་ཟུག རླུང་རེངས་གསུམ་ལ་སེལ་བྱེད་དང་པོ་ལ་ལ་དོར། གཉིས་པ་ལ་རྔན་དགས་བྱིན་པ། གསུམ་པ་ལ་ལ་དོར། བྱིན་གྱིས་བརླབ། བདེ་བ་བསྒོམ་པ་གསུམ་དུ་ཕྱེ་ནས་བསྟན་པའོ། །བཞི་པ་ནི། གནས་སྐབས་ཐིག་ལེ་འབར་བ་དང་། གཡོ་བ་དང་། བརྟན་པ་གསུམ་ལས་དང་པོ་འབར་བའི་ཚེ་ཐིག་ལེའི་ཟུག་འབྱུང་སྟེ་དེ་ལ་ཁ་སྦྱར་བརྟན་པར་གྱུར་ནས་དུད་འགྲོའི་འགྱུར་པ་བཞི་ཡིས་བཟློག་པས་ལུས་ལ་ཐིག་ལེ་གཡོ་བ་མེད་པར་བྱ་སྟེ། དེས་གཡོ་བའི་གེགས་ཀྱང་སེལ་ལོ། །ལུས་ལ་གཏུན་ཤིང་གི་འཁོར་ལོ་བསྐོར་བ་དང་། ཡན་ལག་བཞིས་རླུང་གི་ཞགས་པ་འཕང་བ་དང་། བུ་ཆུང་གི་སྤྱོད་ལམ་གསུམ་གྱིས་ཐིག་ལེ་བརྟན་པར་འགྱུར་བའོ། །གེགས་སེལ་མདོར་བསྡུ་ན་སྐྱོན་ཡོན་ཏན་དུ་སློང་བ་དང་། བར་ཆད་དངོས་གྲུབ་ཏུ་ལེན་པ་དང་། གང་ཡང་ཉམས་ཀྱི་སྣང་བར་མཁྱེན་པ་གསུམ་མོ། །གཞུང་གི་ལམ་རྒྱས་པའི་ཁྲིད་ཚུལ་ཡོངས་སུ་རྫོགས་པ་ནི་ཇི་སྐད་བཤད་པ་འདི་དག་ཡིན་ལ། འདི་ཅི་ལྟ་བ་བཞིན་དུ་བཀྲི་བས་གཞུང་ཇི་ལྟ་བ་བཞིན་དུ་བཀྲི་བའི་གཞུང་ཤིང་ཞེས་པའི་སྒྲ་དོན་ཡང་གྲུབ་བོ། །དེ་ལྟར་འཇིག་རྟེན་པའི་ལམ་དུ་འདི་དག་བརྩོན་པ་དྲག་པོས་བསྒོམས་པས། ཁམས་འདུས་པ་གསུམ་མཐར་ཕྱིན་ཏེ་གྲུབ་མཐའ་སྙོགས་པར་འགྱུར་ལ། དེ་ནས་འཇིག་རྟེན་ལས་འདས་པའི་ལམ་བཞི་པོ་རྒྱལ་བ་སྐུ་བཞིས་སོ་སོར་སྟོན་པར་འགྱུར་རོ། །འདི་ཡང་གནད་ཀྱི་དོན་རྣམས་ལ། རང་ཉིད་བརྗེད་པ་སྤོང་བའི་ཕྱིར། །བློ་ལྡན་བསོད་ནམས་སེངྒེས་སྦྱར། །དགེ་བས་རྡོ་རྗེ་འཆང་ཐོབ་ཤོག །དགེའོ།། ༄༅། །མངོན་པར་བྱང་ཆུབ་པའི་ཚུལ་ལ་དྲང་ངེས་ཕྱེ་བ་བཞུགས།། ༈ །ཡོན་ཏན་ཀུན་འཛིན་བླ་མ་རྡོ་རྗེ་འཛིན། །དགའ་བདེའི་དཔལ་འཛིན་མཁྱེན་པས་དེ་ཉིད་འཛིན། །བཟང་པོའི་སྤྱོད་འཛིན་ཐུགས་རྗེས་གདུལ་བྱ་འཛིན། །དགེ་ལེགས་ཀུན་འཛིན་བླ་མས་རྗེས་འཛིན་མཛོད། །འདིར་མངོན་པར་བྱང་ཆུབ་པའི་ཚུལ་ནི། དེ་ཁོ་ན་ཉིད་བསྡུས་པའི་རྒྱུད་ལས། དེ་ནས་དེ་བཞིན་གཤེགས་པ་ཐམས་ཅད་ཀྱིས་སངས་རྒྱས་ཀྱི་ཞིང་འདི་དཔེར་ན་ཏིལ་གྱི་གོང་བུ་བཞིན་དུ་ཡོངས་སུ་གང་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་ཞེས་བྱ་བ་བྱང་ཆུབ་པའི་སྙིང་པོར་ཞུགས་པ་གང་ན་བ་དེར་གཤེགས་ཏེ། བྱང་ཆུབ་སེམས་དཔའ་དེ་ལ་ཆེད་དུ་ལོངས་སྤྱོད་རྫོགས་པའི་སྐུར་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མངོན་པར་མ་རྟོགས་པར་དཀའ་བ་སྤྱད་པ་ཐམས་ཅད་ལ་སྤྲོ་བ་བསྐྱེད་ཅིང་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱ་སྙམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ། དེ་བཞིན་གཤེགས་པ་ཐམས་ཅད་ཀྱིས་བསྐུལ་བས་མི་གཡོ་བའི་ཏིང་ངེ་འཛིན་དེ་ལས་བཞེངས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་དེ་ཁོ་ན་ཉིད་ནི་ཇི་ལྟ་བུ་ལགས། ཇི་ལྟར་ན་བསྒྲུབ་པར་བགྱི་བཀའ་སྩལ་པར་གསོལ། དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུང་གཅིག་ཏུ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རང་གི་སེམས་ལ་སོ་སོར་རྟོག་ཅིང་མཉམ་པར་ཞོག་ལ་རང་བཞིན་གྱི་གྲུབ་པའི་སྔགས་འདི་ཅི་དགར་ཟློས་ཤིང་བསྒྲུབ་པར་གྱིས་ཤིག ཨོྃ་ཙིཏྟ་པྲ་ཏི་ཞེས་སོགས་མངོན་པར་བྱང་ཆུབ་པ་ལྔ་གསུངས་སོ། །དེའི་འགྲེལ་པར། སློབ་དཔོན་ཤཱཀྱ་བཤེས་གཉེན་གྱིས་ཀོ་ས་ལའི་རྒྱན་ལས། བཅོམ་ལྡན་འདས་དོན་ཐམས་ཅད་གྲུབ་པ་ཤཱཀྱའི་རིགས་སུ་སྐྱེ་བ་ཡོངས་སུ་བཞེས་ནས། གཞོན་ནུའི་རོལ་པ་དང་། བཟོ་བསྟན་པ་དང་། བཙུན་མོའི་འཁོར་ན་བཞུགས་པ་དང་། མངོན་པར་བྱུང་བ་དང་། རབ་ཏུ་བྱུང་བའང་བསྟན་ནས་སེམས་ཅན་སྔོན་ཡོངས་སུ་སྨིན་པར་བྱས་པ་མིར་སྐྱེ་བ་རྣམས་དང་སྐུ་ཚེ་ཡང་དག་པར་འབྲེལ་བ་ལ་སོགས་པས་དོན་མཛད་པའི་ཕྱིར་དང་། མུ་སྟེགས་ཀྱི་ལྟ་བ་མངོན་པར་ཞེན་ཅིང་དཀའ་བར་སྤྱོད་པས་གྲོལ་བར་འགྱུར་རོ་ཞེས་མངོན་པར་རློམ་པ་རྣམས་ལ་མངོན་པའི་ང་རྒྱལ་གཞོམ་པའི་ཕྱིར་དཀའ་བར་སྤྱོད་པ་མཛད་པར་ཡང་བསྟན་ཏེ། དཀའ་བ་སྤྱོད་པའི་ས་ཉིད་ལ་བྱིན་གྱིས་རླབས་ཀྱིས་མིའི་ལུས་བཞག་ནས། རྫུ་འཕྲུལ་གྱིས་ལྷའི་རྒྱལ་པོའི་གནས་སུ་གཤེགས་ཏེ། ཡིད་ཀྱི་རང་བཞིན་གྱི་ལུས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བའི་ཕྱིར། སྟོང་པ་ཉིད་ཀྱི་ཏིང་ངེ་འཛིན་གྱིས་མི་གཡོ་བའི་ཏིང་ངེ་འཛིན་ལྟ་བུ་ལ་སྙོམས་པར་ཞུགས་ནས་འོག་མིན་གྱི་གནས་ན་བཞུགས་པ་གང་ན་བ་དེར་གཤེགས་པ་སྟེ། དེར་བཞུད་ཅེས་བྱ་བའི་དོན་ཏོ་ཞེས་དང་། གལ་ཏེ་མངོན་པར་བྱང་ཆུབ་པ་གཞན་གྱི་མན་ངག་ལ་ལྟོས་དགོས་ན། དེ་ལྟ་ན་ནི་བཅོམ་ལྡན་འདས་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པས་སློབ་དཔོན་མེད་པའི་ཡེ་ཤེས་སུ་ཇི་ལྟར་གཞག་ཅེ་ན། གང་འདི་བཅོམ་ལྡན་འདས་བྱང་ཆུབ་སེམས་དཔའ་དོན་ཐམས་ཅད་གྲུབ་པ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ནི་རྒྱུའི་གནས་སྐབས་ཡོངས་སུ་རྫོགས་པ་ཡིན་གྱི། དེའི་འབྲས་བུའི་གནས་སྐབས་ཡོངས་སུ་རྫོགས་པ་མ་ཡིན་ཏེ། དེའི་ཕྱིར་ལུང་ནོད་པ་གཟུང་བ་རིགས་པ་ཉིད་ཡིན་ལ། གང་གི་ཚེ་འཛམ་བུའི་གླིང་པའི་མི་རྣམས་ཀྱི་དོན་རྫོགས་པར་མཛད་པའི་ཕྱིར་མངོན་པར་བྱང་ཆུབ་པར་སྟོན་པ་དེའི་ཚེ་སློབ་དཔོན་མེད་པའི་ཡེ་ཤེས་ཅན་དུ་གཞག་པ་ཡིན་ནོ་ཞེས་བཤད་དོ། །གྲུབ་ཆེན་ཀུན་དགའ་སྙིང་པོས་དེ་ཉིད་སྣང་བ་ལས། བྱང་ཆུབ་དགོངས་ཤིང་སེམས་དཔའི་ཐུགས་འདི་ལ་མངའ་བས་ན་བྱང་ཆུབ་སེམས་དཔའོ། །སེམས་ཅན་གྱི་ཚོགས་ཆེན་པོའི་དོན་ཆེན་པོ་མཛད་པ་ལ་རབ་ཏུ་འཇུག་པས་ན་སེམས་དཔའ་ཆེན་པོའོ། །བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པས་དོན་ཐམས་ཅད་འགྲུབ་པར་བྱ་བ་བཞེད་པ་ཙམ་ལ་རག་ལས་པ་འདི་ལ་མངའ་བས་ན་དོན་ཐམས་ཅད་གྲུབ་པའོ། །བྱང་ཆུབ་ཀྱི་རྒྱུའི་སྙིང་པོ་ནི་བྱང་ཆུབ་ཀྱི་སྙིང་པོ་སྟེ། མར་གྱི་སྙིང་པོ་དང་འདྲ་བར་གནས་ཀྱི་སྙིང་པོར་གྱུར་པའོ། །དེར་བཞུགས་པ་ནི་ཉེ་བར་གནས་པར་མཛད་པའོ། །གང་ན་བ་དེར་ཞེས་བྱ་བ་ནི་རྒྱུའི་གསུམ་པའོ། །དེའི་དོན་ནི་འདི་ཡིན་ཏེ། གང་གིས་བསྐལ་པ་གྲངས་མེད་པ་གསུམ་དུ་སྐྱེ་བ་སྣ་ཚོགས་བཞེས་ཏེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་མཛད་ནས། བསམ་གཏན་དང་གཟུགས་མེད་པའི་སྙོམས་པར་འཇུག་པ་བསྐྱེད་དེ། བསམ་གཏན་བཞི་པའི་ཆེན་པོའི་ཡང་ཆེན་པོ་བསྐྱེད་ནས་ཏིང་ངེ་འཛིན་གྱི་སྟོབས་ཀྱིས་ཡིད་ཀྱི་རང་བཞིན་གྱི་ལུས་ཅན་གྱི་སྲིད་པ་ཐ་མ་པར་མཛད་ནས། དེ་བཞིན་གཤེགས་པ་ཐམས་ཅད་ལས་དར་དཔྱངས་ཀྱི་དབང་བསྐུར་བ་ཐོབ་པས་སེམས་ཅན་ཐམས་ཅད་ལ་ཕན་པ་དང་བདེ་བའི་རྒྱུར་འཚང་རྒྱ་བར་བྱའོ་ཞེས་དགོངས་ནས། དབུགས་རྔུབ་པ་དང་དབུགས་འབྱུང་བ་བཀག་སྟེ། བཅོམ་ལྡན་འདས་དོན་ཐམས་ཅད་གྲུབ་པ་འོག་མིན་གྱི་གནས་བྱང་ཆུབ་ཀྱི་སྙིང་པོ་ན་བཞུགས་པ་གང་ན་བ་དེར་གཤེགས་ཤིང་བཞུགས་ནས་འདི་སྐད་གསུངས་པ་ཡིན་ནོ། །བཅོམ་ལྡན་འདས་བསྐལ་པ་བསམ་གྱིས་མི་ཁྱབ་པས་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བ་སྟོན་པར་མཛད་དོ་ཞེས་གསུངས་པས་ན་ཤཱཀྱའི་རིགས་སུ་སྐྱེ་བ་བཞེས་ནས་ཞེས་བྱ་བ་འདི་དེ་ལ་མི་རིགས་སོ་ཞེས་བཤད་དོ། །སློབ་དཔོན་ཨཱརྻ་དེ་བས་མངོན་པར་བྱང་ཆུབ་པའི་རིམ་པ་ལས། མངོན་པར་བྱང་ཆུབ་རྣམ་གཉིས་ཏེ། །ཕྱི་དང་ནང་གི་ཞེས་སུ་བཤད། །ཕྱི་ནི་མདོ་སྡེ་རྣལ་འབྱོར་རྒྱུད། །ཐུབ་པ་མི་གཡོ་བ་ལ་བཞུགས། །རྒྱལ་བ་རྣམས་ཀྱིས་འདི་སྐད་བསྐུལ། །འདིས་ནི་མཐར་ཐུག་མི་འཐོབ་སྟེ། །ནམ་མཁའི་དཀྱིལ་ལྟར་མཆོག་གྱུར་པ། །འོད་གསལ་བ་ཡི་གནས་ཐོབ་ནས། །རང་དགའི་བཞུགས་གནས་བྷ་གར་གསུངས། །དེ་ལྟར་ཐམས་ཅད་སྟོང་བསྒོམས་པས། །བྱང་ཆུབ་སྙིང་པོར་མངོན་སངས་རྒྱས། །བྱང་ཆུབ་སེམས་དཔའ་དོན་གྲུབ་ལ། །རིགས་བཞིའི་བདེ་བར་གཤེགས་པ་ཡིས། །མངོན་པར་བྱང་ཆུབ་ལྔ་བསྟན་པས། །དེ་བཞིན་བྱང་ཆུབ་སེམས་དཔའ་དེས། །མངོན་པར་བྱང་ཆུབ་ལྔ་བསྒོམས་པས། །བྱང་ཆུབ་སྙིང་པོར་མངོན་སངས་རྒྱས། །རྣམ་སྣང་མཛད་དང་རྡོར་དབྱིངས་སུ། །མངོན་པར་སངས་རྒྱས་ཕྱི་ཡི་ཚུལ། །ནང་ནི་གསང་སྔགས་ནང་ཚུལ་ཏེ། །སྐྱེ་བོ་འདོད་ཆགས་ཅན་དོན་དུ། །བཅོམ་ལྡན་རྣམ་པར་སྣང་མཛད་ཀྱིས། །ཏིང་ངེ་འཛིན་ལ་སྙོམས་ཞུགས་ཏེ། །ཉིད་ཀྱིས་འཁོར་བསྡུས་གཟུགས་སྤྲུལ་ཏེ། །བདེ་བའི་སྣང་བ་རྣམ་པ་གསུམ། །ཟིལ་གནོན་འོད་གསལ་མི་རྟོག་ལས། །བྷ་ག་བྱིན་བརླབས་གཞལ་ཡས་བསྐྱེད། །སྔགས་ཀྱི་བདག་པོར་བྱིན་བརླབས་ཏེ། །ཞལ་གསུམ་ལྟ་བུར་དབུས་སུ་བཞུགས། །ཆོས་བཤད་འཁོར་རྣམས་རིམ་བྱུང་བ། །དེ་ནི་ནང་གི་བྱང་ཆུབ་བོ། །ཡང་ན་ནང་གི་ཕྱི་ཉིད་ནི། །ཕྱག་རྒྱ་མོ་ལ་རབ་བརྟེན་ཏེ། །སྣང་གསུམ་རིམ་མྱོང་ལས་འདས་པའི། །ཐམས་ཅད་སྟོང་པ་འོད་གསལ་བ། །བླ་མའི་མན་ངག་ལས་རྙེད་པས། །དེ་ནི་ནང་གི་ཕྱི་ཞེས་བཤད། །ནང་གི་ནང་ནི་ཕྱག་རྒྱ་བྲལ། །དང་པོ་སྨིག་རྒྱུ་འོད་ལྔའི་ཚུལ། །བདེ་བ་རྟོག་བྲལ་ཉམས་མྱོང་གསུམ། །གསུམ་པོ་ལས་འདས་གསུམ་པོ་ཉིད། །ཐམས་ཅད་མཁྱེན་པའི་རང་བཞིན་དག །བླ་མའི་མན་ངག་ལས་རྙེད་པའོ། །ཞེས་གསུངས་སོ། །རིམ་པ་གཉིས་པ་ཤཱཀྱ་བཤེས་གཉེན་གྱིས་མཛད་པའི་སྐབས་ལས། སུམ་ཅུ་རྩ་གཉིས་མཚན་འཆང་ཞིང་། །དཔེ་བྱད་བཟང་པོ་བརྒྱད་ཅུར་ལྡན། །རྣམ་པ་ཀུན་གྱིས་མཆོག་ལྡན་པའི། །ཐམས་ཅད་མཁྱེན་པར་དེ་ནས་འགྱུར། །དེ་སྐད་དུ་རྒྱ་ཆེར་རོལ་པའི་མདོ་ལས། ཤཱཀྱ་ཐུབ་པ་དེ་བཞིན་གཤེགས། །མངོན་པར་བྱང་ཆུབ་འདིར་བཞེད་ནས། །སྟོང་པ་ཆེན་པོ་སངས་རྒྱས་ཉིད། །ཐོབ་པར་བྱ་ཞེས་མངོན་པར་དགོངས། །ནཻ་རཱཉྫ་རའི་ཆུ་འགྲམ་དུ། །མི་གཡོའི་ཏིང་ངེ་འཛིན་ལ་བཞུགས། །དེ་ཚེ་རྒྱལ་བས་མཁའ་རྡོ་རྗེ། །ཏིལ་གྱི་གོང་བུ་གང་བཞིན་བཞུགས། །རྒྱལ་བའི་སྲས་ལ་སེ་གོལ་དང་། །དེ་ལ་དབྱངས་གཅིག་གིས་གསུངས་པ། །བསམ་གཏན་འདི་ཡིས་རྣམ་དག་མིན། །འདིས་ནི་མཐར་ཐུག་མི་འཐོབ་སྟེ། །ནམ་མཁའི་ངོས་ལྟར་མཆོག་གྱུར་པ། །འོད་གསལ་བ་ནི་དེ་དམིགས་ཤིག །འོད་གསལ་བ་ཡི་གནས་ཐོབ་ནས། །རང་དགའི་གཟུགས་སུ་སྐྱེ་བར་འགྱུར། །དེ་ཚེ་རབ་དགའ་རྡོ་རྗེའི་སྐུ། །ཀུན་གྱི་དབང་ཕྱུག་འཐོབ་པར་འགྱུར། །འདི་ལྟར་སྒྲ་དེ་གསན་པ་དང་། །དེ་ནས་ཏིང་འཛིན་མི་གཡོ་བཏང་། །འདི་ལྟར་ནམ་ཕྱེད་དུས་སུ་ནི། །རྒྱལ་བའི་སྲས་ཀྱིས་དེ་ཉིད་དམིགས། །སྐུ་ནི་དྲང་པོ་མ་ཡིན་ཅིང་། །མི་དྲང་བ་ཡང་མ་ཡིན་ལ། །དབུགས་གཏོང་བ་དང་རྔུབ་པ་མིན། །གསུངས་པ་མ་ཡིན་མི་གསུང་མིན། །སྤྱན་བཟང་བཙུམས་པ་མ་ཡིན་ཞིང་། །སྤྱན་ཕྱེ་བ་ཡང་མ་ཡིན་པས། །ཐམས་ཅད་སྟོང་པ་རྨད་ཆེན་པོ། །དྭངས་ཤིང་གསལ་བའི་ཡེ་ཤེས་ཆེ། །བླ་མ་ཉིད་ཀྱི་དྲིན་གྱིས་ནི། །དེ་ནས་དེ་ཉིད་གསལ་མཐོང་གྱུར། །འདས་པ་དང་ནི་མ་འོངས་དང་། །ད་ལྟར་བྱུང་བའི་སྲིད་པ་གསུམ། །སྐད་ཅིག་དེ་ལ་མ་ལུས་མཐོང་། །འོད་གསལ་བ་ནི་རྣམ་དག་འཆང་། །རྡོ་རྗེ་ལྟ་བུའི་ཏིང་འཛིན་གྱིས། །སྐྱ་རེངས་འཆར་ཀའི་དུས་སུ་ནི། །ཆུ་ཟླ་དང་ནི་སྨིག་རྒྱུ་སོགས། །སྒྱུ་མའི་ཡོན་ཏན་རྣམས་ཀྱིས་བརྒྱན། །བྱང་ཆུབ་སྙིང་པོར་བཞུགས་ནས་ནི། །དེས་ནི་བདུད་རྣམས་བཅོམ་པར་མཛད། །ཤཱཀྱའི་མགོན་པོས་ཡང་དག་པའི། །ཡེ་ཤེས་བླ་མེད་ལེགས་ཐོབ་ནས། །འགྲོ་བ་བསྐྱབ་ཅིང་ཕན་པའི་ཕྱིར། །དེ་ཉིད་འདིར་ནི་སྟོན་པར་མཛད། །མངོན་པར་བྱང་ཆུབ་སྟོན་པ་ནི། །དེ་ཉིད་ཡེ་ཤེས་ཞེས་བྱར་བཤད། །ཞེས་གསུངས་པ་དང་། དཀྱིལ་འཁོར་ཆེན་པོའི་སློབ་དཔོན་སངས་རྒྱས་ཡེ་ཤེས་ཞབས་ཀྱིས་གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་བསགས་ཀྱང་། །འདི་དོན་མ་རྟོགས་ནཻ་རཱཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་ཏེ། །ནམ་ཕྱེད་དུས་སུ་བརྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་དག་རྟོགས། །བྱང་ཆུབ་སྙིང་པོར་བཞུགས་ནས་ཀྱང་། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བ་འོ། །དེ་ནས་བཟུང་སྟེ་དོན་མཆོག་འདི། །སྐལ་བ་ལྡན་པ་འགའ་ཞིག་ལ། །ཞལ་ནས་ཞལ་དང་སྙན་ནས་སྙན། །བརྒྱུད་དེ་ངེས་པའི་དོན་བསྟན་པའོ། །ཞེས་གསུངས་ཤིང་། སྨན་པའི་ཞབས་ལ་སོགས་པ་རྗེས་འབྲང་དག་གིས་ཀྱང་འདི་ལུང་དུ་དྲངས་ནས་འདི་བཞིན་དུ་བཤད་དོ། །ད་ནི་དེ་དག་གི་དོན་བཤད་པར་བྱ་སྟེ། དེ་ཉིད་བསྡུས་པའི་རྒྱུད་ལས། བྱང་ཆུབ་སེམས་དཔའ་དོན་ཐམས་ཅད་གྲུབ་པ་དཀའ་བ་སྤྱད་པའི་ཚེ་སངས་རྒྱས་ཐམས་ཅད་ལོངས་སྤྱོད་རྫོགས་པའི་སྐུར་བསྟན་ནས་མི་གཡོ་བའི་ཏིང་ངེ་འཛིན་ལས་བསླངས་ཏེ། མངོན་པར་བྱང་ཆུབ་པ་ལྔ་བསྟན་པས་སངས་རྒྱ་བར་དངོས་སུ་གསུངས་པ་ལ། སློབ་དཔོན་ཤཱཀྱ་བཤེས་གཉེན་གྱིས། དེ་ཉིད་ངེས་པའི་དོན་ཉིད་དུ་འཆད་དེ། རྣམ་སྨིན་གྱིས་ལུས་ནཻ་རཱཉྫ་རའི་འགྲམ་དུ་བཞག་ནས། ཡིད་ཀྱི་ལུས་འོག་མིན་དུ་གཤེགས་ཏེ། སངས་རྒྱས་ཐམས་ཅད་ཀྱིས་མངོན་བྱང་ལྔ་བསྟན་པས་སངས་རྒྱ་བར་བཤད་པའི་ཕྱིར་རོ། །འདིའང་དྲང་བའི་དོན་དུ་བཤད་དུ་རུང་ངོ་སྙམ་ན། དེ་ནི་མ་ཡིན་ཏེ། འགྲེལ་པའི་ཚིག་འོག་མས་མངོན་པར་བྱང་ཆུབ་པ་གཞན་གྱི་མན་ངག་ལ་ལྟོས་དགོས་པའི་ཤེས་བྱེད་དུ་བྱང་ཆུབ་སེམས་དཔའ་དོན་ཐམས་ཅད་གྲུབ་པས་རྒྱུའི་གནས་སྐབས་ཀྱི་ཚོགས་གཉིས་རྫོགས་པ་ཡིན་གྱི། འབྲས་བུའི་གནས་སྐབས་མ་རྫོགས་པས་གཞན་གྱི་མན་ངག་ལ་ལྟོས་དགོས་པའི་ཕྱིར་དང་། གཞན་གྱི་གདམས་ངག་ལ་མི་ལྟོས་པ་ནི། འཛམ་བུ་གླིང་པའི་མི་རྣམས་ཀྱི་ངོར་ཚུལ་སྟོན་པ་ཙམ་ཡིན་པར་བཤད་པའི་ཕྱིར་རོ། །གྲུབ་ཆེན་ཀུན་དགའ་སྙིང་པོས་བྱང་ཆུབ་ལ་དགོངས་ཤིང་སེམས་དཔའི་ཐུགས་འདི་ལ་མངའ་བས་ན་བྱང་ཆུབ་སེམས་དཔའོ་ཞེས་པ་ནས། འདི་སྐད་གསུངས་པ་ཡིན་ནོ་ཞེས་པའི་བར་གྱིས་སྔར་གྱི་ཤཱཀྱ་བཤེས་གཉེན་གྱི་བཞེད་པ་དེ་ཉིད་ཕྱོགས་སྔར་བཀོད་ནས། བཅོམ་ལྡན་འདས་བསྐལ་པ་བསམ་གྱིས་མི་ཁྱབ་པས་ཞེས་པ་མན་ཆད་ཀྱིས་གསང་ཆེན་ཐབས་ལ་མཁས་པའི་ལུང་དྲངས་ནས་དེ་དགག་པར་མཛད་དོ། །ཇི་ལྟར་ཞེ་ན། བཅོམ་ལྡན་འདས་དོན་ཐམས་ཅད་གྲུབ་པ་ཤཱཀྱའི་རིགས་སུ་སྐྱེ་བ་ཡོངས་སུ་བཞེས་ནས། དེའི་འོག་ཏུ་མངོན་པར་རྫོགས་པར་སངས་རྒྱ་བ་འདི་གསང་ཆེན་ཐབས་ལ་མཁས་པའི་ལུང་གི་དོན་དེ་ལ་མི་རིགས་པར་ཐལ། ལུང་དེས་བསྐལ་པ་བསམ་གྱིས་མི་ཁྱབ་པའི་གོང་རོལ་དུ་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བ་བཞེས་པར་བསྟན་པའི་ཕྱིར་ཞེས་པའོ། །དེ་བཞིན་དུ་རྗེ་བཙུན་བསོད་ནམས་རྩེ་མོས། སློབ་དཔོན་ཤཱཀྱ་བཤེས་གཉེན་ཞེས་བྱ་བས་ནི་རྒྱལ་པོ་ཟས་གཙང་མའི་སྲས་དོན་ཐམས་ཅད་གྲུབ་པ་དཀའ་ཐུབ་མཛད་པ་ཡན་ཆད་བྱང་ཆུབ་སེམས་དཔའ་རང་རྒྱུད་པ་ཡིན་ལ། དེ་ནས་ཡིད་ཀྱི་ལུས་འོག་མིན་དུ་སངས་རྒྱས་ནས། དེ་ནས་སྤྲུལ་པ་པོ་འདིར་འཚང་རྒྱ་བའི་ཚུལ་སྟོན་པའོ་ཞེས་འདོད་དོ། །དེའང་ཡང་དག་པ་མ་ཡིན་ཏེ། མདོ་ལས། བཅོམ་ལྡན་འདས་འདི་བསྐལ་པ་བསམ་གྱིས་མི་ཁྱབ་པའི་སྔོན་དུ་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བ་སྟོན་པར་མཛད་དོ་ཞེས་གསུངས་པ་དང་འགལ་བར་འགྱུར་རོ། །དེ་བས་ན་ཡང་དག་པར་རྫོགས་པའི་སངས་རྒྱས་བསྐལ་པ་དཔག་ཏུ་མེད་པའི་ཐོག་མར་སངས་རྒྱས་ནས། སྤྲུལ་པའི་སངས་རྒྱས་ཤཱཀྱ་ཐུབ་པ་ནི་ཕྱིས་བསྐལ་པ་བཟང་པོ་འདི་ལ་འཚང་རྒྱ་བའི་ཚུལ་སྟོན་པ་ཡིན་ནོ་ཞེས་བྱ་བ་འདི་ཐེག་པ་ཆེན་པོའི་སློབ་དཔོན་དབྱིག་གཉེན་དང་། ཟླ་བ་གྲགས་པ་དང་། ཀུན་དགའ་སྙིང་པོ་དང་། སྐལ་ལྡན་གྲགས་པ་ལ་སོགས་པ་ཕལ་ཆེ་བའང་བཞེད་ལ། ཁོ་བོ་ཅག་གི་བླ་མ་བརྒྱུད་པ་རྣམས་ཀྱང་བཞེད་པ་ཡིན་ནོ་ཞེས་གསུངས་པའི་གཞན་ལུགས་དགག་པ་ནི་ཡོ་ག་བ་ཤཱཀྱ་བཤེས་གཉེན་གྱི་ལུགས་དགག་པ་ཡིན་ལ། རང་ལུགས་གཞག་པ་ནི་ཐེག་པ་ཆེན་པོའི་མདོ་རྒྱུད་བསྟན་བཅོས་འཁྲུལ་པ་མེད་པ་ཐམས་ཅད་ཀྱི་དགོངས་པ་ཕྱོགས་གཅིག་པར་སྟོན་པའོ། །འདུས་པའི་གཞུང་རྣམས་ཀྱི་དགོངས་པ་ནི་དེ་ཉིད་བསྡུས་པ་དང་། རྒྱ་ཆེར་རོལ་པ་སྟེ། རྡོ་རྗེ་རྩེ་མོ་ལས། ནཻ་རཱཉྫ་རའི་འགྲམ་དུ་བྱང་ཆུབ་སེམས་དཔའ་དོན་ཐམས་ཅད་གྲུབ་པ་མི་གཡོ་བའི་ཏིང་ངེ་འཛིན་ལ་སྙོམས་པར་བཞུགས་པ་ལས། སངས་རྒྱས་ཐམས་ཅད་ལོངས་སྤྱོད་རྫོགས་པའི་སྐུར་བསྟན་ནས་བསླངས་ཏེ་མངོན་པར་བྱང་ཆུབ་པའི་ཐབས་བསྟན་པས་སངས་རྒྱ་བར་གསུངས་པའི་དོན་དྲངས་དོན་དུ་འགྲེལ་པ་སྟེ། དགོངས་གཞི་ནི་སྔོན་བསྐལ་པ་དཔག་ཏུ་མེད་པའི་གོང་རོལ་དུ་མངོན་པར་རྫོགས་པར་སངས་རྒྱ་བའི་ཚེ་སྔགས་ཀྱི་ལམ་ཉམས་སུ་བླངས་པས་སངས་རྒྱ་བ་ལ་དགོངས། དགོས་པ་ནི་ཤཱཀྱ་ཐུབ་པའི་བསྟན་པ་འདིར་གདུལ་བྱ་རྣམས་གསང་སྔགས་ལ་སྤྲོ་བ་བསྐྱེད་པའི་ཆེད་ཡིན་ཏེ། དཀྱིལ་ཆོག་ལས། སྔགས་ཀྱི་སྦྱོར་བ་མཉམ་མེད་པས། །དྲག་པོ་ཆེན་པོ་བདུད་ཀྱི་སྡེ། །སྟོབས་ཆེན་དག་ཀྱང་དེ་ཡིས་བཅོམ། །ཤཱཀྱ་སེངྒེ་མཆོག་ལ་སོགས། །འཇིག་རྟེན་མཐུན་པར་གཤེགས་ནས་ཀྱང་། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་གསུངས་པ་ལྟར་རོ། །སྤྲོ་བ་བསྐྱེད་པ་སྔོན་ཉམས་སུ་བླངས་པས་ཀྱང་འགྲུབ་བོ་སྙམ་ན། དེ་ནི་མ་ཡིན་ཏེ། སྔོན་ཉམས་སུ་བླངས་པ་ནི་ཞིང་འདིའི་གདུལ་བྱས་མི་རྟོགས་ལ། སྟོན་པ་འདིའི་རྟེན་ལ་ཚུལ་བསྟན་པ་ནི་ཞིང་འདིའི་གདུལ་བྱས་རྟོགས་པའི་ཕྱིར་རོ། །དངོས་ལ་གནོད་བྱེད་ནི་སྔར་ཀུན་དགའ་སྙིང་པོས་དྲངས་པའི་ལུང་དང་། སྒྲོན་གསལ་དུ་ཐུན་མོང་མ་ཡིན་པའི་གསང་བའི་ལུང་དྲངས་པ་སོགས། ཐེག་པ་ཆེན་པོའི་མདོ་རྒྱུད་བསྟན་བཅོས་ཐམས་ཅད་ལས་སྟོན་པ་བསྐལ་པ་དཔག་ཏུ་མེད་པའི་སྔོན་རོལ་དུ་མངོན་པར་རྫོགས་པར་སངས་རྒྱས་ནས་ཞིང་འདིར་སངས་རྒྱ་བའི་ཚུལ་སྟོན་པར་གསུངས་པ་རྣམས་ཀྱིས་གནོད་དོ། །གྲུབ་ཆེན་ཀུན་དགའ་སྙིང་པོའི་དགོངས་པའང་འདི་ཉིད་ཡིན་ཏེ། སྔར་གྱི་དགག་སྒྲུབ་ཀྱི་འགྲོས་ལས་ཤེས་སོ། །ཡོ་ག་བ་ཤཱཀྱ་བཤེས་གཉེན་གྱིས། རྣམ་སྨིན་གྱི་ལུས་ནཻ་རཱཉྫ་རའི་འགྲམ་དུ་བཞག་ནས་ཡིད་ཀྱི་ལུས་བྱང་ཆུབ་ཀྱི་སྙིང་པོ་འོག་མིན་དུ་གཤེགས་ནས་མི་གཡོ་བའི་ཏིང་ངེ་འཛིན་ལ་མཉམ་པ་བཞག་པ་ལས་སངས་རྒྱས་རྣམས་ཀྱིས་བསླངས་པར་བཤད་པ་མ་གཏོགས་སློབ་དཔོན་གཞན་རྣམས་ཀྱིས་ནཻ་རཱཉྫ་རའི་འགྲམ་ཉིད་དུ་མི་གཡོ་བའི་ཏིང་ངེ་འཛིན་ལ་མཉམ་པར་བཞག་པ་ལས་སངས་རྒྱས་རྣམས་ཀྱིས་བསླངས་ནས་ཏིང་ངེ་འཛིན་འདི་རྣམ་དག་མ་ཡིན་པས་ཕྱིའི་མངོན་པར་བྱང་ཆུབ་པའམ། ནང་གི་མངོན་པར་བྱང་ཆུབ་པ་བསྟན་པས་བྱང་ཆུབ་ཀྱི་སྙིང་པོ་བྱང་ཆུབ་ཤིང་དྲུང་དུ་སངས་རྒྱ་བའི་ཚུལ་སྟོན་པ་ཁོ་ནར་བཤད་དེ། དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །ཞེས་གསུངས་པ་དང་མཐུན་ནོ། །སློབ་དཔོན་ཨཱརཡདེ་ཝས་ཕྱིའི་མངོན་པར་བྱང་ཆུབ་པ་མདོ་སྡེ་ལས་གསུངས་པའི་འོད་ཟེར་ཆེན་པོའི་དབང་བསྐུར་དང་། ཡོ་ག་ནས་གསུངས་པའི་མངོན་པར་བྱང་ཆུབ་པ་ལྔ་ལ་བྱས་ནས། ནང་གི་མངོན་པར་བྱང་ཆུབ་པ་འདུས་པའི་དཀྱིལ་འཁོར་སྤྲུལ་པ་ལ་བཤད། ཀླུ་སྒྲུབ་ཀྱི་དངོས་སློབ་ཤཱཀྱ་བཤེས་གཉེན་དང་། སངས་རྒྱས་ཡེ་ཤེས་ཞབས་གཉིས་ཀྱིས། ཕྱི་ནང་གཉིས་ཀྱི་དབྱེ་བ་མ་བཤད་ཀྱང་ནཻ་རཱཉྫ་རའི་འགྲམ་དུ་མི་གཡོ་བའི་ཏིང་ངེ་འཛིན་ལས་ལངས་ནས་ཐམས་ཅད་སྟོང་པ་འོད་གསལ་ལམ། ཟབ་གསལ་གཉིས་མེད་བསྟན་པས། ནམ་ཕྱེད་ཀྱི་དུས་སུ་སྣང་མཆེད་ཐོབ་གསུམ་ཐིམ་པའི་རིམ་གྱིས་སེམས་དབེན་མངོན་དུ་བྱས་ནས་སྐྱ་རེངས་འཆར་བའི་དུས་སུ་སྒྱུ་མ་ལྟ་བུའི་སྐུར་ལངས་ཏེ། བྱང་ཆུབ་ཀྱི་ཤིང་དྲུང་དུ་གཤེགས་ནས་སྲོད་ལ་བདུད་བཏུལ། ཐོ་རངས་འོད་གསལ་དང་ཟུང་འཇུག་གི་སྐུ་མངོན་དུ་བྱས་པར་བཞེད་པར་གསལ་ལོ། །ཚུལ་བསྟན་པ་ལ་ནི་སྔ་ཕྱི་གང་ཡང་འགལ་བ་མེད་དེ། གདུལ་བྱ་དེ་དང་དེའི་ངོར་སྣང་ཚུལ་ཐ་དད་པ་ཙམ་ཡིན་པའི་ཕྱིར་རོ། །རྣམ་གཞག་རིམ་པར། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དགའ་ལྡན་ནས་འཛམ་བུའི་གླིང་དུ་བབས་ཏེ་མངལ་དུ་འཇུག་ཚུལ་གསུངས་པའི་མཐར། འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་ཐམས་ཅད་མིའི་བདག་ཉིད་ཀྱི་སྲིད་པར་བཞུགས་ཏེ། ཐམས་ཅད་མཁྱེན་པའི་དངོས་གྲུབ་ཀྱི་གོ་འཕང་བརྙེས་པ་དང་ལྡན་པར་འགྱུར་རོ་ཞེས་གསུངས་པའང་འདུས་པའི་སློབ་དཔོན་གཞན་རྣམས་དང་དགོངས་པ་གཅིག་སྟེ། ཚུལ་སྟོན་པ་ཁོ་ན་ལ་དགོངས་སོ། །ཕྱིས་ཀྱི་བླ་མ་དག་འདིའི་དོན་འདུས་པའི་ལམ་ལ་བརྟེན་ནས་སངས་རྒྱ་བའི་རྟེན་ཡིན་ན་མིའི་རྟེན་ཡིན་པས་ཁྱབ་པར་འདོད་པ་དང་། བྱང་ཆུབ་སེམས་དཔའ་དོན་གྲུབ་འདུས་པའི་ལམ་ལ་བརྟེན་ནས་གསར་དུ་སངས་རྒྱ་དགོས་པ་རྣམས་ནི་སྔ་མས་ཀྱང་ཁེགས་ཤིང་། གཞན་དུའང་བཀག་ཟིན་ཏོ། །མདོར་ན་བྱེ་བྲག་ཏུ་སྨྲ་བ་དང་། ཡོ་ག་བ་ཤཱཀྱ་བཤེས་གཉེན་མ་གཏོགས་ལོངས་སྤྱོད་རྫོགས་སྐུར་འདོད་པ་ཐམས་ཅད་སྟོན་པ་འོག་མིན་དུ་ལོངས་སྐུར་སངས་རྒྱས་ཟིན་ནས། སྤྱིར་མཛད་པ་དཔག་ཏུ་མེད་པ་དང་། བྱེ་བྲག་མི་མཇེད་འཇིག་རྟེན་གྱི་ཁམས་འདིར་བསྐལ་བཟང་གི་སངས་རྒྱས་སྟོང་གི་ཐེག་པ་ཐུན་མོང་བའི་ངོར་མཛད་པ་བཅུ་གཉིས་དང་། རྡོ་རྗེ་ཐེག་པས་འདུལ་བའི་གདུལ་བྱའི་ངོར་སྔགས་ཀྱི་ལམ་གྱིས་སངས་རྒྱ་བའི་ཚུལ་སྟོན་པར་བཞེད་པ་མཐུན་ནོ།། །།དཔག་མེད་བསྐལ་པའི་དུས་ནས་སངས་རྒྱས་ཀྱང་། །ཞིང་འདིར་མངོན་པར་བྱང་ཆུབ་མཛད་པ་ཉིད། །སྟོན་པའི་ཚུལ་ལ་གྲངས་ངེས་རྣམ་འབྱེད་པའི། །དགེ་བས་འགྲོ་ཀུན་བྱང་ཆུབ་མྱུར་ཐོབ་ཤོག །མངོན་པར་བྱང་ཆུབ་པ་སྟོན་པའི་ཚུལ་དྲང་དོན་དང་ངེས་དོན་རབ་ཏུ་ཕྱེ་བའི་རིམ་པ་འདི་ནི་རྒྱལ་བ་རྡོ་རྗེ་འཆང་དང་དབྱེར་མ་མཆིས་པ་རྗེ་བཙུན་ཀུན་དགའ་བཟང་པོ་ལ་སོགས་པའི་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པ་ཤཱཀྱའི་དགེ་སློང་བསོད་ནམས་སེངྒེས་ཨེ་ཝཾ་ཆོས་ལྡན་ཡོན་ཏན་རིན་པོ་ཆེའི་འབྱུང་གནས་སུ་བྲིས་པའོ།། །།དགེའོ།། ༈ །གཞལ་ཡས་ཁང་གི་ཆག་ཚད་བཞུགས་སོ།། ༈ །རང་སེམས་རྣམ་དག་བྱང་ཆུབ་ཕྱོགས། །སུམ་ཅུ་རྩ་བདུན་ཕྱི་ནང་གི །རྟེན་འབྲེལ་གནད་ཀྱིས་ཐར་པ་ཆེའི། །གྲོང་ཁྱེར་མཆོག་ཏུ་ཤར་ལ་འདུད། །སྙིང་པོ་ཀྱེ་ཡི་རྡོ་རྗེ་ཡི། །རྟེན་གྱི་དཀྱིལ་འཁོར་རབ་གསལ་བྱེད། །གནད་ཀྱི་ཟླ་ཟེར་ལས་བྱུང་བ། །ཚིགས་སུ་བཅད་པར་བསྡེབས་པ་ནི། །འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །འོག་ལ་སྣ་ཚོགས་རྡོ་རྗེ་དང་། །ཉི་མ་པདྨ་ཁོར་ཡུག་གོ །རྡོ་རྗེའི་ལྟེ་བ་གྲུ་བཞིའི་རྒྱར། །ཆ་ཆེན་བཅུ་གཉིས་དཔངས་སུ་གཅིག །རྭ་རྩེ་ཡན་ལག་བཞི་དྲུག་ལ། གསུམ་དང་ལྔ་སྟེ་ཆ་ཆེན་གཉིས། །དེ་འོག་ཉི་མ་པད་ལྟེ་ཡི། །དབང་གིས་ལྗང་སེར་དེ་ཡི་ཚད། །དེ་འོག་པདྨ་ལྟེ་བ་ནི། །རྡོ་རྗེའི་ལྟེ་བའི་ཟུར་དང་མཉམ། །པད་འདབ་ཆ་ཕྲན་གཉིས་ཀྱིས་བསྐོར། །ཡན་ལག་བཞི་ཕྱོགས་པདྨ་མེད། །ཁོར་ཡུག་དུར་ཁྲོད་ཆོས་འབྱུང་དང་། །གུར་དང་རྡོ་རྭ་མེ་རི་སྟེ། །སྲུང་འཁོར་ཐུན་མོང་མིན་བསྒོམས་ན། །གུར་ནང་དེ་དང་བཅས་པའོ། །ལོགས་ལ་རྩིག་པ་ཕ་གུ་དང་། །དྲྭ་ཕྱེད་པ་དང་གདུང་ལེབ་སྟེ། །རྩིག་པ་དབུས་ནས་ཆ་ཆེན་བཞི། །དོར་ནས་ལྔ་པའི་དང་པོ་ལ། །ཁ་དོག་ལྔ་སྦྲག་ཆ་ཕྲན་གཅིག །དཔངས་སུ་ཆ་ཕྲན་བཅུ་དྲུག་གོ །དེ་སྟེང་ཕ་གུ་ཆ་ཕྲན་གཅིག །ཞེང་དུ་ཕྱེད་དང་གཉིས་ཡིན་ཏེ། །བ་གམ་ཚུལ་དུ་རྩིག་པ་ལས། །ཕྱི་རུ་ཆ་ཕྲན་ཕྱེད་འཕགས་པའོ། །དེ་སྟེང་དྲྭ་ཕྱེད་ས་ལ་ནི། །དཔངས་སུ་ཆ་ཕྲན་ཕྱེད་པ་ཡི། །ཤིང་བརྩེགས་འོག་མ་ཆ་ཕྲན་གཅིག །གོང་མ་ཕྱེད་ཕྱེད་ཀྱིས་ལྷག་པའི། །བཞི་བརྩེགས་ཕྱོགས་བཞིར་བརྒྱད་བརྒྱད་དང་། །ཟུར་བཞིར་བཞི་སྟེ་སུམ་ཅུ་དྲུག །དེ་སྟེང་གདུང་ལེབ་ཆ་ཕྲན་གཅིག །དཔངས་སུ་ཆ་ཕྲན་ལྔ་ཆས་འགེབས། །ཕྱི་ངོས་ཤིང་བརྩེགས་དག་གི་ཐད། །ཆུ་སྲིན་མགོའམ་གཟི་པ་ཏྲའི། །ཁ་ནས་གཡས་གཡོན་དོ་ཤལ་གྱི། །རྩེ་མོ་གཉིས་དང་ཕྱེད་པ་ཡི། །རྩ་བ་བཟུང་ནས་ཕ་གུ་ལ། །འཕྱང་བའི་ཚུལ་དུ་གནས་པའོ། །རྩིག་པའི་རྩ་བར་འདོད་ཡོན་གྱི། །སྟེགས་བུ་དམར་པོ་ཆ་ཕྲན་གཉིས། །ཕྱོགས་བཞིར་ལྷ་མོ་བཞི་བཞི་ཡིས། །བཅོམ་ལྡན་འདས་ལ་མཆོད་པས་གནས། །སྟེང་ཐོག་ཀ་བ་ཤིང་བརྩེགས་དང་། །གདུང་དང་ཐོག་ཕུབ་རིམ་པ་གསུམ། །ཀ་བ་སྒོ་ནང་རྩ་ཐིག་གི །གཡས་གཡོན་ཆ་ཕྲན་ལྔ་དོར་ནས། །དྲུག་པའི་གདུང་དང་ཕྲད་མཚམས་སུ། །དཔངས་སུ་ཆ་ཕྲན་བཅུ་དྲུག་སྟེ། །འོག་ཏུ་ལྷ་སྣམ་ཆ་ཕྲན་གཅིག །སྟེང་དུ་ཤིང་བརྩེགས་ཀ་ཞུ་ལ། །ཆ་ཕྲན་གཅིག་དང་ལྔ་ཆ་སྟེ། །དེ་སྟེང་གདུང་ཟླུམ་ཆ་ཕྲན་གཅིག །དེ་དང་གདུང་ལེབ་མཉམ་པའི་སྟེང་། །ཐོག་ཕུབ་འོག་མ་ནང་ངོས་ཟླུམ། །ཕྱི་རོལ་གྲུ་བཞི་གདུང་ལེབ་ལས། །ཕྱི་རུ་བྱ་འདབ་ཆ་ཕྲན་གཉིས། །དེ་ལ་འོག་ཏུ་མདའ་ཡབ་དང་། །སྟེང་དུ་རིན་ཆེན་དྲྭ་མིག་གི །པུ་ཤུ་ཆ་ཕྲན་རེ་རེ་སྟེ། །རྒྱལ་མཚན་བ་དན་སོགས་ཀྱིས་བརྒྱན། །ཐོག་ཕུབ་བར་མ་གདུང་ཟླུམ་གྱི། །སྟེང་དུ་རྩིག་ཟླུམ་ཕྱོགས་མདོག་ཅན། །ཆ་ཕྲན་གསུམ་ཏེ་ཕ་གུ་དང་། །དྲྭ་ཕྱེད་གདུང་ལེབ་དེ་ཚད་མཉམ། །དེ་སྟེང་རྡོ་རྗེའི་ཐལ་གདུང་བཞི། །མིག་མངས་རིས་སུ་བྲེས་པ་ནི། །ཆ་ཕྲན་གཅིག་ལ་ལྔ་ཆས་དམན། །རེ་མིག་བརྒྱད་པོ་ཟླུམ་པོར་ཕུབ། །བྱ་འདབ་མདའ་ཡབ་པུ་ཤུ་རྣམས། །སྔ་མའི་ཚད་མཉམ་ཟླུམ་པོའོ། །ཐོག་ཕུབ་གོང་མ་རེ་མིག་དབུས། །གདུང་སྟེང་རྩིག་པ་གྲུ་བཞི་ནི། །སྔོན་པོ་ཆ་ཕྲན་གསུམ་པའི་སྟེང་། །ཕ་གུ་སོགས་ཀྱང་དེ་ཡི་ཚད། །ཐོག་ཕུབ་བྱ་འདབ་མདའ་ཡབ་སོགས། །ཇི་ལྟར་འཚམས་པ་ཏོག་གིས་སྤྲས། །སྒོ་ནི་ཕྱོགས་བཞིའི་རྩིག་པའི་དབུས། །ཆ་ཆེན་གཅིག་སྟེ་དཔངས་སུ་གཉིས། །མདུན་དུ་སྒོ་ཁྱུད་སྒོ་ཡི་ཚད། །དེ་ཡི་གཡས་གཡོན་སྒོ་འགྲམ་ལ། །ཆ་ཕྲན་གཉིས་ཏེ་སླར་ཡང་མདུན། །སྒོ་ལོགས་ནང་དུ་ཆ་ཕྲན་གཉིས། །ཕྱི་རུ་ཆ་ཕྲན་བཞི་ཡིན་ཏེ། །རྩིག་གདོང་གསེག་ཀར་ཡོད་ཕྱིར་རོ། །ཡ་ཕུབ་རྩིག་པ་ཆ་ཕྲན་གཅིག །ཐམས་ཅད་དཔངས་སུ་ཆ་ཕྲན་དགུ། །དེ་སྟེང་ཐོག་རྣམས་མཉམ་པོར་ཕུབ། །སྒོ་ཁྱུད་ཕྱི་མཐར་སྒོ་གླེགས་གཞུག །རྟ་བབས་ཀ་བ་སྒོ་ལོགས་ཀྱི། །གཡས་གཡོན་ཆ་ཕྲན་རེ་དོར་ནས། །ཆ་ཕྲན་ལྔ་པ་གཉིས་གཉིས་ཏེ། །ཕྱི་མའི་ཕྱི་མཐའ་སྟེགས་བུ་མཉམ། །ནང་མའི་ནང་ངོས་འདོད་སྣམ་རེག །དེ་སྟེང་སྣམ་བུ་འོག་མ་ནི། །གཡས་གཡོན་ཆ་ཕྲན་གསུམ་གསུམ་སྟེ། །གཉིས་པ་གཉིས་དང་གསུམ་པ་གཅིག །བཞི་པ་སྒོ་ལོགས་རྩིག་གདོང་མཉམ། །གཡས་གཡོན་སྐས་ཀྱི་རིམ་པ་བཞིན། །མདུན་ངོས་ཐམས་ཅད་མཉམ་པོ་ལ། །ཁ་དོག་དབྱེ་བས་སོ་སོར་ཕྱེ། །དེ་སྟེང་པདྨ་ཆོས་འཁོར་གདུགས། །ཆ་ཕྲན་གཅིག་དང་གཉིས་དང་གཅིག །གཡས་གཡོན་རི་དྭགས་ཕོ་མོ་གཉིས། །ཤིན་ཏུ་འབྱར་མིན་རྒྱང་རིང་མིན། །རྟ་བབས་སྣམ་བུ་དོ་ཤལ་ནང་། །པུ་ཤུའི་ཁོ་ར་ཁོར་ཡུག་ཏུ། །གོས་འཕན་མེ་ཏོག་ཕྲེང་ལ་སོགས། །རྒྱན་རྣམས་ཀུན་གྱིས་མཛེས་པར་བརྒྱན། །ནང་ངོས་རྒྱ་དཔངས་མཉམ་པ་ནི། །ལུས་ཀྱི་དག་པ་ཉིད་དང་སྦྱར། །གྲུ་བཞི་རྒྱ་དཔངས་དཔག་ཚད་ནི། །ལྔ་དང་གསུམ་པར་བྱ་རྒྱུད་ལས། །གསུངས་པ་བཞིབ་པར་བརྩིས་པ་ནི། །གསེར་གདུང་མན་གྱི་ནང་ངོས་ཡིན། །ནང་གི་ཀ་བ་བརྒྱད་པོ་ཡང་། །དཔངས་ལ་ཆ་ཕྲན་བཅུ་དྲུག་པར། །ཡོ་གའི་འགྲེལ་ཆེན་རྣམ་གཉིས་ལས། །གསུངས་པ་ཐམས་ཅད་རང་ཤུགས་ཀྱིས། །འགྲིག་པའི་རྣམ་གཞག་ལྷུན་གྲུབ་འདི། །ལུགས་བཟང་འདི་ཡི་ཁྱད་ཆོས་ཡིན། །རྡོ་རྗེ་འཇིགས་བྱེད་གཤེད་དམར་དང་། །ཚེ་དཔག་མེད་དང་རིགས་བསྡུས་ཀྱི། །ནང་མ་ལྔ་སོགས་སྒོ་རྐྱང་གི །ཐོག་ཕུབ་རིམ་གསུམ་ཀུན་ལ་འགྲེ། །ཀུན་རིག་ལ་སོགས་སྒོ་སྦྲག་དང་། །བདེ་གསང་ལ་སོགས་སྒོ་རྐྱང་གི །ཐོག་ཕུབ་རིམ་ལྷག་རྣམས་ལ་ནི། །ཁྱད་པར་ཅུང་ཟད་བསྣན་པར་བྱ། །གནད་ཀྱི་ཟླ་ཟེར་ལས་བྱུང་བའི། །ཟབ་དོན་ཚིགས་སུ་བཅད་པར་ནི། །བསྡེབས་པ་མཁས་འདོད་མ་ཡིན་གྱི། །བློ་གྲོས་གསར་བུ་འཇུག་ཕྱིར་ཡིན། །འདི་ཡི་དགེ་བས་རང་སེམས་ཀྱི། །གློ་བུར་དྲི་མ་སྦྱངས་ནས་ནི། །བྱང་ཆུབ་ཕྱོགས་ཆོས་སུམ་ཅུ་བདུན། །མྱུར་དུ་མངོན་དུ་འགྱུར་བར་ཤོག །དགེའོ།། ༄༅། །ཀུན་རིག་རིགས་བསྡུས་བདེ་མཆོག་གསང་འདུས་སོགས་ཀྱི་བློས་སློང་གི་སྒོ་སྦྲག་སོགས་ཀྱི་ཁྱད་པར་བཞུགས།། ༈ །སྙིང་གི་དབུས་གནས་རྗེ་བཙུན་ལ། །དྭང་བའི་ཡིད་ཀྱིས་གུས་བཏུད་ནས། །སླར་ཡང་སྒོ་སྦྲག་ཐོག་ཕུབ་ཀྱི། །རིམ་ལྷག་ཚུལ་བཞིན་བཤད་པར་བྱ། །ཀུན་རིག་སྒོ་སྦྲག་ཕྱི་མ་ཡི། །གསེར་གྱི་གདུང་ལེབ་མན་ཆད་ལ། །ཆ་ཕྲན་བཅུ་དགུ་ལྔ་ཆ་གཅིག །ཡོད་པ་དཀྱིལ་འཁོར་སྤྱི་དང་མཐུན། །དེ་ནང་ལྷ་སྣམ་ཆ་ཆེན་གཅིག །དོར་ནས་དབུས་ཀྱི་ཆ་དྲུག་ལ། །ཤེལ་གྱི་གར་བུ་དཔངས་ཀྱི་ཚད། །ཆ་ཆེན་བཞི་པ་ནང་མའི་བཞི། །གར་བུའི་ཕྱི་ངོས་ཕྱོགས་རེ་ན། །ཀ་བ་གཉིས་གཉིས་མཚམས་སུ་བཞི། །བཅུ་གཉིས་སྟེང་དུ་ཀ་ཞུ་དང་། །ཤིང་བརྩེགས་གདུང་རྣམས་གྲུ་བཞིར་གཏང་། །དེ་དང་ཕྱི་ཡི་གདུང་ལེབ་གཉིས། །མཉམ་པའི་སྟེང་དུ་ཐོག་ཕུབ་སྟེ། །ཕྱི་ངོས་དཀྱིལ་འཁོར་སྤྱི་དང་མཐུན། །ནང་ངོས་ནང་མའི་རྟ་བབས་ཀྱི། །ཐད་རྣམས་མ་གཏོགས་གར་བུ་ལ། །ཆ་ཕྲན་ཕྱེད་དང་གསུམ་ཉིད་ཀྱིས། །ནོན་པའི་གྲུ་བཞི་བྱ་དགོས་ཏེ། །བློ་ཡི་སྣང་བར་ཆར་གྱི་ཆུ། །གོང་མ་གོང་མའི་ཐོག་སྟེང་ནས། །འོག་མའི་སྟེང་བབས་ཐམས་ཅད་ཀྱང་། །དཀྱིལ་འཁོར་ཕྱི་མའི་འདོད་སྣམ་གྱི། །འོག་ངོས་འགྲོ་བར་གསུངས་ཕྱིར་རོ། །གར་བུའི་རྒྱར་ནི་ཆ་ཆེན་དྲུག །ཡོད་པའི་མཐའ་ལ་ཆ་ཆེན་རེ། །དོར་ནས་དབུས་ཀྱི་ཆ་ཆེན་བཞི། །དཀྱིལ་འཁོར་ནང་མའི་ནང་གི་ཚད། །དེ་ནང་ཕྱི་མའི་ཆ་ཆེན་ལ། །ནང་མའི་ཆ་ཆེན་གཉིས་ཡིན་ཀྱང་། །ནང་མ་རང་ངོས་བརྩིས་པའི་ཚེ། །གྲངས་རྣམས་སྤྱི་དང་མཐུན་པར་འབྱུང་། །འདི་ནས་བཟུང་སྟེ་ནང་མ་ཡི། །རང་ངོས་ཆ་རྣམས་བརྩི་བྱ་སྟེ། །ཐོག་ཕུབ་རིམ་གསུམ་སྒོ་རྟ་བབས། །དཀྱིལ་འཁོར་སྤྱི་དང་མཐུན་པར་བྱ། །སྣ་ཚོགས་རྡོ་རྗེའི་ལྟེ་བའི་ཚབ། །གར་བུ་ཡིན་ཕྱིར་རྭ་རྣམས་མེད། །གར་བུའི་ཕྱོགས་བཞིར་ནང་མ་ཡི། །སྒོ་ལ་འཛེགས་པའི་ཐེམ་སྐས་བྱ། །རྩིག་པའི་ནང་དུ་རང་ཆ་ཡིས། བརྩིས་པའི་ཆ་ཆེན་རེ་དོར་ནས། །དབུས་ཀྱི་ཆ་ཆེན་དྲུག་པོ་ལ། །དཔངས་སུ་ཆ་ཆེན་གཅིག་སྟེང་དུ། །འཁོར་ལོའི་ལྟེ་བ་དེ་དང་མཉམ། །ལྟེ་བའི་སྟེང་ནས་ཀ་བ་བརྒྱད། །ཆ་ཕྲན་དགུ་པ་ཀ་ཞུ་སོགས། །གདུང་ལེབ་དང་མཉམ་སྤྱི་དང་མཐུན། །ཕྱི་མའི་རྭ་རྩེའི་ཕྱི་རོལ་ནས། །འཇིག་རྟེན་ཁོར་ཡུག་ཟླུམ་པོ་དང་། །རྡོ་རྭ་འོད་ཟེར་ཕྲེང་བས་བསྐོར། །དཀྱིལ་འཁོར་གཉིས་ཀའི་འོག་གཞི་ནས། །ཕྱུར་བུའི་ཐོག་འོག་མན་ཆད་དུ། །རང་རང་ཆ་ཆེན་བརྒྱད་གནས་པ། །རྩིག་ནང་རྒྱ་དང་མཉམ་པ་ནི། །དཀྱིལ་འཁོར་ཀུན་ལ་སྦྱར་བར་བྱ། །ཁ་སྦྱོར་རྒྱུད་ལས་གསུངས་པ་ཡི། །རིགས་བསྡུས་སྒོ་སྦྲག་རིམ་གསུམ་ལའང་། །ཐོག་ཕུབ་འོག་མ་གར་བུར་བཅས། །ཚུལ་འདི་ཇི་བཞིན་སྦྱར་བྱ་སྟེ། །འདི་ཡི་དཀྱིལ་འཁོར་ནང་མ་ཡི། །གསེར་གྱི་གདུང་ལེབ་མན་ཆད་ཀྱི། །ཚུལ་འདི་དཀྱིལ་འཁོར་བར་མར་སྦྱར། །དེ་ནང་ལྷ་སྣམ་ཆ་ཕྲན་གཉིས། །དོར་ནས་དབུས་ཀྱི་ཆ་ཆེན་གསུམ། །དཔངས་སུ་ཆ་ཆེན་གཉིས་འཕགས་པ། །དཀྱིལ་འཁོར་ནང་མའི་འོག་གཞི་ཡིན། །ཐོག་ཕུབ་བར་མ་འོག་དང་མཚུངས། །ནང་མའི་ཐོག་ཕུབ་སྤྱི་དང་མཚུངས། །འདི་ཡི་དཀྱིལ་འཁོར་གསུམ་ཆར་ལའང་། །རང་རང་འོག་གཞི་ནས་བཟུང་སྟེ། །ཕྱུར་བུའི་ཐོག་འོག་མན་ཆད་དུ། །རང་རང་ཆ་ཆེན་བརྒྱད་དུ་གནས། །དེ་དང་རང་རང་རྩིག་ནང་རྒྱ། །མཉམ་པ་བྱུང་ན་འགྲིག་པ་ཡིན།། ༈ །།བདེ་མཆོག་འཁོར་ལོའི་ཕོ་བྲང་ལ། །གསེར་གྱི་གདུང་ལེབ་མན་ཆད་ཀྱི། །རྒྱ་དཔངས་སྒོ་དང་རྟ་བབས་དང་། །སྣ་ཚོགས་རྡོ་རྗེ་སྤྱི་དང་མཐུན། །རྩིག་ནང་ལྷ་སྣམ་ཆ་ཆེན་རེ། །དོར་ནས་དབུས་ཀྱི་ཆ་དྲུག་ལ། །ཨིནྡྲ་ནཱི་ལའི་ས་གཞི་ཡི། །དཔངས་སུ་ཆ་ཕྲན་ཕྱེད་དང་དགུ། །དེ་སྟེང་སྐུ་འཁོར་ལྟེ་བའི་དཔངས། །ཆ་ཕྲན་གཉིས་པའི་སྐེད་པ་ནས། །རྩིབས་ཀྱི་དཔངས་ལ་ཆ་ཕྲན་གཅིག །རྩིབས་མཐའ་འོག་གཞིའི་ལོགས་དང་མཉམ། །རྩིབས་ཀྱི་རྩེ་མོར་འཁོར་ལོ་ཡི། །རྭ་བ་ཆ་ཕྲན་གཉིས་པའི་སྟེང་། །འཁོར་ལོའི་ཀ་བ་ཆ་ཕྲན་ལྔ། །ཀ་ཞུ་ཤིང་བརྩེགས་གདུང་ཟླུམ་རྣམས། །ཆ་ཕྲན་གཉིས་དང་ལྔ་ཆ་གཅིག །དེ་དང་ཕྱི་ཡི་གདུང་ལེབ་གཉིས། །མཉམ་པའི་སྟེང་དུ་ཐོག་ཕུབ་སྟེ། །དམ་ཚིག་འཁོར་ལོའི་ཐོག་ཕུབ་ཡིན། །གདུང་ཟླུམ་སྟེང་དུ་རྩིག་པ་དང་། །ཕ་གུ་གཉིས་ལ་ཆ་ཕྲན་གཅིག །དྲྭ་ཕྱེད་ས་དང་གདུང་ལེབ་ལ། །ཆ་ཕྲན་གཅིག་སྟེ་རྭ་བ་ནས། །བཟུང་སྟེ་གདུང་ལེབ་ཟླུམ་པོའི་བར། །སྐུ་ཡི་འཁོར་ལོའི་ལོགས་ཡིན་ཏེ། །གསུང་འཁོར་རྩིབས་ཀྱི་རྩེ་མོར་ནི། །རྭ་བ་ནས་བཟུང་གདུང་ཟླུམ་བར། །སྔ་མའི་ཚད་བཞིན་གནས་པ་དང་། །མཉམ་པའི་སྟེང་དུ་ཐོག་ཕུབ་སྟེ། །འདི་ནི་སྐུ་འཁོར་ཐོག་ཡིན་ཕྱིར། །འཁོར་ལོ་ཉིད་ཀྱིས་མཚན་པའོ། །དེ་ཉིད་རིགས་པས་གསུང་འཁོར་ཏེ། །ཁྱད་པར་པདྨས་མཚན་པའོ། །དེ་ཡི་རིགས་པས་ཐུགས་འཁོར་ཏེ། །ཁྱད་པར་རྡོ་རྗེས་མཚན་པའོ། །དེ་ཡི་རིགས་པས་བདེ་ཆེན་གྱི། །འཁོར་ལོ་ཡིན་ཏེ་ཁྱད་པར་ནི། །གྲི་གུག་གིས་མཚན་འཁོར་ལོ་ཡི། །ཚབ་ཏུ་པདྨ་འདབ་བརྒྱད་དོ། །རྩིབས་དང་པད་འདབ་རྣམས་ཀྱི་རྒྱར། །ཆ་ཕྲན་གཉིས་པར་མཉམ་པ་སྟེ། །ལྟེ་བ་རིམ་བཞིན་དེ་ཚད་ཀྱིས། །ཆུང་བ་ཡིན་ཏེ་རྩིབས་ཀྱི་རྩེ། །འོག་མའི་ལྟེ་བ་དང་མཉམ་ཕྱིར། །འོག་མའི་ལྟེ་བར་གོང་མ་ཡི། །ཀ་སྟེང་ཆ་ཕྲན་ཕྱེད་དང་གཉིས། །རྩིབས་ཀྱི་བར་མཚམས་བརྒྱད་དུ་བྱ། །བདེ་ཆེན་འཁོར་ལོའི་གདུང་ཟླུམ་སྟེང་། །རྩིག་པ་ནས་བཟུང་གདུང་ལེབ་བར། །ཆ་ཕྲན་གཉིས་ཏེ་དེ་སྟེང་དུ། །ཐལ་གདུང་བཞི་ལ་ཆ་ཕྲན་གཅིག །ཕྱུར་བུའི་ཚད་ལ་ཆ་ཆེན་གཅིག །སྤྱི་དང་མཐུན་ཏེ་འོག་གཞི་ནས། །ཕྱུར་བུའི་ཐོག་འོག་བར་དག་དང་། །རྩིག་ནང་རྒྱ་དང་མཉམ་པ་ཡིན།། ༈ །།གསང་བ་འདུས་པ་རིགས་གསུམ་ལ། །གསེར་གྱི་གདུང་ལེབ་མན་ཆད་ཀྱི། །རྒྱ་དཔངས་དཀྱིལ་འཁོར་སྤྱི་དང་མཐུན། །འཕགས་པའི་ལུགས་ལ་ཀླུ་བྱང་གིས། །སྒོ་ནི་འཁོར་ལོའི་བརྒྱད་ཆ་སྟེ། །སྒོ་ཁྱུད་ཀྱང་ནི་དེ་ཡི་ཚད། །འགྲམ་དང་ལོགས་ཀྱང་དེ་བཞིན་ནོ། །ཞེས་གསུངས་དགོངས་པ་སྒོ་ཡི་དཔངས། །ཆ་ཆེན་གསུམ་དང་རྒྱར་ནི་གཅིག །སྒོ་ཁྱུད་འགྲམ་ལོགས་དེ་བཞིན་ནོ། །དེ་ཡང་ནང་ངོས་བརྩིས་པ་ཡིས། །བྲི་བྱར་ཡ་ཕུབ་མེད་པར་འདོད། །སྣ་ཚོགས་རྡོ་རྗེའི་ལྟེ་བ་ཡི། །ཕྱི་ངོས་ཀ་རྟེན་བཙུགས་ནས་ནི། །དེ་སྟེང་རྟ་བབས་ཀ་བ་གཉིས། །རྟ་བབས་སྣམ་བུ་བཅུ་གཅིག་སྦྱར། །རྩིག་ནང་ལྷ་སྣམ་ཆ་ཆེན་རེ། །དོར་ནས་དབུས་ཀྱི་ཆ་དྲུག་ལ། །དཔངས་སུ་ཆ་ཆེན་གཅིག་འཕགས་པའི། །ཕྱི་ངོས་ཀ་བ་བཅུ་གཉིས་སོགས། །ཐོག་ཕུབ་འོག་མ་ཀུན་རིག་བཞིན། །གདུང་སྟེང་རྩིག་པ་ཕ་གུ་ལ། །ཆ་ཕྲན་ཕྱེད་གཉིས་དྲྭ་ཕྱེད་དང་། །གདུང་ལེབ་ལ་ཡང་དེ་བཞིན་ནོ། །ལྷ་སྣམ་ནང་མའི་ཕྱོགས་རེ་ནས། །ཆ་ཆེན་རེ་དོར་དབུས་ཀྱི་གཞི། །དཔངས་སུ་ཆ་ཆེན་གཅིག་འཕགས་པའི། །སྟེང་དུ་འོད་ཟེར་ཕྲེང་བ་དང་། །བཅས་པའི་རྡོ་རྭ་ཟླུམ་པོ་ནི། །ཀ་རྟེན་བརྒྱད་དང་བཅས་པའི་དཔངས། །ཆ་ཆེན་གཅིག་སྟེ་དེ་སྟེང་དུ། །ཀ་བརྒྱད་དཔངས་ལ་ཆ་ཆེན་གཉིས། །ཀ་ཞུ་ཤིང་བརྩེགས་གདུང་ཟླུམ་ལ། །ཆ་ཕྲན་གཉིས་དང་ལྔ་ཆ་གཅིག །དེ་དང་སྔར་གྱི་གདུང་ལེབ་སྟེང་། །ཐོག་ཕུབ་ཕྱི་ངོས་གྲུ་བཞིའོ། །གདུང་ཟླུམ་སྟེང་དུ་རྩིག་པ་ནས། །གདུང་ལེབ་བར་དུ་ཆ་ཕྲན་ལྔ། །དེ་སྟེང་ཐལ་གདུང་ལྔ་ཆ་གཅིག །དམན་པའི་ཆ་ཕྲན་གཅིག་པའོ། །དེ་སྟེང་ཕྱུར་བུ་ཆ་ཆེན་གཅིག །ལྷག་མའི་ཐོག་ཕུབ་བྱ་འདབ་དང་། །མདའ་ཡབ་པུ་ཤུ་དར་འཕན་སོགས། །དཀྱིལ་འཁོར་སྤྱི་དང་མཐུན་པའོ། །ཚུལ་འདི་དཔྱོད་ལྡན་དོན་གཉེར་གྱིས། །ཚུལ་བཞིན་བསྐུལ་ནས་སྔར་བསྟན་པའི། །ཚུལ་ལུགས་བཟང་པོའི་ཁ་སྐོང་དུ། །ཚུལ་གནས་བསོད་ནམས་སེངྒེས་སྦྱར།། །།དགེའོ།། ༈ །།འདི་བསྒྲུབས་པ་ལས་བྱུང་བ་ཡི། །དགེ་བ་གང་དང་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་མྱུར་ཐོབ་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་འབར་གྱུར་གཅིག །དགེའོ། །དགེའོ། །དགེའོ།། །།

སྣང་བ་གསུམ་གྱི་སྐབས་སུ་ཉེ་བར་མཁོ་བའི་གསལ་བྱེད།

སྣང་བ་གསུམ་གྱི་སྐབས་སུ་ཉེ་བར་མཁོ་བའི་གསལ་བྱེད་བཞུགས་སོ།། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །སྣང་བ་གསུམ་གྱི་སྐབས་སུ་ཉེ་བར་མཁོ་བའི་གནད་ཀྱི་དོན་འགའ་ཞིག་བྲི་བར་བྱ་སྟེ། འདི་ལ་རྒྱུད་ལས་གསུངས་པའི་ཚུལ། དེ་ཉིད་མན་ངག་ཐུན་མོང་བའི་སྐབས་སུ་ཇི་ལྟར་འགྲེལ་པའི་ཚུལ། ཐུན་མོང་མ་ཡིན་པའི་མན་ངག་ཏུ་ཇི་ལྟར་བསྡུས་པའི་ཚུལ་གསུམ་ལས། དང་པོ་ནི་རྩ་རྒྱུད་ཕྱི་མའི་བརྒྱད་པར། སྐལ་མེད་སེམས་ཅན་འདུལ་དཀའ་བ། །གང་གིས་འདུལ་བར་འགྱུར་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱཻ་ཡི་རྡོ་རྗེ་བསྟན། །སློབ་མས་གུས་པས་བླངས་ནས་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །གཉིས་པ་ནི་ལྗོན་ཤིང་ལས་འདི་ལྟར་འགྲེལ་ཏེ། སྤྱིར་ཀྱཻ་རྡོ་རྗེ་ལ་འཇུག་པའི་ལམ་གྱི་རིམ་པ་ལ་སྐལ་བ་མེད་པ་རིམ་གྱིས་འཇུག་པ་དང་། སྐལ་བ་དང་ལྡན་པ་ཅིག་ཆར་དུ་འཇུག་པ་གཉིས་ལས། དང་པོ་ལ་གཉིས་ཏེ། སྤྱོད་པ་རིམ་པ་ཅན་ལ་འཇུག་པ་དང་། ལྟ་བ་རིམ་པ་ཅན་ལ་འཇུག་པའོ། །དང་པོ་ལ་བཞི་སྟེ། སྐྱབས་སུ་འགྲོ་བ། དུས་ཚིགས་ཀྱི་གསོ་སྦྱོང་། སོ་སོ་ཐར་པ་གཏན་ཁྲིམས་བདུན། དུས་ནམ་སྐྱེ་ངེས་པ་མེད་པའི་སེམས་བསྐྱེད་དོ། །དང་པོ་ནི། གཞུང་ལས་དངོས་སུ་མ་གསུངས་ཀྱང་། །གཞན་ལའང་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་གསུངས་པས། བསྙེན་གནས་ཀྱི་སྔོན་དུ་སྐྱབས་འགྲོ་དགོས་པར་གྲུབ་ལ། སྐབས་འདིར་འཇིགས་སྐྱོབ་དང་ལེགས་སྨོན་གྱི་སྐྱབས་འགྲོ་ཙམ་གྱིས་ཀྱང་སྐྱབས་འགྲོའི་གོ་ཆོད་ཅིང་། ངེས་འབྱུང་གི་བསམ་པས་ཟིན་པ་དང་། ཐེག་ཆེན་སེམས་བསྐྱེད་ཀྱིས་ཟིན་པ་ཡང་སྲིད་དོ། །གཉིས་པ་ནི། དེ་ལྟར་སྐྱབས་འགྲོ་བྱས་པ་དེ་ལ་འཆི་བ་མི་རྟག་པ། དལ་འབྱོར་རྙེད་དཀའ་ལ་སོགས་པས་ཚེ་འདི་ལས་བློ་ལྡོག་སྟེ། ཕྱི་མ་ལྷ་མིའི་གོ་འཕང་དོན་དུ་གཉེར་བ་ན་བསྙེན་གནས་ཡན་ལག་བརྒྱད་པ་སྦྱིན་ཏེ། འདི་ནི་ངེས་འབྱུང་གི་བསམ་པའི་སྔོན་དུ་ལེགས་སྨོན་གྱི་ཚུལ་ཁྲིམས་ལ་བཀོད་པ་གཙོ་བོ་ཡིན་ལ། སྔར་ལྟར་ངེས་འབྱུང་གི་བསམ་པས་ཟིན་པ་དང་། ཐེག་ཆེན་སེམས་བསྐྱེད་ཀྱིས་ཟིན་པ་ཡང་སྲིད་དོ། །གསུམ་པ་ནི། དེའི་འོག་ཏུ་འཁོར་བའི་ཉེས་དམིགས་བསྟན་པའི་སྒོ་ནས་འཁོར་བ་མཐའ་དག་སྤངས་པའི་མྱང་འདས་དོན་དུ་གཉེར་བའི་ངེས་འབྱུང་གི་བསམ་པ་སྐྱེ་སྟེ། སོ་སོ་ཐར་པ་གཏན་ཁྲིམས་བདུན་གང་རུང་ངམ་སྐྱེས་པ་དང་བུད་མེད་ཀྱི་བྱེ་བྲག་གིས་བསླབ་ཚིག་གསུམ་མམ་བཞི་རིམ་གྱིས་སྦྱིན་པར་བྱའོ། །དེ་ལྟར་རིགས་བདུན་པོ་རེ་རེ་ཡང་བསླབ་པའི་གནས་བཅུར་འདུས་པས། དེ་རྗེས་བསླབ་པའི་གནས་བཅུ་ཉིད་ཅེས་གསུངས་ཏེ། དགེ་བསྙེན་ཕ་མའི་སྡོམ་པ་ནི་བསླབ་གཞི་ལྔ་བསྲུང་བ་ཡིན་ཀྱང་དེར་མི་དགེ་བ་བཅུ་སྤང་བ་འདུས་པའི་ཕྱིར་དང་། དགེ་ཚུལ་ཕ་མའི་སྡོམ་པ་ནི་རང་གི་བསླབ་པ་རགས་སྡོམ་བཅུར་གསུངས་པའི་ཕྱིར་དང་། དགེ་སློབ་མ་དང་དགེ་སློང་ཕ་མའི་སྡོམ་པ་ལ་བསླབ་པའི་གྲངས་ཇི་སྙེད་ཡོད་པ་ཐམས་ཅད་ཀྱང་མི་དགེ་བ་བཅུ་སྤོང་དུ་འདུས་པའི་ཕྱིར་རོ། །འདི་ལ་དགོངས་ནས་ཁ་ཆེ་བློ་བརྟན་གྱིས་བྱེ་བཤད་དུ། སོ་སོར་ཐར་པའི་སྡོམ་པའི་ངོ་བོ་གཞན་ལ་གནོད་པ་གཞི་དང་བཅས་པ་སྤོང་བ་ཡིན་པར་གསུངས་པའི་རྗེས་སུ་འབྲང་ནས། ས་སྐྱའི་རྗེ་བཙུན་གོང་མ། མཆིམས་ནམ་མཁའ་གྲགས། དཔངས་ལོ་ཆེན་པོ། བུ་སྟོན་ཁ་ཆེ་སོགས་འདི་ལྟར་བཞེད་པ་ནི་གསུང་རབ་ཀྱི་གནད་ཀྱི་དོན་ཡིན་ཏེ། གཞན་ལ་གནོད་པ་ནི་ལུས་ངག་གི་མི་དགེ་བ་བདུན་དང་། དེའི་གཞི་ནི་ཡིད་ཀྱི་མི་དགེ་བ་གསུམ་ཡིན་པའི་ཕྱིར་རོ། །མདོ་ལས། དགེ་བསྙེན་སྟོན་པ་གཞན་ལ་མི་བསྟན་པ། ཆོས་དགེ་བ་བཅུ་སྤྱོད་པ་ཞེས་གསུངས་པའི་དགོངས་པ་ཡང་འདི་ཉིད་ཡིན་ནོ། །འདིར་ནི་འཇིགས་སྐྱོབ་དང་ལེགས་སྨོན་ཙམ་གྱིས་མི་ཆོག་པས་ངེས་འབྱུང་གི་བསམ་པས་ཟིན་པ་ནི་ངེས་པར་དགོས་ལ། ཐེག་ཆེན་སེམས་བསྐྱེད་ཀྱིས་ཟིན་པ་ཡང་སྲིད་དོ། །བཞི་པ་དུས་ནམ་སྐྱེ་ངེས་པ་མེད་པའི་སེམས་བསྐྱེད་ནི། གང་ཟག་གི་རིགས་ཁ་ཅིག་ལ་སྔར་གྱི་སྐྱབས་འགྲོའི་སྐབས་སུ་སྐྱེ་བ་ཡང་སྲིད། ཁ་ཅིག་ལ་དུས་ཚིགས་ཀྱི་གསོ་སྦྱོང་དང་སོ་ཐར་གྱི་སྐབས་སུ་སྐྱེ་བ་ཡང་སྲིད། ཁ་ཅིག་ལ་ལྟ་བ་རིམ་པ་ཅན་གྱི་སྔོན་དུ་ཆོ་གས་བླངས་པ་ཡང་སྲིད། དེ་དག་ཏུ་མ་སྐྱེས་ན་དབང་གི་སྔོན་དུ་ནི་ངེས་པར་དགོས་སོ། །གཉིས་པ་ལྟ་བ་རིམ་པ་ཅན་ལ་བསླབ་པ་ལ་གཉིས་ཏེ། གྲུབ་མཐའ་བཞི་ལ་རིམ་གྱིས་བསླབ་པ་དང་། རྒྱུད་སྡེ་བཞི་ལ་རིམ་གྱིས་བསླབ་པའོ། །དང་པོ་ནི། དེ་ལ་བྱེ་བྲག་སྨྲ་བ་བསྟན། །ཞེས་སོགས་ཏེ། བྱེ་བྲག་ཏུ་སྨྲ་བ་ནས་བཟུང་སྟེ་དབུ་མའི་བར་གྱི་གཞུང་ལུགས་རྣམས་ལ་རིམ་གྱིས་སྦྱངས་ནས་མཐར་དབུ་མའི་ལྟ་བ་ལ་བསླབ་པའོ། །གཉིས་པ་ནི། སྔགས་ཀྱི་རིམ་པ་ཀུན་ཤེས་ནས། །ཞེས་པ་སྟེ། དེའི་རྗེས་སུ་བྱ་བའི་རྒྱུད་ནས་བཟུང་སྟེ་རྣལ་འབྱོར་ཆེན་པོ་ཤེས་རབ་ཀྱི་རྒྱུད་སངས་རྒྱས་མཉམ་སྦྱོར་གྱི་བར་དུ་རིམ་གྱིས་བསླབ་པའོ། །གཉིས་པ་སྐལ་བ་དང་ལྡན་པ་ཅིག་ཆར་དུ་འཇུག་པ་ནི། དེར་རྗེས་ཀྱཻ་ཡི་རྡོ་རྗེ་བསྟན། །ཅེས་པ་སྟེ། ཀྱཻ་རྡོ་རྗེའི་སྨིན་གྲོལ་གཉིས་ཀྱིས་བསྡུས་པའི་ལམ་མོ། །འདི་སྐལ་ལྡན་ཅིག་ཆར་བ་ལ་སྦྱར་བ་ཡང་སྔར་བཤད་པ་ལྟར་གྱི་སྤྱོད་པ་རིམ་པ་ཅན་དང་། ལྟ་བ་རིམ་པ་ཅན་གྱིས་སྦྱངས་པ་ལ་མི་ལྟོས་པར་དང་པོ་ནས་འཇུག་པས་ཆོག་པའི་དབང་དུ་བྱས་པ་ཡིན་གྱི་སྐལ་དམན་རིམ་འཇུག་པ་ལ་ཡང་སྦྱང་བ་དེ་དག་སྔོན་དུ་སོང་ནས་ལམ་གྱི་དངོས་གཞི་འདི་ཉིད་ཡིན་པར་ཁྱད་པར་མེད་དོ། །ཚིག་རྐང་ཕྱི་མ་གཉིས་པོ་དེའི་དོན་ནི་དང་པོ་ནས་དངོས་སུ་ཀྱཻ་རྡོ་རྗེ་ལ་འཇུག་པའི་སྐལ་བ་མེད་ན་ཡང་། བླ་མས་ཇི་སྐད་བསྟན་པ་བཞིན་སློབ་མས་གུས་པས་བླངས་ནས་འགྲུབ་པར་འགྱུར་ཞེས་པ་སྟེ། རྗེ་བཙུན་གྱིས། སློབ་མ་དད་པ་དང་ལྡན་ཞིང་བླ་མས་ཇི་སྐད་བསྒོ་བ་བཞིན་ཉན་པ་ཞིག་ལ་ཞེས་གསུངས་པའི་དོན་ནོ། །གསུམ་པ་མན་ངག་ཐུན་མོང་མ་ཡིན་པའི་སྐབས་སུ་ཇི་ལྟར་བསྡུས་པའི་ཚུལ་ནི། དང་པོ་གསོ་སྦྱོང་ནས་རྣལ་འབྱོར་ཆེན་པོ་ཤེས་རབ་ཀྱི་རྒྱུད་ལ་བསླབ་པའི་བར་ཐམས་ཅད་རྗེ་བཙུན་རྣལ་འབྱོར་གྱི་དབང་ཕྱུག་གིས། སེམས་ཅན་ལ་ཉོན་མོངས་པ་ལ་མ་དག་པའི་སྣང་བ། རྣལ་འབྱོར་པ་ལ་ཏིང་ངེ་འཛིན་ལ་ཉམས་ཀྱི་སྣང་བ། བདེ་བར་གཤེགས་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་དག་པའི་སྣང་བ་ཞེས་པ་གསུམ་དུ་བསྡུས་ནས་གསུངས་སོ། །འདི་ལ་འཁོར་འདས་ཐུན་མོང་བའི་ལམ་འབྲས་བུ་དང་བཅས་པ་བསྟན་པའི་བཤད་ཚུལ་དང་། ལམ་གྱི་གཞི་བཅའ་བ་ལ་སྦྱར་བའི་བཤད་ཚུལ་དང་། དེ་གཉིས་ཀ་ཡང་སྣང་བ་གསུམ་དུ་བསྟན་པའི་དགོས་པ་དང་གསུམ་ལས། དང་པོ་ལ་གསུམ་སྟེ་མ་དག་པའི་སྣང་བ། ཉམས་ཀྱི་སྣང་བ། དག་པའི་སྣང་བའོ། །དང་པོ་ལ་གསུམ་སྟེ། རྟེན་གང་ཡིན་པ། རྒྱུ་གང་ཡིན་པ། སྣང་བ་ཉིད་གང་ཡིན་པའོ། །དང་པོ་ནི་སེམས་ཅན་ལ་ཞེས་པ་སྟེ། སྤྱིར་གཟུང་འཛིན་གཉིས་སྣང་དང་བཅས་པའི་རིགས་དྲུག་གི་སེམས་ཅན་གྱིས་བསྡུས་པ་ལས། ཁྱད་པར་དུ་རྟེན་གྱི་གང་ཟག་ཅིག་ལ་བཞག་ཅིང་ཏིང་ངེ་འཛིན་སྣ་གཅིག་ཀྱང་རྒྱུད་ལ་མ་སྐྱེས་པའོ། །གཉིས་པ་ནི་ཉོན་མོངས་པ་ལ་ཞེས་པ་སྟེ། རྒྱུ་འཁོར་གསུམ་དུ་འཛིན་པའི་རྣམ་རྟོག་ལས་ཉོན་མོངས་པ་དུག་གསུམ་འབྱུང་། དེས་ལས་བསགས་པས་ན་ལས་དང་ཉོན་མོངས་པ་ནི་མ་དག་པའི་སྣང་བ་འཆར་བའི་རྒྱུའོ། །གསུམ་པ་ནི་མ་དག་པའི་སྣང་བ་ཞེས་པ་སྟེ། འདི་ལ་འཁྲུལ་སྣང་དང་ལས་སྣང་གཉིས་ལས། དང་པོ་ནི། ལུགས་གཞན་གྱི་གཞུང་བཤད་འགའ་ཞིག་དང་། རང་ལུགས་ཀྱི་ཟིན་བྲིས་འགའ་ཞིག་ལས། རབ་རིབ་ཅན་ལ་སྐྲ་ཤད་སྣང་བ་ལྟ་བུ་ཞེས་དབང་ཤེས་འཁྲུལ་པའི་སྣང་བ་ལ་འཆད་པ་ནི་དགོངས་པ་མ་ཡིན་ཏེ། གཉག་མ་དང་། དམར་མ་སོགས་ཚད་ལྡན་རྣམས་ལས། སྤྱིར་ལས་ཉོན་གྱི་དབང་གིས་བྱུང་བའི་གཉིས་སྣང་གི་འཁྲུལ་པ་ཙམ་ལ་གསུངས་པའི་ཕྱིར་དང་། དབང་ཤེས་འཁྲུལ་པའི་སྣང་བ་ནི་བག་ཆགས་བརྟན་པའི་སྣང་བ་འདི་མི་བདེན་པར་བསྒྲུབ་པའི་དཔེ་ཙམ་དུ་བཀའ་དང་བསྟན་བཅོས་རྣམས་ནས་བཤད་ཀྱི། གསུང་རབ་ཀྱི་བརྗོད་བྱའི་གཙོ་བོ་བདེན་པ་གཉིས་སུ་བསྡུས་པའི་ཚེ་ཐ་སྙད་བདེན་པའི་ཁོངས་སུ་མི་གཏོགས་པའི་ཕྱིར་རོ། །དེས་ན་ཆུ་ལྟ་བུ་གཅིག་ཉིད་མི་རྣམས་ལ་བག་ཆགས་མཐུན་པར་སད་པས་ཆུར་མཐུན་པར་སྣང་ཡང་། གཉིས་སྣང་གི་འཁྲུལ་པ་ཡིན་པས་མ་དག་པའི་སྣང་བར་བཞག་ལ། དེ་ཉིད་ཡི་དྭགས་ལ་རྣག་ཁྲག