དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ།

དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ་བཞུགས་སོ།།

ན་མོ་གུ་རུ་བྷ་དྲཱ་ཡ། ཐོག་མར་བླ་མའི་ཞབས་ལ་ཕྱག་འཚལ་ནས། །རྡོ་རྗེ་འཆང་ལ་གཉིས་པའི་ཚིག་གིས་འདུད། །མཐུ་སྟོབས་དབང་ཕྱུག་ཞབས་ལ་ཕྱག་འཚལ་ཏེ། །ཟབ་དོན་གནད་ཀྱི་གསུང་སྒྲོས་བྲི་བར་བྱ། །འདིར་དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ་ལ་སྡོམ་ནི། བཀའ་སྲོལ་རྣམ་བཞིས་འབྱུང་ཁུངས་ངེས་བྱས་ཏེ། །དཀྱིལ་འཁོར་གྲངས་ཀྱིས་བསྒྲུབ་བྱ་ངོས་བཟུང་ནས། །སྦྱོར་དངོས་རྒྱས་བསྡུས་སྒོ་ནས་སྒྲུབ་བྱེད་བཤད། །ལུང་རིགས་གཉིས་ཀྱིས་གཙོ་བོ་བསྒྲུབས་བྱས་ནས། །དེ་ཉིད་མངོན་རྟོགས་བཅུ་བཞིས་རྟོགས་པ་བསྐྱེད། །རྣལ་འབྱོར་རྣམ་བཅུས་ཉམས་སུ་ལེན་པའི་ཐབས། །སྦྱང་གཞི་སྦྱོང་ཞིང་ལམ་བྱེད་རྣམ་བཞི་ཡིས། །ལམ་བྱེད་ཚུལ་འདི་བིརྺའི་མན་ངག་ཡིན། །ཞེས་པ་དོན་ཚན་བདུན་ལས། དང་པོ་བཀའ་སྲོལ་རྣམ་བཞིས་འབྱུང་ཁུངས་ངེས་པར་བྱ་བ་ནི། རྗེ་ས་སྐྱ་པ་ཆེན་པོ་ལ་བཀའ་བབས་བཞུགས་པའི་ཀྱེ་རྡོ་རྗེའི་བཀའ་སྲོལ་ལ། གཞུང་འགྲེལ་ལ་བརྟེན་པ་གསུམ་དང་། མན་ངག་ལ་བརྟེན་པ་གཅིག་སྟེ་བཞི་ལས། དང་པོ་ནི་རྗེ་བཙུན་ཆེན་པོས། བིརྺའི་རྗེས་འབྲང་ཌོམྦིའི་སྐོར། །ཡན་ལག་མེད་རྗེས་པདྨའི་སྐོར། །དམ་ཚིག་རྡོ་རྗེ་ནག་པོའི་སྐོར། །གཙོ་ཆེའི་ཆོས་སྣ་སུམ་ཅུ་དགུ། །ལམ་སྐོར་དགུ་ནི་ཁྱད་པར་རོ། །ཞེས་གསུངས་པའི་དང་པོ་བླ་མ་བིརྺ་པའི་རྗེས་སུ་འབྲང་བ་ཌོམྦི་ཧེ་རུ་ཀའི་སྐོར་ལ། ཐོག་མར་ཌོམྦི་བས་བསྐྱེད་རིམ་བདག་མེད་མའི་སྒྲུབ་ཐབས་བདུད་རྩི་འོད། རྫོགས་རིམ་ལྷན་ཅིག་སྐྱེས་གྲུབ། ལམ་གྱི་ཡན་ལག་ཚོགས་འཁོར་འདུ་བ་བསྒྲགས་པ་དང་བཅས་པ། དེ་ཉིད་བཅུ་པ་སྟེ་བཞི་མཛད། དེའི་སློབ་མ་ཨ་ལ་ལ་བཛྲ་གྱིས་སྐུ་རྡོ་རྗེ་ལྷ་དགུའི་མངོན་པར་རྟོགས་པ་ཕྱག་གཉིས་པའི་སྒྲུབ་ཐབས་ཞེས་བྱ་བ་མཛད་དོ། །དེའི་སློབ་མ་ནགས་ཁྲོད་པས་གཞུང་མཛད་པ་མི་སྣང་ལ། དེའི་སློབ་མ་སློབ་དཔོན་གརྦྷ་རི་པས། སྐུ་རྡོ་རྗེ་དཔའ་བོ་གཅིག་པའི་མངོན་པར་རྟོགས་པ་དྲན་པ་གཅིག་པ་ཞེས་བྱ་བ་མཛད། དེའི་སློབ་མ་བསོད་སྙོམས་པས་བདག་མེད་མ་དཔའ་མོ་གཅིག་པའི་སྒྲུབ་ཐབས་མཛད། དེའི་སློབ་མ་སློབ་དཔོན་མི་ཐུབ་ཟླ་བས་སྨིན་བྱེད་ཀྱི་ཆོ་ག་དཀྱིལ་ཆོག་བཟང་པོ་ཡོངས་གཟུང་། གྲོལ་ལམ་བསྐྱེད་རིམ་ལ་རིགས་ལྔ་ཆར་གྱི་སྒྲུབ་ཐབས་སྟོན་པ་གུར་རིགས་བསྡུས་ཀྱི་མངོན་རྟོགས། བྱེ་བྲག་ཏུ་མི་བསྐྱོད་པའི་རིགས་ཅན་རྣམས་ལ་ཀྱེ་རྡོ་རྗེ་ཡབ་ཀྱི་སྒྲུབ་ཐབས་ཡན་ལག་དྲུག་པ། ཡུམ་རྡོ་རྗེ་བདག་མེད་མའི་མངོན་པར་རྟོགས་པ། སྒྲུབ་ཐབས་གསུམ་ཆར་ལ་འཇུག་པའི་གཏོར་མའི་ཆོ་ག་དང་། རྫོགས་རིམ་ལ་གཏུམ་མོའི་འགྲེལ་ཆུང་མཛད་ཅེས་རྗེ་བཙུན་ཆེན་པོས་བཤད་ལ། ད་ལྟ་ཡོད་པའི་གཏུམ་མོའི་འགྲེལ་ཆུང་ནི། རྗེ་བཙུན་ག་ཡ་དྷ་རས་མཛད་པ་ཡིན་ཏེ། དེའི་འཇུག་ན་རྣལ་འབྱོར་གྱི་དབང་ཕྱུག་རཏྣ་ཤྲཱི་ཛྙཱ་ནས་མཛད་ཟེར་བ་སྣང་ལ། དེ་ག་ཡ་དྷ་རའི་མཚན་ཡིན་ནོ་གསུངས། དེ་དག་གི་རྒྱབ་རྟེན་དུ། དཀའ་འགྲེལ་ཀུ་མུ་ཏི་སྟེ་གཞུང་བདུན་མཛད་དོ། །དེའི་སློབ་མ་དགེ་སློང་དཔའ་བོ་རྡོ་རྗེས་དཀྱིལ་ཆོག བསྐྱེད་རིམ། རྫོགས་རིམ། རབ་གནས། སྦྱིན་སྲེག རོ་སྲེག ཚོགས་འཁོར། གཏོར་མ། མཆོད་པའི་ཆོ་ག་རྣམས་ལེའུ་རེ་རེར་བྱས་ནས་ཕྱོགས་གཅིག་ཏུ་བསྡེབས་པ་དཀྱིལ་འཁོར་གྱི་ཆོ་ག་རིན་ཆེན་འབར་བ་ཞེས་བྱ་བ་མཛད་དོ། །སློབ་དཔོན་དེས་རྗེ་བཙུན་འབྲོག་ལ་གདམས། དེས་མངའ་རིས་པ་གསལ་བའི་སྙིང་པོ་ལ། དེས་འཁོན་སྒྱི་ཆུ་བ་ཤཱཀྱ་འབར་ལ། དེས་རྗེ་ས་སྐྱ་པ་ཆེན་པོ་ལ་གདམས་སོ། །གཉིས་པ་བླ་མ་ཡན་ལག་མེད་པའི་རྡོ་རྗེའི་རྗེས་སུ་འབྲང་བ་པདྨ་བཛྲ་གྱི་སྐོར་ལ། གྲུབ་ཆེན་པདྨ་བཛྲ་གྱིས། སྨིན་བྱེད་དབང་གི་ཆོ་ག་ནས་གླིང་མར་གྲགས་པ། གྲོལ་བྱེད་ལ་བསྐྱེད་རིམ་སྒྲུབ་ཐབས་མཚོ་སྐྱེས། རྫོགས་རིམ་མར་མེའི་རྩེ་མོ་ལྟ་བུའི་གདམས་ངག ལམ་གྱི་ཡན་ལག་ཚོགས་འཁོར་དམ་ཚིག་ལྔ་པ། སྦྱིན་སྲེག་གི་ཆོ་ག བསྟོད་པ་ཉི་ཤུ་པ། དེ་ཐམས་ཅད་ཀྱི་རྒྱབ་རྟེན་དུ་རྩ་རྒྱུད་ཀྱི་དཀའ་འགྲེལ་པདྨ་ཅན་རྣམས་མཛད། རྗེ་བཙུན་གྱིས། གླེང་གཞིའི་འགྲེལ་པ། རྩའི་མངོན་པར་རྟོགས་པ་ཆེ་ཆུང་གཉིས། དུར་ཁྲོད་ཀྱི་འགྲེལ་པ་ཆེ་ཆུང་གཉིས། བརྡའི་འགྲེལ་པ། རྡོ་རྗེའི་གླུའི་འགྲེལ་པ་ཆེ་ཆུང་གཉིས་ཏེ། སྐབས་ཀྱི་འགྲེལ་ཆུང་བརྒྱད་ཀྱང་འདིའི་བཀའ་སྲོལ་དུ་བགྲང་ངོ་། །གྲུབ་ཆེན་དེས་ཨིནྡྲ་བྷཱུ་ཏི་ལ་གདམས་སོ། །དེ་ནས་རིམ་པ་བཞིན་ལྕམ་ལཀྵྨཱི། ནག་པོ་སྤྱོད་པ་བ། བྲམ་ཟེ་དཔལ་འཛིན། ག་ཡ་དྷ་ར། འབྲོག་མི། སེ་སྟོན། ཞང་དགོན་པ་བ་རྣམས་ལས་བརྒྱུད་དེ་རྗེ་ས་སྐྱ་པ་ཆེན་པོ་ལ་གདམས་སོ། །གསུམ་པ་བླ་མ་ནག་པོ་དམ་ཚིག་རྡོ་རྗེའི་རྗེས་སུ་འབྲང་བ་ནག་པོ་ཤཱནྟ་བྷ་དྲཱའི་སྐོར་ལ། སློབ་དཔོན་དེས། སྨིན་བྱེད་ཀྱི་དཀྱིལ་འཁོར་ཆོ་ག་གཞུང་འགྲེལ། བསྐྱེད་རིམ་ལ་ལྷ་དགུའི་སྒྲུབ་ཐབས། ཡབ་རྐྱང་པའི་སྒྲུབ་ཐབས། ཡུམ་རྐྱང་པའི་སྒྲུབ་ཐབས། རྫོགས་རིམ་གྱི་གཞུང་གཅིག་ཀྱང་ཡོད་པར་རྗེ་བཙུན་ཆེན་པོས་བཤད་ཀྱང་། དེ་ལྟ་དེའི་དཔེ་མི་སྣང་གསུང་། ལམ་གྱི་ཡན་ལག་ལ་ཚོགས་ཀྱི་འཁོར་ལོའི་ཆོ་ག སྦྱིན་སྲེག རོ་སྲེག རབ་གནས། མཆོད་རྟེན་གྱི་ཆོ་ག གཤིན་གྱི་ཆོ་ག་རྣམས་དང་། དེ་དག་གི་རྒྱབ་རྟེན་དུ་དཀའ་འགྲེལ་རྣལ་འབྱོར་རིན་པོ་ཆེའི་སྦྱོར་ཕྲེང་ཞེས་བྱ་བ་རྣམས་མཛད་དོ། །སློབ་དཔོན་དེས། རྗེ་འགོས་ལོ་ཙཱ་བ་ལ་གདམས། དེས་བླ་མ་མངའ་རིས་པ་ལ། དེས་འཁོན་སྒྱི་ཆུ་བ་ལ། དེས་རྗེ་ས་སྐྱ་པ་ཆེན་པོ་ལ་གདམས་སོ། །གཙོ་ཆེའི་ཆོས་སྣ་སུམ་ཅུ་དགུ་ནི། རྗེ་བཙུན་གྱིས་ཀྱེ་རྡོ་རྗེ་རྒྱུད་གསུམ་སོགས་ཆོས་སྣ་ལྔ་བཅུ་ང་བཞི་ཙམ་བགྲངས་ནས། དེའི་མཇུག་ཏུ་སྔར་གྱི་ཚིགས་བཅད་དེ་ཉིད་གསུངས་པས། དེའི་དགོངས་པ་རྗེ་བླ་མའི་་་་་་ཀུན་དགའ་བཟང་པོའི་བཞེད་པ་ཆོས་སྐོར་དང་པོ་ལ་རིན་ཆེན་འབར་བའི་དཀྱིལ་ཆོག་སོགས་རེ་རེ་ཡང་གཞན་གྱི་ཆོས་སྣ་རེ་རེ་དང་ཁྱད་པར་མེད་པས་དགུར་བགྲངས་ཏེ་ཉི་ཤུ་རྩ་གསུམ། ཆོས་སྐོར་གཉིས་པ་ལ་བདུན། གསུམ་པ་ལ་བཅུ་གཉིས་ཏེ། བཞི་བཅུ་ཞེ་གཉིས་ལས་ཌོམྦི་བའི་ལྷན་ཅིག་སྐྱེས་གྲུབ། མཚོ་སྐྱེས་ཀྱི་བསྐྱེད་རྫོགས་གཉིས་ཏེ་གསུམ་ནི། ལམ་སྐོར་དགུ་ནི་ཁྱད་པར་རོ། །ཞེས་པའི་ཁོངས་སུ་གཏོགས་པས་ལྷག་མ་སུམ་ཅུ་རྩ་དགུ་ལ་བཞེད་པར་མངོན་ཏེ། གནད་ཀྱི་ཟླ་ཟེར་གྱི་བགྲང་ལུགས་ཀྱི་འགྲོས་ལས་ཤེས་སོ། །ཡང་ན་རིན་ཆེན་འབར་བ་གཅིག་ཏུ་བགྲངས་ནས་ཆོས་སྐོར་དང་པོ་ལ་བཅོ་ལྔ། གཉིས་པ་ལ་སྐབས་ཀྱི་འགྲེལ་ཆུང་བརྒྱད་དང་བཅས་པས་བཅོ་ལྔ། གསུམ་པ་ལ་བཅུ་གཉིས་ཏེ་བཞི་བཅུ་ཞེ་གཉིས་ལས་འདོར་ལེན་སྔ་མ་བཞིན་དུ་བྱེད་པ་གང་རུང་ལས་མ་འདས་སོ། །གཉིས་པ་མན་ངག་ལ་བརྟེན་པ་ལ་རྣལ་འབྱོར་དབང་ཕྱུག་ནས་རྗེ་ས་སྐྱ་པ་ཆེན་པོའི་བར་སྙན་བརྒྱུད་འབའ་ཞིག་ཏུ་བཞུགས་པ། རྗེ་བཙུན་གོང་མ་རྣམས་ཀྱིས་ཕྱི་རབས་སྙན་བརྒྱུད་འཛིན་པར་མི་ནུས་པས་ཉམས་ཀྱི་དོགས་ནས་ཡིག་ཆར་བཏབ་པའི་རྐང་གྲངས་ལ་རྒྱུད་འཆད་པའི་གནས་སྐབས་ཀྱི་ཆོས་སྣའི་གྲངས་དང་། གསུང་ངག་ཉམས་སུ་ལེན་པའི་གནས་སྐབས་ཀྱི་ཆོས་སྣའི་གྲངས་གཉིས་ལས། དང་པོ་ནི། རྗེ་བཙུན་གྱི་དག་ལྡན་ལས་ཚོ་བཞིར་གསུངས་ཏེ། རྒྱུད་སྤྱི་ལ་དགོས་པའི་སྡོམ། རྒྱུད་སོ་སོ་ལ་དགོས་པའི་སྡོམ། རྡོ་རྗེ་ཐེག་པ་སྤྱི་དང་བྱེ་བྲག་རྒྱུད་འདིའི་རྣལ་འབྱོར་པ་ལ་དགོས་པའི་སྡོམ། སྦས་པའི་རྣལ་འབྱོར་པ་ལ་དགོས་པའི་སྡོམ་མོ། །དང་པོ་ནི། རྒྱུད་སྡེའི་དུམ་བུ་རྣམ་གཞག་མངོན་རྟོགས་དང་། སྟོང་ཐུན་གཉིས་ཀྱི་དོན་བསྡུས་བསྟོད་པ་གཉིས། །བདག་མེད་བསྟོད་པའི་རྣམ་འགྲེལ་དང་བཅས་པ། །ཀུན་ཏུ་དགོས་པའི་གཞུང་བདུན་འཐོར་མི་བྱ། །ཞེས་ཏེ་དང་པོ་ནི། ཚུལ་བཞི་རྩ་རྒྱུད་ཀྱི་དུམ་བུ་རྣམས་གོ་རིམ་དུ་བསྒྲིག་པ་ས་ཆེན་གྱི་མཛད་པའོ། །གཉིས་པ་ནི། ཚུལ་དང་པོ་གསུམ་གྱི་རྣམ་གཞག་རྒྱས་པ་རྩེ་མོས་མཛད་པའོ། །གསུམ་པ་ནི། ཚུལ་བཞི་པའི་རྣམ་གཞག་རྒྱས་པ་རྗེ་བཙུན་གྱིས་མཛད་པའོ། །བཞི་པ་ནི། དེ་གཉིས་ཀའི་བསྡུས་དོན་རྗེ་བཙུན་གྱིས་མཛད་པའོ། །ལྔ་པ་དང་དྲུག་པ་ནི། རྗེ་བཙུན་གྱིས་མཛད་པའི་ཡབ་ཀྱི་བསྟོད་པ་དཎྜ་ཀ་དང་། ཡུམ་གྱི་བསྟོད་པ་རིན་པོ་ཆེའི་ཕྲེང་བ་གཉིས་སོ། །ཁ་ཅིག་ཡུམ་གྱི་བསྟོད་པ་ཉིད་ལ། ས་དང་ལྷའི་རིམ་པ་ལྟར་བསྟོད་པ་དང་། འཕོ་བའི་རིམ་པ་ལྟར་བསྟོད་པ་གཉིས་ཡོད་པ་ལ་འདོད་པ་ནི་མི་འཐད་དེ། དེ་ལྟར་ན་དེ་གཉིས་ཀའི་དོན་བསྡུས་ཏེ་བསྟོད་པ་གཅིག་ཀྱང་ཡོད་པས་གསུམ་དུ་ཐལ་བའི་ཕྱིར་དང་། བསྟོད་པ་གཉིས་ཞེས་སྤྱིར་བསྟན་ནས་བདག་མེད་བསྟོད་པའི་རྣམ་འགྲེལ་ཞེས་བྱེ་བྲག་ཏུ་བཀར་བ་ཡང་དོན་མེད་པའི་ཕྱིར་རོ། །བདུན་པ་ནི་ཡུམ་གྱི་བསྟོད་པའི་རྣམ་འགྲེལ་རྗེ་ས་པཎ་གྱིས་མཛད་པའོ། །གཉིས་པ་ནི། རྒྱུད་དོན་སོ་སོའི་རྣམ་འགྲེལ་བསྡུས་དོན་བཅས། །གང་ལ་གང་དགོས་དེ་དེ་བླང་བྱ་སྟེ། །དེ་ལྟར་བཅུ་གསུམ་ལེགས་པར་བརྟས་བྱས་ན། །རྣམ་པར་ཕྱེ་བས་རྒྱུད་གསུམ་ཤེས་པར་འགྱུར། །ཞེས་ཏེ། རྩ་རྒྱུད་ཀྱི་འགྲེལ་པ་དག་ལྡན་དང་། དེའི་བསྡུས་དོན་གཉིས། གུར་གྱི་འགྲེལ་པ་གུར་རྒྱན་དང་། དེའི་བསྡུས་དོན་གཉིས། སམྦུ་ཊའི་འགྲེལ་པ་གནད་ཀྱི་གསལ་བྱེད་དང་། དེའི་བསྡུས་དོན་གཉིས་ཏེ་དྲུག་ལས། རྒྱུད་གཅིག་ཤེས་པར་འདོད་ན་གཉིས་དང་། གཉིས་ཤེས་པར་འདོད་ན་བཞི་དང་། གསུམ་ཆར་ཤེས་པར་འདོད་ན་དྲུག་ཆར་བླང་ཞེས་པའོ། །གསུམ་པ་ནི། སྨིན་བྱེད་ལྟུང་བའི་རྣམ་གཞག་སྒྲུབ་ཐབས་བཞི། །རབ་གནས་སྦྱིན་སྲེག་ཚོགས་ཀྱི་ཆོ་གར་བཅས། །རྡོ་རྗེ་དྲིལ་བུ་བགྲང་ཕྲེང་དགང་བླུགས་དང་། །ཐ་མའི་ཆོ་ག་མཆོད་རྟེན་སྒྲུབ་པ་སྟེ། །དེ་ལྟར་བཅུ་བཞི་དང་པོའི་ལས་ཅན་ནས། །བརྩམས་ཏེ་གང་ཟག་ཀུན་གྱིས་གཟུང་བར་བྱ། །ཞེས་ཏེ། སྨིན་བྱེད་ནི་དབང་གི་ཆུ་བོ། ལྟུང་བའི་རྣམ་གཞག་ནི་འཁྲུལ་སྤོང་ངོ་། །སྒྲུབ་ཐབས་བཞི་ནི། ཡབ་ཀྱི་སྒྲུབ་ཐབས་ཡན་ལག་བཞི་དྲུག་གཉིས། ཡུམ་གྱི་སྒྲུབ་ཐབས་ཡན་ལག་བཞི་དྲུག་གཉིས་ཡིག་ཆ་སོ་སོར་མེད་ཀྱང་རྗེ་བཙུན་གྱིས་མཛད་པའི་སྒྲུབ་ཐབས་གཅིག་ཉིད་ལ་དེ་གཉིས་གསལ་བར་འབྱུང་བས་བཞིའོ། །རབ་གནས་ནི་བཟང་པོ་དྲུག་གོ །སྦྱིན་སྲེག་ནི་ལས་བཞིའི་སྦྱིན་སྲེག་གོ །ཚོགས་ཀྱི་ཆོ་ག་ནི་ཚིམ་པ་དྲུག་པའོ། །རྡོ་རྗེ་དྲིལ་བུ་དང་བགྲང་ཕྲེང་གི་ཡིག་ཆ་ལོགས་ན་མེད་ཀྱང་། སམྦུ་ཊའི་འགྲེལ་པར་གསལ་བར་ཐོན་པའོ། །དགང་བླུགས་ཀྱི་ཡིག་ཆའང་ལོགས་ན་མེད་ཀྱང་ལས་བཞིའི་སྦྱིན་སྲེག་གི་ནང་དུ་མདོར་བསྡུས་པ་འབྱུང་ངོ་། །ཐ་མའི་ཆོ་ག་ནི་གཞན་ཕན་བདུད་རྩིའོ། །མཆོད་རྟེན་སྒྲུབ་པའི་ཡིག་ཆ་ལོགས་ན་མེད་ཀྱང་གུར་རྒྱན་དུ་ཅུང་ཟད་འབྱུང་ངོ་། །བཞི་པ་ནི། ལུས་རྒྱན་བཏུང་བའི་སྣོད་དང་གཟུང་བྱའི་རྫས། །རོལ་མོའི་ཆོ་ག་སྟན་དང་བགོ་བའི་གོས། །འདི་དག་ཧེ་རུ་ཀ་དཔལ་ཆས་དྲུག་སྟེ། །རྣམ་པར་ཕྱེ་ན་བཅུ་བཞིར་འགྱུར་པ་ཡིན། །ཞེས་ཏེ། བཅུ་བཞིར་འགྱུར་ཚུལ་ནི་ལུས་རྒྱན་ལ་རུས་པའི་རྒྱན་དྲུག་དང་། ཞག་གི་ཟོ་རིས་དང་། ཐལ་ཆེན་གྱི་ཚོམ་བུ་དང་། ཁྲག་གི་ཐིག་ལེ་སྟེ་བཞི། བཏུང་བའི་སྣོད་ནི་ཐོད་པ་སྟེ་གཅིག གཟུང་བའི་རྫས་ལ་ཁ་ཊྭཱཾ་ག་དང་། གྲི་གུག་གཉིས་དང་། རོལ་མོའི་ཆོ་ག་ལ་ཌཱ་མ་རུ་དང་། གསང་བའི་རྔེའུ་ཆུང་དང་། དུང་ཆེན་གྱི་གླིང་བུ་སྟེ་གསུམ། སྟན་ལ་མི་རོའི་སྟན་དང་། སྟག་ལྤགས་ཀྱི་སྟན་གཉིས། གོས་ལ་མི་ལྤགས་ཀྱི་གཡང་གཞི་དང་། སྟག་ལྤགས་ཀྱི་ཤམ་ཐབས་གཉིས་སུ་ཕྱེ་བའོ། །གཉིས་པ་གསུང་ངག་ཉམས་སུ་ལེན་པའི་ཆོས་སྣའི་རྐང་གྲངས་ནི། རྗེ་བཙུན་ཆེན་པོས་གླེགས་བམ་དཀར་ཆག་ཏུ་བཏབ་པའི་ཆོས་སྣ་དྲུག་ཅུ་པོ་རྣམས་ཏེ་འདིར་མ་སྤྲོས་སོ། །དབང་ཆུ་ཆེན་མོ་སོགས་བདུན་ནི་གཉིས་ཆར་ལ་ཐུན་མོང་དུ་དགོས་པས་དག་ལྡན་དང་། གླེགས་བམ་གྱི་དཀར་ཆག་གཉིས་ཆར་དུ་བགྲངས་པ་ཡིན་ནོ། །ལུགས་འདི་ལ་རིང་བརྒྱུད་ནི་བིརྺ་པ། ནག་པོ་པ། ཌཱ་མ་རུ་པ། ཨ་ཝ་དྷཱུ་ཏི་པ། ག་ཡ་དྷ་ར། འབྲོག་མི། སེ་སྟོན། ཞང་དགོན་པ་བ། དེས་ས་ཆེན་ལ་གདམས་པའོ། །ཉེ་བརྒྱུད་ནི། བླ་མེད་ཕྱོགས་ནི་རིས་བསྒྱུར་མིག་བཅས་པ། །རིག་བྱེད་ཀྱིས་གསལ་ལག་པས་མེ་ལ་བགོ །དེ་འོད་ཀུན་གསལ་ཆུ་གཏེར་འབྱུང་བར་བབ། །བློ་ལྡན་དོན་འདི་ཤེས་ན་སྨྲ་བར་གྱིས། །ཞེས་པ་ལྟར་ཤེས་པར་བྱའོ། །དེ་ལྟར་བཀའ་སྲོལ་བཞིའི་ནང་ནས་མན་ངག་ལུགས་ཀྱི་བསྐྱེད་པའི་རིམ་པ་འདིར་བཤད་པར་བྱ་བ་ཡིན་ནོ། །གཉིས་པ་དཀྱིལ་འཁོར་གྲངས་ཀྱི་བསྒྲུབ་བྱ་ངོས་གཟུང་བ་ནི། འོ་ན་བཀའ་སྲོལ་དེ་ལ་རྒྱུད་གསུམ་ནས་གསུངས་པའི་བསྒྲུབ་བྱ་དཀྱིལ་འཁོར་གྱི་གྲངས་དུ་ཞིག་ཡོད་ཅེ་ན། འདི་ལ་མཆོག་སྒྲུབ་པའི་དཀྱིལ་འཁོར་དང་། ལས་རྒྱས་པའི་ལྷའི་གྲངས་གཉིས་ལས་དང་པོ་ནི། རྩ་བའི་རྒྱུད་ལ་ཧེ་རུ་ཀ་བཞི། བདག་མེད་མ་དང་ལྔ། རྒྱུ་རྡོ་རྗེ་འཛིན་པ་དང་དྲུག་འབྱུང་ངོ་། །རྡོ་རྗེ་གུར་ལས། རིགས་བསྡུས་པ་དང་། རིགས་རྐྱང་གཉིས། དང་པོ་ལ་རྒྱས་པ་ལྷ་བཞི་བཅུ་ཞེ་ལྔ་མ་དང་། བསྡུས་པ་ལྷ་ཉེར་ལྔ་མ་གཉིས་འབྱུང་སྟེ། ལེའུ་ལྔ་པར། དཀྱིལ་འཁོར་རེ་རེ་བསྒོམ་པའམ། །ཡང་ན་བསྡུས་པའི་དཀྱིལ་འཁོར་རོ། །བརྒྱད་བརྒྱད་དབུས་སུ་གནས་པའམ། །ཡང་ན་ཉི་ཤུ་རྩ་ལྔའི་བར། །གང་ཚེ་དཀྱིལ་འཁོར་བསྡུས་པ་ཡི། །སྒོར་ནི་ལྕགས་ཀྱུ་ཞགས་པ་དང་། །ལྕགས་སྒྲོག་དེ་བཞིན་དྲིལ་བུ་ནི། །འཇུག་པའི་སྒོ་སྲུང་དགོད་པར་བྱ། །ཞེས་གསུངས་པའི་ཕྱིར་རོ། །རིགས་བསྡུས་གཉིས་ལ། སྒོ་བ་བཞི་བཀོད་པའི་ཚེ་ལྷ་ཞེ་དགུ་མ་དང་ཉེར་དགུ་མར་འགྱུར་རོ། །རིགས་བསྡུས་འདི་གཉིས་ཀྱང་གཙོ་བོ་གོ་འཕོ་བའི་གནད་ཀྱིས་དཀྱིལ་འཁོར་ལྔ་ལྔར་འགྱུར་ཏེ། གུར་ལས། སངས་རྒྱས་མགོན་པོ་གང་ཉིད་ཀྱི། །དཀྱིལ་འཁོར་དབུས་སུ་གང་གྱུར་པ། །དེ་ཉིད་ཀྱིས་ནི་དཀྱིལ་འཁོར་བརྗོད། །སྙིང་པོ་ཡོངས་གཟུང་དཀྱིལ་འཁོར་རོ། །ཞེས་སོ། །དེས་ན་རྒྱུད་འདིར་དངོས་སུ་རིགས་རྐྱང་གི་དཀྱིལ་འཁོར་ལྷ་དགུ་མ་ལྔ། རིགས་བསྡུས་ཀྱི་དཀྱིལ་འཁོར་རྒྱས་པ་ལྔ་བསྡུས་པ་ལྔ་སྟེ་བཅོ་ལྔ། བདག་མེད་མ་བཅུ་གསུམ་མ་དང་། བཅོ་ལྔ་མ་གཉིས་ཏེ་བཅུ་བདུན་གསུངས་ལ། ཧེ་རུ་ཀ་གསུམ་ལ་རྒྱུད་འདི་ན་དཔའ་བོ་གཅིག་པ་ལས་དཀྱིལ་འཁོར་མ་གསུངས་ཀྱང་རྩ་རྒྱུད་ཀྱི་འཁོར་ཁ་བསྐང་ནས་དཀྱིལ་འཁོར་གསུམ་བྱ་སྟེ། དེ་ལྟར་ན་དཀྱིལ་འཁོར་ཉི་ཤུ་འབྱུང་ངོ་། །དེ་ལ་བླ་མའི་མན་ངག་གིས་དཀྱིལ་འཁོར་དྲུག་ཅུ་རྩ་གཉིས་སུ་དབྱེ་སྟེ། མི་བསྐྱོད་པ་ལ་ཧེ་རུ་ཀ་བཞི་ཡོད་པ་བཞིན་རིགས་གཞན་ལ་ཡང་བཞི་བཞི་ཡོད་པས་རིགས་རྐྱང་གི་དཀྱིལ་འཁོར་ཉི་ཤུ། རིགས་བསྡུས་རྒྱས་པ་ཉི་ཤུ། བསྡུས་པ་ཉི་ཤུ། བདག་མེད་མའི་གཉིས་ཏེ་དྲུག་ཅུ་རྩ་གཉིས་སུ་བཞེད་པར་མངོན་རྟོགས་ལྗོན་ཤིང་ལས་བཤད་ལ། དེའི་སྟེང་དུ་གུར་རྒྱན་ལས། ཡང་འདིར་རིགས་བསྡུས་པ་ལས། བརྒྱད་དང་བཞིའི་དབུས་ན་བཞུགས་པ་ཡོད་པ་བཞིན་དུ་རིགས་རྐྱང་པ་ལའང་བཞིའི་དབུས་ན་བཞུགས་པ་དང་། བརྒྱད་ཀྱི་དབུས་ན་བཞུགས་པ་ཡོད་དོ། །ཞེས་སྦྱར་ན་བརྒྱད་ཀྱི་དབུས་ན་བཞུགས་པ་ཉི་ཤུ་ཐམ་པ་ཡོད་པས་ན། བཞིའི་དབུས་ན་བཞུགས་པའང་ཉི་ཤུ་ཐམ་པ་འབྱུང་བས། དཀྱིལ་འཁོར་བརྒྱད་ཅུ་རྩ་གཉིས་འབྱུང་བ་ཡིན་ནོ་ཞེས་བརྗོད་ཀྱང་འགལ་བ་མེད་དོ་ཞེས་བཤད་པས། རིགས་རྐྱང་བསྡུས་པའི་ལྷ་སྔ་མ་ལྔ་ལ་ཧེ་རུ་ཀ་བཞིས་ཕྱེ་བས་ཉི་ཤུ་འབྱུང་ལ། དེ་ལྟར་ན་གུར་ལས་བརྒྱད་ཅུ་རྩ་གཉིས་བཤད་དོ། །སམྦུ་ཊ་ལས་ཧེ་རུ་ཀ་བཞི། བདག་མེད་མ། ཡེ་ཤེས་མཁའ་འགྲོ་མ། བསྡུས་པའི་དཀྱིལ་འཁོར་རྡོ་རྗེ་དབྱིངས། དྲག་པོ་གདན་ཅན་ཏེ་དངོས་སུ་དཀྱིལ་འཁོར་བརྒྱད་འབྱུང་ལ། བརྟག་པ་བདུན་པ་དངོས་ལས། གང་གིས་གང་ཡང་ལྷའི་འཁོར་ལོའི་དབུས་སུ་བཅུག་པ་དེའི་མཚན་དུ་བརྟན་པར་གྱུར་བའི་རྡོ་རྗེའི་དཀྱིལ་འཁོར་ནི་མཁས་པས་བསྔགས་སོ། །ཞེས་གསུངས་པས་རྡོར་དབྱིངས་ཀྱི་དཀྱིལ་འཁོར་ལ་གཙོ་བོ་འཕོ་བའི་དབྱེ་བས་དཀྱིལ་འཁོར་ལྔར་འགྱུར་ཏེ། དེ་ལྟར་ན་མཆོག་སྒྲུབ་པའི་དཀྱིལ་འཁོར་བཅུ་གཉིས་སོ། །འོ་ན་གཙོ་བོ་དུ་མ་འཕོ་བས་དཀྱིལ་འཁོར་དེ་བས་མང་པར་འགྱུར་རོ་སྙམ་ན། རིགས་ལྔ་ཁོ་ན་གོ་འཕོ་བ་ཡིན་གྱི། ཡུམ་བཞི་མན་ཆད་ཀྱི་དཀྱིལ་འཁོར་ལ་བཀོད་པའི་ལྷ་རྣམས་གཙོ་བོར་གྱུར་པའི་མཆོག་སྒྲུབ་པའི་དཀྱིལ་འཁོར་མེད་དེ། དེ་ལས་རྒྱས་པའི་ལྷ་ཡིན་པའི་ཕྱིར་རོ། །དེ་ཡང་བརྟག་པ་བདུན་པ་དངོས་ལས། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་ལ་འཁོར་ལོའི་བདག་པོ་རྒྱལ་མོ་རྣམ་པར་སྒོམ་པར་བྱེད་དོ་ཞེས་སོ། །འདི་ཡང་ཡུམ་བཞི་ལས་རྒྱས་པའི་ལྷ་ཡིན་པས། གཙོ་བོར་གྱུར་པའི་དཀྱིལ་འཁོར་མེད་ཅེས་པའི་དོན་མ་ཡིན་ཏེ། དེ་ལྟར་ན་རིགས་བཞི་ལ་ཡང་མཚུངས་པའི་ཕྱིར་དང་། བཤད་མ་ཐག་པའི་ལུང་ཉིད་ལས་ཀྱང་གཙོ་བོར་གྱུར་པའི་དཀྱིལ་འཁོར་བསྒོམ་པར་གསུངས་པའི་ཕྱིར། དེས་ན་རིགས་བཞི་གཙོ་བོར་གྱུར་པའི་དཀྱིལ་འཁོར་ནི་མཆོག་སྒྲུབ་པ་ཡིན་ལ། ཡུམ་བཞི་གཙོ་བོར་གྱུར་པའི་དཀྱིལ་འཁོར་ནི་ལས་རྒྱས་པ་ཡིན་ཞེས་པའི་དོན་ཏེ། ལུང་ཉིད་ན་གསལ་ལོ། །འོ་ན་སམྦུ་ཊའི་བདག་མེད་མའི་སྐབས་ཀྱི་རྒྱུ་རྡོ་རྗེ་འཆང་མི་བགྲང་ངམ་སྙམ་ན། དེ་ནི་རྡོ་རྗེའི་དབྱིངས་ཀྱི་ཁོངས་སུ་འདུས་པས་མི་བགྲང་ངོ་སྙམ་མོ་ཞེས་མངོན་རྟོགས་ལྗོན་ཤིང་དུ་བཤད་ལ། འདིའི་དོན་ཨཱ་ལི་ཀཱ་ལི་མཉམ་སྦྱོར་བ། །ཞེས་སོགས་ཀྱི་ཚིགས་བཅད་གཉིས་རྒྱུད་གཉིས་ཆར་ལས་བདག་མེད་མའི་སྐབས་སུ་འབྱུང་བ་ཁྱད་པར་མེད་བཞིན་དུ། རྩ་རྒྱུད་ལས་དཀྱིལ་འཁོར་ལོགས་སུ་བགྲངས་ནས་སཾ་ཊར་དཀྱིལ་འཁོར་ལོགས་སུ་མི་བགྲང་བའི་རྒྱུ་མཚན་ནི། རྩ་རྒྱུད་དུ་ཧེ་རུ་ཀ་བཞི་ལས་ལོགས་སུ་རྒྱུད་གསུང་བ་པོ་རང་ཉིད་ཀྱི་དཀྱིལ་འཁོར་དགོས་པས་བགྲངས་ལ། སཾ་ཊར་ཧེ་རུ་ཀ་བཞི་ལས་ལོགས་སུ་རྒྱུད་གསུང་བ་པོ། སྟོན་པ་རང་ཉིད་ཀྱི་དཀྱིལ་འཁོར་དགོས་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་པས་འདི་ལོགས་སུ་མི་བགྲང་ཞེས་པའི་དོན་ཏོ། །དེ་ལྟར་ན་རྩ་རྒྱུད་དང་བཤད་རྒྱུད་རྡོ་རྗེ་གུར་གཉིས་རྒྱུད་གསུང་བ་པོ་སྟོན་པ་གཅིག་ཉིད་ཡིན་པས་དེའི་དཀྱིལ་འཁོར་རྩ་རྒྱུད་དུ་བཤད་ཅིང་གུར་ལས་མ་བཤད། སཾ་ཊར། རྒྱུད་གསུང་བ་པོའི་སྟོན་པ་ལོགས་སུ་ཡོད་པས་དེའི་དཀྱིལ་འཁོར་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་པས་བདག་མེད་མའི་སྐབས་སུ་དཀྱིལ་འཁོར་ལོགས་སུ་མི་མཛད་པའི་གནད་ཀྱང་འདི་ཉིད་ཡིན་ནོ། །འོ་ན་སཾ་ཊའི་བདག་མེད་མའི་སྐབས་ཀྱི་ཚིགས་སུ་བཅད་པ་གཉིས་ཀྱིས་ཅི་ཞིག་བྱ་སྙམ་ན་ལྷ་བཅུ་བདུན་མའི་རྒྱུ་རྡོ་རྗེ་འཆང་འབའ་ཞིག་བསྟན་པས་ཞལ་བརྒྱད་ཕྱག་བཅུ་དྲུག་པར་བྱ་བ་ཡིན་གྱི། ཞལ་གསུམ་ཕྱག་དྲུག་པར་བྱེད་ན། ཕྱག་མཚན་ཞལ་སོགས་གོང་མ་བཞིན། ཞེས་པའི་དོན་ལ་སྙོགས་པ་མེད་པའི་སྐྱོན་ཡོད་དོ། །རྡོ་རྗེ་སེམས་དཔའ་ཉིད་གྱུར་ནས། །རྡོ་རྗེ་ཅན་གྱིས་རྡོ་རྗེ་དབབ། །ཅེས་པ་ལ་སྙེག་ཅེས་པ་ནི་དེར་ཕྱག་མཚན་ཞལ་སོགས་མ་བཤད་པས་སྙེག་མི་སྙེག་ཁྱད་པར་མེད་དོ། །དེ་ལྟར་ན་རྩ་རྒྱུད་ལས་དཀྱིལ་འཁོར་དྲུག རྡོ་རྗེ་གུར་ལས་བརྒྱད་ཅུ་རྩ་གཉིས། སམྦུ་ཊ་ལས། བཅུ་གཉིས་ཏེ་ཐམས་ཅད་དྲིལ་བས་རྒྱུད་གསུམ་ནས་གསུངས་པའི་མཆོག་སྒྲུབ་པའི་དཀྱིལ་འཁོར་བརྒྱ་ཐམ་པ་འབྱུང་བ་འདི་ནི། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པ་ཡིན་ནོ། །འདིར་ཁ་ཅིག རྩ་རྒྱུད་ཀྱི་དཀྱིལ་འཁོར་དྲུག་པོ་ལོགས་སུ་མི་བགྲང་སྟེ། ཧེ་རུ་ཀ་བཞི་བདག་མེད་མ་དང་ལྔ་ནི་གུར་ནས་གསུངས་པའི་ལྔ་པོའི་ཁོངས་སུ་འདུ་ལ། རྒྱུ་རྡོ་རྗེ་འཆང་ནི་རྡོ་རྗེ་དབྱིངས་གྱི་ཁོངས་སུ་འདུ་བས་མི་བགྲང་ཞེས་རྗེ་བཙུན་གསུང་ཞེས་པ་དང་། སམྦུ་ཊའི་ཧེ་རུ་ཀ་ལྔ་ལ་ཡང་རིགས་ལྔ་ལྔར་ཕྱེ་བས། དཀྱིལ་འཁོར་ཉི་ཤུ་རྩ་ལྔ་རྡོ་རྗེ་དབྱིངས་ཀྱི་དཀྱིལ་འཁོར་ལྔ་དང་སུམ་ཅུ། གུར་ནས་གསུངས་པའི་དཀྱིལ་འཁོར་བརྒྱད་ཅུ་དང་བཅས་པས་བརྒྱ་དང་བཅུ་པོ་ནི། ཀྱེ་རྡོ་རྗེའི་དཀྱིལ་འཁོར་ཡིན་པས་དེའི་སྟེང་དུ་བདག་མེད་མའི་དཀྱིལ་འཁོར་གཉིས་ཏེ། རྒྱུད་གསུམ་ནས་གསུངས་པའི་དཀྱིལ་འཁོར་བརྒྱ་དང་བཅུ་གཉིས་སུ་གྲངས་ངེས་པ་ཡིན་ནོ་ཞེས་བཞེད་དོ། །འདི་མི་འཐད་དེ། རྩ་རྒྱུད་ཀྱི་ཧེ་རུ་ཀ་གསུམ་ཡང་གུར་ནས་གསུངས་པའི་ཧེ་རུ་ཀ་གསུམ་དང་མི་འདྲ་སྟེ། རྩ་རྒྱུད་ལས་མངོན་པར་རྟོགས་པ་རྒྱས་པའི་སྐབས་སུ་ཡང་གཞལ་ཡས་ཁང་མེད་པར། སྲུང་འཁོར་དུར་ཁྲོད་དང་བཅས་པའི་དབུས་སུ་པདྨ་འདབ་བརྒྱད་ཀྱི་ལྟེ་བར་རྒྱུ་རྡོ་རྗེ་འཆང་དང་། ཞུ་བ་གླུས་བསྐུལ་སོགས་མེད་པར་མངོན་བྱང་ལྔ་ལས་གཙོ་བོ་བསྐྱེད་ནས་འཁོར་གྱི་ལྷ་མོའི་ཐུགས་ཀ་ན་སྤྲོ་བ་ཡིན་ལ། གུར་གྱི་ཧེ་རུ་ཀ་གསུམ་གྱི་སྐབས་སུ་གཞལ་ཡས་ཁང་དང་། རྒྱུ་རྡོ་རྗེ་འཆང་དང་། ཞུ་བ་གླུས་བསྐུལ་སོགས་ཡན་ལག་དྲུག་པ་ཇི་ལྟ་བ་བཞིན་མཛད་པའི་ཕྱིར་དང་། འཁོར་གྱི་ལྷ་མོ་ཡང་རྩ་རྒྱུད་དུ་མཆོད་པའི་ལྷ་མོ་བརྒྱད་ཡིན་ལ། གུར་དུ་སྙིང་པོ་ཀྱེ་རྡོ་རྗེ་རིགས་ལྔའི་འཁོར་གྱི་ལྷ་མོ་རྣམས་ཁ་བསྐང་དགོས་པའི་ཕྱིར་ཏེ། གཞན་དུ་ན་ཧེ་རུ་ཀ་གསུམ་ལ་རིགས་ལྔར་ཕྱེ་བའི་དཀྱིལ་འཁོར་དུ་བྱེད་པའི་ཚེ་འཁོར་གྱི་ལྷ་མོ་ཐམས་ཅད་ཁྱད་པར་མེད་པར་འགྱུར་བའི་སྐྱོན་ཡོད་པའི་ཕྱིར། རྩ་རྒྱུད་ཀྱི་ཧེ་རུ་ཀ་བཞི་པ་དང་གུར་གྱི་ཧེ་རུ་ཀ་བཞི་པའི་དཀྱིལ་འཁོར་ཡང་གཏན་མི་འདྲ་སྟེ། གཙོ་བོའི་ཞལ་ཕྱག་ཕལ་ཆེར་འདྲ་ཡང་སྤྱི་བོའི་མཚོན་བྱེད་མི་འདྲ་བ་དང་། འཁོར་གྱི་ལྷ་མོ་ནི་གཽ་རཱི་སོགས་ཀྱི་མིང་ཙམ་འདྲ་ཡང་སྐུ་མདོག་ཕྱག་མཚན་གཏན་མི་འདྲ་བའི་ཕྱིར་རོ། །རྗེ་བཙུན་གྱིས་རྩ་རྒྱུད་ཀྱི་རྒྱུ་རྡོ་རྗེ་འཆང་རྡོ་རྗེ་དབྱིངས་ཀྱི་ཁོངས་སུ་འདུས་པས་ལོགས་སུ་མི་བགྲང་བར་གསུངས་ཞེས་པ་ནི། མངོན་སུམ་ལ་སྨྱོན་འདིངས་པ་སྟེ། ལྗོན་ཤིང་དུ་རྩ་རྒྱུད་ཀྱི་རྒྱུ་རྡོ་རྗེ་འཆང་ལོགས་སུ་བགྲངས་ནས། སཾ་ཊའི་བདག་མེད་མའི་སྐབས་ཀྱི་རྒྱུ་རྡོ་རྗེ་འཆང་ལོགས་སུ་མི་བགྲང་བའི་དོགས་གཅོད་དུ་རྡོ་རྗེ་དབྱིངས་ཀྱི་ཁོངས་སུ་འདུས་པ་གསུངས་པའི་ཕྱིར་རོ། །སཾ་ཊའི་ཧེ་རུ་ཀ་ལྔ་ལ་རིགས་ལྔ་ལྔར་ཕྱེ་བའི་དཀྱིལ་འཁོར་ཉི་ཤུ་རྩ་ལྔར་བྱེད་ན་སྙིང་པོ་ཀྱེ་རྡོ་རྗེ་ལ་རིགས་ལྔར་ཕྱེ་བའི་ཚེ། ཕྱག་མཚན་དང་། འཁོར་གྱི་ལྷ་མོ་མི་འདྲ་བ་ཚན་པ་ལྔ་ཇི་ལྟར་ཐོན། དེ་མ་ཐོན་ན་ཧེ་རུ་ཀ་གཞན་རྣམས་ལ་དེའི་འགྲོས་ཇི་ལྟར་སྦྱར། ལེགས་པར་དཔྱད་ན་ངོས་གཟུང་ཡེ་མེད་དོ། །གུར་གྱི་ཧེ་རུ་ཀ་བཞི་ལ་རིགས་ལྔ་ལྔར་ཕྱེ་བའི་མཚུངས་པ་སྦྱར་བ་ཡིན་ན་ནི་སཾ་ཊའི་ཧེ་རུ་ཀ་ལྔ་ལ་རིགས་ལྔ་ལྔར་ཕྱེ་ནས་ཉི་ཤུ་རྩ་ལྔ་ལ་རིགས་བསྡུས་རྒྱས་བསྡུས་གཉིས། རིགས་རྐྱང་རྒྱས་བསྡུས་གཉིས་གཉིས་སུ་ཕྱེ་བས་དཀྱིལ་འཁོར་བརྒྱ་ཐམ་པ་བྱེད་པ་ཡང་ཅིའི་ཕྱིར་མི་མཚུངས་ལེགས་པར་སོམས། གཞན་ཡང་སཾ་ཊའི་ཡེ་ཤེས་མཁའ་འགྲོ་མ་ལྷ་བཅུ་གསུམ་གྱི་དཀྱིལ་འཁོར་རྒྱུད་དང་། རྗེ་བཙུན་རྩེ་མོས་མཆོག་སྒྲུབ་པའི་དཀྱིལ་འཁོར་དུ་དངོས་སུ་གསུངས་པ་དེའི་སྟོང་འདབ་དགོས་ཏེ། ཁྱེད་རང་གི་བརྒྱ་དང་བཅུ་གཉིས་པོ་དེའི་ནང་དུ་མི་འདུག་པའི་ཕྱིར་རོ། །དེས་ན་གུར་གྱི་སྙིང་པོ་ཀྱེ་རྡོ་རྗེ་ལ་རིགས་ལྔར་ཕྱེ་ནས་ཕྱག་མཚན་དང་འཁོར་གྱི་ལྷ་མོ་མི་འདྲ་བ་ཚན་པ་ལྔ་དངོས་སུ་གསུངས་པའི་འགྲོས། ཧེ་རུ་ཀ་གཞན་གསུམ་ལ་ཡང་སྦྱར་ནས་རིགས་རྐྱང་བསྡུས་ཀྱི་དཀྱིལ་འཁོར་བརྒྱད་ཅུ་ཐམ་པ་འབྱུང་བ་དང་། སཾ་ཊར་སྙིང་པོ་ཀྱེ་རྡོ་རྗེ་ལ་དེ་ལྟར་མ་གསུངས་པས་དེ་འདྲའི་དབྱེ་བ་མི་བྱེད་པ་འདི་ནི་རྗེ་བཙུན་ས་སྐྱ་པ་ཡབ་སྲས་ཀྱི་འཆད་ཚུལ་ཐུན་མོང་མ་ཡིན་པ་ཡིན་པས་བསྐལ་བ་དང་ལྡན་པ་དག་གིས་ཡིད་ཆེས་པའི་གནས་སུ་གྱིས་ཤིག གཉིས་པ་ལས་རྒྱས་པའི་དཀྱིལ་འཁོར་ནི་རྩ་བའི་རྒྱུད་ལས་ལྷ་མོ་བརྒྱད། གུར་ལས་ལྷའི་རྣལ་འབྱོར་ཉེར་བརྒྱད། སཾ་ཊའི་བརྟག་པ་གཉིས་པའི་བཞི་པ་ལས་ལྷའི་རྣལ་འབྱོར་བཅུ་གཅིག བརྟག་པ་བདུན་པར་བཅུ་བདུན། བརྒྱད་པར་ཕྲེང་བ་དང་འབྲེལ་པ་དང་། རྫོགས་རིམ་དང་འབྲེལ་བའི་ལྷའི་རྣལ་འབྱོར་གཉིས་ཏེ་རྒྱུད་གསུམ་ལས་གསུང་པའི་ལས་རྒྱས་པའི་ལྷའི་རྣལ་འབྱོར་དྲུག་ཅུ་རྩ་དྲུག་གསུངས་སོ། །གསུམ་པ་སྦྱོར་དངོས་རྒྱས་བསྡུས་སྒོ་ནས་སྒྲུབ་བྱེད་བཤད་པ་ནི། འོ་ན་ལྷའི་རྣལ་འབྱོར་དེ་དག་སྒྲུབ་པར་བྱེད་པའི་མངོན་པར་རྟོགས་པ་ཇི་ལྟར་ཞེ་ན། འདི་ལ་སྔོན་འགྲོ། དངོས་གཞི། རྗེས་རྫོགས་པར་བྱེད་པ་ལམ་གྱི་ཡན་ལག་དང་གསུམ་ལས། དང་པོ་ལ་ཡང་གསུམ་སྟེ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ལ་ཡང་རྒྱས་བསྡུས་དུ་མ་ཡོད་དེ། བསྡུས་པ་ཚད་མེད་བཞི་བསྒོམ་པ་དང་། དེ་ལས་རྒྱས་པ་ཚོགས་ཞིང་སྤྱན་དྲངས་ནས་མཆོད་པ་བསྣན་པ་དང་། དེ་ལས་རྒྱས་པ་ཡན་ལག་བདུན་པ་བསྣན་པ་དང་། དེ་ལས་རྒྱས་པ་རིགས་ལྔའི་སྡོམ་གཟུང་བསྣན་པ་དང་བཞིའོ། །དེ་ལྟར་ན་སྔོན་འགྲོ་རྒྱས་པ་ནི། བསོད་ནམས་ཚོགས་བསག་རྒྱས་པ་གཉིས་པོ་གང་རུང་དང་། ཡེ་ཤེས་ཚོགས་བསག་དང་། སྲུང་འཁོར་བསྒོམ་པ་གསུམ་ག་བྱ་བའོ། །འབྲིང་ནི་སྲུང་འཁོར་མི་བསྒོམ་པར་ཚོགས་གཉིས་བསག་པ་རྒྱས་པར་བྱ་བའོ། །བསྡུས་པ་ནི་བསོད་ནམས་ཚོགས་བསག་ཚད་མེད་བཞི་ཙམ་ལ་བསྡུས་ནས། ཡེ་ཤེས་ཚོགས་བསག་ལ་འཇུག་པའོ། །སྔོན་འགྲོ་བསྡུས་པ་འདི་ནི་ལས་རྒྱས་པ་ལས་མཆོག་བསྒྲུབ་པ་ལ་མི་འཇུག་གོ །ཞེས་རྗེ་བཙུན་རྩེ་མོས་གསུངས་ལ། རྗེ་བཙུན་གྱིས་ནི་བརྟག་པ་གཉིས་པའི་ལེའུ་གསུམ་པ་དཔང་པོར་བྱས་ན་མཆོག་བསྒྲུབ་པ་ལ་ཡང་འཇུག་པར་མངོན་ནོ། །ཞེས་གསུངས། དེའི་དོན་ལེའུ་གསུམ་པར་ཧེ་རུ་ཀ་གསུམ་ལ་བསྐྱེད་ཆོག་རྒྱས་འབྲིང་བསྡུས་གསུམ་གསུངས་པའི་དང་པོ་གཉིས་ལ། སྔོན་འགྲོ་བསྡུས་པ་འཇུག་ཀྱང་དེ་ནི་དཔའ་བོ་གཅིག་པ་བསྐྱེད་པ་ལས་རྒྱས་པའི་མངོན་རྟོགས་ཡིན་པ་ནི་རྩེ་མོའི་དགོངས་པ་ཡིན་ལ། སྤྱིར་ཧེ་རུ་ཀ་གསུམ་མཆོག་སྒྲུབ་པ་ཡིན་པས་དེ་ལ་སྔོན་འགྲོ་བསྡུས་པ་འཇུག་པ་རྗེ་བཙུན་གྱི་དགོངས་པའོ། །གཉིས་པ་ལ་གསུམ་སྟེ། བསྐྱེད་ཆོག་ཡོངས་སུ་རྫོགས་པ་རྒྱས་པ་དང་། འབྲིང་དང་། བསྡུས་པའོ། །དང་པོ་ལ་ཡང་གསུམ་སྟེ། ཏིང་ངེ་འཛིན་གསུམ་གྱིས་འཆིང་བ་དང་། ཡན་ལག་དྲུག་གིས་འཆིང་བ། བསྙེན་སྒྲུབ་ཡན་ལག་བཞིས་འཆིང་བའོ། །དང་པོ་ནི་སམྦུ་ཊ་དང་། རྡོ་རྗེ་རྩེ་མོའི་དགོངས་པ་སྟེ། རྡོ་རྗེ་རྩེ་མོ་ལས། དང་པོ་སྦྱོར་བའི་ཏིང་འཛིན་གྱིས། །རྣལ་འབྱོར་པས་ནི་སྙོམས་འཇུག་བྱ། །དེ་ནས་དཀྱིལ་འཁོར་རྒྱལ་པོ་མཆོག །དེ་ནས་ཡང་ནི་ལས་རྒྱལ་པོ། །ཞེས་གསུངས་པས། གཙོ་བོ་བསྐྱེད་པ་དང་པོ་སྦྱོར་བ། འཁོར་གྱི་ལྷ་མོ་སྤྲོ་བ། ཡེ་ཤེས་པ་གཞུག་པ། དབང་བསྐུར་རིགས་བདག་གི་རྒྱས་བཏབ་པ། མཆོད་བསྟོད་བདུད་རྩི་མྱང་བའི་བར་དཀྱིལ་འཁོར་རྒྱལ་མཆོག ཕྲ་ཐིག་ལ་སོགས་པ་ལ་སློབ་པ་ནི་ལས་རྒྱལ་མཆོག་གོ །གཉིས་པ་ནི། རྡོ་རྗེ་གུར་གྱི་དགོངས་པ་སྟེ། གུར་ལས། སངས་རྒྱས་གནས་ནི་རྫོགས་པ་དང་། །ཀུན་ཏུ་བཟང་པོའི་རང་བཞིན་དང་། །རང་གི་ལྷག་པའི་ལྷར་བསྒྲུབ་དང་། །མཆོད་བསྟོད་བདུད་རྩི་མྱང་ལ་སོགས། །རྣལ་འབྱོར་ཡན་ལག་དྲུག་ཏུ་འདོད། །ཅེས་གསུངས་ཏེ། སངས་རྒྱས་གནས་ནི་རྫོགས་པ་ནི། གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་སྟེ། ཆོས་འབྱུང་བསྐྱེད་པ་ནས་གདན་བསྐྱེད་པའི་བར་རོ། །ཀུན་ཏུ་བཟང་པོའི་རང་བཞིན་ནི། རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་སྟེ། རྒྱུ་རྡོ་རྗེ་འཆང་བསྐྱེད་པ་ནས། ཡེ་ཤེས་ཀྱི་འཁོར་ལོ་གཞུག་པའི་བར་རོ། །རང་གི་ལྷག་པའི་ལྷར་བསྒྲུབ་པ་ནི། དབང་བསྐུར་བ་མི་བསྐྱོད་པའི་ཡན་ལག་སྟེ། དབང་ལྷ་སྤྱན་དྲང་བ་ནས་རིགས་བདག་གིས་རྒྱས་གདབ་པའི་བར་རོ། །མཆོད་བསྟོད་བདུད་རྩི་མྱང་བ་གསུམ་ནི། དངོས་སུ་བསྟན་པ་དེ་ཉིད་དོ། །སོགས་ཀྱིས་རྗེས་རྫོགས་པར་བྱེད་པ་ལམ་གྱི་ཡན་ལག་བསྟན་ནོ། །གསུམ་པ་ནི། རྩ་རྒྱུད་བརྟག་གཉིས་དང་། གསང་བ་འདུས་པའི་དགོངས་པ་སྟེ། རྩ་རྒྱུད་ལས། དང་པོ་སྟོང་ཉིད་བྱང་ཆུབ་སེམས། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་པ་སྟེ། དང་པོ་སྟོང་ཉིད་ཅེས་པས་ཡེ་ཤེས་ཚོགས་བསག་བྱང་ཆུབ་སེམས་ཞེས་པས་དམ་ཚིག་པ་བསྐྱེད་པ་བསྙེན་པའི་ཡན་ལག གཉིས་པ་ལ་ནི་ས་བོན་བསྡུ། །ཞེས་པས་སྐྱེ་མཆེད་དང་སྐུ་གསུང་ཐུགས་བྱིན་གྱིས་རློབ་པའམ། སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་ཉེར་སྒྲུབ་ཀྱི་ཡན་ལག གསུམ་པ་ལ་ནི་གཟུགས་བརྙན་རྫོགས། །ཞེས་པས་ཡེ་ཤེས་པ་གཞུག་པ་སྒྲུབ་པའི་ཡན་ལག བཞི་པ་ལ་ནི་ཡིག་འབྲུ་དགོད་ཅེས་པས་དབང་བསྐུར་ནས། རིགས་ཀྱི་བདག་པོའི་རྒྱས་གདབ་པའམ། དབང་མ་བསྐུར་བར་དབུ་རྒྱན་རང་ཆས་ཅན་དུ་བསམ་པ་སྒྲུབ་པ་ཆེན་པོའི་ཡན་ལག་བསྟན་ནོ། །འདིས་བསྙེན་སྒྲུབ་ཡན་ལག་བཞི་བསྟན་པར་གང་ལས་ཤེས་ན། འདུས་པའི་རྒྱུད་ཕྱི་མ་ལས། ཐ་མལ་པ་ནི་རྡོ་རྗེ་བཞི། །ཡེ་ཤེས་རྡོ་རྗེ་མཆོག་རྣམས་སོ། །དང་པོ་སྟོང་ཉིད་བྱང་ཆུབ་སེམས། །ཞེས་སོགས་སྔར་དྲངས་པ་ལྟར་གསུངས་སོ། །དེས་རྡོ་རྗེ་རྣམ་བཞིར་བསྟན་གྱི་ཡན་ལག་བཞི་ཇི་ལྟར་བསྟན་སྙམ་ན། འདུས་པའི་རྩ་རྒྱུད་ལེའུ་བཅུ་གཉིས་པ་ལས། བསྙེན་པའི་དམ་ཚིག་རབ་སྦྱོར་བ། །བྱང་ཆུབ་མཆོག་ནི་བསྒོམ་པར་བྱ། །ཉེ་བར་སྒྲུབ་པ་སྒྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་དཔྱད། །སྔགས་ཀྱི་བདག་པོ་བསྒོམ་པ་ཡིས། །བསྒྲུབ་པའི་ཚེ་ན་བསྐུལ་བར་གསུངས། །སྒྲུབ་པ་ཆེན་པོ་བྱེད་པའི་ཚེ། །དབུ་རྒྱན་ལ་ནི་རིགས་བདག་བསམ། །རྡོ་རྗེ་རྣམ་བཞི་འདི་དག་གིས། །ཐ་མལ་བསྒྲུབ་པའི་བསྙེན་པ་བྱ། །ཞེས་རྡོ་རྗེ་རྣམ་བཞི་བསྙེན་སྒྲུབ་བཞིར་གསུངས་པས་ཤེས་སོ། །གསང་འདུས་རྩ་རྒྱུད་ཀྱི་ཚིགས་བཅད་གཉིས་པོ་འདིའི་དོན། འདུས་པ་འཕགས་ལུགས་པས་བསྙེན་སྒྲུབ་ཡན་ལག་བཞིར་སྦྱོར་ཚུལ་དང་། ཡེ་ཤེས་ཞབས་ལུགས་པས་སྦྱོར་ཚུལ་དང་། རྣལ་འབྱོར་དབང་ཕྱུག་གི་སྦྱོར་ཚུལ་དང་མི་འདྲ་བ་གསུམ་ལས། འདིར་ནི་ཕྱི་མ་དེ་ཉིད་དོ། །དངོས་གཞི་རྒྱས་པ་འདི་གསུམ་རྒྱུད་གསུམ་གྱི་དཀྱིལ་འཁོར་གང་ལ་སྦྱོར་ཞེ་ན། སམྦུ་ཊའི་རྡོ་རྗེ་དབྱིངས་ཀྱི་དཀྱིལ་འཁོར་ལྔ་ལ་ཏིང་ངེ་འཛིན་གསུམ་དང་། ཡན་ལག་བཞིས་འཆིང་། གུར་རིགས་བསྡུས་ཀྱི་དཀྱིལ་འཁོར་རྣམས་ལ་ཏིང་ངེ་འཛིན་གསུམ་དང་། ཡན་ལག་དྲུག་དང་། ཡན་ལག་བཞི་གསུམ་ཆར་གྱིས་འཆིང་། རིགས་རྐྱང་རྣམས་དང་། བདག་མེད་མ་གཉིས་དང་རྩ་རྒྱུད་ཀྱི་དྲུག་ནི་ཡན་ལག་དྲུག་དང་། ཡན་ལག་བཞིས་འཆིང་། སམྦུ་ཊའི་ལྷག་མ་རྣམས་དང་། ལས་རྒྱས་པའི་ལྷ་རྣམས་ནི་ཡན་ལག་བཞིས་འཆིང་ཞིང་། མཆོད་བསྟོད་བདུད་རྩི་མྱང་བ་གསུམ་པོ་སྦྱར་བ་ནི་ཡན་ལག་ཡིན་གྱི། དངོས་གཞིར་མི་བྱེད་དོ། །དེས་ན་དངོས་གཞི་རྒྱས་པ་འདིའི་སྐབས་སུ་རྣལ་འབྱོར་དབང་ཕྱུག་གི་དགོངས་པས་བསྙེན་སྒྲུབ་ཡན་ལག་བཞི་མ་ཚང་བ་ནི་མཆོག་ཐུན་མོང་སྒྲུབ་པ་གང་ལ་ཡང་མི་བཞེད་དེ། སྔར་གྱི་དེ་གསུམ་ཆར་ལ་ཡང་བསྙེན་སྒྲུབ་ཡན་ལག་བཞི་ཚང་བས་སོ། །ལྗོན་ཤིང་ལས་ཀྱང་ཚིག་འདི་སྐབས་འདིར་འབྱུང་ཞིང་མཇུག་ཏུ་རྒྱས་པའི་དབང་དུ་བྱས་པའོ། །ཞེས་གསུངས་ཏེ་འཁྲུལ་པ་མེད་དོ། །གཉིས་པ་འབྲིང་པོ་ནི་ཏིང་ངེ་འཛིན་གསུམ་དང་། ཡན་ལག་དྲུག་གིས་འཆིང་བ་ནི་མེད་ལ། སྔར་གྱི་ཡན་ལག་བཞིས་འཆིང་ན། མཆོད་བསྟོད་ལ་སོགས་པ་མེད་པར་བཟླས་པ་ལ་འཇུག་པ་ཉིད་དོ། །ཡན་ལག་དྲུག་པ་ལ་འབྲིང་པོར་བཤད་པ་ནི་བསྐྱེད་ཆོག་གི་དབང་དུ་བྱས་པ་ཡིན་ལ། འདིར་རྒྱས་པར་བཤད་པར་ནི་དངོས་གཞིའི་ཆིངས་རྒྱས་པའི་དབང་དུ་བྱས་པ་ཡིན་པས་མི་འགལ་ལོ། །གསུམ་པ་བསྡུས་པ་ལ་གཉིས་ལས། དང་པོ་ནི། དམ་ཚིག་པ་བསྐྱེད་པ་བསྙེན་པའི་ཡན་ལག སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་ཉེར་སྒྲུབ་ཀྱི་ཡན་ལག ཡེ་ཤེས་པ་གཞུག་པ་སྒྲུབ་པའི་ཡན་ལག དབང་མི་བསྐུར་བར་དབུ་རྒྱན་རང་ཆས་ཅན་དུ་བསམ་པ་སྒྲུབ་པ་ཆེན་པོའི་ཡན་ལག་གོ །བསྡུས་པ་གཉིས་པ་ནི་དམ་ཚིག་སེམས་དཔའ་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་བཟླས་པ་ལ་འཇུག་པ་ཉིད་དོ། །བསྡུས་པ་དང་པོ་འདི་ནི་རྗེ་ས་ཆེན་གྱིས་ཁྲོ་བཅུའི་མངོན་རྟོགས་དང་། རྗེ་བཙུན་གྱིས་དག་ལྡན་དུ་ཧེ་རུ་ཀ་གསུམ་གྱི་བསྐྱེད་ཆོག་དང་པོ་གཉིས་དང་། གུར་རྒྱན་དུ་འབྱུང་པོ་བརྒྱད་གསུམ་ཉི་ཤུ་རྩ་བཞི་དང་རྩ་ལྟུང་འཁྲུལ་སྤོང་དུ་དམ་ཚིག་རྡོ་རྗེའི་མངོན་རྟོགས་ལ་སྦྱར་བར་མཛད་དོ། །བསྡུས་པ་ཕྱི་མ་ནི་ལམ་འབྲས་ཀྱི་ཡིག་ཆར་རྡོ་རྗེ་སེམས་དཔའ་དང་། རྡོ་རྗེ་མཁའ་འགྲོའི་མངོན་རྟོགས་ལ་སྦྱར་བར་མཛད་དོ། །བསྡུས་པ་དང་པོ་འདི་ལ་རྗེ་བཙུན་རྩེ་མོས། འབྲིང་པོ་ལ་གཉིས་སུ་བྱས་པའི་ཕྱི་མར་མཛད་དེ། གནད་གཅིག་ཏུ་ཤེས་པར་བྱའོ། །དེ་ལྟ་བུའི་དངོས་གཞི་ལ་དམ་ཚིག་པ་བསྐྱེད་པའི་བསྐྱེད་ཆོག་ལ་ཚུལ་མི་འདྲ་བ་ལྔ་སྟེ། མངོན་བྱང་ལྔ་ལས་བསྐྱེད་པ་དང་། རྡོ་རྗེ་ཆོ་ག་ཡན་ལག་གསུམ་མམ་བཞི་ལས་བསྐྱེད་པ་དང་། སྙིང་པོ་ཚིག་ཙམ་ལས་བསྐྱེད་པ་དང་། དབུགས་ཀྱི་སྤྲོ་བསྡུ་ལས་བསྐྱེད་པ་དང་། འབྱིན་པའི་ཚུལ་གྱིས་བསྐྱེད་པའོ། །དང་པོ་ལ་མཉམ་སྦྱོར་དང་། མི་མཉམ་སྦྱོར་གཉིས་ལས། དང་པོས་ནི་བསྡུས་པའི་དཀྱིལ་འཁོར་གྱི་གཙོ་བོ་དང་། རྒྱུའི་རྡོ་རྗེ་འཆང་དང་། རིགས་བསྡུས་ཀྱི་གཙོ་བོ་རྣམས་བསྐྱེད་དོ། །གཉིས་པས་ནི་རིགས་སོ་སོར་བ་རྣམས་དང་། བདག་མེད་མ་བསྐྱེད་དོ། །ཧེ་རུ་ཀ་གསུམ་ལ་ནི་མི་མཉམ་སྦྱོར་དང་། རྡོ་རྗེ་ཆོ་ག་གསུམ་དང་། སྙིང་པོ་ཚིག་ཙམ་ལས་བསྐྱེད་པ་གསུམ་ཀ་འཇུག་གོ །དྲག་པོའི་གདན་ཅན་ནི་སྙིང་པོ་ཚིག་ཙམ་དང་ཡེ་ཤེས་མཁའ་འགྲོ་མ་ནི་དབུགས་ཀྱི་སྤྲོ་བསྡུ་ལས་བསྐྱེད་དོ། །འབྱིན་པའི་ཚུལ་གྱིས་བསྐྱེད་པ་ནི་རིགས་བསྡུས་པའི་དཀྱིལ་འཁོར་དང་། ཕྱག་བཞི་པ་དང་། དྲུག་པ་དང་། བཅུ་དྲུག་པའི་འཁོར་རྣམས་སོ། །ལས་རྒྱས་པའི་ལྷ་རྣམས་ལ་རྡོ་རྗེ་འཇིགས་བྱེད་མ་གཏོགས་པ་གཞན་ཐམས་ཅད་སྙིང་པོ་ཚིག་ཙམ་ལས་བསྐྱེད་པར་གཞུང་དུ་གསལ་ཡང་། བླ་མའི་མན་ངག་གིས་རྡོ་རྗེ་ཆོ་ག་གསུམ་དང་། སྙིང་པོ་ཚིག་ཙམ་འདམ་ཁ་ཅན་དུ་གསུངས། སྐྱེ་མཆེད་བྱིན་གྱིས་རློབ་པའི་ལྷ་རྣམས་ནི་ས་བོན་ཙམ་ལས་བསྐྱེད་དེ། འདིའི་སྙིང་པོ་ཚིག་ཙམ་ནི་ས་བོན་ལས་བསྐྱེད་པ་ཉིད་ལ་བཞེད་པར་སྣང་ངོ་། །གསུམ་པ་རྗེས་རྫོགས་པར་བྱེད་པ་ལམ་གྱི་ཡན་ལག་ལ་བཟླས་པ་དང་། སྤྱོད་ལམ་དང་། ཐུན་མཚམས་ཀྱི་བྱ་བ་དང་། ཁ་ཟས་དང་། གཏོར་མ་དང་། ཉལ་བ་དང་། ལྡང་བའི་རྣལ་འབྱོར་ཞེས་བྱ་བ་བདུན་ནི་ཀུན་གྱི་ཐུན་མོང་བ་ཡིན་ལ། མཆོག་སྒྲུབ་པའི་དཀྱིལ་འཁོར་ལ་ནི་དག་པ་རྗེས་སུ་དྲན་པ་ཞེས་བྱ་བ་ཁྱད་པར་གྱི་ཆོས་སོ་ཞེས་བྱ་བ་རིན་པོ་ཆེ་བསོད་ནམས་རྩེ་མོ་གསུང་ངོ་། །བཞི་པ་ལུང་རིགས་གཉིས་ཀྱི་གཙོ་བོ་བསྒྲུབ་པ་ལ་གཉིས་ཏེ། ཐུན་མོང་མ་ཡིན་པའི་རྩ་བཤད་གཉིས་ཀྱི་གཙོ་བོ་བསྒྲུབ་པ་དང་། ཐུན་མོང་གི་བཤད་རྒྱུད་ཀྱི་གཙོ་བོ་བསྒྲུབ་པའོ། །དང་པོ་ལ་གཉིས་ཏེ། ཕྱག་བཅུ་དྲུག་པ་ཡབ་ཡུམ་གཙོ་བོར་བསྒྲུབ་པ་དང་། དེ་ལས་མི་བསྐྱོད་པའི་རིགས་གཙོ་བོར་བསྒྲུབ་པའོ། །དང་པོ་ནི། འོ་ན་མཆོག་བསྒྲུབ་པའི་དཀྱིལ་འཁོར་དེ་རྣམས་ཀྱི་ནང་ནས། གཙོ་བོ་གང་ཡིན་སྙམ་ན། རྩ་བའི་རྒྱུད་དང་། རྡོ་རྗེ་གུར་གཉིས་ལས་ནི་སྙིང་པོ་ཀྱེ་རྡོ་རྗེ་ཕྱག་བཅུ་དྲུག་པའི་དཀྱིལ་འཁོར་དང་། བདག་མེད་ལྷ་མོ་བཅོ་ལྔའི་དཀྱིལ་འཁོར་གཉིས་པོ་གཙོ་བོ་ཡིན་ཏེ། རྩ་རྒྱུད་ལས། བདག་མེད་རྣལ་འབྱོར་ལྡན་པ་འམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང་། །དངོས་གྲུབ་འདོད་པས་མི་གནས་སོ། །ཞེས་གསུངས་ཤིང་། དེའི་དོན་རྣམ་བཤད་དག་ལྡན་ལས། བདག་ནི་གང་ཟག་གི་བདག་དང་། ཆོས་ཀྱི་བདག་གོ །མེད་པ་ནི་དེས་སྟོང་པ་སྟེ། ང་མེད་ན་ང་ཡིར་འཛིན་པ་ཡང་མེད་པས་བདག་གཉིས་ཀྱིས་སྟོང་པའོ། །དེ་ནི་ལྟ་བའམ་ཡེ་ཤེས་སོ། །དེའི་རྣམ་པ་གང་ལ་ཡོད་པ་ནི་བདག་མེད་རྣལ་འབྱོར་ཏེ། ལེའུ་བརྒྱད་པར་བསྟན་པ་གང་ཡིན་པའོ། །ཡང་ན་དཔལ་ཧེ་རུ་ཀ་ཞེས་བྱ་བ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བྱ་བའོ། །དེའང་ལྟ་བའམ་ཡེ་ཤེས་སོ། །དེའི་རྣམ་པ་ནི་ཞལ་བརྒྱད་ཕྱག་བཅུ་དྲུག་པ། ཞབས་བཞི་པ་ལ་སོགས་པའི་མཚན་ཉིད་དང་ལྡན་པའོ། །གཞན་པའི་སེམས་ཀྱིས་ཞེས་བྱ་བ་ནི་བདག་མེད་གཉིས་དང་། ཡེ་ཤེས་དང་བྲལ་བའི་ལྷ་གཞན་ཀུ་རུ་ཀུལླེ་ལ་སོགས་པ་ཤེས་རབ་ཀྱི་རྣལ་འབྱོར་གཞན་དང་། ཕྱག་གཉིས་པ་ལ་སོགས་པའི་ཐབས་ཀྱི་རྣལ་འབྱོར་གཞན་ལ་གནས་པར་མི་བྱའོ། །ཇི་ལྟར་ཞེ་ན། འབྲས་བུ་འབྱུང་བ་མེད་པའི་ཕྱིར་དང་། དཔལ་གྱི་འོས་མ་ཡིན་པའི་ཕྱིར་རོ། །དེ་ལ་འབྲས་བུ་འབྱུང་བ་མེད་པ་ནི་སྤྱིར་གསང་སྔགས་པ་འབྲས་བུ་ལམ་དུ་བྱེད་པས་རྒྱུ་འདྲ་བས་འབྲས་བུ་འདྲ་བ་སྒྲུབ་པར་བྱེད་པ་ལས་ལོངས་སྤྱོད་རྫོགས་པའི་སྐུ་ཞལ་བརྒྱད་ཕྱག་བཅུ་དྲུག་པ་ཡིན་ལ། དེ་རྣམ་པ་གཞན་གྱིས་ཐོབ་པར་ག་ལ་འགྱུར། ལོངས་སྤྱོད་རྫོགས་པའི་སྐུ་དེ་ལྟར་བཞུགས་པར་ཅིས་ཤེས་སྙམ་ན། ཆོས་ཀྱི་སྐུའི་དབང་དུ་བྱས་ནས་རྣམ་པ་གཞན་དཔལ་གྱི་འོས་མ་ཡིན་པའི་ཕྱིར་ཏེ། ཆོས་ཀྱི་སྐུ་ནི་སྟོང་པ་དང་། སྙིང་རྗེ་གཉིས་སུ་མེད་པ་ཡིན་ལ། སྟོང་པ་ཉིད་ནི་ཕྱག་བཅུ་དྲུག་དང་། རྟོགས་པའི་ཁྱད་པར་ནི་ཞལ་བརྒྱད་དུ་སྤྲུལ་ལ། སྙིང་རྗེའི་སྤྱོད་པ་ནི་བསྡུ་བའི་དངོས་པོ་བཞི་ཞབས་བཞིར་སྤྲུལ་ཏོ། །དེ་བས་ན་རྣམ་པ་འདིར་རིགས་སོ། །གལ་ཏེ་རྣམ་པ་དེ་ལྟ་བུ་གཞན་ལའང་སྦྱར་དུ་རུང་མོད་སྙམ་ན། བདེན་མོད་ཀྱི་བཅོམ་ལྡན་འདས་ཀྱི་ཆོས་རྣམས་ནི་གདུལ་བྱ་གང་དང་གང་གིས་འདུལ་བ་ལ་དེ་དང་དེའི་རྣམ་པ་གཙོ་བོར་སྟོན་པ་ཡིན་པས་རྒྱུད་འདིར་སྟོན་པས་དེ་ལྟ་བུའི་རྣམ་འཕྲུལ་གཙོ་བོར་གྱུར་པ་མཛད་ནས་ཆོས་གསུངས་སོ། །དེ་བས་ན་གཙོ་བོ་ཡིན་པའི་ཕྱིར་འདི་ཁོ་ན་བསྒོམ་པར་རིགས་སོ་ཞེས་གསུངས་ལ། དེའི་དོན་ཡང་ཆོས་ཀྱི་སྐུའི་ཡོན་ཏན་གྱི་ཕྱོགས་རེ་ཙམ་ཕྱག་གཉིས་པ་ལ་སོགས་པའི་རྣམ་པ་གཞན་གྱིས་ཀྱང་མཚོན་པར་ནུས་ཀྱང་། ཡོན་ཏན་ཡོངས་སུ་རྫོགས་པ་གཟུགས་སྐུའི་རྣམ་པས་མཚོན་ནུས་པ་ནི་རྒྱུད་འདིའི་ལུགས་ཀྱི་ཞལ་བརྒྱད་ཕྱག་བཅུ་དྲུག་པ་ཁོ་ན་ཡིན་པའི་ཕྱིར་གཙོ་བོར་བྱེད་ཅེས་པའི་དོན་ཏོ། །འོ་ན་རྒྱུ་འབྲས་ཀྱི་ཧེ་རུ་ཀ་གཉིས་ལས་གང་གཙོ་བོ་ཡིན་སྙམ་ན། འབྲས་བུའི་རྡོ་རྗེ་འཛིན་པ་ཉིད་ཡིན་ཏེ། དཀའ་འགྲེལ་ཀུ་མུ་ཏི་ལས། དེ་ཡང་དཔལ་ཧེ་རུ་ཀ་སྟེ་ཞལ་བརྒྱད་པ་ཞབས་བཞི་པ། ཕྱག་བཅུ་དྲུག་པ་འབྲས་བུ་རྡོ་རྗེ་འཛིན་པ་ཀྱེ་རྡོ་རྗེ་ཞེས་བྱ་བའི་དོན་ཏོ། །འབྲས་བུ་ཉིད་འབྱུང་བ་མེད་པའི་ཕྱིར་དང་། དཔལ་གྱི་འོས་མ་ཡིན་པའི་ཕྱིར། ཡང་ཧེ་རུ་ཀ་གཞན་བཟློག་གོ་ཞེས་གསུངས་པའི་ཕྱིར་རོ། །འོ་ན་བདག་མེད་མས་ཆོས་སྐུའི་ཡོན་ཏན་ཇི་ལྟར་མཚོན། རྒྱུད་གསུང་བ་པོ་སྟོན་པ་ཉིད་ཀྱི་རྣམ་པ་ཇི་ལྟར་བཞུགས་སྙམ་ན། སྔར་གྱི་ལྟ་བ་དེ་དག་ཀྱང་། གང་ཟག་དང་ཆོས་ཀྱི་བདག་མེད་གཉིས་སུ་འདུས་ལ། དེའི་རྣལ་འབྱོར་འདི་ལ་ཡོད་པའི་ཕྱིར་དང་། རྒྱུད་གསུངས་པའི་ཚེ་ཡབ་དང་ཞལ་སྦྱོར་གྱི་ཚུལ་དུ་བཞུགས་པས་འདིས་གཙོ་བོ་བྱས་པའི་དཀྱིལ་འཁོར་ཡང་ཇི་སྲིད་ཉེ་རྒྱུ་ལ་མཚམས་སྦྱར་གྱི་བར་དུ་ཡབ་ཀྱི་དཀྱིལ་འཁོར་དང་བསྐྱེད་རིམ་གྱི་གཙོ་བོ་ཁྱད་པར་མེད་པར་རྒྱུད་དང་གོང་མའི་དགོངས་པ་སྟེ། བདག་མེད་རྣལ་འབྱོར་ལྡན་པའམ། །ཞེས་པ་རྩ་འགྲེལ་ལས་ཤེས་སོ། །ཧེ་རུ་ཀ་གཞན་རྣམས་མཆོག་སྒྲུབ་པའི་དཀྱིལ་འཁོར་དུ་ཅི་ལྟར་འགྲོ་སྙམ་ན། གནད་ཀྱི་གསལ་བྱེད་དུ་སློབ་དཔོན་མི་ཐུབ་ཟླ་བ་ནི། ཧེ་རུ་ཀ་གསུམ་ཡང་ལས་དང་པོ་པའི་བསྒོམ་བྱ་ཙམ་དུ་བཞེད་ཅེས་གསུངས་ཏེ། ཕྱག་བཅུ་དྲུག་པའི་དཀྱིལ་འཁོར་བསྒོམ་པ་ལ་བློ་སྦྱོང་བའི་ཆེད་དུ་ལས་དང་པོ་པའི་བསྒོམ་བྱ་ཡིན་པས། མཆོག་སྒྲུབ་པར་འགྲོ་ཞེས་པའི་དོན་ཏོ། །གཉིས་པ་དེ་ལས་མི་བསྐྱོད་པའི་རིགས་གཙོ་བོར་བསྒྲུབ་པ་ལ་གཉིས་ཏེ། ལུང་གིས་བསྒྲུབ་པ་དང་། རིགས་པས་བསྒྲུབ་པའོ། །དང་པོ་ནི། རྩ་རྒྱུད་ཀྱི་སྤྱོད་པའི་སྐབས་སུ། རྡོ་རྗེའི་བུ་མོ་འདི་ཁྱེར་ནས། །སྤྱོད་པ་བྱ་བར་རྟོགས་པར་བྱ། །རྡོ་རྗེ་རིགས་ཀྱི་དངོས་མེད་ན། །རང་འདོད་ལྷ་ཡི་གཟུགས་ཀྱིས་བྱ། །ཡང་ན་གཞན་གྱི་རིགས་བྱུང་བ། །ཞེས་རྡོ་རྗེ་རིགས་ཀྱི་ཕྱག་རྒྱ་གཡུང་མོ་མཆོག་ཏུ་བསྔགས་ལ། དེའི་དོན་ཡང་ལེའུ་དེར། ཞེ་སྡང་རྣམ་དག་རྣལ་འབྱོར་པ། །ཞེས་སྒྲུབ་པ་པོར་རང་གི་ཁ་དོག་དང་། དབྱིབས་ཀྱི་རིགས་མི་གཙོ་བར་རྒྱུད་འདིར་མི་བསྐྱོད་པའི་རིགས་ཀྱི་རྣལ་འབྱོར་གཙོ་བོར་བསྒོམ་དགོས་པས། ལྷའི་རྣལ་འབྱོར་གྱི་ངོས་ནས་ཕྱག་རྒྱ་གཡུང་མོ་བསྔགས་པའི་དོན་ཏོ། །གཉིས་པ་རིགས་པས་བསྒྲུབ་པ་ནི་གཞིའི་སྐབས་སུ་སེམས་ཅན་གྱི་རྒྱུད་འདིར་ཕུང་པོ་ལྔའི་ནང་ནས་སེམས་ཉིད་གཙོ་ཆེ་སྟེ། སློབ་དཔོན་ཨཱརྻ་དེ་ཝས། ཆོས་རྣམས་སྔོན་དུ་ཡིད་འགྲོ་སྟེ། །ཡིད་གཙོ་ཡིད་ཀྱི་འགྲོས་ཅན་ཡིན། །ཅེས་གསུངས་པ་ལྟར། སྒོ་གསུམ་གྱི་ལས་ཐམས་ཅད་སེམས་སྔོན་དུ་འགྲོ་ཞིང་། སེམས་ཀྱི་རྗེས་སུ་འཇུག་པའི་ཕྱིར་དང་། གཟུགས་ལ་སོགས་པའི་ཆོས་རྣམས་ཀྱང་། སེམས་ལས་གཞན་མ་ཡིན་པའི་ཕྱིར་རོ། །དེའི་ཕྱིར་རྒྱུད་དུ་རྣམ་པར་ཤེས་པ་ཉིད་ཀྱི་རང་བཞིན་གྱི་མི་བསྐྱོད་པ་ཉིད་དཀྱིལ་འཁོར་གྱི་གཙོ་བོར་བཞག་སྟེ། གུར་གྱི་དཀའ་འགྲེལ་ལས། འདིར་སེམས་གཙོ་བོ་ཉིད་དུ་བསྟན་པའི་ཕྱིར། བསྡུས་པའི་དཀྱིལ་འཁོར་གྱི་གཙོ་བོ་ཧེ་བཛྲ་ཉིད་ཡིན་པར་ཉེ་བར་བསྟན་མོད་ཀྱི། གཞན་དག་ཀྱང་དགག་པ་ནི་མ་ཡིན་ཏེ། ཞེས་གསུངས་པའི་ཕྱིར་རོ། །གཉིས་པ་ཐུན་མོང་གི་བཤད་རྒྱུད་ཀྱི་གཙོ་བོ་བསྒྲུབ་པ་ནི། སམྦུ་ཊའི་རྒྱུད་འདིར་སྨིན་བྱེད་ནས་འབྲས་བུའི་བར་མངོན་པར་རྟོགས་པ་ཚང་བར་བསྟན་པ་རྣམས་རྒྱུད་སྡེ་གཞན་གྱི་བཤད་རྒྱུད་དུ་འགྲོ་བ་ལ་མ་ལྟོས་པར་རྒྱུད་རང་རྐང་དུ་ཉམས་སུ་ལེན་པའི་དབང་དུ་བྱས་ནས་བསྐྱེད་རིམ་གྱི་གཙོ་བོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་ཏེ། བརྟག་པ་བཞི་པ་དངོས་ལས། དེ་ནས་དཀྱིལ་འཁོར་རྒྱལ་པོ་མཆོག །རྡོ་རྗེ་དབྱིངས་དང་འདྲ་བས་ན། །རྡོ་རྗེ་དབྱིངས་ཞེས་བརྗོད་པ་ཡིན། །ཞེས་གསུངས་པས། རྒྱུད་འདིར་ཆོས་སྐུའི་མཚོན་བྱེད་གཟུགས་སྐུ་དེ་ལྟར་དུ་བསྟན་པའི་ཕྱིར་རོ། །འདི་ནི་རྗེ་བཙུན་གྱིས་གལ་ཏེ་རྣམ་པ་དེ་ལྟ་བུ་གཞན་ལ་ཡང་སྦྱར་དུ་རུང་མོད་སྙམ་ན་བདེན་མོད་ཀྱི། བཅོམ་ལྡན་འདས་ཀྱིས་ཆོས་རྣམས་ནི་གདུལ་བྱ་གང་དང་གང་གིས་འདུལ་བ་ལ་དེ་དང་དེའི་རྣམ་པར་གཙོ་བོར་བསྟན་པ་ཡིན་པས་རྒྱུད་འདིར་སྟོན་པས་དེ་ལྟ་བུའི་རྣམ་འཕྲུལ་གཙོ་བོར་གྱུར་པ་མཛད་ནས་ཆོས་གསུངས་སོ། །ཞེས་གསུངས་པའི་དགོངས་པ་སྟེ། དུས་ཀྱི་འཁོར་ལོ་དང་། བདེ་མཆོག་དང་། གསང་འདུས་སོགས་ཀྱི་ལམ་གྱི་རིམ་པ་ལའང་རང་རང་གི་དཀྱིལ་འཁོར་དེ་ཉིད་བསྐྱེད་རིམ་གྱི་གཙོ་བོར་གྲུབ་པའོ། །གཅིག་བསྒྲུབས་པས་གཞན་རྣམས་ཀྱང་གྲུབ་པ་འདིའི་རྗེས་སུ་འབྲང་བར་བྱའི། གཅིག་གི་སྒྲུབ་བྱེད་མཐོང་ན་གཞན་རྣམས་ལ་སྐུར་བ་གདབ་པར་འགྲོ་བའི་ལོག་རྟོག་གི་རྗེས་སུ་མི་འབྲང་བ་གལ་ཆེའོ། །ལྔ་པ་དེ་ཉིད་མངོན་རྟོགས་བཅུ་བཞིས་རྟོགས་པ་བསྐྱེད་པའི་ཚུལ་ལ་ལྔ་སྟེ། གང་ལ་སྦྱར་བའི་དཀྱིལ་འཁོར་ངོས་གཟུང་། རྒྱུད་ལས་གསུངས་པའི་མངོན་པར་རྟོགས་པ་ལ་ལྔར་ཕྱེ་བ། དེ་ཉིད་རྟེན་གྱི་གང་ཟག་གི་སྒོ་ནས་བཞིར་བསྡུ་བ། རྩ་བཤད་ཀྱི་བསྐྱེད་ཆོག་གི་སྒོ་ནས་བཅུ་བཞིར་དབྱེ་བ། ཁྱད་པར་གྱི་ཆོས་ཞིབ་ཏུ་བཤད་པའོ། །དང་པོ་ནི། སམྦུ་ཊར། རྒྱུད་རང་རྐང་ཚུགས་པའི་ཉམས་ལེན་གྱི་དབང་དུ་བྱས་ན། བསྐྱེད་རིམ་གྱི་གཙོ་བོ་སྔར་བཤད་པ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཡིན་ཀྱང་འདིར་བརྟག་གཉིས་ཀྱི་བཤད་པའི་རྒྱུད་དུ་སྦྱར་ཏེ། རྒྱུད་གསུམ་པོ་གཅིག་ཏུ་བསྲེས་ནས་ཐབས་རྒྱུད་ཀྱི་མངོན་པར་རྟོགས་པ་བཅུ་གཅིག་ཏུ་ཕྱེ་བའི་ཚེ་བསྐྱེད་རིམ་གྱི་གཙོ་བོ་རྩ་རྒྱུད་ནས་བཤད་པའི་ཕྱག་བཅུ་དྲུག་པ་དང་། བདག་མེད་མའི་དཀྱིལ་འཁོར་གཉིས་ཡིན་པར་སྔར་བསྒྲུབས་ཟིན་པ་ལྟར་རོ། །དེས་ན་ཕྱག་བཅུ་དྲུག་པ་ལ་བསྐྱེད་ཆོག་དབྲི་སྐྱེད་ཀྱི་སྒོ་ནས་མངོན་པར་རྟོགས་པ་ཚུལ་བཅུ་བཞི་དང་། ཡུམ་ལ་དབྲི་སྐྱེད་མ་གསུངས་པས་ཚུལ་གཅིག་སྦྱར་བར་བྱ་བ་ཡིན་ནོ། །གཉིས་པ་ནི། རྩ་བའི་རྒྱུད་ཀྱི་ཕྱི་མའི་ལྔ་པར་གཞུང་འཁྲུགས་མེད་དུ་བྱས་ནས་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་གསུངས། དང་པོའི་བརྒྱད་པར་ཡུམ་གྱི་སྐབས་སུ། དེ་ཡི་སྟེང་དུ་ཟླ་བ་ཡིན། །ཟླ་བའི་སྟེང་དུ་ས་བོན་ཉིད། །ཕྱི་ནས་བདུད་ལས་རྒྱལ་བས་མནན། །གཉིས་འདུས་པ་ལས་བདེ་ཆེན་པོ། །ཞེས་ཨཱ་ལི་ཀཱ་ལི་ལ་མ་ལྟོས་པའི་མི་མཉམ་སྦྱོར་དང་། ཨཱ་ལི་ཟླ་བའི་གཟུགས་ཀྱིས་གནས། །ཀཱ་ལིའི་གཟུགས་ཀྱིས་སྣང་བྱེད་དོ། །ཟླ་བ་ཉི་མ་འདུས་པ་ལས། །དཀར་མོ་ལ་སོགས་རབ་ཏུ་གྲགས། །ཞེས་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་མཉམ་སྦྱོར་བ། །རྡོ་རྗེ་སེམས་དཔའ་ཉིད་ཀྱི་གདན། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པ་འདོད་མི་བྱ། །སེམས་དཔའི་གཟུགས་བརྙན་ལས་བྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཅེས་མཉམ་སྦྱོར་གྱི་མངོན་པར་རྟོགས་པ་སྟེ། གསུམ་གསུངས་པ་མན་ངག་གིས་ཡབ་ལ་སྦྱར་བའི་ཚེ་མངོན་པར་རྟོགས་པ་ལྔར་གསུངས་སོ། །གསུམ་པ་ནི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པར་ལྡན་པས་བསྐྱེད་པའི་རིམ་པ་བསྒོམ་པའི་གང་ཟག་གཅིག་ཉིད་ལ། སློབ་དཔོན་བིརྺ་པའི་བཞེད་པས་བཞིར་འགྱུར་བར་གསུངས་ཏེ། ཉོན་མོངས་པའི་འཆིང་བ་མཐའ་དག་དང་ལྡན་པའི་གང་ཟག་ཐ་མའི་ཐ་མ། ཐ་མ། འབྲིང་། རབ་བོ། །དེ་ཉིད་ལ་སློབ་དཔོན་མཚོ་སྐྱེས་ཀྱིས་ལས་དང་པོ་པ། བདེ་བ་ཅུང་ཟད་སྐྱེས་པ། བདེ་སྟོང་གི་ཉམས་སྐྱེས་པ། བདེ་སྟོང་གི་ཉམས་ཆེར་སྐྱེས་པའི་རྟེན་གྱི་གང་ཟག་སྟེ་བཞིར་བཞེད་དོ། །ཡང་དེ་ཉིད་ལས། སངས་རྒྱས་ཡེ་ཤེས་ཞབས་ཀྱིས་ལས་དང་པོ་པ་དང་། ཅུང་ཟད་ཡེ་ཤེས་ལ་དབང་བ་དང་། ཡེ་ཤེས་ལ་དབང་བ་དང་། ཡང་དག་པའི་ཡེ་ཤེས་ལ་དབང་བ་ཅེས་གསུངས་ཏེ། གྲུབ་ཆེན་དེ་རྣམས་ཀྱིས་ཐ་སྙད་སོ་སོར་མཛད་པ་ཙམ་ལས་དོན་མི་གཅིག་པ་མེད་དོ། །དེ་ལ་གང་ཟག་དང་པོས་བསྒོམ་པའི་མངོན་པར་རྟོགས་པ་ནི། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། མཉམ་སྦྱོར་གཉིས་ཏེ། འདི་གཉིས་ནི་བསྐྱེད་ཆོག་ཤིན་ཏུ་རྒྱས་པ་ཡིན་ནོ། །དེ་ལྟར་ཐུན་བཞིར་བསྒོམས་པས་དུ་བ་ལ་སོགས་པའི་རྟགས་ལྔ་པོ་མཉམ་རྗེས་གང་རུང་ལ་མཐོང་བར་འགྱུར་ལ། དེ་མཐོང་ནས་གང་ཟག་དེ་གང་ཟག་གཉིས་པར་ན་འཕོས་པ་ཡིན་ནོ། །གང་ཟག་གཉིས་པས་བསྒོམ་པར་བྱ་བའི་རྣལ་འབྱོར་ནི་ཨཱ་ལི་ཀཱ་ལི་ལ་མི་ལྟོས་པའི་མི་མཉམ་སྦྱོར་ཏེ། སྔར་གྱི་བསྐྱེད་ཆོག་ལས་ཨཱ་ལི་ཀཱ་ལི་ཕྲི་བའོ། །དེ་ལྟར་བསྒོམས་པས་སེམས་ཆེར་བརྟན་ཅིང་། རླུང་སེམས་ཀྱི་འཕྲོ་འདུ་འཕེལ་བའི་སྟོབས་ཀྱིས་བསོད་ནམས་ཀྱི་ཚོགས་ཀྱི་དུས་སུ་ལུས་ལ་བདེ་བ་འབར། ཡེ་ཤེས་ཀྱི་ཚོགས་ཀྱི་དུས་སུ་སེམས་ལ་སྟོང་ཤས་ཆེ། དངོས་གཞིའི་སྐབས་སུ་བདེ་སྟོང་ཟུང་དུ་ཆུད། བར་སྐབས་སུ་ལྷའི་སྣང་བ་སྟོང་ཞིང་འགྲོ། རྨི་ལམ་མངོན་ཤེས་དང་འདྲ་བ་འབྱུང་སྟེ། གང་ཟག་དེ་གང་ཟག་གསུམ་པར་ན་འཕོས་པ་ཡིན་ནོ། །གསུམ་པ་དེས་བསྒོམ་པར་བྱ་བའི་རྣལ་འབྱོར་ནི་ས་བོན་ལས་བསྐྱེད་པ་སྟེ། སྔར་གྱི་བསྐྱེད་ཆོག་ལས་མངོན་བྱང་ཡང་ཕྲི་བའོ། །དེ་ལྟར་ཐུན་བཞིར་ཉམས་སུ་བླངས་པས་ལྷའི་སྣང་བ་བས་རྫོགས་རིམ་ཤས་ཆེ། སྐབས་སྐབས་སུ་ལྷའི་རྣམ་པ་མི་གསལ། དགྱེས་པའི་རྡོ་རྗེ་བསྒོམས་ཀྱང་བདེ་མཆོག་ལ་སོགས་པར་སྣང་བ་དུ་མ་འགྱུར་ཞིང་མཐོང་བ་ཡོད། རིགས་དྲུག་གི་གྲོང་ཁྱེར་ལ་སོགས་པ་འཁྲུལ་སྣང་སྣ་ཚོགས་ཀྱང་མཐོང་དཀྱིལ་འཁོར་ཡང་དུ་སོགས་བཞིན་ཡལ་གིན་འགྲོ་བ་འབྱུང་སྟེ། གང་ཟག་དེ་གང་ཟག་བཞི་པར་ན་འཕོས་པ་ཡིན་ནོ། །གང་ཟག་བཞི་པ་དེས་ཉམས་སུ་བླང་བར་བྱ་བའི་རྣལ་འབྱོར་ནི། སྐད་ཅིག་གིས་བསྐྱེད་པ་སྟེ། སྔར་གྱི་བསྐྱེད་ཆོག་ལས་ས་བོན་ཡང་ཕྲི་བའོ། །དེ་ལྟར་ཐུན་བཞིའི་རིམ་པས་བསྒོམ་ཞིང་སེམས་འཛིན་པའི་མན་ངག་ལ་ནན་ཏན་དུ་བྱས་པའི་སྟོབས་ཀྱིས་འཁོར་བ་རིས་དྲུག་དང་། མྱང་འདས་སྤྲུལ་སྐུའི་ཞིང་ཁམས་རྣམས་ཀྱང་ཉམས་ཀྱི་སྣང་བ་ལ་མཐོང་། ཏིང་ངེ་འཛིན་ལ་མཉམ་རྗེས་མེད། ལུས་སེམས་ལ་བདེ་སྟོང་བརྟན་པར་ཟུང་དུ་ཆུད་དེ། དེ་ཙམ་ན་མཁའ་འགྲོ་མའི་བར་ཆད་ཀྱི་རྩོལ་བ་མང་དུ་བྱུང་ན་བརྡ་བསྟན་པས་བཟློག གལ་ཏེ་བརྡ་ཤེས་ཤིང་མཁའ་འགྲོ་མཚན་ལྡན་གྱིས་རང་གཟུགས་སྟོན་ན། དེ་དང་སྙོམས་པར་ཞུགས་པས་སྐད་ཅིག་ལ་བདེན་པ་མཐོང་བར་འགྱུར་རོ། །དེ་ལྟར་བསྒོམས་པས་གོམས་པའི་སྟོབས་ཀྱིས་སྐད་ཅིག་ཙམ་ལ། ལྷའི་འཁོར་ལོ་ཡོངས་སུ་རྫོགས་པར་བསྒོམ་ནུས་པ་འབྱུང་བས། དེའི་ཚེ་སྐུ་གསུང་ཐུགས་བྱིན་གྱིས་བརླབས་པ་སོགས་བསྒོམ་མི་དགོས་ཏེ་རང་གི་ངང་གིས་ཆོ་ག་མི་དམིགས་པར་འགྱུར་བའི་ཕྱིར་དང་། སྣང་བ་ལྷའི་འཁོར་ལོར་ཤར་བས་བསྐྱེད་ཆོག་རྣམས་བསྒོམ་རྒྱུ་མེད་པར་འགྲོ་བའི་ཕྱིར་རོ། །དེའི་སྐད་ཅིག་ལ་ལུས་རྩའི་དཀྱིལ་འཁོར་མངོན་དུ་འགྱུར་རོ། །ལུས་ཀྱི་རྩ་རྣམས་ལྷར་མཐོང་། ལུས་ཀྱི་དཀྱིལ་འཁོར་ལ་ཡང་ཡང་དུ་བརྟག་ཅིང་བསྒོམས་པས་སྔོན་བླ་མས་བསྟན་པའི་ལུས་དཀྱིལ་གྱི་དོན་མངོན་དུ་འགྱུར། དངོས་གྲུབ་ཐོབ་ཅེས་མིང་ཐོབ་བོ། །འདི་དག་ནི་སློབ་དཔོན་ཐམས་ཅད་མཐུན་པའི་རྟོགས་པའི་རིམ་པའི་དབང་དུ་བྱས་པ་ཡིན་ལ། རྣལ་འབྱོར་དབང་ཕྱུག་གི་བཞེད་པས་བློ་གྲོས་ཀྱི་རིམ་པའི་དབང་དུ་བྱས་ན། རྡོ་རྗེ་སློབ་དཔོན་དུ་དབང་བསྐུར་བ་ཐོབ་པའི་གང་ཟག་བློ་གྲོས་རབ་ཀྱི་དབང་དུ་བྱས་ནས་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། མཉམ་སྦྱོར་གཉིས། འབྲིང་གི་དབང་དུ་བྱས་ནས་ཨཱ་ལི་ཀཱ་ལི་སྤངས་པའི་མི་མཉམ་སྦྱོར། ཐ་ལྟག་གི་དབང་དུ་བྱས་ནས་ས་བོན་ལས་བསྐྱེད་པ། ཐ་མའི་དབང་དུ་བྱས་ནས་སྐད་ཅིག་གིས་བསྐྱེད་པ་ཡང་གསུངས་ཏེ། འདི་ནི་གང་ཟག་རྒྱུད་ཐ་དད་པ་བཞིའི་དབང་དུ་བྱས་པ་ཡིན་ལ། ཕྱི་མ་གསུམ་གྱི་བསྒོམ་བྱ་ཡང་བློ་གྲོས་རབ་གྱི་བསྒོམ་བྱ་ལ་མ་སླེབ་ཀྱི་བར་དུ་བློ་སྦྱོང་བ་ཡིན་པས། རབ་ཀྱི་བསྒོམ་བྱར་སླེབ་ནས་རྟོགས་པའི་རིམ་པ་སྔར་ལྟར་འབྱུང་བ་ནི་གནད་ཀྱི་དོན་ནོ། །བཞི་པ་ནི་ས་བོན་དང་སྐད་ཅིག་གིས་བསྐྱེད་པ་ལ་ནི་དབྱེ་བ་མེད་ལ། མངོན་བྱང་གི་མངོན་པར་རྟོགས་པ་གསུམ་པོ་རེ་རེ་ལ་ཡང་རྩ་རྒྱུད་ཀྱི་བསྐྱེད་ཆོག་སྦྱར་ནས་གཙོ་འཁོར་ཐམས་ཅད་མངོན་བྱང་ལས་བསྐྱེད་པ་ཡན་ལག་བཞི་པའི་ཕྱོགས་དང་། བཤད་རྒྱུད་ཀྱི་བསྐྱེད་ཆོག་སྦྱར་ནས། རྒྱུ་རྡོ་རྗེ་འཆང་ཁོ་ན་མངོན་བྱང་ལས་བསྐྱེད་པ་ཡན་ལག་དྲུག་པའི་ཕྱོགས་གཉིས་གཉིས་སུ་ཕྱེ་བས་དྲུག ཡན་ལག་བཞི་པའི་ཕྱོགས་རྣམས་ལ་འཁོར་གྱི་ལྷ་མོ་ཐིག་ལེ་འགྲོས་དང་། ས་བོན་འགྲོས་གཉིས་གཉིས། དྲུག་པའི་ཕྱོགས་རྣམས་ལ་འཁོར་གྱི་ལྷ་མོ་ས་བོན་འགྲོས་དང་། ལྷ་མོ་འགྲོས་གཉིས་གཉིས་ཏེ། སྔར་གྱི་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་བསྣན་པས་བཅུ་བཞིའོ། །ལྔ་པ་ལ་དྲུག་སྟེ། འཆིང་བྱེད་ཡན་ལག་གི་ཁྱད་པར། གཞལ་ཡས་ཁང་བསྐྱེད་ཆོག་གི་ཁྱད་པར། རྒྱུ་རྡོ་རྗེ་འཆང་བསྐྱེད་ཚུལ་གྱི་ཁྱད་པར། འཁོར་གྱི་ལྷ་མོ་སྤྲོ་ཚུལ་གྱི་ཁྱད་པར། འབྲས་བུ་རྡོ་རྗེ་འཆང་གི་བསྐྱེད་ཆོག་གྱི་ཁྱད་པར། སློབ་དཔོན་གཞན་གྱི་ལུགས་ལས་ཁྱད་པར་དུ་འཕགས་པའི་ཚུལ་ལོ། །དང་པོ་ནི་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་ནི་ཡན་ལག་བཞིས་འཆིང་སྟེ། འདིའི་བསྐྱེད་ཆོག་རྩ་བའི་རྒྱུད་ཉིད་ལས་བཤད་པས་འཆིང་བྱེད་ཀྱང་རྩ་རྒྱུད་ནས་གསུངས་པ་དགོས་ལ། རྩ་རྒྱུད་ལས། ཡང་ནི་སྟོང་པ་བྱང་ཆུབ་སྟེ། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་གསུངས་པ་འདི་གསང་བ་འདུས་པའི་རྒྱུད་དཔང་པོར་བྱས་ནས་བསྙེན་སྒྲུབ་ཡན་ལག་བཞི་ལ་སྦྱར་བ་མན་ངག་གི་ལུགས་ཡིན་པའི་ཕྱིར་རོ། །མངོན་བྱང་གི་ཡན་ལག་བཞི་པའི་ཕྱོགས་དྲུག་ཀྱང་བསྙེན་སྒྲུབ་ཡན་ལག་བཞིས་འཆིང་བའི་སྒྲུབ་བྱེད་ཀྱང་འདི་ཁོ་ནའོ། །རྒྱུ་རྡོ་རྗེའི་འཆང་ཁོ་ན་ལ་མངོན་བྱང་ཡོད་པའི་ཕྱོགས་དྲུག་ནི་ཡན་ལག་དྲུག་གིས་འཆིང་དགོས་ཏེ། འདིའི་བསྐྱེད་ཆོག་གུར་ལས་གསུངས་ལ། གུར་ལས་གསུངས་པའི་བསྐྱེད་ཆོག་ལ་གུར་ཉིད་ལས་གསུངས་པའི་འཆིང་བྱེད་སྦྱར་དགོས་པས་སོ་སྙམ་དུ་དགོངས་སོ། །གཉིས་པ་ནི། ཕྱི་མའི་ལྔ་པར་གསུངས་པའི་བསྐྱེད་ཆོག་གཉིས་ལ་གཞལ་ཡས་ཁང་སྐད་ཅིག་གིས་བསྐྱེད་པར་རྗེ་བཙུན་གྱིས་གསུངས་ཏེ། ལེའུ་དེ་ཉིད་ལས། གཞལ་ཡས་ཁང་སྟོན་བྱེད་ཚིགས་བཅད་གཅིག་གསུངས་པ་ལ་བསྐྱེད་ཆོག་གཞན་མེད་པར་རྣམ་པ་ཙམ་ཞིག་གསུངས་པས་སོ་སྙམ་དུ་དགོངས་སོ། །མངོན་བྱང་གི་ཡན་ལག་བཞི་པའི་ཕྱོགས་རྣམས་ལ། འབྱུང་བཞི་ས་ནས་རིམ་པ་བཞིན་དུ་བསྐྱེད་པའི་ལུགས་བཟློག་ལ་རང་སེམས་འདྲེས་པ་ཙམ་ལས་བསྐྱེད་དགོས་ཏེ། རྩ་རྒྱུད་དང་པོའི་བརྒྱད་པར། འཁོར་ལོ་སྔོན་དུ་ཅི་རིགས་པར། །ལྷ་རྣམས་ཇི་ལྟར་འབྱུང་བའོ། །ཞེས་པའི་ཚིག་རྐང་པ་གཉིས་ལ་ཚིགས་བཅད་འོག་མས་བསྡུས་དོན་མན་ངག་གི་བཤད་པ་བྱེད་པའི་ཚེ། འཁོར་ལོ་ས་དང་། སྔོན་ནི་ཆུ། ཇི་ལྟར་རིགས་པ་མེ། ལྷ་རྣམས་རླུང་། ཇི་ལྟར་འབྱུང་བ་རང་སེམས་ལ་སྦྱར་བ་མཚོ་སྐྱེས་ལུགས་དང་ཚུལ་མཚུངས་པར་མཛད་པའི་ཕྱིར་རོ། །ཡན་ལག་དྲུག་པའི་ཕྱོགས་རྣམས་ལ་ནི་རླུང་ནས་རིམ་པ་བཞིན་དུ་བསྒོམས་པའི་འབྱུང་བཞི་ལུགས་འབྱུང་དང་། དེའི་སྟེང་དུ་བྷྲཱུྃ་ལས་འཁོར་ལོ་དང་། དེ་རྣམས་ལ་བར་དོའི་མཚོན་བྱེད་ཡིག་འབྲུ་ལྔ་འདྲེས་པ་ལས། གཞལ་ཡས་ཁང་བསྐྱེད་དགོས་ཏེ། བསྐྱེད་ཆོག་འདི་གུར་ལས་གསལ་བར་གསུངས་པ་ཡན་ལག་དྲུག་པའི་ཕྱོགས་ལ་སྦྱར་བ་མི་ཐུབ་ཟླ་བ་དང་ཚུལ་མཚུངས་པར་མཛད་པའི་ཕྱིར་རོ། །དེའི་ཚེ་རྩ་རྒྱུད་ཀྱི་ཚིག་གོང་འོག་རྣམས་ལ་ཡན་ལག་གི་དོན་གྱི་བཤད་པ་བྱེད་དགོས་པ་ནི་གནད་ཀྱི་དོན་ནོ། །གསུམ་པ་ནི། སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་ཀྱི་རྒྱུ་རྡོ་རྗེ་འཆང་ནི་ནག་པོ་ཁོ་ན་སྟེ། འདིའི་བསྐྱེད་ཆོག་རྩ་རྒྱུད་ཕྱི་མའི་ལྔ་པ་ལ་བརྟེན་པ་ཡིན་ལ། དེར་རྒྱུ་རྡོ་རྗེ་འཆང་ནག་པོ་ཁོ་ནར་གསུངས་པའི་ཕྱིར། ཡན་ལག་བཞི་པའི་ཕྱོགས་ཀྱི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གཉིས། མི་ལྟོས་པའི་མི་མཉམ་སྦྱོར་གཉིས་ཏེ་བཞི་པོའི་རྒྱུ་རྡོ་རྗེ་འཆང་ཡང་ནག་པོ་སྟེ། གཙོ་འཁོར་ཐམས་ཅད་མི་མཉམ་སྦྱོར་གྱི་མངོན་བྱང་ལས་བསྐྱེད་པ་ཡིན་པས་དེའི་ཚེ་རྒྱུ་རྡོ་རྗེ་འཆང་ནག་པོ་ལས་གཞན་མི་སྲིད་པའི་ཕྱིར། ཡན་ལག་དྲུག་པའི་ཕྱོགས་ཀྱི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གཉིས། མ་ལྟོས་པའི་མི་མཉམ་སྦྱོར་གཉིས་ཏེ་བཞི་པོའི་རྒྱུ་རྡོ་རྗེ་འཆང་ནི་དཀར་པོ་སྟེ། འདི་གུར་ནས་བཤད་པའི་མངོན་རྟོགས་ཀྱིས་འཆིང་དགོས་པས་དེ་ལ་རྒྱུ་རྡོ་རྗེ་འཆང་དཀར་པོ་ལས་གཞན་མ་གསུངས་པའི་ཕྱིར་རོ། །མཉམ་སྦྱོར་གྱི་ཡན་ལག་བཞི་པའི་ཕྱོགས་གཉིས་དང་། དྲུག་པའི་ཕྱོགས་གཉིས་ཏེ་བཞི་པོའི་རྒྱུ་རྡོ་རྗེ་འཆང་ནི་དཀར་པོ་ཁོ་ན་སྟེ། མཉམ་སྦྱོར་ལས་བསྐྱེད་པའི་ལྷའི་གཙོ་བོ་ནི་དཀར་པོ་ཁོ་ནར་གསུངས་པའི་ཕྱིར་རོ། །ཁ་ཅིག་འདི་ལ་བསམས་ནས་མཉམ་སྦྱོར་ལས་རྒྱུ་རྡོ་རྗེ་འཆང་བསྐྱེད་པའི་ཚེ་ཡུམ་སྐད་ཅིག་གིས་བསྐྱེད་དགོས་སོ་ཞེས་སྨྲ་བ་ནི་མི་འཐད་དེ། དེ་ལྟར་ན་རྩ་ཞལ་མ་གཏོགས་པའི་ཞལ་རྣམས་ཀྱང་སྐད་ཅིག་གིས་བསྐྱེད་དགོས་པར་ཐལ་བའི་ཕྱིར་རོ། །བཞི་པ་ནི་ཡུམ་གྱི་མཁར་ཐིག་ལེ་བརྒྱད་དུ་གྱུར་པའི་བར་ནི་ཐམས་ཅད་འདྲ་ལ་སྐད་ཅིག་གིས་བསྐྱེད་པ་ལ་ནི་དེ་རྣམས་ལྷ་མོ་བརྒྱད་དུ་གྱུར་ནས། ཡུམ་གྱི་མཁའ་ནས་ཕྱིར་སྤྲོས་ཏེ། ཤར་དུ་གཽ་རཱི་ཞེས་སོགས་དང་། ས་བོན་ལས་བསྐྱེད་པ་ལ་ནི་ཡན་ལག་དྲུག་པ་ལྟར་རོ། །མངོན་བྱང་ལས་བསྐྱེད་པ་ལ་ཡན་ལག་བཞི་པའི་ཕྱོགས་རྣམས་ལ་ནི་ཡུམ་གྱི་མཁར་ཐིག་ལེ་བརྒྱད་དུ་གྱུར། དེ་རྣམས་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པས་ས་བོན་བརྒྱད་ལས་ཕྱག་མཚན་བརྒྱད་ས་བོན་གྱིས་མཚན་པ། དེ་རྣམས་རོ་གཅིག་ཏུ་འདྲེས་པ་ལས་བསྐྱེད་པའམ། ཡུམ་གྱི་མཁར་ས་བོན་བརྒྱད་དུ་གྱུར་པ་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པ་ཕྱག་མཚན་ལ་ས་བོན་གྱིས་མཚན་པ་དེ་རྣམས་རོ་གཅིག་ཏུ་འདྲེས་པ་ལས་བསྐྱེད་པ་གང་རུང་ངོ་། །ཡན་ལག་དྲུག་པའི་ཕྱོགས་རྣམས་ལ་ཡུམ་གྱི་མཁར་ཐིག་ལེ་བརྒྱད་དུ་གྱུར། དེ་རྣམས་གྃ་ཙྃ་ལ་སོགས་པའི་ས་བོན་བརྒྱད་དུ་གྱུར། དེ་རྣམས་ལྷ་མོ་བརྒྱད་དུ་གྱུར་ནས་སོ་སོའི་གདན་གྱི་སྟེང་དུ་སྤྲོ་བའམ། ས་བོན་བརྒྱད་སོ་སོའི་གདན་གྱི་སྟེང་དུ་སྤྲོས་ནས། ཤར་དུ་གྃ་ལས་གཽ་རཱི་ཞེས་སོགས་ཀྱིས་བསྐྱེད་པ་གང་རུང་ངོ་། །ལྔ་པ་ནི། སྐད་ཅིག་གིས་བསྐྱེད་པའི་ཕྱོགས་ལ་སླར་ཡང་ཡབ་ཡུམ་སྙོམས་པར་ཞུགས་པས་ཡབ་ཡུམ་གྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་བསྐུལ་ཏེ། ཕུང་པོ་དང་། ཁམས་དང་སྐྱེ་མཆེད་ཐམས་ཅད་འོད་དུ་ཞུ་ནས་བདུད་བཞིའི་སྟེང་དུ། བདེ་བ་ཆེན་པོའི་ངོ་བོ་ཐིག་ལེ་སྔོ་སྐྱ་གཅིག་ཏུ་གྱུར་པར་བསམས་ལ་ང་རྒྱལ་འཛིན་པའི་སྔགས་བརྗོད་མི་དགོས། ས་བོན་ལས་བསྐྱེད་པ་དང་། མངོན་བྱང་གི་ཡན་ལག་བཞི་པའི་ཕྱོགས་རྣམས་ལ་ཞུ་བ་འདི་དང་འདྲའོ། །གླུས་བསྐུལ་བ་ནི་ཐམས་ཅད་ལ་འདྲ་ལ། དེ་ནས་སྐད་ཅིག་གིས་བསྐྱེད་པ་ལ་ནི་ཐེག་ལེ་དེ་སྐད་ཅིག་གིས་འབྲས་བུ་རྡོ་རྗེ་འཛིན་པར་བསྐྱེད། ས་བོན་ལས་བསྐྱེད་པ་ལ་ནི་འོག་ཡན་ལག་དྲུག་པ་ལྟར་རོ། །མངོན་བྱང་གི་གཙོ་བོ་མཉམ་སྦྱོར། འཁོར་མི་མཉམ་སྦྱོར་ལས་བསྐྱེད་པ་དང་། གཙོ་འཁོར་ཐམས་ཅད་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་ལས་བསྐྱེད་པ་རྣམས་ལ་ཐིག་ལེ་དེ་ཆ་གསུམ་དུ་ཆད་པ་ལས་འོག་གི་ཐིག་ལེ་ཨཱ་ལི་ལས་ཟླ་བ། སྟེང་གི་ཐིག་ལེ་ཀཱ་ལི་ལས་ཉི་མ། བར་གྱི་ཐིག་ལེ་ས་བོན་ལས་ཕྱག་མཚན་ས་བོན་གྱིས་མཚན་པ་རོ་གཅིག་ཏུ་འདྲེས་པ་ལས་འབྲས་བུ་རྡོ་རྗེ་འཛིན་པར་བསྐྱེད་དོ། །གཙོ་འཁོར་ཐམས་ཅད་ཨཱ་ལི་ཀཱ་ལི་སྤངས་པའི་མི་མཉམ་སྦྱོར་ལས་བསྐྱེད་པའི་ཕྱོགས་ལ་ཐིག་ལེ་དེ་ཆ་གསུམ་དུ་ཆད་པ་ལས་འོག་གི་ཐིག་ལེ་ཟླ་བ། སྟེང་གི་ཐིག་ལེ་ཉི་མ། བར་གྱི་ཐིག་ལེ་མན་ཆད་སྔར་དང་འདྲའོ། །ཡན་ལག་དྲུག་པའི་ཕྱོགས་རྣམས་ལ། རྒྱུ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པས། ནམ་མཁའ་ནས་བར་དོ་མཚོན་བྱེད་ཡིག་འབྲུ་ལྔ་ཞལ་དུ་ཞུགས། མཁར་སླེབ་པའི་རྐྱེན་གྱིས་བདུད་བཞིའི་སྟེང་དུ་བདེ་བ་ཆེན་པོའི་ངོ་བོ། རྡོ་རྗེ་སེམས་དཔའི་རང་བཞིན་གྱི་ཐིག་ལེར་གྱུར་པར་བསམས་ལ་ང་རྒྱལ་འཛིན་པའི་སྔགས་བརྗོད། དེ་ནས་གླུས་བསྐུལ། རྗེས་ཐིག་ལེ་ཧཱུྃ་ཨྃ་སྔོན་པོ་འོད་འབར་ཞིང་འཇིགས་པར་གྱུར། དེ་འོད་དུ་ཞུ་བ་ལས་འབྲས་བུ་རྡོ་རྗེ་འཛིན་པར་བསྐྱེད་དོ། །དྲུག་པ་ནི། སློབ་དཔོན་མི་ཐུབ་ཟླ་བས། དང་པོའི་བརྒྱད་པར་གསུངས་པའི་མི་མཉམ་སྦྱོར་དང་། ཕྱི་མའི་ལྔ་པར་གཞུང་འཁྲུགས་སུ་བསྡེབས་ནས་མངོན་པར་རྟོགས་པ་ཡན་ལག་དྲུག་པ་གཅིག་ཏུ་བྱེད་པས་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་དང་། མངོན་བྱང་གི་ཡན་ལག་བཞི་པའི་ཕྱོགས་རྣམས་མི་འབྱུང་ལ། མཉམ་སྦྱོར་ནི་རྒྱུ་རྡོ་རྗེ་འཆང་གི་སྒྲུབ་ཐབས་ལོགས་སུ་སྟོན་པས་འདིར་མི་སྦྱོར་རོ། །སློབ་དཔོན་མཚོ་སྐྱེས་ཀྱིས་དང་པོའི་བརྒྱད་པར་གསུངས་པའི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་སྤངས་པའི་མི་མཉམ་སྦྱོར་གཉིས་དང་། ཕྱི་མའི་ལྔ་པར་གསུངས་པའི་ས་བོན་ལས་བསྐྱེད་པ་དང་། སྐད་ཅིག་གིས་བསྐྱེད་པ་གཉིས་ཏེ། བཞི་པོ་གང་ཟག་བཞིའི་རྟོགས་པའི་རིམ་པས་བསྐྱེད་ཆོག་ཆ་དབྲི་བའི་མངོན་པར་རྟོགས་པ་ཚུལ་བཞིར་མཛད་དོ། །འདི་ལ་ཁ་ཅིག་མངོན་པར་རྟོགས་པ་ཚུལ་བདུན་ཞེས་དང་། གཞན་དག བཞི་གསུམ་བཅུ་གཉིས་བླ་མ་བཞེད། །ཅེས་པ་ལ་བརྟེན་ནས་ཚུལ་བཅུ་གཉིས་ཞེས་པ་ནི་ཕྱོགས་སུ་ཡང་མ་ཕྱིན་ཏེ། དེ་ལྟར་ན་བིརྺ་པའི་ལུགས་ལ་ཡང་བཞི་བཅུ་ཞེ་གཉིས་སུ་ཐལ་བའི་ཕྱིར་རོ། །ལུགས་འདིས་མཉམ་སྦྱོར་ནི་བདག་མེད་མ་དང་འབྲེལ་པར་འཆད་ཅིང་། ཡན་ལག་དྲུག་པའི་ཕྱོགས་རྣམས་ནི་མི་བཞེད་ལ། གཉིས་ཆར་གྱིས་ཀྱང་འཁོར་གྱི་ལྷ་མོ་སྤྲོ་ཚུལ་གཉིས་གཉིས་མི་བཞེད་པས་མངོན་པར་རྟོགས་པ་ཇི་སྐད་བཤད་པར་གྲངས་ངེས་པའོ། །དེས་ན་བིརྺ་པའི་མན་ངག་ལུགས་འདི་ལ་གྲུབ་ཆེན་མཚོ་སྐྱེས་དང་ཆ་མཚུངས་པའི་མངོན་རྟོགས་བཞིའི་དང་པོ་གཉིས་ལ། འཁོར་གྱི་ལྷ་མོ་སྤྲོ་ཚུལ་གཉིས་གཉིས་སུ་ཕྱེ་བས་བཞི། མཉམ་སྦྱོར་གྱི་ཡན་ལག་བཞི་པའི་ཕྱོགས་ལ་ལྷ་མོ་སྤྲོ་ཚུལ་གཉིས་སུ་ཕྱེ་བས་དྲུག མངོན་བྱང་གསུམ་པོ་རེ་རེ་ལ་ཡན་ལག་དྲུག་པའི་ཕྱོགས་རེ་རེ། དེ་རེ་རེ་ལ་ཡང་འཁོར་སྤྲོ་ཚུལ་གཉིས་གཉིས་སུ་ཕྱེ་བས་བཅུ་བཞིར་འགྱུར་བ་འདི་ནི་རྒྱུད་ཀྱི་སྟེང་དུ་མན་ངག་གི་བཤད་ཚུལ་མཚུངས་པ་མེད་པ་སྟེ། ཐོས་པ་ཙམ་ཡང་དོན་ཡོད་དུ་བྱས་པའོ། །འོ་ན་རྗེ་བཙུན་གྱིས་མངོན་པར་རྟོགས་པ་བཅུ་བཞིའམ་བཅོ་ལྔར་སྣང་མོད་ཀྱི། རྒྱུད་ཉིད་ཀྱི་སྟེང་དུ་རྟོགས་པར་བྱའོ། །ཞེས་གསུངས་པའི་བཅོ་ལྔ་པ་གང་སྙམ་ན་འདི་ལ་སྨིན་བྱེད་དབང་གི་སྒོ་ནས་རྡུལ་ཚོན་གྱི་དཀྱིལ་འཁོར་གཉིས་གསུངས་པ་དང་། ལྟ་བའི་སྒོ་ནས་ཕྱི་ནས་དེ་ཉིད་ཡང་དག་བཤད། །ཅེས་པ་ཡུམ་གྱི་སྐབས་སུ་གསུངས་པ་དང་། གྲོལ་ལམ་བསྐྱེད་རིམ་ལ་ཡབ་ཡུམ་གཉིས་གཙོ་བོར་གསུངས་པ་དང་། རྫོགས་རིམ་ལ་རང་བྱིན་རླབས་དང་། དཀྱིལ་འཁོར་འཁོར་ལོར་ལམ་འབྲས་ནས་བཤད་པ་ཕལ་ཆེར་ཡུམ་གྱི་སྐབས་སུ་གསུངས་པ་དང་། སྤྱོད་པའི་སྐབས་སུ་བུད་མེད་དང་སྐྱེས་པའི་རྟེན་ཅན་གཉིས་ཀས་སྤྱོད་པ་བྱེད་ཚུལ་གསུངས་པ་དང་། ཉེ་རྒྱུའི་སྐབས་སུ་བུད་མེད་ཡུམ་གྱི་རྣལ་འབྱོར་དང་ལྡན་པས་ས་བཅུ་པ་ཐོབ་པའི་ཚེ། ཉེ་རྒྱུ་བྱེད་ཚུལ་ལ་དོགས་གཅོད་གསུངས་པ་དང་། འབྲས་བུ་ལོངས་སྤྱོད་རྫོགས་པའི་སྐུ་ཡབ་ཡུམ་ཞལ་སྦྱོར་གྱི་རྣམ་པར་བཞུགས་པ་སྟེ། རྒྱུ་དང་། ལམ་དང་། འབྲས་བུའི་གནས་སྐབས་ཀུན་ལ་སྦྱར་ནས་ངོས་འཛིན་དགོས་པར་སྣང་སྟེ་ངག་ལས་ཤེས་སོ། །དྲུག་པ་རྣལ་འབྱོར་རྣམ་བཅུས་ཉམས་སུ་ལེན་པའི་ཐབས་ནི། འོ་ན་མངོན་པར་རྟོགས་པ་བཅུ་བཞིའམ་བཅོ་ལྔ་པོ་གང་ཟག་གཅིག་གིས་ཉིན་ཞག་ཕྲུགས་གཅིག་ལ་ཇི་ལྟར་ཉམས་སུ་ལེན་སྙམ་ན། དེ་ལ་ཀྱེ་ཡི་རྡོ་རྗེ་ཡི། །རྣལ་འབྱོར་རྣམ་པ་གཉིས་ཡིན་ཏེ། །མཉམ་པར་གཞག་པའི་རྣལ་འབྱོར་དང་། །མཉམ་པར་མ་གཞག་རྣལ་འབྱོར་རོ། །མཉམ་གཞག་བསྐྱེད་རྫོགས་གཉིས་ཡིན་ཏེ། །མ་གཞག་ཉལ་དང་ལྡང་དང་ཁྲུས། །མཆོད་གཏོར་བཟླས་དང་ཁ་ཟས་དང་། །སྤྱོད་ལམ་རྗེས་ཆགས་རྣལ་འབྱོར་བརྒྱད། །ཞེས་པ་ལྟར་རྣལ་འབྱོར་བཅུས་ཉམས་སུ་བླང་བར་བྱ་བ་ཡིན་པ་ལས་ཉམས་སུ་ལེན་པའི་གོ་རིམ་ནི་ཉལ་པ་དང་། ལྡང་བ་དང་། ཁྲུས་དང་། མཆོད་གཏོར་གྱི་རྣལ་འབྱོར་སྔོན་དུ་བཏང་ནས་མཉམ་གཞག་བསྐྱེད་རྫོགས་གཉིས་བསྒོམ། དེ་ནས་བཟླས་པའི་རྣལ་འབྱོར་སོགས་བཞི་ཉམས་སུ་ལེན་པའོ། །དེ་དག་ཀྱང་རིམ་པ་ལྟར་བཤད་ན། དང་པོ་ཉལ་བའི་རྣལ་འབྱོར་ལ་གཉིས་ཏེ། རང་བཞིན་ལྷན་སྐྱེས་སྟོང་པའི་ངང་ལ་ཉལ་བ་དང་། ཞུ་བདེ་ལྷན་སྐྱེས་བདེ་བའི་ངང་ལ་ཉལ་བའོ། །དང་པོ་ནི། མདང་ནུབ་མོ་སྲོད་ཐུན་གྱི་རྗེས་ལ་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་ལྷ་མོ་བརྒྱད་ལ། དེ་ཞལ་བརྒྱད་ལ། ཡུམ་ཡང་ཡབ་ལ། ཡབ་ཀྱི་ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ལ། དེ་ཡང་སྙིང་གའི་ཧཱུྃ་ལ། ཧཱུྃ་གི་ཞབས་ཀྱུ་ཁོག་པ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། ནཱ་ད་ཡང་མི་དམིགས་ཏེ་སྟོང་པ་ཉིད་ཀྱི་ངང་ལ་ཉལ་ལོ། །གཉིས་པ་ནི་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། སྲུང་འཁོར་མི་བསྡུ་བར་ཞག དེ་ནས་དུར་ཁྲོད་བརྒྱད་ནས་ལྷ་མོ་བརྒྱད་ཞལ་བརྒྱད་ལ་བསྡུ་བའི་བར་སྔ་མ་ལྟར་བྱས་ལ། དེ་ནས་ཡབ་ཡུམ་གཉིས་སྙོམས་འཇུག་བྱས་པས། རྩ་ཕྲན་སྟོང་ཕྲག་བདུན་ཅུ་རྩ་གཉིས་བསྐུལ་བས་གཏུམ་མོ་རྗེས་ཆགས་ཀྱི་མེས་འོད་དུ་ཞུ་ནས་བདེ་བ་ཆེན་པོའི་ངོ་བོ་ཐིག་ལེར་འགྱུར་པའི་ངང་ལ་ཉལ་ལོ། །དེ་ཡང་བདེ་ཤས་ཆེ་ན་རང་བཞིན་ལྷན་སྐྱེས་སྟོང་པའི་ངང་ལ་ཉལ་བས་ཟུང་འཇུག་ཏུ་འགྱུར། སྟོང་ཤས་ཆེ་ན་ཞུ་བདེ་ལྷན་སྐྱེས་ཀྱི་ངང་ལ་ཉལ་བས་ཟུང་འཇུག་ཏུ་འགྱུར་རོ། །དེ་ལྟར་ཉལ་བའི་རྣལ་འབྱོར་ལ་དགོས་པ་གཉིས་ཏེ། ཐ་མལ་གྱི་གཉིད་ཀྱིས་མི་བརྫི་བ་དང་། ཆོས་སྐུའི་ངོ་བོ་ལྷན་སྐྱེས་ངོ་འཕྲོད་པའོ། །གཉིས་པ་ལྡང་བའི་རྣལ་འབྱོར་ལ་ཡང་གཉིས་ལས། ཉལ་ལུགས་དང་པོ་ལྟར་ན། ལྡང་བའི་ཚེ་ཆུ་ལས་ཉ་འཕར་གྱི་ཚུལ་དུ་ཀྱེ་རྡོ་རྗེའི་སྐུར་ལངས་ནས་སྣང་བའི་དངོས་པོ་ལྷར་བསྒོམས་པའོ། །ཉལ་ལུགས་གཉིས་པ་ལྟར་ན་རང་བཞིན་གྱི་གནས་ནས་འོངས་པའི་མཚམས་ཀྱི་ལྷ་མོ་བཞིས། རྗེ་བཙུན་སྙིང་རྗེའི་ཡིད་བཞེངས་ཤིག །ཅེས་སོགས་ཀྱིས་བསྐུལ་བར་བསམས་ནས་སྲོད་ཐུན་ཡན་ལག་དྲུག་པ་ཡིན་ན། ཐིག་ལེ་ཧཱུྃ་ཨྃ་སྔོན་པོ་འོད་འབར་ཞིང་འཇིགས་པར་གྱུར། དེ་ལས་འབྲས་བུ་རྡོ་རྗེ་འཛིན་པར་བཞེངས། ཡན་ལག་བཞི་པ་ཡིན་ན་ཐིག་ལེ་དེ་ཐིག་ལེ་ཆ་གསུམ་དུ་གྱུར་ནས་མི་མཉམ་སྦྱོར་གྱི་མངོན་བྱང་ལས་འབྲས་བུ་རྡོ་རྗེ་འཛིན་པར་བཞེངས་ཏེ། སྣོད་བཅུད་ལྷའི་འཁོར་ལོར་བལྟའོ། །ལྡང་ལུགས་གཉིས་ཀ་ལ་ཡང་དེ་ནས་རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་དང་། བསྔོ་བ་སྨོན་ལམ་དང་། སྐྱེ་མཆེད་སྐུ་གསུང་ཐུགས་བྱིན་གྱིས་བརླབ་པ་བྱ་སྟེ་དེས་སྲོད་ཐུན་རྫོགས་སོ། །ལྡང་བའི་རྣལ་འབྱོར་ལ་ཡང་དགོས་པ་གསུམ་སྟེ། ཐ་མལ་གྱི་རྣམ་རྟོག་བཟློག་པ་དང་། བར་ཆད་ཀྱི་བགེགས་བཟློག་པ་དང་། ལྷས་ལྷ་ལ་མཆོད་པ་བྱས་པས་ཚོགས་མྱུར་དུ་རྫོགས་པའོ། །གསུམ་པ་ཁྲུས་ཀྱི་རྣལ་འབྱོར་ནི། དེ་ནས་བསམ་གཏན་གྱི་གྲོགས་སུ་འགྲོ་ན་ཁྲུས་བྱ། མི་འགྲོ་ན་མ་བྱས་ཀྱང་བཏུབ། སྐབས་འདིའམ་གནས་སྐབས་གཞན་དུའང་རུང་སྟེ་ཁྲུས་བྱེད་པའི་ཚེ་རང་གི་སྙིང་ག་ནས་གདན་གསུམ་ཚང་བའི་དབང་ལྷ་ནམ་མཁར་སྤྱན་དྲངས་ནས། དེ་ལ་མཆོད་པ། བསྟོད་པ། གསོལ་བ་གདབ་པའི་བར་བྱས་ལ། དངོས་སུ་ཁྲུས་བྱ་ཞིང་། སེམས་ཀྱིས་རིགས་ལྔས་བུམ་པ་བདུད་རྩིས་གང་བ་ཐོགས་ནས། འོག་དབང་གི་སྐབས་ལྟར་དབང་བསྐུར་བར་བསམ། ཡན་ལག་བསྲེ་བ་དང་། རིགས་བདག་གིས་རྒྱས་གདབ་ནི་མི་དགོས་ཅེས་རྗེ་བཙུན་རྩེ་མོས་གསུངས་ལ། རྗེ་བཙུན་གྱིས་བདག་མེད་མའི་སྒྲུབ་ཐབས་སུ་རིགས་བདག་གིས་རྒྱས་གདབ་པ་ཡང་གསུངས་ཏེ། སྔ་མ་ནི་ཁྲུས་ལམ་དུ་བསྒྱུར་བ་ཙམ་ཡིན་གྱི། ཡན་ལག་བཞི་རྫོགས་ཀྱི་སྐབས་མ་ཡིན་པས་མ་བྱས་ཀྱང་ཆོག་པ་བསྡུས་པའི་ལུགས་དང་། ཕྱི་མ་ནི་དེ་ལྟར་བྱས་ན་ཆུ་ལྷག་མ་ལ་རིགས་བདག་ཏུ་འགྱུར་བ་རྒྱས་པའི་ལུགས་སོ། །ཡང་ན་ཡབ་ཡུམ་གྱི་ཁྱད་པར་ཡང་ཡིན་ནམ་སྙམ་མོ། །དགོས་པ་ཡང་གཉིས་ཏེ་ཉིན་ཞག་གཅིག་གི་རྩ་བ་དང་ཡན་ལག་གི་ལྟུང་བའི་ཉེས་པ་ཕྲ་མོ་འདག་པ་དང་། བསམ་གཏན་གྱི་གྲོགས་སུ་འགྲོ་བའི་དགོས་པའོ། །བཞི་པ་མཆོད་གཏོར་གྱི་རྣལ་འབྱོར་ནི་ལོགས་སུ་བཤད་ཡོད་པས་དེར་བལྟ་བར་བྱའོ། །དེ་ལྟར་མཉམ་པར་མ་བཞག་པའི་རྣལ་འབྱོར་བཞི་པོ་སྔོན་དུ་བཏང་ནས་མཉམ་བཞག་བསྐྱེད་རྫོགས་གཉིས་ལ་འཇུག་པས་ལྔ་པ་བསྐྱེད་པའི་རིམ་པ་བསྒོམ་པ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་ཡང་གཉིས་ཏེ། ཐུན་མོང་གི་སྔོན་འགྲོ་དང་། ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། རྒྱ་གར་གྱི་སྒྲུབ་ཐབས་ཀྱི་གཞུང་རྣམས་དང་། རྗེ་བཙུན་སྐུ་མཆེད་ཀྱི་ཡབ་ཡུམ་གྱི་སྒྲུབ་ཐབས་རྣམས་སུ་སྔོན་འགྲོ་འདི་རྣམས་བྱེད་པའི་གསལ་ཁ་མེད་ཀྱང་། བླ་ཆེན་འཕགས་པས་སྐྱབས་འགྲོ་སེམས་བསྐྱེད། རྡོ་རྗེ་སེམས་དཔའི་བསྒོམ་བཟླས་གསུམ་སྐབས་འདིར་གསལ་བར་བཤད་པ་ནི་སྔོན་གྱི་གདམས་ངག་ཇི་ལྟ་བ་བཞིན་བྲིས་པར་སྣང་བས་ལེགས་པ་ཡིན་ལ། རྭ་པ་དང་། དཔྱལ་པ་སོགས་བོད་ཀྱི་སྔགས་པ་གཞན་རྣམས་ཀྱི་ཕྱག་ལེན་ལ་ཡང་ཡོད་དོ། །དེ་ལ་སྒྲུབ་ཐབས་ཀྱི་གཞུང་རྣམས་ལས་མ་གསུངས་པ་ནི་རྣལ་འབྱོར་བཅུའི་ཉམས་ལེན་གོ་རིམ་བཞིན་དུ་བཤད་པའི་དབང་དུ་བྱས་ལ། དེའི་ཚེ་མདང་ནུབ་མོ་ཉལ་བའི་རྣལ་འབྱོར་དང་། ཐོ་རངས་ལྡང་བའི་རྣལ་འབྱོར་དང་། མཆོད་གཏོར་གྱི་རྣལ་འབྱོར་རྣམས་བར་མ་ཆད་དུ་བྱས་ནས་བསྐྱེད་རིམ་བསྒོམ་པ་ནི་ཐུན་མཚམས་ཀྱི་ཉེས་ལྟུང་མ་བྱུང་བས། ཚོགས་ཞིང་སྤྱན་དྲང་བ་ནས་བརྩམ་སྟེ། བསྒོམ་པའི་དབང་དུ་བྱས་པའོ། །འཕགས་པས་སྐབས་འདིར་བཤད་པ་ནི་རྣལ་འབྱོར་དེ་དག་ཚུལ་བཞིན་དུ་མ་བྱུང་ན། ཐོ་རངས་ཀྱི་ཐུན་ལ་ཡང་དགོས་ཤིང་། ཐུན་ཕྱི་མ་རྣམས་ལ་ནི་ངེས་པར་དགོས་པའི་དབང་དུ་བྱས་པ་སྟེ། རྗེ་བཙུན་རྩེ་མོའི་དབང་ཆུ་གཉིས་དང་། རྗེ་བཙུན་དང་། ས་པཎ་གྱི་ཚོགས་འཁོར་གྱི་གཞུང་གཉིས་ལས་ཕྱི་མ་རེད་དམ། སྲོད་ཐུན་ལ་མཛད་པའི་དབང་དུ་བྱས་ནས་ཡི་གེ་བརྒྱ་པས་རྒྱུད་སྦྱང་སྒྲུབ་ཐབས་ཀྱི་སྔོན་འགྲོར་ངེས་པར་དགོས་པར་གསུངས་པའི་དགོངས་པ་དཔྱིས་ཕྱིན་པའོ། །འདི་བཤད་པ་ལ་གསུམ། སྔོན་འགྲོ་གསུམ་བྱ་དགོས་པའི་རྒྱུ་མཚན། ཇི་ལྟར་བྱ་བའི་ཚུལ། དེ་ལྟར་བྱས་པའི་དགོས་པའོ། །དང་པོ་ནི། སློབ་དཔོན་འཇམ་དཔལ་གྲགས་པས། སྡོམ་གསུམ་ཆོ་གར་མི་ལྡན་པར། །སྔགས་པའི་བདག་ཉིད་མི་འགྱུར་ཏེ། །ཞེས་གསུངས་པས། སྒྲུབ་པ་པོའི་རྒྱུད་སྡོམ་པ་གསུམ་དང་མི་ལྡན་པར་བསྐྱེད་རྫོགས་ཀྱི་ལམ་བསྒོམས་ཀྱང་ཡེ་ཤེས་མི་སྐྱེ་བས། རྒྱུད་དེ་གསུམ་དང་ལྡན་པ་ནི་མི་དགོས་ཁ་མེད་ཀྱི་ལམ་གྱི་གཞི་ཆེན་པོ་ཡིན་ནོ། །སྡོམ་པ་གསུམ་ལྡན་གྱི་གང་ཟག་དེས་བསྐྱེད་རིམ་ཉམས་སུ་ལེན་པའི་ཚེ་རང་རྒྱུད་ཀྱི་སྡོམ་པ་གསུམ་ལ་ཉེས་པ་མེད་པ་བྱས་པས་བསྒོམ་དགོས་ལ། དེ་ལ་ཉེས་པ་ཆེན་པོ་རྣམས་ནི་སླར་བླང་བ་དང་། ཕྱིར་བཅོས་པ་ལ་སོགས་པའི་ཐབས་ཀྱིས་སྦྱང་དགོས་ལ། ཐུན་བར་གྱི་ཉེས་པ་ཆུང་ངུ་རྣམས་སྦྱོང་བའི་ཕྱིར་དུ་ཐབས་འདི་གསུམ་བྱ་སྟེ། སློབ་དཔོན་འཇམ་དཔལ་གྲགས་པས། དང་པོ་སོ་སོར་ཐར་པ་ཡི། །སྡོམ་པ་ལེགས་པར་མ་བཟུང་བར། །གསུང་བ་ཚོགས་ཚུལ་གནས་བྱེད་པ། །ཐ་བ་ལས་འབྲས་བསྐྱེད་བཞིན་ནོ། །རྩ་བ་རྙེད་པར་མི་འགྱུར་བས། །དང་པོར་སྐྱབས་འགྲོ་ནས་བརྩམས་ཏེ། །སྡོམ་གསུམ་ཆོ་ག་རབ་ཏུ་བརྟག །ཞེས་གསུངས་སོ། །དེས་ན་སོ་ཐར་གྱི་སྡོམ་པ་ཡར་ལྡན་དུ་བྱ་བའི་ཕྱིར་དུ་སྐྱབས་འགྲོ་དང་། བྱང་སེམས་ཀྱི་སྡོམ་པ་འཕེལ་བའི་ཕྱིར་སེམས་བསྐྱེད་དང་། རིག་འཛིན་གྱི་སྡོམ་པའི་ཉེས་ལྟུང་རྣམས་བྱིན་གྱིས་བརླབ་ཅིང་ལྟུང་བ་འཕེལ་དུ་མི་གཞུག་པའི་ཕྱིར། རྡོ་རྗེ་སེམས་དཔའི་བསྒོམ་བཟླས་རྣམས་བྱས་པས། རང་རྒྱུད་ཀྱི་སྡོམ་པ་གསུམ་པོ་ཡོངས་སུ་དག་པར་བྱས་ནས་ལམ་བསྒོམ་པ་ཡིན་ནོ། །གཉིས་པ་ལ་གསུམ། སྐྱབས་འགྲོའི་རྣལ་འབྱོར། སེམས་བསྐྱེད་ཀྱི་རྣལ་འབྱོར། རྡོ་རྗེ་སེམས་དཔའི་རྣལ་འབྱོར་རོ། །དང་པོ་ནི། སྐྱབས་སུ་འགྲོ་བའི་གང་ཟག་ནི། མཐའ་ཡས་པའི་འགྲོ་བ་དྲིན་ཅན་གྱི་ཕ་མར་གྱུར་པ་རྣམས་དང་། རང་ཉིད་དོ། །དུས་ནི་སྙིང་པོ་བྱང་ཆུབ་ཀྱི་གོ་འཕང་མ་ཐོབ་ཀྱི་བར་དུའོ། །ཡུལ་ལ་མི་འདྲ་བ་དུ་མ་ཡོད་པ་རྣམས་ནི་རྒྱུན་བཤགས་ཀྱི་སྐབས་སུ་འཆད་ལ། འདིར་ནི་དཀྱིལ་འཁོར་གྱི་གཙོ་བོ་བླ་མ་དང་ཐ་མི་དད་པ་ནི་སངས་རྒྱས་དཀོན་མཆོག དེའི་ཐུགས་རྒྱུད་ལ་བཞུགས་པའི་རིམ་གཉིས་ཀྱིས་བསྡུས་པའི་རྟོགས་པ་མཐར་ཐུག་པ་ཆོས་དཀོན་མཆོག རྟོགས་པ་དེ་དཔེའི་ཡེ་ཤེས་ཀྱི་ཚུལ་གྱིས་རྒྱུད་ལ་བཞུགས་ཤིང་དབང་བསྐུར་གྱི་བསླབ་པ་རང་བས་རྒན་པར་གྱུར་པའི་གང་ཟག་དང་། དཀྱིལ་འཁོར་ལ་བཀོད་པའི་ལྷ་རྣམས་ནི་དགེ་འདུན་དཀོན་མཆོག་སྟེ། དེ་རྣམས་སོ། །ཚུལ་ནི་སེམས་ཅན་ཐམས་ཅད་ཀྱི་དོན་དུ་རང་ཉིད་དཀོན་མཆོག་གསུམ་གྱི་གོ་འཕང་ཐོབ་པར་འདོད་པའི་ཚུལ་གྱིས་སོ། །རྒྱུ་ནི་འདིར་སྙིང་རྗེ་ཆེན་པོ་དང་། དད་པ་གཉིས་སུ་ཤེས་པར་བྱའོ། །ཉམས་སུ་ལེན་པའི་ཚུལ་ནི་མདུན་གྱི་ནམ་མཁར། ཀྱེ་རྡོར་ལྷ་དགུའི་དཀྱིལ་འཁོར་གསལ་བར་དམིགས་ལ། གཙོ་བོའི་རྒྱབ། ལྷ་མོའི་མདུན་དུ་རིན་པོ་ཆེའི་ཁྲིའི་སྟེང་དུ་ཆོས་པོ་ཏི་བྲག་རི་བརྩེགས་པ་ལྟ་བུ་ངོ་བོ་འགོག་ལམ་གྱིས་བསྡུས་པའི་དམ་ཆོས་སུ་མོས་ནས། ངག་ཏུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཞེས་སོགས་བརྗོད་དེ། དེ་བཞིན་གཤེགས་པ་ཐམས་ཅད་ཀྱི་སྐུ་ནི་རྣམ་པར་སྣང་མཛད། གསུང་ནི་འོད་དཔག་མེད། ཐུགས་ནི་མི་བསྐྱོད་པ། ཡོན་ཏན་ནི་རིན་ཆེན་འབྱུང་ལྡན། ཕྲིན་ལས་ནི་དོན་ཡོད་གྲུབ་པ་སྟེ་རིགས་ལྔའི་ངོ་བོ་སངས་རྒྱས་ཀུན་འདུས། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་ནི་ཆོས་ཀུན་འདུས། འཕགས་པའི་དགེ་འདུན་ཐམས་ཅད་ཀྱི་མངའ་བདག་ནི་དགེ་འདུན་ཀུན་འདུས་ཏེ། དཀོན་མཆོག་གསུམ་པོ་གཅིག་ཏུ་བསྡུས་པ་རྡོ་རྗེ་འཆང་ནས་རྩ་བའི་བླ་མའི་བར་གྱི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཞེས་པ་དང་། སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཞེས་པ་གཉིས་ཆར་གྱི་ཚེ་དཀྱིལ་འཁོར་གྱི་གཙོ་བོ་ལ་དམིགས་པ་གཏད། དམ་པའི་ཆོས་རྣམས་ལ་སྐྱབས་སུ་མཆིའོ། །ཞེས་པའི་ཚེ། རྒྱབ་ཀྱི་ཆོས་པོ་ཏི་ལ་དམིགས་པ་གཏད། འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་པའི་ཚེ་འཁོར་གྱི་ལྷ་མོ་ལ་དམིགས་པ་གཏད། དེ་ལྟ་བུའི་སྐྱབས་འགྲོ་བཞི་སྐོར་གསུམ་ཡན་ཆད་ཅི་ནུས་སུ་བྱས་ལ། མཇུག་ཏུ་བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་པའི་རྐྱེན་གྱིས་འཁོར་གྱི་ལྷ་མོ་དེ་འོད་ཟེར་དཀར་པོའི་རྣམ་པར་ཞུ་ནས་རང་གི་སྤྱི་བོ་ནས། ཆོས་པོ་ཏི་འོད་ཟེར་དམར་པོའི་རྣམ་པར་ཞུ་ནས་རང་གི་མགྲིན་པ་ནས། དཀྱིལ་འཁོར་གྱི་གཙོ་བོ་འོད་ཟེར་སྔོན་པོའི་རྣམ་པར་ཞུ་ནས་སྙིང་གར་ཐིམ་པས་དཀོན་མཆོག་གསུམ་དང་། རང་གི་ལུས་ངག་ཡིད་གསུམ་དབྱེར་མེད་དུ་བསམ་མོ། །གཉིས་པ་ནི། དེ་ནས་བྱང་ཆུབ་ཀྱི་མཆོག་ཏུ་སེམས་བསྐྱེད་པའི་ཆོ་ག་བྱ་སྟེ། དེ་ཡང་ཁམས་གསུམ་གྱི་སེམས་ཅན་ཐམས་ཅད་བདག་གི་ཕ་མར་མ་གྱུར་པ་གཅིག་ཀྱང་མེད་ལ། ཕ་མ་ནམ་བྱས་རེས་ཀྱིས་ཕན་བཏགས་པའི་དྲིན་ཅན་ཤ་སྟག་ཡིན་པས། དྲིན་ཅན་འདི་རྣམས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོར་མཐའ་ཡས་པའི་སྡུག་བསྔལ་གྱིས་གཟིར་པ་རྣམས་སྙིང་རེ་རྗེ་སྙམ་དུ་ཡང་ནས་ཡང་དུ་བསྒོམ་པར་བྱ་སྟེ། འདི་སྔོན་དུ་མ་སོང་ན་སེམས་བསྐྱེད་རྣལ་མ་མི་སྐྱེ་བས་དེ་ལྟར་རྒྱུ་སྙིང་རྗེ་སྔོན་དུ་སོང་ནས། འབྲས་བུ་སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་བསྒོམ་སྙམ་དུ་བྱང་ཆུབ་ཀྱི་སེམས་ཡང་དང་ཡང་དུ་ཡིད་ལ་བྱའོ། །རྗེ་བཙུན་གོང་མའི་གསུང་རབ་རྣམས་ལས། བྱང་ཆུབ་ཀྱི་སེམས་བསྒོམ་ཚུལ་འདི་ལྟར་གསུངས་པ་སྒྲུབ་ཐབས་གང་བསྒོམ་ཡང་སྔོན་འགྲོའི་ཚིག་ཀྱང་འདི་ཉིད་ཀྱིས་ཆོག་གོ །ཁ་ཅིག ཇོ་བོ་རྗེས་མཛད་པའི་ཚིགས་བཅད་དང་། པཎ་ཆེན་ཤཱཀྱ་ཤྲཱིས་མཛད་པའི་འགྲོ་རྣམས་བསྒྲལ་འདོད་བསམ་པ་ཡིས། །ཞེས་སོགས་ཀྱི་ཚིག་གིས་མཛད་པ་ཡང་འགལ་བ་མེད་མོད་ཀྱི། དེ་དག་ནི་སྐྱབས་འགྲོ་དང་སེམས་བསྐྱེད་སྦྲགས་ནས་ལེན་པའི་ལུགས་ཡིན་ལ། འདིར་སྐྱབས་འགྲོ་སྔོན་དུ་སོང་བའི་སེམས་བསྐྱེད་ལ་ནི་ཚིག་སྔ་མ་ཉིད་གཙང་བར་སྣང་ངོ་། །གསུམ་པ་ལ་གསུམ། སྤྱིར་བཤད་པ་དང་། བྱེ་བྲག་ཏུ་ཕྱེ་སྟེ་བཤད་པ། དེ་དག་གི་དགོས་པའོ། །དང་པོ་ནི། སྔགས་ཀྱི་ཡན་ལག་མ་ཚང་བའི་ལྟུང་བ་བྱུང་ན། དེ་བྱིན་གྱིས་རློབ་པའི་ཐབས་ལ། དམ་ཚིག་རྡོ་རྗེའི་བསྒོམ་བཟླས་དང་། རྡོ་རྗེ་སེམས་དཔའི་བསྒོམ་བཟླས་གཉིས་གསུངས་པས་གང་བྱས་ཀྱང་འདྲ་མོད། འདིར་བླ་མ་དག་ཆ་ཕྱི་མ་མཛད་པ་ནི། སློབ་དཔོན་འཇམ་དཔལ་གྲགས་པས། གལ་ཏེ་ལྟུང་སོགས་བྱུང་གྱུར་ན། །ཡི་གེ་བརྒྱས་ནི་བྱིན་གྱིས་བརླབ། །ཇི་སྲིད་དུས་ལས་མ་འདས་པར། །དག་པའི་ལས་ལ་ཉེར་གནས་བྱ། །འགྱོད་བྱས་ཉེས་པ་འཕེལ་མི་འགྱུར། །ཞེས་གསུངས་པ་དང་མཐུན་ནོ། །དེ་ཇི་ལྟར་བྱ་བ་ཡང་རྒྱུད་སྡེ་རྣམས་ལས་མི་འདྲ་བ་མང་པོ་ཞིག་གསུངས་ཀྱང་། འདིར་རྗེ་བཙུན་ས་སྐྱ་པ་རྣམས་ཀྱིས། བདེ་མཆོག་གི་བཤད་རྒྱུད། ཨ་བྷི་དྷ་ན་ལ་བརྟེན་པར་སྣང་བས། དེ་ལྟར་དུ་བཤད་ན། རྒྱུད་དེའི་ལེའུ་ཉི་ཤུ་རྩ་ལྔ་པར་ཡིག་བརྒྱ་ལྷ་ཐམས་ཅད་ཀྱི་གསང་སྔགས་ཡིན་ཚུལ། ཡིག་བརྒྱའི་སྔགས། དེའི་འཁྲུལ་འཁོར་གྱི་ཕྱིར་བཟློག་རྣམས་གསུངས་ལ། ལེའུ་ཉི་ཤུ་རྩ་དྲུག་པར། གང་དུ་དམ་ཚིག་ཉམས་པ་ལ། །སྦྱོར་བ་འདི་ནི་སྦྱིན་པར་བྱ། །ཞི་བར་གྱུར་ནས་བླ་མེད་པས། །རྣལ་འབྱོར་མ་ཡི་དབང་ཡང་བསྐུར། །དུས་བཞི་རྟག་ཏུ་རིམ་པ་ཡིས། །ཕྱི་དང་ནང་གི་ཆུས་ཁྲུས་བྱ། །ཡང་ན་དམ་ཚིག་སྡོམ་པ་བླངས། །བླ་མ་ལ་ནི་གསོལ་བ་གདབ། །བདག་ནི་མི་ཤེས་རྨོངས་པ་སྟེ། །ཞེས་སོགས་ནས། འགྲོ་བའི་གཙོ་ལ་བདག་སྐྱབས་མཆི། །དེ་ནི་ཐེ་ཚོམ་མེད་བྱས་ནས། །ངེས་པར་དངོས་གྲུབ་ཅན་དུ་འགྱུར། །ཞེས་ལྟུང་བ་སྦྱང་བ་དང་། ལྟུང་བཤགས་ཀྱི་ཆོ་ག་གསུངས་ནས། ལྷ་གང་བསྒོམ་གསལ་བར་མ་བཤད་པ་ལ། རྒྱུད་དེའི་ལེའུ་དྲུག་ཅུ་རྩ་བཞི་པར་རྡོ་རྗེ་སེམས་དཔའ་ཞལ་དྲུག་པ་སོགས་གསུངས་ཀྱང་། དེ་རྣམས་སྤྲོས་པ་ཆེ་བས་མ་བཤད་པར། ལེའུ་ཉེར་བཞི་པར་འཁོར་ལོ་བསྒྱུར་བ་དྲུག་གི་དཀྱིལ་འཁོར་གསུངས་པའི་ནང་ནས། རྡོ་རྗེ་སེམས་དཔའི་དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་ཡུམ་དང་བཅས་པ་དེ་ཟུར་དུ་ཕྱུང་ནས་ཆོ་ག་འདི་དང་སྦྱར་བར་སྣང་བས། དེ་བཞིན་དུ་འཆད་ཤེས་དགོས་སོ། །གཉིས་པ་ལ་གསུམ། ལྷ་བསྒོམ་པ། སྔགས་བཟླ་བ། བཤགས་སྡོམ་བྱ་བའོ། །དང་པོ་ནི། བླ་མ་གཞན་དག་རང་རྡོ་རྗེ་སེམས་དཔར་བསྒོམ་པར་འདོད་ཅིང་། ཁ་ཅིག་རང་ལྷར་བསྐྱེད་པའི་སྙིང་གར་རྡོར་སེམས་བསྐྱེད་པར་འདོད་ཀྱང་། འདིར་རྗེ་བཙུན་གྱིས་རང་གི་སྤྱི་བོར་བསྒོམ་པར་བཤད་པ་ནི་ངེས་བརྗོད་བླ་མའི་སྔར་གྱི་ལུང་ལས། ཕྱི་དང་ནང་གི་ཆུས་ཁྲུས་བྱ། །ཞེས་པའི་དོན་དུ་མངོན་ཏེ། སྤྱི་བོར་རྡོར་སེམས་བསྒོམས་ནས། དེའི་སྦྱོར་མཚམས་ནས་བྱུང་བའི་ཆུས་དམ་ཚིག་ཉམས་པའི་དྲི་མ་འཁྲུད་ཅེས་པའི་དོན་ཏོ། །གལ་ཏེ་འཁྲུས་ཀྱི་དོན་ནི། སྟོང་ཉིད་བསྒོམ་པ་ཡིན་ནོ་སྙམ་ན། ནང་ཁྲུས་ནི་དེ་ལྟར་དུ་ཡོ་ག་དང་། གདན་བཞི་སོགས་ལས་བཤད་ཀྱང་དེ་ནང་འཁྲུས་ཡིན་གྱི། ནང་གི་ཆུའི་ཁྲུས་མ་ཡིན་ལ། འདིར་ནི་ནང་གི་ཆུས་ཞེས་དམིགས་བསལ་དུ་འབྱུང་བའི་ཕྱིར་རོ། །དེས་ན་རྗེ་བཙུན་གྱིས་བདག་གི་སྤྱི་བོར་པདྨ་དང་ཟླ་བའི་སྟེང་དུ། རྡོ་རྗེ་སེམས་དཔའ་དཔལ་ཧེ་རུ་ཀ་ཞེས་བྱ་བ། སྐུ་མདོག་དཀར་པོ་རུས་པའི་རྒྱན་ཆ་དྲུག་གིས་བརྒྱན་པ། གཡས་རྡོ་རྗེ། གཡོན་དྲིལ་བུ་ཡུམ་རྡོ་རྗེ་སྙེམས་མ་སྐུ་མདོག་དང་རྒྱན་ཡབ་དང་འདྲ། གྲི་གུག་དང་ཐོད་པ་འཛིན་པས་འཁྱུད་པ། རྡོ་རྗེ་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་གིས་བཞུགས་པར་བསྒོམས་ལ། ཞེས་གསུངས་པ་ལྟར་རོ། །བླ་ཆེན་འཕགས་པས། ཆོ་ག་གསུམ་ལས་བསྐྱེད་ནས། སྐུ་གསུང་ཐུགས་བྱིན་གྱིས་བརླབ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི། རྗེ་བཙུན་གྱིས་གསུངས་པའི་དམ་ཚིག་རྡོ་རྗེའི་བསྒོམ་བཟླས་ཀྱི་བསྐྱེད་ཆོག་སྦྱར་བ་ཡིན་ལ། འདི་ནི་ལྗོན་ཤིང་ལས་གསུངས་པའི་བསྡུས་པ་དང་པོ་ཡིན་ཅིང་། སྔ་མ་ནི་བསྡུས་པ་ཕྱི་མའོ། །འཕགས་པའི་ལུགས་དེ་ལ་ཁ་ཅིག་དབང་བསྐུར་ནས་རིགས་ཀྱི་བདག་པོའི་རྒྱས་གདབ་པ་དང་། གཞན་དག་རྒྱས་གདབ་མེད་པའི་དོན། རྡོ་རྗེ་སེམས་དཔའ་རིགས་ཐམས་ཅད་ཀྱི་བདག་པོ་ཡིན་པས། རྒྱས་གདབ་མི་དགོས་ཞེས་པ་དང་། ཁ་ཅིག་མགོ་བརྒྱན་གྱི་སྟེང་གི་རྡོ་རྗེ་ཕྱེད་པས་གོ་ཆོད་པར་འདོད་པ་སོགས་ནི་དོན་མེད་པས་གཉིས་ཆར་ལ་ཡང་དམ་ཚིག་པ་བསྐྱེད་པའི་ཚེ་དབུ་རྒྱན་རང་ཆས་ཅན་དུ་བསྒོམ་པ་ངག་འདོན་ལ་མེད་ཀྱང་བསྒོམ་དོན་ལ་ངེས་པར་ཡོད་པ་སྟེ། གཞན་དུ་ན་རྗེ་བཙུན་གྱིས་གསུངས་པའི་སྐད་ཅིག་གིས་བསྐྱེད་པ་དེ་ལ་ཡང་དབུ་རྒྱན་གྱི་དཔྱད་པ་དེ་དག་དགོས་པའི་ཕྱིར་ཏེ། ལྗོན་ཤིང་ལས། དམ་ཚིག་སེམས་དཔའ་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་བཟླས་པ་ལ་འཇུག་པ་ཉིད་དོ། །ཞེས་གསུངས་པའི་དོན་ཡིན་པའི་ཕྱིར་རོ། །གཉིས་པ་ལ་གསུམ། བཟླས་པའི་དམིགས་པ། བཟླས་རྒྱུའི་སྔགས། ཇི་ཙམ་བཟླས་པའི་གྲངས་སོ། །དང་པོ་ནི་རྗེ་བཙུན་གྱིས་དེའི་ཐུགས་ཀར་ཟླ་བ་ལ་ཧཱུྃ་དཀར་པོ་གཅིག་བསམས་ལ། ཧཱུྃ་ལས་འོད་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ནས་ཧཱུྃ་ལ་ཐིམ། ཧཱུྃ་ལས་བདུད་རྩི་བབས། ཧེ་རུ་ཀའི་སྐུ་གང་། དེ་ནས་དབྱིབས་བརྒྱུད། ཡུམ་གྱི་སྐུ་གང་། ཡབ་ཡུམ་གྱི་སྐུ་ཐམས་ཅད་ལས་བདུད་རྩི་བབས། བདག་གི་སྤྱི་གཙུག་ནས་ཞུགས་ཏེ། ལུས་ཐམས་ཅད་གང་ནས་བཤང་གཅི་གཉིས་དང་། རྐང་མཐིལ་གཉིས་ལས་སྡིག་པའི་དྲི་མ་ཐམས་ཅད་ཁ་དོག་ནག་པོའི་གཟུགས་ཀྱིས་འཐོན་པ་བསམ། ཞེས་གསུངས་པ་ལྟར་བྱ་ཞིང་། དེ་ཡང་ཨ་བྷི་དྷ་ན་ལས། ཁྲོ་བོ་སངས་རྒྱས་དེ་བཞིན་གཤེགས། །ཐམས་ཅད་སྙིང་གར་བརྟན་བྱས་ཏེ། །བསྒོམས་པས་ཐམས་ཅད་བརྟན་པར་འགྱུར། །གལ་ཏེ་བདག་ཉིད་དངོས་གྲུབ་འདོད། །དངོས་གྲུབ་ཐམས་ཅད་གནས་པ་ཡིན། །ཞེས་བཤད་པའི་དོན་ཡིན་ནམ་སྙམ་སྟེ། དཔྱད་པར་བྱའོ། །བདུད་རྩི་འཛག་ཚུལ་ལ་ཁ་ཅིག་ཡབ་ཀྱི་བ་སྤུའི་བུ་ག་ནས་དང་། ཁ་ཅིག་ཡབ་ཀྱི་མཐེ་བོང་གཡས་པ་ནས་འཛག་པར་འདོད་པ་རྣམས་ལ་ནི་ཤེས་བྱེད་མི་སྣང་ལ། འདིར་ཡབ་ཀྱི་སྐུའི་དབྱིབས་བརྒྱུད་ནས་ཡུམ་གྱི་སྐུ་གང་། དེའི་སྐུ་ལས་བདུད་རྩི་འཛག་པར་བཞེད་པ་ནི། ཨ་བྷི་དྷ་ནར། རྣལ་འབྱོར་མ་ཡི་དབང་ཡང་བསྐུར། །ཞེས་ཡུམ་གྱི་དབང་བསྐུར་བར་བཤད་པའི་དོན་ཡིན་པས། ཡུམ་གྱི་སྐུ་ནས་འཛག་པ་ཅིས་ཀྱང་དགོས་སོ། །གཉིས་པ་ནི། སྤྱིར་ཡི་གེ་བརྒྱ་པ་ལ་དུ་མ་ཞིག་ཡོད་ཀྱང་། འདིར་ཨ་བྷི་དྷ་ནར་བཤད་པའི་ཧེ་རུ་ཀའི་ཡི་གེ་བརྒྱ་པ་ཡིན་ལ། དེ་བཤད་ན། དེ་ལ་ཨོཾ་ནི་བཀྲ་ཤིས་པ་ལ་སོགས་པའི་དོན་བརྒྱད་ལ་འཇུག་ཀྱང་འདིར་ནི་མཆོག་གི་དངོས་གྲུབ་སྟེར་བའི་དོན་ཏོ། །བཛྲ་ཧེ་རུ་ཀ་ནི་རྡོ་རྗེ་ཁྲག་འཐུང་། ས་མ་ཡ་ནི་དམ་ཚིག མ་ནུ་པཱ་ལ་ཡ་རྗེས་སུ་སྐྱོངས་ཤིག ཅེས་ཏེ། རྣམ་ཐར་སྒོ་གསུམ་གྱི་སྟོང་པའི་རང་བཞིན་ཧེ་རུ་ཀས་བདག་སྐྱོངས་ཤིག་ཅེས་སོ། །ཚུལ་ཇི་ལྟར་སྐྱོང་ན་ཧེ་རུ་ཀ་ཏྭེ་ནོ་པ་ཏིཥྛ་ནི་ཁྲག་འཐུང་གིས་ཉེ་བར་མནོས་པ་སྟེ་རང་གི་བསམ་པ་བཞིན་དུའོ། །དྲྀ་ཌྷོ་མེ་བྷ་ཝ། བདག་ལ་བརྟན་པའི་རང་བཞིན་དུའོ། །སུ་ཏོ་ཥྱོ་མེ་བྷ་ཝ། བདག་ལ་དགའ་བའི་རང་བཞིན་དུའོ། །ཨ་ནུ་རཀྟོ་མེ་བྷ་ཝ་ནི་བདག་ལ་རྗེས་སུ་ཆགས་པའི་རང་བཞིན་དུའོ། །སུ་པོ་ཥྱོ་མེ་བྷ་ཝ་བདག་ལ་མཛེས་པའི་རང་བཞིན་དུའོ། །སརྦ་སིདྡྷིམྨེ་པྲ་ཡཙྪ་བདག་ལ་དངོས་གྲུབ་ཐམས་ཅད་སྩོལ། སརྦ་ཀརྨ་སུ་ཙ་མེ་བདག་ལ་ལས་ཐམས་ཅད་སྩོལ་ཅེས་ཏེ་ཚུལ་དེ་ལྟ་བུའི་སྒོ་ནས་བདག་ལ་རྗེས་སུ་སྐྱོངས་ཤིག ཅེས་པའི་དོན་ཏོ། །བསྐྱངས་ནས་ཅི་བྱེད་ཅེ་ན། ཙིཏྟཾ་ཤྲེ་ཡཿཀུ་རུ་བདག་གི་སྙིང་ལ་གནས་པར་མཛོད། གང་གནས་པར་མཛོད་ན། ཧཱུྃ་ནི་ཆོས་ཀྱི་དབྱིངས་མི་འགྱུར་བའི་གནས་དང་། ཧ་ཧ་ཧ་ཧ་བཞི་ནི་ཡེ་ཤེས་གཞན་བཞི་ཧོ་དབྱེར་མེད་པ་སྟེ། མདོར་ན་དབྱིངས་དང་ཡེ་ཤེས་དབྱེར་མེད་པའི་ངེས་དོན་གྱི་ཧེ་རུ་ཀ་དེ་བདག་གི་སྙིང་ལ་གནས་པར་མཛོད་ཅིག་པའོ། །དོན་དེ་ལ་མིང་ཅི་སྐད་བྱ་ན་བྷ་ག་ཝཱན་བཛྲ་ཧེ་རུ་ཀ བཅོམ་ལྡན་འདས་རྡོ་རྗེ་ཁྲག་འཐུང་ཞེས་བྱའོ། །དེས་བདག་ནམ་ཡང་སྤང་བར་བྱ་བ་མ་ཡིན་པས། མཱ་མེ་མུཉྩ་བདག་མ་བཏང་ཞིག་གོ །ཧེ་རུ་ཀོ་བྷ་ཝ་མ་ཧཱ་ས་མ་ཡ་ས་ཏྭ། ཁྲག་འཐུང་གི་རང་བཞིན་དམ་ཚིག་སེམས་དཔའ་ཞེས་བོས་ནས་ཁྱོད་ཀྱིས་བདག་དུས་ཐམས་ཅད་དུ་མ་བཏང་ཞིག་ཅེས་པའོ། །ཨ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོ་ཡིན་པས་ལྷ་དང་། སྔགས་དང་། སྒྲུབ་པ་པོ་རྣམས་རང་བཞིན་སྐྱེ་མེད་དུ་གཅིག་པའི་དོན་ཏོ། །ཧཱུྃ་ནི་དོན་ལྔ་ལ་འཇུག་ཀྱང་འདིར། སྡུག་བསྔལ་འཆོས་ཤིང་འཇོམས་བྱེད་དང་། །སྲིད་པའི་ཞགས་པ་འཇོམས་པར་བྱེད། །ཅེས་པ་ལྟར་སྤང་བྱ་དེ་དག་འཇོམས་པའི་དོན་ཏོ། །ཕཊ་ནི་དོན་གསུམ་ལ་འཇུག་པ་ལས། འདི་ནི་སྡུག་བསྔལ་འཇོམས་པའི་དོན་དུ་གཟུང་ངོ་། །དེ་ལྟ་བུའི་གསང་སྔགས་དེ་ནི་ཨ་བྷི་དྷ་ནར། དཔའ་བོ་དང་ནི་མཁའ་འགྲོ་མ། །འདི་ནི་ཀུན་གྱི་གསང་སྔགས་ཏེ། །ཞེས་ཐམས་ཅད་ཀྱི་གསང་སྔགས་སུ་བཤད་དོ། །གསུམ་པ་ནི་གྲངས་ཇི་ཙམ་མང་ན་བཟང་བས་ཅི་ནུས་སུ་བཟླས་ཤིང་། ཉུང་མཐའ་ཡང་ཉེར་གཅིག་ཡིན་ཏེ། སློབ་དཔོན་འཇམ་དཔལ་གྲགས་པས། ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་འགྱུར་བས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་དག་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་སོ། །དེའི་རྒྱུ་མཚན་ཡང་འདི་བཟླས་པའི་དགོས་པ་ལྟུང་བ་བྱིན་གྱིས་བརླབ་པ་སྟེ། སྟོབས་ཉམས་པར་བྱེད་པ་དང་། མི་འཕེལ་བའི་ཆེད་ཡིན་ལ། དགོས་པ་དེ་དག་བསྒྲུབ་པ་ལ་ཉི་ཤུ་རྩ་གཅིག་པས་ཉུང་བ་མ་བཤད་པའི་ཕྱིར་རོ། །གསུམ་པ་ནི། རྗེ་བཙུན་གྱིས་སྐབས་འདིར་གསལ་བར་མ་བཤད་ཀྱང་། བླ་ཆེན་འཕགས་པས། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཡིས། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ཞེས་ཨ་བྷི་དྷ་ན་ནས་འབྱུང་བ་ལྟར་བརྗོད་པ་ནི་རྒྱུད་དེའི་དོན་དུ་སྣང་ཞིང་གོང་མའི་གདམས་ངག་ཀྱང་ཡིན་ཏེ། རྗེ་བཙུན་རྩེ་མོས་བདེ་མཆོག་གི་ཕྱི་རོལ་མཆོད་པའི་སྐབས་སུ། མདུན་བསྐྱེད་ལ་དམིགས་པའི་ཡི་གེ་བརྒྱ་པ་བཟླས་པའི་མཇུག་ཏུ་ཚིགས་སུ་བཅད་པ་འདི་གཉིས་བརྗོད་པར་གསུངས་པ་དང་། ས་པཎ་གྱི་ཚོགས་འཁོར་རྩོད་སྤོང་དུ་སྔོན་འགྲོ་ཡི་གེ་བརྒྱ་པའི་རྗེས་སུ། ཚིགས་བཅད་འདི་གཉིས་བརྗོད་པར་གསུངས་པས་སོ། །དེའི་མཇུག་ཏུ་བླ་ཆེན་འཕགས་པས་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ། སྒྲིབ་པ། ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཞེས་བརྗོད་པར་གསུངས་པ་ལ་གཞན་ལུགས་ཀྱི་བླ་མ་ཁ་ཅིག སྐུ་གསུང་ཐུགས་ཀྱི་དམ་ཚིག་ཅེས་པའི་ཐ་སྙད་རྙིང་མ་པའི་ལུགས་ཡིན་གྱི་གསར་མའི་གཞུང་གང་ལ་ཡང་མ་བཤད་དོ། །ཞེས་སྨྲ་བ་ནི་སམྦུ་ཊ་ལས། བུད་མེད་དང་ནི་སྐྱེས་པའི་ལུས། །ལས་ནི་དུ་མས་བསྐྱེད་པས་ན། །མི་ཤེས་པས་ཀྱང་མི་བྱ་སྟེ། །སྐུ་ཡི་རྡོ་རྗེའི་དམ་ཚིག་གོ །སེམས་ཅན་སྣ་ཚོགས་གདུང་བ་རྣམས། །ཀུན་རྟོག་དྲྭ་བའི་རྣམ་རྟོག་གིས། །སེམས་ལ་སྨད་པར་མི་བྱ་སྟེ། །ཐུགས་ཀྱི་རྡོ་རྗེའི་དམ་ཚིག་གོ །ཕྲག་དོག་ཉིད་ཀྱིས་མ་རངས་པས། །ཚིག་རྩུབ་ལ་སོགས་སྨྲ་མི་བྱ། །རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ །ཞེས་གསུངས་པ་མ་མཐོང་བཞིན་དུ་རང་དགར་སྨྲ་བར་ཟད་དོ། །དེས་ན་དམ་ཚིག་ཐམས་ཅད་བསྡུ་ན་སྐུ་གསུང་ཐུགས་ཀྱི་དམ་ཚིག་གསུམ་མམ། རྩ་བ་དང་ཡན་ལག་གི་དམ་ཚིག་གཉིས་སུ་འདུས་པས་དེ་དག་ཉམས་པ་བཤགས་པའི་དོན་ཡིན་པས་ཚིག་དོན་གཉིས་ཆར་སྐྱོན་མེད་པར་གྲུབ་བོ། །སྡིག་པ་ནི་ཉོན་མོངས་པའི་སྡིག་པ། སྒྲིབ་པ་ནི་ཤེས་བྱའི་སྒྲིབ་པ། ཉེས་པ་ནི་རང་བཞིན་གྱི་ཉེས་པ། ལྟུང་བ་ནི་བཅས་པའི་ལྟུང་བ། གྲིབ་མ་ནི་གནས་ཀྱི་གྲིབ་མ་ལ་སོགས་པའི་གྲིབ་མ་དྲུག་སྟེ། དེ་དག་བྱང་ཞིང་དག་པར་མཛད་དུ་གསོལ་ཞེས་པའི་དོན་ཏོ། །དེ་ནས་རྗེ་བཙུན་གྱི་ཐུན་འཇོག་ཁར་རྡོ་རྗེ་སེམས་དཔའ་ཡབ་ཡུམ་བདག་རང་ལ་ཐིམ་པས་ལུས་འཇའ་ཚོན་ལྟ་བུར་གྱུར་པར་བསྒོམ་མོ། །ཞེས་གསུངས་པ་ལྟར་བྱའོ། །གསུམ་པ་ནི། དེ་ལྟར་ཐུན་མོང་གི་སྔོན་འགྲོ་གསུམ་གྱིས་རང་གི་སྡོམ་པ་གསུམ་གྱི་ཉེས་ལྟུང་ཕྲ་མོ་ཐམས་ཅད་སྦྱངས་ནས་སྡོམ་གསུམ་དག་པར་བྱས་པ་ལ་དགོས་པ་བསམ་གྱིས་མི་ཁྱབ་པ་ཡོད་དེ། སློབ་དཔོན་འཇམ་དཔལ་གྲགས་པས། སྡོམ་གསུམ་ཆོ་གར་རབ་ཏུ་བརྟག །དེ་ལྟར་སྔགས་པ་ཚུལ་ལྡན་པས། །དངོས་གྲུབ་ལ་ནི་དོགས་མེད་དེ། །སྟོན་པ་སངས་རྒྱས་སོགས་བསྟོད་ཅིང་། །ལྷ་སོགས་འཇིག་རྟེན་ཀུན་གྱིས་བཀུར། །ཞེས་བཤད་པའི་ཕྱིར་རོ། །གཉིས་པ་ལ་གསུམ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ལ་གསུམ། ཡུལ་དག་པ་ལ་བརྟེན་པའི་ཚོགས་བསོག མ་དག་པ་ལ་བརྟེན་པའི་ཚོགས་བསོག ཞར་བྱུང་དེ་དག་གི་དགོས་པ་བཤད་པའོ། །དང་པོ་ལ་བཞི། ཚོགས་བསག་གི་ཞིང་སྤྱན་དྲངས་བ་དེ་ལ་མཆོད་པ། དེའི་སྤྱན་སྔར་རྒྱུན་བཤགས་བྱ་བ། གནང་བ་ནོད་པའོ། །དང་པོ་ནི། རང་སྐད་ཅིག་གིས་ཀྱེ་རྡོ་རྗེར་བསྒོམ་པར་རྗེ་བཙུན་རྩེ་མོས་གསུངས་ཤིང་། ཇི་ལྟར་གསལ་འདེབས་ན། ཁ་ཅིག་སྐུ་རྡོ་རྗེ་ཞལ་གཅིག་ཕྱག་གཉིས་པ། བསྒོམ་པར་འདོད་པ་ལ་ཤེས་བྱེད་ཀྱི་ལུང་མེད་པས། བསྒོམ་བྱའི་དཀྱིལ་འཁོར་གྱི་གཙོ་བོའི་ང་རྒྱལ་དུ་བྱ་དགོས་ཏེ། ཞལ་བརྒྱད་ཕྱག་བཅུ་དྲུག་པར་བསྒོམ་པའམ། ཐུན་མཚམས་ཀྱི་གནས་སྐབས་སུ་ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ཏུ་བསྡུས་པའི་ཞལ་གཅིག་ཕྱག་གཉིས་པ་གང་རུང་ངོ་། །དེ་ལྟར་ལྷ་བསྒོམ་པའི་དགོས་པ་ཡང་ཐ་མལ་གྱི་རྣམ་རྟོག་གི་བློ་བཟློག་པ་དང་། བར་ཆད་ཀྱི་བགེགས་བསྲུང་བ་དང་། ལྷས་ལྷ་ལ་ཚོགས་བསགས་པས་ཚོགས་མྱུར་དུ་རྫོགས་པའོ། །དེའི་སྙིང་གར་ཡན་ལག་དྲུག་པ་ལྟར་ན་པྃ་ལས་པདྨ་དང་། རྃ་ལས་ཉི་མའམ། ཡན་ལག་བཞི་པ་ལྟར་ན་རྃ་ལས་ཉི་མའི་སྟེང་དུ་རང་གི་སེམས་གཟུང་འཛིན་དང་བྲལ་བའི་ངོ་བོ། ཡི་གེ་ཧཱུྃ་སྔོན་པོ་བསྒོམ་མོ། །པདྨའི་ཁ་དོག་གཞུང་གཞན་རྣམས་ནས་མ་བཤད་ཀྱང་མར་མེ་མཛད་ཀྱིས་དམར་པོར་བསྒོམ་པར་བཤད་པ་ནི་ལྷ་དབང་དུ་སྡུད་པ་མཚོན་པས་ལེགས་པ་ཡིན་གསུང་ངོ་། །ཅི་ལྟར་ན་ཧཱུྃ་གཟུང་འཛིན་དང་བྲལ་བའི་ཡིད་དུ་འགྱུར་ཞེ་ན། ཧའི་སྒྲ་ལས། གྲ་ཧ་ཀ་ནི་གཟུང་བ། གྲ་ཧ་ཙ་ནི་འཛིན་པ། ཞབས་ཀྱུ་ཨུ་ལ་རྐྱེན་ཤ་བྱིན་པས། ཤཱུ་ནྱ་ཏཱ་སྟེ་སྟོང་པ། ཀླད་ཀོར་མ་ནི་མ་ནོ་སྟེ་ཡིད་དོ། །དེ་ལྟར་ན་གཟུང་འཛིན་གྱིས་སྟོང་པའི་ཡིད་ཅེས་པར་འགྱུར་རོ། །དེ་ལས་འོད་ཟེར་ཁ་དོག་ལྔ་འཕྲོ་བར་རྗེ་བཙུན་སྐུ་མཆེད་དང་། མཚོ་སྐྱེས་ཀྱིས་བཞེད་ལ། འོད་ཟེར་དེ་ལྕགས་ཀྱུའི་རྣམ་པ་ཅན་དུ་ནག་པོ་པས་བཤད་པས་དེ་ལྟ་བུའི་འོད་ཟེར་དབུགས་ཕྱིར་རྒྱུ་བའི་དུས་ན། སྣ་བུག་གཡས་པ་ནས་སྤྲོས་པས་ཚོགས་རྟེན་གྱི་དཀྱིལ་འཁོར་སྤྱན་དྲངས་སོ། །འདི་ལ་འོད་ཟེར་གྱིས་མདུན་དུ་ཚོགས་རྟེན་བསྒོམ་པ་དང་། གཞན་ནས་སྤྱན་འདྲེན་པ་གཉིས་ལས། ས་ཆེན་ཡབ་སྲས་ཀྱིས་མཚོ་སྐྱེས་ཀྱི་སྐབས་སུ་དང་པོ་གསུངས་ཀྱང་། མན་ངག་ལུགས་ཀྱི་སྐབས་སུ་ཕྱི་མ་གཉིས་གསལ་ལོ། །དེ་ལ་ཡང་རྗེ་བཙུན་རྩེ་མོས་ལྷ་དགུའི་དཀྱིལ་འཁོར་སྤྱན་དྲངས་ནས་ལྷག་པའི་ལྷ་དང་། བླ་མ་དབྱེར་མེད་དུ་བསྒོམ་པར་གསུངས་ལ། རྗེ་བཙུན་གྱིས་ལྷ་དགུའི་དཀྱིལ་འཁོར་སྟེང་གི་ཆ་ལ་བླ་མ་དང་བཅས་པ་སྤྱན་འདྲེན་པར་གསུངས་པ་ནི། ཡན་ལག་བཞི་དྲུག་གི་སྐབས་སུ་སོ་སོར་སྦྱར་བར་བྱའོ། །སྤྱན་འདྲེན་པའི་ཚུལ་ནི། རྡོ་རྗེ་བསྡུ་བའི་སྔགས་དང་། ཕྱག་རྒྱས་བྱ་སྟེ། དེ་ཡང་གུར་འགྲེལ་ལས། རྡོ་རྗེ་སེ་གོལ་སྦྱོར་བ་ཡིས། །ཞེས་བྱ་བ་ནི། ལག་པ་གཉིས་དཔུང་འགོར་རྡོ་རྗེ་བཅིང་བ་བྱས་ལ། ཨོཾ་བཛྲ་ས་མཱ་ཛཿཞེས་བྱ་བར་བརྗོད་ཅིང་མཛུབ་མོ་གཉིས་ལྕགས་ཀྱུ་ལྟར་བཀུག་ནས། མཐེ་བོང་དང་། གུང་མོ་སེ་གོལ་སྦྱར་བའོ། །ཞེས་གསུངས་སོ། །གཉིས་པ་ནི། མཆོད་པའི་སྔོན་དུ་ཕྱག་འཚལ་བ་རྒྱ་གར་བའི་གཞུང་རྣམས་དང་། རྗེ་བཙུན་སྐུ་མཆེད་ཀྱི་ཡན་ལག་བཞི་དྲུག་གཉིས་སུ་མ་གསུངས་པ་ནི། མཆོད་གཏོར་གྱི་རྣལ་འབྱོར་སྔོན་དུ་སོང་བའི་དབང་དུ་བྱས་པ་ཡིན་ལ། སྔོན་དུ་མ་སོང་ན་ངེས་པར་བྱ་དགོས་ཏེ། སམྦུ་ཊ་ལས། ཕྱོགས་བཅུའི་སངས་རྒྱས་ཐམས་ཅད་ལ། །མཆོད་ནས་ཕྱག་འཚལ་འདི་སྐད་གསོལ། །ཞེས་དང་། ལྗོན་ཤིང་དང་། བདག་མེད་མའི་སྒྲུབ་ཐབས་གཉིས་ལས། སྐབས་འདིར་ཕྱག་འཚལ་བར་རྗེ་བཙུན་གྱིས་གསུངས་པའི་ཕྱིར་རོ། །མཆོད་གཏོར་གྱི་རྣལ་འབྱོར་སྔོན་དུ་སོང་ན། དེར་བྱས་པ་ཉིད་ཀྱིས་ཆོག་པས་སྐབས་འདིར་མི་དགོས་ལ། མཆོད་པ་དང་རྒྱུན་བཤགས་ལ་ནི་མི་མཚུངས་ཏེ། གུར་ལས། བླ་མ་རྡོ་རྗེ་ཅན་མཆོད་ཅིང་། །བདུན་པོ་ཡོངས་སུ་དག་པར་བྱ། །ཞེས་ཆོ་གའི་ཡན་ལག་ཉིད་དུ་གསུངས་པའི་ཕྱིར་རོ། །ཕྱག་འཚལ་བའི་ཚིག་ཁ་ཅིག གང་གི་དྲིན་གྱིས་བདེ་ཆེན་ཉིད། །སོགས་དང་། གཞན་དག་རྒྱ་གར་གྱི་སྒྲུབ་ཐབས་ཀྱི་མཆོད་བརྗོད་ཀྱིས་བྱེད་པ་ཡོད་ཀྱང་། འདིར་ནི་རྗེ་བཙུན་གྱིས་བདག་མེད་མའི་སྒྲུབ་ཐབས་ལས། སྔགས་ཙམ་གྱིས་བྱ་བར་གསུངས་པ་ལྟར། ན་མོ་གུ་རུ་བྷྱཿས་བླ་མ་དང་། ན་མཿཤྲཱི་ཧེ་བཛྲ་མཎྜལ་བྷྱཿས་དཀྱིལ་འཁོར་ལ་ཕྱག་བྱའོ། །དེ་ནས་མཆོད་པ་ནི་གང་ཟག་ཐ་མས་མཆོད་པའི་ཡུལ་གྱི་ལྷ་མོ་བརྒྱད་རང་རང་གི་ཕྱག་མཚན་མ་བཟུང་བར། མཆོད་རྫས་བཟུང་ནས་གཙོ་བོ་ལ་མཆོད་པར་བསམས་ལ། འབྲིང་པོས་ནི་སྔར་གི་སྙིང་གའི་ཧཱུྃ་དེ་ལས་མཆོད་པའི་ལྷ་མོ་བརྒྱད་སྤྲོས་ནས་ལྷ་དགུ་ཆར་ལ་མཆོད་པར་བསམས་ཏེ། རྗེ་ས་ཆེན་གྱིས། འབྲིང་དང་ཐ་མ་རྣམ་གཉིས་ཀྱང་། །མཆོད་ལུགས་མི་འདྲ་རྣམ་གཉིས་ཏེ། །དང་པོ་ཐ་མའི་མཆོད་པ་ནི། །མཆོད་པའི་ཞིང་གི་ལྷ་མོ་བརྒྱད། །རང་རྟགས་ཕྱག་མཚན་མ་ཐོགས་པར། །བྱང་ཆུབ་སེམས་སོགས་བདུད་རྩི་ལྔ། །གསང་བ་ཡི་ནི་མཆོད་པས་མཆོད། །བཅུད་ཀྱིས་ལེན་དང་ཅང་ཏེའུ་བརྡུང་། །ཕྱི་ཡི་མཆོད་པ་དེ་ཁོ་ནའི། །མཆོད་པ་གཡུང་མོས་སྐུ་ལ་འཁྱུད། །དེ་ལྟར་རྣམ་པ་གསུམ་གྱིས་ནི། །སྤྱན་དྲངས་ཉིད་ཀྱིས་སྤྱན་དྲངས་ལ། །མཆོད་ལ་འབྲིང་པོའི་མཆོད་པ་ནི། ྎ །རང་རྟགས་ཀྱིས་ནི་མཚན་མ་འཛིན། །མཆོད་བྱེད་ལྷ་མོ་བརྒྱད་རྣམས་ཀྱིས། །མཆོད་པའི་རྫས་ཐོགས་སྙིང་ག་ནས། །སྤྲོས་ལ་མཆོད་པ་གསུམ་གྱིས་མཆོད། །ཅེས་གསུངས་སོ། །དེའི་དོན་ཡང་གང་ཟག་ཐ་མས་དམིགས་པའི་འདོར་ལེན་མང་པོ་མི་ནུས་པའི་དབང་དུ་བྱས་ཏེ། རྩ་རྒྱུད་ལས། འདི་རྣམས་ཀྱིས་ནི་གཙོ་བོ་མཆོད། །ཅེས་པའང་འདི་ལ་དགོངས་སོ། །གང་ཟག་རབ་ཀྱིས་མཆོད་ལུགས་མ་གསུངས་པ་ནི། ཚོགས་གཉིས་བསགས་པ་ལ་མ་ལྟོས་པར་སྐད་ཅིག་གིས་སྣང་བ་ཐམས་ཅད་ལྷར་འཆར་བ་དེ་ཉིད་གསུངས་སོ། །གང་ལྟར་ཡང་མཆོད་པའི་ཚིག་ནི། རྗེ་བཙུན་རྩེ་མོས། ནམ་མཁར་རྗེ་བཙུན་བལྟས་ནས་ནི། །ཞེས་པ་ནས་བརྗོད་པར་གསུངས་ལ། སྒྲུབ་དཀྱིལ་ཕལ་ཆེར་ལས། དཀར་མོ་རི་དྭགས་མཚན་མ་འཛིན། །ཞེས་པ་ནས་བརྗོད་པར་གསུངས་པ་ནི། རྒྱས་བསྡུས་ཀྱི་ཁྱད་པར་ཡིན་ཏེ། སྔ་མ་ལྟར་ན་ཚིགས་བཅད་དང་པོས་མཆོད་ཡུལ་གསལ་གདབ་པ་དང་། མཆོད་པ་མདོར་བསྟན། ལྷག་མ་རྣམས་ཀྱིས་མཆོད་པ་རྒྱས་པར་བཤད་པ་ཡིན་ལ་ཕྱི་མ་ལྟར་ན་མཆོད་པའི་ཚིག་དངོས་སུ་བརྗོད་པའོ། །འདི་ལ་རྗེ་བཙུན་རྩེ་མོས། གསང་བའི་མཆོད་པ། ཕྱིའི་མཆོད་པ། དེ་ཁོ་ན་ཉིད་ཀྱི་མཆོད་པ་གསུམ་དུ་བཤད་པས། དང་པོ་ནི། ལྷ་མོ་དཀར་མོ་སྟེ་གཽ་རཱི། ཕྱག་ན་རི་དྭགས་མཚན་མ་ནི་ཟླ་བ་སྟེ། དེས་བརྡ་བསྟན་པའི་བྱང་སེམས་དཀར་པོས་གང་བའི་ཐོད་པ་འཛིན་པ་དང་། ཆོམ་རྐུན་མ་ནི་ཕྱག་ན་མུན་བའི་བདུད་ལས་རྒྱལ་བ་ཉི་མ་སྟེ། དེས་བརྡ་བསྟན་པ་རཀྟས་གང་བའི་སྣོད་འཛིན་པ་དང་། རོ་ལངས་མ་ནི་དྲི་ཆུས་གང་བའི་ཐོད་པ་འཛིན་པའི་ལག་པ་མ་དང་། གྷསྨ་རཱི་ནི་གསང་བའི་སྨན་དྲི་ཆེན་གྱིས་གང་བའི་ཐོད་པ་འཛིན་ཅིང་། པུཀྐ་སཱི་ནི་རྡོ་རྗེ་སྟེ་ཤ་ཆེན་གྱིས་གང་བའི་ཐོད་པ་འཛིན་པའི་ལག་པ་མ་སྟེ་ལྔའོ། །འདི་ལ་རྗེ་བཙུན་གྱིས་ནང་གི་མཆོད་པ་ཞེས་གསུང་ངོ་། །གཉིས་ནི། ལྷ་མོ་ལྔས་མཆོད་པ་དེ་བཞིན་དུ་རི་ཁྲོད་མ་བཅུད་ལེན་གྱི་རོས་གང་བའི་ཐོད་པ་འཛིན་པ་སྟེ། རྗེ་བཙུན་རྩེ་མོས། བཅུད་ཀྱིས་ལེན་ནི་བསྐལ་པ་བཟང་པོ་ཞེས་བྱ་བ་ལ། སངས་རྒྱས་རྡོ་རྗེ་སེམས་དཔའ་དང་། ཡུམ་རྡོ་རྗེ་སྙེམས་མ་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ལུས་ལ་རེག་ན་སྐྲ་དཀར་དང་གཉེར་མ་མི་འབྱུང་ལ། འཐུངས་ན་ཚེ་ཉི་ཟླ་གནས་ཀྱི་བར་དུ་ཐུབ་པ་ཞིག་ཡིན་ནོ་ཞེས་གྲག་གོ །ཞེས་གསུང་ངོ་། །གདོལ་པ་མོ་ནི་ཅང་ཏེའུ་བརྡུང་བས་མཆོད་དོ། །གསུམ་པ་ནི། འདོད་ཆགས་ཆེན་པོ་སྟེ་ཟག་མེད་ཀྱིས་བདེ་བ་ཉམས་སུ་མྱོང་བས་རྗེས་སུ་ཆགས་པར་བྱ་བའི་ཕྱིར། རྡོ་རྗེ་རིགས་ཀྱི་ལྷ་མོ་གཡུང་མོས་གཙོ་བོའི་སྐུ་ལ་འཁྱུད་པ་ཉིད་དེ། རྗེ་བཙུན་རྩེ་མོས། གཡུང་མོའི་མཆོད་པ་ནི་ལྷ་ཐམས་ཅད་ལ་འཁྱུད་པའི་ཚུལ་བྱ་བའམ། ཡང་ན་བདག་མེད་མ་ལ་ཐིམ་པས་ལྷ་ཐམས་ཅད་རྗེས་སུ་ཆགས་པས་མཉེས་པར་བསམ་པར་བྱའོ། །ཞེས་སོ། །དེ་ལ་ལུགས་དང་པོ་ལྷ་ཐམས་ཅད་ལ་འཁྱུད་པའི་ཚུལ་བྱ་བའི་དོན། ནུབ་བྱང་གི་ཕྱོགས་སུ་གནས་ནས་འཁྱུད་པའི་ཕྱག་རྒྱ་བྱ་བ་ཉིད་ཡིན་གྱི། དངོས་སུ་ལྷ་ཐམས་ཅད་ལ་འཁྱུད་མི་དགོས་ཏེ། བྷ་ཝ་བྷ་དྲས་གཡུང་མོས་མགྲིན་པར་འཁྱུད་ཅེས་པ་ནི། རླུང་གི་གྲྭ་ནས་གཡུང་མོས་མགྲིན་པར་འཁྱུད་པར་གྱུར་པ་ཇི་ལྟར་གྱུར་པ་ཞེས་པ་སྟེ། བྱ་བའི་ཁྱད་པར་འཁྱུད་པའི་ཕྱག་རྒྱ་དང་ལྡན་ཞེས་པའི་དོན་ཏོ། །ཞེས་བཤད་པ་དང་མཐུན་ནོ། །ལུགས་གཉིས་པ་ལྟར་ན་གཡུང་མོ་བདག་མེད་མ་ལ་ཐིམ་པར་བསྒོམས་ཏེ། མི་འཇིགས་པའི་གཞུང་འགྲེལ་ལས་བྱང་དུ་འདོད་ཆགས་རྡོ་རྗེ་མ། སྣ་ཚོགས་བདེ་མ་དང་ལྷན་ཅིག དེའི་བདག་ཉིད་དུ་གྱུར་ནས་ཡང་དག་པར་འཁྱུད་དེ། ཆགས་པ་ཆེན་པོས་རྗེས་སུ་ཆགས་པར་བྱེད་དོ། །ཞེས་བཤད་པ་དང་མཐུན་ནོ། །དེ་ལྟར་ན་ཕྱི་ནང་སོགས་ཀྱི་མཆོད་པ་འདི་རྣམས་ཀྱིས་ནི་གཙོ་བོ་ཧེ་རུ་ཀའམ། འཁོར་དང་བཅས་པ་མཆོད། ཅེས་རིན་ཆེན་འབར་བར་མཇུག་སྡུད་དུ་སྦྱར་བར་བཤད་དོ། །དེ་ལྟར་ན་རྗེ་བཙུན་རྩེ་མོས་གསང་བ་དང་། ཕྱི་དང་། དེ་ཁོ་ན་ཉིད་ཀྱི་མཆོད་པ་ཞེས་དང་། ཕྱི་དང་གསང་བའི་མཆོད་པ་ཞེས་གསུངས་པའི་དང་པོ་ནི། རྫས་ལྔ་པོ་གསང་བའི་རྫས་ཡིན་པ་དང་། འཁྱུད་པ་ལས་དེ་ཁོ་ན་ཉིད་ཀྱི་བདེ་བ་སྐྱེ་བའི་དབང་དུ་མཛད་ལ། ཕྱི་མ་ནི་རྫས་ལྔ་པོ་ནང་གི་མཆོད་པའི་རྒྱུའི་གཙོ་བོ་དང་། འཁྱུད་པ་སྐལ་བ་དང་མི་ལྡན་པ་ལ་གསང་དགོས་པའི་དབང་དུ་བྱས་པ་སྟེ། རིན་ཆེན་འབར་བར། ཕྱི་ནང་གསང་བའི་མཆོད་པ་ཡིས། །བླ་མ་རྡོ་རྗེ་མཆོད་པར་བྱ། །ཞེས་གསུངས་པ་དང་མཐུན་ནོ། །གསུམ་པ་ནི། ཚོགས་རྟེན་གྱི་སྤྱན་སྔར་ཐལ་མོ་སྦྱར་ནས། ཡན་ལག་བདུན་པ་བྱ་སྟེ། འདི་ལ་བདུན་པོ་སོ་སོའི་ངོ་བོ། གོ་རིམ་ངེས་པ། གྲངས་ངེས་པ་དང་གསུམ་ལས། དང་པོ་ནི། ཡན་ལག་བཞི་པ་ལྟར་ན། རྗེ་བཙུན་རྩེ་མོས་གསུངས་པ་ལྟར་ཚིག་ལྷུག་པས་བྱ་ཞིང་། ཡན་ལག་དྲུག་པ་ལྟར་ན། ཚིགས་ལྷུག་པས་བྱ་བ་ལ་བསྔོ་བ་མཇུག་ཏུ་སྟོན་པའམ། རྡོ་རྗེ་གུར་ལས་འབྱུང་བའི། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ཚིགས་བཅད་གསུམ་བརྗོད་པ་གང་རུང་གིས་བྱའོ། །འདི་ལ་ཡན་ལག་བདུན་ལས། དང་པོ་སྡིག་པ་བཤགས་པའི་ཡན་ལག་ནི། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །ཞེས་པ་སྟེ། སྡིག་པ་རང་གི་བྱས་པ་དང་། གཞན་བྱེད་དུ་བཅུག་པ་དང་། ཕ་རོལ་པོས་བྱས་པ་ལ་རྗེས་སུ་ཡི་རང་བར་བྱས་པའི་སྡིག་པ་རྣམས་སྟོབས་བཞིའི་སྒོ་ནས་བཤགས་པའོ། །དེ་ལ་སྟོབས་བཞི་ནི་རྗེ་བཙུན་རྩེ་མོས། རྟེན་གྱི་སྟོབས་ནི་བཅོམ་ལྡན་འདས་ཏེ། ལྷ་དང་བླ་མ་ཐ་མི་དད་པའོ། །རྣམ་པར་སུན་འབྱིན་པ་ནི་བཤགས་པ་སྟེ། སྔར་བྱས་པའི་སྡིག་པ་དྲན་པར་བྱ་སྟེ། དེ་དག་གི་རྣམ་པར་སྨིན་པ་ནི་ངན་འགྲོ་ལས་མེད་ལ། དེ་དག་མ་སྤངས་པར་ནི་བདག་སྡུག་བསྔལ་ལས་གྲོལ་བར་མི་འགྱུར་ལ། དེ་ནི་བདག་ལ་དཔག་ཏུ་མེད་པ་ཅིག་ཡོད་པས་ཁུར་ཆེན་པོ་ཡོད་ཅེས་དྲན་པས་སྔར་གྱི་ལས་ལ་འགྱོད་པ་དྲག་པོ་བསྐྱེད་པར་བྱའོ། །གཉེན་པོ་ནི་མི་བགྱིད་པ་སྟེ་ད་ཕྱིས་སྲོག་གི་ཕྱིར་ཡང་སྤང་བར་འདོད་པའོ། །དེས་སྡིག་པ་འདག་པ་ལ་དགའ་བ་ངང་གིས་སྐྱེ་བ་ནི་སོར་ཆུད་པའི་སྟོབས་སོ། །ཞེས་གསུངས་པ་ལྟར་རོ། །དེ་ལ་ཚིག་རྐང་དང་པོས་རྟེན་གྱི་སྟོབས་བསྟན། གཉིས་པས་རྣམ་པར་སུན་འབྱིན་པའི་སྟོབས་བསྟན། ལྷག་མ་གཉིས་ཤུགས་ལས་བསྟན་ནོ། །གཉིས་པ་རྗེས་སུ་ཡི་རང་བའི་ཡན་ལག་ནི། འགྲོ་བའི་དགེ་ལ་རྗེས་ཡི་རང་། །ཞེས་པ་སྟེ། རང་གཞན་གྱི་དགེ་རྩ་དུས་གསུམ་གྱིས་བསྡུས་པ་ལ་དགའ་བ་ཁྱད་པར་ཅན་བསྒོམ་པའོ། །གསུམ་པ་དོན་དམ་བྱང་ཆུབ་ཀྱི་སེམས་གཟུང་བ་ནི། སངས་རྒྱས་བྱང་ཆུབ་ཡིད་གྱིས་གཟུང་། །ཞེས་པ་སྟེ། སློབ་དཔོན་ཀླུ་སྒྲུབ་ཀྱིས། སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་པ། །རྟག་ཏུ་སྟོང་ཉིད་མཚན་ཉིད་བཞེད། །ཅེས་བཤད་པ་ལྟར་གྱི་བྱང་ཆུབ་ཀྱི་སེམས་ནི་དོན་དམ་བྱང་ཆུབ་ཀྱི་སེམས་ཡིན་ལ། དེ་ཡིད་ཀྱིས་གཟུང་བ་ནི་བསྐྱེད་པར་དམ་བཅའ་བ་སྟེ། རྗེ་ས་པཎ་གྱིས་འདི་དང་། རྣམ་སྣང་མངོན་བྱུང་གི་རྒྱུན་བཤགས་ཀྱི་སྐབས་སུ་དོན་དམ་པའི་སེམས་བསྐྱེད་པར་གསུངས་པ་དམ་བཅའ་ཙམ་ཡིན་གྱི་ཆོ་གའི་སྒོ་ནས་བསྐྱེད་པ་མ་ཡིན་པར་གསུངས་པའི་དོན་ནོ། །ཁ་ཅིག་འདི་དོན་དམ་སེམས་བསྐྱེད་ཀྱི་ཆོ་གར་འདོད་པ་ནི་ཆོ་གའི་རྣམ་པ་མ་ཤར་བ་སྟེ། ཆོ་གས་སྐྱེ་ན་ཆོ་ག་དེ་ཉིད་ཀྱི་ལག་རྗེས་ལ་དོན་དེ་མཚན་ཉིད་པ་རྒྱུད་ལ་སྐྱེ་དགོས་ལ། རྒྱུན་བཤགས་བྱས་མ་ཐག་ཏུ་དོན་དམ་སེམས་བསྐྱེད་མཚན་ཉིད་པ་རྒྱུད་ལ་སྐྱེས་ནས་དང་པོ་ཐོབ་པར་ཐལ་བའི་ཕྱིར་རོ། །བཞི་པ་སྐྱབས་སུ་འགྲོ་བ་ནི། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །ཞེས་པ་སྟེ། འདི་ལ་སློབ་དཔོན་མཚོ་སྐྱེས་ཀྱིས། ཁམས་གསུམ་ཀུན་གྱི་བདག་ཉིད་བདེ་བ་ཆེན་པོའི་རྣམ་པ་སངས་རྒྱས་ཀྱེ་རྡོ་རྗེ་དང་། དེས་བསྟན་པའི་སྔགས་དང་། ཕྱག་རྒྱ་དང་། དཀྱིལ་འཁོར་ལ་སོགས་པའི་རང་བཞིན་གྱི་ཆོས་དང་། དེའི་འཁོར་ནི་འཁོར་ལོར་གནས་པའི་ལྷ་མོའི་ཚོགས་ལ་བདག་སྐྱབས་སུ་སོང་བར་བྱས་ནས་ཞེས་གསུངས་ལ། ནག་པོ་པས་རྒྱུད་གསུང་བ་པོ་རྡོ་རྗེ་འཆང་ནི། སངས་རྒྱས་དཀོན་མཆོག ཐེག་ཆེན་གྱི་ཆོས་མ་ལུས་པ་ནི་ཆོས་དཀོན་མཆོག བྱང་སེམས་ཕྱིར་མི་ལྡོག་པ་དང་། འཁོར་གྱི་ལྷ་དགེ་འདུན་དཀོན་མཆོག་ཏུ་བཤད་དོ། །རིན་ཆེན་འབར་བར་གདུལ་བྱ་གང་ལ་གང་འདུལ་གྱི་སྐུར་སྟོན་པ་སངས་རྒྱས་དཀོན་མཆོག སྤང་བྱ་སྤངས་བའི་འགོག་བདེན་དང་། སོ་སོ་རང་གིས་རིག་པར་བྱ་བའི་ལམ་བདེན་ཆོས་དཀོན་མཆོག