དུད་འགྲོ་ལ་གནས། དམྱལ་བ་ལ་ཁྲོ་ཆུ་ཁོལ་མ། ལྷ་ལ་བདུད་རྩིར་སྣང་བ་རྣམས་ནི་ལས་ཐ་དད་ཀྱི་བག་ཆགས་མི་མཐུན་པར་སད་པ་ཡིན་པས་མ་དག་པའི་སྣང་བར་བཞག་ཅེས་པའི་དོན་ཏོ། །དེས་ན་འཁྲུལ་སྣང་གི་བྱེ་བྲག་ལ་ལས་སྣང་དུ་བཞག་པ་ནི། འཁྲུལ་སྣང་དང་ལས་སྣང་གི་ཁྱད་པར་རོ། །མདོར་ན་གཞུང་འདིས་ལས་དང་ཉོན་མོངས་པའི་དབང་གིས་མ་དག་པའི་སྣང་བ་འཆར་བའི་རིགས་དྲུག་གི་སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པས། དངོས་སམ་བརྒྱུད་ནས་ལམ་འདིར་འཇུག་ཏུ་རུང་ཞེས་པ་སྟེ། སློབ་དཔོན་གརྦ་རི་པས་རྒྱུད་ལ་འཇུག་པ་ལས། རྒྱུ་རིག་སྤང་བྱ་རྐྱེན་ལ་ལྟོས། །གང་ཟག་རྣམ་པ་བཞིར་ནི་འདོད། །ཅེས་གསུངས་པའི་རྒྱུ་ལ་ལྟོས་པའི་གང་ཟག་དང་དོན་གཅིག་གོ །གཉིས་པ་ཉམས་ཀྱི་སྣང་བ་ལ་ཡང་གསུམ་ལས། དང་པོ་རྟེན་གང་ཡིན་པ་ནི་རྣལ་འབྱོར་པ་ལ་ཞེས་པ་སྟེ། འདི་ནི་གང་ཟག་གཅིག་གི་རྒྱུན་ལ་ལུས་ཁྱད་པར་ཅན་དུ་གྱུར་པའི་གང་ཟག རྒྱུད་ཡོངས་སུ་དག་པའི་གང་ཟག ཉམས་རྒྱུད་ལ་སྐྱེས་པའི་གང་ཟག་གསུམ་དུ་བཞག་པའོ། །དང་པོ་ནི། ཟ་མ་མ་ནིང་། འོན་ལོང་། ཡན་ལག་དང་ཉིང་ལག་ཉམས་པ། ཞར་རྒུར། གུ་དིག་ལ་སོགས་པ་དང་བྲལ་བའི་རྡོ་རྗེའི་ལུས་སྐྱོན་མེད་པ་དང་ལྡན་པ་སྟེ། འདི་ནི་རིགས་ལ་ལྟོས་པ་དང་། སྤངས་བྱ་ལ་ལྟོས་པའི་གང་ཟག་གཉིས་དང་དོན་གཅིག་གོ །གཉིས་པ་ལ། ཐོས་བསམ་དང་། བསླབ་པ་དང་། དབང་གིས་དག་པ་གསུམ་ལས། དང་པོ་ནི་ཐོས་བསམ་གྱི་ཤེས་རབ་ཀྱིས་ཕྱིའི་སྒྲོ་འདོགས་བཅད་ནས་ལམ་ལ་ཡིད་ཆེས་རྙེད་པའོ། །གཉིས་པ་ནི་སོ་སོར་ཐར་པའི་སྡོམ་པ་རིགས་བདུན་པོ་གང་རུང་གི་སྟེང་དུ་བྱང་སེམས་ཀྱི་སྡོམ་པ་དང་ལྡན་པས་དབང་བསྐུར་བའི་སྣོད་རུང་དུ་བྱས་པ་སྟེ། གཉིས་པོ་འདི་ནི་རྐྱེན་ལ་ལྟོས་པའི་སྐལ་དམན་རིམ་འཇུག་པ་དང་དོན་གཅིག་གོ །དེས་ན་གཞུང་འདི་དག་གིས་ལམ་དང་འབྲས་བུ་ཡོངས་རྫོགས་བསྟན་པའི་སྐབས་འདིར་རྡོ་རྗེའི་ལུས་སྐྱོན་མེད་དང་ལྡན་པའི་སྐལ་དམན་རིམ་འཇུག་པའི་རྟེན་གྱི་གང་ཟག་གཅིག་ཉིད། ལས་དང་ཉོན་མོངས་པའི་དབང་གིས་འཁྲུལ་སྣང་ཤར་བའི་ཆ་ནས་མ་དག་པའི་སྣང་བའི་རྟེན་གྱི་གང་ཟག་ཏུ་འཇོག རྡོ་རྗེའི་ལུས་སྐྱོན་མེད་གྲུབ་པའི་ཆ་ནས་ལུས་ཁྱད་པར་ཅན་དུ་གྱུར་པའི་གང་ཟག་དང་། དེ་ཉིད་ཐུན་མོང་བ་ལྟར་ན་སྤྱོད་པ་རིམ་པ་ཅན་དང་། ལྟ་བ་རིམ་པ་ཅན་གྱིས་སྦྱང་བ་དང་། ཐུན་མོང་མ་ཡིན་པ་ལྟར་ན། སྣང་བ་གསུམ་གྱི་ཁྲིད་ཀྱིས་སྦྱངས་པའི་ཆ་ནས་ཐོས་བསམ་དང་། བསླབ་པས་རྒྱུད་དག་པའི་གང་ཟག་ཏུ་འཇོག་ཅིང་། དེ་ཉིད་བདེ་གཤེགས་སྙིང་པོ་ཡོད་པ་དང་། ཁ་དོག་དང་། དབྱིབས་ཀྱི་སྒོ་ནས་དང་། རིགས་ལྔ་སོ་སོའི་རིགས་སུ་ངེས་པ་དང་། ཉོན་མོངས་པ་གང་ཤས་ཆེ་བའི་སྒོ་ནས་རིགས་ལྔ་སོ་སོའི་རིགས་སུ་གནས་པ་དང་། སྔར་ལྟར་རྒྱུད་སྦྱང་བ་བྱས་པའི་ཆ་ནས་རྒྱུ་རིགས་སྤངས་བྱ་རྐྱེན་ལ་ལྟོས་པའི་གང་ཟག་བཞིར་ཡང་འཇོག་ཅེས་པ་སྟེ། གང་ཟག་གཅིག་གི་སྟེང་དུ་བཤད་ཚུལ་ཐ་དད་དུ་བྱས་པའོ། །གསུམ་པ་དབང་གིས་དག་པ་ནི་རྟེན་དཀྱིལ་འཁོར་བཞི་ལ་སྨིན་བྱེད་ཀྱི་དབང་བཞི་བསྐུར་བས་སྐུ་བཞིའི་ས་བོན་སད་པ་སྟེ། འདི་ནི་ཀྱཻ་རྡོ་རྗེ་ལ་སྨིན་གྲོལ་གཉིས་སུ་ཕྱེ་བའི་ཚེ་སྨིན་བྱེད་ཐོབ་པ་སྟེ། ལམ་གྲོལ་ལམ་ལ་འཇོག་པའི་ལམ་སྒོམ་རུང་དུ་བྱས་པའོ། །གསུམ་པ་ཉམས་རྒྱུད་ལ་སྐྱེས་པའི་རྣལ་འབྱོར་པ་ནི། བསྒོམས་པའི་སྟོབས་ཀྱིས་སེམས་ཅུང་ཟད་ཟིན་པས་རྣམ་རྟོག་རྒྱུན་ཆགས་ཀྱི་དུག་ཐོན་ཏེ། ཏིང་ངེ་འཛིན་གང་རུང་ཅིག་རྒྱུད་ལ་སྐྱེས་པའོ། །མདོར་ན་ཐོས་བསམ་དང་། བསླབ་པས་རྒྱུད་སྦྱངས་ནས་སྨིན་བྱེད་ཀྱི་དབང་བསྐུར་བ་ཐོབ་སྟེ། བསྒོམས་པའི་སྟོབས་ཀྱིས་ཏིང་ངེ་འཛིན་མཚན་ཉིད་པ་རྒྱུད་ལ་སྐྱེས་པའི་རྟེན་གྱི་གང་ཟག་ནི་ཉམས་ཀྱི་སྣང་བ་འཆར་བའི་རྟེན་གྱི་གང་ཟག་ཡིན་ཞེས་པའི་དོན་ཏོ། །གཉིས་པ་རྒྱུ་གང་ཡིན་པ་ནི། ཏིང་ངེ་འཛིན་ལ་ཞེས་པ་སྟེ། སྔར་སྨོས་པའི་ཏིང་ངེ་འཛིན་ནི་དངོས་བསྟན་ཡིན་ལ། ཤུགས་ཀྱིས་བསྟན་པ་གསང་བ་རྟེན་འབྲེལ་རྩ་ཡི་གེའི་ཕོ་བྲང་དུ། ནང་རྟེན་འབྲེལ་རླུང་སེམས་མཁའ་འགྲོ་ཡབ་ཡུམ་བཅུ་འདུས་པས་བདག་རྒྱུད་བྱིན་གྱིས་བརླབས་པའོ། །གསུམ་པ་སྣང་བ་གང་ཡིན་པ་ནི། རྒྱུད་ལ་འབྱུང་ཚོད་ཀྱི་དབང་དུ་བྱས་ན། རྒྱུ་སེམས་ཅན་གྱི་དུས་ན་རྟོག་པ་བསམ་གྱིས་མི་ཁྱབ་པ་སྐྱེ་བས། ལམ་བསྒོམ་པ་རྣལ་འབྱོར་པའི་དུས་ན་ཉམས་བསམ་གྱིས་མི་ཁྱབ་པ་སྐྱེ་ཡང་རིགས་བསྡུ་ན། ལམ་གསུམ། ཉམས་གསུམ། རྟེན་འབྲེལ་གསུམ། དྲོད་གསུམ། ཏིང་ངེ་འཛིན་གསུམ་སྟེ་བཅོ་ལྔར་འདུས་སོ། །འདི་དག་གི་རྣམ་བཞག་རྒྱས་པར་མ་སྤྲོས་སོ། །སྐབས་འདིར་རྟེན་གྱི་གང་ཟག་ཅིག་སྣང་བ་གསུམ་གྱིས་བཀྲི་བ་ནས་ས་བཅུ་གསུམ་པའི་ཕྱེད་མན་ཆད་ཀྱི་ལམ་གྱི་སྣོད་རུང་། ལམ་དངོས། དེ་ལས་བྱུང་བའི་སྣང་བ་ཐམས་ཅད་གཞུང་བར་པ་འདི་གསུམ་གྱིས་བསྡུས་པ་ཡིན་གྱི་ལམ་གྱི་གཞི་བཅའི་རྟེན་ཚུལ་དང་མི་འདྲ་བས་མ་དག་པའི་སྣང་བའི་བཀྲི་ཚུལ་ཡང་སེམས་ཅན་ལ་ཞེས་སོགས་ལ་སྦྱར་བར་བྱ་བ་མ་ཡིན་ནོ། །གསུམ་པ་དག་པའི་སྣང་བ་ལ་གསུམ་ལས། དང་པོ་རྟེན་གང་ཡིན་པ་ནི། བདེ་བར་གཤེགས་པ་ཞེས་པ་སྟེ། དེའི་ཁྱད་པར་གྱི་ཆོས། སྐུ་གསུང་ཐུགས་མི་ཟད་པ་དང་། རྒྱན་དང་། འཁོར་ལོ་གསུམ་མོ། །གཉིས་པ་རྒྱུ་གང་ཡིན་པ་ནི། དངོས་སུ་མ་སྨོས་ཀྱང་ཤུགས་ལ་བསྟན་པ་འགྲོས་བཞི་ཐིམ་པའོ། །གསུམ་པ་སྣང་བ་ཉིད་གང་ཡིན་པ་ནི། དག་པའི་སྣང་བ་ཞེས་པ་སྟེ། མ་དག་པའི་སྣང་བ་ཉམས་ཀྱི་སྣང་བར་གནས་གྱུར། ཉམས་ཀྱི་སྣང་བ་དག་པའི་སྣང་བར་གནས་གྱུར་ནས་ཤེས་བྱ་ཐམས་ཅད་རང་སྣང་གི་ཡེ་ཤེས་ཐོབ་པའོ། །འདི་ནི་སྐབས་འདིར་ལམ་བསྒོམ་པ་ལས་བྱུང་བའི་འབྲས་བུའི་གནས་ཚུལ་བཤད་པའོ། །གཉིས་པ་ལམ་གྱི་གཞི་བཅའ་བ་ལ་སྦྱར་བའི་བཤད་ཚུལ་ནི། རྡོ་རྗེའི་ཚིག་རྐང་གི་འཁོར་འདས་ཐུན་མོང་བའི་ལམ་གྱི་གཞུང་ཚོམ་བུ་རེ་རེས་ཀྱང་ལམ་འབྲས་བུ་དང་བཅས་པ་ཡོངས་སུ་རྫོགས་པ་རེ་རེ་སོ་སོར་སྟོན་པའི་སྣང་བ་གསུམ་གྱི་གཞུང་གི་བསྟན་ཚུལ་ནི་སྔར་བཤད་པ་ལྟར་ཡིན་ལ། འདི་དང་འཁོར་ལོ་འཆམ་པ་འཇིག་རྟེན་པའི་ལམ་གྱི་གཞུང་ཚོམ་བུ་བདུན་ཏེ། བཅུ་བཞི་པོས་གང་ཟག་ཅིག་གི་ལམ་གྱི་རིམ་པ་ཡོངས་རྫོགས་ཅིག་བསྟན་པའི་དབང་དུ་བྱས་ནས། ས་ཆེན་གྱིས། སྣང་བ་གསུམ་གྱིས་ལམ་གྱི་གཞི་བཅས་ཏེ། །ཞེས་གསུངས་པ་ལྟར། རྗེ་བཙུན་གྱི་ཁྲིད་ཀྱི་གཞུང་ཤིང་གཉིས་ལས། ལམ་གྱི་གཞི་བཅའ་ལ་སྦྱར་བའི་དབང་དུ་བྱས་ན། ལམ་ངོས་བཟུང་བ། དེའོ་གཞི་ངོས་བཟུང་བ། དེ་ཇི་ལྟར་བཅའ་བའི་ཚུལ། གང་ཟག་གི་རིགས་དབྱེ་བ། གཞན་གྱིས་བཀྲི་ཚུལ་དང་འགལ་བ་སྤང་བ། སྦྱོར་ཚུལ་སྔ་མ་དང་འགལ་བ་སྤང་བ་དང་དྲུག་ལས། དང་པོ་ནི། གཞུང་གི་བབས་ཀྱི་དབང་དུ་བྱས་ནས་རྒྱུད་གསུམ་གྱི་སྐབས་ནས་བསྟན་པའི་ལམ་སྟེ། ཉམས་བླང་མ་ལུས་རྒྱུད་གསུམ་དག་གིས་ཤེས། །ཞེས་སོ། །དེ་ཡང་ཐབས་རྒྱུད་ཀྱི་ཐོག་མ་རྒྱུའི་དབང་། ལམ་ལ་སོགས་པའི་ཆོས་ཉི་ཤུ། དམ་ཚིག་གི་ཚོགས་བསྟན་པ། ཉམས་ན་མཁའ་འགྲོ་ལྔའི་ཉམས་ཆགས་བསྐང་བ། ཐབས་རྒྱུད་ཀྱི་གཙོ་བོ་ལམ་དུས་ཀྱི་དབང་བསྟན་པ་སྟེ། འདི་དག་གིས་ལམ་མ་ལུས་པ་བསྡུས་པའོ། །ཀུན་གཞི་རྒྱུ་རྒྱུད་ནི་བསྒོམ་པར་བྱ་བ་འཁོར་འདས་དབྱེར་མེད་དང་པོ་ནས་ཡོད་པས་རྒྱུ་རྒྱུད་དུ་བསྟན་ཀྱང་དེ་བསྒོམ་པ་དབང་གི་རྗེས་སུ་འབྱུང་བས་ལམ་དུ་འགྲོ་ཞིང་། ཕྱག་རྒྱ་ཆེན་པོ་འབྲས་བུའི་རྒྱུད་ཀྱང་སྤྲོ་བ་བསྐྱེད་པའི་ཆ་ནས་ལམ་དུ་བཞག་གོ །ཡང་ལམ་འབྲས་བུ་དང་བཅས་པ་ཞེས་པའི་ལམ་ལ་འཇོག་པ་ཡང་སྐབས་ཀྱི་དོན་ཏེ། འདི་ལ་འཇིག་རྟེན་པ་དང་འཇིག་རྟེན་ལས་འདས་པའི་ལམ་གཉིས། དེ་ཉིད་ལ་འཁོར་ལོ་འཆམ་པ་དང་འཁོར་ལོ་བསྐོར་བའི་ལམ་གཉིས། དྲོད་ཀྱིས་བསྡུས་པ་དང་རྟག་ཀྱིས་བསྡུས་པའི་ལམ་གཉིས། ཡེ་ཤེས་འཇུག་ལྡོག་དང་རྣམ་རྟོག་འཇུག་ལྡོག་གི་ལམ་གཉིས་ཏེ། རྣམ་གྲགས་ཀྱི་ཚུལ་གྱིས་བརྒྱད་དམ། ཡང་ལམ་རྒྱས་པ་ཆོས་བཅོ་བརྒྱད་ཀྱིས་བསྡུས་པ། འབྲིང་པོ་ཆོས་ལྔས་བསྡུས་པ། བསྡུས་པ་བསྒྲུབ་པ་ལུང་སྦྱིན་པ་སྟེ། རྒྱས་འབྲིང་བསྡུས་གསུམ། ལམ་ཟབ་མོ་བླ་མའི་རྣལ་འབྱོར། འབྲིང་དམ་ཚིག་དང་སྡོམ་པ། ཐ་མ་ལུས་སོ་སོར་བརྟགས་པའི་འགོག་པ་སྟེ། ཟབ་འབྲིང་ཐ་མ་གསུམ་དང་དྲུག་གོ །གཉིས་པ་ནི། ཐེག་པའི་རིམ་པ་ལྟར་ན་ཉན་ཐོས་དང་ཐུན་མོང་བའི་ལམ་དང་། ཐེག་པ་ཆེན་པོ་ཕ་རོལ་ཏུ་ཕྱིན་པ་དང་ཐུན་མོང་བའི་ལམ་གཉིས་སམ། སྡོམ་པའི་རིམ་པ་ལྟར་ན་སྡོམ་པ་འོག་མ་གཉིས་ཀྱིས་རྒྱུད་སྦྱངས་པ་སྟེ། སྔར་བཤད་པའི་ལམ་དེ་རྣམས་ཀྱི་ཐོག་མ་ནི་སྨིན་བྱེད་ཀྱི་དབང་ཡིན་པས་དེའི་སྣོད་རུང་དུ་བྱ་བ་ནི་སྐབས་འདིའི་གཞིའི་དོན་ཡིན་པའི་ཕྱིར་རོ། །གསུམ་པ་ནི། མ་དག་པའི་སྣང་བས་ཉན་ཐོས་དང་ཐུན་མོང་བའི་ལམ་ཆོད་ནས་སོ་སོར་ཐར་པའི་སྡོམ་པ་དང་ལྡན་པར་བྱས། ཐུན་མོང་བའི་ཉམས་ཀྱི་སྣང་བས་ཐེག་པ་ཆེན་པོ་ཕ་རོལ་ཏུ་ཕྱིན་པ་དང་ཐུན་མོང་བའི་ལམ་ཆོད་ནས་བྱང་སེམས་ཀྱི་སྡོམ་པ་དང་ལྡན་པར་བྱས། ཐུན་མོང་མ་ཡིན་པའི་ཉམས་ལ་ངེས་ཤེས་བསྒོམ་པས་གསང་སྔགས་ལ་སྤྲོ་བ་བསྐྱེད་པར་བྱས་དག་པའི་སྣང་བས་སྔགས་ལམ་ལ་བརྩོན་འགྲུས་མྱུར་དུ་བརྩམ་པར་བྱས་པ་ནི་གཞི་བཅའ་བའི་དོན་ཏེ། ཞུས་ལན་གསལ་བར། དེ་ཙམ་གྱིས་ནི་བློ་གྲོས་མ་འགེངས་པའི། །བློ་ཆེན་སྦྱངས་པ་ཟབ་མོ་དག་ལ་མོས། །རྡོ་རྗེ་འཆང་ཆེན་མྱུར་དུ་ཐོབ་འདོད་ན། །དེ་ལ་སྔགས་ཀྱི་ཐེག་པ་སྦྱིན་པར་བྱ། །ཞེས་གསུངས་པ་ལྟར་རོ། །དེ་དག་གཞུང་འདིས་ཇི་ལྟར་བསྟན་སྙམ་ན། ཐོག་མར་མ་དག་པའི་སྣང་བ་ལ། སེམས་ཅན་ལ་ཞེས་པས་འཁོར་བའི་ཉེས་དམིགས་རྟེན་ཏེ། སེམས་ཅན་ནི་རིགས་དྲུག་གིས་བསྡུས་པའི་སེམས་ཅན་ཡིན་ལ། དེ་ལ་བརྟགས་པས་སྡུག་བསྔལ་གསུམ་གྱི་རང་བཞིན་ལས་མ་འདས་པའི་ཕྱིར་རོ། །ཉོན་མོངས་པ་ལ་ཞེས་པས་དལ་འབྱོར་རྙེད་དཀའ་བསྟན་ཏེ། ཉོན་མོངས་པ་དུག་གསུམ་གྱིས་ཀུན་ནས་བསླངས་པའི་ལས་ཐམས་ཅད་ཀྱིས་ངན་སོང་བསྐྱེད་པས་དེས་ཀུན་ནས་མ་བསླངས་པའི་ལས་རྙེད་པར་དཀའ་ལ། དེའི་འབྲས་བུ་དལ་འབྱོར་རྙེད་པར་དཀའ་བའི་ཕྱིར་རོ། །ཉོན་མོངས་པ་དེ་ཡང་འདུ་བྱེད་ཀྱི་རྐྱེན་གྱིས་མ་རིག་པ་ལ་འཇོག་ན་དེའི་རྐྱེན་གྱིས་བྱུང་བའི་ལས་ཕལ་ཆེར་མི་དགེ་བ་ཡིན་ཞེས་སྦྱར་ཏེ། དགེ་བ་སྲིད་ཀྱང་དེ་རྙེད་པར་དཀའ་བའོ། །མ་དག་པའི་སྣང་བ་ཞེས་པས་ལས་རྒྱུ་འབྲས་ལ་ཡིད་ཆེས་བསྟན་ཏེ། འདི་ལ་འཁྲུལ་སྣང་དང་། ལས་སྣང་གཉིས་ལས། འཁྲུལ་སྣང་འདི་ལ་ཡང་དབང་ཆེ་ཆུང་དང་། ལོངས་སྤྱོད་ཆེ་ཆུང་དང་། བདེ་སྡུག་སོགས་ཀྱི་ཁྱད་པར་མྱོང་བས་གྲུབ་པས་དེ་དག་ལས་ཀྱི་ཁྱད་པར་ལས་བྱུང་བར་གྲུབ་པའི་ཕྱིར་དང་། ལས་སྣང་ལ་གཞི་གཅིག་ལ་མཐོང་ཚུལ་ཐ་དད་པ་འདི་རྣམས་ལས་ཀྱི་ཁྱད་པར་སོ་སོར་བསགས་པ་ལས་བྱུང་བར་གྲུབ་པའི་ཕྱིར་རོ། །དེ་ལྟར་ལས་རྒྱུ་འབྲས་ལ་ཡིད་ཆེས་སྐྱེས་ནས་མི་དགེ་བ་བཅུ་སྤོང་། དགེ་བ་བཅུ་བསྒྲུབ་པར་འདོད་པའི་ཚེ། སོ་སོར་ཐར་པ་གཏན་ཁྲིམས་བདུན་པོ་གང་རུང་སྦྱིན་པས་དེ་ཉིད་ལ་མི་དགེ་བ་བཅུ་སྤོང་དང་། དགེ་བ་བཅུ་སྒྲུབ་པ་ཚང་བའི་ཚུལ་སྔར་བཤད་པ་ལྟར་ཡིན་ལ། འཁོར་བའི་ཉེས་དམིགས་ཤེས་པ་སྔོན་དུ་སོང་བས་སོ་སོར་ཐར་པའི་སྡོམ་པར་འགྱུར་གྱི་འཇིགས་སྐྱོབ་དང་ལེགས་སྨོན་དུ་འགྱུར་བའི་གོ་སྐབས་མེད་དོ། །གཞུང་འདི་དག་གིས་ལམ་འབྲས་བུ་དང་བཅས་པ་ཡོངས་རྫོགས་བསྟན་པའི་དབང་དུ་བྱས་ན། སོ་ཐར་དང་། བྱང་སེམས་ཀྱི་སྡོམ་པས་རྒྱུད་སྦྱོང་བ་གཉིས་ཀ་ཡང་རྣལ་འབྱོར་པ་ཞེས་པའི་སྐབས་སུ་འབྱུང་བ་ཡིན་གྱི་འདིར་འབྱུང་བ་ནི་མ་ཡིན་ནོ། །གཉིས་པ་ཉམས་ཀྱི་སྣང་བ་ལ་ཐུན་མོང་གི་རྣལ་འབྱོར་པས་ཐུན་མོང་གི་ཉམས་རྒྱུད་ལ་སྐྱེས་སྐྱེས་སུ་བསྒོམ་པ་དང་། ཐུན་མོང་མ་ཡིན་པའི་རྣལ་འབྱོར་པས་སྐྱེ་འགྱུར་གྱི་ཉམས་ལ་ངེས་ཤེས་བསྒོམ་པ་གཉིས་ལས། དང་པོ་ཐུན་མོང་གི་རྣལ་འབྱོར་པ་ལ། ཐུན་མོང་གི་ཏིང་ངེ་འཛིན་ལ། ཐུན་མོང་གི་ཉམས་ཀྱི་སྣང་བ་ཞེས་སྦྱར། ཐུན་མོང་གི་རྣལ་འབྱོར་པ་ནི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལམ་སྒོམ་པ་པོའོ། །ཐུན་མོང་གི་ཏིང་ངེ་འཛིན་ནི་བྱམས་པ་དང་སྙིང་རྗེ་དང་བྱང་ཆུབ་ཀྱི་སེམས་གསུམ་མོ། །ཐུན་མོང་གི་ཉམས་ཀྱི་སྣང་བ་ནི་དེ་དག་སོ་སོའི་ཉམས་མྱོང་རྒྱུད་ལ་སྐྱེས་པའོ། །སྐབས་འདིར་བྱམས་པ་དང་སྙིང་རྗེ་སྔོན་དུ་སོང་ནས་ཆོ་ག་གང་ཡང་རུང་བས་བྱང་སེམས་ཀྱི་སྡོམ་པ་བླངས། དེ་ནས་སྨོན་འཇུག་གི་སེམས་བསྐྱེད་བསྒོམ་པ་ཡང་རུང་ལ། ཡང་སྨོན་འཇུག་གི་སེམས་བསྐྱེད་ཀྱི་དམིགས་པ་སྔོན་དུ་སོང་ནས་དེའི་འོག་ཏུ་སྡོམ་པ་བླངས་པ་ཡང་རུང་ངོ་། །དོན་དམ་བྱང་ཆུབ་ཀྱི་སེམས་ནི་སྔགས་ལམ་ལ་འཇུག་པའི་སྔོན་འགྲོ་ཙམ་ཡིན་ལ་སྐབས་འདིར་མ་བསྒོམས་ཀྱང་རུང་ཞིང་། ཕ་རོལ་ཏུ་ཕྱིན་པའི་ལྟ་སྤྱོད་ཡོངས་རྫོགས་སྔགས་ལམ་གྱི་སྔོན་འགྲོར་བྱེད་ན་སྐབས་འདིར་ངེས་པར་བསྒོམ་དགོས་སོ། །གཉིས་པ་ནི་ཉམས་ཀྱི་སྣང་བ་ཞེས་པའི་ཚིགས་ཟུར་ལ་བརྟེན་ནས་བྱམས་སྙིང་རྗེ་བྱང་ཆུབ་ཀྱི་སེམས་ཀྱི་མྱོང་བ་རྒྱུད་ལ་སྐྱེས་པ་ཙམ་མ་ཡིན་པར་ཉམས་སྣང་ཁྱད་པར་ཅན་ཅིག་ཡོད་པར་དཔོག་ནུས་ཏེ། དེ་དག་གི་མྱོང་བ་རྒྱུད་ལ་སྐྱེས་པའི་ཚེ་ན་ཡང་། སྣང་བ་རང་གི་ངོ་བོ་ནི་སྔར་གྱི་འཁྲུལ་སྣང་དེ་ལས་མ་འདས་བའི་ཕྱིར་རོ། །དེས་ན་ཉམས་སྣང་ཁྱད་པར་ཅན་དེ་ཅི་ཞིག་ཡིན་སྙམ་དུ་ཚོལ་བའི་ཚེ། རྣལ་འབྱོར་པས་བསྐྱེད་རྫོགས་ཀྱི་ལམ་བསྒོམས་པས་སྤྱིར་ཉམས་སྣང་བསམ་གྱིས་མི་ཁྱབ་པ་ཞིག་སྐྱེ་ལ། དེ་ཡང་བསྡུ་ན་སྔར་བཤད་པ་ལྟར་གྱི་བཅོ་ལྔར་འདུས་སོ་ཞེས་བླ་མས་སྟོན་པའི་ཚེ། ཕ་རོལ་ཏུ་ཕྱིན་པའི་ལམ་ཙམ་གྱིས་བློ་མ་ཚིམ་པར་ཟབ་མོ་སྔགས་ཀྱིས་ལམ་ལ་འཇུག་པར་འདོད་པའི་བློ་སྐྱེ་བའོ། །གསུམ་པ་དག་པའི་སྣང་བ་ནི། བདེ་བར་གཤེགས་པ་ཞེས་སོགས་ཏེ། གཞུང་གི་བསྟན་ཚུལ་ནི་སྔ་མ་དང་འདྲ་ལ། སྐབས་འདིར་ཐོབ་བྱའི་འབྲས་བུ་གཏན་ལ་དབབ་པ་ཙམ་མ་ཡིན་པར་འབྲས་བུ་ལ་སྤྲོ་བ་སྐྱེས་ནས་དེ་མྱུར་དུ་ཐོབ་པའི་ཕྱིར་སྔགས་ལམ་ལ་བརྩོན་པ་བསྐྱེད་པའོ། །བཞི་པ་ནི། སྤྱིར་གང་ཟག་གི་རིགས་ལ་ཚེ་འདིར་བསྟན་པ་ལ་མ་ཞུགས་པ་དང་། ཞུགས་པ་གཉིས་ལས། མ་ཞུགས་པ་ལ་དང་པོ་ནས་ཕྱག་ཆེན་མཆོག་གི་དངོས་གྲུབ་འདོད་པ་དང་། ཚེ་འདིའི་འཇིགས་སྐྱོབ་དང་སྐྱེ་བ་ཕྱི་མ་ལྷ་མིའི་གོ་འཕང་ཙམ་འདོད་པ་གཉིས་ལས། དང་པོ་ནི། སྐྱེ་བ་དཔག་ཏུ་མེད་པ་ནས་ཐེག་པ་ཆེན་པོ་ལ་བློ་སྦྱངས་པའི་སྐལ་ལྡན་ཅིག་ཆར་བ་ཡིན་པས་ལམ་གྱི་གཞི་བཅའ་བ་དེ་དག་མི་དགོས་པར་སྨིན་བྱེད་ནས་བརྩམས་ཏེ། ལམ་ཁོ་ན་རྟེན་པར་བྱ་བ་ཡིན་ནོ། །འདི་ལ་ཡང་དབང་གི་སྔོན་དུ་སེམས་བསྐྱེད་ཀྱི་ཆོ་ག་ཕྱག་ལེན་ལ་མཛད་པར་མངོན་རྟོགས་ལྗོན་ཤིང་ལས་གསུངས་སོ། །གཉིས་པ་ནི་སྐལ་དམན་རིམ་འཇུག་པ་ཡིན་པས། འཁོར་བའི་ཉེས་དམིགས་ནས་བརྩམས་ཏེ། གསང་སྔགས་ལ་སྤྲོ་བ་བསྐྱེད་པའི་བར་གྱིས་ལམ་གྱི་གཞི་བཅའ་བ་ཐམས་ཅད་བསྟན་པར་བྱ་བ་ཡིན་ནོ། །གཉིས་པ་ཚེ་འདིར་བསྟན་པ་ལ་ཞུགས་པ་ལ་ཡང་། ཉན་ཐོས་ཀྱི་ལམ་ལ་ཞུགས་པ་དང་། ཐེག་པ་ཆེན་པོ་ཕ་རོལ་ཏུ་ཕྱིན་པའི་ལམ་ལ་ཞུགས་པ་གཉིས་ལས་དང་པོ་ལ་མ་དག་པའི་སྣང་བའི་ཁྲིད་བོར་ནས་བྱམས་པ་སྙིང་རྗེ་བྱང་ཆུབ་ཀྱི་སེམས་གསུམ་བསྟན་ཏེ། གསང་སྔགས་ལ་སྤྲོ་བ་བསྐྱེད་པའི་ཚེ་སྔགས་ལམ་ལ་གཞུག་པར་བྱའོ། །གཉིས་པ་ལ་ཉམས་ཀྱི་སྣང་བའི་ཁྲིད་ཀྱང་བོར་ནས། གསང་སྔགས་ལ་སྤྲོ་བ་ཡོད་ན་སྨིན་བྱེད་ནས་བསྟན་པར་བྱ་བ་ཡིན་ཞིང་། སྤྲོ་བ་མེད་ན། བུ་ཚུར་ཐེག་པ་ཆེན་པོ་ལ། །ཞེས་སོགས་ཀྱིས་གསང་སྔགས་ལ་སྤྲོ་བ་བསྐྱེད་ནས་དེའི་འོག་ཏུ་སྔགས་ཀྱི་ཐེག་པ་སྦྱིན་པར་རྗེ་བཙུན་རྩེ་མོས་གསུངས་སོ། །ལྔ་པ་ནི། འོ་ན་དམ་པ་གཞན་གྱིས་བཀྲི་ཚུལ་ལས། ཐོག་མར་དལ་འབྱོར་རྙེད་དཀའ་དང་། འཆི་བ་མི་རྟག་པས་བཀྲི་བ་དང་འགལ་ལོ་སྙམ་ན། བཀའ་གདམས་པའི་གདམས་ངག་རྣམས་ལས་དེ་ལྟར་འབྱུང་བ་ནི་གང་ཟག་ཅིག་ཉིད་སྐྱེས་བུ་གསུམ་གྱི་ལམ་གྱིས་བཀྲི་བའི་རིམ་པ་ལ་དགོངས་ཏེ་སྐྱེས་བུ་ཆུང་ངུ་ཚེ་འདི་ལ་བློ་ལྡོག་ནས་སྐྱེ་བ་ཕྱི་མ་ལྷ་མིའི་གོ་འཕང་དོན་དུ་གཉེར་བ་ཡིན་ལ། དེ་ལ་དལ་འབྱོར་རྙེད་དཀའ་དང་། འཆི་བ་མི་རྟག་པས་ཚེ་འདི་ལ་བློ་ལྡོག་དགོས། སྐྱེས་བུ་འབྲིང་པོ་ནི་དེའི་འོག་ཏུ་འཁོར་བ་མཐའ་དག་སྤངས་ནས་མྱང་འདས་ཙམ་དོན་དུ་གཉེར་བ་ཡིན་ལ། དེ་ལ་འཁོར་བའི་ཉེས་དམིགས་དང་། ལས་རྒྱུ་འབྲས་ལ་ཡིད་ཆེས་ཀྱི་འཁོར་བ་སྤངས་འདོད་ཀྱི་བློ་བསྐྱེད་དགོས། སྐྱེས་བུ་ཆེན་པོ་ནི་རང་དོན་ལ་སྲེད་པ་སྤངས་ནས་སེམས་ཅན་གྱི་དོན་དུ་བླ་ན་མེད་པའི་བྱང་ཆུབ་འདོད་པ་ཡིན་ལ། དེ་ལ་བྱམས་སྙིང་རྗེ་བྱང་ཆུབ་ཀྱི་སེམས་གསུམ་གྱིས་ཐེག་པ་ཆེན་པོའི་བློ་བསྐྱེད་དགོས་པས་འདིའི་དབང་དུ་བྱས་པ་ཡིན་ཅིང་། ཡང་གང་ཟག་གསུམ་སྐྱེས་བུ་གསུམ་གྱིས་ལམ་གྱིས་སོ་སོར་བཀྲི་བའི་ཚེ་ན་དམན་མཆོག་གི་རིམ་པ་ཡིན་ནོ། །འདི་ལྟ་བུའི་གོ་རིམ་ལུགས་འདིའི་ཐུན་མོང་བའི་སྐབས་སུ་ཡང་གསོ་སྦྱོང་ནི་སྐྱེས་བུ་ཆུང་ངུའི་བཀྲི་ཚུལ་དང་། བསླབ་པའི་གནས་བཅུ་ནི་སྐྱེས་བུ་འབྲིང་གི་བཀྲི་ཚུལ་དང་། སེམས་བསྐྱེད་དང་ལྟ་བ་གཉིས་ནི་སྐྱེས་བུ་ཆེན་པོའི་བཀྲི་ཚུལ་ཡིན་པས་འདིར་ཡང་ཡོད་ཅིང་། བརྒྱུད་པ་འདིའི་ལུགས་ཀྱི་ཞེན་པ་བཞི་བྲལ་སོགས་ལ་ཡང་རིམ་པ་འདི་ཉིད་ཡོད་དོ། །མན་ངག་ཐུན་མོང་མ་ཡིན་པའི་སྐབས་འདིར། ཐོག་མར་འཁོར་བའི་ཉེས་དམིགས་ནས་བཀྲི་བ་ནི་དངོས་གཞི་སྔགས་སྡོམ་ལ་འཇུག་པ་ལ་ཐེག་པ་ཆེན་པོའི་སེམས་བསྐྱེད་སྔོན་དུ་འགྲོ་བ་དགོས་ཤིང་། དེ་ལ་ཡང་སོ་སོ་ཐར་པའི་སྡོམ་པ་སྔོན་དུ་འགྲོ་བ་དགོས། དེ་ལ་ཐོག་མར་ངེས་འབྱུང་གི་བསམ་པ་དགོས་པ་ནི་སྐལ་དམན་རིམ་འཇུག་པའི་བཀྲི་ཚུལ་ལ་མི་དགོས་ཁ་མེད་ཀྱི་ཆོས་རྣམས་ཡིན་པས་འདིའི་དབང་དུ་བྱས་པའོ། །དལ་འབྱོར་རྙེད་དཀའ་དང་འཆི་བ་མི་རྟག་པ་ནི་ཚེ་འདིར་སྲེད་པ་སྐྱེས་ན་དེ་བཟློག་པའི་ཆེད་དུ་དགོས་ཀྱི་གཞན་ལ་མི་དགོས་པས་ཁྲིད་ཀྱི་གཞུང་ཤིང་དུ་འཁོར་བའི་ཉེས་དམིགས་ཀྱི་འོག་ཏུ་བཤད་ཅིང་། ཞུས་ལན་གསལ་བར། དེ་ལྟར་བསམས་ཀྱང་ཚེ་འདིར་སྲེད་པ་ན། །མི་རྟག་པ་ནི་ཐུན་མཚམས་ཐམས་ཅད་དུ། །ཡང་ཡང་དྲན་པར་བྱ་ཡི་མི་རྟག་པ། །རྟག་ཏུ་མི་བསམ་དུས་འདས་དགོས་མེད་ཕྱིར། །ཞེས་གསུངས་སོ། །འདི་ལྟ་བུའི་རིམ་པ་ནི་གཞུང་ལུགས་གཞན་ལ་ཡང་ཡོད་དེ། གཏན་ཁྲིམས་བདུན་པོ་རེ་རེ་ལ་ཡང་། འཇིགས་སྐྱོབ། ལེགས་སྨོན། སོ་ཐར་གསུམ་གསུམ་ཡོད་པ་ལས། ཡོན་ཤཱཀ་གཉིས་ཀྱི་གཞུང་དུ་སོ་ཐར་ཁོ་ན་འཆད་པའི་དབང་དུ་བྱས་ནས། གཞུང་གི་ཐོག་མར་ངེས་པར་འབྱུང་པའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་དང་། ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང་། །ཞེས་འབྱུང་བའི་ཕྱིར་དང་། མངོན་རྟོགས་རྒྱན་ལས། གང་ཟག་ཅིག་ཉིད་ཆོས་སྐུའི་ཕྲིན་ལས་ཉི་ཤུ་རྩ་བདུན་གྱིས་མི་གནས་པའི་མྱང་འདས་སུ་རིམ་གྱིས་ཁྲིད་པ་ལ་ཡང་། འགྲོ་རྣམས་ཞི་བའི་ལས་དང་ནི། །ཞེས་ཐོག་མར་ངེས་འབྱུང་གི་བསམ་པ་གསུངས་པ་ལྟ་བུའོ། །དྲུག་པ་ནི། འོ་ན་སྣང་བ་གསུམ་གྱི་གཞུང་འདི་དག་གིས་ལམ་འབྲས་བུ་དང་བཅས་པ་ཡོངས་རྫོགས་བསྟན་པར་སྔར་བཤད་པ་དང་འགལ་ལོ་སྙམ་ན། མི་འགལ་ཏེ། འདི་མཐའ་འདི་ཙམ་ཁོ་ནར་གནས་སོ་ཞེས། །དེ་མཐའ་དེ་ཙམ་ཁོ་ནར་རྣམ་དཔག་ན། །འགྲོ་བའི་བླ་མའི་གསུང་ལས་བརྒལ་བ་སྟེ། །དེས་ན་མཐའ་མེད་དགོངས་པ་དཔྱོད་པར་བྱ། །ཞེས་པ་ལྟར་རྫོགས་པའི་སངས་རྒྱས་ཀྱི་གསུང་ཚིག་གཅིག་ཉིད་ལ་ཡང་མན་ངག་དང་ལྡན་ན་དོན་བསམ་གྱིས་མི་ཁྱབ་པ་བཤད་དུ་རུང་བའི་ཕྱིར་རོ། །དེས་ན་ལམ་དང་འབྲས་བུ་ཡོངས་རྫོགས་བསྟན་པ་ནི། འཁོར་འདས་ཐུན་མོང་བའི་གཞུང་ཚོམ་བུ་རེ་རེས་ཀྱང་ལམ་འབྲས་བུ་དང་བཅས་པ་ཡོངས་རྫོགས་བསྟན་པའི་དབང་དུ་བྱས་ལ། ལམ་གྱི་གཞི་བཅའ་ལ་སྦྱར་བ་ནི་རྡོ་རྗེའི་ཚིག་རྐང་གི་དོན་ཐམས་ཅད་གང་ཟག་གཅིག་གི་ཉམས་ལེན་ལ་སྦྱར་བའི་དབང་དུ་བྱས་པའོ། །འདི་ལྟ་བུའི་སྦྱར་ཚུལ་བཀའ་དང་བསྟན་བཅོས་གཞན་ལ་ཡང་ཡོད་དེ། རྩ་རྒྱུད་བརྟག་པ་དང་པོའི་ལེའུ་བཅུ་གཅིག་པོ་གང་ཟག་གཅིག་གི་ཉམས་ལེན་ལ་སྦྱར་བའི་ཚེ་ལེའུ་དང་པོས་ལྟ་བ་དང་། བརྒྱད་པས་ཉེ་རྒྱུ་སྟོན་ཀྱང་། ལེའུ་དང་པོ་ཉིད་ལ་རྟེན་དཀྱིལ་འཁོར་ལ་གནད་དུ་བསྣུན་པའི་རྫོགས་རིམ་ཡོངས་རྫོགས་དང་། ལེའུ་བརྒྱད་པ་ཉིད་ལ་ལས་དང་པོ་པ་ནས་འབྲས་བུ་ལ་མཚམས་སྦྱར་བའི་བར་གྱི་བསྐྱེད་རྫོགས་ཡོངས་སུ་རྫོགས་པ་ཡོད་པ་ལྟ་བུ་དང་། མངོན་རྟོགས་རྒྱན་ལ་སྐབས་བརྒྱད་གསུངས་པ་གང་ཟག་ཅིག་གི་ཐོས་བསམ་གྱིས་གཏན་ལ་དབབ་པར་བྱ་བའི་ཡུལ། ཉམས་ལེན་གྱི་སྦྱོར་བ། ཉམས་སུ་བླངས་པའི་འབྲས་བུ་གསུམ་དུ་བསྡུ་བའི་ཚེ་ན་ཡང་རྣམ་མཁྱེན་གཅིག་ཉིད་ལ་ཡང་དེ་ཐམས་ཅད་ཚང་བ་དང་། དེའི་ནང་ནས་སེམས་བསྐྱེད་དང་། གདམས་ངག་ལྟ་བུ་རེ་རེ་ལ་ཡང་ཐེག་པ་ཆེན་པོའི་ལམ་འབྲས་བུ་དང་བཅས་པ་ཚང་བར་ཡོད་པ་ལྟ་བུའོ། །གསུམ་པ་ནི་ཅིའི་ཕྱིར་སྣང་བ་གསུམ་གྱི་སྒོ་ནས་བསྟན་ཅེ་ན། ལམ་འབྲས་བུ་དང་བཅས་པ་ཡོངས་རྫོགས་བསྟན་པའི་དབང་དུ་བྱས་པའི་ཚེ་སྣང་བ་གསུམ་གྱི་སྒོ་ནས་བསྟན་པའི་དགོས་པ་ནི་འཁོར་འདས་ཀྱི་ཆོས་ཐམས་ཅད་སྣང་བ་གསུམ་གྱིས་བསྡུས་པར་ཤེས་པའི་ཆེད་ཡིན་ལ། ལམ་གྱི་གཞི་བཅའ་ལ་སྦྱར་བའི་ཚེ་སྣང་བ་གསུམ་གྱི་སྒོ་ནས་བསྟན་པའི་དགོས་པ་ནི་མ་དག་པའི་སྣང་བ་འདི་ཉིད་ཉམས་ཀྱི་སྣང་བར་བསྒྱུར། ཉམས་ཀྱི་སྣང་བ་ཡང་དག་པའི་སྣང་བར་བསྒྱུར་དགོས་སོ་ཞེས་ཤེས་པའི་ཆེད་ཡིན་ནོ། །སྣང་བ་གསུམ་གྱི་ལམ་གྱི་གཞི་བཅའི་དོན། །མཐའ་ཡས་གསུང་རབ་གནད་དུ་འགྱུར་བའི་ཚུལ། །བློ་ལྡན་བསོད་ནམས་སེང་གེས་གཞན་དོན་དུ། །བཀོད་པ་འདིས་ནི་གཞན་ལ་ཕན་གྱུར་ཅིག །ཅེས་པའི་ཡི་གེ་པ་ནི་གཞོན་ནུ་བཟང་པོའོ། །ཤུ་བྷཾ། དགེ་བ་འདི་ཡིས་ནམ་མཁའི་མཐའ་ཀླས་པའི། །ལུས་ཅན་ཀུན་གྱིས་བསོད་ནམས་ཡེ་ཤེས་ཚོགས། །མྱུར་དུ་བསྒྲུབས་ནས་ཚེ་འདི་ཁོ་ན་ལ། །རྡོ་རྗེ་འཛིན་པའི་ས་མཆོག་ཐོབ་པར་ཤོག །ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན། །ཕྱོགས་བཅུའི་ཐ་གྲུ་ཀུན་ཏུ་གསལ་བ་དང་། །བློ་གྲོས་པདྨོ་རབ་ཏུ་རྒྱས་བྱས་ནས། །གསང་ཆེན་བསྟན་པ་ཡུན་དུ་གནས་གྱུར་ཅིག །དགེའོ། །དགེའོ། །དགེའོ།། །།

དཔལ་ཀྱཻ་རྡོ་རྗེའི་སྒྲུབ་པའི་ཐབས་ཀྱི་རྒྱ་ཆེར་བཤད་པ་བསྐྱེད་རིམ་གནད་ཀྱི་ཟླ་ཟེར་ལ་རྩོད་པ་སྤོང་བ་གནད་ཀྱི་གསལ་བྱེད།

དཔལ་ཀྱཻ་རྡོ་རྗེའི་སྒྲུབ་པའི་ཐབས་ཀྱི་རྒྱ་ཆེར་བཤད་པ་བསྐྱེད་རིམ་གནད་ཀྱི་ཟླ་ཟེར་ལ་རྩོད་པ་སྤོང་བ་གནད་ཀྱི་གསལ་བྱེད་བཞུགས་སོ།། དཔལ་ཀྱཻ་རྡོ་རྗེའི་སྒྲུབ་པའི་ཐབས་ཀྱི་རྒྱ་ཆེར་བཤད་པའི་བསྐྱེད་རིམ་གནད་ཀྱི་ཟླ་ཟེར་ལ་རྩོད་པ་སྤོང་བ་གནད་ཀྱི་གསལ་བྱེད་ཅེས་བྱ་བ། རྒྱལ་བ་ཁྱབ་བདག་རྡོ་རྗེ་འཆང་དང་གཉིས་སུ་དབྱེར་མ་མཆིས་པ་རྗེ་བཙུན་བླ་མ་དམ་པའི་ཞབས་ལ་སྤྱི་བོས་ཕྱག་འཚལ་ལོ། །རྒྱལ་བ་ཀུན་གྱི་གསང་བའི་མཛོད་གཟུང་ནས། །དམ་ཚིག་དགའ་སྟོན་སྐལ་ལྡན་གདུལ་བྱ་ལ། །རྣམ་པར་བཀྱེ་བའི་ཕྲིན་ལས་བཟང་པོ་ཅན། །མཚུངས་མེད་བླ་མ་དེ་ལ་བདག་ཅག་དད། །རྣམ་ཐར་རང་བཞིན་རྣམ་ཐར་ཞལ་ནི་དེ་ཉིད་གསུམ་གྱི་སྤྱན་གྱིས་སྤྲས། །སྟོང་ཉིད་ངོ་བོ་མི་བདག་ཕྱག་ནི་སྙིང་རྗེའི་ཐོད་པར་ལུས་ཅན་འཛིན། །བསྡུ་དངོས་རང་བཞིན་རིག་བྱེད་ཞབས་ནི་བདུད་བཞིའི་སྟེང་ན་གར་སྟབས་མཛད། །རྣམ་འཕྲུལ་བྱེ་བས་གདུལ་བྱའི་ཡིད་བསྒྱུར་ཧེ་རུ་ཀ་དཔལ་ལ་བཏུད་ནས། །མཐུ་སྟོབས་དབང་ཕྱུག་ཞལ་གྱི་གདམས་པ་ཀུ་མུཏྟ་ཁ་འབྱེད་མཛད་པ། །བླ་མའི་གསུང་རབ་གནད་ཀྱི་ཟླ་ཟེར་འགྲོ་བའི་གཙུག་ན་མཛེས་པ་དེ། །ཕྱོགས་ཞེན་སྤྲིན་གྱིས་སྒྲིབ་པར་བརྩོན་པ་དེ་དག་ལུང་རིགས་སེར་བུ་ཡིས། །རྣམ་པར་བསལ་ནས་གངས་རིའི་ངོས་ལ་འཁྱུག་ལྟར་ཆེས་ཆེར་གསལ་བར་བྱ།། །།མགོན་པོ་འཇམ་པའི་དབྱངས་དང་དབྱེར་མ་མཆིས་པ་རྗེ་བཙུན་ས་སྐྱ་པ་ཡབ་སྲས་རྣམས་ཀྱི་མཁྱེན་བརྩེ་ནུས་པ་གཅིག་ཏུ་བསྡུས་ནས་བདེ་བར་གཤེགས་པའི་གསུང་རབ་མཐའ་དག་ལ་མ་རྟོགས་པ་དང་། ལོག་པར་རྟོག་པ་དང་། ཐེ་ཚོམ་གྱི་དྲི་མ་མཐའ་དག་བསལ་ཏེ། ཡང་དག་པའི་བསྟན་པ་ཚུལ་བཞིན་དུ་སྒྲུབ་པར་མཛད་པའི་བདག་ཉིད་ཆེན་པོ་ཐམས་ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས་དཔལ་བིརྺ་པའི་ལུགས་ཀྱི་བཀའ་སྲོལ་གཉིས་གཙོ་བོར་གྱུར་པའི་ཀྱཻ་རྡོ་རྗེ་སྒྲུབ་པའི་ཐབས་བོད་དུ་འགྱུར་རོ་ཅོག་མཐའ་དག་གི་ཆ་མ་འདྲེས་པར་སོ་སོར་སྟོན་པའི་བསྟན་བཅོས་བསྐྱེད་རིམ་གནད་ཀྱི་ཟླ་ཟེར་ཞེས་བྱ་བ་མཛད་པ་ལ། ཕྱིས་རིགས་རུས་ཆོ་འབྲང་ཕུན་སུམ་ཚོགས་ཤིང་སྐྱེས་ཐོབ་ཀྱི་བློ་གྲོས་རྒྱ་ཆེན་པོ་དང་ལྡན་པའི་སློབ་དཔོན་ཆེན་པོ་དཔལ་ཆོས་པ་ཞེས་བྱ་བས། གནད་ཀྱི་ཟླ་ཟེར་གྱི་བཤད་པ་དེ་དག་ནི། རྗེ་བཙུན་གོང་མའི་དགོངས་པ་ཇི་ལྟ་བ་བཞིན་མ་རྟོགས་ཤིང་། འཕགས་པ་རིན་པོ་ཆེའི་བཞེད་གཞུང་དྲི་མ་མེད་པ་ལ་དགག་པ་བརྗོད་པ་དུ་མ་ཞིག་སྣང་བས། དེ་དག་དགག་པར་བྱ་བ་དང་། གཞན་ཡང་མཁས་གྲུབ་དགེ་ལེགས་དཔལ་དང་། དཔལ་འཇིགས་མེད་གྲགས་པ་གཉིས་ཀྱིས། རྗེ་བཙུན་གོང་མའི་བཞེད་པ་ལ་དགག་པ་བརྗོད་པ་དུ་མ་ཞིག་སྣང་བས་དེ་དག་བསལ་བར་བྱ་བའི་ཕྱིར། དཔལ་ཀྱཻ་རྡོ་རྗེའི་མངོན་པར་རྟོགས་པ་མན་ངག་གི་གཏེར་མཛོད་གསལ་བར་བྱེད་པའི་དཀའ་འགྲེལ་རྒྱུད་དོན་གནད་ཀྱི་ལྡེ་མིག་གི་རྒྱས་བཤད་འཁྲུལ་འཇོམས་ཉི་མའི་འོད་ཟེར་ཞེས་བྱ་བ་བྱས་སོ། །དེ་ལ་ལུགས་ཕྱི་མ་གཉིས་ལ་ལན་གདབ་པ་རྣམས་ནི། དཔྱད་པ་འཇུག་པའི་གཞི་རེ་རེ་ཙམ་མ་གཏོགས་ཕལ་ཆེར་ལན་རྣམ་དག་ཏུ་སོང་འདུག་སྟེ། ལུགས་དེ་གཉིས་ནི་རྒྱུད་སྡེའི་དགོངས་པ་གྲུབ་ཆེན་གྱིས་བཀྲལ་བ་འཁྲུལ་པ་མེད་པ་ལ་ལུང་རིགས་ལྟར་སྣང་གིས་སྐྱོན་བརྗོད་པ་འབའ་ཞིག་ཏུ་སྣང་བས། དེའི་ལན་གདབ་པ་ནི་ཤིན་ཏུ་སླ་བའི་ཕྱིར་རོ། །གནད་ཀྱི་ཟླ་ཟེར་ལ་སྐྱོན་བརྗོད་པ་རྣམས་ནི་རང་ཉིད་རྗེ་བཙུན་གོང་མའི་གསུང་རབ་ཚད་མར་ཁས་ལེན་བཞིན་དུ། དེ་དག་གི་དགོངས་པ་ཕྱིན་ཅི་མ་ལོག་པར་བཀྲལ་བ་ལ་སྐྱོན་བརྗོད་པར་སྣང་བས་འགལ་བའི་ཁུར་ཁྱེར་བ་ནི་འདི་དང་འདི་ལྟ་བུའོ་ཞེས་ཁོ་བོས་གསལ་བར་བཤད་པར་བྱ་བ་ལ། བློ་གྲོས་ཀྱི་མིག་དང་ལྡན་པ་དག་གིས་གཟུ་བོར་གནས་པའི་བློས་དཔྱོད་ལ་བླང་དོར་ཚུལ་བཞིན་དུ་གྱིས་ཤིག འདིར་བསྐྱེད་རིམ་གནད་ཀྱི་ཟླ་ཟེར་ལས། དེ་ལས་བོད་ཀྱི་བླ་མ་རྣམས་གང་གི་རྗེས་སུ་འབྲང་དཔྱད་པའི་སྐབས་སུ། བོད་ཡུལ་བསྟན་པའི་སྒྲོན་མེ་རྗེ་བཙུན་ས་སྐྱ་པའི་ལུགས་འདི་འཕགས་ཡུལ་གྱི་གཞུང་གང་གི་རྗེས་སུ་འབྲང་སྙམ་ན། རྗེ་བཙུན་ཆེན་པོས་སྙིང་པོ་དོན་གྱི་ཀྱཻ་རྡོ་རྗེ། །བིརྺའི་རྗེས་འབྲང་ཌོཾ་བིའི་སྐོར། །ཡན་ལག་མེད་རྗེ་པདྨའི་སྐོར། །དམ་ཚིག་རྡོ་རྗེ་ནག་པོའི་སྐོར། །གཙོ་ཆེའི་ཆོས་སྣ་སུམ་ཅུ་དགུ། །ལམ་སྐོར་དགུ་ནི་ཁྱད་པར་རོ། །ཞེས་གསུངས་པས། སྔར་གྱི་མཚོ་སྐྱེས་ཀྱི་ཆོས་སྐོར་དང་། ནག་པོ་པའི་སྐོར་དང་། རྗེ་བཙུན་བིརྺ་པའི་རྗེས་འབྲང་ལ་སློབ་དཔོན་ནག་པོ་པ་ནས་བརྒྱུད་པའི་མན་ངག་ལུགས་དང་མི་ཐུབ་ཟླ་བའི་ཆོས་སྐོར་འགྲེལ་པ་ལུགས་སུ་གྲགས་པ་སྟེ་འདི་གཉིས་ངོ་བོ་གཅིག་ཡིན་པས་ལུགས་གསུམ་མམ་བླ་མ་དག་གི་གསུང་སྒྲོས་ལ་འདི་གཉིས་སོ་སོར་ཕྱེ་ནས་བརྒྱུད་པའི་བཀའ་སྲོལ་བཞི་ཞེས་གསུངས་ཞེས་དང་། འོག་ཏུ་སློབ་དཔོན་ཌོཾ་བི་ཧེ་རུ་ཀས་སྒྲུབ་ཐབས་བདུད་རྩི་འོད་ལ་སོགས་པ་མཛད། ལུགས་འདི་སྨིན་གྲོལ་གྱི་ལམ་ཐམས་ཅད་ཤིན་ཏུ་བསྡུས་ལ་རྒྱུད་ཀྱི་བཤད་པ་ཤིན་ཏུ་རྒྱས་པ་ཞིག་སྣང་། སློབ་དཔོན་ནག་པོ་པ་ནས་བརྒྱུད་པ་ལ། རྣལ་འབྱོར་ཉམས་སུ་བླང་བའི་རིམ་པ་ཤིན་ཏུ་རྒྱས་ཤིང་རྒྱུད་ཀྱི་བཤད་པ་ནི་མན་ངག་དང་སྦྱར་ཏེ་འབྲུ་གཉེར་བ་ཙམ་དང་། དཀའ་གནས་འགའ་ཞིག་གི་བཤད་པ་ཙམ་མ་གཏོགས་པ་རྒྱས་པ་མི་སྣང་ཞིང་། སློབ་དཔོན་གཉིས་ཆར་གྲུབ་ཆེན་བིརྺ་པའི་སློབ་མ་ཡིན་པ་ལ་ལམ་གཉིས་འབྱུང་བའི་རྒྱུ་མཚན་ཅི་ཡིན་སྙམ་ན་དང་པོར་ལམ་ལ་འཇུག་པའི་དུས་སུ་ཌོཾ་བྷི་ཝ་བློ་རབ་དང་། ནག་པོ་པ་བློ་ཐ་མ་ཞིག་ཡོད་པར་སྣང་བས་དེ་དང་མཐུན་པར་བསྟན་པ་ཡིན། དེ་ལྟར་ལམ་གཉིས་ཀྱང་རང་གི་ངོ་བོ་གཅིག་ཡིན་ཏེ། སྐལ་དམན་རིམ་གྱིས་འཇུག་པའི་གང་ཟག་གཅིག་ཌོཾ་བྷི་ཝའི་ལམ་གྱིས་དཀྲི་དགོས་ན། ནག་པོ་པས་བཤད་པ་ལྟར་དཀྲི་བ་ལས་གཞན་པའི་ཐབས་མེད་ཅིང་། སྐལ་ལྡན་ཅིག་ཆར་བ་ཞིག་ནག་པོའི་ལམ་གྱིས་དཀྲི་ན་ཌོྃ་བྷི་ཝས་ཇི་སྐད་བཤད་པ་བཞིན་ལས་གཞན་དུ་མེད་པའི་ཕྱིར། དེས་ན་གདུལ་བྱ་གང་ཟག་གི་ངོས་ནས་གཉིས་སུ་ཕྱེ་བ་ཡིན་གྱི། རང་གི་ངོ་བོའི་སྒོ་ནས་ཕྱེ་བ་མ་ཡིན་པས་ལམ་གཉིས་དོན་གཅིག་དུ་ཤེས་པར་བྱའོ། །གལ་ཏེ་ལམ་འདི་གཉིས་དོན་གཅིག་ན་མི་འདྲ་བ་མི་རིགས་པ་ལ་སྨིན་བྱེད་དང་བསྐྱེད་རིམ་གྱི་སྐབས་ན་མི་འདྲ་བ་དུ་མ་སྣང་བའི་ཕྱིར་རོ་སྙམ་ན། ནང་སེལ་གྱི་དབྱེ་བ་ཕྲ་མོས་ལམ་གྱི་སྤྱི་མི་འདྲ་བར་འབྱེད་མི་ནུས་པས་ན། འགྲེལ་པ་ལུགས་དང་མན་ངག་ལུགས་གཉིས་ཀ་རྗེ་བཙུན་བིརྺ་པའི་ལུགས་ཞེས་གཅིག་ཏུ་ཤེས་པར་བྱ་སྟེ། དཔེར་ན་རྡོར་དབྱིངས་འགྲེལ་པ་ལུགས་དང་དཀྱིལ་ཆོག་ལུགས་གཉིས་ཀ་སློབ་དཔོན་ཀུན་དགའ་སྙིང་པོའི་ལུགས་སུ་གཅིག་པ་བཞིན་ནོ་ཞེས་གསུངས་པ་ལ། ཉི་ཟེར་མཁན་པོ་ན་རེ། དེ་ནི་འཐད་པ་མ་ཡིན་ཏེ། འོ་ན་གོང་དུ་ཁྱེད་རང་གིས་སྨོས་པའི་ལམ་གསུམ་ཀ་ཡང་རང་གི་ངོ་བོ་གཅིག་ཏུ་འགྱུར་ཏེ། མཚོ་སྐྱེས་ལུགས་ཀྱི་ལམ་འབའ་ཞིག་གིས་དཀྲི་བར་འོས་པའི་གང་ཟག་གཅིག་བིརྺ་པ་དང་། དམ་ཚིག་རྡོ་རྗེའི་ལམ་གྱིས་དཀྲི་བའི་ཚེ་མཚོ་སྐྱེས་ལུགས་ཀྱི་ལམ་གྱིས་དཀྲི་དགོས་ལ། ནག་པོ་ལུགས་ཀྱི་ལམ་འབའ་ཞིག་གིས་དཀྲི་བར་འོས་པའི་གང་ཟག་གཅིག་བིརྺ་པ་དང་། མཚོ་སྐྱེས་ལུགས་ཀྱིས་དཀྲི་བའི་ཚེ་ན། ནག་པོ་ལུགས་ལས་དཀྲི་བའི་ཐབས་གཞན་མེད་པའི་ཕྱིར་རོ། །དེ་ན་གདུལ་བྱའི་གང་ཟག་གི་ངོས་ནས་གསུམ་དུ་ཕྱེ་བ་ཡིན་གྱི་རང་གི་ངོ་བོའི་སྒོ་ནས་ཕྱེ་བ་མ་ཡིན་པས་ལམ་གསུམ་གྱི་དོན་ཡང་གཅིག་ཏུ་འགྱུར་རོ། །སྨིན་བྱེད་དང་བསྐྱེད་རྫོགས་གཉིས་ཀྱི་ཚུལ་མི་འདྲ་བས་ལམ་འདི་གསུམ་དོན་མི་གཅིག་གོ་སྙམ་ན། ནང་སེལ་གྱི་དབྱེ་བ་ཕྲ་མོ་ཙམ་གྱིས་སྤྱི་མི་འདྲ་བར་བྱེད་མི་ནུས་པས། ལུགས་གསུམ་ཀ་ཡང་རྡོ་རྗེ་འཆང་ཆེན་པོའི་ལུགས་ཞེས་གཅིག་ཏུ་ཤེས་པར་བྱ་དགོས་པར་འགྱུར་རོ། །འོ་ན་རྡོ་རྗེ་འཆང་ཆེན་པོའི་ལུགས་སུ་གཅིག་པ་ལ་ལམ་གྱི་ནང་སེལ་མི་འདྲ་བ་གསུམ་འབྱུང་བའི་རྒྱུ་མཚན་ཅི་ཡིན་སྙམ་ན། གང་ཟག་གི་དབང་པོའི་ཁྱད་པར་གྱིས་ཡིན་ནོ་ཞེས་རིགས་པ་དབུ་ཞབས་རྣམ་པ་ཐམས་ཅད་དུ་མཚུངས་སོ་ཞེས་བྱ་བ་བྲིས་སོ།། །།འདི་ལ་ཕྱོགས་སྔ་མ་རྟོགས་པ་དང་། ཚིག་ཙམ་ལ་བརྟེན་པའི་སྐྱོན་གཉིས་ལས། དང་པོ་ནི། ཟླ་ཟེར་གྱི་རང་ལུགས་ལ། ལམ་སྲོལ་གསུམ་དུ་རྣམ་པ་ཐམས་ཅད་དུ་དམ་བཅས་པ་མེད་དེ། མཚོ་སྐྱེས་དང་ནག་པོ་དམ་ཚིག་རྡོ་རྗེ་དང་། བིརྺ་པའི་ལུགས་ཞེས་བགྲངས་པའི་ཚེ་ལམ་སྲོལ་གསུམ་དང་། ཕྱི་མ་ལ་མན་ངག་ལུགས་དང་། འགྲེལ་པ་ལུགས་གཉིས་སུ་ཕྱེ་བའི་ཚེ་ལམ་སྲོལ་བཞིར་འགྱུར་བར་ཟླ་ཟེར་ཉིད་ལས་བཤད་པའི་ཕྱིར་དང་། ལམ་སྲོལ་གསུམ་དུ་དམ་བཅས་པའི་སྒྲུབ་བྱེད་དུ། གཞུང་འོག་མ་རྣམས་མ་བཀོད་པའི་ཕྱིར་རོ། །གཉིས་པ་ནི་ཁྱེད་རང་གིས་སྨོས་པའི་ལམ་གསུམ་ཀ་ཡང་ངོ་བོ་གཅིག་ཏུ་འགྱུར་ཏེ། མཚོ་སྐྱེས་ཀྱི་ལུགས་ཀྱི་ལམ་འབའ་ཞིག་གིས་དཀྲི་བར་འོས་པའི་གང་ཟག་གཅིག་བིརྺ་པ་དང་། ནག་པོ་དམ་ཚིག་རྡོ་རྗེའི་ལུགས་ཀྱིས་དཀྲི་བའི་ཚེ། མཚོ་སྐྱེས་ལུགས་ཀྱིས་དཀྲི་དགོས་ལ་ཞེས་སོགས་བྲིས་པ་ནི་ཚིག་ཙམ་ལ་བརྟེན་པ་སྟེ། ཁྱེད་ལ་དེ་ལྟར་དཀྲིས་བའི་མཚན་གཞི་སྟོན་རྒྱུ་མེད་ལ། ངེད་ལ་ནི་ནག་པོ་པའི་ལམ་གྱིས་དཀྲི་བར་འོས་པའི་གང་ཟག་ཌོཾ་བྷི་པའི་ལམ་གྱིས་དཀྲི་བའི་ཚེ་ན། ནག་པོ་པས་དཀྲི་བ་ལྟར་བཤད་པའི་མཚན་གཞི་སྟོན་རྒྱུ་ཡོད་པའི་ཕྱིར་ཏེ། རྗེ་བཙུན་འབྲོག་མི་ལོཙྪ་བ་ལ་སློབ་དཔོན་དཔའ་བོའི་རྡོ་རྗེས་རྩ་བ་རྡོ་རྗེའི་ཚིག་རྐང་མེད་པའི་ལམ་འབྲས་ཀྱི་ཁྲིད་ཚང་མ་བསྟན་པར་གོང་མའི་གསུང་རབ་ལས་བཤད་པའི་ཕྱིར་རོ། །ལུགས་གཉིས་ཀ་བིརྺ་པའི་ལུགས་སུ་གཅིག་ཅེས་པ་ལ། མཚོ་སྐྱེས་སོགས་ཀྱི་བཀའ་སྲོལ་གསུམ་ཀ་ཡང་རྡོ་རྗེ་འཆང་གི་ལུགས་སུ་གཅིག་ཅེས་པ་མཚུངས་པ་བསྒྲེ་བ་ཡང་ཚིག་ཙམ་ལ་བརྟེན་པ་སྟེ། འདིར་འཕགས་ཡུལ་གྱི་འགྲེལ་བྱེད་ཀྱི་ལུགས་བགྲངས་པའི་སྐབས་ཡིན་ལ། བིརྺ་པ་ནི་འཕགས་ཡུལ་གྱི་འགྲེལ་བྱེད་ཡིན་ཞིང་། རྡོ་རྗེ་འཆང་ནི་དེ་མ་ཡིན་པའི་ཕྱིར་རོ། །ཡང་ཁྱེད་ཀྱིས་གཙོ་ཆེའི་ཆོས་སྣ་སུམ་ཅུ་དགུ་ལ། ཀྱཻ་རྡོར་རྒྱུད་གསུམ། ཌོཾ་བི་ལུགས་ཀྱི་གཞུང་བཅོ་བརྒྱད། མཚོ་སྐྱེས་ལུགས་ལ་ལྔ། ནག་པོ་ལུགས་ལ་བཅུ་གསུམ་ཞེས་བགྲངས་ནས། གོང་གི་སྐོར་གསུམ་དུ་མ་གཏོགས་པའི་མན་ངག་ལུགས་ཁྱད་པར་དུ་བསྟན་པའི་ཕྱིར་ལམ་སྐོར་དགུ་ནི་ཁྱད་པར་རོ། །ཞེས་གསུངས་པ་ཡིན་ནོ་ཞེས་བྲིས་པ་ཡང་མི་འཐད་དེ། བཀའ་སྲོལ་གསུམ་གྱི་རྒྱ་གཞུང་ལ། རྒྱུད་གསུམ་བགྲངས་པ་བཞད་གད་ཀྱི་གནས་ཡིན་པའི་ཕྱིར་དང་། ཌོཾ་བྷི་བའི་ལུགས་ལ་རིན་ཆེན་འབར་བ་གཅིག་ཏུ་བགྲངས་ན་གཞུང་བཅོ་ལྔ་ལས་མི་སྣང་བའི་ཕྱིར་དང་། མཚོ་སྐྱེས་ལུགས་ལ་གཞུང་བདུན་ཡོད་ཅིང་ཁྱེད་རང་གི་ཚད་མར་ཕྱེད་པའི་གནད་ཀྱི་ལྡེ་མིག་ལས་ཀྱང་བདུན་བགྲངས་པའི་ཕྱིར་དང་། བསྐྱེད་རྫོགས་ཀྱི་གཞུང་གཉིས་ལམ་སྐོར་གྱི་ཁོངས་སུ་གཏོགས་པས་མི་བགྲངས་ན། ཌོཾ་བི་ཝའི་ལྷན་ཅིག་སྐྱེས་གྲུབ་ཀྱང་མི་བགྲང་བར་མཚུངས་པའི་ཕྱིར་དང་། ནག་པོ་ལུགས་ལ་གཞུང་བཅུ་གཉིས་ལས་མེད་པའི་ཕྱིར་རོ། །གོང་གི་སྐོར་གསུམ་དུ་མ་གཏོགས་པའི་མན་ངག་ལུགས་ཁྱད་པར་དུ་བསྟན་པའི་ཕྱིར། ལམ་སྐོར་དགུ་ནི་ཁྱད་པར་རོ། །ཞེས་གསུང་བ་ཡིན་ནོ་ཞེས་པ་ཡང་མི་འཐད་དེ། ལམ་སྐོར་དགུ་ཆར་མན་ངག་ལུགས་མ་ཡིན་པའི་ཕྱིར་དང་། གཞུང་དེ་ནི་ཆོ་སྣ་སུམ་ཅུ་དགུའི་ནང་དུ་མ་གཏོགས་པའི་གོང་གི་སྐོར་གསུམ་པོ་དེའི་ཆོས་སྣ་འགའ་ཞིག་ཁྱད་པར་དུ་བྱ་བའི་ཕྱིར་སྨོས་པ་ཡིན་པའི་ཕྱིར་རོ། །དེས་ན་ལམ་རང་གི་ངོ་བོའི་སྒོ་ནས་ལམ་སྲོལ་གསུམ་དང་། བིརྺ་པའི་ལུགས་ལ་རྒྱས་བསྡུས་གཉིས་སུ་ཕྱེ་བའི་ཚེ་ན་གཞིར་འགྱུར་བ་ལ་འགལ་བ་མེད་པར་ཤེས་པར་བྱའོ།། །།སྐུ་རྡོ་རྗེའི་འཁོར་གྱི་སྐབས་སུ་ཟླ་ཟེར་ལས། གྲུབ་ཆེན་ཨ་ལ་ལ་བཛྲ་ལྟར་ན་གཽ་རཱི་ལ་སོགས་པའི་ལྷ་མོ་ཐམས་ཅད་ཀྱང་སྐུ་མདོག་ནག་མོ་གཡས་རང་རང་གི་ཕྱག་མཚན་དང་། གཡོན་ཁ་ཊྭཱཾ་ག་འཛིན་པར་བཞེད་དེ། དེས་མཛད་པའི་ཕྱག་གཉིས་པའི་སྒྲུབ་ཐབས་ལས། ཤར་གྱི་འདབ་མར་གཽ་རཱི་ནི། །མི་མགོ་པར་པུ་ལག་ན་འཛིན། །ལྷོར་ནི་ཙཽ་རཱི་ལྷ་མོ་ཡིན། །ལག་པར་ཉི་མ་ཐོགས་པར་གནས། །ནུབ་ཏུ་ལྷ་མོ་བཻ་ཏ་ལཱི། །ལག་པར་ཆུ་ཡི་པར་བུ་འཛིན། །བྱང་དུ་གྷསྨ་ཤེས་པར་བྱ། །སྨན་གྱི་བདུད་རྩི་འཛིན་པ་ཡིན། །དབང་ལྡན་མཚམས་སུ་པུཀྐ་སཱི། །ལག་པར་རྡོ་རྗེ་འཛིན་པར་གནས། །མེ་ཡི་མཚམས་སུ་ཤ་བ་རཱི། །རོ་ཡི་པར་བུ་ལག་ན་འཛིན། །ཙཎྜ་སྲིན་པོའི་མཚམས་སུ་གནས། །ཅང་ཏེའུ་སྒྲ་ནི་གྲག་པར་བྱེད། །རླུང་མཚམས་ཌོཾ་བི་ནཱི་ནི་གནས། །འཁྱུད་པ་དེ་ནི་རབ་ཏུ་དགའ། །ཐམས་ཅད་ཁ་དོག་ནག་པོ་ཡིན། །མེ་འོད་སེར་སྐྱ་གྱེན་དུ་འཁྱིལ། །རོ་དང་ལྡན་པ་སྤྱན་གསུམ་པོ། །ཕྱག་རྒྱ་ལྔ་ནི་ཡང་དག་ལྡན། །གར་བྱེད་པ་ནི་གནས་པ་ཡིན། །ཁ་ཊྭཱཾ་ག་ནི་གཡོན་ན་འཛིན། །ཕྱག་གཉིས་པ་ལ་ཞལ་གཅིག་ཡིན། །ཞེས་གསུངས་སོ། །འདི་ནི་རྒྱུད་ཀྱི་དོན་ལ་ཞུགས་པས་སློབ་དཔོན་གཞན་གྱི་འདོད་པ་ལས་ཁྱད་པར་དུ་འཕགས་ཏེ་ལེའུ་གསུམ་པ་ཉིད་ལས་ལྷ་མོ་བརྒྱད་ཀྱི་ཕྱག་མཚན་དེ་ལྟར་གསུངས་པའི་ཕྱིར་དང་འཁོར་སྤྲོ་བའི་སྐབས་སུ། རང་གི་ལུས་མཚུངས་རྣམ་པར་སྤྲོ། །ཞེས་སྤྲོ་བ་པོ་གཙོ་བོའི་ཁ་དོག་སྔོན་པོར་ཡོད་པ་བཞིན་འཁོར་རྣམས་ཀྱང་རང་དང་འདྲ་བར་གསུངས་པས་ཁ་དོག་ནག་པོར་འགྲུབ་བོ། །དེའི་རྗེས་འབྲང་སློབ་དཔོན་མི་ཐུབ་ཟླ་བ་དང་། རྗེ་བཙུན་ས་སྐྱ་པ་ཡབ་སྲས་རྣམས་ཀྱང་འདི་བཞིན་ཞལ་གྱིས་བཞེས་པར་མངོན་ནོ་ཞེས་གསུངས་པ་ལ། ཉི་ཟེར་མཁན་པོ་ན་རེ། རྗེ་བཙུན་གྱི་དགོངས་པ་དེ་ལྟར་མ་ཡིན་ཏེ། དག་ལྡན་ལས་སྐུ་རྡོ་རྗེ་ལ་ཡུམ་བདག་མེད་མ་དོན་ཐོབ་ཏུ་ཡོད་པའི་དབང་དུ་བྱས་ནས་གཙོ་འཁོར་རྣམས་ཕྱག་མཚན་ལས་བསྐྱེད་པའི་སྐབས་སུ། འདིས་མཚོན་ནས་ཨཾ་ལས་གྲི་གུག་ཨཾ་གིས་མཚན་པ་ལས་བདག་མེད་མ་བསྐྱེད་པ་ནས་བཟུང་སྟེ། ཌཾ་ལས་རྡོ་རྗེ་ཌཾ་གིས་མཚན་པ་ལས་གཡུང་མོ་བསྐྱེད་པའི་བར་དུ་ཡང་སྦྱར་རོ་ཞེས་གསུངས་པའི་ཕྱིར་ཞེས་ཟེར་རོ། །དེ་ནི་མི་འཐད་དེ། དག་ལྡན་ལས་ཧེ་རུ་ཀ་གསུམ་གྱི་བསྐྱེད་ཆོག་ལ་བསྡུས་འབྲིང་རྒྱས་གསུམ་གསུངས་པའི་བསྡུས་པ་ས་བོན་ལས་བསྐྱེད་པའི་སྐབས་སུ་འདི་ལས་མངོན་པར་རྟོགས་པ་དུ་མར་ཡང་སྤེལ་བར་བྱ་སྟེ། ཨཾ་ལས་བདག་མེད་མ་དང་། གཾ་ལས་གཽ་རཱི་ནས་ཌཾ་ལས་གཡུང་མོ་བསྐྱེད་པའི་བར་དུ་ཡང་འདིས་ཤེས་པར་ནུས་སོ་ཞེས་དང་། འབྲིང་ཆོ་ག་གསུམ་བསྐྱེད་ཀྱི་སྐབས་སུ་ཁྱེད་ཀྱིས་བགྲངས་པ་ལྟར་གསུངས་མོད་ཀྱི་དེ་དག་གིས་ནི་ཧེ་རུ་ཀ་གསུམ་གྱི་འཁོར་གྱི་བསྐྱེད་ཆོག་སྟོན་པ་མ་ཡིན་གྱི། ཕྱག་བཅུ་དྲུག་པའི་དཀྱིལ་འཁོར་དུ་རྡོ་རྗེ་སློབ་མའི་དབང་ཙམ་ཐོབ་པའི་གང་ཟག་གིས་མེ་ཏོག་གང་ཕོག་གི་ལྷའི་སྒོམ་བཟླས་བྱེད་ཚུལ་གྱི་མངོན་རྟོགས་བསྟན་པ་ཡིན་པའི་ཕྱིར། གཞན་དུ་ན་འདི་ལས་མངོན་པར་རྟོགས་པ་དུ་མར་ཡང་སྤེལ་བར་བྱ་སྟེ། ཞེས་པའི་ཚིག་ཀྱང་བཤད་དུ་མི་རུང་བར་ཡང་འགྱུར་ཏེ། དཀྱིལ་འཁོར་གཅིག་གི་འཁོར་གྱི་ལྷ་མོའི་བསྐྱེད་ཆོག་ལ་མངོན་རྟོགས་དུ་མའི་དོན་མི་གནས་པའི་ཕྱིར་རོ། །སྐུ་རྡོ་རྗེ་ལ་ཡུམ་བདག་མེད་མ་དོན་ཐོབ་ལ་ཡོད་དུ་ཆུག་ནའང་དེ་ཡབ་ལས་ལོགས་སུ་རྡོ་རྗེ་ཆོ་ག་གསུམ་བསྐྱེད་བྱེད་པ་རྒྱུད་དང་དག་ལྡན་གྱི་དགོངས་པ་མ་ཡིན་ཏེ། ཆོ་ག་གསུམ་བསྐྱེད་ཀྱི་སྐབས་སུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་སྐུ་རྡོ་རྗེ་དང་། ཧེ་རུ་ཀ་ཕྱི་མ་གཉིས་ཡུམ་དང་བཅས་པ་བསྐྱེད་པར་གསུངས་ཀྱི་ཕྱི་མ་གཉིས་ལ་ཡུམ་དངོས་སུ་ཡོད་ཀྱང་ཡབ་ལས་ལོགས་སུ་ཆོ་ག་གསུམ་བསྐྱེད་མ་གསུངས་པའི་ཕྱིར་རོ། །ཁྱེད་རང་གི་ཚད་མར་ཁས་བླངས་པའི་མངོན་པར་རྟོགས་པ་མན་ངག་གི་གཏེར་མཛོད་དང་ཡང་འགལ་ཏེ། དེར་རྩ་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་བསྡུས་འབྲིང་རྒྱས་པ་གསུམ་ཆར་ལ་ཡང་གུར་རྒྱན་ལྟར་རྒྱུ་འབྲས་ཀྱི་རྡོ་རྗེ་འཛིན་པ་དང་འཁོར་གྱི་ལྷ་མོ་མངལ་ནས་དབྱུང་བ་སོགས་བྱས་ལ་དེའི་ཚེ་འཁོར་གྱི་ལྷ་མོ་ལ་ཆོ་ག་གསུམ་བསྐྱེད་མི་སྣང་བའི་ཕྱིར་རོ། །མན་ངག་གི་གཏེར་མཛོད་ཀྱི་ལུགས་དེའང་མི་འཐད་དེ། རྩ་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་བསྡུས་པ་ནི་གདན་གྱི་སྟེང་དུ་གཙོ་རྐྱང་ས་བོན་ལས་བསྐྱེད་པ་དང་། འབྲིང་པོ་ནི་དེའི་སྟེང་དུ་ཐུན་མོང་བའི་སྲུང་འཁོར་དང་། རྡོ་རྗེ་ཆོ་ག་གསུམ་བསྐྱེད་གཉིས་བསྣན་པ་དང་། རྒྱས་པ་ནི་དེའི་སྟེང་དུ་དུར་ཁྲོད་བརྒྱད་བསྣན་ནས་གཙོ་བོ་མངོན་བྱང་ལས་བསྐྱེད་དེ་འཁོར་གྱི་ལྷ་མོ་ཐུགས་ཁ་ནས་སྤྲོ་བའི་ཁྱད་པར་མ་གཏོགས་པ་གསུམ་ཆར་ལ་ཡང་རྒྱུ་རྡོ་རྗེ་འཆང་དང་། ཞུ་བ་གླུས་བསྐུལ་ལ་སོགས་མེད་པར་དག་ལྡན་ལས་གསུངས་པའི་དོན་མ་དགོངས་པར་གུར་རྒྱན་ནས་གསུངས་པའི་བསྐྱེད་ཆོག་དེ་ཉིད་སྦྱར་འདུག་པའི་ཕྱིར། དེས་ན་དག་ལྡན་ནས་བཤད་པའི་བསྐྱེད་ཆོག་བསྡུས་འབྲིང་གཉིས་ཀྱི་སྐབས་སུ་འཁོར་གྱི་ལྷ་མོ་མེད་པའི་ཕྱིར་ན་གོང་གི་དག་ལྡན་གྱི་ལུང་གཉིས་པོ་དེས་འཁོར་གྱི་ལྷ་མོའི་བསྐྱེད་ཆོག་སྟོན་པར་འདོད་པ་ནི་རྗེ་བཙུན་གོང་མའི་དགོངས་པ་མ་རྟོགས་པར་སྣང་ངོ་། །འོ་ན་རྩ་རྒྱུད་ཀྱི་ཧེ་རུ་ཀ་གསུམ་ལ་རྒྱུ་རྡོ་རྗེ་འཆང་དང་། འཁོར་གྱི་ལྷ་མོ་མངལ་ནས་དབྱུང་བ་དང་། ཞུ་བ་གླུས་བསྐུལ་སོགས་དག་ལྡན་ལས་མ་གསུངས་ཤིང་གུར་གྱི་ཧེ་རུ་ཀ་གསུམ་ལ་དེ་ལྟར་གུར་རྒྱན་ལས་གསུངས་པའི་རྒྱུ་མཚན་ཅི་ཡིན་སྙམ་ན་རྩ་རྒྱུད་ཀྱི་ཧེ་རུ་ཀ་གསུམ་ལ་རྩ་རྒྱུད་ལེའུ་གསུམ་པ་རང་ནས་གསུངས་པའི་སྐྱེད་ཆོག་སྦྱར་བར་བཞེད་ཅིང་གུར་གྱི་ཧེ་རུ་ཀ་གསུམ་ལ་གུར་ལེའུ་བཞི་པ་དང་བཅུ་གཉིས་པ་ནས་གསུང་པའི་མངོན་རྟོགས་ཀྱི་ཆིངས་སྦྱར་དགོས་པས་དེའི་ཚེ་དེ་དག་ཡོད་པ་ནི་རྗེ་བཙུན་གོང་མའི་དགོངས་པ་བླ་ན་མེད་པའོ། །མཆོག་སྒྲུབ་པའི་དཀྱིལ་འཁོར་གྱི་གྲངས་ངེས་ཀྱི་སྐབས་སུ། ཟླ་ཟེར་ལས་སཾ་ཊར་གསུངས་པའི་དཀྱིལ་འཁོར་གྱི་སྐབས་སུ། ཧེ་རུ་ཀ་ལྔ་ལ་གཙོ་བོ་འཕོ་བའི་དབྱེ་བ་མཛད་པ་ལ། ཉི་ཟེར་མཁན་པོ་ན་རེ། དེ་ནི་མི་འཐད་དེ། ལྗོན་ཤིང་ལས། དེས་ན་མཆོག་སྒྲུབ་པའི་དཀྱིལ་འཁོར་བཅུ་གཉིས་སོ། །འོ་ན་གཙོ་བོར་དུ་མར་འཕོ་བས་དཀྱིལ་འཁོར་དེ་བས་མང་བར་མི་འགྱུར་རམ་ཞེ་ན། རིགས་ལྔ་ལས་ལྷག་པའི་གཙོ་བོ་གཞན་ནི་མི་བཞེད་དེ། ལྷ་གཞན་ནི་ལས་རྒྱས་པའི་ལྷ་ཞེས་བྱ་བར་འགྱུར་ཏེ་ཞེས་གསུངས་པ་དང་འགལ་ལོ་ཞེས་ཟེར་བར་གྲགས་ནའང་དེ་ནི་མི་འགལ་ཏེ་ལུང་དེའི་དོན་ནི། རིགས་ལྔ་མ་གཏོགས་ཡུམ་བཞི་སོགས་དཀྱིལ་འཁོར་གྱི་ལྷ་གཞན་གཙོ་བོ་འཕོ་བ་བྱས་ན་ལས་རྒྱས་པའི་ལྷར་འགྱུར་ཞེས་བསྟན་པ་ཡིན་གྱི་ཧེ་རུ་ཀ་ལྔ་ལ་རིགས་ལྔ་མེད་པར་སྟོན་པའི་གཞུང་མ་ཡིན་པའི་ཕྱིར། དེར་མ་ཟད་ཧེ་རུ་ཀ་བཞི། དྲག་པོའི་གདན་ཅན་དང་ལྔ་ལ་རིགས་ལྔར་འབྱེད་པ་དོན་གྱིས་ཐོབ་སྟེ། སཾ་ཊར། ལྷ་ཞེས་བྱ་བ་ཅི་ལྟར་ལགས་ཞེས་པའི་ལན་དུ། ཐམས་ཅད་བདག་ཉིད་ཅེས་པའི་འགྲེལ་བར། རྗེ་ས་ཆེན་གྱིས། དེ་བས་ན་ཐམས་ཅད་རྒྱལ་བ་ལྔ་ཡིན་ལ། བདག་ཉིད་ཀྱི་རྒྱལ་བ་ལྔ་པོ་ཐམས་ཅད་ཆོས་ཀྱི་དབྱིངས་ཀྱི་ངོ་བོར་གཅིག་པས་སོ་ཞེས་གསུངས་པའི་ཕྱིར། རིགས་པས་ཀྱང་གྲུབ་སྟེ། རྩ་རྒྱུད་ཀྱི་ཧེ་རུ་ཀ་བཞི་ལ། གུར་དང་ཐུན་མོང་དུ་ཧེ་རུ་ཀ་ལྔར་འབྱེད་ན། སཾ་ཊའི་ཧེ་རུ་ཀ་ལྔ་ལ་ཡང་རིགས་ལྔར་འབྱེད་རིགས་པའི་ཕྱིར་དང་། དེ་དག་ལས་རྒྱས་པའི་ལྷ་ཡིན་ན། གུར་གྱི་སྐབས་སུ་གསུངས་པ་ཡང་ལས་རྒྱས་པའི་ལྷར་འགྱུར་བ་དང་། སངས་རྒྱས་མགོན་པོ་ཞེས་སོགས་གུར་ལས་གསུངས་པ་དེས་ཧེ་རུ་ཀ་བཞི་ལ་རིགས་ལྔ་གཙོ་བོ་འཕོ་བར་འབྱེད་ནུས་ན། གང་གིས་གང་ཡང་ཞེས་སོགས་སཾ་ཊའི་ལུང་གིས་ཀྱང་ཧེ་རུ་ཀ་ལྔ་ལ་གཙོ་བོ་འཕོ་བར་འབྱེད་ནུས་པར་མཚུངས་པའི་ཕྱིར་རོ། །དེས་ན་ཟླ་ཟེར་ལས། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པས་རྒྱུད་གསུམ་ནས་གསུངས་པའི་ཀྱཻ་རྡོ་རྗེའི་དཀྱིལ་འཁོར་ལ་དགུ་བཅུ་གོ་གསུམ་ཡོད་ཅེས་དེ་ལྟར་གྲངས་ངེས་འདོད་པ་ཡང་བཀག་པ་ཡིན་ལ། ཁོ་བོའི་དཔལ་ལྡན་བླ་མ་དམ་པས། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པ། རྒྱུད་གསུམ་ནས་བཤད་པའི་ཀྱཻ་རྡོ་རྗེའི་དཀྱིལ་འཁོར་བརྒྱ་ཐམ་པ་དང་བཅུར་བཞེད་པ་ཡང་ལེགས་པར་གྲུབ་པ་ཡིན་ནོ་ཞེས་བྱ་བ་བྲིས་སོ། །དེ་དག་ནི་མི་འཐད་དེ། ལྗོན་ཤིང་གི་ལུང་དེ་ཁོ་བོའི་བླ་མ་ཐམས་ཅད་མཁྱེན་པས་ཟླ་ཟེར་ལས། སཾ་བུ་ཊི་རྡོ་རྗེ་དབྱིངས་ཀྱི་དཀྱིལ་འཁོར་ལ་རིགས་ལྔ་ལས་གཞན་ཡུམ་བཞི་མན་ཆད་གཙོ་བོ་འཕོ་བ་མེད་པའི་དོན་དུ་མཛད་ཅིང་ལྷ་གཞན་ནི་ལས་རྒྱས་པའི་ལྷ་ཞེས་བྱ་བར་འགྱུར་རོ་ཞེས་སོགས་ཀྱི་ལུང་དྲངས་པ་དེ་མ་མཐོང་བར། ཧེ་རུ་ཀ་ལྔ་ལ་གཙོ་བོ་གོ་འཕོ་བ་མེད་པའི་སྒྲུབ་བྱེད་དུ་བཀོད་པ་མེད་ཀྱང་དེ་མཐོང་འདུག་པས། མིག་གི་དབང་པོ་གཅིག་ལྷག་པའི་ཕྱིར་དང་། དེ་ལྟ་བུའི་སྒྲུབ་བྱེད་དུ་བཀོད་པ་སྐུ་ཚེ་རིལ་པོར་བསྟེན་པའི་སློབ་མ་མཆོག་དག་གིས་ཀྱང་མ་ཐོས་ཀྱང་། ཁྱེད་ལ་དེ་ཐོས་པའི་རྣ་བའི་དབང་པོ་གཅིག་ལྷག་འདུག་པའི་ཕྱིར་རོ། །སཾ་ཊའི་ཧེ་རུ་ཀ་ལྔ་ལ། རིགས་ལྔར་ཕྱེ་ནས་གཙོ་བོ་འཕོ་བ་དོན་གྱིས་ཐོབ་པའི་ཤེས་བྱེད་དུ། ལྷ་ཞེས་བྱ་བ་ཅི་ལྟར་ལགས་ཞེས་པ་རྩ་འགྲེལ་དྲངས་པ་ནི། སྒྲུབ་བྱེད་ཀྱིས་འཕགས་པ་སྟེ། ལུང་དེ་དག་གིས་ལྷ་རེ་རེ་ཡང་རིགས་ལྔའི་བདག་ཉིད་ཡིན་པ་ཙམ་ཞིག་རྟེན་གྱི། རིགས་ལྔར་ཕྱེ་ནས་གཙོ་བོ་འཕོ་བའི་དཀྱིལ་འཁོར་བྱེད་པར་བསྟན་པ་མི་སྣང་བའི་ཕྱིར་རོ། །གལ་ཏེ་རིགས་ལྔ་ཕྱེ་བ་ཙམ་གྱིས་རིགས་ལྔའི་གཙོ་བོ་འཕོ་བའི་དཀྱིལ་འཁོར་ཡོད་པར་འགྲུབ་ན། རྩ་རྒྱུད་ལས། རིགས་གཅིག་ལ་ནི་དེ་བཞིན་གཤེགས་པའི་ཚོགས། །རིགས་ཀྱི་ལྷ་ཚོགས་ལ་རིགས་ནི་དུ་མ་རྣམས། །དེ་རྣམས་ལ་ཡང་འབུམ་ཕྲག་རིགས་ཆེན་ཉིད། །བྱེ་བའི་རིགས་ལ་གྲངས་ནི་མེད་པར་འགྱུར། །ཞེས་གསུངས་པས་ཧེ་རུ་ཀ་རེ་རེ་ལ་ཡང་གཙོ་བོ་འཕོ་བའི་དཀྱིལ་འཁོར་འབུམ་ཕྲག་དང་བྱེ་བ་སོགས་བྱེད་རིགས་པར་འགྱུར་རོ། །དེ་ལྟར་དུ་ཁས་ལེན་ནོ་ཞེ་ན། ཁྱེད་རང་གིས་ཁོ་བོའི་དཔལ་ལྡན་བླ་མ་དམ་པས། ས་སྐྱ་པའི་བཞེད་པ་རྒྱུད་གསུམ་ནས་བཤད་པའི་ཀྱཻ་རྡོ་རྗེའི་དཀྱིལ་འཁོར་བརྒྱ་ཐམ་པ་དང་བཅུར་བཞེས་པ་ཡང་ལེགས་པར་གྲུབ་པ་ཡིན་ནོ་ཞེས་ཁས་བླངས་པ་དང་འགལ་ལོ། །རིགས་པའི་སྒྲུབ་བྱེད་ཡང་མི་འཐད་དེ་རྩ་རྒྱུད་ཀྱི་ཧེ་རུ་ཀ་བཞི་ལ་གུར་དང་ཐུན་མོང་དུ་རིགས་ལྔར་ཕྱེ་ནས་གཙོ་བོ་འཕོ་བ་བྱེད་པ་ནི་ཁྱེད་རང་གི་བློ་སྐྱོན་ཡིན་གྱི་རྩ་རྒྱུད་ཀྱི་ཧེ་རུ་ཀ་བཞི་ལ་རིགས་ལྔར་ཕྱེ་ནས་གཙོ་བོ་གོ་འཕོ་བར་བྱེད་པ་ནི། རྗེ་བཙུན་གོང་མའི་གསུང་རབ་གང་ལས་ཀྱང་མ་བཤད་ཅིང་། བདག་གི་རྗེ་བཙུན་ཐམས་ཅད་མཁྱེན་པས་ཀྱང་ཞལ་གྱིས་མ་བཞེས་པའི་ཕྱིར་རོ། །གུར་གྱི་ཧེ་རུ་ཀ་བཞི་ལ་རིགས་ལྔར་འབྱེད་ན། སཾ་ཊའི་ཧེ་རུ་ཀ་ལྔ་ལ་རིགས་ལྔར་འབྱེད་རིགས་སོ་ཞེས་པ་ནི། རྗེ་བཙུན་གོང་མ་དངོས་སུ་འགོག་པ་སྟེ་རྗེ་བཙུན་གོང་མས་གུར་གྱི་ཧེ་རུ་ཀ་བཞི་ལ་རིགས་ལྔར་དབྱེ་བ་མཛད་ཅིང་། སཾ་ཊའི་ཧེ་རུ་ཀ་རྣམས་ལ་དབྱེ་བ་མ་མཛད་པའི་ཕྱིར་རོ། །སངས་རྒྱས་མགོན་པོ་ཞེས་སོགས་གུར་ལས་གསུངས་པའི་ཧེ་རུ་ཀ་བཞི་ལ་རིགས་ལྔ་གཙོ་བོ་འཕོ་བར་འབྱེད་ནུས་ན། གང་གིས་གང་ཡང་ཞེས་སོགས་སཾ་ཊའི་ལུང་གིས་ཀྱང་ཧེ་རུ་ཀ་ལྔ་ལ་གཙོ་བོ་འཕོ་བར་འབྱེད་ནུས་པ་མཚུངས་སོ་ཞེས་པ་ནི་མ་བརྟགས་པ་ཆེན་པོ་སྟེ། གང་གིས་གང་ཡང་ཞེས་སོགས་ཀྱི་དོན་ནི། རྡོར་དབྱིངས་ཀྱི་དཀྱིལ་འཁོར་ལ་རིགས་ལྔ་གཙོ་བོ་གོ་འཕོ་བའི་དོན་ཡིན་ལ། ཁྱེད་ཧེ་རུ་ཀ་ལྔ་ནི་སྐུ་རྡོ་རྗེ་སོགས་བཞི་དང་། དྲག་པོའི་གདན་ཅན་ལ་འདོད་པའི་ཕྱིར་རོ། །གཞན་དུ་ན་གང་གིས་གང་ཡང་ཞེས་སོགས་སཾ་ཊའི་ལུང་དེས་ཧེ་རུ་ཀ་ལྔ་ལ་རིགས་ལྔ་ལྔར་ཕྱེ་བས་ཉི་ཤུ་རྩ་ལྔ། དེ་རེ་རེ་ལ་རིགས་བསྡུས་རྒྱས་བསྡུས་གཉིས་གཉིས། རིགས་རྐྱང་རྒྱས་བསྡུས་གཉིས་གཉིས་སུ་ཕྱེ་བས་དཀྱིལ་འཁོར་བརྒྱར་འབྱེད་ནུས་པར་ཐལ། སངས་རྒྱས་མགོན་པོ་ཞེས་སོགས་གུར་གྱི་ལུང་ལ་བརྟེན་ནས་གུར་གྱི་ཧེ་རུ་ཀ་བཞི་ལ་རིགས་ལྔ་ལྔར་ཕྱེ་བས་ཉི་ཤུ། དེ་རེ་རེ་ལ་ཡང་ལྔ་ལྔར་ཕྱེ་བས་དཀྱིལ་འཁོར་བརྒྱད་ཅུར་འབྱེད་ནུས་པའི་ཕྱིར། འདོད་ན། རྒྱུད་གསུམ་ནས་གསུངས་པའི་ཀྱཻ་རྡོ་རྗེའི་དཀྱིལ་འཁོར་ལ་ཁྱེད་རང་གི་ལུགས་ལ་ཡང་བརྒྱ་དང་བརྒྱད་ཅུ་གྱ་ལྔར་འགྱུར་ཏེ། ཇི་སྐད་བཤད་པ་བརྒྱ། རྡོར་དབྱིངས་ལ་གཙོ་བོ་གོ་འཕོ་བ་ལྔ། གུར་ནས་གསུངས་པ་བརྒྱད་ཅུར་འགྱུར་བའི་ཕྱིར་རོ། །ལེགས་པར་སོམས་ལ་སྨྲོས་ཤིག