དབང་བསྐུར་གྱི་བསླབ་པ་རྒན་ཞིང་རྡོ་རྗེ་ཐེག་པའི་ལམ་ལ་གནས་པ་དང་། དཀྱིལ་འཁོར་གྱི་འཁོར་ལ་བཀོད་པ་དགེ་འདུན་དཀོན་མཆོག་ཏུ་བཤད་ཅིང་། མན་ངག་ལུགས་ལ་ངོས་འཛིན་གསལ་ཁ་མི་སྣང་ཡང་། འདི་དང་མཐུན་པ་ལ་ཆོས་དཀོན་མཆོག་གཟུགས་ཀྱི་རྣམ་པར་བསྒོམ་པའི་ཚེ་གཙོ་བོའི་རྒྱབ་ཏུ་རིན་པོ་ཆེའི་ཁྲིའི་སྟེང་ན་ཆོས་པོ་ཏི་བརྩེགས་པ་བཞུགས་པ་བསྒོམ་པར་བླ་མ་དག་གསུངས་པ་ནི། གསང་སྔགས་པ་རྣམ་པ་ལམ་བྱེད་ཀྱི་སྒོ་ནས་ཕ་རོལ་ཏུ་ཕྱིན་པའི་བསྒོམ་ཚུལ་ལས་ཁྱད་པར་དུ་འཕགས་པར་གསུངས་པའི་དོན་དུ་སྣང་ངོ་། །དེ་དག་ལ་སྐྱབས་སུ་འགྲོ་བའི་དོན་ནི་གཞན་རྒྱུད་ལ་གྲུབ་ཟིན་པ་ལ་སྐྱབས་གནས་འཆའ་བ་ནི་རྒྱུའི་སྐྱབས་འགྲོ་དང་། རང་རྒྱུད་ལ་དེ་དག་བསྐྱེད་པར་ཁས་འཆེ་བ་ནི་འབྲས་བུའི་སྐྱབས་འགྲོའོ། །ལྔ་པ་སྨོན་པའི་སེམས་བསྐྱེད་པ་ནི། རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཞེས་པ་སྟེ། རང་དོན་མཐར་ཐུག་པ་རང་ཉིད་སངས་རྒྱས་ཐོབ་པ་དང་། གཞན་དོན་མཐར་ཐུག་པ་གཞན་སངས་རྒྱས་ཀྱི་ས་ལ་འགོད་པ་གཉིས་ཀ་ལ་ཡང་རྒྱུ་བྱང་ཆུབ་ཏུ་སེམས་བསྐྱེད་པ་དགོས་པས། དགོས་པ་དེ་འགྲུབ་པའི་ཆེད་དུ་སངས་རྒྱས་ཐོབ་པར་འདོད་པའི་བློ་བསྐྱེད་པའོ། །དྲུག་པ་འཇུག་པའི་སེམས་བསྐྱེད་པ་ནི། བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །ཞེས་པ་སྟེ། སྨོན་པ་སེམས་བསྐྱེད་པའི་རྗེས་སུ། འཇུག་པ་སེམས་བསྐྱེད་ཀྱི་བསླབ་བྱ། ཚུལ་ཁྲིམས་ཀྱི་བསླབ་པ་རྣམ་པ་གསུམ་པོ་བསྐྱེད་པར་བགྱི་ཞེས་པའོ། །བདུན་པ་བསྔོ་བ་ནི། འགྲོ་ལ་ཕན་ཕྱིར་སངས་རྒྱས་འགྲུབ་པ་ཤོག །ཅེས་པ་སྟེ། དེ་ལྟར་སྡིག་པ་བཤགས་པ་ནས་འཇུག་པ་སེམས་བསྐྱེད་ཀྱི་བར་གྱི་དགེ་རྩ་བསྔོ་བ་སྟེ། དགོས་ཆེད་དང་བསྔོ་བའི་ཡུལ་ནི་ཚིག་དེ་གཉིས་ཀྱིས་བསྟན་ནོ། །གཉིས་པ་ནི་འོ་ན་ཡན་ལག་བཞི་པར་སྐྱབས་འགྲོའི་འོག་ཏུ་དོན་དམ་སེམས་བསྐྱེད་གཟུང་བར་བཤད་པ་དང་། གོ་རིམ་འགལ་ལོ་སྙམ་ན། སྐྱོན་མེད་དེ་ཡན་ལག་བཞི་པར་ནི་རྡོ་རྗེ་ཐེག་པའི་ཐུན་མོང་མ་ཡིན་པའི་རྒྱུན་བཤགས་ལ་སྐྱབས་འགྲོ་དང་། སེམས་བསྐྱེད་གཉིས། སེམས་བསྐྱེད་ལ་དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་གཉིས་ཞེས་པའི་གོ་རིམ་གྱི་དབང་དུ་བྱས་པ་ཡིན་ལ། འདིར་ནི་འོག་ཏུ་སྐྱབས་འགྲོ་དང་སྨོན་འཇུག་གི་སེམས་བསྐྱེད་དངོས་སུ་ཡོད་པའི་ཚེ། སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་ཚིག་རྐང་དོན་དམ་སེམས་བསྐྱེད་ལ་སྦྱར་ཡང་དེ་དག་དངོས་སུ་མེད་པའི་ཚེ་ཚིག་རྐང་དེ་ཉིད་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ཀྱི་མདོར་བསྟན་དུ་འགྲོ་བའི་གོ་རིམ་གྱི་དབང་དུ་བྱས་པའོ། །ཡན་ལག་བཞི་པར་བསྔོ་བ་ཡན་ལག་གསུམ་པར་བྱས་ནས་འདིར་བསྔོ་བ་མཇུག་ཏུ་སྟོན་པའི་རྒྱུ་མཚན་ཅི་སྙམ་ན། དེར་ནི་ཕ་རོལ་ཏུ་ཕྱིན་པ་དང་ཐུན་མོང་གི་ཡན་ལག་གསུམ་པོ་སྔོན་ཏུ་བཏང་ནས། ཐུན་མོང་མ་ཡིན་པའི་ཡན་ལག་བཞི་པོ་རྗེས་ལ་བྱེད་པའི་དབང་དུ་བྱས་ལ། འདིར་ནི་རྒྱུན་བཤགས་སྔ་མ་རྣམས་ཀྱི་དགེ་བ་ཡང་བསྔོ་བའི་དབང་དུ་བྱས་པའོ། །གསུམ་པ་ནི། གུར་གྱི་རྒྱུན་བཤགས་འདིར་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་གཉིས་མི་དགོས་པ་ཅི་ཡིན་སྙམ་ན། འདི་ལ་བླ་མ་གཟུངས་ཀྱི་པ་ན་རེ། ཡན་ལག་བདུན་པ་ལ་རིགས་གཉིས་ཏེ། སངས་རྒྱས་སྤྲུལ་སྐུ་དང་། ལོངས་སྐུའི་སྤྱན་སྔར་བྱ་བའོ། །དེ་ལ་སྤྲུལ་པའི་སྐུ་གཞན་སྣང་དུ་མྱ་ངན་ལས་འདའ་བ་དང་། ཆོས་ཀྱི་འཁོར་ལོ་མི་བསྐོར་བའི་ཚུལ་སྟོན་པ་ཡོད་པས། དེའི་སྤྱན་སྔར་དེ་དག་བྱ་དགོས་ལ། ལོངས་སྐུ་ངེས་པ་ལྔ་ལྡན་དུ་བཞུགས་པས། ཆོས་ངེས་པ་ཐེག་ཆེན་གྱི་ཆོས་རྒྱུན་མི་འཆད་དུ་གསུངས་པ་དང་། སློབ་དཔོན་ཡེ་ཤེས་སྙིང་པོས། སྤྲུལ་པའི་སྐུ་ནི་མྱ་ངན་ལས། །འདའ་བར་བྱེད་ཀྱི་ཅིག་ཤོས་མིན། །ཞེས་པ་ལྟར། དུས་ངེས་པ་འཁོར་བ་མ་སྟོངས་ཀྱི་བར་དུ་བཞུགས་པས། དེ་ལ་ཆོས་འཁོར་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་གཉིས་མི་དགོས་སོ། །ཞེས་བཞེད་པ་ནི་མི་འཐད་དེ། ཀྱེ་རྡོར་ལྷ་དགུ་དང་བདག་མེད་ལྷ་མོ་བཅོ་ལྔའི་དཀྱིལ་འཁོར་རྣམས་སྤྲུལ་པ་མཆོག་གི་དཀྱིལ་འཁོར་ཡིན་པར་རྗེ་བཙུན་གོང་མའི་གསུང་རབ་རྣམས་ལས་འབྱུང་བའི་ཕྱིར་དང་། གཞན་དུ་ངེས་པ་ལྔ་ལྡན་ཡིན་ན་མདུན་དུ་སྤྱན་དྲངས་དུ་ཡོད་ན། གནས་ངེས་པ་འགལ་ཞིང་། མེད་ན་རྒྱུན་བཤགས་བྱ་བ་འགལ་བའི་ཕྱིར་དང་། བསྐུལ་བ་དང་། གསོལ་བ་འདེབས་པ་སོགས་རང་གི་བློ་སྦྱོང་བ་ཡིན་གྱི་ཡུལ་ལ་ཁྱད་པར་ཡོད་པ་མ་ཡིན་པའི་ཕྱིར་རོ། །འོ་ན་ཅི་ལྟར་སྙམ་ན་དངོས་གཞི་སྔགས་སྡོམ་ལེན་པའི་ཆོ་ག་ལ་སྔོན་འགྲོ་སྟ་གོན་དང་། འཇུག་པའི་སྐབས་སུ་སྡོམ་པ་འོག་མ་གཉིས་ལེན་པའི་ཆོ་ག་ངེས་པར་དགོས་པ་དང་། དངོས་གཞི་བསྐྱེད་རིམ་ཉམས་སུ་ལེན་པ་ལ་གང་ཟག་འབྲིང་དང་། ཐ་མས་སྔོན་འགྲོ་རྒྱུན་བཤགས་ཀྱི་སྐབས་སུ་སྡོམ་པ་འོག་མ་གཉིས་ཀྱི་ཉམས་ལེན་དགོས་པ་ནི། སྔགས་སྡོམ་ལ་སྡོམ་གསུམ་ལྡན་པའི་ཉམས་ལེན་གྱི་དོན་ཡིན་པས། འདིར་རྒྱུན་བཤགས་ཀྱི་སྐབས་སུ་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ངེས་པར་དགོས་ཤིང་། ཡན་ལག་གཞན་རྣམས་ནི་རྒྱས་བསྡུས་ཅི་རིགས་པ་འབྱུང་བས། མེད་ཀྱང་ཆད་པའི་སྐྱོན་དུ་མི་འགྱུར་ལ། ཡོད་ཀྱང་ལྷག་པའི་སྐྱོན་དུ་མི་འགྱུར་རོ། །དེ་ལ་ཡང་ཕ་རོལ་ཏུ་ཕྱིན་པའི་ཐེག་པ་དང་། གྲངས་སྒོ་བསྟུན་པའི་དབང་དུ་བྱས་ནས་ཡན་ལག་བདུན་དུ་གྲངས་ངེས་པ་དང་། དེར་མ་ངེས་པ་རྒྱས་བསྡུས་གཞན་དུ་འབྱུང་བའི་ལུགས་གཉིས་ལས། དང་པོ་ལ་ཡང་ཕ་རོལ་ཏུ་ཕྱིན་པ་དང་། ཐུན་མོང་གི་ཡན་ལག་གཉིས། ཐུན་མོང་མ་ཡིན་པའི་ཡན་ལག་ལྔར་བྱས་པའི་ལུགས་དང་། ཐུན་མོང་བ་གསུམ། ཐུན་མོང་མ་ཡིན་པ་བཞིར་བྱས་པའི་ལུགས་དང་། ཐུན་མོང་བ་ལྔ། ཐུན་མོང་མ་ཡིན་པ་གཉིས་སུ་བྱས་པའི་ལུགས་དང་གསུམ་ལས། དང་པོ་ནི། རྡོ་རྗེ་འབྱུང་བ་ནས་གསུངས་པའི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་གཉིས། ཐུན་མོང་མ་ཡིན་པ་སྐྱབས་འགྲོ་གསུམ་དུ་བགྲངས་པ་དང་། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས་ཏེ་དེ་ལྟར་བདུན་ནོ། །གཉིས་པ་ནི་མན་ངག་ལུགས་ཀྱི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་དང་། བསྔོ་བ་གསུམ། ཐུན་མོང་མ་ཡིན་པ་སྐྱབས་འགྲོ་གཅིག་ཏུ་བགྲངས་པ་དང་། དོན་དམ་སེམས་བསྐྱེད་དང་། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་དེ་གོ་རིམ་མི་འདྲ་བའི་ཁྱད་པར་ནི་བསྟན་ཟིན་ཏོ། །གསུམ་པ་ནི། བཟང་པོ་ཡོངས་བཟུང་ལས་གསུངས་པའི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་དང་། བསྐུལ་བ་དང་། གསོལ་བ་དང་། བསྔོ་བ་སྟེ་ལྔ། ཐུན་མོང་མ་ཡིན་པ་སྐྱབས་འགྲོ་གཅིག་དང་། སྨོན་འཇུག་གི་སེམས་བསྐྱེད་གཉིས་གཅིག་ཏུ་བགྲངས་ཏེ་དེ་ལྟར་བདུན། ཡུལ་སྤྲུལ་སྐུ་དང་ལོངས་སྐུའི་སྒོ་ནས་ཕྱེ་བ་ལ་ནི་འདིས་ཀྱང་གནོད་དོ། །གཉིས་པ་གྲངས་སྒོ་མ་བསྟུན་པར་རྒྱས་བསྡུས་གཞན་དུ་བྱེད་པའི་ལུགས་ལ་རྒྱས་པའི་ལུགས་དང་། བསྡུས་པའི་ལུགས་གཉིས་ལས། དང་པོ་ནི། ནཱ་རོ་ཏ་པའི་མན་ངག་ལས་བྱུང་བ་ཚོགས་བསག་བཅུ་གསུམ་གྱི་ནང་གི་རྒྱུན་བཤགས་ལྟ་བུ་སྟེ། འདི་ལ་ཐུན་མོང་གི་ཡན་ལག་ལྔ། ཐུན་མོང་མ་ཡིན་པའི་ཡན་ལག་བཞི་སྟེ་དགུར་མཛད་དོ། །གཉིས་པ་ནི་རྣམ་སྣང་སྒྱུ་དྲྭ་ལས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་ཚིགས་བཅད་གཅིག་པོ་འདི་ཉིད་ཀྱིས་བྱ་བར་གསུངས་ཏེ། འདིའི་ཚིག་རྐང་པ་ཐ་མའི་དོན་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ཡིན་པས་དོན་མ་ལུས་པ་ཚང་བའོ། །འདི་ལ་དགོངས་ནས་སློབ་དཔོན་ཀླུའི་བློས། །ཚིགས་བཅད་གཅིག་པོ་འདི་ཉིད་ཀྱིས། །རྒྱུན་བཤགས་བྱ་བར་གསུངས་པ་དང་། །རྗེ་བཙུན་རྩེ་མོས་ཌོམྦི་ལུགས་ཀྱི་དཀྱིལ་ཆོག་ཏུ། རྒྱུན་བཤགས་བསྡུས་པ་བྱེད་ན་འདི་ཉིད་ཀྱིས་ཀྱང་ཆོག་པར་གསུངས་པར་ཤེས་པར་བྱའོ། །དེ་ནས་སྐབས་འདིར་རྗེ་བཙུན་སྐུ་མཆེད་ཀྱི་སྒྲུབ་ཐབས་དང་། རྒྱ་གར་བའི་གཞུང་ཐམས་ཅད་ནས་རིགས་ལྔའི་སྡོམ་གཟུང་བྱ་བར་བཤད་པ་མེད་ཀྱང་བླ་མ་རྣམས་ཀྱི་ཕྱག་ལེན་ལ་མཛད་པ་ནི། རྗེ་བཙུན་གྱིས་དགའ་སྟོན་ལ་གདམས་པར། སྲས་བཅས་སངས་རྒྱས་ཐམས་ཅད་དང་། །ཞེས་པ་ལ་སོགས་པ་ལན་གསུམ་གྱིས་རིགས་ལྔའི་སྡོམ་པ་གཟུང་། ཞེས་བཤད་པ་ལ་བརྟེན་པར་སྣང་ཞིང་། དེའི་དགོས་པ་ཡང་དེ་ཉིད་ལས། རྡོ་རྗེ་ཐེག་པའི་རྒྱུ་དུས་ཀྱི་སྟ་གོན་དང་། ཡོལ་བའི་ཕྱི་འཇུག་དང་། ནང་འཇུག་གི་སྡོམ་པ་ཐམས་ཅད་ཀྱང་དེར་སོར་ཆུད་པ་ཡིན་ཞེས་བཤད་པ་ལྟར་རོ། །འདི་རྒྱུན་བཤགས་ཀྱི་ཁོངས་སུ་འདུ་བར་མངོན་རྟོགས་ལྗོན་ཤིང་ལས་བཤད་པ་ནི། དེ་ལྟར་ན། རྡོ་རྗེ་གུར་ལས། རྒྱུན་བཤགས་ཀྱི་རྗེས་སུ་ཚད་མེད་བཞི་བསྒོམ་པ་ལས་གཞན་མ་བཤད་པ་དང་འགལ་ལོ་སྙམ་ན། རྒྱུན་བཤགས་ཀྱི་ནང་གི་འཇུག་པ་སེམས་བསྐྱེད་རྒྱས་པར་བཟུང་བ་ཡིན་པས་དེ་དང་འགལ་བའི་སྐྱོན་མེད་ཅེས་པའི་དོན་ཏོ། །ཉམས་སུ་ལེན་པའི་ཚེ་ནི་མཆོད་གཏོར་སྔོན་དུ་སོང་ན་སྐབས་འདིར་བྱ་མི་དགོས་ཏེ། སྔར་བྱས་ཟིན་མ་ཐག་ཡིན་པའི་ཕྱིར་རོ། །དེ་ལ་དགོངས་ནས་སྔར་གྱི་གཞུང་རྣམས་སུ་མ་བཤད་པ་ཡིན་ལ། མཆོད་གཏོར་གྱི་རྣལ་འབྱོར་སྔོན་དུ་མ་སོང་ན་སྐབས་འདིར་ངེས་པར་བྱ་དགོས་ཏེ། སྡོམ་པ་སོར་ཆུད་དགོས་པའི་ཕྱིར། དེ་ལ་དགོངས་ནས། སམྦུ་ཊའི་རྡོ་རྗེ་དབྱིངས་ཀྱི་མངོན་རྟོགས་ཀྱི་སྐབས་སུ་སྡོམ་གཟུང་བཤད་ཅིང་། བདེ་མཆོག་སོགས་གཞུང་གཞན་ལས་ཀྱང་བཤད་དོ། །རྒྱུན་བཤགས་ལ་མི་མཚུངས་པའི་རྒྱུ་མཚན་ནི། སྔར་ཕྱག་འཚལ་བའི་དོགས་གཅོད་ཀྱི་སྐབས་སུ་བཤད་པ་ལྟར་ཤེས་པར་བྱའོ། །བཞི་པ་ནི། དེ་ལྟར་རྒྱུན་བཤགས་བྱས་པས་ཚོགས་རྟེན་དེ་དག་གི་ཞལ་ནས། རིགས་ཀྱི་བུ་ཁྱོད་ཀྱིས་མཆོག་གི་དངོས་གྲུབ་ཐོབ་པའི་སྐལ་བ་ཡོད་པས། ལམ་རིམ་པ་གཉིས་སྒོམས་ཤིག་ཅེས་གནང་བ་བྱིན་པར་བསམ་མོ། །དེ་ནས་རྗེ་བཙུན་སྐུ་མཆེད་ཀྱིས་ཚོགས་རྟེན་ཇི་ལྟར་བྱེད་མི་གསལ་ཀྱང་། ས་པཎ་གྱི་ཕྱི་ནང་གསང་གསུམ་གྱི་མཎྜལ་གྱི་ཡིག་ཆ་ལས་མི་དམིགས་པའམ། རང་ལ་བསྡུ་བའམ། རང་གནས་སུ་གཤེགས་པ་གང་རུང་བྱ་བར་གསུངས་པ་ལྟར་བྱའོ། །གཉིས་པ་ཡུལ་མ་དག་པ་ལ་བརྟེན་པའི་ཚོགས་བསག་པ་ནི། གུར་ལས། ཚངས་པའི་གནས་ནི་བཞི་པོ་ཡིས། །སེམས་ཀྱི་ངལ་ནི་བསོ་བར་བྱ། །ཞེས་གསུངས་པ་ལྟར་མཐར་ཐུག་གི་ཚངས་པ་སངས་རྒྱས་དང་། གནས་སྐབས་སུ་ལྷ་ཚངས་པའི་གོ་འཕང་ཐོབ་པར་བྱ་བའི་ཐབས་ཚད་མེད་བཞི་བསྒོམ་པར་བྱ་སྟེ། འདིར་རྗེ་བཙུན་རྩེ་མོས་མཚོ་སྐྱེས་ཀྱི་ཊཱི་ཀར། ཚད་མེད་བཞི་ཕར་ཕྱིན་ཐེག་པ་ལྟར་བསྒོམ་པ་དང་། གསང་སྔགས་ལྟར་བསྒོམ་པ་གཉིས་ཀྱི་དང་པོ་སྔར་དང་འདྲ་ལ། ཕྱི་མ་ནི་རང་གི་སྙིང་གའི་ས་བོན་ལས་ལྷ་མོ་པུཀྐ་སཱིའམ་འོད་ཟེར་སྔོན་པོ་འཕྲོས། དེས་སེམས་ཅན་ཐམས་ཅད་བྱམས་པ་ཚད་མེད་པ་ལ་བཀོད་པར་བསམ། དེ་བཞིན་དུ་ཤ་ཝ་རཱིའམ་འོད་ཟེར་དཀར་པོ་འཕྲོས་པས་སྙིང་རྗེ་དང་། ཙཎྜ་ལཱིའམ་འོད་ཟེར་སྔོ་དམར་འཕྲོས་པས་དགའ་བ་དང་། ཌོམྦི་ནཱིའམ་འོད་ཟེར་སྣ་ཚོགས་འཕྲོས་པས་བཏང་སྙོམས་ཚད་མེད་པ་ལ་བཀོད་པར་བསམ་པར་བཞེད་དོ། །གསུམ་པ་ནི་དེ་ལྟར་ཚོགས་བསག་རྣམ་པ་གཉིས་བྱས་པ་ལ་དགོས་པ་ཅི་ཡོད་ཅེ་ན། རྗེ་བཙུན་རྩེ་མོས། དེ་ལྟར་ཚོགས་བསག་བྱས་པ་ཡང་། །དགོས་པ་རྣམ་པ་གཉིས་གསུངས་ཏེ། །རྒྱུད་དག་པ་ཡི་དགོས་པ་དང་། །སྔོན་གྱི་རྒྱལ་དང་མཚུངས་བྱ་འོ། །དེ་ལ་དགོས་པ་དང་པོ་ནི། དཔེར་ན་སྣོད་ནང་བཟའ་འདྲེན་པ། །དང་པོ་སྣོད་དག་བྱས་ནས་ནི། །དེ་ནས་སྣོད་དུ་བཟའ་འདྲེན་ལྟར། །དང་པོར་ཚོགས་བསག་རྒྱུད་དག་པས། །སྣོད་ཀྱི་དྲི་མ་དག་བྱས་མཚུངས། །དེ་ནས་ཚོགས་རྫོགས་ལྷར་བསྐྱེད་པ། །སྣོད་དུ་བཟའ་འདྲེན་ཇི་བཞིན་ནོ། །དགོས་པ་གཉིས་པའང་བཤད་བྱ་སྟེ། །རྒྱལ་པས་སྔོན་དུ་ཚོགས་བསགས་ཏེ། །དེ་རྗེས་སངས་རྒྱས་དེ་བཞིན་དུ། །མཆོད་སོགས་ཚོགས་བསག་པ་དང་མཚུངས། །དེ་ནས་ལྷ་ནི་རྣམ་བསྐྱེད་པ། །མངོན་པར་རྫོགས་སངས་རྒྱས་དང་མཚུངས། །དེ་ཡང་དོན་ནི་འདི་ཡིན་ཏེ། །སྤྱིར་ཕ་རོལ་ཏུ་ཕྱིན་པའི་ཐེག་པ་ལ་བསྐལ་པ་གྲངས་མེད་གསུམ་ལ་སོགས་པར་ཚོགས་བསགས་ནས། མཐར་མངོན་པར་བྱང་ཆུབ་པའི་ཚུལ་དེ་གསང་སྔགས་ཀྱི་ལུགས་ཀྱི་སྟན་ཐོག་གཅིག་ཏུ་བསྒོམ་པ་ཡིན་ཏེ། ཚོགས་བསགས་ནས་དེ་ནས་མངོན་པར་འཚང་རྒྱ་བའི་གནས་ལ་སོགས་པ་དང་། དེར་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་སེམས་ཅན་གྱི་དོན་བྱེད་པ་སླར་ཡང་དག་པའི་མཐའ་ཉིད་དུ་འཇུག་པ་ལ་སོགས་པ་སྟོན་ཏེ། དེས་ན་གསང་སྔགས་འབྲས་བུ་ལམ་དུ་བྱེད་པ་ཞེས་བྱ་བར་འདོད་པའི་གཞུང་ངོ་ཞེས་བཤད་པ་ལྟར་རོ། །གཉིས་པ་ལ་གསུམ། སྟོང་ཉིད་བསྒོམ་པ། དེ་སྔགས་ཀྱིས་བརྟན་པར་བྱ་བ། ཞར་བྱུང་དེ་དག་གི་དགོས་པ་བཤད་པའོ། །དང་པོ་ནི། རྗེ་བཙུན་རྩེ་མོས། བཙན་ཐབས་སུ་སྟོང་ཉིད་བསྒོམ་པ་དང་། བཤིག་ནས་སྟོང་ཉིད་བསྒོམ་པ་གཉིས་ཀྱི་དང་པོ་ནི། སྔགས་བརྗོད་དེ། དེའི་དོན་དྲན་པ་ཙམ་གྱི་སྟོང་པ་ཉིད་དུ་བསྒོམ་པ་དང་། ཕྱི་མ་ནི་གཅིག་དང་དུ་བྲལ་ལ་སོགས་པའི་རིགས་པས་རང་བཞིན་མེད་པར་བྱས་ནས་སྔགས་ཀྱིས་བརྟན་པར་བྱེད་པ་ལ་བཤད་དོ། །དེ་ལ་དང་པོ་ནི། གང་ཟག་བློ་མཆོག་སྟོང་ཉིད་ཀྱི་ལྟ་བ་ཁོང་དུ་ཆུད་པས། སྟོང་ཉིད་ལ་བློ་ཁ་ཕྱོགས་པ་ཙམ་གྱིས་སྣང་བ་ཐམས་ཅད་མི་དམིགས་པར་འགྲོ་བའམ། སྐལ་ལྡན་ཅིག་ཆར་བ་སྔར་དབུ་མའི་ལྟ་བ་ལ་ཐོས་བསམ་མ་བྱས་ཀྱང་གསང་སྔགས་ཀྱི་ལུགས་ཀྱིས་སྟོང་ཉིད་བསྒོམ་ཚུལ་གྱི་དབང་དུ་བྱས་པའོ། །ཕྱི་མ་ནི་སྔར་དབུ་མའི་ལྟ་བ་ལ་ཐོས་བསམ་གྱི་སྦྱངས་པ་རྩོལ་བས་སྟོང་ཉིད་བསྒོམ་དགོས་པ་དག་གིས་ཕ་རོལ་ཏུ་ཕྱིན་པ་དང་ཐུན་མོང་དུ་བསྒོམ་ཚུལ་ལོ། །དེ་གཉིས་ཀ་ལ་ཡང་སྣང་བའི་སྟེང་དུ་བདེན་འཛིན་གྱི་དྲི་མ་སྦྱངས་པར་མ་ཟད་སྣང་བ་ཉིད་ཀྱང་མི་དམིགས་པར་བསྒོམ་དགོས་ཏེ། འོག་ནས་འཆད་པར་འགྱུར་པའི་དགོས་པ་གཉིས་པ་ངེས་པར་བསྒྲུབ་དགོས་པའི་ཕྱིར། དེ་ལ་ཕྱིས་ཀྱི་མདོ་སྔགས་ཀྱི་གཞུང་ལུགས་སྨྲ་བར་རློམ་པ་ཁ་ཅིག་ན་རེ། སྣང་བ་མེད་པར་བསྒོམས་ན་སྣང་བ་ལ་སྐུར་པ་བཏབ་པའི་ལོག་ལྟར་འགྱུར་བས་ངན་འགྲོའི་རྒྱུ་ཡིན་གྱི། བདེ་འགྲོའི་རྒྱུ་ཙམ་དུ་ཡང་མི་རུང་ན་ཡེ་ཤེས་ཚོགས་བསག་ཏུ་ག་ལ་རུང་། དེས་ན་སྣང་བའི་སྟེང་དུ་བདེན་པ་བསལ་ནས་སྣང་བ་ཉིད་མི་བསལ་བར་སྣང་ལ་རང་བཞིན་མེད་པ་སྒྱུ་མ་ལྟ་བུར་བསྒོམ་པ་ཡེ་ཤེས་ཚོགས་བསག་གི་དོན་ཡིན་ནོ་ཞེས་འཛེར་ཏོ། །འོ་ན་ཁྱོད་ཉིད་གསང་བ་འདུས་པའི་ཡེ་ཤེས་ཀྱིས་བསྐྱེད་པའི་སྐབས་སུ་ཁམས་གསུམ་སྣོད་བཅུད་སྲུང་བའི་འཁོར་ལོ་དང་བཅས་པ་འོད་གསལ་སྟོང་པ་ཉིད་དུ་ཐིམ་པར་འདོད་པ་ལ་ཡང་མཚུངས་ཏེ། ཐ་སྙད་དུ་དེ་དག་ལ་སྐུར་པ་བཏབ་པས་བདེ་འགྲོའི་རྒྱུ་ཙམ་དུ་ཡང་མི་རུང་ན། ཡེ་ཤེས་ཀྱི་ས་བསྐྱེད་པར་ག་ལ་རུང་ཞེས་བརྗོད་ན་ལན་ཅི་སྨྲ། དེ་ལ་ཡང་ལན་འདི་སྐད་དུ་སྨྲ་བར་སྣང་སྟེ། ཁོ་བོས་དེའི་ཚེ་ཁམས་གསུམ་སྣོད་བཅུད་སྲུང་བའི་འཁོར་ལོ་དང་བཅས་པ་རེ་ཤིག་བློ་ངོར་མི་དམིགས་པར་སྒོམ་པ་ཙམ་ཡིན་གྱི། མེད་པར་མ་བཏང་བའི་ཕྱིར་ཞེས་སྨྲའོ། །འོ་ན་རྒྱུ་མཚན་དེ་ཉིད་གཞན་གྱིས་ཅིའི་ཕྱིར་སྨྲ་མི་ཤེས། གལ་ཏེ་གཞན་གྱིས་མེད་པར་བཏང་བས་སྨྲ་རྒྱུ་མེད་དོ་སྙམ་ན། བློ་ངོར་མི་དམིགས་པ་ཙམ་གྱིས་མེད་པར་བཏང་ན། ཁྱོད་ཉིད་ཀྱིས་ཀྱང་མེད་པར་བཏང་ལ། སྣང་བ་རང་ངོས་ནས་མེད་པར་བཏང་བ་ནི་གཞན་གྱིས་ཀྱང་མ་བྱས་ཏེ་ད་དུང་སྣང་བ་འདུག་པའི་ཕྱིར་རོ། །ཡེ་ཤེས་ཚོགས་བསག་གི་སྐབས་སུ་སྣང་བ་མི་དམིགས་པར་བསྒོམས་པས། ཐ་སྙད་ལ་སྐུར་པ་བཏབ་ན། དོན་དམ་པར་སྣང་བ་མི་དམིགས་པར་བསྒོམས་པས་ཀྱང་ཐ་སྙད་ལ་སྐུར་པ་བཏབ་པར་འགྱུར་ཏེ། ཡེ་ཤེས་ཚོགས་བསག་ནི་དོན་དམ་གྱི་གནས་ཚུལ་བསྒོམ་པའི་སྐབས་ཡིན་པའི་ཕྱིར་རོ། །ཁྱོད་ཉིད་སྐབས་འདིར་སྣང་བ་མི་བསལ་ན། འོག་ཏུ་རྟེན་དང་བརྟེན་པར་བཅས་པའི་འཁོར་ལོ་བསྒོམ་པའི་ཚེ་རང་གི་གོས་དང་། གདན་དང་། གནས་ཁང་དང་། གདོས་བཅས་ཀྱི་ཕུང་པོ་འདི་དག་གཞལ་ཡས་ཁང་པའི་ཕྱི་ན་ཡོད་པ་ཡིན་ནམ་ནང་ན་ཡོད་པ་ཡིན། རང་གིས་གོན་པའི་གོས་རྣམས་ལྷ་དེ་ཉིད་ལ་གཡོགས་པའི་ཚུལ་དུ་ཡོད་པ་ཡིན་ནམ། མཐའ་སྐོར་དུ་ཡོད་པ་ཡིན། ལེགས་པར་སོམས་ལ་སྨྲོས་ཤིག འདི་ལྟར་སྨྲ་བ་དེས་ནི་བསྐྱེད་རིམ་རྣལ་མ་ཅིག་མ་བསྒོམས་པར་གསལ་ལོ། །གཞན་ཡང་སྟོང་པའི་ངང་ལས་ཞེས་པའི་དོན་ཡང་སྨྲ་དགོས་ཏེ། ཁྱེད་བསྒོམ་པའི་སྟོང་ཉིད་ནི་སྣང་བ་མི་བསལ་བར་བདེན་པར་བསལ་བ་ཙམ་ཡིན་པས་བདེན་པར་མེད་པའི་ངང་ལས་སླར་ཡང་བདེན་པར་ལངས་ཞེས་པར་སོང་བའི་ཕྱིར། སྣང་བ་གསལ་བར་འདོད་པ་ལ་ཡང་མཚུངས་སོ་སྙམ་ན། དེ་དག་ནི་ཐ་མལ་གྱི་སྣང་བ་ཙམ་ཡང་མི་དམིགས་པའི་ངང་ལས་སླར་ཡང་སྣང་བར་འཆར་བ་འདི། ཐ་མལ་གྱི་སྣང་བར་འཆར་བ་བཀག་ནས་ལྷའི་སྣང་བར་བསྒྲུབ་ཅེས་པའི་དོན་ཡིན་པས་ཉེས་པ་མི་མཚུངས་པའི་སྟེང་དུ་ཡེ་ཤེས་ཚོགས་བསག་གི་དོན་ཉིད་ཀྱང་རྟོགས་པར་འགྱུར་རོ། །ཕ་རོལ་ཏུ་ཕྱིན་པའི་དབུ་མའི་སྐབས་སུ་ཡང་། སྣང་བ་དེའི་གནས་ཚུལ་ལ་དཔྱད་པའི་ཚེ་སྣང་བ་དེ་ཉིད་མི་རྙེད་པ། ཐལ་འགྱུར་བའི་ལུགས་མཆོག་དམ་པ་ཡིན་པ་ནི་གཞན་དུ་བཤད་ཟིན་ཏོ། །རྡོ་རྗེ་ཐེག་པའི་སྐབས་འདིར། དབང་གི་སྐབས་སུ་ཐོབ་པའི་ལྟ་བ་བསྒོམ་པ་ལ། སྣང་བའི་དམིགས་པ་གང་ཡང་མེད་པ་བཙན་ཐབས་སུ་བསྒོམ་པ་འདི་ཉིད་མཆོག་ཡིན་པ་ལ་དགོངས་ནས། རྗེ་བཙུན་རྩེ་མོས་སྣང་ལ་རང་བཞིན་མེད་པར་བསྒོམ་པ་དང་། སྣང་མེད་དུ་བསྒོམ་པ་གཉིས་ལས། འདི་ནི་སྣང་བ་མེད་པར་བསྒོམ་པའི་ལུགས་སོ་ཞེས་གསུངས་པར་ཤེས་པར་བྱའོ། །གཉིས་པ་ནི་དེ་ལྟར་སྒོམ་ཚུལ་གཉིས་ལས། བཙན་ཐབས་སུ་སྟོང་ཉིད་བསྒོམས་པས་ནི་སྔགས་བརྗོད་པ་དང་དུས་མཉམ་དུ་སྟོང་ཉིད་བསྒོམ་པ་ཡིན་ལ། བཤིག་སྟེ་སྟོང་ཉིད་བསྒོམས་པས་ནི་སྟོང་ཉིད་བསྒོམས་པའི་རྗེས་སུ་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེའི་དོན་གུར་འགྲེལ་ལས། ཨོཾ་ཞེས་བྱ་བའི་དོན་ནི་འདིའོ། །ཤཱུ་ནྱ་ཏཱ་ཛྙཱ་ནི་སྟེ་རབ་ཏུ་གསལ་བ་ཙམ་ཡིན་པའི་ཕྱིར་རོ། །བཛྲ་ཞེས་བྱ་བ་ནི་བདག་ཉིད་མི་ཕྱེད་པའི་ཕྱིར་དང་། སྒྲིབ་པ་ཐམས་ཅད་འཇོམས་པའི་ཕྱིར་རོ། །ཡང་ན་སྟོང་པ་ཉིད་ཀྱི་དོན་ཅན་གྱི་མེ་ལོང་ལྟ་བུའི་ཡེ་ཤེས་ནི་ཨོཾ་ཞེས་བྱའོ། །མཉམ་པ་ཉིད་ཀྱི་ཡེ་ཤེས་ནི་ཤཱུ་ནྱ་ཏཱའོ། །སོ་སོར་རྟོག་པའི་ཡེ་ཤེས་ནི་ཛྙཱ་ནའོ། །བྱ་བ་ནན་ཏན་གྱི་ཡེ་ཤེས་ནི་བཛྲ་སྟེ། སྤྲུལ་པའི་སྐུ་ནམ་མཁའ་ཇི་སྙེད་པར་གནས་པའི་ཕྱིར་རོ། །ཤིན་ཏུ་རྣམ་པར་དག་པའི་ཡེ་ཤེས་ནི་སྭ་བྷཱ་ཝ་ཨཱཏྨ་ཀོ྅ཧཾ་ངོ་། །ཞེས་བཤད་པ་ལྟར་གོ་བར་བྱའོ། །གསུམ་པ་ནི། དེ་ལྟར་ཡེ་ཤེས་ཀྱི་ཚོགས་བསག་བསྒོམ་པ་ལ་དགོས་པ་ཅི་ཡོད་སྙམ་ན། རྗེ་བཙུན་རྩེ་མོས། ཡེ་ཤེས་ཚོགས་བསག་དགོས་པ་ཡང་། །རྣམ་པ་བཞི་རུ་ཤེས་བྱ་སྟེ། །ཀུན་ཏུ་བརྟགས་པའི་དྲི་མ་ལས། །དག་པར་བྱ་བའི་དགོས་པ་དང་། །གཉིས་པ་ཐམས་ཅད་མཁྱེན་པ་ཡི། །ལྷ་ཡི་མྱུ་གུ་བསྐྱེད་པ་དང་། །གསུམ་པ་བསོད་ནམས་ཚོགས་དང་ནི། །ཡེ་ཤེས་ཚོགས་སུ་འབྲེལ་ཕྱིར་དང་། །བཞི་པ་ཆོས་ཀྱི་སྐུ་ལས་ནི། །གཟུགས་སྐུ་འགྲུབ་པར་བྱ་ཕྱིར་རོ། །དེ་ལས་དང་པོ་བཤད་བྱ་སྟེ། །གང་ཟག་བདག་ལ་སོགས་པ་རྣམས། །ཡང་དག་མ་ཡིན་ཀུན་བརྟགས་པ། །སྟོང་པ་བསྒོམས་པས་དག་ཕྱིར་ཏེ། །དཔེར་ན་རིགས་ངན་ཁང་བསྲེགས་པས། །དག་འགྱུར་དེ་ཡང་ཁ་སྦྱོར་ལས། །དང་པོར་སྟོང་ཉིད་བསམ་པས་ནི། །ལུས་ཅན་རྣམས་ཀྱི་དྲི་མ་བཀྲུ། །གཉིས་པ་ཡང་ནི་བཤད་བྱ་སྟེ། །ཐ་མལ་དངོས་པོ་རགས་པ་རྣམས། །ལན་ཅིག་སྟོང་པར་བསྒོམ་མིན་ན། །འདི་ལས་ལྷར་ནི་བསྐྱེད་མི་བཏུབ། །ལན་ཅིག་སྟོང་པར་བྱས་པ་ཡི། །དེ་ལས་ལྷར་ནི་བསྐྱེད་བྱ་སྟེ། །དང་པོར་རྡོ་སོགས་རགས་པ་རྣམས། །བསལ་ནས་ས་བོན་བཏབ་པ་ལས། །མྱུ་གུ་འབྱུང་ཞིང་དེ་སྐད་དུའང་། །ལུས་སོགས་སྟོང་པའི་ཞིང་ས་ལ། །བློ་དང་ལྡན་པས་ས་བོན་བཏབ། །གསུམ་པ་ཡང་ནི་བཤད་བྱ་སྟེ། །ཐབས་དང་བྲལ་བའི་ཤེས་རབ་དང་། །ཤེས་རབ་བྲལ་བའི་ཐབས་དག་གིས། །འཆིང་ཞིང་གྲོལ་བར་མི་འགྱུར་ལ། །ཐབས་དང་ཤེས་རབ་ཟུང་འཇུག་པས། །གྲོལ་བར་བཤད་པས་བསོད་ནམས་ཚོགས། །ཐབས་ཡིན་ཡེ་ཤེས་ཚོགས་སྟོང་ཉིད། །ཤེས་རབ་ཟུང་དུ་འཇུག་པར་བྱ། །བཞི་པ་སྟོང་ཉིད་ཆོས་སྐུ་ལས། །འོག་གི་ལྷ་བསྐྱེད་གཟུགས་སྐུའོ། །དེ་འགྲུབ་ཕྱིར་ནི་སྟོང་པ་ཉིད། །ཆོས་ཀྱི་སྐུ་ཡི་ངོ་བོར་བསྒོམ། །ཞེས་གསུངས་པ་ལྟར་རོ། །ཡེ་ཤེས་ཚོགས་བསག་དང་། སྲུང་འཁོར་བསྒོམ་པའི་བར་འདིར་གཞན་ལུགས་ཀྱི་བླ་མ་ཁ་ཅིག སྟོང་པའི་ངང་ལས་བར་དོའི་མཚོན་བྱེད་ཡིག་འབྲུ་ལྔ་བར་སྣང་ལ་བསྒོམ་པར་འདོད་མོད་ཀྱི། ཀྱེ་རྡོ་རྗེའི་རྒྱུད་འགྲེལ། སྒྲུབ་ཐབས་ཀྱི་གཞུང་གང་དུའང་ཟུར་ཙམ་ཡང་མི་འབྱུང་ཞིང་། བོད་ཀྱི་བླ་མ་སྔ་རབས་པ་མཁས་པ་སུས་ཀྱང་མ་བཤད་པས་ཡེ་ཤེས་ཞབས་ལུགས་སོགས་གཞན་གྱི་ལུགས་འཕྱུགས་པ་ཡིན་ནོ། །འོ་ན་འདིར་བར་དོའི་སྦྱོང་བྱེད་མེད་པར་འགྱུར་ལ། དེ་ལྟར་ན་སྐུ་གསུམ་ལམ་བྱེད་ཀྱི་སྒྲུབ་ཐབས་སུ་མ་སོང་བས་གནད་ཐམས་ཅད་འཕྱུགས་སོ་སྙམ་ན་སྐབས་འདིར་ནཱ་ད་སོགས་ནམ་མཁའ་ལ་བཞག་པ་མེད་པས་བར་དོའི་སྦྱོང་བྱེད་ཆད་ན་ནི། འདུས་པ་འཕགས་ལུགས་སོགས་ལའང་དེར་ཐལ་བར་འགྱུར་ལ། སྤྱིར་སྒྲུབ་ཐབས་ལ་བར་དོའི་སྦྱོང་བྱེད་མ་ཆད་པ་ཡོད་པས་ཆོག་ན། འདིར་ཡང་སྐྱོན་མེད་དེ། མངོན་བྱང་གསུམ་པ་བར་དོ་སྦྱོང་བྱེད་དུ་འདོད་པའི་ཕྱིར་རོ། །གསུམ་པ་ལ་གཉིས། ཐུན་མོང་གི་སྲུང་འཁོར་དང་། ཐུན་མོང་མ་ཡིན་པའི་སྲུང་འཁོར་རོ། །དང་པོ་ནི་རྩ་རྒྱུད་ལས། རེ་ཕས་ཉི་མ་སྔོན་དུ་རྣམ་བསྒོམས་ནས། །ཉི་དེར་ཧཱུྃ་བྱུང་སྣ་ཚོགས་རྡོ་རྗེ་སྟེ། །རྡོ་རྗེ་དེ་ཉིད་ཀྱིས་ནི་རྭ་བ་དང་། །གུར་བཅིངས་པ་ཡང་རྣམ་པར་བསྒོམ་པ་ཉིད། །ཅེས་གསུངས་པའི་དོན་སྟོང་པའི་ངང་ལས་ཡན་ལག་བཞི་པ་ལྟར་ན། རཾ་ལས་ཉི་མ་རྐྱང་པའམ། དྲུག་པ་ལྟར་ན། པཾ་ལས་པདྨ་དང་། རཾ་ལས་ཉི་མ་སྟེ། རྗེ་བཙུན་སྐུ་མཆེད་ཀྱིས་དེ་ལྟར་སོ་སོར་བཤད་ཅིང་། སློབ་དཔོན་མཚོ་སྐྱེས་དང་། མི་ཐུབ་ཟླ་བས་གུར་གྱི་སྒྲུབ་ཐབས་ལས་ཉི་མ་རྐྱང་པ་དང་། མི་ཐུབ་ཟླ་བའི་ཡན་ལག་དྲུག་པ་དང་། བདག་མེད་མའི་སྒྲུབ་ཐབས་དང་། རིན་ཆེན་འབར་བ་གཉིས་སུ་པདྨ་དང་ཉི་མ་གཉིས་ཀ་བཤད་དོ། །དེའི་སྟེང་དུ་ཧཱུྃ་ལས་བྱུང་བའི་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། དེ་ལ་ཧཱུྃ་གིས་མཚན་པ་བསྒོམས་ཏེ། སྣ་ཚོགས་རྡོ་རྗེའི་དོན་ནི་ཁ་དོག་སྣ་ཚོགས་སུ་འདུག་པ་དང་། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་མཛད་པ་དང་། འོད་ཟེར་སྣ་ཚོགས་འཕྲོ་བས་སྣ་ཚོགས་རྡོ་རྗེའོ། །ཞེས་བོད་ཀྱི་བླ་མ་རྣམས་གསུངས་ལ། རྭ་རྣམས་ནི་སྒྲུབ་ཐབས་མཚོ་སྐྱེས་སུ་སྣ་ཚོགས་རྡོ་རྗེ་རྩེ་མོ་གསུམ་པ་ཅན། འོད་ཟེར་ལྔ་པ་ཅན་ཞེས་པ་ལ་བརྟེན་ནས། རྗེ་བཙུན་རྩེ་མོས་ཡན་ལག་བཞི་པར་རྭ་བཅུ་གཉིས་པ་དང་། རྗེ་བཙུན་གྱིས་ཡན་ལག་དྲུག་པར་རྭ་ཉི་ཤུ་པར་བཤད་ལ། དེའི་དོན་ནི་དང་པོས་རྟེན་འབྲེལ་བཅུ་གཉིས་དང་། ཕྱི་མས་འཇིག་ཚོགས་ལ་ལྟ་བའི་རི་བོ་ཉི་ཤུ་འཇོམས་པ་མཚོན་ཟེར་རོ། །དེ་ལྟར་སྲུང་འཁོར་སྤྲོ་བའི་གཞི་སྣ་ཚོགས་རྡོ་རྗེ་བསྒོམས་ནས། རྒྱ་གར་གྱི་སློབ་དཔོན་ཁ་ཅིག སྣ་ཚོགས་རྡོ་རྗེ་ཉི་མ་དང་བཅས་པ་ཞུ་བ་ལས། རྭ་གུར་སོགས་སྤྲོ་བ་བཤད་པ་ཡོད་ཀྱང་། སློབ་དཔོན་མཚོ་སྐྱེས་དང་། རྗེ་བཙུན་སྐུ་མཆེད་ཀྱིས་འོད་ཟེར་སྤྲོ་བ་བཤད་པས། སྔར་གྱི་སྣ་ཚོགས་རྡོ་རྗེའི་ལྟེ་བའི་ཧཱུྃ་ལས་འོད་ཟེར་དཔག་ཏུ་མེད་པ་འཕྲོས་པས། རྡོ་རྗེ་འགྲེང་བུར་གྱུར་པ་ཟླུམ་པོར་བསྐོར་བ་རེ་རེའི་སྟེང་དུ་རྡོ་རྗེ་མཆུར་རྒྱུགས་ཟླུམ་པོ་དང་། ཡང་དེའི་སྟེང་དུ་རྡོ་རྗེ་འགྲེང་བུ་དང་མཆུར་རྒྱུགས་བརྩེགས་པའི་རྭ་བ་དང་དེའི་ནང་དུ་རྭ་བ་དང་མཉམ་པའི་རྡོ་རྗེའི་གུར་རྩེ་མོ་གུར་སྟབས་ཀྱི་རྣམ་པར་ཡོད་པ་སྟེ། དེ་ཉིད་རྭ་གུར་གཉིས་ཀྱི་ལོགས་ཉིས་རིམ་དུ་གྱུར་པར་རྗེ་བཙུན་རྩེ་མོས་བཤད་དོ། །རྭ་གུར་གཉིས་ལས་འོད་འཕྲོས་པས་རྡོ་རྗེའི་ས་གཞི་དང་། མེ་རི་ཡང་བསྒོམ་མོ། །རྗེ་བཙུན་སྐུ་མཆེད་ཀྱིས། བཞི་པོ་འདི་ཙམ་ཞིག་བཤད་ལ། སློབ་དཔོན་མཚོ་སྐྱེས་ཀྱིས་མེ་རི་དང་། རྭ་བ་དང་། གུར་ཏེ་གསུམ་དུ་བཤད། མི་ཐུབ་ཟླ་བས་ཡབ་ཀྱི་སྒྲུབ་ཐབས་སུ་གུར་དང་། བླ་རེ་གཉིས་ལས་མ་གསུངས་ཀྱང་གུར་གྱི་སྒྲུབ་ཐབས་སུ་རྭ་བའང་གསུངས་པའི་དོན། རིན་ཆེན་འབར་བར། རྭ་བ་བླ་རེ་གུར་ནང་དུ། །ཞེས་གསུངས་སོ། །འདི་དག་གི་ཚད་ཀྱང་སློབ་དཔོན་མཚོ་སྐྱེས་ཀྱིས། ཅི་སྙེད་འདོད་པའི་ཞེས་རང་གི་བློ་ལ་ཅི་ལྟར་འཚམ་པ་ཙམ་བསྒོམ་པར་གསུངས་པ་ནི་གནད་དུ་ཆེ་སྟེ། གཞལ་ཡས་ཁང་རང་གི་བློ་ལ་ཅི་ཙམ་འཚམ་པ་བསྒོམ་དགོས་པས། དེ་དང་འཚམ་པའི་སྲུང་འཁོར་བསྒོམ་དགོས་པའི་ཕྱིར་རོ། །རྒྱ་གར་བ་ཁ་ཅིག དབང་ཆེན་གྱི་ས་གཞི་ལ་ཐུག་གི་བར་དུ་བསྒོམ་པ་དང་། དམྱལ་བའི་ས་གཞི་ལ་ཐུག་གི་བར་དུ་བསྒོམ་པར་བཤད་པ་ཡང་ཡོད་དོ། །དེ་ལྟར་ཐུན་མོང་བའི་སྲུང་འཁོར་བསྒོམས་པའི་རྗེས་སུ་སྔགས་འདིས་བརྟེན་པར་བྱ་སྟེ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ལན་གསུམ་བརྗོད་པས་བྱིན་གྱིས་བརླབ་བོ། །འདིར་བཛྲ་ནི་ཌོམྦི་ལུགས་ཀྱི་སྒྲུབ་ཐབས་རྣམས་དང་རྗེ་བཙུན་སྐུ་མཆེད་ཀྱིས་མ་བཤད་ལ། ཕཊ་སྭཱ་ཧཱ་ནི་མི་ཐུབ་ཟླ་བས་ཡན་ལག་དྲུག་པར་མ་བཤད་ཀྱང་། རྒྱུད་དང་། རིན་ཆེན་འབར་བ་དང་། རྗེ་བཙུན་སྐུ་མཆེད་ཀྱིས་བཤད་དོ། །གཉིས་པ་ལ་གཉིས། སྲུང་འཁོར་ཐུན་མོང་མ་ཡིན་པའི་རྣམ་གཞག་སྤྱིར་བསྟན། ཉམས་སུ་བླང་བའི་རིམ་པ་བྱེ་བྲག་ཏུ་བཤད་པའོ། །དང་པོ་ལ་གསུམ། བཤད་རྒྱུད་ལས་ཇི་ལྟར་གསུངས་ཚུལ། དེ་རྩ་རྒྱུད་ལ་སྦྱར་མི་སྦྱར་དཔྱད་པ། ཐུན་མོང་མ་ཡིན་པའི་སྲུང་འཁོར་གྱི་སྒྲ་དོན་ནོ། །དང་པོ་ལ། ཁྲོ་བོ་སོ་སོའི་མངོན་པར་རྟོགས་པ་དང་། འཁོར་ལོ་ཡོངས་རྫོགས་ཀྱི་མངོན་རྟོགས་གཉིས་སུ་གུར་རྒྱན་ལས་བཤད་པས། དང་པོ་ནི། རྡོ་རྗེ་གུར་ལེའུ་བཞི་པར། གཤིན་རྗེ་གཤེད་ཀྱིས་བུ་མོ་དགུག་པ། ཤེས་རབ་མཐར་བྱེད་ཀྱིས་བགེགས་བསལ་བ། པདྨ་མཐར་བྱེད་ཀྱིས་དུག་ཞི་བ། བགེགས་མཐར་བྱེད་ཀྱིས་ལས་བསྒྲུབ་པ། དབྱུག་སྔོན་ཅན་གྱིས་བསད་ལས་བསྒྲུབ་པ། སྟོབས་པོ་ཆེས་ཀླུའི་གདོན་ཞི་བ། མི་གཡོ་བས་དགུག་པའི་ལས་བྱ་བ། གནོད་མཛེས་ཀྱིས་གནོད་སྦྱིན་མོ་དབང་དུ་བྱ་བ། འདོད་རྒྱལ་གྱིས་བརྒྱ་བྱིན་སོགས་འགུག་པའི་ལས་བྱེད་པ། གཙུག་ཏོར་འཁོར་ལོས་སྒྱུར་བས་ཕྱིར་ཟློག་གི་ལས་བསྒྲུབ་པ་སྟེ། དེ་རྣམས་ཀྱི་ལས་སྦྱོར་དང་། སྔགས་དང་། ལས་སོ་སོའི་ཕན་ཡོན་རྣམས་གསུངས་ལ། དེའི་དོན་གུར་རྒྱན་ལས་འདི་ལྟར་བཤད་དོ། །གཙུག་ཏོར་འཁོར་ལོས་སྒྱུར་བ་མ་གཏོགས་པའི་ཁྲོ་བོ་གཞན་དགུ་པོའི་ལས་བསྒྲུབ་ན། ཚོགས་གཉིས་བསགས་པ་སྔོན་དུ་སོང་ནས་ཐུན་མོང་གི་སྲུང་འཁོར་གྱི་ནང་དུ་པད་ཉིའི་སྟེང་དུ་ས་བོན་ཙམ་མམ། ཆོ་ག་གསུམ་ལས་ཁྲོ་བོ་སོ་སོའི་སྐུར་བསྐྱེད། མིག་དང་སྐུ་སོགས་བྱིན་གྱིས་བརླབ་པ། ཡེ་ཤེས་པ་གཞུག་པ། དབང་བསྐུར་རིགས་བདག་གི་རྒྱས་བཏབ་ནས། སོ་སོའི་སྔགས་ཀྱི་བསྙེན་པ་སྔོན་དུ་སོང་ནས། རང་རང་གི་ལས་རྣམས་རྒྱུད་ནས་བཤད་པ་བཞིན་བསྒྲུབས་པས་ཐོགས་པ་མེད་པར་འགྲུབ་པར་བཤད་ལ། གཙུག་ཏོར་འཁོར་ལོས་སྒྱུར་བ་ནི་འཁོར་ལོ་ཡོངས་རྫོགས་ཀྱི་མངོན་རྟོགས་གཙོ་ཆེ་མོད། དཔའ་བོ་གཅིག་པར་བྱེད་ན། སྲུང་འཁོར་ཐུན་མོང་བའི་ནང་དུ་འཁོར་ལོ་རྩིབས་བཅུ་པའི་ལྟེ་བར། གཙུག་ཏོར་འཁོར་ལོས་སྒྱུར་བ་ཡན་ལག་བཞི་རྫོགས་སུ་བསྐྱེད་ལ། གོང་འོག་གི་ཆོ་ག་རྣམས་སྔ་མ་བཞིན་བྱས་ནས། ཕྱིར་ཟློག་གི་ལས་བསྒྲུབ་པ་སྟེ། དེ་ལྟར་ན་ལྷ་རྐྱང་པའི་སྒྲུབ་ཐབས་ལས་སྦྱོར་དང་བཅས་པ་བཅུ་བཤད་དོ། །གཉིས་པ་འཁོར་ལོ་ཡོངས་སུ་རྫོགས་པའི་མངོན་རྟོགས་ནི། ལེའུ་བཅུ་གཉིས་པར། བདག་མེད་མའི་མངོན་རྟོགས་ཀྱི་སྔོན་འགྲོར། ནམ་མཁའི་ཁམས་ཀྱི་དབུས་གནས་པར། །སྣ་ཚོགས་རྡོ་རྗེ་བསྒོམ་པར་བྱ། །ཧཱུྃ་ནི་བཅུ་ཡི་སྦྱོར་བ་ཡིས། །ཁྲོ་བོ་བཅུ་ནི་རིམ་པས་དགོད། །གཤིན་རྗེ་མཐར་བྱེད་ཤེས་རབ་མཐར། །པདྨ་མཐར་བྱེད་བགེགས་མཐར་བྱེད། །ཊ་ཀི་ཁྲོ་བོ་དབྱུག་པ་སྔོན། །མི་གཡོ་བ་དང་སྟོབས་ཆེན་དང་། །གཙུག་ཏོར་གདུགས་ནི་དཀར་པོ་དང་། །རྡོ་རྗེ་ཞབས་འོག་གནས་པ་ནི། །བདུད་རྩི་སྦྱོར་བས་ཐམས་ཅད་དུ། །ཁྲོ་བོའི་སྒོམ་པས་བསྒོམ་པར་བྱ། །དཔག་ཚད་བརྒྱ་ནི་ཁྱབ་པ་རུ། །བསམས་ནས་བགེགས་ནི་བསྐྲད་པར་བྱ། །ཞེས་ཁྲོ་བོ་བཅུའི་མཚན་ཙམ་ཞིག་ལས་མ་གསུངས་ལ། ལེའུ་བཅུ་བཞི་པར་ཁྲོ་བོ་བཅུའི་ཕྱག་མཚན། སྐུ་མདོག རིགས་བདག གདན། སྲུང་འཁོར་གྱི་ཚད་རྣམས་གསུངས་ཏེ། ལེའུ་འདི་གཉིས་ཕྱོགས་གཅིག་ཏུ་བྱས་ནས་འཁོར་ལོ་ཡོངས་རྫོགས་ཀྱི་མངོན་རྟོགས་སུ། གུར་རྒྱན་ལས་བཤད་པས། དེ་ལྟར་ན་སྔོན་འགྲོ་ཚོགས་གཉིས་བསགས་པ་དང་། རྭ་གུར་གྱི་དབུས་སུ་འཁོར་ལོ་རྩིབས་བཅུ་པའི་ལྟེ་བར་གཙུག་ཏོར་འཁོར་ལོས་སྒྱུར་བ་དང་། སྟེང་དུ་ཧཱུྃ་མཛད་བསྒོམ་པ་ཁ་བསྐང་། ཕྱོགས་མཚམས་བརྒྱད་འོག་དང་བཅས་པར་ཁྲོ་བོ་གཞན་ཏེ། ཐམས་ཅད་ཀྱང་ས་བོན་ཙམ་ལས་བསྐྱེད། མིག་སོགས་བྱིན་གྱིས་བརླབ། སྙིང་གར་རྡོ་རྗེའི་ལྟེ་བར་བསྲུང་བྱའི་མིང་སྦས་ལ། ཡེ་ཤེས་ཀྱི་འཁོར་ལོ་དགུག་གཞུག་བྱ། དབང་བསྐུར་ལ་རིགས་བདག་གི་རྒྱས་གདབ་བོ། །དེ་ནས་སྔགས་བཟླས་པ་དང་བསྟུན་ལ། འཁོར་ལོ་གཡོན་དུ་འཁོར་བས་གནོད་བྱེད་རྣམས་གཏུབས་པ་དང་། ཁྲོ་བོ་རྣམས་ཞལ་ཕྱིར་གཟིགས་ནས། གནོད་པ་ཐམས་ཅད་བཟློག་པར་བསམ་ཞིང་སྔགས་བཟླས་སོ། །དེ་ནས་གོ་གྱོན་པ་སོགས་མཚན་མ་བཟང་པོ་བྱུང་ན་བྲིས་པས་ཕྱིར་བཟློག་པའི་ལས་སྦྱོར་བྱའོ། །དེ་བཞིན་དུ་གཤིན་རྗེའི་གཤེད་དམ། རྟ་མགྲིན་ལ་སོགས་པ་གང་མོས་པ་དབུས་སུ་བསྐྱེད་ལ། དེའི་ཤུལ་དུ་ཧཱུྃ་མཛད་བསྒོམ་ཞིང་འཁོར་ལོའི་དབུས་སུ་ཁྲོ་བོ་གང་ཡོད་ཀྱི་སྔགས་བཟླས་ལ་སྔར་བཤད་པ་ལྟར་གྱི་ལས་སྦྱོར་རྣམས་ཉམས་སུ་བླང་ངོ་། །ཧཱུྃ་མཛད་དབུས་སུ་བཞུགས་པའི་མངོན་རྟོགས་ནི་གཙུག་ཏོར་འཁོར་ལོས་སྒྱུར་བ་སྟེང་དུ་བསྒོམ་ཞིང་། འཁོར་ལོ་གཡས་སུ་འཁོར་བ་ལ་བརྟེན་ནས་སྔགས་མི་བཟློས་པར་བསྲུང་བ་འབའ་ཞིག་བྱ་སྟེ། དེ་ལྟར་ན་འཁོར་ལོའི་མངོན་རྟོགས་བཅུ་གཅིག་གོ །གང་ལྟར་ཡང་རུང་སྟེ་མངོན་པར་རྟོགས་པ་གཞན་དང་འབྲེལ་ན། གཙུག་ཏོར་འཁོར་ལོས་སྒྱུར་བ་ལ་སོགས་པའི་ལྟོ་བའམ་ཧཱུྃ་མཛད་སོགས་ཞུ་བ་ལས་ཆོས་འབྱུང་དུ་གྱུར་པའི་ནང་དུ་གཞལ་ཡས་ཁང་བསམ་པ་ནས་བརྩམས་ཏེ། མངོན་པར་རྟོགས་པ་བསྒོམ་པར་བྱའོ། །ཞེས་གུར་རྒྱན་དུ་བཤད་ཅིང་། ལྷའི་རིགས་ཀྱི་བློ་གྲོས་ཀྱི་གུར་གྱི་སྒྲུབ་ཐབས་ལས་འདི་ནི་སྲུང་བའི་འཁོར་ལོའི་གཙོ་བོ་གང་འདོད་པས་སྲུང་བའི་འཁོར་ལོའི་གཙོ་བོ་བྱའོ་ཞེས་པ་དང་མཐུན་ནོ། །གཉིས་པ་རིན་ཆེན་འབར་བར། རྭ་བ་བླ་རེ་གུར་ནང་དུ། །ཁྲོ་བོ་བཅུས་ཀྱང་བསྲུང་བ་བྱ། །ཞེས་ཟུར་ཙམ་ཞིག་བཤད་ལ། རྗེ་བཙུན་གྱི་ཡན་ལག་དྲུག་པ་དང་། ཡུམ་གྱི་སྒྲུབ་ཐབས་སུ་སྤྲོ་ན་བསྒོམ་པར་གསུངས་སོ། །རྗེ་བཙུན་རྩེ་མོས་ཡན་ལག་བཞི་པ་དང་། མཚོ་སྐྱེས་ཀྱི་འགྲེལ་པར་ཁྲོ་བཅུའི་སྲུང་འཁོར་བསྒོམ་པར་མ་གསུངས་སོ། །དེས་ན་ཁྲོ་བཅུའི་སྲུང་འཁོར་བྱེད་མི་བྱེད་གཉིས་ལས། གུར་ནས་གསུངས་པའི་དཀྱིལ་འཁོར་རྣམས་ལ་ནི་མ་བྱས་ན་ཆོ་ག་ཉམས་པར་འགྱུར་བས་ངེས་པར་བྱ་དགོས་ལ། རྩ་རྒྱུད་ཀྱི་དཀྱིལ་འཁོར་རྣམས་ལ་ནི་མ་བྱས་ཀྱང་ཆོ་ག་ཆད་པའི་སྐྱོན་མེད་ཅིང་། བྱས་ན་ཕུན་སུམ་ཚོགས་པའི་ཡན་ལག་ཏུ་འགྱུར་བ་ཙམ་མོ། །གསུམ་པ་ནི། སློབ་དཔོན་ཁ་ཅིག་ནི། ཁྲོ་བོ་བཅུའི་སྲུང་འཁོར་ལ་རྩིབས་བཅུ་པའི་སྲུང་བའི་འཁོར་ལོ་ཞེས་པ་ཙམ་ལས། ཐུན་མོང་མ་ཡིན་པའི་སྲུང་བའི་འཁོར་ལོ་ཅེས་པའི་ཐ་སྙད་མི་སྣང་ངོ་སྙམ་ན། དེ་ལྟར་ཡིན་མོད་ཀྱི་འོན་ཀྱང་རྗེ་བཙུན་ས་སྐྱ་པ་ཡབ་སྲས་ཀྱིས། ཐུན་མོང་མ་ཡིན་པའི་སྲུང་འཁོར་ཞེས་ཐ་སྙད་མཛད་པ་ནི། གུར་ལས། དེ་ནས་རྡོ་རྗེ་འཛིན་རྒྱལ་ནི། །ཐམས་ཅད་དབུགས་དབྱུང་རབ་རྩོལ་བས། །དམ་ཚིག་རྡོ་རྗེ་སྲུང་དོན་དུ། །སྦས་པའི་སྤྱོད་ཡུལ་འདི་གསུངས་པ། །ཞེས་ཁྲོ་བོ་བཅུའི་སྲུང་འཁོར་ནི་སྦས་ཏེ་གསུངས་པར་བཤད་ལ། གང་དུ་སྦས་ན་ཀྱེ་རྡོར་རྩ་བའི་རྒྱུད་དུ་སྦས་པའོ། །དེས་ན་རྩ་རྒྱུད་དུ་གསུངས་པའི་རྭ་གུར་སོགས་ལ་ཐུན་མོང་བ་དང་། བཤད་རྒྱུད་དུ་གསུངས་པའི་ཁྲོ་བོ་བཅུ་ལ་ཐུན་མོང་མ་ཡིན་པར་འཇོག་པ་ཡིན་གྱི། རྭ་གུར་སོགས་བླ་མེད་ཀྱི་མངོན་རྟོགས་ཕལ་མོ་ཆེ་ལས་འབྱུང་བས་ཐུན་མོང་བ་དང་། ཁྲོ་བཅུ་ཀྱེ་རྡོར་ཁོ་ན་ལས་འབྱུང་བས་ཐུན་མོང་མ་ཡིན་པར་འདོད་པ་ནི་དུས་འཁོར་དང་གསང་འདུས་སོགས་ལའང་ཁྲོ་བཅུའི་སྲུང་འཁོར་ཡོད་པས་དེར་མ་ངེས་སོ། །གཉིས་པ་ཉམས་སུ་བླང་བའི་རིམ་པ་བྱེ་བྲག་ཏུ་བཤད་པ་ནི་དཔལ་བིརྺ་པའི་མན་ངག་ཌོམྦི་ཧེ་རུ་ཀས་དེ་ཉིད་བཅུ་པར་རང་བསྲུང་བ་དང་། གནོད་པ་ཕྱིར་བཟློག་གཉིས་གསུངས་ཤིང་། རྗེ་ས་ཆེན་གྱིས་ཀྱང་དེ་ལྟར་གསུངས་པ་ལྟར་བཤད་ན། འདི་ལ་གཉིས་ཏེ། རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ནི། ཌོམྦི་པས་ཡི་གེ་པཾ་སེར་པོའི་ས་བོན་ལས་བྱུང་བའི་སྣ་ཚོགས་པདྨ་དང་། ཡི་གེ་རཾ་ལས་སྐྱེས་པའི་ཉི་མ་ལ་གནས་པའི་ས་བོན་བྷྲཱུྃ་སེར་པོ་དེ་ཡོངས་སུ་གྱུར་པའི་འཁོར་ལོ་རྩིབས་བཅུ་པའོ། །ཞེས་གསུངས་ཤིང་། དེའི་དབྱིབས་ནི་རྗེ་ས་ཆེན་གྱིས་རྩེ་མོ་རྣོ་བ། ཁོག་པ་སྟོང་པ། ཡངས་ཤིང་རྒྱ་ཆེ་བ་གཅིག་བསྒོམ་ཞེས་གསུངས་པའི་དོན། རྩིབས་བཅུ་ནི་ཕྱོགས་མཚམས་བརྒྱད། །སྟེང་འོག་གཉིས་དང་བཅུ་ཡིན་ལ། །རྩེ་མོ་རྣོ་བ་ནི་རྩ་བ་ནས་རྩེ་མོའི་བར་ཇེ་ཕྲར་སོང་ནས་གཡས་གཡོན་གྱི་སོ་དང་། རྩེ་མོ་རྣམས་རལ་གྲི་སོ་གཉིས་པའི་རྣམ་པ་ལྟར་ཤིན་ཏུ་རྣོ་བའོ། །ཁོག་པ་སྟོང་པ་ནི་རྩིབས་བཅུ་པ་སོ་སོར་གྱེས་པའི་ཚེ་སྟེང་འོག་གི་རྩིབས་ཀྱི་རྩ་བ་ཟླུམ་པོའི་ཁ་ཞེང་དང་། གཡས་གཡོན་གྱི་རྩིབས་ཀྱི་རྩ་བ་ནས་རྩེ་མོའི་བར་མཉམ་པས་སུམ་ཆར་གནས་པའོ། །ཕྱོགས་མཚམས་བརྒྱད་ཀྱི་རྩིབས་ཀྱི་རྩ་བ་ལ་སྟེང་འོག་གཉིས་གཡས་གཡོན་སུམ་ཆ་ཙམ་འབྲེལ་ཞིང་ཕྱི་ནས་བལྟས་པའི་ཚེ་བར་མཚམས་ཅུང་ཟད་མངོན་པ། དབུས་ཀྱི་རྩིབས་ལ་སྦྱར་བ་ན་ཕྱོགས་མཚམས་བརྒྱད་ཀྱི་འོག་ཕྱོགས་ཀྱི་ཁ་དང་། འོག་གི་རྩིབས་ཀྱི་ཁ་གཉིས་མུ་ཁྱུད་གཅིག་གིས་བསྡོམ་ཞིང་། དེ་བཞིན་དུ་སྟེང་གི་ཁ་གཉིས་ཀྱང་མུ་ཁྱུད་གཅིག་གིས་བསྡོམ་པའོ། །དེ་ལྟ་བུའི་ནང་ཐམས་ཅད་སྦུབས་སྟོང་དུ་ཡོད་ཅིང་། མུ་ཁྱུད་གོང་འོག་གི་བར་དུ་ཕྱོགས་མཚམས་ཀྱི་ཁྲོ་བོ་བཞུགས་པའི་ཚེ་འོག་གི་མུ་ཁྱུད་ལ་པད་གདན་ནས་གང་ཙམ་གྱིས་མ་རེག་ཅིང་སྟེང་གི་མུ་ཁྱུད་ལ་གཙུག་ཏོར་ནས་གང་ཙམ་གྱིས་མ་རེག་པ་སྟེ། རྗེ་ས་ཆེན་གྱིས་འཁོར་ལོའི་ལྟེ་བའི་མུ་ཁྱུད་ཀྱི་སྟེང་དུ་ནས་རེས་མ་རེག་པར་པདྨ་དང་། ཉི་མ་བཅུ་བསམ། དེ་ལ་ཤར་གྱི་རྩིབས་ཀྱི་ནང་དུ་ཞེས་བཤད་པས་སོ། །མུ་ཁྱུད་ནི་ངེས་པར་དགོས་ཏེ། མུ་ཁྱུད་ཀྱི་དོན་མཐའ་སྐོར་བ་ཡིན་ཅིང་། ལྟེ་བའི་མུ་ཁྱུད་ཅེས་གསུངས་པས་ལྟེ་བའི་མཐའ་སྐོར་བ་ཡིན་པས་ཕྱོགས་མཚམས་ཀྱི་རྩིབས་ཀྱི་རྩ་བ་སྦྱོར་བ་ཤུགས་ལས་གྲུབ་པའི་ཕྱིར་རོ། །རྩིབས་ཀྱི་མུ་ཁྱུད་ཆོས་ཀྱི་འཁོར་ལོ་ལ་ཡོད་ཀྱང་འདིར་མི་བཞེད་དེ། མཚོན་ཆ་འཁོར་ལོ་ཡིན་པའི་ཕྱིར་རོ། །ཡངས་ཤིང་རྒྱ་ཆེ་བའི་དོན་གུར་ལས་དཔག་ཚད་བརྒྱའི་ཚད་ཙམ་མོ། །ཞེས་གསུངས་པ་ནི་མཚོན་པ་སྟེ། དབུས་ཀྱི་ཁྲོ་བོ་ཞུ་བའམ། དེའི་ལྟོ་བ་ཡངས་པའི་ནང་དུ་ཆོས་འབྱུང་བསྒོམས་ནས། དེར་གཞལ་ཡས་ཁང་བསྒོམ་དགོས་པས། དེ་དང་འཚམ་པ་ལ་དེ་ལ་ལྟོས་པའི་ཡངས་ཤིང་རྒྱ་ཆེ་བ་དགོས་པའི་ཕྱིར་རོ། །དེ་ལྟ་བུའི་འཁོར་ལོའི་དབུས་དང་ཕྱོགས་བཅུར་པདྨ་དང་། ཉི་མའི་གདན་རེ་བསྒོམས་ཏེ། གུར་དང་མི་ཐུབ་ཟླ་བས། རྡོ་རྗེ་དཀྱིལ་འཁོར་དབུས་གནས་པར། །རྡོ་རྗེ་ཉི་མ་བསྒོམ་པར་བྱ། །འོག་ཏུ་པདྨའི་གདན་བསམས་ནས། །ཁྲོ་བོ་བཅུ་རྣམས་རབ་བསྒོམ་བྱ། །ཞེས་བཤད་དོ། །གཉིས་པ་ལ་བཞི་སྟེ། བསྙེན་པ། ཉེར་བསྒྲུབ། སྒྲུབ་པ། སྒྲུབ་ཆེན་གྱི་ཡན་ལག་གོ །དང་པོ་ནི། ལྷ་རྣམས་ས་བོན་ཙམ་ལས་བསྐྱེད་པར་རྗེ་ས་ཆེན་གྱིས་གསུངས་ཤིང་། ས་བོན་དེ་ཡང་གུར་དང་། ཌོམྦི་པ་དང་། མི་ཐུབ་ཟླ་བས་ཧཱུྃ་འབའ་ཞིག་ཏུ་གསུངས་སོ། །རྗེ་བཙུན་གྱི་གུར་རྒྱན་ལས་གཙུག་ཏོར་འཁོར་ལོས་སྒྱུར་བ་བྷྲཱུྃ་ལས་བསྐྱེད་པར་གསུངས་པ་ནི། དེ་དབུས་སུ་བསྒོམ་པའི་ཚེ་དེའི་ས་བོན་དང་། རྟེན་སྲུང་འཁོར་གྱི་ས་བོན་གཉིས་གཅིག་པ་ཅིག་དགོས་སྙམ་དུ་དགོངས་པ་འདྲའོ། །དེར་དབུས་སུ་ཧཱུྃ་མཛད་བསྐྱེད་པ་རྒྱུད་ཀྱིས་སྲུང་འཁོར་གྱི་སྐབས་རྣམས་སུ་དངོས་སུ་མི་སྣང་ཡང་། ལེའུ་བཅོ་ལྔ་པར་དེའི་མངོན་རྟོགས་དང་། ཕན་ཡོན་གྱི་སྐབས་ནས། ལྷ་དང་ལྷ་མིན་ཧཱུྃ་མཛད་ཀྱི། །ཞེས་ལྷ་དང་ལྷ་མིན་གྱིས་བྱས་པའི་བར་ཆད་བསྲུང་བ་ལ་ཧཱུྃ་མཛད་བསྔགས་པར་བཤད་པ་ལ་དགོངས་པ་ཡིན་ནོ། །འཁོར་རྣམས་གང་དུ་བསྐྱེད་པའི་གནས་ནི་ཕྱོགས་བཞི་དང་། སྟེང་འོག་གཉིས་ལ་མི་མཐུན་པ་མེད་ལ། མཚམས་ཀྱི་བཞི་ལ། ཌོམྦི་པས་དབང་ལྡན་དུ་འདོད་རྒྱལ། མེར་དབྱུག་སྔོན་ཅན། བདེན་བྲལ་དུ་སྟོབས་པོ་ཆེ། རླུང་དུ་མི་གཡོ་བ་རྣམས་འགོད་པར་བཤད་པས་དེ་བཞིན་བྱས་ཀྱང་རུང་ལ། རྗེ་ས་ཆེན་གྱིས་དབང་ལྡན་དུ་མི་གཡོ་བ། མེར་འདོད་རྒྱལ། བདེན་བྲལ་དུ་དབྱུག་སྔོན། རླུང་དུ་སྟོབས་པོ་ཆེ་རྣམས་འགོད་པར་གསུངས་པས་དེ་ལྟར་བྱའོ། །སྐུ་མདོག་ནི་གུར་ལས། དབང་པོ་སྔོན་པོའི་རྣམ་པ་ལྟར། །མཐར་བྱེད་རྣམ་པར་བསྒོམ་པར་བྱ། །གཞན་གྱིས་མི་ཐུབ་རྡོ་རྗེ་ནི། །འཇིགས་བྱེད་ཟླ་བའི་ནོར་བུ་འདྲ། །པདྨའི་ཁྲོ་བོ་དམར་པོ་ཆེ། །རྡོ་རྗེ་བདུད་རྩིའི་བདག་ཉིད་ནག །མཚམས་ཀྱི་ཁྲོ་བོ་ཆེར་གནག་ཅིང་། །ཞེས་བཤད་ལ། སྟེང་འོག་གི་ཁྲོ་བོ་གཉིས་ཀྱི་སྐུ་མདོག་ནི་འདིར་མ་བཤད་ཀྱང་། རྗེ་ས་ཆེན་གྱིས་གཙུག་ཏོར་འཁོར་ལོས་སྒྱུར་བ་སེར་པོ་དང་། གནོད་མཛེས་ནག་པོར་གསུངས་པ་བཞིན། ཌོམྦི་པ་དང་ལྷའི་རིགས་ཀྱི་བློ་གྲོས་རྣམས་ཀྱིས་ཀྱང་བཤད་དོ། །དེ་དག་གི་ཕྱག་མཚན་ཡང་གུར་ལས། རྡོ་རྗེ་ཁྲོ་བོ་སྐྱེས་བུ་ཆེ། །ཐམས་ཅད་ཞལ་གཅིག་ཕྱག་གཉིས་པ། །སྙིང་གར་མནན་པའི་ཁུ་ཚུར་མཛུབ། །གཡས་ན་རང་གི་མཚོན་ཆ་འཕྱར། །གཤིན་རྗེ་གསོད་པའི་དབྱུག་ཐོ་སྟེ། །གཞན་གྱིས་མི་ཐུབ་རྡོ་རྗེ་དབྱིག །རྟ་མགྲིན་ལ་ནི་དབང་མཆོག་དམར། །མི་ཕྱེད་བདུད་རྩིའི་ཐབ་སྦྱོར་ལ། ཊཀྐིའི་རྒྱལ་པོ་ལྕགས་ཀྱུ་སྟེ། །དབྱིག་སྔོན་ཅན་ལ་རང་གི་མིང་། །སྟོབས་ཀྱི་རྒྱལ་པོ་རྩེ་གསུམ་པ། །མི་གཡོ་ཡི་གེ་རལ་གྲི་རྩེ། །ཚ་སྐྱོབ་དཀར་པོ་རྒྱལ་པོ་ལ། །ཆོས་ཀྱི་འཁོར་ལོ་རྣམ་པར་བསྒོམ། །གཏུན་ཤིང་རྡོ་རྗེ་རྐང་འོག་ལ། །ཞབས་གཡོན་བརྐྱང་བས་གནས་པ་འོ། །ཞེས་གསུངས་ལ། དེའི་དོན་རྒྱ་བོད་ཀྱི་བླ་མ་རྣམས་ཀྱིས་མི་མཐུན་པ་མི་སྣང་ངོ་། །རྒྱན་དང་བཞུགས་ཚུལ་ནི། ཌོམྦི་པས། ཁྲོ་བོ་ཐམས་ཅད་ཞལ་གཅིག་ཕྱག་གཉིས་པ་སྟེ། གཡོན་གྱི་མཛུབ་མོ་དག་ནི་སྡིགས་མཛུབ་དང་བཅས་པ། གཡས་རྣམས་ནི་རང་རང་གི་ཕྱག་མཚན་འཕྱར་བ། ཁྲོ་བ་དང་བཅས་པའི་ཞལ་མདོག་ཟླུམ་ལ་དམར་བ། སྐྲ་སེར་ལ་གྱེན་དུ་བརྫེས་པ། འོད་ཟེར་འཕྲོ་བས་བདུད་རྣམས་བསྡིགས་པར་མཛད་པ། ཉི་མ་ལ་བཞུགས་ཤིང་ཉི་མའི་དཀྱིལ་འཁོར་གྱི་འོད་ཅན་དག་གོ །གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་དག་ནི་སྦོམ་ལ་གསུས་པ་འཕྱང་བ། སྦྲུལ་གྱིས་བརྒྱན་པ། སྨིན་མ་སེར་པོ་གྱེན་དུ་བརྫེས་པ་ཡིན་ལ། གཞན་རྣམས་རོལ་པའི་སྐུ་ཅན་ཡིན་ནོ། །ཞེས་ཕྱོགས་ཀྱི་ཁྲོ་བོ་བཞི་ཤིན་ཏུ་ཁྲོས་པའི་རྣམ་པ་ཅན་དང་། གཞན་རྣམས་ཅུང་ཟད་ཞི་བའི་ཚུལ་དུ་བཤད་ལ། རྗེ་ས་ཆེན་གྱིས་ཕྱོགས་བཞི་དབུས་མ་དང་ལྔ་ནི་བརྗིད་པའི་ཁྲོ་བོ་སྟེ་ཞེས་དང་། ཁྲོ་བོ་གཞན་རྣམས་ནི་མཛེས་པའི་ཁྲོ་བོ་སྟེ། ཅུང་ཟད་སྒེག་པ། ཡིད་ཙམ་ཁྲོས་པ། སྐེམས་ཤིང་གྲིམས་པ། དར་སྣ་ཚོགས་ཀྱི་ཤམ་ཐབས་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པའོ་ཞེས་བཤད། གུར་རྒྱན་ལས། ཁྲོ་བོ་འདི་རྣམས་ལ་རང་འདྲའི་ཡུམ་ཡོད་པར་མངོན་ཏེ། རང་གི་རིག་མ་སྐྱེས་བུ་བདག །ཅེས་འབྱུང་བའི་དོན་ཡིན་ནོ། །ཞེས་གསུངས་སོ། །གཉིས་པ་ནི། དེ་ལྟར་དམ་ཚིག་པ་བསྐྱེད་ནས་ཡེ་ཤེས་ཀྱི་འཁོར་ལོ་དགུག་གཞུག་བྱའོ། །གསུམ་པ་ནི། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའོ། །བཞི་པ་ནི། དབང་བསྐུར་ནས་རིགས་ཀྱི་བདག་པོའི་རྒྱས་བཏབ་སྟེ། གུར་ལས། སྤྱི་བོར་རྡོ་རྗེ་འཛིན་པ་འཛིན། །གཤིན་རྗེ་རྣམ་སྣང་ཉིད་ཀྱིས་ཏེ། །རྡོ་རྗེ་སེམས་དཔས་དབྱིག་པ་ཅན། །པདྨའི་འཁོར་ལོ་རྣམ་གཟིགས་རྗེས། །རྡོ་རྗེ་སེམས་དཔས་ཐབ་སྦྱོར་ལ། །ཞེས་གསུངས་སོ། །དེའི་དོན་རྗེ་ས་ཆེན་གྱིས། གཤིན་རྗེ་གཤེད་ལ་རྣམ་པར་སྣང་མཛད། པདྨ་མཐར་བྱེད་ལ་འོད་དཔག་མེད། གཞན་ཐམས་ཅད་ལ་མི་བསྐྱོད་པས་དབུ་བརྒྱན་གསུངས་ལ། རྡོ་རྗེ་སེམས་དཔས་ཐབ་སྦྱོར་ལ། །ཞེས་པའི་དོན་ནི། རྡོ་རྗེ་སེམས་དཔའ་དང་། མི་བསྐྱོད་པ་དོན་གཅིག་པས་མི་བསྐྱོད་པ་ཡིན་ལ། མཚམས་ཀྱི་ཁྲོ་བོ་ཆེར་གནག་ཅིང་། །སྤྱི་བོར་རྡོ་རྗེ་འཛིན་པ་འཛིན། །ཞེས་པ་མཚམས་བཞི་ལ་མི་བསྐྱོད་པས་དངོས་སུ་རྒྱས་འདེབས་པར་བསྟན་པའི་ཤུགས་ལ། སྟེང་འོག་གཉིས་ལ་ཡང་མི་བསྐྱོད་པའི་རྒྱས་འདེབས་པར་མངོན་ནོ། །ཌོམྦི་པས་ནི་འདི་དང་མི་འདྲ་བར་གསུངས་ཏེ། ཧཱུྃ་མཛད་ལ་མི་བསྐྱོད་པ། གཤིན་རྗེའི་གཤེད་དང་འདོད་རྒྱལ་ལ་མི་བསྐྱོད་པ། ཤེས་རབ་མཐར་བྱེད་དང་དབྱུག་སྔོན་ཅན་ལ་རྣམ་སྣང་། པདྨ་མཐར་བྱེད་དང་། སྟོབས་པོ་ཆེ་ལ་འོད་དཔག་མེད། བགེགས་མཐར་བྱེད་དང་། མི་གཡོ་བ་ལ་དོན་ཡོད་གྲུབ་པས་རྒྱས་གདབ་པར་གསུངས་སོ། །དེ་ལྟར་ཡན་ལག་བཞི་རྫོགས་སུ་བྱས་ནས་འཁོར་ལོ་གཡས་སུ་འཁོར་བ་དང་། བསྒོམ་པའི་ཁྲོ་བོ་རྣམས་ལས་འོད་ཟེར་མེ་འོད་ལྟ་བུ་དཔག་ཏུ་མེད་པ་འཕྲོས་པས། དེས་བདུད་དང་ལོག་པར་འདྲེན་པ་ཐམས་ཅད་བསྲེགས་ནས་དཔག་ཚད་བརྒྱའི་ཚད་ཙམ་དུ་བསྐྲད་པར་བསམས་སྟེ། མི་ཐུབ་ཟླ་བས། དཔག་ཚད་བརྒྱར་ནི་འཇུག་པ་ཡིས། །བགེགས་རྣམས་བསྐྲོད་པར་བསམ་པར་བྱ། །ཞེས་སོ། །འདི་ནི་ལྗོན་ཤིང་ལས་གསུངས་པའི་དངོས་གཞིའི་ཆིངས་འབྲིང་པོའོ། །ཡང་ན་སྔར་བཞིན་དམ་ཚིག་པ་བསྐྱེད། ཡེ་ཤེས་པ་དགུག་གཞུག་བྱ། སྐུ་གསུང་ཐུགས་ཙམ་བྱིན་གྱིས་བརླབ། དབུ་རྒྱན་རང་ཆས་སུ་བསྒོམ་པར་ཡང་རྗེ་ས་ཆེན་གྱིས་གསུངས་ཏེ། གནད་ཀྱི་གསལ་བྱེད་ལས་གསུངས་པའི་འབྲིང་པོ་ཕྱི་མ་དང་། ལྗོན་ཤིང་ལས་གསུངས་པའི་བསྡུས་པ་དང་པོའོ། །ཡང་ན་ཁྲོ་བོ་རྣམས་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་ཡེ་ཤེས་པ་དགུག་གཞུག་སོགས་མི་བྱ་བར། དེ་ཉིད་བཅུ་པ་དང་། མི་ཐུབ་ཟླ་བས་ཀྱང་བཤད་དེ། བསྡུས་པ་ཕྱི་མའོ། །དེ་ལྟར་རྒྱས་འབྲིང་བསྡུས་གསུམ་གང་ཡང་རུང་བ་ཅིག་བསྒོམས་ནས། དབུས་ཀྱི་ཧཱུྃ་མཛད་ཞུ་བ་ལས་ཆོས་འབྱུང་དུ་གྱུར་པའམ། དེའི་ལྟོ་བ་ཡངས་པའི་ནང་དུ་ཆོས་འབྱུང་བསྒོམ་པ་སོགས་ཀྱི་མངོན་རྟོགས་ལ་འཇུག་སྟེ། རྗེ་ས་ཆེན་གྱིས་རང་བསྲུང་བ་ཙམ་བསྒོམ་པར་འདོད་ན། མངོན་པར་རྟོགས་པ་དང་མ་འབྲེལ་བ་གུད་དུ་བསྒོམ་པ་ནི་མེད་དོ། །དེ་ཡང་མངོན་པར་རྟོགས་པ་ཐམས་ཅད་གོང་མ་དང་འདྲ་བ་ལས་འཁོར་ལོ་གཡས་སུ་འཁོར་བ་དང་། དབུས་སུ་ཧཱུྃ་མཛད་བསྒོམ་ཞིང་སྟེང་དུ་གཙུག་ཏོར་འཁོར་ལོས་སྒྱུར་བ་གཞག་པ་དང་། ལྷ་རྣམས་ཞལ་ནང་དུ་གཟིགས་པ་དང་། སྔགས་བཟླས་མི་དགོས་སོ། །དེ་ནས་ཧཱུྃ་མཛད་ཀྱི་ནང་དུ་གཞལ་ཡས་ཁང་བསྒོམ་པའམ། ཧཱུྃ་མཛད་ཆོས་འབྱུང་དུ་གྱུར་པའི་ནང་དུ་གཞལ་ཡས་ཁང་བསྒོམ་པ་ནས་བཟུང་སྟེ་མངོན་པར་རྟོགས་པ་ལ་འཇུག་གོ །ཞེས་གསུངས་སོ། །གཉིས་པ་ནི་གལ་ཏེ་བསྒོམས་པས་ཕྱིར་བཟློག་པའི་སྲུང་འཁོར་བསྒོམ་པར་འདོད་ན་ཐུན་མོང་གི་སྲུང་འཁོར་སྔར་བཞིན་དུ་བསྒོམས་ལ། དེ་ནས་སྔར་གྱི་སྲུང་འཁོར་དེ་ཉིད་དང་། གནད་ལྔའི་སྒོ་ནས་མི་འདྲ་ཞིང་ལྷག་མ་རྣམས་འདྲ་བར་ཉམས་སུ་ལེན་ཏེ། དེ་ལ་གནད་ལྔ་ལ་མི་འདྲ་བ་དུ་མ་འཆད་ཀྱང་ཤེས་བྱེད་ཀྱི་ཁུངས་མེད་པས་རང་བཟོ་ཁོ་ནར་སྣང་ལ། འདིར་བླ་ཆེན་འཕགས་པས་རང་ཉིད་དབུས་སུ་གཙུག་ཏོར་འཁོར་ལོས་སྒྱུར་བར་བསམ་ཞིང་། སྟེང་དུ་ཧཱུྃ་མཛད་བསྒོམ་པ་གཙོ་བོ་འཕོ་བའི་གནད་དང་། བདག་ཉིད་ཀྱི་སྙིང་གར་ཉི་མའི་སྟེང་དུ་ཧཱུྃ་ལས་རྡོ་རྗེའི་ནང་དུ་བདག་ཉིད་ཀྱི་རྣམ་ཤེས་ཧཱུྃ་དུ་བསམས་ལ། དེའི་མཐར་བསྒྲུབ་བྱའི་མིང་གི་ཡི་གེ་དང་པོ་བསམས་ཏེ། བསྲུང་བར་བསམ་པ་ནི་བསྲུང་བྱ་སྦ་བའི་གནད་དང་། ཁྲོ་བོ་རྣམས་ཤིན་ཏུ་ཁྲོས་པའི་ཚུལ་ཅན་ཞལ་ཕྱི་རོལ་ཏུ་གཟིགས་ནས། ཐུགས་ཀ་ནས་རང་དང་འདྲ་བའི་ཁྲོ་བོ་དུ་མ་འཕྲོས་ཏེ། ཕ་རོལ་གྱི་སྲུང་མ་དང་། བདག་ལ་རྦད་པའི་གནོད་བྱེད་རྣམས་ཚར་བཅད་པར་བསམ་པ་ལྷའི་རྣམ་པའི་གནད་དང་། འཁོར་ལོ་གཡོན་དུ་འཁོར་བས་དགྲ་བགེགས་རྣམས་ཕྱེ་མར་བརླག་པ་འཁོར་ལོ་འཁོར་བའི་གནད་དང་། ཨུཥྞཱི་ཥའི་སྔགས་བཟླ་བ་སྔགས་ཀྱི་གནད་དོ། །གནད་ལྔ་དང་ལྡན་པའོ་ཞེས་གསུངས་པ་ལྟར་ཡིན་ནོ། །དེ་ཡང་དེ་ཉིད་བཅུ་པ་ལས། ད་ནི་བསྒོམས་པས་ཕྱིར་བཟློག་པ་བསྟན་པར་བྱ་སྟེ། ཁྲོ་བོ་གཙུག་ཏོར་འཁོར་ལོས་སྒྱུར་བའི་ཕྱག་གཉིས་རང་གི་ཕྱག་མཚན་དང་། སྡིགས་མཛུབ་ཅན་ཁྲོ་བ་དང་བཅས་པ་ཉི་མའི་གདན་ཅན་གཡས་བརྐྱང་བས་བཞུགས་པ། ཁྲོ་བོའི་གཟུགས་ཅན་དབང་བསྐུར་བ་ལ་སོགས་པ་བླངས་ལ། དགྲ་བོའི་ཚོགས་ལ་བསྡིགས་པ་གཡོན་དུ་འཁོར་བས་གཡོ་བ་རྣམ་པར་བསམས་ལ། ན་མཿས་མནྟ་བུདྡྷཱ་ནཱཾ་ཞེས་སོགས་གསུངས་སོ། །དེ་ལ་གཙོ་བོ་འཕོ་བ་དང་། འཁོར་ལོ་དང་སྔགས་ཀྱི་གནད་གསུམ་དངོས་སུ་བསྟན་ལ། དགྲ་བོའི་ཚོགས་ལ་བསྡིགས་པ་ཞེས་པས་ལྷའི་རྣམ་པའི་གནད་གསལ་བར་བསྟན་ནོ། །བསྲུང་བྱ་སྦ་བའི་གནད་གཞུང་དེ་ནས་དངོས་སུ་མ་གསུངས་ཀྱང་། གུར་འགྲེལ་ལས། བདག་ཉིད་བསྲུང་ན་གཙུག་ཏོར་འཁོར་ལོས་སྒྱུར་བའི་རྣལ་འབྱོར་གྱིས་སྲུང་བའི་འཁོར་ལོའི་དབུས་སུ་གནས་ནས་རང་གི་སྙིང་གར་འཁོར་ལོའི་ལྟེ་བར་ཧཱུྃ་གི་ཐིག་ལེ་ལ་རང་གི་གཟུགས་བསམས་ནས་འཁོར་ལོ་གཡོན་དུ་འཁོར་བར་བསམས་ན་བསྲུང་བར་འགྱུར་ཏེ། གཞན་ལ་ཡང་དེ་བཞིན་ཞེས་བསྲུང་བྱ་སྦ་བ་ཡང་བཤད་པས་གནད་ལྔ་ནི་རྒྱ་གར་གྱི་གཞུང་རྣམས་ནས་འབྱུང་བའི་མན་ངག་ཡིན་གྱི། བོད་ཀྱི་བློས་བརྟགས་ནས་བྱས་པ་མ་ཡིན་ནོ། །འདི་དག་གི་དོན་རྗེ་ས་ཆེན་གྱིས་ཡན་ལག་བཞི་རྫོགས་སུ་བྱས་པའི་རྗེས་ལ། དེ་ནས་ལུས་བསྲུང་ཞིང་མིང་སྦ་བར་བྱ་སྟེ། དེ་ཡང་རང་གི་སྙིང་གའི་ཧཱུྃ་ལས་འོད་འཕྲོས་པས་བ་སྤུའི་བུ་ག་ཐམས་ཅད་རྡོ་རྗེ་ཕྲ་མོ་དཔག་ཏུ་མེད་པས་བལྟམས་པར་བསམ་པ་ནི་གོ་བགོ་བའོ། །དེ་ནས་རང་གི་སྙིང་གར་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་གྱེན་དུ་ལངས་པ་ཅིག་བསྒོམ། དེའི་མཐའ་ན་ཕར་གང་བསྲུང་བར་འདོད་པའི་མིང་གི་ཡི་གེ་དང་པོ་བསམས་ལ། དེ་ཡང་སློབ་དཔོན་བསྲུང་བར་འདོད་ན་སྤྱི་བོར་བསྒོམ། སྤུན་ཟླ་གཡོན་དུ་བསམ། ཕ་མ་བདུན་དུ་བསམ། བུ་དང་ཆུང་མ་གཡས་སུ་བསམ། འཁོར་གཡོག་རྒྱབ་ཏུ་བསམ། ནོར་རྫས་རྣམས་འོག་ཏུ་བསམ། གང་མི་བསྲུང་བ་སྟོང་པར་གཞག་གོ །དེ་ནས་མཆོད་བསྟོད་བདུད་རྩི་མྱང་བ་ལ་སོགས་པ་གྲུབ་ན་བྱ་མ་གྲུབ་ཀྱང་ཆོག་དེ་ནས་ཙཀྲའི་ཕྱོགས་མཚམས་བརྒྱད་ཀྱི་རྩིབས་ཀྱི་བར་དུ། ཡྃ་ལས་རླུང་གི་དཀྱིལ་འཁོར་དེའི་སྟེང་དུ་རྃ་ལས་མེའི་དཀྱིལ་འཁོར་གྱི་སྟེང་དུ། བསྒྲུབ་བྱ་ལུས་རེད་པ། སྐྲ་འཛིངས་པ། ཁ་ནས་ཁྲག་སྐྱུགས་པ། སྤྱིའུ་ཚུགས་སུ་འདུག་པར་བལྟ་སྟེ། དེ་ལ་གནོད་བྱེད་ཀྱི་ཤེས་པ་བཀུག་ལ་བསྟིམ་མོ། །དེ་ནས་སྔགས་བཟླས་པ་དང་། ཁྲོ་བོ་བཅུ་ཞལ་ཕྱིར་གཟིགས་པ་དང་། ཙཀྲ་གཡོན་དུ་མྱུར་བར་འཁོར་བས་གནོད་བྱེད་ཀྱི་ལུས་རླུང་གིས་བསྐྱོད། མེས་བསྲེགས་ཤིང་ཙཀྲའི་རྩེ་མོས་ཉལ་ཉལ་གཏུབས་པར་བསམ་མོ། །དེ་ལྟར་ལུས་གཏུབས་པས་ཁོའི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་བྱང་ནས་རྣམ་པར་ཤེས་པ་མི་བསྐྱོད་པའི་གནས་སུ་སྐྱེ་བར་བསམ་ཞིང་སྔགས་བཟླའོ། །ཞེས་གསུངས་པ་ལྟར་ཉམས་སུ་བླང་བར་བྱའོ། །དེ་ལ་བཟླས་པའི་སྔགས་གུར་ལེའུ་བཞི་པར་བཤད་པའི་སྔགས་ཀྱི་དོན་ནི། ན་མཿས་མནྟ་བུདྡྷཱ་ནཱཾ། ཞེས་པ་ནི་ཀུན་ནས་དྭང་བས་སངས་རྒྱས་ལ་ཕྱག་འཚལ་ལོ་ཞེས་པའི་དོན་ཡིན་ལ། དེ་བཞིན་དུ་ན་མཿས་མནྟ་དྷརྨཱ་ནཱཾ་ཀུན་ནས་དྭང་བས་ཆོས་ལ་ཕྱག་འཚལ་ལོ་ཞེས་པའོ། །ན་མཿས་མནྟ་སཾ་གྷཱ་ནཱཾ་ཀུན་ནས་དྭང་བས་དགེ་འདུན་ལ་ཕྱག་འཚལ་ལོ་ཞེས་པའོ། །ཨོཾ་ནི་འདིར། སྐལ་བཟང་རྣམ་པ་དང་ལྡན་ཞིང་། །ཞེས་པའི་དོན་ནོ། །སི་ཏཱ་ཏ་པ་ཏྲ་ནི་གདུགས་དཀར་པོ་ཅན་ཏེ་ཇི་ལྟར་གདུགས་ཀྱིས་ཚ་གདུང་སྐྱོབ་པ་ལྟར་ཆོས་དབྱིངས་ཡེ་ཤེས་ཀྱིས་ཉོན་མོངས་པའི་གདུང་བ་སྐྱོབ་པའི་དོན་ཏོ། །ཨོཾ་བི་མ་ལ་ནི་དྲི་མ་མེད་པ་སྟེ། ཆོས་དབྱིངས་ཡེ་ཤེས་ཀྱི་རང་གི་ངོ་བོ་ཉོན་མོངས་པ་དང་མཚན་མའི་དྲི་མ་དང་བྲལ་བའོ། །ཨོཾ་ཤཾ་ཀ་ར་ནི་འབྱུང་གནས་ཏེ། ཡེ་ཤེས་དེ་ཉིད་ཆོས་ཀྱི་ལོངས་སྤྱོད་ཀྱི་བདེ་བའི་འབྱུང་གནས་སུ་གྱུར་པའོ། །ཨོཾ་པྲ་ཏྱཾ་གི་ར་བཛྲ་ནི་ཚུལ་མ་ཡིན་བརླག་པར་བྱེད་པའི་རྡོ་རྗེ་སྟེ། ཡེ་ཤེས་དེས་མཚན་མ་དང་རྣམ་པར་རྟོག་པ་ཐམས་ཅད་བརླག་པར་བྱེད་པའོ། །ཨུཥྞཱི་ཥ་ཙཀྲ་ཝརྟི་ནི་གཙུག་ཏོར་འཁོར་ལོས་སྒྱུར་བ་སྟེ། སྔར་གྱི་དྲི་མ་མེད་པ་ལ་སོགས་པའི་ཆོས་གསུམ་དང་ལྡན་པའི་ཆོས་དབྱིངས་ཡེ་ཤེས་དེ་ཉིད་གཟུགས་རྣམས་ཁྲོ་བོ་གཙུག་ཏོར་འཁོར་ལོས་སྒྱུར་བར་ཤར་ཅེས་པའོ། །ཁྲོ་བོ་དེས་བྱེད་ལས་ཅི་ཞིག་ཅེ་ན། སརྦ་ཐམས་ཅད། ཡནྟྲ་འཁྲུལ་འཁོར། མནྟྲ་སྔགས། མཱུ་ལ་ཀརྨཱ་རྩ་བའི་ལས། བནྡྷཱ་ནཱཾ་འཆིང་བ། ཏཱ་ཌ་ནཱཾ་བཟློག་པ་སྟེ། མདོར་ན་སྔགས་དང་། འཁྲུལ་འཁོར་དང་། མངོན་སྤྱོད་ཀྱི་ཕྲིན་ལས་ཀྱི་སྒོ་ནས་བདག་ལ་གནོད་པའི་ལས་ཐམས་ཅད་འཆིང་བ་དང་། བཟློག་པའི་ལས་བྱེད་ཅེས་པའོ། །དེར་མ་ཟད་བྱེད་ལས་གཉིས་པ་ནི། ཀཱི་ལ་ནཱཾ་པཱ་ཕུར་བུའི་མཱ་མ་བདག་ལ། ཀྲྀ་ཏ་བྱས་ན། ཡེ་ན་གལ་ཏེ། ཀེ་ན་བྱེད་ན། ཙིཏྟ་སེམས་ཀྱི། ཀྲྀ་ཏཾ་ཏ་ཏ་དེ་དག་སྟེ། མདོར་ན་གཞན་འབའ་ཞིག་གིས་བདག་ལ་ཕུར་བུ་སྟེ་བྱད་ཀའི་གནོད་པ་བྱས་པ་དང་། བྱེད་པར་སེམས་པ་དེ་དག་ཅེས་པའོ། །སརྦནྟུ་ནི་ཐམས་ཅད་དེ། སྔར་གྱི་གནོད་པའི་ལས་ཐམས་ཅད་ཕྱོགས་གཅིག་ཏུ་བསྡུས་ནས་འཇོམས་ཞེས་པའོ། །ཇི་ལྟར་འཇོམས་ན་ཚིནྡྷ་ཚིནྡྷ་གཏུབས་ཤིག་པ་སྟེ། གཞན་གྱི་རིག་སྔགས་གཏུབས་ཤིག་པའོ། །བིནྡྷ་བིནྡྷ་ཕུག་ཅིག་པ་སྟེ། གཞན་གྱི་ཕྱག་རྒྱ་ཐམས་ཅད་ཕུག་ཅིག་པའོ། །ཙི་རི་ཙི་རི་ནི་ཕྱེ་མར་གྱིས་ཤིག་པ་སྟེ། རྩ་བའི་ལས་དམན་པ་ཐམས་ཅད་ཕྱེ་མར་གྱིས་ཤིག་པའོ། །གི་རི་གི་རི་ནི་གྱིས་ཤིག་པ་སྟེ་གང་གྱིས་ཤིག་ན་མ་ར་མ་ར་གསོད་གསོད་སྟེ། གསོད་པར་གྱིས་ཤིག་པའོ། །དོན་ནི་ཕྱི་རོལ་གྱི་དགྲ་བསད་པས་ལུས་མི་སྣང་བར་བྱས་པ་བཞིན་དུ། ཆོས་དབྱིངས་ཡེ་ཤེས་ཀྱིས་གཟུང་འཛིན་གྱི་བདུད་ཐམས་ཅད་མི་སྣང་བར་གྱིས་ཤིག་པའོ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ནི་ཆོས་ཀྱི་དབྱིངས་ལ་ཡུལ་ཅན་བཅུ་མེད་པའི་ཕྱིར་ཧཱུྃ་བཅུ་སྨོས་པའོ། །ཕཊ་ཕཊ་ཕཊ་ནི་དགས་པ་སྟེ། གནས་གསུམ་དུ་ལྟུང་བའི་ཉེས་པ་རྣམས་དགས་པའི་དོན་ཏོ། །དོན་དེ་དག་དང་ལྡན་པའི་གསང་སྔགས་ལན་བདུན་ནམ་ཉེར་གཅིག་གམ་བརྒྱ་རྩ་བརྒྱད་ལ་སོགས་པ་ཅི་རིགས་པར་བཟླས་ཤིང་། དེའི་ཚེ་དམིགས་པ་ཇི་ལྟར་བྱ་ན། རྗེ་བཙུན་གྱི་མན་ངག་ལས། ན་མཿས་མནྟ་ནས་ཙཀྲ་ཝརྟི་ཡན་ཆད་ཀྱིས་གཙོ་བོ་གསལ་གདབ། སརྦ་ཡནྟྲ་ནས་མ་ར་ཡན་ཆད་ཀྱིས། ཁྲོ་བོ་རྣམས་ལས་ཁྲོ་བོ་རང་འདྲ་བ་དཔག་ཏུ་མེད་པ་སྤྲོས་ལ། གནོད་བྱེད་ཐམས་ཅད་ཚར་བཅད་པར་བསམ་མོ། །ཧཱུྃ་བཅུ་ཡིས་ཁྲོ་བོ་བཅུ་གསལ་གདབ། ཕཊ་གཅིག་གིས་སྟེང་། གཅིག་གིས་འོག གཅིག་གིས་བདག་དང་བསྲུང་བྱ་རྣམས་གསལ་གདབ། ཞེས་གསུངས་པ་ལྟར་བྱའོ། །དེ་ནས་འཕྲོ་འཇོག་པ་ན། རྗེ་ས་ཆེན་གྱིས་གང་དག་བདག་ལ་སྡང་བའི་སེམས་དང་ལྡན་པ་རྣམས་དང་། གདུག་པའི་སེམས་དང་ལྡན་པ་རྣམས་དང་། དྲག་ཤུལ་གྱི་སེམས་དང་ལྡན་པ་རྣམས་དང་། སྦྱོར་བ་ངན་པར་བྱེད་པའི་དགྲ་བགེགས་གང་ཡིན་པ་དེ་དག་གི་ལུས་བཅིང་བར་བགྱིའོ། །ངག་བཅིང་བར་བགྱིའོ། །ཡིད་བཅིང་བར་བགྱིའོ། །མཐུ་བརླག་བར་གྱུར་ཅིག རྫུ་འཕྲུལ་བརླག་པར་གྱུར་ཅིག སྟོབས་བརླག་པར་གྱུར་ཅིག དེས་བཟླས་པའི་སྔགས་ཀྱིས་དེ་ཉིད་བརླག་པར་གྱུར་ཅིག དེས་བསྒྲུབས་པའི་ལྷ་འདྲེས་དེ་ཉིད་ཀྱི་ཤ་ལ་ཟ་བར་གྱུར་ཅིག ཅེས་བརྗོད་ཅིང་ཐལ་མོ་བརྡབ་བོ། །ཞེས་གསུངས་པ་ལྟར་ངག་ཏུ་བཟློག་པའི་ཚིག་དེ་དག་བརྗོད་ཅིང་། ལུས་ཀྱིས་ཐལ་མོ་བརྡབ་སྟེ། རྡོ་རྗེ་གུར་ལས། ཧཱུྃ་གིས་དྲེགས་བྱས་ཕྱག་རྒྱས་གདབ། །རྡོ་རྗེ་འཚིར་བས་འཚིར་བ་ཉིད། །ཅེས་པའི་དོན། ལག་པ་གཉིས་ཀྱི་མཐིལ་དུ་ཧཱུྃ་ལས་སྣ་ཚོགས་རྡོ་རྗེ་བསྒོམ། སོར་མོ་རྣམས་ཀྱང་རྡོ་རྗེའི་རང་བཞིན་དུ་བསམས་ལ། ལག་པ་གཉིས་ཐལ་མོ་བརྡབ་པའི་བར་དུ་བགེགས་འཚིར་བར་བསམ་པ་གུར་རྒྱན་དུ་བཤད་ལ། དེ་ནས་སེམས་ཀྱི་དམིགས་པ་ནི་རྗེ་ས་ཆེན་གྱིས་བདག་ཉིད་ཀྱི་ཐུགས་ཀ་ནས་ཁྲོ་བོ་རང་འདྲ་བ་མཚོན་ཆ་ཐོགས་པ་དཔག་ཏུ་མེད་པ་སྤྲོས་ཏེ། གནོད་བྱེད་ཐམས་ཅད་ཀྱི་ལྕེ་བཅད་ཅིང་ལུས་མགོ་ནས་བཤང་ལམ་གྱི་བར་དུ་གཏུབས། གཤག་ཅིང་ལུས་རྡུལ་ཕྲ་རབ་ཙམ་དུ་བྱས་ནས་མེས་བསྲེགས། རླུང་གིས་གཏོར་བར་བསམ་ཞེས་གསུངས་པ་ལྟར་རོ། །དེ་ལྟར་བྱས་པའི་རྗེས་སུ་གཙུག་ཏོར་འཁོར་ལོས་སྒྱུར་བའི་ལྟོ་བ་ཡངས་པའམ། དེ་འོད་དུ་ཞུ་བ་ལས་ཆོས་འབྱུང་དུ་བསམས་ནས་མངོན་པར་རྟོགས་པ་བསྒོམ་པ་ལ་འཇུག་གོ །ལྟོ་བའི་ནང་དུ་བསྒོམ་པ་ནི་རྡོ་རྗེ་གུར་ལས། ཡེ་ཤེས་རྡོ་རྗེ་རང་དབུས་སུ། །བཅུ་ཕྱེད་དཀྱིལ་འཁོར་བདག་ཉིད་དེ། །ཞེས་སྲུང་འཁོར་གྱི་སྐབས་ནས་གསུངས་པའི་དོན་ཡེ་ཤེས་རྡོ་རྗེ་སྟེ། རྣལ་འབྱོར་པ་རང་ཉིད་ཧཱུྃ་མཛད་ལ་སོགས་པ་དབུས་ཀྱི་ཁྲོ་བོའི་ང་རྒྱལ་གྱིས་སྲུང་འཁོར་གྱི་དབུས་སུ་གནས་ནས། བཅུ་ཕྱེད་དཀྱིལ་འཁོར་ཏེ། རིགས་བསྡུས་ཀྱི་དཀྱིལ་འཁོར་གྱི་དཀྱིལ་འཁོར་ལྔ་པོ་བདག་ཉིད་ཀྱི་ལྟོ་བར་བསྒོམ་ཞེས་པ་སྟེ། ལྷའི་རིགས་ཀྱི་བློ་གྲོས་ཀྱི་འགྲེལ་པར། དབུས་ན་དཀྱིལ་འཁོར་ལྔ་ལ་ཁྲོ་བོ་གཞན་དང་ལྡན་པའོ། །ཞེས་སྲུང་འཁོར་གྱི་དབུས་སུ་ཁྲོ་བོ་དང་དཀྱིལ་འཁོར་གཉིས་ཀར་ལྡན་དགོས་པར་བཤད་པའི་ཕྱིར་རོ། །སྤྱི་དོན་གཉིས་པ་དངོས་གཞིའི་རྣལ་འབྱོར་ལ། ཡན་ལག་བཞི་དྲུག་གཉིས་ལས། བཞི་པ་ལྟར་ན་རྟེན་བསྐྱེད་པ་དང་། བརྟེན་པ་བསྐྱེད་པ་གཉིས། ཕྱི་མ་ལ་བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་གྱི་སྒོ་ནས་བཤད་པར་བྱ་བ་ཡིན་མོད་ཀྱི། ཡན་ལག་དྲུག་པའི་ནང་དུ་དེ་དག་ཐམས་ཅད་འདུས་པས་འདིར་ཡན་ལག་དྲུག་པ་ལྟར་བཤད་པ་ལ་བཞི་སྟེ། བསྐྱེད་རིམ་ཡན་ལག་དྲུག་བསྒོམ་པ། དེ་དེ་བཞིན་གཤེགས་པ་རིགས་དྲུག་དང་སྦྱར་བ། དེའི་རྒྱུ་མཚན། དེ་བསྒོམས་པ་ལས་བྱུང་བའི་རྟགས་སོ། །དང་པོ་ལ་དྲུག་སྟེ། གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག དབང་བསྐུར་བ་མི་བསྐྱོད་པའི་ཡན་ལག བདུད་རྩི་མྱང་བ་འོད་དཔག་མེད་ཀྱི་ཡན་ལག མཆོད་པ་དོན་ཡོད་གྲུབ་པའི་ཡན་ལག བསྟོད་པ་རིན་ཆེན་འབྱུང་ལྡན་གྱི་ཡན་ལག་གོ །དང་པོ་ལ་བཞི་སྟེ། གཞིའི་ཡན་ལག རྒྱུའི་ཡན་ལག རྐྱེན་གྱི་ཡན་ལག གནས་ཐབས་ཀྱི་ཡན་ལག་གོ །དང་པོ་ནི། དེ་ལྟར་སྲུང་འཁོར་ཐུན་མོང་བ་རྐྱང་པ་བསྒོམས་ན་དེའི་དབུས་སུ་དང་། ཁྲོ་བོ་བཅུའི་སྲུང་འཁོར་བསྒོམས་ན། དབུས་ཀྱི་ཁྲོ་བོའི་ལྟོ་བའམ། ཞུ་བ་ལས་ཆོས་འབྱུང་བསྒོམས་ཏེ། དེ་ལ་དབྱིབས་ནི། སློབ་དཔོན་དཔལ་འཛིན་གྱིས། ཕྱག་རྒྱ་གྲུ་གསུམ་ཉིད་དེ། འདོད་པ་དང་། གཟུགས་དང་། གཟུགས་མེད་པ་རྣམ་པར་དག་པའི་རང་བཞིན་ཡིན་པའི་ཕྱིར། འོག་ཏུ་ཟུར་གཅིག སྟེང་དུ་གཉིས་པའོ། །ཞེས་བཤད་པ་དང་། རྗེ་བཙུན་རྩེ་མོས་སྐུ་གསུང་ཐུགས་སྙིང་པོའི་ཕྱིར་གྲུ་གསུམ་ཟུར་བཞི་པའོ། །ཞེས་བཤད་པ་གཉིས་དོན་གཅིག་སྟེ། ཕྱོགས་གསུམ་པོ་གང་ནས་བལྟས་ཀྱང་ཕྱག་རྒྱའི་སྐྱེ་གནས་ཀྱི་དབྱིབས་སུ་གནས་པ་དང་། ཟུར་སྲིད་ཚད་ཀྱི་དབང་དུ་བྱས་ན། སྟེང་དུ་ཟུར་གསུམ་དང་། འོག་ཏུ་ཟུར་གཅིག་ཡོད་པའི་ཕྱིར་རོ། །འདི་གཉིས་ཀྱི་དབྱིབས་ཐ་དད་དུ་འཆད་ན། རྗེ་བཙུན་རྩེ་མོས་བཤད་པ་ལ་ཕྱག་རྒྱའི་སྐྱེ་གནས་ཀྱི་མཚོན་བྱེད་མ་ཚང་བར་འགྱུར་ཞིང་། དེ་ལྟར་དུ་འདོད་ན་གླེང་གཞིའི་ཨེ་ལ་ཕྱག་རྒྱའི་སྐྱེ་གནས་ཀྱི་མཚོན་བྱེད་མ་ཚང་བར་འགྱུར་རོ། །ཁ་དོག་ནི་མཚོ་སྐྱེས་ཀྱི་སྐབས་སུ་དཀར་པོར་བཤད་ཀྱང་། མན་ངག་ལུགས་ཀྱི་ཡན་ལག་བཞི་དྲུག་གཉིས་ཆར་དུ་ཕྱི་དཀར་ལ་ནང་དམར་བར་བཤད་ཅིང་། ས་བོན་ནི་རྒྱ་གར་བའི་སྒྲུབ་ཐབས་ཕལ་ཆེར་དང་། རྗེ་བཙུན་སྐུ་མཆེད་ཀྱིས་མ་བཤད་ལ། མར་མེ་མཛད་སོགས་ཀྱིས་ཨེ་ལས་བསྐྱེད་པར་བཤད་པ་ཡང་ཡོད་དོ། །ཆོས་འབྱུང་དེར་རྟེན་དང་བརྟེན་པར་བཅས་པའི་ལྷ་ཚོགས་བསྒོམ་པའི་དགོས་པ་ནི། རྗེ་བཙུན་སྐུ་མཆེད་ཀྱིས་གདུལ་བྱ་འདོད་ཆགས་ཅན་ཉེ་བར་གཞུག་པ་དང་། ཆོས་ཀྱི་སྐུ་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་དུ་བསྟན་པའི་དགོས་པའོ། །དེ་ཡང་གཉིས་སུ་མེད་པ་རྣམ་པར་རྒྱལ་བའི་རྒྱུད་ལས། བྷ་ག་བཅོམ་ལྡན་སངས་རྒྱས་ཏེ། །དེས་ན་འདོད་ཆགས་སུན་མི་དབྱུང་། །གང་གཞན་དམ་ཚིག་གསུམ་པོ་རྣམས། །དེ་ཉིད་ཀྱི་ནི་ནང་དུ་འདུས། །ཞེས་གསུངས་ཞེས་བཤད་དོ། །གཉིས་པ་ནི། ཆོས་འབྱུང་དེའི་ནང་དུ་བདུད་རྩི་འོད་མ་གཏོགས་པའི་འགྲེལ་པ་ལུགས་ཀྱི་སྒྲུབ་ཐབས་རྣམས་དང་། མན་ངག་ལུགས་ཀྱི་ཡན་ལག་དྲུག་པ་ལས། རླུང་ནས་རིམ་པ་བཞིན་དུ་འབྱུང་བཞི་བསྒོམ་པ་གསུངས་ཤིང་། བདུད་རྩི་འོད་དང་། སྒྲུབ་ཐབས་མཚོ་སྐྱེས་དང་། མན་ངག་ལུགས་ཀྱི་ཡན་ལག་བཞི་པ་རྣམས་སུ་ས་ནས་རིམ་པ་བཞིན་དུ་བསྒོམ་པ་གསུངས་སོ། །འོ་ན་འདི་གཉིས་མི་འདྲ་བར་བཤད་པའི་རྒྱུ་མཚན་ཅི་ཞེ་ན། རྗེ་བཙུན་གྱི་དག་ལྡན་ལས། འདིར་རླུང་ནས་མས་རིམ་དུ་བསྒོམ་པར་བྱའོ། །དེ་ལྟར་ན་སློབ་དཔོན་པདྨ་བ་དང་། ཌོམྦི་པས་ས་ནས་བསྒོམ་པར་བཤད་པ་དང་མི་འགལ་ལམ་སྙམ་ན་མི་འགལ་ཏེ། དེ་དག་ནི་བྱང་ཆུབ་སེམས་ཀྱི་དཀྱིལ་འཁོར་དང་། འཁོར་ལོ་བཞིའི་གོ་རིམ་ལ་དགོངས་པ་ཡིན་ཏེ། འདི་ཉིད་ཀྱི་ལེའུ་བཅུ་པ་ལས། རེག་པ་སྲ་བའི་བག་ཆགས་ཀྱིས། །ས་ནི་དེ་ལས་སྐྱེ་བར་འགྱུར། །བྱང་སེམས་གཤེར་བའི་རྣམ་པ་ཡིས། །ཆུ་ཡི་ཁམས་ནི་འབྱུང་བར་འགྱུར། །བསྐྱོད་པ་ལས་ནི་དྲོད་སྐྱེ་སྟེ། །འགྲོ་བ་རླུང་དུ་རབ་ཏུ་གྲགས། །ཞེས་འབྱུང་བ་དང་། ཡང་ལྟེ་བ་ས། སྙིང་ག་ཆུ། མགྲིན་པ་མེ། སྤྱི་བོ་རླུང་གི་རང་བཞིན་ཡིན་པའི་ཕྱིར་རོ། །རླུང་ནས་བསྒོམ་པ་ནི་ཕྱི་རོལ་གྱི་འབྱུང་བ་རླུང་ནས་རིམ་གྱིས་འཆགས་པ་དང་། ལུས་ཀྱི་དཀྱིལ་འཁོར་ལ་དགོངས་ཏེ། ཁ་སྦྱོར་ལས། རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ལྟོ་བར་ཡང་ནི་ཆུ་ཡིན་ཏེ། །ཟླུམ་པོའི་གཟུགས་སུ་ཡང་དག་གནས། །སྙིང་གར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །ཞེས་འབྱུང་ངོ་། །དེ་དག་ནི་ཡན་ལག་ཙམ་ཡིན་ལ། གཙོ་བོར་ས་ནས་བསྒོམ་པ་ནི་སྦྱང་གཞི་ལུས་གྲུབ་པའི་མངལ་གྱི་སྔོན་འགྲོ་སྦྱོང་བས་ན་དྲི་མ་ཆུང་ལ། རླུང་ནས་བསྒོམ་པ་ནི་མངལ་གྱི་དངོས་གཞི་སྦྱོང་བས་ན་ཅུང་ཟད་ཟབ་སྟེ། ཕྱག་རྒྱ་ཆེན་པོ་ཐིག་ལེ་ལས། རྣམ་ཤེས་ལས་ནི་སྐྱེས་པ་རླུང་། །དེ་ལས་མེ་ནི་འབྱུང་བར་འགྱུར། །དེ་ལས་སྐྱེས་པ་ཆུ་ཡིན་ཏེ། །དེ་ལས་དབང་ཆེན་འབྱུང་བར་འགྱུར། །དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་གསུངས་པ་ཡིན་ནོ། །གང་ལྟར་ཡང་འདྲ་བར་སྣང་བས་ན་སྦྱང་གཞི་གཙོ་ཆེ་ཆུང་ཡོད་ཀྱང་། ས་ནས་རིམ་གྱིས་བསྒོམས་པས་བཏུབ་མོད་སྙམ་ན། རྡོ་རྗེ་གུར་ལས། ནམ་མཁའི་དཀྱིལ་འཁོར་དབུས་གནས་པར། །རྡོ་རྗེའི་དཀྱིལ་འཁོར་བསྒོམ་པར་བྱ། །རྡོ་རྗེ་དཀྱིལ་འཁོར་སྟེང་དུ་ཡང་། །གསལ་བའི་དཀྱིལ་འཁོར་བསྒོམ་པར་བྱ། །གསལ་བའི་དཀྱིལ་འཁོར་དབུས་གནས་པར། །ཆུ་ཡི་དཀྱིལ་འཁོར་བསྒོམ་པར་བྱ། །ཆུ་ཡི་དཀྱིལ་འཁོར་སྟེང་དུ་ནི། །བརྟུལ་ཞུགས་ཅན་གྱིས་དབང་ཆེན་བསྒོམ། །ཞེས་འབྱུང་བ་ཡིན་ནོ། །ཞེས་བཤད་པ་ལྟར་རོ། །སའི་དཀྱིལ་འཁོར་གྱི་སྟེང་དུ། རྡོ་རྗེ་གུར་ལས། འབྱུང་བཞིའི་བདག་ཉིད་དཀྱིལ་འཁོར་ཉིད། །དེ་ཡི་སྟེང་དུ་སངས་རྒྱས་བསམ། །སྤྲོས་ནས་གཞལ་ཡས་གནས་དགོད་བྱ། །ཞེས་གསུངས་པ་ལ་བརྟེན་ནས་འགྲེལ་པ་ལུགས་དང་། མན་ངག་ལུགས་ཀྱི་ཡན་ལག་དྲུག་པ་རྣམས་སུ་འབྱུང་བཞིའི་སྟེང་དུ་བྷྲཱུྃ་ལས་འཁོར་ལོ་བསྒོམས་ལ། དེའི་ཁ་དོག་ནི། བླ་ཆེན་འཕགས་པས་དཀར་པོར་བཤད་ཅིང་། ཁ་ཅིག་གིས་སེར་པོར་བྱས་སོ། །དེ་ལ་དང་པོ་ལྟར་ན། འཁོར་ལོ་རྣམ་པར་སྣང་མཛད་ཀྱི་རང་བཞིན་ཡིན་པས་དེའི་ཁ་དོག་ལ་དགོངས་པ་ཡིན་ལ། ཕྱི་མ་ནི་རྣམ་སྣང་གི་སྦྱང་གཞི་སའི་ཁམས་ཡིན་ལ། དེའི་ཁ་དོག་སེར་པོ་ཡིན་པས་དེའི་དབང་དུ་བྱས་པའོ། །ཞེས་ཡེ་ཤེས་ཞབས་ལུགས་པ་རྣམས་འཆད་དོ། །དབྱིབས་ནི་རྗེ་བཙུན་རྩེ་མོས་རྩིབས་བརྒྱད་པ་དང་། རྗེ་བཙུན་ཆེན་པོས་རྩིབས་བཅུ་པར་གསུངས་པ་གཉིས་ཀ་མི་འགལ་ཏེ། དང་པོས་ཕྱོགས་མཚམས་བརྒྱད་པོ་ཙམ་ཞིག་དང་། གཉིས་པས་སྟེང་འོག་གཉིས་དང་བཅས་པའི་དབང་དུ་བྱས་པ་ཡིན་པའི་ཕྱིར་རོ། །གསུམ་པ་ནི་དེའི་སྟེང་དུ་བར་སྲིད་ཀྱི་ངོ་བོ་ཨོཾ་དཀར་པོ། ཨཱཿདམར་པོ། ཧཱུྃ་སྔོན་པོ་སྟེ་སྒོ་གསུམ་གྱི་ངོ་བོའི་ཡི་གེ་གསུམ་སྟེང་ནས་སྟེང་དུ་བརྩེགས་པ་སྲེད་པ་དང་ལེན་པའི་རང་བཞིན་ཧོ་དམར་པོ་གཉིས་ཀྱིས་སྟེང་འོག་གི་མཐའ་བརྟེན་བསྒོམས་ཏེ། རྗེ་བཙུན་གྱི་ཡན་ལག་དྲུག་པར། བར་སྣང་དུ་ཡི་གེ་ཨོཾ་ཨཱཿཧཱུྃ་གསུམ། ཧོ་དམར་པོ་གཉིས་ཀྱིས་མཐའ་བརྟེན་པ་ཞེས་གསུངས་པས་སོ། །བླ་མ་ཁ་ཅིག་རང་བཞིན་གྱི་གནས་ནས་བར་སྲིད་ཡིག་འབྲུ་ལྔའི་གཟུགས་ཀྱིས་འོངས་ནས་འབྱུང་བཞི་སོགས་ལ་འདྲེས་པ་ལས་ཐོག་མར་བསྐྱེད་པ་མི་འདོད་པ་ནི་ཤིན་ཏུ་མི་འཐད་དེ། སློབ་དཔོན་མི་ཐུབ་ཟླ་བས། ཡབ་ཡུམ་གྱི་སྒྲུབ་ཐབས་གཉིས། ཀུ་མུ་ཏི་རྣམས་ལས། བྷྲཱུྃ་ལས་འཁོར་ལོའི་སྟེང་དུ་བདག །སྲིད་པ་བར་མའི་བསམ་གཏན་བྱ། །ཞེས་དང་། རིན་ཆེན་འབར་བར། བྷྲཱུྃ་ལས་འཁོར་ལོ་དེ་སྟེང་དུ། །སྲིད་པ་བར་མའི་བག་ཆགས་བསམ། །ཞེས་བསྐྱེད་པ་དངོས་སུ་གསུངས་པ་དང་འགལ་བའི་ཕྱིར་རོ། །དེ་ལྟ་བུའི་ཡིག་འབྲུ་ལྔ་འབྱུང་བཞི་འཁོར་ལོ་དང་བཅས་པ་ལ་རོ་གཅིག་ཏུ་འདྲེས་པའི་རྐྱེན་གྱི་གཞལ་ཡས་ཁང་བསྐྱེད་དགོས་ཏེ། རྗེ་བཙུན་གྱིས་ཡན་ལག་དྲུག་པར་བར་དོའི་ཤེས་པ་འབྱུང་བཞི་འཁོར་ལོ་དང་བཅས་པ་ལ་ཞུགས་པས་གཞལ་ཡས་ཁང་ཞེས་གསུངས་པས་སོ། །འདིའི་དོན་རྟོག་གེ་ལ་མངོན་པར་དགའ་བ་ཁ་ཅིག་མིག་གི་རྣམ་པར་ཤེས་པ་སྔོན་པོ་ལ་ཞུགས་ཞེས་པ་དཔེར་བྱས་ནས་ཡིག་འབྲུ་ལྔ་པོ་འདྲེས་པ་མ་ཡིན་གྱི། དེའི་དམིགས་པ་བཞུགས་པས་བྱུང་བཞི་འཁོར་ལོ་དང་བཅས་པ་འདྲེས་ནས་གཞལ་ཡས་ཁང་བསྐྱེད་པ་ཡིན་ཅེས་པ་ནི་ཧ་ཅང་མི་འཚམ་པའི་གཏམ་སྟེ། མི་ཐུབ་ཟླ་བས། སྲིད་པ་བར་མ་བསམ་བྱས་ནས། །ཨེ་ཝཾ་ཉིད་དུ་རབ་ཏུ་འདྲེས། །འདྲེས་གྱུར་དེ་ལས་བྱུང་བ་ནི། །སངས་རྒྱས་ཕོ་བྲང་ཐུན་མོང་ཡིན། །ཞེས་དང་། གྲུབ་ཆེན་ཌོམྦི་པས། བདག་ཀྱང་བསམ་པར་བྱ་བ་སྟེ། །ཨེ་ཝཾ་ཉིད་དུ་བདག་དང་ནི། །འདྲེས་པར་གྱུར་པ་འཁོར་ལོ་ཡིན། །གྲུ་བཞི་པ་ལ་སྒོ་བཞི་པ། །ཞེས་གསུངས་པ་དང་འགལ་བའི་ཕྱིར་རོ། །འདིར་གཞལ་ཡས་ཁང་ལ་རྫོགས་པར་བསྟིམ་པས་འོག་ཏུ་རྒྱུ་རྡོ་རྗེ་འཆང་གི་ཞལ་དུ་འཇུག་རྒྱུ་མེད་པ་ཡང་མ་ཡིན་ཏེ། དེར་ཡང་ཡིག་འབྲུ་ལྔ་གསར་དུ་བསྐྱེད་ནས་འཇུག་པའི་ཕྱིར་རོ། །གང་ཟག་གཞན་གྱི་བར་དོར་འགྱུར་བའི་སྐྱོན་ཡང་མི་གནས་ཏེ། རྣལ་འབྱོར་པའི་བློ་ངོར་ནི་སེམས་ཅན་ཐམས་ཅད་ཀྱི་བར་དོ་སྦྱོང་བ་ཡིན་ལ། གོ་དོན་མངོན་རྟོགས་ཀྱི་རྒྱུན་རྣལ་འབྱོར་པ་རང་ཉིད་ལ་སྦྱོར་བའི་ཚེ་ན་ཡང་རང་གི་བར་དོ་སྦྱོང་བྱེད་ལན་གཉིས་སུ་འགྱུར་བའི་ཕྱིར། བར་དོ་སྦྱོང་བྱེད་ཡིན་ན་འཆི་སྲིད་སྦྱོང་བྱེད་དེའི་སྔ་རོལ་དེ་མ་ཐག་ཏུ་དགོས་པ་ཡང་མ་ཡིན་ཏེ། མངོན་རྟོགས་ཀྱི་དངོས་གཞིས་སྐྱེ་འཆི་བར་དོ་གསུམ་སྦྱོང་བའི་ཚེ་ཐོག་མར་བར་དོ་སྦྱོང་བྱེད་དགོས་པའི་ཕྱིར་རོ། །གཞན་ལུགས་ཀྱི་བླ་མ་དག་བརྟེན་པ་ལྷ་ལ་རང་གི་ཤེས་པ་འཇུག་པ་ནི་ལེགས་མོད་ཀྱི། རྟེན་གཞལ་ཡས་ཁང་ལ་ཤེས་པ་འཇུག་པ་ཤིན་ཏུ་མི་འཐད་དེ། བེམ་པོ་ལ་ཡིད་ཀྱི་ཤེས་པ་མེད་པའི་ཕྱིར་རོ། །སྙམ་ན། དེ་ནི་མི་འཐད་དེ། འདིར་ནི་གཞལ་ཡས་ཁང་དང་ཤེས་པ་བསྲེ་བ་ནི། རྩ་རྒྱུད་ལས། ཇི་ལྟར་སྒོམ་པ་པོ་འབྱུང་བའང་། །ཞེས་པའི་དོན་ཡིན་པས་འདི་མི་འདོད་པའི་རྒྱ་བོད་སུ་ཡང་མེད་ལ། བསྲེས་པའི་དགོས་པའང་འབྱུང་བཞི་ལུགས་འབྱུང་མངལ་གྱི་དངོས་གཞི་སྦྱོང་བྱེད་དུ་གསུངས་ཤིང་། སྐབས་དེར་བར་དོ་བསྲེས་ཏེ། འབྲས་བུ་གཟུགས་ཀྱི་རྣམ་པ་གཞལ་ཡས་ཁང་དུ་ཤར་ཅིང་། ངོ་བོ་རྣམ་པར་སྣང་མཛད་ཀྱི་ང་རྒྱལ་བསྒོམས་པས་བར་སྲིད་དང་། སྐྱེ་སྲིད་གཉིས་ཆར་སྦྱོང་བའི་ཕྱིར་རོ། །འབྱུང་བཞི་ལུགས་བཟློག་ལ་བར་སྲིད་མི་བསྲེ་བའི་གནད་ཀྱང་འདི་ཉིད་ཡིན་ནོ། །འོ་ན་དེ་ལ་རྐྱེན་གྱི་ཡན་ལག་ཅི་ལྟར་འགྱུར་སྙམ་ན་འབྱུང་བཞི་ལ་རང་སེམས་བསྲེ་བ་སྟེ། རྗེ་བཙུན་རྩེ་མོས། དེ་ནས་རྐྱེན་གྱི་ཡན་ལག་ནི། །འབྱུང་བཞིར་རྣམ་ཤེས་ཞུགས་བསྒོམས་ཏེ། །འབྱུང་བཞིའི་དཀྱིལ་འཁོར་ཐམས་ཅད་ཀྱང་། །རང་གི་སེམས་ཙམ་དུ་ཤེས་བྱ། །ཞེས་པས་རྐྱེན་གྱི་ཡན་ལག་དང་། འཇུག་ཚུལ་གཉིས་རྟེན་པའི་ཕྱིར། དེའི་དགོས་པ་ཡང་གཞལ་ཡས་ཁང་རང་གི་སེམས་ཙམ་དུ་ཤེས་པའོ། །བཞི་པ་གནས་ཐབས་ཀྱི་ཡན་ལག་ལ་གསུམ་སྟེ། གནས་ཐབས་ཞིབ་ཏུ་གཏན་ལ་དབབ་པ། ཞར་བྱུང་དུར་ཁྲོད་བཤད་པ། ནང་གི་རྣམ་པ་དང་གདན་བཤད་པའོ། །དང་པོ་ནི། འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །འོག་ལ་སྣ་ཚོགས་རྡོ་རྗེ་དང་། །ཉི་མ་པདྨ་ཁོར་ཡུག་གོ །དེ་ལ་དང་པོ་སྣ་ཚོགས་རྡོ་རྗེ་ནི་གཞལ་ཡས་ཁང་པ་གནས་པའི་རྟེན་ཏེ། དེའི་ལྟེ་བ་གྲུ་བཞི་པའི་ཤར་ནུབ་ཀྱི་རྒྱ་ནི་ཆ་ཆེན་བཅུ་གཉིས་ཡིན་ལ། དེའི་སྟེང་འོག་གི་དཔངས་ནི་ཆ་ཆེན་གཅིག་གོ །དེ་ལས་འཐོན་པའི་ཕྱོགས་བཞིའི་རྭ་ནི་འདིར་རྩ་ཐིག་ནས་རྩ་ཐིག་གི་བར་ལ་དཀྱིལ་འཁོར་དུ་བྱས་པའི་ཐིག་སྐུད་དེ་ཉིས་འགྱུར་གྱི་ལུགས་ཏེ། ཐིག་སྐུད་ཆ་ཆུང་རེ་བཞི་པའི་ཕྱོགས། རྟ་བབས་དཔངས་སུ་སྒོ་ཚད་གཅིག་མ་ཡིན་ལ། དེའི་ཕྱི་རོལ་རྭའི་སྲིད་ལ་ཆ་ཆེན་གཉིས་ཡོད་དོ། །རྭ་རྣམས་ཀྱི་ཁ་དོག་ཀྱང་ཕྱོགས་མདོག་ཡིན་ལ། དབུས་ཀྱི་ཁ་དོག་ནི་འདིར་སྔོན་པོའོ། །གཉིས་པ་ཉི་མ་ནི། སྣ་ཚོགས་རྡོ་རྗེ་གནས་པའི་གཞི་སྟེ། མེ་ཤེལ་གྱི་རང་བཞིན་ཅན་ཁ་དོག་དམར་པོ། དབྱིབས་ཟླུམ་པོ། རྒྱར་ཆ་ཆུང་དྲུག་ཅུ་རེ་བཞིའོ། །གལ་ཏེ་ཉི་མ་དམར་པོ་ཡིན་ན། བྲི་ཆ་ལ་ཁ་དོག་ལྗང་གུར་བྱེད་པ་དང་འགལ་སྙམ་ན། ཉི་མའི་ཁ་དོག་དམར་པོ་ཡིན་ཀྱང་། དེའི་འོག་ན་པདྨ་ཡོད་ལ། དེའི་ལྟེ་བ་ལྗང་གུ་ཡིན་པར་ཨ་བྷ་ཡས་བཤད་པས་དེའི་ཁ་དོག་ཏུ་གྱུར་པ་སྟེ། དཔེར་ན་དར་ལྗང་གུའི་སྟེང་དུ་ཤེལ་དམར་པོ་བཞག་པ་ལྟ་བུའོ་ཞེས་བོད་ཀྱི་ཕྲེང་བ་མཁན་པོ་རྣམས་གསུང་ངོ་། །གསུམ་པ་པདྨ་ནི། སྣ་ཚོགས་རྡོ་རྗེ་གནས་པའི་རྟེན་ཏེ། ལྟེ་བའི་ཚད་ཉི་དཀྱིལ་དང་མཉམ་ལ། འདབ་མའི་རྒྱ་ཆ་ཆུང་གཉིས་པར་ཐིག་གིས་རིགས་པས་ཤེས་ཤིང་། གྲངས་ནི་ལ་ལི་ཏ་བཛྲ་གྱིས། འདབ་མ་འབུམ་ལྡན་དེ་དབུས་སུ། །ཞེས་བཤད་ལ། བླ་མ་རྔོག་པ་རྣམས་ཀྱིས་སུམ་ཅུ་སོ་གཉིས་པར་འདོད་དེ། ཁ་དོག་ནི་ཨ་བྷ་ཡས་སྣ་ཚོགས་པར་བཤད་པ་ལྟར་ཡིན་ནོ། །བཞི་པ་ཁོར་ཡུག་ནི། ཆོས་འབྱུང་གི་ས་དང་། རྡོ་ར་དང་། མེ་རི་སྟེ། འདི་དག་ནི་སྔར་བཤད་པ་ལྟར་རོ། །ལོགས་ལ་རྩིག་པ་ཕ་གུ་དང་། དྲྭ་ཕྱེད་མདའ་ཡབ་པུ་ཤུའོ། །དེ་ལ་དང་པོ་རྩིག་པ་ནི་སྔར་གྱི་སྣ་ཚོགས་རྡོ་རྗེའི་སྟེང་དུ་ཆ་ཆེན་བཅུ་གཉིས་མཉམ་པར་བགོས་པའི་དབུས་ནས་ཕྱི་རོལ་དུ་བགྲངས་པའི་ཆ་ཆེན་ལྔ་པ་ལ་དབུས་དོར་མཐའ་གཉིས་གདབ་པའི་མཐའ་ནང་མ་ནི་རྩིག་པའི་ས་ཡིན་པས། དེའི་རྒྱ་ནི་ཐིག་ན་ཇི་ལྟར་ཡོད་པ་བཞིན་ཡིན་ལ། ཆུར་ནི་ཕྱོགས་བཞི་ཆར་ལ་སྒོ་ལོགས་ནས་སྒོ་ལོགས་ཀྱི་བར་རྒྱུན་ཆགས་སུ་སོང་བའོ། །དཔངས་ནི་རྒྱ་དཔང་མཉམ་པར་འདོད་པ། རྒྱ་ཕྱེད་དཔངས་སུ་འདོད་པ། ཆ་ཕྲན་ལྔར་འདོད་པ་གསུམ་ལས། དང་པོ་ལྟར་ན་སྔ་རབས་པ་འགའ་ཞིག་རྩིག་པའི་ནང་ནས་ནང་གི་བར་ལ་ཆ་ཆེན་བརྒྱད་ཡོད་ལ། དེ་ཉིད་རྩིག་པ་མན་ཆད་ཀྱི་དཔངས་སུ་འདོད་ལ། ཁ་ཅིག་ཆ་ཆེན་བརྒྱད་པོ་དེ་ཉིད་དྲྭ་ཕྱེད་མན་ཆད་ཀྱི་དཔངས་སུ་འདོད་དོ། །དེ་ལ་ཕྱིས་ཀྱི་མཁས་པ་དག་དཀྱིལ་འཁོར་གྱི་ཀ་བ་ལ་ཆ་ཆེན་བཞི་ལས་མེད་པས། ཀ་བའི་རྩེ་མོ་ནས་ཐོག་གི་བར་དུ་བར་སྟོང་ཆ་ཆེན་བཞི་ཡོད་པར་འགྱུར་ལ། དེ་ལྟར་ན་ཀ་བ་ལ་འདེགས་རྒྱུ་མེད། གདུང་ལ་འདེགས་མཁན་མེད་པའི་སྐྱོན་ཡོད་དོ། །གལ་ཏེ་སྐྱོན་མེད་དེ། ཐིག་ཏལ་པོར་བཏབ་པ་དེ་ཀ་བ་དེའི་དཔངས་ཚད་ཡིན་པས་ཐོག་དང་། ཀ་བ་དཔངས་མཉམ་མོ་ཞེ་ན། དེ་ལྟར་ན་ཀ་བ་བཞི་ལས་མེད་པས་བརྒྱད་མ་ཚང་ཞིང་། ཕྱོགས་རེར་ཀ་བ་རེ་རེ་ལས་མེད་པའམ། ཡང་ན་ཕྱོགས་གཉིས་སུ་ཀ་བ་གཉིས་གཉིས་ཕྱོགས་གཉིས་སུ་ཀ་བ་མེད་པའི་སྐྱོན་དུ་འགྱུར་ལ། དེ་ཉིད་སྣང་ཆེན་དུ་ཕྱོགས་ཀྱི་ཆ་རེ་རེ་ཞིང་རྩིག་པ་ལ་བརྟེན་པའི་རྡོ་རྗེའི་ཀ་བ་གཉིས་གཉིས་ཡོད་པས་ཞེས་བཤད་པ་དང་འགལ་བར་འགྱུར་རོ། །འོ་ན་ཐམས་ཅད་གསང་བར། ཕྱི་ཡི་གྲུ་བཞི་གང་ཡིན་པར། །ཚད་ཀྱིས་མཉམ་པ་ཉིད་གྱུར་པ། །ཞེས་རྒྱ་དཔངས་མཉམ་པར་བཤད་པ་མ་ཡིན་ནམ་ཞེ་ན། མ་ཡིན་ཏེ། གྲུ་བཞིའི་ལོགས་བཞི་པོ་མཉམ་པོ་ལ་དགོངས་ཏེ། དེའི་འགྲེལ་པར། ཕྱིའི་གནས་གང་ཡིན་པར་ཚད་ཀྱི་ལོགས་བཞི་མཉམ་པར་འགྱུར་བ་གང་ཡིན་པ་དེ་ནི་ཐིག་བཞི་ཞེས་བྱ་ལ། ཞེས་ལོགས་བཞི་མཉམ་པ་ལ་བཤད་པའི་ཕྱིར་རོ་ཞེས་ཕྱོགས་སྔ་མ་ལ་དགག་པ་མཛད་པ་རྣམས་སྙོན་མི་ནུས་པར་སོང་སྣང་མོད། འོན་ཀྱང་དེ་ཉིད་སྣང་ཆེན་གྱི་ལུང་དེ་ནི་བསྒོམ་བྱའི་སྐབས་སུ་ཀ་བ་བརྒྱད་ཡོད་པར་བརྟེན་པ་ཡིན་ལ། འདིར་ཕྱོགས་སྔའི་བློ་ཡུལ་དུ་བྲི་བྱ་ལ་ཀ་བ་བརྒྱད་ཡོད་པའི་ལུང་ཞིག་དགོས་པས་ན། འདིར་རྡོ་རྗེ་རྩེ་མོ་ལས། ཟུར་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་མཛེས་བྱས་ཤིང་། །རྡོ་རྗེ་ཕྲེང་བས་ཡོངས་བསྐོར་བར། །དཀྱིལ་འཁོར་དབུས་མ་བྲི་བར་བྱ། །ཞེས་དང་། དེ་ཉིད་བསྡུས་པ་ལས། དེ་ཡི་འཁོར་ལོ་སོ་སོའི་སྐབས། །ནང་དུ་ཡང་ནི་ཞུགས་ནས་ནི། །རྡོ་རྗེ་ཐེག་ནི་ཡོངས་བཅུག་ཅིང་། །ཕྱི་རོལ་དཀྱིལ་འཁོར་ཐིག་གདབ་བྱ། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཀ་བའི་རྩེར་གནས་ལ། །དཀྱིལ་འཁོར་ལྔ་ཡིས་རྣམ་པར་བརྒྱན། །ཞེས་གསུངས་པ་རྣམས་ལུང་དུ་དྲངས་པས་རྒྱ་དཔངས་མཉམ་པོར་འདོད་པ་ཐམས་ཅད་ཁེགས་པ་ཡིན་ནོ། །གཉིས་པ་རྒྱ་ཕྱེད་དཔངས་སུ་འདོད་པ་ལྟར་ན། ཕྱིས་ཀྱི་མཁས་པ་དག་དཀྱིལ་འཁོར་གྱི་ཀ་བ་ནི་རྩ་བ་རྩིག་པ་ནས། རྩེ་མོ་དཀྱིལ་འཁོར་དབུས་སུ་སླེབ་པ་ཆ་ཆེན་བཞི་ཡིན་ཏེ། ཀོ་ས་ལར། ཀ་བ་བརྒྱད་ཀྱི་ཞེས་པ་ལ་སོགས་པ་ལ་སྒོ་རེ་རེའི་ཐད་ཀར་ཡང་ཀ་བ་གཉིས་གཉིས་ཏེ་མཐའ་གཅིག་ནི་རྡོ་རྗེའི་ཐིག་ལ་བརྟེན་པ། མཐའ་གཅིག་ནི་དཀྱིལ་འཁོར་གྱི་ལྟེ་བ་ལ་བརྟེན་ནོ། །དེ་ལྟར་ན་སྒོ་བཞིའི་ཐད་ཀར་ཀ་བ་བརྒྱད་དུ་འགྱུར་རོ་ཞེས་སོ། །ཀ་བ་རྣམས་ཕྱོགས་མདོག་ལ་ཁ་དོག་གཞན་རིན་པོ་ཆེས་སྤྲས་པ། ཀ་གདན་ཀ་ཞུ་ལའང་རིན་པོ་ཆེས་སྤྲས་ཤིང་ཇི་ལྟར་མཛེས་པར་བྱས་ཏེ་དེ་གཉིས་ཀྱང་ཀ་བའི་དཔངས་ལ་ཐེའོ། །ཀ་བ་འདིའི་རིགས་པས་དཀྱིལ་འཁོར་གྱི་ཐོག་དཔངས་ཀྱང་རྒྱའི་ཕྱེད་དུ་བྱས་པ་ཡིན་ནོ། །དེའི་ཕྱིར་རྩིག་པའི་དཔངས་ལ་ཆ་ཆེན་གསུམ་དང་ཆ་ཕྲན་གཅིག རིན་ཆེན་སྣམ་བུ་ལ་ཆ་ཕྲན་གཅིག དྲྭ་བ་དྲྭ་ཕྱེད་ཀྱི་ས་ལ་ཆ་ཕྲན་གཉིས་ཏེ། དེ་དང་ནང་གི་གདུང་དཔངས་མཉམ་པར་བྱའོ་ཞེས་བཞེད་པ་ཡང་ཀ་བའི་ཚད་དེ་ལྟར་ཡིན་པ་ཤིན་ཏུ་ལེགས་མོད། དེས་དཀྱིལ་འཁོར་གྱི་ལོགས་ཀྱི་དཔངས་གཞལ་བ་ཤིན་ཏུ་མི་འཐད་དེ། ཁྱེད་རང་གི་ལུགས་ལ་ཀ་བའི་སྟེང་དུ་གདུང་ཟླུམ་ཆ་ཕྲན་གཅིག་པ་དང་། ཐལ་གདུང་ཆ་ཕྲན་གཅིག་པ་གཏོང་བར་འདོད་པ་ལ་ཀ་བ་དང་དྲྭ་ཕྱེད་མན་ཆད་དཔངས་མཉམ་ན། གདུང་གཉིས་པོ་དྲྭ་ཕྱེད་ཀྱི་སྟེང་དུ་བྱུང་བས། དྲྭ་ཕྱེད་ཀྱི་སྟེང་དང་ཐོག་དཔངས་མཉམ་པོར་འདོད་པ་དང་ནང་འགལ་ལོ། །ཡང་གདུང་གཉིས་པོ་དེ་དྲྭ་ཕྱེད་མན་ཆད་ལ་ཆུད་པར་བྱས་ན་ཀ་བ་ཆ་ཆེན་ཕྱེད་དང་བཞི་པར་འགྱུར་བའི་སྐྱོན་ཡོད་དོ། །གཞན་ཡང་ཀ་གདན་དང་ཀ་ཞུ་ཀ་བའི་དཔངས་ལ་ཐེ་བ་ཤིན་ཏུ་མི་རིགས་ཏེ། དཀྱིལ་འཁོར་ཤར་ནུབ་ཀྱི་ལེ་དགུའི་ཐིག་རྣམས་ནི་ཀ་བ་ཁོ་ནའི་ཐིག་ཡིན་གྱི། གཞན་གྱི་དོན་མེད་པའི་ཕྱིར་རོ། །གསུམ་པ་ཆ་ཕྲན་ལྔར་འདོད་པ་ལྟར་ན། བླ་མ་ཁ་ཅིག་རྟ་བབས་ཀྱི་ཀ་བ་ལ་ཆ་ཕྲན་ལྔ་ཡོད་པས་བཞི་ནི་ལྷའི་ལུས་ཡིན་ལ། ཆ་ཕྲན་གཅིག་ཁྲུ་གང་ཡིན་པས་ལྷའི་སྐུ་བས་ཁྲུ་གང་གིས་མཐོ་བས་ཆོག་པའི་ཕྱིར། ཐོག་དཔངས་དེ་ཙམ་མོ་ཞེས་གསུང་པ་ནི་བདེ་མཆོག་གི་འཁོར་ལོའི་ཐོག་དཔངས་དེ་ལྟར་དུ་གསུངས་པའི་རིགས་པས་གཞལ་ཡས་ཁང་ལ་སྦྱར་བར་སྣང་མོད། སྔར་དྲངས་པའི་ལུང་རྣམས་ལས་ཀ་བའི་དཔངས་ཆ་ཆེན་བཞིར་བཤད་པས་ཀ་བ་ཐོག་འོག་ཏུ་མ་ཆུད་པའི་སྐྱོན་ཡོད་དོ། །དེས་ན་རང་ལུགས་ནི་གཞལ་ཡས་ཁང་གི་དཔངས་འདི་ལྟར་ཡིན། རྒྱུད་དང་རྒྱ་གཞུང་གཞན་རྣམས་ལས་དངོས་སུ་མི་གསལ་ཡང་། ནོར་བུ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ལས། ས་ཕྱོགས་དེར་རིན་པོ་ཆེ་སྣ་བདུན་གྱི་ཁང་པ་བརྩེགས་པ་གྲུ་བཞི་པ་ཀ་བ་བཞི་ཟུག་པ། སྒོ་བཞི་གཏོད་པ། མཉམ་པ་ཉམས་དགའ་བ། ཤིན་ཏུ་རྣམ་པར་ཕྱེ་བ། ཆེས་མཛེས་པར་བྱས་པ། བཀྲ་བ། བལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། འཕང་དུ་དཔག་ཚད་གསུམ་ཡོད་པ། རྒྱར་དཔག་ཚད་ལྔ་ཡོད་པ་ཞིག་འབྱུང་ངོ་ཞེས་གསུངས་པས་ཤར་ནུབ་ཏུ་ཆ་ཆེན་བརྒྱད། ཆ་ཕྲན་སུམ་ཅུ་སོ་གཉིས་ཡོད་པ་དེ་ཉིད་དུམ་བུ་ལྔར་བགོས་པའི་དུམ་བུ་རེ་རེ་ནི་དཔག་ཚད་རེ་རེ་བྱས་པས་འདིར་དཔག་ཚད་རེ་ལ་ཆ་ཕྲན་དྲུག་རེ་དང་། ཆ་ཕྲན་གཅིག་གི་ཆ་གཉིས་རེ་ཐོབ་སྟེ། དེ་ལྟར་ན་རྒྱར་དཔག་ཚད་ལྔ་ཞེས་པའི་དོན་ཏོ། །འཕང་དུ་དཔག་ཚད་གསུམ་ནི་གྲུ་བཞི་པའི་ཐོག་མན་ཆད་ཀྱི་དཔངས་ཡིན་པས་ཆ་ཕྲན་བཅུ་དགུ་དང་། ཆ་ཕྲན་གཅིག་གིས་ལྔ་ཆ་སྟེ། མདོར་ན་རྩིག་པའི་དཔངས་ཆ་ཆེན་བཞི། ཕ་གུ་ལ་ཆ་ཕྲན་གཅིག དྲྭ་ཕྱེད་ལ་ཆ་ཕྲན་གཉིས། གསེར་གྱི་སྐ་རགས་ལ་ཆ་ཕྲན་གཅིག་གི་ལྔ་ཆ་སྟེ། འདི་མན་ཆད་དཔག་ཚད་གསུམ་ཡིན་ལ། སྐ་རགས་དང་ནང་གི་གདུང་དཔངས་མཉམ་པའི་སྟེང་ནས་ཐོག་འབུབས་པ་ཡིན་ནོ། །དེ་ལ་རྩིག་པ་ལྔ་ནི་རྒྱ་གར་བ་ཁ་ཅིག་རྩིག་པ་ལྔ་སྟེང་ནས་སྟེང་དུ་བརྩེགས་པར་འདོད་པ་ཡོད་མོད་ཀྱི། འདིར་ནི་རྡོ་རྗེ་རྩེ་མོ་ལས། སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལས་བགྱིས་པ་སྟེ། །པདྨ་རཱ་གའི་རང་བཞིན་གཞན། །དེ་བཞིན་གཞན་དག་མརྒད་འདྲ། །དཀར་པོ་ནང་དུ་ཤེས་བྱ་སྟེ། །ཞེས་གསུངས་པ་དང་། བྲི་བྱ་ལ་ཕྱི་ནང་དུ་ཡོད་པ་ལྟར་བསྒོམ་དོན་ལ་མི་རུང་བའི་དམིགས་བསལ་མེད་པ་ལ་དགོངས་ནས་རྩིག་པ་ལྔ་ཕྱི་ནང་དུ་སྦྲག་པར་འདོད་ལ། དེ་རྣམས་ཀྱི་ཁ་དོག་ཀྱང་གུར་འགྲེལ་ལས། ཧེ་རུ་ཀ་ལ་ནི་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་སྟེ་ཞེས་གསུངས་པ་ལྟར་ཕྱི་ནས་རིམ་པ་བཞིན་དུ་ཡོད་པའོ། །རྩིག་པའི་ཞེང་ཚད་ནི་བཞི་བརྒྱ་ལྔ་བཅུ་པ་ལས། སྒོ་ཡི་ཉི་ཤུ་ཆ་རུ་ནི། །རི་མོ་མཉམ་པར་དགྱེ་བར་བྱ། །ཞེས་གསུངས་པས་ཆ་ཕྲན་གཅིག་གི་ལྔ་ཆའོ། །དེའི་འོག་ཏུ་རི་མོ་ཕན་ཚུན་ནས་གང་གི །མ་རེག་པར་ནི་བྲི་བར་བྱ། །ཞེས་བཤད་པ་ལ་ཕྱིས་ཀྱི་མཁས་པ་དག དེས་རྩིག་པའི་བར་སྟོང་སྟོན་པར་བསམས་ནས། རེ་ཁའི་སྦོམས་སུ་སྒོའི་ཉི་ཤུ་ཆ་ཡིན་ལ། རྩིག་པ་ལྔ་ཆར་བསྡོམས་པ་ལ་སྒོའི་བཞི་ཆ་གཅིག་ལས་མེད་པས་བར་སྟོང་བཞག་ས་མི་འོང་བའི་ཕྱིར་ནང་འགལ་དོགས་ཡོད་དོ་ཞེས་དགག་པ་མཛད་དོ། །དེ་ལ་སྔགས་རིམ་མཁན་པོས་རང་གིས་མ་ངེས་བཞིན་དུ་གྲུབ་ཆེན་ལ་དགག་པ་བྱེད་པ་ཤིན་ཏུ་མི་རིགས་ཏེ། བཞི་བརྒྱ་ལྔ་བཅུ་པར་བཤད་པ་དེ་ནི་རྩ་ཐིག་ཁྲུ་གང་པ་ཁོ་ནའི་དབང་དུ་མཛད་པ་སྟེ། དེ་ལ་སྒོ་བཞི་ཆ་སྟེ་ཆ་ཕྲན་གཅིག་ལ་ནས་ལྔ་དང་། ནས་གཅིག་གིས་བཞི་ཆ་ཐོབ་ལ་རྩིག་པ་རེ་རེའི་ཞིང་གི་ཕར་མཐའ་དང་ཚུར་མཐའི་བར་ལ་ནས་རེ་བྱེད་པ་ཡིན་གྱི། རྩིག་པ་རེ་རེའི་བར་ན་ནས་རེ་ཡོད་པར་འདོད་པ་མ་ཡིན་ནོ། །ལྷག་མ་ནས་གཅིག་གི་བཞི་ཆའི་ཚད་ཡོད་མོད། དེ་བཏང་སྙོམས་སུ་བཞག་ནས་རགས་རྩིས་མཛད་པའོ་ཞེས་ལུགས་སྔ་མ་དག་བཀག་ནས་རང་ལུགས་འཇོག་པ་མཛད་དོ། །དེ་ལ་ལུགས་སྔ་མ་ཡང་མི་འཐད་དེ། རི་མོ་ཕན་ཚུན་ནས་གང་གི་ཞེས་པའི་གཞུང་གི་དོན་རྩིག་པའི་ཞེང་ཚད་དང་བར་སྟོང་གང་ཡང་སྟོན་པ་མ་ཡིན་པས་ནང་འགལ་འོང་བའི་དོན་མེད་པའི་ཕྱིར་ཏེ། ཞེང་ཚད་སྒོའི་ཉི་ཤུ་ཆར་གཞུང་གོང་མས་བཤད་ཟིན་པའི་ཕྱིར་ལུགས་ཕྱི་མ་ཡང་མི་འཐད་དེ། གཞུང་གི་དོན་མ་ཡིན་པའི་སྐྱོན་སྔ་མ་སོ་ན་གནས་ཤིང་། འདི་རྩ་ཐིག་ཁྲུ་གང་པ་ཁོ་ནའི་དབང་དུ་བྱས་པ་ཡིན་ན། རྩ་རྒྱུད་ལེའུ་བཅུ་པར། རྩ་ཐིག་ཁྲུ་གསུམ་དང་། མཐེ་བོང་གསུམ་དུ་གསུངས་པའི་སྐབས་སུ་ཡང་། འོག་ཏུ་ནས་གང་ཙམ་གྱི་ཚད། །དེ་ལས་དཀྱིལ་འཁོར་བྲི་བར་བྱ། །ཞེས་པ་ཡང་རྩ་ཐིག་ཁྲུ་གང་པ་ཁོ་ནའི་དབང་དུ་བྱས་པར་ཐལ་བའི་ཕྱིར་རོ། །དེས་ན་གཞུང་འདིའི་འོག་ཏུ་ཞེས་པའི་ཚིག་གིས་བྲི་བྱའི་སྐབས་སུ་རྩིག་པའི་དཔངས་ཚད་སྟོན་པར་གྲུབ་ཅིང་། བཞི་བརྒྱ་ལྔ་བཅུ་པའི་གཞུང་དེ་དག་ཀྱང་བྲི་བྱའི་སྐབས་ཡིན་པས། གཞུང་སྔ་མས་ཞེང་ཚད་དང་། ཕྱི་མས་དཔངས་ཚད་སྟོན་ལ། དྷ་རི་ཀ་པས། ནས་གང་གིས་ནི་མ་འདྲེས་པས། །རི་མོ་ཀུན་ཏུ་བྲི་བར་བྱ། །ཞེས་པ་ཡང་ཚུལ་དེ་ལྟར་རོ། །འདིར་བསྒོམ་བྱའི་སྐབས་སུ་དཔངས་ནི་སྔར་བཤད་པ་ལྟར་ཡིན་ལ། དེ་ལྟ་བུའི་རྩིག་པ་ལྔ་ཆར་སྒོའི་བུག་པའི་ཐད་མ་གཏོགས་པར་ཟུར་ནས་ཟུར་གྱི་བར་ཏལ་པོར་འགྲོ་ལ། སྒོའི་བུག་པའི་ཐད་ནི་སྒོ་ལོགས་ཀྱི་བར་འགྲོ་སྟེ། སྒོ་ལོགས་ཀྱི་མཐའ་ལ་རིང་ཐུང་དགོས་མི་དགོས་ནི་འོག་ཏུ་འཆད་དོ། །གཉིས་པ་ཕ་གུ་ནི། སློབ་དཔོན་ཤྲདྡྷས། འགྲམ་རྒྱབ་རིན་ཆེན་ཕ་གུ་སྟེ། །ཆ་ཆུང་གཅིག་གི་ཚད་དུ་བྱ། །ཞེས་གསུངས་པས། དཔངས་སུ་ཆ་ཆུང་གཅིག་ཡིན་ལ། རྒྱར་ནི་རྩིག་པ་ལས་ཆ་ཆུང་ཕྱེད་ཀྱི་འཕྱར་དུ་ཡོད་པར་ཡོ་ག་པའི་བླ་མ་རྣམས་བཞེད་དོ། །ཁ་དོག་ནི་ཨ་བྷ་ཡས། རྩིག་པ་ལྔ་ཕྱི་ནང་སྦྲག་པར་འདོད་པའི་ལུགས་ལ་ཁ་དོག་དམར་པོ་དང་། རྩེག་པར་འདོད་པའི་ལུགས་ལ་རྩིག་པ་དང་པོའི་ཁ་དོག་ཏུ་འདོད་ཀྱང་། ཤྲདྡྷ་ནས་བརྒྱུད་པའི་མན་ངག་ལས་གཞི་སེར་པོར་བཤད་པས། གསེར་གྱི་རང་བཞིན་ཟུར་གསུམ་དང་། གྲུ་བཞི་དང་། ཟླུམ་པོའི་དབྱིབས་ཀྱིས་རིན་པོ་ཆེའི་ཕྲས་སྤྲས་པའོ། །གསུམ་པ་དྲྭ་ཕྱེད་ནི། ཕ་གུའི་སྟེང་དུ་ཆ་ཕྲན་གཉིས་ཀྱི་གཞི་ནག་པོར་བཤད་པ་ནི་བར་སྟོང་གི་དོན་ཡིན་པས་སྟོང་པའི་རང་བཞིན་ལ་བར་སྐབས་སུ་རིན་པོ་ཆེའི་བྲེ་ཕུལ་བཞི། སྟེང་འོག་ཏུ་བརྩེགས་པ་རེ་རེའི་དཔངས་ལ་ཆ་ཕྲན་ཕྱེད་ཡོད་ཅིང་། རྒྱར་ནི་བྲེ་ཕུལ་འོག་མ་ལ་ཆ་ཕྲན་གཅིག གོང་མ་རྣམས་ཆ་ཕྲན་ཕྱེད་ཕྱེད་ཀྱིས་རྒྱ་ཆེ་བར་གྱུར་པའོ། །དེའི་སྟེང་དུ་གསེར་གྱི་སྐ་རགས་ནི་དོན་གསེར་གྱི་གདུང་ལེབ་སྟེ། དཔངས་སུ་ཐིག་སྐུད་གང་ལས་མེད་པས་ཆ་ཕྲན་གཅིག་གི་ལྔ་ཆ་ཡིན་ལ། རྒྱར་བྲེ་ཕུལ་གོང་མ་དང་མཉམ་པའོ། །དེའི་ཕྱི་ངོས་སུ་ཆུ་སྲིན་མ་ཀ་རའི་ཁ་ནས་བྱུང་བའི་དྲྭ་བ་དང་དྲྭ་བ་ཕྱེད་པ་འཕྱང་བ་སྟེ། དེ་ལ་སློབ་དཔོན་ཤཱཀྱ་བཤེས་གཉེན་གྱིས་དྲྭ་བ་ནི་མུ་ཏིག་གི་ཆུན་འཕྱང་སྟེ། མཆོག་དབུས་ན་ཡོད་པའོ། །དྲྭ་བ་ཕྱེད་པ་ནི་མཆོག་མཐའ་ན་ཡོད་པའོ་ཞེས་དང་། སློབ་དཔོན་དཔལ་འབྲས་རྡོ་རྗེས། མུ་ཏིག་གི་ཆུན་འཕྱང་དབུས་ན་ནོར་བུས་མཛེས་པ་ལ་ནི་དྲྭ་བ་ཞེས་བྱ་ལ། དབུས་ན་རྒྱན་མེད་པ་ལ་ནི་དྲྭ་བ་ཕྱེད་པ་ཞེས་བྱའོ་ཞེས་གསུངས་པ་ལྟར་རོ། །བཞི་པ་མདའ་ཡབ་ནི། གསེར་གྱི་སྐ་རགས་དང་། ནང་གི་གདུང་མཉམ་པོར་བྱས་པའི་སྟེང་ནས་ཐོག་ཕུབ་པའི་བྱ་འདབ་འོག་གི་འདོད་སྣམ་དང་ཐད་མཉམ་པོར་ཡོད་པའི་མཐའ་སྐོར་ལ་རིན་པོ་ཆེའི་མདའ་ཡབ་ཐུར་དུ་འཕྱང་བ་སྟེ། འདི་ལ་རྣམ་པ་འདི་ལྟར་ཡིན། གཞུང་རྣམས་ནས་བཤད་པ་མི་སྣང་ཡང་བླ་མ་གོང་མ་རྣམས་ཀྱི་མཐོང་བ་བརྒྱུད་པའི་ཕྱག་བཞེས་ཀྱིས་མཆུ་མེད་པའི་སྤྱི་བླུགས་མགོ་མཇུག་བཟློག་པ་ལྟ་བུའམ། རུས་རྒྱན་རྙིང་པའི་ཟ་ར་ཚགས་ཀྱི་སྣེ་མོའི་རྣམ་པ་ཅན་དུ་བཞེད་དེ། རྒྱ་གར་དང་བལ་པོར་བྲིས་པའི་ཐང་སྐུ་རྙིང་པ་རྣམས་ལ་བྲིས་པ་དང་མཐུན་པར་སྣང་ངོ་ཞེས་བླ་མ་དག་གསུང་ངོ་། །ལྔ་པ་པུ་ཤུ་ནི་མདའ་ཡབ་ཀྱི་སྟེང་གི་ཐད་དུ་གྱེན་དུ་འགྲེང་བའི་ཚུལ་གྱིས་གནས་པ་སྟེ། དབྱིབས་ནི་རྗེ་བཙུན་དང་འཕགས་པས་རིན་པོ་ཆེའི་དྲྭ་མིག་སེང་མའི་པུ་ཤུ་ཞེས་གསུངས་ཏེ། པུ་ཤུའི་རྣམ་པ་ཆ་ཕྲན་གཉིས་པ་ཁོར་ཡུག་ཏུ་ཡོད་པ་ལ། དྲྭ་མིག་གི་ནང་དུ་རིན་པོ་ཆེ་མིག་གསུམ་པ་ཡོད་པའོ། །འདིར་ཨ་བྷ་ཡས་འོག་ཏུ་འཕྱང་བ་ལ་ཤར་བུ་དང་། སྟེང་དུ་བརྩེགས་པ་ལ་མདའ་ཡབ་ཀྱི་ཐ་སྙད་མཛད་ཅིང་དབྱིབས་ཀྱང་པདྨ་འདབ་མ་ཕྱེད་པའི་དབྱིབས་ཅན་དུ་བཞེད་དོ། །སྟེང་ཐོག་ཀ་བ་ཤིང་རྩེག་དང་། །གདུང་དང་ཐོག་ཕུབ་རིམ་པ་གསུམ། །དང་པོ་ཀ་བ་ནི་སྣ་ཚོགས་རྡོ་རྗེའི་ལྟེ་བའི་སྟེང་དུ་ལྷ་སྣམ་ཕྱོགས་ཀྱི་མདོག་ཅན། རྒྱར་སྒོའི་ནང་ནས་ཁོར་ཡུག་ཏུ་ཆ་ཆེན་རེ་རེ་དང་། དཔངས་སུ་ཆ་ཕྲན་གཅིག་པ། དབུས་སུ་རྒྱར་ཆ་ཆེན་དྲུག་པ་དང་། དཔངས་སུ་ཆ་ཕྲན་གཉིས་པ་སྟེ། དེ་ལྟ་བུའི་ལྷ་སྣམ་ཆ་ཕྲན་གཅིག་པའི་སྟེང་དུ་ཚངས་ཐིག་ནས་ཆ་ཕྲན་ལྔ་དོར་བའི་མཐའ་རྣམས་སུ་ཀ་བ་ཕྱོགས་མདོག་ཅན་གཉིས་གཉིས་ཏེ་དཔངས་སུ་ཆ་ཕྲན་བཅུ་དྲུག་ཡོད་པ་འཛུགས་སོ། །རྩིག་པའི་ནང་ནས་ཇི་ཙམ་དོར་བའི་སར་འཛུགས་སྙམ་ན། དེའི་སྟེང་གི་གདུང་ཟླུམ་ཕྱོགས་བཞིའི་སྒོའི་ཐད་ཀྱི་རྩིག་པ་ལ་མ་རེག་པར་དགོས་པས་དེ་དང་ཀ་བ་ཕྲད་པའི་ས་ནི་ཐིག་གི་རིགས་པས་ནང་ངོས་ཆ་ཕྲན་གཅིག་དང་། ཕྱི་ངོས་ཆ་ཕྲན་གཅིག་དང་བཞི་ཆ་གཅིག་ཙམ་དོར་བའི་སར་འཛུགས་པར་གྲུབ་བོ། །ཤིང་རྩེག་ནི་ཀ་བ་དེ་དག་གི་སྟེང་དུ་གདུང་ཟླུམ་གྱི་འགྲོས་དང་འདྲ་བའི་ཆ་ཕྲན་གཅིག་དང་། ཆ་ཕྲན་གཅིག་གི་ལྔ་ཆའི་དཔངས་ལ་ཞུ་རིང་ཐུང་གི་རྣམ་པ་ཇི་ལྟར་མཛེས་པར་བྱས་པའོ། །གདུང་ནི་དེ་དག་གི་སྟེང་དུ་རྡོ་རྗེའི་གདུང་དཔངས་སུ་ཆ་ཕྲན་གཅིག་པ་ཟླུམ་པོར་བསྐོར་བའོ། །གདུང་ལ་རྡོ་རྗེས་མཚན་ཞིང་ཀ་བ་རྣམས་ལ་ནི་ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པའོ། །ཐོག་ཕུབ་རིམ་པ་གསུམ་ནི་གདུང་ཟླུམ་དེ་དང་། ཕྱིའི་གསེར་གྱི་སྐ་རགས་མཉམ་པོར་ཡོད་པའི་སྟེང་དུ་ཅམ་བཏང་སྟེ། ཕྱི་གྲུ་བཞི་དང་ནང་ཟླུམ་པོའི་ཚུལ་གྱིས་ཕུབ་པ་ནི་ཐོག་ཕུབ་འོག་མའོ། །གདུང་ཟླུམ་གྱི་སྟེང་དུ་རྩིག་པ་ཟླུམ་པོ་ཟུར་ཐིག་གིས་བཅད་པའི་ཕྱོགས་ཀྱི་མདོག་ཅན་དཔངས་སུ་ཆ་ཕྲན་གསུམ་ལ། ལྔ་ཆ་གཅིག་གིས་མཆོག་པ་དེའི་སྟེང་དུ་ཕ་གུ་དང་། ཤིང་རྩེག་དང་གསེར་གྱི་གདུང་ལེབ་རྣམས་ཟླུམ་པོ། དཔངས་སུ་ཆ་ཕྲན་གསུམ་ཡོད་པའི་སྟེང་དུ་རྡོ་རྗེའི་གདུང་མིག་མངས་རིས་སུ་བྲེས་པ་དཔངས་སུ་ཆ་ཕྲན་གཅིག་ཡོད་པ་བཀོད་ཅིང་རེ་མིག་བརྒྱད་ཕྱིའི་བྱ་འདབ་དང་བཅས་པ་ཟླུམ་པོར་ཕུབ་ཅིང་། མདའ་ཡབ་དང་། པུ་ཤུ་དང་། འོག་གི་གསེར་གྱི་སྐ་རགས་ལ་དྲྭ་ཕྱེད་ཟླུམ་པོར་བསྐོར་བ་ནི་ཐོག་ཕུབ་གཉིས་པའོ། །རེ་མིག་དབུས་མའི་གདུང་གི་སྟེང་དུ་གཙོ་བོའི་ཁ་དོག་དང་མཐུན་པའི་རྩིག་པ་ཆ་ཕྲན་གསུམ། དེའི་སྟེང་དུ་ཕ་གུ་དང་། ཤིང་རྩེག་དང་། གསེར་གྱི་གདུང་ལེབ་རྣམས་ལ་ཆ་ཕྲན་གསུམ་ཡོད་པའི་སྟེང་ཐོག་མཉམ་པོར་ཕུབ་ཅིང་། བྱ་འདབ་ལ་མདའ་ཡབ་དང་། པུ་ཤུ་དང་། གསེར་གྱི་སྐ་རགས་ལ་འཕྱང་བའི་དྲྭ་ཕྱེད་རྣམས་ཀྱང་གྲུ་བཞིར་བྱས་པའི་སྟེང་དུ་རྡོ་རྗེ་ནོར་བུ་རིན་པོ་ཆེའི་ཏོག་ཆ་ཆེན་གཅིག་པས་སྤྲས་པ་ནི་ཐོག་ཕུབ་གསུམ་པའོ། །དེ་ལྟར་ན་སྣ་ཚོགས་རྡོ་རྗེའི་ལྟེ་བ་ནས་ཐོག་ཕུབས་གོང་མའི་བར་ཆ་ཆེན་བརྒྱད་དང་། རྩིག་པའི་ནང་མཐའ་ནས་ནང་མཐའི་བར་ཆ་ཆེན་བརྒྱད་ཡོད་པ་མཉམ་པ་ནི་ལུས་ཡར་མར་དང་། ཕན་ཚུན་འདོམ་གང་དུ་མཉམ་པ་མཚོན་པའི་དོན་ཡིན་ལ། ཐོག་ཕུབས་ཀྱི་རིམ་པ་འདི་ནི་སློབ་དཔོན་རིགས་ཀྱི་སྦྱིན་པས། ཀ་བའི་སྟེང་དུ་གདུང་འཛིན་བཀོད་ནས། དེའི་སྟེང་དུ་དགོད་པར་བྱའོ། །གདུང་གི་སྟེང་དུ་གདུང་དང་མཉམ་པའི་རྩིག་པའི་སྟེང་དུ་ཀླུའི་སྟོབས་སམ། ཡང་ན་དོ་ཤལ་གྱི་སྣམ་བུའོ། །དེའི་སྟེང་དུ་སེང་གེ་རྣམས་ཀྱི་ཁ་ནས་བྱས་པའོ། །དེའི་སྟེང་དུ་རྗེས་སུ་འགུགས་པ་རྣམས་སོ། །དེའི་སྟེང་དུ་སོ་ཕག་རྣམས་ཀྱིས་བྱས་པའི་གཞིའོ། །དེའི་སྟེང་དུ་མགྲིན་པའོ་ཞེས་གསུངས་པའི་དོན་ཡིན་པར་མངོན་ཏེ་ཀ་བ་ནི་དཀྱིལ་འཁོར་གྱི་ནང་གི་ཀ་བ་བརྒྱད་དོ། །གདུང་འཛིན་པ་ཞེས་པ་ནི་ཀ་ཞུ་ལ་སོགས་པའི་ཤིང་རྩེག་གོ །དེའི་སྟེང་གི་གདུང་ནི་གདུང་ཟླུམ་པོ་གདུང་སྟེང་གི་རྩིག་པ་ནི་རྩིག་པ་ཟླུམ་པོའོ། །ཀླུའི་སྟོབས་ནི་ཕ་གུའོ། །དེའི་སྟེང་དུ་སེང་གེ་རྣམས་ཀྱི་ཁ་ནས་བྱས་པ་ནི་སེང་གེའི་ཁ་ནས་དྲྭ་ཕྱེད་བྱུང་བ་སྟེ། སྔར་གྱི་ཆུ་སྲིན་གྱི་ཁ་ནས་བྱུང་བར་བཤད་པ་དང་དོན་འདྲའོ། །དེའི་སྟེང་དུ་རྗེས་སུ་འགུགས་པ་ནི་གཅིག་རྗེས་སུ་གཅིག་བཀབ་པ་སྟེ་དོན་ཐལ་གདུང་བཞིའོ། །དེའི་སྟེང་དུ་སོ་ཕག་གིས་བྱས་པའི་གཞི་ནི་སྟེང་ཐོག་གོ །དེའི་སྟེང་དུ་མགྲིན་པའོ་ཞེས་པ་ནི་རེ་མིག་དབུས་མའི་སྟེང་གི་ཁང་བརྩེགས་བསྟན་པས་སོ། །གཞན་ཡང་དརྤན་གྱིས། ཕྱི་དབྱིབས་མཆོད་རྟེན་གུར་ཐབས་དང་། །རྒྱལ་ཁབ་རི་བོའི་གུར་དུ་འདོད། །ཅེས་བཞི་གསུངས་པའི་དང་པོ་མཆོད་རྟེན་གྱི་རྣམ་པའང་འདི་ལ་ཚང་ཞིང་། ཡེ་ཤེས་ཞབས་ལུགས་སོགས་གཞུང་ཁུངས་ཐུབ་དུ་མ་ལས། གཞལ་ཡས་ཁང་ལ་ཁང་པ་བརྩེགས་པ་ཞེས་པའི་ཐ་སྙད་གསུངས་པས། ཐོག་ཕུབ་ཀྱི་རིམ་པ་འདི་ལས་འོས་མེད་དོ། །བཞི་པ་སྒོ་ནི་རྒྱུད་གཞུང་དུ་མ་ལས། སྒོ་ནི་འཁོར་ལོའི་བརྒྱད་ཆ་སྟེ། །ཞེས་དང་། ཐིག་རྩ་ལས་ཀྱང་། དབུས་སུ་བརྒྱད་ཆ་ཕྱིས་ལ་སྒོ། །ཞེས་བཤད་པས་རྩ་བའི་སྒོའི་རྒྱར་ཆ་ཆེན་གཅིག་པ་ཡིན་ལ། དཔངས་སུ་སྔགས་ཀྱི་རྒྱུད་འགྲེལ་རྣམས་ལས་གསལ་བར་བཤད་པ་ཉུང་ཡང་། སློབ་དཔོན་དརྤན་གྱིས། འགལ་བ་མེད་པས་ལྷ་ཡི་ཕྱིར། །རིང་བའི་སྒོ་ནི་བཤད་པ་ཡིན། །ཤིན་ཏུ་ཆུང་ནའང་མི་འགལ་བས། །མཆོད་བྱ་རྣམས་ཀྱང་བསྟན་པ་སྟེ། །ཞེས་གསུངས་པ་ལྟར་ཡིན་ལ། དེ་ལ་སྒོ་ཆེ་བ་ནི་གཞུང་དེར་མ་ཐེམ་གྱི་ས་ནི་གདུང་གི་མཐར་ཐུག་པའི་ཚད་གང་ཡིན་པ་སྟེ། དེ་བཞིན་དུ་རྩེ་མོའི་མཐར་ཐུག་པའི་རིངས་སུ་ནི་ཆ་གསུམ་གྱི་ཚད་དུ་འགྱུར་ཞིང་། ཆ་རེ་རེ་ནི་ཆ་ཆེན་པོའོ་ཞེས་སྒོའི་དཔངས་སྒོ་ཚད་གསུམ་དུ་གསུངས་སོ། །སྒོ་ཆུང་བ་ཡང་། དརྤན་གྱིས་ཁང་བཟངས་ཀྱི་བརྒྱད་དང་བཅུའི་ཆ་ཤས་ཀྱི་ཞེང་ནི་སྒོའི་དབུས་ཀྱི་ཆ་ལ་སྟེ་དེའི་ཚད་ཀྱི་ཡལ་འདབ་དང་། དེའི་ཉིས་འགྱུར་ནི་སྒོའི་དཔངས་སུ་བསྟན་ཅིང་སྒོ་ཁྱུད་དང་། དཔུང་པ་དང་། རེ་བཞི་རྣམས་ནི་དེའི་ཆ་ལྔ་པར་བཤད་དོ། །ཞེས་སྒོ་དཔངས་ཆེ་ཆུང་གཉིས་སུ་གསལ་བར་བཤད་ལ་འདི་སྒོ་ཆུང་ངུའི་ལུགས་ཡིན་པའང་དེ་ཉིད་ལས། འདེགས་པའི་དཔངས་ནི་རྣམ་ཟུང་ལ། །འདེགས་པའི་རྒྱ་ཡི་ཚད་ཡིན་ཏེ། །ཆ་གཉིས་སླར་ཡང་སྟེང་དུ་ནི། །ཆུང་བར་བཟོ་བོ་ཡང་དག་འདོད། །ཅེས་གསུངས་པའི་ཕྱིར་རོ། །དེས་ན་ལུགས་འདི་གཉིས་ཀ་ཡང་ཁས་བླང་དགོས་ཏེ། རྟ་བབས་དཔངས་སུ་སྒོ་ཚད་གསུམ་མ་ལྟར་ན་སྒོ་ཆེ་བ་དང་། སྒོ་ཚད་གཅིག་མ་ལྟར་ན་སྒོ་ཆུང་བ་འདོད་དགོས་པའི་ཕྱིར་རོ། །དེ་ལྟ་བུའི་རྩ་བའི་སྒོའི་ཕྱི་རོལ་མདུན་དུ་སྒོ་ཚད་གཅིག་ཡོད་པའི་ས་ནི་སྒོ་ཁྱུད་དེ། འདིའི་མཐར་སྒོ་གླེགས་གཞུག་གོ །བུ་སྟོན་གྱིས་དེ་ཉིད་བསྡུས་པ་དང་། དཔལ་མཆོག་དང་། ཀོ་ས་ལའི་རྒྱན་དང་། གཙུག་དགུ་རྣམས་སུ་སྒོའི་དབུས་སུ་སྒོ་སྲུང་འགོད་པར་གསུངས་པ་ཤེས་བྱེད་དུ་བྱས་ནས་རྩ་བའི་སྒོ་ལའང་སྒོ་གླེགས་གཞུག་སྟེ། སྒོ་གླེགས་གཉིས་ཀྱི་དབུས་སུ་སྒོ་སྲུང་བཞུགས་པ་ལུང་དེ་དག་གི་དོན་དུ་བཞེད་ཅིང་། རྗེ་བླ་མ་ཡང་སྐུ་ཚེའི་སྟོད་ཀྱི་བཞེད་པ་འདི་ལ་མཛད་དོ། །ཕྱིས་རྟིང་དེ་ལྟར་ན་སྒོ་ཕྱི་ནས་འབྱེད་ན་ཕྱི་མས་དང་། ནང་ནས་འབྱེད་ན་ནང་མས་ཆ་ཕྲན་ཕྱེད་དང་གསུམ་གྱི་བར་གཅོད་པས་དབུས་སུ་སྒོ་སྲུང་བཞུགས་ས་མི་འོང་བར་གཟིགས་ནས་སྒོ་གླེགས་ཕྱི་མ་ཁོ་ན་བཞེད་དོ། །དེས་ན་རྩ་བའི་སྒོ་ལ་རྒྱ་དཔངས་གཉིས་ཅར་དུ་རྩིག་པ་ལྔའི་བཅད་འཕྲོ་མ་གཏོགས། རེ་བཞི་ཡང་མི་དགོས་ཤིང་འོག་གཞི་ཡང་བྲི་བྱ་ལ་ཡོད་པ་ལྟར་ལྷ་སྣམ་དེ་ཉིད་ཏལ་པོར་འགྲོ་བས། མ་ཐེམ་ཡང་མི་དགོས་པའི་ཕྱིར་ན། རྩ་བའི་སྒོའི་དབུས་སུ་སྒོ་སྲུང་འགོད་པ་ནི་ལུང་དེ་དག་གི་དོན་ཏོ། །དེས་ན་སློབ་དཔོན་ཀུན་སྙིང་གིས། །སྒོ་ནི་འཁོར་ལོའི་བརྒྱད་ཆ་སྟེ། །སྒོ་ཁྱུད་ཀྱང་ནི་སྒོ་ཡི་ཚད། །ཅེས་དང་། གྲུབ་ཆེན་ཀླུ་བྱང་གིས་ཀྱང་དེ་བཞིན་དུ་གསུངས་ལ། དེ་ཉིད་སྣང་ཆེན་དུ། སྒོ་ཁྱུད་ནི་སྒོའི་ཚད་དོ། །ཁ་ཁྱེར་ནི་སྒོའི་ཕྱེད་ཀྱི་ཚད་དོ། །སྒོ་འགྲམ་ནི་ཁ་ཁྱེར་གྱི་ཚད་དོ། །ཞེས་གསུངས་པས་སྒོ། སྒོ་ཁྱུད། སྒོ་འགྲམ། སྒོ་ལོགས་བཞི་ཀ་མཉམ་པ་དང་། སྒོ་དང་མི་མཉམ་གཞན་གསུམ་མཉམ་པ་དང་། སྒོ་དང་སྒོ་ཁྱུད་མཉམ། སྒོ་འགྲམ་དང་སྒོ་ལོགས་མཉམ་པའི་ལུགས་གསུམ་ལས་འདིར་ཕྱི་མའི་དབང་དུ་བྱས་པ་སྟེ། སྒོ་དང་སྒོ་ཁྱུད་ཀྱི་ནང་མཉམ་པས་ཆ་ཕྲན་བཞི་བཞི་སྒོ་འགྲམ་དང་སྒོ་ལོགས་ཀྱི་ནང་མཉམ་པས་ཆ་ཕྲན་གཉིས་གཉིས་ཏེ། སྒོ་ལོགས་ཀྱི་ཕྱི་ལ་ནི་ཆ་ཕྲན་བཞི་ཡོད་པའོ། །སྒོ་ཁང་གི་རྩིག་པའི་དཔངས་ནི་རྟ་བབས་སྒོ་གདོང་ལ་སྦྱར་བ་ལྟར་ན། ཆ་ཕྲན་དགུ་དགོས་ཤིང་། རྟ་བབས་ཀྱི་སྟེང་འགེབས་པ་ལྟར་ན། རྩ་བའི་སྒོ་དང་མཉམ་པར་ཆ་ཕྲན་བརྒྱད་དོ། །ལྔ་པ་རྟ་བབས་ནི། ཨ་བྷ་ཡས། གཉིས་མཉམ་དགུ་མཉམ་དང་། ལྔ་མཉམ་གསུམ་གསུམ་མཉམ་སྟེ། སྒོ་ཚད་གསུམ་མའི་ལུགས་གཉིས་དང་། སྒོ་ཚད་གཅིག་མ་ལ་ལྔ་མཉམ་གསུམ་གསུམ་མཉམ་གཅིག་སྟེ། དཀྱིལ་འཁོར་སྤྱི་འགྲོའི་རྟ་བབས་མི་འདྲ་བ་གསུམ་བཤད་པ་དང་། རབ་ཏུ་སྒྲོན་གསལ་ལས། རྟ་བབས་ཀྱི་དཔངས་སྒོ་ཚད་གཉིས་མར་བཤད་ཀྱང་། སྣམ་བུ་སོགས་འདི་ལྟར་བྱེད་ཀྱི། གསལ་ཁ་མི་སྣང་བ་ནི་སློབ་དཔོན་གཞན་གྱི་ལུགས་ཡིན་ལ། གཞན་རྒྱ་གར་བའི་གཞུང་ཕལ་མོ་ཆེ་ནས་རྟ་བབས་སྒོ་ཚད་གཅིག་མར་གསུངས་པ་མང་ཞིང་། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པའང་འདི་ཁོ་ན་བཞིན་ཡིན་པས་དེ་བཤད་ན་སློབ་དཔོན་ཤྲདྡྷ་ཀ་ར་ཝརྨས། རྟ་བབས་ཡ་ཕུབ་དག་ལ་ནི། །ཆ་གཅིག་དོར་བར་ཆ་ཆེན་ཚད། །ཆུར་ནི་ཆ་ཆེན་བཞི་པ་སྟེ། །སྐས་ལ་སོགས་པ་ཇི་བཞིན་འགྱུར། །རྟ་བབས་ཆ་གཅིག་པདྨར་གནས། །ཆོས་ཀྱི་འཁོར་ལོ་ཆ་གཉིས་པ། །ཆུ་དང་ཞེང་མཉམ་གདུགས་ཀྱི་ཚད། །ཆ་གཅིག་པ་ལ་ཡུ་བ་ཕྱེད། །འཁོར་ལོའི་ངོས་གཉིས་ཐད་ཀར་ནི། །རི་དྭགས་གཉིས་ནི་མཉམ་གནས་པར། །རྟ་བབས་ལ་བརྟན་འཁོར་ལོ་ཕྱོགས། །ཤིན་ཏུ་འབྱར་མིན་རྒྱང་རིང་མིན། །རྡོ་རྗེ་རིན་ཆེན་ཡུ་བ་ཅན། །དེ་ཚད་རི་དྭགས་ཀྱི་རྒྱབ་ཏུ། །ཆ་ཆུང་གཅིག་དོར་ཐིག་ལ་བརྟེན། །རྡོ་རྗེ་རིན་ཆེན་ཡུ་བ་ཕྱེད། །བ་དན་དྲིལ་བུར་ལྡན་པ་ཡི། །མཛེས་པ་རྟ་བབས་ཡིན་པར་འདོད། །ཅེས་གསུངས་པས། སྒོའི་སྟེང་ནས་ཆ་ཕྲན་གཅིག་དོར་བའི་སྟེང་དུ། རྟ་བབས་དཔངས་སུ་ཆ་ཆེན་གཅིག་པ། རྒྱར་སྣམ་བུ་འོག་མའི་མཐའ་ནས་མཐའི་བར་ལ་སྒོ་ཚད་བཞི་ཡོད་ལ། སྣམ་བུ་གོང་མ་གསུམ་འོག་མ་ལས་གཡས་གཡོན་གཉིས་ནས་ཆ་ཕྲན་རེ་རེ་ཐུར་དུ་སོང་བ་སྟེ། སྣམ་བུ་སྟེང་མ་ལ་ཆ་ཕྲན་བཅུ་ཡོད་པ་དེའི་སྟེང་དུ་ཆོས་འཁོར་གྱི་གདན་གྱི་པདྨ། དཔངས་ཆ་ཆུང་གཅིག རྒྱར་ཆོས་འཁོར་དང་མཉམ་པ། དེའི་སྟེང་དུ་ཆོས་འཁོར་རྩིབས་བརྒྱད་པའམ། བཅུ་གཉིས་པ། ཆུ་ཞེང་དུ་ཆ་ཆུང་གཉིས་ཡོད་པ། དེའི་སྟེང་དུ་གདུགས་ཆ་ཆུང་གཅིག་གི་ཚད་ལ་ཕྱེད་གདུགས་ངོ་བོ་དང་། ཕྱེད་ཡུ་བ་ལ་ཡོད་པ། ཆོས་འཁོར་གྱི་གཡས་གཡོན་གཉིས་སུ་རི་དྭགས་ཀྲྀཥྞ་སཱ་ར་གཉིས་ཆོས་འཁོར་ལ་ཁ་བལྟས་ཤིང་། ཤིན་ཏུ་འབྱར་མིན་རྒྱང་རིང་མིན། །ཞེས་པའི་དོན་རི་དྭགས་དང་། ཆོས་འཁོར་གྱི་བར་ན་ཆ་ཆུང་རེ་རེ་གནས་པ་ལ་འགྲེལ་པས་བཤད་དོ། །རི་དྭགས་ཀྱི་དཔངས་ཀྱི་ཚད་ནི་ཆ་ཕྲན་གཉིས་ཡིན་ལ། དེ་ནས་ཆ་ཕྲན་གཅིག་དོར་བར་བ་དན་དྲིལ་བུ་དང་བཅས་པ་ཡུ་བ་ལ་ཆ་ཕྲན་གཅིག་སྟེང་ཆ་ཕྲན་གཅིག་ལ་ཕྱེད་རྡོ་རྗེ། ཕྱེད་རིན་པོ་ཆེར་བྱས་པ་ལ་བ་དན་དང་དྲིལ་བུ་སྣ་ཚོགས་པ་བཏགས་པས་མཛེས་པར་བྱས་པའོ། །རྡོ་རྗེ་མཁའ་འགྲོ་ལས། སྒོ་ལས་སུམ་འགྱུར་རྟ་བབས་ཏེ། །ཞེས་བཤད་པ་ནི་སློབ་དཔོན་འདི་དང་། སློབ་དཔོན་ལ་ཝ་པ་ལྟར་ན། ཀ་བའི་ནང་མཐའ་ནས་ནང་མཐའི་བར་ལ་རྟ་བབས་ཀྱི་ཚད་དུ་བྱས་ནས་དེ་ལ་སྒོ་ལས་སུམ་འགྱུར་དུ་ཡོད་པར་དགོངས་པ་ལ་བཞེད་དོ། །འདི་དག་ནི་བྲི་བྱའི་དབང་དུ་བྱས་པ་ཡིན་ལ། བློས་བསླངས་ན་སྒོ་འགྲམ་གྱི་ཕྱི་མཐའ་དང་། སྒོ་ལོགས་ཀྱི་ཕྱི་མཐའ་གཉིས་སུ་རྟ་བབས་ཀྱི་ཀ་བ་དཔངས་ཆ་ཕྲན་ལྔ་པ། ཀ་རྒྱན་དང་བཅས་པ་བཞི་བཞི་བཙུགས་ལ། དེའི་སྟེང་དུ་སྒོ་འགྲམ་གྱི་ཕྱི་ནས་སྒོ་ལོགས་ཀྱི་བར་མདུན་དུ་འོངས་ཤིང་། དེ་ནས་སྒོ་ལོགས་ཅིག་ཤོས་ཀྱི་བར་ངོས་སུ་སོང་བ། དེ་ནས་སྒོ་འགྲམ་ཅིག་ཤོས་ཀྱི་བར་རྒྱབ་ཏུ་སོང་བར་གྱུར་པའི་བར་རྡོ་རྗེའི་གདུང་དགོད་དེ། རིན་ཆེན་འབར་བར། ཡ་ཕུབ་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །བརྒྱད་པ་པདྨ་འཁོར་ལོ་གདུགས། །ཞེས་གསུངས་སོ། །དེའི་སྟེང་དུ་རྟ་བབས་རྣམས་བརྩིགས་ཏེ་ཀ་རྒྱན་གྱི་སྟེང་དུ་ཆ་ཕྲན་གཅིག་པ། དེ་ནས་ཀ་བའི་སྟེང་དུ་བང་རིམ་གཉིས་པ་ལ་ཆ་ཕྲན་གཅིག་གིས་ཐུང་བ། དེ་ནས་མུན་སྣམ་གྱི་སྟེང་དུ་བང་རིམ་གསུམ་པ་སྔར་བས་ཆ་ཕྲན་གཅིག་གིས་ཐུང་བ། དེ་ལས་སྒོ་ཁང་ཆ་ཕྲན་གཅིག་གིས་ཐུང་བ་ནི་རིམ་པ་བཞི་པ་སྟེ། དེའི་སྟེང་དུ་པདྨ་དང་ཆོས་འཁོར་སོགས་དགོད་དོ། །དེ་ལྟར་ན་རྟ་བབས་ཀ་བ་དང་བཅས་པའི་དཔངས་ཆ་ཕྲན་དགུ་ཡིན་ལ། དེ་བཞིན་དུ་རྩ་བའི་སྒོ་དང་། སྒོ་ཁྱུད་དང་། འགྲམ་ལོགས་རྣམས་ཀྱི་དཔངས་ཀྱང་ཆ་ཕྲན་དགུ་དང་། སྒོའི་དཔངས་ཀྱང་སྔར་བཤད་པ་ལྟར་ཆ་ཆེན་གཉིས་ཡིན་ནོ། །དེ་ལྟར་ན་གཡས་གཡོན་གྱི་རྟ་བབས་ནི་རིང་ཐུང་གི་ཚུལ་དུ་གནས་ལ། སྒོ་མདུན་གི་རྟ་བབས་རྣམས་ལོགས་མཉམ་པོར་ཡོད་ཀྱང་། ཁ་དོག་མི་འདྲ་བའི་དབང་གིས་སྣམ་བུ་བཞི་ཡོད་དོ་ཞེས་པ་ནི་རྗེ་བླ་མའི་བཞེད་པའོ། །རྗེ་བཙུན་གྱིས་ལཱུ་ཧི་པའི་སྒྲུབ་ཐབས་ལས། སྒོ་ནི་ས་གཞི་ལ་བྲིས་པ་བཞིན་བརྩིགས་ནས་ཀྱང་ཡོད་པར་འདོད་དེ། ཡ་ཕུབ་ནི་སྒོའི་དངོས་གཞི་ཡིན་པའི་ཕྱིར་ཡ་ཕུབ་ཀྱི་རྩིག་པ་ནི་མེད་པར་འདོད་ལ། སྒོ་ཁང་གི་སྟེང་བཀབ་པ་ནི་རྟ་བབས་ཡིན་པས་ཀ་བ་བཞིས་མཐོ་བར་བཏེག་ལ། རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའོ། །ཕ་གུ་དང་མདའ་ཡབ་ཀྱི་བར་ན་དྲྭ་ཕྱེད་ཡོད་པ་མདའ་ཡབ་ཀྱི་སྟེང་ན་ཡར་ལ་པུ་ཤུ་ཞེས་བྱ་བ་རིན་པོ་ཆེའི་དྲྭ་བ་སེང་མ་ནང་ནས་ཕྱི་མཐོང་བ་ལ་མདའ་ཡབ་ཀྱི་དཔངས་དང་མཉམ་པ་ཡོད་དོ་ཞེས་གསུངས་པའི་དོན་འདི་ལྟར་མངོན་ཏེ། སྤྱིར་སྒོ་ཁང་བྲིས་པ་བཞིན་བརྩིགས་ནས་ཡོད་པར་འདོད་ལ། དམིགས་བསལ་བྲི་བྱའི་ཡ་ཕུབ་ནི་སྒོའི་དངོས་གཞིའི་ཐད་ཀྱི་རྩིག་རྒྱུན་མ་ཆད་པ་མཚོན་པའི་ཕྱིར། དེར་བྲིས་པ་ཡིན་གྱི་བསྒོམ་བྱ་ལ་ཡ་ཕུབ་ཀྱི་ཐད་ཀྱི་རྩིག་པ་མེད་པར་འདོད་དོ། །འོ་ན་བསྒོམ་བྱ་ལ་རྩིག་རྒྱུན་ཆད་པར་འགྱུར་རོ་སྙམ་ན་མ་ཡིན་ཏེ། སྒོའི་སྟེང་དུ་ཡང་ཆ་ཆེན་གཉིས་ཀྱི་རྩིག་རྒྱན་མ་ཆད་པར་ཡོད་པའི་ཕྱིར་རོ། །རྟ་བབས་ཀྱི་སྒོ་ཁང་གི་སྟེང་འགེབས་དགོས་པའི་སྒོ་ལོགས་ཀྱི་ཕྱི་མཐའ་ཆ་ཕྲན་རེ་རེ་སོང་བའི་སར་ནང་ངོས་འདོད་སྣམ་ལ་རེག་པ་དང་། ཕྱི་ངོས་སྣ་ཚོགས་རྡོ་རྗེ་ལྟེ་བ་ཟད་མཚམས་སུ་སྟེགས་བུ་གྲུ་བཞི། དཔངས་སུ་ཆ་ཕྲན་གཅིག དེའི་སྟེང་དུ་བུམ་པ་ཆ་ཕྲན་གཅིག དེའི་སྟེང་དུ་ཀ་བ་ཆ་ཕྲན་ལྔ་པ་བཞི་འཛུགས་སོ། །དེ་དག་གི་སྟེང་དུ་ཞུ་རིང་ཐུང་གཉིས་ལ་དཔངས་སུ་ཆ་ཕྲན་གཅིག སྲིད་དུ་ཞུ་རིང་ཆ་ཕྲན་གཉིས་ཡོད་པ། རྩེ་མོ་ཀ་རྒྱན་དང་། མུན་པའི་ཕྱེད་ནོན་པའི་ཚུལ་གྱིས་ཡོད་པའོ། །དེའི་སྟེང་དུ་མདུན་ངོས་ལ་གདུང་། དཀྱུས་སུ་ཆ་ཆེན་བཞི། དཔངས་སུ་ཆ་ཕྲན་གཅིག་ཡོད་པ་དང་། ཀ་བ་ནང་མ་གཉིས་ཀྱི་སྟེང་དུ་ཡང་དེ་དང་མཉམ་པའི་གདུང་འགོད་དོ། །དེའི་སྟེང་དུ་རྟ་བབས་སྣམ་བུ་འོག་མ་དཀྱུས་སུ་ཆ་ཆེན་བཞི། ཞེང་དུ་ཆ་ཕྲན་ལྔ་ཡོད་པས་བཀབ། དེའི་སྟེང་དུ་སྣམ་བུ་གོང་མ་གསུམ་གཡས་གཡོན་དང་། མདུན་ངོས་གསུམ་ཆ་ཕྲན་རེ་རེ་ཐུང་བ་བརྩེགས་ཏེ། མཆོད་རྟེན་གྱི་བང་རིམ་ལྟར་ཡོད་པའི་སྟེང་མ་ལ་དཀྱུས་སུ་ཆ་ཕྲན་བཅུ་དང་། ཞེང་དུ་ཆ་ཕྲན་གཉིས་ཡོད་པའོ། །དེའི་དབུས་སུ་པདྨ་འཁོར་ལོ་གདུགས་གསུམ་ཆ་ཆེན་གཅིག་གི་ཚད་དང་། གཡས་གཡོན་དུ་རི་དྭགས་ཕོ་མོ་གཉིས་དང་། མཇུག་མའི་ངོས་སུ་གདུགས་འཛིན་པའི་སྤྲེའུ་གཉིས་དང་། སྣམ་བུའི་རིམ་པ་རྣམས་ལ་རྒྱལ་མཚན་དང་། བ་དན་ལ་སོགས་པ་རྒྱན་སྣ་ཚོགས་ཀྱིས་བརྒྱན་པའོ། །སྣམ་བུ་བཞི་ཆར་གྱི་ནང་ངོས་མཉམ་པ་དང་། སྒོའི་སྟེང་གི་ལོགས་ཀྱི་རྩིག་པའི་བར་ན་ཆ་ཕྲན་གཉིས་སྟོང་པར་ཡོད་པ་ནི་རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའི་དོན་ཡིན་ཞིང་། སྒོ་ཁང་གི་རྩིག་པ་དང་། རྟ་བབས་ཀྱི་བར་ན་ཆ་ཕྲན་གཅིག་ཡོད་པ་ནི་ཀ་བ་བཞིས་མཐོ་བར་བཏེག་པ་ཞེས་དང་། ཀ་བ་བཞི་དགོས་པའི་དོན་ཀྱང་ཡིན་ནོ། །ཀ་བའི་གདན་ལ་སྟེགས་བུ་དང་། བུམ་པ་ཡོད་པ་ནི་ཀླུའི་བློས། བུམ་པ་ཀ་བའི་སྟེགས་གནས་པའི། །སྒོ་ལས་སུམ་འགྱུར་རྟ་བབས་ཏེ། །ཞེས་དང་། ཕྲེང་བར། སྟེགས་བུ་བུམ་པ་ལ་གནས་པའི། །རྟ་བབས་ཀ་བ་དྲང་པོར་བྱ། །ཞེས་པས་འགྲུབ་ཅིང་། རྟ་བབས་འདགས་པའི་གདུང་དགོས་པ་ནི། རིན་ཆེན་འབར་བར། ཡ་ཕུབས་ཐ་མ་རྡོ་རྗེའི་གདུང་། །ཞེས་པས་འགྲུབ་བོ། །འདི་ཉིད་བྲི་བྱ་ལ་མེད་དོ་སྙམ་ན། ཡ་ཕུབས་དང་རྟ་བབས་ཀྱི་བར་གྱི་ཆ་ཕྲན་གཅིག་པོ་དེ་ཉིད་སློབ་དཔོན་འདིས་གདུང་གི་ཐིག་ཏུ་འདོད་དེ། ཡ་ཕུབས་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །ཞེས་པ་བྲི་བྱའི་སྐབས་སུ་བཤད་པའི་ཕྱིར་རོ། །ཤྲདྡྷས་གདུང་ཐིག་དང་། མུན་སྣམ་གང་གི་ཡང་གསལ་ཁ་མེད་ཅིང་། དབང་ཆུར་ནམ་མཁའ་ཞེས་བཤད་པས་མུན་སྣམ་དུ་བཞེད་པ་གདམ་ཁ་ཅན་ཏེ། གང་ལྟར་ཡང་བསྒོམ་པ་ལ་ཁྱད་མེད་དོ། །གུ་ཎ་དྷ་ར་ནི་སྣམ་བུ་འོག་མའི་ནང་ངོས། དཔངས་སུ་ཆ་ཕྲན་ཕྱེད་ཙམ་བྲུས་པའི་དབྱིབས་མཛེས་པོ་འབྱུང་ལ། དྲྭ་བ་དང་དྲྭ་ཕྱེད་ལ་སོགས་པའི་གནམ་རྒྱན་སྣ་ཚོགས་འདོགས་པའོ། །ཞེས་པ་འདི་རྗེ་བཙུན་གྱི་དགོངས་པའོ་སྙམ་དུ་ཁོ་བོ་སེམས་སོ། །གཉིས་པ་ཞར་བྱུང་དུར་ཁྲོད་བཤད་པ་ནི། རྩ་རྒྱུད་ལས། དུར་ཁྲོད་དུ་ནི་མགོན་པོ་རོལ། །ཞེས་པ་ཙམ་ལས་མི་འབྱུང་ཞིང་། སློབ་དཔོན་མི་ཐུབ་ཟླ་བའི་ཀྱེ་རྡོ་རྗེའི་སྒྲུབ་ཐབས་ཀྱི་གཞུང་རྣམས་དང་། སློབ་དཔོན་མཚོ་སྐྱེས་ཀྱིས་ཀྱང་དུར་ཁྲོད་བཤད་པ་མེད་ཀྱང་། རྗེ་བཙུན་སྐུ་མཆེད་ཀྱིས་དུར་ཁྲོད་དགོས་པར་གསུང་པས་དེ་བཞིན་དུ་བཤད་པ་ལ་གསུམ་སྟེ། དུར་ཁྲོད་ཀྱི་དོན་བཤད་པ། དེ་གནས་གང་དུ་བསྒོམ་པ། བསྒོམ་བྱའི་དུར་ཁྲོད་དངོས་སོ། །དང་པོ་ནི། དུར་ཁྲོད་ལ་ཤྭ་ས་ཏི་ཞེས་འབྱུང་བའི་ཤྭ་དང་བ་གཉིས་ཕྲལ་ཏེ། ཤ་ལ་ར་སྦྱར་ནས་ཤྲ་བ་ནི་རོ། །ཡང་བ་མར་སྦྱར་ཏེ། བ་ས་ཏི་ནི་གནས་ཏེ་རོའི་གནས་སོ། །དེ་ཉིད་དོན་འགྱུར་དུ་བྱས་ནས་དུར་ཁྲོད་ལ་བཤད་པ་ནི་དྲང་དོན་གྱི་དུར་ཁྲོད་དོ། །ངེས་དོན་ནི་དབུགས་རྒྱུ་བ་དང་བཅས་པས་ལུས་ལ་བཤད་པ་དང་། སྣོད་བཅུད་ཐམས་ཅད་ལ་བདག་མེད་པས་ཁྱབ་པ་ལ་བཤད་པ་རྣམས་སུ་ཡོད་དོ། །གཉིས་པ་ནི། རྡོ་རྗེ་མཁའ་འགྲོར་རྡོ་རྗེ་རྭ་བའི་ནང་དུ་བསྒོམ་པར་གསུངས་པ་དང་། སྡོམ་འབྱུང་དུ་རྡོ་རྗེ་རྭ་བའི་ཕྱི་རོལ་དུ་བསྒོམ་པར་གསུངས་པ་གཉིས་ཡོད་ཅིང་། རྗེ་བཙུན་སྐུ་མཆེད་ཀྱིས་འཁོར་འདས་དབྱེར་མེད་ཡིན་པས། དེ་གཉིས་ཁྱད་མེད་པར་བཤད་པའི་ནང་ནས་ནང་དུ་བསྒོམ་པའི་བཤད་པ་ཅུང་མང་བ་ནི་དུར་ཁྲོད་ཀྱི་གཞུང་ཆེ་བར། རྡོ་རྗེ་གུར་གྱི་ནང་དུ་ནི། །བཞི་བཞིར་སྦྱོར་བ་བྱ་བ་ཉིད། །ཅེས་གསུངས་པ་ལ་བརྟེན་པར་སྣང་ངོ་། །གསུམ་པ་ནི། འདིར་རྗེ་བཙུན་རྩེ་མོས་ནག་པོ་པའི་གཞུང་ལྟར་དུ་མཛད་པས། དེ་ལྟར་དུ་བཤད་ན། སྒྲུབ་ཐབས་དེ་ཉིད་གསལ་བ་ལས། ཕྱི་རོལ་དུར་ཁྲོད་འཇིགས་པ་སྟེ། །རྡོ་རྗེ་རྭ་བའི་ནང་ཉིད་དུ། །སྟུག་ཅིང་དྲག་དང་འཐུག་པ་དང་། །དེ་བཞིན་འབར་བའི་ཕྲེང་བ་དང་། །འཇིགས་པར་བྱེད་པའི་ཐོད་པ་ཅན། །གཡོན་ནས་ཤར་ལ་སོགས་པ་བཞིན། །དྲག་ཏུ་དགོད་པ་དབང་ལྡན་དུ། །དབང་ཕྱུག་ནགས་ཚལ་མེ་ཡི་མཚམས། །འཇིགས་བྱེད་མུན་པ་བདེན་བྲལ་དུ། །རླུང་དུ་ཀི་ལི་ཀི་ལ་སྒྲོགས། །ཤིར་ཤ་ཨ་ཤྭ་ཀཾ་ཀ་ལི། །ཙུ་ཏའི་ཤིང་ནི་ཤར་སོགས་རིམ། །ཤིང་ཆེན་ཀ་རཉྫ་ཉིད་དང་། །འཁྲིལ་ཤིང་ཅན་དང་ཨརྫུ་ན། །དབང་པོ་ནོར་སྦྱིན་ཞགས་པ་ཅན། །གཤིན་རྗེའི་རྒྱལ་པོ་ཕྱོགས་སུ་འདོད། །དབང་ལྡན་མཚམས་དང་བྱིན་ཟ་དང་། །སྲིན་པོའི་དབང་པོ་རླུང་དག་ཏུའོ། །ནོར་རྒྱས་བུ་དང་ཏཀྵ་ཀ །ཀརྐོ་ཊ་དང་པདྨ་དང་། །པདྨ་ཆེན་པོ་ཧུ་ལུནྟ། །རིགས་ལྡན་དང་ནི་དུང་སྐྱོང་ཉིད། །སྒྲོགས་བྱེད་འཁོར་བྱེད་འཇིགས་པ་དང་། །ལྡོག་བྱེད་དང་ནི་འཐུག་པོ་ཉིད། །འགེངས་བྱེད་དང་ནི་ཆར་འབེབས་དང་། །གཏུམ་པོ་རིམ་བཞིན་སྤྲིན་གྱི་བདག །དེ་ལ་བརྒྱ་བྱིན་ནི་གླང་པོ་ཆེ་ལ་ཞོན་པ་མདོག་སེར་པོ་ལག་པ་གཡོན་ན་རྡོ་རྗེས་མཚན་པའི་ཐོད་པ་ཐོགས་པའོ། །ནོར་སྦྱིན་ནི་གནོད་སྦྱིན་ལ་ཞོན་པ་མདོག་སེར་པོ་གསུས་པ་འཕྱང་བ་མིའུ་ཐུང་གཡོན་ན་ཐོད་པ་དང་དབྱུག་པ་ཐོགས་པའོ། །ཆུ་ལྷ་ནི་ཆུ་སྲིན་ལ་ཞོན་པ་མདོག་དཀར་པོ་སྦྲུལ་གྱིས་བརྒྱན་པ་གཡོན་ན་ཐོད་པ་དང་ཞགས་པ་ཐོགས་པའོ། །གཤིན་རྗེ་ནི་མ་ཧེ་ལ་ཞོན་པ་མདོག་སྔོན་པོ་ལྟོ་བ་འཕྱང་བ་སྐྲ་སེར་པོ་གྱེན་དུ་བརྫེས་པ་མིའུ་ཐུང་གི་གཟུགས་ཅན་གཡོན་ན་ཐོད་པ་དང་དབྱུག་པ་ཐོགས་པའོ། །དབང་ལྡན་ནི་གླང་ལ་ཞོན་པ་མིག་གསུམ་པ་མདོག་དཀར་པོ་གཡོན་ན་ཐོད་པ་དང་མདུང་ཐོགས་པའོ། །བྱིན་ཟ་ནི་ར་སྐྱེས་ལ་ཞོན་པ་མདོག་དམར་སེར་ཕྱག་བཞི་པ་སྐྲ་སེར་པོ་དབྱུག་གུ་གསུམ་པ་དང་ཐོད་པ་དང་ཕྲེང་བ་འཛིན་པའོ། །སྲིན་པོའི་བདག་པོ་ནི་རོ་ལ་ཞོན་པ་མིའུ་ཐུང་གི་གཟུགས་ཅན་མདོག་སྔོན་པོ་སྐྲ་སེར་པོ་གྱེན་དུ་འབར་བ་གསུས་པ་འཕྱང་བ་གཡོན་ཐོད་པ་དང་རལ་གྲི་ཐོགས་པའོ། །རླུང་གི་བདག་པོ་ནི་མདོག་སྔོན་པོ་རི་དྭགས་ལ་ཞོན་པ་ཞི་བའི་གདོང་ཅན་བ་དན་ཐོགས་པའོ། །འཇིག་རྟེན་སྐྱོང་བ་འདི་དག་ཀུན་རང་རང་གི་མདོག་དང་། གདན་དང་། ཕྱག་མཚན་དང་ལྡན་ཞིང་ཀུན་ཀྱང་གཡས་ཀྱིས་ནི་བཅོམ་ལྡན་འདས་ལ་ཕྱག་འཚལ་བའོ། །སྤྲིན་རྣམས་ཀྱི་ཁ་དོག་ནི་འཇིག་རྟེན་སྐྱོང་བ་ལྟ་བུའོ། །ཀླུ་རྣམས་ནི་དེ་དག་ལ་གནས་པ་སྟེ། ཀུན་ཀྱང་ཐལ་མོ་སྦྱར་བའོ། །ཤིང་བརྒྱད་ལ་གནས་པའི་ཞིང་སྐྱོང་བརྒྱད་ནི་འཇིག་རྟེན་སྐྱོང་བ་བརྒྱད་ཀྱི་བཞོན་པ་རྣམས་ཀྱི་གདོང་ལྟ་བུའོ། །སྐྲ་དམར་སེར་གྱེན་དུ་བརྫེས་པ་བཞིན་འགྱུར་བ་སྟེ། ཤི་རི་ཤ་ལ་གནས་པ་ནི་ལྷའི་དགེ་འདུན་ཞེས་བྱ་བ་མདོག་དཀར་པོའོ། །ཤིང་ཙུ་ཏ་ལ་གནས་པ་ནི་གཤིན་རྗེ་ཞེས་བྱ་སྟེ་མདོག་སྔོན་པོའོ། །ཨ་ཤྭ་ཀ་ལ་གནས་པ་ནི་སྤྲིན་གྱི་རྒྱལ་པོ་ཞེས་བྱ་བ་སྟེ་མདོག་དམར་པོའོ། །བྱང་ཆུབ་ཀྱི་ཤིང་ལ་གནས་པ་ནི་གནོད་སྦྱིན་གྱི་སྡེ་དཔོན་ཞེས་བྱ་བ་སྟེ་མདོག་སེར་པོའོ། །ཀ་རཉྫའི་ཤིང་ལ་གནས་པ་ནི་དྲང་སྲོང་འདུས་པ་ཞེས་བྱ་བ་སྟེ་དམར་པོའོ། །འཁྲིལ་ཤིང་ཅན་ལ་གནས་པ་ནི་སྲིན་པོའི་ཚོགས་ཅན་ཏེ་ཁ་དོག་སྔོན་པོའོ། །ཨརྫུ་ན་ལ་གནས་པ་ནི་རླུང་གི་རྒྱལ་པོ་ཞེས་བྱ་བ་སྟེ་མདོག་ལྗང་གུའོ། །ཤིང་ཆེན་པོ་ལ་གནས་པ་ནི་ཡི་དྭགས་འདུས་པ་ཞེས་བྱ་བ་སྟེ་དུ་བའི་མདོག་ཅན་དུ་བལྟ་བར་བྱའོ། །ཕྱོགས་མཚམས་བརྒྱད་ཀྱི་དུར་ཁྲོད་རྣམས་ནི་མགོ་བཅད་པ་དང་། དཔྱངས་པ་དང་། བསྙལ་བ་དང་། གསལ་ཤིང་གིས་ཕུག་པ་དང་། མགོ་བོ་དང་། ཀེང་རུས་དང་། བ་གླང་གི་ཚེ་དང་། ཁྭ་དང་། འུག་པ་དང་། བྱ་རྒོད་དང་། རོ་ལངས་རྣམས་ཕཻཾ་ཞེས་བྱ་བའི་སྒྲ་སྒྲོགས་པར་བྱེད་དེ། མ་ལུས་པ་ཀུན་ཀྱང་སྔོན་གྱི་གྲུབ་པ་ཐོབ་པ་རྣམས་ཀྱིས་མངོན་པར་བརྟགས་པ་སྟེ། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། སྨྱོ་བྱེད་དང་། བརྗེད་བྱེད་དང་། གདོན་དང་། མཁའ་འགྲོ་དང་། མཁའ་འགྲོ་མ་རྣམས་ཀྱིས་རྣམ་པར་བརྒྱན་ཅིང་སྒྲུབ་པ་པོ་རྣམས་དང་བཅས་པར་བལྟ་བར་བྱའོ་ཞེས་གསུངས་པ་ལྟར་རོ། །གསུམ་པ་ནང་གི་དབྱིབས་དང་གདན་བཤད་པ་ནི། ལྷ་སྣམ་ཡོད་པ་དང་། མེད་པའི་ལུགས་གཉིས་ལས། དང་པོ་ནི། རིན་ཆེན་འབར་བར། གསུམ་པའི་ཕྱེད་རྒྱབ་དེ་ཕྱེད་ནང་། །རྡོར་ཕྲེང་བཞི་པ་ལྷ་སྣམ་ཡིན། །ཞེས་ཆ་ཆེན་གསུམ་པའི་མཐའ་ཐིག་ཡན་ཆད་ཟླུམ་པོར་བསྐོར་བ། གཙོ་བོའི་པདྨ་རྡོར་ཕྲེང་དང་བཅས་པ་དང་། ཆ་ཆེན་བཞི་པ་ལྷ་སྣམ་དུ་བཤད་ལ། ནག་པོ་པའི་དཀྱིལ་ཆོག་ལས། ལྷ་ཡི་གནས་ཀྱི་སྐུད་པ་ནི། །མཚམས་སུ་སྒོ་དང་མཚུངས་པར་གདབ། །ཅེས་ལྷ་སྣམ་ཆ་ཆེན་གཅིག་བཤད་ཅིང་། མཚོ་སྐྱེས་ཀྱིས་ཀྱང་དེ་དང་འདྲ་བར་བཤད་པས། སློབ་དཔོན་དེ་རྣམས་ཀྱི་ལུགས་ལ་དབུས་ཀྱི་ཆ་ཆེན་དྲུག་ལ་རྡོ་རྭ་མེ་རི་དང་བཅས་པའི་པདྨ། གཙོ་བོའི་གནས་དང་ལྷ་སྣམ་ལ་པདྨ་ཆུང་དུ་བརྒྱད། འཁོར་གྱི་ལྷ་མོའི་གནས་སུ་བཞེད་དོ། །རྗེ་བཙུན་སྐུ་མཆེད་ཀྱི་སྒྲུབ་ཐབས་གཉིས་ལས། པདྨ་རྐྱང་པ་ལས་རྡོར་ཕྲེང་སོགས་བྱ་བར་མ་གསུངས་ཤིང་། དབང་གི་ཆུ་བོར་པདྨའི་མཐར་རྡོ་རྭ་མེ་རིས་བསྐོར་ཞིང་། དེ་དང་རྩིག་པ་གཉིས་ཀྱི་བར་ན་ལྷ་སྣམ་ཆ་ཆེན་གཅིག་ཡོད་པ་འཕར་མ་གཉིས་པའི་ལུགས་དང་། དེ་བར་ན་མེད་པ་འཕར་མ་གཅིག་པའི་ལུགས་གཉིས་གསུངས་པ་ལ། དང་པོ་ནི། དབང་ཆུ་ནི་ཡབ་ཡུམ་གཉིས་ཀྱི་ཐུན་མོང་བ་ཡིན་པས་བདག་མེད་མའི་དབང་དུ་བྱས་ལ། ཕྱི་མ་ནི་ཡབ་ཀྱི་དཀྱིལ་འཁོར་ཁོ་ནའི་དབང་དུ་བྱས་པ་སྟེ། རྩ་རྒྱུད་ལས། ཡུམ་གྱི་སྐབས་སུ། འཕར་མ་གཉིས་བཟང་རྣམས་བྲིས་ནས། །མྱུར་དུ་དཀར་མོ་ལ་སོགས་བྲི། །ཞེས་དང་། ཡབ་ཀྱི་སྐབས་སུ། འཕར་མ་གཅིག་དང་སྒོ་བཞི་པ། །ཞེས་གསུངས་པའི་ཐིག་གདབ་ཚུལ་གཉིས་ཀ་སྟོན་དགོས་པའི་ཕྱིར་རོ། །འཕར་མ་གཉིས་ཀྱི་དོན་འདི་ལ་རྒྱ་གར་གྱི་འགྲེལ་པ་རྣམས་ལ་བཤད་ཚུལ་མི་འདྲ་བ་དྲུག་ཙམ་སྣང་ཡང་། བིརྺ་པའི་ལུགས་གཉིས་ཀྱི་དགོངས་པ་ནི། འཁོར་གྱི་ལྷ་མོའི་གནས་ལ་རྡོ་རྭ་མེ་རིས་བསྐོར་བ་རིམ་པ་གཅིག་ལས་མེད་པ་ནི་འཕར་མ་གཅིག་དང་། དེ་རིམ་པ་གཉིས་ཡོད་པ་ནི་འཕར་མ་གཉིས་པར་བཞེད་དེ། ཡབ་ཀྱི་སྐབས་སུ་གཙོ་བོའི་པདྨ་ལ་རྡོ་རྭ་མེ་རི་ཡོད་པའམ། མེད་ཀྱང་རུང་། ལྷ་མོ་བརྒྱད་ལ་ཕྱིའི་རྡོ་རྭ་མེ་རིས་བསྐོར་བའི་རིམ་པ་གཅིག་ལས་མེད་པས། འཕར་མ་གཅིག་པར་འཇོག་པའི་ཕྱིར་དང་། ཡུམ་གྱི་སྐབས་སུ་ནང་གི་རྣལ་འབྱོར་མ་ལྔའམ་བདུན་ལ་བསྐོར་བའི་རྡོ་རྭ་མེ་རི་གཅིག ཕྱིའི་རྣལ་འབྱོར་མ་བཅུའམ་བརྒྱད་ལ་རྡོ་རྭ་མེ་རིས་བསྐོར་བའི་རིམ་པ་གཅིག་ཡོད་པས་འཕར་མ་གཉིས་པར་འཇོག་པའི་ཕྱིར། འདི་ལ་དགོངས་ནས་སྐབས་ཁ་ཅིག་ཏུ་ཁ་སྦྱོར་ཞེས་དང་། མི་ཐུབ་ཟླ་བས་ཡབ་ཀྱི་སྒྲུབ་ཐབས་སུ་ཕྲེང་བ་ཞེས་གསུངས་པ་འཕར་མའི་མིང་གི་རྣམ་གྲངས་སུ་བཞེད་ཅིང་། འགྲེལ་པ་ཀུ་མུ་ཏི་ལས། ནང་གི་རྣལ་འབྱོར་མ་ལྔ་ལ། རྡོ་རྗེ་རྭ་བས་བཅད་ཅིང་སྦས་པ་འཕར་མ་གཅིག་དང་། ཕྱིའི་རྣལ་འབྱོར་མ་རྣམས་ལ་རྡོ་རྗེ་རྭ་བས་བཅད་ཅིང་སྦས་པ་འཕར་མ་གཉིས་པར་གསུངས་སོ། །དེར་གདན་བསྒོམ་པ་ནི་པདྨའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་བདུད་བཞི་སྟེང་ནས་སྟེང་དུ་བརྩེགས་པར་གནས་པ་ཡིན་ཏེ། རྗེ་བཙུན་སྐུ་མཆེད་ཀྱིས་མན་ངག་ལུགས་ཀྱི་སྐབས་སུ་བདུད་བཞི་བརྩེགས་པའི་གདན་གྱི་སྟེང་དུ་ཞེས་དང་། མཚོ་སྐྱེས་ལུགས་ཀྱི་སྐབས་སུ་ཡང་དེ་ལྟར་དུ་གསུངས་ཤིང་། དེ་དང་མཐུན་པར་སློབ་དཔོན་ཤཱནྟི་པས་ཀྱང་། དབུས་སུ་བདུད་ནི་བཞི་པོ་དག །གོང་ནས་གོང་དུ་བཀན་པའོ། །ཞེས་གསུངས་སོ། །ཕྱག་མཚན་ནི་གཞུང་རྣམས་སུ་མི་གསལ་ལ། རྗེ་བཙུན་གྱིས། གདོང་བཞི་དང་ནི་དབང་པོ་དང་བཅས་འཇུག་སེལ་དག་དང་དྲག་པོ་རྣམས་ནི་རྟབས་ཤིང་འགྱེལ་ལ་ལག་ཆ་ཤོར་ནས་ཐལ་མོ་སྦྱར་ཞིང་གདོང་གིས་གྱེན་དུ་བལྟ་བ་ཞེས་ལག་པ་གཉིས་ཐལ་མོ་སྦྱར་བར་བཤད་པ་ལྟར་བྱའོ། །ལྷ་མོ་བརྒྱད་ཀྱི་གདན་ནི་རྗེ་བཙུན་རྩེ་མོས། འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ། ཤར་དུ་ཚངས་པ་སེར་པོ། ལྷོར་དབང་པོ་དཀར་པོ། ནུབ་ཏུ་ཉེ་དབང་སྔོན་པོའམ་དམར་པོ། བྱང་དུ་དྲག་པོ་ནག་པོ། བྱང་ཤར་དུ་གཤིན་རྗེ་སྔོན་པོ། ཤར་ལྷོར་ནོར་བདག་སེར་པོ། ལྷོ་ནུབ་ཏུ་སྲིན་པོ་ནག་པོ། ནུབ་བྱང་དུ་ཐགས་ཟངས་རིས་ལྗང་གུའམ་དུད་ཀའོ་ཞེས་གསུངས་སོ། །གལ་ཏེ་རྗེ་བཙུན་སྐུ་མཆེད་ཀྱི་ལུགས་ལ་ཟླ་གདན་དུ་བྱས་པ་མི་འཐད་དེ། སློབ་དཔོན་ཤཱནྟི་པ་སོགས་ཀྱིས་བདག་མེད་མ་ལ་ཟླ་གདན་བྱས་པ་ལ། རྗེ་བཙུན་གྱིས་ཟླ་བའི་གདན་ཡང་མི་རིགས་ཏེ། འདི་དག་ནི་ཁྲོ་མོ་ཡིན་ལ། ཁྲོ་བོ་ཁྲོ་མོ་རྣམས་ནི། འབར་བའི་ཕྲེང་བ་འཁྲུགས་པའི་འོད། །ཅེས་བྱ་བ་ཉི་མར་བཤད་པ་དང་འགལ་བའི་ཕྱིར་རོ། །ཞེས་དགག་པ་མཛད་པས་སོ་སྙམ་ན་འདི་ནི་བདག་མེད་ལྷ་མོ་བཅོ་ལྔ་ལ་ཟླ་གདན་བྱེད་པ་བཀག་པ་ཡིན་གྱི། ཡབ་ཀྱི་འཁོར་རྣམས་ལ་ཟླ་གདན་བྱེད་པ་བཀག་པ་མ་ཡིན་ནོ། །འོ་ན་དེ་གཉིས་ལ་ཁྱད་པར་ཅི་ཡོད་སྙམ་ན། བདག་མེད་མ་གཙོ་འཁོར་རྣམས་ནི། རྩ་རྒྱུད་ལས། ལྷ་མོ་ཐམས་ཅད་ཁ་དོག་ནག །དྲག་ཆེན་ཕྱག་རྒྱ་ལྔ་ཡིས་བརྒྱན། །ཞེས་ཐམས་ཅད་དྲག་མོར་བཤད་ལ། གུར་ལས་ཀྱང་། ཐམས་ཅད་ཁ་དོག་ནག་པོ་མཚུངས་པ། རབ་ཏུ་སོན་པའི་སྟེང་དུ་གར་དང་བཅས་པ། ཁྲོ་མོ་ཆེན་མོ། དཔའ་མོ། གཡོན་ན་ཁ་ཊྭཱཾ་ག་འཛིན་པ་མོའོ་ཞེས་ཁྲོ་མོར་བཤད་པས་དེ་དག་ཁྲོ་མོར་འདོད་དགོས་ལ། འདིར་ནི་ཁྲོ་མོ་ཡིན་པའི་དམིགས་བསལ་མ་གསུངས་པའི་ཕྱིར་རོ། །དེས་ན་ཁྲོ་མོ་དང་ཅུང་ཟད་ཞི་བའི་ཁྱད་པར་ཡོད་པས་གདན་གཉིས་ཀྱང་དེ་བཞིན་དུ་བྱ་བ་ཡིན་ཏེ། དཔེར་ན་དགྲ་ནག་གི་དཀྱིལ་འཁོར་དུ་ཁྲོ་བོ་གཞན་རྣམས་ལ་ཉི་གདན་དང་། གཏི་མུག་གཤིན་རྗེ་གཤེད་ལ་ཟླ་གདན་དུ་བཤད་པའི་ཕྱིར་རོ། །གདན་དེ་དག་བསྒོམ་དགོས་པ་ནི། རྗེ་བཙུན་རྩེ་མོས། གདན་བརྒྱད་བསྒོམ་པ་བདུད་བཞི་དང་། །འབྱུང་བཞིའི་རྣམ་རྟོག་སྤངས་རྟགས་ཡིན། །ཞེས་བཤད་པ་ལྟར་རོ། །གདན་འདི་དག་ཀྱང་གཞལ་ཡས་ཁང་པ་གྲུབ་པ་དང་དུས་གཅིག་ཏུ་གྲུབ་པ་གཉིས་མེད་རྡོ་རྗེས་བཤད་པ་ལྟར་བྱའོ། །དེ་ལྟར་རྟེན་གཞལ་ཡས་ཁང་བསྐྱེད་པའི་དམིགས་རྣམས་གསལ་པོར་བསྒོམས་པའི་རྗེས་ལ། རང་གི་ངོ་བོ་རྣམ་པར་སྣང་མཛད། གཟུགས་རྣམས་གཞལ་ཡས་ཁང་པའི་རྣམ་པར་ཤར་བའི་ང་རྒྱལ་ལ་སེམས་བཞག་ནས། གུར་ལས་གསུངས་པའི་སྔགས་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད། ནཱི་ལ་ཕོ་བྲང་། བཛྲ་རྡོ་རྗེ། སྭ་བྷཱ་ཝ་རང་བཞིན། ཨཱཏྨ་ཀོ྅ཧཾ་བདག ཨ་ཧཾ་ངའོ་ཞེས་པ་སྟེ། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་བཞུགས་གནས་གཞལ་ཡས་ཁང་པ་འདི་ནི་བདག་རྣམ་པར་སྣང་མཛད་ཀྱི་རང་བཞིན་ནོ་ཞེས་དེའི་སྟེང་དུ་ང་རྒྱལ་འཛིན་པའོ། །གཉིས་པ་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ལ་གསུམ། དམ་ཚིག་པ་བསྐྱེད་པ། མིག་སོགས་བྱིན་གྱིས་བརླབ་པ། ཡེ་ཤེས་པ་གཞུག་པའོ། །དང་པོ་ལ་གཉིས། མངོན་བྱང་ལྔ་ལས་རྒྱུ་རྡོ་རྗེ་འཛིན་པ་བསྐྱེད་པ། ཞུ་བ་གླུས་བསྐུལ་ལས་འབྲས་བུ་རྡོ་རྗེ་འཛིན་པ་བསྐྱེད་པའོ། །དང་པོ་ལ་གསུམ། རྒྱུ་རྡོ་རྗེ་འཆང་བསྐྱེད་པ། བསྐྱེད་ནས་འཁོར་སྤྲོ་བ། སྤྲོས་ནས་ཐིག་ལེར་ཞུ་བའོ། །དང་པོ་ལ་གསུམ། མི་མཉམ་སྦྱོར་གྱི་དོན་བཤད། མཉམ་སྦྱོར་གྱི་དོན་བཤད། དེ་གཉིས་མི་འདྲ་བའི་རྒྱུ་མཚན་བཤད་པའོ། །དང་པོ་ལ་གསུམ། གང་བསྒོམ་པའི་དོན་དང་། ཇི་ལྟར་བསྒོམ་པའི་ཚུལ་དང་། དེ་ལྟར་བསྒོམས་པའི་འཐད་པའོ། །དང་པོ་ནི། མངོན་པར་བྱང་ཆུབ་པ་ལྔ་སྟེ། དེའང་གདན་གྱི་སྟེང་དུ་ཨཱ་ལི་ཕྲག་གཉིས་སྐར་མ་ལྟ་བུ་བསམས་ཏེ། སུམ་ཅུ་རྩ་གཉིས་པོ་དེ་ནི་མཚན་སུམ་ཅུ་རྩ་གཉིས་སུ་མོས་པ་བྱའོ། །དེ་གྱུར་པ་ལས་ཟླ་བའི་དཀྱིལ་འཁོར་བསྐྱེད་དེ། མེ་ལོང་ལྟ་བུའི་ཡེ་ཤེས་སོ། །ཡང་ཟླ་བའི་སྟེང་དུ་ཀཱ་ལི་སོ་བཞི། ཡ་ར་ལ་ཝ་ཌ་ཌྷ་ཞེས་པ་དྲུག་བསྣན་པ་བཞི་བཅུ། དེ་ཕྲག་གཉིས་མར་མེའི་རྣམ་པ་དང་འདྲ་བ་བརྒྱད་ཅུ། དཔེ་བྱད་བཟང་པོ་བརྒྱད་ཅུའོ། །དེ་ལས་ཉི་མ་སྟེ། མཉམ་པ་ཉིད་ཀྱི་ཡེ་ཤེས་སོ། །དེ་དག་གི་བར་རྣམས་སུ་ཧཱུྃ་ལ་སོགས་པའི་ས་བོན་ལས་ཕྱག་མཚན་ས་བོན་གྱིས་མཚན་པ་སྟེ། སོ་སོར་རྟོག་པའི་ཡེ་ཤེས་སོ། །སོ་སོར་ས་བོན་ཕྱག་མཚན་དང་། ཟླ་བ་ཉི་མ་འདྲེས་པ་ནི་བྱ་བ་ནན་ཏན་གྱི་ཡེ་ཤེས་སོ། །དེ་ལས་ལྷ་བསྐྱེད་པར་བྱ་སྟེ་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་སུ་མོས་པ་བྱའོ། །གཉིས་པ་ཇི་ལྟར་བསྒོམ་པའི་ཚུལ་ནི་ཁ་ཅིག་འདི་སྐད་དུ་གལ་ཏེ་ཟླ་བ་ལ་སོགས་པ་འདི་དག་མེ་ལོང་ལྟ་བུ་ལ་སོགས་པ་ཡིན་ནས་བསྒོམ་མམ་མིན་ཡང་བསྒོམ། དང་པོ་ལྟར་ན་གྲུབ་ཟིན་པ་བསྒྲུབ་པར་འགྱུར་ལ། གཉིས་པ་ལྟར་ན་སྤྲང་པོ་རྒྱལ་པོར་རློམ་པ་ལྟར་བསྒོམས་ཀྱང་མི་འགྲུབ་བོ་སྙམ་ན་ཡིན་ནས་བསྒོམ་ལ། འདི་ལ་ཡང་འབྲས་བུ་དངོས་ཡིན་པ་དང་། ཆོས་ཉིད་དམ་རྣམ་པ་ཡིན་པ་གཉིས་ལས། འདི་ནི་ཆོས་ཉིད་དམ་རྣམ་པ་ཡིན་ལ། དེའང་ཚུལ་འདི་ལྟར་བསྒོམས་ཏེ། རྣམ་པ་ཟླ་བར་བསྒོམས་པ་ནི་བསྒོམས་སླ་བས་རྣམ་པ་ལམ་དུ་བྱེད་པ་ཞེས་བྱ། རྣམ་པ་དེ་ཉིད་ལ་དོན་མེ་ལོང་ལྟ་བུའི་ཡེ་ཤེས་ལ་སོགས་པ་མོས་པར་བྱས་པས་ལན་ཅིག་དེ་ཐོབ་པར་འགྱུར་བས་མོས་པ་ལམ་དུ་བྱེད་པ་སྟེ། ཟླ་བ་མེ་ལོང་ཡེ་ཤེས་ལྡན། །ཞེས་འབྱུང་ངོ་། །དེ་ཡང་སངས་རྒྱས་ལ་མངའ་བའི་མེ་ལོང་ལྟ་བུའི་ཡེ་ཤེས་ནི་འདི་ཉིད་ཡིན་སྙམ་དུ་འབྲས་བུ་ད་ལྟ་ཉིད་ནས་བསྒོམས་པས་འབྲས་བུ་ལམ་དུ་བྱེད་པའོ། །དེས་བདག་གི་རྒྱུད་ལ་ཚོགས་བསག་ཅིང་སྒྲིབ་པ་འདག་པའི་རྟེན་འབྲེལ་དུ་འགྱུར་བས་ན་བྱིན་རླབས་ལམ་དུ་བྱེད་པའོ། །དེ་བས་ན་རྣམ་པ་དེ་ལ་ངོ་བོར་ཞེན་པས་ན་ཞེན་པས་འཇུག་པའི་ལམ། ཐབས་དེས་དེ་བཞིན་གཤེགས་པའི་ཐུགས་རྗེས་མི་བསླུ་བས་འབྲེལ་པས་མི་བསླུ་བའི་ལམ་ཞེས་བྱའོ། །གསུམ་པ་དེ་ལྟར་བསྒོམས་པའི་འཐད་པ་ནི། མངོན་པར་བྱང་ཆུབ་པ་ལྔ་ལས། མངོན་བྱང་དང་པོའི་དབང་དུ་བྱས་ནས་ཅིའི་ཕྱིར་མེ་ལོང་ལྟ་བུ་ཞེས་བྱ། ཅིའི་ཕྱིར་རྣམ་པ་ཟླ་བར་བསྒོམ། ཅིའི་ཕྱིར་རྒྱུ་ཨཱ་ལི་ལས་བསྐྱེད་ཅེ་ན། དང་པོ་ནི། ཆོས་ཐམས་ཅད་གཟུགས་བརྙན་གྱི་ཚུལ་དུ་སྣང་བས་མེ་ལོང་དང་འདྲ་བས་མེ་ལོང་ལྟ་བུ་སྟེ། ཡེ་ཤེས་གྲུབ་པ་ལས། ཇི་ལྟར་གཟུགས་བརྙན་མེ་ལོང་ལ། །རང་ཉིད་ངེས་པར་སྣང་བ་བཞིན། །དེ་བཞིན་ཆོས་སྐུའི་ཡེ་ཤེས་ནི། །སྣང་བས་མེ་ལོང་ཞེས་བྱའོ། །དེ་ཉིད་གཟུགས་ཀྱི་ཕུང་པོ་དང་། །ཀུན་གཞི་དག་པའི་བདག་ཉིད་དོ། །གཉིས་པ་དེ་ཟླ་བ་ལྟ་བུར་བསྒོམ་པ་ནི་ཟླ་བ་དང་འདྲ་བའི་ཕྱིར་ཏེ། རྡོ་རྗེ་རྩེ་མོ་དང་ཁ་སྦྱོར་ལས། ཡིད་གཉིས་ཀུན་ལས་རྣམ་གྲོལ་བ། །རྣམ་པར་རྟོག་པའི་རབ་རིབ་འཕྲོག །ཉོན་མོངས་དྲི་མ་ཀུན་ལས་འདས། །ཟླ་མཚུངས་སེམས་ནི་ཟླ་བ་ཉིད། །ཅེས་དྲི་མ་དང་བྲལ་བར་འདྲ་བས་སོ། །གསུམ་པ་དེ་ཨཱ་ལི་ལས་བསྐྱེད་པ་ནི། དེ་ཉིད་སྐུའི་རྣམ་པར་འབྱུང་བ་ན་མཚན་གྱི་རྣམ་པ་སྟེ། སངས་རྒྱས་ཀུན་གྱི་ཡོན་ཏན་འདིར། །ཨ་སོགས་གཟུགས་ཀྱིས་འཇུག་པར་འགྱུར། །ཞེས་སོ། །ཡང་མངོན་བྱང་གཉིས་པ་འདི་ལ་བཞི་ལས། དང་པོ་ཅིའི་ཕྱིར་མཉམ་པ་ཉིད་ཡིན་ཞེ་ན། ཡེ་ཤེས་གང་གིས་ཐམས་ཅད་མཉམ་པ་ཉིད་དུ་རྟོགས་པ་སྟེ། དེ་བཞིན་གཤེགས་ཀུན་ཡེ་ཤེས་ཏེ། །རང་གི་དང་ནི་འགྲོ་བ་ཡི། །དངོས་ཉིད་གཅིག་པར་ཐུགས་ཆུད་པས། །མཉམ་ཉིད་ཡེ་ཤེས་ཞེས་བྱའོ། །ཞེའོ། །ཡེ་ཤེས་དེ་ནི་ཚོར་བའི་ཕུང་པོ་དང་། ཉོན་མོངས་པ་ཅན་གྱི་ཡིད་དག་པའི་བདག་ཉིད་ཀྱི་ཕྱིར་རོ། །གཉིས་པ་དེ་ཉི་མར་བསྒོམ་པ་ནི་ཉི་མ་དང་འདྲ་བའི་ཕྱིར་ཏེ། ཉི་མས་མུན་པ་ཐམས་ཅད་མཉམ་པར་འཇོམས་པས་སམ། ཡང་ན་ཡེ་ཤེས་དེ་སེམས་ཅན་ལ་ཆགས་པས་སེམས་ཅན་འཛིན་པ་སྟེ། སྙིང་རྗེས་སྡུག་བསྔལ་ཡང་དག་འབྱུང་། །སེམས་ཅན་རྗེས་སུ་འཛིན་པའོ། །དགེ་བའི་ཆོས་ཀྱིས་ཡང་དག་གང་། །ཉོན་མོངས་ཐམས་ཅད་ངེས་པར་གནོན། །ཞེའོ། །གསུམ་པ་ཉི་མ་འོད་དམར་པོར་བསྒོམ་པ་ནི་ཡེ་ཤེས་དེ་སེམས་ཅན་ལ་རྗེས་སུ་ཆགས་པའོ། །བཞི་པ་ཀཱ་ལིས་མཚན་པ་ནི། ཡེ་ཤེས་དེ་སྐུའི་རྣམ་པར་འབྱུང་བ་ན་དཔེ་བྱད་བརྒྱད་ཅུར་འགྱུར་བས་ཀཱ་ལི་ལས་བསྐྱེད་དེ། སངས་རྒྱས་ཡོན་ཏན་ཀ་སོགས་ཀྱི། །རྣལ་འབྱོར་གྱིས་ནི་འཇུག་པར་འགྱུར། །ཞེའོ། །འོག་མ་གསུམ་ལ་གཉིས་གཉིས་ལས། དང་པོ་མངོན་བྱང་གསུམ་པ་སོ་སོར་རྟོག་པའི་ཡེ་ཤེས་ནི། རང་བཞིན་གྱིས་འོད་གསལ་བས། ཤེས་བྱ་ཐམས་ཅད་མ་འདྲེས་པར་མཁྱེན་པ་སྟེ། གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་པས། །སོ་སོར་རྟོག་པ་ཅན་ཞེས་བཤད། །ཅེས་སོ། །དེ་ཉིད་འདུ་ཤེས་ཀྱི་ཕུང་པོ་དང་། ཡིད་ཀྱི་རྣམ་པར་ཤེས་པའི་བདག་ཉིད་ཅན་ནོ། །གཉིས་པ་དེ་ཕྱག་མཚན་དུ་བསྒོམ་པའང་འདྲ་བའི་ཕྱིར་ཏེ། བྱང་ཆུབ་སྤྱོད་དང་དེ་བཞིན་ས། །ཡེ་ཤེས་དག་པ་ཟག་པ་མེད། །དེ་ཕྱིར་དཀྱིལ་འཁོར་ནང་གནས་པ། །དེ་ཡི་ནང་གི་ཕྱག་མཚན་བརྟག །ཅེས་སོ། །མངོན་བྱང་བཞི་པ་བྱ་བ་ནན་ཏན་ནི། སངས་རྒྱས་ཀྱི་མཛད་པ་རོ་གཅིག་པ་སྟེ། ཀུན་ཏུ་ཀུན་ནས་སངས་རྒྱས་ཀྱི། །སངས་རྒྱས་མཛད་པ་ལ་འཇུག་པ། །སངས་རྒྱས་ཐམས་ཅད་མཛད་གཅིག་པས། །བྱ་བ་གྲུབ་པ་ཞེས་བཤད་དོ། །ཞེས་སོ། །དེ་ཉིད་འདུ་བྱེད་ཀྱི་ཕུང་པོ་དང་། སྒོ་ལྔའི་རྣམ་ཤེས་ཀྱི་བདག་ཉིད་དོ། །གཉིས་པ་འདྲེས་པར་བསྒོམ་པའང་འདིར་གཅིག་ཏུ་གྱུར་པ་དང་འདྲ་བས་སོ། །མངོན་བྱང་ལྔ་པ་ཆོས་ཀྱི་དབྱིངས་ལ་ཆོས་ནི་ཕུང་པོ་ལྔའི་བདག་ཉིད་དམ། སྒྲིབ་པ་ཐམས་ཅད་ཀྱི་བདག་ཉིད་དོ། །དེ་དག་གི་དབྱིངས་ནི་རྒྱུའོ། །དེ་གང་ཞེ་ན། རྣམ་པར་དག་པ་སྟེ། སྤྲོས་པ་དང་བྲལ་བའོ། །ཡང་ན་ཆོས་ནི་སངས་རྒྱས་ཀྱི་ཆོས་སོ། །དབྱིངས་ནི་རྒྱུའོ། །དེ་སྒྲིབ་པ་ཐམས་ཅད་ལས་གྲོལ་བ་སྟེ། གང་ཚེ་ཉོན་མོངས་ཤེས་བྱའི་སྒྲིབ། །ཐམས་ཅད་ལས་གྲོལ་དེ་ཡི་ཚེ། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་དག་ཅེས་བཤད་དོ། །དེ་ཉིད་རྣམ་ཤེས་ཀྱི་ཕུང་པོ་དང་། །བྱང་ཆུབ་སེམས་ཀྱི་བདག་ཉིད་དོ། །གཉིས་པ་དེ་སྐུ་རྫོགས་པ་དང་མཐུན་ཏེ། སངས་རྒྱས་ཀྱི་ཡེ་ཤེས་ཐམས་ཅད་ཡོངས་སུ་རྫོགས་པ་དང་འདྲ་བས་སོ། །དེ་ལྟར་མངོན་པར་བྱང་ཆུབ་པ་ལྔ་པོ་འདིས་སྦྱང་གཞི་དང་། ལམ་དང་། འབྲས་བུ་དང་བཅས་པ་གོ་བར་བྱའོ། །ཡེ་ཤེས་ཀྱི་ངེས་ཚིག་འཕགས་པ་བྱམས་པས་བཤད་པ་ལ་སོགས་པའང་འདི་དང་དོན་འདྲའོ། །འདིར་བྲིས་པ་ནི་སངས་རྒྱས་ཀྱི་སའི་དགོངས་པ་དང་། ཡེ་ཤེས་གྲུབ་པ་ལས་གསུངས་པ་དང་། རྡོ་རྗེ་རྩེ་མོ་དང་། ཁ་སྦྱོར་ལས་གསུངས་པ་ཡིན་ནོ་ཞེས་རྗེ་བཙུན་སྐུ་མཆེད་ཀྱི་རྣམ་བཤད་གཉིས་ལས་འབྱུང་ངོ་། །གཉིས་པ་ལ་གསུམ། མངོན་བྱང་རང་གི་ངོ་བོ། དེ་ཤེས་བྱེད་དང་སྦྱར་བ། གཞན་གྱིས་བརྟགས་པའི་མཐའ་དགག་པའོ། །དང་པོ་ནི། དེ་ལྟར་མི་མཉམ་སྦྱོར་གྱི་མངོན་བྱང་ལས་གཙོ་བོ་བསྐྱེད་པ་ལྟར། མཉམ་སྦྱོར་གྱི་མངོན་བྱང་ལས་ཀྱང་གཙོ་བོ་བསྐྱེད་པར་བྱ་སྟེ། སྔར་གྱི་མི་མཉམ་སྦྱོར་དང་། མངོན་བྱང་དང་པོ་མི་འདྲ་བ་ནི་ཨཱ་ལི་ལས་ཟླ་བའི་དཀྱིལ་འཁོར་ཟུར་གསུམ་པར་ཨཱ་ལིས་མཚན་པ་ཡིན་པས། དང་པོ་མི་འདྲ་སྟེ། དཔལ་ཁ་སྦྱོར་ལས། གྲུ་གསུམ་རྒྱ་ཆེན་རང་བཞིན་ཅན། །སངས་རྒྱས་ཀུན་གྱི་ཡོན་ཏན་གནས། །འདི་ཡང་ཨ་སོགས་གཟུགས་ཀྱི་ནི། །སངས་རྒྱས་ཡོན་ཏན་འཇུག་པར་འགྱུར། །ཤེལ་དང་ཟླ་བ་ལྟ་བུར་ནི། །དེ་ཡི་སྟེང་དུ་འཇུག་པར་འགྱུར། །ཞེས་བྱ་བ་དང་། གྲུ་གསུམ་དུ་བསྒོམ་པའང་། དེ་ལས་ཟླ་བའི་དཀྱིལ་འཁོར་ནི། །གྲུ་གསུམ་ཉིད་དུ་བསྒོམ་པར་བྱ། །ཞེས་སོ། །གཉིས་པའང་མི་འདྲ་སྟེ། ཀཱ་ལི་བརྒྱད་ཅུ་ལས་མཉམ་པར་སྦྱོར་བ་སྟེ། ཡང་ཟླ་བ་གྲུ་གསུམ་ཀཱ་ལིས་བརྒྱན་པའོ། །ཡང་གསུངས་པ། ཟླ་བའི་སྟེང་དུ་ཡང་ཟླ་བ། །བྱང་ཆུབ་ཟླ་བ་གཉིས་པ་ཅན། །སངས་རྒྱས་ཡོན་ཏན་ཀ་སོགས་ཀྱི། །སྐར་མདའ་འདིར་ཡང་འཇུག་པར་འགྱུར། །ཞེས་སོ། །གསུམ་པའང་མི་འདྲ་སྟེ། དེ་ལྟ་བུའི་ཟླ་བ་གཉིས་ནི། རྡོ་རྗེ་སེམས་དཔའ་ཉིད་ཀྱི་གདན་ཏེ། བསྐྱེད་པའི་གཞིའོ་དེའི་སྟེང་དུ། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པའང་འདོད་མི་བྱ། །ཧཱུྃ་ལས་བྱུང་བའི་རྡོ་རྗེ་རྩེ་ལྔ་པ་དཀར་པོ་ཧཱུྃ་གིས་མ་མཚན་པའོ། །དེ་ལྟར་ཡང་། བྱང་ཆུབ་སྤྱོད་པ་བླ་ན་མེད། །དེ་ཡི་ས་ནི་རྟོགས་པ་སྟེ། །ཟླ་བའི་དཀྱིལ་འཁོར་དབུས་སུ་ནི། །རྡོ་རྗེ་ངེས་པར་བརྟག་པར་བྱ། །ཞེས་སོ། །བཞི་པའང་མི་འདྲ་སྟེ། དེ་ལས་འོད་སྤྲོ་བ་དང་། བསྡུ་བ་བྱས་པ་ལས་གཅིག་ཏུ་གྱུར་པའོ། །ཡང་གསུངས་པ། རྡོ་རྗེ་སེམས་དཔའི་རྡོ་རྗེ་ནི། །རྩེ་མོ་ལྔ་པ་འོད་ཟེར་ཅན། །ཞེས་བྱ་བ་དང་། འདིས་ནི་སྔགས་ཀྱི་རྣལ་འབྱོར་གྱིས། །སྤྲོ་བ་དང་ནི་བསྡུ་བ་བྱ། །ཞེས་སོ། །ལྔ་པ་ཡང་མི་འདྲ་སྟེ། སེམས་དཔའི་གཟུགས་བརྙན་ལས་བྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཅེས་བྱ་སྟེ། སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ་སྟེ། ཡང་གསུངས་པ། རྡོ་རྗེ་ཡོངས་གྱུར་དེ་མ་ཐག །རྣམ་པ་ཀུན་གྱི་མཆོག་ལྡན་པའི། །ཟླ་བའི་ཁ་དོག་མཉམ་འོད་ཀྱི། །རྡོ་རྗེ་སེམས་དཔའ་བསམ་པར་བྱ། །ཞེས་གསུངས་པ་ལྟ་བུའོ། །དེ་ལྟ་བུའི་མངོན་པར་བྱང་ཆུབ་པ་ལྔ་པོ་དེ་ནི་འདི་ཡིན་ཏེ། སེམས་སོ་སོར་རྟོག་པ་དང་། དེ་གསལ་བར་བྱེད་པ་དང་། དེ་བརྟན་པར་བྱེད་པ་དང་། ཤིན་ཏུ་བརྟན་པར་བྱེད་པ་དང་། རྡོ་རྗེའི་སྐུར་གྱུར་པའོ། །དེ་ནི་ཡེ་ཤེས་ལྔར་འགྱུར་རོ། །ཞེས་བྱ་བར་དགོངས་པའོ། །ཞེས་རྗེ་བཙུན་རིན་པོ་ཆེས་གསུངས་སོ། །གཉིས་པ་ནི། དེ་ལྟ་བུའི་མངོན་བྱང་དེ་ཉིད་རྒྱུད་གང་ལས་གསུངས་སྙམ་ན། རྩ་བའི་རྒྱུད་ལས་གསུངས་ཏེ། ཇི་སྐད་དུ། ཨཱ་ལི་ཀཱ་ལི་མཉམ་སྦྱོར་བ། །རྡོ་རྗེ་སེམས་དཔའ་ཉིད་ཀྱི་གདན། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པ་འདོད་མི་བྱ། །སེམས་དཔའི་གཟུགས་བརྙན་ལས་འབྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཞེས་གསལ་བར་གསུངས་ཤིང་། དེའི་དོན་རྒྱ་གར་བའི་འགྲེལ་པ་རྣམས་ལས་བཤད་པ་སྲོལ་མི་འདྲ་བ་དྲུག་ཙམ་སྣང་ཡང་། འདིར་རྗེ་བཙུན་བིརྺ་པ་ཡབ་སྲས་ཀྱི་སྲོལ་འཛིན་སློབ་དཔོན་མི་ཐུབ་ཟླ་བའི་སྔར་བཤད་པ་ལྟར་དུ་གསལ་བར་གསུངས་ཏེ། དཀའ་འགྲེལ་ཀུ་མུ་ཏི་ལས་ཇི་ལྟར་ལྷ་མོ་རྣམས་ཀྱི་རྣམ་པ་ལྔ་པོ་ངེས་པར་སྦྱོར་བ་འདི་ཉིད་ལྷན་ཅིག་སྐྱེས་པ་བཅོམ་ལྡན་འདས་ཀྱིའང་ཇི་ལྟ་བ་དེ་ལྟ་བུ་ཡིན་ནམ་ཞེ་ན། མི་འདྲ་བར་བསྟན་པའི་ཕྱིར་ཨཱ་ལི་ཀཱ་ལི་ཞེས་བྱ་བ་ལ་སོགས་པ་གསུངས་ཏེ། ཨཱ་ལི་དང་ཀཱ་ལི་དག་ནི་མཉམ་པས་ཟླ་བའི་རྣམ་པ་ལས་མི་མཉམ་པ་མེད་པའི་ངོ་བོས་ཡིན་ལ། རང་གི་ས་བོན་ཡོངས་སུ་གྱུར་བའི་ཟླ་བ་ཀུན་ཏུ་སྦྱོར་བ་ནི། ཨཱ་ལི་ཀཱ་ལི་མཉམ་པར་སྦྱོར་བའོ་ཞེས་སོགས་མཉམ་སྦྱོར་གྱི་མངོན་བྱང་དུ་བསྙོན་མེད་པར་བཀྲལ་བ་ལ། སློབ་དཔོན་འདིས་གུར་རིགས་བསྡུས་ཀྱི་སྒྲུབ་ཐབས་སུ་ཡང་གསལ་བར་བཤད་པས་གཞུང་འདི་རྣམས་ལ་བརྟེན་ནས་རྗེ་བཙུན་ས་སྐྱ་པ་ཡབ་སྲས་རྣམས་ཀྱིས་མཉམ་སྦྱོར་དུ་བཤད་པ་ཡིན་ནོ། །གསུམ་པ་ནི། དེ་ལྟར་རྗེ་བཙུན་ས་སྐྱ་པས་སྔར་གྱི། ཨཱ་ལི་ཀཱ་ལི་མཉམ་སྦྱོར་བ། །ཞེས་སོགས་ཀྱི་གཞུང་གི་དོན་སློབ་དཔོན་ཤཱནྟི་པ་སོགས་ཀྱིས་བདག་མེད་མའི་མངོན་བྱང་གི་མཇུག་སྡུད་དུ་འཆད་པ་ལ་དགག་པ་མཛད་ཅིང་། རང་ལུགས་སྔར་བཤད་པ་ལྟར་བཞེད་པ་ལ་གནས་དྲུག་པས། གཟུ་བོར་གནས་པའི་བློས་དཔྱད་པ་ཡིན་ཟེར་ནས། རྗེ་བཙུན་གྱི་ལུགས་མི་འཐད། ཤཱནྟི་པའི་ལུགས་འཐད་པའི་སྤྲོས་པ་མང་དུ་བྲིས་པ་ལ། གནད་ཀྱི་ཟླ་ཟེར་ལས། ལུང་རིགས་ཀྱིས་སུན་ཕྱུང་ནས། རྗེ་བཙུན་མཆོག་གི་བཞེད་པ་གཞུང་འཛུགས་པར་མཛད་པ་ནི་རྣམ་བཤད་དེ་ཉིད་དུ་བལྟ་བར་བྱའོ། །གསུམ་པ་ནི། དེ་ལ་མཉམ་སྦྱོར་མི་མཉམ་སྦྱོར་གཉིས་གང་རུང་ཅིག་བསྟན་པས་ཆོག་མོད། གཉིས་ཀ་བསྟན་དགོས་པའི་རྒྱུ་མཚན་ཅི་ཞེ་ན། དབྱིངས་དང་ཡེ་ཤེས་རྒྱས་གདབ་ཕྱིར། །རང་བཞིན་གྱིས་དག་རྒྱུ་འབྲས་ཕྱིར། །ཐིག་ལེའི་རིམ་ཕྱིར་ལུགས་སེམས་ཕྱིར། །དབང་ཕྱིར་དགོས་པ་བསམ་ཡས་ཕྱིར། །ཞེས་གསུངས་ཏེ། འདི་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། སྤྱིར་ཆོས་ཐམས་ཅད་རྒྱུ་ལམ་འབྲས་བུ་གསུམ་དུ་འདུ་བའི་ཕྱིར། འདིར་ཡང་དེ་གསུམ་དུ་འདུ་བར་བསྟན་ཏོ། །དེའང་གཞུང་ལས། ཐོག་མར་འབྲས་བུ་ནས་བསྟན་ཀྱང་། འདིར་བཤད་བདེ་བས་རྒྱུ་འབྲས་གོ་རིམ་བཞིན་དུ་བརྗོད་ན། ལུས་སེམས་ཕྱིར་ཞེས་པས་རྒྱུ་རྒྱུད་བསྟན། རང་བཞིན་གྱིས་དག་རྒྱུ་འབྲས་ཕྱིར་དང་། ཐིག་ལེའི་རིམ་ཕྱིར་དང་། དབང་ཕྱིར་རྣམས་ཀྱིས་ལམ་བསྟན། དབྱིངས་དང་ཡེ་ཤེས་རྒྱས་གདབ་ཕྱིར་གྱིས་འབྲས་བུ་བསྟན། དགོས་པ་བསམ་ཡས་ཕྱིར་གྱིས་མཇུག་བསྡུ་བའི་ཚུལ་གྱིས་རྒྱུ་འབྲས་གསུམ་ཀ་བསྟན་ནོ། །གཉིས་པ་ལ་གསུམ་སྟེ། སྦྱང་གཞིའི་རྒྱུའི་རྒྱུད་དང་། སྦྱོང་བྱེད་ཐབས་ཀྱི་རྒྱུད་དང་། གྲུབ་པ་འབྲས་བུའི་རྒྱུད་ལ་སྦྱར་ནས་བཤད་པའོ། །དང་པོ་ནི། ལུས་སེམས་ཕྱིར་ཞེས་པ་སྟེ། ལུས་ནི་ལས་ཀྱི་དབང་གིས་བགོས་པའི་བག་ཆགས་ཀྱིས་རྐྱེན་བྱས་ནས། འབྱུང་བ་ལྔ་དང་། ཉོན་མོངས་པ་ལྔ་ལ་སོགས་པ་ལས་སྐྱེ་བ་དང་། འགའ་ཞིག་སྨོན་ལམ་གྱི་དབང་གི་སྐྱེ་བ་ཡང་ཡོད་ལ། སྦྱང་གཞི་དེའི་གཉེན་པོར་མི་མཉམ་སྦྱོར་གྱི་མངོན་བྱང་གསུངས་ཏེ། དེའང་རྒྱུ་དུས་སུ་ལུས་གྲུབ་པ་ན་ཕ་མའི་བྱང་སེམས་དཀར་དམར་གཉིས་ཚོགས་པས་ན། མངོན་བྱང་ལ་ཡང་ཟླ་བ་དང་། ཉི་མ་བར་དོའི་རྣམ་ཤེས་འོངས་ཏེ། ཁམས་གཉིས་ཀྱི་བར་དུ་གནས་པ་ནི་ཉི་ཟླའི་བར་དུ་ས་བོན་དང་ཕྱག་མཚན། དེ་ལས་མངལ་གྱི་གནས་སྐབས་བཅུར་ལུས་གྲུབ་པ་ནི། མངོན་བྱང་དང་པོ་གསུམ་རོ་གཅིག་ཏུ་འདྲེས་པ། དེ་ལས་མིའི་ལུས་གྲུབ་པ་ནི་ལྷའི་སྐུ་བསྐྱེད་པ་སྟེ། མདོར་ན་མི་མཉམ་སྦྱོར་ལས་བསྐྱེད་པ་ནི། ལུས་གྲུབ་པ་དང་ཆོས་མཚུངས་སོ། །སེམས་ནི་རང་བཞིན་གྱིས་འོད་གསལ་བ་སྟེ། ཆོས་ཀྱི་སྐུའི་རང་བཞིན་ཡིན་ལ། སྦྱང་གཞི་དེའི་གཉེན་པོར་མཉམ་སྦྱོར་གྱི་མངོན་བྱང་གསུངས་ཏེ། དེ་ཡང་སེམས་ཉིད་རང་རིག་པ་ཙམ་དུ་གནས་པ་ནི་ཟླ་བ་དང་པོ། དེ་གསལ་བར་རྟོགས་པ་ནི་ཟླ་བ་གཉིས་པ། དེ་གཉིས་ཀྱི་ངོ་བོ་སྟོང་ཉིད་དུ་གནས་པ་ནི་ཟླ་བ་གཉིས་ཀྱི་སྟེང་དུ་རྡོ་རྗེ། གསལ་སྟོང་ཟུང་འཇུག་དེས་འཁོར་འདས་གཉིས་ཀྱི་རྒྱུ་བྱེད་པ་ནི་འོད་ཟེར་གྱི་སྤྲོ་བསྡུ་དང་བཅས་པ། ལམ་གྱིས་སྦྱངས་པས་སྤྲོས་བྲལ་དེ་ཁོ་ན་ཉིད་ཀྱི་དོན་མཐོང་བ་ནི་ལྷའི་སྐུ་བསྐྱེད་པའོ། །དེ་ཡང་ཇི་སྐད་དུ། ལུས་ནི་འབྱུང་བ་བཞི་ལ་སོགས། །ལས་དང་ཉོན་མོངས་སོགས་ལས་གྲུབ། །སེམས་ནི་རང་བཞིན་ཆོས་ཉིད་དེ། །འོད་གསལ་བར་ནི་གྲུབ་པ་འོ། །མི་མཉམ་མཉམ་པས་མཚོན་པར་གསལ། །ཞེས་གསུངས་སོ། །གཉིས་པ་ལ་གཉིས། སྨིན་བྱེད་དབང་དང་། གྲོལ་བྱེད་ལམ་ལ་སྦྱར་བའོ། །དང་པོ་ནི། མཉམ་སྦྱོར་གྱིས་གསང་དབང་མཚོན་ལ། མི་མཉམ་སྦྱོར་གྱི་ཤེས་རབ་ཡེ་ཤེས་ཀྱི་དབང་མཚོན་ཏེ། རྗེ་བཙུན་གྱིས་དེ་ལ་གསང་དབང་གི་དུས་སུ་སློབ་མ་ལ་རྣམ་པར་རྟོག་པའི་གྲྭ་དང་བཅས་པས་ཟུར་གསུམ་པའོ། །ཤེས་རབ་ཡེ་ཤེས་ཀྱི་དུས་སུ་མི་རྟོག་པས་ཟླུམ་པོའོ། །གསང་དབང་ལ་གཉིས་ཀའི་བྱང་ཆུབ་ཀྱི་སེམས་དཀར་བ་དང་ལྡན་པས་ན་གཉིས་ཀའང་ཟླ་བའོ། །ཤེས་རབ་ཡེ་ཤེས་ཀྱི་ཤེས་རབ་ཉི་མ་ལྟར་དམར་ཞིང་ཐབས་དཀར་བས་ན་ཟླ་བ་དང་ཉི་མའོ། །གསང་དབང་གི་བྱང་ཆུབ་ཀྱི་སེམས་ནི། མཐེ་བོང་སྲིན་ལག་དག་གིས་ནི། །སློབ་མའི་ཁར་ནི་བཏུང་བར་བྱ། །ཞེས་འབྱུང་བས་ན་མི་འགེགས་པས་ཧཱུྃ་ཕཊ་མེད་པའོ། །ཤེས་རབ་ཡེ་ཤེས་འགེགས་པས་ན་ས་བོན་ཡོད་པའོ། །གསང་དབང་གི་ཐིག་ལེ་སྤྲོ་བས་ན་འོད་སྤྲོ་བའོ། །ཤེས་རབ་ཡེ་ཤེས་འཛིན་པས་ན་འོད་མི་སྤྲོ་བའོ། །གསང་དབང་གི་བྱང་ཆུབ་ཀྱི་སེམས་ཐིག་ལེ་ལ་བརྟན་པས་སམ། རང་བཞིན་བརྒྱད་ཅུའི་རྟོག་པའི་དྲི་མ་དང་བྲལ་བས་དཀར་བའོ། །ཤེས་རབ་ཡེ་ཤེས་ཀྱི་བདེ་བ་ནི་བདེ་བ་གནག་ཅིང་ཞེས་པ་ལ་སོགས་པས་དཀར་བ་མ་ཡིན་པའོ་ཞེས་བྱ་བ་ལ་དགོངས་པའོ་ཞེས་གསུང་ཞིང་། རྗེ་བཙུན་རྩེ་མོས་ཀྱང་དེ་བཞིན་དུ་བཤད་དོ། །འདིར་གཉིས་ཀའི་བྱང་སེམས་དཀར་བ་ཞེས་པའི་དོན་ལ། ཁ་ཅིག་ཡུམ་ལ་དཀར་ཆ་ཡོད་པས་དེ་ཡང་ཕྱུང་བས་ན་གཉིས་ཀའི་དཀར་པོའོ་ཞེས་དང་། ལ་ལ་དག་ཡབ་ཀྱི་བྱང་སེམས་ལས་ཡུམ་གྱི་དམར་ཆ་མངོན་དུ་མི་བྱེད་པས་གཉིས་ཀ་དཀར་པོ་ཞེས་དང་། གཞན་དག་ཡུམ་ལ་དམར་ཆ་ཡོད་ཀྱང་རང་བཞིན་བརྒྱད་ཅུའི་རྟོག་པ་དང་བྲལ་བའི་ཆ་ནས་དཀར་པོར་བཞག་པས་གཉིས་ཀ་དཀར་པོ་ཞེས་དང་། འགའ་ཞིག་སློབ་མའི་གཞིར་གནས་ཀྱི་བྱང་སེམས་ཀྱི་སྟེང་དུ་སློབ་དཔོན་གྱིས་ཕྱུང་བའི་བྱང་སེམས་བླུགས་པས་གཉིས་ཀ་དཀར་པོའོ་ཞེས་འདོད་དོ། །དེ་ལ་ཕྱོགས་དང་པོ་མི་འཐད་དེ། སྙོམས་འཇུག་གི་ཚེ་ཡུམ་གྱི་དཀར་ཆ་བབས་ན་དེ་འཆི་ལྟས་སུ་བདེ་མཆོག་སྡོམ་འབྱུང་དང་། དུས་འཁོར་དུ་བཤད་པ་དང་། གསང་དབང་གི་ཚེ་ཡུམ་ལ་དཀར་ཆ་བབས་པའང་ད་དུང་བསྒྲུབ་བྱར་འདུག་པའི་ཕྱིར་རོ། །གཉིས་པའང་མི་འཐད་དེ། དེའི་ཚེ་དམར་ཆ་མངོན་དུ་མི་བྱེད་ན་དགའ་བོ་མངལ་འཇུག་གི་མདོ་ལས། མ་ནད་པར་གྱུར་པ་དང་། ཆགས་པའི་སེམས་མེད་ན་དམར་ཆ་མི་འབབ་ལ། གཞན་སྙོམས་པར་འཇུག་རེས་ཀྱིས་འབབ་པར་བཤད་པ་ལས། འདིར་གསང་དབང་གི་རྟེན་དུ་རིག་མ་ནད་ཀྱིས་བཏབ་པ་མི་དགོས་ཏེ། ཤིན་ཏུ་བཞིན་བཟང་མིག་ཡངས་མ། །གཟུགས་དང་ལང་ཚོས་རྣམ་པར་བརྒྱན། །ཞེས་བཤད་པའི་ཕྱིར་རོ། །དེ་བཞིན་དུ་ཆགས་པའི་སེམས་མེད་པའང་མི་དགོས་ཏེ། ལམ་འབྲས་ལས། གཉིས་ཀ་འདོད་པ་མཉམ་པར་དགོས་པར་བཤད་པའི་ཕྱིར་རོ། །གསུམ་པའང་མི་འཐད་དེ། གསང་དབང་ཐོབ་ནས་རང་བཞིན་བརྒྱད་ཅུའི་ཀུན་རྟོགས་དང་བྲལ་བ་ཡིན་ཀྱང་། འདིར་དེའི་བྲལ་ཆ་ནས་དཀར་པོར་འཇོག་པ་མི་འཐད་དེ། གསང་དབང་མ་ཐོབ་པའི་ཕྱིར་དང་། རྟོག་པའི་གྲྭ་ཟུར་ཅན་དུ་གསུངས་པའི་ཕྱིར་རོ། །བཞི་པ་མི་འཐད་དེ། རྗེ་བཙུན་རྩེ་མོས། གསང་དབང་གི་ཐབས་ཤེས་རབ་གཉིས་ཀའི་བྱང་སེམས་ཟླ་བ་ལྟར་དཀར་བས་ཟླ་བ་གཉིས་སོ་ཞེས་གཉིས་ཀའི་དོན་ཡབ་ཡུམ་ལ་ངོས་གཟུང་གི དཔོན་སློབ་ལ་མ་བཤད་པའི་ཕྱིར་རོ། །དེས་ན་ལུགས་དེ་རྣམས་ནི་མི་འཐད་པ་ཁོ་ན་ཡིན་ནོ། །བླ་མ་མཁས་པ་དག་གསང་དབང་བསྐུར་བའི་ཕྱིར་སློབ་དཔོན་ཡབ་ཡུམ་སྙོམས་པར་ཞུགས་ནས། ཡབ་ཀྱི་བྱང་སེམས་བབས་པའི་དྲོད་ཉམས་པར་བྱས་པ་དེ་ཉིད་ཡུམ་གྱི་བྷ་གར་བཞག་པ་དེས་སློབ་མ་ལ་དབང་བསྐུར་བ་ཡིན་ཏེ། དེས་ན་ཡབ་ཀྱི་བྱང་སེམས་དེ་ཉིད་ཡུམ་གྱི་བྷ་ག་ནས་ལེན་པའི་ཕྱིར། གཉིས་ཀའི་བྱང་སེམས་དཀར་བའོ་ཞེས་པའི་ཐ་སྙད་མཛད་པ་སྟེ། དཔེར་ན་མཎྜལ་གྱི་སྟེང་གི་ནས་ལ་མཎྜལ་གྱི་ནས་ཞེས་བརྟེན་པ་ལ། རྟེན་གྱི་མིང་བཏགས་པ་ལྟ་བུའོ་ཞེས་གསུངས་པ་ལའང་རྗེ་བཙུན་ཡབ་ལས་ཐོབ་པ་ལ་གཉིས་ཀའི་བྱང་སེམས་ཀྱི་དོན་མ་ཚང་བའི་སྐྱོན་ཡོད་པ་འདྲའོ། །དེས་ན་དོན་འདི་ཡིན་ཏེ། སཾ་པུ་ཊི་ལས། སིཧླ་ག་པུར་བགོས་པ་ནི། །ཇི་སྲིད་ཁུ་བ་ལྡན་གྱུར་པ། །དེ་སྲིད་ཕྱག་རྒྱ་བསྟེན་པར་བྱ། །ཞེས་པའི་འགྲེལ་པར། རྗེ་བཙུན་རྩེ་མོས། སིཧླ་ཞེས་བྱ་བ་ལ་སོགས་པས་ནི་བསྟེན་པའི་ཚད་བསྟན་ཏེ། གསང་བའི་དབང་བསྐུར་བ་ལ་གཉིས་ཀའི་བྱང་ཆུབ་ཀྱི་སེམས་དགོས་པའི་ཕྱིར་ཞེས་གསུངས་པས། གསང་དབང་གི་རྟེན་ཚད་ནི། ཡབ་ཀྱི་རྡོ་རྗེ་ཇི་སྲིད་ཁུ་བ་ལྡན་ལྡན་གྱི་བར་བསྟེན། ཁུ་བ་དེ་ཡང་ཡབ་ཀྱི་རྡོ་རྗེ་དང་མ་བྲལ་བའི་ཚེ། ཡུམ་གྱིས་སིཧླ་ལས་ཅུང་ཟད་བགོས་པས་གཉིས་ཀའི་བྱང་སེམས་དཀར་དམར་ཚང་ཡང་། ཁ་དོག་གཞན་དུ་བསྒྱུར་བར་མ་ནུས་པས་དཀར་པོར་གནས་པའོ། །དེ་ཉིད་ཡབ་ཀྱི་རྡོ་རྗེས་འགྲིམ་ན་ཡབ་ལས་ཐོབ་པ་དང་། ཡུམ་གྱི་མཁར་ཕབ་ནས་འགྲིམ་པ་ཡུམ་ལས་ཐོབ་པ་དང་། ཉ་ཕྱིས་སོགས་སུ་བླུགས་ནས་སྟེར་ན་གྲོལ་བའི་སྟོབས་ལས་ཐོབ་པར་འཇོག་གོ །གསང་དབང་དང་། ཤེས་རབ་ཡེ་ཤེས་ཀྱི་དབང་གཉིས་བསྟེན་ཚད་མི་འདྲ་བའི་ཁྱད་པར་ནི། རྒྱུད་ཡེ་ཤེས་སྙིང་པོར། གསང་བའི་དབང་ནི་སྐྱེ་མཆེད་ཀྱི་ལོ་དང་ལྡན་པའི་གཞོན་ནུ་མ་ལ་ནང་གི་རྐན་ཡོངས་སུ་གཞིབས་པ་ལས་སོ། །ཤེས་རབ་ཡེ་ཤེས་ནི་ཁམས་ཀྱི་ལོ་དང་ལྡན་པའི་གཞོན་ནུ་མ་ལ་ལྷན་ཅིག་བསྲུབ་པ་དང་། བསྲུབ་པའི་ཐབས་ཆེན་པོ་ལས་ཞུ་བ་འཕོ་བའི་དུས་སུ་ཉམས་སུ་མྱོང་བས་སོ་ཞེས་གསུངས་པ་ལྟར་རོ། །བསྟེན་ཚད་མི་འདྲ་བས་བྱང་སེམས་འབབ་ཚུལ་ཡང་མི་འདྲ་སྟེ། གསང་དབང་གི་འབབ་ཚུལ་ནི་སྔར་བཤད་པ་ལྟར་ཡིན་ལ། ཤེས་རབ་ཡེ་ཤེས་ཀྱི་སྐབས་སུ་རྗེ་བཙུན་གྱིས་མཆོག་དབང་གསུམ་གྲོལ་ལམ་ལ་བརྟེན་ནས་བསྐུར་བའི་མན་ངག་ལས། དེ་ལྟ་བུའི་བདེ་ཆེན་གྱི་མེས་ཡབ་ཀྱི་ཁམས་དྭངས་མ་ཞུ་ནས་དབུ་མའི་ལམ་ནས་བྱོན་ཏེ། ཐིག་ལེ་མུ་ཏིག་གི་རྡོག་མ་ལྟ་བུ་རིགས་ཀྱི་བདག་པོའི་ཁར་བབ། ཡུམ་གྱི་ཁམས་དྭངས་མ་བཞུ་ནས་མར་དབུ་མའི་ལམ་ནས་བྱོན་ཏེ་ཐིག་ལེ་དམར་པོར་མཛེས་སྤྱིར་དབབ། དེ་ནས་ཐིག་ལེ་དཀར་དམར་གཉིས་སྙོམས་འཇུག་བྱས་པས་གཅིག་ཏུ་གྱུར་པ་ནི། ཟླ་བ་ཉི་མའི་གོས་ཀྱིས་བཀག་པ་ཞེས་ཀྱང་བྱ། ཉི་ཟླ་གཟས་ཟིན་པའི་དུས་ཞེས་ཀྱང་བྱ་སྟེ། སེམས་ཀྱི་གནད་དོ་ཞེས་གསུངས་པ་ལྟར་ཡིན་ནོ། །གཉིས་པ་ལ་གཉིས་ཏེ། བསྐྱེད་པའི་རིམ་པ་དང་། དེ་ཉིད་རྫོགས་རིམ་ལ་སྦྱར་བའོ། །དང་པོ་ནི། ཐིག་ལེའི་རིམ་ཕྱིར་ཞེས་ཏེ། དེ་ལྟར་དབང་དང་། སྦྱང་གཞིའི་དབང་གིས་བསྐྱེད་རིམ་ལ་ཡང་མཉམ་སྦྱོར། མི་ཉམས་སྦྱོར་གཉིས་གྲུབ་པ་ཡིན་ཏེ། དེ་ཡང་མངལ་དུ་མ་ཞུགས་པར་ཕའི་བྱང་སེམས་ལས་བུ་ཚའི་ལུས་གྲུབ་པ་ཡང་ཡོད་ལ། དེ་དང་སྒོ་བསྟུན་ནས་མཉམ་སྦྱོར་བསྟན་ནོ། །འོན་ཀྱང་བུ་མོ་བསྐྱེད་པ་མི་སྲིད་པའི་ཕྱིར་ཡུམ་གྱི་དཀྱིལ་འཁོར་མཉམ་སྦྱོར་ལས་བསྐྱེད་པ་མ་གསུངས་པ་ཡིན་ཏེ། ཐིག་ལེའི་རིམ་པ་ཐབས་ཕྱོགས་ལ། །ཟག་བཅས་བདེ་བ་བསྐྱེད་པ་ལ། །གཞན་ལ་རག་ལས་མེད་པའང་སྲིད། །ཕ་ཡི་བྱང་སེམས་རྐྱང་པ་ལས། །བུ་ཚའི་ཕུང་ཁམས་བསྐྱེད་པའང་སྲིད། །འོན་ཀྱང་བུ་མོ་སྐྱེད་མི་སྲིད། །ཡབ་ཀྱི་ཕྱོགས་ལས་གཉིས་བྱུང་བའི། །དེས་ན་མཉམ་སྦྱོར་བསྐྱེད་ཆོག་བསྟན། །ཤེས་རབ་ཟག་མེད་བསྐྱེད་པའམ། །ཟུང་འཇུག་མེད་ན་མི་འབྱུང་བས། །མ་ཡི་ཁམས་ནི་རྐྱང་པ་ལས། །བུ་ཚ་བསྐྱེད་པ་མི་སྲིད་དོ། །དེས་ན་ཡུམ་གྱི་ཕྱོགས་ལ་ནི། །མཉམ་སྦྱོར་ཆོ་ག་མ་བསྟན་ནོ། །ཞེས་གསུངས་སོ། །དེས་ན་སྐྱེས་པ་ལ་བུད་མེད་ལ་ལྟོས་པ་དང་། མ་ལྟོས་ཀྱང་འཛག་བདེ་ཉམས་སུ་མྱོང་རྒྱུ་ཡོད་པའི་ཕྱིར། ཡབ་ཀྱི་དཀྱིལ་འཁོར་ལ་མཉམ་སྦྱོར་དང་། མི་མཉམ་སྦྱོར་གཉིས་ཀ་བསྟན་ལ། བུད་མེད་སྐྱེས་པ་ལ་མ་ལྟོས་པའི་འཛག་བདེ་ཉམས་སུ་མྱོང་རྒྱུ་མེད་པའི་ཕྱིར། ཡུམ་གྱི་དཀྱིལ་འཁོར་ལ་མཉམ་སྦྱོར་མ་གསུངས་པ་ཡིན་ནོ། །གཉིས་པ་ལ་གཉིས། རང་བྱིན་རླབས་དང་། དཀྱིལ་འཁོར་འཁོར་ལོ་ལ་སྦྱར་བའོ། །དང་པོ་ནི། རང་བཞིན་གྱིས་དག་རྒྱུ་ཞེས་ཏེ། བསྐྱེད་རིམ་སྔོན་དུ་སོང་ནས་རྫོགས་རིམ་རང་བྱིན་རླབས་བསྒོམ་པ་ན། ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ་དག་པར་ཤེས་པས་གཉིས་ཀ་ཟླ་བར་བསྒོམ་པའི་དུས་སུ་འཁོར་ལོ་བཞི་གསལ་བཏབ་ནས། གཏུམ་མོའི་མེ་སྦར་བས་ལྟེ་བ་དང་སྤྱི་བོའི་འཁོར་ལོ་བཞུ་བཏུལ་མེད་པས་ཟླ་བ་གཉིས་ལ་ཨཱ་ལི་ཀཱ་ལིས་མཚན་པ། སྙིང་ག་དང་མགྲིན་པའི་འཁོར་ལོའི་ཡི་གེ་རྣམས་བསྲེགས་པས་ས་བོན་གྱིས་མ་མཚན་པ། མེ་དེས་དེ་བཞིན་གཤེགས་པའི་རྒྱུད་ལ་འགྲོ་འོང་བྱེད་པས་འོད་ཟེར་གྱི་སྤྲོ་བསྡུ་བྱེད་པ། སྤྱི་བོའི་ཧྃ་ལས་བྱང་སེམས་ཟླ་བ་ལྟར་དཀར་བ་བབས་པས་ཁ་དོག་དཀར་པོ། རང་བྱུང་གི་ཡེ་ཤེས་དེ་མཚན་རྟོག་གིས་མི་ཕྱེད་པས་མངོན་བྱང་གསུམ་པ་རྡོ་རྗེ་བསྒོམ་པ་སྟེ། རང་བཞིན་གྱིས་དག་ཐབས་རྒྱུད་དེ། །ཆོས་རྣམས་རང་བཞིན་སྤྲོས་བྲལ་ལས། །ལམ་དུ་བསྒོམ་པའི་ཉམས་མྱོང་གིས། །དག་ལ་དག་པར་ཤེས་པ་དང་། །འཁོར་ལོ་བཞི་རྫོགས་འབར་འཛག་གི །དུས་སུ་ལྟེ་བ་བདེ་ཆེན་ལ། །ཡི་གེ་རྫོགས་པར་དགོད་པ་དང་། །བཞུ་བཏུལ་མེད་པར་གསལ་བས་ན། །ཟླ་བ་ཨཱ་ལི་ཀཱ་ལིས་མཚན། །མེ་སྦར་སྙིང་མགྲིན་ཡི་གེ་རྣམས། །བསྲེགས་པས་ཕྱག་མཚན་ས་བོན་མེད། །ཕྱོགས་བཅུའི་དེ་བཞིན་གཤེགས་སྐུ་ལ། །འགྲོ་འོང་བྱེད་པས་འོད་ཟེར་སྤྲོ། །བྱང་སེམས་ཟླ་བའི་རྣམ་པར་འབབ། །དེ་ཕྱིར་སྐུ་མདོག་དཀར་པོར་ངེས། །དེ་ལས་སྐྱེས་པའི་ཡེ་ཤེས་ནི། །མཚན་རྟོག་གིས་ནི་མི་ཕྱེད་པས། །མངོན་བྱང་གསུམ་པ་རྡོ་རྗེར་ངེས། །རང་བཞིན་གྱིས་དག་མཉམ་སྦྱོར་རྒྱུའོ། །ཞེས་སོ། །གཉིས་པ་ནི་འབྲས་ཕྱིར་ཞེས་པ་སྟེ། རང་བྱིན་རླབས་སྔོན་དུ་སོང་བས་ཐིག་ལེ་ལ་དབང་ཐོབ་པར་བྱས་ནས། འབྲས་བུ་ཕོ་ཉའི་ལམ་བསྒོམ་པ་ན་སྒྲུབ་པ་པོའི་ཐིག་ལེ་དཀར་པོ་དང་། ཕྱག་རྒྱའི་རཀྟ་དམར་པོ་བབས་པས་ཟླ་བ་དང་ཉི་མ། དེ་རྡོ་རྗེ་དང་པདྨའི་རྩ་སྒོར་འབེབས་པས་ཨཱ་ལི་ཀཱ་ལིས་མ་མཚན་པ། ཕྱིར་འཕོ་བ་བཀག་ནས་གྱེན་དུ་འདྲེན་པས་ཕྱག་མཚན་ལ་ས་བོན་གྱིས་མཚན་པ། ཁམས་གཉིས་པོ་ཡབ་ཡུམ་གྱི་རང་གནས་སུ་འཇོག་པས་འོད་ཟེར་གྱི་སྤྲོ་བསྡུ་མེད་པ། དེ་ལས་སྐྱེས་པའི་ཡེ་ཤེས་ཀྱང་སྣ་ཚོགས་སུ་སྐྱེ་བས་སྐུ་མདོག་ཀྱང་སྣ་ཚོགས་སུ་བསྒོམ་པ་སྟེ། འབྲས་བུ་ཞེས་བྱ་ཕོ་ཉ་ཡི། །ལམ་ལ་གནས་སྐབས་གསུམ་ཀ་རུ། །ཐིག་ལེ་དཀར་དམར་གཉིས་ལ་བརྟེན། །དགོས་པའི་ཕྱིར་ན་ཉི་ཟླར་ངེས། །དེའང་རྩ་སྒོར་འབེབས་མཚོན་པས། །ཨཱ་ལི་ཀཱ་ལིས་མ་མཚན་ནོ། །འགྱུར་བ་བཀག་ནས་ཡར་འདྲེན་པས། །ཕྱག་མཚན་ས་བོན་གྱིས་མཚན་ཏེ། །ཁམས་གཉིས་རང་སར་འཇོག་པའི་ཕྱིར། །འོད་ཟེར་གྱི་ནི་སྤྲོ་བསྡུ་མེད། །དེ་ལས་སྐྱེས་པའི་ཡེ་ཤེས་ཀྱང་། །བདེ་བ་གནག་ཅིང་བདེ་བ་སེར། །ཞེས་སོགས་སྣ་ཚོགས་སུ་སྐྱེ་བས། །སྐུ་མདོག་རྣམས་ལ་མ་ངེས་སོ། །ཉེ་རྒྱུའི་བསྒོམ་ཚུལ་དེ་ལྟ་བུས། །འབྲས་བུ་ལ་ནི་ཉེ་བའི་ཕྱིར། །འབྲས་བུ་ཞེས་ནི་བསྟེན་པ་ཡིན། །ཞེས་སོ། །གསུམ་པ་ལ་གསུམ། མཉམ་སྦྱོར་དབྱིངས་ཀྱི་བཤད་པ། མི་མཉམ་སྦྱོར་ཡེ་ཤེས་ཀྱི་བཤད་པ། རྒྱས་གདབ་ཀྱི་དེ་གཉིས་ཀ་བཤད་པའོ། །དང་པོ་ནི་དབྱིངས་དང་ཡེ་ཤེས་ཏེ། དབྱིངས་རང་བཞིན་གྱིས་དག་པ་དང་། སྤང་བྱ་གློ་བུར་གྱི་དྲི་མ་དག་པས་ན་གཉིས་ཀ་ཟླ་བ། དེ་རྣམ་ཐར་སྒོ་གསུམ་མཚོན་པས་ཟུར་གསུམ། དོན་ཐབས་ཤེས་ཟུང་དུ་འཇུག་པས་ཨཱ་ལི་དང་ཀཱ་ལིས་མཚན་པ། དེ་ལྟ་བུའི་དག་པ་གཉིས་ལྡན་གྱི་ཆོས་སྐུ་དེ་ས་བཅུ་པས་ཀྱང་རྟོགས་པར་དཀའ་བས་མངོན་བྱང་གསུམ་པ་རྡོ་རྗེ། དེ་རིགས་ལྔ་དང་ཡེ་ཤེས་ལྔའི་ཚུལ་དུ་སྣང་བས་རྩེ་ལྔ་པ། ངོ་བོ་སྤྲོས་པ་དང་བྲལ་ཞིང་སྐྱེད་བྱེད་གཞན་མེད་པས་རྡོ་རྗེ་ལ་ས་བོན་གྱིས་མ་མཚན་པ། ཆོས་ཀྱི་སྐུ་དེ་ལས་གཟུགས་ཀྱི་སྐུ་གཉིས་འཕྲོ་ཞིང་རྟེན་བྱེད་པས་རྡོ་རྗེ་ལས་འོད་ཟེར་གྱི་སྤྲོ་བསྡུ་ཡོད་པ། ཆོས་ཀྱི་སྐུ་རང་བཞིན་གྱིས་འོད་གསལ་བས་སྐུ་མདོག་དཀར་པོ་སྟེ། ཇི་སྐད་དུ། དབྱིངས་ནི་རང་བཞིན་རྣམ་དག་དང་། །སྤང་བྱ་གློ་བུར་རྣམ་དག་ལ། །དག་པ་གཉིས་ལྡན་ཆོས་སྐུ་སྟེ། །ཤིན་ཏུ་རྣམ་དག་ཟབ་པའི་ཕྱིར། །ས་བཅུ་པས་ཀྱང་རྟོགས་དཀའ་བས། །མཚོན་བྱེད་རྡོ་རྗེ་རྩེ་ལྔ་པ། །རིགས་ལྔ་ཡེ་ཤེས་ལྔར་སྣང་ཡང་། །ངོ་བོ་ཆོས་སྐུ་སྤྲོས་དང་བྲལ། །ཐོག་མ་ཐ་མ་མེད་པའི་མཆོག །དེ་ལ་སྐྱེད་བྱེད་གཞན་མེད་པས། །ཕྱག་མཚན་ས་བོན་མ་མཚན་ལ། །དེ་ཡང་སྐུ་གཉིས་རྟེན་བྱེད་པས། །འོད་ཟེར་སྤྲོ་དང་བསྡུ་བའོ། །རང་བཞིན་འོད་གསལ་གཞིར་གྱུར་པས། །སྐུ་མདོག་དཀར་པོར་ངེས་པ་ཡིན། །ཐབས་ཤེས་ཟུང་དུ་འཇུག་པའི་ཕྱིར། །ཨཱ་དང་ཀཱ་སོགས་མཚན་པ་དང་། །ཡབ་ཀྱི་རྣམ་པར་ངེས་པའོ། །གཉིས་པ་ནི་ཡེ་ཤེས་ཞེས་བྱ་སྟེ། རྒྱུ་དུས་ཀྱི་ཕུང་པོ་ལྔ་གནས་གྱུར་པ་ལོངས་སྤྱོད་རྫོགས་པའི་སྐུ་ཡེ་ཤེས་ལྔའི་རང་བཞིན་དེ་ཉིད་ཡབ་ཡུམ་ཞལ་སྦྱོར་དུ་བཞུགས་པས་མངོན་བྱང་དང་པོ་གཉིས་ཟླ་བ་དང་ཉི་མ་ཁ་སྦྱར་བ། དེའི་སྤྲུལ་སྐུས་སེམས་ཅན་ཐམས་ཅད་ཀྱི་དོན་མཛད་པས་མངོན་བྱང་གསུམ་པ་རྡོ་རྗེར་མ་ངེས་ཤིང་ཐོད་པ་དང་། སྣ་ཚོགས་རྡོ་རྗེ་དང་། གྲི་གུག་སོགས་ཀྱི་ཕྱག་མཚན་ཡོད་པ། ལོངས་སྐུ་ས་བདུན་མན་ཆད་ལ་སྦས་པས་ཕྱག་མཚན་ལ་ས་བོན་གྱིས་མཚན་པ། སྤྲུལ་སྐུ་མཆོག་འབྲིང་ཐ་མ་གསུམ་ལས་གཞན་མི་སྤྲོ་བས་འོད་ཟེར་གྱི་སྤྲོ་བསྡུ་མེད་པ། ལོངས་སྐུ་ཡེ་ཤེས་ལྔའི་རང་བཞིན་ཡིན་པས་སྐུ་མདོག་དཀར་པོ་ཁོ་ནར་མ་ངེས་ཀྱི་ནག་པོ་དང་སེར་པོ་ལ་སོགས་པ་སྣ་ཚོགས་པའོ། །དེའང་ཇི་སྐད་དུ། ཡེ་ཤེས་རྒྱུ་དུས་ཕུང་པོ་ལྔ། །གནས་གྱུར་ལོངས་སྤྱོད་རྫོགས་པའི་སྐུ། །ཡེ་ཤེས་ལྔ་ཡི་ངོ་བོ་དེ། །ཡབ་ཡུམ་ཞལ་སྦྱོར་དུ་སྣང་བས། །ཉི་ཟླ་གཉིས་སུ་ངེས་པ་ཡིན། །སྤྲུལ་སྐུ་སེམས་ཅན་སྣ་ཚོགས་ཀྱི། །དོན་མཛད་རྡོ་རྗེར་མ་ངེས་སོ། །ལོངས་སྐུ་ས་བདུན་མན་ཆད་ལ། །སྦས་པ་མཚོན་པས་ཕྱག་མཚན་ལ། །ས་བོན་གྱིས་ནི་མཚན་པ་འོ། །སྤྲུལ་སྐུ་རིགས་གསུམ་ལས་གཞན་མེད། །དེས་ན་འོད་ཟེར་སྤྲོ་བསྡུ་མེད། །ཉི་ཟླ་ཟུང་འཇུག་ཐབས་ཤེས་ཡིན། །དེས་ན་སྐུ་མདོག་རྣམ་པ་སོགས། །གཅིག་པ་ཁོ་ནར་མ་ངེས་སོ། །ཞེས་སོ། །གསུམ་པ་ནི། འབྲས་བུ་ཆོས་ཀྱི་སྐུ་དང་། གཟུགས་སྐུ་གཉིས་དབྱེར་མེད་དུ་གནས་པ་ནི་རྒྱས་གདབ་པའི་དོན་ཏེ། ཇི་སྐད་དུ། རྒྱས་གདབ་སྐུ་གསུམ་དབྱེར་མེད་དོ། །ཞེས་སོ། །འདི་དག་གི་དོན་གཞན་ཡང་མང་དུ་ཡོད་མོད། འདིར་དེ་ཙམ་ཞིག་གིས་ཆོག་པས་མ་བཤད་ལ། འདིར་བྲིས་པའི་མན་ངག་གི་བཤད་པ་འདི་ནི་དཔལ་ལྡན་ས་སྐྱ་པཎྜི་ཏའི་སྲས་ཀྱི་ཐུ་བོ། གྲུབ་ཐོབ་ཡོན་ཏན་དཔལ་གྱི་དངོས་སློབ་བློ་གྲོས་དཔལ་གྱིས་བཤད་པ་བཞིན་བྲིས་པ་ཡིན་གསུང་ངོ་། །མདོར་ན། རྒྱུ་དུས་ཀྱི་ལུས་སེམས་གཉིས་མངོན་བྱང་ལྔའི་ཚུལ་དུ་རང་གྲུབ་ཏུ་ཡོད་པ་ནི་སྦྱང་གཞི་ཡིན་ལ། དེ་ལ་གསང་དབང་དང་། ཤེས་རབ་ཡེ་ཤེས་གཉིས་མངོན་བྱང་ལྔའི་ཚུལ་དུ་བསྐུར་བ་ནི་སྨིན་བྱེད་ཡིན་ཞིང་། དེ་ཉིད་བསྐྱེད་རིམ་གྱི་མངོན་བྱང་ལྔ་རྟེན་དུ་བྱས་ནས། རྫོགས་རིམ་རང་བྱིན་རླབས་དང་། དཀྱིལ་འཁོར་འཁོར་ལོ་མངོན་བྱང་ལྔའི་ཚུལ་དུ་བསྒོམས་པས་འབྲས་བུ་ཡེ་ཤེས་ལྔ་མངོན་དུ་གྱུར་ནས་འཚང་རྒྱ་བ་ཡིན་པས། འདི་རྣམས་རྒྱུ་འབྲས་སུ་འགྲོ་བའི་བཤད་པ་ཤེས་དགོས་ཀྱི། མཚོན་དོན་བསྒྲིགས་པ་ཙམ་གྱི་བཤད་པ་ལ་སྙིང་པོ་མེད་དོ། །ཡང་མཉམ་སྦྱོར་དང་། མི་མཉམ་སྦྱོར་གཉིས་ཀྱིས་ལུས་སེམས་གཉིས་སྦྱོང་ཞིང་འབྲས་བུ་སྐུ་གཉིས་སོགས་འགྲུབ་པར་བཤད་པ་ནི། གཙོ་ཆེ་བའི་དབང་དུ་བྱས་པ་ཡིན་གྱི། རེ་རེས་སྦྱང་གཞི་ཐམས་ཅད་སྦྱོང་བ་དང་། འབྲས་བུ་གཉིས་ཀ་འགྲུབ་མི་ནུས་པ་མ་ཡིན་ནོ། །དེ་ལྟར་ན་མན་ངག་ལུགས་ཀྱི་མངོན་པར་རྟོགས་པ་ཚུལ་བཅུ་བཞིར་བྱེད་པའི་ཚེ། མཉམ་སྦྱོར་གྱི་མངོན་བྱང་དང་། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་སྤང་བའི་མི་མཉམ་སྦྱོར་དང་། ས་བོན་དང་། སྐད་ཅིག་གིས་བསྐྱེད་པ་སྟེ། རྒྱུ་རྡོ་རྗེ་འཆང་གི་བསྐྱེད་ཆོག་ལྔར་ངེས་ལ། ཁ་དོག་ནི་མཉམ་སྦྱོར་ལ་ཡན་ལག་བཞི་དྲུག་གང་སྦྱར་ཡང་དཀར་པོར་ངེས་ཤིང་། མི་མཉམ་སྦྱོར་གཉིས་ལ་ཡན་ལག་བཞི་པ་སྦྱར་བའི་ཚེ་ནག་པོ་དང་། ཡན་ལག་དྲུག་པ་སྦྱར་བའི་ཚེ་དཀར་པོར་ངེས་ཤིང་། ཕྱི་མ་གཉིས་ལ་ནི་ནག་པོའོ། །མི་མཉམ་སྦྱོར་གི་ཡན་ལག་དྲུག་པའི་ཚེ་དཀར་པོར་བྱེད་པ་ནི་འགྲེལ་པ་ལུགས་ཀྱང་བཞེད་དེ། ཡན་ལག་དྲུག་པ་ལས། ཟླ་བ་ཆུ་ཤེལ་ནོར་བུའི་འོད། །རྩ་བའི་ལུས་མཚུངས་གཡོན་པ་ནི། །དམར་ཞིང་ཞལ་གཞན་གནག་པ་དང་། །ཞེས་དང་། རིན་ཆེན་འབར་བར། དེ་ལས་བྱུང་བའི་ཀུན་ཏུ་བཟང་། །ཞལ་བརྒྱད་ཞབས་བཞི་བཅུ་དྲུག་ཕྱག །རྩ་ཞལ་ཟླ་འདྲ་གཡས་དང་གཡོན། །སྔོན་པོ་དམར་པོ་ལྷག་མ་གནག །ཅེས་གསུངས་པས་སོ། །སློབ་དཔོན་དཔལ་འཛིན་གྱིས་དགྲ་ནག་གི་འགྲེལ་པར། དགྲ་ནག་གི་རྒྱུ་རྡོ་རྗེ་འཆང་ནག་པོར་འདོད་པ་ལ་དགག་པ་མཛད་པའི་སྐབས་སུའང་གསལ་པོར་གསུངས་ཏེ། ཤིན་ཏུ་གདུག་པ་ཅན་རྗེས་སུ་འཛིན་པས་ཁྲོ་བོའི་གཟུགས་ཅན་ནག་པོར་ལ་ལ་འདོད་དོ། །དེ་མི་འཐད་དེ། གང་གི་ཕྱིར་ཐམས་ཅད་རྗེས་སུ་གཟུང་བའི་ཕྱིར་རྣམ་པར་གནས་པ་ཡིན་ལ། ནག་པོ་ཉིད་ནི་ཞེ་སྡང་ལ་སྤྱོད་པ་རྗེས་སུ་གཟུང་བའི་དོན་ཡིན་པའི་ཕྱིར་རོ། །གཞན་ཡང་རྒྱུད་གཞན་ནས་བསྟན་པ་དང་ཡང་འགལ་བ་ཡིན་ཏེ། དེ་ཡང་དགྱེས་པའི་རྡོ་རྗེ་ལས། ནོར་བུ་ཆུ་ཤེལ་འོད་འདྲ་ཞིང་། །ཞེས་གསུངས་པ་དང་། ཞེས་འདིར་དཀར་པོར་གསུངས་པ་འདི་རྒྱུད་འགྲེལ་གཞན་གྱིས་ཤེས་བྱེད་ཡང་དག་ཏུ་དྲངས་སོ། །ཡང་སྐབས་འདིར་གྲུབ་ཆེན་མཚོ་སྐྱེས་ཀྱིས། མངོན་པར་རྟོགས་པ་ཚུལ་བཞིར་བྱེད་པའི་ཚེ། རྒྱུ་རྡོ་རྗེ་འཆང་གི་བསྐྱེད་ཆོག་ལ་མཉམ་སྦྱོར་མ་གཏོགས་པའི་ཕྱི་མ་བཞི་ཁོ་ན་བཞེད་ཅིང་། དེའི་ཚེ་ཁ་དོག་ནི་ནག་པོ་ཁོ་ནར་བཞེད་དོ། །དེའི་རྒྱུ་མཚན་ཡང་ལུགས་འདི་དང་། མན་ངག་ལུགས་གཉིས་ཆར་གྱི་རྩ་རྒྱུད་ལེའུ་བརྒྱད་པ་ནས་བཤད་པའི་མི་མཉམ་སྦྱོར་གཙོ་འཁོར་ཐམས་ཅད་ལ་སྦྱར་བ་དང་། ཕྱི་མའི་ལེའུ་ལྔ་པར། ས་བོན་དང་སྐད་ཅིག་གིས་བསྐྱེད་པའི་བསྐྱེད་ཆོག་རྣམས་ནི་རྩ་རྒྱུད་ཀྱི་ཐུན་མོང་མ་ཡིན་པ་ཡིན་པས་ཡན་ལག་བཞིས་འཆིང་ལ། དེའི་ཚེ་རྒྱུ་རྡོ་རྗེ་འཆང་ནག་པོ་ངེས་པར་བཞེད་དོ། །གཞན་ཕྱག་མཚན་སོགས་ནི་འབྲས་བུ་རྡོ་རྗེ་འཆང་གི་སྐབས་སུ་འཆད་དོ། །གཉིས་པ་བསྐྱེད་ནས་འཁོར་སྤྲོ་བ་ལ་གསུམ་སྟེ། སྦྱོར་བ་འདུ་ཤེས་གསུམ་ལྡན་བསམ་པ། དངོས་གཞི་འཁོར་སྤྲོ་བ། སྤྲོས་པའི་འཁོར་རྣམས་ཀྱི་སྐུ་མདོག་སོགས་བཤད་པའོ། །དང་པོ་ནི། རང་ཉིད་རྒྱུ་རྡོ་རྗེ་འཛིན་པ་དང་། རིག་མ་བདག་མེད་མར་བསམ། ཡུམ་གྱི་མཁའ་མི་དམིགས་ཏེ། སྟོང་པའི་ངང་ལས་ཨ་ལས་པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལ་ཨས་མཚན་པ་བསམས་ལ། སྔགས་ཀྱིས་བྱིན་གྱིས་བརླབས་ཏེ། ཨོཾ་པདྨ་སུ་ཁ་བདེ་བ། དྷ་ར་འཛིན་པ། མ་ཧཱ་རཱ་ག་འདོད་ཆགས་ཆེན་པོ། སུ་ཁཾ་ད་ད་བདེ་བ་སྟེར་བ། ཙ་ཏུ་རཱ་ནནྡ་དགའ་བ་བཞི། བྷ་ག་པདྨ། བི་ཤྭ་སྣ་ཚོགས། ཧཱུྃ་གསུམ། ཀརྻཾ་བྱ་བ། ཀུ་རུ་མཛོད། ཥྭ་མེ་བདག་གི་ཞེས་པས་སོ། །ཡང་ཡབ་ཀྱི་གསང་གནས་མི་དམིགས་ཏེ། སྟོང་པའི་ངང་ལས་ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པ་བསམས་ལ། ཨོཾ་བཛྲ་རྡོ་རྗེ། མ་ཧཱ་དྭེ་ཥ་ཞེ་སྡང་ཆེན་པོ། ཙ་ཏུར་བཞི། ཨཱ་ནནྡ་དགའ་བ། ད་ཡ་ཀ་སྟེར་བ། ཁ་ག་མཁའ་འགྲོ། མུ་ཁ་ཨེ་ཀ་ར་སྭ་གདོང་གཅིག་པ། ནཱ་ཐ་མགོན་པོ། ཧཱུྃ་གསུམ། ཀརྻཾ་ཀུ་རུ་ཥྭ་མེ་གོང་དང་འདྲ། དེ་ལྟ་བུའི་སྔགས་ཀྱིས་བྱིན་གྱིས་བརླབས་ནས། ཐབས་ཤེས་རབ་སྙོམས་པར་ཞུགས་པས། འཁོར་གྱི་ལྷ་མོ་དབྱུང་སྙམ་དུ་དྲན་པར་བྱ་སྟེ། རྗེ་བཙུན་རྩེ་མོས། དེའང་འདུ་ཤེས་གསུམ་ཚུལ་ཏེ། །ཡབ་ཡུམ་བསྐྱེད་པ་ལྷ་འདུ་ཤེས། །ཡུམ་གྱི་ཐ་མལ་པདྨ་ནི། །སྐད་ཅིག་ཙམ་གྱིས་མི་དམིགས་པས། །ཨ་ལས་པདྨ་འདབ་བརྒྱད་པར། །བསམས་ལ་སྔགས་ཀྱིས་བྱིན་གྱིས་བརླབ། །ཡབ་ཀྱི་ཐ་མལ་རྡོ་རྗེ་ནི། །སྟོང་པར་བསམས་ཏེ་ཧཱུྃ་རྡོ་རྗེ། །རྩེ་ལྔ་པར་བསྐྱེད་གསང་སྔགས་ཀྱིས། །བྱིན་གྱིས་བརླབས་ཤིང་སྔགས་འདུ་ཤེས། །ཐ་མལ་རྗེས་ཆགས་མ་ཡིན་ཏེ། །ཡབ་ཡུམ་སྙོམས་པར་ཞུགས་པ་ལས། །འཁོར་གྱི་ལྷ་མོ་དབྱུང་ངོའི་བར། །བསམ་པ་ཆོས་ཀྱི་འདུ་ཤེས་སོ། །དེ་ལྟར་འདུ་ཤེས་གསུམ་བསྒོམ་པའང་། །ཐ་མལ་རྟོག་པ་ཞི་བྱེད་དེ། །ལུས་དང་བྷ་ག་བསམ་པ་ཀུན། །མཆོག་ཏུ་གྱུར་པའང་བྱས་པ་ཡིན། །ཞེས་དགོས་པ་དང་བཅས་པའང་གསུངས་སོ། །གཉིས་པ་ནི། ཡབ་ཡུམ་སྙོམས་པར་ཞུགས་པས་རྗེས་སུ་ཆགས་པའི་སྒྱུ་མ་བདེ་བའི་སྒྲ། ཧ་སི་སོགས་གསང་གནས་ན་གྲགས་པའི་སྒྲ་དེས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ། ཁའམ་སྣ་བུག་གཡོན་ནས་ཞུགས། རྗེས་སུ་ཆགས་པའི་མེས་སྙིང་གར་བཞུ་སྟེ། ཡུམ་གྱི་མཁར་བབས་པ་ཐིག་ལེ་བརྒྱད་དུ་བསམ་པར་བྱའོ། །འདི་ནི་ཚུལ་བཅུ་བཞི་པ་ཐམས་ཅད་ལ་འདྲ་ལ། མངོན་བྱང་གི་ཡན་ལག་བཞི་པ་རྣམས་ལ་ནི་ཐིག་ལེ་དེ་རྣམས་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོ་བ་དང་། ཐིག་ལེ་ལས་ས་བོན་དུ་གྱུར་ནས་སྤྲོ་བ་སྟེ་འགྲོས་གཉིས་སོ། །ཡན་ལག་དྲུག་པ་རྣམས་ལ་ནི། མངལ་དུ་ཐིག་ལེ་ལས་ས་བོན་དུ་གྱུར། དེ་ལས་ལྷ་མོར་གྱུར་ཏེ་སྤྲོ་བ་དང་། ཐིག་ལེ་ལས་ས་བོན་དུ་གྱུར་པ་གདན་རྣམས་ཀྱི་སྟེང་དུ་སྤྲོས་ནས་ལྷ་མོར་བསྐྱེད་པ་སྟེ་འགྲོས་གཉིས་སོ། །ས་བོན་ལས་བསྐྱེད་པའི་སྐབས་སུ་ནི་ཡན་ལག་དྲུག་པའི་ལྷ་མོ་འགྲོས་དང་འདྲ་ལ། སྐད་ཅིག་གིས་བསྐྱེད་པའི་སྐབས་སུ་ནི། མངལ་དུ་ཐིག་ལེ་ལས་ལྷ་མོར་གྱུར་ནས་སྤྲོ་བ་སྟེ། དེ་ལྟར་ན་ཚུལ་བཅུ་བཞི་ལས་ལྷ་མོ་སྤྲོ་ཚུལ་ལྔར་ངེས་ཤིང་། མཚོ་སྐྱེས་ལུགས་ལ་ནི་བཞིར་ངེས་སོ། །གསུམ་པ་ལ་བཞི་སྟེ། གནས་དང་སྐུ་མདོག་བཤད་པ། ཕྱག་མཚན་དག་པ་དང་བཅས་པ་བཤད་པ། རྣམ་པ་དང་རྒྱན་བཤད་པ། གདན་བཤད་པའོ། །དང་པོ་ནི། འཁོར་གྱི་ལྷ་མོ་རྣམས་དཀྱིལ་འཁོར་གྱི་ཕྱོགས་གང་དུ་འགོད། སྐུ་མདོག་ཅི་ལྟ་བུ་སྙམ་ན། གཽ་རཱི་ནི་ཤར་དུ་སྟེ། ཆོས་ཉིད་ལས་མི་འགྱུར་བས་ཁ་དོག་ནག་མོའོ། །ཙཽ་རཱི་ནི་ལྷོར་ཏེ། སེམས་ཅན་གྱི་དོན་ལ་ཆགས་པས་ཁ་དོག་དམར་པོའོ། །བེ་ཏཱ་ལཱི་ནི་ནུབ་ཏུ་སྟེ། སངས་རྒྱས་ཀྱི་ཡོན་ཏན་རྒྱས་པས་ཁ་དོག་སེར་པོའོ། །གྷསྨ་རཱི་ནི་བྱང་དུ་སྟེ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་བྱེད་པས་ལྗང་གུའོ། །པུཀྐ་སཱི་ནི་དབང་ལྡན་དུ་སྟེ། ཁ་དོག་གཽ་རཱི་དང་མཚུངས་སོ། །རི་ཁྲོད་མ་ནི་མེར་ཏེ། རང་བཞིན་གྱིས་རྟོག་པ་དང་བྲལ་བས་དཀར་པོའོ། །གདོལ་པ་མོ་ནི་སྲིན་པོར་ཏེ། སེམས་ཅན་གྱི་དོན་ལ་ཆགས་པས་སྔོ་བསངས་སོ། །གཡུང་མོ་ནི་རླུང་དུ་སྟེ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་བྱེད་པས་ཁ་དོག་སྣ་ཚོགས་པའོ། །འདིར་དེ་བཞིན་གཤེགས་པ་དང་། ཕྱོགས་ཀྱི་དབང་དུ་བྱས་ན་གཽ་རཱི་དཀར་མོ། ཙཽ་རཱི་སེར་མོ། བེ་ཏཱ་ལཱི་དམར་མོར་འབྱུང་རྒྱུ་ཡིན་ཞིང་། བཤད་རྒྱུད་གུར་ལས་ཀྱང་དེ་བཞིན་གསུངས་མོད། འདིར་རྩ་བའི་རྒྱུད་དུ་སྔར་བཞིན་གསུངས་པ་ནི། དེ་བཞིན་གཤེགས་པ་རེ་རེ་ཡང་ཡེ་ཤེས་ལྔ་ལྔའི་རང་བཞིན་ཡིན་ལ། ཡེ་ཤེས་དེ་གཟུགས་ཀྱི་རྣམ་པ་ལྷར་ལངས་པའི་ཚེ། ཡེ་ཤེས་སོ་སོ་དང་མཐུན་པའི་ཁ་དོག་ཏུ་འགྱུར་བ་ཡིན་ཏེ། གཽ་རཱི་རྣམ་སྣང་གི་རིགས་ཡིན་ཀྱང་། དེའི་ནང་ཚན་ཆོས་དབྱིངས་ཡེ་ཤེས་ཀྱི་གཟུགས་རྣམ་ཡིན་པས་ནག་མོ་དང་། ཙཽ་རཱི་རིན་ཆེན་འབྱུང་ལྡན་གྱི་ཡེ་ཤེས་ལྔ་ལས་སོར་རྟོག་ཡེ་ཤེས་ཀྱི་གཟུགས་རྣམ་ཡིན་པས་དམར་མོ་དང་། བེ་ཏཱ་ལཱི་འོད་དཔག་མེད་ཀྱི་ནང་ཚན་ཡེ་ཤེས་ལྔ་ལས། མཉམ་ཉིད་ཡེ་ཤེས་ཀྱི་གཟུགས་རྣམ་ཡིན་པས། སེར་མོར་འབྱུང་བ་ཡིན་ལ། དེ་བཞིན་དུ་འཁོར་གཞན་རྣམས་ལ་ཡང་གོ་བར་བྱའོ། །གཉིས་པ་ནི། ཕྱག་མཚན་གྱི་དག་པར། འཁོར་བའི་རྒྱ་མཚོ་དུག་ཆུ་ལས། །ཉ་འདྲའི་འགྲོ་བ་འདོན་ཕྱིར་རམ། །བཀྲ་ཤིས་འཛིན་པ་རོ་ཧི་ཏ། །ཉོན་མོངས་རྒྱ་འདྲ་གྲིྃ་གུག་གཡས། །གཏི་མུག་གིས་ནི་རབ་རྨོངས་པ། །ཕག་དང་འདྲ་བའི་སེམས་ཅན་ནི། །གཏི་མུག་གཉིད་ལས་བསླང་བའི་ཕྱིར། །གཡས་ན་ཅང་ཏེའུ་སྒྲ་སྒོགས་པ། །འདོད་ཆགས་ཀྱིས་གདུངས་རུས་སྦལ་ནི། །འགྲོ་བའི་ནད་རྣམས་བསལ་ཕྱིར་དང་། །ཆགས་ཆེན་བདུད་རྩིས་ཚིམ་བྱའི་ཕྱིར། །རུས་སྦལ་དང་ནི་པད་སྣོད་བསྣམས། །ཞེ་སྡང་དགྲ་ཡིས་ཕམ་བྱས་པ། །སྦྲུལ་དང་འདྲ་བའི་སེམས་ཅན་རྣམས། །ཞེ་སྡང་ཆེན་པོས་ཚིམ་བྱའི་ཕྱིར། །ཕྱག་ན་སྦྲུལ་དང་ཐོད་པ་འོ། །ངན་རྟོག་པ་ཡི་རི་དྭགས་རྣམས། །སྐྲག་པར་བྱ་ཕྱིར་སེང་གེ་འམ། །སེང་འདྲ་ང་རྒྱལ་གཞོམ་བྱའི་ཕྱིར། །སེང་གེ་དང་ནི་དགྲ་སཏྭ་བསྣམས། །བདག་ཏུ་ལྟ་བ་ལ་སོགས་པའི། །ལྟ་བ་པོ་ཡི་གཉིས་པའོ། །བདག་ཏུ་ལྟ་བའི་མདུད་པ་དང་། །སེར་སྣ་དགྲོལ་བར་བྱ་བའི་ཕྱིར། །དགེ་སློང་དང་ནི་འཁར་གསིལ་ལོ། །དཔེར་ན་ཐོང་པ་ལྟ་བུ་ཡི། །ཆོས་ཀྱི་འཁོར་ལོ་བསྐོར་བ་ཡིས། །ཉོན་མོངས་ཐ་བ་བརླག་པའི་ཕྱིར། །འཁོར་ལོ་དང་ནི་ཐོང་པ་བསྣམས། །རྣམ་པར་རྟོག་པའི་རི་བསྙིལ་ཞིང་། །གདུག་པ་ཚར་གཅད་བྱ་བའི་ཕྱིར། །གཡས་པས་རྡོ་རྗེ་འཛིན་པ་དང་། །གཡོན་པས་སྡིགས་མཛུབ་བསྟན་པ་འོ། །ཞེས་གསུངས་པ་ལྟར་རོ། །གསུམ་པ་ནི། ལྷ་མོ་ཐམས་ཅད་ཆོས་ཐམས་ཅད་དེ་བཞིན་ཉིད་དུ་རོ་གཅིག་པས་ཞལ་གཅིག་མ། བདེན་པ་གཉིས་ཐུགས་སུ་ཆུད་པས་ཕྱག་གཉིས་མ། སྐུ་གསུམ་བརྙེས་པས་སྤྱན་གསུམ། སངས་རྒྱས་གྱི་ཡོན་ཏན་གོང་ནས་གོང་དུ་རྒྱས་པས་དབུ་སྐྲ་དམར་སེར་གྱེན་དུ་འཁྱིལ་བ། རྒྱལ་བ་ལྔ་དག་པའི་ཕྱག་རྒྱ་ལྔས་ལུས་ལ་བརྒྱན་པའོ། །གཞུང་འགའ་ཞིག་ལས་སྟག་གི་པགས་པའི་ཤམ་ཐབས་བཤད་ཀྱང་། རྒྱ་གར་གྱི་གཞུང་ཕལ་ཆེར་དང་། རྗེ་བཙུན་གོང་མས་གཅེར་བུར་བཞེད་དོ། །མི་གནས་པའི་མྱ་ངན་ལས་འདས་པ་མཚོན་པས་ཞབས་གཡོན་བརྐྱངས་པའི་བརླ་ལ་གཡས་བསྐུམ་པའི་སོར་མོ་རེག་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའོ། །བཞི་པ་ནི། གཽ་རཱི་ཚངས་པའི་གདན་ལ་སོགས་པ་སྔར་གྱི་གདན་སོ་སོའི་སྟེང་དུ་བཞུགས་པ་ཡིན་ཞིང་། དེ་རྣམས་ཀྱི་ངོ་བོ་ནི་རྗེ་བཙུན་རིན་པོ་ཆེས། ཚངས་པ་ནི་འདོད་ཁམས་ཀྱི། དབང་པོ་ནི་ཤར་ཕྱོགས་ཀྱི། ཉེ་དབང་ནི་དབང་ལྡན། གཤིན་རྗེ་ནི་ལྷོ་ཕྱོགས་ཀྱི། ནོར་སྦྱིན་ནི་རྣམ་ཐོས་སྲས། སྲིན་པོ་ནི་ལྷོ་ནུབ་ཀྱིའོ། །ཐགས་ཟངས་རིས་ལྷ་མ་ཡིན་གྱི་དབང་པོ་ཡིན་ནོ། །ཞེས་སོ། །དེ་ལ་འདོད་ཁམས་ཀྱི་ཚངས་པ་ཞེས་པ་ལ། ཁ་ཅིག་གཟུགས་ཁམས་ཀྱི་ཚངས་པ་ལས་གཞན་པའི་ཚངས་པ་མེད་དེ། ཚངས་པའི་དོན་འདོད་པ་ལ་འདོད་ཆགས་དང་བྲལ་བ་ཡིན་ལ། འདོད་ཁམས་སུ་ཡོད་ན་ཆགས་བྲལ་དུ་མི་རུང་བའི་ཕྱིར་རོ། །ཞེས་ཟེར་རོ། །དེའི་ལན་དུ་གནས་དྲུག་པས། འདི་ནི་མི་འཐད་དེ། ཁྱད་པར་འཕགས་པའི་བསྟོད་པར། ལྷ་ཆེན་ཐིག་ལེ་མཆོག་མ་ལ། །ཆགས་པ་སྐྱེས་པས་གདོང་བཞི་བྱུང་། །ཞེས་པའི་འགྲེལ་པར། ཐིག་ལེ་མཆོག་མས་ལྷ་ཆེན་པོ་ལ་བསྐོར་བ་བྱས་པས་ཆགས་པའི་དབང་གི་ཕྱོགས་ཐམས་ཅད་ལ་ལྟ་བར་འདོད་ནས། གདོང་པ་བཞི་སྤྲུལ་པར་བཤད་པས། འདོད་པ་ལ་ཆགས་པ་དང་མ་བྲལ་བའི་ཚངས་པ་མུ་སྟེགས་བྱེད་རྣམས་ཀྱིས་སྟོན་པར་བྱེད་པ་ཞིག་ཡོད་པར་གྲུབ་ལ། ལྷ་ལས་ཕུལ་བྱུང་གི་བསྟོད་པའི་འགྲེལ་པར་ཡང་དེ་བཞིན་དུ་བཤད་དོ་ཞེས་ལན་འདེབས་སོ། །འདིའང་ཅུང་ཟད་མི་འཐད་པར་སྣང་སྟེ། ཐིག་ལེ་མཆོག་མ་ལ་ཆགས་པ་སྐྱེས་ནས་གདོང་བཞི་སྤྲུལ་པ་པོ་ནི་མུ་སྟེགས་བྱེད་ཀྱིས་ལྷ་ཚངས་པ་ཆོས་སྐུ། དབང་ཕྱུག་ལོངས་སྐུ། ཁྱབ་འཇུག་སྤྲུལ་སྐུ་གསུམ་དུ་འདོད་པའི་བར་མ་དེ་ཉིད་ཡིན་ལ། འདིར་འདོད་ཁམས་ཀྱི་ཚངས་པ་ནི་དང་པོ་དེ་ཉིད་དུ་འདོད་དགོས་པའི་ཕྱིར་ཏེ། རྗེ་བཙུན་རྩེ་མོས། མུ་སྟེགས་བྱེད་ཀྱི་ལྷ་དེ་གསུམ་ལ་གཏི་མུག་ཅན་ཚངས་པ་དང་། འདོད་ཆགས་ཅན་དབང་ཕྱུག་དང་། ཞེ་སྡང་ཅན་ཁྱབ་འཇུག་ཅེས་པའི་ཐ་སྙད་མཛད་ནས། གསུམ་ཆར་ཡང་འདོད་ཁམས་སུ་ཡོད་པར་བཞེད་པའི་ཕྱིར་རོ། །གསུམ་པ་སྤྲོས་ནས་ཐིག་ལེར་ཞུ་བ་ནི། རྡོ་རྗེ་གུར་ལས། དྲི་ཟ་མཉམ་པར་ཞུགས་ནས་ནི། །ཁུ་བར་རྗེས་སུ་དྲན་པར་བྱ། །ཞེས་གསུངས་པའི་དོན་ལ་བཞི་སྟེ། རྒྱུ་གང་ཞུ་བ། རྐྱེན་གང་གིས་ཞུ་བ། རྣམ་པ་ཇི་ལྟར་དུ་ཞུ་བ། དེ་ལྟར་ཞུ་བའི་དགོས་པའོ། །དང་པོ་ནི། གཞལ་ཡས་ཁང་གི་དབུས་ན་གནས་པའི་རྒྱུ་རྡོ་རྗེ་འཆང་ཡབ་ཡུམ་གྱི་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་དོ། །གཉིས་པ་ལ་གཉིས་ཏེ། སྙོམས་པར་ཞུགས་པའི་རྐྱེན་དང་། དྲི་ཟ་ཞུགས་པའི་རྐྱེན་ནོ། །དང་པོ་ནི། ཡབ་ཡུམ་ཐབས་ཤེས་སྙོམས་པར་ཞུགས་པས་ལུས་ཐམས་ཅད་དྭངས་མས་གང་ཞིང་། དེའི་རྐྱེན་གྱིས་བདེ་བ་ཆེན་པོ་སྐྱེས་པར་བསྒོམས་ཏེ། རྗེ་བཙུན་རྩེ་མོས། དེ་ནས་ཡབ་ཡུམ་གྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་བ་སྤུའི་བུ་ག་བྱེ་བ་ཕྲག་ཕྱེད་དང་བཞི་ཐམས་ཅད་རྩ་དང་བ་སྤུའི་བུ་ག་ཐམས་ཅད་ཁམས་དྭངས་མ་བྱང་ཆུབ་སེམས་ཀྱི་ཐིག་ལེས་གང་བར་མོས། དེས་ནས་ཡབ་ཡུམ་ཐབས་དང་ཤེས་རབ་སྙོམས་པར་ཞུགས་པ་ལས། རྗེས་སུ་ཆགས་པའི་མེས་ཁམས་དྭངས་མའི་ཐིག་ལེ་རྣམས་ཞུ་སྟེ། སླར་ཡང་ཟག་པ་མེད་པའི་བདེ་བ་ཆེན་པོ་སྐྱེས་པར་མོས་ཞེས་གསུངས་པས་སོ། །རྐྱེན་གཉིས་པ་ནི། ཡན་ལག་བཞི་པའི་སྐབས་སུ་མི་དགོས་ལ། ཡན་ལག་དྲུག་པའི་སྐབས་སུ་ཧོཿགཉིས་ཀྱི་བར་དུ་ཆུད་པའི་བར་དོའི་ལུས་ངག་ཡིད་གསུམ་མཚོན་བྱེད་ཨོཾ་ཨཱཿཧཱུྃ་གི་ཡི་གེ་གསུམ་ནམ་མཁར་གསར་དུ་བསྐྱེད་ནས། དེ་ཉིད་ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་ནས། ཡུམ་གྱི་མཁར་ཡིག་འབྲུ་སླེབ་པའི་རྐྱེན་གྱིས་ཞུ་བར་བིརྺ་པའི་བཀའ་སྲོལ་གཉིས་དང་། མར་མེ་མཛད་ལ་སོགས་པ་གཞན་རྒྱ་གར་བའི་གཞུང་ཕལ་ཆེར་བ་ལས་བཤད་དོ། །གསུམ་པ་ནི། ངོ་བོ་བདེ་བ་ལ་རྣམ་པ་ཐིག་ལེའི་དབྱིབས་སུ་གནས་པ་ཡིན་ལ། དེས་སྟོང་པ་ཆོས་ཀྱི་སྐུའི་ཡེ་ཤེས་འདྲེན་ནུས་པར་བསྒོམས་ཏེ། རྩེ་མོས། ཡབ་ཞུ་ཡེ་ཤེས་ཡུམ་ཞུ་དབྱིངས། །དབྱེར་མེད་ཐིག་ལེ་གདན་སྟེང་དུ། །དེ་ནི་ལོངས་སྐུ་ལ་བརྟེན་པའི། །དབྱིངས་དང་ཡེ་ཤེས་དབྱེར་མེད་པའི། །ཆོས་སྐུའི་ངོ་བོ་ཞེས་བྱ་སྟེ། །ཞེས་གསུངས་པའི་ཕྱིར་རོ། །བཞི་པ་ནི། དེ་ལྟར་གཉིས་སྣང་གི་རྟོག་པ་ཐམས་ཅད་བསྡུས་ནས། ལྷན་སྐྱེས་ཀྱི་ངང་དུ་ཡིད་མཉམ་པར་གཞག་པས། ཆོས་སྐུའི་དོན་རྟོགས་པར་བྱེད་པ་ཡིན་ནོ། །དེ་ལྟར་བདེ་སྟོང་རོ་གཅིག་པའི་ཐིག་ལེ་ལ་སེམས་བཟུང་ནས། ང་རྒྱལ་བསྐྱེད་པའི་སྔགས་འདི་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཨ་ནུ་རཱ་ག་ཎ་ནི་རྗེས་སུ་ཆགས་པ། བཛྲ་ནི་རྡོ་རྗེ། སྭ་བྷཱ་ཝ་ནི་རང་བཞིན། ཨཏྨ་ཀོ྅ཧཾ་ནི་བདག