འོ་ན་རྩ་རྒྱུད་དང་སཾ་བུ་ཊའི་ཧེ་རུ་ཀ་བཞི་ལ་རིགས་ལྔར་ཕྱེ་ནས་གཙོ་བོ་གོ་འཕོ་བ་མི་མཛད་ཅིང་། གུར་གྱི་ཧེ་རུ་ཀ་བཞི་ལ་མཛད་པའི་རྒྱུ་མཚན་ཅི་ཡིན་སྙམ་ན་རྗེ་བཙུན་ས་སྐྱ་པ་ཡབ་སྲས་ཀྱི་དགོངས་པ་ནི་གུར་གྱི་སྙིང་པོ་ཀྱཻ་རྡོ་རྗེ་ཕྱག་བཅུ་དྲུག་པ་ལ་རིགས་ལྔར་ཕྱེ་ནས་སྐུ་མདོག་དང་། ཕྱག་མཚན་དང་། འཁོར་གྱི་ལྷ་མོ་མི་འདྲ་བའི་དཀྱིལ་འཁོར་ལྔ་རྒྱུད་ལས་དངོས་སུ་གསུངས་པའི་ཤུགས་ཀྱིས་ཧེ་རུ་ཀ་གཞན་གསུམ་ལ་ཡང་རིགས་ལྔ་ལྔར་ཕྱེ་ནས། དཀྱིལ་འཁོར་མི་འདྲ་བ་ལྔ་ལྔར་འབྱུང་བར་དོན་གྱིས་ཐོབ་ལ། རྩ་རྒྱུད་དང་སཾ་བུ་ཊའི་སྙིང་པོ་ཀྱཻ་རྡོ་རྗེ་ཕྱག་བཅུ་དྲུག་པ་ལ་ཕྱག་མཚན་སོགས་སོ་སོར་བཤད་པའི་རིགས་ལྔར་ཕྱེ་བ་མེད་པས། ཧེ་རུ་ཀ་གཞན་གསུམ་ལ་ཡང་དེ་ལྟ་བུ་འབྱེད་མི་ནུས་པར་བཞེད་པ་ཡིན་ནོ། །འདི་ལ་དགོངས་ནས་ལྗོན་ཤིང་དུ། རྒྱུད་གསུམ་ཆར་གྱི་མཆོག་སྒྲུབ་པའི་དཀྱིལ་འཁོར་གྱི་དབྱེ་བ་མཛད་པའི་ཚེ་ཡང་། གུར་གྱི་ཧེ་རུ་ཀ་བཞི་ལ་གཙོ་བོ་འཕོ་བའི་དབྱེ་བ་མཛད་ཅིང་གུར་རྒྱན་ལས་ཀྱང་གུར་གྱི་ཧེ་རུ་ཀ་བཞི་ལ་གཙོ་བོ་འཕོ་བའི་དབྱེ་བ་མཛད་ལ། སཾ་བུ་ཊའི་ཊཱི་ཀ་གནད་ཀྱི་གསལ་བྱེད་དུ། སཾ་བུ་ཊའི་ཧེ་རུ་བཞི་ལ་གཙོ་བོ་འཕོ་བའི་དབྱེ་བ་མ་མཛད་པ་ཡིན་ནོ། །མདོར་ན་སཾ་བུ་ཊའི་ཧེ་རུ་ཀ་ལྔ་ལ་གཙོ་བོ་འཕོ་བས་དཀྱིལ་འཁོར་ཉི་ཤུར་འགྱུར་བའི་རྗེ་བཙུན་གོང་མའི་གསུང་གཅིག་སྟོན་རྒྱུ་ཡོད་ན་ཁོ་བོ་ཅག་ཁྱེད་ཀྱི་རྗེས་སུ་འབྲང་ངོ་། །དེའི་ཕྱིར་བདག་གི་བླ་མ་རྗེ་ཐམས་ཅད་མཁྱེན་པས་རྒྱུད་གསུམ་ནས་གསུངས་པའི་ཀྱཻ་རྡོ་རྗེ་དང་བདག་མེད་མའི་དཀྱིལ་འཁོར་དགུ་བཅུ་གོ་གསུམ་དུ་གྲངས་ངེས་པར་བཞེད་པ་ཡང་ལེགས་པར་གྲུབ་པ་ཡིན་ནོ།། །།ཟླ་ཟེར་ལས་དེས་ན་རྒྱུད་འདིར་བཤད་པའི་ཧེ་རུ་ཀ་བཞི་བདག་མེད་མ་དང་ལྔ་པོ་ཙམ་ཞིག་ཀྱཻ་རྡོ་རྗེར་སྣང་ལ་ལྷག་མ་རྡོར་དབྱིངས་ནི། དེ་ནས་དཀྱིལ་འཁོར་ཆེན་པོ་མཆོག་ཅེས་གསུངས་པས། རྒྱུད་འདི་ནས་བཤད་པའི་དཀྱིལ་འཁོར་རྣམས་ཀྱི་གཙོ་བོ་རྒྱུད་གསུང་བ་པོ་སྟོན་པའི་དཀྱིལ་འཁོར་དུ་བཞེད་ལ་ཆོ་གའི་སྐབས་རྣམས་དེ་ཉིད་འདུས་པ་དང་། རྡོ་རྗེ་རྩེ་མོ་དང་། སྒྱུ་འཕྲུལ་དྲྭ་བ་དང་། རྡོ་རྗེ་མཁའ་འགྲོ་རྣམས་ཀྱི་བཤད་རྒྱུད་དུ་བཤད་ཀྱི་ཀྱཻ་རྡོ་རྗེའི་བཤད་རྒྱུད་དུ་ཡང་མ་བཤད་པས་ཀྱཻ་རྡོར་ཡིན་དོན་མེད་དོ། །གལ་ཏེ་འདིའི་དཀྱིལ་འཁོར་གྱི་གཙོ་བོ་དང་། ཧེ་རུ་ཀ་ཕྱག་བཅུ་དྲུག་པའི་རྒྱུ་རྡོ་རྗེ་འཛིན་པ་གཉིས་དོན་གཅིག་པར་རྗེ་བཙུན་གྱིས་བཤད་ཅིང་། ཕྱག་བཅུ་དྲུག་པ་ཀྱེ་རྡོར་དུ་ཁས་བླངས་པས་སོ་སྙམ་ན། འབྲས་བུ་རྡོར་འཛིན་ཀྱཻ་རྡོར་ཡིན་པས་དེའི་རྒྱུ་རྡོར་འཛིན་ཀྱཻ་རྡོར་ཡིན་མི་དགོས་ཏེ། དཔེར་ན་རྡོ་རྗེ་འཇིགས་བྱེད་ཀྱི་རྒྱུ་རྡོ་རྗེ་འཛིན་པ་འཇམ་དབྱངས་ཡིན་ཀྱང་། འཇམ་དབྱངས་འཇིགས་བྱེད་མ་ཡིན་པ་བཞིན་ནོ་ཞེས་གསུངས་པ་ལ། ཉི་ཟེར་བདག་པོ་ན་རེ། དེ་ནི་མི་འཐད་དེ། དེ་ལྟར་ན་ཀྱཻ་རྡོར་མཚོན་ཆ་ཅན་ཡང་ཀྱེ་རྡོར་མ་ཡིན་པར་འགྱུར་ཏེ། མཉམ་སྦྱོར་གྱི་བརྟག་པ་ལྔ་པའི་མི་གསལ་བ་གསལ་བར་བྱེད་པས་བཤད་རྒྱུད་དང་། བརྟག་གཉིས་ཕྱི་མའི་ལྔ་པར་ཚུལ་མི་འདྲ་བས་བཤད་རྒྱུད་དུ་བཤད་ཀྱི་ཀྱཻ་རྡོར་དུ་མ་བཤད་པའི་ཕྱིར་ཞེས་མཚུངས་སོ། །དེས་ན་རྡོར་དབྱིངས་ཀྱཻ་རྡོར་དུ་གྲུབ་སྟེ། རྗེ་བཙུན་གྱིས་བདག་མེད་མའི་སྐབས་ཀྱི་རྒྱུ་རྡོ་རྗེ་འཛིན་པ་མི་བགྲང་ངམ་སྙམ་ན་དེ་ནི་རྡོ་རྗེ་དབྱིངས་ཀྱི་ཁོངས་སུ་བསྡུ་བས་མི་བགྲང་ངོ་ཞེས་རྡོར་དབྱིངས་དང་རྒྱུ་རྡོ་རྗེ་འཛིན་པ་ཕྱག་བཅུ་དྲུག་པ་གཉིས་དོན་གཅིག་ཏུ་གསུངས་པའི་ཕྱིར་རོ། །གལ་ཏེ་དེ་གཉིས་རྡོ་རྗེ་སེམས་དཔའ་གསུངས་པས་ཀྱཻ་རྡོ་རྗེ་མ་ཡིན་ནོ་སྙམ་ན་མ་ངེས་ཏེ། རྩ་རྒྱུད་དང་། རྡོ་རྗེ་སྙིང་འགྲེལ་ལས་འབུམ་ཕྲག་ལྔ་པའི་ལུང་དྲངས་པ་ལས་ཀྱཻ་རྡོར་ཉིད་ལ་རྡོ་རྗེ་སེམས་དཔའ་གསུངས་པའི་ཕྱིར་རོ། །འབྲས་བུ་རྡོར་འཛིན་ཀྱཻ་རྡོར་ཡིན་པས་དེའི་རྒྱུ་རྡོར་འཛིན་ཀྱཻ་རྡོར་ཡིན་མི་དགོས་ཏེ་ཞེས་སོགས་ཀྱི་ཐལ་བ་ནི་ཁས་བླངས་མེད་པའི་ཐལ་བ་སྟེ། དེ་ལྟར་ན་ཨཾ་ཧཱུྃ་སྔོན་པོ་འབར་འཇིགས་པས། ཞེས་པའི་སྐབས་ཀྱི་ཧེ་རུ་ཀ་དེ་ཀྱཻ་རྡོ་རྗེ་ཡིན་པར་གང་གིས་བསྒྲུབ། ཀྱཻ་རྡོ་རྗེའི་འབྲས་བུ་རྡོ་རྗེ་འཛིན་པ་ཡིན་པས་སོ་སྙམ་ན་རྒྱུ་རྡོར་འཛིན་ཀྱཻ་རྡོར་ཡིན་པས་དེའི་འབྲས་བུ་རྡོར་འཛིན་ཡང་ཀྱཻ་རྡོར་ཡིན་མི་དགོས་ཏེ། དཔེར་ན་འཇམ་དབྱངས་ཀྱི་འབྲས་བུ་རྡོར་འཛིན་འཇིགས་བྱེད་ཡིན་ཡང་འཇིགས་བྱེད་འཇམ་དབྱངས་མ་ཡིན་པ་བཞིན་ནོ། །གཞན་ཡང་འཇམ་དབྱངས་འཇིགས་བྱེད་མ་ཡིན་པ་བཞིན་ཞེས་པའི་དཔེ་ཡང་མ་གྲུབ་སྟེ། རྗེ་ས་ཆེན་གྱིས། ཐམས་ཅད་མཁྱེན་པས་འཇིགས་བྱེད་ཞི་བའི་ཆ་ལུགས་ཅན་བསྟན་པའི་རྗེས་ལ་ཁྲོ་བོ་འཇིགས་བྱེད་རྟོགས་པ་བདུན་པ་ལས་ཚོགས་ཀྱི་ལེའུ་ཡོད་པ་ཞེས་གསུངས་པའི་ཕྱིར་རོ། །ཞེས་བྱ་བ་བྲིས་སོ། །དེ་ནི་མི་འཐད་དེ། ཀྱཻ་རྡོར་མཚོན་ཆ་ཅན་ཡང་ཀྱེ་རྡོར་མ་ཡིན་པར་འགྱུར་ཞེས་མཚུངས་པ་བསྒྲེ་བ་ནི་ངོ་མཚར་བར་སྣང་སྟེ། ཕྱོགས་སྔ་མས་ཀྱཻ་རྡོ་རྗེའི་བཤད་རྒྱུད་དུ་ཡང་མ་བཤད་པས་ཞེས་པའི་ལན་དུ་ཁྱོད་ཀྱིས་བརྟག་གཉིས་ཕྱི་མའི་ལྔ་པར་ཚུལ་མི་འདྲ་བས་བཤད་རྒྱུད་དུ་བཤད་ཅེས་སྨྲས་པས་ཁྱབ་པ་སྒྲིག་པའི་ཚེ་ཀྱཻ་རྡོར་དུ་བཤད་ན་ཀྱཻ་རྡོར་མ་ཡིན་པས་མ་ཁྱབ་ན། ཀྱཻ་རྡོར་དུ་མ་བཤད་ན་ཀྱཻ་རྡོར་མ་ཡིན་པས་ཁྱབ་པ་བུད་ཞེས་འབུད་དགོས་པར་སྣང་བའི་ཕྱིར་དང་། ཁྱོད་ཀྱི་ཆོ་ག་སྦས་ཀྱང་བརྟག་གཉིས་ཕྱི་མའི་ལྔ་པར་ཚུལ་མི་འདྲ་བར་བཤད་རྒྱུད་དུ་བཤད་ཀྱི་ཀྱཻ་རྡོར་གྱི་བཤད་རྒྱུད་དུ་ཡང་མ་བཤད་པས་ཞེས་པའི་ཚིག་སྦྱོར་དགོས་མི་དགོས་ལེགས་པར་སོམས་ཤིག རྡོར་དབྱིངས་ཀྱཻ་རྡོར་དུ་བསྒྲུབས་པའི་སྒྲུབ་བྱེད་བཀོད་པ་རྣམས་ནི་ཟླ་ཟེར་གྱི་ཕྱོགས་སྔ་དེ་ཉིད་སླར་ཡང་བསྐྱར་བ་ཙམ་དུ་སྣང་བས་ཟླ་ཟེར་ཉིད་ཀྱིས་བཀག་ཟིན་ཏོ། །རྡོ་རྗེ་སེམས་དཔའ་ཡིན་པས་ཀྱཻ་རྡོར་མ་ཡིན་པར་འདོད་ན་ཞེས་པའི་ཕྱོགས་སྔ་བརྗོད་ནས་ལན་བཏབ་པ་ནི་རང་གི་འདོད་པ་རང་གི་འཇོམས་པ་ཡིན་གྱིས་གཞན་སུ་ལ་ཡང་མི་གནོད་དེ། རྩ་རྒྱུད་ནས་གསུངས་པའི་རྡོ་རྗེ་སེམས་དཔའ་ཀྱཻ་རྡོར་ཡིན་པ་དང་། སཾ་ཊ་ནས་གསུངས་པའི་རྡོ་རྗེ་སེམས་དཔའ་ཀྱཻ་རྡོར་མ་ཡིན་པའི་ཁྱད་པར་སོ་སོར་ཕྱེ་ནས་སྨྲས་ཟིན་པའི་ཕྱིར་རོ། །འབྲས་བུ་རྡོར་འཛིན་ཀྱཻ་རྡོར་ཡིན་པས་ཞེས་སོགས་ཁས་བླངས་མེད་པའི་ཐལ་བར་འདོད་པ་ནི་རྡོ་རྗེ་དབྱིངས་དང་། རྒྱུ་རྡོ་རྗེ་འཛིན་པ་ཕྱག་བཅུ་དྲུག་པ་གཉིས་ཀྱཻ་རྡོར་ཡིན་པའི་སྒྲུབ་བྱེད་དྲིས་ན་དེ་མ་ཐག་ཏུ་གསལ་བར་འགྱུར་རོ། །ཨཾ་ཧཱུྃ་སྔོན་པོ་ཞེས་སོགས་ཀྱི་མཚུངས་པ་བསྒྲེ་བ་ནི་དོན་མེད་དེ། ངེད་ཀྱཻ་རྡོར་ཀྱཻ་རྡོར་དུ་སྒྲུབ་པ་ལ་ཀྱཻ་རྡོར་གྱི་འབྲས་བུ་ཡིན་པའི་ཕྱིར་ཞེས་མི་འགོད་པའི་ཕྱིར་རོ། །འཇིགས་བྱེད་ཞི་བའི་ཆ་ལུགས་ཅན་འཇམ་དབྱངས་ཡིན་པར་འདོད་པ་ནི་མ་བརྟགས་པ་སྟེ། རྒྱུད་གཅིག་པ་ཙམ་གྱིས་དེ་ཡིན་པར་འདོད་ན། ཁྲོ་བོ་འཇིགས་བྱེད་ཀྱང་འཇམ་དབྱངས་སུ་འགྱུར་རོ། །གལ་ཏེ་དེ་འཇམ་དབྱངས་མ་ཡིན་ཏེ། འཇིགས་བྱེད་ཡིན་པའི་ཕྱིར་ཞེ་ན། འཇིགས་བྱེད་ཞི་བའི་ཆ་ལུགས་ཅན་དེ་ཆོས་ཅན། དེར་ཐལ། དེའི་ཕྱིར། གཞན་ཡང་འཇམ་དབྱངས་དེ་འཇིགས་བྱེད་ཞི་བའི་ཆ་ལུགས་ཅན་ཡིན་ན། དགྲ་གདོང་འཇིགས་གསུམ་འཇམ་དབྱངས་ཁྲོ་བོའི་ཆ་ལུགས་ཅན་དུ་ཁས་བླངས་དགོས་ཤིང་དེའང་འདོད་ན། དགྲ་གདོང་གཉིས་པོ་ཆོས་ཅན། འཇིགས་བྱེད་དུ་ཐལ། འཇམ་དབྱངས་ཁྲོ་བོའི་ཆ་ལུགས་ཅན་ཡིན་པའི་ཕྱིར། མ་ཁྱབ་ན་འཇིགས་བྱེད་ཞི་བའི་ཆ་ལུགས་ཅན་ཡིན་ན། འཇམ་དབྱངས་ཡིན་པས་ཁྱབ་པ་བུད། དེས་ན་ས་ཆེན་གྱི་གསུང་དེས་འཇིགས་བྱེད་ཞི་བའི་ཆ་ལུགས་ཅན་འཇིགས་བྱེད་ཡིན་པ་ཙམ་ཞིག་གྲུབ་ལ། ཅི་འདྲ་ཞིག་ཡིན་ནི་ཁོ་བོ་ལ་རྒྱུས་མེད་དེ་ཁྱོད་དང་འདྲའོ། །འོ་ན་རྗེ་བཙུན་གྱིས་སཾ་བུ་ཊའི་བདག་མེད་མའི་སྐབས་ཀྱི་རྡོ་རྗེ་འཛིན་པ་རྒྱུ་རྡོ་རྗེ་དབྱིངས་ཀྱི་ཁོངས་སུ་བསྡུ་བས་མི་བགྲངས་པར་གསུངས་པའི་དོན་ཅི་ཡིན་ཞེ་ན། འདི་འདྲའི་རིགས་ཅན་ཁོ་བོས་བཤད་པར་བྱ་སྟེ། རྩ་རྒྱུད་ཀྱི་བདག་མེད་མའི་སྐབས་ཀྱི་རྒྱུ་རྡོ་རྗེ་འཛིན་པ་ནི་རྩ་རྒྱུད་དང་། བཤད་རྒྱུད་ཐུན་མོང་མ་ཡིན་པ་གསུང་བ་པོ་སྟོན་པ་ཉིད་ཀྱི་དཀྱིལ་འཁོར་ཡིན་པས་འདིས་གཙོ་བོ་བྱས་པའི་དཀྱིལ་འཁོར་ལོགས་སུ་བགྲང་དགོས་ལ། སཾ་ཊའི་བདག་མེད་མའི་སྐབས་ཀྱི་རྒྱུ་རྡོ་རྗེ་འཛིན་པས་གཙོ་བོ་བྱས་པའི་དཀྱིལ་འཁོར་ལོགས་སུ་བགྲང་མི་དགོས་ཏེ། སཾ་ཊའི་རྒྱུད་གསུང་བ་པོ་སྟོན་པ་ཉིད་ཀྱི་དཀྱིལ་འཁོར་ནི་རྡོ་རྗེ་དབྱིངས་ཀྱི་ཁོངས་སུ་འདུ་བས་སོ་ཞེས་པ་ནི་རྗེ་བཙུན་རིན་པོ་ཆེ་འཁྲུལ་པ་ཟད་པ་དེའི་དགོངས་པའོ། །འདིས་གནད་ཀྱི་ཟླ་ཟེར་ལས། རྩ་རྒྱུད་ཀྱི་རྒྱུ་རྡོ་རྗེ་འཛིན་པ་ཀྱཻ་རྡོར་ཡིན་པ་དང་། སཾ་ཊའི་རྒྱུ་རྡོ་རྗེ་འཛིན་པ་དང་། རྡོར་དབྱིངས་ཀྱཻ་རྡོར་མ་ཡིན་པའི་ཁྱད་པར་འབད་མེད་དུ་གྲུབ་སྟེ། རྩ་རྒྱུད་ཀྱི་རྒྱུད་གསུང་བ་པོ་སྟོན་པ་ཀྱཻ་རྡོར་ཡིན་པར་རྗེ་བཙུན་གྱིས་དག་ལྡན་ལས་རྒྱུ་འདྲ་བས་འབྲས་བུ་འདྲ་བ་བསྒྲུབ་པའི་རིགས་པས་བསྒྲུབ་ལ། སཾ་ཊ་ནི་སྤྱིར་རྒྱུད་སྡེ་འབུམ་ཕྲག་གསུམ་ཅུ་སོ་དྲུག་དང་། བོད་དུ་ཉེ་བར་མཁོ་བ་བླ་མེད་ཀྱི་རྒྱུད་སྡེ་བཅུ་དྲུག་དང་། གཙོ་བོར་བདེ་ཀྱཻ་གཉིས་ཀྱི་བཤད་རྒྱུད་དུ་འགྲོ་ཚུལ་ཆ་མཉམ་པར་གསུངས་པས་དེའི་རྒྱུད་གསུང་བ་པོ་ཀྱཻ་རྡོར་ཡིན་ན་བདེ་མཆོག་ཏུ་ཡང་ཁས་བླང་དགོས་ཤིང་། དཀྱིལ་འཁོར་གཞན་གྱི་གཙོ་བོར་ཡང་ཁས་བླང་དགོས་པར་འགྱུར་བས་སོ། །མདོར་ན་རྗེ་བཙུན་གོང་མས་རྩ་རྒྱུད་ཀྱི་རྒྱུ་རྡོ་རྗེ་འཛིན་པའི་དཀྱིལ་འཁོར་ལོགས་སུ་བགྲང་། གུར་ལས་དེ་འདྲའི་ཚུལ་མ་གསུངས། སཾ་ཊའི་རྒྱུ་རྡོ་རྗེ་འཛིན་པ་རྡོར་དབྱིངས་ཀྱི་ཁོངས་སུ་བསྡུ་བར་གསུངས་པའི་ཚུལ་ལ་ཇི་སྐད་བཤད་པ་ལྟར་གྱི་གནད་ངོས་ཟིན་ན་གཅིག་པུར་གནས་ཀྱང་གད་མོའི་ཅ་ཅོ་འཆོར་རོ།། །།ཟླ་ཟེར་ལས་དྲག་པོའི་གདན་ཅན་ལ་རྗེ་བཙུན་རྩེ་མོས། བརྟག་གཉིས་ཀྱི་དང་པོའི་གསུམ་པར་ཕྱག་གཉིས་པའི་སྒྲུབ་ཐབས་གསུངས་པ་ཡིན་ཡང་། དེ་ཉིད་འདིར་དྲག་པོའི་གདན་ཅན་དུ་གསུངས་པ་དང་ཞེས་པའི་དོན་ནི་བརྟག་གཉིས་སུ་བཤད་པའི་སྐུ་རྡོ་རྗེ་དང་། འདི་གཉིས་དྲག་པོའི་གདན་ཡོད་མེད་མ་གཏོགས་ལྷའི་སྐུའི་རྣམ་པ་ལ་ཁྱད་པར་མེད་པ་ཙམ་ལ་དགོངས་ནས་དེ་སྐད་གསུངས་ཀྱི་འདི་ཀྱཻ་རྡོར་བཞེད་པ་ནི་མ་ཡིན་ཏེ། གལ་ཏེ་ཡིན་ན་དེ་ཉིད་ལས། མཉམ་སྦྱོར་དུ་དཀྱིལ་འཁོར་དང་། ལྷའི་ས་བོན་སོགས་དང་དུར་ཁྲོད་བརྒྱད་མ་གསུངས་པ་འདིས་ཁ་བསྐང་བར་བཤད་པས། མཉམ་སྦྱོར་དུ་བཤད་པ་དང་འགལ་བར་འགྱུར་བའི་ཕྱིར། ལྷའི་ཞལ་ཕྱག་སོགས་འདྲ་བས་གཅིག་ཏུ་བཤད་དུ་མི་རུང་སྟེ། བདག་མེད་མ་ལྷ་མོ་བཅོ་ལྔའི་འཁོར་རྣམས་ཞལ་ཕྱག་སོགས་བདག་མེད་མ་དང་འདྲ་ཡང་དེ་རྣམས་བདག་མེད་མ་མ་ཡིན་པ་བཞིན་ནོ་ཞེས་གསུངས་པ་ལ། ཉི་ཟེར་སློབ་དཔོན་ན་རེ་དེ་ཡང་མ་ཡིན་ཏེ། གོང་གི་ཕྱག་བཅུ་དྲུག་པ་ལ་གོང་དུ་བཤད་པ་ལྟ་བུའི་རིགས་པས་ཀྱང་གནོད་པར་མཚུངས་པའི་ཕྱིར་དང་། རྗེ་ས་ཆེན་གྱིས་སཾ་བུ་ཊའི་དཀའ་འགྲེལ་དུ། རྩ་བའི་རྒྱུད་བརྟག་པ་གཉིས་པའི་ལེའུ་གསུམ་པར་ཕྱག་གཉིས་པ་ལྷ་དགུའི་སྒྲུབ་ཐབས་བཤད་པ་དེར་དྲག་པོའི་གདན་ཅན་གྱི་ཚུལ་དུ་སྒྲུབ་པ་དང་། ཡིག་འབྲུ་ཙམ་ལས་བསྐྱེད་པ་ནི་ཚུལ་མི་འདྲ་བའི་སྒོ་ནས་མ་ཚང་བ་ཁ་བསྐང་། དེར་དུར་ཁྲོད་དུ་ནི་མགོན་པོ་རོལ། །ཞེས་གསུངས་པའི་དོན་འདིར་གསལ་བར་བཤད་དོ་ཅེས་དང་། དེ་ཡང་ཕྱག་གཉིས་པ་ནི་མཚན་རྡོ་རྗེ་སེམས་དཔའ་ཞེས་བྱ་བ་ཡིན་ཡང་། དྲག་པོའི་གདན་ཅན་ལ་དགའ་བ་དང་ངོ་བོ་གཅིག་པའི་དབང་དུ་བྱས་ནས་གསལ་བར་བཤད་དོ་ཅེས་གསུངས་པའི་ཕྱིར་རོ། །གཞན་ཡང་བདག་མེད་མ་ཀྱཻ་རྡོ་རྗེ་ཡིན་ནོ་ཟེར་བ་ལ་རྒྱུ་མཚན་ཅི་ཞིག་ཡོད། ཀྱཻ་རྡོ་རྗེ་ཡུམ་ཡིན་པས་ཀྱཻ་རྡོ་རྗེར་བཤད་དུ་མི་རུང་སྟེ། རྡོ་རྗེ་ཕག་མོ་བདེ་མཆོག་གི་ཡུམ་ཡིན་ཡང་བདེ་མཆོག་མ་ཡིན་པ་བཞིན་ནོ་ཞེས་རིགས་པ་མཚུངས་སོ། །དེས་ན་བདག་མེད་མ་ཀྱཻ་རྡོ་རྗེར་ཁས་བླངས་ནས་སཾ་བུ་ཊའི་རྡོར་དབྱིངས་དང་། དྲག་པོའི་གདན་ཅན་གཉིས་ཀྱེ་རྡོ་རྗེ་མ་ཡིན་པར་ནན་གྱིས་བསྒྲུབ་པ་ནི་རྗེ་བཙུན་བྱམས་པས། གང་ཞིག་ཡོད་པ་མི་མཐོང་མེད་མཐོང་བ། །འདི་འདྲའི་མུན་ནག་རྣམ་པ་དེ་གང་ཞིག །ཅེས་གསུངས་པའི་ལུང་གིས་ཟིན་པར་སྣང་ངོ་ཞེས་བྲིས་སོ། །དེ་ནི་མི་འཐད་དེ། ཕྱག་བཅུ་དྲུག་པ་ལ་གོང་དུ་བརྗོད་པའི་སྐྱོན་རྣམས་ནི་སུན་ཕྱུང་ཟིན་ལ། ས་ཆེན་གྱིས་ལུང་དྲངས་པའི་དོན་ལ་གནད་བསྡུ་ན། ཁྱོད་ཀྱིས་དྲག་པོའི་གདན་ཅན་དེ་སྐུ་རྡོ་རྗེ་ཉིད་དུ་འདོད་པ་ཡིན་ནམ། སྐུ་རྡོ་རྗེ་ལས་གཞན་དུ་གྱུར་པའི་ཀྱཻ་རྡོར་དུ་འདོད་པ་ཡིན། དང་པོ་ལྟར་ན་ཧེ་རུ་ཀ་བཞི་ལས་ལོགས་སུ་གྱུར་པའི་མཆོག་སྒྲུབ་པའི་དཀྱིལ་འཁོར་ལྔར་བགྲངས་པ་དང་འགལ་ཞིང་། ཕྱི་མ་ལྟར་ན་དེ་ཀྱཻ་རྡོར་དུ་སྒྲུབ་པའི་ཆེད་དུ། རྗེ་ས་ཆེན་གྱིས་སྐུ་རྡོ་རྗེའི་བཤད་རྒྱུད་དུ་གསུངས་པའི་ལུང་དྲང་པ་དང་འབྲེལ་ཅི་ཡོད་ལེགས་པར་སོམས་ཤིག སྐུ་རྡོ་རྗེའི་བཤད་རྒྱུད་དུ་གསུངས་པས་སྐུ་རྡོ་རྗེ་ཡིན་དགོས་ན། མཉམ་སྦྱོར་གྱི་བཤད་རྒྱུད་དུ་གསུངས་པས་མཉམ་སྦྱོར་ཡིན་དགོས་པར་འགྱུར་རོ་ཞེས་ཟླ་ཟེར་ཉིད་ལས་གསུངས་པས་དེའི་སྐྱོན་ཡང་ཇི་ལྟར་སྤང་། དེས་ན་དྲག་པོའི་གདན་ཅན་མཆོག་སྒྲུབ་པའི་དཀྱིལ་འཁོར་ལོགས་སུ་བགྲངས་པའི་ཆེད་དུ་སྐུ་རྡོ་རྗེ་མ་ཡིན་པར་འདོད། ཀྱཻ་རྡོར་དུ་སྒྲུབ་པའི་ཆེད་དུ་སྐུ་རྡོ་རྗེ་ཡིན་པར་འདོད་པ་ཁྱོད་ནི་ཆོས་ཀྱི་གྲགས་པས། སྐྱེས་བུས་ལེགས་པར་མ་བྱས་པ། །རྣམ་པ་ཀུན་ཏུ་དོན་མེད་འགྱུར། །ལེགས་བྱས་ཁས་ལེན་ན་འདི་ནི། །དངོས་སུ་གླང་ཆེན་ཁྲུས་འདྲར་འགྱུར། །ཞེས་པའི་ལུང་གི་ཟིན་པར་སྣང་ངོ་། །བདག་མེད་མ་ཀྱཻ་རྡོར་ཡིན་པར་གང་དུ་ཁས་བླངས། དེ་ལྟར་ན་ཀྱཻ་རྡོ་རྗེའི་དཀྱིལ་འཁོར་དགུ་བཅུ་གོ་གསུམ་མོ་ཞེས་པས་སོ་ཞེ་ན། འོ་ན་ཁྱོད་ཀྱཻ་རྡོ་རྗེ་ལྷ་དགུའོ་ཞེས་བརྗོད་པའི་ཚེ་ལྷ་མོ་བརྒྱད་པོ་ཀྱཻ་རྡོར་ཡིན་པ་ལ་རྒྱུ་མཚན་ཅི་ཞིག་ཡོད། ཀྱཻ་རྡོར་གྱི་འཁོར་ཡིན་པས་ཀྱཻ་རྡོར་དུ་བཤད་དུ་མི་རུང་སྟེ། མཁའ་འགྲོ་མ་ལ་སོགས་པ་བདེ་མཆོག་གི་འཁོར་ཡིན་ཡང་བདེ་མཆོག་མ་ཡིན་པ་བཞིན་ནོ་ཞེས་བརྗོད་ན་ལན་ཅི་ཡོད། ཀྱཻ་རྡོ་རྗེ་འཁོར་དང་བཅས་པ་ལྷ་དགུ་ཞེས་པ་ལ་བར་གྱི་ཚིག་མི་མངོན་པར་བྱས་པ་ཡིན་གྱི་ལྷ་མོ་བརྒྱད་ཀྱཻ་རྡོར་དུ་ཁས་ལེན་པ་མ་ཡིན་ནོ་སྙམ་ན། འོ་ན་སྔ་མ་ལ་ཡང་ཀྱཻ་རྡོ་རྗེ་ཡུམ་དང་བཅས་པའི་དཀྱིལ་འཁོར་དགུ་བཅུ་གོ་གསུམ་ཞེས་པ་ལ་ཡང་བར་གྱི་ཚིག་མི་མངོན་པ་ཅིའི་ཕྱིར་མི་འབྱུང་། དེས་ན་བར་གྱི་ཚིག་མི་མངོན་པའི་ཐ་སྙད་ཙམ་ཡང་མ་མཐོང་ཞིང་། དྲག་པོའི་གདན་ཅན་ཀྱཻ་རྡོར་ཡིན་པར་ནན་གྱིས་སྒྲུབ་པ་ནི། སྔར་གྱི་རྗེ་བཙུན་བྱམས་པའི་ལུང་དེས་ཁྱོད་ཉིད་ཟིན་པར་སྣང་ངོ་།། །།གནད་ཀྱི་ཟླ་ཟེར་ལས་ལྷ་བཅུ་བདུན་མ་ཕྱག་བཅུ་དྲུག་པའི་སྐབས་སུ། འདི་ལ་ཁྱུང་པོ་རྣལ་འབྱོར་གྱིས་ཀྱཻ་རྡོར་མཚོན་ཆ་ཅན་ཟེར་མོད། རྒྱུད་འགྲེལ་རྣམས་ལས་དེའི་ཐ་སྙད་མེད་དོ་ཞེས་དང་། འོག་སྒྲུབ་བྱེད་མངོན་རྟོགས་ཀྱི་རྣམ་དབྱེའི་སྐབས་སུ་སློབ་དཔོན་ཀཾ་པ་ལས་མཛད་པའི་ཀྱཻ་རྡོར་མཚོན་ཆ་ཅན་གྱི་སྒྲུབ་ཐབས་ཞེས་གསུངས་པ་ལ། ཉི་ཟེར་མཁན་པོ་ན་རེ། སློབ་དཔོན་ཀཾ་པ་ལས་མཛད་པའི་ཀྱཻ་རྡོ་རྗེའི་སྒྲུབ་ཐབས་དེ་ཁོ་ན་ཉིད་བཞིའི་རིམ་པ་ལ། ཟླ་ཟེར་མཁན་པོས་ཀྱཻ་རྡོར་མཚོན་ཆ་ཅན་གྱི་སྒྲུབ་ཐབས་ཟེར་མོད། རྒྱུད་འགྲེལ་རྣམས་ལས་དེའི་ཐ་སྙད་མེད་དོ་ཞེས་སྨྲས་ན། མི་སྨྲ་བའི་བརྟུལ་ཤུགས་བཟུང་དགོས་པར་འགྱུར་རོ་ཞེས་བྲིས་སོ། །དེ་ནི་མི་འཐད་དེ། ཁྱུང་པོ་རྣལ་འབྱོར་གྱིས་མཚོན་ཆ་ཅན་ཞེས་རང་དགར་བཏགས་པ་ཡིན་གྱི། དེ་ཡན་ཆད་དུ་ཐ་སྙད་མེད་ལ། དེ་ནས་བཟུང་སྟེ་བོད་དུ་མཚོན་ཆ་ཅན་དུ་གྲགས་པས་ཟླ་ཟེར་ལས། ཡོངས་སུ་གྲགས་པ་གོ་སླ་བའི་དབང་དུ་བྱས་ནས་དེ་ལྟར་དུ་གསུངས་པ་ཡིན་པས་མཚུངས་པའི་གོ་སྐབས་མེད་པའི་ཕྱིར་རོ། །དེས་ན་འདི་འདྲའི་མཚུངས་པ་བསྒྲེ་བ་ནི། དཔལ་ལྡན་ས་སྐྱ་པཎྜི་ཏས། ཕྱོགས་དང་ཆོས་ཅན་མཚུངས་ཤེ་ན། །གྲགས་པའི་སྒོ་ནས་ཁྱད་པར་ཡོད། །ཅེས་གསུངས་པ་མ་མཐོང་བར་ཟད་དོ་ཅེས་སྨྲས་ན། མི་ཤེས་པའི་བརྟུལ་ཞུགས་བཟུང་དགོས་པར་འགྱུར་རོ།། །།གནད་ཀྱི་ཟླ་ཟེར་ལས་རྗེ་བཙུན་ཡབ་སྲས་ཀྱི་གཞུང་རྣམས་སུ་སྔོན་འགྲོ་འདི་རྣམས་བྱེད་པའི་གསལ་ཁ་མེད་ཅེས་གསུངས་པ་ལ། ཉི་ཟེར་དཔལ་ཆོས་ན་རེ། དེ་མི་འཐད་དེ། གོང་དུ་བཤད་པ་ལྟར་སེམས་བསྐྱེད་སྒྲུབ་ཐབས་གཉིས་སུ་གསུངས་པ་དང་། རྗེ་བཙུན་རྩེ་མོས་ཌོཾ་བི་ལུགས་ཀྱི་དབང་ཆུ། དེ་ནས་ལྷག་ཆད་ཁ་བསྐང་བའི་དོན་དུ་ཡི་གེ་བརྒྱ་པ་ཅི་ནུས་པར་བཟླས་ཏེ། འདི་ནི་སྔོན་དུ་བྱ་བའི་ཆོ་གའོ། །དེ་ནས་བདག་ཉིད་བསོད་ནམས་ཀྱི་ཚོགས་བསག་པ་ནས་བཟུང་སྟེ། ཞེས་དང་། མན་ངག་ལུགས་ཀྱི་དབང་ཆུར་དམ་ཚིག་ཉམས་ཆག་ཁ་བསྐང་བའི་ཕྱིར་ཡི་གེ་བརྒྱ་པ་ཅི་ནུས་བཟླས། བར་ཆད་ཉེ་བར་ཞི་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་ཞེས་དང་། རྗེ་བཙུན་གྱི་ཚོགས་གཞུང་དུ་དེའི་རྗེས་ལ་ཡི་གེ་བརྒྱ་པ་བརྗོད་པས་དམ་ཚིག་ཉམས་ཆག་སྦྱོང་། ཁྲོ་བཅུའི་སྲུང་འཁོར་བསྒོམ་པ་ཡང་ཕྱག་ལེན་ལ་མཛད་ཅེས་སོགས་ཀྱི་སྔོན་དུ་ཡི་གེ་བརྒྱ་པས་རྒྱུད་སྦྱང་བར་གསུངས་པ་རྣམས་དང་འགལ་བའི་ཕྱིར་རོ་ཞེས་བྱ་བ་བྲིས་སོ། །དེ་ནི་རང་ཚིགས་ལ་ཅོ་འདྲི་བ་སྟེ། ཁྱེད་རང་གི་དེའི་གོང་དུ་གནད་ཀྱི་ལྡེ་མིག་ལས། དེས་ན་སྐྱབས་འགྲོ་སེམས་བསྐྱེད་རྒྱུད་དང་། རྒྱ་གཞུང་ལས་དངོས་སུ་མི་གསལ་ཡང་བརྒྱུད་པའི་ཕྱག་སྲོལ་ལ་སྐབས་འདིར་མཛད་དོ། །འོ་ན་རང་བཟོར་མི་འགྱུར་རམ་སྙམ་ན་མི་འགྱུར་ཏེ། རྒྱུད་གསང་བ་སྤྱི་རྒྱུད་དང་། རྒྱ་གཞུང་རིན་ཆེན་འབར་བ་ལས། ཐོག་མར་གསུམ་ལ་སྐྱབས་སུ་འགྲོ། །དེ་ནས་རྫོགས་པའི་བྱང་ཆུབ་སེམས། །མ་བསྐྱེད་པ་རྣམས་བསྐྱེད་བྱ་ཞིང་། །ཞེས་པས། རྣལ་འབྱོར་ལ་འཇུག་པའི་ཐོག་མར་སྐྱབས་འགྲོ་སེམས་བསྐྱེད་བསྟན་ཞེས་སོགས་དང་། དེ་ནས་སྐབས་འདིར་ཡི་གེ་བརྒྱ་པས་རྒྱུད་སྦྱང་བ་རྒྱ་གཞུང་དང་བླ་མ་གོང་མའི་སྒྲུབ་ཐབས་ཀྱི་ཡིག་ཆ་རྣམས་ན་དངོས་སུ་མེད་ཀྱང་། དབང་བསྐུར་དང་ཚོགས་འཁོར་གྱི་ཡིག་ཆར་རྣལ་འབྱོར་ལ་འཇུག་པའི་སྔོན་དུ། ཡི་གེ་བརྒྱ་པས་བརྒྱུད་སྦྱང་བར་གསུངས་ཤིང་ཕྱག་ལེན་ལ་ཡང་མཛད་དོ། །ཨ་བྷི་དྷ་ན་ལས། ཐོག་མ་དབུས་དང་མཐར་ཐུག་པར། །ཡི་གེ་བརྒྱ་པའི་གསང་སྔགས་བཟླས། །ཞེས་གསུངས་པའི་དོན་འཆད་པ་ན། རྟོག་གེ་པ་འགའ་ཞིག་གིས་རྣམ་པར་རྟོག་པས་གོང་དུ་རྒྱུད་རྒྱ་གཞུང་ལས་དངོས་སུ་མི་གསལ་བར་དམ་བཅས་ནས་འོག་ཏུ་གསང་བ་སྤྱི་རྒྱུད། རིན་ཆེན་འབར་བ། ཨ་བྷི་དྷ་ནའི་རྒྱུད་རྒྱ་གཞུང་རྣམས་ནས་གསུངས་པར་བཤད་པས་ནང་འགལ་ལོ་སྙམ་དུ་རྟོག་པར་བྱེད་ན་ཡང་། དེ་ནི་ཞིབ་ཏུ་མ་བརྟགས་པའི་སྐྱོན་ཡིན་ཏེ། དེ་ནས་ཞེས་དང་། སྐབས་འདིར་ཞེས་པའི་དོན་ཁྲུས་ཀྱི་རྣལ་འབྱོར་ཡན་ཆད་གྲུབ་ནས་ཚོགས་ཞིང་མཆོད་པའི་གོང་འདིར་ཞེས་པ་ཡིན་ལ། རྒྱུད་རྒྱ་གཞུང་རྗེ་བཙུན་གོང་མ་རྣམས་ཀྱི་སྒྲུབ་ཐབས་ཀྱི་ཡིག་ཆ་ཞེས་པ་རྣམས་ཀྱང་། ཀྱཻ་རྡོ་རྗེ་སྒྲུབ་ཐབས་སྟོན་པའི་རྒྱུད་ལ་སོགས་པ་འབའ་ཞིག་སྐབས་ཐོབ་ཀྱིས་གཟུང་བར་བྱ་བ་ཡིན་གྱི། རྒྱུད་སྡེ་རབ་འབྱམས་དང་། རྒྱ་གཞུང་མཐའ་དག་དང་། རྗེ་བཙུན་གོང་མས་མཛད་པའི་སྒྲུབ་ཐབས་ཀྱི་ཡིག་ཆ་མ་ལུས་པ་ནས་དེ་དག་མ་བཤད་པར་ཞལ་གྱིས་བཞེས་པ་མ་ཡིན་ནོ། །མདོར་ན་སྐྱབས་འགྲོ་སེམས་བསྐྱེད་ཡིག་བརྒྱ་གསུམ་གནས་སྐབས་འདིར་བྱེད་པ་ཀྱཻ་རྡོར་སྐོར་གྱི་སྒྲུབ་ཐབས་སྟོན་པའི་རྒྱུད་དང་། རྒྱ་གཞུང་སོགས་ནས་དངོས་སུ་མ་བཤད་ཅེས་བྲིས་པ་དང་མཚུངས་པའི་ཕྱིར་རོ། །དེ་ཡང་འདི་ལྟར་རྟོག་གེ་པ་འགའ་ཞིག་གི་རྣམ་པར་རྟོག་པས། རྗེ་བཙུན་ཡབ་སྲས་ཀྱི་གཞུང་རྣམས་ལས་སྔོན་འགྲོ་འདི་རྣམས་བྱེད་པའི་གསལ་ཁ་མེད་ཅེས་ཁས་བླངས་པ་ལ་ཌོཾ་བི་ལུགས་ཀྱི་དབང་ཆུ་དང་། མན་ངག་ལུགས་ཀྱི་དབང་ཆུ་དང་། རྗེ་བཙུན་གྱི་ཚོགས་གཞུང་རྣམས་ལས་ཡི་གེ་བརྒྱ་པས་རྒྱུད་སྦྱང་བར་གསུངས་པ་དང་འགལ་ལོ་སྙམ་དུ་རྟོག་པར་བྱེད་ན་ཡང་། དེ་ནི་ཞིབ་ཏུ་མ་བརྟགས་པའི་བློ་སྐྱོན་ཡིན་ཏེ། རྗེ་བཙུན་ཡབ་སྲས་ཀྱི་ཞེས་སོགས་ཀྱི་དོན་ནི། རྗེ་ས་ཆེན་གྱི་མཚོ་སྐྱེས་ལུགས་ཀྱི་སྒྲུབ་ཐབས་དང་། རྗེ་བཙུན་སྐུ་མཆེད་ཀྱི་ཡན་ལག་བཞི་དྲུག་སྐབས་ཐོབ་ཀྱིས་གཟུང་བར་བྱ་བ་ཡིན་གྱི་རྗེ་བཙུན་གོང་མས་མཛད་པའི་དབང་ཆུ་དང་ཚོགས་འཁོར་སོགས་མཐའ་དག་ནས་དེ་དག་མ་བཤད་པར་ཞལ་གྱིས་བཞེས་པ་མ་ཡིན་ནོ་ཞེས་བརྗོད་ན་ཅིའི་ཕྱིར་མི་མཚུངས། དེས་ན་རང་གི་རྒྱུད་དང་རྒྱ་གཞུང་ལས་དངོས་སུ་མ་བཤད་ཀྱང་། རྒྱུད་གསང་བ་སྤྱི་རྒྱུད་དང་། རྒྱ་གཞུང་རིན་ཆེན་འབར་བ་ནས་བཤད་ཅེས་པ་ལ་སྐབས་ཐོབ་ཀྱི་བཤད་པ་བྱས་ནས་གཞན་ལ་སྐྱོན་དེ་ལྟར་དུ་གཟུང་བ་ཁྱོད་ནི་མེ་ལོང་གཅིག་ངེས་པར་འཆང་དགོས་པར་སྣང་སྟེ། གཞན་ལ་བལྟ་བའི་མིག་ཡོད་ཀྱང་། །རང་ལ་བལྟ་ན་མེ་ལོང་དགོས་ཞེས་སོ། །འདིར་རྒྱུད་དང་། རྒྱ་གཞུང་རྣམས་དང་། རྗེ་བཙུན་གོང་མའི་བསྒྲུབ་ཐབས་རྣམས་སུ་སྐབས་འདིར་ཡི་གེ་བརྒྱ་པས་རྒྱུད་སྦྱང་བ་མ་གསུང་ཤིང་། དབང་ཆུ་གཉིས་དང་ཚོགས་འཁོར་གྱི་གཞུང་དུ་སྐབས་འདིར་བྱ་བར་གསུངས་པའི་དོན་ནི་འདི་ལྟར་མངོན་ཏེ། ཉིན་ཞག་ཕྲུགས་གཅིག་གི་ཐུན་དང་པོར་བྱ་བ་དང་། ཐུན་ཕྱི་མ་རྣམས་སུ་བྱ་བ་གཉིས་ལས། དང་པོ་ནི་ཐོ་རངས་ཀྱི་ཐུན་ཏེ། ཉལ་བའི་རྣལ་འབྱོར་དང་ལྡང་བའི་རྣལ་འབྱོར་གཉིས་ནི་སྲོད་ཐུན་གྱི་མཇུག་ཡིན་པར་གསུང་ལ། དེ་ནས་ཁྲུས་ཀྱི་རྣལ་འབྱོར་དང་མཆོད་གཏོར་གྱི་རྣལ་འབྱོར་མ་གཏོགས་པ་གཞན་ཐུན་མཚམས་ཀྱི་བྱ་བ་མེད་པར་དེ་མ་ཐག་ཏུ་ཐོ་རངས་ཀྱི་ཐུན་ལ་འཇུག་པས་དེའི་ཚེ་ཡི་གེ་བརྒྱ་པས་རྒྱུད་སྦྱང་བ་མི་དགོས་ཏེ། ཐུན་མཚམས་དེར་ནི་ཉེས་ལྟུང་འབྱུང་བའི་གོ་སྐབས་མེད་ཅིང་། ཐུན་མཚམས་སྔ་མ་རྣམས་སུ་བྱུང་བ་ནི་སྲོད་ཐུན་གྱི་ཐོག་མར་ཡི་གེ་བརྒྱ་པས་རྒྱུད་སྦྱངས་ཟིན་པའི་ཕྱིར་རོ། །འདི་ལ་དགོངས་ནས་རྩ་རྒྱུད་ལེའུ་གསུམ་པར། དང་པོར་བྱམས་པ་བསྒོམ་པར་བྱ། །ཞེས་སོགས་ཀྱིས་ཚད་མེད་བཞི་ནས་འཇུག་པ་དང་། ནམ་མཁར་རྗེ་བཙུན་ཞེས་སོགས་དང་། གུར་ལེའུ་བདུན་པར་བླ་མ་རྡོ་རྗེ་རྣམ་མཆོད་ཅིང་། བདུན་པོ་ཡོངས་སུ་དག་པར་བྱ། །ཞེས་སོགས་དང་། སཾ་བུ་ཊའི་བརྟག་པ་གསུམ་པའི་བཞི་པར། དེ་ལ་དང་པོར་ལྷ་ཉིད་ཀྱི། །ཁྱིམ་དུ་སྔགས་པ་ཞུགས་ནས་ནི། །ཨ་ལས་ཟླ་བའི་དཀྱིལ་འཁོར་ནི། །བསམ་ནས་དེ་སྟེང་རྡོ་རྗེ་ནི། །དཀར་པོ་རྩེ་མོ་ལྔ་པ་ཉིད། །ཆོ་གས་བསམས་པར་བྱས་ནས་ནི། །དེ་བཞིན་གཤེགས་པ་ཀུན་སོགས་ལ། །མཆོད་ནས་ཕྱག་འཚལ་འདི་སྐད་གསོལ། །ཞེས་ཚོགས་ཞིང་མཆོད་པ་ནས་འཇུག་པ་དང་། རྡོ་རྗེ་སྙིང་འགྲེལ་ལས་རྩ་རྒྱུད་རྒྱས་པའི་ལུང་དྲངས་པར། ཐོ་རངས་དུས་སུ་སྔགས་པ་ཡིས། །བཤང་གཅི་དག་ནི་དོར་བ་དང་། །གཙང་སྦྲ་ལ་སོགས་བྱས་རྗེས་སུ། །འཇམ་པའི་སྟན་ལ་དེ་འདུག་ནས། །རྫས་བཅུའི་རང་བཞིན་རིལ་བུ་ནི། །བྱས་ནས་རང་གི་ཁ་རུ་གཞུག །བདུད་རྩི་ལྔ་བྱས་བ་བྱུང་གིས། །མདུན་དུ་མཎྜལ་བྱས་ནས་ནི། །དྲི་དང་མེ་ཏོག་ལ་སོགས་པ། །གཽ་རཱི་སོགས་ལ་རིམ་བཞིན་དབུལ། །ཞེས་དང་། ནག་པོ་པས་ཐོ་རངས་ཀྱི་དུས་སུ་མལ་ནས་ལངས་ལ་སྙིང་ཁར་རཾ་ལས་བྱུང་བའི་ཉི་མའི་དཀྱིལ་འཁོར་བལྟས་ལ། དེའི་འོད་ཀྱིས་བདག་ཉིད་དྲི་མ་མེད་པར་བྱས་ནས་ཞེས་དང་། མཚོ་སྐྱེས་རྡོ་རྗེ་ཡིད་དུ་འོང་བའི་གནས་སུ་འདུག་ནས་མཆོད་པ་དང་གཏོར་མ་ལ་སོགས་པ་བྱས་ཏེ། རང་གི་སྙིང་ཁར་རཾ་ལས་བྱུང་བའི་ཉི་མ་ལ་ཧཱུྃ་ཡིག་སྔོན་པོར་བལྟས་ཏེ། ཞེས་སོགས་དང་། བདུད་རྩི་འོད་ལས། ནམ་མཁར་རྗེ་བཙུན་བླ་མ་དང་། །ཞེས་དང་། ཨ་ལ་ལ་བཛྲ་གྱིས། བདེ་བའི་སྟན་ལ་འདུག་ནས། དེ་ནས་རང་གི་སྙིང་ཁར་པདྨ་འདབ་མ་བརྒྱད་པ་གཅིག་བསམས། དེའི་དབུས་སུ་ཉི་མའི་དཀྱིལ་འཁོར། དེའི་དབུས་སུ་ཧཱུྃ་ཡིག་གཅིག་བསམས་ཞེས་དང་། གརྦྷ་རི་པས། གཏོར་མའང་འབྱོར་པས་ཚད་བྱས་ལ། །དད་པས་ངེས་པར་བསྒོམ་བྱས་ཏེ། །སྙིང་ཁར་པཾ་རཾ་པད་ཉིའི་སྟེང་། །ཞེས་སོགས་དང་། མི་ཐུབ་ཟླ་བས་ཡན་ལག་དྲུག་པར། འཇིགས་པ་མེད་པར་བསམ་གཏན་བྱ། །སྙིང་ཁར་ཆུ་སྐྱེས་ཉི་མའི་སྟེང་། །གཟུགས་ཅན་ཧཱུྃ་ལས་ཁྱད་པར་བསྒོམ། །ཞེས་སོགས་དང་། བདག་མེད་མའི་སྒྲུབ་ཐབས་སུ། རྡོ་རྗེ་སྐྱིལ་ཀྲུང་བཅས་བྱས་ལ། །སྙིང་ཁར་པཾ་ལས་པདྨ་སྟེ། །ཞེས་སོགས་དང་། གུར་རིགས་བསྡུས་ཀྱི་སྒྲུབ་ཐབས་སུ། །གང་ཡང་རུང་བར་འཇམ་པའི་སྟན་གནས་ཏེ། །བློ་ཡིས་བསམ་བྱ་བསམ་པར་བྱ་བ་ནི། །ཧཱུྃ་ཞེས་སོགས་དང་། རིན་ཆེན་འབར་བ་ལས། བདེ་བའི་སྟན་ལ་དེར་གནས་པ། །པཾ་པད་རཾ་སྐྱེས་གཞོམ་མེད་ལས། །ལྕགས་ཀྱུ་ལྟ་བུའི་འོད་ཟེར་གྱིས། །རྒྱལ་བ་སྤྱན་དྲངས་མཁའ་ལ་བཞུགས། །ཞེས་སོགས་དང་། རྗེ་ས་སྐྱ་པ་ཆེན་པོས། མཚོ་སྐྱེས་ལུགས་ཀྱི་མངོན་རྟོགས་སུ་ཡང་རེ་ཕའི་འོད་ལྕགས་ཀྱུ་ལྟ་བུའི་ཁ་དོག་ལྔས། ཧེ་བཛྲ་མདུན་གྱི་ནམ་མཁར་སྤྱན་དྲངས་ཞེས་དང་། རྗེ་བཙུན་རྩེ་མོས་མངོན་རྟོགས་རྒྱས་པར། དང་པོ་ནི། དཔལ་ཀྱཻ་རྡོ་རྗེ་གསལ་བཏབ་པའི་ཐུགས་ཁར། རཾ་ལས་ཉི་མའི་དཀྱིལ་འཁོར་བསམས་ཏེ། ཆོས་ཐམས་ཅད་རང་གི་སེམས་ཡིན་ཞེས་བསམ། དེའི་སྟེང་དུ་ཧཱུྃ་སྔོན་པོ་གཅིག་བསམས་ཏེ། ཧཱུྃ་དེ་ཡང་གཟུང་འཛིན་གཉིས་དང་བྲལ་བའི་ཡིད་ཙམ་དུ་མོས་པར་བྱ། དེ་ལ་དབུགས་ཕྱིར་རྒྱུ་བའི་དུས་སུ། ལམ་སྣ་བུག་གཡས་ནས་འོད་ཟེར་ཁ་དོག་རྣམ་པ་ལྔ་ལྕགས་ཀྱུའི་ཚུལ་དུ་སྤྲོས་པས། མདུན་གྱི་ནམ་མཁར་རྗེ་བཙུན་ལྷ་དགུའི་དཀྱིལ་འཁོར་སྤྱན་དྲངས་ནས་ཞེས་གསུངས་པ་རྣམས་ཀྱིས་ཚོགས་ཞིང་མཆོད་པ་ནས་དབུ་བརྩམས། རྗེ་བཙུན་ཆེན་པོས་མངོན་རྟོགས་འབྲིང་པོར། བཅོམ་ལྡན་འདས་ཀྱཻ་རྡོ་རྗེའི་གོ་འཕང་ཐོབ་པར་བྱ་སྙམ་དུ་བསམས་ལ། དེ་ནས་རང་གི་སྙིང་ཁར་པཾ་ལས་པདྨ་དམར་པོ་འདབ་མ་བརྒྱད་པ་ཞེས་སོགས་དང་། བདག་མེད་མའི་སྒྲུབ་ཐབས་སུ། སེམས་ཅན་ཐམས་ཅད་ཀྱི་དོན་དུ་རྡོ་རྗེ་བདག་མེད་མ་བསྒོམ་པར་བྱའོ་ཞེས་བྱང་ཆུབ་ཀྱི་སེམས་བརྟན་པར་བྱས་ལ། དེ་ནས་བསམ་གཏན་ལ་འཇུག་པར་བྱ་སྟེ། རང་གི་སྙིང་ཁར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཡི་གེ་ཨཾ་སྔོན་པོ་དམིགས་ཏེ་ཞེས་པ་རྣམས་ཀྱིས་ཐོག་མར་སེམས་བསྐྱེད་པ་དང་། ཚོགས་ཞིང་མཆོད་པ་ནས་འཇུག་པར་གསུངས་ལ་རྒྱ་གཞུང་གཞན་རྣམས་ལས་ཀྱང་དེ་ལྟར་རོ། །གཉིས་པ་ནི། ཨ་བྷི་དྷ་ན་ལས། ཐོག་མ་དབུས་དང་མཐར་ཐུག་པར། །ཡི་གེ་བརྒྱ་པའི་གསང་སྔགས་བཟླས། །ཞེས་དང་། སློབ་དཔོན་འཇམ་དཔལ་གྲགས་པས། ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབ་འགྱུར་ཞིང་། །འཕེལ་བ་རུ་ནི་མི་འགྱུར་རོ། །ཞེས་གསུངས་པ་ལྟར་ཐུན་ལ་འཇུག་པའི་ཐོག་མར་ཡི་གེ་བརྒྱ་པས་རྒྱུད་སྦྱང་བ་ངེས་པར་དགོས་ཏེ། སྔགས་ཀྱི་སྡོམ་ལྡན་ལ་སྡོམ་པ་གསུམ་གྱི་ཉེས་ལྟུང་བྱུང་བ་ཐམས་ཅད་སྔགས་སྡོམ་ལ་ལྟོས་པའི་ལྟུང་བ་ཡིན་པར་རྩ་ལྟུང་འཁྲུལ་སྤོང་གིས་འགྲུབ་ཅིང་། ལས་དང་པོ་པ་ལ་སྡོམ་གསུམ་གང་རུང་གི་ལྟུང་བ་ནི་རང་གི་ངང་གིས་འབྱུང་བས། ཐུན་ལ་འཇུག་པའི་ཚེ་རྒྱུད་ལྟུང་མེད་དུ་བྱས་ནས་ཉམས་སུ་ལེན་དགོས་པས་སོ། །འདི་ལ་དགོངས་ནས་དབང་ཆུ་གཉིས་དང་། ཚོགས་གཞུང་དུ་ཡི་གེ་བརྒྱ་པས་རྒྱུད་སྦྱང་བར་གསུངས་ཏེ། འདི་དག་ཐུན་ཕྱི་མ་ལ་ཡིན་པར་ནི་དབང་ཆུར་ཕྱི་མ་རེད་དམ་སྲོད་ཀྱི་དུས་སུ་ཞེས་དང་། ཚོགས་འཁོར་ཡང་མཚན་མོ་ཕྱེད་པའི་དབང་དུ་བྱས་པ་ལས་ཤེས་སོ། །ཉལ་བའི་རྣལ་འབྱོར་སོགས་ཚུལ་བཞིན་མ་བྱུང་ན། ཐོ་རངས་ཀྱི་ཐུན་ལ་ཡང་དགོས་པ་ནི་སྔར་གྱི་དགོས་པས་འགྲུབ་བོ།། །།གནད་ཀྱི་ཟླ་ཟེར་ལས། དེས་ན་རྗེ་བཙུན་གྱིས་བདག་གི་སྤྱི་བོར་པདྨ་དང་ཟླ་བའི་སྟེང་དུ་རྡོ་རྗེ་སེམས་དཔའ་དཔལ་ཧེ་རུ་ཀ་ཞེས་བྱ་བ་སྐུ་མདོག་དཀར་པོ། རྒྱན་ཆ་དྲུག་གིས་བརྒྱན་པ་གཡས་རྡོ་རྗེ་གཡོན་དྲིལ་བུ། ཡུམ་རྡོ་རྗེ་སྙེམས་མ་སྐུ་མདོག་དང་། རྒྱན་ཡབ་དང་འདྲ་བ། གྲི་གུག་དང་ཐོད་པ་འཛིན་པས་འཁྱུད་པ་རྡོ་རྗེ་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་གིས་བཞུགས་པར་བསྒོམ་ཞེས་གསུངས་པ་ལྟར་བྱའོ། །དེ་ལ་བླ་མ་ཁ་ཅིག་གིས་ཆོ་ག་གསུམ་ལས་བསྐྱེད་པར་བཤད་པ་ནི། རྗེ་བཙུན་གྱི་གསུང་དང་མི་མཐུན་པས་འདིར་སྐད་ཅིག་གིས་བསྐྱེད་པ་ཡིན་ལ། ལྷའི་རྣམ་པ་ནི་ནག་པོ་དམ་ཚིག་རྡོ་རྗེས་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ་སྐུ་མདོག་སྟོན་ཀའི་ཟླ་བ་ལྟར་དཀར་ཞིང་ཕྱག་ན་རྡོ་རྗེ་དང་དྲིལ་བུ་བསྣམས་པ་རལ་པའི་ཐོར་ཚུགས་ཅན་ཞི་ཞིང་སྒེག་པའི་ཉམས་དང་ལྡན་པ། རང་གི་བཙུན་མོས་མགུལ་པ་ནས་འཁྱུད་པ། སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་གདན་ལ་སེམས་དཔའི་སྐྱིལ་ཀྲུང་གིས་བཞུགས་པར་བསྒོམ་ཞེས་བཤད་པ་དང་མཐུན། རྒྱན་ལ་རྗེ་བཙུན་གྱིས་འདིར་རུས་རྒྱན་དང་། ལམ་འབྲས་ཀྱི་གཞུང་ཤིང་དུ་རིན་པོ་ཆེའི་རྒྱན་དུ་བཤད་པ་ནི་གཉིས་པོ་གང་བྱས་ཀྱང་ཆོག་པའི་དོན་ཡིན་གྱི་གཉིས་ཆར་གྱིས་བརྒྱན་པར་འདོད་པ་ནི་དོན་མ་གོ་བར་ཟད་དོ། །དེས་ན་བླ་ཆེན་འཕགས་པས་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་པ་གཞུག་པ་རྣམས་བྱ་ཞིང་དབང་བསྐུར་བར་མ་བཤད་པ་ལ་ཁ་ཅིག་རྡོ་རྗེ་འཆང་ངམ་མི་བསྐྱོད་པས་རྒྱས་བཏབ་ནས་ཡན་ལག་བཞི་ཚང་བར་འདོད་ཅེས་དང་། དེ་ལ་སྤྱིར་ཡན་ལག་བཞི་དངོས་སུ་ཡོད་པར་འདོད་པ་ནི་མི་འཐད་དེ། རྗེ་བཙུན་གྱི་གསུང་རབ་གཉིས་ལས་མ་བཤད་པའི་ཕྱིར་རོ། །འོ་ན་ལྗོན་ཤིང་ལས་སློབ་དཔོན་བིརྺ་པའི་བཞེད་པས། བསྙེན་སྒྲུབ་ཡན་ལག་བཞི་མ་ཚང་བའི་མངོན་པར་རྟོགས་པ་མཆོག་ཐུན་མོང་གང་ལ་ཡང་མི་བཞེད་དོ་ཅེས་པ་དང་འགལ་ལོ་སྙམ་ན་མི་འགལ་ཏེ་ཡན་ལག་བཞི་ལ་རྒྱས་བསྡུས་གསུམ་ཡོད་པ་ལས་རྒྱས་པ་ནི་ཇི་སྐད་བཤད་པ་བཞིན་ཡིན་ལ། བསྡུས་པ་གཉིས་ནི་ལྗོན་ཤིང་ལས། བསྡུས་པ་ནི་སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་དང་། དབང་མི་བསྐུར་བར་དབུ་རྒྱན་རང་ཆས་སུ་བསྒོམ་པའི་ཡན་ལག་བཞིའམ། དམ་ཚིག་སེམས་དཔའ་དབུ་རྒྱན་རང་ཆས་ཅན་སྐད་ཅིག་མས་བསྐྱེད་ནས་བཟླས་པ་ལ་འཇུག་པ་ཡིན་ནོ་ཞེས་གསུངས་པ་ཆོ་ག་བསྡུས་པའི་ལུགས་ཡིན་པར་གསུངས་པའི་ཕྱིར་རོ། །དབང་བསྐུར་རྒྱས་བཏབ་མི་བྱེད་པའི་ལུགས་ནི་བསྙེན་བསྒྲུབ་ཡན་ལག་བཞི་རྒྱས་པ་མ་ཡིན་ཏེ་དབང་བསྐུར་རིགས་བདག་གིས་རྒྱས་གདབ་པ་དངོས་སུ་མི་བྱེད་པའི་ཕྱིར། བར་པ་མ་ཡིན་ཏེ། ཡེ་ཤེས་པ་དགུག་པར་འདོད་པའི་ཕྱིར། བསྡུས་པ་མ་ཡིན་ཏེ། གནས་གསུམ་བྱིན་གྱིས་བརླབ་པ་དང་། ཡེ་ཤེས་པ་དགུག་པར་འདོད་པའི་ཕྱིར་ཞེས་གསུངས་པ་ལ། ཉི་ཟེར་དཔོན་བཙུན་ན་རེ། འདི་ནི་ཤིན་ཏུ་མི་འཐད་དེ། རྗེ་བཙུན་ཆེན་པོས་བདག་གི་སྤྱི་བོར་ཞེས་སོགས་གསུངས་པ་དེ་ནི་སྐྱེད་ཆོག་བསྡུས་པ་ལ་རྒྱས་བསྡུས་གཉིས་ཡོད་པའི་ནང་ནས་བསྡུས་པའི་ཡང་བསྡུས་པའི་ལུགས་ཡིན་ལ་འཕགས་པ་རིན་པོ་ཆེའི་ཕྱག་ལེན་འདི་ནི། བསྡུས་པའི་རྒྱས་པའི་ལུགས་ཡིན་པའི་ཕྱིར་རོ། །དེས་ན་ལུགས་འདི་ནི་རྗེ་བཙུན་ཆེན་པོའི་དགོངས་པ་དང་ཡང་ཤིན་ཏུ་མཐུན་ཏེ། རྗེ་བཙུན་ཆེན་པོས་རྩ་ལྟུང་འཁྲུལ་སྤོང་ལས་དམ་ཚིག་རྡོ་རྗེའི་བསྒོམ་བཟླས་གསུངས་པ་དང་། ལྷ་མི་འདྲ་བ་མ་གཏོགས་སྐྱེད་ཆོག་ཅིག་ཡིན་པའི་ཕྱིར་རོ། །དེས་ན་འཕགས་པ་རིན་པོ་ཆེས་མཛད་པའི་རྡོ་རྗེ་སེམས་དཔའི་སྐྱེད་ཆོག་ལ་ཁྱེད་ཀྱིས་བརྗོད་པའི་གནོད་བྱེད་དེ་དག་འཇུག་ན་རྗེ་བཙུན་ཆེན་པོའི་དམ་ཚིག་རྡོ་རྗེའི་སྐྱེད་ཆོག་ལ་ཡང་འཇུག་པར་འགྱུར་ཏེ། འདི་ལྟར་རྩ་ལྟུང་འཁྲུལ་སྤོང་ནས་བཤད་པའི་དམ་ཚིག་རྡོ་རྗེའི་སྐྱེད་ཆོག་དེ་ལ་སྤྱིར་ཡན་ལག་བཞི་དངོས་སུ་ཡོད་པར་འདོད་པ་ནི་མི་འཐད་དེ་ཅེས་པ་ནས་བསྡུས་པ་མ་ཡིན་ཏེ་གནས་གསུམ་བྱིན་གྱིས་བརླབ་པ་དང་། ཡེ་ཤེས་པ་དགུག་པར་འདོད་པའི་ཕྱིར་རོ་ཞེས་པའི་བར་ཇི་ལྟ་བ་བཞིན་དུ་བཟློག་སྟེ་བརྗོད་ན་མཚུངས་པའི་ཕྱིར་རོ། །གལ་ཏེ་དེ་གཉིས་མི་མཚུངས་ཏེ། དམ་ཚིག་རྡོ་རྗེ་ལ་རྒྱས་གདབ་དངོས་སུ་བྱེད་ལ་ཁྱེད་ཀྱིས་རྡོ་རྗེ་སེམས་དཔའ་ལ་རྒྱས་གདབ་དངོས་སུ་མ་བྱས་པའི་ཕྱིར་རོ་སྙམ་ན། དེ་གཉིས་ལ་རྒྱས་གདབ་དངོས་སུ་བྱེད་མི་བྱེད་ཀྱི་ཁྱད་པར་ཡོད་པ་མ་ཡིན་ཏེ། ངག་འདོན་དུ་རྒྱས་གདབ་དངོས་སུ་མི་བྱེད་ཀྱང་དབུ་རྒྱན་རང་ཆས་ཅན་དུ་བསྒོམ་པར་མཚུངས་པའི་ཕྱིར་རོ། །གལ་ཏེ་དེ་གཉིས་མི་མཚུངས་ཏེ། དམ་ཚིག་རྡོ་རྗེ་ལ་དབུ་རྒྱན་རང་ཆས་ཅན་དུ་བསྒོམ་པའི་གསལ་ཁ་དངོས་བསྟན་ལ་ཡོད་ལ། རྡོ་རྗེ་སེམས་དཔའ་ལ་དེའི་གསལ་ཁ་དངོས་བསྟན་ལ་མེད་པའི་ཕྱིར་རོ་སྙམ་ན། དབུ་རྒྱན་རང་ཆས་ཅན་དུ་བསྒོམ་པའི་གསལ་ཁ་དངོས་བསྟན་ལ་མེད་པས། དབུ་རྒྱན་རང་ཆས་ཅན་དུ་མི་བསྒོམ་པས་མ་ཁྱབ་སྟེ་ཁྱབ་ན་ཁྱེད་རང་གིས་དྲངས་པའི་རྡོ་རྗེ་སེམས་དཔའི་བསྒོམ་བཟླས་རྗེ་བཙུན་ཆེན་པོས་མཛད་པ་དེ་བསྐྱེད་ཆོག་བསྡུས་པ་མ་ཡིན་པར་འགྱུར་ཏེ། དབུ་རྒྱན་རང་ཆས་ཅན་དུ་མི་བསྒོམ་པས་སོ། །དེས་ན་རྗེ་བཙུན་ཆེན་པོས་མཛད་པའི་བསྐྱེད་ཆོག་དེ་ལ་དབུ་རྒྱན་རང་ཆས་ཅན་དུ་བསྒོམ་པའི་དངོས་བསྟན་མེད་ཀྱང་། དམ་ཚིག་སེམས་དཔའ་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་བཟླས་པ་ལ་འཇུག་པ་ཡིན་ནོ་ཞེས་གསུངས་པའི་དགོངས་པ་ཡིན་པ་བཞིན་དུ་འཕགས་པ་རིན་པོ་ཆེས་མཛད་པའི་བསྐྱེད་ཆོག་འདི་ལ་ཡང་དབུ་རྒྱན་རང་ཆས་སུ་བསྒོམ་པའི་དངོས་བསྟན་མེད་ཀྱང་སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་དང་། དབང་མི་བསྐུར་བར་དབུ་རྒྱན་རང་ཆས་སུ་བསྒོམ་པའི་ཡན་ལག་བཞིའམ་ཞེས་གསུངས་པའི་དགོངས་པ་ཡིན་པར་གྲུབ་བོ། །གཞན་ཡང་བར་མ་འདི་ལ་ལྗོན་ཤིང་ལས་ཡེ་ཤེས་པ་དགུག་པ་དངོས་སུ་མ་བཤད་པས་མེད་པར་འདོད་ན་འདི་ལ་དམ་ཚིག་པ་བསྐྱེད་པ་ཡང་མི་དགོས་པར་ཐལ་བའི་སྐྱོན་ཡོད་དོ། །གཞན་ཡང་འདིའི་རྡོ་རྗེ་སེམས་དཔའི་རྣམ་པ་ནག་པོ་དམ་ཚིག་རྡོ་རྗེས་བཤད་པ་དང་མཐུན་ཞེས་པ་ཡང་མ་བརྟགས་པ་ཡིན་ཏེ། དམ་ཚིག་རྡོ་རྗེས་ཞི་ཞིང་སྒེག་པར་བཞེད་ལ། འདིར་ནི་དམ་ཚིག་རྡོ་རྗེ་ལ་འཛུམ་ཁྲོའི་རྣམ་པ་ཅན་དུ་གསུངས་པ་ལྟར་རྡོ་རྗེ་སེམས་དཔའ་ཡང་འཛུམ་ཁྲོའི་རྣམ་པ་ཅན་དུ་བསྒོམ་དགོས་པའི་ཕྱིར་ཏེ། འདི་ནི་འཁོར་ལོས་སྒྱུར་བ་དྲུག་གི་རྡོ་རྗེ་སེམས་དཔའ་ཡིན་པར་ཨ་བྷི་དྷ་ན་ལས་བཤད་ལ། དེ་ཁྲོ་ཆགས་ཀྱི་རྣམ་པ་ཅན་དུ་གསུངས་པའི་ཕྱིར་རོ། །དེས་ན་རྡོ་རྗེ་སེམས་དཔའ་ཞི་ཞིང་སྒེག་པའི་རྣམ་པ་ཅན་དུ་བསྒོམས་ནས་ཧེ་རུ་ཀའི་ཡི་གེ་བརྒྱ་པ་བཟླ་བར་ཁས་བླངས་པས། དཔལ་དེ་ཉིད་འདུས་པ་ནས་གསུངས་པའི་དགག་པ་ལ་ལན་འདེབས་པའི་ངལ་བ་ལྷུར་ལེན་དགོས་པར་སྣང་ངོ་། །རྒྱན་གྱི་རྣམ་བཞག་ལ་ཡང་ཁྱེད་རང་གིས་དྲངས་པའི་རྗེ་བཙུན་གྱི་ལུང་གཉིས་པོ་དེ་ཕན་ཚུན་གསལ་བྱེད་ཡིན་ལ་དེ་ཉིད་འཕགས་པས་གཉིས་ཀའང་རུས་པ་དང་། རིན་པོ་ཆེའི་རྒྱན་གྱིས་བརྒྱན་པ་ཞེས་གསུངས་པ་ཡིན་ཏེ། རྗེ་བཙུན་གྱིས་ནག་པོ་དཀྱིལ་ཆོག་དང་། དམ་ཚིག་རྡོ་རྗེའི་བསྒོམ་བཟླས་དང་། དྲི་མ་ཁྲུས་ཀྱིས་སེལ་བའི་སྐབས་དང་། ཀུ་རུ་ཀུ་ལླེའི་སྒྲུབ་ཐབས་དང་། ངེས་བརྗོད་བླ་མའི་འཁྲུལ་འཁོར་གྱི་སྐབས་དང་། ས་སྐྱ་པཎྜི་ཏས་སྐག་ཆོལ་གྱི་མངོན་རྟོགས་རྣམས་སུ་རུས་པ་དང་། རིན་པོ་ཆེ་གཉིས་ཀའི་རྒྱན་ཅན་དུ་བཤད་པའི་ཕྱིར་དང་། རྒྱན་འདི་དག་ཡེ་ཤེས་ཀྱི་སྣང་བ་ལས་གྲུབ་པའི་རྒྱན་ཡིན་པས་གོ་སར་མ་ཤོང་དོགས་མི་དགོས་པ་ལ་དེ་ལྟ་བུར་དོགས་པ་ནི་འཇིག་རྟེན་ཐ་མལ་པའི་རྒྱན་ལ་ཞེན་པར་ཟད་དོ་ཞེས་དང་། གཞན་ཡང་སྐུ་གཅིག་ཉིད་ལ་རུས་པ་དང་རིན་པོ་ཆེར་མ་ཟད་རྒྱན་གོས་མི་འདྲ་བ་དུ་མས་བརྒྱན་པ་ཡང་གསུངས་ཏེ། མི་གཡོ་བའི་རྟོག་པ་ལས། ཧཱུྃ་ཧཱུྃ་ཧཱུྃ་ཞེས་བརྗོད་མ་ཐག་དུ་རང་ཉིད་ཀྱི་མདུན་དུ་ཁྲོ་བོ་ཆེན་པོ་མི་གཡོ་བ་སྐུ་མདོག་མཐིང་ནག་ཏུ་གྱུར་པ་ཞལ་སྟོང་ཕྲག་ཧ་ཧར་བཞད་པ། ཞབས་སྟོང་ཕྲག་བརྐྱང་བསྐུམ་གྱི་ཚུལ་དུ་བཞུགས་པ། ཕྱག་སྟོང་ཕྲག་གདུག་པའི་མཚོན་ཆ་རལ་གྲི་དང་། རལ་གྲི་ཀྱོག་པོ་དང་། ཆུ་གྲི་དང་། གྲི་གུག་དང་། ཁ་ཊྭཱཾ་དང་། རྩེ་གསུམ་དང་། རྩེ་གཅིག་དང་། མདུང་དང་། འཕེན་མདུང་དང་། ལྡིང་མདུང་དང་། མདའ་དང་། མདའ་སྟེའུ་ཁ་དང་། མདའ་རྩེ་ལྔ་པ་དང་། མདའ་ཁ་བྲག་དང་། མདའ་རྩེ་གཅིག་པ་དང་། རྩེ་གསུམ་པ་དང་། རྩེ་དགུ་པ་དང་། རྩེ་མོ་བཅུ་གཉིས་པ་དང་། སཏྭ་རེ་དང་། དགྲ་སཏྭ་དང་། སྟེབ་ལེབ་དང་། སོ་སཏྭ་དང་། འཕེན་སྟ་དང་། བཞད་རྟ་དང་། དབྱུག་པ་དང་། ཐོ་བ་དང་། གཏུན་ཤིང་དང་། འཁོར་ལོ་དང་། མགོ་དང་། འབིར་རི་པ་དང་། གཞུ་དང་། གཞུ་མེན་དང་། ཐོད་པ་དང་། ཐོད་ཚལ་དང་། གྲི་ཟླུམ་དང་། གྲི་རིང་དང་། ལྕགས་ཀྱུ་དང་། ཞགས་པ་དང་། རྔ་ཡབ་དང་། བ་དན་དང་། མེའི་ཕུང་པོ་དང་། ཆུའི་སྒྱོགས་དང་། བྲག་དང་། ཐོད་པ་ཁྲག་གིས་བཀང་བ་དང་། ཕུར་པ་དང་། ཐོད་པའི་ཕྲེང་བ་དང་། ཞིང་དབྱུག་དང་། མེ་རི་དང་། སོའི་ཕྲེང་བ་དང་། དྲིལ་བུ་དང་། ཇེང་དང་། པི་ཝང་དང་། གླིང་བུ་དང་། རྫ་རྔ་དང་། པ་ཏ་ཧ་དང་། རྔ་ཟླུམ་དང་། སྐེད་ཉེག་པ་དང་། དུང་དང་། སིལ་ཕྲེང་དང་། ལག་པ་དང་། རྐང་པ་དང་། ཁ་བ་དང་། བསིལ་བྱེད་དང་། ནམ་མཁའ་ལྡིང་དང་། སྦྲུལ་ལྕག་ལ་སོགས་པའི་མཚོན་ཆ་དུ་མ་གཟུང་ནས། ཕྱག་ལྷག་མ་རྣམས་གཡས་པས་རལ་གྲི་འཕྱར་ནས། གཡོན་པས་སྡིགས་མཛུབ་འཕྱར་བར་མཛད་དོ། །ཞལ་སྟོང་ཕྲག་ལ། འཛུམ་པ་དང་། བཞད་པ་དང་། ཧ་ཧ་ཞེས་སྒྲོགས་པ་དང་། མཆེ་བ་གཙིགས་པ་དང་། སོ་འདར་བ་དང་། གྱེན་དུ་གདངས་པ་དང་། ཁྲག་ལྡག་པ་དང་། རྔམ་པ་དང་། ཞི་བར་ཡང་མཛད་དོ། །ཁ་དོག་ཀྱང་ཐ་དད་དོ། །དབུ་སྐྲ་ཡང་ནག་པོ་དང་། སེར་པོ་དང་། དམར་པོ་ལ་སོགས་པ་ཐ་དད་དོ། །སྐུ་སྟོད་ལ་གླང་པོ་ཆེའི་ཀོ་བ་གྱོན་ནས་སྨད་དུ་སྟག་གི་པགས་པས་དཀྲིས་ཤིང་ཕྱག་དང་། ཞལ་དང་། ཞབས་ཀྱི་བྱེ་བྲག་གིས་ནི་རྒྱན་ཡང་ཐ་དད་དེ། རིན་པོ་ཆེ་དུ་མ་དང་། རུས་པའི་ཕྲེང་བ་དང་། སྦྲུལ་གྱི་ཆུན་པོ་དང་། མི་མགོའི་ཕྲེང་བ་དང་། མིའི་པགས་པ་དང་། སེང་གེའི་པགས་པ་དང་། མ་ཧེའི་པགས་པ་ལ་སོགས་པ་ཐ་དད་དོ། །ཞལ་རེ་རེ་ལ་ཡང་སྤྱན་གསུམ་གསུམ་དང་། གཉིས་གཉིས་དང་། རེ་རེ་འོ་ཞེས་གསུངས་པས་སོ། །དེས་ན་ཟླ་ཟེར་མཁན་པོ་ཁྱེད་ཆོས་ཀྱི་རྒྱལ་པོ་འཕགས་པ་རིན་པོ་ཆེ་ལ་སྡང་ཤུགས་འབའ་ཞིག་གིས་དགག་པ་བྱེད་པ་ལ་སྤྲོ་བར་ཟད་ཀྱི་ལུང་རིགས་དང་། རྗེ་བཙུན་གོང་མའི་དགོངས་པ་གཞིར་བཞག་ནས་གནས་ལུགས་ལ་དཔྱོད་པ་མ་ཡིན་པར་གསལ་ལོ་ཞེས་བྱ་བ་བྲིས་སོ། །དེ་དག་ལ་གཟུ་བོའི་བློས་རིམ་པ་བཞིན་དུ་ལན་འདེབས་ན་རྡོ་རྗེ་སེམས་དཔའི་བསྒོམ་བཟླས་འཕགས་པས་མཛད་པ་དེ་ལྗོན་ཤིང་ལས་བསྡུས་པ་ལ་གཉིས་གསུངས་པའི་བསྡུས་པའི་རྒྱས་པའི་ལུགས་ཡིན་པ་དང་། རྗེ་བཙུན་གྱིས་མཛད་པ་དེ་བསྡུས་པའི་ཡང་བསྡུས་པའི་ལུགས་ཡིན་པ་དང་། གཉིས་ཀ་ལ་རྒྱས་གདབ་ངག་འདོན་ལ་མེད་ཀྱང་བསྒོམ་དོན་ལ་ཚང་བར་མཚུངས་པ་དང་། དམ་ཚིག་རྡོ་རྗེའི་བསྒོམ་བཟླས་བསྡུས་པ་དང་པོའི་ལུགས་ཡིན་པ་རྣམས་ནི་རྗེ་བཙུན་གྱི་དགོངས་པ་དེ་ལྟར་ཡིན་པས། ཟླ་ཟེར་ལས། བར་པ་མ་ཡིན་ཏེ། ཡེ་ཤེས་པ་དགུག་པར་འདོད་པའི་ཕྱིར། བསྡུས་པ་མ་ཡིན་ཏེ་གནས་གསུམ་བྱིན་གྱིས་བརླབ་པ་དང་། ཡེ་ཤེས་པ་དགུག་པར་འདོད་པའི་ཕྱིར་ཞེས་པའི་དགག་པ་གཉིས་པོ་ཅུང་ཟད་ཐལ་བ་འདྲའོ། །འོན་ཀྱང་མན་ངག་ལུགས་ཀྱི་ཉམས་ལེན་གྱི་སྐབས་འདིར་རྒྱུད་སྡེ་གཞན་ནས་གསུངས་པའི་ཐུན་མཚམས་ཀྱི་ཉེས་ལྟུང་སྦྱོང་བའི་ལྷའི་སྒོམ་བཟླས་གཉིས་ཡོད་པ་ལས། དམ་ཚིག་རྡོ་རྗེ་ལ་བསྡུས་པ་དང་པོ་དང་། རྡོ་རྗེ་སེམས་དཔའ་ལ་བསྡུས་པ་ཕྱི་མ་རྗེ་བཙུན་གྱིས་དངོས་སུ་སྦྱར་བ་འདི་ཉིད་ཉམས་སུ་བླངས་ན་དག་པ་ཡིན་པར་ཤེས་པར་བྱའོ། །ཁྱོད་ཀྱི་བསྐྱེད་ཆོག་བསྡུས་པ་ཞེས་པ་ལ་ནི་སྐྱོན་ཆགས་ཏེ། ལྗོན་ཤིང་ལས། སྒྲུབ་བྱེད་མངོན་རྟོགས་ཀྱི་རྣམ་དབྱེ་ལ་སྔོན་འགྲོ་དང་། དངོས་གཞི་དང་། རྗེས་རྫོགས་པར་བྱེད་པ་ལམ་གྱི་ཡན་ལག་གསུམ་གྱི་དངོས་གཞི་ལ་ཡང་རྒྱས་འབྲིང་བསྡུས་པ་གསུམ་དུ་ཕྱེ་བའི་བསྡུས་པ་ནི་སྐབས་འདིའི་བསྡུས་པ་ཡིན་ལ་དེ་བསྐྱེད་ཆོག་བསྡུས་པ་ཡིན་ན། འབྲིང་པོ་དང་། རྒྱས་པ་ཡང་བསྐྱེད་ཆོག་གི་སྒོ་ནས་འཇོགས་དགོས་པས། རྗེ་བཙུན་གྱིས་འབྲིང་པོ་འདི་ལ་ཏིང་ངེ་འཛིན་གསུམ་དང་། ཡན་ལག་དྲུག་གིས་འཆིང་བ་ནི་མེད་ལ་ཞེས་གསུངས་པ་དང་འགལ་བའི་ཕྱིར་ཏེ། ཡན་ལག་དྲུག་པ་ནི་བསྐྱེད་ཆོག་གི་སྒོ་ནས་འབྲིང་པོ་ཁོ་ན་ཡིན་པའི་ཕྱིར་རོ། །དེས་ན་ལྗོན་ཤིང་ལས་དངོས་གཞིའི་ཆིངས་རྒྱས་འབྲིང་བསྡུས་གསུམ་གསུངས་པ་དང་། བསྐྱེད་ཆོག་རྒྱས་འབྲིང་བསྡུས་གསུམ་ནོར་བར་མི་བྱའོ། །འདིའི་རྡོ་རྗེ་སེམས་དཔའ་ནག་པོ་དམ་ཚིག་རྡོ་རྗེས་གསུངས་པ་དང་མཐུན་ཞེས་པ་ཙམ་གྱིས་དེ་ཇི་ལྟ་བ་བཞིན་དུ་ཁས་ལེན་དགོས་པ་མ་ཡིན་ཏེ། གཞན་དུ་ན་རྗེ་བཙུན་གྱིས་མན་ངག་ལུགས་ཀྱི་ཡན་ལག་དྲུག་པ། ཌོཾ་བི་ལུགས་དང་མཐུན། ཡན་ལག་བཞི་པ་མཚོ་སྐྱེས་ལུགས་དང་མཐུན་པར་གསུངས་པས་དེ་དག་ཇི་ལྟ་བ་བཞིན་དུ་ཁས་ལེན་དགོས་པར་ཐལ་བའི་ཕྱིར་དང་། མི་འདྲ་བའི་ཁྱད་པར་ཡོད་ཀྱང་གཙོ་བོ་མཐུན་པས་མཐུན་པར་འཇོག་ན། འདིར་ཡང་སྐུ་མདོག་དང་། ཕྱག་མཚན་དང་། གདན་དང་། ཡུམ་ལ་འཁྱུད་ཚུལ་མཐུན་པས་མཐུན་པར་འཇོག་པ་ཡིན་གྱི། ཞི་ཞིང་སྒེག་པའི་རྣམ་པ་ཅན་དུ་ཁས་བླངས་མི་དགོས་པའི་ཕྱིར་རོ། །འདི་ནི་ཨ་བྷི་དྷ་ན་ལས་གསུངས་པའི་འཁོར་ལོས་སྒྱུར་བ་དྲུག་གི་རྡོ་རྗེ་སེམས་དཔའ་ཡིན་ཞེས་པ་ནི་ཟླ་ཟེར་ལས། ཨ་བྷི་དྷ་ན་དང་སྦྱར་བའི་བཤད་པ་ངོ་མཚར་བ་དེ་མཐོང་ནས་ཚུར་ངོམ་པ་ནི་གཡར་པོའི་རྒྱན་བདག་པོ་ལ་ངོམ་པ་དང་ཚུལ་མཚུངས་སོ། །དེ་ཉིད་འདུས་པ་ནས་བཤད་པའི་དགག་པ་ལ་ལན་འདེབས་ན། ངལ་བ་ལྷུར་ལེན་པ་འབའ་ཞིག་ལས་མ་འདས་ཏེ། དེ་ནས་བཤད་པའི་དགག་སྒྲུབ་ལ་ལུང་རིགས་ཀྱིས་མཚམས་གཟུང་དུ་མེད་པར་བབ་ཆོལ་འབའ་ཞིག་ཏུ་སྣང་བའི་ཕྱིར་རོ། །འོན་ཀྱང་འདིར་ནི་དེའི་ཕྱོགས་ལྔ་ཁས་མ་བླངས་པས་ལན་འདེབས་མི་དགོས་པ་སྔར་བཤད་པ་ལས་ཤེས་སོ། །གལ་ཏེ་ཞི་ཞིང་སྒེག་པའི་རྣམ་པ་ཅན་དུ་ཁས་བླངས་ན་ཡང་ཧེ་རུ་ཀའི་ཡི་གེ་བརྒྱ་པ་བཟླར་མི་རུང་བ་མ་ཡིན་ཏེ། ཨ་བྷི་དྷ་ན་ལས། དཔའ་བོ་དང་ནི་མཁའ་འགྲོ་མ། །འདི་ནི་ཀུན་གྱི་གསང་སྔགས་ཏེ། །ཞེས་གསུངས་པས་སོ། །གལ་ཏེ་དཔའ་བོ་ཞེས་པས་ཁྲོ་བོར་གྲུབ་བོ་ཞེ་ན། དེ་ལྟར་ན་བྱང་ཆུབ་སེམས་དཔའ་ཐམས་ཅད་ཁྲོ་བོར་འགྱུར་ཏེ། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཞེས་པ་ཡང་སྨྲ་མི་རུང་བར་འགྱུར་རོ། །རྒྱན་གྱི་རྣམ་བཞག་གི་སྐབས་སུ་ཁྱེད་རང་གིས་གཞན་ལ་སྐྱོན་བརྗོད་པ་ལ་ཡང་མཚུངས་ཏེ། ཞི་ཞིང་སྒེག་པ་དང་། ཁྲོ་ཆགས་ཀྱི་རྣམ་པ་འདི་དག་ཡེ་ཤེས་ཀྱི་རང་སྣང་ལས་གྲུབ་པའི་རྣམ་པ་ཡིན་པས་གོ་སར་མ་ཤོང་དོགས་མི་དགོས་པ་ལ་དེ་ལྟ་བུར་དོགས་པ་ནི་འཇིག་རྟེན་ཐ་མལ་གྱི་བཞིན་གྱི་རྣམ་འགྱུར་ལ་ཞེན་པར་ཟད་དོ་ཞེས་བརྗོད་ན་ལན་ཅི་ཡོད། རུས་རྒྱན་དང་། རིན་པོ་ཆེའི་རྒྱན་གཉིས་ཀས་བརྒྱན་པའི་ལུང་དེ་དག་གང་རུང་གིས་བརྒྱན་པའི་དོན་དུ་ཟླ་ཟེར་ཉིད་ལས་བཤད་ཟིན་ལ། དེ་གཉིས་གོ་ས་གཅིག་ལ་ཡོད་པའི་ཤེས་བྱེད་དུ། མི་གཡོ་བའི་རྟོག་པ་ལས། ཕྱག་དང་ཞལ་དང་ཞབས་སོ་སོ་ལ་རིན་པོ་ཆེ་དང་རུས་པ་ལ་སོགས་པས་བརྒྱན་པ་བཀོད་པ་ནི་ལྷྭམ་དང་ཞྭ་གཉིས་པོ་གོ་ས་གཅིག་ཏུ་གོན་དགོས་ཏེ། མགོ་བོ་ལ་ཞྭ་དང་། རྐང་པ་ལ་ལྷྭམ་སོ་སོར་གོན་དགོས་པའི་ཕྱིར་ཞེས་བཀོད་པ་དང་མཚུངས་སོ། །དེས་ན་ཉི་ཟེར་མཁན་པོ་ཁྱེད་ཆོས་ཀྱི་རྒྱལ་པོ་ངོར་པ་རིན་པོ་ཆེ་ལ་སྡང་ཤུགས་འབའ་ཞིག་གིས་དགག་པ་བྱེད་པ་ལ་སྤྲོ་བར་ཟད་ཀྱི་ལུང་རིགས་དང་། རྗེ་བཙུན་གོང་མའི་བཞེད་པ་གཞིར་བཞག་ནས་གནས་ལུགས་ལ་དཔྱོད་པ་མ་ཡིན་པར་གསལ་ལོ། །གནད་ཀྱི་ཟླ་ཟེར་ལས། གསུམ་པ་ནི། རྗེ་བཙུན་གྱིས་གསལ་བར་མ་བཤད་ཀྱང་བླ་ཆེན་འཕགས་པས། བདག་ནི་མི་ཤེས་རྨོངས་པ་ཡིས། །ཞེས་སོགས་ཨ་བྷི་དྷ་ན་ལས་འབྱུང་བ་ལྟར་བརྗོད་པ་ནི་རྒྱུད་སྡེའི་དོན་དུ་སྣང་བས་གོང་མའི་གདམས་ངག་ཏུ་མངོན་ནོ་ཞེས་གསུངས་པ་ལ། ཉི་ཟེར་བདག་པོ་ན་རེ། དེ་ནི་གོང་མའི་ཡིག་ཆ་ལ་ཞིབ་ཏུ་མ་བལྟས་པའི་ཚོད་དཔག་ཏུ་སྣང་སྟེ། དཔལ་ལྡན་ས་སྐྱ་པཎྜི་ཏས་དྲུག་པ་རྒྱུད་སྦྱང་བ་ནི། ཐམས་ཅད་ཀྱི་དམ་ཚིག་གི་ཉེས་པ་བཤགས་པའི་ཕྱིར་སྤྱི་བོར་རྡོ་རྗེ་སེམས་དཔའ་མན་ངག་ལྟར་བསྒོམ། ཡི་གེ་བརྒྱ་པ་ཅི་རིགས་པར་བཟླས་ནས་ཨ་བྷི་དྷ་ན་ལས་འབྱུང་བའི་ཚིག་འདི་བརྗོད། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ཞེས་བརྗོད་ཅེས་གསལ་བར་གསུངས་པས་སོ་ཞེས་བྱ་བ་བྲིས་སོ། །དེ་ནི་ཟླ་ཟེར་ལ་ཞིབ་ཏུ་མ་བལྟས་པའི་ཚོད་དཔག་ཏུ་སྣང་སྟེ། ཟླ་ཟེར་ལས་རྗེ་བཙུན་གྱིས་གསལ་བར་མ་བཤད་ཅེས་སོགས་ཀྱི་གོང་མའི་ཡིག་ཆ་ལ་གཏན་མེད་པར་མ་གསུངས་ཀྱང་ཁྱེད་ཀྱི་རྗེ་བཙུན་གྱིས་གསལ་བར་མ་བཤད་པ་མི་འཐད་དེ། ས་པཎ་གྱིས་གསལ་བར་བཤད་པའི་ཕྱིར་ཞེས་པ་ནི། བྱམས་པའི་མགོ་ལ་སྐྲ་དཀར་མེད་པ་མི་འཐད་དེ། ཉེ་སྦས་ཀྱི་མགོ་སྤྲ་བའི་མེ་ཏོག་ལྟར་སོང་འདུག་པའི་ཕྱིར་ཞེས་བཀོད་པ་དང་མཚུངས་སོ། །དེས་ན་འདི་ལ་ཡང་རྗེ་བཙུན་གྱིས་གསལ་བར་མ་བཤད་ཀྱང་ས་པཎ་གྱིས་གསལ་བར་བཤད་པ་ནི་གོང་མའི་གདམས་ངག་ཏུ་སྣང་ངོ་ཞེས་པ་ཡང་དོན་གྱིས་ཐོབ་བོ།། །།གནད་ཀྱི་ཟླ་ཟེར་ལས། མཐར་བླ་མ་ཁ་ཅིག་རྡོ་རྗེ་སེམས་དཔའ་རང་ཉིད་ལ་བསྟིམས་ནས་ཨོཾ་ཨཿཧཱུྃ་ཞེས་བརྗོད་པས། ཨོཾ་གྱིས་རྡོ་རྗེ་སེམས་དཔའི་སྐུ་དང་རང་གི་ལུས་དབྱེར་མེད། ཨཱཿས་གསུང་དང་ངག་དང་། ཧཱུྃ་གིས་ཐུགས་དང་སེམས་དབྱེར་མེད་དུ་བསམ་ཟེར་ཏེ། སྒྲོ་བཏགས་པ་ཙམ་དུ་ཟད་དོ་ཟེར་བ་ལ། ཉི་ཟེར་མཁན་པོ་ན་རེ། དེ་ལྟར་མ་ཡིན་ཏེ། རྗེ་བཙུན་གྱིས་མཐར་ཐུན་འཇོག་ཁར་རྡོ་རྗེ་སེམས་དཔའ་ཡབ་ཡུམ་རང་ལ་ཐིམ་པས་ལུས་འཇའ་ཚོན་ལྟ་བུར་གྱུར་པར་བསྒོམ་མོ་ཞེས་དང་། འཕགས་པས་རྡོ་རྗེ་སེམས་དཔའ་རང་ལ་ཐིམ་པར་བསམས་ནས་ཨོཾ་ཨཱཿཧཱུྃ་ཞེས་བརྗོད་པས་གཉིས་སུ་མེད་པར་བསམ་མོ་ཞེས་གསུངས་ལ། དེའི་སྒོམ་དོན་གོང་དུ་བཤད་པ་ལྟར་མིན་ན་ཇི་ལྟར་ཡིན་སྨྲོས་ཤིག་ཅེས་བྲིས་སོ། །དེ་ནི་སྨྲ་རྒྱུ་མེད་ཀྱང་སྨྲ་བ་ལ་དགའ་བ་ཙམ་དུ་ཟད་དེ། རྗེ་བཙུན་གྱིས་གསུངས་པའི་བསྒོམ་དོན་ནི་རྡོ་རྗེ་སེམས་དཔའ་རང་ལ་ཐིམ་པས་ལུས་འཇའ་ཚོན་ལྟ་བུར་བསྒོམ་པ་དེ་ཉིད་ཡིན་ལ། འཕགས་པས་གསུངས་པའི་སྒོམ་དོན་ནི་ཡི་གེ་གསུམ་བརྗོད་པས་གཉིས་སུ་མེད་པར་བསམས་པ་དེ་ཉིད་ཡིན་པས་གཞན་སྨྲ་ཅི་ཞིག་དགོས། ཚོགས་ཞིང་གི་སྐབས་སུ་གནད་ཀྱི་ཟླ་ཟེར་ལས། ཁ་ཅིག་སྐུ་རྡོ་རྗེ་ཞལ་གཅིག་ཕྱག་གཉིས་པ་བསྒོམ་པར་འདོད་པ་ལ་ཤེས་བྱེད་ཀྱི་གཞུང་མེད་པས་བསྒོམ་བྱའི་དཀྱིལ་འཁོར་གྱི་གཙོ་བོའི་ང་རྒྱལ་དུ་བྱ་དགོས་ཏེ། མར་མེ་མཛད་ཀྱིས་ཞལ་བརྒྱད་ང་རྒྱལ་བ་དག་བསྒོམ་ཏེ་ཞེས་གསུངས་པའི་ཕྱིར་རོ་ཞེས་གསུངས་པ་ལ། ཉི་ཟེར་མཁན་པོ་ན་རེ། ཚོགས་བསག་གི་སྐབས་སུ་བསྒོམ་བྱའི་གཙོ་བོའི་ང་རྒྱལ་འབའ་ཞིག་དགོས་པས་མ་ཁྱབ་སྟེ། བདེ་མཆོག་མཁའ་འགྲོ་རྒྱ་མཚོའི་སྒྲུབ་ཐབས་ཛཱ་ཡ་སེ་ནས་མཛད་པ་ལས། དེ་ནས་བདག་ཉིད་སྐད་ཅིག་གིས་བདེ་མཆོག་ཞལ་བཞི་ཕྱག་བཅུ་གཉིས་པ་སྐུ་མདོག་སྔོན་པོ་ཕག་མོ་དང་བཅས་པར་བསྒོམ་པ་ནི། ལུས་དག་པར་བྱེད་པའོ་ཞེས་དང་། དེ་ནས་སྙིང་ཁའི་ས་བོན་ལས་འཕྲོས་པའི་འོད་ཟེར་རྣམས་ཀྱིས་བླ་མ་དང་དཔལ་མཁའ་འགྲོ་རྒྱ་མཚོའི་དཀྱིལ་འཁོར་སྤྱན་དྲངས་ཏེ། སྔགས་ཀྱིས་མཎྜལ་གྱིས་དབུས་སུ་བཞུགས་པར་བྱའོ་ཞེས་པ་ལ་སོགས་པ་བདེ་མཆོག་ཕྱག་བཅུ་གཉིས་པའི་ང་རྒྱལ་གྱིས་ཚོགས་བསག་རྒྱས་པར་བྱེད་པར་བཤད་ཀྱིས་གཙོ་བོ་ཞལ་བཅུ་བདུན་ཕྱག་བདུན་ཅུ་རྩ་གཉིས་པའི་ང་རྒྱལ་གྱིས་ཚོགས་བསག་བྱེད་པར་མ་གསུངས་པ་བཞིན་ནོ། །དེས་ན་ཁོ་བོའི་དཔལ་ལྡན་བླ་མ་དམ་པས་ཐུན་མཚམས་གཞན་གྱིས་བར་མ་ཆོད་པར་ལྡང་བའི་རྣལ་འབྱོར་དང་འབྲེལ་ན་ཕྱག་བཅུ་དྲུག་པ་སོགས་ཀྱི་རྣམ་པ་དང་། ཐུན་མཚམས་ཀྱི་བྱ་བ་གཞན་ལ་ཞུགས་པ་ན། ཕྱག་གཉིས་པར་བསྒོམ་པར་འདམ་ཁར་མཛད་པ་ཉིད་ལེགས་ཏེ། རྗེ་བཙུན་རྩེ་མོས་མངོན་རྟོགས་རྒྱས་པར་རང་ཀྱཻ་རྡོ་རྗེ་ཕྱག་གཉིས་པའི་ང་རྒྱལ་དུ་དྲན་པར་བྱས་ལ་སྟན་ལ་འདུག་སྟེ། ཞེས་ཐུན་མཚམས་ཀྱི་བྱ་བ་གསུངས་ནས་མཉམ་པར་བཞག་པའི་རྣལ་འབྱོར་གྱི་སྐབས་སུ་རང་ཀྱཻ་རྡོ་རྗེར་གསལ་བཏབ་པའི་ཞེས་གསུངས་པ་ཡང་འདི་ལ་སྙོག་པར་སེམས་སོ། །སྐུ་རྡོ་རྗེའི་རྣམ་པ་ཅན་དུ་བསྒོམ་པ་ནི་བརྒྱུད་པའི་ཕྱག་ལེན་ཙམ་ཡིན་མོད། སྐུ་རྡོ་རྗེར་བསྒོམ་པར་ཁས་བླངས་པ་ཡང་མ་ཡིན་ནོ། །གལ་ཏེ་སྐུ་རྡོ་རྗེའི་སྐུ་མདོག་ཕྱག་མཚན་ཇི་ལྟ་བ་བཞིན་དུ་འདུག་པས་སྐུ་རྡོ་རྗེ་ཡིན་ནོ་སྙམ་ན་ལྷའི་ཞལ་ཕྱག་སོགས་འདྲ་བས་གཅིག་ཏུ་བཤད་དུ་མི་རུང་སྟེ། བདག་མེད་ལྷ་མོ་བཅོ་ལྔའི་འཁོར་རྣམས་ཞལ་ཕྱག་སོགས་བདག་མེད་མ་དང་འདྲ་ཡང་། དེ་རྣམས་བདག་མེད་མ་མ་ཡིན་ཞེས་ཁྱེད་རང་གི་སྨྲས་པ་བཟློག་ནས་བརྗོད་ན། ཆོས་མཐུན་གྱི་ལན་ཅི་ཡང་ཡོད་པ་མ་ཡིན་ནོ་ཞེས་བྲིས་སོ། །དེ་ནི་མི་འཐད་དེ། མཁའ་འགྲོ་རྒྱ་མཚོའི་སྒྲུབ་ཐབས་ལས་དེ་ལྟར་གསུངས་པ་ནི། མཁའ་འགྲོ་རྒྱ་མཚོའི་རྒྱུ་རྡོ་རྗེ་འཆང་ཞལ་བཞི་ཕྱག་བཅུ་གཉིས་པ་ཡིན་པའི་དབང་དུ་བྱས་པ་ཡིན་པས། འདིའི་སྒྲུབ་བྱེད་དུ་འགྲོ་བའི་ཕྱིར་དང་། ཚོགས་ཞིང་གི་སྐབས་ཀྱི་ཧེ་རུ་ཀ་རྡོ་རྗེ་དང་ཐོད་པ་འཛིན་པ་དེ་སྐུ་རྡོ་རྗེ་ཡིན་ན། ད་དུང་དེ་གོམ་པ་ལ་ཤེས་བྱེད་འགོད་དགོས་ཤིང་། སྐུ་རྡོ་རྗེའི་སྐུ་མདོག་ཕྱག་མཚན་ཇི་ལྟ་བ་བཞིན་དུ་འདུག་པས། སྐུ་རྡོ་རྗེ་ཡིན་ནོ་སྙམ་ན། ཞེས་སོགས་ཀྱི་དགག་སྒྲུབ་དོན་མེད་པའི་ཕྱིར་དང་། སྐུ་རྡོ་རྗེ་མ་ཡིན་ན་དེ་རྒྱུད་གསུམ་ནས་གསུངས་པའི་ལྷ་གང་ཡིན་སྨྲ་དགོས་པའི་ཕྱིར་དང་། ཐུན་མཚམས་ཀྱི་བྱ་བ་གཞན་སྔོན་དུ་སོང་ན་ཞལ་གཅིག་ཕྱག་གཉིས་པར་བྱེད་པ་ལ་ཡང་ཤེས་བྱེད་གསར་དུ་འགོད་དགོས་པའི་ཕྱིར་རོ། །ཡང་གནད་ཀྱི་ཟླ་ཟེར་ལས་ཁ་ཅིག་སྤྱན་དྲངས་པའི་རྗེས་སུ་ཕྱག་འཚལ་བའི་ཚིག་དང་། སྐབས་འདིར་ཡང་དཀྱིལ་འཁོར་གྱི་ལྷ་ལ་ཕྱག་འཚལ་བར་འདོད་པ་ན། ཀཾ་པ་ལ་དང་། མར་མེ་མཛད་ཀྱིས། བླ་མ་སངས་རྒྱས་རང་བདག་ལྷ། །བསམ་བསྒོམ་ལུས་སྤྲུལ་ཕྱག་བྱའོ། །ཞེས་དང་པོར་ཕྱག་བྱ་བ་དང་། གཉིས་མེད་རྡོ་རྗེས་མཆོད་པ་བྱས་ནས་ལུས་ངག་ཡིད་གསུམ་དྭང་བས་ཕྱག་བྱས་ཏེ། དེའི་མདུན་དུ་སྡིག་པ་བཤགས་པ་ལ་སོགས་པ་བྱའོ་ཞེས་སྐབས་འདིར་ཕྱག་བྱེད་པར་བཤད་པས་གཞུང་དེ་གཉིས་བཏུན་ན་རུང་ཙམ་སྣང་ན་ཡང་། གཞན་རྒྱ་གར་བའི་སྒྲུབ་ཐབས་ཐམས་ཅད་དང་། རྗེ་བཙུན་སྐུ་མཆེད་ཀྱིས་བཤད་པ་མེད་དོ་ཞེས་གསུངས་པ་ལ། ཉི་ཟེར་ལས་སཾ་ཊིར། དེ་བཞིན་གཤེགས་པ་ཀུན་སོགས་ལ། །མཆོད་ནས་ཕྱག་འཚལ་འདི་སྐད་གསོལ། །ཞེས་དང་། དེ་ཉིད་མན་ངག་གིས་འཁྲུག་བསྡེབས་ནས་བདུད་རྩི་འོད་ལས། མངའ་བདག་རྡོ་རྗེ་དབང་དམིགས་ཏེ། །བློ་དང་ལྡན་པས་ཕྱག་འཚལ་མཆོད། །ཅེས་གསུངས་པ་དང་། རྗེ་བཙུན་གྲགས་པ་རྒྱལ་མཚན་གྱིས། བདག་མེད་མའི་སྒྲུབ་ཐབས་སུ་དེ་དག་གི་ཞབས་ལ་གུས་པའི་ཡིད་ཀྱིས་ཕྱག་འཚལ་ཏེ། ཐུགས་ཁའི་ཨཾ་ལས་ལྷ་མོ་བརྒྱད་སྤྲོས་ཏེ་ཞེས་གསུངས་པ་རྣམས་མ་དྲན་པར་ཟད་དོ། །གནད་ཀྱི་ལྡེ་མིག་ལས་ཚོགས་ཞིང་མཆོད་པའི་སྐབས་སུ་ཐོག་མར་ཕྱག་འཚལ་བ་རྗེ་བཙུན་གོང་མའི་ཡིག་ཆར་མེད་ཀྱང་། སཾ་བུ་ཊིར་གསུངས་པ་ལ་བརྟེན་ནས། སྔ་རབས་པ་དག་ཕྱག་ལེན་ལ་མཛད་དོ་ཞེས་གསུངས་པ་ནི། མན་ངག་ལུགས་ཀྱི་དབང་དུ་མཛད་པ་ཡིན་ནོ། །འོ་ན་རྗེ་བཙུན་གྱི་ལུང་དེས་ཁྱེད་ལ་ཡང་གནོད་པར་མཚུངས་སྙམ་ན་མི་མཚུངས་ཏེ། ཁྱེད་མན་ངག་ལུགས་དང་། འགྲེལ་པ་ལུགས་གཉིས་ཀ་སྲོལ་གཅིག་ཏུ་འདོད་པས་གནོད་བྱེད་དུ་འཇུག་ལ། ཁོ་བོའི་བླ་མ་དམ་པ་ནི་དེ་གཉིས་ཀ་སྲོལ་སོ་སོར་བཞེད་པར་ལེགས་པར་བསྒྲུབས་ཟིན་པས་དེ་དག་གནོད་བྱེད་དུ་མི་འཇུག་པས་རྣམ་པ་ཀུན་ཏུ་མཚུངས་པ་མ་ཡིན་ནོ། །རྒྱུ་མཚན་འདི་དག་དང་འོག་ནས་འབྱུང་བ་དུ་མའི་ཕྱིར་ན་རྗེ་བཙུན་ཆེན་པོས་མཛད་པའི་བདག་མེད་མའི་སྒྲུབ་ཐབས་འདི་མན་ངག་ལུགས་དང་། འགྲེལ་པ་ལུགས་ཐུན་མོང་བའི་ནང་ནས་བདུད་རྩི་འོད་ཀྱི་རྗེས་སུ་འབྲང་ནས་མཛད་པར་སྣང་བས་འགྲེལ་པ་ལུགས་གཙོ་ཆེ་བར་སེམས་སོ་ཞེས་བྲིས་སོ། །དེ་ནི་རང་ལུགས་ངན་པ་ནན་གྱིས་སྒྲུབ་ཅིང་གཞན་ལུགས་བཟང་པོ་རྩོལ་བས་འགོག་པ་སྟེ། རང་ཉིད་ཀྱིས་རྗེ་བཙུན་གོང་མའི་ཡིག་ཆར་མེད་ཀྱང་ཞེས་པའི་དོན་མན་ངག་ལུགས་ཀྱི་དབང་དུ་བྱས་པར་བཤད་ནས། གཞན་གྱིས་སྤྱན་དྲངས་པའི་རྗེས་སུ་ཕྱག་འཚལ་བའི་ཚིགས་བཅད་རྗེ་བཙུན་སྐུ་མཆེད་ཀྱིས་བཤད་པ་མེད་ཅེས་པའི་དོན་རྗེ་བཙུན་སྐུ་མཆེད་ཀྱི་ཡིག་ཆ་མཐའ་དག་ལ་བྱས་འདུག་པའི་ཕྱིར་རོ། །རང་ལུགས་རྗེ་བཙུན་གོང་མའི་གཞུང་དང་མི་འགལ་བའི་ཤེས་བྱེད་དུ་རྗེ་བཙུན་གྱིས་མཛད་པའི་བདག་མེད་མའི་སྒྲུབ་ཐབས་འགྲེལ་པ་ལུགས་ཀྱི་དབང་དུ་བྱས་པ་ཡིན་ཞེས་པ་ནི་གནད་ཀྱི་ལྡེ་མིག་ལས་བཀའ་སྲོལ་བཞིའི་ནང་ནས་མན་ངག་ལུགས་ཀྱི་ཆོས་སྐོར་བགྲངས་པའི་ཚེ་སྒྲུབ་ཐབས་བཞི་ལ་ཡབ་ཀྱི་སྒྲུབ་ཐབས་གསུམ་དང་ཡུམ་གྱི་སྒྲུབ་ཐབས་གཅིག་སྟེ་བཞི་བགྲངས་པའི་རང་ལུགས་དང་འགལ་ཞིང་། གཞན་གྱིས་མངོན་རྟོགས་ཚུལ་བཅོ་ལྔ་པ་མི་ཐུབ་ཟླ་བའི་འཁྲུགས་ཅན་དུ་བཞེད་པ་ལ་ཁྱེད་རང་གིས་གསུང་ངག་ལམ་འབྲས་ཀྱི་བསྐྱེད་རིམ་གྱི་སྐབས་སུ་འགྲེལ་པ་ལུགས་ཀྱི་བསྐྱེད་རིམ་བགྲང་བ་མི་འཐད་ཅེས་པ་དང་དངོས་སུ་འགལ་ཏེ། ཡུམ་གྱི་སྒྲུབ་ཐབས་འདི་ཡང་རྗེ་བཙུན་གྱིས་གསུང་ངག་ལམ་འབྲས་ཀྱི་བསྐྱེད་རིམ་གྱི་སྐབས་སུ་གསུངས་པའི་ཕྱིར་རོ། །གནད་ཀྱི་ཟླ་ཟེར་ལས་གཞན་རྒྱ་གར་བའི་སྒྲུབ་ཐབས་ཐམས་ཅད་དང་། རྗེ་བཙུན་སྐུ་མཆེད་ཀྱིས་བཤད་པ་མེད་ཅེས་གསུངས་པའི་དོན་ནི་རྒྱ་གར་བའི་ཡབ་ཀྱི་སྒྲུབ་ཐབས་ཐམས་ཅད་དང་། རྗེ་བཙུན་སྐུ་མཆེད་ཀྱིས་ཡན་ལག་བཞི་དྲུག་ལ་སྐབས་ཐོབ་ཀྱིས་འཇུག་པ་ཡིན་གྱི། རྒྱ་གར་བའི་གཞུང་ཐམས་ཅད་དང་། རྗེ་བཙུན་སྐུ་མཆེད་ཀྱི་ཡིག་ཆ་ཐམས་ཅད་ལ་འཇུག་པ་ནི་མ་ཡིན་ཏེ། རྒྱ་བོད་ཀྱི་བདག་མེད་མའི་སྒྲུབ་ཐབས་གཉིས་དང་། མངོན་རྟོགས་ལྗོན་ཤིང་ལས། ཕྱག་དང་མཆོད་པ་དང་། སྡིག་པ་བཤགས་པ་ལ་སོགས་པའི་རྒྱུན་བཤགས་བྱ་ཞེས་གསུངས་པའི་རྗེས་སུ་འབྲང་ནས་སྐབས་འདིར་བླ་མ་དང་། ཡི་དམ་ལ་ཕྱག་བྱ་བ་ཁོ་བོའི་དཔལ་ལྡན་བླ་མ་ཡང་བཞེད་པའི་ཕྱིར་རོ། །ལྗོན་ཤིང་གི་ལུང་གི་དོན་ཁྱེད་ཀྱིས་ཕྱག་དང་མཆོད་པ་དང་། སྡིག་པ་བཤགས་པའམ་རྒྱུན་བཤགས་བྱ་ཞེས་པའི་དོན་དུ་འཆད་པ་དང་། རང་བཟོ་མཁན་དག་བཟང་སྤྱོད་ནས་འབྱུང་བ་ལྟར་གྱི་ཡན་ལག་བདུན་པའི་དོན་དུ་འཆད་པ་ནི་ལུང་དེའི་དོན་ལ་བློ་ཁ་མ་ཕྱོགས་པ་སྟེ། ལྗོན་ཤིང་གི་དགོངས་པ་ནི་ཚོགས་ཞིང་ལ་ཕྱག་དང་མཆོད་པ་གཉིས་སྔོན་དུ་སོང་ནས་སྡིག་པ་བཤགས་པ་ལ་སོགས་པ་གུར་ནས་འབྱུང་བའི་རྒྱུན་བཤགས་བྱ་ཞེས་པའི་དོན་ཡིན་གྱི་གསུམ་པོ་རྒྱུན་བཤགས་ཀྱི་ཁོངས་སུ་བགྲངས་ན་ཕྱག་ལ་སོགས་པའི་རྒྱུན་བཤགས་བྱ་ཞེས་འཆད་རིགས་པའི་ཕྱིར་རོ། །གནད་ཀྱི་ཟླ་ཟེར་ལས། གཡུང་མོས་སྐུ་ལ་འཁྱུད་པ་ཉིད། །ཅེས་པའི་སྐབས་སུ་གཡུང་མོ་ནུབ་བྱང་གི་གྲྭར་གནས་ནས། འཁྱུད་པའི་ཕྱག་རྒྱ་བྱས་པས་ལྷ་ཐམས་ཅད་རྗེས་སུ་ཆགས་པས་མཉེས་པའམ་བདག་མེད་མ་ལ་ཐིམ་པས་ལྷ་ཐམས་ཅད་རྗེས་སུ་ཆགས་པས་ཚིམ་པར་བསམ་པར་གསུངས་པ་ལ། ཉི་ཟེར་ལས་དེ་བཀག་སྟེ། བུད་མེད་གཟུགས་ནི་སྤངས་ནས་གཞན། །བཅོམ་ལྡན་འདས་ཀྱི་གཟུགས་སུ་བྱ། །ཞེས་སོགས་ཀྱི་ལུང་ལ་བརྟེན་ནས་གཡུང་མོ་ལྟ་བུར་ཧེ་རུ་ཀར་བསྒྱུར་ནས་འཁྱུད་པར་ཁོ་བོའི་དཔལ་ལྡན་བླ་མ་དམ་པ་བཞེད་པ་ནི་ཤིན་ཏུ་ལེགས་ཏེ་ཞེས་སོགས་བྲིས་སོ། །དེ་ནི་མི་འཐད་དེ། ལུང་དེའི་དོན་ལས་དང་པོ་པས་བསྐྱེད་རིམ་བསྒོམ་པའི་གནས་སྐབས་ཀྱི་ལྷ་མོ་ཕོར་བསྒྱུར་བ་ལ་འཆད་ན་རྗེ་བཙུན་གྱིས་ཉེ་རྒྱུའི་གནས་སྐབས་ཀྱི་རྟེན་གྱི་གང་ཟག་བུད་མེད་སྐྱེས་པར་བསྒྱུར་བ་ལ་བཤད་པ་དང་འགལ་བའི་ཕྱིར་དང་། གཞན་ལུགས་ཀྱི་བླ་མ་དག་གིས་གཞུང་དེ་ཉིད་འཇིགས་བྱེད་ལ་ཡུམ་ཡོད་པའི་སྒྲུབ་བྱེད་དུ་བཀོད་པའི་ཚེ། ལས་དང་པོ་པས་བསྐྱེད་རིམ་བསྒོམ་པའི་གནས་སྐབས་ཀྱི་ལྷ་མོ་ཕོར་བསྒྱུར་བ་ལ་བཤད་པའི་སྐྱོན་སྤོང་བའི་རྩོལ་བ་ཡང་བྱ་དགོས་པའི་ཕྱིར་རོ།། །།ཡང་གནད་ཀྱི་ཟླ་ཟེར་ལས་སྐབས་འདིར་རྒྱ་གར་བའི་གཞུང་ཐམས་ཅད་ལས་རིགས་ལྔའི་སྡོམ་གཟུང་བཤད་པ་མེད་ཅེས་གསུངས་པ་ལ། ཉི་ཟེར་ལས། དཔའ་བོའི་རྡོ་རྗེས་སྡོམ་པ་གཟུང་བར་བྱ་སྟེ། ཇི་ལྟར་དུས་གསུམ་མགོན་པོ་རྣམས། །ཞེས་བྱ་བ་ནས་ཞེས་སོགས་གསུངས་པ་མ་མཐོང་བར་ཟད་དོ་ཞེས་བྲིས་སོ། །དེ་ནི་དགག་པ་ལ་དགའ་བ་ཙམ་དུ་ཟད་དེ། ཟླ་ཟེར་ལས། སྐབས་འདིར་ཞེས་པ་ནི། སྒྲུབ་ཐབས་ཀྱི་བསོད་ནམས་ཚོགས་བསག་གི་སྐབས་འདིར་ཞེས་པ་ཡིན་ལ། དཔའ་བོའི་རྡོ་རྗེས་སྒྲུབ་ཐབས་ཀྱི་བསོད་ནམས་ཚོགས་བསག་གི་སྐབས་སུ་ལུང་དེ་མ་གསུངས་པའི་ཕྱིར་རོ། །ཡེ་ཤེས་ཚོགས་བསག་གི་སྐབས་སུ་གནད་ཀྱི་ཟླ་ཟེར་ལས། བདག་མེད་གཉིས་སྒོམ་ཚུལ་རྒྱས་པར་བཤད་པའི་གང་ཟག་གི་བདག་ངོས་འཛིན་གྱི་སྐབས་སུ་དུད་འགྲོ་ཡན་ཆད་ཀྱི་སེམས་ཅན་ཐམས་ཅད་ལ་རང་འཁྲུངས་སུ་ཡོད་པ། ང་དང་ང་ཡིར་འཛིན་པའི་བདག་འཛིན་འཇིག་ལྟ་ལྷན་སྐྱེས་ཀྱི་ཞེན་ཡུལ་འདི་ཉིད་ཡིན་ནོ། །འདི་མུ་སྟེགས་རྣམས་ཀྱིས་རྟག་ཅིག་རང་དབང་ཅན་དུ་སྒྲོ་བཏགས་པ་ལྟར་ཡུལ་རང་ངོས་ནས་ཐ་སྙད་དུ་ཡང་མ་གྲུབ་མོད། ལྷན་སྐྱེས་ཀྱི་བློས་ཞེན་པ་ལྟར་ཐ་སྙད་དུ་མེད་པ་མ་ཡིན་ཏེ། ང་དང་ང་ཡིར་ཞེས་སོགས་ཀྱི་ཐ་སྙད་སྣ་ཚོགས་འཇིག་རྟེན་ན་གྲགས་ཤིང་གནོད་པ་མེད་པའི་ཕྱིར་རོ་ཞེས་དང་། ཆོས་བདག་ངོས་འཛིན་གྱི་སྐབས་སུ་ཐ་སྙད་ཀྱི་རྗེས་སུ་འབྲང་བའི་ལྷན་སྐྱེས་ཀྱི་བློ་རང་དགའ་བ་འདིས་ཕྱི་ནང་གི་དངོས་པོ་རྣམས་ལ་བདེན་པར་མངོན་པར་ཞེན་པ་རྟོག་པས་རྟག་པ་ཙམ་དུ་ཟད་ཀྱི། དངོས་པོ་ཐམས་ཅད་ཀྱི་རང་བཞིན་མ་ཡིན་པས། དེ་ཁོ་ན་ཉིད་སེམས་པའི་ཚེ་རིགས་པས་དགག་པར་བྱ་བ་ཡིན་ནོ་ཞེས་གསུངས་པ་ལ། ཉི་ཟེར་ལས། དེ་ཡང་མི་འཐད་དེ། ཆོས་ཀྱི་བདག་ཀྱང་ལྷན་སྐྱེས་ཀྱི་བློས་ཞེན་པ་ལྟར་ཐ་སྙད་དུ་ཡོད་པར་འགྱུར་ཏེ། ཕྱི་ནང་གི་དངོས་པོ་ཐམས་ཅད་ལ་བདེན་པར་ཞེན་པའི་ཐ་སྙད་སྣ་ཚོགས་འཇིག་རྟེན་ན་གྲགས་ཤིང་གནོད་པ་མེད་པའི་ཕྱིར་རོ། །གཞན་ལ་ལན་འདེབས་པའི་གནས་མེད་དོ་སྙམ་ན། ཐ་སྙད་དུ་གང་ཟག་གི་བདག་དང་། ཆོས་ཀྱི་བདག་གཉིས་ཡོད་པ་ཁས་ལེན་པའི་སངས་རྒྱས་པ་སྔོན་ཆད་མ་བྱུང་བ་འཛིན་མའི་ཁྱོན་འདིར་འབྱུང་བ་ངོ་མཚར་ཆེའོ་ཞེས་བྲིས་སོ། །དེ་ནི་མི་འཐད་དེ། ལྷན་སྐྱེས་ཀྱི་ཞེན་ཡུལ་ཞེས་པ་ནི་ལྷན་སྐྱེས་ཀྱི་བློས་བདེན་པར་གཟུང་བའི་འཛིན་སྟངས་ཀྱི་གཟུང་བྱ་དེ་ཉིད་ཡིན་ལ་ཞེན་པ་ལྟར་ཐ་སྙད་དུ་མེད་པ་མ་ཡིན་ཏེ་ཞེས་པའི་དོན་ནི་ལྷན་སྐྱེས་ཀྱི་བློའི་དམིགས་ཡུལ་གྱི་ང་ཙམ་དེ་ཉིད་ཡིན་ཞིང་དེ་ནི་གང་ཟག་ཙམ་ཡིན་གྱི་གང་ཟག་གི་བདག་མ་ཡིན་སྔ་མ་ནི་གང་ཟག་གི་བདག་ཡིན་ཀྱང་ཐ་སྙད་དུ་ཡོད་པར་ཁས་མི་ལེན་པས་གང་ཟག་གི་བདག་དང་། ཆོས་ཀྱི་བདག་ཐ་སྙད་དུ་ཡོད་པར་ཁས་ལེན་མི་དགོས་པའི་ཕྱིར་རོ། །སྲུང་འཁོར་གྱི་སྐབས་སུ་ཟླ་ཟེར་ལས། གུར་གྱི་དོན་ནི་རྡོ་རྗེའི་ས་གཞི་ལ་སོགས་པ་སྲུང་འཁོར་ཐུན་མོང་བ་སྤྱིའི་མིང་ཡིན་ཏེ། སློབ་དཔོན་ཨ་བྷ་ཡ་ཀ་རས། ས་འོག་གི་མཐར་ཐུག་པར་ཇི་ལྟར་མངོན་པར་འདོད་པའི་རྒྱར་གཅིག་ཏུ་སྲ་ཞིང་མཁྲེགས་ལ་འབར་བའི་རྡོ་རྗེའི་རང་བཞིན་གྱི་ས་གཞི་བསྐལ་པའི་མཐའི་མེ་ལྟར་འབར་བའི་འོད་ཟེར་འབར་བའི་ཕྲེང་བས་མཚམས་བཅིངས་པ་དང་། ས་འོག་ནས་སྟེང་གི་བར་ཤིན་ཏུ་མཐོ་བ་མཐུག་ཅིང་མཁྲེགས་པ་སྲ་ཞིང་འབར་བའི་རྡོ་རྗེའི་རྭ་བ་དང་། རྡོ་རྗེ་རྭ་བའི་སྟེང་དུ་བར་མཚམས་མེད་པར་དུམ་བུ་གཅིག་ཏུ་གྱུར་ཅིང་། སྟེང་རྡོ་རྗེའི་མདའི་དྲྭ་བ་དང་། འོག་ཏུ་རྡོ་རྗེའི་བླ་རེས་བརྒྱན་པའི་རྡོ་རྗེའི་གུར་འབར་བའོ། །ཞེས་གསལ་བར་གསུངས་པའི་ཕྱིར་རོ་ཞེས་གསུངས་པ་ལ། ཉི་ཟེར་ལས། དེ་ནི་མི་འཐད་དེ། སྤྱིར་རྒྱུད་དང་། རྒྱ་གཞུང་ཕལ་མོ་ཆེ་ནས་རྡོ་རྗེའི་རྭ་བ་དང་གུར་སོགས་སོ་སོའི་མིང་དུ་གསུངས་ཀྱི། གུར་ཞེས་པ་སྲུང་འཁོར་ཐུན་མོང་བ་སྤྱིའི་མིང་དུ་གསུངས་པ་མ་མཐོང་ལ། ཁྱད་པར་དུ་རྫོགས་ཕྲེང་དུ་གསུངས་པའི་ཨ་བྷ་ཡའི་ལུང་དེའི་དགོངས་པ་ནི། འོག་ཕྱོགས་སུ་ས་འོག་གི་མཐར་ཐུག་པར་རྡོ་རྗེའི་ས་གཞི་འོད་ཟེར་འབར་བའི་ཕྲེང་བ་དང་བཅས་པས་མཚམས་བཅིངས་པ་དང་། ས་འོག་ནས་སྟེང་གི་བར་རྡོ་རྗེའི་རྭ་བ་དང་། རྭ་བའི་སྟེང་དུ་བར་མཚམས་མེད་པར་དུམ་བུ་གཅིག་ཏུ་གྱུར་པའི་རྡོ་རྗེའི་གུར་འབར་བ་ལ། སྟེང་དུ་མདའི་དྲྭ་བ་དང་། འོག་ཏུ་བླ་རེས་བརྒྱན་པ་བསྒོམ་པར་ཤིན་ཏུ་གསལ་བའི་ཕྱིར་ན་ལུང་དེས་རྡོ་རྗེའི་གུར་ཞེས་པ་ཐུན་མོང་གི་སྲུང་འཁོར་གྱི་མིང་དུ་བསྟན་པ་བསྒྲུབ་མི་ནུས་ཤིང་དེར་མ་ཟད། ཨ་བྷཱ་ཡའི་ལུགས་ལ། རྡོ་རྗེའི་ས་གཞི་དང་། རྭ་བ་དང་། གུར་དང་། བླ་རེ་དང་། མདའི་དྲྭ་བ་རྣམས་སོ་སོ་ཐ་དད་པར་བཞེད་པ་ཡིན་ནོ། །མན་ངག་སྙེ་མ་ལས། སྣ་ཚོགས་ཆུ་སྐྱེས་ལ་རཾ་ལས་བསྐྱེད་པའི་ཉི་མ་ལ་གནས་པའི་ཧཱུྃ་ལས་བྱུང་བའི་སྣ་ཚོགས་རྡོ་རྗེ་ལ་གནས་པའི་ཧཱུྃ་ཡིག་གི་འོད་ཟེར་ལས་སྐྱེས་པའི་འབར་བའི་རྡོ་རྗེའི་ཚོགས་རྣམས་ཀྱིས་བར་མཚམས་མེད་པར་དུམ་བུ་གཅིག་ཏུ་གྱུར་པའི་རྡོ་རྗེའི་རྭ་བ་དང་། གུར་དང་མདའི་དྲྭ་བ་དང་། བླ་རེ་དང་། འོག་ཏུ་སྣ་ཚོགས་རྡོ་རྗེའི་རང་བཞིན་གྱིས་ས་གཞི་རྗེས་སུ་བསམས་ནས་ཞེས་གསུངས་པའི་ཕྱིར་རོ། །འོ་ན་མན་སྙེ་དང་། རྫོགས་ཕྲེང་དུ། རྡོ་རྗེའི་གུར་གྱི་ནང་དུ་ཆོས་འབྱུང་དང་གཞལ་ཡས་ཁང་བསྒོམ་པར་ཡང་ནས་ཡང་དུ་གསུངས་པ་དེ་རྣམས་ཀྱིས་ཐུན་མོང་གི་སྲུང་འཁོར་སྤྱིའི་མིང་ལ་གུར་ཞེས་བསྟན་པ་མ་ཡིན་ནམ་སྙམ་ན་མ་ཡིན་ཏེ། དཔེར་ན་རྒྱལ་པོ་གུར་ནང་དུ་བཞུགས་ཟེར་བས་གུར་གྱི་འོག་གི་ས་གཞི་ཡང་གུར་ཡིན་པར་བསྟན་མི་དགོས་པ་བཞིན་ནོ་ཞེས་པ་བྲིས་སོ། །དེ་ནི་མི་འཐད་དེ། སྤྱིར་རྒྱུད་རྒྱ་གཞུང་ཕལ་མོ་ཆེ་ནས། རྡོ་རྗེའི་རྭ་བ་དང་། གུར་སོགས་སོ་སོའི་མིང་དུ་གསུངས་ཀྱང་། ཨ་བྷཱ་ཡའི་ལུགས་ལ། རྣམ་པ་གཉིས་ཡོད་པ་ལས་རྣལ་འབྱོར་རྫོགས་ཕྲེང་དུ་ནི་ཐ་སྙད་བདེ་བའི་ཕྱིར་དུ་སྲུང་འཁོར་ཐུན་མོང་བ་སྤྱི་ལ་རྡོ་རྗེའི་གུར་ཞེས་པའི་ཐ་སྙད་མཛད་ནས་འོག་ཏུ་གཞལ་ཡས་ཁང་སྲུང་འཁོར་གྱི་ནང་དུ་བསྒོམ་པའི་གནས་སྐབས་རྣམས་ལ་རྡོ་རྗེ་གུར་གྱི་ནང་དུ་ཆོས་འབྱུང་དང་གཞལ་ཡས་ཁང་བསྒོམ་པར་གསུངས་པའི་ཕྱིར་དང་། མན་ངག་སྙེ་མ་ལས་གསུངས་པའི་སྔར་གྱི་ལུང་ལས་ནི། རྭ་བ་དང་གུར་སོགས་སོ་སོར་བཞེད་པ་ཡིན་པའི་ཕྱིར་རོ། །རྒྱལ་པོ་གུར་གྱི་ནང་དུ་བཞུགས་ཞེས་པ་དང་དཔེ་དོན་མཚུངས་པ་ཡང་མ་ཡིན་ཏེ། དེའི་ཚེ་གནས་ཀྱི་གཙོ་བོ་གུར་ཡིན་ཞིང་། རྣལ་འབྱོར་རྫོགས་ཕྲེང་དུ་བཤད་པའི་གུར་སྲུང་འཁོར་ཐུན་མོང་བ་སྤྱིའི་མིང་དུ་མི་བྱེད་ན། གུར་བྱེ་བྲག་པ་དེ་ཆོས་འབྱུང་གཞལ་ཡས་ཁང་བསྐྱེད་པའི་གནས་ཀྱི་གཙོ་བོར་མི་འགྲུབ་པའི་ཕྱིར་རོ། །ཟླ་ཟེར་ལས་དབུས་དང་སྟེང་འོག་གི་ཁྲོ་བོ་གསུམ་ཞབས་གཡས་བརྐྱང་དུ་བསྒྱུར་བ་ནི་སྟངས་སྟབས་བཟློག་པ་ཡིན་ཞེས་གསུངས་པ་ལ། ཉི་ཟེར་དགེ་བཤེས་ན་རེ། དྲི་མེད་གྲགས་པའི་དེ་ཉིད་བཅུ་པར། གཞན་རྣམས་ཌོཾ་བིའི་འདི་ལ་བྲིས་བཤུས་བྱས་པ་ལྟ་བུར་སྣང་བ་ལ་སྐབས་འདིར་གཡོན་བརྐྱང་པས་བཞུགས་པ་ཞེས་བཤད་འདུག་པས་བརྟག་དགོས་སོ་ཞེས་བྲིས་པ་མི་འཐད་དེ། གཞན་རྣམས་བྲིས་བཤུས་བྱས་ཤིང་སྐབས་དེ་བྲིས་བཤུས་བྱས་པ་མ་ཡིན་པར་སྣང་བས་བརྟག་རྒྱུ་ཅི་ཡང་མེད་པའི་ཕྱིར་རོ། །གཡོན་བརྐྱང་དུ་བཤད་ན་ཡང་དེས་མི་གནོད་དེ། དེ་ནི་དང་པོའི་བསྒོམ་ཚུལ་ཡིན་ལ་འདིར་ནི་ཕྱིས་སྟངས་སྟབས་བསྒྱུར་བའི་ཚེ་གཡས་བརྐྱང་དུ་ཁས་བླངས་པའི་ཕྱིར། ཡང་ཟླ་ཟེར་ལས། སློབ་དཔོན་ཁ་ཅིག་གིས་ཁྲོ་བོ་བཅུའི་སྲུང་འཁོར་ལ་རྩིབས་བཅུ་པའི་སྲུང་བའི་འཁོར་ལོ་ཞེས་པ་ཙམ་ལས་ཐུན་མོང་མ་ཡིན་པའི་སྲུང་བའི་འཁོར་ལོའི་ཐ་སྙད་མི་སྣང་མོད་སྙམ་ན་དེ་ཡིན་མོད་ཀྱི་འོན་ཀྱང་རྗེ་བཙུན་ཡབ་སྲས་ཀྱིས་ཐུན་མོང་བའི་སྲུང་འཁོར་ཞེས་པའི་ཐ་སྙད་མཛད་པ་ནི། གུར་ལས། དེ་ནས་རྡོ་རྗེ་འཛིན་རྒྱལ་ནི། ཐམས་ཅད་དབུགས་དབྱུང་རབ་སྩོལ་བས། །དམ་ཚིག་རྡོ་རྗེ་བསྲུང་དོན་དུ། །སྦས་པའི་སྤྱོད་ཡུལ་འདི་གསུངས་པ། །ཞེས་ཁྲོ་བོ་བཅུའི་སྲུང་འཁོར་ནི་སྦས་ཏེ་གསུངས་པར་བཤད་ལ། གང་དུ་སྦས་ན། ཀྱཻ་རྡོ་རྗེ་རྩ་བའི་རྒྱུད་དུ་སྦས་སོ། །དེས་ན་རྩ་བའི་རྒྱུད་དུ་གསུངས་པའི་གུར་སོགས་ལ་ཐུན་མོང་བ་དང་། བཤད་རྒྱུད་དུ་གསུངས་པའི་ཁྲོ་བོ་བཅུ་ལ་ཐུན་མོང་མ་ཡིན་པར་འཇོག་པ་ཡིན་གྱི། རྭ་གུར་སོགས་བླ་མེད་ཀྱི་མངོན་རྟོགས་ཕལ་མོ་ཆེ་ལས་འབྱུང་བས་ཐུན་མོང་བ་དང་། ཁྲོ་བོ་བཅུ་ཀྱཻ་རྡོ་རྗེ་ཁོ་ན་ལས་འབྱུང་བས་ཐུན་མོང་མ་ཡིན་པར་འདོད་པ་ནི་དུས་འཁོར་དང་། གསང་འདུས་སོགས་ལ་ཁྲོ་བོ་བཅུའི་སྲུང་འཁོར་ཡོད་པས་དེར་མ་ངེས་སོ་ཞེས་གསུངས་པ་ལ། ཉི་ཟེར་བླ་མ་ན་རེ། ཀྱཻ་རྡོར་རྩ་བའི་རྒྱུད་དུ་སྦས་པས་ཐུན་མོང་མ་ཡིན་པར་འཇོག་ན་ནི་མི་འཐད་དེ། དེ་ལྟར་ན་དུས་འཁོར་དང་། གསང་འདུས་སོགས་ཀྱི་ཁྲོ་བོ་བཅུའི་སྲུང་འཁོར་རྣམས་ཀྱང་སྐབས་འདིར་ཐུན་མོང་མ་ཡིན་པའི་སྲུང་འཁོར་དུ་འགྱུར་ཏེ། ཀྱཻ་རྡོ་རྗེ་རྩ་བའི་རྒྱུད་དུ་སྦས་པའི་སྲུང་འཁོར་ཡིན་པའི་ཕྱིར། དེས་ན་རྭ་གུར་སོགས་ཐུན་མོང་གི་བཤད་རྒྱུད་སཾ་བུ་ཊི་དང་། བླ་མེད་ཀྱི་རྒྱུད་ཕལ་ཆེ་བ་ལས་འབྱུང་བ་དང་། ཐུན་མོང་བ་ཡིན་པས་ཐུན་མོང་བ་དང་། སྐབས་འདིའི་ཁྲོ་བོ་བཅུའི་སྲུང་འཁོར་ནི་ཐུན་མོང་མ་ཡིན་པའི་བཤད་རྒྱུད་གུར་ནས་གསུངས་པའི་སྲུང་འཁོར་ཡིན་པས། ཐུན་མོང་མ་ཡིན་པའི་སྲུང་འཁོར་དུ་ཤེས་པར་བྱའོ་ཞེས་བྱ་བ་བྲིས་སོ། །དེ་ནི་མི་འཐད་དེ། དུས་འཁོར་དང་། གསང་འདུས་སོགས་ཀྱི་ཁྲོ་བཅུའི་སྲུང་འཁོར་རྣམས་ཀྱཻ་རྡོ་རྗེ་རྩ་བའི་རྒྱུད་དུ་སྦས་པའི་སྲུང་འཁོར་ཡིན་པ་མི་གྲུབ་པའི་ཕྱིར་དང་། རྭ་གུར་སོགས་ཐུན་མོང་གི་བཤད་རྒྱུད་སཾ་བུ་ཊི་དང་། བླ་མེད་ཀྱི་རྒྱུད་ཕལ་ཆེ་བ་ལས་འབྱུང་བ་དང་། ཐུན་མོང་བ་ཡིན་པས་ཐུན་མོང་བར་འཇོག་པ་ལ་ཁྲོ་བཅུའི་སྲུང་འཁོར་ཡང་ཐུན་མོང་བར་འགྱུར་རོ་ཞེས་པའི་སྐྱོན་བསྟན་པ་དེ་ཉིད་མ་བསལ་བས་སྐྱོན་དེ་སླར་ཡང་འཇུག་པའི་ཕྱིར་རོ། །ཆོས་འབྱུང་གི་སྐབས་སུ་ཉི་ཟེར་མཁན་པོས། ལྕང་ར་མཁན་པོའི་གསང་འདུས་ཀྱི་བསྐྱེད་རིམ་གྱི་བཤད་པར། ཆོས་འབྱུང་གི་དབྱིབས་ནི་ཟུར་གསུམ་པ་གྱེན་དུ་ལངས་པ་ཟུར་ཕྲ་བ་འོག་ཏུ་ཟུག་ཅིང་། ཟུར་གཉིས་སྟེང་དུ་གནས་པ་ཤེས་རབ་མའི་སྐྱེ་གནས་ཀྱི་གཟུགས་ཅན་ཁོག་པ་སྟོང་པ་སྟེ་ཞེས་པའི་ཕྱོགས་སྔ་བརྗོད་ནས་དེ་ནི་མི་འཐད་དེ། ཡན་ལག་མེད་པའི་རྡོ་རྗེས་སྟེང་ཡངས་པ་ཟུར་གསུམ་པ་ཞེས་དང་། ཁ་སྦྱོར་དྲི་མེད་ལས་ཆོས་འབྱུང་གྲུ་གསུམ་སྟེང་དུ་རྒྱས་པ་ཞེས་དང་། བྷ་ཝ་བྷ་དྲས་ཆོས་འབྱུང་ནི་ཕྱག་རྒྱ་གྲུ་གསུམ་གྱེན་དུ་གནས་པ་ཞེས་དང་། ཀུ་མུ་ཏི་ལས་གྲུ་གསུམ་ནི་ཕྱི་རོལ་གྱི་མཐའ་གསུམ་མོ་ཞེས་གསུངས་པའི་ཕྱིར་རོ་ཞེས་བཀག་ནས་འདིར་ལྕང་ར་མཁན་པོ་བླ་མ་དང་བཅས་པའི་འདོད་ལུགས་དཔལ་འཛིན་གྱིས་བཤད་པ་ལྟར་ཡིན་པ་ལ་ཟླ་ཟེར་ལས་དེ་དག་གི་ལུགས་ནི་ཆོས་འབྱུང་གི་དབྱིབས་རེ་ཁཱས་བཅད་པའི་གྲུ་གསུམ་ལྟ་བུ་ལ་རྩེ་མོ་གཅིག་ཐུར་དང་། གཉིས་གྱེན་དུ་བསྟན་པར་འདོད་པ་ཡིན་ནོ་ཞེས་དགག་པ་བྱེད་ཀྱིན་ཡོད་པར་སྣང་སྟེ། དེ་ནི་ཕྱོགས་སྔའི་ནམ་མ་ལངས་བར་དགག་པའི་ཉི་མ་ཤར་བར་ཟད་དོ་ཞེས་བྲིས་སོ། །དེ་ནི་མི་འཐད་དེ། གོང་གི་ལུང་དེ་དག་གི་དོན་སྟེང་ཕྱོགས་སུ་ཟུར་གསུམ་ཡོད་པ་སྲིད་ན་ཡང་། ཕྱོགས་སྔའི་བློ་ཡུལ་དུ་སྤྱིར་ཟུར་གསུམ་དང་སྟེང་ཕྱོགས་སུ་རྒྱས་པ་ཙམ་ཞིག་ལས་བསྟན་མི་ནུས་ཤིང་དེ་ཙམ་ནི་ཕྱོགས་སྔ་སྨྲ་བ་པོ་ཡང་འདོད་པའི་ཕྱིར་རོ། །ལྕང་ར་མཁན་པོ་བླ་མ་དང་བཅས་པའི་འདོད་པ་ཁོ་བོའི་བླ་མས་གསུངས་པ་ལྟར་ཡིན་པ་ཡང་། བླ་མ་རི་བོ་དགེ་ལྡན་པ་རང་གིས། རྟའི་ཡོབ་གྱེན་དུ་ལངས་པ་ལྟ་བུའོ་ཞེས་དཔེ་དང་བཅས་ཏེ་གསུངས་པའི་གསུང་སྒྲོས་དགེ་ལྡན་པ་ཐམས་ཅད་ཀྱིས་འཆད་པས་དེ་དག་གིས་དགོངས་པ་དཔལ་འཛིན་གྱིས་བཤད་པ་ལྟར་ཡིན་ཞེས་སྨྲ་བ་ནི་ཆ་མེད་ཀྱི་རྒྱུས་གཏམ་དུ་སྣང་ངོ་། །བར་སྲིད་ཀྱི་སྐབས་སུ་ཟླ་ཟེར་ལས། མདོར་ན་འཁོར་ལོའི་སྟེང་དུ་བར་སྲིད་མཚོན་བྱེད་ཡིག་འབྲུ་ལྔ་བསྒོམས་ནས་དེ་ནས་དེ་འདྲ་བའི་ཡིག་འབྲུ་ལྔ་ཆ་གཅིག་ཆད་དེ་འབྱུང་བཞི་འཁོར་ལོ་དང་བཅས་པ་ལ་ཐིམ་པས་གཞལ་ཡས་ཁང་གྲུབ་པར་བསྒོམས་ཏེ། མི་ཐུབ་ཟླ་བས། སྲིད་པ་བར་མར་བསམ་བྱས་ནས། །ཨེ་ཝཾ་ཉིད་དུ་རབ་ཏུ་འདྲེས། །འདྲེས་གྱུར་དེ་ལས་བྱུང་བ་ནི། །སངས་རྒྱས་ཕོ་བྲང་ཐུན་མོང་ཡིན། །ཞེས་དང་། གྲུབ་ཆེན་ཌོཾ་བྷི་ཝས། བདག་ཀྱང་བསམ་པར་བྱ་བ་སྟེ། །ཨེ་ཝཾ་ཉིད་དུ་བདག་དང་ནི། །འདྲེས་པར་གྱུར་པ་འཁོར་ལོ་ཡིན། །གྲུ་བཞི་པ་ལ་སྒོ་བཞི་པ། །ཞེས་གསུངས་སོ། །དེ་རྣམས་ཀྱི་དོན་བསྡུས་ན། རྗེ་བཙུན་གྱི་ཡན་ལག་དྲུག་པར་བར་དོའི་ཤེས་པ་འབྱུང་བཞི་འཁོར་ལོ་དང་བཅས་པ་ལ་ཞུགས་པས་གཞལ་ཡས་ཁང་ཞེས་གསུངས། གལ་ཏེ་བར་དོ་བསྐྱེད་པ་དང་བསྟིམ་པ་བཤད་པ་བདེན་མོད། ཆ་གཅིག་བར་སྣང་ལ་འཇོག་པ་བྱ་བ་མི་དགོས་སོ་སྙམ་ན། དེ་ལྟར་ན་རང་གི་བར་སྲིད་ཀྱིས་ཡི་དམ་ལྷའི་སྐྱེ་བ་ལེན་མི་དགོས་པར་འགྱུར་ཏེ། འདིར་ཐམས་ཅད་བསྟིམས་ནས་གཞལ་ཡས་ཁང་དུ་སྐྱེ་བ་བླངས་པའི་ཕྱིར་རོ། །གཞན་ཡང་འོག་ཏུ་རྒྱུ་རྡོ་རྗེ་འཛིན་པ་སྙོམས་འཇུག་བྱེད་པའི་སྐབས་སུ་བར་སྲིད་འཇུག་པར་བཤད་པ་དེ་གང་ཟག་གཞན་གྱི་བར་སྲིད་དུ་འགྱུར་ཏེ། རྣལ་འབྱོར་པ་རང་གི་བར་སྲིད་ཐམས་ཅད་སྔར་བཅུག་ཟིན་པའི་ཕྱིར། གལ་ཏེ་རྒྱུ་རྡོ་རྗེ་འཛིན་པ་སྙོམས་འཇུག་བྱེད་པའི་སྐབས་སུ་སྔར་དང་འདྲ་བའི་བར་སྲིད་བསྒོམས་ནས་དེ་རང་ལ་བཅུག་པས་ཆོག་གོ་སྙམ་ན་དེ་ལྟར་ན་བར་སྲིད་དེ། འཆི་སྲིད་ལས་ལྡང་མི་དགོས་པར་འགྱུར་ཏེ། སྐབས་དེར་འཆི་སྲིད་ཀྱི་སྦྱོང་བྱེད་གང་ཡང་མ་བསྟན་པའི་ཕྱིར་རོ། །དེས་ན་ཡི་གེ་ལྔ་པོ་འདི་བར་སྣང་ལ་རྒྱུ་རྡོ་རྗེ་འཛིན་པ་ཡབ་ཡུམ་སྙོམས་པར་མ་ཞུགས་ཀྱི་བར་ལ་འཇོག་ཅིང་། གཞལ་ཡས་ཁང་བསྐྱེད་པའི་སྐབས་འདིར་སྔར་བཤད་པ་ལྟར་དེ་ལས་བར་དོའི་ཤེས་པ་ཆ་གཅིག་ཆད་ནས་འབྱུང་བཞི་ལ་ཐིམ་པར་བསྒོམས་ལ། འབྲས་བུ་རྡོ་རྗེ་འཛིན་པའི་གོང་དུ་ནི་ཐམས་ཅད་ཐིམ་པ་ཡིན་ནོ་ཞེས་ཤེས་པར་བྱའོ་ཞེས་གསུངས་པ་ལ། ཉི་ཟེར་ལས། དེ་ལྟར་ན་གཙུག་ཏོར་འཁོར་ལོས་སྒྱུར་བ་ལྟ་བུ་དབུས་ཀྱི་ཁྲོ་བོའི་ལྟོ་བར་རྟེན་དང་བརྟེན་པར་བཅས་པའི་དཀྱིལ་འཁོར་བསྐྱེད་པའི་ཚེ་བདག་ཉིད་ཆ་གཉིས་སུ་བྱས་ཏེ། ཆ་གཅིག་དབུས་ཀྱི་ཁྲོ་བོ་དང་། ཆ་གཅིག་བར་སྣང་ལ་བཞག་ནས། ཕྱིས་དཀྱིལ་འཁོར་གྱི་གཙོ་བོ་བྱེད་དགོས་པར་འགྱུར་ཏེ། དེ་ལྟར་མ་ཡིན་ན་འོག་གི་དཀྱིལ་འཁོར་གྱི་གཙོ་བོ་དེ་གང་ཟག་གཞན་ཡིན་པར་ཐལ་ཏེ། རྣལ་འབྱོར་པ་རང་ཉིད་སྔར་དབུས་ཀྱི་ཁྲོ་བོར་བྱས་ཟིན་པའི་ཕྱིར་རོ། །གལ་ཏེ་གོང་དུ་རང་ཉིད་ཆ་གཉིས་སུ་མ་བྱས་ཀྱང་རྗེས་སུ་བདག་གི་སེམས་རྒྱུད་དེ་ཉིད་དཀྱིལ་འཁོར་གྱི་གཙོ་བོར་བསྒོམས་པས་ཆོག་གོ་སྙམ་ན། དེ་ནི་བར་སྲིད་འཇུག་ཚུལ་ལ་ཡང་མཚུངས་སོ། །དེས་ན་གཞལ་ཡས་ཁང་ལ་བར་སྲིད་བསྲེ་བའི་དགོས་པ་རྗེ་ས་སྐྱ་པ་ཆེན་པོས། འབྱུང་བཞིའི་དཀྱིལ་འཁོར་ཐམས་ཅད་ཀྱང་། །རང་སེམས་ཙམ་དུ་གོ་བྱའི་ཕྱིར། །འབྱུང་བཞིའི་གསེབ་ཏུ་རང་སེམས་བསྒོམ། །ཞེས་གསུངས་ལ་འཇུག་པའི་ཚུལ་ལ་དཔལ་ལྡན་ས་སྐྱ་པཎྜི་ཏས་བླ་མའི་རྣལ་འབྱོར་གྱི་སྐབས་སུ། རང་གི་ལུས་ཀྱི་ཡན་ལག་རེ་རེ་ནས་བཅད་དེ། ཀ་པཱ་ལར་སྐྱུར་ཚར་བའི་རྗེས་སུ་བར་སྐབས་དེར་ཡང་ལུས་སུ་སྣང་བ་གཅིག་ཡོད་པས་དེ་ཡང་དོར་ལ་ཞེས་སླར་ལུས་འདོར་བའི་དམིགས་པ་བཤད་པ་ལྟར་བྱས་པས་ཆོག་གི་ཆ་གཅིག་བར་སྣང་ལ་འཇོག་པ་སོགས་ཀྱི་རང་བཟོ་བྱེད་པ་ནི་ཧ་ཅང་ཐལ་ལོ་ཞེས་བྲིས་སོ། །དེ་ནི་མི་འཐད་དེ། འདིར་བར་སྲིད་ནི་སྦྱང་གཞི་ལ་སྦྱར་དགོས་པས། བར་སྲིད་སྔ་མ་སྐྱེ་བ་བླངས་པ་དང་། ཕྱི་མ་སྐྱེ་བ་བླངས་པ་གཉིས་རྒྱུད་གཅིག་ན་བར་དུ་འཆི་སྲིད་སྦྱོང་བྱེད་དགོས་ཤིང་། རྒྱུད་ཐ་དད་ན་འོག་གི་ལྷ་རང་ཉིད་ཀྱི་སྦྱོང་བྱེད་དུ་མི་འགྱུར་བའི་སྐྱོན་ཡོད་ལ། གཙུག་ཏོར་འཁོར་ལོས་སྒྱུར་བ་དང་། འོག་གི་ལྷ་གཉིས་ལ་ནི་དེ་ལྟ་བུའི་ཁྱད་པར་སྦྱར་རྒྱུ་མེད་པའི་ཕྱིར། གལ་ཏེ་ཡོད་ན་དེ་གཉིས་རྒྱུད་ཐ་དད་པ་ལ་ནི་སྐྱོན་སྔ་མ་ལྟར་འཇུག་ལ། རྒྱུད་གཅིག་ན་གཞིའི་ཡན་ལག རྒྱུའི་ཡན་ལག རྐྱེན་གྱི་ཡན་ལག་གསུམ་པོ་བར་སྲིད་སྦྱོང་བྱེད་དུ་འཆད་པ་ལ་ཁྱེད་རང་གིས་བདེན་ལན་སྟེར་བས་གཙུག་ཏོར་འཁོར་ལོས་སྒྱུར་བའི་ལྟོ་བའི་ནང་དུ་དེ་དག་བསྒོམ་པའི་ཚེ་ན་བར་དེར་འཆི་སྲིད་སྦྱོང་བྱེད་གང་ཡིན་སྨྲ་དགོས་སོ། །འཇུག་པའི་ཚུལ་ལ་ལུས་སྔ་མ་དུམ་བུར་གཏུབས་པའི་རྗེས་སུ་ཡང་ལུས་ཀྱི་སྣང་བ་གཅིག་འབྱུང་བ་དང་དཔེ་དོན་དུ་སྦྱར་བ་ཡང་མི་འཐད་དེ། དེ་དག་ནི་བློའི་སྣང་བ་ལ་འཆར་ཚུལ་ཙམ་ཡིན་ལ་བར་སྲིད་སྔ་ཕྱི་ནི་སྦྱང་གཞི་ལ་སྦྱར་དགོས་པས་དོན་སྟེང་དུ་གནས་པ་གཅིག་དགོས་པའི་ཕྱིར་རོ། །གཞན་ཡང་ཉི་ཟེར་ལས་བདུད་རྩི་འོད་ལས། ཨེ་ཝཾ་ཉིད་དུ་བདག་དང་ནི། །འདྲེས་པར་གྱུར་པ་འཁོར་ལོ་ཡིན། །ཞེས་དང་། མི་ཐུབ་ཟླ་བས། སྲིད་པ་བར་མར་བསམས་བྱས་ནས། །ཨེ་ཝཾ་ཉིད་དུ་རབ་ཏུ་འདྲེས། །ཞེས་པའི་དོན་བར་དོ་ཨེ་ཝཾ་གི་རྣམ་པས་འཇུག་པ་ལ་བཤད་འདུག་པ་ནི་ཤིན་ཏུ་ནོར་ཏེ། ཨེ་ཝཾ་ནི་ཆོས་འབྱུང་གི་མིང་གི་རྣམ་གྲངས་ཡིན་པས་གང་དུ་འདྲེས་པའི་གཞི་ཆོས་འབྱུང་སྟོན་གྱི་བར་དོའི་རྣམ་པ་སྟོན་པ་མ་ཡིན་པའི་ཕྱིར་ཏེ་གཞན་དུ་ན་མི་ཐུབ་ཟླ་བའི་ཡན་ལག་དྲུག་པར། ཧོ་གཉིས་དབུས་སུ་གནས་པ་ནི། །སྐུ་གསུང་ཐུགས་ཀྱི་ཡི་གེ་སྟེ། །འདི་ནི་བར་མའི་སེམས་ཅན་མིང་། །ཞེས་དང་། རིགས་བསྡུས་ཀྱི་སྒྲུབ་ཐབས་སུ། ཧོ་ཡིག་དམར་པོའི་འོད་ཟེར་བཅས། །གཉིས་ཀྱི་བར་དུ་འོད་ཟེར་གསུམ། །ཞེས་ཡིག་འབྲུ་ལྔ་ཡི་རྣམ་པས་འཇུག་པར་གསུངས་པ་དང་འགལ་བའི་ཕྱིར་རོ། །ཁ་ཅིག ཡབ་ཀྱི་ཡན་ལག་དྲུག་པའི་སྐབས་སུ་བར་དོ་གཞལ་ཡས་ཁང་ལ་རྫོགས་པར་བསྲེས་ནས་རྒྱུ་རྡོ་རྗེ་འཆང་གི་ཞལ་དུ་མི་འཇུག་པ་དག་པའི་ཤེས་བྱེད་དུ། རྒྱ་གར་བའི་ཡབ་ཀྱི་སྒྲུབ་ཐབས་ཐམས་ཅད་ལ་འབྱུང་བཞི་འཁོར་ལོ་དང་བཅས་པའི་སྟེང་དུ་བར་སྲིད་བསྒོམས་པའི་རྐྱེན་གྱིས་འབྱུང་བཞི་འཁོར་ལོ་དང་བཅས་པ་ལས་གཞལ་ཡས་ཁང་གྲུབ་པ་ཡིན་གྱི། བར་སྲིད་བསྲེ་བ་མ་ཡིན་ལ། བར་སྲིད་ནི་རྒྱུ་རྡོ་རྗེ་འཆང་གི་ཞལ་དུ་འཇུག་པར་བཤད་ཅིང་། ཌོཾ་བྷི་ཝ་དང་མི་ཐུབ་ཟླ་བའི་ཡུམ་གྱི་སྒྲུབ་ཐབས་གཉིས་སུ་རྒྱུ་རྡོ་རྗེ་འཆང་ལ་བར་སྲིད་འཇུག་རྒྱུ་མེད་པས་གཞལ་ཡས་ཁང་ལ་རྫོགས་པར་བསྲེ་བར་གསུངས་པའི་ཕྱིར་ཞེས་བཀོད་པར་གྲགས་པ་བདེན་ན་ཡབ་ཀྱི་ཡན་ལག་དྲུག་པའི་སྐབས་སུ་རྒྱུ་རྡོ་རྗེ་འཆང་གི་ཞལ་དུ་བར་སྲིད་མི་འཇུག་པའི་ཤེས་བྱེད་དུ་གཞལ་ཡས་ཁང་ལ་བར་སྲིད་མི་བསྲེ་བར་རྒྱུ་རྡོ་རྗེ་འཆང་གི་ཞལ་དུ་འཇུག་པར་རྒྱ་གར་གྱི་གཞུང་ཐམས་ཅད་ལས་བཤད་པའི་ཕྱིར་ཞེས་བཀོད་པ་འདི་ལ་སེམས་ཡོད་རྣམས་ཀྱིས་དཔྱོད་གཅིག། །།གཞལ་ཡས་ཁང་གི་སྐབས་སུ་གནད་ཀྱི་ཟླ་ཟེར་ལས་དེའི་ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང་བ་རྣམས་མཉམ་པོར་གྱུར་པའི་དབུས་སྔོན་པོ་ཕྱོགས་མདོག་ལས་ཆ་ཕྲན་གཅིག་གིས་མཐོ་བ། དེའི་དབུས་སུ་གཽ་རཱི་ལ་སོགས་པའི་ལྷ་མོ་བརྒྱད་ཀྱི་སྐུ་ལས་སྐྱེས་པའི་འོད་རྣམས་ཀྱིས་ནི། རང་རང་གི་གནས་འོད་གསལ་བར་བྱས་པ་ལ་ལྷའི་སྣམ་བུ་ཞེས་བྱ་བ་ཡིན་ཏེ། དཔལ་མཆོག་ཌོཾ་བྷི་བས། ས་བོན་ལས་ནི་སྤྲོ་བར་བྱ། །གར་བྱེད་པ་ཡི་བརླ་སྟེངས་སུ། །པདྨ་ལ་ནི་རིམ་ཇི་བཞིན། །ཞེས་དང་། བདེ་བའི་རྡོ་རྗེས། ལྷ་མོ་བརྒྱད་ཀྱི་འོད་ཀྱིས་ཀྱང་། །གསལ་བར་ལྷ་ཡི་སྣམ་བྱས་བྱ། །ཞེས་བཤད་པས་སོ། །དེས་ན་གཞུང་འདིའི་དོན། སྒོའི་ནང་དུ་ལྷ་སྣམ་ཆ་ཆེན་གཅིག་བཞག་ནས་དེ་ལ་ལྷ་མོ་བརྒྱད་འགོད་པར་འདོད་པ་ནི་ཤིན་ཏུ་མི་འཐད་དེ། ལྷ་སྣམ་བྱས་ན་འཕར་མ་གཉིས་པར་འགྱུར་བ་ལ། འདི་རྩ་རྒྱུད་ལས་འཕར་མ་གཅིག་དང་སྒོ་བཞི་པ་ཞེས་བཤད་པ་དང་འགལ་བའི་ཕྱིར་རོ་ཞེས་གསུངས་པ་ལ། ཉི་ཟེར་ལས་དེ་ནི་མི་འཐད་དེ། དེ་ལྟར་ན་ཤཱནྟི་པའི་འཁྲུལ་སྤོང་ལས། དེ་ཡི་ནང་གི་རིམ་པ་ལ། །པདྨ་འདབ་བརྒྱད་གེ་སར་བཅས། །སྒོ་བཞི་དང་ནི་གྲུ་བཞི་དང་། །དབུས་མ་དག་ཏུ་སྟན་དག་ནི། །ཚངས་དབང་ཉེ་དབང་དྲག་པོ་དང་། །གང་གི་གྲུབ་པའི་ལྷ་མོ་དཀར། །ཁ་དོག་ནག་མོ་གྲི་གུག་དང་། །རོ་ཧི་ཏའི་ཉ་འཛིན་པ་ཤར་གྱི་སྒོར་ཟླ་བའི་གདན་ལ་བསམ་མོ་ཞེས་གསུངས་པ་དང་། ནག་པོ་པས་དེ་ཉིད་གསལ་བར། དེ་ཡི་སྙིང་པོའི་པདྨ་ནི། །འདབ་མ་སྣ་ཚོགས་གེ་སར་བཅས། །སྒོ་བཞི་དང་ནི་མཚམས་བཞི་རུ། །སྣ་ཚོགས་པདྨ་རི་བོང་ཅན། །ཚངས་པ་དབང་པོ་ཉེ་དབང་དྲག །ཅེས་གསུངས་པ་དང་། མཚོ་སྐྱེས་རྡོ་རྗེས། དེ་ལ་ཤར་གྱི་ཕྱོགས་ཀྱི་སྒོར་ནི། དཀར་མོ་གཟུགས་ཀྱི་ཕུང་པོའི་རང་བཞིན་ཞེས་སོགས་དང་། དག་པ་རྡོ་རྗེའི་སྒྲོན་མར་ཤར་ལ་སོགས་པའི་སྒོ་རྣམས་སུ་རིམ་པ་ཇི་ལྟ་བར་ཚངས་པ་དང་ཞེས་སོགས་དང་། ཡན་ལག་མེད་པའི་རྡོ་རྗེས། དེའི་དཀྱིལ་འཁོར་དུ་སྣ་ཚོགས་པདྨ་འདབ་མ་བརྒྱད་པ་གེ་སར་དང་བཅས་པའོ། །དེ་བཞིན་ཕྱོགས་མཚམས་པདྨ་ནི། །རང་དང་རང་གདན་གེ་སར་ལ། །ཞེས་གསུངས་པ་དང་། རྗེ་བཙུན་རྩེ་མོའི་ཀྱཻ་རྡོར་འགྲེལ་པ་ལུགས་ཀྱི་དགོངས་པ་ཡང་། སྒོ་ཡི་ནང་དུ་ལྷ་སྣམ་ཆ་ཆེན་གཅིག་བཞག་ནས། དེ་ལ་ལྷ་མོ་བརྒྱད་འགོད་པ་མ་ཡིན་པར་འགྱུར་ཏེ། ལྷ་སྣམ་བྱས་ན་འཕར་མ་གཉིས་པར་འགྱུར་བ་ལས། འདིར་རྩ་རྒྱུད་ལས། འཕར་མ་གཅིག་དང་སྒོ་བཞི་པ། །ཞེས་བཤད་པའི་ཕྱིར་རོ། །གཞན་ཡང་ཁྱེད་རང་གི་ཟླ་ཟེར་ལས། རིན་ཆེན་འབར་བར། གསུམ་པའི་རྒྱབ་ཕྱེད་དེ་ཕྱེད་ནང་། །རྡོར་ཕྲེང་བཞི་པ་ལྷ་སྣམ་ཡིན། །ཞེས་ཆ་ཆེན་གསུམ་པའི་མཐའ་ཐིག་ཡན་ཆད་ཟླུམ་པོར་བསྐོར་བ་གཙོ་བོའི་པདྨ་རྡོར་ཕྲེང་དང་བཅས་པ་དང་། ཆ་ཆེན་བཞི་པ་ལྷ་སྣམ་དུ་བཤད་པ་ལ། ནག་པོ་པའི་དཀྱིལ་ཆོག་ལས། ལྷ་ཡི་གནས་ཀྱི་སྐུད་པ་ནི། །མཚམས་སུ་སྒོ་དང་མཚུངས་པར་གདབ། །ཅེས་ལྷ་སྣམ་ཆ་ཆེན་གཅིག་བཤད་ཅིང་། ཡང་དེར་རྡོ་རྗེའི་ཕྲེང་བས་བསྐོར་བའི་སྙིང་པོའི་དཀྱིལ་འཁོར་གྱི་ས་གཞི་ནི་སྔོན་པོར་བྱས་ལ་ཞེས་དང་། དབང་ལྡན་གྱི་མཚམས་ཀྱི་ལྷ་སྣམ་ལ་སྣ་ཚོགས་པདྨའི་སྟེང་དུ་སེང་གེ་ནག་པོ་བྲིའོ་ཞེས་སོགས་བཤད་པས་སློབ་དཔོན་དེ་རྣམས་ཀྱི་པདྨ་རྡོར་ཕྲེང་གིས་བསྐོར་བ་གཙོ་བོའི་གནས་དང་། ལྷ་སྣམ་གྱི་ཕྱོགས་མཚམས་བརྒྱད་དུ་པད་འདབ་ཆུང་ངུ་རེ་ལ་ལྷ་མོ་བརྒྱད་འགོད་པར་བཞེད་དོ་ཞེས་སྨྲས་པ་དང་ནང་འགལ་བའི་སྐྱོན་ཡོད་དེ། ཟླ་ཟེར་མཁན་པོས། རིན་ཆེན་འབར་བ་དང་། ནག་པོ་པའི་གཞུང་འདིའི་དོན་སྒོའི་ནང་དུ་ལྷ་སྣམ་ཆ་ཆེན་གཅིག་བཞག་ནས། དེར་ལྷ་མོ་བརྒྱད་འགོད་པར་འདོད་པ་ནི་ཤིན་ཏུ་མི་འཐད་དེ། ལྷ་སྣམ་བྱས་ན་འཕར་མ་གཉིས་པར་འགྱུར་བ་ལས། འདིར་རྩ་རྒྱུད་ལས། འཕར་མ་གཅིག་དང་སྒོ་བཞི་པ། །ཞེས་བཤད་པ་དང་འགལ་ལོ་ཞེས་སྨྲས་ན་མི་སྨྲ་བའི་བརྟུལ་ཞུགས་བཟུང་དགོས་པར་འགྱུར་རོ། །དེས་ན་འགྲེལ་པ་ལུགས་ཀྱི་དགོངས་པ་ལྷ་སྣམ་ཆ་ཆེན་གཅིག་བཞག་པ་ལ་ལྷ་མོ་རྣམས་འགོད་པ་ཡིན་ཏེ་ཞེས་དམ་བཅས་ནས། དེའི་སྒྲུབ་བྱེད་དུ་མི་ཐུབ་ཟླ་བའི་ཡན་ལག་དྲུག་པ་དང་། ཀུ་མུ་ཏི་དང་། བཟང་པོ་ཡོངས་བཟུང་དང་། རིན་ཆེན་འབར་བ་དང་། དབང་ཆུ་ཆེན་མོའི་འཕར་མ་གཉིས་པ་སྟོན་པའི་སྐབས་ཀྱི་ལུང་རྣམས་བྲིས་སོ། །དེ་དག་ནི་མི་འཐད་དེ། ཡབ་ཀྱི་སྐབས་སུ་པད་འདབ་བརྒྱད་ལ་ལྷ་མོ་མི་འགོད་པར་ལྷ་སྣམ་ལ་འགོད་པའི་ཤེས་བྱེད་དུ། ཤཱནྟི་པའི་འཁྲུལ་སྤོང་དང་། ནག་པོ་པའི་དེ་ཁོ་ན་ཉིད་གསལ་བ་དང་། དག་པ་རྡོ་རྗེའི་སྒྲོན་མེ་རྣམས་ཀྱིས་སྒོ་མཚམས་བརྒྱད་དུ་ལྷ་མོ་འགོད་པར་བཤད་པ་བཀོད་པ་ལ་ནི་འགལ་བའི་ཁུར་ཆེན་པོ་ཡོད་པ་ནི་འོག་འཕར་མ་གཉིས་ཀྱི་དོན་བཤད་པའི་སྐབས་སུ་བཏེག་སྟེ། ཁྱེད་ཀྱི་གྲུབ་མཐའི་སྤྱི་བོར་བཞག་པར་བྱའོ། །ཡན་ལག་མེད་པའི་རྡོ་རྗེས་སྒོ་མཚམས་ལ་འགོད་པར་བཤད་པ་ནི་ལུགས་གཞན་ཡིན་པས། མི་ཐུབ་ཟླ་བའི་ལུགས་ལ་མི་གནོད་ཅིང་། རྗེ་བཙུན་རྩེ་མོའི་འགྲེལ་པ་ལུགས་ཀྱི་དབང་ཆུའི་དགོངས་པ་སྒོའི་ནང་དུ་ལྷ་སྣམ་ཆ་ཆེན་གཅིག་བཞག་ནས་དེ་ལ་ལྷ་མོ་བརྒྱད་འགོད་པ་མ་ཡིན་པར་འགྱུར་བ་ལ་ནི་རྣམ་པར་ཕྱེ་སྟེ་ལན་གདབ་དགོས་ཏེ་འོག་ཏུ་འཆད་དོ། །གནད་ཀྱི་ཟླ་ཟེར་ལས། རིན་ཆེན་འབར་བ་དང་། ནག་པོ་པའི་དཀྱིལ་ཆོག་གཉིས་ཀྱི་ལུགས་ལ་སྒོའི་ནང་དུ་ལྷ་སྣམ་ཆ་ཆེན་གཅིག་བཞག་ནས། དེ་ལ་ལྷ་མོ་བརྒྱད་འགོད་པར་བཤད་པ་དང་ནང་འགལ་ཏེ་ཞེས་སོགས་བྲིས་པ་ཡང་བློ་གྲོས་རྩིང་བ་སྟེ། སློབ་དཔོན་དེ་གཉིས་ཀྱི་འཕར་མ་གཉིས་ཀྱི་འདོད་ཚུལ་དང་མན་ངག་ལུགས་དང་། སློབ་དཔོན་མི་ཐུབ་ཟླ་བའི་འཕར་མ་གཉིས་ཀྱི་འདོད་ཚུལ་ཁྱད་པར་ཤིན་ཏུ་ཆེ་བ་མ་ཕྱེད་པའི་གཏམ་དུ་སྣང་བའི་ཕྱིར་རོ། །མི་ཐུབ་ཟླ་བའི་དགོངས་པ་ཡབ་ཀྱི་སྐབས་སུ་ལྷ་སྣམ་ལ་ལྷ་མོ་བརྒྱད་འགོད་པར་འདོད་པ་ནི་མི་འཐད་དེ། ཡན་ལག་དྲུག་པར། འདིར་ནི་ཆུ་སྐྱེས་འདབ་མ་ནི། །དྲུག་པ་བྲི་ཞིང་ཕྲེང་བ་གཅིག །ཅེས་གསུངས་པ་འདིར་ནི་ཞེས་པ་ལྷ་མོ་བརྒྱད་ཀྱི་གནས་ལ་སྙེག་པར་གསལ་བའི་ཕྱིར་དང་། སྒོ་མཚམས་བརྒྱད་ལ་འགོད་པར་བཤད་པ་ཙམ་གྱིས་ལྷ་སྣམ་ལ་འགོད་ན་འགལ་འདུ་ཡོད་པ་ནི་འོག་ཏུ་འཆད་པའི་ཕྱིར་དང་། ཁྱེད་རང་གིས་དྲངས་པའི་ཀུ་མུ་ཏའི་ལུང་དང་། བཟང་པོ་ཡོངས་བཟུང་གཉིས་ཀྱང་འདབ་མ་བརྒྱད་ལ་འགོད་པའི་ལུང་དུ་སྣང་བའི་ཕྱིར་རོ། །མན་ངག་ལུགས་ཀྱི་དབང་ཆུར་འཕར་མ་གཉིས་པ་བཤད་པ་འགྲེལ་པ་ལུགས་ཀྱི་ཤེས་བྱེད་དུ་འདྲེན་པ་ནི་བཞད་གད་ཀྱི་གནས་ཏེ། དབང་ཆུ་འདི་ཡབ་ཡུམ་གཉིས་ཀྱི་ཐུན་མོང་བ་ཡིན་པས་འཕར་མ་གཉིས་པས་ཡུམ་གྱི་དཀྱིལ་འཁོར་སྟོན་པའི་ཕྱིར་རོ། །ཁ་ཅིག་འདིར་དབང་ཆུར་འཕར་མ་གཉིས་པ་གསུངས་པ་ཡབ་ཡུམ་གྱི་ཐུན་མོང་བ་ཡིན་པ་མི་འཐད་དེ། ཡབ་ཀྱི་ཡིན་ན་ཡུམ་གྱི་ཡིན་པར་འགལ། ཡུམ་གྱི་ཡིན་ན་ཡབ་ཀྱི་ཡིན་པར་འགལ་བའི་ཕྱིར་ཞེས་སྨྲ་བ་གྲག་ན་ཡང་། དེ་ནི་ཁས་བླང་མེད་པའི་དགག་པ་སྟེ། དབང་ཆུའི་ཐིག་གི་སྐབས་དེ་ཐུན་མོང་བར་ཁས་བླངས་ཀྱི། འཕར་མ་གཉིས་པ་ཐུན་མོང་བར་ཁས་མ་བླངས་པའི་ཕྱིར་རོ། །དེ་ལ་ཡང་རིགས་པ་སྔ་མ་མཚུངས་སོ་ཞེ་ན་དེ་ནི་མཐར་ཐུག་གཅོད་པའི་རིགས་པས། ཐ་སྙད་ཀྱི་རྣམ་བཞག་འགོག་པར་སྣང་བས་དགག་སྒྲུབ་ཀྱི་གནད་མི་ཤེས་པའི་གཏམ་སྟེ། དེ་ལྟར་ན་བསྟན་བཅོས་དང་འཇིག་རྟེན་ལ་ཐུན་མོང་བའི་ཐ་སྙད་ཅིག་ཀྱང་མེད་པར་ཐལ་བའི་ཕྱིར་རོ། །ཡུམ་གྱི་དཀྱིལ་འཁོར་གྱི་སྐབས་སུ་རྩ་རྒྱུད་ལས། འཕར་མ་གཉིས་དག་ཅེས་གསུངས་པའི་དོན་ལ། ཁོ་བོའི་བླ་མའི་དྲི་ལན་གྱི་ཡིག་ཆ་ཞིག་ལས། འཕར་མ་གཉིས་ཀྱི་དོན་པདྨ་འདབ་བརྒྱད་ཉིས་བརྩེགས་ལ་འཆད་པ་མི་འཐད་དེ། རྡོ་རྗེ་གུར་དང་། ཌོཾ་བྷི་ཝ། གཉིས་མེད་རྡོ་རྗེ། རྗེ་བཙུན་ཆེན་པོ། ཤཱནྟི་པ་རྣམས་ཀྱིས་ཡུམ་གྱི་སྐབས་ཀྱི་ལྷ་མོ་ཕྱི་མ་བརྒྱད་སྒོ་མཚམས་ལ་འགོད་པར་བཤད་པའི་ཕྱིར་རོ། །དབང་ཆུ་ཆེན་མོར་ཡང་འཕར་མ་གཉིས་པར་བྱེད་ན་ལྷ་སྣམ་ཆ་ཆེན་གཅིག་བཞག་ནས་དེའི་ནང་དུ་པདྨ་འདབ་བརྒྱད་བསྐོར། འཕར་མ་གཅིག་པར་བྱེད་ན་འདབ་བརྒྱད་གཅིག་གིས་སྒོའི་ནང་ཡན་ཆད་ཁྱེད་པར་བྱེད་པར་གསུངས་པའི་ཕྱིར་ན་འཕར་མ་གཉིས་ལ་འདབ་བརྒྱད་ཕྱི་མ་ནི་དོན་མེད་དོ། །དེས་ན་འཕར་མ་གཉིས་ཀྱི་དོན་ནི་པདྨ་འདབ་བརྒྱད་པའམ། བཞི་པ་ལ་རྡོ་རྗེའི་རྭ་བ་མེ་འོད་ཀྱིས་བསྐོར་བ་འཕར་མ་གཅིག་དང་། ཆོས་འབྱུང་གྲུ་གསུམ་པའི་ནང་དུ་ཆུད་པའི་དཀྱིལ་འཁོར་གྲུ་བཞི་སྒོ་བཞི་འཕར་མ་གཅིག་ཡིན་ཏེ། དེ་ལྟར་དུ་བླ་མ་མངའ་རིས་པའི་ཚིག་འགྲེལ་ལས། འཕར་མ་གཉིས་ནི་ནང་ན་ལྷ་མོ་བདུན་གྱི་གནས་ལ་རྡོ་རྗེ་རྭ་བ་དང་། མེ་འོད་ཀྱིས་བསྐོར་བ་ཕྱི་གྲུ་བཞི་སྒོ་བཞི་པའོ་ཞེས་གསུངས་ཤིང་ལྷ་མོ་བདུན་གྱི་གནས་ནི་བསྒོམ་དོན་གྱི་དབང་དུ་བྱས་ལ། སློབ་དཔོན་མཚོ་སྐྱེས་ཀྱིས་ཀྱང་ཉིས་བརྩེགས་ནི་ཁང་པ་ཉིས་རིམ་མོ། །ལྟེ་བ་ཡིས་ནི་གཅིག་ཡིན་ཏེ། །ཞེས་པ་ནི་ལྟེ་བས་ཉེ་བར་མཚོན་པས་པདྨ་ནི་དབུས་ཀྱི་པདྨ་ཞེས་བྱ་བའི་དོན་ཏོ། །ཟུར་གསུམ་གྱིས་ནི་ཞེས་བྱ་བ་ནི་ཆོས་ཀྱི་འབྱུང་གནས་ཀྱིས་མཚོན་པའི་བརྩེགས་མ་གཞན་གྱི་ཕྱི་རོལ་ཕྱིའི་གཽ་རཱི་ལ་སོགས་པའི་གནས་གྲུ་བཞིའོ་ཞེས་དང་། དེ་བཞིན་དུ་དམ་ཚིག་རྡོ་རྗེ་བྷ་ཝ་བྷ་ཏྲ་རྣམས་ཀྱིས་ཀྱང་གསལ་བར་བཤད་པའི་ཕྱིར་ཞེས་བཞེད་པ་ལ་ཉི་ཟེར་བདག་པོ་ན་རེ། འདི་ལ་ཞིབ་ཏུ་དཔྱད་པར་བྱ་སྟེ་དེ་ཡང་སྤྱིར་རྒྱ་བོད་ཀྱི་གཞུང་ལུགས་རྣམས་ལས་འཕར་མའི་བཤད་པ་མི་འདྲ་བ་ཤིན་ཏུ་མང་སྟེ། ལྷ་སྣམ་གྱི་ནང་དུ་པདྨ་ལ་རྡོ་རྗེ་རྭ་བ་དང་། མེ་རིས་བསྐོར་བ་ལ་འཕར་མ་དང་པོ་དང་། ལྷ་སྣམ་ཕན་ཆད་ཆོས་འབྱུང་དང་བཅས་པའི་དཀྱིལ་འཁོར་མེ་རི་ཚུན་ཆད་ལ་འཕར་མ་ཕྱི་མར་འདོད་པའི་ལུགས་དང་། ལྷ་མོ་བཅོ་ལྔ་ལ་ཐུན་མོང་གི་པད་གདན་མེད་པར་ནང་དུ་ལྷ་ལྔ་དང་། ཕྱི་རུ་བཅུ་ལ་པད་ཉི་དང་རོ་གདན་བཅོ་ལྔ་སོ་སོར་བཏིང་བའི་རིམ་པ་གཉིས་ལ་རྡོ་རྭ་མེ་རི་ཚུན་ཆོད་ཉིས་སྦྲག་རྩིག་པའི་ནང་ན་ཡོད་པ་ལ་འཕར་མ་གཉིས་པར་འདོད་པའི་ལུགས་དང་། པདྨ་འདབ་བརྒྱད་ཀྱིས་སྒོ་ནང་ཚུན་ཆད་ཁྱེད་པར་བྱས་ནས་པདྨའི་ཟེ་འབྲུ་ཉིད་ལ་འཕར་མ་དང་པོ་དང་། འདབ་མ་ཕན་ཆད་ལ་འཕར་མ་ཕྱི་མར་འདོད་པའི་ལུགས་དང་། ནང་གི་པདྨ་འདབ་བཞི་ལ་འཕར་མ་དང་པོ་དང་། ཕྱིའི་པདྨ་འདབ་བརྒྱད་ལ་འཕར་མ་ཕྱི་མར་འདོད་པའི་ལུགས་དང་། ནང་དུ་པདྨ་འདབ་བརྒྱད་ཉིས་རིམ་ལ་འཕར་མ་དང་པོར་འདོད་པ་དང་། ཆོས་འབྱུང་ལ་འཕར་མ་ཕྱི་མར་འདོད་པའི་ལུགས་དང་། པདྨ་འདབ་བརྒྱད་ཉིས་རིམ་ལ་འཕར་མ་གཉིས་སུ་འདོད་པའི་ལུགས་ཏེ་དྲུག་མཐོང་ལ། དེ་ལ་ལུགས་དང་པོ་ནི་མཚོ་སྐྱེས་དང་། བྷ་ཝ་བྷ་ཏྲ་དང་། དམ་ཚིག་རྡོ་རྗེ་དང་། ནག་པོ་པའི་དྲན་པའི་འབྱུང་གནས་དང་། དཀོན་མཆོག་འབྱུང་གནས་ཀྱི་བདག་མེད་མའི་སྒྲུབ་ཐབས་དང་། རྗེ་བཙུན་རྩེ་མོའི་རྣམ་བཤད་ཉི་འོད་རྣམས་ཀྱི་དགོངས་པ་ཡིན་ལ། འདི་ལ་དགོངས་ནས་དབང་ཆུར་ཡབ་ལ་ཡང་འཕར་མ་གཉིས་པའི་ཐ་སྙད་ཡོད་པར་གསུངས་སོ། །ལུགས་གཉིས་པ་ནི་འདུད་རྩི་འོད་དང་། མི་ཐུབ་ཟླ་བའི་དགོངས་པ་ཡིན་ཏེ། མི་ཐུབ་ཟླ་བས་བདག་མེད་མའི་སྒྲུབ་ཐབས་སུ། ཆོས་འབྱུང་ལས་སྐྱེས་འཁོར་ལོ་ནི། །ཁ་སྦྱོར་གཉིས་དག་སྐྱོན་མེད་པ། །ཞེས་དང་། ཀུ་མུ་ཏི་ལས། འཕར་མ་གཉིས་ཞེས་བྱ་བ་ནི། །ཁ་སྦྱོར་ལྟ་བུའི་འཕར་མ་སྟེ། །རྡོ་རྗེའི་ཕྲེང་བས་ཡོངས་སུ་བཅད་པ་དང་། སྦས་པའོ་ཞེས་འབྱུང་བས་འཕར་མའི་དོན་རྡོར་ཕྲེང་གིས་བཅད་པ་དང་སྦས་པ་ལ་གསུངས་ལ། ཡབ་ཀྱི་སྐབས་སུ་ཀུ་མུ་ཏི་དང་། ཡན་ལག་དྲུག་པའི་ལུང་གོང་དུ་དྲངས་པ་ལྟར་འཕར་མ་གཅིག་པ་ལ་གཞལ་ཡས་ཁང་གི་ནང་དུ་རྡོ་རྗེ་ཕྲེང་བ་གཅིག་གསུངས་པས་འཕར་མ་གཉིས་པ་ལ་གཞས་ཡས་ཁང་གི་ནང་དུ་རྡོར་ཕྲེང་གཉིས་ཡོད་པར་གྲུབ་ཅིང་། རྗེ་བཙུན་རྩེ་མོས་ཀྱང་ནང་གི་རྣལ་འབྱོར་མ་ལྔ་ལ། རྡོ་རྗེ་རྭ་བ་མེ་རིས་བསྐོར་བ་འཕར་མ་ནང་མ་དང་། ཕྱིའི་རྣལ་འབྱོར་མ་བཅུ་ལ་རྡོ་རྗེ་རྭ་བ་མེ་རིས་བསྐོར་བ་འཕར་མ་ཕྱི་མ་སྟེ། འཕར་མ་གཉིས་པ་ཞེས་གསལ་བར་གསུངས་ལ། ལྷ་སྣམ་ལ་ཡང་གདན་སོ་སོ་བ་བྱེད་པ་ཡང་བདུད་རྩི་འོད་ལས། འཁོར་ལོ་དེར་ནི་སྲོག་སོང་པ། །བཅོ་ལྔ་རྣམས་པར་བསྒོམ་པར་བྱ། །རྣལ་འབྱོར་མ་ཡི་ཕྱོགས་མཚམས་ལས། །གདན་ནི་བཅོ་ལྔ་ཉིད་དུ་བརྗོད། །ཅེས་རོ་གདན་ལས་ལོགས་སུ་གདན་བཅོ་ལྔ་གསུངས་པ་དང་། རྗེ་བཙུན་རྩེ་མོས་ལྷ་མོ་རྣམས་ཀྱི་གནས་སུ་པད་ཉི་དང་རོ་གདན་བཅོ་ལྔ་བསྐྱེད་པར་བྱ་སྟེ། ཞེས་གདན་སོ་སོར་ཤིན་ཏུ་གསལ་བར་གསུངས་པའི་ཕྱིར་རོ། །ལུགས་གསུམ་པ་ནི། པདྨའི་མྱུ་གུའི་དགོངས་པ་སྟེ་དེ་ཡང་པདྨ་འདབ་བརྒྱད་ཀྱི་གཙོ་མོ་ལ་ཉེ་བར་རྡོ་རྗེ་མ་སོགས་བཞི་དང་། པུཀྐ་སཱི་སོགས་བཞི་སྟེ་བརྒྱད་བསྐོར། ཕྱོགས་ཀྱི་འདབ་མ་དེ་ཉིད་ཀྱི་སྟེང་ལྷ་མོ་ནང་མ་རྣམས་ཀྱི་རྒྱབ་ཏུ་གཽ་རཱི་ལ་སོགས་བཞི་འགོད་པར་བཞེད་དོ། །ལུགས་བཞི་པ་ནི། ཌཾ་ཀ་ད་ཤའི་དགོངས་པ་ཡིན་ལ། དེ་ཉིད་རྗེ་ས་ཆེན་དང་། ནེ་ཚོ་སྦལ་སྟོན་གྱིས་ཀྱང་བཤད་པས་མན་ངག་ལུགས་ཀྱི་བཞེད་པ་གཅིག་དང་ཡང་མཐུན་ནོ། །ལུགས་ལྔ་པ་ནི། ཀྱཻ་རྡོ་རྗེའི་རྒྱུད་ཀྱི་དོན་བསྡུས་པ་ཞེས་བྱ་བའི་དགོངས་པ་ཡིན་ཞིང་། མན་ངག་ལུགས་ཀྱི་འཕར་མ་གཉིས་པའི་ལུགས་གཅིག་འདི་དང་ཡང་མཐུན་པར་སྣང་ངོ་། །ལུགས་དྲུག་པ་ནི། འཕགས་པ་རིན་པོ་ཆེས་གསལ་བར་གསུངས་པ་ལྟར་ཡིན་ལ། དེ་ཉིད་རྗེ་ས་ཆེན་གྱིས་བརྟག་གཉིས་ཀྱི་དཀའ་འགྲེལ་དུ། འཕར་མ་གཉིས་ཞེས་པ་ནི། ནང་གི་འཕར་མ་ལ་རྡོ་རྗེའི་རྭ་བ་དང་། མེ་འོད་གཅིག་ཡོད་ལ། ཕྱི་ལའང་དེ་བཞིན་དུ་ཡོད་པར་བསྒོམ་མོ་ཞེས་གསུངས་པ་དང་། རྗེ་བཙུན་ཆེན་པོས་བདག་མེད་མའི་སྒྲུབ་ཐབས་སུ། ནང་གི་རྣལ་འབྱོར་མ་ལྔ་ལ་རྡོ་རྗེ་རྭ་བ་མེ་རིས་བསྐོར་བ་འཕར་མ་ནང་མ་དང་། ཕྱིའི་རྣལ་འབྱོར་མ་བཅུ་ལ་རྡོ་རྗེ་རྭ་བ་མེ་རིས་བསྐོར་བ་འཕར་མ་ཕྱི་མ་སྟེ་འཕར་མ་གཉིས་པ་ཞེས་གསུངས་པ་གོང་དུ་དྲངས་པའི་དགོངས་པ་ཡང་ཡིན་པས། མདོར་ན་མན་ངག་ལུགས་ཀྱི་འཕར་མ་གཉིས་པའི་ལུགས་གསུམ་པ་ཡིན་པར་ཤེས་པར་བྱའོ། །རྒྱ་གཞུང་འགའ་ཞིག་ལས་ཀྱང་འདི་བཞིན་དུ་བཤད་དེ། དཔའ་བོ་རྡོ་རྗེས། སཾ་བུ་ཊིའི་འགྲེལ་པ་དང་། ཨ་བྷ་ཡ་ཀ་རའི་མན་ངག་སྙེ་མར་འདི་བཞིན་དུ་གསུངས་པའི་ཕྱིར་རོ། །འོ་ན་གོང་དུ་བཤད་པ་ལྟར་རྗེ་བཙུན་ཆེན་པོའི་གསུང་རབ་ལས་ཕྱིའི་ལྷ་མོ་བརྒྱད་སྒོ་མཚམས་སུ་འགོད་པར་གསུངས་པས་གནོད་དམ་སྙམ་ན་མི་གནོད་དེ། དེ་ལྟར་ན་མན་ངག་ལུགས་ཀྱི་ཡབ་ཀྱི་དཀྱིལ་འཁོར་དུ་ལྷ་མོ་བརྒྱད་དབུས་ཀྱི་པདྨ་ཆེན་པོའི་འདབ་མ་ལ་མི་འགོད་པར་འགྱུར་ཏེ། རྩ་རྒྱུད་དང་། ས་ཆེན་གྱི་བརྟག་གཉིས་ཀྱི་དཀའ་འགྲེལ་དང་། རྗེ་བཙུན་སྐུ་མཆེད་ཀྱི་ཡན་ལག་བཞི་དྲུག་རྣམས་ལས་སྒོ་མཚམས་སུ་འགོད་པར་གསུངས་པའི་ཕྱིར་རོ། །གཞན་ཡང་རྗེ་བཙུན་རྩེ་མོས་དབང་ཆུ་ཆེན་མོར་པདྨའི་འདབ་མ་རྣམས་ལ་ལྷ་མོ་རྣམས་ཀྱི་མཚན་མ་བཀོད་པ་དང་། ཤར་སྒོར་གྲི་གུག་ནག་པོ་ཞེས་སོགས་གསུངས་པ་ཡང་ཚིག་མགོ་མཇུག་འགལ་བར་ཐལ་བའི་སྐྱོན་ཡོད་དོ། །སྒོ་མཚམས་སུ་འགོད་པར་བཤད་པས་པད་འདབ་ལ་མི་འགོད་པར་འགྱུར་བའི་ཕྱིར་རོ། །དེས་ན་དཀར་མོ་ལ་སོགས་པའི་ལྷ་མོ་བརྒྱད་སྒོ་མཚམས་སུ་འགོད་པར་གསུངས་པའི་ཕྱིར་ན། འདབ་བརྒྱད་ཕྱི་མ་དོན་མེད་དོ་ཟེར་བ་ནི་རྣམ་པར་མ་བརྟགས་པ་ཁོ་ནའོ། །དེ་བས་ན་དབང་ཆུར་སྒོ་མཚམས་སུ་གསུངས་ཀྱང་། འདབ་བརྒྱད་ལ་འགོད་པར་བཤད་པའི་ཤུགས་ལས་ཀྱང་འཕགས་པ་རིན་པོ་ཆེའི་བཞེད་པ་ལྟར་འཐད་པར་གྲུབ་བོ། །དེ་ལྟ་མ་ཡིན་ན་ཁྱེད་འདོད་པའི་མན་ངག་ལུགས་ལ། ནང་གི་ལྷ་མོ་ལྔ་འདབ་བརྒྱད་གེ་སར་དང་བཅས་པ་ལ་བཀོད་ནས། ཕྱིའི་ལྷ་མོ་བརྒྱད་སྒོ་མཚམས་ལ་འགོད་པ་ཡང་མི་འཐད་པར་འགྱུར་ཏེ། རྗེ་བཙུན་གྱིས་བདག་མེད་མའི་སྒྲུབ་ཐབས་སུ་ལྷ་མོ་རྣམས་ཀྱི་གནས་སུ་པད་ཉི་དང་གདན་རོ་བཅོ་ལྔ་བསྐྱེད་པར་བྱ་སྟེ། ཞེས་སོགས་གདན་བཅོ་ལྔ་བསྐྱེད་པར་དངོས་སུ་གསལ་བར་གསུངས་པས་སོ། །འོ་ན་ལུང་འདིས་ཁྱེད་རང་གི་མན་ངག་ལུགས་ལ་ཡང་གནོད་དོ་སྙམ་ན་མི་གནོད་དེ། རྗེ་བཙུན་ཆེན་པོས་བདག་མེད་མའི་སྒྲུབ་ཐབས་འདི་གཙོ་བོར་བདུད་རྩི་འོད་ཀྱི་རྗེས་སུ་འབྲང་བའི་སྒྲུབ་ཐབས་ཡིན་པས། མན་ངག་ལུགས་དང་ཅུང་ཟད་མི་འདྲ་བའི་ཁྱད་པར་མང་རབ་ཡོད་ལ། སྐབས་འདིར་རྡོ་རྭ་མེ་རི་ཉིས་སྦྲག་ལ་འཕར་མ་གཉིས་པར་བྱེད་པ་མན་ངག་ལུགས་དང་། འགྲེལ་པ་ལུགས་གཉིས་ཀ་མཐུན་པ་ལ། མི་འདྲ་བའི་ཁྱད་པར་མན་ངག་ལུགས་ལ། ཡབ་ཡུམ་གཉིས་ཀའི་འཁོར་གྱི་ལྷ་མོ་རྣམས་པདྨ་ཆེན་པོའི་སྟེང་དུ་སོ་སོའི་པད་ཆུང་ལ་འགོད་ལ། འགྲེལ་པ་ལུགས་ལ་ཡབ་ཡུམ་གཉིས་ཀའི་སྐབས་སུ་འཁོར་གྱི་ལྷ་མོ་པད་ཆེན་མེད་པར་སོ་སོའི་པད་ཆུང་ལ་འགོད་པ་ཡིན་པར་ཤིན་ཏུ་གསལ་བའི་ཕྱིར་རོ། །རྒྱུ་མཚན་ཌོཾ་བྷི་པའི་རྗེས་འབྲང་དང་བཅས་པའི་རྒྱ་བོད་ཀྱི་གཞུང་ལུགས་རྣམས་ལས་ཤིན་ཏུ་གསལ་བར་འབྱུང་བས་རྟོགས་ཤིང་། དེས་ན་མན་ངག་ལུགས་ཀྱི་འཕར་མ་གཉིས་པའི་ལུགས་གཉིས་པོ་རྗེ་བཙུན་གྱི་གསུང་ལས་དངོས་སུ་མི་གསལ་བར་སྙམ་པ་ལ་རང་གི་རྟོག་པས་བརྟགས་པ་ལས་འཕགས་པའི་རྗེས་སུ་འབྲང་བར་རིགས་ཏེ། འཕགས་པའི་ལུགས་འདི་གོང་དུ་བཤད་པ་ལྟར་ས་ཆེན་ཡབ་སྲས་ཀྱི་བཞེད་པར་ཤུགས་ལས་གྲུབ་པ་ཡིན་ལ། ཁྱེད་ཀྱི་རྟོག་བརྟགས་དེ་ཤུགས་ལ་ཡང་མི་འགྲུབ་པའི་ཕྱིར་རོ་ཞེས་བྲིས་སོ། །ད་ནི་འདི་ལ་ཁོ་བོས་ཞིབ་ཏུ་བརྟག་པར་བྱ་སྟེ། དེ་ལ་ལུགས་དང་པོ་རྒྱ་གར་བའི་སློབ་དཔོན་དེ་རྣམས་ཀྱི་བཞེད་པ་ཡིན་པ་ནི་དེ་བཞིན་དུ་སྣང་ཞིང་། ཁོ་བོའི་བླ་མ་ཐམས་ཅད་མཁྱེན་པས་ཀྱང་བཤད་ཟིན་ལ། རྗེ་བཙུན་རྩེ་མོའི་རྣམ་བཤད་ཉི་འོད་ཀྱི་དགོངས་པ་ཡང་དེ་བཞིན་ཡིན་མོད་ཀྱི་དེ་ལ་དགོངས་ནས་དབང་ཆུར་ཡབ་ལ་ཡང་འཕར་མ་གཉིས་པའི་ཐ་སྙད་ཡོད་པར་གསུངས་ཞེས་པ་ནི་མ་བརྟགས་པ་སྟེ། དབང་ཆུར་འཕར་མ་གཉིས་པའི་ཐ་སྙད་གསུངས་ཀྱང་དེ་ཡབ་ལ་སྦྱར་རྒྱུ་མ་ཡིན་པར་བཤད་ཟིན་པའི་ཕྱིར་དང་། རྣམ་བཤད་ཉི་འོད་ལས་ནང་དུ་པདྨ་འདབ་མ་བརྒྱད་པ་ལ་ལྷ་མོ་བཅོ་ལྔ་ལ་བསྐོར་བ་གཅིག་གོ །གྲུ་གསུམ་གྱིས་ནི་ཕྱི་མ་སྟེ། །ཞེས་ཡུམ་གྱི་སྐབས་སུ་འཕར་མ་གཉིས་པ་བཤད་ཀྱི། ཡབ་ཀྱི་སྐབས་སུ་བཤད་པ་མི་སྣང་ལ། ཡུམ་གྱི་སྐབས་སུ་འཕར་མ་གཉིས་ཡོད་པ་ལ་དགོངས་ནས། ཡབ་ཀྱི་སྐབས་སུ་འཕར་མ་གཉིས་པའི་ཐ་སྙད་ཡོད་པར་གསུངས་ཞེས་པ་ནི། རྗེ་བཙུན་རྩེ་མོ་ལ་སྐུར་འདེབས་ཤིན་ཏུ་ཆེ་བ་ཡིན་ཏེ། རྩ་རྒྱུད་ལས། ཡུམ་གྱི་སྐབས་སུ་འཕར་མ་གཉིས་དག་སྐྱོན་མེད་པ། །ཞེས་དང་། ཡབ་ཀྱི་སྐབས་སུ་འཕར་མ་གཅིག་དང་སྒོ་བཞི་པ། །ཞེས་དངོས་སུ་གསུངས་པ་དེ་རྗེ་བཙུན་རྩེ་མོས་འགོག་པར་ཁས་ལེན་དགོས་པའི་ཕྱིར་རོ། །ལུགས་གཉིས་པ་ནི་བདུད་རྩི་འོད་དང་མི་ཐུབ་ཟླ་བའི་དགོངས་པ་གཏན་མ་ཡིན་ཏེ། སྒྲུབ་བྱེད་མ་ངེས་ཤིང་གནོད་བྱེད་ཡོད་པའི་ཕྱིར་རོ། །སྒྲུབ་བྱེད་མ་ངེས་པ་ནི་མི་ཐུབ་ཟླ་བས་བདག་མེད་མའི་སྒྲུབ་ཐབས་ལ་ནི། ཁ་སྦྱོར་གཉིས་ཡོད་པར་བསྟན་གྱི་དེ་ངོས་འཛིན་མི་སྣང་ལ། ཀུ་མུ་ཏི་ལས། རྡོ་རྗེའི་ཕྲེང་བས་ཡོངས་སུ་བཅད་པ་སྦས་པ་ལ་གསུངས་ཀྱང་། དེས་རྩིག་པའི་ནང་དུ་རྡོར་ཕྲེང་ཉིས་སྦྲག་ཡོད་པར་མི་འགྲུབ་སྟེ། ནང་གི་འཕར་མ་ལ་རྡོར་ཕྲེང་ཡོད་པ་ནི་ཕྱོགས་སྔ་ཕྱི་གཉིས་མཐུན་ལ་འཕར་མ་ཕྱི་མའི་རྡོར་ཕྲེང་ནི་གཞལ་ཡས་ཁང་གི་ཕྱི་རོལ་གྱི་རྡོར་ཕྲེང་ཉིད་ཡིན་པའི་ཕྱིར་རོ། །ཡབ་ཀྱི་སྐབས་སུ་ཀུ་མུ་ཏི་དང་། ཡན་ལག་དྲུག་པར་འཕར་མ་གཅིག་པ་ལ་གཞལ་ཡས་ཁང་གི་ནང་དུ་རྡོ་རྗེ་ཕྲེང་བ་གཅིག་གསུངས་པས་འཕར་མ་གཉིས་པ་ལ་གཞལ་ཡས་ཁང་གི་ནང་དུ་རྡོར་ཕྲེང་གཉིས་ཡོད་པར་གྲུབ་ན་གོང་དུ་ཁྱེད་རང་གི་རྗེ་བཙུན་རྩེ་མོའི་རྣམ་བཤད་ཉི་འོད་དང་། དབང་ཆུ་ཆེན་མོར་ཡབ་ལ་འཕར་མ་གཉིས་ཀྱི་ཐ་སྙད་ཡོད་པར་ཁས་བླངས་པ་དེ་ལ་ཡང་གཞལ་ཡས་ཁང་གི་ནང་དུ་རྡོར་ཕྲེང་གཉིས་ཡོད་པར་འགྱུར་ཏེ། འཕར་མ་གཅིག་པ་ལ་གཞལ་ཡས་ཁང་གི་ནང་དུ་རྡོར་ཕྲེང་གཅིག་གསུངས་པའི་ཕྱིར། གསུམ་ཅར་ཁས་བླངས་ཏེ། རྟག་ཁྱབ་ད་ལྟ་ཉིད་དུ་ཁས་བླངས་ཤིང་། གསལ་བ་ནི། ལུགས་དང་པོ་ཡིན་པར་བཤད་པས་ཁས་བླངས་སོ། །རྗེ་བཙུན་རྩེ་མོའི་ལུང་གི་གཞས་ཡས་ཁང་གི་ནང་དུ་རྡོར་ཕྲེང་ཉིས་སྦྲག་བྱེད་པར་མི་འགྲུབ་སྟེ། ཕྱིའི་རྣལ་འབྱོར་མ་བཅུ་ལ་རྡོ་རྗེའི་རྭ་བ་མེ་རིས་བསྐོར་བ་ནི། གཞལ་ཡས་ཁང་གི་ཕྱི་རོལ་གྱི་རྡོ་རྭ་མེ་རི་ཡིན་པའི་ཕྱིར། གཞན་དུ་ན་ཕྱིའི་རྣལ་འབྱོར་མ་བཅུ་ལ་ཞེས་པའི་ཚིག་དང་འགལ་ཏེ། བསྒོམ་བྱའི་སྐབས་སུ་ནི་སྟེང་འོག་གི་ལྷ་མོ་གཉིས་གཙོ་མོའི་སྟེང་འོག་ཏུ་འོང་ལ། བྲི་བྱའི་སྐབས་སུ་ཁྱེད་ལྟར་ན། སྟེང་འོག་གི་ལྷ་མོ་གཉིས་པོ་དེ་རྡོ་རྭ་མེ་རི་ཕྱི་མའི་ཡང་ཕྱི་རོལ་ཏུ་འོང་དགོས་པའི་ཕྱིར། བདུད་རྩི་འོད་ཀྱི་དགོངས་པ་རོ་གདན་ལས་ལོགས་སུ་གྱུར་པའི་གདན་བཅོ་ལྔ་པར་སྟོན་པ་ཡང་མ་ཡིན་ཏེ། རོ་བཅོ་ལྔ་པོ་དེ་ཉིད་རྣལ་འབྱོར་མ་རྣམས་ཀྱི་གདན་བཅོ་ལྔ་ཉིད་དུ་བརྗོད་ཅེས་ཤིན་ཏུ་གསལ་བར་གསུངས་པའི་ཕྱིར་རོ། །གལ་ཏེ་སྟོན་ན་ཡང་ཉི་མ་བཅོ་ལྔ་སྟོན་པས་ཁྱེད་ཀྱི་འདོད་པ་འགྲུབ་པ་ལ་ནི་ཕན་པ་མེད་དོ། །གནོད་བྱེད་ཡོད་པ་ནི་ལུགས་འདི་ལ་ལྷ་མོ་བརྒྱད་ལྷ་སྣམ་ལ་འགོད་པ་དང་། རྩིག་པའི་ནང་དུ་རྡོ་རྭ་ཉིས་སྦྲག་བྱེད་པར་འདོད་པ་ནི་བློ་གྲོས་རྩིང་པོས་རང་དགར་སྨྲས་པ་སྟེ། ཕྱོགས་ཀྱི་ལྷ་མོ་བཞི་ནང་དུ་འདུས་པའི་རྡོ་རྭ་བསྐོར་ན། མཚམས་ཀྱི་ལྷ་མོ་བཞི་རྡོ་རྭའི་ཕྱི་རོལ་ཏུ་ལུས་པའི་ཕྱིར་དང་། མཚམས་ཀྱི་ལྷ་མོ་བཞི་ནང་དུ་འདུས་པར་བྱེད་ན། སྒོ་ལོགས་ཀྱི་ཕྱི་ནས་བསྐོར་དགོས་པའི་རྩིག་པའི་ནང་དུ་བསྐོར་བ་དང་འགལ་བའི་ཕྱིར་རོ། །དེས་ན་ལེགས་པར་སོམས་ལ་སྨོས་ཤིག ལུགས་གསུམ་པ་ནི་འཕར་མ་གཉིས་ཀྱི་འདོད་ཚུལ་དེ་ལྟར་དུ་སྣང་ཡང་། ཁྱེད་ཀྱིས་འགྲེལ་པ་དེའི་དགོངས་པ་པདྨ་འདབ་བརྒྱད་ཀྱི་གཙོ་མོ་ལ་ཉེ་བར་རྡོ་རྗེ་མ་སོགས་བཞི་དང་། པུཀྐ་སཱི་སོགས་བཞི་སྟེ་བརྒྱད་བསྐོར། ཕྱོགས་ཀྱི་པད་འདབ་དེ་ཉིད་ཀྱི་སྟེང་ལྷ་མོ་ནང་མ་རྣམས་ཀྱི་རྒྱབ་ཏུ་གཽ་རཱི་སོགས་བཞི་འགོད་པར་བཞེད་དོ་ཞེས་བྲིས་པ་ནི་འགྲེལ་པ་དེའི་དགོངས་པ་ནི་མ་ཡིན་ཏེ། དེའི་དགོངས་པ་ནི་དབུས་ཀྱི་པདྨའི་འདབ་མ་བརྒྱད་ལ་རྡོ་རྗེ་མ་སོགས་བཞི་དང་། པུཀྐ་སཱི་སོགས་བཞི་སྟེ་བརྒྱད་བསྐོར་སྒོ་བཞིར་པདྨ་རེ་རེའི་སྟེང་དུ་གཽ་རཱི་ལ་སོགས་པ་བཞི་དང་། ཤར་སྒོའི་པདྨའི་འདབ་མའི་སྣ་དང་། ནུབ་སྒོའི་པདྨའི་འདབ་མའི་སྣ་ལ་སྟེང་འོག་གི་ལྷ་མོ་གཉིས་འགོད་པ་ཡིན་པའི་ཕྱིར་ཏེ། འགྲེལ་པར་གོང་དུ་བསམ་པར་བྱ་ཞེ་ན། ཟེ་འབྲུ་དང་། འདབ་མ་བརྒྱད་དང་། སྒོ་བཞི་དང་། ཤར་ཕྱོགས་ཀྱི་པདྨའི་འདབ་མའི་སྣ་དང་། ནུབ་ཕྱོགས་ཀྱི་པདྨའི་འདབ་མའི་སྣར་བྱའོ་ཞེས་དང་། ཤར་གྱི་སྒོ་ལ་ཞེས་བྱ་བ་ལ་སོགས་པ་ནི་ཤར་ཕྱོགས་ཀྱི་སྒོའི་པདྨའི་འདབ་མ་རྣམས་ལ་གནས་སོ། །དེ་ལྟ་བུའི་རིམ་པས་གཽ་རཱི་དང་། ཙཽ་རཱི་དང་། བེ་ཏཱ་ལཱི་དང་། གྷསྨ་རཱིའོ། །དེ་དག་སྒོའི་པདྨའི་འདབ་མ་ལ་བསམ་པར་བྱའོ་ཞེས་ཤར་ཕྱོགས་ཀྱི་པདྨ་དང་། སྒོའི་པདྨ་ཞེས་པའི་ཐ་སྙད་གསུངས་པའི་ཕྱིར་རོ། །ལུགས་བཞི་པ་ནི་ཌཾ་ཀ་ད་ཤའི་འགྲེལ་པའི་དགོངས་པར་སྣང་མོད་ཀྱི། དེ་ཉིད་མན་ངག་ལུགས་ཀྱི་འཕར་མ་གཉིས་པའི་ལུགས་དང་མཐུན་པར་འདོད་པ་ནི་མི་འཐད་དེ། ཁྱོད་རང་གི་དྲངས་པའི་རྗེ་ས་ཆེན་གྱི་གསུངས་ལས་ཀྱང་ནང་པདྨ་འདབ་མ་བཞི་པ་ལྟེ་བ་དང་བཅས་པ་ཞེས་པ་ཙམ་ལས། ཕྱི་རོལ་འདབ་མ་བརྒྱད་ཀྱིས་བསྐོར་བ་མ་གསུངས་པའི་ཕྱིར་དང་། རྗེ་བཙུན་ཆེན་པོའི་དངོས་སློབ་དག་ལ་གྲུབ་མཐའ་མི་མཐུན་པ་དུ་མ་སྣང་བས་མཐའ་གཅིག་ཏུ་ཤེས་བྱེད་དུ་མི་རུང་བའི་ཕྱིར་རོ། །ལུགས་ལྔ་པ་ནི། ཀྱཻ་རྡོར་དོན་བསྡུས་ཀྱི་དགོངས་པར་སྣང་ཡང་དེ་ཉིད་མན་ངག་ལུགས་ཀྱི་འཕར་མ་གཉིས་པའི་ལུགས་གཅིག་དང་མཐུན་པར་འདོད་པ་ནི་མི་འཐད་དེ། མན་ངག་ལུགས་ཀྱི་ཡིག་ཆ་གང་དུ་ཡང་པད་འདབ་བརྒྱད་ཉིས་བརྩེགས་ལ་འཕར་མ་ནང་མར་བྱེད་པར་མ་གསུངས་ཤིང་། ཁྱེད་རང་གིས་ཀྱང་བསྟན་རྒྱུ་མི་འདུག་པའི་ཕྱིར་རོ། །ལུགས་དྲུག་པ་ནི་ས་ཆེན་དང་། རྗེ་བཙུན་གྱི་དགོངས་པར་མི་འཐད་དེ། དེ་གཉིས་ཀྱི་གསུང་རང་གིས་དྲངས་པ་ལས། འཕར་མ་སྔ་ཕྱི་གཉིས་ལ་རྡོ་རྗེའི་རྭ་བ་དང་། མེ་རིས་བསྐོར་བ་གསུངས་ཀྱང་པདྨ་འདབ་བརྒྱད་ཉིས་བརྩེགས་གསུངས་པ་མི་འདུག་པའི་ཕྱིར་དང་། རྗེ་བཙུན་གྱིས་བདག་མེད་མའི་སྒྲུབ་ཐབས་ཀྱི་འཕར་མ་གཉིས་པའི་ལུགས་དེ། བདུད་རྩི་འོད་ཀྱི་རྗེས་སུ་འབྲངས་ནས། ལྷ་མོ་རྣམས་ལ་ཐུན་མོང་གི་གདན་པདྨ་འདབ་བརྒྱད་མེད་པར། པདྨ་སོ་སོ་ལ་འགོད་པ་ཡིན་པར་གོང་དུ་ཁྱེད་རང་གིས་ཁས་བླངས་པ་དང་དངོས་སུ་འགལ་བའི་ཕྱིར་རོ། །ཡང་རྒྱུད་དང་རྗེ་བཙུན་ཆེན་པོའི་གསུང་རབ་ལས་ཕྱིའི་ལྷ་མོ་བརྒྱད་སྒོ་མཚམས་སུ་འགོད་པར་གསུངས་པས་གནོད་དེ་ཞེས་སོགས་ལ་ནི། གོང་དུ་འཕར་མ་གཉིས་པའི་སྐབས་སུ་བཏེག་སྟེ་ཁྱེད་ཀྱི་སྤྱི་བོར་བཞག་པར་བྱའོ་ཞེས་ཁས་བླངས་པ་དེ་འདིར་དྲན་པར་གྱིས་ཤིག ཅི་ལྟར་ཞེ་ན། ཤཱནྟི་པའི་འཁྲུལ་སྤོང་དང་། མཚོ་སྐྱེས་རྡོ་རྗེ་དང་། དག་པ་རྡོ་རྗེའི་སྒྲོན་མ་དང་། ཡན་ལག་མེད་པའི་རྡོ་རྗེ་རྣམས་ཀྱིས་ལྷ་མོ་བརྒྱད་སྒོ་མཚམས་སུ་འགོད་པར་བཤད་པས། མི་ཐུབ་ཟླ་བའི་ཡན་ལག་དྲུག་པར། ལྷ་མོ་བརྒྱད་པདྨའི་འདབ་མ་བརྒྱད་ལ་འགོད་པ་ལ་གནོད་དོ་སྙམ་ན་མི་གནོད་དེ། དེ་ལྟར་ན་མན་ངག་ལུགས་ཀྱི་སྐབས་སུ་ལྷ་མོ་བརྒྱད་ཡབ་ཀྱི་དཀྱིལ་འཁོར་དུ་དབུས་ཀྱི་པདྨ་ཆེན་པོའི་འདབ་མ་ལ་མི་འགོད་པར་འགྱུར་ཏེ། རྒྱུད་དང་རྗེ་བཙུན་གོང་མའི་གསུང་རབ་ལས་དེ་དག་སྒོ་མཚམས་སུ་འགོད་པར་གསུངས་པའི་ཕྱིར་རོ་ཞེས་སོགས་རྣམ་པ་ཀུན་ཏུ་མཚུངས་སོ། །གཞན་ཡང་རྗེ་བཙུན་རྩེ་མོས་དབང་ཆུ་ཆེན་མོར། དེའི་པདྨའི་འདབ་མ་རྣམས་ལ་ཡང་ཞེས་པ་ནས། བྱང་སྒོར་སྦྲུལ་ལྗང་ཁུ་བྲི་ཞེས་པའི་བར་གསུངས་པ་ཡང་ཚིག་མགོ་མཇུག་འགལ་བར་ཐལ་བའི་སྐྱོན་ཡོད་དེ། སྒོ་མཚམས་སུ་འགོད་པར་བཤད་པས་པད་འདབ་ལ་མི་འགོད་པར་འགྱུར་བའི་ཕྱིར་རོ། །དེས་ན་དཀར་མོ་ལ་སོགས་པའི་ལྷ་མོ་བརྒྱད་སྒོ་མཚམས་སུ་འགོད་པར་གསུངས་པའི་ཕྱིར། མི་ཐུབ་ཟླ་བའི་དགོངས་པ་པདྨའི་འདབ་མ་བརྒྱད་ལ་འགོད་པ་མ་ཡིན་ནོ་ཞེས་ཟེར་བ་ནི་རྣམ་པར་མ་བརྟགས་པ་ཁོ་ནའོ་ཞེས་བཟློག་ན་མི་སྨྲ་བའི་བརྟུལ་ཞུགས་བཟུང་དགོས་པར་འགྱུར་རོ། །རྗེ་བཙུན་གྱིས་བདག་མེད་མའི་སྒྲུབ་ཐབས་སུ་ལྷ་མོ་རྣམས་ཀྱི་གནས་སུ་པད་ཉི་དང་གདན་རོ་བཅོ་ལྔ་བསྐྱེད་པར་གསུངས་པས་ནང་གི་རྣལ་འབྱོར་མ་ལྔ་འདབ་བརྒྱད་གེ་སར་དང་བཅས་པ་ལ་འགོད་པར་འདོད་པ་ལ་མི་གནོད་དེ། པདྨའི་འདབ་མ་དེ་ཉིད་ཀྱིས་པདྨའི་གོ་ཆོད་པའི་ཕྱིར་རོ། །མན་ངག་ལུགས་ཀྱི་འཕར་མ་གཉིས་པའི་ལུགས་གཉིས་པོ་འདི་རྗེ་བཙུན་གྱི་གསུངས་ལས་དངོས་སུ་མི་གསལ་ཞེས་པ་ནི་ཤིན་ཏུ་བདེན་ཏེ། རྗེ་བཙུན་གྱི་གསུང་རབ་གང་ལས་ཀྱང་དེ་འདྲ་མ་བཤད་པའི་ཕྱིར་རོ། །འོན་ཀྱང་ས་ཆེན་ཡབ་སྲས་ཀྱི་བཞེད་པར་ཤུགས་ལས་འགྲུབ་པར་འདོད་པ་ནི་མི་འཐད་དེ། ཤུགས་ལས་འགྲུབ་ན། ནང་དུ་པདྨ་འདབ་མ་བཞི་དང་། འདབ་མ་བརྒྱད་པར་སྟོན་པའི་གསུངས་གཉིས་པོ་གང་རུང་གིས་འགྲུབ་དགོས་པ་ལས། དེས་འགྲུབ་ན་ཡབ་ཀྱི་གནས་སྐབས་སུ་ཡང་པདྨ་ཉིས་བརྩེགས་ཡོད་པར་འགྲུབ་པར་ཐལ་བའི་ཕྱིར་རོ། །དེ་ལས་གཞན་པའི་ཚིག་གིས་འགྲུབ་ན་ནི་སྨྲ་བའི་དུས་ལ་བབ་བོ། །ཁྱེད་ཀྱི་རྟོག་བརྟགས་དེ་ཤུགས་ལ་ཡང་མི་འགྲུབ་བཅས་པ་ནི་རྣམ་པར་མ་བརྟགས་པ་སྟེ། རྗེ་བཙུན་རྩེ་མོས་དབང་ཆུར་འཕར་མ་གཉིས་པར་བྱེད་ན། རྡོ་རྗེའི་རྭ་བ་སྔོན་པོ་མེ་རི་དམར་སེར་དུ་བྱ། དེ་ནས་ལྷ་སྣམ་ཤར་ཕྱོགས་ཀྱི་སྒོ་དཀར་པོ་བྱ། ལྷོ་སེར་པོ། ནུབ་དམར་པོ། བྱང་ལྗང་གུ་ཞེས་དངོས་སུ་གསུངས་པས་ཤུགས་ལ་འགྲུབ་མི་དགོས་པའི་ཕྱིར་རོ། །གལ་ཏེ་དེ་ཉིད་ཡབ་ཀྱི་དབང་དུ་བྱས་སོ་སྙམ་ན། རྒྱུད་འགོག་པ་དང་། རྗེ་བཙུན་སྐུ་མཆེད་ལ་སྐུར་པ་བཏབ་པ་ཡིན་པར་གོང་དུ་བཤད་ཟིན་ཅིང་། ཁྱེད་རང་གིས་ཚད་མར་ཁས་བླངས་པའི་གནད་ཀྱི་ལྡེ་མིག་ལས་ཀྱང་། ཡབ་ཡུམ་གྱི་དཀྱིལ་འཁོར་ཚུལ་མཚུངས་ན་མི་འདྲ་བའི་ཁྱད་པར་ཅི་ལྟ་བུ་ཞེ་ན་ཞེས་པ་ནས། འཕར་མ་གཉིས་པ་བཤད་དོ་ཞེས་པའི་བར་གྱི་ཡབ་ཡུམ་གྱི་དཀྱིལ་འཁོར་གྱི་ཁྱད་པར་སྟོན་པར་ཁྱེད་རང་གིས་བྲིས་པ་དང་འགལ་བའི་ཕྱིར་རོ། །དེས་ན་མན་ངག་ལུགས་ཀྱི་འཕར་མ་གཉིས་ཀྱི་དོན་ནི། དབུས་པདྨ་འདབ་མ་བཞི་པའམ་བརྒྱད་པ་ལ། ལྷ་མོ་ལྔ་བཀོད་ནས་རྡོ་རྗེའི་རྭ་བ་མེ་རིས་བསྐོར་བ་དང་། ལྷ་སྣམ་ལ་ལྷ་མོ་བརྒྱད་དམ་བཅུ་བཀོད་ནས་གཞལ་ཡས་ཁང་གྲུ་བཞི་དང་རྡོ་རྗེའི་རྭ་བ་མེ་རིས་བསྐོར་བ་ཉིད་ཡིན་ཏེ། རྗེ་བཙུན་རྩེ་མོས་དབང་ཆུར་གསལ་བར་གསུངས་ཤིང་། རྗེ་ས་ཆེན་དང་། རྗེ་བཙུན་གྱིས་བདག་མེད་མའི་སྒྲུབ་ཐབས་ལས། ནང་གི་འཕར་མ་ལ་རྡོ་རྗེ་རྭ་བ་མེ་རིས་བསྐོར་བ་དང་། ཕྱིའི་འཕར་མ་ལ་ཡང་རྡོ་རྗེའི་རྭ་བ་མེ་རིས་བསྐོར་བ་གསུངས་པའི་དགོངས་པ་ཡང་འདི་ཉིད་ཡིན་པའི་ཕྱིར་རོ། །སློབ་དཔོན་མི་ཐུབ་ཟླ་བའི་དགོངས་པ་ཡང་འདི་ཉིད་ཡིན་པར་གོང་དུ་བཤད་ཟིན་ཏོ། །དེས་ན་མི་ཐུབ་ཟླ་བ་དང་མན་ངག་ལུགས་ཀྱི་དགོངས་པ་ལ་ཡབ་ཀྱི་སྐབས་སུ་ལྷ་སྣམ་ལ་ལྷ་མོ་བརྒྱད་བཀོད་ནས་དེའི་ནང་དུ་པདྨ་འདབ་བརྒྱད་ལ་རྡོ་རྭ་དང་མེ་རིས་བསྐོར་བ་ནི་མི་འཐད་དེ། དེ་ལྟར་ན་དེ་གཉིས་ཀྱི་ལུགས་ལ་འཕར་མ་གཉིས་པར་འགྱུར་བ་ལས་ཡབ་ཀྱི་སྐབས་སུ་འཕར་མ་གཅིག་པར་རྒྱུད་ལས་གསུངས་པའི་ཕྱིར། ཞེས་པ་ནི་ཁོ་བོའི་བླ་མ་ཐམས་ཅད་མཁྱེན་པའི་དགོངས་པ་ཡིན་པས་དགག་པའི་ཉི་མ་ཤར་བར་འདོད་ན། ཕྱོགས་སྔའི་ནམ་ལངས་པར་གྱིས་ཤིག སྤྱིར་པདྨ་འདབ་བརྒྱད་ལ་རྡོ་རྭ་མེ་རིས་བསྐོར་ནས་ལྷ་སྣམ་ལ་ལྷ་མོ་བརྒྱད་འགོད་པ་ཙམ་གྱིས་འཕར་མ་གཉིས་པར་འགྱུར་བའི་ངེས་པ་མེད་དེ། འཕར་མ་གཉིས་ཀྱི་འདོད་ཚུལ་མི་འདྲ་བ་མང་དུ་ཡོད་པའི་ཕྱིར་དང་། རིན་ཆེན་འབར་བ་དང་། ནག་པོ་དམ་ཚིག་རྡོ་རྗེས་ཡབ་ཀྱི་སྐབས་སུ་ཡང་དེ་ལྟར་གསུང་ཤིང་། དེ་དག་གིས་ཀྱང་ཡབ་ཀྱི་སྐབས་སུ་འཕར་མ་གཉིས་པ་མི་བཞེད་པའི་ཕྱིར་ཏེ། རྒྱུད་འགོག་མི་ནུས་པའི་ཕྱིར་རོ། །ཁ་ཅིག་ཡུམ་ལ་འཕར་མ་གཉིས་པ་གསུངས་ཤིང་། ཡབ་ལ་འཕར་མ་གཅིག་པ་གསུངས་པས་དེ་ལས་བཟློག་སྟེ་སྨྲར་མི་རུང་ན། སྒོ་བཞི་ཡུམ་ལ་སྦྱར་བ་མི་རིགས་པར་ཐལ། འཕར་མ་གཅིག་དང་སྒོ་བཞི་པ། །ཞེས་པ་ཡབ་ཁོ་ན་ལ་གསུངས་པའི་ཕྱིར་ཞེས་སྨྲ་བ་ནི་ཁོ་ན་ཞེས་པའི་ཚིག་སྒོ་བཞི་པ་ཞེས་པ་ལ་སྦྱར་རྒྱུ་ཡིན་ན། ཡུམ་གྱི་སྐབས་སུ། སྒོ་བཞི་གཟི་བརྗིད་ཆེན་པོ་ཉིད། །ཅེས་པ་དེ་མ་མཐོང་བར་རང་དགར་སྨྲས་པར་སྣང་ལ་འཕར་མ་གཅིག་ལ་སྦྱར་རྒྱུ་ཡིན་ན་ནི་ཐལ་བ་དང་འབྲེལ་ཅི་ཡོད་སོམས་ཤིག གཞན་ཡང་ཐལ་བ་དེ་ཕྱོགས་སྔའི་འཐུར་ཁྱབ་ལ་གཏང་བར་སྣང་ཞིང་། ཡབ་ཀྱི་སྐབས་སུ། འཕར་མ་གཅིག་དང་སྒོ་བཞི་པ། །ཞེས་དང་། ཡུམ་གྱི་སྐབས་སུ། འཕར་མ་གཉིས་བཟང་རྣམ་བྲིས་ནས། །ཞེས་དང་། སྒོ་བཞི་གཟི་བརྗིད་ཆེན་པོ་ཉིད། །ཅེས་དངོས་སུ་རྒྱུད་ལས་གསུངས་བཞིན་དུ། ཡབ་ཡུམ་གྱི་འཕར་མ་གཅིག་པ་དང་། གཉིས་པ་ཕན་ཚུན་ཐུན་མོང་བར་བྱེད་པའི་དཔེ་སྒོ་བཞི་ལ་བྱེད་པ་ནི་རྡོ་རྗེ་འཆང་ལ་བརྒལ་བར་སྣང་བས་དེ་འདྲའི་རིགས་ཅན་ལ་བག་ཟོན་བྱའོ།། །།གནད་ཀྱི་ཟླ་ཟེར་ལས། གཞལ་ཡས་ཁང་གི་འོག་གཞི་ཉི་མའི་ཁ་དོག་དམར་པོ་ཞེས་གསུངས་པ་ལ། ཉི་ཟེར་ལས། རྗེ་བཙུན་ཆེན་པོས་ཉི་མའི་ཁ་དོག་ལྗང་སེར་ཞེས་གསུངས་པ་དང་འགལ་ལོ་ཞེས་བྲིས་པ་ནི་རྣམ་པར་མ་བརྟགས་པ་སྟེ། ཉི་མའི་ཁ་དོག་དམར་པོར་གསུངས་པ་ནི་རང་ངོས་ཀྱི་ཁ་དོག་ལ་དགོངས་ལ། རྗེ་བཙུན་གྱིས་པད་ལྟེ་དང་ཕྲད་པའི་ཚེ་ལྗང་སེར་དུ་འགྱུར་བ་ལ་དགོངས་ནས་ལྗང་སེར་དུ་གསུངས་ཀྱི་ཉི་མ་རང་ངོས་ནས་རྒྱུ་མེ་ཤེལ་ལས་གྲུབ་པ་ཡིན་པར་རྗེ་བཙུན་ཡང་བཞེད་པའི་ཕྱིར་རོ།། །།གནད་ཀྱི་ཟླ་ཟེར་ལས། རྩིག་པ་ནས་ཆ་ཆེན་གཅིག་དོར། ཚངས་ཐིག་ནས་ཆ་ཕྲན་ལྔ་དོར་བའི་མཐའ་རྣམས་སུ་ཀ་བ་བརྒྱད་ནི་དེ་ཉིད་སྣང་ཆེན་ལས། ཀ་བ་བརྒྱད་ཀྱི་མཛེས་བྱས་ལ། །ཞེས་བྱ་བ་ནི་ཕྱོགས་ཀྱི་ཆ་རེ་རེ་ཞིང་རྩིག་པ་ལ་བརྟེན་པའི་ཀ་བ་གཉིས་གཉིས་ཡོད་པས་དེའི་ཕྱིར་ཀ་བ་བརྒྱད་ཀྱིས་མཛེས་པར་བྱས་པ་ཡིན་ནོ་ཞེས་གསུངས་པ་ལྟར། ཀ་བ་རྣམས་རྩིག་པའི་ནང་ལ་བརྟེན་པའོ་ཞེས་གསུངས་པ་ལ། ཉི་ཟེར་ལས། ཀ་བ་རྩིག་པ་ལ་བརྟེན་པར་ལུང་དེས་གྲུབ་པ་བདེན་མོད། རང་གིས་སྨྲས་མ་ཐག་པ་དང་ནང་འགལ་བའི་སྐྱོན་ཡོད་དོ་ཞེས་བྲིས་པ་ནི་མི་འཐད་དེ། སྨྲས་མ་ཐག་པ་དང་ནང་འགལ་ཞེས་པའི་དོན། ཀ་བ་དང་རྩིག་པའི་བར་ཆ་ཆེན་གཅིག་ཡོད་པས་བར་སྟོང་དང་བཅས་པའི་ཕྱིར་ན། ཀ་བ་རྩིག་པ་ལ་བརྟེན་པ་འགལ་ཞེས་པ་ཡིན་ན་ནི། ཁྱེད་རང་གིས་ཀྱང་རྩིག་པའི་ནང་དུ་ཚངས་ཐིག་ནས་ཆ་ཆེན་དང་པོ་གཉིས་གཡས་གཡོན་དུ་དོར་བར་ཆ་ཆེན་གཉིས་པའི་ཆ་ཕྲན་དང་པོའི་སྟེང་དུ་རྩིག་པ་ལ་བརྟེན་པའི་ཀ་བ་གཉིས་གཉིས་ཕྱོགས་རེ་རེ་ལ་གནས་ལ་ཞེས་བྲིས་པ་ལ་ཡང་ནང་འགལ་བའི་སྐྱོན་ཡོད་དེ། ཚངས་ཐིག་ནས་ཆ་ཆེན་རེ་རེ་དོར་ནས་གདུང་ཟླུམ་དང་ཕྲད་པའི་སར་ཀ་བ་འཛུགས་ན་དེ་དང་རྩིག་པའི་བར་དུ་བར་སྟོང་དང་བཅས་པ་ལས་མ་འདས་ཤིང་། ཀ་བ་རྩིག་པ་ལ་བརྟེན་པ་ཁྱེད་རང་གིས་ཀྱང་སྨྲས་པའི་ཕྱིར་རོ། །གལ་ཏེ་ཚངས་ཐིག་ནས་ཆ་ཆེན་རེ་རེ་དོར་བའི་སར་རྩིག་པ་ལ་བཅར་བའི་ཚུལ་གྱིས་ཀ་བ་འཛུགས་པས་ནང་འགལ་བའི་སྐྱོན་མེད་དོ་སྙམ་ན། དེ་ལྟར་ན་ཀ་བའི་སྟེང་དུ་གདུང་ཟླུམ་ཡོད་མི་ཡོད་ལེགས་པར་སོམས་ཤིག། །།གདན་གྱི་སྐབས་སུ་གནད་ཀྱི་ཟླ་ཟེར་ལས། འདིར་རྗེ་བཙུན་ཆེན་པོས་དབུས་སུ་ཉི་མའི་དཀྱིལ་འཁོར་གྱི་སྟེང་དུ་བདུད་བཞི་དང་། འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ་ཚངས་སོགས་ཀྱི་གདན་འགོད་པར་བཞེད་ལ། སྒྲུབ་ཐབས་འདི་དང་མངོན་རྟོགས་དོན་གསལ་གྱི་དགོངས་པའང་དེ་བཞིན་དུ་ཤེས་པར་བྱའོ། །ཤཱནྟི་པ། ཉིན་འབྱུང་། ནག་པོ་པ། གཉིས་མེད་རྡོ་རྗེ། མར་མེ་མཛད། ཀཾ་པ་ལ་རྣམས་ཀྱི་ཀྱང་ལྷ་མོ་བརྒྱད་ལ་ཟླ་གདན་བཤད་དོ། །གལ་ཏེ་རྗེ་བཙུན་སྐུ་མཆེད་ཀྱི་ལུགས་ལ་ལྷ་མོ་རྣམས་ལ་ཟླ་གདན་དུ་བྱས་པ་མི་འཐད་དེ། སློབ་དཔོན་ཤཱནྟི་པ་སོགས་ཀྱིས། བདག་མེད་མ་ལ་ཟླ་གདན་བྱས་པ་ལ། རྗེ་བཙུན་གྱིས་ཟླ་བའི་གདན་ཡང་མི་རིགས་ཏེ། འདི་དག་ནི་ཁྲོ་མོ་ཡིན་ལ། ཁྲོ་བོ་ཁྲོ་མོ་རྣམས་ནི་འབར་བའི་ཕྲེང་བ་འཁྲུགས་པའི་འོད་ཅེས་བྱ་བ་ཉི་མར་བཤད་པ་དང་འགལ་བའི་ཕྱིར་རོ། །ཞེས་དགག་པ་མཛད་པའི་ཕྱིར་རོ་སྙམ་ན། དེ་ནི་བདག་མེད་ལྷ་མོ་བཅོ་ལྔ་ལ་ཟླ་གདན་བྱེད་པ་བཀག་པ་ཡིན་གྱི་ཡབ་ཀྱི་འཁོར་རྣམས་ལ་ཟླ་གདན་བྱེད་པ་བཀག་པ་མ་ཡིན་ནོ་ཞེས་པ་ནས། གཏི་མུག་གཤིན་རྗེའི་གཤེད་ལ་ཟླ་གདན་དུ་བཤད་པ་ལྟར་རོ་ཞེས་པའི་བར་གསུངས་པ་ལ། ཉི་ཟེར་བླ་མ་ན་རེ། ཟླ་ཟེར་མཁན་པོས། དེ་ལྟར་འགལ་སྤོང་དང་བཅས་ཏེ་འཆད་ཀྱང་། ཁོ་བོའི་དཔལ་ལྡན་བླ་མ་དམ་པའི་ཞལ་སྔ་ནས། ལྷ་མོ་བརྒྱད་ལ་ཟླ་གདན་མཚོ་སྐྱེས་སོགས་རྒྱ་གཞུང་རྣམས་ནས་བཤད་ཀྱང་དག་ལྡན་ནས་བཀག རྩེ་མོས་མངོན་རྟོགས་རྒྱས་པ་ལས། ཟླ་གདན་དང་ཉི་གདན་གཉིས་བཤད་པའི་དཔེ་གཉིས་མཐོང་ནའང་ཟླ་གདན་མ་དག་པར་གསལ། དེས་ན་རྗེ་བཙུན་གོང་མ་རྣམས་ལྷ་མོ་བརྒྱད་ལ་ཉི་གདན་བཞེད་དེ། རྒྱུ་མཚན་གུར་ལས། ཉི་མའི་དཀྱིལ་འཁོར་དབུས་གནས་པར། །དཀར་མོའི་གཟུགས་ཅན་བསྒོམ་པར་བྱ། །ཞེས་གསུངས་པའི་རྗེས་སུ་འབྲང་ཞེས་རྒྱལ་མཚན་བཟང་པོའི་ཞུས་ལན་དུ་གསུངས་མོད། འོན་ཀྱང་མངོན་རྟོགས་རྒྱས་པར་ཟླ་གདན་བྲིས་པའི་དཔེ་ཤིན་ཏུ་མང་བས། དེ་ལུགས་ཀྱི་འགལ་སྤོང་བྱེད་ན་དཀའ་འགྲེལ་དུ་གསུངས་པ་ལྟར། རྩེ་མོའི་མངོན་རྟོགས་རྒྱས་པར་ལྷ་མོ་རྣམས་ལ་ཟླ་གདན་བཤད་པ་ནི་མཚོ་སྐྱེས་དང་ཚུལ་མཚུངས་པའི་དབང་དུ་མཛད་ལ། འདིར་མན་ངག་ལུགས་ལ་ཉི་གདན་དུ་བླ་མ་གོང་མའི་རྣམ་འགྲེལ་ཕལ་ཆེར་ལས་བཤད་ཅིང་། ཟླ་གདན་གུར་དང་འགལ་བས་བཀག་གོ་ཞེས་གསུངས་པ་ལེགས་ཏེ། རྗེ་བཙུན་གྱི་མངོན་རྟོགས་རྒྱས་པ་འདི་ནི། རྣལ་འབྱོར་གྱི་དབང་ཕྱུག་པདྨ་བཛྲ་གྱི་དགོངས་པ་དང་ཚུལ་མཚུངས་པ་ཡིན་མོད་ཀྱི་ཞེས་གསུངས་པའི་ཕྱིར་རོ་ཞེས་བྲིས་སོ། །དེ་ལ་ཐོག་མར་དྲིས་ལན་གྱི་བཞེད་པ་ཡབ་ཀྱི་གནས་སྐབས་ཀྱི་ལྷ་མོ་བརྒྱད་ལ་ཟླ་གདན་རྒྱ་གཞུང་རྣམས་ནས་བཤད་པ་དག་ལྡན་ནས་བཀག་ཅེས་པ་མི་འཐད་དེ། དག་ལྡན་ནས་ཡུམ་གྱི་སྐབས་ཀྱི་ལྷ་མོ་རྣམས་ལ་ཟླ་གདན་བྱེད་པ་བཀག་པ་ཡིན་གྱི་ཡབ་ཀྱི་འཁོར་རྣམས་ལ་ཟླ་གདན་བྱེད་པ་བཀག་པ་མི་སྣང་བའི་ཕྱིར་རོ། །གུར་ལས་ཉི་གདན་གསུངས་པས་འདིར་ཉི་གདན་བྱེད་དགོས་པར་མི་འགྲུབ་སྟེ། དེ་ལྟར་ན་གུར་ནས་ལྷ་མོ་ཐམས་ཅད་གཡོན་ཐུགས་ཁར་སྡིགས་མཛུབ་བྱེད་པར་བཤད་པས་འདིར་ཡང་དེ་ལྟར་དུ་ཁས་ལེན་དགོས་པར་ཐལ་བའི་ཕྱིར་རོ། །དཀའ་འགྲེལ་ལས། སྐྱོན་སྤོང་ཚུལ་ཡན་ལག་བཞི་པར་ལྷ་མོ་རྣམས་ལ་ཟླ་གདན་བཤད་པ་ནི་མཚོ་སྐྱེས་དང་ཚུལ་མཚུངས་པའི་དབང་དུ་མཛད་ལ། མན་ངག་ལུགས་ལ་ཉི་གདན་ཁོ་ན་ཡིན་པར་འདོད་པ་ནི་མི་འཐད་དེ། རྗེ་བཙུན་གྱིས་མངོན་རྟོགས་རྒྱས་པ་འདི་ནི་པདྨ་བཛྲ་གྱི་དགོངས་པ་དང་ཚུལ་མཚུངས་པར་གསུངས་ནས་མི་འདྲ་བའི་ཁྱད་པར་རྣམས་ལོགས་སུ་གསུངས་ཀྱང་ཉི་གདན་བྱེད་པ་མི་འདྲ་བའི་ཁྱད་པར་ཡིན་པ་མ་གསུངས་པའི་ཕྱིར་རོ། །ཉི་གདན་དུ་བླ་མ་གོང་མའི་རྣམ་འགྲེལ་ཕལ་ཆེར་ལས་བཤད་ཅེས་པ་ཡང་མི་འཐད་དེ། བླ་མ་གོང་མའི་རྣམ་འགྲེལ་རྣམས་ལས། རྩ་རྒྱུད་ནས་གསུངས་པའི་ཡབ་ཀྱི་འཁོར་རྣམས་ལ་ཉི་གདན་བཤད་པ་གཅིག་ཡང་མི་སྣང་བའི་ཕྱིར་རོ། །ཨཱ་ལི་ཀཱ་ལི་ལ་མི་ལྟོས་པའི་མི་མཉམ་སྦྱོར་འབྲིང་པོའི་སྐབས་སུ་གནད་ཀྱི་ཟླ་ཟེར་ལས། དབུས་ཀྱི་གདན་གྱི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་ཉི་མའི་དཀྱིལ་འཁོར། དེ་གཉིས་ཀྱི་བར་དུ་ཧཱུྃ་ལས་ཐོད་པ་བསྒོམས་པ་ནས། རྒྱུ་རྡོ་རྗེ་འཆང་དཀར་པོར་བསྐྱེད་ཅིང་ཞེས་དང་། ས་བོན་ལས་བསྐྱེད་པའི་སྐབས་སུ་གནད་ཀྱི་ཟླ་ཟེར་ལས། འདི་ལ་བླ་མ་དག་རྒྱུ་རྡོ་རྗེ་འཛིན་པ་ནག་པོར་བྱས་ནས་ཡན་ལག་བཞིས་འཆིང་བར་འདོད་པ་ནི་མཚོ་སྐྱེས་རྩ་འགྲེལ་གྱི་ལུགས་ལ་དེ་ལྟར་དུ་ཁས་ལེན་དགོས་ཀྱང་། འདིར་ནི་འཁོར་གྱི་ལྷ་མོ་དབྱུང་བའི་སྐབས་སུ་རྗེ་བཙུན་གྱིས་ཐིག་ལེ་ལས་ས་བོན་དུ་གྱུར་ནས་ས་བོན་ལས་ལྷ་མོ་བརྒྱད་དུ་གྱུར་ཏེ་ཕྱིར་སྤྲོ་བ་ནི་ཞེས་དང་། འཁོར་རྣམས་མངལ་དུ་ས་བོན་ལས་སྐུར་གྱུར་ཏེ། ཕྱོགས་མཚམས་སུ་སྤྲོ་བ་དེའི་ཚེ། རྒྱུ་རྡོ་རྗེ་འཛིན་པ་དཀར་པོར་བྱ་སྟེ། ཞེས་གསུངས་པས་ཡན་ལག་དྲུག་གིས་བཅིངས་ནས་རྒྱུ་རྡོ་རྗེ་འཆང་དཀར་པོར་བྱའོ་ཞེས་གསུངས་པ་ལ། ཉི་ཟེར་ལས་དེ་ནི་མི་འཐད་དེ། དེ་ལྟར་ན་མཉམ་སྦྱོར་གྱི་མངོན་བྱང་རྒྱས་པའི་སྐབས་སུ་འཁོར་རྣམས་ཀྱང་མངོན་བྱང་ལས་བསྐྱེད་པའི་ཕྱིར་རྒྱུ་རྡོ་རྗེ་འཛིན་པ་ཡང་ནག་པོར་བྱེད་དགོས་པར་འགྱུར་ཏེ། ཁྱེད་རང་གིས་དྲངས་པའི་ལུང་དེའི་སྔ་རོལ་དེ་མ་ཐག་ཏུ་རྗེ་བཙུན་གྱིས་དེ་ལ་འཁོར་རྣམས་ཀྱང་མངོན་བྱང་ལས་བསྐྱེད་པར་གྱུར་པ་དེའི་ཚེ་རྒྱུ་རྡོ་རྗེ་འཛིན་པ་ནག་པོར་བྱ་སྟེ་ཞེས་གསུངས་པའི་ཕྱིར་རོ། །འདོད་ན། །རྗེ་བཙུན་གྱི་ལུང་དང་། རང་གི་ཁས་བླངས་དང་འགལ་བའི་སྐྱོན་ཡོད་དོ། །དེས་ན་རྗེ་བཙུན་གྱིས་དཀྲོང་བསྐྱེད་ཀྱི་སྐབས་སུ། སྐད་ཅིག་ཙམ་གྱིས་རྒྱུ་རྡོ་རྗེ་འཛིན་པ་ནག་པོའི་རྣམ་པར་བསྐྱེད་པ་གསལ་གདབ་པར་བྱ་སྟེ་ཞེས་དང་། དེའི་རྗེས་སུ་ས་བོན་ལས་བསྐྱེད་པའི་སྐབས་སུ་བསྐྱེད་ཆོག་མི་འདྲ་བའི་ཁྱད་པར་གསུངས་ནས་སྐུ་མདོག་གི་དམིགས་བསལ་དངོས་སུ་མ་གསུངས་པར་ཆོ་ག་ལྷག་མ་རྣམས་ནི་སྔ་མ་དང་འདྲའོ་ཞེས་དང་། དེའི་རྗེས་ཐོགས་སུ་ཨཱ་ལི་ཀཱ་ལི་ལ་མ་ལྟོས་པའི་རྒྱས་འབྲིང་གཉིས་ཀའི་སྐབས་སུ་ཡང་བསྐྱེད་ཆོག་གི་ཁྱད་པར་ཙམ་བསྟན་ནས། ཆོ་ག་ལྷག་མ་རྣམས་སྔ་མ་དང་འདྲའོ་ཞེས་གསུངས་པས་སྐུ་མདོག་ཀྱང་བསྟན་པ་ཡིན་ནོ། །གཞན་ཡང་གོང་གི་བསྐྱེད་ཆོག་གསུམ་དང་། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གྱི་མངོན་རྟོགས་ཏེ་ཚུལ་བཞི་གསུངས་པའི་རྗེས་ལ། རྗེ་བཙུན་གྱིས་མངོན་པར་རྟོགས་པ་རྒྱས་པ་ཡན་ཆད་ཚུལ་བཞི་ནི་རྣལ་འབྱོར་གྱི་དབང་ཕྱུག་པདྨ་བཛྲ་གྱི་སྙིང་རྗེ་ཆེན་པོ་དང་ཚུལ་མཚུངས་ལ་ཞེས་པ་དང་། ས་བོན་ལས་བསྐྱེད་པ་འབྲིང་པོའི་དབང་དུ་མཛད་ནས་རྗེ་བཙུན་གྱིས་འབྲིང་གི་དབང་དུ་བྱས་པ་ནི། ཏིང་ངེ་འཛིན་གསུམ་དང་ཡན་ལག་དྲུག་ནི་མེད་ལ་བསྙེན་སྒྲུབ་བཞིས་བསྐྱེད་ནས་མཆོད་བསྟོད་ལ་སོགས་པ་མི་བྱ་བར་བཟླས་པ་ལ་འཇུག་པ་ཡིན་ནོ་ཞེས་གསུངས་པས་ས་བོན་ལས་བསྐྱེད་པའི་སྐབས་སུ་ཡན་ལག་བཞིས་འཆིང་བ་དང་། རྒྱུ་རྡོ་རྗེ་འཆང་ནག་པོ་ཡིན་པར་གྲུབ་བོ། །འོ་ན་གོང་གི་རྗེ་བཙུན་གྱི་ལུང་ཇི་ལྟར་དྲང་སྙམ་ན། དེ་ནི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་རྒྱས་འབྲིང་གཉིས་ཀྱི་དོན་བསྡུ་ཡིན་གྱི་རྣམ་པ་ཐམས་ཅད་དུ་འཇུག་པ་མ་ཡིན་ནོ། །ཞིབ་པར་ནི་དག་ལྡན་དགོངས་པ་ཞིབ་ཏུ་བཤད་ཟིན་པ་ལས་ཤེས་པར་བྱའོ་ཞེས་བྲིས་སོ། །དེ་དག་ལ་ས་བོན་ལས་བསྐྱེད་པའི་སྐབས་སུ་རྒྱུ་རྡོ་རྗེ་འཆང་ནག་པོར་བྱས་ནས་ཡན་ལག་བཞིས་འཆིང་བ། རྗེ་བཙུན་གྱིས་མངོན་པར་རྟོགས་པ་རྒྱས་པ་ཡན་ཆད་ཚུལ་བཞི་ནི་རྣལ་འབྱོར་གྱི་དབང་ཕྱུག་པདྨ་བཛྲ་གྱི་སྙིང་རྗེ་ཆེན་པོ་དང་ཚུལ་མཚུངས་ལ་ཞེས་པའི་དགོངས་པར་འཆད་པ་ནི་ལེགས་ཀྱང་སྒྲུབ་བྱེད་གཞན་རྣམས་ལ་བློ་གྲོས་རྩིང་བའི་རྣམ་བཞག་འདི་ལྟར་མཐོང་སྟེ་དེའི་རྗེས་ཐོགས་སུ་ཨཱ་ལི་ཀཱ་ལི་ལ་མ་ལྟོས་པའི་རྒྱས་འབྲིང་གཉིས་ཀའི་སྐབས་སུ་ཡང་བསྐྱེད་ཆོག་གི་ཁྱད་པར་ཙམ་བསྟན་ནས་ཆོ་ག་ལྷག་མ་རྣམས་སྔ་མ་དང་འདྲའོ་ཞེས་གསུངས་པས་སྐུ་མདོག་ཀྱང་བསྟན་ཞེས་པ་ནི་རྩིངས་ཏེ། དེ་ལྟར་ན་ཨཱ་ལི་ཀཱ་ལི་ལ་མ་ལྟོས་པའི་འབྲིང་གི་སྐབས་སུ་ཡང་རྒྱུ་རྡོ་རྗེ་འཆང་ནག་པོར་ཐལ་བའི་ཕྱིར་རོ། །གོང་གི་བསྐྱེད་ཆོག་གསུམ་དང་། ཨཱ་ལི་ཀཱ་ལི་ལ་མ་ལྟོས་པའི་མི་མཉམ་སྦྱོར་གྱི་མངོན་རྟོགས་ཏེ་ཚུལ་བཞི་པོ་པདྨ་བཛྲ་དང་ཚུལ་མཚུངས་པར་འདོད་པ་ཡང་རྩིངས་ཏེ། དེ་ལྟར་ན་ཨཱ་ལི་ཀཱ་ལི་ལ་མ་ལྟོས་པ་དང་། ལྟོས་པའི་ཡན་ལག་དྲུག་པ་རྣམས་ཀྱང་དེར་ཐལ་བའི་ཕྱིར་རོ། །ས་བོན་ལས་བསྐྱེད་པ་ལ་འབྲིང་པོའི་ཐ་སྙད་བྱེད་པ་ནི་ཤིན་ཏུ་ནོར་ཏེ། རྟོགས་པ་ཡས་རིམ་དང་། བློ་གྲོས་མས་རིམ་གང་གི་ཡང་འབྲིང་གི་བསྒོམ་བྱ་མ་ཡིན་ཞིང་། ལྗོན་ཤིང་ནས་གསུངས་པའི་དངོས་གཞིའི་ཆིངས་རྒྱས་འབྲིང་བསྡུས་པ་གསུམ་ཆར་སྦྱར་དུ་རུང་བར་མཚུངས་ལ། བསྐྱེད་ཆོག་གི་སྒོ་ནས་འབྲིང་པོ་ནི་རྒྱུ་རྡོ་རྗེ་འཆང་མངོན་བྱང་ལས་བསྐྱེད་ཅིང་འཁོར་གྱི་ལྷ་མོ་ལ་མངོན་བྱང་མེད་པ་ཉིད་ཡིན་པའི་ཕྱིར་དང་། དེ་ལས་གཞན་འབྲིང་པོར་འཇོག་པའི་སྒྲུབ་བྱེད་ལན་བརྒྱར་བཙལ་ཀྱང་མི་རྙེད་པའི་ཕྱིར་རོ། །ས་བོན་ལས་བསྐྱེད་པ་འབྲིང་པོའི་དབང་དུ་མཛད་ནས་རྗེ་བཙུན་གྱིས་འབྲིང་གི་དབང་དུ་བྱས་པ་ནི། ཏིང་ངེ་འཛིན་གསུམ་དང་། ཡན་ལག་དྲུག་ནི་མེད་ལ། བསྙེན་སྒྲུབ་བཞིས་བསྐྱེད་ནས་མཆོད་བསྟོད་ལ་སོགས་པ་མི་བྱ་བར་བཟླས་པ་ལ་འཇུག་པ་ཡིན་ནོ་ཞེས་གསུངས་ཞེས་པ་ནི། མངོན་བྱང་གི་སྐབས་ཀྱི་རྒྱས་འབྲིང་དང་། མངོན་རྟོགས་ལྗོན་ཤིང་ལས་གསུངས་པའི་རྒྱས་འབྲིང་གཉིས་ཀྱི་ཁྱད་པར་མ་ཕྱེད་པའི་གཏམ་སྟེ། མངོན་བྱང་གི་སྐབས་ཀྱི་འབྲིང་པོ་ཡིན་ན། ཡན་ལག་དྲུག་གིས་འཆིང་བས་ཁྱབ་ལ་ལྗོན་ཤིང་ལས་གསུངས་པའི་འབྲིང་པོ་ཡིན་ན། ཏིང་ངེ་འཛིན་གསུམ་དང་། ཡན་ལག་དྲུག་གིས་མི་འཆིང་བས་ཁྱབ་པ་དངོས་སུ་གསུངས་པས་དེ་གཉིས་འགལ་བའི་ཕྱིར་རོ། །གལ་ཏེ་ལྗོན་ཤིང་ནས་གསུངས་པའི་འབྲིང་པོའི་འབྲིང་པོ་དེ། ས་བོན་ལས་བསྐྱེད་པ་འབྲིང་པོའི་དབང་དུ་མཛད་པ་ཡིན་ན། དེ་ནས་གསུངས་པའི་རྒྱས་པ་དེ་ཡང་མངོན་བྱང་ལས་བསྐྱེད་པ་རྒྱས་པའི་དབང་དུ་བྱས་པར་ཁས་ལེན་དགོས་ལ། དེ་ཡང་ཁས་ལེན་ན་ལྗོན་ཤིང་ནས་གསུངས་པའི་རྒྱས་འབྲིང་བསྡུས་པ་གསུམ་པོ་དེ་རྒྱུད་གསུམ་ནས་གསུངས་པའི་མཆོག་སྒྲུབ་པ་དང་། ལས་རྒྱས་པའི་ལྷ་ཐམས་ཅད་ཀྱི་མངོན་པར་རྟོགས་པ་སྟོན་པ་མ་ཡིན་པར་འགྱུར་རོ། །དགག་སྒྲུབ་བྱེད་ཚུལ་འདི་ལ་བལྟས་ན་རྒྱུད་གསུམ་གྱི་བརྡ་ཆད་ཐུན་མོང་མ་ཡིན་པ་རྣམས་ལ་ཞིབ་ཆ་ཆེ་བ་གཅིག་མེད་པ་འདྲའོ། །གཞན་ཡང་རྗེ་བཙུན་གྱིས་འབྲིང་གི་དབང་དུ་བྱས་པ་ནི། ཏིང་ངེ་འཛིན་གསུམ་དང་། ཡན་ལག་དྲུག་ནི་མེད་ལ་བསྙེན་སྒྲུབ་བཞིས་བསྐྱེད་ཅེས་གསུངས་པ་ལ་བརྟེན་ནས་འབྲིང་པོ་ས་བོན་ལས་བསྐྱེད་པའི་སྐབས་སུ་ཡན་ལག་བཞིས་འཆིང་བ་དང་། རྒྱུ་རྡོ་རྗེ་འཆང་ནག་པོ་ཡིན་པར་འགྲུབ་ན་རྒྱུ་རྡོ་རྗེ་འཆང་ཁོ་ན་མངོན་བྱང་ལས་བསྐྱེད་པའི་མངོན་པར་རྟོགས་པ་ཐམས་ཅད་ལ་ཡན་ལག་བཞིས་འཆིང་བ་དང་། རྒྱུ་རྡོ་རྗེ་འཆང་ནག་པོ་ཡིན་པར་ཁས་ལེན་དགོས་པར་འགྱུར་ཏེ། དེ་དག་འབྲིང་པོ་ཡིན་ཞིང་འདི་དང་ལྗོན་ཤིང་ནས་བཤད་པའི་འབྲིང་པོ་གཉིས་པོ་དོན་གཅིག་པར་ཁས་བླངས་པའི་ཕྱིར་རོ། །མན་ངག་གི་གཏེར་མཛོད་ལས། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གྱི་སྐབས་སུ་ཉི་ཟླ་གཉིས་ལ་ཨཱ་ལི་ཀཱ་ལིས་མཚན་པར་བཞེད་པ་ནི་མི་འཐད་དེ། གོང་མའི་གསུང་རབ་གང་ལས་ཀྱང་མ་བཤད་ཅིང་། མི་མཉམ་སྦྱོར་གྱི་སྐབས་སུ་ཉི་ཟླ་གཉིས་ཀྱི་ངོས་ནས་ཐབས་ཤེས་རབ་ཏུ་གྲུབ་ཟིན་པས་ཨཱ་ལི་ཀཱ་ལིས་མཚན་མི་དགོས་ལ། མཉམ་སྦྱོར་གྱི་སྐབས་སུ་ཟླ་བ་གཉིས་སུ་འདྲ་ཡང་། ཐབས་ཤེས་ལ་སོ་སོར་སྦྱོར་བའི་ཆེད་དུ་ཨཱ་ལི་ཀཱ་ལིས་མཚན་པའི་ཁྱད་པར་མ་དགོངས་འདུག་པའི་ཕྱིར་རོ། །གཙོ་བོ་མཉམ་སྦྱོར་ལས་བསྐྱེད་པའི་སྐབས་སུ་འཁོར་གྱི་ལྷ་མོ་མཉམ་སྦྱོར་ལས་བསྐྱེད་པ་ཡང་ཤིན་ཏུ་ནོར་ཏེ། དག་ལྡན་ལས། ཟླ་བ་གྲུ་གསུམ་ཉིས་བརྩེགས་ཀྱི་མངོན་བྱང་ལས་རྒྱུ་རྡོ་རྗེ་འཛིན་པ་བསྐྱེད། འཁོར་གྱི་ལྷ་མོ་རྣམས་ནི་མངལ་ནས་ས་བོན་ནམ། སྐུ་ཡོངས་སུ་རྫོགས་པ་བསྐྱེད་ཀྱང་རུང་། གཙོ་ཆེ་བ་ནི་ཨཱ་ལི་ཀཱ་ལི་ལས་ཉི་ཟླ་གྲུབ་པའི་བར་དུ་དབང་གི་གནས་ནི་ཐིག་ལེ་རྐྱང་པའམ་ས་བོན་སྤྲོས་པའི་མངོན་བྱང་མི་མཉམ་སྦྱོར་རྫོགས་པ་ལས་བསྐྱེད་པར་བྱ་སྟེ། དེའང་ལེའུ་བརྒྱད་པ་ལས། ཨཱ་ལི་ཀཱ་ལི་མཉམ་སྦྱོར་བ། །ཞེས་བྱ་བ་ཚིགས་སུ་བཅད་པ་གཉིས་ཀྱིས་གཙོ་བོ་བསྐྱེད་པའི་རྗེས་ཁོ་ན་ལ། ཐབས་དང་ཤེས་རབ་རང་བཞིན་ལས། །ཞེས་བྱ་བ་ཚིགས་སུ་བཅད་པ་ཕྱེད་དང་གཉིས་ཀྱིས་འཁོར་བསྐྱེད་པ་བསྟན་པ་ཡིན་ནོ་ཞེས་དང་། གསང་དབང་གི་བྱང་ཆུབ་ཀྱི་སེམས་ཐིག་ལེ་ལ་བརྟེན་པའམ། རང་བཞིན་བརྒྱད་ཅུའི་རྟོག་པ་དང་བྲལ་བས་ན་དཀར་བའོ་ཞེས་མཉམ་སྦྱོར་གྱི་མངོན་བྱང་ལྔ་པ་དེ་དཀར་པོ་ཁོ་ནར་གསུངས་པ་དང་འགལ་བའི་ཕྱིར་རོ། །ཡུམ་གྱི་མངོན་བྱང་ལ་ཨཱ་ལི་ཀཱ་ལི་ལ་མ་ལྟོས་པའི་མི་མཉམ་སྦྱོར་དང་། ལྟོས་པའི་མི་མཉམ་སྦྱོར་དེ་མངོན་པར་རྟོགས་པ་གཉིས་སུ་འདོད་པ་ཡང་མི་འཐད་དེ། ལེའུ་བརྒྱད་པར། དེ་ཡི་སྟེང་དུ་ཟླ་བ་ཡིན་ཞེས་སོགས་ལ་ཨཱ་ལི་ཀཱ་ལི་ལ་མི་ལྟོས་པ་དང་། ཨཱ་ལི་ཟླ་བའི་གཟུགས་ཀྱི་ནི། །ཞེས་སོགས་ལ་ཨཱ་ལི་ཀཱ་ལི་ལ་ལྟོས་པའི་མངོན་པར་རྟོགས་པས་སོ་སོར་ཕྱེ་བ་ནི་ཡབ་ཀྱི་སྐབས་སུ་ཡིན་གྱི་ཡུམ་གྱི་སྐབས་སུ་དེ་གཉིས་མདོར་བསྟན་རྒྱས་བཤད་དུ་སྦྱར་ནས་མངོན་བྱང་གཅིག་ཏུ་བྱ་བར་དག་ལྡན་ལས་ཤིན་ཏུ་གསལ་བའི་ཕྱིར་རོ། །མངོན་རྟོགས་ཚུལ་བཅོ་ལྔ་པ་ངོས་འཛིན་པའི་སྐབས་སུ་གནད་ཀྱི་ཟླ་ཟེར་ལས། དཔལ་བིརྺ་པའི་བཞེད་པས། སྙིང་པོ་ཀྱཻ་རྡོ་རྗེའི་སྒྲུབ་ཐབས་ལ་བཅུ་བཞི་པོ་འདི་ཁོ་ནར་ངེས་སོ། །འོ་ན་རྗེ་བཙུན་གྱིས་མངོན་པར་རྟོགས་པ་ཚུལ་བཅུ་བཞིའམ། བཅོ་ལྔ་སྣང་མོད་ཀྱི་རྒྱུད་ཉིད་ཀྱི་སྟེང་དུ་རྟོགས་པར་བྱའོ་ཞེས་པ་དེ་ཇི་ལྟར་དྲང་ཞེ་ན། འདི་ལ་བླ་མ་དག་གི་གསུང་སྒྲོས་ལ་ཞེས་པ་ནས་གཞུང་འཁྲུགས་ཅན་དུ་བྱས་ཏེ། སློབ་དཔོན་མི་ཐུབ་ཟླ་བའི་ལུགས་ལྟར་མངོན་རྟོགས་གཅིག་ཏུ་བྱས་པ་དང་། གཞུང་འཁྲུགས་པ་མེད་པར་ལེའུ་བརྒྱད་པ་དང་སྦྱར་ནས་མངོན་རྟོགས་བཅུ་བཞིར་བྱ་བ་སྟེ་ལུགས་གཉིས་བཤད་པའི་དང་པོ་འཁྲུགས་ཅན་ལ་ཟེར་བ་ཡིན་ཏེ། དེ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་རོ་ཞེས་གསུངས་པ་ལ། ཉི་ཟེར་སློབ་དཔོན་ན་རེ། འདི་ནི་ཆེས་ཤིན་ཏུ་མི་འཐད་དེ། བིརྺ་པའི་ལུགས་ཀྱི་སྙིང་པོ་ཀྱཻ་རྡོ་རྗེ་མངོན་རྟོགས་ཚུལ་བཅུ་བཞིར་གྲངས་ངེས་ན་གོང་དུ་ཌཾ་བྷི་ཧེ་རུ་ཀ་རྗེས་འབྲང་དང་བཅས་པས་སྨིན་གྲོལ་གྱི་ལམ་ཐམས་ཅད་བིརྺ་པའི་ལམ་དུ་བསྒྲུབ་པ་དང་། ཁྱད་པར་དུ་བིརྺ་པའི་ལུགས་ཀྱི་མངོན་རྟོགས་ཚུལ་བཅོ་ལྔ་པ་ལ་མི་ཐུབ་ཟླ་བའི་འཁྲུགས་ཅན་བགྲངས་པ་དང་ཁས་བླངས་ནང་འགལ་བའི་སྐྱོན་ཡང་ཡོད་ལ། མན་ངག་ལུགས་ལ་ཡང་བཅུ་བཞིར་གྲངས་ངེས་པ་མ་ཡིན་ཏེ། མངོན་རྟོགས་ཚུལ་བཅོ་ལྔར་གྲངས་ངེས་པའི་ཕྱིར་རོ། །མན་ངག་ལུགས་ལ་ལྷའི་ལེའུར་བཤད་པའི་ཆོ་ག་གསུམ་བསྐྱེད་ཀྱིས་ཁ་བསྐངས་ན། དེར་བཤད་པའི་དཀྲོང་བསྐྱེད་ཀྱིས་ཁ་བསྐང་བར་འགྱུར་ཞེས་པ་ཡང་འབྲེལ་མེད་ཡིན་ཏེ། མན་ངག་ལུགས་ལ་ལྷའི་ལེའུའི་སྐབས་འདིར་བསྡུས་པ་ས་བོན་ལས་བསྐྱེད་པ་འབྲིང་པོ་རྡོ་རྗེ་ཆོ་ག་གསུམ་ལས་བསྐྱེད་པ་རྒྱས་པ་མངོན་བྱང་ལས་བསྐྱེད་པ་གསུམ་བཤད་ཀྱི། སྐབས་འདིར་དཀྲོང་བསྐྱེད་ཀྱི་བཤད་པ་མན་ངག་ལུགས་ཀྱི་གཞུང་གི་ཆ་གང་དུ་ཡང་མི་འབྱུང་བའི་ཕྱིར་རོ། །འདིར་བཤད་པའི་ས་བོན་ལས་བསྐྱེད་པ་དང་། མངོན་བྱང་ལས་བསྐྱེད་པ་གཉིས། སྔར་གྱི་བཅུའི་ནང་དུ་འདུས་ཀྱང་། ཧེ་རུ་ཀ་གསུམ་གྱི་མངོན་རྟོགས་དང་། ཕྱག་བཅུ་དྲུག་པའི་མངོན་རྟོགས་མི་འདྲ་བའི་ཁྱད་པར་ཆེན་པོ་ཡོད་པར་སྨྲ་བའི་སྒྲུབ་བྱེད་དེ་དག་ཀྱང་མ་བརྟགས་པ་ཁོ་ནར་ཟད་དེ། འདི་ལྟར་ཧེ་རུ་ཀ་གསུམ་གྱི་མངོན་རྟོགས་ལ་མན་ངག་ལུགས་ལ། རྒྱུ་རྡོ་རྗེ་འཛིན་པ་བསྐྱེད་པ། འཁོར་གྱི་ལྷ་མོ་དབྱུང་བ། ཞུ་བ་གླུས་བསྐུལ་བ་རྣམས་ནི་ཤིན་ཏུ་གསལ་བར་བཤད་དེ། རྗེ་བཙུན་གྱིས་གུར་རྒྱན་གྱི་ལེའུ་བཞི་པར་རིགས་རྐྱང་བསྡུས་ཀྱི་དབྱེ་བས། མངོན་པར་བྱང་ཆུབ་པ་ཚན་པ་ལྔའམ་གཅིག་གིས། རྒྱུ་རྡོ་རྗེ་འཛིན་པ་དཀར་པོ་ལྔའམ་གཅིག་བསྐྱེད་པ་སྟེ། ཡན་ལག་བདུན་པ་ནས་རྒྱུ་རྡོ་རྗེ་འཛིན་པའི་མངོན་བྱང་ལྔ་ཡན་ཆད་ལེའུ་བཅུ་གཉིས་པ་ན་ཤིན་ཏུ་གསལ་བར་བཞུགས་སོ། །དེ་ནས་མཁའ་གསང་བྱིན་གྱིས་བརླབས་པ་ནས་སྙོམས་པར་ཞུགས་ཏེ། དེ་བཞིན་གཤེགས་པའི་ཚོགས་སྤྱན་དྲངས་ནས་ཞུ་བར་གྱུར་པ་ལས། དབང་གི་གནས་སུ་རང་རང་གི་ལྷ་མོ་རྣམས་ཀྱི་མིང་གི་ཡི་གེ་དང་པོ་ལས་རང་རང་གི་ལྷ་མོ་རྣམས་བསྐྱེད། རང་རང་གི་གནས་སུ་ཕྱུང་ལ་གསལ་གདབ་པ་ནི། མཁའ་འགྲོ་མ་ཡི་དཀྱིལ་འཁོར་སྤྲོ། །ཞེས་བྱ་བ་ཡིན་ནོ། །དེ་དག་ལས་དཀྱིལ་འཁོར་གྱི་རྒྱ་ཁྱོན་ནི་ལེའུ་དྲུག་པ་ནས་འབྱུང་། དཀྱིལ་འཁོར་གྱི་བཀོད་པ་དང་། ལྷ་ཡི་གྲངས་ནི་ལེའུ་དང་པོ་ནས། གཙོ་བོ་རྣམས་ཀྱི་སྐུ་མདོག་དང་ཕྱག་མཚན་ལེའུ་བཅུ་བཞི་པ་དང་། ལྔ་པ་དང་། དགུ་པ་ནས། ཧེ་རུ་ཀ་གསུམ་གྱི་རྣམ་པ་ནི་བཅོ་ལྔ་པའི་སྟོད་ནས། འཁོར་གྱི་ལྷ་མོ་རྣམས་ཀྱི་ཕྱག་མཚན་དག་པ་དང་བཅས་པ་ནི་ལེའུ་བཞི་པ་ལས་གསུངས། དེ་ལྟ་བུའི་རིགས་རྐྱང་བསྡུས་དང་། བསྡུས་པ་རྒྱས་བསྡུས་ཀྱི་དབྱེ་བ་ནི་ལེའུ་ལྔ་པ་ནས་འབྱུང་བས། མངོན་པར་རྟོགས་པའང་དེར་བཤད་པར་བྱའོ། །དེ་ནས་རྒྱུ་རྡོ་རྗེ་འཛིན་པ་འོད་དུ་ཞུ་བ་ནི་ཡི་གེ་གསུམ་ཧོ་གཉིས་ཀྱི་མཐའ་བསྟན་པ་ཞལ་དུ་ཞུགས་པས་ཞུ་བ་ནི། དྲི་ཟ་མཉམ་པར་ཞུགས་ནས་ནི། །ཁུ་བར་རྗེས་སུ་དྲན་པར་བྱ། །ཞེས་བྱའོ། །དེ་ནས། མཚམས་ཀྱི་ལྷ་མོས་བསྐུལ་བར་བྱ། །ཞེས་བྱ་བས་གླུས་བསྐུལ་ཏེ། གླུའི་ཚིག་ནི་ལེའུ་བརྒྱད་པ་ནས་འབྱུང་ངོ་། །འཁོར་ལོའི་འདྲེན་པ་བསྐུལ་ནས་ནི། །ཞེས་བྱ་བ་ནི་འབྲས་བུ་རྡོར་འཛིན་བཞེངས་པ་སྟེ། བཞེངས་པའི་སྔགས་ནི་ལེའུ་བཅུ་གཉིས་པ་ནས་འབྱུང་ངོ་ཞེས་ཧེ་རུ་ཀ་གསུམ་ལ་ཡང་ཡན་ལག་དྲུག་པའི་ཚུལ་དུ་སྤྱིར་གསུངས་ནས་དེ་ཉིད་གསལ་བར་བྱ་བའི་ཕྱིར། ལེའུ་བཅོ་ལྔ་པ་ལས། ཡན་ལག་གི་དོན་ནི་ཧེ་རུ་ཀ་གསུམ་ནི་འདིར་དཔའ་བོ་གཅིག་པའམ། ལྷན་གཅིག་བསྐྱེད་པའི་རྣལ་འབྱོར་དུ་གསུངས་ཏེ། དེ་ལྟ་བུའི་མངོན་པར་རྟོགས་པ་བསྒོམས་ན། འོག་ཏུ་ཀུ་རུ་ཀུལླེ་ལ་སོགས་པ་དང་འདྲ་བས་དེར་བརྗོད་པར་བྱའོ། །དཀྱིལ་འཁོར་དུ་བསྒོམས་ན་རྩ་བའི་རྒྱུད་དང་ཐུན་མོང་དུ་བྱས་ཏེ། ཚོགས་ཀྱི་ཞིང་སྤྱན་དྲང་པ་ནས་གཞལ་ཡས་ཁང་བསྒོམ་པའི་བར་ལེའུ་བཅུ་གཉིས་པ་བཞིན་བྱ། དེ་ནས་མངོན་བྱང་ལྔ་ལས་རྒྱུ་རྡོ་རྗེ་འཛིན་པ་བསྐྱེད་པ་དག་འཁོར་གྱི་ལྷ་མོ་དབྱུང་བ་ནས་བརྩམས་ཏེ། ཡན་ལག་ཐམས་ཅད་གོང་དུ་བསྟན་པ་བཞིན་ཤེས་པར་བྱའོ། །ཡང་ཕྱག་གཉིས་པ་ལ་ཡུམ་མེད་པས་འཁོར་གྱི་ལྷ་མོ་སྙིང་ཁ་ནས་འབྱིན་ཏེ། དེའི་ཕྱིར་རྒྱུ་རྡོ་རྗེ་འཛིན་པ་འོད་དུ་ཞུ་བ་དང་། གླུས་བསྐུལ་བ་དང་། འབྲས་བུ་རྡོ་རྗེ་འཛིན་པ་བཞེངས་པ་འདིའི་ཕྱོགས་ལ་མི་དགོས་སོ། །ཡང་བདག་མེད་མ་ནི་སྤྱིའི་ཡུམ་ཡིན་པས། ཡུམ་བདག་མེད་མས་བྱས་ལ་མཁའ་གསང་བྱིན་གྱིས་བརླབ་པ་ལ་སོགས་པ་ཐམས་ཅད་ཕྱག་བཅུ་དྲུག་པ་བཞིན་དུ་བྱས་པས་འགྲུབ་པ་ཡིན་ནོ་ཞེས་གསུངས་པའི་ཕྱིར་རོ། །འོ་ན་གོང་གི་རྗེ་བཙུན་གྱི་ལུང་ཇི་ལྟར་དྲངས་སྙམ་ན་དེ་ནི་མི་ཐུབ་ཟླ་བའི་ལུགས་བརྗོད་པ་ཙམ་ཡིན་ཏེ། དག་ལྡན་ལས། ནམ་མཁའི་དཀྱིལ་འཁོར་ཁྱབ་པ་ཡི། །ཞེས་བྱ་བའི་ཚིགས་སུ་བཅད་པ་གཅིག་གིས་ནི་འཁོར་གྱི་ལྷ་མོ་དབྱུང་བ་བསྟན་ཏེ། སྦྱང་དཀའ་ཟླ་བའི་དགོངས་པ་ཡིན་ནོ་ཞེས་གསུངས་པའི་ཕྱིར་དང་། རྗེ་བཙུན་གྱི་དགོངས་པ་མཐའ་གཅིག་ཏུ་མིན་པར་བཤད་མ་ཐག་པའི་གུར་རྒྱན་གྱི་ལུང་ལས་གསལ་ལོ། །རྗེ་བཙུན་རྩེ་མོས་ཀྱང་ཧེ་རུ་ཀའི་འཁོར་ཐུགས་ཁ་ནས་སྤྲོ་བ་འབའ་ཞིག་ཏུ་བཤད་པ་མ་ཡིན་ཏེ། རྗེ་བཙུན་རྩེ་མོས་སཾ་བུ་ཊའི་ཊཱི་ཀར། དེ་ལྟར་གཙོ་བོ་བསྐྱེད་ནས་འཁོར་བསྐྱེད་པ་ནི་ནམ་མཁའི་དཀྱིལ་འཁོར་ཞེས་བྱ་བ་ཤ་ལོ་ཀ་གཅིག་སྟེ། འདི་ནི་ཕྱག་གཉིས་པའི་དབང་དུ་བྱས་པར་བཞེད་དོ་ཞེས་དང་། ཕྱག་བཞི་པའི་སྐབས་སུ་འོན་ཀྱང་འདིའི་འཁོར་གྱི་ལྷ་མོ་ནི་མངལ་སྐྱེས་སུ་བྱའོ་ཞེས་བྱ་བ་ནི་མན་ངག་གོ་ཞེས་དང་། ཕྱག་དྲུག་པའི་སྐབས་སུ་གསུམ་པ་དེར་འཁོར་གྱི་ལྷ་མོ་དབྱུང་བ་ནི་དེ་ཡང་མངལ་སྐྱེས་ཀྱི་ཚུལ་གྱིས་དབྱུང་སྟེ་ཞེས་གསལ་བར་གསུངས་པ་དང་། རྗེ་ས་སྐྱ་པ་ཆེན་པོས་ཐབས་དང་ཤེས་རབ་སྙོམས་པར་ཞུགས་པ་ལས། གསང་གནས་ནས་རྫུས་སྐྱེས་ཀྱི་ཚུལ་དུ་འཁོར་གྱི་ལྷ་རྣམས་ཕྱུང་སྟེ་ཞེས་གསུངས་པ་ལ་རྟོག་ཤིག