ཨ་ཧཾ་ནི་ངའོ། །འདིར་ང་རྒྱལ་འཛིན་པའི་སྔགས་སྐབས་འདིར་གསུངས་པ་ནི། རྗེས་སུ་ཆགས་པའི་ཡན་ལག་གི་དངོས་གཞི་ལ་དགོངས་ལ། མི་ཐུབ་ཟླ་བས། མཁའ་གསང་བྱིན་གྱིས་བརླབ་པའི་སྐབས་སུ་གསུངས་པ་ནི་རྗེས་སུ་ཆགས་པར་བྱེད་པ་ལ་དགོངས་ཤིང་། བདག་མེད་མའི་སྒྲུབ་ཐབས་སུ། ཡེ་ཤེས་པ་དགུག་གཞུག་གི་རྗེས་ལ་གསུངས་པ་ནི་ཡན་ལག་རྫོགས་པ་ལ་དགོངས་སོ། །གཉིས་པ་ཞུ་བ་གླུས་བསྐུལ་ལས་འབྲས་བུ་རྡོ་རྗེ་འཆང་བསྐྱེད་པ་ལ་གསུམ་སྟེ། ཞུ་བ་ལས་གླུས་བསྐུལ་བ། བསྐུལ་ནས་འབྲས་བུ་རྡོ་རྗེ་འཛིན་པར་བཞེངས་པ། བཞེངས་ནས་སྣོད་བཅུད་སྦྱང་བའོ། །དང་པོ་ལ་ལྔ་སྟེ། གང་ལ་བསྐུལ་བ། གང་གིས་བསྐུལ་བ། ཇི་ལྟར་བསྐུལ་བ། དེ་ལྟར་བསྐུལ་བའི་དགོས་པ། བསྐུལ་ནས་བཞེངས་པ་ལ་རྩོད་པ་སྤོང་བའོ། །དང་པོ་ནི། བདེ་སྟོང་གཉིས་སུ་མེད་པའི་ཡེ་ཤེས་རྣམ་པ་ཐིག་ལེའི་གཟུགས་ཅན་དེ་ཉིད་ལའོ། །གཉིས་པ་ནི། པུཀྐ་སཱི་ལ་སོགས་པ་མཚམས་མ་བཞིས་བསྐུལ་ཏེ། དེའི་རྒྱུ་མཚན་ཡང་། འབྲས་བུའི་གནས་སྐབས་སུ་འོད་གསལ་ཆོས་ཀྱི་སྐུའི་ངང་ལས་མ་གཡོས་བཞིན་དུ། ཀུན་རྫོབ་གཟུགས་ཀྱི་སྐུ་གཉིས་ཀྱིས་སེམས་ཅན་གྱི་དོན་འབད་མེད་དུ་གྲུབ་པར་མཛད་པ་ནི། ལམ་གྱི་གནས་སྐབས་སུ། ཚད་མེད་བཞི་བསྒོམས་པའི་འབྲས་བུ་ཡིན་ལ། དེ་བཞི་དག་པ་ནི་མཚམས་མ་བཞི་ཡིན་པས། དེས་བསྐུལ་བ་ཡིན་ཏེ། རྗེ་བཙུན་རྩེ་མོས། དེ་དག་ནི་ཚད་མེད་པ་བཞིའི་ངོ་བོ་ཡིན་པས། དེ་ལ་གཙོ་བོ་གཟུགས་ཀྱི་སྐུ་མེད་ན་སེམས་ཅན་གྱི་དོན་བྱ་བར་མི་ནུས་པས། དེའི་ཕྱིར་གླུས་བསྐུལ་བ་ཡིན་ནོ་ཞེས་སོ། །གསུམ་པ་ནི། པུཀྐ་སཱིས་ཐུགས་རྗེ་ཆེན་པོའི་ཚུལ་གྱིས་དང་། ཤ་ཝ་རཱིས་གནད་ལ་བོར་བའི་ཚུལ་གྱིས་དང་། ཙཎྜ་ལཱིས་སྔོན་གྱི་ཐུགས་དམ་རྗེས་སུ་དྲན་པའི་སྒོ་ནས་བསྐུལ་ཞིང་། དེ་ལྷ་མོ་གསུམ་གྱིས་བསྐུལ་བས་བཞེངས་སུ་མ་བཏུབ་པས། གསུམ་པོ་ཡི་ཆད་པའི་ཚུལ་དུ་གནས་པ་ལ། གཡུང་མོས་ཐུགས་ཡོངས་སུ་མཁྱེན་པའི་ཚུལ་གྱིས་གླུས་བསྐུལ་བ་ཡིན་ལ། རྡོ་རྗེའི་གླུ་རྣམས་ཀྱི་དོན་ནི། སྤྱིར་དུ་མ་ཞིག་ཡོད་ཀྱང་འདིར་གཉིས་སུ་མེད་པའི་ཡེ་ཤེས་ཀྱི་སྣང་བར་གྱུར་པ་ལ་རྗེ་བཙུན་རྩེ་མོས་བཤད་དོ། །བསྐུལ་བའི་ཚེ་རྣལ་འབྱོར་པ་རང་གི་ཤེས་པའི་རྒྱུན་མཚམས་ཀྱི་ལྷ་མོ་བཞི་ལ་འཕོས་ནས། ལྷ་མོ་གཅིག་གིས་གླུ་ལེན་པའི་ཚེ། གཞན་རྣམས་ཀྱིས་རམ་བུ་འདེགས་པའི་ཚུལ་གྱིས་བསྐུལ་བར་བླ་མ་དག་གསུངས་ངོ་། །ཚིག་གི་དོན་ནི། པུཀྐ་སཱིས་བྱམས་པ་ཚད་མེད་པའི་སྒོ་ནས་བསྐུལ་བ་ནི། རྗེ་བཙུན་ཀྱེ་རྡོ་རྗེ་བཞེངས་ཤིག རྒྱུ་གང་གིས་ན་སེམས་ཅན་སྡུག་བསྔལ་རྒྱུ་དང་བཅས་པ་ལས་བསྒྲལ་འདོད་ཀྱི་སྙིང་རྗེའི་ཡིད་ཀྱིས་སོ། །བཞེངས་ནས་ཅི་བྱ་སྙམ་ན། པུཀྐ་སཱི་ནི་བདག་དང་སེམས་ཅན་ཐམས་ཅད་ལ་སྐྱོབས་ཤིག ཇི་ལྟར་སྐྱོབ་ན། ཞལ་ཕྱག་གི་སྟོང་པའི་རང་བཞིན་ཐིག་ལེའི་ངོ་བོ་ཉིད་སྤངས་ནས་ནི། པུཀྐ་སཱི་བདག་ལ་བདེ་བ་ཆེན་པོའི་འདོད་པ་སྦྱོར་བ་བཞེད་པར་མཛོད་ཅིག་པའོ། །ཤ་ཝ་རཱིས་སྙིང་རྗེ་ཚད་མེད་པའི་སྒོ་ནས་བསྐུལ་བ་ནི། གཙོ་བོ་ཁྱོད་མེད་ན་བདག་འགུམ་པས་ཏེ། འཆི་བར་འགྱུར་བས་ཞལ་ཕྱག་གི་སྟོང་པའི་རང་བཞིན་ཐིག་ལེའི་ངོ་བོ་ཉིད་སྤངས་པ་སྟེ། དགོས་པ་ནི། རི་ཁྲོད་མ་བདག་གི་ཡིད་ལ་རེ་བའི་འབྲས་བུ་བདེ་བ་ཆེན་པོ་ལ་སྦྱོར་བར་འདོད་པ་འགྲུབ་པའི་ཕྱིར་དུ་ནི། ཀྱེ་རྡོ་རྗེ་ཁྱོད་གཟུགས་ཀྱི་སྐུར་བཞེངས་ཤིག་པའོ། །གདོལ་པ་མོས་དགའ་བ་ཚད་མེད་པའི་སྒོ་ནས་བསྐུལ་བ་ནི། ལམ་དུས་སུ་སྨོན་པ་བྱང་ཆུབ་ཀྱི་སེམས་ཀྱིས་བདག་ཧེ་རུ་ཀར་གྱུར་ནས། སེམས་ཅན་ཐམས་ཅད་དེའི་གོ་འཕང་ལ་འགོད་པར་བྱའོ། །ཞེས་འཇིག་རྟེན་ཐམས་ཅད་སངས་རྒྱས་ལ་མགྲོན་དུ་གཉེར་ནས་དགའ་བའམ། འདོད་པའི་གཙོ་བོ་གྲུབ་པའི་ཚེ་སྟོང་པ་ཉིད་ལ་ཞུགས་སམ་ཅི་སྟེ་ཞུགས་པར་མི་རིགས་སོ། །ཁྱོད་མེད་ན་བདག་གིས་སེམས་ཅན་གྱི་དོན་ཕྱོགས་ཙམ་ཡང་མི་འཚལ་བས། གདོལ་པ་མོ་བདག་ནི་གཙོ་བོ་ཐིག་ལེ་ལས་བཞེངས་པར་ཞུ་བ་བགྱིད་པའོ། །གཡུང་མོས་བཏང་སྙོམས་ཚད་མེད་པའི་སྒོ་ནས་བསྐུལ་བ་ནི། གཡུང་མོ་བདག་ནི་དྲན་པ་ཉམས་པས། འདི་ལ་སྙིང་རྗེ་ཆེན་པོའི་རྒྱུན་ཆད་མ་མཛད་ཅིག གཡུང་མོ་བདག་གིས་ཁྱེད་ཀྱི་ཐུགས་སྣ་ཚོགས་སུ་སྣང་བའི་གཡོ་སྒྱུ་དང་བཅས་པར་འཚལ་བ་སྟེ་ཤེས་ཀྱི། དེ་བས་ན་གཅིག་ལས་སྣ་ཚོགས་སུ་སྤྲུལ་པའི་མིག་འཕྲུལ་མངའ་བའི་གཙོ་བོ་ཁྱེད་བཞེངས་ཤིག ཅེས་པའོ། །བཞི་པ་ནི། རྗེ་བཙུན་རྩེ་མོས། དེའང་འདི་ལྟར་རྒྱལ་པ་ལ་ནི་བཞེངས་སུ་གསོལ་བར་བསྐུལ་དགོས་པ་མ་ཡིན་ཏེ། ཉིན་མཚན་ལན་དྲུག་ཏུ་ཀུན་ནས་གཟིགས་པ་ཡིན་ལ། གླུས་བསྐུལ་བ་ལའང་བཞེངས་སུ་མི་བཏུབ་པ་ལ་དེ་ལ་ཡི་ཆད་པ་ཡོད་པ་མ་ཡིན་ཡང་། སངས་རྒྱས་ཀྱི་མཛད་པ་ནི་གདུལ་བྱའི་སྣང་བ་ཡིན་ལ། དེ་ཡང་འཇིག་རྟེན་ན་ཆེ་བར་གྲགས་པའི་སྤྱོད་པ་ལ་འཇིག་རྟེན་པ་མཆོག་ཏུ་འཛིན་པས། གདུལ་བྱ་ལ་ཡང་སངས་རྒྱས་ཀྱི་མཛད་པ་དེ་ལྟར་སྣང་བ་ཡིན་ནོ། །ཞེས་གསུངས་སོ། །ལྔ་པ་ནི། དག་པ་རྡོ་རྗེའི་སྒྲོན་མེར། རྩོད་སྤང་གི་ཚུལ་མང་དུ་གསུངས་པ་རྣམས་ཤེས་པར་འདོད་ན་གནད་ཀྱི་ཟླ་ཟེར་དུ་བལྟ་བར་བྱ་ཞིང་། འདིར་ནི་བཤད་མ་ཐག་པའི་དགོས་པ་དེ་ཉིད་ཀྱིས་རྩོད་པ་མ་ལུས་པ་སྤངས་ཟིན་པ་ནི་གསུང་རབ་ཀྱི་གནད་དོ། །གཉིས་པ་བསྐུལ་ནས་འབྲས་བུ་རྡོ་རྗེ་འཛིན་པ་བཞེངས་པ་ནི། མི་ཐུབ་ཟླ་བས། བསྐུལ་བས་སྔོན་གྱི་བྱང་ཆུབ་ཀྱི། །སྨོན་ལམ་རྗེས་སུ་དྲན་ནས་ནི། །ཁུ་བའི་གཟུགས་ལས་བཞེངས་པ་ནི། །ཨྃ་དང་ཧཱུྃ་གཉིས་རྡོ་རྗེ་ཆེ། །ཞེས་དང་། རིན་ཆེན་འབར་བར། བསྐུལ་བས་སྨོན་ལམ་རྗེས་དྲན་ནས། །ཧཱུྃ་དང་ཨྃ་ལས་རབ་བཞེངས་པ། །ཞེས་དང་། རྗེ་བཙུན་ཆེན་པོས། ཐིག་ལེ་གཉིས་ལས་ཨྃ་དང་ཧཱུྃ་གཉིས་སུ་གྱུར། དེ་ལས་ཡབ་ཡུམ་གྱི་སྐུ་རྫོགས་པར་བསྐྱེད་དེ། ཞེས་གསུངས་པ་ནི་མངོན་བྱང་གི་ཡན་ལག་དྲུག་པ་རྣམས་དང་། ས་བོན་ལས་བསྐྱེད་པ་རྣམས་ཀྱི་བཞེངས་ཚུལ་ལོ། །མཉམ་སྦྱོར་གྱི་ཡན་ལག་བཞི་པ་གཉིས་དང་། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གྱི་ཡན་ལག་བཞི་པ་གཉིས་ཏེ། བཞི་པོ་ལ་ནི་ཐིག་ལེ་དེ་ཐིག་ལེ་ཆ་གསུམ་དུ་ཆད་དེ། འོག་གི་ཐིག་ལེ་ཨཱ་ལི་ལས་ཟླ་བ། སྟེང་གི་ཐིག་ལེ་ཀཱ་ལི་ལས་ཉི་མ། བར་གྱི་ཐིག་ལེ་ས་བོན་དང་ཕྱག་མཚན་དུ་གྱུར་པའི་མངོན་བྱང་ལྔ་ལས་བསྐྱེད་དོ། །ཨཱ་ལི་ཀཱ་ལི་སྤངས་པའི་མི་མཉམ་སྦྱོར་གྱི་མངོན་བྱང་གཉིས་ལ་ནི་འདིར་ཡང་ཉི་ཟླ་གཉིས་ཀྱི་རྒྱུ་ཨཱ་ལི་ཀཱ་ལི་སྤངས་བ་སྟེ། གཞན་འདྲའོ། །སྐད་ཅིག་གིས་བསྐྱེད་པ་ལ་ནི། ཐིག་ལེ་དེ་ཉིད་སྐད་ཅིག་གིས་འབྲས་བུ་རྡོ་རྗེ་འཛིན་པར་བཞེངས་པ་སྟེ། དེ་ལྟར་ན་མངོན་རྟོགས་ཚུལ་བཞི་ལ་འབྲས་བུ་རྡོ་རྗེ་འཛིན་པ་བཞེངས་ཚུལ་བཞིར་ངེས་ཤིང་། མཚོ་སྐྱེས་ཀྱི་ལུགས་ལ་ཡང་བཞིར་ངེས་ཏེ། རྗེ་ས་ཆེན་གྱིས། བཞི་གསུམ་བཅུ་གཉིས་བླ་མ་བཞེད། །ཅེས་པའི་དོན་ཏོ། །དེ་ལྟར་བསྐྱེད་པའི་ལྷའི་ཞལ་ཕྱག་དང་། རྣམ་པ་ཇི་ལྟ་བུ་ཞེ་ན། སྐུ་མདོག་ནི་ཐམས་ཅད་དུ་ནག་པོར་ངེས་ཤིང་། ཞལ་བརྒྱད་ནི་མགྲིན་པའི་སྟེང་དུ་རྩ་བའི་ཞལ་མདུན་དུ་བསྟན་པ་དང་། དེའི་གཡས་སུ་ཞལ་གསུམ་དང་། གཡོན་དུ་ཞལ་གསུམ་སྟེ། བདུན་པོ་ནི་སྙན་གྱི་རྩེ་མོ་ཕྲད་ཙམ་གྱིས་བསྐོར་ནས་གནས་པ་ཡིན་ལ། གཡས་གཡོན་གྱི་ཞལ་ཐ་མ་གཉིས་ཀྱི་རྩེ་མོ་མི་ཕྲད་པར་བར་དུ་ལྟག་པ་ཅུང་ཟད་དང་བཅས་པའོ། །དེའི་སྟེང་དུ་མགྲིན་པ་དང་བཅས་པའི་ཞལ་མདུན་དུ་གཟིགས་པ་སྟེ། ཞལ་བརྒྱད་དེ་ལྟར་ཡིན་ལ། འདི་ལ་ཁ་ཅིག་ཞལ་རྒྱབ་མ་བཞི་གནག་པ་ཞེས་དང་། གཡས་གཡོན་གྱི་ཞལ་ལྷག་མ་གཉིས་གཉིས་ཞེས་པའི་ཐ་སྙད་ཇི་ལྟར་བྱས་ཀྱང་རུང་ངོ་། །དེ་ལྟ་བུའི་ཞལ་བརྒྱད་པོ་རེ་རེ་ལ་ཡང་། དཔྲལ་བའི་སྟེང་དུ་མི་མགོ་སྐམ་པོ་ལྔ་ལྔའི་དབུ་རྒྱན་དང་། དེའི་སྟེང་དུ་རྩེ་ཕྲན་ལྔ་ལ་སངས་རྒྱས་ལྔ་བཞུགས་པའོ། །ཞལ་བདུན་གྱི་མདུན་ཕྱོགས་སུམ་གཉིས་ཙམ་སོ་སོར་གྱེས་ཤིང་། རྒྱབ་ཕྱོགས་ཀྱི་སུམ་ཆ་ཙམ་ཕྱོགས་གཅིག་འདུས་པའི་དབུས་སུ་སྟེང་ཞལ་ཡོད་པ་སྟེ། ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པའོ། །ཕྱག་བརྒྱད་ཀྱི་གྱེས་ཚུལ་ནི། ཁ་ཆེ་རིན་ཆེན་རྡོ་རྗེས། ཞལ་བཞི་པ་ལ་དཔུང་པ་བཞི། །ཕྱག་བཞི་པ་ལ་ཞབས་བཞི་པ། །རྟ་མགྲིན་རྒྱལ་པོ་ཆེན་པོ་སྟེ། །ཞེས་ཕྱག་བཞི་པ་ལ་དཔུང་པ་བཞི་ཡོད་པར་བཤད་པའི་རིགས་པས། འདིར་ཕྱག་བཅུ་དྲུག་པ་ལ་དཔུང་པའང་བཅུ་དྲུག་ཡོད་པར་འདོད་དགོས་ལ། དེ་ལས་གཞན་སོག་པ་སོགས་ཀྱི་རྣམ་གཞག་ནི་མི་དགོས་ཏེ། ལྷ་སྐུ་རང་གི་ངོ་བོ་ནི་ཡེ་ཤེས་ཀྱི་སྣང་བ་ལས་གྲུབ་པའི་ཞལ་ཕྱག་གི་རྣམ་པ་ཙམ་ཡིན་ལ། དེ་ཉིད་གདུལ་བྱའི་བློ་ངོར་བསྒོམས་པ་དང་། ལྡེར་སྐུ་སོགས་བཞེངས་པ་ལ་ནི་ཕྱི་རོལ་གྱི་གྱེས་ཚུལ་ཙམ་གྱིས་ཆོག་པའི་ཕྱིར་རོ། །ཕྱག་མཚན་འཛིན་ཚུལ་ནི་ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་ནས། དེ་དག་གི་ནང་དུ་སྲོག་ཆགས་བཅུ་དྲུག་གནས་ཏེ། གཡས་ཀྱི་གླང་པོ་ཆེ་ལ་སོགས་པ་བརྒྱད་ནི། སེམས་ཅན་གྱི་ནད་བརྒྱད་རང་ལ་བསྡུ་བ་མཚོན་པས་ཁ་ནང་ལ་བསྟན་ཏེ། རྡོ་རྗེ་གུར་ལས། མི་ཡི་འགྲོ་བ་དེ་ལྟ་བུ། །རབ་མཆོག་ནད་ཀྱིས་ཁྱབ་མཐོང་ནས། །སངས་རྒྱས་ལྔ་ནི་ཆེར་གྲགས་པ། །བདག་གི་ལུས་ལ་བསྡུ་བར་བྱ། །ཞེས་གསུངས་པས་སོ། །གཡོན་གྱི་སའི་ལྷ་ལ་སོགས་པ་བརྒྱད་ནི། དབང་ཕྱུག་བརྒྱད་སེམས་ཅན་ལ་སྩོལ་བ་མཚོན་པས་ཁ་ཕྱིར་བསྟན་ཏེ། གུར་ལས། ས་ནི་དང་པོ་ནོར་སྦྱིན་མཐར། །དབང་ཕྱུག་བརྒྱད་ནི་སྩོལ་བར་མཛད། །ཅེས་སོ། །རྩ་ཕྱག་གཉིས་ཀྱིས་ཡུམ་ལ་འཁྱུད་ཅིང་། ལྷག་མ་རྣམས་ནི་མདུན་ནས་རྒྱབ་ཏུ་རིམ་པ་བཞིན་བསྒྲིགས་ཏེ། ཕྱག་མཚན་རྣམས་ཅུང་ཟད་སྟེང་འོག་གི་ཚུལ་དུ་འཛིན་པའོ། །ཞབས་གཡས་གཡོན་དུ་གཉིས་གཉིས་མདུན་རྒྱབ་ཏུ་བསྒྲིགས་པའི་གཡས་གཉིས་བརྐྱང་བའི་བརླ་ལ་གཡོན་གཉིས་བསྐུམ་པའི་སོར་མོ་གཏད་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ་ནི་མན་ངག་ལུགས་དང་། མཚོ་སྐྱེས་ལུགས་གཉིས་ཀྱི་བཞུགས་ཚུལ་ཡིན་ཏེ། རྗེ་བཙུན་རྩེ་མོས། མཚོ་སྐྱེས་ལུགས་ཀྱི་དཀྱིལ་ཆོག་ལས། ཚིག་འདི་དངོས་སུ་གསུངས་ཤིང་། མན་ངག་ལུགས་ཀྱི་གཞུང་རྣམས་ལས་ཀྱང་། སྐབས་འགའ་ཞིག་ཏུ་གཡས་བརྐྱང་ཞེས་པ་ཙམ་དང་། འགའ་ཞིག་ཏུ་སྐྱིལ་ཀྲུང་ཕྱེད་པ་ཞེས་པ་ཙམ་ལས་མ་གསུངས་ཀྱང་། མཚོ་སྐྱེས་ཀྱི་སྒྲུབ་ཐབས་དང་། མན་ངག་ལུགས་ཀྱི་ཡན་ལག་བཞི་དྲུག་གཉིས་ཆར་དུ་བདུད་བཞི་བརྩེགས་གདན་འབའ་ཞིག་གསུངས་པས། བཞུགས་ཚུལ་འདི་ལས་མ་འདས་པའི་ཕྱིར་རོ། །གལ་ཏེ་རྗེ་བཙུན་རྩེ་མོས། ཞབས་གཡས་བརྐྱང་བ་དང་། གཡོན་བསྐུམ་པ་དང་། སྐྱིལ་ཀྲུང་ཕྱེད་པའི་དག་པ་གསུམ་སོ་སོར་གསུངས་པས། མདུན་མ་གཉིས་གཡས་བརྐྱང་ཞིང་གཡོན་བསྐུམ་པ་དང་། རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་བསྟན་ནོ་སྙམ་ན། དེ་ནི་མ་ཡིན་ཏེ། སྐྱིལ་ཀྲུང་ཕྱེད་པ་དེ་ཉིད་ལ་གཡས་བརྐྱང་གཡོན་བསྐུམ་ཚང་བས། དེའི་དག་པ་སྟོན་པ་ཡིན་པའི་ཕྱིར་ཏེ། མཚོ་སྐྱེས་ཀྱི་འགྲེལ་པར། དེ་དག་ཀྱང་མཉམ་པར་བརྩེགས་པའི་སྙིང་གར་ཞབས་གཡས་པ་གཉིས་ཀྱིས་མནན་པའོ། །རོལ་མོའི་ཚུལ་ནི་སྐྱིལ་ཀྲུང་ཕྱེད་པའོ། །དེའི་གཡས་བརྐྱངས་པ་ནི་ཐུགས་རྗེས་སེམས་ཅན་ལ་ཁྱབ་པའོ། །གཡོན་བསྐུམ་པ་ནི་ཤེས་རབ་ཀྱིས་ཆོས་གང་ཡང་མི་འཛིན་པར་བཏང་བའོ། །ཞེས་གསལ་བར་གསུངས་པས་སོ། །གཞན་དུ་ན་འཁོར་ལོ་བདེ་མཆོག་ལ་རྡོ་རྗེ་དང་དྲིལ་བུ་འཛིན་པའི་ཕྱག་གཉིས་ལས་གཞན་པ་གཉིས་ཀྱིས་ཡུམ་ལ་འཁྱུད་པ་དགོས་པར་འགྱུར་ཏེ། རྗེ་བཙུན་གྱིས་རྡོ་རྗེ་འཛིན་པ་དང་། དྲིལ་བུ་འཛིན་པ་དང་། ཡུམ་ལ་འཁྱུད་པའི་དག་པ་གསུམ་སོ་སོར་གསུངས་པའི་ཕྱིར་རོ། །འགྲེལ་པ་ལུགས་ཀྱི་གཞུང་གཞན་རྣམས་ལས། གཡས་བརྐྱང་ཞེས་པ་ཙམ་དང་། སྐྱིལ་ཀྲུང་ཕྱེད་པ་ཞེས་པ་ཙམ་ལས་གསལ་ཁ་མི་སྣང་ཡང་། རིན་ཆེན་འབར་བར། ཉི་མར་ཞབས་གཡས་བརྐྱང་གཡོན་བསྐུམ། །ལྷག་མ་གར་གྱི་ཚུལ་གྱིས་བཞེངས། །ཞེས་གསུངས་པའི་དོན་ནི། མདུན་མ་གཉིས་གཡས་བརྐྱང་གཡོན་བསྐུམ་རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་ཡིན་པར་མངོན་ཏེ། རྗེ་བཙུན་ཆེན་པོས་མཛད་པའི་གདན་གྱི་རྣམ་དག་ལས། གཙོ་བོའི་ཞབས་ཕྱེད་ཀྲུང་དུ་བཞུགས་པས། ཚངས་པའི་སྙིང་ག་ནས་མནན་པ་དང་། ཞབས་གཡས་བརྐྱང་བས་དབང་ཕྱུག་ཆེན་པོའི་སྙིང་ག་ནས་མནན་པ་དང་། གཡོན་བསྐུམ་པས་གཞན་འཕྲུལ་དབང་བྱེད་ཀྱི་བདུད་སྡིག་ཅན་གྱི་སྙིང་ག་ནས་མནན་པ་དང་། ཡུམ་གྱི་ཞབས་གཡོན་པས་བརྒྱ་བྱིན་གྱི་སྙིང་ག་ནས་མནན་པར་གསུངས་པ་ཡང་། འདི་ལ་དགོངས་པར་སྣང་བས། བདུད་བཞི་བཀྲམ་གདན་གྱི་ཚེ་ཡབ་ཀྱི་ཞབས་བརྐྱངས་པ་གསུམ་དང་། ཡུམ་གྱི་ཞབས་བརྐྱངས་པ་གཅིག་གིས་བདུད་བཞི་སོ་སོར་མནན་ནས་བསྐུམ་པ་གཉིས་ཀྱིས་མནན་རྒྱུ་མེད་པ་བྱ་དགོས་པར་སྣང་ངོ་། །མདོར་ན་གསུངས་ཚུལ་སོ་སོར་གསུངས་པ་ཙམ་མ་གཏོགས། སྦྱར་ཚུལ་གང་ལ་སྦྱར་ཡང་དག་པ་རེ་སྦྱར་རྒྱུ་ཡོད་པས། འགལ་བ་མེད་པ་འདྲའོ། །རྒྱན་ཆ་ལ་རྗེ་བཙུན་གྱིས་བསྟོད་པ་ལས། སྟག་ལྤགས་དང་ནི་མིའི་པགས་པས་སྣམ་དཀྲིས་ཞེས་གསུངས་པ་ནི། སྔོན་བྱུང་གི་རྣམ་འཕྲུལ་ཙམ་ལ་དགོངས་ལ། འདིར་ནི་མི་མགོ་རློན་པའི་དོ་ཤལ་དང་། རུས་པའི་རྒྱན་དྲུག་ལས་གཞན་པའི་རྒྱན་མི་དགོས་སོ། །འདིར་རྩ་རྒྱུད་ལས། སྒེག་པ་དཔའ་བ་མི་སྡུག་པ། །དགོད་པ་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་རོ་དང་ལྡན་པ་ཉིད། །ཅེས་གསུངས་པའི་དོན་རྗེ་བཙུན་རིན་པོ་ཆེས། ཉམས་དགུ་ལ་བཤད་པ་བསམ་ཀྱིས་མི་ཁྱབ་པ་ཅིག་བྱུང་ཡང་། སྐབས་འདི་བདག་གི་བླ་མ་འདི་ཙམ་ཞིག་གསུང་སྟེ། སྒེག་ཅིང་དཔའ་བ་མི་སྡུག་པ་ནི་སྐུའི་ཉམས་གསུམ་སྟེ། དེའང་སྒེག་པ་ནི་རྒྱན་སྣ་ཚོགས་དང་། བཞུགས་ཚུལ་དུ་མ་སྟེ། དེའང་སྐུ་ལྟ་བས་ཆོག་མི་ཤེས་པ་དང་ལྡན་པས་གདུལ་བྱ་འདོད་ཆགས་ཅན་འདུལ་བར་བྱེད་པ་ཡིན་ནོ། །དཔའ་བ་ནི་བདུད་བཞི་མཉམ་པར་མནན་ནས་སྐུ་ཆེ་ཞིང་བརྗིད་པ་སྟེ། ཞེ་སྡང་ཅན་འདུལ་བ་ཡིན་ནོ། །མི་སྡུག་པ་ནི་གཏི་མུག་ཅན་ལ་བྱེ་བྲག་ཏུ་སྣང་བ་སྟེ། ཞལ་སྨིན་མ་དང་དཔྲལ་བར་བསྡུས་ཤིང་། རྣམ་འགྱུར་དུ་མ་དང་ལྡན་པ་སྟེ། གཏི་མུག་ཅན་འདུལ་བར་བྱེད་པ་ཡིན་ནོ། །དགོད་ཅིང་དྲག་ཤུལ་འཇིགས་སུ་རུང་ནི་གསུང་གི་ཉམས་གསུམ་སྟེ། དེ་ལ་དགོད་པ་ནི་རབ་ཏུ་དགའ་ཞིང་། ཆགས་པའི་བཞད་པའི་སྒྲས་འདོད་ཆགས་ཅན་འདུལ་ལ། ཧཱུྃ་དང་ཕཊ་ལ་སོགས་པ་དྲག་ཤུལ་གྱི་ང་རོས་ཞེ་སྡང་ཅན་འདུལ་ཞིང་། འཇིགས་སུ་རུང་བ་ནི་རྟག་པ་དང་། ཆད་པར་འཛིན་པ་རྣམས་འཇིགས་པར་བྱེད་པའི་སྒྲ་སྟེ། སྟོང་པ་དང་ཟུང་དུ་འཇུག་པའི་གསུང་ཡིན་ནོ། །སྙིང་རྗེ་རྔམ་དང་ཞི་བ་ནི་ཐུགས་ཀྱི་ཉམས་གསུམ་སྟེ། སྙིང་རྗེ་ནི་སེམས་ཅན་ཐམས་ཅད་ལ་རྗེས་སུ་འཛིན་པར་བཞེད་དེ། འདོད་ཆགས་ཅན་འདུལ་ལ། རྔམ་པ་ནི་བྱམས་པ་ཆེན་པོས་རབ་ཏུ་ཁྲོ་བར་མཛད་པ་ནི། ཞེ་སྡང་ཅན་འདུལ་ཞིང་། ཟུང་དུ་འཇུག་པ་ཞི་བ་ཆེན་པོའི་ཐུགས་ཀྱིས་ལོག་པར་ལྟ་བ་དང་ལྡན་པའི་གཏི་མུག་ཅན་འདུལ་བར་བྱེད་པ་ཡིན་ནོ། །གསུམ་པ་བཞེངས་ནས་སྣོད་བཅུད་སྦྱང་བ་ལ་གཉིས་ཏེ། སེམས་དཔའ་སུམ་བརྩེགས་བསྒོམ་པ། དེས་སྣོད་བཅུད་སྦྱང་བའོ། །དང་པོ་ནི། སློབ་དཔོན་མི་ཐུབ་ཟླ་བའི་གཞུང་རྣམས་དང་། རིན་ཆེན་འབར་བར། གཙོ་འཁོར་ཐམས་ཅད་ཀྱི་ཐུགས་ཀར་རང་རང་གི་ས་བོན་དང་། ཕྱག་མཚན་ལས་རང་འདྲའི་ཡེ་ཤེས་སེམས་དཔའ་བསྐྱེད། དེའི་ཐུགས་ཀར་ཏིང་ངེ་འཛིན་སེམས་དཔའ་ས་བོན་ལས་ཕྱག་མཚན་གྱིས་མཚན་པ་བསྒོམ་པར་གསུངས་པ་ནི་རྒྱས་པའི་ལུགས་སོ། །གཉིས་མེད་རྡོ་རྗེ་དང་། མར་མེ་མཛད་སོགས་ཀྱིས། གཙོ་འཁོར་ཐམས་ཅད་ཀྱི་ཐུགས་ཀར་རང་རང་གི་ས་བོན་ལས་ཕྱག་མཚན་བསྒོམས་པའི་སྟེང་དུ། རང་རང་གི་ས་བོན་བསྒོམ་པ་ནི་འབྲིང་པོའི་ལུགས་སོ། །གྲུབ་ཆེན་མཚོ་སྐྱེས་ཀྱིས་ས་བོན་རྐྱང་པ་བསྒོམ་པར་གསུངས་ལ། ས་བོན་གྱི་ངོ་བོ་ནི་ཡེ་ཤེས་སེམས་དཔའ་དང་། དེའི་ཐིག་ལེ་ནི་ཏིང་ངེ་འཛིན་སེམས་དཔའ་བཤད་པས། སེམས་དཔའ་སུམ་བརྩེགས་བསྡུས་པའི་དབང་དུ་བྱས་པའོ། །འདི་རྣམས་ཀྱི་དོན་མ་གོ་བར་སྔགས་རིམ་མཁན་པོས་མི་ཐུབ་ཟླ་བ་སོགས་ཀྱི་རྒྱ་གཞུང་རྣམས་ནས་སེམས་དཔའ་སུམ་བརྩེགས་བཤད་བཞིན་དུ། རྗེ་བཙུན་ས་སྐྱ་པ་རྣམས་ཀྱིས་ས་བོན་འགོད་པ་ཙམ་ལས་མ་བཤད་པས། ནོར་བའི་རྣམ་གཞག་ཤིན་ཏུ་ཆེའོ་ཞེས་འཆད་པ་ནི། མ་བརྟགས་པ་ཁོ་ན་ཡིན་ཏེ། རྗེ་བཙུན་གྱིས། ཐུགས་ཀར་པདྨ་དང་ཉི་མའི་སྟེང་དུ། ཨྃ་ལས་གྲི་གུག་ཨྃ་གིས་མཚན་པ་ཙམ་མམ། ཡང་ན་རྗེ་བཙུན་མའི་སྐུ་མཚོན་གང་བ་ཅིག་གི་ཐུགས་ཀར་ཕྱག་མཚན་ས་བོན་གྱིས་མཚན་པ་བསྒོམས་ལ། སེམས་དཔའ་སུམ་བརྩེགས་སུ་བསྒོམས་པ་སྟེ། དེ་གཉིས་གང་རུང་ཅིག་བྱའོ། །ཞེས་སེམས་དཔའ་སུམ་བརྩེགས་རྒྱས་པ་དང་། བར་མ་བསྒོམ་པའི་ཚུལ་བཤད་ཅིང་རྗེ་བཙུན་རྩེ་མོས། ལྷ་དགུའི་ཐུགས་ཀར་ཉི་ཟླ་ཁ་སྦྱོར་གྱི་བར་དུ་རང་རང་གི་ས་བོན་བསམས་ལ། ཡབ་ཀྱི་ཐུགས་ཀར་ཉི་མའི་སྟེང་དུ་ཧཱུྃ། འཁོར་རྣམས་ཀྱི་ཟླ་བའི་སྟེང་དུ་རང་རང་གི་ས་བོན་ནོ། །ཞེས་བསྡུས་པའི་ཚུལ་གསལ་བར་གསུངས་པའི་ཕྱིར་རོ། །གལ་ཏེ་སེམས་དཔའ་གསུམ་དངོས་སུ་བཤད་པ་རྣམས་དེ་ལྟར་ཡིན་མོད། ས་བོན་ཐིག་ལེས་བརྒྱན་པ་ལ་སེམས་དཔའ་ཐ་མ་གཉིས་ཀྱི་དོན་ཚང་བར་གཞུང་གང་ནས་ཀྱང་བཤད་པ་མེད་དོ་ཞེ་ན། འདི་ནི་ཤིན་ཏུ་མི་འཐད་དེ། དཔལ་གསང་བ་འདུས་པའི་འགྲེལ་པ་སྒྲོན་མ་གསལ་བར། དེས་ན་ཁམས་གསུམ་པའི་དམ་ཚིག་སེམས་དཔའི་སྙིང་གར་ཡི་གེ་ཧཱུྃ། ཡེ་ཤེས་སེམས་དཔའ་བསྒོམས་ནས། སེམས་ནི་ཐིག་ལེར་གྱུར་པར་བཞག །ཅེས་བྱ་བའི་དམ་ཚིག་སེམས་དཔའི་སྙིང་གར་གནས་པའི་ཡེ་ཤེས་སེམས་དཔའ་ཞེས་གྲགས་པ་ལ། རང་གི་སེམས་ཐིག་ལེར་གྱུར་བའི་ཏིང་ངེ་འཛིན་གྱི་སེམས་དཔའི་གཟུགས་ཅན་གཞག་གོ །ཞེས་གསུངས་པ་དང་འགལ་བའི་ཕྱིར་རོ། །གཉིས་པ་ནི། གྲུབ་ཆེན་མཚོ་སྐྱེས་ཀྱིས། རང་གི་སྙིང་གར་ཉི་མ་ལ་གནས་པའི་ས་བོན་ལས་འོད་ཟེར་བྱུང་སྟེ། འོད་ཟེར་དེ་རྣམས་ཀྱིས་ཀྱང་ཁམས་གསུམ་ཐམས་ཅད་མངོན་པར་ཁྱབ་པར་བྱས་ནས་ཡི་གེ་དེ་ཉིད་ལ་ཞུགས་སོ་ཞེས་དང་། མར་མེ་མཛད་ཀྱིས། དེ་ཡི་ས་བོན་ཕྱོགས་བཅུར་སྤྲོས། །བསྐུལ་སྦྱངས་ས་བོན་སོ་སོར་ཐིམ། །ཞེས་པ་ལས། རྒྱ་གར་བའི་གཞུང་གཞན་རྣམས་ལ་སྣོད་བཅུད་སྦྱང་བ་མི་གསལ་ཡང་། རྗེ་བཙུན་སྐུ་མཆེད་གཉིས་ཆར་གྱིས་གསུངས་ཤིང་། ཇི་ལྟར་བྱ་བའི་ཚུལ་ཡང་། རྗེ་བཙུན་རྩེ་མོས། ད་ནས་དབུགས་ཕྱིར་རྒྱུ་བའི་དུས་སུ་འོད་ཟེར་གྱི་ཚོགས་དཔག་ཏུ་མེད་པ་སྤྲོས་པས་སྣོད་ཀྱི་འཇིག་རྟེན་ལ་ཕོག་པས། དེ་མ་ཐག་ཏུ་གཞལ་ཡས་ཁང་དཔག་ཏུ་མེད་པར་འགྱུར། ཡང་འོད་ཟེར་སླར་འདུས་ནས་རང་གི་ས་བོན་ལ་ཐིམ། དེ་ཙམ་གྱིས་ནི་གཞན་དམ་ཚིག་སེམས་དཔའ་ལ་འགོད་པ་ཞེས་ཀྱང་བྱའོ། །ཞེས་གསུང་པ་ལྟར་ཡིན་ནོ། །འོད་ཟེར་དེ་གང་ལས་སྤྲོ་ན་རྗེ་བཙུན་རྩེ་མོས། དེ་ཡང་ལྷ་དགུའི་ཆོ་ག་ཡིས། །རང་རང་ས་བོན་ལས་འོད་སྤྲོ། །ཞེས་དང་། རྗེ་བཙུན་གྱིས་བཅོམ་ལྡན་འདས་དང་། ལྷ་མོ་རྣམས་ཀྱི་ས་བོན་ལས་འོད་འཕྲོས་པས་ཞེས་གསུངས་པས། གཙོ་འཁོར་ཐམས་ཅད་ཀྱི་ཐུགས་ཀ་ནས་སྤྲོ་བ་ཡིན་ནོ། །འདིར་སྣོད་བཅུད་སྦྱང་བ་དང་། འདུས་པ་འཕགས་ལུགས་ལས་ལྷག་མོས་ཀྱིས་མཛད་པ་གསུངས་པ་དང་། ཡེ་ཤེས་ཞབས་ལུགས་པས། འགྲོ་བ་དབང་བསྐུར་གསུངས་པ་རྣམས་བསྐྱེད་རིམ་གྱི་སྒྲུབ་ཐབས་གཅིག་གི་ནང་དུ་མ་དག་པའི་སྣོད་བཅུད་སྦྱངས་ནས། སངས་རྒྱས་ཀྱི་ཞིང་རྣམ་པར་དག་པ་བསྒྲུབ་པའི་དམིགས་པ་ཚང་བའི་དོན་དུ་གཅིག་པར་རྗེ་བླ་མ་ཐམས་ཅད་མཁྱེན་པ་གསུང་ངོ་། །གཉིས་པ་མིག་སོགས་བྱིན་གྱིས་བརླབ་པ་ལ་བཞི་སྟེ། གང་ལ་འགོད་པའི་གཞི། དེ་ལ་བཀོད་པའི་ལྷ། ཅི་ཙམ་ཞིག་བཀོད་པའི་གྲངས། དེ་ལྷར་བཀོད་པའི་དགོས་པའོ། །དང་པོ་ནི། འགྲེལ་པ་ལུགས་ཀྱི་གཞུང་རྣམས་དང་། གྲུབ་ཆེན་མཚོ་སྐྱེས་ཀྱིས་དམ་ཚིག་གི་དཀྱིལ་འཁོར་ལ་ཡེ་ཤེས་ཀྱི་འཁོར་ལོ་བཅུག་པའི་རྗེས་ལ་སྐྱེ་མཆེད་ཀྱི་ལྷ་འགོད་པར་བཤད་པས། དེ་ལྟར་ན་ཡེ་ཤེས་པ་དང་། དམ་ཚིག་པ་དབྱེར་མེད་དུ་བྱས་པའི་དཀྱིལ་འཁོར་ལ་འགོད་པའོ། །ནག་པོ་པ་ལྟར་ན། གཙོ་བོ་ཡབ་ཡུམ་བསྐྱེད་ཚར་བའི་རྗེས་ལ་སྐྱེ་མཆེད་ཀྱི་ལྷ་རྣམས་བཀོད་ནས། འཁོར་གི་ལྷ་མོ་ཕྱུང་ཚར་བའི་རྗེས་ལ་མ་བཤད་པའི་ཕྱིར། གཙོ་བོ་ཡབ་ཡུམ་ཙམ་ཞིག་ལ་འགོད་པར་གསལ་ལོ། །རྗེ་ས་ཆེན་ཡབ་སྲས་ཀྱིས་མཚོ་སྐྱེས་འགྲེལ་པར། ཡེ་ཤེས་པ་བཀུག་པའི་རྗེས་ལ་སྐྱེ་མཆེད་བྱིན་གྱིས་རློབ་པར་འདོད་པ་བཀག་ནས། རང་ལུགས་རྫོགས་རིམ་བསྒོམས་ཚར་བའི་རྗེས་ལ་སྐྱེ་མཆེད་བྱིན་གྱིས་རློབ་པར་བཤད་དེ། འགྲེལ་པར། མདའ་གཅིག་ཤ་གཉིས་ཚུལ་གྱིས་ནི། །ཞེས་མདའ་གཅིག་གིས་ཤ་བ་གཉིས་གསོད་པ་ལྟར། སྐབས་འདིར་འགོད་པ་ནི། ཡན་ལག་བཞིའི་སྐྱེ་མཆེད་བྱིན་རླབས་དང་། རྣམ་དག་གཉིས་ཀ་དུས་གཅིག་ལ་འགྲུབ་པའི་དབང་དུ་བྱས་ནས། སྐབས་འདིར་བྱིན་གྱིས་རློབ་པ་སྟེ། དེ་ལྟར་ན་ཡན་ལག་གསུམ་རྫོགས་པའི་ལྷ་ལ་འགོད་པའོ། །རྗེ་བཙུན་གྱིས་ཡན་ལག་དྲུག་པར་སྐྱེ་མཆེད་བྱིན་གྱིས་བརླབས་ནས། ཡེ་ཤེས་པ་སྤྱན་འདྲེན་པར་གསུངས་པས། དེ་ལྟར་ན་དམ་ཚིག་གི་དཀྱིལ་འཁོར་ཁོ་ན་ལ་འགོད་པ་སྟེ། རྩ་རྒྱུད་ལས། གཉིས་པ་ལ་ནི་ས་བོན་བསྡུ། །ཞེས་དང་། གསང་བ་འདུས་པའི་ལེའུ་བཅུ་གཉིས་པ་ལས། ཉེ་བར་སྒྲུབ་པ་གྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་དཔྱད། །ཅེས་གསུངས་པའི་དོན་དུ་མཛད་པའོ། །གཉིས་པ་ནི། རྒྱ་གར་བའི་སྒྲུབ་ཐབས་ཕལ་ཆེར་དང་། རྗེ་བཙུན་སྐུ་མཆེད་གཉིས་ཀྱིས་སྐྱེ་མཆེད་དྲུག་དང་། སྐུ་གསུང་ཐུགས་ཀྱི་ལྷ་མོ་གསུམ་སྟེ། དགུ་འགོད་པར་གསུངས་པ་འདི་ཉིད་གཙོ་བོར་བྱའོ། །དེ་རྣམས་ཞལ་གཅིག་ཕྱག་གཉིས་པ་ལ་མི་མཐུན་པ་མེད་ཅིང་ཁ་དོག་ནི་ཉིན་འབྱུང་ཟླ་བས་ནག་པོ་འབའ་ཞིག་ཏུ་བཤད་ཀྱང་། རྗེ་བཙུན་སྐུ་མཆེད་ཀྱིས་གཏི་མུག་རྡོ་རྗེ་མ་དཀར་མོ། ཞེ་སྡང་རྡོ་རྗེ་མ་སྔོན་མོ་སོགས་སུ་བཤད་པ་ལྟར་རོ། །ཕྱག་མཚན་ནི་རྗེ་བཙུན་སྐུ་མཆེད་ཀྱིས་གཡས་གྲི་གུག གཡོན་ཐོད་པ། གྲུ་མོ་ན་ཁ་ཊྭཱཾ་ག་འཛིན་པ་དང་། རྒྱན་ཆ་ནི་ཕྱག་རྒྱ་ལྔས་བརྒྱན་པ་དང་། གདན་ནི་པད་ཉི་དང་རོ་གདན་དུ་གསུངས་པ་ལྟར་རོ། །བསྒོམ་ཚུལ་ནི། རྗེ་བཙུན་རྩེ་མོས་མིག་ལ་སོགས་པ་སྐྱེ་མཆེད་ཐ་མལ་པ་རྣམས་སྟོང་པར་བསམས་ཏེ། དེར་པྃ་ལས་པདྨ་དང་། རྃ་ལས་ཉི་མའི་སྟེང་དུ་རོ་རེ་བསམས་ཏེ། ཞེས་བཤད་པ་ནི་གདོང་དྲུག་གི་རྒྱུད་ལས། མིག་སོགས་བྱིན་གྱིས་བརླབ་པ་ལ། །གཏི་མུག་རྡོ་རྗེ་སོགས་ཀྱིས་བསྲུང་། །དབང་སྦུབས་སྟོང་པ་ཉིད་བྱ་སྟེ། །སྙིང་པོའམ་མིང་གི་ཡི་གེ་ཡིས། །རིགས་ཀྱི་ཕྱག་མཚན་ལྡན་པ་ཡི། །སྐུ་རྣམས་ངེས་པར་བསྐྱེད་པའོ། །ཞེས་གསུང་པ་དང་མཐུན་པས། མིག་སོགས་ཐ་མལ་གྱི་སྐྱེ་མཆེད་རྣམས་སྟོང་པར་བསྒོམས་ནས། དེར་ས་བོན་སོགས་ལས་ལྷ་བསྐྱེད་པ་ཡིན་གྱི། དབང་རྟེན་ཉིད་ལྷར་བསྒོམ་པ་མ་ཡིན་པས། ལུས་དཀྱིལ་དང་། སྐྱེ་མཆེད་ཀྱི་ལྷའི་བསྒོམ་ཚུལ་གྱི་ཁྱད་པར་རྒྱུ་མཚན་དང་བཅས་པའང་ཤེས་དགོས་སོ། །གསུམ་པ་ནི། མི་ཐུབ་ཟླ་བས་བདག་མེད་མར་སྒྲུབ་ཐབས་ལས། གཏི་མུག་རྡོ་རྗེ་མིག་གཉིས་སུ། །ཞེས་དང་། ཡབ་ཀྱི་སྒྲུབ་ཐབས་ལས། མིག་གཉིས་ཞེས་དང་། རྣ་བ་གཉིས་ཞེས་བཤད་པ་དང་། བདུད་རྩི་འོད་ལས། མིག་དག་གཏི་མུག་རྡོ་རྗེ་ཡིན། །ཞེས་གསུངས་པས། གཙོ་བོའི་རྩ་ཞལ་གྱི་སྤྱན་གཉིས་དང་། སྙན་གཉིས་དང་། འཁོར་རྣམས་ཀྱི་ཡང་སྤྱན་གཉིས་དང་། སྙན་གཉིས་ལ་འགོད་པ་ཡིན་གྱི། སྤྱན་དབུས་མ་དང་། གཙོ་བོའི་ཞལ་ལྷག་མ་རྣམས་ལ་མི་འགོད་དེ། སྔར་གྱི་ལུང་དེ་རྣམས་ལས་མིག་གཉིས་ཞེས་སོགས་དམིགས་བསལ་དུ་འབྱུང་བའི་ཕྱིར་རོ། །དེའི་རྒྱུ་མཚན་ཡང་འོག་ནས་འཆད་པའི་དགོས་པ་གསུམ་གྱིས་ཐ་མལ་གྱི་རྣམ་རྟོག་བཟློག་པ་ཡང་། སྦྱང་གཞི་ཉིད་ལ་དགོས་པ་ཡིན་གྱི། གཞན་ལ་མི་དགོས་པ་དང་། མངོན་ཤེས་ལྔ་འཆར་བ་ཡང་སྦྱང་གཞི་ཉིད་ལ་འཆར་བ་དང་། བར་ཆད་ཀྱི་བགེགས་ལས་བསྲུང་བ་ཡང་སྦྱང་གཞི་ཉིད་བསྲུང་དགོས་པ་རྒྱུ་མཚན་དུ་བྱས་ནས། གཙོ་བོའི་སྦྱང་གཞི་ཉིད་ལ་འགོད་ལ། དེའི་འགྲོས་ཀྱིས་འཁོར་གྱི་ལྷ་རྣམས་ལ་ཡང་དེ་ལྟར་དུ་སྦྱར་བའོ། །བཞི་པ་ནི། རྗེ་བཙུན་རྩེ་མོས། དེ་ལྟར་གོ་ཆ་བགོས་པ་ལ། །དགོས་པ་རྣམ་པ་གསུམ་གསུངས་ཏེ། །ཐ་མལ་རྣམ་རྟོག་བློ་བཟློག་དང་། །མངོན་པར་ཤེས་པ་ལྔ་འཆར་དང་། །བར་ཆད་བགེགས་ལས་བསྲུང་བ་སྟེ། །དེ་ལས་དང་པོ་རྣམ་པ་གཉིས། །གུར་གྱི་ལུང་ཡིན་ཐ་མ་ནི། །བླ་མ་དམ་པའི་གདམས་ངག་ཡིན། །ཞེས་གསུངས་ལ། དེའི་དོན་དང་པོ་ནི། རྡོ་རྗེ་གུར་ལས། བསྐྱེད་རིམ་གྱིས་ཐ་མལ་གྱི་རྣམ་རྟོག་བཟློག་པར་གསུང་པ་ལྟར་འདིར་མིག་སོགས་ལ་ལྷ་བཀོད་པས་མིག་སོགས་ཐ་མལ་གྱི་དབང་པོར་ཞེན་པ་བཟློག་པ་ཡིན་ནོ། །གཉིས་པ་ནི། གུར་ལས། སྐྱེས་པ་དང་ནི་སྐྱེ་བ་དང་། །སྐྱེ་བོ་གང་ཞིག་སྐྱེ་འགྱུར་བ། །གཏི་མུག་རྡོ་རྗེའི་སྦྱོར་བ་ལས། །རྡོ་རྗེའི་མིག་གིས་མཐོང་བར་འགྱུར། །ཁམས་གསུམ་ལམ་ནི་ཉམས་དགའ་བར། །སྒྲ་ནི་གང་ཞིག་རབ་གྲགས་པར། །རྣ་བའི་དྲུང་དུ་གནས་པ་བཞིན། །ཞེ་སྡང་རྡོ་རྗེའི་སྦྱོར་བ་ལ། །དྲང་སྲོང་མངོན་པར་ཤེས་པས་ཐོས། །སེམས་ཅན་ཀུན་གྱི་སེམས་ཆེན་པོ། །མཚོན་དཀའ་ལྟ་བུའི་མཚན་ཉིད་ནི། །ལག་མཐིལ་སྐྱུ་རུ་ར་ལྔ་བཞིན། །རྡོ་རྗེ་སེམས་ཀྱིས་ཤེས་པར་འགྱུར། །སྐྱེ་བ་བྱེ་བ་སྟོང་ཕྲག་ཏུ། །རང་གི་རིགས་ནི་སྟོང་ཕྲག་གཅིག །རྡོ་རྗེ་སྦྱོར་བས་དྲན་གྱུར་ཏེ། །ཉི་མ་གསུམ་བཞིན་དྲན་པར་འགྱུར། །སྒྱུ་འཕྲུལ་དྲྭ་བ་དུ་མ་ཡི། །འདིས་ནི་སྣང་བར་བྱེད་པར་འགྱུར། །མངོན་ཤེས་ལྔ་ཡི་སྦྱོར་བ་ཡིས། །སངས་རྒྱས་མངོན་ཤེས་ཐོབ་པར་འགྱུར། །ཞེས་གསུངས་པས། གཏི་མུག་རྡོ་རྗེ་མ་དང་། ཞེ་སྡང་རྡོ་རྗེ་མ་གཉིས་བསྒོམས་པས་ལྷའི་མིག་དང་རྣ་བའི་མངོན་པར་ཤེས་པ་ཐོབ། བར་མ་གསུམ་གྱིས་རྫུ་འཕྲུལ་གྱི་མངོན་པར་ཤེས་པ་ཐོབ་པ་དེ་རྣལ་འབྱོར་པས་གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་དང་། འཆི་འཕོ་བ་དང་སྐྱེ་བ་ཤེས་པ་ཐོབ། ལྷའི་མིག་དང་། རྣ་བ་གཉིས་མངོན་ཤེས་གཅིག་ཏུ་བྱས་པའི་མངོན་ཤེས་ལྔ་ལ་བརྟེན་ནས། དྲུག་པ་ཟག་མེད་ཀྱི་མངོན་ཤེས་ཐོབ་པར་འགྱུར་ཏེ། ཀཾ་པ་ལས། མིག་ལ་སོགས་པའི་དབང་པོ་དྲུག །མངོན་ཤེས་བསྐྱེད་ཕྱིར་སྦྱང་བར་བྱ། །ཞེས་སོ། །གསུམ་པ་ནི། རྩ་རྒྱུད་དུ། འདིས་ནི་གོ་ཆ་སེམས་དཔའ་ཆེ། །ཞེས་འདི་རྣམས་གོ་ཆར་གསུངས་ལ། གོ་ཆས་བར་ཆད་བསྲུང་བ་ཆོས་ཉིད་ཡིན་ཏེ། གསང་འདུས་སྒྲོན་གསལ་ལས། མིག་བྱང་ཆུབ་སེམས་དཔའ་སའི་སྙིང་པོ་སོགས་སུ་བསྒོམས་པས་བརྒྱ་བྱིན་ལ་སོགས་པ་བགེགས་ཀྱིས་མི་ཚུགས་པར་བཤད་པ་ལྟ་བུའོ། །གསུམ་པ་ཡེ་ཤེས་ཀྱི་འཁོར་ལོ་དགུག་གཞུག་ལ་གཉིས་ཏེ། དངོས་དང་། ཞར་ལས་དེའི་དགོས་པའོ། །དང་པོ་ནི། རང་གི་སྙིང་གའི་ཧཱུྃ་ལས་འོད་འཕྲོས་པས་ཡེ་ཤེས་ཀྱི་དཀྱིལ་འཁོར་ལྷ་དགུའི་རྣམ་པར་སྤྱན་དྲངས། ལྷ་མོ་བརྒྱད་ཀྱིས་མཆོད། འོག་ནས་འབྱུང་བའི་བསྟོད་པས་བསྟོད། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿཞེས་བརྗོད་པས་ལྷ་མོ་གཽ་རཱི་ནག་མོ་ལྕགས་ཀྱུ་ཐོགས་པས་སྲུང་བའི་འཁོར་ལོའི་ནང་དུ་སྤྱན་དྲངས། ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ་ཞེས་བརྗོད་པས་ཙཽ་རཱི་དམར་མོ་ཞགས་པ་ཐོགས་པས། མགྲིན་པ་ལ་རེག་པས་ཡེ་ཤེས་སེམས་དཔའ་རྣམས་སྨིན་མཚམས་ནས་ཐིམ། ཨོྃ་བཛྲ་བེ་ཏཱ་ལཱི་བནྡྷ་བཾ་ཞེས་བརྗོད་པས་བེ་ཏཱ་ལཱི་སེར་མོ་ལྕགས་སྒྲོག་ཐོགས་པས་ཞབས་ལ་རེག་པས་ཆུ་ལ་ཆུ་འདྲེས་པ་བཞིན་བསམ། ཨོཾ་བཛྲ་གྷསྨ་རཱི་ཝ་ཤཾ་ཀུ་རུ་ཧོཿཞེས་བརྗོད་པས་གྷསྨ་རཱི་ལྗང་གུ་དྲིལ་བུ་ཐོགས་པས། ཕྱི་ནང་ཀུན་ཏུ་དྲིལ་བུའི་སྒྲ་བྱུང་བས་དམ་ཚིག་པ་རྣམས་ཡེ་ཤེས་པའི་ངོ་བོར་གྱུར་པར་བསམ་མོ། །གཉིས་པ་ནི། རྗེ་བཙུན་རྩེ་མོས། དེ་ལྟར་དམ་ཚིག་འཁོར་ལོ་ལ། །ཡེ་ཤེས་བསྟིམ་པའི་དགོས་པ་ཡང་། །འདི་ལྟར་ཁ་ཅིག་དམ་ཚིག་པ། །དམན་འཛིན་ཡེ་ཤེས་མཆོག་ཏུ་འཛིན། །དེ་ལྟར་འཛིན་པའི་གང་ཟག་གིས། །ཡེ་ཤེས་དགུག་གཞུག་མ་བྱས་ན། །དམ་ཚིག་འབའ་ཞིག་གཟུགས་བརྙན་ཙམ། །ལམ་དུ་བྱས་ཡིན་དེས་མི་འགྲུབ། །དེ་བས་དམ་ཚིག་འཁོར་ལོ་ལ། །ཡེ་ཤེས་བཅུག་པས་དེར་རྟོགས་པས། །འབྲས་བུ་འབྱིན་ཡིན་ཡང་དག་པར། །དེ་ལྟར་མེད་ཀྱང་དེར་དགོངས་གསུངས། །ཞེས་གསུངས་པ་ལྟར་ཡིན་ནོ། །གསུམ་པ་དབང་བསྐུར་བ་མི་བསྐྱོད་པའི་ཡན་ལག་ལ་ལྔ་སྟེ། དབང་བསྐུར་གི་ལྷ་སྤྱན་དྲངས། མཆོད་ཅིང་གསོལ་བ་གདབ་པ། དབང་བསྐུར་བ་དངོས། རིགས་བདག་གིས་རྒྱས་གདབ་པ། དབང་དོན་ལ་ང་རྒྱལ་གཟུང་བའོ། །དང་པོ་ནི། རྩ་རྒྱུད་ལས། རང་གི་སྙིང་གར་ས་བོན་བསམ་མོ། །ས་བོན་ལས་འོད་ཟེར་ནག་པོ་ལྕགས་ཀྱུའི་རྣམ་པའི་གཟུགས་ཀྱིས་ཕྱུང་ནས། དེས་ཁམས་གསུམ་དུ་བཞུགས་པའི་སངས་རྒྱས་ཐམས་ཅད་སྤྱན་དྲངས་ལ་ཞེས་གསུངས་པའི་དོན་སྤྱན་འདྲེན་པའི་གཞི་ནི། རང་གི་སྙིང་གར་ས་བོན་ཞེས་ཏེ། རིགས་སོ་སོའི་ས་བོན་ནོ། །དེ་ལས་འོད་ཟེར་ཁ་དོག་ནག་པོ་རྩེ་མོ་གུག་པ་ལྕགས་ཀྱུའི་རྣམ་པ་སྤྲོས་ནས། གང་སྤྱན་འདྲེན་ན་ཁམས་གསུམ་ན་བཞུགས་པའི་སངས་རྒྱས་ཐམས་ཅད་ཅེས་པ་ལ། འགྲེལ་པ་ལུགས་ཀྱི་གཞུང་རྣམས་སུ་སངས་རྒྱས་ཐམས་ཅད་ཅེས་དང་། དེ་བཞིན་གཤེགས་པ་ཐམས་ཅད་ཅེས་པ་ཙམ་ལས་མི་འབྱུང་ཡང་། གྲུབ་ཆེན་མཚོ་སྐྱེས་ཀྱིས། རང་གི་སྐུ་ལས་བྱུང་བའི་འོད་ཟེར་གྱི་ཚོགས་ཀྱིས་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། རིག་མ་དང་། ལྷ་མོ་དང་། ཁྲོ་བོ་ལ་སོགས་པ་རྣམས་ཀྱིས་བདུད་རྩི་ལྔས་གང་བའི་དབང་བསྐུར་བ་དང་ལྡན་པ་དང་། ཞེས་གསུངས་སོ། །དེ་དང་མཐུན་པར་རྗེ་བཙུན་སྐུ་མཆེད་ཀྱིས་ཀྱང་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་སྟེ། གདན་གསུམ་དངོས་སུ་ཚང་བའི་དཀྱིལ་འཁོར་སྤྱན་འདྲེན་པར་མཛད་དོ། །གཉིས་པ་ནི་རྩ་རྒྱུད་ལས། མ་མོ་བརྒྱད་ཀྱིས་ཡང་དག་པར་མཆོད་ནས་གསོལ་བ་གདབ་པར་བྱའོ། །ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་པའི་དོན་སྤྱན་དྲངས་པའི་དཀྱིལ་འཁོར་ལ་ལྷ་མོ་བརྒྱད་ཀྱིས་ཡང་དག་པར་མཆོད་ནས་དབང་བསྐུར་བའི་ཕྱིར་དུ་གསོལ་བ་གདབ་པའི་སྔགས་དོན་ནི། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ་ཞེས་པ་སྟེ་བསྡུས་པ་ཡིན་ལ། རྒྱས་པར་ན། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་རང་བཞིན་ཅན་རྣམས་ཀྱི། །ཁྱོད་ཀྱིས་བདག་ལ་དབང་བསྐུར་སྩོལ། །ཞེས་པས་གསོལ་བ་གདབ་བོ། །གསུམ་པ་ནི། རྩ་རྒྱུད་ལས། སངས་རྒྱས་དེ་རྣམས་ཧེ་རུ་ཀའི་རྣམ་པའི་གཟུགས་ཀྱིས་དེ་བཞིན་གཤེགས་པ་ལྔའི་བདག་ཉིད་ཀྱིས་བདུད་རྩི་ལྔས་གང་བའི་བུམ་པས་དབང་བསྐུར་བར་བྱའོ། །དབང་བསྐུར་བ་ན་མེ་ཏོག་གི་ཆར་འབབ་པར་འགྱུར་རོ། །རྔའི་སྒྲ་འབྱུང་བར་འགྱུར་རོ། །གུར་གུམ་གྱི་ཆུའི་ཆར་འབབ་པར་འགྱུར་རོ། །གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པར་བྱའོ། །རྡོ་རྗེའི་གླུ་སྤྱན་མ་ལ་སོགས་པ་རྣམས་ཀྱིས་བླང་བར་བྱའོ། །ཞེས་པའི་དོན་གསོལ་བ་བཏབ་པའི་རྗེས་དེ་ནས་དེ་བཞིན་གཤེགས་པ་རིགས་ལྔ་པོ་འདི་དག་ཧེ་རུ་ཀའི་རྣམ་པའི་གཟུགས་སུ་གྱུར་པ་ནི། ཀུ་མུ་ཏིར། ཧེ་རུ་ཀའི་གཟུགས་བྱས་པས། །ཞེས་བྱ་བ་ནི་ཞལ་བརྒྱད་ཞབས་བཞི་པ། ཕྱག་བཅུ་དྲུག་གིས་བརྒྱན་པ་རྣམས་སོ། །ཞེས་གསུངས་པ་ལྟར་རྗེ་བཙུན་རྩེ་མོས་ཀྱང་གསུངས་སོ། །དེ་ལྟ་བུའི་ཕྱག་བཅུ་དྲུག་གིས་ཐོད་པའི་ཚབ་ཏུ། གུར་ལས། མི་བསྐྱོད་པ་ནི་རྡོ་རྗེའི་ཆུ། །རྣམ་པར་སྣང་མཛད་དྲི་ཆུར་བརྗོད། །སྣང་བ་མཐའ་ཡས་ཁུ་བ་སྟེ། །རིན་ཆེན་འབྱུང་ལྡན་ཁྲག་ཅེས་བྱ། །ཤ་ཆེན་དོན་ཡོད་གྲུབ་པ་འོ། །ཞེས་གསུངས་པ་ལྟར་གྱི་བདུད་རྩི་ལྔའི་ཆུས་ཡོངས་སུ་གང་བའི་བུམ་པ་བསྣམས་ནས་སྤྱི་བོ་ནས་བླུགས་ཤིང་། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ཞེས་གསུངས་ཤིང་དབང་བསྐུར། དེའི་ཚེ་ཡུམ་བཞིས་རྡོ་རྗེའི་གླུ་ལེན། བྱང་སེམས་ཀྱིས་བཀྲ་ཤིས་བརྗོད། ལྷ་མོ་རྣམས་ཀྱིས་མཆོད། ཁྲོ་བོ་རྣམས་ཀྱིས་འགེགས་བསྐྲད་པར་བསམ་མོ། །འདིར་འགྲེལ་པ་ལུགས་ཀྱི་གཞུང་རྣམས་སུ་དེ་ལྟར་དབང་བསྐུར་བས་ལུས་ཐམས་ཅད་གང་། དྲི་མ་དག་རིགས་བདག་གི་རྒྱས་འདེབས་པ་ཙམ་ལས་མ་གསུངས་ལ། མན་ངག་ལུགས་ལ་བྱང་ཆུབ་ཀྱི་སེམས་ཀྱི་ཆུ་རྒྱུན་གཅིག་ལས་དབང་བཞི་ལེན་པའི་ཚུལ་གསུངས་ཏེ། རྗེ་བཙུན་རིན་པོ་ཆེས། བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་སྨིན་མཚམས་ཡན་ཆད་གང་བས་རྡོ་རྗེ་སློབ་དཔོན་གྱི་དབང་ཐོབ། ལུས་ཀྱི་དྲི་མ་དག བསྐྱེད་པའི་རིམ་པ་དབྱིབས་བསྒོམ་པ་ལ་དབང་། དེའི་མཐར་ཐུག་རྒྱན་དྲུག་གི་དག་པ་ཡིན་པས། སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །གདུ་བུ་རྣམ་པར་སྣང་མཛད་དེ། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་མགོན། །ཞེས་བྱ་བ་ཐལ་བ་དང་མཆོད་ཕྱིར་ཐོགས་རྡོ་རྗེ་འཆང་ཆེན་པོ་ཡིན་སྙམ་དུ་བསམ་མོ། །ཡང་དབང་གི་ཆུ་རྒྱུན་གྱིས་མགྲིན་པ་ཡན་ཆད་གང་བས་གསང་བའི་དབང་ཐོབ། ངག་གི་དྲི་མ་དག བདག་བྱིན་གྱིས་བརླབ་པའི་རིམ་པ་བསྒོམ་པ་ལ་དབང་། དེའི་མཐར་ཐུག་འཁོར་ལོ་བཞིའི་རྒྱས་གདབ་པ་ཡིན་པས་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་ཨྃ་ལས་ཀྱི་ཕྱག་རྒྱ། སྙིང་ག་ཆོས་ཀྱི་འཁོར་ལོ་འདབ་མ་བརྒྱད་པའི་དབུས་ན་ཧཱུྃ་ཆོས་ཀྱི་ཕྱག་རྒྱ། མགྲིན་པ་ལོངས་སྤྱོད་ཀྱི་འཁོར་ལོ་འདབ་མ་བཅུ་དྲུག་པ་ཁ་དོག་དམར་པོ་ཁ་གྱེན་ལ་བལྟས་པའི་དབུས་ན་ཨོཾ་དམར་པོ་ཡོད་པ་ནི་ཕྱག་རྒྱ་ཆེན་པོ། སྤྱི་བོ་བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་པ་ཁ་དོག་དཀར་པོ་ཁ་ཐུར་ལ་ལྟ་བའི་དབུས་ན་ཧྃ་ཡོད་པ་ནི་དམ་ཚིག་གི་ཕྱག་རྒྱར་མོས་པ་བྱ། ཡང་དབང་གི་ཆུ་རྒྱུན་གྱིས་སྙིང་ག་ཡན་ཆད་གང་བས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱིས་དྲི་མ་དག་ལམ་དཀྱིལ་འཁོར་འཁོར་ལོ་བསྒོམ་པ་ལ་དབང་། དེ་ལས་མངོན་པར་ཤེས་པ་བསྐྱེད་པ་སྔར་གྱི་སྐྱེ་མཆེད་དང་། སྐུ་གསུང་ཐུགས་བྱིན་གྱིས་བརླབ་པ་དྲན་པ་ཙམ་བྱ། དེ་ནས་དབང་གི་ཆུ་རྒྱུན་དེས་གསང་གནས་ནས་རྐང་པའི་མཐིལ་ཡན་ཆད་གང་། ལུས་ཐམས་ཅད་མ་ལུས་པར་གང་བས། མཆོག་ཏུ་བདེ་བ་ཆེན་པོ་བཞི་པའི་དབང་ཐོབ། ལུས་ངག་ཡིད་གསུམ་གྱི་དྲི་མ་དག་པས་བརྟན་པར་བྱས། དེས་ནས་དབང་རྫོགས་པ་དང་། ལམ་རྫོགས་པས་ན་རིགས་ཀྱི་བདག་པོས་རྒྱས་གདབ་པར་བྱ་སྟེ་ཞེས་སོ། །འདི་ལ་ཕྱིས་ཀྱི་སྔགས་རིམ་མཁན་པོ་དག དབང་བཞི་ཆུ་རྒྱུན་གཅིག་ལས་ལེན་པ་རྒྱ་གར་བའི་གཞུང་གང་དུའང་བཤད་པ་མེད་པས་མི་དག་གོ་ཞེས་འཆད་པ་ནི་ཤིན་ཏུ་མི་རིགས་ཏེ། གྲུབ་ཆེན་མཚོ་སྐྱེས་ཀྱིས། འདི་སྐད་དུ་རིམ་པ་ཇི་ལྟ་བར་རྣམ་པ་སྣ་ཚོགས་པ་དང་། རྣམ་པར་སྨིན་པ་དང་། རྣམ་པར་ཉེད་པ་དང་། མཚན་ཉིད་དང་བྲལ་བའི་སྐད་ཅིག་མ་བཞི་པོ་རྣམས་ཐོབ་པ་དང་། དགའ་བ་དང་། མཆོག་ཏུ་དགའ་བ་དང་། དགའ་བྲལ་གྱི་དགའ་བ་དང་། ལྷན་ཅིག་སྐྱེས་པའི་དགའ་བ་རྣམ་པ་བཞི་པོ་རྣམས་མངོན་པར་མཚོན་པ་དང་། དགོད་པ་དང་། ལྟ་བ་དང་། འཁྱུད་པ་དང་། གཉིས་གཉིས་བཞི་པོ་རྣམ་པར་དག་པ་ནི། སློབ་དཔོན་དང་། གསང་བ་དང་། ཤེས་རབ་དང་། མཆོག་ཏུ་བདེ་བ་ཆེན་པོའི་མཐར་ཐུག་པ་དབང་བཞི་པོ་རྣམས་བླང་ངོ་། །དབང་བསྐུར་ནས་རང་གི་རིགས་ཀྱི་བདག་པོས་སྤྱི་བོར་མཚན་ཏོ། །ཞེས་སྐབས་འདིར་དབང་བཞི་ལེན་པ་གསལ་བར་གསུངས་པའི་ཕྱིར་རོ། །གཞུང་འདིའི་དོན་དབང་རང་གི་ངོ་བོ་གང་བླང་ན། སློབ་དཔོན་སོགས་སོ། །དེས་དྲི་མ་གང་དག་ན་དགོད་པ་དང་སོགས་སོ། །དེས་ཉམས་མྱོང་ཅི་སྐྱེ་ན། དགའ་བ་དང་སོགས་སོ། །དེ་ཇི་ཙམ་གྱི་དུས་སུ་སྐྱེ་ན། རྣམ་པ་སྣ་ཚོགས་པ་སོགས་ཏེ། གཞུང་མས་རིམ་གྱིས་བཤད་ལ། སློབ་དཔོན་བདེ་བའི་རྡོ་རྗེས་སྐུ་རྡོ་རྗེ་ལྷ་དགུའི་སྒྲུབ་ཐབས་སུ་དོན་འདི་དང་འདྲ་བར་བཤད་དོ། །བཞི་པ་ནི་རྩ་རྒྱུད་ལས། དབང་བསྐུར་ནས་སྤྱི་བོར་རང་གི་རིགས་ཀྱིས་བདག་པོར་འགྱུར་རོ། །ཞེས་པའི་དོན་ནི་རྗེ་བཙུན་རིན་པོ་ཆེས། སྤྱིར་རྡོ་རྗེ་ཐེག་པའི་ལམ་དང་། འབྲས་བུ་ཐམས་ཅད་ཕྱག་རྒྱས་མཚོན་ནུས་ལ། དེའང་བསྐྱེད་པའི་རིམ་པའི་སྟེང་དུ་མཚོན་པས། ལམ་ཐམས་ཅད་མཚོན་པར་ནུས་པ་ཡིན་ནོ། །དེ་ལ་ལྔ་སྟེ། ངོ་བོ་ཉིད་ལ་ངོ་བོ་ཉིད་ཀྱི་ཕྱག་རྒྱ། ལུས་ལ་སེམས་ཀྱི་ཕྱག་རྒྱ། སེམས་ལ་ལུས་ཀྱི་ཕྱག་རྒྱ། རྒྱུ་ལ་འབྲས་བུའི་ཕྱག་རྒྱ། འབྲས་བུ་ལ་རྒྱུའི་ཕྱག་རྒྱའོ། །དང་པོ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ། རང་བཞིན་གྱིས་རྣམ་པར་དག་པར་ཤེས་པ་ནི། ངོ་བོ་ཉིད་ལ་ངོ་བོ་ཉིད་ཀྱི་ཕྱག་རྒྱ་སྟེ། སཾ་པུ་ཊ་ལས། འདོད་ཆགས་དག་པས་འདོད་ཆགས་ཉིད། །ཞེ་སྡང་དག་པས་ཞེ་སྡང་ཉིད། །གཏི་མུག་དག་པས་གཏི་མུག་སྟེ། །ཐམས་ཅད་རྣམ་དག་རྡོར་འཛིན་མགོན། །ཞེས་བྱ་བ་དང་། དཔལ་མཆོག་ལས་ཀྱང་། འདོད་ཆགས་རྣམ་པར་དག་པའི་གནས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་གནས་སོ། །ཞེས་བྱ་བ་ལ་སོགས་པ་གསུངས་ལ། འདི་ཉིད་ལས་ཀྱང་། ངོ་བོ་གཟུགས་མེད་མཐོང་བ་པོ། །ཞེས་བྱ་བ་ལ་སོགས་པ་དེའི་དོན་ཡིན་ཏེ། དེ་མཚོན་པ་ནི་གཙོ་བོ་དང་། ནང་གི་རྣལ་འབྱོར་མ་རྣམས་དང་། སྟེང་འོག་ལ་རང་གི་རིགས་ཀྱི་དབུ་རྒྱན་བྱས་པས་ངོ་བོ་ཉིད་མཚོན་པ་ཡིན་ནོ། །ལུས་ལ་སེམས་ཀྱི་ཕྱག་རྒྱ་ནི། ཕྱི་དང་ནང་གིས་བསྡུས་པའི་ཆོས་ཐམས་ཅད་རང་གི་སེམས་ལས་མ་གཏོགས་པ་གུད་ན་མེད་དོ་ཞེས་རྟོགས་པར་བྱ་བ་སྟེ་མཚོན་པ་ནི། པུཀྐ་སཱི་ས་རྣམ་པར་དག་པ་དང་། གཽ་རཱི་གཟུགས་དང་གཟུགས་ཀྱི་ཕུང་པོ་རྣམ་པར་དག་པ། རྣམ་པར་སྣང་མཛད་ཀྱི་ངོ་བོ་ལ་སེམས་ཀྱི་ངོ་བོ་མི་བསྐྱོད་པའི་རྒྱས་བཏབ་པ་འདིས་མཚོན་པ་ཡིན་ནོ། །དེའང་རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་གསུངས་པ་དང་། འཕགས་པ་ས་བཅུ་པ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ་ཞེས་གསུངས་པ་ཡིན་ནོ། །སེམས་ལ་ལུས་ཀྱི་ཕྱག་རྒྱ་ནི་སྲུང་བའི་འཁོར་ལོ་དང་། གཞལ་ཡས་ཁང་ལ་སོགས་པ་ལུས་དང་། ཕྱི་རོལ་བེམས་པོའི་རྣམ་འཕྲུལ་ཐམས་ཅད་སེམས་ཀྱིས་བྱེད་པ་ནི་སེམས་ལུས་སུ་སྒྲུབ་པ་སྟེ། དེ་མཚོན་པ་ནི་ཆུ་རྣམ་པར་དག་པ་ཤ་ཝ་རཱི་དང་། སྒྲ་དང་ཚོར་བ་རྣམ་པར་དག་པ་ཙཽ་རཱི་གཉིས་མི་བསྐྱོད་པའི་ངོ་བོ་སེམས་ལ་རྣམ་པར་སྣང་མཛད་ལུས་ཀྱིས་དབུར་བརྒྱན་པ་ནི་སེམས་ལ་ལུས་ཀྱི་རྒྱ་སྟེ། དེ་གཉིས་ཀའང་དཔལ་གསང་བ་འདུས་པ་ལས། རིགས་ཀྱི་བུ་ཁྱོད་ཀྱི་ལུས་སེམས་ལྟ་བུ་དང་། སེམས་ཚིག་ཏུ་བརྗོད་པ་ལྟ་བུར་ཀུན་དུ་སྒོམས་ཤིག ཅེས་གསུང་པའི་དོན་ཡང་དེ་ཡིན་ནོ། །རྒྱུ་ལ་འབྲས་བུའི་རྒྱ་ཞེས་བྱ་བ་ནི། མ་དག་པའི་ཕུང་ཁམས་སྐྱེ་མཆེད་རྣམས་དག་པ་དེ་བཞིན་གཤེགས་པ་རིགས་ལྔ་དང་། བྱང་ཆུབ་སེམས་དཔའ་ལ་སོགས་པར་བྱིན་གྱིས་རློབ་པ་ནི། རྒྱུ་ལ་འབྲས་བུ་གནས་པ་འབྲེལ་པ་ཅན་དུ་བསྒོམ་པ་སྟེ། དེ་ནི་ཙཎྜ་ལཱི་མེ་རྣམ་པར་དག་པ་དང་། བེ་ཏཱ་ལཱི་དྲི་དང་། འདུ་ཤེས་རྣམ་པར་དག་པ་འོད་དཔག་ཏུ་མེད་པའི་ངོ་བོ། རྒྱུ་འདོད་ཆགས་རྣམ་པར་དག་པ་ལ་འདོད་ཆགས་ཀྱི་འབྲས་བུ་སེར་སྣ་རྣམ་པར་དག་པ་རིན་ཆེན་འབྱུང་ལྡན་གྱིས་རྒྱས་བཏབ་པས་དེ་མཚོན་པ་ཡིན་ཏེ། གཟུགས་ཕུང་རྡོ་རྗེ་མ་ཞེས་བྱ་བ་ལ་སོགས་པའི་དོན་ཡང་། རྒྱུ་འབྲས་བུར་བྱིན་གྱིས་རློབ་པའི་དོན་ཡིན་ནོ། །འབྲས་བུ་ལ་རྒྱུའི་ཕྱག་རྒྱ་ཞེས་བྱ་བ་ནི་དག་པ་རིགས་ལྔ་དང་། ཡེ་ཤེས་ལྔ་ཡང་རྒྱུ་ཕུང་པོ་དང་། ཉོན་མོངས་པ་གནས་གྱུར་པ་ལས་འབྱུང་ངོ་ཞེས་སྟོན་པ་ནི། རླུང་རྣམ་པར་དག་པ་གཡུང་མོ་དང་། རོ་དང་འདུ་བྱེད་རྣམ་པར་དག་པ་གྷསྨ་རཱི་གཉིས་དོན་ཡོད་གྲུབ་པ། འབྲས་བུ་ཕྲག་དོག་གི་ངོ་བོ་ལ་རྒྱུ་འདོད་ཆགས་རྣམ་པར་དག་པ་འོད་དཔག་ཏུ་མེད་པས་རྒྱས་བཏབ་པས་དེ་མཚོན་པ་ཡིན་ཏེ། འབྲས་བུ་དེ་ཡང་རྒྱུའི་རིགས་ལས་འབྱུང་བ་མཚོན་པར་བྱ་བ་ཡིན་པའི་ཕྱིར་རོ། །དེ་ཡང་རྡོ་རྗེ་གུར་ལས། ཐུབ་པ་རྣམ་པར་སྣང་མཛད་རྨོངས། །ཞེ་སྡང་འདྲེན་པ་མི་བསྐྱོད་པ། །འདོད་ཆགས་དཔག་མེད་རྡོ་རྗེ་སྟེ། །སེར་སྣ་རྡོ་རྗེ་སྣང་བྱེད་ཉིད། །དོན་ཡོད་སྐྱོན་ནི་ཐམས་ཅད་བྱེད། །འདྲེན་པ་ལྔ་ནི་སྐྱོན་ལྡན་ནོ། །ཞེས་གསུངས་པ་ཡིན་ནོ། །དེ་ལྟར་རྒྱུ་འབྲས་ཀྱི་རྒྱ་ཚན་པ་དེ་གཉིས་ཀའི་ལུང་ཡང་། ཐམས་ཅད་གསང་བ་ལས། རྒྱུ་ལ་འབྲས་བུའི་རྒྱས་གདབ་ཅིང་། །འབྲས་བུ་ལ་ཡང་རྒྱུའི་རྒྱས་གདབ། །གཞན་དུ་བསྐལ་པ་བྱེ་བར་ནི། །གྲངས་མེད་པར་ཡང་འགྲུབ་མི་འགྱུར། །ཞེས་གསུངས་ལ། སཾ་པུ་ཊི་ལས་ཀྱང་། བུད་ཤིང་བསྲེགས་པའི་རིགས་པ་ཡིས། །དགེས་པའི་རྒྱལ་བ་གར་མཁན་མཆོག །ཅེས་གསུངས་ཏེ། བུད་ཤིང་ལ་མེའི་རིགས་དང་། མེ་ལ་བུད་ཤིང་གི་རིགས་ཞེས་བརྗོད་པ་དང་འདྲ་བ་ཡིན་ནོ། །དེའང་རྒྱུ་འདོད་ཆགས་ལས་འབྲས་བུ་སེར་སྣ་དང་ཕྲག་དོག་འབྱུང་བས། རྒྱུ་འབྲས་དེ་གཉིས་ནི་ཕན་ཚུན་མི་སླུ་བའི་ཕྱིར་རོ། །དེ་ཙམ་དཔེར་བཞག་ནས་འཁོར་བའི་རྒྱུ་འབྲས་དག་བྱ་དག་བྱེད་ངོ་སྤྲད་པའི་ལམ་འདིས་འབྲས་བུ་སངས་རྒྱས་འགྲུབ་པ་མི་སླུ་བ་ཡིན་ནོ། །ཡང་ཁ་ཅིག་འདི་སྐད་དུ། ཕྱོགས་ཀྱི་ལྷ་མོ་ནི་ཕུང་པོར་གང་ནས་བཤད། དྲི་དག་པ་ནི་རིན་ཆེན་འབྱུང་ལྡན་ཡིན། རོ་དག་པ་ནི་འོད་དཔག་ཏུ་མེད་པ་ཡིན་པས། དེ་གཉིས་ཀྱི་ངོ་བོ་བེ་ཏཱ་ལཱི་དང་། གྷསྨ་རཱི་གཉིས་ལ་རང་གི་རིགས་ཀྱིས་དབུ་རྒྱན་བྱུང་བས་ན་ངོ་བོ་ཉིད་ལ་ངོ་བོ་ཉིད་ཀྱི་རྒྱར་མི་འགྱུར་རམ་ཞེ་ན། ཕྱོགས་ཀྱི་ལྷ་མོ་ཕུང་པོར་བཤད་པ་ནི། རྒྱུད་འབུམ་པའི་ལུང་སློབ་དཔོན་མཚོ་སྐྱེས་ཀྱིས་གསུངས་ལ། དྲི་དང་རོའི་དག་པའང་སྦྱང་གཞི་དྲི་སེར་སྣའི་ངོ་བོ། འབྲས་བུ་ལ་སྦྱོང་བྱེད་བེ་ཏཱ་ལཱི་རྒྱུ་འདོད་ཆགས་ཀྱིས་སྦྱོང་ལ། དེ་ལ་ཡང་འབྲས་བུ་སེར་སྣའི་རྒྱས་བཏབ་པ་ལ་སུམ་སྦག་ཡིན་ལ། རོ་འདོད་ཆགས་རྒྱུ་ལ་གྷསྨ་རཱི་འབྲས་བུ་ཕྲག་དོག་གིས་སྦྱོང་ལ། དེ་ལ་འདོད་ཆགས་འོད་དཔག་ཏུ་མེད་པས་རྒྱས་བཏབ་པས་རྒྱ་སུམ་སྦག་ཡིན་ནོ། །དེ་ལྟར་ན་ལུས་སེམས་ལ་ཉིས་སྦག་ལས་མི་ཡོང་ལ། རྒྱུ་འབྲས་ལ་སུམ་སྦག་ཡོད་པ་ཅིའི་ཕྱིར་ཞེ་ན། རྒྱུ་འབྲས་འདི་ལམ་གྱི་གཙོ་བོ་ཡིན་པའི་ཕྱིར། སྦྱང་གཞི་ནས་མཚོན་དགོས་ལ། ལུས་སེམས་ཀྱི་དག་བྱ་དག་བྱེད་ནི་དེ་ཉིད་ཀྱིས་རྫོགས་ཏེ། དེ་ཐམས་ཅད་ལ་ཡང་ངོ་བོ་ཉིད་ལ་ངོ་བོ་ཉིད་ཀྱི་རྒྱ་ཞེས་བྱ་བས་ཁྱབ་དགོས་པས་དབུ་རྒྱན་རྣམས་ཀྱི་སྤྱི་བོར་ཡང་རང་གི་རིགས་ཀྱི་ཕྱག་མཚན་བསྒོམ་དགོས་ཏེ། རྡོ་རྗེ་གུར་ལས། སྤྱི་བོར་རྡོ་རྗེ་འཛིན་པ་མཆོག །དེར་ཡང་རྡོ་རྗེ་མཆོག་ནག་པོ། །ཞེས་བྱ་བ་དང་། ཆོས་ཀྱི་འཁོར་ལོ་སྤྱི་བོར་འཛིན། །ཞེས་བྱ་བ་ལ་སོགས་པ་གསུངས་སོ། །དེ་ལ་ཁ་ཅིག་ལོག་པར་རྟོག་པ་འདི་སྐད་དུ། པུཀྐ་སཱི་ལ་རྣམ་པར་སྣང་མཛད་ཀྱིས་དབུར་བརྒྱན་ན། ལུས་བརྩེགས་ན་དོན་མེད་ཅིང་། ཤ་ཝ་རཱི་ལ་མི་བསྐྱོད་པས་དབུར་བརྒྱན་པ་ནི། ལུས་མེད་པའི་སེམས་རྟེན་མེད་པས་མི་མཛེས་སོ། །ཞེས་བྱ་བ་ལྷའི་དབུ་རྒྱན་རྐྱང་པ་ཙམ་མཐོང་བས་གཞུང་འདི་ཉིད་ཀྱི་གོང་དུ་བསྟན་པ་ཙམ་ཡང་མ་དྲན་པས་ལོག་པར་སྨྲ་བ་ཡིན་ཏེ། དེ་ལྟར་ན་བདག་མེད་མ་ལ་མི་བསྐྱོད་པ་དང་། རྡོ་རྗེ་མ་ལ་རྣམ་སྣང་གི་དབུ་རྒྱན་ཡང་མི་མཛེས་པར་འགྱུར་རོ། །དེ་ལྟར་ན། ལུས་སྤངས་ནས་ནི་སེམས་ཀྱིས་ནི། །ཞེས་པ་དང་། སེམས་སྤངས་ནས་ནི་ལུས་ཀྱིས་ནི། །ཞེས་བྱ་བའི་གཞུང་ཇི་ལྟར་དྲང་ཞེ་ན། དེ་ཉིད་སྔར་སྨོས་པ་བཞིན་དུ་ཆོས་ཐམས་ཅད་སེམས་སུ་བསྒྲུབ་པ་དང་། སེམས་ཉིད་ཀྱང་རྟེན་དུ་བསྒྲུབ་པ་ལ་སོགས་པའི་དགོས་པ་ཡིན་ཏེ། མདོར་ན་རྡོ་རྗེ་ཐེག་པའི་ལམ་ཐམས་ཅད་ཕྱག་རྒྱའི་གདབ་ཚུལ་ལྔ་པོ་འདིས་མཚོན་པ་ཡིན་ནོ། །ཞེས་རྣམ་བཤད་དག་ལྡན་ལས་འབྱུང་ལ། དེ་ལ་རྒྱས་འདེབས་ཀྱི་ལྷའི་སྤྱི་བོར་ཕྱག་མཚན་གྱི་རྒྱས་འདེབས་བཤད་པའི་དོན། རྗེ་བཙུན་ཉིད་ཀྱིས་དབུ་རྒྱན་རྣམས་ནི་རང་རང་གི་རིགས་དང་རྗེས་སུ་མཐུན་པའི་དབུ་རྒྱན་ཡིན་ཅིང་། དེ་དག་གི་སྤྱི་བོར་ཡང་རང་གི་རིགས་ཀྱི་མཚན་མ་ཡིན་ཏེ། དེ་ཡང་མ་དག་པ་ལྷར་བྱིན་གྱིས་རློབ་པ་ནི་སྣང་བ་ཀུན་བརྟགས་ལ་གཞན་དབང་གི་ཕྱག་རྒྱ་ཡིན་ལ། སྤྱིར་ངོ་བོ་ཉིད་ལ་ངོ་བོ་ཉིད་དང་། ལུས་ལ་སེམས་ཀྱི་རྒྱ་ལ་སོགས་པ་བྱུང་བ་ནི་གཞན་དབང་ལ་གཞན་དབང་གི་རྒྱ་ཡིན་ཅིང་། དེའི་སྤྱི་བོར་རང་གི་རིགས་ཀྱི་མཚན་མ་བྱུང་བ་ནི། ལྷ་ཐམས་ཅད་རང་བཞིན་མེད་པར་བསྒྲུབ་པ་གཞན་དབང་ལ་ཡོངས་སུ་གྲུབ་པའི་རྒྱ་ཞེས་བྱ་བ་ཡིན་ནོ། །ཞེས་གསུངས་སོ། །ངོ་བོ་ཉིད་གསུམ་པོ་འདི་ཐེག་ཆེན་གྱི་མདོ་སྡེ་དང་། རྒྱུད་སྡེ་ཀུན་ལས་གསུངས་པས་སེམས་ཙམ་པ་དང་ངོས་འཛིན་མི་འདྲ་ཡང་། རྣལ་འབྱོར་སྤྱོད་པའི་དབུ་མ་པ་རྣམས་དང་། སློབ་དཔོན་ཟླ་བས་ཀྱང་འཇུག་འགྲེལ་ལས། འདིའི་རྣམ་གཞག་བཤད་དོ། །རྒྱས་འདེབས་ཀྱི་དེ་བཞིན་གཤེགས་པ་རྣམས་སྤྲུལ་སྐུའི་རྣམ་པ་ཅན་དུ་དུས་འཁོར་དུ་བཤད་ཀྱང་། དེ་ནི་གཞུང་དེ་ཁོ་ནའི་སྒོས་ཆོས་ཡིན་ལ། བླ་མེད་གཞན་རྣམས་ལ་རང་རང་གི་རིགས་ལྔའི་རྣམ་པ་དགོས་པར་མངོན་ནོ། །ལྔ་པ་ནི་དེ་ལྟར་དབང་བསྐུར་བ་ནི་ཁམས་གསུམ་གྱི་ཆོས་ཀྱི་རྒྱལ་པོའི་གོ་འཕང་ལ་གཞག་པའི་དོན་ཡིན་པས་དེ་ལྟ་བུའི་ང་རྒྱལ་བྱ་ཞིང་། ཨོཾ་སརྦ་ཏ་ཐཱ་ག་ཏ་ནི་སྔར་བཞིན། ཨ་བྷི་མངོན་པར། ཥེ་ཀ་ཏ་དབང་བསྐུར་བ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ནི་སྔར་བཞིན་ཏེ། དེའི་དོན་ལ་སེམས་གཞག་གོ །བཞི་པ་བདུད་རྩི་མྱང་བ་འོད་དཔག་མེད་ཀྱི་ཡན་ལག་ནི། སཾ་པུ་ཊིའི་དགུ་པའི་གཉིས་པ་ལས། ཀྱེ་བཅོམ་ལྡན་འདས་ཡེ་ཤེས་ཀྱི་ལྕགས་ཀྱུ་རུ་གསུངས་པ་དེ་གང་ལགས། བཅོམ་ལྡན་འདས་ཀྱི་བཀའ་སྩལ་པ། དང་པོ་སྐྱེ་དགུའི་བདག་པོར་བརྗོད། །དེ་བཞིན་གཉིས་པར་སྒྲོལ་མ་ཉིད། །གསུམ་པ་ལ་ནི་རབ་མཆོག་ཉིད། །བཞི་པ་ལ་ནི་མང་པོ་སྐྱེས། །ལྔ་པ་ལ་ནི་སྟོབས་ཞེས་བྱ། །རིགས་ལྔ་རྣམས་ཀྱི་སྔགས་འདི་དག །ཡེ་ཤེས་ལྔ་ཡི་རབ་དབྱེ་བས། །ཡེ་ཤེས་ཆེན་པོ་ལྔ་པོ་འདི། །ཁྱོད་ལ་ཕན་པའི་བསམ་པས་བཤད། །ཡེ་ཤེས་ལྕགས་ཀྱུའི་རབ་དབྱེ་བས། །ལས་རྣམས་ཀུན་ལ་སྦྱར་བར་བྱ། །གལ་ཏེ་ལས་ལ་ཕན་འདོད་པས། །རྣལ་འབྱོར་མ་ཀུན་ཚིམ་པར་བྱ། །འདོད་ལ་དགའ་བར་མི་བྱ་ཞིང་། །ལོངས་སྤྱོད་ལ་ནི་སྦྱར་མི་བྱ། །སེམས་ཅན་དོན་རྒྱུ་རྣལ་འབྱོར་པས། །མཆོད་པ་ཐམས་ཅད་རབ་ཏུ་བརྟག །དབྱངས་ཀྱི་བཅུ་གསུམ་ལས་བྱུང་བ། །གང་ཞིག་ཟླ་བ་དེ་རབ་གྲགས། །དེ་ཡི་དབུས་སུ་ས་བོན་གྱི། །ཨཱ་ལི་ཀཱ་ལི་མཉམ་སྦྱོར་བས། །ལྷ་ཀུན་དེ་ནས་ཚིམ་པར་བྱ། །འབུད་པ་འབར་བ་ཉིད་དང་ཡང་། །ཁྱད་པར་དུ་ནི་བསྐོལ་བ་ཉིད། །ཤེལ་གྱི་གཟུགས་ཀྱིས་བསྐྱེད་བྱ་ཞིང་། །དེ་ཕྱིར་ཐམས་ཅད་བརྟག་པར་བྱ། །དེ་ཡི་དབུས་སུ་བླངས་ནས་ནི། །དེ་ནས་བདུད་རྩི་མྱང་བར་བྱ། །ཞེས་གསུངས་པའི་དོན་རྒྱ་གར་གྱི་སློབ་དཔོན་ཕལ་ཆེར་དང་། རྗེ་བཙུན་གོང་མ་རྣམས་ཀྱིས། བདུད་རྩི་བྱིན་གྱིས་བརླབ་པའི་ཚུལ་འདི་ཁོ་ན་བཞིན་དུ་མཛད་དོ། །བདུད་རྩི་མྱང་བའི་རྗེས་དེ་ནས། ཨོཾ་སརྦ་ཏ་ཐཱ་ག་ཏ་སྔར་བཞིན། ཨ་མྲྀ་ཏ་བདུད་རྩི། སྭ་ད་ན་བཟང་པོ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ་སྔར་བཞིན། བདུད་རྩི་མྱང་བ་པོ་འོད་དཔག་མེད་ཀྱི་ངོ་བོ་ཡིན་སྙམ་པའི་ང་རྒྱལ་བཟུང་ངོ་། །ལྔ་པ་མཆོད་པ་དོན་ཡོད་གྲུབ་པའི་ཡན་ལག་ནི། དེ་ནས་ཡེ་ཤེས་ཀྱི་སྣང་བ་ལས་གྲུབ་པའི་གཽ་རཱི་ལ་སོགས་པའི་ལྷ་མོ་བརྒྱད་སྙིང་ག་ནས་སྤྲོས་ཤིང་། ཕྱོགས་མཚམས་བརྒྱད་དུ་རང་རང་གི་མཆོད་རྫས་ཐོགས་པས་འཁོད་ནས། གཙོ་བོ་ཡབ་ཡུམ་ནས། འཁོར་གྱི་ལྷ་ཐམས་ཅད་མཆོད་པར་བསམ་ཏེ། རིན་ཆེན་འབར་བར། དེ་ནས་མཁའ་འགྲོའི་ཚོགས་སྤྲོས་པས། །ཟླ་ཉི་ཆུ་སྨན་རྡོ་རྗེ་རོ། །ཅང་ཏེའུའི་སྒྲ་དང་འཁྱུད་པ་སྟེ། །གཙོ་བོ་ནས་བརྩམས་རིམ་བཞིན་མཆོད། །ཅེས་གསུངས་པ་ལྟར་རོ། །དེ་ནས་ཨོཾ་སརྦ་ཏ་ཐཱ་ག་ཏ་སྔར་བཞིན། པཱུ་ཛ་མཆོད་པ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔར་བཞིན། དེ་ལྟར་བརྗོད་ཅིང་དེ་བཞིན་གཤེགས་པ་རྣམས་མཆོད་པ་པོ་དོན་ཡོད་གྲུབ་པའི་ངོ་བོ་ཡིན་སྙམ་དུ་ང་རྒྱལ་བཟུང་ངོ་། །དྲུག་པ་བསྟོད་པ་རིན་ཆེན་འབྱུང་ལྡན་གྱི་ཡན་ལག་ནི། དེ་ནས་མཆོད་པ་བྱེད་མཁན་གྱི་རྣལ་འབྱོར་མ་ནི་བརྒྱད་པོ་དེ་དག་གིས་འཁོར་ལོའི་གཙོ་བོ་ལ་ཡོན་ཏན་བརྗོད་པའི་སྒོ་ནས་བསྟོད་པར་བྱ་སྟེ། གུར་ལས་འབྱུང་བའི་བསྟོད་པ་ལ་གཞུང་འདིར་བཤད་པ་ནི་འགྱུར་ཅུང་ཟད་མི་བདེ་ཞིང་རྒྱུད་ཉིད་ལས། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱིས་མཆོག་བརྙེས་པ། །ཁྱོད་ཀྱི་རྒྱུ་དང་མི་རྒྱུའི་འགྲོ་བ་ཀུན་བསྒྲུབས་ཤིང་། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲོས་པས་རྡོ་རྗེ་འཕེན་མཛད་པ། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །ཞེས་འགྱུར་བཅོས་པ་ལྟར་བཤད་ན། དཀྱིལ་འཁོར་གྱི་གཙོ་བོ་ཁྱོད་ནི། བདག་མེད་མ་ལ་སོགས་པའི་ལྷན་ཅིག་སྤྱོད་མ་དང་། གཽ་རཱི་ལ་སོགས་པའི་རྗེས་སུ་འབྲང་མའི་རྣལ་འབྱོར་གྱི་ཚོགས་ཀྱིས་ཡོངས་སུ་བསྐོར་ནས། ཟག་མེད་ཀྱི་བདེ་བ་ལ་ལོངས་སྤྱོད་པ་སྟེ། ལོངས་སྤྱོད་རྫོགས་པ་དང་། ཁ་སྦྱོར་དང་། བདེ་ཆེན་ཞེས་བྱ་བ་ཡན་ལག་གསུམ་དང་ལྡན་པ་ལོངས་སྐུའི་མཚན་ཉིད་དོ། །གཙོ་བོ་ཁྱོད་ནི་དེ་ཁོ་ན་ཉིད་ཀྱི་དོན་ཐུགས་སུ་ཆུད་པས། ཐུགས་རྣམ་པར་མི་རྟོག་པ་ཆོས་ཀྱི་སྐུའི་དངོས་གྲུབ་ཀྱི་མཆོག་བརྙེས་པ་སྟེ། རང་བཞིན་མེད་པའི་ཡན་ལག་ཆོས་སྐུའི་མཚན་ཉིད་དོ། །སྤྲུལ་པའི་སྐུ་ཁྱོད་ཀྱི་ཕྲིན་ལས་ཀྱི་སྒོ་ནས་རྒྱུ་བ་གང་བཅུད་ཀྱི་སེམས་ཅན་དང་། མི་རྒྱུ་བ་སྣོད་ཀྱི་འཇིག་རྟེན་ན་གནས་པའི་འགྲོ་བ་ཀུན་གྱི་དོན་འབད་མེད་དུ་བསྒྲུབས་ཤིང་། དེའི་རྒྱུ་ཡང་དམིགས་པ་མེད་པའི་སྙིང་རྗེ་ཆེན་པོའི་ཐུགས་ཀྱིས་སེམས་ཅན་རྣམས་འཁོར་བའི་སྡུག་བསྔལ་ལས་སད་པ་སྟེ། སྒྲོལ་བར་མཛད་པའོ། །ཚུལ་ཇི་ལྟར་ན། གདུལ་བྱ་གང་ལ་གང་འདུལ་གྱི་རྣམ་པར་སྟོན་ནས་རྡོ་རྗེ་སྟེ་སྟོང་ཉིད་ཆོས་སྐུའི་ངང་དུ་འཕེན་པ་སྟེ་བསྒྲུབ་པའམ། དེའི་གོ་འཕང་ལ་འགོད་པར་མཛད་པ་སྟེ། སྙིང་རྗེས་ཡོངས་སུ་གང་བ་དང་། རྒྱུན་མི་འཆད་པ་དང་། འགོག་པ་མེད་པའི་ཡན་ལག་གསུམ་དང་ལྡན་པ་སྤྲུལ་སྐུའི་མཚན་ཉིད་དོ། །ཧེ་རུ་ཀ་དཔལ་ནི་རྩ་རྒྱུད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་པ་ལྟར་གྱི་ཡི་གེ་བཞིའི་དོན་ལྡན་གྱི་ཧེ་རུ་ཀ་དཔལ་ཁྱོད་ཀྱི་རང་བཞིན་ནི་རྡོ་རྗེ་སྟེ། སྟོང་ཉིད་ཆོས་ཀྱི་སྐུ་དང་། ཡིད་ཀྱིས་དགེས་པ་ཆེན་པོ་འགྱུར་མེད་ཀྱི་བདེ་བ་བརྙེས་པ་ནི། བདེ་བ་ཆེན་པོའི་སྐུ་སྟེ། བདེ་སྟོང་ཟུང་དུ་འཇུག་པའི་ལྷ་ཀྱེ་རྡོ་རྗེ་ལ་ཕྱག་འཚལ་ལོ། །ཞེས་པའི་དོན་ཏོ། །སྒྲུབ་ཐབས་ཀྱི་གཞུང་ཕལ་ཆེ་བར། བསྟོད་པ་འདི་ཁོ་ན་འབྱུང་ལ། རིན་ཆེན་འབར་བར། འགྲོ་བ་དུག་ཆེན་མི་བཟད་པས། །ཁྱབ་པར་བཞུགས་ནས་ཧེ་རུ་ཀས། །སྣ་ཚོགས་ཚུལ་གྱིས་བདུད་རྩིར་བསྒྱུར། །སྨན་མཆོག་དཔའ་བོ་ཁྱོད་ལ་འདུད། །ཅེས་པའང་བཤད་དོ། །དེ་ལྟར་བསྟོད་པ་བྱས་པའི་རྗེས་སུ་མཆོད་བསྟོད་བྱེད་མཁན་གྱི་ལྷ་མོ་རྣམས་རང་གི་སྙིང་གར་ཐིམ་པར་བསམས་ལ་ང་རྒྱལ་བཟུང་སྟེ། ཨོཾ་སརྦ་ཏ་ཐཱ་ག་ཏ་སྔར་བཞིན། སྟུ་སྟི་ནི་བསྟོད་པ། བཛྲ་སྭ་བྷ་ཝ་ཨཱཏྨ་ཀོ྅ཧཾ་སྔར་བཞིན་ཏེ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་བརྗོད་པ་པོ་རིན་ཆེན་འབྱུང་ལྡན་ང་ཡིན་སྙམ་དུ་སེམས་མཉམ་པར་གཞག་གོ །གཉིས་པ་དེ་དེ་བཞིན་གཤེགས་པ་རིགས་དྲུག་དང་སྦྱར་བ་ནི། གཞལ་ཡས་ཁང་ནི་གཟུགས་ཀྱི་རྣམ་པ་གཞལ་ཡས་ཁང་ཡིན་ཡང་། རང་གི་ངོ་བོ་རྣམ་པར་སྣང་མཛད་ཡིན་པ་ནས། བསྟོད་པ་ནི་གཟུགས་ཀྱི་རྣམ་པ་བསྟོད་པ་ཡིན་ཀྱང་། རང་གི་ངོ་བོ་རིན་ཆེན་འབྱུང་ལྡན་ཡིན་པའི་བར་དུ་སྦྱར་བར་བྱ་ཞིང་། ཡིན་ཚུལ་ནི། མངོན་བྱང་གི་སྐབས་སུ་བཤད་པ་བཞིན་ནོ། །གསུམ་པ་དེ་ལྟར་སྦྱར་བའི་རྒྱུ་མཚན་ནི། དེ་ལྟར་ཡན་ལག་དྲུག་པོ་དེ་བཞིན་གཤེགས་པ་དྲུག་གི་ཡན་ལག་ཡིན་པའི་རྒྱུ་མཚན་ཅི་ཡིན་སྙམ་ན། ཕོ་བྲང་གཞལ་ཡས་ཁང་ཡང་སྐུ་ཡིན་ལ། སངས་རྒྱས་རྣམ་པར་སྣང་མཛད་ཀྱང་སྐུ་ཡིན་པས་ན་གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་དང་། དབང་བསྐུར་བའི་གཙོ་བོ་ནི་ཆུ་ཡིན་ལ། མི་བསྐྱོད་པ་དེ་བཞིན་གཤེགས་པ་ཡང་ཆུ་རྣམ་པར་དག་པ་ཡིན་པའི་ཕྱིར་དབང་བསྐུར་བ་མི་བསྐྱོད་པའི་ཡན་ལག་དང་། བདུད་རྩི་མྱང་བའང་མགྲིན་པར་ཉམས་སུ་མྱོང་བ་ཡིན་ལ། འོད་དཔག་ཏུ་མེད་པ་ཡང་གསུང་དག་པའི་ཕྱིར་བདུད་རྩི་མྱང་བ་འོད་དཔག་ཏུ་མེད་པའི་ཡན་ལག་དང་། བསྟོད་པ་ཡང་ཡོན་ཏན་ཡིན་ཅིང་། རིན་ཆེན་འབྱུང་ལྡན་དཔལ་ཡང་ཡོན་ཏན་ཡིན་པའི་ཕྱིར་བསྟོད་པ་རིན་ཆེན་འབྱུང་ལྡན་གྱི་ཡན་ལག་དང་། མཆོད་པའང་ཕྲིན་ལས་ཡིན་ལ། དོན་ཡོད་གྲུབ་པའང་ཕྲིན་ལས་དག་པ་ཡིན་པའི་ཕྱིར། མཆོད་པ་དོན་ཡོད་གྲུབ་པའི་ཡན་ལག་ཏུ་ཡང་དག་པར་བརྗོད་དོ། །རྗེས་སུ་ཆགས་པ་ནི་བདེ་བ་ཆེན་པོ་ཡིན་ལ། ལམ་བྱང་ཆུབ་སེམས་ཀྱང་རྗེས་སུ་ཆགས་པ་དང་ཆོས་མཐུན་ཅིང་། སངས་རྒྱས་ཀྱི་རྩ་བ་ཡང་བྱང་ཆུབ་ཀྱི་སེམས་ཡིན་པ་དང་། རྡོ་རྗེ་སེམས་དཔའ་ཡང་སངས་རྒྱས་ཀྱི་རྩ་བ་ཡིན་པའི་ཕྱིར། རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ཏུ་གསུངས་ཏེ། མངོན་པར་རྟོགས་པའི་རྩ་བ་ཡང་དམ་ཚིག་པ་བསྐྱེད་པ། སྐྱེ་མཆེད་དང་སྒོ་གསུམ་བྱིན་གྱིས་བརླབ་པ། ཡེ་ཤེས་པ་གཞུག་པ་རྣམས་ཡིན་པར་རྗེ་བཙུན་རིན་པོ་ཆེས་གསུངས་སོ། །བཞི་པ་བསྒོམས་པ་ལས་འབྲས་བུ་འགྲུབ་པའི་རྟགས་ནི། རྡོ་རྗེ་གུར་ལས། མཚན་མ་ཡང་དག་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །གཉིས་པ་དུ་བ་འདྲ་བ་ཉིད། །གསུམ་པ་མེ་ཁྱེར་རྣམ་པ་སྟེ། །བཞི་པ་མར་མེ་ཉེར་འབར་བ། །ལྔ་པ་རྟག་ཏུ་སྣང་བ་སྟེ། །སྤྲིན་མེད་ནམ་མཁའ་འདྲ་བ་ཉིད། །དེ་ནི་ཐམས་ཅད་བདེན་པའི་རྒྱུ། །དངོས་གྲུབ་ཉེ་བར་འགྱུར་བ་ཡིན། །ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པར་སྐད་ཅིག་འགྱུར། །ཁམས་གསུམ་རྒྱུ་དང་མི་རྒྱུ་བའི། །མ་ལུས་ལུས་པ་མེད་པར་འགྲུབ། །འཇིག་རྟེན་ཁམས་ནི་ཐམས་ཅད་དུ། །ཇི་སྲིད་རྡོ་རྗེ་ལུས་ཅན་རྣམས། །ཡེ་ཤེས་ཕུང་པོའི་བློ་ལྡན་པ། །དེ་ཡི་རྗེས་སུ་ཐམས་ཅད་འབྲང་། །ཇི་སྲིད་སྐྱེ་གནས་ལས་བྱུང་བ། །ཁམས་གསུམ་ལམ་ནི་ཉམས་དགའ་བར། །ཕྱག་རྒྱ་ཆེན་པོར་རབ་སྦྱོར་བས། །དེ་རྣམས་ཐམས་ཅད་བཟའ་བར་བྱ། །ཞེས་གསུངས་སོ། །འདིའི་དོན་གུར་རྒྱན་དུ། དུ་སོགས་རྟགས་ལྔ་ལ་དྲོད། རྩེ་མོ། བཟོད་པ། ཆོས་མཆོག མཐོང་ལམ་དང་སྦྱར་ནས། ཕྱི་ནས་སྒྱུ་མའི་ལྟར་ཞེས་སོགས་ཀྱིས་བསྒོམས་ལམ་དང་། འཇིག་རྟེན་ཁམས་ནི་ཐམས་ཅད་དུ། །ཞེས་སོགས་ཀྱིས་མཐར་ཕྱིན་པའི་ལམ་དང་། ཇི་སྲིད་སྐྱེ་གནས་ལས་བྱུང་བ། །ཞེས་སོགས་སངས་རྒྱས་ཀྱིས་དངོས་ལ་འཆད་དོ། །དྲུག་པ་རྫོགས་པའི་རིམ་པ་ནི། རང་བྱིན་གྱིས་བརླབས་ཀྱི་དམིགས་པ་ཐམས་ཅད་ཀྱི་གཙོ་བོ་འཁོར་ལོ་བཞི་ལ་བརྟེན་པའི་གཏུམ་མོའི་རྣལ་འབྱོར་བསྟན་པའི་ཕྱིར་རྩ་བའི་རྒྱུད་ལས། ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་རི་བོང་ཅན་ཧཾ་འཛག །ཅེས་གསུངས་ཏེ། རང་དཀྱིལ་འཁོར་གྱི་གཙོ་བོར་བསྒོམས་པའི་ལུས་ཀྱི་དབུས་སུ་སྤྱི་གཙུག་ནས་ལྟེ་བའི་བར་དུ། རྩ་ཨ་ཝ་དྷཱུ་ཏཱི་ཤིན་ཏུ་ཕྲ་ཞིང་གསལ་བ། ཐིག་ལེའི་དྭངས་མས་གང་བ་དེའི་གཡས་སུ་རོ་མ་མེའི་རང་བཞིན་རཀྟས་གང་བ་དམར་པོ། གཡོན་དུ་རྐྱང་མ་ཆུའི་རང་བཞིན་བྱང་ཆུབ་ཀྱི་སེམས་ཀྱིས་གང་བ་དཀར་པོ་སྟེ་རྩ་གསུམ་གསལ་གདབ། དེ་ནས་ཨ་ཝ་དྷཱུ་ཏཱི་ལ་བརྟེན་པའི་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པའི་ལྟེ་བར་ཨྃ་དམར་མོ་མེའི་རང་བཞིན་མགོ་བོ་གྱེན་དུ་བལྟ་བ། ནང་སྐོར་གྱི་འདབ་མ་བརྒྱད་ལ། ཨ་ཀ་ཙ་ཊ་ཏ་པ་ཡ་ཤ ཕྱིའི་འདབ་མ་ལ། ཨཱ་ལི་ཕྲག་གཉིས། ཀཱ་ལི་ཕྲག་གཅིག་ལ་ཧ་དང་ཀྵ་སྤངས་པ་དང་། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པའི་ལྟེ་བར་ཧཱུྃ་ནག་པོ་མགོ་བོ་ཐུར་དུ་བལྟ་བ། ཕྱོགས་བཞིར། བྷྲཱུྃ་ཨཱྃ་ཛྲཱིཾ་ཁྃ། མཚམས་བཞིར། ལྃ་མཱྃ་པྃ་ཏཱྃ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་ལྟེ་བར། ཨོཾ་དམར་པོ་མགོ་བོ་གྱེན་དུ་བལྟ་བ། འདབ་མ་ལ་ཨཱ་ལི་ཕྲག་གཅིག སྤྱི་བོ་བདེ་བ་ཆེན་པོའི་འཁོར་ལོ་རྩ་འདབ་སུམ་ཅུ་རྩ་གཉིས་པའི་ལྟེ་བར་ཧྃ་དཀར་པོ་མགོ་ཐུར་དུ་བལྟ་བ། འདབ་མ་ལ་ཨཱ་ལི་ཕྲག་གཉིས་བསམ། བཤང་སྒོར་རླུང་གི་དཀྱིལ་འཁོར་དང་། སུམ་མདོར་མེའི་དཀྱིལ་འཁོར་ཡང་བསྒོམས་ནས་འོག་སྒོ་འབྱེད་འཛུམ་གྱི་སྦྱོར་བ་བྱས་པས། འོག་གི་རླུང་ལྟེ་བར་གཏུམ་མོའི་ངོ་བོ་ཨྃ་ཡིག་ལ་ཕོག་པས་དེ་མེར་འབར་བའི་སྦྱོར་བས་གཡས་རོ་མའི་མེ་དང་འགྲོགས་ཏེ་གྱེན་དུ་འབར་བས་སྙིང་གར་དེ་བཞིན་གཤེགས་པ་ལྔའི་ངོ་བོ་ཡིག་འབྲུ་ལྔ་དང་སྤྱན་མ་ལ་སོགས་པ་ལྷ་མོ་བཞིའི་ངོ་བོ་ཡིག་འབྲུ་བཞི་ཡང་བསྲེགས་ཏེ། ཡང་ཡར་འབར་བས་མགྲིན་པའི་འཁོར་ལོ་བསྲེགས་པའི་རྗེས་སུ་མེ་དེས་སྤྱི་བོའི་འཁོར་ལོ་བསྲེགས་པས། དེའི་དབུས་ཀྱི་ཧྃ་དེ་ལས་རི་བོང་ཅན། བྱང་སེམས་བདུད་རྩིའི་རྒྱུན་གཡོན་རྐྱང་མའི་བྱང་སེམས་དང་བསྡོངས་ནས་རིམ་གྱིས་འཛག་པ་སྟེ། བབས་པས་མགྲིན་པ་དང་སྙིང་གའི་འཁོར་ལོ་རྣམས་སྔར་བས་ཀྱང་གསལ་བར་གསོས་བཏབ་ནས། ཐིགས་པ་ཅིག་ལྟེ་བའི་ཨྃ་ལ་ཕོག་པས་ཨྃ་ལས་མེའི་ཟེར་ཤིན་ཏུ་ཕྲ་བ་ལས། ཨ་ཝ་དྷཱུ་ཏཱིའི་ནང་ནས་མྱུར་དུ་སོང་བས། སྙིང་གའི་ཧཱུྃ་དང་། མགྲིན་པའི་ཨོཾ་བཅོམ། སྤྱི་བོའི་ཧྃ་ལ་ཕོག་པས་ཧྃ་ལས་བྱང་སེམས་དྭངས་མ་ཤིན་ཏུ་ཕྲ་བའི་རྒྱུན་དབུ་མའི་ལམ་ནས་འཛག སྙིང་གའི་ཧཱུྃ་དང་མགྲིན་པའི་ཨོཾ་གསོས་བཏབ་ནས་དེའི་ནུས་པས་ལྟེ་བའི་མེ་ཆེར་འབར། འབར་བ་དང་འཛག་པ་དབུ་མར་ཐིམ་པས་འབར་བའི་ནུས་པས་ལུས་དྲོད་ཀྱིས་གང་ཞིང་། ནད་དང་རྟོག་པ་བསྲེགས། འཛག་པའི་སྟོབས་ཀྱིས་རྩ་སྦུབས་ཐམས་ཅད་ཐིག་ལེས་གང་ནས་བདེ་བས་ལུས་རྒྱས། སེམས་ལ་ཡེ་ཤེས་སྐྱེས་པར་བསམ་ཞིང་། རླུང་ཁ་སྦྱོར་བསྒོམ་པར་བྱའོ། །རྒྱུན་ཏུ་བསྒོམས་ན་དྲོད་འབར་ཞིང་གསལ་སྟོང་གི་ཏིང་ངེ་འཛིན་སྐྱེ་ལ། གོམས་ན་རང་བྱུང་གི་ཡེ་ཤེས་སྐྱེ་བར་འགྱུར་རོ། །ཡེ་ཤེས་དེས་ལྷ་དང་ཕྱི་རོལ་གྱི་དངོས་པོ་རྣམས་ལ་རྒྱས་བཏབ་ནས་བསྒོམས་པས་བསྐྱེད་རིམ་གྱི་མཚན་མར་འཛིན་པའི་དུག་སྦྱངས་ནས་ཟུང་འཇུག་གི་ཏིང་ངེ་འཛིན་སྐྱེ་བར་འགྱུར་རོ། །བདུན་པ་བཟླས་པའི་རྣལ་འབྱོར་ལ་གཉིས་ཏེ། སྔོན་དུ་འགྲོ་བ་དག་པ་དྲན་པ་དང་། བཟླས་པའི་རྣལ་འབྱོར་དངོས་སོ། །དང་པོ་ནི་རྩ་རྒྱུད་ལས། སྙིང་རྗེའི་སྤྱན་ནི་དམར་པོ་ལ། །བྱམས་པའི་ཐུགས་ལ་ཡན་ལག་གནག །བསྡུ་བའི་དངོས་པོ་བཞི་ཡིས་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་བརྒྱད། །ཕྱག་ནི་སྟོང་པ་བཅུ་དྲུག་ཉིད། །གུག་བསྐྱེད་ཀྱིས་ནི་སངས་རྒྱས་ལྔ། །གདུག་པ་འདུལ་ཕྱིར་ཁྲོ་བོ་ཉིད། །དེ་ཉིད་གསུམ་ནི་སྤྱན་གསུམ་མོ། །ཤ་ནི་པུཀྐ་སཱི་རུ་བརྗོད། །དེ་བཞིན་ཁྲག་ནི་རི་ཁྲོད་མ། །གདོལ་པ་མོ་ནི་ཁུ་བར་བརྗོད། །གཡུང་མོ་རྐང་དང་ཚིལ་བུ་དག །ལྤགས་པ་བྱང་ཆུབ་ཡན་ལག་བདུན། །རུས་པ་བདེན་པ་བཞི་པོ་ཉིད། །ཅེས་ཞལ་ཕྱག་དང་། ཁམས་ཀྱི་དག་པ་དང་། གློ་དང་དབུགས་དང་དེ་བཞིན་སྨྱོ། །ཁོང་སྐམ་མཛེ་དང་བིར་ཙི་ཀ །མཆིན་པ་མཚེར་པའི་ནད་རྣམས་ལ། །གླང་པོ་ལ་སོགས་རིམ་ཤེས་བྱ། །ས་ནི་དང་པོར་ནོར་སྦྱིན་མཐར། །དབང་ཕྱུག་བརྒྱད་ནི་སྩོལ་བར་མཛད། །ཅེས་ཕྱག་མཚན་གྱི་དག་པ་དང་། གཟུགས་ཕུང་རྡོ་རྗེ་མ་ཡིན་ཏེ། །ཚོར་བ་ལ་ཡང་དཀར་མོར་བརྗོད། །འདུ་ཤེས་ཆུ་ཡི་རྣལ་འབྱོར་མ། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ཞེས་ཕུང་པོའི་དག་པ་དང་། ཞེ་སྡང་ཞེས་བཤད་རྡོ་རྗེ་མ། །འདོད་ཆགས་ཆུ་ཡི་རྣལ་འབྱོར་མ། །ཕྲག་དོག་རྡོ་རྗེ་མཁའ་འགྲོ་མ། །སེར་སྣ་གསང་བའི་དཀར་མོ་ཉིད། །གཏི་མུག་དེ་བཞིན་རྡོ་རྗེར་བཤད། །ཅེས་ཉོན་མོངས་ལྔའི་དག་པ་དང་། ས་ནི་པུཀྐ་སཱི་ཞེས་བཤད། །ཆུ་ཁམས་རྔོན་པ་མ་ཞེས་བརྗོད། །མེ་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲག །ཅེས་ཁམས་བཞིའི་དག་པ་དང་། མིག་ཏུ་གཏི་མུག་རྡོ་རྗེ་མ། །རྣ་བར་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །ཞེས་ནང་གི་སྐྱེ་མཆེད་ཀྱི་དག་པ་དང་། གཟུགས་ལ་གཽ་རཱིར་རྟག་ཏུ་བཤད། །སྒྲ་ལ་ཆོམ་རྐུན་མ་རབ་གྲག །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་རབ་གྲག །རེག་ལ་ས་སྤྱོད་མ་ཞེས་བཤད། །ཆོས་ཀྱི་དབྱིངས་ལ་མཁའ་སྤྱོད་མ། །ཞེས་ཕྱིའི་སྐྱེ་མཆེད་ཀྱི་དག་པ་དང་། གཞལ་ཡས་ཁང་ནི་བྱང་ཆུབ་ཀྱི་ཆོས་སུམ་ཅུ་རྩ་བདུན་རྣམ་པར་དག་པའོ། །བཅོམ་ལྡན་འདས་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །གཽ་རཱི་ནི་མེ་ལོང་ལྟ་བུའི་ཡེ་ཤེས་སོ། །ཙཽ་རཱི་ནི་མཉམ་པ་ཉིད་ཀྱི་ཡེ་ཤེས་སོ། །བེ་ཏཱ་ལཱི་ནི་སོ་སོར་རྟོག་པའི་ཡེ་ཤེས་སོ། །གྷསྨ་རཱི་ནི་བྱ་བ་གྲུབ་པའི་ཡེ་ཤེས་སོ། །པུཀྐ་སཱི་ནི་བྱམས་པ་ཚད་མེད་པའོ། །ཤ་ཝ་རཱི་ནི་སྙིང་རྗེ་ཚད་མེད་པའོ། །ཙཎྜ་ལཱི་ནི་དགའ་བ་ཚད་མེད་པའོ། །གཡུང་མོ་ནི་བཏང་སྙོམས་ཚད་མེད་པའོ། །ཞེས་རྟེན་དང་བརྟེན་པའི་དག་པ་དྲན་པར་བྱའོ། །དེ་དག་གི་དགོས་པ་ཡང་རྩ་རྒྱུད་ལས། རིན་ཆེན་གཟི་བརྗིད་འབར་བ་ཡི། །ཕྲེང་བ་འཁྲུགས་པ་ལྷ་མོ་ལྟོས། །མ་ཕུག་པས་ནི་སྦྱོར་བྲལ་གྱུར། །ཕུག་པས་དགའ་བ་སྦྱིན་པ་པོ། །དེ་ལྟར་འཁོར་བ་འདོད་པ་ཡི། །ཡོན་ཏན་ལྔ་ལྡན་རིན་པོ་ཆེ། །མ་དག་པས་ནི་དུག་ཏུ་འགྱུར། །དག་པས་བདུད་རྩི་ལྟ་བུར་འགྱུར། །ཞེས་གསུངས་སོ། །གཉིས་པ་བཟླས་པ་དངོས་ལ་གསུམ་སྟེ། བཟླས་པའི་ཡུལ། ཇི་ལྟར་བཟླས་པའི་བསམ་གཏན། བཟླས་བྱའི་སྔགས་སོ། །དང་པོ་ལ་བདུན་ཏེ། ཕྲེང་བའི་རྒྱུ། ཕྲེང་བའི་གྲངས། ཕྲེང་ཐག མདོ་འཛིན། བརྒྱུ་བའི་ཚུལ། བྱིན་གྱིས་བརླབ་པ། བགྲང་བའི་ཚུལ་ལོ། །དང་པོ་ནི། ལས་སོ་སོའི་ཕྲེང་བ། རྩ་རྒྱུད་ལས། ཤེལ་གྱིས་རེངས་པའི་བཟླས་པ་ཉིད། །ཞེས་སོགས་རྒྱས་པར་གསུངས་ཤིང་། སཾ་པུ་ཊའི་བརྒྱད་པའི་གཉིས་པ་ལས། ཤེལ་དང་ཉ་ཕྱིས་མུ་ཏིག་དང་། །ཁམས་ནི་དཀར་པོ་ལ་སོགས་གཞན། །ཞི་བའི་ལས་ལ་ཁྱད་པར་དུ། །ཕྲེང་བ་ཡི་ནི་མཚན་ཉིད་དོ། །གསེར་དང་དངུལ་དང་ཟངས་མ་དང་། །པདྨའི་ས་བོན་ཁྱད་པར་དུ། །རྒྱས་པ་ལ་ནི་ཕྲེང་བ་ཉིད། །རྣམ་པར་མཁས་པས་བགྲང་བར་བྱ། །གུར་གུམ་ལ་སོགས་དྲི་སོགས་ཀྱིས། །དྲི་ནི་ཐམས་ཅད་ཁྱད་པར་དུ། །བསྒྲུབས་ཤིང་རིལ་བུ་བྱས་ནས་ནི། །དབང་ལ་ཡོངས་སུ་རབ་ཏུ་གྲགས། །རུ་རཀྵ་དང་ལུང་ཐང་དང་། །དེ་བཞིན་སྐྱེས་པའི་རུས་པ་ཉིད། །དྲག་པོའི་ལས་ལ་སྦྱར་བར་བྱ། །མངོན་སྤྱོད་ལ་ནི་རབ་ཏུ་གྲགས། །ཞེས་གསུངས་ལ། ལས་གང་བསྒྲུབ་ཀྱང་ཐུན་མོང་གི་ཕྲེང་བ་ནི། དེ་ཉིད་ལས། ཞི་རྒྱས་དབང་དང་མངོན་སྤྱོད་ལས། །བོ་ཏི་ཙེས་ནི་ལས་ཀུན་བྱེད། །ཅེས་གསུངས་སོ། །འདིར་ཁམས་ནི་དཀར་པོ་ཞེས་པ་ལ། རུས་པ་དང་རྡོ་དཀར་ཞེས་གསུང་མོད་ཀྱང་། འགྱུར་ཁ་ཅིག་ལས། གཞན་ཡང་ནོར་བུ་སོགས་ཟེར་བ་ཡོད་པས་བདེའོ། །དབང་གི་ཕྲེང་བར་གུར་གུམ་སོགས་ཀྱི་དོན། གུར་གུམ་ལ་སོགས་པའི་དྲི་བཟང་པོ་སྣ་ཚོགས་ཀྱིས་ལྡེ་གུའི་རིལ་བུ་ཕྲེང་བའི་གཟུགས་སུ་བྱས་ཏེ། མིག་ཕུག་པ་ཡིན་ནམ་སྙམ། གཉིས་པ་ནི་དེ་ཉིད་ལས། སྔགས་ཀྱི་སྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པར་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་གིས། །ཕྲེང་བ་ལ་སོགས་བྱ་བའོ། །ཞེས་གསུངས་སོ། །གསུམ་པ་ནི། ལས་ཐུན་མོང་གི་རྒྱུད་རྡོ་རྗེ་མཁའ་འགྲོ་ལས། ཡང་ན་རས་བལ་སྐུད་པ་ནི། །ཞེས་བཤད་ལ། ལས་སོ་སོ་ལ་དེ་ལ་འདི་དག་བསྲེ་བར་བྱ་སྟེ། སྡོམ་འབྱུང་ལས། བོང་བུ་རྔ་མོའི་སྤུ་དང་ནི། །ཁྭ་ཡི་སྒྲོ་ནི་བསྲེ་བྱས་ལ། །མནན་དང་བསྐྲད་པའི་ལས་ལ་ནི། །དེ་ཡི་སྲད་བུས་བརྒྱུ་བར་བྱ། །རྟ་དང་མ་ཧེའི་སྤུ་ཡིས་ནི། །རྣམ་པར་སྡང་ལ་སྲད་བུ་བྱ། །དུར་ཁྲོད་སྐྲ་ཡི་སྲད་བུ་དང་། །ཁྱི་ཡི་སྤུ་ནི་བསྲེ་བྱ་སྟེ། །དེ་ཡི་སྲད་བུ་དྲག་པོ་ཡི། །ལས་ལ་བསྔགས་ཕྱིར་སྦྱར་བར་བྱ། །ཞེས་སོ། །ཉག་མའི་གྲངས་ནི། སཾ་པུ་ཊའི་བརྒྱད་པའི་གཉིས་པ་ལས། ཕྱོགས་དང་མཚམས་ནི་བརྒྱད་རྣམས་ཀྱི། །དབུས་སུ་དགུ་པ་སངས་རྒྱས་ཉིད། །ལྷ་ནི་དགུ་སོགས་སྲད་བུ་ལ། །ལྷ་དགུས་བྱིན་གྱིས་བརླབ་པར་བྱ། །ཞེས་པའི་དོན་སྲད་བུ་དགུ་སྒྲིལ་དུ་བྱས་ལ། དགུ་པོ་དེའང་ལྷ་བརྒྱད་དང་། དབུས་སུ་དགུ་པ་རྡོ་རྗེ་འཆང་མཚོན་ཅིང་། དེར་བྱིན་གྱིས་བརླབ་བོ། །ལྷ་བརྒྱད་པོ་ཁ་ཅིག་རིགས་བཞི་ཡུམ་བཞིར་ཟེར་མོད། རྗེ་བཙུན་རྩེ་མོས། སཾ་པུ་ཊའི་རྡོ་རྗེའི་དེ་ཁོ་ན་ཉིད་དུ་བསྟན་པ་བཞིན། པདྨའི་ཕྱག་དང་བྱམས་པ་དང་། །ནམ་མཁའི་མཛོད་དང་ཀུན་ཏུ་བཟང་། །གནོད་སྤྱིན་བདག་པོ་འཇམ་པའི་དཔལ། །སྒྲིབ་པ་སེལ་དང་ས་སྙིང་ཉིད། །ཅེས་པ་རྣམས་ལ་བཤད་དོ། །སྐུད་པ་འཁལ་མཁན་ཀྱང་ལས་འཇམ་པོ་ལ་ནི་རྡོ་རྗེ་མཁའ་འགྲོར། གཞོན་ནུ་མ་ཡིས་བཀལ་བ་ཡི། །དེ་ཡང་གཟུགས་མཛེས་ལུས་རྫོགས་ཤིང་། །གཙང་ཞིང་དྲན་ལྡན་སྙན་པར་སྨྲ། །དེ་ཡིས་བཀལ་བའི་ཕྲེང་ཐག་གིས། །གྲོལ་བའི་དངོས་གྲུབ་སྐྱེ་བར་འགྱུར། །ཞེས་གསུངས་པ་ལྟར་བྱས་ལ། ལས་དྲག་པོ་རྣམས་ལའང་རིགས་པས་དཔྱད་དོ། །བཞི་པ་ནི། སཾ་པུ་ཊར། ཕྲེང་བ་ཀུན་ནི་དགྲ་བཅོམ་པ། །མཆོད་རྟེན་སྟེང་དུ་རབ་ཏུ་བརྟག །མཆོད་རྟེན་ཆོས་ཀྱི་དབང་པོའི་ཕྱིར། །སྟེང་དུ་ཡང་ནི་ཆོས་ཀྱི་དབྱིངས། །ཞེས་པའི་དོན་མདོ་འཛིན་ཉིས་བརྩེགས་སུ་བྱས་པའི་འོག་མ་ཡེ་ཤེས་སྟོབས་སོགས་དང་། གོང་མ་ཆོས་དབྱིངས་མཚོན་པའོ། །ལྔ་པ་ནི། ཕྲེང་ཐག་སངས་རྒྱས་དང་བྱང་ཆུབ་སེམས་དཔར་ཤེས་ནས། ཕྲེང་བའི་རྡོག་མ་རྣམས་དེ་བཞིན་གཤེགས་པ་དགྲ་བཅོམ་པར་མོས་ཏེ། ངག་ཏུ་ཧཱུྃ་གི་གླུ་ལེན་ཅིང་བརྒྱུ་བར་བྱ་སྟེ། སཾ་པུ་ཊར། ཨཱ་ལི་ཀཱ་ལིའི་ས་བོན་ནི། །ཧཱུྃ་གི་སྲད་བུར་བརྒྱུ་བ་ཉིད། །ཅེས་གསུངས་སོ། །དྲུག་པ་ནི། ལྷ་ཡི་རྣལ་འབྱོར་ལ་གནས་པས་བྱ་སྟེ། དེའང་སཾ་པུ་ཊར་འདིའི་སྐབས་སུ། འཕགས་པ་རྣམ་པར་སྣང་མཛད་གཙོ། །ཞེས་གསུངས་པ་ནི། རྣལ་འབྱོར་ནམ་མཁའ་ལ་དགོངས་ལ། སྤྱིར་ཡི་དམ་གྱི་ལྷ་གང་ཡིན་གྱི་རྣལ་འབྱོར་གྱིས་བྱ་ཞིང་། ལས་སོ་སོ་ལ་རིགས་དང་མཐུན་པའི་རྣལ་འབྱོར་དགོས་སམ་བསམ། གང་ལྟར་ཡང་ལྷར་གསལ་བའི་རང་གི་ལག་པ་གཡོན་པའི་སོར་མོ་རྣམས་པདྨ་འདབ་མ་ལྔ་པ། ལག་པའི་མཐིལ་དུ་ཟླ་བའི་དཀྱིལ་འཁོར་ལ་ཨཱ་སོགས་དབྱངས་ཡིག་གིས་གཡོན་དུ་བསྐོར་བའི་ལྟེ་བ་ལ་ཨ། ལག་པ་གཡས་པའི་སོར་མོ་ལྔ་རྡོ་རྗེ་ལྔ་པ། ལག་པའི་མཐིལ་དུ་ཉི་མའི་དཀྱིལ་འཁོར་ལ་ཀཱ་སོགས་གསལ་བྱེད་ཀྱིས་གཡས་སུ་བསྐོར་བའི་ལྟེ་བ་ལ་ཡི་གེ་ཧཱུྃ་བསམས་ལ། པད་སྐོར་སྔོན་དུ་འགྲོ་བས་བསང་སྦྱངས་ལེགས་པར་བྱས་པའི་ཕྲེང་བ་བླངས་ཏེ་ལག་པ་གཉིས་ཀྱི་དབུས་སུ་གཞག བདུད་རྩིའི་ཡི་གེ་སུྃ་དཀར་པོ་འོད་ཟེར་འཕྲོ་བ་བསམ། རྡོ་རྗེ་དང་པདྨ་སྙོམས་པར་ཞུགས་པའི་བྱང་ཆུབ་ཀྱི་སེམས་སུྃ་ལ་ཁྱབ། དེས་ཨཱ་ལི་དང་ཀཱ་ལི་ལ་ཁྱབ། དེ་ཕྲེང་བ་དང་གཉིས་སུ་མེད་པར་གྱུར་པར་བསམས་ལ། ཨོཾ་པ་དེ་པ་དེ་མ་ཧཱ་ཛྙཱ་ནཾ། སརྦ་བུདྡྷ་མ་ཡཾ་བྷ་བེ་ཏེ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱ་ཁཾ་སྭཱ་ཧཱ། ཞེས་པའི་སྔགས་འདི་དང་པོ་བྱིན་གྱིས་རློབ་དུས་ཕྲེང་སྐོར་གཅིག་བཟླས་ཕྱིས་བཟླས་པ་ནམ་བྱེད་དུས་ཀྱང་གསུམ་ལ་སོགས་པ་བཟླས་ན་མཐུ་དང་ལྡན་པར་འགྱུར་རོ། །ཞེས་བླ་མ་དམ་པ་གསུངས་ཞེས་རྗེ་བཙུན་རྩེ་མོས་བཤད་དོ། །འགའ་ཞིག་ཏུ་གཞན་རྣམས་འདྲ་བ་ལ། ཁ་སྦྱོར་གྱི་བར་དུ་ཡི་གེ་ཨོཾ་ཨཱཿཧཱུྃ། གསུམ་ཡང་བསམས་ལ། ཡིག་འབྲུ་རྣམས་ལས་འོད་ཟེར་དཀར་པོ་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཁ་ནས་ཨཱ་ལི་ཀཱ་ལི་དཔག་ཏུ་མེད་པ་འཐོན་ནས་ཕྲེང་བ་ལ་ཐིམ་པར་བསམ་མོ། །དེ་ནས་རྡོ་རྗེ་པདྨ་ཟླ་ཉི་ཨཱཿཧཱུྃ། ཨཱ་ལི་ཀཱ་ལི་གཉིས་ཏེ། དེ་རྣམས་སྙོམས་འཇུག་བྱས་པས་ཡིག་འབྲུ་གསུམ་ལ་ཐིམ་སྟེ་གྱུར་པ་ལས་ཕྲེང་བར་གྱུར་པར་བསམས་ཏེ། ཨོཾ་ལས་མདོ་འཛིན་བྱུང་སྟེ། ཆོས་སྐུ་ལ་ཨཱཿལས་ཕྲེང་བ་དགྲ་བཅོམ་པས་བསྐོར་བར་བསམ། ཧཱུྃ་ལས་ཕྲེང་ཐག་ལྷ་དགུའི་རང་བཞིན་དུ་བྱིན་གྱིས་བརླབ་པར་བསམས་ལ། སྔགས་བརྗོད་ཟེར་ཏེ་འགྲིག་འགྲིག་འདྲ་བར་སྣང་ཡང་དཔྱད་པར་བྱའོ། །དེ་ལྟར་བྱིན་གྱིས་རློབ་པའི་ཚུལ་སཾ་ཊིར། ལག་མཐིལ་ཉི་མ་བསམས་ནས་ནི། །དབྱངས་ཡིག་དང་པོ་ལ་སོགས་པ། །ལག་པའི་དབུས་སུ་རྣལ་འབྱོར་པས། །བསྒོམས་ཤིང་བདུད་རྩིའི་ཡི་གེ་ནི། །འོད་ཟེར་འཕྲོ་བ་དུ་མ་དང་། །ཁ་དོག་དཀར་པོ་བསམས་ནས་ནི། །གཡོན་པ་པདྨ་འཛིན་པ་ཉིད། །པདྨ་རྡོ་རྗེ་འཇུག་པ་ཡིས། །ཡང་དག་སྦྱོར་བ་ཉི་མའི་ནང་། །ཀུན་གྱིས་དེ་ཉིད་བསྒོམ་བྱ་ཞིང་། །ཕྲེང་བ་བྱིན་གྱིས་བརླབ་པར་བྱ། །ཞེས་དང་། སྔགས་ཀྱི་ཕྲེང་བ་སྦྱངས་ནས་ནི། །གང་འདོད་དེ་ཉིད་བསྒྲུབ་པར་བྱ། །དེ་ཉིད་ལས་ནི་འགྲུབ་པར་འགྱུར། །ཀུན་ཏུ་གསལ་བ་མེད་ན་རིང་། །ཞེས་སོ། །བདུན་པ་ནི། སཾ་ཊར། སོར་མོ་ལ་སོགས་བྱེ་བྲག་ལ། །ཕྱིས་ནི་སྔགས་པས་བཟླས་པར་བྱ། །ཞེས་མདོར་བསྟན་ནས། ཞི་ལ་ཁྲོ་བོར་དགོད་པར་བྱ། །རྒྱས་ལ་དབུ་མའི་དེ་ཉིད་ལ། །སྲིན་ལག་ལ་ནི་དབང་དུ་གསུངས། །ཀུན་གྱི་མཐར་ནི་མངོན་སྤྱོད་ལ། །ཞེས་གསུངས་པས། ཞི་བ་ལ་ཁྲོ་བོ་སྟེ་མཛུབ་མོའི་སྟེང་ནས། རྒྱས་པ་ལ་གུང་མོའི། དབང་ལ་སྲིན་ལག མངོན་སྤྱོད་ལ་མཐེའུ་ཆུང་གི་སྟེང་ནས་ཕྲེང་བ་འོང་བར་བྱ་སྟེ། མཐེ་བོང་རྡོ་རྗེ་ལྕགས་ཀྱུ་ལས། །དངོས་གྲུབ་ལས་ནི་དགུག་པར་བྱ། །ཞེས་གསུངས་པས། མཐེ་བོང་རྡོ་རྗེ་ལྕགས་ཀྱུར་བསམས་ནས། དངོས་གྲུབ་གང་ཡིན་པ་འགུགས་པར་འདོད་པའི་བསམས་པས། མདོ་འཛིན་གྱི་བར་དུ་བགྲང་། དེ་ནས་མདོ་འཛིན་མི་འགོམ་པར་བསྐོར་བ་བྱེད་པའི་ཚུལ་གྱིས་བགྲང་ངོ་། །ལག་པ་གཡས་གཡོན་གང་གིས་བགྲང་ན། འདིར། གཡོན་པ་རྡོ་རྗེ་ཅན་གྱི་དངོས། །ཞེས་གསུངས་པས། ལག་པ་གཡོན་པ་རྡོ་རྗེར་བསམས་ནས་བགྲང་བ་ནི། མ་རྒྱུད་པས་གཡོན་གྱི་ཀུན་སྤྱོད་གཙོ་ཆེ་བ་ལ་དགོངས་སམ་བསམ། འགའ་ཞིག་ཏུ་ལྷ་མོ་བསྒྲུབ་ན་གཡོན་པས་བགྲང་། ཕོ་བསྒྲུབ་ན་གཡས་པས་བགྲང་ཟེར་ཏེ་དཔྱད་པར་བྱའོ། །དེ་ལྟར་ཕྲེང་བའི་ཀུན་རྫོབ་དང་། དོན་དམ་པའི་དེ་ཁོ་ན་ཉིད་ཤེས་པས་སྔགས་བཟླས་ན་དངོས་གྲུབ་འགྲུབ་ཅིང་གཞན་དུ་ན་འབྲས་བུ་མི་འབྱུང་སྟེ། སམྦུ་ཊར། མཉམ་གཞག་བཟླས་དང་བསྒོམ་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ཉིད་མེད་པའི་རྣལ་འབྱོར་པས། །དེ་ཉིད་མེད་པའི་སྔགས་བཟླས་དང་། །རྡོ་རྗེ་དྲིལ་བུའི་དེ་ཉིད་མེད། །ཕྱག་རྒྱའི་དེ་ཉིད་སྐྱེ་མི་འགྱུར། །རྣལ་འབྱོར་པ་ཡི་དེ་ཉིད་དམིགས། །དེ་ཉིད་ཐམས་ཅད་བྱེད་པ་ཉིད། །ཅེས་གསུངས་སོ། །གཉིས་པ་ལ་གསུམ་སྟེ། འཁོར་བའི་བཟླས་པ། སྤྲོ་བསྡུའི་བཟླས་པ། བཀོད་པའི་བཟླས་པའོ། །དང་པོ་ནི། རྗེ་བཙུན་རྩེ་མོས། རང་གཙོ་བོ་ཡབ་ཡུམ་དུ་བསྒོམས་པའི་ཡུམ་གྱི་ཐུགས་ཀའི་ཨྃ་ལས་སྔགས་ཀྱི་ཕྲེང་བ་བྱུང་། ཡུམ་གྱི་ཞལ་ནས་འཐོན། ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་སྟེ་པདྨར་ཞུགས་ནས་ཡུམ་གྱི་སྐུའི་དབྱིབས་བརྒྱུད། ཡུམ་གྱི་ཞལ་ནས་འཐོན་པར་བསྒོམ་ཞིང་རྒྱུན་མི་འཆད་པར་འཁོར་བ་ལ་དམིགས་ལ་བཟླས་པ་བྱའོ། །སྔགས་ཀྱི་ཁ་དོག་ནི་ཞི་བ་ལ་དཀར་པོ། རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོ། རྒྱུན་གྱི་བཟླས་པ་ཐམས་ཅད་སྡིག་པ་ཞི་བའི་ཕྱིར་དཀར་པོར་བྱ། དབང་བསྐུར་གྱི་བསྙེན་པ་བྱེད་ན་ལྷ་དབང་དུ་སྡུད་པས་དམར་པོར་བསམ། རབ་གནས་ཀྱི་བསྙེན་པ་བྱེད་ན། བསོད་ནམས་རྒྱས་པས་སེར་པོར་བསྒོམ། གཞན་ལས་གང་བྱེད་པ་དེ་དང་དེའི་ཁ་དོག་དང་མཐུན་པར་བྱའོ། །འཁོར་རྣམས་ཀྱི་སྔགས་ཟློས་ན་འཁོར་བའི་དམིགས་པ་སྔ་མ་བཞིན་བྱས་ལ། སྔགས་ཀྱི་འོད་ཟེར་དེས་ལྷ་མོ་གང་གི་བཟླས་པ་བྱེད་པའི་ལྷ་མོ་དེ་ལ་ཕོག་པས་དེ་དབང་དུ་འདུ་ཞིང་ཕྲིན་ལས་ལ་བསྐུལ་བར་བསྒོམས་ལ་བཟླས་པ་བྱའོ་ཞེས་གསུངས་པ་ལྟར་བྱའོ། །རྗེ་བཙུན་རིན་པོ་ཆེས། བདེ་མཆོག་གི་སྐབས་སུ་ཕར་འཁོར་དུ་གསུངས་ཤིང་། རྗེ་ས་ཆེན་གྱིས་རླུང་བརྟན་པར་འདོད་ན་ཚུར་འཁོར་དང་། བྱང་སེམས་བརྟེན་པར་འདོད་ན་ཕར་འཁོར་དུ་བྱ་བར་གསུངས་པས། དགོས་པའི་དབང་གིས་གང་འདོད་པ་བྱའོ། །གཉིས་པ་ནི། སྔགས་ཀྱི་ཡིག་འབྲུ་ལས་འོད་ཟེར་འཕྲོས་པས། ལྷའི་རྣམ་པ་གསལ་གདབ་ཅིང་མཆོད་པ་དང་། སངས་རྒྱས་ཀྱི་ཐུགས་རྒྱུད་བསྐུལ་ཞིང་སེམས་ཅན་གྱི་དོན་བྱས། ཚུར་འདུས་ནས་རང་གི་སྙིང་གར་ཐིམ་ཞིང་ཟློས་པ་སྟེ། འདི་ནི་རྗེ་བཙུན་རྩེ་མོས་ཚོགས་འཁོར་ལ་སོགས་པའི་དུས་སུ་ཟློས་པའི་མན་ངག་ཏུ་བཤད་དོ། །གསུམ་པ་ནི། སྙིང་གར་སྔགས་ཀྱི་ཡིག་འབྲུ་བཀོད་ནས་དེ་ལ་དམིགས་ནས་ཀློག་པའི་ཚུལ་གྱིས་བཟླའོ། །གསུམ་པ་ལ་ལྔ་སྟེ། བཟླས་བྱའི་སྔགས་དངོས། ཟློས་པའི་གོ་རིམ། ཇི་ལྟར་ཟློས་པའི་ཚུལ། ཇི་ཙམ་བཟླས་པའི་གྲངས། དེ་ལྟར་བཟླས་པའི་དགོས་པའོ། །དང་པོ་ནི། གཙོ་འཁོར་རྣམས་ཀྱི་སྔགས་ཏེ། ཨོཾ་ནི་མཆོག་སྟེར་བའི་དོན་ནོ། །ཨཥྚཱ་ན་ནཱ་ཡ་བརྒྱད་པའི་ཞལ་ཅན། པིཾ་གཽརྡྷ་ཀཻ་ཤ་ཝརྟ་མ་ནེ་དབུ་སྐྲ་སེར་པོ་གྱེན་དུ་བརྫེས་པ། ཙ་ཏུར་བིཾ་ཤ་ཏི་ནཻ་ཏྲཱ་ཡ་ཉི་ཤུ་རྩ་བཞིའི་སྤྱན་ཅན། ཥོ་ཌ་ཤ་བྷཱུ་ཛ་ཡ་བཅུ་དྲུག་གི་ཕྱག་ཅན། ཀྲྀཥྞ་ཛཱི་མུ་ཏ་ཝ་པུ་ཥེ་སྐུ་མདོག་ཆར་སྤྲིན་ལྟར་ནག་པ། ཀ་པཱ་ལ་མཱ་ལ་ཨ་ནཻ་ཀཾ་དྷ་རི་ཎེ་ཐོད་པའི་ཕྲེང་བ་དུ་མ་འཛིན་པ། ཨཱདྷྨ་ཏཱ་ཀྲཱུ་ར་ཙིཏྟ་ཡ་ནི་བདག་ཉིད་ཀྱི་སེམས་ཁོང་ནས་འཁྲུགས་པ། ཨརྡྷེནྡུ་དཾ་ཥྚྲི་ཎེ་མཆེ་བ་ཟླ་བ་ཕྱེད་པ་ལྟ་བུ་ཅན། འདིར་ཨོཾ་ཞེས་པ་མི་ཐུབ་ཟླ་བའི་ཀུ་མུ་ཏི་དང་། སྒྲུབ་ཐབས་གཉིས་ཆར་དུ་མེད་ཅིང་། རྩ་རྒྱུད་ཀྱི་རྒྱ་དཔེ་ཁ་ཅིག་དང་། སྒྲུབ་ཐབས་མཚོ་སྐྱེས། རིན་ཆེན་འབར་བ། བླ་མ་གོང་མ་རྣམས་ཀྱིས་བཤད་པས། དེ་ལྟར་ན་ཨོཾ་ནི་དམ་བཅའ་བའོ། །མཱ་ར་ཡ་མཱ་ར་ཡ་སོད་སོད། ཀཱ་ར་ཡ་ཀཱ་ར་ཡ་གྱིས་གྱིས། གརྫ་ཡ་གརྫ་ཡ་སྒྲོགས་སྒྲོགས། ཏརྫ་ཡ་ཏརྫ་ཡ་རྟོགས་རྟོགས། ཤོ་ཥ་ཡ་ཤོ་ཥ་ཡ་སྐོམས་སྐོམས། གང་སྐེམས་ན། སཔྟ་སཱ་ག་རཱ་ན་རྒྱ་མཚོ་བདུན། བནྡྷ་བནྡྷ་ཆིངས་ཆིངས། གང་ཆིངས་ན་ནཱ་ག་ཨཥྚ་ཀཱན་ཀླུ་བརྒྱད། གྲྀཧྣ་གྲྀཧྣ་ཟུང་ཟུང་། གང་ཟུང་ན་ཤ་ཏྲཱུན་དགྲ་བོ། ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧ་ཞེས་པ་རྣམས་ནི་ཡུམ་གྱི་ཨཱ་ལིའི་དོད་དོ། །ཕོ་སྐད་ཀྱི་ཡི་གེ་ཧ་ལ་དབྱངས་བཅུ་གཉིས་སྦྱར་བས་བཞད་པའི་ཉམས་བཅུ་གཉིས་སུ་འགྱུར་བ་ཡིན་ཏེ། གསང་སྔགས་ཀྱི་དངོས་གཞི་ལྟ་བུ་ཡིན་ནོ། །ཞེས་རྗེ་བཙུན་གསུང་ངོ་། །ཕཊ་དགས་པ། སྭཱ་ཧཱ་གཞི་ཚུགས་པ་སྟེ་རྩ་བའ་ིསྔགས་སོ། །སྔགས་དོན་གྱི་བཤད་པ་རྒྱས་པ་ནི་དཔལ་ལྡན་ས་སྐྱ་པཎྜི་ཏའི་ཨཥྚའི་བཞི་བཤད་དུ་བལྟ་བར་བྱའོ། །ཨོཾ་ནི་སྔགས་ཀྱི་འགོ་འདྲེན། དེ་ཝ་ཞེས་བྱ་བ་ནི་རོལ་པ་སྟེ། བདེ་བ་ལ་རོལ་པས་ལྷའམ་སེམས་ཅན་གྱི་དོན་ལ་རོལ་པར་བྱེད་པའོ། །པི་ཙུ་ནི་འཇམ་པོ་སྟེ། ཇི་ལྟར་བལ་འཇམ་པོས་སྦར་སྦུར་སྡུད་པ་ལྟར་འདིའི་ཐུགས་རྡོ་རྗེ་འཇམ་པོས་སེམས་ཅན་ཐམས་ཅད་སྡུད་པའོ། །བཛྲ་ཞེས་བྱ་བ་ནི་རྡོ་རྗེ་མི་ཕྱེད་པ་ལྟར་ཤེས་རབ་སྟོང་པ་ཉིད་ཀྱི་དོན་ཏེ། ཇི་ལྟར་རྡོ་རྗེ་ཕ་རོལ་འཇོམས་པ་ལྟར། ཐུགས་རྡོ་རྗེས་མ་རུངས་པ་རྣམས་འཇོམས་པའི་དོན་ཏོ། །དེ་བས་ན་ཧེ་བཛྲ་འདི་ནི་ཆོས་གསུམ་དང་ལྡན་པ་ཞེས་བྱ་བའི་དོན་ཏོ། །ཧཱུྃ་གསུམ་ནི་སྐུ་གསུང་ཐུགས་མི་ཕྱེད་པ་སྟེ། གསང་བ་འདུས་པ་ལས། ཧཱུྃ་ནི་སྐུ་དང་གསུང་དང་ཐུགས། །རྡོ་རྗེ་མི་ཕྱེད་གསུམ་འབྱུང་བ། །ཞེས་སོ། །ཕཊ་སྭཱ་ཧཱ་ནི་སྔར་བཞིན་ཏེ་སྙིང་པོའོ། །ཨོཾ་སྔར་བཞིན། བཛྲ་ཀརྟ་རི་རྡོ་རྗེ་གྲི་གུག ཧེ་བཛྲ་ཡ། ཀྱེ་རྡོ་རྗེའི་བཀས་ཞེས་ཏེ། གྲི་གུག་གིས་གཞན་གཅོད་པ་ལྟར། སྟོང་ཉིད་རྟོགས་པའི་ཡེ་ཤེས་ཀྱི་མཚན་མ་དང་། རྣམ་པར་རྟོག་པ་ཆོད་ཅིག་པའོ། །ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ་ནི་སྔར་བཞིན་ཏེ། ཉེ་བའི་སྙིང་པོའོ། །ཡུམ་དང་འཁོར་རྣམས་ཀྱིས་སྔགས་ནི། རྩ་རྒྱུད་ལས། དབྱངས་བཅོ་ལྔ་རྣལ་འབྱོར་མ་རྣམས་ཀྱི་ས་བོན་དུ་བཤད་པ་དང་། ཕྱི་མའི་ལྔ་པར། ཨྃ་ཡུམ་གྱི་ས་བོན་དང་། གྃ་ཙྃ་སོགས་ལྷ་མོ་བརྒྱད་ཀྱི་ས་བོན་དུ་བཤད་པ་ལ། དང་པོའི་གཉིས་པར། སྔགས་ཐམས་ཅད་ཀྱི་རྐང་པ་དང་པོར་ཨོཾ་གྱི་རྣམ་པ་དང་། མཐར་ནི་སྭཱ་ཧཱ་དང་། ཧཱུྃ་ཕཊ་ཀྱི་རྣམ་པ་ནི་ནང་དུ་གཞུག་གོ །ཞེས་མགོ་བོར་ཨོཾ་དང་མཇུག་ཏུ་ཧཱུྃ་ཕཊ་སྭཱ་ཧཱ། ཞེས་པ་སྦྱོར་བར་གསུངས་པ་ལ་བརྟེན་ནས། རྗེ་བཙུན་རྩེ་མོས་འཁོར་རྣམས་ཀྱི་སྔགས་མཛད་པ་ནི་རྒྱུད་དང་ཤིན་ཏུ་མཐུན་ནོ། །དེ་ལ་ཨོཾ་ཨཱཿཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨྃ་ཧཱུྃ་ཕཊ་སྭཱ་ཧཱ། རྣལ་འབྱོར་མ་རྣམས་ཀྱི་ཕྲེང་བའི་སྔགས་སོ། །ཨོཾ་ཨཱཿཨྃ་ཧཱུྃ་ཕཊ་སྭཱ་ཧཱ། བདག་མེད་མའི་འོ། །ཨོཾཨཱཿགྃ་ཧཱུྃ་ཕཊ་སྭཱ་ཧཱ། གཽ་རཱིའི་འོ། །ཨོཾ་ཨཱཿཙྃ་ཧཱུྃ་ཕཊ་སྭཱ་ཧཱ། ཙཽ་རཱིའི་འོ། །ཨོཾ་ཨཱཿབྃ་ཧཱུྃ་ཕཊ་སྭཱ་ཧཱ། བེ་ཏཱ་ལཱིའི་འོ། །ཨོཾ་ཨཱཿགྷྃ་ཧཱུྃ་ཕཊ་སྭཱ་ཧཱ། གྷསྨ་རཱིའི་འོ། །ཨོཾ་ཨཱཿཔྃ་ཧཱུྃ་ཕཊ་སྭཱ་ཧཱ། པུཀྐ་སཱིའི་འོ། །ཨོཾ་ཨཱཿཤ་ྃཧཱུྃ་ཕཊ་སྭཱ་ཧཱ། ཤ་ཝ་རཱིའི་འོ། །ཨོཾ་ཨཱཿལྃ་ཧཱུྃ་ཕཊ་སྭཱ་ཧཱ། ཙཎྜ་ལཱིའི་འོ། །ཨོཾ་ཨཱཿཌྃ་ཧཱུྃ་ཕཊ་སྭཱ་ཧཱ། ཌོཾ་བི་ནཱིའི་འོ། །རྒྱས་པར་སྤྲོ་ན་ཨོཾ་ཨཱཿགྃ་གཽ་རཱི་ཧཱུྃ་ཕཊ་ཞེས་བྱ་བ་ལ་སོགས་པ་ས་བོན་གྱ་ིརྩ་བར་མིང་གཞུག་པར་བྱས་ལ་བཟླས་སོ། །གཉིས་པ་ནི། སྔགས་གསུམ་གྱིས་སྐུ་གསུང་ཐུགས་བསྐུལ་བར་བཤད་པ་ལྟར། ཐོག་མར་རྩ་སྔགས་བཟླས་ཏེ། དེ་ནི་སྐུ་བསྐུལ་བྱེད་དུ་གསུངས་ལ་སྐུ་དེ་ནི་རིགས་པ་ཡིན་པས་བསྐུལ་སླ་བའི་ཕྱིར་རོ། །གསུང་ཕྲ་བས་དེའི་རྗེས་དང་། ཐུགས་ཤིན་ཏུ་ཕྲ་བས་བསྐུལ་དཀའ་བས་ཐམས་ཅད་ཀྱི་རྗེས་སུ་བསྐུལ་བ་ཡིན་ཞེས་བླ་མ་དག་གསུང་ངོ་། །གསུམ་པ་ནི་སྔགས་ཀྱི་ཚིག་ངག་ཏུ་མི་བརྗོད་པར་ཡིད་ཀྱིས་ཟློས་པས་ཡིད་བཟླས། རླུང་བསྒོམས་ནས་ཡིད་ཀྱིས་ཟློས་པ་འགོག་པའི་བཟླས་པ། རླུང་འགྲོ་འོང་དང་སྦྱར་ནས་བཟླས་པ་རྡོ་རྗེའི་བཟླས་པ། ལྕེ་རྩེ་དང་མཆུ་གཡོ་བ་ཙམ་གྱིས་བཟླས་པ་ཤུབ་བུའི་བཟླས་པ། ཡི་གེ་རིང་ཐུང་བྱེད་ཅིང་སྐད་གསང་ཆེན་པོས་བཟླས་པ་རིག་བྱེད་འདོན་པ་ལྟ་བུའི་བཟླས་པ་སྟེ་ལྔ་ཡིན་ནོ་ཞེས་བླ་མ་དག་གསུང་ངོ་། །བཞི་པ་ནི་རྗེ་བཙུན་རིན་པོ་ཆེས་ལམ་འབྲས་ཀྱི་མན་ངག་ལས། བསྙེན་པ་རབ་འབྲིང་དགུར་གསུངས་ཏེ། དེའང་མཚན་མའི་བསྙེན་པ་རབ་འབྲིང་གསུམ་ནི། རབ་ཡི་དམ་གྱི་ལྷ་ལས་དངོས་སུ་གནང་བ་ཐོབ་པ། འབྲིང་རྡོ་རྗེ་དྲིལ་བུ་ནམ་མཁའ་ལ་འཇོག་ནུས་པ། ཐ་མ་རྨི་ལམ་དུ་གནང་བ་ཐོབ་པ། འབྲིང་དུས་ཀྱི་བསྙེན་པ་རབ་འབྲིང་གསུམ་ནི་རབ་ལོ་དྲུག འབྲིང་ཟླ་བ་དྲུག ཐ་མ་ཞག་བདུན་ཡིན་ནོ། །ཐ་མ་གྲངས་ཀྱི་བསྙེན་པར་འབྲིང་གསུམ་ནི་རབ་གཙོ་བོ་ལ་བཞི་འབུམ། འཁོར་ལ་བཞི་ཁྲི། འབྲིང་གཙོ་བོ་ལ་བཞི་ཁྲི། འཁོར་ལ་བཞི་སྟོང་། ཐ་མ་གཙོ་བོ་ལ་བཞི་སྟོང་། འཁོར་ལ་བཞི་བརྒྱ་ཡིན་ནོ། །དུས་དང་གྲངས་ཀྱི་འབྲིང་དང་། ཐ་མ་གཉིས་ནི་བསྙེན་པ་ཁ་གསོ་བ་ལས་དངོས་གཞིའི་བསྙེན་པ་ནི་མ་ཡིན་ནོ། །ཞེས་གསུང་། རྗེ་བཙུན་རྩེ་མོས་དབང་ཆུར་གཞན་འདྲ་བ་ལ་རྡོ་རྗེ་དྲིལ་བུ་ནམ་མཁའ་ལ་འཇོག་པ་རབ་ཀྱི་ནང་དུ་བསྡུས་ནས། འབྲིང་རྨི་ལམ་དུ་གནང་བ་ཐོབ་པ། ཐ་མ་ཉམས་ཀྱི་སྣང་བ་ལ་འདྲིར་རུང་བ་དང་། དུས་ཀྱི་བསྙེན་པ་ལ་རབ་ཟླ་བ་དྲུག འབྲིང་ཟླ་བ་གསུམ་ཞེས་གསུངས་ཏེ། གསུང་ངག་དང་། སྤྱིར་དཀྱིལ་འཁོར་གྱི་བསྙེན་པའི་ཁྱད་པར་ཡིན་ནམ་སྙམ་མོ། །འོ་ན་རྩ་རྒྱུད་ལས། དཀྱིལ་འཁོར་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གཙོ་བོ་ལ་འབུམ་དང་། འཁོར་རྣམས་ལ་ཁྲི་ཕྲག་རེ་བཟླས་པར་བཤད་པ་དང་འགལ་ལོ་སྙམ་ན། བོད་ཀྱི་བླ་མ་རྣམས་ལུང་དེ་ནི་རྫོགས་ལྡན་གྱི་དུས་ཀྱི་དབང་དུ་བྱས་ལ། ད་ལྟ་རྩོད་དུས་ཡིན་པས་དེ་བཞི་འགྱུར་དུ་བྱ་དགོས་ཏེ། སྡོམ་འབྱུང་ལས། རྫོགས་ལྡན་ལ་ནི་བཟླས་བྱ་གཅིག །ཉིས་འགྱུར་སུམ་ལྡན་ལ་བཟླས་བྱ། །སུམ་འགྱུར་ཉིས་ལྡན་ལ་རབ་བརྗོད། །རྩོད་ལྡན་བཟླས་པ་བཞི་འགྱུར་རོ། །ཞེས་གསུངས་པས་མི་འགལ་བར་བཞེད་པ་ནི་ཤིན་ཏུ་ལེགས་ཏེ། སངས་རྒྱས་ཐོད་པའི་དཀའ་འགྲེལ་ཡེ་ཤེས་ལྡན་ལས་ཀྱང་། རྫོགས་ལྡན་དུས་སུ་ཡི་གེ་འབུམ་བཟླས་ཏེ། །སུམ་ལྡན་དུས་ཀྱི་སྔགས་པས་འབུམ་ཕྲག་གཉིས། །ཉིས་ལྡན་དུས་སུ་འབུམ་ཕྲག་གསུམ་དུ་འགྱུར། །བྱེ་བ་ཕྲག་གསུམ་འབུམ་བཞི་རྩོད་དུས་སྦྱར། །ཞེས་སོ། །ལྔ་པ་ནི་བཟླས་པས་སངས་རྒྱས་ཀྱི་ཐུགས་བསྐུལ་བས། རང་གིས་མཆོག་དང་ཐུན་མོང་གི་དངོས་གྲུབ་འགྲུབ་པ་ཡིན་ཏེ། རྡོ་རྗེ་གུར་ལས། མཁའ་འགྲོ་མ་དང་རང་བཙུན་མོ། །མངོན་སུམ་དུ་ནི་བྱ་བའི་ཕྱིར། །སྔགས་ནི་སྙན་གསན་འབེབས་པར་བརྗོད། །དཔེར་ན་སྐྱེས་བུ་ལ་ལ་ཞིག །སྐད་ཀྱི་ང་རོས་བོས་པ་ན། །མངོན་སུམ་དུ་ནི་འོང་བར་འགྱུར། །དེ་བཞིན་དེ་བཞིན་གཤེགས་ཀུན་གཤེགས། །ཞེས་གསུངས་སོ། །བསྙེན་པ་དང་། ཚོགས་འཁོར་གྱི་དུས་སུ་དེ་ལྟར་བཟླས་པའི་རྗེས་ལ་དཀྱིལ་འཁོར་བསྡུ་བ་ཡིན་ཅིང་། སྐབས་གཞན་དུ། སྔར་གྱི་བསྟོད་པའི་རྗེས་ལ་བསྡུས་ཀྱང་བཏུབ། རྫོགས་རིམ་བསྒོམས་པའི་རྗེས་ལ་བསྡུས་ཀྱང་བཏུབ། དག་པ་རྗེས་སུ་དྲན་པའི་རྗེས་ལ་བསྡུས་ཀྱང་བཏུབ་སྟེ། གང་ལྟར་ཡང་བསྡུ་བའི་རིམ་པ་ནི། གཙོ་བོའི་ཐུགས་ཀའི་ཧཱུྃ་ལས་འོད་ཟེར་འཕྲོས་ནས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ་བསྡུ། དེ་གཞལ་ཡས་ཁང་ལ་བསྡུ། དེ་ལྷ་མོ་བརྒྱད་ལ། དེ་ཞལ་བརྒྱད་ལ་བསྡུས་ལ། གཙོ་བོ་ཡབ་ཡུམ་གྱི་ང་རྒྱལ་གྱིས་རྫོགས་རིམ་བསྒོམ་པའམ། དེ་ཟིན་ནས་དག་པ་རྗེས་དྲན་བྱ་བའམ། དེ་ཟིན་ནས་སྡུད་ན་བཟླས་པའི་རྣལ་འབྱོར་ལ་འཇུག་པར་བྱའོ། །གང་ལྟར་ཡང་གཙོ་བོ་ཡབ་ཡུམ་ནི་ཉལ་བའི་རྣལ་འབྱོར་གྱི་བར་དུ་བསྡུ་བ་མེད་དོ། །སྟན་ལས་ལྡང་བའམ། བཟླས་བརྗོད་ཟིན་པའི་རྗེས་ལ། རྡོ་རྗེའི་གླུ་དང་བཀྲ་ཤིས་ཀྱི་ཚིགས་བཅད་དང་། སྨོན་ལམ་རྣམ་པར་དག་པ་བཏབ་ལ། ཁ་ཟས་སམ། སྤྱོད་ལམ་གྱི་རྣལ་འབྱོར་ལ་འཇུག་པར་བྱའོ། །ཞེས་རྗེ་བཙུན་གསུང་ངོ་། །བརྒྱད་པ་ཁ་ཟས་ཀྱི་རྣལ་འབྱོར་ནི། ཁ་ཟས་དང་པོར་བདུད་རྩི་འཁྱིལ་པའི་སྔགས་ཀྱིས་བགེགས་བསལ་བ་ལ་སོགས་གཏོར་མ་བཞིན་བྱིན་གྱིས་བརླབས་ཏེ། རང་དཔལ་ཀྱེ་རྡོ་རྗེའི་རྣལ་འབྱོར་གསལ་བའི་ཐུགས་ཀར་པདྨ་དང་ཉི་མའི་སྟེང་དུ་ཧཱུྃ་ཙམ་ལས་ལྷ་དགུའི་དཀྱིལ་འཁོར་དང་། ལྟེ་བར་འབྱུང་པོ་བརྒྱད་གསུམ་ཉེར་བཞི་བསྐྱེད་ལ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས། ཐུགས་ཀའི་ཧཱུྃ་གི་འོད་ཀྱིས་ཡེ་ཤེས་པ་སྤྱན་དྲངས་ལ་རང་གི་སྙིང་ག་ནས་ཞུགས་ཏེ། དམ་ཚིག་པ་ལ་བསྟིམ། དབང་བསྐུར་ཡང་དྲན་པར་བྱས་ལ། རང་གི་ལྕེ་ཧཱུྃ་ལས་རྡོ་རྗེར་བསྐྱེད་ལ། དེ་ལས་འོད་བྱུང་སྟེ་གསོལ་བས། ཕུད་ཀྱིས་སྙིང་གའི་ལྷ་དགུ་མཆོད། དེའི་ལྷག་མས་ལྟེ་བའི་འབྱུང་པོ་བརྒྱད་གསུམ་ཉི་ཤུ་རྩ་བཞི་མཆོད་པར་བསམ་ཞིང་། ཁ་ཧོམ་ཁུང་དང་། ལག་པ་གཟར་བུ། ཁ་ཟས་བསྲེག་རྫས་སུ་བསམས་ལ་བཟའོ། །འབྲིང་ནི་ཁ་ཟས་མཁའ་འགྲོ་སྤྱི་གཏོར་བཞིན་བྱིན་གྱིས་བརླབས་ལ། སྙིང་གར་ལྷ་དགུའི་དཀྱིལ་འཁོར་བསམ་ལ། ལྟེ་བ་ནས་མེ་སྦར་ཏེ་ལྷ་མཆོད་པའི་བསམས་པས་བཟའོ། །འདི་ནི་ནང་གི་གཏོར་མ་ཞེས་པ་ཡིན་ལ། དམིགས་པ་དང་ང་རྒྱལ་བརྟན་པ་རྣམས་ལ་གཏོར་མ་ལ་སོགས་པ་གཞན་མི་དགོས་ཀྱང་དེ་བཞིན་གཤེགས་པའི་བཀའ་བཞིན་བསྲུང་བ་དང་། རང་གི་སྔགས་ཀྱི་སྤྱོད་པ་དང་། དམ་བཅའ་བརྟན་པའི་ཕྱིར་དང་། སེམས་ཅན་མ་དད་པ་བསྲུང་བའི་ཕྱིར་དང་། ལས་དང་པོ་པའི་སེམས་ཅན་གཞན་རྗེས་སུ་དྲང་བའི་ཕྱིར་ལྷ་བཤོས་དང་། ཆང་བུ་དང་། གཏོར་མ་ལ་སོགས་པ་ཐམས་ཅད་ཐུན་མོང་གི་ལུགས་བཞིན་བྱའོ། །བསྡུས་པ་ནི་ཁ་ཟས་ལ་ལག་པ་གཡོན་གྱི་སྲིན་ལག་དང་མཐེ་བོང་གིས་རེག་སྟེ། ཨོཾ་ཨཱཿཧཱུྃ་ཞེས་བརྗོད་ལ། ཁ་ཟས་དེ་ཤ་ལྔ་དང་། བདུད་རྩི་ལྔ་ཡེ་ཤེས་ལྔའི་ངོ་བོར་བསམས་ལ། སྙིང་གའི་ཡི་གེ་ཧཱུྃ་ལྷ་ཐམས་ཅད་ཀྱི་ངོ་བོར་མོས་ལ། དེ་མཆོད་པའི་བསམ་པས་བཟའ་སྟེ། སྙིང་གའི་ས་བོན་མེ་འབར་ལ། །དེ་ཡི་ག་བུར་བཏུང་བར་བྱ། །བཏུང་བ་དེ་ཡིས་རྣལ་འབྱོར་པ། །མྱུར་དུ་དངོས་གྲུབ་ཐོབ་པར་འགྱུར། །ཞེས་གསུངས་ཏེ། འདིས་བཅུད་ལེན་དུ་འགྱུར་བའི་དགོས་པ་ཡང་བསྟན་ནོ། །གཞན་ཡང་ཡོན་དག་པའི་དགོས་པ་ཡང་ཡོད་དེ། ཟས་ཀྱི་རྣལ་འབྱོར་འདི་ཡིས་ནི། །བུ་ལོན་དུ་ཡང་མི་འགྱུར་རོ། །ཞེས་གསུངས་སོ། །གཞན་ཡང་འདིས་རྩ་བའི་ལྟུང་བ་བཅུ་གསུམ་པ་མི་འབྱུང་བའི་དགོས་པ་ཡང་ཡོད་དོ། །དགུ་པ་སྤྱོད་ལམ་གྱི་རྣལ་འབྱོར་ལ་གཉིས་ཏེ། གང་གིས་བྱེད་པའི་རྣལ་འབྱོར། དེས་བྱ་བའི་རྣལ་འབྱོར་རོ། །དང་པོ་ནི་རྩ་རྒྱུད་ལས། ལངས་ཏེ་ལྷའི་གཟུགས་སུ་གཞག་གོ །ཞེས་གསུངས་ལ། དེའི་དོན་མཉམ་གཞག་ལས་ལངས་ནས། སྤྱོད་ལམ་སྣ་ཚོགས་ལ་འཇུག་པའི་ཚེ་ལྷའི་ང་རྒྱལ་དང་མ་བྲལ་བར་གནས་དགོས་པ་ཡིན་ཏེ། བྷ་ཝ་བྷ་དྲས། ཐུན་དང་། སྒོམ་པའི་ཕྱི་རོལ་གྱི་བྱ་བ་གསུངས་པ། ལྷའི་ཞེས་བྱ་བ་ལ་སོགས་པ་ལ། ལྷའི་གཟུགས་ནི་འདུག་པ་དང་། བཟའ་བ་དང་། ཉལ་བ་ལ་སོགས་པ་རྣམས་སུ་ལྷའི་ང་རྒྱལ་གྱིས། ཡུལ་རྣམས་ལ་ལྷའི་གཟུགས་སུ་ཉེ་བར་ལོངས་སྤྱོད་པའི་རྣལ་འབྱོར་གྱི་ངེས་པ་ཉིད་དོ་ཞེས་དགོངས་སོ་ཞེས་བཤད་པའི་ཕྱིར་རོ། །འོ་ན་ལྷའི་ང་རྒྱལ་ཇི་ལྟ་བུར་བསྒོམ་སྙམ་ན། ཕྱི་ནང་གི་ཆོས་ཐམས་ཅད་རང་བཞིན་གྱིས་མ་གྲུབ་པར་ཤེས་པའི་སྟོང་པ་ཉིད་དང་། དེ་ཉིད་གཟུགས་ཀྱི་རྣམ་པ་ལྷའི་སྐུ་སྒྱུ་མ་ལྟ་བུར་ཤར་བ་གཉིས་དབྱེར་མེད་པའི་རང་བཞིན་ཅན་དུ་བསྒོམ་པ་ཡིན་ཏེ། གྲུབ་ཆེན་མཚོ་སྐྱེས་ཀྱིས། ལྷའི་ལུས་ཀྱི་གནས་པར་བྱའོ་ཞེས་པ་ནི་སྒྱུ་མ་ལྟ་བུ་གཉིས་སུ་མེད་པ་བདེ་བ་ཆེན་པོའི་རང་བཞིན་གྱི་བདག་ཉིད་ཀྱིས་ཆོས་ཐམས་ཅད་ལྷག་པར་མོས་ཏེ། ཐམས་ཅད་དུ་གནས་པར་བྱའོ་ཞེས་གསུངས་སོ། །གཉིས་པ་ལ་གཉིས། རང་གི་ལྷག་པའི་ལྷའི་རྣལ་འབྱོར་དང་། ལྷ་སོ་སོའི་རྣལ་འབྱོར་རོ། །དང་པོ་ནི། ཅི་དང་ཅིར་སྣང་བའི་དངོས་པོ་ཐམས་ཅད་ཀྱེ་རྡོ་རྗེར་ཤེས་པར་བྱས་ནས་ལོངས་སྤྱོད་དེ། གསང་འདུས་ལས། འདོད་པའི་ལོངས་སྤྱོད་ཐམས་ཅད་ནི། །ཅི་ལྟར་འདོད་པས་བསྟེན་བྱ་སྟེ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །སོགས་སོ། །འདི་ནི་ཉུང་ངུ་ལ་མོས་པ་རྣམས་ཀྱི་ཐ་མལ་གྱི་རྣམ་རྟོག་ལོག་པར་བྱེད་པའོ། །གཉིས་པ་ནི་ཡུལ་དང་ཡུལ་ཅན་གྱི་དབྱེ་བས་མཐའ་ཡས་པར་བྱས་ལ། དེ་དག་རེ་རེ་ཡང་ལྷ་སོ་སོར་ཤེས་པར་བྱེད་པ་སྟེ། དེ་ཡང་གཟུགས་གཽ་རཱི། སྒྲ་ཙཽ་རཱི། དྲི་བེ་ཏཱ་ལཱི། རོ་གྷསྨ་རཱི། རེག་ས་སྤྱོད་མ། ཆོས་ཁམས་མཁའ་སྤྱོད་མ་སྟེ། ཕྱིའི་ཡུལ་དྲུག་ལྷ་མོ་དྲུག་དང་། མིག་སོགས་ནང་གི་དབང་པོ་དྲུག་དང་། རྣམ་ཤེས་དྲུག་པོ་གཏི་མུག་རྡོ་རྗེ་མ་ལ་སོགས་པའི་ལྷ་མོ་དྲུག་ཏུ་བྱ་སྟེ། ལྷ་ལ་ལྷ་ཐིམ་པའི་ཚུལ་གྱིས་ལོངས་སྤྱད་དོ། །འདི་ནི་རྒྱ་ཆེན་པོ་ལ་དགའ་བ་རྣམས་ལ་ཐ་མལ་པར་འཛིན་པ་དང་། རིལ་པོ་གཅིག་ཏུ་འཛིན་པའི་རྣམ་རྟོག་ཐམས་ཅད་བཤིག་པ་ཡིན་ནོ། །དེ་ལྟར་འཆིང་བའི་རྒྱ་ནི་ཐ་མལ་པའི་རྣམ་པར་རྟོག་པ་ཡིན་ལ། དེ་ལྷའི་རྣམ་པར་ཤེས་པ་ན་ཐ་མལ་པ་དག་པས་ཐམས་ཅད་རིལ་གྱིས་སྤོང་བར་འགྱུར་རོ། །གཞན་ཡང་སྐབས་འགའ་ཞིག་ཏུ་དཀྱིལ་འཁོར་དང་། ལྷའི་རྣམ་དག་དང་། དེ་ཁོ་ན་ཉིད་རྣམས་ཀྱང་རྒྱས་པར་དྲན་པར་བྱ་ཞིང་། དཀྱིལ་འཁོར་དང་། རབ་གནས་དང་། སྦྱིན་སྲེག་དང་། ཆོས་འཆད་པ་དང་། ཉན་པ་ལ་སོགས་པའི་སྤྱོད་ལམ་ཐམས་ཅད་ཀྱང་ལྷའི་རྣལ་འབྱོར་གྱིས་བྱའོ། །བཅུ་པ་རྗེས་ཆགས་ཀྱི་རྣལ་འབྱོར་ནི་ཁྱིམ་པ་རྡོ་རྗེ་འཛིན་པས་ལས་ཀྱི་ཕྱག་རྒྱ་བསྟེན་པར་འདོད་ན། ལྷའི་འདུ་ཤེས་སྔགས་ཀྱི་འདུ་ཤེས། ཆོས་ཀྱི་འདུ་ཤེས་ཏེ་བྱ་བ་དེ་གསུམ་དང་ལྡན་པས་བསྟེན་ན། འདོད་ཆགས་ཉིད་བྱང་ཆུབ་ཀྱི་ལམ་དུ་འགྱུར་རོ། །དེ་ལ་ལྷའི་འདུ་ཤེས་ནི་རང་ཀྱེ་རྡོ་རྗེ་དང་། ཡུམ་བདག་མེད་མར་བསྐྱེད་པའོ། །སྔགས་ཀྱི་འདུ་ཤེས་ནི་ཡུམ་གྱི་མཁའ་སྟོང་པར་བསམས་པའི་ངང་ལས། པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལ་ཨཱས་མཚན་པར་བསྐྱེད་ལ། པདྨ་སུ་ཁ་སོགས་ཀྱིས་བྱིན་གྱིས་བརླབ། ཡབ་ཀྱི་གསང་གནས་སྟོང་པར་བསམས་པའི་ངང་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུྃ་གིས་མཚན་པ་བསྐྱེད་ལ། ཨོཾ་བཛྲ་མ་ཧཱ་སོགས་ཀྱིས་བྱིན་གྱིས་བརླབ་བོ། །དེ་ནས་གཉིས་ཀའི་མགོ་བོར་ཨོཾ། མགྲིན་པར་ཨཱཿ སྙིང་གར་ཧཱུྃ་བསམ་མོ། །ཆོས་ཀྱི་འདུ་ཤེས་ལ་བསྐྱེད་པའི་རིམ་པ་ལྟར་ན་བདེ་བ་ཆེན་པོའི་ཡེ་ཤེས་ཀྱི་དཔལ་ཀྱེ་རྡོ་རྗེ་ལ་མཆོད་པར་བྱའོ་སྙམ་དུ་བསམས་ལ། རྫོགས་པའི་རིམ་པ་ལྟར་ན། ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་ཞེས་བསམ་མོ། །རྒྱས་པར་ནི་དབང་གསུམ་པའི་མན་ངག་ཏུ་རྟོགས་པར་བྱའོ། །འདིའི་དགོས་པ་ནི་གསུམ་སྟེ། འདོད་པས་ལོག་པར་གཡེམ་པར་མི་འགྱུར་བ་དང་། ལྷ་མཆོད་པར་འགྱུར་བ་དང་། ལྷན་སྐྱེས་ཀྱི་ཡེ་ཤེས་རྟོགས་པར་འགྱུར་བའོ། །དང་པོ་ནི། དེ་ཉིད་འདུས་པར་ནི། འདོད་ཆགས་ལྟ་བུའི་བདེ་བ་མེད། །དེ་བས་རྒྱལ་བ་རྣམས་ལ་འབུལ། །སེམས་ཅན་དོན་ཕྱིར་གཞན་བུད་མེད། །བསྟེན་པས་བསོད་ནམས་ཐོབ་པར་འགྱུར། །ཞེས་གསུངས་ཏེ། ཆོས་ཀྱི་འདུ་ཤེས་ཀྱི་དགོས་པའོ། །གཉིས་པ་ནི་རྡོ་རྗེ་གུར་ལས། རང་ཉིད་ཧེ་རུ་ཀར་བྱས་ཤིང་། །རང་གི་བཙུན་མོ་ངར་བྱས་ནས། །ཆགས་ཆེན་གྱིས་ནི་འདོད་སྤྱོད་པ། །དེ་ལ་ང་ནི་རྟག་ཏུ་མཉེས། །ཞེས་པ་སྟེ། ལྷའི་འདུ་ཤེས་ཀྱི་དགོས་པའོ། །གསུམ་པ་ནི། སློབ་དཔོན་ཨིནྡྲ་བྷཱུ་ཏིས། བདེ་བ་བདེ་བ་ཆེན་པོ་ཀུན། །སྲིད་པའི་སྡུག་བསྔལ་གཅོད་བྱེད་ཅིང་། །མྱ་ངན་འདས་པའི་གནས་ཐོབ་ཅེས། །བཅོམ་ལྡན་འདས་ཀྱིས་དེ་སྐད་གསུངས། །ཞེས་གསུངས་པ་ལྟར་རོ། །འདི་ནི་རྣལ་འབྱོར་པ་ཁྱིམ་པ་ཁོ་ནའི་དབང་དུ་མཛད་ནས་གསུངས་ཀྱིས། དགེ་སློང་རྡོ་རྗེ་འཛིན་པ་ལ་ནི་འདི་མི་དགོས་པས། རྣལ་འབྱོར་དགུས་ཉིན་མཚན་ཁོར་ཡུག་ཏུ་འདའ་བར་བྱེད་པ་ཡིན་ནོ། །རྣལ་འབྱོར་བཅུ་ལ་བཤད་པའི་གོ་རིམ་མཉམ་པར་གཞག་པའི་རྣལ་འབྱོར་གཉིས། མཉམ་པར་མ་བཞག་པའི་རྣལ་འབྱོར་བརྒྱད་ཅེས་པ་བདེ་བ་ཡིན་ན་ཡང་། འདིར་ནི་མདང་ནུབ་མོ་ཉལ་བའི་རྣལ་འབྱོར་ནས་བརྩམས་ཏེ། ཉིན་ཞག་གཅིག་གི་ཉམས་ལེན་གྱི་རིམ་པའི་དབང་དུ་བྱས་ནས་བཤད་པ་ཡིན་ནོ། །བདུན་པ་སྦྱང་གཞི་སྦྱོང་ཞིང་ལམ་བྱེད་བཞིས་ལམ་དུ་བྱེད་པའི་ཚུལ་ལ་གཉིས་ཏེ། སྦྱང་གཞི་སྦྱོང་བའི་ཚུལ་དང་། དེ་ཉིད་ལམ་བྱེད་བཞིས་ལམ་དུ་བྱེད་པའི་ཚུལ་ལོ། །དང་པོ་ནི། སྦྱང་གཞི་མི་སྦྱོང་བའི་ལྷའི་རྣལ་འབྱོར་བློས་བསྐྱེད་པ་ཙམ་ནི་རྒྱུད་སྡེ་འོག་མ་གསུམ་ལ་ཡང་ཡོད་པས་བསྐྱེད་པའི་རིམ་པར་མི་འགྱུར་ཞིང་། སྦྱང་གཞི་སྦྱོང་བྱེད་ལེགས་པར་ངོ་འཕྲོད་པའི་ལྷའི་རྣལ་འབྱོར་གང་བསྒོམ་པ་ཐམས་ཅད་རྣལ་འབྱོར་ཆེན་པོའི་རིམ་པ་གཉིས་ཀྱི་ནང་ནས་བསྐྱེད་པའི་རིམ་པར་འགྱུར་བས་འདི་ཚུལ་བཞིན་དུ་བཤད་པ་གལ་ཆེ་བ་ཡིན་ལ། དེ་ལ་ཡང་མན་ངག་མེད་པར་རྣམ་རྟོག་གིས་སྒྲོ་བཏགས་པའི་ལུགས་ནི་ལམ་དུ་མི་འགྱུར་བས་རྒྱུད་སྡེའི་དགོངས་པ་མན་ངག་གིས་ལེགས་པར་བརྒྱན་པ་ཤེས་དགོས་སོ། །འདི་ལ་གཉིས་ཏེ། རྟོག་པས་བཏགས་པའི་ལུགས་དགག་པ། རྒྱུད་ཀྱི་དགོངས་པ་ཕྱིན་ཅི་མ་ལོག་པར་བཤད་པའོ། །དང་པོ་ལ་གཉིས་ཏེ། ཕྱོགས་སྔ་མ་བརྗོད་དེ་སུན་དབྱུང་བའོ། །དང་པོ་ལ་གཉིས་ཏེ། ཆོས་དབྱིངས་ཁོ་ན་སྦྱང་གཞིར་འདོད་པའི་ལུགས། མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པའི་ལུགས་སོ། །དང་པོ་ནི། གཞན་སྟོང་གི་གྲུབ་མཐའ་འཛུགས་པའི་སྔོན་གྱི་མཁས་པ་ཁ་ཅིག་ན་རེ། ཕུང་ཁམས་སྐྱེ་མཆེད་ཀྱི་ཆོས་རེ་རེ་ལ་ཡང་། མཚན་ཉིད་གསུམ་གསུམ་དུ་ཕྱེ་བའི་ཡོངས་གྲུབ་ཁོ་ན་སྦྱང་གཞི་ཡིན་གྱི། ཀུན་བརྟགས་དང་གཞན་དབང་གཉིས་ནི་སྦྱང་གཞི་མ་ཡིན་ཏེ། དེ་དག་ནི་ཀུན་རྫོབ་ཀྱི་བདེན་པ་སྤང་བར་བྱ་བ་ཁོ་ན་ཡིན་པའི་ཕྱིར་དང་། སྦྱང་གཞི་དོན་ལྷར་བསྒོམས་པས་ལྷར་འགྱུར་བ་ཅིག་དགོས་ལ། ཀུན་རྫོབ་ཀྱི་བདེན་པ་ནི་རང་བཞིན་རྣམ་དག་གི་ལྷ་མ་ཡིན་པས་ལྷར་བསྒོམས་ཀྱང་ལྷར་འགྱུར་བ་མི་སྲིད་པའི་ཕྱིར་རོ། །ཡེ་ཤེས་ཚོགས་བསག་གི་སྔགས་དོན་ལས་ཀྱང་ཤེས་ཏེ། སྟོང་ཉིད་ཡེ་ཤེས་རྡོ་རྗེའི་རང་བཞིན་ངའོ་ཞེས་དང་། ཆོས་ཐམས་ཅད་རང་བཞིན་གྱིས་རྣམ་པར་དག་པ་ངའོ་ཞེས་དང་། ཆོས་ཐམས་ཅད་རྣལ་འབྱོར་གྱི་ངོ་བོར་རྣམ་པར་དག་པ་ངའོ་ཞེས་ང་རྒྱལ་འཇོག་པ་ཡེ་ཤེས་ཚོགས་བསག་ཏུ་བཤད་ལ། དེའི་དོན་ཡང་། འདུས་བྱས་ཀུན་རྫོབ་ཀྱི་བདེན་པ་ཐམས་ཅད་སྟོང་ཉིད་དུ་གཏན་ལ་ཕབ་ནས་འདུས་མ་བྱས་ཆོས་དབྱིངས་བདེན་གྲུབ་ལ་ང་རྒྱལ་གཞག་སྟེ། དེ་ཉིད་འོག་ནས་འབྱུང་བའི་རྟེན་དང་བརྟེན་པར་བཅས་པའི་ལྷར་བསྐྱེད་དེ་བསྒོམས་པས་ཆོས་དབྱིངས་དེ་ཉིད་ལ་གློ་བུར་གྱི་དྲི་མ་དག་ནས་ལྷར་འགྱུར་བའི་དོན་ཡིན་པའི་ཕྱིར་རོ་ཞེས་སྨྲའོ། །གཉིས་པ་ནི་ཕྱིས་ཀྱི་བླ་མ་གསང་སྔགས་རང་བཟོར་བྱེད་པ་དག་ན་རེ། སྔར་འདས་ཟིན་པ་དང་། ད་ལྟར་སྐྱེས་པའི་དངོས་པོ་ཐམས་ཅད་ནི་སྦྱང་གཞི་མ་ཡིན་ཏེ། སྔར་འདས་ཟིན་པ་དང་། ད་ལྟར་བ་ནི་སྐད་ཅིག་གིས་མི་གནས་པས་སྦྱང་མི་དགོས་པར་རང་གི་ངང་གིས་འཇིགས་པའི་ཕྱིར་རོ། །དེས་ན་ལམ་བསྒོམ་པའི་སྒྲུབ་པ་པོ་ལ་མ་འོངས་པ་ན་འབྱུང་འགྱུར་གྱི་སྐྱེ་འཆི་བར་དོ་གསུམ་པོ་ཁོ་ན་སྦྱང་གཞི་ཡིན་ཏེ། སྦྱང་གཞི་སྦྱོང་བའི་དོན་ལམ་མ་བསྒོམས་ན་སྐྱེ་འཆི་བར་དོ་གསུམ་འབྱུང་རྒྱུ་ཡིན་པ་ལས་ལམ་བསྒོམས་པའི་བྱེད་པས། སྐྱེ་འཆི་བར་དོ་གསུམ་གྱི་ཚབ་ཏུ་འབྲས་བུ་སྐུ་གསུམ་འབྱུང་བ་ལ་འཇོག་དགོས་པའི་ཕྱིར་རོ། །འབྱུང་འགྱུར་གྱི་ཆོས་གསུམ་པོ་དེ་ཡང་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཡིན་པ་ཅིག་དགོས་ཏེ་སྦྱོང་བྱེད་ཀྱི་མངོན་པར་རྟོགས་པ་ནི་སྦྱང་གཞིའི་ཆོས་གསུམ་པོ་དེ་དང་འདྲ་བ་ཅིག་བསྒོམ་དགོས་པ་གང་ཞིག དེ་ཅི་འདྲ་བ་ནི་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཁོ་ན་ལ་ཡོད་ཀྱི་གཞན་ལ་མེད་པའི་ཕྱིར་རོ། །སྦྱང་གཞི་སྦྱོང་བའི་དོན་སྦྱང་གཞི་དེ་ཉིད་ལྷར་བསྒོམ་པ་ནི་མ་ཡིན་ཏེ། མ་དག་པའི་སྣང་བ་འདི་རྣམས་ནི་ལས་ཉོན་གྱི་འབྲས་བུར་གྱུར་པའི་སྡུག་བསྔལ་གྱི་བདེན་པ་ཡིན་པས་ལྷར་བསྒོམས་ཀྱང་ལྷར་འགྱུར་བ་མི་སྲིད་པའི་ཕྱིར། སོལ་བ་བརྡར་བ་ལས་དུང་མི་འབྱུང་བ་བཞིན་ནོ། །ཞེས་འཛེར་ཏོ། །གཉིས་པ་དེ་སུན་དབྱུང་བ་ལ་གཉིས་ཏེ། སོ་སོར་དགག་པ་དང་། ཐུན་མོང་དུ་དགག་པའོ། །དང་པོ་ལ་གཉིས་ཏེ། ཆོས་དབྱིངས་ཁོ་ན་སྦྱང་གཞིར་འདོད་པ་དགག མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པ་དགག་པའོ། །དང་པོ་ནི། ཆོས་དབྱིངས་དོན་དམ་པའི་བདེན་པ་སྦྱང་གཞི་ཡིན་པའི་དོན། འཕགས་པའི་མཉམ་གཞག་གིས་ཉམས་སུ་མྱོང་བའི་ཆོས་དབྱིངས་མཚན་ཉིད་པ་སྦྱང་གཞི་ཡིན་ནམ། ཐ་མལ་པའི་རྣམ་རྟོག་ལ་ཆོས་དབྱིངས་སུ་སྣང་བ་སྦྱང་གཞི་ཡིན། དང་པོ་ལྟར་ན་ཤིན་ཏུ་མི་འཐད་དེ། མཉམ་གཞག་སོ་སོ་རང་རིག་པའི་ཡེ་ཤེས་ཁོ་ནས་ཉམས་སུ་མྱོང་བར་བྱ་བ་ཡིན་གྱི་ཐ་མལ་གྱི་རྣམ་རྟོག་འཇོག་པའི་གཞི་མ་ཡིན་པས་སྦྱང་གཞིར་བྱེད་པ་དོན་མེད་པའི་ཕྱིར་རོ། །དེ་ལྟར་ཡང་གུར་ལས། ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །ཞེས་དང་། བྱང་ཆུབ་སེམས་དཔའ་རྣམས་ཀྱི་རྟོགས་པ་དེ་བཞིན་ཏེ། འོན་ཀྱང་མི་གཙང་བའི་ཚད་མཉམ་པར་སྦྱང་བའི་ཕྱིར། དེ་བཞིན་གཤེགས་པའི་སྐུ་གཟུགས་བསྒོམ་པར་བྱའོ། །ཞེས་དང་། སངས་རྒྱས་ཡེ་ཤེས་ཞབས་ཀྱིས། ཐ་མལ་རྣམ་རྟོག་རྒྱུན་ནི་མ་གཏོགས་པ། །སྲིད་པའི་འཆིང་བ་གཞན་ན་ཡོད་མ་ཡིན། །དེ་དང་རྣམ་པ་འགལ་བར་གྱུར་པའི་སེམས། །གང་ཡིན་དེས་ནི་ཀུན་རྟོག་སྣང་མི་འགྱུར། །ཞེས་གསུངས་པས་སོ། །ཕྱི་མ་ལྟར་ན་སྒྲ་རྟོག་གི་ཡུལ་དུ་གྱུར་པའི་ཆོས་དབྱིངས་ནི། རྣམ་གྲངས་པའི་དོན་དམ་བདེན་པ་ཞེས་བྱ་བ་ཡིན་གྱི། རང་གི་ངོ་བོ་སྒྲ་རྟོགས་གི་ཡུལ་ཀུན་རྫོབ་བདེན་པ་ཡིན་པས་དེ་ནི་ཀུན་རྫོབ་སྦྱང་གཞིར་སོང་བའི་དོན་ཡིན་ལ། ཕུང་པོ་ལྔའི་ཆོས་ཉིད་རིགས་དྲུག་པའི་སྦྱང་གཞིར་གསུངས་པ་ཡང་འདི་ལ་དགོངས་སོ། །སྤྲོས་བྲལ་རང་གི་ངོ་བོ་ལྷར་བསྒོམས་པ་ཉིད་ཀྱང་མི་འཐད་དེ། རྩ་རྒྱུད་བརྟག་གཉིས་ལས། སྒོམ་པ་པོ་མེད་སྒོམ་པའང་མེད། །ལྷ་མེད་སྔགས་ཀྱང་ཡོད་མ་ཡིན། །ཞེས་གསུངས་པས་སོ། །བདེན་པ་གཉིས་སུ་ཕྱེ་ནས། ཀུན་རྫོབ་བདེན་པ་ལྷར་མི་བསྒོམ་པར་དོན་དམ་བདེན་པ་ལྷར་བསྒོམ་པ་ནི་རྒྱུད་དང་དངོས་སུ་འགལ་ཏེ། རྩ་རྒྱུད་དང་པོའི་དགུ་པར། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་དོན་དམ་པར་ཕྱི་ནང་གི་དངོས་པོ་ཐམས་ཅད་དེ་བཞིན་ཉིད་སྤྲོས་བྲལ་ཡིན་པས་ལྷར་བསྒོམས་པ་མེད་ཀྱང་ཕྱི་ནས་ཏེ། དེ་མ་གཏོགས་པར་ཀུན་རྫོབ་ཀྱི་སྤྲོས་པ་སྣ་ཚོགས་འཆར་བ་རེ་རེ་ནས་ལྷར་བསྒོམས་ཞེས་པའི་དོན་ཡིན་པའི་ཕྱིར་དང་། ཕྱི་མའི་བཅུ་གཅིག་པར། བུད་མེད་དང་ནི་སྐྱེས་པ་ཡི། །གང་གི་སྲིན་ལག་རྩ་བ་ལ། །རྡོ་རྗེ་རྩེ་དགུ་པར་གྱུར་པ། །མི་བསྐྱོད་པ་ཡི་རིགས་མཆོག་ཉིད། །ཅེས་སོགས་དབྱིབས་ཀྱི་སྒོ་ནས་རིགས་ལྔ་སོ་སོའི་རིགས་སུ་ངེས་པ་དང་། རྣལ་འབྱོར་པ་གང་ནག་པོ་ཉིད། །དེ་ཡི་ལྷ་ནི་མི་བསྐྱོད་པ། །ཞེས་སོགས་ཁ་དོག་གི་སྒོ་ནས་རིགས་ལྔ་སོ་སོའི་རིགས་སུ་ངེས་པའི་ཚུལ་གསུངས་ཤིང་། དེ་ཡང་ཀུན་རྫོབ་ཏུ་དེ་དང་དེའི་རིགས་ཡིན་པའི་ཚུལ། ལུང་དེའི་མཇུག་ཏུ། ཀུན་རྫོབ་གཟུགས་སུ་གནས་ནས་ནི། །དེ་རྣམས་བདེ་གཤེགས་རིགས་སུ་འགྱུར། །བུད་མེད་རྣམས་ཀྱི་མཚན་ཉིད་འདི། །ཇི་ལྟར་སྐྱེས་པ་དེ་བཞིན་ནོ། །ཀུན་རྫོབ་ཐ་སྙད་ཚུལ་ལས་ནི། །དེ་ཡི་རིགས་སུའང་དེ་འགྱུར་རོ། །ཞེས་གསུངས་པས་སོ། །འདི་ཉིད་རྡོ་རྗེ་གུར་ལས་ཀྱང་གསལ་བར་གསུངས་ཏེ། གལ་ཏེ་འགལ་བ་ཡོད་པ་མ་ཡིན་ཡང་། །དེ་ཚེ་རྒྱལ་བའི་དངོས་པོས་སྦྱངས་པ་ཡོད། །ཀུན་རྫོབ་གཟུགས་སུ་རྣམ་པར་གནས་ནས་ནི། །འཁོར་ལོའི་གཟུགས་ཀྱི་ཆོས་ཙམ་རྣམ་པར་བརྟག །ཅེས་གསུངས་ཤིང་དེའི་དོན་ཡང་། དོན་དམ་ཆོས་ཉིད་ཀྱི་ངོས་ནས་འགལ་བ་སྦྱང་གཞི་དང་། སྦྱོང་བྱེད་སོ་སོར་ཡོད་པ་མ་ཡིན་ཡང་། ཆོས་ཉིད་མ་གཏོགས་པར་ཀུན་རྫོབ་ཕུང་ཁམས་སྐྱེ་མཆེད་ཀྱི་སྣང་བ་འཆར་བ་དེའི་ཚེ་སྦྱང་གཞི་དེ་དག་རྒྱལ་བའི་དངོས་པོས་སྦྱངས་པས་སྦྱང་གཞི་དང་། སྦྱོང་བྱེད་ཀྱི་རྣམ་གཞག་ཡོད་དོ། །དེས་ན་སྦྱོང་བྱེད་འཁོར་ལོའི་གཟུགས་ཀྱིས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ཙམ་ལྷའི་ངོ་བོར་རྣམ་པར་བརྟགས་པའི་སྦྱང་གཞི་དང་སྦྱོང་བྱེད་གཉིས་ཀ་ཡང་། ཀུན་རྫོབ་གཟུགས་སུ་རྣམ་པར་གནས་ནས་ཡིན་གྱི་དོན་དམ་པར་ནི་མ་ཡིན་ཞེས་པའི་དོན་ཏོ། །དེ་ལྟར་ན་རྩ་རྒྱུད་ལས། ཕྱི་ནས་ཞེས་པ་དང་། གུར་ལས། དེ་ཚེ་ཞེས་པ་དོན་གཅིག་པས་རྒྱ་བོད་ཀྱི་མཁས་གྲུབ་རྣམས་ཀྱི་སྒྲུབ་ཐབས་རྣམས་ལས། ཡེ་ཤེས་ཚོགས་བསག་སྟོང་ཉིད་བསྒོམས་པའི་རྗེས་སུ་སྟོང་པའི་ངང་ལས་ཞེས་གསུངས་པར་ཤེས་པར་བྱས་ནས་དོན་དམ་སྤྲོས་བྲལ་སྦྱང་གཞི་ཡིན་ཀུན་རྫོབ་སྤྲོས་བཅས་སྦྱང་གཞི་མ་ཡིན་ཞེས་བྱ་བའི་གཏམ་སྨྲ་བར་མི་བྱའོ། །བསྟན་བཅོས་ཆེན་པོ་དང་ཡང་འགལ་ཏེ། སྤྱོད་བསྡུས་ལས། གང་ཞིག་སྐྱེ་བ་ཀུན་རྫོབ་བདེན་པ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །རིམ་གཉིས་འདི་དག་བླ་མའི་བཀའ་དྲིན་གྱིས། །རྙེད་པ་གང་དེ་མ་འོངས་སངས་རྒྱས་ཡིན། །ཞེས་པ་དང་འགལ་བའི་ཕྱིར་ཏེ། སྐྱེ་བ་ཀུན་རྫོབ་ཀྱི་བདེན་པ་བསྐྱེད་རིམ་གྱི་སྦྱང་གཞི་འཇོག་ན་དངོས་སུ་འགལ་ཞིང་། སྦྱོང་བྱེད་ཀྱི་ལྷ་ཡིན་ན་དོན་དམ་ཀུན་རྫོབ་ཏུ་བསྒོམ་པར་ཐལ་བའི་སྐྱོན་སྔར་བཤད་ཟིན་པའི་ཕྱིར་རོ། །གཞན་ཡང་འདི་ལ་རིགས་པ་དུ་མས་གནོད་དེ། ཆོས་ཉིད་ལྷར་བསྒོམ་པའི་ཚེ་ལྷའི་འཁོར་ལོ་དེ་ཀུན་རྫོབ་མ་ཡིན་ན་ནི་སྔར་གྱི་ལུང་དེ་དག་གིས་དངོས་སུ་གནོད། ཀུན་རྫོབ་ཡིན་ན་དོན་དམ་ཀུན་རྫོབ་ཏུ་བསྒོམ་པ་མི་འཐད་དེ། ཀུན་རྫོབ་ཏུ་ལྷར་བསྒོམས་ཀྱང་དེ་ལྷར་མི་འགྱུར་བའི་ཕྱིར་རོ། །ཞེས་ཟློག་ན་ལན་ཅི་སྨྲ། གཞན་ཡང་དོན་དམ་བདེན་པ་བདེན་གྲུབ་ཏུ་བྱས་ནས་དེ་ཉིད་ལྷར་བསྒོམས་པས་ལྷར་འགྱུར་བར་འདོད་པ་ནི་ཁས་བླངས་འགལ་ཏེ། འཕགས་མཆོག་ཀླུ་སྒྲུབ་ཀྱིས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མ་ཡིན། །ཞེས་གསུངས་པས་སོ། །གལ་ཏེ་ལྷར་འབྱུང་བའི་དོན། དང་པོ་ནས་ལྷ་ཡིན་པ་ལ་ཕྱིས་གློ་བུར་གྱི་དྲི་མ་བསལ་ནས། ལྷར་མཐོང་བ་ཙམ་ལ་བྱེད་དོ་སྙམ་ན། དེ་ཡང་མི་རུང་སྟེ། སྔར་གྱི་ལུང་དེས་བདེན་པར་གྲུབ་ན་བྱ་བྱེད་གང་ཡང་མི་རུང་བ་བསྟན་པའི་ཕྱིར་རོ། །གཞན་ཡང་འདི་ལ་རྩ་ལྟུང་བསྲུང་ཚུལ་མི་རུང་བ་དང་། སྤྱོད་ལམ་གྱི་རྣལ་འབྱོར་མི་རུང་བ་དང་། ཁ་ཟས་ཀྱི་རྣལ་འབྱོར་མི་རུང་བ་དང་། མཆོད་གཏོར་བྱིན་རླབས་མི་རུང་བ་དང་། རབ་གནས་མི་རུང་བ་དང་། སྦྱིན་སྲེག་མི་རུང་བ་སོགས་སྐྱོན་དཔག་ཏུ་མེད་པ་ཡོད་པ་ལས་རེ་ཤིག་དང་པོ་ནི། ཕུང་པོ་སངས་རྒྱས་ལྔ་བདག་ཉིད། །དེ་ལ་སྨོད་པ་བརྒྱད་པ་ཡིན། །ཞེས་པ་མི་རུང་བར་འགྱུར་ཏེ། ཆོས་ཉིད་ཡོངས་གྲུབ་ལ་སྨད་པ་མེད་པའི་ཕྱིར། གཉིས་པ་ནི་རྩ་རྒྱུད་ལས། ལངས་ཏེ་ལྷའི་གཟུགས་སུ་གཞག་གོ །ཞེས་པ་མི་རུང་བར་འགྱུར་ཏེ། མཉམ་གཞག་ལས་ལངས་པའི་ཚེ་དོན་དམ་ནི་བློ་ལ་མི་སྣང་། ཀུན་རྫོབ་ནི་ལྷའི་གཟུགས་སུ་མི་གཞག་པའི་ཕྱིར་རོ། །གསུམ་པ་ཁ་ཟས་བདུད་རྩིར་བྱིན་གྱིས་བརླབས་ནས་བཟའ་བར་མི་རུང་བར་འགྱུར་ཏེ། ཀུན་རྫོབ་ནི་བདུད་རྩིར་བྱིན་གྱིས་མི་བརླབ། ཆོས་ཉིད་ནི་བཟའ་བར་མི་རུང་བའི་ཕྱིར་རོ། །བཞི་པ་ནི་མཆོད་པ་དང་གཏོར་མ་སོགས་བྱིན་གྱིས་བརླབ་པ་ལ་ཡང་རིགས་པ་དེས་བསྒྲེའོ། །ལྔ་པ་ནི་རབ་གནས་ཀྱང་མི་རུང་བར་འགྱུར་ཏེ། རབ་གནས་ཀྱི་རྒྱུད་ལས། སངས་རྒྱས་ཀུན་ན་རབ་ཏུ་བཞུགས། །རབ་ཏུ་གནས་པ་གང་ཡང་མེད། །ཀུན་ཏུ་མཁའ་ལྟར་གནས་པ་ལ། །ཅིག་ཤོས་ཀྱིས་ནི་རབ་ཏུ་བརྟག །འཇིག་རྟེན་ཀུན་རྫོབ་ལ་བརྟེན་ནས། །རབ་ཏུ་གནས་པ་རབ་ཏུ་བརྟག །ཅེས་དོན་དམ་པར་རབ་ཏུ་གནས་བྱ་གནས་བྱེད་མེད་པར་གསུངས་ཤིང་། ཀུན་རྫོབ་ཏུ་རབ་ཏུ་གནས་བྱ་གནས་བྱེད་ནི་ཁྱེད་ཀྱིས་བཀག་པའི་ཕྱིར་རོ། །དྲུག་པ་ནི་སྦྱིན་སྲེག་ཀྱང་མི་རུང་བར་འགྱུར་ཏེ། ཐབ་ཁུང་གི་ནང་དུ་ལྷ་བསྐྱེད་ནས་བསྲེག་རྫས་འབུལ་བའི་རྣམ་གཞག་དེ་དག་དོན་དམ་ཡིན་ན་ནི། སྔར་གྱི་ཀླུ་སྒྲུབ་ཀྱི་ལུང་གིས་གནོད། ཀུན་རྫོབ་ཡིན་པ་ནི་ཁྱེད་ཀྱིས་བཀག་པའི་ཕྱིར་རོ། །འདི་དག་ཐམས་ཅད་ལ་ཡང་མཚན་ཉིད་གསུམ་གསུམ་དུ་ཕྱེ་བའི་ཡོངས་གྲུབ་ཀྱི་གཟུགས་སོགས་ལ་དགོངས་སོ་ཞེས་པའི་ལན་ནི་མི་རུང་སྟེ། ཡོངས་གྲུབ་མཚན་ཉིད་པ་ལ་ནི་བྱ་བྱེད་མེད། ཐ་མལ་པའི་བློ་ངོར་ཡོངས་གྲུབ་ཏུ་སྣང་བ་ནི་ཀུན་རྫོབ་ཡིན་པས་རང་གི་ཕྱོགས་སུ་འདུག་ནས་ཕར་ཟ་བའི་ཕྱིར་རོ། །ཡེ་ཤེས་ཚོགས་བསག་གི་སྔགས་དོན་དོན་དམ་བདེན་པ་བདེན་གྲུབ་ལ་ང་རྒྱལ་འཇོག་པར་འདོད་པ་ནི་ཤིན་ཏུ་འཁྲུལ་ཏེ། བདེན་གྲུབ་ལ་ང་རྒྱལ་འཇོག་པ་ཐོག་མ་མེད་པ་ནས་ཡོད་པའི་བདེན་འཛིན་ལྷན་སྐྱེས་ཡིན་པས་འཁོར་བའི་རྒྱུ་ཡིན་པའི་ཕྱིར་ཏེ། སྤྱོད་འཇུག་ལས། འདིར་ནི་སྡུག་བསྔལ་རྒྱུར་གྱུར་པའི། །བདེན་པར་ཞེན་པ་བཟློག་བྱ་ཡིན། །ཞེས་གསུངས་པའི་ཕྱིར་རོ། །རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་འགྲུབ་པར་འགྱུར། །ཞེས་གསུངས་པ་ནི། བདེན་གྲུབ་ལ་ང་རྒྱལ་འཇོག་པ་མ་ཡིན་ཏེ། ལྟ་བས་བདེན་འཛིན་གྱི་དྲི་མ་སྦྱངས་ནས་ཀུན་རྫོབ་སྣང་ཙམ་ལ་ཐ་མལ་གྱི་རྣམ་རྟོག་སྤོང་བའི་ཕྱིར་དུ་ལྷའི་འཁོར་ལོ་བསྒོམ་པའི་དོན་ཡིན་པའི་ཕྱིར་ཏེ། རྩ་རྒྱུད་ལས། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་གསུངས་པའི་དོན། རྗེ་བཙུན་གོང་མ་འཁྲུལ་པའི་དྲི་མ་ཟད་པ་དག་གིས། དུག་དེ་ལ་ཀུན་ཏུ་བརྟགས་པའི་དུག་དང་། ཀུན་ཏུ་རྟོག་པའི་དུག་གཉིས་ལས། དང་པོ་ནི་བདེན་འཛིན་ཡིན་པས་ལྟ་བས་སྦྱོང་བར་བྱེད། གཉིས་པ་ནི་ཐ་མལ་གྱི་རྣམ་རྟོག་ཡིན་པས་བསྐྱེད་རིམ་གྱིས་སྤོང་བར་བྱེད་པའི་དོན་དུ་གསུངས་པ་འདི་ཉིད་རྒྱུད་ཀྱི་དོན་དུ་གནས་པའི་ཕྱིར་རོ། །ཅི་ལྟར་གནས་ན་ལུང་དེའི་གོང་དུ་དེ་བཞིན་ཉིད་ཀྱི་དག་པ་དང་། ལྷ་སོ་སོའི་དག་པ་གཉིས་གསུངས་པ་ལས་ཤེས་སོ། །འོ་ན་ཡེ་ཤེས་ཚོགས་བསག་གི་སྔགས་དོན་གང་ཞེ་ན། སྐབས་དེར་ངའོ་ཞེས་པའི་ང་ནི་གཞི་ལམ་འབྲས་བུའི་གནས་སྐབས་ཐམས་ཅད་དུ་ཀུན་རྫོབ་ཐ་སྙད་དུ་གསལ་སྟོང་ཟུང་འཇུག་ཡོད་པ་དེ་ཉིད་ཡིན་ཏེ། རྩ་རྒྱུད་ལས། ང་ལས་འགྲོ་བ་ཐམས་ཅད་འབྱུང་། །ང་ལས་གནས་གསུམ་པོ་ཡང་འབྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་དང་། དངོས་ང་དངོས་པོ་མེད་པ་ང་། །དངོས་པོ་རྟོགས་ཕྱིར་སངས་རྒྱས་ང་། །གང་ཞིག་ལེ་ལོས་བསྣུན་པ་དང་། །རྨོངས་པ་གང་གིས་ང་མི་ཤེས། །ཞེས་གསུངས་པས་སོ། །ང་རྒྱལ་འཇོག་པའི་ཚུལ་ཡང་རང་བཞིན་རྣམ་དག་གི་སྟོང་ཉིད་ཁྱད་གཞིར་བཟུང་ནས་ཁྱད་ཆོས་ངའོ་སྙམ་པའི་འཛིན་སྟངས་བསྣན་པ་མ་ཡིན་གྱི། སྣང་བ་ཐམས་ཅད་སྟོང་ཉིད་དུ་སྦྱངས་ནས་རི་བོང་གི་རྭ་ལྟར་ཅི་ཡང་མེད་ཙམ་མ་ཡིན་པར་སྟོང་པ་དང་གསལ་བ་དབྱེར་མེད་པ་ལ་མཉམ་པར་གཞག་པའི་དོན་ཏོ། །དེས་ན་རྗེ་ས་ཆེན་གྱིས་གསུངས་པ་ལྟར་ཡེ་ཤེས་ཚོགས་བསག་གི་དགོས་པ་གསུམ་ཡང་འགྲུབ་ཅིང་ལྟ་བའི་ངོ་བོ་ཟུང་འཇུག་ལ་གཞག་པ་ཡང་འགྲུབ་བོ། །གང་ཞིག་ལེ་ལོས་བསྣུན་པ་དང་། །རྨོངས་པ་གང་གིས་ང་མི་ཤེས། །ཞེས་གསུངས་པའི་སྐབས་འདིའི་ང་དང་། ཕ་རོལ་ཏུ་ཕྱིན་པའི་ཐེག་པར་གྲགས་པའི་ང་དོན་མི་གཅིག་པའི་ཚུལ་ཞིབ་པར་ངག་ལས་ཤེས་དགོས་སོ། །གཉིས་པ་མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པའི་ལུགས་དགག་པ་ནི་ཁྱོད་ཀྱིས་རྣམ་གཞག་རིམ་པའི་ཊཱི་ཀར་སྔར་འདས་ཟིན་པའི་བསྐལ་པ་ད་ལྟ་རྣལ་འབྱོར་པའི་ལམ་བསྒོམ་པའི་སྦྱང་གཞིར་འཇོག་ན་ན་ཉིང་ཞིག་ཟིན་པའི་བུད་ཤིང་ད་ལོའི་མེས་བསྲེག་པར་ཐལ་ལོ། །ཞེས་པའི་སྐྱོན་འཕེན་པ་ནི་རང་གི་གྲུབ་མཐའི་གཙོ་བོ་ལ་སྐྱོན་འདི་ལྟར་ཐོང་ཞིག ཅེས་པའི་བརྡ་སྟེ། སང་ཕོད་སྐྱེ་འགྱུར་གྱི་བུད་ཤིང་ད་ལོའི་མེས་བསྲེག་པར་འགྱུར་ཏེ། མ་འོངས་པ་ན་འབྱུང་འགྱུར་གྱི་སྐྱེ་འཆི་བར་དོ་གསུམ་ད་ལྟ་རྣལ་འབྱོར་པས་ལམ་བསྒོམ་པའི་སྦྱང་གཞི་ཡིན་པའི་ཕྱིར་ཞེས་བརྗོད་ན་ལན་ཅི་ཡོད། སྦྱང་གཞི་སྦྱོང་བའི་དོན་ལམ་མ་བསྒོམས་ན་སྐྱེ་འཆི་བར་དོ་གསུམ་འབྱུང་རྒྱུ་ཡིན་པ་ལ། ལམ་བསྒོམས་པའི་བྱེད་པས་དེའི་དོད་དུ་འབྲས་བུ་སྐུ་གསུམ་འབྱུང་བ་ལ་འདོད་པ་ནི། རང་དགར་རྣམ་པར་རྟོགས་པས་བཏགས་པ་ཙམ་ཡིན་གྱི་རྡོ་རྗེ་ཐེག་པའི་རྒྱུད་གཞུང་གང་གི་ཡང་ལུགས་མ་ཡིན་ཏེ། དེ་ལྟར་ན་སྦྱོང་བྱེད་བསྐྱེད་པའི་རིམ་པ་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་དང་། རྣམ་པ་ཅི་འདྲ་མ་འདྲ་ཞིག་བསྒོམས་པ་དོན་མེད་པའི་ཕྱིར་ཏེ། མ་འོངས་པ་ན་འབྱུང་འགྱུར་གྱི་སྲིད་པ་བཀག་ནས་དེའི་དོད་དུ་ཡོན་ཏན་གཞན་འབྱུང་བ་ནི་ཕ་རོལ་ཏུ་ཕྱིན་པ་དང་། རྒྱུད་སྡེ་འོག་མ་གསུམ་གྱི་ལམ་ལ་ཡང་ཡོད་པའི་ཕྱིར། ལམ་མ་བསྒོམས་ན་འགྲོ་བ་གཞན་དུ་སྐྱེ་བར་འགྱུར་བའི་རྣལ་འབྱོར་པས་བླ་མེད་ཀྱི་ལམ་བསྒོམ་པའི་ཚེ་སྦྱང་གཞི་སྦྱོང་ཚུལ་གཏན་མེད་པར་འགྱུར་ཏེ། འགྲོ་བ་གཞན་གྱི་སྐྱེ་འཆི་བར་དོ་གསུམ་སྦྱང་གཞི་མ་ཡིན་པའི་ཕྱིར་རོ། །མཚམས་མེད་བྱས་ནས་ལམ་མ་བསྒོམས་པར་དམྱལ་བར་སྐྱེ་འགྱུར་གྱི་རྣལ་འབྱོར་པས་ལམ་བསྒོམ་པའི་བྱེད་པས་དམྱལ་བའི་ཆོས་གསུམ་གྱི་དོད་དུ་འབྲས་བུ་སྐུ་གསུམ་འབྱུང་བ་མེད་པར་འགྱུར་ཏེ། སྦྱང་གཞིའི་ཆོས་གསུམ་འཛམ་བུ་གླིང་པའི་མི་མངལ་སྐྱེས་ཁོ་ན་ལ་འཇོག་དགོས་པའི་ཕྱིར། འདོད་ན། རྩ་རྒྱུད་བརྟག་གཉིས་ལས། མཚམས་མེད་ལྔ་ནི་བྱེད་པ་དང་། །གཞན་ཡང་སྐྱེ་བ་དམན་གང་དང་། །རྨོངས་དང་མ་རུངས་ལས་བྱེད་དང་། །གཟུགས་ངན་ཡན་ལག་མ་ཚང་བ། །བསམ་པས་དེ་རྣམས་འགྲུབ་པར་འགྱུར། །ཞེས་གསུངས་པ་དང་འགལ་ལོ། །སློབ་དཔོན་འཕགས་པ་ལྷའི་རྣལ་འབྱོར་ཆེན་པོའི་ལམ་ལ་སྦྱང་གཞི་གསུམ་མ་ཚང་བར་འགྱུར་ཏེ། དེ་ལམ་མ་བསྒོམས་ན་འཛམ་བུ་གླིང་པའི་མི་མངལ་སྐྱེས་སུ་སྐྱེ་སྲིད་དུ་ཆུག་ན་ཡང་། དེའི་འཆི་སྲིད་ནི་རྫུས་སྐྱེས་ཀྱི་འཆི་སྲིད་ཁོ་ན་ཡིན་པའི་ཕྱིར་རོ། །འོག་མིན་ལོངས་སྤྱོད་རྫོགས་སྐུའི་འཁོར་གྱི་ས་བཅུའི་བྱང་སེམས་རྣམས་ལ་སྦྱང་གཞི་སྦྱོང་བའི་རྣལ་འབྱོར་ཆེན་པོའི་ལམ་མེད་པར་འགྱུར་ཏེ། དེ་དག་ལ་མ་འོངས་པའི་འཛམ་བུ་གླིང་པའི་སྐྱེ་འཆི་བར་དོ་གསུམ་མེད་པའི་ཕྱིར། མང་དུ་བརྗོད་པས་ཅི་ཞིག་བྱ། རྣལ་འབྱོར་ཆེན་པོའི་སྦྱང་གཞི་སྦྱོང་བྱེད་སྦྱར་བའི་ལམ་བསྒོམ་པ་པོ་དེ་ཡིན་ན། འཛམ་བུ་གླིང་པའི་མི་མངལ་སྐྱེས་ཁོ་ནར་སྐྱེ་བར་འགྱུར་བ་ཅིག་དགོས་ཀྱི་འགྲོ་བ་གཞན་དུ་སྐྱེ་བར་འགྱུར་བས་དེ་ལྟ་བུའི་ལམ་བསྒོམས་པ་དོན་མེད་ཅེས་པ་འདི་ལྟ་བུའི་བློ་གྲོས་ཤིན་ཏུ་དོག་པ། ལུང་དང་རིགས་པ་དུ་མས་གནོད་པ། མཁས་པས་མཐོང་ན་བཞད་གད་ཀྱི་གནས་སུ་གྱུར་པ་འདི་འདྲ་བ་ལ་རྗེས་འཇུག་དུ་མ་འབྱུང་བ་ནི། སེམས་ཅན་རང་རང་ལས་ལ་སྤྱོད་པའི་ཚུལ་དུ་སྣང་ངོ་། །ལུགས་ངན་པ་འདི་གསང་བ་འདུས་པའི་རྩོད་སྤོང་དུ་ཡང་རྒྱས་པར་བཀག་ཟིན་པས་ཤེས་པར་འདོད་ན་དེར་བལྟ་བར་བྱའོ། །གཉིས་པ་ཐུན་མོང་དུ་དགག་པ་ནི་ལུགས་འདི་གཉིས་ཆར་གྱིས་ཀྱང་ཀུན་རྫོབ་ཕུང་ཁམས་སྐྱེ་མཆེད་ཀྱི་དངོས་པོ་རྣམས་ལྷའི་ངོ་བོར་རང་བཞིན་གྱིས་རྣམ་པར་དག་པ་མ་ཡིན་པས། དེ་ལྷར་བསྒོམས་ཀྱང་ལྷར་འགྱུར་བ་མི་སྲིད་དོ། །དེའི་རྒྱུ་མཚན་གྱིས་དེ་དག་སྦྱང་གཞི་ཡང་མ་ཡིན་ཞིང་། ལྷར་བསྒོམ་པ་ཡང་མི་རུང་ཞེས་སྨྲ་བ་མཐུན་པར་སྣང་བས་དེ་དག་རྡོ་རྗེ་ཐེག་པའི་རྒྱུད་གཞུང་རྣམས་དང་འགལ་བའི་ཚུལ་མདོར་བསྡུས་ཏེ་བརྗོད་པར་བྱའོ། །དེ་ལ་ཐོག་མར་འཁོར་ལོ་བདེ་མཆོག་གི་རྒྱུད་གཞུང་དང་འགལ་བ་ནི་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། དེ་ལ་རེ་ཤིག་རྣལ་འབྱོར་གྱི་དབང་ཕྱུག་གིས་ཕུང་པོ་ལྔའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་པ་ནས་ནམ་མཁའི་ཁམས་ལ་ནི་པདྨའི་དྲྭ་བ་ཅན་མ་སྟེ། དེ་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་ལ་ང་རྒྱལ་བསྐྱེད་པར་བྱའོ། །ཞེས་པའི་བར་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལྷ་བཅུ་བདུན་གྱི་ངོ་བོར་ང་རྒྱལ་བསྐྱེད་པར་གསུངས་ཤིང་། དེ་ཉིད་ཀྱི་ལེའུ་བཞི་པ་ལས། སོ་དང་སེན་མོ་དག་པ་ལ་ནི་ཐོད་པ་ཕྱེད་པའོ། །སྐྲ་དང་སྤུ་ལ་ནི་ཀེང་རུས་ཆེན་པོའོ། །ཞེས་པ་ནས་སྣབས་ལ་ནི་རྡོ་རྗེ་སེམས་དཔའོ་ཞེས་པའི་བར་ལུས་ཀྱི་ཁམས་ཉི་ཤུ་རྩ་བཞི། དཔའ་བོ་ཉི་ཤུ་རྩ་བཞིའི་ངོ་བོར་གསུངས། ལེའུ་ལྔ་པ་ལས། པུ་ཞེས་བྱ་བ་ནི་པུ་ལི་ར་མ་ལ་ཡ་ན་ཁཎྜ་ཀ་པཱ་ལ་དང་། པྲ་ཙཎྜིའོ་ཞེས་སོགས་ཡུལ་ཉི་ཤུ་རྩ་བཞིའི་རྩ་ཁམས་རྣམས་དཔའ་བོ་ཉི་ཤུ་རྩ་བཞི་དང་། དཔའ་མོ་ཉི་ཤུ་རྩ་བཞིའི་ངོ་བོར་གསུངས་སོ། །དེ་དག་གི་དོན་རྣལ་འབྱོར་དབང་ཕྱུག་ལཱུ་ཧི་པས། སྒྲུབ་ཐབས་ཀྱི་ཐོག་མར་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལྷ་བཅུ་བདུན་དུ་བསྒོམ་ཚུལ་དང་། ལུས་དཀྱིལ་གྱི་ཐད་དུ་རྩ་ཁམས་རྣམས་ལྷར་བསྒོམས་ཚུལ་དང་། རྗེས་སྤྱོད་ཀྱི་སྐབས་སུ་ཁམས་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་བསྒོམ་ཚུལ་རྒྱུད་ཀྱི་ཚིག་ཇི་ལྟ་བ་བཞིན་གསུངས་སོ། །དེ་བཞིན་དུ་རྡོ་རྗེ་དྲིལ་བུ་པས་ཀྱང་ལུས་དཀྱིལ་བསྒོམ་ཚུལ་སྔ་མ་བཞིན་དང་། རྗེས་སྤྱོད་ཀྱི་སྐབས་སུ། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་ཧེ་རུ་ཀ །རྣལ་འབྱོར་མ་ནི་མཚན་མོར་བཤད། །ཅེས་གསུངས་སོ། །སློབ་དཔོན་ནག་པོ་སྤྱོད་པའི་གཞུང་རྣམས་ལས་ཀྱང་། སྔར་གི་དེ་དག་གསལ་བར་གསུངས་ཏེ། ལུང་རྣམས་ནི་ཚིག་མང་དུ་དོགས་པས་མ་བྲིས་སོ། །དེ་ལྟར་ན་འཁོར་ལོ་བདེ་མཆོག་གི་རྒྱུད་གཞུང་རྣམས་ལས། ཕུང་ཁམས་སྐྱེ་མཆེད་ཀྱི་དངོས་པོ་ཐམས་ཅད་ལྷའི་ངོ་བོར་རང་བཞིན་གྱིས་རྣམ་པར་དག་ཀྱང་གློ་བུར་གྱི་དྲི་མ་སྦྱང་བའི་ཕྱིར་དུ་ལྷར་བསྒོམ་ཚུལ་གསུངས་པ་ཤེས་པར་བྱས་ནས། ངན་རྟོག་གིས་བསླད་པར་མི་བྱའོ། །ཀྱེ་རྡོ་རྗེའི་རྒྱུད་གཞུང་རྣམས་དང་ཡང་འགལ་ཏེ། རྩ་རྒྱུད་དང་པོའི་དགུ་པར། གཟུགས་ལ་སོགས་པའི་ཡུལ་རྣམས་དང་། །གཞན་ཡང་རྣལ་འབྱོར་པས་མཐོང་བ། །དངོས་པོ་དེ་ཀུན་དག་པ་སྟེ། །འདི་ལྟར་འགྲོ་བ་སངས་རྒྱས་འགྱུར། །ཀྱེ་བཅོམ་ལྡན་འདས་རྣམ་པར་མ་དག་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གཟུགས་ལ་སོགས་པའོ། །ཅིའི་སླད་དུ་ཞེ་ན། གཟུང་བ་དང་འཛིན་པའི་དངོས་པོའི་ཕྱིར་རོ། །རྡོ་རྗེ་སྙིང་པོས་གསོལ་པ། ཀྱེ་བཅོམ་ལྡན་འདས་གཟུང་བ་དང་འཛིན་པ་ཡང་གང་ལགས། བཅོམ་ལྡན་འདས་ཀྱི་བཀའ་སྩལ་པ། མིག་གིས་གཟུགས་ནི་གཟུང་བར་བྱ། །ཞེས་སོགས་སྐྱེ་མཆེད་བཅུ་གཉིས་ཀྱིས་གཟུང་འཛིན་གྱི་ཚུལ་གསུངས་ནས། མཇུག་ཏུ། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་གསུངས་སོ། །དེའི་དོན་གཟུགས་སོགས་ཀྱི་དངོས་པོ་སྔར་དག་པར་གསུངས་པ་ནི། རང་བཞིན་གྱིས་རྣམ་པར་དག་པ་ཡིན་ལ། མ་དག་པར་གསུངས་པ་ནི་གློ་བུར་གྱི་དྲི་མས་ཐ་མལ་པའི་གཟུང་འཛིན་དུ་བརྟགས་པས་མ་དག་པའི་དོན་ཡིན་ནོ། །དེ་ལ་དག་པར་གསུངས་པས་ནི་སྦྱང་ནུས་པར་བསྟན་ཅིང་། མ་དག་པར་གསུངས་པས་ནི་སྦྱང་དགོས་པར་བསྟན་ཏེ། སྦྱོང་བའི་ཐབས་ཀྱང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་དང་། ཞེ་སྡང་ཞེས་བཤད་རྡོ་རྗེ་མ། །ཞེས་སོགས་ཀྱི་ཕུང་པོ་ལྔ་དང་། ཉོན་མོངས་པ་ལྔ་ནང་གི་རྣལ་འབྱོར་མ་ལྔའི་ངོ་བོར་བསྒོམ་ཚུལ་དང་། ས་ནི་པུཀྐ་སཱི་ཞེས་བཤད། །ཅེས་སོགས་ཀྱིས་ཁམས་བཞི། ཕྱིའི་མཚམས་མ་བཞི་དང་། གཟུགས་ལ་གཽ་རཱིར་རྟག་ཏུ་བཤད། །ཅེས་སོགས་ཀྱིས་ཡུལ་དྲུག་ཕྱིའི་ལྷ་མོ་དྲུག་ཏུ་བསྒོམ་ཚུལ་གསལ་བར་གསུངས་ཏེ། དེ་ལྟ་བུའི་དག་པས་ཐ་མལ་གྱི་གཟུང་འཛིན་དུ་བརྟགས་པའི་དུག་མེད་པར་བྱས་ནས་བསྟེན་བྱ་གཟུགས་སོགས་འདི་དག་ལྷའི་ངོ་བོར་བསྟེན་ཞེས་པ་ནི་ཚིག་རྐང་གཉིས་ཀྱི་དོན་ཏོ། །དེ་ལྟ་བུའི་དག་པ་དེ་དག་ནི། དགོངས་འགྲེལ་གྱི་བསྟན་བཅོས་ཆེན་པོ། ཌོམྦི་ཧེ་རུ་ཀས་མཛད་པའི་བདག་མེད་མའི་སྒྲུབ་ཐབས་དང་། མི་ཐུབ་ཟླ་བས་མཛད་པའི་བདག་མེད་མའི་སྒྲུབ་ཐབས་དང་། དེས་མཛད་པའི་གུར་རིགས་བསྡུས་ཀྱི་སྒྲུབ་ཐབས་སོགས་གཞུང་ལུགས་ཚད་ལྡན་ཕལ་ཆེར་ལས་གསུངས་སོ། །གསང་བ་འདུས་པའི་རྒྱུད་གཞུང་དང་ཡང་འགལ་ཏེ། རྩ་བའི་རྒྱུད་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེའི་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བརྗོད། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །གཟུགས་སྒྲ་ལ་སོགས་སྔགས་པ་ཡིས། །ལྷ་ཉིད་དུ་ནི་རྟག་ཏུ་བསྒོམ། །ཞེས་གསུངས་ཤིང་དེ་ཉིད་ཀྱི་དོན་རྒྱས་པར་རྣམ་གཞག་རིམ་པ་ལས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ལ། རིགས་བརྒྱར་ཕྱེ་ནས་སྦྱོང་བྱེད་རིགས་ལྔ་ཡུམ་བཞི། བྱང་ཆུབ་སེམས་དཔའ་ལྔ། རྡོ་རྗེ་མ་ལྔ་སྟེ། བཅུ་དགུ་པོ་རེ་རེ་ལ་རིགས་ལྔ་ལྔར་ཕྱེ་བས་དགུ་བཅུ་གོ་ལྔ། ཡེ་ཤེས་ལྔ་སྟེ་རྣམ་པ་བརྒྱར་བསྒོམ་པའི་ཚུལ་དུ་གསུངས་སོ། །སྦྱང་གཞི་དེ་དག་ལྷ་དེའི་ངོ་བོར་བསྒོམ་པ་མ་ཡིན་ནོ་སྙམ་ན་དེ་ཡང་མི་འཐད་དེ། དེ་ཉིད་ལས། ཡང་འདི་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་ཐོག་མ་མེད་པ་ནས་ཐ་མལ་པའི་ང་རྒྱལ་གྱིས་གནས་པ་རྣམས་ནི། དེ་ལྟར་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་བསྒྲུབས་པའི་ངོ་བོ་ཉིད་དུ་བསྟན་ཏེ་ཞེས་གསུངས་ཤིང་དེའི་ཤེས་བྱེད་དུ་སྔར་གི་རྩ་རྒྱུད་ཀྱི་ལུང་དྲངས་པའོ། །དེ་བཞིན་དུ་སྒྲུབ་ཐབས་མདོར་བྱས་ལས་ཀྱང་དཀྱིལ་འཁོར་རྒྱལ་མཆོག་གི་སྐབས་སུ་སྦྱང་གཞི་སྦྱོང་བྱེད་སྦྱང་ཚུལ་རྒྱས་པར་གསུངས་ཤིང་། ལུས་དཀྱིལ་གྱི་སྐབས་སུ། རྣམ་པར་སྣང་མཛད་ཀྱི་ས་བོན་ནི། ཁ་དོག་དཀར་པོ་ཡི་གེ་ཨོྃ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་དགོད། །ཅེས་སོགས་རྒྱས་པར་གསུངས་སོ། །དེ་བཞིན་དུ་རྣལ་འབྱོར་ཆེན་པོའི་རྒྱུད་གཞུང་མཐའ་དག་ལས། ཕུང་ཁམས་སྐྱེ་མཆེད་ཐ་མལ་དུ་འཛིན་པའི་གཞི་ཐམས་ཅད་ལྷའི་ངོ་བོར་བསྒོམས་པས་ལྷར་གསལ་བར་འཆར་བའི་ཚུལ་མཚུངས་པར་གསུངས་ཤིང་། དེའི་སྒྲུབ་བྱེད་ཀུན་རྫོབ་རང་བཞིན་རྣམ་དག་གི་ལྷ་ཡིན་པར་གསུངས་པ་འདི་ལས་བཟློག་སྟེ་སྨྲ་བར་མི་བྱའོ། །གཉིས་པ་རྒྱུད་ཀྱི་དགོངས་པ་ཕྱིན་ཅི་མ་ལོག་པར་བཤད་པ་ལ་གསུམ་སྟེ། སྦྱང་གཞི་དང་སྦྱོང་བྱེད་ཀྱི་དོན་བཤད་པ། དེ་ཉམས་ལེན་གྱི་རིམ་པ་ལ་ཇི་ལྟར་སྦྱར་བའི་ཚུལ། ཡིད་ཆེས་བསྐྱེད་པའི་ཕྱིར་འཁྲུལ་ཟད་ཀྱི་ལུང་ཁུངས་བསྟན་པའོ། །དང་པོ་ནི། སྦྱང་གཞི་དང་སྦྱོང་བྱེད་ཀྱི་དོན། རྩ་རྒྱུད་ལེའུ་དང་པོ་ལས། དངོས་པོ་ཉིད་ཀྱིས་རྣམ་གྲོལ་ཞིང་། །དངོས་པོའི་འཆིང་བས་འཆིང་བར་འགྱུར། །དེ་ཡོངས་ཤེས་པས་གྲོལ་བ་ཡིན། །དངོས་པོ་མེད་པའང་ཡོངས་ཤེས་པས། །དངོས་པོ་བསྒོམ་གྱུར་ཤེས་རབ་ཅན། །ཞེས་དང་། ལེའུ་དགུ་པར། ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །རང་བཞིན་གྱིས་ནི་རྣམ་པར་དག །ཉོན་མོངས་ཤེས་བྱའི་སྒྲིབ་སྦྱང་བྱ། །ཀྱེ་བཅོམ་ལྡན་འདས་རྣམ་པར་མ་དག་པ་གང་ལགས། ཞེས་པ་ནས། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་པའི་བར་སྔར་དྲངས་པ་དང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཕུང་ཁམས་སྐྱེ་མཆེད་ལྷ་མོ་བཅོ་ལྔའི་ངོ་བོར་གསུངས་པའི་གཞུང་རྣམས་དང་། ཞེ་སྡང་ལ་སོགས་རྣམ་སྦྱོང་པ། །བསྐྱེད་པའི་རིམ་པའི་ཕྱོགས་ལས་ནི། །འདིས་ནི་ཕུང་པོ་སྦྱང་བར་བྱ། །ཞེས་དང་། ཕྱི་མའི་གཉིས་པར། དེ་བཞིན་དངོས་པོའི་རྣམ་རྟོག་ཀྱང་། །རྣམ་པར་ངེས་པས་སྦྱང་བར་བྱ། །ཞེས་དང་། རྡོ་རྗེ་གུར་ལས། ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །རང་བཞིན་གནས་སྐབས་བསྒོམས་པ་ལས། །བསྒོམ་པ་མ་ཡིན་མི་བསྒོམ་མིན། །བྱང་ཆུབ་སེམས་དཔའ་རྣམས་ཀྱི་རྟོག་པ་དེ་བཞིན་ཏེ། འོན་ཀྱང་མི་གཙང་བའི་ཚད་མཉམ་པར་སྦྱོང་བའི་ཕྱིར་དེ་བཞིན་གཤེགས་པའི་སྐུ་གཟུགས་རབ་ཏུ་བསྒོམ་པར་བྱའོ། །ཞེས་དང་། གལ་ཏེ་འགལ་བ་ཡོད་པ་མ་ཡིན་ཡང་། །དེ་ཚེ་རྒྱལ་བའི་དངོས་པོས་སྦྱང་བ་ཡོད། །ཀུན་རྫོབ་གཟུགས་སུ་རྣམ་པར་གནས་ནས་ནི། །འཁོར་ལོའི་གཟུགས་ཀྱི་ཆོས་ཙམ་རྣམ་པར་བརྟགས། །ཞེས་དང་། གསང་འདུས་རྩ་རྒྱུད་ལས། མདོར་ན་ཕུང་པོ་ལྔ་རྣམས་ནི། །ཞེས་སྔར་དྲངས་པ་དང་། སྒྲུབ་ཐབས་མདོར་བྱས་ལས། རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་མང་ལ། །བློ་དང་ལྡན་པས་ལེགས་བལྟས་ནས། །རྣལ་འབྱོར་རྒྱུད་ཀྱིས་སྦྱང་བར་བྱ། །ཞེས་དང་། འདི་དག་སྐྱེ་མཆེད་རྣམ་སྦྱོང་ཞིང་། །ལྷ་ཡི་མིག་སོགས་སྩོལ་བའོ། །ཞེས་པ་རྣམས་ཀྱིས་བསྟན་ཏེ། ཞིབ་ཏུ་ཕྱེ་ན་རྒྱུད་དང་། རྒྱ་གར་བའི་གཞུང་ཚད་ལྡན་རྣམས་ལས་འདི་ཁོ་ན་བཞིན་དུ་བཤད་དོ། །འདི་དག་གི་དོན་ལ་སྦྱང་གཞི། སྦྱང་བྱ། སྦྱོང་བྱེད། སྦྱོང་ཚུལ། སྦྱངས་འབྲས་ངོས་གཟུང་བ་དང་ལྔ་ལས། དང་པོ་ནི། ཐ་མལ་པའི་བློ་ལ་ཕུང་པོ་དང་། ཁམས་དང་། སྐྱེ་མཆེད་དུ་སྣང་བ་དང་། གཟུང་བ་དང་འཛིན་པར་སྣང་བའི་ཀུན་རྫོབ་ཀྱི་བདེན་པས་བསྡུས་པའི་ཆོས་མཐའ་དག་སྟེ། ལྷའི་ངོ་བོར་རང་བཞིན་གྱིས་རྣམ་པར་དག་པས་ལྷར་འགྱུར་བའི་གཞི་ཡང་ཡིན། ཐ་མལ་གྱི་རྣམ་རྟོག་གིས་ཐ་མལ་དུ་གཟུང་བས་སྦྱང་དགོས་པའི་གཞི་ཡང་ཡིན་པའི་ཕྱིར་རོ། །འདི་ནི་སྔར་གྱི་ལུང་རྣམས་ཀྱི་དངོས་པོ་ཉིད་ཀྱིས་ཞེས་དང་། ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །ཞེས་དང་། བསྟེན་བྱ་འདི་དག་ཅེས་དང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཀྱིས་ཕུང་ཁམས་སྐྱེ་མཆེད་སྟོན་པའི་ཚིག་རྣམས་དང་། ཞེ་སྡང་ལ་སོགས་ཞེས་དང་། ཕུང་པོ་ཞེས་དང་། གུར་ལས། ཆོས་ཙམ་ཞེས་དང་། གསང་འདུས་ལས། ཕུང་པོ་ལྔ་རྣམས་ནི་ཞེས་སོགས་ཀྱིས་བསྟན་ཏོ། །འདི་དག་ཀྱང་ཀུན་རྫོབ་ཏུ་ཡིན་གྱི། དམ་པའི་དོན་དུ་སྦྱང་གཞི་མེད་དེ། མི་ཐུབ་ཟླ་བས་ཡན་ལག་དྲུག་པར། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཚིག་རྐང་དྲུག་གསུངས་ནས། མཇུག་ཏུ། དམ་པའི་དོན་དུ་ཕུང་པོ་མེད། །ཅེས་གསུངས་པས་སོ། །གཉིས་པ་ནི་སྣང་བ་འདི་དག་ལ་བདེན་པར་འཛིན་པའམ། བདེན་འཛིན་གྱི་སྒྲོ་འདོགས་ཆོད་ནས་བརྟགས་པ་ཙམ་དུ་འཛིན་པ་གང་ཡིན་ཀྱང་རུང་སྟེ། ལྷའི་ངོ་བོར་མ་ཤེས་པར་འདི་ནི་གཟུགས་སོ། །འདི་ནི་ཚོར་བའོ། །ཞེས་སོགས་སྣང་བ་རང་དགར་འཛིན་པའི་རྟོག་པ་ཐམས་ཅད་དེ། འདི་ནི་འཁོར་བར་འཆིང་བའི་རྒྱུ་ཡིན་པས་འཆིང་བ་ཞེས་དང་། ཡུལ་གྱི་སྤུ་རིས་ཕྱེ་ནས་མངོན་པར་ཞེན་པས་མཚན་རྟོག་ཅེས་དང་། ཐུན་མོང་གི་སྐབས་སུ་བདེན་འཛིན་ལ་ཉོན་སྒྲིབ་དང་། འདི་ལ་ཤེས་སྒྲིབ་ཏུ་འཇོག་པས་ཤེས་སྒྲིབ་ཅེས་དང་། གང་ཞིག་མྱ་ངན་འདས་པ་འཆི་བར་བྱེད་པས་དུག་ཅེས་དང་། དངོས་པོ་ཙམ་ལ་རྣམ་པར་རྟོག་པས་དངོས་པོའི་རྣམ་རྟོག་ཅེས་དང་། ཐ་མལ་དུ་འཛིན་པས་ཕལ་པའི་གནས་སྐབས་ཞེས་དང་། མི་གཙང་བའི་ཚད་ཅེས་པའི་ཐ་སྙད་དུ་མས་བསྟན་པའོ། །འདི་དག་ཀྱང་སྔར་གི་ལུང་རྣམས་ཀྱི་དངོས་པོའི་འཆིང་བ་ཞེས་སོགས་ཀྱིས་བསྟན་ཏེ་གོ་སླའོ། །འོ་ན་རྣམ་རྟོག་དེ་ཉིད་སྦྱང་གཞི་མ་ཡིན་ན། ཕུང་ཁམས་སྐྱེ་མཆེད་ཀྱི་ཆོས་སུ་འདོད་པ་དང་འགལ་ཞིང་། ཡིན་ན་སྦྱང་བྱར་བཤད་པ་དང་འགལ་ལོ་སྙམ་ན། གཞི་གཞན་གྱི་སྟེང་དུ་རྣམ་རྟོག་དེ་ཉིད་སྦྱང་བྱ་ཡིན་ཀྱང་། དེ་ཉིད་ལ་ཐ་མལ་དུ་རྣམ་པར་རྟོག་པའི་ཚེ། ཡུལ་གྱི་རྣམ་རྟོག་སྦྱང་གཞི་དང་། ཡུལ་ཅན་གྱི་རྣམ་རྟོག་སྦྱང་བྱར་འདོད་པས་མི་འགལ་ལོ། །གསུམ་པ་ནི་རྣམ་ཐར་སྒོ་གསུམ་དང་། བྱང་ཕྱོགས་སོ་བདུན་དང་། ཡེ་ཤེས་ལྔ་ལ་སོགས་པ་ཆོས་སྐུའི་ཡོན་ཏན་རྣམས་དང་། རིགས་ལྔ་ཡུམ་བཞི་སོགས་གཟུགས་སྐུ་གདན་གསུམ་ཚང་བའི་ལྷ་ཚོགས་རྣམས་ནི་སྦྱོང་བྱེད་ཡིན་ཏེ། སྔར་གྱི་ལུང་རྣམས་ཀྱི་དངོས་པོ་བསྒོམ་འགྱུར་ཞེས་པའི་དངོས་པོ་དང་། དག་པས་ཞེས་དང་། རྡོ་རྗེ་མ་ཡིན་ཏེ་ཞེས་སོགས་ལྷ་སྟོན་པའི་ཚིག་རྣམས་དང་། གུར་ལས། དེ་བཞིན་གཤེགས་པའི་སྐུ་གཟུགས་ཞེས་དང་། རྒྱལ་བའི་དངོས་པོས་ཞེས་དང་། གསང་འདུས་ལས། སངས་རྒྱས་ལྔར་ནི་རབ་ཏུ་བསྒྲགས། །ཞེས་སོགས་ཀྱིས་བསྟན་ནོ། །བཞི་པ་ནི་རྣལ་འབྱོར་པས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ཐམས་ཅད་ཐ་མལ་པ་མ་ཡིན་པར་རྣམ་ཐར་སྒོ་གསུམ་མམ། བྱང་ཕྱོགས་སོ་བདུན་ནམ། ཡེ་ཤེས་ལྔའམ། རིགས་ལྔ་ཡུམ་བཞི་ལ་སོགས་པའི་ངོ་བོར་བསྒོམ་པ་སྟེ། འདི་ལ་མཉམ་གཞག་གི་རྣལ་འབྱོར་གྱིས་སྦྱང་ཚུལ་དང་། རྗེས་སྤྱོད་ཀྱི་རྣལ་འབྱོར་གྱིས་སྦྱང་ཚུལ་གཉིས་ལས། དང་པོ་ནི། ཡེ་ཤེས་ཚོགས་བསག་གིས་སྣང་བའི་དངོས་པོ་ཐམས་ཅད་སྟོང་ཉིད་དུ་སྦྱངས་པའི་སྟོང་ཉིད་དང་། སེམས་གསལ་བ་དང་ཐ་མི་དད་པའི་གསལ་སྟོང་ཟུང་འཇུག་ལ་མཉམ་པར་གཞག་ནས། དེ་ལས་ལངས་པའི་ཚེ་ཀུན་རྫོབ་ཐ་མལ་པའི་སྣང་བ་འཆར་དུ་མི་འཇུག་པར། རྟེན་དང་བརྟེན་པར་བཅས་པའི་འཁོར་ལོ་བསྒོམས་ནས་དེ་ཀུན་རྫོབ་ཀྱི་སྣང་བ་དང་དབྱེར་མེད་དུ་བསྒོམས་པའོ། །གཉིས་པ་ནི། མཉམ་གཞག་ལས་ལངས་ནས་རྗེས་སྤྱོད་ཀྱི་ཚེ་ཐོག་མ་མེད་པའི་བག་ཆགས་ཀྱི་དབང་གིས་སྣང་བའི་དངོས་པོ་མཐོང་ཐོས་ཐམས་ཅད་ཐ་མལ་དུ་འཛིན་པ་རང་ཤུགས་ཀྱིས་སྐྱེ་ལ། དེའི་ཚེ་དྲན་པའི་རྩིས་ཟིན་པར་བྱས་ནས་ཐ་མལ་གྱི་རྣམ་རྟོག་བཀག་སྟེ། འདི་ནི་ལྷའོ་སྙམ་དུ་བསྒོམས་པས་སྔར་གི་མཉམ་གཞག་གི་རྟོགས་པ་བོགས་དབྱུང་བའོ། །འདིའི་གནད་ཀྱང་མཉམ་རྗེས་གཉིས་པོ་སྦྱང་གཞི་གཅིག་ཡིན་པ་དང་། སྦྱོང་ཚུལ་ཐ་མལ་གྱི་རྣམ་རྟོག་སྤོང་བར་གཅིག་པའི་ཕྱིར་རོ། །འདི་དག་ཀྱང་སྔར་གྱི་ལུང་རྣམས་ཀྱི་དེ་ཡོངས་ཤེས་པས་ཞེས་དང་། དངོས་པོ་མེད་པའང་ཡོངས་ཤེས་པས། །དངོས་པོར་བསྒོམ་འགྱུར་ཞེས་དང་། དུག་མེད་བྱས་ནས་ནི། བསྟེན་པ་ཉིད་ཅེས་པའི་ཚིག་སྦྲེལ་བ་དང་། རྣམ་པར་ངེས་པས་སྦྱང་བར་བྱ། །ཞེས་དང་། གུར་ལས། བསྒོམ་པ་ཡང་དག་རབ་ཏུ་གྲགས། །ཞེས་དང་། དེ་བཞིན་གཤེགས་པའི་སྐུ་གཟུགས་བསྒོམ་པར་བྱའོ་ཞེས་དང་། འཁོར་ལོའི་གཟུགས་ཀྱིས་ཆོས་ཙམ་རྣམ་པར་བརྟགས་ཞེས་པའི་ཚིག་སྦྲེལ་བ་རྣམས་ཀྱིས་བསྟན་ནོ། །ལྔ་པ་ནི་ཕུང་ཁམས་སྐྱེ་མཆེད་ཀྱི་ཆོས་འདི་དག ལྷའི་ངོ་བོར་བསྒོམས་པས་གློ་བུར་གྱི་དྲི་མ་དག་ནས་ཆོས་སྐུའམ། གཟུགས་སྐུའི་ངོ་བོར་གྱུར་པ་སྟེ། རྟག་ཏུ་འདི་དག་རྣམ་དག་པས། །དེ་ཉིད་རྣལ་འབྱོར་པས་འགྲུབ་འགྱུར། །ཞེས་གསུངས་པས་སོ། །འདི་དག་ཀྱང་གཞི་གཅིག་གི་སྟེང་དུ་གནད་མདོར་བསྡུས་ན། གཟུགས་ཕུང་ནི་སྦྱང་གཞི། རྣམ་པར་སྣང་མཛད་དམ། རྡོ་རྗེ་མ་ནི་སྦྱོང་བྱེད། གཟུགས་ཕུང་ལྷར་མ་ཤེས་པར། གཟུགས་ཕུང་ཙམ་དུ་འཛིན་པ་ནི་སྦྱང་བྱ། གཟུགས་ཕུང་རྣམ་སྣང་ངམ། རྡོ་རྗེ་མའི་ངོ་བོར་རང་བཞིན་གྱིས་རྣམ་པར་དག་པར་ཤེས་ནས། མཉམ་བཞག་དང་། རྗེས་ཐོབ་ཀྱིས་ལྷར་བསྒོམ་པ་ནི་སྦྱོང་ཚུལ་དེ་ལྟར་བསྒོམས་པས་གཟུགས་ཕུང་རྣམ་སྣང་ངམ། རྡོ་རྗེ་མའི་ངོ་བོར་གནས་གྱུར་པ་ནི་སྦྱངས་འབྲས་ཏེ། ཐམས་ཅད་ལ་འདི་བཞིན་དུ་སྦྱར་བར་བྱའོ། །ཡེ་ཤེས་ལྔར་བསྒོམ་ཚུལ་ལ་རྣམ་པ་གཟུགས་ཀྱི་རྣམ་པར་བསྒོམ་དགོས་པས། ཟླ་བ་ལ་སོགས་པ་མངོན་བྱང་ལྔ་པོ་རེ་རེའི་སྟེང་དུ་སྔ་མ་བཞིན་སྦྱར་བར་བྱའོ། །འཁོར་འདས་དབྱེར་མེད་ཀྱི་འགྲེལ་པར་སྦྱང་གཞི་ནི་འཁོར་བའི་ཆོས། སྦྱོང་བྱེད་ནི་འབྲས་བུ་སྟེ་མྱ་ངན་ལས་འདས་པའི་ཆོས། དེ་སྦྱར་བ་ནི། འཁོར་འདས་དབྱེར་མེད་དུ་བསྒོམ་པ་སྟེ་བསྐྱེད་རྫོགས་ཀྱི་རྣལ་འབྱོར་ཉིད་ལ་བཤད་པ་ཡང་འདི་དང་གནད་གཅིག་པར་ཤེས་པར་བྱའོ། །གཉིས་པ་ལ་བདུན་ཏེ། སྔོན་འགྲོས་ལས་ཉོན་སྦྱོང་ཚུལ། དངོས་གཞི་རྟེན་གྱིས་སྣོད་སྦྱོང་ཚུལ། བསྐྱེད་ཆོག་གིས་སྐྱེ་གནས་བཞི་སྦྱོང་ཚུལ། ལྷ་བསྡུ་བས་འཆི་སྲིད་སྦྱོང་ཚུལ། ལྷའི་རྣམ་པས་དུག་གསུམ་སྦྱོང་ཚུལ། ཁ་དོག་དང་དབྱིབས་ཀྱིས་དུག་ལྔ་སྦྱོང་ཚུལ། ཕྱག་ཞབས་ཀྱི་རྣམ་འགྱུར་གྱིས་མཐའ་གཉིས་སྦྱོང་ཚུལ་ལོ། །དང་པོ་ནི་ལྗོན་ཤིང་ལས་སྔོན་འགྲོ་ཚོགས་གཉིས་བསག་པས་ཚེ་སྔ་མའི་ལས་དང་ཉོན་མོངས་པ་སྦྱང་བར་གསུངས་ལ། འབྲས་བུའི་རྣམ་པ་ལམ་བྱེད་བསྐལ་པ་གྲངས་མེད་གསུམ་དུ་ཚོགས་བསག་པའི་དོད་ཡིན་པར་གསུངས་སོ། །བོད་ཕལ་ཆེར་ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱོར་བར་འདོད་ཀྱང་། རྗེ་བཙུན་གོང་མའི་གསུང་རབ་ལས། དེའི་གསལ་ཁ་མི་སྣང་ཞིང་སྦྱང་གཞིའི་གཙོ་བོ་སྐྱེ་འཆི་བར་དོ་གསུམ་ལ་བྱེད་པའི་ཚེ་ན་ཡང་ལས་འཕེན་གཅིག་གིས་འཕངས་པའི་ཆོས་གསུམ་དགོས་ཤིང་། ཚེ་སྔ་མའི་འཆི་སྲིད་ནི་ཚེ་འདིའི་བར་དོ་སྐྱེ་སྲིད་གཉིས་དང་། ལས་འཕེན་གཅིག་གིས་འཕངས་པ་མ་ཡིན་པས་སྦྱང་གཞི་ལ་བརྟགས་ན་ཡང་མི་འཐད་དོ། །སྦྱོང་བྱེད་ལ་བརྟགས་ན་ཡང་མི་འཐད་དེ་སྦྱང་གཞིའི་གཙོ་བོ་ཆོས་གསུམ་པོ་དེ་སྦྱོང་བྱེད་ཀྱི་གཙོ་བོ་མངོན་རྟོགས་ཀྱི་དངོས་གཞིས་སྦྱང་དགོས་པའི་ཕྱིར་རོ། །ཡེ་ཤེས་ཞབས་ལུགས་སོགས་རྒྱ་གར་བ་ཁ་ཅིག ཡེ་ཤེས་ཚོགས་བསག་གི་དེ་མ་ཐག་ཏུ་བར་སྲིད་མཚོན་བྱེད་ཀྱི་ཡི་གེ་ལྔ་ལ་སོགས་པ་ལངས་པར་གསུངས་པ་ཡང་སྦྱང་གཞི་ཆོས་གསུམ་གྱི་ཐོག་མ་ངོས་འཛིན་པ་ཡིན་གྱི་ཆོས་གསུམ་གྱི་ནང་ཚན་གྱི་འཆི་སྲིད་སྦྱོང་བྱེད་སྔོན་དུ་སོང་ནས་བར་སྲིད་ལངས་པ་མ་ཡིན་ཏེ། ཆོས་གསུམ་གྱི་གོ་རིམ་དང་འགལ་བའི་ཕྱིར་རོ། །ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་བའི་འཁྲུལ་གཞི་འདིས་བྱས་ནས་བླ་མ་ཕྱི་མ་དག་ཀྱེ་རྡོར་གྱི་སྐབས་སུ་ཡེ་ཤེས་ཚོགས་བསག་གི་དེ་མ་ཐག་བར་སྲིད་མཚོན་བྱེད་ཀྱི་ཡིག་འབྲུ་ལྔ་ལངས་དགོས་པར་འདོད་པ་ནི། རྗེ་བླ་མས་རྒྱས་པར་བཀག་པ་སྔར་བརྗོད་ཟིན་ཏོ། །སྦྱང་གཞི་ནི་སྔར་བཤད་པ་ལྟར་ཡིན་ལ། དགོས་པ་གསུམ་པོ་ནི་རྗེ་ས་ཆེན་གྱིས་གསུངས་པ་གོང་དུ་བརྗོད་ཟིན་ཏོ། །གཉིས་པ་ནི་སྲུང་བའི་འཁོར་ལོ་ལྗོན་ཤིང་ལས་གསལ་ཁ་མི་སྣང་། རྒ་སྟོན་སྤྲིང་ཡིག་ཏུ་སྲོད་ལ་བདུད་བཏུལ་བ་མཚོན་ཞེས་གསུངས་པ་ནི། འབྲས་བུའི་རྣམ་པ་ལམ་བྱེད་ཡིན་ཅིང་སྦྱང་གཞི་མ་ཡིན་ནོ། །འདུས་པའི་བླ་མ་ཁ་ཅིག ཕྱིའི་ལྕགས་རི་སྦྱོང་བར་གསུངས་ཀྱང་། གཞལ་ཡས་ཁང་གིས་སྣོད་ཀྱི་འཇིག་རྟེན་སྦྱོང་ཚུལ་ཕྱིའི་རྒྱ་མཚོ་ཡན་ཆད་ལ་སྦྱར་བ་ཁོ་ན་ཡིན་ན། འདི་འཐད་དུ་ཆུག་ཀྱང་དེའི་ངེས་པ་མི་སྣང་ངོ་། །འོ་ན་ཅི་ལྟར་ཞེ་ན་བླ་ཆེན་འཕགས་པས། ལུས་ངག་ཡིད་གསུམ་གྱི་མི་མཐུན་ཕྱོགས་མཐའ་དག་སྦྱོང་བར་གསུངས་པ་འདི་ཉིད་ལེགས་པར་མཐོང་སྟེ། སྦྱང་གཞིའི་སྐབས་སུ་འཇིག་རྟེན་པ་རྣམས་གོ་ཆ་གྱོན་པ་དང་། སྨན་གཏོང་བ་ལ་སོགས་པས་ལུས་ཀྱི་བར་ཆད་བཟློག་པ་དང་། ངག་མནན་ཟློག་པ་སོགས་ངག་གི་བར་ཆད་བཟློག་པ་དང་། སྨྱོ་འབོགས་སེམས་འཁྲུལ་སོགས་སེམས་ཀྱི་བར་ཆད་བཟློག་པའི་ཐབས་ལ་རྩོལ་བ་བྱེད་པ་ཡོད་པས་དེ་སྦྱོང་བྱེད་དེ་དང་རྣམ་པ་འདྲ་བ་དགོས་པའི་ཕྱིར་རོ། །དེ་ནས་གཞིའི་ཡན་ལག་ཆོས་འབྱུང་གྲུ་གསུམ་གྱིས་ནི་སྐྱེ་གནས་བཞི་ཆར་གི་སྣོད་སྦྱོང་སྟེ། མངལ་སྐྱེས་ལ་མའི་བྷ་ག་དང་། སྒོང་སྐྱེས་ལ་སྒོ་ང་དང་། རྫུས་སྐྱེས་ལ་མེ་ཏོག་པདྨ་ལ་སོགས་པ་དང་། དྲོད་གཤེར་སྐྱེས་ལ་རང་གང་དུ་སྐྱེས་པའི་ས་གཞི་དང་། ནམ་མཁའ་རྣམས་ཀྱང་སྟོད་རྒྱས་ཤིང་སྨད་ཞུམ་པའི་རྣམ་པ་ཅན་དུ་ཡོད་པས་རྣམ་པ་མཐུན་པའི་ཕྱིར་རོ། །འབྲས་བུའི་རྣམ་པ་ལམ་བྱེད་ནི། རྗེ་བཙུན་རྩེ་མོས། སྐུ་གསུང་ཐུགས་སྙིང་པོའི་ཕྱིར་གྲུ་གསུམ་ཟུར་བཞི་པའོ། །ཞེས་གསུངས་ཤིང་། རྗེ་བཙུན་གྱིས་སངས་རྒྱས་པའི་རྣམ་ཐར་སྒོ་གསུམ་མཚོན་ལ། ས་དང་པོ་ལ་སོགས་པའི་ཡོན་ཏན་གོང་ནས་གོང་དུ་རྒྱས་པ་མཚོན་པས་སྟོད་འཕེལ་ཁ་ཆེ་བ། ཐབས་ཤེས་ཟུང་དུ་འཇུག་པས་ཕྱི་དཀར་ལ་ནང་དམར་བར་གསུངས་སོ། །དེ་ནས་རྒྱུའི་ཡན་ལག་ལས་ནས་བསྒོམ་པའི་འབྱུང་བཞི་ལུགས་བཟློག་དང་། རླུང་ནས་བསྒོམ་པའི་འབྱུང་བཞི་ལུགས་འབྱུང་གཉིས་ལས། དང་པོས་ནི་མངལ་གྱི་སྔོན་འགྲོ་སྦྱོང་སྟེ། རྩ་རྒྱུད་དང་པོའི་བཅུ་པར། རེག་པ་སྲ་བའི་བག་ཆགས་ཀྱིས། །ས་ནི་དེ་ལས་སྐྱེ་བར་འགྱུར། །བྱང་སེམས་གཤེར་བའི་རྣམ་པ་ཡིས། །ཆུ་ཡི་ཁམས་ནི་འབྱུང་བར་འགྱུར། །བསྐྱོད་པ་ལས་ནི་དྲོད་སྐྱེ་སྟེ། །འགྲོ་བ་རླུང་དུ་རབ་ཏུ་གྲགས། །ཞེས་གསུངས་པ་ལྟར་གྱི་གོ་རིམ་སྦྱོང་བས་སོ། །ཡང་ལུས་ཀྱི་དཀྱིལ་འཁོར་ལ་སྦྱར་ན། ལྟེ་བ་ས། སྙིང་ག་ཆུ། མགྲིན་པ་མེ། སྤྱི་བོར་རླུང་སྦྱོང་བའི་རིམ་པའི་དབང་དུ་བྱས་པའོ། །གཉིས་པས་ནི་མངལ་གྱི་དངོས་གཞི་སྦྱོང་སྟེ། ཕྱག་ཆེན་ཐིག་ལེ་ལས། རྣམ་ཤེས་ལས་ནི་སྐྱེས་པ་རླུང་། །དེ་ལས་མེ་ནི་སྐྱེ་བར་འགྱུར། །དེ་ལས་ཆུ་ནི་འབྱུང་བར་འགྱུར། །དེ་ལས་དབང་ཆེན་འབྱུང་བར་འགྱུར། །དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་གསུངས་པའི་རིམ་པས་སྦྱོང་བའོ། །དེས་ན་སྐབས་འདིར་བར་དོ་བསྲེ་བ་ཡང་མངལ་གྱི་དངོས་གཞིའི་གནས་སྐབས་སུ་བར་དོ་འཇུག་པས་དེ་སྦྱོང་ཞིང་། སྦྱོང་བྱེད་ལ་ཡང་གཟུགས་ཀྱི་རྣམ་པ་གཞལ་ཡས་ཁང་དུ་བསྒོམ་པ་ཡང་ངོ་བོ་རྣམ་པར་སྣང་མཛད་ལམ་དུ་བྱེད་པའི་གནད་ཀྱིས་སོ། །འབྱུང་བཞིའི་སྟེང་དུ་འཁོར་ལོ་བསྒོམ་པས་ནི། དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་པ་སྦྱོང་བར་མངོན་ནོ། །ཡང་འདི་ཉིད་ལུས་ལ་སྦྱར་ན། རྐང་མཐིལ་རླུང་། སུམ་མདོ་མེ། ལྟོ་བ་ཆུ། སྙིང་ག་ས་ཡིན་པའི་རིམ་པ་སྦྱོང་ཞིང་། ཕྱི་སྣོད་ཀྱི་འཇིག་རྟེན་ལ་སྦྱར་ན། རླུང་ནས་རིམ་པ་བཞིན་ཆགས་པ་སྦྱོང་ངོ་། །འདི་ལ་དུས་འཁོར་བ་དག་མེའི་དཀྱིལ་འཁོར་དངོས་སུ་ཡོད་པར་བཞེད་ཀྱང་རྒྱུད་སྡེ་གཞན་རྣམས་ལ་མངོན་པ་དང་སྒོ་བསྟུན་ནས་མེའི་དཀྱིལ་འཁོར་དངོས་སུ་མེད་ཀྱང་དཀྱིལ་འཁོར་གཞན་གསུམ་ལ་མེའི་རྡུལ་ཕྲ་རབ་ཡོད་པ་སྦྱང་གཞི་ཡིན་པ་གྲུབ་ཆེན་ཀླུའི་བྱང་ཆུབ་ཀྱི་གསུང་པ་དེ་ཉིད་བླང་བར་བྱའོ། །འདི་གཉིས་ཆར་ལ་ཡང་འབྲས་བུའི་རྣམ་པ་ལམ་བྱེད་ནི་ས་སོགས་འབྱུང་བ་བཞིས་ལྷ་མོ་བཞི་དང་། ཚད་མེད་བཞི་མཚོན། འཁོར་ལོས་ནི་རྣམ་པར་སྣང་མཛད་མཚོན་པའོ། །དེ་ནས་རྐྱེན་གྱི་ཡན་ལག་ལ་ལུགས་འབྱུང་ལ་བར་དོ་བསྲེ་བའི་སྦྱོང་ཚུལ་ནི་བཤད་ཟིན་ཅིང་། ལུགས་བཟློག་ལ་རང་གི་སེམས་སྣང་བསྲེ་བས་ནི། གཞིའི་སྐབས་སུ་སྣོད་ཀྱི་སྣང་བ་ཐམས་ཅད་རང་སེམས་ཡིན་པ་སྦྱོང་ཞིང་ལམ་གྱི་སྐབས་སུ་གཞལ་ཡས་ཁང་དུ་སྣང་བ་རང་སེམས་ཡིན་པ་མཚོན་ནོ། །དེ་ནས་གནས་ཐབས་ཀྱི་ཡན་ལག་གཞལ་ཡས་ཁང་གིས་ནི་ཕྱི་སྣོད་ཀྱི་འཇིག་རྟེན་སྦྱོང་སྟེ། སྤྱི་ཙམ་གྱི་དབང་དུ་བྱས་ན། མ་དག་པའི་སྣོད་ཀྱི་འཇིག་རྟེན་མཐའ་དག་དང་། དེ་ལས་བསྡུ་ན་མི་མཇེད་ཀྱི་འཇིག་རྟེན་གྱི་ཁམས་དང་། གླིང་བཞི་རི་རབ་དང་བཅས་པ་དང་། འཛམ་བུ་གླིང་ལ་སོགས་པ་རང་གང་དུ་གནས་པའི་གླིང་དང་། རང་གང་དུ་གནས་པའི་གནས་ཁང་སྟེ། མདོར་ན་མ་དག་པའི་བློ་ལ་རྟེན་དང་བརྟེན་པ་གཉིས་སུ་སྣང་བའི་རྟེན་མཐའ་དག་སྦྱོང་བའོ། །འབྲས་བུའི་རྣམ་པ་ལམ་བྱེད་ནི་སངས་རྒྱས་པའི་བྱང་ཕྱོགས་སོ་བདུན་མཚོན་པ་སྟེ། འདི་ལ་བླ་མ་གོང་མས་བདེ་དགྱེས་ཀྱི་སྐབས་སུ་རྒྱུད་རྡོ་རྗེ་རྩེ་མོ་ནས་གསུང་པ་གཙོ་བོར་མཛད་ལ་འདུས་པ་འཕགས་ལུགས་དང་། ཡེ་ཤེས་ཞབས་ལུགས་སོགས་རྣམས་ལས། རྒྱུད་སྡེ་གཞན་ལས་གསུངས་པའི་སྦྱོར་ཚུལ་མི་འདྲ་བ་དུ་མ་སྣང་ཡང་དོན་གྱི་གནད་གཅིག་པར་ཤེས་པར་བྱའོ། །དེ་ནི་ཆོས་སྐུའི་དབང་དུ་བྱས་ལ། གཟུགས་སྐུའི་དབང་དུ་བྱས་ན་འོག་མིན་གྱི་གཞལ་ཡས་ཁང་པའམ། རྡོ་རྗེའི་གདན་དུ་བྱིན་གྱིས་བརླབ་པའོ། །གསུམ་པ་ལ་གཉིས་ཏེ། མངོན་རྟོགས་ཡོངས་སུ་རྫོགས་པས་སྐྱེ་གནས་བཞི་སྦྱོང་བ་དང་། མངོན་བྱང་ལྔ་པོ་ཁོ་ནས་སྐྱེ་གནས་བཞི་སྦྱོང་བའོ། །དང་པོ་ནི། མངོན་བྱང་ལྔའི་ཉི་མ་ནི་དྲོད་དང་། ཟླ་བ་ནི་གཤེར་ཡིན་པས་དྲོད་གཤེར་སྐྱེས་སྦྱོང་། ཡང་ཉི་མ་ནི་མའི་ཁྲག་དང་། ཟླ་བ་ནི་ཕའི་ཁུ་བ་ཡིན་པས་མངལ་སྐྱེས་སྦྱོང་། གཉིས་ཀ་ལའང་མངོན་བྱང་གསུམ་པས་བར་དོ་སྦྱོང་ངོ་། །འཁོར་གྱི་ལྷ་མོ་མངལ་ནས་འབྱིན་པས་མངལ་སྐྱེས་སྦྱོང་། འབྲས་བུ་རྡོ་རྗེ་འཛིན་པ་ཐིག་ལེའི་གོང་བུ་ལས་བཞེངས་པ་དང་། རྒ་སྟོན་སྤྲིང་ཡིག་ལྟར་ན། རྒྱུ་རྡོ་རྗེ་འཛིན་པའང་རོ་གཅིག་ཏུ་འདྲེས་པའི་ཐིག་ལེས་སྒོང་སྐྱེས་སྦྱོང་། དེ་ལས་ཡིད་ཀྱི་ལུས་ཀྱི་ལྷར་གྱུར་པས་ནི་རྫུས་སྐྱེས་སྦྱོང་། སྐྱེ་མཆེད་ཀྱི་ལྷ་སྐད་ཅིག་མའམ། ས་བོན་ཙམ་ལས་བསྐྱེད་པས་རྫུས་སྐྱེས་སྦྱོང་ངོ་། །ལྗོན་ཤིང་ལས། འདི་ཙམ་ཞིག་ལས་གཞན་སྦྱར་བ་མི་སྣང་ཡང་། འབྲས་བུའི་རྣམ་པ་ལམ་བྱེད་ཀྱི་སྐབས་དང་རུང་མཐུན་སྦྱར་ན། སྣོད་བཅུད་སྦྱང་བས་ནི་འཕྲལ་གྱི་ལུས་ངག་གི་བྱ་བས་གཞན་ལ་ཕན་པ་སྒྲུབ་པ་སྦྱོང་། ཡེ་ཤེས་ཀྱི་འཁོར་ལོ་དགུག་གཞུག་གིས་ནི་ལུས་སེམས་ཡོངས་སུ་རྫོགས་པ་སྦྱོང་། དབང་བསྐུར་བས་ནི་རྒྱལ་པོའི་རིགས་ཡིན་ན་རྒྱལ་སར་དབང་བསྐུར་བའམ། ཕལ་པ་ལའང་རང་རང་གི་གཞི་འཛིན་པ་སྦྱོང་། དེ་ནས་སྔགས་ཀྱི་བཟླས་པ་ལ་སོགས་པས་ནི་འཕྲལ་གྱི་འཇིག་རྟེན་གྱི་བྱ་བ་སྣ་ཚོགས་གྲུབ་པ་སྦྱོང་ངོ་། །གཉིས་པ་ནི་སྐྱེ་གནས་དང་པོ་གཉིས་ཀྱི་སྦྱོང་ཚུལ་ནི་བཤད་ཟིན་ལ། སྒོང་སྐྱེས་ལ་ཉི་མ་ནི་མ་དང་། ཟླ་བ་ནི་ཕ་མཚོན་ལ། རྫུས་སྐྱེས་ལ་ཉི་མ་ནི་སྟོང་པ་དང་། ཟླ་བ་ནི་གསལ་བ་སྟེ། ཐམས་ཅད་ལ་ཡང་མངོན་བྱང་གསུམ་པ་ནི་བར་དོའི་སྦྱོང་བྱེད་དོ། །བཞི་པ་ནི་སྤྱིར་བསྐྱེད་རིམ་གྱིས་སྐྱེ་བ་དང་། རྫོགས་རིམ་གྱིས་འཆི་བ་སྦྱོང་བ་ཡིན་ན་བསྐྱེད་རྫོགས་རེ་རེས་ཀྱང་སྐྱེ་འཆི་བར་དོ་དང་། སྦྱང་གཞི་མཐའ་དག་སྦྱོང་བ་ཡིན་པས་འདིར་བསྐྱེད་རིམ་གྱིས་འཆི་བ་སྦྱོང་བའི་ཚུལ་ནི་ལྗོན་ཤིང་ལས། དཀྱིལ་འཁོར་བསྡུ་བས་ནི་སྣོད་བཅུད་འཇིག་པ་སྦྱོང་ངོ་ཞེས་གསུངས་པའི་སྣོད་འཇིག་པ་ནི་མེ་ཆུ་རླུང་གསུམ་གྱིས་འཇིག་པ་ཡིན་ལ། དེ་ནི་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ་བ་ནས་གཞལ་ཡས་ཁང་ལྷ་མོ་བརྒྱད་ལ་བསྡུ་བའི་བར་གྱིས་སྦྱོང་། བཅུད་འཇིག་པ་ནི་སེམས་ཅན་འཆི་བ་ཡིན་ལ། དེ་ནི་ལྷ་མོ་བརྒྱད་ཞལ་བརྒྱད་ལ་བསྡུ་བ་ནས། ནཱ་དའང་མི་དམིགས་ཏེ་སྟོང་ཉིད་དུ་འགྱུར་བས་སྦྱོང་ངོ་། །འདི་ལ་ཡན་ལག་དྲུག་པར་གཙོ་བོ་ཡབ་ཡུམ་ནི་ཉལ་བའི་རྣལ་འབྱོར་གྱི་བར་དུ་བསྡུ་བ་མེད་དོ། །ཞེས་གསུངས་པ་ལྟར་ན་ཉལ་བའི་རྣལ་འབྱོར་དེ་ཉིད་ཀྱིས་སྦྱོང་ངོ་། །དེས་ན་མངོན་རྟོགས་ཀྱི་དངོས་གཞིས་ལས་འཕེན་གཅིག་གིས་འཕངས་པའི་སྐྱེ་འཆི་བར་དོ་གསུམ་སྦྱོང་བའི་ཚེ་ཐོག་མར་ཕ་མའི་ཁུ་ཁྲག་དང་། བར་དོ་རོ་གཅིག་ཏུ་འདྲེས་པ་དེ་ནས་མངལ་གྱི་གནས་སྐབས་ལྔ་རྫོགས་ནས་ཕྱིར་བཙས་པ། དེ་ནས་དེ་ཉིད་འཆི་བ་གསུམ་རིམ་ཅན་དུ་འབྱུང་བས་སྦྱོང་བྱེད་ལ་ཡང་གསུམ་པོ་རིམ་ཅན་དུ་དགོས་པ་ནི། རྗེ་བཙུན་གོང་མ་འཁྲུལ་པའི་དྲི་མ་ཟད་པ་དག་གི་གསུང་རབ་ལས་འབྱུང་གི་གཞན་ལ་མི་སྣང་ངོ་། །མངོན་བྱང་ལྔ་ནས་འདིའི་བར་གྱི་འབྲས་བུའི་རྣམ་པ་ལམ་བྱེད་ནི། རྗེ་བཙུན་གྱིས་མངོན་པར་བྱང་ཆུབ་པ་ལྔའི་རིམ་པས་ལྷའི་རྣམ་པ་གྲུབ་པ་ནི། འོག་མིན་ནམ་རྡོ་རྗེ་གདན་གྱི་སྟེང་དུ་ཐོ་རངས་སངས་རྒྱས་པ་དང་འདྲ། ཁམས་གསུམ་ཆོས་ཀྱི་རྒྱལ་པོར་མངོན་པར་དབང་བསྐུར་ནས་འོད་ཟེར་གྱི་འཕྲོ་འདུས་སེམས་ཅན་གྱི་དོན་བྱེད་པ་དང་བཟླས་པ་ལ་སོགས་པ་ཆོས་ཀྱི་འཁོར་ལོ་བསྐོར་བ་དང་མཐུན། བསྐྱེད་པའི་རིམ་པ་བསྡུས་ཏེ། སྟོང་པ་ཉིད་དུ་བསྒོམས་པས་ཡོངས་སུ་མྱ་ངན་ལས་འདས་པ་དང་མཐུན་ཏེ། དེ་ལྟར་མཛད་པ་བཅུ་གཉིས་དང་མཐུན་པས་སངས་རྒྱས་ཀྱི་ཕྲིན་ལས་མཛད་ནས་སླར་ཡང་མཛད་པ་རྒྱུན་མི་འཆད་པ་དང་འདྲ་བར་སྟོང་པ་ཉིད་ཀྱི་ངང་ལས་ལྷའི་སྐུར་ལངས་ནས་སྤྱོད་ལམ་གྱི་རྣལ་འབྱོར་གྱི་ཚུལ་གྱིས་སེམས་ཅན་གྱི་དོན་བྱེད་པ་ཡིན་ནོ་ཞེས་གསུངས་སོ། །ལྔ་པ་ལྷའི་རྣམ་པས་དུག་གསུམ་སྦྱོང་ཚུལ་ནི་ཤིན་ཏུ་ཟབ་པའི་བསྐྱེད་པའི་རིམ་པ་ཁྲོ་ཆགས་ཀྱི་རྣམ་པ་སྟེ་ཁྲོ་བོའི་སྐུར་བཞུགས་པས་ཞེ་སྡང་སྦྱོང་། བཙུན་མོའི་འཁོར་གི་དབུས་ན་བཞུགས་པས་འདོད་ཆགས་སྦྱོང་། མཚན་དང་དཔེ་བྱད་ཀྱིས་བརྒྱན་པའི་གཟུགས་ཀྱི་སྐུར་བསྒོམས་པས་གཏི་མུག་ཞི་བར་བྱེད་པ་ཡིན་ཏེ། རྡོ་རྗེ་གུར་ལས། འདོད་ཆགས་ཞེ་སྡང་གཏི་མུག་དང་། །ང་རྒྱལ་སེར་སྣའི་སྐྱེ་བོ་རྣམས། །བསྡུ་ཕྱིར་རང་གི་འཁོར་ལོ་ལ། །རྡོ་རྗེ་གཟུགས་ནི་དུ་མ་འཛིན། །ཞེས་པ་དང་། །ཞེ་སྡང་འདུལ་བའི་དབང་དུ་བྱས་ནས། ཤིན་ཏུ་གདུག་པ་དྲག་པོ་ལ། །ཞི་བ་ཉེ་བར་མི་སྦྱར་ཏེ། །འདི་མཁྱེན་རྡོ་རྗེ་ཅན་གྱིས་ནི། །བདག་ཉིད་ཀྱེ་ཡི་རྡོ་རྗེར་འགྱུར། །ཞེས་པ་དང་། གཏི་མུག་འདུལ་བའི་དབང་དུ་བྱས་ནས། ཤིན་ཏུ་སྟོང་པར་ཞེན་རྣམས་ཀྱིས། །ཡོད་མིན་བརྟུལ་ཞུགས་འཛིན་རྣམས་ཀྱི། །དོན་དུ་སངས་རྒྱས་གཏི་མུག་སྦྱོང་། །རྡོ་རྗེ་རྫོགས་པའི་སངས་རྒྱས་འགྱུར། །ཞེས་པ་དང་། འདོད་ཆགས་འདུལ་བའི་དབང་དུ་བྱས་ཏེ། །བྱང་ཆུབ་ཆགས་བྲལ་ལས་སྐྱེས་སྤངས། །སེམས་ཅན་གང་ཞིག་བདེ་བྱེད་པ། །ཆགས་པས་བྱང་ཆུབ་རབ་སྦྱིན་ཕྱིར། །པདྨ་གར་གི་དབང་ཕྱུག་འགྱུར། །ཞེས་གསུངས་པས་སོ། །དེ་ལྟར་ཁྲོ་ཆགས་ཀྱི་སྐུས་རྩ་བའི་ཉོན་མོངས་པ་གསུམ་ཞི་བར་བྱེད་པ་ཡིན་པས་ན་ཉོན་མོངས་པ་གཞན་རྣམས་ཤུགས་ལས་ཞི་བར་བྱེད་པ་ཡིན་ནོ། །ཁྲོ་ཆགས་ཀྱི་རྣམ་པའི་སྐུ་མེད་པ་རྣམས་ནི་བསྐྱེད་པའི་རིམ་པ་མི་ཟབ་པ་ཡིན་ནོ། །ཡང་སྒེག་པ། དཔའ་བ། མི་སྡུག་པ་སྟེ་སྐུའི་ཉམས་གསུམ་གྱིས་རིམ་པ་ལྟར་འདོད་ཆགས་དང་། ཞེ་སྡང་དང་། གཏི་མུག་སྦྱོང་། དགོད་ཅིང་དྲག་ཤུལ་འཇིགས་སུ་རུང་བ་སྟེ། གསུང་གི་ཉམས་གསུམ་གྱིས་ཀྱང་རིམ་པ་ལྟར་དེ་གསུམ་སྦྱོང་ངོ་། །སྙིང་རྗེ་ངམ་དང་ཞི་བ་སྟེ་ཐུགས་ཀྱི་ཉམས་གསུམ་གྱིས་ཀྱང་རིམ་པ་ལྟར་དེ་གསུམ་སྦྱོང་ངོ་། །དྲུག་པ་ཁ་དོག་དང་དབྱིབས་ཀྱིས་དུག་ལྔ་སྦྱོང་ཚུལ་ལ་གཉིས་ཏེ། ཁ་དོག་གིས་དུག་ལྔ་སྦྱོང་ཚུལ་དང་། ཕྱག་མཚན་གྱིས་དུག་ལྔ་སྦྱོང་ཚུལ་ལོ། །དང་པོ་ནི། གཏི་མུག་ཅན་ནི་གང་དུའང་བསྒྱུར་དུ་འདོད་ཅིང་། མེ་ལོང་ལྟ་བུའི་ཡེ་ཤེས་ཀྱང་ཡེ་ཤེས་གཞན་གསུམ་གྱི་གཞི་ཡིན་པའི་ཕྱིར། ཁ་དོག་དཀར་པོས་མཚོན་ཡང་ཞེ་སྡང་སྐྱེས་པའི་ཚེ་ནག་ཏོམ་གྱིས་འགྲོ་ལ། ཆོས་དབྱིངས་ཡེ་ཤེས་ཀྱང་འགྱུར་བ་མེད་པའི་ཕྱིར་ཁ་དོག་ནག་པོས་མཚོན། ཡང་འདོད་ཆགས་སྐྱེས་པའི་ཚེ་ཁ་དོག་དམར་ལ། སོ་སོར་རྟོག་པའི་ཡེ་ཤེས་སེམས་ཅན་གྱི་དོན་ལ་ཆགས་པས་ཁ་དོག་དམར་པོས་མཚོན། ཡང་ལོངས་སྤྱོད་འཛིན་པ་ནི་སེར་སྣ་ཡིན་ལ། ལོངས་སྤྱོད་ཡོད་པ་རྣམས་ལ་ང་རྒྱལ་སྐྱེ་ཞིང་ལོངས་སྤྱོད་ཀྱི་གཙོ་བོ་རིན་པོ་ཆེ་དང་། གསེར་ལ་སོགས་པ་རྣམས་ནི་འོད་གསལ་བ་དང་། མཉམ་པ་ཉིད་ཀྱི་ཡེ་ཤེས་ཀྱང་འོད་གསལ་བས་སེར་པོས་མཚོན། ཡང་ཉོན་མོངས་པ་ཕྲག་དོག་ནི་ཉོན་མོངས་པ་ཀུན་ལྡན་ལས་སྐྱེ་བ་ཡིན་ལ། བྱ་བ་གྲུབ་པའི་ཡེ་ཤེས་ཀྱང་ཡེ་ཤེས་ཐམས་ཅད་ཀྱི་ཕྲིན་ལས་ཡིན་པས་ཁ་དོག་ལྗང་གུས་མཚོན་ཏེ། ཁ་དོག་ལྔ་པོ་གང་ཡོད་སར་འདི་ལྟ་བུའི་སྦྱང་གཞི་དང་སྦྱོང་བྱེད་ངོ་སྤྲད་ཅིང་བསྒོམས་པས། ཉོན་མོངས་པ་ལྔ་ཡེ་ཤེས་ལྔར་བྱིན་གྱིས་བརླབས་པ་ཡིན་ནོ། །གཉིས་པ་ནི། ཕྱག་མཚན་འཁོར་ལོས་ཉོན་མོངས་པ་གཏི་མུག་དང་། མེ་ལོང་ལྟ་བུའི་ཡེ་ཤེས་མཚོན། རྡོ་རྗེ་ཞེ་སྡང་དང་། ཆོས་དབྱིངས་ཡེ་ཤེས་མཚོན། རིན་པོ་ཆེས་ང་རྒྱལ་དང་། སེར་སྣ་དང་། མཉམ་པ་ཉིད་ཀྱི་ཡེ་ཤེས་མཚོན། པདྨས་འདོད་ཆགས་དང་། སོ་སོར་རྟོག་པའི་ཡེ་ཤེས་མཚོན། རལ་གྲིའམ་སྣ་ཚོགས་རྡོ་རྗེས་ཕྲག་དོག་དང་། བྱ་བ་གྲུབ་པའི་ཡེ་ཤེས་མཚོན་ལ། དེ་བཞིན་དུ་ཕྱག་མཚན་གཞན་རྣམས་ལ་ཡང་རུང་མཐུན་བརྩི་བར་བྱའོ། །སྲོག་ཆགས་ཀྱི་ཕྱག་མཚན་རྣམས་ནི་མཚོན་བྱེད་བཟང་བ་ཡིན་ཏེ། རེ་རེ་ལ་ཡང་ཕུང་པོ་ལྔ་དང་། ཉོན་མོངས་པ་ལྔ་དང་། ཡེ་ཤེས་ལྔ་ལ་སོགས་པའི་སྦྱང་གཞི་སྦྱོང་བྱེད་ཐམས་ཅད་ཚང་བའི་ཕྱིར་རོ། །དེ་ལྟར་ཕྱག་མཚན་ཐམས་ཅད་ལ་སྦྱང་གཞི་སྦྱོང་བྱེད་ངོ་སྤྲད་ཅིང་བསྒོམས་པས་ཉོན་མོངས་པ་ལྔ། ཡེ་ཤེས་ལྔར་བྱིན་གྱིས་བརླབས་པ་ཡིན་ནོ། །བདུན་པ་ཕྱག་ཞབས་ཀྱི་རྣམ་འགྱུར་གྱིས་མཐའ་གཉིས་སྦྱོང་ཚུལ་ནི། ཕྱག་དང་ཞབས་གཡས་བརྐྱང་བས་ནི་སྙིང་རྗེ་ཆེན་པོས་སེམས་ཅན་གྱི་དོན་བྱེད་པ་མཚོན་ལ། བསྐུམ་པས་ནི་བདག་ཐུགས་རྗེ་ཆེན་པོ་དང་ལྡན་པ་མཚོན། གཡོན་བརྐྱངས་པས་ནི་ཆོས་ཉིད་སྟོང་པ་ཉིད་ཀུན་ལ་ཁྱབ་པ་མཚོན། དེས་འཁོར་བའི་མཐའ་མནན་ནོ། །བསྐུམ་པས་ནི་བདག་དང་དེ་བཞིན་ཉིད་དུ་ལྡན་པ་མཚོན། དེས་མྱ་ངན་ལས་འདས་པའི་མཐའ་མནན་ནོ། །ཕྱག་གཉིས་ཐུགས་ཀར་བསྣོལ་བ་དང་། ཞབས་རྡོ་རྗེ་སྐྱིལ་ཀྲུང་དུ་བཞུགས་པས་ནི་ཟུང་དུ་འཇུག་པ་མཚོན་ཏེ། དེས་མཐའ་གཉིས་ཆར་སྦྱོང་ངོ་། །དེ་ལྟར་ན་རྗེ་བཙུན་གྱིས་ལྗོན་ཤིང་ལས་སྦྱང་གཞི་དང་སྦྱོང་བྱེད་ཐམས་ཅད་ངོ་སྤྲད་པ། ལམ་ཐམས་ཅད་གཅིག་ཏུ་བསྲེ་བ་འདི་ནི། རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོའི་བཞེད་པ་ཡིན་ནོ། །ཞེས་གསུངས་པའི་དོན་ཡིན་ལ། འདི་ཚུལ་བཞིན་ཤེས་ནས་བསྒོམ་ན། རྒ་སྟོན་སྤྲིང་ཡིག་ལས། སྤྱིར་སྦྱང་གཞི་དང་། སྦྱོང་བྱེད་ལེགས་པར་ངོ་འཕྲོད་ཅིང་བསྒོམས་ན། བསྒོམ་པ་ལ་བརྩོན་ཡང་རུང་མ་བརྩོན་ཡང་རུང་འཁོར་བའི་རྒྱ་མཚོ་ལས་བདག་སྒྲོལ་ཞིང་གཞན་སྒྲོལ་བའི་ནུས་པ་དང་ལྡན་པར་གྱུར་པའོ། །ཞེས་གསུངས་པ་ལྟར་གྱི་འབྲས་བུ་འབྱུང་བར་ཤེས་ནས་བཀའ་སྲོལ་འདི་ལྟ་བུའི་རྗེས་སུ་འབྲང་བར་བྱ་བ་ཡིན་གྱི། ཆོས་དབྱིངས་བདེན་གྲུབ་ཁོ་ན་སྦྱང་གཞི་ཡིན་གྱི། ཀུན་རྫོབ་ཕུང་ཁམས་སྐྱེ་མཆེད་ཐམས་ཅད་སྦྱང་གཞི་མ་ཡིན་ནོ་ཞེས་ཤིན་ཏུ་འཆལ་ཞིང་། རྣམ་པར་འཆལ་བའི་ཤེས་རབ་ཀྱིས་ལོག་པར་རྟོག་པའི་རྗེས་སུ་འབྲང་བར་མི་བྱའོ། །སྤྱིར་གསང་སྔགས་རྡོ་རྗེ་ཐེག་པའི་གནད་ཕྱིན་ཅི་མ་ལོག་པར་རྟོགས་པ་ལ། རྗེ་ས་ཆེན་གྱིས། ཐམས་ཅད་མཁྱེན་པའི་བཀའ་ནི་རྒྱ་མཚོ་བཞིན། །ཟབ་ཅིང་གཏིང་དཔག་དཀའ་ལ་ཐུག་པ་མེད། །རྡོ་རྗེ་ཐེག་པ་དགོངས་པ་དུ་མ་ཡིས། །གསུང་ཤིང་རྡོ་རྗེའི་ཚིག་གིས་རྒྱས་བཏབ་པས། །ལུང་བསྟན་གྱུར་པ་ཀླུ་སྒྲུབ་ལ་སོགས་སམ། །མཁའ་འགྲོས་བྱིན་བརླབས་བིརྺ་པ་ལ་སོགས། །གྲུབ་ཐོབ་རྣམས་ཀྱི་མན་ངག་ལ་བརྟེན་ནས། །རྗེས་འཇུག་སྐྱེ་བོས་བཀའ་རྣམས་རྟོགས་པར་འགྱུར། །ཞེས་གསུངས་པ་ལྟར། བཀའ་སྲོལ་རྣམ་པར་དག་པའི་རྗེས་སུ་འབྲང་དགོས་པ་འདིའང་ངེས་པར་བྱའོ། །གསུམ་པ་ཡིད་ཆེས་བསྐྱེད་པའི་ཕྱིར་འཁྲུལ་ཟད་ཀྱི་ལུང་ཁུངས་བསྟན་པ་ནི་གནད་འདི་དག རྗེ་ས་ཆེན་གྱི་དབང་བཞི་ངོ་སྤྲོད་ཀྱི་འགྲེལ་པ། རྗེ་བཙུན་རྩེ་མོའི་མངོན་རྟོགས་རྒྱས་པ། རྗེ་བཙུན་རིན་པོ་ཆེའི་མངོན་རྟོགས་ལྗོན་ཤིང་། འཁོར་འདས་དབྱེར་མེད་ཀྱི་འགྲེལ་པ། རྒ་སྟོན་སྤྲིང་ཡིག་རྣམས་ལས་གསལ་བར་འབྱུང་ལ། གཞན་ཡང་། རྒྱུད་གསུམ་གྱི་འགྲེལ་པ་སོགས་གོང་མའི་གསུང་རབ་རྣམས་ལས་ཆ་ཤས་ཀྱིས་འབྱུང་བ་ནི་སྐལ་བ་དང་ལྡན་པ་རྣམས་ཡིད་ཆེས་པའི་ལུང་ཁུངས་ཡིན་ནོ། །དེ་དག་ལ་ཡིད་མི་ཆེས་པ་རྣམས་ཀྱིས་ཀྱང་། སྔར་དྲངས་པའི་རྒྱུད་གཞུང་རྣམ་པར་དག་པའི་ལུང་རྣམས་ལ་བརྟེན་ནས་མ་འཁྱོགས་པའི་བློ་གྲོས་ཀྱིས་དཔྱད་ཅིང་རང་གཞན་ལ་ཕན་པར་བྱའོ། །གཉིས་པ་དེ་ཉིད་ལམ་བྱེད་བཞིས་ལམ་དུ་བྱེད་པའི་ཚུལ་ནི་སྔར་བཤད་པའི་སྦྱང་གཞི་དང་སྦྱོང་བྱེད་དེ་དག་ཐམས་ཅད་ཀྱང་། འདྲ་ཆོས་དང་། མཚོན་དོན་རྟོགས་པ་རང་དགའ་བས་བསྒྲིགས་པ་ཙམ་མ་ཡིན་གྱི། སེམས་ཀུན་གཞིའི་སྟེང་དུ་མྱ་ངན་ལས་འདས་པའི་ཆོས་ཐམས་ཅད་ཀྱི་བག་ཆགས་གནས་པའི་སྟོབས་ཀྱིས། ཀུན་རྫོབ་ཀྱི་སྣང་བ་ཐམས་ཅད་འབྲས་བུ་སངས་རྒྱས་ཀྱི་སའི་གཟུགས་སྐུ་དང་། ཆོས་སྐུའི་རྣམ་པ་རང་བཞིན་རྣམ་དག་གི་ཚུལ་གྱིས་འབྱུང་བ་ཡིན་པར་ནི་རྩ་རྒྱུད་ཕྱི་མའི་བཅུ་གཅིག་པར། ལུས་ཅན་ཐམས་ཅད་ཁ་དོག་དང་དབྱིབས་ཀྱི་སྒོ་ནས་རིགས་ལྔར་ངེས་ཚུལ་གསུངས་པས་ཤེས་ལ། དེའི་ཕྱིར་བསྒོམས་པས་གློ་བུར་གྱི་དྲི་མ་དག་སྟེ། མངོན་དུ་འགྱུར་བ་ནི་སྦྱང་གཞི་དང་། སྦྱོང་བྱེད་མཚོན་དོན་བསྒྲིགས་པའི་དོན་ནོ། །དེས་ན་འདི་ལ་སྦྱང་གཞི་ཐམས་ཅད་ལམ་གྱིས་རྣམ་པ་དེ་དང་དེར་བསྒོམ་པའི་ཚུལ་དང་། དེ་ཉིད་ལམ་བྱེད་བཞིས་བྱིན་གྱིས་བརླབ་པའི་ཚུལ་གཉིས་ལས། དང་པོ་ནི་རྒྱས་པར་སྔར་བཤད་ཟིན་ཅིང་། མཚན་གཞི་གཅིག་ལ་སྦྱར་ན་མངལ་སྐྱེས་ཀྱི་མའི་ཕྱག་རྒྱ་གྲུ་གསུམ་དང་། སྒོང་སྐྱེས་ཀྱི་སྒོ་ང་སོགས་བཞི་པོ་མ་དག་པའི་ཕྱག་རྒྱ་སོགས་མ་ཡིན་གྱི། བདག་གི་བློ་ལ་སྣང་བའི་ཆོས་འབྱུང་གྲུ་གསུམ་འདི་ཉིད་ཡིན་ནོ་སྙམ་དུ་དབྱེར་མེད་དུ་བསྒོམ་པའོ། །གཉིས་པ་ནི་དེ་ལྟར་ཆོས་འབྱུང་གྲུ་གསུམ་དུ་བསྒོམས་པས་རྣམ་པ་གཟུགས་ཀྱི་རྣམ་པ་བསྒོམ་སླ་བས་རྣམ་པ་ལམ་དུ་བྱེད་པ་ཞེས་བྱ། དེ་ཉིད་རྣམ་ཐར་སྒོ་གསུམ་དང་། སྤྱན་ལ་སོགས་པའི་ཕྱག་རྒྱར་མོས་པ་བྱས་པས། མོས་པ་ལམ་དུ་བྱེད་པ་ཞེས་བྱ། དེ་ཡང་སངས་རྒྱས་སའི་འབྲས་བུ་རྣམ་ཐར་སྒོ་གསུམ་དང་། སྤྱན་ལ་སོགས་པའི་ཕྱག་རྒྱ་དངོས་ཡིན་པར་བསྒོམས་པས་འབྲས་བུ་ལམ་དུ་བྱེད་པ་ཞེས་བྱ། དེས་རྣལ་འབྱོར་པའི་སེམས་རྒྱུད་བྱིན་གྱིས་བརླབས་ཤིང་ཚོགས་རྫོགས་པས་བྱིན་རླབས་ལམ་དུ་བྱེད་པ་ཞེས་བྱ་སྟེ། དེའི་རྒྱུ་མཚན་ཡང་ཞེན་པས་འཇུག་ཅིང་འབྲེལ་པས་མི་བསླུ་བའི་ལམ་ཡིན་པའི་ཕྱིར་རོ། །དེ་ལ་ཞེན་པས་འཇུག་པ་ནི། སྦྱང་གཞི་ལ་རྣམ་པར་ཞེན། རྣམ་པ་ལ་འབྲས་བུ་དངོས་སུ་ཞེན་པའོ། །འབྲེལ་པས་མི་བསླུ་བ་ནི་སྦྱང་གཞི་དང་། ལམ་དང་། འབྲས་བུ་སུམ་ཆར་ཡང་གཅིག་ལ་གཅིག་འབྲེལ་པའམ། དོན་ལ་དབྱེར་མེད་པས་མི་བསླུ་བ་སྟེ། བསྐྱེད་པའི་རིམ་པའི་སྦྱང་གཞི་དང་། སྦྱོང་བྱེད་བསྒོམས་པས་སངས་རྒྱས་ཀྱི་སའི་ཆོས་ཐམས་ཅད་འཐོབ་པའི་རྒྱུ་མཚན་ཡང་འདི་ཉིད་ཡིན་ནོ། །དེ་ལྟར་རྣལ་འབྱོར་བཅུ་པོ་སྦྱང་གཞི་སྦྱོང་བྱེད་སྦྱར་ཞིང་། ལམ་བྱེད་བཞི་ལྡན་དུ་བརྩོན་པ་དྲག་པོས་བསྒོམས་པས་དྲོད་ཆུང་ངུ་ཐོབ་པ་ན། ཀུན་འདར་གསང་ནས་སྤྱོད། དེས་དྲོད་འབྲིང་ཐོབ་པ་ན། ཀུན་འདར་འཇིག་རྟེན་པའི་མངོན་དུ་སྤྱོད། དེས་ལུང་བསྟན་པའི་བུ་མོ་པདྨ་ཅན་ལ་བརྟེན་ནས་དྲོད་ཆེན་པོ་ཐོབ་པ་ན། ཀུན་ཏུ་བཟང་པོའི་སྤྱོད་པ་ཟླ་བ་གཅིག་གིས་ས་བརྒྱད་པ་ཐོབ་སྟེ། ཉེ་རྒྱུ་སྤྱོད་པའི་སྐལ་བ་དང་ལྡན་པར་འགྱུར་ཞིང་། དེ་ནས་ཉེ་རྒྱུ་ཞག་བདུན་གྱིས་རྡོ་རྗེ་འཆང་ཆེན་པོའི་ས་བཅུ་གསུམ་པ་ཐོབ་པར་འགྱུར་པ་ནི་ངེས་པའོ།། ༈ །།ཀུན་མཁྱེན་བླ་མའི་ལེགས་བཤད་ཟླ་ཟེར་གྱིས། །ལམ་བཟང་སྣང་བ་གསལ་བར་མཛད་པ་ལས། །མན་ངག་ཀུ་མུ་ཏ་ཀ་བྱེ་བའི་ཆུ། །དོན་གཉེར་བློ་ཡི་རེ་བ་སྐོང་ཕྱིར་སྦྱིན། །རབ་དཀར་དགེ་ཚོགས་གང་ཞིག་གྲུབ་པ་དེས། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་ཞེས་གྲགས་པར་སྐྱེས་གྱུར་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །དོན་དམ་སྤྲོས་བྲལ་མངོན་དུ་མ་གྱུར་ཀྱང་། །སྣ་ཚོགས་རྒྱུད་སྡེའི་དགོངས་པ་དྲི་མེད་ལ། །རྣམ་བཀྲའི་བློ་གྲོས་གང་གི་དྲིན་ཉིད་ལས། །ལེགས་པར་ཐོབ་པའི་རྗེ་བཙུན་ཞབས་པད་ལ། །སྒོ་གསུམ་དྭང་བས་རྟག་ཏུ་ཕྱག་འཚལ་ཞིང་། །ལུས་དང་ལོངས་སྤྱོད་དུས་གསུམ་དགེ་རྩ་ཡིས། །རྒྱུན་དུ་མཆོད་དོ་ཐུགས་རྗེའི་ལྕགས་ཀྱུ་ཡིས། །ད་དུང་སྲིད་མཐའི་བར་དུ་རྗེས་གཟུང་གསོལ། །རྗེ་བཙུན་བླ་མའི་ལེགས་བཤད་གནད་ཀྱི་ཟླ་ཟེར་འཕགས་ཡུལ་གྱི་ཀྱེ་རྡོ་རྗེའི་ལམ་ཡོངས་སུ་རྫོགས་པའི་ལམ་སྲོལ་དྲུག་རྫོགས་པར་བཤད་པའི་ནང་ནས་བློ་དམན་པ་རྣམས་ལ་ཕན་པའི་ཕྱིར་མན་ངག་ལུགས་ལོགས་སུ་བཀོལ་ཏེ། གསུང་སྒྲོས་ཁྱད་པར་ཅན་འགའ་ཞིག་དང་། རྗེ་བཙུན་གོང་མའི་གསུང་རབ་ཀྱི་ནང་ནས་བསྣན་ཁ་འགའ་ཞིག་དང་བཅས་ཏེ་འབྲི་དགོས་སོ་ཞེས་དོན་གཉེར་དུ་མས་བསྐུལ་ཏེ། མགོ་བརྩམས་ནས་ཡུན་རིང་དུ་མ་གྲུབ་པ་ལ། དུས་ཕྱིས་བསྟན་པ་དྲི་མ་མེད་པའི་ཁུར་གྱིས་ལྕི་བ་མཁན་ཆེན་སངས་རྒྱས་རྒྱ་མཚོ་བའི་གསུང་གིས་བསྐུལ་བས་རྐྱེན་བྱས་ནས། རྗེ་བླ་མས་ལེགས་བཤད་གནད་ཀྱི་ཟླ་ཟེར་སྒྱུར་བྱེད་ཅེས་བྱ་བ། ས་མོ་ཕག་གི་ལོ་ལ་བརྩམ་ནས་ལོ་དྲུག་ཅུ་རེ་དྲུག་འདས་པ། སྣ་ཚོགས་འབྱིག་ཅེས་པ་ཤིང་མོ་སྦྲུལ་གྱི་ལོ་ལ། ཤཱཀྱའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་ལེགས་པར་གྲུབ་པའི་ཡི་གེ་པ་ནི་གཞོན་ནུ་བཟང་པོའོ།། །།དགེའོ།། །། ༄༅། །ན་མཿསངྒུ་རུ་པཱ་དཱ་ཡ། ཀུན་ཁྱབ་དམིགས་པ་མེད་པའི་སྙེང་རྗེའི་རྩལ། །མ་འགག་རང་བཞིན་རྣམ་པ་ཐམས་ཅད་ཀྱི། །མཆོག་ལས་མི་འགྱུར་འོད་གསལ་ཤེས་རབ་ཆེ། །ཟུང་འཇུག་སྲིད་ཞི་ཀུན་ཁྱབ་དགེས་མཛད་མགོན། །དེས་གསུང་རྒྱུད་ཀྱི་ཡང་སྙིང་རྣལ་འབྱོར་བཅུ། །འདོམས་མཛད་དཔལ་ལྡན་ཆོས་སྐྱོང་སྲས་བཅས་ཀྱི། །ལུགས་མཆོག་སྒྲོས་ངན་སྤངས་པ་འདི་ཙམ་ཞེས། །མདོ་རྒྱུད་གདམས་པའི་ང་རོས་འབོད་རྒྱངས་མཁན། །དེ་རྒྱུན་བསོད་ནམས་གསེར་གྱི་སྒོང་སྦུབས་ལས། །སྐྱེས་པ་སྡེ་བཞིའི་གདོང་མཛེས་དགེ་ཆོས་ཀྱི། །འཁོར་ལོས་ལག་བྲེལ་ས་་་་་་བསྟན་པ་ཚེ་རིང་སྤྱོད་འཇིག་རྟེན་མེས། །གྲགས་པའི་གསུང་སྙན་ཡན་ལག་རྫོགས་པ་ཅན། །གང་དེས་སྤེལ་པའི་རྣམ་དཀར་དགེ་བའི་མཐུས། །ཆོས་འདུལ་མངོན་པ་མདོ་དང་རྒྱུད་སྡེའི་གནད། །མཐའ་དྲུག་ལམ་ནས་འདྲེན་ལ་མི་འཇིགས་གདེང་། །འཇམ་དཔལ་གཞོན་ནུས་བྱིན་གྱུར་ས་སྐྱ་པ། །བརྒྱུད་པར་བཅས་པའི་རིང་ལུགས་དར་གྱུར་ཅིག །ཚུལ་འདིར་རྒྱུ་སྦྱོར་དཀར་པོའི་བག་ཆགས་རྒྱུན། །བཞག་པས་བསྡུས་པའི་ལུས་ཅན་བྱང་ཆུབ་བར། །ཡང་སྲིད་བླ་མ་ལྷག་པའི་ལྷས་བྱིན་བརླབས། །མཁས་པའི་བགྱི་བས་བསྟན་པ་རྒྱས་བྱེད་ཤོག །དེ་སྐད་དམར་སེར་ཞེས་བྱའི་ལོར། །ས་སྤྱོད་ཐུགས་བསྐྱེད་ལྡེ་མིག་གི །འཕྲུལ་གྱིས་ཆོས་སྦྱིན་མ་མོའི་སྒོ། །འབུམ་ཕྲག་གསར་དུ་ཕྱེ་བའི་སྐབས། །རྗེ་བཙུན་བླ་མ་རྣམས་ཀྱི་ཐུགས། །བརྩེ་བས་ལེགས་བསྐྱངས་ཆོས་འདིའི་རིགས། །སྐྱེས་པས་སྐལ་བ་སྦོམ་གྱུར་མིང་། །ཚུལ་ཁྲིམས་རིན་ཆེན་བཏགས་པས་བྲིས།། །།མངྒལཾ།། །།