ཁྱད་པར་དུ་སྐབས་འདིར་མི་ཐུབ་ཟླ་བའི་འཁྲུགས་ཅན་མངོན་པར་རྟོགས་པ་བཅོ་ལྔ་པ་ཡིན་པར་རིགས་ཏེ། དེ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་རོ་ཞེས་ཟེར་བ་ནི་རིགས་པ་དང་བྲལ་བའི་རྣམ་འགྱུར་ཡིན་ཏེ། དེ་ལྟར་ན་མི་ཐུབ་ཟླ་བའི་དགོངས་པ་མཉམ་སྦྱོར་དང་མི་མཉམ་སྦྱོར་གྱི་སྒྲུབ་ཐབས་གཉིས་པོ་རེ་རེ་ལ་ཡང་ས་བོན་སྤྲོ་བ་དང་། ལྷ་མོ་སྤྲོ་བ་གཉིས་ཀྱིས་ཕྱེ་བས་སྙིང་པོ་ཀྱཻ་རྡོ་རྗེའི་མངོན་རྟོགས་བཞི་དང་། མཚོ་སྐྱེས་དགོངས་པ་དཀྲོང་བསྐྱེད། ས་བོན་ལས་བསྐྱེད་པ། རྡོ་རྗེ་ཆོ་ག་ལས་བསྐྱེད་པ། མངོན་བྱང་ལ་ཨཱ་ལི་ཀཱ་ལི་ལ་ལྟོས་མ་ལྟོས་གཉིས། དེ་རེ་རེ་ལ་ཡང་ཐིག་ལེ་སྤྲོ་བ་དང་། ས་བོན་སྤྲོ་བ་གཉིས་ཀྱིས་ཕྱེ་བས། སྙིང་པོ་ཀྱཻ་རྡོ་རྗེའི་སྒྲུབ་ཐབས་བདུན་དང་། གཞན་ཡང་ནག་པོ་དམ་ཚིག་རྡོ་རྗེས་བཤད་པ་ལ་སོགས་པ་གོང་གི་བཅུ་གཉིས་པོ་ལ་མ་གཏོགས་པའི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཐམས་ཅད་སྐབས་འདིའི་མངོན་རྟོགས་བཅོ་ལྔ་པར་འགྱུར་ཏེ། དེ་རྣམས་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་རོ། །ཁྱད་པར་དུ་རྡོ་རྗེ་ཆོ་ག་ཡན་ལག་གསུམ་ལས་བསྐྱེད་པའི་ཀྱཻ་རྡོ་རྗེའི་སྒྲུབ་ཐབས་དེ་སྐབས་འདིའི་མངོན་རྟོགས་ཚུལ་བཅོ་ལྔ་པར་འགྱུར་ཏེ། དེ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་རོ་ཞེས་པ་ཐམས་ཅད་དུ་མཚུངས་སོ། །དེས་ན་མི་ཐུབ་ཟླ་བའི་འཁྲུགས་ཅན་སྐབས་འདིའི་མངོན་རྟོགས་བཅོ་ལྔ་པར་བགྲང་བ་མི་རིགས་ཏེ། སྐབས་འདིའི་ཚུལ་བཅོ་ལྔ་པོ་མན་ངག་ལུགས་འབའ་ཞིག་ཡིན་པའི་ཕྱིར་རོ། །དེའི་ཕྱིར་རྡོ་རྗེ་ཆོ་ག་གསུམ་ལས་བསྐྱེད་པ་བཅོ་ལྔ་པར་བགྲང་བར་རིགས་ཏེ། དག་ལྡན་ལས། དེའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་ཧེ་རུ་ཀ་གསུམ་གྱི་དམ་ཚིག་སེམས་དཔའ་སྒོམ་པ་ནི། ཤླཽ་ཀ་ཕྱེད་དང་གསུམ་གྱིས་བསྟན་ཏེ། འདིས་མཚོན་ནས་ཨཾ་ལས་གྲི་གུག་ཨཾ་གིས་མཚན་པ་ལས་བདག་མེད་མ་བསྐྱེད་པ་ནས་བཟུང་སྟེ། ཌཾ་ལས་རྡོ་རྗེ་ཌཾ་གིས་མཚན་པ་ལས་གཡུང་མོ་བསྐྱེད་པའི་བར་དུ་ཡང་སྦྱར་རོ་ཞེས་སྐབས་འདིར་སྐུ་རྡོ་རྗེ་ལ་ཡུམ་དངོས་སུ་མ་གསུངས་ཀྱང་དེ་ལྟར་དུ་གསུངས་པས། འདི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ལ་སྦྱོར་བར་ཤིན་ཏུ་གསལ་ལོ། །དེས་ན་ཁོ་བོའི་དཔལ་ལྡན་བླ་མ་དམ་པས་མངོན་རྟོགས་ཚུལ་བཅུ་བཞི་པའི་རྒྱུ་རྡོ་རྗེ་འཛིན་པའི་སྐུ་མདོག་གི་ཁྱད་པར་དང་། ཚུལ་བཅོ་ལྔ་པ་རྡོ་རྗེ་ཆོ་ག་ལས་བསྐྱེད་པར་མཛད་པ་དང་། ཧེ་རུ་ཀ་གསུམ་ལ་རྒྱུ་རྡོ་རྗེ་འཆང་བསྐྱེད་པ་དང་། འཁོར་གྱི་ལྷ་མོ་མངལ་ནས་དབྱུང་བ། འབྲས་བུ་རྡོ་རྗེ་འཛིན་པ་བཞེངས་པ་ཡོད་པར་གསུངས་པ་རྣམས་ནི། རྗེ་བཙུན་གོང་མ་རྣམས་ཀྱི་དགོངས་པ་ཕྱིན་ཅི་མ་ལོག་པ་ཡིན་པར་ཤེས་དགོས་ཤིང་འདི་ལྟ་བུའི་རྗེས་སུ་འཇུག་པ་ཡང་སྐལ་བ་བཟང་བར་རྟོགས་པར་བྱའོ་ཞེས་བྲིས་སོ། །དེ་དག་རིམ་པ་བཞིན་འགོག་པ་ནི། བིརྺ་པའི་ལུགས་ཀྱི་ཀྱཻ་རྡོ་རྗེའི་མངོན་རྟོགས་ཚུལ་བཅུ་བཞིར་གྲངས་ངེས་པ་ཞེས་པ་དང་། གོང་དུ་ཌོཾ་བྷི་ཧེ་རུ་ཀ་རྗེས་འབྲང་དང་བཅས་པའི་སྨིན་གྲོལ་གྱི་ལམ་ཐམས་ཅད་བིརྺ་པའི་ལམ་དུ་བསྒྲུབ་པ་དང་། མངོན་རྟོགས་ཚུལ་བཅོ་ལྔ་པ་ལ་མི་ཐུབ་ཟླ་བའི་འཁྲུགས་ཅན་བགྲངས་པ་རྣམས་ནང་འགལ་ལོ་ཞེས་པ་ནི་ཚིག་ཙམ་ལ་བརྟེན་པའི་དགག་སྒྲུབ་སྟེ། འདིར་བིརྺ་པའི་ལུགས་ཀྱི་སྙིང་པོ་ཀྱཻ་རྡོ་རྗེའི་མངོན་རྟོགས་ཚུལ་བཅུ་བཞིར་གྲངས་ངེས་ཞེས་པ་ནི་མན་ངག་ལུགས་ཀྱི་དབང་དུ་བྱས་པ་ཡིན་པའི་ཕྱིར་རོ། །མན་ངག་ལུགས་ཉིད་ལ་ཡང་བཅུ་བཞིར་གྲངས་མ་ངེས་ཏེ་མངོན་རྟོགས་ཚུལ་བཅོ་ལྔར་གྲངས་ངེས་པའི་ཕྱིར་རོ་ཞེས་པ་ནི་ཤིན་ཏུ་མི་འཐད་དེ། སྤྱིར་མན་ངག་ལུགས་ཀྱི་མངོན་རྟོགས་ལ་བཅུ་བཞིར་གྲངས་ངེས་པ་གཞན་གྱིས་ཀྱང་ཁས་མ་བླངས་ལ་མན་ངག་ལུགས་ལ་སྙིང་པོ་ཀྱཻ་རྡོ་རྗེའི་མངོན་རྟོགས་ཚུལ་བཅོ་ལྔ་པ་ནི་གཞི་མ་གྲུབ་པའི་ཕྱིར་རོ། །ལྷའི་ལེའུ་ལས་བཤད་པའི་དཀྲོང་བསྐྱེད་ཀྱིས་ཁ་བསྐང་བར་འགྱུར་ཞེས་པ་ཡང་འབྲེལ་མེད་ཡིན་ཞེས་སོགས་ཀྱི་སྐྱོན་སྤོང་ནུས་པ་ཡང་མ་ཡིན་ཏེ། ལྷའི་ལེའུ་ལས་བཤད་པའི་ས་བོན་ལས་བསྐྱེད་པ་དང་། མངོན་བྱང་ལས་བསྐྱེད་པ་གཉིས་ཀྱིས་ཀྱང་ཁ་བསྐང་དགོས་པར་འགྱུར་རོ་ཞེས་པའི་སྐྱོན་སྤོང་བའི་བརྩོན་པ་ད་དུང་བྱེད་དགོས་པའི་ཕྱིར་རོ། །རྩ་རྒྱུད་ཀྱི་ཧེ་རུ་ཀ་གསུམ་གྱི་མངོན་རྟོགས་རྒྱུ་འབྲས་ཀྱི་རྡོ་རྗེ་འཛིན་པ་དང་། ཞུ་བ་གླུས་བསྐུལ་སོགས་ཡོད་པའི་ཤེས་བྱེད་དུ་གུར་རྒྱན་གྱི་ལུང་རབ་ཏུ་མང་པོ་དྲངས་པ་རྣམས་ནི་རྩ་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་དང་། གུར་གྱི་ཧེ་རུ་ཀ་གསུམ་གྱི་བསྐྱེད་ཆོག་མ་ཕྱེད་པའི་གཏམ་དུ་སྣང་སྟེ། གུར་གྱི་ཧེ་རུ་ཀ་གསུམ་ལ་བསྐྱེད་ཆོག་དེ་དག་མེད་པར་གཞན་གྱིས་ཀྱང་མ་སྨྲས་པའི་ཕྱིར་དང་། རྩ་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་ལ་དག་ལྡན་ཚད་མ་ཡིན་པའི་ཕྱིར་རོ། །རྩ་རྒྱུད་ཀྱི་ཧེ་རུ་ཀ་གསུམ་ལ་འཁོར་གྱི་ལྷ་མོ་ཐུགས་ཀ་ནས་སྤྲོ་བ་རྗེ་བཙུན་གྱི་དགོངས་པ་མཐའ་གཅིག་ཏུ་མ་ཡིན་པར་བཤད་མ་ཐག་པའི་གུར་རྒྱན་གྱི་ལུང་དང་། སཾ་བུ་ཊའི་ཊཱི་ཀ་དང་། རྗེ་ས་ཆེན་གྱི་གསུང་རྣམས་ལས་རྟོགས་ཤིག་ཅེས་པ་ནི། རྩ་རྒྱུད་དང་། བཤད་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་གི་ཁྱད་པར་མ་ཕྱེད་པ་ཡིན་པར་གོང་དུ་བཤད་ཟིན་ཏོ། །གཞན་ཡང་རྩ་རྒྱུད་ཀྱི་ཧེ་རུ་ཀ་གསུམ་གྱི་བསྐྱེད་ཆོག་རྒྱས་འབྲིང་བསྡུས་པ་གསུམ་ཆར་ལ་ཡང་། དང་པོ་སྟོང་ཉིད་བྱང་ཆུབ་སེམས། །ཞེས་སོགས་བསྙེན་སྒྲུབ་ཡན་ལག་བཞིས་འཆིང་བ་དང་། གུར་གྱི་ཧེ་རུ་ཀ་གསུམ་གྱི་མངོན་རྟོགས་ལ་གུར་ནས་བཤད་པའི་ཡན་ལག་དྲུག་གིས་འཆིང་བར་རྗེ་བཙུན་གྱིས་འགྲེལ་པ་གཉིས་ལས་སོ་སོར་འབྱུང་བའི་དོན་རྟོགས་ན། རྩ་རྒྱུད་ཀྱི་ཧེ་རུ་ཀ་གསུམ་ལ་ཞུ་བ་གླུས་བསྐུལ་བ་དང་། རྒྱུ་འབྲས་ཀྱི་ཧེ་རུ་ཀ་སྦྱོར་བ་སོགས་ཀྱི་འཁྲུལ་པ་འདི་ཡོད་པའི་དོན་མེད་དོ། །འོ་ན་གུར་རྒྱན་ལས། དཀྱིལ་འཁོར་དུ་སྒོམ་ན་རྩ་བའི་རྒྱུད་དང་ཐུན་མོང་དུ་བྱས་ཏེ་ཞེས་གསུངས་པ་ཇི་ལྟར་དྲང་སྙམ་ན་དེ་ནི་གུར་ལས་ཧེ་རུ་ཀ་གསུམ་ལ་དཔའ་བོ་གཅིག་པ་ལས་མ་གསུངས་པས་རྩ་བའི་རྒྱུད་ལས་འཁོར་གསུངས་པ་དང་ཐུན་མོང་དུ་བྱེད་ཅེས་པའི་དོན་ཡིན་གྱི་མངོན་རྟོགས་ཀྱི་ཆིངས་རྩ་རྒྱུད་དང་ཐུན་མོང་དུ་བྱེད་ཅེས་པ་མིན་ཏེ་ཚོགས་ཞིང་སྤྲོ་བ་མན་ཆད་ཀྱི་མངོན་རྟོགས་ཀྱི་ཆིངས་རྣམས་གུར་དང་སྦྱར་གྱི་རྩ་རྒྱུད་དང་སྦྱར་བ་མི་སྣང་བའི་ཕྱིར་རོ། །གུར་རྒྱན་གྱི་ལུང་འདིས་ཉི་ཟེར་མཁན་པོས་རྩ་རྒྱུད་ཀྱི་ཧེ་རུ་ཀ་གསུམ་གྱི་འཁོར། ཕྱག་བཅུ་དྲུག་པའི་འཁོར་དུ་རྗེ་བཙུན་གྱི་བཞེད་པར་འཆད་པ་བཀག་པ་ཡིན་ཏེ། རྩ་རྒྱུད་ཀྱི་ཧེ་རུ་ཀ་གསུམ་གྱི་འཁོར་ལེའུ་གསུམ་པ་ཉིད་ལས་གསུངས་པའི་ལྷ་མོ་བརྒྱད་ལ་བྱེད་རིགས་པའི་ཕྱིར་རོ། །མངོན་རྟོགས་ཚུལ་བཅོ་ལྔ་པ་མི་ཐུབ་ཟླ་བའི་ལུགས་ཀྱི་འཁྲུགས་ཅན་ལ་ཟེར་ཏེ། དེ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་རོ་ཞེས་པ་ལ་སྐྱོན་མང་དུ་བརྗོད་འདུག་པ་རྣམས་ནི་དོན་ལ་སྐྱོན་བརྗོད་པ་ཡིན་ནམ། ཚིག་ལ་སྐྱོན་བརྗོད་པ་ཡིན། དང་པོ་ལྟར་ན་སྐྱོན་དེ་དག་འཇུག་པའི་གོ་སྐབས་མེད་དེ། འདིའི་མངོན་རྟོགས་ཚུལ་བཅོ་ལྔ་པ་ནི་ཧེ་རུ་ཀ་གསུམ་གྱི་སྐབས་སུ་བཤད་པའི་རྡོ་རྗེ་ཆོ་ག་གསུམ་བསྐྱེད་དང་། མི་ཐུབ་ཟླ་བའི་འཁྲུགས་ཅན་གཉིས་ཀྱི་ནང་ནས་ཕྱི་མ་ཡིན་པར་རིགས་ཏེ། འདིའི་མངོན་རྟོགས་ཚུལ་བཅོ་ལྔ་པོ་ཐམས་ཅད་ཀྱང་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པས་སྔ་མ་སྙིང་པོ་ཀྱཻ་རྡོ་རྗེའི་སྒྲུབ་ཐབས་མ་ཡིན། ཕྱི་མ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་ཞེས་པའི་དོན་ཡིན་པས་ཁྱོད་ཀྱི་སྐྱོན་དེ་དག་གང་ལ་གཏོང་བ་ཡིན་སོམས་ཤིག ཚིག་ལ་སྐྱོན་བརྗོད་པ་ཡིན་ན་ཡང་འཇུག་པའི་གོ་སྐབས་མེད་དེ། མི་ཐུབ་ཟླ་བའི་འཁྲུགས་ཅན་དེ་མངོན་རྟོགས་ཚུལ་བཅོ་ལྔ་པ་ཡིན་ཏེ། དེ་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་པའི་ཕྱིར་ཞེས་པ་ཡིན་གྱི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ཡིན་ན་སྐབས་འདིའི་མངོན་རྟོགས་ཚུལ་བཅོ་ལྔ་པ་ཡིན་པས་ཁྱབ་པ་ཚིག་དོན་གང་དུ་ཡང་ཞལ་གྱིས་མ་བཞེས་པས་དོན་མེད་ཀྱི་ཐལ་བ་མང་པོ་བརྗོད་པའི་ངལ་བས་ཅི་ཞིག་བྱ། མི་ཐུབ་ཟླ་བའི་དགོངས་པ་མཉམ་སྦྱོར་དང་། མི་མཉམ་སྦྱོར་གྱི་སྒྲུབ་ཐབས་གཉིས་པོ་རེ་རེ་ལ་ཡང་ས་བོན་སྤྲོ་བ་དང་། ལྷ་མོ་སྤྲོ་བ་གཉིས་ཀྱིས་ཕྱེ་བས་སྙིང་པོ་ཀྱཻ་རྡོ་རྗེའི་མངོན་རྟོགས་བཞི་ཞེས་པ་ནི་སྔོན་མེད་པའི་གཏམ་སྟེ། ཀུ་མུ་ཏིར། མཉམ་སྦྱོར་ནི་རྒྱུ་རྡོ་རྗེ་འཆང་གི་མངོན་རྟོགས་ལ་སྦྱར་ལ། དེའི་ཚེ་འཁོར་གྱི་ལྷ་མོ་རྣམས་མི་མཉམ་སྦྱོར་གྱི་མངོན་བྱང་ལས་བསྐྱེད་པ་མ་གཏོགས་འཁོར་གྱི་ལྷ་མོ་སྤྲོ་བ་དང་། ཞུ་བ་གླུས་བསྐུལ་སོགས་གཏན་མེད་པའི་ཕྱིར་དང་། མི་མཉམ་སྦྱོར་ལ་ལྷ་མོ་སྤྲོ་བ་ཁོ་ན་ཡིན་གྱི་ས་བོན་སྤྲོ་བ་གཏན་མེད་པའི་ཕྱིར་ཏེ། གལ་ཏེ་ཡོད་ན་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་འདིའི་ས་བོན་དབྱུང་བ་དང་ཞེས་པས་ས་བོན་སྤྲོ་བ་དང་། གྲོང་ཁྱེར་ཉམས་དགར་ཁྱོད་དང་ང་། །ཞེས་སོགས་ཀྱིས་ལྷ་མོ་སྤྲོ་བ་བསྟན་དགོས་པ་ལས། འཁྲུགས་ཅན་གྱི་ཚེ་དེ་གཉིས་གཅིག་ཏུ་བྱས་ནས་ལྷ་མོ་སྤྲོ་བ་ཁོ་ན་ལ་སྦྱར་བར་དག་ལྡན་ལས་གསུངས་པའི་ཕྱིར་རོ། །དེ་བས་ཆེས་མཚོ་སྐྱེས་ལུགས་ལ་མངོན་རྟོགས་ཚུལ་བདུན་དུ་ཕྱེ་བ་འདི་ངོ་མཚར་ཆེ་སྟེ་རྡོ་རྗེ་ཆོ་ག་གསུམ་བསྐྱེད་མན་ངག་ལུགས་ལའང་སྦྱར་ས་མ་རྙེད་པའི་སྙིང་ནད་མཚོ་སྐྱེས་ལུགས་ལ་ལེན་པར་སྣང་ཡང་ལུགས་དེ་ལ་དེ་ལས་ཀྱང་ཆེས་མི་འཐད་པའི་ཕྱིར་དང་། ཨཱ་ལི་ཀཱ་ལི་ལ་ལྟོས་མ་ལྟོས་ཀྱི་མངོན་བྱང་རེ་རེ་ལ་ཡང་ཐིག་ལེ་སྤྲོ་བ་དང་ས་བོན་སྤྲོ་བ་དང་གཉིས་གཉིས་སུ་ཕྱེ་བས་སྙིང་པོ་ཀྱཻ་རྡོ་རྗེའི་སྒྲུབ་ཐབས་བདུན་དུ་འགྱུར་ན། རྩ་བའི་ཚུལ་བདུན་པོ་རེ་རེ་ལ་ཡང་རྒྱུ་རྡོ་རྗེ་འཆང་བཞེངས་ཚུལ། འཁོར་གྱི་ལྷ་མོ་དབྱུང་ཚུལ། འབྲས་བུ་རྡོ་རྗེ་འཆང་བཞེངས་ཚུལ་གསུམ་གསུམ་དུ་ཕྱེ་བས་ཁྱད་པར་བདུན་གསུམ་ཉི་ཤུ་རྩ་གཅིག་ཏུ་འགྱུར་ཏེ། རྗེ་ས་ཆེན་གྱིས་མཚོ་སྐྱེས་ལུགས་ཀྱི་རྩ་བའི་མངོན་པར་རྟོགས་པ་ཚུལ་རེ་རེ་ལ་ཡང་ཁྱད་པར་གསུམ་གསུམ་གྱི་སྒོ་ནས་ཕྱེ་བའི་རྣམ་བཞག་མཛད་པའི་ཕྱིར་རོ། །དེ་ཡང་ཇི་ལྟར་ཞེ་ན་དཔལ་བརྩེ་བ་ཆེན་པོའི་ཞལ་སྔ་ནས། དེ་ཡང་གང་ཟག་དབང་པོ་རབ། །འབྲིང་སོགས་བཞི་ཡི་སྒོམ་ཐབས་ནི། །སྐབས་གསུམ་དུ་ནི་མི་འདྲ་ལ། །བཞི་གསུམ་བཅུ་གཉིས་བླ་མ་བཞེད། །ཅེས་གསུངས་པ་ལ། བཞི་གསུམ་བཅུ་གཉིས་སུ་འགྱུར་བའི་ཚུལ་ཡང་གསུངས་པ། རྒྱུ་ཡི་རྡོ་རྗེ་འཆང་བསྐྱེད་དེ། །མི་འདྲ་རྣམ་པ་བཞི་རུ་གནས། །དེ་ནས་འཁོར་གྱི་ལྷ་མོ་རྣམས། །དབྱུང་ལ་མི་འདྲ་རྣམ་པ་བཞི། །འབྲས་བུ་རྡོ་རྗེ་འཆང་བཞེངས་ལ། །མི་འདྲ་བཞི་སྟེ་དེ་ལྟར་ན། །མི་འདྲ་བཅུ་གཉིས་དེ་ལྟར་གསུངས། །ཞེས་རྩ་བའི་མངོན་པར་རྟོགས་པ་ཚུལ་བཞི་ལ་གནས་སྐབས་གསུམ་དུ་མི་འདྲ་བ་གསུམ་གསུམ་དུ་ཕྱེ་བས་མི་འདྲ་བའི་ཁྱད་པར་བཅུ་གཉིས་ཞེས་པ་བཞེད་དོ། །འདི་ལྟ་བུའི་གསལ་བ་ཡོད་བཞིན་དུ། མཚོ་སྐྱེས་ལུགས་ལ་རྩ་བའི་མངོན་པར་རྟོགས་པ་བདུན་ཞེས་པའི་རྣམ་རྟོག་གི་རྙོག་མ་དེ་ཙམ་ཞིག་སློང་བ་ལ་དགོས་པ་ཅི་ཞིག་སྒྲུབ། བཞི་གསུམ་བཅུ་གཉིས་ཞེས་པས་མངོན་རྟོགས་ཚུལ་བཅུ་གཉིས་སུ་འགྱུར་བ་ནི་མ་ཡིན་ཏེ། ཚུལ་བཞི་ཉིད་ཡིན་པའི་ཕྱིར་རོ། །ལུགས་འདི་ལ་ཚུལ་བཞི་ལས་མེད་པའི་རྒྱུ་མཚན་ཡང་ཕྱི་མའི་ལྔ་པར་གསུངས་པའི་དཀྲོང་བསྐྱེད་དང་། ས་བོན་ལས་བསྐྱེད་པ་གཉིས་དང་། དང་པོའི་བརྒྱད་པར་གསུངས་པའི་ཨཱ་ལི་ཀཱ་ལི་ལ་ལྟོས་མ་ལྟོས་ཀྱི་མི་མཉམ་སྦྱོར་གཉིས་ལ་ཡན་ལག་བཞི་པ་སྦྱར་བ་ཁོ་ན་བཞེད་ཀྱི། ཡན་ལག་དྲུག་པའི་ཕྱོགས་དང་། མཉམ་སྦྱོར་གྱི་ཕྱོགས་དང་། འཁོར་སྤྲོ་ཚུལ་གཉིས་གཉིས་སུ་ཕྱེ་བའི་ཕྱོགས་རྣམས་ཞལ་གྱིས་མི་བཞེས་པའི་ཕྱིར་རོ། དཔལ་བརྩེ་བ་ཆེན་པོ་ཡབ་སྲས་ཀྱི་འགྲེལ་པ་གཉིས་ལ་ཞིབ་པར་ལྟོས་ཤིག མི་ཐུབ་ཟླ་བའི་འཁྲུགས་ཅན་མངོན་རྟོགས་བཅོ་ལྔ་པར་མི་རིགས་ཏེ། སྐབས་འདིར་ཚུལ་བཅོ་ལྔ་པོ་མན་ངག་ལུགས་འབའ་ཞིག་ཡིན་པའི་ཕྱིར་རོ་ཞེས་པ་ཡང་སྒྲུབ་བྱེད་བསྒྲུབ་བྱ་དང་མཚུངས་ཏེ། གཏན་ཚིགས་སྒྲུབ་པའི་ངལ་བ་ད་དུང་བྱ་དགོས་པའི་ཕྱིར་རོ། །གལ་ཏེ་ལམ་འབྲས་ཀྱི་བསྐྱེད་རིམ་གྱི་སྐབས་སུ་བཤད་པས་མན་ངག་ལུགས་འབའ་ཞིག་ཡིན་ནོ་སྙམ་ན། ཁྱེད་མན་ངག་ལུགས་དང་འགྲེལ་པ་ལུགས་ལམ་གྱི་ངོ་བོ་ཐ་དད་དུ་འཇོག་པ་ལ་འདི་ལྟ་བུའི་རྣམ་བཞག་མི་རུང་བ་བདེན་མོད་ཀྱི་ཁོ་བོའི་བླ་མ་ཐམས་ཅད་མཁྱེན་པ་ནི་དེ་གཉིས་ལམ་གྱི་ངོ་བོ་གཅིག་ཏུ་བཞེད་པའི་འགྲེལ་པ་ལུགས་ཀྱི་བསྐྱེད་རིམ་དང་ལམ་འབྲས་ཀྱི་རྫོགས་རིམ་སྦྱར་ནས་བསྒོམ་པ་བིརྺ་པའི་ལུགས་ཀྱི་ལམ་དུ་འགྱུར་བའི་ཕྱིར་རོ། །གཞན་ཡང་དཔའ་བོ་རྡོ་རྗེས་འབྲོག་མི་ལོ་ཙྪ་བ་ལ་ལམ་འབྲས་རྩ་བ་མེད་པ་གནང་བའི་བསྐྱེད་རིམ་དེ་འགྲེལ་པ་ལུགས་དང་། མན་ངག་ལུགས་གང་ཡིན་སྨྲོས་ཤིག དེ་ལྟ་མ་ཡིན་པར་ལམ་འབྲས་ཀྱི་ཉམས་ལེན་གྱི་སྐབས་སུ་བཤད་པ་ཐམས་ཅད་མན་ངག་ལུགས་འབའ་ཞིག་ཡིན་ན། རྡོ་རྗེ་སེམས་དཔའི་སྒོམ་བཟླས་དང་། དམ་ཚིག་རྡོ་རྗེའི་སྒོམ་བཟླས་དང་། རྡོ་རྗེ་མཁའ་འགྲོའི་སྦྱིན་སྲེག་རྣམས་ཀྱང་མན་ངག་ལུགས་སུ་འགྱུར་རོ། །རྡོ་རྗེ་ཆོ་ག་གསུམ་ལས་བསྐྱེད་པ་བཅོ་ལྔ་པར་རིགས་ཞེས་པའི་དོན། རྡོ་རྗེ་ཆོ་ག་གསུམ་ལས་བསྐྱེད་པའི་ཧེ་རུ་ཀ་གསུམ་གྱི་མངོན་རྟོགས་བགྲང་བ་ཡིན་ནམ། རྡོ་རྗེ་ཆོ་ག་གསུམ་ལས་བསྐྱེད་པའི་སྙིང་པོ་ཀྱཻ་རྡོ་རྗེའི་མངོན་རྟོགས་བགྲང་བ་ཡིན། དང་པོ་ལྟར་ན་ཤིན་ཏུ་མི་འཐད་དེ་འདི་ཡི་སྐབས་ཀྱི་མངོན་རྟོགས་ཚུལ་བཅོ་ལྔ་པོ་རྣམས་ལམ་འབྲས་ཀྱི་ལམ་ཡོངས་རྫོགས་བསྒོམས་ནས་ཚེ་གཅིག་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་སྒྲུབ་པའི་སྐབས་ཀྱི་བསྐྱེད་པའི་རིམ་པ་ཡིན་ལ་ཧེ་རུ་ཀ་གསུམ་ནི་དེའི་སྐབས་ཀྱི་བསྐྱེད་པའི་རིམ་པར་མི་རུང་བར། བདག་མེད་རྣལ་འབྱོར་ལྡན་པའམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང་། །དངོས་གྲུབ་འདོད་པས་མི་གནས་སོ། །ཞེས་པའི་དོན་ཡིན་པར་འགྲེལ་པ་ལུགས་དང་མན་ངག་ལུགས་གཉིས་མཐུན་པའི་ཕྱིར་རོ། །ཕྱི་མ་ལྟར་ན་དེ་ལྟ་བུའི་བསྐྱེད་ཆོག་མན་ངག་ལུགས་ཀྱི་ཡིག་ཆ་གང་དུ་ཡང་མེད་པས་མི་འཐད་ལ། ཚུལ་བཅོ་ལྔ་པར་བགྲང་བ་ཉིད་ཀྱིས་ཀྱང་དེ་ལྟ་བུ་མེད་པར་གསལ་ཏེ། གལ་ཏེ་ཡོད་ན་དཀྲོང་བསྐྱེད་དང་། ས་བོན་ལས་བསྐྱེད་པ་གཉིས་སོང་ནས་ཚུལ་གསུམ་པར་བགྲང་བར་རིགས་ཀྱི་ཚུལ་བཅོ་ལྔ་པར་བགྲང་བ་བཤད་པའི་གོ་རིམ་དང་། ཉམས་ལེན་གྱི་གོ་རིམ་ཡང་མེད་པའི་ཕྱིར་རོ། །སྔ་མ་ནི་བཤད་པའི་གོ་རིམ་ཡིན་ཏེ། མན་ངག་ལུགས་ཀྱི་མངོན་པར་རྟོགས་པ་ཕྱོགས་གཅིག་ཏུ་བགྲངས་ནས་འགྲེལ་པ་ལུགས་ཀྱི་མངོན་རྟོགས་ལོགས་སུ་བགྲང་བའི་དབང་དུ་བྱས་པའི་ཕྱིར་རོ། །འདིས་མཚོན་ནས་ཨཾ་ལས་གྲི་གུག་ཨཾ་གིས་མཚན་པ་ལས་བདག་མེད་མ་བསྐྱེད་པ་ནས་བཟུང་སྟེ། ཌཾ་ལས་རྡོ་རྗེ་ཌཾ་གིས་མཚན་པ་ལས་གཡུང་མོ་བསྐྱེད་པའི་བར་དུ་སྦྱར་རོ་ཞེས་སྐབས་འདིར་སྐུ་རྡོ་རྗེ་ལ་བདག་མེད་མ་དངོས་སུ་མ་གསུངས་པས་འདི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ལ་སྦྱོར་བ་ཤིན་ཏུ་གསལ་ལོ་ཞེས་པ་ནི། སྒྲུབ་བྱེད་ཀྱིས་ཕོངས་པས་གླང་པོ་ཆེའི་ཁྲུས་འདྲ་བར་གྱུར་ཏེ། སྔར་སྐུ་རྡོ་རྗེ་ལ་ཕྱག་བཅུ་དྲུག་པའི་འཁོར་ཡོད་པར་སྒྲུབ་པའི་སྐབས་སུ། སྐུ་རྡོ་རྗེ་ལ་ཡུམ་བདག་མེད་མ་དོན་ཐོབ་ལ་ཡོད་པའི་དབང་དུ་བྱས་ནས་འདི་གསུངས་པར་ཁས་བླངས་ལ། འདིར་ནི་སྙིང་པོ་ཀྱཻ་རྡོ་རྗེ་ལ་ཆོ་ག་གསུམ་བསྐྱེད་ཡོད་པར་སྒྲུབ་པའི་ཆེད་དུ་སྐུ་རྡོ་རྗེ་ལ་ཡུམ་བདག་མེད་མ་དངོས་སུ་མ་གསུངས་པས་འདི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ལ་སྦྱོར་བར་སྨྲས་པའི་ཕྱིར་རོ། །སྐྱོན་གཞན་ཡང་འདི་སྙིང་པོ་ཀྱཻ་རྡོ་རྗེའི་སྒྲུབ་ཐབས་ལ་སྦྱོར་ན་འཁོར་གྱི་ལྷ་མོ་རྣམས་ཀྱང་མངལ་དུ་རྡོ་རྗེ་ཆོ་ག་གསུམ་ལས་བསྐྱེད་པ་དགོས་པ་ལས་དེ་ལྟ་བུ་ནི་མན་ངག་ལུགས་ཀྱི་ཡིག་ཆ་གང་དུ་ཡང་མ་བཤད་ཅིང་ཁྱད་རང་གིས་ཚད་མར་ཁས་བླངས་པའི་མན་ངག་གི་གཏེར་མཛོད་ལས་ཀྱང་། ཧེ་རུ་ཀ་གསུམ་རྡོ་རྗེ་ཆོ་ག་གསུམ་ལས་བསྐྱེད་པའི་སྐབས་སུ་འཁོར་གྱི་ལྷ་མོ་རྣམས་མངལ་དུ་ས་བོན་ལས་བསྐྱེད་པ་བྱས་པ་དང་ཡང་འགལ་ལོ། །དེས་ན་ཁོ་བོའི་བླ་མ་ཐམས་ཅད་མཁྱེན་པས་མངོན་རྟོགས་ཚུལ་བཅུ་བཞི་པོའི་ཁྱད་པར་དང་། ཚུལ་བཅོ་ལྔ་པ་མི་ཐུབ་ཟླ་བའི་འཁྲུགས་ཅན་ལ་མཛད་པ་དང་། ཧེ་རུ་ཀ་གསུམ་ལ་རྒྱུ་རྡོ་རྗེ་འཆང་བསྐྱེད་པ། འཁོར་གྱི་ལྷ་མོ་མངལ་ནས་དབྱུང་བ། འབྲས་བུ་རྡོ་རྗེ་འཛིན་པ་བཞེངས་པ་རྣམས་བཤད་རྒྱུད་དང་། རྩ་རྒྱུད་ལ་ཡོད་མེད་སོགས་ཕྱེ་ནས་གསུངས་པ་ནི། རྗེ་བཙུན་གོང་མ་རྣམས་ཀྱི་དགོངས་པ་ཕྱིན་ཅི་མ་ལོག་པར་ཡིན་པར་ཤེས་དགོས་ཤིང་འདི་ལྟ་བུའི་རྗེས་སུ་འཇུག་པ་ཡང་སྐལ་བ་བཟང་པོར་ཤེས་པར་བྱའོ། །འདིར་ལྟོ་གོས་ཀྱི་རེ་བ་ལྷུར་བླང་ཞིང་ངོ་ཚ་རྒྱང་དུ་དོར་བའི་རྨོངས་པའི་འཁོར་དག་གི་གཅམ་བུའི་ངོ་བོས་བསྟོད་པས་མཁས་པར་རློམ་སྟེ་བསྟན་འཛིན་ཆེན་པོ་དག་ལ་ཚམ་ཚོམ་མེད་པར་རྒོལ་བའི་མངོན་པའི་ང་རྒྱལ་ཅན་དག་རྗེ་བཙུན་གྱི་དགོངས་པ་མངོན་རྟོགས་ཚུལ་བཅུ་བཞི་འདི་ལྟར་འཆད་དེ། གང་ཟག་ལྔ་ལས་མངོན་པར་རྟོགས་པ་གསུམ་དུ་བསྡུ་བ་དང་། དེ་ལ་དོགས་པ་སྤོང་བ། དེ་ལས་བཅུ་བཞིར་དབྱེ་བའོ། །དང་པོ་ལ་གསུམ། གང་ཟག་རབ་དང་ཐ་མ་ལ་མངོན་རྟོགས་བསྡུས་པ། རབ་འོག་དང་ཐ་ལྟག་ལ་མངོན་རྟོགས་འབྲིང་པོ། གང་ཟག་འབྲིང་ལ་མངོན་རྟོགས་རྒྱས་པའོ། །དང་པོ་ནི་དཀྲོང་བསྐྱེད་དང་། གཉིས་པ་ནི་ས་བོན་ལས་བསྐྱེད་པ་ལ་འཆད། གསུམ་པ་ལ་གཉིས། གང་ཟག་ཏིང་ངེ་འཛིན་གྱི་རྟོགས་པ་ཅུང་ཟད་ཡོད་པས་བསྒོམ་པ་ཨཱ་ལི་ཀཱ་ལི་ལ་མ་ལྟོས་པ་དང་། དེ་མེད་ཀྱང་བློ་དང་ལྡན་པས་བསྒོམ་པ་ཨཱ་ལི་ཀཱ་ལི་ལ་ལྟོས་པའོ། །དང་པོ་ནི། ད་ནི་གང་ཟག་བློ་གྲོས་འབྲིང་དུ་གྱུར་པས་སྒོམ་པའི་མངོན་པར་རྟོགས་པ་ནི་ཞེས་དག་ལྡན་གྱི་ལུང་དྲངས་ནས་ཨཱ་ལི་ཀཱ་ལི་སྤངས་པའི་མངོན་བྱང་རྣམས་འཆད། གཉིས་པ་ལ་བཞི། མི་མཉམ་སྦྱོར་རྒྱས་པ། དེ་བསྡུས་པ། མཉམ་སྦྱོར་རྒྱས་པ། དེ་བསྡུས་པའོ། །དང་པོ་ནི། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་ལས་གཙོ་འཁོར་ཐམས་ཅད་བསྐྱེད་པ་དང་། གཉིས་པ་ནི་རྒྱུ་རྡོ་རྗེ་འཆང་ཁོ་ན་བསྐྱེད་པ་དང་། གསུམ་པ་ནི་གཙོ་བོ་མཉམ་སྦྱོར་འཁོར་མི་མཉམ་སྦྱོར་ལས་བསྐྱེད་པ་དང་། བཞི་པ་ནི་གཙོ་བོ་ཁོ་ན་མཉམ་སྦྱོར་ལས་བསྐྱེད་པའོ། །གཉིས་པ་དོགས་པ་སྤོང་བ་ནི་རབ་དང་ཐ་མ་ལ་མངོན་རྟོགས་གཅིག་ཏུ་འོང་བ་ལ་སོགས་པ་ཇི་ལྟར་རིགས་སྙམ་ན་སྐྱོན་མེད་དེ། རབ་ལ་ནི་དེ་ཙམ་གྱིས་ཆོག་ཅིང་ཐ་མས་ནི་དེ་ཙམ་ལས་བསྒོམ་མི་ནུས་པའི་ཕྱིར་རོ། །གསུམ་པ་དེ་བཅུ་བཞིར་དབྱེ་བ་ནི་དག་ལྡན་ལས་གསུངས་པའི་བཅུ་བཞིའི་གྲངས་བགྲངས་ནས། དེས་ན་ངོར་པའི་བགྲང་ཚུལ་ནི་བཅུ་བཞིར་གྲངས་མཐུན་པ་ཙམ་མ་གཏོགས་རྗེ་བཙུན་གྱི་བཞེད་པ་འདི་དང་མི་མཐུན་པར་འདིར་གོང་འོག་ཏུ་བཤད་པ་རྣམས་ཀྱིས་ཤེས་སོ་ཟེར་རོ། །འདི་ལ་གང་ཟག་ལྔ་ལས་ཞེས་པ་ནོར། མངོན་རྟོགས་གསུམ་དུ་བསྡུ་བ་ནོར། རབ་དང་ཐ་མ་ཞེས་པ་ནོར། རབ་འོག་དང་ཐ་ལྟག་ཅེས་པ་ནོར། མངོན་རྟོགས་འབྲིང་པོ་ཞེས་པ་ནོར། གང་ཟག་འབྲིང་ལ་ཞེས་པ་ནོར། དེ་ལ་ཏིང་ངེ་འཛིན་གྱི་རྟོགས་པ་ཅུང་ཟད་ཡོད་པ་དང་། དེ་མེད་ཀྱང་བློ་དང་ལྡན་པ་དང་གཉིས་སུ་ཕྱེ་བ་ནོར། གང་ཟག་བློ་གྲོས་འབྲིང་དུ་གྱུར་པས་ཞེས་པའི་ལུང་སྦྱོར་ནོར། མངོན་རྟོགས་རྒྱས་པ་ཞེས་པ་ནོར། དེ་ལ་གཉིས་སུ་ཕྱེ་ནས་ཨཱ་ལི་ཀཱ་ལི་ལ་ལྟོས་པ་ལ་མི་མཉམ་སྦྱོར་རྒྱས་བསྡུས་དང་མཉམ་སྦྱོར་རྒྱས་བསྡུས་ཀྱི་ཐ་སྙད་བྱེད་པ་ནོར། དོགས་པ་སྤོང་བའི་སྐབས་ནོར། མངོན་རྟོགས་བཅུ་བཞིར་བགྲངས་ནས་གཞན་གྱི་བགྲང་ཚུལ་རྗེ་བཙུན་གྱི་བཞེད་པ་མ་ཡིན་པ་ནོར་བ་དང་བཅུ་གཉིས་ལས་དང་པོ་ནི། རྗེ་བཙུན་གྱི་རྟོགས་པ་ཡས་རིམ་གྱི་དབང་དུ་བྱས་ནས་རྟོགས་པ་རབ་དང་། དེའི་འོག་མ་དང་། འབྲིང་དང་། ཏིང་ངེ་འཛིན་གྱི་རྟོགས་པ་མེད་པ་བཞི་བློ་གྲོས་མས་རིམ་གྱི་དབང་དུ་བྱས་ནས་བློ་གྲོས་ཐ་མ་དང་། ཐ་ལྟག་དང་། འབྲིང་དང་། བློ་གྲོས་རབ་དང་ལྡན་པ་བཞི་སྟེ། སྐབས་འདིར་བཞི་ཚན་གཉིས་གསུངས་ཀྱི་ཁྱོད་འདོད་པ་ལྟར་གྱི་གང་ཟག་ལྔའི་རྣམ་བཞག་ནི་ཚིག་དང་དོན་གང་ལ་ཡང་མེད་པས་རྙོག་མ་འདི་ལྟ་བུ་ཅིའི་ཕྱིར་སློང་བར་བྱེད། གཉིས་པ་ནི་སྐབས་འདིར་སྔར་གྱི་གང་ཟག་བཞི་ཚན་གཉིས་ལ་དཀྲོང་བསྐྱེད། ས་བོན་ལས་བསྐྱེད་པ། ཨཱ་ལི་ཀཱ་ལི་ལ་མ་ལྟོས་པའི་མངོན་བྱང་། ལྟོས་པའི་མངོན་བྱང་སྟེ་བཞི་གསུངས་ཀྱི། རྒྱས་འབྲིང་བསྡུས་གསུམ་གྱི་ཐ་སྙད་མ་གསུངས་པ་ལམ་འབྲས་ཀྱི་ཡིག་ཆུང་དུ་རྒྱས་འབྲིང་བསྡུས་གསུམ་གྱི་ཐ་སྙད་གསུངས་པ་ནི་གཙོ་འཁོར་ཐམས་ཅད་མངོན་བྱང་ལས་བསྐྱེད་པ་དང་། རྒྱུ་རྡོ་རྗེ་འཛིན་པ་ཁོ་ན་མངོན་བྱང་ལས་བསྐྱེད་པ་དང་། སྐད་ཅིག་གིས་བསྐྱེད་པ་གསུམ་ལ་གསུངས་ཀྱི་ཁྱོད་འདོད་པ་ལྟར་གྱི་རྒྱས་འབྲིང་བསྡུས་གསུམ་ནི་མན་ངག་ལུགས་ཀྱི་ཡིག་ཆ་གང་ལ་ཡང་མེད་པས་ངན་རྟོག་འདི་གང་ལས་རྙེད། གསུམ་པ་ནི་རབ་དང་ཐ་མ་ནི་རྟོགས་པ་རབ་དང་བློ་གྲོས་ཐ་མ་ལ་འདོད་ན་ནི་རྟོགས་པ་ཐ་མ་དང་བློ་གྲོས་རབ་གཉིས་ཀྱང་སོ་སོར་བགྲང་དགོས་པ་ལས་དེ་གཉིས་གང་ཟག་འབྲིང་གི་ནང་དུ་བགྲང་འདུག་པ་དང་འགལ་ཞིང་དེ་ལས་གཞན་པའི་རབ་དང་ཐ་མ་བསྟན་རྒྱུ་ཡོད་ན་སྨྲ་བའི་དུས་ལ་བབ་བོ། །བཞི་པ་ནི་རབ་འོག་དང་ཐ་ལྟག་ཅེས་པ་རྟོགས་པར་རབ་འོག་དང་། བློ་གྲོས་ཐ་ལྟག་ལ་འདོད་ན་སྔར་གྱི་སྐྱོན་གནས་ཤིང་དེ་ལས་གཞན་ལ་འདོད་ན་ཡང་དེ་ལྟར་རོ། །ལྔ་པ་ནི་ས་བོན་ལས་བསྐྱེད་པ་འབྲིང་པོར་འདོད་པ་སྣང་བས་སྔར་ཉི་ཟེར་མཁན་པོ་ལ་བརྗོད་པའི་སྐྱོན་ཐམས་ཅད་དྲན་པར་གྱིས་ཤིག དྲུག་པ་ནི་ཁྱེད་རྗེ་བཙུན་གྱིས་གསུངས་པའི་གང་ཟག་ཕྱི་མ་བཞི་ཆར་ལ་གང་ཟག་འབྲིང་དུ་འདོད་པར་སྣང་བས་རྟོགས་པ་ཡས་རིམ་གྱི་ཐ་མ་དང་། བློ་གྲོས་མས་རིམ་གྱི་རབ་གཉིས་གང་ཟག་འབྲིང་དུ་ཁས་ལེན་པ་ནི་ཡོངས་འཛིན་གྱི་འཁར་བ་དང་བྲལ་ཞིང་བློ་གྲོས་ཀྱི་མིག་ཉམས་པའི་གཏམ་དུ་སྣང་ངོ་། །བདུན་པ་ནི་དེ་ལ་ཏིང་ངེ་འཛིན་གྱི་རྟོགས་པ་ཅུང་ཟད་ཡོད་པ་དང་དེ་མེད་ཀྱང་བློ་གྲོས་དང་ལྡན་པ་གཉིས་སུ་ཕྱེ་བ་འདི་ནི་རྣམ་རྟོག་གི་སྒྲོ་བཏགས་པ་སྟེ། སྐབས་འདིར་གང་ཟག་འབྲིང་ལ་རྟོགས་པ་འབྲིང་དང་བློ་གྲོས་འབྲིང་གཉིས་ཡོད་པ་ཡིན་གྱི་ཁྱེད་ཀྱི་དབྱེ་བ་གཉིས་པོ་གཏན་མེད་པའི་ཕྱིར། གང་ཟག་བཞི་པའི་སྐབས་སུ་ཏིང་ངེ་འཛིན་གྱི་རྟོགས་པ་འདི་ནི་མེད་ལ་བློ་གྲོས་དང་ལྡན་པས་བསྒོམ་པར་བྱ་བ་ཞེས་པའི་ཤུགས་ལས་ཐོབ་པ་ཡིན་ན། ཏིང་ངེ་འཛིན་གྱི་རྟོགས་པ་ཅུང་ཟད་ཡོད་ཅིང་བློ་གྲོས་དང་མི་ལྡན་པ་ཞེས་པ་ཅིག་ཐོབ་པར་ཐལ་བའི་ཕྱིར་རོ། །བརྒྱད་པ་ནི་དག་ལྡན་ལས་གང་ཟག་གསུམ་པའི་སྐབས་སུ་བློ་འབྲིང་དུ་གྱུར་པས་ཞེས་པ་ཡོད་ཀྱི་བློ་གྲོས་འབྲིང་དུ་གྱུར་པས་ཞེས་པ་མེད་ལ། བློ་འབྲིང་དུ་གྱུར་པ་ནི་རྟོགས་པ་ཡས་རིམ་དང་། བློ་གྲོས་མས་རིམ་གྱི་འབྲིང་གཉིས་ཀ་ལ་འཇུག་པའི་དོན་མ་རྟོགས་པར་བློ་གྲོས་འབྲིང་དུ་གྱུར་པས་ཞེས་པ་ནི་རང་གི་གྲུབ་མཐའ་ངན་པ་དང་འདྲེས་པའི་བརྫུན་ལུང་ཡིན་ནོ། །དགུ་པ་ནི་ཁྱོད་མངོན་བྱང་ལས་བསྐྱེད་པའི་མངོན་རྟོགས་བཅུ་གཉིས་པོ་ཐམས་ཅད་རྒྱས་པར་འདོད་པར་སྣང་བས་འདི་ལ་རྗེ་བཙུན་གྱི་གསུང་དང་འགལ་བ་དང་། རྒོལ་བ་རང་གི་ཚིག་དང་འགལ་བ་གཉིས་ལས། དང་པོ་ནི། རྗེ་བཙུན་གྱིས་གཙོ་འཁོར་ཐམས་ཅད་མངོན་བྱང་ལས་བསྐྱེད་པ་ལ་རྒྱས་པ་དང་། རྒྱུ་རྡོ་རྗེ་འཛིན་པ་ཁོ་ན་མངོན་བྱང་ལས་བསྐྱེད་པ་ལ་འབྲིང་པོའི་ཐ་སྙད་གསུང་ཞིང་ལུང་འདི་ཁྱེད་རང་གིས་ཀྱང་དྲངས་འདུག་པ་དང་འགལ་མི་འགལ་སོམས་ཤིག གཉིས་པ་ནི་ཁྱེད་རང་གིས་རྒྱས་པ་དེ་ལ་ཨཱ་ལི་ཀཱ་ལི་ལ་མི་ལྟོས་པ་དང་ལྟོས་པ་གཉིས། ལྟོས་པ་ལ་མི་མཉམ་སྦྱོར་རྒྱས་བསྡུས་གཉིས། མཉམ་སྦྱོར་རྒྱས་བསྡུས་གཉིས་ཞེས་བྲིས་པ་དང་འགལ་ཏེ། མི་མཉམ་སྦྱོར་དང་མཉམ་སྦྱོར་གྱི་བསྡུས་པ་གཉིས་ཁས་བླངས་ནས་དེ་ཉིད་རྒྱས་པའི་དབྱེ་བར་བྱས་འདུག་པའི་ཕྱིར་རོ། །བཅུ་པ་ནི་ཁྱེད་རྒྱུ་རྡོ་རྗེ་འཛིན་པ་ཁོ་ན་མངོན་བྱང་ལས་བསྐྱེད་པའི་མི་མཉམ་སྦྱོར་དང་མཉམ་སྦྱོར་གྱི་མངོན་རྟོགས་གཉིས་ཀ་ལ་བསྡུས་པའི་ཐ་སྙད་བྱེད་པར་སྣང་བས་དེ་ཡན་ལག་དྲུག་གིས་འཆིང་བའི་ཚེ་ན་བསྡུས་པ་ཡན་ལག་དྲུག་པ་ཞེས་པར་འགྱུར་བ་ལས་གོང་མའི་གསུང་རབ་རྣམས་ལས་འབྲིང་པོ་ཡན་ལག་དྲུག་པ་ཞེས་གསུངས་པ་དང་འགལ་ཞིང་། ཁྱེད་རང་གིས་ཀྱང་འདིའི་ཐད་ཀྱི་ལུང་སྦྱོར་དུ་དག་ལྡན་ལས། འཁོར་རྣམས་མངལ་དུ་ས་བོན་ལས་སྐུར་གྱུར་ཏེ། ཕྱོགས་མཚམས་སུ་སྤྲོ་བ་དེའི་ཚེ་རྒྱུ་རྡོ་རྗེ་འཛིན་པ་དཀར་པོར་བྱས་ཏེ་མངོན་པར་རྟོགས་པ་འབྲིང་པོའོ་ཞེས་གསུངས་པ་དྲངས་འདུག་པ་དང་ཅིའི་ཕྱིར་མི་འགལ། བཅུ་གཅིག་པ་ནི་ཁྱེད་རབ་དང་ཐ་མའི་འཇོག་ཚུལ་རྟོགས་པ་རབ་དང་། བློ་གྲོས་ཐ་མ་ལ་འཇོག་ན་རབ་ལ་དེ་ཙམ་གྱིས་ཆོག་ཅིང་། ཐ་མས་ནི་དེ་ཙམ་ལས་སྒོམ་མི་ནུས་པས་ཞེས་པ་འཐད་ཀྱང་དེའི་ཚེ་རྟོགས་པ་ཐ་མ་དང་། བློ་གྲོས་རབ་ཀྱིས་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་སྒོམ་པར་ཁས་ལེན་དགོས་ལ། དེ་ཁས་ལེན་ན་ཁྱེད་མངོན་བྱང་གི་མངོན་པར་རྟོགས་པ་ཐམས་ཅད་གང་ཟག་འབྲིང་གི་བསྒོམ་བྱར་འདོད་པ་དང་འགལ་ལོ། །བཅུ་གཉིས་པ་ནི་ངོར་པའི་བགྲང་ཚུལ་ནི་བཅུ་བཞིར་གྲངས་མཐུན་པ་ཙམ་མ་གཏོགས། རྗེ་བཙུན་གྱི་བཞེད་པ་འདི་དང་མི་མཐུན་ཞེས་པ་ནི་མངོན་སུམ་ལ་སྙོན་འདིངས་པ་སྟེ། རྣམ་བཤད་ལས་ནི་རེ་ཤིག་རྟོགས་པའི་རིམ་པ་དང་སྦྱར་བའི་དབང་དུ་བྱས་ནས་ཏིང་ངེ་འཛིན་གྱི་རྟོགས་པ་ཐ་མས་བསྒོམ་པར་བྱ་བ་ལ་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་མཉམ་སྦྱོར་གཉིས། དེ་རེ་རེ་ལ་ཡང་ཡན་ལག་བཞི་པ་དང་དྲུག་པའི་ཕྱོགས་གཉིས་གཉིས། དེ་རེ་རེ་ལ་ཡང་ལྷ་མོའི་སྤྲོ་ཚུལ་གཉིས་གཉིས་ཏེ་བརྒྱད། རྟོགས་པ་འབྲིང་གིས་བསྒོམ་པར་བྱ་བ་ལ་ཨཱ་ལི་ཀཱ་ལི་ལ་མ་ལྟོས་པའི་ཡན་ལག་བཞི་དྲུག་གི་ཕྱོགས་གཉིས། དེ་རེ་རེ་ལ་ཡང་འཁོར་སྤྲོ་ཚུལ་གཉིས་གཉིས་ཏེ་བཞི། རྟོགས་པ་རབ་འོག་གིས་བསྒོམ་པར་བྱ་བ་ནི་ས་བོན་ལས་བསྐྱེད་པ། རྟོགས་པ་རབ་ཀྱིས་བསྒོམ་པར་བྱ་བ་ནི་སྐད་ཅིག་གི་བསྐྱེད་པ་ཡིན་པ་བཞེད་ཅིང་རྟོགས་པ་རིམ་པ་བཞི་པོ་ལ་ལས་དང་པོ་པ་ཞེས་སོགས་ཀྱི་ཐ་སྙད་གསུངས་པ་ཙམ་ཡིན་ལ། དེ་ཉིད་བློ་གྲོས་ཀྱི་རིམ་པ་དང་སྦྱར་བའི་ཚེ་བློ་གྲོས་རབ་དང་། འབྲིང་དང་། ཐ་ལྟག་དང་། ཐ་མ་བཞི་ལ་རིམ་པ་བཞིན་སྦྱར་བར་བཞེད་པ་དེ་མཐོང་ན་རྗེ་བཙུན་གྱིས་དག་ལྡན་ལས་དཀྲོང་བསྐྱེད་ཀྱི་སྐབས་སུ་ཐོག་མར་གང་ཟག་རྟོགས་པ་མཆོག་ཏུ་གྱུར་པའམ། རྡོ་རྗེ་སློབ་དཔོན་དུ་དབང་བསྐུར་བ་ཐོབ་ཅིང་དད་པ་ཆེན་པོ་དང་ལྡན་ཡང་བློ་གྲོས་ཤིན་ཏུ་དམན་པར་གྱུར་པས་བསྒོམ་པར་བྱ་བ་ནི་ཞེས་དང་། ས་བོན་ལས་བསྐྱེད་པའི་སྐབས་སུ་ཡང་ཡས་རིམ་དུ་སྦྱར་ན་རྟོགས་པ་སྔ་མ་བས་ཅུང་ཟད་དམའ་བ་དང་། མས་རིམ་དུ་སྦྱར་ན་བློ་གྲོས་ཐ་ལྟག་ཙམ་དུ་གྱུར་པས་ས་བོན་ལས་བསྐྱེད་པ་ནི་ཞེས་དང་། ཨཱ་ལི་ཀཱ་ལི་ལ་མ་ལྟོས་པའི་མངོན་བྱང་གི་སྐབས་སུ་གང་ཟག བློ་འབྲིང་དུ་གྱུར་པས་བསྒོམ་པའི་མངོན་པར་རྟོགས་པ་ནི་ཞེས་དང་། ཨཱ་ལི་ཀཱ་ལི་ལ་ལྟོས་པའི་མངོན་བྱང་གི་སྐབས་སུ་གང་ཟག་ཏིང་ངེ་འཛིན་གྱི་རྟོགས་པ་ནི་མེད་ལ་བློ་གྲོས་དང་ལྡན་པས་བསྒོམ་པར་བྱ་བ་ནི་གཉིས་ཏེ་མངོན་པར་བྱང་ཆུབ་པ་མི་མཉམ་པར་སྦྱོར་བ་དང་མཉམ་པར་སྦྱོར་བའོ་ཞེས་གསུངས་པའི་དོན་དུ་གཟུ་བོར་གནས་པ་དག་གིས་མི་རྟོགས་པའི་དོན་མེད་ཅིང་ཁྱོད་ཀྱི་གྲུབ་མཐའི་མཚང་རྣམས་ཀྱང་ལུང་འདི་དག་གིས་རིག་པར་འགྱུར་རོ། །འདི་འདྲའི་རིགས་ཅན་དགག་སྒྲུབ་ཀྱི་ཡུལ་མ་ཡིན་ཡང་རང་ཉིད་མངོན་རྟོགས་ཚུལ་བཅུ་བཞིའི་བགྲང་ཚུལ་ལ་ནོར་བ་འདི་ཙམ་བྱས་བཞིན་དུ་གངས་ཅན་གྱི་མཁས་བཙུན་ཐམས་ཅད་ཀྱི་གཙུག་རྒྱན་ལ་ཕལ་ཚིག་སྣ་ཚོགས་ཀྱི་སྒོ་ནས་སྨོད་པའི་བསྟན་བཅོས་བརྩམས་འདུག་པས་དེའི་མཚང་གཞན་གྱིས་ཤེས་པའི་ཆེད་དུ་མདོར་བསྡུས་ཙམ་བྲིས་པའོ། །ཁོ་བོའི་རྟོག་པ་ལ་ནི་མངོན་པར་རྟོགས་པ་བཅོ་ལྔ་པོ་རྗེ་དགོན་པ་བ་ནས་བརྒྱུད་པའི་མན་ངག་ལུགས་འབའ་ཞིག་ཡིན་པས་ཡབ་ཀྱི་མངོན་རྟོགས་བཅུ་བཞིའམ་ཡུམ་གྱི་མངོན་རྟོགས་དང་བཅས་ན་བཅོ་ལྔ་ཞེས་པར་མངོན་ཏེ་རྒྱུད་ཀྱི་སྟེང་དུ་རྟོགས་པར་བྱའོ་ཞེས་པའི་དོན་ཡང་རྩ་རྒྱུད་དང་པོའི་བརྒྱད་པར་ཡུམ་གྱི་མངོན་རྟོགས་དང་ཕྱི་མའི་ལྔ་པར་ཡབ་ཀྱི་མངོན་རྟོགས་བཅུ་བཞི་དག་ལྡན་ལས་གསུངས་པའི་དབང་དུ་བྱས་པའོ། །འདི་ཉིད་རྒྱུད་ཀྱི་དགོངས་པ་ཡང་ཡིན་ཏེ། བརྟག་པ་དང་པོར་ཡུམ་གྱི་བསྐྱེད་རྫོགས་དང་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བའི་ཚུལ་དུ་གསུངས་ཤིང་། བརྟག་པ་ཕྱི་མར་ཡབ་ཀྱི་བསྐྱེད་རྫོགས་དང་། རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བའི་ཚུལ་གསུངས་ལ་ཧེ་རུ་ཀ་གཞན་ལ་མ་གསུངས་པ་དང་། བརྟག་པ་ཕྱི་མར། བདག་མེད་རྣལ་འབྱོར་ལྡན་པའམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང་། །དངོས་གྲུབ་འདོད་པས་མི་གནས་སོ། །ཞེས་པའི་དོན་རྩ་རྒྱུད་འདིར་སྤྱིར་མཆོག་སྒྲུབ་པའི་དཀྱིལ་འཁོར་དྲུག་གསུངས་ཀྱང་གཉིས་པོ་ཁོ་ནས་གྲོལ་བར་གསུངས་པ་མི་འགལ་བའི་གནད་ཤེས་ན་འདི་ལས་འོས་མེད་པའི་ཕྱིར་དང་། བུད་མེད་ཀྱི་རྟེན་ཅན་བདག་མེད་མའི་རྣལ་འབྱོར་བསྒོམ་པ་ཞིག་ཉེ་རྒྱུའི་སྤྱོད་པ་སྤྱོད་པའི་ཚེ་རང་དང་རྟོགས་པ་མཉམ་པའི་ཐབས་མ་རྙེད་ན་རང་ཉིད་སྐྱེས་པར་བསྒྱུར་ནས་ཕྱག་རྒྱ་གཞན་བསྟེན་པར་བཤད་པས་ཀྱང་ལས་དང་པོ་པ་ནས་བཟུང་སྟེ་འབྲས་དུས་ཀྱི་དབང་ལ་མ་ཐུག་གི་བར་གྱི་བསྐྱེད་རིམ་རུང་བར་གསལ་བའི་ཕྱིར་རོ། །མན་ངག་གི་དགོངས་པ་ཡང་འདི་ཉིད་ཡིན་ཏེ། དབང་ཆུ་ཡབ་ཡུམ་གཉིས་ཀའི་ཐུན་མོང་བ་ཡིན་པ་ལ་དགོངས་ནས་ཡུམ་གྱི་བསྐྱེད་རིམ་ལོགས་སུ་གླེགས་བམ་གྱི་དཀར་ཆག་ཏུ་བགྲངས་འདུག་པའི་ཕྱིར་དང་། ལམ་འབྲས་ཀྱི་རྒྱུ་དུས་ཀྱི་དབང་ལ་ཡབ་ཡུམ་གཉིས་ཀའི་རྡུལ་ཚོན་དུ་དབང་བསྐུར་བ་ངེས་པར་དགོས་པ་མ་ཡིན་པའི་ཕྱིར་རོ། །གལ་ཏེ་ཡུམ་གྱི་མངོན་རྟོགས་ལ་ཡན་ལག་བཞི་དྲུག་གཉིས་ཡོད་པས་བཅུ་དྲུག་ཏུ་འགྱུར་རོ་སྙམ་ན་སྐྱོན་མེད་དེ། འདིར་ནི་བསྐྱེད་ཆོག་གི་སྒོ་ནས་ཕྱེ་བའི་སྐབས་ཡིན་ཅིང་ཡབ་ཀྱི་ཡན་ལག་བཞི་དྲུག་གཉིས་ལ་ནི་བསྐྱེད་ཆོག་གི་ཁྱད་པར་ཡོད་ལ་ཡུམ་གྱི་ཡན་ལག་བཞི་དྲུག་གཉིས་ལ་བསྐྱེད་ཆོག་གི་ཁྱད་པར་མེད་པའི་ཕྱིར་རོ། །གོང་དུ་གཞན་ལ་སྐྱོན་བརྗོད་པ་རྣམས་ནི་མི་ཐུབ་ཟླ་བའི་འཁྲུགས་ཅན་སྒྲུབ་པའི་སྐབས་ཡིན་པས་འདི་དང་འགལ་བར་སེམས་པར་མི་བྱའོ། །ཞལ་གྱི་སྐབས་སུ་གནད་ཀྱི་ཟླ་ཟེར་ལས་ཞལ་བརྒྱད་ནི་མགྲིན་པའི་སྟེང་དུ་རྩ་བའི་ཞལ་མདུན་དུ་བསྟན་པ་དང་། དེའི་གཡས་སུ་ཞལ་གསུམ་འདབ་ཆགས་སུ་བསྒྲིགས་ནས་གཡས་སུ་བལྟ་བ་དང་། གཡོན་དུ་ཡང་དེའི་ཞལ་གསུམ་འདབ་ཆགས་སུ་བསྒྲིགས་ནས་གཡོན་དུ་བལྟ་བ་དང་། དེའི་སྟེང་དུ་མགྲིན་པ་དང་བཅས་པའི་སྟེང་ཞལ་མདུན་དུ་གཟིགས་པ་སྟེ། ཞལ་བརྒྱད་དེ་ལྟར་ཡིན་ལ། ཁ་ཅིག་རྒྱབ་ཞལ་བཞི་ཞེས་ཞལ་ནག་པོ་བཞི་རྒྱབ་ཏུ་བལྟ་བར་འདོད་པ་ནི་ཤིན་ཏུ་མི་འཐད་དེ། ཞེས་པ་ནས་གཡས་གཡོན་གྱི་ཞལ་གཉིས་ཀྱི་ལྟག་ན་ཡོད་པ་དང་དེ་གཉིས་ལས་གཞན་པའི་དོན་དུ་ཤེས་པར་བྱའོ་ཞེས་གསུངས་པ་ལ། ཉི་ཟེར་ལས། དེ་ལ་ཞལ་རྣམས་ཀྱིས་གཟིགས་ལུགས་དེ་ལྟར་ཡིན་ཡང་། འཕགས་པ་རིན་པོ་ཆེས་རྒྱབ་ཞལ་བཞི་ནག་པ་ཞེས་གསུངས་པ་ལ། དེའི་དགོངས་པ་ཞལ་ནག་པོ་བཞི་རྒྱབ་ཏུ་བལྟ་བར་བཞེད་པར་གཟུངས་ནས་དགག་པ་བྱེད་པ་ནི་ཕྱོགས་སྔ་སྨྲ་བ་པོའི་བཞེད་པ་མ་རྟོགས་པར་ཚིག་ཙམ་ལ་བརྟེན་པའི་དགག་པ་ཡིན་ནོ། །དེ་ལྟར་ན་དོན་གསལ་མཁན་པོས། ལྟག་པའི་ཞལ་བཞི་ནི་ནག་པོའོ་ཞེས་དང་། རྡོ་རྗེ་སྙིང་པོས་མཛད་ཟེར་བའི་དེ་ཁོ་ན་ཉིད་སྣང་བ་ལས་ནུབ་ཀྱི་ཞལ་ནི་མཆེ་བ་གཙིགས་པ་སྟེ། བདུད་བཞི་མནན་པའི་དོན་དུའོ་ཞེས་གསུངས་པ་གཉིས་པོ་འདིས་ཀྱང་ཞལ་ནག་པོ་བཞི་ལྟག་པར་བལྟ་བ་དང་། ནུབ་ཏུ་བལྟ་བར་བསྟན་པར་འགྱུར་ཏེ། འཕགས་པ་རིན་པོ་ཆེས། རྒྱབ་ཞལ་བཞི་ནག་པ་ཞེས་གསུངས་པས། ཞལ་ནག་པོ་བཞི་རྒྱབ་ཏུ་བལྟ་བར་བསྟན་པའི་ཕྱིར། སྐྱོན་མེད་དེ་ལུང་དེ་གཉིས་ཀྱི་དོན་གོང་དུ་བཤད་པ་ལྟར་གཡས་གཡོན་གྱི་ཞལ་གཉིས་ཀྱི་ལྟག་ན་ཡོད་པ་དང་། དེ་གཉིས་ལ་བལྟས་པའི་ནུབ་ན་ཡོད་པས་སོ་སྙམ་ན། འཕགས་པ་རིན་པོ་ཆེས་ཀྱང་། མངོན་རྟོགས་སུ་རྒྱབ་ཞལ་བཞི་ཞེས་དང་། བརྟག་གཉིས་ཀྱི་མཆན་བུར་ལྟག་པའི་ཞལ་བཞི་ཞེས་གསུངས་པ་ཡང་གཡས་གཡོན་གྱི་ཞལ་གཉིས་ཀྱི་རྒྱབ་དང་ལྟག་ན་ཡོད་པ་ལ་དགོངས་ནས་དེ་ལྟར་གསུངས་པ་ཡིན་པས་སྐྱོན་མེད་དོ་ཞེས་རྣམ་པ་ཐམས་ཅད་དུ་མཚུངས་སོ། །གཞན་ཡང་ཁས་བླངས་ནང་འགལ་བའི་སྐྱོན་ཡང་ཡོད་དེ། ཟླ་ཟེར་མཁན་པོས་བསྟོད་པ་ཉི་ཤུ་པའི་ཊཱི་ཀར། དེ་ལས་གང་གི་ལྷག་པའི་རྒྱབ་ཞལ་རྣམས་ནི་བུང་བ་ལྟར་ནག་པ་ཞེས་ཞལ་ནག་པོ་བཞི་རྒྱབ་ཏུ་བལྟ་བར་འདོད་པ་ནི་ཤིན་ཏུ་མི་འཐད་དེ་ཞེས་པ་ནས་ནག་པོ་བཞི་ནུབ་ཏུ་ལྟ་བ་གཏན་མ་ཡིན་ནོ་ཞེས་པའི་བར་ཁྱེད་རང་གིས་སྨྲས་པ་ཇི་ལྟ་བ་བཞིན་བརྗོད་ན། ཆོས་དང་མཐུན་པའི་ལན་ཅི་ཡང་མེད་པར་འགྱུར་རོ། །གལ་ཏེ་ཁོ་བོས་རྒྱབ་ཞལ་བཞི་ཞེས་སྨྲས་ཀྱང་། ཞེ་འདོད་ནི་དཀའ་འགྲེལ་དུ་བཤད་པ་ལྟར་ཡིན་པས་སྐྱོན་མེད་དོ་སྙམ་ན། འཕགས་པ་རིན་པོ་ཆེས་ཀྱང་། ཚིག་འདོན་བདེ་བའི་དབང་དུ་མཛད་ནས་རྒྱབ་ཞལ་ཞེས་གསུངས་པ་ཡིན་གྱི། ཐུགས་བཞེད་ལ་ཞལ་གྱི་སྒྲིག་ལུགས་རྗེ་བཙུན་ཆེན་པོས་བཞེད་པ་ལྟར་ཤིན་ཏུ་ཡང་བདེན་ཏེ། རྗེ་བཙུན་རྩེ་མོས་ཞལ་བརྒྱད་དུ་རིམ་པ་བཞིན་དུ་གཞུག་ཅེས་བྱ་བ་ནི། གཽ་རཱི་ནི་རྩ་བའི་ཞལ་ལའོ་ཞེས་སོགས་གསུངས་པ་ལྟར་དུ། འཕགས་པ་རིན་པོ་ཆེས་ལྷ་མོ་རྣམས་རང་རང་གི་ཐད་ཀར་ཞལ་རྣམས་ལ་བསྡུས་ཏེ། བཻ་ཏ་ལཱི་སྟེང་ཞལ་ལའོ་ཞེས་བཻ་ཏ་ལཱི་མ་གཏོགས་པའི་ལྷ་མོ་བདུན་པོ་ཞལ་བདུན་པོ་དང་ཐད་མཉམ་དུ་ཡོད་པར་ཤིན་ཏུ་གསལ་བར་གསུངས་པའི་ཕྱིར་རོ་ཞེས་བྱ་བ་བྲིས་སོ། །དེ་དག་ནི་ཕྱོགས་སྔ་མ་རྟོགས་པ་སྟེ། འཕགས་པ་རིན་པོ་ཆེས་རྒྱབ་ཞལ་བཞི་ནག་པ་ཞེས་གསུངས་པའི་དགོངས་པ་ཞལ་ནག་པོ་བཞི་རྒྱབ་ཏུ་བལྟ་བར་བཞེད་པར་བཟུང་ནས་དགག་པ་བྱེད་པ་མ་ཡིན་གྱི་འཕགས་པའི་གསུང་དེའི་དགོངས་པ་བླ་མ་ཕྱི་མ་དག་གིས་ཞལ་ནག་པོ་བཞི་རྒྱབ་ཏུ་ལྟ་བར་འདོད་པ་ལ་དགག་པ་བྱེད་པ་ཡིན་པའི་ཕྱིར་རོ། །དེས་ན་ཉི་ཟེར་མཁན་པོས་འཕགས་པས་རྒྱབ་ཞལ་བཞི་གནག་པ་ཞེས་གསུངས་པའི་དགོངས་པ་ཞལ་ནག་པོ་བཞི་རྒྱབ་ཏུ་བལྟ་བ་ཡིན་པར་འདོད་པ་ལ་དགག་པ་མང་དུ་བརྗོད་པ་རྣམས་ནི། གནད་ཀྱི་ཟླ་ཟེར་གྱི་ཕྱོགས་སྔ་འགོག་པའི་དཔུང་རོགས་ལ་འབྱོན་པར་གདའ་བས་ཤིན་ཏུ་ལེགས་སོ། །དེས་ན་བསྟོད་པ་ཉི་ཤུ་པའི་ཊཱི་ཀར་གང་གི་ལྷག་པའི་རྒྱབ་ཞལ་རྣམས་ནི་བུང་བ་ལྟར་ནག་པ་ཞེས་གསུངས་པ་དང་། ཁས་བླངས་འགལ་བའི་སྐྱོན་ཡང་མེད་དེ། རྒྱབ་ཞལ་གྱི་དོན་ཞལ་ནག་པོ་བཞི་ནུབ་ཏུ་བལྟ་བ་ཡིན་པ་འགོག་པའི་སྐབས་ཡིན་པའི་ཕྱིར་རོ། །འཕགས་པའི་བཞེད་པ་རྗེ་བཙུན་ཆེན་པོ་བཞེད་པ་ལྟར་ཡིན་པ་ཡང་འདིར་གནོད་བྱེད་དུ་མི་འཇུག་སྟེ། དེ་ལྟར་དུ་ཁས་ལེན་པའི་ཕྱིར་རོ། །ཞབས་ཀྱི་བཞུགས་སྟབས་ཀྱི་སྐབས་སུ་གནད་ཀྱི་ཟླ་ཟེར་ལས། ཞབས་བཞི་གཡས་གཉིས་བརྐྱང་པའི་བརླ་ལ་གཡོན་བསྐུམ་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ་ཡིན་པར་ལུང་རིགས་ཀྱི་སྒྲུབ་བྱེད་དོགས་སྤོང་དང་བཅས་ཏེ་རྒྱས་པར་གསུངས་པ་ལ། ཉི་ཟེར་ལས། འདི་ཡང་རྣམ་པར་བརྟག་པ་བྱ་སྟེ་ནག་པོ་པ་ལ་སོགས་པའི་རྒྱ་གཞུང་དུ་མའི་དགོངས་པ་ཡིན་ཀྱང་རྒྱུད་འགྲེལ་གྱི་དགོངས་པ་དེ་ཁོ་ན་མ་ཡིན་ཏེ། ནཱ་རོ་འགྲེལ་ཆེན་ལས། གཙོ་བོ་ལ་གར་སྟབས་ཀྱི་ཚུལ་གྱིས་བཞུགས་པ་ཞེས་གསུངས་ཤིང་། འཁོར་ལ་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ་ཞེས་གསུངས་པ་དང་། འཇམ་དཔལ་ཡེ་ཤེས་ཞབས་ཀྱིས་ཀྱང་། གཙོ་བོ་ལ་ཉི་མ་ལ་བཞུགས་སྟངས་མི་འདྲ་བར་ཤིན་ཏུ་གསལ་བའི་ཕྱིར་དང་། བྱང་ཆུབ་སྙིང་པོས། བདུད་བཞི་རིམ་པར་ཞབས་ཀྱིས་མནན། །ཞེས་དང་། ཞབས་བཞི་པ་ལ་མནན་པ་ཡིས། །ལྷ་དང་ལྷ་མིན་འཇིགས་པར་བྱེད། །ཅེས་པས་ཞབས་མདུན་རྒྱབ་བཞི་ཀ་མཐོ་ལྔ་རྣམ་པར་བརྒྱངས་པའི་གཡས་བརྐྱང་གིས་བདུད་རེ་རེ་མནན་པ་ལྟ་བུར་གསུངས་པའི་ཕྱིར་རོ། །ཁྱད་པར་དུ་ཡང་རྗེ་བཙུན་ས་སྐྱ་པ་ཡབ་སྲས་ཀྱི་ལུགས་ལ་མཚོ་སྐྱེས་ལུགས་དང་། འགྲེལ་པ་ལུགས་དང་། མན་ངག་ལུགས་གསུམ་ཆར་གྱི་དགོངས་པ་ཡང་ཞབས་མདུན་མ་གཉིས་གཡས་བརྐྱང་ཞིང་གཡོན་བསྐུམ་པ་ལ། རྒྱབ་མ་གཉིས་གར་སྟབས་ཀྱི་བཞུགས་པ་ཡིན་ཏེ། བསྟོད་པ་ཉི་ཤུ་པར། ཞབས་བཞི་པོས་ནི་བདུད་བཞི་པོ། །མཉམ་པར་མནན་ཅིང་གཅེར་བུ་ཉིད། །ཅེས་གསུངས་པ་དང་། མི་ཐུབ་ཟླ་བས། བདུད་བཞི་ཞབས་ཀྱིས་མནན་པ་སྟེ། །ཞེས་གསུངས་པ་དང་། ཤཱནྟི་པས། དབུས་སུ་བདུད་ནི་བཞི་པོ་སྟེ། །གོང་ནས་གོང་དུ་བཀན་པའོ། །ཞེས་གསུངས་པ་རྣམས་དང་མཐུན་པར་ས་ཆེན་གྱིས། པད་ཉིའི་སྟེང་དུ་གཙོ་བོ་ལ་བདུད་བཞི་བརྩེགས་པའི་གདན་ཞེས་དང་། རྗེ་བཙུན་རྩེ་མོས་དེའི་སྟེང་དུ་བདུད་བཞི་བརྩེགས་པའི་གདན་ཞེས་དང་། རྗེ་བཙུན་ཆེན་པོས། དབུས་ཀྱི་པདྨ་དང་ཉི་མའི་སྟེང་དུ་བདུད་བཞི་བརྩེགས་པའི་གདན་ཞེས་གསུངས་པས། རྒྱ་གཞུང་དེ་རྣམས་དང་། མན་ངག་ལུགས་ཕལ་ཆེ་བ་ལ་བདུད་བཞི་རིམ་པར་སྟེང་འོག་ཏུ་བརྩེགས་པའི་གདན་དུ་བཞེད་ལ། དེའི་སྟེང་དུ་བཞུགས་ཚུལ་ཡང་བསྟོད་པ་ཉི་ཤུ་པ་ལས། ཉི་མར་ཞབས་གཡས་བརྐྱང་དང་བསྐུམ། །གར་མཛད་དེ་ལ་ཕྱག་འཚལ་ལོ། །ཞེས་གསུངས་པའི་ཚིག་རྐང་དང་པོས་ཞབས་མདུན་མ་གཡས་བརྐྱང་ཞིང་གཡོན་བསྐུམ་པར་བསྟན་ལ། གཉིས་པས་རྒྱབ་མ་གར་སྟབས་སུ་བཞུགས་པར་བསྟན་པས། མཚོ་སྐྱེས་ཀྱི་དགོངས་པ་དེ་ལྟར་དུ་གྲུབ་བོ། །གལ་ཏེ་ལུང་དེའི་དོན་ནི་དེ་ལྟར་མ་ཡིན་ཏེ། ཟླ་ཟེར་ཉིད་ལས་གཞན་ལུགས་འགོག་པའི་སྐབས་སུ་བསྟོད་པ་ཉི་ཤུ་པར། ཉི་མར་ཞབས་གཡས་བརྐྱང་དང་སྔོ། །ཞེས་བོད་དཔེ་རྙིང་པ་ཐམས་ཅད་དང་། རྒྱ་དཔེ་ལས་འབྱུང་གི་བསྐུམ་ཞེས་པ་མི་འབྱུང་ལ་གལ་ཏེ་འབྱུང་ན་བསྟོད་པ་དེར། སྐུ་མདོག་གི་སྒོ་ནས་བསྟོད་པ་ཅིག་ཀྱང་མ་བསྟན་པར་ཐལ་བའི་སྐྱོན་ཡོད་དོ། །ཞེས་ཟེར་བ་ནི་མི་འཐད་དེ། བསྐུམ་ཞེས་པའི་དཔེ་རྙིང་མ་མཐོང་བའི་ཕྱིར་ན། བོད་དཔེ་རྙིང་པ་ཐམས་ཅད་ལས། ཉི་མར་ཞབས་གཡས་བརྐྱང་དང་སྔོ། །ཞེས་འབའ་ཞིག་འབྱུང་བའི་རྟགས་ཀྱང་མ་གྲུབ་ལ། ཁྱབ་པའང་མ་ངེས་ཏེ་དེ་ལྟར་ན་བསྐུམ་ཞེས་པ་མི་འབྱུང་ན་གཞུང་དེར་མདུན་ཞབས་གཡོན་པ་ལ་བསྟོད་པ་གཅིག་ཀྱང་མ་བསྟན་པར་ཐལ་བའི་སྐྱོན་ཡོད་དོ། །གལ་ཏེ་གར་མཛད་ཅེས་པའི་ཁོངས་ནས་མདུན་ཞབས་གཡོན་པའི་བསྟོད་པའང་སྟོན་སྙམ་ན། འོ་ན་སྤྱི་བོ་དང་སྟེང་ནག་པོ་མཛེས་ཞེས་པའི་དང་ཞེས་པ་ནི། དང་པོའི་ཞལ་དེ་རྩ་ཞལ་ཡིན་ལ། དེ་ནག་པོར་བསྟན་པའི་ཁོངས་ནས་སྐུ་མདོག་གི་བསྟོད་པའང་བསྟན་ནོ་ཞེས་མཚུངས་སོ། །དེས་ན་མཚོ་སྐྱེས་ཀྱི་དགོངས་པ་སྔར་འཆད་པ་ལྟར་ཡིན་ཏེ། རྗེ་བཙུན་རྩེ་མོས་མཚོ་སྐྱེས་ཀྱི་འགྲེལ་པའི་ལུང་ཁྱེད་རང་གིས་དྲངས་པ་ལས། ཞབས་གཡས་གཉིས་ཀྱིས་མནན་པ་ཞེས་པ་ནི་ཡི་གེ་མ་དག་པ་ཡིན་ངེས་ཀྱི་ཁོ་བོས་དཔེ་མི་གཅིག་པ་དུ་མ་མཐོང་བ་ན་ཞབས་གཡས་པ་ཉིད་ཀྱིས་མནན་པ་ཤས་དག་ཏུ་སྣང་བས་དེ་བཞིན་ཡིན་ལ་ལུང་དེར་ཡང་། གཡས་བརྐྱང་གཡོན་བསྐུམ་གར་སྟབས་ཀྱི་དག་པ་གསུམ་སོ་སོར་གསུངས་པའི་ཕྱིར་རོ། །གལ་ཏེ་སྙིང་ཁར་ཞབས་གཡས་པ་ཉིད་ཀྱིས་མནན་པ་ཞེས་གསུངས་པས། སྐྱིལ་ཀྲུང་ཕྱེད་པའི་གར་སྟབས་འབའ་ཞིག་ཏུ་བསྟན་ནོ་སྙམ་ན་མ་ཡིན་ཏེ། ལུང་དེས་བདུད་བཞི་བརྩེགས་པའི་སྙིང་ཁར་ཞབས་གཡས་པ་ཁོ་ནས་མནན་པར་བསྟན་གྱི་ཞབས་གཡོན་པས་བདུད་བཞིའི་རྐང་པ་ནས་མ་མནན་པར་དངོས་ཤུགས་གང་ལ་ཡང་མ་བསྟན་པའི་ཕྱིར་རོ། །འགྲེལ་པ་ལུགས་ལ་ཡང་འདུག་སྟངས་དེ་ཉིད་ཡིན་ཏེ་རིན་ཆེན་འབར་བ་ལས། ཉི་མར་ཞབས་གཡས་བརྐྱང་གཡོན་བསྐུམ་ལྷག་མ་གར་གྱི་ཚུལ་གྱིས་བཞེངས། ཞེས་ཤིན་ཏུ་གསལ་བར་གསུངས་པའི་ཕྱིར་རོ། །དེ་ལ་རིན་ཆེན་འབར་བ་དང་། ཨ་བྷ་ཡའི་ལུང་དེའི་དགོངས་པ་ཞབས་མདུན་མ་གཉིས་གཡས་བརྐྱང་བའི་བརླ་ལ་གཡོན་བསྐུམ་ནས་སོར་མོ་སྦྱར་བ་དང་། ལྷག་མ་རྒྱབ་མ་གཉིས་མདུན་མ་ལྟ་བུའི་གར་སྟབས་ཀྱི་ཚུལ་གྱིས་བཞེངས་པ་ལྟར་འབྲུ་བརྣན་དུ་རུང་ན་སློབ་དཔོན་ཐམས་ཅད་དགོངས་པ་གཅིག་པར་འགྱུར་བས་ཤིན་ཏུ་ལེགས་ཀྱི་གཞན་དུ་ན་སློབ་དཔོན་འདི་གཉིས་ཀྱང་མི་མཁས་པར་འགྱུར་བའི་སྐྱོན་ཡོད་དེ། རྒྱུད་དང་མི་མཐུན་པའི་ཕྱིར་ཞེས་ཟེར་བ་ནི་ཧ་ཅང་ཐལ་ཏེ། དེ་ལྟར་ན་ཁྱེད་རང་གིས་དྲངས་པའི་ཇོ་བོས། སྟེང་ན་ཞབས་བཞི་གཡས་བརྐྱང་བཞུགས། །ཞེས་དང་། ཀཾ་པ་ལས། གཙོ་བོའི་ཞབས་བཞི་གཡས་བརྐྱང་གནས། །ཞེས་གསུངས་པ་སོགས་གཡས་བརྐྱང་བའི་གར་སྟབས་ཀྱི་བཞུགས་པར་བསྟན་པའི་ལུང་ཐམས་ཅད་ཀྱང་། ཞབས་མདུན་མ་གཉིས་གཡས་བརྐྱང་ཞིང་གཡོན་བསྐུམ་པ། མཐོ་ལྔ་རྣམ་པར་བརྒྱངས་པའི་གར་གྱིས་བཞུགས་སྟབས་དང་། རྒྱབ་མ་གཉིས་གཡས་བརྐྱངས་པའི་བརླ་ལ་གཡོན་བསྐུམ་པའི་སོར་མོ་སྦྱར་བའི་གར་སྟབས་ཀྱིས་བཞུགས་པ་ཡིན་ཞེས་བཤད་ན། སློབ་དཔོན་ཐམས་ཅད་དགོངས་པ་གཅིག་ཏུ་གྱུར་པས་ལེགས་སོ་ཞེས་རྣམ་པ་ཀུན་ཏུ་མཚུངས་སོ། །མན་ངག་ལུགས་ཀྱི་དགོངས་པ་ཡང་དེ་བཞིན་ཡིན་ཏེ། རྗེ་བཙུན་རྩེ་མོས་མངོན་རྟོགས་རྒྱས་པར་བསྒོམ་བྱའི་སྐབས་སུ་གཅེར་བུ་ཞབས་གཡས་བརྐྱངས་པས་བཞུགས་པ་ཞེས་པ་ཙམ་ལས་མ་གསུངས་ཀྱང་། དག་པ་དྲན་པའི་སྐབས་སུ། ཐུགས་རྗེ་ཆེན་པོས་སེམས་ཅན་ལ་ཁྱབ་པས་ན་མྱ་ངན་ལས་འདས་པ་ལ་མི་བཞུགས་པར་བསྟན་པའི་ཕྱིར་ཞབས་གཡས་བརྐྱངས་པའོ། །ཤེས་རབ་ཀྱིས་ཆོས་གང་ཡང་མི་འཛིན་པས་འཁོར་བ་ལ་མི་བཞུགས་པར་བསྟན་པའི་ཕྱིར་ཞབས་གཡོན་བསྐུམ་པའོ། །གར་མཁན་ལྟར་ཆ་ལུགས་སྣ་ཚོགས་ཀྱིས་སེམས་ཅན་གྱི་དོན་མཛད་པས་ན་གར་མཁན་གྱི་ཆ་ལུགས་སུ་སྐྱིལ་ཀྲུང་ཕྱེད་པའི་གར་སྟབས་ཀྱི་བཞུགས་པའོ་ཞེས་བདུད་བཞི་བརྩེགས་གདན་གྱི་ཚུལ་དུ་ཡོད་པ་ལ་ཞབས་གཡས་བརྐྱངས། གཡོན་བསྐུམ། གར་སྟབས་གསུམ་དག་པ་སོ་སོར་གསུངས་ལ་དེ་ཉིད་གསལ་པོར་བྱ་བའི་ཕྱིར། འཕགས་པས་ཞབས་མདུན་མ་གཉིས་གཡས་བརྐྱང་ཞིང་གཡོན་བསྐུམ་པ་རྒྱབ་མ་གཉིས་གར་སྟབས་ཀྱིས་བཞུགས་པ་ཞེས་དང་། སྲིད་ཞིའི་མཐའ་གཉིས་མནན་པས་རྩ་བའི་ཞབས་གཉིས་བརྐྱང་བསྐུམ། མི་གནས་པའི་མྱ་ངན་ལས་འདས་པའི་ས་ལ་བཞུགས་པས་རྒྱབ་མ་གཉིས་ཀྱིས་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའོ་ཞེས་གསུངས་པས་སོ། །གཞན་ཡང་རྗེ་བཙུན་ཆེན་པོས་མཛད་པའི་གདན་གྱི་རྣམ་དག་ལས། བདུད་བཞི་བཀྲམ་གདན་གྱི་དབང་དུ་བྱས་ནས་ཀྱང་ཞབས་མདུན་མ་གཉིས་བརྐྱང་ཞིང་གཡོན་བསྐུམ། རྒྱབ་མ་གཉིས་གར་སྟབས་ཀྱིས་བཞུགས་པ་ཡིན་པར་ཤིན་ཏུ་གསལ་བར་བཤད་པས། སེམས་རྣལ་དུ་ཕོབ་ལ་གཟུ་བོའི་བློས་དཔྱོད་ཅིག འོ་ན་གོང་དུ་དྲངས་པའི་ཉི་མར་བཞུགས་ཤིང་གར་སྟབས་ལྡན་ཞེས་རྩ་རྒྱུད་ལས་གསུངས་པ་ཇི་ལྟར་དྲངས་སྙམ་ན། དེའི་དོན་སྐྱིལ་ཀྲུང་ཕྱེད་པའི་གར་དང་ལྡན་པ་ཁོ་ནར་འཆད་པ་མ་ཡིན་གྱི། དེའི་དོན་གར་མཁན་ལྟར་ཆ་ལུགས་རྣམ་པ་སྣ་ཚོགས་ཀྱི་སྒོ་ནས་སེམས་ཅན་གྱི་དོན་མཛད་པ་ཡིན་ཏེ་ཞེས་བྱ་བ་བྲིས་སོ། །འདི་དག་ནི་མི་འཐད་དེ། དེ་ལ་ཐོག་མར་ནཱ་རོ་འགྲེལ་ཆེན་དང་། འཇམ་དཔལ་ཡེ་ཤེས་ཞབས་ཀྱིས་འཁོར་ལ་སྐྱིལ་ཀྲུང་ཕྱེད་པར་གསུང་ཤིང་། གཙོ་བོ་ལ་དམིགས་བསལ་མ་གསུངས་པས། གཙོ་བོའི་སྐྱིལ་ཀྲུང་ཕྱེད་པ་འགོག་མི་ནུས་ཏེ། གལ་ཏེ་ནུས་ན་ཁྱེད་རང་མན་ངག་ལུགས་སོགས་ལུགས་གསུམ་པོ་ལ་ཞབས་རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་སུ་བཞུགས་པར་འདོད་པ་དེ་ཡང་སུན་འབྱིན་པར་འགྱུར་ཏེ། ལུགས་གསུམ་པོ་དེ་ལ་འཁོར་ལ་སྐྱིལ་ཀྲུང་ཕྱེད་པ་དངོས་སུ་མ་གསུངས་པའི་ཕྱིར་རོ། །བྱང་ཆུབ་སྙིང་པོའི་དགོངས་པ་ཞབས་བཞི་ག་མཐོ་ལྔ་རྣམ་པར་བརྒྱངས་པའི་གཡས་བརྐྱང་གིས་བདུད་རེ་རེ་མནན་པ་ལ་འཆད་པ་དང་། མཚོ་སྐྱེས་དང་། མི་ཐུབ་ཟླ་བའི་དགོངས་པ། ཞབས་མདུན་མ་གཉིས་གཡས་བརྐྱང་གཡོན་བསྐུམ། རྒྱབ་མ་གཉིས་གར་སྟབས་ཀྱིས་བཞུགས་པར་འཆད་པ་ནི་ཅི་རུང་རུང་དུ་སྨྲས་པ་སྟེ། བྱང་ཆུབ་སྙིང་པོས། བདུད་བཞི་རིམ་པར་ཞབས་ཀྱིས་མནན། །ཞེས་གསུངས་པ་བདུད་བཞི་རིམ་པ་བཞིན་དུ་ཞབས་བཞིས་རིམ་པ་བཞིན་དུ་མནན་པ་ལ་འཆད་ན། མཚོ་སྐྱེས་ཀྱིས། ཞབས་བཞི་པོས་ནི་བདུད་བཞི་པོ། །མཉམ་པར་མནན་ཅིང་ཞེས་པ་ཡང་ཞབས་རེ་རེས་བདུད་བཞི་པོ་རེ་རེ་མཉམ་པར་མནན་པ་ལ་འཆད་དགོས་ཤིང་། བདུད་བཞི་མཉམ་པར་མནན་ཅེས་པའི་དོན་བདུད་བཞི་བརྩེགས་པ་ལ་འཆད་ན། བདུད་བཞི་རིམ་པར་ཞེས་པའི་དོན་ཡང་བདུད་བཞི་རིམ་པར་བརྩེགས་པ་ལ་འཆད་དགོས་པའི་ཕྱིར་རོ། །རྗེ་བཙུན་ས་སྐྱ་པ་ཡབ་སྲས་ཀྱི་ལུགས་ལ། མཚོ་སྐྱེས་ལུགས། འགྲེལ་པ་ལུགས། མན་ངག་ལུགས་གསུམ་ཆར་གྱི་དགོངས་པ་ཞབས་མདུན་མ་གཉིས་གཡས་བརྐྱང་ཞིང་གཡོན་བསྐུམ་རྒྱབ་མ་གཉིས་གར་སྟབས་ཀྱིས་བཞུགས་པ་ཡིན་པའི་ཤེས་བྱེད་དུ། ལུགས་གསུམ་པོ་དེ་དག་གི་གཞུང་རྣམས་ལས་བདུད་བཞི་བརྩེགས་པའི་གདན་དུ་གསུངས་པ་དྲངས་པ་རྣམས་ནི་ལུགས་སྔ་ཕྱི་མ་ཕྱེད་པ་ལྟ་བུར་སྣང་སྟེ། བདུད་བཞི་བརྩེགས་གདན་ནི་སྐྱིལ་ཀྲུང་ཕྱེད་པའི་གར་སྟབས་སུ་བཞུགས་པའི་ཤེས་བྱེད་དུ་འགྱུར་བའི་ཕྱིར་རོ། །བསྟོད་པ་ཉི་ཤུ་པར། ཉི་མར་ཞབས་གཡས་བརྐྱང་དང་བསྐུམ། །ཞེས་པའི་ཞབས་མདུན་མ་གཉིས་གཡས་བརྐྱང་གཡོན་བསྐུམ་བསྟན་པར་འདོད་པ་ནི་གཞུང་དེ་ཉིད་དང་འགལ་ཏེ། གཞུང་དེ་ལྟར་དུ་ཡོད་ན་ཡང་ཞབས་གཡས་པ་ལ་བརྐྱང་བ་དང་བསྐུམ་པ་གཉིས་ཡོད་ཅེས་པར་འཆད་དགོས་ཀྱི། གཡས་པ་བསྐུམ་པའི་དོན་གཡོན་པ་བསྐུམ་པ་ལ་འཆད་པ་ནི་བཞད་གད་ཀྱི་གནས་ཡིན་ནོ། །གནད་ཀྱི་ཟླ་ཟེར་ལས། ཉི་མར་ཞབས་གཡས་བརྐྱང་དང་སྔོ། །ཞེས་པའི་འགྱུར་དུ་ཡོད་པར་གསུངས་ལ། དགག་པ་བརྗོད་པ་རྣམས་ནི་མི་འཐད་དེ། སྔོ་ཞེས་པ་རྗེ་བཙུན་ཉིད་ཀྱིས་གཟིགས་པའི་བོད་དཔེ་རྙིང་པ་ཐམས་ཅད་ལས་འབྱུང་ཞེས་གསུངས་པས། ཁྱེད་དཔེ་མ་དག་པ་དང་ཐུག་པ་མི་འགོག་པའི་ཕྱིར་དང་། བསྐུམ་ཞེས་པ་མི་འབྱུང་ན་མདུན་ཞབས་གཡོན་པ་ལ་བསྟོད་པ་ཅིག་ཀྱང་མ་བསྟན་པར་ཐལ་བའི་སྐྱོན་ཡོད་དོ་ཞེས་སོགས་ཀྱི་མཚུངས་པ་བསྒྲེ་བ་ནི། ཕྱོགས་སྔ་ཕྱི་སོ་སོར་མ་ཕྱེད་པའི་མཚུངས་པ་སྣང་བའི་ཕྱིར་ཏེ། གཞུང་དེ་ལྟར་དུ་ཡོད་ན་ཡང་མདུན་ཞབས་གཡོན་པ་བསྐུམ་པ་མི་སྟོན་པར་བཤད་ཟིན་ཅིང་། གལ་ཏེ་བསྟན་ན་ཡང་ངེད་ལ་གནོད་པ་ཅུང་ཟད་ཀྱང་མེད་དེ། ངེད་ཞབས་གཡོན་པ་གཉིས་ཆར་བསྐུམ་པ་བཞེད་པའི་ཕྱིར་རོ། །མཚོ་སྐྱེས་ཀྱི་འགྲེལ་པར་ཞབས་གཡས་པ་གཉིས་ཀྱིས་མནན་པ་ཞེས་པ་དཔེ་མ་དག་པར་བྱས་ནས་ཞབས་གཡས་པ་ཉིད་ཀྱིས་མནན་པ་ཞེས་པར་ཡོད་པས། རང་ལུགས་སྒྲུབ་པར་འདོད་པ་ནི་རང་ལུགས་འགོག་པར་བྱེད་པ་སྟེ། ཁྱེད་རང་གིས་འབྲུ་གཉེར་བ་ལྟར་བདུད་བཞིའི་སྙིང་ཁར་ཞབས་གཡས་པ་ཁོ་ནས་མནན་པའི་དོན་དུ་འདོད་ན་ཡང་། ཞབས་གཡས་པ་གཉིས་ཆར་གྱིས་བདུད་བཞིའི་སྙིང་ཁ་ནས་མནན་པར་ཁས་ལེན་དགོས་ལ། དེའི་ཚེ་ཞབས་རྒྱབ་མ་གཉིས་སྐྱིལ་ཀྲུང་ཕྱེད་པར་བཞུགས་པའི་ཞབས་གཡས་པའི་ཐད་དུ་ཡང་སྙིང་ཁ་ཡོད་པར་ཁས་ལེན་དགོས་པའི་ཕྱིར་ན། བདུད་ཀྱི་སྙིང་ག་དེ་བདུད་ཀྱི་ལྟོ་བ་ཐམས་ཅད་ལ་ཁྱབ་ནས་ཡོད་པར་ཐལ་བའི་ཕྱིར་རོ། །མཚོ་སྐྱེས་ཀྱི་འགྲེལ་པར་གཡས་བརྐྱང་གཡོན་བསྐུམ་དང་། སྐྱིལ་ཀྲུང་ཕྱེད་པ་གསུམ་ལ་དག་པ་སོ་སོར་གསུངས་པས་དེ་གསུམ་སོ་སོར་ཡོད་པར་མི་འགྲུབ་སྟེ་འགྲེལ་པར་རོལ་པའི་ཚུལ་ནི་སྐྱིལ་ཀྲུང་ཕྱེད་པའོ། །དེའི་གཡས་བརྐྱང་པ་ནི་ཐུགས་རྗེ་ཆེན་པོས་སེམས་ཅན་ལ་ཁྱབ་པའོ་ཞེས་སྐྱིལ་ཀྲུང་ཕྱེད་པ་དེ་ཡི་གཡས་བརྐྱང་གཡོན་བསྐུམ་གྱི་དག་པ་གསུངས་པར་ཤིན་ཏུ་གསལ་བའི་ཕྱིར་རོ། །མན་ངག་ལུགས་ཀྱི་དགོངས་པ་ལ། རྗེ་བཙུན་རྩེ་མོས་བསྒོམ་བྱའི་སྐབས་སུ་གཅེར་བུ་གཡས་བརྐྱང་པས་བཞུགས་པ་ཞེས་པ་ཙམ་ལས་མ་གསུངས་ཀྱང་། དག་པ་དྲན་པའི་སྐབས་སུ་གཡས་བརྐྱང་། གཡོན་བསྐུམ་དང་། སྐྱིལ་ཀྲུང་ཕྱེད་པ་གསུམ་གྱིས་དག་པ་གསུངས་པས། གཡས་བརྐྱང་གཡོན་བསྐུམ་ལས་ལོགས་སུ་གྱུར་པའི་སྐྱིལ་ཀྲུང་ཕྱེད་པ་ཡོད་པར་འགྲུབ་པར་འདོད་པ་ཡང་ཤིན་ཏུ་མི་འཐད་དེ། སྔར་མཚོ་སྐྱེས་ཀྱི་འགྲེལ་པའི་ལུགས་དང་དོན་གཅིག་པའི་ཕྱིར་དང་། གཞན་དུ་རྗེ་བཙུན་ཆེན་པོས་བདེ་མཆོག་ལོ་དྲིལ་གཉིས་ཀྱི་སྐབས་སུ། གཡས་དང་པོ་རྡོ་རྗེ་དང་། གཡོན་དང་པོ་དྲིལ་བུ་འཛིན་པ་དང་། ཡུམ་ལ་འཁྱུད་པའི་དག་པ་གསུམ་སོ་སོར་གསུངས་པས་རྡོར་དྲིལ་འཛིན་པའི་ཕྱག་གཉིས་ལས་ལོགས་སུ་གྱུར་པའི་ཡུམ་ལ་འཁྱུད་པའི་ཕྱག་གཉིས་ཡོད་པར་ཁས་ལེན་དགོས་པར་ཐལ་བའི་ཕྱིར་རོ། །རྗེ་བཙུན་ཆེན་པོས་མཛད་པའི་གདན་གྱི་རྣམ་དག་ལས། གཙོ་བོའི་ཞབས་ཕྱེད་ཀྲུང་དུ་བཞུགས་པས་ཚངས་པའི་སྙིང་ཁ་ནས་མནན་པ་དང་ཞབས་གཡས་བརྐྱང་པས་དབང་ཕྱུག་ཆེན་པོའི་སྙིང་ཁ་ནས་མནན་པ་དང་། གཡོན་བསྐུམ་པས་གཞན་འཕྲུལ་དབང་བྱེད་ཀྱི་བདུད་སྡིག་ཅན་གྱི་སྙིང་ཁ་ནས་མནན་པ་དང་། ཡུམ་གྱི་ཞབས་གཡོན་པས་བརྒྱ་བྱིན་གྱིས་སྙིང་ཁ་ནས་མནན་པར་གསུངས་ཀྱི། ཞབས་མདུན་རྒྱབ་ཀྱི་གསལ་ཁ་མི་སྣང་བས་འདིའང་བདུད་བཞི་བཀྲམ་གདན་གྱི་དབང་དུ་བྱས་པ་ཡིན་པར་མི་འགྲུབ་སྟེ། འདི་ཡང་བདུད་བཞི་བརྩེགས་གདན་གྱི་དབང་དུ་བྱས་ནས་གཙོ་བོའི་ཞབས་ཐམས་ཅད་ཀྱི་ནུས་པ་སྡོམ་ནས་ཞབས་གཡས་པ་གཉིས་དང་། ཡུམ་གྱི་ཞབས་གཡོན་པ་གསུམ་གྱིས་བདུད་བཞི་བརྩེགས་པའི་སྙིང་ཁ་ནས་མནན་པའི་དོན་དུ་སྣང་བའི་ཕྱིར་རོ། །སེམས་རྣལ་དུ་ཕབ་ནས་གཟུ་བོའི་བློས་དཔྱད་པའི་ཚེ་ཇི་ལྟར་འབྱུང་བ་དགོངས་མཛོད་ཅིག ཉི་མར་བཞུགས་ཤིང་གར་སྟབས་ལྡན། །ཞེས་པའི་དོན་གར་མཁན་ལྟར་ཆ་ལུགས་སྣ་ཚོགས་ཀྱིས་སེམས་ཅན་གྱི་དོན་མཛད་པ་ལ་འཆད་པ་ནི་རྣམ་པར་འཁྱམས་ཏེ། དེ་ལྟར་ན་སངས་རྒྱས་ཐམས་ཅད་གར་མཁན་ལྟར་ཆ་ལུགས་སྣ་ཚོགས་ཀྱི་སྒོ་ནས་སེམས་ཅན་གྱི་དོན་མཛད་པ་ཡིན་པས། སངས་རྒྱས་སྐྱིལ་ཀྲུང་གིས་བཞུགས་པ་རྣམས་ལ་ཡང་གར་སྟབས་ལྡན་ཞེས་གསུང་དགོས་པར་ཐལ་ལོ། །དྲན་པའི་འབྱུང་གནས་ལས་རྣམ་པ་སྣ་ཚོགས་སུ་སྤྲོ་བས་ན་གར་དང་ལྡན་ནོ་ཞེས་པའི་དོན་ནི་གར་གྱི་རྣམ་དག་འཆད་པ་ཡིན་གྱི་གར་གྱི་བཞུགས་སྟབས་འཆད་པ་མ་ཡིན་ནོ། །ཡང་ཉི་ཟེར་ལས་བོད་ཀྱི་འཁྲུལ་སྤོང་མཁན་པོས་རྩ་རྒྱུད་ཀྱི་ཊཱི་ཀར། མན་ངག་ལུགས་ལ་སེམས་དཔའ་སུམ་བརྩེགས་འཆད་པས་ནོར་རོ་ཞེས་བཀག་པ་ལ། གནད་ཀྱི་ཟླ་ཟེར་ལས། དེའི་སྐྱོན་སྤོང་ནས་མན་ངག་ལུགས་ལ་སེམས་དཔའ་སུམ་བརྩེགས་ཡོད་པར་སྒྲུབ་བོ། །དེ་ལ་ཕྱོགས་སྔ་ནི་ཟླ་ཟེར་གྱི་ལན་དེས་ཀྱང་ཁེགས་མོད་ཟླ་ཟེར་གྱི་ལུགས་དེ་ལའང་ཅུང་ཟད་དཔྱད་ན། རྗེ་བཙུན་ཆེན་པོས་བདག་མེད་མའི་སྒྲུབ་ཐབས་སུ། སེམས་དཔའ་སུམ་བརྩེགས་ཀྱི་རྣམ་བཞག་གཉིས་གསུངས་པ་ཁྱེད་ཀྱིས་བཤད་པ་ལྟར་ཡིན་མོད། དེ་ཡང་མན་ངག་ལུགས་ཀྱི་དབང་དུ་བྱས་པ་མ་ཡིན་གྱི་སྒྲུབ་ཐབས་འདི་འགྲེལ་པ་ལུགས་དང་། མན་ངག་ལུགས་ཐུན་མོང་བའི་ནང་ནས་འགྲེལ་པ་ལུགས་ཤས་ཆེ་བར་སྣང་བས། དེའི་ཕྱིར་བདུད་རྩི་འོད་ཀྱི་རྗེས་སུ་འབྲང་ནས་སེམས་དཔའ་སུམ་བརྩེགས་ཀྱི་ཐ་སྙད་གསུངས་པ་ཡིན་ལ། མན་ངག་ལུགས་ཀྱི་གསུངས་རབ་འགྲེལ་བྱེད་གང་དུ་ཡང་སེམས་དཔའ་སུམ་བརྩེགས་ཀྱི་ཐ་སྙད་གསུངས་པ་མེད་པས་ཐུགས་ཁར་ས་བོན་འགོད་པ་ཙམ་ལས་མི་མཛད་དོ། །སྒྲོན་གསལ་གྱི་ལུང་གི་དོན་ནི་ཁྱེད་ཀྱིས་བཤད་པ་ལྟར་ལེགས་པས་ས་བོན་ཐིག་ལེས་བརྒྱན་པ་ཡོད་པ་རྣམས་ལ་སེམས་དཔའ་སུམ་བརྩེགས་ཀྱི་དོན་ཚང་བ་ལེགས་པར་གྲུབ་བོ། །ཞེས་བྱ་བ་བྲིས་སོ། །དེ་ལ་བོད་ཀྱི་འཁྲུལ་སྤོང་མཁན་པོས་རྩ་རྒྱུད་ཊཱི་ཀར། དེ་ལྟར་དུ་ཡོད་པ་ཟླ་ཟེར་ལས་བཀག་ཅེས་པ་ནི་ཚོད་དཔག་ཙམ་དུ་སྣང་སྟེ། དེས་རྩ་རྒྱུད་ཀྱི་ཊཱི་ཀ་འགོག་པ་ལ་རྩོལ་བ་མི་མཛད་པའི་ཕྱིར་རོ། །འོན་ཀྱང་དེ་ཞར་ལ་ཁེགས་མོད་ཀྱི། ཟླ་ཟེར་གྱི་ཕྱོགས་སྔ་ནི་གཞན་ཞིག་ནི་ཡོད་དོ། །རྗེ་བཙུན་ཆེན་པོས་མཛད་པའི་བདག་མེད་མའི་སྒྲུབ་ཐབས་མན་ངག་ལུགས་མ་ཡིན་པར་འགྲེལ་པ་ལུགས་སུ་འདོད་པ་ནི་སྔར་བཀག་ཟིན་ལ། མན་ངག་ལུགས་ལ་སེམས་དཔའ་སུམ་བརྩེགས་ཡོད་ན་ཐུགས་ཁར་ས་བོན་འགོད་པ་ཙམ་ལས་མི་མཛད་ཅེས་པའི་ཙམ་སྒྲས་གང་གཅོད་པ་ཡིན་སྨྲ་དགོས་ལ། མེད་ན་ས་བོན་ཐིག་ལེས་བརྒྱན་པ་ཡོད་པ་རྣམས་ལ་སེམས་དཔའ་སུམ་བརྩེགས་ཀྱི་དོན་ཚང་བ་ལེགས་པར་གྲུབ་ཅེས་ཁས་བླངས་པ་དང་འགལ་ལོ། །གནད་ཀྱི་ཟླ་ཟེར་ལས། བླ་ཆེན་འཕགས་པས་རང་གི་ཐུགས་ཁ་ནས་སྔགས་ཕྲེང་ཐོན། ཡུམ་གྱི་ཁར་ཞུགས་ཐུགས་ཁར་ཐིམ། མཁའ་ནང་ནས་ཐོན། ཡབ་ཀྱི་རྡོ་རྗེར་ཞུགས་ཐུགས་ཁར་ཐིམ་པར་བསྒོམས་ལ་བཟླས་ཤིང་། འཁོར་རྣམས་ཀྱི་རང་རང་གི་ཐུགས་ཁའི་ས་བོན་ལ་འཁོར་བར་བསམ་ཞིང་བཟླའོ། །ཞེས་གསུངས་མོད། རྗེ་བཙུན་དང་མི་མཐུན་པར་མངོན་ནོ་ཞེས་གསུངས་པ་ལ། ཉི་ཟེར་ལས། དེའང་མི་འཐད་དེ་གཙོ་བོ་ཡབ་ཡུམ་གྱི་སྔགས་བཟླ་བའི་ཚེ། རྗེ་བཙུན་སྐུ་མཆེད་ཀྱི་ཞལ་ནས་ཚུར་འཁོར་དུ་བཤད་པ་ནི་རླུང་བརྟན་པར་བྱ་བའི་དབང་དུ་བྱས་ཏེ། རྗེ་ས་སྐྱ་པ་ཆེན་པོས་བཟླས་པའི་མན་ངག་ནི། ཡུམ་གྱི་ཐུགས་ཁའི་ཨཾ་ལས་སྔགས་ཀྱི་ཕྲེང་བ་བྱུང་སྟེ། རང་གི་ཁར་ཞུགས་ཏེ་ཚུར་འཁོར་བ་འདིས་ནི་རླུང་བརྟན་པར་འགྱུར་རོ་ཞེས་གསུངས་པ་ལྟར་མཛད་པ་ཡིན་ལ། དེའི་ཤུགས་ལས་བྱུང་སེམས་བརྟན་པར་འདོད་པས་ཕར་འཁོར་དུ་བཟླ་བ་སྙན་བརྒྱུད་ལ་བཞུགས་པ་འཕགས་པ་རིན་པོ་ཆེས་གསལ་བར་བཀོད་པ་ཡིན་ཏེ། རྗེ་བཙུན་གྱིས་ཡུམ་དང་བཅས་པ་ལ། འདོ་ལའི་བཟླས་པ་དང་ཞེས་པ་རྒྱས་བཤད་ཀྱི་སྐབས་སུ་འཕགས་པས་འཁོར་བའི་བཟླས་པ་ལ་གཉིས་སུ་མེད་པ་ལས་ཡབ་ཡུམ་ཞལ་སྦྱོར་གྱི་སྟེང་འོག་གི་སྒོ་གཉིས་ནས་ཕར་ཚུར་འཁོར་བས་རང་བཞིན་གྱི་དོན་བྱས་པར་བསམ་ཞིང་བཟླ་བ་དང་ཞེས་གསུངས་པས་སོ། །འདི་ཉིད་རྗེ་བཙུན་ཆེན་པོའི་དགོངས་པར་ཤིན་ཏུ་གསལ་ཏེ། དེ་ཁོ་ན་ཉིད་གསུམ་གྱི་མན་ངག་ལས། ཀྱཻ་རྡོ་རྗེ་དང་། བདེ་མཆོག་ཡུམ་ལ་འཁོར་བའི་བཟླས་པ་ཞེས་བྱ་བ་ཡུམ་ལས་ཡབ་ཀྱི་སྔགས་ཀྱི་འོད་ཟེར་དང་ཡིག་འབྲུ་ཚུར་འཁོར་བའམ། ཡབ་ལས་ཡུམ་ལ་ཕར་འཁོར་བའི་ཚུལ་དུ་བཟླས་པར་བཤད་དེ། དེ་ཡང་ཚུར་འཁོར་ནས་བཟླས་ན་རླུང་བརྟན་པར་འགྱུར། ཕར་འཁོར་དུ་བཟླས་ན་བྱང་ཆུབ་ཀྱི་སེམས་བརྟན་པར་འགྱུར་ཞེས་གསུངས་སོ། །གཞན་ཡང་བཟླས་ཐབས་གཞུང་སོ་སོ་གང་གི་ལུགས་སུ་བྱས་ཀྱང་བཏུབ་སྟེ། བཟླས་ཐབས་ཀྱི་བྱེ་བྲག་གོ་ཞེས་ཤིན་ཏུ་གསལ་བར་གསུངས་པའི་ཕྱིར་རོ། །འཁོར་གྱི་སྔགས་བཟླ་ཚུལ་ཡང་རྗེ་བཙུན་རྩེ་མོས་སྔགས་ཀྱི་འོད་ཟེར་ལྷ་མོ་ལ་ཕོག་པས། ཐུགས་བརྒྱུད་བསྐུལ་བར་བསམ་ཞེས་གསུངས་པ་ནི། བཟླ་ཚུལ་གྱི་རྣམ་གྲངས་གཞན་ཡིན་ལ། རྗེ་བཙུན་གྱི་དགོངས་པ་ཡང་མཐའ་གཅིག་པ་མ་ཡིན་ཏེ། རྗེ་བཙུན་གྱིས་ཡུམ་མེད་པ་ལ་ནི་མ་ནིང་གི་བཟླས་པ་ཞེས་གསུངས་ལ། རྒྱས་བཤད་དུ་འཕགས་པས་ཡབ་ཡུམ་རྐྱང་པ་ལ་འཁོར་བར་བསྒོམ་པ་མ་ནིང་གི་བཟླས་པ་ཞེས་གསུངས་སོ། །གལ་ཏེ་རྗེ་བཙུན་གྱིས་ཡུམ་མེད་པ་ལ་ཞེས་གསུངས་པ་ནི། སྐུ་རྡོ་རྗེ་ཡུམ་མེད་པ་ལ་དགོངས་པ་ཡིན་གྱི། ལྷ་མོ་རྣམས་ལ་མ་ཡིན་ནོ་སྙམ་ན་ལྷ་མོ་རྣམས་ལ་ཡང་ཚུལ་དེ་ཉིད་དུ་བཟླ་བ་རྗེ་བཙུན་གྱི་དགོངས་པ་ཡིན་ཏེ། རྗེ་བཙུན་གྱིས་བདག་མེད་པའི་མངོན་རྟོགས་སུ་ཐུགས་ཁའི་ཨཾ་ལས་སྔགས་ཀྱི་ཕྲེང་བ་བྱུང་སྟེ། ལྟེ་བ་ནས་ཐོན་ནས་ཞལ་ནས་ཞུགས་ཏེ། ཐུགས་ཀའི་ཨཾ་ལ་ཐིམ་པའི་ཚུལ་གྱིས་ཚུར་འཁོར་གྱི་རྣམ་པའམ་ཞལ་ནས་བྱུང་སྟེ། ལྟེ་བར་ཞུགས་ནས་ཨཾ་ལ་མས་ཡར་ཐིམ་པའི་ཚུལ་གྱིས་ཕར་འཁོར་གྱི་རྣམ་པར་བཟླས་པ་གང་རུང་ངོ་ཞེས་གསལ་བར་གསུངས་པའི་ཕྱིར་རོ། །དེས་ན་འདོ་ལའི་བཟླས་པ་དང་། མ་ནིང་གི་བཟླས་པ་གཉིས་ཀ་ལ་ཡང་ཕར་འཁོར་དང་ཚུར་འཁོར་དུ་བཟླས་པ་ལུགས་གཉིས་ཀ་ཡོད་པ་རྗེ་བཙུན་གྱི་དགོངས་པ་ཡིན་པར་གསལ་བར་བཤད་པས། འཕགས་པ་རིན་པོ་ཆེས་བཟླས་པའི་མན་ངག་རྗེ་བཙུན་སྐུ་མཆེད་དང་མི་མཐུན་པ་མ་ཡིན་པར་ཤེས་པར་གྱིས་ཤིག་ཅེས་བྱ་བ་བྲིས་སོ། །འདི་ལ་དཔྱད་པར་བྱ་སྟེ། རྗེ་བཙུན་སྐུ་མཆེད་ཀྱིས་སྒྲུབ་ཐབས་གཉིས་ལས་ཚུར་འཁོར་མ་གཏོགས་པ་ཕར་འཁོར་མ་བཤད་པས་འཕགས་པས་ཕར་འཁོར་དུ་བཤད་པ་རྗེ་བཙུན་གྱི་གསུང་དང་མི་མཐུན་པར་མངོན་ཞེས་གསུངས་ཀྱི། ཕར་འཁོར་གཏན་མི་རུང་བར་བཞེད་པ་ནི་མ་ཡིན་ལ་དེ་ཁོ་ན་ཉིད་གསུམ་གྱི་མན་ངག་ལས། ཚུར་འཁོར་མ་གཏོགས་པ་ཕར་འཁོར་ཡོད་པ་སྒྲུབ་མི་ནུས་ཏེ། ལུང་དེའི་དོན་ནི་ཀྱཻ་རྡོར་དང་། བདེ་མཆོག་གཉིས་ལ་ཚུར་འཁོར་དང་། ཕར་འཁོར་གཉིས་པོ་སོ་སོར་སྦྱར་བ་ཡིན་པའི་ཕྱིར་རོ། །དེས་ན་ཀྱཻ་རྡོར་གྱི་སྐབས་སུ་རླུང་བརྟན་པའི་དབང་དུ་བྱས་ནས་ཚུར་འཁོར་དང་། བདེ་མཆོག་གི་སྐབས་སུ་བྱང་ཆུབ་ཀྱི་སེམས་བརྟན་པའི་དབང་དུ་བྱས་ནས་ཕར་འཁོར་དུ་བྱ་བར་བཤད་པས་གནས་སྐབས་མ་འདྲེས་པ་སོ་སོར་ཉམས་སུ་ལོངས་ཤིག འཁོར་གྱི་སྔགས་བཟླས་པའི་ཚུལ་རྗེ་བཙུན་རྩེ་མོས་སྔགས་ཀྱི་འོད་ཟེར་ལྷ་མོ་ལ་ཕོག་པས་ཐུགས་རྒྱུད་བསྐུལ་བར་བསམས་ཞེས་གསུངས་པ་རྗེ་བཙུན་གྱི་དགོངས་པ་མཐའ་གཅིག་པ་མ་ཡིན་པའི་ཤེས་བྱེད་དུ། ཡུམ་མེད་པ་ལ་མ་ནིང་གི་བཟླས་པ་ཞེས་པ་དྲངས་པ་ནི་འབྲེལ་མེད་དེ། དེ་ནི་ཡུམ་མེད་པའི་དཀྱིལ་འཁོར་གྱི་གཙོ་བོའམ། དཔའ་བོ་གཅིག་པའི་བཟླས་ཚུལ་སྟོན་པའི་ཕྱིར་རོ། །ཡང་དེ་ཡུམ་མེད་པ་སྐུ་རྡོ་རྗེ་ལྟ་བུ་ལ་དགོངས་པ་མ་ཡིན་པའི་ཤེས་བྱེད་དུ་རྗེ་བཙུན་གྱི་བདག་མེད་མའི་མངོན་རྟོགས་སུ། ཐུགས་ཀའི་ཨཾ་ལས་སྔགས་ཀྱི་ཕྲེང་བ་བྱུང་སྟེ་ཞེས་སོགས་དྲངས་པས་ཀྱང་འཁོར་གྱི་ལྷ་མོ་རྣམས་ལ་འཁོར་ཚུལ་དེ་ལྟ་བུ་བྱེད་པར་སྒྲུབ་མི་ནུས་ཏེ། དེ་ནི་བདག་མེད་ལྷ་མོ་བཅོ་ལྔའི་དཀྱིལ་འཁོར་གྱི་གཙོ་མོ་ལ་དགོངས་པའི་ཕྱིར་རོ། །གལ་ཏེ་སྒྲུབ་ནུས་ན་ཡང་། དེས་འཕགས་པས་འཁོར་རྣམས་ཀྱི་ནི། རང་རང་གི་ཐུགས་ཁའི་ས་བོན་ལ་འཁོར་བར་བསམ་ཞིང་བཟླའོ་ཞེས་པ་དེ་སྒྲུབ་མི་ནུས་ཏེ། དེ་གཉིས་ལ་འབྲེལ་མི་འདུག་པའི་ཕྱིར་རོ། །དེས་ན་ཁོ་བོའི་བླ་མས་སྤྱིར་འདོ་ལའི་བཟླས་པ་དང་། མ་ནིང་གི་བཟླས་པ་གཉིས་ཀ་ལ་ཕར་འཁོར་དང་ཚུར་འཁོར་དུ་བཟླ་བའི་ལུགས་གཉིས་མེད་པ་མ་གསུངས་ལ། འོན་ཀྱང་ཀྱཻ་རྡོར་དང་བདེ་མཆོག་གཉིས་ལ་ཚུར་འཁོར་དང་ཕར་འཁོར་སོ་སོར་སྦྱར་བ་ནི་རྗེ་བཙུན་གོང་མའི་གསུང་ལ་ཤིན་ཏུ་གསལ་བས་དེ་ལས་ལྡོག་པ་གཅིག་བྱེད་པ་ལ་དགོས་པ་ཅི་ཞིག་སྒྲུབ། གཏོར་ཆོག་གི་ཊཱི་ཀར་ཁ་ཅིག་ཆོས་འབྱུང་གཅིག་གི་ནང་དུ་པདྨ་གསུམ་ཀ་འདོད་པ་ནི་མི་འཐད་དེ། དེ་ཉིད་བཅུ་པར་གོང་མ་གོང་མའི་རིམ་པས་ཆོས་འབྱུང་སུམ་བརྒྱུད་ཀྱི་དབུས་སུ་ཆུད་པ། པདྨ་དམར་པོ་འདབ་མ་བརྒྱད་པ་བལྟས་ལ་ཞེས་དང་། སློབ་དཔོན་ཀཾ་པ་ལས་ཆོས་འབྱུང་སུམ་བརྩེགས་བར་མར་ནི་ཞེས་དང་། མར་མེ་མཛད་ཀྱི་སྟེང་གི་ཆོས་འབྱུང་པདྨ་དཀར་ཞེས་དང་། འོག་གི་ཆོས་འབྱུང་པདྨ་དམར་ཞེས་དང་། རྗེ་བཙུན་རྩེ་མོས་དཀྱིལ་འཁོར་གྱི་ནུབ་ཕྱོགས་འོག་གི་ཆ་ལ་ཆོས་འབྱུང་གི་ནང་དུ་པདྨ་འདབ་བརྒྱད་ལ་ཞེས་སོགས་དཀྱིལ་འཁོར་དང་འབྲེལ་བའི་སྐབས་ནས་གསུངས་ཤིང་། རྗེ་བཙུན་གྱིས་སྟེང་གི་ཆོས་འབྱུང་གི་པདྨ་ཞེས་དང་། བར་གྱི་ཆོས་འབྱུང་གི་པདྨ་ཞེས་དང་། ཆོས་འབྱུང་འོག་མའི་པདྨ་ཞེས་དང་འགལ་བའི་ཕྱིར་རོ་ཞེས་གསུངས་པ་ལ། ཉི་ཟེར་ལས། དེ་ལ་ཆོས་འབྱུང་སུམ་བརྩེགས་ཁོ་ན་མཐའ་གཅིག་ཏུ་འདོད་པ་མི་འཐད་དེ། ཨ་ལ་ལ་བཛྲ་གྱིས་མདུན་དུ་གྲུ་གསུམ་ཆོས་འབྱུང་ནང་དུ་པདྨ་སུམ་བརྩེགས་བསམ་སྟེ་ཞེས་དང་། མི་ཐུབ་ཟླ་བས། ཆོས་ཀྱི་འབྱུང་གནས་ནང་དུ་ནི། །པདྨ་འདབ་བརྒྱད་སུམ་བརྩེགས་སུ། །ཞེས་དང་། ས་ཆེན་གྱིས་གཏོར་མ་གཏོང་ན་མདུན་དུ་ཆོས་འབྱུང་གི་ནང་དུ་པཾ་ལས་པདྨ་སུམ་བརྩེགས་བལྟས་ལ་ཞེས་དང་། རྗེ་བཙུན་རྩེ་མོས་མངོན་རྟོགས་རྒྱས་པར་ཁྱེད་རང་གི་དྲངས་པའི་ལུང་དེའི་སྔ་རོལ་དེ་ཉིད་དུ་དེ་ལ་མགྲོན་བསྐྱེད་པ་ནི་མདུན་དུ་དཀྱིལ་འཁོར་མ་བྱས་ན། སྐད་ཅིག་གིས་ཆོས་འབྱུང་བསྒོམས་ཏེ་དེའི་ནང་དུ་པཾ་སུམ་བརྩེགས་ལས་པདྨ་འདབ་བརྒྱད་སུམ་བརྩེགས་བསྒོམས་ཏེ་ཞེས་དང་། དཀྱིལ་འཁོར་དང་འབྲེལ་བའི་དབང་དུ་བྱས་ནས་ཀྱང་། ཆོས་འབྱུང་གཅིག་པོའི་ནང་དུ་གཏོར་མགྲོན་རྣམས་བསྒོམ་པར་གསུངས་པའི་ཕྱིར་རོ། །གལ་ཏེ་ནུབ་བམ་ལྷོ་ནུབ་ཀྱི་འོག་གི་ཆ་ལ་ཆོས་འབྱུང་གི་ནང་དུ་ཞེས་དྲངས་པའི་ལུང་གི་ཆོས་འབྱུང་སུམ་བརྩེགས་སུ་འགྲུབ་བོ་སྙམ་ན་མི་འགྲུབ་སྟེ། དེ་ནི་འོག་གི་གཏོར་མགྲོན་རྣམས་ཕྱིའི་ཆོས་འབྱུང་གི་ནང་དུ་ཆུད་པ་ལ་དགོངས་ཀྱི། སྒོས་ཀྱི་ཆོས་འབྱུང་ངེས་པར་བཞེད་པ་ནི་མ་ཡིན་སྟེ། ཡིན་ན་སྟེང་གི་གཏོར་མགྲོན་རྣམས་ལ་ཡང་། སྒོས་ཀྱི་ཆོས་འབྱུང་གསུངས་པར་རིགས་པ་ལ། རྗེ་བཙུན་རྩེ་མོས། དེའི་ཤར་རམ། བྱང་ཤར་གྱི་སྟེང་གི་ཆ་ལ་པདྨ་འདབ་བརྒྱད་ཀྱི་ཨོཾ་དགུ་ལས་ལྟེ་བ་ལ་སྐུ་རྡོ་རྗེ། འདབ་མ་ལ་ལྷ་ཆེན་པོ་བརྒྱད། ཅེས་པ་ཙམ་ལས་སྟེང་གི་མགྲོན་རྣམས་ལ་ཆོས་འབྱུང་མ་གསུངས་འི་ཕྱིར་རོ། །དེས་ན་ཆོས་འབྱུང་སུམ་བརྩེགས་སམ། ཆོས་འབྱུང་གཅིག་གི་ནང་དུ་པདྨ་འདབ་བརྒྱད་སུམ་བརྩེགས་བྱེད་པ་འདམ་ཁ་ཅན་དུ་ཤེས་པར་བྱའོ་ཞེས་བྱ་བ་བྲིས་སོ། །དེ་ལ་ལུང་དེ་རྣམས་ལས་ཆོས་འབྱུང་གི་ནང་དུ་པདྨ་འདབ་བརྒྱད་སུམ་བརྩེགས་ཡོད་པར་གསུངས་ཀྱི་ཆོས་འབྱུང་གཅིག་གི་ནང་དུ་པདྨ་འདབ་བརྒྱད་སུམ་བརྩེགས་ཡོད་པར་མ་གསུངས་ལ། གནད་ཀྱི་ཟླ་ཟེར་ལས་དྲངས་པའི་ལུང་རྣམས་ལས་ནི་ཆོས་འབྱུང་སུམ་བརྩེགས་དངོས་སུ་གསུངས་པས། ཨ་ལ་ལ་བཛྲ་དང་། མི་ཐུབ་ཟླ་བ་སོགས་ཀྱི་ལུང་གི་དོན་ཡང་། ཆོས་འབྱུང་གི་ནང་དུ་པདྨ་འདབ་བརྒྱད་དང་བཅས་པ་ཞེས་པའི་དོན་དུ་སྣང་སྟེ། དཔེར་ན་བུམ་པའི་ནང་དུ་ཆུས་གང་བ་སུམ་བརྩེགས་ཅེས་པས་བུམ་པ་ཆུས་གང་བ་སུམ་བརྩེགས་སྟོན་གྱི་བུམ་པའི་ནང་དུ་ཆུ་སུམ་བརྩེགས་ཡོད་པ་མི་སྟོན་པ་བཞིན་ནོ། །རྗེ་བཙུན་རྩེ་མོས་ལྷོ་ནུབ་ཀྱི་འོག་གི་ཆ་ལ་ཆོས་འབྱུང་གི་ནང་དུ་ཞེས་གསུངས་པའི་དོན། འོག་གི་གཏོར་མགྲོན་རྣམས་ཕྱིའི་ཆོས་འབྱུང་གི་ནང་དུ་ཆུད་པ་ལ་དགོངས་ཞེས་པ་ནི་ཧ་ཅང་ཐལ་ཏེ། དེ་ལྟ་བུའི་དོགས་པ་མེད་པའི་ཕྱིར་དང་། གལ་ཏེ་ཡོད་ན་སྲུང་འཁོར་གྱི་ནང་དུ་ཆུད་མི་ཆུད་ཀྱི་དོགས་པ་ཡང་ཡོད་པས། སྲུང་འཁོར་གྱི་ནང་དུ་ཞེས་པ་ཡང་དོགས་པར་ཐལ་བའི་ཕྱིར་རོ། །འོག་གི་གཏོར་མགྲོན་ལ་སྒོས་ཀྱི་ཆོས་འབྱུང་ངེས་པར་བཞེད་ནས་དེ་ལྟར་དུ་གསུངས་ན་སྟེང་གི་གཏོར་མགྲོན་ལ་ཡང་སྒོས་ཀྱི་ཆོས་འབྱུང་གསུང་བར་རིགས་ཞེས་པ་ནི། ཁྱེད་རང་ལ་མཚུངས་ཏེ། འོག་གི་གཏོར་མགྲོན་ཕྱིའི་ཆོས་འབྱུང་གི་ནང་དུ་ཆུད་པ་ལ་དགོངས་ནས་ཆོས་འབྱུང་གི་ནང་དུ་ཞེས་གསུངས་ན་སྟེང་གི་གཏོར་མགྲོན་ལ་ཡང་དེ་ལྟར་དུ་དགོས་པར་ཐལ་བར་མཚུངས་པའི་ཕྱིར་རོ། །མདོར་ན་དེ་ཉིད་བཅུ་པ་ལ་སོགས་པའི་རྒྱ་བོད་ཀྱི་གཞུང་ཁུངས་ཐུབ་རྣམས་ལས་ཆོས་འབྱུང་སུམ་བརྩེགས་དངོས་སུ་གསུངས་ཤིང་། ཆོས་འབྱུང་གཅིག་གི་ནང་དུ་པདྨ་འདབ་བརྒྱད་སུམ་བརྩེགས་བྱེད་པའི་གསལ་ཁ་ཅན་གྱི་གཞུང་ཁུངས་ཐུབ་གཅིག་ཀྱང་མེད་པའི་ཕྱིར་དང་། ཨ་ལ་ལ་བཛྲ། མི་ཐུབ་ཟླ་བ། ས་ཆེན། རྗེ་བཙུན་རྩེ་མོའི་ལུང་རྣམས་ཀྱི་དོན་ཡང་ཆོས་འབྱུང་གི་ནང་དུ་པདྨ་འདབ་བརྒྱད་ཡོད་པ་དེ་ལྟ་བུ་སུམ་བརྩེགས་ཅེས་པ་ཡིན་པས་འདམ་ཁ་ཅན་མ་ཡིན་པར་ཤེས་པར་བྱའོ། །གཏོར་ཆོག་གི་ཊཱི་ཀར། འཕགས་པ་རིན་པོ་ཆེས་རྡོ་རྗེ་གསུམ་གྱི་དབང་དུ་མཛད་ནས། གཡས་པ་རྣམས་འཁོར་ལོ། རྡོ་རྗེ། པདྨ་གཡོན་པ་རྣམས་ཀྱིས་དེ་དག་གིས་ཡུ་བ་བྱས་པའི་དྲིལ་བུ་འཛིན་པར་བཤད་པ་ལ། ཁ་ཅིག ཨ་ལ་ལ་བཛྲ་གྱི་གཏོར་ཆོག་ལས། དཀར་པོ་བརྟག་པའི་དབུ་རྒྱན་ཅན། །འཁོར་ལོ་དྲིལ་བུས་ལག་པ་སྦྲེལ། །སྔོན་པོ་མི་བསྐྱོད་ཅོད་པཎ་ཅན། །རྡོ་རྗེ་དྲིལ་བུས་ལག་གཉིས་སྦྲེལ། །དམར་པོ་སྣང་མཐའི་དབུ་རྒྱན་ཅན། །པདྨ་དྲིལ་བུས་ལག་པ་སྦྲེལ། །ཞེས་བཤད་དོ་ཟེར་ཏེ། གཞུང་དེ་མཐོང་ན་དཔྱད་ཟེར་བ་ལ། ཉི་ཟེར་མཁན་པོ་ན་རེ། ཁོ་བོས་གཞུང་དེ་མཐོང་བ་ན་ཕྱག་མཚན་དེ་ཁོ་ན་བཞིན་དུ་བཞུགས་ཀྱིན་འདུག་ཀྱང་དེའི་ལུགས་ལ་སྟེང་མ་ཁྱུང་མགོ བར་མ་སྲིན་པོའི་མགོ འོག་མ་ཆུ་སྲིན་མགོར་བཤད་འདུག་པས་དེ་ནས་བཤད་པའི་ལུགས་དེ་འདིར་བླངས་པ་མ་ཡིན་པར་སྣང་མོད། འོན་ཀྱང་འཕགས་པ་རིན་པོ་ཆེས། དེ་ལྟར་གསུངས་པ་ནི། གོང་མའི་གདམས་ངག་སྙན་བརྒྱུད་དུ་ཤེས་པར་བྱའོ་ཞེས་བྱ་བ་བྲིས་སོ། །དེ་ནི་འཕགས་པའི་བཞེད་པ་སྒྲུབ་པར་རློམ་ཡང་། སྒྲུབ་བྱེད་གཏན་མེད་པ་གཅིག་ཐོན་སྣང་སྟེ། ལུགས་དེ་ལ་ཨ་ལ་ལ་བཛྲ་གྱི་གཏོར་ཆོག་ལས་དེ་ལྟར་དུ་བཤད་པ་ལས་གཞན་པའི་སྒྲུབ་བྱེད་མེད་ཅིང་། གཞུང་དེ་ཡང་སྒྲུབ་བྱེད་མ་ཡིན་པར་ཁས་བླངས་པའི་ཕྱིར་རོ། །གོང་མའི་མན་ངག་སྙན་བརྒྱུད་དུ་ཤེས་པར་བྱ་ཞེས་པ་ཡང་དམ་བཅའ་ཙམ་སྟེ། མན་ངག་ལུགས་ཀྱི་ཡིག་ཆ་གང་དུ་ཡང་དེ་ལྟར་མ་གསུངས་ཤིང་། རྒྱུད་ལས། རྡོ་རྗེ་དྲིལ་བུས་ལག་པ་སྦྲེལ། །ཞེས་གསུངས་པ་དང་འགལ་བའི་ཕྱིར་རོ། །ཡུམ་གྱི་ཕྱག་མཚན་གྱི་སྐབས་སུ་གཏོར་ཆོག་གི་ཊཱི་ཀར། ཁ་ཅིག་གྲི་གུག་དང་ཐོད་པར་བྱེད་པ་ནི་རྒྱུད་རྒྱ་གཞུང་གོང་མའི་གསུང་རབ་ཐམས་ཅད་ནས་མི་འབྱུང་བས་འདིར། རང་མཚུངས་རིག་མས་ལུས་སྤྲད་ནས། །ཞེས་གསུངས་པ་ཡབ་དང་མཚུངས་པར་བྱའོ་ཞེས་གསུངས་པ་ལ། ཉི་ཟེར་ལས། དེ་ལ་རྒྱུད་དེའི་དོན་ཡབ་དང་མདོག་མཚུངས་པ་ཙམ་ལ་དགོངས་ཏེ་མི་ཐུབ་ཟླ་བས། རང་མདོག་རིག་མས་ཡན་ལག་འཁྱུད། །ཅེས་དང་། རིན་ཆེན་འབར་བ་ལས་ཀྱང་། ཚིག་དེ་ཉིད་གསུངས་པའི་ཕྱིར་རོ། །དེས་ན་འཕགས་པ་རིན་པོ་ཆེས། རང་དང་འདྲ་བའི་རིག་མ་གྲི་གུག་དང་ཐོད་པ་འཛིན་པས་འཁྱུད་ཅེས་གསུངས་པ་ལྟར་འཐད་ཀྱི། རང་མཚུངས་ཞེས་པས་ཕྱག་མཚན་ཡང་མཚུངས་མི་དགོས་ཏེ། དགོས་ན། ཤེས་རབ་རྡོ་རྗེ་ཕག་མོ་ནི་བཅོམ་ལྡན་འདས་ཀྱི་གཟུགས་ཅན་ནོ། །ཞེས་པའི་སྐབས་ཀྱི་ཕག་མོའི་ཕྱག་མཚན་ཡང་ཡབ་དང་མཚུངས་དགོས་པར་འགྱུར་བས་ཧ་ཅང་ཐལ་ལོ་ཞེས་བྱ་བ་བྲིས་སོ། །དེ་ནི་ཤིན་ཏུ་མི་འཐད་དེ། མི་ཐུབ་ཟླ་བས། རང་མདོག་རིག་མས་ཡན་ལག་འཁྱུད། །ཅེས་མདོག་མཚུངས་ལ་སྦྱར་ཡང་། ཕྱག་མཚན་ལོགས་སུ་མ་གསུངས་པའི་ཕྱིར་དང་། ཤེས་རབ་རྡོ་རྗེ་ཕག་མོ་ནི། །བཅོམ་ལྡན་འདས་ཀྱི་གཟུགས་ཅན་ནོ། །ཞེས་པ་དང་མི་མཚུངས་ཏེ། དེར་རྡོ་རྗེ་ཕག་མོ་དང་ལུ་གུ་རྒྱུད་གཉིས་ལ་བཅོམ་ལྡན་འདས་ཀྱི་གཟུགས་ཅན་ནོ་ཞེས་སྤྱིར་བཏང་ནས། འོན་ཀྱང་གྲི་གུག་དང་ཐོད་པའོ་ཞེས་ཕྱག་མཚན་གྱི་དམིགས་བསལ་རྒྱུད་ལས་དངོས་སུ་གསུངས་ཤིང་། གུར་ལས། རང་མཚུངས་རིག་མས་ལུས་སྤྲད་ནས། །ཞེས་གསུངས་པའི་མཇུག་ཏུ། རྡོ་རྗེ་དྲིལ་བུས་ལག་པ་སྦྲེལ། །ཞེས་ཕྱག་མཚན་ཐུན་མོང་དུ་གསུངས་པའི་ཕྱིར་རོ། །དེས་ན་ལེགས་པར་སོམས་ལ་སྨྲོས་ཤིག རྒྱས་བཏབ་ཀྱི་སྐབས་སུ་གཏོར་ཆོག་གི་ཊཱི་ཀར། ཁ་ཅིག་ཀྱཻ་རྡོ་རྗེ་ཕྱོགས་སྐྱོང་བརྒྱད་དང་བཅས་པ་ལ་མི་བསྐྱོད་པ་ཞེས་ཐམས་ཅད་ལ་མི་བསྐྱོད་པས་རྒྱས་འདེབས་པ་དང་། སྲུ་ལུང་པས། གཙོ་བོ་ཡབ་ཡུམ་གཽ་རཱི་དང་། །པུཀྐ་སཱི་ལ་མི་བསྐྱོད་པ། །ཞེས་སོགས་སྒྲུབ་ཐབས་ལྟར་བྱེད་པ་གཉིས་ལས། མདུན་བསྐྱེད་ཀྱི་དཀྱིལ་འཁོར་དང་མ་འབྲེལ་ན། དབུས་སུ་དཀྱིལ་འཁོར་གསར་དུ་བསྐྱེད་དགོས་ལ། དེ་ལ་ཡང་ཡན་ལག་བཞི་མ་རྫོགས་ན་ཆོ་ག་མ་ཚང་བར་རྣལ་འབྱོར་དབང་ཕྱུག་བཞེད་ཅིང་། ཐམས་ཅད་ཀྱི་རིགས་བདག་མི་བསྐྱོད་པ་མ་ཡིན་པས་ཕྱི་མ་ལེགས་པར་མཐོང་ངོ་ཞེས་གསུངས་པ་ལ། ཉི་ཟེར་ལས། གུར་རྒྱན་དུ་བར་དུ་ཧཱུྃ་དགུ་ལས་ལྟེ་བར་ཐུགས་རྡོ་རྗེའམ་ལྷ་དགུའམ། བཞི་བཅུ་ཞེ་དགུ་ཕྱོགས་སྐྱོང་བརྒྱད་ཀྱིས་བསྐོར་བ་ནག་པོ་མི་བསྐྱོད་པའི་དབུ་རྒྱན་ཅན་དང་ཞེས་གསུངས་པས་གཙོ་བོ་ལ་རྒྱས་བཏབ་དངོས་སུ་ངག་འདོན་ལ་གསུངས་ནས་འཁོར་རྣམས་ལ་རིགས་བདག་དྲན་པ་ཙམ་གྱིས་ཆོག་པ་རྗེ་བཙུན་གྱི་དགོངས་པ་ཡིན་པར་སེམས་ལ་དེ་ལྟར་བྱས་པས་ཡན་ལག་བཞི་མ་ཚང་བའི་སྐྱོན་ལས་ཀྱང་གྲོལ་ལོ། །དེས་ན་འཕགས་པ་རིན་པོ་ཆེས་ཀྱཻ་རྡོ་རྗེ་ཕྱོགས་སྐྱོང་བརྒྱད་དང་བཅས་པ་ལ་མི་བསྐྱོད་པ་ཞེས་གསུངས་པ་ཙམ་གྱིས་ལྷ་མོ་བརྒྱད་ལ་ཡང་མི་བསྐྱོད་པས་རྒྱས་བཏབ་པར་ཁས་ལེན་མི་དགོས་ཏེ། ལྷ་མོ་བརྒྱད་པོ་ཀྱཻ་རྡོར་དུ་ཁས་མ་བླངས་པའི་ཕྱིར་རོ་ཞེས་བྲིས་སོ། །འདི་མ་བརྟགས་པ་ཆེན་པོ་སྟེ། གུར་རྒྱན་ལས། མི་བསྐྱོད་པ་ཡི་དབུ་རྒྱན་ཅན། །ཞེས་པས། གཙོ་བོ་ལ་རྒྱས་གདབ་དངོས་སུ་ངག་འདོན་ལ་གསུངས་པ་ཡིན་ན། ལུང་དེའི་གོང་གི་ནག་པོ་ཞེས་པས་ཀྱང་གཙོ་བོའི་ཁ་དོག་དངོས་སུ་གསུངས་པར་ཁས་ལེན་དགོས་པས། ལྷ་ཞེ་དགུ་བྱེད་པའི་ཚེ་རིགས་གཞན་བཞིའི་ཁ་དོག་ཀྱང་ནག་པོར་འགྱུར་བའི་སྐྱོན་ཡོད་པའི་ཕྱིར་རོ། །དེས་ན་གུར་རྒྱན་གྱི་ལུང་གི་དོན་ནི། དབུས་སུ་དཀྱིལ་འཁོར་གང་བསྒོམས་པའི་རིགས་བདག་སྒྲུབ་ཐབས་ལྟར་དུ་སྒོམ་པ་གཞིར་བཞག་པ་ཡིན་ཏེ་རྗེ་བཙུན་རྩེ་མོས་ལྷ་ཆེན་བརྒྱད་ལ་རྣམ་པར་སྣང་མཛད། ཕྱོགས་སྐྱོང་བརྒྱད་ལ་མི་བསྐྱོད་པ། ཀླུ་ཆེན་བརྒྱད་ལ་འོད་དཔག་མེད་ཀྱིས། ལྷ་དགུའི་དཀྱིལ་འཁོར་ལ་རང་རང་གི་རིགས་བདག་གིས་དབུ་བརྒྱན་པར་བྱའོ་ཞེས་གསུངས་པས་སོ། །དེས་ན་ནག་པོ་མི་བསྐྱོད་པའི་དབུ་བརྒྱན་ཞེས་པས་ཕྱོགས་སྐྱོང་བརྒྱད་ཀྱི་ཁ་དོག་དང་རིགས་བདག་སྟོན་པ་ཡིན་ལ། དེ་ཡང་གཙོ་འཁོར་ཐམས་ཅད་རིགས་བདག་རང་ཆས་ཅན་དུ་བསྒོམས་པའི་ཡན་ལག་བཞི་རྫོགས་སུ་བྱེད་པའི་སྐབས་ཡིན་གྱི་གཙོ་བོ་ལ་དབང་བསྐུར་ནས་རྒྱས་གདབ་པ་དང་། འཁོར་རྣམས་ལ་རིགས་བདག་དྲན་པ་ཙམ་བྱེད་པའི་ལུགས་ནི་མན་ངག་ལུགས་ལ་མེད་དོ། །འཕགས་པའི་བཞེད་པ་ནི་ཀྱཻ་རྡོར་ལྷ་དགུ་ཆར་ལ་མི་བསྐྱོད་པས་རྒྱས་གདབ་པ་ཡིན་ཏེ། གཞན་དུ་འཁོར་ལ་རྒྱས་འདེབས་མི་དགོས་པའམ་རིགས་བདག་དྲན་པ་ཙམ་གྱིས་ཆོག་ན། ཕྱོགས་སྐྱོང་བརྒྱད་ལ་ཡང་མཚུངས་པ་ལས། ཕྱོགས་སྐྱོང་བརྒྱད་ལ་རྒྱས་འདེབས་དངོས་སུ་གསུངས་པའི་ཕྱིར་རོ། །དེ་ལྟར་ན་གནད་ཀྱི་ཟླ་ཟེར་ནི་ཀྱཻ་རྡོ་རྗེའི་སྒྲུབ་ཐབས་བོད་དུ་འགྱུར་རོ་འཚལ་མཐའ་དག་དང་། ཁྱད་པར་རྗེ་བཙུན་བིརྺ་པའི་བཀའ་སྲོལ་མན་ངག་ལུགས་དང་། འགྲེལ་པ་ལུགས་གཉིས་ཀྱི་ཉམས་ལེན་གྱི་ཆ་གསལ་བར་སྟོན་པ་ལ་འཁྲུལ་པའི་དྲི་མ་ཟད་པ་ཡིན་ཀྱང་ཉི་ཟེར་མཁན་པོས། རང་གི་གྲུབ་མཐའ་སྔ་མ་ཉེས་པ་དང་མ་མཐུན་པ་རྣམས་ལ་འཁྱོག་པོའི་ཚུལ་གྱིས་སྐྱོན་སྤོང་མང་པོ་སྨྲས་འདུག་པ་རྣམས་ལ། ཁོ་བོས་ཆོས་མཐུན་གྱི་ལན་བཏབ་པ་ཡིན་པས། གཟུ་བོར་གནས་པའི་བློ་གྲོས་དང་ལྡན་པ་དག་གིས་ཚུལ་བཞིན་དུ་དཔྱད་ནས་ཕྱོགས་ལས་རྣམ་པར་རྒྱལ་བའི་སྒྲ་ཆེན་པོ་བསྒྲག་པར་གྱིས་ཤིག། ༈ །།ཀུན་མཁྱེན་གསུང་གི་ནམ་མཁའ་ཡངས་པར། །དགའ་བཞིའི་དཀྱིལ་འཁོར་ཆ་ཤས་ཡོངས་རྫོགས། །མཁས་མང་གཟའ་སྐར་དབུས་ན་ལྷམ་མེ། །སྨྲ་བའི་ཟླ་བ་བཟང་པོ་ལས་བྱུང་། །བསྐྱེད་རིམ་གསལ་བའི་གནད་ཀྱི་ཟླ་ཟེར། །མི་ཤེས་གདུང་བ་སྐྱོབ་པའི་བསིལ་ཟེར། །མཁས་པར་རློམ་པ་འགའ་ཡིས་འགོག་ཟེར། །འགོག་བྱེད་ཡི་གེའི་མིང་ལ་ཅི་ཟེར། །འཁྲུལ་འཇོམས་མིང་ཅན་འཁྲུལ་པའི་ཉི་ཟེར། །ལན་མེད་ཚེ་ན་སྨྲ་བ་མང་ཟེར། །མ་དཔྱད་བློ་ངོར་དེ་ཡིས་ཆོག་ཟེར། །འདི་ལྟར་དཔྱད་ཚེ་ལན་དུ་ཅི་ཟེར། །དེང་ནས་བཟུང་སྟེ་བློ་གྲོས་ལྡན་རྣམས། །བླ་མའི་གསུང་རབ་དབང་གི་རྒྱལ་པོ། །སྒྲིབ་པར་བྱེད་པའི་ལོག་རྟོག་དྲི་མ། །ཁོ་བོས་ལེགས་བཤད་ཆུ་འདིས་སྦྱངས་ནས། །ཐོས་བསམ་སྒོམ་པའི་རྒྱལ་མཚན་རྩེ་མོར། །མཆོད་པར་བྱེད་ན་དགོས་འདོད་མ་ལུས། །འབད་མེད་ལྷུན་གྲུབ་འབྱུང་བར་འགྱུར་ཞེས། །གསང་མཐོའི་སྐད་ཀྱིས་ཁོ་བོ་བསྒྲགས་སོ། །འདི་སྦྱར་དགེ་ཚོགས་འོད་དཀར་དྲྭ་བ། །རབ་ཏུ་གསལ་བ་གང་ཐོབ་དེ་ཡིས། །བདེ་གཤེགས་བསྟན་པ་ཀུནྡའི་ཕྲེང་བ། །རྣམ་པ་ཀུན་ཏུ་རྒྱས་པར་གྱུར་ཅིག །བདག་ཀྱང་དེང་ནས་ཚེ་རབས་ཀུན་ཏུ། །ཀུན་དགའི་ཞབས་ཀྱི་པདྨོ་དྲི་མེད། །ལུས་སྲོག་ལོངས་སྤྱོད་ཀུན་གྱིས་བསྟེན་ཅིང་། །གདམས་པ་བཟང་པོས་སྐྱོང་བར་ཤོག་ཤིག །གདམས་པའི་དོན་རྣམས་ཚུལ་བཞིན་བསྒོམས་པས། །གནས་དང་ཉེ་གནས་ལ་སོགས་ས་རྣམས། །བདེ་བླག་བགྲོད་ནས་རྡོ་རྗེ་འཛིན་པའི། །ས་མཆོག་མྱུར་དུ་ཐོབ་པར་ཤོག་ཤིག །དེ་མ་ཐོབ་ཀྱི་གནས་སྐབས་ཀུན་ཏུ། །འགལ་རྐྱེན་བར་ཆད་མཐའ་དག་ཞི་ཞིང་། །རྒྱལ་བས་བསྔགས་པའི་མཐུན་རྐྱེན་ཚང་སྟེ། །ཡང་དག་བསྟན་པའི་དཔལ་དུ་གྱུར་ཅིག །དཔལ་ཀྱཻ་རྡོ་རྗེའི་སྒྲུབ་པའི་ཐབས་ཀྱི་རྒྱ་ཆེར་བཤད་པ་བསྐྱེད་རིམ་གནད་ཀྱི་ཟླ་ཟེར་ལ་རྩོད་པ་སྤོང་བ་གནད་ཀྱི་གསལ་བྱེད་ཅེས་བྱ་བ་འདི་ནི་དུས་གསུམ་གྱི་རྒྱལ་བ་ཐམས་ཅད་ཀྱི་སྲས་ཀྱི་ཐུ་བོ། ལྷ་དང་བཅས་པའི་འཇིག་རྟེན་པ་ཐམས་ཅད་ཀྱི་འདྲེན་པ་དམ་པ། གསུང་རབ་དགོངས་འགྲེལ་དང་བཅས་པ་ལ་འཁྲུལ་པའི་དྲི་མ་ཟད་པའི་ཐུགས་མངའ་བ། མགོན་པོ་འཇམ་པའི་དབྱངས་དང་དབྱེར་མ་མཆིས་པ། རྗེ་བཙུན་ས་སྐྱ་པ་ཡབ་སྲས་ཀྱི་བསྟན་པ་ཚུལ་བཞིན་དུ་འཛིན་པ་ལ་འགྲན་ཟླ་ཐམས་ཅད་དང་བྲལ་བ། ཐམས་ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས་དང་། གཏིང་དཔག་དཀའ་བའི་གནས་ལུགས་ཟབ་མོ་འབྱེད་པའི་མཁྱེན་རབ་དང་། འགྲོ་བ་ཐམས་ཅད་ལ་བུ་གཅིག་པ་ལྟར་བརྩེ་བའི་ཐུགས་རྗེ་ཟུང་དུ་འཇུག་པའི་སྒོ་ནས་སྙིགས་དུས་ཀྱི་གདུལ་བྱ་རྣམས་ཀྱི་མགོན་སྐྱབས་སུ་གྱུར་པ་རྗེ་བཙུན་དཀོན་མཆོག་རྒྱལ་མཚན་དཔལ་བཟང་པོ་ལ་སོགས་པའི་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པས། སྡེ་སྣོད་གསུམ་དང་རྒྱུད་སྡེ་བཞི་ལ་བློ་ཁ་ཅུང་ཟད་ཕྱོགས་ཤིང་། ཁྱད་པར་རྒྱུད་གསུམ་མན་ངག་དང་བཅས་པའི་དོན་ལ་གཞན་གྱི་དྲིང་མི་འཇོག་པའི་སྤོབས་པ་ཐོབ་པ། མང་དུ་ཐོས་པའི་དགེ་སློང་བསོད་ནམས་སེང་གེས། མེ་ཕོ་ཁྱིའི་ལོ་ས་ག་ཟླ་བའི་ཡར་ཚེས་བཅོ་ལྔ་ལ་དཔལ་ངམ་རིང་གི་ཆོས་གྲྭ་ཆེན་པོར་སྦྱར་བ་ལས། སླར་ཡང་ཞུས་ཅིང་བཅོས་ཏེ་དག་པར་བགྱིས་པའི་ཡི་གེ་པ་ནི་གཞོན་ནུ་བཟང་པོས་བགྱིས་སོ།། །།འདིས་ཀྱང་རྡོ་རྗེ་ཐེག་པའི་བསྟན་པ་ཉིན་མོ་ལྟར་གྱུར་ཅིག། ༄༅། །འདི་བསྒྲུབས་པ་ལས་བྱུང་བ་ཡི། །དགེ་བ་གང་ཞིག་ཐོབ་པ་དེས། །མཁའ་ཁྱབ་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

དམ་ཚིག་དང་སྡོམ་པའི་རྣམ་གཞག་ཟབ་དོན་བདུད་རྩིའི་སྙིང་པོ།

དམ་ཚིག་དང་སྡོམ་པའི་རྣམ་གཞག་ཟབ་དོན་བདུད་རྩིའི་སྙིང་པོ་ཞེས་བྱ་བ་བཞུགས་སོ།།

ན་མོ་གུ་རུ་བྷ་དྲཱ་ཡ། རྟེན་དང་བརྟེན་པའི་ཆོས་བདུན་ཀུན་གཞི་ཡི། །དྲི་མ་སྨིན་གྲོལ་ཆུ་ཡིས་ལེགས་སྦྱངས་ཏེ། །གནས་གྱུར་སྐུ་བཞི་རྣམ་དག་རོ་གཅིག་ཏུ། །གསལ་བར་སྟོན་མཛད་རྗེ་བཙུན་བླ་མ་རྒྱལ། །དེའི་གསུང་དྲི་མེད་བདུད་རྩིའི་ཆར་རྒྱུན་གྱིས། །བདག་བློའི་པདྨོ་རྣམ་པར་རྒྱས་བྱེད་ཅིང་། །སྐལ་ལྡན་བུང་བས་ཟློས་གར་རྩེ་བའི་ཕྱིར། །ཟབ་དོན་བདུད་རྩིའི་སྙིང་པོ་སྤེལ་བར་བྱ། །འདིར་དམ་ཚིག་དང་སྡོམ་པའི་རྣམ་པར་བཞག་པ་ལ་གསུམ་སྟེ། དམ་ཚིག་དང་སྡོམ་པའི་ངོ་བོ། དམ་ཚིག་དང་སྡོམ་པའི་དབྱེ་བསྡུ། སྐབས་སུ་བབས་པའི་དམ་ཚིག་དང་སྡོམ་པ་བྱེ་བྲག་ཏུ་བཤད་པའོ། །དང་པོ་ནི། ཡིད་མཚན་རྟོག་ལས་སྐྱོབ་པའི་སྒོ་ནས་བདེ་བར་གྱུར་པའོ། །དེ་ཉིད་སྔགས་ཀྱི་དམ་ཚིག་དང་སྡོམ་པ་གཉིས་ཀའི་མཚན་ཉིད་ཡིན་ཏེ། དེ་གཉིས་མཚན་ཉིད་གཅིག་གིས་མཚོན་པར་ནུས་པའི་མཚོན་བྱ་མིང་གི་རྣམ་གྲངས་པ་ཡིན་པའི་ཕྱིར་ཏེ། རྩ་རྒྱུད་ལས། སྡོམ་པ་ཞེས་བྱ་གང་གིས་དང་། །དམ་ཚིག་གང་གིས་གནས་པར་བགྱི། །ཞེས་པའི་འགྲེལ་པ་དག་ལྡན་དུ། དང་པོར་ཐོབ་པ་ལ་དམ་ཚིག་དང་རྗེས་སུ་བསྲུང་བ་ལ་སྡོམ་པའམ། ཡང་ན་བཟའ་བ་ལ་དམ་ཚིག་དང་བསྲུང་བ་ལ་སྡོམ་པའམ། ཡང་ན་གཉེན་པོ་རྟེན་པ་ལ་དམ་ཚིག་དང་སྤང་བྱ་སྤོང་བ་ལ་སྡོམ་པའམ། ཡང་ན་དེ་གཉིས་མིང་གི་རྣམ་གྲངས་སུ་ཡང་འགྱུར་རོ་ཞེས་གསུངས་པའི་ཕྱིར། ཅིའི་ཕྱིར་དམ་ཚིག་དང་སྡོམ་པ་མིང་གི་རྣམ་གྲངས་ཡིན་ཞེ་ན། དམ་ཚིག་གི་སྐད་དོད་ལ། ས་མ་ཡ་ཞེས་པ་ཡོད་ལ། དེ་ཉིད་མཉམ་པ་དང་། མི་འདའ་བ་དང་། རྟོག་པ་གསུམ་ལ་འཇུག་པ་ལས། རང་གིས་བླངས་པའི་བསླབ་པའི་རྐང་གྲངས་ཐམས་ཅད་བསྲུང་བར་མཉམ་པ་དང་། རྐང་གྲངས་ཐམས་ཅད་ལས་མི་འདའ་བ་དང་། བསླབ་པའི་བླང་བྱ་དང་སྤང་བྱའི་གནས་ཚུལ་ཇི་ལྟ་བ་བཞིན་རྟོགས་པས་ན་དམ་ཚིག་ཅེས་བྱའོ། །འདི་ལྟ་བུའི་བཤད་ཚུལ་ནི་སྡོམ་པ་གསུམ་ཀ་ལ་འཇུག་གོ །སྡོམ་པའི་སྐད་དོད་ལ་སམ་བ་ར་ཞེས་ཡོད་ལ། སམ་གྱི་སྒྲ་ལས་སུ་ཁ་ནི་བདེ་བ། བ་ར་ནི་མཆོག་ཅེས་བྱ་ལ། དེ་ཡང་ཚིག་འགྱུར་ལ་བདེ་མཆོག་དང་། དོན་འགྱུར་ལ་སྡོམ་པར་འགྱུར་རོ། །འཁོར་ལོ་བདེ་མཆོག་ལ་ནི་གཉིས་ཆར་དུ་བསྒྱུར་བ་ཡོད་དེ་ཙཀྲ་སམ་བ་ར་ཞེས་པ་གཅིག་ཉིད་འཁོར་ལོ་བདེ་མཆོག་ཅེས་པ་དང་། འཁོར་ལོ་སྡོམ་པ་ཞེས་པར་བསྒྱུར་རོ། །འདི་ལ་བདེ་བའི་དོན་ངེས་པར་བྱ་བ་དང་། མཆོག་གི་དོན་ངེས་པར་བྱ་བ་གཉིས། དང་པོ་ནི། སྐབས་འདིའི་བདེ་བ་དེ་ཚོར་བ་བདེ་བ་མ་ཡིན་ཏེ། ཚོར་བ་བདེ་བ་ནི་སིམས་པར་ཉམས་སུ་མྱོང་བ་ཡིན་ལ། འདི་ནི་དེ་ལྟར་མིན་པའི་ཕྱིར། ཤིན་སྦྱངས་ཀྱི་བདེ་བ་ཡང་མིན་ཏེ། ཤིན་སྦྱངས་ཀྱི་བདེ་བ་ནི་ཞི་གནས་ཀྱི་ཡོན་ཏན་ཡིན་ལ། འདི་ནི་དེ་ལྟར་མིན་པའི་ཕྱིར་རོ། །དེས་ན་སྐབས་འདིའི་བདེ་བ་ནི། སྤང་བྱ་སྤོང་བའི་སྒོ་ནས་བདེ་བར་འཇོག་པ་ཡིན་ཏེ། དཔེར་ན་དགྲ་བོ་བཅོམ་པས་ཡུལ་ཁམས་བདེ་བ་བཞིན་ནོ། །གཉིས་པ་སྐབས་འདིའི་མཆོག་ནི་ཟག་བཅས་ལས་མཆོག་ཏུ་གྱུར་པ་མིན་ཏེ། ཟག་བཅས་ལ་ཡང་སྐབས་འདིའི་མཆོག་བཤད་དགོས་པ་ཡོད་པའི་ཕྱིར་ཏེ། ཟག་མེད་ཁོ་ནར་མ་ངེས་པའི་ཕྱིར། ཉན་ཐོས་དང་ཕ་རོལ་ཏུ་ཕྱིན་པ་ལས་མཆོག་ཏུ་གྱུར་པའང་མིན་ཏེ། དེ་གཉིས་ལ་ཡང་འདིའི་མཆོག་དེ་བཤད་དགོས་པའི་ཕྱིར་ཏེ། འདིའི་མཆོག་དེ་གསང་སྔགས་ཁོ་ནར་མ་ངེས་པའི་ཕྱིར། དེས་ན་སྐབས་འདིའི་མཆོག་དེ་སྡོམ་པས་བསྡུས་པའི་བདེ་བ་ཡིན་ཏེ། རྗེ་བཙུན་གྱིས་སྡོམ་པ་གསུམ་ཀའང་དོན་མཚན་ལྔ་ལྔའི་སྒོ་ནས་བཤད་པའི་ཚེ། སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ་ཞེས་གསུངས་པས་དོན་ཚན་བཞིའི་སྒོ་ནས་བདེ་བར་གྱུར་པ་ལ་མཆོག་ཅེས་བྱ་བ་ཡིན་ལ། དེ་ལས་གཞན་དུ་གྱུར་པའི་མཆོག་གི་དོན་མ་གསུངས་པའི་ཕྱིར་རོ། །འོ་ན་སྡོམ་པ་གསུམ་པོ་དོན་ཚན་ལྔ་ལྔའི་སྒོ་ནས་ཇི་ལྟར་བཤད་ཅེ་ན། རྗེ་བཙུན་གྱིས། སོ་ཐར་དང་རྫོགས་རིམ་གྱི་སྡོམ་པ་གཉིས་དོན་ཚན་ལྔ་ལྔའི་སྒོ་ནས་བཤད་ནས། བྱང་སེམས་ལའང་སྤང་བྱ་གང་སྡོམ་ཙམ་ལས་མ་གསུངས་ཀྱང་། རྗེ་བཙུན་རྩེ་མོས། སོ་ཐར། བྱང་སེམས། བསྐྱེད་རིམ། རྫོགས་རིམ་གྱི་སྡོམ་པ་དང་བཞི་ཆར་དོན་ཚན་ལྔ་ལྔའི་སྒོ་ནས་གསུངས་པ་ལྟར་བཤད་ན། སོ་ཐར་གྱི་སྡོམ་པ་ལ་ལྔ་ལས། གནས་གང་དུ་སྡོམ་པ་ནི་རྒྱ་གར་ན་ལེནྡྲ་ལ་སོགས་པ་དགེ་འདུན་གང་དུ་བཞུགས་པའི་གནས་དེ་ཉིད་དུའོ། །གྲངས་ཇི་སྙེད་ཅིག་སྡོམ་ན་དགེ་སློང་ལ་བསླབ་བྱའི་གྲངས་ཇི་སྙེད་ཅིག་ཡོད་ཀྱང་ཉིས་བརྒྱ་ལྔ་བཅུ་རྩ་གསུམ་དང་། དགེ་ཚུལ་ལ་ཇི་སྙེད་ཡོད་ཀྱང་བཅུ་དང་། དགེ་བསྙེན་ལ་ཇི་སྙེད་ཡོད་ཀྱང་ལྔར་སྡོམ་པའོ། །སྤང་བྱ་གང་སྡོམ་པ་ནི་ལུས་ངག་གི་ཁ་ན་མ་ཐོ་བ་སྡོམ། ཐབས་གང་གི་སྡོམ་ན་གསོལ་བཞིའི་ལས་ལ་སོགས་པའི་ཐབས་ཀྱིས་སྡོམ་པའོ། །སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ། མཐུན་པ་རྣམས་ཀྱི་དཀའ་ཐུབ་བདེ། །ཞེས་གསུངས་སོ། །བྱང་སེམས་ལ་ཡང་ལྔ་ལས། གནས་གང་དུ་སྡོམ་ན་སོ་ཐར་བཞིན་བྱང་ཆུབ་སེམས་དཔའ་གང་དུ་བཞུགས་པའི་གནས་དེ་ཉིད་དུའོ། །གྲངས་ནི་བྱང་ཆུབ་སེམས་དཔའི་བསླབ་པའི་གྲངས་ཇི་སྙེད་ཡོད་པ་ཐམས་ཅད་དང་སྡོམ་པ་ཉི་ཤུ་པ་ལྟར་ན་རྩ་བ་བཞི་དང་ཉེས་བྱས་བཞི་བཅུ་རྩ་དྲུག་སྤང་བར་སྡོམ། ནམ་མཁའི་སྙིང་པོའི་མདོ་ལྟར་ན་བཅུ་བཞིའམ་བཅུ་དགུར་སྡོམ། ཡང་ན་ཚུལ་ཁྲིམས་ཀྱི་བསླབ་པ་གསུམ་དུ་སྡོམ། ཡང་ན་བྱང་ཆུབ་སེམས་དཔའི་ཉམས་ལེན་གྱི་སྤྱོད་པ་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་པ་ལ་སོགས་པ་མཐའ་ཡས་སོ། །སྤང་བྱ་གང་སྡོམ་ན་སེམས་ཀྱི་ཁ་ན་མ་ཐོ་བ་སྡོམ་པ་སྟེ་གཞན་ལ་གནོད་པ་ནི་ཉན་ཐོས་དང་ཐུན་མོང་བ་ཡིན་ལ། འདིར་ནི་གཞན་ལ་ཕན་པ་བསྒྲུབ་པར་མི་ནུས་པའི་དམན་སེམས་སྡོམ་པ་གཙོ་བོ་ཡིན་ནོ། །ཐབས་གང་གིས་སྡོམ་ན་དགེ་བའི་བཤེས་གཉེན་ནམ་རྟེན་གྱི་དྲུང་དུ་དབུ་སེམས་ཀྱི་ཆོ་གའི་ཐབས་ཀྱིས་སོ། །སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ། གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེར་འབྲེལ་བའི། །བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་པའོ། །བསྐྱེད་རིམ་ལའང་ལྔ་ལས། གནས་ནི་མཉམ་གཞག་ཏུ་སྒྲུབ་པ་པོ་རང་ཉིད་གང་དུ་གནས་པའི་གནས་དེ་ཉིད་དུ་སྡོམ་སྟེ། སྒྲུབ་ཐབས་རྣམས་ལས་གང་དུ་སྒོམ་པའི་གནས་གསུངས་པ་ལྟ་བུའོ། །རྗེས་སྤྱོད་ལ་སྣང་བའི་དངོས་པོ་གང་དུ་ཡོད་པའི་སྟེང་དུའོ། །གྲངས་ནི་ཕྱི་རོལ་གྱི་ཆོས་ཐམས་ཅད་ནང་དུ་སྡོམ་པ་སྟེ། གཟུགས་ཀྱི་ཕུང་པོ་གཅིག་ཉིད་ལ་དབང་པོ་ལྔ་དང་། དོན་ལྔ་ལ་སོགས་པ་དང་། དེ་རེ་རེ་ལའང་སྐད་ཅིག་སྔ་ཕྱི་ལ་སོགས་པ་བསམ་གྱིས་མི་ཁྱབ་པ་ཡོད་ཀྱང་། དེ་ཐམས་ཅད་རྣམ་སྣང་གཅིག་གི་ངོ་བོར་སྡོམ་པ་ལྟ་བུ་ལ་སོགས་པའོ། །སྤང་བྱ་ནི་ཐ་མལ་པའི་རྣམ་རྟོག་གོ །ཐབས་ནི་དང་པོར་བུམ་དབང་དང་། དེ་ནས་ཕྱི་ནང་གི་བསྐྱེད་རིམ་སྒོམ་པའི་ཐབས་ཀྱིས་སོ། །སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ། གུར་ལས། དེ་ཕྱིར་དཀྱིལ་འཁོར་འཁོར་ལོ་ཞེས། །ཐབས་འདི་བདེ་བའི་སྡོམ་པ་སྟེ། །ཞེས་གསུངས་སོ། །བཞི་པ་རྫོགས་རིམ་ལའང་ལྔ་ལས། གནས་ནི་རང་བྱིན་རླབས་ཀྱི་སྐབས་སུ་སྤྱིར་རྩ་འཁོར་ལོ་བཞི་དང་། ཁྱད་པར་ལྟེ་བའི་ཨཾ་གི་གནས་སུའོ། །དཀྱིལ་འཁོར་འཁོར་ལོའི་སྐབས་སུ་ནི་དབང་གི་གནས་སུའོ། །གྲངས་ནི་ཕྱི་རོལ་གྱི་ཆོས་ཐམས་ཅད་ནང་དུ་སྡོམ་པ་སྟེ། དེ་ཡང་བཞི་ཚན་གྱི་ཆོས་ཐམས་ཅད་རྩ་འཁོར་ལོ་བཞི་དང་། གསུམ་ཚན་ཐམས་ཅད་རྩ་གསུམ་དང་། གཉིས་ཚན་ཐམས་ཅད་རྩ་རོ་རྐྱང་གཉིས་སུ་སྡོམ་པའོ། །སྤང་བྱ་ནི་མཚན་མ་དང་རྣམ་པར་རྟོག་པ་ཐམས་ཅད་དོ། །ཐབས་ནི་དང་པོར་དབང་གོང་མ་དང་། དེ་ནས་རང་བྱིན་རླབས་དང་དཀྱིལ་འཁོར་འཁོར་ལོ་སྒོམ་པའི་ཐབས་ཀྱིས་སོ། །རང་བྱིན་རླབས་ནི་རྗེ་བཙུན་གྱིས། ལྟེ་བར་གཏུམ་མོ་འབར་བ་ཡིས། །ཞེས་སོགས་ཀྱི་གཞུང་ལ་དགོངས་ལ། རྩ་རྒྱུད་ཕྱི་མར། སངས་རྒྱས་ཀུན་གྱིས་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཨེ་ཝཾ་རྣམ་པ་བདེ་ཆེན་པོ། །དབང་གི་གནས་སུ་ཡང་དག་གནས། །ཞེས་གསུངས་པས་དབང་གི་སྡོམ་པ་ཡང་གསུངས་སོ། །སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ། རང་རིག་བདེ་བ་ཆེན་པོ་ཉིད། །ཅེས་གསུངས་སོ། །གཉིས་པ་དབྱེ་བསྡུ་ལ། དབྱེ་བ་དང་བསྡུ་བ་གཉིས་ལས། དང་པོ་ལ་བདུན་ཏེ། བརྗོད་བྱ་རྒྱུད་ཀྱི་སྒོ་ནས་དབྱེ་བ། རྗོད་བྱེད་རྒྱུད་སྡེའི་སྒོ་ནས། རྟེན་དང་བརྟེན་པའི་སྒོ་ནས། རྟེན་གི་གང་ཟག་གི་སྒོ་ནས། ཆོ་གའི་གནས་སྐབས་ཀྱི་སྒོ་ནས། སྨིན་བྱེད་དབང་གི་སྒོ་ནས། གྲོལ་བྱེད་ལམ་གྱི་སྒོ་ནས་དབྱེ་བའོ། །དང་པོ་ལ་གསུམ་སྟེ། རྒྱུ་རྒྱུད་ཀྱི་སྔགས་སྡོམ། ཐབས་རྒྱུད་ཀྱི་སྔགས་སྡོམ། འབྲས་རྒྱུད་ཀྱི་སྔགས་སྡོམ་མོ། །དང་པོའི་མཚན་ཉིད། ཡིད་མཚན་རྟོག་ལས་རང་བཞིན་གྱིས་སྐྱོབ་པའི་སྒོ་ནས་རང་བཞིན་གྱིས་བདེ་བར་གྱུར་པ་སྟེ། འཁོར་བ་ཐོག་མ་མེད་པ་ནས་བཟུང་སྟེ་སྨིན་བྱེད་ཀྱི་དབང་མ་ཐོབ་ཀྱི་བར་གྱི་སེམས་གསལ་སྟོང་ཟུང་འཇུག་དེ་ཉིད་དོ། །རྟེན་ནི་རིགས་དྲུག་གི་སེམས་ཅན་ཐམས་ཅད་དོ། །གཉིས་པའི་མཚན་ཉིད། ཡིད་མཚན་རྟོག་ལས་སྐྱོབ་པའི་ཐབས་སུ་གྱུར་པའི་སྒོ་ནས་ལམ་གྱི་ངོ་བོར་གྱུར་པའི་བདེ་བ་སྟེ། སྨིན་བྱེད་ཐོབ་པ་ནས་འབྲས་རྒྱུད་མ་ཐོབ་ཀྱི་བར་གྱི་ཉམས་ལེན་ཐམས་ཅད་དོ། །གསུམ་པའི་མཚན་ཉིད། ཡིད་མཚན་རྟོག་མ་ལུས་པ་ལས་སྐྱོབ་པའི་སྒོ་ནས་འབྲས་བུའི་ངོ་བོར་གྱུར་པའི་བདེ་བ། འདི་ནི་བཅུ་གསུམ་རྡོ་རྗེ་འཛིན་པའི་སས་བསྡུས་སོ། །དེ་ལྟར་གསུམ་དུ་ཡོད་ཀྱང་། རྒྱུ་རྒྱུད་ཀྱི་སྔགས་སྡོམ་གྱིས་ནི་གསུང་རབ་འཆད་པའི་སྐབས་ཀྱི་ཐ་སྙད་ཀྱི་སྔགས་སྡོམ་གྱི་གོ་མི་ཆོད་དེ། དཔེར་ན་རྒྱུ་རྒྱུད་ཀྱི་དེ་ཁོ་ན་ཉིད་བསྡུས་པའི་གོ་མི་ཆོད་པ་བཞིན་ནོ། །གཉིས་པ་རྗོད་བྱེད་རྒྱུད་སྡེའི་སྒོ་ནས་དབྱེ་བ་ལ་བཞི་སྟེ། བྱ་རྒྱུད་ཀྱི་སྔགས་སྡོམ། སྤྱོད་རྒྱུད་ཀྱི། རྣལ་འབྱོར་རྒྱུད་ཀྱི། རྣལ་འབྱོར་བླ་མེད་རྒྱུད་ཀྱི་སྔགས་སྡོམ་མོ། །དང་པོའི་མཚན་ཉིད། མཚན་བཅས་ཀྱི་རྣལ་འབྱོར་མདུན་བསྐྱེད་ཁོ་ན་དང་། མཚན་མེད་ཀྱི་རྣལ་འབྱོར་མེར་གནས། སྒྲར་གནས། སྒྲ་མཐའི་ཏིང་ངེ་འཛིན་གསུམ་གྱི་ཐབས་ཀྱིས་ཡིད་མཚན་རྟོག་ལས་སྐྱོབ་པའི་སྒོ་ནས་བདེ་བར་གྱུར་པ། དེ་ནི་ཆུ་དང་ཅོད་པཎ་གྱི་དབང་གི་སྐབས་སུ་ཐོབ་བོ། །གཉིས་པའི་མཚན་ཉིད། མཚན་བཅས་ཀྱི་རྣལ་འབྱོར་དམ་ཚིག་སེམས་དཔའ་དང་ཡེ་ཤེས་སེམས་དཔའ་ཐ་དད་པ་ཁོ་ན་དང་། མཚན་མེད་ཀྱི་རྣལ་འབྱོར་སྔར་གྱི་ཏིང་ངེ་འཛིན་གསུམ་གྱི་ཐབས་ཀྱིས་ཡིད་མཚན་རྟོག་ལས་སྐྱོབ་པའི་སྒོ་ནས་བདེ་བར་གྱུར་པ་དེ་ནི་རྡོ་རྗེ་དྲིལ་བུ་མིང་གི་དབང་གི་སྐབས་སུ་ཐོབ་བོ། །གསུམ་པའི་མཚན་ཉིད། མཚན་བཅས་ཀྱི་རྣལ་འབྱོར་མཉམ་གཞག་ཏུ་དམ་ཚིག་པ་དང་ཡེ་ཤེས་པ་དབྱེར་མེད་པ་ཁོ་ན་དང་། རྗེས་སྤྱོད་ལ་དེ་གཉིས་ཐ་དད་ཁོ་ན་དང་། མཚན་མེད་ཀྱི་རྣལ་འབྱོར་ཡེ་ཤེས་ཀྱི་དེ་ཁོ་ན་ཉིད་ཀྱི་ཐབས་ཀྱིས་ཡིད་མཚན་རྟོག་ལས་སྐྱོབ་པའི་སྒོ་ནས་བདེ་བར་གྱུར་པ། དེ་ནི་ཕྱིར་མི་ལྡོག་པ་འཁོར་ལོའི་དབང་གི་སྐབས་སུ་ཐོབ་བོ། །བཞི་པའི་མཚན་ཉིད། བསྐྱེད་རྫོགས་གཉིས་ཀྱི་ཐབས་ཀྱིས་ཡིད་མཚན་རྟོག་ལས་སྐྱོབ་པའི་སྒོ་ནས་བདེ་བར་གྱུར་པ། དེ་ནི་དབང་བཞི་རྫོགས་པའི་སྐབས་སུ་ཐོབ་བོ། །གསུམ་པ་རྟེན་དང་བརྟེན་པའི་སྒོ་ནས་དབྱེ་ན་གསུམ་སྟེ། སོ་ཐར་གྱི་ངོ་བོར་གྱུར་པའི་སྔགས་སྡོམ། བྱང་སེམས་ཀྱི་ངོ་བོར་གྱུར་པའི་སྔགས་སྡོམ། སྡོམ་པ་གསུམ་གྱི་ཟླས་ཕྱེ་བའི་སྔགས་སྡོམ་མོ། །དང་པོའི་མཚན་ཉིད། གཞན་ལ་གནོད་པ་གཞི་བཅས་སྤོང་བའི་སྒོ་ནས་ཡིད་མཚན་རྟོག་ལས་སྐྱོབ་པའི་བདེ་བ། གཉིས་པའི་མཚན་ཉིད། གཞན་ལ་ཕན་པ་ཁྱད་པར་ཅན་སྒྲུབ་པའི་སྒོ་ནས་ཡིད་མཚན་རྟོག་ལས་སྐྱོབ་པའི་བདེ་བ། གསུམ་པའི་མཚན་ཉིད། ལྷའི་རྣམ་པའམ་ཡེ་ཤེས་ཀྱི་བྱིན་གྱིས་བརླབས་པའི་སྒོ་ནས་ཡིད་མཚན་རྟོག་ལས་སྐྱོབ་པའི་བདེ་བའོ། །བཞི་པ་རྟེན་གྱི་གང་ཟག་གི་སྒོ་ནས་དབྱེ་ན། གང་ཟག་སྤྱིའི་དམ་ཚིག ལས་དང་པོ་པའི། བརྟན་པ་ཐོབ་པའི། བརྟན་པ་ཆེར་ཐོབ་པའི་དམ་ཚིག་གོ །དང་པོ་ནི། བླ་མ་ལ་མ་གུས་པ་སྤང་བ་དང་། སྙིང་རྗེ་དང་བྱང་ཆུབ་ཀྱི་སེམས་ལ་སོགས་པ་མི་སྤང་བའོ། །གཉིས་པ་ནི། རྩ་བ་དང་ཡན་ལག་གི་དམ་ཚིག་ཉི་ཤུ་རྩ་གཉིས་སྲུང་བ་དང་། གུར་ནས་གསུངས་པའི་ཇི་སྲིད་བྱང་ཆུབ་སྙིང་པོའི་བར། །ཞེས་བྱ་བ་ལ་སོགས་པའོ། །གསུམ་པ་ནི། ཕྱག་རྒྱ་བཅིང་བ་རྣམ་སྤང་ཞིང་། །ཞེས་པའི་ཚིག་རྐང་བདུན་ནོ། །བཞི་པ་ནི། དབང་དང་བསླབ་ལས་རྣམ་པར་གྲོལ། །ཞེས་བྱ་བ་ལ་སོགས་པའོ། །ལྔ་པ་ཆོ་གའི་གནས་སྐབས་ཀྱི་སྒོ་ནས་དབྱེ་བ་ལ་གཉིས། སྟ་གོན་གྱི་སྐབས་སུ་ཐོབ་པའི་སྡོམ་པ་དང་། དངོས་གཞིའི་སྐབས་སུ་ཐོབ་པའི་སྡོམ་པའོ། །དང་པོ་ལ་སྡོམ་པ་གསུམ་ཡོད་པ་ལས། སྡོམ་པ་འོག་མ་གཉིས་རྒྱུན་བཤགས་ལན་གསུམ་བྱས་པའི་སྐབས་སུ་ཐོབ་བོ། །དེ་ཡང་སྔར་སྔོན་དུ་མ་སོང་བ་ཡིན་ན་སྐབས་འདིར་གསར་དུ་ཐོབ་ལ། སྔོན་དུ་སོང་ན་སྐབས་འདིར་སྔགས་སྡོམ་གྱི་ངོ་བོར་གནས་འགྱུར་རོ། །སྔགས་སྡོམ་ནི་མྱང་འདས་ཀྱི་བསམ་པ་བསྐྱེད་པ་དང་། གསང་སྔགས་ལ་སྤྲོ་བ་བསྐྱེད་པ་དང་། གནས་གསུམ་བསྲུང་བའི་སྐབས་དང་། ཟབ་མོའི་ཆོས་བཤད་ཀྱི་སྐབས་རྣམས་སུ་ཐོབ་པའོ། །གཉིས་པ་ལྔ་སྟེ། འཇུག་པའི་སྐབས་སུ་ཐོབ་པ་དང་། རིགས་ལྔའི་དབང་གི་དང་། བརྟུལ་ཞུགས་ཀྱི་དང་། རྡོ་རྗེ་སློབ་དཔོན་གྱི་དང་། དབང་གོང་མ་གསུམ་གྱི་སྐབས་སུ་ཐོབ་པའོ། །དང་པོ་ལ་གཉིས་ལས་ཕྱི་འཇུག་ལ་རྒྱུན་བཤགས་ཀྱི་སྐབས་སུ་ནི། སྔར་གྱི་དེ་དག་གོང་འཕེལ་དུ་འགྱུར་རོ། །འདོད་པ་དྲི་བའི་སྐབས་སུ། བུ་ཁྱོད་སུ་ཡིན་ཅི་ལ་དགའ། །ཞེས་པའི་ལན་དུ། སྐལ་བཟང་བདག་བདེ་བ་ཆེན་པོ་ལའོ། །ཞེས་པའི་ལན་བཏབ། བདེ་བ་ཆེན་པོ། དེ་ཡིས་བུ་ལ་ཅི་ཞིག་བྱ། །ཞེས་པའི་ལན་དུ། སངས་རྒྱས་མཆོག་གི་དམ་ཚིག་གོ །ཞེས་ལན་བཏབ་པ་འདི་མན་ཆད་ཀྱི་ཆོ་གའི་སྒོ་ནས་ཐོབ་པའི་སྡོམ་པ་ཐམས་ཅད་བདེ་བ་ཆེན་པོ་དང་། སངས་རྒྱས་མཆོག་གི་དམ་ཚིག་ཡིན་པ་ལ་ནི་ཁྱད་པར་མེད་དོ། །དེ་ཡང་བསྒོམ་བྱ་ཕ་རོལ་ཏུ་ཕྱིན་པ་དང་ཐུན་མོང་བ་ཡིན་ཞིང་། སྒོམ་ཚུལ་རྡོ་རྗེ་ཐེག་པའི་ཐུན་མོང་མ་ཡིན་པ་ནི་ཟླ་བ་རྡོ་རྗེའི་སེམས་བསྐྱེད་པ་སྟེ། བསྒོམ་བྱ་བདེན་པ་གཉིས་ཀྱི་བདག་ཉིད་ཅན་གྱི་བྱང་ཆུབ་ཀྱི་སེམས་ཀྱི་དེ་ཉིད། སྒོམ་ཚུལ་གཟུགས་ཀྱི་རྣམ་པར་སྒོམ་པ་ཡིན་པའི་ཕྱིར། དེ་ནི་ཕྱི་འཇུག་གི་སྐབས་སུ་ཐོབ་པའི་སྡོམ་པ་ཡིན་ནོ། །ནང་འཇུག་ལ་ཡེ་ཤེས་དབབ་པའི་སྐབས་དང་། མེ་ཏོག་དབུལ་ཞིང་མགོ་ལ་བཅིང་བ་དང་། དཀྱིལ་འཁོར་བསྟན་པ་རྣམས་ཀྱི་སྐབས་སུ་ཐོབ་པའི་སྡོམ་པ་ཡིན་ནོ། །མདོར་ན་ཡོལ་བའི་ཕྱི་ནང་གི་འཇུག་པའི་སྐབས་སུ་ཐོབ་པའི་སྡོམ་པ་རྣམས་ལ་ནི་ལྷ་དང་སྐལ་བ་མཉམ་པའི་དམ་ཚིག་ཅེས་པའི་ཐ་སྙད་ཀྱང་གསུངས་སོ། །གཉིས་པ་རིག་པའི་དབང་ལྔའི་སྐབས་སུ་ཐོབ་པ་ལ་གཉིས་ཏེ། བླ་མེད་དང་ཡོ་གའོ། །དང་པོ་ལ་གསུམ། གྲངས་དང་། སྤང་བྱ་དང་། དམ་ཚིག་གང་ཐོབ་པའོ། །དང་པོ་གྲངས་ནི་རྣམ་པར་ཤེས་པའི་ཕུང་པོ་ལ་གྲངས་ཇི་སྙེད་ཅིག་ཡོད་ཀྱང་དེ་ཐམས་ཅད་མི་བསྐྱོད་པའི་ངོ་བོར་སྡོམ་མོ། །དེ་བཞིན་དུ་ཕུང་པོ་གཞན་བཞི་པོ་སོ་སོ་ལ་གྲངས་ཇི་སྙེད་ཡོད་པ་ཐམས་ཅད་དེ་བཞིན་གཤེགས་པ་རིགས་གཞན་བཞི་པོ་སོ་སོའི་ངོ་བོར་སྡོམ་པའོ། །གཉིས་པ་སྤང་བྱ་ནི་དེ་ཐམས་ཅད་ལ་ཐ་མལ་དུ་འཛིན་པའི་རྟོག་པ་སྡོམ་པའོ། །གསུམ་པ་དམ་ཚིག་ནི་རིག་ལྔ་སྤྱི་དང་བྱེ་བྲག་གི་དམ་ཚིག་ཐོབ་པ་ཡིན་ཏེ། རྗེ་བཙུན་རྩེ་མོས། དབང་དེ་དག་ཐོབ་པས་ཚུལ་ཁྲིམས་ཀྱི་བསླབ་པ་གསུམ་ལ་སོགས་པ་དེ་བཞིན་གཤེགས་པ་སྤྱི་དང་བྱེ་བྲག་གི་དམ་ཚིག་བསྲུང་ཞིང་བསྟེན་པ་ལ་བསླབ་པར་བྱའོ་ཞེས་གསུངས་པའི་ཕྱིར། གཉིས་པ་ཡོ་ག་ལ་རྡོ་རྗེ་སློབ་མའི་དབང་གི་སྐབས་ཀྱི་རིག་པའི་དབང་ལྔ་དང་། རྡོ་རྗེ་སློབ་དཔོན་གྱི་སྐབས་ཀྱི་རིག་པའི་དབང་གཉིས་ལས། དང་པོའི་སྐབས་སུ་རིག་ལྔའི་དམ་ཚིག་དེ་དག་ཐོབ་པར་མི་འགྱུར་ཏེ། དེ་ནི་དམ་ཚིག་འཛིན་ནུས་པ་དང་མི་ནུས་པ་གཉིས་ཆར་ལ་བསྐུར་བར་གསུངས་ཤིང་། མི་ནུས་པ་ལ་འཇུག་པའི་སྐབས་སུ་སྡོམ་པ་བསྒྲགས་བཟུང་ལ་སོགས་པའི་ཆོས་བདུན་ཡང་མི་མཛད་པར་གསུངས་པའི་ཕྱིར། དེས་ན་གཉིས་པའི་སྐབས་སུ་ཐོབ་པ་ཡིན་ཏེ། རིག་ལྔའི་དམ་ཚིག་ཡིན་པས་རིག་པའི་དབང་གི་སྐབས་སུ་ཐོབ་དགོས་ཤིང་། དང་པོ་ནི་མེ་ཏོག་གང་ཕོག་གི་ལྷ་ལ་བརྟེན་པ་ཡིན་ལ། ཕྱི་མ་ནི་མེ་ཏོག་གང་ལ་ཕོག་ཀྱང་རྡོ་རྗེ་སེམས་དཔའ་ཁོ་ན་ལ་བརྟེན་པར་གསུངས་པའི་ཕྱིར་རོ། །དེས་ན་བླ་མེད་ཀྱི་རིག་པའི་དབང་ལྔ་དང་། ཡོ་གའི་རྡོ་རྗེ་སློབ་མའི་དབང་གི་སྐབས་ཀྱི་རིག་པའི་དབང་ལྔ་ནི་ན་མི་མཉམ་ལ། དེའི་རྡོ་རྗེ་སློབ་དཔོན་གྱི་དབང་གི་སྐབས་ཀྱི་རིག་པའི་དབང་དང་ན་མཉམ་པར་ཤེས་པར་བྱའོ། །གསུམ་པ་རྡོ་རྗེའི་བརྟུལ་ཞུགས་ཀྱི་སྐབས་སུ་ཐོབ་པའི་དམ་ཚིག་ལ་ཐ་མལ་པའི་ལུས་ངག་ཡིད་གསུམ་གྱི་སྤྱོད་པ་བརྟུལ་པའི་སྡོམ་པ་ཞེས་པའི་ཐ་སྙད་གསུངས་སོ། །བཞི་པ་རྡོ་རྗེ་སློབ་དཔོན་གྱི་སྐབས་སུ་ཐོབ་པ་ལ་བླ་མེད་དང་། རྒྱུད་སྡེ་གཞན་གསུམ་གྱི་ལུགས་གཉིས་ལས། དང་པོ་ལ་སངས་རྒྱས་ཀུན་གྱི་དམ་ཚིག་བླ་ན་མེད་པ་དང་། སངས་རྒྱས་ཀུན་གྱི་སྡོམ་པ་བླ་ན་མེད་པ་ཞེས་པའི་ཐ་སྙད་གསུངས་སོ། །དེ་གནས་སྐབས་གང་དུ་ཐོབ་ན། དམ་ཚིག་གསུམ་སྦྱིན་ཆུ་དབང་རྒྱས་པ་བསྐུར་ཏེ། རིགས་བདག་གིས་རྒྱས་གདབ་པའི་དུས་སུ་ཐོབ་བོ། །གཉིས་པ་ལ་དམ་ཚིག་གསུམ་སྦྱིན་དགོས་པའི་ངེས་པ་མེད་པར་རང་རང་གི་སློབ་དཔོན་གྱིས་དབང་གི་དོན་དུ་གསོལ་བ་གདབ་པའི་རྗེས་སུ། དབང་སྟེགས་ཀྱི་སྟེང་དུ་བཞག་ནས་ཆུ་དབང་རྒྱས་པ་བསྐུར་ཏེ་རིགས་བདག་གི་རྒྱས་གདབ་པའི་སྐབས་སུ་ཐོབ་པའོ། །ལྔ་པ་དབང་གོང་མ་གསུམ་གྱི་སྐབས་སུ་ཐོབ་པ་ལ་རང་རིག་བདེ་བ་ཆེན་པོའི་སྡོམ་པ་ཞེས་པའི་ཐ་སྙད་གསུངས་སོ། །དྲུག་པ་སྨིན་བྱེད་དབང་གི་སྒོ་ནས་དབྱེ་ན་བཞི། བུམ་དབང་། གསང་དབང་། ཤེས་རབ་ཡེ་ཤེས་ཀྱི་དབང་། དབང་བཞི་པའི་དམ་ཚིག་གོ །དེ་རེ་རེ་ལའང་ལྔ་ལྔ་སྟེ་ཉི་ཤུའོ། །བདུན་པ་གྲོལ་བྱེད་ལམ་གྱི་སྒོ་ནས་དབྱེ་ན་གཉིས་ཏེ། གསང་བ་འདུས་པའི་རྒྱུད་ལས། སྡོམ་པ་ཞེས་བྱ་བ་ཅི་ལྟ་བུ་ཞེས་པའི་ལན་དུ། སངས་རྒྱས་རྣམས་ཀྱིས་དེར་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་ཉིད་དོ། །ཞེས་གསུངས་པ་ལྟར་བསྐྱེད་རིམ་གྱི་སྡོམ་པ་དང་། རྫོགས་རིམ་གྱི་སྡོམ་པ་གཉིས་སོ། །གཉིས་པ་བསྡུ་བའི་རིམ་པ་ལ་གཉིས། བསྲུང་བྱའི་སྒོ་ནས་དང་། སྦྱང་གཞིའི་སྒོ་ནས་བསྡུ་བའོ། །དང་པོ་ལ་གསུམ། བཟའ་བའི་དམ་ཚིག བསྲུང་བའི་དམ་ཚིག མི་འབྲལ་བའམ་རྟེན་པའི་དམ་ཚིག་གོ །དང་པོ་ལ་གཉིས་ལས། རྒྱུན་གྱི་དམ་ཚིག་ནི་ཤ་ལྔ་བདུད་རྩི་ལྔའི་རིལ་བུ་བསྟེན་པའོ། །དུས་ཁྱད་པར་ཅན་གྱི་དམ་ཚིག་ནི་ཟླ་བ་གཅིག་ལ་དུས་དྲུག་གི་བརྒྱད་ཆ་ལ་ཚོགས་ཀྱི་འཁོར་ལོ་བྱའོ། །གཉིས་པ་ལ། སྦྱང་གཞི་རང་གཞན་གྱི་ལུས་ངག་ཡིད་གསུམ་ལ་འདུས་པས། དམ་ཚིག་ཀྱང་སྐུ་གསུང་ཐུགས་རྡོ་རྗེའི་དམ་ཚིག་གསུམ་དུ་འདུས་ཏེ། འདི་གསུམ་གྱི་དམ་ཚིག་བསྲུང་བས་དམ་ཚིག་གཞན་ཐམས་ཅད་བསྲུང་བར་འགྱུར་བའི་ཕྱིར་རོ། །ཅི་ལྟར་རྡོ་རྗེ་གསུམ་གྱི་དམ་ཚིག་ཡིན་ཞེ་ན། སཾ་བུ་ཊི་ལས། བུད་མེད་དང་ནི་སྐྱེས་པའི་ལུས། །ལས་ནི་དུ་མས་བསྐྱེད་པས་ན། །མི་ཤེས་པས་ཀྱང་མི་བྱ་སྟེ། །སྐུ་ཡི་རྡོ་རྗེའི་དམ་ཚིག་གོ །ཞེས་པས་གཞན་གྱི་གཟུགས་བཟང་ངན་སྣ་ཚོགས་པ་འདི་དག་བག་ཆགས་ཀྱི་དབང་གིས་གློ་བུར་དུ་བསྐྱེད་པ་ཡིན་གྱི། རང་བཞིན་རྣམ་དག་གི་ཆ་ནས་སྐུ་རྡོ་རྗེ་ཡིན་ནོ་ཞེས་སྐུ་རྡོ་རྗེར་ཤེས་ནས་གཞན་གྱི་ལུས་ལ་མི་སྨོད་པ་དངོས་སུ་བསྟན་ནས། ཤུགས་ལ་རང་གི་ལུས་ཀྱི་མི་དགེ་བ་གསུམ་སྤང་བ་དང་ལུས་ལ་མི་སྨོད་པ་བསྟན། སེམས་ཅན་སྣ་ཚོགས་གདུང་བ་དང་། །ཀུན་རྟོག་དྲྭ་བའི་རྣམ་རྟོག་གིས། །སེམས་ལ་སྨད་པར་མི་བྱ་སྟེ། །ཐུགས་ཀྱི་རྡོ་རྗེའི་དམ་ཚིག་གོ །ཞེས་གསུངས་པས་གཞན་གྱི་སེམས་ཉོན་མོངས་པས་གདུང་བ་དང་། རྣམ་རྟོག་གི་དྲྭ་བས་གཡོགས་པ་འདི་དག་བག་ཆགས་ཀྱི་དབང་གིས་གློ་བུར་དུ་བྱུང་བ་ཡིན་གྱི། རང་བཞིན་རྣམ་དག་གི་ཆ་ནས་ཐུགས་རྡོ་རྗེ་ཡིན་ནོ་ཞེས་ཐུགས་རྡོ་རྗེར་ཤེས་ནས་གཞན་གྱི་སེམས་ལ་མི་སྨོད་པ་དངོས་སུ་བསྟན་ནས། ཤུགས་ལ་རང་གི་སེམས་ལ་མི་སྨོད་པ་དང་སེམས་ཀྱི་མི་དགེ་བ་གསུམ་སྤང་བ་བསྟན། ཕྲག་དོག་ཉིད་ཀྱིས་མ་རངས་པ། །ཚིག་རྩུབ་ལ་སོགས་སྨྲ་མི་བྱ། །རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ །ཞེས་གསུངས་པས་རྒྱུ་ཕྲག་དོག་གིས་ཀུན་ནས་བསླངས་ཏེ། ཚིག་རྩུབ་ལ་སོགས་པའི་ངག་གི་མི་དགེ་བ་བཞི་པོ་འདི་བག་ཆགས་ཀྱི་དབང་གིས་གློ་བུར་དུ་བྱུང་བ་ཡིན་གྱི། རང་བཞིན་རྣམ་དག་གི་ཆ་ནས་གསུང་རྡོ་རྗེ་ཡིན་ནོ་ཞེས་རང་གི་ངག་ལ་མི་སྨོད་པ་དང་ངག་གི་མི་དགེ་བ་བཞི་སྤང་བ་དངོས་སུ་བསྟན་ནས། ཤུགས་ལ་གཞན་གྱི་ངག་འཇམ་རྩུབ་གང་ལ་ཡང་མི་སྨོད་པ་བསྟན་ཏོ། །ཡེ་ཤེས་ཞབས་ལུགས་པས་ཀྱང་ལས་དང་པོ་པའི་སྐབས་སུ་ལུས་ཀྱི་མི་དགེ་བ་གསུམ་སྤངས་པ་ལུས་ཀྱི་སྡོམ་པ། ངག་གི་བཞི་སྤངས་པ་ངག་གི་སྡོམ་པ། ཡིད་ཀྱི་གསུམ་སྤངས་པ་ཡིད་ཀྱི་སྡོམ་པ་དང་། བརྟན་པ་ཐོབ་པའི་སྐབས་སུ་ལུས་ཀྱི་ལས་བཟང་ངན་ལ་བླང་དོར་མེད་པ་སྐུ་རྡོ་རྗེའི་དམ་ཚིག ངག་གི་ལས་བཟང་ངན་ལ་བླང་དོར་མེད་པ་གསུང་རྡོ་རྗེའི་དམ་ཚིག སེམས་ཀྱི་ལས་བཟང་ངན་ལ་བླང་དོར་མེད་པ་ཐུགས་ཀྱི་རྡོ་རྗེའི་དམ་ཚིག་ཏུ་བཤད་དོ།། །།འདི་འདྲའི་ཆོས་ཚུལ་འདོམས་པར་བྱེད་པ་པོ། །སྲིད་གསུམ་འདྲེན་པ་དམ་པར་རབ་གྲགྃས་པྃ། །ཐར་པའི་རྒྱལྃ་མཚནྃ་སློང་བར་མཛད་པ་ཡི། །ཐུགས་རྗེས་སྤྲུལ་པའི་སྐྱེས་མཆོག་ཁྱོད་ལ་འདུད། །ཕུང་ཁམས་སྐྱེ་མཆེད་སྒོ་གསུམ་དྲི་མ་སྦྱངས། །དཀྱིལ་འཁོར་བཞི་ལ་སྐུ་བཞིའི་ས་བོན་བཏབས། །བསོདྃ་ནམྃས་ཡེ་ཤེས་ཚོགས་གཉིས་མཐར་ཕྱིན་ནས། །དམ་ཆོས་སྨྲ་བའི་སེྃང་གེྃར་འགྱུར་བར་ཤོག །སྙན་པའི་གྲགས་པས་ས་སྟེང་ཁྱབ་བྱས་ནས། །འགྲོ་བའི་ཆོས་དང་དཔལ་འབྱོར་རྒྱས་པ་ལ། །བུམ་བཟང་དཔག་བསམ་ཤིང་སོགས་ལྟ་བུ་དང་། །རྣམ་མང་ཉེར་འཚོའི་རྒྱུ་ཡང་བདག་གྱུར་ཅིག །ཅེས་པ་འདིའང་སྙིགས་དུས་ཀྱི་ཐུབ་དབང་གཉིས་པ་ཀུན་མཁྱེན་བླ་མའི་གསུང་ཇི་ལྟ་བ་བཞིན་བཀོད་པའོ།། །།རྒྱལ་བ་ཀུན་གྱི་གསང་ཆེན་མཛོད། །བླ་མེད་རྡོ་རྗེ་ཐེག་པ་ཡི། །བསྟན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །།

དམ་ཚིག་རྣམ་བཤད་ཟབ་དོན་སྙིང་པོ་བསྡུས་པ།

དམ་ཚིག་རྣམ་བཤད་ཟབ་དོན་སྙིང་པོ་བསྡུས་པ་ཞེས་བྱ་བ་བཞུགས་སོ།། ཨོཾ་སྭསྟི། དམ་ཚིག་རྣམ་བཤད་ཟབ་དོན་སྙིང་པོ་བསྡུས་པ་ཞེས་བྱ་བ་བླ་མ་དམ་པའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། འདིར་སྔགས་སྡོམ་གྱི་རྣམ་པར་གཞག་པ་ལ། མ་ཐོབ་པ་ཐོབ་པར་བྱེད་པའི་ཆོ་ག་དང་། ཐོབ་པ་མི་ཉམས་པར་སྲུང་བའི་ཚུལ་གཉིས། དང་པོ་ནི་དབང་བསྐུར་གྱི་ཆོ་ག་སྟེ། དེ་ཡང་རྒྱུད་སྡེ་བཞི་ལ་དབང་བསྐུར་གྱི་ཆོ་གའི་བབས་མི་འདྲ་བ་བཞི་ཡོད་དོ། །གཉིས་པ་ནི་དེ་ལྟར་ཡོད་པའི་རྒྱུ་མཚན་གྱིས་དམ་ཚིག་དང་སྡོམ་པ་སྲུང་ཚུལ་མི་འདྲ་བ་བཞི་ཡོད་པ་ལས། འདིར་བླ་མེད་ཀྱི་དབང་དུ་བྱས་ནས་འཆད་ན། གཞུང་འདི་རྩོམ་པ་པོའི་སློབ་དཔོན་ངོས་གཟུང་བ། རྒྱུད་གཞུང་གང་ལ་བརྟེན་པ། རྩོམ་པའི་དགོས་པ། དགོས་ལྡན་གྱི་བསྟན་བཅོས་དོན་དུ་ཞིག་གི་སྒོ་ནས་འཆད་པ་དང་བཞིའོ། །དང་པོ་ནི། རང་རང་གི་བླ་མ་གོང་མ་གྲུབ་པ་ཐོབ་པ་རྣམས་ཀྱིས་ཕྱུང་བར་བཞེད་ཀྱང་། མན་ངག་བརྒྱུད་པ་འདིར་ནི་རྣལ་འབྱོར་དབང་ཕྱུག་བིརྺ་པས་ཕྱུང་བར་བཞེད་དོ། །ཁ་ཅིག་མགོན་པོ་ཀླུ་སྒྲུབ་ཀྱིས་ཕྱུང་བར་བཞེད་པ་དང་། ཁ་ཅིག་སློབ་དཔོན་བྷ་ཝི་ལྷས་ཕྱུང་བར་བཞེད་པ་དང་ཡང་མི་འགལ་ཏེ། བཀའ་ལས་ཕྱུང་བའི་བསྟན་བཅོས་ཡིན་པའི་ཕྱིར། གཉིས་པ་ནི་གཞུང་འདིའི་ཚིག་རིགས་ཇི་ལྟ་བ་བཞིན་གསང་བ་འདུས་པའི་རྒྱུད་འབུམ་པར་བཞུགས་ཤིང་། དོན་འདྲ་ཡང་ཚིག་མི་འདྲ་བ་ཙམ་ནི་དུས་ཀྱི་འཁོར་ལོའི་རྒྱུད་དམ་པ་དང་པོའི་ལེའུ་གསུམ་པ་དང་། རྡོ་རྗེ་རྭ་གུར་གི་ལེའུ་བཅོ་ལྔ་པ་དང་། གཤིན་རྗེ་གཤེད་དགྲ་ནག་གི་ལེའུ་བདུན་པར་བཞུགས་སོ། །གསུམ་པ་ནི། འོ་ན་དེ་རྒྱུད་དུ་བཞུགས་བཞིན་དུ་ལོགས་སུ་རྩོམ་པ་ལ་དགོས་པ་ཅི་ཡོད་ཅེ་ན། དེ་ལ་དགོས་པ་ཡོད་དེ། རྒྱུད་རྒྱས་པར་བཞུགས་པ་གདུལ་བྱ་ལས་དང་པོ་པ་རྣམས་ཀྱིས་མི་རྙེད་ལ། དམ་པ་དང་པོའི་རྒྱུད་དུ་ཅུང་ཟད་བསྡུས་པའི་ཚུལ་གྱིས་བཞུགས་པ་དང་། རྡོ་རྗེ་རྭ་གུར་དུ་མི་གསལ་བའི་ཚུལ་གྱིས་བཞུགས་པ་དང་། དགྲ་ནག་གི་རྒྱུད་དུ་གོ་རིམ་འཁྲུགས་པའི་ཚུལ་གྱིས་བཞུགས་པས་ན། གསལ་ལ་མ་འཁྲུགས་པ་བདེ་བླག་ཏུ་རྟོགས་པའི་ཆེད་དུ་རྩོམ་པ་ཡིན་ནོ། །བཞི་པ་ལ་རྩ་བའི་ལྟུང་བ་དང་། ཡན་ལག་གི་ལྟུང་བ་གཉིས་ལས། དང་པོ་ལ་ཀླད་ཀྱི་དོན་དང་། གཞུང་གི་དོན་གཉིས། དང་པོ་ལ་མཆོད་པར་བརྗོད་པ་དང་། རྩོམ་པར་དམ་བཅའ་བ་གཉིས་ལས། དང་པོ་ནི། ཀུན་ནས་དྭང་བས་བླ་མ་ཡི། །ཞབས་ཀྱི་པདྨོ་ལ་བཏུད་དེ། །ཞེས་པས་བསྟན་ཏོ། །གཉིས་པ་ནི། རྩ་བའི་ལྟུང་བ་བཅུ་བཞི་ནི། །རྒྱུད་ལས་གསུངས་པ་བཤད་པར་བྱ། །ཞེས་པས་བསྟན་ཏོ། །གཉིས་པ་གཞུང་གི་དོན་ལ། ལྟུང་བ་སོ་སོའི་ངོ་བོ། བསྲུང་བའི་ཕན་ཡོན། མ་བསྲུང་བའི་ཉེས་དམིགས། མི་འབྱུང་བའི་ཕྱིར་སྐྱོང་བའི་ཐབས། བྱུང་ན་ཕྱིར་བཅོས་པའི་ཐབས་དང་ལྔའོ། །དང་པོ་ལ་རྩ་བའི་ལྟུང་བ་བཅུ་བཞི་ཡོད་པ་ལས། དང་པོ་ནི། གང་ཕྱིར་རྡོ་རྗེ་འཛིན་པ་ཡི། །དངོས་གྲུབ་སློབ་དཔོན་རྗེས་འབྲངས་གསུངས། །དེ་བས་དེ་ལ་བརྙེས་པ་ནི། །རྩ་བའི་ལྟུང་བ་དང་པོར་བཤད། །ཅེས་པས་བསྟན་ཏོ། །འདི་ལའང་ལྟུང་བའི་ངོ་བོ་ཉིད་ཀྱི་རྣམ་པར་གཞག་པ། ཡན་ལག་དུས་ལྟུང་བར་འགྱུར་བ། ལྟུང་བར་འགྱུར་བའི་རྒྱུ་མཚན། མི་འབྱུང་བའི་ཕྱིར་བསླབ་པ། བྱུང་ན་ཕྱིར་བཅོས་པའི་ཐབས། རྣམ་སྨིན་རྟོགས་པའི་ཕྱིར་དུ་ཆུང་འབྲིང་ཆེ་གསུམ་གྱི་རྣམ་པར་གཞག་པ་དང་དྲུག་གོ །དང་པོ་ནི། རྡོ་རྗེ་སློབ་དཔོན་ལ་བརྙས་པའོ། །འོ་ན་རྡོ་རྗེ་སློབ་དཔོན་ཇི་ལྟ་བུ། དེ་ལ་བརྙས་པའི་ཚུལ་དེ་ཇི་ལྟ་བུ་ཞེ་ན། དང་པོ་ནི་རྒྱུད་རྒྱས་པའི་ལུང་གྲུབ་ཆེན་དཔལ་འཛིན་གྱིས་དགྲ་ནག་གི་དཀའ་འགྲེལ་དུ་དྲངས་པ་ལས། དམ་ཚིག་ཀློག་པ་སྦྱིན་པ་དང་། །འཆད་བྱེད་མན་ངག་སྟོན་པ་དང་། །དབང་བསྐུར་བ་དང་ལས་བྱེད་པ། །དེ་དག་སློབ་དཔོན་ཞེས་བྱའོ། །ཞེས་གསུངས་པ་ལྟར་བླ་མེད་ཀྱི་བསླབ་བྱ་སྦྱིན་པ་དང་། རྡོ་རྗེ་ཐེག་པའི་སྔགས་ཀྱི་བཟླས་ལུང་སྦྱིན་པ། རྡོ་རྗེ་ཐེག་པའི་གཞུང་འཆད་པ། རིམ་གཉིས་ཀྱི་མན་ངག་སྟོན་པ། དབང་བསྐུར་བ་དང་། རབ་གནས་ཀྱི་ལས་བྱེད་པའི་རྡོ་རྗེ་སློབ་དཔོན་དང་དབང་བསྐུར་གྱི་ལས་བྱེད་པའི་རྡོ་རྗེ་སློབ་དཔོན་ཡང་འདིའི་ཁོངས་སུ་འདུས་པ་ཡིན་ནོ། །གཉིས་པ་ནི་རང་རང་གི་རིགས་དང་ཚུལ་ཁྲིམས་དང་ཐོས་པ་ལ་སོགས་པའི་སྒོ་ནས་རྡོ་རྗེ་སློབ་དཔོན་ལས་མཆོག་ཏུ་འཛིན་པའི་སེམས་ཀྱིས་བརྙས་ན་རྩ་བའི་ལྟུང་བར་འགྱུར་རོ། །གཉིས་པ་ཡན་ལག་དུས་ལྟུང་བར་འགྱུར་བ་ལ། རྟེན་གྱི་ཡན་ལག ཡུལ་གྱི། ངོ་བོ་ཉིད་ཀྱི། བསམ་པའི། དུས་སྐབས་ཀྱི་ཡན་ལག་དང་ལྔའོ། །དང་པོ་ནི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་ལྡན་པ་བསམ་པ་རང་བཞིན་དུ་གནས་པའོ། །གཉིས་པ་ནི་སྔར་བཤད་པའི་རྡོ་རྗེ་སློབ་དཔོན་དྲུག་པོ་དེའོ། །གསུམ་པ་ནི་ལུས་ངག་གང་རུང་གི་གྲོགས་ཡོད་ཀྱང་རུང་མེད་ཀྱང་རུང་གཙོ་བོར་ཡིད་ཀྱིས་བརྙས་པའོ། །བཞི་པ་ནི་རྡོ་རྗེ་སློབ་དཔོན་ལ་བརྙས་པ་ལ་རྩ་བའི་ལྟུང་བ་འབྱུང་བར་མི་ཤེས་པར་བརྙས་པའམ། ཤེས་ཀྱང་མ་གུས་སམ། གུས་ཀྱང་དྲན་ཤེས་བཞིན་གྱིས་མ་བསྐྱངས་ཏེ་བག་མེད་པས་སམ། བག་ཡོད་ཀྱང་ཉོན་མོངས་མང་བའི་སྟོབས་ཀྱིས་རང་དབང་མེད་པར་བརྙས་པའོ། །ལྔ་པ་ནི་རྡོ་རྗེ་སློབ་དཔོན་རང་ཉིད་ཀྱིས་བརྙས་པར་ཤེས་ནས་ཐུགས་ཅུང་ཟད་འཁྲུགས་པའོ། །དེ་སྐད་དུ་ཡང་དམ་པ་དང་པོའི་རྒྱུད་ལས། དཔལ་ལྡན་བླ་མའི་ཐུགས་སུན་དབྱུང་། །རི་བོང་འཛིན་པ་རུ་ནི་འགྱུར། །ཞེས་གསུངས་པའི་ཕྱིར། གསུམ་པ་ལྟུང་བར་འགྱུར་བའི་རྒྱུ་མཚན་ནི། དབང་བསྐུར་གྱི་གནས་སྐབས་སུ་ཁས་བླངས་པའི་ཕྱིར། དེང་ཕྱིན་ཆད་བུ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ངས་ཇི་ལྟར་བསྒོ་བ་བཞིན་ཁྱོད་ཀྱིས་དེ་ལྟར་བྱ་དགོས་སོ། །ང་ལ་ཡང་བརྙས་པར་མ་བྱེད་ཅིག བྱས་ན་ཡ་ང་བ་མ་སྤངས་པར་འཆི་བའི་དུས་བྱས་ཏེ། སེམས་ཅན་དམྱལ་བ་ཆེན་པོ་ལྟུང་བར་འགྱུར་ཏ་རེ་ཞེས་དང་། མི་བསྐྱོད་པའི་དམ་ཚིག་གནས་སྐབས་སུ། སློབ་དཔོན་དག་ཀྱང་གཟུང་བར་བགྱི། །ཞེས་པ་དང་། རྣམ་སྣང་གི་དམ་ཚིག་གནས་སྐབས་སུ། དཀོན་མཆོག་གསུམ་བཟུང་བས་བླ་མ་དཀོན་མཆོག་གསུམ་གྱི་ཁོངས་སུ་འདུས་པའི་ཕྱིར་རོ། །བཞི་པ་ནི། རྡོ་རྗེ་སློབ་དཔོན་དངོས་གྲུབ་སྟེར་བའི་ཡི་དམ་ལྷའི་འདུ་ཤེས་དང་། མི་མཐུན་ཕྱོགས་ལས་རྒྱལ་བར་བྱེད་པའི་དམག་དཔོན་དཔའ་བོ་ཆེན་པོའི་འདུ་ཤེས་དང་། ཆུ་བོའི་ཕ་རོལ་ཏུ་སྒྲོལ་བར་བྱེད་པའི་གྲུ་སྐྱ་འཛིན་པའི་འདུ་ཤེས་དང་། ནད་གསོ་པའི་སྨན་པ་ཆེན་པོའི་འདུ་ཤེས་དང་། རང་ཉིད་དངོས་གྲུབ་ཞུ་བ་པོ་ལ་སོགས་པའི་འདུས་ཤེས་བསྒོམ་པར་བྱའོ། །ལྔ་པ་ལ། ཡན་ལག་མ་ཚང་བ་ལ་ལྟུང་བ་ལས་ལྡང་བའི་ཚུལ་དང་། ཡན་ལག་ཚང་བ་ལ་སླར་ལེན་པའི་ཐབས་གཉིས། དང་པོ་ལ་སྟོབས་བཞིའི། དམ་ཚིག་རྡོ་རྗེའི་བསྙེན་སྒྲུབ་ཡན་ལག་བཞིའི། ཚུལ་གཞན་གྱི་སྒོ་ནས་བཤགས་པའོ། །དང་པོ་ལ། རྟེན་གྱི་སྟོབས། རྣམ་པར་སུན་འབྱིན་པའི། གཉེན་པོ་ཀུན་ཏུ་སྤྱོད་པའི། ཉེས་པར་སོར་ཆུད་པའི་སྟོབས་དང་བཞིའོ། །དང་པོ་ནི་རང་ཉིད་རྡོ་རྗེ་སློབ་དཔོན་ནམ། གྲོགས་ཚངས་པ་མཚུངས་པར་སྤྱོད་པ་གང་ཡང་རུང་བའི་མདུན་དུ་ཙོག་ཙོག་པོར་འདུག་ལ། རིག་པ་འཛིན་པ་འདི་ཞེས་བྱ་བ་དགོངས་སུ་གསོལ། བདག་རིག་པ་འཛིན་པ་འདི་ཞེས་བྱ་བ་ལ་ལྟུང་བ་འདི་ཞེས་བྱ་བ་བྱུང་བས། ཁྱོད་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །དེ་ལྟར་མཐོལ་ཞིང་བཤགས་ན་བདག་བདེ་བ་ལ་རེག་པར་འགྱུར་གྱི། མ་མཐོལ་ཞིང་མ་བཤགས་ན་དེ་ལྟར་མི་འགྱུར་བ་ལགས་སོ། །ཕ་རོལ་པོས་ཉེས་པ་ལ་ཉེས་པར་མཐོང་ངམ་ཞེས་པ་དང་། རང་ཉིད་ཀྱིས་མཐོང་ལགས་ཞེས་པ་དང་། ཕ་རོལ་པོས་ཕྱིན་ཆད་རྡོ་རྗེ་འཆང་གི་བཀའ་བཞིན་དུ་སྡོམ་མམ། རང་གིས་སྡོམ་ལགས་སོ་ཞེས་དང་། ཡང་ཕ་རོལ་པོས་འདི་ནི་ཐབས་ཡིན་ནོ་ཞེས་དང་། རང་ཉིད་ཀྱིས་ལེགས་སོ་ཞེས་ལན་གསུམ་གྱི་བར་བྱའོ། །གཉིས་པ་ནི་སྔར་ཉེས་པ་བྱས་པ་རྣམས་ལ་དུག་འཐུང་པ་ལྟ་བུའི་འགྱོད་སེམས་དྲག་པོའི་སྒོ་ནས་བཤགས་པར་བྱེད་པའོ། །གསུམ་པ་ནི་ད་ཕྱིན་ཆད་ཉེས་པ་འདི་ལྟ་བུ་སྲོག་ལ་བབ་ཀྱང་མི་བྱེད་སྙམ་དུ་སྡོམ་སེམས་དྲག་པོའི་སྒོ་ནས་བཤགས་པ་བྱེད་པའོ། །བཞི་པ་ནི་ཐབས་དེ་དག་ལ་བརྟེན་ནས་སྔར་གྱི་ཉེས་པ་དེ་རྣམས་དག་གོ་སྙམ་དུ་དགའ་སྤྲོ་བསྒོམ་པའོ། །གཉིས་པ་ནི་དམ་ཚིག་རྡོ་རྗེའི་བསྙེན་སྒྲུབ་ཡན་ལག་བཞིའི་སྒོ་ནས་བཤགས་པ་ལ། བསྙེན་པ། ཉེ་བར་བསྙེན་པ། སྒྲུབ་པ། སྒྲུབ་པ་ཆེན་པོའི་འོ། །དང་པོ་ནི་དམ་ཚིག་པ་བསྐྱེད་པའོ། །གཉིས་པ་ནི་སྐུ་གསུང་ཐུགས་ཀྱི་ཡིག་འབྲུ་བསམ་པའོ། །གསུམ་པ་ནི་ཡེ་ཤེས་པ་འགུག་གཞུག་བྱེད་པའོ། །བཞི་པ་ནི་དབང་མ་བསྐུར་བར་དབུ་རྒྱན་རང་ཆས་སུ་ཡོད་པར་བསམ་པའོ། །དེ་རྣམས་ཚིག་འདོན་བྱེད་ན་དོན་ཡོད་གྲུབ་པའི་ཅོད་པཎ་ཟེར་བ་འདིར་འཛུད། སྔགས་བཟླ་བ་སོགས་སོ། །དེ་དག་གི་དོན་ཡང་རང་ཉིད་ཡི་དམ་དུ་གསལ་བའི་སྤྱི་བོར་པདྨ་དང་ཟླ་བ་དང་ཉི་མའི་དཀྱིལ་འཁོར་གྱི་སྟེང་དུ། ཁཾ་ལས་རལ་གྲི་ལྗང་ཁུ་ཁཾ་གིས་མཚན་པ་དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས། དམ་ཚིག་རྡོ་རྗེ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ། གཡས་རལ་གྲི་གཡོན་དེའི་ཡུ་བ་བྱས་པའི་དྲིལ་བུ་འཛིན་པ། དར་གྱི་ཤམ་ཐབས་གསོལ་བ། དེའི་པང་ན་ཡུམ་དམ་ཚིག་སྒྲོལ་མ་ལྗང་གུ་གཡས་གྲི་གུག གཡོན་ཐོད་པ་འཛིན་པས་ཡབ་ལ་འཁྱུད་པ། གཉིས་ཀའང་རུས་པ་དང་རིན་པོ་ཆེའི་རྒྱན་གྱིས་བརྒྱན་པ། ཞལ་ཅུང་ཟད་ཁྲོ་ཞིང་ཞི་བའི་ཉམས་དང་ལྡན་པ། ཟླ་བའི་རྒྱབ་ཡོལ་དང་། དོན་ཡོད་གྲུབ་པའི་དབུ་རྒྱན་ཅན། དེ་གཉིས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་འཕྲོས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དམ་ཚིག་རྡོ་རྗེ་ཡབ་ཡུམ་གྱི་རྣམ་པར་བཛྲ་ས་མ་ཛཱ། ཛཿཧཱུྃ་བྃ་ཧོཿ གཉིས་སུ་མེད་པར་གྱུར། དེའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཁཾ་ལྗང་གུ། དེའི་མཐའ་བསྐོར་དུ། ཨོཾ་ཨ་ཁཾ་ཧཱུྃ་ཕཊ་སྭཱ་ཧཱ། ཞེས་པས་བསྐོར་བ་ལ་དམིགས་ཏེ་རྟགས་མ་བྱུང་བར་བཟླས་པ་བྱའོ། །གསུམ་པ་ནི། ཐུན་བཞིའི་རྣལ་འབྱོར་གྱི་སྒོ་ནས་བཞི་འབུམ་གྱི་སྒོ་ནས། དེའི་བཞི་ཆའི་སྦྱིན་སྲེག་གི་སྒོ་ནས། ཚོགས་འཁོར་གྱི་སྒོ་ནས། མཐུན་མཚམས་སུ་ཕྱག་འཚལ་བ་དང་མཆོད་པ་འབུལ་བ་ལ་སོགས་པའི་སྒོ་ནས་བཤགས་པའོ། །གཉིས་པ་ཡན་ལག་ཚང་བ་ལ་སླར་ལེན་པའི་ཐབས་ནི། གལ་ཏེ་ལྟུང་སོགས་བྱུང་བར་གྱུར་ན། རང་གི་རྡོ་རྗེ་སློབ་དཔོན་ནམ། རྡོ་རྗེ་སློབ་དཔོན་གཞན་ཞིག་ལ། དབང་བསྐུར་ཞུས་ཏེ་སླར་ཡང་སྔགས་སྡོམ་ལེན་པར་བྱེད་དོ། །དྲུག་པ་རྣམ་སྨིན་རྟོགས་པའི་ཕྱིར་དུ་ཆེ་འབྲིང་ཆུང་གསུམ་གྱི་རྣམ་པར་གཞག་པ་ལ། ཡུལ་གྱི་སྒོ་ནས་རྡོ་རྗེ་སློབ་དཔོན་གཅིག་ལྡན་ལ་བརྙས་ན་ཆུང་ངུ་། གཉིས་ལྡན་ལ་འབྲིང་། གསུམ་ལྡན་ལ་ཆེན་པོ། ངོ་བོ་ཉིད་ཀྱི་སྒོ་ནས་ལུས་ངག་གང་རུང་གི་གྲོགས་མེད་པར་ཡིད་རྐྱང་པས་བརྙས་ན་ཆུང་ངུ་། གང་རུང་གི་གྲོགས་དང་བཅས་ཏེ་བརྙས་ན་འབྲིང་། གཉིས་ཀའི་གྲོགས་དང་བཅས་ཏེ་བརྙས་ན་ཆེན་པོའོ། །བསམ་པའི་སྒོ་ནས་མི་ཤེས་པའི་དབང་གིས་བརྙས་ན་ཆུང་ངུ་། མ་གུས་པ་དང་བག་མེད་པའི་སྒོ་ནས་བརྙས་ན་འབྲིང་། ཉོན་མོངས་མང་བའི་སྒོ་ནས་བརྙས་ན་ཆེན་པོའོ། །བསགས་པའི་སྒོ་ནས་ལན་གཅིག་བསགས་པ་ལ་ཆུང་ངུ་། གཉིས་དང་གསུམ་འབྲིང་། བཞི་ཕན་ཆད་ལ་ཆེན་པོའོ། །ཉེས་པ་བྱས་པའི་སྒོ་ནས་དབྱེ་ན། གནོད་པ་ཆེན་པོ་བྱས་ན་ཆེན་པོ། འབྲིང་བྱས་ན་འབྲིང་། ཆུང་ངུ་བྱས་ན་ཆུང་ངུ་ཡིན་ནོ། །གཉིས་པ་ནི། བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བརྗོད། །ཅེས་གསུངས་པ་འདི་ལ་ཡང་སྔར་ལྟར་དྲུག་ལས། དང་པོ་ནི། བདེ་བར་གཤེགས་པའི་བཀའ་སྟེ། སྡོམ་པ་འོག་མ་གཉིས་ཀྱི་བཅས་པའོ། །དེ་ལ་ཡང་ཉན་ཐོས་དང་ཐུན་མོང་བའི་ཕམ་པ་བཞི་དང་། བྱང་ཆུབ་སེམས་དཔའ་དང་ཐུན་མོང་བའི་ཕམ་འདྲ་བཞི་སྟེ་བརྒྱད་པོ་འདི་དག་ལ་དངོས་སུ་ཁྱད་གསོད་མེད་པར་སྤྱད་ན་ཡང་རྩ་བའི་ལྟུང་བ། ཡན་ལག་རྣམས་ལ་ཁྱད་གསོད་ཀྱི་སྒོ་ནས་སྤྱད་ན་རྩ་བའི་ལྟུང་བར་འགྱུར་རོ། །གཉིས་པ་ལ་སྔར་ལྟར་ལྔ་ལས། དང་པོ་ནི་སྔར་དང་འདྲ། གཉིས་པ་ནི་ཉན་ཐོས་ཀྱི་བཅས་པ་ལ་མཚོན་ན། མིའམ་མིར་ཆགས་པ་ལ་སོགས་པ་བཅས་པ་རང་རང་གི་སྐབས་ལས་ཤེས་པར་བྱའོ། །གསུམ་པ་ནི་གཙོ་བོར་ཡིད་དགོས་ཤིང་ལུས་ངག་གང་རུང་གི་གྲོགས་ཀྱང་དགོས་སོ། །བཞི་པ་ནི་ཐུན་མོང་བའི་རྒྱུ་བཞི་སྔོན་དུ་བཏང་ནས་ཁྱད་གསོད་ཀྱི་ཀུན་སློང་གི་བསམ་པས་སོ། །ལྔ་པ་ནི་ལྟུང་བ་གང་ཡིན་པ་དེ་དང་དེར་རྫོགས་པར་སྤྱད་ཟིན་པ་ནའོ། །གསུམ་པ་ནི་རྒྱུད་རྡོ་རྗེ་རྩེ་མོ་ལས། ཁྱོད་ཀྱིས་སྲོག་ཆགས་གསད་མི་བྱ། །ཞེས་སོགས་ཀྱི་ཕམ་པ་བཞི་དང་། ཆང་སྤོང་བར་གསུངས་པས་སོ་སོར་ཐར་པའི་སྡོམ་པ་བཟུང་བ་དང་། རྒྱུན་བཤགས་ཀྱི་སྐབས་སུ། སངས་རྒྱས་ཆོས་དང་ཚོགས་མཆོག་ལ། །ཞེས་སོགས་སྐྱབས་འགྲོ་ལན་གསུམ་བྱས་པས་སོ་ཐར་གྱི་སྡོམ་པ་བཟུང་བ་དང་། རང་གཞན་དོན་ནི་རབ་བསྒྲུབ་ཕྱིར། །ཞེས་སོགས་སྨོན་པ་སེམས་བསྐྱེད་ལན་གསུམ་བྱས་པས་བྱང་སེམས་ཀྱི་སྡོམ་པ་བཟུང་བ་དང་། རིགས་ལྔ་སྤྱིའི་དམ་ཚིག་གི་སྐབས་སུ། ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །ཞེས་པའི་སྐབས་སུ་སོ་སོར་ཐར་པ་རིགས་བདུན་གྱི་ཚུལ་ཁྲིམས་ཀྱི་བསླབ་པའི་ཁོངས་སུ་བསྡུས་ནས་བཟུང་བ་དང་། ཇི་ལྟར་དུས་གསུམ་མགོན་པོ་རྣམས། །ཞེས་སོགས་ཀྱི་སྐབས་སུ་བྱང་སེམས་ཀྱི་སྡོམ་པ་བཟུང་བའི་ཕྱིར། བཞི་པ་ནི། བདེ་བར་གཤེགས་པའི་བཀའ་ལ་ལམ་པོ་ཆེ་དང་ཆུའི་ཕ་རོལ་ཏུ་སྒྲོལ་བའི་གྲུའི་འདུ་ཤེས་བསྒོམ་པར་བྱའོ། །ལྔ་པ་དང་དྲུག་པ་གཉིས་སྔ་མ་ལས་དཔག་སྟེ་ཤེས་པར་བྱའོ། །གསུམ་པ་ནི། རྡོ་རྗེའི་སྤུན་ལ་ཁྲོས་པ་ནི། །ཉེས་པར་བརྗོད་པ་གསུམ་པ་ཡིན། །ཞེས་པ་སྟེ། འདི་ལ་སྔར་ལྟར་དྲུག་ལས། དང་པོ་ནི། རྡོ་རྗེ་ཐེག་པའི་སྒོར་ཞུགས་པའི་དམ་ཚིག་དང་སྡོམ་པ་དང་ལྡན་པའི་རྡོ་རྗེའི་སྤུན་ལ་དགྲར་འཛིན་པའི་སྒོ་ནས་ཁྲོས་པའོ། །གཉིས་པ་ལ་སྔར་ལྟར་ལྔ་ལས། དང་པོ་ནི་སྔར་ལྟར་རོ། །གཉིས་པ་ནི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་དང་ལྡན་པ། རང་དང་རྒྱུད་ཐ་དད་པ། རང་གི་རྩ་བའི་བླ་མ་མིན་པའོ། །གསུམ་པ་ནི་གཙོ་བོར་ཡིད་དགོས་ཤིང་། ལུས་ངག་གང་རུང་གི་གྲོགས་ཀྱང་དགོས་ཏེ། ལུས་ངག་གང་རུང་གི་གྲོགས་མེད་ན། དགྲར་འཛིན་གྱི་སྦྱོར་བ་མི་རྫོགས་པའི་ཕྱིར། བཞི་པ་ནི་སྔར་ལྟར་ཐུན་མོང་གི་རྒྱུ་བཞི་སྔོན་དུ་བཏང་བའི་སྒོ་ནས་དགྲར་འཛིན་པའི་བསམ་པས་ཁྲོས་པའོ། །ལྔ་པ་དུས་སྐབས་ཀྱི་ཡན་ལག་ནི་རྡོ་རྗེ་སྤུན་ཕ་རོལ་པོས་དགྲར་འཛིན་པ་གོ་བར་གྱུར་པའོ། །གསུམ་པ་ནི། དམ་ཚིག་བསྒྲགས་པའི་སྐབས་སུ། སྤུན་ལ་ཁྲོ་བར་མི་བྱ་ཉིད། །ཅེས་གསུངས་པའི་ཕྱིར། བཞི་པ་ནི། རྡོ་རྗེའི་སྤུན་དེ་ཉིད་ལ་འཇིགས་པ་ལས་སྐྱོབ་པའི་སྙིང་བརྩེ་བའི་གྲོགས་ཀྱི་འདུ་ཤེས་བསྒོམ་པར་བྱའོ། །ལྔ་པ་དང་དྲུག་པ་གཉིས་ནི་སྔ་མ་ལས་དཔག་སྟེ་ཤེས་པར་བྱའོ། །བཞི་པ་ནི། སེམས་ཅན་རྣམས་ལ་བྱམས་པ་སྤོང་། །བཞི་པ་ཡིན་པ་རྒྱལ་བས་གསུངས། །ཞེས་པ་སྟེ། འདི་ལ་ཡང་སྔར་ལྟར་དྲུག་ལས། དང་པོ་ནི། སེམས་ཅན་གང་ཡང་རུང་བ་ཞིག་བདེ་བ་དང་བདེ་བའི་རྒྱུ་དང་བྲལ་ན་སྙམ་པའི་བློ་རྩེ་གཅིག་པ་སྐྱེས་ནའོ། །གཉིས་པ་ལ་ལྔ་ལས། དང་པོ་འདྲ། གཉིས་པ་ནི་སེམས་ཅན་གང་ཡང་རུང་བ་གཅིག་གོ །གསུམ་པ་ནི་འདིར་སེམས་རྐྱང་པས་རྫོགས་པས་ལུས་ངག་གང་རུང་གི་གྲོགས་མེད་ཀྱང་རུང་ངོ་། །བཞི་པ་ནི་ཐུན་མོང་གི་རྒྱུ་བཞི་སྔོན་དུ་བཏང་ནས་སེམས་ཅན་ལ་བྱམས་པ་སྤོང་འདོད་ཀྱི་བློ་སྐྱེས་པའོ། །ལྔ་པ་ནི་ཉིན་ཞག་གཅིག་ལ་ཆ་དྲུག་ཏུ་བགོས་པའི་ཆ་གཅིག་ལ་གཉེན་པོས་བར་མ་ཆོད་པར་སེམས་ཅན་ལ་བྱམས་པ་སྤོང་འདོད་ཀྱི་བློ་སྐྱེས་པའོ། །གསུམ་པ་རྒྱུ་མཚན་ནི། དོན་ཡོད་གྲུབ་པའི་དམ་ཚིག་གི་སྐབས་སུ། ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམས་བཞི་རྟག་ཏུ་སྦྱིན། །ཞེས་གསུངས་པའི་ཕྱིར། བཞི་པ་ནི། སེམས་ཅན་ཐམས་ཅད་ལ་ཕ་མའི་འདུ་ཤེས་བསྒོམ་པར་བྱའོ། །ལྔ་པ་དང་དྲུག་པ་ནི་གོང་མ་ལས་དཔག་སྟེ་ཤེས་པར་བྱའོ། །ལྔ་པ་ནི། ཆོས་ཀྱི་རྩ་བ་བྱང་ཆུབ་སེམས། །དེ་སྤོང་བ་ནི་ལྔ་པ་ཡིན། །ཞེས་པ་སྟེ། འདི་ལ་ལྟུང་བའི་ངོ་བོ་ཉིད་རྣམ་པར་གཞག་པ། ལྟུང་བར་འགྱུར་བའི་རྒྱུ་མཚན། མི་འབྱུང་བའི་ཕྱིར་བསླབ་པ་དང་གསུམ། དང་པོ་ནི། ཐེག་པ་ཆེན་པོའི་ཆོས་ཐམས་ཅད་ཀྱི་རྩ་བ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་པའི་སྨོན་པའི་སེམས་དེ་སྤོང་བའོ། །གཉིས་པ་ནི། རྒྱུན་བཤགས་ཀྱི་སྐབས་སུ། རང་གཞན་དོན་ནི་རབ་བསྒྲུབ་ཕྱིར། །ཞེས་སོགས་དང་། རིགས་ལྔ་སྤྱིའི་དམ་ཚིག་གི་སྐབས་སུ། ཇི་ལྟར་དུས་གསུམ་མགོན་པོ་རྣམས། །ཞེས་གསུངས་པའི་ཕྱིར་རོ། །གསུམ་པ་ནི། སྨོན་པ་བྱང་ཆུབ་ཀྱི་སེམས་འདི་སངས་རྒྱས་ཀྱི་རྒྱུའི་གཙོ་བོ་ཡིན་སྙམ་དུ་བསམ་པའོ། །དྲུག་པ་ནི། རང་ངམ་གཞན་གྱི་གྲུབ་པའི་མཐའ། །ཆོས་ལ་སྨོད་པ་དྲུག་པ་ཡིན། །འདི་ལ་ཡང་སྔར་ལྟར་གསུམ་ལས། དང་པོ་ནི། རང་སྔགས་ཀྱི་ཐེག་པ་ལ་བྱས། གཞན་ཕ་རོལ་ཏུ་ཕྱིན་པའི་ཐེག་པ་ལ་བྱེད་པའམ། རང་ཕ་རོལ་ཏུ་ཕྱིན་པའི་ཐེག་པ་ལ་བྱས། གཞན་ཉན་ཐོས་ཀྱི་ཐེག་པ་ལ་བྱས་ཏེ། མདོར་ན་སངས་རྒྱས་པའི་གྲུབ་མཐས་བསྡུས་པའི་ཆོས་ཤིག་ལ་སྨོད་ཅིང་། གྲུབ་མཐའ་འཛིན་པ་ཕ་རོལ་པོས་གོ་བར་གྱུར་པའོ། །གཉིས་པ་ནི། འོད་དཔག་མེད་ཀྱི་དམ་ཚིག་གི་སྐབས་སུ། ཕྱི་དང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་གཟུང་། །ཞེས་གསུངས་པའི་ཕྱིར། གསུམ་པ་ནི། བདེ་བར་གཤེགས་པའི་བཀའ་ལ་ལམ་པོ་ཆེའི་འདུ་ཤེས་བསྒོམ་པར་བྱའོ། །བདུན་པ་ནི། ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་བདུན་པ་ཡིན། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། བླ་མེད་ཀྱི་བུམ་དབང་གི་འཇུག་པ་དང་དངོས་གཞིས་མ་སྨིན་པའི་གང་ཟག་ལ་གསང་བ་བསྒྲགས་ནའོ། །གསང་བ་སྒྲོགས་པ་ལའང་། གསང་བའི་རྫས། སྤྱོད་པ། ཆོས་སྒྲོགས་པ་དང་གསུམ་ལས། དང་པོ་ནི་རང་གི་དམ་ཚིག་རྫས་སུ་བཟུང་བའི་རྡོ་རྗེ་དྲིལ་བུ་ཅང་ཏེའུ་སོགས་ལ་འདི་དང་འདི་ཞེས་བསྒྲགས་པའི་སྒོ་ནས་བསྟན་པའོ། །གཉིས་པ་ནི་ཚོགས་འཁོར་དང་རབ་གནས་སོགས་བྱེད་པར་མ་སྨིན་པའི་སེམས་ཅན་འོང་དུ་བཅུག་པའམ། མ་བཅུག་ཀྱང་འདི་དང་འདི་ཞེས་བརྡ་སྤྲད་ནའོ། །གསུམ་པ་ནི་རིམ་གཉིས་ཀྱི་མན་ངག་ཟབ་མོ་བསྟན་པའམ། བླ་མེད་ཀྱི་རྒྱུད་ཀྱི་དོན་ཟབ་མོ་བསྟན་ན་འདི་རྩ་བའི་ལྟུང་བའོ། །རྒྱུ་མཚན་ནི། དབང་བསྐུར་གྱི་སྐབས་སུ་ཁས་བླངས་པའི་ཕྱིར་ཏེ། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་བྲལ་ཏེ་གཤེགས། །ཞེས་གསུངས་པའི་ཕྱིར་རོ། །གསུམ་པ་ནི། ནོར་བུ་དང་ལྡན་པའི་གང་ཟག་འཇིགས་པ་དང་བཅས་པའི་ལམ་ལ་འགྲོ་བའི་ཚེ་ཆོམ་རྐུན་ལ་སོགས་པ་ལ་ནོར་བུ་ཤོར་གྱིས་དོགས་ནས་གསང་བ་དེ་བཞིན་དུ། རང་གི་སྔགས་ཀྱི་ཉམས་ལེན་དེ་ཉིད་མི་མ་ཡིན་ལ་སོགས་པའི་བར་ཆད་ཀྱི་དབང་དུ་ཤོར་གྱིས་དོགས་ནས་ཤིན་ཏུ་གསང་བའི་སྒོ་ནས་བསླབ་པར་བྱའོ། །བརྒྱད་པ་ནི། ཕུང་པོ་སངས་རྒྱས་ལྔའི་བདག་ཉིད། །དེ་ལ་སྨོད་པ་བརྒྱད་པ་ཡིན། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། རང་གི་ཕུང་པོ་ལྔ་དང་པོ་ཉིད་ནས་དེ་བཞིན་གཤེགས་པ་རིགས་ལྔའི་རང་བཞིན་དུ་རྣམ་པར་དག་པ་ལ། དབང་གི་གནས་སྐབས་སུ་རྡོ་རྗེ་སློབ་དཔོན་གྱི་དེ་བཞིན་གཤེགས་པ་རིགས་ལྔའི་ངོ་བོར་བསྐྱེད་པ་དེ་ཉིད་ལ་འདི་ནི་རྒྱུ་ལས་ཉོན། འབྲས་བུ་སྡུག་བསྔལ་གྱི་བདེན་པ་མི་གཙང་བའི་སྣོད་ཅེས་སྨོད་པ་དང་དམའ་དབབ་པའི་སྒོ་ནས་རྒྱབ་རྡུང་དང་། ལུས་གདུང་བའི་ཕྱིར་སྨྱུང་གནས་སོགས་ཀྱི་སྒོ་ནས་ཟས་གཅོད་པར་བྱེད་ན་སྐབས་འདིར་བསྟན་གྱི་རྩ་ལྟུང་ངོ་། །གཉིས་པ་ནི། དབང་གི་སྐབས་སུ་ཕུང་པོ་ལྔ་དེ་བཞིན་གཤེགས་པ་རིགས་ལྔའི་ངོ་བོར་བསྐྱེད་པའི་ཕྱིར་རོ། །གསུམ་པ་ནི། རང་གི་ཕུང་པོ་ལྔ་དེ་བཞིན་གཤེགས་པའི་རིགས་ལྔའི་ངོ་བོར་བསྒོམ་པའོ། །དགུ་པ་ནི། རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ་ཡིན། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། ཆོས་ཉིད་དོན་དམ་པའི་བདེན་པ་རྣམས་རང་བཞིན་གྱིས་རྣམ་པར་དག་པ་དང་། ཆོས་ཅན་ཀུན་རྫོབ་པའི་དངོས་པོ་རྣམས་ལྷ་སོ་སོའི་ངོ་བོར་དག་པ་ཡིན་པ་ལ། ཡིན་ནམ་མིན་སྙམ་དུ་ཐེ་ཚོམ་ཟ་ན་སྐབས་འདིར་རང་བཞིན་གྱི་ལྟུང་བར་འགྱུར་ན་མཐའ་གཅིག་ཏུ་མིན་ནོ་སྙམ་དུ་འཛིན་ན་ལྟ་སྨོས་ཀྱང་ཅི་དགོས། གཉིས་པ་ནི། དམ་ཚིག་བསྒྲགས་པའི་སྐབས་སུ། ཆོས་ལ་ཡིད་གཉིས་མི་བྱ་ཞིང་། །ཞེས་སོགས་དང་། བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །ཞེས་གསུངས་པའི་ཕྱིར། གསུམ་པ་ནི། རྫོགས་པའི་སངས་རྒྱས་ཀྱི་ཆོས་ཐམས་ཅད་དག་པ་གསུམ་གྱི་བདག་ཉིད་དུ་གསུངས་པ་འདི་གདམས་པ་ཟབ་མོ་ཡིན་ནོ་སྙམ་དུ་སྒོམས་པར་བྱེད་དོ། །བཅུ་པ་ནི། གདུག་ལ་རྟག་ཏུ་བྱམས་ལྡན་པར། །བྱེད་པ་དེ་ནི་བཅུ་པར་འདོད། །ཅེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། རང་ངམ་ཡུལ་དེ་ཉིད་ཀྱི་རྡོ་རྗེ་སློབ་དཔོན་ལ་སྨོད་པའམ། སངས་རྒྱས་ཀྱི་བསྟན་པ་སྤྱི་ལ་གནོད་པའམ། སེམས་ཅན་མང་པོ་ལ་གནོད་པའམ། དཀོན་མཆོག་གསུམ་ལ་སྐུར་པ་འདེབས་པའམ། དེ་ལས་གཞན་མཚམས་མེད་པ་ལ་སོགས་པའི་ལས་ཤིན་ཏུ་ཆེན་པོ་བྱེད་པའི་གང་ཟག་དེ་ཉིད་ལ། རང་གི་མཛའ་བོའི་གྲོགས་ལྟར་ལུས་ངག་གི་བྱམས་པ་སྟོན་པ་དང་། རང་ཉིད་ལ་དེ་སྒྲོལ་བའི་ནུས་པ་ཡོད་བཞིན་དུ་མ་བསྒྲལ་བའམ། ནུས་པ་མེད་ན་གཞན་ལ་གསོལ་བ་མི་འདེབས་ན་འདིར་བསྟན་གྱི་གདུག་ལ་བྱམས་པ་སྟེ་རྩ་བའི་ལྟུང་བར་འགྱུར་རོ། །གཉིས་པ་ནི། དབང་གི་དམ་ཚིག་བསྒྲགས་པའི་སྐབས་སུ། གདུག་ལ་བྱམས་པ་ཉིད་མི་བྱ། །ཞེས་སོགས་གསུངས་པའི་ཕྱིར། གསུམ་པ་ནི། རང་གི་སྙིང་བརྩེ་བའི་བུ་བྱ་བ་ངན་པ་ལ་ཞུགས་པ་དེ་ཉིད་རྒྱབ་རྡུང་ལ་སོགས་པའི་སྒོ་ནས་བྱ་བ་བཟང་པོ་ལ་སྦྱོར་བ་དེ་བཞིན་དུ། དེ་ལྟ་བུའི་གདུང་བ་ཅན་གྱིས་གང་ཟག་ལམ་ལོག་ལ་ཞུགས་པ་དེ་ཉིད། སྙིང་བརྩེ་བའི་བསམ་པས་སྒྲོལ་བ་ལ་སོགས་པའི་སྒོ་ནས་ཡང་དག་པའི་ལམ་ལ་སྦྱོར་བར་བྱེད་དོ། །བཅུ་གཅིག་པ་ནི། མིང་སོགས་བྲལ་བའི་ཆོས་རྣམས་ལ། །དེ་རྟོག་པ་ནི་བཅུ་གཅིག་པ། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། ཆོས་ཐམས་ཅད་མིང་དང་མཚན་མ་དང་བྲལ་བ་ཡིན་པ་ལ་དེར་ཞེན་ན་རྩ་བའི་ལྟུང་བར་འགྱུར་ཏེ། བཅོམ་ལྡན་འདས་ཀྱི་ཆོས་ཐམས་ཅད་སྤྲོས་པའི་མཐའ་བཞི་དང་བྲལ་བར་གསུངས་པའི་མཐའ་དང་པོ་བཀག་ནས་མཐའ་གཉིས་པ་ཕན་ཆད་ལ་ཞེན་པའི་ལྟུང་བར་འགྱུར་བའི་ཕྱིར། གཉིས་པ་ནི། ཆོས་ཉིད་ཚད་ནི་གཟུང་མི་བྱ། །ཞེས་པ་དང་། བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །ཞེས་གསུངས་པའི་ཕྱིར། གསུམ་པ་ནི། ཆོས་ཐམས་ཅད་དོན་དམ་པར་སྤྲོས་པའི་མཐའ་བཞི་དང་བྲལ་ཞིང་། ཀུན་རྫོབ་སྒྱུ་མ་ལྟ་བུར་རྟེན་ཅིང་འབྲེལ་བར་འབྱུང་བའི་ཚུལ་གྱིས་བསླབ་པར་བྱའོ། །བཅུ་གཉིས་པ་ནི། སེམས་ཅན་དད་དང་ལྡན་པ་ཡི། །སེམས་སུན་འབྱིན་པ་བཅུ་གཉིས་པ། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། དཀོན་མཆོག་གསུམ་ལ་དད་པ་དང་ལྡན་པའི་སེམས་ཅན་གཅིག་གི་དད་ཡུལ་གྱི་དཀོན་མཆོག་གསུམ་གང་ཡང་རུང་བ་ལ་སྐྱོན་བརྗོད་ཅིང་། ཡུལ་དེའི་དད་པ་སུན་ཕྱུང་སྟེ་ཟློག་ན་འདིར་བསྟན་གྱི་ལྟུང་བར་འགྱུར་རོ། །གཉིས་པ་ནི། དམ་ཚིག་བསྒྲགས་པའི་སྐབས་སུ། སྐལ་ལྡན་སེམས་ཅན་སྤོང་མི་བྱ། །ཞེས་གསུངས་པའི་ཕྱིར། །གསུམ་པ་ནི། རང་གི་བུ་གཞོན་ནུ་བྱ་བ་ངན་པ་ལ་ཞུགས་པ་དེ་ཉིད་བྱ་བ་བཟང་པོ་ལ་འཛུད་པ་དེ་བཞིན་དུ། སེམས་ཅན་དཀོན་མཆོག་གསུམ་ལ་མ་དད་པ་རྣམས་དད་པར་བྱེད་པ་དང་། དད་པ་རྣམས་གོང་ནས་གོང་དུ་འཕེལ་བའི་ཕྱིར་སློབ་བོ། །བཅུ་གསུམ་པ་ནི། དམ་ཚིག་རྫས་ནི་ཇི་བཞིན་ཉིད། །མི་བསྟེན་པ་དེ་བཅུ་གསུམ་པ། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། བཟའ་བའི་དམ་ཚིག་གི་རྫས་ཚོགས་འཁོར་གྱི་ཆོ་ག་ཇི་ལྟ་བ་བཞིན་གྱིས་བྱིན་གྱིས་བརླབས་པ་དེ་ཉིད། མི་གཙང་བའི་སྒོ་ནས་མི་ཟ་བ་དང་། ཕྱི་དྲོའི་ཁ་ཟས་ཀྱི་ཉེས་པར་དོགས་ནས་མི་ཟ་བ་དང་། ཚུལ་འཆོས་ཀྱི་སྒོ་ནས་མི་ཟ་ན་རྩ་བའི་ལྟུང་བར་འགྱུར་རོ། །གཉིས་པ་ནི། དམ་ཚིག་རྟག་ཏུ་གཟུང་བར་བྱ། །ཞེས་གསུངས་པའི་ཕྱིར། གསུམ་པ་ནི། རྫོགས་པའི་སངས་རྒྱས་ཀྱིས་བཟའ་བའི་དམ་ཚིག་གི་རྫས་སུ་གསུངས་པ་དང་། རང་ཉིད་ཀྱི་ལུས་ལྷར་བསྐྱེད་པ་ལ་ལྷ་མཆོད་པ་བསམ་པས་བསླབ་པར་བྱའོ། །བཅུ་བཞི་པ་ནི། ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །ཞེས་པ་སྟེ། འདི་ལ་ཡང་སྔར་ལྟར་གསུམ་ལས། དང་པོ་ནི། བུད་མེད་གང་ཡང་རུང་བ་ཞིག་ལ། འདི་ནི་མི་གཙང་བའི་སྣོད་དོ། །གཡོ་སྒྱུ་ཆེའོ་ཞེས་སྐྱེས་པ་ལས་ཟུར་དུ་བཀར་ཏེ། བུད་མེད་ཀྱི་རྟེན་གྱི་སྒོ་ནས་སྨད་ན་རྩ་བའི་ལྟུང་བར་འགྱུར་རོ། །གཉིས་པ་ནི། བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །ཞེས་པའི་སྐབས་སུ། དོན་ཤེས་རབ་གྱི་ཕ་རོལ་ཏུ་ཕྱིན་པ་བདག་མེད་པ་དང་། བུད་མེད་དེ་མཚོན་པའི་རྟགས་ཤེས་རབ་ཀྱི་ཕ་རོལ་ཏུ་ཕྱིན་པ་ཁས་བླངས་པའི་ཕྱིར། གསུམ་པ་ནི། དོན་ཤེར་ཕྱིན་བདག་མེད་མ་ཡིན་ཞིང་། དེ་མཚོན་པའི་རྟགས་ཤེར་ཕྱིན་བུད་མེད་ཡིན་པས། བུད་མེད་ཐམས་ཅད་ལ་བདག་མེད་མའི་འདུ་ཤེས་བསྒོམ་པར་བྱའོ། །གཉིས་པ་བསྲུངས་པའི་ཕན་ཡོན་ནི། སྔགས་པས་འདི་དག་སྤངས་ན་ནི། །དངོས་གྲུབ་ངེས་པར་ཐོབ་པར་འགྱུར། །ཞེས་པས་བསྟན་ཏེ། དེ་ཡང་ཡིད་མཚན་རྟོགས་ལས་སྐྱོབ་པའམ། ཐབས་ཤེས་ཟུང་དུ་འབྲེལ་བའི་སྔགས་པས་རྩ་བའི་ལྟུང་བ་འདི་དག་སྤངས་ནས་དམ་ཚིག་དང་ལྡན་ན་ནི། སྐྱེ་བ་བཅུ་དྲུག་ཚུན་ཆད་དུ་མཆོག་གི་དངོས་གྲུབ་ངེས་པར་ཐོབ་པར་འགྱུར་རོ། །ཚོགས་འཁོར་དམ་ཚིག་ལྔ་པ་ལས། །གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་ཚུན་ཆད་དུ། །འགྲུབ་པར་རྫོགས་པའི་སངས་རྒྱས་གསུངས། །ཞེས་གསུངས་པའི་ཕྱིར་རོ། །གསུམ་པ་མ་བསྲུང་བའི་ཉེས་དམིགས་ནི། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་གཟུང་བར་འགྱུར། །དེ་ནི་སྡུག་བསྔལ་མྱོང་འགྱུར་ཏེ། །ཐུར་དུ་བལྟས་ཏེ་དམྱལ་བར་འགྲོ། །ཞེས་པ་སྟེ། དམ་ཚིག་སྲུང་བ་ལས་གཞན་དུ་དམ་ཚིག་ལས་ཉམས་ནས་སོར་མ་ཆུད་པས་གང་ཟག་དེ་ཉིད་བདུད་བཞིས་རིམ་གྱིས་གཟུང་བར་འགྱུར་ཏེ། དང་པོར་ཉོན་མོངས་པའི་བདུད་ཀྱིས་དུག་གསུམ་ལ་རང་དབང་མེད་པར་སྤྱོད་པར་བྱེད། དེ་ནས་ལྷའི་བུའི་བདུད་ཀྱིས་མི་མཚམས་པ་སྣ་ཚོགས་སྟོན་པར་བྱེད། དེ་ནས་འཆི་བདག་གི་བདུད་ཀྱིས་སྲོག་གི་དབང་པོ་རང་དབང་མེད་པར་འགག་པར་བྱེད། དེ་ནས་ཕུང་པོའི་བདུད་ཀྱིས་རྣམ་སྨིན་གྱི་ཕུང་པོ་བླངས་ཏེ་སྡུག་བསྔལ་སྣ་ཚོགས་མྱོང་བར་བྱེད་དོ། །མྱོང་ཚུལ་ནི་མགོ་ཐུར་དུ་བལྟས་ཏེ་དམྱལ་བར་འགྲོའོ། །བཞི་པ་མི་འབྱུང་བའི་ཕྱིར་དུ་སྐྱོང་བའི་ཐབས་ནི། དེ་བས་ང་རྒྱལ་བཅོམ་ནས་ནི། །བདག་ཉིད་མ་འཁྲུལ་ཤེས་པར་བྱ། །ཞེས་པ་སྟེ། ལྟུང་བ་བསྲུངས་པ་ལ་ཕན་ཡོན། མ་བསྲུངས་པ་ལ་ཉེས་དམིགས་ཡོད་པ་དེ་བས་ན། ལྟུང་བ་ཐམས་ཅད་འབྱུང་བའི་སྒོར་གྱུར་པའི་ང་རྒྱལ་བཅོམ་ནས་བསླབ་པར་བྱའོ། །འདིས་རྩ་བའི་ལྟུང་བ་འབྱུང་བའི་གང་ཟག་དེ་བསམ་པ་རང་བཞིན་དུ་གནས་པ་ཅིག་དགོས་པར་བསྟན་པས་རྟེན་གྱི་གང་ཟག་དང་། དྲན་ཤེས་བཞིན་མེད་པའི་འཁྲུལ་པ་ལས་ལོག་ནས། དྲན་ཤེས་བཞིན་གྱིས་ཟིན་པའི་མ་འཁྲུལ་པའི་སྒོ་ནས་ཇི་སྐད་བཤད་པའི་བསླབ་བྱ་སློབ་ཚུལ་གཉིས་ཀ་བསྟན་ཏོ། །ལྔ་པ་བྱུང་ན་ཕྱིར་བཅོས་པའི་ཐབས་ལ། ཡན་ལག་མ་ཚང་བ་ལྟུང་བ་ལས་ལྡང་བའི་ཚུལ་དང་། ཡན་ལག་ཚང་བ་སླར་ལེན་པའི་ཐབས་གཉིས། དང་པོ་ནི། མཉམ་པར་བཞག་པས་བླ་མ་ལ། །ཅི་འབྱོར་པ་ཡིས་མཆོད་བྱས་ནས། །ཞེས་པ་སྟེ། དྲན་ཤེས་བཞིན་གྱིས་མཉམ་པར་བཞག་པས་བླ་མ་ལ་ཅི་འབྱོར་བ་ཡིས་མཆོད་པ་དང་གསོལ་བ་འདེབས་པ་སོགས་ཀྱི་སྒོ་ནས། སྟོབས་བཞི་ལ་སོགས་པའི་བཤགས་པ་བྱའོ། །གཉིས་པ་ནི། གསུམ་ལ་སྐྱབས་འགྲོ་ནས་བརྩམ་སྟེ། །བྱང་ཆུབ་སེམས་སོགས་སྡོམ་པ་ནི། །གལ་ཏེ་བདག་ལ་ཕན་འདོད་ན། །སྔགས་པས་འབད་དེ་བཟུང་བར་བྱ། །ཞེས་པ་སྟེ། ཐུན་མོང་མ་ཡིན་པའི་སྐྱབས་འགྲོ་བླངས་པ་ནས་བརྩམ་སྟེ་སྨོན་པ་སེམས་བསྐྱེད་སོགས་བྱང་ཆུབ་སེམས་དཔའི་སྡོམ་པ་དང་། སོགས་ཀྱི་སྒྲས་སྔགས་ཀྱི་སྡོམ་པ་བླངས་ཏེ་སླར་ཡང་བསླབ་པར་བྱའོ། །གང་ཟག་གང་གིས་ན་མཐར་ཐུག་བདག་ལ་ཕན་པར་འདོད་པའི་སྔགས་པས་སོ། །གཉིས་པ་ཡན་ལག་གི་ལྟུང་བ་ལ་མདོར་བསྟན་པ་དང་། རྒྱས་པར་བཤད་པ་གཉིས། དང་པོ་ནི། ཡན་ལག་དམ་ཚིག་ཅེས་བྱ་བ། །ཞེས་པ་སྟེ། ཡན་ལག་ལྔ་ཆར་མ་ཚང་བས་རྩ་བའི་ལྟུང་བར་མི་འགྱུར་ཞིང་། ཡན་ལག་འགའ་ཞིག་ཚང་བས་དངོས་གྲུབ་མྱུར་དུ་ཐོབ་པ་ལ་གེགས་བྱེད་པས་ན་ཡན་ལག་དམ་ཚིག་ཅེས་བྱའོ། །གཉིས་པ་རྒྱས་པར་བཤད་པ་ལ། སོ་སོའི་ངོ་བོ། ཡན་ལག་གི་སྒྲ་དོན། མ་བསྲུངས་པའི་ཉེས་དམིགས། བསྲུངས་པའི་དུས་དང་བཞི། དང་པོ་ལ་དགུ་ཡོད་པའི་དང་པོ་ནི། དམ་ཚིག་དང་ནི་མི་ལྡན་པའི། །རིག་མ་བསྟེན་པར་དགའ་བ་དང་། །ཞེས་པ་སྟེ། དམ་ཚིག་དང་སྡོམ་པ་དང་མི་ལྡན་པའི་རིག་མ་ཡིད་ཀྱི་ཡུལ་དུ་བརྟེན་ན་ཡན་ལག་གི་ལྟུང་བར་འགྱུར་རོ། །དངོས་སུ་བསྟེན་ན་རྩ་ལྟུང་དུ་འགྱུར་རོ། །གཉིས་པ་ནི། ཚོགས་ཀྱི་འཁོར་ལོ་རྩོད་པ་དང་། །ཞེས་པ་སྟེ། ཚོགས་འཁོར་གྱི་གནས་སྐབས་སུ་ཁོང་ཁྲོ་བའི་བསམ་པ་མེད་པར་ཕན་ཚུན་ཁ་ཤགས་འགྱེད་ན་ཡན་ལག་གི་ལྟུང་བར་འགྱུར་རོ། །གསུམ་པ་ནི། གསང་བའི་ཆོས་ནི་སྟོན་པ་དང་། །ཞེས་པ་སྟེ། ཚོགས་འཁོར་གྱི་གནས་སྐབས་སུ་བསྒྲག་པར་བྱ་བ་ཆང་ལ་མ་ད་ན་དང་། ཤ་ལ་བ་ལ་ཞེས་པ་ལ་སོགས་པ་རྣམས། ཚོགས་འཁོར་མིན་པའི་གནས་སྐབས་སུ་དབང་བསྐུར་ཐོབ་པ་ལ་ཡང་འདི་དང་འདི་ཞེས་བྱ་བ་མིང་གིས་བརྗོད་ན་ཡན་ལག་གི་ལྟུང་བ་འབྱུང་ངོ་། །བཞི་པ་ནི། སེམས་ཅན་དད་དང་ལྡན་པ་ལ། །དམ་ཆོས་གཞན་དུ་སྟོན་པ་དང་། །ཞེས་པ་སྟེ། བླ་མེད་ཀྱི་དབང་བསྐུར་ཐོབ་ཅིང་རྫོགས་རིམ་གྱི་སྣོད་དུ་རུང་བའི་གང་ཟག་རྫོགས་རིམ་ལ་དད་པར་ཤེས་བཞིན་དུ་རྫོགས་རིམ་ལས་གཞན་དུ་བསྐྱེད་རིམ་བསྟན་ཏེ། ཁོ་བོ་འདོད་པའི་ཆོས་ནི་འདི་མིན་ནོ་སྙམ་དུ་སེམས་ཤིང་མ་དད་པ་ཡན་ལག་གི་ལྟུང་བར་འགྱུར་རོ། །ལྔ་པ་ནི། ཉན་ཐོས་དག་ཏུ་རློམ་བྱེད་པའི། །ནང་དུ་ཞག་བདུན་གནས་པ་དང་། །ཞེས་པ་སྟེ། ཉན་ཐོས་ཀྱི་ལྟ་སྤྱོད་ལ་མཆོག་ཏུ་འཛིན་ཞིང་། ཐེག་ཆེན་ལ་མ་དད་པའི་གང་ཟག་གི་ནང་དུ་ཞག་བདུན་གནས་ཏེ། རང་གི་གཏོར་མ་ལ་སོགས་པའི་ཆག་མེད་རྣམས་ཆག་ན་ཡན་ལག་གི་ལྟུང་བར་འགྱུར་ཞིང་། གལ་ཏེ་གཏོར་མ་ལ་སོགས་གསང་བའི་རྫས་བསྟན་ན་རྩ་ལྟུང་དུ་འགྱུར་བའི་གོ་སྐབས་ཀྱང་སྲིད་དོ། །དྲུག་པ་ནི། སྦྱོར་བ་ངེས་པར་མ་བྱས་པར། །སྐལ་མིན་གསང་བ་སྟོན་པ་དང་། །ཞེས་པ་སྟེ། བླ་མེད་ཀྱི་བུམ་པའི་དབང་བསྐུར་རྫོགས་པར་ཐོབ་ཀྱང་དབང་གོང་མ་གསུམ་རྫོགས་པར་མ་ཐོབ་པའི་གང་ཟག་ལ་རྫོགས་རིམ་བསྟན་ན་ཡན་ལག་གི་ལྟུང་བའོ། །བདུན་པ་ནི། གང་ཞིག་ཕྱག་རྒྱ་མི་མཁས་ལ། །ལུས་ཀྱི་ཕྱག་རྒྱ་སྟོན་པ་དང་། །ཞེས་པ་སྟེ། དབང་ཐོབ་པའི་གང་ཟག་འགའ་ཞིག ཕྱག་རྒྱའི་དེ་ཁོ་ན་ཉིད་མི་ཤེས་པ་ལ། རང་གི་དམ་ཚིག་གྱི་ཕྱག་རྒྱ་སེམས་མ་རྡོ་རྗེ་མ་ལ་སོགས་པའི་ཕྱག་རྒྱ་བསྟེན་ན་ཡན་ལག་གི་ལྟུང་བའོ། །བརྒྱད་པ་ནི། བསྙེན་སོགས་དག་པར་མ་བྱས་པར། །དཀྱིལ་འཁོར་ལས་ལ་འཇུག་པ་དང་། །ཞེས་པ་སྟེ། གྲངས་ཀྱི་བསྙེན་པ་བཞི་འབུམ་དང་། དེའི་བཅུ་ཆའི་སྦྱིན་སྲེག་སོགས་མ་བྱས་པར་དབང་བསྐུར་བ་དང་། ཚོགས་འཁོར་དང་། སྦྱིན་སྲེག་དང་། རྡུལ་ཚོན་གྱི་དཀྱིལ་འཁོར་ལ་སོགས་པའི་དཀྱིལ་འཁོར་གྱི་ལས་ལ་འཇུག་ན་ཡན་ལག་གི་ལྟུང་བའོ། །དགུ་པ་ནི། སྡོམ་པ་གཉིས་ཀྱི་བཅས་པ་ལས། །དགོས་པ་མེད་པར་འདའ་བ་དང་། །ཞེས་པ་སྟེ། སྡོམ་པ་འོག་མ་གཉིས་ཀྱི་བཅས་པ་ལས། དགོས་པ་མེད་པར་འདའ་བ་སྟེ་ཁྱད་གསོད་མེད་པར་འདས་ན་ཡན་ལག་གི་ལྟུང་བར་འགྱུར་རོ། །ཡན་ལག་གི་ལྟུང་བ་བརྒྱད་དུ་འདྲེན་པའི་ཚེ། གསུམ་པ་དང་བདུན་པ་གཅིག་ཏུ་འདྲེན་པ་ཡིན་ཏེ། གསུམ་པས་གསང་བའི་ཆོས་དང་། བདུན་པས་གསང་བའི་སྤྱོད་པ་བསྟན་པས་དེ་གཉིས་ཀྱི་གསང་བའི་ཡན་ལག་ཏུ་འགྱུར་བའི་ཕྱིར་རོ། །གཉིས་པ་ཡན་ལག་གི་སྒྲ་དོན་ནི། ཁ་ན་མ་ཐོ་བཅས་གྱུར་ཏེ། །སྔགས་པ་དེ་ཡི་དམ་ཚིག་ཟད། །ཅེས་པ་སྟེ། ཡན་ལག་གི་ལྟུང་བ་བྱུང་ན། ཁ་ན་མ་ཐོ་བ་སྦོམ་པོ་དང་བཅས་པར་འགྱུར་ཞིང་། སྔགས་པ་དེའི་དམ་ཚིག་རྣམས་རིམ་གྱིས་ཟད་པར་འགྱུར་བས་ན་ཡན་ལག་གི་ལྟུང་བ་ཞེས་བྱའོ། །གསུམ་པ་མ་བསྲུང་བའི་ཉེས་དམིགས་ནི། ཟད་པས་འགྲུབ་པར་མི་འགྱུར་ཞིང་། །བདུད་དང་སྡུག་བསྔལ་ཤིན་ཏུ་འཕེལ། །ཞེས་པ་སྟེ། དམ་ཚིག་ཟད་པས་དངོས་གྲུབ་མྱུར་དུ་འགྲུབ་པར་མི་འགྱུར་ཞིང་། སྔར་བཤད་པའི་བདུད་བཞིའི་ཆ་མཐུན་གྱིས་རིམ་བཞིན་བཟུང་ནས། བདུད་དང་སྡུག་བསྔལ་ཤིན་ཏུ་འཕེལ་བ་ཡིན་ནོ། །བཞི་པ་བསྲུང་བའི་དུས་ནི། ཉིན་དང་མཚན་མོ་ལན་གསུམ་དུ། །ཉིན་རེ་བཞིན་དུ་བཟླ་བར་བྱ། །ཞེས་བྱ་བ་སྟེ། ཉིན་དང་མཚན་མོར་ལན་གསུམ་གསུམ་འདོན་ཞིང་། ལྟུང་བ་བྱུང་མ་བྱུང་ལེགས་པར་བརྟགས་ནས། མ་བྱུང་ན་དགའ་བ་བསྒོམ་ཞིང་། གལ་ཏེ་བྱུང་ན་རང་རང་གི་ཕྱིར་བཅོས་བྱེད་པ་སྐབས་ཐོབ་ཀྱིས་ཤེས་པར་བྱའོ།། །།དེ་ལྟར་རྩ་ལྟུང་འཁྲུལ་སྤོང་མདོར་བསྡུས་པ་འདི་ནི། སློབ་མ་སྐལ་ལྡན་འགའ་ཞིག་གིས་དུས་ཡང་དང་ཡང་དུ་བསྐུལ་བའི་ངོར། ཨེ་ཝྃ་ཆོས་ལྡན་གྱི་དགོན་པར་ཤཱཀྱའི་དགེ་སློང་བསོད་ནམས་སེང་གེས་ལེགས་པར་སྦྱར་བའོ། །འདིས་འགྲོ་བ་དཔག་ཏུ་མེད་པ་ལ་ཕན་ཐོག་པར་འགྱུར་ཅིག། །།རྒྱལ་བ་ཀུན་གྱི་གསང་ཆེན་མཛོད། །བླ་མེད་རྡོ་རྗེ་ཐེག་པ་ཡི། །བསྟན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །