ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ན༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ།

དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ་བཞུགས་སོ།།

ན་མོ་གུ་རུ་བྷ་དྲཱ་ཡ། ཐོག་མར་བླ་མའི་ཞབས་ལ་ཕྱག་འཚལ་ནས། །རྡོ་རྗེ་འཆང་ལ་གཉིས་པའི་ཚིག་གིས་འདུད། །མཐུ་སྟོབས་དབང་ཕྱུག་ཞབས་ལ་ཕྱག་འཚལ་ཏེ། །ཟབ་དོན་གནད་ཀྱི་གསུང་སྒྲོས་བྲི་བར་བྱ། །འདིར་དཔལ་ཀྱེ་རྡོ་རྗེ་མན་ངག་ལུགས་ཀྱི་བསྐྱེད་པའི་རིམ་པ་གསལ་བར་བཤད་པ་ལ་སྡོམ་ནི། བཀའ་སྲོལ་རྣམ་བཞིས་འབྱུང་ཁུངས་ངེས་བྱས་ཏེ། །དཀྱིལ་འཁོར་གྲངས་ཀྱིས་བསྒྲུབ་བྱ་ངོས་བཟུང་ནས། །སྦྱོར་དངོས་རྒྱས་བསྡུས་སྒོ་ནས་སྒྲུབ་བྱེད་བཤད། །ལུང་རིགས་གཉིས་ཀྱིས་གཙོ་བོ་བསྒྲུབས་བྱས་ནས། །དེ་ཉིད་མངོན་རྟོགས་བཅུ་བཞིས་རྟོགས་པ་བསྐྱེད། །རྣལ་འབྱོར་རྣམ་བཅུས་ཉམས་སུ་ལེན་པའི་ཐབས། །སྦྱང་གཞི་སྦྱོང་ཞིང་ལམ་བྱེད་རྣམ་བཞི་ཡིས། །ལམ་བྱེད་ཚུལ་འདི་བིརྺའི་མན་ངག་ཡིན། །ཞེས་པ་དོན་ཚན་བདུན་ལས། དང་པོ་བཀའ་སྲོལ་རྣམ་བཞིས་འབྱུང་ཁུངས་ངེས་པར་བྱ་བ་ནི། རྗེ་ས་སྐྱ་པ་ཆེན་པོ་ལ་བཀའ་བབས་བཞུགས་པའི་ཀྱེ་རྡོ་རྗེའི་བཀའ་སྲོལ་ལ། གཞུང་འགྲེལ་ལ་བརྟེན་པ་གསུམ་དང་། མན་ངག་ལ་བརྟེན་པ་གཅིག་སྟེ་བཞི་ལས། དང་པོ་ནི་རྗེ་བཙུན་ཆེན་པོས། བིརྺའི་རྗེས་འབྲང་ཌོམྦིའི་སྐོར། །ཡན་ལག་མེད་རྗེས་པདྨའི་སྐོར། །དམ་ཚིག་རྡོ་རྗེ་ནག་པོའི་སྐོར། །གཙོ་ཆེའི་ཆོས་སྣ་སུམ་ཅུ་དགུ། །ལམ་སྐོར་དགུ་ནི་ཁྱད་པར་རོ། །ཞེས་གསུངས་པའི་དང་པོ་བླ་མ་བིརྺ་པའི་རྗེས་སུ་འབྲང་བ་ཌོམྦི་ཧེ་རུ་ཀའི་སྐོར་ལ། ཐོག་མར་ཌོམྦི་བས་བསྐྱེད་རིམ་བདག་མེད་མའི་སྒྲུབ་ཐབས་བདུད་རྩི་འོད། རྫོགས་རིམ་ལྷན་ཅིག་སྐྱེས་གྲུབ། ལམ་གྱི་ཡན་ལག་ཚོགས་འཁོར་འདུ་བ་བསྒྲགས་པ་དང་བཅས་པ། དེ་ཉིད་བཅུ་པ་སྟེ་བཞི་མཛད། དེའི་སློབ་མ་ཨ་ལ་ལ་བཛྲ་གྱིས་སྐུ་རྡོ་རྗེ་ལྷ་དགུའི་མངོན་པར་རྟོགས་པ་ཕྱག་གཉིས་པའི་སྒྲུབ་ཐབས་ཞེས་བྱ་བ་མཛད་དོ། །དེའི་སློབ་མ་ནགས་ཁྲོད་པས་གཞུང་མཛད་པ་མི་སྣང་ལ། དེའི་སློབ་མ་སློབ་དཔོན་གརྦྷ་རི་པས། སྐུ་རྡོ་རྗེ་དཔའ་བོ་གཅིག་པའི་མངོན་པར་རྟོགས་པ་དྲན་པ་གཅིག་པ་ཞེས་བྱ་བ་མཛད། དེའི་སློབ་མ་བསོད་སྙོམས་པས་བདག་མེད་མ་དཔའ་མོ་གཅིག་པའི་སྒྲུབ་ཐབས་མཛད། དེའི་སློབ་མ་སློབ་དཔོན་མི་ཐུབ་ཟླ་བས་སྨིན་བྱེད་ཀྱི་ཆོ་ག་དཀྱིལ་ཆོག་བཟང་པོ་ཡོངས་གཟུང་། གྲོལ་ལམ་བསྐྱེད་རིམ་ལ་རིགས་ལྔ་ཆར་གྱི་སྒྲུབ་ཐབས་སྟོན་པ་གུར་རིགས་བསྡུས་ཀྱི་མངོན་རྟོགས། བྱེ་བྲག་ཏུ་མི་བསྐྱོད་པའི་རིགས་ཅན་རྣམས་ལ་ཀྱེ་རྡོ་རྗེ་ཡབ་ཀྱི་སྒྲུབ་ཐབས་ཡན་ལག་དྲུག་པ། ཡུམ་རྡོ་རྗེ་བདག་མེད་མའི་མངོན་པར་རྟོགས་པ། སྒྲུབ་ཐབས་གསུམ་ཆར་ལ་འཇུག་པའི་གཏོར་མའི་ཆོ་ག་དང་། རྫོགས་རིམ་ལ་གཏུམ་མོའི་འགྲེལ་ཆུང་མཛད་ཅེས་རྗེ་བཙུན་ཆེན་པོས་བཤད་ལ། ད་ལྟ་ཡོད་པའི་གཏུམ་མོའི་འགྲེལ་ཆུང་ནི། རྗེ་བཙུན་ག་ཡ་དྷ་རས་མཛད་པ་ཡིན་ཏེ། དེའི་འཇུག་ན་རྣལ་འབྱོར་གྱི་དབང་ཕྱུག་རཏྣ་ཤྲཱི་ཛྙཱ་ནས་མཛད་ཟེར་བ་སྣང་ལ། དེ་ག་ཡ་དྷ་རའི་མཚན་ཡིན་ནོ་གསུངས། དེ་དག་གི་རྒྱབ་རྟེན་དུ། དཀའ་འགྲེལ་ཀུ་མུ་ཏི་སྟེ་གཞུང་བདུན་མཛད་དོ། །དེའི་སློབ་མ་དགེ་སློང་དཔའ་བོ་རྡོ་རྗེས་དཀྱིལ་ཆོག བསྐྱེད་རིམ། རྫོགས་རིམ། རབ་གནས། སྦྱིན་སྲེག རོ་སྲེག ཚོགས་འཁོར། གཏོར་མ། མཆོད་པའི་ཆོ་ག་རྣམས་ལེའུ་རེ་རེར་བྱས་ནས་ཕྱོགས་གཅིག་ཏུ་བསྡེབས་པ་དཀྱིལ་འཁོར་གྱི་ཆོ་ག་རིན་ཆེན་འབར་བ་ཞེས་བྱ་བ་མཛད་དོ། །སློབ་དཔོན་དེས་རྗེ་བཙུན་འབྲོག་ལ་གདམས། དེས་མངའ་རིས་པ་གསལ་བའི་སྙིང་པོ་ལ། དེས་འཁོན་སྒྱི་ཆུ་བ་ཤཱཀྱ་འབར་ལ། དེས་རྗེ་ས་སྐྱ་པ་ཆེན་པོ་ལ་གདམས་སོ། །གཉིས་པ་བླ་མ་ཡན་ལག་མེད་པའི་རྡོ་རྗེའི་རྗེས་སུ་འབྲང་བ་པདྨ་བཛྲ་གྱི་སྐོར་ལ། གྲུབ་ཆེན་པདྨ་བཛྲ་གྱིས། སྨིན་བྱེད་དབང་གི་ཆོ་ག་ནས་གླིང་མར་གྲགས་པ། གྲོལ་བྱེད་ལ་བསྐྱེད་རིམ་སྒྲུབ་ཐབས་མཚོ་སྐྱེས། རྫོགས་རིམ་མར་མེའི་རྩེ་མོ་ལྟ་བུའི་གདམས་ངག ལམ་གྱི་ཡན་ལག་ཚོགས་འཁོར་དམ་ཚིག་ལྔ་པ། སྦྱིན་སྲེག་གི་ཆོ་ག བསྟོད་པ་ཉི་ཤུ་པ། དེ་ཐམས་ཅད་ཀྱི་རྒྱབ་རྟེན་དུ་རྩ་རྒྱུད་ཀྱི་དཀའ་འགྲེལ་པདྨ་ཅན་རྣམས་མཛད། རྗེ་བཙུན་གྱིས། གླེང་གཞིའི་འགྲེལ་པ། རྩའི་མངོན་པར་རྟོགས་པ་ཆེ་ཆུང་གཉིས། དུར་ཁྲོད་ཀྱི་འགྲེལ་པ་ཆེ་ཆུང་གཉིས། བརྡའི་འགྲེལ་པ། རྡོ་རྗེའི་གླུའི་འགྲེལ་པ་ཆེ་ཆུང་གཉིས་ཏེ། སྐབས་ཀྱི་འགྲེལ་ཆུང་བརྒྱད་ཀྱང་འདིའི་བཀའ་སྲོལ་དུ་བགྲང་ངོ་། །གྲུབ་ཆེན་དེས་ཨིནྡྲ་བྷཱུ་ཏི་ལ་གདམས་སོ། །དེ་ནས་རིམ་པ་བཞིན་ལྕམ་ལཀྵྨཱི། ནག་པོ་སྤྱོད་པ་བ། བྲམ་ཟེ་དཔལ་འཛིན། ག་ཡ་དྷ་ར། འབྲོག་མི། སེ་སྟོན། ཞང་དགོན་པ་བ་རྣམས་ལས་བརྒྱུད་དེ་རྗེ་ས་སྐྱ་པ་ཆེན་པོ་ལ་གདམས་སོ། །གསུམ་པ་བླ་མ་ནག་པོ་དམ་ཚིག་རྡོ་རྗེའི་རྗེས་སུ་འབྲང་བ་ནག་པོ་ཤཱནྟ་བྷ་དྲཱའི་སྐོར་ལ། སློབ་དཔོན་དེས། སྨིན་བྱེད་ཀྱི་དཀྱིལ་འཁོར་ཆོ་ག་གཞུང་འགྲེལ། བསྐྱེད་རིམ་ལ་ལྷ་དགུའི་སྒྲུབ་ཐབས། ཡབ་རྐྱང་པའི་སྒྲུབ་ཐབས། ཡུམ་རྐྱང་པའི་སྒྲུབ་ཐབས། རྫོགས་རིམ་གྱི་གཞུང་གཅིག་ཀྱང་ཡོད་པར་རྗེ་བཙུན་ཆེན་པོས་བཤད་ཀྱང་། དེ་ལྟ་དེའི་དཔེ་མི་སྣང་གསུང་། ལམ་གྱི་ཡན་ལག་ལ་ཚོགས་ཀྱི་འཁོར་ལོའི་ཆོ་ག སྦྱིན་སྲེག རོ་སྲེག རབ་གནས། མཆོད་རྟེན་གྱི་ཆོ་ག གཤིན་གྱི་ཆོ་ག་རྣམས་དང་། དེ་དག་གི་རྒྱབ་རྟེན་དུ་དཀའ་འགྲེལ་རྣལ་འབྱོར་རིན་པོ་ཆེའི་སྦྱོར་ཕྲེང་ཞེས་བྱ་བ་རྣམས་མཛད་དོ། །སློབ་དཔོན་དེས། རྗེ་འགོས་ལོ་ཙཱ་བ་ལ་གདམས། དེས་བླ་མ་མངའ་རིས་པ་ལ། དེས་འཁོན་སྒྱི་ཆུ་བ་ལ། དེས་རྗེ་ས་སྐྱ་པ་ཆེན་པོ་ལ་གདམས་སོ། །གཙོ་ཆེའི་ཆོས་སྣ་སུམ་ཅུ་དགུ་ནི། རྗེ་བཙུན་གྱིས་ཀྱེ་རྡོ་རྗེ་རྒྱུད་གསུམ་སོགས་ཆོས་སྣ་ལྔ་བཅུ་ང་བཞི་ཙམ་བགྲངས་ནས། དེའི་མཇུག་ཏུ་སྔར་གྱི་ཚིགས་བཅད་དེ་ཉིད་གསུངས་པས། དེའི་དགོངས་པ་རྗེ་བླ་མའི་་་་་་ཀུན་དགའ་བཟང་པོའི་བཞེད་པ་ཆོས་སྐོར་དང་པོ་ལ་རིན་ཆེན་འབར་བའི་དཀྱིལ་ཆོག་སོགས་རེ་རེ་ཡང་གཞན་གྱི་ཆོས་སྣ་རེ་རེ་དང་ཁྱད་པར་མེད་པས་དགུར་བགྲངས་ཏེ་ཉི་ཤུ་རྩ་གསུམ། ཆོས་སྐོར་གཉིས་པ་ལ་བདུན། གསུམ་པ་ལ་བཅུ་གཉིས་ཏེ། བཞི་བཅུ་ཞེ་གཉིས་ལས་ཌོམྦི་བའི་ལྷན་ཅིག་སྐྱེས་གྲུབ། མཚོ་སྐྱེས་ཀྱི་བསྐྱེད་རྫོགས་གཉིས་ཏེ་གསུམ་ནི། ལམ་སྐོར་དགུ་ནི་ཁྱད་པར་རོ། །ཞེས་པའི་ཁོངས་སུ་གཏོགས་པས་ལྷག་མ་སུམ་ཅུ་རྩ་དགུ་ལ་བཞེད་པར་མངོན་ཏེ། གནད་ཀྱི་ཟླ་ཟེར་གྱི་བགྲང་ལུགས་ཀྱི་འགྲོས་ལས་ཤེས་སོ། །ཡང་ན་རིན་ཆེན་འབར་བ་གཅིག་ཏུ་བགྲངས་ནས་ཆོས་སྐོར་དང་པོ་ལ་བཅོ་ལྔ། གཉིས་པ་ལ་སྐབས་ཀྱི་འགྲེལ་ཆུང་བརྒྱད་དང་བཅས་པས་བཅོ་ལྔ། གསུམ་པ་ལ་བཅུ་གཉིས་ཏེ་བཞི་བཅུ་ཞེ་གཉིས་ལས་འདོར་ལེན་སྔ་མ་བཞིན་དུ་བྱེད་པ་གང་རུང་ལས་མ་འདས་སོ། །གཉིས་པ་མན་ངག་ལ་བརྟེན་པ་ལ་རྣལ་འབྱོར་དབང་ཕྱུག་ནས་རྗེ་ས་སྐྱ་པ་ཆེན་པོའི་བར་སྙན་བརྒྱུད་འབའ་ཞིག་ཏུ་བཞུགས་པ། རྗེ་བཙུན་གོང་མ་རྣམས་ཀྱིས་ཕྱི་རབས་སྙན་བརྒྱུད་འཛིན་པར་མི་ནུས་པས་ཉམས་ཀྱི་དོགས་ནས་ཡིག་ཆར་བཏབ་པའི་རྐང་གྲངས་ལ་རྒྱུད་འཆད་པའི་གནས་སྐབས་ཀྱི་ཆོས་སྣའི་གྲངས་དང་། གསུང་ངག་ཉམས་སུ་ལེན་པའི་གནས་སྐབས་ཀྱི་ཆོས་སྣའི་གྲངས་གཉིས་ལས། དང་པོ་ནི། རྗེ་བཙུན་གྱི་དག་ལྡན་ལས་ཚོ་བཞིར་གསུངས་ཏེ། རྒྱུད་སྤྱི་ལ་དགོས་པའི་སྡོམ། རྒྱུད་སོ་སོ་ལ་དགོས་པའི་སྡོམ། རྡོ་རྗེ་ཐེག་པ་སྤྱི་དང་བྱེ་བྲག་རྒྱུད་འདིའི་རྣལ་འབྱོར་པ་ལ་དགོས་པའི་སྡོམ། སྦས་པའི་རྣལ་འབྱོར་པ་ལ་དགོས་པའི་སྡོམ་མོ། །དང་པོ་ནི། རྒྱུད་སྡེའི་དུམ་བུ་རྣམ་གཞག་མངོན་རྟོགས་དང་། སྟོང་ཐུན་གཉིས་ཀྱི་དོན་བསྡུས་བསྟོད་པ་གཉིས། །བདག་མེད་བསྟོད་པའི་རྣམ་འགྲེལ་དང་བཅས་པ། །ཀུན་ཏུ་དགོས་པའི་གཞུང་བདུན་འཐོར་མི་བྱ། །ཞེས་ཏེ་དང་པོ་ནི། ཚུལ་བཞི་རྩ་རྒྱུད་ཀྱི་དུམ་བུ་རྣམས་གོ་རིམ་དུ་བསྒྲིག་པ་ས་ཆེན་གྱི་མཛད་པའོ། །གཉིས་པ་ནི། ཚུལ་དང་པོ་གསུམ་གྱི་རྣམ་གཞག་རྒྱས་པ་རྩེ་མོས་མཛད་པའོ། །གསུམ་པ་ནི། ཚུལ་བཞི་པའི་རྣམ་གཞག་རྒྱས་པ་རྗེ་བཙུན་གྱིས་མཛད་པའོ། །བཞི་པ་ནི། དེ་གཉིས་ཀའི་བསྡུས་དོན་རྗེ་བཙུན་གྱིས་མཛད་པའོ། །ལྔ་པ་དང་དྲུག་པ་ནི། རྗེ་བཙུན་གྱིས་མཛད་པའི་ཡབ་ཀྱི་བསྟོད་པ་དཎྜ་ཀ་དང་། ཡུམ་གྱི་བསྟོད་པ་རིན་པོ་ཆེའི་ཕྲེང་བ་གཉིས་སོ། །ཁ་ཅིག་ཡུམ་གྱི་བསྟོད་པ་ཉིད་ལ། ས་དང་ལྷའི་རིམ་པ་ལྟར་བསྟོད་པ་དང་། འཕོ་བའི་རིམ་པ་ལྟར་བསྟོད་པ་གཉིས་ཡོད་པ་ལ་འདོད་པ་ནི་མི་འཐད་དེ། དེ་ལྟར་ན་དེ་གཉིས་ཀའི་དོན་བསྡུས་ཏེ་བསྟོད་པ་གཅིག་ཀྱང་ཡོད་པས་གསུམ་དུ་ཐལ་བའི་ཕྱིར་དང་། བསྟོད་པ་གཉིས་ཞེས་སྤྱིར་བསྟན་ནས་བདག་མེད་བསྟོད་པའི་རྣམ་འགྲེལ་ཞེས་བྱེ་བྲག་ཏུ་བཀར་བ་ཡང་དོན་མེད་པའི་ཕྱིར་རོ། །བདུན་པ་ནི་ཡུམ་གྱི་བསྟོད་པའི་རྣམ་འགྲེལ་རྗེ་ས་པཎ་གྱིས་མཛད་པའོ། །གཉིས་པ་ནི། རྒྱུད་དོན་སོ་སོའི་རྣམ་འགྲེལ་བསྡུས་དོན་བཅས། །གང་ལ་གང་དགོས་དེ་དེ་བླང་བྱ་སྟེ། །དེ་ལྟར་བཅུ་གསུམ་ལེགས་པར་བརྟས་བྱས་ན། །རྣམ་པར་ཕྱེ་བས་རྒྱུད་གསུམ་ཤེས་པར་འགྱུར། །ཞེས་ཏེ། རྩ་རྒྱུད་ཀྱི་འགྲེལ་པ་དག་ལྡན་དང་། དེའི་བསྡུས་དོན་གཉིས། གུར་གྱི་འགྲེལ་པ་གུར་རྒྱན་དང་། དེའི་བསྡུས་དོན་གཉིས། སམྦུ་ཊའི་འགྲེལ་པ་གནད་ཀྱི་གསལ་བྱེད་དང་། དེའི་བསྡུས་དོན་གཉིས་ཏེ་དྲུག་ལས། རྒྱུད་གཅིག་ཤེས་པར་འདོད་ན་གཉིས་དང་། གཉིས་ཤེས་པར་འདོད་ན་བཞི་དང་། གསུམ་ཆར་ཤེས་པར་འདོད་ན་དྲུག་ཆར་བླང་ཞེས་པའོ། །གསུམ་པ་ནི། སྨིན་བྱེད་ལྟུང་བའི་རྣམ་གཞག་སྒྲུབ་ཐབས་བཞི། །རབ་གནས་སྦྱིན་སྲེག་ཚོགས་ཀྱི་ཆོ་གར་བཅས། །རྡོ་རྗེ་དྲིལ་བུ་བགྲང་ཕྲེང་དགང་བླུགས་དང་། །ཐ་མའི་ཆོ་ག་མཆོད་རྟེན་སྒྲུབ་པ་སྟེ། །དེ་ལྟར་བཅུ་བཞི་དང་པོའི་ལས་ཅན་ནས། །བརྩམས་ཏེ་གང་ཟག་ཀུན་གྱིས་གཟུང་བར་བྱ། །ཞེས་ཏེ། སྨིན་བྱེད་ནི་དབང་གི་ཆུ་བོ། ལྟུང་བའི་རྣམ་གཞག་ནི་འཁྲུལ་སྤོང་ངོ་། །སྒྲུབ་ཐབས་བཞི་ནི། ཡབ་ཀྱི་སྒྲུབ་ཐབས་ཡན་ལག་བཞི་དྲུག་གཉིས། ཡུམ་གྱི་སྒྲུབ་ཐབས་ཡན་ལག་བཞི་དྲུག་གཉིས་ཡིག་ཆ་སོ་སོར་མེད་ཀྱང་རྗེ་བཙུན་གྱིས་མཛད་པའི་སྒྲུབ་ཐབས་གཅིག་ཉིད་ལ་དེ་གཉིས་གསལ་བར་འབྱུང་བས་བཞིའོ། །རབ་གནས་ནི་བཟང་པོ་དྲུག་གོ །སྦྱིན་སྲེག་ནི་ལས་བཞིའི་སྦྱིན་སྲེག་གོ །ཚོགས་ཀྱི་ཆོ་ག་ནི་ཚིམ་པ་དྲུག་པའོ། །རྡོ་རྗེ་དྲིལ་བུ་དང་བགྲང་ཕྲེང་གི་ཡིག་ཆ་ལོགས་ན་མེད་ཀྱང་། སམྦུ་ཊའི་འགྲེལ་པར་གསལ་བར་ཐོན་པའོ། །དགང་བླུགས་ཀྱི་ཡིག་ཆའང་ལོགས་ན་མེད་ཀྱང་ལས་བཞིའི་སྦྱིན་སྲེག་གི་ནང་དུ་མདོར་བསྡུས་པ་འབྱུང་ངོ་། །ཐ་མའི་ཆོ་ག་ནི་གཞན་ཕན་བདུད་རྩིའོ། །མཆོད་རྟེན་སྒྲུབ་པའི་ཡིག་ཆ་ལོགས་ན་མེད་ཀྱང་གུར་རྒྱན་དུ་ཅུང་ཟད་འབྱུང་ངོ་། །བཞི་པ་ནི། ལུས་རྒྱན་བཏུང་བའི་སྣོད་དང་གཟུང་བྱའི་རྫས། །རོལ་མོའི་ཆོ་ག་སྟན་དང་བགོ་བའི་གོས། །འདི་དག་ཧེ་རུ་ཀ་དཔལ་ཆས་དྲུག་སྟེ། །རྣམ་པར་ཕྱེ་ན་བཅུ་བཞིར་འགྱུར་པ་ཡིན། །ཞེས་ཏེ། བཅུ་བཞིར་འགྱུར་ཚུལ་ནི་ལུས་རྒྱན་ལ་རུས་པའི་རྒྱན་དྲུག་དང་། ཞག་གི་ཟོ་རིས་དང་། ཐལ་ཆེན་གྱི་ཚོམ་བུ་དང་། ཁྲག་གི་ཐིག་ལེ་སྟེ་བཞི། བཏུང་བའི་སྣོད་ནི་ཐོད་པ་སྟེ་གཅིག གཟུང་བའི་རྫས་ལ་ཁ་ཊྭཱཾ་ག་དང་། གྲི་གུག་གཉིས་དང་། རོལ་མོའི་ཆོ་ག་ལ་ཌཱ་མ་རུ་དང་། གསང་བའི་རྔེའུ་ཆུང་དང་། དུང་ཆེན་གྱི་གླིང་བུ་སྟེ་གསུམ། སྟན་ལ་མི་རོའི་སྟན་དང་། སྟག་ལྤགས་ཀྱི་སྟན་གཉིས། གོས་ལ་མི་ལྤགས་ཀྱི་གཡང་གཞི་དང་། སྟག་ལྤགས་ཀྱི་ཤམ་ཐབས་གཉིས་སུ་ཕྱེ་བའོ། །གཉིས་པ་གསུང་ངག་ཉམས་སུ་ལེན་པའི་ཆོས་སྣའི་རྐང་གྲངས་ནི། རྗེ་བཙུན་ཆེན་པོས་གླེགས་བམ་དཀར་ཆག་ཏུ་བཏབ་པའི་ཆོས་སྣ་དྲུག་ཅུ་པོ་རྣམས་ཏེ་འདིར་མ་སྤྲོས་སོ། །དབང་ཆུ་ཆེན་མོ་སོགས་བདུན་ནི་གཉིས་ཆར་ལ་ཐུན་མོང་དུ་དགོས་པས་དག་ལྡན་དང་། གླེགས་བམ་གྱི་དཀར་ཆག་གཉིས་ཆར་དུ་བགྲངས་པ་ཡིན་ནོ། །ལུགས་འདི་ལ་རིང་བརྒྱུད་ནི་བིརྺ་པ། ནག་པོ་པ། ཌཱ་མ་རུ་པ། ཨ་ཝ་དྷཱུ་ཏི་པ། ག་ཡ་དྷ་ར། འབྲོག་མི། སེ་སྟོན། ཞང་དགོན་པ་བ། དེས་ས་ཆེན་ལ་གདམས་པའོ། །ཉེ་བརྒྱུད་ནི། བླ་མེད་ཕྱོགས་ནི་རིས་བསྒྱུར་མིག་བཅས་པ། །རིག་བྱེད་ཀྱིས་གསལ་ལག་པས་མེ་ལ་བགོ །དེ་འོད་ཀུན་གསལ་ཆུ་གཏེར་འབྱུང་བར་བབ། །བློ་ལྡན་དོན་འདི་ཤེས་ན་སྨྲ་བར་གྱིས། །ཞེས་པ་ལྟར་ཤེས་པར་བྱའོ། །དེ་ལྟར་བཀའ་སྲོལ་བཞིའི་ནང་ནས་མན་ངག་ལུགས་ཀྱི་བསྐྱེད་པའི་རིམ་པ་འདིར་བཤད་པར་བྱ་བ་ཡིན་ནོ། །གཉིས་པ་དཀྱིལ་འཁོར་གྲངས་ཀྱི་བསྒྲུབ་བྱ་ངོས་གཟུང་བ་ནི། འོ་ན་བཀའ་སྲོལ་དེ་ལ་རྒྱུད་གསུམ་ནས་གསུངས་པའི་བསྒྲུབ་བྱ་དཀྱིལ་འཁོར་གྱི་གྲངས་དུ་ཞིག་ཡོད་ཅེ་ན། འདི་ལ་མཆོག་སྒྲུབ་པའི་དཀྱིལ་འཁོར་དང་། ལས་རྒྱས་པའི་ལྷའི་གྲངས་གཉིས་ལས་དང་པོ་ནི། རྩ་བའི་རྒྱུད་ལ་ཧེ་རུ་ཀ་བཞི། བདག་མེད་མ་དང་ལྔ། རྒྱུ་རྡོ་རྗེ་འཛིན་པ་དང་དྲུག་འབྱུང་ངོ་། །རྡོ་རྗེ་གུར་ལས། རིགས་བསྡུས་པ་དང་། རིགས་རྐྱང་གཉིས། དང་པོ་ལ་རྒྱས་པ་ལྷ་བཞི་བཅུ་ཞེ་ལྔ་མ་དང་། བསྡུས་པ་ལྷ་ཉེར་ལྔ་མ་གཉིས་འབྱུང་སྟེ། ལེའུ་ལྔ་པར། དཀྱིལ་འཁོར་རེ་རེ་བསྒོམ་པའམ། །ཡང་ན་བསྡུས་པའི་དཀྱིལ་འཁོར་རོ། །བརྒྱད་བརྒྱད་དབུས་སུ་གནས་པའམ། །ཡང་ན་ཉི་ཤུ་རྩ་ལྔའི་བར། །གང་ཚེ་དཀྱིལ་འཁོར་བསྡུས་པ་ཡི། །སྒོར་ནི་ལྕགས་ཀྱུ་ཞགས་པ་དང་། །ལྕགས་སྒྲོག་དེ་བཞིན་དྲིལ་བུ་ནི། །འཇུག་པའི་སྒོ་སྲུང་དགོད་པར་བྱ། །ཞེས་གསུངས་པའི་ཕྱིར་རོ། །རིགས་བསྡུས་གཉིས་ལ། སྒོ་བ་བཞི་བཀོད་པའི་ཚེ་ལྷ་ཞེ་དགུ་མ་དང་ཉེར་དགུ་མར་འགྱུར་རོ། །རིགས་བསྡུས་འདི་གཉིས་ཀྱང་གཙོ་བོ་གོ་འཕོ་བའི་གནད་ཀྱིས་དཀྱིལ་འཁོར་ལྔ་ལྔར་འགྱུར་ཏེ། གུར་ལས། སངས་རྒྱས་མགོན་པོ་གང་ཉིད་ཀྱི། །དཀྱིལ་འཁོར་དབུས་སུ་གང་གྱུར་པ། །དེ་ཉིད་ཀྱིས་ནི་དཀྱིལ་འཁོར་བརྗོད། །སྙིང་པོ་ཡོངས་གཟུང་དཀྱིལ་འཁོར་རོ། །ཞེས་སོ། །དེས་ན་རྒྱུད་འདིར་དངོས་སུ་རིགས་རྐྱང་གི་དཀྱིལ་འཁོར་ལྷ་དགུ་མ་ལྔ། རིགས་བསྡུས་ཀྱི་དཀྱིལ་འཁོར་རྒྱས་པ་ལྔ་བསྡུས་པ་ལྔ་སྟེ་བཅོ་ལྔ། བདག་མེད་མ་བཅུ་གསུམ་མ་དང་། བཅོ་ལྔ་མ་གཉིས་ཏེ་བཅུ་བདུན་གསུངས་ལ། ཧེ་རུ་ཀ་གསུམ་ལ་རྒྱུད་འདི་ན་དཔའ་བོ་གཅིག་པ་ལས་དཀྱིལ་འཁོར་མ་གསུངས་ཀྱང་རྩ་རྒྱུད་ཀྱི་འཁོར་ཁ་བསྐང་ནས་དཀྱིལ་འཁོར་གསུམ་བྱ་སྟེ། དེ་ལྟར་ན་དཀྱིལ་འཁོར་ཉི་ཤུ་འབྱུང་ངོ་། །དེ་ལ་བླ་མའི་མན་ངག་གིས་དཀྱིལ་འཁོར་དྲུག་ཅུ་རྩ་གཉིས་སུ་དབྱེ་སྟེ། མི་བསྐྱོད་པ་ལ་ཧེ་རུ་ཀ་བཞི་ཡོད་པ་བཞིན་རིགས་གཞན་ལ་ཡང་བཞི་བཞི་ཡོད་པས་རིགས་རྐྱང་གི་དཀྱིལ་འཁོར་ཉི་ཤུ། རིགས་བསྡུས་རྒྱས་པ་ཉི་ཤུ། བསྡུས་པ་ཉི་ཤུ། བདག་མེད་མའི་གཉིས་ཏེ་དྲུག་ཅུ་རྩ་གཉིས་སུ་བཞེད་པར་མངོན་རྟོགས་ལྗོན་ཤིང་ལས་བཤད་ལ། དེའི་སྟེང་དུ་གུར་རྒྱན་ལས། ཡང་འདིར་རིགས་བསྡུས་པ་ལས། བརྒྱད་དང་བཞིའི་དབུས་ན་བཞུགས་པ་ཡོད་པ་བཞིན་དུ་རིགས་རྐྱང་པ་ལའང་བཞིའི་དབུས་ན་བཞུགས་པ་དང་། བརྒྱད་ཀྱི་དབུས་ན་བཞུགས་པ་ཡོད་དོ། །ཞེས་སྦྱར་ན་བརྒྱད་ཀྱི་དབུས་ན་བཞུགས་པ་ཉི་ཤུ་ཐམ་པ་ཡོད་པས་ན། བཞིའི་དབུས་ན་བཞུགས་པའང་ཉི་ཤུ་ཐམ་པ་འབྱུང་བས། དཀྱིལ་འཁོར་བརྒྱད་ཅུ་རྩ་གཉིས་འབྱུང་བ་ཡིན་ནོ་ཞེས་བརྗོད་ཀྱང་འགལ་བ་མེད་དོ་ཞེས་བཤད་པས། རིགས་རྐྱང་བསྡུས་པའི་ལྷ་སྔ་མ་ལྔ་ལ་ཧེ་རུ་ཀ་བཞིས་ཕྱེ་བས་ཉི་ཤུ་འབྱུང་ལ། དེ་ལྟར་ན་གུར་ལས་བརྒྱད་ཅུ་རྩ་གཉིས་བཤད་དོ། །སམྦུ་ཊ་ལས་ཧེ་རུ་ཀ་བཞི། བདག་མེད་མ། ཡེ་ཤེས་མཁའ་འགྲོ་མ། བསྡུས་པའི་དཀྱིལ་འཁོར་རྡོ་རྗེ་དབྱིངས། དྲག་པོ་གདན་ཅན་ཏེ་དངོས་སུ་དཀྱིལ་འཁོར་བརྒྱད་འབྱུང་ལ། བརྟག་པ་བདུན་པ་དངོས་ལས། གང་གིས་གང་ཡང་ལྷའི་འཁོར་ལོའི་དབུས་སུ་བཅུག་པ་དེའི་མཚན་དུ་བརྟན་པར་གྱུར་བའི་རྡོ་རྗེའི་དཀྱིལ་འཁོར་ནི་མཁས་པས་བསྔགས་སོ། །ཞེས་གསུངས་པས་རྡོར་དབྱིངས་ཀྱི་དཀྱིལ་འཁོར་ལ་གཙོ་བོ་འཕོ་བའི་དབྱེ་བས་དཀྱིལ་འཁོར་ལྔར་འགྱུར་ཏེ། དེ་ལྟར་ན་མཆོག་སྒྲུབ་པའི་དཀྱིལ་འཁོར་བཅུ་གཉིས་སོ། །འོ་ན་གཙོ་བོ་དུ་མ་འཕོ་བས་དཀྱིལ་འཁོར་དེ་བས་མང་པར་འགྱུར་རོ་སྙམ་ན། རིགས་ལྔ་ཁོ་ན་གོ་འཕོ་བ་ཡིན་གྱི། ཡུམ་བཞི་མན་ཆད་ཀྱི་དཀྱིལ་འཁོར་ལ་བཀོད་པའི་ལྷ་རྣམས་གཙོ་བོར་གྱུར་པའི་མཆོག་སྒྲུབ་པའི་དཀྱིལ་འཁོར་མེད་དེ། དེ་ལས་རྒྱས་པའི་ལྷ་ཡིན་པའི་ཕྱིར་རོ། །དེ་ཡང་བརྟག་པ་བདུན་པ་དངོས་ལས། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་ལ་འཁོར་ལོའི་བདག་པོ་རྒྱལ་མོ་རྣམ་པར་སྒོམ་པར་བྱེད་དོ་ཞེས་སོ། །འདི་ཡང་ཡུམ་བཞི་ལས་རྒྱས་པའི་ལྷ་ཡིན་པས། གཙོ་བོར་གྱུར་པའི་དཀྱིལ་འཁོར་མེད་ཅེས་པའི་དོན་མ་ཡིན་ཏེ། དེ་ལྟར་ན་རིགས་བཞི་ལ་ཡང་མཚུངས་པའི་ཕྱིར་དང་། བཤད་མ་ཐག་པའི་ལུང་ཉིད་ལས་ཀྱང་གཙོ་བོར་གྱུར་པའི་དཀྱིལ་འཁོར་བསྒོམ་པར་གསུངས་པའི་ཕྱིར། དེས་ན་རིགས་བཞི་གཙོ་བོར་གྱུར་པའི་དཀྱིལ་འཁོར་ནི་མཆོག་སྒྲུབ་པ་ཡིན་ལ། ཡུམ་བཞི་གཙོ་བོར་གྱུར་པའི་དཀྱིལ་འཁོར་ནི་ལས་རྒྱས་པ་ཡིན་ཞེས་པའི་དོན་ཏེ། ལུང་ཉིད་ན་གསལ་ལོ། །འོ་ན་སམྦུ་ཊའི་བདག་མེད་མའི་སྐབས་ཀྱི་རྒྱུ་རྡོ་རྗེ་འཆང་མི་བགྲང་ངམ་སྙམ་ན། དེ་ནི་རྡོ་རྗེའི་དབྱིངས་ཀྱི་ཁོངས་སུ་འདུས་པས་མི་བགྲང་ངོ་སྙམ་མོ་ཞེས་མངོན་རྟོགས་ལྗོན་ཤིང་དུ་བཤད་ལ། འདིའི་དོན་ཨཱ་ལི་ཀཱ་ལི་མཉམ་སྦྱོར་བ། །ཞེས་སོགས་ཀྱི་ཚིགས་བཅད་གཉིས་རྒྱུད་གཉིས་ཆར་ལས་བདག་མེད་མའི་སྐབས་སུ་འབྱུང་བ་ཁྱད་པར་མེད་བཞིན་དུ། རྩ་རྒྱུད་ལས་དཀྱིལ་འཁོར་ལོགས་སུ་བགྲངས་ནས་སཾ་ཊར་དཀྱིལ་འཁོར་ལོགས་སུ་མི་བགྲང་བའི་རྒྱུ་མཚན་ནི། རྩ་རྒྱུད་དུ་ཧེ་རུ་ཀ་བཞི་ལས་ལོགས་སུ་རྒྱུད་གསུང་བ་པོ་རང་ཉིད་ཀྱི་དཀྱིལ་འཁོར་དགོས་པས་བགྲངས་ལ། སཾ་ཊར་ཧེ་རུ་ཀ་བཞི་ལས་ལོགས་སུ་རྒྱུད་གསུང་བ་པོ། སྟོན་པ་རང་ཉིད་ཀྱི་དཀྱིལ་འཁོར་དགོས་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་པས་འདི་ལོགས་སུ་མི་བགྲང་ཞེས་པའི་དོན་ཏོ། །དེ་ལྟར་ན་རྩ་རྒྱུད་དང་བཤད་རྒྱུད་རྡོ་རྗེ་གུར་གཉིས་རྒྱུད་གསུང་བ་པོ་སྟོན་པ་གཅིག་ཉིད་ཡིན་པས་དེའི་དཀྱིལ་འཁོར་རྩ་རྒྱུད་དུ་བཤད་ཅིང་གུར་ལས་མ་བཤད། སཾ་ཊར། རྒྱུད་གསུང་བ་པོའི་སྟོན་པ་ལོགས་སུ་ཡོད་པས་དེའི་དཀྱིལ་འཁོར་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་པས་བདག་མེད་མའི་སྐབས་སུ་དཀྱིལ་འཁོར་ལོགས་སུ་མི་མཛད་པའི་གནད་ཀྱང་འདི་ཉིད་ཡིན་ནོ། །འོ་ན་སཾ་ཊའི་བདག་མེད་མའི་སྐབས་ཀྱི་ཚིགས་སུ་བཅད་པ་གཉིས་ཀྱིས་ཅི་ཞིག་བྱ་སྙམ་ན་ལྷ་བཅུ་བདུན་མའི་རྒྱུ་རྡོ་རྗེ་འཆང་འབའ་ཞིག་བསྟན་པས་ཞལ་བརྒྱད་ཕྱག་བཅུ་དྲུག་པར་བྱ་བ་ཡིན་གྱི། ཞལ་གསུམ་ཕྱག་དྲུག་པར་བྱེད་ན། ཕྱག་མཚན་ཞལ་སོགས་གོང་མ་བཞིན། ཞེས་པའི་དོན་ལ་སྙོགས་པ་མེད་པའི་སྐྱོན་ཡོད་དོ། །རྡོ་རྗེ་སེམས་དཔའ་ཉིད་གྱུར་ནས། །རྡོ་རྗེ་ཅན་གྱིས་རྡོ་རྗེ་དབབ། །ཅེས་པ་ལ་སྙེག་ཅེས་པ་ནི་དེར་ཕྱག་མཚན་ཞལ་སོགས་མ་བཤད་པས་སྙེག་མི་སྙེག་ཁྱད་པར་མེད་དོ། །དེ་ལྟར་ན་རྩ་རྒྱུད་ལས་དཀྱིལ་འཁོར་དྲུག རྡོ་རྗེ་གུར་ལས་བརྒྱད་ཅུ་རྩ་གཉིས། སམྦུ་ཊ་ལས། བཅུ་གཉིས་ཏེ་ཐམས་ཅད་དྲིལ་བས་རྒྱུད་གསུམ་ནས་གསུངས་པའི་མཆོག་སྒྲུབ་པའི་དཀྱིལ་འཁོར་བརྒྱ་ཐམ་པ་འབྱུང་བ་འདི་ནི། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པ་ཡིན་ནོ། །འདིར་ཁ་ཅིག རྩ་རྒྱུད་ཀྱི་དཀྱིལ་འཁོར་དྲུག་པོ་ལོགས་སུ་མི་བགྲང་སྟེ། ཧེ་རུ་ཀ་བཞི་བདག་མེད་མ་དང་ལྔ་ནི་གུར་ནས་གསུངས་པའི་ལྔ་པོའི་ཁོངས་སུ་འདུ་ལ། རྒྱུ་རྡོ་རྗེ་འཆང་ནི་རྡོ་རྗེ་དབྱིངས་གྱི་ཁོངས་སུ་འདུ་བས་མི་བགྲང་ཞེས་རྗེ་བཙུན་གསུང་ཞེས་པ་དང་། སམྦུ་ཊའི་ཧེ་རུ་ཀ་ལྔ་ལ་ཡང་རིགས་ལྔ་ལྔར་ཕྱེ་བས། དཀྱིལ་འཁོར་ཉི་ཤུ་རྩ་ལྔ་རྡོ་རྗེ་དབྱིངས་ཀྱི་དཀྱིལ་འཁོར་ལྔ་དང་སུམ་ཅུ། གུར་ནས་གསུངས་པའི་དཀྱིལ་འཁོར་བརྒྱད་ཅུ་དང་བཅས་པས་བརྒྱ་དང་བཅུ་པོ་ནི། ཀྱེ་རྡོ་རྗེའི་དཀྱིལ་འཁོར་ཡིན་པས་དེའི་སྟེང་དུ་བདག་མེད་མའི་དཀྱིལ་འཁོར་གཉིས་ཏེ། རྒྱུད་གསུམ་ནས་གསུངས་པའི་དཀྱིལ་འཁོར་བརྒྱ་དང་བཅུ་གཉིས་སུ་གྲངས་ངེས་པ་ཡིན་ནོ་ཞེས་བཞེད་དོ། །འདི་མི་འཐད་དེ། རྩ་རྒྱུད་ཀྱི་ཧེ་རུ་ཀ་གསུམ་ཡང་གུར་ནས་གསུངས་པའི་ཧེ་རུ་ཀ་གསུམ་དང་མི་འདྲ་སྟེ། རྩ་རྒྱུད་ལས་མངོན་པར་རྟོགས་པ་རྒྱས་པའི་སྐབས་སུ་ཡང་གཞལ་ཡས་ཁང་མེད་པར། སྲུང་འཁོར་དུར་ཁྲོད་དང་བཅས་པའི་དབུས་སུ་པདྨ་འདབ་བརྒྱད་ཀྱི་ལྟེ་བར་རྒྱུ་རྡོ་རྗེ་འཆང་དང་། ཞུ་བ་གླུས་བསྐུལ་སོགས་མེད་པར་མངོན་བྱང་ལྔ་ལས་གཙོ་བོ་བསྐྱེད་ནས་འཁོར་གྱི་ལྷ་མོའི་ཐུགས་ཀ་ན་སྤྲོ་བ་ཡིན་ལ། གུར་གྱི་ཧེ་རུ་ཀ་གསུམ་གྱི་སྐབས་སུ་གཞལ་ཡས་ཁང་དང་། རྒྱུ་རྡོ་རྗེ་འཆང་དང་། ཞུ་བ་གླུས་བསྐུལ་སོགས་ཡན་ལག་དྲུག་པ་ཇི་ལྟ་བ་བཞིན་མཛད་པའི་ཕྱིར་དང་། འཁོར་གྱི་ལྷ་མོ་ཡང་རྩ་རྒྱུད་དུ་མཆོད་པའི་ལྷ་མོ་བརྒྱད་ཡིན་ལ། གུར་དུ་སྙིང་པོ་ཀྱེ་རྡོ་རྗེ་རིགས་ལྔའི་འཁོར་གྱི་ལྷ་མོ་རྣམས་ཁ་བསྐང་དགོས་པའི་ཕྱིར་ཏེ། གཞན་དུ་ན་ཧེ་རུ་ཀ་གསུམ་ལ་རིགས་ལྔར་ཕྱེ་བའི་དཀྱིལ་འཁོར་དུ་བྱེད་པའི་ཚེ་འཁོར་གྱི་ལྷ་མོ་ཐམས་ཅད་ཁྱད་པར་མེད་པར་འགྱུར་བའི་སྐྱོན་ཡོད་པའི་ཕྱིར། རྩ་རྒྱུད་ཀྱི་ཧེ་རུ་ཀ་བཞི་པ་དང་གུར་གྱི་ཧེ་རུ་ཀ་བཞི་པའི་དཀྱིལ་འཁོར་ཡང་གཏན་མི་འདྲ་སྟེ། གཙོ་བོའི་ཞལ་ཕྱག་ཕལ་ཆེར་འདྲ་ཡང་སྤྱི་བོའི་མཚོན་བྱེད་མི་འདྲ་བ་དང་། འཁོར་གྱི་ལྷ་མོ་ནི་གཽ་རཱི་སོགས་ཀྱི་མིང་ཙམ་འདྲ་ཡང་སྐུ་མདོག་ཕྱག་མཚན་གཏན་མི་འདྲ་བའི་ཕྱིར་རོ། །རྗེ་བཙུན་གྱིས་རྩ་རྒྱུད་ཀྱི་རྒྱུ་རྡོ་རྗེ་འཆང་རྡོ་རྗེ་དབྱིངས་ཀྱི་ཁོངས་སུ་འདུས་པས་ལོགས་སུ་མི་བགྲང་བར་གསུངས་ཞེས་པ་ནི། མངོན་སུམ་ལ་སྨྱོན་འདིངས་པ་སྟེ། ལྗོན་ཤིང་དུ་རྩ་རྒྱུད་ཀྱི་རྒྱུ་རྡོ་རྗེ་འཆང་ལོགས་སུ་བགྲངས་ནས། སཾ་ཊའི་བདག་མེད་མའི་སྐབས་ཀྱི་རྒྱུ་རྡོ་རྗེ་འཆང་ལོགས་སུ་མི་བགྲང་བའི་དོགས་གཅོད་དུ་རྡོ་རྗེ་དབྱིངས་ཀྱི་ཁོངས་སུ་འདུས་པ་གསུངས་པའི་ཕྱིར་རོ། །སཾ་ཊའི་ཧེ་རུ་ཀ་ལྔ་ལ་རིགས་ལྔ་ལྔར་ཕྱེ་བའི་དཀྱིལ་འཁོར་ཉི་ཤུ་རྩ་ལྔར་བྱེད་ན་སྙིང་པོ་ཀྱེ་རྡོ་རྗེ་ལ་རིགས་ལྔར་ཕྱེ་བའི་ཚེ། ཕྱག་མཚན་དང་། འཁོར་གྱི་ལྷ་མོ་མི་འདྲ་བ་ཚན་པ་ལྔ་ཇི་ལྟར་ཐོན། དེ་མ་ཐོན་ན་ཧེ་རུ་ཀ་གཞན་རྣམས་ལ་དེའི་འགྲོས་ཇི་ལྟར་སྦྱར། ལེགས་པར་དཔྱད་ན་ངོས་གཟུང་ཡེ་མེད་དོ། །གུར་གྱི་ཧེ་རུ་ཀ་བཞི་ལ་རིགས་ལྔ་ལྔར་ཕྱེ་བའི་མཚུངས་པ་སྦྱར་བ་ཡིན་ན་ནི་སཾ་ཊའི་ཧེ་རུ་ཀ་ལྔ་ལ་རིགས་ལྔ་ལྔར་ཕྱེ་ནས་ཉི་ཤུ་རྩ་ལྔ་ལ་རིགས་བསྡུས་རྒྱས་བསྡུས་གཉིས། རིགས་རྐྱང་རྒྱས་བསྡུས་གཉིས་གཉིས་སུ་ཕྱེ་བས་དཀྱིལ་འཁོར་བརྒྱ་ཐམ་པ་བྱེད་པ་ཡང་ཅིའི་ཕྱིར་མི་མཚུངས་ལེགས་པར་སོམས། གཞན་ཡང་སཾ་ཊའི་ཡེ་ཤེས་མཁའ་འགྲོ་མ་ལྷ་བཅུ་གསུམ་གྱི་དཀྱིལ་འཁོར་རྒྱུད་དང་། རྗེ་བཙུན་རྩེ་མོས་མཆོག་སྒྲུབ་པའི་དཀྱིལ་འཁོར་དུ་དངོས་སུ་གསུངས་པ་དེའི་སྟོང་འདབ་དགོས་ཏེ། ཁྱེད་རང་གི་བརྒྱ་དང་བཅུ་གཉིས་པོ་དེའི་ནང་དུ་མི་འདུག་པའི་ཕྱིར་རོ། །དེས་ན་གུར་གྱི་སྙིང་པོ་ཀྱེ་རྡོ་རྗེ་ལ་རིགས་ལྔར་ཕྱེ་ནས་ཕྱག་མཚན་དང་འཁོར་གྱི་ལྷ་མོ་མི་འདྲ་བ་ཚན་པ་ལྔ་དངོས་སུ་གསུངས་པའི་འགྲོས། ཧེ་རུ་ཀ་གཞན་གསུམ་ལ་ཡང་སྦྱར་ནས་རིགས་རྐྱང་བསྡུས་ཀྱི་དཀྱིལ་འཁོར་བརྒྱད་ཅུ་ཐམ་པ་འབྱུང་བ་དང་། སཾ་ཊར་སྙིང་པོ་ཀྱེ་རྡོ་རྗེ་ལ་དེ་ལྟར་མ་གསུངས་པས་དེ་འདྲའི་དབྱེ་བ་མི་བྱེད་པ་འདི་ནི་རྗེ་བཙུན་ས་སྐྱ་པ་ཡབ་སྲས་ཀྱི་འཆད་ཚུལ་ཐུན་མོང་མ་ཡིན་པ་ཡིན་པས་བསྐལ་བ་དང་ལྡན་པ་དག་གིས་ཡིད་ཆེས་པའི་གནས་སུ་གྱིས་ཤིག གཉིས་པ་ལས་རྒྱས་པའི་དཀྱིལ་འཁོར་ནི་རྩ་བའི་རྒྱུད་ལས་ལྷ་མོ་བརྒྱད། གུར་ལས་ལྷའི་རྣལ་འབྱོར་ཉེར་བརྒྱད། སཾ་ཊའི་བརྟག་པ་གཉིས་པའི་བཞི་པ་ལས་ལྷའི་རྣལ་འབྱོར་བཅུ་གཅིག བརྟག་པ་བདུན་པར་བཅུ་བདུན། བརྒྱད་པར་ཕྲེང་བ་དང་འབྲེལ་པ་དང་། རྫོགས་རིམ་དང་འབྲེལ་བའི་ལྷའི་རྣལ་འབྱོར་གཉིས་ཏེ་རྒྱུད་གསུམ་ལས་གསུང་པའི་ལས་རྒྱས་པའི་ལྷའི་རྣལ་འབྱོར་དྲུག་ཅུ་རྩ་དྲུག་གསུངས་སོ། །གསུམ་པ་སྦྱོར་དངོས་རྒྱས་བསྡུས་སྒོ་ནས་སྒྲུབ་བྱེད་བཤད་པ་ནི། འོ་ན་ལྷའི་རྣལ་འབྱོར་དེ་དག་སྒྲུབ་པར་བྱེད་པའི་མངོན་པར་རྟོགས་པ་ཇི་ལྟར་ཞེ་ན། འདི་ལ་སྔོན་འགྲོ། དངོས་གཞི། རྗེས་རྫོགས་པར་བྱེད་པ་ལམ་གྱི་ཡན་ལག་དང་གསུམ་ལས། དང་པོ་ལ་ཡང་གསུམ་སྟེ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ལ་ཡང་རྒྱས་བསྡུས་དུ་མ་ཡོད་དེ། བསྡུས་པ་ཚད་མེད་བཞི་བསྒོམ་པ་དང་། དེ་ལས་རྒྱས་པ་ཚོགས་ཞིང་སྤྱན་དྲངས་ནས་མཆོད་པ་བསྣན་པ་དང་། དེ་ལས་རྒྱས་པ་ཡན་ལག་བདུན་པ་བསྣན་པ་དང་། དེ་ལས་རྒྱས་པ་རིགས་ལྔའི་སྡོམ་གཟུང་བསྣན་པ་དང་བཞིའོ། །དེ་ལྟར་ན་སྔོན་འགྲོ་རྒྱས་པ་ནི། བསོད་ནམས་ཚོགས་བསག་རྒྱས་པ་གཉིས་པོ་གང་རུང་དང་། ཡེ་ཤེས་ཚོགས་བསག་དང་། སྲུང་འཁོར་བསྒོམ་པ་གསུམ་ག་བྱ་བའོ། །འབྲིང་ནི་སྲུང་འཁོར་མི་བསྒོམ་པར་ཚོགས་གཉིས་བསག་པ་རྒྱས་པར་བྱ་བའོ། །བསྡུས་པ་ནི་བསོད་ནམས་ཚོགས་བསག་ཚད་མེད་བཞི་ཙམ་ལ་བསྡུས་ནས། ཡེ་ཤེས་ཚོགས་བསག་ལ་འཇུག་པའོ། །སྔོན་འགྲོ་བསྡུས་པ་འདི་ནི་ལས་རྒྱས་པ་ལས་མཆོག་བསྒྲུབ་པ་ལ་མི་འཇུག་གོ །ཞེས་རྗེ་བཙུན་རྩེ་མོས་གསུངས་ལ། རྗེ་བཙུན་གྱིས་ནི་བརྟག་པ་གཉིས་པའི་ལེའུ་གསུམ་པ་དཔང་པོར་བྱས་ན་མཆོག་བསྒྲུབ་པ་ལ་ཡང་འཇུག་པར་མངོན་ནོ། །ཞེས་གསུངས། དེའི་དོན་ལེའུ་གསུམ་པར་ཧེ་རུ་ཀ་གསུམ་ལ་བསྐྱེད་ཆོག་རྒྱས་འབྲིང་བསྡུས་གསུམ་གསུངས་པའི་དང་པོ་གཉིས་ལ། སྔོན་འགྲོ་བསྡུས་པ་འཇུག་ཀྱང་དེ་ནི་དཔའ་བོ་གཅིག་པ་བསྐྱེད་པ་ལས་རྒྱས་པའི་མངོན་རྟོགས་ཡིན་པ་ནི་རྩེ་མོའི་དགོངས་པ་ཡིན་ལ། སྤྱིར་ཧེ་རུ་ཀ་གསུམ་མཆོག་སྒྲུབ་པ་ཡིན་པས་དེ་ལ་སྔོན་འགྲོ་བསྡུས་པ་འཇུག་པ་རྗེ་བཙུན་གྱི་དགོངས་པའོ། །གཉིས་པ་ལ་གསུམ་སྟེ། བསྐྱེད་ཆོག་ཡོངས་སུ་རྫོགས་པ་རྒྱས་པ་དང་། འབྲིང་དང་། བསྡུས་པའོ། །དང་པོ་ལ་ཡང་གསུམ་སྟེ། ཏིང་ངེ་འཛིན་གསུམ་གྱིས་འཆིང་བ་དང་། ཡན་ལག་དྲུག་གིས་འཆིང་བ། བསྙེན་སྒྲུབ་ཡན་ལག་བཞིས་འཆིང་བའོ། །དང་པོ་ནི་སམྦུ་ཊ་དང་། རྡོ་རྗེ་རྩེ་མོའི་དགོངས་པ་སྟེ། རྡོ་རྗེ་རྩེ་མོ་ལས། དང་པོ་སྦྱོར་བའི་ཏིང་འཛིན་གྱིས། །རྣལ་འབྱོར་པས་ནི་སྙོམས་འཇུག་བྱ། །དེ་ནས་དཀྱིལ་འཁོར་རྒྱལ་པོ་མཆོག །དེ་ནས་ཡང་ནི་ལས་རྒྱལ་པོ། །ཞེས་གསུངས་པས། གཙོ་བོ་བསྐྱེད་པ་དང་པོ་སྦྱོར་བ། འཁོར་གྱི་ལྷ་མོ་སྤྲོ་བ། ཡེ་ཤེས་པ་གཞུག་པ། དབང་བསྐུར་རིགས་བདག་གི་རྒྱས་བཏབ་པ། མཆོད་བསྟོད་བདུད་རྩི་མྱང་བའི་བར་དཀྱིལ་འཁོར་རྒྱལ་མཆོག ཕྲ་ཐིག་ལ་སོགས་པ་ལ་སློབ་པ་ནི་ལས་རྒྱལ་མཆོག་གོ །གཉིས་པ་ནི། རྡོ་རྗེ་གུར་གྱི་དགོངས་པ་སྟེ། གུར་ལས། སངས་རྒྱས་གནས་ནི་རྫོགས་པ་དང་། །ཀུན་ཏུ་བཟང་པོའི་རང་བཞིན་དང་། །རང་གི་ལྷག་པའི་ལྷར་བསྒྲུབ་དང་། །མཆོད་བསྟོད་བདུད་རྩི་མྱང་ལ་སོགས། །རྣལ་འབྱོར་ཡན་ལག་དྲུག་ཏུ་འདོད། །ཅེས་གསུངས་ཏེ། སངས་རྒྱས་གནས་ནི་རྫོགས་པ་ནི། གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་སྟེ། ཆོས་འབྱུང་བསྐྱེད་པ་ནས་གདན་བསྐྱེད་པའི་བར་རོ། །ཀུན་ཏུ་བཟང་པོའི་རང་བཞིན་ནི། རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་སྟེ། རྒྱུ་རྡོ་རྗེ་འཆང་བསྐྱེད་པ་ནས། ཡེ་ཤེས་ཀྱི་འཁོར་ལོ་གཞུག་པའི་བར་རོ། །རང་གི་ལྷག་པའི་ལྷར་བསྒྲུབ་པ་ནི། དབང་བསྐུར་བ་མི་བསྐྱོད་པའི་ཡན་ལག་སྟེ། དབང་ལྷ་སྤྱན་དྲང་བ་ནས་རིགས་བདག་གིས་རྒྱས་གདབ་པའི་བར་རོ། །མཆོད་བསྟོད་བདུད་རྩི་མྱང་བ་གསུམ་ནི། དངོས་སུ་བསྟན་པ་དེ་ཉིད་དོ། །སོགས་ཀྱིས་རྗེས་རྫོགས་པར་བྱེད་པ་ལམ་གྱི་ཡན་ལག་བསྟན་ནོ། །གསུམ་པ་ནི། རྩ་རྒྱུད་བརྟག་གཉིས་དང་། གསང་བ་འདུས་པའི་དགོངས་པ་སྟེ། རྩ་རྒྱུད་ལས། དང་པོ་སྟོང་ཉིད་བྱང་ཆུབ་སེམས། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་པ་སྟེ། དང་པོ་སྟོང་ཉིད་ཅེས་པས་ཡེ་ཤེས་ཚོགས་བསག་བྱང་ཆུབ་སེམས་ཞེས་པས་དམ་ཚིག་པ་བསྐྱེད་པ་བསྙེན་པའི་ཡན་ལག གཉིས་པ་ལ་ནི་ས་བོན་བསྡུ། །ཞེས་པས་སྐྱེ་མཆེད་དང་སྐུ་གསུང་ཐུགས་བྱིན་གྱིས་རློབ་པའམ། སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་ཉེར་སྒྲུབ་ཀྱི་ཡན་ལག གསུམ་པ་ལ་ནི་གཟུགས་བརྙན་རྫོགས། །ཞེས་པས་ཡེ་ཤེས་པ་གཞུག་པ་སྒྲུབ་པའི་ཡན་ལག བཞི་པ་ལ་ནི་ཡིག་འབྲུ་དགོད་ཅེས་པས་དབང་བསྐུར་ནས། རིགས་ཀྱི་བདག་པོའི་རྒྱས་གདབ་པའམ། དབང་མ་བསྐུར་བར་དབུ་རྒྱན་རང་ཆས་ཅན་དུ་བསམ་པ་སྒྲུབ་པ་ཆེན་པོའི་ཡན་ལག་བསྟན་ནོ། །འདིས་བསྙེན་སྒྲུབ་ཡན་ལག་བཞི་བསྟན་པར་གང་ལས་ཤེས་ན། འདུས་པའི་རྒྱུད་ཕྱི་མ་ལས། ཐ་མལ་པ་ནི་རྡོ་རྗེ་བཞི། །ཡེ་ཤེས་རྡོ་རྗེ་མཆོག་རྣམས་སོ། །དང་པོ་སྟོང་ཉིད་བྱང་ཆུབ་སེམས། །ཞེས་སོགས་སྔར་དྲངས་པ་ལྟར་གསུངས་སོ། །དེས་རྡོ་རྗེ་རྣམ་བཞིར་བསྟན་གྱི་ཡན་ལག་བཞི་ཇི་ལྟར་བསྟན་སྙམ་ན། འདུས་པའི་རྩ་རྒྱུད་ལེའུ་བཅུ་གཉིས་པ་ལས། བསྙེན་པའི་དམ་ཚིག་རབ་སྦྱོར་བ། །བྱང་ཆུབ་མཆོག་ནི་བསྒོམ་པར་བྱ། །ཉེ་བར་སྒྲུབ་པ་སྒྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་དཔྱད། །སྔགས་ཀྱི་བདག་པོ་བསྒོམ་པ་ཡིས། །བསྒྲུབ་པའི་ཚེ་ན་བསྐུལ་བར་གསུངས། །སྒྲུབ་པ་ཆེན་པོ་བྱེད་པའི་ཚེ། །དབུ་རྒྱན་ལ་ནི་རིགས་བདག་བསམ། །རྡོ་རྗེ་རྣམ་བཞི་འདི་དག་གིས། །ཐ་མལ་བསྒྲུབ་པའི་བསྙེན་པ་བྱ། །ཞེས་རྡོ་རྗེ་རྣམ་བཞི་བསྙེན་སྒྲུབ་བཞིར་གསུངས་པས་ཤེས་སོ། །གསང་འདུས་རྩ་རྒྱུད་ཀྱི་ཚིགས་བཅད་གཉིས་པོ་འདིའི་དོན། འདུས་པ་འཕགས་ལུགས་པས་བསྙེན་སྒྲུབ་ཡན་ལག་བཞིར་སྦྱོར་ཚུལ་དང་། ཡེ་ཤེས་ཞབས་ལུགས་པས་སྦྱོར་ཚུལ་དང་། རྣལ་འབྱོར་དབང་ཕྱུག་གི་སྦྱོར་ཚུལ་དང་མི་འདྲ་བ་གསུམ་ལས། འདིར་ནི་ཕྱི་མ་དེ་ཉིད་དོ། །དངོས་གཞི་རྒྱས་པ་འདི་གསུམ་རྒྱུད་གསུམ་གྱི་དཀྱིལ་འཁོར་གང་ལ་སྦྱོར་ཞེ་ན། སམྦུ་ཊའི་རྡོ་རྗེ་དབྱིངས་ཀྱི་དཀྱིལ་འཁོར་ལྔ་ལ་ཏིང་ངེ་འཛིན་གསུམ་དང་། ཡན་ལག་བཞིས་འཆིང་། གུར་རིགས་བསྡུས་ཀྱི་དཀྱིལ་འཁོར་རྣམས་ལ་ཏིང་ངེ་འཛིན་གསུམ་དང་། ཡན་ལག་དྲུག་དང་། ཡན་ལག་བཞི་གསུམ་ཆར་གྱིས་འཆིང་། རིགས་རྐྱང་རྣམས་དང་། བདག་མེད་མ་གཉིས་དང་རྩ་རྒྱུད་ཀྱི་དྲུག་ནི་ཡན་ལག་དྲུག་དང་། ཡན་ལག་བཞིས་འཆིང་། སམྦུ་ཊའི་ལྷག་མ་རྣམས་དང་། ལས་རྒྱས་པའི་ལྷ་རྣམས་ནི་ཡན་ལག་བཞིས་འཆིང་ཞིང་། མཆོད་བསྟོད་བདུད་རྩི་མྱང་བ་གསུམ་པོ་སྦྱར་བ་ནི་ཡན་ལག་ཡིན་གྱི། དངོས་གཞིར་མི་བྱེད་དོ། །དེས་ན་དངོས་གཞི་རྒྱས་པ་འདིའི་སྐབས་སུ་རྣལ་འབྱོར་དབང་ཕྱུག་གི་དགོངས་པས་བསྙེན་སྒྲུབ་ཡན་ལག་བཞི་མ་ཚང་བ་ནི་མཆོག་ཐུན་མོང་སྒྲུབ་པ་གང་ལ་ཡང་མི་བཞེད་དེ། སྔར་གྱི་དེ་གསུམ་ཆར་ལ་ཡང་བསྙེན་སྒྲུབ་ཡན་ལག་བཞི་ཚང་བས་སོ། །ལྗོན་ཤིང་ལས་ཀྱང་ཚིག་འདི་སྐབས་འདིར་འབྱུང་ཞིང་མཇུག་ཏུ་རྒྱས་པའི་དབང་དུ་བྱས་པའོ། །ཞེས་གསུངས་ཏེ་འཁྲུལ་པ་མེད་དོ། །གཉིས་པ་འབྲིང་པོ་ནི་ཏིང་ངེ་འཛིན་གསུམ་དང་། ཡན་ལག་དྲུག་གིས་འཆིང་བ་ནི་མེད་ལ། སྔར་གྱི་ཡན་ལག་བཞིས་འཆིང་ན། མཆོད་བསྟོད་ལ་སོགས་པ་མེད་པར་བཟླས་པ་ལ་འཇུག་པ་ཉིད་དོ། །ཡན་ལག་དྲུག་པ་ལ་འབྲིང་པོར་བཤད་པ་ནི་བསྐྱེད་ཆོག་གི་དབང་དུ་བྱས་པ་ཡིན་ལ། འདིར་རྒྱས་པར་བཤད་པར་ནི་དངོས་གཞིའི་ཆིངས་རྒྱས་པའི་དབང་དུ་བྱས་པ་ཡིན་པས་མི་འགལ་ལོ། །གསུམ་པ་བསྡུས་པ་ལ་གཉིས་ལས། དང་པོ་ནི། དམ་ཚིག་པ་བསྐྱེད་པ་བསྙེན་པའི་ཡན་ལག སྐྱེ་མཆེད་བྱིན་གྱིས་མི་རློབ་པར་སྐུ་གསུང་ཐུགས་བྱིན་གྱིས་རློབ་པ་ཉེར་སྒྲུབ་ཀྱི་ཡན་ལག ཡེ་ཤེས་པ་གཞུག་པ་སྒྲུབ་པའི་ཡན་ལག དབང་མི་བསྐུར་བར་དབུ་རྒྱན་རང་ཆས་ཅན་དུ་བསམ་པ་སྒྲུབ་པ་ཆེན་པོའི་ཡན་ལག་གོ །བསྡུས་པ་གཉིས་པ་ནི་དམ་ཚིག་སེམས་དཔའ་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་བཟླས་པ་ལ་འཇུག་པ་ཉིད་དོ། །བསྡུས་པ་དང་པོ་འདི་ནི་རྗེ་ས་ཆེན་གྱིས་ཁྲོ་བཅུའི་མངོན་རྟོགས་དང་། རྗེ་བཙུན་གྱིས་དག་ལྡན་དུ་ཧེ་རུ་ཀ་གསུམ་གྱི་བསྐྱེད་ཆོག་དང་པོ་གཉིས་དང་། གུར་རྒྱན་དུ་འབྱུང་པོ་བརྒྱད་གསུམ་ཉི་ཤུ་རྩ་བཞི་དང་རྩ་ལྟུང་འཁྲུལ་སྤོང་དུ་དམ་ཚིག་རྡོ་རྗེའི་མངོན་རྟོགས་ལ་སྦྱར་བར་མཛད་དོ། །བསྡུས་པ་ཕྱི་མ་ནི་ལམ་འབྲས་ཀྱི་ཡིག་ཆར་རྡོ་རྗེ་སེམས་དཔའ་དང་། རྡོ་རྗེ་མཁའ་འགྲོའི་མངོན་རྟོགས་ལ་སྦྱར་བར་མཛད་དོ། །བསྡུས་པ་དང་པོ་འདི་ལ་རྗེ་བཙུན་རྩེ་མོས། འབྲིང་པོ་ལ་གཉིས་སུ་བྱས་པའི་ཕྱི་མར་མཛད་དེ། གནད་གཅིག་ཏུ་ཤེས་པར་བྱའོ། །དེ་ལྟ་བུའི་དངོས་གཞི་ལ་དམ་ཚིག་པ་བསྐྱེད་པའི་བསྐྱེད་ཆོག་ལ་ཚུལ་མི་འདྲ་བ་ལྔ་སྟེ། མངོན་བྱང་ལྔ་ལས་བསྐྱེད་པ་དང་། རྡོ་རྗེ་ཆོ་ག་ཡན་ལག་གསུམ་མམ་བཞི་ལས་བསྐྱེད་པ་དང་། སྙིང་པོ་ཚིག་ཙམ་ལས་བསྐྱེད་པ་དང་། དབུགས་ཀྱི་སྤྲོ་བསྡུ་ལས་བསྐྱེད་པ་དང་། འབྱིན་པའི་ཚུལ་གྱིས་བསྐྱེད་པའོ། །དང་པོ་ལ་མཉམ་སྦྱོར་དང་། མི་མཉམ་སྦྱོར་གཉིས་ལས། དང་པོས་ནི་བསྡུས་པའི་དཀྱིལ་འཁོར་གྱི་གཙོ་བོ་དང་། རྒྱུའི་རྡོ་རྗེ་འཆང་དང་། རིགས་བསྡུས་ཀྱི་གཙོ་བོ་རྣམས་བསྐྱེད་དོ། །གཉིས་པས་ནི་རིགས་སོ་སོར་བ་རྣམས་དང་། བདག་མེད་མ་བསྐྱེད་དོ། །ཧེ་རུ་ཀ་གསུམ་ལ་ནི་མི་མཉམ་སྦྱོར་དང་། རྡོ་རྗེ་ཆོ་ག་གསུམ་དང་། སྙིང་པོ་ཚིག་ཙམ་ལས་བསྐྱེད་པ་གསུམ་ཀ་འཇུག་གོ །དྲག་པོའི་གདན་ཅན་ནི་སྙིང་པོ་ཚིག་ཙམ་དང་ཡེ་ཤེས་མཁའ་འགྲོ་མ་ནི་དབུགས་ཀྱི་སྤྲོ་བསྡུ་ལས་བསྐྱེད་དོ། །འབྱིན་པའི་ཚུལ་གྱིས་བསྐྱེད་པ་ནི་རིགས་བསྡུས་པའི་དཀྱིལ་འཁོར་དང་། ཕྱག་བཞི་པ་དང་། དྲུག་པ་དང་། བཅུ་དྲུག་པའི་འཁོར་རྣམས་སོ། །ལས་རྒྱས་པའི་ལྷ་རྣམས་ལ་རྡོ་རྗེ་འཇིགས་བྱེད་མ་གཏོགས་པ་གཞན་ཐམས་ཅད་སྙིང་པོ་ཚིག་ཙམ་ལས་བསྐྱེད་པར་གཞུང་དུ་གསལ་ཡང་། བླ་མའི་མན་ངག་གིས་རྡོ་རྗེ་ཆོ་ག་གསུམ་དང་། སྙིང་པོ་ཚིག་ཙམ་འདམ་ཁ་ཅན་དུ་གསུངས། སྐྱེ་མཆེད་བྱིན་གྱིས་རློབ་པའི་ལྷ་རྣམས་ནི་ས་བོན་ཙམ་ལས་བསྐྱེད་དེ། འདིའི་སྙིང་པོ་ཚིག་ཙམ་ནི་ས་བོན་ལས་བསྐྱེད་པ་ཉིད་ལ་བཞེད་པར་སྣང་ངོ་། །གསུམ་པ་རྗེས་རྫོགས་པར་བྱེད་པ་ལམ་གྱི་ཡན་ལག་ལ་བཟླས་པ་དང་། སྤྱོད་ལམ་དང་། ཐུན་མཚམས་ཀྱི་བྱ་བ་དང་། ཁ་ཟས་དང་། གཏོར་མ་དང་། ཉལ་བ་དང་། ལྡང་བའི་རྣལ་འབྱོར་ཞེས་བྱ་བ་བདུན་ནི་ཀུན་གྱི་ཐུན་མོང་བ་ཡིན་ལ། མཆོག་སྒྲུབ་པའི་དཀྱིལ་འཁོར་ལ་ནི་དག་པ་རྗེས་སུ་དྲན་པ་ཞེས་བྱ་བ་ཁྱད་པར་གྱི་ཆོས་སོ་ཞེས་བྱ་བ་རིན་པོ་ཆེ་བསོད་ནམས་རྩེ་མོ་གསུང་ངོ་། །བཞི་པ་ལུང་རིགས་གཉིས་ཀྱི་གཙོ་བོ་བསྒྲུབ་པ་ལ་གཉིས་ཏེ། ཐུན་མོང་མ་ཡིན་པའི་རྩ་བཤད་གཉིས་ཀྱི་གཙོ་བོ་བསྒྲུབ་པ་དང་། ཐུན་མོང་གི་བཤད་རྒྱུད་ཀྱི་གཙོ་བོ་བསྒྲུབ་པའོ། །དང་པོ་ལ་གཉིས་ཏེ། ཕྱག་བཅུ་དྲུག་པ་ཡབ་ཡུམ་གཙོ་བོར་བསྒྲུབ་པ་དང་། དེ་ལས་མི་བསྐྱོད་པའི་རིགས་གཙོ་བོར་བསྒྲུབ་པའོ། །དང་པོ་ནི། འོ་ན་མཆོག་བསྒྲུབ་པའི་དཀྱིལ་འཁོར་དེ་རྣམས་ཀྱི་ནང་ནས། གཙོ་བོ་གང་ཡིན་སྙམ་ན། རྩ་བའི་རྒྱུད་དང་། རྡོ་རྗེ་གུར་གཉིས་ལས་ནི་སྙིང་པོ་ཀྱེ་རྡོ་རྗེ་ཕྱག་བཅུ་དྲུག་པའི་དཀྱིལ་འཁོར་དང་། བདག་མེད་ལྷ་མོ་བཅོ་ལྔའི་དཀྱིལ་འཁོར་གཉིས་པོ་གཙོ་བོ་ཡིན་ཏེ། རྩ་རྒྱུད་ལས། བདག་མེད་རྣལ་འབྱོར་ལྡན་པ་འམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང་། །དངོས་གྲུབ་འདོད་པས་མི་གནས་སོ། །ཞེས་གསུངས་ཤིང་། དེའི་དོན་རྣམ་བཤད་དག་ལྡན་ལས། བདག་ནི་གང་ཟག་གི་བདག་དང་། ཆོས་ཀྱི་བདག་གོ །མེད་པ་ནི་དེས་སྟོང་པ་སྟེ། ང་མེད་ན་ང་ཡིར་འཛིན་པ་ཡང་མེད་པས་བདག་གཉིས་ཀྱིས་སྟོང་པའོ། །དེ་ནི་ལྟ་བའམ་ཡེ་ཤེས་སོ། །དེའི་རྣམ་པ་གང་ལ་ཡོད་པ་ནི་བདག་མེད་རྣལ་འབྱོར་ཏེ། ལེའུ་བརྒྱད་པར་བསྟན་པ་གང་ཡིན་པའོ། །ཡང་ན་དཔལ་ཧེ་རུ་ཀ་ཞེས་བྱ་བ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བྱ་བའོ། །དེའང་ལྟ་བའམ་ཡེ་ཤེས་སོ། །དེའི་རྣམ་པ་ནི་ཞལ་བརྒྱད་ཕྱག་བཅུ་དྲུག་པ། ཞབས་བཞི་པ་ལ་སོགས་པའི་མཚན་ཉིད་དང་ལྡན་པའོ། །གཞན་པའི་སེམས་ཀྱིས་ཞེས་བྱ་བ་ནི་བདག་མེད་གཉིས་དང་། ཡེ་ཤེས་དང་བྲལ་བའི་ལྷ་གཞན་ཀུ་རུ་ཀུལླེ་ལ་སོགས་པ་ཤེས་རབ་ཀྱི་རྣལ་འབྱོར་གཞན་དང་། ཕྱག་གཉིས་པ་ལ་སོགས་པའི་ཐབས་ཀྱི་རྣལ་འབྱོར་གཞན་ལ་གནས་པར་མི་བྱའོ། །ཇི་ལྟར་ཞེ་ན། འབྲས་བུ་འབྱུང་བ་མེད་པའི་ཕྱིར་དང་། དཔལ་གྱི་འོས་མ་ཡིན་པའི་ཕྱིར་རོ། །དེ་ལ་འབྲས་བུ་འབྱུང་བ་མེད་པ་ནི་སྤྱིར་གསང་སྔགས་པ་འབྲས་བུ་ལམ་དུ་བྱེད་པས་རྒྱུ་འདྲ་བས་འབྲས་བུ་འདྲ་བ་སྒྲུབ་པར་བྱེད་པ་ལས་ལོངས་སྤྱོད་རྫོགས་པའི་སྐུ་ཞལ་བརྒྱད་ཕྱག་བཅུ་དྲུག་པ་ཡིན་ལ། དེ་རྣམ་པ་གཞན་གྱིས་ཐོབ་པར་ག་ལ་འགྱུར། ལོངས་སྤྱོད་རྫོགས་པའི་སྐུ་དེ་ལྟར་བཞུགས་པར་ཅིས་ཤེས་སྙམ་ན། ཆོས་ཀྱི་སྐུའི་དབང་དུ་བྱས་ནས་རྣམ་པ་གཞན་དཔལ་གྱི་འོས་མ་ཡིན་པའི་ཕྱིར་ཏེ། ཆོས་ཀྱི་སྐུ་ནི་སྟོང་པ་དང་། སྙིང་རྗེ་གཉིས་སུ་མེད་པ་ཡིན་ལ། སྟོང་པ་ཉིད་ནི་ཕྱག་བཅུ་དྲུག་དང་། རྟོགས་པའི་ཁྱད་པར་ནི་ཞལ་བརྒྱད་དུ་སྤྲུལ་ལ། སྙིང་རྗེའི་སྤྱོད་པ་ནི་བསྡུ་བའི་དངོས་པོ་བཞི་ཞབས་བཞིར་སྤྲུལ་ཏོ། །དེ་བས་ན་རྣམ་པ་འདིར་རིགས་སོ། །གལ་ཏེ་རྣམ་པ་དེ་ལྟ་བུ་གཞན་ལའང་སྦྱར་དུ་རུང་མོད་སྙམ་ན། བདེན་མོད་ཀྱི་བཅོམ་ལྡན་འདས་ཀྱི་ཆོས་རྣམས་ནི་གདུལ་བྱ་གང་དང་གང་གིས་འདུལ་བ་ལ་དེ་དང་དེའི་རྣམ་པ་གཙོ་བོར་སྟོན་པ་ཡིན་པས་རྒྱུད་འདིར་སྟོན་པས་དེ་ལྟ་བུའི་རྣམ་འཕྲུལ་གཙོ་བོར་གྱུར་པ་མཛད་ནས་ཆོས་གསུངས་སོ། །དེ་བས་ན་གཙོ་བོ་ཡིན་པའི་ཕྱིར་འདི་ཁོ་ན་བསྒོམ་པར་རིགས་སོ་ཞེས་གསུངས་ལ། དེའི་དོན་ཡང་ཆོས་ཀྱི་སྐུའི་ཡོན་ཏན་གྱི་ཕྱོགས་རེ་ཙམ་ཕྱག་གཉིས་པ་ལ་སོགས་པའི་རྣམ་པ་གཞན་གྱིས་ཀྱང་མཚོན་པར་ནུས་ཀྱང་། ཡོན་ཏན་ཡོངས་སུ་རྫོགས་པ་གཟུགས་སྐུའི་རྣམ་པས་མཚོན་ནུས་པ་ནི་རྒྱུད་འདིའི་ལུགས་ཀྱི་ཞལ་བརྒྱད་ཕྱག་བཅུ་དྲུག་པ་ཁོ་ན་ཡིན་པའི་ཕྱིར་གཙོ་བོར་བྱེད་ཅེས་པའི་དོན་ཏོ། །འོ་ན་རྒྱུ་འབྲས་ཀྱི་ཧེ་རུ་ཀ་གཉིས་ལས་གང་གཙོ་བོ་ཡིན་སྙམ་ན། འབྲས་བུའི་རྡོ་རྗེ་འཛིན་པ་ཉིད་ཡིན་ཏེ། དཀའ་འགྲེལ་ཀུ་མུ་ཏི་ལས། དེ་ཡང་དཔལ་ཧེ་རུ་ཀ་སྟེ་ཞལ་བརྒྱད་པ་ཞབས་བཞི་པ། ཕྱག་བཅུ་དྲུག་པ་འབྲས་བུ་རྡོ་རྗེ་འཛིན་པ་ཀྱེ་རྡོ་རྗེ་ཞེས་བྱ་བའི་དོན་ཏོ། །འབྲས་བུ་ཉིད་འབྱུང་བ་མེད་པའི་ཕྱིར་དང་། དཔལ་གྱི་འོས་མ་ཡིན་པའི་ཕྱིར། ཡང་ཧེ་རུ་ཀ་གཞན་བཟློག་གོ་ཞེས་གསུངས་པའི་ཕྱིར་རོ། །འོ་ན་བདག་མེད་མས་ཆོས་སྐུའི་ཡོན་ཏན་ཇི་ལྟར་མཚོན། རྒྱུད་གསུང་བ་པོ་སྟོན་པ་ཉིད་ཀྱི་རྣམ་པ་ཇི་ལྟར་བཞུགས་སྙམ་ན། སྔར་གྱི་ལྟ་བ་དེ་དག་ཀྱང་། གང་ཟག་དང་ཆོས་ཀྱི་བདག་མེད་གཉིས་སུ་འདུས་ལ། དེའི་རྣལ་འབྱོར་འདི་ལ་ཡོད་པའི་ཕྱིར་དང་། རྒྱུད་གསུངས་པའི་ཚེ་ཡབ་དང་ཞལ་སྦྱོར་གྱི་ཚུལ་དུ་བཞུགས་པས་འདིས་གཙོ་བོ་བྱས་པའི་དཀྱིལ་འཁོར་ཡང་ཇི་སྲིད་ཉེ་རྒྱུ་ལ་མཚམས་སྦྱར་གྱི་བར་དུ་ཡབ་ཀྱི་དཀྱིལ་འཁོར་དང་བསྐྱེད་རིམ་གྱི་གཙོ་བོ་ཁྱད་པར་མེད་པར་རྒྱུད་དང་གོང་མའི་དགོངས་པ་སྟེ། བདག་མེད་རྣལ་འབྱོར་ལྡན་པའམ། །ཞེས་པ་རྩ་འགྲེལ་ལས་ཤེས་སོ། །ཧེ་རུ་ཀ་གཞན་རྣམས་མཆོག་སྒྲུབ་པའི་དཀྱིལ་འཁོར་དུ་ཅི་ལྟར་འགྲོ་སྙམ་ན། གནད་ཀྱི་གསལ་བྱེད་དུ་སློབ་དཔོན་མི་ཐུབ་ཟླ་བ་ནི། ཧེ་རུ་ཀ་གསུམ་ཡང་ལས་དང་པོ་པའི་བསྒོམ་བྱ་ཙམ་དུ་བཞེད་ཅེས་གསུངས་ཏེ། ཕྱག་བཅུ་དྲུག་པའི་དཀྱིལ་འཁོར་བསྒོམ་པ་ལ་བློ་སྦྱོང་བའི་ཆེད་དུ་ལས་དང་པོ་པའི་བསྒོམ་བྱ་ཡིན་པས། མཆོག་སྒྲུབ་པར་འགྲོ་ཞེས་པའི་དོན་ཏོ། །གཉིས་པ་དེ་ལས་མི་བསྐྱོད་པའི་རིགས་གཙོ་བོར་བསྒྲུབ་པ་ལ་གཉིས་ཏེ། ལུང་གིས་བསྒྲུབ་པ་དང་། རིགས་པས་བསྒྲུབ་པའོ། །དང་པོ་ནི། རྩ་རྒྱུད་ཀྱི་སྤྱོད་པའི་སྐབས་སུ། རྡོ་རྗེའི་བུ་མོ་འདི་ཁྱེར་ནས། །སྤྱོད་པ་བྱ་བར་རྟོགས་པར་བྱ། །རྡོ་རྗེ་རིགས་ཀྱི་དངོས་མེད་ན། །རང་འདོད་ལྷ་ཡི་གཟུགས་ཀྱིས་བྱ། །ཡང་ན་གཞན་གྱི་རིགས་བྱུང་བ། །ཞེས་རྡོ་རྗེ་རིགས་ཀྱི་ཕྱག་རྒྱ་གཡུང་མོ་མཆོག་ཏུ་བསྔགས་ལ། དེའི་དོན་ཡང་ལེའུ་དེར། ཞེ་སྡང་རྣམ་དག་རྣལ་འབྱོར་པ། །ཞེས་སྒྲུབ་པ་པོར་རང་གི་ཁ་དོག་དང་། དབྱིབས་ཀྱི་རིགས་མི་གཙོ་བར་རྒྱུད་འདིར་མི་བསྐྱོད་པའི་རིགས་ཀྱི་རྣལ་འབྱོར་གཙོ་བོར་བསྒོམ་དགོས་པས། ལྷའི་རྣལ་འབྱོར་གྱི་ངོས་ནས་ཕྱག་རྒྱ་གཡུང་མོ་བསྔགས་པའི་དོན་ཏོ། །གཉིས་པ་རིགས་པས་བསྒྲུབ་པ་ནི་གཞིའི་སྐབས་སུ་སེམས་ཅན་གྱི་རྒྱུད་འདིར་ཕུང་པོ་ལྔའི་ནང་ནས་སེམས་ཉིད་གཙོ་ཆེ་སྟེ། སློབ་དཔོན་ཨཱརྻ་དེ་ཝས། ཆོས་རྣམས་སྔོན་དུ་ཡིད་འགྲོ་སྟེ། །ཡིད་གཙོ་ཡིད་ཀྱི་འགྲོས་ཅན་ཡིན། །ཅེས་གསུངས་པ་ལྟར། སྒོ་གསུམ་གྱི་ལས་ཐམས་ཅད་སེམས་སྔོན་དུ་འགྲོ་ཞིང་། སེམས་ཀྱི་རྗེས་སུ་འཇུག་པའི་ཕྱིར་དང་། གཟུགས་ལ་སོགས་པའི་ཆོས་རྣམས་ཀྱང་། སེམས་ལས་གཞན་མ་ཡིན་པའི་ཕྱིར་རོ། །དེའི་ཕྱིར་རྒྱུད་དུ་རྣམ་པར་ཤེས་པ་ཉིད་ཀྱི་རང་བཞིན་གྱི་མི་བསྐྱོད་པ་ཉིད་དཀྱིལ་འཁོར་གྱི་གཙོ་བོར་བཞག་སྟེ། གུར་གྱི་དཀའ་འགྲེལ་ལས། འདིར་སེམས་གཙོ་བོ་ཉིད་དུ་བསྟན་པའི་ཕྱིར། བསྡུས་པའི་དཀྱིལ་འཁོར་གྱི་གཙོ་བོ་ཧེ་བཛྲ་ཉིད་ཡིན་པར་ཉེ་བར་བསྟན་མོད་ཀྱི། གཞན་དག་ཀྱང་དགག་པ་ནི་མ་ཡིན་ཏེ། ཞེས་གསུངས་པའི་ཕྱིར་རོ། །གཉིས་པ་ཐུན་མོང་གི་བཤད་རྒྱུད་ཀྱི་གཙོ་བོ་བསྒྲུབ་པ་ནི། སམྦུ་ཊའི་རྒྱུད་འདིར་སྨིན་བྱེད་ནས་འབྲས་བུའི་བར་མངོན་པར་རྟོགས་པ་ཚང་བར་བསྟན་པ་རྣམས་རྒྱུད་སྡེ་གཞན་གྱི་བཤད་རྒྱུད་དུ་འགྲོ་བ་ལ་མ་ལྟོས་པར་རྒྱུད་རང་རྐང་དུ་ཉམས་སུ་ལེན་པའི་དབང་དུ་བྱས་ནས་བསྐྱེད་རིམ་གྱི་གཙོ་བོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཉིད་ཡིན་ཏེ། བརྟག་པ་བཞི་པ་དངོས་ལས། དེ་ནས་དཀྱིལ་འཁོར་རྒྱལ་པོ་མཆོག །རྡོ་རྗེ་དབྱིངས་དང་འདྲ་བས་ན། །རྡོ་རྗེ་དབྱིངས་ཞེས་བརྗོད་པ་ཡིན། །ཞེས་གསུངས་པས། རྒྱུད་འདིར་ཆོས་སྐུའི་མཚོན་བྱེད་གཟུགས་སྐུ་དེ་ལྟར་དུ་བསྟན་པའི་ཕྱིར་རོ། །འདི་ནི་རྗེ་བཙུན་གྱིས་གལ་ཏེ་རྣམ་པ་དེ་ལྟ་བུ་གཞན་ལ་ཡང་སྦྱར་དུ་རུང་མོད་སྙམ་ན་བདེན་མོད་ཀྱི། བཅོམ་ལྡན་འདས་ཀྱིས་ཆོས་རྣམས་ནི་གདུལ་བྱ་གང་དང་གང་གིས་འདུལ་བ་ལ་དེ་དང་དེའི་རྣམ་པར་གཙོ་བོར་བསྟན་པ་ཡིན་པས་རྒྱུད་འདིར་སྟོན་པས་དེ་ལྟ་བུའི་རྣམ་འཕྲུལ་གཙོ་བོར་གྱུར་པ་མཛད་ནས་ཆོས་གསུངས་སོ། །ཞེས་གསུངས་པའི་དགོངས་པ་སྟེ། དུས་ཀྱི་འཁོར་ལོ་དང་། བདེ་མཆོག་དང་། གསང་འདུས་སོགས་ཀྱི་ལམ་གྱི་རིམ་པ་ལའང་རང་རང་གི་དཀྱིལ་འཁོར་དེ་ཉིད་བསྐྱེད་རིམ་གྱི་གཙོ་བོར་གྲུབ་པའོ། །གཅིག་བསྒྲུབས་པས་གཞན་རྣམས་ཀྱང་གྲུབ་པ་འདིའི་རྗེས་སུ་འབྲང་བར་བྱའི། གཅིག་གི་སྒྲུབ་བྱེད་མཐོང་ན་གཞན་རྣམས་ལ་སྐུར་བ་གདབ་པར་འགྲོ་བའི་ལོག་རྟོག་གི་རྗེས་སུ་མི་འབྲང་བ་གལ་ཆེའོ། །ལྔ་པ་དེ་ཉིད་མངོན་རྟོགས་བཅུ་བཞིས་རྟོགས་པ་བསྐྱེད་པའི་ཚུལ་ལ་ལྔ་སྟེ། གང་ལ་སྦྱར་བའི་དཀྱིལ་འཁོར་ངོས་གཟུང་། རྒྱུད་ལས་གསུངས་པའི་མངོན་པར་རྟོགས་པ་ལ་ལྔར་ཕྱེ་བ། དེ་ཉིད་རྟེན་གྱི་གང་ཟག་གི་སྒོ་ནས་བཞིར་བསྡུ་བ། རྩ་བཤད་ཀྱི་བསྐྱེད་ཆོག་གི་སྒོ་ནས་བཅུ་བཞིར་དབྱེ་བ། ཁྱད་པར་གྱི་ཆོས་ཞིབ་ཏུ་བཤད་པའོ། །དང་པོ་ནི། སམྦུ་ཊར། རྒྱུད་རང་རྐང་ཚུགས་པའི་ཉམས་ལེན་གྱི་དབང་དུ་བྱས་ན། བསྐྱེད་རིམ་གྱི་གཙོ་བོ་སྔར་བཤད་པ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཡིན་ཀྱང་འདིར་བརྟག་གཉིས་ཀྱི་བཤད་པའི་རྒྱུད་དུ་སྦྱར་ཏེ། རྒྱུད་གསུམ་པོ་གཅིག་ཏུ་བསྲེས་ནས་ཐབས་རྒྱུད་ཀྱི་མངོན་པར་རྟོགས་པ་བཅུ་གཅིག་ཏུ་ཕྱེ་བའི་ཚེ་བསྐྱེད་རིམ་གྱི་གཙོ་བོ་རྩ་རྒྱུད་ནས་བཤད་པའི་ཕྱག་བཅུ་དྲུག་པ་དང་། བདག་མེད་མའི་དཀྱིལ་འཁོར་གཉིས་ཡིན་པར་སྔར་བསྒྲུབས་ཟིན་པ་ལྟར་རོ། །དེས་ན་ཕྱག་བཅུ་དྲུག་པ་ལ་བསྐྱེད་ཆོག་དབྲི་སྐྱེད་ཀྱི་སྒོ་ནས་མངོན་པར་རྟོགས་པ་ཚུལ་བཅུ་བཞི་དང་། ཡུམ་ལ་དབྲི་སྐྱེད་མ་གསུངས་པས་ཚུལ་གཅིག་སྦྱར་བར་བྱ་བ་ཡིན་ནོ། །གཉིས་པ་ནི། རྩ་བའི་རྒྱུད་ཀྱི་ཕྱི་མའི་ལྔ་པར་གཞུང་འཁྲུགས་མེད་དུ་བྱས་ནས་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་གསུངས། དང་པོའི་བརྒྱད་པར་ཡུམ་གྱི་སྐབས་སུ། དེ་ཡི་སྟེང་དུ་ཟླ་བ་ཡིན། །ཟླ་བའི་སྟེང་དུ་ས་བོན་ཉིད། །ཕྱི་ནས་བདུད་ལས་རྒྱལ་བས་མནན། །གཉིས་འདུས་པ་ལས་བདེ་ཆེན་པོ། །ཞེས་ཨཱ་ལི་ཀཱ་ལི་ལ་མ་ལྟོས་པའི་མི་མཉམ་སྦྱོར་དང་། ཨཱ་ལི་ཟླ་བའི་གཟུགས་ཀྱིས་གནས། །ཀཱ་ལིའི་གཟུགས་ཀྱིས་སྣང་བྱེད་དོ། །ཟླ་བ་ཉི་མ་འདུས་པ་ལས། །དཀར་མོ་ལ་སོགས་རབ་ཏུ་གྲགས། །ཞེས་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་མཉམ་སྦྱོར་བ། །རྡོ་རྗེ་སེམས་དཔའ་ཉིད་ཀྱི་གདན། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པ་འདོད་མི་བྱ། །སེམས་དཔའི་གཟུགས་བརྙན་ལས་བྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཅེས་མཉམ་སྦྱོར་གྱི་མངོན་པར་རྟོགས་པ་སྟེ། གསུམ་གསུངས་པ་མན་ངག་གིས་ཡབ་ལ་སྦྱར་བའི་ཚེ་མངོན་པར་རྟོགས་པ་ལྔར་གསུངས་སོ། །གསུམ་པ་ནི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པར་ལྡན་པས་བསྐྱེད་པའི་རིམ་པ་བསྒོམ་པའི་གང་ཟག་གཅིག་ཉིད་ལ། སློབ་དཔོན་བིརྺ་པའི་བཞེད་པས་བཞིར་འགྱུར་བར་གསུངས་ཏེ། ཉོན་མོངས་པའི་འཆིང་བ་མཐའ་དག་དང་ལྡན་པའི་གང་ཟག་ཐ་མའི་ཐ་མ། ཐ་མ། འབྲིང་། རབ་བོ། །དེ་ཉིད་ལ་སློབ་དཔོན་མཚོ་སྐྱེས་ཀྱིས་ལས་དང་པོ་པ། བདེ་བ་ཅུང་ཟད་སྐྱེས་པ། བདེ་སྟོང་གི་ཉམས་སྐྱེས་པ། བདེ་སྟོང་གི་ཉམས་ཆེར་སྐྱེས་པའི་རྟེན་གྱི་གང་ཟག་སྟེ་བཞིར་བཞེད་དོ། །ཡང་དེ་ཉིད་ལས། སངས་རྒྱས་ཡེ་ཤེས་ཞབས་ཀྱིས་ལས་དང་པོ་པ་དང་། ཅུང་ཟད་ཡེ་ཤེས་ལ་དབང་བ་དང་། ཡེ་ཤེས་ལ་དབང་བ་དང་། ཡང་དག་པའི་ཡེ་ཤེས་ལ་དབང་བ་ཅེས་གསུངས་ཏེ། གྲུབ་ཆེན་དེ་རྣམས་ཀྱིས་ཐ་སྙད་སོ་སོར་མཛད་པ་ཙམ་ལས་དོན་མི་གཅིག་པ་མེད་དོ། །དེ་ལ་གང་ཟག་དང་པོས་བསྒོམ་པའི་མངོན་པར་རྟོགས་པ་ནི། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། མཉམ་སྦྱོར་གཉིས་ཏེ། འདི་གཉིས་ནི་བསྐྱེད་ཆོག་ཤིན་ཏུ་རྒྱས་པ་ཡིན་ནོ། །དེ་ལྟར་ཐུན་བཞིར་བསྒོམས་པས་དུ་བ་ལ་སོགས་པའི་རྟགས་ལྔ་པོ་མཉམ་རྗེས་གང་རུང་ལ་མཐོང་བར་འགྱུར་ལ། དེ་མཐོང་ནས་གང་ཟག་དེ་གང་ཟག་གཉིས་པར་ན་འཕོས་པ་ཡིན་ནོ། །གང་ཟག་གཉིས་པས་བསྒོམ་པར་བྱ་བའི་རྣལ་འབྱོར་ནི་ཨཱ་ལི་ཀཱ་ལི་ལ་མི་ལྟོས་པའི་མི་མཉམ་སྦྱོར་ཏེ། སྔར་གྱི་བསྐྱེད་ཆོག་ལས་ཨཱ་ལི་ཀཱ་ལི་ཕྲི་བའོ། །དེ་ལྟར་བསྒོམས་པས་སེམས་ཆེར་བརྟན་ཅིང་། རླུང་སེམས་ཀྱི་འཕྲོ་འདུ་འཕེལ་བའི་སྟོབས་ཀྱིས་བསོད་ནམས་ཀྱི་ཚོགས་ཀྱི་དུས་སུ་ལུས་ལ་བདེ་བ་འབར། ཡེ་ཤེས་ཀྱི་ཚོགས་ཀྱི་དུས་སུ་སེམས་ལ་སྟོང་ཤས་ཆེ། དངོས་གཞིའི་སྐབས་སུ་བདེ་སྟོང་ཟུང་དུ་ཆུད། བར་སྐབས་སུ་ལྷའི་སྣང་བ་སྟོང་ཞིང་འགྲོ། རྨི་ལམ་མངོན་ཤེས་དང་འདྲ་བ་འབྱུང་སྟེ། གང་ཟག་དེ་གང་ཟག་གསུམ་པར་ན་འཕོས་པ་ཡིན་ནོ། །གསུམ་པ་དེས་བསྒོམ་པར་བྱ་བའི་རྣལ་འབྱོར་ནི་ས་བོན་ལས་བསྐྱེད་པ་སྟེ། སྔར་གྱི་བསྐྱེད་ཆོག་ལས་མངོན་བྱང་ཡང་ཕྲི་བའོ། །དེ་ལྟར་ཐུན་བཞིར་ཉམས་སུ་བླངས་པས་ལྷའི་སྣང་བ་བས་རྫོགས་རིམ་ཤས་ཆེ། སྐབས་སྐབས་སུ་ལྷའི་རྣམ་པ་མི་གསལ། དགྱེས་པའི་རྡོ་རྗེ་བསྒོམས་ཀྱང་བདེ་མཆོག་ལ་སོགས་པར་སྣང་བ་དུ་མ་འགྱུར་ཞིང་མཐོང་བ་ཡོད། རིགས་དྲུག་གི་གྲོང་ཁྱེར་ལ་སོགས་པ་འཁྲུལ་སྣང་སྣ་ཚོགས་ཀྱང་མཐོང་དཀྱིལ་འཁོར་ཡང་དུ་སོགས་བཞིན་ཡལ་གིན་འགྲོ་བ་འབྱུང་སྟེ། གང་ཟག་དེ་གང་ཟག་བཞི་པར་ན་འཕོས་པ་ཡིན་ནོ། །གང་ཟག་བཞི་པ་དེས་ཉམས་སུ་བླང་བར་བྱ་བའི་རྣལ་འབྱོར་ནི། སྐད་ཅིག་གིས་བསྐྱེད་པ་སྟེ། སྔར་གྱི་བསྐྱེད་ཆོག་ལས་ས་བོན་ཡང་ཕྲི་བའོ། །དེ་ལྟར་ཐུན་བཞིའི་རིམ་པས་བསྒོམ་ཞིང་སེམས་འཛིན་པའི་མན་ངག་ལ་ནན་ཏན་དུ་བྱས་པའི་སྟོབས་ཀྱིས་འཁོར་བ་རིས་དྲུག་དང་། མྱང་འདས་སྤྲུལ་སྐུའི་ཞིང་ཁམས་རྣམས་ཀྱང་ཉམས་ཀྱི་སྣང་བ་ལ་མཐོང་། ཏིང་ངེ་འཛིན་ལ་མཉམ་རྗེས་མེད། ལུས་སེམས་ལ་བདེ་སྟོང་བརྟན་པར་ཟུང་དུ་ཆུད་དེ། དེ་ཙམ་ན་མཁའ་འགྲོ་མའི་བར་ཆད་ཀྱི་རྩོལ་བ་མང་དུ་བྱུང་ན་བརྡ་བསྟན་པས་བཟློག གལ་ཏེ་བརྡ་ཤེས་ཤིང་མཁའ་འགྲོ་མཚན་ལྡན་གྱིས་རང་གཟུགས་སྟོན་ན། དེ་དང་སྙོམས་པར་ཞུགས་པས་སྐད་ཅིག་ལ་བདེན་པ་མཐོང་བར་འགྱུར་རོ། །དེ་ལྟར་བསྒོམས་པས་གོམས་པའི་སྟོབས་ཀྱིས་སྐད་ཅིག་ཙམ་ལ། ལྷའི་འཁོར་ལོ་ཡོངས་སུ་རྫོགས་པར་བསྒོམ་ནུས་པ་འབྱུང་བས། དེའི་ཚེ་སྐུ་གསུང་ཐུགས་བྱིན་གྱིས་བརླབས་པ་སོགས་བསྒོམ་མི་དགོས་ཏེ་རང་གི་ངང་གིས་ཆོ་ག་མི་དམིགས་པར་འགྱུར་བའི་ཕྱིར་དང་། སྣང་བ་ལྷའི་འཁོར་ལོར་ཤར་བས་བསྐྱེད་ཆོག་རྣམས་བསྒོམ་རྒྱུ་མེད་པར་འགྲོ་བའི་ཕྱིར་རོ། །དེའི་སྐད་ཅིག་ལ་ལུས་རྩའི་དཀྱིལ་འཁོར་མངོན་དུ་འགྱུར་རོ། །ལུས་ཀྱི་རྩ་རྣམས་ལྷར་མཐོང་། ལུས་ཀྱི་དཀྱིལ་འཁོར་ལ་ཡང་ཡང་དུ་བརྟག་ཅིང་བསྒོམས་པས་སྔོན་བླ་མས་བསྟན་པའི་ལུས་དཀྱིལ་གྱི་དོན་མངོན་དུ་འགྱུར། དངོས་གྲུབ་ཐོབ་ཅེས་མིང་ཐོབ་བོ། །འདི་དག་ནི་སློབ་དཔོན་ཐམས་ཅད་མཐུན་པའི་རྟོགས་པའི་རིམ་པའི་དབང་དུ་བྱས་པ་ཡིན་ལ། རྣལ་འབྱོར་དབང་ཕྱུག་གི་བཞེད་པས་བློ་གྲོས་ཀྱི་རིམ་པའི་དབང་དུ་བྱས་ན། རྡོ་རྗེ་སློབ་དཔོན་དུ་དབང་བསྐུར་བ་ཐོབ་པའི་གང་ཟག་བློ་གྲོས་རབ་ཀྱི་དབང་དུ་བྱས་ནས་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། མཉམ་སྦྱོར་གཉིས། འབྲིང་གི་དབང་དུ་བྱས་ནས་ཨཱ་ལི་ཀཱ་ལི་སྤངས་པའི་མི་མཉམ་སྦྱོར། ཐ་ལྟག་གི་དབང་དུ་བྱས་ནས་ས་བོན་ལས་བསྐྱེད་པ། ཐ་མའི་དབང་དུ་བྱས་ནས་སྐད་ཅིག་གིས་བསྐྱེད་པ་ཡང་གསུངས་ཏེ། འདི་ནི་གང་ཟག་རྒྱུད་ཐ་དད་པ་བཞིའི་དབང་དུ་བྱས་པ་ཡིན་ལ། ཕྱི་མ་གསུམ་གྱི་བསྒོམ་བྱ་ཡང་བློ་གྲོས་རབ་གྱི་བསྒོམ་བྱ་ལ་མ་སླེབ་ཀྱི་བར་དུ་བློ་སྦྱོང་བ་ཡིན་པས། རབ་ཀྱི་བསྒོམ་བྱར་སླེབ་ནས་རྟོགས་པའི་རིམ་པ་སྔར་ལྟར་འབྱུང་བ་ནི་གནད་ཀྱི་དོན་ནོ། །བཞི་པ་ནི་ས་བོན་དང་སྐད་ཅིག་གིས་བསྐྱེད་པ་ལ་ནི་དབྱེ་བ་མེད་ལ། མངོན་བྱང་གི་མངོན་པར་རྟོགས་པ་གསུམ་པོ་རེ་རེ་ལ་ཡང་རྩ་རྒྱུད་ཀྱི་བསྐྱེད་ཆོག་སྦྱར་ནས་གཙོ་འཁོར་ཐམས་ཅད་མངོན་བྱང་ལས་བསྐྱེད་པ་ཡན་ལག་བཞི་པའི་ཕྱོགས་དང་། བཤད་རྒྱུད་ཀྱི་བསྐྱེད་ཆོག་སྦྱར་ནས། རྒྱུ་རྡོ་རྗེ་འཆང་ཁོ་ན་མངོན་བྱང་ལས་བསྐྱེད་པ་ཡན་ལག་དྲུག་པའི་ཕྱོགས་གཉིས་གཉིས་སུ་ཕྱེ་བས་དྲུག ཡན་ལག་བཞི་པའི་ཕྱོགས་རྣམས་ལ་འཁོར་གྱི་ལྷ་མོ་ཐིག་ལེ་འགྲོས་དང་། ས་བོན་འགྲོས་གཉིས་གཉིས། དྲུག་པའི་ཕྱོགས་རྣམས་ལ་འཁོར་གྱི་ལྷ་མོ་ས་བོན་འགྲོས་དང་། ལྷ་མོ་འགྲོས་གཉིས་གཉིས་ཏེ། སྔར་གྱི་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་བསྣན་པས་བཅུ་བཞིའོ། །ལྔ་པ་ལ་དྲུག་སྟེ། འཆིང་བྱེད་ཡན་ལག་གི་ཁྱད་པར། གཞལ་ཡས་ཁང་བསྐྱེད་ཆོག་གི་ཁྱད་པར། རྒྱུ་རྡོ་རྗེ་འཆང་བསྐྱེད་ཚུལ་གྱི་ཁྱད་པར། འཁོར་གྱི་ལྷ་མོ་སྤྲོ་ཚུལ་གྱི་ཁྱད་པར། འབྲས་བུ་རྡོ་རྗེ་འཆང་གི་བསྐྱེད་ཆོག་གྱི་ཁྱད་པར། སློབ་དཔོན་གཞན་གྱི་ལུགས་ལས་ཁྱད་པར་དུ་འཕགས་པའི་ཚུལ་ལོ། །དང་པོ་ནི་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་ནི་ཡན་ལག་བཞིས་འཆིང་སྟེ། འདིའི་བསྐྱེད་ཆོག་རྩ་བའི་རྒྱུད་ཉིད་ལས་བཤད་པས་འཆིང་བྱེད་ཀྱང་རྩ་རྒྱུད་ནས་གསུངས་པ་དགོས་ལ། རྩ་རྒྱུད་ལས། ཡང་ནི་སྟོང་པ་བྱང་ཆུབ་སྟེ། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་གསུངས་པ་འདི་གསང་བ་འདུས་པའི་རྒྱུད་དཔང་པོར་བྱས་ནས་བསྙེན་སྒྲུབ་ཡན་ལག་བཞི་ལ་སྦྱར་བ་མན་ངག་གི་ལུགས་ཡིན་པའི་ཕྱིར་རོ། །མངོན་བྱང་གི་ཡན་ལག་བཞི་པའི་ཕྱོགས་དྲུག་ཀྱང་བསྙེན་སྒྲུབ་ཡན་ལག་བཞིས་འཆིང་བའི་སྒྲུབ་བྱེད་ཀྱང་འདི་ཁོ་ནའོ། །རྒྱུ་རྡོ་རྗེའི་འཆང་ཁོ་ན་ལ་མངོན་བྱང་ཡོད་པའི་ཕྱོགས་དྲུག་ནི་ཡན་ལག་དྲུག་གིས་འཆིང་དགོས་ཏེ། འདིའི་བསྐྱེད་ཆོག་གུར་ལས་གསུངས་ལ། གུར་ལས་གསུངས་པའི་བསྐྱེད་ཆོག་ལ་གུར་ཉིད་ལས་གསུངས་པའི་འཆིང་བྱེད་སྦྱར་དགོས་པས་སོ་སྙམ་དུ་དགོངས་སོ། །གཉིས་པ་ནི། ཕྱི་མའི་ལྔ་པར་གསུངས་པའི་བསྐྱེད་ཆོག་གཉིས་ལ་གཞལ་ཡས་ཁང་སྐད་ཅིག་གིས་བསྐྱེད་པར་རྗེ་བཙུན་གྱིས་གསུངས་ཏེ། ལེའུ་དེ་ཉིད་ལས། གཞལ་ཡས་ཁང་སྟོན་བྱེད་ཚིགས་བཅད་གཅིག་གསུངས་པ་ལ་བསྐྱེད་ཆོག་གཞན་མེད་པར་རྣམ་པ་ཙམ་ཞིག་གསུངས་པས་སོ་སྙམ་དུ་དགོངས་སོ། །མངོན་བྱང་གི་ཡན་ལག་བཞི་པའི་ཕྱོགས་རྣམས་ལ། འབྱུང་བཞི་ས་ནས་རིམ་པ་བཞིན་དུ་བསྐྱེད་པའི་ལུགས་བཟློག་ལ་རང་སེམས་འདྲེས་པ་ཙམ་ལས་བསྐྱེད་དགོས་ཏེ། རྩ་རྒྱུད་དང་པོའི་བརྒྱད་པར། འཁོར་ལོ་སྔོན་དུ་ཅི་རིགས་པར། །ལྷ་རྣམས་ཇི་ལྟར་འབྱུང་བའོ། །ཞེས་པའི་ཚིག་རྐང་པ་གཉིས་ལ་ཚིགས་བཅད་འོག་མས་བསྡུས་དོན་མན་ངག་གི་བཤད་པ་བྱེད་པའི་ཚེ། འཁོར་ལོ་ས་དང་། སྔོན་ནི་ཆུ། ཇི་ལྟར་རིགས་པ་མེ། ལྷ་རྣམས་རླུང་། ཇི་ལྟར་འབྱུང་བ་རང་སེམས་ལ་སྦྱར་བ་མཚོ་སྐྱེས་ལུགས་དང་ཚུལ་མཚུངས་པར་མཛད་པའི་ཕྱིར་རོ། །ཡན་ལག་དྲུག་པའི་ཕྱོགས་རྣམས་ལ་ནི་རླུང་ནས་རིམ་པ་བཞིན་དུ་བསྒོམས་པའི་འབྱུང་བཞི་ལུགས་འབྱུང་དང་། དེའི་སྟེང་དུ་བྷྲཱུྃ་ལས་འཁོར་ལོ་དང་། དེ་རྣམས་ལ་བར་དོའི་མཚོན་བྱེད་ཡིག་འབྲུ་ལྔ་འདྲེས་པ་ལས། གཞལ་ཡས་ཁང་བསྐྱེད་དགོས་ཏེ། བསྐྱེད་ཆོག་འདི་གུར་ལས་གསལ་བར་གསུངས་པ་ཡན་ལག་དྲུག་པའི་ཕྱོགས་ལ་སྦྱར་བ་མི་ཐུབ་ཟླ་བ་དང་ཚུལ་མཚུངས་པར་མཛད་པའི་ཕྱིར་རོ། །དེའི་ཚེ་རྩ་རྒྱུད་ཀྱི་ཚིག་གོང་འོག་རྣམས་ལ་ཡན་ལག་གི་དོན་གྱི་བཤད་པ་བྱེད་དགོས་པ་ནི་གནད་ཀྱི་དོན་ནོ། །གསུམ་པ་ནི། སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་གཉིས་ཀྱི་རྒྱུ་རྡོ་རྗེ་འཆང་ནི་ནག་པོ་ཁོ་ན་སྟེ། འདིའི་བསྐྱེད་ཆོག་རྩ་རྒྱུད་ཕྱི་མའི་ལྔ་པ་ལ་བརྟེན་པ་ཡིན་ལ། དེར་རྒྱུ་རྡོ་རྗེ་འཆང་ནག་པོ་ཁོ་ནར་གསུངས་པའི་ཕྱིར། ཡན་ལག་བཞི་པའི་ཕྱོགས་ཀྱི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གཉིས། མི་ལྟོས་པའི་མི་མཉམ་སྦྱོར་གཉིས་ཏེ་བཞི་པོའི་རྒྱུ་རྡོ་རྗེ་འཆང་ཡང་ནག་པོ་སྟེ། གཙོ་འཁོར་ཐམས་ཅད་མི་མཉམ་སྦྱོར་གྱི་མངོན་བྱང་ལས་བསྐྱེད་པ་ཡིན་པས་དེའི་ཚེ་རྒྱུ་རྡོ་རྗེ་འཆང་ནག་པོ་ལས་གཞན་མི་སྲིད་པའི་ཕྱིར། ཡན་ལག་དྲུག་པའི་ཕྱོགས་ཀྱི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གཉིས། མ་ལྟོས་པའི་མི་མཉམ་སྦྱོར་གཉིས་ཏེ་བཞི་པོའི་རྒྱུ་རྡོ་རྗེ་འཆང་ནི་དཀར་པོ་སྟེ། འདི་གུར་ནས་བཤད་པའི་མངོན་རྟོགས་ཀྱིས་འཆིང་དགོས་པས་དེ་ལ་རྒྱུ་རྡོ་རྗེ་འཆང་དཀར་པོ་ལས་གཞན་མ་གསུངས་པའི་ཕྱིར་རོ། །མཉམ་སྦྱོར་གྱི་ཡན་ལག་བཞི་པའི་ཕྱོགས་གཉིས་དང་། དྲུག་པའི་ཕྱོགས་གཉིས་ཏེ་བཞི་པོའི་རྒྱུ་རྡོ་རྗེ་འཆང་ནི་དཀར་པོ་ཁོ་ན་སྟེ། མཉམ་སྦྱོར་ལས་བསྐྱེད་པའི་ལྷའི་གཙོ་བོ་ནི་དཀར་པོ་ཁོ་ནར་གསུངས་པའི་ཕྱིར་རོ། །ཁ་ཅིག་འདི་ལ་བསམས་ནས་མཉམ་སྦྱོར་ལས་རྒྱུ་རྡོ་རྗེ་འཆང་བསྐྱེད་པའི་ཚེ་ཡུམ་སྐད་ཅིག་གིས་བསྐྱེད་དགོས་སོ་ཞེས་སྨྲ་བ་ནི་མི་འཐད་དེ། དེ་ལྟར་ན་རྩ་ཞལ་མ་གཏོགས་པའི་ཞལ་རྣམས་ཀྱང་སྐད་ཅིག་གིས་བསྐྱེད་དགོས་པར་ཐལ་བའི་ཕྱིར་རོ། །བཞི་པ་ནི་ཡུམ་གྱི་མཁར་ཐིག་ལེ་བརྒྱད་དུ་གྱུར་པའི་བར་ནི་ཐམས་ཅད་འདྲ་ལ་སྐད་ཅིག་གིས་བསྐྱེད་པ་ལ་ནི་དེ་རྣམས་ལྷ་མོ་བརྒྱད་དུ་གྱུར་ནས། ཡུམ་གྱི་མཁའ་ནས་ཕྱིར་སྤྲོས་ཏེ། ཤར་དུ་གཽ་རཱི་ཞེས་སོགས་དང་། ས་བོན་ལས་བསྐྱེད་པ་ལ་ནི་ཡན་ལག་དྲུག་པ་ལྟར་རོ། །མངོན་བྱང་ལས་བསྐྱེད་པ་ལ་ཡན་ལག་བཞི་པའི་ཕྱོགས་རྣམས་ལ་ནི་ཡུམ་གྱི་མཁར་ཐིག་ལེ་བརྒྱད་དུ་གྱུར། དེ་རྣམས་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པས་ས་བོན་བརྒྱད་ལས་ཕྱག་མཚན་བརྒྱད་ས་བོན་གྱིས་མཚན་པ། དེ་རྣམས་རོ་གཅིག་ཏུ་འདྲེས་པ་ལས་བསྐྱེད་པའམ། ཡུམ་གྱི་མཁར་ས་བོན་བརྒྱད་དུ་གྱུར་པ་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པ་ཕྱག་མཚན་ལ་ས་བོན་གྱིས་མཚན་པ་དེ་རྣམས་རོ་གཅིག་ཏུ་འདྲེས་པ་ལས་བསྐྱེད་པ་གང་རུང་ངོ་། །ཡན་ལག་དྲུག་པའི་ཕྱོགས་རྣམས་ལ་ཡུམ་གྱི་མཁར་ཐིག་ལེ་བརྒྱད་དུ་གྱུར། དེ་རྣམས་གྃ་ཙྃ་ལ་སོགས་པའི་ས་བོན་བརྒྱད་དུ་གྱུར། དེ་རྣམས་ལྷ་མོ་བརྒྱད་དུ་གྱུར་ནས་སོ་སོའི་གདན་གྱི་སྟེང་དུ་སྤྲོ་བའམ། ས་བོན་བརྒྱད་སོ་སོའི་གདན་གྱི་སྟེང་དུ་སྤྲོས་ནས། ཤར་དུ་གྃ་ལས་གཽ་རཱི་ཞེས་སོགས་ཀྱིས་བསྐྱེད་པ་གང་རུང་ངོ་། །ལྔ་པ་ནི། སྐད་ཅིག་གིས་བསྐྱེད་པའི་ཕྱོགས་ལ་སླར་ཡང་ཡབ་ཡུམ་སྙོམས་པར་ཞུགས་པས་ཡབ་ཡུམ་གྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་བསྐུལ་ཏེ། ཕུང་པོ་དང་། ཁམས་དང་སྐྱེ་མཆེད་ཐམས་ཅད་འོད་དུ་ཞུ་ནས་བདུད་བཞིའི་སྟེང་དུ། བདེ་བ་ཆེན་པོའི་ངོ་བོ་ཐིག་ལེ་སྔོ་སྐྱ་གཅིག་ཏུ་གྱུར་པར་བསམས་ལ་ང་རྒྱལ་འཛིན་པའི་སྔགས་བརྗོད་མི་དགོས། ས་བོན་ལས་བསྐྱེད་པ་དང་། མངོན་བྱང་གི་ཡན་ལག་བཞི་པའི་ཕྱོགས་རྣམས་ལ་ཞུ་བ་འདི་དང་འདྲའོ། །གླུས་བསྐུལ་བ་ནི་ཐམས་ཅད་ལ་འདྲ་ལ། དེ་ནས་སྐད་ཅིག་གིས་བསྐྱེད་པ་ལ་ནི་ཐེག་ལེ་དེ་སྐད་ཅིག་གིས་འབྲས་བུ་རྡོ་རྗེ་འཛིན་པར་བསྐྱེད། ས་བོན་ལས་བསྐྱེད་པ་ལ་ནི་འོག་ཡན་ལག་དྲུག་པ་ལྟར་རོ། །མངོན་བྱང་གི་གཙོ་བོ་མཉམ་སྦྱོར། འཁོར་མི་མཉམ་སྦྱོར་ལས་བསྐྱེད་པ་དང་། གཙོ་འཁོར་ཐམས་ཅད་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་ལས་བསྐྱེད་པ་རྣམས་ལ་ཐིག་ལེ་དེ་ཆ་གསུམ་དུ་ཆད་པ་ལས་འོག་གི་ཐིག་ལེ་ཨཱ་ལི་ལས་ཟླ་བ། སྟེང་གི་ཐིག་ལེ་ཀཱ་ལི་ལས་ཉི་མ། བར་གྱི་ཐིག་ལེ་ས་བོན་ལས་ཕྱག་མཚན་ས་བོན་གྱིས་མཚན་པ་རོ་གཅིག་ཏུ་འདྲེས་པ་ལས་འབྲས་བུ་རྡོ་རྗེ་འཛིན་པར་བསྐྱེད་དོ། །གཙོ་འཁོར་ཐམས་ཅད་ཨཱ་ལི་ཀཱ་ལི་སྤངས་པའི་མི་མཉམ་སྦྱོར་ལས་བསྐྱེད་པའི་ཕྱོགས་ལ་ཐིག་ལེ་དེ་ཆ་གསུམ་དུ་ཆད་པ་ལས་འོག་གི་ཐིག་ལེ་ཟླ་བ། སྟེང་གི་ཐིག་ལེ་ཉི་མ། བར་གྱི་ཐིག་ལེ་མན་ཆད་སྔར་དང་འདྲའོ། །ཡན་ལག་དྲུག་པའི་ཕྱོགས་རྣམས་ལ། རྒྱུ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པས། ནམ་མཁའ་ནས་བར་དོ་མཚོན་བྱེད་ཡིག་འབྲུ་ལྔ་ཞལ་དུ་ཞུགས། མཁར་སླེབ་པའི་རྐྱེན་གྱིས་བདུད་བཞིའི་སྟེང་དུ་བདེ་བ་ཆེན་པོའི་ངོ་བོ། རྡོ་རྗེ་སེམས་དཔའི་རང་བཞིན་གྱི་ཐིག་ལེར་གྱུར་པར་བསམས་ལ་ང་རྒྱལ་འཛིན་པའི་སྔགས་བརྗོད། དེ་ནས་གླུས་བསྐུལ། རྗེས་ཐིག་ལེ་ཧཱུྃ་ཨྃ་སྔོན་པོ་འོད་འབར་ཞིང་འཇིགས་པར་གྱུར། དེ་འོད་དུ་ཞུ་བ་ལས་འབྲས་བུ་རྡོ་རྗེ་འཛིན་པར་བསྐྱེད་དོ། །དྲུག་པ་ནི། སློབ་དཔོན་མི་ཐུབ་ཟླ་བས། དང་པོའི་བརྒྱད་པར་གསུངས་པའི་མི་མཉམ་སྦྱོར་དང་། ཕྱི་མའི་ལྔ་པར་གཞུང་འཁྲུགས་སུ་བསྡེབས་ནས་མངོན་པར་རྟོགས་པ་ཡན་ལག་དྲུག་པ་གཅིག་ཏུ་བྱེད་པས་སྐད་ཅིག་གིས་བསྐྱེད་པ་དང་། ས་བོན་ལས་བསྐྱེད་པ་དང་། མངོན་བྱང་གི་ཡན་ལག་བཞི་པའི་ཕྱོགས་རྣམས་མི་འབྱུང་ལ། མཉམ་སྦྱོར་ནི་རྒྱུ་རྡོ་རྗེ་འཆང་གི་སྒྲུབ་ཐབས་ལོགས་སུ་སྟོན་པས་འདིར་མི་སྦྱོར་རོ། །སློབ་དཔོན་མཚོ་སྐྱེས་ཀྱིས་དང་པོའི་བརྒྱད་པར་གསུངས་པའི་ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་སྤངས་པའི་མི་མཉམ་སྦྱོར་གཉིས་དང་། ཕྱི་མའི་ལྔ་པར་གསུངས་པའི་ས་བོན་ལས་བསྐྱེད་པ་དང་། སྐད་ཅིག་གིས་བསྐྱེད་པ་གཉིས་ཏེ། བཞི་པོ་གང་ཟག་བཞིའི་རྟོགས་པའི་རིམ་པས་བསྐྱེད་ཆོག་ཆ་དབྲི་བའི་མངོན་པར་རྟོགས་པ་ཚུལ་བཞིར་མཛད་དོ། །འདི་ལ་ཁ་ཅིག་མངོན་པར་རྟོགས་པ་ཚུལ་བདུན་ཞེས་དང་། གཞན་དག བཞི་གསུམ་བཅུ་གཉིས་བླ་མ་བཞེད། །ཅེས་པ་ལ་བརྟེན་ནས་ཚུལ་བཅུ་གཉིས་ཞེས་པ་ནི་ཕྱོགས་སུ་ཡང་མ་ཕྱིན་ཏེ། དེ་ལྟར་ན་བིརྺ་པའི་ལུགས་ལ་ཡང་བཞི་བཅུ་ཞེ་གཉིས་སུ་ཐལ་བའི་ཕྱིར་རོ། །ལུགས་འདིས་མཉམ་སྦྱོར་ནི་བདག་མེད་མ་དང་འབྲེལ་པར་འཆད་ཅིང་། ཡན་ལག་དྲུག་པའི་ཕྱོགས་རྣམས་ནི་མི་བཞེད་ལ། གཉིས་ཆར་གྱིས་ཀྱང་འཁོར་གྱི་ལྷ་མོ་སྤྲོ་ཚུལ་གཉིས་གཉིས་མི་བཞེད་པས་མངོན་པར་རྟོགས་པ་ཇི་སྐད་བཤད་པར་གྲངས་ངེས་པའོ། །དེས་ན་བིརྺ་པའི་མན་ངག་ལུགས་འདི་ལ་གྲུབ་ཆེན་མཚོ་སྐྱེས་དང་ཆ་མཚུངས་པའི་མངོན་རྟོགས་བཞིའི་དང་པོ་གཉིས་ལ། འཁོར་གྱི་ལྷ་མོ་སྤྲོ་ཚུལ་གཉིས་གཉིས་སུ་ཕྱེ་བས་བཞི། མཉམ་སྦྱོར་གྱི་ཡན་ལག་བཞི་པའི་ཕྱོགས་ལ་ལྷ་མོ་སྤྲོ་ཚུལ་གཉིས་སུ་ཕྱེ་བས་དྲུག མངོན་བྱང་གསུམ་པོ་རེ་རེ་ལ་ཡན་ལག་དྲུག་པའི་ཕྱོགས་རེ་རེ། དེ་རེ་རེ་ལ་ཡང་འཁོར་སྤྲོ་ཚུལ་གཉིས་གཉིས་སུ་ཕྱེ་བས་བཅུ་བཞིར་འགྱུར་བ་འདི་ནི་རྒྱུད་ཀྱི་སྟེང་དུ་མན་ངག་གི་བཤད་ཚུལ་མཚུངས་པ་མེད་པ་སྟེ། ཐོས་པ་ཙམ་ཡང་དོན་ཡོད་དུ་བྱས་པའོ། །འོ་ན་རྗེ་བཙུན་གྱིས་མངོན་པར་རྟོགས་པ་བཅུ་བཞིའམ་བཅོ་ལྔར་སྣང་མོད་ཀྱི། རྒྱུད་ཉིད་ཀྱི་སྟེང་དུ་རྟོགས་པར་བྱའོ། །ཞེས་གསུངས་པའི་བཅོ་ལྔ་པ་གང་སྙམ་ན་འདི་ལ་སྨིན་བྱེད་དབང་གི་སྒོ་ནས་རྡུལ་ཚོན་གྱི་དཀྱིལ་འཁོར་གཉིས་གསུངས་པ་དང་། ལྟ་བའི་སྒོ་ནས་ཕྱི་ནས་དེ་ཉིད་ཡང་དག་བཤད། །ཅེས་པ་ཡུམ་གྱི་སྐབས་སུ་གསུངས་པ་དང་། གྲོལ་ལམ་བསྐྱེད་རིམ་ལ་ཡབ་ཡུམ་གཉིས་གཙོ་བོར་གསུངས་པ་དང་། རྫོགས་རིམ་ལ་རང་བྱིན་རླབས་དང་། དཀྱིལ་འཁོར་འཁོར་ལོར་ལམ་འབྲས་ནས་བཤད་པ་ཕལ་ཆེར་ཡུམ་གྱི་སྐབས་སུ་གསུངས་པ་དང་། སྤྱོད་པའི་སྐབས་སུ་བུད་མེད་དང་སྐྱེས་པའི་རྟེན་ཅན་གཉིས་ཀས་སྤྱོད་པ་བྱེད་ཚུལ་གསུངས་པ་དང་། ཉེ་རྒྱུའི་སྐབས་སུ་བུད་མེད་ཡུམ་གྱི་རྣལ་འབྱོར་དང་ལྡན་པས་ས་བཅུ་པ་ཐོབ་པའི་ཚེ། ཉེ་རྒྱུ་བྱེད་ཚུལ་ལ་དོགས་གཅོད་གསུངས་པ་དང་། འབྲས་བུ་ལོངས་སྤྱོད་རྫོགས་པའི་སྐུ་ཡབ་ཡུམ་ཞལ་སྦྱོར་གྱི་རྣམ་པར་བཞུགས་པ་སྟེ། རྒྱུ་དང་། ལམ་དང་། འབྲས་བུའི་གནས་སྐབས་ཀུན་ལ་སྦྱར་ནས་ངོས་འཛིན་དགོས་པར་སྣང་སྟེ་ངག་ལས་ཤེས་སོ། །དྲུག་པ་རྣལ་འབྱོར་རྣམ་བཅུས་ཉམས་སུ་ལེན་པའི་ཐབས་ནི། འོ་ན་མངོན་པར་རྟོགས་པ་བཅུ་བཞིའམ་བཅོ་ལྔ་པོ་གང་ཟག་གཅིག་གིས་ཉིན་ཞག་ཕྲུགས་གཅིག་ལ་ཇི་ལྟར་ཉམས་སུ་ལེན་སྙམ་ན། དེ་ལ་ཀྱེ་ཡི་རྡོ་རྗེ་ཡི། །རྣལ་འབྱོར་རྣམ་པ་གཉིས་ཡིན་ཏེ། །མཉམ་པར་གཞག་པའི་རྣལ་འབྱོར་དང་། །མཉམ་པར་མ་གཞག་རྣལ་འབྱོར་རོ། །མཉམ་གཞག་བསྐྱེད་རྫོགས་གཉིས་ཡིན་ཏེ། །མ་གཞག་ཉལ་དང་ལྡང་དང་ཁྲུས། །མཆོད་གཏོར་བཟླས་དང་ཁ་ཟས་དང་། །སྤྱོད་ལམ་རྗེས་ཆགས་རྣལ་འབྱོར་བརྒྱད། །ཞེས་པ་ལྟར་རྣལ་འབྱོར་བཅུས་ཉམས་སུ་བླང་བར་བྱ་བ་ཡིན་པ་ལས་ཉམས་སུ་ལེན་པའི་གོ་རིམ་ནི་ཉལ་པ་དང་། ལྡང་བ་དང་། ཁྲུས་དང་། མཆོད་གཏོར་གྱི་རྣལ་འབྱོར་སྔོན་དུ་བཏང་ནས་མཉམ་གཞག་བསྐྱེད་རྫོགས་གཉིས་བསྒོམ། དེ་ནས་བཟླས་པའི་རྣལ་འབྱོར་སོགས་བཞི་ཉམས་སུ་ལེན་པའོ། །དེ་དག་ཀྱང་རིམ་པ་ལྟར་བཤད་ན། དང་པོ་ཉལ་བའི་རྣལ་འབྱོར་ལ་གཉིས་ཏེ། རང་བཞིན་ལྷན་སྐྱེས་སྟོང་པའི་ངང་ལ་ཉལ་བ་དང་། ཞུ་བདེ་ལྷན་སྐྱེས་བདེ་བའི་ངང་ལ་ཉལ་བའོ། །དང་པོ་ནི། མདང་ནུབ་མོ་སྲོད་ཐུན་གྱི་རྗེས་ལ་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་ལྷ་མོ་བརྒྱད་ལ། དེ་ཞལ་བརྒྱད་ལ། ཡུམ་ཡང་ཡབ་ལ། ཡབ་ཀྱི་ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ལ། དེ་ཡང་སྙིང་གའི་ཧཱུྃ་ལ། ཧཱུྃ་གི་ཞབས་ཀྱུ་ཁོག་པ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། ནཱ་ད་ཡང་མི་དམིགས་ཏེ་སྟོང་པ་ཉིད་ཀྱི་ངང་ལ་ཉལ་ལོ། །གཉིས་པ་ནི་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། སྲུང་འཁོར་མི་བསྡུ་བར་ཞག དེ་ནས་དུར་ཁྲོད་བརྒྱད་ནས་ལྷ་མོ་བརྒྱད་ཞལ་བརྒྱད་ལ་བསྡུ་བའི་བར་སྔ་མ་ལྟར་བྱས་ལ། དེ་ནས་ཡབ་ཡུམ་གཉིས་སྙོམས་འཇུག་བྱས་པས། རྩ་ཕྲན་སྟོང་ཕྲག་བདུན་ཅུ་རྩ་གཉིས་བསྐུལ་བས་གཏུམ་མོ་རྗེས་ཆགས་ཀྱི་མེས་འོད་དུ་ཞུ་ནས་བདེ་བ་ཆེན་པོའི་ངོ་བོ་ཐིག་ལེར་འགྱུར་པའི་ངང་ལ་ཉལ་ལོ། །དེ་ཡང་བདེ་ཤས་ཆེ་ན་རང་བཞིན་ལྷན་སྐྱེས་སྟོང་པའི་ངང་ལ་ཉལ་བས་ཟུང་འཇུག་ཏུ་འགྱུར། སྟོང་ཤས་ཆེ་ན་ཞུ་བདེ་ལྷན་སྐྱེས་ཀྱི་ངང་ལ་ཉལ་བས་ཟུང་འཇུག་ཏུ་འགྱུར་རོ། །དེ་ལྟར་ཉལ་བའི་རྣལ་འབྱོར་ལ་དགོས་པ་གཉིས་ཏེ། ཐ་མལ་གྱི་གཉིད་ཀྱིས་མི་བརྫི་བ་དང་། ཆོས་སྐུའི་ངོ་བོ་ལྷན་སྐྱེས་ངོ་འཕྲོད་པའོ། །གཉིས་པ་ལྡང་བའི་རྣལ་འབྱོར་ལ་ཡང་གཉིས་ལས། ཉལ་ལུགས་དང་པོ་ལྟར་ན། ལྡང་བའི་ཚེ་ཆུ་ལས་ཉ་འཕར་གྱི་ཚུལ་དུ་ཀྱེ་རྡོ་རྗེའི་སྐུར་ལངས་ནས་སྣང་བའི་དངོས་པོ་ལྷར་བསྒོམས་པའོ། །ཉལ་ལུགས་གཉིས་པ་ལྟར་ན་རང་བཞིན་གྱི་གནས་ནས་འོངས་པའི་མཚམས་ཀྱི་ལྷ་མོ་བཞིས། རྗེ་བཙུན་སྙིང་རྗེའི་ཡིད་བཞེངས་ཤིག །ཅེས་སོགས་ཀྱིས་བསྐུལ་བར་བསམས་ནས་སྲོད་ཐུན་ཡན་ལག་དྲུག་པ་ཡིན་ན། ཐིག་ལེ་ཧཱུྃ་ཨྃ་སྔོན་པོ་འོད་འབར་ཞིང་འཇིགས་པར་གྱུར། དེ་ལས་འབྲས་བུ་རྡོ་རྗེ་འཛིན་པར་བཞེངས། ཡན་ལག་བཞི་པ་ཡིན་ན་ཐིག་ལེ་དེ་ཐིག་ལེ་ཆ་གསུམ་དུ་གྱུར་ནས་མི་མཉམ་སྦྱོར་གྱི་མངོན་བྱང་ལས་འབྲས་བུ་རྡོ་རྗེ་འཛིན་པར་བཞེངས་ཏེ། སྣོད་བཅུད་ལྷའི་འཁོར་ལོར་བལྟའོ། །ལྡང་ལུགས་གཉིས་ཀ་ལ་ཡང་དེ་ནས་རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་དང་། བསྔོ་བ་སྨོན་ལམ་དང་། སྐྱེ་མཆེད་སྐུ་གསུང་ཐུགས་བྱིན་གྱིས་བརླབ་པ་བྱ་སྟེ་དེས་སྲོད་ཐུན་རྫོགས་སོ། །ལྡང་བའི་རྣལ་འབྱོར་ལ་ཡང་དགོས་པ་གསུམ་སྟེ། ཐ་མལ་གྱི་རྣམ་རྟོག་བཟློག་པ་དང་། བར་ཆད་ཀྱི་བགེགས་བཟློག་པ་དང་། ལྷས་ལྷ་ལ་མཆོད་པ་བྱས་པས་ཚོགས་མྱུར་དུ་རྫོགས་པའོ། །གསུམ་པ་ཁྲུས་ཀྱི་རྣལ་འབྱོར་ནི། དེ་ནས་བསམ་གཏན་གྱི་གྲོགས་སུ་འགྲོ་ན་ཁྲུས་བྱ། མི་འགྲོ་ན་མ་བྱས་ཀྱང་བཏུབ། སྐབས་འདིའམ་གནས་སྐབས་གཞན་དུའང་རུང་སྟེ་ཁྲུས་བྱེད་པའི་ཚེ་རང་གི་སྙིང་ག་ནས་གདན་གསུམ་ཚང་བའི་དབང་ལྷ་ནམ་མཁར་སྤྱན་དྲངས་ནས། དེ་ལ་མཆོད་པ། བསྟོད་པ། གསོལ་བ་གདབ་པའི་བར་བྱས་ལ། དངོས་སུ་ཁྲུས་བྱ་ཞིང་། སེམས་ཀྱིས་རིགས་ལྔས་བུམ་པ་བདུད་རྩིས་གང་བ་ཐོགས་ནས། འོག་དབང་གི་སྐབས་ལྟར་དབང་བསྐུར་བར་བསམ། ཡན་ལག་བསྲེ་བ་དང་། རིགས་བདག་གིས་རྒྱས་གདབ་ནི་མི་དགོས་ཅེས་རྗེ་བཙུན་རྩེ་མོས་གསུངས་ལ། རྗེ་བཙུན་གྱིས་བདག་མེད་མའི་སྒྲུབ་ཐབས་སུ་རིགས་བདག་གིས་རྒྱས་གདབ་པ་ཡང་གསུངས་ཏེ། སྔ་མ་ནི་ཁྲུས་ལམ་དུ་བསྒྱུར་བ་ཙམ་ཡིན་གྱི། ཡན་ལག་བཞི་རྫོགས་ཀྱི་སྐབས་མ་ཡིན་པས་མ་བྱས་ཀྱང་ཆོག་པ་བསྡུས་པའི་ལུགས་དང་། ཕྱི་མ་ནི་དེ་ལྟར་བྱས་ན་ཆུ་ལྷག་མ་ལ་རིགས་བདག་ཏུ་འགྱུར་བ་རྒྱས་པའི་ལུགས་སོ། །ཡང་ན་ཡབ་ཡུམ་གྱི་ཁྱད་པར་ཡང་ཡིན་ནམ་སྙམ་མོ། །དགོས་པ་ཡང་གཉིས་ཏེ་ཉིན་ཞག་གཅིག་གི་རྩ་བ་དང་ཡན་ལག་གི་ལྟུང་བའི་ཉེས་པ་ཕྲ་མོ་འདག་པ་དང་། བསམ་གཏན་གྱི་གྲོགས་སུ་འགྲོ་བའི་དགོས་པའོ། །བཞི་པ་མཆོད་གཏོར་གྱི་རྣལ་འབྱོར་ནི་ལོགས་སུ་བཤད་ཡོད་པས་དེར་བལྟ་བར་བྱའོ། །དེ་ལྟར་མཉམ་པར་མ་བཞག་པའི་རྣལ་འབྱོར་བཞི་པོ་སྔོན་དུ་བཏང་ནས་མཉམ་བཞག་བསྐྱེད་རྫོགས་གཉིས་ལ་འཇུག་པས་ལྔ་པ་བསྐྱེད་པའི་རིམ་པ་བསྒོམ་པ་ལ་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་ཡང་གཉིས་ཏེ། ཐུན་མོང་གི་སྔོན་འགྲོ་དང་། ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། རྒྱ་གར་གྱི་སྒྲུབ་ཐབས་ཀྱི་གཞུང་རྣམས་དང་། རྗེ་བཙུན་སྐུ་མཆེད་ཀྱི་ཡབ་ཡུམ་གྱི་སྒྲུབ་ཐབས་རྣམས་སུ་སྔོན་འགྲོ་འདི་རྣམས་བྱེད་པའི་གསལ་ཁ་མེད་ཀྱང་། བླ་ཆེན་འཕགས་པས་སྐྱབས་འགྲོ་སེམས་བསྐྱེད། རྡོ་རྗེ་སེམས་དཔའི་བསྒོམ་བཟླས་གསུམ་སྐབས་འདིར་གསལ་བར་བཤད་པ་ནི་སྔོན་གྱི་གདམས་ངག་ཇི་ལྟ་བ་བཞིན་བྲིས་པར་སྣང་བས་ལེགས་པ་ཡིན་ལ། རྭ་པ་དང་། དཔྱལ་པ་སོགས་བོད་ཀྱི་སྔགས་པ་གཞན་རྣམས་ཀྱི་ཕྱག་ལེན་ལ་ཡང་ཡོད་དོ། །དེ་ལ་སྒྲུབ་ཐབས་ཀྱི་གཞུང་རྣམས་ལས་མ་གསུངས་པ་ནི་རྣལ་འབྱོར་བཅུའི་ཉམས་ལེན་གོ་རིམ་བཞིན་དུ་བཤད་པའི་དབང་དུ་བྱས་ལ། དེའི་ཚེ་མདང་ནུབ་མོ་ཉལ་བའི་རྣལ་འབྱོར་དང་། ཐོ་རངས་ལྡང་བའི་རྣལ་འབྱོར་དང་། མཆོད་གཏོར་གྱི་རྣལ་འབྱོར་རྣམས་བར་མ་ཆད་དུ་བྱས་ནས་བསྐྱེད་རིམ་བསྒོམ་པ་ནི་ཐུན་མཚམས་ཀྱི་ཉེས་ལྟུང་མ་བྱུང་བས། ཚོགས་ཞིང་སྤྱན་དྲང་བ་ནས་བརྩམ་སྟེ། བསྒོམ་པའི་དབང་དུ་བྱས་པའོ། །འཕགས་པས་སྐབས་འདིར་བཤད་པ་ནི་རྣལ་འབྱོར་དེ་དག་ཚུལ་བཞིན་དུ་མ་བྱུང་ན། ཐོ་རངས་ཀྱི་ཐུན་ལ་ཡང་དགོས་ཤིང་། ཐུན་ཕྱི་མ་རྣམས་ལ་ནི་ངེས་པར་དགོས་པའི་དབང་དུ་བྱས་པ་སྟེ། རྗེ་བཙུན་རྩེ་མོའི་དབང་ཆུ་གཉིས་དང་། རྗེ་བཙུན་དང་། ས་པཎ་གྱི་ཚོགས་འཁོར་གྱི་གཞུང་གཉིས་ལས་ཕྱི་མ་རེད་དམ། སྲོད་ཐུན་ལ་མཛད་པའི་དབང་དུ་བྱས་ནས་ཡི་གེ་བརྒྱ་པས་རྒྱུད་སྦྱང་སྒྲུབ་ཐབས་ཀྱི་སྔོན་འགྲོར་ངེས་པར་དགོས་པར་གསུངས་པའི་དགོངས་པ་དཔྱིས་ཕྱིན་པའོ། །འདི་བཤད་པ་ལ་གསུམ། སྔོན་འགྲོ་གསུམ་བྱ་དགོས་པའི་རྒྱུ་མཚན། ཇི་ལྟར་བྱ་བའི་ཚུལ། དེ་ལྟར་བྱས་པའི་དགོས་པའོ། །དང་པོ་ནི། སློབ་དཔོན་འཇམ་དཔལ་གྲགས་པས། སྡོམ་གསུམ་ཆོ་གར་མི་ལྡན་པར། །སྔགས་པའི་བདག་ཉིད་མི་འགྱུར་ཏེ། །ཞེས་གསུངས་པས། སྒྲུབ་པ་པོའི་རྒྱུད་སྡོམ་པ་གསུམ་དང་མི་ལྡན་པར་བསྐྱེད་རྫོགས་ཀྱི་ལམ་བསྒོམས་ཀྱང་ཡེ་ཤེས་མི་སྐྱེ་བས། རྒྱུད་དེ་གསུམ་དང་ལྡན་པ་ནི་མི་དགོས་ཁ་མེད་ཀྱི་ལམ་གྱི་གཞི་ཆེན་པོ་ཡིན་ནོ། །སྡོམ་པ་གསུམ་ལྡན་གྱི་གང་ཟག་དེས་བསྐྱེད་རིམ་ཉམས་སུ་ལེན་པའི་ཚེ་རང་རྒྱུད་ཀྱི་སྡོམ་པ་གསུམ་ལ་ཉེས་པ་མེད་པ་བྱས་པས་བསྒོམ་དགོས་ལ། དེ་ལ་ཉེས་པ་ཆེན་པོ་རྣམས་ནི་སླར་བླང་བ་དང་། ཕྱིར་བཅོས་པ་ལ་སོགས་པའི་ཐབས་ཀྱིས་སྦྱང་དགོས་ལ། ཐུན་བར་གྱི་ཉེས་པ་ཆུང་ངུ་རྣམས་སྦྱོང་བའི་ཕྱིར་དུ་ཐབས་འདི་གསུམ་བྱ་སྟེ། སློབ་དཔོན་འཇམ་དཔལ་གྲགས་པས། དང་པོ་སོ་སོར་ཐར་པ་ཡི། །སྡོམ་པ་ལེགས་པར་མ་བཟུང་བར། །གསུང་བ་ཚོགས་ཚུལ་གནས་བྱེད་པ། །ཐ་བ་ལས་འབྲས་བསྐྱེད་བཞིན་ནོ། །རྩ་བ་རྙེད་པར་མི་འགྱུར་བས། །དང་པོར་སྐྱབས་འགྲོ་ནས་བརྩམས་ཏེ། །སྡོམ་གསུམ་ཆོ་ག་རབ་ཏུ་བརྟག །ཞེས་གསུངས་སོ། །དེས་ན་སོ་ཐར་གྱི་སྡོམ་པ་ཡར་ལྡན་དུ་བྱ་བའི་ཕྱིར་དུ་སྐྱབས་འགྲོ་དང་། བྱང་སེམས་ཀྱི་སྡོམ་པ་འཕེལ་བའི་ཕྱིར་སེམས་བསྐྱེད་དང་། རིག་འཛིན་གྱི་སྡོམ་པའི་ཉེས་ལྟུང་རྣམས་བྱིན་གྱིས་བརླབ་ཅིང་ལྟུང་བ་འཕེལ་དུ་མི་གཞུག་པའི་ཕྱིར། རྡོ་རྗེ་སེམས་དཔའི་བསྒོམ་བཟླས་རྣམས་བྱས་པས། རང་རྒྱུད་ཀྱི་སྡོམ་པ་གསུམ་པོ་ཡོངས་སུ་དག་པར་བྱས་ནས་ལམ་བསྒོམ་པ་ཡིན་ནོ། །གཉིས་པ་ལ་གསུམ། སྐྱབས་འགྲོའི་རྣལ་འབྱོར། སེམས་བསྐྱེད་ཀྱི་རྣལ་འབྱོར། རྡོ་རྗེ་སེམས་དཔའི་རྣལ་འབྱོར་རོ། །དང་པོ་ནི། སྐྱབས་སུ་འགྲོ་བའི་གང་ཟག་ནི། མཐའ་ཡས་པའི་འགྲོ་བ་དྲིན་ཅན་གྱི་ཕ་མར་གྱུར་པ་རྣམས་དང་། རང་ཉིད་དོ། །དུས་ནི་སྙིང་པོ་བྱང་ཆུབ་ཀྱི་གོ་འཕང་མ་ཐོབ་ཀྱི་བར་དུའོ། །ཡུལ་ལ་མི་འདྲ་བ་དུ་མ་ཡོད་པ་རྣམས་ནི་རྒྱུན་བཤགས་ཀྱི་སྐབས་སུ་འཆད་ལ། འདིར་ནི་དཀྱིལ་འཁོར་གྱི་གཙོ་བོ་བླ་མ་དང་ཐ་མི་དད་པ་ནི་སངས་རྒྱས་དཀོན་མཆོག དེའི་ཐུགས་རྒྱུད་ལ་བཞུགས་པའི་རིམ་གཉིས་ཀྱིས་བསྡུས་པའི་རྟོགས་པ་མཐར་ཐུག་པ་ཆོས་དཀོན་མཆོག རྟོགས་པ་དེ་དཔེའི་ཡེ་ཤེས་ཀྱི་ཚུལ་གྱིས་རྒྱུད་ལ་བཞུགས་ཤིང་དབང་བསྐུར་གྱི་བསླབ་པ་རང་བས་རྒན་པར་གྱུར་པའི་གང་ཟག་དང་། དཀྱིལ་འཁོར་ལ་བཀོད་པའི་ལྷ་རྣམས་ནི་དགེ་འདུན་དཀོན་མཆོག་སྟེ། དེ་རྣམས་སོ། །ཚུལ་ནི་སེམས་ཅན་ཐམས་ཅད་ཀྱི་དོན་དུ་རང་ཉིད་དཀོན་མཆོག་གསུམ་གྱི་གོ་འཕང་ཐོབ་པར་འདོད་པའི་ཚུལ་གྱིས་སོ། །རྒྱུ་ནི་འདིར་སྙིང་རྗེ་ཆེན་པོ་དང་། དད་པ་གཉིས་སུ་ཤེས་པར་བྱའོ། །ཉམས་སུ་ལེན་པའི་ཚུལ་ནི་མདུན་གྱི་ནམ་མཁར། ཀྱེ་རྡོར་ལྷ་དགུའི་དཀྱིལ་འཁོར་གསལ་བར་དམིགས་ལ། གཙོ་བོའི་རྒྱབ། ལྷ་མོའི་མདུན་དུ་རིན་པོ་ཆེའི་ཁྲིའི་སྟེང་དུ་ཆོས་པོ་ཏི་བྲག་རི་བརྩེགས་པ་ལྟ་བུ་ངོ་བོ་འགོག་ལམ་གྱིས་བསྡུས་པའི་དམ་ཆོས་སུ་མོས་ནས། ངག་ཏུ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཞེས་སོགས་བརྗོད་དེ། དེ་བཞིན་གཤེགས་པ་ཐམས་ཅད་ཀྱི་སྐུ་ནི་རྣམ་པར་སྣང་མཛད། གསུང་ནི་འོད་དཔག་མེད། ཐུགས་ནི་མི་བསྐྱོད་པ། ཡོན་ཏན་ནི་རིན་ཆེན་འབྱུང་ལྡན། ཕྲིན་ལས་ནི་དོན་ཡོད་གྲུབ་པ་སྟེ་རིགས་ལྔའི་ངོ་བོ་སངས་རྒྱས་ཀུན་འདུས། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་ནི་ཆོས་ཀུན་འདུས། འཕགས་པའི་དགེ་འདུན་ཐམས་ཅད་ཀྱི་མངའ་བདག་ནི་དགེ་འདུན་ཀུན་འདུས་ཏེ། དཀོན་མཆོག་གསུམ་པོ་གཅིག་ཏུ་བསྡུས་པ་རྡོ་རྗེ་འཆང་ནས་རྩ་བའི་བླ་མའི་བར་གྱི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཞེས་པ་དང་། སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཞེས་པ་གཉིས་ཆར་གྱི་ཚེ་དཀྱིལ་འཁོར་གྱི་གཙོ་བོ་ལ་དམིགས་པ་གཏད། དམ་པའི་ཆོས་རྣམས་ལ་སྐྱབས་སུ་མཆིའོ། །ཞེས་པའི་ཚེ། རྒྱབ་ཀྱི་ཆོས་པོ་ཏི་ལ་དམིགས་པ་གཏད། འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་པའི་ཚེ་འཁོར་གྱི་ལྷ་མོ་ལ་དམིགས་པ་གཏད། དེ་ལྟ་བུའི་སྐྱབས་འགྲོ་བཞི་སྐོར་གསུམ་ཡན་ཆད་ཅི་ནུས་སུ་བྱས་ལ། མཇུག་ཏུ་བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་པའི་རྐྱེན་གྱིས་འཁོར་གྱི་ལྷ་མོ་དེ་འོད་ཟེར་དཀར་པོའི་རྣམ་པར་ཞུ་ནས་རང་གི་སྤྱི་བོ་ནས། ཆོས་པོ་ཏི་འོད་ཟེར་དམར་པོའི་རྣམ་པར་ཞུ་ནས་རང་གི་མགྲིན་པ་ནས། དཀྱིལ་འཁོར་གྱི་གཙོ་བོ་འོད་ཟེར་སྔོན་པོའི་རྣམ་པར་ཞུ་ནས་སྙིང་གར་ཐིམ་པས་དཀོན་མཆོག་གསུམ་དང་། རང་གི་ལུས་ངག་ཡིད་གསུམ་དབྱེར་མེད་དུ་བསམ་མོ། །གཉིས་པ་ནི། དེ་ནས་བྱང་ཆུབ་ཀྱི་མཆོག་ཏུ་སེམས་བསྐྱེད་པའི་ཆོ་ག་བྱ་སྟེ། དེ་ཡང་ཁམས་གསུམ་གྱི་སེམས་ཅན་ཐམས་ཅད་བདག་གི་ཕ་མར་མ་གྱུར་པ་གཅིག་ཀྱང་མེད་ལ། ཕ་མ་ནམ་བྱས་རེས་ཀྱིས་ཕན་བཏགས་པའི་དྲིན་ཅན་ཤ་སྟག་ཡིན་པས། དྲིན་ཅན་འདི་རྣམས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོར་མཐའ་ཡས་པའི་སྡུག་བསྔལ་གྱིས་གཟིར་པ་རྣམས་སྙིང་རེ་རྗེ་སྙམ་དུ་ཡང་ནས་ཡང་དུ་བསྒོམ་པར་བྱ་སྟེ། འདི་སྔོན་དུ་མ་སོང་ན་སེམས་བསྐྱེད་རྣལ་མ་མི་སྐྱེ་བས་དེ་ལྟར་རྒྱུ་སྙིང་རྗེ་སྔོན་དུ་སོང་ནས། འབྲས་བུ་སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་བསྒོམ་སྙམ་དུ་བྱང་ཆུབ་ཀྱི་སེམས་ཡང་དང་ཡང་དུ་ཡིད་ལ་བྱའོ། །རྗེ་བཙུན་གོང་མའི་གསུང་རབ་རྣམས་ལས། བྱང་ཆུབ་ཀྱི་སེམས་བསྒོམ་ཚུལ་འདི་ལྟར་གསུངས་པ་སྒྲུབ་ཐབས་གང་བསྒོམ་ཡང་སྔོན་འགྲོའི་ཚིག་ཀྱང་འདི་ཉིད་ཀྱིས་ཆོག་གོ །ཁ་ཅིག ཇོ་བོ་རྗེས་མཛད་པའི་ཚིགས་བཅད་དང་། པཎ་ཆེན་ཤཱཀྱ་ཤྲཱིས་མཛད་པའི་འགྲོ་རྣམས་བསྒྲལ་འདོད་བསམ་པ་ཡིས། །ཞེས་སོགས་ཀྱི་ཚིག་གིས་མཛད་པ་ཡང་འགལ་བ་མེད་མོད་ཀྱི། དེ་དག་ནི་སྐྱབས་འགྲོ་དང་སེམས་བསྐྱེད་སྦྲགས་ནས་ལེན་པའི་ལུགས་ཡིན་ལ། འདིར་སྐྱབས་འགྲོ་སྔོན་དུ་སོང་བའི་སེམས་བསྐྱེད་ལ་ནི་ཚིག་སྔ་མ་ཉིད་གཙང་བར་སྣང་ངོ་། །གསུམ་པ་ལ་གསུམ། སྤྱིར་བཤད་པ་དང་། བྱེ་བྲག་ཏུ་ཕྱེ་སྟེ་བཤད་པ། དེ་དག་གི་དགོས་པའོ། །དང་པོ་ནི། སྔགས་ཀྱི་ཡན་ལག་མ་ཚང་བའི་ལྟུང་བ་བྱུང་ན། དེ་བྱིན་གྱིས་རློབ་པའི་ཐབས་ལ། དམ་ཚིག་རྡོ་རྗེའི་བསྒོམ་བཟླས་དང་། རྡོ་རྗེ་སེམས་དཔའི་བསྒོམ་བཟླས་གཉིས་གསུངས་པས་གང་བྱས་ཀྱང་འདྲ་མོད། འདིར་བླ་མ་དག་ཆ་ཕྱི་མ་མཛད་པ་ནི། སློབ་དཔོན་འཇམ་དཔལ་གྲགས་པས། གལ་ཏེ་ལྟུང་སོགས་བྱུང་གྱུར་ན། །ཡི་གེ་བརྒྱས་ནི་བྱིན་གྱིས་བརླབ། །ཇི་སྲིད་དུས་ལས་མ་འདས་པར། །དག་པའི་ལས་ལ་ཉེར་གནས་བྱ། །འགྱོད་བྱས་ཉེས་པ་འཕེལ་མི་འགྱུར། །ཞེས་གསུངས་པ་དང་མཐུན་ནོ། །དེ་ཇི་ལྟར་བྱ་བ་ཡང་རྒྱུད་སྡེ་རྣམས་ལས་མི་འདྲ་བ་མང་པོ་ཞིག་གསུངས་ཀྱང་། འདིར་རྗེ་བཙུན་ས་སྐྱ་པ་རྣམས་ཀྱིས། བདེ་མཆོག་གི་བཤད་རྒྱུད། ཨ་བྷི་དྷ་ན་ལ་བརྟེན་པར་སྣང་བས། དེ་ལྟར་དུ་བཤད་ན། རྒྱུད་དེའི་ལེའུ་ཉི་ཤུ་རྩ་ལྔ་པར་ཡིག་བརྒྱ་ལྷ་ཐམས་ཅད་ཀྱི་གསང་སྔགས་ཡིན་ཚུལ། ཡིག་བརྒྱའི་སྔགས། དེའི་འཁྲུལ་འཁོར་གྱི་ཕྱིར་བཟློག་རྣམས་གསུངས་ལ། ལེའུ་ཉི་ཤུ་རྩ་དྲུག་པར། གང་དུ་དམ་ཚིག་ཉམས་པ་ལ། །སྦྱོར་བ་འདི་ནི་སྦྱིན་པར་བྱ། །ཞི་བར་གྱུར་ནས་བླ་མེད་པས། །རྣལ་འབྱོར་མ་ཡི་དབང་ཡང་བསྐུར། །དུས་བཞི་རྟག་ཏུ་རིམ་པ་ཡིས། །ཕྱི་དང་ནང་གི་ཆུས་ཁྲུས་བྱ། །ཡང་ན་དམ་ཚིག་སྡོམ་པ་བླངས། །བླ་མ་ལ་ནི་གསོལ་བ་གདབ། །བདག་ནི་མི་ཤེས་རྨོངས་པ་སྟེ། །ཞེས་སོགས་ནས། འགྲོ་བའི་གཙོ་ལ་བདག་སྐྱབས་མཆི། །དེ་ནི་ཐེ་ཚོམ་མེད་བྱས་ནས། །ངེས་པར་དངོས་གྲུབ་ཅན་དུ་འགྱུར། །ཞེས་ལྟུང་བ་སྦྱང་བ་དང་། ལྟུང་བཤགས་ཀྱི་ཆོ་ག་གསུངས་ནས། ལྷ་གང་བསྒོམ་གསལ་བར་མ་བཤད་པ་ལ། རྒྱུད་དེའི་ལེའུ་དྲུག་ཅུ་རྩ་བཞི་པར་རྡོ་རྗེ་སེམས་དཔའ་ཞལ་དྲུག་པ་སོགས་གསུངས་ཀྱང་། དེ་རྣམས་སྤྲོས་པ་ཆེ་བས་མ་བཤད་པར། ལེའུ་ཉེར་བཞི་པར་འཁོར་ལོ་བསྒྱུར་བ་དྲུག་གི་དཀྱིལ་འཁོར་གསུངས་པའི་ནང་ནས། རྡོ་རྗེ་སེམས་དཔའི་དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་ཡུམ་དང་བཅས་པ་དེ་ཟུར་དུ་ཕྱུང་ནས་ཆོ་ག་འདི་དང་སྦྱར་བར་སྣང་བས། དེ་བཞིན་དུ་འཆད་ཤེས་དགོས་སོ། །གཉིས་པ་ལ་གསུམ། ལྷ་བསྒོམ་པ། སྔགས་བཟླ་བ། བཤགས་སྡོམ་བྱ་བའོ། །དང་པོ་ནི། བླ་མ་གཞན་དག་རང་རྡོ་རྗེ་སེམས་དཔར་བསྒོམ་པར་འདོད་ཅིང་། ཁ་ཅིག་རང་ལྷར་བསྐྱེད་པའི་སྙིང་གར་རྡོར་སེམས་བསྐྱེད་པར་འདོད་ཀྱང་། འདིར་རྗེ་བཙུན་གྱིས་རང་གི་སྤྱི་བོར་བསྒོམ་པར་བཤད་པ་ནི་ངེས་བརྗོད་བླ་མའི་སྔར་གྱི་ལུང་ལས། ཕྱི་དང་ནང་གི་ཆུས་ཁྲུས་བྱ། །ཞེས་པའི་དོན་དུ་མངོན་ཏེ། སྤྱི་བོར་རྡོར་སེམས་བསྒོམས་ནས། དེའི་སྦྱོར་མཚམས་ནས་བྱུང་བའི་ཆུས་དམ་ཚིག་ཉམས་པའི་དྲི་མ་འཁྲུད་ཅེས་པའི་དོན་ཏོ། །གལ་ཏེ་འཁྲུས་ཀྱི་དོན་ནི། སྟོང་ཉིད་བསྒོམ་པ་ཡིན་ནོ་སྙམ་ན། ནང་ཁྲུས་ནི་དེ་ལྟར་དུ་ཡོ་ག་དང་། གདན་བཞི་སོགས་ལས་བཤད་ཀྱང་དེ་ནང་འཁྲུས་ཡིན་གྱི། ནང་གི་ཆུའི་ཁྲུས་མ་ཡིན་ལ། འདིར་ནི་ནང་གི་ཆུས་ཞེས་དམིགས་བསལ་དུ་འབྱུང་བའི་ཕྱིར་རོ། །དེས་ན་རྗེ་བཙུན་གྱིས་བདག་གི་སྤྱི་བོར་པདྨ་དང་ཟླ་བའི་སྟེང་དུ། རྡོ་རྗེ་སེམས་དཔའ་དཔལ་ཧེ་རུ་ཀ་ཞེས་བྱ་བ། སྐུ་མདོག་དཀར་པོ་རུས་པའི་རྒྱན་ཆ་དྲུག་གིས་བརྒྱན་པ། གཡས་རྡོ་རྗེ། གཡོན་དྲིལ་བུ་ཡུམ་རྡོ་རྗེ་སྙེམས་མ་སྐུ་མདོག་དང་རྒྱན་ཡབ་དང་འདྲ། གྲི་གུག་དང་ཐོད་པ་འཛིན་པས་འཁྱུད་པ། རྡོ་རྗེ་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་གིས་བཞུགས་པར་བསྒོམས་ལ། ཞེས་གསུངས་པ་ལྟར་རོ། །བླ་ཆེན་འཕགས་པས། ཆོ་ག་གསུམ་ལས་བསྐྱེད་ནས། སྐུ་གསུང་ཐུགས་བྱིན་གྱིས་བརླབ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི། རྗེ་བཙུན་གྱིས་གསུངས་པའི་དམ་ཚིག་རྡོ་རྗེའི་བསྒོམ་བཟླས་ཀྱི་བསྐྱེད་ཆོག་སྦྱར་བ་ཡིན་ལ། འདི་ནི་ལྗོན་ཤིང་ལས་གསུངས་པའི་བསྡུས་པ་དང་པོ་ཡིན་ཅིང་། སྔ་མ་ནི་བསྡུས་པ་ཕྱི་མའོ། །འཕགས་པའི་ལུགས་དེ་ལ་ཁ་ཅིག་དབང་བསྐུར་ནས་རིགས་ཀྱི་བདག་པོའི་རྒྱས་གདབ་པ་དང་། གཞན་དག་རྒྱས་གདབ་མེད་པའི་དོན། རྡོ་རྗེ་སེམས་དཔའ་རིགས་ཐམས་ཅད་ཀྱི་བདག་པོ་ཡིན་པས། རྒྱས་གདབ་མི་དགོས་ཞེས་པ་དང་། ཁ་ཅིག་མགོ་བརྒྱན་གྱི་སྟེང་གི་རྡོ་རྗེ་ཕྱེད་པས་གོ་ཆོད་པར་འདོད་པ་སོགས་ནི་དོན་མེད་པས་གཉིས་ཆར་ལ་ཡང་དམ་ཚིག་པ་བསྐྱེད་པའི་ཚེ་དབུ་རྒྱན་རང་ཆས་ཅན་དུ་བསྒོམ་པ་ངག་འདོན་ལ་མེད་ཀྱང་བསྒོམ་དོན་ལ་ངེས་པར་ཡོད་པ་སྟེ། གཞན་དུ་ན་རྗེ་བཙུན་གྱིས་གསུངས་པའི་སྐད་ཅིག་གིས་བསྐྱེད་པ་དེ་ལ་ཡང་དབུ་རྒྱན་གྱི་དཔྱད་པ་དེ་དག་དགོས་པའི་ཕྱིར་ཏེ། ལྗོན་ཤིང་ལས། དམ་ཚིག་སེམས་དཔའ་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་བཟླས་པ་ལ་འཇུག་པ་ཉིད་དོ། །ཞེས་གསུངས་པའི་དོན་ཡིན་པའི་ཕྱིར་རོ། །གཉིས་པ་ལ་གསུམ། བཟླས་པའི་དམིགས་པ། བཟླས་རྒྱུའི་སྔགས། ཇི་ཙམ་བཟླས་པའི་གྲངས་སོ། །དང་པོ་ནི་རྗེ་བཙུན་གྱིས་དེའི་ཐུགས་ཀར་ཟླ་བ་ལ་ཧཱུྃ་དཀར་པོ་གཅིག་བསམས་ལ། ཧཱུྃ་ལས་འོད་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ནས་ཧཱུྃ་ལ་ཐིམ། ཧཱུྃ་ལས་བདུད་རྩི་བབས། ཧེ་རུ་ཀའི་སྐུ་གང་། དེ་ནས་དབྱིབས་བརྒྱུད། ཡུམ་གྱི་སྐུ་གང་། ཡབ་ཡུམ་གྱི་སྐུ་ཐམས་ཅད་ལས་བདུད་རྩི་བབས། བདག་གི་སྤྱི་གཙུག་ནས་ཞུགས་ཏེ། ལུས་ཐམས་ཅད་གང་ནས་བཤང་གཅི་གཉིས་དང་། རྐང་མཐིལ་གཉིས་ལས་སྡིག་པའི་དྲི་མ་ཐམས་ཅད་ཁ་དོག་ནག་པོའི་གཟུགས་ཀྱིས་འཐོན་པ་བསམ། ཞེས་གསུངས་པ་ལྟར་བྱ་ཞིང་། དེ་ཡང་ཨ་བྷི་དྷ་ན་ལས། ཁྲོ་བོ་སངས་རྒྱས་དེ་བཞིན་གཤེགས། །ཐམས་ཅད་སྙིང་གར་བརྟན་བྱས་ཏེ། །བསྒོམས་པས་ཐམས་ཅད་བརྟན་པར་འགྱུར། །གལ་ཏེ་བདག་ཉིད་དངོས་གྲུབ་འདོད། །དངོས་གྲུབ་ཐམས་ཅད་གནས་པ་ཡིན། །ཞེས་བཤད་པའི་དོན་ཡིན་ནམ་སྙམ་སྟེ། དཔྱད་པར་བྱའོ། །བདུད་རྩི་འཛག་ཚུལ་ལ་ཁ་ཅིག་ཡབ་ཀྱི་བ་སྤུའི་བུ་ག་ནས་དང་། ཁ་ཅིག་ཡབ་ཀྱི་མཐེ་བོང་གཡས་པ་ནས་འཛག་པར་འདོད་པ་རྣམས་ལ་ནི་ཤེས་བྱེད་མི་སྣང་ལ། འདིར་ཡབ་ཀྱི་སྐུའི་དབྱིབས་བརྒྱུད་ནས་ཡུམ་གྱི་སྐུ་གང་། དེའི་སྐུ་ལས་བདུད་རྩི་འཛག་པར་བཞེད་པ་ནི། ཨ་བྷི་དྷ་ནར། རྣལ་འབྱོར་མ་ཡི་དབང་ཡང་བསྐུར། །ཞེས་ཡུམ་གྱི་དབང་བསྐུར་བར་བཤད་པའི་དོན་ཡིན་པས། ཡུམ་གྱི་སྐུ་ནས་འཛག་པ་ཅིས་ཀྱང་དགོས་སོ། །གཉིས་པ་ནི། སྤྱིར་ཡི་གེ་བརྒྱ་པ་ལ་དུ་མ་ཞིག་ཡོད་ཀྱང་། འདིར་ཨ་བྷི་དྷ་ནར་བཤད་པའི་ཧེ་རུ་ཀའི་ཡི་གེ་བརྒྱ་པ་ཡིན་ལ། དེ་བཤད་ན། དེ་ལ་ཨོཾ་ནི་བཀྲ་ཤིས་པ་ལ་སོགས་པའི་དོན་བརྒྱད་ལ་འཇུག་ཀྱང་འདིར་ནི་མཆོག་གི་དངོས་གྲུབ་སྟེར་བའི་དོན་ཏོ། །བཛྲ་ཧེ་རུ་ཀ་ནི་རྡོ་རྗེ་ཁྲག་འཐུང་། ས་མ་ཡ་ནི་དམ་ཚིག མ་ནུ་པཱ་ལ་ཡ་རྗེས་སུ་སྐྱོངས་ཤིག ཅེས་ཏེ། རྣམ་ཐར་སྒོ་གསུམ་གྱི་སྟོང་པའི་རང་བཞིན་ཧེ་རུ་ཀས་བདག་སྐྱོངས་ཤིག་ཅེས་སོ། །ཚུལ་ཇི་ལྟར་སྐྱོང་ན་ཧེ་རུ་ཀ་ཏྭེ་ནོ་པ་ཏིཥྛ་ནི་ཁྲག་འཐུང་གིས་ཉེ་བར་མནོས་པ་སྟེ་རང་གི་བསམ་པ་བཞིན་དུའོ། །དྲྀ་ཌྷོ་མེ་བྷ་ཝ། བདག་ལ་བརྟན་པའི་རང་བཞིན་དུའོ། །སུ་ཏོ་ཥྱོ་མེ་བྷ་ཝ། བདག་ལ་དགའ་བའི་རང་བཞིན་དུའོ། །ཨ་ནུ་རཀྟོ་མེ་བྷ་ཝ་ནི་བདག་ལ་རྗེས་སུ་ཆགས་པའི་རང་བཞིན་དུའོ། །སུ་པོ་ཥྱོ་མེ་བྷ་ཝ་བདག་ལ་མཛེས་པའི་རང་བཞིན་དུའོ། །སརྦ་སིདྡྷིམྨེ་པྲ་ཡཙྪ་བདག་ལ་དངོས་གྲུབ་ཐམས་ཅད་སྩོལ། སརྦ་ཀརྨ་སུ་ཙ་མེ་བདག་ལ་ལས་ཐམས་ཅད་སྩོལ་ཅེས་ཏེ་ཚུལ་དེ་ལྟ་བུའི་སྒོ་ནས་བདག་ལ་རྗེས་སུ་སྐྱོངས་ཤིག ཅེས་པའི་དོན་ཏོ། །བསྐྱངས་ནས་ཅི་བྱེད་ཅེ་ན། ཙིཏྟཾ་ཤྲེ་ཡཿཀུ་རུ་བདག་གི་སྙིང་ལ་གནས་པར་མཛོད། གང་གནས་པར་མཛོད་ན། ཧཱུྃ་ནི་ཆོས་ཀྱི་དབྱིངས་མི་འགྱུར་བའི་གནས་དང་། ཧ་ཧ་ཧ་ཧ་བཞི་ནི་ཡེ་ཤེས་གཞན་བཞི་ཧོ་དབྱེར་མེད་པ་སྟེ། མདོར་ན་དབྱིངས་དང་ཡེ་ཤེས་དབྱེར་མེད་པའི་ངེས་དོན་གྱི་ཧེ་རུ་ཀ་དེ་བདག་གི་སྙིང་ལ་གནས་པར་མཛོད་ཅིག་པའོ། །དོན་དེ་ལ་མིང་ཅི་སྐད་བྱ་ན་བྷ་ག་ཝཱན་བཛྲ་ཧེ་རུ་ཀ བཅོམ་ལྡན་འདས་རྡོ་རྗེ་ཁྲག་འཐུང་ཞེས་བྱའོ། །དེས་བདག་ནམ་ཡང་སྤང་བར་བྱ་བ་མ་ཡིན་པས། མཱ་མེ་མུཉྩ་བདག་མ་བཏང་ཞིག་གོ །ཧེ་རུ་ཀོ་བྷ་ཝ་མ་ཧཱ་ས་མ་ཡ་ས་ཏྭ། ཁྲག་འཐུང་གི་རང་བཞིན་དམ་ཚིག་སེམས་དཔའ་ཞེས་བོས་ནས་ཁྱོད་ཀྱིས་བདག་དུས་ཐམས་ཅད་དུ་མ་བཏང་ཞིག་ཅེས་པའོ། །ཨ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོ་ཡིན་པས་ལྷ་དང་། སྔགས་དང་། སྒྲུབ་པ་པོ་རྣམས་རང་བཞིན་སྐྱེ་མེད་དུ་གཅིག་པའི་དོན་ཏོ། །ཧཱུྃ་ནི་དོན་ལྔ་ལ་འཇུག་ཀྱང་འདིར། སྡུག་བསྔལ་འཆོས་ཤིང་འཇོམས་བྱེད་དང་། །སྲིད་པའི་ཞགས་པ་འཇོམས་པར་བྱེད། །ཅེས་པ་ལྟར་སྤང་བྱ་དེ་དག་འཇོམས་པའི་དོན་ཏོ། །ཕཊ་ནི་དོན་གསུམ་ལ་འཇུག་པ་ལས། འདི་ནི་སྡུག་བསྔལ་འཇོམས་པའི་དོན་དུ་གཟུང་ངོ་། །དེ་ལྟ་བུའི་གསང་སྔགས་དེ་ནི་ཨ་བྷི་དྷ་ནར། དཔའ་བོ་དང་ནི་མཁའ་འགྲོ་མ། །འདི་ནི་ཀུན་གྱི་གསང་སྔགས་ཏེ། །ཞེས་ཐམས་ཅད་ཀྱི་གསང་སྔགས་སུ་བཤད་དོ། །གསུམ་པ་ནི་གྲངས་ཇི་ཙམ་མང་ན་བཟང་བས་ཅི་ནུས་སུ་བཟླས་ཤིང་། ཉུང་མཐའ་ཡང་ཉེར་གཅིག་ཡིན་ཏེ། སློབ་དཔོན་འཇམ་དཔལ་གྲགས་པས། ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་འགྱུར་བས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་དག་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་སོ། །དེའི་རྒྱུ་མཚན་ཡང་འདི་བཟླས་པའི་དགོས་པ་ལྟུང་བ་བྱིན་གྱིས་བརླབ་པ་སྟེ། སྟོབས་ཉམས་པར་བྱེད་པ་དང་། མི་འཕེལ་བའི་ཆེད་ཡིན་ལ། དགོས་པ་དེ་དག་བསྒྲུབ་པ་ལ་ཉི་ཤུ་རྩ་གཅིག་པས་ཉུང་བ་མ་བཤད་པའི་ཕྱིར་རོ། །གསུམ་པ་ནི། རྗེ་བཙུན་གྱིས་སྐབས་འདིར་གསལ་བར་མ་བཤད་ཀྱང་། བླ་ཆེན་འཕགས་པས། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཡིས། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ཞེས་ཨ་བྷི་དྷ་ན་ནས་འབྱུང་བ་ལྟར་བརྗོད་པ་ནི་རྒྱུད་དེའི་དོན་དུ་སྣང་ཞིང་གོང་མའི་གདམས་ངག་ཀྱང་ཡིན་ཏེ། རྗེ་བཙུན་རྩེ་མོས་བདེ་མཆོག་གི་ཕྱི་རོལ་མཆོད་པའི་སྐབས་སུ། མདུན་བསྐྱེད་ལ་དམིགས་པའི་ཡི་གེ་བརྒྱ་པ་བཟླས་པའི་མཇུག་ཏུ་ཚིགས་སུ་བཅད་པ་འདི་གཉིས་བརྗོད་པར་གསུངས་པ་དང་། ས་པཎ་གྱི་ཚོགས་འཁོར་རྩོད་སྤོང་དུ་སྔོན་འགྲོ་ཡི་གེ་བརྒྱ་པའི་རྗེས་སུ། ཚིགས་བཅད་འདི་གཉིས་བརྗོད་པར་གསུངས་པས་སོ། །དེའི་མཇུག་ཏུ་བླ་ཆེན་འཕགས་པས་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ། སྒྲིབ་པ། ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། ཞེས་བརྗོད་པར་གསུངས་པ་ལ་གཞན་ལུགས་ཀྱི་བླ་མ་ཁ་ཅིག སྐུ་གསུང་ཐུགས་ཀྱི་དམ་ཚིག་ཅེས་པའི་ཐ་སྙད་རྙིང་མ་པའི་ལུགས་ཡིན་གྱི་གསར་མའི་གཞུང་གང་ལ་ཡང་མ་བཤད་དོ། །ཞེས་སྨྲ་བ་ནི་སམྦུ་ཊ་ལས། བུད་མེད་དང་ནི་སྐྱེས་པའི་ལུས། །ལས་ནི་དུ་མས་བསྐྱེད་པས་ན། །མི་ཤེས་པས་ཀྱང་མི་བྱ་སྟེ། །སྐུ་ཡི་རྡོ་རྗེའི་དམ་ཚིག་གོ །སེམས་ཅན་སྣ་ཚོགས་གདུང་བ་རྣམས། །ཀུན་རྟོག་དྲྭ་བའི་རྣམ་རྟོག་གིས། །སེམས་ལ་སྨད་པར་མི་བྱ་སྟེ། །ཐུགས་ཀྱི་རྡོ་རྗེའི་དམ་ཚིག་གོ །ཕྲག་དོག་ཉིད་ཀྱིས་མ་རངས་པས། །ཚིག་རྩུབ་ལ་སོགས་སྨྲ་མི་བྱ། །རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ །ཞེས་གསུངས་པ་མ་མཐོང་བཞིན་དུ་རང་དགར་སྨྲ་བར་ཟད་དོ། །དེས་ན་དམ་ཚིག་ཐམས་ཅད་བསྡུ་ན་སྐུ་གསུང་ཐུགས་ཀྱི་དམ་ཚིག་གསུམ་མམ། རྩ་བ་དང་ཡན་ལག་གི་དམ་ཚིག་གཉིས་སུ་འདུས་པས་དེ་དག་ཉམས་པ་བཤགས་པའི་དོན་ཡིན་པས་ཚིག་དོན་གཉིས་ཆར་སྐྱོན་མེད་པར་གྲུབ་བོ། །སྡིག་པ་ནི་ཉོན་མོངས་པའི་སྡིག་པ། སྒྲིབ་པ་ནི་ཤེས་བྱའི་སྒྲིབ་པ། ཉེས་པ་ནི་རང་བཞིན་གྱི་ཉེས་པ། ལྟུང་བ་ནི་བཅས་པའི་ལྟུང་བ། གྲིབ་མ་ནི་གནས་ཀྱི་གྲིབ་མ་ལ་སོགས་པའི་གྲིབ་མ་དྲུག་སྟེ། དེ་དག་བྱང་ཞིང་དག་པར་མཛད་དུ་གསོལ་ཞེས་པའི་དོན་ཏོ། །དེ་ནས་རྗེ་བཙུན་གྱི་ཐུན་འཇོག་ཁར་རྡོ་རྗེ་སེམས་དཔའ་ཡབ་ཡུམ་བདག་རང་ལ་ཐིམ་པས་ལུས་འཇའ་ཚོན་ལྟ་བུར་གྱུར་པར་བསྒོམ་མོ། །ཞེས་གསུངས་པ་ལྟར་བྱའོ། །གསུམ་པ་ནི། དེ་ལྟར་ཐུན་མོང་གི་སྔོན་འགྲོ་གསུམ་གྱིས་རང་གི་སྡོམ་པ་གསུམ་གྱི་ཉེས་ལྟུང་ཕྲ་མོ་ཐམས་ཅད་སྦྱངས་ནས་སྡོམ་གསུམ་དག་པར་བྱས་པ་ལ་དགོས་པ་བསམ་གྱིས་མི་ཁྱབ་པ་ཡོད་དེ། སློབ་དཔོན་འཇམ་དཔལ་གྲགས་པས། སྡོམ་གསུམ་ཆོ་གར་རབ་ཏུ་བརྟག །དེ་ལྟར་སྔགས་པ་ཚུལ་ལྡན་པས། །དངོས་གྲུབ་ལ་ནི་དོགས་མེད་དེ། །སྟོན་པ་སངས་རྒྱས་སོགས་བསྟོད་ཅིང་། །ལྷ་སོགས་འཇིག་རྟེན་ཀུན་གྱིས་བཀུར། །ཞེས་བཤད་པའི་ཕྱིར་རོ། །གཉིས་པ་ལ་གསུམ། བསོད་ནམས་ཀྱི་ཚོགས་བསག་པ། ཡེ་ཤེས་ཀྱི་ཚོགས་བསག་པ། སྲུང་བའི་འཁོར་ལོ་བསྒོམ་པའོ། །དང་པོ་ལ་གསུམ། ཡུལ་དག་པ་ལ་བརྟེན་པའི་ཚོགས་བསོག མ་དག་པ་ལ་བརྟེན་པའི་ཚོགས་བསོག ཞར་བྱུང་དེ་དག་གི་དགོས་པ་བཤད་པའོ། །དང་པོ་ལ་བཞི། ཚོགས་བསག་གི་ཞིང་སྤྱན་དྲངས་བ་དེ་ལ་མཆོད་པ། དེའི་སྤྱན་སྔར་རྒྱུན་བཤགས་བྱ་བ། གནང་བ་ནོད་པའོ། །དང་པོ་ནི། རང་སྐད་ཅིག་གིས་ཀྱེ་རྡོ་རྗེར་བསྒོམ་པར་རྗེ་བཙུན་རྩེ་མོས་གསུངས་ཤིང་། ཇི་ལྟར་གསལ་འདེབས་ན། ཁ་ཅིག་སྐུ་རྡོ་རྗེ་ཞལ་གཅིག་ཕྱག་གཉིས་པ། བསྒོམ་པར་འདོད་པ་ལ་ཤེས་བྱེད་ཀྱི་ལུང་མེད་པས། བསྒོམ་བྱའི་དཀྱིལ་འཁོར་གྱི་གཙོ་བོའི་ང་རྒྱལ་དུ་བྱ་དགོས་ཏེ། ཞལ་བརྒྱད་ཕྱག་བཅུ་དྲུག་པར་བསྒོམ་པའམ། ཐུན་མཚམས་ཀྱི་གནས་སྐབས་སུ་ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ཏུ་བསྡུས་པའི་ཞལ་གཅིག་ཕྱག་གཉིས་པ་གང་རུང་ངོ་། །དེ་ལྟར་ལྷ་བསྒོམ་པའི་དགོས་པ་ཡང་ཐ་མལ་གྱི་རྣམ་རྟོག་གི་བློ་བཟློག་པ་དང་། བར་ཆད་ཀྱི་བགེགས་བསྲུང་བ་དང་། ལྷས་ལྷ་ལ་ཚོགས་བསགས་པས་ཚོགས་མྱུར་དུ་རྫོགས་པའོ། །དེའི་སྙིང་གར་ཡན་ལག་དྲུག་པ་ལྟར་ན་པྃ་ལས་པདྨ་དང་། རྃ་ལས་ཉི་མའམ། ཡན་ལག་བཞི་པ་ལྟར་ན་རྃ་ལས་ཉི་མའི་སྟེང་དུ་རང་གི་སེམས་གཟུང་འཛིན་དང་བྲལ་བའི་ངོ་བོ། ཡི་གེ་ཧཱུྃ་སྔོན་པོ་བསྒོམ་མོ། །པདྨའི་ཁ་དོག་གཞུང་གཞན་རྣམས་ནས་མ་བཤད་ཀྱང་མར་མེ་མཛད་ཀྱིས་དམར་པོར་བསྒོམ་པར་བཤད་པ་ནི་ལྷ་དབང་དུ་སྡུད་པ་མཚོན་པས་ལེགས་པ་ཡིན་གསུང་ངོ་། །ཅི་ལྟར་ན་ཧཱུྃ་གཟུང་འཛིན་དང་བྲལ་བའི་ཡིད་དུ་འགྱུར་ཞེ་ན། ཧའི་སྒྲ་ལས། གྲ་ཧ་ཀ་ནི་གཟུང་བ། གྲ་ཧ་ཙ་ནི་འཛིན་པ། ཞབས་ཀྱུ་ཨུ་ལ་རྐྱེན་ཤ་བྱིན་པས། ཤཱུ་ནྱ་ཏཱ་སྟེ་སྟོང་པ། ཀླད་ཀོར་མ་ནི་མ་ནོ་སྟེ་ཡིད་དོ། །དེ་ལྟར་ན་གཟུང་འཛིན་གྱིས་སྟོང་པའི་ཡིད་ཅེས་པར་འགྱུར་རོ། །དེ་ལས་འོད་ཟེར་ཁ་དོག་ལྔ་འཕྲོ་བར་རྗེ་བཙུན་སྐུ་མཆེད་དང་། མཚོ་སྐྱེས་ཀྱིས་བཞེད་ལ། འོད་ཟེར་དེ་ལྕགས་ཀྱུའི་རྣམ་པ་ཅན་དུ་ནག་པོ་པས་བཤད་པས་དེ་ལྟ་བུའི་འོད་ཟེར་དབུགས་ཕྱིར་རྒྱུ་བའི་དུས་ན། སྣ་བུག་གཡས་པ་ནས་སྤྲོས་པས་ཚོགས་རྟེན་གྱི་དཀྱིལ་འཁོར་སྤྱན་དྲངས་སོ། །འདི་ལ་འོད་ཟེར་གྱིས་མདུན་དུ་ཚོགས་རྟེན་བསྒོམ་པ་དང་། གཞན་ནས་སྤྱན་འདྲེན་པ་གཉིས་ལས། ས་ཆེན་ཡབ་སྲས་ཀྱིས་མཚོ་སྐྱེས་ཀྱི་སྐབས་སུ་དང་པོ་གསུངས་ཀྱང་། མན་ངག་ལུགས་ཀྱི་སྐབས་སུ་ཕྱི་མ་གཉིས་གསལ་ལོ། །དེ་ལ་ཡང་རྗེ་བཙུན་རྩེ་མོས་ལྷ་དགུའི་དཀྱིལ་འཁོར་སྤྱན་དྲངས་ནས་ལྷག་པའི་ལྷ་དང་། བླ་མ་དབྱེར་མེད་དུ་བསྒོམ་པར་གསུངས་ལ། རྗེ་བཙུན་གྱིས་ལྷ་དགུའི་དཀྱིལ་འཁོར་སྟེང་གི་ཆ་ལ་བླ་མ་དང་བཅས་པ་སྤྱན་འདྲེན་པར་གསུངས་པ་ནི། ཡན་ལག་བཞི་དྲུག་གི་སྐབས་སུ་སོ་སོར་སྦྱར་བར་བྱའོ། །སྤྱན་འདྲེན་པའི་ཚུལ་ནི། རྡོ་རྗེ་བསྡུ་བའི་སྔགས་དང་། ཕྱག་རྒྱས་བྱ་སྟེ། དེ་ཡང་གུར་འགྲེལ་ལས། རྡོ་རྗེ་སེ་གོལ་སྦྱོར་བ་ཡིས། །ཞེས་བྱ་བ་ནི། ལག་པ་གཉིས་དཔུང་འགོར་རྡོ་རྗེ་བཅིང་བ་བྱས་ལ། ཨོཾ་བཛྲ་ས་མཱ་ཛཿཞེས་བྱ་བར་བརྗོད་ཅིང་མཛུབ་མོ་གཉིས་ལྕགས་ཀྱུ་ལྟར་བཀུག་ནས། མཐེ་བོང་དང་། གུང་མོ་སེ་གོལ་སྦྱར་བའོ། །ཞེས་གསུངས་སོ། །གཉིས་པ་ནི། མཆོད་པའི་སྔོན་དུ་ཕྱག་འཚལ་བ་རྒྱ་གར་བའི་གཞུང་རྣམས་དང་། རྗེ་བཙུན་སྐུ་མཆེད་ཀྱི་ཡན་ལག་བཞི་དྲུག་གཉིས་སུ་མ་གསུངས་པ་ནི། མཆོད་གཏོར་གྱི་རྣལ་འབྱོར་སྔོན་དུ་སོང་བའི་དབང་དུ་བྱས་པ་ཡིན་ལ། སྔོན་དུ་མ་སོང་ན་ངེས་པར་བྱ་དགོས་ཏེ། སམྦུ་ཊ་ལས། ཕྱོགས་བཅུའི་སངས་རྒྱས་ཐམས་ཅད་ལ། །མཆོད་ནས་ཕྱག་འཚལ་འདི་སྐད་གསོལ། །ཞེས་དང་། ལྗོན་ཤིང་དང་། བདག་མེད་མའི་སྒྲུབ་ཐབས་གཉིས་ལས། སྐབས་འདིར་ཕྱག་འཚལ་བར་རྗེ་བཙུན་གྱིས་གསུངས་པའི་ཕྱིར་རོ། །མཆོད་གཏོར་གྱི་རྣལ་འབྱོར་སྔོན་དུ་སོང་ན། དེར་བྱས་པ་ཉིད་ཀྱིས་ཆོག་པས་སྐབས་འདིར་མི་དགོས་ལ། མཆོད་པ་དང་རྒྱུན་བཤགས་ལ་ནི་མི་མཚུངས་ཏེ། གུར་ལས། བླ་མ་རྡོ་རྗེ་ཅན་མཆོད་ཅིང་། །བདུན་པོ་ཡོངས་སུ་དག་པར་བྱ། །ཞེས་ཆོ་གའི་ཡན་ལག་ཉིད་དུ་གསུངས་པའི་ཕྱིར་རོ། །ཕྱག་འཚལ་བའི་ཚིག་ཁ་ཅིག གང་གི་དྲིན་གྱིས་བདེ་ཆེན་ཉིད། །སོགས་དང་། གཞན་དག་རྒྱ་གར་གྱི་སྒྲུབ་ཐབས་ཀྱི་མཆོད་བརྗོད་ཀྱིས་བྱེད་པ་ཡོད་ཀྱང་། འདིར་ནི་རྗེ་བཙུན་གྱིས་བདག་མེད་མའི་སྒྲུབ་ཐབས་ལས། སྔགས་ཙམ་གྱིས་བྱ་བར་གསུངས་པ་ལྟར། ན་མོ་གུ་རུ་བྷྱཿས་བླ་མ་དང་། ན་མཿཤྲཱི་ཧེ་བཛྲ་མཎྜལ་བྷྱཿས་དཀྱིལ་འཁོར་ལ་ཕྱག་བྱའོ། །དེ་ནས་མཆོད་པ་ནི་གང་ཟག་ཐ་མས་མཆོད་པའི་ཡུལ་གྱི་ལྷ་མོ་བརྒྱད་རང་རང་གི་ཕྱག་མཚན་མ་བཟུང་བར། མཆོད་རྫས་བཟུང་ནས་གཙོ་བོ་ལ་མཆོད་པར་བསམས་ལ། འབྲིང་པོས་ནི་སྔར་གི་སྙིང་གའི་ཧཱུྃ་དེ་ལས་མཆོད་པའི་ལྷ་མོ་བརྒྱད་སྤྲོས་ནས་ལྷ་དགུ་ཆར་ལ་མཆོད་པར་བསམས་ཏེ། རྗེ་ས་ཆེན་གྱིས། འབྲིང་དང་ཐ་མ་རྣམ་གཉིས་ཀྱང་། །མཆོད་ལུགས་མི་འདྲ་རྣམ་གཉིས་ཏེ། །དང་པོ་ཐ་མའི་མཆོད་པ་ནི། །མཆོད་པའི་ཞིང་གི་ལྷ་མོ་བརྒྱད། །རང་རྟགས་ཕྱག་མཚན་མ་ཐོགས་པར། །བྱང་ཆུབ་སེམས་སོགས་བདུད་རྩི་ལྔ། །གསང་བ་ཡི་ནི་མཆོད་པས་མཆོད། །བཅུད་ཀྱིས་ལེན་དང་ཅང་ཏེའུ་བརྡུང་། །ཕྱི་ཡི་མཆོད་པ་དེ་ཁོ་ནའི། །མཆོད་པ་གཡུང་མོས་སྐུ་ལ་འཁྱུད། །དེ་ལྟར་རྣམ་པ་གསུམ་གྱིས་ནི། །སྤྱན་དྲངས་ཉིད་ཀྱིས་སྤྱན་དྲངས་ལ། །མཆོད་ལ་འབྲིང་པོའི་མཆོད་པ་ནི། ྎ །རང་རྟགས་ཀྱིས་ནི་མཚན་མ་འཛིན། །མཆོད་བྱེད་ལྷ་མོ་བརྒྱད་རྣམས་ཀྱིས། །མཆོད་པའི་རྫས་ཐོགས་སྙིང་ག་ནས། །སྤྲོས་ལ་མཆོད་པ་གསུམ་གྱིས་མཆོད། །ཅེས་གསུངས་སོ། །དེའི་དོན་ཡང་གང་ཟག་ཐ་མས་དམིགས་པའི་འདོར་ལེན་མང་པོ་མི་ནུས་པའི་དབང་དུ་བྱས་ཏེ། རྩ་རྒྱུད་ལས། འདི་རྣམས་ཀྱིས་ནི་གཙོ་བོ་མཆོད། །ཅེས་པའང་འདི་ལ་དགོངས་སོ། །གང་ཟག་རབ་ཀྱིས་མཆོད་ལུགས་མ་གསུངས་པ་ནི། ཚོགས་གཉིས་བསགས་པ་ལ་མ་ལྟོས་པར་སྐད་ཅིག་གིས་སྣང་བ་ཐམས་ཅད་ལྷར་འཆར་བ་དེ་ཉིད་གསུངས་སོ། །གང་ལྟར་ཡང་མཆོད་པའི་ཚིག་ནི། རྗེ་བཙུན་རྩེ་མོས། ནམ་མཁར་རྗེ་བཙུན་བལྟས་ནས་ནི། །ཞེས་པ་ནས་བརྗོད་པར་གསུངས་ལ། སྒྲུབ་དཀྱིལ་ཕལ་ཆེར་ལས། དཀར་མོ་རི་དྭགས་མཚན་མ་འཛིན། །ཞེས་པ་ནས་བརྗོད་པར་གསུངས་པ་ནི། རྒྱས་བསྡུས་ཀྱི་ཁྱད་པར་ཡིན་ཏེ། སྔ་མ་ལྟར་ན་ཚིགས་བཅད་དང་པོས་མཆོད་ཡུལ་གསལ་གདབ་པ་དང་། མཆོད་པ་མདོར་བསྟན། ལྷག་མ་རྣམས་ཀྱིས་མཆོད་པ་རྒྱས་པར་བཤད་པ་ཡིན་ལ་ཕྱི་མ་ལྟར་ན་མཆོད་པའི་ཚིག་དངོས་སུ་བརྗོད་པའོ། །འདི་ལ་རྗེ་བཙུན་རྩེ་མོས། གསང་བའི་མཆོད་པ། ཕྱིའི་མཆོད་པ། དེ་ཁོ་ན་ཉིད་ཀྱི་མཆོད་པ་གསུམ་དུ་བཤད་པས། དང་པོ་ནི། ལྷ་མོ་དཀར་མོ་སྟེ་གཽ་རཱི། ཕྱག་ན་རི་དྭགས་མཚན་མ་ནི་ཟླ་བ་སྟེ། དེས་བརྡ་བསྟན་པའི་བྱང་སེམས་དཀར་པོས་གང་བའི་ཐོད་པ་འཛིན་པ་དང་། ཆོམ་རྐུན་མ་ནི་ཕྱག་ན་མུན་བའི་བདུད་ལས་རྒྱལ་བ་ཉི་མ་སྟེ། དེས་བརྡ་བསྟན་པ་རཀྟས་གང་བའི་སྣོད་འཛིན་པ་དང་། རོ་ལངས་མ་ནི་དྲི་ཆུས་གང་བའི་ཐོད་པ་འཛིན་པའི་ལག་པ་མ་དང་། གྷསྨ་རཱི་ནི་གསང་བའི་སྨན་དྲི་ཆེན་གྱིས་གང་བའི་ཐོད་པ་འཛིན་ཅིང་། པུཀྐ་སཱི་ནི་རྡོ་རྗེ་སྟེ་ཤ་ཆེན་གྱིས་གང་བའི་ཐོད་པ་འཛིན་པའི་ལག་པ་མ་སྟེ་ལྔའོ། །འདི་ལ་རྗེ་བཙུན་གྱིས་ནང་གི་མཆོད་པ་ཞེས་གསུང་ངོ་། །གཉིས་ནི། ལྷ་མོ་ལྔས་མཆོད་པ་དེ་བཞིན་དུ་རི་ཁྲོད་མ་བཅུད་ལེན་གྱི་རོས་གང་བའི་ཐོད་པ་འཛིན་པ་སྟེ། རྗེ་བཙུན་རྩེ་མོས། བཅུད་ཀྱིས་ལེན་ནི་བསྐལ་པ་བཟང་པོ་ཞེས་བྱ་བ་ལ། སངས་རྒྱས་རྡོ་རྗེ་སེམས་དཔའ་དང་། ཡུམ་རྡོ་རྗེ་སྙེམས་མ་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ལུས་ལ་རེག་ན་སྐྲ་དཀར་དང་གཉེར་མ་མི་འབྱུང་ལ། འཐུངས་ན་ཚེ་ཉི་ཟླ་གནས་ཀྱི་བར་དུ་ཐུབ་པ་ཞིག་ཡིན་ནོ་ཞེས་གྲག་གོ །ཞེས་གསུང་ངོ་། །གདོལ་པ་མོ་ནི་ཅང་ཏེའུ་བརྡུང་བས་མཆོད་དོ། །གསུམ་པ་ནི། འདོད་ཆགས་ཆེན་པོ་སྟེ་ཟག་མེད་ཀྱིས་བདེ་བ་ཉམས་སུ་མྱོང་བས་རྗེས་སུ་ཆགས་པར་བྱ་བའི་ཕྱིར། རྡོ་རྗེ་རིགས་ཀྱི་ལྷ་མོ་གཡུང་མོས་གཙོ་བོའི་སྐུ་ལ་འཁྱུད་པ་ཉིད་དེ། རྗེ་བཙུན་རྩེ་མོས། གཡུང་མོའི་མཆོད་པ་ནི་ལྷ་ཐམས་ཅད་ལ་འཁྱུད་པའི་ཚུལ་བྱ་བའམ། ཡང་ན་བདག་མེད་མ་ལ་ཐིམ་པས་ལྷ་ཐམས་ཅད་རྗེས་སུ་ཆགས་པས་མཉེས་པར་བསམ་པར་བྱའོ། །ཞེས་སོ། །དེ་ལ་ལུགས་དང་པོ་ལྷ་ཐམས་ཅད་ལ་འཁྱུད་པའི་ཚུལ་བྱ་བའི་དོན། ནུབ་བྱང་གི་ཕྱོགས་སུ་གནས་ནས་འཁྱུད་པའི་ཕྱག་རྒྱ་བྱ་བ་ཉིད་ཡིན་གྱི། དངོས་སུ་ལྷ་ཐམས་ཅད་ལ་འཁྱུད་མི་དགོས་ཏེ། བྷ་ཝ་བྷ་དྲས་གཡུང་མོས་མགྲིན་པར་འཁྱུད་ཅེས་པ་ནི། རླུང་གི་གྲྭ་ནས་གཡུང་མོས་མགྲིན་པར་འཁྱུད་པར་གྱུར་པ་ཇི་ལྟར་གྱུར་པ་ཞེས་པ་སྟེ། བྱ་བའི་ཁྱད་པར་འཁྱུད་པའི་ཕྱག་རྒྱ་དང་ལྡན་ཞེས་པའི་དོན་ཏོ། །ཞེས་བཤད་པ་དང་མཐུན་ནོ། །ལུགས་གཉིས་པ་ལྟར་ན་གཡུང་མོ་བདག་མེད་མ་ལ་ཐིམ་པར་བསྒོམས་ཏེ། མི་འཇིགས་པའི་གཞུང་འགྲེལ་ལས་བྱང་དུ་འདོད་ཆགས་རྡོ་རྗེ་མ། སྣ་ཚོགས་བདེ་མ་དང་ལྷན་ཅིག དེའི་བདག་ཉིད་དུ་གྱུར་ནས་ཡང་དག་པར་འཁྱུད་དེ། ཆགས་པ་ཆེན་པོས་རྗེས་སུ་ཆགས་པར་བྱེད་དོ། །ཞེས་བཤད་པ་དང་མཐུན་ནོ། །དེ་ལྟར་ན་ཕྱི་ནང་སོགས་ཀྱི་མཆོད་པ་འདི་རྣམས་ཀྱིས་ནི་གཙོ་བོ་ཧེ་རུ་ཀའམ། འཁོར་དང་བཅས་པ་མཆོད། ཅེས་རིན་ཆེན་འབར་བར་མཇུག་སྡུད་དུ་སྦྱར་བར་བཤད་དོ། །དེ་ལྟར་ན་རྗེ་བཙུན་རྩེ་མོས་གསང་བ་དང་། ཕྱི་དང་། དེ་ཁོ་ན་ཉིད་ཀྱི་མཆོད་པ་ཞེས་དང་། ཕྱི་དང་གསང་བའི་མཆོད་པ་ཞེས་གསུངས་པའི་དང་པོ་ནི། རྫས་ལྔ་པོ་གསང་བའི་རྫས་ཡིན་པ་དང་། འཁྱུད་པ་ལས་དེ་ཁོ་ན་ཉིད་ཀྱི་བདེ་བ་སྐྱེ་བའི་དབང་དུ་མཛད་ལ། ཕྱི་མ་ནི་རྫས་ལྔ་པོ་ནང་གི་མཆོད་པའི་རྒྱུའི་གཙོ་བོ་དང་། འཁྱུད་པ་སྐལ་བ་དང་མི་ལྡན་པ་ལ་གསང་དགོས་པའི་དབང་དུ་བྱས་པ་སྟེ། རིན་ཆེན་འབར་བར། ཕྱི་ནང་གསང་བའི་མཆོད་པ་ཡིས། །བླ་མ་རྡོ་རྗེ་མཆོད་པར་བྱ། །ཞེས་གསུངས་པ་དང་མཐུན་ནོ། །གསུམ་པ་ནི། ཚོགས་རྟེན་གྱི་སྤྱན་སྔར་ཐལ་མོ་སྦྱར་ནས། ཡན་ལག་བདུན་པ་བྱ་སྟེ། འདི་ལ་བདུན་པོ་སོ་སོའི་ངོ་བོ། གོ་རིམ་ངེས་པ། གྲངས་ངེས་པ་དང་གསུམ་ལས། དང་པོ་ནི། ཡན་ལག་བཞི་པ་ལྟར་ན། རྗེ་བཙུན་རྩེ་མོས་གསུངས་པ་ལྟར་ཚིག་ལྷུག་པས་བྱ་ཞིང་། ཡན་ལག་དྲུག་པ་ལྟར་ན། ཚིགས་ལྷུག་པས་བྱ་བ་ལ་བསྔོ་བ་མཇུག་ཏུ་སྟོན་པའམ། རྡོ་རྗེ་གུར་ལས་འབྱུང་བའི། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ཚིགས་བཅད་གསུམ་བརྗོད་པ་གང་རུང་གིས་བྱའོ། །འདི་ལ་ཡན་ལག་བདུན་ལས། དང་པོ་སྡིག་པ་བཤགས་པའི་ཡན་ལག་ནི། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །ཞེས་པ་སྟེ། སྡིག་པ་རང་གི་བྱས་པ་དང་། གཞན་བྱེད་དུ་བཅུག་པ་དང་། ཕ་རོལ་པོས་བྱས་པ་ལ་རྗེས་སུ་ཡི་རང་བར་བྱས་པའི་སྡིག་པ་རྣམས་སྟོབས་བཞིའི་སྒོ་ནས་བཤགས་པའོ། །དེ་ལ་སྟོབས་བཞི་ནི་རྗེ་བཙུན་རྩེ་མོས། རྟེན་གྱི་སྟོབས་ནི་བཅོམ་ལྡན་འདས་ཏེ། ལྷ་དང་བླ་མ་ཐ་མི་དད་པའོ། །རྣམ་པར་སུན་འབྱིན་པ་ནི་བཤགས་པ་སྟེ། སྔར་བྱས་པའི་སྡིག་པ་དྲན་པར་བྱ་སྟེ། དེ་དག་གི་རྣམ་པར་སྨིན་པ་ནི་ངན་འགྲོ་ལས་མེད་ལ། དེ་དག་མ་སྤངས་པར་ནི་བདག་སྡུག་བསྔལ་ལས་གྲོལ་བར་མི་འགྱུར་ལ། དེ་ནི་བདག་ལ་དཔག་ཏུ་མེད་པ་ཅིག་ཡོད་པས་ཁུར་ཆེན་པོ་ཡོད་ཅེས་དྲན་པས་སྔར་གྱི་ལས་ལ་འགྱོད་པ་དྲག་པོ་བསྐྱེད་པར་བྱའོ། །གཉེན་པོ་ནི་མི་བགྱིད་པ་སྟེ་ད་ཕྱིས་སྲོག་གི་ཕྱིར་ཡང་སྤང་བར་འདོད་པའོ། །དེས་སྡིག་པ་འདག་པ་ལ་དགའ་བ་ངང་གིས་སྐྱེ་བ་ནི་སོར་ཆུད་པའི་སྟོབས་སོ། །ཞེས་གསུངས་པ་ལྟར་རོ། །དེ་ལ་ཚིག་རྐང་དང་པོས་རྟེན་གྱི་སྟོབས་བསྟན། གཉིས་པས་རྣམ་པར་སུན་འབྱིན་པའི་སྟོབས་བསྟན། ལྷག་མ་གཉིས་ཤུགས་ལས་བསྟན་ནོ། །གཉིས་པ་རྗེས་སུ་ཡི་རང་བའི་ཡན་ལག་ནི། འགྲོ་བའི་དགེ་ལ་རྗེས་ཡི་རང་། །ཞེས་པ་སྟེ། རང་གཞན་གྱི་དགེ་རྩ་དུས་གསུམ་གྱིས་བསྡུས་པ་ལ་དགའ་བ་ཁྱད་པར་ཅན་བསྒོམ་པའོ། །གསུམ་པ་དོན་དམ་བྱང་ཆུབ་ཀྱི་སེམས་གཟུང་བ་ནི། སངས་རྒྱས་བྱང་ཆུབ་ཡིད་གྱིས་གཟུང་། །ཞེས་པ་སྟེ། སློབ་དཔོན་ཀླུ་སྒྲུབ་ཀྱིས། སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་པ། །རྟག་ཏུ་སྟོང་ཉིད་མཚན་ཉིད་བཞེད། །ཅེས་བཤད་པ་ལྟར་གྱི་བྱང་ཆུབ་ཀྱི་སེམས་ནི་དོན་དམ་བྱང་ཆུབ་ཀྱི་སེམས་ཡིན་ལ། དེ་ཡིད་ཀྱིས་གཟུང་བ་ནི་བསྐྱེད་པར་དམ་བཅའ་བ་སྟེ། རྗེ་ས་པཎ་གྱིས་འདི་དང་། རྣམ་སྣང་མངོན་བྱུང་གི་རྒྱུན་བཤགས་ཀྱི་སྐབས་སུ་དོན་དམ་པའི་སེམས་བསྐྱེད་པར་གསུངས་པ་དམ་བཅའ་ཙམ་ཡིན་གྱི་ཆོ་གའི་སྒོ་ནས་བསྐྱེད་པ་མ་ཡིན་པར་གསུངས་པའི་དོན་ནོ། །ཁ་ཅིག་འདི་དོན་དམ་སེམས་བསྐྱེད་ཀྱི་ཆོ་གར་འདོད་པ་ནི་ཆོ་གའི་རྣམ་པ་མ་ཤར་བ་སྟེ། ཆོ་གས་སྐྱེ་ན་ཆོ་ག་དེ་ཉིད་ཀྱི་ལག་རྗེས་ལ་དོན་དེ་མཚན་ཉིད་པ་རྒྱུད་ལ་སྐྱེ་དགོས་ལ། རྒྱུན་བཤགས་བྱས་མ་ཐག་ཏུ་དོན་དམ་སེམས་བསྐྱེད་མཚན་ཉིད་པ་རྒྱུད་ལ་སྐྱེས་ནས་དང་པོ་ཐོབ་པར་ཐལ་བའི་ཕྱིར་རོ། །བཞི་པ་སྐྱབས་སུ་འགྲོ་བ་ནི། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །ཞེས་པ་སྟེ། འདི་ལ་སློབ་དཔོན་མཚོ་སྐྱེས་ཀྱིས། ཁམས་གསུམ་ཀུན་གྱི་བདག་ཉིད་བདེ་བ་ཆེན་པོའི་རྣམ་པ་སངས་རྒྱས་ཀྱེ་རྡོ་རྗེ་དང་། དེས་བསྟན་པའི་སྔགས་དང་། ཕྱག་རྒྱ་དང་། དཀྱིལ་འཁོར་ལ་སོགས་པའི་རང་བཞིན་གྱི་ཆོས་དང་། དེའི་འཁོར་ནི་འཁོར་ལོར་གནས་པའི་ལྷ་མོའི་ཚོགས་ལ་བདག་སྐྱབས་སུ་སོང་བར་བྱས་ནས་ཞེས་གསུངས་ལ། ནག་པོ་པས་རྒྱུད་གསུང་བ་པོ་རྡོ་རྗེ་འཆང་ནི། སངས་རྒྱས་དཀོན་མཆོག ཐེག་ཆེན་གྱི་ཆོས་མ་ལུས་པ་ནི་ཆོས་དཀོན་མཆོག བྱང་སེམས་ཕྱིར་མི་ལྡོག་པ་དང་། འཁོར་གྱི་ལྷ་དགེ་འདུན་དཀོན་མཆོག་ཏུ་བཤད་དོ། །རིན་ཆེན་འབར་བར་གདུལ་བྱ་གང་ལ་གང་འདུལ་གྱི་སྐུར་སྟོན་པ་སངས་རྒྱས་དཀོན་མཆོག སྤང་བྱ་སྤངས་བའི་འགོག་བདེན་དང་། སོ་སོ་རང་གིས་རིག་པར་བྱ་བའི་ལམ་བདེན་ཆོས་དཀོན་མཆོག དབང་བསྐུར་གྱི་བསླབ་པ་རྒན་ཞིང་རྡོ་རྗེ་ཐེག་པའི་ལམ་ལ་གནས་པ་དང་། དཀྱིལ་འཁོར་གྱི་འཁོར་ལ་བཀོད་པ་དགེ་འདུན་དཀོན་མཆོག་ཏུ་བཤད་ཅིང་། མན་ངག་ལུགས་ལ་ངོས་འཛིན་གསལ་ཁ་མི་སྣང་ཡང་། འདི་དང་མཐུན་པ་ལ་ཆོས་དཀོན་མཆོག་གཟུགས་ཀྱི་རྣམ་པར་བསྒོམ་པའི་ཚེ་གཙོ་བོའི་རྒྱབ་ཏུ་རིན་པོ་ཆེའི་ཁྲིའི་སྟེང་ན་ཆོས་པོ་ཏི་བརྩེགས་པ་བཞུགས་པ་བསྒོམ་པར་བླ་མ་དག་གསུངས་པ་ནི། གསང་སྔགས་པ་རྣམ་པ་ལམ་བྱེད་ཀྱི་སྒོ་ནས་ཕ་རོལ་ཏུ་ཕྱིན་པའི་བསྒོམ་ཚུལ་ལས་ཁྱད་པར་དུ་འཕགས་པར་གསུངས་པའི་དོན་དུ་སྣང་ངོ་། །དེ་དག་ལ་སྐྱབས་སུ་འགྲོ་བའི་དོན་ནི་གཞན་རྒྱུད་ལ་གྲུབ་ཟིན་པ་ལ་སྐྱབས་གནས་འཆའ་བ་ནི་རྒྱུའི་སྐྱབས་འགྲོ་དང་། རང་རྒྱུད་ལ་དེ་དག་བསྐྱེད་པར་ཁས་འཆེ་བ་ནི་འབྲས་བུའི་སྐྱབས་འགྲོའོ། །ལྔ་པ་སྨོན་པའི་སེམས་བསྐྱེད་པ་ནི། རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཞེས་པ་སྟེ། རང་དོན་མཐར་ཐུག་པ་རང་ཉིད་སངས་རྒྱས་ཐོབ་པ་དང་། གཞན་དོན་མཐར་ཐུག་པ་གཞན་སངས་རྒྱས་ཀྱི་ས་ལ་འགོད་པ་གཉིས་ཀ་ལ་ཡང་རྒྱུ་བྱང་ཆུབ་ཏུ་སེམས་བསྐྱེད་པ་དགོས་པས། དགོས་པ་དེ་འགྲུབ་པའི་ཆེད་དུ་སངས་རྒྱས་ཐོབ་པར་འདོད་པའི་བློ་བསྐྱེད་པའོ། །དྲུག་པ་འཇུག་པའི་སེམས་བསྐྱེད་པ་ནི། བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །ཞེས་པ་སྟེ། སྨོན་པ་སེམས་བསྐྱེད་པའི་རྗེས་སུ། འཇུག་པ་སེམས་བསྐྱེད་ཀྱི་བསླབ་བྱ། ཚུལ་ཁྲིམས་ཀྱི་བསླབ་པ་རྣམ་པ་གསུམ་པོ་བསྐྱེད་པར་བགྱི་ཞེས་པའོ། །བདུན་པ་བསྔོ་བ་ནི། འགྲོ་ལ་ཕན་ཕྱིར་སངས་རྒྱས་འགྲུབ་པ་ཤོག །ཅེས་པ་སྟེ། དེ་ལྟར་སྡིག་པ་བཤགས་པ་ནས་འཇུག་པ་སེམས་བསྐྱེད་ཀྱི་བར་གྱི་དགེ་རྩ་བསྔོ་བ་སྟེ། དགོས་ཆེད་དང་བསྔོ་བའི་ཡུལ་ནི་ཚིག་དེ་གཉིས་ཀྱིས་བསྟན་ནོ། །གཉིས་པ་ནི་འོ་ན་ཡན་ལག་བཞི་པར་སྐྱབས་འགྲོའི་འོག་ཏུ་དོན་དམ་སེམས་བསྐྱེད་གཟུང་བར་བཤད་པ་དང་། གོ་རིམ་འགལ་ལོ་སྙམ་ན། སྐྱོན་མེད་དེ་ཡན་ལག་བཞི་པར་ནི་རྡོ་རྗེ་ཐེག་པའི་ཐུན་མོང་མ་ཡིན་པའི་རྒྱུན་བཤགས་ལ་སྐྱབས་འགྲོ་དང་། སེམས་བསྐྱེད་གཉིས། སེམས་བསྐྱེད་ལ་དོན་དམ་སེམས་བསྐྱེད་དང་། ཀུན་རྫོབ་སེམས་བསྐྱེད་གཉིས་ཞེས་པའི་གོ་རིམ་གྱི་དབང་དུ་བྱས་པ་ཡིན་ལ། འདིར་ནི་འོག་ཏུ་སྐྱབས་འགྲོ་དང་སྨོན་འཇུག་གི་སེམས་བསྐྱེད་དངོས་སུ་ཡོད་པའི་ཚེ། སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་ཚིག་རྐང་དོན་དམ་སེམས་བསྐྱེད་ལ་སྦྱར་ཡང་དེ་དག་དངོས་སུ་མེད་པའི་ཚེ་ཚིག་རྐང་དེ་ཉིད་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ཀྱི་མདོར་བསྟན་དུ་འགྲོ་བའི་གོ་རིམ་གྱི་དབང་དུ་བྱས་པའོ། །ཡན་ལག་བཞི་པར་བསྔོ་བ་ཡན་ལག་གསུམ་པར་བྱས་ནས་འདིར་བསྔོ་བ་མཇུག་ཏུ་སྟོན་པའི་རྒྱུ་མཚན་ཅི་སྙམ་ན། དེར་ནི་ཕ་རོལ་ཏུ་ཕྱིན་པ་དང་ཐུན་མོང་གི་ཡན་ལག་གསུམ་པོ་སྔོན་ཏུ་བཏང་ནས། ཐུན་མོང་མ་ཡིན་པའི་ཡན་ལག་བཞི་པོ་རྗེས་ལ་བྱེད་པའི་དབང་དུ་བྱས་ལ། འདིར་ནི་རྒྱུན་བཤགས་སྔ་མ་རྣམས་ཀྱི་དགེ་བ་ཡང་བསྔོ་བའི་དབང་དུ་བྱས་པའོ། །གསུམ་པ་ནི། གུར་གྱི་རྒྱུན་བཤགས་འདིར་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་གཉིས་མི་དགོས་པ་ཅི་ཡིན་སྙམ་ན། འདི་ལ་བླ་མ་གཟུངས་ཀྱི་པ་ན་རེ། ཡན་ལག་བདུན་པ་ལ་རིགས་གཉིས་ཏེ། སངས་རྒྱས་སྤྲུལ་སྐུ་དང་། ལོངས་སྐུའི་སྤྱན་སྔར་བྱ་བའོ། །དེ་ལ་སྤྲུལ་པའི་སྐུ་གཞན་སྣང་དུ་མྱ་ངན་ལས་འདའ་བ་དང་། ཆོས་ཀྱི་འཁོར་ལོ་མི་བསྐོར་བའི་ཚུལ་སྟོན་པ་ཡོད་པས། དེའི་སྤྱན་སྔར་དེ་དག་བྱ་དགོས་ལ། ལོངས་སྐུ་ངེས་པ་ལྔ་ལྡན་དུ་བཞུགས་པས། ཆོས་ངེས་པ་ཐེག་ཆེན་གྱི་ཆོས་རྒྱུན་མི་འཆད་དུ་གསུངས་པ་དང་། སློབ་དཔོན་ཡེ་ཤེས་སྙིང་པོས། སྤྲུལ་པའི་སྐུ་ནི་མྱ་ངན་ལས། །འདའ་བར་བྱེད་ཀྱི་ཅིག་ཤོས་མིན། །ཞེས་པ་ལྟར། དུས་ངེས་པ་འཁོར་བ་མ་སྟོངས་ཀྱི་བར་དུ་བཞུགས་པས། དེ་ལ་ཆོས་འཁོར་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་གཉིས་མི་དགོས་སོ། །ཞེས་བཞེད་པ་ནི་མི་འཐད་དེ། ཀྱེ་རྡོར་ལྷ་དགུ་དང་བདག་མེད་ལྷ་མོ་བཅོ་ལྔའི་དཀྱིལ་འཁོར་རྣམས་སྤྲུལ་པ་མཆོག་གི་དཀྱིལ་འཁོར་ཡིན་པར་རྗེ་བཙུན་གོང་མའི་གསུང་རབ་རྣམས་ལས་འབྱུང་བའི་ཕྱིར་དང་། གཞན་དུ་ངེས་པ་ལྔ་ལྡན་ཡིན་ན་མདུན་དུ་སྤྱན་དྲངས་དུ་ཡོད་ན། གནས་ངེས་པ་འགལ་ཞིང་། མེད་ན་རྒྱུན་བཤགས་བྱ་བ་འགལ་བའི་ཕྱིར་དང་། བསྐུལ་བ་དང་། གསོལ་བ་འདེབས་པ་སོགས་རང་གི་བློ་སྦྱོང་བ་ཡིན་གྱི་ཡུལ་ལ་ཁྱད་པར་ཡོད་པ་མ་ཡིན་པའི་ཕྱིར་རོ། །འོ་ན་ཅི་ལྟར་སྙམ་ན་དངོས་གཞི་སྔགས་སྡོམ་ལེན་པའི་ཆོ་ག་ལ་སྔོན་འགྲོ་སྟ་གོན་དང་། འཇུག་པའི་སྐབས་སུ་སྡོམ་པ་འོག་མ་གཉིས་ལེན་པའི་ཆོ་ག་ངེས་པར་དགོས་པ་དང་། དངོས་གཞི་བསྐྱེད་རིམ་ཉམས་སུ་ལེན་པ་ལ་གང་ཟག་འབྲིང་དང་། ཐ་མས་སྔོན་འགྲོ་རྒྱུན་བཤགས་ཀྱི་སྐབས་སུ་སྡོམ་པ་འོག་མ་གཉིས་ཀྱི་ཉམས་ལེན་དགོས་པ་ནི། སྔགས་སྡོམ་ལ་སྡོམ་གསུམ་ལྡན་པའི་ཉམས་ལེན་གྱི་དོན་ཡིན་པས། འདིར་རྒྱུན་བཤགས་ཀྱི་སྐབས་སུ་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ངེས་པར་དགོས་ཤིང་། ཡན་ལག་གཞན་རྣམས་ནི་རྒྱས་བསྡུས་ཅི་རིགས་པ་འབྱུང་བས། མེད་ཀྱང་ཆད་པའི་སྐྱོན་དུ་མི་འགྱུར་ལ། ཡོད་ཀྱང་ལྷག་པའི་སྐྱོན་དུ་མི་འགྱུར་རོ། །དེ་ལ་ཡང་ཕ་རོལ་ཏུ་ཕྱིན་པའི་ཐེག་པ་དང་། གྲངས་སྒོ་བསྟུན་པའི་དབང་དུ་བྱས་ནས་ཡན་ལག་བདུན་དུ་གྲངས་ངེས་པ་དང་། དེར་མ་ངེས་པ་རྒྱས་བསྡུས་གཞན་དུ་འབྱུང་བའི་ལུགས་གཉིས་ལས། དང་པོ་ལ་ཡང་ཕ་རོལ་ཏུ་ཕྱིན་པ་དང་། ཐུན་མོང་གི་ཡན་ལག་གཉིས། ཐུན་མོང་མ་ཡིན་པའི་ཡན་ལག་ལྔར་བྱས་པའི་ལུགས་དང་། ཐུན་མོང་བ་གསུམ། ཐུན་མོང་མ་ཡིན་པ་བཞིར་བྱས་པའི་ལུགས་དང་། ཐུན་མོང་བ་ལྔ། ཐུན་མོང་མ་ཡིན་པ་གཉིས་སུ་བྱས་པའི་ལུགས་དང་གསུམ་ལས། དང་པོ་ནི། རྡོ་རྗེ་འབྱུང་བ་ནས་གསུངས་པའི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་གཉིས། ཐུན་མོང་མ་ཡིན་པ་སྐྱབས་འགྲོ་གསུམ་དུ་བགྲངས་པ་དང་། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་གཉིས་ཏེ་དེ་ལྟར་བདུན་ནོ། །གཉིས་པ་ནི་མན་ངག་ལུགས་ཀྱི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་དང་། བསྔོ་བ་གསུམ། ཐུན་མོང་མ་ཡིན་པ་སྐྱབས་འགྲོ་གཅིག་ཏུ་བགྲངས་པ་དང་། དོན་དམ་སེམས་བསྐྱེད་དང་། སྨོན་པ་སེམས་བསྐྱེད་དང་། འཇུག་པ་སེམས་བསྐྱེད་དེ་གོ་རིམ་མི་འདྲ་བའི་ཁྱད་པར་ནི་བསྟན་ཟིན་ཏོ། །གསུམ་པ་ནི། བཟང་པོ་ཡོངས་བཟུང་ལས་གསུངས་པའི་རྒྱུན་བཤགས་ལྟ་བུ་སྟེ། ཐུན་མོང་བ་བཤགས་པ་དང་། ཡི་རང་དང་། བསྐུལ་བ་དང་། གསོལ་བ་དང་། བསྔོ་བ་སྟེ་ལྔ། ཐུན་མོང་མ་ཡིན་པ་སྐྱབས་འགྲོ་གཅིག་དང་། སྨོན་འཇུག་གི་སེམས་བསྐྱེད་གཉིས་གཅིག་ཏུ་བགྲངས་ཏེ་དེ་ལྟར་བདུན། ཡུལ་སྤྲུལ་སྐུ་དང་ལོངས་སྐུའི་སྒོ་ནས་ཕྱེ་བ་ལ་ནི་འདིས་ཀྱང་གནོད་དོ། །གཉིས་པ་གྲངས་སྒོ་མ་བསྟུན་པར་རྒྱས་བསྡུས་གཞན་དུ་བྱེད་པའི་ལུགས་ལ་རྒྱས་པའི་ལུགས་དང་། བསྡུས་པའི་ལུགས་གཉིས་ལས། དང་པོ་ནི། ནཱ་རོ་ཏ་པའི་མན་ངག་ལས་བྱུང་བ་ཚོགས་བསག་བཅུ་གསུམ་གྱི་ནང་གི་རྒྱུན་བཤགས་ལྟ་བུ་སྟེ། འདི་ལ་ཐུན་མོང་གི་ཡན་ལག་ལྔ། ཐུན་མོང་མ་ཡིན་པའི་ཡན་ལག་བཞི་སྟེ་དགུར་མཛད་དོ། །གཉིས་པ་ནི་རྣམ་སྣང་སྒྱུ་དྲྭ་ལས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་ཚིགས་བཅད་གཅིག་པོ་འདི་ཉིད་ཀྱིས་བྱ་བར་གསུངས་ཏེ། འདིའི་ཚིག་རྐང་པ་ཐ་མའི་དོན་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ཡིན་པས་དོན་མ་ལུས་པ་ཚང་བའོ། །འདི་ལ་དགོངས་ནས་སློབ་དཔོན་ཀླུའི་བློས། །ཚིགས་བཅད་གཅིག་པོ་འདི་ཉིད་ཀྱིས། །རྒྱུན་བཤགས་བྱ་བར་གསུངས་པ་དང་། །རྗེ་བཙུན་རྩེ་མོས་ཌོམྦི་ལུགས་ཀྱི་དཀྱིལ་ཆོག་ཏུ། རྒྱུན་བཤགས་བསྡུས་པ་བྱེད་ན་འདི་ཉིད་ཀྱིས་ཀྱང་ཆོག་པར་གསུངས་པར་ཤེས་པར་བྱའོ། །དེ་ནས་སྐབས་འདིར་རྗེ་བཙུན་སྐུ་མཆེད་ཀྱི་སྒྲུབ་ཐབས་དང་། རྒྱ་གར་བའི་གཞུང་ཐམས་ཅད་ནས་རིགས་ལྔའི་སྡོམ་གཟུང་བྱ་བར་བཤད་པ་མེད་ཀྱང་བླ་མ་རྣམས་ཀྱི་ཕྱག་ལེན་ལ་མཛད་པ་ནི། རྗེ་བཙུན་གྱིས་དགའ་སྟོན་ལ་གདམས་པར། སྲས་བཅས་སངས་རྒྱས་ཐམས་ཅད་དང་། །ཞེས་པ་ལ་སོགས་པ་ལན་གསུམ་གྱིས་རིགས་ལྔའི་སྡོམ་པ་གཟུང་། ཞེས་བཤད་པ་ལ་བརྟེན་པར་སྣང་ཞིང་། དེའི་དགོས་པ་ཡང་དེ་ཉིད་ལས། རྡོ་རྗེ་ཐེག་པའི་རྒྱུ་དུས་ཀྱི་སྟ་གོན་དང་། ཡོལ་བའི་ཕྱི་འཇུག་དང་། ནང་འཇུག་གི་སྡོམ་པ་ཐམས་ཅད་ཀྱང་དེར་སོར་ཆུད་པ་ཡིན་ཞེས་བཤད་པ་ལྟར་རོ། །འདི་རྒྱུན་བཤགས་ཀྱི་ཁོངས་སུ་འདུ་བར་མངོན་རྟོགས་ལྗོན་ཤིང་ལས་བཤད་པ་ནི། དེ་ལྟར་ན། རྡོ་རྗེ་གུར་ལས། རྒྱུན་བཤགས་ཀྱི་རྗེས་སུ་ཚད་མེད་བཞི་བསྒོམ་པ་ལས་གཞན་མ་བཤད་པ་དང་འགལ་ལོ་སྙམ་ན། རྒྱུན་བཤགས་ཀྱི་ནང་གི་འཇུག་པ་སེམས་བསྐྱེད་རྒྱས་པར་བཟུང་བ་ཡིན་པས་དེ་དང་འགལ་བའི་སྐྱོན་མེད་ཅེས་པའི་དོན་ཏོ། །ཉམས་སུ་ལེན་པའི་ཚེ་ནི་མཆོད་གཏོར་སྔོན་དུ་སོང་ན་སྐབས་འདིར་བྱ་མི་དགོས་ཏེ། སྔར་བྱས་ཟིན་མ་ཐག་ཡིན་པའི་ཕྱིར་རོ། །དེ་ལ་དགོངས་ནས་སྔར་གྱི་གཞུང་རྣམས་སུ་མ་བཤད་པ་ཡིན་ལ། མཆོད་གཏོར་གྱི་རྣལ་འབྱོར་སྔོན་དུ་མ་སོང་ན་སྐབས་འདིར་ངེས་པར་བྱ་དགོས་ཏེ། སྡོམ་པ་སོར་ཆུད་དགོས་པའི་ཕྱིར། དེ་ལ་དགོངས་ནས། སམྦུ་ཊའི་རྡོ་རྗེ་དབྱིངས་ཀྱི་མངོན་རྟོགས་ཀྱི་སྐབས་སུ་སྡོམ་གཟུང་བཤད་ཅིང་། བདེ་མཆོག་སོགས་གཞུང་གཞན་ལས་ཀྱང་བཤད་དོ། །རྒྱུན་བཤགས་ལ་མི་མཚུངས་པའི་རྒྱུ་མཚན་ནི། སྔར་ཕྱག་འཚལ་བའི་དོགས་གཅོད་ཀྱི་སྐབས་སུ་བཤད་པ་ལྟར་ཤེས་པར་བྱའོ། །བཞི་པ་ནི། དེ་ལྟར་རྒྱུན་བཤགས་བྱས་པས་ཚོགས་རྟེན་དེ་དག་གི་ཞལ་ནས། རིགས་ཀྱི་བུ་ཁྱོད་ཀྱིས་མཆོག་གི་དངོས་གྲུབ་ཐོབ་པའི་སྐལ་བ་ཡོད་པས། ལམ་རིམ་པ་གཉིས་སྒོམས་ཤིག་ཅེས་གནང་བ་བྱིན་པར་བསམ་མོ། །དེ་ནས་རྗེ་བཙུན་སྐུ་མཆེད་ཀྱིས་ཚོགས་རྟེན་ཇི་ལྟར་བྱེད་མི་གསལ་ཀྱང་། ས་པཎ་གྱི་ཕྱི་ནང་གསང་གསུམ་གྱི་མཎྜལ་གྱི་ཡིག་ཆ་ལས་མི་དམིགས་པའམ། རང་ལ་བསྡུ་བའམ། རང་གནས་སུ་གཤེགས་པ་གང་རུང་བྱ་བར་གསུངས་པ་ལྟར་བྱའོ། །གཉིས་པ་ཡུལ་མ་དག་པ་ལ་བརྟེན་པའི་ཚོགས་བསག་པ་ནི། གུར་ལས། ཚངས་པའི་གནས་ནི་བཞི་པོ་ཡིས། །སེམས་ཀྱི་ངལ་ནི་བསོ་བར་བྱ། །ཞེས་གསུངས་པ་ལྟར་མཐར་ཐུག་གི་ཚངས་པ་སངས་རྒྱས་དང་། གནས་སྐབས་སུ་ལྷ་ཚངས་པའི་གོ་འཕང་ཐོབ་པར་བྱ་བའི་ཐབས་ཚད་མེད་བཞི་བསྒོམ་པར་བྱ་སྟེ། འདིར་རྗེ་བཙུན་རྩེ་མོས་མཚོ་སྐྱེས་ཀྱི་ཊཱི་ཀར། ཚད་མེད་བཞི་ཕར་ཕྱིན་ཐེག་པ་ལྟར་བསྒོམ་པ་དང་། གསང་སྔགས་ལྟར་བསྒོམ་པ་གཉིས་ཀྱི་དང་པོ་སྔར་དང་འདྲ་ལ། ཕྱི་མ་ནི་རང་གི་སྙིང་གའི་ས་བོན་ལས་ལྷ་མོ་པུཀྐ་སཱིའམ་འོད་ཟེར་སྔོན་པོ་འཕྲོས། དེས་སེམས་ཅན་ཐམས་ཅད་བྱམས་པ་ཚད་མེད་པ་ལ་བཀོད་པར་བསམ། དེ་བཞིན་དུ་ཤ་ཝ་རཱིའམ་འོད་ཟེར་དཀར་པོ་འཕྲོས་པས་སྙིང་རྗེ་དང་། ཙཎྜ་ལཱིའམ་འོད་ཟེར་སྔོ་དམར་འཕྲོས་པས་དགའ་བ་དང་། ཌོམྦི་ནཱིའམ་འོད་ཟེར་སྣ་ཚོགས་འཕྲོས་པས་བཏང་སྙོམས་ཚད་མེད་པ་ལ་བཀོད་པར་བསམ་པར་བཞེད་དོ། །གསུམ་པ་ནི་དེ་ལྟར་ཚོགས་བསག་རྣམ་པ་གཉིས་བྱས་པ་ལ་དགོས་པ་ཅི་ཡོད་ཅེ་ན། རྗེ་བཙུན་རྩེ་མོས། དེ་ལྟར་ཚོགས་བསག་བྱས་པ་ཡང་། །དགོས་པ་རྣམ་པ་གཉིས་གསུངས་ཏེ། །རྒྱུད་དག་པ་ཡི་དགོས་པ་དང་། །སྔོན་གྱི་རྒྱལ་དང་མཚུངས་བྱ་འོ། །དེ་ལ་དགོས་པ་དང་པོ་ནི། དཔེར་ན་སྣོད་ནང་བཟའ་འདྲེན་པ། །དང་པོ་སྣོད་དག་བྱས་ནས་ནི། །དེ་ནས་སྣོད་དུ་བཟའ་འདྲེན་ལྟར། །དང་པོར་ཚོགས་བསག་རྒྱུད་དག་པས། །སྣོད་ཀྱི་དྲི་མ་དག་བྱས་མཚུངས། །དེ་ནས་ཚོགས་རྫོགས་ལྷར་བསྐྱེད་པ། །སྣོད་དུ་བཟའ་འདྲེན་ཇི་བཞིན་ནོ། །དགོས་པ་གཉིས་པའང་བཤད་བྱ་སྟེ། །རྒྱལ་པས་སྔོན་དུ་ཚོགས་བསགས་ཏེ། །དེ་རྗེས་སངས་རྒྱས་དེ་བཞིན་དུ། །མཆོད་སོགས་ཚོགས་བསག་པ་དང་མཚུངས། །དེ་ནས་ལྷ་ནི་རྣམ་བསྐྱེད་པ། །མངོན་པར་རྫོགས་སངས་རྒྱས་དང་མཚུངས། །དེ་ཡང་དོན་ནི་འདི་ཡིན་ཏེ། །སྤྱིར་ཕ་རོལ་ཏུ་ཕྱིན་པའི་ཐེག་པ་ལ་བསྐལ་པ་གྲངས་མེད་གསུམ་ལ་སོགས་པར་ཚོགས་བསགས་ནས། མཐར་མངོན་པར་བྱང་ཆུབ་པའི་ཚུལ་དེ་གསང་སྔགས་ཀྱི་ལུགས་ཀྱི་སྟན་ཐོག་གཅིག་ཏུ་བསྒོམ་པ་ཡིན་ཏེ། ཚོགས་བསགས་ནས་དེ་ནས་མངོན་པར་འཚང་རྒྱ་བའི་གནས་ལ་སོགས་པ་དང་། དེར་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་སེམས་ཅན་གྱི་དོན་བྱེད་པ་སླར་ཡང་དག་པའི་མཐའ་ཉིད་དུ་འཇུག་པ་ལ་སོགས་པ་སྟོན་ཏེ། དེས་ན་གསང་སྔགས་འབྲས་བུ་ལམ་དུ་བྱེད་པ་ཞེས་བྱ་བར་འདོད་པའི་གཞུང་ངོ་ཞེས་བཤད་པ་ལྟར་རོ། །གཉིས་པ་ལ་གསུམ། སྟོང་ཉིད་བསྒོམ་པ། དེ་སྔགས་ཀྱིས་བརྟན་པར་བྱ་བ། ཞར་བྱུང་དེ་དག་གི་དགོས་པ་བཤད་པའོ། །དང་པོ་ནི། རྗེ་བཙུན་རྩེ་མོས། བཙན་ཐབས་སུ་སྟོང་ཉིད་བསྒོམ་པ་དང་། བཤིག་ནས་སྟོང་ཉིད་བསྒོམ་པ་གཉིས་ཀྱི་དང་པོ་ནི། སྔགས་བརྗོད་དེ། དེའི་དོན་དྲན་པ་ཙམ་གྱི་སྟོང་པ་ཉིད་དུ་བསྒོམ་པ་དང་། ཕྱི་མ་ནི་གཅིག་དང་དུ་བྲལ་ལ་སོགས་པའི་རིགས་པས་རང་བཞིན་མེད་པར་བྱས་ནས་སྔགས་ཀྱིས་བརྟན་པར་བྱེད་པ་ལ་བཤད་དོ། །དེ་ལ་དང་པོ་ནི། གང་ཟག་བློ་མཆོག་སྟོང་ཉིད་ཀྱི་ལྟ་བ་ཁོང་དུ་ཆུད་པས། སྟོང་ཉིད་ལ་བློ་ཁ་ཕྱོགས་པ་ཙམ་གྱིས་སྣང་བ་ཐམས་ཅད་མི་དམིགས་པར་འགྲོ་བའམ། སྐལ་ལྡན་ཅིག་ཆར་བ་སྔར་དབུ་མའི་ལྟ་བ་ལ་ཐོས་བསམ་མ་བྱས་ཀྱང་གསང་སྔགས་ཀྱི་ལུགས་ཀྱིས་སྟོང་ཉིད་བསྒོམ་ཚུལ་གྱི་དབང་དུ་བྱས་པའོ། །ཕྱི་མ་ནི་སྔར་དབུ་མའི་ལྟ་བ་ལ་ཐོས་བསམ་གྱི་སྦྱངས་པ་རྩོལ་བས་སྟོང་ཉིད་བསྒོམ་དགོས་པ་དག་གིས་ཕ་རོལ་ཏུ་ཕྱིན་པ་དང་ཐུན་མོང་དུ་བསྒོམ་ཚུལ་ལོ། །དེ་གཉིས་ཀ་ལ་ཡང་སྣང་བའི་སྟེང་དུ་བདེན་འཛིན་གྱི་དྲི་མ་སྦྱངས་པར་མ་ཟད་སྣང་བ་ཉིད་ཀྱང་མི་དམིགས་པར་བསྒོམ་དགོས་ཏེ། འོག་ནས་འཆད་པར་འགྱུར་པའི་དགོས་པ་གཉིས་པ་ངེས་པར་བསྒྲུབ་དགོས་པའི་ཕྱིར། དེ་ལ་ཕྱིས་ཀྱི་མདོ་སྔགས་ཀྱི་གཞུང་ལུགས་སྨྲ་བར་རློམ་པ་ཁ་ཅིག་ན་རེ། སྣང་བ་མེད་པར་བསྒོམས་ན་སྣང་བ་ལ་སྐུར་པ་བཏབ་པའི་ལོག་ལྟར་འགྱུར་བས་ངན་འགྲོའི་རྒྱུ་ཡིན་གྱི། བདེ་འགྲོའི་རྒྱུ་ཙམ་དུ་ཡང་མི་རུང་ན་ཡེ་ཤེས་ཚོགས་བསག་ཏུ་ག་ལ་རུང་། དེས་ན་སྣང་བའི་སྟེང་དུ་བདེན་པ་བསལ་ནས་སྣང་བ་ཉིད་མི་བསལ་བར་སྣང་ལ་རང་བཞིན་མེད་པ་སྒྱུ་མ་ལྟ་བུར་བསྒོམ་པ་ཡེ་ཤེས་ཚོགས་བསག་གི་དོན་ཡིན་ནོ་ཞེས་འཛེར་ཏོ། །འོ་ན་ཁྱོད་ཉིད་གསང་བ་འདུས་པའི་ཡེ་ཤེས་ཀྱིས་བསྐྱེད་པའི་སྐབས་སུ་ཁམས་གསུམ་སྣོད་བཅུད་སྲུང་བའི་འཁོར་ལོ་དང་བཅས་པ་འོད་གསལ་སྟོང་པ་ཉིད་དུ་ཐིམ་པར་འདོད་པ་ལ་ཡང་མཚུངས་ཏེ། ཐ་སྙད་དུ་དེ་དག་ལ་སྐུར་པ་བཏབ་པས་བདེ་འགྲོའི་རྒྱུ་ཙམ་དུ་ཡང་མི་རུང་ན། ཡེ་ཤེས་ཀྱི་ས་བསྐྱེད་པར་ག་ལ་རུང་ཞེས་བརྗོད་ན་ལན་ཅི་སྨྲ། དེ་ལ་ཡང་ལན་འདི་སྐད་དུ་སྨྲ་བར་སྣང་སྟེ། ཁོ་བོས་དེའི་ཚེ་ཁམས་གསུམ་སྣོད་བཅུད་སྲུང་བའི་འཁོར་ལོ་དང་བཅས་པ་རེ་ཤིག་བློ་ངོར་མི་དམིགས་པར་སྒོམ་པ་ཙམ་ཡིན་གྱི། མེད་པར་མ་བཏང་བའི་ཕྱིར་ཞེས་སྨྲའོ། །འོ་ན་རྒྱུ་མཚན་དེ་ཉིད་གཞན་གྱིས་ཅིའི་ཕྱིར་སྨྲ་མི་ཤེས། གལ་ཏེ་གཞན་གྱིས་མེད་པར་བཏང་བས་སྨྲ་རྒྱུ་མེད་དོ་སྙམ་ན། བློ་ངོར་མི་དམིགས་པ་ཙམ་གྱིས་མེད་པར་བཏང་ན། ཁྱོད་ཉིད་ཀྱིས་ཀྱང་མེད་པར་བཏང་ལ། སྣང་བ་རང་ངོས་ནས་མེད་པར་བཏང་བ་ནི་གཞན་གྱིས་ཀྱང་མ་བྱས་ཏེ་ད་དུང་སྣང་བ་འདུག་པའི་ཕྱིར་རོ། །ཡེ་ཤེས་ཚོགས་བསག་གི་སྐབས་སུ་སྣང་བ་མི་དམིགས་པར་བསྒོམས་པས། ཐ་སྙད་ལ་སྐུར་པ་བཏབ་ན། དོན་དམ་པར་སྣང་བ་མི་དམིགས་པར་བསྒོམས་པས་ཀྱང་ཐ་སྙད་ལ་སྐུར་པ་བཏབ་པར་འགྱུར་ཏེ། ཡེ་ཤེས་ཚོགས་བསག་ནི་དོན་དམ་གྱི་གནས་ཚུལ་བསྒོམ་པའི་སྐབས་ཡིན་པའི་ཕྱིར་རོ། །ཁྱོད་ཉིད་སྐབས་འདིར་སྣང་བ་མི་བསལ་ན། འོག་ཏུ་རྟེན་དང་བརྟེན་པར་བཅས་པའི་འཁོར་ལོ་བསྒོམ་པའི་ཚེ་རང་གི་གོས་དང་། གདན་དང་། གནས་ཁང་དང་། གདོས་བཅས་ཀྱི་ཕུང་པོ་འདི་དག་གཞལ་ཡས་ཁང་པའི་ཕྱི་ན་ཡོད་པ་ཡིན་ནམ་ནང་ན་ཡོད་པ་ཡིན། རང་གིས་གོན་པའི་གོས་རྣམས་ལྷ་དེ་ཉིད་ལ་གཡོགས་པའི་ཚུལ་དུ་ཡོད་པ་ཡིན་ནམ། མཐའ་སྐོར་དུ་ཡོད་པ་ཡིན། ལེགས་པར་སོམས་ལ་སྨྲོས་ཤིག འདི་ལྟར་སྨྲ་བ་དེས་ནི་བསྐྱེད་རིམ་རྣལ་མ་ཅིག་མ་བསྒོམས་པར་གསལ་ལོ། །གཞན་ཡང་སྟོང་པའི་ངང་ལས་ཞེས་པའི་དོན་ཡང་སྨྲ་དགོས་ཏེ། ཁྱེད་བསྒོམ་པའི་སྟོང་ཉིད་ནི་སྣང་བ་མི་བསལ་བར་བདེན་པར་བསལ་བ་ཙམ་ཡིན་པས་བདེན་པར་མེད་པའི་ངང་ལས་སླར་ཡང་བདེན་པར་ལངས་ཞེས་པར་སོང་བའི་ཕྱིར། སྣང་བ་གསལ་བར་འདོད་པ་ལ་ཡང་མཚུངས་སོ་སྙམ་ན། དེ་དག་ནི་ཐ་མལ་གྱི་སྣང་བ་ཙམ་ཡང་མི་དམིགས་པའི་ངང་ལས་སླར་ཡང་སྣང་བར་འཆར་བ་འདི། ཐ་མལ་གྱི་སྣང་བར་འཆར་བ་བཀག་ནས་ལྷའི་སྣང་བར་བསྒྲུབ་ཅེས་པའི་དོན་ཡིན་པས་ཉེས་པ་མི་མཚུངས་པའི་སྟེང་དུ་ཡེ་ཤེས་ཚོགས་བསག་གི་དོན་ཉིད་ཀྱང་རྟོགས་པར་འགྱུར་རོ། །ཕ་རོལ་ཏུ་ཕྱིན་པའི་དབུ་མའི་སྐབས་སུ་ཡང་། སྣང་བ་དེའི་གནས་ཚུལ་ལ་དཔྱད་པའི་ཚེ་སྣང་བ་དེ་ཉིད་མི་རྙེད་པ། ཐལ་འགྱུར་བའི་ལུགས་མཆོག་དམ་པ་ཡིན་པ་ནི་གཞན་དུ་བཤད་ཟིན་ཏོ། །རྡོ་རྗེ་ཐེག་པའི་སྐབས་འདིར། དབང་གི་སྐབས་སུ་ཐོབ་པའི་ལྟ་བ་བསྒོམ་པ་ལ། སྣང་བའི་དམིགས་པ་གང་ཡང་མེད་པ་བཙན་ཐབས་སུ་བསྒོམ་པ་འདི་ཉིད་མཆོག་ཡིན་པ་ལ་དགོངས་ནས། རྗེ་བཙུན་རྩེ་མོས་སྣང་ལ་རང་བཞིན་མེད་པར་བསྒོམ་པ་དང་། སྣང་མེད་དུ་བསྒོམ་པ་གཉིས་ལས། འདི་ནི་སྣང་བ་མེད་པར་བསྒོམ་པའི་ལུགས་སོ་ཞེས་གསུངས་པར་ཤེས་པར་བྱའོ། །གཉིས་པ་ནི་དེ་ལྟར་སྒོམ་ཚུལ་གཉིས་ལས། བཙན་ཐབས་སུ་སྟོང་ཉིད་བསྒོམས་པས་ནི་སྔགས་བརྗོད་པ་དང་དུས་མཉམ་དུ་སྟོང་ཉིད་བསྒོམ་པ་ཡིན་ལ། བཤིག་སྟེ་སྟོང་ཉིད་བསྒོམས་པས་ནི་སྟོང་ཉིད་བསྒོམས་པའི་རྗེས་སུ་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེའི་དོན་གུར་འགྲེལ་ལས། ཨོཾ་ཞེས་བྱ་བའི་དོན་ནི་འདིའོ། །ཤཱུ་ནྱ་ཏཱ་ཛྙཱ་ནི་སྟེ་རབ་ཏུ་གསལ་བ་ཙམ་ཡིན་པའི་ཕྱིར་རོ། །བཛྲ་ཞེས་བྱ་བ་ནི་བདག་ཉིད་མི་ཕྱེད་པའི་ཕྱིར་དང་། སྒྲིབ་པ་ཐམས་ཅད་འཇོམས་པའི་ཕྱིར་རོ། །ཡང་ན་སྟོང་པ་ཉིད་ཀྱི་དོན་ཅན་གྱི་མེ་ལོང་ལྟ་བུའི་ཡེ་ཤེས་ནི་ཨོཾ་ཞེས་བྱའོ། །མཉམ་པ་ཉིད་ཀྱི་ཡེ་ཤེས་ནི་ཤཱུ་ནྱ་ཏཱའོ། །སོ་སོར་རྟོག་པའི་ཡེ་ཤེས་ནི་ཛྙཱ་ནའོ། །བྱ་བ་ནན་ཏན་གྱི་ཡེ་ཤེས་ནི་བཛྲ་སྟེ། སྤྲུལ་པའི་སྐུ་ནམ་མཁའ་ཇི་སྙེད་པར་གནས་པའི་ཕྱིར་རོ། །ཤིན་ཏུ་རྣམ་པར་དག་པའི་ཡེ་ཤེས་ནི་སྭ་བྷཱ་ཝ་ཨཱཏྨ་ཀོ྅ཧཾ་ངོ་། །ཞེས་བཤད་པ་ལྟར་གོ་བར་བྱའོ། །གསུམ་པ་ནི། དེ་ལྟར་ཡེ་ཤེས་ཀྱི་ཚོགས་བསག་བསྒོམ་པ་ལ་དགོས་པ་ཅི་ཡོད་སྙམ་ན། རྗེ་བཙུན་རྩེ་མོས། ཡེ་ཤེས་ཚོགས་བསག་དགོས་པ་ཡང་། །རྣམ་པ་བཞི་རུ་ཤེས་བྱ་སྟེ། །ཀུན་ཏུ་བརྟགས་པའི་དྲི་མ་ལས། །དག་པར་བྱ་བའི་དགོས་པ་དང་། །གཉིས་པ་ཐམས་ཅད་མཁྱེན་པ་ཡི། །ལྷ་ཡི་མྱུ་གུ་བསྐྱེད་པ་དང་། །གསུམ་པ་བསོད་ནམས་ཚོགས་དང་ནི། །ཡེ་ཤེས་ཚོགས་སུ་འབྲེལ་ཕྱིར་དང་། །བཞི་པ་ཆོས་ཀྱི་སྐུ་ལས་ནི། །གཟུགས་སྐུ་འགྲུབ་པར་བྱ་ཕྱིར་རོ། །དེ་ལས་དང་པོ་བཤད་བྱ་སྟེ། །གང་ཟག་བདག་ལ་སོགས་པ་རྣམས། །ཡང་དག་མ་ཡིན་ཀུན་བརྟགས་པ། །སྟོང་པ་བསྒོམས་པས་དག་ཕྱིར་ཏེ། །དཔེར་ན་རིགས་ངན་ཁང་བསྲེགས་པས། །དག་འགྱུར་དེ་ཡང་ཁ་སྦྱོར་ལས། །དང་པོར་སྟོང་ཉིད་བསམ་པས་ནི། །ལུས་ཅན་རྣམས་ཀྱི་དྲི་མ་བཀྲུ། །གཉིས་པ་ཡང་ནི་བཤད་བྱ་སྟེ། །ཐ་མལ་དངོས་པོ་རགས་པ་རྣམས། །ལན་ཅིག་སྟོང་པར་བསྒོམ་མིན་ན། །འདི་ལས་ལྷར་ནི་བསྐྱེད་མི་བཏུབ། །ལན་ཅིག་སྟོང་པར་བྱས་པ་ཡི། །དེ་ལས་ལྷར་ནི་བསྐྱེད་བྱ་སྟེ། །དང་པོར་རྡོ་སོགས་རགས་པ་རྣམས། །བསལ་ནས་ས་བོན་བཏབ་པ་ལས། །མྱུ་གུ་འབྱུང་ཞིང་དེ་སྐད་དུའང་། །ལུས་སོགས་སྟོང་པའི་ཞིང་ས་ལ། །བློ་དང་ལྡན་པས་ས་བོན་བཏབ། །གསུམ་པ་ཡང་ནི་བཤད་བྱ་སྟེ། །ཐབས་དང་བྲལ་བའི་ཤེས་རབ་དང་། །ཤེས་རབ་བྲལ་བའི་ཐབས་དག་གིས། །འཆིང་ཞིང་གྲོལ་བར་མི་འགྱུར་ལ། །ཐབས་དང་ཤེས་རབ་ཟུང་འཇུག་པས། །གྲོལ་བར་བཤད་པས་བསོད་ནམས་ཚོགས། །ཐབས་ཡིན་ཡེ་ཤེས་ཚོགས་སྟོང་ཉིད། །ཤེས་རབ་ཟུང་དུ་འཇུག་པར་བྱ། །བཞི་པ་སྟོང་ཉིད་ཆོས་སྐུ་ལས། །འོག་གི་ལྷ་བསྐྱེད་གཟུགས་སྐུའོ། །དེ་འགྲུབ་ཕྱིར་ནི་སྟོང་པ་ཉིད། །ཆོས་ཀྱི་སྐུ་ཡི་ངོ་བོར་བསྒོམ། །ཞེས་གསུངས་པ་ལྟར་རོ། །ཡེ་ཤེས་ཚོགས་བསག་དང་། སྲུང་འཁོར་བསྒོམ་པའི་བར་འདིར་གཞན་ལུགས་ཀྱི་བླ་མ་ཁ་ཅིག སྟོང་པའི་ངང་ལས་བར་དོའི་མཚོན་བྱེད་ཡིག་འབྲུ་ལྔ་བར་སྣང་ལ་བསྒོམ་པར་འདོད་མོད་ཀྱི། ཀྱེ་རྡོ་རྗེའི་རྒྱུད་འགྲེལ། སྒྲུབ་ཐབས་ཀྱི་གཞུང་གང་དུའང་ཟུར་ཙམ་ཡང་མི་འབྱུང་ཞིང་། བོད་ཀྱི་བླ་མ་སྔ་རབས་པ་མཁས་པ་སུས་ཀྱང་མ་བཤད་པས་ཡེ་ཤེས་ཞབས་ལུགས་སོགས་གཞན་གྱི་ལུགས་འཕྱུགས་པ་ཡིན་ནོ། །འོ་ན་འདིར་བར་དོའི་སྦྱོང་བྱེད་མེད་པར་འགྱུར་ལ། དེ་ལྟར་ན་སྐུ་གསུམ་ལམ་བྱེད་ཀྱི་སྒྲུབ་ཐབས་སུ་མ་སོང་བས་གནད་ཐམས་ཅད་འཕྱུགས་སོ་སྙམ་ན་སྐབས་འདིར་ནཱ་ད་སོགས་ནམ་མཁའ་ལ་བཞག་པ་མེད་པས་བར་དོའི་སྦྱོང་བྱེད་ཆད་ན་ནི། འདུས་པ་འཕགས་ལུགས་སོགས་ལའང་དེར་ཐལ་བར་འགྱུར་ལ། སྤྱིར་སྒྲུབ་ཐབས་ལ་བར་དོའི་སྦྱོང་བྱེད་མ་ཆད་པ་ཡོད་པས་ཆོག་ན། འདིར་ཡང་སྐྱོན་མེད་དེ། མངོན་བྱང་གསུམ་པ་བར་དོ་སྦྱོང་བྱེད་དུ་འདོད་པའི་ཕྱིར་རོ། །གསུམ་པ་ལ་གཉིས། ཐུན་མོང་གི་སྲུང་འཁོར་དང་། ཐུན་མོང་མ་ཡིན་པའི་སྲུང་འཁོར་རོ། །དང་པོ་ནི་རྩ་རྒྱུད་ལས། རེ་ཕས་ཉི་མ་སྔོན་དུ་རྣམ་བསྒོམས་ནས། །ཉི་དེར་ཧཱུྃ་བྱུང་སྣ་ཚོགས་རྡོ་རྗེ་སྟེ། །རྡོ་རྗེ་དེ་ཉིད་ཀྱིས་ནི་རྭ་བ་དང་། །གུར་བཅིངས་པ་ཡང་རྣམ་པར་བསྒོམ་པ་ཉིད། །ཅེས་གསུངས་པའི་དོན་སྟོང་པའི་ངང་ལས་ཡན་ལག་བཞི་པ་ལྟར་ན། རཾ་ལས་ཉི་མ་རྐྱང་པའམ། དྲུག་པ་ལྟར་ན། པཾ་ལས་པདྨ་དང་། རཾ་ལས་ཉི་མ་སྟེ། རྗེ་བཙུན་སྐུ་མཆེད་ཀྱིས་དེ་ལྟར་སོ་སོར་བཤད་ཅིང་། སློབ་དཔོན་མཚོ་སྐྱེས་དང་། མི་ཐུབ་ཟླ་བས་གུར་གྱི་སྒྲུབ་ཐབས་ལས་ཉི་མ་རྐྱང་པ་དང་། མི་ཐུབ་ཟླ་བའི་ཡན་ལག་དྲུག་པ་དང་། བདག་མེད་མའི་སྒྲུབ་ཐབས་དང་། རིན་ཆེན་འབར་བ་གཉིས་སུ་པདྨ་དང་ཉི་མ་གཉིས་ཀ་བཤད་དོ། །དེའི་སྟེང་དུ་ཧཱུྃ་ལས་བྱུང་བའི་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། དེ་ལ་ཧཱུྃ་གིས་མཚན་པ་བསྒོམས་ཏེ། སྣ་ཚོགས་རྡོ་རྗེའི་དོན་ནི་ཁ་དོག་སྣ་ཚོགས་སུ་འདུག་པ་དང་། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་མཛད་པ་དང་། འོད་ཟེར་སྣ་ཚོགས་འཕྲོ་བས་སྣ་ཚོགས་རྡོ་རྗེའོ། །ཞེས་བོད་ཀྱི་བླ་མ་རྣམས་གསུངས་ལ། རྭ་རྣམས་ནི་སྒྲུབ་ཐབས་མཚོ་སྐྱེས་སུ་སྣ་ཚོགས་རྡོ་རྗེ་རྩེ་མོ་གསུམ་པ་ཅན། འོད་ཟེར་ལྔ་པ་ཅན་ཞེས་པ་ལ་བརྟེན་ནས། རྗེ་བཙུན་རྩེ་མོས་ཡན་ལག་བཞི་པར་རྭ་བཅུ་གཉིས་པ་དང་། རྗེ་བཙུན་གྱིས་ཡན་ལག་དྲུག་པར་རྭ་ཉི་ཤུ་པར་བཤད་ལ། དེའི་དོན་ནི་དང་པོས་རྟེན་འབྲེལ་བཅུ་གཉིས་དང་། ཕྱི་མས་འཇིག་ཚོགས་ལ་ལྟ་བའི་རི་བོ་ཉི་ཤུ་འཇོམས་པ་མཚོན་ཟེར་རོ། །དེ་ལྟར་སྲུང་འཁོར་སྤྲོ་བའི་གཞི་སྣ་ཚོགས་རྡོ་རྗེ་བསྒོམས་ནས། རྒྱ་གར་གྱི་སློབ་དཔོན་ཁ་ཅིག སྣ་ཚོགས་རྡོ་རྗེ་ཉི་མ་དང་བཅས་པ་ཞུ་བ་ལས། རྭ་གུར་སོགས་སྤྲོ་བ་བཤད་པ་ཡོད་ཀྱང་། སློབ་དཔོན་མཚོ་སྐྱེས་དང་། རྗེ་བཙུན་སྐུ་མཆེད་ཀྱིས་འོད་ཟེར་སྤྲོ་བ་བཤད་པས། སྔར་གྱི་སྣ་ཚོགས་རྡོ་རྗེའི་ལྟེ་བའི་ཧཱུྃ་ལས་འོད་ཟེར་དཔག་ཏུ་མེད་པ་འཕྲོས་པས། རྡོ་རྗེ་འགྲེང་བུར་གྱུར་པ་ཟླུམ་པོར་བསྐོར་བ་རེ་རེའི་སྟེང་དུ་རྡོ་རྗེ་མཆུར་རྒྱུགས་ཟླུམ་པོ་དང་། ཡང་དེའི་སྟེང་དུ་རྡོ་རྗེ་འགྲེང་བུ་དང་མཆུར་རྒྱུགས་བརྩེགས་པའི་རྭ་བ་དང་དེའི་ནང་དུ་རྭ་བ་དང་མཉམ་པའི་རྡོ་རྗེའི་གུར་རྩེ་མོ་གུར་སྟབས་ཀྱི་རྣམ་པར་ཡོད་པ་སྟེ། དེ་ཉིད་རྭ་གུར་གཉིས་ཀྱི་ལོགས་ཉིས་རིམ་དུ་གྱུར་པར་རྗེ་བཙུན་རྩེ་མོས་བཤད་དོ། །རྭ་གུར་གཉིས་ལས་འོད་འཕྲོས་པས་རྡོ་རྗེའི་ས་གཞི་དང་། མེ་རི་ཡང་བསྒོམ་མོ། །རྗེ་བཙུན་སྐུ་མཆེད་ཀྱིས། བཞི་པོ་འདི་ཙམ་ཞིག་བཤད་ལ། སློབ་དཔོན་མཚོ་སྐྱེས་ཀྱིས་མེ་རི་དང་། རྭ་བ་དང་། གུར་ཏེ་གསུམ་དུ་བཤད། མི་ཐུབ་ཟླ་བས་ཡབ་ཀྱི་སྒྲུབ་ཐབས་སུ་གུར་དང་། བླ་རེ་གཉིས་ལས་མ་གསུངས་ཀྱང་གུར་གྱི་སྒྲུབ་ཐབས་སུ་རྭ་བའང་གསུངས་པའི་དོན། རིན་ཆེན་འབར་བར། རྭ་བ་བླ་རེ་གུར་ནང་དུ། །ཞེས་གསུངས་སོ། །འདི་དག་གི་ཚད་ཀྱང་སློབ་དཔོན་མཚོ་སྐྱེས་ཀྱིས། ཅི་སྙེད་འདོད་པའི་ཞེས་རང་གི་བློ་ལ་ཅི་ལྟར་འཚམ་པ་ཙམ་བསྒོམ་པར་གསུངས་པ་ནི་གནད་དུ་ཆེ་སྟེ། གཞལ་ཡས་ཁང་རང་གི་བློ་ལ་ཅི་ཙམ་འཚམ་པ་བསྒོམ་དགོས་པས། དེ་དང་འཚམ་པའི་སྲུང་འཁོར་བསྒོམ་དགོས་པའི་ཕྱིར་རོ། །རྒྱ་གར་བ་ཁ་ཅིག དབང་ཆེན་གྱི་ས་གཞི་ལ་ཐུག་གི་བར་དུ་བསྒོམ་པ་དང་། དམྱལ་བའི་ས་གཞི་ལ་ཐུག་གི་བར་དུ་བསྒོམ་པར་བཤད་པ་ཡང་ཡོད་དོ། །དེ་ལྟར་ཐུན་མོང་བའི་སྲུང་འཁོར་བསྒོམས་པའི་རྗེས་སུ་སྔགས་འདིས་བརྟེན་པར་བྱ་སྟེ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ལན་གསུམ་བརྗོད་པས་བྱིན་གྱིས་བརླབ་བོ། །འདིར་བཛྲ་ནི་ཌོམྦི་ལུགས་ཀྱི་སྒྲུབ་ཐབས་རྣམས་དང་རྗེ་བཙུན་སྐུ་མཆེད་ཀྱིས་མ་བཤད་ལ། ཕཊ་སྭཱ་ཧཱ་ནི་མི་ཐུབ་ཟླ་བས་ཡན་ལག་དྲུག་པར་མ་བཤད་ཀྱང་། རྒྱུད་དང་། རིན་ཆེན་འབར་བ་དང་། རྗེ་བཙུན་སྐུ་མཆེད་ཀྱིས་བཤད་དོ། །གཉིས་པ་ལ་གཉིས། སྲུང་འཁོར་ཐུན་མོང་མ་ཡིན་པའི་རྣམ་གཞག་སྤྱིར་བསྟན། ཉམས་སུ་བླང་བའི་རིམ་པ་བྱེ་བྲག་ཏུ་བཤད་པའོ། །དང་པོ་ལ་གསུམ། བཤད་རྒྱུད་ལས་ཇི་ལྟར་གསུངས་ཚུལ། དེ་རྩ་རྒྱུད་ལ་སྦྱར་མི་སྦྱར་དཔྱད་པ། ཐུན་མོང་མ་ཡིན་པའི་སྲུང་འཁོར་གྱི་སྒྲ་དོན་ནོ། །དང་པོ་ལ། ཁྲོ་བོ་སོ་སོའི་མངོན་པར་རྟོགས་པ་དང་། འཁོར་ལོ་ཡོངས་རྫོགས་ཀྱི་མངོན་རྟོགས་གཉིས་སུ་གུར་རྒྱན་ལས་བཤད་པས། དང་པོ་ནི། རྡོ་རྗེ་གུར་ལེའུ་བཞི་པར། གཤིན་རྗེ་གཤེད་ཀྱིས་བུ་མོ་དགུག་པ། ཤེས་རབ་མཐར་བྱེད་ཀྱིས་བགེགས་བསལ་བ། པདྨ་མཐར་བྱེད་ཀྱིས་དུག་ཞི་བ། བགེགས་མཐར་བྱེད་ཀྱིས་ལས་བསྒྲུབ་པ། དབྱུག་སྔོན་ཅན་གྱིས་བསད་ལས་བསྒྲུབ་པ། སྟོབས་པོ་ཆེས་ཀླུའི་གདོན་ཞི་བ། མི་གཡོ་བས་དགུག་པའི་ལས་བྱ་བ། གནོད་མཛེས་ཀྱིས་གནོད་སྦྱིན་མོ་དབང་དུ་བྱ་བ། འདོད་རྒྱལ་གྱིས་བརྒྱ་བྱིན་སོགས་འགུག་པའི་ལས་བྱེད་པ། གཙུག་ཏོར་འཁོར་ལོས་སྒྱུར་བས་ཕྱིར་ཟློག་གི་ལས་བསྒྲུབ་པ་སྟེ། དེ་རྣམས་ཀྱི་ལས་སྦྱོར་དང་། སྔགས་དང་། ལས་སོ་སོའི་ཕན་ཡོན་རྣམས་གསུངས་ལ། དེའི་དོན་གུར་རྒྱན་ལས་འདི་ལྟར་བཤད་དོ། །གཙུག་ཏོར་འཁོར་ལོས་སྒྱུར་བ་མ་གཏོགས་པའི་ཁྲོ་བོ་གཞན་དགུ་པོའི་ལས་བསྒྲུབ་ན། ཚོགས་གཉིས་བསགས་པ་སྔོན་དུ་སོང་ནས་ཐུན་མོང་གི་སྲུང་འཁོར་གྱི་ནང་དུ་པད་ཉིའི་སྟེང་དུ་ས་བོན་ཙམ་མམ། ཆོ་ག་གསུམ་ལས་ཁྲོ་བོ་སོ་སོའི་སྐུར་བསྐྱེད། མིག་དང་སྐུ་སོགས་བྱིན་གྱིས་བརླབ་པ། ཡེ་ཤེས་པ་གཞུག་པ། དབང་བསྐུར་རིགས་བདག་གི་རྒྱས་བཏབ་ནས། སོ་སོའི་སྔགས་ཀྱི་བསྙེན་པ་སྔོན་དུ་སོང་ནས། རང་རང་གི་ལས་རྣམས་རྒྱུད་ནས་བཤད་པ་བཞིན་བསྒྲུབས་པས་ཐོགས་པ་མེད་པར་འགྲུབ་པར་བཤད་ལ། གཙུག་ཏོར་འཁོར་ལོས་སྒྱུར་བ་ནི་འཁོར་ལོ་ཡོངས་རྫོགས་ཀྱི་མངོན་རྟོགས་གཙོ་ཆེ་མོད། དཔའ་བོ་གཅིག་པར་བྱེད་ན། སྲུང་འཁོར་ཐུན་མོང་བའི་ནང་དུ་འཁོར་ལོ་རྩིབས་བཅུ་པའི་ལྟེ་བར། གཙུག་ཏོར་འཁོར་ལོས་སྒྱུར་བ་ཡན་ལག་བཞི་རྫོགས་སུ་བསྐྱེད་ལ། གོང་འོག་གི་ཆོ་ག་རྣམས་སྔ་མ་བཞིན་བྱས་ནས། ཕྱིར་ཟློག་གི་ལས་བསྒྲུབ་པ་སྟེ། དེ་ལྟར་ན་ལྷ་རྐྱང་པའི་སྒྲུབ་ཐབས་ལས་སྦྱོར་དང་བཅས་པ་བཅུ་བཤད་དོ། །གཉིས་པ་འཁོར་ལོ་ཡོངས་སུ་རྫོགས་པའི་མངོན་རྟོགས་ནི། ལེའུ་བཅུ་གཉིས་པར། བདག་མེད་མའི་མངོན་རྟོགས་ཀྱི་སྔོན་འགྲོར། ནམ་མཁའི་ཁམས་ཀྱི་དབུས་གནས་པར། །སྣ་ཚོགས་རྡོ་རྗེ་བསྒོམ་པར་བྱ། །ཧཱུྃ་ནི་བཅུ་ཡི་སྦྱོར་བ་ཡིས། །ཁྲོ་བོ་བཅུ་ནི་རིམ་པས་དགོད། །གཤིན་རྗེ་མཐར་བྱེད་ཤེས་རབ་མཐར། །པདྨ་མཐར་བྱེད་བགེགས་མཐར་བྱེད། །ཊ་ཀི་ཁྲོ་བོ་དབྱུག་པ་སྔོན། །མི་གཡོ་བ་དང་སྟོབས་ཆེན་དང་། །གཙུག་ཏོར་གདུགས་ནི་དཀར་པོ་དང་། །རྡོ་རྗེ་ཞབས་འོག་གནས་པ་ནི། །བདུད་རྩི་སྦྱོར་བས་ཐམས་ཅད་དུ། །ཁྲོ་བོའི་སྒོམ་པས་བསྒོམ་པར་བྱ། །དཔག་ཚད་བརྒྱ་ནི་ཁྱབ་པ་རུ། །བསམས་ནས་བགེགས་ནི་བསྐྲད་པར་བྱ། །ཞེས་ཁྲོ་བོ་བཅུའི་མཚན་ཙམ་ཞིག་ལས་མ་གསུངས་ལ། ལེའུ་བཅུ་བཞི་པར་ཁྲོ་བོ་བཅུའི་ཕྱག་མཚན། སྐུ་མདོག རིགས་བདག གདན། སྲུང་འཁོར་གྱི་ཚད་རྣམས་གསུངས་ཏེ། ལེའུ་འདི་གཉིས་ཕྱོགས་གཅིག་ཏུ་བྱས་ནས་འཁོར་ལོ་ཡོངས་རྫོགས་ཀྱི་མངོན་རྟོགས་སུ། གུར་རྒྱན་ལས་བཤད་པས། དེ་ལྟར་ན་སྔོན་འགྲོ་ཚོགས་གཉིས་བསགས་པ་དང་། རྭ་གུར་གྱི་དབུས་སུ་འཁོར་ལོ་རྩིབས་བཅུ་པའི་ལྟེ་བར་གཙུག་ཏོར་འཁོར་ལོས་སྒྱུར་བ་དང་། སྟེང་དུ་ཧཱུྃ་མཛད་བསྒོམ་པ་ཁ་བསྐང་། ཕྱོགས་མཚམས་བརྒྱད་འོག་དང་བཅས་པར་ཁྲོ་བོ་གཞན་ཏེ། ཐམས་ཅད་ཀྱང་ས་བོན་ཙམ་ལས་བསྐྱེད། མིག་སོགས་བྱིན་གྱིས་བརླབ། སྙིང་གར་རྡོ་རྗེའི་ལྟེ་བར་བསྲུང་བྱའི་མིང་སྦས་ལ། ཡེ་ཤེས་ཀྱི་འཁོར་ལོ་དགུག་གཞུག་བྱ། དབང་བསྐུར་ལ་རིགས་བདག་གི་རྒྱས་གདབ་བོ། །དེ་ནས་སྔགས་བཟླས་པ་དང་བསྟུན་ལ། འཁོར་ལོ་གཡོན་དུ་འཁོར་བས་གནོད་བྱེད་རྣམས་གཏུབས་པ་དང་། ཁྲོ་བོ་རྣམས་ཞལ་ཕྱིར་གཟིགས་ནས། གནོད་པ་ཐམས་ཅད་བཟློག་པར་བསམ་ཞིང་སྔགས་བཟླས་སོ། །དེ་ནས་གོ་གྱོན་པ་སོགས་མཚན་མ་བཟང་པོ་བྱུང་ན་བྲིས་པས་ཕྱིར་བཟློག་པའི་ལས་སྦྱོར་བྱའོ། །དེ་བཞིན་དུ་གཤིན་རྗེའི་གཤེད་དམ། རྟ་མགྲིན་ལ་སོགས་པ་གང་མོས་པ་དབུས་སུ་བསྐྱེད་ལ། དེའི་ཤུལ་དུ་ཧཱུྃ་མཛད་བསྒོམ་ཞིང་འཁོར་ལོའི་དབུས་སུ་ཁྲོ་བོ་གང་ཡོད་ཀྱི་སྔགས་བཟླས་ལ་སྔར་བཤད་པ་ལྟར་གྱི་ལས་སྦྱོར་རྣམས་ཉམས་སུ་བླང་ངོ་། །ཧཱུྃ་མཛད་དབུས་སུ་བཞུགས་པའི་མངོན་རྟོགས་ནི་གཙུག་ཏོར་འཁོར་ལོས་སྒྱུར་བ་སྟེང་དུ་བསྒོམ་ཞིང་། འཁོར་ལོ་གཡས་སུ་འཁོར་བ་ལ་བརྟེན་ནས་སྔགས་མི་བཟློས་པར་བསྲུང་བ་འབའ་ཞིག་བྱ་སྟེ། དེ་ལྟར་ན་འཁོར་ལོའི་མངོན་རྟོགས་བཅུ་གཅིག་གོ །གང་ལྟར་ཡང་རུང་སྟེ་མངོན་པར་རྟོགས་པ་གཞན་དང་འབྲེལ་ན། གཙུག་ཏོར་འཁོར་ལོས་སྒྱུར་བ་ལ་སོགས་པའི་ལྟོ་བའམ་ཧཱུྃ་མཛད་སོགས་ཞུ་བ་ལས་ཆོས་འབྱུང་དུ་གྱུར་པའི་ནང་དུ་གཞལ་ཡས་ཁང་བསམ་པ་ནས་བརྩམས་ཏེ། མངོན་པར་རྟོགས་པ་བསྒོམ་པར་བྱའོ། །ཞེས་གུར་རྒྱན་དུ་བཤད་ཅིང་། ལྷའི་རིགས་ཀྱི་བློ་གྲོས་ཀྱི་གུར་གྱི་སྒྲུབ་ཐབས་ལས་འདི་ནི་སྲུང་བའི་འཁོར་ལོའི་གཙོ་བོ་གང་འདོད་པས་སྲུང་བའི་འཁོར་ལོའི་གཙོ་བོ་བྱའོ་ཞེས་པ་དང་མཐུན་ནོ། །གཉིས་པ་རིན་ཆེན་འབར་བར། རྭ་བ་བླ་རེ་གུར་ནང་དུ། །ཁྲོ་བོ་བཅུས་ཀྱང་བསྲུང་བ་བྱ། །ཞེས་ཟུར་ཙམ་ཞིག་བཤད་ལ། རྗེ་བཙུན་གྱི་ཡན་ལག་དྲུག་པ་དང་། ཡུམ་གྱི་སྒྲུབ་ཐབས་སུ་སྤྲོ་ན་བསྒོམ་པར་གསུངས་སོ། །རྗེ་བཙུན་རྩེ་མོས་ཡན་ལག་བཞི་པ་དང་། མཚོ་སྐྱེས་ཀྱི་འགྲེལ་པར་ཁྲོ་བཅུའི་སྲུང་འཁོར་བསྒོམ་པར་མ་གསུངས་སོ། །དེས་ན་ཁྲོ་བཅུའི་སྲུང་འཁོར་བྱེད་མི་བྱེད་གཉིས་ལས། གུར་ནས་གསུངས་པའི་དཀྱིལ་འཁོར་རྣམས་ལ་ནི་མ་བྱས་ན་ཆོ་ག་ཉམས་པར་འགྱུར་བས་ངེས་པར་བྱ་དགོས་ལ། རྩ་རྒྱུད་ཀྱི་དཀྱིལ་འཁོར་རྣམས་ལ་ནི་མ་བྱས་ཀྱང་ཆོ་ག་ཆད་པའི་སྐྱོན་མེད་ཅིང་། བྱས་ན་ཕུན་སུམ་ཚོགས་པའི་ཡན་ལག་ཏུ་འགྱུར་བ་ཙམ་མོ། །གསུམ་པ་ནི། སློབ་དཔོན་ཁ་ཅིག་ནི། ཁྲོ་བོ་བཅུའི་སྲུང་འཁོར་ལ་རྩིབས་བཅུ་པའི་སྲུང་བའི་འཁོར་ལོ་ཞེས་པ་ཙམ་ལས། ཐུན་མོང་མ་ཡིན་པའི་སྲུང་བའི་འཁོར་ལོ་ཅེས་པའི་ཐ་སྙད་མི་སྣང་ངོ་སྙམ་ན། དེ་ལྟར་ཡིན་མོད་ཀྱི་འོན་ཀྱང་རྗེ་བཙུན་ས་སྐྱ་པ་ཡབ་སྲས་ཀྱིས། ཐུན་མོང་མ་ཡིན་པའི་སྲུང་འཁོར་ཞེས་ཐ་སྙད་མཛད་པ་ནི། གུར་ལས། དེ་ནས་རྡོ་རྗེ་འཛིན་རྒྱལ་ནི། །ཐམས་ཅད་དབུགས་དབྱུང་རབ་རྩོལ་བས། །དམ་ཚིག་རྡོ་རྗེ་སྲུང་དོན་དུ། །སྦས་པའི་སྤྱོད་ཡུལ་འདི་གསུངས་པ། །ཞེས་ཁྲོ་བོ་བཅུའི་སྲུང་འཁོར་ནི་སྦས་ཏེ་གསུངས་པར་བཤད་ལ། གང་དུ་སྦས་ན་ཀྱེ་རྡོར་རྩ་བའི་རྒྱུད་དུ་སྦས་པའོ། །དེས་ན་རྩ་རྒྱུད་དུ་གསུངས་པའི་རྭ་གུར་སོགས་ལ་ཐུན་མོང་བ་དང་། བཤད་རྒྱུད་དུ་གསུངས་པའི་ཁྲོ་བོ་བཅུ་ལ་ཐུན་མོང་མ་ཡིན་པར་འཇོག་པ་ཡིན་གྱི། རྭ་གུར་སོགས་བླ་མེད་ཀྱི་མངོན་རྟོགས་ཕལ་མོ་ཆེ་ལས་འབྱུང་བས་ཐུན་མོང་བ་དང་། ཁྲོ་བཅུ་ཀྱེ་རྡོར་ཁོ་ན་ལས་འབྱུང་བས་ཐུན་མོང་མ་ཡིན་པར་འདོད་པ་ནི་དུས་འཁོར་དང་གསང་འདུས་སོགས་ལའང་ཁྲོ་བཅུའི་སྲུང་འཁོར་ཡོད་པས་དེར་མ་ངེས་སོ། །གཉིས་པ་ཉམས་སུ་བླང་བའི་རིམ་པ་བྱེ་བྲག་ཏུ་བཤད་པ་ནི་དཔལ་བིརྺ་པའི་མན་ངག་ཌོམྦི་ཧེ་རུ་ཀས་དེ་ཉིད་བཅུ་པར་རང་བསྲུང་བ་དང་། གནོད་པ་ཕྱིར་བཟློག་གཉིས་གསུངས་ཤིང་། རྗེ་ས་ཆེན་གྱིས་ཀྱང་དེ་ལྟར་གསུངས་པ་ལྟར་བཤད་ན། འདི་ལ་གཉིས་ཏེ། རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ནི། ཌོམྦི་པས་ཡི་གེ་པཾ་སེར་པོའི་ས་བོན་ལས་བྱུང་བའི་སྣ་ཚོགས་པདྨ་དང་། ཡི་གེ་རཾ་ལས་སྐྱེས་པའི་ཉི་མ་ལ་གནས་པའི་ས་བོན་བྷྲཱུྃ་སེར་པོ་དེ་ཡོངས་སུ་གྱུར་པའི་འཁོར་ལོ་རྩིབས་བཅུ་པའོ། །ཞེས་གསུངས་ཤིང་། དེའི་དབྱིབས་ནི་རྗེ་ས་ཆེན་གྱིས་རྩེ་མོ་རྣོ་བ། ཁོག་པ་སྟོང་པ། ཡངས་ཤིང་རྒྱ་ཆེ་བ་གཅིག་བསྒོམ་ཞེས་གསུངས་པའི་དོན། རྩིབས་བཅུ་ནི་ཕྱོགས་མཚམས་བརྒྱད། །སྟེང་འོག་གཉིས་དང་བཅུ་ཡིན་ལ། །རྩེ་མོ་རྣོ་བ་ནི་རྩ་བ་ནས་རྩེ་མོའི་བར་ཇེ་ཕྲར་སོང་ནས་གཡས་གཡོན་གྱི་སོ་དང་། རྩེ་མོ་རྣམས་རལ་གྲི་སོ་གཉིས་པའི་རྣམ་པ་ལྟར་ཤིན་ཏུ་རྣོ་བའོ། །ཁོག་པ་སྟོང་པ་ནི་རྩིབས་བཅུ་པ་སོ་སོར་གྱེས་པའི་ཚེ་སྟེང་འོག་གི་རྩིབས་ཀྱི་རྩ་བ་ཟླུམ་པོའི་ཁ་ཞེང་དང་། གཡས་གཡོན་གྱི་རྩིབས་ཀྱི་རྩ་བ་ནས་རྩེ་མོའི་བར་མཉམ་པས་སུམ་ཆར་གནས་པའོ། །ཕྱོགས་མཚམས་བརྒྱད་ཀྱི་རྩིབས་ཀྱི་རྩ་བ་ལ་སྟེང་འོག་གཉིས་གཡས་གཡོན་སུམ་ཆ་ཙམ་འབྲེལ་ཞིང་ཕྱི་ནས་བལྟས་པའི་ཚེ་བར་མཚམས་ཅུང་ཟད་མངོན་པ། དབུས་ཀྱི་རྩིབས་ལ་སྦྱར་བ་ན་ཕྱོགས་མཚམས་བརྒྱད་ཀྱི་འོག་ཕྱོགས་ཀྱི་ཁ་དང་། འོག་གི་རྩིབས་ཀྱི་ཁ་གཉིས་མུ་ཁྱུད་གཅིག་གིས་བསྡོམ་ཞིང་། དེ་བཞིན་དུ་སྟེང་གི་ཁ་གཉིས་ཀྱང་མུ་ཁྱུད་གཅིག་གིས་བསྡོམ་པའོ། །དེ་ལྟ་བུའི་ནང་ཐམས་ཅད་སྦུབས་སྟོང་དུ་ཡོད་ཅིང་། མུ་ཁྱུད་གོང་འོག་གི་བར་དུ་ཕྱོགས་མཚམས་ཀྱི་ཁྲོ་བོ་བཞུགས་པའི་ཚེ་འོག་གི་མུ་ཁྱུད་ལ་པད་གདན་ནས་གང་ཙམ་གྱིས་མ་རེག་ཅིང་སྟེང་གི་མུ་ཁྱུད་ལ་གཙུག་ཏོར་ནས་གང་ཙམ་གྱིས་མ་རེག་པ་སྟེ། རྗེ་ས་ཆེན་གྱིས་འཁོར་ལོའི་ལྟེ་བའི་མུ་ཁྱུད་ཀྱི་སྟེང་དུ་ནས་རེས་མ་རེག་པར་པདྨ་དང་། ཉི་མ་བཅུ་བསམ། དེ་ལ་ཤར་གྱི་རྩིབས་ཀྱི་ནང་དུ་ཞེས་བཤད་པས་སོ། །མུ་ཁྱུད་ནི་ངེས་པར་དགོས་ཏེ། མུ་ཁྱུད་ཀྱི་དོན་མཐའ་སྐོར་བ་ཡིན་ཅིང་། ལྟེ་བའི་མུ་ཁྱུད་ཅེས་གསུངས་པས་ལྟེ་བའི་མཐའ་སྐོར་བ་ཡིན་པས་ཕྱོགས་མཚམས་ཀྱི་རྩིབས་ཀྱི་རྩ་བ་སྦྱོར་བ་ཤུགས་ལས་གྲུབ་པའི་ཕྱིར་རོ། །རྩིབས་ཀྱི་མུ་ཁྱུད་ཆོས་ཀྱི་འཁོར་ལོ་ལ་ཡོད་ཀྱང་འདིར་མི་བཞེད་དེ། མཚོན་ཆ་འཁོར་ལོ་ཡིན་པའི་ཕྱིར་རོ། །ཡངས་ཤིང་རྒྱ་ཆེ་བའི་དོན་གུར་ལས་དཔག་ཚད་བརྒྱའི་ཚད་ཙམ་མོ། །ཞེས་གསུངས་པ་ནི་མཚོན་པ་སྟེ། དབུས་ཀྱི་ཁྲོ་བོ་ཞུ་བའམ། དེའི་ལྟོ་བ་ཡངས་པའི་ནང་དུ་ཆོས་འབྱུང་བསྒོམས་ནས། དེར་གཞལ་ཡས་ཁང་བསྒོམ་དགོས་པས། དེ་དང་འཚམ་པ་ལ་དེ་ལ་ལྟོས་པའི་ཡངས་ཤིང་རྒྱ་ཆེ་བ་དགོས་པའི་ཕྱིར་རོ། །དེ་ལྟ་བུའི་འཁོར་ལོའི་དབུས་དང་ཕྱོགས་བཅུར་པདྨ་དང་། ཉི་མའི་གདན་རེ་བསྒོམས་ཏེ། གུར་དང་མི་ཐུབ་ཟླ་བས། རྡོ་རྗེ་དཀྱིལ་འཁོར་དབུས་གནས་པར། །རྡོ་རྗེ་ཉི་མ་བསྒོམ་པར་བྱ། །འོག་ཏུ་པདྨའི་གདན་བསམས་ནས། །ཁྲོ་བོ་བཅུ་རྣམས་རབ་བསྒོམ་བྱ། །ཞེས་བཤད་དོ། །གཉིས་པ་ལ་བཞི་སྟེ། བསྙེན་པ། ཉེར་བསྒྲུབ། སྒྲུབ་པ། སྒྲུབ་ཆེན་གྱི་ཡན་ལག་གོ །དང་པོ་ནི། ལྷ་རྣམས་ས་བོན་ཙམ་ལས་བསྐྱེད་པར་རྗེ་ས་ཆེན་གྱིས་གསུངས་ཤིང་། ས་བོན་དེ་ཡང་གུར་དང་། ཌོམྦི་པ་དང་། མི་ཐུབ་ཟླ་བས་ཧཱུྃ་འབའ་ཞིག་ཏུ་གསུངས་སོ། །རྗེ་བཙུན་གྱི་གུར་རྒྱན་ལས་གཙུག་ཏོར་འཁོར་ལོས་སྒྱུར་བ་བྷྲཱུྃ་ལས་བསྐྱེད་པར་གསུངས་པ་ནི། དེ་དབུས་སུ་བསྒོམ་པའི་ཚེ་དེའི་ས་བོན་དང་། རྟེན་སྲུང་འཁོར་གྱི་ས་བོན་གཉིས་གཅིག་པ་ཅིག་དགོས་སྙམ་དུ་དགོངས་པ་འདྲའོ། །དེར་དབུས་སུ་ཧཱུྃ་མཛད་བསྐྱེད་པ་རྒྱུད་ཀྱིས་སྲུང་འཁོར་གྱི་སྐབས་རྣམས་སུ་དངོས་སུ་མི་སྣང་ཡང་། ལེའུ་བཅོ་ལྔ་པར་དེའི་མངོན་རྟོགས་དང་། ཕན་ཡོན་གྱི་སྐབས་ནས། ལྷ་དང་ལྷ་མིན་ཧཱུྃ་མཛད་ཀྱི། །ཞེས་ལྷ་དང་ལྷ་མིན་གྱིས་བྱས་པའི་བར་ཆད་བསྲུང་བ་ལ་ཧཱུྃ་མཛད་བསྔགས་པར་བཤད་པ་ལ་དགོངས་པ་ཡིན་ནོ། །འཁོར་རྣམས་གང་དུ་བསྐྱེད་པའི་གནས་ནི་ཕྱོགས་བཞི་དང་། སྟེང་འོག་གཉིས་ལ་མི་མཐུན་པ་མེད་ལ། མཚམས་ཀྱི་བཞི་ལ། ཌོམྦི་པས་དབང་ལྡན་དུ་འདོད་རྒྱལ། མེར་དབྱུག་སྔོན་ཅན། བདེན་བྲལ་དུ་སྟོབས་པོ་ཆེ། རླུང་དུ་མི་གཡོ་བ་རྣམས་འགོད་པར་བཤད་པས་དེ་བཞིན་བྱས་ཀྱང་རུང་ལ། རྗེ་ས་ཆེན་གྱིས་དབང་ལྡན་དུ་མི་གཡོ་བ། མེར་འདོད་རྒྱལ། བདེན་བྲལ་དུ་དབྱུག་སྔོན། རླུང་དུ་སྟོབས་པོ་ཆེ་རྣམས་འགོད་པར་གསུངས་པས་དེ་ལྟར་བྱའོ། །སྐུ་མདོག་ནི་གུར་ལས། དབང་པོ་སྔོན་པོའི་རྣམ་པ་ལྟར། །མཐར་བྱེད་རྣམ་པར་བསྒོམ་པར་བྱ། །གཞན་གྱིས་མི་ཐུབ་རྡོ་རྗེ་ནི། །འཇིགས་བྱེད་ཟླ་བའི་ནོར་བུ་འདྲ། །པདྨའི་ཁྲོ་བོ་དམར་པོ་ཆེ། །རྡོ་རྗེ་བདུད་རྩིའི་བདག་ཉིད་ནག །མཚམས་ཀྱི་ཁྲོ་བོ་ཆེར་གནག་ཅིང་། །ཞེས་བཤད་ལ། སྟེང་འོག་གི་ཁྲོ་བོ་གཉིས་ཀྱི་སྐུ་མདོག་ནི་འདིར་མ་བཤད་ཀྱང་། རྗེ་ས་ཆེན་གྱིས་གཙུག་ཏོར་འཁོར་ལོས་སྒྱུར་བ་སེར་པོ་དང་། གནོད་མཛེས་ནག་པོར་གསུངས་པ་བཞིན། ཌོམྦི་པ་དང་ལྷའི་རིགས་ཀྱི་བློ་གྲོས་རྣམས་ཀྱིས་ཀྱང་བཤད་དོ། །དེ་དག་གི་ཕྱག་མཚན་ཡང་གུར་ལས། རྡོ་རྗེ་ཁྲོ་བོ་སྐྱེས་བུ་ཆེ། །ཐམས་ཅད་ཞལ་གཅིག་ཕྱག་གཉིས་པ། །སྙིང་གར་མནན་པའི་ཁུ་ཚུར་མཛུབ། །གཡས་ན་རང་གི་མཚོན་ཆ་འཕྱར། །གཤིན་རྗེ་གསོད་པའི་དབྱུག་ཐོ་སྟེ། །གཞན་གྱིས་མི་ཐུབ་རྡོ་རྗེ་དབྱིག །རྟ་མགྲིན་ལ་ནི་དབང་མཆོག་དམར། །མི་ཕྱེད་བདུད་རྩིའི་ཐབ་སྦྱོར་ལ། ཊཀྐིའི་རྒྱལ་པོ་ལྕགས་ཀྱུ་སྟེ། །དབྱིག་སྔོན་ཅན་ལ་རང་གི་མིང་། །སྟོབས་ཀྱི་རྒྱལ་པོ་རྩེ་གསུམ་པ། །མི་གཡོ་ཡི་གེ་རལ་གྲི་རྩེ། །ཚ་སྐྱོབ་དཀར་པོ་རྒྱལ་པོ་ལ། །ཆོས་ཀྱི་འཁོར་ལོ་རྣམ་པར་བསྒོམ། །གཏུན་ཤིང་རྡོ་རྗེ་རྐང་འོག་ལ། །ཞབས་གཡོན་བརྐྱང་བས་གནས་པ་འོ། །ཞེས་གསུངས་ལ། དེའི་དོན་རྒྱ་བོད་ཀྱི་བླ་མ་རྣམས་ཀྱིས་མི་མཐུན་པ་མི་སྣང་ངོ་། །རྒྱན་དང་བཞུགས་ཚུལ་ནི། ཌོམྦི་པས། ཁྲོ་བོ་ཐམས་ཅད་ཞལ་གཅིག་ཕྱག་གཉིས་པ་སྟེ། གཡོན་གྱི་མཛུབ་མོ་དག་ནི་སྡིགས་མཛུབ་དང་བཅས་པ། གཡས་རྣམས་ནི་རང་རང་གི་ཕྱག་མཚན་འཕྱར་བ། ཁྲོ་བ་དང་བཅས་པའི་ཞལ་མདོག་ཟླུམ་ལ་དམར་བ། སྐྲ་སེར་ལ་གྱེན་དུ་བརྫེས་པ། འོད་ཟེར་འཕྲོ་བས་བདུད་རྣམས་བསྡིགས་པར་མཛད་པ། ཉི་མ་ལ་བཞུགས་ཤིང་ཉི་མའི་དཀྱིལ་འཁོར་གྱི་འོད་ཅན་དག་གོ །གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་དག་ནི་སྦོམ་ལ་གསུས་པ་འཕྱང་བ། སྦྲུལ་གྱིས་བརྒྱན་པ། སྨིན་མ་སེར་པོ་གྱེན་དུ་བརྫེས་པ་ཡིན་ལ། གཞན་རྣམས་རོལ་པའི་སྐུ་ཅན་ཡིན་ནོ། །ཞེས་ཕྱོགས་ཀྱི་ཁྲོ་བོ་བཞི་ཤིན་ཏུ་ཁྲོས་པའི་རྣམ་པ་ཅན་དང་། གཞན་རྣམས་ཅུང་ཟད་ཞི་བའི་ཚུལ་དུ་བཤད་ལ། རྗེ་ས་ཆེན་གྱིས་ཕྱོགས་བཞི་དབུས་མ་དང་ལྔ་ནི་བརྗིད་པའི་ཁྲོ་བོ་སྟེ་ཞེས་དང་། ཁྲོ་བོ་གཞན་རྣམས་ནི་མཛེས་པའི་ཁྲོ་བོ་སྟེ། ཅུང་ཟད་སྒེག་པ། ཡིད་ཙམ་ཁྲོས་པ། སྐེམས་ཤིང་གྲིམས་པ། དར་སྣ་ཚོགས་ཀྱི་ཤམ་ཐབས་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པའོ་ཞེས་བཤད། གུར་རྒྱན་ལས། ཁྲོ་བོ་འདི་རྣམས་ལ་རང་འདྲའི་ཡུམ་ཡོད་པར་མངོན་ཏེ། རང་གི་རིག་མ་སྐྱེས་བུ་བདག །ཅེས་འབྱུང་བའི་དོན་ཡིན་ནོ། །ཞེས་གསུངས་སོ། །གཉིས་པ་ནི། དེ་ལྟར་དམ་ཚིག་པ་བསྐྱེད་ནས་ཡེ་ཤེས་ཀྱི་འཁོར་ལོ་དགུག་གཞུག་བྱའོ། །གསུམ་པ་ནི། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའོ། །བཞི་པ་ནི། དབང་བསྐུར་ནས་རིགས་ཀྱི་བདག་པོའི་རྒྱས་བཏབ་སྟེ། གུར་ལས། སྤྱི་བོར་རྡོ་རྗེ་འཛིན་པ་འཛིན། །གཤིན་རྗེ་རྣམ་སྣང་ཉིད་ཀྱིས་ཏེ། །རྡོ་རྗེ་སེམས་དཔས་དབྱིག་པ་ཅན། །པདྨའི་འཁོར་ལོ་རྣམ་གཟིགས་རྗེས། །རྡོ་རྗེ་སེམས་དཔས་ཐབ་སྦྱོར་ལ། །ཞེས་གསུངས་སོ། །དེའི་དོན་རྗེ་ས་ཆེན་གྱིས། གཤིན་རྗེ་གཤེད་ལ་རྣམ་པར་སྣང་མཛད། པདྨ་མཐར་བྱེད་ལ་འོད་དཔག་མེད། གཞན་ཐམས་ཅད་ལ་མི་བསྐྱོད་པས་དབུ་བརྒྱན་གསུངས་ལ། རྡོ་རྗེ་སེམས་དཔས་ཐབ་སྦྱོར་ལ། །ཞེས་པའི་དོན་ནི། རྡོ་རྗེ་སེམས་དཔའ་དང་། མི་བསྐྱོད་པ་དོན་གཅིག་པས་མི་བསྐྱོད་པ་ཡིན་ལ། མཚམས་ཀྱི་ཁྲོ་བོ་ཆེར་གནག་ཅིང་། །སྤྱི་བོར་རྡོ་རྗེ་འཛིན་པ་འཛིན། །ཞེས་པ་མཚམས་བཞི་ལ་མི་བསྐྱོད་པས་དངོས་སུ་རྒྱས་འདེབས་པར་བསྟན་པའི་ཤུགས་ལ། སྟེང་འོག་གཉིས་ལ་ཡང་མི་བསྐྱོད་པའི་རྒྱས་འདེབས་པར་མངོན་ནོ། །ཌོམྦི་པས་ནི་འདི་དང་མི་འདྲ་བར་གསུངས་ཏེ། ཧཱུྃ་མཛད་ལ་མི་བསྐྱོད་པ། གཤིན་རྗེའི་གཤེད་དང་འདོད་རྒྱལ་ལ་མི་བསྐྱོད་པ། ཤེས་རབ་མཐར་བྱེད་དང་དབྱུག་སྔོན་ཅན་ལ་རྣམ་སྣང་། པདྨ་མཐར་བྱེད་དང་། སྟོབས་པོ་ཆེ་ལ་འོད་དཔག་མེད། བགེགས་མཐར་བྱེད་དང་། མི་གཡོ་བ་ལ་དོན་ཡོད་གྲུབ་པས་རྒྱས་གདབ་པར་གསུངས་སོ། །དེ་ལྟར་ཡན་ལག་བཞི་རྫོགས་སུ་བྱས་ནས་འཁོར་ལོ་གཡས་སུ་འཁོར་བ་དང་། བསྒོམ་པའི་ཁྲོ་བོ་རྣམས་ལས་འོད་ཟེར་མེ་འོད་ལྟ་བུ་དཔག་ཏུ་མེད་པ་འཕྲོས་པས། དེས་བདུད་དང་ལོག་པར་འདྲེན་པ་ཐམས་ཅད་བསྲེགས་ནས་དཔག་ཚད་བརྒྱའི་ཚད་ཙམ་དུ་བསྐྲད་པར་བསམས་སྟེ། མི་ཐུབ་ཟླ་བས། དཔག་ཚད་བརྒྱར་ནི་འཇུག་པ་ཡིས། །བགེགས་རྣམས་བསྐྲོད་པར་བསམ་པར་བྱ། །ཞེས་སོ། །འདི་ནི་ལྗོན་ཤིང་ལས་གསུངས་པའི་དངོས་གཞིའི་ཆིངས་འབྲིང་པོའོ། །ཡང་ན་སྔར་བཞིན་དམ་ཚིག་པ་བསྐྱེད། ཡེ་ཤེས་པ་དགུག་གཞུག་བྱ། སྐུ་གསུང་ཐུགས་ཙམ་བྱིན་གྱིས་བརླབ། དབུ་རྒྱན་རང་ཆས་སུ་བསྒོམ་པར་ཡང་རྗེ་ས་ཆེན་གྱིས་གསུངས་ཏེ། གནད་ཀྱི་གསལ་བྱེད་ལས་གསུངས་པའི་འབྲིང་པོ་ཕྱི་མ་དང་། ལྗོན་ཤིང་ལས་གསུངས་པའི་བསྡུས་པ་དང་པོའོ། །ཡང་ན་ཁྲོ་བོ་རྣམས་དབུ་རྒྱན་རང་ཆས་ཅན་དུ་སྐད་ཅིག་གིས་བསྐྱེད་ནས་ཡེ་ཤེས་པ་དགུག་གཞུག་སོགས་མི་བྱ་བར། དེ་ཉིད་བཅུ་པ་དང་། མི་ཐུབ་ཟླ་བས་ཀྱང་བཤད་དེ། བསྡུས་པ་ཕྱི་མའོ། །དེ་ལྟར་རྒྱས་འབྲིང་བསྡུས་གསུམ་གང་ཡང་རུང་བ་ཅིག་བསྒོམས་ནས། དབུས་ཀྱི་ཧཱུྃ་མཛད་ཞུ་བ་ལས་ཆོས་འབྱུང་དུ་གྱུར་པའམ། དེའི་ལྟོ་བ་ཡངས་པའི་ནང་དུ་ཆོས་འབྱུང་བསྒོམ་པ་སོགས་ཀྱི་མངོན་རྟོགས་ལ་འཇུག་སྟེ། རྗེ་ས་ཆེན་གྱིས་རང་བསྲུང་བ་ཙམ་བསྒོམ་པར་འདོད་ན། མངོན་པར་རྟོགས་པ་དང་མ་འབྲེལ་བ་གུད་དུ་བསྒོམ་པ་ནི་མེད་དོ། །དེ་ཡང་མངོན་པར་རྟོགས་པ་ཐམས་ཅད་གོང་མ་དང་འདྲ་བ་ལས་འཁོར་ལོ་གཡས་སུ་འཁོར་བ་དང་། དབུས་སུ་ཧཱུྃ་མཛད་བསྒོམ་ཞིང་སྟེང་དུ་གཙུག་ཏོར་འཁོར་ལོས་སྒྱུར་བ་གཞག་པ་དང་། ལྷ་རྣམས་ཞལ་ནང་དུ་གཟིགས་པ་དང་། སྔགས་བཟླས་མི་དགོས་སོ། །དེ་ནས་ཧཱུྃ་མཛད་ཀྱི་ནང་དུ་གཞལ་ཡས་ཁང་བསྒོམ་པའམ། ཧཱུྃ་མཛད་ཆོས་འབྱུང་དུ་གྱུར་པའི་ནང་དུ་གཞལ་ཡས་ཁང་བསྒོམ་པ་ནས་བཟུང་སྟེ་མངོན་པར་རྟོགས་པ་ལ་འཇུག་གོ །ཞེས་གསུངས་སོ། །གཉིས་པ་ནི་གལ་ཏེ་བསྒོམས་པས་ཕྱིར་བཟློག་པའི་སྲུང་འཁོར་བསྒོམ་པར་འདོད་ན་ཐུན་མོང་གི་སྲུང་འཁོར་སྔར་བཞིན་དུ་བསྒོམས་ལ། དེ་ནས་སྔར་གྱི་སྲུང་འཁོར་དེ་ཉིད་དང་། གནད་ལྔའི་སྒོ་ནས་མི་འདྲ་ཞིང་ལྷག་མ་རྣམས་འདྲ་བར་ཉམས་སུ་ལེན་ཏེ། དེ་ལ་གནད་ལྔ་ལ་མི་འདྲ་བ་དུ་མ་འཆད་ཀྱང་ཤེས་བྱེད་ཀྱི་ཁུངས་མེད་པས་རང་བཟོ་ཁོ་ནར་སྣང་ལ། འདིར་བླ་ཆེན་འཕགས་པས་རང་ཉིད་དབུས་སུ་གཙུག་ཏོར་འཁོར་ལོས་སྒྱུར་བར་བསམ་ཞིང་། སྟེང་དུ་ཧཱུྃ་མཛད་བསྒོམ་པ་གཙོ་བོ་འཕོ་བའི་གནད་དང་། བདག་ཉིད་ཀྱི་སྙིང་གར་ཉི་མའི་སྟེང་དུ་ཧཱུྃ་ལས་རྡོ་རྗེའི་ནང་དུ་བདག་ཉིད་ཀྱི་རྣམ་ཤེས་ཧཱུྃ་དུ་བསམས་ལ། དེའི་མཐར་བསྒྲུབ་བྱའི་མིང་གི་ཡི་གེ་དང་པོ་བསམས་ཏེ། བསྲུང་བར་བསམ་པ་ནི་བསྲུང་བྱ་སྦ་བའི་གནད་དང་། ཁྲོ་བོ་རྣམས་ཤིན་ཏུ་ཁྲོས་པའི་ཚུལ་ཅན་ཞལ་ཕྱི་རོལ་ཏུ་གཟིགས་ནས། ཐུགས་ཀ་ནས་རང་དང་འདྲ་བའི་ཁྲོ་བོ་དུ་མ་འཕྲོས་ཏེ། ཕ་རོལ་གྱི་སྲུང་མ་དང་། བདག་ལ་རྦད་པའི་གནོད་བྱེད་རྣམས་ཚར་བཅད་པར་བསམ་པ་ལྷའི་རྣམ་པའི་གནད་དང་། འཁོར་ལོ་གཡོན་དུ་འཁོར་བས་དགྲ་བགེགས་རྣམས་ཕྱེ་མར་བརླག་པ་འཁོར་ལོ་འཁོར་བའི་གནད་དང་། ཨུཥྞཱི་ཥའི་སྔགས་བཟླ་བ་སྔགས་ཀྱི་གནད་དོ། །གནད་ལྔ་དང་ལྡན་པའོ་ཞེས་གསུངས་པ་ལྟར་ཡིན་ནོ། །དེ་ཡང་དེ་ཉིད་བཅུ་པ་ལས། ད་ནི་བསྒོམས་པས་ཕྱིར་བཟློག་པ་བསྟན་པར་བྱ་སྟེ། ཁྲོ་བོ་གཙུག་ཏོར་འཁོར་ལོས་སྒྱུར་བའི་ཕྱག་གཉིས་རང་གི་ཕྱག་མཚན་དང་། སྡིགས་མཛུབ་ཅན་ཁྲོ་བ་དང་བཅས་པ་ཉི་མའི་གདན་ཅན་གཡས་བརྐྱང་བས་བཞུགས་པ། ཁྲོ་བོའི་གཟུགས་ཅན་དབང་བསྐུར་བ་ལ་སོགས་པ་བླངས་ལ། དགྲ་བོའི་ཚོགས་ལ་བསྡིགས་པ་གཡོན་དུ་འཁོར་བས་གཡོ་བ་རྣམ་པར་བསམས་ལ། ན་མཿས་མནྟ་བུདྡྷཱ་ནཱཾ་ཞེས་སོགས་གསུངས་སོ། །དེ་ལ་གཙོ་བོ་འཕོ་བ་དང་། འཁོར་ལོ་དང་སྔགས་ཀྱི་གནད་གསུམ་དངོས་སུ་བསྟན་ལ། དགྲ་བོའི་ཚོགས་ལ་བསྡིགས་པ་ཞེས་པས་ལྷའི་རྣམ་པའི་གནད་གསལ་བར་བསྟན་ནོ། །བསྲུང་བྱ་སྦ་བའི་གནད་གཞུང་དེ་ནས་དངོས་སུ་མ་གསུངས་ཀྱང་། གུར་འགྲེལ་ལས། བདག་ཉིད་བསྲུང་ན་གཙུག་ཏོར་འཁོར་ལོས་སྒྱུར་བའི་རྣལ་འབྱོར་གྱིས་སྲུང་བའི་འཁོར་ལོའི་དབུས་སུ་གནས་ནས་རང་གི་སྙིང་གར་འཁོར་ལོའི་ལྟེ་བར་ཧཱུྃ་གི་ཐིག་ལེ་ལ་རང་གི་གཟུགས་བསམས་ནས་འཁོར་ལོ་གཡོན་དུ་འཁོར་བར་བསམས་ན་བསྲུང་བར་འགྱུར་ཏེ། གཞན་ལ་ཡང་དེ་བཞིན་ཞེས་བསྲུང་བྱ་སྦ་བ་ཡང་བཤད་པས་གནད་ལྔ་ནི་རྒྱ་གར་གྱི་གཞུང་རྣམས་ནས་འབྱུང་བའི་མན་ངག་ཡིན་གྱི། བོད་ཀྱི་བློས་བརྟགས་ནས་བྱས་པ་མ་ཡིན་ནོ། །འདི་དག་གི་དོན་རྗེ་ས་ཆེན་གྱིས་ཡན་ལག་བཞི་རྫོགས་སུ་བྱས་པའི་རྗེས་ལ། དེ་ནས་ལུས་བསྲུང་ཞིང་མིང་སྦ་བར་བྱ་སྟེ། དེ་ཡང་རང་གི་སྙིང་གའི་ཧཱུྃ་ལས་འོད་འཕྲོས་པས་བ་སྤུའི་བུ་ག་ཐམས་ཅད་རྡོ་རྗེ་ཕྲ་མོ་དཔག་ཏུ་མེད་པས་བལྟམས་པར་བསམ་པ་ནི་གོ་བགོ་བའོ། །དེ་ནས་རང་གི་སྙིང་གར་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པ་གྱེན་དུ་ལངས་པ་ཅིག་བསྒོམ། དེའི་མཐའ་ན་ཕར་གང་བསྲུང་བར་འདོད་པའི་མིང་གི་ཡི་གེ་དང་པོ་བསམས་ལ། དེ་ཡང་སློབ་དཔོན་བསྲུང་བར་འདོད་ན་སྤྱི་བོར་བསྒོམ། སྤུན་ཟླ་གཡོན་དུ་བསམ། ཕ་མ་བདུན་དུ་བསམ། བུ་དང་ཆུང་མ་གཡས་སུ་བསམ། འཁོར་གཡོག་རྒྱབ་ཏུ་བསམ། ནོར་རྫས་རྣམས་འོག་ཏུ་བསམ། གང་མི་བསྲུང་བ་སྟོང་པར་གཞག་གོ །དེ་ནས་མཆོད་བསྟོད་བདུད་རྩི་མྱང་བ་ལ་སོགས་པ་གྲུབ་ན་བྱ་མ་གྲུབ་ཀྱང་ཆོག་དེ་ནས་ཙཀྲའི་ཕྱོགས་མཚམས་བརྒྱད་ཀྱི་རྩིབས་ཀྱི་བར་དུ། ཡྃ་ལས་རླུང་གི་དཀྱིལ་འཁོར་དེའི་སྟེང་དུ་རྃ་ལས་མེའི་དཀྱིལ་འཁོར་གྱི་སྟེང་དུ། བསྒྲུབ་བྱ་ལུས་རེད་པ། སྐྲ་འཛིངས་པ། ཁ་ནས་ཁྲག་སྐྱུགས་པ། སྤྱིའུ་ཚུགས་སུ་འདུག་པར་བལྟ་སྟེ། དེ་ལ་གནོད་བྱེད་ཀྱི་ཤེས་པ་བཀུག་ལ་བསྟིམ་མོ། །དེ་ནས་སྔགས་བཟླས་པ་དང་། ཁྲོ་བོ་བཅུ་ཞལ་ཕྱིར་གཟིགས་པ་དང་། ཙཀྲ་གཡོན་དུ་མྱུར་བར་འཁོར་བས་གནོད་བྱེད་ཀྱི་ལུས་རླུང་གིས་བསྐྱོད། མེས་བསྲེགས་ཤིང་ཙཀྲའི་རྩེ་མོས་ཉལ་ཉལ་གཏུབས་པར་བསམ་མོ། །དེ་ལྟར་ལུས་གཏུབས་པས་ཁོའི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་བྱང་ནས་རྣམ་པར་ཤེས་པ་མི་བསྐྱོད་པའི་གནས་སུ་སྐྱེ་བར་བསམ་ཞིང་སྔགས་བཟླའོ། །ཞེས་གསུངས་པ་ལྟར་ཉམས་སུ་བླང་བར་བྱའོ། །དེ་ལ་བཟླས་པའི་སྔགས་གུར་ལེའུ་བཞི་པར་བཤད་པའི་སྔགས་ཀྱི་དོན་ནི། ན་མཿས་མནྟ་བུདྡྷཱ་ནཱཾ། ཞེས་པ་ནི་ཀུན་ནས་དྭང་བས་སངས་རྒྱས་ལ་ཕྱག་འཚལ་ལོ་ཞེས་པའི་དོན་ཡིན་ལ། དེ་བཞིན་དུ་ན་མཿས་མནྟ་དྷརྨཱ་ནཱཾ་ཀུན་ནས་དྭང་བས་ཆོས་ལ་ཕྱག་འཚལ་ལོ་ཞེས་པའོ། །ན་མཿས་མནྟ་སཾ་གྷཱ་ནཱཾ་ཀུན་ནས་དྭང་བས་དགེ་འདུན་ལ་ཕྱག་འཚལ་ལོ་ཞེས་པའོ། །ཨོཾ་ནི་འདིར། སྐལ་བཟང་རྣམ་པ་དང་ལྡན་ཞིང་། །ཞེས་པའི་དོན་ནོ། །སི་ཏཱ་ཏ་པ་ཏྲ་ནི་གདུགས་དཀར་པོ་ཅན་ཏེ་ཇི་ལྟར་གདུགས་ཀྱིས་ཚ་གདུང་སྐྱོབ་པ་ལྟར་ཆོས་དབྱིངས་ཡེ་ཤེས་ཀྱིས་ཉོན་མོངས་པའི་གདུང་བ་སྐྱོབ་པའི་དོན་ཏོ། །ཨོཾ་བི་མ་ལ་ནི་དྲི་མ་མེད་པ་སྟེ། ཆོས་དབྱིངས་ཡེ་ཤེས་ཀྱི་རང་གི་ངོ་བོ་ཉོན་མོངས་པ་དང་མཚན་མའི་དྲི་མ་དང་བྲལ་བའོ། །ཨོཾ་ཤཾ་ཀ་ར་ནི་འབྱུང་གནས་ཏེ། ཡེ་ཤེས་དེ་ཉིད་ཆོས་ཀྱི་ལོངས་སྤྱོད་ཀྱི་བདེ་བའི་འབྱུང་གནས་སུ་གྱུར་པའོ། །ཨོཾ་པྲ་ཏྱཾ་གི་ར་བཛྲ་ནི་ཚུལ་མ་ཡིན་བརླག་པར་བྱེད་པའི་རྡོ་རྗེ་སྟེ། ཡེ་ཤེས་དེས་མཚན་མ་དང་རྣམ་པར་རྟོག་པ་ཐམས་ཅད་བརླག་པར་བྱེད་པའོ། །ཨུཥྞཱི་ཥ་ཙཀྲ་ཝརྟི་ནི་གཙུག་ཏོར་འཁོར་ལོས་སྒྱུར་བ་སྟེ། སྔར་གྱི་དྲི་མ་མེད་པ་ལ་སོགས་པའི་ཆོས་གསུམ་དང་ལྡན་པའི་ཆོས་དབྱིངས་ཡེ་ཤེས་དེ་ཉིད་གཟུགས་རྣམས་ཁྲོ་བོ་གཙུག་ཏོར་འཁོར་ལོས་སྒྱུར་བར་ཤར་ཅེས་པའོ། །ཁྲོ་བོ་དེས་བྱེད་ལས་ཅི་ཞིག་ཅེ་ན། སརྦ་ཐམས་ཅད། ཡནྟྲ་འཁྲུལ་འཁོར། མནྟྲ་སྔགས། མཱུ་ལ་ཀརྨཱ་རྩ་བའི་ལས། བནྡྷཱ་ནཱཾ་འཆིང་བ། ཏཱ་ཌ་ནཱཾ་བཟློག་པ་སྟེ། མདོར་ན་སྔགས་དང་། འཁྲུལ་འཁོར་དང་། མངོན་སྤྱོད་ཀྱི་ཕྲིན་ལས་ཀྱི་སྒོ་ནས་བདག་ལ་གནོད་པའི་ལས་ཐམས་ཅད་འཆིང་བ་དང་། བཟློག་པའི་ལས་བྱེད་ཅེས་པའོ། །དེར་མ་ཟད་བྱེད་ལས་གཉིས་པ་ནི། ཀཱི་ལ་ནཱཾ་པཱ་ཕུར་བུའི་མཱ་མ་བདག་ལ། ཀྲྀ་ཏ་བྱས་ན། ཡེ་ན་གལ་ཏེ། ཀེ་ན་བྱེད་ན། ཙིཏྟ་སེམས་ཀྱི། ཀྲྀ་ཏཾ་ཏ་ཏ་དེ་དག་སྟེ། མདོར་ན་གཞན་འབའ་ཞིག་གིས་བདག་ལ་ཕུར་བུ་སྟེ་བྱད་ཀའི་གནོད་པ་བྱས་པ་དང་། བྱེད་པར་སེམས་པ་དེ་དག་ཅེས་པའོ། །སརྦནྟུ་ནི་ཐམས་ཅད་དེ། སྔར་གྱི་གནོད་པའི་ལས་ཐམས་ཅད་ཕྱོགས་གཅིག་ཏུ་བསྡུས་ནས་འཇོམས་ཞེས་པའོ། །ཇི་ལྟར་འཇོམས་ན་ཚིནྡྷ་ཚིནྡྷ་གཏུབས་ཤིག་པ་སྟེ། གཞན་གྱི་རིག་སྔགས་གཏུབས་ཤིག་པའོ། །བིནྡྷ་བིནྡྷ་ཕུག་ཅིག་པ་སྟེ། གཞན་གྱི་ཕྱག་རྒྱ་ཐམས་ཅད་ཕུག་ཅིག་པའོ། །ཙི་རི་ཙི་རི་ནི་ཕྱེ་མར་གྱིས་ཤིག་པ་སྟེ། རྩ་བའི་ལས་དམན་པ་ཐམས་ཅད་ཕྱེ་མར་གྱིས་ཤིག་པའོ། །གི་རི་གི་རི་ནི་གྱིས་ཤིག་པ་སྟེ་གང་གྱིས་ཤིག་ན་མ་ར་མ་ར་གསོད་གསོད་སྟེ། གསོད་པར་གྱིས་ཤིག་པའོ། །དོན་ནི་ཕྱི་རོལ་གྱི་དགྲ་བསད་པས་ལུས་མི་སྣང་བར་བྱས་པ་བཞིན་དུ། ཆོས་དབྱིངས་ཡེ་ཤེས་ཀྱིས་གཟུང་འཛིན་གྱི་བདུད་ཐམས་ཅད་མི་སྣང་བར་གྱིས་ཤིག་པའོ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ནི་ཆོས་ཀྱི་དབྱིངས་ལ་ཡུལ་ཅན་བཅུ་མེད་པའི་ཕྱིར་ཧཱུྃ་བཅུ་སྨོས་པའོ། །ཕཊ་ཕཊ་ཕཊ་ནི་དགས་པ་སྟེ། གནས་གསུམ་དུ་ལྟུང་བའི་ཉེས་པ་རྣམས་དགས་པའི་དོན་ཏོ། །དོན་དེ་དག་དང་ལྡན་པའི་གསང་སྔགས་ལན་བདུན་ནམ་ཉེར་གཅིག་གམ་བརྒྱ་རྩ་བརྒྱད་ལ་སོགས་པ་ཅི་རིགས་པར་བཟླས་ཤིང་། དེའི་ཚེ་དམིགས་པ་ཇི་ལྟར་བྱ་ན། རྗེ་བཙུན་གྱི་མན་ངག་ལས། ན་མཿས་མནྟ་ནས་ཙཀྲ་ཝརྟི་ཡན་ཆད་ཀྱིས་གཙོ་བོ་གསལ་གདབ། སརྦ་ཡནྟྲ་ནས་མ་ར་ཡན་ཆད་ཀྱིས། ཁྲོ་བོ་རྣམས་ལས་ཁྲོ་བོ་རང་འདྲ་བ་དཔག་ཏུ་མེད་པ་སྤྲོས་ལ། གནོད་བྱེད་ཐམས་ཅད་ཚར་བཅད་པར་བསམ་མོ། །ཧཱུྃ་བཅུ་ཡིས་ཁྲོ་བོ་བཅུ་གསལ་གདབ། ཕཊ་གཅིག་གིས་སྟེང་། གཅིག་གིས་འོག གཅིག་གིས་བདག་དང་བསྲུང་བྱ་རྣམས་གསལ་གདབ། ཞེས་གསུངས་པ་ལྟར་བྱའོ། །དེ་ནས་འཕྲོ་འཇོག་པ་ན། རྗེ་ས་ཆེན་གྱིས་གང་དག་བདག་ལ་སྡང་བའི་སེམས་དང་ལྡན་པ་རྣམས་དང་། གདུག་པའི་སེམས་དང་ལྡན་པ་རྣམས་དང་། དྲག་ཤུལ་གྱི་སེམས་དང་ལྡན་པ་རྣམས་དང་། སྦྱོར་བ་ངན་པར་བྱེད་པའི་དགྲ་བགེགས་གང་ཡིན་པ་དེ་དག་གི་ལུས་བཅིང་བར་བགྱིའོ། །ངག་བཅིང་བར་བགྱིའོ། །ཡིད་བཅིང་བར་བགྱིའོ། །མཐུ་བརླག་བར་གྱུར་ཅིག རྫུ་འཕྲུལ་བརླག་པར་གྱུར་ཅིག སྟོབས་བརླག་པར་གྱུར་ཅིག དེས་བཟླས་པའི་སྔགས་ཀྱིས་དེ་ཉིད་བརླག་པར་གྱུར་ཅིག དེས་བསྒྲུབས་པའི་ལྷ་འདྲེས་དེ་ཉིད་ཀྱི་ཤ་ལ་ཟ་བར་གྱུར་ཅིག ཅེས་བརྗོད་ཅིང་ཐལ་མོ་བརྡབ་བོ། །ཞེས་གསུངས་པ་ལྟར་ངག་ཏུ་བཟློག་པའི་ཚིག་དེ་དག་བརྗོད་ཅིང་། ལུས་ཀྱིས་ཐལ་མོ་བརྡབ་སྟེ། རྡོ་རྗེ་གུར་ལས། ཧཱུྃ་གིས་དྲེགས་བྱས་ཕྱག་རྒྱས་གདབ། །རྡོ་རྗེ་འཚིར་བས་འཚིར་བ་ཉིད། །ཅེས་པའི་དོན། ལག་པ་གཉིས་ཀྱི་མཐིལ་དུ་ཧཱུྃ་ལས་སྣ་ཚོགས་རྡོ་རྗེ་བསྒོམ། སོར་མོ་རྣམས་ཀྱང་རྡོ་རྗེའི་རང་བཞིན་དུ་བསམས་ལ། ལག་པ་གཉིས་ཐལ་མོ་བརྡབ་པའི་བར་དུ་བགེགས་འཚིར་བར་བསམ་པ་གུར་རྒྱན་དུ་བཤད་ལ། དེ་ནས་སེམས་ཀྱི་དམིགས་པ་ནི་རྗེ་ས་ཆེན་གྱིས་བདག་ཉིད་ཀྱི་ཐུགས་ཀ་ནས་ཁྲོ་བོ་རང་འདྲ་བ་མཚོན་ཆ་ཐོགས་པ་དཔག་ཏུ་མེད་པ་སྤྲོས་ཏེ། གནོད་བྱེད་ཐམས་ཅད་ཀྱི་ལྕེ་བཅད་ཅིང་ལུས་མགོ་ནས་བཤང་ལམ་གྱི་བར་དུ་གཏུབས། གཤག་ཅིང་ལུས་རྡུལ་ཕྲ་རབ་ཙམ་དུ་བྱས་ནས་མེས་བསྲེགས། རླུང་གིས་གཏོར་བར་བསམ་ཞེས་གསུངས་པ་ལྟར་རོ། །དེ་ལྟར་བྱས་པའི་རྗེས་སུ་གཙུག་ཏོར་འཁོར་ལོས་སྒྱུར་བའི་ལྟོ་བ་ཡངས་པའམ། དེ་འོད་དུ་ཞུ་བ་ལས་ཆོས་འབྱུང་དུ་བསམས་ནས་མངོན་པར་རྟོགས་པ་བསྒོམ་པ་ལ་འཇུག་གོ །ལྟོ་བའི་ནང་དུ་བསྒོམ་པ་ནི་རྡོ་རྗེ་གུར་ལས། ཡེ་ཤེས་རྡོ་རྗེ་རང་དབུས་སུ། །བཅུ་ཕྱེད་དཀྱིལ་འཁོར་བདག་ཉིད་དེ། །ཞེས་སྲུང་འཁོར་གྱི་སྐབས་ནས་གསུངས་པའི་དོན་ཡེ་ཤེས་རྡོ་རྗེ་སྟེ། རྣལ་འབྱོར་པ་རང་ཉིད་ཧཱུྃ་མཛད་ལ་སོགས་པ་དབུས་ཀྱི་ཁྲོ་བོའི་ང་རྒྱལ་གྱིས་སྲུང་འཁོར་གྱི་དབུས་སུ་གནས་ནས། བཅུ་ཕྱེད་དཀྱིལ་འཁོར་ཏེ། རིགས་བསྡུས་ཀྱི་དཀྱིལ་འཁོར་གྱི་དཀྱིལ་འཁོར་ལྔ་པོ་བདག་ཉིད་ཀྱི་ལྟོ་བར་བསྒོམ་ཞེས་པ་སྟེ། ལྷའི་རིགས་ཀྱི་བློ་གྲོས་ཀྱི་འགྲེལ་པར། དབུས་ན་དཀྱིལ་འཁོར་ལྔ་ལ་ཁྲོ་བོ་གཞན་དང་ལྡན་པའོ། །ཞེས་སྲུང་འཁོར་གྱི་དབུས་སུ་ཁྲོ་བོ་དང་དཀྱིལ་འཁོར་གཉིས་ཀར་ལྡན་དགོས་པར་བཤད་པའི་ཕྱིར་རོ། །སྤྱི་དོན་གཉིས་པ་དངོས་གཞིའི་རྣལ་འབྱོར་ལ། ཡན་ལག་བཞི་དྲུག་གཉིས་ལས། བཞི་པ་ལྟར་ན་རྟེན་བསྐྱེད་པ་དང་། བརྟེན་པ་བསྐྱེད་པ་གཉིས། ཕྱི་མ་ལ་བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་གྱི་སྒོ་ནས་བཤད་པར་བྱ་བ་ཡིན་མོད་ཀྱི། ཡན་ལག་དྲུག་པའི་ནང་དུ་དེ་དག་ཐམས་ཅད་འདུས་པས་འདིར་ཡན་ལག་དྲུག་པ་ལྟར་བཤད་པ་ལ་བཞི་སྟེ། བསྐྱེད་རིམ་ཡན་ལག་དྲུག་བསྒོམ་པ། དེ་དེ་བཞིན་གཤེགས་པ་རིགས་དྲུག་དང་སྦྱར་བ། དེའི་རྒྱུ་མཚན། དེ་བསྒོམས་པ་ལས་བྱུང་བའི་རྟགས་སོ། །དང་པོ་ལ་དྲུག་སྟེ། གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག དབང་བསྐུར་བ་མི་བསྐྱོད་པའི་ཡན་ལག བདུད་རྩི་མྱང་བ་འོད་དཔག་མེད་ཀྱི་ཡན་ལག མཆོད་པ་དོན་ཡོད་གྲུབ་པའི་ཡན་ལག བསྟོད་པ་རིན་ཆེན་འབྱུང་ལྡན་གྱི་ཡན་ལག་གོ །དང་པོ་ལ་བཞི་སྟེ། གཞིའི་ཡན་ལག རྒྱུའི་ཡན་ལག རྐྱེན་གྱི་ཡན་ལག གནས་ཐབས་ཀྱི་ཡན་ལག་གོ །དང་པོ་ནི། དེ་ལྟར་སྲུང་འཁོར་ཐུན་མོང་བ་རྐྱང་པ་བསྒོམས་ན་དེའི་དབུས་སུ་དང་། ཁྲོ་བོ་བཅུའི་སྲུང་འཁོར་བསྒོམས་ན། དབུས་ཀྱི་ཁྲོ་བོའི་ལྟོ་བའམ། ཞུ་བ་ལས་ཆོས་འབྱུང་བསྒོམས་ཏེ། དེ་ལ་དབྱིབས་ནི། སློབ་དཔོན་དཔལ་འཛིན་གྱིས། ཕྱག་རྒྱ་གྲུ་གསུམ་ཉིད་དེ། འདོད་པ་དང་། གཟུགས་དང་། གཟུགས་མེད་པ་རྣམ་པར་དག་པའི་རང་བཞིན་ཡིན་པའི་ཕྱིར། འོག་ཏུ་ཟུར་གཅིག སྟེང་དུ་གཉིས་པའོ། །ཞེས་བཤད་པ་དང་། རྗེ་བཙུན་རྩེ་མོས་སྐུ་གསུང་ཐུགས་སྙིང་པོའི་ཕྱིར་གྲུ་གསུམ་ཟུར་བཞི་པའོ། །ཞེས་བཤད་པ་གཉིས་དོན་གཅིག་སྟེ། ཕྱོགས་གསུམ་པོ་གང་ནས་བལྟས་ཀྱང་ཕྱག་རྒྱའི་སྐྱེ་གནས་ཀྱི་དབྱིབས་སུ་གནས་པ་དང་། ཟུར་སྲིད་ཚད་ཀྱི་དབང་དུ་བྱས་ན། སྟེང་དུ་ཟུར་གསུམ་དང་། འོག་ཏུ་ཟུར་གཅིག་ཡོད་པའི་ཕྱིར་རོ། །འདི་གཉིས་ཀྱི་དབྱིབས་ཐ་དད་དུ་འཆད་ན། རྗེ་བཙུན་རྩེ་མོས་བཤད་པ་ལ་ཕྱག་རྒྱའི་སྐྱེ་གནས་ཀྱི་མཚོན་བྱེད་མ་ཚང་བར་འགྱུར་ཞིང་། དེ་ལྟར་དུ་འདོད་ན་གླེང་གཞིའི་ཨེ་ལ་ཕྱག་རྒྱའི་སྐྱེ་གནས་ཀྱི་མཚོན་བྱེད་མ་ཚང་བར་འགྱུར་རོ། །ཁ་དོག་ནི་མཚོ་སྐྱེས་ཀྱི་སྐབས་སུ་དཀར་པོར་བཤད་ཀྱང་། མན་ངག་ལུགས་ཀྱི་ཡན་ལག་བཞི་དྲུག་གཉིས་ཆར་དུ་ཕྱི་དཀར་ལ་ནང་དམར་བར་བཤད་ཅིང་། ས་བོན་ནི་རྒྱ་གར་བའི་སྒྲུབ་ཐབས་ཕལ་ཆེར་དང་། རྗེ་བཙུན་སྐུ་མཆེད་ཀྱིས་མ་བཤད་ལ། མར་མེ་མཛད་སོགས་ཀྱིས་ཨེ་ལས་བསྐྱེད་པར་བཤད་པ་ཡང་ཡོད་དོ། །ཆོས་འབྱུང་དེར་རྟེན་དང་བརྟེན་པར་བཅས་པའི་ལྷ་ཚོགས་བསྒོམ་པའི་དགོས་པ་ནི། རྗེ་བཙུན་སྐུ་མཆེད་ཀྱིས་གདུལ་བྱ་འདོད་ཆགས་ཅན་ཉེ་བར་གཞུག་པ་དང་། ཆོས་ཀྱི་སྐུ་སྐྱེ་བ་མེད་པ་ལས་སྐྱེ་བའི་ཆོ་འཕྲུལ་དུ་བསྟན་པའི་དགོས་པའོ། །དེ་ཡང་གཉིས་སུ་མེད་པ་རྣམ་པར་རྒྱལ་བའི་རྒྱུད་ལས། བྷ་ག་བཅོམ་ལྡན་སངས་རྒྱས་ཏེ། །དེས་ན་འདོད་ཆགས་སུན་མི་དབྱུང་། །གང་གཞན་དམ་ཚིག་གསུམ་པོ་རྣམས། །དེ་ཉིད་ཀྱི་ནི་ནང་དུ་འདུས། །ཞེས་གསུངས་ཞེས་བཤད་དོ། །གཉིས་པ་ནི། ཆོས་འབྱུང་དེའི་ནང་དུ་བདུད་རྩི་འོད་མ་གཏོགས་པའི་འགྲེལ་པ་ལུགས་ཀྱི་སྒྲུབ་ཐབས་རྣམས་དང་། མན་ངག་ལུགས་ཀྱི་ཡན་ལག་དྲུག་པ་ལས། རླུང་ནས་རིམ་པ་བཞིན་དུ་འབྱུང་བཞི་བསྒོམ་པ་གསུངས་ཤིང་། བདུད་རྩི་འོད་དང་། སྒྲུབ་ཐབས་མཚོ་སྐྱེས་དང་། མན་ངག་ལུགས་ཀྱི་ཡན་ལག་བཞི་པ་རྣམས་སུ་ས་ནས་རིམ་པ་བཞིན་དུ་བསྒོམ་པ་གསུངས་སོ། །འོ་ན་འདི་གཉིས་མི་འདྲ་བར་བཤད་པའི་རྒྱུ་མཚན་ཅི་ཞེ་ན། རྗེ་བཙུན་གྱི་དག་ལྡན་ལས། འདིར་རླུང་ནས་མས་རིམ་དུ་བསྒོམ་པར་བྱའོ། །དེ་ལྟར་ན་སློབ་དཔོན་པདྨ་བ་དང་། ཌོམྦི་པས་ས་ནས་བསྒོམ་པར་བཤད་པ་དང་མི་འགལ་ལམ་སྙམ་ན་མི་འགལ་ཏེ། དེ་དག་ནི་བྱང་ཆུབ་སེམས་ཀྱི་དཀྱིལ་འཁོར་དང་། འཁོར་ལོ་བཞིའི་གོ་རིམ་ལ་དགོངས་པ་ཡིན་ཏེ། འདི་ཉིད་ཀྱི་ལེའུ་བཅུ་པ་ལས། རེག་པ་སྲ་བའི་བག་ཆགས་ཀྱིས། །ས་ནི་དེ་ལས་སྐྱེ་བར་འགྱུར། །བྱང་སེམས་གཤེར་བའི་རྣམ་པ་ཡིས། །ཆུ་ཡི་ཁམས་ནི་འབྱུང་བར་འགྱུར། །བསྐྱོད་པ་ལས་ནི་དྲོད་སྐྱེ་སྟེ། །འགྲོ་བ་རླུང་དུ་རབ་ཏུ་གྲགས། །ཞེས་འབྱུང་བ་དང་། ཡང་ལྟེ་བ་ས། སྙིང་ག་ཆུ། མགྲིན་པ་མེ། སྤྱི་བོ་རླུང་གི་རང་བཞིན་ཡིན་པའི་ཕྱིར་རོ། །རླུང་ནས་བསྒོམ་པ་ནི་ཕྱི་རོལ་གྱི་འབྱུང་བ་རླུང་ནས་རིམ་གྱིས་འཆགས་པ་དང་། ལུས་ཀྱི་དཀྱིལ་འཁོར་ལ་དགོངས་ཏེ། ཁ་སྦྱོར་ལས། རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ལྟོ་བར་ཡང་ནི་ཆུ་ཡིན་ཏེ། །ཟླུམ་པོའི་གཟུགས་སུ་ཡང་དག་གནས། །སྙིང་གར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །ཞེས་འབྱུང་ངོ་། །དེ་དག་ནི་ཡན་ལག་ཙམ་ཡིན་ལ། གཙོ་བོར་ས་ནས་བསྒོམ་པ་ནི་སྦྱང་གཞི་ལུས་གྲུབ་པའི་མངལ་གྱི་སྔོན་འགྲོ་སྦྱོང་བས་ན་དྲི་མ་ཆུང་ལ། རླུང་ནས་བསྒོམ་པ་ནི་མངལ་གྱི་དངོས་གཞི་སྦྱོང་བས་ན་ཅུང་ཟད་ཟབ་སྟེ། ཕྱག་རྒྱ་ཆེན་པོ་ཐིག་ལེ་ལས། རྣམ་ཤེས་ལས་ནི་སྐྱེས་པ་རླུང་། །དེ་ལས་མེ་ནི་འབྱུང་བར་འགྱུར། །དེ་ལས་སྐྱེས་པ་ཆུ་ཡིན་ཏེ། །དེ་ལས་དབང་ཆེན་འབྱུང་བར་འགྱུར། །དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་གསུངས་པ་ཡིན་ནོ། །གང་ལྟར་ཡང་འདྲ་བར་སྣང་བས་ན་སྦྱང་གཞི་གཙོ་ཆེ་ཆུང་ཡོད་ཀྱང་། ས་ནས་རིམ་གྱིས་བསྒོམས་པས་བཏུབ་མོད་སྙམ་ན། རྡོ་རྗེ་གུར་ལས། ནམ་མཁའི་དཀྱིལ་འཁོར་དབུས་གནས་པར། །རྡོ་རྗེའི་དཀྱིལ་འཁོར་བསྒོམ་པར་བྱ། །རྡོ་རྗེ་དཀྱིལ་འཁོར་སྟེང་དུ་ཡང་། །གསལ་བའི་དཀྱིལ་འཁོར་བསྒོམ་པར་བྱ། །གསལ་བའི་དཀྱིལ་འཁོར་དབུས་གནས་པར། །ཆུ་ཡི་དཀྱིལ་འཁོར་བསྒོམ་པར་བྱ། །ཆུ་ཡི་དཀྱིལ་འཁོར་སྟེང་དུ་ནི། །བརྟུལ་ཞུགས་ཅན་གྱིས་དབང་ཆེན་བསྒོམ། །ཞེས་འབྱུང་བ་ཡིན་ནོ། །ཞེས་བཤད་པ་ལྟར་རོ། །སའི་དཀྱིལ་འཁོར་གྱི་སྟེང་དུ། རྡོ་རྗེ་གུར་ལས། འབྱུང་བཞིའི་བདག་ཉིད་དཀྱིལ་འཁོར་ཉིད། །དེ་ཡི་སྟེང་དུ་སངས་རྒྱས་བསམ། །སྤྲོས་ནས་གཞལ་ཡས་གནས་དགོད་བྱ། །ཞེས་གསུངས་པ་ལ་བརྟེན་ནས་འགྲེལ་པ་ལུགས་དང་། མན་ངག་ལུགས་ཀྱི་ཡན་ལག་དྲུག་པ་རྣམས་སུ་འབྱུང་བཞིའི་སྟེང་དུ་བྷྲཱུྃ་ལས་འཁོར་ལོ་བསྒོམས་ལ། དེའི་ཁ་དོག་ནི། བླ་ཆེན་འཕགས་པས་དཀར་པོར་བཤད་ཅིང་། ཁ་ཅིག་གིས་སེར་པོར་བྱས་སོ། །དེ་ལ་དང་པོ་ལྟར་ན། འཁོར་ལོ་རྣམ་པར་སྣང་མཛད་ཀྱི་རང་བཞིན་ཡིན་པས་དེའི་ཁ་དོག་ལ་དགོངས་པ་ཡིན་ལ། ཕྱི་མ་ནི་རྣམ་སྣང་གི་སྦྱང་གཞི་སའི་ཁམས་ཡིན་ལ། དེའི་ཁ་དོག་སེར་པོ་ཡིན་པས་དེའི་དབང་དུ་བྱས་པའོ། །ཞེས་ཡེ་ཤེས་ཞབས་ལུགས་པ་རྣམས་འཆད་དོ། །དབྱིབས་ནི་རྗེ་བཙུན་རྩེ་མོས་རྩིབས་བརྒྱད་པ་དང་། རྗེ་བཙུན་ཆེན་པོས་རྩིབས་བཅུ་པར་གསུངས་པ་གཉིས་ཀ་མི་འགལ་ཏེ། དང་པོས་ཕྱོགས་མཚམས་བརྒྱད་པོ་ཙམ་ཞིག་དང་། གཉིས་པས་སྟེང་འོག་གཉིས་དང་བཅས་པའི་དབང་དུ་བྱས་པ་ཡིན་པའི་ཕྱིར་རོ། །གསུམ་པ་ནི་དེའི་སྟེང་དུ་བར་སྲིད་ཀྱི་ངོ་བོ་ཨོཾ་དཀར་པོ། ཨཱཿདམར་པོ། ཧཱུྃ་སྔོན་པོ་སྟེ་སྒོ་གསུམ་གྱི་ངོ་བོའི་ཡི་གེ་གསུམ་སྟེང་ནས་སྟེང་དུ་བརྩེགས་པ་སྲེད་པ་དང་ལེན་པའི་རང་བཞིན་ཧོ་དམར་པོ་གཉིས་ཀྱིས་སྟེང་འོག་གི་མཐའ་བརྟེན་བསྒོམས་ཏེ། རྗེ་བཙུན་གྱི་ཡན་ལག་དྲུག་པར། བར་སྣང་དུ་ཡི་གེ་ཨོཾ་ཨཱཿཧཱུྃ་གསུམ། ཧོ་དམར་པོ་གཉིས་ཀྱིས་མཐའ་བརྟེན་པ་ཞེས་གསུངས་པས་སོ། །བླ་མ་ཁ་ཅིག་རང་བཞིན་གྱི་གནས་ནས་བར་སྲིད་ཡིག་འབྲུ་ལྔའི་གཟུགས་ཀྱིས་འོངས་ནས་འབྱུང་བཞི་སོགས་ལ་འདྲེས་པ་ལས་ཐོག་མར་བསྐྱེད་པ་མི་འདོད་པ་ནི་ཤིན་ཏུ་མི་འཐད་དེ། སློབ་དཔོན་མི་ཐུབ་ཟླ་བས། ཡབ་ཡུམ་གྱི་སྒྲུབ་ཐབས་གཉིས། ཀུ་མུ་ཏི་རྣམས་ལས། བྷྲཱུྃ་ལས་འཁོར་ལོའི་སྟེང་དུ་བདག །སྲིད་པ་བར་མའི་བསམ་གཏན་བྱ། །ཞེས་དང་། རིན་ཆེན་འབར་བར། བྷྲཱུྃ་ལས་འཁོར་ལོ་དེ་སྟེང་དུ། །སྲིད་པ་བར་མའི་བག་ཆགས་བསམ། །ཞེས་བསྐྱེད་པ་དངོས་སུ་གསུངས་པ་དང་འགལ་བའི་ཕྱིར་རོ། །དེ་ལྟ་བུའི་ཡིག་འབྲུ་ལྔ་འབྱུང་བཞི་འཁོར་ལོ་དང་བཅས་པ་ལ་རོ་གཅིག་ཏུ་འདྲེས་པའི་རྐྱེན་གྱི་གཞལ་ཡས་ཁང་བསྐྱེད་དགོས་ཏེ། རྗེ་བཙུན་གྱིས་ཡན་ལག་དྲུག་པར་བར་དོའི་ཤེས་པ་འབྱུང་བཞི་འཁོར་ལོ་དང་བཅས་པ་ལ་ཞུགས་པས་གཞལ་ཡས་ཁང་ཞེས་གསུངས་པས་སོ། །འདིའི་དོན་རྟོག་གེ་ལ་མངོན་པར་དགའ་བ་ཁ་ཅིག་མིག་གི་རྣམ་པར་ཤེས་པ་སྔོན་པོ་ལ་ཞུགས་ཞེས་པ་དཔེར་བྱས་ནས་ཡིག་འབྲུ་ལྔ་པོ་འདྲེས་པ་མ་ཡིན་གྱི། དེའི་དམིགས་པ་བཞུགས་པས་བྱུང་བཞི་འཁོར་ལོ་དང་བཅས་པ་འདྲེས་ནས་གཞལ་ཡས་ཁང་བསྐྱེད་པ་ཡིན་ཅེས་པ་ནི་ཧ་ཅང་མི་འཚམ་པའི་གཏམ་སྟེ། མི་ཐུབ་ཟླ་བས། སྲིད་པ་བར་མ་བསམ་བྱས་ནས། །ཨེ་ཝཾ་ཉིད་དུ་རབ་ཏུ་འདྲེས། །འདྲེས་གྱུར་དེ་ལས་བྱུང་བ་ནི། །སངས་རྒྱས་ཕོ་བྲང་ཐུན་མོང་ཡིན། །ཞེས་དང་། གྲུབ་ཆེན་ཌོམྦི་པས། བདག་ཀྱང་བསམ་པར་བྱ་བ་སྟེ། །ཨེ་ཝཾ་ཉིད་དུ་བདག་དང་ནི། །འདྲེས་པར་གྱུར་པ་འཁོར་ལོ་ཡིན། །གྲུ་བཞི་པ་ལ་སྒོ་བཞི་པ། །ཞེས་གསུངས་པ་དང་འགལ་བའི་ཕྱིར་རོ། །འདིར་གཞལ་ཡས་ཁང་ལ་རྫོགས་པར་བསྟིམ་པས་འོག་ཏུ་རྒྱུ་རྡོ་རྗེ་འཆང་གི་ཞལ་དུ་འཇུག་རྒྱུ་མེད་པ་ཡང་མ་ཡིན་ཏེ། དེར་ཡང་ཡིག་འབྲུ་ལྔ་གསར་དུ་བསྐྱེད་ནས་འཇུག་པའི་ཕྱིར་རོ། །གང་ཟག་གཞན་གྱི་བར་དོར་འགྱུར་བའི་སྐྱོན་ཡང་མི་གནས་ཏེ། རྣལ་འབྱོར་པའི་བློ་ངོར་ནི་སེམས་ཅན་ཐམས་ཅད་ཀྱི་བར་དོ་སྦྱོང་བ་ཡིན་ལ། གོ་དོན་མངོན་རྟོགས་ཀྱི་རྒྱུན་རྣལ་འབྱོར་པ་རང་ཉིད་ལ་སྦྱོར་བའི་ཚེ་ན་ཡང་རང་གི་བར་དོ་སྦྱོང་བྱེད་ལན་གཉིས་སུ་འགྱུར་བའི་ཕྱིར། བར་དོ་སྦྱོང་བྱེད་ཡིན་ན་འཆི་སྲིད་སྦྱོང་བྱེད་དེའི་སྔ་རོལ་དེ་མ་ཐག་ཏུ་དགོས་པ་ཡང་མ་ཡིན་ཏེ། མངོན་རྟོགས་ཀྱི་དངོས་གཞིས་སྐྱེ་འཆི་བར་དོ་གསུམ་སྦྱོང་བའི་ཚེ་ཐོག་མར་བར་དོ་སྦྱོང་བྱེད་དགོས་པའི་ཕྱིར་རོ། །གཞན་ལུགས་ཀྱི་བླ་མ་དག་བརྟེན་པ་ལྷ་ལ་རང་གི་ཤེས་པ་འཇུག་པ་ནི་ལེགས་མོད་ཀྱི། རྟེན་གཞལ་ཡས་ཁང་ལ་ཤེས་པ་འཇུག་པ་ཤིན་ཏུ་མི་འཐད་དེ། བེམ་པོ་ལ་ཡིད་ཀྱི་ཤེས་པ་མེད་པའི་ཕྱིར་རོ། །སྙམ་ན། དེ་ནི་མི་འཐད་དེ། འདིར་ནི་གཞལ་ཡས་ཁང་དང་ཤེས་པ་བསྲེ་བ་ནི། རྩ་རྒྱུད་ལས། ཇི་ལྟར་སྒོམ་པ་པོ་འབྱུང་བའང་། །ཞེས་པའི་དོན་ཡིན་པས་འདི་མི་འདོད་པའི་རྒྱ་བོད་སུ་ཡང་མེད་ལ། བསྲེས་པའི་དགོས་པའང་འབྱུང་བཞི་ལུགས་འབྱུང་མངལ་གྱི་དངོས་གཞི་སྦྱོང་བྱེད་དུ་གསུངས་ཤིང་། སྐབས་དེར་བར་དོ་བསྲེས་ཏེ། འབྲས་བུ་གཟུགས་ཀྱི་རྣམ་པ་གཞལ་ཡས་ཁང་དུ་ཤར་ཅིང་། ངོ་བོ་རྣམ་པར་སྣང་མཛད་ཀྱི་ང་རྒྱལ་བསྒོམས་པས་བར་སྲིད་དང་། སྐྱེ་སྲིད་གཉིས་ཆར་སྦྱོང་བའི་ཕྱིར་རོ། །འབྱུང་བཞི་ལུགས་བཟློག་ལ་བར་སྲིད་མི་བསྲེ་བའི་གནད་ཀྱང་འདི་ཉིད་ཡིན་ནོ། །འོ་ན་དེ་ལ་རྐྱེན་གྱི་ཡན་ལག་ཅི་ལྟར་འགྱུར་སྙམ་ན་འབྱུང་བཞི་ལ་རང་སེམས་བསྲེ་བ་སྟེ། རྗེ་བཙུན་རྩེ་མོས། དེ་ནས་རྐྱེན་གྱི་ཡན་ལག་ནི། །འབྱུང་བཞིར་རྣམ་ཤེས་ཞུགས་བསྒོམས་ཏེ། །འབྱུང་བཞིའི་དཀྱིལ་འཁོར་ཐམས་ཅད་ཀྱང་། །རང་གི་སེམས་ཙམ་དུ་ཤེས་བྱ། །ཞེས་པས་རྐྱེན་གྱི་ཡན་ལག་དང་། འཇུག་ཚུལ་གཉིས་རྟེན་པའི་ཕྱིར། དེའི་དགོས་པ་ཡང་གཞལ་ཡས་ཁང་རང་གི་སེམས་ཙམ་དུ་ཤེས་པའོ། །བཞི་པ་གནས་ཐབས་ཀྱི་ཡན་ལག་ལ་གསུམ་སྟེ། གནས་ཐབས་ཞིབ་ཏུ་གཏན་ལ་དབབ་པ། ཞར་བྱུང་དུར་ཁྲོད་བཤད་པ། ནང་གི་རྣམ་པ་དང་གདན་བཤད་པའོ། །དང་པོ་ནི། འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །འོག་ལ་སྣ་ཚོགས་རྡོ་རྗེ་དང་། །ཉི་མ་པདྨ་ཁོར་ཡུག་གོ །དེ་ལ་དང་པོ་སྣ་ཚོགས་རྡོ་རྗེ་ནི་གཞལ་ཡས་ཁང་པ་གནས་པའི་རྟེན་ཏེ། དེའི་ལྟེ་བ་གྲུ་བཞི་པའི་ཤར་ནུབ་ཀྱི་རྒྱ་ནི་ཆ་ཆེན་བཅུ་གཉིས་ཡིན་ལ། དེའི་སྟེང་འོག་གི་དཔངས་ནི་ཆ་ཆེན་གཅིག་གོ །དེ་ལས་འཐོན་པའི་ཕྱོགས་བཞིའི་རྭ་ནི་འདིར་རྩ་ཐིག་ནས་རྩ་ཐིག་གི་བར་ལ་དཀྱིལ་འཁོར་དུ་བྱས་པའི་ཐིག་སྐུད་དེ་ཉིས་འགྱུར་གྱི་ལུགས་ཏེ། ཐིག་སྐུད་ཆ་ཆུང་རེ་བཞི་པའི་ཕྱོགས། རྟ་བབས་དཔངས་སུ་སྒོ་ཚད་གཅིག་མ་ཡིན་ལ། དེའི་ཕྱི་རོལ་རྭའི་སྲིད་ལ་ཆ་ཆེན་གཉིས་ཡོད་དོ། །རྭ་རྣམས་ཀྱི་ཁ་དོག་ཀྱང་ཕྱོགས་མདོག་ཡིན་ལ། དབུས་ཀྱི་ཁ་དོག་ནི་འདིར་སྔོན་པོའོ། །གཉིས་པ་ཉི་མ་ནི། སྣ་ཚོགས་རྡོ་རྗེ་གནས་པའི་གཞི་སྟེ། མེ་ཤེལ་གྱི་རང་བཞིན་ཅན་ཁ་དོག་དམར་པོ། དབྱིབས་ཟླུམ་པོ། རྒྱར་ཆ་ཆུང་དྲུག་ཅུ་རེ་བཞིའོ། །གལ་ཏེ་ཉི་མ་དམར་པོ་ཡིན་ན། བྲི་ཆ་ལ་ཁ་དོག་ལྗང་གུར་བྱེད་པ་དང་འགལ་སྙམ་ན། ཉི་མའི་ཁ་དོག་དམར་པོ་ཡིན་ཀྱང་། དེའི་འོག་ན་པདྨ་ཡོད་ལ། དེའི་ལྟེ་བ་ལྗང་གུ་ཡིན་པར་ཨ་བྷ་ཡས་བཤད་པས་དེའི་ཁ་དོག་ཏུ་གྱུར་པ་སྟེ། དཔེར་ན་དར་ལྗང་གུའི་སྟེང་དུ་ཤེལ་དམར་པོ་བཞག་པ་ལྟ་བུའོ་ཞེས་བོད་ཀྱི་ཕྲེང་བ་མཁན་པོ་རྣམས་གསུང་ངོ་། །གསུམ་པ་པདྨ་ནི། སྣ་ཚོགས་རྡོ་རྗེ་གནས་པའི་རྟེན་ཏེ། ལྟེ་བའི་ཚད་ཉི་དཀྱིལ་དང་མཉམ་ལ། འདབ་མའི་རྒྱ་ཆ་ཆུང་གཉིས་པར་ཐིག་གིས་རིགས་པས་ཤེས་ཤིང་། གྲངས་ནི་ལ་ལི་ཏ་བཛྲ་གྱིས། འདབ་མ་འབུམ་ལྡན་དེ་དབུས་སུ། །ཞེས་བཤད་ལ། བླ་མ་རྔོག་པ་རྣམས་ཀྱིས་སུམ་ཅུ་སོ་གཉིས་པར་འདོད་དེ། ཁ་དོག་ནི་ཨ་བྷ་ཡས་སྣ་ཚོགས་པར་བཤད་པ་ལྟར་ཡིན་ནོ། །བཞི་པ་ཁོར་ཡུག་ནི། ཆོས་འབྱུང་གི་ས་དང་། རྡོ་ར་དང་། མེ་རི་སྟེ། འདི་དག་ནི་སྔར་བཤད་པ་ལྟར་རོ། །ལོགས་ལ་རྩིག་པ་ཕ་གུ་དང་། དྲྭ་ཕྱེད་མདའ་ཡབ་པུ་ཤུའོ། །དེ་ལ་དང་པོ་རྩིག་པ་ནི་སྔར་གྱི་སྣ་ཚོགས་རྡོ་རྗེའི་སྟེང་དུ་ཆ་ཆེན་བཅུ་གཉིས་མཉམ་པར་བགོས་པའི་དབུས་ནས་ཕྱི་རོལ་དུ་བགྲངས་པའི་ཆ་ཆེན་ལྔ་པ་ལ་དབུས་དོར་མཐའ་གཉིས་གདབ་པའི་མཐའ་ནང་མ་ནི་རྩིག་པའི་ས་ཡིན་པས། དེའི་རྒྱ་ནི་ཐིག་ན་ཇི་ལྟར་ཡོད་པ་བཞིན་ཡིན་ལ། ཆུར་ནི་ཕྱོགས་བཞི་ཆར་ལ་སྒོ་ལོགས་ནས་སྒོ་ལོགས་ཀྱི་བར་རྒྱུན་ཆགས་སུ་སོང་བའོ། །དཔངས་ནི་རྒྱ་དཔང་མཉམ་པར་འདོད་པ། རྒྱ་ཕྱེད་དཔངས་སུ་འདོད་པ། ཆ་ཕྲན་ལྔར་འདོད་པ་གསུམ་ལས། དང་པོ་ལྟར་ན་སྔ་རབས་པ་འགའ་ཞིག་རྩིག་པའི་ནང་ནས་ནང་གི་བར་ལ་ཆ་ཆེན་བརྒྱད་ཡོད་ལ། དེ་ཉིད་རྩིག་པ་མན་ཆད་ཀྱི་དཔངས་སུ་འདོད་ལ། ཁ་ཅིག་ཆ་ཆེན་བརྒྱད་པོ་དེ་ཉིད་དྲྭ་ཕྱེད་མན་ཆད་ཀྱི་དཔངས་སུ་འདོད་དོ། །དེ་ལ་ཕྱིས་ཀྱི་མཁས་པ་དག་དཀྱིལ་འཁོར་གྱི་ཀ་བ་ལ་ཆ་ཆེན་བཞི་ལས་མེད་པས། ཀ་བའི་རྩེ་མོ་ནས་ཐོག་གི་བར་དུ་བར་སྟོང་ཆ་ཆེན་བཞི་ཡོད་པར་འགྱུར་ལ། དེ་ལྟར་ན་ཀ་བ་ལ་འདེགས་རྒྱུ་མེད། གདུང་ལ་འདེགས་མཁན་མེད་པའི་སྐྱོན་ཡོད་དོ། །གལ་ཏེ་སྐྱོན་མེད་དེ། ཐིག་ཏལ་པོར་བཏབ་པ་དེ་ཀ་བ་དེའི་དཔངས་ཚད་ཡིན་པས་ཐོག་དང་། ཀ་བ་དཔངས་མཉམ་མོ་ཞེ་ན། དེ་ལྟར་ན་ཀ་བ་བཞི་ལས་མེད་པས་བརྒྱད་མ་ཚང་ཞིང་། ཕྱོགས་རེར་ཀ་བ་རེ་རེ་ལས་མེད་པའམ། ཡང་ན་ཕྱོགས་གཉིས་སུ་ཀ་བ་གཉིས་གཉིས་ཕྱོགས་གཉིས་སུ་ཀ་བ་མེད་པའི་སྐྱོན་དུ་འགྱུར་ལ། དེ་ཉིད་སྣང་ཆེན་དུ་ཕྱོགས་ཀྱི་ཆ་རེ་རེ་ཞིང་རྩིག་པ་ལ་བརྟེན་པའི་རྡོ་རྗེའི་ཀ་བ་གཉིས་གཉིས་ཡོད་པས་ཞེས་བཤད་པ་དང་འགལ་བར་འགྱུར་རོ། །འོ་ན་ཐམས་ཅད་གསང་བར། ཕྱི་ཡི་གྲུ་བཞི་གང་ཡིན་པར། །ཚད་ཀྱིས་མཉམ་པ་ཉིད་གྱུར་པ། །ཞེས་རྒྱ་དཔངས་མཉམ་པར་བཤད་པ་མ་ཡིན་ནམ་ཞེ་ན། མ་ཡིན་ཏེ། གྲུ་བཞིའི་ལོགས་བཞི་པོ་མཉམ་པོ་ལ་དགོངས་ཏེ། དེའི་འགྲེལ་པར། ཕྱིའི་གནས་གང་ཡིན་པར་ཚད་ཀྱི་ལོགས་བཞི་མཉམ་པར་འགྱུར་བ་གང་ཡིན་པ་དེ་ནི་ཐིག་བཞི་ཞེས་བྱ་ལ། ཞེས་ལོགས་བཞི་མཉམ་པ་ལ་བཤད་པའི་ཕྱིར་རོ་ཞེས་ཕྱོགས་སྔ་མ་ལ་དགག་པ་མཛད་པ་རྣམས་སྙོན་མི་ནུས་པར་སོང་སྣང་མོད། འོན་ཀྱང་དེ་ཉིད་སྣང་ཆེན་གྱི་ལུང་དེ་ནི་བསྒོམ་བྱའི་སྐབས་སུ་ཀ་བ་བརྒྱད་ཡོད་པར་བརྟེན་པ་ཡིན་ལ། འདིར་ཕྱོགས་སྔའི་བློ་ཡུལ་དུ་བྲི་བྱ་ལ་ཀ་བ་བརྒྱད་ཡོད་པའི་ལུང་ཞིག་དགོས་པས་ན། འདིར་རྡོ་རྗེ་རྩེ་མོ་ལས། ཟུར་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་མཛེས་བྱས་ཤིང་། །རྡོ་རྗེ་ཕྲེང་བས་ཡོངས་བསྐོར་བར། །དཀྱིལ་འཁོར་དབུས་མ་བྲི་བར་བྱ། །ཞེས་དང་། དེ་ཉིད་བསྡུས་པ་ལས། དེ་ཡི་འཁོར་ལོ་སོ་སོའི་སྐབས། །ནང་དུ་ཡང་ནི་ཞུགས་ནས་ནི། །རྡོ་རྗེ་ཐེག་ནི་ཡོངས་བཅུག་ཅིང་། །ཕྱི་རོལ་དཀྱིལ་འཁོར་ཐིག་གདབ་བྱ། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཀ་བའི་རྩེར་གནས་ལ། །དཀྱིལ་འཁོར་ལྔ་ཡིས་རྣམ་པར་བརྒྱན། །ཞེས་གསུངས་པ་རྣམས་ལུང་དུ་དྲངས་པས་རྒྱ་དཔངས་མཉམ་པོར་འདོད་པ་ཐམས་ཅད་ཁེགས་པ་ཡིན་ནོ། །གཉིས་པ་རྒྱ་ཕྱེད་དཔངས་སུ་འདོད་པ་ལྟར་ན། ཕྱིས་ཀྱི་མཁས་པ་དག་དཀྱིལ་འཁོར་གྱི་ཀ་བ་ནི་རྩ་བ་རྩིག་པ་ནས། རྩེ་མོ་དཀྱིལ་འཁོར་དབུས་སུ་སླེབ་པ་ཆ་ཆེན་བཞི་ཡིན་ཏེ། ཀོ་ས་ལར། ཀ་བ་བརྒྱད་ཀྱི་ཞེས་པ་ལ་སོགས་པ་ལ་སྒོ་རེ་རེའི་ཐད་ཀར་ཡང་ཀ་བ་གཉིས་གཉིས་ཏེ་མཐའ་གཅིག་ནི་རྡོ་རྗེའི་ཐིག་ལ་བརྟེན་པ། མཐའ་གཅིག་ནི་དཀྱིལ་འཁོར་གྱི་ལྟེ་བ་ལ་བརྟེན་ནོ། །དེ་ལྟར་ན་སྒོ་བཞིའི་ཐད་ཀར་ཀ་བ་བརྒྱད་དུ་འགྱུར་རོ་ཞེས་སོ། །ཀ་བ་རྣམས་ཕྱོགས་མདོག་ལ་ཁ་དོག་གཞན་རིན་པོ་ཆེས་སྤྲས་པ། ཀ་གདན་ཀ་ཞུ་ལའང་རིན་པོ་ཆེས་སྤྲས་ཤིང་ཇི་ལྟར་མཛེས་པར་བྱས་ཏེ་དེ་གཉིས་ཀྱང་ཀ་བའི་དཔངས་ལ་ཐེའོ། །ཀ་བ་འདིའི་རིགས་པས་དཀྱིལ་འཁོར་གྱི་ཐོག་དཔངས་ཀྱང་རྒྱའི་ཕྱེད་དུ་བྱས་པ་ཡིན་ནོ། །དེའི་ཕྱིར་རྩིག་པའི་དཔངས་ལ་ཆ་ཆེན་གསུམ་དང་ཆ་ཕྲན་གཅིག རིན་ཆེན་སྣམ་བུ་ལ་ཆ་ཕྲན་གཅིག དྲྭ་བ་དྲྭ་ཕྱེད་ཀྱི་ས་ལ་ཆ་ཕྲན་གཉིས་ཏེ། དེ་དང་ནང་གི་གདུང་དཔངས་མཉམ་པར་བྱའོ་ཞེས་བཞེད་པ་ཡང་ཀ་བའི་ཚད་དེ་ལྟར་ཡིན་པ་ཤིན་ཏུ་ལེགས་མོད། དེས་དཀྱིལ་འཁོར་གྱི་ལོགས་ཀྱི་དཔངས་གཞལ་བ་ཤིན་ཏུ་མི་འཐད་དེ། ཁྱེད་རང་གི་ལུགས་ལ་ཀ་བའི་སྟེང་དུ་གདུང་ཟླུམ་ཆ་ཕྲན་གཅིག་པ་དང་། ཐལ་གདུང་ཆ་ཕྲན་གཅིག་པ་གཏོང་བར་འདོད་པ་ལ་ཀ་བ་དང་དྲྭ་ཕྱེད་མན་ཆད་དཔངས་མཉམ་ན། གདུང་གཉིས་པོ་དྲྭ་ཕྱེད་ཀྱི་སྟེང་དུ་བྱུང་བས། དྲྭ་ཕྱེད་ཀྱི་སྟེང་དང་ཐོག་དཔངས་མཉམ་པོར་འདོད་པ་དང་ནང་འགལ་ལོ། །ཡང་གདུང་གཉིས་པོ་དེ་དྲྭ་ཕྱེད་མན་ཆད་ལ་ཆུད་པར་བྱས་ན་ཀ་བ་ཆ་ཆེན་ཕྱེད་དང་བཞི་པར་འགྱུར་བའི་སྐྱོན་ཡོད་དོ། །གཞན་ཡང་ཀ་གདན་དང་ཀ་ཞུ་ཀ་བའི་དཔངས་ལ་ཐེ་བ་ཤིན་ཏུ་མི་རིགས་ཏེ། དཀྱིལ་འཁོར་ཤར་ནུབ་ཀྱི་ལེ་དགུའི་ཐིག་རྣམས་ནི་ཀ་བ་ཁོ་ནའི་ཐིག་ཡིན་གྱི། གཞན་གྱི་དོན་མེད་པའི་ཕྱིར་རོ། །གསུམ་པ་ཆ་ཕྲན་ལྔར་འདོད་པ་ལྟར་ན། བླ་མ་ཁ་ཅིག་རྟ་བབས་ཀྱི་ཀ་བ་ལ་ཆ་ཕྲན་ལྔ་ཡོད་པས་བཞི་ནི་ལྷའི་ལུས་ཡིན་ལ། ཆ་ཕྲན་གཅིག་ཁྲུ་གང་ཡིན་པས་ལྷའི་སྐུ་བས་ཁྲུ་གང་གིས་མཐོ་བས་ཆོག་པའི་ཕྱིར། ཐོག་དཔངས་དེ་ཙམ་མོ་ཞེས་གསུང་པ་ནི་བདེ་མཆོག་གི་འཁོར་ལོའི་ཐོག་དཔངས་དེ་ལྟར་དུ་གསུངས་པའི་རིགས་པས་གཞལ་ཡས་ཁང་ལ་སྦྱར་བར་སྣང་མོད། སྔར་དྲངས་པའི་ལུང་རྣམས་ལས་ཀ་བའི་དཔངས་ཆ་ཆེན་བཞིར་བཤད་པས་ཀ་བ་ཐོག་འོག་ཏུ་མ་ཆུད་པའི་སྐྱོན་ཡོད་དོ། །དེས་ན་རང་ལུགས་ནི་གཞལ་ཡས་ཁང་གི་དཔངས་འདི་ལྟར་ཡིན། རྒྱུད་དང་རྒྱ་གཞུང་གཞན་རྣམས་ལས་དངོས་སུ་མི་གསལ་ཡང་། ནོར་བུ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ལས། ས་ཕྱོགས་དེར་རིན་པོ་ཆེ་སྣ་བདུན་གྱི་ཁང་པ་བརྩེགས་པ་གྲུ་བཞི་པ་ཀ་བ་བཞི་ཟུག་པ། སྒོ་བཞི་གཏོད་པ། མཉམ་པ་ཉམས་དགའ་བ། ཤིན་ཏུ་རྣམ་པར་ཕྱེ་བ། ཆེས་མཛེས་པར་བྱས་པ། བཀྲ་བ། བལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། འཕང་དུ་དཔག་ཚད་གསུམ་ཡོད་པ། རྒྱར་དཔག་ཚད་ལྔ་ཡོད་པ་ཞིག་འབྱུང་ངོ་ཞེས་གསུངས་པས་ཤར་ནུབ་ཏུ་ཆ་ཆེན་བརྒྱད། ཆ་ཕྲན་སུམ་ཅུ་སོ་གཉིས་ཡོད་པ་དེ་ཉིད་དུམ་བུ་ལྔར་བགོས་པའི་དུམ་བུ་རེ་རེ་ནི་དཔག་ཚད་རེ་རེ་བྱས་པས་འདིར་དཔག་ཚད་རེ་ལ་ཆ་ཕྲན་དྲུག་རེ་དང་། ཆ་ཕྲན་གཅིག་གི་ཆ་གཉིས་རེ་ཐོབ་སྟེ། དེ་ལྟར་ན་རྒྱར་དཔག་ཚད་ལྔ་ཞེས་པའི་དོན་ཏོ། །འཕང་དུ་དཔག་ཚད་གསུམ་ནི་གྲུ་བཞི་པའི་ཐོག་མན་ཆད་ཀྱི་དཔངས་ཡིན་པས་ཆ་ཕྲན་བཅུ་དགུ་དང་། ཆ་ཕྲན་གཅིག་གིས་ལྔ་ཆ་སྟེ། མདོར་ན་རྩིག་པའི་དཔངས་ཆ་ཆེན་བཞི། ཕ་གུ་ལ་ཆ་ཕྲན་གཅིག དྲྭ་ཕྱེད་ལ་ཆ་ཕྲན་གཉིས། གསེར་གྱི་སྐ་རགས་ལ་ཆ་ཕྲན་གཅིག་གི་ལྔ་ཆ་སྟེ། འདི་མན་ཆད་དཔག་ཚད་གསུམ་ཡིན་ལ། སྐ་རགས་དང་ནང་གི་གདུང་དཔངས་མཉམ་པའི་སྟེང་ནས་ཐོག་འབུབས་པ་ཡིན་ནོ། །དེ་ལ་རྩིག་པ་ལྔ་ནི་རྒྱ་གར་བ་ཁ་ཅིག་རྩིག་པ་ལྔ་སྟེང་ནས་སྟེང་དུ་བརྩེགས་པར་འདོད་པ་ཡོད་མོད་ཀྱི། འདིར་ནི་རྡོ་རྗེ་རྩེ་མོ་ལས། སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལས་བགྱིས་པ་སྟེ། །པདྨ་རཱ་གའི་རང་བཞིན་གཞན། །དེ་བཞིན་གཞན་དག་མརྒད་འདྲ། །དཀར་པོ་ནང་དུ་ཤེས་བྱ་སྟེ། །ཞེས་གསུངས་པ་དང་། བྲི་བྱ་ལ་ཕྱི་ནང་དུ་ཡོད་པ་ལྟར་བསྒོམ་དོན་ལ་མི་རུང་བའི་དམིགས་བསལ་མེད་པ་ལ་དགོངས་ནས་རྩིག་པ་ལྔ་ཕྱི་ནང་དུ་སྦྲག་པར་འདོད་ལ། དེ་རྣམས་ཀྱི་ཁ་དོག་ཀྱང་གུར་འགྲེལ་ལས། ཧེ་རུ་ཀ་ལ་ནི་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་སྟེ་ཞེས་གསུངས་པ་ལྟར་ཕྱི་ནས་རིམ་པ་བཞིན་དུ་ཡོད་པའོ། །རྩིག་པའི་ཞེང་ཚད་ནི་བཞི་བརྒྱ་ལྔ་བཅུ་པ་ལས། སྒོ་ཡི་ཉི་ཤུ་ཆ་རུ་ནི། །རི་མོ་མཉམ་པར་དགྱེ་བར་བྱ། །ཞེས་གསུངས་པས་ཆ་ཕྲན་གཅིག་གི་ལྔ་ཆའོ། །དེའི་འོག་ཏུ་རི་མོ་ཕན་ཚུན་ནས་གང་གི །མ་རེག་པར་ནི་བྲི་བར་བྱ། །ཞེས་བཤད་པ་ལ་ཕྱིས་ཀྱི་མཁས་པ་དག དེས་རྩིག་པའི་བར་སྟོང་སྟོན་པར་བསམས་ནས། རེ་ཁའི་སྦོམས་སུ་སྒོའི་ཉི་ཤུ་ཆ་ཡིན་ལ། རྩིག་པ་ལྔ་ཆར་བསྡོམས་པ་ལ་སྒོའི་བཞི་ཆ་གཅིག་ལས་མེད་པས་བར་སྟོང་བཞག་ས་མི་འོང་བའི་ཕྱིར་ནང་འགལ་དོགས་ཡོད་དོ་ཞེས་དགག་པ་མཛད་དོ། །དེ་ལ་སྔགས་རིམ་མཁན་པོས་རང་གིས་མ་ངེས་བཞིན་དུ་གྲུབ་ཆེན་ལ་དགག་པ་བྱེད་པ་ཤིན་ཏུ་མི་རིགས་ཏེ། བཞི་བརྒྱ་ལྔ་བཅུ་པར་བཤད་པ་དེ་ནི་རྩ་ཐིག་ཁྲུ་གང་པ་ཁོ་ནའི་དབང་དུ་མཛད་པ་སྟེ། དེ་ལ་སྒོ་བཞི་ཆ་སྟེ་ཆ་ཕྲན་གཅིག་ལ་ནས་ལྔ་དང་། ནས་གཅིག་གིས་བཞི་ཆ་ཐོབ་ལ་རྩིག་པ་རེ་རེའི་ཞིང་གི་ཕར་མཐའ་དང་ཚུར་མཐའི་བར་ལ་ནས་རེ་བྱེད་པ་ཡིན་གྱི། རྩིག་པ་རེ་རེའི་བར་ན་ནས་རེ་ཡོད་པར་འདོད་པ་མ་ཡིན་ནོ། །ལྷག་མ་ནས་གཅིག་གི་བཞི་ཆའི་ཚད་ཡོད་མོད། དེ་བཏང་སྙོམས་སུ་བཞག་ནས་རགས་རྩིས་མཛད་པའོ་ཞེས་ལུགས་སྔ་མ་དག་བཀག་ནས་རང་ལུགས་འཇོག་པ་མཛད་དོ། །དེ་ལ་ལུགས་སྔ་མ་ཡང་མི་འཐད་དེ། རི་མོ་ཕན་ཚུན་ནས་གང་གི་ཞེས་པའི་གཞུང་གི་དོན་རྩིག་པའི་ཞེང་ཚད་དང་བར་སྟོང་གང་ཡང་སྟོན་པ་མ་ཡིན་པས་ནང་འགལ་འོང་བའི་དོན་མེད་པའི་ཕྱིར་ཏེ། ཞེང་ཚད་སྒོའི་ཉི་ཤུ་ཆར་གཞུང་གོང་མས་བཤད་ཟིན་པའི་ཕྱིར་ལུགས་ཕྱི་མ་ཡང་མི་འཐད་དེ། གཞུང་གི་དོན་མ་ཡིན་པའི་སྐྱོན་སྔ་མ་སོ་ན་གནས་ཤིང་། འདི་རྩ་ཐིག་ཁྲུ་གང་པ་ཁོ་ནའི་དབང་དུ་བྱས་པ་ཡིན་ན། རྩ་རྒྱུད་ལེའུ་བཅུ་པར། རྩ་ཐིག་ཁྲུ་གསུམ་དང་། མཐེ་བོང་གསུམ་དུ་གསུངས་པའི་སྐབས་སུ་ཡང་། འོག་ཏུ་ནས་གང་ཙམ་གྱི་ཚད། །དེ་ལས་དཀྱིལ་འཁོར་བྲི་བར་བྱ། །ཞེས་པ་ཡང་རྩ་ཐིག་ཁྲུ་གང་པ་ཁོ་ནའི་དབང་དུ་བྱས་པར་ཐལ་བའི་ཕྱིར་རོ། །དེས་ན་གཞུང་འདིའི་འོག་ཏུ་ཞེས་པའི་ཚིག་གིས་བྲི་བྱའི་སྐབས་སུ་རྩིག་པའི་དཔངས་ཚད་སྟོན་པར་གྲུབ་ཅིང་། བཞི་བརྒྱ་ལྔ་བཅུ་པའི་གཞུང་དེ་དག་ཀྱང་བྲི་བྱའི་སྐབས་ཡིན་པས། གཞུང་སྔ་མས་ཞེང་ཚད་དང་། ཕྱི་མས་དཔངས་ཚད་སྟོན་ལ། དྷ་རི་ཀ་པས། ནས་གང་གིས་ནི་མ་འདྲེས་པས། །རི་མོ་ཀུན་ཏུ་བྲི་བར་བྱ། །ཞེས་པ་ཡང་ཚུལ་དེ་ལྟར་རོ། །འདིར་བསྒོམ་བྱའི་སྐབས་སུ་དཔངས་ནི་སྔར་བཤད་པ་ལྟར་ཡིན་ལ། དེ་ལྟ་བུའི་རྩིག་པ་ལྔ་ཆར་སྒོའི་བུག་པའི་ཐད་མ་གཏོགས་པར་ཟུར་ནས་ཟུར་གྱི་བར་ཏལ་པོར་འགྲོ་ལ། སྒོའི་བུག་པའི་ཐད་ནི་སྒོ་ལོགས་ཀྱི་བར་འགྲོ་སྟེ། སྒོ་ལོགས་ཀྱི་མཐའ་ལ་རིང་ཐུང་དགོས་མི་དགོས་ནི་འོག་ཏུ་འཆད་དོ། །གཉིས་པ་ཕ་གུ་ནི། སློབ་དཔོན་ཤྲདྡྷས། འགྲམ་རྒྱབ་རིན་ཆེན་ཕ་གུ་སྟེ། །ཆ་ཆུང་གཅིག་གི་ཚད་དུ་བྱ། །ཞེས་གསུངས་པས། དཔངས་སུ་ཆ་ཆུང་གཅིག་ཡིན་ལ། རྒྱར་ནི་རྩིག་པ་ལས་ཆ་ཆུང་ཕྱེད་ཀྱི་འཕྱར་དུ་ཡོད་པར་ཡོ་ག་པའི་བླ་མ་རྣམས་བཞེད་དོ། །ཁ་དོག་ནི་ཨ་བྷ་ཡས། རྩིག་པ་ལྔ་ཕྱི་ནང་སྦྲག་པར་འདོད་པའི་ལུགས་ལ་ཁ་དོག་དམར་པོ་དང་། རྩེག་པར་འདོད་པའི་ལུགས་ལ་རྩིག་པ་དང་པོའི་ཁ་དོག་ཏུ་འདོད་ཀྱང་། ཤྲདྡྷ་ནས་བརྒྱུད་པའི་མན་ངག་ལས་གཞི་སེར་པོར་བཤད་པས། གསེར་གྱི་རང་བཞིན་ཟུར་གསུམ་དང་། གྲུ་བཞི་དང་། ཟླུམ་པོའི་དབྱིབས་ཀྱིས་རིན་པོ་ཆེའི་ཕྲས་སྤྲས་པའོ། །གསུམ་པ་དྲྭ་ཕྱེད་ནི། ཕ་གུའི་སྟེང་དུ་ཆ་ཕྲན་གཉིས་ཀྱི་གཞི་ནག་པོར་བཤད་པ་ནི་བར་སྟོང་གི་དོན་ཡིན་པས་སྟོང་པའི་རང་བཞིན་ལ་བར་སྐབས་སུ་རིན་པོ་ཆེའི་བྲེ་ཕུལ་བཞི། སྟེང་འོག་ཏུ་བརྩེགས་པ་རེ་རེའི་དཔངས་ལ་ཆ་ཕྲན་ཕྱེད་ཡོད་ཅིང་། རྒྱར་ནི་བྲེ་ཕུལ་འོག་མ་ལ་ཆ་ཕྲན་གཅིག གོང་མ་རྣམས་ཆ་ཕྲན་ཕྱེད་ཕྱེད་ཀྱིས་རྒྱ་ཆེ་བར་གྱུར་པའོ། །དེའི་སྟེང་དུ་གསེར་གྱི་སྐ་རགས་ནི་དོན་གསེར་གྱི་གདུང་ལེབ་སྟེ། དཔངས་སུ་ཐིག་སྐུད་གང་ལས་མེད་པས་ཆ་ཕྲན་གཅིག་གི་ལྔ་ཆ་ཡིན་ལ། རྒྱར་བྲེ་ཕུལ་གོང་མ་དང་མཉམ་པའོ། །དེའི་ཕྱི་ངོས་སུ་ཆུ་སྲིན་མ་ཀ་རའི་ཁ་ནས་བྱུང་བའི་དྲྭ་བ་དང་དྲྭ་བ་ཕྱེད་པ་འཕྱང་བ་སྟེ། དེ་ལ་སློབ་དཔོན་ཤཱཀྱ་བཤེས་གཉེན་གྱིས་དྲྭ་བ་ནི་མུ་ཏིག་གི་ཆུན་འཕྱང་སྟེ། མཆོག་དབུས་ན་ཡོད་པའོ། །དྲྭ་བ་ཕྱེད་པ་ནི་མཆོག་མཐའ་ན་ཡོད་པའོ་ཞེས་དང་། སློབ་དཔོན་དཔལ་འབྲས་རྡོ་རྗེས། མུ་ཏིག་གི་ཆུན་འཕྱང་དབུས་ན་ནོར་བུས་མཛེས་པ་ལ་ནི་དྲྭ་བ་ཞེས་བྱ་ལ། དབུས་ན་རྒྱན་མེད་པ་ལ་ནི་དྲྭ་བ་ཕྱེད་པ་ཞེས་བྱའོ་ཞེས་གསུངས་པ་ལྟར་རོ། །བཞི་པ་མདའ་ཡབ་ནི། གསེར་གྱི་སྐ་རགས་དང་། ནང་གི་གདུང་མཉམ་པོར་བྱས་པའི་སྟེང་ནས་ཐོག་ཕུབ་པའི་བྱ་འདབ་འོག་གི་འདོད་སྣམ་དང་ཐད་མཉམ་པོར་ཡོད་པའི་མཐའ་སྐོར་ལ་རིན་པོ་ཆེའི་མདའ་ཡབ་ཐུར་དུ་འཕྱང་བ་སྟེ། འདི་ལ་རྣམ་པ་འདི་ལྟར་ཡིན། གཞུང་རྣམས་ནས་བཤད་པ་མི་སྣང་ཡང་བླ་མ་གོང་མ་རྣམས་ཀྱི་མཐོང་བ་བརྒྱུད་པའི་ཕྱག་བཞེས་ཀྱིས་མཆུ་མེད་པའི་སྤྱི་བླུགས་མགོ་མཇུག་བཟློག་པ་ལྟ་བུའམ། རུས་རྒྱན་རྙིང་པའི་ཟ་ར་ཚགས་ཀྱི་སྣེ་མོའི་རྣམ་པ་ཅན་དུ་བཞེད་དེ། རྒྱ་གར་དང་བལ་པོར་བྲིས་པའི་ཐང་སྐུ་རྙིང་པ་རྣམས་ལ་བྲིས་པ་དང་མཐུན་པར་སྣང་ངོ་ཞེས་བླ་མ་དག་གསུང་ངོ་། །ལྔ་པ་པུ་ཤུ་ནི་མདའ་ཡབ་ཀྱི་སྟེང་གི་ཐད་དུ་གྱེན་དུ་འགྲེང་བའི་ཚུལ་གྱིས་གནས་པ་སྟེ། དབྱིབས་ནི་རྗེ་བཙུན་དང་འཕགས་པས་རིན་པོ་ཆེའི་དྲྭ་མིག་སེང་མའི་པུ་ཤུ་ཞེས་གསུངས་ཏེ། པུ་ཤུའི་རྣམ་པ་ཆ་ཕྲན་གཉིས་པ་ཁོར་ཡུག་ཏུ་ཡོད་པ་ལ། དྲྭ་མིག་གི་ནང་དུ་རིན་པོ་ཆེ་མིག་གསུམ་པ་ཡོད་པའོ། །འདིར་ཨ་བྷ་ཡས་འོག་ཏུ་འཕྱང་བ་ལ་ཤར་བུ་དང་། སྟེང་དུ་བརྩེགས་པ་ལ་མདའ་ཡབ་ཀྱི་ཐ་སྙད་མཛད་ཅིང་དབྱིབས་ཀྱང་པདྨ་འདབ་མ་ཕྱེད་པའི་དབྱིབས་ཅན་དུ་བཞེད་དོ། །སྟེང་ཐོག་ཀ་བ་ཤིང་རྩེག་དང་། །གདུང་དང་ཐོག་ཕུབ་རིམ་པ་གསུམ། །དང་པོ་ཀ་བ་ནི་སྣ་ཚོགས་རྡོ་རྗེའི་ལྟེ་བའི་སྟེང་དུ་ལྷ་སྣམ་ཕྱོགས་ཀྱི་མདོག་ཅན། རྒྱར་སྒོའི་ནང་ནས་ཁོར་ཡུག་ཏུ་ཆ་ཆེན་རེ་རེ་དང་། དཔངས་སུ་ཆ་ཕྲན་གཅིག་པ། དབུས་སུ་རྒྱར་ཆ་ཆེན་དྲུག་པ་དང་། དཔངས་སུ་ཆ་ཕྲན་གཉིས་པ་སྟེ། དེ་ལྟ་བུའི་ལྷ་སྣམ་ཆ་ཕྲན་གཅིག་པའི་སྟེང་དུ་ཚངས་ཐིག་ནས་ཆ་ཕྲན་ལྔ་དོར་བའི་མཐའ་རྣམས་སུ་ཀ་བ་ཕྱོགས་མདོག་ཅན་གཉིས་གཉིས་ཏེ་དཔངས་སུ་ཆ་ཕྲན་བཅུ་དྲུག་ཡོད་པ་འཛུགས་སོ། །རྩིག་པའི་ནང་ནས་ཇི་ཙམ་དོར་བའི་སར་འཛུགས་སྙམ་ན། དེའི་སྟེང་གི་གདུང་ཟླུམ་ཕྱོགས་བཞིའི་སྒོའི་ཐད་ཀྱི་རྩིག་པ་ལ་མ་རེག་པར་དགོས་པས་དེ་དང་ཀ་བ་ཕྲད་པའི་ས་ནི་ཐིག་གི་རིགས་པས་ནང་ངོས་ཆ་ཕྲན་གཅིག་དང་། ཕྱི་ངོས་ཆ་ཕྲན་གཅིག་དང་བཞི་ཆ་གཅིག་ཙམ་དོར་བའི་སར་འཛུགས་པར་གྲུབ་བོ། །ཤིང་རྩེག་ནི་ཀ་བ་དེ་དག་གི་སྟེང་དུ་གདུང་ཟླུམ་གྱི་འགྲོས་དང་འདྲ་བའི་ཆ་ཕྲན་གཅིག་དང་། ཆ་ཕྲན་གཅིག་གི་ལྔ་ཆའི་དཔངས་ལ་ཞུ་རིང་ཐུང་གི་རྣམ་པ་ཇི་ལྟར་མཛེས་པར་བྱས་པའོ། །གདུང་ནི་དེ་དག་གི་སྟེང་དུ་རྡོ་རྗེའི་གདུང་དཔངས་སུ་ཆ་ཕྲན་གཅིག་པ་ཟླུམ་པོར་བསྐོར་བའོ། །གདུང་ལ་རྡོ་རྗེས་མཚན་ཞིང་ཀ་བ་རྣམས་ལ་ནི་ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པའོ། །ཐོག་ཕུབ་རིམ་པ་གསུམ་ནི་གདུང་ཟླུམ་དེ་དང་། ཕྱིའི་གསེར་གྱི་སྐ་རགས་མཉམ་པོར་ཡོད་པའི་སྟེང་དུ་ཅམ་བཏང་སྟེ། ཕྱི་གྲུ་བཞི་དང་ནང་ཟླུམ་པོའི་ཚུལ་གྱིས་ཕུབ་པ་ནི་ཐོག་ཕུབ་འོག་མའོ། །གདུང་ཟླུམ་གྱི་སྟེང་དུ་རྩིག་པ་ཟླུམ་པོ་ཟུར་ཐིག་གིས་བཅད་པའི་ཕྱོགས་ཀྱི་མདོག་ཅན་དཔངས་སུ་ཆ་ཕྲན་གསུམ་ལ། ལྔ་ཆ་གཅིག་གིས་མཆོག་པ་དེའི་སྟེང་དུ་ཕ་གུ་དང་། ཤིང་རྩེག་དང་གསེར་གྱི་གདུང་ལེབ་རྣམས་ཟླུམ་པོ། དཔངས་སུ་ཆ་ཕྲན་གསུམ་ཡོད་པའི་སྟེང་དུ་རྡོ་རྗེའི་གདུང་མིག་མངས་རིས་སུ་བྲེས་པ་དཔངས་སུ་ཆ་ཕྲན་གཅིག་ཡོད་པ་བཀོད་ཅིང་རེ་མིག་བརྒྱད་ཕྱིའི་བྱ་འདབ་དང་བཅས་པ་ཟླུམ་པོར་ཕུབ་ཅིང་། མདའ་ཡབ་དང་། པུ་ཤུ་དང་། འོག་གི་གསེར་གྱི་སྐ་རགས་ལ་དྲྭ་ཕྱེད་ཟླུམ་པོར་བསྐོར་བ་ནི་ཐོག་ཕུབ་གཉིས་པའོ། །རེ་མིག་དབུས་མའི་གདུང་གི་སྟེང་དུ་གཙོ་བོའི་ཁ་དོག་དང་མཐུན་པའི་རྩིག་པ་ཆ་ཕྲན་གསུམ། དེའི་སྟེང་དུ་ཕ་གུ་དང་། ཤིང་རྩེག་དང་། གསེར་གྱི་གདུང་ལེབ་རྣམས་ལ་ཆ་ཕྲན་གསུམ་ཡོད་པའི་སྟེང་ཐོག་མཉམ་པོར་ཕུབ་ཅིང་། བྱ་འདབ་ལ་མདའ་ཡབ་དང་། པུ་ཤུ་དང་། གསེར་གྱི་སྐ་རགས་ལ་འཕྱང་བའི་དྲྭ་ཕྱེད་རྣམས་ཀྱང་གྲུ་བཞིར་བྱས་པའི་སྟེང་དུ་རྡོ་རྗེ་ནོར་བུ་རིན་པོ་ཆེའི་ཏོག་ཆ་ཆེན་གཅིག་པས་སྤྲས་པ་ནི་ཐོག་ཕུབ་གསུམ་པའོ། །དེ་ལྟར་ན་སྣ་ཚོགས་རྡོ་རྗེའི་ལྟེ་བ་ནས་ཐོག་ཕུབས་གོང་མའི་བར་ཆ་ཆེན་བརྒྱད་དང་། རྩིག་པའི་ནང་མཐའ་ནས་ནང་མཐའི་བར་ཆ་ཆེན་བརྒྱད་ཡོད་པ་མཉམ་པ་ནི་ལུས་ཡར་མར་དང་། ཕན་ཚུན་འདོམ་གང་དུ་མཉམ་པ་མཚོན་པའི་དོན་ཡིན་ལ། ཐོག་ཕུབས་ཀྱི་རིམ་པ་འདི་ནི་སློབ་དཔོན་རིགས་ཀྱི་སྦྱིན་པས། ཀ་བའི་སྟེང་དུ་གདུང་འཛིན་བཀོད་ནས། དེའི་སྟེང་དུ་དགོད་པར་བྱའོ། །གདུང་གི་སྟེང་དུ་གདུང་དང་མཉམ་པའི་རྩིག་པའི་སྟེང་དུ་ཀླུའི་སྟོབས་སམ། ཡང་ན་དོ་ཤལ་གྱི་སྣམ་བུའོ། །དེའི་སྟེང་དུ་སེང་གེ་རྣམས་ཀྱི་ཁ་ནས་བྱས་པའོ། །དེའི་སྟེང་དུ་རྗེས་སུ་འགུགས་པ་རྣམས་སོ། །དེའི་སྟེང་དུ་སོ་ཕག་རྣམས་ཀྱིས་བྱས་པའི་གཞིའོ། །དེའི་སྟེང་དུ་མགྲིན་པའོ་ཞེས་གསུངས་པའི་དོན་ཡིན་པར་མངོན་ཏེ་ཀ་བ་ནི་དཀྱིལ་འཁོར་གྱི་ནང་གི་ཀ་བ་བརྒྱད་དོ། །གདུང་འཛིན་པ་ཞེས་པ་ནི་ཀ་ཞུ་ལ་སོགས་པའི་ཤིང་རྩེག་གོ །དེའི་སྟེང་གི་གདུང་ནི་གདུང་ཟླུམ་པོ་གདུང་སྟེང་གི་རྩིག་པ་ནི་རྩིག་པ་ཟླུམ་པོའོ། །ཀླུའི་སྟོབས་ནི་ཕ་གུའོ། །དེའི་སྟེང་དུ་སེང་གེ་རྣམས་ཀྱི་ཁ་ནས་བྱས་པ་ནི་སེང་གེའི་ཁ་ནས་དྲྭ་ཕྱེད་བྱུང་བ་སྟེ། སྔར་གྱི་ཆུ་སྲིན་གྱི་ཁ་ནས་བྱུང་བར་བཤད་པ་དང་དོན་འདྲའོ། །དེའི་སྟེང་དུ་རྗེས་སུ་འགུགས་པ་ནི་གཅིག་རྗེས་སུ་གཅིག་བཀབ་པ་སྟེ་དོན་ཐལ་གདུང་བཞིའོ། །དེའི་སྟེང་དུ་སོ་ཕག་གིས་བྱས་པའི་གཞི་ནི་སྟེང་ཐོག་གོ །དེའི་སྟེང་དུ་མགྲིན་པའོ་ཞེས་པ་ནི་རེ་མིག་དབུས་མའི་སྟེང་གི་ཁང་བརྩེགས་བསྟན་པས་སོ། །གཞན་ཡང་དརྤན་གྱིས། ཕྱི་དབྱིབས་མཆོད་རྟེན་གུར་ཐབས་དང་། །རྒྱལ་ཁབ་རི་བོའི་གུར་དུ་འདོད། །ཅེས་བཞི་གསུངས་པའི་དང་པོ་མཆོད་རྟེན་གྱི་རྣམ་པའང་འདི་ལ་ཚང་ཞིང་། ཡེ་ཤེས་ཞབས་ལུགས་སོགས་གཞུང་ཁུངས་ཐུབ་དུ་མ་ལས། གཞལ་ཡས་ཁང་ལ་ཁང་པ་བརྩེགས་པ་ཞེས་པའི་ཐ་སྙད་གསུངས་པས། ཐོག་ཕུབ་ཀྱི་རིམ་པ་འདི་ལས་འོས་མེད་དོ། །བཞི་པ་སྒོ་ནི་རྒྱུད་གཞུང་དུ་མ་ལས། སྒོ་ནི་འཁོར་ལོའི་བརྒྱད་ཆ་སྟེ། །ཞེས་དང་། ཐིག་རྩ་ལས་ཀྱང་། དབུས་སུ་བརྒྱད་ཆ་ཕྱིས་ལ་སྒོ། །ཞེས་བཤད་པས་རྩ་བའི་སྒོའི་རྒྱར་ཆ་ཆེན་གཅིག་པ་ཡིན་ལ། དཔངས་སུ་སྔགས་ཀྱི་རྒྱུད་འགྲེལ་རྣམས་ལས་གསལ་བར་བཤད་པ་ཉུང་ཡང་། སློབ་དཔོན་དརྤན་གྱིས། འགལ་བ་མེད་པས་ལྷ་ཡི་ཕྱིར། །རིང་བའི་སྒོ་ནི་བཤད་པ་ཡིན། །ཤིན་ཏུ་ཆུང་ནའང་མི་འགལ་བས། །མཆོད་བྱ་རྣམས་ཀྱང་བསྟན་པ་སྟེ། །ཞེས་གསུངས་པ་ལྟར་ཡིན་ལ། དེ་ལ་སྒོ་ཆེ་བ་ནི་གཞུང་དེར་མ་ཐེམ་གྱི་ས་ནི་གདུང་གི་མཐར་ཐུག་པའི་ཚད་གང་ཡིན་པ་སྟེ། དེ་བཞིན་དུ་རྩེ་མོའི་མཐར་ཐུག་པའི་རིངས་སུ་ནི་ཆ་གསུམ་གྱི་ཚད་དུ་འགྱུར་ཞིང་། ཆ་རེ་རེ་ནི་ཆ་ཆེན་པོའོ་ཞེས་སྒོའི་དཔངས་སྒོ་ཚད་གསུམ་དུ་གསུངས་སོ། །སྒོ་ཆུང་བ་ཡང་། དརྤན་གྱིས་ཁང་བཟངས་ཀྱི་བརྒྱད་དང་བཅུའི་ཆ་ཤས་ཀྱི་ཞེང་ནི་སྒོའི་དབུས་ཀྱི་ཆ་ལ་སྟེ་དེའི་ཚད་ཀྱི་ཡལ་འདབ་དང་། དེའི་ཉིས་འགྱུར་ནི་སྒོའི་དཔངས་སུ་བསྟན་ཅིང་སྒོ་ཁྱུད་དང་། དཔུང་པ་དང་། རེ་བཞི་རྣམས་ནི་དེའི་ཆ་ལྔ་པར་བཤད་དོ། །ཞེས་སྒོ་དཔངས་ཆེ་ཆུང་གཉིས་སུ་གསལ་བར་བཤད་ལ་འདི་སྒོ་ཆུང་ངུའི་ལུགས་ཡིན་པའང་དེ་ཉིད་ལས། འདེགས་པའི་དཔངས་ནི་རྣམ་ཟུང་ལ། །འདེགས་པའི་རྒྱ་ཡི་ཚད་ཡིན་ཏེ། །ཆ་གཉིས་སླར་ཡང་སྟེང་དུ་ནི། །ཆུང་བར་བཟོ་བོ་ཡང་དག་འདོད། །ཅེས་གསུངས་པའི་ཕྱིར་རོ། །དེས་ན་ལུགས་འདི་གཉིས་ཀ་ཡང་ཁས་བླང་དགོས་ཏེ། རྟ་བབས་དཔངས་སུ་སྒོ་ཚད་གསུམ་མ་ལྟར་ན་སྒོ་ཆེ་བ་དང་། སྒོ་ཚད་གཅིག་མ་ལྟར་ན་སྒོ་ཆུང་བ་འདོད་དགོས་པའི་ཕྱིར་རོ། །དེ་ལྟ་བུའི་རྩ་བའི་སྒོའི་ཕྱི་རོལ་མདུན་དུ་སྒོ་ཚད་གཅིག་ཡོད་པའི་ས་ནི་སྒོ་ཁྱུད་དེ། འདིའི་མཐར་སྒོ་གླེགས་གཞུག་གོ །བུ་སྟོན་གྱིས་དེ་ཉིད་བསྡུས་པ་དང་། དཔལ་མཆོག་དང་། ཀོ་ས་ལའི་རྒྱན་དང་། གཙུག་དགུ་རྣམས་སུ་སྒོའི་དབུས་སུ་སྒོ་སྲུང་འགོད་པར་གསུངས་པ་ཤེས་བྱེད་དུ་བྱས་ནས་རྩ་བའི་སྒོ་ལའང་སྒོ་གླེགས་གཞུག་སྟེ། སྒོ་གླེགས་གཉིས་ཀྱི་དབུས་སུ་སྒོ་སྲུང་བཞུགས་པ་ལུང་དེ་དག་གི་དོན་དུ་བཞེད་ཅིང་། རྗེ་བླ་མ་ཡང་སྐུ་ཚེའི་སྟོད་ཀྱི་བཞེད་པ་འདི་ལ་མཛད་དོ། །ཕྱིས་རྟིང་དེ་ལྟར་ན་སྒོ་ཕྱི་ནས་འབྱེད་ན་ཕྱི་མས་དང་། ནང་ནས་འབྱེད་ན་ནང་མས་ཆ་ཕྲན་ཕྱེད་དང་གསུམ་གྱི་བར་གཅོད་པས་དབུས་སུ་སྒོ་སྲུང་བཞུགས་ས་མི་འོང་བར་གཟིགས་ནས་སྒོ་གླེགས་ཕྱི་མ་ཁོ་ན་བཞེད་དོ། །དེས་ན་རྩ་བའི་སྒོ་ལ་རྒྱ་དཔངས་གཉིས་ཅར་དུ་རྩིག་པ་ལྔའི་བཅད་འཕྲོ་མ་གཏོགས། རེ་བཞི་ཡང་མི་དགོས་ཤིང་འོག་གཞི་ཡང་བྲི་བྱ་ལ་ཡོད་པ་ལྟར་ལྷ་སྣམ་དེ་ཉིད་ཏལ་པོར་འགྲོ་བས། མ་ཐེམ་ཡང་མི་དགོས་པའི་ཕྱིར་ན། རྩ་བའི་སྒོའི་དབུས་སུ་སྒོ་སྲུང་འགོད་པ་ནི་ལུང་དེ་དག་གི་དོན་ཏོ། །དེས་ན་སློབ་དཔོན་ཀུན་སྙིང་གིས། །སྒོ་ནི་འཁོར་ལོའི་བརྒྱད་ཆ་སྟེ། །སྒོ་ཁྱུད་ཀྱང་ནི་སྒོ་ཡི་ཚད། །ཅེས་དང་། གྲུབ་ཆེན་ཀླུ་བྱང་གིས་ཀྱང་དེ་བཞིན་དུ་གསུངས་ལ། དེ་ཉིད་སྣང་ཆེན་དུ། སྒོ་ཁྱུད་ནི་སྒོའི་ཚད་དོ། །ཁ་ཁྱེར་ནི་སྒོའི་ཕྱེད་ཀྱི་ཚད་དོ། །སྒོ་འགྲམ་ནི་ཁ་ཁྱེར་གྱི་ཚད་དོ། །ཞེས་གསུངས་པས་སྒོ། སྒོ་ཁྱུད། སྒོ་འགྲམ། སྒོ་ལོགས་བཞི་ཀ་མཉམ་པ་དང་། སྒོ་དང་མི་མཉམ་གཞན་གསུམ་མཉམ་པ་དང་། སྒོ་དང་སྒོ་ཁྱུད་མཉམ། སྒོ་འགྲམ་དང་སྒོ་ལོགས་མཉམ་པའི་ལུགས་གསུམ་ལས་འདིར་ཕྱི་མའི་དབང་དུ་བྱས་པ་སྟེ། སྒོ་དང་སྒོ་ཁྱུད་ཀྱི་ནང་མཉམ་པས་ཆ་ཕྲན་བཞི་བཞི་སྒོ་འགྲམ་དང་སྒོ་ལོགས་ཀྱི་ནང་མཉམ་པས་ཆ་ཕྲན་གཉིས་གཉིས་ཏེ། སྒོ་ལོགས་ཀྱི་ཕྱི་ལ་ནི་ཆ་ཕྲན་བཞི་ཡོད་པའོ། །སྒོ་ཁང་གི་རྩིག་པའི་དཔངས་ནི་རྟ་བབས་སྒོ་གདོང་ལ་སྦྱར་བ་ལྟར་ན། ཆ་ཕྲན་དགུ་དགོས་ཤིང་། རྟ་བབས་ཀྱི་སྟེང་འགེབས་པ་ལྟར་ན། རྩ་བའི་སྒོ་དང་མཉམ་པར་ཆ་ཕྲན་བརྒྱད་དོ། །ལྔ་པ་རྟ་བབས་ནི། ཨ་བྷ་ཡས། གཉིས་མཉམ་དགུ་མཉམ་དང་། ལྔ་མཉམ་གསུམ་གསུམ་མཉམ་སྟེ། སྒོ་ཚད་གསུམ་མའི་ལུགས་གཉིས་དང་། སྒོ་ཚད་གཅིག་མ་ལ་ལྔ་མཉམ་གསུམ་གསུམ་མཉམ་གཅིག་སྟེ། དཀྱིལ་འཁོར་སྤྱི་འགྲོའི་རྟ་བབས་མི་འདྲ་བ་གསུམ་བཤད་པ་དང་། རབ་ཏུ་སྒྲོན་གསལ་ལས། རྟ་བབས་ཀྱི་དཔངས་སྒོ་ཚད་གཉིས་མར་བཤད་ཀྱང་། སྣམ་བུ་སོགས་འདི་ལྟར་བྱེད་ཀྱི། གསལ་ཁ་མི་སྣང་བ་ནི་སློབ་དཔོན་གཞན་གྱི་ལུགས་ཡིན་ལ། གཞན་རྒྱ་གར་བའི་གཞུང་ཕལ་མོ་ཆེ་ནས་རྟ་བབས་སྒོ་ཚད་གཅིག་མར་གསུངས་པ་མང་ཞིང་། རྗེ་བཙུན་ས་སྐྱ་པ་ཡབ་སྲས་ཀྱི་བཞེད་པའང་འདི་ཁོ་ན་བཞིན་ཡིན་པས་དེ་བཤད་ན་སློབ་དཔོན་ཤྲདྡྷ་ཀ་ར་ཝརྨས། རྟ་བབས་ཡ་ཕུབ་དག་ལ་ནི། །ཆ་གཅིག་དོར་བར་ཆ་ཆེན་ཚད། །ཆུར་ནི་ཆ་ཆེན་བཞི་པ་སྟེ། །སྐས་ལ་སོགས་པ་ཇི་བཞིན་འགྱུར། །རྟ་བབས་ཆ་གཅིག་པདྨར་གནས། །ཆོས་ཀྱི་འཁོར་ལོ་ཆ་གཉིས་པ། །ཆུ་དང་ཞེང་མཉམ་གདུགས་ཀྱི་ཚད། །ཆ་གཅིག་པ་ལ་ཡུ་བ་ཕྱེད། །འཁོར་ལོའི་ངོས་གཉིས་ཐད་ཀར་ནི། །རི་དྭགས་གཉིས་ནི་མཉམ་གནས་པར། །རྟ་བབས་ལ་བརྟན་འཁོར་ལོ་ཕྱོགས། །ཤིན་ཏུ་འབྱར་མིན་རྒྱང་རིང་མིན། །རྡོ་རྗེ་རིན་ཆེན་ཡུ་བ་ཅན། །དེ་ཚད་རི་དྭགས་ཀྱི་རྒྱབ་ཏུ། །ཆ་ཆུང་གཅིག་དོར་ཐིག་ལ་བརྟེན། །རྡོ་རྗེ་རིན་ཆེན་ཡུ་བ་ཕྱེད། །བ་དན་དྲིལ་བུར་ལྡན་པ་ཡི། །མཛེས་པ་རྟ་བབས་ཡིན་པར་འདོད། །ཅེས་གསུངས་པས། སྒོའི་སྟེང་ནས་ཆ་ཕྲན་གཅིག་དོར་བའི་སྟེང་དུ། རྟ་བབས་དཔངས་སུ་ཆ་ཆེན་གཅིག་པ། རྒྱར་སྣམ་བུ་འོག་མའི་མཐའ་ནས་མཐའི་བར་ལ་སྒོ་ཚད་བཞི་ཡོད་ལ། སྣམ་བུ་གོང་མ་གསུམ་འོག་མ་ལས་གཡས་གཡོན་གཉིས་ནས་ཆ་ཕྲན་རེ་རེ་ཐུར་དུ་སོང་བ་སྟེ། སྣམ་བུ་སྟེང་མ་ལ་ཆ་ཕྲན་བཅུ་ཡོད་པ་དེའི་སྟེང་དུ་ཆོས་འཁོར་གྱི་གདན་གྱི་པདྨ། དཔངས་ཆ་ཆུང་གཅིག རྒྱར་ཆོས་འཁོར་དང་མཉམ་པ། དེའི་སྟེང་དུ་ཆོས་འཁོར་རྩིབས་བརྒྱད་པའམ། བཅུ་གཉིས་པ། ཆུ་ཞེང་དུ་ཆ་ཆུང་གཉིས་ཡོད་པ། དེའི་སྟེང་དུ་གདུགས་ཆ་ཆུང་གཅིག་གི་ཚད་ལ་ཕྱེད་གདུགས་ངོ་བོ་དང་། ཕྱེད་ཡུ་བ་ལ་ཡོད་པ། ཆོས་འཁོར་གྱི་གཡས་གཡོན་གཉིས་སུ་རི་དྭགས་ཀྲྀཥྞ་སཱ་ར་གཉིས་ཆོས་འཁོར་ལ་ཁ་བལྟས་ཤིང་། ཤིན་ཏུ་འབྱར་མིན་རྒྱང་རིང་མིན། །ཞེས་པའི་དོན་རི་དྭགས་དང་། ཆོས་འཁོར་གྱི་བར་ན་ཆ་ཆུང་རེ་རེ་གནས་པ་ལ་འགྲེལ་པས་བཤད་དོ། །རི་དྭགས་ཀྱི་དཔངས་ཀྱི་ཚད་ནི་ཆ་ཕྲན་གཉིས་ཡིན་ལ། དེ་ནས་ཆ་ཕྲན་གཅིག་དོར་བར་བ་དན་དྲིལ་བུ་དང་བཅས་པ་ཡུ་བ་ལ་ཆ་ཕྲན་གཅིག་སྟེང་ཆ་ཕྲན་གཅིག་ལ་ཕྱེད་རྡོ་རྗེ། ཕྱེད་རིན་པོ་ཆེར་བྱས་པ་ལ་བ་དན་དང་དྲིལ་བུ་སྣ་ཚོགས་པ་བཏགས་པས་མཛེས་པར་བྱས་པའོ། །རྡོ་རྗེ་མཁའ་འགྲོ་ལས། སྒོ་ལས་སུམ་འགྱུར་རྟ་བབས་ཏེ། །ཞེས་བཤད་པ་ནི་སློབ་དཔོན་འདི་དང་། སློབ་དཔོན་ལ་ཝ་པ་ལྟར་ན། ཀ་བའི་ནང་མཐའ་ནས་ནང་མཐའི་བར་ལ་རྟ་བབས་ཀྱི་ཚད་དུ་བྱས་ནས་དེ་ལ་སྒོ་ལས་སུམ་འགྱུར་དུ་ཡོད་པར་དགོངས་པ་ལ་བཞེད་དོ། །འདི་དག་ནི་བྲི་བྱའི་དབང་དུ་བྱས་པ་ཡིན་ལ། བློས་བསླངས་ན་སྒོ་འགྲམ་གྱི་ཕྱི་མཐའ་དང་། སྒོ་ལོགས་ཀྱི་ཕྱི་མཐའ་གཉིས་སུ་རྟ་བབས་ཀྱི་ཀ་བ་དཔངས་ཆ་ཕྲན་ལྔ་པ། ཀ་རྒྱན་དང་བཅས་པ་བཞི་བཞི་བཙུགས་ལ། དེའི་སྟེང་དུ་སྒོ་འགྲམ་གྱི་ཕྱི་ནས་སྒོ་ལོགས་ཀྱི་བར་མདུན་དུ་འོངས་ཤིང་། དེ་ནས་སྒོ་ལོགས་ཅིག་ཤོས་ཀྱི་བར་ངོས་སུ་སོང་བ། དེ་ནས་སྒོ་འགྲམ་ཅིག་ཤོས་ཀྱི་བར་རྒྱབ་ཏུ་སོང་བར་གྱུར་པའི་བར་རྡོ་རྗེའི་གདུང་དགོད་དེ། རིན་ཆེན་འབར་བར། ཡ་ཕུབ་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །བརྒྱད་པ་པདྨ་འཁོར་ལོ་གདུགས། །ཞེས་གསུངས་སོ། །དེའི་སྟེང་དུ་རྟ་བབས་རྣམས་བརྩིགས་ཏེ་ཀ་རྒྱན་གྱི་སྟེང་དུ་ཆ་ཕྲན་གཅིག་པ། དེ་ནས་ཀ་བའི་སྟེང་དུ་བང་རིམ་གཉིས་པ་ལ་ཆ་ཕྲན་གཅིག་གིས་ཐུང་བ། དེ་ནས་མུན་སྣམ་གྱི་སྟེང་དུ་བང་རིམ་གསུམ་པ་སྔར་བས་ཆ་ཕྲན་གཅིག་གིས་ཐུང་བ། དེ་ལས་སྒོ་ཁང་ཆ་ཕྲན་གཅིག་གིས་ཐུང་བ་ནི་རིམ་པ་བཞི་པ་སྟེ། དེའི་སྟེང་དུ་པདྨ་དང་ཆོས་འཁོར་སོགས་དགོད་དོ། །དེ་ལྟར་ན་རྟ་བབས་ཀ་བ་དང་བཅས་པའི་དཔངས་ཆ་ཕྲན་དགུ་ཡིན་ལ། དེ་བཞིན་དུ་རྩ་བའི་སྒོ་དང་། སྒོ་ཁྱུད་དང་། འགྲམ་ལོགས་རྣམས་ཀྱི་དཔངས་ཀྱང་ཆ་ཕྲན་དགུ་དང་། སྒོའི་དཔངས་ཀྱང་སྔར་བཤད་པ་ལྟར་ཆ་ཆེན་གཉིས་ཡིན་ནོ། །དེ་ལྟར་ན་གཡས་གཡོན་གྱི་རྟ་བབས་ནི་རིང་ཐུང་གི་ཚུལ་དུ་གནས་ལ། སྒོ་མདུན་གི་རྟ་བབས་རྣམས་ལོགས་མཉམ་པོར་ཡོད་ཀྱང་། ཁ་དོག་མི་འདྲ་བའི་དབང་གིས་སྣམ་བུ་བཞི་ཡོད་དོ་ཞེས་པ་ནི་རྗེ་བླ་མའི་བཞེད་པའོ། །རྗེ་བཙུན་གྱིས་ལཱུ་ཧི་པའི་སྒྲུབ་ཐབས་ལས། སྒོ་ནི་ས་གཞི་ལ་བྲིས་པ་བཞིན་བརྩིགས་ནས་ཀྱང་ཡོད་པར་འདོད་དེ། ཡ་ཕུབ་ནི་སྒོའི་དངོས་གཞི་ཡིན་པའི་ཕྱིར་ཡ་ཕུབ་ཀྱི་རྩིག་པ་ནི་མེད་པར་འདོད་ལ། སྒོ་ཁང་གི་སྟེང་བཀབ་པ་ནི་རྟ་བབས་ཡིན་པས་ཀ་བ་བཞིས་མཐོ་བར་བཏེག་ལ། རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའོ། །ཕ་གུ་དང་མདའ་ཡབ་ཀྱི་བར་ན་དྲྭ་ཕྱེད་ཡོད་པ་མདའ་ཡབ་ཀྱི་སྟེང་ན་ཡར་ལ་པུ་ཤུ་ཞེས་བྱ་བ་རིན་པོ་ཆེའི་དྲྭ་བ་སེང་མ་ནང་ནས་ཕྱི་མཐོང་བ་ལ་མདའ་ཡབ་ཀྱི་དཔངས་དང་མཉམ་པ་ཡོད་དོ་ཞེས་གསུངས་པའི་དོན་འདི་ལྟར་མངོན་ཏེ། སྤྱིར་སྒོ་ཁང་བྲིས་པ་བཞིན་བརྩིགས་ནས་ཡོད་པར་འདོད་ལ། དམིགས་བསལ་བྲི་བྱའི་ཡ་ཕུབ་ནི་སྒོའི་དངོས་གཞིའི་ཐད་ཀྱི་རྩིག་རྒྱུན་མ་ཆད་པ་མཚོན་པའི་ཕྱིར། དེར་བྲིས་པ་ཡིན་གྱི་བསྒོམ་བྱ་ལ་ཡ་ཕུབ་ཀྱི་ཐད་ཀྱི་རྩིག་པ་མེད་པར་འདོད་དོ། །འོ་ན་བསྒོམ་བྱ་ལ་རྩིག་རྒྱུན་ཆད་པར་འགྱུར་རོ་སྙམ་ན་མ་ཡིན་ཏེ། སྒོའི་སྟེང་དུ་ཡང་ཆ་ཆེན་གཉིས་ཀྱི་རྩིག་རྒྱན་མ་ཆད་པར་ཡོད་པའི་ཕྱིར་རོ། །རྟ་བབས་ཀྱི་སྒོ་ཁང་གི་སྟེང་འགེབས་དགོས་པའི་སྒོ་ལོགས་ཀྱི་ཕྱི་མཐའ་ཆ་ཕྲན་རེ་རེ་སོང་བའི་སར་ནང་ངོས་འདོད་སྣམ་ལ་རེག་པ་དང་། ཕྱི་ངོས་སྣ་ཚོགས་རྡོ་རྗེ་ལྟེ་བ་ཟད་མཚམས་སུ་སྟེགས་བུ་གྲུ་བཞི། དཔངས་སུ་ཆ་ཕྲན་གཅིག དེའི་སྟེང་དུ་བུམ་པ་ཆ་ཕྲན་གཅིག དེའི་སྟེང་དུ་ཀ་བ་ཆ་ཕྲན་ལྔ་པ་བཞི་འཛུགས་སོ། །དེ་དག་གི་སྟེང་དུ་ཞུ་རིང་ཐུང་གཉིས་ལ་དཔངས་སུ་ཆ་ཕྲན་གཅིག སྲིད་དུ་ཞུ་རིང་ཆ་ཕྲན་གཉིས་ཡོད་པ། རྩེ་མོ་ཀ་རྒྱན་དང་། མུན་པའི་ཕྱེད་ནོན་པའི་ཚུལ་གྱིས་ཡོད་པའོ། །དེའི་སྟེང་དུ་མདུན་ངོས་ལ་གདུང་། དཀྱུས་སུ་ཆ་ཆེན་བཞི། དཔངས་སུ་ཆ་ཕྲན་གཅིག་ཡོད་པ་དང་། ཀ་བ་ནང་མ་གཉིས་ཀྱི་སྟེང་དུ་ཡང་དེ་དང་མཉམ་པའི་གདུང་འགོད་དོ། །དེའི་སྟེང་དུ་རྟ་བབས་སྣམ་བུ་འོག་མ་དཀྱུས་སུ་ཆ་ཆེན་བཞི། ཞེང་དུ་ཆ་ཕྲན་ལྔ་ཡོད་པས་བཀབ། དེའི་སྟེང་དུ་སྣམ་བུ་གོང་མ་གསུམ་གཡས་གཡོན་དང་། མདུན་ངོས་གསུམ་ཆ་ཕྲན་རེ་རེ་ཐུང་བ་བརྩེགས་ཏེ། མཆོད་རྟེན་གྱི་བང་རིམ་ལྟར་ཡོད་པའི་སྟེང་མ་ལ་དཀྱུས་སུ་ཆ་ཕྲན་བཅུ་དང་། ཞེང་དུ་ཆ་ཕྲན་གཉིས་ཡོད་པའོ། །དེའི་དབུས་སུ་པདྨ་འཁོར་ལོ་གདུགས་གསུམ་ཆ་ཆེན་གཅིག་གི་ཚད་དང་། གཡས་གཡོན་དུ་རི་དྭགས་ཕོ་མོ་གཉིས་དང་། མཇུག་མའི་ངོས་སུ་གདུགས་འཛིན་པའི་སྤྲེའུ་གཉིས་དང་། སྣམ་བུའི་རིམ་པ་རྣམས་ལ་རྒྱལ་མཚན་དང་། བ་དན་ལ་སོགས་པ་རྒྱན་སྣ་ཚོགས་ཀྱིས་བརྒྱན་པའོ། །སྣམ་བུ་བཞི་ཆར་གྱི་ནང་ངོས་མཉམ་པ་དང་། སྒོའི་སྟེང་གི་ལོགས་ཀྱི་རྩིག་པའི་བར་ན་ཆ་ཕྲན་གཉིས་སྟོང་པར་ཡོད་པ་ནི་རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའི་དོན་ཡིན་ཞིང་། སྒོ་ཁང་གི་རྩིག་པ་དང་། རྟ་བབས་ཀྱི་བར་ན་ཆ་ཕྲན་གཅིག་ཡོད་པ་ནི་ཀ་བ་བཞིས་མཐོ་བར་བཏེག་པ་ཞེས་དང་། ཀ་བ་བཞི་དགོས་པའི་དོན་ཀྱང་ཡིན་ནོ། །ཀ་བའི་གདན་ལ་སྟེགས་བུ་དང་། བུམ་པ་ཡོད་པ་ནི་ཀླུའི་བློས། བུམ་པ་ཀ་བའི་སྟེགས་གནས་པའི། །སྒོ་ལས་སུམ་འགྱུར་རྟ་བབས་ཏེ། །ཞེས་དང་། ཕྲེང་བར། སྟེགས་བུ་བུམ་པ་ལ་གནས་པའི། །རྟ་བབས་ཀ་བ་དྲང་པོར་བྱ། །ཞེས་པས་འགྲུབ་ཅིང་། རྟ་བབས་འདགས་པའི་གདུང་དགོས་པ་ནི། རིན་ཆེན་འབར་བར། ཡ་ཕུབས་ཐ་མ་རྡོ་རྗེའི་གདུང་། །ཞེས་པས་འགྲུབ་བོ། །འདི་ཉིད་བྲི་བྱ་ལ་མེད་དོ་སྙམ་ན། ཡ་ཕུབས་དང་རྟ་བབས་ཀྱི་བར་གྱི་ཆ་ཕྲན་གཅིག་པོ་དེ་ཉིད་སློབ་དཔོན་འདིས་གདུང་གི་ཐིག་ཏུ་འདོད་དེ། ཡ་ཕུབས་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །ཞེས་པ་བྲི་བྱའི་སྐབས་སུ་བཤད་པའི་ཕྱིར་རོ། །ཤྲདྡྷས་གདུང་ཐིག་དང་། མུན་སྣམ་གང་གི་ཡང་གསལ་ཁ་མེད་ཅིང་། དབང་ཆུར་ནམ་མཁའ་ཞེས་བཤད་པས་མུན་སྣམ་དུ་བཞེད་པ་གདམ་ཁ་ཅན་ཏེ། གང་ལྟར་ཡང་བསྒོམ་པ་ལ་ཁྱད་མེད་དོ། །གུ་ཎ་དྷ་ར་ནི་སྣམ་བུ་འོག་མའི་ནང་ངོས། དཔངས་སུ་ཆ་ཕྲན་ཕྱེད་ཙམ་བྲུས་པའི་དབྱིབས་མཛེས་པོ་འབྱུང་ལ། དྲྭ་བ་དང་དྲྭ་ཕྱེད་ལ་སོགས་པའི་གནམ་རྒྱན་སྣ་ཚོགས་འདོགས་པའོ། །ཞེས་པ་འདི་རྗེ་བཙུན་གྱི་དགོངས་པའོ་སྙམ་དུ་ཁོ་བོ་སེམས་སོ། །གཉིས་པ་ཞར་བྱུང་དུར་ཁྲོད་བཤད་པ་ནི། རྩ་རྒྱུད་ལས། དུར་ཁྲོད་དུ་ནི་མགོན་པོ་རོལ། །ཞེས་པ་ཙམ་ལས་མི་འབྱུང་ཞིང་། སློབ་དཔོན་མི་ཐུབ་ཟླ་བའི་ཀྱེ་རྡོ་རྗེའི་སྒྲུབ་ཐབས་ཀྱི་གཞུང་རྣམས་དང་། སློབ་དཔོན་མཚོ་སྐྱེས་ཀྱིས་ཀྱང་དུར་ཁྲོད་བཤད་པ་མེད་ཀྱང་། རྗེ་བཙུན་སྐུ་མཆེད་ཀྱིས་དུར་ཁྲོད་དགོས་པར་གསུང་པས་དེ་བཞིན་དུ་བཤད་པ་ལ་གསུམ་སྟེ། དུར་ཁྲོད་ཀྱི་དོན་བཤད་པ། དེ་གནས་གང་དུ་བསྒོམ་པ། བསྒོམ་བྱའི་དུར་ཁྲོད་དངོས་སོ། །དང་པོ་ནི། དུར་ཁྲོད་ལ་ཤྭ་ས་ཏི་ཞེས་འབྱུང་བའི་ཤྭ་དང་བ་གཉིས་ཕྲལ་ཏེ། ཤ་ལ་ར་སྦྱར་ནས་ཤྲ་བ་ནི་རོ། །ཡང་བ་མར་སྦྱར་ཏེ། བ་ས་ཏི་ནི་གནས་ཏེ་རོའི་གནས་སོ། །དེ་ཉིད་དོན་འགྱུར་དུ་བྱས་ནས་དུར་ཁྲོད་ལ་བཤད་པ་ནི་དྲང་དོན་གྱི་དུར་ཁྲོད་དོ། །ངེས་དོན་ནི་དབུགས་རྒྱུ་བ་དང་བཅས་པས་ལུས་ལ་བཤད་པ་དང་། སྣོད་བཅུད་ཐམས་ཅད་ལ་བདག་མེད་པས་ཁྱབ་པ་ལ་བཤད་པ་རྣམས་སུ་ཡོད་དོ། །གཉིས་པ་ནི། རྡོ་རྗེ་མཁའ་འགྲོར་རྡོ་རྗེ་རྭ་བའི་ནང་དུ་བསྒོམ་པར་གསུངས་པ་དང་། སྡོམ་འབྱུང་དུ་རྡོ་རྗེ་རྭ་བའི་ཕྱི་རོལ་དུ་བསྒོམ་པར་གསུངས་པ་གཉིས་ཡོད་ཅིང་། རྗེ་བཙུན་སྐུ་མཆེད་ཀྱིས་འཁོར་འདས་དབྱེར་མེད་ཡིན་པས། དེ་གཉིས་ཁྱད་མེད་པར་བཤད་པའི་ནང་ནས་ནང་དུ་བསྒོམ་པའི་བཤད་པ་ཅུང་མང་བ་ནི་དུར་ཁྲོད་ཀྱི་གཞུང་ཆེ་བར། རྡོ་རྗེ་གུར་གྱི་ནང་དུ་ནི། །བཞི་བཞིར་སྦྱོར་བ་བྱ་བ་ཉིད། །ཅེས་གསུངས་པ་ལ་བརྟེན་པར་སྣང་ངོ་། །གསུམ་པ་ནི། འདིར་རྗེ་བཙུན་རྩེ་མོས་ནག་པོ་པའི་གཞུང་ལྟར་དུ་མཛད་པས། དེ་ལྟར་དུ་བཤད་ན། སྒྲུབ་ཐབས་དེ་ཉིད་གསལ་བ་ལས། ཕྱི་རོལ་དུར་ཁྲོད་འཇིགས་པ་སྟེ། །རྡོ་རྗེ་རྭ་བའི་ནང་ཉིད་དུ། །སྟུག་ཅིང་དྲག་དང་འཐུག་པ་དང་། །དེ་བཞིན་འབར་བའི་ཕྲེང་བ་དང་། །འཇིགས་པར་བྱེད་པའི་ཐོད་པ་ཅན། །གཡོན་ནས་ཤར་ལ་སོགས་པ་བཞིན། །དྲག་ཏུ་དགོད་པ་དབང་ལྡན་དུ། །དབང་ཕྱུག་ནགས་ཚལ་མེ་ཡི་མཚམས། །འཇིགས་བྱེད་མུན་པ་བདེན་བྲལ་དུ། །རླུང་དུ་ཀི་ལི་ཀི་ལ་སྒྲོགས། །ཤིར་ཤ་ཨ་ཤྭ་ཀཾ་ཀ་ལི། །ཙུ་ཏའི་ཤིང་ནི་ཤར་སོགས་རིམ། །ཤིང་ཆེན་ཀ་རཉྫ་ཉིད་དང་། །འཁྲིལ་ཤིང་ཅན་དང་ཨརྫུ་ན། །དབང་པོ་ནོར་སྦྱིན་ཞགས་པ་ཅན། །གཤིན་རྗེའི་རྒྱལ་པོ་ཕྱོགས་སུ་འདོད། །དབང་ལྡན་མཚམས་དང་བྱིན་ཟ་དང་། །སྲིན་པོའི་དབང་པོ་རླུང་དག་ཏུའོ། །ནོར་རྒྱས་བུ་དང་ཏཀྵ་ཀ །ཀརྐོ་ཊ་དང་པདྨ་དང་། །པདྨ་ཆེན་པོ་ཧུ་ལུནྟ། །རིགས་ལྡན་དང་ནི་དུང་སྐྱོང་ཉིད། །སྒྲོགས་བྱེད་འཁོར་བྱེད་འཇིགས་པ་དང་། །ལྡོག་བྱེད་དང་ནི་འཐུག་པོ་ཉིད། །འགེངས་བྱེད་དང་ནི་ཆར་འབེབས་དང་། །གཏུམ་པོ་རིམ་བཞིན་སྤྲིན་གྱི་བདག །དེ་ལ་བརྒྱ་བྱིན་ནི་གླང་པོ་ཆེ་ལ་ཞོན་པ་མདོག་སེར་པོ་ལག་པ་གཡོན་ན་རྡོ་རྗེས་མཚན་པའི་ཐོད་པ་ཐོགས་པའོ། །ནོར་སྦྱིན་ནི་གནོད་སྦྱིན་ལ་ཞོན་པ་མདོག་སེར་པོ་གསུས་པ་འཕྱང་བ་མིའུ་ཐུང་གཡོན་ན་ཐོད་པ་དང་དབྱུག་པ་ཐོགས་པའོ། །ཆུ་ལྷ་ནི་ཆུ་སྲིན་ལ་ཞོན་པ་མདོག་དཀར་པོ་སྦྲུལ་གྱིས་བརྒྱན་པ་གཡོན་ན་ཐོད་པ་དང་ཞགས་པ་ཐོགས་པའོ། །གཤིན་རྗེ་ནི་མ་ཧེ་ལ་ཞོན་པ་མདོག་སྔོན་པོ་ལྟོ་བ་འཕྱང་བ་སྐྲ་སེར་པོ་གྱེན་དུ་བརྫེས་པ་མིའུ་ཐུང་གི་གཟུགས་ཅན་གཡོན་ན་ཐོད་པ་དང་དབྱུག་པ་ཐོགས་པའོ། །དབང་ལྡན་ནི་གླང་ལ་ཞོན་པ་མིག་གསུམ་པ་མདོག་དཀར་པོ་གཡོན་ན་ཐོད་པ་དང་མདུང་ཐོགས་པའོ། །བྱིན་ཟ་ནི་ར་སྐྱེས་ལ་ཞོན་པ་མདོག་དམར་སེར་ཕྱག་བཞི་པ་སྐྲ་སེར་པོ་དབྱུག་གུ་གསུམ་པ་དང་ཐོད་པ་དང་ཕྲེང་བ་འཛིན་པའོ། །སྲིན་པོའི་བདག་པོ་ནི་རོ་ལ་ཞོན་པ་མིའུ་ཐུང་གི་གཟུགས་ཅན་མདོག་སྔོན་པོ་སྐྲ་སེར་པོ་གྱེན་དུ་འབར་བ་གསུས་པ་འཕྱང་བ་གཡོན་ཐོད་པ་དང་རལ་གྲི་ཐོགས་པའོ། །རླུང་གི་བདག་པོ་ནི་མདོག་སྔོན་པོ་རི་དྭགས་ལ་ཞོན་པ་ཞི་བའི་གདོང་ཅན་བ་དན་ཐོགས་པའོ། །འཇིག་རྟེན་སྐྱོང་བ་འདི་དག་ཀུན་རང་རང་གི་མདོག་དང་། གདན་དང་། ཕྱག་མཚན་དང་ལྡན་ཞིང་ཀུན་ཀྱང་གཡས་ཀྱིས་ནི་བཅོམ་ལྡན་འདས་ལ་ཕྱག་འཚལ་བའོ། །སྤྲིན་རྣམས་ཀྱི་ཁ་དོག་ནི་འཇིག་རྟེན་སྐྱོང་བ་ལྟ་བུའོ། །ཀླུ་རྣམས་ནི་དེ་དག་ལ་གནས་པ་སྟེ། ཀུན་ཀྱང་ཐལ་མོ་སྦྱར་བའོ། །ཤིང་བརྒྱད་ལ་གནས་པའི་ཞིང་སྐྱོང་བརྒྱད་ནི་འཇིག་རྟེན་སྐྱོང་བ་བརྒྱད་ཀྱི་བཞོན་པ་རྣམས་ཀྱི་གདོང་ལྟ་བུའོ། །སྐྲ་དམར་སེར་གྱེན་དུ་བརྫེས་པ་བཞིན་འགྱུར་བ་སྟེ། ཤི་རི་ཤ་ལ་གནས་པ་ནི་ལྷའི་དགེ་འདུན་ཞེས་བྱ་བ་མདོག་དཀར་པོའོ། །ཤིང་ཙུ་ཏ་ལ་གནས་པ་ནི་གཤིན་རྗེ་ཞེས་བྱ་སྟེ་མདོག་སྔོན་པོའོ། །ཨ་ཤྭ་ཀ་ལ་གནས་པ་ནི་སྤྲིན་གྱི་རྒྱལ་པོ་ཞེས་བྱ་བ་སྟེ་མདོག་དམར་པོའོ། །བྱང་ཆུབ་ཀྱི་ཤིང་ལ་གནས་པ་ནི་གནོད་སྦྱིན་གྱི་སྡེ་དཔོན་ཞེས་བྱ་བ་སྟེ་མདོག་སེར་པོའོ། །ཀ་རཉྫའི་ཤིང་ལ་གནས་པ་ནི་དྲང་སྲོང་འདུས་པ་ཞེས་བྱ་བ་སྟེ་དམར་པོའོ། །འཁྲིལ་ཤིང་ཅན་ལ་གནས་པ་ནི་སྲིན་པོའི་ཚོགས་ཅན་ཏེ་ཁ་དོག་སྔོན་པོའོ། །ཨརྫུ་ན་ལ་གནས་པ་ནི་རླུང་གི་རྒྱལ་པོ་ཞེས་བྱ་བ་སྟེ་མདོག་ལྗང་གུའོ། །ཤིང་ཆེན་པོ་ལ་གནས་པ་ནི་ཡི་དྭགས་འདུས་པ་ཞེས་བྱ་བ་སྟེ་དུ་བའི་མདོག་ཅན་དུ་བལྟ་བར་བྱའོ། །ཕྱོགས་མཚམས་བརྒྱད་ཀྱི་དུར་ཁྲོད་རྣམས་ནི་མགོ་བཅད་པ་དང་། དཔྱངས་པ་དང་། བསྙལ་བ་དང་། གསལ་ཤིང་གིས་ཕུག་པ་དང་། མགོ་བོ་དང་། ཀེང་རུས་དང་། བ་གླང་གི་ཚེ་དང་། ཁྭ་དང་། འུག་པ་དང་། བྱ་རྒོད་དང་། རོ་ལངས་རྣམས་ཕཻཾ་ཞེས་བྱ་བའི་སྒྲ་སྒྲོགས་པར་བྱེད་དེ། མ་ལུས་པ་ཀུན་ཀྱང་སྔོན་གྱི་གྲུབ་པ་ཐོབ་པ་རྣམས་ཀྱིས་མངོན་པར་བརྟགས་པ་སྟེ། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། སྨྱོ་བྱེད་དང་། བརྗེད་བྱེད་དང་། གདོན་དང་། མཁའ་འགྲོ་དང་། མཁའ་འགྲོ་མ་རྣམས་ཀྱིས་རྣམ་པར་བརྒྱན་ཅིང་སྒྲུབ་པ་པོ་རྣམས་དང་བཅས་པར་བལྟ་བར་བྱའོ་ཞེས་གསུངས་པ་ལྟར་རོ། །གསུམ་པ་ནང་གི་དབྱིབས་དང་གདན་བཤད་པ་ནི། ལྷ་སྣམ་ཡོད་པ་དང་། མེད་པའི་ལུགས་གཉིས་ལས། དང་པོ་ནི། རིན་ཆེན་འབར་བར། གསུམ་པའི་ཕྱེད་རྒྱབ་དེ་ཕྱེད་ནང་། །རྡོར་ཕྲེང་བཞི་པ་ལྷ་སྣམ་ཡིན། །ཞེས་ཆ་ཆེན་གསུམ་པའི་མཐའ་ཐིག་ཡན་ཆད་ཟླུམ་པོར་བསྐོར་བ། གཙོ་བོའི་པདྨ་རྡོར་ཕྲེང་དང་བཅས་པ་དང་། ཆ་ཆེན་བཞི་པ་ལྷ་སྣམ་དུ་བཤད་ལ། ནག་པོ་པའི་དཀྱིལ་ཆོག་ལས། ལྷ་ཡི་གནས་ཀྱི་སྐུད་པ་ནི། །མཚམས་སུ་སྒོ་དང་མཚུངས་པར་གདབ། །ཅེས་ལྷ་སྣམ་ཆ་ཆེན་གཅིག་བཤད་ཅིང་། མཚོ་སྐྱེས་ཀྱིས་ཀྱང་དེ་དང་འདྲ་བར་བཤད་པས། སློབ་དཔོན་དེ་རྣམས་ཀྱི་ལུགས་ལ་དབུས་ཀྱི་ཆ་ཆེན་དྲུག་ལ་རྡོ་རྭ་མེ་རི་དང་བཅས་པའི་པདྨ། གཙོ་བོའི་གནས་དང་ལྷ་སྣམ་ལ་པདྨ་ཆུང་དུ་བརྒྱད། འཁོར་གྱི་ལྷ་མོའི་གནས་སུ་བཞེད་དོ། །རྗེ་བཙུན་སྐུ་མཆེད་ཀྱི་སྒྲུབ་ཐབས་གཉིས་ལས། པདྨ་རྐྱང་པ་ལས་རྡོར་ཕྲེང་སོགས་བྱ་བར་མ་གསུངས་ཤིང་། དབང་གི་ཆུ་བོར་པདྨའི་མཐར་རྡོ་རྭ་མེ་རིས་བསྐོར་ཞིང་། དེ་དང་རྩིག་པ་གཉིས་ཀྱི་བར་ན་ལྷ་སྣམ་ཆ་ཆེན་གཅིག་ཡོད་པ་འཕར་མ་གཉིས་པའི་ལུགས་དང་། དེ་བར་ན་མེད་པ་འཕར་མ་གཅིག་པའི་ལུགས་གཉིས་གསུངས་པ་ལ། དང་པོ་ནི། དབང་ཆུ་ནི་ཡབ་ཡུམ་གཉིས་ཀྱི་ཐུན་མོང་བ་ཡིན་པས་བདག་མེད་མའི་དབང་དུ་བྱས་ལ། ཕྱི་མ་ནི་ཡབ་ཀྱི་དཀྱིལ་འཁོར་ཁོ་ནའི་དབང་དུ་བྱས་པ་སྟེ། རྩ་རྒྱུད་ལས། ཡུམ་གྱི་སྐབས་སུ། འཕར་མ་གཉིས་བཟང་རྣམས་བྲིས་ནས། །མྱུར་དུ་དཀར་མོ་ལ་སོགས་བྲི། །ཞེས་དང་། ཡབ་ཀྱི་སྐབས་སུ། འཕར་མ་གཅིག་དང་སྒོ་བཞི་པ། །ཞེས་གསུངས་པའི་ཐིག་གདབ་ཚུལ་གཉིས་ཀ་སྟོན་དགོས་པའི་ཕྱིར་རོ། །འཕར་མ་གཉིས་ཀྱི་དོན་འདི་ལ་རྒྱ་གར་གྱི་འགྲེལ་པ་རྣམས་ལ་བཤད་ཚུལ་མི་འདྲ་བ་དྲུག་ཙམ་སྣང་ཡང་། བིརྺ་པའི་ལུགས་གཉིས་ཀྱི་དགོངས་པ་ནི། འཁོར་གྱི་ལྷ་མོའི་གནས་ལ་རྡོ་རྭ་མེ་རིས་བསྐོར་བ་རིམ་པ་གཅིག་ལས་མེད་པ་ནི་འཕར་མ་གཅིག་དང་། དེ་རིམ་པ་གཉིས་ཡོད་པ་ནི་འཕར་མ་གཉིས་པར་བཞེད་དེ། ཡབ་ཀྱི་སྐབས་སུ་གཙོ་བོའི་པདྨ་ལ་རྡོ་རྭ་མེ་རི་ཡོད་པའམ། མེད་ཀྱང་རུང་། ལྷ་མོ་བརྒྱད་ལ་ཕྱིའི་རྡོ་རྭ་མེ་རིས་བསྐོར་བའི་རིམ་པ་གཅིག་ལས་མེད་པས། འཕར་མ་གཅིག་པར་འཇོག་པའི་ཕྱིར་དང་། ཡུམ་གྱི་སྐབས་སུ་ནང་གི་རྣལ་འབྱོར་མ་ལྔའམ་བདུན་ལ་བསྐོར་བའི་རྡོ་རྭ་མེ་རི་གཅིག ཕྱིའི་རྣལ་འབྱོར་མ་བཅུའམ་བརྒྱད་ལ་རྡོ་རྭ་མེ་རིས་བསྐོར་བའི་རིམ་པ་གཅིག་ཡོད་པས་འཕར་མ་གཉིས་པར་འཇོག་པའི་ཕྱིར། འདི་ལ་དགོངས་ནས་སྐབས་ཁ་ཅིག་ཏུ་ཁ་སྦྱོར་ཞེས་དང་། མི་ཐུབ་ཟླ་བས་ཡབ་ཀྱི་སྒྲུབ་ཐབས་སུ་ཕྲེང་བ་ཞེས་གསུངས་པ་འཕར་མའི་མིང་གི་རྣམ་གྲངས་སུ་བཞེད་ཅིང་། འགྲེལ་པ་ཀུ་མུ་ཏི་ལས། ནང་གི་རྣལ་འབྱོར་མ་ལྔ་ལ། རྡོ་རྗེ་རྭ་བས་བཅད་ཅིང་སྦས་པ་འཕར་མ་གཅིག་དང་། ཕྱིའི་རྣལ་འབྱོར་མ་རྣམས་ལ་རྡོ་རྗེ་རྭ་བས་བཅད་ཅིང་སྦས་པ་འཕར་མ་གཉིས་པར་གསུངས་སོ། །དེར་གདན་བསྒོམ་པ་ནི་པདྨའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་བདུད་བཞི་སྟེང་ནས་སྟེང་དུ་བརྩེགས་པར་གནས་པ་ཡིན་ཏེ། རྗེ་བཙུན་སྐུ་མཆེད་ཀྱིས་མན་ངག་ལུགས་ཀྱི་སྐབས་སུ་བདུད་བཞི་བརྩེགས་པའི་གདན་གྱི་སྟེང་དུ་ཞེས་དང་། མཚོ་སྐྱེས་ལུགས་ཀྱི་སྐབས་སུ་ཡང་དེ་ལྟར་དུ་གསུངས་ཤིང་། དེ་དང་མཐུན་པར་སློབ་དཔོན་ཤཱནྟི་པས་ཀྱང་། དབུས་སུ་བདུད་ནི་བཞི་པོ་དག །གོང་ནས་གོང་དུ་བཀན་པའོ། །ཞེས་གསུངས་སོ། །ཕྱག་མཚན་ནི་གཞུང་རྣམས་སུ་མི་གསལ་ལ། རྗེ་བཙུན་གྱིས། གདོང་བཞི་དང་ནི་དབང་པོ་དང་བཅས་འཇུག་སེལ་དག་དང་དྲག་པོ་རྣམས་ནི་རྟབས་ཤིང་འགྱེལ་ལ་ལག་ཆ་ཤོར་ནས་ཐལ་མོ་སྦྱར་ཞིང་གདོང་གིས་གྱེན་དུ་བལྟ་བ་ཞེས་ལག་པ་གཉིས་ཐལ་མོ་སྦྱར་བར་བཤད་པ་ལྟར་བྱའོ། །ལྷ་མོ་བརྒྱད་ཀྱི་གདན་ནི་རྗེ་བཙུན་རྩེ་མོས། འདབ་མ་བརྒྱད་ལ་ཟླ་བའི་དཀྱིལ་འཁོར་གྱི་སྟེང་དུ། ཤར་དུ་ཚངས་པ་སེར་པོ། ལྷོར་དབང་པོ་དཀར་པོ། ནུབ་ཏུ་ཉེ་དབང་སྔོན་པོའམ་དམར་པོ། བྱང་དུ་དྲག་པོ་ནག་པོ། བྱང་ཤར་དུ་གཤིན་རྗེ་སྔོན་པོ། ཤར་ལྷོར་ནོར་བདག་སེར་པོ། ལྷོ་ནུབ་ཏུ་སྲིན་པོ་ནག་པོ། ནུབ་བྱང་དུ་ཐགས་ཟངས་རིས་ལྗང་གུའམ་དུད་ཀའོ་ཞེས་གསུངས་སོ། །གལ་ཏེ་རྗེ་བཙུན་སྐུ་མཆེད་ཀྱི་ལུགས་ལ་ཟླ་གདན་དུ་བྱས་པ་མི་འཐད་དེ། སློབ་དཔོན་ཤཱནྟི་པ་སོགས་ཀྱིས་བདག་མེད་མ་ལ་ཟླ་གདན་བྱས་པ་ལ། རྗེ་བཙུན་གྱིས་ཟླ་བའི་གདན་ཡང་མི་རིགས་ཏེ། འདི་དག་ནི་ཁྲོ་མོ་ཡིན་ལ། ཁྲོ་བོ་ཁྲོ་མོ་རྣམས་ནི། འབར་བའི་ཕྲེང་བ་འཁྲུགས་པའི་འོད། །ཅེས་བྱ་བ་ཉི་མར་བཤད་པ་དང་འགལ་བའི་ཕྱིར་རོ། །ཞེས་དགག་པ་མཛད་པས་སོ་སྙམ་ན་འདི་ནི་བདག་མེད་ལྷ་མོ་བཅོ་ལྔ་ལ་ཟླ་གདན་བྱེད་པ་བཀག་པ་ཡིན་གྱི། ཡབ་ཀྱི་འཁོར་རྣམས་ལ་ཟླ་གདན་བྱེད་པ་བཀག་པ་མ་ཡིན་ནོ། །འོ་ན་དེ་གཉིས་ལ་ཁྱད་པར་ཅི་ཡོད་སྙམ་ན། བདག་མེད་མ་གཙོ་འཁོར་རྣམས་ནི། རྩ་རྒྱུད་ལས། ལྷ་མོ་ཐམས་ཅད་ཁ་དོག་ནག །དྲག་ཆེན་ཕྱག་རྒྱ་ལྔ་ཡིས་བརྒྱན། །ཞེས་ཐམས་ཅད་དྲག་མོར་བཤད་ལ། གུར་ལས་ཀྱང་། ཐམས་ཅད་ཁ་དོག་ནག་པོ་མཚུངས་པ། རབ་ཏུ་སོན་པའི་སྟེང་དུ་གར་དང་བཅས་པ། ཁྲོ་མོ་ཆེན་མོ། དཔའ་མོ། གཡོན་ན་ཁ་ཊྭཱཾ་ག་འཛིན་པ་མོའོ་ཞེས་ཁྲོ་མོར་བཤད་པས་དེ་དག་ཁྲོ་མོར་འདོད་དགོས་ལ། འདིར་ནི་ཁྲོ་མོ་ཡིན་པའི་དམིགས་བསལ་མ་གསུངས་པའི་ཕྱིར་རོ། །དེས་ན་ཁྲོ་མོ་དང་ཅུང་ཟད་ཞི་བའི་ཁྱད་པར་ཡོད་པས་གདན་གཉིས་ཀྱང་དེ་བཞིན་དུ་བྱ་བ་ཡིན་ཏེ། དཔེར་ན་དགྲ་ནག་གི་དཀྱིལ་འཁོར་དུ་ཁྲོ་བོ་གཞན་རྣམས་ལ་ཉི་གདན་དང་། གཏི་མུག་གཤིན་རྗེ་གཤེད་ལ་ཟླ་གདན་དུ་བཤད་པའི་ཕྱིར་རོ། །གདན་དེ་དག་བསྒོམ་དགོས་པ་ནི། རྗེ་བཙུན་རྩེ་མོས། གདན་བརྒྱད་བསྒོམ་པ་བདུད་བཞི་དང་། །འབྱུང་བཞིའི་རྣམ་རྟོག་སྤངས་རྟགས་ཡིན། །ཞེས་བཤད་པ་ལྟར་རོ། །གདན་འདི་དག་ཀྱང་གཞལ་ཡས་ཁང་པ་གྲུབ་པ་དང་དུས་གཅིག་ཏུ་གྲུབ་པ་གཉིས་མེད་རྡོ་རྗེས་བཤད་པ་ལྟར་བྱའོ། །དེ་ལྟར་རྟེན་གཞལ་ཡས་ཁང་བསྐྱེད་པའི་དམིགས་རྣམས་གསལ་པོར་བསྒོམས་པའི་རྗེས་ལ། རང་གི་ངོ་བོ་རྣམ་པར་སྣང་མཛད། གཟུགས་རྣམས་གཞལ་ཡས་ཁང་པའི་རྣམ་པར་ཤར་བའི་ང་རྒྱལ་ལ་སེམས་བཞག་ནས། གུར་ལས་གསུངས་པའི་སྔགས་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད། ནཱི་ལ་ཕོ་བྲང་། བཛྲ་རྡོ་རྗེ། སྭ་བྷཱ་ཝ་རང་བཞིན། ཨཱཏྨ་ཀོ྅ཧཾ་བདག ཨ་ཧཾ་ངའོ་ཞེས་པ་སྟེ། མི་བསྐྱོད་པ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་བཞུགས་གནས་གཞལ་ཡས་ཁང་པ་འདི་ནི་བདག་རྣམ་པར་སྣང་མཛད་ཀྱི་རང་བཞིན་ནོ་ཞེས་དེའི་སྟེང་དུ་ང་རྒྱལ་འཛིན་པའོ། །གཉིས་པ་རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ལ་གསུམ། དམ་ཚིག་པ་བསྐྱེད་པ། མིག་སོགས་བྱིན་གྱིས་བརླབ་པ། ཡེ་ཤེས་པ་གཞུག་པའོ། །དང་པོ་ལ་གཉིས། མངོན་བྱང་ལྔ་ལས་རྒྱུ་རྡོ་རྗེ་འཛིན་པ་བསྐྱེད་པ། ཞུ་བ་གླུས་བསྐུལ་ལས་འབྲས་བུ་རྡོ་རྗེ་འཛིན་པ་བསྐྱེད་པའོ། །དང་པོ་ལ་གསུམ། རྒྱུ་རྡོ་རྗེ་འཆང་བསྐྱེད་པ། བསྐྱེད་ནས་འཁོར་སྤྲོ་བ། སྤྲོས་ནས་ཐིག་ལེར་ཞུ་བའོ། །དང་པོ་ལ་གསུམ། མི་མཉམ་སྦྱོར་གྱི་དོན་བཤད། མཉམ་སྦྱོར་གྱི་དོན་བཤད། དེ་གཉིས་མི་འདྲ་བའི་རྒྱུ་མཚན་བཤད་པའོ། །དང་པོ་ལ་གསུམ། གང་བསྒོམ་པའི་དོན་དང་། ཇི་ལྟར་བསྒོམ་པའི་ཚུལ་དང་། དེ་ལྟར་བསྒོམས་པའི་འཐད་པའོ། །དང་པོ་ནི། མངོན་པར་བྱང་ཆུབ་པ་ལྔ་སྟེ། དེའང་གདན་གྱི་སྟེང་དུ་ཨཱ་ལི་ཕྲག་གཉིས་སྐར་མ་ལྟ་བུ་བསམས་ཏེ། སུམ་ཅུ་རྩ་གཉིས་པོ་དེ་ནི་མཚན་སུམ་ཅུ་རྩ་གཉིས་སུ་མོས་པ་བྱའོ། །དེ་གྱུར་པ་ལས་ཟླ་བའི་དཀྱིལ་འཁོར་བསྐྱེད་དེ། མེ་ལོང་ལྟ་བུའི་ཡེ་ཤེས་སོ། །ཡང་ཟླ་བའི་སྟེང་དུ་ཀཱ་ལི་སོ་བཞི། ཡ་ར་ལ་ཝ་ཌ་ཌྷ་ཞེས་པ་དྲུག་བསྣན་པ་བཞི་བཅུ། དེ་ཕྲག་གཉིས་མར་མེའི་རྣམ་པ་དང་འདྲ་བ་བརྒྱད་ཅུ། དཔེ་བྱད་བཟང་པོ་བརྒྱད་ཅུའོ། །དེ་ལས་ཉི་མ་སྟེ། མཉམ་པ་ཉིད་ཀྱི་ཡེ་ཤེས་སོ། །དེ་དག་གི་བར་རྣམས་སུ་ཧཱུྃ་ལ་སོགས་པའི་ས་བོན་ལས་ཕྱག་མཚན་ས་བོན་གྱིས་མཚན་པ་སྟེ། སོ་སོར་རྟོག་པའི་ཡེ་ཤེས་སོ། །སོ་སོར་ས་བོན་ཕྱག་མཚན་དང་། ཟླ་བ་ཉི་མ་འདྲེས་པ་ནི་བྱ་བ་ནན་ཏན་གྱི་ཡེ་ཤེས་སོ། །དེ་ལས་ལྷ་བསྐྱེད་པར་བྱ་སྟེ་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་སུ་མོས་པ་བྱའོ། །གཉིས་པ་ཇི་ལྟར་བསྒོམ་པའི་ཚུལ་ནི་ཁ་ཅིག་འདི་སྐད་དུ་གལ་ཏེ་ཟླ་བ་ལ་སོགས་པ་འདི་དག་མེ་ལོང་ལྟ་བུ་ལ་སོགས་པ་ཡིན་ནས་བསྒོམ་མམ་མིན་ཡང་བསྒོམ། དང་པོ་ལྟར་ན་གྲུབ་ཟིན་པ་བསྒྲུབ་པར་འགྱུར་ལ། གཉིས་པ་ལྟར་ན་སྤྲང་པོ་རྒྱལ་པོར་རློམ་པ་ལྟར་བསྒོམས་ཀྱང་མི་འགྲུབ་བོ་སྙམ་ན་ཡིན་ནས་བསྒོམ་ལ། འདི་ལ་ཡང་འབྲས་བུ་དངོས་ཡིན་པ་དང་། ཆོས་ཉིད་དམ་རྣམ་པ་ཡིན་པ་གཉིས་ལས། འདི་ནི་ཆོས་ཉིད་དམ་རྣམ་པ་ཡིན་ལ། དེའང་ཚུལ་འདི་ལྟར་བསྒོམས་ཏེ། རྣམ་པ་ཟླ་བར་བསྒོམས་པ་ནི་བསྒོམས་སླ་བས་རྣམ་པ་ལམ་དུ་བྱེད་པ་ཞེས་བྱ། རྣམ་པ་དེ་ཉིད་ལ་དོན་མེ་ལོང་ལྟ་བུའི་ཡེ་ཤེས་ལ་སོགས་པ་མོས་པར་བྱས་པས་ལན་ཅིག་དེ་ཐོབ་པར་འགྱུར་བས་མོས་པ་ལམ་དུ་བྱེད་པ་སྟེ། ཟླ་བ་མེ་ལོང་ཡེ་ཤེས་ལྡན། །ཞེས་འབྱུང་ངོ་། །དེ་ཡང་སངས་རྒྱས་ལ་མངའ་བའི་མེ་ལོང་ལྟ་བུའི་ཡེ་ཤེས་ནི་འདི་ཉིད་ཡིན་སྙམ་དུ་འབྲས་བུ་ད་ལྟ་ཉིད་ནས་བསྒོམས་པས་འབྲས་བུ་ལམ་དུ་བྱེད་པའོ། །དེས་བདག་གི་རྒྱུད་ལ་ཚོགས་བསག་ཅིང་སྒྲིབ་པ་འདག་པའི་རྟེན་འབྲེལ་དུ་འགྱུར་བས་ན་བྱིན་རླབས་ལམ་དུ་བྱེད་པའོ། །དེ་བས་ན་རྣམ་པ་དེ་ལ་ངོ་བོར་ཞེན་པས་ན་ཞེན་པས་འཇུག་པའི་ལམ། ཐབས་དེས་དེ་བཞིན་གཤེགས་པའི་ཐུགས་རྗེས་མི་བསླུ་བས་འབྲེལ་པས་མི་བསླུ་བའི་ལམ་ཞེས་བྱའོ། །གསུམ་པ་དེ་ལྟར་བསྒོམས་པའི་འཐད་པ་ནི། མངོན་པར་བྱང་ཆུབ་པ་ལྔ་ལས། མངོན་བྱང་དང་པོའི་དབང་དུ་བྱས་ནས་ཅིའི་ཕྱིར་མེ་ལོང་ལྟ་བུ་ཞེས་བྱ། ཅིའི་ཕྱིར་རྣམ་པ་ཟླ་བར་བསྒོམ། ཅིའི་ཕྱིར་རྒྱུ་ཨཱ་ལི་ལས་བསྐྱེད་ཅེ་ན། དང་པོ་ནི། ཆོས་ཐམས་ཅད་གཟུགས་བརྙན་གྱི་ཚུལ་དུ་སྣང་བས་མེ་ལོང་དང་འདྲ་བས་མེ་ལོང་ལྟ་བུ་སྟེ། ཡེ་ཤེས་གྲུབ་པ་ལས། ཇི་ལྟར་གཟུགས་བརྙན་མེ་ལོང་ལ། །རང་ཉིད་ངེས་པར་སྣང་བ་བཞིན། །དེ་བཞིན་ཆོས་སྐུའི་ཡེ་ཤེས་ནི། །སྣང་བས་མེ་ལོང་ཞེས་བྱའོ། །དེ་ཉིད་གཟུགས་ཀྱི་ཕུང་པོ་དང་། །ཀུན་གཞི་དག་པའི་བདག་ཉིད་དོ། །གཉིས་པ་དེ་ཟླ་བ་ལྟ་བུར་བསྒོམ་པ་ནི་ཟླ་བ་དང་འདྲ་བའི་ཕྱིར་ཏེ། རྡོ་རྗེ་རྩེ་མོ་དང་ཁ་སྦྱོར་ལས། ཡིད་གཉིས་ཀུན་ལས་རྣམ་གྲོལ་བ། །རྣམ་པར་རྟོག་པའི་རབ་རིབ་འཕྲོག །ཉོན་མོངས་དྲི་མ་ཀུན་ལས་འདས། །ཟླ་མཚུངས་སེམས་ནི་ཟླ་བ་ཉིད། །ཅེས་དྲི་མ་དང་བྲལ་བར་འདྲ་བས་སོ། །གསུམ་པ་དེ་ཨཱ་ལི་ལས་བསྐྱེད་པ་ནི། དེ་ཉིད་སྐུའི་རྣམ་པར་འབྱུང་བ་ན་མཚན་གྱི་རྣམ་པ་སྟེ། སངས་རྒྱས་ཀུན་གྱི་ཡོན་ཏན་འདིར། །ཨ་སོགས་གཟུགས་ཀྱིས་འཇུག་པར་འགྱུར། །ཞེས་སོ། །ཡང་མངོན་བྱང་གཉིས་པ་འདི་ལ་བཞི་ལས། དང་པོ་ཅིའི་ཕྱིར་མཉམ་པ་ཉིད་ཡིན་ཞེ་ན། ཡེ་ཤེས་གང་གིས་ཐམས་ཅད་མཉམ་པ་ཉིད་དུ་རྟོགས་པ་སྟེ། དེ་བཞིན་གཤེགས་ཀུན་ཡེ་ཤེས་ཏེ། །རང་གི་དང་ནི་འགྲོ་བ་ཡི། །དངོས་ཉིད་གཅིག་པར་ཐུགས་ཆུད་པས། །མཉམ་ཉིད་ཡེ་ཤེས་ཞེས་བྱའོ། །ཞེའོ། །ཡེ་ཤེས་དེ་ནི་ཚོར་བའི་ཕུང་པོ་དང་། ཉོན་མོངས་པ་ཅན་གྱི་ཡིད་དག་པའི་བདག་ཉིད་ཀྱི་ཕྱིར་རོ། །གཉིས་པ་དེ་ཉི་མར་བསྒོམ་པ་ནི་ཉི་མ་དང་འདྲ་བའི་ཕྱིར་ཏེ། ཉི་མས་མུན་པ་ཐམས་ཅད་མཉམ་པར་འཇོམས་པས་སམ། ཡང་ན་ཡེ་ཤེས་དེ་སེམས་ཅན་ལ་ཆགས་པས་སེམས་ཅན་འཛིན་པ་སྟེ། སྙིང་རྗེས་སྡུག་བསྔལ་ཡང་དག་འབྱུང་། །སེམས་ཅན་རྗེས་སུ་འཛིན་པའོ། །དགེ་བའི་ཆོས་ཀྱིས་ཡང་དག་གང་། །ཉོན་མོངས་ཐམས་ཅད་ངེས་པར་གནོན། །ཞེའོ། །གསུམ་པ་ཉི་མ་འོད་དམར་པོར་བསྒོམ་པ་ནི་ཡེ་ཤེས་དེ་སེམས་ཅན་ལ་རྗེས་སུ་ཆགས་པའོ། །བཞི་པ་ཀཱ་ལིས་མཚན་པ་ནི། ཡེ་ཤེས་དེ་སྐུའི་རྣམ་པར་འབྱུང་བ་ན་དཔེ་བྱད་བརྒྱད་ཅུར་འགྱུར་བས་ཀཱ་ལི་ལས་བསྐྱེད་དེ། སངས་རྒྱས་ཡོན་ཏན་ཀ་སོགས་ཀྱི། །རྣལ་འབྱོར་གྱིས་ནི་འཇུག་པར་འགྱུར། །ཞེའོ། །འོག་མ་གསུམ་ལ་གཉིས་གཉིས་ལས། དང་པོ་མངོན་བྱང་གསུམ་པ་སོ་སོར་རྟོག་པའི་ཡེ་ཤེས་ནི། རང་བཞིན་གྱིས་འོད་གསལ་བས། ཤེས་བྱ་ཐམས་ཅད་མ་འདྲེས་པར་མཁྱེན་པ་སྟེ། གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་པས། །སོ་སོར་རྟོག་པ་ཅན་ཞེས་བཤད། །ཅེས་སོ། །དེ་ཉིད་འདུ་ཤེས་ཀྱི་ཕུང་པོ་དང་། ཡིད་ཀྱི་རྣམ་པར་ཤེས་པའི་བདག་ཉིད་ཅན་ནོ། །གཉིས་པ་དེ་ཕྱག་མཚན་དུ་བསྒོམ་པའང་འདྲ་བའི་ཕྱིར་ཏེ། བྱང་ཆུབ་སྤྱོད་དང་དེ་བཞིན་ས། །ཡེ་ཤེས་དག་པ་ཟག་པ་མེད། །དེ་ཕྱིར་དཀྱིལ་འཁོར་ནང་གནས་པ། །དེ་ཡི་ནང་གི་ཕྱག་མཚན་བརྟག །ཅེས་སོ། །མངོན་བྱང་བཞི་པ་བྱ་བ་ནན་ཏན་ནི། སངས་རྒྱས་ཀྱི་མཛད་པ་རོ་གཅིག་པ་སྟེ། ཀུན་ཏུ་ཀུན་ནས་སངས་རྒྱས་ཀྱི། །སངས་རྒྱས་མཛད་པ་ལ་འཇུག་པ། །སངས་རྒྱས་ཐམས་ཅད་མཛད་གཅིག་པས། །བྱ་བ་གྲུབ་པ་ཞེས་བཤད་དོ། །ཞེས་སོ། །དེ་ཉིད་འདུ་བྱེད་ཀྱི་ཕུང་པོ་དང་། སྒོ་ལྔའི་རྣམ་ཤེས་ཀྱི་བདག་ཉིད་དོ། །གཉིས་པ་འདྲེས་པར་བསྒོམ་པའང་འདིར་གཅིག་ཏུ་གྱུར་པ་དང་འདྲ་བས་སོ། །མངོན་བྱང་ལྔ་པ་ཆོས་ཀྱི་དབྱིངས་ལ་ཆོས་ནི་ཕུང་པོ་ལྔའི་བདག་ཉིད་དམ། སྒྲིབ་པ་ཐམས་ཅད་ཀྱི་བདག་ཉིད་དོ། །དེ་དག་གི་དབྱིངས་ནི་རྒྱུའོ། །དེ་གང་ཞེ་ན། རྣམ་པར་དག་པ་སྟེ། སྤྲོས་པ་དང་བྲལ་བའོ། །ཡང་ན་ཆོས་ནི་སངས་རྒྱས་ཀྱི་ཆོས་སོ། །དབྱིངས་ནི་རྒྱུའོ། །དེ་སྒྲིབ་པ་ཐམས་ཅད་ལས་གྲོལ་བ་སྟེ། གང་ཚེ་ཉོན་མོངས་ཤེས་བྱའི་སྒྲིབ། །ཐམས་ཅད་ལས་གྲོལ་དེ་ཡི་ཚེ། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་དག་ཅེས་བཤད་དོ། །དེ་ཉིད་རྣམ་ཤེས་ཀྱི་ཕུང་པོ་དང་། །བྱང་ཆུབ་སེམས་ཀྱི་བདག་ཉིད་དོ། །གཉིས་པ་དེ་སྐུ་རྫོགས་པ་དང་མཐུན་ཏེ། སངས་རྒྱས་ཀྱི་ཡེ་ཤེས་ཐམས་ཅད་ཡོངས་སུ་རྫོགས་པ་དང་འདྲ་བས་སོ། །དེ་ལྟར་མངོན་པར་བྱང་ཆུབ་པ་ལྔ་པོ་འདིས་སྦྱང་གཞི་དང་། ལམ་དང་། འབྲས་བུ་དང་བཅས་པ་གོ་བར་བྱའོ། །ཡེ་ཤེས་ཀྱི་ངེས་ཚིག་འཕགས་པ་བྱམས་པས་བཤད་པ་ལ་སོགས་པའང་འདི་དང་དོན་འདྲའོ། །འདིར་བྲིས་པ་ནི་སངས་རྒྱས་ཀྱི་སའི་དགོངས་པ་དང་། ཡེ་ཤེས་གྲུབ་པ་ལས་གསུངས་པ་དང་། རྡོ་རྗེ་རྩེ་མོ་དང་། ཁ་སྦྱོར་ལས་གསུངས་པ་ཡིན་ནོ་ཞེས་རྗེ་བཙུན་སྐུ་མཆེད་ཀྱི་རྣམ་བཤད་གཉིས་ལས་འབྱུང་ངོ་། །གཉིས་པ་ལ་གསུམ། མངོན་བྱང་རང་གི་ངོ་བོ། དེ་ཤེས་བྱེད་དང་སྦྱར་བ། གཞན་གྱིས་བརྟགས་པའི་མཐའ་དགག་པའོ། །དང་པོ་ནི། དེ་ལྟར་མི་མཉམ་སྦྱོར་གྱི་མངོན་བྱང་ལས་གཙོ་བོ་བསྐྱེད་པ་ལྟར། མཉམ་སྦྱོར་གྱི་མངོན་བྱང་ལས་ཀྱང་གཙོ་བོ་བསྐྱེད་པར་བྱ་སྟེ། སྔར་གྱི་མི་མཉམ་སྦྱོར་དང་། མངོན་བྱང་དང་པོ་མི་འདྲ་བ་ནི་ཨཱ་ལི་ལས་ཟླ་བའི་དཀྱིལ་འཁོར་ཟུར་གསུམ་པར་ཨཱ་ལིས་མཚན་པ་ཡིན་པས། དང་པོ་མི་འདྲ་སྟེ། དཔལ་ཁ་སྦྱོར་ལས། གྲུ་གསུམ་རྒྱ་ཆེན་རང་བཞིན་ཅན། །སངས་རྒྱས་ཀུན་གྱི་ཡོན་ཏན་གནས། །འདི་ཡང་ཨ་སོགས་གཟུགས་ཀྱི་ནི། །སངས་རྒྱས་ཡོན་ཏན་འཇུག་པར་འགྱུར། །ཤེལ་དང་ཟླ་བ་ལྟ་བུར་ནི། །དེ་ཡི་སྟེང་དུ་འཇུག་པར་འགྱུར། །ཞེས་བྱ་བ་དང་། གྲུ་གསུམ་དུ་བསྒོམ་པའང་། དེ་ལས་ཟླ་བའི་དཀྱིལ་འཁོར་ནི། །གྲུ་གསུམ་ཉིད་དུ་བསྒོམ་པར་བྱ། །ཞེས་སོ། །གཉིས་པའང་མི་འདྲ་སྟེ། ཀཱ་ལི་བརྒྱད་ཅུ་ལས་མཉམ་པར་སྦྱོར་བ་སྟེ། ཡང་ཟླ་བ་གྲུ་གསུམ་ཀཱ་ལིས་བརྒྱན་པའོ། །ཡང་གསུངས་པ། ཟླ་བའི་སྟེང་དུ་ཡང་ཟླ་བ། །བྱང་ཆུབ་ཟླ་བ་གཉིས་པ་ཅན། །སངས་རྒྱས་ཡོན་ཏན་ཀ་སོགས་ཀྱི། །སྐར་མདའ་འདིར་ཡང་འཇུག་པར་འགྱུར། །ཞེས་སོ། །གསུམ་པའང་མི་འདྲ་སྟེ། དེ་ལྟ་བུའི་ཟླ་བ་གཉིས་ནི། རྡོ་རྗེ་སེམས་དཔའ་ཉིད་ཀྱི་གདན་ཏེ། བསྐྱེད་པའི་གཞིའོ་དེའི་སྟེང་དུ། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པའང་འདོད་མི་བྱ། །ཧཱུྃ་ལས་བྱུང་བའི་རྡོ་རྗེ་རྩེ་ལྔ་པ་དཀར་པོ་ཧཱུྃ་གིས་མ་མཚན་པའོ། །དེ་ལྟར་ཡང་། བྱང་ཆུབ་སྤྱོད་པ་བླ་ན་མེད། །དེ་ཡི་ས་ནི་རྟོགས་པ་སྟེ། །ཟླ་བའི་དཀྱིལ་འཁོར་དབུས་སུ་ནི། །རྡོ་རྗེ་ངེས་པར་བརྟག་པར་བྱ། །ཞེས་སོ། །བཞི་པའང་མི་འདྲ་སྟེ། དེ་ལས་འོད་སྤྲོ་བ་དང་། བསྡུ་བ་བྱས་པ་ལས་གཅིག་ཏུ་གྱུར་པའོ། །ཡང་གསུངས་པ། རྡོ་རྗེ་སེམས་དཔའི་རྡོ་རྗེ་ནི། །རྩེ་མོ་ལྔ་པ་འོད་ཟེར་ཅན། །ཞེས་བྱ་བ་དང་། འདིས་ནི་སྔགས་ཀྱི་རྣལ་འབྱོར་གྱིས། །སྤྲོ་བ་དང་ནི་བསྡུ་བ་བྱ། །ཞེས་སོ། །ལྔ་པ་ཡང་མི་འདྲ་སྟེ། སེམས་དཔའི་གཟུགས་བརྙན་ལས་བྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཅེས་བྱ་སྟེ། སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ་སྟེ། ཡང་གསུངས་པ། རྡོ་རྗེ་ཡོངས་གྱུར་དེ་མ་ཐག །རྣམ་པ་ཀུན་གྱི་མཆོག་ལྡན་པའི། །ཟླ་བའི་ཁ་དོག་མཉམ་འོད་ཀྱི། །རྡོ་རྗེ་སེམས་དཔའ་བསམ་པར་བྱ། །ཞེས་གསུངས་པ་ལྟ་བུའོ། །དེ་ལྟ་བུའི་མངོན་པར་བྱང་ཆུབ་པ་ལྔ་པོ་དེ་ནི་འདི་ཡིན་ཏེ། སེམས་སོ་སོར་རྟོག་པ་དང་། དེ་གསལ་བར་བྱེད་པ་དང་། དེ་བརྟན་པར་བྱེད་པ་དང་། ཤིན་ཏུ་བརྟན་པར་བྱེད་པ་དང་། རྡོ་རྗེའི་སྐུར་གྱུར་པའོ། །དེ་ནི་ཡེ་ཤེས་ལྔར་འགྱུར་རོ། །ཞེས་བྱ་བར་དགོངས་པའོ། །ཞེས་རྗེ་བཙུན་རིན་པོ་ཆེས་གསུངས་སོ། །གཉིས་པ་ནི། དེ་ལྟ་བུའི་མངོན་བྱང་དེ་ཉིད་རྒྱུད་གང་ལས་གསུངས་སྙམ་ན། རྩ་བའི་རྒྱུད་ལས་གསུངས་ཏེ། ཇི་སྐད་དུ། ཨཱ་ལི་ཀཱ་ལི་མཉམ་སྦྱོར་བ། །རྡོ་རྗེ་སེམས་དཔའ་ཉིད་ཀྱི་གདན། །ཡི་གེ་ལས་བྱུང་གོང་བུ་ལ། །ཧཱུྃ་ཕཊ་རྣམ་པ་འདོད་མི་བྱ། །སེམས་དཔའི་གཟུགས་བརྙན་ལས་འབྱུང་བའི། །དཀྱིལ་འཁོར་བདག་པོ་རྣམ་པར་བསྒོམ། །ཕྱག་མཚན་ཞལ་སོགས་གོང་མ་བཞིན། །ཟླ་བ་ཆུ་ཤེལ་ནོར་བུའི་འོད། །ཞེས་གསལ་བར་གསུངས་ཤིང་། དེའི་དོན་རྒྱ་གར་བའི་འགྲེལ་པ་རྣམས་ལས་བཤད་པ་སྲོལ་མི་འདྲ་བ་དྲུག་ཙམ་སྣང་ཡང་། འདིར་རྗེ་བཙུན་བིརྺ་པ་ཡབ་སྲས་ཀྱི་སྲོལ་འཛིན་སློབ་དཔོན་མི་ཐུབ་ཟླ་བའི་སྔར་བཤད་པ་ལྟར་དུ་གསལ་བར་གསུངས་ཏེ། དཀའ་འགྲེལ་ཀུ་མུ་ཏི་ལས་ཇི་ལྟར་ལྷ་མོ་རྣམས་ཀྱི་རྣམ་པ་ལྔ་པོ་ངེས་པར་སྦྱོར་བ་འདི་ཉིད་ལྷན་ཅིག་སྐྱེས་པ་བཅོམ་ལྡན་འདས་ཀྱིའང་ཇི་ལྟ་བ་དེ་ལྟ་བུ་ཡིན་ནམ་ཞེ་ན། མི་འདྲ་བར་བསྟན་པའི་ཕྱིར་ཨཱ་ལི་ཀཱ་ལི་ཞེས་བྱ་བ་ལ་སོགས་པ་གསུངས་ཏེ། ཨཱ་ལི་དང་ཀཱ་ལི་དག་ནི་མཉམ་པས་ཟླ་བའི་རྣམ་པ་ལས་མི་མཉམ་པ་མེད་པའི་ངོ་བོས་ཡིན་ལ། རང་གི་ས་བོན་ཡོངས་སུ་གྱུར་བའི་ཟླ་བ་ཀུན་ཏུ་སྦྱོར་བ་ནི། ཨཱ་ལི་ཀཱ་ལི་མཉམ་པར་སྦྱོར་བའོ་ཞེས་སོགས་མཉམ་སྦྱོར་གྱི་མངོན་བྱང་དུ་བསྙོན་མེད་པར་བཀྲལ་བ་ལ། སློབ་དཔོན་འདིས་གུར་རིགས་བསྡུས་ཀྱི་སྒྲུབ་ཐབས་སུ་ཡང་གསལ་བར་བཤད་པས་གཞུང་འདི་རྣམས་ལ་བརྟེན་ནས་རྗེ་བཙུན་ས་སྐྱ་པ་ཡབ་སྲས་རྣམས་ཀྱིས་མཉམ་སྦྱོར་དུ་བཤད་པ་ཡིན་ནོ། །གསུམ་པ་ནི། དེ་ལྟར་རྗེ་བཙུན་ས་སྐྱ་པས་སྔར་གྱི། ཨཱ་ལི་ཀཱ་ལི་མཉམ་སྦྱོར་བ། །ཞེས་སོགས་ཀྱི་གཞུང་གི་དོན་སློབ་དཔོན་ཤཱནྟི་པ་སོགས་ཀྱིས་བདག་མེད་མའི་མངོན་བྱང་གི་མཇུག་སྡུད་དུ་འཆད་པ་ལ་དགག་པ་མཛད་ཅིང་། རང་ལུགས་སྔར་བཤད་པ་ལྟར་བཞེད་པ་ལ་གནས་དྲུག་པས། གཟུ་བོར་གནས་པའི་བློས་དཔྱད་པ་ཡིན་ཟེར་ནས། རྗེ་བཙུན་གྱི་ལུགས་མི་འཐད། ཤཱནྟི་པའི་ལུགས་འཐད་པའི་སྤྲོས་པ་མང་དུ་བྲིས་པ་ལ། གནད་ཀྱི་ཟླ་ཟེར་ལས། ལུང་རིགས་ཀྱིས་སུན་ཕྱུང་ནས། རྗེ་བཙུན་མཆོག་གི་བཞེད་པ་གཞུང་འཛུགས་པར་མཛད་པ་ནི་རྣམ་བཤད་དེ་ཉིད་དུ་བལྟ་བར་བྱའོ། །གསུམ་པ་ནི། དེ་ལ་མཉམ་སྦྱོར་མི་མཉམ་སྦྱོར་གཉིས་གང་རུང་ཅིག་བསྟན་པས་ཆོག་མོད། གཉིས་ཀ་བསྟན་དགོས་པའི་རྒྱུ་མཚན་ཅི་ཞེ་ན། དབྱིངས་དང་ཡེ་ཤེས་རྒྱས་གདབ་ཕྱིར། །རང་བཞིན་གྱིས་དག་རྒྱུ་འབྲས་ཕྱིར། །ཐིག་ལེའི་རིམ་ཕྱིར་ལུགས་སེམས་ཕྱིར། །དབང་ཕྱིར་དགོས་པ་བསམ་ཡས་ཕྱིར། །ཞེས་གསུངས་ཏེ། འདི་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། སྤྱིར་ཆོས་ཐམས་ཅད་རྒྱུ་ལམ་འབྲས་བུ་གསུམ་དུ་འདུ་བའི་ཕྱིར། འདིར་ཡང་དེ་གསུམ་དུ་འདུ་བར་བསྟན་ཏོ། །དེའང་གཞུང་ལས། ཐོག་མར་འབྲས་བུ་ནས་བསྟན་ཀྱང་། འདིར་བཤད་བདེ་བས་རྒྱུ་འབྲས་གོ་རིམ་བཞིན་དུ་བརྗོད་ན། ལུས་སེམས་ཕྱིར་ཞེས་པས་རྒྱུ་རྒྱུད་བསྟན། རང་བཞིན་གྱིས་དག་རྒྱུ་འབྲས་ཕྱིར་དང་། ཐིག་ལེའི་རིམ་ཕྱིར་དང་། དབང་ཕྱིར་རྣམས་ཀྱིས་ལམ་བསྟན། དབྱིངས་དང་ཡེ་ཤེས་རྒྱས་གདབ་ཕྱིར་གྱིས་འབྲས་བུ་བསྟན། དགོས་པ་བསམ་ཡས་ཕྱིར་གྱིས་མཇུག་བསྡུ་བའི་ཚུལ་གྱིས་རྒྱུ་འབྲས་གསུམ་ཀ་བསྟན་ནོ། །གཉིས་པ་ལ་གསུམ་སྟེ། སྦྱང་གཞིའི་རྒྱུའི་རྒྱུད་དང་། སྦྱོང་བྱེད་ཐབས་ཀྱི་རྒྱུད་དང་། གྲུབ་པ་འབྲས་བུའི་རྒྱུད་ལ་སྦྱར་ནས་བཤད་པའོ། །དང་པོ་ནི། ལུས་སེམས་ཕྱིར་ཞེས་པ་སྟེ། ལུས་ནི་ལས་ཀྱི་དབང་གིས་བགོས་པའི་བག་ཆགས་ཀྱིས་རྐྱེན་བྱས་ནས། འབྱུང་བ་ལྔ་དང་། ཉོན་མོངས་པ་ལྔ་ལ་སོགས་པ་ལས་སྐྱེ་བ་དང་། འགའ་ཞིག་སྨོན་ལམ་གྱི་དབང་གི་སྐྱེ་བ་ཡང་ཡོད་ལ། སྦྱང་གཞི་དེའི་གཉེན་པོར་མི་མཉམ་སྦྱོར་གྱི་མངོན་བྱང་གསུངས་ཏེ། དེའང་རྒྱུ་དུས་སུ་ལུས་གྲུབ་པ་ན་ཕ་མའི་བྱང་སེམས་དཀར་དམར་གཉིས་ཚོགས་པས་ན། མངོན་བྱང་ལ་ཡང་ཟླ་བ་དང་། ཉི་མ་བར་དོའི་རྣམ་ཤེས་འོངས་ཏེ། ཁམས་གཉིས་ཀྱི་བར་དུ་གནས་པ་ནི་ཉི་ཟླའི་བར་དུ་ས་བོན་དང་ཕྱག་མཚན། དེ་ལས་མངལ་གྱི་གནས་སྐབས་བཅུར་ལུས་གྲུབ་པ་ནི། མངོན་བྱང་དང་པོ་གསུམ་རོ་གཅིག་ཏུ་འདྲེས་པ། དེ་ལས་མིའི་ལུས་གྲུབ་པ་ནི་ལྷའི་སྐུ་བསྐྱེད་པ་སྟེ། མདོར་ན་མི་མཉམ་སྦྱོར་ལས་བསྐྱེད་པ་ནི། ལུས་གྲུབ་པ་དང་ཆོས་མཚུངས་སོ། །སེམས་ནི་རང་བཞིན་གྱིས་འོད་གསལ་བ་སྟེ། ཆོས་ཀྱི་སྐུའི་རང་བཞིན་ཡིན་ལ། སྦྱང་གཞི་དེའི་གཉེན་པོར་མཉམ་སྦྱོར་གྱི་མངོན་བྱང་གསུངས་ཏེ། དེ་ཡང་སེམས་ཉིད་རང་རིག་པ་ཙམ་དུ་གནས་པ་ནི་ཟླ་བ་དང་པོ། དེ་གསལ་བར་རྟོགས་པ་ནི་ཟླ་བ་གཉིས་པ། དེ་གཉིས་ཀྱི་ངོ་བོ་སྟོང་ཉིད་དུ་གནས་པ་ནི་ཟླ་བ་གཉིས་ཀྱི་སྟེང་དུ་རྡོ་རྗེ། གསལ་སྟོང་ཟུང་འཇུག་དེས་འཁོར་འདས་གཉིས་ཀྱི་རྒྱུ་བྱེད་པ་ནི་འོད་ཟེར་གྱི་སྤྲོ་བསྡུ་དང་བཅས་པ། ལམ་གྱིས་སྦྱངས་པས་སྤྲོས་བྲལ་དེ་ཁོ་ན་ཉིད་ཀྱི་དོན་མཐོང་བ་ནི་ལྷའི་སྐུ་བསྐྱེད་པའོ། །དེ་ཡང་ཇི་སྐད་དུ། ལུས་ནི་འབྱུང་བ་བཞི་ལ་སོགས། །ལས་དང་ཉོན་མོངས་སོགས་ལས་གྲུབ། །སེམས་ནི་རང་བཞིན་ཆོས་ཉིད་དེ། །འོད་གསལ་བར་ནི་གྲུབ་པ་འོ། །མི་མཉམ་མཉམ་པས་མཚོན་པར་གསལ། །ཞེས་གསུངས་སོ། །གཉིས་པ་ལ་གཉིས། སྨིན་བྱེད་དབང་དང་། གྲོལ་བྱེད་ལམ་ལ་སྦྱར་བའོ། །དང་པོ་ནི། མཉམ་སྦྱོར་གྱིས་གསང་དབང་མཚོན་ལ། མི་མཉམ་སྦྱོར་གྱི་ཤེས་རབ་ཡེ་ཤེས་ཀྱི་དབང་མཚོན་ཏེ། རྗེ་བཙུན་གྱིས་དེ་ལ་གསང་དབང་གི་དུས་སུ་སློབ་མ་ལ་རྣམ་པར་རྟོག་པའི་གྲྭ་དང་བཅས་པས་ཟུར་གསུམ་པའོ། །ཤེས་རབ་ཡེ་ཤེས་ཀྱི་དུས་སུ་མི་རྟོག་པས་ཟླུམ་པོའོ། །གསང་དབང་ལ་གཉིས་ཀའི་བྱང་ཆུབ་ཀྱི་སེམས་དཀར་བ་དང་ལྡན་པས་ན་གཉིས་ཀའང་ཟླ་བའོ། །ཤེས་རབ་ཡེ་ཤེས་ཀྱི་ཤེས་རབ་ཉི་མ་ལྟར་དམར་ཞིང་ཐབས་དཀར་བས་ན་ཟླ་བ་དང་ཉི་མའོ། །གསང་དབང་གི་བྱང་ཆུབ་ཀྱི་སེམས་ནི། མཐེ་བོང་སྲིན་ལག་དག་གིས་ནི། །སློབ་མའི་ཁར་ནི་བཏུང་བར་བྱ། །ཞེས་འབྱུང་བས་ན་མི་འགེགས་པས་ཧཱུྃ་ཕཊ་མེད་པའོ། །ཤེས་རབ་ཡེ་ཤེས་འགེགས་པས་ན་ས་བོན་ཡོད་པའོ། །གསང་དབང་གི་ཐིག་ལེ་སྤྲོ་བས་ན་འོད་སྤྲོ་བའོ། །ཤེས་རབ་ཡེ་ཤེས་འཛིན་པས་ན་འོད་མི་སྤྲོ་བའོ། །གསང་དབང་གི་བྱང་ཆུབ་ཀྱི་སེམས་ཐིག་ལེ་ལ་བརྟན་པས་སམ། རང་བཞིན་བརྒྱད་ཅུའི་རྟོག་པའི་དྲི་མ་དང་བྲལ་བས་དཀར་བའོ། །ཤེས་རབ་ཡེ་ཤེས་ཀྱི་བདེ་བ་ནི་བདེ་བ་གནག་ཅིང་ཞེས་པ་ལ་སོགས་པས་དཀར་བ་མ་ཡིན་པའོ་ཞེས་བྱ་བ་ལ་དགོངས་པའོ་ཞེས་གསུང་ཞིང་། རྗེ་བཙུན་རྩེ་མོས་ཀྱང་དེ་བཞིན་དུ་བཤད་དོ། །འདིར་གཉིས་ཀའི་བྱང་སེམས་དཀར་བ་ཞེས་པའི་དོན་ལ། ཁ་ཅིག་ཡུམ་ལ་དཀར་ཆ་ཡོད་པས་དེ་ཡང་ཕྱུང་བས་ན་གཉིས་ཀའི་དཀར་པོའོ་ཞེས་དང་། ལ་ལ་དག་ཡབ་ཀྱི་བྱང་སེམས་ལས་ཡུམ་གྱི་དམར་ཆ་མངོན་དུ་མི་བྱེད་པས་གཉིས་ཀ་དཀར་པོ་ཞེས་དང་། གཞན་དག་ཡུམ་ལ་དམར་ཆ་ཡོད་ཀྱང་རང་བཞིན་བརྒྱད་ཅུའི་རྟོག་པ་དང་བྲལ་བའི་ཆ་ནས་དཀར་པོར་བཞག་པས་གཉིས་ཀ་དཀར་པོ་ཞེས་དང་། འགའ་ཞིག་སློབ་མའི་གཞིར་གནས་ཀྱི་བྱང་སེམས་ཀྱི་སྟེང་དུ་སློབ་དཔོན་གྱིས་ཕྱུང་བའི་བྱང་སེམས་བླུགས་པས་གཉིས་ཀ་དཀར་པོའོ་ཞེས་འདོད་དོ། །དེ་ལ་ཕྱོགས་དང་པོ་མི་འཐད་དེ། སྙོམས་འཇུག་གི་ཚེ་ཡུམ་གྱི་དཀར་ཆ་བབས་ན་དེ་འཆི་ལྟས་སུ་བདེ་མཆོག་སྡོམ་འབྱུང་དང་། དུས་འཁོར་དུ་བཤད་པ་དང་། གསང་དབང་གི་ཚེ་ཡུམ་ལ་དཀར་ཆ་བབས་པའང་ད་དུང་བསྒྲུབ་བྱར་འདུག་པའི་ཕྱིར་རོ། །གཉིས་པའང་མི་འཐད་དེ། དེའི་ཚེ་དམར་ཆ་མངོན་དུ་མི་བྱེད་ན་དགའ་བོ་མངལ་འཇུག་གི་མདོ་ལས། མ་ནད་པར་གྱུར་པ་དང་། ཆགས་པའི་སེམས་མེད་ན་དམར་ཆ་མི་འབབ་ལ། གཞན་སྙོམས་པར་འཇུག་རེས་ཀྱིས་འབབ་པར་བཤད་པ་ལས། འདིར་གསང་དབང་གི་རྟེན་དུ་རིག་མ་ནད་ཀྱིས་བཏབ་པ་མི་དགོས་ཏེ། ཤིན་ཏུ་བཞིན་བཟང་མིག་ཡངས་མ། །གཟུགས་དང་ལང་ཚོས་རྣམ་པར་བརྒྱན། །ཞེས་བཤད་པའི་ཕྱིར་རོ། །དེ་བཞིན་དུ་ཆགས་པའི་སེམས་མེད་པའང་མི་དགོས་ཏེ། ལམ་འབྲས་ལས། གཉིས་ཀ་འདོད་པ་མཉམ་པར་དགོས་པར་བཤད་པའི་ཕྱིར་རོ། །གསུམ་པའང་མི་འཐད་དེ། གསང་དབང་ཐོབ་ནས་རང་བཞིན་བརྒྱད་ཅུའི་ཀུན་རྟོགས་དང་བྲལ་བ་ཡིན་ཀྱང་། འདིར་དེའི་བྲལ་ཆ་ནས་དཀར་པོར་འཇོག་པ་མི་འཐད་དེ། གསང་དབང་མ་ཐོབ་པའི་ཕྱིར་དང་། རྟོག་པའི་གྲྭ་ཟུར་ཅན་དུ་གསུངས་པའི་ཕྱིར་རོ། །བཞི་པ་མི་འཐད་དེ། རྗེ་བཙུན་རྩེ་མོས། གསང་དབང་གི་ཐབས་ཤེས་རབ་གཉིས་ཀའི་བྱང་སེམས་ཟླ་བ་ལྟར་དཀར་བས་ཟླ་བ་གཉིས་སོ་ཞེས་གཉིས་ཀའི་དོན་ཡབ་ཡུམ་ལ་ངོས་གཟུང་གི དཔོན་སློབ་ལ་མ་བཤད་པའི་ཕྱིར་རོ། །དེས་ན་ལུགས་དེ་རྣམས་ནི་མི་འཐད་པ་ཁོ་ན་ཡིན་ནོ། །བླ་མ་མཁས་པ་དག་གསང་དབང་བསྐུར་བའི་ཕྱིར་སློབ་དཔོན་ཡབ་ཡུམ་སྙོམས་པར་ཞུགས་ནས། ཡབ་ཀྱི་བྱང་སེམས་བབས་པའི་དྲོད་ཉམས་པར་བྱས་པ་དེ་ཉིད་ཡུམ་གྱི་བྷ་གར་བཞག་པ་དེས་སློབ་མ་ལ་དབང་བསྐུར་བ་ཡིན་ཏེ། དེས་ན་ཡབ་ཀྱི་བྱང་སེམས་དེ་ཉིད་ཡུམ་གྱི་བྷ་ག་ནས་ལེན་པའི་ཕྱིར། གཉིས་ཀའི་བྱང་སེམས་དཀར་བའོ་ཞེས་པའི་ཐ་སྙད་མཛད་པ་སྟེ། དཔེར་ན་མཎྜལ་གྱི་སྟེང་གི་ནས་ལ་མཎྜལ་གྱི་ནས་ཞེས་བརྟེན་པ་ལ། རྟེན་གྱི་མིང་བཏགས་པ་ལྟ་བུའོ་ཞེས་གསུངས་པ་ལའང་རྗེ་བཙུན་ཡབ་ལས་ཐོབ་པ་ལ་གཉིས་ཀའི་བྱང་སེམས་ཀྱི་དོན་མ་ཚང་བའི་སྐྱོན་ཡོད་པ་འདྲའོ། །དེས་ན་དོན་འདི་ཡིན་ཏེ། སཾ་པུ་ཊི་ལས། སིཧླ་ག་པུར་བགོས་པ་ནི། །ཇི་སྲིད་ཁུ་བ་ལྡན་གྱུར་པ། །དེ་སྲིད་ཕྱག་རྒྱ་བསྟེན་པར་བྱ། །ཞེས་པའི་འགྲེལ་པར། རྗེ་བཙུན་རྩེ་མོས། སིཧླ་ཞེས་བྱ་བ་ལ་སོགས་པས་ནི་བསྟེན་པའི་ཚད་བསྟན་ཏེ། གསང་བའི་དབང་བསྐུར་བ་ལ་གཉིས་ཀའི་བྱང་ཆུབ་ཀྱི་སེམས་དགོས་པའི་ཕྱིར་ཞེས་གསུངས་པས། གསང་དབང་གི་རྟེན་ཚད་ནི། ཡབ་ཀྱི་རྡོ་རྗེ་ཇི་སྲིད་ཁུ་བ་ལྡན་ལྡན་གྱི་བར་བསྟེན། ཁུ་བ་དེ་ཡང་ཡབ་ཀྱི་རྡོ་རྗེ་དང་མ་བྲལ་བའི་ཚེ། ཡུམ་གྱིས་སིཧླ་ལས་ཅུང་ཟད་བགོས་པས་གཉིས་ཀའི་བྱང་སེམས་དཀར་དམར་ཚང་ཡང་། ཁ་དོག་གཞན་དུ་བསྒྱུར་བར་མ་ནུས་པས་དཀར་པོར་གནས་པའོ། །དེ་ཉིད་ཡབ་ཀྱི་རྡོ་རྗེས་འགྲིམ་ན་ཡབ་ལས་ཐོབ་པ་དང་། ཡུམ་གྱི་མཁར་ཕབ་ནས་འགྲིམ་པ་ཡུམ་ལས་ཐོབ་པ་དང་། ཉ་ཕྱིས་སོགས་སུ་བླུགས་ནས་སྟེར་ན་གྲོལ་བའི་སྟོབས་ལས་ཐོབ་པར་འཇོག་གོ །གསང་དབང་དང་། ཤེས་རབ་ཡེ་ཤེས་ཀྱི་དབང་གཉིས་བསྟེན་ཚད་མི་འདྲ་བའི་ཁྱད་པར་ནི། རྒྱུད་ཡེ་ཤེས་སྙིང་པོར། གསང་བའི་དབང་ནི་སྐྱེ་མཆེད་ཀྱི་ལོ་དང་ལྡན་པའི་གཞོན་ནུ་མ་ལ་ནང་གི་རྐན་ཡོངས་སུ་གཞིབས་པ་ལས་སོ། །ཤེས་རབ་ཡེ་ཤེས་ནི་ཁམས་ཀྱི་ལོ་དང་ལྡན་པའི་གཞོན་ནུ་མ་ལ་ལྷན་ཅིག་བསྲུབ་པ་དང་། བསྲུབ་པའི་ཐབས་ཆེན་པོ་ལས་ཞུ་བ་འཕོ་བའི་དུས་སུ་ཉམས་སུ་མྱོང་བས་སོ་ཞེས་གསུངས་པ་ལྟར་རོ། །བསྟེན་ཚད་མི་འདྲ་བས་བྱང་སེམས་འབབ་ཚུལ་ཡང་མི་འདྲ་སྟེ། གསང་དབང་གི་འབབ་ཚུལ་ནི་སྔར་བཤད་པ་ལྟར་ཡིན་ལ། ཤེས་རབ་ཡེ་ཤེས་ཀྱི་སྐབས་སུ་རྗེ་བཙུན་གྱིས་མཆོག་དབང་གསུམ་གྲོལ་ལམ་ལ་བརྟེན་ནས་བསྐུར་བའི་མན་ངག་ལས། དེ་ལྟ་བུའི་བདེ་ཆེན་གྱི་མེས་ཡབ་ཀྱི་ཁམས་དྭངས་མ་ཞུ་ནས་དབུ་མའི་ལམ་ནས་བྱོན་ཏེ། ཐིག་ལེ་མུ་ཏིག་གི་རྡོག་མ་ལྟ་བུ་རིགས་ཀྱི་བདག་པོའི་ཁར་བབ། ཡུམ་གྱི་ཁམས་དྭངས་མ་བཞུ་ནས་མར་དབུ་མའི་ལམ་ནས་བྱོན་ཏེ་ཐིག་ལེ་དམར་པོར་མཛེས་སྤྱིར་དབབ། དེ་ནས་ཐིག་ལེ་དཀར་དམར་གཉིས་སྙོམས་འཇུག་བྱས་པས་གཅིག་ཏུ་གྱུར་པ་ནི། ཟླ་བ་ཉི་མའི་གོས་ཀྱིས་བཀག་པ་ཞེས་ཀྱང་བྱ། ཉི་ཟླ་གཟས་ཟིན་པའི་དུས་ཞེས་ཀྱང་བྱ་སྟེ། སེམས་ཀྱི་གནད་དོ་ཞེས་གསུངས་པ་ལྟར་ཡིན་ནོ། །གཉིས་པ་ལ་གཉིས་ཏེ། བསྐྱེད་པའི་རིམ་པ་དང་། དེ་ཉིད་རྫོགས་རིམ་ལ་སྦྱར་བའོ། །དང་པོ་ནི། ཐིག་ལེའི་རིམ་ཕྱིར་ཞེས་ཏེ། དེ་ལྟར་དབང་དང་། སྦྱང་གཞིའི་དབང་གིས་བསྐྱེད་རིམ་ལ་ཡང་མཉམ་སྦྱོར། མི་ཉམས་སྦྱོར་གཉིས་གྲུབ་པ་ཡིན་ཏེ། དེ་ཡང་མངལ་དུ་མ་ཞུགས་པར་ཕའི་བྱང་སེམས་ལས་བུ་ཚའི་ལུས་གྲུབ་པ་ཡང་ཡོད་ལ། དེ་དང་སྒོ་བསྟུན་ནས་མཉམ་སྦྱོར་བསྟན་ནོ། །འོན་ཀྱང་བུ་མོ་བསྐྱེད་པ་མི་སྲིད་པའི་ཕྱིར་ཡུམ་གྱི་དཀྱིལ་འཁོར་མཉམ་སྦྱོར་ལས་བསྐྱེད་པ་མ་གསུངས་པ་ཡིན་ཏེ། ཐིག་ལེའི་རིམ་པ་ཐབས་ཕྱོགས་ལ། །ཟག་བཅས་བདེ་བ་བསྐྱེད་པ་ལ། །གཞན་ལ་རག་ལས་མེད་པའང་སྲིད། །ཕ་ཡི་བྱང་སེམས་རྐྱང་པ་ལས། །བུ་ཚའི་ཕུང་ཁམས་བསྐྱེད་པའང་སྲིད། །འོན་ཀྱང་བུ་མོ་སྐྱེད་མི་སྲིད། །ཡབ་ཀྱི་ཕྱོགས་ལས་གཉིས་བྱུང་བའི། །དེས་ན་མཉམ་སྦྱོར་བསྐྱེད་ཆོག་བསྟན། །ཤེས་རབ་ཟག་མེད་བསྐྱེད་པའམ། །ཟུང་འཇུག་མེད་ན་མི་འབྱུང་བས། །མ་ཡི་ཁམས་ནི་རྐྱང་པ་ལས། །བུ་ཚ་བསྐྱེད་པ་མི་སྲིད་དོ། །དེས་ན་ཡུམ་གྱི་ཕྱོགས་ལ་ནི། །མཉམ་སྦྱོར་ཆོ་ག་མ་བསྟན་ནོ། །ཞེས་གསུངས་སོ། །དེས་ན་སྐྱེས་པ་ལ་བུད་མེད་ལ་ལྟོས་པ་དང་། མ་ལྟོས་ཀྱང་འཛག་བདེ་ཉམས་སུ་མྱོང་རྒྱུ་ཡོད་པའི་ཕྱིར། ཡབ་ཀྱི་དཀྱིལ་འཁོར་ལ་མཉམ་སྦྱོར་དང་། མི་མཉམ་སྦྱོར་གཉིས་ཀ་བསྟན་ལ། བུད་མེད་སྐྱེས་པ་ལ་མ་ལྟོས་པའི་འཛག་བདེ་ཉམས་སུ་མྱོང་རྒྱུ་མེད་པའི་ཕྱིར། ཡུམ་གྱི་དཀྱིལ་འཁོར་ལ་མཉམ་སྦྱོར་མ་གསུངས་པ་ཡིན་ནོ། །གཉིས་པ་ལ་གཉིས། རང་བྱིན་རླབས་དང་། དཀྱིལ་འཁོར་འཁོར་ལོ་ལ་སྦྱར་བའོ། །དང་པོ་ནི། རང་བཞིན་གྱིས་དག་རྒྱུ་ཞེས་ཏེ། བསྐྱེད་རིམ་སྔོན་དུ་སོང་ནས་རྫོགས་རིམ་རང་བྱིན་རླབས་བསྒོམ་པ་ན། ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ་དག་པར་ཤེས་པས་གཉིས་ཀ་ཟླ་བར་བསྒོམ་པའི་དུས་སུ་འཁོར་ལོ་བཞི་གསལ་བཏབ་ནས། གཏུམ་མོའི་མེ་སྦར་བས་ལྟེ་བ་དང་སྤྱི་བོའི་འཁོར་ལོ་བཞུ་བཏུལ་མེད་པས་ཟླ་བ་གཉིས་ལ་ཨཱ་ལི་ཀཱ་ལིས་མཚན་པ། སྙིང་ག་དང་མགྲིན་པའི་འཁོར་ལོའི་ཡི་གེ་རྣམས་བསྲེགས་པས་ས་བོན་གྱིས་མ་མཚན་པ། མེ་དེས་དེ་བཞིན་གཤེགས་པའི་རྒྱུད་ལ་འགྲོ་འོང་བྱེད་པས་འོད་ཟེར་གྱི་སྤྲོ་བསྡུ་བྱེད་པ། སྤྱི་བོའི་ཧྃ་ལས་བྱང་སེམས་ཟླ་བ་ལྟར་དཀར་བ་བབས་པས་ཁ་དོག་དཀར་པོ། རང་བྱུང་གི་ཡེ་ཤེས་དེ་མཚན་རྟོག་གིས་མི་ཕྱེད་པས་མངོན་བྱང་གསུམ་པ་རྡོ་རྗེ་བསྒོམ་པ་སྟེ། རང་བཞིན་གྱིས་དག་ཐབས་རྒྱུད་དེ། །ཆོས་རྣམས་རང་བཞིན་སྤྲོས་བྲལ་ལས། །ལམ་དུ་བསྒོམ་པའི་ཉམས་མྱོང་གིས། །དག་ལ་དག་པར་ཤེས་པ་དང་། །འཁོར་ལོ་བཞི་རྫོགས་འབར་འཛག་གི །དུས་སུ་ལྟེ་བ་བདེ་ཆེན་ལ། །ཡི་གེ་རྫོགས་པར་དགོད་པ་དང་། །བཞུ་བཏུལ་མེད་པར་གསལ་བས་ན། །ཟླ་བ་ཨཱ་ལི་ཀཱ་ལིས་མཚན། །མེ་སྦར་སྙིང་མགྲིན་ཡི་གེ་རྣམས། །བསྲེགས་པས་ཕྱག་མཚན་ས་བོན་མེད། །ཕྱོགས་བཅུའི་དེ་བཞིན་གཤེགས་སྐུ་ལ། །འགྲོ་འོང་བྱེད་པས་འོད་ཟེར་སྤྲོ། །བྱང་སེམས་ཟླ་བའི་རྣམ་པར་འབབ། །དེ་ཕྱིར་སྐུ་མདོག་དཀར་པོར་ངེས། །དེ་ལས་སྐྱེས་པའི་ཡེ་ཤེས་ནི། །མཚན་རྟོག་གིས་ནི་མི་ཕྱེད་པས། །མངོན་བྱང་གསུམ་པ་རྡོ་རྗེར་ངེས། །རང་བཞིན་གྱིས་དག་མཉམ་སྦྱོར་རྒྱུའོ། །ཞེས་སོ། །གཉིས་པ་ནི་འབྲས་ཕྱིར་ཞེས་པ་སྟེ། རང་བྱིན་རླབས་སྔོན་དུ་སོང་བས་ཐིག་ལེ་ལ་དབང་ཐོབ་པར་བྱས་ནས། འབྲས་བུ་ཕོ་ཉའི་ལམ་བསྒོམ་པ་ན་སྒྲུབ་པ་པོའི་ཐིག་ལེ་དཀར་པོ་དང་། ཕྱག་རྒྱའི་རཀྟ་དམར་པོ་བབས་པས་ཟླ་བ་དང་ཉི་མ། དེ་རྡོ་རྗེ་དང་པདྨའི་རྩ་སྒོར་འབེབས་པས་ཨཱ་ལི་ཀཱ་ལིས་མ་མཚན་པ། ཕྱིར་འཕོ་བ་བཀག་ནས་གྱེན་དུ་འདྲེན་པས་ཕྱག་མཚན་ལ་ས་བོན་གྱིས་མཚན་པ། ཁམས་གཉིས་པོ་ཡབ་ཡུམ་གྱི་རང་གནས་སུ་འཇོག་པས་འོད་ཟེར་གྱི་སྤྲོ་བསྡུ་མེད་པ། དེ་ལས་སྐྱེས་པའི་ཡེ་ཤེས་ཀྱང་སྣ་ཚོགས་སུ་སྐྱེ་བས་སྐུ་མདོག་ཀྱང་སྣ་ཚོགས་སུ་བསྒོམ་པ་སྟེ། འབྲས་བུ་ཞེས་བྱ་ཕོ་ཉ་ཡི། །ལམ་ལ་གནས་སྐབས་གསུམ་ཀ་རུ། །ཐིག་ལེ་དཀར་དམར་གཉིས་ལ་བརྟེན། །དགོས་པའི་ཕྱིར་ན་ཉི་ཟླར་ངེས། །དེའང་རྩ་སྒོར་འབེབས་མཚོན་པས། །ཨཱ་ལི་ཀཱ་ལིས་མ་མཚན་ནོ། །འགྱུར་བ་བཀག་ནས་ཡར་འདྲེན་པས། །ཕྱག་མཚན་ས་བོན་གྱིས་མཚན་ཏེ། །ཁམས་གཉིས་རང་སར་འཇོག་པའི་ཕྱིར། །འོད་ཟེར་གྱི་ནི་སྤྲོ་བསྡུ་མེད། །དེ་ལས་སྐྱེས་པའི་ཡེ་ཤེས་ཀྱང་། །བདེ་བ་གནག་ཅིང་བདེ་བ་སེར། །ཞེས་སོགས་སྣ་ཚོགས་སུ་སྐྱེ་བས། །སྐུ་མདོག་རྣམས་ལ་མ་ངེས་སོ། །ཉེ་རྒྱུའི་བསྒོམ་ཚུལ་དེ་ལྟ་བུས། །འབྲས་བུ་ལ་ནི་ཉེ་བའི་ཕྱིར། །འབྲས་བུ་ཞེས་ནི་བསྟེན་པ་ཡིན། །ཞེས་སོ། །གསུམ་པ་ལ་གསུམ། མཉམ་སྦྱོར་དབྱིངས་ཀྱི་བཤད་པ། མི་མཉམ་སྦྱོར་ཡེ་ཤེས་ཀྱི་བཤད་པ། རྒྱས་གདབ་ཀྱི་དེ་གཉིས་ཀ་བཤད་པའོ། །དང་པོ་ནི་དབྱིངས་དང་ཡེ་ཤེས་ཏེ། དབྱིངས་རང་བཞིན་གྱིས་དག་པ་དང་། སྤང་བྱ་གློ་བུར་གྱི་དྲི་མ་དག་པས་ན་གཉིས་ཀ་ཟླ་བ། དེ་རྣམ་ཐར་སྒོ་གསུམ་མཚོན་པས་ཟུར་གསུམ། དོན་ཐབས་ཤེས་ཟུང་དུ་འཇུག་པས་ཨཱ་ལི་དང་ཀཱ་ལིས་མཚན་པ། དེ་ལྟ་བུའི་དག་པ་གཉིས་ལྡན་གྱི་ཆོས་སྐུ་དེ་ས་བཅུ་པས་ཀྱང་རྟོགས་པར་དཀའ་བས་མངོན་བྱང་གསུམ་པ་རྡོ་རྗེ། དེ་རིགས་ལྔ་དང་ཡེ་ཤེས་ལྔའི་ཚུལ་དུ་སྣང་བས་རྩེ་ལྔ་པ། ངོ་བོ་སྤྲོས་པ་དང་བྲལ་ཞིང་སྐྱེད་བྱེད་གཞན་མེད་པས་རྡོ་རྗེ་ལ་ས་བོན་གྱིས་མ་མཚན་པ། ཆོས་ཀྱི་སྐུ་དེ་ལས་གཟུགས་ཀྱི་སྐུ་གཉིས་འཕྲོ་ཞིང་རྟེན་བྱེད་པས་རྡོ་རྗེ་ལས་འོད་ཟེར་གྱི་སྤྲོ་བསྡུ་ཡོད་པ། ཆོས་ཀྱི་སྐུ་རང་བཞིན་གྱིས་འོད་གསལ་བས་སྐུ་མདོག་དཀར་པོ་སྟེ། ཇི་སྐད་དུ། དབྱིངས་ནི་རང་བཞིན་རྣམ་དག་དང་། །སྤང་བྱ་གློ་བུར་རྣམ་དག་ལ། །དག་པ་གཉིས་ལྡན་ཆོས་སྐུ་སྟེ། །ཤིན་ཏུ་རྣམ་དག་ཟབ་པའི་ཕྱིར། །ས་བཅུ་པས་ཀྱང་རྟོགས་དཀའ་བས། །མཚོན་བྱེད་རྡོ་རྗེ་རྩེ་ལྔ་པ། །རིགས་ལྔ་ཡེ་ཤེས་ལྔར་སྣང་ཡང་། །ངོ་བོ་ཆོས་སྐུ་སྤྲོས་དང་བྲལ། །ཐོག་མ་ཐ་མ་མེད་པའི་མཆོག །དེ་ལ་སྐྱེད་བྱེད་གཞན་མེད་པས། །ཕྱག་མཚན་ས་བོན་མ་མཚན་ལ། །དེ་ཡང་སྐུ་གཉིས་རྟེན་བྱེད་པས། །འོད་ཟེར་སྤྲོ་དང་བསྡུ་བའོ། །རང་བཞིན་འོད་གསལ་གཞིར་གྱུར་པས། །སྐུ་མདོག་དཀར་པོར་ངེས་པ་ཡིན། །ཐབས་ཤེས་ཟུང་དུ་འཇུག་པའི་ཕྱིར། །ཨཱ་དང་ཀཱ་སོགས་མཚན་པ་དང་། །ཡབ་ཀྱི་རྣམ་པར་ངེས་པའོ། །གཉིས་པ་ནི་ཡེ་ཤེས་ཞེས་བྱ་སྟེ། རྒྱུ་དུས་ཀྱི་ཕུང་པོ་ལྔ་གནས་གྱུར་པ་ལོངས་སྤྱོད་རྫོགས་པའི་སྐུ་ཡེ་ཤེས་ལྔའི་རང་བཞིན་དེ་ཉིད་ཡབ་ཡུམ་ཞལ་སྦྱོར་དུ་བཞུགས་པས་མངོན་བྱང་དང་པོ་གཉིས་ཟླ་བ་དང་ཉི་མ་ཁ་སྦྱར་བ། དེའི་སྤྲུལ་སྐུས་སེམས་ཅན་ཐམས་ཅད་ཀྱི་དོན་མཛད་པས་མངོན་བྱང་གསུམ་པ་རྡོ་རྗེར་མ་ངེས་ཤིང་ཐོད་པ་དང་། སྣ་ཚོགས་རྡོ་རྗེ་དང་། གྲི་གུག་སོགས་ཀྱི་ཕྱག་མཚན་ཡོད་པ། ལོངས་སྐུ་ས་བདུན་མན་ཆད་ལ་སྦས་པས་ཕྱག་མཚན་ལ་ས་བོན་གྱིས་མཚན་པ། སྤྲུལ་སྐུ་མཆོག་འབྲིང་ཐ་མ་གསུམ་ལས་གཞན་མི་སྤྲོ་བས་འོད་ཟེར་གྱི་སྤྲོ་བསྡུ་མེད་པ། ལོངས་སྐུ་ཡེ་ཤེས་ལྔའི་རང་བཞིན་ཡིན་པས་སྐུ་མདོག་དཀར་པོ་ཁོ་ནར་མ་ངེས་ཀྱི་ནག་པོ་དང་སེར་པོ་ལ་སོགས་པ་སྣ་ཚོགས་པའོ། །དེའང་ཇི་སྐད་དུ། ཡེ་ཤེས་རྒྱུ་དུས་ཕུང་པོ་ལྔ། །གནས་གྱུར་ལོངས་སྤྱོད་རྫོགས་པའི་སྐུ། །ཡེ་ཤེས་ལྔ་ཡི་ངོ་བོ་དེ། །ཡབ་ཡུམ་ཞལ་སྦྱོར་དུ་སྣང་བས། །ཉི་ཟླ་གཉིས་སུ་ངེས་པ་ཡིན། །སྤྲུལ་སྐུ་སེམས་ཅན་སྣ་ཚོགས་ཀྱི། །དོན་མཛད་རྡོ་རྗེར་མ་ངེས་སོ། །ལོངས་སྐུ་ས་བདུན་མན་ཆད་ལ། །སྦས་པ་མཚོན་པས་ཕྱག་མཚན་ལ། །ས་བོན་གྱིས་ནི་མཚན་པ་འོ། །སྤྲུལ་སྐུ་རིགས་གསུམ་ལས་གཞན་མེད། །དེས་ན་འོད་ཟེར་སྤྲོ་བསྡུ་མེད། །ཉི་ཟླ་ཟུང་འཇུག་ཐབས་ཤེས་ཡིན། །དེས་ན་སྐུ་མདོག་རྣམ་པ་སོགས། །གཅིག་པ་ཁོ་ནར་མ་ངེས་སོ། །ཞེས་སོ། །གསུམ་པ་ནི། འབྲས་བུ་ཆོས་ཀྱི་སྐུ་དང་། གཟུགས་སྐུ་གཉིས་དབྱེར་མེད་དུ་གནས་པ་ནི་རྒྱས་གདབ་པའི་དོན་ཏེ། ཇི་སྐད་དུ། རྒྱས་གདབ་སྐུ་གསུམ་དབྱེར་མེད་དོ། །ཞེས་སོ། །འདི་དག་གི་དོན་གཞན་ཡང་མང་དུ་ཡོད་མོད། འདིར་དེ་ཙམ་ཞིག་གིས་ཆོག་པས་མ་བཤད་ལ། འདིར་བྲིས་པའི་མན་ངག་གི་བཤད་པ་འདི་ནི་དཔལ་ལྡན་ས་སྐྱ་པཎྜི་ཏའི་སྲས་ཀྱི་ཐུ་བོ། གྲུབ་ཐོབ་ཡོན་ཏན་དཔལ་གྱི་དངོས་སློབ་བློ་གྲོས་དཔལ་གྱིས་བཤད་པ་བཞིན་བྲིས་པ་ཡིན་གསུང་ངོ་། །མདོར་ན། རྒྱུ་དུས་ཀྱི་ལུས་སེམས་གཉིས་མངོན་བྱང་ལྔའི་ཚུལ་དུ་རང་གྲུབ་ཏུ་ཡོད་པ་ནི་སྦྱང་གཞི་ཡིན་ལ། དེ་ལ་གསང་དབང་དང་། ཤེས་རབ་ཡེ་ཤེས་གཉིས་མངོན་བྱང་ལྔའི་ཚུལ་དུ་བསྐུར་བ་ནི་སྨིན་བྱེད་ཡིན་ཞིང་། དེ་ཉིད་བསྐྱེད་རིམ་གྱི་མངོན་བྱང་ལྔ་རྟེན་དུ་བྱས་ནས། རྫོགས་རིམ་རང་བྱིན་རླབས་དང་། དཀྱིལ་འཁོར་འཁོར་ལོ་མངོན་བྱང་ལྔའི་ཚུལ་དུ་བསྒོམས་པས་འབྲས་བུ་ཡེ་ཤེས་ལྔ་མངོན་དུ་གྱུར་ནས་འཚང་རྒྱ་བ་ཡིན་པས། འདི་རྣམས་རྒྱུ་འབྲས་སུ་འགྲོ་བའི་བཤད་པ་ཤེས་དགོས་ཀྱི། མཚོན་དོན་བསྒྲིགས་པ་ཙམ་གྱི་བཤད་པ་ལ་སྙིང་པོ་མེད་དོ། །ཡང་མཉམ་སྦྱོར་དང་། མི་མཉམ་སྦྱོར་གཉིས་ཀྱིས་ལུས་སེམས་གཉིས་སྦྱོང་ཞིང་འབྲས་བུ་སྐུ་གཉིས་སོགས་འགྲུབ་པར་བཤད་པ་ནི། གཙོ་ཆེ་བའི་དབང་དུ་བྱས་པ་ཡིན་གྱི། རེ་རེས་སྦྱང་གཞི་ཐམས་ཅད་སྦྱོང་བ་དང་། འབྲས་བུ་གཉིས་ཀ་འགྲུབ་མི་ནུས་པ་མ་ཡིན་ནོ། །དེ་ལྟར་ན་མན་ངག་ལུགས་ཀྱི་མངོན་པར་རྟོགས་པ་ཚུལ་བཅུ་བཞིར་བྱེད་པའི་ཚེ། མཉམ་སྦྱོར་གྱི་མངོན་བྱང་དང་། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་དང་། ཨཱ་ལི་ཀཱ་ལི་སྤང་བའི་མི་མཉམ་སྦྱོར་དང་། ས་བོན་དང་། སྐད་ཅིག་གིས་བསྐྱེད་པ་སྟེ། རྒྱུ་རྡོ་རྗེ་འཆང་གི་བསྐྱེད་ཆོག་ལྔར་ངེས་ལ། ཁ་དོག་ནི་མཉམ་སྦྱོར་ལ་ཡན་ལག་བཞི་དྲུག་གང་སྦྱར་ཡང་དཀར་པོར་ངེས་ཤིང་། མི་མཉམ་སྦྱོར་གཉིས་ལ་ཡན་ལག་བཞི་པ་སྦྱར་བའི་ཚེ་ནག་པོ་དང་། ཡན་ལག་དྲུག་པ་སྦྱར་བའི་ཚེ་དཀར་པོར་ངེས་ཤིང་། ཕྱི་མ་གཉིས་ལ་ནི་ནག་པོའོ། །མི་མཉམ་སྦྱོར་གི་ཡན་ལག་དྲུག་པའི་ཚེ་དཀར་པོར་བྱེད་པ་ནི་འགྲེལ་པ་ལུགས་ཀྱང་བཞེད་དེ། ཡན་ལག་དྲུག་པ་ལས། ཟླ་བ་ཆུ་ཤེལ་ནོར་བུའི་འོད། །རྩ་བའི་ལུས་མཚུངས་གཡོན་པ་ནི། །དམར་ཞིང་ཞལ་གཞན་གནག་པ་དང་། །ཞེས་དང་། རིན་ཆེན་འབར་བར། དེ་ལས་བྱུང་བའི་ཀུན་ཏུ་བཟང་། །ཞལ་བརྒྱད་ཞབས་བཞི་བཅུ་དྲུག་ཕྱག །རྩ་ཞལ་ཟླ་འདྲ་གཡས་དང་གཡོན། །སྔོན་པོ་དམར་པོ་ལྷག་མ་གནག །ཅེས་གསུངས་པས་སོ། །སློབ་དཔོན་དཔལ་འཛིན་གྱིས་དགྲ་ནག་གི་འགྲེལ་པར། དགྲ་ནག་གི་རྒྱུ་རྡོ་རྗེ་འཆང་ནག་པོར་འདོད་པ་ལ་དགག་པ་མཛད་པའི་སྐབས་སུའང་གསལ་པོར་གསུངས་ཏེ། ཤིན་ཏུ་གདུག་པ་ཅན་རྗེས་སུ་འཛིན་པས་ཁྲོ་བོའི་གཟུགས་ཅན་ནག་པོར་ལ་ལ་འདོད་དོ། །དེ་མི་འཐད་དེ། གང་གི་ཕྱིར་ཐམས་ཅད་རྗེས་སུ་གཟུང་བའི་ཕྱིར་རྣམ་པར་གནས་པ་ཡིན་ལ། ནག་པོ་ཉིད་ནི་ཞེ་སྡང་ལ་སྤྱོད་པ་རྗེས་སུ་གཟུང་བའི་དོན་ཡིན་པའི་ཕྱིར་རོ། །གཞན་ཡང་རྒྱུད་གཞན་ནས་བསྟན་པ་དང་ཡང་འགལ་བ་ཡིན་ཏེ། དེ་ཡང་དགྱེས་པའི་རྡོ་རྗེ་ལས། ནོར་བུ་ཆུ་ཤེལ་འོད་འདྲ་ཞིང་། །ཞེས་གསུངས་པ་དང་། ཞེས་འདིར་དཀར་པོར་གསུངས་པ་འདི་རྒྱུད་འགྲེལ་གཞན་གྱིས་ཤེས་བྱེད་ཡང་དག་ཏུ་དྲངས་སོ། །ཡང་སྐབས་འདིར་གྲུབ་ཆེན་མཚོ་སྐྱེས་ཀྱིས། མངོན་པར་རྟོགས་པ་ཚུལ་བཞིར་བྱེད་པའི་ཚེ། རྒྱུ་རྡོ་རྗེ་འཆང་གི་བསྐྱེད་ཆོག་ལ་མཉམ་སྦྱོར་མ་གཏོགས་པའི་ཕྱི་མ་བཞི་ཁོ་ན་བཞེད་ཅིང་། དེའི་ཚེ་ཁ་དོག་ནི་ནག་པོ་ཁོ་ནར་བཞེད་དོ། །དེའི་རྒྱུ་མཚན་ཡང་ལུགས་འདི་དང་། མན་ངག་ལུགས་གཉིས་ཆར་གྱི་རྩ་རྒྱུད་ལེའུ་བརྒྱད་པ་ནས་བཤད་པའི་མི་མཉམ་སྦྱོར་གཙོ་འཁོར་ཐམས་ཅད་ལ་སྦྱར་བ་དང་། ཕྱི་མའི་ལེའུ་ལྔ་པར། ས་བོན་དང་སྐད་ཅིག་གིས་བསྐྱེད་པའི་བསྐྱེད་ཆོག་རྣམས་ནི་རྩ་རྒྱུད་ཀྱི་ཐུན་མོང་མ་ཡིན་པ་ཡིན་པས་ཡན་ལག་བཞིས་འཆིང་ལ། དེའི་ཚེ་རྒྱུ་རྡོ་རྗེ་འཆང་ནག་པོ་ངེས་པར་བཞེད་དོ། །གཞན་ཕྱག་མཚན་སོགས་ནི་འབྲས་བུ་རྡོ་རྗེ་འཆང་གི་སྐབས་སུ་འཆད་དོ། །གཉིས་པ་བསྐྱེད་ནས་འཁོར་སྤྲོ་བ་ལ་གསུམ་སྟེ། སྦྱོར་བ་འདུ་ཤེས་གསུམ་ལྡན་བསམ་པ། དངོས་གཞི་འཁོར་སྤྲོ་བ། སྤྲོས་པའི་འཁོར་རྣམས་ཀྱི་སྐུ་མདོག་སོགས་བཤད་པའོ། །དང་པོ་ནི། རང་ཉིད་རྒྱུ་རྡོ་རྗེ་འཛིན་པ་དང་། རིག་མ་བདག་མེད་མར་བསམ། ཡུམ་གྱི་མཁའ་མི་དམིགས་ཏེ། སྟོང་པའི་ངང་ལས་ཨ་ལས་པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལ་ཨས་མཚན་པ་བསམས་ལ། སྔགས་ཀྱིས་བྱིན་གྱིས་བརླབས་ཏེ། ཨོཾ་པདྨ་སུ་ཁ་བདེ་བ། དྷ་ར་འཛིན་པ། མ་ཧཱ་རཱ་ག་འདོད་ཆགས་ཆེན་པོ། སུ་ཁཾ་ད་ད་བདེ་བ་སྟེར་བ། ཙ་ཏུ་རཱ་ནནྡ་དགའ་བ་བཞི། བྷ་ག་པདྨ། བི་ཤྭ་སྣ་ཚོགས། ཧཱུྃ་གསུམ། ཀརྻཾ་བྱ་བ། ཀུ་རུ་མཛོད། ཥྭ་མེ་བདག་གི་ཞེས་པས་སོ། །ཡང་ཡབ་ཀྱི་གསང་གནས་མི་དམིགས་ཏེ། སྟོང་པའི་ངང་ལས་ཧཱུྃ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པ་བསམས་ལ། ཨོཾ་བཛྲ་རྡོ་རྗེ། མ་ཧཱ་དྭེ་ཥ་ཞེ་སྡང་ཆེན་པོ། ཙ་ཏུར་བཞི། ཨཱ་ནནྡ་དགའ་བ། ད་ཡ་ཀ་སྟེར་བ། ཁ་ག་མཁའ་འགྲོ། མུ་ཁ་ཨེ་ཀ་ར་སྭ་གདོང་གཅིག་པ། ནཱ་ཐ་མགོན་པོ། ཧཱུྃ་གསུམ། ཀརྻཾ་ཀུ་རུ་ཥྭ་མེ་གོང་དང་འདྲ། དེ་ལྟ་བུའི་སྔགས་ཀྱིས་བྱིན་གྱིས་བརླབས་ནས། ཐབས་ཤེས་རབ་སྙོམས་པར་ཞུགས་པས། འཁོར་གྱི་ལྷ་མོ་དབྱུང་སྙམ་དུ་དྲན་པར་བྱ་སྟེ། རྗེ་བཙུན་རྩེ་མོས། དེའང་འདུ་ཤེས་གསུམ་ཚུལ་ཏེ། །ཡབ་ཡུམ་བསྐྱེད་པ་ལྷ་འདུ་ཤེས། །ཡུམ་གྱི་ཐ་མལ་པདྨ་ནི། །སྐད་ཅིག་ཙམ་གྱིས་མི་དམིགས་པས། །ཨ་ལས་པདྨ་འདབ་བརྒྱད་པར། །བསམས་ལ་སྔགས་ཀྱིས་བྱིན་གྱིས་བརླབ། །ཡབ་ཀྱི་ཐ་མལ་རྡོ་རྗེ་ནི། །སྟོང་པར་བསམས་ཏེ་ཧཱུྃ་རྡོ་རྗེ། །རྩེ་ལྔ་པར་བསྐྱེད་གསང་སྔགས་ཀྱིས། །བྱིན་གྱིས་བརླབས་ཤིང་སྔགས་འདུ་ཤེས། །ཐ་མལ་རྗེས་ཆགས་མ་ཡིན་ཏེ། །ཡབ་ཡུམ་སྙོམས་པར་ཞུགས་པ་ལས། །འཁོར་གྱི་ལྷ་མོ་དབྱུང་ངོའི་བར། །བསམ་པ་ཆོས་ཀྱི་འདུ་ཤེས་སོ། །དེ་ལྟར་འདུ་ཤེས་གསུམ་བསྒོམ་པའང་། །ཐ་མལ་རྟོག་པ་ཞི་བྱེད་དེ། །ལུས་དང་བྷ་ག་བསམ་པ་ཀུན། །མཆོག་ཏུ་གྱུར་པའང་བྱས་པ་ཡིན། །ཞེས་དགོས་པ་དང་བཅས་པའང་གསུངས་སོ། །གཉིས་པ་ནི། ཡབ་ཡུམ་སྙོམས་པར་ཞུགས་པས་རྗེས་སུ་ཆགས་པའི་སྒྱུ་མ་བདེ་བའི་སྒྲ། ཧ་སི་སོགས་གསང་གནས་ན་གྲགས་པའི་སྒྲ་དེས་ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ། ཁའམ་སྣ་བུག་གཡོན་ནས་ཞུགས། རྗེས་སུ་ཆགས་པའི་མེས་སྙིང་གར་བཞུ་སྟེ། ཡུམ་གྱི་མཁར་བབས་པ་ཐིག་ལེ་བརྒྱད་དུ་བསམ་པར་བྱའོ། །འདི་ནི་ཚུལ་བཅུ་བཞི་པ་ཐམས་ཅད་ལ་འདྲ་ལ། མངོན་བྱང་གི་ཡན་ལག་བཞི་པ་རྣམས་ལ་ནི་ཐིག་ལེ་དེ་རྣམས་ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོ་བ་དང་། ཐིག་ལེ་ལས་ས་བོན་དུ་གྱུར་ནས་སྤྲོ་བ་སྟེ་འགྲོས་གཉིས་སོ། །ཡན་ལག་དྲུག་པ་རྣམས་ལ་ནི། མངལ་དུ་ཐིག་ལེ་ལས་ས་བོན་དུ་གྱུར། དེ་ལས་ལྷ་མོར་གྱུར་ཏེ་སྤྲོ་བ་དང་། ཐིག་ལེ་ལས་ས་བོན་དུ་གྱུར་པ་གདན་རྣམས་ཀྱི་སྟེང་དུ་སྤྲོས་ནས་ལྷ་མོར་བསྐྱེད་པ་སྟེ་འགྲོས་གཉིས་སོ། །ས་བོན་ལས་བསྐྱེད་པའི་སྐབས་སུ་ནི་ཡན་ལག་དྲུག་པའི་ལྷ་མོ་འགྲོས་དང་འདྲ་ལ། སྐད་ཅིག་གིས་བསྐྱེད་པའི་སྐབས་སུ་ནི། མངལ་དུ་ཐིག་ལེ་ལས་ལྷ་མོར་གྱུར་ནས་སྤྲོ་བ་སྟེ། དེ་ལྟར་ན་ཚུལ་བཅུ་བཞི་ལས་ལྷ་མོ་སྤྲོ་ཚུལ་ལྔར་ངེས་ཤིང་། མཚོ་སྐྱེས་ལུགས་ལ་ནི་བཞིར་ངེས་སོ། །གསུམ་པ་ལ་བཞི་སྟེ། གནས་དང་སྐུ་མདོག་བཤད་པ། ཕྱག་མཚན་དག་པ་དང་བཅས་པ་བཤད་པ། རྣམ་པ་དང་རྒྱན་བཤད་པ། གདན་བཤད་པའོ། །དང་པོ་ནི། འཁོར་གྱི་ལྷ་མོ་རྣམས་དཀྱིལ་འཁོར་གྱི་ཕྱོགས་གང་དུ་འགོད། སྐུ་མདོག་ཅི་ལྟ་བུ་སྙམ་ན། གཽ་རཱི་ནི་ཤར་དུ་སྟེ། ཆོས་ཉིད་ལས་མི་འགྱུར་བས་ཁ་དོག་ནག་མོའོ། །ཙཽ་རཱི་ནི་ལྷོར་ཏེ། སེམས་ཅན་གྱི་དོན་ལ་ཆགས་པས་ཁ་དོག་དམར་པོའོ། །བེ་ཏཱ་ལཱི་ནི་ནུབ་ཏུ་སྟེ། སངས་རྒྱས་ཀྱི་ཡོན་ཏན་རྒྱས་པས་ཁ་དོག་སེར་པོའོ། །གྷསྨ་རཱི་ནི་བྱང་དུ་སྟེ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་བྱེད་པས་ལྗང་གུའོ། །པུཀྐ་སཱི་ནི་དབང་ལྡན་དུ་སྟེ། ཁ་དོག་གཽ་རཱི་དང་མཚུངས་སོ། །རི་ཁྲོད་མ་ནི་མེར་ཏེ། རང་བཞིན་གྱིས་རྟོག་པ་དང་བྲལ་བས་དཀར་པོའོ། །གདོལ་པ་མོ་ནི་སྲིན་པོར་ཏེ། སེམས་ཅན་གྱི་དོན་ལ་ཆགས་པས་སྔོ་བསངས་སོ། །གཡུང་མོ་ནི་རླུང་དུ་སྟེ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་བྱེད་པས་ཁ་དོག་སྣ་ཚོགས་པའོ། །འདིར་དེ་བཞིན་གཤེགས་པ་དང་། ཕྱོགས་ཀྱི་དབང་དུ་བྱས་ན་གཽ་རཱི་དཀར་མོ། ཙཽ་རཱི་སེར་མོ། བེ་ཏཱ་ལཱི་དམར་མོར་འབྱུང་རྒྱུ་ཡིན་ཞིང་། བཤད་རྒྱུད་གུར་ལས་ཀྱང་དེ་བཞིན་གསུངས་མོད། འདིར་རྩ་བའི་རྒྱུད་དུ་སྔར་བཞིན་གསུངས་པ་ནི། དེ་བཞིན་གཤེགས་པ་རེ་རེ་ཡང་ཡེ་ཤེས་ལྔ་ལྔའི་རང་བཞིན་ཡིན་ལ། ཡེ་ཤེས་དེ་གཟུགས་ཀྱི་རྣམ་པ་ལྷར་ལངས་པའི་ཚེ། ཡེ་ཤེས་སོ་སོ་དང་མཐུན་པའི་ཁ་དོག་ཏུ་འགྱུར་བ་ཡིན་ཏེ། གཽ་རཱི་རྣམ་སྣང་གི་རིགས་ཡིན་ཀྱང་། དེའི་ནང་ཚན་ཆོས་དབྱིངས་ཡེ་ཤེས་ཀྱི་གཟུགས་རྣམ་ཡིན་པས་ནག་མོ་དང་། ཙཽ་རཱི་རིན་ཆེན་འབྱུང་ལྡན་གྱི་ཡེ་ཤེས་ལྔ་ལས་སོར་རྟོག་ཡེ་ཤེས་ཀྱི་གཟུགས་རྣམ་ཡིན་པས་དམར་མོ་དང་། བེ་ཏཱ་ལཱི་འོད་དཔག་མེད་ཀྱི་ནང་ཚན་ཡེ་ཤེས་ལྔ་ལས། མཉམ་ཉིད་ཡེ་ཤེས་ཀྱི་གཟུགས་རྣམ་ཡིན་པས། སེར་མོར་འབྱུང་བ་ཡིན་ལ། དེ་བཞིན་དུ་འཁོར་གཞན་རྣམས་ལ་ཡང་གོ་བར་བྱའོ། །གཉིས་པ་ནི། ཕྱག་མཚན་གྱི་དག་པར། འཁོར་བའི་རྒྱ་མཚོ་དུག་ཆུ་ལས། །ཉ་འདྲའི་འགྲོ་བ་འདོན་ཕྱིར་རམ། །བཀྲ་ཤིས་འཛིན་པ་རོ་ཧི་ཏ། །ཉོན་མོངས་རྒྱ་འདྲ་གྲིྃ་གུག་གཡས། །གཏི་མུག་གིས་ནི་རབ་རྨོངས་པ། །ཕག་དང་འདྲ་བའི་སེམས་ཅན་ནི། །གཏི་མུག་གཉིད་ལས་བསླང་བའི་ཕྱིར། །གཡས་ན་ཅང་ཏེའུ་སྒྲ་སྒོགས་པ། །འདོད་ཆགས་ཀྱིས་གདུངས་རུས་སྦལ་ནི། །འགྲོ་བའི་ནད་རྣམས་བསལ་ཕྱིར་དང་། །ཆགས་ཆེན་བདུད་རྩིས་ཚིམ་བྱའི་ཕྱིར། །རུས་སྦལ་དང་ནི་པད་སྣོད་བསྣམས། །ཞེ་སྡང་དགྲ་ཡིས་ཕམ་བྱས་པ། །སྦྲུལ་དང་འདྲ་བའི་སེམས་ཅན་རྣམས། །ཞེ་སྡང་ཆེན་པོས་ཚིམ་བྱའི་ཕྱིར། །ཕྱག་ན་སྦྲུལ་དང་ཐོད་པ་འོ། །ངན་རྟོག་པ་ཡི་རི་དྭགས་རྣམས། །སྐྲག་པར་བྱ་ཕྱིར་སེང་གེ་འམ། །སེང་འདྲ་ང་རྒྱལ་གཞོམ་བྱའི་ཕྱིར། །སེང་གེ་དང་ནི་དགྲ་སཏྭ་བསྣམས། །བདག་ཏུ་ལྟ་བ་ལ་སོགས་པའི། །ལྟ་བ་པོ་ཡི་གཉིས་པའོ། །བདག་ཏུ་ལྟ་བའི་མདུད་པ་དང་། །སེར་སྣ་དགྲོལ་བར་བྱ་བའི་ཕྱིར། །དགེ་སློང་དང་ནི་འཁར་གསིལ་ལོ། །དཔེར་ན་ཐོང་པ་ལྟ་བུ་ཡི། །ཆོས་ཀྱི་འཁོར་ལོ་བསྐོར་བ་ཡིས། །ཉོན་མོངས་ཐ་བ་བརླག་པའི་ཕྱིར། །འཁོར་ལོ་དང་ནི་ཐོང་པ་བསྣམས། །རྣམ་པར་རྟོག་པའི་རི་བསྙིལ་ཞིང་། །གདུག་པ་ཚར་གཅད་བྱ་བའི་ཕྱིར། །གཡས་པས་རྡོ་རྗེ་འཛིན་པ་དང་། །གཡོན་པས་སྡིགས་མཛུབ་བསྟན་པ་འོ། །ཞེས་གསུངས་པ་ལྟར་རོ། །གསུམ་པ་ནི། ལྷ་མོ་ཐམས་ཅད་ཆོས་ཐམས་ཅད་དེ་བཞིན་ཉིད་དུ་རོ་གཅིག་པས་ཞལ་གཅིག་མ། བདེན་པ་གཉིས་ཐུགས་སུ་ཆུད་པས་ཕྱག་གཉིས་མ། སྐུ་གསུམ་བརྙེས་པས་སྤྱན་གསུམ། སངས་རྒྱས་གྱི་ཡོན་ཏན་གོང་ནས་གོང་དུ་རྒྱས་པས་དབུ་སྐྲ་དམར་སེར་གྱེན་དུ་འཁྱིལ་བ། རྒྱལ་བ་ལྔ་དག་པའི་ཕྱག་རྒྱ་ལྔས་ལུས་ལ་བརྒྱན་པའོ། །གཞུང་འགའ་ཞིག་ལས་སྟག་གི་པགས་པའི་ཤམ་ཐབས་བཤད་ཀྱང་། རྒྱ་གར་གྱི་གཞུང་ཕལ་ཆེར་དང་། རྗེ་བཙུན་གོང་མས་གཅེར་བུར་བཞེད་དོ། །མི་གནས་པའི་མྱ་ངན་ལས་འདས་པ་མཚོན་པས་ཞབས་གཡོན་བརྐྱངས་པའི་བརླ་ལ་གཡས་བསྐུམ་པའི་སོར་མོ་རེག་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པའོ། །བཞི་པ་ནི། གཽ་རཱི་ཚངས་པའི་གདན་ལ་སོགས་པ་སྔར་གྱི་གདན་སོ་སོའི་སྟེང་དུ་བཞུགས་པ་ཡིན་ཞིང་། དེ་རྣམས་ཀྱི་ངོ་བོ་ནི་རྗེ་བཙུན་རིན་པོ་ཆེས། ཚངས་པ་ནི་འདོད་ཁམས་ཀྱི། དབང་པོ་ནི་ཤར་ཕྱོགས་ཀྱི། ཉེ་དབང་ནི་དབང་ལྡན། གཤིན་རྗེ་ནི་ལྷོ་ཕྱོགས་ཀྱི། ནོར་སྦྱིན་ནི་རྣམ་ཐོས་སྲས། སྲིན་པོ་ནི་ལྷོ་ནུབ་ཀྱིའོ། །ཐགས་ཟངས་རིས་ལྷ་མ་ཡིན་གྱི་དབང་པོ་ཡིན་ནོ། །ཞེས་སོ། །དེ་ལ་འདོད་ཁམས་ཀྱི་ཚངས་པ་ཞེས་པ་ལ། ཁ་ཅིག་གཟུགས་ཁམས་ཀྱི་ཚངས་པ་ལས་གཞན་པའི་ཚངས་པ་མེད་དེ། ཚངས་པའི་དོན་འདོད་པ་ལ་འདོད་ཆགས་དང་བྲལ་བ་ཡིན་ལ། འདོད་ཁམས་སུ་ཡོད་ན་ཆགས་བྲལ་དུ་མི་རུང་བའི་ཕྱིར་རོ། །ཞེས་ཟེར་རོ། །དེའི་ལན་དུ་གནས་དྲུག་པས། འདི་ནི་མི་འཐད་དེ། ཁྱད་པར་འཕགས་པའི་བསྟོད་པར། ལྷ་ཆེན་ཐིག་ལེ་མཆོག་མ་ལ། །ཆགས་པ་སྐྱེས་པས་གདོང་བཞི་བྱུང་། །ཞེས་པའི་འགྲེལ་པར། ཐིག་ལེ་མཆོག་མས་ལྷ་ཆེན་པོ་ལ་བསྐོར་བ་བྱས་པས་ཆགས་པའི་དབང་གི་ཕྱོགས་ཐམས་ཅད་ལ་ལྟ་བར་འདོད་ནས། གདོང་པ་བཞི་སྤྲུལ་པར་བཤད་པས། འདོད་པ་ལ་ཆགས་པ་དང་མ་བྲལ་བའི་ཚངས་པ་མུ་སྟེགས་བྱེད་རྣམས་ཀྱིས་སྟོན་པར་བྱེད་པ་ཞིག་ཡོད་པར་གྲུབ་ལ། ལྷ་ལས་ཕུལ་བྱུང་གི་བསྟོད་པའི་འགྲེལ་པར་ཡང་དེ་བཞིན་དུ་བཤད་དོ་ཞེས་ལན་འདེབས་སོ། །འདིའང་ཅུང་ཟད་མི་འཐད་པར་སྣང་སྟེ། ཐིག་ལེ་མཆོག་མ་ལ་ཆགས་པ་སྐྱེས་ནས་གདོང་བཞི་སྤྲུལ་པ་པོ་ནི་མུ་སྟེགས་བྱེད་ཀྱིས་ལྷ་ཚངས་པ་ཆོས་སྐུ། དབང་ཕྱུག་ལོངས་སྐུ། ཁྱབ་འཇུག་སྤྲུལ་སྐུ་གསུམ་དུ་འདོད་པའི་བར་མ་དེ་ཉིད་ཡིན་ལ། འདིར་འདོད་ཁམས་ཀྱི་ཚངས་པ་ནི་དང་པོ་དེ་ཉིད་དུ་འདོད་དགོས་པའི་ཕྱིར་ཏེ། རྗེ་བཙུན་རྩེ་མོས། མུ་སྟེགས་བྱེད་ཀྱི་ལྷ་དེ་གསུམ་ལ་གཏི་མུག་ཅན་ཚངས་པ་དང་། འདོད་ཆགས་ཅན་དབང་ཕྱུག་དང་། ཞེ་སྡང་ཅན་ཁྱབ་འཇུག་ཅེས་པའི་ཐ་སྙད་མཛད་ནས། གསུམ་ཆར་ཡང་འདོད་ཁམས་སུ་ཡོད་པར་བཞེད་པའི་ཕྱིར་རོ། །གསུམ་པ་སྤྲོས་ནས་ཐིག་ལེར་ཞུ་བ་ནི། རྡོ་རྗེ་གུར་ལས། དྲི་ཟ་མཉམ་པར་ཞུགས་ནས་ནི། །ཁུ་བར་རྗེས་སུ་དྲན་པར་བྱ། །ཞེས་གསུངས་པའི་དོན་ལ་བཞི་སྟེ། རྒྱུ་གང་ཞུ་བ། རྐྱེན་གང་གིས་ཞུ་བ། རྣམ་པ་ཇི་ལྟར་དུ་ཞུ་བ། དེ་ལྟར་ཞུ་བའི་དགོས་པའོ། །དང་པོ་ནི། གཞལ་ཡས་ཁང་གི་དབུས་ན་གནས་པའི་རྒྱུ་རྡོ་རྗེ་འཆང་ཡབ་ཡུམ་གྱི་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་དོ། །གཉིས་པ་ལ་གཉིས་ཏེ། སྙོམས་པར་ཞུགས་པའི་རྐྱེན་དང་། དྲི་ཟ་ཞུགས་པའི་རྐྱེན་ནོ། །དང་པོ་ནི། ཡབ་ཡུམ་ཐབས་ཤེས་སྙོམས་པར་ཞུགས་པས་ལུས་ཐམས་ཅད་དྭངས་མས་གང་ཞིང་། དེའི་རྐྱེན་གྱིས་བདེ་བ་ཆེན་པོ་སྐྱེས་པར་བསྒོམས་ཏེ། རྗེ་བཙུན་རྩེ་མོས། དེ་ནས་ཡབ་ཡུམ་གྱི་རྩ་ཕྲན་སྟོང་ཕྲག་བདུན་ཅུ་རྩ་གཉིས་བ་སྤུའི་བུ་ག་བྱེ་བ་ཕྲག་ཕྱེད་དང་བཞི་ཐམས་ཅད་རྩ་དང་བ་སྤུའི་བུ་ག་ཐམས་ཅད་ཁམས་དྭངས་མ་བྱང་ཆུབ་སེམས་ཀྱི་ཐིག་ལེས་གང་བར་མོས། དེས་ནས་ཡབ་ཡུམ་ཐབས་དང་ཤེས་རབ་སྙོམས་པར་ཞུགས་པ་ལས། རྗེས་སུ་ཆགས་པའི་མེས་ཁམས་དྭངས་མའི་ཐིག་ལེ་རྣམས་ཞུ་སྟེ། སླར་ཡང་ཟག་པ་མེད་པའི་བདེ་བ་ཆེན་པོ་སྐྱེས་པར་མོས་ཞེས་གསུངས་པས་སོ། །རྐྱེན་གཉིས་པ་ནི། ཡན་ལག་བཞི་པའི་སྐབས་སུ་མི་དགོས་ལ། ཡན་ལག་དྲུག་པའི་སྐབས་སུ་ཧོཿགཉིས་ཀྱི་བར་དུ་ཆུད་པའི་བར་དོའི་ལུས་ངག་ཡིད་གསུམ་མཚོན་བྱེད་ཨོཾ་ཨཱཿཧཱུྃ་གི་ཡི་གེ་གསུམ་ནམ་མཁར་གསར་དུ་བསྐྱེད་ནས། དེ་ཉིད་ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་ནས། ཡུམ་གྱི་མཁར་ཡིག་འབྲུ་སླེབ་པའི་རྐྱེན་གྱིས་ཞུ་བར་བིརྺ་པའི་བཀའ་སྲོལ་གཉིས་དང་། མར་མེ་མཛད་ལ་སོགས་པ་གཞན་རྒྱ་གར་བའི་གཞུང་ཕལ་ཆེར་བ་ལས་བཤད་དོ། །གསུམ་པ་ནི། ངོ་བོ་བདེ་བ་ལ་རྣམ་པ་ཐིག་ལེའི་དབྱིབས་སུ་གནས་པ་ཡིན་ལ། དེས་སྟོང་པ་ཆོས་ཀྱི་སྐུའི་ཡེ་ཤེས་འདྲེན་ནུས་པར་བསྒོམས་ཏེ། རྩེ་མོས། ཡབ་ཞུ་ཡེ་ཤེས་ཡུམ་ཞུ་དབྱིངས། །དབྱེར་མེད་ཐིག་ལེ་གདན་སྟེང་དུ། །དེ་ནི་ལོངས་སྐུ་ལ་བརྟེན་པའི། །དབྱིངས་དང་ཡེ་ཤེས་དབྱེར་མེད་པའི། །ཆོས་སྐུའི་ངོ་བོ་ཞེས་བྱ་སྟེ། །ཞེས་གསུངས་པའི་ཕྱིར་རོ། །བཞི་པ་ནི། དེ་ལྟར་གཉིས་སྣང་གི་རྟོག་པ་ཐམས་ཅད་བསྡུས་ནས། ལྷན་སྐྱེས་ཀྱི་ངང་དུ་ཡིད་མཉམ་པར་གཞག་པས། ཆོས་སྐུའི་དོན་རྟོགས་པར་བྱེད་པ་ཡིན་ནོ། །དེ་ལྟར་བདེ་སྟོང་རོ་གཅིག་པའི་ཐིག་ལེ་ལ་སེམས་བཟུང་ནས། ང་རྒྱལ་བསྐྱེད་པའི་སྔགས་འདི་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཨ་ནུ་རཱ་ག་ཎ་ནི་རྗེས་སུ་ཆགས་པ། བཛྲ་ནི་རྡོ་རྗེ། སྭ་བྷཱ་ཝ་ནི་རང་བཞིན། ཨཏྨ་ཀོ྅ཧཾ་ནི་བདག ཨ་ཧཾ་ནི་ངའོ། །འདིར་ང་རྒྱལ་འཛིན་པའི་སྔགས་སྐབས་འདིར་གསུངས་པ་ནི། རྗེས་སུ་ཆགས་པའི་ཡན་ལག་གི་དངོས་གཞི་ལ་དགོངས་ལ། མི་ཐུབ་ཟླ་བས། མཁའ་གསང་བྱིན་གྱིས་བརླབ་པའི་སྐབས་སུ་གསུངས་པ་ནི་རྗེས་སུ་ཆགས་པར་བྱེད་པ་ལ་དགོངས་ཤིང་། བདག་མེད་མའི་སྒྲུབ་ཐབས་སུ། ཡེ་ཤེས་པ་དགུག་གཞུག་གི་རྗེས་ལ་གསུངས་པ་ནི་ཡན་ལག་རྫོགས་པ་ལ་དགོངས་སོ། །གཉིས་པ་ཞུ་བ་གླུས་བསྐུལ་ལས་འབྲས་བུ་རྡོ་རྗེ་འཆང་བསྐྱེད་པ་ལ་གསུམ་སྟེ། ཞུ་བ་ལས་གླུས་བསྐུལ་བ། བསྐུལ་ནས་འབྲས་བུ་རྡོ་རྗེ་འཛིན་པར་བཞེངས་པ། བཞེངས་ནས་སྣོད་བཅུད་སྦྱང་བའོ། །དང་པོ་ལ་ལྔ་སྟེ། གང་ལ་བསྐུལ་བ། གང་གིས་བསྐུལ་བ། ཇི་ལྟར་བསྐུལ་བ། དེ་ལྟར་བསྐུལ་བའི་དགོས་པ། བསྐུལ་ནས་བཞེངས་པ་ལ་རྩོད་པ་སྤོང་བའོ། །དང་པོ་ནི། བདེ་སྟོང་གཉིས་སུ་མེད་པའི་ཡེ་ཤེས་རྣམ་པ་ཐིག་ལེའི་གཟུགས་ཅན་དེ་ཉིད་ལའོ། །གཉིས་པ་ནི། པུཀྐ་སཱི་ལ་སོགས་པ་མཚམས་མ་བཞིས་བསྐུལ་ཏེ། དེའི་རྒྱུ་མཚན་ཡང་། འབྲས་བུའི་གནས་སྐབས་སུ་འོད་གསལ་ཆོས་ཀྱི་སྐུའི་ངང་ལས་མ་གཡོས་བཞིན་དུ། ཀུན་རྫོབ་གཟུགས་ཀྱི་སྐུ་གཉིས་ཀྱིས་སེམས་ཅན་གྱི་དོན་འབད་མེད་དུ་གྲུབ་པར་མཛད་པ་ནི། ལམ་གྱི་གནས་སྐབས་སུ། ཚད་མེད་བཞི་བསྒོམས་པའི་འབྲས་བུ་ཡིན་ལ། དེ་བཞི་དག་པ་ནི་མཚམས་མ་བཞི་ཡིན་པས། དེས་བསྐུལ་བ་ཡིན་ཏེ། རྗེ་བཙུན་རྩེ་མོས། དེ་དག་ནི་ཚད་མེད་པ་བཞིའི་ངོ་བོ་ཡིན་པས། དེ་ལ་གཙོ་བོ་གཟུགས་ཀྱི་སྐུ་མེད་ན་སེམས་ཅན་གྱི་དོན་བྱ་བར་མི་ནུས་པས། དེའི་ཕྱིར་གླུས་བསྐུལ་བ་ཡིན་ནོ་ཞེས་སོ། །གསུམ་པ་ནི། པུཀྐ་སཱིས་ཐུགས་རྗེ་ཆེན་པོའི་ཚུལ་གྱིས་དང་། ཤ་ཝ་རཱིས་གནད་ལ་བོར་བའི་ཚུལ་གྱིས་དང་། ཙཎྜ་ལཱིས་སྔོན་གྱི་ཐུགས་དམ་རྗེས་སུ་དྲན་པའི་སྒོ་ནས་བསྐུལ་ཞིང་། དེ་ལྷ་མོ་གསུམ་གྱིས་བསྐུལ་བས་བཞེངས་སུ་མ་བཏུབ་པས། གསུམ་པོ་ཡི་ཆད་པའི་ཚུལ་དུ་གནས་པ་ལ། གཡུང་མོས་ཐུགས་ཡོངས་སུ་མཁྱེན་པའི་ཚུལ་གྱིས་གླུས་བསྐུལ་བ་ཡིན་ལ། རྡོ་རྗེའི་གླུ་རྣམས་ཀྱི་དོན་ནི། སྤྱིར་དུ་མ་ཞིག་ཡོད་ཀྱང་འདིར་གཉིས་སུ་མེད་པའི་ཡེ་ཤེས་ཀྱི་སྣང་བར་གྱུར་པ་ལ་རྗེ་བཙུན་རྩེ་མོས་བཤད་དོ། །བསྐུལ་བའི་ཚེ་རྣལ་འབྱོར་པ་རང་གི་ཤེས་པའི་རྒྱུན་མཚམས་ཀྱི་ལྷ་མོ་བཞི་ལ་འཕོས་ནས། ལྷ་མོ་གཅིག་གིས་གླུ་ལེན་པའི་ཚེ། གཞན་རྣམས་ཀྱིས་རམ་བུ་འདེགས་པའི་ཚུལ་གྱིས་བསྐུལ་བར་བླ་མ་དག་གསུངས་ངོ་། །ཚིག་གི་དོན་ནི། པུཀྐ་སཱིས་བྱམས་པ་ཚད་མེད་པའི་སྒོ་ནས་བསྐུལ་བ་ནི། རྗེ་བཙུན་ཀྱེ་རྡོ་རྗེ་བཞེངས་ཤིག རྒྱུ་གང་གིས་ན་སེམས་ཅན་སྡུག་བསྔལ་རྒྱུ་དང་བཅས་པ་ལས་བསྒྲལ་འདོད་ཀྱི་སྙིང་རྗེའི་ཡིད་ཀྱིས་སོ། །བཞེངས་ནས་ཅི་བྱ་སྙམ་ན། པུཀྐ་སཱི་ནི་བདག་དང་སེམས་ཅན་ཐམས་ཅད་ལ་སྐྱོབས་ཤིག ཇི་ལྟར་སྐྱོབ་ན། ཞལ་ཕྱག་གི་སྟོང་པའི་རང་བཞིན་ཐིག་ལེའི་ངོ་བོ་ཉིད་སྤངས་ནས་ནི། པུཀྐ་སཱི་བདག་ལ་བདེ་བ་ཆེན་པོའི་འདོད་པ་སྦྱོར་བ་བཞེད་པར་མཛོད་ཅིག་པའོ། །ཤ་ཝ་རཱིས་སྙིང་རྗེ་ཚད་མེད་པའི་སྒོ་ནས་བསྐུལ་བ་ནི། གཙོ་བོ་ཁྱོད་མེད་ན་བདག་འགུམ་པས་ཏེ། འཆི་བར་འགྱུར་བས་ཞལ་ཕྱག་གི་སྟོང་པའི་རང་བཞིན་ཐིག་ལེའི་ངོ་བོ་ཉིད་སྤངས་པ་སྟེ། དགོས་པ་ནི། རི་ཁྲོད་མ་བདག་གི་ཡིད་ལ་རེ་བའི་འབྲས་བུ་བདེ་བ་ཆེན་པོ་ལ་སྦྱོར་བར་འདོད་པ་འགྲུབ་པའི་ཕྱིར་དུ་ནི། ཀྱེ་རྡོ་རྗེ་ཁྱོད་གཟུགས་ཀྱི་སྐུར་བཞེངས་ཤིག་པའོ། །གདོལ་པ་མོས་དགའ་བ་ཚད་མེད་པའི་སྒོ་ནས་བསྐུལ་བ་ནི། ལམ་དུས་སུ་སྨོན་པ་བྱང་ཆུབ་ཀྱི་སེམས་ཀྱིས་བདག་ཧེ་རུ་ཀར་གྱུར་ནས། སེམས་ཅན་ཐམས་ཅད་དེའི་གོ་འཕང་ལ་འགོད་པར་བྱའོ། །ཞེས་འཇིག་རྟེན་ཐམས་ཅད་སངས་རྒྱས་ལ་མགྲོན་དུ་གཉེར་ནས་དགའ་བའམ། འདོད་པའི་གཙོ་བོ་གྲུབ་པའི་ཚེ་སྟོང་པ་ཉིད་ལ་ཞུགས་སམ་ཅི་སྟེ་ཞུགས་པར་མི་རིགས་སོ། །ཁྱོད་མེད་ན་བདག་གིས་སེམས་ཅན་གྱི་དོན་ཕྱོགས་ཙམ་ཡང་མི་འཚལ་བས། གདོལ་པ་མོ་བདག་ནི་གཙོ་བོ་ཐིག་ལེ་ལས་བཞེངས་པར་ཞུ་བ་བགྱིད་པའོ། །གཡུང་མོས་བཏང་སྙོམས་ཚད་མེད་པའི་སྒོ་ནས་བསྐུལ་བ་ནི། གཡུང་མོ་བདག་ནི་དྲན་པ་ཉམས་པས། འདི་ལ་སྙིང་རྗེ་ཆེན་པོའི་རྒྱུན་ཆད་མ་མཛད་ཅིག གཡུང་མོ་བདག་གིས་ཁྱེད་ཀྱི་ཐུགས་སྣ་ཚོགས་སུ་སྣང་བའི་གཡོ་སྒྱུ་དང་བཅས་པར་འཚལ་བ་སྟེ་ཤེས་ཀྱི། དེ་བས་ན་གཅིག་ལས་སྣ་ཚོགས་སུ་སྤྲུལ་པའི་མིག་འཕྲུལ་མངའ་བའི་གཙོ་བོ་ཁྱེད་བཞེངས་ཤིག ཅེས་པའོ། །བཞི་པ་ནི། རྗེ་བཙུན་རྩེ་མོས། དེའང་འདི་ལྟར་རྒྱལ་པ་ལ་ནི་བཞེངས་སུ་གསོལ་བར་བསྐུལ་དགོས་པ་མ་ཡིན་ཏེ། ཉིན་མཚན་ལན་དྲུག་ཏུ་ཀུན་ནས་གཟིགས་པ་ཡིན་ལ། གླུས་བསྐུལ་བ་ལའང་བཞེངས་སུ་མི་བཏུབ་པ་ལ་དེ་ལ་ཡི་ཆད་པ་ཡོད་པ་མ་ཡིན་ཡང་། སངས་རྒྱས་ཀྱི་མཛད་པ་ནི་གདུལ་བྱའི་སྣང་བ་ཡིན་ལ། དེ་ཡང་འཇིག་རྟེན་ན་ཆེ་བར་གྲགས་པའི་སྤྱོད་པ་ལ་འཇིག་རྟེན་པ་མཆོག་ཏུ་འཛིན་པས། གདུལ་བྱ་ལ་ཡང་སངས་རྒྱས་ཀྱི་མཛད་པ་དེ་ལྟར་སྣང་བ་ཡིན་ནོ། །ཞེས་གསུངས་སོ། །ལྔ་པ་ནི། དག་པ་རྡོ་རྗེའི་སྒྲོན་མེར། རྩོད་སྤང་གི་ཚུལ་མང་དུ་གསུངས་པ་རྣམས་ཤེས་པར་འདོད་ན་གནད་ཀྱི་ཟླ་ཟེར་དུ་བལྟ་བར་བྱ་ཞིང་། འདིར་ནི་བཤད་མ་ཐག་པའི་དགོས་པ་དེ་ཉིད་ཀྱིས་རྩོད་པ་མ་ལུས་པ་སྤངས་ཟིན་པ་ནི་གསུང་རབ་ཀྱི་གནད་དོ། །གཉིས་པ་བསྐུལ་ནས་འབྲས་བུ་རྡོ་རྗེ་འཛིན་པ་བཞེངས་པ་ནི། མི་ཐུབ་ཟླ་བས། བསྐུལ་བས་སྔོན་གྱི་བྱང་ཆུབ་ཀྱི། །སྨོན་ལམ་རྗེས་སུ་དྲན་ནས་ནི། །ཁུ་བའི་གཟུགས་ལས་བཞེངས་པ་ནི། །ཨྃ་དང་ཧཱུྃ་གཉིས་རྡོ་རྗེ་ཆེ། །ཞེས་དང་། རིན་ཆེན་འབར་བར། བསྐུལ་བས་སྨོན་ལམ་རྗེས་དྲན་ནས། །ཧཱུྃ་དང་ཨྃ་ལས་རབ་བཞེངས་པ། །ཞེས་དང་། རྗེ་བཙུན་ཆེན་པོས། ཐིག་ལེ་གཉིས་ལས་ཨྃ་དང་ཧཱུྃ་གཉིས་སུ་གྱུར། དེ་ལས་ཡབ་ཡུམ་གྱི་སྐུ་རྫོགས་པར་བསྐྱེད་དེ། ཞེས་གསུངས་པ་ནི་མངོན་བྱང་གི་ཡན་ལག་དྲུག་པ་རྣམས་དང་། ས་བོན་ལས་བསྐྱེད་པ་རྣམས་ཀྱི་བཞེངས་ཚུལ་ལོ། །མཉམ་སྦྱོར་གྱི་ཡན་ལག་བཞི་པ་གཉིས་དང་། ཨཱ་ལི་ཀཱ་ལི་ལ་ལྟོས་པའི་མི་མཉམ་སྦྱོར་གྱི་ཡན་ལག་བཞི་པ་གཉིས་ཏེ། བཞི་པོ་ལ་ནི་ཐིག་ལེ་དེ་ཐིག་ལེ་ཆ་གསུམ་དུ་ཆད་དེ། འོག་གི་ཐིག་ལེ་ཨཱ་ལི་ལས་ཟླ་བ། སྟེང་གི་ཐིག་ལེ་ཀཱ་ལི་ལས་ཉི་མ། བར་གྱི་ཐིག་ལེ་ས་བོན་དང་ཕྱག་མཚན་དུ་གྱུར་པའི་མངོན་བྱང་ལྔ་ལས་བསྐྱེད་དོ། །ཨཱ་ལི་ཀཱ་ལི་སྤངས་པའི་མི་མཉམ་སྦྱོར་གྱི་མངོན་བྱང་གཉིས་ལ་ནི་འདིར་ཡང་ཉི་ཟླ་གཉིས་ཀྱི་རྒྱུ་ཨཱ་ལི་ཀཱ་ལི་སྤངས་བ་སྟེ། གཞན་འདྲའོ། །སྐད་ཅིག་གིས་བསྐྱེད་པ་ལ་ནི། ཐིག་ལེ་དེ་ཉིད་སྐད་ཅིག་གིས་འབྲས་བུ་རྡོ་རྗེ་འཛིན་པར་བཞེངས་པ་སྟེ། དེ་ལྟར་ན་མངོན་རྟོགས་ཚུལ་བཞི་ལ་འབྲས་བུ་རྡོ་རྗེ་འཛིན་པ་བཞེངས་ཚུལ་བཞིར་ངེས་ཤིང་། མཚོ་སྐྱེས་ཀྱི་ལུགས་ལ་ཡང་བཞིར་ངེས་ཏེ། རྗེ་ས་ཆེན་གྱིས། བཞི་གསུམ་བཅུ་གཉིས་བླ་མ་བཞེད། །ཅེས་པའི་དོན་ཏོ། །དེ་ལྟར་བསྐྱེད་པའི་ལྷའི་ཞལ་ཕྱག་དང་། རྣམ་པ་ཇི་ལྟ་བུ་ཞེ་ན། སྐུ་མདོག་ནི་ཐམས་ཅད་དུ་ནག་པོར་ངེས་ཤིང་། ཞལ་བརྒྱད་ནི་མགྲིན་པའི་སྟེང་དུ་རྩ་བའི་ཞལ་མདུན་དུ་བསྟན་པ་དང་། དེའི་གཡས་སུ་ཞལ་གསུམ་དང་། གཡོན་དུ་ཞལ་གསུམ་སྟེ། བདུན་པོ་ནི་སྙན་གྱི་རྩེ་མོ་ཕྲད་ཙམ་གྱིས་བསྐོར་ནས་གནས་པ་ཡིན་ལ། གཡས་གཡོན་གྱི་ཞལ་ཐ་མ་གཉིས་ཀྱི་རྩེ་མོ་མི་ཕྲད་པར་བར་དུ་ལྟག་པ་ཅུང་ཟད་དང་བཅས་པའོ། །དེའི་སྟེང་དུ་མགྲིན་པ་དང་བཅས་པའི་ཞལ་མདུན་དུ་གཟིགས་པ་སྟེ། ཞལ་བརྒྱད་དེ་ལྟར་ཡིན་ལ། འདི་ལ་ཁ་ཅིག་ཞལ་རྒྱབ་མ་བཞི་གནག་པ་ཞེས་དང་། གཡས་གཡོན་གྱི་ཞལ་ལྷག་མ་གཉིས་གཉིས་ཞེས་པའི་ཐ་སྙད་ཇི་ལྟར་བྱས་ཀྱང་རུང་ངོ་། །དེ་ལྟ་བུའི་ཞལ་བརྒྱད་པོ་རེ་རེ་ལ་ཡང་། དཔྲལ་བའི་སྟེང་དུ་མི་མགོ་སྐམ་པོ་ལྔ་ལྔའི་དབུ་རྒྱན་དང་། དེའི་སྟེང་དུ་རྩེ་ཕྲན་ལྔ་ལ་སངས་རྒྱས་ལྔ་བཞུགས་པའོ། །ཞལ་བདུན་གྱི་མདུན་ཕྱོགས་སུམ་གཉིས་ཙམ་སོ་སོར་གྱེས་ཤིང་། རྒྱབ་ཕྱོགས་ཀྱི་སུམ་ཆ་ཙམ་ཕྱོགས་གཅིག་འདུས་པའི་དབུས་སུ་སྟེང་ཞལ་ཡོད་པ་སྟེ། ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པའོ། །ཕྱག་བརྒྱད་ཀྱི་གྱེས་ཚུལ་ནི། ཁ་ཆེ་རིན་ཆེན་རྡོ་རྗེས། ཞལ་བཞི་པ་ལ་དཔུང་པ་བཞི། །ཕྱག་བཞི་པ་ལ་ཞབས་བཞི་པ། །རྟ་མགྲིན་རྒྱལ་པོ་ཆེན་པོ་སྟེ། །ཞེས་ཕྱག་བཞི་པ་ལ་དཔུང་པ་བཞི་ཡོད་པར་བཤད་པའི་རིགས་པས། འདིར་ཕྱག་བཅུ་དྲུག་པ་ལ་དཔུང་པའང་བཅུ་དྲུག་ཡོད་པར་འདོད་དགོས་ལ། དེ་ལས་གཞན་སོག་པ་སོགས་ཀྱི་རྣམ་གཞག་ནི་མི་དགོས་ཏེ། ལྷ་སྐུ་རང་གི་ངོ་བོ་ནི་ཡེ་ཤེས་ཀྱི་སྣང་བ་ལས་གྲུབ་པའི་ཞལ་ཕྱག་གི་རྣམ་པ་ཙམ་ཡིན་ལ། དེ་ཉིད་གདུལ་བྱའི་བློ་ངོར་བསྒོམས་པ་དང་། ལྡེར་སྐུ་སོགས་བཞེངས་པ་ལ་ནི་ཕྱི་རོལ་གྱི་གྱེས་ཚུལ་ཙམ་གྱིས་ཆོག་པའི་ཕྱིར་རོ། །ཕྱག་མཚན་འཛིན་ཚུལ་ནི་ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་ནས། དེ་དག་གི་ནང་དུ་སྲོག་ཆགས་བཅུ་དྲུག་གནས་ཏེ། གཡས་ཀྱི་གླང་པོ་ཆེ་ལ་སོགས་པ་བརྒྱད་ནི། སེམས་ཅན་གྱི་ནད་བརྒྱད་རང་ལ་བསྡུ་བ་མཚོན་པས་ཁ་ནང་ལ་བསྟན་ཏེ། རྡོ་རྗེ་གུར་ལས། མི་ཡི་འགྲོ་བ་དེ་ལྟ་བུ། །རབ་མཆོག་ནད་ཀྱིས་ཁྱབ་མཐོང་ནས། །སངས་རྒྱས་ལྔ་ནི་ཆེར་གྲགས་པ། །བདག་གི་ལུས་ལ་བསྡུ་བར་བྱ། །ཞེས་གསུངས་པས་སོ། །གཡོན་གྱི་སའི་ལྷ་ལ་སོགས་པ་བརྒྱད་ནི། དབང་ཕྱུག་བརྒྱད་སེམས་ཅན་ལ་སྩོལ་བ་མཚོན་པས་ཁ་ཕྱིར་བསྟན་ཏེ། གུར་ལས། ས་ནི་དང་པོ་ནོར་སྦྱིན་མཐར། །དབང་ཕྱུག་བརྒྱད་ནི་སྩོལ་བར་མཛད། །ཅེས་སོ། །རྩ་ཕྱག་གཉིས་ཀྱིས་ཡུམ་ལ་འཁྱུད་ཅིང་། ལྷག་མ་རྣམས་ནི་མདུན་ནས་རྒྱབ་ཏུ་རིམ་པ་བཞིན་བསྒྲིགས་ཏེ། ཕྱག་མཚན་རྣམས་ཅུང་ཟད་སྟེང་འོག་གི་ཚུལ་དུ་འཛིན་པའོ། །ཞབས་གཡས་གཡོན་དུ་གཉིས་གཉིས་མདུན་རྒྱབ་ཏུ་བསྒྲིགས་པའི་གཡས་གཉིས་བརྐྱང་བའི་བརླ་ལ་གཡོན་གཉིས་བསྐུམ་པའི་སོར་མོ་གཏད་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ་ནི་མན་ངག་ལུགས་དང་། མཚོ་སྐྱེས་ལུགས་གཉིས་ཀྱི་བཞུགས་ཚུལ་ཡིན་ཏེ། རྗེ་བཙུན་རྩེ་མོས། མཚོ་སྐྱེས་ལུགས་ཀྱི་དཀྱིལ་ཆོག་ལས། ཚིག་འདི་དངོས་སུ་གསུངས་ཤིང་། མན་ངག་ལུགས་ཀྱི་གཞུང་རྣམས་ལས་ཀྱང་། སྐབས་འགའ་ཞིག་ཏུ་གཡས་བརྐྱང་ཞེས་པ་ཙམ་དང་། འགའ་ཞིག་ཏུ་སྐྱིལ་ཀྲུང་ཕྱེད་པ་ཞེས་པ་ཙམ་ལས་མ་གསུངས་ཀྱང་། མཚོ་སྐྱེས་ཀྱི་སྒྲུབ་ཐབས་དང་། མན་ངག་ལུགས་ཀྱི་ཡན་ལག་བཞི་དྲུག་གཉིས་ཆར་དུ་བདུད་བཞི་བརྩེགས་གདན་འབའ་ཞིག་གསུངས་པས། བཞུགས་ཚུལ་འདི་ལས་མ་འདས་པའི་ཕྱིར་རོ། །གལ་ཏེ་རྗེ་བཙུན་རྩེ་མོས། ཞབས་གཡས་བརྐྱང་བ་དང་། གཡོན་བསྐུམ་པ་དང་། སྐྱིལ་ཀྲུང་ཕྱེད་པའི་དག་པ་གསུམ་སོ་སོར་གསུངས་པས། མདུན་མ་གཉིས་གཡས་བརྐྱང་ཞིང་གཡོན་བསྐུམ་པ་དང་། རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་བསྟན་ནོ་སྙམ་ན། དེ་ནི་མ་ཡིན་ཏེ། སྐྱིལ་ཀྲུང་ཕྱེད་པ་དེ་ཉིད་ལ་གཡས་བརྐྱང་གཡོན་བསྐུམ་ཚང་བས། དེའི་དག་པ་སྟོན་པ་ཡིན་པའི་ཕྱིར་ཏེ། མཚོ་སྐྱེས་ཀྱི་འགྲེལ་པར། དེ་དག་ཀྱང་མཉམ་པར་བརྩེགས་པའི་སྙིང་གར་ཞབས་གཡས་པ་གཉིས་ཀྱིས་མནན་པའོ། །རོལ་མོའི་ཚུལ་ནི་སྐྱིལ་ཀྲུང་ཕྱེད་པའོ། །དེའི་གཡས་བརྐྱངས་པ་ནི་ཐུགས་རྗེས་སེམས་ཅན་ལ་ཁྱབ་པའོ། །གཡོན་བསྐུམ་པ་ནི་ཤེས་རབ་ཀྱིས་ཆོས་གང་ཡང་མི་འཛིན་པར་བཏང་བའོ། །ཞེས་གསལ་བར་གསུངས་པས་སོ། །གཞན་དུ་ན་འཁོར་ལོ་བདེ་མཆོག་ལ་རྡོ་རྗེ་དང་དྲིལ་བུ་འཛིན་པའི་ཕྱག་གཉིས་ལས་གཞན་པ་གཉིས་ཀྱིས་ཡུམ་ལ་འཁྱུད་པ་དགོས་པར་འགྱུར་ཏེ། རྗེ་བཙུན་གྱིས་རྡོ་རྗེ་འཛིན་པ་དང་། དྲིལ་བུ་འཛིན་པ་དང་། ཡུམ་ལ་འཁྱུད་པའི་དག་པ་གསུམ་སོ་སོར་གསུངས་པའི་ཕྱིར་རོ། །འགྲེལ་པ་ལུགས་ཀྱི་གཞུང་གཞན་རྣམས་ལས། གཡས་བརྐྱང་ཞེས་པ་ཙམ་དང་། སྐྱིལ་ཀྲུང་ཕྱེད་པ་ཞེས་པ་ཙམ་ལས་གསལ་ཁ་མི་སྣང་ཡང་། རིན་ཆེན་འབར་བར། ཉི་མར་ཞབས་གཡས་བརྐྱང་གཡོན་བསྐུམ། །ལྷག་མ་གར་གྱི་ཚུལ་གྱིས་བཞེངས། །ཞེས་གསུངས་པའི་དོན་ནི། མདུན་མ་གཉིས་གཡས་བརྐྱང་གཡོན་བསྐུམ་རྒྱབ་མ་གཉིས་སྐྱིལ་ཀྲུང་ཕྱེད་པའི་གར་སྟབས་ཡིན་པར་མངོན་ཏེ། རྗེ་བཙུན་ཆེན་པོས་མཛད་པའི་གདན་གྱི་རྣམ་དག་ལས། གཙོ་བོའི་ཞབས་ཕྱེད་ཀྲུང་དུ་བཞུགས་པས། ཚངས་པའི་སྙིང་ག་ནས་མནན་པ་དང་། ཞབས་གཡས་བརྐྱང་བས་དབང་ཕྱུག་ཆེན་པོའི་སྙིང་ག་ནས་མནན་པ་དང་། གཡོན་བསྐུམ་པས་གཞན་འཕྲུལ་དབང་བྱེད་ཀྱི་བདུད་སྡིག་ཅན་གྱི་སྙིང་ག་ནས་མནན་པ་དང་། ཡུམ་གྱི་ཞབས་གཡོན་པས་བརྒྱ་བྱིན་གྱི་སྙིང་ག་ནས་མནན་པར་གསུངས་པ་ཡང་། འདི་ལ་དགོངས་པར་སྣང་བས། བདུད་བཞི་བཀྲམ་གདན་གྱི་ཚེ་ཡབ་ཀྱི་ཞབས་བརྐྱངས་པ་གསུམ་དང་། ཡུམ་གྱི་ཞབས་བརྐྱངས་པ་གཅིག་གིས་བདུད་བཞི་སོ་སོར་མནན་ནས་བསྐུམ་པ་གཉིས་ཀྱིས་མནན་རྒྱུ་མེད་པ་བྱ་དགོས་པར་སྣང་ངོ་། །མདོར་ན་གསུངས་ཚུལ་སོ་སོར་གསུངས་པ་ཙམ་མ་གཏོགས། སྦྱར་ཚུལ་གང་ལ་སྦྱར་ཡང་དག་པ་རེ་སྦྱར་རྒྱུ་ཡོད་པས། འགལ་བ་མེད་པ་འདྲའོ། །རྒྱན་ཆ་ལ་རྗེ་བཙུན་གྱིས་བསྟོད་པ་ལས། སྟག་ལྤགས་དང་ནི་མིའི་པགས་པས་སྣམ་དཀྲིས་ཞེས་གསུངས་པ་ནི། སྔོན་བྱུང་གི་རྣམ་འཕྲུལ་ཙམ་ལ་དགོངས་ལ། འདིར་ནི་མི་མགོ་རློན་པའི་དོ་ཤལ་དང་། རུས་པའི་རྒྱན་དྲུག་ལས་གཞན་པའི་རྒྱན་མི་དགོས་སོ། །འདིར་རྩ་རྒྱུད་ལས། སྒེག་པ་དཔའ་བ་མི་སྡུག་པ། །དགོད་པ་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་རོ་དང་ལྡན་པ་ཉིད། །ཅེས་གསུངས་པའི་དོན་རྗེ་བཙུན་རིན་པོ་ཆེས། ཉམས་དགུ་ལ་བཤད་པ་བསམ་ཀྱིས་མི་ཁྱབ་པ་ཅིག་བྱུང་ཡང་། སྐབས་འདི་བདག་གི་བླ་མ་འདི་ཙམ་ཞིག་གསུང་སྟེ། སྒེག་ཅིང་དཔའ་བ་མི་སྡུག་པ་ནི་སྐུའི་ཉམས་གསུམ་སྟེ། དེའང་སྒེག་པ་ནི་རྒྱན་སྣ་ཚོགས་དང་། བཞུགས་ཚུལ་དུ་མ་སྟེ། དེའང་སྐུ་ལྟ་བས་ཆོག་མི་ཤེས་པ་དང་ལྡན་པས་གདུལ་བྱ་འདོད་ཆགས་ཅན་འདུལ་བར་བྱེད་པ་ཡིན་ནོ། །དཔའ་བ་ནི་བདུད་བཞི་མཉམ་པར་མནན་ནས་སྐུ་ཆེ་ཞིང་བརྗིད་པ་སྟེ། ཞེ་སྡང་ཅན་འདུལ་བ་ཡིན་ནོ། །མི་སྡུག་པ་ནི་གཏི་མུག་ཅན་ལ་བྱེ་བྲག་ཏུ་སྣང་བ་སྟེ། ཞལ་སྨིན་མ་དང་དཔྲལ་བར་བསྡུས་ཤིང་། རྣམ་འགྱུར་དུ་མ་དང་ལྡན་པ་སྟེ། གཏི་མུག་ཅན་འདུལ་བར་བྱེད་པ་ཡིན་ནོ། །དགོད་ཅིང་དྲག་ཤུལ་འཇིགས་སུ་རུང་ནི་གསུང་གི་ཉམས་གསུམ་སྟེ། དེ་ལ་དགོད་པ་ནི་རབ་ཏུ་དགའ་ཞིང་། ཆགས་པའི་བཞད་པའི་སྒྲས་འདོད་ཆགས་ཅན་འདུལ་ལ། ཧཱུྃ་དང་ཕཊ་ལ་སོགས་པ་དྲག་ཤུལ་གྱི་ང་རོས་ཞེ་སྡང་ཅན་འདུལ་ཞིང་། འཇིགས་སུ་རུང་བ་ནི་རྟག་པ་དང་། ཆད་པར་འཛིན་པ་རྣམས་འཇིགས་པར་བྱེད་པའི་སྒྲ་སྟེ། སྟོང་པ་དང་ཟུང་དུ་འཇུག་པའི་གསུང་ཡིན་ནོ། །སྙིང་རྗེ་རྔམ་དང་ཞི་བ་ནི་ཐུགས་ཀྱི་ཉམས་གསུམ་སྟེ། སྙིང་རྗེ་ནི་སེམས་ཅན་ཐམས་ཅད་ལ་རྗེས་སུ་འཛིན་པར་བཞེད་དེ། འདོད་ཆགས་ཅན་འདུལ་ལ། རྔམ་པ་ནི་བྱམས་པ་ཆེན་པོས་རབ་ཏུ་ཁྲོ་བར་མཛད་པ་ནི། ཞེ་སྡང་ཅན་འདུལ་ཞིང་། ཟུང་དུ་འཇུག་པ་ཞི་བ་ཆེན་པོའི་ཐུགས་ཀྱིས་ལོག་པར་ལྟ་བ་དང་ལྡན་པའི་གཏི་མུག་ཅན་འདུལ་བར་བྱེད་པ་ཡིན་ནོ། །གསུམ་པ་བཞེངས་ནས་སྣོད་བཅུད་སྦྱང་བ་ལ་གཉིས་ཏེ། སེམས་དཔའ་སུམ་བརྩེགས་བསྒོམ་པ། དེས་སྣོད་བཅུད་སྦྱང་བའོ། །དང་པོ་ནི། སློབ་དཔོན་མི་ཐུབ་ཟླ་བའི་གཞུང་རྣམས་དང་། རིན་ཆེན་འབར་བར། གཙོ་འཁོར་ཐམས་ཅད་ཀྱི་ཐུགས་ཀར་རང་རང་གི་ས་བོན་དང་། ཕྱག་མཚན་ལས་རང་འདྲའི་ཡེ་ཤེས་སེམས་དཔའ་བསྐྱེད། དེའི་ཐུགས་ཀར་ཏིང་ངེ་འཛིན་སེམས་དཔའ་ས་བོན་ལས་ཕྱག་མཚན་གྱིས་མཚན་པ་བསྒོམ་པར་གསུངས་པ་ནི་རྒྱས་པའི་ལུགས་སོ། །གཉིས་མེད་རྡོ་རྗེ་དང་། མར་མེ་མཛད་སོགས་ཀྱིས། གཙོ་འཁོར་ཐམས་ཅད་ཀྱི་ཐུགས་ཀར་རང་རང་གི་ས་བོན་ལས་ཕྱག་མཚན་བསྒོམས་པའི་སྟེང་དུ། རང་རང་གི་ས་བོན་བསྒོམ་པ་ནི་འབྲིང་པོའི་ལུགས་སོ། །གྲུབ་ཆེན་མཚོ་སྐྱེས་ཀྱིས་ས་བོན་རྐྱང་པ་བསྒོམ་པར་གསུངས་ལ། ས་བོན་གྱི་ངོ་བོ་ནི་ཡེ་ཤེས་སེམས་དཔའ་དང་། དེའི་ཐིག་ལེ་ནི་ཏིང་ངེ་འཛིན་སེམས་དཔའ་བཤད་པས། སེམས་དཔའ་སུམ་བརྩེགས་བསྡུས་པའི་དབང་དུ་བྱས་པའོ། །འདི་རྣམས་ཀྱི་དོན་མ་གོ་བར་སྔགས་རིམ་མཁན་པོས་མི་ཐུབ་ཟླ་བ་སོགས་ཀྱི་རྒྱ་གཞུང་རྣམས་ནས་སེམས་དཔའ་སུམ་བརྩེགས་བཤད་བཞིན་དུ། རྗེ་བཙུན་ས་སྐྱ་པ་རྣམས་ཀྱིས་ས་བོན་འགོད་པ་ཙམ་ལས་མ་བཤད་པས། ནོར་བའི་རྣམ་གཞག་ཤིན་ཏུ་ཆེའོ་ཞེས་འཆད་པ་ནི། མ་བརྟགས་པ་ཁོ་ན་ཡིན་ཏེ། རྗེ་བཙུན་གྱིས། ཐུགས་ཀར་པདྨ་དང་ཉི་མའི་སྟེང་དུ། ཨྃ་ལས་གྲི་གུག་ཨྃ་གིས་མཚན་པ་ཙམ་མམ། ཡང་ན་རྗེ་བཙུན་མའི་སྐུ་མཚོན་གང་བ་ཅིག་གི་ཐུགས་ཀར་ཕྱག་མཚན་ས་བོན་གྱིས་མཚན་པ་བསྒོམས་ལ། སེམས་དཔའ་སུམ་བརྩེགས་སུ་བསྒོམས་པ་སྟེ། དེ་གཉིས་གང་རུང་ཅིག་བྱའོ། །ཞེས་སེམས་དཔའ་སུམ་བརྩེགས་རྒྱས་པ་དང་། བར་མ་བསྒོམ་པའི་ཚུལ་བཤད་ཅིང་རྗེ་བཙུན་རྩེ་མོས། ལྷ་དགུའི་ཐུགས་ཀར་ཉི་ཟླ་ཁ་སྦྱོར་གྱི་བར་དུ་རང་རང་གི་ས་བོན་བསམས་ལ། ཡབ་ཀྱི་ཐུགས་ཀར་ཉི་མའི་སྟེང་དུ་ཧཱུྃ། འཁོར་རྣམས་ཀྱི་ཟླ་བའི་སྟེང་དུ་རང་རང་གི་ས་བོན་ནོ། །ཞེས་བསྡུས་པའི་ཚུལ་གསལ་བར་གསུངས་པའི་ཕྱིར་རོ། །གལ་ཏེ་སེམས་དཔའ་གསུམ་དངོས་སུ་བཤད་པ་རྣམས་དེ་ལྟར་ཡིན་མོད། ས་བོན་ཐིག་ལེས་བརྒྱན་པ་ལ་སེམས་དཔའ་ཐ་མ་གཉིས་ཀྱི་དོན་ཚང་བར་གཞུང་གང་ནས་ཀྱང་བཤད་པ་མེད་དོ་ཞེ་ན། འདི་ནི་ཤིན་ཏུ་མི་འཐད་དེ། དཔལ་གསང་བ་འདུས་པའི་འགྲེལ་པ་སྒྲོན་མ་གསལ་བར། དེས་ན་ཁམས་གསུམ་པའི་དམ་ཚིག་སེམས་དཔའི་སྙིང་གར་ཡི་གེ་ཧཱུྃ། ཡེ་ཤེས་སེམས་དཔའ་བསྒོམས་ནས། སེམས་ནི་ཐིག་ལེར་གྱུར་པར་བཞག །ཅེས་བྱ་བའི་དམ་ཚིག་སེམས་དཔའི་སྙིང་གར་གནས་པའི་ཡེ་ཤེས་སེམས་དཔའ་ཞེས་གྲགས་པ་ལ། རང་གི་སེམས་ཐིག་ལེར་གྱུར་བའི་ཏིང་ངེ་འཛིན་གྱི་སེམས་དཔའི་གཟུགས་ཅན་གཞག་གོ །ཞེས་གསུངས་པ་དང་འགལ་བའི་ཕྱིར་རོ། །གཉིས་པ་ནི། གྲུབ་ཆེན་མཚོ་སྐྱེས་ཀྱིས། རང་གི་སྙིང་གར་ཉི་མ་ལ་གནས་པའི་ས་བོན་ལས་འོད་ཟེར་བྱུང་སྟེ། འོད་ཟེར་དེ་རྣམས་ཀྱིས་ཀྱང་ཁམས་གསུམ་ཐམས་ཅད་མངོན་པར་ཁྱབ་པར་བྱས་ནས་ཡི་གེ་དེ་ཉིད་ལ་ཞུགས་སོ་ཞེས་དང་། མར་མེ་མཛད་ཀྱིས། དེ་ཡི་ས་བོན་ཕྱོགས་བཅུར་སྤྲོས། །བསྐུལ་སྦྱངས་ས་བོན་སོ་སོར་ཐིམ། །ཞེས་པ་ལས། རྒྱ་གར་བའི་གཞུང་གཞན་རྣམས་ལ་སྣོད་བཅུད་སྦྱང་བ་མི་གསལ་ཡང་། རྗེ་བཙུན་སྐུ་མཆེད་གཉིས་ཆར་གྱིས་གསུངས་ཤིང་། ཇི་ལྟར་བྱ་བའི་ཚུལ་ཡང་། རྗེ་བཙུན་རྩེ་མོས། ད་ནས་དབུགས་ཕྱིར་རྒྱུ་བའི་དུས་སུ་འོད་ཟེར་གྱི་ཚོགས་དཔག་ཏུ་མེད་པ་སྤྲོས་པས་སྣོད་ཀྱི་འཇིག་རྟེན་ལ་ཕོག་པས། དེ་མ་ཐག་ཏུ་གཞལ་ཡས་ཁང་དཔག་ཏུ་མེད་པར་འགྱུར། ཡང་འོད་ཟེར་སླར་འདུས་ནས་རང་གི་ས་བོན་ལ་ཐིམ། དེ་ཙམ་གྱིས་ནི་གཞན་དམ་ཚིག་སེམས་དཔའ་ལ་འགོད་པ་ཞེས་ཀྱང་བྱའོ། །ཞེས་གསུང་པ་ལྟར་ཡིན་ནོ། །འོད་ཟེར་དེ་གང་ལས་སྤྲོ་ན་རྗེ་བཙུན་རྩེ་མོས། དེ་ཡང་ལྷ་དགུའི་ཆོ་ག་ཡིས། །རང་རང་ས་བོན་ལས་འོད་སྤྲོ། །ཞེས་དང་། རྗེ་བཙུན་གྱིས་བཅོམ་ལྡན་འདས་དང་། ལྷ་མོ་རྣམས་ཀྱི་ས་བོན་ལས་འོད་འཕྲོས་པས་ཞེས་གསུངས་པས། གཙོ་འཁོར་ཐམས་ཅད་ཀྱི་ཐུགས་ཀ་ནས་སྤྲོ་བ་ཡིན་ནོ། །འདིར་སྣོད་བཅུད་སྦྱང་བ་དང་། འདུས་པ་འཕགས་ལུགས་ལས་ལྷག་མོས་ཀྱིས་མཛད་པ་གསུངས་པ་དང་། ཡེ་ཤེས་ཞབས་ལུགས་པས། འགྲོ་བ་དབང་བསྐུར་གསུངས་པ་རྣམས་བསྐྱེད་རིམ་གྱི་སྒྲུབ་ཐབས་གཅིག་གི་ནང་དུ་མ་དག་པའི་སྣོད་བཅུད་སྦྱངས་ནས། སངས་རྒྱས་ཀྱི་ཞིང་རྣམ་པར་དག་པ་བསྒྲུབ་པའི་དམིགས་པ་ཚང་བའི་དོན་དུ་གཅིག་པར་རྗེ་བླ་མ་ཐམས་ཅད་མཁྱེན་པ་གསུང་ངོ་། །གཉིས་པ་མིག་སོགས་བྱིན་གྱིས་བརླབ་པ་ལ་བཞི་སྟེ། གང་ལ་འགོད་པའི་གཞི། དེ་ལ་བཀོད་པའི་ལྷ། ཅི་ཙམ་ཞིག་བཀོད་པའི་གྲངས། དེ་ལྷར་བཀོད་པའི་དགོས་པའོ། །དང་པོ་ནི། འགྲེལ་པ་ལུགས་ཀྱི་གཞུང་རྣམས་དང་། གྲུབ་ཆེན་མཚོ་སྐྱེས་ཀྱིས་དམ་ཚིག་གི་དཀྱིལ་འཁོར་ལ་ཡེ་ཤེས་ཀྱི་འཁོར་ལོ་བཅུག་པའི་རྗེས་ལ་སྐྱེ་མཆེད་ཀྱི་ལྷ་འགོད་པར་བཤད་པས། དེ་ལྟར་ན་ཡེ་ཤེས་པ་དང་། དམ་ཚིག་པ་དབྱེར་མེད་དུ་བྱས་པའི་དཀྱིལ་འཁོར་ལ་འགོད་པའོ། །ནག་པོ་པ་ལྟར་ན། གཙོ་བོ་ཡབ་ཡུམ་བསྐྱེད་ཚར་བའི་རྗེས་ལ་སྐྱེ་མཆེད་ཀྱི་ལྷ་རྣམས་བཀོད་ནས། འཁོར་གི་ལྷ་མོ་ཕྱུང་ཚར་བའི་རྗེས་ལ་མ་བཤད་པའི་ཕྱིར། གཙོ་བོ་ཡབ་ཡུམ་ཙམ་ཞིག་ལ་འགོད་པར་གསལ་ལོ། །རྗེ་ས་ཆེན་ཡབ་སྲས་ཀྱིས་མཚོ་སྐྱེས་འགྲེལ་པར། ཡེ་ཤེས་པ་བཀུག་པའི་རྗེས་ལ་སྐྱེ་མཆེད་བྱིན་གྱིས་རློབ་པར་འདོད་པ་བཀག་ནས། རང་ལུགས་རྫོགས་རིམ་བསྒོམས་ཚར་བའི་རྗེས་ལ་སྐྱེ་མཆེད་བྱིན་གྱིས་རློབ་པར་བཤད་དེ། འགྲེལ་པར། མདའ་གཅིག་ཤ་གཉིས་ཚུལ་གྱིས་ནི། །ཞེས་མདའ་གཅིག་གིས་ཤ་བ་གཉིས་གསོད་པ་ལྟར། སྐབས་འདིར་འགོད་པ་ནི། ཡན་ལག་བཞིའི་སྐྱེ་མཆེད་བྱིན་རླབས་དང་། རྣམ་དག་གཉིས་ཀ་དུས་གཅིག་ལ་འགྲུབ་པའི་དབང་དུ་བྱས་ནས། སྐབས་འདིར་བྱིན་གྱིས་རློབ་པ་སྟེ། དེ་ལྟར་ན་ཡན་ལག་གསུམ་རྫོགས་པའི་ལྷ་ལ་འགོད་པའོ། །རྗེ་བཙུན་གྱིས་ཡན་ལག་དྲུག་པར་སྐྱེ་མཆེད་བྱིན་གྱིས་བརླབས་ནས། ཡེ་ཤེས་པ་སྤྱན་འདྲེན་པར་གསུངས་པས། དེ་ལྟར་ན་དམ་ཚིག་གི་དཀྱིལ་འཁོར་ཁོ་ན་ལ་འགོད་པ་སྟེ། རྩ་རྒྱུད་ལས། གཉིས་པ་ལ་ནི་ས་བོན་བསྡུ། །ཞེས་དང་། གསང་བ་འདུས་པའི་ལེའུ་བཅུ་གཉིས་པ་ལས། ཉེ་བར་སྒྲུབ་པ་གྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་པར་དཔྱད། །ཅེས་གསུངས་པའི་དོན་དུ་མཛད་པའོ། །གཉིས་པ་ནི། རྒྱ་གར་བའི་སྒྲུབ་ཐབས་ཕལ་ཆེར་དང་། རྗེ་བཙུན་སྐུ་མཆེད་གཉིས་ཀྱིས་སྐྱེ་མཆེད་དྲུག་དང་། སྐུ་གསུང་ཐུགས་ཀྱི་ལྷ་མོ་གསུམ་སྟེ། དགུ་འགོད་པར་གསུངས་པ་འདི་ཉིད་གཙོ་བོར་བྱའོ། །དེ་རྣམས་ཞལ་གཅིག་ཕྱག་གཉིས་པ་ལ་མི་མཐུན་པ་མེད་ཅིང་ཁ་དོག་ནི་ཉིན་འབྱུང་ཟླ་བས་ནག་པོ་འབའ་ཞིག་ཏུ་བཤད་ཀྱང་། རྗེ་བཙུན་སྐུ་མཆེད་ཀྱིས་གཏི་མུག་རྡོ་རྗེ་མ་དཀར་མོ། ཞེ་སྡང་རྡོ་རྗེ་མ་སྔོན་མོ་སོགས་སུ་བཤད་པ་ལྟར་རོ། །ཕྱག་མཚན་ནི་རྗེ་བཙུན་སྐུ་མཆེད་ཀྱིས་གཡས་གྲི་གུག གཡོན་ཐོད་པ། གྲུ་མོ་ན་ཁ་ཊྭཱཾ་ག་འཛིན་པ་དང་། རྒྱན་ཆ་ནི་ཕྱག་རྒྱ་ལྔས་བརྒྱན་པ་དང་། གདན་ནི་པད་ཉི་དང་རོ་གདན་དུ་གསུངས་པ་ལྟར་རོ། །བསྒོམ་ཚུལ་ནི། རྗེ་བཙུན་རྩེ་མོས་མིག་ལ་སོགས་པ་སྐྱེ་མཆེད་ཐ་མལ་པ་རྣམས་སྟོང་པར་བསམས་ཏེ། དེར་པྃ་ལས་པདྨ་དང་། རྃ་ལས་ཉི་མའི་སྟེང་དུ་རོ་རེ་བསམས་ཏེ། ཞེས་བཤད་པ་ནི་གདོང་དྲུག་གི་རྒྱུད་ལས། མིག་སོགས་བྱིན་གྱིས་བརླབ་པ་ལ། །གཏི་མུག་རྡོ་རྗེ་སོགས་ཀྱིས་བསྲུང་། །དབང་སྦུབས་སྟོང་པ་ཉིད་བྱ་སྟེ། །སྙིང་པོའམ་མིང་གི་ཡི་གེ་ཡིས། །རིགས་ཀྱི་ཕྱག་མཚན་ལྡན་པ་ཡི། །སྐུ་རྣམས་ངེས་པར་བསྐྱེད་པའོ། །ཞེས་གསུང་པ་དང་མཐུན་པས། མིག་སོགས་ཐ་མལ་གྱི་སྐྱེ་མཆེད་རྣམས་སྟོང་པར་བསྒོམས་ནས། དེར་ས་བོན་སོགས་ལས་ལྷ་བསྐྱེད་པ་ཡིན་གྱི། དབང་རྟེན་ཉིད་ལྷར་བསྒོམ་པ་མ་ཡིན་པས། ལུས་དཀྱིལ་དང་། སྐྱེ་མཆེད་ཀྱི་ལྷའི་བསྒོམ་ཚུལ་གྱི་ཁྱད་པར་རྒྱུ་མཚན་དང་བཅས་པའང་ཤེས་དགོས་སོ། །གསུམ་པ་ནི། མི་ཐུབ་ཟླ་བས་བདག་མེད་མར་སྒྲུབ་ཐབས་ལས། གཏི་མུག་རྡོ་རྗེ་མིག་གཉིས་སུ། །ཞེས་དང་། ཡབ་ཀྱི་སྒྲུབ་ཐབས་ལས། མིག་གཉིས་ཞེས་དང་། རྣ་བ་གཉིས་ཞེས་བཤད་པ་དང་། བདུད་རྩི་འོད་ལས། མིག་དག་གཏི་མུག་རྡོ་རྗེ་ཡིན། །ཞེས་གསུངས་པས། གཙོ་བོའི་རྩ་ཞལ་གྱི་སྤྱན་གཉིས་དང་། སྙན་གཉིས་དང་། འཁོར་རྣམས་ཀྱི་ཡང་སྤྱན་གཉིས་དང་། སྙན་གཉིས་ལ་འགོད་པ་ཡིན་གྱི། སྤྱན་དབུས་མ་དང་། གཙོ་བོའི་ཞལ་ལྷག་མ་རྣམས་ལ་མི་འགོད་དེ། སྔར་གྱི་ལུང་དེ་རྣམས་ལས་མིག་གཉིས་ཞེས་སོགས་དམིགས་བསལ་དུ་འབྱུང་བའི་ཕྱིར་རོ། །དེའི་རྒྱུ་མཚན་ཡང་འོག་ནས་འཆད་པའི་དགོས་པ་གསུམ་གྱིས་ཐ་མལ་གྱི་རྣམ་རྟོག་བཟློག་པ་ཡང་། སྦྱང་གཞི་ཉིད་ལ་དགོས་པ་ཡིན་གྱི། གཞན་ལ་མི་དགོས་པ་དང་། མངོན་ཤེས་ལྔ་འཆར་བ་ཡང་སྦྱང་གཞི་ཉིད་ལ་འཆར་བ་དང་། བར་ཆད་ཀྱི་བགེགས་ལས་བསྲུང་བ་ཡང་སྦྱང་གཞི་ཉིད་བསྲུང་དགོས་པ་རྒྱུ་མཚན་དུ་བྱས་ནས། གཙོ་བོའི་སྦྱང་གཞི་ཉིད་ལ་འགོད་ལ། དེའི་འགྲོས་ཀྱིས་འཁོར་གྱི་ལྷ་རྣམས་ལ་ཡང་དེ་ལྟར་དུ་སྦྱར་བའོ། །བཞི་པ་ནི། རྗེ་བཙུན་རྩེ་མོས། དེ་ལྟར་གོ་ཆ་བགོས་པ་ལ། །དགོས་པ་རྣམ་པ་གསུམ་གསུངས་ཏེ། །ཐ་མལ་རྣམ་རྟོག་བློ་བཟློག་དང་། །མངོན་པར་ཤེས་པ་ལྔ་འཆར་དང་། །བར་ཆད་བགེགས་ལས་བསྲུང་བ་སྟེ། །དེ་ལས་དང་པོ་རྣམ་པ་གཉིས། །གུར་གྱི་ལུང་ཡིན་ཐ་མ་ནི། །བླ་མ་དམ་པའི་གདམས་ངག་ཡིན། །ཞེས་གསུངས་ལ། དེའི་དོན་དང་པོ་ནི། རྡོ་རྗེ་གུར་ལས། བསྐྱེད་རིམ་གྱིས་ཐ་མལ་གྱི་རྣམ་རྟོག་བཟློག་པར་གསུང་པ་ལྟར་འདིར་མིག་སོགས་ལ་ལྷ་བཀོད་པས་མིག་སོགས་ཐ་མལ་གྱི་དབང་པོར་ཞེན་པ་བཟློག་པ་ཡིན་ནོ། །གཉིས་པ་ནི། གུར་ལས། སྐྱེས་པ་དང་ནི་སྐྱེ་བ་དང་། །སྐྱེ་བོ་གང་ཞིག་སྐྱེ་འགྱུར་བ། །གཏི་མུག་རྡོ་རྗེའི་སྦྱོར་བ་ལས། །རྡོ་རྗེའི་མིག་གིས་མཐོང་བར་འགྱུར། །ཁམས་གསུམ་ལམ་ནི་ཉམས་དགའ་བར། །སྒྲ་ནི་གང་ཞིག་རབ་གྲགས་པར། །རྣ་བའི་དྲུང་དུ་གནས་པ་བཞིན། །ཞེ་སྡང་རྡོ་རྗེའི་སྦྱོར་བ་ལ། །དྲང་སྲོང་མངོན་པར་ཤེས་པས་ཐོས། །སེམས་ཅན་ཀུན་གྱི་སེམས་ཆེན་པོ། །མཚོན་དཀའ་ལྟ་བུའི་མཚན་ཉིད་ནི། །ལག་མཐིལ་སྐྱུ་རུ་ར་ལྔ་བཞིན། །རྡོ་རྗེ་སེམས་ཀྱིས་ཤེས་པར་འགྱུར། །སྐྱེ་བ་བྱེ་བ་སྟོང་ཕྲག་ཏུ། །རང་གི་རིགས་ནི་སྟོང་ཕྲག་གཅིག །རྡོ་རྗེ་སྦྱོར་བས་དྲན་གྱུར་ཏེ། །ཉི་མ་གསུམ་བཞིན་དྲན་པར་འགྱུར། །སྒྱུ་འཕྲུལ་དྲྭ་བ་དུ་མ་ཡི། །འདིས་ནི་སྣང་བར་བྱེད་པར་འགྱུར། །མངོན་ཤེས་ལྔ་ཡི་སྦྱོར་བ་ཡིས། །སངས་རྒྱས་མངོན་ཤེས་ཐོབ་པར་འགྱུར། །ཞེས་གསུངས་པས། གཏི་མུག་རྡོ་རྗེ་མ་དང་། ཞེ་སྡང་རྡོ་རྗེ་མ་གཉིས་བསྒོམས་པས་ལྷའི་མིག་དང་རྣ་བའི་མངོན་པར་ཤེས་པ་ཐོབ། བར་མ་གསུམ་གྱིས་རྫུ་འཕྲུལ་གྱི་མངོན་པར་ཤེས་པ་ཐོབ་པ་དེ་རྣལ་འབྱོར་པས་གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་དང་། འཆི་འཕོ་བ་དང་སྐྱེ་བ་ཤེས་པ་ཐོབ། ལྷའི་མིག་དང་། རྣ་བ་གཉིས་མངོན་ཤེས་གཅིག་ཏུ་བྱས་པའི་མངོན་ཤེས་ལྔ་ལ་བརྟེན་ནས། དྲུག་པ་ཟག་མེད་ཀྱི་མངོན་ཤེས་ཐོབ་པར་འགྱུར་ཏེ། ཀཾ་པ་ལས། མིག་ལ་སོགས་པའི་དབང་པོ་དྲུག །མངོན་ཤེས་བསྐྱེད་ཕྱིར་སྦྱང་བར་བྱ། །ཞེས་སོ། །གསུམ་པ་ནི། རྩ་རྒྱུད་དུ། འདིས་ནི་གོ་ཆ་སེམས་དཔའ་ཆེ། །ཞེས་འདི་རྣམས་གོ་ཆར་གསུངས་ལ། གོ་ཆས་བར་ཆད་བསྲུང་བ་ཆོས་ཉིད་ཡིན་ཏེ། གསང་འདུས་སྒྲོན་གསལ་ལས། མིག་བྱང་ཆུབ་སེམས་དཔའ་སའི་སྙིང་པོ་སོགས་སུ་བསྒོམས་པས་བརྒྱ་བྱིན་ལ་སོགས་པ་བགེགས་ཀྱིས་མི་ཚུགས་པར་བཤད་པ་ལྟ་བུའོ། །གསུམ་པ་ཡེ་ཤེས་ཀྱི་འཁོར་ལོ་དགུག་གཞུག་ལ་གཉིས་ཏེ། དངོས་དང་། ཞར་ལས་དེའི་དགོས་པའོ། །དང་པོ་ནི། རང་གི་སྙིང་གའི་ཧཱུྃ་ལས་འོད་འཕྲོས་པས་ཡེ་ཤེས་ཀྱི་དཀྱིལ་འཁོར་ལྷ་དགུའི་རྣམ་པར་སྤྱན་དྲངས། ལྷ་མོ་བརྒྱད་ཀྱིས་མཆོད། འོག་ནས་འབྱུང་བའི་བསྟོད་པས་བསྟོད། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿཞེས་བརྗོད་པས་ལྷ་མོ་གཽ་རཱི་ནག་མོ་ལྕགས་ཀྱུ་ཐོགས་པས་སྲུང་བའི་འཁོར་ལོའི་ནང་དུ་སྤྱན་དྲངས། ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ་ཞེས་བརྗོད་པས་ཙཽ་རཱི་དམར་མོ་ཞགས་པ་ཐོགས་པས། མགྲིན་པ་ལ་རེག་པས་ཡེ་ཤེས་སེམས་དཔའ་རྣམས་སྨིན་མཚམས་ནས་ཐིམ། ཨོྃ་བཛྲ་བེ་ཏཱ་ལཱི་བནྡྷ་བཾ་ཞེས་བརྗོད་པས་བེ་ཏཱ་ལཱི་སེར་མོ་ལྕགས་སྒྲོག་ཐོགས་པས་ཞབས་ལ་རེག་པས་ཆུ་ལ་ཆུ་འདྲེས་པ་བཞིན་བསམ། ཨོཾ་བཛྲ་གྷསྨ་རཱི་ཝ་ཤཾ་ཀུ་རུ་ཧོཿཞེས་བརྗོད་པས་གྷསྨ་རཱི་ལྗང་གུ་དྲིལ་བུ་ཐོགས་པས། ཕྱི་ནང་ཀུན་ཏུ་དྲིལ་བུའི་སྒྲ་བྱུང་བས་དམ་ཚིག་པ་རྣམས་ཡེ་ཤེས་པའི་ངོ་བོར་གྱུར་པར་བསམ་མོ། །གཉིས་པ་ནི། རྗེ་བཙུན་རྩེ་མོས། དེ་ལྟར་དམ་ཚིག་འཁོར་ལོ་ལ། །ཡེ་ཤེས་བསྟིམ་པའི་དགོས་པ་ཡང་། །འདི་ལྟར་ཁ་ཅིག་དམ་ཚིག་པ། །དམན་འཛིན་ཡེ་ཤེས་མཆོག་ཏུ་འཛིན། །དེ་ལྟར་འཛིན་པའི་གང་ཟག་གིས། །ཡེ་ཤེས་དགུག་གཞུག་མ་བྱས་ན། །དམ་ཚིག་འབའ་ཞིག་གཟུགས་བརྙན་ཙམ། །ལམ་དུ་བྱས་ཡིན་དེས་མི་འགྲུབ། །དེ་བས་དམ་ཚིག་འཁོར་ལོ་ལ། །ཡེ་ཤེས་བཅུག་པས་དེར་རྟོགས་པས། །འབྲས་བུ་འབྱིན་ཡིན་ཡང་དག་པར། །དེ་ལྟར་མེད་ཀྱང་དེར་དགོངས་གསུངས། །ཞེས་གསུངས་པ་ལྟར་ཡིན་ནོ། །གསུམ་པ་དབང་བསྐུར་བ་མི་བསྐྱོད་པའི་ཡན་ལག་ལ་ལྔ་སྟེ། དབང་བསྐུར་གི་ལྷ་སྤྱན་དྲངས། མཆོད་ཅིང་གསོལ་བ་གདབ་པ། དབང་བསྐུར་བ་དངོས། རིགས་བདག་གིས་རྒྱས་གདབ་པ། དབང་དོན་ལ་ང་རྒྱལ་གཟུང་བའོ། །དང་པོ་ནི། རྩ་རྒྱུད་ལས། རང་གི་སྙིང་གར་ས་བོན་བསམ་མོ། །ས་བོན་ལས་འོད་ཟེར་ནག་པོ་ལྕགས་ཀྱུའི་རྣམ་པའི་གཟུགས་ཀྱིས་ཕྱུང་ནས། དེས་ཁམས་གསུམ་དུ་བཞུགས་པའི་སངས་རྒྱས་ཐམས་ཅད་སྤྱན་དྲངས་ལ་ཞེས་གསུངས་པའི་དོན་སྤྱན་འདྲེན་པའི་གཞི་ནི། རང་གི་སྙིང་གར་ས་བོན་ཞེས་ཏེ། རིགས་སོ་སོའི་ས་བོན་ནོ། །དེ་ལས་འོད་ཟེར་ཁ་དོག་ནག་པོ་རྩེ་མོ་གུག་པ་ལྕགས་ཀྱུའི་རྣམ་པ་སྤྲོས་ནས། གང་སྤྱན་འདྲེན་ན་ཁམས་གསུམ་ན་བཞུགས་པའི་སངས་རྒྱས་ཐམས་ཅད་ཅེས་པ་ལ། འགྲེལ་པ་ལུགས་ཀྱི་གཞུང་རྣམས་སུ་སངས་རྒྱས་ཐམས་ཅད་ཅེས་དང་། དེ་བཞིན་གཤེགས་པ་ཐམས་ཅད་ཅེས་པ་ཙམ་ལས་མི་འབྱུང་ཡང་། གྲུབ་ཆེན་མཚོ་སྐྱེས་ཀྱིས། རང་གི་སྐུ་ལས་བྱུང་བའི་འོད་ཟེར་གྱི་ཚོགས་ཀྱིས་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། རིག་མ་དང་། ལྷ་མོ་དང་། ཁྲོ་བོ་ལ་སོགས་པ་རྣམས་ཀྱིས་བདུད་རྩི་ལྔས་གང་བའི་དབང་བསྐུར་བ་དང་ལྡན་པ་དང་། ཞེས་གསུངས་སོ། །དེ་དང་མཐུན་པར་རྗེ་བཙུན་སྐུ་མཆེད་ཀྱིས་ཀྱང་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་སྟེ། གདན་གསུམ་དངོས་སུ་ཚང་བའི་དཀྱིལ་འཁོར་སྤྱན་འདྲེན་པར་མཛད་དོ། །གཉིས་པ་ནི་རྩ་རྒྱུད་ལས། མ་མོ་བརྒྱད་ཀྱིས་ཡང་དག་པར་མཆོད་ནས་གསོལ་བ་གདབ་པར་བྱའོ། །ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་པའི་དོན་སྤྱན་དྲངས་པའི་དཀྱིལ་འཁོར་ལ་ལྷ་མོ་བརྒྱད་ཀྱིས་ཡང་དག་པར་མཆོད་ནས་དབང་བསྐུར་བའི་ཕྱིར་དུ་གསོལ་བ་གདབ་པའི་སྔགས་དོན་ནི། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ་ཞེས་པ་སྟེ་བསྡུས་པ་ཡིན་ལ། རྒྱས་པར་ན། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་རང་བཞིན་ཅན་རྣམས་ཀྱི། །ཁྱོད་ཀྱིས་བདག་ལ་དབང་བསྐུར་སྩོལ། །ཞེས་པས་གསོལ་བ་གདབ་བོ། །གསུམ་པ་ནི། རྩ་རྒྱུད་ལས། སངས་རྒྱས་དེ་རྣམས་ཧེ་རུ་ཀའི་རྣམ་པའི་གཟུགས་ཀྱིས་དེ་བཞིན་གཤེགས་པ་ལྔའི་བདག་ཉིད་ཀྱིས་བདུད་རྩི་ལྔས་གང་བའི་བུམ་པས་དབང་བསྐུར་བར་བྱའོ། །དབང་བསྐུར་བ་ན་མེ་ཏོག་གི་ཆར་འབབ་པར་འགྱུར་རོ། །རྔའི་སྒྲ་འབྱུང་བར་འགྱུར་རོ། །གུར་གུམ་གྱི་ཆུའི་ཆར་འབབ་པར་འགྱུར་རོ། །གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པར་བྱའོ། །རྡོ་རྗེའི་གླུ་སྤྱན་མ་ལ་སོགས་པ་རྣམས་ཀྱིས་བླང་བར་བྱའོ། །ཞེས་པའི་དོན་གསོལ་བ་བཏབ་པའི་རྗེས་དེ་ནས་དེ་བཞིན་གཤེགས་པ་རིགས་ལྔ་པོ་འདི་དག་ཧེ་རུ་ཀའི་རྣམ་པའི་གཟུགས་སུ་གྱུར་པ་ནི། ཀུ་མུ་ཏིར། ཧེ་རུ་ཀའི་གཟུགས་བྱས་པས། །ཞེས་བྱ་བ་ནི་ཞལ་བརྒྱད་ཞབས་བཞི་པ། ཕྱག་བཅུ་དྲུག་གིས་བརྒྱན་པ་རྣམས་སོ། །ཞེས་གསུངས་པ་ལྟར་རྗེ་བཙུན་རྩེ་མོས་ཀྱང་གསུངས་སོ། །དེ་ལྟ་བུའི་ཕྱག་བཅུ་དྲུག་གིས་ཐོད་པའི་ཚབ་ཏུ། གུར་ལས། མི་བསྐྱོད་པ་ནི་རྡོ་རྗེའི་ཆུ། །རྣམ་པར་སྣང་མཛད་དྲི་ཆུར་བརྗོད། །སྣང་བ་མཐའ་ཡས་ཁུ་བ་སྟེ། །རིན་ཆེན་འབྱུང་ལྡན་ཁྲག་ཅེས་བྱ། །ཤ་ཆེན་དོན་ཡོད་གྲུབ་པ་འོ། །ཞེས་གསུངས་པ་ལྟར་གྱི་བདུད་རྩི་ལྔའི་ཆུས་ཡོངས་སུ་གང་བའི་བུམ་པ་བསྣམས་ནས་སྤྱི་བོ་ནས་བླུགས་ཤིང་། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེའི་དབང་བསྐུར་ཆེན་པོ་སྦྱིན། །ཞེས་གསུངས་ཤིང་དབང་བསྐུར། དེའི་ཚེ་ཡུམ་བཞིས་རྡོ་རྗེའི་གླུ་ལེན། བྱང་སེམས་ཀྱིས་བཀྲ་ཤིས་བརྗོད། ལྷ་མོ་རྣམས་ཀྱིས་མཆོད། ཁྲོ་བོ་རྣམས་ཀྱིས་འགེགས་བསྐྲད་པར་བསམ་མོ། །འདིར་འགྲེལ་པ་ལུགས་ཀྱི་གཞུང་རྣམས་སུ་དེ་ལྟར་དབང་བསྐུར་བས་ལུས་ཐམས་ཅད་གང་། དྲི་མ་དག་རིགས་བདག་གི་རྒྱས་འདེབས་པ་ཙམ་ལས་མ་གསུངས་ལ། མན་ངག་ལུགས་ལ་བྱང་ཆུབ་ཀྱི་སེམས་ཀྱི་ཆུ་རྒྱུན་གཅིག་ལས་དབང་བཞི་ལེན་པའི་ཚུལ་གསུངས་ཏེ། རྗེ་བཙུན་རིན་པོ་ཆེས། བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་སྨིན་མཚམས་ཡན་ཆད་གང་བས་རྡོ་རྗེ་སློབ་དཔོན་གྱི་དབང་ཐོབ། ལུས་ཀྱི་དྲི་མ་དག བསྐྱེད་པའི་རིམ་པ་དབྱིབས་བསྒོམ་པ་ལ་དབང་། དེའི་མཐར་ཐུག་རྒྱན་དྲུག་གི་དག་པ་ཡིན་པས། སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །གདུ་བུ་རྣམ་པར་སྣང་མཛད་དེ། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་མགོན། །ཞེས་བྱ་བ་ཐལ་བ་དང་མཆོད་ཕྱིར་ཐོགས་རྡོ་རྗེ་འཆང་ཆེན་པོ་ཡིན་སྙམ་དུ་བསམ་མོ། །ཡང་དབང་གི་ཆུ་རྒྱུན་གྱིས་མགྲིན་པ་ཡན་ཆད་གང་བས་གསང་བའི་དབང་ཐོབ། ངག་གི་དྲི་མ་དག བདག་བྱིན་གྱིས་བརླབ་པའི་རིམ་པ་བསྒོམ་པ་ལ་དབང་། དེའི་མཐར་ཐུག་འཁོར་ལོ་བཞིའི་རྒྱས་གདབ་པ་ཡིན་པས་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་ཨྃ་ལས་ཀྱི་ཕྱག་རྒྱ། སྙིང་ག་ཆོས་ཀྱི་འཁོར་ལོ་འདབ་མ་བརྒྱད་པའི་དབུས་ན་ཧཱུྃ་ཆོས་ཀྱི་ཕྱག་རྒྱ། མགྲིན་པ་ལོངས་སྤྱོད་ཀྱི་འཁོར་ལོ་འདབ་མ་བཅུ་དྲུག་པ་ཁ་དོག་དམར་པོ་ཁ་གྱེན་ལ་བལྟས་པའི་དབུས་ན་ཨོཾ་དམར་པོ་ཡོད་པ་ནི་ཕྱག་རྒྱ་ཆེན་པོ། སྤྱི་བོ་བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་པ་ཁ་དོག་དཀར་པོ་ཁ་ཐུར་ལ་ལྟ་བའི་དབུས་ན་ཧྃ་ཡོད་པ་ནི་དམ་ཚིག་གི་ཕྱག་རྒྱར་མོས་པ་བྱ། ཡང་དབང་གི་ཆུ་རྒྱུན་གྱིས་སྙིང་ག་ཡན་ཆད་གང་བས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱིས་དྲི་མ་དག་ལམ་དཀྱིལ་འཁོར་འཁོར་ལོ་བསྒོམ་པ་ལ་དབང་། དེ་ལས་མངོན་པར་ཤེས་པ་བསྐྱེད་པ་སྔར་གྱི་སྐྱེ་མཆེད་དང་། སྐུ་གསུང་ཐུགས་བྱིན་གྱིས་བརླབ་པ་དྲན་པ་ཙམ་བྱ། དེ་ནས་དབང་གི་ཆུ་རྒྱུན་དེས་གསང་གནས་ནས་རྐང་པའི་མཐིལ་ཡན་ཆད་གང་། ལུས་ཐམས་ཅད་མ་ལུས་པར་གང་བས། མཆོག་ཏུ་བདེ་བ་ཆེན་པོ་བཞི་པའི་དབང་ཐོབ། ལུས་ངག་ཡིད་གསུམ་གྱི་དྲི་མ་དག་པས་བརྟན་པར་བྱས། དེས་ནས་དབང་རྫོགས་པ་དང་། ལམ་རྫོགས་པས་ན་རིགས་ཀྱི་བདག་པོས་རྒྱས་གདབ་པར་བྱ་སྟེ་ཞེས་སོ། །འདི་ལ་ཕྱིས་ཀྱི་སྔགས་རིམ་མཁན་པོ་དག དབང་བཞི་ཆུ་རྒྱུན་གཅིག་ལས་ལེན་པ་རྒྱ་གར་བའི་གཞུང་གང་དུའང་བཤད་པ་མེད་པས་མི་དག་གོ་ཞེས་འཆད་པ་ནི་ཤིན་ཏུ་མི་རིགས་ཏེ། གྲུབ་ཆེན་མཚོ་སྐྱེས་ཀྱིས། འདི་སྐད་དུ་རིམ་པ་ཇི་ལྟ་བར་རྣམ་པ་སྣ་ཚོགས་པ་དང་། རྣམ་པར་སྨིན་པ་དང་། རྣམ་པར་ཉེད་པ་དང་། མཚན་ཉིད་དང་བྲལ་བའི་སྐད་ཅིག་མ་བཞི་པོ་རྣམས་ཐོབ་པ་དང་། དགའ་བ་དང་། མཆོག་ཏུ་དགའ་བ་དང་། དགའ་བྲལ་གྱི་དགའ་བ་དང་། ལྷན་ཅིག་སྐྱེས་པའི་དགའ་བ་རྣམ་པ་བཞི་པོ་རྣམས་མངོན་པར་མཚོན་པ་དང་། དགོད་པ་དང་། ལྟ་བ་དང་། འཁྱུད་པ་དང་། གཉིས་གཉིས་བཞི་པོ་རྣམ་པར་དག་པ་ནི། སློབ་དཔོན་དང་། གསང་བ་དང་། ཤེས་རབ་དང་། མཆོག་ཏུ་བདེ་བ་ཆེན་པོའི་མཐར་ཐུག་པ་དབང་བཞི་པོ་རྣམས་བླང་ངོ་། །དབང་བསྐུར་ནས་རང་གི་རིགས་ཀྱི་བདག་པོས་སྤྱི་བོར་མཚན་ཏོ། །ཞེས་སྐབས་འདིར་དབང་བཞི་ལེན་པ་གསལ་བར་གསུངས་པའི་ཕྱིར་རོ། །གཞུང་འདིའི་དོན་དབང་རང་གི་ངོ་བོ་གང་བླང་ན། སློབ་དཔོན་སོགས་སོ། །དེས་དྲི་མ་གང་དག་ན་དགོད་པ་དང་སོགས་སོ། །དེས་ཉམས་མྱོང་ཅི་སྐྱེ་ན། དགའ་བ་དང་སོགས་སོ། །དེ་ཇི་ཙམ་གྱི་དུས་སུ་སྐྱེ་ན། རྣམ་པ་སྣ་ཚོགས་པ་སོགས་ཏེ། གཞུང་མས་རིམ་གྱིས་བཤད་ལ། སློབ་དཔོན་བདེ་བའི་རྡོ་རྗེས་སྐུ་རྡོ་རྗེ་ལྷ་དགུའི་སྒྲུབ་ཐབས་སུ་དོན་འདི་དང་འདྲ་བར་བཤད་དོ། །བཞི་པ་ནི་རྩ་རྒྱུད་ལས། དབང་བསྐུར་ནས་སྤྱི་བོར་རང་གི་རིགས་ཀྱིས་བདག་པོར་འགྱུར་རོ། །ཞེས་པའི་དོན་ནི་རྗེ་བཙུན་རིན་པོ་ཆེས། སྤྱིར་རྡོ་རྗེ་ཐེག་པའི་ལམ་དང་། འབྲས་བུ་ཐམས་ཅད་ཕྱག་རྒྱས་མཚོན་ནུས་ལ། དེའང་བསྐྱེད་པའི་རིམ་པའི་སྟེང་དུ་མཚོན་པས། ལམ་ཐམས་ཅད་མཚོན་པར་ནུས་པ་ཡིན་ནོ། །དེ་ལ་ལྔ་སྟེ། ངོ་བོ་ཉིད་ལ་ངོ་བོ་ཉིད་ཀྱི་ཕྱག་རྒྱ། ལུས་ལ་སེམས་ཀྱི་ཕྱག་རྒྱ། སེམས་ལ་ལུས་ཀྱི་ཕྱག་རྒྱ། རྒྱུ་ལ་འབྲས་བུའི་ཕྱག་རྒྱ། འབྲས་བུ་ལ་རྒྱུའི་ཕྱག་རྒྱའོ། །དང་པོ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ། རང་བཞིན་གྱིས་རྣམ་པར་དག་པར་ཤེས་པ་ནི། ངོ་བོ་ཉིད་ལ་ངོ་བོ་ཉིད་ཀྱི་ཕྱག་རྒྱ་སྟེ། སཾ་པུ་ཊ་ལས། འདོད་ཆགས་དག་པས་འདོད་ཆགས་ཉིད། །ཞེ་སྡང་དག་པས་ཞེ་སྡང་ཉིད། །གཏི་མུག་དག་པས་གཏི་མུག་སྟེ། །ཐམས་ཅད་རྣམ་དག་རྡོར་འཛིན་མགོན། །ཞེས་བྱ་བ་དང་། དཔལ་མཆོག་ལས་ཀྱང་། འདོད་ཆགས་རྣམ་པར་དག་པའི་གནས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་གནས་སོ། །ཞེས་བྱ་བ་ལ་སོགས་པ་གསུངས་ལ། འདི་ཉིད་ལས་ཀྱང་། ངོ་བོ་གཟུགས་མེད་མཐོང་བ་པོ། །ཞེས་བྱ་བ་ལ་སོགས་པ་དེའི་དོན་ཡིན་ཏེ། དེ་མཚོན་པ་ནི་གཙོ་བོ་དང་། ནང་གི་རྣལ་འབྱོར་མ་རྣམས་དང་། སྟེང་འོག་ལ་རང་གི་རིགས་ཀྱི་དབུ་རྒྱན་བྱས་པས་ངོ་བོ་ཉིད་མཚོན་པ་ཡིན་ནོ། །ལུས་ལ་སེམས་ཀྱི་ཕྱག་རྒྱ་ནི། ཕྱི་དང་ནང་གིས་བསྡུས་པའི་ཆོས་ཐམས་ཅད་རང་གི་སེམས་ལས་མ་གཏོགས་པ་གུད་ན་མེད་དོ་ཞེས་རྟོགས་པར་བྱ་བ་སྟེ་མཚོན་པ་ནི། པུཀྐ་སཱི་ས་རྣམ་པར་དག་པ་དང་། གཽ་རཱི་གཟུགས་དང་གཟུགས་ཀྱི་ཕུང་པོ་རྣམ་པར་དག་པ། རྣམ་པར་སྣང་མཛད་ཀྱི་ངོ་བོ་ལ་སེམས་ཀྱི་ངོ་བོ་མི་བསྐྱོད་པའི་རྒྱས་བཏབ་པ་འདིས་མཚོན་པ་ཡིན་ནོ། །དེའང་རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་གསུངས་པ་དང་། འཕགས་པ་ས་བཅུ་པ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ་ཞེས་གསུངས་པ་ཡིན་ནོ། །སེམས་ལ་ལུས་ཀྱི་ཕྱག་རྒྱ་ནི་སྲུང་བའི་འཁོར་ལོ་དང་། གཞལ་ཡས་ཁང་ལ་སོགས་པ་ལུས་དང་། ཕྱི་རོལ་བེམས་པོའི་རྣམ་འཕྲུལ་ཐམས་ཅད་སེམས་ཀྱིས་བྱེད་པ་ནི་སེམས་ལུས་སུ་སྒྲུབ་པ་སྟེ། དེ་མཚོན་པ་ནི་ཆུ་རྣམ་པར་དག་པ་ཤ་ཝ་རཱི་དང་། སྒྲ་དང་ཚོར་བ་རྣམ་པར་དག་པ་ཙཽ་རཱི་གཉིས་མི་བསྐྱོད་པའི་ངོ་བོ་སེམས་ལ་རྣམ་པར་སྣང་མཛད་ལུས་ཀྱིས་དབུར་བརྒྱན་པ་ནི་སེམས་ལ་ལུས་ཀྱི་རྒྱ་སྟེ། དེ་གཉིས་ཀའང་དཔལ་གསང་བ་འདུས་པ་ལས། རིགས་ཀྱི་བུ་ཁྱོད་ཀྱི་ལུས་སེམས་ལྟ་བུ་དང་། སེམས་ཚིག་ཏུ་བརྗོད་པ་ལྟ་བུར་ཀུན་དུ་སྒོམས་ཤིག ཅེས་གསུང་པའི་དོན་ཡང་དེ་ཡིན་ནོ། །རྒྱུ་ལ་འབྲས་བུའི་རྒྱ་ཞེས་བྱ་བ་ནི། མ་དག་པའི་ཕུང་ཁམས་སྐྱེ་མཆེད་རྣམས་དག་པ་དེ་བཞིན་གཤེགས་པ་རིགས་ལྔ་དང་། བྱང་ཆུབ་སེམས་དཔའ་ལ་སོགས་པར་བྱིན་གྱིས་རློབ་པ་ནི། རྒྱུ་ལ་འབྲས་བུ་གནས་པ་འབྲེལ་པ་ཅན་དུ་བསྒོམ་པ་སྟེ། དེ་ནི་ཙཎྜ་ལཱི་མེ་རྣམ་པར་དག་པ་དང་། བེ་ཏཱ་ལཱི་དྲི་དང་། འདུ་ཤེས་རྣམ་པར་དག་པ་འོད་དཔག་ཏུ་མེད་པའི་ངོ་བོ། རྒྱུ་འདོད་ཆགས་རྣམ་པར་དག་པ་ལ་འདོད་ཆགས་ཀྱི་འབྲས་བུ་སེར་སྣ་རྣམ་པར་དག་པ་རིན་ཆེན་འབྱུང་ལྡན་གྱིས་རྒྱས་བཏབ་པས་དེ་མཚོན་པ་ཡིན་ཏེ། གཟུགས་ཕུང་རྡོ་རྗེ་མ་ཞེས་བྱ་བ་ལ་སོགས་པའི་དོན་ཡང་། རྒྱུ་འབྲས་བུར་བྱིན་གྱིས་རློབ་པའི་དོན་ཡིན་ནོ། །འབྲས་བུ་ལ་རྒྱུའི་ཕྱག་རྒྱ་ཞེས་བྱ་བ་ནི་དག་པ་རིགས་ལྔ་དང་། ཡེ་ཤེས་ལྔ་ཡང་རྒྱུ་ཕུང་པོ་དང་། ཉོན་མོངས་པ་གནས་གྱུར་པ་ལས་འབྱུང་ངོ་ཞེས་སྟོན་པ་ནི། རླུང་རྣམ་པར་དག་པ་གཡུང་མོ་དང་། རོ་དང་འདུ་བྱེད་རྣམ་པར་དག་པ་གྷསྨ་རཱི་གཉིས་དོན་ཡོད་གྲུབ་པ། འབྲས་བུ་ཕྲག་དོག་གི་ངོ་བོ་ལ་རྒྱུ་འདོད་ཆགས་རྣམ་པར་དག་པ་འོད་དཔག་ཏུ་མེད་པས་རྒྱས་བཏབ་པས་དེ་མཚོན་པ་ཡིན་ཏེ། འབྲས་བུ་དེ་ཡང་རྒྱུའི་རིགས་ལས་འབྱུང་བ་མཚོན་པར་བྱ་བ་ཡིན་པའི་ཕྱིར་རོ། །དེ་ཡང་རྡོ་རྗེ་གུར་ལས། ཐུབ་པ་རྣམ་པར་སྣང་མཛད་རྨོངས། །ཞེ་སྡང་འདྲེན་པ་མི་བསྐྱོད་པ། །འདོད་ཆགས་དཔག་མེད་རྡོ་རྗེ་སྟེ། །སེར་སྣ་རྡོ་རྗེ་སྣང་བྱེད་ཉིད། །དོན་ཡོད་སྐྱོན་ནི་ཐམས་ཅད་བྱེད། །འདྲེན་པ་ལྔ་ནི་སྐྱོན་ལྡན་ནོ། །ཞེས་གསུངས་པ་ཡིན་ནོ། །དེ་ལྟར་རྒྱུ་འབྲས་ཀྱི་རྒྱ་ཚན་པ་དེ་གཉིས་ཀའི་ལུང་ཡང་། ཐམས་ཅད་གསང་བ་ལས། རྒྱུ་ལ་འབྲས་བུའི་རྒྱས་གདབ་ཅིང་། །འབྲས་བུ་ལ་ཡང་རྒྱུའི་རྒྱས་གདབ། །གཞན་དུ་བསྐལ་པ་བྱེ་བར་ནི། །གྲངས་མེད་པར་ཡང་འགྲུབ་མི་འགྱུར། །ཞེས་གསུངས་ལ། སཾ་པུ་ཊི་ལས་ཀྱང་། བུད་ཤིང་བསྲེགས་པའི་རིགས་པ་ཡིས། །དགེས་པའི་རྒྱལ་བ་གར་མཁན་མཆོག །ཅེས་གསུངས་ཏེ། བུད་ཤིང་ལ་མེའི་རིགས་དང་། མེ་ལ་བུད་ཤིང་གི་རིགས་ཞེས་བརྗོད་པ་དང་འདྲ་བ་ཡིན་ནོ། །དེའང་རྒྱུ་འདོད་ཆགས་ལས་འབྲས་བུ་སེར་སྣ་དང་ཕྲག་དོག་འབྱུང་བས། རྒྱུ་འབྲས་དེ་གཉིས་ནི་ཕན་ཚུན་མི་སླུ་བའི་ཕྱིར་རོ། །དེ་ཙམ་དཔེར་བཞག་ནས་འཁོར་བའི་རྒྱུ་འབྲས་དག་བྱ་དག་བྱེད་ངོ་སྤྲད་པའི་ལམ་འདིས་འབྲས་བུ་སངས་རྒྱས་འགྲུབ་པ་མི་སླུ་བ་ཡིན་ནོ། །ཡང་ཁ་ཅིག་འདི་སྐད་དུ། ཕྱོགས་ཀྱི་ལྷ་མོ་ནི་ཕུང་པོར་གང་ནས་བཤད། དྲི་དག་པ་ནི་རིན་ཆེན་འབྱུང་ལྡན་ཡིན། རོ་དག་པ་ནི་འོད་དཔག་ཏུ་མེད་པ་ཡིན་པས། དེ་གཉིས་ཀྱི་ངོ་བོ་བེ་ཏཱ་ལཱི་དང་། གྷསྨ་རཱི་གཉིས་ལ་རང་གི་རིགས་ཀྱིས་དབུ་རྒྱན་བྱུང་བས་ན་ངོ་བོ་ཉིད་ལ་ངོ་བོ་ཉིད་ཀྱི་རྒྱར་མི་འགྱུར་རམ་ཞེ་ན། ཕྱོགས་ཀྱི་ལྷ་མོ་ཕུང་པོར་བཤད་པ་ནི། རྒྱུད་འབུམ་པའི་ལུང་སློབ་དཔོན་མཚོ་སྐྱེས་ཀྱིས་གསུངས་ལ། དྲི་དང་རོའི་དག་པའང་སྦྱང་གཞི་དྲི་སེར་སྣའི་ངོ་བོ། འབྲས་བུ་ལ་སྦྱོང་བྱེད་བེ་ཏཱ་ལཱི་རྒྱུ་འདོད་ཆགས་ཀྱིས་སྦྱོང་ལ། དེ་ལ་ཡང་འབྲས་བུ་སེར་སྣའི་རྒྱས་བཏབ་པ་ལ་སུམ་སྦག་ཡིན་ལ། རོ་འདོད་ཆགས་རྒྱུ་ལ་གྷསྨ་རཱི་འབྲས་བུ་ཕྲག་དོག་གིས་སྦྱོང་ལ། དེ་ལ་འདོད་ཆགས་འོད་དཔག་ཏུ་མེད་པས་རྒྱས་བཏབ་པས་རྒྱ་སུམ་སྦག་ཡིན་ནོ། །དེ་ལྟར་ན་ལུས་སེམས་ལ་ཉིས་སྦག་ལས་མི་ཡོང་ལ། རྒྱུ་འབྲས་ལ་སུམ་སྦག་ཡོད་པ་ཅིའི་ཕྱིར་ཞེ་ན། རྒྱུ་འབྲས་འདི་ལམ་གྱི་གཙོ་བོ་ཡིན་པའི་ཕྱིར། སྦྱང་གཞི་ནས་མཚོན་དགོས་ལ། ལུས་སེམས་ཀྱི་དག་བྱ་དག་བྱེད་ནི་དེ་ཉིད་ཀྱིས་རྫོགས་ཏེ། དེ་ཐམས་ཅད་ལ་ཡང་ངོ་བོ་ཉིད་ལ་ངོ་བོ་ཉིད་ཀྱི་རྒྱ་ཞེས་བྱ་བས་ཁྱབ་དགོས་པས་དབུ་རྒྱན་རྣམས་ཀྱི་སྤྱི་བོར་ཡང་རང་གི་རིགས་ཀྱི་ཕྱག་མཚན་བསྒོམ་དགོས་ཏེ། རྡོ་རྗེ་གུར་ལས། སྤྱི་བོར་རྡོ་རྗེ་འཛིན་པ་མཆོག །དེར་ཡང་རྡོ་རྗེ་མཆོག་ནག་པོ། །ཞེས་བྱ་བ་དང་། ཆོས་ཀྱི་འཁོར་ལོ་སྤྱི་བོར་འཛིན། །ཞེས་བྱ་བ་ལ་སོགས་པ་གསུངས་སོ། །དེ་ལ་ཁ་ཅིག་ལོག་པར་རྟོག་པ་འདི་སྐད་དུ། པུཀྐ་སཱི་ལ་རྣམ་པར་སྣང་མཛད་ཀྱིས་དབུར་བརྒྱན་ན། ལུས་བརྩེགས་ན་དོན་མེད་ཅིང་། ཤ་ཝ་རཱི་ལ་མི་བསྐྱོད་པས་དབུར་བརྒྱན་པ་ནི། ལུས་མེད་པའི་སེམས་རྟེན་མེད་པས་མི་མཛེས་སོ། །ཞེས་བྱ་བ་ལྷའི་དབུ་རྒྱན་རྐྱང་པ་ཙམ་མཐོང་བས་གཞུང་འདི་ཉིད་ཀྱི་གོང་དུ་བསྟན་པ་ཙམ་ཡང་མ་དྲན་པས་ལོག་པར་སྨྲ་བ་ཡིན་ཏེ། དེ་ལྟར་ན་བདག་མེད་མ་ལ་མི་བསྐྱོད་པ་དང་། རྡོ་རྗེ་མ་ལ་རྣམ་སྣང་གི་དབུ་རྒྱན་ཡང་མི་མཛེས་པར་འགྱུར་རོ། །དེ་ལྟར་ན། ལུས་སྤངས་ནས་ནི་སེམས་ཀྱིས་ནི། །ཞེས་པ་དང་། སེམས་སྤངས་ནས་ནི་ལུས་ཀྱིས་ནི། །ཞེས་བྱ་བའི་གཞུང་ཇི་ལྟར་དྲང་ཞེ་ན། དེ་ཉིད་སྔར་སྨོས་པ་བཞིན་དུ་ཆོས་ཐམས་ཅད་སེམས་སུ་བསྒྲུབ་པ་དང་། སེམས་ཉིད་ཀྱང་རྟེན་དུ་བསྒྲུབ་པ་ལ་སོགས་པའི་དགོས་པ་ཡིན་ཏེ། མདོར་ན་རྡོ་རྗེ་ཐེག་པའི་ལམ་ཐམས་ཅད་ཕྱག་རྒྱའི་གདབ་ཚུལ་ལྔ་པོ་འདིས་མཚོན་པ་ཡིན་ནོ། །ཞེས་རྣམ་བཤད་དག་ལྡན་ལས་འབྱུང་ལ། དེ་ལ་རྒྱས་འདེབས་ཀྱི་ལྷའི་སྤྱི་བོར་ཕྱག་མཚན་གྱི་རྒྱས་འདེབས་བཤད་པའི་དོན། རྗེ་བཙུན་ཉིད་ཀྱིས་དབུ་རྒྱན་རྣམས་ནི་རང་རང་གི་རིགས་དང་རྗེས་སུ་མཐུན་པའི་དབུ་རྒྱན་ཡིན་ཅིང་། དེ་དག་གི་སྤྱི་བོར་ཡང་རང་གི་རིགས་ཀྱི་མཚན་མ་ཡིན་ཏེ། དེ་ཡང་མ་དག་པ་ལྷར་བྱིན་གྱིས་རློབ་པ་ནི་སྣང་བ་ཀུན་བརྟགས་ལ་གཞན་དབང་གི་ཕྱག་རྒྱ་ཡིན་ལ། སྤྱིར་ངོ་བོ་ཉིད་ལ་ངོ་བོ་ཉིད་དང་། ལུས་ལ་སེམས་ཀྱི་རྒྱ་ལ་སོགས་པ་བྱུང་བ་ནི་གཞན་དབང་ལ་གཞན་དབང་གི་རྒྱ་ཡིན་ཅིང་། དེའི་སྤྱི་བོར་རང་གི་རིགས་ཀྱི་མཚན་མ་བྱུང་བ་ནི། ལྷ་ཐམས་ཅད་རང་བཞིན་མེད་པར་བསྒྲུབ་པ་གཞན་དབང་ལ་ཡོངས་སུ་གྲུབ་པའི་རྒྱ་ཞེས་བྱ་བ་ཡིན་ནོ། །ཞེས་གསུངས་སོ། །ངོ་བོ་ཉིད་གསུམ་པོ་འདི་ཐེག་ཆེན་གྱི་མདོ་སྡེ་དང་། རྒྱུད་སྡེ་ཀུན་ལས་གསུངས་པས་སེམས་ཙམ་པ་དང་ངོས་འཛིན་མི་འདྲ་ཡང་། རྣལ་འབྱོར་སྤྱོད་པའི་དབུ་མ་པ་རྣམས་དང་། སློབ་དཔོན་ཟླ་བས་ཀྱང་འཇུག་འགྲེལ་ལས། འདིའི་རྣམ་གཞག་བཤད་དོ། །རྒྱས་འདེབས་ཀྱི་དེ་བཞིན་གཤེགས་པ་རྣམས་སྤྲུལ་སྐུའི་རྣམ་པ་ཅན་དུ་དུས་འཁོར་དུ་བཤད་ཀྱང་། དེ་ནི་གཞུང་དེ་ཁོ་ནའི་སྒོས་ཆོས་ཡིན་ལ། བླ་མེད་གཞན་རྣམས་ལ་རང་རང་གི་རིགས་ལྔའི་རྣམ་པ་དགོས་པར་མངོན་ནོ། །ལྔ་པ་ནི་དེ་ལྟར་དབང་བསྐུར་བ་ནི་ཁམས་གསུམ་གྱི་ཆོས་ཀྱི་རྒྱལ་པོའི་གོ་འཕང་ལ་གཞག་པའི་དོན་ཡིན་པས་དེ་ལྟ་བུའི་ང་རྒྱལ་བྱ་ཞིང་། ཨོཾ་སརྦ་ཏ་ཐཱ་ག་ཏ་ནི་སྔར་བཞིན། ཨ་བྷི་མངོན་པར། ཥེ་ཀ་ཏ་དབང་བསྐུར་བ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ནི་སྔར་བཞིན་ཏེ། དེའི་དོན་ལ་སེམས་གཞག་གོ །བཞི་པ་བདུད་རྩི་མྱང་བ་འོད་དཔག་མེད་ཀྱི་ཡན་ལག་ནི། སཾ་པུ་ཊིའི་དགུ་པའི་གཉིས་པ་ལས། ཀྱེ་བཅོམ་ལྡན་འདས་ཡེ་ཤེས་ཀྱི་ལྕགས་ཀྱུ་རུ་གསུངས་པ་དེ་གང་ལགས། བཅོམ་ལྡན་འདས་ཀྱི་བཀའ་སྩལ་པ། དང་པོ་སྐྱེ་དགུའི་བདག་པོར་བརྗོད། །དེ་བཞིན་གཉིས་པར་སྒྲོལ་མ་ཉིད། །གསུམ་པ་ལ་ནི་རབ་མཆོག་ཉིད། །བཞི་པ་ལ་ནི་མང་པོ་སྐྱེས། །ལྔ་པ་ལ་ནི་སྟོབས་ཞེས་བྱ། །རིགས་ལྔ་རྣམས་ཀྱི་སྔགས་འདི་དག །ཡེ་ཤེས་ལྔ་ཡི་རབ་དབྱེ་བས། །ཡེ་ཤེས་ཆེན་པོ་ལྔ་པོ་འདི། །ཁྱོད་ལ་ཕན་པའི་བསམ་པས་བཤད། །ཡེ་ཤེས་ལྕགས་ཀྱུའི་རབ་དབྱེ་བས། །ལས་རྣམས་ཀུན་ལ་སྦྱར་བར་བྱ། །གལ་ཏེ་ལས་ལ་ཕན་འདོད་པས། །རྣལ་འབྱོར་མ་ཀུན་ཚིམ་པར་བྱ། །འདོད་ལ་དགའ་བར་མི་བྱ་ཞིང་། །ལོངས་སྤྱོད་ལ་ནི་སྦྱར་མི་བྱ། །སེམས་ཅན་དོན་རྒྱུ་རྣལ་འབྱོར་པས། །མཆོད་པ་ཐམས་ཅད་རབ་ཏུ་བརྟག །དབྱངས་ཀྱི་བཅུ་གསུམ་ལས་བྱུང་བ། །གང་ཞིག་ཟླ་བ་དེ་རབ་གྲགས། །དེ་ཡི་དབུས་སུ་ས་བོན་གྱི། །ཨཱ་ལི་ཀཱ་ལི་མཉམ་སྦྱོར་བས། །ལྷ་ཀུན་དེ་ནས་ཚིམ་པར་བྱ། །འབུད་པ་འབར་བ་ཉིད་དང་ཡང་། །ཁྱད་པར་དུ་ནི་བསྐོལ་བ་ཉིད། །ཤེལ་གྱི་གཟུགས་ཀྱིས་བསྐྱེད་བྱ་ཞིང་། །དེ་ཕྱིར་ཐམས་ཅད་བརྟག་པར་བྱ། །དེ་ཡི་དབུས་སུ་བླངས་ནས་ནི། །དེ་ནས་བདུད་རྩི་མྱང་བར་བྱ། །ཞེས་གསུངས་པའི་དོན་རྒྱ་གར་གྱི་སློབ་དཔོན་ཕལ་ཆེར་དང་། རྗེ་བཙུན་གོང་མ་རྣམས་ཀྱིས། བདུད་རྩི་བྱིན་གྱིས་བརླབ་པའི་ཚུལ་འདི་ཁོ་ན་བཞིན་དུ་མཛད་དོ། །བདུད་རྩི་མྱང་བའི་རྗེས་དེ་ནས། ཨོཾ་སརྦ་ཏ་ཐཱ་ག་ཏ་སྔར་བཞིན། ཨ་མྲྀ་ཏ་བདུད་རྩི། སྭ་ད་ན་བཟང་པོ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ་སྔར་བཞིན། བདུད་རྩི་མྱང་བ་པོ་འོད་དཔག་མེད་ཀྱི་ངོ་བོ་ཡིན་སྙམ་པའི་ང་རྒྱལ་བཟུང་ངོ་། །ལྔ་པ་མཆོད་པ་དོན་ཡོད་གྲུབ་པའི་ཡན་ལག་ནི། དེ་ནས་ཡེ་ཤེས་ཀྱི་སྣང་བ་ལས་གྲུབ་པའི་གཽ་རཱི་ལ་སོགས་པའི་ལྷ་མོ་བརྒྱད་སྙིང་ག་ནས་སྤྲོས་ཤིང་། ཕྱོགས་མཚམས་བརྒྱད་དུ་རང་རང་གི་མཆོད་རྫས་ཐོགས་པས་འཁོད་ནས། གཙོ་བོ་ཡབ་ཡུམ་ནས། འཁོར་གྱི་ལྷ་ཐམས་ཅད་མཆོད་པར་བསམ་ཏེ། རིན་ཆེན་འབར་བར། དེ་ནས་མཁའ་འགྲོའི་ཚོགས་སྤྲོས་པས། །ཟླ་ཉི་ཆུ་སྨན་རྡོ་རྗེ་རོ། །ཅང་ཏེའུའི་སྒྲ་དང་འཁྱུད་པ་སྟེ། །གཙོ་བོ་ནས་བརྩམས་རིམ་བཞིན་མཆོད། །ཅེས་གསུངས་པ་ལྟར་རོ། །དེ་ནས་ཨོཾ་སརྦ་ཏ་ཐཱ་ག་ཏ་སྔར་བཞིན། པཱུ་ཛ་མཆོད་པ། བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔར་བཞིན། དེ་ལྟར་བརྗོད་ཅིང་དེ་བཞིན་གཤེགས་པ་རྣམས་མཆོད་པ་པོ་དོན་ཡོད་གྲུབ་པའི་ངོ་བོ་ཡིན་སྙམ་དུ་ང་རྒྱལ་བཟུང་ངོ་། །དྲུག་པ་བསྟོད་པ་རིན་ཆེན་འབྱུང་ལྡན་གྱི་ཡན་ལག་ནི། དེ་ནས་མཆོད་པ་བྱེད་མཁན་གྱི་རྣལ་འབྱོར་མ་ནི་བརྒྱད་པོ་དེ་དག་གིས་འཁོར་ལོའི་གཙོ་བོ་ལ་ཡོན་ཏན་བརྗོད་པའི་སྒོ་ནས་བསྟོད་པར་བྱ་སྟེ། གུར་ལས་འབྱུང་བའི་བསྟོད་པ་ལ་གཞུང་འདིར་བཤད་པ་ནི་འགྱུར་ཅུང་ཟད་མི་བདེ་ཞིང་རྒྱུད་ཉིད་ལས། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱིས་མཆོག་བརྙེས་པ། །ཁྱོད་ཀྱི་རྒྱུ་དང་མི་རྒྱུའི་འགྲོ་བ་ཀུན་བསྒྲུབས་ཤིང་། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མའི་སྤྲོས་པས་རྡོ་རྗེ་འཕེན་མཛད་པ། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །ཞེས་འགྱུར་བཅོས་པ་ལྟར་བཤད་ན། དཀྱིལ་འཁོར་གྱི་གཙོ་བོ་ཁྱོད་ནི། བདག་མེད་མ་ལ་སོགས་པའི་ལྷན་ཅིག་སྤྱོད་མ་དང་། གཽ་རཱི་ལ་སོགས་པའི་རྗེས་སུ་འབྲང་མའི་རྣལ་འབྱོར་གྱི་ཚོགས་ཀྱིས་ཡོངས་སུ་བསྐོར་ནས། ཟག་མེད་ཀྱི་བདེ་བ་ལ་ལོངས་སྤྱོད་པ་སྟེ། ལོངས་སྤྱོད་རྫོགས་པ་དང་། ཁ་སྦྱོར་དང་། བདེ་ཆེན་ཞེས་བྱ་བ་ཡན་ལག་གསུམ་དང་ལྡན་པ་ལོངས་སྐུའི་མཚན་ཉིད་དོ། །གཙོ་བོ་ཁྱོད་ནི་དེ་ཁོ་ན་ཉིད་ཀྱི་དོན་ཐུགས་སུ་ཆུད་པས། ཐུགས་རྣམ་པར་མི་རྟོག་པ་ཆོས་ཀྱི་སྐུའི་དངོས་གྲུབ་ཀྱི་མཆོག་བརྙེས་པ་སྟེ། རང་བཞིན་མེད་པའི་ཡན་ལག་ཆོས་སྐུའི་མཚན་ཉིད་དོ། །སྤྲུལ་པའི་སྐུ་ཁྱོད་ཀྱི་ཕྲིན་ལས་ཀྱི་སྒོ་ནས་རྒྱུ་བ་གང་བཅུད་ཀྱི་སེམས་ཅན་དང་། མི་རྒྱུ་བ་སྣོད་ཀྱི་འཇིག་རྟེན་ན་གནས་པའི་འགྲོ་བ་ཀུན་གྱི་དོན་འབད་མེད་དུ་བསྒྲུབས་ཤིང་། དེའི་རྒྱུ་ཡང་དམིགས་པ་མེད་པའི་སྙིང་རྗེ་ཆེན་པོའི་ཐུགས་ཀྱིས་སེམས་ཅན་རྣམས་འཁོར་བའི་སྡུག་བསྔལ་ལས་སད་པ་སྟེ། སྒྲོལ་བར་མཛད་པའོ། །ཚུལ་ཇི་ལྟར་ན། གདུལ་བྱ་གང་ལ་གང་འདུལ་གྱི་རྣམ་པར་སྟོན་ནས་རྡོ་རྗེ་སྟེ་སྟོང་ཉིད་ཆོས་སྐུའི་ངང་དུ་འཕེན་པ་སྟེ་བསྒྲུབ་པའམ། དེའི་གོ་འཕང་ལ་འགོད་པར་མཛད་པ་སྟེ། སྙིང་རྗེས་ཡོངས་སུ་གང་བ་དང་། རྒྱུན་མི་འཆད་པ་དང་། འགོག་པ་མེད་པའི་ཡན་ལག་གསུམ་དང་ལྡན་པ་སྤྲུལ་སྐུའི་མཚན་ཉིད་དོ། །ཧེ་རུ་ཀ་དཔལ་ནི་རྩ་རྒྱུད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་པ་ལྟར་གྱི་ཡི་གེ་བཞིའི་དོན་ལྡན་གྱི་ཧེ་རུ་ཀ་དཔལ་ཁྱོད་ཀྱི་རང་བཞིན་ནི་རྡོ་རྗེ་སྟེ། སྟོང་ཉིད་ཆོས་ཀྱི་སྐུ་དང་། ཡིད་ཀྱིས་དགེས་པ་ཆེན་པོ་འགྱུར་མེད་ཀྱི་བདེ་བ་བརྙེས་པ་ནི། བདེ་བ་ཆེན་པོའི་སྐུ་སྟེ། བདེ་སྟོང་ཟུང་དུ་འཇུག་པའི་ལྷ་ཀྱེ་རྡོ་རྗེ་ལ་ཕྱག་འཚལ་ལོ། །ཞེས་པའི་དོན་ཏོ། །སྒྲུབ་ཐབས་ཀྱི་གཞུང་ཕལ་ཆེ་བར། བསྟོད་པ་འདི་ཁོ་ན་འབྱུང་ལ། རིན་ཆེན་འབར་བར། འགྲོ་བ་དུག་ཆེན་མི་བཟད་པས། །ཁྱབ་པར་བཞུགས་ནས་ཧེ་རུ་ཀས། །སྣ་ཚོགས་ཚུལ་གྱིས་བདུད་རྩིར་བསྒྱུར། །སྨན་མཆོག་དཔའ་བོ་ཁྱོད་ལ་འདུད། །ཅེས་པའང་བཤད་དོ། །དེ་ལྟར་བསྟོད་པ་བྱས་པའི་རྗེས་སུ་མཆོད་བསྟོད་བྱེད་མཁན་གྱི་ལྷ་མོ་རྣམས་རང་གི་སྙིང་གར་ཐིམ་པར་བསམས་ལ་ང་རྒྱལ་བཟུང་སྟེ། ཨོཾ་སརྦ་ཏ་ཐཱ་ག་ཏ་སྔར་བཞིན། སྟུ་སྟི་ནི་བསྟོད་པ། བཛྲ་སྭ་བྷ་ཝ་ཨཱཏྨ་ཀོ྅ཧཾ་སྔར་བཞིན་ཏེ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་བརྗོད་པ་པོ་རིན་ཆེན་འབྱུང་ལྡན་ང་ཡིན་སྙམ་དུ་སེམས་མཉམ་པར་གཞག་གོ །གཉིས་པ་དེ་དེ་བཞིན་གཤེགས་པ་རིགས་དྲུག་དང་སྦྱར་བ་ནི། གཞལ་ཡས་ཁང་ནི་གཟུགས་ཀྱི་རྣམ་པ་གཞལ་ཡས་ཁང་ཡིན་ཡང་། རང་གི་ངོ་བོ་རྣམ་པར་སྣང་མཛད་ཡིན་པ་ནས། བསྟོད་པ་ནི་གཟུགས་ཀྱི་རྣམ་པ་བསྟོད་པ་ཡིན་ཀྱང་། རང་གི་ངོ་བོ་རིན་ཆེན་འབྱུང་ལྡན་ཡིན་པའི་བར་དུ་སྦྱར་བར་བྱ་ཞིང་། ཡིན་ཚུལ་ནི། མངོན་བྱང་གི་སྐབས་སུ་བཤད་པ་བཞིན་ནོ། །གསུམ་པ་དེ་ལྟར་སྦྱར་བའི་རྒྱུ་མཚན་ནི། དེ་ལྟར་ཡན་ལག་དྲུག་པོ་དེ་བཞིན་གཤེགས་པ་དྲུག་གི་ཡན་ལག་ཡིན་པའི་རྒྱུ་མཚན་ཅི་ཡིན་སྙམ་ན། ཕོ་བྲང་གཞལ་ཡས་ཁང་ཡང་སྐུ་ཡིན་ལ། སངས་རྒྱས་རྣམ་པར་སྣང་མཛད་ཀྱང་སྐུ་ཡིན་པས་ན་གཞལ་ཡས་ཁང་བསྐྱེད་པ་རྣམ་པར་སྣང་མཛད་ཀྱི་ཡན་ལག་དང་། དབང་བསྐུར་བའི་གཙོ་བོ་ནི་ཆུ་ཡིན་ལ། མི་བསྐྱོད་པ་དེ་བཞིན་གཤེགས་པ་ཡང་ཆུ་རྣམ་པར་དག་པ་ཡིན་པའི་ཕྱིར་དབང་བསྐུར་བ་མི་བསྐྱོད་པའི་ཡན་ལག་དང་། བདུད་རྩི་མྱང་བའང་མགྲིན་པར་ཉམས་སུ་མྱོང་བ་ཡིན་ལ། འོད་དཔག་ཏུ་མེད་པ་ཡང་གསུང་དག་པའི་ཕྱིར་བདུད་རྩི་མྱང་བ་འོད་དཔག་ཏུ་མེད་པའི་ཡན་ལག་དང་། བསྟོད་པ་ཡང་ཡོན་ཏན་ཡིན་ཅིང་། རིན་ཆེན་འབྱུང་ལྡན་དཔལ་ཡང་ཡོན་ཏན་ཡིན་པའི་ཕྱིར་བསྟོད་པ་རིན་ཆེན་འབྱུང་ལྡན་གྱི་ཡན་ལག་དང་། མཆོད་པའང་ཕྲིན་ལས་ཡིན་ལ། དོན་ཡོད་གྲུབ་པའང་ཕྲིན་ལས་དག་པ་ཡིན་པའི་ཕྱིར། མཆོད་པ་དོན་ཡོད་གྲུབ་པའི་ཡན་ལག་ཏུ་ཡང་དག་པར་བརྗོད་དོ། །རྗེས་སུ་ཆགས་པ་ནི་བདེ་བ་ཆེན་པོ་ཡིན་ལ། ལམ་བྱང་ཆུབ་སེམས་ཀྱང་རྗེས་སུ་ཆགས་པ་དང་ཆོས་མཐུན་ཅིང་། སངས་རྒྱས་ཀྱི་རྩ་བ་ཡང་བྱང་ཆུབ་ཀྱི་སེམས་ཡིན་པ་དང་། རྡོ་རྗེ་སེམས་དཔའ་ཡང་སངས་རྒྱས་ཀྱི་རྩ་བ་ཡིན་པའི་ཕྱིར། རྗེས་སུ་ཆགས་པ་རྡོ་རྗེ་སེམས་དཔའི་ཡན་ལག་ཏུ་གསུངས་ཏེ། མངོན་པར་རྟོགས་པའི་རྩ་བ་ཡང་དམ་ཚིག་པ་བསྐྱེད་པ། སྐྱེ་མཆེད་དང་སྒོ་གསུམ་བྱིན་གྱིས་བརླབ་པ། ཡེ་ཤེས་པ་གཞུག་པ་རྣམས་ཡིན་པར་རྗེ་བཙུན་རིན་པོ་ཆེས་གསུངས་སོ། །བཞི་པ་བསྒོམས་པ་ལས་འབྲས་བུ་འགྲུབ་པའི་རྟགས་ནི། རྡོ་རྗེ་གུར་ལས། མཚན་མ་ཡང་དག་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །གཉིས་པ་དུ་བ་འདྲ་བ་ཉིད། །གསུམ་པ་མེ་ཁྱེར་རྣམ་པ་སྟེ། །བཞི་པ་མར་མེ་ཉེར་འབར་བ། །ལྔ་པ་རྟག་ཏུ་སྣང་བ་སྟེ། །སྤྲིན་མེད་ནམ་མཁའ་འདྲ་བ་ཉིད། །དེ་ནི་ཐམས་ཅད་བདེན་པའི་རྒྱུ། །དངོས་གྲུབ་ཉེ་བར་འགྱུར་བ་ཡིན། །ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པར་སྐད་ཅིག་འགྱུར། །ཁམས་གསུམ་རྒྱུ་དང་མི་རྒྱུ་བའི། །མ་ལུས་ལུས་པ་མེད་པར་འགྲུབ། །འཇིག་རྟེན་ཁམས་ནི་ཐམས་ཅད་དུ། །ཇི་སྲིད་རྡོ་རྗེ་ལུས་ཅན་རྣམས། །ཡེ་ཤེས་ཕུང་པོའི་བློ་ལྡན་པ། །དེ་ཡི་རྗེས་སུ་ཐམས་ཅད་འབྲང་། །ཇི་སྲིད་སྐྱེ་གནས་ལས་བྱུང་བ། །ཁམས་གསུམ་ལམ་ནི་ཉམས་དགའ་བར། །ཕྱག་རྒྱ་ཆེན་པོར་རབ་སྦྱོར་བས། །དེ་རྣམས་ཐམས་ཅད་བཟའ་བར་བྱ། །ཞེས་གསུངས་སོ། །འདིའི་དོན་གུར་རྒྱན་དུ། དུ་སོགས་རྟགས་ལྔ་ལ་དྲོད། རྩེ་མོ། བཟོད་པ། ཆོས་མཆོག མཐོང་ལམ་དང་སྦྱར་ནས། ཕྱི་ནས་སྒྱུ་མའི་ལྟར་ཞེས་སོགས་ཀྱིས་བསྒོམས་ལམ་དང་། འཇིག་རྟེན་ཁམས་ནི་ཐམས་ཅད་དུ། །ཞེས་སོགས་ཀྱིས་མཐར་ཕྱིན་པའི་ལམ་དང་། ཇི་སྲིད་སྐྱེ་གནས་ལས་བྱུང་བ། །ཞེས་སོགས་སངས་རྒྱས་ཀྱིས་དངོས་ལ་འཆད་དོ། །དྲུག་པ་རྫོགས་པའི་རིམ་པ་ནི། རང་བྱིན་གྱིས་བརླབས་ཀྱི་དམིགས་པ་ཐམས་ཅད་ཀྱི་གཙོ་བོ་འཁོར་ལོ་བཞི་ལ་བརྟེན་པའི་གཏུམ་མོའི་རྣལ་འབྱོར་བསྟན་པའི་ཕྱིར་རྩ་བའི་རྒྱུད་ལས། ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་རི་བོང་ཅན་ཧཾ་འཛག །ཅེས་གསུངས་ཏེ། རང་དཀྱིལ་འཁོར་གྱི་གཙོ་བོར་བསྒོམས་པའི་ལུས་ཀྱི་དབུས་སུ་སྤྱི་གཙུག་ནས་ལྟེ་བའི་བར་དུ། རྩ་ཨ་ཝ་དྷཱུ་ཏཱི་ཤིན་ཏུ་ཕྲ་ཞིང་གསལ་བ། ཐིག་ལེའི་དྭངས་མས་གང་བ་དེའི་གཡས་སུ་རོ་མ་མེའི་རང་བཞིན་རཀྟས་གང་བ་དམར་པོ། གཡོན་དུ་རྐྱང་མ་ཆུའི་རང་བཞིན་བྱང་ཆུབ་ཀྱི་སེམས་ཀྱིས་གང་བ་དཀར་པོ་སྟེ་རྩ་གསུམ་གསལ་གདབ། དེ་ནས་ཨ་ཝ་དྷཱུ་ཏཱི་ལ་བརྟེན་པའི་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པའི་ལྟེ་བར་ཨྃ་དམར་མོ་མེའི་རང་བཞིན་མགོ་བོ་གྱེན་དུ་བལྟ་བ། ནང་སྐོར་གྱི་འདབ་མ་བརྒྱད་ལ། ཨ་ཀ་ཙ་ཊ་ཏ་པ་ཡ་ཤ ཕྱིའི་འདབ་མ་ལ། ཨཱ་ལི་ཕྲག་གཉིས། ཀཱ་ལི་ཕྲག་གཅིག་ལ་ཧ་དང་ཀྵ་སྤངས་པ་དང་། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པའི་ལྟེ་བར་ཧཱུྃ་ནག་པོ་མགོ་བོ་ཐུར་དུ་བལྟ་བ། ཕྱོགས་བཞིར། བྷྲཱུྃ་ཨཱྃ་ཛྲཱིཾ་ཁྃ། མཚམས་བཞིར། ལྃ་མཱྃ་པྃ་ཏཱྃ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་ལྟེ་བར། ཨོཾ་དམར་པོ་མགོ་བོ་གྱེན་དུ་བལྟ་བ། འདབ་མ་ལ་ཨཱ་ལི་ཕྲག་གཅིག སྤྱི་བོ་བདེ་བ་ཆེན་པོའི་འཁོར་ལོ་རྩ་འདབ་སུམ་ཅུ་རྩ་གཉིས་པའི་ལྟེ་བར་ཧྃ་དཀར་པོ་མགོ་ཐུར་དུ་བལྟ་བ། འདབ་མ་ལ་ཨཱ་ལི་ཕྲག་གཉིས་བསམ། བཤང་སྒོར་རླུང་གི་དཀྱིལ་འཁོར་དང་། སུམ་མདོར་མེའི་དཀྱིལ་འཁོར་ཡང་བསྒོམས་ནས་འོག་སྒོ་འབྱེད་འཛུམ་གྱི་སྦྱོར་བ་བྱས་པས། འོག་གི་རླུང་ལྟེ་བར་གཏུམ་མོའི་ངོ་བོ་ཨྃ་ཡིག་ལ་ཕོག་པས་དེ་མེར་འབར་བའི་སྦྱོར་བས་གཡས་རོ་མའི་མེ་དང་འགྲོགས་ཏེ་གྱེན་དུ་འབར་བས་སྙིང་གར་དེ་བཞིན་གཤེགས་པ་ལྔའི་ངོ་བོ་ཡིག་འབྲུ་ལྔ་དང་སྤྱན་མ་ལ་སོགས་པ་ལྷ་མོ་བཞིའི་ངོ་བོ་ཡིག་འབྲུ་བཞི་ཡང་བསྲེགས་ཏེ། ཡང་ཡར་འབར་བས་མགྲིན་པའི་འཁོར་ལོ་བསྲེགས་པའི་རྗེས་སུ་མེ་དེས་སྤྱི་བོའི་འཁོར་ལོ་བསྲེགས་པས། དེའི་དབུས་ཀྱི་ཧྃ་དེ་ལས་རི་བོང་ཅན། བྱང་སེམས་བདུད་རྩིའི་རྒྱུན་གཡོན་རྐྱང་མའི་བྱང་སེམས་དང་བསྡོངས་ནས་རིམ་གྱིས་འཛག་པ་སྟེ། བབས་པས་མགྲིན་པ་དང་སྙིང་གའི་འཁོར་ལོ་རྣམས་སྔར་བས་ཀྱང་གསལ་བར་གསོས་བཏབ་ནས། ཐིགས་པ་ཅིག་ལྟེ་བའི་ཨྃ་ལ་ཕོག་པས་ཨྃ་ལས་མེའི་ཟེར་ཤིན་ཏུ་ཕྲ་བ་ལས། ཨ་ཝ་དྷཱུ་ཏཱིའི་ནང་ནས་མྱུར་དུ་སོང་བས། སྙིང་གའི་ཧཱུྃ་དང་། མགྲིན་པའི་ཨོཾ་བཅོམ། སྤྱི་བོའི་ཧྃ་ལ་ཕོག་པས་ཧྃ་ལས་བྱང་སེམས་དྭངས་མ་ཤིན་ཏུ་ཕྲ་བའི་རྒྱུན་དབུ་མའི་ལམ་ནས་འཛག སྙིང་གའི་ཧཱུྃ་དང་མགྲིན་པའི་ཨོཾ་གསོས་བཏབ་ནས་དེའི་ནུས་པས་ལྟེ་བའི་མེ་ཆེར་འབར། འབར་བ་དང་འཛག་པ་དབུ་མར་ཐིམ་པས་འབར་བའི་ནུས་པས་ལུས་དྲོད་ཀྱིས་གང་ཞིང་། ནད་དང་རྟོག་པ་བསྲེགས། འཛག་པའི་སྟོབས་ཀྱིས་རྩ་སྦུབས་ཐམས་ཅད་ཐིག་ལེས་གང་ནས་བདེ་བས་ལུས་རྒྱས། སེམས་ལ་ཡེ་ཤེས་སྐྱེས་པར་བསམ་ཞིང་། རླུང་ཁ་སྦྱོར་བསྒོམ་པར་བྱའོ། །རྒྱུན་ཏུ་བསྒོམས་ན་དྲོད་འབར་ཞིང་གསལ་སྟོང་གི་ཏིང་ངེ་འཛིན་སྐྱེ་ལ། གོམས་ན་རང་བྱུང་གི་ཡེ་ཤེས་སྐྱེ་བར་འགྱུར་རོ། །ཡེ་ཤེས་དེས་ལྷ་དང་ཕྱི་རོལ་གྱི་དངོས་པོ་རྣམས་ལ་རྒྱས་བཏབ་ནས་བསྒོམས་པས་བསྐྱེད་རིམ་གྱི་མཚན་མར་འཛིན་པའི་དུག་སྦྱངས་ནས་ཟུང་འཇུག་གི་ཏིང་ངེ་འཛིན་སྐྱེ་བར་འགྱུར་རོ། །བདུན་པ་བཟླས་པའི་རྣལ་འབྱོར་ལ་གཉིས་ཏེ། སྔོན་དུ་འགྲོ་བ་དག་པ་དྲན་པ་དང་། བཟླས་པའི་རྣལ་འབྱོར་དངོས་སོ། །དང་པོ་ནི་རྩ་རྒྱུད་ལས། སྙིང་རྗེའི་སྤྱན་ནི་དམར་པོ་ལ། །བྱམས་པའི་ཐུགས་ལ་ཡན་ལག་གནག །བསྡུ་བའི་དངོས་པོ་བཞི་ཡིས་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་བརྒྱད། །ཕྱག་ནི་སྟོང་པ་བཅུ་དྲུག་ཉིད། །གུག་བསྐྱེད་ཀྱིས་ནི་སངས་རྒྱས་ལྔ། །གདུག་པ་འདུལ་ཕྱིར་ཁྲོ་བོ་ཉིད། །དེ་ཉིད་གསུམ་ནི་སྤྱན་གསུམ་མོ། །ཤ་ནི་པུཀྐ་སཱི་རུ་བརྗོད། །དེ་བཞིན་ཁྲག་ནི་རི་ཁྲོད་མ། །གདོལ་པ་མོ་ནི་ཁུ་བར་བརྗོད། །གཡུང་མོ་རྐང་དང་ཚིལ་བུ་དག །ལྤགས་པ་བྱང་ཆུབ་ཡན་ལག་བདུན། །རུས་པ་བདེན་པ་བཞི་པོ་ཉིད། །ཅེས་ཞལ་ཕྱག་དང་། ཁམས་ཀྱི་དག་པ་དང་། གློ་དང་དབུགས་དང་དེ་བཞིན་སྨྱོ། །ཁོང་སྐམ་མཛེ་དང་བིར་ཙི་ཀ །མཆིན་པ་མཚེར་པའི་ནད་རྣམས་ལ། །གླང་པོ་ལ་སོགས་རིམ་ཤེས་བྱ། །ས་ནི་དང་པོར་ནོར་སྦྱིན་མཐར། །དབང་ཕྱུག་བརྒྱད་ནི་སྩོལ་བར་མཛད། །ཅེས་ཕྱག་མཚན་གྱི་དག་པ་དང་། གཟུགས་ཕུང་རྡོ་རྗེ་མ་ཡིན་ཏེ། །ཚོར་བ་ལ་ཡང་དཀར་མོར་བརྗོད། །འདུ་ཤེས་ཆུ་ཡི་རྣལ་འབྱོར་མ། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ཞེས་ཕུང་པོའི་དག་པ་དང་། ཞེ་སྡང་ཞེས་བཤད་རྡོ་རྗེ་མ། །འདོད་ཆགས་ཆུ་ཡི་རྣལ་འབྱོར་མ། །ཕྲག་དོག་རྡོ་རྗེ་མཁའ་འགྲོ་མ། །སེར་སྣ་གསང་བའི་དཀར་མོ་ཉིད། །གཏི་མུག་དེ་བཞིན་རྡོ་རྗེར་བཤད། །ཅེས་ཉོན་མོངས་ལྔའི་དག་པ་དང་། ས་ནི་པུཀྐ་སཱི་ཞེས་བཤད། །ཆུ་ཁམས་རྔོན་པ་མ་ཞེས་བརྗོད། །མེ་ནི་གཏུམ་མོར་ཤེས་པར་བྱ། །རླུང་ནི་གཡུང་མོར་རབ་ཏུ་གྲག །ཅེས་ཁམས་བཞིའི་དག་པ་དང་། མིག་ཏུ་གཏི་མུག་རྡོ་རྗེ་མ། །རྣ་བར་ཞེ་སྡང་རྡོ་རྗེ་མ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་རྣལ་འབྱོར་མ། །ཞེས་ནང་གི་སྐྱེ་མཆེད་ཀྱི་དག་པ་དང་། གཟུགས་ལ་གཽ་རཱིར་རྟག་ཏུ་བཤད། །སྒྲ་ལ་ཆོམ་རྐུན་མ་རབ་གྲག །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་རབ་གྲག །རེག་ལ་ས་སྤྱོད་མ་ཞེས་བཤད། །ཆོས་ཀྱི་དབྱིངས་ལ་མཁའ་སྤྱོད་མ། །ཞེས་ཕྱིའི་སྐྱེ་མཆེད་ཀྱི་དག་པ་དང་། གཞལ་ཡས་ཁང་ནི་བྱང་ཆུབ་ཀྱི་ཆོས་སུམ་ཅུ་རྩ་བདུན་རྣམ་པར་དག་པའོ། །བཅོམ་ལྡན་འདས་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །གཽ་རཱི་ནི་མེ་ལོང་ལྟ་བུའི་ཡེ་ཤེས་སོ། །ཙཽ་རཱི་ནི་མཉམ་པ་ཉིད་ཀྱི་ཡེ་ཤེས་སོ། །བེ་ཏཱ་ལཱི་ནི་སོ་སོར་རྟོག་པའི་ཡེ་ཤེས་སོ། །གྷསྨ་རཱི་ནི་བྱ་བ་གྲུབ་པའི་ཡེ་ཤེས་སོ། །པུཀྐ་སཱི་ནི་བྱམས་པ་ཚད་མེད་པའོ། །ཤ་ཝ་རཱི་ནི་སྙིང་རྗེ་ཚད་མེད་པའོ། །ཙཎྜ་ལཱི་ནི་དགའ་བ་ཚད་མེད་པའོ། །གཡུང་མོ་ནི་བཏང་སྙོམས་ཚད་མེད་པའོ། །ཞེས་རྟེན་དང་བརྟེན་པའི་དག་པ་དྲན་པར་བྱའོ། །དེ་དག་གི་དགོས་པ་ཡང་རྩ་རྒྱུད་ལས། རིན་ཆེན་གཟི་བརྗིད་འབར་བ་ཡི། །ཕྲེང་བ་འཁྲུགས་པ་ལྷ་མོ་ལྟོས། །མ་ཕུག་པས་ནི་སྦྱོར་བྲལ་གྱུར། །ཕུག་པས་དགའ་བ་སྦྱིན་པ་པོ། །དེ་ལྟར་འཁོར་བ་འདོད་པ་ཡི། །ཡོན་ཏན་ལྔ་ལྡན་རིན་པོ་ཆེ། །མ་དག་པས་ནི་དུག་ཏུ་འགྱུར། །དག་པས་བདུད་རྩི་ལྟ་བུར་འགྱུར། །ཞེས་གསུངས་སོ། །གཉིས་པ་བཟླས་པ་དངོས་ལ་གསུམ་སྟེ། བཟླས་པའི་ཡུལ། ཇི་ལྟར་བཟླས་པའི་བསམ་གཏན། བཟླས་བྱའི་སྔགས་སོ། །དང་པོ་ལ་བདུན་ཏེ། ཕྲེང་བའི་རྒྱུ། ཕྲེང་བའི་གྲངས། ཕྲེང་ཐག མདོ་འཛིན། བརྒྱུ་བའི་ཚུལ། བྱིན་གྱིས་བརླབ་པ། བགྲང་བའི་ཚུལ་ལོ། །དང་པོ་ནི། ལས་སོ་སོའི་ཕྲེང་བ། རྩ་རྒྱུད་ལས། ཤེལ་གྱིས་རེངས་པའི་བཟླས་པ་ཉིད། །ཞེས་སོགས་རྒྱས་པར་གསུངས་ཤིང་། སཾ་པུ་ཊའི་བརྒྱད་པའི་གཉིས་པ་ལས། ཤེལ་དང་ཉ་ཕྱིས་མུ་ཏིག་དང་། །ཁམས་ནི་དཀར་པོ་ལ་སོགས་གཞན། །ཞི་བའི་ལས་ལ་ཁྱད་པར་དུ། །ཕྲེང་བ་ཡི་ནི་མཚན་ཉིད་དོ། །གསེར་དང་དངུལ་དང་ཟངས་མ་དང་། །པདྨའི་ས་བོན་ཁྱད་པར་དུ། །རྒྱས་པ་ལ་ནི་ཕྲེང་བ་ཉིད། །རྣམ་པར་མཁས་པས་བགྲང་བར་བྱ། །གུར་གུམ་ལ་སོགས་དྲི་སོགས་ཀྱིས། །དྲི་ནི་ཐམས་ཅད་ཁྱད་པར་དུ། །བསྒྲུབས་ཤིང་རིལ་བུ་བྱས་ནས་ནི། །དབང་ལ་ཡོངས་སུ་རབ་ཏུ་གྲགས། །རུ་རཀྵ་དང་ལུང་ཐང་དང་། །དེ་བཞིན་སྐྱེས་པའི་རུས་པ་ཉིད། །དྲག་པོའི་ལས་ལ་སྦྱར་བར་བྱ། །མངོན་སྤྱོད་ལ་ནི་རབ་ཏུ་གྲགས། །ཞེས་གསུངས་ལ། ལས་གང་བསྒྲུབ་ཀྱང་ཐུན་མོང་གི་ཕྲེང་བ་ནི། དེ་ཉིད་ལས། ཞི་རྒྱས་དབང་དང་མངོན་སྤྱོད་ལས། །བོ་ཏི་ཙེས་ནི་ལས་ཀུན་བྱེད། །ཅེས་གསུངས་སོ། །འདིར་ཁམས་ནི་དཀར་པོ་ཞེས་པ་ལ། རུས་པ་དང་རྡོ་དཀར་ཞེས་གསུང་མོད་ཀྱང་། འགྱུར་ཁ་ཅིག་ལས། གཞན་ཡང་ནོར་བུ་སོགས་ཟེར་བ་ཡོད་པས་བདེའོ། །དབང་གི་ཕྲེང་བར་གུར་གུམ་སོགས་ཀྱི་དོན། གུར་གུམ་ལ་སོགས་པའི་དྲི་བཟང་པོ་སྣ་ཚོགས་ཀྱིས་ལྡེ་གུའི་རིལ་བུ་ཕྲེང་བའི་གཟུགས་སུ་བྱས་ཏེ། མིག་ཕུག་པ་ཡིན་ནམ་སྙམ། གཉིས་པ་ནི་དེ་ཉིད་ལས། སྔགས་ཀྱི་སྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པར་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་གིས། །ཕྲེང་བ་ལ་སོགས་བྱ་བའོ། །ཞེས་གསུངས་སོ། །གསུམ་པ་ནི། ལས་ཐུན་མོང་གི་རྒྱུད་རྡོ་རྗེ་མཁའ་འགྲོ་ལས། ཡང་ན་རས་བལ་སྐུད་པ་ནི། །ཞེས་བཤད་ལ། ལས་སོ་སོ་ལ་དེ་ལ་འདི་དག་བསྲེ་བར་བྱ་སྟེ། སྡོམ་འབྱུང་ལས། བོང་བུ་རྔ་མོའི་སྤུ་དང་ནི། །ཁྭ་ཡི་སྒྲོ་ནི་བསྲེ་བྱས་ལ། །མནན་དང་བསྐྲད་པའི་ལས་ལ་ནི། །དེ་ཡི་སྲད་བུས་བརྒྱུ་བར་བྱ། །རྟ་དང་མ་ཧེའི་སྤུ་ཡིས་ནི། །རྣམ་པར་སྡང་ལ་སྲད་བུ་བྱ། །དུར་ཁྲོད་སྐྲ་ཡི་སྲད་བུ་དང་། །ཁྱི་ཡི་སྤུ་ནི་བསྲེ་བྱ་སྟེ། །དེ་ཡི་སྲད་བུ་དྲག་པོ་ཡི། །ལས་ལ་བསྔགས་ཕྱིར་སྦྱར་བར་བྱ། །ཞེས་སོ། །ཉག་མའི་གྲངས་ནི། སཾ་པུ་ཊའི་བརྒྱད་པའི་གཉིས་པ་ལས། ཕྱོགས་དང་མཚམས་ནི་བརྒྱད་རྣམས་ཀྱི། །དབུས་སུ་དགུ་པ་སངས་རྒྱས་ཉིད། །ལྷ་ནི་དགུ་སོགས་སྲད་བུ་ལ། །ལྷ་དགུས་བྱིན་གྱིས་བརླབ་པར་བྱ། །ཞེས་པའི་དོན་སྲད་བུ་དགུ་སྒྲིལ་དུ་བྱས་ལ། དགུ་པོ་དེའང་ལྷ་བརྒྱད་དང་། དབུས་སུ་དགུ་པ་རྡོ་རྗེ་འཆང་མཚོན་ཅིང་། དེར་བྱིན་གྱིས་བརླབ་བོ། །ལྷ་བརྒྱད་པོ་ཁ་ཅིག་རིགས་བཞི་ཡུམ་བཞིར་ཟེར་མོད། རྗེ་བཙུན་རྩེ་མོས། སཾ་པུ་ཊའི་རྡོ་རྗེའི་དེ་ཁོ་ན་ཉིད་དུ་བསྟན་པ་བཞིན། པདྨའི་ཕྱག་དང་བྱམས་པ་དང་། །ནམ་མཁའི་མཛོད་དང་ཀུན་ཏུ་བཟང་། །གནོད་སྤྱིན་བདག་པོ་འཇམ་པའི་དཔལ། །སྒྲིབ་པ་སེལ་དང་ས་སྙིང་ཉིད། །ཅེས་པ་རྣམས་ལ་བཤད་དོ། །སྐུད་པ་འཁལ་མཁན་ཀྱང་ལས་འཇམ་པོ་ལ་ནི་རྡོ་རྗེ་མཁའ་འགྲོར། གཞོན་ནུ་མ་ཡིས་བཀལ་བ་ཡི། །དེ་ཡང་གཟུགས་མཛེས་ལུས་རྫོགས་ཤིང་། །གཙང་ཞིང་དྲན་ལྡན་སྙན་པར་སྨྲ། །དེ་ཡིས་བཀལ་བའི་ཕྲེང་ཐག་གིས། །གྲོལ་བའི་དངོས་གྲུབ་སྐྱེ་བར་འགྱུར། །ཞེས་གསུངས་པ་ལྟར་བྱས་ལ། ལས་དྲག་པོ་རྣམས་ལའང་རིགས་པས་དཔྱད་དོ། །བཞི་པ་ནི། སཾ་པུ་ཊར། ཕྲེང་བ་ཀུན་ནི་དགྲ་བཅོམ་པ། །མཆོད་རྟེན་སྟེང་དུ་རབ་ཏུ་བརྟག །མཆོད་རྟེན་ཆོས་ཀྱི་དབང་པོའི་ཕྱིར། །སྟེང་དུ་ཡང་ནི་ཆོས་ཀྱི་དབྱིངས། །ཞེས་པའི་དོན་མདོ་འཛིན་ཉིས་བརྩེགས་སུ་བྱས་པའི་འོག་མ་ཡེ་ཤེས་སྟོབས་སོགས་དང་། གོང་མ་ཆོས་དབྱིངས་མཚོན་པའོ། །ལྔ་པ་ནི། ཕྲེང་ཐག་སངས་རྒྱས་དང་བྱང་ཆུབ་སེམས་དཔར་ཤེས་ནས། ཕྲེང་བའི་རྡོག་མ་རྣམས་དེ་བཞིན་གཤེགས་པ་དགྲ་བཅོམ་པར་མོས་ཏེ། ངག་ཏུ་ཧཱུྃ་གི་གླུ་ལེན་ཅིང་བརྒྱུ་བར་བྱ་སྟེ། སཾ་པུ་ཊར། ཨཱ་ལི་ཀཱ་ལིའི་ས་བོན་ནི། །ཧཱུྃ་གི་སྲད་བུར་བརྒྱུ་བ་ཉིད། །ཅེས་གསུངས་སོ། །དྲུག་པ་ནི། ལྷ་ཡི་རྣལ་འབྱོར་ལ་གནས་པས་བྱ་སྟེ། དེའང་སཾ་པུ་ཊར་འདིའི་སྐབས་སུ། འཕགས་པ་རྣམ་པར་སྣང་མཛད་གཙོ། །ཞེས་གསུངས་པ་ནི། རྣལ་འབྱོར་ནམ་མཁའ་ལ་དགོངས་ལ། སྤྱིར་ཡི་དམ་གྱི་ལྷ་གང་ཡིན་གྱི་རྣལ་འབྱོར་གྱིས་བྱ་ཞིང་། ལས་སོ་སོ་ལ་རིགས་དང་མཐུན་པའི་རྣལ་འབྱོར་དགོས་སམ་བསམ། གང་ལྟར་ཡང་ལྷར་གསལ་བའི་རང་གི་ལག་པ་གཡོན་པའི་སོར་མོ་རྣམས་པདྨ་འདབ་མ་ལྔ་པ། ལག་པའི་མཐིལ་དུ་ཟླ་བའི་དཀྱིལ་འཁོར་ལ་ཨཱ་སོགས་དབྱངས་ཡིག་གིས་གཡོན་དུ་བསྐོར་བའི་ལྟེ་བ་ལ་ཨ། ལག་པ་གཡས་པའི་སོར་མོ་ལྔ་རྡོ་རྗེ་ལྔ་པ། ལག་པའི་མཐིལ་དུ་ཉི་མའི་དཀྱིལ་འཁོར་ལ་ཀཱ་སོགས་གསལ་བྱེད་ཀྱིས་གཡས་སུ་བསྐོར་བའི་ལྟེ་བ་ལ་ཡི་གེ་ཧཱུྃ་བསམས་ལ། པད་སྐོར་སྔོན་དུ་འགྲོ་བས་བསང་སྦྱངས་ལེགས་པར་བྱས་པའི་ཕྲེང་བ་བླངས་ཏེ་ལག་པ་གཉིས་ཀྱི་དབུས་སུ་གཞག བདུད་རྩིའི་ཡི་གེ་སུྃ་དཀར་པོ་འོད་ཟེར་འཕྲོ་བ་བསམ། རྡོ་རྗེ་དང་པདྨ་སྙོམས་པར་ཞུགས་པའི་བྱང་ཆུབ་ཀྱི་སེམས་སུྃ་ལ་ཁྱབ། དེས་ཨཱ་ལི་དང་ཀཱ་ལི་ལ་ཁྱབ། དེ་ཕྲེང་བ་དང་གཉིས་སུ་མེད་པར་གྱུར་པར་བསམས་ལ། ཨོཾ་པ་དེ་པ་དེ་མ་ཧཱ་ཛྙཱ་ནཾ། སརྦ་བུདྡྷ་མ་ཡཾ་བྷ་བེ་ཏེ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱ་ཁཾ་སྭཱ་ཧཱ། ཞེས་པའི་སྔགས་འདི་དང་པོ་བྱིན་གྱིས་རློབ་དུས་ཕྲེང་སྐོར་གཅིག་བཟླས་ཕྱིས་བཟླས་པ་ནམ་བྱེད་དུས་ཀྱང་གསུམ་ལ་སོགས་པ་བཟླས་ན་མཐུ་དང་ལྡན་པར་འགྱུར་རོ། །ཞེས་བླ་མ་དམ་པ་གསུངས་ཞེས་རྗེ་བཙུན་རྩེ་མོས་བཤད་དོ། །འགའ་ཞིག་ཏུ་གཞན་རྣམས་འདྲ་བ་ལ། ཁ་སྦྱོར་གྱི་བར་དུ་ཡི་གེ་ཨོཾ་ཨཱཿཧཱུྃ། གསུམ་ཡང་བསམས་ལ། ཡིག་འབྲུ་རྣམས་ལས་འོད་ཟེར་དཀར་པོ་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཁ་ནས་ཨཱ་ལི་ཀཱ་ལི་དཔག་ཏུ་མེད་པ་འཐོན་ནས་ཕྲེང་བ་ལ་ཐིམ་པར་བསམ་མོ། །དེ་ནས་རྡོ་རྗེ་པདྨ་ཟླ་ཉི་ཨཱཿཧཱུྃ། ཨཱ་ལི་ཀཱ་ལི་གཉིས་ཏེ། དེ་རྣམས་སྙོམས་འཇུག་བྱས་པས་ཡིག་འབྲུ་གསུམ་ལ་ཐིམ་སྟེ་གྱུར་པ་ལས་ཕྲེང་བར་གྱུར་པར་བསམས་ཏེ། ཨོཾ་ལས་མདོ་འཛིན་བྱུང་སྟེ། ཆོས་སྐུ་ལ་ཨཱཿལས་ཕྲེང་བ་དགྲ་བཅོམ་པས་བསྐོར་བར་བསམ། ཧཱུྃ་ལས་ཕྲེང་ཐག་ལྷ་དགུའི་རང་བཞིན་དུ་བྱིན་གྱིས་བརླབ་པར་བསམས་ལ། སྔགས་བརྗོད་ཟེར་ཏེ་འགྲིག་འགྲིག་འདྲ་བར་སྣང་ཡང་དཔྱད་པར་བྱའོ། །དེ་ལྟར་བྱིན་གྱིས་རློབ་པའི་ཚུལ་སཾ་ཊིར། ལག་མཐིལ་ཉི་མ་བསམས་ནས་ནི། །དབྱངས་ཡིག་དང་པོ་ལ་སོགས་པ། །ལག་པའི་དབུས་སུ་རྣལ་འབྱོར་པས། །བསྒོམས་ཤིང་བདུད་རྩིའི་ཡི་གེ་ནི། །འོད་ཟེར་འཕྲོ་བ་དུ་མ་དང་། །ཁ་དོག་དཀར་པོ་བསམས་ནས་ནི། །གཡོན་པ་པདྨ་འཛིན་པ་ཉིད། །པདྨ་རྡོ་རྗེ་འཇུག་པ་ཡིས། །ཡང་དག་སྦྱོར་བ་ཉི་མའི་ནང་། །ཀུན་གྱིས་དེ་ཉིད་བསྒོམ་བྱ་ཞིང་། །ཕྲེང་བ་བྱིན་གྱིས་བརླབ་པར་བྱ། །ཞེས་དང་། སྔགས་ཀྱི་ཕྲེང་བ་སྦྱངས་ནས་ནི། །གང་འདོད་དེ་ཉིད་བསྒྲུབ་པར་བྱ། །དེ་ཉིད་ལས་ནི་འགྲུབ་པར་འགྱུར། །ཀུན་ཏུ་གསལ་བ་མེད་ན་རིང་། །ཞེས་སོ། །བདུན་པ་ནི། སཾ་ཊར། སོར་མོ་ལ་སོགས་བྱེ་བྲག་ལ། །ཕྱིས་ནི་སྔགས་པས་བཟླས་པར་བྱ། །ཞེས་མདོར་བསྟན་ནས། ཞི་ལ་ཁྲོ་བོར་དགོད་པར་བྱ། །རྒྱས་ལ་དབུ་མའི་དེ་ཉིད་ལ། །སྲིན་ལག་ལ་ནི་དབང་དུ་གསུངས། །ཀུན་གྱི་མཐར་ནི་མངོན་སྤྱོད་ལ། །ཞེས་གསུངས་པས། ཞི་བ་ལ་ཁྲོ་བོ་སྟེ་མཛུབ་མོའི་སྟེང་ནས། རྒྱས་པ་ལ་གུང་མོའི། དབང་ལ་སྲིན་ལག མངོན་སྤྱོད་ལ་མཐེའུ་ཆུང་གི་སྟེང་ནས་ཕྲེང་བ་འོང་བར་བྱ་སྟེ། མཐེ་བོང་རྡོ་རྗེ་ལྕགས་ཀྱུ་ལས། །དངོས་གྲུབ་ལས་ནི་དགུག་པར་བྱ། །ཞེས་གསུངས་པས། མཐེ་བོང་རྡོ་རྗེ་ལྕགས་ཀྱུར་བསམས་ནས། དངོས་གྲུབ་གང་ཡིན་པ་འགུགས་པར་འདོད་པའི་བསམས་པས། མདོ་འཛིན་གྱི་བར་དུ་བགྲང་། དེ་ནས་མདོ་འཛིན་མི་འགོམ་པར་བསྐོར་བ་བྱེད་པའི་ཚུལ་གྱིས་བགྲང་ངོ་། །ལག་པ་གཡས་གཡོན་གང་གིས་བགྲང་ན། འདིར། གཡོན་པ་རྡོ་རྗེ་ཅན་གྱི་དངོས། །ཞེས་གསུངས་པས། ལག་པ་གཡོན་པ་རྡོ་རྗེར་བསམས་ནས་བགྲང་བ་ནི། མ་རྒྱུད་པས་གཡོན་གྱི་ཀུན་སྤྱོད་གཙོ་ཆེ་བ་ལ་དགོངས་སམ་བསམ། འགའ་ཞིག་ཏུ་ལྷ་མོ་བསྒྲུབ་ན་གཡོན་པས་བགྲང་། ཕོ་བསྒྲུབ་ན་གཡས་པས་བགྲང་ཟེར་ཏེ་དཔྱད་པར་བྱའོ། །དེ་ལྟར་ཕྲེང་བའི་ཀུན་རྫོབ་དང་། དོན་དམ་པའི་དེ་ཁོ་ན་ཉིད་ཤེས་པས་སྔགས་བཟླས་ན་དངོས་གྲུབ་འགྲུབ་ཅིང་གཞན་དུ་ན་འབྲས་བུ་མི་འབྱུང་སྟེ། སམྦུ་ཊར། མཉམ་གཞག་བཟླས་དང་བསྒོམ་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ཉིད་མེད་པའི་རྣལ་འབྱོར་པས། །དེ་ཉིད་མེད་པའི་སྔགས་བཟླས་དང་། །རྡོ་རྗེ་དྲིལ་བུའི་དེ་ཉིད་མེད། །ཕྱག་རྒྱའི་དེ་ཉིད་སྐྱེ་མི་འགྱུར། །རྣལ་འབྱོར་པ་ཡི་དེ་ཉིད་དམིགས། །དེ་ཉིད་ཐམས་ཅད་བྱེད་པ་ཉིད། །ཅེས་གསུངས་སོ། །གཉིས་པ་ལ་གསུམ་སྟེ། འཁོར་བའི་བཟླས་པ། སྤྲོ་བསྡུའི་བཟླས་པ། བཀོད་པའི་བཟླས་པའོ། །དང་པོ་ནི། རྗེ་བཙུན་རྩེ་མོས། རང་གཙོ་བོ་ཡབ་ཡུམ་དུ་བསྒོམས་པའི་ཡུམ་གྱི་ཐུགས་ཀའི་ཨྃ་ལས་སྔགས་ཀྱི་ཕྲེང་བ་བྱུང་། ཡུམ་གྱི་ཞལ་ནས་འཐོན། ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་སྟེ་པདྨར་ཞུགས་ནས་ཡུམ་གྱི་སྐུའི་དབྱིབས་བརྒྱུད། ཡུམ་གྱི་ཞལ་ནས་འཐོན་པར་བསྒོམ་ཞིང་རྒྱུན་མི་འཆད་པར་འཁོར་བ་ལ་དམིགས་ལ་བཟླས་པ་བྱའོ། །སྔགས་ཀྱི་ཁ་དོག་ནི་ཞི་བ་ལ་དཀར་པོ། རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོ། རྒྱུན་གྱི་བཟླས་པ་ཐམས་ཅད་སྡིག་པ་ཞི་བའི་ཕྱིར་དཀར་པོར་བྱ། དབང་བསྐུར་གྱི་བསྙེན་པ་བྱེད་ན་ལྷ་དབང་དུ་སྡུད་པས་དམར་པོར་བསམ། རབ་གནས་ཀྱི་བསྙེན་པ་བྱེད་ན། བསོད་ནམས་རྒྱས་པས་སེར་པོར་བསྒོམ། གཞན་ལས་གང་བྱེད་པ་དེ་དང་དེའི་ཁ་དོག་དང་མཐུན་པར་བྱའོ། །འཁོར་རྣམས་ཀྱི་སྔགས་ཟློས་ན་འཁོར་བའི་དམིགས་པ་སྔ་མ་བཞིན་བྱས་ལ། སྔགས་ཀྱི་འོད་ཟེར་དེས་ལྷ་མོ་གང་གི་བཟླས་པ་བྱེད་པའི་ལྷ་མོ་དེ་ལ་ཕོག་པས་དེ་དབང་དུ་འདུ་ཞིང་ཕྲིན་ལས་ལ་བསྐུལ་བར་བསྒོམས་ལ་བཟླས་པ་བྱའོ་ཞེས་གསུངས་པ་ལྟར་བྱའོ། །རྗེ་བཙུན་རིན་པོ་ཆེས། བདེ་མཆོག་གི་སྐབས་སུ་ཕར་འཁོར་དུ་གསུངས་ཤིང་། རྗེ་ས་ཆེན་གྱིས་རླུང་བརྟན་པར་འདོད་ན་ཚུར་འཁོར་དང་། བྱང་སེམས་བརྟེན་པར་འདོད་ན་ཕར་འཁོར་དུ་བྱ་བར་གསུངས་པས། དགོས་པའི་དབང་གིས་གང་འདོད་པ་བྱའོ། །གཉིས་པ་ནི། སྔགས་ཀྱི་ཡིག་འབྲུ་ལས་འོད་ཟེར་འཕྲོས་པས། ལྷའི་རྣམ་པ་གསལ་གདབ་ཅིང་མཆོད་པ་དང་། སངས་རྒྱས་ཀྱི་ཐུགས་རྒྱུད་བསྐུལ་ཞིང་སེམས་ཅན་གྱི་དོན་བྱས། ཚུར་འདུས་ནས་རང་གི་སྙིང་གར་ཐིམ་ཞིང་ཟློས་པ་སྟེ། འདི་ནི་རྗེ་བཙུན་རྩེ་མོས་ཚོགས་འཁོར་ལ་སོགས་པའི་དུས་སུ་ཟློས་པའི་མན་ངག་ཏུ་བཤད་དོ། །གསུམ་པ་ནི། སྙིང་གར་སྔགས་ཀྱི་ཡིག་འབྲུ་བཀོད་ནས་དེ་ལ་དམིགས་ནས་ཀློག་པའི་ཚུལ་གྱིས་བཟླའོ། །གསུམ་པ་ལ་ལྔ་སྟེ། བཟླས་བྱའི་སྔགས་དངོས། ཟློས་པའི་གོ་རིམ། ཇི་ལྟར་ཟློས་པའི་ཚུལ། ཇི་ཙམ་བཟླས་པའི་གྲངས། དེ་ལྟར་བཟླས་པའི་དགོས་པའོ། །དང་པོ་ནི། གཙོ་འཁོར་རྣམས་ཀྱི་སྔགས་ཏེ། ཨོཾ་ནི་མཆོག་སྟེར་བའི་དོན་ནོ། །ཨཥྚཱ་ན་ནཱ་ཡ་བརྒྱད་པའི་ཞལ་ཅན། པིཾ་གཽརྡྷ་ཀཻ་ཤ་ཝརྟ་མ་ནེ་དབུ་སྐྲ་སེར་པོ་གྱེན་དུ་བརྫེས་པ། ཙ་ཏུར་བིཾ་ཤ་ཏི་ནཻ་ཏྲཱ་ཡ་ཉི་ཤུ་རྩ་བཞིའི་སྤྱན་ཅན། ཥོ་ཌ་ཤ་བྷཱུ་ཛ་ཡ་བཅུ་དྲུག་གི་ཕྱག་ཅན། ཀྲྀཥྞ་ཛཱི་མུ་ཏ་ཝ་པུ་ཥེ་སྐུ་མདོག་ཆར་སྤྲིན་ལྟར་ནག་པ། ཀ་པཱ་ལ་མཱ་ལ་ཨ་ནཻ་ཀཾ་དྷ་རི་ཎེ་ཐོད་པའི་ཕྲེང་བ་དུ་མ་འཛིན་པ། ཨཱདྷྨ་ཏཱ་ཀྲཱུ་ར་ཙིཏྟ་ཡ་ནི་བདག་ཉིད་ཀྱི་སེམས་ཁོང་ནས་འཁྲུགས་པ། ཨརྡྷེནྡུ་དཾ་ཥྚྲི་ཎེ་མཆེ་བ་ཟླ་བ་ཕྱེད་པ་ལྟ་བུ་ཅན། འདིར་ཨོཾ་ཞེས་པ་མི་ཐུབ་ཟླ་བའི་ཀུ་མུ་ཏི་དང་། སྒྲུབ་ཐབས་གཉིས་ཆར་དུ་མེད་ཅིང་། རྩ་རྒྱུད་ཀྱི་རྒྱ་དཔེ་ཁ་ཅིག་དང་། སྒྲུབ་ཐབས་མཚོ་སྐྱེས། རིན་ཆེན་འབར་བ། བླ་མ་གོང་མ་རྣམས་ཀྱིས་བཤད་པས། དེ་ལྟར་ན་ཨོཾ་ནི་དམ་བཅའ་བའོ། །མཱ་ར་ཡ་མཱ་ར་ཡ་སོད་སོད། ཀཱ་ར་ཡ་ཀཱ་ར་ཡ་གྱིས་གྱིས། གརྫ་ཡ་གརྫ་ཡ་སྒྲོགས་སྒྲོགས། ཏརྫ་ཡ་ཏརྫ་ཡ་རྟོགས་རྟོགས། ཤོ་ཥ་ཡ་ཤོ་ཥ་ཡ་སྐོམས་སྐོམས། གང་སྐེམས་ན། སཔྟ་སཱ་ག་རཱ་ན་རྒྱ་མཚོ་བདུན། བནྡྷ་བནྡྷ་ཆིངས་ཆིངས། གང་ཆིངས་ན་ནཱ་ག་ཨཥྚ་ཀཱན་ཀླུ་བརྒྱད། གྲྀཧྣ་གྲྀཧྣ་ཟུང་ཟུང་། གང་ཟུང་ན་ཤ་ཏྲཱུན་དགྲ་བོ། ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧ་ཞེས་པ་རྣམས་ནི་ཡུམ་གྱི་ཨཱ་ལིའི་དོད་དོ། །ཕོ་སྐད་ཀྱི་ཡི་གེ་ཧ་ལ་དབྱངས་བཅུ་གཉིས་སྦྱར་བས་བཞད་པའི་ཉམས་བཅུ་གཉིས་སུ་འགྱུར་བ་ཡིན་ཏེ། གསང་སྔགས་ཀྱི་དངོས་གཞི་ལྟ་བུ་ཡིན་ནོ། །ཞེས་རྗེ་བཙུན་གསུང་ངོ་། །ཕཊ་དགས་པ། སྭཱ་ཧཱ་གཞི་ཚུགས་པ་སྟེ་རྩ་བའ་ིསྔགས་སོ། །སྔགས་དོན་གྱི་བཤད་པ་རྒྱས་པ་ནི་དཔལ་ལྡན་ས་སྐྱ་པཎྜི་ཏའི་ཨཥྚའི་བཞི་བཤད་དུ་བལྟ་བར་བྱའོ། །ཨོཾ་ནི་སྔགས་ཀྱི་འགོ་འདྲེན། དེ་ཝ་ཞེས་བྱ་བ་ནི་རོལ་པ་སྟེ། བདེ་བ་ལ་རོལ་པས་ལྷའམ་སེམས་ཅན་གྱི་དོན་ལ་རོལ་པར་བྱེད་པའོ། །པི་ཙུ་ནི་འཇམ་པོ་སྟེ། ཇི་ལྟར་བལ་འཇམ་པོས་སྦར་སྦུར་སྡུད་པ་ལྟར་འདིའི་ཐུགས་རྡོ་རྗེ་འཇམ་པོས་སེམས་ཅན་ཐམས་ཅད་སྡུད་པའོ། །བཛྲ་ཞེས་བྱ་བ་ནི་རྡོ་རྗེ་མི་ཕྱེད་པ་ལྟར་ཤེས་རབ་སྟོང་པ་ཉིད་ཀྱི་དོན་ཏེ། ཇི་ལྟར་རྡོ་རྗེ་ཕ་རོལ་འཇོམས་པ་ལྟར། ཐུགས་རྡོ་རྗེས་མ་རུངས་པ་རྣམས་འཇོམས་པའི་དོན་ཏོ། །དེ་བས་ན་ཧེ་བཛྲ་འདི་ནི་ཆོས་གསུམ་དང་ལྡན་པ་ཞེས་བྱ་བའི་དོན་ཏོ། །ཧཱུྃ་གསུམ་ནི་སྐུ་གསུང་ཐུགས་མི་ཕྱེད་པ་སྟེ། གསང་བ་འདུས་པ་ལས། ཧཱུྃ་ནི་སྐུ་དང་གསུང་དང་ཐུགས། །རྡོ་རྗེ་མི་ཕྱེད་གསུམ་འབྱུང་བ། །ཞེས་སོ། །ཕཊ་སྭཱ་ཧཱ་ནི་སྔར་བཞིན་ཏེ་སྙིང་པོའོ། །ཨོཾ་སྔར་བཞིན། བཛྲ་ཀརྟ་རི་རྡོ་རྗེ་གྲི་གུག ཧེ་བཛྲ་ཡ། ཀྱེ་རྡོ་རྗེའི་བཀས་ཞེས་ཏེ། གྲི་གུག་གིས་གཞན་གཅོད་པ་ལྟར། སྟོང་ཉིད་རྟོགས་པའི་ཡེ་ཤེས་ཀྱི་མཚན་མ་དང་། རྣམ་པར་རྟོག་པ་ཆོད་ཅིག་པའོ། །ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ་ནི་སྔར་བཞིན་ཏེ། ཉེ་བའི་སྙིང་པོའོ། །ཡུམ་དང་འཁོར་རྣམས་ཀྱིས་སྔགས་ནི། རྩ་རྒྱུད་ལས། དབྱངས་བཅོ་ལྔ་རྣལ་འབྱོར་མ་རྣམས་ཀྱི་ས་བོན་དུ་བཤད་པ་དང་། ཕྱི་མའི་ལྔ་པར། ཨྃ་ཡུམ་གྱི་ས་བོན་དང་། གྃ་ཙྃ་སོགས་ལྷ་མོ་བརྒྱད་ཀྱི་ས་བོན་དུ་བཤད་པ་ལ། དང་པོའི་གཉིས་པར། སྔགས་ཐམས་ཅད་ཀྱི་རྐང་པ་དང་པོར་ཨོཾ་གྱི་རྣམ་པ་དང་། མཐར་ནི་སྭཱ་ཧཱ་དང་། ཧཱུྃ་ཕཊ་ཀྱི་རྣམ་པ་ནི་ནང་དུ་གཞུག་གོ །ཞེས་མགོ་བོར་ཨོཾ་དང་མཇུག་ཏུ་ཧཱུྃ་ཕཊ་སྭཱ་ཧཱ། ཞེས་པ་སྦྱོར་བར་གསུངས་པ་ལ་བརྟེན་ནས། རྗེ་བཙུན་རྩེ་མོས་འཁོར་རྣམས་ཀྱི་སྔགས་མཛད་པ་ནི་རྒྱུད་དང་ཤིན་ཏུ་མཐུན་ནོ། །དེ་ལ་ཨོཾ་ཨཱཿཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨྃ་ཧཱུྃ་ཕཊ་སྭཱ་ཧཱ། རྣལ་འབྱོར་མ་རྣམས་ཀྱི་ཕྲེང་བའི་སྔགས་སོ། །ཨོཾ་ཨཱཿཨྃ་ཧཱུྃ་ཕཊ་སྭཱ་ཧཱ། བདག་མེད་མའི་འོ། །ཨོཾཨཱཿགྃ་ཧཱུྃ་ཕཊ་སྭཱ་ཧཱ། གཽ་རཱིའི་འོ། །ཨོཾ་ཨཱཿཙྃ་ཧཱུྃ་ཕཊ་སྭཱ་ཧཱ། ཙཽ་རཱིའི་འོ། །ཨོཾ་ཨཱཿབྃ་ཧཱུྃ་ཕཊ་སྭཱ་ཧཱ། བེ་ཏཱ་ལཱིའི་འོ། །ཨོཾ་ཨཱཿགྷྃ་ཧཱུྃ་ཕཊ་སྭཱ་ཧཱ། གྷསྨ་རཱིའི་འོ། །ཨོཾ་ཨཱཿཔྃ་ཧཱུྃ་ཕཊ་སྭཱ་ཧཱ། པུཀྐ་སཱིའི་འོ། །ཨོཾ་ཨཱཿཤ་ྃཧཱུྃ་ཕཊ་སྭཱ་ཧཱ། ཤ་ཝ་རཱིའི་འོ། །ཨོཾ་ཨཱཿལྃ་ཧཱུྃ་ཕཊ་སྭཱ་ཧཱ། ཙཎྜ་ལཱིའི་འོ། །ཨོཾ་ཨཱཿཌྃ་ཧཱུྃ་ཕཊ་སྭཱ་ཧཱ། ཌོཾ་བི་ནཱིའི་འོ། །རྒྱས་པར་སྤྲོ་ན་ཨོཾ་ཨཱཿགྃ་གཽ་རཱི་ཧཱུྃ་ཕཊ་ཞེས་བྱ་བ་ལ་སོགས་པ་ས་བོན་གྱ་ིརྩ་བར་མིང་གཞུག་པར་བྱས་ལ་བཟླས་སོ། །གཉིས་པ་ནི། སྔགས་གསུམ་གྱིས་སྐུ་གསུང་ཐུགས་བསྐུལ་བར་བཤད་པ་ལྟར། ཐོག་མར་རྩ་སྔགས་བཟླས་ཏེ། དེ་ནི་སྐུ་བསྐུལ་བྱེད་དུ་གསུངས་ལ་སྐུ་དེ་ནི་རིགས་པ་ཡིན་པས་བསྐུལ་སླ་བའི་ཕྱིར་རོ། །གསུང་ཕྲ་བས་དེའི་རྗེས་དང་། ཐུགས་ཤིན་ཏུ་ཕྲ་བས་བསྐུལ་དཀའ་བས་ཐམས་ཅད་ཀྱི་རྗེས་སུ་བསྐུལ་བ་ཡིན་ཞེས་བླ་མ་དག་གསུང་ངོ་། །གསུམ་པ་ནི་སྔགས་ཀྱི་ཚིག་ངག་ཏུ་མི་བརྗོད་པར་ཡིད་ཀྱིས་ཟློས་པས་ཡིད་བཟླས། རླུང་བསྒོམས་ནས་ཡིད་ཀྱིས་ཟློས་པ་འགོག་པའི་བཟླས་པ། རླུང་འགྲོ་འོང་དང་སྦྱར་ནས་བཟླས་པ་རྡོ་རྗེའི་བཟླས་པ། ལྕེ་རྩེ་དང་མཆུ་གཡོ་བ་ཙམ་གྱིས་བཟླས་པ་ཤུབ་བུའི་བཟླས་པ། ཡི་གེ་རིང་ཐུང་བྱེད་ཅིང་སྐད་གསང་ཆེན་པོས་བཟླས་པ་རིག་བྱེད་འདོན་པ་ལྟ་བུའི་བཟླས་པ་སྟེ་ལྔ་ཡིན་ནོ་ཞེས་བླ་མ་དག་གསུང་ངོ་། །བཞི་པ་ནི་རྗེ་བཙུན་རིན་པོ་ཆེས་ལམ་འབྲས་ཀྱི་མན་ངག་ལས། བསྙེན་པ་རབ་འབྲིང་དགུར་གསུངས་ཏེ། དེའང་མཚན་མའི་བསྙེན་པ་རབ་འབྲིང་གསུམ་ནི། རབ་ཡི་དམ་གྱི་ལྷ་ལས་དངོས་སུ་གནང་བ་ཐོབ་པ། འབྲིང་རྡོ་རྗེ་དྲིལ་བུ་ནམ་མཁའ་ལ་འཇོག་ནུས་པ། ཐ་མ་རྨི་ལམ་དུ་གནང་བ་ཐོབ་པ། འབྲིང་དུས་ཀྱི་བསྙེན་པ་རབ་འབྲིང་གསུམ་ནི་རབ་ལོ་དྲུག འབྲིང་ཟླ་བ་དྲུག ཐ་མ་ཞག་བདུན་ཡིན་ནོ། །ཐ་མ་གྲངས་ཀྱི་བསྙེན་པར་འབྲིང་གསུམ་ནི་རབ་གཙོ་བོ་ལ་བཞི་འབུམ། འཁོར་ལ་བཞི་ཁྲི། འབྲིང་གཙོ་བོ་ལ་བཞི་ཁྲི། འཁོར་ལ་བཞི་སྟོང་། ཐ་མ་གཙོ་བོ་ལ་བཞི་སྟོང་། འཁོར་ལ་བཞི་བརྒྱ་ཡིན་ནོ། །དུས་དང་གྲངས་ཀྱི་འབྲིང་དང་། ཐ་མ་གཉིས་ནི་བསྙེན་པ་ཁ་གསོ་བ་ལས་དངོས་གཞིའི་བསྙེན་པ་ནི་མ་ཡིན་ནོ། །ཞེས་གསུང་། རྗེ་བཙུན་རྩེ་མོས་དབང་ཆུར་གཞན་འདྲ་བ་ལ་རྡོ་རྗེ་དྲིལ་བུ་ནམ་མཁའ་ལ་འཇོག་པ་རབ་ཀྱི་ནང་དུ་བསྡུས་ནས། འབྲིང་རྨི་ལམ་དུ་གནང་བ་ཐོབ་པ། ཐ་མ་ཉམས་ཀྱི་སྣང་བ་ལ་འདྲིར་རུང་བ་དང་། དུས་ཀྱི་བསྙེན་པ་ལ་རབ་ཟླ་བ་དྲུག འབྲིང་ཟླ་བ་གསུམ་ཞེས་གསུངས་ཏེ། གསུང་ངག་དང་། སྤྱིར་དཀྱིལ་འཁོར་གྱི་བསྙེན་པའི་ཁྱད་པར་ཡིན་ནམ་སྙམ་མོ། །འོ་ན་རྩ་རྒྱུད་ལས། དཀྱིལ་འཁོར་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གཙོ་བོ་ལ་འབུམ་དང་། འཁོར་རྣམས་ལ་ཁྲི་ཕྲག་རེ་བཟླས་པར་བཤད་པ་དང་འགལ་ལོ་སྙམ་ན། བོད་ཀྱི་བླ་མ་རྣམས་ལུང་དེ་ནི་རྫོགས་ལྡན་གྱི་དུས་ཀྱི་དབང་དུ་བྱས་ལ། ད་ལྟ་རྩོད་དུས་ཡིན་པས་དེ་བཞི་འགྱུར་དུ་བྱ་དགོས་ཏེ། སྡོམ་འབྱུང་ལས། རྫོགས་ལྡན་ལ་ནི་བཟླས་བྱ་གཅིག །ཉིས་འགྱུར་སུམ་ལྡན་ལ་བཟླས་བྱ། །སུམ་འགྱུར་ཉིས་ལྡན་ལ་རབ་བརྗོད། །རྩོད་ལྡན་བཟླས་པ་བཞི་འགྱུར་རོ། །ཞེས་གསུངས་པས་མི་འགལ་བར་བཞེད་པ་ནི་ཤིན་ཏུ་ལེགས་ཏེ། སངས་རྒྱས་ཐོད་པའི་དཀའ་འགྲེལ་ཡེ་ཤེས་ལྡན་ལས་ཀྱང་། རྫོགས་ལྡན་དུས་སུ་ཡི་གེ་འབུམ་བཟླས་ཏེ། །སུམ་ལྡན་དུས་ཀྱི་སྔགས་པས་འབུམ་ཕྲག་གཉིས། །ཉིས་ལྡན་དུས་སུ་འབུམ་ཕྲག་གསུམ་དུ་འགྱུར། །བྱེ་བ་ཕྲག་གསུམ་འབུམ་བཞི་རྩོད་དུས་སྦྱར། །ཞེས་སོ། །ལྔ་པ་ནི་བཟླས་པས་སངས་རྒྱས་ཀྱི་ཐུགས་བསྐུལ་བས། རང་གིས་མཆོག་དང་ཐུན་མོང་གི་དངོས་གྲུབ་འགྲུབ་པ་ཡིན་ཏེ། རྡོ་རྗེ་གུར་ལས། མཁའ་འགྲོ་མ་དང་རང་བཙུན་མོ། །མངོན་སུམ་དུ་ནི་བྱ་བའི་ཕྱིར། །སྔགས་ནི་སྙན་གསན་འབེབས་པར་བརྗོད། །དཔེར་ན་སྐྱེས་བུ་ལ་ལ་ཞིག །སྐད་ཀྱི་ང་རོས་བོས་པ་ན། །མངོན་སུམ་དུ་ནི་འོང་བར་འགྱུར། །དེ་བཞིན་དེ་བཞིན་གཤེགས་ཀུན་གཤེགས། །ཞེས་གསུངས་སོ། །བསྙེན་པ་དང་། ཚོགས་འཁོར་གྱི་དུས་སུ་དེ་ལྟར་བཟླས་པའི་རྗེས་ལ་དཀྱིལ་འཁོར་བསྡུ་བ་ཡིན་ཅིང་། སྐབས་གཞན་དུ། སྔར་གྱི་བསྟོད་པའི་རྗེས་ལ་བསྡུས་ཀྱང་བཏུབ། རྫོགས་རིམ་བསྒོམས་པའི་རྗེས་ལ་བསྡུས་ཀྱང་བཏུབ། དག་པ་རྗེས་སུ་དྲན་པའི་རྗེས་ལ་བསྡུས་ཀྱང་བཏུབ་སྟེ། གང་ལྟར་ཡང་བསྡུ་བའི་རིམ་པ་ནི། གཙོ་བོའི་ཐུགས་ཀའི་ཧཱུྃ་ལས་འོད་ཟེར་འཕྲོས་ནས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ་བསྡུ། དེ་གཞལ་ཡས་ཁང་ལ་བསྡུ། དེ་ལྷ་མོ་བརྒྱད་ལ། དེ་ཞལ་བརྒྱད་ལ་བསྡུས་ལ། གཙོ་བོ་ཡབ་ཡུམ་གྱི་ང་རྒྱལ་གྱིས་རྫོགས་རིམ་བསྒོམ་པའམ། དེ་ཟིན་ནས་དག་པ་རྗེས་དྲན་བྱ་བའམ། དེ་ཟིན་ནས་སྡུད་ན་བཟླས་པའི་རྣལ་འབྱོར་ལ་འཇུག་པར་བྱའོ། །གང་ལྟར་ཡང་གཙོ་བོ་ཡབ་ཡུམ་ནི་ཉལ་བའི་རྣལ་འབྱོར་གྱི་བར་དུ་བསྡུ་བ་མེད་དོ། །སྟན་ལས་ལྡང་བའམ། བཟླས་བརྗོད་ཟིན་པའི་རྗེས་ལ། རྡོ་རྗེའི་གླུ་དང་བཀྲ་ཤིས་ཀྱི་ཚིགས་བཅད་དང་། སྨོན་ལམ་རྣམ་པར་དག་པ་བཏབ་ལ། ཁ་ཟས་སམ། སྤྱོད་ལམ་གྱི་རྣལ་འབྱོར་ལ་འཇུག་པར་བྱའོ། །ཞེས་རྗེ་བཙུན་གསུང་ངོ་། །བརྒྱད་པ་ཁ་ཟས་ཀྱི་རྣལ་འབྱོར་ནི། ཁ་ཟས་དང་པོར་བདུད་རྩི་འཁྱིལ་པའི་སྔགས་ཀྱིས་བགེགས་བསལ་བ་ལ་སོགས་གཏོར་མ་བཞིན་བྱིན་གྱིས་བརླབས་ཏེ། རང་དཔལ་ཀྱེ་རྡོ་རྗེའི་རྣལ་འབྱོར་གསལ་བའི་ཐུགས་ཀར་པདྨ་དང་ཉི་མའི་སྟེང་དུ་ཧཱུྃ་ཙམ་ལས་ལྷ་དགུའི་དཀྱིལ་འཁོར་དང་། ལྟེ་བར་འབྱུང་པོ་བརྒྱད་གསུམ་ཉེར་བཞི་བསྐྱེད་ལ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས། ཐུགས་ཀའི་ཧཱུྃ་གི་འོད་ཀྱིས་ཡེ་ཤེས་པ་སྤྱན་དྲངས་ལ་རང་གི་སྙིང་ག་ནས་ཞུགས་ཏེ། དམ་ཚིག་པ་ལ་བསྟིམ། དབང་བསྐུར་ཡང་དྲན་པར་བྱས་ལ། རང་གི་ལྕེ་ཧཱུྃ་ལས་རྡོ་རྗེར་བསྐྱེད་ལ། དེ་ལས་འོད་བྱུང་སྟེ་གསོལ་བས། ཕུད་ཀྱིས་སྙིང་གའི་ལྷ་དགུ་མཆོད། དེའི་ལྷག་མས་ལྟེ་བའི་འབྱུང་པོ་བརྒྱད་གསུམ་ཉི་ཤུ་རྩ་བཞི་མཆོད་པར་བསམ་ཞིང་། ཁ་ཧོམ་ཁུང་དང་། ལག་པ་གཟར་བུ། ཁ་ཟས་བསྲེག་རྫས་སུ་བསམས་ལ་བཟའོ། །འབྲིང་ནི་ཁ་ཟས་མཁའ་འགྲོ་སྤྱི་གཏོར་བཞིན་བྱིན་གྱིས་བརླབས་ལ། སྙིང་གར་ལྷ་དགུའི་དཀྱིལ་འཁོར་བསམ་ལ། ལྟེ་བ་ནས་མེ་སྦར་ཏེ་ལྷ་མཆོད་པའི་བསམས་པས་བཟའོ། །འདི་ནི་ནང་གི་གཏོར་མ་ཞེས་པ་ཡིན་ལ། དམིགས་པ་དང་ང་རྒྱལ་བརྟན་པ་རྣམས་ལ་གཏོར་མ་ལ་སོགས་པ་གཞན་མི་དགོས་ཀྱང་དེ་བཞིན་གཤེགས་པའི་བཀའ་བཞིན་བསྲུང་བ་དང་། རང་གི་སྔགས་ཀྱི་སྤྱོད་པ་དང་། དམ་བཅའ་བརྟན་པའི་ཕྱིར་དང་། སེམས་ཅན་མ་དད་པ་བསྲུང་བའི་ཕྱིར་དང་། ལས་དང་པོ་པའི་སེམས་ཅན་གཞན་རྗེས་སུ་དྲང་བའི་ཕྱིར་ལྷ་བཤོས་དང་། ཆང་བུ་དང་། གཏོར་མ་ལ་སོགས་པ་ཐམས་ཅད་ཐུན་མོང་གི་ལུགས་བཞིན་བྱའོ། །བསྡུས་པ་ནི་ཁ་ཟས་ལ་ལག་པ་གཡོན་གྱི་སྲིན་ལག་དང་མཐེ་བོང་གིས་རེག་སྟེ། ཨོཾ་ཨཱཿཧཱུྃ་ཞེས་བརྗོད་ལ། ཁ་ཟས་དེ་ཤ་ལྔ་དང་། བདུད་རྩི་ལྔ་ཡེ་ཤེས་ལྔའི་ངོ་བོར་བསམས་ལ། སྙིང་གའི་ཡི་གེ་ཧཱུྃ་ལྷ་ཐམས་ཅད་ཀྱི་ངོ་བོར་མོས་ལ། དེ་མཆོད་པའི་བསམ་པས་བཟའ་སྟེ། སྙིང་གའི་ས་བོན་མེ་འབར་ལ། །དེ་ཡི་ག་བུར་བཏུང་བར་བྱ། །བཏུང་བ་དེ་ཡིས་རྣལ་འབྱོར་པ། །མྱུར་དུ་དངོས་གྲུབ་ཐོབ་པར་འགྱུར། །ཞེས་གསུངས་ཏེ། འདིས་བཅུད་ལེན་དུ་འགྱུར་བའི་དགོས་པ་ཡང་བསྟན་ནོ། །གཞན་ཡང་ཡོན་དག་པའི་དགོས་པ་ཡང་ཡོད་དེ། ཟས་ཀྱི་རྣལ་འབྱོར་འདི་ཡིས་ནི། །བུ་ལོན་དུ་ཡང་མི་འགྱུར་རོ། །ཞེས་གསུངས་སོ། །གཞན་ཡང་འདིས་རྩ་བའི་ལྟུང་བ་བཅུ་གསུམ་པ་མི་འབྱུང་བའི་དགོས་པ་ཡང་ཡོད་དོ། །དགུ་པ་སྤྱོད་ལམ་གྱི་རྣལ་འབྱོར་ལ་གཉིས་ཏེ། གང་གིས་བྱེད་པའི་རྣལ་འབྱོར། དེས་བྱ་བའི་རྣལ་འབྱོར་རོ། །དང་པོ་ནི་རྩ་རྒྱུད་ལས། ལངས་ཏེ་ལྷའི་གཟུགས་སུ་གཞག་གོ །ཞེས་གསུངས་ལ། དེའི་དོན་མཉམ་གཞག་ལས་ལངས་ནས། སྤྱོད་ལམ་སྣ་ཚོགས་ལ་འཇུག་པའི་ཚེ་ལྷའི་ང་རྒྱལ་དང་མ་བྲལ་བར་གནས་དགོས་པ་ཡིན་ཏེ། བྷ་ཝ་བྷ་དྲས། ཐུན་དང་། སྒོམ་པའི་ཕྱི་རོལ་གྱི་བྱ་བ་གསུངས་པ། ལྷའི་ཞེས་བྱ་བ་ལ་སོགས་པ་ལ། ལྷའི་གཟུགས་ནི་འདུག་པ་དང་། བཟའ་བ་དང་། ཉལ་བ་ལ་སོགས་པ་རྣམས་སུ་ལྷའི་ང་རྒྱལ་གྱིས། ཡུལ་རྣམས་ལ་ལྷའི་གཟུགས་སུ་ཉེ་བར་ལོངས་སྤྱོད་པའི་རྣལ་འབྱོར་གྱི་ངེས་པ་ཉིད་དོ་ཞེས་དགོངས་སོ་ཞེས་བཤད་པའི་ཕྱིར་རོ། །འོ་ན་ལྷའི་ང་རྒྱལ་ཇི་ལྟ་བུར་བསྒོམ་སྙམ་ན། ཕྱི་ནང་གི་ཆོས་ཐམས་ཅད་རང་བཞིན་གྱིས་མ་གྲུབ་པར་ཤེས་པའི་སྟོང་པ་ཉིད་དང་། དེ་ཉིད་གཟུགས་ཀྱི་རྣམ་པ་ལྷའི་སྐུ་སྒྱུ་མ་ལྟ་བུར་ཤར་བ་གཉིས་དབྱེར་མེད་པའི་རང་བཞིན་ཅན་དུ་བསྒོམ་པ་ཡིན་ཏེ། གྲུབ་ཆེན་མཚོ་སྐྱེས་ཀྱིས། ལྷའི་ལུས་ཀྱི་གནས་པར་བྱའོ་ཞེས་པ་ནི་སྒྱུ་མ་ལྟ་བུ་གཉིས་སུ་མེད་པ་བདེ་བ་ཆེན་པོའི་རང་བཞིན་གྱི་བདག་ཉིད་ཀྱིས་ཆོས་ཐམས་ཅད་ལྷག་པར་མོས་ཏེ། ཐམས་ཅད་དུ་གནས་པར་བྱའོ་ཞེས་གསུངས་སོ། །གཉིས་པ་ལ་གཉིས། རང་གི་ལྷག་པའི་ལྷའི་རྣལ་འབྱོར་དང་། ལྷ་སོ་སོའི་རྣལ་འབྱོར་རོ། །དང་པོ་ནི། ཅི་དང་ཅིར་སྣང་བའི་དངོས་པོ་ཐམས་ཅད་ཀྱེ་རྡོ་རྗེར་ཤེས་པར་བྱས་ནས་ལོངས་སྤྱོད་དེ། གསང་འདུས་ལས། འདོད་པའི་ལོངས་སྤྱོད་ཐམས་ཅད་ནི། །ཅི་ལྟར་འདོད་པས་བསྟེན་བྱ་སྟེ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །སོགས་སོ། །འདི་ནི་ཉུང་ངུ་ལ་མོས་པ་རྣམས་ཀྱི་ཐ་མལ་གྱི་རྣམ་རྟོག་ལོག་པར་བྱེད་པའོ། །གཉིས་པ་ནི་ཡུལ་དང་ཡུལ་ཅན་གྱི་དབྱེ་བས་མཐའ་ཡས་པར་བྱས་ལ། དེ་དག་རེ་རེ་ཡང་ལྷ་སོ་སོར་ཤེས་པར་བྱེད་པ་སྟེ། དེ་ཡང་གཟུགས་གཽ་རཱི། སྒྲ་ཙཽ་རཱི། དྲི་བེ་ཏཱ་ལཱི། རོ་གྷསྨ་རཱི། རེག་ས་སྤྱོད་མ། ཆོས་ཁམས་མཁའ་སྤྱོད་མ་སྟེ། ཕྱིའི་ཡུལ་དྲུག་ལྷ་མོ་དྲུག་དང་། མིག་སོགས་ནང་གི་དབང་པོ་དྲུག་དང་། རྣམ་ཤེས་དྲུག་པོ་གཏི་མུག་རྡོ་རྗེ་མ་ལ་སོགས་པའི་ལྷ་མོ་དྲུག་ཏུ་བྱ་སྟེ། ལྷ་ལ་ལྷ་ཐིམ་པའི་ཚུལ་གྱིས་ལོངས་སྤྱད་དོ། །འདི་ནི་རྒྱ་ཆེན་པོ་ལ་དགའ་བ་རྣམས་ལ་ཐ་མལ་པར་འཛིན་པ་དང་། རིལ་པོ་གཅིག་ཏུ་འཛིན་པའི་རྣམ་རྟོག་ཐམས་ཅད་བཤིག་པ་ཡིན་ནོ། །དེ་ལྟར་འཆིང་བའི་རྒྱ་ནི་ཐ་མལ་པའི་རྣམ་པར་རྟོག་པ་ཡིན་ལ། དེ་ལྷའི་རྣམ་པར་ཤེས་པ་ན་ཐ་མལ་པ་དག་པས་ཐམས་ཅད་རིལ་གྱིས་སྤོང་བར་འགྱུར་རོ། །གཞན་ཡང་སྐབས་འགའ་ཞིག་ཏུ་དཀྱིལ་འཁོར་དང་། ལྷའི་རྣམ་དག་དང་། དེ་ཁོ་ན་ཉིད་རྣམས་ཀྱང་རྒྱས་པར་དྲན་པར་བྱ་ཞིང་། དཀྱིལ་འཁོར་དང་། རབ་གནས་དང་། སྦྱིན་སྲེག་དང་། ཆོས་འཆད་པ་དང་། ཉན་པ་ལ་སོགས་པའི་སྤྱོད་ལམ་ཐམས་ཅད་ཀྱང་ལྷའི་རྣལ་འབྱོར་གྱིས་བྱའོ། །བཅུ་པ་རྗེས་ཆགས་ཀྱི་རྣལ་འབྱོར་ནི་ཁྱིམ་པ་རྡོ་རྗེ་འཛིན་པས་ལས་ཀྱི་ཕྱག་རྒྱ་བསྟེན་པར་འདོད་ན། ལྷའི་འདུ་ཤེས་སྔགས་ཀྱི་འདུ་ཤེས། ཆོས་ཀྱི་འདུ་ཤེས་ཏེ་བྱ་བ་དེ་གསུམ་དང་ལྡན་པས་བསྟེན་ན། འདོད་ཆགས་ཉིད་བྱང་ཆུབ་ཀྱི་ལམ་དུ་འགྱུར་རོ། །དེ་ལ་ལྷའི་འདུ་ཤེས་ནི་རང་ཀྱེ་རྡོ་རྗེ་དང་། ཡུམ་བདག་མེད་མར་བསྐྱེད་པའོ། །སྔགས་ཀྱི་འདུ་ཤེས་ནི་ཡུམ་གྱི་མཁའ་སྟོང་པར་བསམས་པའི་ངང་ལས། པདྨ་དམར་པོ་འདབ་མ་བརྒྱད་པ་ཟེའུ་འབྲུ་ལ་ཨཱས་མཚན་པར་བསྐྱེད་ལ། པདྨ་སུ་ཁ་སོགས་ཀྱིས་བྱིན་གྱིས་བརླབ། ཡབ་ཀྱི་གསང་གནས་སྟོང་པར་བསམས་པའི་ངང་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུྃ་གིས་མཚན་པ་བསྐྱེད་ལ། ཨོཾ་བཛྲ་མ་ཧཱ་སོགས་ཀྱིས་བྱིན་གྱིས་བརླབ་བོ། །དེ་ནས་གཉིས་ཀའི་མགོ་བོར་ཨོཾ། མགྲིན་པར་ཨཱཿ སྙིང་གར་ཧཱུྃ་བསམ་མོ། །ཆོས་ཀྱི་འདུ་ཤེས་ལ་བསྐྱེད་པའི་རིམ་པ་ལྟར་ན་བདེ་བ་ཆེན་པོའི་ཡེ་ཤེས་ཀྱི་དཔལ་ཀྱེ་རྡོ་རྗེ་ལ་མཆོད་པར་བྱའོ་སྙམ་དུ་བསམས་ལ། རྫོགས་པའི་རིམ་པ་ལྟར་ན། ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་ཞེས་བསམ་མོ། །རྒྱས་པར་ནི་དབང་གསུམ་པའི་མན་ངག་ཏུ་རྟོགས་པར་བྱའོ། །འདིའི་དགོས་པ་ནི་གསུམ་སྟེ། འདོད་པས་ལོག་པར་གཡེམ་པར་མི་འགྱུར་བ་དང་། ལྷ་མཆོད་པར་འགྱུར་བ་དང་། ལྷན་སྐྱེས་ཀྱི་ཡེ་ཤེས་རྟོགས་པར་འགྱུར་བའོ། །དང་པོ་ནི། དེ་ཉིད་འདུས་པར་ནི། འདོད་ཆགས་ལྟ་བུའི་བདེ་བ་མེད། །དེ་བས་རྒྱལ་བ་རྣམས་ལ་འབུལ། །སེམས་ཅན་དོན་ཕྱིར་གཞན་བུད་མེད། །བསྟེན་པས་བསོད་ནམས་ཐོབ་པར་འགྱུར། །ཞེས་གསུངས་ཏེ། ཆོས་ཀྱི་འདུ་ཤེས་ཀྱི་དགོས་པའོ། །གཉིས་པ་ནི་རྡོ་རྗེ་གུར་ལས། རང་ཉིད་ཧེ་རུ་ཀར་བྱས་ཤིང་། །རང་གི་བཙུན་མོ་ངར་བྱས་ནས། །ཆགས་ཆེན་གྱིས་ནི་འདོད་སྤྱོད་པ། །དེ་ལ་ང་ནི་རྟག་ཏུ་མཉེས། །ཞེས་པ་སྟེ། ལྷའི་འདུ་ཤེས་ཀྱི་དགོས་པའོ། །གསུམ་པ་ནི། སློབ་དཔོན་ཨིནྡྲ་བྷཱུ་ཏིས། བདེ་བ་བདེ་བ་ཆེན་པོ་ཀུན། །སྲིད་པའི་སྡུག་བསྔལ་གཅོད་བྱེད་ཅིང་། །མྱ་ངན་འདས་པའི་གནས་ཐོབ་ཅེས། །བཅོམ་ལྡན་འདས་ཀྱིས་དེ་སྐད་གསུངས། །ཞེས་གསུངས་པ་ལྟར་རོ། །འདི་ནི་རྣལ་འབྱོར་པ་ཁྱིམ་པ་ཁོ་ནའི་དབང་དུ་མཛད་ནས་གསུངས་ཀྱིས། དགེ་སློང་རྡོ་རྗེ་འཛིན་པ་ལ་ནི་འདི་མི་དགོས་པས། རྣལ་འབྱོར་དགུས་ཉིན་མཚན་ཁོར་ཡུག་ཏུ་འདའ་བར་བྱེད་པ་ཡིན་ནོ། །རྣལ་འབྱོར་བཅུ་ལ་བཤད་པའི་གོ་རིམ་མཉམ་པར་གཞག་པའི་རྣལ་འབྱོར་གཉིས། མཉམ་པར་མ་བཞག་པའི་རྣལ་འབྱོར་བརྒྱད་ཅེས་པ་བདེ་བ་ཡིན་ན་ཡང་། འདིར་ནི་མདང་ནུབ་མོ་ཉལ་བའི་རྣལ་འབྱོར་ནས་བརྩམས་ཏེ། ཉིན་ཞག་གཅིག་གི་ཉམས་ལེན་གྱི་རིམ་པའི་དབང་དུ་བྱས་ནས་བཤད་པ་ཡིན་ནོ། །བདུན་པ་སྦྱང་གཞི་སྦྱོང་ཞིང་ལམ་བྱེད་བཞིས་ལམ་དུ་བྱེད་པའི་ཚུལ་ལ་གཉིས་ཏེ། སྦྱང་གཞི་སྦྱོང་བའི་ཚུལ་དང་། དེ་ཉིད་ལམ་བྱེད་བཞིས་ལམ་དུ་བྱེད་པའི་ཚུལ་ལོ། །དང་པོ་ནི། སྦྱང་གཞི་མི་སྦྱོང་བའི་ལྷའི་རྣལ་འབྱོར་བློས་བསྐྱེད་པ་ཙམ་ནི་རྒྱུད་སྡེ་འོག་མ་གསུམ་ལ་ཡང་ཡོད་པས་བསྐྱེད་པའི་རིམ་པར་མི་འགྱུར་ཞིང་། སྦྱང་གཞི་སྦྱོང་བྱེད་ལེགས་པར་ངོ་འཕྲོད་པའི་ལྷའི་རྣལ་འབྱོར་གང་བསྒོམ་པ་ཐམས་ཅད་རྣལ་འབྱོར་ཆེན་པོའི་རིམ་པ་གཉིས་ཀྱི་ནང་ནས་བསྐྱེད་པའི་རིམ་པར་འགྱུར་བས་འདི་ཚུལ་བཞིན་དུ་བཤད་པ་གལ་ཆེ་བ་ཡིན་ལ། དེ་ལ་ཡང་མན་ངག་མེད་པར་རྣམ་རྟོག་གིས་སྒྲོ་བཏགས་པའི་ལུགས་ནི་ལམ་དུ་མི་འགྱུར་བས་རྒྱུད་སྡེའི་དགོངས་པ་མན་ངག་གིས་ལེགས་པར་བརྒྱན་པ་ཤེས་དགོས་སོ། །འདི་ལ་གཉིས་ཏེ། རྟོག་པས་བཏགས་པའི་ལུགས་དགག་པ། རྒྱུད་ཀྱི་དགོངས་པ་ཕྱིན་ཅི་མ་ལོག་པར་བཤད་པའོ། །དང་པོ་ལ་གཉིས་ཏེ། ཕྱོགས་སྔ་མ་བརྗོད་དེ་སུན་དབྱུང་བའོ། །དང་པོ་ལ་གཉིས་ཏེ། ཆོས་དབྱིངས་ཁོ་ན་སྦྱང་གཞིར་འདོད་པའི་ལུགས། མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པའི་ལུགས་སོ། །དང་པོ་ནི། གཞན་སྟོང་གི་གྲུབ་མཐའ་འཛུགས་པའི་སྔོན་གྱི་མཁས་པ་ཁ་ཅིག་ན་རེ། ཕུང་ཁམས་སྐྱེ་མཆེད་ཀྱི་ཆོས་རེ་རེ་ལ་ཡང་། མཚན་ཉིད་གསུམ་གསུམ་དུ་ཕྱེ་བའི་ཡོངས་གྲུབ་ཁོ་ན་སྦྱང་གཞི་ཡིན་གྱི། ཀུན་བརྟགས་དང་གཞན་དབང་གཉིས་ནི་སྦྱང་གཞི་མ་ཡིན་ཏེ། དེ་དག་ནི་ཀུན་རྫོབ་ཀྱི་བདེན་པ་སྤང་བར་བྱ་བ་ཁོ་ན་ཡིན་པའི་ཕྱིར་དང་། སྦྱང་གཞི་དོན་ལྷར་བསྒོམས་པས་ལྷར་འགྱུར་བ་ཅིག་དགོས་ལ། ཀུན་རྫོབ་ཀྱི་བདེན་པ་ནི་རང་བཞིན་རྣམ་དག་གི་ལྷ་མ་ཡིན་པས་ལྷར་བསྒོམས་ཀྱང་ལྷར་འགྱུར་བ་མི་སྲིད་པའི་ཕྱིར་རོ། །ཡེ་ཤེས་ཚོགས་བསག་གི་སྔགས་དོན་ལས་ཀྱང་ཤེས་ཏེ། སྟོང་ཉིད་ཡེ་ཤེས་རྡོ་རྗེའི་རང་བཞིན་ངའོ་ཞེས་དང་། ཆོས་ཐམས་ཅད་རང་བཞིན་གྱིས་རྣམ་པར་དག་པ་ངའོ་ཞེས་དང་། ཆོས་ཐམས་ཅད་རྣལ་འབྱོར་གྱི་ངོ་བོར་རྣམ་པར་དག་པ་ངའོ་ཞེས་ང་རྒྱལ་འཇོག་པ་ཡེ་ཤེས་ཚོགས་བསག་ཏུ་བཤད་ལ། དེའི་དོན་ཡང་། འདུས་བྱས་ཀུན་རྫོབ་ཀྱི་བདེན་པ་ཐམས་ཅད་སྟོང་ཉིད་དུ་གཏན་ལ་ཕབ་ནས་འདུས་མ་བྱས་ཆོས་དབྱིངས་བདེན་གྲུབ་ལ་ང་རྒྱལ་གཞག་སྟེ། དེ་ཉིད་འོག་ནས་འབྱུང་བའི་རྟེན་དང་བརྟེན་པར་བཅས་པའི་ལྷར་བསྐྱེད་དེ་བསྒོམས་པས་ཆོས་དབྱིངས་དེ་ཉིད་ལ་གློ་བུར་གྱི་དྲི་མ་དག་ནས་ལྷར་འགྱུར་བའི་དོན་ཡིན་པའི་ཕྱིར་རོ་ཞེས་སྨྲའོ། །གཉིས་པ་ནི་ཕྱིས་ཀྱི་བླ་མ་གསང་སྔགས་རང་བཟོར་བྱེད་པ་དག་ན་རེ། སྔར་འདས་ཟིན་པ་དང་། ད་ལྟར་སྐྱེས་པའི་དངོས་པོ་ཐམས་ཅད་ནི་སྦྱང་གཞི་མ་ཡིན་ཏེ། སྔར་འདས་ཟིན་པ་དང་། ད་ལྟར་བ་ནི་སྐད་ཅིག་གིས་མི་གནས་པས་སྦྱང་མི་དགོས་པར་རང་གི་ངང་གིས་འཇིགས་པའི་ཕྱིར་རོ། །དེས་ན་ལམ་བསྒོམ་པའི་སྒྲུབ་པ་པོ་ལ་མ་འོངས་པ་ན་འབྱུང་འགྱུར་གྱི་སྐྱེ་འཆི་བར་དོ་གསུམ་པོ་ཁོ་ན་སྦྱང་གཞི་ཡིན་ཏེ། སྦྱང་གཞི་སྦྱོང་བའི་དོན་ལམ་མ་བསྒོམས་ན་སྐྱེ་འཆི་བར་དོ་གསུམ་འབྱུང་རྒྱུ་ཡིན་པ་ལས་ལམ་བསྒོམས་པའི་བྱེད་པས། སྐྱེ་འཆི་བར་དོ་གསུམ་གྱི་ཚབ་ཏུ་འབྲས་བུ་སྐུ་གསུམ་འབྱུང་བ་ལ་འཇོག་དགོས་པའི་ཕྱིར་རོ། །འབྱུང་འགྱུར་གྱི་ཆོས་གསུམ་པོ་དེ་ཡང་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཡིན་པ་ཅིག་དགོས་ཏེ་སྦྱོང་བྱེད་ཀྱི་མངོན་པར་རྟོགས་པ་ནི་སྦྱང་གཞིའི་ཆོས་གསུམ་པོ་དེ་དང་འདྲ་བ་ཅིག་བསྒོམ་དགོས་པ་གང་ཞིག དེ་ཅི་འདྲ་བ་ནི་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཁོ་ན་ལ་ཡོད་ཀྱི་གཞན་ལ་མེད་པའི་ཕྱིར་རོ། །སྦྱང་གཞི་སྦྱོང་བའི་དོན་སྦྱང་གཞི་དེ་ཉིད་ལྷར་བསྒོམ་པ་ནི་མ་ཡིན་ཏེ། མ་དག་པའི་སྣང་བ་འདི་རྣམས་ནི་ལས་ཉོན་གྱི་འབྲས་བུར་གྱུར་པའི་སྡུག་བསྔལ་གྱི་བདེན་པ་ཡིན་པས་ལྷར་བསྒོམས་ཀྱང་ལྷར་འགྱུར་བ་མི་སྲིད་པའི་ཕྱིར། སོལ་བ་བརྡར་བ་ལས་དུང་མི་འབྱུང་བ་བཞིན་ནོ། །ཞེས་འཛེར་ཏོ། །གཉིས་པ་དེ་སུན་དབྱུང་བ་ལ་གཉིས་ཏེ། སོ་སོར་དགག་པ་དང་། ཐུན་མོང་དུ་དགག་པའོ། །དང་པོ་ལ་གཉིས་ཏེ། ཆོས་དབྱིངས་ཁོ་ན་སྦྱང་གཞིར་འདོད་པ་དགག མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པ་དགག་པའོ། །དང་པོ་ནི། ཆོས་དབྱིངས་དོན་དམ་པའི་བདེན་པ་སྦྱང་གཞི་ཡིན་པའི་དོན། འཕགས་པའི་མཉམ་གཞག་གིས་ཉམས་སུ་མྱོང་བའི་ཆོས་དབྱིངས་མཚན་ཉིད་པ་སྦྱང་གཞི་ཡིན་ནམ། ཐ་མལ་པའི་རྣམ་རྟོག་ལ་ཆོས་དབྱིངས་སུ་སྣང་བ་སྦྱང་གཞི་ཡིན། དང་པོ་ལྟར་ན་ཤིན་ཏུ་མི་འཐད་དེ། མཉམ་གཞག་སོ་སོ་རང་རིག་པའི་ཡེ་ཤེས་ཁོ་ནས་ཉམས་སུ་མྱོང་བར་བྱ་བ་ཡིན་གྱི་ཐ་མལ་གྱི་རྣམ་རྟོག་འཇོག་པའི་གཞི་མ་ཡིན་པས་སྦྱང་གཞིར་བྱེད་པ་དོན་མེད་པའི་ཕྱིར་རོ། །དེ་ལྟར་ཡང་གུར་ལས། ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །ཞེས་དང་། བྱང་ཆུབ་སེམས་དཔའ་རྣམས་ཀྱི་རྟོགས་པ་དེ་བཞིན་ཏེ། འོན་ཀྱང་མི་གཙང་བའི་ཚད་མཉམ་པར་སྦྱང་བའི་ཕྱིར། དེ་བཞིན་གཤེགས་པའི་སྐུ་གཟུགས་བསྒོམ་པར་བྱའོ། །ཞེས་དང་། སངས་རྒྱས་ཡེ་ཤེས་ཞབས་ཀྱིས། ཐ་མལ་རྣམ་རྟོག་རྒྱུན་ནི་མ་གཏོགས་པ། །སྲིད་པའི་འཆིང་བ་གཞན་ན་ཡོད་མ་ཡིན། །དེ་དང་རྣམ་པ་འགལ་བར་གྱུར་པའི་སེམས། །གང་ཡིན་དེས་ནི་ཀུན་རྟོག་སྣང་མི་འགྱུར། །ཞེས་གསུངས་པས་སོ། །ཕྱི་མ་ལྟར་ན་སྒྲ་རྟོག་གི་ཡུལ་དུ་གྱུར་པའི་ཆོས་དབྱིངས་ནི། རྣམ་གྲངས་པའི་དོན་དམ་བདེན་པ་ཞེས་བྱ་བ་ཡིན་གྱི། རང་གི་ངོ་བོ་སྒྲ་རྟོགས་གི་ཡུལ་ཀུན་རྫོབ་བདེན་པ་ཡིན་པས་དེ་ནི་ཀུན་རྫོབ་སྦྱང་གཞིར་སོང་བའི་དོན་ཡིན་ལ། ཕུང་པོ་ལྔའི་ཆོས་ཉིད་རིགས་དྲུག་པའི་སྦྱང་གཞིར་གསུངས་པ་ཡང་འདི་ལ་དགོངས་སོ། །སྤྲོས་བྲལ་རང་གི་ངོ་བོ་ལྷར་བསྒོམས་པ་ཉིད་ཀྱང་མི་འཐད་དེ། རྩ་རྒྱུད་བརྟག་གཉིས་ལས། སྒོམ་པ་པོ་མེད་སྒོམ་པའང་མེད། །ལྷ་མེད་སྔགས་ཀྱང་ཡོད་མ་ཡིན། །ཞེས་གསུངས་པས་སོ། །བདེན་པ་གཉིས་སུ་ཕྱེ་ནས། ཀུན་རྫོབ་བདེན་པ་ལྷར་མི་བསྒོམ་པར་དོན་དམ་བདེན་པ་ལྷར་བསྒོམ་པ་ནི་རྒྱུད་དང་དངོས་སུ་འགལ་ཏེ། རྩ་རྒྱུད་དང་པོའི་དགུ་པར། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་དོན་དམ་པར་ཕྱི་ནང་གི་དངོས་པོ་ཐམས་ཅད་དེ་བཞིན་ཉིད་སྤྲོས་བྲལ་ཡིན་པས་ལྷར་བསྒོམས་པ་མེད་ཀྱང་ཕྱི་ནས་ཏེ། དེ་མ་གཏོགས་པར་ཀུན་རྫོབ་ཀྱི་སྤྲོས་པ་སྣ་ཚོགས་འཆར་བ་རེ་རེ་ནས་ལྷར་བསྒོམས་ཞེས་པའི་དོན་ཡིན་པའི་ཕྱིར་དང་། ཕྱི་མའི་བཅུ་གཅིག་པར། བུད་མེད་དང་ནི་སྐྱེས་པ་ཡི། །གང་གི་སྲིན་ལག་རྩ་བ་ལ། །རྡོ་རྗེ་རྩེ་དགུ་པར་གྱུར་པ། །མི་བསྐྱོད་པ་ཡི་རིགས་མཆོག་ཉིད། །ཅེས་སོགས་དབྱིབས་ཀྱི་སྒོ་ནས་རིགས་ལྔ་སོ་སོའི་རིགས་སུ་ངེས་པ་དང་། རྣལ་འབྱོར་པ་གང་ནག་པོ་ཉིད། །དེ་ཡི་ལྷ་ནི་མི་བསྐྱོད་པ། །ཞེས་སོགས་ཁ་དོག་གི་སྒོ་ནས་རིགས་ལྔ་སོ་སོའི་རིགས་སུ་ངེས་པའི་ཚུལ་གསུངས་ཤིང་། དེ་ཡང་ཀུན་རྫོབ་ཏུ་དེ་དང་དེའི་རིགས་ཡིན་པའི་ཚུལ། ལུང་དེའི་མཇུག་ཏུ། ཀུན་རྫོབ་གཟུགས་སུ་གནས་ནས་ནི། །དེ་རྣམས་བདེ་གཤེགས་རིགས་སུ་འགྱུར། །བུད་མེད་རྣམས་ཀྱི་མཚན་ཉིད་འདི། །ཇི་ལྟར་སྐྱེས་པ་དེ་བཞིན་ནོ། །ཀུན་རྫོབ་ཐ་སྙད་ཚུལ་ལས་ནི། །དེ་ཡི་རིགས་སུའང་དེ་འགྱུར་རོ། །ཞེས་གསུངས་པས་སོ། །འདི་ཉིད་རྡོ་རྗེ་གུར་ལས་ཀྱང་གསལ་བར་གསུངས་ཏེ། གལ་ཏེ་འགལ་བ་ཡོད་པ་མ་ཡིན་ཡང་། །དེ་ཚེ་རྒྱལ་བའི་དངོས་པོས་སྦྱངས་པ་ཡོད། །ཀུན་རྫོབ་གཟུགས་སུ་རྣམ་པར་གནས་ནས་ནི། །འཁོར་ལོའི་གཟུགས་ཀྱི་ཆོས་ཙམ་རྣམ་པར་བརྟག །ཅེས་གསུངས་ཤིང་དེའི་དོན་ཡང་། དོན་དམ་ཆོས་ཉིད་ཀྱི་ངོས་ནས་འགལ་བ་སྦྱང་གཞི་དང་། སྦྱོང་བྱེད་སོ་སོར་ཡོད་པ་མ་ཡིན་ཡང་། ཆོས་ཉིད་མ་གཏོགས་པར་ཀུན་རྫོབ་ཕུང་ཁམས་སྐྱེ་མཆེད་ཀྱི་སྣང་བ་འཆར་བ་དེའི་ཚེ་སྦྱང་གཞི་དེ་དག་རྒྱལ་བའི་དངོས་པོས་སྦྱངས་པས་སྦྱང་གཞི་དང་། སྦྱོང་བྱེད་ཀྱི་རྣམ་གཞག་ཡོད་དོ། །དེས་ན་སྦྱོང་བྱེད་འཁོར་ལོའི་གཟུགས་ཀྱིས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ཙམ་ལྷའི་ངོ་བོར་རྣམ་པར་བརྟགས་པའི་སྦྱང་གཞི་དང་སྦྱོང་བྱེད་གཉིས་ཀ་ཡང་། ཀུན་རྫོབ་གཟུགས་སུ་རྣམ་པར་གནས་ནས་ཡིན་གྱི་དོན་དམ་པར་ནི་མ་ཡིན་ཞེས་པའི་དོན་ཏོ། །དེ་ལྟར་ན་རྩ་རྒྱུད་ལས། ཕྱི་ནས་ཞེས་པ་དང་། གུར་ལས། དེ་ཚེ་ཞེས་པ་དོན་གཅིག་པས་རྒྱ་བོད་ཀྱི་མཁས་གྲུབ་རྣམས་ཀྱི་སྒྲུབ་ཐབས་རྣམས་ལས། ཡེ་ཤེས་ཚོགས་བསག་སྟོང་ཉིད་བསྒོམས་པའི་རྗེས་སུ་སྟོང་པའི་ངང་ལས་ཞེས་གསུངས་པར་ཤེས་པར་བྱས་ནས་དོན་དམ་སྤྲོས་བྲལ་སྦྱང་གཞི་ཡིན་ཀུན་རྫོབ་སྤྲོས་བཅས་སྦྱང་གཞི་མ་ཡིན་ཞེས་བྱ་བའི་གཏམ་སྨྲ་བར་མི་བྱའོ། །བསྟན་བཅོས་ཆེན་པོ་དང་ཡང་འགལ་ཏེ། སྤྱོད་བསྡུས་ལས། གང་ཞིག་སྐྱེ་བ་ཀུན་རྫོབ་བདེན་པ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །རིམ་གཉིས་འདི་དག་བླ་མའི་བཀའ་དྲིན་གྱིས། །རྙེད་པ་གང་དེ་མ་འོངས་སངས་རྒྱས་ཡིན། །ཞེས་པ་དང་འགལ་བའི་ཕྱིར་ཏེ། སྐྱེ་བ་ཀུན་རྫོབ་ཀྱི་བདེན་པ་བསྐྱེད་རིམ་གྱི་སྦྱང་གཞི་འཇོག་ན་དངོས་སུ་འགལ་ཞིང་། སྦྱོང་བྱེད་ཀྱི་ལྷ་ཡིན་ན་དོན་དམ་ཀུན་རྫོབ་ཏུ་བསྒོམ་པར་ཐལ་བའི་སྐྱོན་སྔར་བཤད་ཟིན་པའི་ཕྱིར་རོ། །གཞན་ཡང་འདི་ལ་རིགས་པ་དུ་མས་གནོད་དེ། ཆོས་ཉིད་ལྷར་བསྒོམ་པའི་ཚེ་ལྷའི་འཁོར་ལོ་དེ་ཀུན་རྫོབ་མ་ཡིན་ན་ནི་སྔར་གྱི་ལུང་དེ་དག་གིས་དངོས་སུ་གནོད། ཀུན་རྫོབ་ཡིན་ན་དོན་དམ་ཀུན་རྫོབ་ཏུ་བསྒོམ་པ་མི་འཐད་དེ། ཀུན་རྫོབ་ཏུ་ལྷར་བསྒོམས་ཀྱང་དེ་ལྷར་མི་འགྱུར་བའི་ཕྱིར་རོ། །ཞེས་ཟློག་ན་ལན་ཅི་སྨྲ། གཞན་ཡང་དོན་དམ་བདེན་པ་བདེན་གྲུབ་ཏུ་བྱས་ནས་དེ་ཉིད་ལྷར་བསྒོམས་པས་ལྷར་འགྱུར་བར་འདོད་པ་ནི་ཁས་བླངས་འགལ་ཏེ། འཕགས་མཆོག་ཀླུ་སྒྲུབ་ཀྱིས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཉིད། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མ་ཡིན། །ཞེས་གསུངས་པས་སོ། །གལ་ཏེ་ལྷར་འབྱུང་བའི་དོན། དང་པོ་ནས་ལྷ་ཡིན་པ་ལ་ཕྱིས་གློ་བུར་གྱི་དྲི་མ་བསལ་ནས། ལྷར་མཐོང་བ་ཙམ་ལ་བྱེད་དོ་སྙམ་ན། དེ་ཡང་མི་རུང་སྟེ། སྔར་གྱི་ལུང་དེས་བདེན་པར་གྲུབ་ན་བྱ་བྱེད་གང་ཡང་མི་རུང་བ་བསྟན་པའི་ཕྱིར་རོ། །གཞན་ཡང་འདི་ལ་རྩ་ལྟུང་བསྲུང་ཚུལ་མི་རུང་བ་དང་། སྤྱོད་ལམ་གྱི་རྣལ་འབྱོར་མི་རུང་བ་དང་། ཁ་ཟས་ཀྱི་རྣལ་འབྱོར་མི་རུང་བ་དང་། མཆོད་གཏོར་བྱིན་རླབས་མི་རུང་བ་དང་། རབ་གནས་མི་རུང་བ་དང་། སྦྱིན་སྲེག་མི་རུང་བ་སོགས་སྐྱོན་དཔག་ཏུ་མེད་པ་ཡོད་པ་ལས་རེ་ཤིག་དང་པོ་ནི། ཕུང་པོ་སངས་རྒྱས་ལྔ་བདག་ཉིད། །དེ་ལ་སྨོད་པ་བརྒྱད་པ་ཡིན། །ཞེས་པ་མི་རུང་བར་འགྱུར་ཏེ། ཆོས་ཉིད་ཡོངས་གྲུབ་ལ་སྨད་པ་མེད་པའི་ཕྱིར། གཉིས་པ་ནི་རྩ་རྒྱུད་ལས། ལངས་ཏེ་ལྷའི་གཟུགས་སུ་གཞག་གོ །ཞེས་པ་མི་རུང་བར་འགྱུར་ཏེ། མཉམ་གཞག་ལས་ལངས་པའི་ཚེ་དོན་དམ་ནི་བློ་ལ་མི་སྣང་། ཀུན་རྫོབ་ནི་ལྷའི་གཟུགས་སུ་མི་གཞག་པའི་ཕྱིར་རོ། །གསུམ་པ་ཁ་ཟས་བདུད་རྩིར་བྱིན་གྱིས་བརླབས་ནས་བཟའ་བར་མི་རུང་བར་འགྱུར་ཏེ། ཀུན་རྫོབ་ནི་བདུད་རྩིར་བྱིན་གྱིས་མི་བརླབ། ཆོས་ཉིད་ནི་བཟའ་བར་མི་རུང་བའི་ཕྱིར་རོ། །བཞི་པ་ནི་མཆོད་པ་དང་གཏོར་མ་སོགས་བྱིན་གྱིས་བརླབ་པ་ལ་ཡང་རིགས་པ་དེས་བསྒྲེའོ། །ལྔ་པ་ནི་རབ་གནས་ཀྱང་མི་རུང་བར་འགྱུར་ཏེ། རབ་གནས་ཀྱི་རྒྱུད་ལས། སངས་རྒྱས་ཀུན་ན་རབ་ཏུ་བཞུགས། །རབ་ཏུ་གནས་པ་གང་ཡང་མེད། །ཀུན་ཏུ་མཁའ་ལྟར་གནས་པ་ལ། །ཅིག་ཤོས་ཀྱིས་ནི་རབ་ཏུ་བརྟག །འཇིག་རྟེན་ཀུན་རྫོབ་ལ་བརྟེན་ནས། །རབ་ཏུ་གནས་པ་རབ་ཏུ་བརྟག །ཅེས་དོན་དམ་པར་རབ་ཏུ་གནས་བྱ་གནས་བྱེད་མེད་པར་གསུངས་ཤིང་། ཀུན་རྫོབ་ཏུ་རབ་ཏུ་གནས་བྱ་གནས་བྱེད་ནི་ཁྱེད་ཀྱིས་བཀག་པའི་ཕྱིར་རོ། །དྲུག་པ་ནི་སྦྱིན་སྲེག་ཀྱང་མི་རུང་བར་འགྱུར་ཏེ། ཐབ་ཁུང་གི་ནང་དུ་ལྷ་བསྐྱེད་ནས་བསྲེག་རྫས་འབུལ་བའི་རྣམ་གཞག་དེ་དག་དོན་དམ་ཡིན་ན་ནི། སྔར་གྱི་ཀླུ་སྒྲུབ་ཀྱི་ལུང་གིས་གནོད། ཀུན་རྫོབ་ཡིན་པ་ནི་ཁྱེད་ཀྱིས་བཀག་པའི་ཕྱིར་རོ། །འདི་དག་ཐམས་ཅད་ལ་ཡང་མཚན་ཉིད་གསུམ་གསུམ་དུ་ཕྱེ་བའི་ཡོངས་གྲུབ་ཀྱི་གཟུགས་སོགས་ལ་དགོངས་སོ་ཞེས་པའི་ལན་ནི་མི་རུང་སྟེ། ཡོངས་གྲུབ་མཚན་ཉིད་པ་ལ་ནི་བྱ་བྱེད་མེད། ཐ་མལ་པའི་བློ་ངོར་ཡོངས་གྲུབ་ཏུ་སྣང་བ་ནི་ཀུན་རྫོབ་ཡིན་པས་རང་གི་ཕྱོགས་སུ་འདུག་ནས་ཕར་ཟ་བའི་ཕྱིར་རོ། །ཡེ་ཤེས་ཚོགས་བསག་གི་སྔགས་དོན་དོན་དམ་བདེན་པ་བདེན་གྲུབ་ལ་ང་རྒྱལ་འཇོག་པར་འདོད་པ་ནི་ཤིན་ཏུ་འཁྲུལ་ཏེ། བདེན་གྲུབ་ལ་ང་རྒྱལ་འཇོག་པ་ཐོག་མ་མེད་པ་ནས་ཡོད་པའི་བདེན་འཛིན་ལྷན་སྐྱེས་ཡིན་པས་འཁོར་བའི་རྒྱུ་ཡིན་པའི་ཕྱིར་ཏེ། སྤྱོད་འཇུག་ལས། འདིར་ནི་སྡུག་བསྔལ་རྒྱུར་གྱུར་པའི། །བདེན་པར་ཞེན་པ་བཟློག་བྱ་ཡིན། །ཞེས་གསུངས་པའི་ཕྱིར་རོ། །རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་འགྲུབ་པར་འགྱུར། །ཞེས་གསུངས་པ་ནི། བདེན་གྲུབ་ལ་ང་རྒྱལ་འཇོག་པ་མ་ཡིན་ཏེ། ལྟ་བས་བདེན་འཛིན་གྱི་དྲི་མ་སྦྱངས་ནས་ཀུན་རྫོབ་སྣང་ཙམ་ལ་ཐ་མལ་གྱི་རྣམ་རྟོག་སྤོང་བའི་ཕྱིར་དུ་ལྷའི་འཁོར་ལོ་བསྒོམ་པའི་དོན་ཡིན་པའི་ཕྱིར་ཏེ། རྩ་རྒྱུད་ལས། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་གསུངས་པའི་དོན། རྗེ་བཙུན་གོང་མ་འཁྲུལ་པའི་དྲི་མ་ཟད་པ་དག་གིས། དུག་དེ་ལ་ཀུན་ཏུ་བརྟགས་པའི་དུག་དང་། ཀུན་ཏུ་རྟོག་པའི་དུག་གཉིས་ལས། དང་པོ་ནི་བདེན་འཛིན་ཡིན་པས་ལྟ་བས་སྦྱོང་བར་བྱེད། གཉིས་པ་ནི་ཐ་མལ་གྱི་རྣམ་རྟོག་ཡིན་པས་བསྐྱེད་རིམ་གྱིས་སྤོང་བར་བྱེད་པའི་དོན་དུ་གསུངས་པ་འདི་ཉིད་རྒྱུད་ཀྱི་དོན་དུ་གནས་པའི་ཕྱིར་རོ། །ཅི་ལྟར་གནས་ན་ལུང་དེའི་གོང་དུ་དེ་བཞིན་ཉིད་ཀྱི་དག་པ་དང་། ལྷ་སོ་སོའི་དག་པ་གཉིས་གསུངས་པ་ལས་ཤེས་སོ། །འོ་ན་ཡེ་ཤེས་ཚོགས་བསག་གི་སྔགས་དོན་གང་ཞེ་ན། སྐབས་དེར་ངའོ་ཞེས་པའི་ང་ནི་གཞི་ལམ་འབྲས་བུའི་གནས་སྐབས་ཐམས་ཅད་དུ་ཀུན་རྫོབ་ཐ་སྙད་དུ་གསལ་སྟོང་ཟུང་འཇུག་ཡོད་པ་དེ་ཉིད་ཡིན་ཏེ། རྩ་རྒྱུད་ལས། ང་ལས་འགྲོ་བ་ཐམས་ཅད་འབྱུང་། །ང་ལས་གནས་གསུམ་པོ་ཡང་འབྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་དང་། དངོས་ང་དངོས་པོ་མེད་པ་ང་། །དངོས་པོ་རྟོགས་ཕྱིར་སངས་རྒྱས་ང་། །གང་ཞིག་ལེ་ལོས་བསྣུན་པ་དང་། །རྨོངས་པ་གང་གིས་ང་མི་ཤེས། །ཞེས་གསུངས་པས་སོ། །ང་རྒྱལ་འཇོག་པའི་ཚུལ་ཡང་རང་བཞིན་རྣམ་དག་གི་སྟོང་ཉིད་ཁྱད་གཞིར་བཟུང་ནས་ཁྱད་ཆོས་ངའོ་སྙམ་པའི་འཛིན་སྟངས་བསྣན་པ་མ་ཡིན་གྱི། སྣང་བ་ཐམས་ཅད་སྟོང་ཉིད་དུ་སྦྱངས་ནས་རི་བོང་གི་རྭ་ལྟར་ཅི་ཡང་མེད་ཙམ་མ་ཡིན་པར་སྟོང་པ་དང་གསལ་བ་དབྱེར་མེད་པ་ལ་མཉམ་པར་གཞག་པའི་དོན་ཏོ། །དེས་ན་རྗེ་ས་ཆེན་གྱིས་གསུངས་པ་ལྟར་ཡེ་ཤེས་ཚོགས་བསག་གི་དགོས་པ་གསུམ་ཡང་འགྲུབ་ཅིང་ལྟ་བའི་ངོ་བོ་ཟུང་འཇུག་ལ་གཞག་པ་ཡང་འགྲུབ་བོ། །གང་ཞིག་ལེ་ལོས་བསྣུན་པ་དང་། །རྨོངས་པ་གང་གིས་ང་མི་ཤེས། །ཞེས་གསུངས་པའི་སྐབས་འདིའི་ང་དང་། ཕ་རོལ་ཏུ་ཕྱིན་པའི་ཐེག་པར་གྲགས་པའི་ང་དོན་མི་གཅིག་པའི་ཚུལ་ཞིབ་པར་ངག་ལས་ཤེས་དགོས་སོ། །གཉིས་པ་མ་འོངས་པའི་ཆོས་གསུམ་ཁོ་ན་སྦྱང་གཞིར་འདོད་པའི་ལུགས་དགག་པ་ནི་ཁྱོད་ཀྱིས་རྣམ་གཞག་རིམ་པའི་ཊཱི་ཀར་སྔར་འདས་ཟིན་པའི་བསྐལ་པ་ད་ལྟ་རྣལ་འབྱོར་པའི་ལམ་བསྒོམ་པའི་སྦྱང་གཞིར་འཇོག་ན་ན་ཉིང་ཞིག་ཟིན་པའི་བུད་ཤིང་ད་ལོའི་མེས་བསྲེག་པར་ཐལ་ལོ། །ཞེས་པའི་སྐྱོན་འཕེན་པ་ནི་རང་གི་གྲུབ་མཐའི་གཙོ་བོ་ལ་སྐྱོན་འདི་ལྟར་ཐོང་ཞིག ཅེས་པའི་བརྡ་སྟེ། སང་ཕོད་སྐྱེ་འགྱུར་གྱི་བུད་ཤིང་ད་ལོའི་མེས་བསྲེག་པར་འགྱུར་ཏེ། མ་འོངས་པ་ན་འབྱུང་འགྱུར་གྱི་སྐྱེ་འཆི་བར་དོ་གསུམ་ད་ལྟ་རྣལ་འབྱོར་པས་ལམ་བསྒོམ་པའི་སྦྱང་གཞི་ཡིན་པའི་ཕྱིར་ཞེས་བརྗོད་ན་ལན་ཅི་ཡོད། སྦྱང་གཞི་སྦྱོང་བའི་དོན་ལམ་མ་བསྒོམས་ན་སྐྱེ་འཆི་བར་དོ་གསུམ་འབྱུང་རྒྱུ་ཡིན་པ་ལ། ལམ་བསྒོམས་པའི་བྱེད་པས་དེའི་དོད་དུ་འབྲས་བུ་སྐུ་གསུམ་འབྱུང་བ་ལ་འདོད་པ་ནི། རང་དགར་རྣམ་པར་རྟོགས་པས་བཏགས་པ་ཙམ་ཡིན་གྱི་རྡོ་རྗེ་ཐེག་པའི་རྒྱུད་གཞུང་གང་གི་ཡང་ལུགས་མ་ཡིན་ཏེ། དེ་ལྟར་ན་སྦྱོང་བྱེད་བསྐྱེད་པའི་རིམ་པ་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་དང་། རྣམ་པ་ཅི་འདྲ་མ་འདྲ་ཞིག་བསྒོམས་པ་དོན་མེད་པའི་ཕྱིར་ཏེ། མ་འོངས་པ་ན་འབྱུང་འགྱུར་གྱི་སྲིད་པ་བཀག་ནས་དེའི་དོད་དུ་ཡོན་ཏན་གཞན་འབྱུང་བ་ནི་ཕ་རོལ་ཏུ་ཕྱིན་པ་དང་། རྒྱུད་སྡེ་འོག་མ་གསུམ་གྱི་ལམ་ལ་ཡང་ཡོད་པའི་ཕྱིར། ལམ་མ་བསྒོམས་ན་འགྲོ་བ་གཞན་དུ་སྐྱེ་བར་འགྱུར་བའི་རྣལ་འབྱོར་པས་བླ་མེད་ཀྱི་ལམ་བསྒོམ་པའི་ཚེ་སྦྱང་གཞི་སྦྱོང་ཚུལ་གཏན་མེད་པར་འགྱུར་ཏེ། འགྲོ་བ་གཞན་གྱི་སྐྱེ་འཆི་བར་དོ་གསུམ་སྦྱང་གཞི་མ་ཡིན་པའི་ཕྱིར་རོ། །མཚམས་མེད་བྱས་ནས་ལམ་མ་བསྒོམས་པར་དམྱལ་བར་སྐྱེ་འགྱུར་གྱི་རྣལ་འབྱོར་པས་ལམ་བསྒོམ་པའི་བྱེད་པས་དམྱལ་བའི་ཆོས་གསུམ་གྱི་དོད་དུ་འབྲས་བུ་སྐུ་གསུམ་འབྱུང་བ་མེད་པར་འགྱུར་ཏེ། སྦྱང་གཞིའི་ཆོས་གསུམ་འཛམ་བུ་གླིང་པའི་མི་མངལ་སྐྱེས་ཁོ་ན་ལ་འཇོག་དགོས་པའི་ཕྱིར། འདོད་ན། རྩ་རྒྱུད་བརྟག་གཉིས་ལས། མཚམས་མེད་ལྔ་ནི་བྱེད་པ་དང་། །གཞན་ཡང་སྐྱེ་བ་དམན་གང་དང་། །རྨོངས་དང་མ་རུངས་ལས་བྱེད་དང་། །གཟུགས་ངན་ཡན་ལག་མ་ཚང་བ། །བསམ་པས་དེ་རྣམས་འགྲུབ་པར་འགྱུར། །ཞེས་གསུངས་པ་དང་འགལ་ལོ། །སློབ་དཔོན་འཕགས་པ་ལྷའི་རྣལ་འབྱོར་ཆེན་པོའི་ལམ་ལ་སྦྱང་གཞི་གསུམ་མ་ཚང་བར་འགྱུར་ཏེ། དེ་ལམ་མ་བསྒོམས་ན་འཛམ་བུ་གླིང་པའི་མི་མངལ་སྐྱེས་སུ་སྐྱེ་སྲིད་དུ་ཆུག་ན་ཡང་། དེའི་འཆི་སྲིད་ནི་རྫུས་སྐྱེས་ཀྱི་འཆི་སྲིད་ཁོ་ན་ཡིན་པའི་ཕྱིར་རོ། །འོག་མིན་ལོངས་སྤྱོད་རྫོགས་སྐུའི་འཁོར་གྱི་ས་བཅུའི་བྱང་སེམས་རྣམས་ལ་སྦྱང་གཞི་སྦྱོང་བའི་རྣལ་འབྱོར་ཆེན་པོའི་ལམ་མེད་པར་འགྱུར་ཏེ། དེ་དག་ལ་མ་འོངས་པའི་འཛམ་བུ་གླིང་པའི་སྐྱེ་འཆི་བར་དོ་གསུམ་མེད་པའི་ཕྱིར། མང་དུ་བརྗོད་པས་ཅི་ཞིག་བྱ། རྣལ་འབྱོར་ཆེན་པོའི་སྦྱང་གཞི་སྦྱོང་བྱེད་སྦྱར་བའི་ལམ་བསྒོམ་པ་པོ་དེ་ཡིན་ན། འཛམ་བུ་གླིང་པའི་མི་མངལ་སྐྱེས་ཁོ་ནར་སྐྱེ་བར་འགྱུར་བ་ཅིག་དགོས་ཀྱི་འགྲོ་བ་གཞན་དུ་སྐྱེ་བར་འགྱུར་བས་དེ་ལྟ་བུའི་ལམ་བསྒོམས་པ་དོན་མེད་ཅེས་པ་འདི་ལྟ་བུའི་བློ་གྲོས་ཤིན་ཏུ་དོག་པ། ལུང་དང་རིགས་པ་དུ་མས་གནོད་པ། མཁས་པས་མཐོང་ན་བཞད་གད་ཀྱི་གནས་སུ་གྱུར་པ་འདི་འདྲ་བ་ལ་རྗེས་འཇུག་དུ་མ་འབྱུང་བ་ནི། སེམས་ཅན་རང་རང་ལས་ལ་སྤྱོད་པའི་ཚུལ་དུ་སྣང་ངོ་། །ལུགས་ངན་པ་འདི་གསང་བ་འདུས་པའི་རྩོད་སྤོང་དུ་ཡང་རྒྱས་པར་བཀག་ཟིན་པས་ཤེས་པར་འདོད་ན་དེར་བལྟ་བར་བྱའོ། །གཉིས་པ་ཐུན་མོང་དུ་དགག་པ་ནི་ལུགས་འདི་གཉིས་ཆར་གྱིས་ཀྱང་ཀུན་རྫོབ་ཕུང་ཁམས་སྐྱེ་མཆེད་ཀྱི་དངོས་པོ་རྣམས་ལྷའི་ངོ་བོར་རང་བཞིན་གྱིས་རྣམ་པར་དག་པ་མ་ཡིན་པས། དེ་ལྷར་བསྒོམས་ཀྱང་ལྷར་འགྱུར་བ་མི་སྲིད་དོ། །དེའི་རྒྱུ་མཚན་གྱིས་དེ་དག་སྦྱང་གཞི་ཡང་མ་ཡིན་ཞིང་། ལྷར་བསྒོམ་པ་ཡང་མི་རུང་ཞེས་སྨྲ་བ་མཐུན་པར་སྣང་བས་དེ་དག་རྡོ་རྗེ་ཐེག་པའི་རྒྱུད་གཞུང་རྣམས་དང་འགལ་བའི་ཚུལ་མདོར་བསྡུས་ཏེ་བརྗོད་པར་བྱའོ། །དེ་ལ་ཐོག་མར་འཁོར་ལོ་བདེ་མཆོག་གི་རྒྱུད་གཞུང་དང་འགལ་བ་ནི་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། དེ་ལ་རེ་ཤིག་རྣལ་འབྱོར་གྱི་དབང་ཕྱུག་གིས་ཕུང་པོ་ལྔའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་པ་ནས་ནམ་མཁའི་ཁམས་ལ་ནི་པདྨའི་དྲྭ་བ་ཅན་མ་སྟེ། དེ་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་ལ་ང་རྒྱལ་བསྐྱེད་པར་བྱའོ། །ཞེས་པའི་བར་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལྷ་བཅུ་བདུན་གྱི་ངོ་བོར་ང་རྒྱལ་བསྐྱེད་པར་གསུངས་ཤིང་། དེ་ཉིད་ཀྱི་ལེའུ་བཞི་པ་ལས། སོ་དང་སེན་མོ་དག་པ་ལ་ནི་ཐོད་པ་ཕྱེད་པའོ། །སྐྲ་དང་སྤུ་ལ་ནི་ཀེང་རུས་ཆེན་པོའོ། །ཞེས་པ་ནས་སྣབས་ལ་ནི་རྡོ་རྗེ་སེམས་དཔའོ་ཞེས་པའི་བར་ལུས་ཀྱི་ཁམས་ཉི་ཤུ་རྩ་བཞི། དཔའ་བོ་ཉི་ཤུ་རྩ་བཞིའི་ངོ་བོར་གསུངས། ལེའུ་ལྔ་པ་ལས། པུ་ཞེས་བྱ་བ་ནི་པུ་ལི་ར་མ་ལ་ཡ་ན་ཁཎྜ་ཀ་པཱ་ལ་དང་། པྲ་ཙཎྜིའོ་ཞེས་སོགས་ཡུལ་ཉི་ཤུ་རྩ་བཞིའི་རྩ་ཁམས་རྣམས་དཔའ་བོ་ཉི་ཤུ་རྩ་བཞི་དང་། དཔའ་མོ་ཉི་ཤུ་རྩ་བཞིའི་ངོ་བོར་གསུངས་སོ། །དེ་དག་གི་དོན་རྣལ་འབྱོར་དབང་ཕྱུག་ལཱུ་ཧི་པས། སྒྲུབ་ཐབས་ཀྱི་ཐོག་མར་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལྷ་བཅུ་བདུན་དུ་བསྒོམ་ཚུལ་དང་། ལུས་དཀྱིལ་གྱི་ཐད་དུ་རྩ་ཁམས་རྣམས་ལྷར་བསྒོམས་ཚུལ་དང་། རྗེས་སྤྱོད་ཀྱི་སྐབས་སུ་ཁམས་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་བསྒོམ་ཚུལ་རྒྱུད་ཀྱི་ཚིག་ཇི་ལྟ་བ་བཞིན་གསུངས་སོ། །དེ་བཞིན་དུ་རྡོ་རྗེ་དྲིལ་བུ་པས་ཀྱང་ལུས་དཀྱིལ་བསྒོམ་ཚུལ་སྔ་མ་བཞིན་དང་། རྗེས་སྤྱོད་ཀྱི་སྐབས་སུ། ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་ཧེ་རུ་ཀ །རྣལ་འབྱོར་མ་ནི་མཚན་མོར་བཤད། །ཅེས་གསུངས་སོ། །སློབ་དཔོན་ནག་པོ་སྤྱོད་པའི་གཞུང་རྣམས་ལས་ཀྱང་། སྔར་གི་དེ་དག་གསལ་བར་གསུངས་ཏེ། ལུང་རྣམས་ནི་ཚིག་མང་དུ་དོགས་པས་མ་བྲིས་སོ། །དེ་ལྟར་ན་འཁོར་ལོ་བདེ་མཆོག་གི་རྒྱུད་གཞུང་རྣམས་ལས། ཕུང་ཁམས་སྐྱེ་མཆེད་ཀྱི་དངོས་པོ་ཐམས་ཅད་ལྷའི་ངོ་བོར་རང་བཞིན་གྱིས་རྣམ་པར་དག་ཀྱང་གློ་བུར་གྱི་དྲི་མ་སྦྱང་བའི་ཕྱིར་དུ་ལྷར་བསྒོམ་ཚུལ་གསུངས་པ་ཤེས་པར་བྱས་ནས། ངན་རྟོག་གིས་བསླད་པར་མི་བྱའོ། །ཀྱེ་རྡོ་རྗེའི་རྒྱུད་གཞུང་རྣམས་དང་ཡང་འགལ་ཏེ། རྩ་རྒྱུད་དང་པོའི་དགུ་པར། གཟུགས་ལ་སོགས་པའི་ཡུལ་རྣམས་དང་། །གཞན་ཡང་རྣལ་འབྱོར་པས་མཐོང་བ། །དངོས་པོ་དེ་ཀུན་དག་པ་སྟེ། །འདི་ལྟར་འགྲོ་བ་སངས་རྒྱས་འགྱུར། །ཀྱེ་བཅོམ་ལྡན་འདས་རྣམ་པར་མ་དག་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གཟུགས་ལ་སོགས་པའོ། །ཅིའི་སླད་དུ་ཞེ་ན། གཟུང་བ་དང་འཛིན་པའི་དངོས་པོའི་ཕྱིར་རོ། །རྡོ་རྗེ་སྙིང་པོས་གསོལ་པ། ཀྱེ་བཅོམ་ལྡན་འདས་གཟུང་བ་དང་འཛིན་པ་ཡང་གང་ལགས། བཅོམ་ལྡན་འདས་ཀྱི་བཀའ་སྩལ་པ། མིག་གིས་གཟུགས་ནི་གཟུང་བར་བྱ། །ཞེས་སོགས་སྐྱེ་མཆེད་བཅུ་གཉིས་ཀྱིས་གཟུང་འཛིན་གྱི་ཚུལ་གསུངས་ནས། མཇུག་ཏུ། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་གསུངས་སོ། །དེའི་དོན་གཟུགས་སོགས་ཀྱི་དངོས་པོ་སྔར་དག་པར་གསུངས་པ་ནི། རང་བཞིན་གྱིས་རྣམ་པར་དག་པ་ཡིན་ལ། མ་དག་པར་གསུངས་པ་ནི་གློ་བུར་གྱི་དྲི་མས་ཐ་མལ་པའི་གཟུང་འཛིན་དུ་བརྟགས་པས་མ་དག་པའི་དོན་ཡིན་ནོ། །དེ་ལ་དག་པར་གསུངས་པས་ནི་སྦྱང་ནུས་པར་བསྟན་ཅིང་། མ་དག་པར་གསུངས་པས་ནི་སྦྱང་དགོས་པར་བསྟན་ཏེ། སྦྱོང་བའི་ཐབས་ཀྱང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་དང་། ཞེ་སྡང་ཞེས་བཤད་རྡོ་རྗེ་མ། །ཞེས་སོགས་ཀྱི་ཕུང་པོ་ལྔ་དང་། ཉོན་མོངས་པ་ལྔ་ནང་གི་རྣལ་འབྱོར་མ་ལྔའི་ངོ་བོར་བསྒོམ་ཚུལ་དང་། ས་ནི་པུཀྐ་སཱི་ཞེས་བཤད། །ཅེས་སོགས་ཀྱིས་ཁམས་བཞི། ཕྱིའི་མཚམས་མ་བཞི་དང་། གཟུགས་ལ་གཽ་རཱིར་རྟག་ཏུ་བཤད། །ཅེས་སོགས་ཀྱིས་ཡུལ་དྲུག་ཕྱིའི་ལྷ་མོ་དྲུག་ཏུ་བསྒོམ་ཚུལ་གསལ་བར་གསུངས་ཏེ། དེ་ལྟ་བུའི་དག་པས་ཐ་མལ་གྱི་གཟུང་འཛིན་དུ་བརྟགས་པའི་དུག་མེད་པར་བྱས་ནས་བསྟེན་བྱ་གཟུགས་སོགས་འདི་དག་ལྷའི་ངོ་བོར་བསྟེན་ཞེས་པ་ནི་ཚིག་རྐང་གཉིས་ཀྱི་དོན་ཏོ། །དེ་ལྟ་བུའི་དག་པ་དེ་དག་ནི། དགོངས་འགྲེལ་གྱི་བསྟན་བཅོས་ཆེན་པོ། ཌོམྦི་ཧེ་རུ་ཀས་མཛད་པའི་བདག་མེད་མའི་སྒྲུབ་ཐབས་དང་། མི་ཐུབ་ཟླ་བས་མཛད་པའི་བདག་མེད་མའི་སྒྲུབ་ཐབས་དང་། དེས་མཛད་པའི་གུར་རིགས་བསྡུས་ཀྱི་སྒྲུབ་ཐབས་སོགས་གཞུང་ལུགས་ཚད་ལྡན་ཕལ་ཆེར་ལས་གསུངས་སོ། །གསང་བ་འདུས་པའི་རྒྱུད་གཞུང་དང་ཡང་འགལ་ཏེ། རྩ་བའི་རྒྱུད་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེའི་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བརྗོད། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །གཟུགས་སྒྲ་ལ་སོགས་སྔགས་པ་ཡིས། །ལྷ་ཉིད་དུ་ནི་རྟག་ཏུ་བསྒོམ། །ཞེས་གསུངས་ཤིང་དེ་ཉིད་ཀྱི་དོན་རྒྱས་པར་རྣམ་གཞག་རིམ་པ་ལས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ལ། རིགས་བརྒྱར་ཕྱེ་ནས་སྦྱོང་བྱེད་རིགས་ལྔ་ཡུམ་བཞི། བྱང་ཆུབ་སེམས་དཔའ་ལྔ། རྡོ་རྗེ་མ་ལྔ་སྟེ། བཅུ་དགུ་པོ་རེ་རེ་ལ་རིགས་ལྔ་ལྔར་ཕྱེ་བས་དགུ་བཅུ་གོ་ལྔ། ཡེ་ཤེས་ལྔ་སྟེ་རྣམ་པ་བརྒྱར་བསྒོམ་པའི་ཚུལ་དུ་གསུངས་སོ། །སྦྱང་གཞི་དེ་དག་ལྷ་དེའི་ངོ་བོར་བསྒོམ་པ་མ་ཡིན་ནོ་སྙམ་ན་དེ་ཡང་མི་འཐད་དེ། དེ་ཉིད་ལས། ཡང་འདི་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་ཐོག་མ་མེད་པ་ནས་ཐ་མལ་པའི་ང་རྒྱལ་གྱིས་གནས་པ་རྣམས་ནི། དེ་ལྟར་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་བསྒྲུབས་པའི་ངོ་བོ་ཉིད་དུ་བསྟན་ཏེ་ཞེས་གསུངས་ཤིང་དེའི་ཤེས་བྱེད་དུ་སྔར་གི་རྩ་རྒྱུད་ཀྱི་ལུང་དྲངས་པའོ། །དེ་བཞིན་དུ་སྒྲུབ་ཐབས་མདོར་བྱས་ལས་ཀྱང་དཀྱིལ་འཁོར་རྒྱལ་མཆོག་གི་སྐབས་སུ་སྦྱང་གཞི་སྦྱོང་བྱེད་སྦྱང་ཚུལ་རྒྱས་པར་གསུངས་ཤིང་། ལུས་དཀྱིལ་གྱི་སྐབས་སུ། རྣམ་པར་སྣང་མཛད་ཀྱི་ས་བོན་ནི། ཁ་དོག་དཀར་པོ་ཡི་གེ་ཨོྃ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་དགོད། །ཅེས་སོགས་རྒྱས་པར་གསུངས་སོ། །དེ་བཞིན་དུ་རྣལ་འབྱོར་ཆེན་པོའི་རྒྱུད་གཞུང་མཐའ་དག་ལས། ཕུང་ཁམས་སྐྱེ་མཆེད་ཐ་མལ་དུ་འཛིན་པའི་གཞི་ཐམས་ཅད་ལྷའི་ངོ་བོར་བསྒོམས་པས་ལྷར་གསལ་བར་འཆར་བའི་ཚུལ་མཚུངས་པར་གསུངས་ཤིང་། དེའི་སྒྲུབ་བྱེད་ཀུན་རྫོབ་རང་བཞིན་རྣམ་དག་གི་ལྷ་ཡིན་པར་གསུངས་པ་འདི་ལས་བཟློག་སྟེ་སྨྲ་བར་མི་བྱའོ། །གཉིས་པ་རྒྱུད་ཀྱི་དགོངས་པ་ཕྱིན་ཅི་མ་ལོག་པར་བཤད་པ་ལ་གསུམ་སྟེ། སྦྱང་གཞི་དང་སྦྱོང་བྱེད་ཀྱི་དོན་བཤད་པ། དེ་ཉམས་ལེན་གྱི་རིམ་པ་ལ་ཇི་ལྟར་སྦྱར་བའི་ཚུལ། ཡིད་ཆེས་བསྐྱེད་པའི་ཕྱིར་འཁྲུལ་ཟད་ཀྱི་ལུང་ཁུངས་བསྟན་པའོ། །དང་པོ་ནི། སྦྱང་གཞི་དང་སྦྱོང་བྱེད་ཀྱི་དོན། རྩ་རྒྱུད་ལེའུ་དང་པོ་ལས། དངོས་པོ་ཉིད་ཀྱིས་རྣམ་གྲོལ་ཞིང་། །དངོས་པོའི་འཆིང་བས་འཆིང་བར་འགྱུར། །དེ་ཡོངས་ཤེས་པས་གྲོལ་བ་ཡིན། །དངོས་པོ་མེད་པའང་ཡོངས་ཤེས་པས། །དངོས་པོ་བསྒོམ་གྱུར་ཤེས་རབ་ཅན། །ཞེས་དང་། ལེའུ་དགུ་པར། ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །རང་བཞིན་གྱིས་ནི་རྣམ་པར་དག །ཉོན་མོངས་ཤེས་བྱའི་སྒྲིབ་སྦྱང་བྱ། །ཀྱེ་བཅོམ་ལྡན་འདས་རྣམ་པར་མ་དག་པ་གང་ལགས། ཞེས་པ་ནས། དག་པས་དུག་མེད་བྱས་ནས་ནི། །བསྟེན་བྱ་འདི་དག་བསྟེན་པ་ཉིད། །ཅེས་པའི་བར་སྔར་དྲངས་པ་དང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཕུང་ཁམས་སྐྱེ་མཆེད་ལྷ་མོ་བཅོ་ལྔའི་ངོ་བོར་གསུངས་པའི་གཞུང་རྣམས་དང་། ཞེ་སྡང་ལ་སོགས་རྣམ་སྦྱོང་པ། །བསྐྱེད་པའི་རིམ་པའི་ཕྱོགས་ལས་ནི། །འདིས་ནི་ཕུང་པོ་སྦྱང་བར་བྱ། །ཞེས་དང་། ཕྱི་མའི་གཉིས་པར། དེ་བཞིན་དངོས་པོའི་རྣམ་རྟོག་ཀྱང་། །རྣམ་པར་ངེས་པས་སྦྱང་བར་བྱ། །ཞེས་དང་། རྡོ་རྗེ་གུར་ལས། ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །རང་བཞིན་གནས་སྐབས་བསྒོམས་པ་ལས། །བསྒོམ་པ་མ་ཡིན་མི་བསྒོམ་མིན། །བྱང་ཆུབ་སེམས་དཔའ་རྣམས་ཀྱི་རྟོག་པ་དེ་བཞིན་ཏེ། འོན་ཀྱང་མི་གཙང་བའི་ཚད་མཉམ་པར་སྦྱོང་བའི་ཕྱིར་དེ་བཞིན་གཤེགས་པའི་སྐུ་གཟུགས་རབ་ཏུ་བསྒོམ་པར་བྱའོ། །ཞེས་དང་། གལ་ཏེ་འགལ་བ་ཡོད་པ་མ་ཡིན་ཡང་། །དེ་ཚེ་རྒྱལ་བའི་དངོས་པོས་སྦྱང་བ་ཡོད། །ཀུན་རྫོབ་གཟུགས་སུ་རྣམ་པར་གནས་ནས་ནི། །འཁོར་ལོའི་གཟུགས་ཀྱི་ཆོས་ཙམ་རྣམ་པར་བརྟགས། །ཞེས་དང་། གསང་འདུས་རྩ་རྒྱུད་ལས། མདོར་ན་ཕུང་པོ་ལྔ་རྣམས་ནི། །ཞེས་སྔར་དྲངས་པ་དང་། སྒྲུབ་ཐབས་མདོར་བྱས་ལས། རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་མང་ལ། །བློ་དང་ལྡན་པས་ལེགས་བལྟས་ནས། །རྣལ་འབྱོར་རྒྱུད་ཀྱིས་སྦྱང་བར་བྱ། །ཞེས་དང་། འདི་དག་སྐྱེ་མཆེད་རྣམ་སྦྱོང་ཞིང་། །ལྷ་ཡི་མིག་སོགས་སྩོལ་བའོ། །ཞེས་པ་རྣམས་ཀྱིས་བསྟན་ཏེ། ཞིབ་ཏུ་ཕྱེ་ན་རྒྱུད་དང་། རྒྱ་གར་བའི་གཞུང་ཚད་ལྡན་རྣམས་ལས་འདི་ཁོ་ན་བཞིན་དུ་བཤད་དོ། །འདི་དག་གི་དོན་ལ་སྦྱང་གཞི། སྦྱང་བྱ། སྦྱོང་བྱེད། སྦྱོང་ཚུལ། སྦྱངས་འབྲས་ངོས་གཟུང་བ་དང་ལྔ་ལས། དང་པོ་ནི། ཐ་མལ་པའི་བློ་ལ་ཕུང་པོ་དང་། ཁམས་དང་། སྐྱེ་མཆེད་དུ་སྣང་བ་དང་། གཟུང་བ་དང་འཛིན་པར་སྣང་བའི་ཀུན་རྫོབ་ཀྱི་བདེན་པས་བསྡུས་པའི་ཆོས་མཐའ་དག་སྟེ། ལྷའི་ངོ་བོར་རང་བཞིན་གྱིས་རྣམ་པར་དག་པས་ལྷར་འགྱུར་བའི་གཞི་ཡང་ཡིན། ཐ་མལ་གྱི་རྣམ་རྟོག་གིས་ཐ་མལ་དུ་གཟུང་བས་སྦྱང་དགོས་པའི་གཞི་ཡང་ཡིན་པའི་ཕྱིར་རོ། །འདི་ནི་སྔར་གྱི་ལུང་རྣམས་ཀྱི་དངོས་པོ་ཉིད་ཀྱིས་ཞེས་དང་། ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །ཞེས་དང་། བསྟེན་བྱ་འདི་དག་ཅེས་དང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཀྱིས་ཕུང་ཁམས་སྐྱེ་མཆེད་སྟོན་པའི་ཚིག་རྣམས་དང་། ཞེ་སྡང་ལ་སོགས་ཞེས་དང་། ཕུང་པོ་ཞེས་དང་། གུར་ལས། ཆོས་ཙམ་ཞེས་དང་། གསང་འདུས་ལས། ཕུང་པོ་ལྔ་རྣམས་ནི་ཞེས་སོགས་ཀྱིས་བསྟན་ཏོ། །འདི་དག་ཀྱང་ཀུན་རྫོབ་ཏུ་ཡིན་གྱི། དམ་པའི་དོན་དུ་སྦྱང་གཞི་མེད་དེ། མི་ཐུབ་ཟླ་བས་ཡན་ལག་དྲུག་པར། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཚིག་རྐང་དྲུག་གསུངས་ནས། མཇུག་ཏུ། དམ་པའི་དོན་དུ་ཕུང་པོ་མེད། །ཅེས་གསུངས་པས་སོ། །གཉིས་པ་ནི་སྣང་བ་འདི་དག་ལ་བདེན་པར་འཛིན་པའམ། བདེན་འཛིན་གྱི་སྒྲོ་འདོགས་ཆོད་ནས་བརྟགས་པ་ཙམ་དུ་འཛིན་པ་གང་ཡིན་ཀྱང་རུང་སྟེ། ལྷའི་ངོ་བོར་མ་ཤེས་པར་འདི་ནི་གཟུགས་སོ། །འདི་ནི་ཚོར་བའོ། །ཞེས་སོགས་སྣང་བ་རང་དགར་འཛིན་པའི་རྟོག་པ་ཐམས་ཅད་དེ། འདི་ནི་འཁོར་བར་འཆིང་བའི་རྒྱུ་ཡིན་པས་འཆིང་བ་ཞེས་དང་། ཡུལ་གྱི་སྤུ་རིས་ཕྱེ་ནས་མངོན་པར་ཞེན་པས་མཚན་རྟོག་ཅེས་དང་། ཐུན་མོང་གི་སྐབས་སུ་བདེན་འཛིན་ལ་ཉོན་སྒྲིབ་དང་། འདི་ལ་ཤེས་སྒྲིབ་ཏུ་འཇོག་པས་ཤེས་སྒྲིབ་ཅེས་དང་། གང་ཞིག་མྱ་ངན་འདས་པ་འཆི་བར་བྱེད་པས་དུག་ཅེས་དང་། དངོས་པོ་ཙམ་ལ་རྣམ་པར་རྟོག་པས་དངོས་པོའི་རྣམ་རྟོག་ཅེས་དང་། ཐ་མལ་དུ་འཛིན་པས་ཕལ་པའི་གནས་སྐབས་ཞེས་དང་། མི་གཙང་བའི་ཚད་ཅེས་པའི་ཐ་སྙད་དུ་མས་བསྟན་པའོ། །འདི་དག་ཀྱང་སྔར་གི་ལུང་རྣམས་ཀྱི་དངོས་པོའི་འཆིང་བ་ཞེས་སོགས་ཀྱིས་བསྟན་ཏེ་གོ་སླའོ། །འོ་ན་རྣམ་རྟོག་དེ་ཉིད་སྦྱང་གཞི་མ་ཡིན་ན། ཕུང་ཁམས་སྐྱེ་མཆེད་ཀྱི་ཆོས་སུ་འདོད་པ་དང་འགལ་ཞིང་། ཡིན་ན་སྦྱང་བྱར་བཤད་པ་དང་འགལ་ལོ་སྙམ་ན། གཞི་གཞན་གྱི་སྟེང་དུ་རྣམ་རྟོག་དེ་ཉིད་སྦྱང་བྱ་ཡིན་ཀྱང་། དེ་ཉིད་ལ་ཐ་མལ་དུ་རྣམ་པར་རྟོག་པའི་ཚེ། ཡུལ་གྱི་རྣམ་རྟོག་སྦྱང་གཞི་དང་། ཡུལ་ཅན་གྱི་རྣམ་རྟོག་སྦྱང་བྱར་འདོད་པས་མི་འགལ་ལོ། །གསུམ་པ་ནི་རྣམ་ཐར་སྒོ་གསུམ་དང་། བྱང་ཕྱོགས་སོ་བདུན་དང་། ཡེ་ཤེས་ལྔ་ལ་སོགས་པ་ཆོས་སྐུའི་ཡོན་ཏན་རྣམས་དང་། རིགས་ལྔ་ཡུམ་བཞི་སོགས་གཟུགས་སྐུ་གདན་གསུམ་ཚང་བའི་ལྷ་ཚོགས་རྣམས་ནི་སྦྱོང་བྱེད་ཡིན་ཏེ། སྔར་གྱི་ལུང་རྣམས་ཀྱི་དངོས་པོ་བསྒོམ་འགྱུར་ཞེས་པའི་དངོས་པོ་དང་། དག་པས་ཞེས་དང་། རྡོ་རྗེ་མ་ཡིན་ཏེ་ཞེས་སོགས་ལྷ་སྟོན་པའི་ཚིག་རྣམས་དང་། གུར་ལས། དེ་བཞིན་གཤེགས་པའི་སྐུ་གཟུགས་ཞེས་དང་། རྒྱལ་བའི་དངོས་པོས་ཞེས་དང་། གསང་འདུས་ལས། སངས་རྒྱས་ལྔར་ནི་རབ་ཏུ་བསྒྲགས། །ཞེས་སོགས་ཀྱིས་བསྟན་ནོ། །བཞི་པ་ནི་རྣལ་འབྱོར་པས་སྦྱང་གཞི་ཕུང་ཁམས་སྐྱེ་མཆེད་ཀྱི་ཆོས་ཐམས་ཅད་ཐ་མལ་པ་མ་ཡིན་པར་རྣམ་ཐར་སྒོ་གསུམ་མམ། བྱང་ཕྱོགས་སོ་བདུན་ནམ། ཡེ་ཤེས་ལྔའམ། རིགས་ལྔ་ཡུམ་བཞི་ལ་སོགས་པའི་ངོ་བོར་བསྒོམ་པ་སྟེ། འདི་ལ་མཉམ་གཞག་གི་རྣལ་འབྱོར་གྱིས་སྦྱང་ཚུལ་དང་། རྗེས་སྤྱོད་ཀྱི་རྣལ་འབྱོར་གྱིས་སྦྱང་ཚུལ་གཉིས་ལས། དང་པོ་ནི། ཡེ་ཤེས་ཚོགས་བསག་གིས་སྣང་བའི་དངོས་པོ་ཐམས་ཅད་སྟོང་ཉིད་དུ་སྦྱངས་པའི་སྟོང་ཉིད་དང་། སེམས་གསལ་བ་དང་ཐ་མི་དད་པའི་གསལ་སྟོང་ཟུང་འཇུག་ལ་མཉམ་པར་གཞག་ནས། དེ་ལས་ལངས་པའི་ཚེ་ཀུན་རྫོབ་ཐ་མལ་པའི་སྣང་བ་འཆར་དུ་མི་འཇུག་པར། རྟེན་དང་བརྟེན་པར་བཅས་པའི་འཁོར་ལོ་བསྒོམས་ནས་དེ་ཀུན་རྫོབ་ཀྱི་སྣང་བ་དང་དབྱེར་མེད་དུ་བསྒོམས་པའོ། །གཉིས་པ་ནི། མཉམ་གཞག་ལས་ལངས་ནས་རྗེས་སྤྱོད་ཀྱི་ཚེ་ཐོག་མ་མེད་པའི་བག་ཆགས་ཀྱི་དབང་གིས་སྣང་བའི་དངོས་པོ་མཐོང་ཐོས་ཐམས་ཅད་ཐ་མལ་དུ་འཛིན་པ་རང་ཤུགས་ཀྱིས་སྐྱེ་ལ། དེའི་ཚེ་དྲན་པའི་རྩིས་ཟིན་པར་བྱས་ནས་ཐ་མལ་གྱི་རྣམ་རྟོག་བཀག་སྟེ། འདི་ནི་ལྷའོ་སྙམ་དུ་བསྒོམས་པས་སྔར་གི་མཉམ་གཞག་གི་རྟོགས་པ་བོགས་དབྱུང་བའོ། །འདིའི་གནད་ཀྱང་མཉམ་རྗེས་གཉིས་པོ་སྦྱང་གཞི་གཅིག་ཡིན་པ་དང་། སྦྱོང་ཚུལ་ཐ་མལ་གྱི་རྣམ་རྟོག་སྤོང་བར་གཅིག་པའི་ཕྱིར་རོ། །འདི་དག་ཀྱང་སྔར་གྱི་ལུང་རྣམས་ཀྱི་དེ་ཡོངས་ཤེས་པས་ཞེས་དང་། དངོས་པོ་མེད་པའང་ཡོངས་ཤེས་པས། །དངོས་པོར་བསྒོམ་འགྱུར་ཞེས་དང་། དུག་མེད་བྱས་ནས་ནི། བསྟེན་པ་ཉིད་ཅེས་པའི་ཚིག་སྦྲེལ་བ་དང་། རྣམ་པར་ངེས་པས་སྦྱང་བར་བྱ། །ཞེས་དང་། གུར་ལས། བསྒོམ་པ་ཡང་དག་རབ་ཏུ་གྲགས། །ཞེས་དང་། དེ་བཞིན་གཤེགས་པའི་སྐུ་གཟུགས་བསྒོམ་པར་བྱའོ་ཞེས་དང་། འཁོར་ལོའི་གཟུགས་ཀྱིས་ཆོས་ཙམ་རྣམ་པར་བརྟགས་ཞེས་པའི་ཚིག་སྦྲེལ་བ་རྣམས་ཀྱིས་བསྟན་ནོ། །ལྔ་པ་ནི་ཕུང་ཁམས་སྐྱེ་མཆེད་ཀྱི་ཆོས་འདི་དག ལྷའི་ངོ་བོར་བསྒོམས་པས་གློ་བུར་གྱི་དྲི་མ་དག་ནས་ཆོས་སྐུའམ། གཟུགས་སྐུའི་ངོ་བོར་གྱུར་པ་སྟེ། རྟག་ཏུ་འདི་དག་རྣམ་དག་པས། །དེ་ཉིད་རྣལ་འབྱོར་པས་འགྲུབ་འགྱུར། །ཞེས་གསུངས་པས་སོ། །འདི་དག་ཀྱང་གཞི་གཅིག་གི་སྟེང་དུ་གནད་མདོར་བསྡུས་ན། གཟུགས་ཕུང་ནི་སྦྱང་གཞི། རྣམ་པར་སྣང་མཛད་དམ། རྡོ་རྗེ་མ་ནི་སྦྱོང་བྱེད། གཟུགས་ཕུང་ལྷར་མ་ཤེས་པར། གཟུགས་ཕུང་ཙམ་དུ་འཛིན་པ་ནི་སྦྱང་བྱ། གཟུགས་ཕུང་རྣམ་སྣང་ངམ། རྡོ་རྗེ་མའི་ངོ་བོར་རང་བཞིན་གྱིས་རྣམ་པར་དག་པར་ཤེས་ནས། མཉམ་བཞག་དང་། རྗེས་ཐོབ་ཀྱིས་ལྷར་བསྒོམ་པ་ནི་སྦྱོང་ཚུལ་དེ་ལྟར་བསྒོམས་པས་གཟུགས་ཕུང་རྣམ་སྣང་ངམ། རྡོ་རྗེ་མའི་ངོ་བོར་གནས་གྱུར་པ་ནི་སྦྱངས་འབྲས་ཏེ། ཐམས་ཅད་ལ་འདི་བཞིན་དུ་སྦྱར་བར་བྱའོ། །ཡེ་ཤེས་ལྔར་བསྒོམ་ཚུལ་ལ་རྣམ་པ་གཟུགས་ཀྱི་རྣམ་པར་བསྒོམ་དགོས་པས། ཟླ་བ་ལ་སོགས་པ་མངོན་བྱང་ལྔ་པོ་རེ་རེའི་སྟེང་དུ་སྔ་མ་བཞིན་སྦྱར་བར་བྱའོ། །འཁོར་འདས་དབྱེར་མེད་ཀྱི་འགྲེལ་པར་སྦྱང་གཞི་ནི་འཁོར་བའི་ཆོས། སྦྱོང་བྱེད་ནི་འབྲས་བུ་སྟེ་མྱ་ངན་ལས་འདས་པའི་ཆོས། དེ་སྦྱར་བ་ནི། འཁོར་འདས་དབྱེར་མེད་དུ་བསྒོམ་པ་སྟེ་བསྐྱེད་རྫོགས་ཀྱི་རྣལ་འབྱོར་ཉིད་ལ་བཤད་པ་ཡང་འདི་དང་གནད་གཅིག་པར་ཤེས་པར་བྱའོ། །གཉིས་པ་ལ་བདུན་ཏེ། སྔོན་འགྲོས་ལས་ཉོན་སྦྱོང་ཚུལ། དངོས་གཞི་རྟེན་གྱིས་སྣོད་སྦྱོང་ཚུལ། བསྐྱེད་ཆོག་གིས་སྐྱེ་གནས་བཞི་སྦྱོང་ཚུལ། ལྷ་བསྡུ་བས་འཆི་སྲིད་སྦྱོང་ཚུལ། ལྷའི་རྣམ་པས་དུག་གསུམ་སྦྱོང་ཚུལ། ཁ་དོག་དང་དབྱིབས་ཀྱིས་དུག་ལྔ་སྦྱོང་ཚུལ། ཕྱག་ཞབས་ཀྱི་རྣམ་འགྱུར་གྱིས་མཐའ་གཉིས་སྦྱོང་ཚུལ་ལོ། །དང་པོ་ནི་ལྗོན་ཤིང་ལས་སྔོན་འགྲོ་ཚོགས་གཉིས་བསག་པས་ཚེ་སྔ་མའི་ལས་དང་ཉོན་མོངས་པ་སྦྱང་བར་གསུངས་ལ། འབྲས་བུའི་རྣམ་པ་ལམ་བྱེད་བསྐལ་པ་གྲངས་མེད་གསུམ་དུ་ཚོགས་བསག་པའི་དོད་ཡིན་པར་གསུངས་སོ། །བོད་ཕལ་ཆེར་ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱོར་བར་འདོད་ཀྱང་། རྗེ་བཙུན་གོང་མའི་གསུང་རབ་ལས། དེའི་གསལ་ཁ་མི་སྣང་ཞིང་སྦྱང་གཞིའི་གཙོ་བོ་སྐྱེ་འཆི་བར་དོ་གསུམ་ལ་བྱེད་པའི་ཚེ་ན་ཡང་ལས་འཕེན་གཅིག་གིས་འཕངས་པའི་ཆོས་གསུམ་དགོས་ཤིང་། ཚེ་སྔ་མའི་འཆི་སྲིད་ནི་ཚེ་འདིའི་བར་དོ་སྐྱེ་སྲིད་གཉིས་དང་། ལས་འཕེན་གཅིག་གིས་འཕངས་པ་མ་ཡིན་པས་སྦྱང་གཞི་ལ་བརྟགས་ན་ཡང་མི་འཐད་དོ། །སྦྱོང་བྱེད་ལ་བརྟགས་ན་ཡང་མི་འཐད་དེ་སྦྱང་གཞིའི་གཙོ་བོ་ཆོས་གསུམ་པོ་དེ་སྦྱོང་བྱེད་ཀྱི་གཙོ་བོ་མངོན་རྟོགས་ཀྱི་དངོས་གཞིས་སྦྱང་དགོས་པའི་ཕྱིར་རོ། །ཡེ་ཤེས་ཞབས་ལུགས་སོགས་རྒྱ་གར་བ་ཁ་ཅིག ཡེ་ཤེས་ཚོགས་བསག་གི་དེ་མ་ཐག་ཏུ་བར་སྲིད་མཚོན་བྱེད་ཀྱི་ཡི་གེ་ལྔ་ལ་སོགས་པ་ལངས་པར་གསུངས་པ་ཡང་སྦྱང་གཞི་ཆོས་གསུམ་གྱི་ཐོག་མ་ངོས་འཛིན་པ་ཡིན་གྱི་ཆོས་གསུམ་གྱི་ནང་ཚན་གྱི་འཆི་སྲིད་སྦྱོང་བྱེད་སྔོན་དུ་སོང་ནས་བར་སྲིད་ལངས་པ་མ་ཡིན་ཏེ། ཆོས་གསུམ་གྱི་གོ་རིམ་དང་འགལ་བའི་ཕྱིར་རོ། །ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་བའི་འཁྲུལ་གཞི་འདིས་བྱས་ནས་བླ་མ་ཕྱི་མ་དག་ཀྱེ་རྡོར་གྱི་སྐབས་སུ་ཡེ་ཤེས་ཚོགས་བསག་གི་དེ་མ་ཐག་བར་སྲིད་མཚོན་བྱེད་ཀྱི་ཡིག་འབྲུ་ལྔ་ལངས་དགོས་པར་འདོད་པ་ནི། རྗེ་བླ་མས་རྒྱས་པར་བཀག་པ་སྔར་བརྗོད་ཟིན་ཏོ། །སྦྱང་གཞི་ནི་སྔར་བཤད་པ་ལྟར་ཡིན་ལ། དགོས་པ་གསུམ་པོ་ནི་རྗེ་ས་ཆེན་གྱིས་གསུངས་པ་གོང་དུ་བརྗོད་ཟིན་ཏོ། །གཉིས་པ་ནི་སྲུང་བའི་འཁོར་ལོ་ལྗོན་ཤིང་ལས་གསལ་ཁ་མི་སྣང་། རྒ་སྟོན་སྤྲིང་ཡིག་ཏུ་སྲོད་ལ་བདུད་བཏུལ་བ་མཚོན་ཞེས་གསུངས་པ་ནི། འབྲས་བུའི་རྣམ་པ་ལམ་བྱེད་ཡིན་ཅིང་སྦྱང་གཞི་མ་ཡིན་ནོ། །འདུས་པའི་བླ་མ་ཁ་ཅིག ཕྱིའི་ལྕགས་རི་སྦྱོང་བར་གསུངས་ཀྱང་། གཞལ་ཡས་ཁང་གིས་སྣོད་ཀྱི་འཇིག་རྟེན་སྦྱོང་ཚུལ་ཕྱིའི་རྒྱ་མཚོ་ཡན་ཆད་ལ་སྦྱར་བ་ཁོ་ན་ཡིན་ན། འདི་འཐད་དུ་ཆུག་ཀྱང་དེའི་ངེས་པ་མི་སྣང་ངོ་། །འོ་ན་ཅི་ལྟར་ཞེ་ན་བླ་ཆེན་འཕགས་པས། ལུས་ངག་ཡིད་གསུམ་གྱི་མི་མཐུན་ཕྱོགས་མཐའ་དག་སྦྱོང་བར་གསུངས་པ་འདི་ཉིད་ལེགས་པར་མཐོང་སྟེ། སྦྱང་གཞིའི་སྐབས་སུ་འཇིག་རྟེན་པ་རྣམས་གོ་ཆ་གྱོན་པ་དང་། སྨན་གཏོང་བ་ལ་སོགས་པས་ལུས་ཀྱི་བར་ཆད་བཟློག་པ་དང་། ངག་མནན་ཟློག་པ་སོགས་ངག་གི་བར་ཆད་བཟློག་པ་དང་། སྨྱོ་འབོགས་སེམས་འཁྲུལ་སོགས་སེམས་ཀྱི་བར་ཆད་བཟློག་པའི་ཐབས་ལ་རྩོལ་བ་བྱེད་པ་ཡོད་པས་དེ་སྦྱོང་བྱེད་དེ་དང་རྣམ་པ་འདྲ་བ་དགོས་པའི་ཕྱིར་རོ། །དེ་ནས་གཞིའི་ཡན་ལག་ཆོས་འབྱུང་གྲུ་གསུམ་གྱིས་ནི་སྐྱེ་གནས་བཞི་ཆར་གི་སྣོད་སྦྱོང་སྟེ། མངལ་སྐྱེས་ལ་མའི་བྷ་ག་དང་། སྒོང་སྐྱེས་ལ་སྒོ་ང་དང་། རྫུས་སྐྱེས་ལ་མེ་ཏོག་པདྨ་ལ་སོགས་པ་དང་། དྲོད་གཤེར་སྐྱེས་ལ་རང་གང་དུ་སྐྱེས་པའི་ས་གཞི་དང་། ནམ་མཁའ་རྣམས་ཀྱང་སྟོད་རྒྱས་ཤིང་སྨད་ཞུམ་པའི་རྣམ་པ་ཅན་དུ་ཡོད་པས་རྣམ་པ་མཐུན་པའི་ཕྱིར་རོ། །འབྲས་བུའི་རྣམ་པ་ལམ་བྱེད་ནི། རྗེ་བཙུན་རྩེ་མོས། སྐུ་གསུང་ཐུགས་སྙིང་པོའི་ཕྱིར་གྲུ་གསུམ་ཟུར་བཞི་པའོ། །ཞེས་གསུངས་ཤིང་། རྗེ་བཙུན་གྱིས་སངས་རྒྱས་པའི་རྣམ་ཐར་སྒོ་གསུམ་མཚོན་ལ། ས་དང་པོ་ལ་སོགས་པའི་ཡོན་ཏན་གོང་ནས་གོང་དུ་རྒྱས་པ་མཚོན་པས་སྟོད་འཕེལ་ཁ་ཆེ་བ། ཐབས་ཤེས་ཟུང་དུ་འཇུག་པས་ཕྱི་དཀར་ལ་ནང་དམར་བར་གསུངས་སོ། །དེ་ནས་རྒྱུའི་ཡན་ལག་ལས་ནས་བསྒོམ་པའི་འབྱུང་བཞི་ལུགས་བཟློག་དང་། རླུང་ནས་བསྒོམ་པའི་འབྱུང་བཞི་ལུགས་འབྱུང་གཉིས་ལས། དང་པོས་ནི་མངལ་གྱི་སྔོན་འགྲོ་སྦྱོང་སྟེ། རྩ་རྒྱུད་དང་པོའི་བཅུ་པར། རེག་པ་སྲ་བའི་བག་ཆགས་ཀྱིས། །ས་ནི་དེ་ལས་སྐྱེ་བར་འགྱུར། །བྱང་སེམས་གཤེར་བའི་རྣམ་པ་ཡིས། །ཆུ་ཡི་ཁམས་ནི་འབྱུང་བར་འགྱུར། །བསྐྱོད་པ་ལས་ནི་དྲོད་སྐྱེ་སྟེ། །འགྲོ་བ་རླུང་དུ་རབ་ཏུ་གྲགས། །ཞེས་གསུངས་པ་ལྟར་གྱི་གོ་རིམ་སྦྱོང་བས་སོ། །ཡང་ལུས་ཀྱི་དཀྱིལ་འཁོར་ལ་སྦྱར་ན། ལྟེ་བ་ས། སྙིང་ག་ཆུ། མགྲིན་པ་མེ། སྤྱི་བོར་རླུང་སྦྱོང་བའི་རིམ་པའི་དབང་དུ་བྱས་པའོ། །གཉིས་པས་ནི་མངལ་གྱི་དངོས་གཞི་སྦྱོང་སྟེ། ཕྱག་ཆེན་ཐིག་ལེ་ལས། རྣམ་ཤེས་ལས་ནི་སྐྱེས་པ་རླུང་། །དེ་ལས་མེ་ནི་སྐྱེ་བར་འགྱུར། །དེ་ལས་ཆུ་ནི་འབྱུང་བར་འགྱུར། །དེ་ལས་དབང་ཆེན་འབྱུང་བར་འགྱུར། །དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་གསུངས་པའི་རིམ་པས་སྦྱོང་བའོ། །དེས་ན་སྐབས་འདིར་བར་དོ་བསྲེ་བ་ཡང་མངལ་གྱི་དངོས་གཞིའི་གནས་སྐབས་སུ་བར་དོ་འཇུག་པས་དེ་སྦྱོང་ཞིང་། སྦྱོང་བྱེད་ལ་ཡང་གཟུགས་ཀྱི་རྣམ་པ་གཞལ་ཡས་ཁང་དུ་བསྒོམ་པ་ཡང་ངོ་བོ་རྣམ་པར་སྣང་མཛད་ལམ་དུ་བྱེད་པའི་གནད་ཀྱིས་སོ། །འབྱུང་བཞིའི་སྟེང་དུ་འཁོར་ལོ་བསྒོམ་པས་ནི། དེ་ལས་ཕུང་པོ་འབྱུང་བར་འགྱུར། །དེ་ལས་ཡེ་ཤེས་སྐྱེ་བར་འགྱུར། །བརྒྱ་རྩ་བརྒྱད་ཀྱི་སྦྱོར་བས་སོ། །ཞེས་པ་སྦྱོང་བར་མངོན་ནོ། །ཡང་འདི་ཉིད་ལུས་ལ་སྦྱར་ན། རྐང་མཐིལ་རླུང་། སུམ་མདོ་མེ། ལྟོ་བ་ཆུ། སྙིང་ག་ས་ཡིན་པའི་རིམ་པ་སྦྱོང་ཞིང་། ཕྱི་སྣོད་ཀྱི་འཇིག་རྟེན་ལ་སྦྱར་ན། རླུང་ནས་རིམ་པ་བཞིན་ཆགས་པ་སྦྱོང་ངོ་། །འདི་ལ་དུས་འཁོར་བ་དག་མེའི་དཀྱིལ་འཁོར་དངོས་སུ་ཡོད་པར་བཞེད་ཀྱང་རྒྱུད་སྡེ་གཞན་རྣམས་ལ་མངོན་པ་དང་སྒོ་བསྟུན་ནས་མེའི་དཀྱིལ་འཁོར་དངོས་སུ་མེད་ཀྱང་དཀྱིལ་འཁོར་གཞན་གསུམ་ལ་མེའི་རྡུལ་ཕྲ་རབ་ཡོད་པ་སྦྱང་གཞི་ཡིན་པ་གྲུབ་ཆེན་ཀླུའི་བྱང་ཆུབ་ཀྱི་གསུང་པ་དེ་ཉིད་བླང་བར་བྱའོ། །འདི་གཉིས་ཆར་ལ་ཡང་འབྲས་བུའི་རྣམ་པ་ལམ་བྱེད་ནི་ས་སོགས་འབྱུང་བ་བཞིས་ལྷ་མོ་བཞི་དང་། ཚད་མེད་བཞི་མཚོན། འཁོར་ལོས་ནི་རྣམ་པར་སྣང་མཛད་མཚོན་པའོ། །དེ་ནས་རྐྱེན་གྱི་ཡན་ལག་ལ་ལུགས་འབྱུང་ལ་བར་དོ་བསྲེ་བའི་སྦྱོང་ཚུལ་ནི་བཤད་ཟིན་ཅིང་། ལུགས་བཟློག་ལ་རང་གི་སེམས་སྣང་བསྲེ་བས་ནི། གཞིའི་སྐབས་སུ་སྣོད་ཀྱི་སྣང་བ་ཐམས་ཅད་རང་སེམས་ཡིན་པ་སྦྱོང་ཞིང་ལམ་གྱི་སྐབས་སུ་གཞལ་ཡས་ཁང་དུ་སྣང་བ་རང་སེམས་ཡིན་པ་མཚོན་ནོ། །དེ་ནས་གནས་ཐབས་ཀྱི་ཡན་ལག་གཞལ་ཡས་ཁང་གིས་ནི་ཕྱི་སྣོད་ཀྱི་འཇིག་རྟེན་སྦྱོང་སྟེ། སྤྱི་ཙམ་གྱི་དབང་དུ་བྱས་ན། མ་དག་པའི་སྣོད་ཀྱི་འཇིག་རྟེན་མཐའ་དག་དང་། དེ་ལས་བསྡུ་ན་མི་མཇེད་ཀྱི་འཇིག་རྟེན་གྱི་ཁམས་དང་། གླིང་བཞི་རི་རབ་དང་བཅས་པ་དང་། འཛམ་བུ་གླིང་ལ་སོགས་པ་རང་གང་དུ་གནས་པའི་གླིང་དང་། རང་གང་དུ་གནས་པའི་གནས་ཁང་སྟེ། མདོར་ན་མ་དག་པའི་བློ་ལ་རྟེན་དང་བརྟེན་པ་གཉིས་སུ་སྣང་བའི་རྟེན་མཐའ་དག་སྦྱོང་བའོ། །འབྲས་བུའི་རྣམ་པ་ལམ་བྱེད་ནི་སངས་རྒྱས་པའི་བྱང་ཕྱོགས་སོ་བདུན་མཚོན་པ་སྟེ། འདི་ལ་བླ་མ་གོང་མས་བདེ་དགྱེས་ཀྱི་སྐབས་སུ་རྒྱུད་རྡོ་རྗེ་རྩེ་མོ་ནས་གསུང་པ་གཙོ་བོར་མཛད་ལ་འདུས་པ་འཕགས་ལུགས་དང་། ཡེ་ཤེས་ཞབས་ལུགས་སོགས་རྣམས་ལས། རྒྱུད་སྡེ་གཞན་ལས་གསུངས་པའི་སྦྱོར་ཚུལ་མི་འདྲ་བ་དུ་མ་སྣང་ཡང་དོན་གྱི་གནད་གཅིག་པར་ཤེས་པར་བྱའོ། །དེ་ནི་ཆོས་སྐུའི་དབང་དུ་བྱས་ལ། གཟུགས་སྐུའི་དབང་དུ་བྱས་ན་འོག་མིན་གྱི་གཞལ་ཡས་ཁང་པའམ། རྡོ་རྗེའི་གདན་དུ་བྱིན་གྱིས་བརླབ་པའོ། །གསུམ་པ་ལ་གཉིས་ཏེ། མངོན་རྟོགས་ཡོངས་སུ་རྫོགས་པས་སྐྱེ་གནས་བཞི་སྦྱོང་བ་དང་། མངོན་བྱང་ལྔ་པོ་ཁོ་ནས་སྐྱེ་གནས་བཞི་སྦྱོང་བའོ། །དང་པོ་ནི། མངོན་བྱང་ལྔའི་ཉི་མ་ནི་དྲོད་དང་། ཟླ་བ་ནི་གཤེར་ཡིན་པས་དྲོད་གཤེར་སྐྱེས་སྦྱོང་། ཡང་ཉི་མ་ནི་མའི་ཁྲག་དང་། ཟླ་བ་ནི་ཕའི་ཁུ་བ་ཡིན་པས་མངལ་སྐྱེས་སྦྱོང་། གཉིས་ཀ་ལའང་མངོན་བྱང་གསུམ་པས་བར་དོ་སྦྱོང་ངོ་། །འཁོར་གྱི་ལྷ་མོ་མངལ་ནས་འབྱིན་པས་མངལ་སྐྱེས་སྦྱོང་། འབྲས་བུ་རྡོ་རྗེ་འཛིན་པ་ཐིག་ལེའི་གོང་བུ་ལས་བཞེངས་པ་དང་། རྒ་སྟོན་སྤྲིང་ཡིག་ལྟར་ན། རྒྱུ་རྡོ་རྗེ་འཛིན་པའང་རོ་གཅིག་ཏུ་འདྲེས་པའི་ཐིག་ལེས་སྒོང་སྐྱེས་སྦྱོང་། དེ་ལས་ཡིད་ཀྱི་ལུས་ཀྱི་ལྷར་གྱུར་པས་ནི་རྫུས་སྐྱེས་སྦྱོང་། སྐྱེ་མཆེད་ཀྱི་ལྷ་སྐད་ཅིག་མའམ། ས་བོན་ཙམ་ལས་བསྐྱེད་པས་རྫུས་སྐྱེས་སྦྱོང་ངོ་། །ལྗོན་ཤིང་ལས། འདི་ཙམ་ཞིག་ལས་གཞན་སྦྱར་བ་མི་སྣང་ཡང་། འབྲས་བུའི་རྣམ་པ་ལམ་བྱེད་ཀྱི་སྐབས་དང་རུང་མཐུན་སྦྱར་ན། སྣོད་བཅུད་སྦྱང་བས་ནི་འཕྲལ་གྱི་ལུས་ངག་གི་བྱ་བས་གཞན་ལ་ཕན་པ་སྒྲུབ་པ་སྦྱོང་། ཡེ་ཤེས་ཀྱི་འཁོར་ལོ་དགུག་གཞུག་གིས་ནི་ལུས་སེམས་ཡོངས་སུ་རྫོགས་པ་སྦྱོང་། དབང་བསྐུར་བས་ནི་རྒྱལ་པོའི་རིགས་ཡིན་ན་རྒྱལ་སར་དབང་བསྐུར་བའམ། ཕལ་པ་ལའང་རང་རང་གི་གཞི་འཛིན་པ་སྦྱོང་། དེ་ནས་སྔགས་ཀྱི་བཟླས་པ་ལ་སོགས་པས་ནི་འཕྲལ་གྱི་འཇིག་རྟེན་གྱི་བྱ་བ་སྣ་ཚོགས་གྲུབ་པ་སྦྱོང་ངོ་། །གཉིས་པ་ནི་སྐྱེ་གནས་དང་པོ་གཉིས་ཀྱི་སྦྱོང་ཚུལ་ནི་བཤད་ཟིན་ལ། སྒོང་སྐྱེས་ལ་ཉི་མ་ནི་མ་དང་། ཟླ་བ་ནི་ཕ་མཚོན་ལ། རྫུས་སྐྱེས་ལ་ཉི་མ་ནི་སྟོང་པ་དང་། ཟླ་བ་ནི་གསལ་བ་སྟེ། ཐམས་ཅད་ལ་ཡང་མངོན་བྱང་གསུམ་པ་ནི་བར་དོའི་སྦྱོང་བྱེད་དོ། །བཞི་པ་ནི་སྤྱིར་བསྐྱེད་རིམ་གྱིས་སྐྱེ་བ་དང་། རྫོགས་རིམ་གྱིས་འཆི་བ་སྦྱོང་བ་ཡིན་ན་བསྐྱེད་རྫོགས་རེ་རེས་ཀྱང་སྐྱེ་འཆི་བར་དོ་དང་། སྦྱང་གཞི་མཐའ་དག་སྦྱོང་བ་ཡིན་པས་འདིར་བསྐྱེད་རིམ་གྱིས་འཆི་བ་སྦྱོང་བའི་ཚུལ་ནི་ལྗོན་ཤིང་ལས། དཀྱིལ་འཁོར་བསྡུ་བས་ནི་སྣོད་བཅུད་འཇིག་པ་སྦྱོང་ངོ་ཞེས་གསུངས་པའི་སྣོད་འཇིག་པ་ནི་མེ་ཆུ་རླུང་གསུམ་གྱིས་འཇིག་པ་ཡིན་ལ། དེ་ནི་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ་བ་ནས་གཞལ་ཡས་ཁང་ལྷ་མོ་བརྒྱད་ལ་བསྡུ་བའི་བར་གྱིས་སྦྱོང་། བཅུད་འཇིག་པ་ནི་སེམས་ཅན་འཆི་བ་ཡིན་ལ། དེ་ནི་ལྷ་མོ་བརྒྱད་ཞལ་བརྒྱད་ལ་བསྡུ་བ་ནས། ནཱ་དའང་མི་དམིགས་ཏེ་སྟོང་ཉིད་དུ་འགྱུར་བས་སྦྱོང་ངོ་། །འདི་ལ་ཡན་ལག་དྲུག་པར་གཙོ་བོ་ཡབ་ཡུམ་ནི་ཉལ་བའི་རྣལ་འབྱོར་གྱི་བར་དུ་བསྡུ་བ་མེད་དོ། །ཞེས་གསུངས་པ་ལྟར་ན་ཉལ་བའི་རྣལ་འབྱོར་དེ་ཉིད་ཀྱིས་སྦྱོང་ངོ་། །དེས་ན་མངོན་རྟོགས་ཀྱི་དངོས་གཞིས་ལས་འཕེན་གཅིག་གིས་འཕངས་པའི་སྐྱེ་འཆི་བར་དོ་གསུམ་སྦྱོང་བའི་ཚེ་ཐོག་མར་ཕ་མའི་ཁུ་ཁྲག་དང་། བར་དོ་རོ་གཅིག་ཏུ་འདྲེས་པ་དེ་ནས་མངལ་གྱི་གནས་སྐབས་ལྔ་རྫོགས་ནས་ཕྱིར་བཙས་པ། དེ་ནས་དེ་ཉིད་འཆི་བ་གསུམ་རིམ་ཅན་དུ་འབྱུང་བས་སྦྱོང་བྱེད་ལ་ཡང་གསུམ་པོ་རིམ་ཅན་དུ་དགོས་པ་ནི། རྗེ་བཙུན་གོང་མ་འཁྲུལ་པའི་དྲི་མ་ཟད་པ་དག་གི་གསུང་རབ་ལས་འབྱུང་གི་གཞན་ལ་མི་སྣང་ངོ་། །མངོན་བྱང་ལྔ་ནས་འདིའི་བར་གྱི་འབྲས་བུའི་རྣམ་པ་ལམ་བྱེད་ནི། རྗེ་བཙུན་གྱིས་མངོན་པར་བྱང་ཆུབ་པ་ལྔའི་རིམ་པས་ལྷའི་རྣམ་པ་གྲུབ་པ་ནི། འོག་མིན་ནམ་རྡོ་རྗེ་གདན་གྱི་སྟེང་དུ་ཐོ་རངས་སངས་རྒྱས་པ་དང་འདྲ། ཁམས་གསུམ་ཆོས་ཀྱི་རྒྱལ་པོར་མངོན་པར་དབང་བསྐུར་ནས་འོད་ཟེར་གྱི་འཕྲོ་འདུས་སེམས་ཅན་གྱི་དོན་བྱེད་པ་དང་བཟླས་པ་ལ་སོགས་པ་ཆོས་ཀྱི་འཁོར་ལོ་བསྐོར་བ་དང་མཐུན། བསྐྱེད་པའི་རིམ་པ་བསྡུས་ཏེ། སྟོང་པ་ཉིད་དུ་བསྒོམས་པས་ཡོངས་སུ་མྱ་ངན་ལས་འདས་པ་དང་མཐུན་ཏེ། དེ་ལྟར་མཛད་པ་བཅུ་གཉིས་དང་མཐུན་པས་སངས་རྒྱས་ཀྱི་ཕྲིན་ལས་མཛད་ནས་སླར་ཡང་མཛད་པ་རྒྱུན་མི་འཆད་པ་དང་འདྲ་བར་སྟོང་པ་ཉིད་ཀྱི་ངང་ལས་ལྷའི་སྐུར་ལངས་ནས་སྤྱོད་ལམ་གྱི་རྣལ་འབྱོར་གྱི་ཚུལ་གྱིས་སེམས་ཅན་གྱི་དོན་བྱེད་པ་ཡིན་ནོ་ཞེས་གསུངས་སོ། །ལྔ་པ་ལྷའི་རྣམ་པས་དུག་གསུམ་སྦྱོང་ཚུལ་ནི་ཤིན་ཏུ་ཟབ་པའི་བསྐྱེད་པའི་རིམ་པ་ཁྲོ་ཆགས་ཀྱི་རྣམ་པ་སྟེ་ཁྲོ་བོའི་སྐུར་བཞུགས་པས་ཞེ་སྡང་སྦྱོང་། བཙུན་མོའི་འཁོར་གི་དབུས་ན་བཞུགས་པས་འདོད་ཆགས་སྦྱོང་། མཚན་དང་དཔེ་བྱད་ཀྱིས་བརྒྱན་པའི་གཟུགས་ཀྱི་སྐུར་བསྒོམས་པས་གཏི་མུག་ཞི་བར་བྱེད་པ་ཡིན་ཏེ། རྡོ་རྗེ་གུར་ལས། འདོད་ཆགས་ཞེ་སྡང་གཏི་མུག་དང་། །ང་རྒྱལ་སེར་སྣའི་སྐྱེ་བོ་རྣམས། །བསྡུ་ཕྱིར་རང་གི་འཁོར་ལོ་ལ། །རྡོ་རྗེ་གཟུགས་ནི་དུ་མ་འཛིན། །ཞེས་པ་དང་། །ཞེ་སྡང་འདུལ་བའི་དབང་དུ་བྱས་ནས། ཤིན་ཏུ་གདུག་པ་དྲག་པོ་ལ། །ཞི་བ་ཉེ་བར་མི་སྦྱར་ཏེ། །འདི་མཁྱེན་རྡོ་རྗེ་ཅན་གྱིས་ནི། །བདག་ཉིད་ཀྱེ་ཡི་རྡོ་རྗེར་འགྱུར། །ཞེས་པ་དང་། གཏི་མུག་འདུལ་བའི་དབང་དུ་བྱས་ནས། ཤིན་ཏུ་སྟོང་པར་ཞེན་རྣམས་ཀྱིས། །ཡོད་མིན་བརྟུལ་ཞུགས་འཛིན་རྣམས་ཀྱི། །དོན་དུ་སངས་རྒྱས་གཏི་མུག་སྦྱོང་། །རྡོ་རྗེ་རྫོགས་པའི་སངས་རྒྱས་འགྱུར། །ཞེས་པ་དང་། འདོད་ཆགས་འདུལ་བའི་དབང་དུ་བྱས་ཏེ། །བྱང་ཆུབ་ཆགས་བྲལ་ལས་སྐྱེས་སྤངས། །སེམས་ཅན་གང་ཞིག་བདེ་བྱེད་པ། །ཆགས་པས་བྱང་ཆུབ་རབ་སྦྱིན་ཕྱིར། །པདྨ་གར་གི་དབང་ཕྱུག་འགྱུར། །ཞེས་གསུངས་པས་སོ། །དེ་ལྟར་ཁྲོ་ཆགས་ཀྱི་སྐུས་རྩ་བའི་ཉོན་མོངས་པ་གསུམ་ཞི་བར་བྱེད་པ་ཡིན་པས་ན་ཉོན་མོངས་པ་གཞན་རྣམས་ཤུགས་ལས་ཞི་བར་བྱེད་པ་ཡིན་ནོ། །ཁྲོ་ཆགས་ཀྱི་རྣམ་པའི་སྐུ་མེད་པ་རྣམས་ནི་བསྐྱེད་པའི་རིམ་པ་མི་ཟབ་པ་ཡིན་ནོ། །ཡང་སྒེག་པ། དཔའ་བ། མི་སྡུག་པ་སྟེ་སྐུའི་ཉམས་གསུམ་གྱིས་རིམ་པ་ལྟར་འདོད་ཆགས་དང་། ཞེ་སྡང་དང་། གཏི་མུག་སྦྱོང་། དགོད་ཅིང་དྲག་ཤུལ་འཇིགས་སུ་རུང་བ་སྟེ། གསུང་གི་ཉམས་གསུམ་གྱིས་ཀྱང་རིམ་པ་ལྟར་དེ་གསུམ་སྦྱོང་ངོ་། །སྙིང་རྗེ་ངམ་དང་ཞི་བ་སྟེ་ཐུགས་ཀྱི་ཉམས་གསུམ་གྱིས་ཀྱང་རིམ་པ་ལྟར་དེ་གསུམ་སྦྱོང་ངོ་། །དྲུག་པ་ཁ་དོག་དང་དབྱིབས་ཀྱིས་དུག་ལྔ་སྦྱོང་ཚུལ་ལ་གཉིས་ཏེ། ཁ་དོག་གིས་དུག་ལྔ་སྦྱོང་ཚུལ་དང་། ཕྱག་མཚན་གྱིས་དུག་ལྔ་སྦྱོང་ཚུལ་ལོ། །དང་པོ་ནི། གཏི་མུག་ཅན་ནི་གང་དུའང་བསྒྱུར་དུ་འདོད་ཅིང་། མེ་ལོང་ལྟ་བུའི་ཡེ་ཤེས་ཀྱང་ཡེ་ཤེས་གཞན་གསུམ་གྱི་གཞི་ཡིན་པའི་ཕྱིར། ཁ་དོག་དཀར་པོས་མཚོན་ཡང་ཞེ་སྡང་སྐྱེས་པའི་ཚེ་ནག་ཏོམ་གྱིས་འགྲོ་ལ། ཆོས་དབྱིངས་ཡེ་ཤེས་ཀྱང་འགྱུར་བ་མེད་པའི་ཕྱིར་ཁ་དོག་ནག་པོས་མཚོན། ཡང་འདོད་ཆགས་སྐྱེས་པའི་ཚེ་ཁ་དོག་དམར་ལ། སོ་སོར་རྟོག་པའི་ཡེ་ཤེས་སེམས་ཅན་གྱི་དོན་ལ་ཆགས་པས་ཁ་དོག་དམར་པོས་མཚོན། ཡང་ལོངས་སྤྱོད་འཛིན་པ་ནི་སེར་སྣ་ཡིན་ལ། ལོངས་སྤྱོད་ཡོད་པ་རྣམས་ལ་ང་རྒྱལ་སྐྱེ་ཞིང་ལོངས་སྤྱོད་ཀྱི་གཙོ་བོ་རིན་པོ་ཆེ་དང་། གསེར་ལ་སོགས་པ་རྣམས་ནི་འོད་གསལ་བ་དང་། མཉམ་པ་ཉིད་ཀྱི་ཡེ་ཤེས་ཀྱང་འོད་གསལ་བས་སེར་པོས་མཚོན། ཡང་ཉོན་མོངས་པ་ཕྲག་དོག་ནི་ཉོན་མོངས་པ་ཀུན་ལྡན་ལས་སྐྱེ་བ་ཡིན་ལ། བྱ་བ་གྲུབ་པའི་ཡེ་ཤེས་ཀྱང་ཡེ་ཤེས་ཐམས་ཅད་ཀྱི་ཕྲིན་ལས་ཡིན་པས་ཁ་དོག་ལྗང་གུས་མཚོན་ཏེ། ཁ་དོག་ལྔ་པོ་གང་ཡོད་སར་འདི་ལྟ་བུའི་སྦྱང་གཞི་དང་སྦྱོང་བྱེད་ངོ་སྤྲད་ཅིང་བསྒོམས་པས། ཉོན་མོངས་པ་ལྔ་ཡེ་ཤེས་ལྔར་བྱིན་གྱིས་བརླབས་པ་ཡིན་ནོ། །གཉིས་པ་ནི། ཕྱག་མཚན་འཁོར་ལོས་ཉོན་མོངས་པ་གཏི་མུག་དང་། མེ་ལོང་ལྟ་བུའི་ཡེ་ཤེས་མཚོན། རྡོ་རྗེ་ཞེ་སྡང་དང་། ཆོས་དབྱིངས་ཡེ་ཤེས་མཚོན། རིན་པོ་ཆེས་ང་རྒྱལ་དང་། སེར་སྣ་དང་། མཉམ་པ་ཉིད་ཀྱི་ཡེ་ཤེས་མཚོན། པདྨས་འདོད་ཆགས་དང་། སོ་སོར་རྟོག་པའི་ཡེ་ཤེས་མཚོན། རལ་གྲིའམ་སྣ་ཚོགས་རྡོ་རྗེས་ཕྲག་དོག་དང་། བྱ་བ་གྲུབ་པའི་ཡེ་ཤེས་མཚོན་ལ། དེ་བཞིན་དུ་ཕྱག་མཚན་གཞན་རྣམས་ལ་ཡང་རུང་མཐུན་བརྩི་བར་བྱའོ། །སྲོག་ཆགས་ཀྱི་ཕྱག་མཚན་རྣམས་ནི་མཚོན་བྱེད་བཟང་བ་ཡིན་ཏེ། རེ་རེ་ལ་ཡང་ཕུང་པོ་ལྔ་དང་། ཉོན་མོངས་པ་ལྔ་དང་། ཡེ་ཤེས་ལྔ་ལ་སོགས་པའི་སྦྱང་གཞི་སྦྱོང་བྱེད་ཐམས་ཅད་ཚང་བའི་ཕྱིར་རོ། །དེ་ལྟར་ཕྱག་མཚན་ཐམས་ཅད་ལ་སྦྱང་གཞི་སྦྱོང་བྱེད་ངོ་སྤྲད་ཅིང་བསྒོམས་པས་ཉོན་མོངས་པ་ལྔ། ཡེ་ཤེས་ལྔར་བྱིན་གྱིས་བརླབས་པ་ཡིན་ནོ། །བདུན་པ་ཕྱག་ཞབས་ཀྱི་རྣམ་འགྱུར་གྱིས་མཐའ་གཉིས་སྦྱོང་ཚུལ་ནི། ཕྱག་དང་ཞབས་གཡས་བརྐྱང་བས་ནི་སྙིང་རྗེ་ཆེན་པོས་སེམས་ཅན་གྱི་དོན་བྱེད་པ་མཚོན་ལ། བསྐུམ་པས་ནི་བདག་ཐུགས་རྗེ་ཆེན་པོ་དང་ལྡན་པ་མཚོན། གཡོན་བརྐྱངས་པས་ནི་ཆོས་ཉིད་སྟོང་པ་ཉིད་ཀུན་ལ་ཁྱབ་པ་མཚོན། དེས་འཁོར་བའི་མཐའ་མནན་ནོ། །བསྐུམ་པས་ནི་བདག་དང་དེ་བཞིན་ཉིད་དུ་ལྡན་པ་མཚོན། དེས་མྱ་ངན་ལས་འདས་པའི་མཐའ་མནན་ནོ། །ཕྱག་གཉིས་ཐུགས་ཀར་བསྣོལ་བ་དང་། ཞབས་རྡོ་རྗེ་སྐྱིལ་ཀྲུང་དུ་བཞུགས་པས་ནི་ཟུང་དུ་འཇུག་པ་མཚོན་ཏེ། དེས་མཐའ་གཉིས་ཆར་སྦྱོང་ངོ་། །དེ་ལྟར་ན་རྗེ་བཙུན་གྱིས་ལྗོན་ཤིང་ལས་སྦྱང་གཞི་དང་སྦྱོང་བྱེད་ཐམས་ཅད་ངོ་སྤྲད་པ། ལམ་ཐམས་ཅད་གཅིག་ཏུ་བསྲེ་བ་འདི་ནི། རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོའི་བཞེད་པ་ཡིན་ནོ། །ཞེས་གསུངས་པའི་དོན་ཡིན་ལ། འདི་ཚུལ་བཞིན་ཤེས་ནས་བསྒོམ་ན། རྒ་སྟོན་སྤྲིང་ཡིག་ལས། སྤྱིར་སྦྱང་གཞི་དང་། སྦྱོང་བྱེད་ལེགས་པར་ངོ་འཕྲོད་ཅིང་བསྒོམས་ན། བསྒོམ་པ་ལ་བརྩོན་ཡང་རུང་མ་བརྩོན་ཡང་རུང་འཁོར་བའི་རྒྱ་མཚོ་ལས་བདག་སྒྲོལ་ཞིང་གཞན་སྒྲོལ་བའི་ནུས་པ་དང་ལྡན་པར་གྱུར་པའོ། །ཞེས་གསུངས་པ་ལྟར་གྱི་འབྲས་བུ་འབྱུང་བར་ཤེས་ནས་བཀའ་སྲོལ་འདི་ལྟ་བུའི་རྗེས་སུ་འབྲང་བར་བྱ་བ་ཡིན་གྱི། ཆོས་དབྱིངས་བདེན་གྲུབ་ཁོ་ན་སྦྱང་གཞི་ཡིན་གྱི། ཀུན་རྫོབ་ཕུང་ཁམས་སྐྱེ་མཆེད་ཐམས་ཅད་སྦྱང་གཞི་མ་ཡིན་ནོ་ཞེས་ཤིན་ཏུ་འཆལ་ཞིང་། རྣམ་པར་འཆལ་བའི་ཤེས་རབ་ཀྱིས་ལོག་པར་རྟོག་པའི་རྗེས་སུ་འབྲང་བར་མི་བྱའོ། །སྤྱིར་གསང་སྔགས་རྡོ་རྗེ་ཐེག་པའི་གནད་ཕྱིན་ཅི་མ་ལོག་པར་རྟོགས་པ་ལ། རྗེ་ས་ཆེན་གྱིས། ཐམས་ཅད་མཁྱེན་པའི་བཀའ་ནི་རྒྱ་མཚོ་བཞིན། །ཟབ་ཅིང་གཏིང་དཔག་དཀའ་ལ་ཐུག་པ་མེད། །རྡོ་རྗེ་ཐེག་པ་དགོངས་པ་དུ་མ་ཡིས། །གསུང་ཤིང་རྡོ་རྗེའི་ཚིག་གིས་རྒྱས་བཏབ་པས། །ལུང་བསྟན་གྱུར་པ་ཀླུ་སྒྲུབ་ལ་སོགས་སམ། །མཁའ་འགྲོས་བྱིན་བརླབས་བིརྺ་པ་ལ་སོགས། །གྲུབ་ཐོབ་རྣམས་ཀྱི་མན་ངག་ལ་བརྟེན་ནས། །རྗེས་འཇུག་སྐྱེ་བོས་བཀའ་རྣམས་རྟོགས་པར་འགྱུར། །ཞེས་གསུངས་པ་ལྟར། བཀའ་སྲོལ་རྣམ་པར་དག་པའི་རྗེས་སུ་འབྲང་དགོས་པ་འདིའང་ངེས་པར་བྱའོ། །གསུམ་པ་ཡིད་ཆེས་བསྐྱེད་པའི་ཕྱིར་འཁྲུལ་ཟད་ཀྱི་ལུང་ཁུངས་བསྟན་པ་ནི་གནད་འདི་དག རྗེ་ས་ཆེན་གྱི་དབང་བཞི་ངོ་སྤྲོད་ཀྱི་འགྲེལ་པ། རྗེ་བཙུན་རྩེ་མོའི་མངོན་རྟོགས་རྒྱས་པ། རྗེ་བཙུན་རིན་པོ་ཆེའི་མངོན་རྟོགས་ལྗོན་ཤིང་། འཁོར་འདས་དབྱེར་མེད་ཀྱི་འགྲེལ་པ། རྒ་སྟོན་སྤྲིང་ཡིག་རྣམས་ལས་གསལ་བར་འབྱུང་ལ། གཞན་ཡང་། རྒྱུད་གསུམ་གྱི་འགྲེལ་པ་སོགས་གོང་མའི་གསུང་རབ་རྣམས་ལས་ཆ་ཤས་ཀྱིས་འབྱུང་བ་ནི་སྐལ་བ་དང་ལྡན་པ་རྣམས་ཡིད་ཆེས་པའི་ལུང་ཁུངས་ཡིན་ནོ། །དེ་དག་ལ་ཡིད་མི་ཆེས་པ་རྣམས་ཀྱིས་ཀྱང་། སྔར་དྲངས་པའི་རྒྱུད་གཞུང་རྣམ་པར་དག་པའི་ལུང་རྣམས་ལ་བརྟེན་ནས་མ་འཁྱོགས་པའི་བློ་གྲོས་ཀྱིས་དཔྱད་ཅིང་རང་གཞན་ལ་ཕན་པར་བྱའོ། །གཉིས་པ་དེ་ཉིད་ལམ་བྱེད་བཞིས་ལམ་དུ་བྱེད་པའི་ཚུལ་ནི་སྔར་བཤད་པའི་སྦྱང་གཞི་དང་སྦྱོང་བྱེད་དེ་དག་ཐམས་ཅད་ཀྱང་། འདྲ་ཆོས་དང་། མཚོན་དོན་རྟོགས་པ་རང་དགའ་བས་བསྒྲིགས་པ་ཙམ་མ་ཡིན་གྱི། སེམས་ཀུན་གཞིའི་སྟེང་དུ་མྱ་ངན་ལས་འདས་པའི་ཆོས་ཐམས་ཅད་ཀྱི་བག་ཆགས་གནས་པའི་སྟོབས་ཀྱིས། ཀུན་རྫོབ་ཀྱི་སྣང་བ་ཐམས་ཅད་འབྲས་བུ་སངས་རྒྱས་ཀྱི་སའི་གཟུགས་སྐུ་དང་། ཆོས་སྐུའི་རྣམ་པ་རང་བཞིན་རྣམ་དག་གི་ཚུལ་གྱིས་འབྱུང་བ་ཡིན་པར་ནི་རྩ་རྒྱུད་ཕྱི་མའི་བཅུ་གཅིག་པར། ལུས་ཅན་ཐམས་ཅད་ཁ་དོག་དང་དབྱིབས་ཀྱི་སྒོ་ནས་རིགས་ལྔར་ངེས་ཚུལ་གསུངས་པས་ཤེས་ལ། དེའི་ཕྱིར་བསྒོམས་པས་གློ་བུར་གྱི་དྲི་མ་དག་སྟེ། མངོན་དུ་འགྱུར་བ་ནི་སྦྱང་གཞི་དང་། སྦྱོང་བྱེད་མཚོན་དོན་བསྒྲིགས་པའི་དོན་ནོ། །དེས་ན་འདི་ལ་སྦྱང་གཞི་ཐམས་ཅད་ལམ་གྱིས་རྣམ་པ་དེ་དང་དེར་བསྒོམ་པའི་ཚུལ་དང་། དེ་ཉིད་ལམ་བྱེད་བཞིས་བྱིན་གྱིས་བརླབ་པའི་ཚུལ་གཉིས་ལས། དང་པོ་ནི་རྒྱས་པར་སྔར་བཤད་ཟིན་ཅིང་། མཚན་གཞི་གཅིག་ལ་སྦྱར་ན་མངལ་སྐྱེས་ཀྱི་མའི་ཕྱག་རྒྱ་གྲུ་གསུམ་དང་། སྒོང་སྐྱེས་ཀྱི་སྒོ་ང་སོགས་བཞི་པོ་མ་དག་པའི་ཕྱག་རྒྱ་སོགས་མ་ཡིན་གྱི། བདག་གི་བློ་ལ་སྣང་བའི་ཆོས་འབྱུང་གྲུ་གསུམ་འདི་ཉིད་ཡིན་ནོ་སྙམ་དུ་དབྱེར་མེད་དུ་བསྒོམ་པའོ། །གཉིས་པ་ནི་དེ་ལྟར་ཆོས་འབྱུང་གྲུ་གསུམ་དུ་བསྒོམས་པས་རྣམ་པ་གཟུགས་ཀྱི་རྣམ་པ་བསྒོམ་སླ་བས་རྣམ་པ་ལམ་དུ་བྱེད་པ་ཞེས་བྱ། དེ་ཉིད་རྣམ་ཐར་སྒོ་གསུམ་དང་། སྤྱན་ལ་སོགས་པའི་ཕྱག་རྒྱར་མོས་པ་བྱས་པས། མོས་པ་ལམ་དུ་བྱེད་པ་ཞེས་བྱ། དེ་ཡང་སངས་རྒྱས་སའི་འབྲས་བུ་རྣམ་ཐར་སྒོ་གསུམ་དང་། སྤྱན་ལ་སོགས་པའི་ཕྱག་རྒྱ་དངོས་ཡིན་པར་བསྒོམས་པས་འབྲས་བུ་ལམ་དུ་བྱེད་པ་ཞེས་བྱ། དེས་རྣལ་འབྱོར་པའི་སེམས་རྒྱུད་བྱིན་གྱིས་བརླབས་ཤིང་ཚོགས་རྫོགས་པས་བྱིན་རླབས་ལམ་དུ་བྱེད་པ་ཞེས་བྱ་སྟེ། དེའི་རྒྱུ་མཚན་ཡང་ཞེན་པས་འཇུག་ཅིང་འབྲེལ་པས་མི་བསླུ་བའི་ལམ་ཡིན་པའི་ཕྱིར་རོ། །དེ་ལ་ཞེན་པས་འཇུག་པ་ནི། སྦྱང་གཞི་ལ་རྣམ་པར་ཞེན། རྣམ་པ་ལ་འབྲས་བུ་དངོས་སུ་ཞེན་པའོ། །འབྲེལ་པས་མི་བསླུ་བ་ནི་སྦྱང་གཞི་དང་། ལམ་དང་། འབྲས་བུ་སུམ་ཆར་ཡང་གཅིག་ལ་གཅིག་འབྲེལ་པའམ། དོན་ལ་དབྱེར་མེད་པས་མི་བསླུ་བ་སྟེ། བསྐྱེད་པའི་རིམ་པའི་སྦྱང་གཞི་དང་། སྦྱོང་བྱེད་བསྒོམས་པས་སངས་རྒྱས་ཀྱི་སའི་ཆོས་ཐམས་ཅད་འཐོབ་པའི་རྒྱུ་མཚན་ཡང་འདི་ཉིད་ཡིན་ནོ། །དེ་ལྟར་རྣལ་འབྱོར་བཅུ་པོ་སྦྱང་གཞི་སྦྱོང་བྱེད་སྦྱར་ཞིང་། ལམ་བྱེད་བཞི་ལྡན་དུ་བརྩོན་པ་དྲག་པོས་བསྒོམས་པས་དྲོད་ཆུང་ངུ་ཐོབ་པ་ན། ཀུན་འདར་གསང་ནས་སྤྱོད། དེས་དྲོད་འབྲིང་ཐོབ་པ་ན། ཀུན་འདར་འཇིག་རྟེན་པའི་མངོན་དུ་སྤྱོད། དེས་ལུང་བསྟན་པའི་བུ་མོ་པདྨ་ཅན་ལ་བརྟེན་ནས་དྲོད་ཆེན་པོ་ཐོབ་པ་ན། ཀུན་ཏུ་བཟང་པོའི་སྤྱོད་པ་ཟླ་བ་གཅིག་གིས་ས་བརྒྱད་པ་ཐོབ་སྟེ། ཉེ་རྒྱུ་སྤྱོད་པའི་སྐལ་བ་དང་ལྡན་པར་འགྱུར་ཞིང་། དེ་ནས་ཉེ་རྒྱུ་ཞག་བདུན་གྱིས་རྡོ་རྗེ་འཆང་ཆེན་པོའི་ས་བཅུ་གསུམ་པ་ཐོབ་པར་འགྱུར་པ་ནི་ངེས་པའོ།། ༈ །།ཀུན་མཁྱེན་བླ་མའི་ལེགས་བཤད་ཟླ་ཟེར་གྱིས། །ལམ་བཟང་སྣང་བ་གསལ་བར་མཛད་པ་ལས། །མན་ངག་ཀུ་མུ་ཏ་ཀ་བྱེ་བའི་ཆུ། །དོན་གཉེར་བློ་ཡི་རེ་བ་སྐོང་ཕྱིར་སྦྱིན། །རབ་དཀར་དགེ་ཚོགས་གང་ཞིག་གྲུབ་པ་དེས། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་ཞེས་གྲགས་པར་སྐྱེས་གྱུར་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །དོན་དམ་སྤྲོས་བྲལ་མངོན་དུ་མ་གྱུར་ཀྱང་། །སྣ་ཚོགས་རྒྱུད་སྡེའི་དགོངས་པ་དྲི་མེད་ལ། །རྣམ་བཀྲའི་བློ་གྲོས་གང་གི་དྲིན་ཉིད་ལས། །ལེགས་པར་ཐོབ་པའི་རྗེ་བཙུན་ཞབས་པད་ལ། །སྒོ་གསུམ་དྭང་བས་རྟག་ཏུ་ཕྱག་འཚལ་ཞིང་། །ལུས་དང་ལོངས་སྤྱོད་དུས་གསུམ་དགེ་རྩ་ཡིས། །རྒྱུན་དུ་མཆོད་དོ་ཐུགས་རྗེའི་ལྕགས་ཀྱུ་ཡིས། །ད་དུང་སྲིད་མཐའི་བར་དུ་རྗེས་གཟུང་གསོལ། །རྗེ་བཙུན་བླ་མའི་ལེགས་བཤད་གནད་ཀྱི་ཟླ་ཟེར་འཕགས་ཡུལ་གྱི་ཀྱེ་རྡོ་རྗེའི་ལམ་ཡོངས་སུ་རྫོགས་པའི་ལམ་སྲོལ་དྲུག་རྫོགས་པར་བཤད་པའི་ནང་ནས་བློ་དམན་པ་རྣམས་ལ་ཕན་པའི་ཕྱིར་མན་ངག་ལུགས་ལོགས་སུ་བཀོལ་ཏེ། གསུང་སྒྲོས་ཁྱད་པར་ཅན་འགའ་ཞིག་དང་། རྗེ་བཙུན་གོང་མའི་གསུང་རབ་ཀྱི་ནང་ནས་བསྣན་ཁ་འགའ་ཞིག་དང་བཅས་ཏེ་འབྲི་དགོས་སོ་ཞེས་དོན་གཉེར་དུ་མས་བསྐུལ་ཏེ། མགོ་བརྩམས་ནས་ཡུན་རིང་དུ་མ་གྲུབ་པ་ལ། དུས་ཕྱིས་བསྟན་པ་དྲི་མ་མེད་པའི་ཁུར་གྱིས་ལྕི་བ་མཁན་ཆེན་སངས་རྒྱས་རྒྱ་མཚོ་བའི་གསུང་གིས་བསྐུལ་བས་རྐྱེན་བྱས་ནས། རྗེ་བླ་མས་ལེགས་བཤད་གནད་ཀྱི་ཟླ་ཟེར་སྒྱུར་བྱེད་ཅེས་བྱ་བ། ས་མོ་ཕག་གི་ལོ་ལ་བརྩམ་ནས་ལོ་དྲུག་ཅུ་རེ་དྲུག་འདས་པ། སྣ་ཚོགས་འབྱིག་ཅེས་པ་ཤིང་མོ་སྦྲུལ་གྱི་ལོ་ལ། ཤཱཀྱའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་ལེགས་པར་གྲུབ་པའི་ཡི་གེ་པ་ནི་གཞོན་ནུ་བཟང་པོའོ།། །།དགེའོ།། །། ༄༅། །ན་མཿསངྒུ་རུ་པཱ་དཱ་ཡ། ཀུན་ཁྱབ་དམིགས་པ་མེད་པའི་སྙེང་རྗེའི་རྩལ། །མ་འགག་རང་བཞིན་རྣམ་པ་ཐམས་ཅད་ཀྱི། །མཆོག་ལས་མི་འགྱུར་འོད་གསལ་ཤེས་རབ་ཆེ། །ཟུང་འཇུག་སྲིད་ཞི་ཀུན་ཁྱབ་དགེས་མཛད་མགོན། །དེས་གསུང་རྒྱུད་ཀྱི་ཡང་སྙིང་རྣལ་འབྱོར་བཅུ། །འདོམས་མཛད་དཔལ་ལྡན་ཆོས་སྐྱོང་སྲས་བཅས་ཀྱི། །ལུགས་མཆོག་སྒྲོས་ངན་སྤངས་པ་འདི་ཙམ་ཞེས། །མདོ་རྒྱུད་གདམས་པའི་ང་རོས་འབོད་རྒྱངས་མཁན། །དེ་རྒྱུན་བསོད་ནམས་གསེར་གྱི་སྒོང་སྦུབས་ལས། །སྐྱེས་པ་སྡེ་བཞིའི་གདོང་མཛེས་དགེ་ཆོས་ཀྱི། །འཁོར་ལོས་ལག་བྲེལ་ས་་་་་་བསྟན་པ་ཚེ་རིང་སྤྱོད་འཇིག་རྟེན་མེས། །གྲགས་པའི་གསུང་སྙན་ཡན་ལག་རྫོགས་པ་ཅན། །གང་དེས་སྤེལ་པའི་རྣམ་དཀར་དགེ་བའི་མཐུས། །ཆོས་འདུལ་མངོན་པ་མདོ་དང་རྒྱུད་སྡེའི་གནད། །མཐའ་དྲུག་ལམ་ནས་འདྲེན་ལ་མི་འཇིགས་གདེང་། །འཇམ་དཔལ་གཞོན་ནུས་བྱིན་གྱུར་ས་སྐྱ་པ། །བརྒྱུད་པར་བཅས་པའི་རིང་ལུགས་དར་གྱུར་ཅིག །ཚུལ་འདིར་རྒྱུ་སྦྱོར་དཀར་པོའི་བག་ཆགས་རྒྱུན། །བཞག་པས་བསྡུས་པའི་ལུས་ཅན་བྱང་ཆུབ་བར། །ཡང་སྲིད་བླ་མ་ལྷག་པའི་ལྷས་བྱིན་བརླབས། །མཁས་པའི་བགྱི་བས་བསྟན་པ་རྒྱས་བྱེད་ཤོག །དེ་སྐད་དམར་སེར་ཞེས་བྱའི་ལོར། །ས་སྤྱོད་ཐུགས་བསྐྱེད་ལྡེ་མིག་གི །འཕྲུལ་གྱིས་ཆོས་སྦྱིན་མ་མོའི་སྒོ། །འབུམ་ཕྲག་གསར་དུ་ཕྱེ་བའི་སྐབས། །རྗེ་བཙུན་བླ་མ་རྣམས་ཀྱི་ཐུགས། །བརྩེ་བས་ལེགས་བསྐྱངས་ཆོས་འདིའི་རིགས། །སྐྱེས་པས་སྐལ་བ་སྦོམ་གྱུར་མིང་། །ཚུལ་ཁྲིམས་རིན་ཆེན་བཏགས་པས་བྲིས།། །།མངྒལཾ།། །།

དཔལ་ཀྱཻ་རྡོ་རྗེའི་ལུས་དཀྱིལ་གྱི་རྣམ་པར་བཤད་པ་བདེ་ཆེན་བཅུད་ཀྱི་སྙིང་པོ།

དཔལ་ཀྱཻ་རྡོ་རྗེའི་ལུས་དཀྱིལ་གྱི་རྣམ་པར་བཤད་པ་བདེ་ཆེན་བཅུད་ཀྱི་སྙིང་པོ་བཞུགས་སོ།། ༄༅། །དཔལ་ཀྱཻ་རྡོ་རྗེའི་ལུས་ཀྱི་དཀྱིལ་འཁོར་གྱི་རྣམ་པར་བཤད་པ་བདེ་ཆེན་བཅུད་ཀྱི་སྙིང་པོ་ཞེས་བྱ་བ། རྗེ་བཙུན་བླ་མ་ཐུགས་རྗེ་ཆེན་པོ་དང་ལྡན་པ་རྣམས་དང་། བཅོམ་ལྡན་འདས་ཀྱཻ་རྡོ་རྗེ་ལ་ཕྱག་འཚལ་ལོ། །བདེ་གཤེགས་རིགས་དྲུག་ལྷ་དང་བྷ་ག་ཡེ་ཤེས་ལྔ་ཡི་དངོས། །སྙིང་པོ་བདེ་ཆེན་རང་ལ་གནས་པ་ལེན་ཅིང་འཛིན་པའི་ཐབས། །རང་བཞིན་ཉམས་དགའི་དཀྱིལ་འཁོར་སྟོན་མཛད་དཔལ་ལྡན་བླ་མ་མཆོག །ཧེ་རུ་ཀ་དཔལ་ཉིད་དང་དབྱེར་མེད་དེ་ཡི་ཞབས་བཏུད་ནས། །ཕྱི་རོལ་སྤྲོས་ཀུན་ནང་དུ་ལེགས་བསྡོམས་ཏེ། །བདེ་ཆེན་ཡེ་ཤེས་ཉིད་ཀྱི་རྣམ་རོལ་དུ། །སྣང་བའི་ཆོས་ཀུན་རྟོགས་པར་བྱེད་པའི་ཐབས། །ཟབ་མོའི་དགོངས་པ་བཤད་ཀྱིས་དགའ་བས་ཉོན།། ༈ །།དཔལ་ཀྱཻའི་རྡོ་རྗེའི་རྩ་བའི་རྒྱུད་དང་། བཤད་པའི་རྒྱུད་ཀུན་ཏུ་ཁ་སྦྱོར་ལས་གསུངས་པའི་ལུས་ཀྱི་དཀྱིལ་འཁོར་རྣལ་འབྱོར་དབང་ཕྱུག་བིརྺ་པའི་མན་ངག་བཞིན། རྗེ་བཙུན་གོང་མ་རྣམས་ཀྱི་ཇི་ལྟར་བཞེད་པའི་ཚུལ། འདིར་བཤད་པར་བྱ་བ་ལ་དོན་གསུམ་སྟེ། སྤྱིར་དཀྱིལ་འཁོར་གྱི་སྒྲ་དོན། དཀྱིལ་འཁོར་དེའི་རབ་ཏུ་དབྱེ་བ། ལུས་དཀྱིལ་བྱེ་བྲག་ཏུ་བཤད་པའོ། །དང་པོ་ནི། ཅིའི་ཕྱིར་དཀྱིལ་འཁོར་ཞེས་བྱ་ཞེ་ན། དེའི་སྐད་དོད་མཎྜལ་ཅེས་པའི་མའི་སྒྲ་ལས། མ་ནུ་སཱ་ར་ནི་སྙིང་པོ་སྟེ། བྱང་ཆུབ་ཀྱི་སེམས་བདེ་བ་ཆེན་པོའོ། །ལ་ནི་ལེན་པའམ་འཛིན་པ་སྟེ། སྙིང་པོ་བདེ་བ་ཆེན་པོ་ལེན་ཅིང་འཛིན་པར་བྱེད་པས་ན་དཀྱིལ་འཁོར་ཏེ། རྩ་བའི་རྒྱུད་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་ཉིད་དུ་བརྗོད། །ཅེས་དང་། ཁ་སྦྱོར་ལས། དངོས་པོ་ཀུན་གྱི་སྙིང་པོ་མཆོག །ལེན་ཅིང་གཅོད་པ་ཉིད་ཀྱི་ཕྱིར། །ལུས་ནི་དཀྱིལ་འཁོར་ཉིད་དུ་བརྗོད། །རྩ་ཆེན་སུམ་ཅུ་རྩ་གཉིས་ཀྱི། །དཀྱིལ་འཁོར་ཡང་ནི་དཀྱིལ་འཁོར་ཉིད། །བྱང་ཆུབ་སེམས་ནི་བདེ་ཆེན་པོ། །དཀྱིལ་འཁོར་དེ་ཉིད་དཀྱིལ་འཁོར་བརྗོད། །ཅེས་གསུངས་པས་སོ། །སྙིང་པོ་བདེ་ཆེན་ལེན་པས་དཀྱིལ་འཁོར་དུ་འཇོག་པའི་སྒྲ་དོན་དེ་ཉིད། རས་བྲིས་དང་། རྡུལ་ཚོན་དང་། བདག་བསྐྱེད་ཀྱི་དཀྱིལ་འཁོར་ལ་ཡང་འཇུག་སྟེ། སྨན་པའི་ཞབས་ཀྱིས། དཀྱིལ་འཁོར་བཞི་སྟེ་རི་མོ་དང་། །ལུས་དང་བྷ་ག་བྱང་ཆུབ་སེམས། །ཡེ་ཤེས་ལྔ་ལ་སོགས་པའི་གནས། །ཐོབ་བྱེད་ཉིད་དུ་གྱུར་པ་འོ། །ཅེས་གསུངས་པས་སོ། །དེས་ན་འཆད་པ་པོ་འགའ་ཞིག་གིས་གཙོ་བོ་ལ་དཀྱིལ་དང་། འཁོར་ལ་འཁོར་ཅེས་དང་། བརྟེན་པ་ལ་དཀྱིལ་དང་། རྟེན་ལ་འཁོར་ཞེས་དང་། འདས་པ་ལ་དཀྱིལ་དང་། འཇིག་རྟེན་པ་ལ་འཁོར་ཞེས་སྨྲ་བ་ནི་རྒྱུད་གཞུང་གི་ཁུངས་མེད་བཞིན་དུ་རང་དགར་སྨྲས་པའོ། །གཉིས་པ་ལ་དབྱེ་སྒོ་དྲུག་སྟེ། དཀྱིལ་འཁོར་བརྒྱད་དུ་དབྱེ་བ། དྲུག་ཏུ་དབྱེ་བ། ལྔར་དབྱེ་བ། བཞིར་དབྱེ་བ། གསུམ་དུ་དབྱེ་བ། གཉིས་སུ་དབྱེ་བའོ། །དང་པོ་ནི། གྲུབ་ཆེན་ཀླུ་བྱང་གིས། སློབ་མའི་དོན་ཀུན་བསྒྲུབ་པའི་ཕྱིར། །འཁོར་ལོ་རྣམ་བརྒྱད་བྲི་བར་བྱ། །རིན་ཆེན་དེ་བཞིན་ས་བོན་དང་། །མེ་ཏོག་ཚོན་དང་དེ་བཞིན་དུ། །བྱེ་མ་གཡོ་དང་ཕྱེ་མ་སྟེ། །དེ་བཞིན་ཡིད་ཀྱི་དཀྱིལ་འཁོར་བདེན། །ཞེས་གསུངས་པའི་དང་པོ་གཉིས་ནི་རྩ་རྒྱུད་དང་པོའི་བཅུ་པར། རྡུལ་ཚོན་དམ་པའི་ཚོན་དང་ནི། །ཡང་ན་འབྲིང་པོ་ཉིད་ཀྱིས་ཏེ། །རིན་ཆེན་ལྔ་ཡི་ཕྱེ་མའམ། །ཡང་ན་འབྲས་ལ་སོགས་པས་སོ། །ཞེས་གསུང་པ་དང་དོན་གཅིག་གོ །གསུམ་པ་ནི་རྟེན་གྱི་དཀྱིལ་འཁོར་རྡུལ་ཚོན་གྱིས་བྲིས་ཟིན་ནས་ལྷའི་མཚན་མ་ལ་མེ་ཏོག་འགོད་པའོ། །བཞི་པ་ནི་རས་ལ་ཚོན་གྱིས་བྲིས་པའི་རས་བྲིས་སོ། །ལྔ་པ་དང་དྲུག་པ་ནི་ཁུངས་ནས་འབྱུང་བའི་བྱེ་བ་མ་དང་རྡོའི་ཕྱེ་མ་སྟེ་ཚོན་གྱི་རྒྱུའོ། བདུན་པ་ནི་ཡེ་ཤེས་ཞབས་ལུགས་པ་དག་གིས། ཏིང་ངེ་འཛིན་གྱི་དཀྱིལ་འཁོར་དང་། བསམ་གཏན་གྱི་དཀྱིལ་འཁོར་གསུངས་པ་དང་དོན་གཅིག་གོ །བརྒྱད་པ་ནི་ལུས་ཀྱི་དཀྱིལ་འཁོར་དང་དོན་གཅིག་སྟེ། སློབ་དཔོན་དྲིལ་བུ་པས་རང་བཞིན་གྱིས་གྲུབ་པའི་དཀྱིལ་འཁོར་ཞེས་པ་ལ་འདིར་བདེན་པའི་དཀྱིལ་འཁོར་ཞེས་པའི་ཐ་སྙད་མཛད་པའི་ཕྱིར་རོ། །གཉིས་པ་ནི་མངོན་བརྗོད་བླ་མ་ལས། ཡི་གེའི་དཀྱིལ་འཁོར་དང་པོ་སྟེ། །གཉིས་པ་མཚན་མའི་དཀྱིལ་འཁོར་ཡིན། །ལག་པའི་ཕྱག་རྒྱ་གསུམ་པ་སྟེ། །གཟུགས་བརྙན་བཀོད་པ་བཞི་པའོ། །མེ་ཏོག་བཀྲམ་པ་ལྔ་པ་སྟེ། །དྲུག་པ་ཚོགས་ཀྱི་དཀྱིལ་འཁོར་རོ། །དཀྱིལ་འཁོར་འདི་དག་བྲིས་ནས་ནི། །རྟག་ཏུ་སྒྲུབ་ཅིང་མཆོད་པར་བྱ། །ཞེས་གསུངས་ཏེ། དང་པོ་ལྔ་ནི་རྡུལ་ཚོན་གྱི་དཀྱིལ་འཁོར་ལ་ཧཱུྃ་ལ་སོགས་པའི་ཡི་གེ་དང་། རྡོ་རྗེ་ལ་སོགས་པའི་མཚན་མ་དང་། མཆོག་སྦྱིན་ལ་སོགས་པའི་ཕྱག་རྒྱ་དང་། ལྷའི་གཟུགས་རྫོགས་པར་བྲི་བའམ་སྐུ་རབ་གནས་ཅན་བཞག་པ་དང་། མེ་ཏོག་གི་ཚོམ་བུ་དགོད་པ་སྟེ། མཚན་མ་འགོད་ཚུལ་གྱི་སྒོ་ནས་དབྱེ་བ་ཡིན་ལ། དྲུག་པ་ནི། ཚོགས་འཁོར་ལ་སོགས་པའི་དུས་སུ་ལྷ་གྲངས་དང་མཉམ་པའི་རྣལ་འབྱོར་ཕོ་མོ་ཕྱོགས་ཕྱོགས་སུ་བཀོད་པ་སྟེ། འདུས་པ་འཕགས་ལུགས་ལས་འདི་ལྟ་བུའི་དཀྱིལ་འཁོར་ལ་བརྟེན་ནས་དབང་གོང་མ་བསྐུར་བར་གསུངས་པ་དང་མཐུན་ནོ། །དབྱེ་སྒོ་གསུམ་པ་ནི། ཤིན་དུ་ཟབ་པའི་མན་ངག་ལས། །དཀྱིལ་འཁོར་ལྔ་ལ་བཏུད་དེ་བསྐྲུན། །ཞེས་ཏེ། ཕྱི་དབྱིབས་རྡུལ་ཚོན་གྱི་དཀྱིལ་འཁོར་དང་། ལུས་དང་། བྷ་ག་དང་། བྱང་ཆུབ་ཀྱི་སེམས་དང་། སྙིང་པོ་ཡེ་ཤེས་རླུང་དང་ལྔའོ། །ཡང་ཡེ་ཤེས་ཞབས་ལུགས་པ་དག་བུམ་དབང་ལེན་པའི་དཀྱིལ་འཁོར་ལ་རི་མོ་དང་ལུས་ཀྱི་དཀྱིལ་འཁོར་གཉིས། དབང་བར་མ་གཉིས་ལེན་པའི་དཀྱིལ་འཁོར་ལ་བྷ་ག་དང་། བྱང་ཆུབ་ཀྱི་སེམས་ཀྱི་དཀྱིལ་འཁོར་གཉིས་ཏེ་བཞི་ཡིན་པར་གསུངས་པའི་ཤུགས་ཀྱིས་ཀྱང་དཀྱིལ་འཁོར་ལྔར་གྲུབ་སྟེ། སློབ་དཔོན་སྨན་པའི་ཞབས་ཀྱིས་དབང་བཞི་པ་ལ་དབང་དང་པོ་གསུམ་ལྟར་བཅོས་མའི་དཀྱིལ་འཁོར་སོགས་མེད་ཀྱང་རང་བཞིན་གྱི་དཀྱིལ་འཁོར་སོགས་ཡོད་པར་གསུངས་པས་སོ། །དབྱེ་སྒོ་བཞི་པ་ནི། ཇི་སྐད་བཤད་པའི་བཅོས་མའི་དཀྱིལ་འཁོར་བཞིར་ཕྱེ་བ་སྟེ། སྨན་པའི་ཞབས་ཀྱིས། དཀྱིལ་འཁོར་བཞི་སྟེ་རི་མོ་དང་། །ལུས་དང་བྷ་ག་བྱང་ཆུབ་སེམས། །ཞེས་གསུངས་པ་ལྟར་རོ། །ཡང་མན་ངག་ཐུན་མོང་མ་ཡིན་པ་ལས། གང་ལས་ལེན་པའི་བསྐུར་བྱེད་ཀྱི་དཀྱིལ་འཁོར་བཞི། གང་དུ་བསྐུར་བ་སྦྱང་གཞིའི་དཀྱིལ་འཁོར་བཞི་སྟེ་ཚན་པ་གཉིས་གསུངས་པ་ལས། དང་པོ་ནི། ཕྱི་དབྱིབས་རྡུལ་ཚོན་གྱི་དཀྱིལ་འཁོར། རྫས་གསང་བ་བྱང་ཆུབ་སེམས་ཀྱི་དཀྱིལ་འཁོར། ཕྱག་རྒྱའི་བྷ་གའི་དཀྱིལ་འཁོར། དོན་དམ་བྱང་ཆུབ་སེམས་ཀྱི་དཀྱིལ་འཁོར་དང་བཞིའོ། །ཕྱི་མ་ནི། སློབ་མའི་ལུས་རྩ། ཡི་གེ་བྷ་ག ཁམས་བདུད་རྩི། སྙིང་པོ་ཡེ་ཤེས་རླུང་གི་དཀྱིལ་འཁོར་དང་བཞིའོ། །དབྱེ་སྒོ་ལྔ་པ་ནི། སློབ་དཔོན་རྡོ་རྗེ་དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །འོན་ཀྱང་དཀྱིལ་འཁོར་དེའི་རང་བཞིན། །ཅི་ཡིན་དེ་ནི་བདག་གིས་བཤད། །རི་མོར་གནས་པའི་ལས་དང་ནི། །ཐིག་ལས་ཚོན་དགྱེའི་རིམ་པ་བསྟན། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །བཅོས་མ་གཉིས་ཀྱི་ངོ་བོ་གང་། །དེ་ནི་གདུལ་བྱའི་དབང་ལས་འདོད། །མཁས་པས་བསྒྲུབ་བྱ་དེ་མིན་ཏེ། །ཡང་དག་དོན་མཐོང་གྲོལ་ཕྱིར་རོ། །ཞེས་གདུལ་བྱ་དབང་རྟུལ་ལ་རས་བྲིས་དང་། དབང་འབྲིང་ལ་རྡུལ་ཚོན་དང་། དབང་རྣོན་ལ་ལུས་དཀྱིལ་གསུངས་སོ། །འདི་དག་གདུལ་བྱ་སོ་སོ་ལ་སྨིན་བྱེད་ཀྱི་དཀྱིལ་འཁོར་དུ་རུང་བར་རྗེ་བཙུན་རྩེ་མོས་བཞེད་ཅིང་། རྗེ་བཙུན་གྱིས་དེང་སང་གི་གདུལ་བྱ་རབ་ཀྱང་འདིའི་འབྲིང་པོ་ལས་མ་འདས་པ་ལ་དགོངས་ནས་ལུས་དཀྱིལ་དུ་དབང་བསྐུར་བ་ལ་བཅོས་མའི་དཀྱིལ་འཁོར་གཉིས་སུ་སྨིན་བྱེད་སྔོན་དུ་འགྲོ་དགོས་པར་བཞེད་དེ་དགོངས་པ་གཅིག་གོ །ཡང་འདུས་པ་དང་། ཁ་སྦྱོར་གྱི་རྒྱུད་ཕྱི་མ་གཉིས་ལས། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་བརྗོད་པ་ཉིད། །དཀྱིལ་འཁོར་བྱང་ཆུབ་སེམས་ཉིད་དེ། །དཀྱིལ་འཁོར་གསུམ་ནི་ཡོངས་སུ་བརྟག །ཞེས་གསུངས་ཤིང་། འདི་ལ་རྗེ་བཙུན་གོང་མས་གསང་བ་ཆོས་ཀྱི་དཀྱིལ་འཁོར་གསུམ་ཞེས་པའི་ཐ་སྙད་མཛད་དོ། །དབྱེ་སྒོ་དྲུག་པ་ནི། ཁ་སྦྱོར་གྱི་དྲུག་པའི་གསུམ་པར། ཕྱི་རོལ་བཅས་པའི་ནང་ཉིད་ཀྱིས། །སྣ་ཚོགས་ཁྱབ་ཅིང་རྣམ་པར་གནས། །ཕྱི་རོལ་གཟུགས་དང་སྒྲ་ལ་སོགས། །དབང་པོ་རྣམས་ནི་འཇུག་པའོ། །ནང་གི་ཁུ་བ་བྱང་ཆུབ་སེམས། །གྲུབ་པའི་རྫས་ནི་གནས་པའོ། །ཞེས་གསུངས་ཤིང་དེའི་འགྲེལ་པར། རྗེ་བཙུན་རྩེ་མོས་བཅོས་མ་གཉིས་ལ་ཕྱིའི་དཀྱིལ་འཁོར་དང་། གསང་པ་ཆོས་ཀྱི་དཀྱིལ་འཁོར་གསུམ་ལ་ནང་གི་དཀྱིལ་འཁོར་ཞེས་པའི་ཐ་སྙད་མཛད་དོ། །གསུམ་པ་ལུས་དཀྱིལ་བྱེ་བྲག་ཏུ་བཤད་པ་ལ་ལྔ་སྟེ། ཕྱི་དཀྱིལ་ལས་ལུས་དཀྱིལ་ཁྱད་པར་དུ་འཕགས་པའི་རྒྱུ་མཚན། ཁྱད་པར་དུ་འཕགས་པའི་ལུས་དཀྱིལ་གྱི་སྒྲ་དོན། སྒྲ་དེ་ལྡན་གྱི་ལུས་དཀྱིལ་གྱི་དབྱེ་བ། དབྱེ་གཞི་ལུས་དཀྱིལ་གྱི་མཚན་གྱི་རྣམ་གྲངས། མཚན་དེ་དང་ལྡན་པའི་ལུས་དཀྱིལ་ཉིད་གཏན་ལ་དབབ་པའོ། །དང་པོ་ལ་གསུམ་སྟེ། རྒྱུའི་སྒོ་ནས་དང་། ངོ་བོའི་སྒོ་ནས་དང་། འབྲས་བུའི་སྒོ་ནས་ཁྱད་པར་དུ་འཕགས་པའོ། །དང་པོ་ནི། དྲིལ་བུ་པས་གསུངས་པ་ལྟར་དཀྱིལ་འཁོར་གསུམ་དུ་ཕྱེ་བའི་ཚེ་དཀྱིལ་འཁོར་དང་པོ་གཉིས་ལས་ལུས་དཀྱིལ་རྒྱུའི་སྒོ་ནས་ཁྱད་པར་དུ་འཕགས་ཏེ། དང་པོ་གཉིས་ནི་ལྷ་བཟོ་བ་སོགས་ཀྱིས་ཚོན་ལ་སོགས་པའི་སྒོ་ནས་གསར་དུ་བཅོས་པ་ཡིན་པ་དང་། དཀྱིལ་འཁོར་དེར་དབང་བསྐུར་བའི་བྱ་བ་རྫོགས་ནས་དབེན་པའི་གནས་སུ་བཞག་པའམ་ཆུ་བོ་སོགས་སུ་དོར་བར་བྱ་བ་ཡིན་གྱི་འཇའ་ལུས་རྡོ་རྗེའི་སྐུར་འགྱུར་བའི་རྒྱུ་མ་ཡིན་ལ། ལུས་ཀྱི་དཀྱིལ་འཁོར་ནི་ཕ་མའི་ཁུ་ཁྲག་ལས་བུ་ཚའི་ལུས་གྲུབ་པའི་ཚེ་ལྷ་བཟོ་བ་སོགས་ཀྱིས་གསར་དུ་བཅོས་པ་ལ་མ་ལྟོས་པར་རྟེན་དང་བརྟེན་པའི་དཀྱིལ་འཁོར་རང་བཞིན་ལྷུན་གྲུབ་ཀྱི་ཚུལ་གྱིས་གྲུབ་པའི་ཕྱིར་དང་། དེ་ཉིད་ལམ་གྱི་གནས་སྐབས་སུ་བསྒོམས་པས་འཇའ་ལུས་རྡོ་རྗེའི་སྐུར་འགྱུར་བའི་ཕྱིར་རོ། །འདི་ཡང་སྔར་གྱི་ལུང་གིས། ཡང་དག་དོན་མཐོང་གྲོལ་ཕྱིར་རོ། །ཞེས་པའི་དོན་ཏེ་ལུས་ཉིད་ལྷར་མཐོང་ན་གྲོལ་ཞེས་པའི་སྒོ་ནས་བཅོས་མ་གཉིས་ལས་ཁྱད་པར་དུ་འཕགས་པར་བསྟན་པའི་ཕྱིར་རོ། །གཉིས་པ་ནི། རྩ་བའི་རྒྱུད་ལས། ཇི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་དུ་ཕྱེ། །ཞེས་པས། རང་གི་ངོ་བོ་སྤྲོས་པ་གཅོད་ཚུལ་གྱི་སྒོ་ནས་ཕྱི་དཀྱིལ་ལས་ཁྱད་པར་དུ་འཕགས་པར་བསྟན་ཏེ། ཕྱི་རོལ་དུ་སྣང་བ་ཆར་ཚུལ་ནང་དུ་རྩ་ཁམས་ཀྱི་དབང་གིས་བྱུང་བས་ནང་གི་རྩ་ཁམས་ལྷར་བསྒོམས་ཏེ་སྒྲོ་འདོགས་ཆོད་པ་ན་ཕྱི་རོལ་གི་སྣང་བ་ཐམས་ཅད་ལ་སྒྲོ་འདོགས་ཅིག་ཆར་དུ་ཆོད་ཅིང་། དེ་ལྟ་བུའི་སྒྲོ་འདོགས་གཅོད་ཚུལ་དེ་ཕྱི་དཀྱིལ་ལ་མེད་པའི་ཕྱིར་རོ། །ཇི་ལྟར་མེད་ན་ཕྱི་དཀྱིལ་ལ་མཉམ་བཞག་དང་། རྗེས་སྤྱོད་ཀྱི་ཉམས་ལེན་གཉིས་ལས། དང་པོ་ནི་ཡེ་ཤེས་ཚོགས་བསག་གིས་སྣང་བ་ཐམས་ཅད་སྟོང་པ་ཉིད་དུ་སྦྱངས་ནས་དེའི་ངང་ལས་སེམས་གསལ་ཙམ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོར་བསྒོམས་ཏེ་ཕྱི་རོལ་གྱི་སྣང་བ་ཐམས་ཅད་དེ་དང་དབྱེར་མེད་དུ་སྦྱང་གཞི་སྦྱོང་བྱེད་སྦྱར་ནས་བསྒོམ་པ་ཙམ་ཡིན་གྱི། སྣང་བ་འཆར་བའི་གཞི་ལུས་འདི་ལ་གནད་དུ་བསྣུན་ནས་བསྒོམ་པ་མ་ཡིན་པའི་ཕྱིར་དང་། རྗེས་སྤྱོད་ཀྱི་ཉམས་ལེན་ཡང་སྣང་བ་ཉིད་ལ་ཐ་མལ་དུ་ཞེན་པ་ནམ་སྐྱེས་པའི་ཚེ་དེ་བཀག་ནས་ལྷའི་ངོ་བོར་ཞེན་པ་ཙམ་ལས་མེད་པའི་ཕྱིར་རོ། །མདོར་ན་སེམས་ཀུན་གཞི་ལ་བག་ཆགས་བསགས་ཚད་ལུས་ལ་རྩ་ཁམས་ཀྱི་ཚུལ་གྱིས་ཚང་། དེར་ཚང་ཚད་ཕྱི་རོལ་དུ་སྣང་བ་སྣ་ཚོགས་འཆར་བའི་རིམ་པ་གསུམ་ཡོད་པ་ལས། ཕྱི་དཀྱིལ་ལ་རིམ་པ་ཕྱི་མ་ལ་གནད་དུ་བསྣུན་ནས་བསྒོམ་པ་ལས་གཞན་མེད་ཅིང་དེས་ནང་གི་རྒྱུ་ལ་སྒྲོ་འདོགས་གཅོད་མི་ནུས་ལ་ལུས་དཀྱིལ་གྱིས་རིམ་པ་བར་མ་ལ་གནད་དུ་བསྣུན་པས་དེའི་དབང་གིས་འཆར་བའི་རིམ་པ་ཕྱི་མ་ལ་སྒྲོ་འདོགས་གཅོད་ནུས་པ་ནི་ཟབ་ཁྱད་ཀྱི་དངོས་གཞིའོ། །གསུམ་པ་ནི། འབྲས་བུའི་རྫོགས་པའི་རིམ་པའི་ལྟ་བ་འདྲེན་པའི་སྒོ་ནས་ཀྱང་ཕྱི་དཀྱིལ་ལས་ཁྱད་པར་དུ་འཕགས་པ་ཡིན་ཏེ། ཕྱི་དཀྱིལ་བསྒོམས་པས་ཐ་མལ་གྱི་རྣམ་རྟོག་སྤངས་ནས་ལྟ་བ་ངོ་བོ་ཉིད་གསུམ་འདྲེན་ནུས་ཀྱང་གྱ་ནོམ་ལྷར་ཞེན་གྱི་རྣམ་རྟོག་སྤངས་ནས་རྫོགས་རིམ་གི་ལྟ་བ་འདྲེན་མི་ནུས་ལ། ལུས་དཀྱིལ་གྱིས་སྔ་མ་མ་ཟད་གྱ་ནོམ་ལྷར་ཞེན་གྱི་རྣམ་རྟོག་སྤངས་ནས་རྫོགས་རིམ་གྱི་ལྟ་བ་འདྲེན་ནུས་པའི་ཕྱིར་རོ། །འདི་ཡང་རྡོ་རྗེའི་ཚིག་རྐང་ལས་ལམ་གྱི་ཐུན་བཞི་ལ་དབང་བཞི་བསྒོམས་པས་ལུས་ལ་བརྟེན་ནས་བདེ་ཆེན་གྱི་སྒྲིབ་པ་འགག་ཅིང་འཚང་རྒྱ་བར་གསལ་བས་བཤད་རྒྱུད་ཅེས་པས་སྟོན་ཏེ། བདེ་ཆེན་ནི་རྫོགས་རིམ་གྱི་ཡེ་ཤེས་ཡིན་ལ། དེའི་སྒྲིབ་པ་ནི་ཤེས་བྱའི་སྒྲིབ་པ་ཉམས་སྐྱོན་ཅན་བརྒྱད་དེ། བུམ་དབང་གི་སྣང་ཕྱོགས་དང་། སྟོང་ཕྱོགས་ཀྱི་ངོ་བོ་ཉིད་གཉིས། གསང་དབང་གི་ཉོན་མོངས། རྣམ་རྟོག སྣྲེལ་ཞི་རང་འབྱུང་གསུམ། དབང་གོང་མ་གཉིས་ཀྱི་དགའ་བ་དང་པོ་གསུམ་སྟེ་བརྒྱད་དོ། །དེ་འགག་ཅིང་ཉམས་སྐྱོན་མེད་གསུམ་བསྐྱེད་པའི་སྒོ་ནས་འཚང་རྒྱ་བར་གསལ་བས་ལུས་བཤད་རྒྱུད་ཡིན་ཏེ། རྟོགས་པར་བྱ་རྒྱུ་སེམས་ཀུན་གཞི་ལུས་ལ་གནད་དུ་སྣུན་པ་ལས་རྟོགས་པའི་ཕྱིར་རོ། །ཞེས་པའི་དོན་ཏོ། །གལ་ཏེ་དེ་ལྟར་ན་དབང་བཞི་བསྒོམས་པས་བདེ་ཆེན་གྱི་སྒྲིབ་པ་འགག་ཅིང་འཚང་རྒྱ་བར་གསུངས་ཀྱི་ལུས་དཀྱིལ་གྱི་བྱེད་པར་མ་སོང་ངོ་སྙམ་ན། དེ་ནི་ལུས་ལ་བརྟེན་ནས་ཞེས་པ་དང་། ལུས་བཤད་རྒྱུད་ཅེས་པའི་དོན་མ་རྟོགས་པ་སྟེ། རྒྱུ་ལུས་ལ་བརྟེན་ནས་རྐྱེན་དབང་བཞི་བསྒོམས་པས་ལུས་ཉིད་ཀྱིས་བདེ་ཆེན་གྱི་སྒྲིབ་པ་འགག་ཅིང་འཚང་རྒྱ་བར་གསལ་བས་ལུས་བཤད་རྒྱུད་ཅེས་པའི་དོན་ཡིན་པའི་ཕྱིར་ཏེ། གཞུང་བཤད་རྣམས་ལས། སྤང་བྱ་ཡང་ལུས་ལ་སྤང་། ས་ལམ་ཡང་ལུས་ལ་བགྲོད། འབྲས་བུ་ཡང་ལུས་ལ་མངོན་དུ་འགྱུར་པའི་དོན་དུ་བཤད་པའི་ཕྱིར་རོ། །འོ་ན་དེ་ལྟར་དབང་བཞི་ཆར་གྱི་ལྟ་བ་འདྲེན་ནུས་ན་དབང་བཞི་ཆར་གྱི་ལམ་ཚང་བར་འགྱུར་རོ་ཞེ་ན། དེ་ནི་ཤིན་དུ་ཡང་ཚང་སྟེ། བརྒྱུད་པ་འདིའི་ལུགས་ཀྱིས་ཐོག་མར་སྨིན་བྱེད་ཀྱི་དབང་བཞི་ཐོབ་ནས། དེའི་འོག་ཏུ་བླ་མ་ལས་ལམ་དུས་ཀྱི་དབང་བླངས་ཏེ་ལམ་གྱི་ཐུན་བཞིར་བསྒོམས་པ་ཡིན་གྱིས་བུམ་དབང་ཙམ་ལ་བརྟེན་པའི་ལམ་དུས་ཀྱི་དབང་ཡང་མེད་ཅིང་། ལམ་དུས་ཉིད་ལ་ཡང་རྒྱུ་དུས་ལྟར་རིམ་གྱིས་པའི་རྣམ་གཞག་མེད་པས་ཐུན་རེ་ལ་ཡང་དབང་བཞི་ཆར་བསྒོམ་དགོས་ལ། དེ་ལྟ་བུའི་ལམ་དེ་ལ་དབང་ཉིད་ལ་ལམ་བཞི་ཚང་བའི་ཚུལ་དང་། མངོན་རྟོགས་ཚར་གཅིག་ལ་ལམ་བཞི་ཚང་བའི་ཚུལ་དང་། སྦྱོང་བྱེད་ལྷ་རེ་རེ་ལ་ལམ་བཞི་ཚང་བའི་ཚུལ་དང་། སྦྱང་གཞི་རྩ་ཁམས་རེ་རེ་ལ་ལམ་བཞི་ཚང་བའི་ཚུལ་བཞིས་རྟོགས་པར་བྱའོ། །དང་པོ་ལ་འཇུག་པའི་སྐབས་སུ་ཚང་བའི་ཚུལ་དང་། དངོས་གཞིའི་སྐབས་སུ་ཚང་བའི་ཚུལ་གཉིས་ལས། དང་པོ་ནི། བརྒྱུད་པའི་རིམ་པས་བྱིན་གྱིས་བརླབ་པ་ནི་རྒྱུ་དུས་ཀྱི་དབང་གི་ཆུ་བོ་དེ་ཉིད་ལམ་དུས་ཀྱི་དབང་གིས་ཆུ་བོར་བསྒྱུར་བ་ཡིན་པས་ལམ་བཞི་ཚང་། ལྷའི་རིམ་པས་བྱིན་གྱིས་བརླབ་པ་ནི་བུམ་དབང་གི་ལྟ་བ་བསྐྱེད་པ་ཡིན་པས་བུམ་དབང་གི་ལམ་ཚང་། སྔགས་ཀྱི་རིམ་པས་བྱིན་གྱིས་བརླབ་པ་ནི་གསང་དབང་གི་ལྟ་བ་བསྐྱེད་པ་ཡིན་པས་གསང་དབང་གི་ལམ་ཚང་། ཡེ་ཤེས་ཀྱི་རིམ་པས་བྱིན་གྱིས་བརླབ་པ་ནི་ཤེས་རབ་ཡེ་ཤེས་ཀྱི་ལྟ་བ་བསྐྱེད་པ་ཡིན་པས་དེའི་ལམ་ཚང་། དེ་ཁོ་ན་ཉིད་ཀྱི་རིམ་པས་བྱིན་གྱིས་བརླབ་པ་ནི་དབང་བཞིའི་ལྟ་བ་བསྐྱེད་པ་ཡིན་པས་དེའི་ལམ་ཚང་བ་ཡིན་ནོ། །གཉིས་པ་དངོས་གཞིའི་སྐབས་སུ་ཚང་ཚུལ་ནི་ལམ་དུས་ཀྱི་དབང་འདི་ཐོག་མར་བསྐུར་བའི་ཚེ་ན་ཡང་རིམ་གྱིས་པའི་ལུགས་མེད་པས་བཞི་ཆར་བསྐུར་བ་ཡིན་ལ། ཕྱིས་ལེན་པའི་ཚེ་རྒྱས་འབྲིང་བསྡུས་གསུམ་གང་བླངས་ཀྱང་བཞི་ཆར་བླང་དགོས་པས་ལམ་བཞི་ཆར་ཚང་བའོ། །གཉིས་པ་མངོན་རྟོགས་ཚར་གཅིག་ལ་ལམ་བཞི་ཚང་བའི་ཚུལ་ནི་སྲུང་བའི་འཁོར་ལོ་དང་གཞལ་ཡས་ཁང་ལུས་ལ་བསྒོམས་པས་བུམ་དབང་གི་ལམ་ཚང་། འཁོར་ལོ་བཞིའི་རྩ་འདབ་ལྷར་བསྒོམས་པས་གསང་དབང་གི་ལམ་ཚང་། ཕོ་བྲང་ལྔའི་གཙོ་བོ་ཡབ་ཡུམ་ཞལ་སྦྱོར་གི་རྣམ་པ་ཅན་བསྒོམས་པས་ཤེས་རབ་ཡེ་ཤེས་ཀྱི་དབང་གི་ལམ་ཚང་། ཡན་ལག་གི་ལྷ་ཉེར་གཉིས་བསྒོམས་པས་དབང་བཞི་པའི་ལམ་ཚང་སྟེ། ཡུལ་གྱི་ལྷ་མོ་དྲུག་བསྒོམས་པས་གཟུང་བའི་རྦ་རླབས་རེངས། ཡུལ་ཅན་གྱི་ལྷ་མོ་དྲུག་བསྒོམས་པས་འཛིན་པའི་རྦ་རླབས་རེངས། ཁྲོ་བོ་བཅུ་བསྒོམས་པས་ཚིགས་ཆེན་བརྒྱད། སྤྱི་བོ་རྐང་མཐིལ་གཉིས་ཀྱི་རྩ་མདུད་རྣམས་གྲོལ་བས་དབུ་མའི་རྦ་རླབས་རེངས་པའོ། །གསུམ་པ་སྦྱོང་བྱེད་ལྷ་རེ་རེ་ལ་ལམ་བཞི་ཚང་བའི་ཚུལ་ནི་ལུས་དཀྱིལ་གྱི་ལྷ་རེ་རེ་ཡང་སྐུ་དབྱིབས་ཞལ་ཕྱག་གི་རྣམ་པ་ཅན་དང་། དེ་ཡང་རྣམ་པ་བདེ་བར་འཆར་བ་དང་། བདེ་བ་དེ་ཡང་རང་བཞིན་གསལ་སྟོང་དུ་འཆར་བ་དང་། གསལ་སྟོང་དེ་ཡང་ཟུང་དུ་འཇུག་པར་འཆར་བའི་ཆ་ནས་རིམ་པ་ལྟར་དབང་བཞིའི་ལམ་ཚང་བའོ། །བཞི་པ་སྦྱང་གཞི་རྩ་ཁམས་རེ་རེ་ལ་ལམ་བཞི་ཚང་བའི་ཚུལ་ནི་སྦྱང་གཞི་རེ་རེ་ཡང་རྩའི་ཆ་ནས་བུམ་དབང་གི་ལམ་ཚང་། དེ་ཡང་ཡི་གེའི་དབྱིབས་སུ་ཡོད་པས་གསང་དབང་གི་ལམ་ཚང་། དེའི་ནང་བྱང་ཆུབ་ཀྱི་སེམས་ཀྱིས་གང་བ་དང་། དེ་དང་རླུང་དབྱེར་མེད་དུ་གནས་པའི་ཆ་ནས་གསུམ་པ་དང་། བཞི་པའི་ལམ་ཚང་བའོ། །གལ་ཏེ་དེ་ལྟར་ལུས་དཀྱིལ་ཉིད་ལ་ལམ་བཞི་ཆར་ཚང་ན། རྡོ་རྗེའི་ཚིག་རྐང་ལས། ལམ་དུ་བསྐྱེད་རིམ་སོགས་ལྔ་པ་བཞིས་བསྟན་ཅེས་པའི་བུམ་དབང་གི་ལམ་བསྐྱེད་རིམ་ལ་ཕྱི་བསྐྱེད་རིམ་དང་། ནང་བསྐྱེད་རིམ་གཉིས་སུ་གསུངས་པ་དང་། བརྡ་དོན་གསལ་བར་དབང་བཞིའི་ལམ་བཞིར་ཕྱེ་བའི་ཚེ་བུམ་དབང་གི་ལམ་ལུས་དཀྱིལ་ཉིད་ལ་གསུངས་པ་དང་འགལ་ལོ་སྙམ་ན། དེའི་དོན་ནི་སྦྱང་གཞི་ལ་ལུས་རྩ་གཙོ་ཆེ་བ་དང་། སྦྱོང་བྱེད་ལ་དབྱིབས་ཀྱི་ལམ་ཞལ་ཕྱག་གི་རྣམ་པ་ཅན་བསྒོམ་པས་བུམ་དབང་གི་ལམ་གཙོ་ཆེ་བ་ལ་དགོངས་ནས་བུམ་དབང་གི་ལམ་དུ་བཤད་པས་འགལ་བ་ཅུང་ཟད་ཀྱང་མེད་དོ། །གཉིས་པ་ཁྱད་པར་དུ་འཕགས་པའི་ལུས་དཀྱིལ་གྱི་སྒྲ་དོན་ནི། ཅིའི་ཕྱིར་ལུས་ཀྱི་དཀྱིལ་འཁོར་ཞེས་བྱ་ཞེ་ན། དཀྱིལ་འཁོར་གྱི་སྒྲ་དོན་ནི་སྔར་བཤད་ཟིན་ལ། ལུས་ཀྱི་སྒྲ་དོན་འདི་ལ་དཔྱོད་ལྡན་གྱི་དོགས་པའི་གནས་དགོད་པ་དང་། དེའི་ལན་གྱིས་སྒོ་ནས་ངེས་ཤེས་བསྐྱེད་པ་གཉིས་ལས། དང་པོ་ནི། ལུས་ཞེས་པ་རྡོས་བཅས་ཀྱི་ལུས་ལ་བྱེད་ན། བཤད་རྒྱུད་རྡོ་རྗེ་ཕྲེང་བ་ལས། མིག་གི་རྣམ་ཤེས་མེ་ལོང་སྟེ། །ཞེས་སོགས་རྣམ་ཤེས་རྟེན་ལུས་དཀྱིལ་དུ་བསྒོམ་པའི་ཚུལ་དང་། རྗེས་སུ་ཆགས་པའི་རྡོ་རྗེ་ནི། །ཚོར་བ་ཡི་ནི་ཕུང་པོར་བཞུགས། །ཞེས་སོགས་ཚོར་བ་རིན་ཆེན་འབྱུང་ལྡན། འདུ་ཤེས་འདོད་དཔག་མེད། འདུ་བྱེད་དོན་ཡོད་གྲུབ་པ། རྣམ་ཤེས་མི་བསྐྱོད་པར་བསྒོམ་པ་དང་། འདིར་ཡང་ཡིད་བདག་མེད་རྣལ་འབྱོར་མར་བསྒོམ་པ་བརྟེན་པ་ལུས་དཀྱིལ་དུ་བཤད་པ་དང་འགལ་ལོ། །སྒོམ་པ་པོ་རྣལ་འབྱོར་པའི་སྦྱང་གཞི་ལ་ཇི་ལྟར་ཡོད་པ་ལུས་སུ་འཇོག་ན། ཨ་བྷི་དྷ་ན་ལས་མ་མོ་བཅུ་གཉིས་ཕྱག་བཅུ་གཉིས་ལ་བསྒོམ་པར་གསུངས་ཤིང་། འདི་ཉིད་རྗེ་བཙུན་གྱིས་རྣལ་འབྱོར་མ་ཀུན་སྤྱོད་ཀྱི་ཊཱི་ཀར་ལུས་དཀྱིལ་དུ་བཤད་པ་དང་འགལ་ལོ་སྙམ་དུ་དོགས་པའོ། །གཉིས་པ་ལ་གསུམ་སྟེ་ཐོག་མར་དཔེ་འགོད་པ། དེ་ཉིད་དོན་དང་སྦྱར་བ། དོགས་པའི་གནས་གཞན་དཔྱད་པའོ། །དང་པོ་ནི། ལུས་ཞེས་པའི་སྒྲ་འཇུག་པའི་གཞི་ཆོས་མངོན་པ་ལས་ཀྱང་བཞི་གསུངས་ཏེ། དབང་པོ་ལྔ་བགྲང་བའི་ཚེ་ལུས་དབང་ཁོ་ན་ལ་ལུས་ཀྱི་སྒྲ་འཇུག ཚོར་བ་ལ་ལུས་ཚོར་དང་སེམས་ཚོར་གཉིས་སུ་ཕྱེ་བའི་ཚེ། དབང་པོ་གཟུགས་ཅན་ལྔ་ཆར་ལ་ལུས་ཀྱི་སྒྲ་འཇུག ཡང་ཚོར་བ་ལ་ཞེན་པ་བརྟེན་པ་དང་མངོན་པར་འབྱུང་བ་བརྟེན་པ་གཉིས་སུ་ཕྱེ་བའི་ཚེ། ཉེར་ལེན་གྱི་ཕུང་པོ་ཙམ་ལ་ལུས་ཀྱི་སྒྲ་འཇུག་སྟེ། ཆོས་མངོན་པ་ལས། ཞེན་པ་བརྟེན་པ་གང་ཞེ་ན་གང་ལུས་ལ་སྲེད་པ་དང་མཚུངས་པར་ལྡན་པའོ་ཞེས་ཉེར་ལེན་གྱི་ཕུང་པོ་ལ་སྲེད་པ་ལ་ལུས་ལ་སྲེད་པར་གསུངས་པའི་ཕྱིར་རོ། །ཡང་རྡུལ་ཕྲ་རབ་ལུས་མེད་པར་རིགས་པར་བྱའོ་ཞེས་གསུངས་པའི་སྐབས་སུ་རྫས་སུ་གྲུབ་པ་ཙམ་ལ་ལུས་ཀྱི་སྒྲ་འཇུག་སྟེ། རྫས་སུ་མེད་པའི་དོན་ལ་ལུས་མེད་པར་གསུངས་པའི་ཕྱིར་རོ། །གཉིས་པ་ནི། དཔེ་དེ་བཞིན་དུ་རྡོ་རྗེ་ཐེག་པ་འདིར་ཡང་ལུས་ཀྱི་སྒྲ་འཇུག་པའི་གཞི་མང་དུ་གསུངས་ཏེ། རིགས་དྲུག་གི་སེམས་ཅན་གྱི་ཉེར་ལེན་གྱི་ཕུང་པོ་ཙམ་དང་། རྡོ་རྗེའི་ལུས་སྐྱོན་མེད་པ་དང་། གསང་བ་ཆོས་ཀྱི་དཀྱིལ་འཁོར་གསུམ་གྱི་ནང་ནས་རྩ་ཁོ་ན་དང་། རྡོ་རྗེའི་ལུས་ཀྱི་དབང་རྟེན་ཁོག་པ་དང་། རྟེན་དཀྱིལ་འཁོར་བཞི་ཀ་དང་། གཙོ་བོའི་ལུས་ཙམ་ལ་ལུས་ཀྱི་སྒྲ་འཇུག་པ་དང་དྲུག་གོ །དང་པོ་ནི། རྩ་རྒྱུད་ལས། ལུས་ལ་ཡེ་ཤེས་ཆེན་པོ་གནས། །རྟོགས་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་པ་འདི་རང་བཞིན་ལྷན་སྐྱེས་ལ་སྦྱར་བ་དང་། ཞུ་བདེ་ལྷན་སྐྱེས་ལ་སྦྱར་བ་གཉིས་ལས། དང་པོའི་སྐབས་སུ་རིགས་དྲུག་གི་སེམས་ཅན་གྱི་ཉེར་ལེན་གྱི་ཕུང་པོ་ཙམ་ལ་ལུས་ཀྱི་སྒྲ་འཇུག་སྟེ། སྐབས་དེར་ལུས་ནི་ཉོན་མོངས་དང་བཅས་པའི་ལུས་དང་། ཡེ་ཤེས་ཆེན་པོ་ནི་རྒྱུད་བླའི་བདེ་གཤེགས་སྙིང་པོ་སྟོན་པའི་གཞུང་ཤེས་བྱེད་དུ་མཛད་ནས་སངས་རྒྱས་ཀྱི་ཡེ་ཤེས་གནས་པ་ལ་གསུངས་པའི་ཕྱིར་རོ། །གཉིས་པ་ནི་སྔར་གྱི་གཞུང་དེ་ཉིད་ཞུ་བདེ་ལྷན་སྐྱེས་ལ་སྦྱར་བའི་ཚེ་རྡོ་རྗེའི་ལུས་སྐྱོན་མེད་ལ་ལུས་ཀྱི་སྒྲ་འཇུག་སྟེ། ལུས་ལ་ཡེ་ཤེས་ཆེན་པོ་གནས་པའི་ཚུལ་ཡང་། དངོས་པོ་ཀུན་ལ་ཁྱབ་པ་པོ། །ཞེས་པའི་དོན་ལུས་ཐམས་ཅད་ལ་རྩས་ཁྱབ། དེ་ཐམས་ཅད་ལ་བྱང་ཆུབ་ཀྱི་སེམས་ཀྱིས་ཁྱབ། དེ་ཐམས་ཅད་ལ་ཚོར་བ་བདེ་བས་ཁྱབ། དེ་ལ་མི་རྟོག་པས་ཁྱབ་པའི་དོན་དུ་བཤད་ནས། ཀྱཻ་བཅོམ་ལྡན་འདས་རྡོ་རྗེའི་ལུས་ལ་རྩ་དུ་ལགས་ཞེས་པ་དང་འགྲེལ་པར་མཛད་པའི་ཕྱིར་རོ། །གསུམ་པ་ནི། དཀྱིལ་འཁོར་ལུས་སུ་གསུངས་པ་སྟེ་ཞེས་པའི་སྐབས་སུ་རྟེན་དཀྱིལ་འཁོར་བཞིའི་ནང་ནས་རྩ་ཁོ་ན་ལ་ལུས་ཀྱི་སྒྲ་འཇུག་སྟེ། གསང་བ་ཆོས་ཀྱི་དཀྱིལ་འཁོར་གསུམ་གྱི་ནང་ནས་དང་པོ་ལ་ལུས་ཞེས་གསུངས་པའི་ཕྱིར་རོ། །བཞི་པ་ནི། ཁ་སྦྱོར་ལས། ལུས་ནི་དཀྱིལ་འཁོར་ཉམས་དགའ་བ། །ཞེས་དང་། སློབ་དཔོན་རྡོ་རྗེ་དྲིལ་བུ་པས། རྒྱན་རྣམས་རབ་མཛེས་ཧེ་རུ་ཀའི། །ལུས་ནི་དཀྱིལ་འཁོར་ཉིད་དུ་འདོད། །ཅེས་རྟེན་ལུས་དཀྱིལ་གྱི་སྐབས་སུ་དབང་རྟེན་ཁོག་པ་ལ་ལུས་ཀྱི་སྒྲ་འཇུག་སྟེ། དེའི་དཀྱིལ་འཁོར་ངོས་འཛིན་པའི་སྐབས་སུ་རྐང་མཐིལ་ནས་སྒལ་ཚིགས་དང་། མགོ་བོའི་བར་དང་། ལུས་ཡན་མན་དང་། ཕན་ཚུན་མཉམ་པ་དང་། རྐང་བརྒྱད་པོ་རྣམས་ལ་ངོས་འཛིན་པར་མཛད་ཅིང་། མན་ངག་གི་སྐབས་སུ་མིག་པཉྩ་རེ་ཁཱའི་རྩིག་པ་སོགས་གསུངས་པ་ཡང་དབང་རྟེན་ཉིད་ལ་ངོས་འཛིན་པར་མཛད་པའི་ཕྱིར་རོ། །ལྔ་པ་ནི། རྡོ་རྗེའི་ཚིག་རྐང་ལས། ལུས་ཐབས་རྒྱུད་སོགས་ལ་ཞེས་དང་། ལུས་ལ་བརྟེན་ནས་བདེ་ཆེན་གྱི་སྒྲིབ་པ་འགག་ཅིང་ཞེས་པའི་སྐབས་སུ་རྟེན་དཀྱིལ་འཁོར་བཞི་ལ་ལུས་ཀྱི་སྒྲ་འཇུག་སྟེ། རྟེན་དཀྱིལ་འཁོར་བཞི་ལ་གནད་དུ་བསྣུན་པས་སེམས་ཀུན་གཞི་རྟོགས་པའི་རྒྱུ་མཚན་གྱིས་ལུས་ཐབས་རྒྱུད་དང་བཤད་རྒྱུད་དུ་གསུངས་པའི་ཕྱིར་རོ། །དྲུག་པ་ནི། རྗེ་བཙུན་གྱིས་ཀུན་སྤྱོད་ཀྱི་འགྲེལ་པར་གཙོ་བོའི་ཕྱག་བཅུ་གཉིས་ལ་མ་མོ་བཅུ་གཉིས་བཀོད་པ་ཡང་ལུས་དཀྱིལ་དུ་གསུངས་པའི་རིགས་པས་གཙོ་བོའི་ལུས་ཙམ་ལ་ལུས་ཞེས་པའི་ཐ་སྙད་གྲུབ་བོ། །དེས་ན་གནད་ཀྱི་དོན་ནི། ཐ་སྙད་དང་པོའི་དབང་དུ་མཛད་ནས། མིག་གི་རྣམ་ཤེས་མེ་ལོང་སོགས་དང་། ཚོར་བ་རིན་ཆེན་འབྱུང་ལྡན་སོགས་བཤད་རྒྱུད་རྡོ་རྗེ་ཕྲེང་བ་ལས་གསུང་པ་རྣམས་ཀྱང་ལུས་དཀྱིལ་དུ་གྲུབ་ལ། ཐ་སྙད་གསུམ་པའི་དབང་དུ་བྱས་ནས། དྲིལ་བུ་ལུས་དཀྱིལ་དུ་མ་མོ་བཅུ་གཉིས་སྙིང་གའི་རྩ་འདབ་ལ་བཀོད་པ་དང་། ཀྱཻ་རྡོ་རྗེའི་ཕོ་བྲང་ལྔའི་རྩ་འདབ་ལ་ལྷ་མོ་བཀོད་པ་རྣམས་ཀྱང་ལུས་དཀྱིལ་དུ་གྲུབ་བོ། །ཐ་སྙད་བཞི་པའི་དབང་དུ་བྱས་ནས་རྐང་མཐིལ་རླུང་ལ་སོགས་པའི་གཞལ་ཡས་ཁང་གི་རྟེན་དང་། ལུས་འདོམ་གང་གྲུ་བཞི་ལ་སོགས་པའི་གཞལ་ཡས་ཁང་གི་ཆོས་དང་། སྤྱི་བོ་སྣ་ཚོགས་རྡོ་རྗེ་ལ་སོགས་པའི་སྲུང་འཁོར་རྣམས་ཀྱང་ལུས་དཀྱིལ་དུ་གྲུབ་བོ། །ཐ་སྙད་ལྔ་པའི་དབང་དུ་བྱས་ནས་འཁོར་ལོ་བདེ་མཆོག་གི་སྙིང་གའི་ཧཱུྃ་གཙོ་བོ་ཡབ་ཡུམ་དང་། ཡུལ་ཉི་ཤུ་རྩ་བཞིའི་དཔའ་བོ་དང་དཔའ་མོ་རྣམས་དང་། ཀྱཻ་རྡོ་རྗེའི་ཕོ་བྲང་ལྔའི་གཙོ་བོ་ཡབ་ཡུམ་རྣམས་ལུས་དཀྱིལ་དུ་གྲུབ་སྟེ། ཕྱི་ཤུན་གྱི་རྩ་དཔའ་མོར་བསྒོམ་པའི་ཚེ་ཡི་གེ་ཉིད་ཀྱང་བསྒོམ་པར་སོང་བའི་ཕྱིར་དང་། དེའི་ནང་གི་བྱང་ཆུབ་ཀྱི་སེམས་དཔའ་བོར་བསྒོམས་པའི་ཚེ་དེ་དང་དབྱེར་མེད་ཀྱི་རླུང་ཡང་བསྒོམས་པར་སོང་བའི་ཕྱིར་རོ། །ཐ་སྙད་དྲུག་པའི་ཚེ་ཨ་བྷི་དྷ་ནའི་དགུ་པར། མཁའ་འགྲོ་མ་ནི་རྡོ་རྗེ། ལཱ་མ་ནི་དྲིལ་བུ། དུམ་སྐྱེས་མ་དང་གཟུགས་ཅན་མ་ནི་གླང་པོ་ཆེའི་ལྤགས་པ་འཛིན་པའི་ཁུ་ཚུར། ཁྭ་གདོང་མ་ནི་རྡོ་རྗེ་མདུང་། འུག་གདོང་མ་ནི་ལྕགས་ཀྱུ། ཁྱི་གདོང་མ་ནི་གྲི་གུག ཕག་གདོང་མ་ནི་ཅང་ཏེའུ། གཤིན་རྗེ་སྲེག་མ་ནི་ཐོད་པའི་ཁ་ཊཱཾ་ག གཤིན་རྗེ་ཕོ་ཉ་མ་ནི་ཞགས་པ། གཤིན་རྗེ་མཆེ་བ་མ་ནི་ཚངས་པའི་མགོ་བོ། གཤིན་རྗེ་འཇོམས་མ་ནི་དགྲ་སཏྭ། བྱང་ཆུབ་ཀྱི་སེམས་ཀྱི་སྣོད་ནི་ཞལ་བཞིའི་ངོ་བོ་ཞེས་གསུངས་པའི་དོན་རྗེ་ས་ཆེན་གྱི་ནག་པོ་པའི་སྐབས་སུ་མ་མོ་བཅུ་གཉིས་ཕྱག་བཅུ་གཉིས་ལ་འགོད་པར་མཛད། རྗེ་བཙུན་གྱིས་ལཱུ་ཧི་པའི་སྐབས་སུ་དེ་ལྟར་མཛད་པ་ལ་ཡང་ལུས་དཀྱིལ་གྱི་ཐ་སྙད་ཐོབ་སྟེ། ཕྱི་དཀྱིལ་གྱི་ལྷ་གྲངས་གཙོ་བོའི་ལུས་ལ་བཀོད་པ་ཡིན་པའི་ཕྱིར་རོ། །དེ་ཐམས་ཅད་ཀྱང་རྡོ་རྗེའི་ལུས་སྐྱོན་མེད་ལ་ལྷ་བསྒོམས་ནས་དེ་ལ་དཀྱིལ་འཁོར་གི་ལྷ་བཀོད་པ་ཡིན་པས་ལུས་དཀྱིལ་ཐམས་ཅད་ཀྱི་ཐ་སྙད་འདི་ལ་རག་ལས་སོ། །དེ་ལྟར་ལུས་དཀྱིལ་དུ་འཇོག་པའི་འཇོག་མཚམས་མང་དུ་ཡོད་པའི་ནང་ནས་གཙོ་བོ་ནི་ཉོན་མོངས་ལྔ་དང་ཕུང་པོ་ལྔ་སྦྱངས་ནས་ཡེ་ཤེས་ལྔ་བསྒྲུབ་པའི་དབང་དུ་བྱས་པ་དང་། གནས་དེ་དང་དེའི་རླུང་སེམས་དབུ་མར་ཐིམ་པ་ལས་སའི་རྟོགས་པ་བསྐྱེད་པའི་དབང་དུ་བྱས་པ་གཉིས་ཡིན་པ་ལས། དང་པོ་ནི། ཀྱཻ་རྡོ་རྗེར་ཕོ་བྲང་ལྔའི་ལུས་དཀྱིལ་བསྒོམ་པ་འདི་ཉིད་ཡིན་ཞིང་། ཕྱི་མ་ལ་ཕ་རོལ་དུ་ཕྱིན་པའི་ཐེག་པ་དང་ལུང་སྒོ་བསྟུན་གྱི་དབང་དུ་བྱས་ནས་ས་བཅུ་བགྲོད་པའི་ལུས་དཀྱིལ་ནི་རྣལ་འབྱོར་མ་ཀུན་སྤྱོད། རྡོ་རྗེ་མཁའ་འགྲོའི་ལུས་དཀྱིལ་སྟོན་པའི་སྐབས་རྣམས་སུ་འཁོར་ལོ་གསུམ་གྱི་ལུས་དཀྱིལ་ཁོ་ན་གསུངས་ཤིང་། ལཱུ་ནག་གཉིས་ཀྱི་གཞུང་གི་དངོས་བསྟན་ལ་ཡང་འཁོར་ལོ་གསུམ་གྱི་ལུས་དཀྱིལ་ཁོ་ན་གསུངས་པ་ལྟ་བུ་སྟེ། བདེ་མཆོག་རྩ་རྒྱུད་དང་། སཾ་བུ་ཊི་ལས། གནས་ནི་རབ་ཏུ་དགའ་བའི་ས་ཞེས་པ་ནས། ཉེ་བའི་དུར་ཁྲོད་ཆོས་ཀྱི་སྤྲིན། །ཞེས་པའི་བར་གསུངས་ནས། ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཞེས་གསུངས་པ་ལས་ཤེས་སོ། །རྡོ་རྗེ་ཐེག་པའི་ཐུན་མོང་མ་ཡིན་པའི་ས་བཅུ་གསུམ་བགྲོད་པའི་ལུས་དཀྱིལ་ནི། སཾ་བུ་ཊི་ལས། རྩ་སུམ་ཅུ་སོ་གཉིས་བཤད་པའི་རྗེས་སུ། ལུས་ཅན་སྙིང་གི་ནང་དུ་ཡང་། །རྩ་རྣམས་ལྔ་ནི་ཡང་དག་གནས། །ཞེས་གསུངས་པ་ལ་བརྟེན་ནས་སློབ་དཔོན་རྡོ་རྗེ་དྲིལ་བུ་པས་འཁོར་ལོ་གསུམ་གྱི་ལུས་དཀྱིལ་སྔ་མ་དང་འདྲ་བ་ལས། སྙིང་ཁར་རྩ་ཨ་ཝ་དྷཱུ་ཏཱི་ཧཱུྃ་གིས་དབྱིབས་ཅན་གཙོ་བོ་ཡབ་ཡུམ་དང་། ཕྱི་ནང་གི་རྩ་འདབ་བཅུ་གཉིས་མ་མོ་བཅུ་གཉིས་སུ་བསྒོམ་པར་གསུངས་པ་ལྟ་བུ་སྟེ། སྒོ་མཚམས་མ་བརྒྱད་ཀྱི་རྩའི་རླུང་སེམས་དབུ་མར་ཐིམ་པས་ས་བཅུ་གཅིག་པ་དང་། བཅུ་གཉིས་པ་སྙིང་པོའི་རྣལ་འབྱོར་མ་བཞི་དང་། གཙོ་བོ་ཡབ་ཡུམ་གྱི་རྩའི་རླུང་སེམས་དབུ་མར་ཐིམ་པས་ས་བཅུ་གསུམ་པའི་རྟོགས་པ་བསྐྱེད་པའི་དབང་དུ་བྱས་པའོ། །རྗེ་བཙུན་རྡོ་རྗེ་བདག་མེད་མའི་ལུས་དཀྱིལ་ལ་ནི་ཕོ་བྲང་ལྔའི་ལུས་དཀྱིལ་དང་། ཡུལ་སུམ་ཅུ་སོ་གཉིས་ཀྱི་ལུས་དཀྱིལ་གཉིས་ཀ་བསྒོམས་པས་སྔར་གྱི་གཙོ་བོར་འཇོག་པའི་འཇོག་མཚམས་གཉིས་ཀ་ཚང་སྟེ་འདི་ནི་ཤིན་དུ་ཟབ་པའོ། །གསུམ་པ་དོགས་པའི་གནས་གཞན་དཔྱད་པ་ནི་དེ་ལྟར་གཙོ་བོའི་ལུས་ལ་བཀོད་པ་ཙམ་གྱིས་ལུས་དཀྱིལ་དུ་འགྱུར་ན། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་པའི་ལྷ་རྣམས་ཀྱང་ལུས་དཀྱིལ་དུ་འགྱུར་རོ་སྙམ་ན། སྒྲ་བཤད་དུ་ཡོད་པ་ལ་འཇུག་ཏུ་ཡོད་པས་མ་ཁྱབ་པ་མཚོ་སྐྱེས་ཀྱི་སྒྲ་བཞིན་དུ་ཤེས་པར་བྱའོ། །གསུམ་པ་སྒྲ་དེ་ལྡན་གྱི་ལུས་དཀྱིལ་གྱི་དབྱེ་བ་ལ་གཉིས་ཏེ། བསྒོམ་པའི་གནས་སྐབས་ཀྱི་སྒོ་ནས་དབྱེ་བ་དང་། བསྒོམ་བྱ་ལུས་ཀྱི་སྒོ་ནས་དབྱེ་བའོ། །དང་པོ་ལ་གཉིས་ཏེ། ལུས་དཀྱིལ་རྐྱང་པ་བསྒོམ་པའི་ཚུལ་དང་། ཕྱི་ནང་སྦྲགས་ནས་བསྒོམ་པའི་ཚུལ་ལོ། །དང་པོ་ནི་བདེ་མཆོག་དྲིལ་བུ་ལུས་དཀྱིལ་དང་། ངག་དབང་གྲགས་པའི་གཉུག་མ་དྲན་གསལ་གྱི་ལུས་དཀྱིལ་དང་། ལམ་སོགས་ཉི་ཤུའི་སྐབས་ཀྱི་ཡིག་ཆུང་ནས་བཤད་པའི་ཀྱཻ་རྡོ་རྗེའི་ལུས་དཀྱིལ་རྣམས་སོ། །གཉིས་པ་ལ་ལུས་དཀྱིལ་གསལ་འདེབས་ཚུལ་གྱི་སྒོ་ནས་བཞི་ཙམ་འབྱུང་སྟེ། ལུས་ལ་རང་བཞིན་གྱིས་གྲུབ་པ་དེ་ཉིད། བསྐྱེད་ཆོག་གི་སྒོ་ནས་གསལ་འདེབས་པ་འདུས་པ་འཕགས་ལུས་ཀྱི་ལུས་དཀྱིལ་ལྟ་བུ་དང་། བསྐྱེད་ཆོག་མེད་པར་སྒྲ་ཚུལ་གྱི་རྐྱེན་གྱིས་གསལ་འདེབས་པ་ལཱུ་ཧི་པའི་ལུས་དཀྱིལ་ལྟ་བུ་དང་། དཀྱིལ་འཁོར་རྒྱལ་མཆོག་སྤྲོ་བའི་ཞར་ལ་གསལ་འདེབས་པ་ནག་པོ་པའི་ལུས་དཀྱིལ་ལྟ་བུ་དང་། ཡེ་ཤེས་ཀྱི་འཁོར་ལོ་དགུག་གཞུག་བྱས་པའི་རྐྱེན་གྱིས་གསལ་འདེབས་པ་ཀྱཻ་རྡོ་རྗེའི་ཕྱི་ནང་སྦྲགས་པའི་ལུས་དཀྱིལ་ལྟ་བུ་རྣམས་སོ། །གཉིས་པ་བསྒོམ་བྱ་ལུས་ཀྱི་སྒོ་ནས་དབྱེ་ན་རགས་པ་ཕུང་ཁམས་སྐྱེ་མཆེད་ལས་བསྐྱེད་པ་འདུས་པ་འཕགས་ལུགས་ཀྱི་ལུས་དཀྱིལ་ལྟ་བུ་དང་། ཕྲ་བ་རྩ་ཁམས་ལས་བསྐྱེད་པ་བདེ་དགྱེས་གཉིས་ཀྱི་ལུས་དཀྱིལ་ལྟ་བུ་དང་གཉིས་ལས། ཕྱི་མ་ལ་ཡང་ཨིནྡྲ་བྷཱུ་ཏི་དང་། རྡོ་རྗེ་སྙིང་འགྲེལ་ལས། རྩ་འཁོར་ལོ་དྲུག་ལ་འགོད་པ་ནས་གསུམ་ལ་འགོད་པའི་བར་གསུངས་པ་དང་། རྣལ་འབྱོར་དབང་ཕྱུག་གི་མན་ངག་དང་། སློབ་དཔོན་དགྲ་ལས་རྣམ་རྒྱལ་དང་། ནག་པོ་པ་རྣམས་ཀྱི་རྩ་འཁོར་ལོ་ལྔ་ལ་འགོད་པ་དང་། ལཱུ་ནག་དྲིལ་གསུམ་གྱིས་ཡུལ་ཉི་ཤུ་རྩ་བཞི་ལ་འགོད་པར་གསུངས་པ་རྣམས་སོ། །ཡང་བསྒོམ་བྱ་ལུས་ཀྱི་སྒོ་ནས་དབྱེ་ན་སྔར་སྒྲ་དོན་གྱི་སྐབས་སུ་བཤད་པ་ལྟར་གྱི་དབྱེ་སྒོ་ལྔ་ཡང་རུང་ངོ་། །བཞི་པ་དབྱེ་གཞི་ལུས་དཀྱིལ་གྱི་མཚན་གྱི་རྣམ་གྲངས་ལ། བདེན་པའི་དཀྱིལ་འཁོར། རང་བཞིན་གྱིས་གྲུབ་པའི་དཀྱིལ་འཁོར། མ་བཅོས་པའི་དཀྱིལ་འཁོར། ཡང་དག་པའི་དཀྱིལ་འཁོར། དོན་དམ་པའི་དཀྱིལ་འཁོར། ནང་གི་དཀྱིལ་འཁོར། ལུས་ཀྱི་དཀྱིལ་འཁོར་དང་བདུན་ལས། དང་པོ་ནི་ཀླུ་བྱང་གིས། དེ་བཞིན་ཡིད་ཀྱི་དཀྱིལ་འཁོར་བདེན། །ཅེས་པའི་ཚིག་ཕྱི་མ་དེ་ཉིད་ཀྱིས་ལུས་དཀྱིལ་སྟོན་ཏེ། གཞན་དུ་ན་དེར་འཁོར་ལོ་རྣམ་བརྒྱད་མ་ཚང་བར་ཐལ་བའི་ཕྱིར་རོ། །གཉིས་པ་ནི། རྡོ་རྗེ་དྲིལ་བུ་པས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་དངོས་སུ་གསུངས་སོ། །གསུམ་པ་ནི་སློབ་དཔོན་དེ་ཉིད་ཀྱིས། བཅོས་མ་གཉིས་ཀྱི་ངོ་བོ་གང་། །ཞེས་གསུངས་པའི་ཤུགས་ཀྱིས་ལུས་ཀྱི་དཀྱིལ་འཁོར་ལ་མ་བཅོས་པའི་ཐ་སྙད་གྲུབ་པའོ། །བཞི་པ་ནི། སློབ་དཔོན་དེ་ཉིད་ཀྱིས། ཡང་དག་དོན་མཐོང་གྲོལ་ཕྱིར་རོ། །ཞེས་གསུངས་པས་བསྟན་ཏེ། ལུས་དཀྱིལ་མཐོང་བ་ལ་ཡང་དག་པའི་དོན་མཐོང་བར་གསུངས་པའི་ཕྱིར་རོ། །ལྔ་པ་ནི། སློབ་དཔོན་དེ་ཉིད་ཀྱིས། འཁོར་ལོ་གསུམ་གྱི་དཀྱིལ་འཁོར་གྲུབ། །དཀྱིལ་འཁོར་ལྷ་རྣམས་གྲུབ་པའོ། །དེ་ཡི་དབང་བསྐུར་ལ་སོགས་རིམ། །ཅི་ནས་མ་གྲུབ་ཡང་གྲུབ་བྱེད། །ཅེས་གསུངས་ནས། དབང་བསྐུར་སོགས་རིམ་ཀུན་རྫོབ་ཏུ། །མངོན་སུམ་དུ་ནི་གྲུབ་པ་འོ། །ཞེས་གསུངས་པས་ལུས་དཀྱིལ་ལ་དོན་དམ་པའི་ཐ་སྙད་འཇུག་སྟེ། རང་བཞིན་གྱིས་གྲུབ་པ་དང་། མ་བཅོས་པར་གྲུབ་པ་ནི་ཀུན་རྫོབ་ཏུ་བསྒྲུབ་མི་དགོས་ལ་དབང་བསྐུར་སོགས་ནི་ཀུན་རྫོབ་ཏུ་བློ་ངོར་མ་གྲུབ་པ་བསྒྲུབ་པར་བྱ་བའི་ཆེད་ཡིན་ཅེས་པའི་དོན་དུ་འཆད་དགོས་པའི་ཕྱིར་རོ། །དྲུག་པ་ནི། བདེ་མཆོག་རྩ་རྒྱུད་ལས། པཱུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཅེས་དང་། སཾ་བུ་ཊི་ལས། ཕྱི་རོལ་བཅས་པའི་ནང་ཉིད་ཀྱིས། །སྣ་ཚོགས་ཁྱབ་ཅིང་རྣམ་པར་གནས། །ཞེས་གསུངས་པའི་དོན་དུ་དགོངས་ནས་རྗེ་ས་ཆེན་གྱིས་ནག་པོ་པའི་སྐབས་སུ་ལུས་དཀྱིལ་ལ་ནང་དུ་བསྒོམ་པ་ཞེས་པའི་ཐ་སྙད་གསུངས་སོ། །བདུན་པཾ་ནི། རྒྱུད་གཞུང་ཕལ་ཆེར་གསུངས་ཤིང་ཡོངས་སུ་གྲགས་པའོ། །སྐབས་འདིའི་དོན་དམ་པ་དང་། ཡང་དག་པ་དང་། བདེན་པ་རྣམས་ནི་གསུང་རབ་སྤྱིའི་བརྡ་ཆད་ཀྱི་བདེན་པ་གཉིས་སུ་ཕྱེ་བའི་དོན་དམ་པ་སོགས་ལ་འཁྲུལ་པར་མི་བྱ་སྟེ། རྡོ་རྗེ་གུར་སོགས་ལས། སྦྱང་གཞི་སྦྱོང་བྱེད་ཐམས་ཅད་ཀུན་རྫོབ་ཀྱི་བདེན་པ་ཡིན་པར་གསུངས་པའི་ཕྱིར་དང་། ཕན་ཚུན་ལྟོས་ནས་དོན་དམ་པ་དང་། ཀུན་རྫོབ་ཀྱི་ཁྱད་པར་སོགས་གསུངས་པ་རྣམས་གནས་སྐབས་གཞན་ལ་ལྟོས་ནས་གཞན་དུ་ཡང་འགྱུར་བའི་ཕྱིར་རོ། །ལྔ་པ་སྒྲ་དེ་ལྡན་གྱི་ལུས་དཀྱིལ་གཏན་ལ་དབབ་པ་ལ་གཉིས་ཏེ། རྟེན་ལུས་དཀྱིལ་དང་། བརྟེན་པ་ལུས་དཀྱིལ་ལོ། །དང་པོ་ལ་གསུམ་སྟེ། རྒྱུད་ལས་གསུངས་པའི་ཚུལ། དེ་ཉིད་མན་ངག་གིས་འགྲེལ་པའི་ཚུལ། དེ་ལ་ལོག་པར་རྟོག་པ་དགག་པའོ། །དང་པོ་ནི། བོད་དུ་འགྱུར་བའི་རྒྱུད་སྡེ་ལས། རྟེན་ལུས་དཀྱིལ་གསུངས་པ་བཤད་རྒྱུད་རྡོ་རྗེ་ཕྲེང་བ་དང་། སཾ་བུ་ཊི་གཉིས་ལས། འདིར་སྐབས་སུ་བབ་པ་ཕྱི་མ་ལྟར་འཆད་ན། རྒྱུད་དེའི་དྲུག་པའི་གསུམ་པ་ལས། ལུས་ནི་དཀྱིལ་འཁོར་ཉམས་དགའ་བ། །སྒོ་བཞི་ཇི་སྐད་གསུངས་པའོ། །རང་གི་ཡན་ལག་བརྒྱད་བྱུང་བས། །ཀ་བ་དེ་ཡིས་བསྐོར་ཏེ་གནས། །དངོས་པོ་ཀུན་གྱི་མཉམ་པའི་ཕྱིར། །གྲུ་བཞི་པར་ནི་རབ་ཏུ་གྲགས། །སྐུ་གསུང་ཐུགས་སུ་དབྱེ་བ་ཡི། །འཁོར་ལོ་གསུམ་ནི་གཅིག་ཏུ་གསུངས། །རི་ནི་མགོ་བོའི་ཟེའུ་འབྲུ་ལ། །ཇི་ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །འདི་ནི་རྫོགས་པར་དཀྱིལ་འཁོར་གནས། །རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་ཡང་དག་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ལྟོ་བར་ཡང་ནི་ཆུ་ཡིན་ཏེ། །ཟླུམ་པོའི་གཟུགས་ཀྱིས་ཡང་དག་གནས། །སྙིང་གར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱུག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །ཞེས་གསུངས་སོ། །གཉིས་པ་ལ་གཉིས་ཏེ། དངོས་བསྟན་ཕྱི་རོལ་ན་ཇི་སྙེད་ཡོད་པ་ནང་དུ་བསྡུ་བའི་ཚུལ་དང་། བླ་མའི་མན་ངག་གིས་དཀྱིལ་འཁོར་རྫོགས་པ་ཁ་བསྐང་བའི་ཚུལ་ལོ། །དང་པོ་ནི། ཇི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་དུ་ཕྱེ། །ཞེས་པའི་དོན་རྫོགས་རིམ་གྱི་སྐབས་སུ་ཕྱི་རོལ་གྱི་སྣང་བ་ཐམས་ཅད་ནང་རྩ་ཁམས་ལ་སྡོམ་པའི་དོན་དུ་འཆད་དགོས་ཀྱང་། ལུས་དཀྱིལ་གྱི་སྐབས་འདིར་ཕྱི་དཀྱིལ་ལ་ཇི་ལྟར་ཡོད་པ་ནང་ལུས་ལ་སྡོམ་པའི་དོན་དུ་བཤད་དགོས་པས། ཕྱི་དཀྱིལ་ལ་གྲུ་བཞི་ཡོད་པ་ནང་དུ་ལུས་ལ་ཡན་མན་དང་། ཕན་ཚུན་དུ་མཉམ་པ་ལ་ཚང་། སྒོ་བཞི་ནི་ནང་དུ་སྙིང་གའི་འབྱུང་བ་བཞིའི་རླུང་རྒྱུ་བའི་བུ་ག་བཞི་ལ་ཚང་སྟེ། ཇི་སྐད་གསུངས་པ་ཞེས་པའི་དོན་དྲུག་པའི་རབ་བྱེད་གཉིས་པར། འདབ་མ་རྣམས་ཀྱི་གཞི་ལ་ཡང་། །འབྱུང་བ་བཞི་ཡི་རྩ་རྣམས་ནི། །མར་མེའི་རང་བཞིན་ལྟ་བུ་ལས། །ཕྱོགས་བཞི་ལ་ནི་རྣམ་པར་གནས། །ཞེས་གསུངས་པ་ལ་བསྙགས་པར་མཛད་དོ། །ཕྱི་ལ་ཀ་བ་བརྒྱད་ཀྱིས་གཞལ་ཡས་ཁང་གི་ནང་བསྐོར་བ་ནི་ནང་དུ་རྐང་བརྒྱད་ཀྱིས་ལུས་བསྐོར་བ་ལ་ཚང་། ཕྱི་ལ་འཁོར་ལོ་གསུམ་གྱི་རྩིབས་ཉེར་བཞི་ནི་ནང་དུ་སྤྱི་བོ་ལ་སོགས་པའི་གནས་ཉི་ཤུ་རྩ་བཞི་ལ་ཚང་། ཕྱི་ལ་རི་རབ་ཀྱི་ལྕོག་བརྒྱད་ནི་ནང་དུ་མགོ་བོའི་ཟུར་བཞི་ལ་ཚང་། ཕྱི་ལ་གཞལ་ཡས་ཁང་གི་རྒྱུའམ་འོག་གཞི་རྟེན་གང་ཡིན་ཀྱང་རུང་སྟེ། འབྱུང་བ་བཞི་ནི་རྐང་མཐིལ་ལ་སོགས་པ་བཞི་ལ་ཚང་། རི་རབ་ནི་སྒལ་ཚིགས་ཉེར་གཅིག་དབྱུག་གུའི་གཟུགས་སུ་གནས་པ་ལ་ཚང་བའི་དོན་དུ་འཆད་དོ། །གཉིས་པ་ནི། བླ་མའི་དུས་ཐབས་རིམ་ཉིད་ཀྱིས། །འདི་ནི་རྫོགས་པར་དཀྱིལ་འཁོར་གནས། །ཞེས་འདིར་དངོས་སུ་མ་བསྟན་པ་རྣམས་བླ་མའི་མན་ངག་གིས་ཁ་བསྐངས་ཏེ། དཀྱིལ་འཁོར་གི་ཆ་ཤས་རྫོགས་པར་བསྒོམས་ཞེས་གསུངས་ལ། མན་ངག་ལ་ཡང་རྣལ་འབྱོར་དབང་ཕྱུག་ནས་བརྒྱུད་པ་དང་། ནཱ་རོ་པ་ནས་བརྒྱུད་པ་གཉིས་ལས། དང་པོ་ལ་སྤྱི་བོ་སྣ་ཚོགས་རྡོ་རྗེ་སོགས་སྲུང་འཁོར་ཡང་ལུས་ལ་བསྒོམ་པ་དང་། མིག་པཉྩ་རེ་ཁཱའི་རྩིག་པ་སོགས་གཞལ་ཡས་ཁང་གི་ཆ་ཤས་གཞན་རྣམས་ཀྱང་ལུས་ལ་བསྒོམ་པའི་ཚུལ་གསུངས་ཤིང་། ནཱ་རོ་པའི་མན་ངག་ལས་སྲུང་འཁོར་ལུས་ལ་བསྒོམ་པ་མི་སྣང་ཞིང་། མིག་དང་། རྣ་བ་དང་། སྣ་དང་། ལྕེ་དང་། རྒྱུ་མ་ལ་སོགས་པ་ནི་གཞལ་ཡས་ཁང་གི་རྒྱན་ཅེས་པ་ཙམ་ལས་གསལ་བར་མ་གསུངས་ཀྱང་། འཕགས་པས་ཀྱཻ་རྡོར་ཇི་ལྟ་བ་བཞིན་དུ་བསྒོམ་པར་གསུངས་པ་ནི་ཡེ་ཤེས་ཀྱི་མཁའ་འགྲོ་མའི་མན་ངག་ཡིན་པས་རུང་བར་སྣང་ངོ་། །མན་ངག་ཅེས་པ་ཡང་ཡེ་ཤེས་ཀྱི་མཁའ་འགྲོ་མས་གྲུབ་ཐོབ་ལ་གནང་ནས་རྩ་བའི་བླ་མའི་བར་དུ་སྙན་ནས་སྙན་དུ་བརྒྱུད་པ་གཅིག་དགོས་ཀྱི་བླ་མ་འགའ་ཞིག་གིས་བར་སྐབས་སུ་ཕོ་ཚོད་ཀྱིས་རང་བཟོ་བྱས་ནས་གང་འགྲིག་སྦྱར་བ་མན་ངག་མ་ཡིན་ཏེ། དེ་ལྟར་ན་མན་ངག་གཞན་ནས་བརྒྱུད་མི་དགོས་པར་རང་གིས་བཟོས་པས་ཆོག་པར་ཐལ་བའི་ཕྱིར་རོ། །འོ་ན་བསྒོམས་པའི་ཚེ་ཚང་བརྩི་བ་ཙམ་གྱིས་ཆོག་གམ། རྣམ་པ་ཉིད་ངེས་པར་བསྒོམ་དགོས་སམ་སྙམ་ན། འདི་ལ་ཕྱི་ལ་ཡོད་པ་ནང་དུ་སྡོམ་པ་གཙོ་བོར་བྱེད་པ་དང་། ནང་ཉིད་ལ་ཡང་ཐ་མལ་གྱི་རྣམ་རྟོག་བཀག་དགོས་པ་གཉིས་ལས། དང་པོའི་སྐབས་སུ་ཚང་བརྩི་བ་ཙམ་གྱིས་ཆོག་པར་མངོན་ཏེ། རྗེ་བཙུན་གྱིས་དྲིལ་བུ་ལུས་དཀྱིལ་གྱི་བརྟེན་པ་ལྷ་ལ་ཡང་རྣམ་པ་ཡི་གེ་ཉིད་ལྷའི་ངོ་བོར་བསྒོམ་པའི་ཚུལ་ཡང་གསུངས་པའི་ཕྱིར་རོ། །ནང་ཉིད་ལ་ཡང་ཐ་མལ་གྱི་རྣམ་རྟོག་བཀག་པ་གཙོ་བོར་བྱེད་ན་རྣམ་པ་ཉིད་ཀྱང་བསྒོམ་དགོས་ཏེ། རྐང་བརྒྱད་ཀ་བའི་རྣམ་པར་མ་བསྒོམ་ན་ཐ་མལ་གྱི་རྣམ་རྟོག་བཀག་མི་ནུས་པའི་ཕྱིར་རོ། །དེའི་ཚེ་ཡང་ལུས་ཀྱི་ཆ་ཤས་གང་དུ་ཡོད་ས་དེར་གཞལ་ཡས་ཁང་གི་ཆ་ཤས་དེ་དང་དེར་བསྒོམ་པ་ཡིན་གྱི་ཐམས་ཅད་བཤིག་ནས་གཞལ་ཡས་ཁང་གཅིག་ཏུ་བསྒོམ་པ་ནི་མ་ཡིན་སྟེ། འོག་ཏུ་འཆད་དོ། །གསུམ་པ་དེ་ལ་ལོག་རྟོག་དགག་པ་ལ་གཉིས་ཏེ། བསྒོམ་ཚུལ་གི་རྣམ་གཞག་སྤྱིར་རྟེན་པ། དེ་ལ་མི་འཐད་པའི་ཆ་དགག་པའོ། །དང་པོ་ནི། རྟེན་ལུས་དཀྱིལ་བསྒོམ་ཚུལ་འདི་ལ་ལུགས་བཞི་འབྱུང་སྟེ། ལུགས་དང་པོ་ནི། བཤད་མ་ཐག་པའི་རྒྱུད་དོན་མན་ངག་གིས་བཤད་པ་རྗེ་བཙུན་ས་སྐྱ་པའི་ལུགས་ཏེ། ཕྱིའི་གཞལ་ཡས་ཁང་པའི་ཆ་ཤས་ནང་གྱི་ལུས་ཀྱི་ཆ་ཤས་གང་དུ་ཡོད་ས་དེར་ཕྱིའི་ཆ་ཤས་ཀྱི་ངོ་བོའམ་རྣམ་པ་གང་རུང་དུ་བསྒོམ་པ་སྟེ། རྗེ་བཙུན་རྩེ་མོས་དྲིལ་བུ་ལུས་དཀྱིལ་དུ་རྟེན་ཡང་རྐང་མཐིལ་ན་རླུང་ཞེས་བྱ་བ་ནས་བརྩམས་ཏེ། ལྕེ་དང་མཆུ་འདོད་པའི་ཡོན་ཏན་ལ་སོགས་པ་ལུས་ཀྱི་ཆ་ཤས་དཀྱིལ་འཁོར་གྱི་རྒྱན་གྱི་བར་རྟེན་ཡང་གནས་པར་བཤད་དེ་ཞེས་གསུངས་པས་སོ། །དེ་ཡང་ཕྱི་ལ་ཡོད་པའི་ཆ་ཤས་རྒྱུད་དང་མན་ངག་གིས་ཇི་ལྟར་བཀྲལ་བ་ཙམ་ཞིག་བསྒོམ་པ་ཡིན་གྱི་མངོན་རྟོག་དེ་ཉིད་ཀྱི་ཕྱི་ལ་ཇི་ལྟར་ཡོད་པ་བཞིན་བསྒོམ་པ་ནི་མ་ངེས་ཏེ་དྲིལ་བུ་ལུས་དཀྱིལ་ལ་ཕྱི་དཀྱིལ་མེད་པའི་ཕྱིར་དང་། ཀྱཻ་རྡོར་གྱི་ཕྱི་དཀྱིལ་ལ་མདའི་དྲྭ་བ་དང་། འོག་གཞིའི་རི་རབ་མེད་ཀྱང་སྤྱིར་ཕྱི་དཀྱིལ་ལ་ཡོད་པ་བསྒོམ་པའི་ཕྱིར་རོ། །ལུགས་གཉིས་པ་ནི། སྔོན་གྱི་མཁས་པ་འགོས་རྔོག་དང་། དཔྱལ་སེ་ལ་སོགས་པ་རྣམས་བསྐྱེད་གཞི་རང་གི་ལུས་ལ་རང་བཞིན་གྱིས་གྲུབ་པའི་ཕུང་པོའི་ཆ་ཤས་དེ་དང་དེ། གཞལ་ཡས་ཁང་གི་ཆ་ཤས་དེ་དང་དེའི་ངོ་བོའམ་དོད་དམ་ཚང་བརྩི་བའི་ཚུལ་གྱིས་བསྒོམས་པ་ཡིན་གྱི། རྣམ་པ་བསྒོམ་མི་དགོས་པར་བཞེད་ཅིང་། རྗེ་བཙུན་གོང་མའི་བཞེད་པ་ཕྱོགས་གཅིག་ལ་ཡང་ངོ་བོར་བསྒོམ་པ་འདི་ཉིད་ཡོད་དོ། །གཞན་དུ་རྣམ་པ་ངེས་པར་བསྒོམ་དགོས་ན། མིག་གི་རྣམ་ཤེས་མེ་ལོང་དང་། རྣ་བའི་རྣམ་ཤེས་བ་དན་དུ་བསྒོམ་པ་སོགས་གཞག་དཀའོ། །ལུགས་གསུམ་པ་ནི་གཞན་ལུགས་ཀྱི་བླ་མ་ཁ་ཅིག ཐོག་མར་གཞལ་ཡས་ཁང་གི་དབུས་གཙོ་བོའི་གནས་སུ་རང་གི་ལུས་ལས་བྱུང་བའི་ཕྱི་དཀྱིལ་ལྟ་བུའི་གྲུ་བཞི་སྒོ་བཞིའི་རྣམ་པ་ཅན་དུ་བསྒོམས་ནས་དེའི་དབུས་སུ་གཙོ་བོའི་ལུས་ཡོད་པའི་གྲུབ་མཐའ་བཅས་པ་ལ། སྔགས་འཆང་གཞན་དག་གིས། དེ་ལྟར་ན་ཁྱོད་ཀྱི་འདུས་པ་འཕགས་ལུགས་ཀྱི་དཀྱིལ་འཁོར་རྒྱལ་མཆོག་གི་གཞལ་ཡས་ཁང་པ་སྒོ་ཉིས་སྦྲག་ཏུ་འགྱུར་རོ་ཞེས་པའི་གནོད་བྱེད་བརྗོད་པ་མ་བཟོད་ནས། རྗེས་སུ་ལྷག་མོས་ཀྱི་གཞལ་ཡས་ཁང་པའི་རྒྱུན་མ་བསྡུས་པར་ཡོད་པ་ལ་སྤྲུལ་སྐུ་རྡོར་སེམས་ལ་ལུས་དཀྱིལ་བཀོད་པའི་ཐད་དུ་སླེབ་པ་དང་། རང་གི་ལུས་ཀྱི་རིགས་འདྲ་སྔ་མ་རྣམས་ཆད་ནས་བསྟིམས་པས་ལུས་དཀྱིལ་གྱི་གཞལ་ཡས་ཁང་དུ་འགྲོ་བ་ཡིན་ཏེ། ལུས་རྒྱུར་སོང་ཞིང་གྲུ་བཞི་སྒོ་བཞིའི་རྣམ་པ་ཅན་དུ་འདུག་པའི་ཕྱིར་ཞེས་འདོད་དོ། །ལུགས་བཞི་པ་ནི་རང་ལུགས་ཀྱི་རྗེ་བཙུན་གོང་མའི་གསུང་རབ་ཚད་མར་བྱས་ཀྱང་བཤད་མ་ཐག་པ་འདི་ཉིད་སྙིང་ལ་འཚང་བའི་བླ་མ་དག་ཕྱི་དཀྱིལ་གྱི་གཞལ་ཡས་ཁང་པའི་དབུས་སུ་འཁོར་གྱི་ལྷ་རྣམས་ཕྱིར་བཞག་ནས་དེ་དང་གཙོ་བོའི་བར་དུ་ལུས་ལས་བྱུང་བའི་གྲུ་བཞི་སྒོ་བཞི་བསྒོམས་ནས་དེའི་དབུས་སུ་གཙོ་བོ་བཞུགས་པ་དེ་ལ་བརྟེན་པ་ལུས་དཀྱིལ་འགོད་པ་ཡིན་ཏེ། རིགས་པ་ནི་ལུས་དཀྱིལ་གྱི་གཞལ་ཡས་ཁང་པ་ཡིན་ན། ལུས་རྒྱུར་བྱས་པའི་གྲུ་བཞི་སྒོ་བཞིའི་རྣམ་པ་ཅན་ཡིན་དགོས་པའི་ཕྱིར་དང་། ལུང་ནི་སཾ་བུ་ཊི་ལས། ལུས་ནི་དཀྱིལ་འཁོར་ཉམས་དགའ་བ། །ཞེས་སོགས་ལུས་གཞལ་ཡས་ཁང་གྲུ་བཞི་སྒོ་བཞི་ཀ་བ་བརྒྱད་ཀྱིས་བསྐོར་བ་དང་བཅས་པ་བཤད་པའི་མཇུག་ཏུ། བླ་མའི་དུས་ཐབས་རིམ་ཉིད་ཀྱིས། །འདི་ནི་རྫོགས་པར་དཀྱིལ་འཁོར་གནས། །ཞེས་དངོས་སུ་མི་གསལ་བའི་གཞལ་ཡས་ཁང་གི་ཆ་ཤས་རྣམས་བླ་མའི་མན་ངག་གིས་ཁ་བསྐངས་ནས་ཡོངས་སུ་རྫོགས་པར་བསྒོམ་པར་གསུངས་པའི་ཕྱིར་དང་། བཤད་རྒྱུད་རྡོ་རྗེ་ཕྲེང་བ་ལས། ལུས་ནི་གཞལ་ཡས་ཁང་དུ་གྱུར། །སངས་རྒྱས་ཀུན་གྱིས་ཡང་དག་བརྟེན། །ཞེས་མདོར་བསྟན་ནས། བསྒོམ་ཚུལ་རྒྱས་པར་བཤད་པའི་མཇུག་ཏུ། དེ་དག་གཞལ་ཡས་ཁང་དུ་བསྒོམ་ཞེས་གསུངས་པའི་ཕྱིར་དང་། སློབ་དཔོན་དགྲ་ལས་རྣམ་རྒྱལ་གྱིས། རྣལ་འབྱོར་ཆེ་མཆོག་རང་གི་ལུས། །གྲུབ་པའི་དཀྱིལ་འཁོར་སྐད་ཅིག་ལྟ། །ཞེས་དང་། གྲུབ་ཆེན་དྲིལ་བུ་པས། རྒྱན་རྣམས་རབ་མཛེས་ཧེ་རུ་ཀའི། །ལུས་ནི་དཀྱིལ་འཁོར་དུ་འདོད་དོ། །ཞེས་དང་། ཀླུ་བྱང་གིས། ཚངས་པའི་ཐིག་ལ་ཡང་དག་བརྟེན། །གྲུ་བཞི་པ་རུ་རྣམ་པར་དབྱེ། །ཞེས་དང་། རྗེ་བཙུན་རྩེ་མོས་སཾ་བུ་ཊིའི་ཊཱི་ཀར། དེ་དག་གི་རྟེན་ཡང་ལུས་ནི་ཞེས་སྨོས་ཏེ། གཞལ་ཡས་ཁང་གི་མཚན་ཉིད་དང་། རི་རབ་འབྱུང་བ་རིམ་བརྩིག་དང་བཅས་པ་རྣམས་བསྟན་ཏེ་ཚིག་གོ་སླའོ་ཞེས་དེ་གཉིས་རྟེན་དང་བརྟེན་པར་གསུངས་པའི་ཕྱིར་དང་། རྗེ་བཙུན་གྱིས་དྲིལ་བུ་པའི་སྒྲུབ་ཐབས་ལས། མགོ་བོ་རི་རབ་ཀྱི་སྟོད་ཀྱི་ཆ། དེའི་སྟེང་གི་གཞལ་ཡས་ཁང་གྲུ་བཞི་པ་ནི་ལུས་མི་མཉམ་པ་མེད་པ་གྲུ་བཞི་ཞེས་མགོ་བོ་རི་རབ་ཏུ་གྱུར་པའི་སྟེང་དུ་ལུས་གཞལ་ཡས་ཁང་དུ་བསྒོམ་པར་བཤད་པའི་ཕྱིར་དང་། གཉུག་མ་དྲན་གསལ་ལས། རྐང་མཐིལ་རྡོ་རྗེའི་ས་གཞི། སྤྱི་བོ་རྡོ་རྗེ་རྒྱ་གྲམ་གྱི་ཐོག་ཞེས་སོགས་རྟེན་གཞལ་ཡས་ཁང་བསྒོམས་པའི་རྗེས་སུ་དེའི་དབུས་སུ་རང་གང་བསྒོམས་པའི་གཞི་དུས་ཀྱི་ཧེ་རུ་ཀར་གསལ་བའི་གསང་གནས་སུ་དོན་ཡོད་གྲུབ་པ་ཞེས་ལུས་དཀྱིལ་གྱི་གཞལ་ཡས་ཁང་གི་དབུས་སུ་ཧེ་རུ་ཀའི་ལུས་ལ་བརྟེན་པ་ལུས་དཀྱིལ་འགོད་པ་གསལ་བར་བཤད་པའི་ཕྱིར་རོ་ཞེས་སོགས་ཀྱི་སྒྲུབ་བྱེད་མང་དུ་འགོད་པར་བྱེད་དོ། །དེ་ལྟར་ལུགས་བཞི་ལས། དང་པོ་གཉིས་ནི་དོད་ཙམ་བསྒོམས་པ་དང་། རྣམ་པ་བསྒོམ་པའི་ཁྱད་པར་ཅུང་ཟད་ཡོད་ཀྱང་། བློའི་བྱེ་བྲག་གི་གཉིས་ཆར་ཁས་ལེན་དགོས་པའི་ཕྱིར་དང་། རྒྱུད་དོན་མན་ངག་གིས་འགྲེལ་པའི་ལུགས་བཟང་ཡིན་པ་དང་། ཕྱིའི་གཞལ་ཡས་ཁང་ནང་དུ་སྡོམ་པའི་རིགས་པའི་གནད་ཀྱང་ཚང་བས་རང་ལུགས་སུ་གཞག་པར་བྱ་བ་ཡིན་ནོ། །གཉིས་པ་མི་འཐད་པའི་ཆ་དགག་པ་ནི། ལུགས་གསུམ་པ་ལ་ཐོག་མར་འདི་འདྲི་སྟེ། ལུས་རྒྱུར་སོང་ཞིང་གྲུ་བཞི་སྒོ་བཞིའི་རྣམ་པ་ཅན་དུ་འདུག་པའི་ཕྱིར་ཞེས་པའི་དོན་ལུས་དཀྱིལ་གྱི་གྲུ་བཞི་སྒོ་བཞིའི་རྣམ་པ་ཅན་ལ་ཟེར་རམ། ཕྱི་དཀྱིལ་གྱི་གྲུ་བཞི་སྒོ་བཞིའི་རྣམ་པ་ཅན་ལ་ཟེར། དང་པོ་ལྟར་ན་ལུགས་མཆོག་སྔ་མ་གཉིས་ལ་ཡང་ཚང་སྟེ། རྡོ་རྗེ་ཕྲེང་བ་ལས། གྲུ་བཞི་ཡི་ནི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། །ཞེས་དང་། སཾ་བུ་ཊི་ལས། དངོས་པོ་ཀུན་གྱི་མཉམ་པའི་ཕྱིར། །གྲུ་བཞི་པར་ནི་རབ་ཏུ་གྲགས། །ཞེས་དང་། སྒོ་བཞི་ཇི་སྐད་གསུངས་པའོ། །ཞེས་གསུངས་པས་སོ། །ཕྱི་མ་ལྟར་ན་ཤིན་དུ་མི་འཐད་དེ། ལུས་དཀྱིལ་སྟོན་པའི་རྒྱུད་གཞུང་རྣམས་ལས། ཕྱི་རོལ་ལ་ཇི་ལྟར་ཡོད་པ་ལྟར་ནང་ལ་ཚང་བ་འབའ་ཞིག་གསུངས་ཀྱི་ནང་ཉིད་ཕྱི་རོལ་ཇི་ལྟ་བ་བཞིན་བསྒོམ་པར་གསུངས་པ་མི་སྣང་བའི་ཕྱིར་དང་། གཞན་དུ་བརྟེན་པ་ལུས་དཀྱིལ་ཡང་ལུས་ཀྱི་ཆ་ཤས་གང་ཡོད་ས་དེར་མི་བསྒོམ་པར་ཕྱི་དཀྱིལ་གྱི་བཀོད་པ་ཇི་ལྟ་བ་བཞིན་བསྒོམ་དགོས་པར་ཐལ་བའི་ཕྱིར་རོ། །གཞན་ཡང་ལུས་ཀྱི་ཆ་ཤས་བསྲེས་ཟིན་པའི་དཀྱིལ་འཁོར་རྒྱལ་མཆོག་གི་ཁང་པ་དེ་ཕྱི་ནང་གཉིས་ཀའི་གཞལ་ཡས་ཁང་ཡིན་ནམ། ལུས་དཀྱིལ་རྐྱང་པའི་གཞལ་ཡས་ཁང་ཡིན། དང་པོ་ལྟར་ན་མི་རིགས་ཏེ། སློབ་དཔོན་དྲིལ་བུ་པས། བཅོས་མ་གཉིས་ཀྱིས་ངོ་བོ་གང་། །ཞེས་གསུངས་པས། བཅོས་མ་དང་མ་བཅོས་པའི་དཀྱིལ་འཁོར་གྱི་གཞི་མཐུན་དུ་ཐལ་བའི་ཕྱིར་རོ། །གལ་ཏེ་ལུང་དེ་ཉིད་རྡུལ་ཚོན་དང་རས་རིས་ལ་བཅོས་མར་འཆད་པའི་སྐབས་ཡིན་གྱིས་བདག་བསྐྱེད་ཀྱི་དཀྱིལ་འཁོར་ལ་བཅོས་མའི་ཐ་སྙད་མི་བྱེད་དོ་ཞེ་ན། འོ་ན་གྲུབ་ཆེན་ཀླུ་བྱང་གིས་རྡུལ་ཚོན་ལ་བདག་མདུན་ཐ་མི་དད་དུ་བསྒྲུབ་པར་བཤད་པ་ཉམས་སུ་ལེན་པའི་ཚེ་ལུས་དཀྱིལ་བཀོད་ཕྱིན་ཆད་བཅོས་མ་བཅོས་ཀྱི་གཞི་མཐུན་དུ་འགྱུར་ཏེ། ལུས་དཀྱིལ་དང་རྡུལ་ཚོན་གྱི་དཀྱིལ་འཁོར་གྱི་གཞི་མཐུན་ཡིན་པའི་ཕྱིར་རོ། །གཉིས་པ་ལྟར་ན་ཡང་མི་རིགས་ཏེ། འདུས་པ་འཕགས་ལུགས་ཀྱི་སྤྲུལ་སྐུ་རྡོ་རྗེ་སེམས་དཔའ་ལ་ལུས་དཀྱིལ་འགོད་ཕྱིན་ཆད་ཕྱི་དཀྱིལ་གཏན་མེད་པར་འགྱུར་ཞིང་། དེ་ཡང་འདོད་ན་སྔར་བཤད་པ་ལྟར་རྡུལ་ཚོན་ལ་བདག་མདུན་ཐ་མི་དད་དུ་བསྒྲུབས་ནས་དཀྱིལ་འཁོར་སྟོན་པའི་ཚེ་ཕྱི་དཀྱིལ་སྟོན་རྒྱུ་མེད་པར་འགྱུར་རོ། །གཞན་ཡང་ཕྱི་དཀྱིལ་ལ་ལུས་ཀྱི་ཆ་ཤས་བསྲེས་པར་མོས་པ་ཙམ་གྱིས་ལུས་དཀྱིལ་བསྒོམས་པར་འགྲོ་ན་དཀྱིལ་འཁོར་རྒྱལ་མཆོག་གི་དཀྱིལ་འཁོར་ཐམས་ཅད་ལུས་དཀྱིལ་དུ་འགྱུར་ཏེ་ཕྱི་དཀྱིལ་ལ་ལུས་དཀྱིལ་གྱི་ཆ་ཤས་འདྲེས་པའི་མོས་པ་བྱེད་པར་མཚུངས་པའི་ཕྱིར་རོ། །གཞན་ཡང་བདེ་མཆོག་དྲིལ་བུ་ཞབས་ཀྱི་ལུགས་ལ་ལུས་དཀྱིལ་གྱི་གཞལ་ཡས་ཁང་མེད་པར་འགྱུར་ཏེ། ལུས་ཀྱི་རིགས་འདྲ་བསྲེ་བའི་གཞི་ཕྱིའི་གཞལ་ཡས་ཁང་མེད་པའི་ཕྱིར། གལ་ཏེ་དེར་གྲུབ་ཆེན་གྱིས་དངོས་སུ་མ་བཤད་ཀྱང་མངོན་བརྗོད་དགུ་པ་ནས་འབྱུང་བཞི་རི་རབ་དང་བཅས་པའི་སྟེང་དུ་སྒྲ་ཚུལ་ལས་གཞལ་ཡས་ཁང་ཕྱིའི་ཧེ་རུ་ཀ་དང་བཅས་པ་ཅིག་ཆར་དུ་བསྐྱེད་པ་ཁ་བསྐངས་ནས་དེ་ལྟ་བུའི་གཞལ་ཡས་ཁང་དང་། ལུས་ཀྱི་ཆ་ཤས་རྣམས་བསྲེས་ནས་བསྒོམས་པས་སྐྱོན་མེད་དོ་ཞེ་ན། དེ་ནི་ཤིན་ཏུ་མི་འཐད་དེ། མངོན་བརྗོད་དགུ་པ་ནི་ཕྱི་ནང་སྦྲག་མ་སྟོན་པའི་སྐབས་ཡིན་པས་དེ་ལྟར་བྱས་ན་གྲུབ་ཆེན་གྱིས། ཕྱི་རོལ་རྣམ་རྟོགས་སྤངས་ནས་ནི། །ཞེས་གསུངས་པ་དང་འགལ་བའི་ཕྱིར་ཏེ། དེ་ལྟ་བུའི་བསྐྱེད་ཆོག་དེ་ཕྱིའི་སྤྲོས་པ་ལཱུ་ཧི་པ་དང་ཁྱད་པར་མི་འདུག་པའི་ཕྱིར་རོ། །གལ་ཏེ་འདིར་གཞལ་ཡས་ཁང་གི་ནང་ན་ཕྱིའི་ཧེ་རུ་ཀ་དཔའ་བོ་གཅིག་ལས་མེད་པས་ལཱུ་ཧི་པ་དང་མི་མཚུངས་སོ་སྙམ་ན་དེ་ལྟར་ན་འཁོར་གྱི་ལྷ་ཡོད་མེད་ཀྱི་སྒོ་ནས་ཕྱི་དཀྱིལ་དང་ལུས་དཀྱིལ་དུ་འཇོག་པར་སྣང་བས་རྡོ་རྗེ་འཇིགས་བྱེད་ཀྱི་སྒྲུབ་ཐབས་སོགས་གཞལ་ཡས་ཁང་གི་ནང་དུ་ལྷ་དཔའ་བོ་གཅིག་པ་བསྐྱེད་པའི་གཞལ་ཡས་ཁང་ཐམས་ཅད་ལུས་དཀྱིལ་དུ་འགྱུར་རོ། །གཞན་ཡང་གྲུབ་ཆེན་གྱི་གཞུང་དུ། འོད་ཟེར་སྤྲོས་པས་སྔོན་གྲུབ་པ། །བསྐུལ་ནས་ཕྱག་འཚལ་རང་ལུས་གཞུག །རྐང་མཐིལ་སུམ་མདོ་ལྟེ་སྙིང་ག །རླུང་དང་མེ་ཆུ་ས་ཡིན་ནོ། །ཞེས་ཚོགས་ཞིང་བསྟིམས་པའི་རྗེས་སུ་ལུས་དཀྱིལ་གསལ་གདབ་པ་ལས་ཁྱེད་འདོད་པ་ལྟར་གྱི་ཕྱི་དཀྱིལ་ཁ་བསྐངས་པ་གཏན་མ་བཤད་ཅིང་ནཱ་རོ་པ་ནས་བརྒྱུད་པ་དང་། པཎ་ཆེན་ཤཱཀྱ་ཤྲཱི་ནས་བརྒྱུད་པ་གང་ལ་ཡང་འདི་ལྟ་བུའི་ཁ་བསྐང་ཚུལ་མ་གསུངས་པས་རང་བཟོ་ཁོ་ནའོ། །གལ་ཏེ་དཀྱིལ་མཆོག་ལས་མནའ་ཆུ་བླུད་པ་ཡན་ཆད་མ་གསུང་ཀྱང་ནག་པོ་དཀྱིལ་ཆོག་ལས་གསུངས་པ་ཁ་བསྐང་བའི་རིགས་པས་འདིར་ཡང་ཁ་བསྐང་ངོ་སྙམ་ན་དེ་ནི་མི་མཚུངས་ཏེ། དཀྱིལ་ཆོག་ལས། དང་པོར་སློབ་དཔོན་བདག་ཉིད་རང་། །དེ་ནས་སློབ་མ་བདག་འདྲར་བསམ། །དེ་ནས་ཐམས་ཅད་བསྒྲུབ་པར་བྱ། །ཞེས་ཁ་འཕངས་པའི་དོན་ཁ་བསྐང་བ་ཡིན་གྱི་འདིར་ནི་དེ་ལྟ་བུའི་ཁ་འཕངས་ཀྱི་ཚིག་གི་ཁྱད་པར་མེད་པའི་ཕྱིར། གཞན་ཡང་བརྗོད་པར་བྱ་བ་མང་དུ་ཡོད་མོད་ཀྱི་རེ་ཤིག་གཞག་གོ །ད་ནི་ལུགས་བཞི་པ་ལ་དཔྱད་པར་བྱ་སྟེ། སྒྲུབ་བྱེད་མེད་པར་བསྟན་པ་དང་། གནོད་བྱེད་ཡོད་པར་བསྟན་པ་གཉིས་ལས། དང་པོ་ནི། ཁྱོད་ཀྱི་སྒྲུབ་བྱེད་ཀྱི་གཙོ་བོ་རྒྱུད་གཉིས། རྒྱ་གཞུང་གསུམ་ཊཱི་ཀ་དང་བཅས་པའི་ལུགས་དེ་དག་སྒྲུབ་བྱེད་དུ་ཅུང་ཟད་ཙམ་ཡང་མ་འབྲེལ་ཏེ། དེ་དག་ལ་སོགས་པའི་རྒྱུད་འགྲེལ་མང་པོ་ནས། ལུས་དཀྱིལ་འཁོར་ཡིན་ཞེས་པ་དང་། ལུས་དཀྱིལ་འཁོར་དུ་གྱུར་ཞེས་པ་དང་། ལུས་དཀྱིལ་འཁོར་དུ་བསྒོམས་ཞེས་གསུངས་པས་རང་གི་ལུས་འདི་དཀྱིལ་འཁོར་དུ་བསྒོམ་པ་སྟོན་པ་ཡིན་པར་ཐམས་ཅད་མཐུན་མོད། དེ་ཙམ་གྱིས་ཕྱི་དཀྱིལ་ལྟ་བུའི་གྲུ་བཞི་སྒོ་བཞིའི་རྣམ་པར་བསྒོམས་པ་མི་གྲུབ་པའི་ཕྱིར་ཏེ། སྤྱིར་དཀྱིལ་འཁོར་ཡིན་ན་ཡང་གྲུ་བཞི་སྒོ་བཞིའི་རྣམ་པ་ཅན་ཡིན་པས་མ་ཁྱབ་པའི་ཕྱིར་ཏེ། ཕྱིའི་དབང་དུ་བྱས་ན་མཁའ་འགྲོ་རྒྱ་མཚོའི་དཀྱིལ་འཁོར་ནང་མ་རྣམས་ཟླུམ་པོར་ཡོད་པའི་ཕྱིར་དང་། ནང་གི་དབང་དུ་བྱས་ན་གསང་བ་ཆོས་ཀྱི་དཀྱིལ་འཁོར་གསུམ་ལ་ཡང་དཀྱིལ་འཁོར་གྱི་ཐ་སྙད་ཡོད་པའི་ཕྱིར་རོ། །རྩ་རྒྱུད་དང་སཾ་བུ་ཊི་གཉིས་ཆར་ལས། དཀྱིལ་འཁོར་འཁོར་ལོའི་སྐབས་སུ། དཀྱིལ་འཁོར་སངས་རྒྱས་བཞུགས་པའི་གྲོང་ཁྱེར་ལ་འཁྲུལ་ནས། དོགས་པ་ཞུས་པའི་ལན་དུ་དཀྱིལ་འཁོར་གྱི་སྒྲ་དོན་སྙིང་པོ་ལེན་པ་ཡིན་པས་དེ་འཁྲུལ་མི་དགོས་སོ་ཞེས་པའི་ལན་གསུངས་པ་ཡང་འདི་འདྲའི་རིགས་ཅན་ལ་དགོངས་པར་སྣང་སྟེ་ཁྱོད་ཀྱང་དཀྱིལ་འཁོར་ཞེས་པའི་ཐ་སྙད་ཐམས་ཅད་གྲུ་བཞི་སྒོ་བཞིའི་རྣམ་པ་ཅན་དུ་འཁྲུལ་འདུག་པའི་ཕྱིར་རོ། །དྲིལ་བུ་པའི་སྒྲུབ་ཐབས་རྗེ་བཙུན་གྱིས་མཛད་པ་ལས། དེ་ལྟར་གསུངས་པ་ནི་ཕྱི་ལ་ཇི་ལྟར་ཡོད་པ་ནང་དུ་བསྒོམ་པའི་ཚེ་ཕྱིའི་རྟེན་འབྱུང་བཞི་རི་རབ་དང་བཅས་པ་ནང་དུ་འདི་ཡིན། ཕྱིའི་དེའི་སྟེང་གི་གཞལ་ཡས་ཁང་པ་ནང་དུ་འདི་ཡིན་ཞེས་པའི་དོན་ཡིན་གྱི་ནང་དུ་དེ་གཉིས་སྟེང་འོག་ཏུ་བསྒོམ་པའི་དོན་མ་ཡིན་ནོ། །གཉུག་མ་དྲན་གསལ་གྱི་ལུང་གི་དོན་ཡང་ཁྱོད་འདོད་པ་ལྟར་མ་ཡིན་ཏེ། དེ་ཡང་སྔ་མ་ལྟར། ཕྱི་ལ་སྲུང་བའི་འཁོར་ལོ་ཡོད་པ་ནང་དུ་རྐང་མཐིལ་རྡོ་རྗེའི་ས་གཞི། སྤྱི་བོ་རྡོ་རྗེ་རྒྱ་གྲམ་གྱི་ཐོག་ཞེས་སོགས་དང་། ཕྱི་ལ་གཞལ་ཡས་ཁང་ཡོད་པ་ནང་དུ་ལུས་འདོམ་གང་གྲུ་བཞི་སོགས་དང་། ཕྱི་ལ་གཞལ་ཡས་ཁང་གི་དབུས་ཕྱིའི་ཧེ་རུ་ཀ་བསྒོམ་པ་ནང་དུ་རང་གང་བསྒོམ་པའི་གཞི་དུས་ཀྱི་ཧེ་རུ་ཀར་གསལ་བ་ཡིན་ཞེས་པའི་དོན་ཡིན་གྱི། ལུས་ཀྱི་གཞལ་ཡས་ཁང་གྲུ་བཞི་སྒོ་བཞིར་བསྒོམས་པའི་དབུས་སུ་ཕྱིའི་ཧེ་རུ་ཀ་བསྒོམ་པའི་དོན་གཏན་མ་ཡིན་པའི་ཕྱིར་ཏེ་གཞན་དུ་ན་སཾ་བུ་ཊི་ལས། ཀ་བ་གཅིག་དང་སྒོ་དགུ་པ། །སྦོམ་པོ་ལྔ་ནི་ལྷག་པའི་ལྷ། །ཞེས་པའི་དོན་ཡང་། གཞི་དུས་སུ་རྩ་དབུ་མ་ཀ་བ་གཅིག་དང་། བུ་ག་དགུ་སྒོ་དགུར་སྐྱེས་པའི་ཁང་པའི་ནང་དུ་ཕུང་པོ་ལྔ་ཡོད་པའི་དོན་ཡིན་པར་འགྱུར་ཏེ། དེའི་འགྲེལ་པར་གནད་ཀྱི་གསལ་བྱེད་ལས། ཀ་བ་གཅིག་ནི་ལུས་ཀྱི་ཀ་བ་རྩ་ཨ་ཝ་ངྷཱུ་ཏཱི་དབུས་ན་གནས་པའོ། །སྒོ་དགུ་ནི་འོག་ཏུ་སྦྱར་ལ། བུ་ག་དགུ་ཞེས་སྦྱར་ཏེ། མིག་ལ་སོགས་པ་དགུའོ། །དེ་ལྟ་བུའི་ཁང་པ་ན་ལྷ་གང་ཡོད་ཅེ་ན་སྦོམ་པོ་ལྔ་སྟེ། ཕུང་པོ་ལྔ་རྒྱལ་བ་ལྔའོ། །ཞེས་གསུངས་པས་སོ། །ལེགས་པར་སོམས་ཤིག གཞུང་དེར་སྤྱི་བོར་རྡོ་རྗེ་རྒྱ་གྲམ་གྱི་ཐོག་ཅེས་པ་འདི་ཉིད་ཀྱིས། ཁྱོད་ཀྱི་འདོད་པ་དེ་ཉིད་བཀག་པར་གསལ་ཏེ། རྡོ་རྗེ་རྒྱ་གྲམ་གྱི་ཐོག་དེ་ཉིད་ལུས་དཀྱིལ་གྱི་ཐོག་ཡིན་ནམ། ཕྱི་དཀྱིལ་གྱི་ཐོག་ཡིན། དང་པོ་ལྟར་ན་ཁྱོད་ལུས་དཀྱིལ་གྱི་རྡོ་རྗེ་རྒྱ་གྲམ་གཞལ་ཡས་ཁང་གི་འོག་གཞིར་བསྒོམས་པ་དང་དངོས་སུ་འགལ་ཞིང་། གཞན་གྱི་འདོད་པ་སྦྱང་གཞི་གང་དུ་ཡོད་སར་བསྒོམ་པ་འདི་ཉིད་འགྲུབ་བོ། །ཕྱི་མ་ལྟར་ན་ཕྱི་དཀྱིལ་ལ་རྡོ་རྗེ་རྒྱ་གྲམ་འོག་གཞིར་ཡོད་ཀྱི་ཐོག་ཏུ་མེད་པས་བསལ་ལོ། །གཉིས་པ་གནོད་བྱེད་ཡོད་པར་བསྟན་པ་ལ་ལུང་གི་གནོད་བྱེད་དང་། རིགས་པའི་གནོད་བྱེད་གཉིས་ལས། དང་པོ་ནི། ཇི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་ཏུ་ཕྱེ། །ཞེས་པ་འདི་ཉིད་ཀྱིས་གནོད་དེ་ཁྱོད་འདོད་པ་ལྟར། ལུས་ཀྱི་ཆ་ཤས་འདི་ཉིད་ལ་གཞལ་ཡས་ཁང་གྲུ་བཞི་སྒོ་བཞིར་བྱས་ནས་རང་གི་ལུས་ཀྱི་ཕྱི་རོལ་དུ་ཡོད་ན། ཇི་ལྟར་ནང་དུ་དེ་བཞིན་ཕྱིར། །འཐོར་བའི་དེ་ཉིད་རབ་ཏུ་ཕྱེ། །ཞེས་པར་སོང་འདུག་པའི་ཕྱིར་རོ། །གལ་ཏེ་ནང་ཞེས་པའི་དོན་ལུས་དཀྱིལ་གྱི་གཞལ་ཡས་ཁང་ཡིན་ལ། དེར་ཕྱི་དཀྱིལ་ལ་ཇི་ལྟར་ཡོད་པ་སྡོམ་པའི་དོན་ཡིན་ནོ་སྙམ་ན། དེ་ལྟར་ན་སྦྱིན་སྲེག་ལུས་ལ་སྡོམ་པར་གསུངས་པ་ལ་ཡང་། ཐབ་ཁུང་དང་དགང་བླུགས་གཟར་དང་། བསྲེག་རྫས་རྣམས་ལུས་རྒྱུར་བྱས་པ་ལས་བྱུང་བ་ཞིག་ལུས་ལས་ལོགས་སུ་བསྒོམ་ནས་དེར་ཕྱི་ལ་ཇི་ལྟར་ཡོད་པ་བསྡོམ་དགོས་པར་འགྱུར་ཞིང་། དེ་བཞིན་དུ་འཕགས་པའི་བདེན་པ་བཞི་དང་། སྡེ་པ་བཞི་ལ་སོགས་པ་ལུས་ལ་སྡོམ་པ་ལ་ཡང་མཚུངས་པས་དེ་དག་ཇི་ལྟར་བསྒོམ་པ་ཡིན་ལེགས་པར་སོམས་ཤིག གཉིས་པ་ལ་བརྒྱད་དེ། རྒྱུ་ལ་བརྟགས་ཏེ་མི་འཐད་པ། བསྒོམ་ཚུལ་ལ་བརྟགས་ཏེ་མི་འཐད་པ། གནས་ལ་བརྟགས་ཏེ་མི་འཐད་པ། ཚད་ལ་བརྟགས་ཏེ་མི་འཐད་པ། རྟེན་དང་བརྟེན་པའི་ཚུལ་ལ་བརྟགས་ཏེ་མི་འཐད་པ། སྒྲ་དོན་ལ་བརྟགས་ཏེ་མི་འཐད་པ། དཀྱིལ་འཁོར་སྟོན་ཚུལ་ལ་བརྟགས་ཏེ་མི་འཐད་པ། དཀྱིལ་འཁོར་བསྡུ་བ་ཡོད་མེད་ལ་བརྟགས་ཏེ་མི་འཐད་པའོ། །དང་པོ་ནི། ཁྱོད་ཀྱི་རྟེན་ལུས་དཀྱིལ་གྱི་གཞལ་ཡས་ཁང་པ་དེ་དཀྱིལ་འཁོར་གྱི་གཙོ་བོའི་ལུས་དེ་ཉིད་དངོས་སུ་གཞལ་ཡས་ཁང་པར་གྱུར་པ་ཡིན་ནམ། ལུས་ཀྱི་ཆ་ཤས་རྣམས་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་འཕྲོས་པ་ལས་བྱུང་བ་ཡིན་ནམ། ལུས་ལས་བྱུང་བར་མོས་པ་ཙམ་གྱིས་བསྒོམ་པ་ཡིན། དང་པོ་ལྟར་ན་དེ་ཕྱིན་ཆད་དཀྱིལ་འཁོར་གྱི་གཙོ་བོའི་ལུས་མེད་པར་འགྱུར་ཏེ། ལུས་དེ་ཉིད་ཁྱེད་འདོད་པ་ལྟར་གྱི་གྲུ་བཞི་སྒོ་བཞིར་དངོས་སུ་སོང་བའི་ཕྱིར། གཉིས་པ་ལྟར་ན་ལུས་དཀྱིལ་གྱི་གཞལ་ཡས་ཁང་མ་ཡིན་པར་འགྱུར་ཏེ། ལུས་གང་དུ་ཡོད་སར་གཞལ་ཡས་ཁང་མེད་ལ། གཞལ་ཡས་ཁང་གང་དུ་ཡོད་སར་ལུས་མེད་པའི་ཕྱིར། གཞན་ཡང་བསྒོམ་ཚུལ་དེ་རྣམ་པར་རྟོག་པས་སྒྲོ་བཏགས་ནས་བསྒོམ་པ་ཙམ་ཡིན་པས། འདི་དང་ཕྱོགས་གསུམ་པ་གཉིས་ཆར་ཡང་བཅོས་མའི་དཀྱིལ་འཁོར་ཡིན་གྱི་མ་བཅོས་པའི་དཀྱིལ་འཁོར་དུ་མི་འགྱུར་རོ། །གཉིས་པ་ནི། ཁྱོད་ཀྱིས་ལུས་དཀྱིལ་བསྒོམ་པའི་ཚེ་ཡེ་ཤེས་པ་བཅུག་པ་སོགས་ཀྱི་རྐྱེན་གྱིས་རིམ་གྱིས་བསྐྱེད་པ་ཡིན་ནམ། ཅིག་ཆར་བསྐྱེད་ནས་རིམ་གྱིས་གསལ་འདེབས་པ་ཡིན། དང་པོ་ལྟར་ན། རྗེ་བཙུན་ཆེན་པོས་བདེ་དགྱེས་གཉིས་ཀྱི་སྐབས་སུ། ལུས་དཀྱིལ་ཅིག་ཆར་བསྐྱེད་ནས་རིམ་གྱིས་གསལ་འདེབས་པར་བཤད་པ་དང་འགལ་ཞིང་། ཁྱེད་རང་གི་ལུགས་དང་ཡང་འགལ་ཏེ། རྩིག་པ་མ་བསྐྱེད་པའི་གོང་དུ་གྲུ་བཞི་སྒོ་བཞི་བསྐྱེད་པ་སོགས་ཁྱད་གཞི་མེད་པའི་ཁྱད་ཆོས་དུ་མ་བཟོ་དགོས་པའི་ཕྱིར་ཏེ་ཁྱེད་ཀྱིས་ཕྱི་དཀྱིལ་ལྟ་བུའི་གྲུ་བཞི་སྒོ་བཞི་འདོད་པའི་ཕྱིར་རོ། །གཉིས་པ་ལྟར་ན་དོན་ལ་འཐད་ཀྱང་ཁྱོད་ལ་འགལ་ཏེ། དེ་ལྟར་ན་ལུས་དཀྱིལ་གྱི་གཞལ་ཡས་ཁང་ཐོག་མར་གྲུ་བཞི་སྒོ་བཞི་བློ་ཡུལ་དུ་འཆར་དུ་བཅུག་ནས་གཞལ་ཡས་ཁང་གི་ཆ་ཤས་འདི་དང་འདི་ལུས་དཀྱིལ་གྱི་འདི་དང་འདི་ལས་བྱུང་ངོ་ཞེས་པའི་ཚུལ་གྱིས་གསལ་གདབ་དགོས་པར་འགྱུར་ཏེ། ལུས་དཀྱིལ་གྱི་གཞལ་ཡས་ཁང་གྲུ་བཞི་སྒོ་བཞིར་ཅིག་ཆར་བསྐྱེད་ནས་རིམ་གྱིས་གསལ་འདེབས་པ་ཡིན་པའི་ཕྱིར་རོ། །འདོད་ན་གཞལ་ཡས་ཁང་གི་འོག་གི་རླུང་ཡང་རྐང་མཐིལ། མེ་ནི་སུམ་མདོ་ཞེས་སོགས་གོང་མའི་གསུང་རབ་ལས་བརྗོད་པ་ཕྱིན་ཅི་ལོག་ཏུ་བསྒྱུར་དགོས་པར་འགྱུར་རོ། །གསུམ་པ་ནི་ལུས་དཀྱིལ་གྱི་གཞལ་ཡས་ཁང་གི་འོག་གཞི་འབྱུང་བཞི་རི་རབ་སྣ་ཚོགས་རྡོ་རྗེ་དང་བཅས་པ་དེ་ཕྱི་དཀྱིལ་གྱི་གཞལ་ཡས་ཁང་གི་འོག་ཏུ་བསྒོམ་པ་ཡིན་ནམ། དེའི་ནང་དུ་བསྒོམ་པ་ཡིན། དང་པོ་ལྟར་ན་བདེ་མཆོག་ལཱུ་ནག་གཉིས་ལྟ་བུ་ལ་འོག་གཞི་རི་རབ་སྣ་ཚོགས་རྡོ་རྗེ་དང་བཅས་པ་གཉིས་བརྩེགས་སུ་འབྱུང་ཞིང་། ཀྱཻ་རྡོ་རྗེ་ལ་ཕྱི་དཀྱིལ་གྱི་འོག་གཞིར་དེ་དག་ཡོད་པར་འགྱུར་རོ། །གལ་ཏེ་ཕྱོགས་གཉིས་པ་ལྟར་ན་ཀྱཻ་རྡོར་མན་ངག་ལུགས་ལྟ་བུ་ལ་དེ་དག་པདྨ་འདབ་བརྒྱད་ཀྱི་འོག་ཏུ་བསྒོམ་མམ། དབུས་ཀྱི་ཉི་མ་བཏེགས་ནས་པདྨའི་སྟེང་དུ་བསྒོམ་མམ། བདུད་བཞི་བཏེགས་ནས་ཉི་མའི་སྟེང་དུ་བསྒོམ་མམ། བདུད་བཞིའི་ཡང་སྟེང་དུ་བསྒོམ་དཔྱད་ན་བསྒོམ་སའི་གནས་མི་རྙེད་དོ། །བཞི་པ་ནི་ཁྱོད་ཀྱི་ཀྱཻ་རྡོ་རྗེའི་ལུས་དཀྱིལ་གྱི་གཞལ་ཡས་ཁང་སྲུང་འཁོར་སྣ་ཚོགས་རྡོ་རྗེ་དང་བཅས་པ་ཕྱིའི་ལྷ་མོ་བརྒྱད་ཀྱི་ནང་ཆ་ཆེན་དྲུག་ཚུན་ཆད་དུ་ཚུད་དགོས་ལ་དེའི་ཚེ་གཞལ་ཡས་ཁང་རང་གི་ཚད་ལ་རྩིག་པའི་ནང་མཐའ་ནས་ནང་མཐའི་བར་ཆ་ཆེན་གཅིག་ཙམ་ལས་མི་འབྱུང་ཞིང་དེའི་ནང་དུ་གཙོ་བོ་ཆ་ཆེན་གཅིག་གདན་དང་བཅས་པ་དཔངས་སུ་མི་ཤོང་བའི་ཕྱིར་དང་། སྒོ་ལ་ཡང་ཆ་ཕྲན་ཕྱེད་ལས་མེད་པས་ནང་ན་ལྷ་ཆ་ཆེན་གཅིག་གི་ཚད་བཞུགས་པ་དེ་ལྟ་བུའི་རྟེན་བརྟེན་པའི་རྣམ་གཞག་ནི་གསང་སྔགས་རྒྱུད་སྡེའི་ལུགས་ལ་མེད་དོ། །གལ་ཏེ་དེ་དག་ཡེ་ཤེས་ཀྱི་སྣང་བ་ལས་གྲུབ་པས་རྡུལ་གཅིག་སྟེང་ན་རྡུལ་སྙེད་ཀྱི་སངས་རྒྱས་བཞུགས་པའི་ཚུལ་ཡིན་པས་སྐྱོན་མེད་དོ་སྙམ་ན། དེ་ལྟར་ན་ཁྱེད་ཀྱིས་གཞན་ལ་སྐྱོན་བརྗོད་པའི་ཚེ་སྙིང་གའི་རྩ་བཞིའི་ཐད་དུ་སྒོ་བཞི་བསྒོམས་ན་སྒོ་ཆུང་བའི་སྐྱོན་བརྗོད་པ་ལ་ཡང་ཅིའི་ཕྱིར་མི་མཚུངས། ལྔ་པ་ནི། ཁྱོད་ཀྱིས་ལུས་དཀྱིལ་གྱི་གཞལ་ཡས་ཁང་ན་ཡོད་པའི་གཙོ་བོ་དེ་ཕྱི་དཀྱིལ་གྱི་ལྷ་ཡིན་ན། རྟེན་དང་བརྟེན་པར་མ་འབྲེལ་ཏེ། ལུས་དཀྱིལ་གྱི་གཞལ་ཡས་ཁང་པའི་ནང་ན་ཕྱི་དཀྱིལ་གྱི་ལྷ་འདུག་པའི་ཕྱིར་རོ། །ལུས་དཀྱིལ་གྱི་ལྷ་ཡིན་ན། ལུས་དཀྱིལ་བསྒོམས་ཕྱིན་ཆད་ཕྱི་དཀྱིལ་ལ་གཙོ་བོ་མེད་པར་འགྱུར་ཞིང་། གཉིས་ཀ་ཡིན་ན་བཅོས་མ་དང་མ་བཅོས་པའི་གཞི་མཐུན་དུ་འགྱུར་རོ། །གཞན་ཡང་གཞལ་ཡས་ཁང་དེ་ལྟར་བསྒོམ་དགོས་ན་བརྟེན་པ་ལྷ་ཡང་ཕྱི་དཀྱིལ་ལྟ་བུའི་བཀོད་པ་བསྒོམ་དགོས་པར་འགྱུར་ཏེ། གཞན་དུ་ན་རྟེན་བརྟེན་པ་མ་འབྲེལ་བའི་ཕྱིར་རོ། །དྲུག་པ་ནི་ཁྱེད་ལུས་དཀྱིལ་གྱི་གཞལ་ཡས་ཁང་འདི་ངེས་པར་ཕྱི་དཀྱིལ་ལྟར་གྱི་གྲུ་བཞི་སྒོ་བཞི་པར་བསྒོམ་དགོས་པའི་རྒྱུ་མཚན་ཅི་ཡིན་ཞེས་དྲིས་པས་དེ་ལ་དཀྱིལ་འཁོར་གྱི་སྒྲ་དོན་ཚང་དགོས་པའི་ཕྱིར་ཏེ། ཕྱིའི་དཀྱིལ་འཁོར་བཞིན་ནོ་ཞེ་ན། དེ་ནི་དོན་མ་རྟོགས་པ་སྟེ། དཀྱིལ་འཁོར་གྱི་སྒྲ་དོན་རྒྱུད་ལས་སྙིང་པོ་ལེན་པ་ལ་གསུངས་ཀྱི་གྲུ་བཞི་སྒོ་བཞི་པ་ལ་བཤད་པ་མེད་པའི་ཕྱིར་དང་། ཕྱིའི་དཀྱིལ་འཁོར་ལ་ཡང་གྲུ་བཞི་སྒོ་བཞི་པར་མ་ངེས་ཏེ། ཟླུམ་པོའི་དཀྱིལ་འཁོར་མང་དུ་ཡོད་པའི་ཕྱིར་རོ། །བདུན་པ་ནི་རྗེ་བཙུན་རྩེ་མོས་དྲིལ་བུ་དཀྱིལ་ཆོག་ལས། དཀྱིལ་འཁོར་སྟོན་པའི་སྐབས་སུ་རྐང་མཐིལ་རླུང་ནས་ལྕེ་དང་མཆུ་འདོད་ཡོན་གྱི་སྣམ་བུ་ཞེས་སོགས་གཞལ་ཡས་ཁང་གི་ཆ་ཤས་རྫོགས་པར་བསྟན་པར་བཤད་པས་དེའི་ཚེ་ལུས་དཀྱིལ་གྱི་གཞལ་ཡས་ཁང་མ་བསྡུས་པར་སྟོན་ནམ་བསྡུས་ནས་སྟོན། དང་པོ་ལྟར་ན་མིག་དར་བཅིངས་པ་ལ་སོགས་པ་དབང་རྫས་འགྲིམ་པའི་ཆོ་ག་རྣམས་བྱེད་པའི་ཚེ་གཞལ་ཡས་ཁང་འདི་མལ་དུ་བཞག་ནས་བྱེད་དམ། མ་བཞག་པར་དེ་དང་བཅས་ཏེ་བྱེད། དང་པོ་ལྟར་ན་ཆོ་ག་བྱེད་པའི་སློབ་དཔོན་གྱི་ལུས་ལ་ལུས་དཀྱིལ་མེད་པར་འགྱུར་ཞིང་། ཕྱི་མ་ལྟར་ན་ཕྱི་དཀྱིལ་ལ་ཡང་མཚུངས་པས་ཆོ་གའི་རྣམ་གཞག་མ་ཤེས་པའོ། །བསྡུས་ནས་སྟོན་ན། ཕྱི་དཀྱིལ་ལ་ཡང་མཚུངས་ཤིང་། བསྡུས་ནས་སྟོན་ཞེས་པ་རང་ཚིག་དང་འགལ་ཏེ་བསྡུས་ནས་སྟོན་རྒྱུ་མེད་པའི་ཕྱིར་རོ། །བརྒྱད་པ་ནི་ལུས་དཀྱིལ་བསྒོམས་པའི་ཐུན་མཇུག་ཏུ་ལུས་དཀྱིལ་གྱི་གཞལ་ཡས་ཁང་འདི་ལུས་ལ་བསྡུའམ་མི་བསྡུ། དང་པོ་ལྟར་ན་རྗེ་བཙུན་གོང་མའི་གསུང་རབ་བདེ་དགྱེས་ཀྱི་ལུས་དཀྱིལ་སྟོན་པའི་གནས་སྐབས་གང་དུ་ཡང་ལུས་དཀྱིལ་གྱི་གཞལ་ཡས་ཁང་བསྡུ་ཚུལ་ཟུར་ཙམ་ཡང་མི་འབྱུང་བས་རང་བཟོ་ཁོ་ནར་འགྱུར་ལ་ཕྱི་མ་ལྟར་ན་ཕྱི་དཀྱིལ་ཡང་བསྡུ་མི་དགོས་པར་འགྱུར་ཏེ། རྒྱུ་མཚན་ཕྱེད་ཁྱེད་རང་གིས་ཁས་བླངས་ཤིང་། ཕྱེད་རིགས་པས་གྲུབ་པའི་ཕྱིར་རོ། །གཞན་ཡང་ཕྱོགས་སྔ་མ་སྨྲ་བ་པོ་འདིས་གཞལ་ཡས་ཁང་གི་མཚན་ཉིད་མ་རྫོགས་པའི་བསྒོམ་ཚུལ་དེ་ལྟ་བུ་ནི་ཤིན་དུ་མི་འཐད་དེ་ལུང་དང་རིགས་པས་གནོད་པའི་ཕྱིར་རོ། །དེ་ལ་ལུང་ནི་སཾ་བུ་ཊི་ལས། ལུས་ནི་དཀྱིལ་འཁོར་ཞེས་པ་ནས། །འདི་ནི་རྫོགས་པར་དཀྱིལ་འཁོར་གནས། །ཞེས་པའི་བར་གྱིས་རྟེན་ལུས་དཀྱིལ་གཞལ་ཡས་ཁང་མཚན་ཉིད་ཡོངས་སུ་རྫོགས་པར་བསྒོམས་པར་བསྟན་པ་དང་འགལ་ལོ། །རིགས་པས་གནོད་པ་ནི་སྲུང་འཁོར་བསྒོམ་ཚུལ་ལ་བརྟགས་ན་མི་འཐད་དེ། གཞལ་ཡས་ཁང་གི་འོག་གཞི་སྣ་ཚོགས་རྡོ་རྗེ་སྟེང་དུ་བསྒོམ་པ་དང་། རྡོ་རྗེའི་ས་གཞི་གུར་གྱིས་བཏུམས་པ་དང་། རྡོ་རྗེའི་རྭ་བ་རྩིབ་མའི་ཐད་དུ་ཤ་བའི་རྭ་ལག་བརྒྱངས་པ་ལྟར་བསྒོམ་པ་དང་། ཕྱོགས་ཀུན་ནས་འཆིང་བའི་མེ་རི་བསྒོམ་རྒྱུ་ཡིན་པ་ལ་སེན་མོ་ཉི་ཤུའི་ཐད་དུ་པྲ་ཚུགས་ཙམ་རེ་བསྒོམ་པ་ནི་ཤིན་ཏུ་མི་རིགས་པའི་ཕྱིར་དང་། གཞལ་ཡས་ཁང་གི་རྟེན་འབྱུང་གཞི་གཞལ་ཡས་ཁང་གི་འོག་ཏུ་ཡིན་པ་ལ་རྐང་མཐིལ་དང་། སུམ་མདོ་སོགས་ཀྱི་གནས་སུ་བསྒོམ་པ་མི་རིགས་པའི་ཕྱིར་དང་། གཞལ་ཡས་ཁང་གཅིག་ལ་རླུང་གི་དཀྱིལ་འཁོར་གཉིས་དང་། རི་རབ་ཉེར་གཅིག་ཡོད་པ་ཡང་མི་འཐད་པའི་ཕྱིར་རོ། །གཞལ་ཡས་ཁང་དངོས་ལ་བརྟགས་ན་ཡང་མི་འཐད་དེ། གང་དུ་གྲུ་བཞི་ཡོད་ས་དེར་རྩིག་པ་མེད། རྩིག་པ་ཡོད་ས་དེར་སྒོ་མེད། སྒོ་ཡོད་ས་དེར་རྟ་བབས་མེད་པ་སོགས་དང་། གཞལ་ཡས་ཁང་གཅིག་ལ་རྟ་བབས་གཉིས་ལས་མེད་པ་སོགས་མི་རིགས་པ་མང་དུ་འདུག་པའི་ཕྱིར་ཞེས་རྣམ་རྟོག་གི་སྤྲོས་པས་སུན་འབྱིན་ལྟར་སྣང་མང་དུ་སྨྲ་བར་སྣང་ངོ་། །འདི་དག་དགག་སྒྲུབ་ཀྱི་གནས་སུ་མི་འདུག་ནའང་མ་ངེས་པའི་བློ་ཅན་འགའ་ཞིག་སྒྲུབ་བྱེད་ལྟར་སྣང་ལ་སུན་འབྱིན་ལྟར་སྣང་གིས་བསླུ་བས་འདི་ལ་ཡང་ཅུང་ཟད་དཔྱད་ན། ལུང་གིས་མི་གནོད་པའི་ཚུལ་ནི་ཕྱི་དཀྱིལ་ལྟར་གྱི་གཞལ་ཡས་ཁང་མཚན་ཉིད་རྫོགས་པར་བསྒོམ་པ་ལུང་དོན་མ་ཡིན་ཞིང་ལུངཾ་དོནཾ་གྱི་གཞལ་ཡས་ཁང་གི་མཚན་ཉིད་ཡོངས་སུ་རྫོགས་པ་མེད་པ་ནི་མ་གྲུབ་པར་སྔར་བཤད་ཟིན་ཏོ། །རིགས་པའི་གནོད་བྱེད་རྣམས་ནི་རྡོ་རྗེའི་ལུས་སྐྱོན་མེད་གཅིག་མདུན་དུ་བཞག་ནས་དེ་ལ་གནོད་བྱེད་བརྗོད་པར་སྣང་སྟེ། དགག་བྱའི་ཕྱོགས་སྔ་དེ་དག་དེ་ལ་གྲུབ་པའི་ཕྱིར་རོ། །གལ་ཏེ་ལུས་ལ་དེ་ལྟར་གྲུབ་ཀྱང་བསྒོམ་པའི་ཚེ་ལུས་ལས་ཕྱི་རོལ་དུ་གྲུ་བཞི་སྒོ་བཞིར་བསྒོམས་པས་སྐྱོན་མེད་དོ་སྙམ་ན། དེ་ལྟར་ན་གང་དུ་གྲུ་བཞི་ཡོད་ས་དེར་རྩིག་པ་མེད་པ་སོགས་ཀྱི་སྐྱོན་ལས་ལྷག་པ་གང་དུ་ལུས་ཡོད་སར་ལུས་དཀྱིལ་གྱི་རྩིག་པ་དང་། ཕ་གུ་སོགས་གཞལ་ཡས་ཁང་གི་ཆ་ཤས་གང་ཡང་མེད་པའི་སྐྱོན་འཇུག་པར་མི་འགྱུར་རམ་ལེགས་པར་སོམས་ཤིག གཞལ་ཡས་ཁང་གཅིག་ལ་རླུང་གི་དཀྱིལ་འཁོར་གཉིས་ཡོད་པ་དང་། རྟ་བབས་གཉིས་ལས་མེད་པ་སོགས་ནི་ཕྱི་ནང་ལྷ་གྲངས་མི་མཐུན་པའི་ལོག་རྟོག་དང་འདྲ་བར་སྣང་བས་རྗེ་བླ་མས་བཀག་ཟིན་ཏོ། །མདོར་ན་རྗེ་བཙུན་རྩེ་མོས་དྲིལ་བུ་དཀྱིལ་ཆོག་གི་འགྲེལ་པར། གདུལ་བྱ་དབང་རྟུལ་ལྷ་ཞལ་ཕྱག་གི་རྣམ་པ་ཅན་མེད་ན་ཡིད་མི་ཆེས་པ་དང་། དབང་འབྲིང་རྡུལ་ཚོན་གྱི་མཚན་མ་ཙམ་གྱིས་ཡིད་ཆེས་པ་དང་། དབང་རྣོན་རྡོ་རྗེ་སློབ་དཔོན་གྱི་ལུས་ལ་དཀྱིལ་འཁོར་ཚང་བར་ཡིད་ཆེས་པ་གསུམ་གྱི་དེར་རིམ་པ་ལྟར། རས་རིས་དང་རྡུལ་ཚོན་དང་། ལུས་དཀྱིལ་གསུངས་པར་བཤད་པའི་དགོངས་པ་ཤེས་ནས་བསྟན་པ་མ་བཀྲུགས་པར་ཉམས་སུ་ལོང་ཤིག གཉིས་པ་བརྟེན་པ་ལུས་དཀྱིལ་བཤད་པ་ལ་གཉིས་ཏེ། སྤྱིར་བཤད་པ་དང་། སྐབས་སུ་བབ་པ་བྱེ་བྲག་ཏུ་བཤད་པའོ། །དང་པོ་ནི་སྤྱིར་བརྟེན་པ་ལུས་དཀྱིལ་ལ་སྦྱང་གཞི་ཕུང་ཁམས་སྐྱེ་མཆེད་སྦྱོང་བ་གཙོ་བོར་བྱས་པ་དང་། གནས་དེ་དང་དེའི་རླུང་སེམས་ཐིམས་པས་ས་བཅུ་བགྲོད་པ་གཙོ་བོར་བྱས་པ་དང་། དེ་གཉིས་ཀ་ཚང་ཞིང་དབང་བཞིའི་ལམ་དང་སྦྱར་བ་གཙོ་བོར་བྱས་པ་གསུམ་ཡོད་པ་ལས། དང་པོ་ནི། གསང་འདུས་འཕགས་ལུགས་ཀྱི་ལུས་དཀྱིལ་ཏེ། བཤད་རྒྱུད་རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་གྱི་ལུས་ལ་གདན་གསུམ་ཚང་བའི་ལྷ་ཚོགས་བཞུགས་པར་གསུངས་པ་དེ་ཉིད་ཤེས་བྱེད་དུ་མཛད་ནས། དང་པོའི་མགོན་པོའམ་སྤྲུལ་སྐུ་རྡོར་སེམས་ཀྱི་ལུས་ལ་ལུས་དཀྱིལ་བཀོད་པའི་ཚེ་སྒྲུབ་པ་པོའི་ཕུང་ཁམས་སྐྱེ་མཆེད་ཀྱི་ཆོས་རྣམས་གནས་དེ་དང་དེར་ས་བོན་གྱི་རྣམ་པར་བསྒོམས་ནས། ས་བོན་དེ་ཉིད་ལྷའི་ངོ་བོར་བསྒོམ་པའམ་ས་བོན་དེ་ཡོངས་སུ་གྱུར་པ་ལས་ལྷའི་རྣམ་པར་བསྒོམ་པའི་ཚུལ་གཉིས་གསུངས་པའི་ཕྱིར་ཏེ། སྒྲུབ་ཐབས་མདོར་བྱས་ལས། རྣམ་སྣང་མཛད་ཀྱི་ས་བོན་ནི། །ཁ་དོག་དཀར་པོ་ཡི་གེ་ཨོཾ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་དགོད། །ཅེས་སོགས་གསལ་བར་གསུངས་ཤིང་། རྣམ་གཞག་རིམ་པ་སོགས་གཞུང་གི་ཆ་འགའ་ཞིག་ཏུ་རྣམ་པ་བསྒོམ་པ་ཡང་གསུངས་པའི་ཕྱིར་རོ། །གཉིས་པ་ནི་འཁོར་ལོ་བདེ་མཆོག་གི་ལུས་དཀྱིལ་ཏེ། རྩ་རྒྱུད་དང་། སཾ་བུ་ཊི་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚནྡོ་མངོན་དུ་གྱུར་པ་སྟེ། །ཉེ་བའི་ཚནྡོ་སྦྱང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །པཱུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཞེས་ཕ་རོལ་ཏུ་ཕྱིན་པའི་ཐ་སྙད་རབ་དགའ་སོགས་ས་བཅུ་ལ་མ་རྒྱུད་འདིར་བསྡུས་དོན་མན་ངག་གི་བཤད་པས་གནས་ལ་སོགས་པ་རྣམ་པ་བཅུར་གསུངས་ཤིང་། དེ་ཉིད་ལམ་འདི་ལ་བརྟེན་ནས་ཡུལ་ཉི་ཤུ་རྩ་བཞིའི་རླུང་སེམས་དབུ་མར་ཐིམ་པས་ཐོབ་པའི་ཚུལ་གསུངས་སོ། །གསུམ་པ་ནི། ཀྱཻ་རྡོ་རྗེའི་ལུས་དཀྱིལ་ཏེ། འདི་ལ་ཡུམ་གྱི་སྐབས་སུ་རྩ་རྒྱུད་ལེའུ་དང་པོར། རྩ་སུམ་ཅུ་རྩ་གཉིས་དང་། བདུན་པར་ཡུལ་སུམ་ཅུ་སོ་གཉིས་དང་། ཕྱི་མའི་བཞི་པར་དེ་དག་བདག་མེད་ལྷ་མོ་བཅོ་ལྔ་ཡབ་ཧེ་རུ་ཀ་དང་བཅུ་དྲུག་གིས་སྦྱོང་བའི་ཚུལ་གསུངས་པ་ལ་བརྟེན་ནས་རྣལ་འབྱོར་དབང་ཕྱུག་གི་མན་ངག་ལས། ཡུལ་སུམ་ཅུ་རྩ་གཉིས་ཀྱི་ལུས་དཀྱིལ་དང་། དེ་ལ་བརྟེན་ནས་ས་བཅུ་གཉིས་བགྲོད་པའི་ཚུལ་རྣམས་གསུངས་ལ། ཡབ་དང་ཐུན་མོང་བའི་ལུས་དཀྱིལ་རྣམས་ཀྱང་གསུངས་སོ། །ཡབ་ཀྱི་སྐབས་སུ་སྦྱང་གཞི་ཕུང་པོ་ལྔ། ཁམས་ལྔ། སྐྱེ་མཆེད་བཅུ་གཉིས། ལུས་ཀྱི་སྐྱེ་མཆེད་ཆ་ཤས་ཡན་ལག་བཅུ་རྣམས་སྦྱོང་བའི་དབང་དུ་བྱས་ནས་སྦྱོང་བྱེད་རིགས་ལྔ། ཡུམ་ལྔ་སྐྱེ་མཆེད་ཀྱི་ལྷ་བཅུ་གཉིས། ཁྲོ་བོ་བཅུ་རྣམས་བསྒོམ་པའི་ཚུལ་གསུངས་སོ། །འདི་ཉིད་ལ་དབང་བཞིའི་ལམ་དང་སྦྱར་བ་ཡང་ཚང་སྟེ། ལྟ་བ་ངོ་བོ་ཉིད་གསུམ་བསྐྱེད་པའི་ཆ་ནས་བུམ་དབང་གི་ལམ་ཁོ་ན་ལ་སྦྱར་བ་དང་། རྣམ་པ་བསྒོམ་ཚུལ་གྱི་ལྷ་རེ་རེ་ལ་ཡང་དབང་བཞི་ཆར་གྱི་ལམ་ཚང་བ་དང་། སྦྱང་གཞི་ལྷུན་གྲུབ་ཀྱི་སྒོ་ནས་འབྲས་བུ་སྐུ་བཞི་ཚང་བའི་ཚུལ་རྣམས་ངག་ལས་ཤེས་པར་བྱའོ། །གཉིས་པ་སྐབས་སུ་བབ་པ་ཀྱཻ་རྡོ་རྗེ་ཡབ་ཀྱི་ལུས་དཀྱིལ་བྱེ་བྲག་ཏུ་བཤད་པ་ལ་ལྔ་སྟེ། སྦྱང་གཞི་རྩ་ཁམས་གང་ལ་བསྒོམ་པ། སྦྱོང་བྱེད་ལྷའི་རྣམ་པ་གང་བསྒོམ་པ། བསྒོམ་ཚུལ་དམིགས་པའི་ཁྱད་པར་ཇི་ལྟར་བསྒོམ་པ། མན་ངག་ཐུན་མོང་མ་ཡིན་པར་ཅི་ལྟར་འདུས་པ། དེ་ལྟར་བསྒོམ་པས་གནས་སྐབས་དང་མཐར་ཐུག་གི་འབྲས་བུ་བསྟན་པའོ། །དང་པོ་ནི། སྤྱིར་ལུས་དཀྱིལ་གྱི་ཐ་སྙད་ཡོད་པ་ཙམ་ལ་བསྐྱེད་གཞི་ལུས་ཀྱི་རྩ་ཁམས་དགོས་པའི་ངེས་པ་མི་སྣང་ཡང་། འདིར་ནི་སྦྱང་གཞི་རྩ་ཁམས་ལས་བསྐྱེད་ཅིང་། དབང་བཞིའི་ལམ་ཚང་བའི་ཟབ་མོ་ལུས་དཀྱིལ་ཡིན་པས་བསྐྱེད་གཞི་ལུས་ཀྱི་རྩ་ཁམས་ངེས་པར་དགོས་སོ། །དེ་ཡང་རྩ་རྒྱུད་དང་པོ་ལས། ཨེ་ཡི་རྣམ་པ་ལྷ་མོ་སྤྱན། །ཝཾ་གི་རྣམ་པ་བདག་མར་བརྗོད། །མ་ནི་ལྷ་མོ་གོས་དཀར་མོ། །ཡ་ཡི་རྣམ་པ་སྒྲོལ་མར་བརྗོད། །ཅེས་དང་། སྤྲུལ་པའི་འཁོར་ལོ་ལ་པདྨ་འདབ་མ་དྲུག་ཅུ་རྩ་བཞི་དང་། ཆོས་ཀྱི་འཁོར་ལོ་ལ་འདབ་མ་བརྒྱད་དང་། ལོངས་སྤྱོད་རྫོགས་པའི་འཁོར་ལོ་ལ་འདབ་མ་བཅུ་དྲུག་དང་། བདེ་བ་ཆེན་པོའི་འཁོར་ལོ་ལ་འདབ་མ་སོ་གཉིས་སོ་ཞེས་པ་འདི་དག་གིས་ཡུམ་རྣམས་བསྐྱེད་པའི་གཞི་རྩ་བསྟན་པའོ། །འོ་ན་འདིར་འཁོར་ལོ་བཞི་ལས་མ་བྱུང་ངོ་སྙམ་ན། རང་བྱིན་བརླབས་ཀྱི་སྐབས་སུ་འཕགས་པའི་བདེན་པ་བཞི་ལ་སོགས་པ་གཞི་ལམ་འབྲས་བུའི་བཞི་ཚན་གྱི་ཆོས་ཐམས་ཅད་ནང་དུ་བསྡོམས་པ་མཚོན་བྱེད་དུ་འཁོར་ལོ་བཞི་ལས་མ་གསུངས་ཀྱང་། ལུས་དཀྱིལ་གྱི་སྐབས་སུ་ཕུང་པོ་ལྔ་དང་ཉོན་མོངས་ལྔ་སྦྱངས་ནས། ཡེ་ཤེས་ལྔ་དང་རིགས་ལྔར་བསྒྱུར་བ་མཚོན་བྱེད་དུ་བདེ་ཆེན་གྱི་འཁོར་ལོ་ཞེས་པའི་ཚིག་གཅིག་ཉིད་ཀྱིས་གསང་གནས་བདེ་ཆེན་དང་། སྤྱི་བོ་བདེ་ཆེན་གཉིས་ཀ་བསྟན་པར་བིརྺ་པ་དང་། དགྲ་ལས་རྣམ་རྒྱལ་གྱི་བཞེད་པ་གཉིས་མཐུན་ཏེ། མན་ངག་ལས་དེ་ལྟར་བཤད་ཅིང་དགྲ་ལས་རྣམ་རྒྱལ་གྱིས། གསང་བར་པདྨ་སུམ་ཅུ་གཉིས། །སྒྲོལ་མ་ལྗང་སྔོ་རླུང་གི་ཁམས། །སྟེང་གི་བདེ་ཆེན་འཁོར་ལོ་ལ། །རྡོ་རྗེ་དབྱིངས་ཀྱི་དབང་ཕྱུག་མ། །སུམ་ཅུ་གཉིས་ལྡན་ཁ་དོག་དཀར། །བདེ་ཆེན་ནམ་མཁའ་ཉིད་དུ་བརྗོད། །ཅེས་གསུངས་པས་སོ། །འོ་ན་ཨེ་ཝཾ་མ་ཡ་ལྷ་མོ་བཞིའི་བསྐྱེད་གཞིར་གསུངས་ཀྱང་། འཁོར་ལོའི་རྩ་འདབ་རྣམས་ལྷ་མོ་བཞིར་བསྐྱེད་པ་གང་ནས་བཤད་སྙམ་ན། སཾ་བུ་ཊིའི་དང་པོའི་བཞི་པར། ཡང་དག་སྦྱོར་བྱུང་མཚན་ཉིད་ནི། །དེ་ནས་མཆོག་ཏུ་རབ་བཤད་པ། །ཨེ་ནི་ས་རུ་ཤེས་པར་བྱ། །ལས་ཀྱི་ཕྱག་རྒྱ་སྤྱན་མ་ཉིད། །སྙིང་རྗེ་ཆེན་པོ་ཐབས་ཆེན་མོ། །རང་བཞིན་སྣ་ཚོགས་སྤྱོད་ཡུལ་ལ། །ལྟེ་བར་སྣ་ཚོགས་འདམ་སྐྱེས་ལ། །སྤྲུལ་པའི་འཁོར་ལོ་རྣམ་པར་གནས། །ཝཾ་ནི་ཆུ་རུ་ཤེས་པར་བྱ། །ཆོས་ཀྱི་ཕྱག་རྒྱ་མཱ་མ་ཀཱི། །བྱམས་པ་དང་ནི་སྨོན་ལམ་ཚུལ། །ལྷ་མོ་རྡོ་རྗེའི་རིགས་གཙོ་མ། །སྙིང་ཁར་ཆུ་སྐྱེས་འདབ་བརྒྱད་ལ། །ཆོས་ཀྱི་འཁོར་ལོ་ཡང་དག་གནས། །མ་ནི་མེ་རུ་བརྗོད་པ་སྟེ། །ཕྱག་རྒྱ་ཆེན་མོ་གོས་དཀར་མོ། །དགའ་དང་སྟོབས་ཀྱི་རྣལ་འབྱོར་གྱི། །ལྷ་མོ་པདྨའི་རིགས་འབྱུང་མ། །ལྐོག་མར་ཆུ་སྐྱེས་འདབ་བརྒྱད་གཉིས། །ལོངས་སྤྱོད་འཁོར་ལོར་ཡང་དག་གནས། །ཡ་ནི་རླུང་གི་རང་བཞིན་ཏེ། །ཉོན་མོངས་ཐམས་ཅད་རབ་འཇོམས་བྱེད། །དམ་ཚིག་ཕྱག་རྒྱ་ཆེན་མོར་ངེས། །ལྷ་མོ་ལས་ཀྱི་རིགས་གཙོ་མ། །བཏང་སྙོམས་ཡེ་ཤེས་རྣལ་འབྱོར་གྱིས། །སྒྲོལ་མ་འཁོར་བ་སྒྲོལ་བ་མོ། །འདམ་སྐྱེས་འདབ་མ་སུམ་ཅུ་གཉིས། །བདེ་ཆེན་འཁོར་ལོ་ཆེན་པོར་གནས། །ཞེས་འཁོར་ལོ་བཞི་པོ་རེ་རེ་ལ་ཡི་གེ་དང་། འབྱུང་བ་དང་། ཕྱག་རྒྱ་དང་། ལྷ་མོ་དང་། ཚད་མེད་པ་དང་། ཕ་རོལ་དུ་ཕྱིན་པ་དང་། རིགས་དང་། གནས་དང་། རྩ་འདབ་ཀྱི་གྲངས་དང་། འཁོར་ལོའི་མིང་སྟེ། དོན་ཚན་བཅུ་བཅུ་སྦྱར་བས་རྩ་འདབ་ཀྱི་གྲངས་རྣམས་ཀྱང་ལྷ་མོ་དེ་དང་དེར་བསྒོམ་དགོས་པར་ཤིན་ཏུ་གསལ་ལོ། །རིགས་ལྔའི་བསྐྱེད་གཞི་ནི་འཁོར་ལོ་ལྔའི་དབུས་སུ་རྩ་ཧཱ་དང་། ཨཾ་དང་། ཧཱུྃ་དང་། ཨོཾ་དང་། ཧཾ་གི་དབྱིབས་སུ་གནས་པའི་ནང་གི་བྱང་ཆུབ་ཀྱི་སེམས་དེ་ཉིད་ཡིན་ཏེ། སཾ་བུ་ཊིའི་བརྟག་པ་དྲུག་པའི་བཞི་པར། རྟག་ཏུ་བཞུགས་པར་འདོད་པ་འདི། །སངས་རྒྱས་ཀུན་གྱི་སྡོམ་པ་བདག །ཡང་ན་མེ་ལོང་ལྟ་བུའི་ཚུལ། །དེ་བཞིན་དུ་ཡང་ཉམས་པ་ཉིད། །སོ་སོར་རྟོག་པའི་ཆོ་ག་བཞིན། །དེ་བཞིན་བྱ་བ་ནན་ཏན་ལ། །རྟག་ཏུ་བཞུགས་པར་བརྗོད་པ་འདི། །ཤིན་ཏུ་རྣམ་དག་རང་བཞིན་ཅན། །དེ་བཞིན་རྣམ་པར་སྣང་མཛད་ཉིད། །གཞན་ཡང་མི་བསྐྱོད་པ་ཉིད་དང་། །ཡང་ན་རིན་ཆེན་འབྱུང་གནས་ལ། །ཡང་ན་འོད་དཔག་མེད་པ་ཡིས། །གང་ཚེ་རྟག་བཞུགས་དོན་ཡོད་ལ། །བདུད་རྩི་ལྔ་ཡི་གོང་བུའི་དངོས། །ཐིག་ལེའི་གཟུགས་ཏེ་ཡིད་ལྟ་བུ། །ཤིན་ཏུ་རྣམ་དག་ཡེ་ཤེས་ཆེར། །ལྷ་མོ་ཀུན་གྱི་རང་བཞིན་ཅན། །རྡོ་རྗེ་སེམས་དཔའ་ཞེས་བྱར་བཤད། །བདེ་བ་དམ་པ་རུ་ནི་བརྗོད། །ཅེས་གསུངས་པས་སོ། །རྩ་དེ་དག་ནི་ནང་གི་ཁམས་དཔའ་བོ་དང་། ཕྱི་ཤུན་གྱི་རྩ་ཡུམ་དུ་བསྒོམ་པ་ནི། སློབ་དཔོན་རྡོ་རྗེ་དྲིལ་བུ་པས། འདི་དག་གནས་སུ་རྣལ་འབྱོར་མ། །རྩ་ཡིན་དཔའ་བོ་ཉི་ཤུ་བཞི། །ལུས་ཀྱི་ཁམས་སུ་བརྟག་པར་བྱ། །ཞེས་པས་བསྟན་པར་བཞེད་ཅིང་། རྩ་འདབ་མ་རྣམས་ལ་ཁམས་ཡོད་ཀྱང་། དེ་དཔའ་བོར་མི་སྒོམ་པ་ནི་ཁམས་གང་ནས་འབྱུང་བའི་གནས་མ་ཡིན་པས་མི་བསྒོམ་པར་བཞེད་དོ། །འོ་ན་སྔར་ཨེ་ཝཾ་མ་ཡའི་དབྱིབས་ཅན་ཡུམ་བཞིར་བསྒོམ་པར་བཤད་པ་དང་འགལ་ལོ་སྙམ་ན་དེ་ནི་འཁོར་ལོ་བཞིའི་དབྱིབས་དེ་ལྟར་ཡོད་པས་ཨེ་ཝཾ་མ་ཡར་བཤད་པ་ཡིན་གྱི་ཡུམ་གྱི་བསྐྱེད་གཞི་དངོས་ནི་ཡབ་ཀྱི་བསྐྱེད་གཞིའི་ཕྱི་ཤུན་གྱི་རྩ་དེ་དག་ཉིད་ཡིན་ནོ། །ཡན་ལག་གི་ལྷའི་བསྐྱེད་གཞི་ནི་སཾ་བུ་ཊིའི་དང་པོའི་བཞི་པར། དེ་ལྟར་རིགས་ནི་ལྔ་རྣམས་དང་། །ཡེ་ཤེས་ལྔ་དང་སངས་རྒྱས་ལྔ། །འདི་ལས་རྡོ་རྗེ་སྙིང་པོ་དང་། །ཁྲོ་བོ་ཁམས་གསུམ་སེམས་ཅན་སྐྱེས། །ནང་གི་དབྱེ་བ་འདི་ཉིད་ནི། །བླ་མའི་ཞལ་ལས་རྙེད་པར་འགྱུར། །ཞེས་གསུངས་ཏེ། འདི་རྒྱུ་རྒྱུད་ལ་སྦྱར་བའི་ཚེ་ཕུང་པོ་ལྔ་ལས་རྡོ་རྗེ་སྙིང་པོས་མཚོན་པའི་ཡུལ་ཡུལ་ཅན་གྱི་སྐྱེ་མཆེད་དང་། ཚིགས་མཚམས་བརྒྱད་དང་སྤྱི་བོ་རྐང་མཐིལ་རྣམས་སྐྱེ་བ་ལ་བཤད་དགོས་པ་ནི་སྐབས་འདིར་བསྐྱེད་གཞི་ཡིན་ལ། ལྷ་དེ་དང་དེར་བསྐྱེད་པ་ཡང་འདིས་ཟིན་ནོ། །གཉིས་པ་སྦྱོང་བྱེད་ལྷའི་རྣམ་པ་གང་བསྒོམ་པ་ནི། ས་ལམ་བགྲོད་པ་གཙོ་བོར་བྱས་ནས་ལྷ་མོ་བཅོ་ལྔ་སྒོམ་དགོས་པ་ནི་ཡུམ་གྱི་སྐབས་སུ་བཤད་ལ། འདིར་ནི་སྦྱང་གཞི་ཕུང་ཁམས་སྐྱེ་མཆེད་སྦྱོང་ཞིང་། གདན་གསུམ་ཚང་བའི་ལྷ་ཚོགས་བསྒོམ་པའི་དབང་དུ་བྱས་ནས་རིགས་ལྔ་ཡུམ་ལྔ། སྐྱེ་མཆེད་ཀྱི་ལྷ་བཅུ་གཉིས། ཁྲོ་བོ་བཅུ་རྣམས་བསྒོམ་པའོ། །གདན་གསུམ་ཚང་བའི་ལྷ་ཚོགས་བསྒོམ་པ་ཡང་། རྩ་རྒྱུད་དང་པོའི་བཞི་པར། དབང་བསྐུར་གྱི་ལྷ་གདན་གསུམ་ཚང་བ་དོན་གྱིས་གསུངས་པ་དང་། བཤད་རྒྱུད་རྡོ་རྗེ་ཕྲེང་བར། རྡོ་རྗེ་སློབ་དཔོན་གྱི་ལུས་ལ་གདན་གསུམ་ཚང་བའི་ལྷ་ཚོགས་བཞུགས་པར་གསུངས་པ་དེ་ཉིད་ཐུགས་ལ་བཞག་ནས། དཔལ་ལྡན་ས་སྐྱ་པཎྜི་ཏས། ཁྱོད་ནི་གདུལ་བྱ་སྨིན་བྱའི་ཕྱིར། །དེ་བཞིན་གཤེགས་པ་རྣམ་པ་ལྔ། །ཁྱོད་ཀྱི་ཕུང་པོ་རྣམས་ལྔར་སྟོན། །སྤྱན་སོགས་ཁྱོད་ཀྱི་འབྱུང་བ་བཞི། །ས་ཡི་སྙིང་པོ་རྡོ་རྗེ་འཛིན། །ནམ་མཁའི་སྙིང་པོ་སྤྱན་རས་གཟིགས། །འཇམ་དབྱངས་སྒྲིབ་པ་རྣམ་པར་སེལ། །བྱམས་པ་ཀུན་དུ་བཟང་པོ་རྣམས། །མགོན་པོ་ཁྱོད་ཀྱི་དབང་པོ་སོགས། །གཤིན་རྗེའི་གཤེད་སོགས་ཁྲོ་བོ་བཅུ། །དཔལ་ལྡན་ཁྱོད་ཀྱི་སྐུ་ཡི་ཆ། །གཟུགས་སོགས་རྡོ་རྗེ་ལྷ་མོར་སྟོན། །ཞེས་དང་། ལམ་ཟབ་བླ་མའི་སྐབས་སུ་ཡང་ལུས་ལ་འགོད་ཚུལ་དེ་ལྟར་དུ་གསུངས་པས་སྟོན་ཏོ། །དེ་ལྟར་ན་རྡོ་རྗེའི་ཚིག་རྐང་ལས། ལུས་ཀྱི་དཀྱིལ་འཁོར་མཐོང་ནས་རྟགས་བསྟན་པ་ཞེས་དང་། ལམ་བསྡུས་པར། དཀྱིལ་འཁོར་ལྔ་ལ་བཏུད་དེ་བསྐྲུན། །ཞེས་གསུངས་པའི་དོན་སྙན་བརྒྱུད་བར་མ་ཆད་པ་ལས་འབྱུང་བ་འདི་ནི་རྒྱུད་སྡེའི་དགོངས་པ་བླ་ན་མེད་པའོ། །གསུམ་པ་བསྒོམ་ཚུལ་དམིགས་པའི་ཁྱད་པར་ཇི་ལྟར་བསྒོམ་པ་ལ་དྲུག་སྟེ། གནས་གང་དུ་བསྒོམ་པ། རྣམ་པ་ཅི་ལྟར་བསྒོམ་པ། ཚད་ཇི་ཙམ་བསྒོམ་པ། གྲངས་དུ་ཞིག་བསྒོམ་པ། རིམ་པ་ཇི་ལྟར་བསྒོམ་པ། གནས་སྐབས་གང་དུ་བསྒོམ་པའོ། །དང་པོ་ནི། འདི་དག་སྦྱང་གཞི་གང་དུ་གནས་པའི་ས་དེར་བསྒོམ་དགོས་པས་འཁོར་ལོ་ལྔ་ནི་ལུས་ཀྱི་དབུས་དྲང་པོར་སྤྱི་བོ་དང་། མགྲིན་པ་དང་། སྙིང་ག་དང་། ལྟེ་བ་དང་། གསང་གནས་ཀྱི་རྐེད་པ་རྣམས་སུ་ཕོ་བྲང་ལྔའི་ལྷ་ཚོགས་བསྒོམ་ལ། སྐྱེ་མཆེད་གྱི་ལྷ་དྲུག་ནི་མིག་འབྲས་གཉིས་དང་། རྣ་བའི་བུ་ག་གཉིས་དང་། སྣའི་བུག་པ་གཉིས་ཡར་འཛོམས་པའི་ས་དང་། ལྕེའི་རྐེད་པ་དང་། སྙིང་གའི་འཁོར་ལོའི་མདུན་ཕྱོགས་དང་། དཔྲལ་བའི་དབྱེས་རྣམས་སུ་བསྒོམ་ཞིང་། ཡུལ་གྱི་ལྷ་དྲུག་ཀྱང་དེ་དག་སོ་སོའི་མདུན་དུ་བསྒོམ་མོ། །ཁྲོ་བོ་བཅུ་ལག་ངར་དང་། དཔུང་པའི་མཚམས་གཉིས་དང་། ལྕེའི་རྩེ་མོའི་ཕྱོགས་དང་། གསང་གནས་ཀྱི་རྩེ་མོའི་ཕྱོགས་དང་། དཔུང་པ་དང་སོག་པ་སྤྲད་མཚམས་གཉིས་དང་། པུས་མོའི་ཚིགས་མཚམས་གཉིས་དང་། སྤྱི་གཙུག་དང་རྐང་མཐིལ་གཉིས་རྣམས་སུ་རྩ་ཧཱུྃ་གི་དབྱིབས་ཅན་རེ་རེ་ཡོད་པས་དེར་བསྒོམ་མོ། །གཤིན་རྗེའི་གཤེད་དང་། ཤེས་རབ་མཐར་བྱེད་གཉིས་མཁྲིག་མའི་མཚམས་སུ་བསྒོམ་པ་ནི་མ་ཡིན་ཏེ། བཤད་རྒྱུད་རྡོ་རྗེ་ཕྲེང་བ་ལས། ལག་པ་གཡས་པའི་རྩ་བར་ནི། །དེ་བཞིན་གཤེགས་པ་གཤིན་རྗེའི་གཤེད། །ལག་པ་གཡོན་པའི་རྩ་བར་ནི། །བདེ་གཤེགས་གཞན་གྱིས་མི་ཐུབ་པ། །ཞེས་རྩ་བར་བསྒོམས་པར་གསུངས་པའི་ཕྱིར་དང་། རྡོ་རྗེའི་ལུས་འདི་ལ་མགྲིན་པ་ཡན་ཆད་སྟེང་གི་ཆ་དང་། པུས་མོ་མན་ཆད་འོག་གི་ཆ་དང་། གྲུ་མོའི་ཚིགས་མཚམས་གཉིས་དང་། ཁ་དང་གསང་གནས་ཕྱོགས་ཀྱི་ཆ་དང་། དཔུང་པའི་རྩ་བ་གཉིས་དང་། པུས་མོ་གཉིས་མཚམས་ཀྱི་ཆར་བྱས་ནས་ཁྲོ་བོ་རྣམས་འགོད་པའི་དབང་དུ་བྱས་པའི་ཕྱིར་རོ། །གཉིས་པ་ནི། སློབ་དཔོན་དགྲ་ལས་རྣམ་རྒྱལ་གྱིས་དམིགས་པ་རྒྱས་པར་ནུས་ན་ཕོ་བྲང་ལྔའི་གཙོ་བོ་གུར་ནས་འབྱུང་བའི་ཞལ་ཕྱག་ཚང་མར་བསྒོམ་པ་དང་། མི་ནུས་ན་ཞལ་གཅིག་ཕྱག་གཉིས་པ། གཡས་པ་རྣམས་ན་འཁོར་ལོ་སོགས་དང་། གཡོན་པ་རྣམས་ན་དེས་ཡུ་བ་བྱས་པའི་དྲིལ་བུ་འཛིན་པ་བསྒོམ་པའི་ཚུལ་གཉིས་གསུངས་ཀྱང་། འདིར་ནི་དམིགས་པ་ཉུང་བའི་དབང་དུ་བྱས་ནས་ཞལ་གཅིག་ཕྱག་གཉིས་བསྒོམ་པའི་ཚུལ་འདི་ཉིད་བཞེད་དོ། །ཞལ་གཅིག་ཕྱག་གཉིས་པ་དེ་ཡང་རིག་པའི་དབང་ལྔའི་སྐབས་སུ་ཞལ་བརྒྱད་ཕྱག་བཅུ་དྲུག་པ་ཕྱག་གཉིས་པར་བསྡུ་བའི་ཚུལ་གསུངས་པ་དང་མཐུན་ཅིང་ཡུམ་རྣམས་ནི་གུར་ནས་འབྱུང་བའི་ཞལ་གཅིག་ཕྱག་གཉིས་པ་དེ་ཉིད་དོ། །ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་གཞུང་བཤད་གཉགས་མར་ལྷར་དྲན་པར་བྱའོ་ཞེས་པ་ཙམ་ལས་ལྷ་གང་བསྒོམ་མ་གསུངས་ཀྱང་། ས་སྙིང་སོགས་དྲུག་དང་། གཟུགས་རྡོ་རྗེ་མ་སོགས་དྲུག་བསྒོམ་པའི་ཚུལ་དང་། གཏི་མུག་རྡོ་རྗེ་མ་སོགས་དང་། གཽ་རཱི་སོགས་དྲུག་བསྒོམ་པའི་ཚུལ་གཉིས་ལས། དང་པོ་ནི་གཞུང་བཤད་སྲས་དོན་མ། གཞུང་བཤད་དཔེ་དམར་མ། ཕག་མོ་གྲུབ་པའི་བཤད་མཛོད་མ། ཤར་པ་རྡོ་རྗེ་འོད་ཟེར་གྱི་གཞུང་བཤད། ཆོས་རྗེ་བླ་མའི་གཞུང་བཤད་སོགས་རབ་ཏུ་མང་པོར་འབྱུང་ལ། དེ་ཡང་མིག་གཉིས་སུ་སའི་སྙིང་པོ། རྣ་བ་གཉིས་སུ་ཕྱག་རྡོར། སྣར་ནམ་སྙིང་། ལྕེར་འཇིག་རྟེན་དབང་ཕྱུག སྨིན་མཚམས་སུ་སྒྲིབ་པ་རྣམ་སེལ། སྙིང་གའི་སྟོད་དུ་འཇམ་དབྱངས་བསྒོམ་པར་གསུངས་ལ། ཚིགས་མཚམས་སུ་ཀུན་བཟང་དང་། སྤྱི་གཙུག་ཏུ་བྱམས་པ་བསྒོམ་པ་ཡང་དགོས་སོ་ཞེས་རྗེ་བླ་མ་བཞེད་དོ། །དེ་བཞིན་དུ་མིག་གི་སྒོར་གཟུགས་རྡོ་རྗེ་མ་ལ་སོགས་པ་དྲུག་བསྒོམ་པ་ཡང་བཤད་དོ། །འདི་ནི་སྔར་བཤད་པ་ལྟར་གདན་གསུམ་ཚང་བའི་ལྷ་ཚོགས་བསྒོམ་པ་དང་མཐུན་པས་ལེགས་པའོ། །ཚུལ་གཉིས་པ་ནི་གྲུབ་ཆེན་བྲག་ཕུག་པས་མིག་ཏུ་གཏི་མུག་རྡོ་རྗེ་མ་སོགས་དྲུག་དང་། དེ་དག་གི་མདུན་དུ་གཟུགས་གཽ་རཱི་སོགས་དྲུག་བསྒོམ་པར་གསུངས་པ་ནི་བརྟག་པ་ཕྱི་མར་དབང་པོའི་རྣམ་དག་དེ་ལྟར་གསུངས་ཤིང་། དང་པོའི་བརྒྱད་པར་གཽ་རཱི་སོགས་དྲུག་གཟུགས་སྒྲ་སོགས་རྣམ་པར་དག་པར་གསུངས་པས་ཤིན་དུ་ལེགས་པའོ། །གསུམ་པ་ནི་ལས་དང་པོ་པས་སྦྱང་གཞིའི་ཚད་དང་མཐུན་པར་བསྒོམས་ན་བསྒོམ་སླ་བས་ཕོ་བྲང་ལྔའི་གཙོ་བོ་ཡབ་ཡུམ་མཐེབ་ཆུང་གིས་སོར་ཕྱེད་ཙམ་དང་། འཁོར་གྱི་ལྷ་དང་ཡན་ལག་གི་ལྷ་རྣམས་ནས་འབྲས་ཙམ་རེ་བསྒོམ་པར་གསུངས་ལ། གཞུང་བཤད་སྲས་དོན་མར་བློའི་རྩལ་སྦྱང་བའི་ཕྱིར་ཆེ་བ་རི་རབ་ཙམ། ཆུང་བ་རྡུལ་ཕྲན་ཙམ་བསྒོམ་པར་གསུངས་སོ། །བཞི་པ་ནི་སྦྱང་གཞིའི་གྲངས་དང་མཐུན་པར་བསྒོམས་པ་སྟེ། རྩ་འདབ་གྱི་གྲངས་དང་མཉམ་པའི་འཁོར་གྱི་ལྷ་མོ་བསྒོམ་པ་དང་། གཏི་མུག་རྡོ་རྗེ་མ་གཉིས་དང་། གནོད་མཛེས་གཉིས་བསྒོམ་པ་ལྟ་བུའོ། །ལྔ་པ་ནི། རྗེ་བཙུན་གོང་མས་གསལ་འདེབས་པའི་ཚེ་ལུས་གྲུབ་པའི་ཐོག་མ་ཡིན་པས་ལྟེ་བ་ནས་གསལ་འདེབས། སེམས་འཛིན་པའི་ཚེ་སེམས་གནས་པའི་ས་ཡིན་པས་སྙིང་ག་ནས་བསྒོམ་པར་གསུངས་ཤིང་། རྟེན་དང་བརྟེན་པ་གཉིས་ག་རིམ་ལ་ཁྱད་པར་ཆེར་མི་སྣང་ཡང་། ཕྱིའི་རྟེན་དང་བརྟེན་པ་དང་སྒོ་བསྟུན་ནས་ལུགས་འདི་ལ་ཐོག་མར་རྟེན་གསལ་འདེབས་པ་ཡང་གསུངས་སོ། །དྲུག་པ་ནི། ཕྱི་དཀྱིལ་དང་སྦྲགས་ནས་བསྒོམ་པའི་ཚེ་ཡེ་ཤེས་ཀྱི་འཁོར་ལོ་དགུག་གཞུག་གིས་རྐྱེན་བྱས་ནས་གསལ་འདེབས་ལ། ལུས་དཀྱིལ་རྐྱང་པ་བསྒོམ་པའི་ཚེ་ཚོགས་ཞིང་བསྟིམས་པས་རྐྱེན་བྱས་ནས་གསལ་འདེབས་པའི་ཚུལ་གཉིས་ཁོ་ན་གསུངས་སོ། །བཞི་པ་མན་ངག་ཐུན་མོང་མ་ཡིན་པར་ཇི་ལྟར་འདུས་པའི་ཚུལ་ནི། སྦྱང་གཞི་སྦྱོང་བའི་ཚུལ་རྣམས་ནི་ཕྱི་བསྐྱེད་པའི་རིམ་པའི་སྐབས་ལྟར་སྦྱར་བར་བྱ་ཞིང་། ལམ་བྱེད་བཞི་ཡང་འདི་ལ་ཚང་སྟེ། སྙིང་གའི་མི་བསྐྱོད་པའི་ཕོ་བྲང་ལྟ་བུ་ལ་མཚོན་ན། རྣམ་པ་མི་བསྐྱོད་པ་ཡབ་ཡུམ་ཞལ་ཕྱག་གི་རྣམ་པ་ཅན་བསྒོམས་པས་རྣམ་པ་བསྒོམ་སླ་བས་རྣམ་པ་ལམ་བྱེད་དང་། དེ་ཉིད་མེ་ལོང་ལྟ་བུའི་ཡེ་ཤེས་སུ་མོས་པར་བྱས་པས་མོས་པ་ལམ་བྱེད་དང་། དེ་ཡང་འབྲས་བུ་སངས་རྒྱས་ཀྱི་སའི་མེ་ལོང་ལྟ་བུའི་ཡེ་ཤེས་དངོས་སུ་བསྒོམས་པས་འབྲས་བུ་ལམ་བྱེད་དང་། དེ་ལྟར་བསྒོམས་པས་འབྲས་བུ་སངས་རྒྱས་ཀྱི་ཡེ་ཤེས་ཀྱིས་མི་བསྐྱོད་པའི་རྣམ་པ་བྱིན་གྱིས་བརླབས། དེས་རྣལ་འབྱོར་པའི་སེམས་རྒྱུད་བྱིན་གྱིས་བརླབས་པས་ནམ་ཞིག་ན་འབྲས་བུ་སངས་རྒྱས་ཀྱི་ཡེ་ཤེས་ཐོབ་པ་འགྱུར་བས་བྱིན་རླབས་ལམ་བྱེད་དོ། །དེས་ན་ཞེན་པས་འཇུག་ཅིང་འབྲེལ་པས་མི་བསླུ་བའི་ལམ་ཞེས་བྱ་སྟེ། འབྲས་བུ་སངས་རྒྱས་ཀྱི་ཡེ་ཤེས་དངོས་སུ་ཞེན་ནས་ལམ་གྱི་རྣམ་པ་ལ་འཇུག་པས་དེ་གཉིས་རང་བཞིན་རྣམ་དག་གི་ཚུལ་གྱིས་འབྲེལ་པའི་ཕྱིར་ཏེ། ནམ་ཞིག་ན་དེ་ཐོབ་པ་ལ་མི་བསླུ་བའི་ཕྱིར་རོ། །འོ་ན་རྣམ་པ་དེ་མེ་ལོང་ལྟ་བུའི་ཡེ་ཤེས་ཡིན་ནས་བསྒོམ་མམ། མ་ཡིན་ཡང་བསྒོམ། ཡིན་ནས་བསྒོམས་ན་གྲུབ་ཟིན་བསྒྲུབ་པར་འགྱུར་ལ། མ་ཡིན་ཡང་བསྒོམས་ན་སྤྲང་པོ་རྒྱལ་པོར་རློམ་པ་དང་འདྲའོ་ཞེ་ན། ཡིན་ནས་བསྒོམས་པས་སྐྱོན་ཕྱི་མ་མེད་ཅིང་། གྲུབ་ཟིན་བསྒྲུབ་པའི་སྐྱོན་ཡང་མེད་དེ། ངོ་བོ་དངོས་མ་ཡིན་ཡང་རྣམ་པའམ་ཆོས་ཉིད་ཡིན་པའི་ཕྱིར་རོ། །ཆོས་ཉིད་ཡིན་པ་ནི་རྣལ་འབྱོར་པའི་བློར་སྣང་གི་རྣམ་པ་དང་འབྲས་བུ་སངས་རྒྱས་ཀྱི་ཡེ་ཤེས་ཀྱི་གསལ་སྟོང་ཟུང་འཇུག་དབྱེར་མེད་པའི་དོན་ཡིན་ལ་སངས་རྒྱས་སའི་མེ་ལོང་ལྟ་བུའི་ཡེ་ཤེས་གཟུགས་ཀྱི་རྣམ་པར་ཤར་བ་ན་མི་བསྐྱོད་པའམ་རྣམ་སྣང་དང་། རྡོ་རྗེའམ་འཁོར་ལོ་དང་། ཁ་དོག་ནག་པོའམ་དཀར་པོ་དང་། ས་བོན་ཧཱུྃ་བཾ་བྷྲཱུྃ་ལ་སོགས་པ་དང་། མངོན་བྱང་ལྔའི་ནང་ནས་ཟླ་བའི་རྣམ་པར་འབྱུང་བའི་ཕྱིར་རོ། །དེ་ལྟར་འབྱུང་བའི་རྒྱུ་མཚན་ཡང་ཕུང་པོ་ལྔ་དང་། ཉོན་མོངས་པ་ལྔ་ཡེ་ཤེས་ལྔར་གནས་གྱུར་པ་རྩི་བའི་ཚེ། གཟུགས་ཕུང་དང་ཞེ་སྡང་གནས་གྱུར་པ་ལས་མེ་ལོང་ལྟ་བུའི་ཡེ་ཤེས་སུ་གྱུར་པས་རྣམ་སྣང་དང་། འཁོར་ལོ་སོགས་མེ་ལོང་ལྟ་བུའི་ཡེ་ཤེས་ཀྱི་གཟུགས་ཀྱི་རྣམ་པར་གཞག་དགོས་ཏེ། འདི་ལ་དགོངས་ནས་དཀྱིལ་ཆོག་ཕལ་ཆེར་དང་། གཏོར་མའི་སྐབས་ཀྱི་ཡེ་ཤེས་ལྔ་དང་། འཁོར་འདས་དབྱེར་མེད་ཀྱི་འགྲེལ་པར་རྣམ་སྣང་དང་མེ་ལོང་ལྟ་བུའི་ཡེ་ཤེས་སྦྱར་བ་མཛད་ཅིང་། དེའི་ཚེ་མི་བསྐྱོད་པ་དང་ཆོས་དབྱིངས་ཡེ་ཤེས་སྦྱར་བ་ལས་འོས་མེད་དོ། །ཡང་ཚོགས་བརྒྱད་གནས་གྱུར་པ་ལས་ཡེ་ཤེས་ལྔ་འབྱུང་བའི་ཚེ། ཉོན་ཡིད་མཉམ་པ་ཉིད་དང་། ཡིད་ཀྱི་རྣམ་ཤེས་སོ་སོར་རྟོག་པ་དང་། སྒོ་ལྔའི་རྣམ་ཤེས་བྱ་བ་གྲུབ་པ་དང་། ཀུན་གཞི་ལ་གསལ་སྟོང་གཉིས་ལས། སྟོང་པའི་ཆ་ཆོས་དབྱིངས་ཡེ་ཤེས་དང་། གསལ་བའི་ཆ་མེ་ལོང་ཡེ་ཤེས་སུ་གནས་གྱུར་པར་མངོན་རྟོགས་ལྗོན་ཤིང་ལས་བཤད་པས། ཀུན་གཞི་གསལ་བའི་ཆ་དེ་ཉིད་མི་བསྐྱོད་པའི་ངོ་བོར་ཁས་བླང་དགོས་ཏེ། གཞི་ལམ་འབྲས་བུའི་ཆོས་ཐམས་ཅད་སེམས་སུ་འདུས་པ་ལུགས་འདིའི་ཟབ་ཁྱད་ཡིན་ཅིང་། སེམས་དེ་ཡང་ཀུན་གཞི་གསལ་བའི་ཆ་ལ་གཞག་དགོས་པའི་ཕྱིར་ཏེ། སྣང་བ་ཐམས་ཅད་སེམས་སུ་འདུས་པ་ཡང་ཐ་སྙད་བདེན་པའི་སྐབས་ཡིན་ཅིང་། གསལ་སྟོང་གཉིས་ཀྱི་ནང་ནས་གསལ་བའི་ཆ་དེ་ཐ་སྙད་བདེན་པ་ཡིན་པའི་ཕྱིར་རོ། །དེའི་ཚེ་རྣམ་སྣང་དང་ཆོས་དབྱིངས་ཡེ་ཤེས་སྦྱར་བ་ལས་འོས་མེད་དོ། །འདི་ལ་དགོངས་ནས་དམར་གཉགས་སོགས་གཞུང་བཤད་ཐམས་ཅད་ལས་ལུས་དཀྱིལ་གྱི་མི་བསྐྱོད་པ་མེ་ལོང་ལྟ་བུའི་ཡེ་ཤེས་དང་སྦྱར་བ་དང་། མན་ངག་ལུགས་ཀྱི་དབང་ཆུར་མི་བསྐྱོད་པ་ཆུ་དབང་གི་དག་པ་མེ་ལོང་ལྟ་བུའི་ཡེ་ཤེས་དང་སྦྱར་བ་ཁོ་ན་གསུངས་ཏེ། སྤང་བྱ་ཞེ་སྡང་དང་རྣམ་པར་ཤེས་པའི་ཕུང་པོ་རྣམ་པར་དག་པས་འབྲས་བུ་མེ་ལོང་ལྟ་བུའི་ཡེ་ཤེས་སུ་ཤར་བ་ཞེས་གསུངས་ཤིང་། དེའི་དོན་ཡང་ཀུན་གཞི་གསལ་བའི་ཆ་ལ་གནས་གྱུར་བརྩི་བའི་ཚེ་ཞེ་སྡང་དང་རྣམ་ཤེས་སྤར་བྱར་བྱེད་ཅེས་པའི་དོན་ཡིན་པའི་ཕྱིར་རོ། །འདི་ཉིད་འཁོར་ལོ་བདེ་མཆོག་ལས་ཀྱང་གསུངས་ཏེ། གྲུབ་ཆེན་བྷཱུ་རི་པས། ཚོགས་བརྒྱད་གྱུར་པ་ཡེ་ཤེས་ལྔར་གྱུར་ཏེ། །ཞེས་དང་། ནག་པོ་དཀྱིལ་ཆོག་ལས། དབང་གི་དག་པ་སྔ་མ་ལྟར་གསུངས་པའི་ཕྱིར་རོ། །དེང་སང་མེ་ལོང་ལྟ་བུའི་ཡེ་ཤེས་མི་བསྐྱོད་པ་ལ་སྦྱར་བ་ཡོ་གའི་ལུགས་ཡིན་གྱི། བླ་མེད་ཀྱི་ཐུན་མོང་མ་ཡིན་པ་ཆོས་དབྱིངས་ཡེ་ཤེས་ལ་སྦྱར་དགོས་སོ་སྙམ་ནས་ལུས་དཀྱིལ་དང་། རྒྱུ་དུས་ལམ་དུས་ཀྱི་དབང་གི་དག་པའི་ཚིག་འདོན་བཅོས་པ་དག་གིས་ནི་དོན་འདི་ཤེས་པར་གྱིས་ལ། གོང་མའི་གསུང་རབ་ལ་བསྲེ་སླད་མ་བྱེད་པར་གཞན་དང་མཐུན་པར་གྱིས་ཤིག གཞན་ལྷ་རེ་རེ་ལ་དབང་བཞི་ཆར་གྱི་ལམ་ཚང་བ་དང་། སྦྱང་གཞི་རྩ་ཁམས་ཀྱི་ཆ་ནས་འབྲས་བུ་སྐུ་བཞི་ལྷུན་གྲུབ་ཏུ་ཚང་བའི་ཚུལ་རྣམས་ནི་སྔར་བཤད་ཟིན་ཅིང་། ཕྱིས་ཀྱི་མཁས་རློམ་མན་ངག་མེད་པར་རྟོག་གེའི་རིགས་པས་གསང་སྔགས་རང་དགར་འཆད་པ་དག་གིས་ཕྱི་ནང་ཐུན་མོང་བའི་ལྷ་མེད་པ་དང་། ཕྱི་ནང་ལྷ་གྲངས་མ་མཐུན་པ་དང་། རྒྱུད་གཞུང་ལས་མ་བཤད་པས་མི་འཐད་ཅེས་པའི་ལོག་པར་སྨྲ་བ་རྣམས་ལུང་རིགས་ཀྱིས་ཇི་ལྟར་བསལ་བའི་ཚུལ་རྣམས་ནི་རྗེ་བླ་མས་མཛད་པའི་ལྟ་བ་ངན་སེལ་དང་། སྨྲ་བ་ངན་འཇོམས་གཉིས་སུ་བལྟ་བར་བྱའོ། །ལྔ་པ་དེ་ལྟར་བསྒོམས་པས་གནས་སྐབས་དང་མཐར་ཐུག་གི་འབྲས་བུ་བསྟན་པ་ནི། དེ་ལྟར་རྒྱུད་སྡེའི་དོན་མན་ངག་གིས་བཀྲལ་བ་བསྲེ་སླད་མེད་པར་ཚུལ་བཞིན་དུ་བསྒོམས་པས་གནས་སྐབས་སུ་ལྟ་བ་ངོ་བོ་ཉིད་གསུམ་སྐྱེ་ཞིང་། དེ་བསྒོམས་པས་གྲུབ་མཐའ་འཁོར་འདས་དབྱེར་མེད་ས་དང་པོ་ནས་དྲུག་པའི་བར་གྱི་རྟོགས་པ་འཆར་ལ། མཐར་ཐུག་གི་འབྲས་བུ་ལུས་རྩ་གནས་གྱུར་སྤྲུལ་པའི་སྐུ་མངོན་དུ་འགྱུར་བའོ། །འདི་ཡང་ལམ་སོགས་ཉི་ཤུའི་སྐབས་སུ་བུམ་དབང་གི་ལམ་དུ་བཤད་པའི་དབང་དུ་བྱས་ཀྱི་ཡང་དག་པར་ན་ལུས་དཀྱིལ་བསྒོམ་ནས་ལམ་གྱི་ཐུན་བཞི་ལ་དབང་བཞི་བླངས་པས་སྤང་བྱ་མ་ལུས་པ་སྤངས་ནས་འབྲས་བུ་སྐུ་བཞི་ཐོབ་པར་རྡོ་རྗེའི་ཚིག་རྐང་ཉིད་ལས་གསུངས་པས་སྐལ་བ་དང་ལྡན་པའི་སྐྱེ་བོ་དག་འདི་ལ་འཇུག་པར་རིགས་སོ། །འདི་དག་ཅིའི་ཕྱིར་བཤད་ཅེ་ན་རང་ཉིད་ངེས་པའི་ཤེས་པ་དང་ལྡན་ཡང་། དེང་སང་གི་སྐྱེ་བོ་ཕལ་ཆེར་ལོག་པར་བཀྲལ་བའི་ལམ་ལ་འཇུག་པ་མང་བས་དེ་དག་དགག་པར་བྱ་བའི་ཕྱིར་དང་། འགའ་ཞིག་ཡང་དག་པའི་ལམ་ལ་འཇུག་པར་འདོད་ཀྱང་ཟིན་བྲིས་ཙམ་དང་། ཟེར་སྒྲོས་ཙམ་ཚད་མར་བྱས་ནས་འགྲོན་པོ་ཕྱོགས་སླད་པ་ལྟར་གྱུར་པ་དག་རྗེས་སུ་གཟུང་བའི་ཕྱིར་གཞན་གྱི་དོན་དུ་བཤད་དོ།། ༈ །།རྣམ་མང་རྒྱུད་སྡེའི་རྒྱ་མཚོ་ལས་བྱུང་བའི། །རང་བཞིན་གྲུབ་པའི་དཀྱིལ་འཁོར་རིན་ཆེན་ཚོགས། །སྙན་བརྒྱུད་གདམས་པའི་སྲད་བུ་ལ་བརྒྱུས་འདི། །སྒྲུབ་པོའི་ལུས་བཟང་མཛེས་པའི་རྒྱན་དུ་སྦྱིན། །དེ་ལས་བྱུང་བའི་རྣམ་དཀར་དགེ་བའི་ཚོགས། །བདག་གི་རྒྱུད་ལ་ཐོབ་པ་གང་ཡིན་དེས། །མཁའ་མཉམ་འགྲོ་བའི་སྙིང་མུན་ཀུན་བསལ་ནས། །རྨད་བྱུང་གདམས་པའི་དཔལ་ལ་སྤྱོད་པར་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །འདྲེན་མཆོག་བླ་མ་རྣམས་ཀྱིས་རྗེས་བཟུང་སྟེ། །རྣལ་འབྱོར་དབང་ཕྱུག་གསུང་གི་མཛོད་འཛིན་ཅིང་། །རྟག་ཏུ་འགྲོ་ལ་དམ་ཆོས་སྟོན་པར་ཤོག །དཔལ་ཀྱཻ་རྡོ་རྗེའི་ལུས་དཀྱིལ་གྱི་དཀྱིལ་འཁོར་གྱི་རྣམ་པར་བཤད་པ་བདེ་ཆེན་བཅུད་ཀྱི་སྙིང་པོ་ཞེས་བྱ་བ་འདི་ནི་བདེ་བར་གཤེགས་པའི་རིང་ལུགས་པ་ཐམས་ཅད་ཀྱི་གཙུག་གི་ནོར་བུ་རྗེ་བཙུན་ཐམས་ཅད་མཁྱེན་པ་ཀུན་དགའ་བཟང་པོ་ཡབ་སྲས་ཀྱི་གསུང་གི་བདུད་རྩི་མྱངས་པ་མང་དུ་ཐོས་པའི་དགེ་སློང་བསོད་ནམས་སེང་གེས་ཤིང་ཕོ་འབྲུག་གི་ལོ་ལ་ཐུབ་བསྟན་རྣམ་པར་རྒྱལ་པའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་གནས་གྱུར་ཅིག །དགེའོ། །དགེའོ། །དགེའོ།། །།

དཔལ་ཀྱེ་རྡོ་རྗེའི་དབང་གི་ཆུ་བོ་ཆེན་མོའི་རྣམ་བཤད་བདེ་ཆེན་རྒྱ་མཚོ།

དཔལ་ཀྱེ་རྡོ་རྗེའི་དབང་གི་ཆུ་བོ་ཆེན་མོའི་རྣམ་བཤད་བདེ་ཆེན་རྒྱ་མཚོ་ཞེས་བྱ་བ་བཞུགས་སོ།། དཔལ་ཀྱེ་རྡོ་རྗེའི་དབང་གི་ཆུ་བོ་ཆེན་མོའི་རྣམ་པར་བཤད་པ་བདེ་ཆེན་རྒྱ་མཚོ་ཞེས་བྱ་བ། བླ་མ་དང་དཔལ་ཀྱེ་རྡོ་རྗེ་ལ་ཕྱག་འཚལ་ལོ། །དཀྱིལ་འཁོར་བཞི་ལ་དབང་བཞིའི་ཆར་གྱིས་གཏམས། །ལམ་བཟང་བཞི་ཡིས་འགྲོས་བཞི་ཐིམ་བྱས་ནས། །སྐུ་བཞིའི་ལོ་ཏོག་རྒྱས་མཛད་དྲིན་ཆེན་རྗེ། །ཀུན་དགའི་མཚན་ཅན་འདྲེན་མཆོག་བཟང་པོ་རྒྱལ། །དབང་གི་ཏིང་འཛིན་ལ་གནས་གླུ་སྙན་དང་། །ཤིས་བརྗོད་ཚིག་དང་སྣ་ཚོགས་མཆོད་པ་དང་། །ཧཱུྃ་ཕཊ་སྒྲ་ཡིས་བགེགས་ཀུན་མཐར་བྱེད་པའི། །གདན་གསུམ་ཚང་བའི་ལྷ་ཚོགས་ལ་ཕྱག་འཚལ། །ཟབ་མོ་རྒྱུད་སྡེ་ཀུན་གྱི་བཅུད་བསྡུས་ནས། །མཚུངས་བྲལ་གྲུབ་པའི་དབང་ཕྱུག་ལས་བརྒྱུད་པའི། །རྣམ་དག་ཆོ་གས་སློབ་མ་དབང་བསྐུར་བ། །རྡོ་རྗེ་ཐེག་པའི་ལམ་གྱི་ཐོག་མ་ཡིན། །འདི་ན་ལ་ལ་མཁས་པར་མ་སྦྱངས་ཤིང་། །འཁོར་དང་ལོངས་སྤྱོད་སྡུད་པའི་སྲེད་པ་ཡིས། །མ་འབྲེལ་ཉམས་པའི་ཆོ་གའི་གཟུགས་བརྙན་ལ། །དབང་བསྐུར་ཡིན་ཞེས་ངོ་མཚར་འཛིན་པ་མང་། །དེ་དག་བསལ་ནས་གཟུར་གནས་དོན་གཉེར་ལ། །ཕན་གདགས་འདོད་པས་སྙན་བརྒྱུད་གདམས་པའི་སྲོལ། །རྗེ་བཙུན་མཆོག་གིས་ཕྱེ་བའི་རྗེས་འབྲང་ནས། །སྨིན་བྱེད་དབང་གི་རྣམ་བཤད་འབྲི་བར་སྤྲོ། །འདིར་སྨིན་བྱེད་དབང་གི་ཆོ་གའི་རྣམ་གཞག་རྒྱུད་སྡེ་སོ་སོའི་དགོངས་པ་གྲུབ་པའི་དབང་ཕྱུག་རྣམས་ཀྱིས་བཀྲལ་བའི་ཚུལ་ནང་གསེས་ཅུང་ཟད་མི་འདྲ་བ་དུ་མ་ཡོད་པ་ལས། ཐུན་མོང་བ་རྣམས་མི་འགལ་ཞིང་། ཐུན་མོང་མ་ཡིན་པ་རྣམས་མ་འདྲེས་པའི་སྒོ་ནས་ཀྱེ་རྡོ་རྗེ་མན་ངག་ལུགས་ཀྱི་དབང་གི་ཆུ་བོའི་རྣམ་པར་བཤད་པ་འབྲི་བ་ལ་དོན་ལྔ་སྟེ། དབང་བསྐུར་བ་རྡོ་རྗེ་ཐེག་པའི་ལམ་གྱི་དངོས་གཞིར་བསྟན་པ། དབང་མ་བསྐུར་བའི་ཉེས་དམིགས། དབང་བསྐུར་བའི་ཕན་ཡོན། བསྐུར་བྱའི་དབང་སྤྱིའི་རྣམ་བཞག ཆོ་གའི་ངོ་བོའོ། །དང་པོ་ནི། དབང་བསྐུར་བ་ནི་རྡོ་རྗེ་ཐེག་པའི་ལམ་གྱི་དངོས་གཞི་ཡིན་ཏེ། རྡོ་རྗེ་རྩེ་མོ་ལས། སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་རྡོ་རྗེ་ཐེག་པའི་ལམ་ཐ་དག་སྨིན་གྲོལ་གཉིས་སུ་འདུས་པར་གསུངས་པའི་ཕྱིར་རོ། །འོ་ན་སྨིན་གྲོལ་གཉིས་ཀ་ལམ་གྱི་དངོས་གཞིར་རིགས་ཀྱི་སྨིན་བྱེད་ཉིད་ལམ་གྱི་དངོས་གཞིར་མི་རིགས་སོ་སྙམ་ན། འདི་ལ་སྨིན་བྱེད་ཀྱི་དབང་ཐོབ་ནས། གྲོལ་བྱེད་ཀྱི་ལམ་བསྒོམ་པ་ལ་མ་ལྟོས་པར་དམ་ཚིག་བསྲུང་བ་ཉིད་ཀྱིས་ལམ་མཐའ་དག་བགྲོད་པའི་ཚུལ་དང་། དབང་བསྐུར་ཐོབ་པ་ཉིད་ཀྱིས་སྐྱེ་བ་དུ་མར་བསྲུང་བ་ལ་མ་ལྟོས་པར་ལམ་མཐའ་དག་བགྲོད་པའི་ཚུལ་དང་། སྨིན་བྱེད་ཀྱི་དབང་ཐོབ་ནས་གྲོལ་བྱེད་ཀྱི་ལམ་བསྒོམ་པ་ལ་ལྟོས་ཏེ་ལམ་མཐའ་དག་བགྲོད་པའི་ཚུལ་གསུམ་ལས། དང་པོ་ནི། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ན་ནི། །མ་བསྒོམས་པར་ཡང་སངས་རྒྱས་འགྱུར། །ཞེས་དང་། ཚོགས་འཁོར་དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ནས་འགྲུབ། །ཅེས་སྨིན་བྱེད་ཀྱི་དབང་ཐོབ་ནས་རྩ་བའི་ལྟུང་བས་མ་གོས་ན། དབང་བསྐུར་དེ་ཉིད་གོང་ནས་གོང་དུ་འཕེལ་ཏེ། སྐྱེ་བ་བདུན་ནམ་བཅུ་དྲུག་ནས་འབྲས་བུ་མཆོག་འགྲུབ་ཅེས་པ་འདིས་དབང་བསྐུར་བ་ལམ་གྱི་དངོས་གཞི་ཡིན་པར་གྲུབ་བོ། །གཉིས་པ་ནི། རྒྱལ་པོ་ཨིནྡྲ་བྷཱུ་ཏི་ལྟ་བུ་གསང་བ་འདུས་པའི་སྤྲུལ་པའི་དཀྱིལ་འཁོར་དུ་དབང་བསྐུར་བ་ཉིད་ཀྱིས། དབང་གི་ཡེ་ཤེས་ལ་བཅུ་གསུམ་རྡོ་རྗེ་འཛིན་པའི་ས་སྐྱེས་པར་གསུངས་པ་འདིས་ཀྱང་དབང་བསྐུར་བ་ལམ་གྱི་དངོས་གཞིར་གྲུབ་བོ། །གསུམ་པ་ནི། དབང་གིས་གྲོལ་བར་མ་ནུས་པའི་གང་ཟག་གཞན་གྱིས་རིམ་གཉིས་བསྒོམ་དགོས་ཀྱང་། དབང་ལས་ལོགས་སུ་གྱུར་པའི་ལམ་བསྒོམ་རྒྱུ་ཡོད་པ་མ་ཡིན་ཏེ། བུམ་དབང་གི་གནས་སྐབས་སུ་ཐ་མལ་གྱི་རྣམ་རྟོག་སྡོམ་པའི་སྡོམ་པ་ཐོབ་པ་དེ་ཉིད་བསྒོམ་པ་ལ་བསྐྱེད་རིམ་བསྒོམ་པ་དང་། དབང་གོང་མ་གསུམ་གྱི་སྐབས་སུ་གྱ་ནོམ་ལྷར་ཞེན་གྱི་རྣམ་རྟོག་སྡོམ་པའི་སྡོམ་པ་ཐོབ་པ་དེ་ཉིད་བསྒོམ་པ་ལ་རྫོགས་རིམ་བསྒོམ་པར་འཇོག་པ་ཡིན་པས། འདིས་ཀྱང་དབང་བསྐུར་བ་ལམ་གྱི་དངོས་གཞིར་གྲུབ་བོ། །གཉིས་པ་ནི། ཕྱག་རྒྱ་ཆེན་པོ་ཐིག་ལེ་ལས། དབང་མེད་ན་ནི་དངོས་གྲུབ་མེད། །བྱེ་མ་བརྩིར་ཡང་མར་མེད་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་ནོད་ཞུ། །ཞེས་པ་འདིས་དབང་བསྐུར་མེད་པར་རྒྱུད་ཀྱི་ལུང་ལ་བལྟས་ཏེ། ཤེས་པར་འདུག་སྙམ་པའི་ང་རྒྱལ་གྱིས་རྒྱུད་འཆད་པའི་ཉེས་དམིགས་བསྟན་ནོ། །དམ་པ་དང་པོ་ལས། དབང་བསྐུར་མེད་པར་རྒྱུད་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱིས་གྲོལ་བར་མིན། །ཞེས་པ་འདིས་དབང་བསྐུར་མེད་པར་གཞན་ལ་རྒྱུད་འཆད་པ་དང་རང་གིས་བསྒོམ་པ་གཉིས་ཀའི་ཉེས་དམིགས་བསྟན་ནོ། །བདེ་མཆོག་རྩ་རྒྱུད་ལས། སྔགས་པ་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་རུ་འདོད། །མཁའ་ལ་ཁུ་ཚུར་གྱིས་བརྡེག་བཞིན། །སྨིག་རྒྱུའི་ཆུ་ནི་འཐུང་དང་མཚུངས། །ཞེས་དང་སངས་རྒྱས་ཐོད་པའི་ལེའུ་གསུམ་པ་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པི་ཝང་སྦྱོར་ཀུན་ཚོགས། རྒྱུད་དང་བྲལ་ན་བརྡུང་མི་རུང་། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་པར་འགྲོ། །ཞེས་གསུངས་ཤིང་། དེའི་དཀའ་འགྲེལ་ཡེ་ཤེས་ལྡན་ལས། བུ་ནི་མིག་ལ་སོགས་པའི་བྱང་ཆུབ་སེམས་དཔའ་སྟེ། དེ་རྣམས་ཀྱིས་བྱིན་གྱིས་བརླབས་པའི་ལུས་ནི་ཁྱིམ་སྟེ། དེས་སྟོང་པ་ཁོང་དུ་ཆུད་པར་བྱའོ། །ཤི་མ་ཐག་ཏུ་སྟོང་པའོ། །ཞེས་པ་ནི། བྱང་ཆུབ་སེམས་དཔའ་དེ་རྣམས་ཀྱི་བྱིན་གྱིས་མ་བརླབས་པ་ནི། ཤི་ནས་རྣལ་འབྱོར་པ་དེ་ཁྱད་པར་ཅན་དུ་འགྲོ་བར་མི་འགྱུར་རོ། །དེ་བཞིན་དབང་དང་བྲལ་ན་ནི། །ཞེས་པ་ནི་དབང་མེད་ནའོ། །ཡེ་ཤེས་ཀུན་གྱིས་སྟོང་པ་ཉིད། །ཅེས་པ་ནི། ཡེ་ཤེས་ཀུན་ནི། མེ་ལོང་ལྟ་བུའི་ཡེ་ཤེས་ལ་སོགས་པའོ། །དེ་རྣམས་ཀྱིས་བྱིན་གྱིས་མ་བརླབས་པ་ནི། ཐེག་པ་ཆེན་པོ་ཡོངས་སུ་ཤེས་པས་སྟོང་པའོ། །འདིས་ཅི་ཞིག་སྟོན་ཅེ་ན། མིག་ལ་སོགས་པ་བྱིན་གྱིས་བརླབས་པར་བྱས་ནས། ཡེ་ཤེས་ལྔ་ཡི་བདག་ཉིད་བྱང་ཆུབ་སེམས་དཔཾའ་སློབ་མ་ལ་སྦྱིན་པར་བྱའོ། །ཞེས་དང་། པི་ཝཾ་གི་སྒྲས་ནི་ཨ་ཝ་ངྷཱུ་ཏཱིའོ། །དེའི་སྦྱོར་བ་ཀུན་ཚོགས་པ་ནི་ཕུང་པོ་དང་ཁམས་དང་སྐྱེ་མཆེད་ཐམས་ཅད་ཀྱི་སྦྱོར་བ་འདུས་པ་ནི་བདེ་བ་ཆེན་པོའི་བསམ་གཏན་དུ་འགྱུར་རོ། །རྒྱུད་དང་བྲལ་ན་བརྡུང་མི་རུང་། །ཞེས་པ་ནི། རྒྱུད་དང་ལྡན་པའི་ཕྱིར་ན་རྒྱུད་ཅན་ནོ། །བྱང་ཆུབ་སེམས་ཀྱི་རྒྱུ་བ་དང་བྲལ་ན། བདེ་བ་ཆེན་པོ་མྱོང་བར་མི་རུང་བ་ནི་བརྡུང་དུ་མི་རུང་བའོ། །དེ་བཞིན་དབང་དང་བྲལ་ན་ནི། །ཞེས་པ་ལ། ཤེས་རབ་ཡེ་ཤེས་ཀྱི་དབང་དང་བྲལ་ན་ཕྱག་རྒྱ་ཆེན་པོའི་དངོས་གྲུབ་མེད་པའོ། །ཞེས་དང་། སངས་རྒྱས་ཀྱི་དེ་ཁོ་ན་ཉིད་མི་ཤེས་པའི་རྨོངས་པ་དབང་མེད་པར་སློབ་མ་རྣམས་སྡུད་པར་བྱེད་པའི་སེམས་ཅན་དེ་རྣམས་དམྱལ་བར་འགྲོ་བར་འགྱུར་རོ། །ཞེས་གསུངས་པས་ཚིགས་བཅད་གསུམ་པོ་འདིས་དངོས་སུ་དབང་གོང་མ་གསུམ་མ་བསྐུར་བའི་ཉེས་དམིགས། ཤུགས་ལ་དབང་གོང་མ་གསུམ་བསྟན་ནོ། །ཚིགས་བཅད་དེ་གསུམ་གྱི་ཐོག་མར། བརྩེ་དང་ལྡན་པའི་དྲག་ཆེན་མོ། །འཁོར་བའི་འདམ་དུ་བྱིང་བ་བདག །དབང་བསྐུར་བ་ཡིས་བདག་གྲོལ་ཕྱིར། །རྡོ་རྗེ་རྣལ་འབྱོར་མས་ཁྲུས་ཤིག །ཅེས་གསུངས་པ་འདི་འགྲེལ་པར། བུམ་དབང་ལ་དངོས་སུ་སྦྱར་བར་མེད་ཀྱང་ཚིགས་བཅད་འོག་མ་གསུམ་གྱི་འགྲོས་དང་། བསྐྱེད་རིམ་གྱི་དབང་གི་གསོལ་གདབ་ཀྱི་སྐབས་ཡིན་པས། བུམ་དབང་ལ་སྦྱར་བ་དོན་གྱིས་ཐོབ་ལ། ཚིགས་བཅད་བཞི་པོ་དེའི་འཇུག་ཏུ། དེ་ལྟར་ཤེས་བྱས་རྣལ་འབྱོར་མ། །སླར་ཡང་བདག་ལ་དབང་བསྐུར་ཅིག །ཅེས་བསྐྱེད་རིམ་གྱི་དབང་གི་གསོལ་གདབ་ལ། དབང་བཞི་ཆར་གྱི་གསོལ་གདབ་བྱས་པས་བསྐྱེད་རིམ་གྱི་དབང་ལ་དབང་བཞི་ཆར་ལེན་པར་གྲུབ་བོ། །ཕྱི་མ་ཁ་ཅིག་བསྐྱེད་རིམ་གྱི་དབང་གི་སྐབས་སུ། དབང་གི་ཆུ་རྒྱུན་གཅིག་ལ་དབང་བཞི་ལེན་པ་འགོག་པ་ནི་རྒྱུད་འདིའི་དོན་རྒྱ་བོད་ཀྱི་མཁས་གྲུབ་རྣམས་ཀྱིས་དབང་ཐམས་ཅད་ཐོབ་ཅེས་པ་དབང་བཞི་ཆར་ལ་འཇུག་པར་བཞེད་པའི་དོན་ཙམ་ལའང་བློ་ཁ་མ་ཕྱོགས་ཤིང་། གྲུབ་ཆེན་མཚོ་སྐྱེས་ཀྱིས་དབང་བཞི་ལེན་པར་གསུངས་པ་དང་ཡང་འགལ་ལོ། །གསུམ་པ་ནི། སྔར་གྱི་སྐྱེ་བ་བདུན་ནམ་བཅུ་དྲུག་ན་འགྲུབ་པར་གསུངས་པ་དང་ལམ་བསྒོམས་ན་ཚེ་འདིའམ་བར་དོ་སོགས་སུ་སངས་རྒྱ་བར་གསུངས་པ་ནི་ཕན་ཡོན་གྱི་གཙོ་བོ་ཡིན་ལ། གཞན་ཡང་སྟ་གོན་གི་སྤྲོ་བ་བསྐྱེད་པའི་སྐབས་དང་། འཇུག་པའི་ཕན་ཡོན་གྱི་སྒོ་ནས་དམ་ལ་བཞག་པའི་སྐབས་དང་། དབང་བསྐུར་བ་ཐོབ་པས་ལྷ་མཆོད་པ་དང་། སེམས་ཅན་གྱི་དོན་བྱ་བ་དང་། ཆོས་ཀྱི་འཁོར་ལོ་བསྐོར་བ་དང་། ཕྲིན་ལས་རྣམས་བསྒྲུབ་པ་ལ་དབང་ངོ་ཞེས་རྗེས་གནང་གི་སྐབས་རྣམས་དང་། ལུང་བསྟན། དབུགས་དབྱུང་། གཟེངས་བསྟོད་ཀྱི་སྐབས་ནས་གསུངས་པ་རྣམས་ཀྱང་དབང་བསྐུར་བའི་ཕན་ཡོན་ནོ། །བཞི་པ་ལ་བཞི་སྟེ། གང་གིས་བསྐུར་བའི་སློབ་དཔོན། གང་ལ་བསྐུར་བའི་སློབ་མ། གང་ལས་བསྐུར་བའི་དཀྱིལ་འཁོར། ཇི་ལྟར་བསྐུར་བའི་དབང་ཉིད་གཏན་ལ་དབབ་པའོ།། །།དང་པོ་ནི། བདེ་མཆོག་སྡོམ་འབྱུང་ལས། དེ་ནས་རྡོ་རྗེ་སློབ་དཔོན་གྱི། །ཆོ་ག་འདི་ལས་ཡང་དག་བཤད། །དལ་བ་ཞི་བའི་ཆ་ལུགས་ཅན། །སེམས་ཅན་ཀུན་རབ་མི་འཇིགས་སྟེར། །སྔགས་དང་རྒྱུད་ཀྱི་རབ་སྦྱོར་ཤེས། །བསྟན་བཅོས་རིག་ཅིང་སྙིང་རྗེར་ལྡན། །སྙན་པའི་ངག་སྨྲ་ཐམས་ཅད་ལ། །སེམས་ཅན་ཀུན་ལ་བུ་བཞིན་དུ། །རྟག་ཏུ་སྦྱིན་པ་ལ་སོགས་དགའ། །རྣལ་འབྱོར་བསམ་གཏན་མངོན་པར་བརྩོན། །བདེན་པར་སྨྲ་ཞིང་འཚེ་བ་མེད། །སྙིང་རྗེ་དང་ནི་ཕན་སེམས་ལྡན། །སེམས་ནི་མཉམ་ཉིད་ཕྱག་རྒྱར་ལྡན། །སེམས་ཅན་ཀུན་གྱི་མགོན་གྱུར་ཅིང་། །སེམས་ཅན་བསམ་པའི་ཁྱད་པར་ཤེས། །མགོན་དང་བྲལ་བ་རྣམས་ཀྱི་གཉེན། །དབང་པོ་ཡོངས་སུ་རྫོགས་པའི་ལུས། །བལྟ་ན་སྡུག་པའི་གཟུགས་དང་ལྡན། །དབང་བསྐུར་དོན་གྱི་དེ་ཉིད་རིག །ཚིག་གསལ་ཡོན་ཏན་རྒྱ་མཚོ་སྟེ། །རྟག་པར་རྒྱུན་དུ་གནས་བསྟན་པ། །དེ་ནི་སློབ་དཔོན་ཡིན་ཞེས་བྱ། །ཞེས་གསུངས་པ་ནི། མཚན་ཉིད་རྒྱས་པའི་དབང་དུ་བྱས་པ་ཡིན་ལ། མདོར་བསྡུ་ན་རྗེ་བཙུན་རིན་པོ་ཆེས། བླ་མ་བརྒྱུད་པ་དད་ལྡན་རྒྱུད་དོན་རིག །དམ་ཚིག་མཆོག་བསྲུང་མན་ངག་དུ་མས་བརྒྱན། །སྙིང་རྗེས་རྒྱུད་བརླན་བསྟན་བཅོས་མང་དུ་ཤེས། །དེ་ཡི་ཞབས་བསྟེན་གསོལ་བ་ལན་མང་གདབ། །ཅེས་གསུངས་པའི་མཚན་ཉིད་དང་ལྡན་པ་ངེས་པར་དགོས་སོ། །གཉིས་པ་ལ་གསུམ་སྟེ། རང་བཞིན་རྒྱུད་ཀྱི་ཁྱད་པར། ཐོས་བསམ་གྱིས་རྒྱུད་སྦྱངས་མ་སྦྱངས་ཀྱི་ཁྱད་པར། བསླབ་པས་རྒྱུད་སྦྱངས་མ་སྦྱངས་ཀྱི་ཁྱད་པར་རོ། །དང་པོ་ནི། བདེ་མཆོག་སྡོམ་འབྱུང་ལས། སློབ་དཔོན་གྱིས་ནི་ཆོས་ལ་སྤྲོ། །རིགས་ལྡན་སློབ་མ་ཡང་དག་བསྡུ། །སྙིང་རྗེ་མེད་ཅིང་ཁྲོ་ལ་གདུག །ཁེངས་དང་མ་བསྡོམས་རྣམ་གཡེངས་ཅན། །མ་རུངས་རྨོངས་པ་སྙོམ་ལས་ཅན། །གཞན་གྱི་སྲོག་ལ་བརྩེ་བ་བྲལ། །ཕ་རོལ་རྫས་ལ་མངོན་པར་ཞེན། །བླ་མས་རྟག་ཏུ་སྤང་བར་བྱ། །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །མི་དགེ་བཅུ་ནི་ཡོངས་སུ་སྤངས། །སེམས་ཅན་རྣམས་ཀྱིས་བལྟ་ན་སྡུག །འབར་བའི་མེ་དང་དུག་སོགས་བཞིན། །ཕ་རོལ་རྫས་ལ་རེག་མི་བྱ། །རྟག་པར་རྒྱུན་དུ་བླ་མ་མཆོད། །དམ་ཆོས་ལྟ་བ་ལ་སྤྲོ་ཞིང་། །རྟག་ཏུ་སྦྱིན་ལ་སོགས་ལ་དགའ། །འཇིག་རྟེན་ཕ་རོལ་མངོན་འདོད་པ། །རབ་བསྔགས་སློབ་མ་དེ་རྣམས་ལ། །སྦྱིན་བྱ་དཀྱིལ་འཁོར་དམ་པའོ། །ཞེས་གསུངས་པའི་ཚིག་རྐང་དང་པོ་གཉིས་ཀྱིས་མདོར་བསྟན། དེ་ནས་དྲུག་གིས་སྤང་བྱའི་མཚན་ཉིད་དོ། །དེ་ནས་ཚིག་བཅད་གསུམ་གྱིས་བླང་བྱའི་མཚན་ཉིད་བསྟན་ནོ། །གཉིས་པ་ནི། ཇི་སྐད་བཤད་པའི་སྤང་བྱའི་མཚན་ཉིད་དང་ལྡན་པ་དེ་དག་རྣམ་པ་ཐམས་ཅད་དུ་སྤང་བར་བྱ་བ་ཡིན་ནམ་སྙམ་ན། རྒྱུད་སྦྱང་བར་མ་བྱས་ན་སྤང་བར་བྱ་བ་ཡིན་ཀྱང་ཐོས་བསམ་དང་། བསླབ་པས་རིམ་གྱིས་རྒྱུད་སྦྱངས་ནས་སྣོད་དུ་གྱུར་པ་ན་བླང་བར་བྱ་བ་ཁོ་ན་ཡིན་ཏེ། བརྟག་གཉིས་ལས། མཚམས་མེད་ལྔ་ནི་བྱེད་པ་དང་། །སྲོག་ཆགས་གསོད་ལ་དགའ་བ་དང་། །གཞན་ཡང་སྐྱེ་བ་དམན་གང་དང་། །རྨོངས་དང་མ་རུངས་ལས་བྱེད་དང་། །གཟུགས་ངན་ཡན་ལག་མ་ཚང་བ། །བསམས་པས་དེ་རྣམས་འགྲུབ་པར་འགྱུར། །ཞེས་གསུངས་ཤིང་རྒྱུད་སྦྱང་བ་མ་བྱས་ཀྱང་འགྲུབ་ན་གཞུང་སྔ་མས་སྤང་བར་བྱ་བ་གསུངས་པ་དང་འགལ་ལ་རྒྱུད་སྦྱང་བ་བྱས་ཀྱང་མི་འགྲུབ་ན་གཞུང་ཕྱི་མ་དང་འགལ་བའི་ཕྱིར་རོ། །ཐོས་བསམ་གྱིས་རྒྱུད་ཇི་ལྟར་སྦྱང་སྙམ་ན། རྩ་རྒྱུད་ཕྱི་མའི་བརྒྱད་པ་ལས། དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱེ་ཡི་རྡོ་རྗེ་བསྟན། །ཞེས་གསུངས་པ་ལྟར། གྲུབ་མཐའ་བཞི་དང་། རྒྱུད་སྡེ་བཞི་ལ་རིམ་གྱིས་བསླབ་པའམ། དེ་ཙམ་མ་ནུས་ན་ཡང་ཐོས་བསམ་ཅི་རིགས་པས་སྒྲོ་འདོགས་བཅད་པའོ། །སྔར་བཤད་པའི་བླང་བྱའི་མཚན་ཉིད་དང་ལྡན་པ་དེ་དག་ནི་དང་པོ་ཉིད་ནས་བླང་བར་བྱ་བ་ཡིན་ཏེ། བརྟག་གཉིས་ལས། དགེ་བ་བཅུ་ལ་གོམས་པ་དང་། །བླ་མ་ལ་གུས་དབང་པོ་ཐུལ། །ང་རྒྱལ་ཁྲོ་ལས་རྣམ་པར་གྲོལ། །དེས་ནི་རེ་ཞིག་ངེས་འགྲུབ་འགྱུར། །ཞེས་གསུངས་པ་ནི། རྒྱུད་སྦྱང་བ་མ་བྱས་ཀྱང་དང་པོ་ནས་སྣོད་དུ་གྱུར་པའི་དབང་དུ་བྱས་པའི་ཕྱིར་རོ། །དེས་ན་རང་བཞིན་རྒྱུད་ཀྱི་ཁྱད་པར་གཉིས་ཀའང་དངོས་སམ། བརྒྱུད་པའི་སྒོ་ནས་གཉིས་ཀའང་རུང་བར་ཤེས་པར་བྱའོ། །གསུམ་པ་ལ་གསུམ་སྟེ། བསླབ་པ་འོག་མ་གཉིས་ཀྱིས་རིམ་གྱིས་རྒྱུད་སྦྱངས་པ་དང་། བསླབ་པ་འོག་མ་གཉིས་གང་རུང་གིས་རྒྱུད་སྦྱངས་པ་དང་། དེ་ལའང་མ་ལྟོས་པ་དང་པོ་ཉིད་ནས་དབང་བསྐུར་བར་བྱ་བའོ། །དང་པོ་ནི། དཀྱིལ་ཆོག་རྣམས་ལས། རང་གི་བསླབ་ལྡན་འཁོར་བཞི་པོ། །ཐེག་ཆེན་བློ་ཅན་རྣམས་ལ་ནི། །དེ་བཞིན་གཤེགས་པས་གསུངས་པ་ཡི། །ཡང་དག་ཆོ་ག་རྗེས་སུ་གནང་། །ཞེས་གསུངས་པའི་འཁོར་བཞི་ནི་དགེ་སློང་ཕ་མ་གཉིས། དགེ་བསྙེན་ཕ་མ་གཉིས་ཏེ་བཞི་ཡིན་ལ། དགེ་ཚུལ་ཕ་མ་དང་། དགེ་སློབ་མ་ནི་དགེ་སློང་ཕ་མའི་ཉེ་གནས་སམ་འཁོར་ཡིན་པས་ཤུགས་ལ་བསྟན་ཏེ། དེ་དག་རང་རང་གི་བསླབ་པ་དང་ལྡན་པའི་དོན། སོ་སོར་ཐར་པ་གཏན་ཁྲིམས་བདུན་པོ་གང་རུང་གི་བསླབ་པ་དང་ལྡན་པ་ཡིན་ལ། དེའི་སྟེང་དུ་ཐེག་ཆེན་བློ་ཅན་ཏེ། སྨོན་འཇུག་གི་སེམས་བསྐྱེད་བྱས་པ་ལ་དབང་བསྐུར་བར་གསུངས་པས། སྡོམ་པ་འོག་མ་གཉིས་ཀྱིས་རིམ་གྱིས་རྒྱུད་སྦྱངས་པར་གྲུབ་བོ། །གཉིས་པ་ནི། རྒྱུད་རྒྱས་པའི་ལུང་དེ་ཁོ་ན་ཉིད་ཀྱིས་ཡེ་ཤེས་གྲུབ་པ་ལས་དྲངས་པ། རྡོ་ཡི་རིགས་ཀྱི་བྱེ་བྲག་གིས། །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་བསྒྱུར་བ་ལྟར། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་བསླབ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རིག་པ་འཛིན་པ་ཞེས་བྱའོ། །ཞེས་རིགས་ཅན་གསུམ་པོ་གང་རུང་གི་བསླབ་པ་དང་ལྡན་པ་དཀྱིལ་འཁོར་ཆེན་པོར་ཞུགས་པར་གསུངས་པ་ལྟ་བུའོ། །འདི་ཡང་རིགས་ཅན་གསུམ་གྱི་བསླབ་པས་རིམ་གྱིས་རྒྱུད་སྦྱངས་པ་ལ་དགོངས་སོ་སྙམ་ན། དེ་ཡང་མ་ཡིན་ཏེ། དཔེ་དང་མི་འགྲིགས་པའི་ཕྱིར་རོ། །དེ་བཞིན་དུ་སྤྱོད་བསྡུས་སྒྲོན་མེ་ལས། དང་པོ་སངས་རྒྱས་པའི་ཐེག་པའི་བསམ་པ་ལ་བསླབ་པར་བྱའོ། །དེ་ནས་ཐེག་པ་གསར་པ་དྲན་པ་གཅིག་པའི་མངོན་རྟོགས་ལ་བསླབ་པར་བྱའོ། །ཞེས་གསུངས་པའང་སྔ་མ་དེ་ཉིད་དེ། སངས་རྒྱས་པའི་ཐེག་པའི་བསམ་པ་ནི། ཐེག་པ་གསུམ་པོ་རང་རང་གི་ངེས་འབྱུང་གི་བསམ་པ་ཙམ་ཡིན་གྱི། ཐེག་ཆེན་སེམས་བསྐྱེད་ཁོ་ན་མ་ཡིན་ཞིང་། ཐེག་པ་གསར་པ་ནི་རྒྱུད་འདིའི་ལུགས་ཀྱི་གསང་སྔགས་རྡོ་རྗེ་ཐེག་པ། འདས་པའི་སངས་རྒྱས་གསུམ་གྱིས་ཀྱང་མ་གསུངས་ཤིང་། མ་བྱོན་པའི་སངས་རྒྱས་བྱམས་པ་ལ་སོགས་པས་ཀྱང་མི་གསུང་བས། ཤཱཀྱ་ཐུབ་པ་འདིའི་བསྟན་པ་ལ་གསར་དུ་བྱུང་བར་བཞེད་པས། སྔགས་ལམ་གྱི་ཐོག་མར་དབང་བསྐུར་ཉིད་ལ་བཞེད་པའི་ཕྱིར་རོ། །བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །ཅེས་པའི་སྤྱོད་པ་རིམ་པ་ཅན་ལ། བླ་མ་གོང་མས་དུས་ནམ་སྐྱེ་ངེས་པ་མེད་པའི་སེམས་བསྐྱེད་བསྣན་པར་མཛད་པས། བསླབ་པའི་གནས་བཅུའི་སྟེང་དུ་སེམས་བསྐྱེད་བྱས་ནས་དབང་བསྐུར་ན་དང་པོའི་ཁོངས་སུ་གཏོགས་ཤིང་། བསླབ་པའི་གནས་བཅུ་ལ་གནས་པ་ཉིད་ལ་དབང་བསྐུར་ན་གཉིས་པའི་ཁོངས་སུ་གཏོགས་པར་ཤེས་པར་བྱའོ། །གསུམ་པ་ནི། སྐྱེ་བ་མང་པོ་ནས་ཐེག་པ་ཆེན་པོའི་ལམ་ལ་སྦྱངས་པའི་སྐལ་ལྡན་ཅིག་ཅར་བ་སྟེ། སྔར་གྱི་དགེ་བ་བཅུ་ལ་གོམས་པ་དང་ཞེས་སོགས་ཀྱིས་ཀྱང་བསྟན་ཅིང་། སྐལ་མེད་སེམས་ཅན་གདུལ་དཀའ་བ། །ཞེས་སོགས་ཀྱི་ཤུགས་ལ། སྐལ་ལྡན་སེམས་ཅན་གདུལ་སླ་བ། །གང་གིས་འདུལ་བར་འགྱུར་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །གསོ་སྦྱོང་སྦྱིན་སོགས་མ་ལྟོས་པར། །དང་པོ་ཀྱེ་ཡི་རྡོ་རྗེ་བསྟན། །ཞེས་པ་ངེས་པར་ཐོབ་པའི་ཕྱིར་རོ། །མདོར་ན། ཉན་ཐོས་དང་ཐུན་མོང་བའི་ལམ་རིམ་གྱིས་སྦྱངས་པའམ། ཐེག་པ་ཆེན་པོ་ཕ་རོལ་ཏུ་ཕྱིན་པའི་ལམ་རིམ་གྱིས་སྦྱངས་པའམ། དང་པོ་ཉིད་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འདོད་པའི་ཅིག་ཅར་བ་གསུམ་ནི་དངོས་སུ་དབང་བསྐུར་བར་བྱ་བའི་སློབ་མའི་མཚན་ཉིད་ཚང་བའོ། །གསུམ་པ་གང་ལས་བསྐུར་བའི་དཀྱིལ་འཁོར་ལ་གཉིས་ཏེ། དབང་བསྐུར་བ་ལ་དཀྱིལ་འཁོར་སྔོན་དུ་འགྲོ་དགོས་པར་བསྟན་པ་དང་། དཀྱིལ་འཁོར་དེའི་རབ་ཏུ་དབྱེ་བའོ། །དང་པོ་ནི་རྒྱུ་སྡེ་རྣམས་ལས། དཀྱིལ་འཁོར་དང་བཅས་ཏེ་དབང་བསྐུར་བ་ཁོ་ན་གསུངས་ཀྱི། དཀྱིལ་འཁོར་མེད་པར་དབང་བསྐུར་བའི་ཚུལ་མ་གསུངས་པ་ལ་དགོངས་ནས། སློབ་དཔོན་རྡོ་རྗེ་དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་དང་། སངས་རྒྱས་ཡེ་ཤེས་ཞབས་ཀྱིས་ཀྱང་། འདུས་པའི་སྒྲུབ་ཐབས་ཀྱི་འགྲོ་བ་དབང་བསྐུར་གྱི་སྐབས་སུ་འདི་ཉིད་རྒྱུ་མཚན་དུ་བྱས་ནས་འགྲོ་བ་དབང་བསྐུར་བ་ལ། དེའི་སྔོན་དུ་མངལ་དུ་དཀྱིལ་འཁོར་བསྒྲུབ་དགོས་པར་གསུངས་པ་ལས་ཤེས་སོ། །གཉིས་པ་ནི་སངས་རྒྱས་རྡོ་རྗེ་འཆང་གིས་རྒྱུད་གསུངས་པའི་ཚེ་ཡེ་ཤེས་ཀྱི་དཀྱིལ་འཁོར་སྤྲུལ་ནས་ས་བཅུ་པའི་བྱང་སེམས་སོགས་ལ་དབང་བསྐུར་ནས་རྒྱུད་ཉན་པའི་སྣོད་རུང་དུ་བྱས་པ་དང་། རྫོགས་པའི་སངས་རྒྱས་སྤྲུལ་པའི་སྐུས་སྤྲུལ་པ་མཆོག་གི་དཀྱིལ་འཁོར་སྤྲུལ་ནས་གྲུབ་པའི་ས་ལ་ཉེ་བའམ། གྲུབ་པའི་ས་ལ་གནས་པ་རྣམས་ལ་དབང་བསྐུར་བའི་དཀྱིལ་འཁོར་གྱི་རྣམ་པར་བཞག་པ་ནི་སྔོན་གྱི་ཆོ་ག་འཕགས་པ་ཁོ་ནའི་སྤྱོད་ཡུལ་ཡིན་གྱི། སོ་སོ་སྐྱེ་བོའི་བློ་ལས་འདས་པས་རྣམ་གཞག་འདི་ཙམ་མོ་ཞེས་བྱ་བར་འཇོག་མི་ནུས་སོ། །དེང་སང་སོ་སོ་སྐྱེ་བོའི་རྡོ་རྗེ་སློབ་དཔོན་གྱིས་སློབ་མ་སྨིན་པར་བྱེད་པའི་དབང་དུ་བྱས་ནས་རྒྱུད་སྡེ་རྣམས་ལས་རྡུལ་ཚོན་གྱི་དཀྱིལ་འཁོར་གཙོ་བོར་གསུངས་ཀྱང་། སྤྱིར་དཀྱིལ་འཁོར་གྱི་རྣམ་གཞག་ལ་དཀྱིལ་འཁོར་བརྒྱད་དུ་དབྱེ་བ། དྲུག་ཏུ་དབྱེ་བ། དེ་དག་བཞིར་བསྡུ་བ། གསུམ་དུ་བསྡུ་བ་དང་བཞི་ལས། དང་པོ་ནི། གྲུབ་ཆེན་ཀླུའི་བྱང་ཆུབ་ཀྱིས། སློབ་མའི་དོན་ཀུན་བསྒྲུབ་པའི་ཕྱིར། །འཁོར་ལོ་རྣམ་བརྒྱད་བྲི་བར་བྱ། །རིན་ཆེན་དེ་བཞིན་ས་བོན་དང་། །མེ་ཏོག་ཚོན་དང་དེ་བཞིན་དུ། །བྱེ་མ་གཡོ་དང་ཕྱེ་མ་དང་། །དེ་བཞིན་ཡིད་ཀྱི་དཀྱིལ་འཁོར་བདེན། །ཞེས་བརྒྱད་གསུངས་པའི་རིན་ཆེན་ནི་རྡུལ་ཚོན་གྱི་རྒྱུ་རིན་པོ་ཆེ་ལས་བྱས་པའོ། །ས་བོན་ནི་འབྲས་ལ་སོགས་པ་ཚོན་གྱིས་ཁ་བསྒྱུར་བ་སྟེ། འདི་གཉིས་ནི་རྩ་རྒྱུད་ལས། རྡུལ་ཚོན་དམ་པའི་ཚོན་དང་ནི། །ཡང་ན་འབྲིང་པོ་ཉིད་ཀྱིས་ཏེ། །རིན་ཆེན་ལྔ་ཡི་ཕྱེ་མའམ། །ཡང་ན་འབྲས་ལ་སོགས་པས་སོ། །ཞེས་གསུངས་པའི་དོན་ནོ། །མེ་ཏོག་ནི་རྟེན་གྱི་དཀྱིལ་འཁོར་ལྷའི་གདན་དང་བཅས་པ་བྲིས་ནས་ལྷའི་མཚན་མ་ལ་མེ་ཏོག་འགོད་པའོ། །ཚོན་ནི་རས་ལ་ཚོན་གྱིས་བྲིས་པའི་རས་རིས་ཀྱི་དཀྱིལ་འཁོར་རོ། །བྱེ་མ་ནི་ཁུང་ནས་བྱུང་བའི་བྱེ་མ་ལ་ཚོན་གྱིས་ཁ་བསྒྱུར་བའོ། །ཕྱེ་མ་ནི་རྡོ་ལ་སོགས་པའི་ཕྱེ་མ་ལ་ཚོན་གྱིས་ཁ་བསྒྱུར་བའོ། །ཡིད་ཀྱི་དཀྱིལ་འཁོར་ནི་ཏིང་ངེ་འཛིན་ལ་བརྟན་པ་ཐོབ་པའི་རྡོ་རྗེ་སློབ་དཔོན་གྱིས་ལུས་ངག་གི་བྱ་བ་ཅུང་ཟད་ཀྱང་མེད་པར་ས་ཆོག་ནས་བརྩམས་ཏེ། རྡུལ་ཚོན་གྱི་དཀྱིལ་འཁོར་ཅི་ལྟ་བ་བཞིན་ཏིང་ངེ་འཛིན་གྱིས་སྤྲུལ་ནས་སློབ་མ་ལ་བསྟན་ནུས་པའི་ཚེ་དབང་བསྐུར་བ་ཡིན་ལ། འདི་ལ་ཡེ་ཤེས་ཞབས་ལུགས་པ་རྣམས་ཀྱིས་བསམ་གཏན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་ཞེས་པའི་ཐ་སྙད་མཛད་ཅིང་། དེ་དག་གི་སྒྲུབ་མཆོད་ལའང་བསམ་གཏན་གྱི་སྒྲུབ་མཆོད་དང་། ཏིང་ངེ་འཛིན་གྱི་སྒྲུབ་མཆོད་ཅེས་གསུངས་སོ། །བདེན་ཞེས་པ་ནི་ལུས་དཀྱིལ་ཏེ། གྲུབ་ཆེན་དྲིལ་བུ་པས་རང་བཞིན་གྱིས་གྲུབ་པའི་དཀྱིལ་འཁོར་དང་མ་བཅོས་པའི་དཀྱིལ་འཁོར་ཞེས་གསུངས་པ་དང་དོན་གཅིག་གོ །དེ་ལ་དང་པོ་གཉིས་དང་། ལྔ་པ་དང་། དྲུག་པ་ནི་རྡུལ་ཚོན་གྱི་རྒྱུའི་སྒོ་ནས་སོ་སོར་ཕྱེ་བ་ཡིན་ལ། གསུམ་པ་ནི་རྡུལ་ཚོན་གྱི་དཀྱིལ་འཁོར་ལ་ལྷའི་མཚན་མའི་རྒྱུའི་སྒོ་ནས་བཞག་པ་ཡིན་པས། ལྔ་ཆར་ཡང་རྡུལ་ཚོན་གྱི་དཀྱིལ་འཁོར་དུ་འདུས་སོ། །གཉིས་པ་ནི། ཨ་བྷི་དྷ་ན་ལས། ཡི་གེའི་དཀྱིལ་འཁོར་དང་པོ་སྟེ། །གཉིས་པ་མཚན་མའི་དཀྱིལ་འཁོར་ཡིན། །ལག་པའི་ཕྱག་རྒྱ་གསུམ་པ་སྟེ། །གཟུགས་བརྙན་འགོད་པ་བཞི་པའོ། །མེ་ཏོག་དགྲམ་པ་ལྔ་པ་སྟེ། །དྲུག་པ་ཚོགས་ཀྱི་དཀྱིལ་འཁོར་རོ། །ཞེས་གསུངས་པའི་དང་པོ་བཞི་རྡུལ་ཚོན་གྱི་དཀྱིལ་འཁོར་ལ་གཞལ་ཡས་ཁང་གདན་བཅས་བྲིས་ཟིན་ནས་མཚན་མ་དགོད་ཚུལ་གྱི་སྒོ་ནས་དབྱེ་བ་ཡིན་ཏེ། དེ་ལ་ཡི་གེའི་དཀྱིལ་འཁོར་ནི་ཧཱུྃ་ལ་སོགས་པའི་ས་བོན་འགོད་པའོ། །མཚན་མའི་དཀྱིལ་འཁོར་ནི་རྡོ་རྗེ་ལ་སོགས་པའི་ཕྱག་མཚན་འགོད་པའོ། །ལག་པའི་ཕྱག་རྒྱའི་དཀྱིལ་འཁོར་ནི་ཆོས་འཆད་ལ་སོགས་པའི་ཕྱག་རྒྱ་འགོད་པའོ། །གཟུགས་བརྙན་འགོད་པ་ནི། གཙོ་བོ་རི་མོ་ལུགས་མའང་རུང་། །རྡོ་རྗེ་ཅན་དང་ལྷན་ཅིག་གཞག །ཅེས་པ་ལྟར་རས་བྲིས་སམ། ལུགས་མའམ། ལྡེར་སྐུ་ཞལ་ཕྱག་ཡོངས་རྫོགས་འགོད་པའམ། རྡུལ་ཚོན་གྱིས་ལྷ་སྐུ་ཞལ་ཕྱག་ཡོངས་རྫོགས་བྲི་བའོ། །མེ་ཏོག་དགྲམ་པ་ནི་སྔར་བཤད་པ་ལྟར་ལྷའི་མཚན་མའི་རྒྱུའི་སྒོ་ནས་དབྱེ་བ་དང་དོན་གཅིག་གོ །དེ་ལྟར་ན་རྒྱུའི་སྒོ་ནས་དབྱེ་བ་ལྔ་པོ་རེ་རེ་ལའང་མཚན་མ་འགོད་ཚུལ་གི་སྒོ་ནས་དབྱེ་བ་བཞི་བཞི་ཡོད་པས་ཞིབ་ཏུ་ཕྱེ་ན་ཉི་ཤུར་ཡང་འགྱུར་རོ། །ཚོགས་ཀྱི་དཀྱིལ་འཁོར་ནི། ཚོགས་འཁོར་གྱི་དུས་སུ་ལྷ་གྲངས་དང་མཐུན་པའི་རྣལ་འབྱོར་པ་ལྷ་སོ་སོའི་ཆས་སུ་ཞུགས་ཏེ། ཚོགས་འཁོར་ཚུལ་བཞིན་དུ་བྱས་པ་ལས། དབང་གོང་མ་བསྐུར་བར་འདུས་པ་འཕགས་ལུགས་པས་གསུངས་པས་དེ་བསྟན་པ་འདྲའོ། །གསུམ་པ་ནི། དཀྱིལ་འཁོར་བརྒྱད་དུ་དབྱེ་བ་དང་། དྲུག་ཏུ་དབྱེ་བ་དེ་དག་བསྡུ་ན་བཞིར་འདུས་པ་ཡིན་ཏེ། ཀླུ་བྱང་གིས་གསུངས་པའི་རིན་ཆེན་སོགས་རྡུལ་ཚོན་གྱི་རྒྱུའི་སྒོ་ནས་དབྱེ་བ་བཞི་དང་། མཚན་མའི་རྒྱུའི་སྒོ་ནས་དབྱེ་བ་སྟེ་ལྔ་དང་། ཨ་བྷི་དྷ་ན་ལས་གསུངས་པའི་བཞི་ནི་རྡུལ་ཚོན་གྱི་དཀྱིལ་འཁོར་དུ་འདུས་པས། དེ་དང་། རས་བྲིས་ཀྱི་དཀྱིལ་འཁོར་དང་། ཡིད་ཀྱི་དཀྱིལ་འཁོར་དང་། ལུས་ཀྱི་དཀྱིལ་འཁོར་ཏེ། རྒྱུད་སྨིན་བྱེད་དུ་རུང་བའི་དཀྱིལ་འཁོར་ནི་བཞི་པོ་འདི་ཁོ་ན་ཡིན་པར་ཤེས་པར་བྱའོ། །རས་བྲིས་ཀྱི་དཀྱིལ་འཁོར་སྨིན་བྱེད་དུ་རུང་བ་ནི། གྲུབ་ཆེན་དྲིལ་བུ་པས། རས་བྲིས་དང་། རྡུལ་ཚོན་གྱི་དཀྱིལ་འཁོར་གཉིས་བཅོས་མ་གཉིས་ཀྱི་ངོ་བོ་ཞེས་ཆ་མཉམ་དུ་གསུངས་པ་དང་། སློབ་དཔོན་སྒྲ་གཅན་འཛིན་དཔལ་བཤེས་གཉེན་གྱིས། འདུས་པ་མི་བསྐྱོད་པའི་རས་བྲིས་ཀྱི་དཀྱིལ་འཁོར་ལ་བརྟེན་ནས་དབང་བསྐུར་བར་གསུངས་པ་དང་། ཨ་བྷ་ཡས་ཕྲེང་བར་གསུངས་པའི་དཀྱིལ་འཁོར་རྣམས་ལ་རས་བྲིས་དང་། རྡུལ་ཚོན་གཉིས་གཉིས་སུ་གསུངས་པ་དང་། རྗེ་བཙུན་རྩེ་མོས་རས་བྲིས་ཀྱི་དཀྱིལ་འཁོར་ལ་བརྟེན་པའི་ལུགས་འདི་ནི་བདེ་མཆོག་ཨ་བྷི་དྷ་ན་ལས་གསུངས་པ་ལ་བརྟེན་ཏེ། སློབ་དཔོན་རྡོ་རྗེ་དྲིལ་བུ་པ་དང་། སློབ་དཔོན་དགའ་རབ་རྡོ་རྗེ་ལ་སོགས་པས་གསུངས་ལ། དེང་སང་རྒྱ་གར་གྱི་ཡུལ་ནའང་ཆོ་ག་ཕལ་ཆེར་འདི་ལ་བྱེད་དོ། །བླ་མ་གོང་མ་རྣམས་ཀྱང་ཕལ་ཆེར་ཕྱག་ལེན་འདི་ལ་མཛད་པས་ལུགས་འདི་ནི་ཧ་ཅང་མི་ལེགས་པ་མ་ཡིན་ནོ་ཞེས་དང་། རྗེ་བཙུན་རིན་པོ་ཆེས་སྦྱོང་རྒྱུད་དཀྱིལ་འཁོར་བཅུ་གཉིས་ལ། རྡུལ་ཚོན་གྱི་དཀྱིལ་འཁོར་བཅུ་གཉིས་དང་། རས་བྲིས་ཀྱི་དཀྱིལ་འཁོར་བཅུ་གཉིས། ཏིང་ངེ་འཛིན་གྱི་དཀྱིལ་འཁོར་བཅུ་གཉིས་སུ་ཕྱེ་བར་གསུངས་པ་རྣམས་ཀྱིས་ཤེས་སོ། །རས་བྲིས་ཀྱི་དཀྱིལ་འཁོར་ལ་ནི་ལྷ་ཞལ་ཕྱག་ཡོངས་སུ་རྫོགས་པ་འབྲི་དགོས་ཏེ། ཛ་ཡ་སེ་ནས། རྡུལ་ཚོན་བྲི་བར་མ་ནུས་ན། །དཀྱིལ་འཁོར་དང་མཉམ་རས་ལ་ནི། །ངེས་པར་བཅོམ་ལྡན་ཧེ་རུ་ཀ །ཕྱག་རྒྱའི་ཚོགས་དང་བཅས་པ་བྲི། །ཞེས་དང་། རྗེ་བཙུན་རྩེ་མོས། རས་བྲིས་ཀྱི་དཀྱིལ་འཁོར་ནི། ལྷ་ཞལ་ཕྱག་གི་རྣམ་པ་ཅན་མེད་ན་ཡིད་མི་ཆེས་པའི་དབང་རྟུལ་གྱི་དབང་དུ་བྱས་པར་གསུངས་པའི་ཕྱིར་རོ། །བཞི་པ་ནི། གྲུབ་ཆེན་རྡོ་རྗེ་དྲིལ་བུ་པས། འོན་ཀྱང་དཀྱིལ་འཁོར་དེའི་རང་བཞིན། །ཅི་ཡིན་དེ་ནི་བདག་གིས་བཤད། །རི་མོར་གནས་པའི་ལས་དང་ནི། །ཐིག་ལས་ཚོན་དགྱེའི་རིམ་པ་བསྟན། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །བཅོས་མ་གཉིས་ཀྱི་ངོ་བོ་གང་། །དེ་ནི་གདུལ་བྱའི་དབང་ལས་འདོད། །མཁས་པས་བསྒྲུབ་བྱ་དེ་མིན་ཏེ། །ཡང་དག་དོན་མཐོང་གྲོལ་ཕྱིར་རོ། །འཁོར་ལོ་གསུམ་གྱི་བདག་ཉིད་གྲུབ། །དཀྱིལ་འཁོར་ལྷ་རྣམས་གྲུབ་པའོ། །དེ་ཡི་དབང་བསྐུར་ལ་སོགས་རིམ། །ཅི་ནས་མ་གྲུབ་ཡང་གྲུབ་བྱེད། །ཅེས་གསུངས་པའི་ཚིག་རྐང་དང་པོ་དྲུག་གིས། སྤྱིར་དཀྱིལ་འཁོར་ལ་རས་བྲིས། རྡུལ་ཚོན། རང་བཞིན་གྱིས་གྲུབ་པའི་དཀྱིལ་འཁོར་གསུམ་དུ་ཡོད་པར་བསྟན། དེ་ནས་ཚིག་རྐང་གཉིས་ཀྱིས། དཀྱིལ་འཁོར་དང་པོ་གཉིས་བཅོས་མའི་དཀྱིལ་འཁོར་ཡིན་པས། ལྷ་ཞལ་ཕྱག་གི་རྣམ་པ་ཅན་མེད་ན་ཡིད་མི་ཆེས་པའི་གདུལ་བྱ་དབང་རྟུལ་དང་། དེ་མེད་ཀྱང་ཚོན་སྤུངས་ཙམ་གྱིས་ཡིད་ཆེས་པའི་གདུལ་བྱ་དབང་འབྲིང་གི་དབང་དུ་བྱས་པར་བསྟན། དེ་ནས་ཚིག་རྐང་གཉིས་ཀྱིས་བཅོས་མའི་དཀྱིལ་འཁོར་གཉིས་པོ་དེ་སྐབས་འདིའི་བསྒྲུབ་པར་བྱ་བ་མ་ཡིན་ཏེ། སྐབས་འདིར་གདུལ་བྱ་མཁས་པའམ། དབང་རྣོན་གྱི་དབང་དུ་བྱས་པ་ཡིན་ལ། དེས་བསྒྲུབ་པར་བྱ་བ་ནི་ཡང་དག་པའི་དོན་མཐོང་བའི་ཚེ་གྲོལ་བར་འགྱུར་པ་ཅིག་དགོས་པ་ལས། བཅོས་མའི་དཀྱིལ་འཁོར་གཉིས་པོ་དེ་ཡང་དག་པའི་དོན་མཐོང་བའི་ཚེ་གྲོལ་བར་འགྱུར་བ་མ་ཡིན་པའི་ཕྱིར་ཏེ། ཆོ་ག་ཚར་ནས་ཕྱགས་ཏེ་ཆུ་བོར་དོར་བའམ། གནས་དབེན་པར་བཞག་པར་བྱ་བ་ཡིན་པའི་ཕྱིར་རོ། །དེ་ནས་ཚིག་རྐང་གཉིས་ཀྱིས་སྐབས་འདིའི་བསྒྲུབ་པར་བྱ་བའི་དཀྱིལ་འཁོར་ནི་རང་བཞིན་གྱིས་གྲུབ་པའི་དཀྱིལ་འཁོར་ཡིན་ཏེ། རྟེན་འཁོར་ལོ་གསུམ་གྱི་དཀྱིལ་འཁོར་ཡང་རང་བཞིན་གྱིས་གྲུབ། བརྟེན་པ་དེའི་ལྷ་རྣམས་ཀྱང་རང་བཞིན་གྱིས་གྲུབ་པའི་ལུས་ཀྱི་དཀྱིལ་འཁོར་ནི་ཡང་དག་པའི་དོན་ཡིན་ལ། དེ་དག་རྟེན་དང་བརྟེན་པ་ནམ་མཐོང་བའི་ཚེ་གྲོལ་བར་འགྱུར་བའི་ཕྱིར་ཞེས་བསྟན་ཏོ། །ཚིག་རྐང་ཐ་མ་གཉིས་ཀྱིས་དེ་དག་རང་བཞིན་གྱིས་གྲུབ་ན། དབང་བསྐུར་བ་ལ་སོགས་པ་མི་དགོས་པར་འགྱུར་རོ་སྙམ་ན། དབང་བསྐུར་བ་ལ་སོགས་པ་ནི་རང་བཞིན་གྱིས་མ་གྲུབ་པ་བསྒྲུབ་པའི་ཕྱིར་མ་ཡིན་གྱི། ཀུན་རྫོབ་ཏུ་གདུལ་བྱའི་བློ་ངོར་མ་གྲུབ་པ་གྲུབ་པར་བྱ་བའི་ཕྱིར་ཡིན་ཞེས་བསྟན་ཏོ། །འདིར་རང་བཞིན་གྱིས་གྲུབ་པའི་དོན་ལ། གང་ལ་རང་བཞིན་གྱིས་གྲུབ་ན་རྡོ་རྗེའི་ལུས་སྐྱོན་མེད་ལའོ། །གང་རང་བཞིན་གྱིས་གྲུབ་ན་འཁོར་ལོ་གསུམ་གྱི་རྟེན་དང་བརྟེན་པའོ། །ཚུལ་ཇི་ལྟར་རང་བཞིན་གྱིས་གྲུབ་ན་ཚེ་འདི་ཉིད་ལ་མཆོག་ཐོབ་པའི་དབང་དུ་བྱས་ནས། འབྲས་དུས་ཀྱི་འཁོར་ལོ་གསུམ་གྱིས་རྟེན་དང་བརྟེན་པར་དངོས་སུ་འགྱུར་རུང་གི་ཚུལ་གྱིས་སོ། །དེས་ན་འདོད་འཇོ་མཁན་པོས། ལྷའི་སྒྲུབ་གཞི་ལུས་ཀྱི་རྩ་ཁམས་ལྷ་བཟོ་བ་སོགས་ཀྱིས་བྱེད་པ་ལ་མ་ལྟོས་པར་ཕ་མའི་ཁུ་ཁྲག་ལས་རང་བཞིན་གྱིས་གྲུབ་ཅེས་སྨྲ་བ་ནི་ཟབ་མོའི་དོན་མ་རྟོགས་ཤིང་། དེ་ལྟར་ན་བཅོས་མ་གཉིས་པོ་ཡང་ཕ་མའི་ཁུ་ཁྲག་སོགས་ལ་མ་ལྟོས་པར་ལྷ་བཟོ་བ་སོགས་ཀྱིས་བྲིས་ཟིན་པའི་ཚེ་རང་བཞིན་གྱིས་གྲུབ་པའི་དོན་ཚང་བར་ཐལ་བའི་སྐྱོན་རྣམ་པ་ཀུན་ཏུ་མཚུངས་ཏེ། རྒྱུ་རྐྱེན་གྱིས་བཅོས་མར་མཚུངས་ཤིང་རྒྱུ་རྐྱེན་ལས་གྲུབ་ཟིན་པའི་ཚེ་རྒྱུ་རྐྱེན་ལ་མི་ལྟོས་པར་ཡང་མཚུངས་པའི་ཕྱིར་རོ། །དེས་ན་རང་བཞིན་གྱིས་གྲུབ་པའི་དཀྱིལ་འཁོར་འདི་སྐབས་འདིར་གདུལ་བྱ་གསུམ་དུ་ཕྱེ་བའི་དབང་རྣོན་ལ་སྨིན་བྱེད་ཀྱི་དཀྱིལ་འཁོར་དུ་རུང་ཡང་། གདུལ་བྱ་འོག་མ་གཉིས་ལ་བཅོས་མ་གཉིས་ཀྱི་དཀྱིལ་འཁོར་དུ་རྒྱུད་སྨིན་པ་སྔོན་དུ་འགྲོ་དགོས་པས། རྗེ་བཙུན་གྱིས་དེ་ལྟར་གསུངས་པ་ནི། དེང་སང་གི་གདུལ་བྱ་རབ་ཀྱང་། འདིའི་འབྲིང་ཙམ་ལས་མི་ཡོང་བ་ལ་དགོངས་ནས་གསུངས་པས། རྗེ་བཙུན་སྐུ་མཆེད་དོན་གྱི་དགོངས་པ་ཅིག་ཏུ་ཤེས་པར་བྱའོ། །བཞི་པ་ཇི་ལྟར་བསྐུར་བའི་དབང་ཉིད་གཏན་ལ་དབབ་པ་ལ་ལྔ་སྟེ། དབང་བསྐུར་བ་རང་གི་ངོ་བོ། དབང་བསྐུར་གྱི་སྒྲ་དོན། སྤྱིའི་གྲངས་ངེས། ནང་གསེས་ཀྱི་དབྱེ་བ། དབང་གི་གོ་རིམ་མོ། །དང་པོ་ནི། ཆོ་ག་ཁྱད་པར་ཅན་ལ་བརྟེན་ཏེ་ཕུང་ཁམས་སྐྱེ་མཆེད་ལ་སངས་རྒྱས་ཀྱི་ས་བོན་བཏབ་པའི་སྒོ་ནས་རྒྱུད་ཡོངས་སུ་སྨིན་པའི་ངོ་བོ་སྟེ། སྨིན་པའི་ཚད་ནི། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་སྤྱད་དུ་རུང་བ་སྨིན་འདོད་ལྟར། །དེ་བཞིན་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པར་བསྟན། །ཞེས་ཕར་ཕྱིན་ཐེག་པར་རྟེན་དེ་ཉིད་ལ་སྤང་བྱ་མཐོང་སྤང་སྤོང་རུང་དང་། གཉེན་པོ་མཐོང་ལམ་སྐྱེ་རུང་ལ་སྨིན་པར་འཇོག་པ་ལྟར། རྡོ་རྗེ་ཐེག་པའི་སྐབས་འདིར་རྟེན་དེ་ཉིད་ལ་སྤང་བྱ་སྒྲིབ་གཉིས་སྤོང་རུང་དང་། ཐོབ་བྱ་མཆོག་གི་དངོས་གྲུབ་ཐོབ་རུང་དུ་འགྱུར་བ་ནི་སྨིན་པའི་ངོ་བོའོ། །དེ་ན་དབང་བསྐུར་བ་ཐོབ་པ་དང་། སྔགས་ཀྱི་དམ་ཚིག་ཐོབ་པ་དང་། སྔགས་ཀྱི་སྡོམ་པ་ཐོབ་པ་དང་། རྒྱུད་སྨིན་པར་བྱས་པ་རྣམས་དོན་གཅིག་ཡིན་ཅིང་། དབང་བསྐུར་དང་། སྔགས་ཀྱི་དམ་ཚིག་དང་། སྔགས་ཀྱི་སྡོམ་པ་དང་། རྒྱུད་སྨིན་པའི་ངོ་བོ་རྣམས་དོན་གཅིག་སྟེ། འདི་ལ་དགོངས་ནས། ས་སྐྱ་པཎྜི་ཏས། དེ་ཕྱིར་ཕ་རོལ་ཕྱིན་པ་ལ། །སེམས་བསྐྱེད་མིན་པའི་ཆོས་གཞན་མེད། །རྡོ་རྗེ་ཐེག་པའི་སྒོར་ཞུགས་ནས། །དབང་བསྐུར་ལས་གཞན་ཆོས་མེད་དོ། །ཞེས་གསུངས་སོ། །འདི་ལ་དབྱེ་ན། རྒྱུ་དུས་ཀྱི་དབང་དང་། ལམ་དུས་ཀྱི་དབང་དང་། འབྲས་དུས་ཀྱི་དབང་གསུམ་ལས། དང་པོ་ནི། སྨིན་བྱེད་ཁོ་ན་ཡིན་ལ། ཕྱི་མ་གཉིས་གྲོལ་བྱེད་ཀྱི་ལམ་ཡིན་ནོ། །དེ་དག་སྒྲུབ་པར་བྱེད་པའི་ཐབས་སྦྱོར་དངོས་རྗེས་གསུམ་ཚང་བའི་ཆོ་ག་ནི་དབང་བསྐུར་གྱི་ཆོ་ག་ཡིན་ཏེ། ཆོ་གའི་སྐད་དོད་ལ་ཀལ་པ་ཞེས་པ་ཡོད་ལ། དེ་བརྟགས་པ་དང་། རྟོག་པ་དང་། ཆོ་ག་དང་། བསྐལ་པ་རྣམས་ལ་འཇུག་པས། རྣམ་པར་རྟོག་པས་དོན་ལ་མེད་བཞིན་དུ་བརྟགས་པ་དང་། དེ་ལྟར་རྟོག་པར་བྱེད་པའི་རྟོག་པ་དང་། དོན་ལ་མེད་བཞིན་དུ་སྐད་ཅིག་སྔ་ཕྱི་མང་པོ་ལ་བློས་ཕྱོགས་གཅིག་ཏུ་བསྐལ་པར་སྒྲོ་བཏགས་པ་དང་འདྲ་བར་འདིར་ཡང་དོན་ལ་མེད་བཞིན་དུ་སྦྱོར་དངོས་རྗེས་གསུམ་གྱི་བྱ་བའི་ཆ་ཤས་སོ་སོ་ལ་བློས་ཕྱོགས་གཅིག་ཏུ་ཆོ་གར་སྒྲོ་བཏགས་པས་ཆོ་ག་ཞིབ་མོ་ཞེས་འཇོག་པའི་ཕྱིར་རོ། །གཉིས་པ་ནི། རྩ་རྒྱུད་ཕྱི་མའི་གསུམ་པར། གཏོར་དང་བླུགས་པ་ཞེས་བྱ་འདིས། །དེས་ན་དབང་ཞེས་བརྗོད་པར་བྱ། །ཞེས་པའི་འགྲེལ་པ་དག་ལྡན་ལས། བུམ་དབང་གི་དུས་སུ་སྤྱི་བོ་ནས། གསང་དབང་གི་དུས་སུ་ལྕེ་ལ། ཤེས་རབ་ཡེ་ཤེས་ཀྱི་དུས་སུ་དབང་གི་གནས་སུ། བཞི་པ་ལ་རང་གི་སེམས་ལ་གཏོར་ཞིང་བླུགས་པ་སྟེ། ཨ་བྷི་ཥེ་ཀ་ཏ་ཞེས་པའི་དོན་ཏོ། །ཡང་ན་ཨ་བྷི་ཥིཉྩ་ནི་དབང་བར་བྱས་པས་དབང་སྟེ། དབང་བཞི་ཐོབ་པས་བསྐྱེད་རིམ་དང་། ཙཎྜ་ལཱི་དང་། དཀྱིལ་འཁོར་འཁོར་ལོ་དང་། བཞི་པའི་ལམ་བསྒོམ་པ་ལ་དབང་བར་བྱས་པའོ། །ཡང་ན་སྣ་ནན་ཏ་ནི་འཁྲུད་པར་བྱེད་པས་དབང་སྟེ། བུམ་དབང་གིས་ལུས་ཀྱི་དྲི་མ་འཁྲུད་ཅེས་བྱ་བ་ནས། དེ་བཞིན་དུ་ངག་དང་། ཡིད་དང་། ཀུན་གྱི་དྲི་མ་འཁྲུད་ཅེས་བྱ་བའོ། །ཡང་ན་པྲ་ཐེཀྵ་ཞེས་བྱས་ན་སྐལ་བ་དང་ལྡན་པ་སྟེ། བུམ་དབང་ཐོབ་པས་བསྐྱེད་རིམ་བསྒོམ་པའི་སྐལ་བ་དང་ལྡན་པར་བྱས་པ་ནས། བདག་བྱིན་བརླབས་དང་། དཀྱིལ་འཁོར་འཁོར་ལོ་དང་། དབང་བཞི་པའི་ལམ་བསྒོམ་པའི་སྐལ་བ་དང་ལྡན་པར་བྱས་ཞེས་བྱ་བའི་དོན་ཏོ། །ཞེས་གསུངས་སོ། །གསུམ་པ་ནི། ཆོ་གའི་སྒོ་ནས་སྤྱིར་དབང་བསྐུར་ལ། རྒྱུད་སྡེ་བཞི་ལ་སྤྱིར་དབང་གི་བབས་མི་འདྲ་བ་བཞི་ཡོད་དེ། ཡེ་ཤེས་ཐིག་ལེའི་རྒྱུད་ལས། ཆུ་ཡི་དབང་བསྐུར་ཅོད་པཎ་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་དུ་ཡོངས་སུ་གྲགས། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་ཕྱེ། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་འདོད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་བྱ་རྒྱུད་ལ་ཆུ་དང་ཅོད་པཎ་གྱི་དབང་གཉིས། སྤྱོད་རྒྱུད་ལ་དེའི་སྟེང་དུ་རྡོ་རྗེ་དྲིལ་བུ་མིང་གི་དབང་གསུམ། རྣལ་འབྱོར་རྒྱུད་ལ་དེ་ཐམས་ཅད་རྡོ་རྗེ་སློབ་མའི་དབང་དུ་བྱས་ནས། དེའི་སྟེང་དུ་ཕྱིར་མི་ལྡོག་པ་རྡོ་རྗེ་སློབ་དཔོན་གྱི་དབང་། བླ་མེད་ལ་དེ་ཐམས་ཅད་བུམ་དབང་དུ་བྱས་ནས། དེའི་སྟེང་དུ་གསང་དབང་། ཤེས་རབ་ཡེ་ཤེས། དབང་བཞི་པ་རྣམས་ཡོད་པར་གསུངས་པའི་ཕྱིར་རོ། །དབང་གི་དངོས་གཞིའི་ཆོ་ག་ལ། རྡོ་རྗེ་སློབ་མའི་དབང་དང་། སློབ་དཔོན་གྱི་དབང་གཉིས་སུ་ཕྱེ་བའི་སློབ་དཔོན་གྱི་དབང་། རྣལ་འབྱོར་རྒྱུད་ཡན་ཆད་ལ་ཡོད་པ་ཡིན་གྱི། སྤྱིར་རྡོ་རྗེ་སློབ་དཔོན་གྱི་དབང་རྒྱུད་སྡེ་འོག་མ་གཉིས་ལའང་མེད་པ་མ་ཡིན་ཏེ། གསང་བ་སྤྱི་རྒྱུད་ལས། སློབ་དཔོན་གོ་འཕང་རབ་བསྒྲུབ་ཕྱིར། །དང་པོ་ཡོངས་སུ་བསྒྲགས་པ་ཡིན། །ཞེས་གསུངས་པའི་ཕྱིར་དང་། རྒྱུད་སྡེ་འོག་མ་གཉིས་ཀྱི་དབང་ཡོངས་སུ་རྫོགས་པར་ཐོབ་པའི་གང་ཟག་དེས། གཞན་ལ་དབང་བསྐུར་བ་དང་། རྒྱུད་འཆད་པ་སོགས་སློབ་དཔོན་གྱི་ཕྲིན་ལས་ལ་དབང་བའི་རིགས་པས་ཀྱང་ཤེས་སོ། །བླ་མེད་ཀྱི་དབང་ལ་རྣམ་པ་བཞིར་གྲངས་ངེས་པའི་རྒྱུ་མཚན་ནི། སྦྱང་གཞི་ཆོས་བཞིར་གྲངས་ངེས་པ་དང་། སྦྱང་བྱ་དྲི་མ་བཞིར་གྲངས་ངེས་པ་དང་། སྦྱོང་བྱེད་ཀྱི་ལམ་བཞིར་གྲངས་ངེས་པ་དང་། སྦྱངས་འབྲས་སྐུ་བཞིར་གྲངས་ངེས་པ་སོགས་རྒྱས་པར་གཞན་དུ་ཤེས་པར་བྱའོ། །བཞི་པ་ནི། དབང་གི་ཆོ་གའི་ནང་གསེས་ལ། ཀླུ་སྒྲུབ་ཀྱིས་མཛད་པར་གྲགས་པའི་འདུས་པ་མི་བསྐྱོད་པའི་དཀྱིལ་འཁོར་གྱི་ཆོ་ག་ལ་དབང་བཞི་ཆར་གྱི་ཆོ་ག་ཉི་ཤུར་མཛད་པ་དང་། ཀླུ་བྱང་གིས་རྡུལ་ཚོན་གྱི་དཀྱིལ་འཁོར་དུ་བུམ་དབང་བསྐུར་བའི་ཆོ་ག་ཉི་ཤུར་མཛད་པ་དང་། བདེ་མཆོག་ནག་པོའི་དཀྱིལ་ཆོག་ཏུ། སྔོན་དུ་བསྙེན་པ་དང་། དཀྱིལ་འཁོར་གྱི་སྤྱོད་པ་བདུན་དང་། བརྟུལ་ཞུགས་ཀྱི་རིམ་པ་བཅུ་བཞི་སྟེ། ཉི་ཤུ་རྩ་གཉིས་སུ་མཛད་པ་དང་། གྲུབ་ཆེན་དྲིལ་བུ་པས། སློབ་དཔོན་དབང་སོགས་དབྱེ་བ་ཡིས། །དབང་བསྐུར་རྣམ་པ་བཞིར་བཤད་དེ། །ཆུ་ཡི་དབང་སོགས་དབྱེ་བ་ཡིས། །བཞི་པོ་དེ་ཡང་བཅུ་བཞི་འོ། །ཞེས་རྩ་བའི་དབྱེ་བ་བཞི། ཡན་ལག་གི་དབྱེ་བ་བཅུ་བཞིར་གསུངས་པ་དང་། ཀྱེ་རྡོར་མན་ངག་ལུགས་ལ། ཞལ་དང་འདྲ་བའི་ཆོ་གའི་སྒོ་བརྒྱད། ཞབས་དང་འདྲ་བའི་ཆོ་གའི་ཆིངས་བཞི། ཕྱག་དང་འདྲ་བའི་ཆོ་གའི་ཡན་ལག་བཅུ་དྲུག མིག་དང་འདྲ་བའི་ཆོ་གའི་གཙོ་བོ་ཉེར་བཞི་ཞེས་གསུངས་པ་ལ་སོགས་པ་རྣམས་ནི་དཀྱིལ་འཁོར་གྱི་ཆོ་ག་སོ་སོའི་སྟེང་དུ་གྲུབ་ཆེན་སོ་སོས་རྣམ་གཞག་མཛད་པ་རྣམས་ནི་ཆོ་གའི་ནང་གསེས་ཀྱི་དབྱེ་བ་ཙམ་སྟེ། མ་འདྲེས་པར་ཤེས་པར་བྱའོ། །ལྔ་པ་ནི། བརྟག་གཉིས་ལས། དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ། །ཞེས་དབང་གསུམ་པའི་ཕྱག་རྒྱ་དང་སྙོམས་པར་འཇུག་པའི་དགའ་བ་ལ་སོགས་པ་བཞི་པོ་སྔ་མ་སྔ་མ་མེད་ན་ཕྱི་མ་ཕྱི་མ་མི་འབྱུང་ཞིང་། སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་འབྱུང་བ་དཔེར་བྱས་པ་དེ་ཉིད་ཀྱིས་སློབ་དཔོན་གྱིས་དབང་ལ་སོགས་པ་བཞི་པོའང་སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་འབྱུང་བའི་གོ་རིམ་གྲུབ་པའོ། །འདི་མན་ཆད་ན་ཌོཾ་བི་དཀྱིལ་ཆོག་ཅེས་པ་བཟང་པོ་ཡོངས་གཟུང་དང་། རིན་ཆེན་འབར་བ་གཉིས་ལ་འཇུག ཌོཾ་བི་ལུགས་ཀྱི་དབང་ཆུ་ཞེས་དང་། མཚོ་སྐྱེས་ལུགས་ཀྱི་དབང་ཆུ་ཞེས་པ་རྗེ་བཙུན་རྩེ་མོས་མཛད་པ་གཉིས་ལ་འཇུག དབང་ཆུ་ཞེས་སྤྱིར་བཏང་བ་མན་ངག་ལུགས་དང་། ནག་པོ་དཀྱིལ་ཆོག་ཅེས་སྤྱིར་བཏང་བ་ནི་ནག་པོ་ཤཱནྟ་བྷ་དྲྭས་མཛད་པའི་དཀྱིལ་འཁོར་གྱི་ཆོ་ག་གཞུང་འགྲེལ་ལ་འཇུག་པར་ཤེས་པར་བྱའོ། །ལྔ་པ་ཆོ་གའི་ངོ་བོ་ལ་ཞལ་དང་འདྲ་བའི་ཆོ་གའི་སྒོ་བརྒྱད་ཡོད་དེ། གཞན་དོན་དུ་སློབ་མ་ཡོངས་སུ་གཟུང་བའི་ཆོ་ག སྔོན་དུ་བསྙེན་པའི་ཆོ་ག སའི་ཆོ་ག སྟ་གོན་གྱི་ཆོ་ག དཀྱིལ་འཁོར་བྲི་ཞིང་རྒྱན་དགྲམ་པའི་ཆོ་ག སྒྲུབ་ཅིང་མཆོད་པའི་ཆོ་ག འཇུག་ཅིང་དབང་བསྐུར་བའི་ཆོ་ག དཀྱིལ་འཁོར་ཆེན་པོའི་མཇུག་གི་ཆོ་གའོ། །དང་པོ་ལ་བཞི་སྟེ། གང་ལས་གསུངས་པའི་ལུང་ཁུངས། གང་ལ་བྱ་བའི་སློབ་མ། ཇི་ལྟར་བྱ་བའི་ཆོ་ག དེ་ལྟར་བྱས་པའི་དགོས་པའོ། །དང་པོ་ནི། རྒྱུད་གསུམ་པོ་འདིར། སཾ་བུ་ཊའི་རྒྱུད་ཕྱི་མ་ལས། སློབ་མས་པུས་མོའི་ལྷ་ང་ནི། །ས་ལ་དད་པས་བཙུགས་ནས་ནི། །ཐལ་མོ་སྦྱར་ནས་འདི་སྐད་དུ། །སྟོན་པ་ལ་ནི་ཞུ་བར་བྱ། །ཞེས་པ་ཙམ་ལས་མ་གསུངས་ཀྱང་། གསང་བ་སྤྱི་རྒྱུད་ལས། ལས་ཀུན་བྱེད་པའི་གསང་སྔགས་ཀྱིས། །དེ་ནས་སློབ་མ་ཡོངས་སུ་གཟུང་། །བུ་མོ་གཞོན་ནུས་བཀལ་བའི་སྐུད། །བླངས་ནས་བཞི་བཅུ་རྩ་དགུར་བཟླས། །སློབ་མ་རྣམས་ནི་མངོན་བསམས་ནས། །མཉམ་པར་བཞག་སྟེ་མདུད་པ་བོར། །ཞེས་པ་འདི་ས་ཆོག་དང་། སྟ་གོན་གྱི་བར་དུ་གསུངས་སོ། །ཌོཾ་བིའི་དཀྱིལ་ཆོག་གཉིས་དང་། ནས་གླིང་མ་གསུམ་ལས། སློབ་མས་གསོལ་བ་བཏབ་ནས། བླ་མས་བསྙེན་པའི་ཡོ་བྱད་བླང་བ་ཙམ་ལས། སློབ་མ་རྗེས་འཛིན་དངོས་སུ་གསུངས་པ་མི་སྣང་ཡང་། ཌོཾ་བི་ལུགས་ཀྱི་དབང་ཆུ་ལས་གཏོར་མ་འབུལ་བ་དང་། བསྲུང་བའི་གོ་རིམ་ཙམ་མ་གཏོགས་འདིའི་ཆོ་ག་མན་ངག་ལུགས་ཇི་ལྟ་བ་བཞིན་གསུངས་སོ། །ནག་པོ་དཀྱིལ་ཆོག་ལས། སློབ་མས་དཀྱིལ་འཁོར་བྲི་བའི་ཕྱིར། ལན་གསུམ་གྱི་བར་དུ་གསོལ་བ་གདབ་པར་བྱའོ། །དེ་ནས་དེའི་སེམས་ལས་བྱུང་བའི་བགེགས་རང་གི་སྙིང་གའི་ས་བོན་གྱི་གཟི་བརྗིད་ཀྱི་བསྐྲད་ལ། རྩ་བའི་སྔགས་སམ། ཕྲེང་བའི་སྔགས་བརྒྱ་རྩ་བརྒྱད་བཟླས་པས་བསྲུངས་ནས་ཞེས་གསུངས་ཤིང་། མན་ངག་ལུགས་ཀྱང་འདི་དང་ཆ་འདྲ་བར་སྣང་ངོ་། །གཉིས་པ་ནི་དབང་ཆུར། སློབ་དཔོན་མཚན་ཉིད་དང་ལྡན་པ་ལ། སློབ་མས་ཞུ་བའི་ཕྱིར། ཁྱོད་ཞབས་པདྨོ་སྤངས་ནས་ནི། །གཙོ་བོ་གཞན་ན་སྐྱབས་མ་མཆིས། །འགྲོ་བའི་དཔའ་བོ་ཐུབ་ཆེན་གྱིས། །བློ་མཆོག་བདག་ལ་གནང་བར་མཛོད། །ཅེས་བྱ་བའམ་ཡང་ན་འདི་སྐད་དུ། ཁྱོད་ལ་བདག་གིས་བླ་མར་གསོལ་བར་འདེབས་ཀྱིས། བདག་ལ་དཔལ་ཀྱེ་རྡོ་རྗེའི་དཀྱིལ་འཁོར་དུ་དབང་བསྐུར་བར་ཞུའོ། །ཞེས་དེ་སྐད་དུ་ལན་གཉིས་སམ་ལན་གསུམ་དུ་གསོལ་བ་འདེབས་ན། བླ་མས་ཡོན་ཏན་ཐམས་ཅད་ཀྱི་འབྱུང་གནས་སྐྱབས་གསུམ་སྔོན་དུ་སོང་བའི་སོ་སོར་ཐར་པའི་སྡོམ་པ་ལ་སོགས་པ་ལ་སྔར་བསྙེན་ཏམ། ད་བསྙེན་པར་སྤྲོའམ་ཞེས་འདྲི། སྔར་བསྙེན་ན་མི་དགོས། མ་བསྙེན་ན་སྐྱབས་འགྲོ་སེམས་བསྐྱེད་བྱ། དཔོན་སློབ་འབྲེལ་བརྟགས་ལ། སློབ་དཔོན་གྱིས་སློབ་མའི་བློའི་རིགས་བརྟགས་ཏེ་རྗེས་སུ་གཟུང་བར་བྱའོ། །དེ་ལ་གང་ཟག་གི་རིགས་བཞི་སྟེ། སྔར་གསང་སྔགས་ཀྱི་སྒོར་ཞུགས་པ་དང་། གསང་སྔགས་ལ་མ་ཞུགས་ཀྱང་ཐེག་པ་ཆེན་པོའི་ལམ་ལ་ཞུགས་པ་དང་། ཐེག་པ་ཆེན་པོ་ལའང་མ་ཞུགས་ཀྱང་ཉན་ཐོས་ལ་སོགས་པའི་ལམ་ལ་ཅི་རིགས་པར་ཞུགས་པ་དང་། སངས་རྒྱས་ཀྱི་བསྟན་པ་ལ་མ་ཞུགས་པའོ། །དེ་ལྟར་བཞིར་ཤེས་པར་བྱས་ལ། སློབ་དཔོན་གྱིས་དྲི་བར་བྱ་སྟེ། ཁྱོད་སྔར་སངས་རྒྱས་ཀྱི་བསྟན་པ་ལ་མ་ཞུགས་པ་ཡིན་ནམ། ཞུགས་པ་ཞིག་ཡིན། ཞུགས་པ་ཞིག་ཡིན་ན་གང་ལ་ཞུགས་པ་ཡིན་ཞེས་དྲི་བར་བྱའོ། །དེ་ལ་དང་པོ་གསང་སྔགས་ཀྱི་ལམ་ལ་སྔར་ཞུགས་ཟིན་པ་ཡིན་ནོ་ཞེས་སྨྲ་ན། དེས་གསང་སྔགས་ལ་ཇི་ལྟར་ཞུགས་པར་ཤེས་པར་བྱས་ལ་ཁས་བླངས། གལ་ཏེ་གསང་སྔགས་ཀྱི་ལམ་ལ་ནི་མ་ཞུགས་ཏེ། བྱང་ཆུབ་ཏུ་སེམས་བསྐྱེད་པ་བྱས་ཏེ། ཐེག་པ་ཆེན་པོ་ལ་ཞུགས་སོ་ཞེས་སྨྲ་ན་དེའང་འོས་སུ་གྱུར་པ་ཡིན་པས་སློབ་མར་ཁས་བླངས་ཏེ་སློབ་མར་རྗེས་སུ་བཟུང་བར་བྱའོ། །གལ་ཏེ་ཐེག་པ་ཆེན་པོ་ལའང་མ་ཞུགས་ཏེ། སོ་སོར་ཐར་པ་ལ་བསླབས་སོ་ཞེས་སྨྲ་ན། དེ་མ་ཐག་ཏུ་དབང་བསྐུར་བར་ཁས་མི་བླངས་ཏེ། སྙིང་རྗེ་ཆེན་པོ་སྔོན་ཏུ་འགྲོ་བས། བྱང་ཆུབ་ཏུ་སེམས་བསྐྱེད་ལ་དེའི་འོག་ཏུ་སློབ་མ་རྗེས་སུ་བཟུང་བའི་ཆོ་ག་བྱའོ། །གལ་ཏེ་སྔར་སངས་རྒྱས་ཀྱི་བསྟན་པ་ལ་མ་ཞུགས་སོ་ཞེས་སྨྲ་ན། དེ་ལ་ཁྱོད་ཅི་དོན་དུ་གཉེར་ནས་དབང་བསྐུར་བ་འདོད་ཅེས་དྲི་བར་བྱའོ། །དེ་ལའང་རིགས་གསུམ་སྟེ། སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་འདོད་དོ་ཞེས་ཟེར་ན། དེ་ནི་སྐྱེ་བ་མང་པོ་ནས་ཐེག་པ་ཆེན་པོ་ལ་ཞུགས་པ་ཡིན་པས་སློབ་མ་རྗེས་སུ་གཟུང་བའི་ཆོ་ག་བྱའོ། །གལ་ཏེ་བདག་ཉིད་གཅིག་པུ་འཁོར་བ་ལས་ཐར་ཏེ། ཞི་བ་དོན་དུ་གཉེར་བར་འདོད་དོ་ཞེས་སྨྲ་ན། དེ་ལའང་བྱང་ཆུབ་ཀྱི་མཆོག་ཏུ་སེམས་བསྐྱེད་ལ་དཔོན་སློབ་ཕན་ཚུན་འབྲེལ་པ་བརྟགས་ལ་རྗེས་སུ་མཐུན་ན་གདོད་སློབ་མ་རྗེས་སུ་བཟུང་བའི་ཆོ་ག་བྱའོ། །གལ་ཏེ་ཚེ་འདིར་ཚེ་རིང་བ་དང་ནད་མེད་པ་ལ་སོགས་པའམ། སྐྱེ་བ་ཕ་རོལ་ཏུ་ལྷ་དང་མི་ལ་སོགས་པ་དོན་དུ་གཉེར་བར་འཚལ་ལོ་ཞེས་ཟེར་ན། དེ་ལ་དེ་མ་ཐག་ཏུ་རྗེས་སུ་བཟུང་བར་མི་བྱ་སྟེ། དཔལ་ཀྱཻ་རྡོ་རྗེའི་རྒྱུད་ལས་གསུངས་པ་ལྟར། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབས་པའི་གནས་བཅུ་ཉིད། །ཅེས་བྱ་བ་ལ་སོགས་པ་དང་། རྣམ་སྣང་སྒྱུ་དྲྭ་དང་། དཔལ་མཆོག་བཞིན་འབྲེལ་པ་བརྟགས་པ་ལ་སོགས་པས་བློ་ལེགས་པར་སྦྱངས་ལ། བྱང་ཆུབ་ཀྱི་སེམས་སྐྱེས་པ་དང་། དེ་ནས་གདོད་རྗེས་སུ་བཟུང་བར་བྱའོ། །དེ་ལྟར་འབྲེལ་བརྟགས་ནས་མཚན་ཉིད་དང་ལྡན་པའི་སློབ་མ་གཅིག་ནས་ཉི་ཤུ་རྩ་ལྔའི་བར་གྲངས་ཁ་ཡར་བ་གཟུང་བར་བྱའི། ཁ་འཆམ་པ་དང་། དེ་བས་ལྷག་པ་དཀྱིལ་འཁོར་གཅིག་ཏུ་མི་བཟུང་སྟེ། དེ་སྐད་དུའང་གསང་བ་སྤྱི་རྒྱུད་ལས། མཁས་པས་སློབ་མ་གཅིག་གམ་གསུམ། །ལྔའམ་ཡང་ན་བདུན་དག་གམ། །ཉི་ཤུ་རྩ་ནི་ལྔ་ཡི་བར། །ཟུང་དུ་མ་གྱུར་སློབ་མ་གཟུང་། །དེ་བས་ལྷག་པའི་སློབ་མ་ནི། །ཡོངས་སུ་གཟུང་བར་མི་ཤིས་སོ། །ཞེས་གསུངས་པའོ། །དེའང་གཟའ་དང་། རྒྱུ་སྐར་བཟང་བ་དང་། ཡར་ངོ་ལ་བྱ་སྟེ། དེ་སྐད་དུའང་། དབང་བསྐུར་དང་ནི་རབ་གནས་ཉིད། །ཡར་གྱི་ངོ་ལ་བསྟན་པར་བྱ། །ཞེས་གསུངས་ལ། ཡང་། གཟའ་དང་སྐར་མ་འཛོམ་གྱུར་ན། །མར་གྱི་ངོ་ལའང་ཉེས་པ་མེད། །ཅེས་ཀྱང་གསུངས་པས་སོ། །ཞེས་གསུངས་ཏེ། གང་ཟག་གི་རིགས་བཞིར་དབྱེ་བ་འདི་ནི་ཌོཾ་བི་ལུགས་ཀྱི་དབང་ཆུ་ལས་ཀྱང་འདི་ཁོ་ན་བཞིན་འབྱུང་བས། སྲོལ་གཉིས་ཆར་ལའང་། སྐལ་དམན་རིམ་འཇུག་པ་དང་། སྐལ་ལྡན་ཅིག་ཅར་བའི་དཀྲི་ཚུལ་གཉིས་ཀ་ཡོད་པར་ཤེས་པར་བྱའོ། །འདིར་གལ་ཏེ་ཐེག་པ་ཆེན་པོ་ལའང་མ་ཞུགས་ཏེ། སོ་སོར་ཐར་པ་ལ་བསླབས་སོ་ཞེས་སྨྲ་ན། དེ་མ་ཐག་ཏུ་དབང་བསྐུར་བ་ཁས་མི་བླང་སྟེ། སྙིང་རྗེ་ཆེན་པོ་སྔོན་དུ་འགྲོ་བས་བྱང་ཆུབ་ཏུ་སེམས་བསྐྱེད་ལ་ཞེས་གསུངས་པ་དང་། སྔར་རྒྱུད་རྒྱས་པའི་ལུང་། རིགས་ཅན་གསུམ་གྱི་བསླབ་པ་ཡང་། །ཞེས་གསུངས་པ་དང་འགལ་ལོ་སྙམ་ན་མི་འགལ་ཏེ། རིགས་ཅན་འོག་མ་གཉིས་ཀྱི་བསླབ་པ་ལ་གནས་པ་དེ་བསླབ་པ་ཐེག་པ་ཆེན་པོའི་བསླབ་པར་གནས་མ་གྱུར་ཡང་སེམས་ཅན་གྱི་དོན་དུ་སངས་རྒྱས་ཐོབ་པར་བྱ་བའི་ཕྱིར་དུ། སྔགས་ལམ་ལ་འཇུག་པར་འདོད་པའི་དབང་དུ་བྱས་ནས། རིགས་ཅན་གསུམ་གྱི་བསླབ་པ་ཡང་ཞེས་གསུངས་ལ། འདིར་ནི་རིགས་ཅན་འོག་མ་གཉིས་ཀྱི་བསླབ་པ་ལ་གནས་ནས་བསམ་པ་དེ་ཙམ་ཡང་མ་སྐྱེས་པའི་དབང་དུ་བྱས་པའི་ཕྱིར་རོ། །ལུགས་སྔ་མ་ལ་བསླབ་པ་གནས་མ་གྱུར་པ་དང་། ལུགས་ཕྱི་མ་ལ་བསམ་པ་དེ་ཙམ་ཡང་མ་སྐྱེས་པ་མི་འཐད་དོ་སྙམ་ན། དེའང་མ་ཡིན་ཏེ། ཉན་ཐོས་དགྲ་བཅོམ་པ་ཐེག་ཆེན་ལམ་དུ་འཇུག་ཁ་མའི་ཚེ། སེམས་ཅན་གྱི་དོན་དུ་སངས་རྒྱས་ཐོབ་པའི་ཕྱིར་དུ། ཐེག་ཆེན་གྱི་ལམ་དུ་འཇུག་འདོད་ཡོད་ཀྱང་། བསླབ་པ་གནས་མ་གྱུར་པ་དང་། དེ་ལས་གཞན་པའི་དགྲ་བཅོམ་རྣམས་ལ་བསམ་པ་དེ་ཙམ་ཡང་མ་སྐྱེས་པ་འཐད་པའི་ཕྱིར་རོ། །གསུམ་པ་ནི། གནས་དབེན་པར་ཆུ་བཞི་སྔོན་དུ་འགྲོ་བའི་ཉེར་སྤྱོད་དང་། གཏོར་མ་བཤམས། རང་གི་མདུན་དུ་རྡོ་རྗེ་དྲིལ་བུ་ནང་མཆོད་རྣམས་ཀྱང་བཤམས་ལ། སློབ་མས་མཎྜལ་ཕུལ་ལ། ཐལ་མོ་སྦྱར་ཏེ། ཙོག་པུར་སྡོད་དུ་གཞུག་ནས། ཡོན་ཏན་ཐམས་ཅད་འབྱུང་བའི་གནས། །ཐབས་དང་ཤེས་རབ་བདག་ཉིད་ཅན། །སྟོན་པའི་བསྟན་ལ་ལེགས་གནས་པ། །ཀྱེ་རྡོར་ཆོ་ག་བཤད་དུ་གསོལ། །ཞེས་ལན་གསུམ་གསོལ་བ་འདེབས་སུ་བཅུག་གོ །དེ་ནས་སློབ་དཔོན་རང་དཔལ་ཀྱེ་རྡོ་རྗེའི་རྣལ་འབྱོར་གསལ་བར་དམིགས་ཏེ། སློབ་མ་རྣམས་ཞལ་ནས་བཅུག་ལ་སྙིང་གར་བཞག་སྟེ། རང་གི་སྙིང་གའི་ཧཱུྃ་གི་འོད་ཟེར་གྱིས་སློབ་མའི་ལུས་ལ་ཞུགས་ཏེ། དེའི་ཐོག་མ་མེད་པ་ནས་བསགས་པའི་ལས་ཀྱི་སྒྲིབ་པ་ཐམས་ཅད་དང་། བགེགས་ཐམས་ཅད་བསྲེགས་པར་བསམས་ཞིང་རྩ་བའི་སྔགས་བརྒྱ་རྩ་བརྒྱད་བཟླས་སོ། །དེ་ནས་གསང་གནས་ནས་ཕྱུང་སྟེ་གཞག་ལ། དེ་ནས་གཏོར་མའི་ཆོ་གས་ལྷ་དང་འབྱུང་པོ་ཐམས་ཅད་ལ་གཏོར་མ་བྱིན་ཏེ། ཁོ་བོས་ནི་ལྷ་མཉེས་པར་བྱ་བའི་ཕྱིར་སྔོན་དུ་བསྙེན་པ་བྱའོ། །ཁྱོད་ཀྱིས་དཀྱིལ་འཁོར་གྱི་འཁོར་ལོ་མཆོད་པའི་ཡོ་བྱད་དང་། དཔའ་བོ་དང་རྣལ་འབྱོར་མ་རྣམས་མཆོད་པའི་ཡོ་བྱད་འདི་དང་འདི་དག་དགོས་པས་འཚོག་ཆས་གྱིས་ཤིག ལུས་དང་སྲོག་གི་བར་ཆད་དུ་འགྱུར་བ་ཡ་ང་བའི་གནས་འདི་དག་ཏུ་མ་འགྲོ་ཞིག དགེ་བའི་རྩ་བ་ལ་བརྩོན་པར་གྱིས་ཤིག་ཅེས་བསྒོ་ལ་བཏང་ངོ་། །དབང་ཆུའི་དཔེ་ལ་ལར། སློབ་མ་རྣམས་ཞལ་ནས་བཅུག་ལ། སྙིང་གར་བཞག་སྟེ་ཞེས་པ་དང་། དེ་ནས་གསང་གནས་ནས་ཕྱུང་སྟེ་བཞག་ལ། ཞེས་པའི་ཚིག་གཉིས་མེད་པ་འབྱུང་བ་ནི་མ་དག་པ་སྟེ། ནག་པོ་དཀྱིལ་ཆོག་གི་འཁྲུལ་གཞི་བྱས་ཏེ། ཚིག་དེ་གཉིས་བཅད་པར་སྣང་ཡང་། ལུགས་འདིའི་ཐུན་མོང་མ་ཡིན་པ་དཔེ་དག་པ་རྣམས་ལ་འདི་ལྟར་འབྱུང་བའི་ཕྱིར་རོ། །ཡང་དཔེ་ལ་ལར། སྔར་གྱི་སློབ་མ་བརྟགས་པ་ལ་སློབ་མ་རྗེས་འཛིན་དུ་བྱས་ནས་མཆོད་གཏོར་བཤམས་པ་ནས་འདིའི་བར་བསྙེན་པའི་ས་ཁོངས་སུ་བསྡུ་བ་ནི་ཌོཾ་བིའི་དཀྱིལ་ཆོག་གཉིས་དང་། བདེ་མཆོག་ནག་པོའི་དཀྱིལ་ཆོག་དང་། མཚོ་སྐྱེས་ལུགས་ཀྱི་དབང་ཆུ་རྣམས་སུ། སློབ་མ་རྗེས་འཛིན་མི་འབྱུང་བར་གསོལ་བ་བཏབ་པའི་རྗེས་སུ་བསྙེན་པའི་ཡོ་བྱད་ཕུལ་བར་བཤད་པས་འཁྲུལ་གཞི་བྱས་པ་ཡིན་པས་དཔེ་མ་དག་པ་སྟེ། མངོན་རྟོགས་ལྗོན་ཤིང་ལས། སཾ་བུ་ཊའི་རྒྱུད་ཕྱི་མའི་གསོལ་བ་བཏབ་པའི་ཚིག་དེས། སློབ་མ་རྗེས་འཛིན་སྟོན་པར་བཤད་པའི་ཕྱིར་དང་། སྤྱི་རྒྱུད་དང་། ནག་པོ་དཀྱིལ་ཆོག་དང་། ཌོམྦི་ལུགས་ཀྱི་དབང་ཆུ་ལས། བསྲུང་པའི་ཆོ་ག་ལ་སློབ་མ་རྗེས་འཛིན་དུ་བཤད་པའི་ཕྱིར་རོ། །བཞི་པ་ནི། སློབ་མ་ལ་དབང་བསྐུར་གྱི་ཆོ་ག་མ་རྫོགས་ཀྱི་བར་དུ་བགེགས་མི་འབྱུང་བར་བྱ་བའི་ཆེད་ཡིན་ཏེ། སྤྱི་རྒྱུད་ལས། དེ་ནས་སློབ་མ་ཡོངས་བཟུང་ནས། །ལས་ལ་བགེགས་ནི་མེད་པར་འགྱུར། །ཞེས་དང་། ནག་པོ་དཀྱིལ་ཆོག་ལས། དེ་ནས་དེའི་སེམས་ལས་བྱུང་བའི་བགེགས། རང་གི་སྙིང་གའི་ས་བོན་གྱི་གཟི་བརྗིད་ཀྱིས་བསྐྲད་ལ་ཞེས་གསུངས་པས་སོ། །གཉིས་པ་སྔོན་དུ་བསྙེན་པའི་ཆོ་ག་ནི། དེ་ནས་སློབ་དཔོན་ལ་བསྙེན་པའི་ཡོ་བྱད་ཕུལ་བ་དང་། སློབ་དཔོན་གྱིས་གནས་དབེན་པར་འདུག་སྟེ། ཐུན་བཞིའི་རིམ་པས། གཏོར་མ་དང་མཆོད་པ་ལ་སོགས་པ་སྔོན་དུ་འགྲོ་བས། སྒྲུབ་ཐབས་ཀྱི་རིམ་པ་ལྟར་ཏིང་ངེ་འཛིན་གྱི་དཀྱིལ་འཁོར་སྒོམ་པ་དང་། བཟླས་པས་བསྙེན་པ་བྱའོ། །སྔགས་རིམ་མཁན་པོས་འདིའི་མཆོད་གཏོར། ཕྱོགས་སྐྱོང་ལ་གཏོང་བའི་སྔོན་འགྲོ་གཏོར་མར་འདོད་པ་ནི་འཁྲུལ་ཏེ། རྒྱུད་རྒྱས་པའི་ལུང་རྡོ་རྗེའི་སྙིང་འགྲེལ་དུ་དྲངས་པ་ལས། ཐོ་རངས་དུས་སུ་སྔགས་པ་ཡིས། །བཤང་གཅི་དག་ནི་དོར་བ་དང་། །གཙང་སྦྲ་ལ་སོགས་བྱས་རྗེས་སུ། །འཇམ་པའི་སྟན་ལ་བདེར་འདུག་ནས། །རྫས་བཅུའི་རང་བཞིན་རིལ་བུ་ནི། །བྱས་ནས་རང་གི་ཁ་རུ་གཞུག །བདུད་རྩི་ལྔ་བྱས་བ་བྱུང་གིས། །མདུན་དུ་མཎྜལ་བྱས་ན་ནི། །དྲི་དང་མེ་ཏོག་ལ་སོགས་པ། །གཽ་རཱི་སོགས་ལ་རིམ་བཞིན་དབུལ། །ཞེས་དང་། རིན་ཆེན་འབར་བར་ལས། དངོས་དང་དངོས་བྲལ་ཀུན་ངོ་བོ། །ཀྱེ་ཡི་རྡོ་རྗེ་འཁོར་བཅས་ལ། །མཆོད་གཏོར་ལྡན་པ་ཐུན་བཞིར་བསྒོམ། །ཐུན་མཚམས་བཟླས་པ་འབུམ་ཁྲི་འམ། །ཡང་ན་མཚན་བཟང་མཐོང་བས་ཏེ། །ཞེས་གསུངས་པས་སོ། །དེ་ལའང་བསྙེན་པའི་ལུགས་གཉིས་ཡོད་དེ། བུམ་པ་ལ་མ་བརྟེན་པ་དང་། བརྟེན་པའོ། །དང་པོ་ནི། སྒྲུབ་ཐབས་ནས་འབྱུང་བ་ལྟར་བསྒོམས་ཏེ། བཟླས་པའི་དུས་སུ་རང་གི་བསྒོམས་པའི་ལྷ་ཐམས་ཅད་དང་། གཞན་ཡང་ནམ་མཁར་དཀྱིལ་འཁོར་གྱི་འཁོར་ལོ་དཔག་ཏུ་མེད་པར་བསམས་ལ། རྩ་སྔགས་ཀྱི་འོད་ཕོག་པས། དབང་དུ་བྱེད་པའི་བཟླས་པ་དམར་པོར་བྱེད་པའམ། ཡང་ན་བདག་དང་སློབ་མའི་བསོད་ནམས་རྒྱས་པའི་བཟླས་པ་སེར་པོར་བྱེད་པ་གང་རུང་བྱའོ། །གཉིས་པ་ནི། རྣམ་རྒྱལ་བུམ་པ་གཅིག་པུ་བུམ་པ་སྟ་གོན་གྱི་ཆོ་ག་ཇི་ལྟ་བ་བཞིན་དུ་ལེགས་པར་བཅས། བུམ་པའི་སྟེང་དུ་དུང་ཆོས་ཀྱི་ནང་དུ་དྲི་ཞིམ་པོ་ལ་སོགས་པ་ལེགས་པར་བཅས་ཏེ། བདག་གི་ལྷའི་རྣལ་འབྱོར་དབང་བསྐུར་གྱི་བར་དུ་རྫོགས་པ་དང་། བུམ་པ་ལ་བགེགས་བསལ་ལ་སྭ་བྷཱ་ཝའི་སྔགས་ཀྱིས་སྟོང་པར་སྦྱངས་ཏེ། པྃ་ལས་པདྨ། ཨ་ལས་ཟླ་བའི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ལྟོ་བ་ཡངས་ཤིང་མགྲིན་པ་ཕྲ་བ་བསྐྱེད་ལ། དེ་ནས་བུམ་པའི་ནང་དུ་སྲུང་འཁོར་དུར་ཁྲོད་བརྒྱད་གཞལ་ཡས་ཁང་སྐད་ཅིག་མས་བསྐྱེད་ལ། དེར་གཙོ་བོ་མངོན་བྱང་ལྔས་འཁོར་རྣམས་འབྱིན་པའི་ཚུལ་དུ་བསྐྱེད། ཡན་ལག་བཞི་རྫོགས་སུ་བྱ། དེ་ལ་མཆོད་པ་དང་བསྟོད་པ་བྱའོ། །དེ་ནས་ཡུམ་གྱི་ཞལ་ནས་ཡབ་ཀྱི་ཞལ་དུ་ཚུར་འཁོར་བའི་སྔགས་ཕྲེང་དམར་པོའམ། སེར་པོ་ལས་འོད་འཕྲོས་བུམ་ནང་གི་ལྷ་ལ་ཕོག་པས་ཐམས་ཅད་དམར་པོར་སོང་བས་ལྷ་ཐམས་ཅད་དབང་དུ་གྱུར་པར་དམིགས་པའམ། ཡང་ན་སེར་པོར་འཕྲོས་ནས། ལྷ་ཐམས་ཅད་སེར་ལམ་སོང་བས་བདེ་བ་ཆེན་པོའི་ཡེ་ཤེས་རྒྱས་པར་དམིགས་ལ། བུམ་པའི་ནང་གི་ལྷ་ཐམས་ཅད་ཀྱི་བ་སྤུའི་བུ་ག་ནས་བདུད་རྩིའི་རྒྱུན་འཛག་པར་དམིགས་ལ་བཟླས་སོ། །བསྙེན་པ་རབ་འབྲིང་དགུ་གང་རུང་རྫོགས་ནས། བུམ་པའི་ལྷ་ལ་མཆོད་པ་དང་། བསྟོད་པ་ལ་སོགས་པ་བྱས་ནས་དུང་ཆོས་ཀྱི་ཆུ་བླུགས་པས་བུམ་པའི་ལྷ་རྣམས་འོད་དུ་ཞུ་བར་བྱའོ། །འདིར་ལྷ་བཞུ་བ་ལན་གཅིག་བྱ་བ་ནི་འདིའི་ཁྱད་ཆོས་སོ། །བསྙེན་པའི་གྲངས་ལ་རྩ་རྒྱུད་ལས། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གྲངས་ཀྱི་བསྙེན་པ་འབའ་ཞིག་གསུངས་ལ། བཟང་པོ་ཡོངས་བཟུང་ལས། འཁོར་ལོ་ཅན་གི་སྔགས་འབུམ་བཟླས། །རང་གི་ལྷག་པའི་ལྷ་ཡི་འབུམ། །གཞན་རྣམས་ཀྱི་ནི་ཁྲི་ཉིད་དེ། །དངོས་གྲུབ་མཚན་མ་མཆོག་ཐོབ་ནས། །ཞེས་གྲངས་དང་མཚན་མའི་བསྙེན་པ་གཉིས་གསུངས་ཤིང་། རིན་ཆེན་འབར་བ་ལས་ཀྱང་། ལྷག་པའི་ལྷའི་ཞེས་པ་མ་གཏོགས་དེ་བཞིན་དུ་གསུངས་སོ། །ལྷག་པའི་ལྷའི་བཟླས་པ་ནི། མེ་ཏོག་གང་ཕོག་གི་ལྷའི་ཡིན་པར་གྲུབ་བོ། །ནས་གླིང་མ་ལས། གཙོ་བོའི་འཛབ་ནི་འབུམ་དུ་བཟླས་པར་བྱའོ། །ལྷ་མོ་རྣམས་ཀྱི་འཛབ་ནི་སྟོང་དུ་བཟླས་པར་བྱའོ། །ཁ་ཅིག་གི་བཞེད་པས་ལྷ་མོ་རྣམས་ཀྱི་འཛབ་མི་དགོས་ཏེ། དཔའ་བོའི་ཡན་ལག་ཏུ་འདུས་པས་སོ། །ཞེས་རང་ལུགས་གཞན་ལུགས་གཉིས་གསུངས་ཞིང་། ཕྱི་མ་ནི་ནག་པོ་དཀྱིལ་ཆོག་ལས། འཁོར་ལོ་ཅན་གྱི་རྩ་བའི་སྔགས་དང་། བདག་མེད་མའི་སྔགས་འབུམ་ཕྲག་རེ་རེ་བཟླས་པས་བསྙེན་པ་བྱའོ། །ཞེས་གསུངས་པ་དང་མཐུན་པར་སྣང་ངོ་། །འདི་དག་ཐམས་ཅད་ལའང་སྡོམ་འབྱུང་ལས། རྫོགས་ལྡན་ལ་ནི་བཟླས་བྱ་གཅིག །གཉིས་འགྱུར་སུམ་ལྡན་ལ་བཟླས་བྱ། །གསུམ་འགྱུར་གཉིས་ལྡན་ལ་རབ་བརྗོད། །རྩོད་ལྡན་བཟླས་པ་བཞི་འགྱུར་རོ། །ཞེས་རྩོད་དུས་སུ་བཞི་འགྱུར་བཟླ་དགོས་པར་གསུངས་པ་དེ་ཉིད་སྦྱར་དགོས་པར་རྗེ་བཙུན་གོང་མ་བཞེད་དོ། །སྐབས་འདིར་ནི། བསྙེན་པ་རབ་འབྲིང་གསུམ་སྟེ། གྲངས་ཀྱི་བསྙེན་པ་དང་། དུས་ཀྱི་བསྙེན་པ་དང་། མཚན་མའི་བསྙེན་པའོ། །དེ་རེ་རེ་ལའང་གསུམ་གསུམ་སྟེ། རྫོགས་ལྡན་ལ་རབ་གཙོ་བོ་ལ་འབུམ། འཁོར་ལ་ཁྲི་ཕྲག་རེ། འབྲིང་གཙོ་བོ་ལ་ཁྲི། འཁོར་ལ་སྟོང་ཕྲག་རེ། ཐ་མ་གཙོ་བོ་ལ་སྟོང་། འཁོར་ལ་བརྒྱ་ཕྲག་རེ་བཟླས། དེའང་རྩོད་དུས་སུ་བཞི་འགྱུར་དུ་བཟླ་དགོས་སོ། །དུས་ཀྱི་བསྙེན་པ་རབ་ཟླ་བ་དྲུག འབྲིང་ཟླ་བ་གསུམ། ཐ་མ་ཞག་བདུན་དུ་ཐུན་བཞིའི་ངེས་པས་བྱ་བར་གསུངས་ཤིང་། ལམ་འབྲས་ཀྱི་དབང་གི་ཆུ་བོ་མ་ནུབ་པར་བསྐུར་བའི་མན་ངག་གི་གནད་ལས། རབ་ལོ་དྲུག འབྲིང་ཟླ་བ་དྲུག ཐ་མ་ཞག་བདུན་དུའང་གསུངས་སོ། །མཚན་མའི་བསྙེན་པ་རབ་ལྷས་དངོས་སུ་གནང་བ་བྱིན་པའམ། རྡོ་རྗེ་དྲིལ་བུ་ནམ་མཁའ་ལ་འཇོག་པ། འབྲིང་རྨི་ཉམས་སུ་གནང་བ་བྱིན་པ། ཐ་མ་རང་གི་ཉམས་སམ། བླ་མས་གནང་བ་བྱིན་པའོ། །ཞེས་གསུངས་ཤིང་། ལམ་འབྲས་ཀྱི་ཡིག་ཆར་རྡོ་རྗེ་དྲིལ་བུ་ནམ་མཁའ་ལ་འཇོག་པ་འབྲིང་དང་། རྨི་ཉམས་ཐ་མར་བཤད་དོ། །མཚན་མའི་བསྙེན་པ་རབ་འབྲིང་གསུམ་དང་། དུས་དང་གྲངས་ཀྱི་བསྙེན་པ་རབ་གཉིས་སྟེ། ལྔ་པོས་ནི་གཞི་བསྙེན་གྱི་གོ་ཆོད་ལ། གཞན་བཞི་པོས་ནི་བསྙེན་པ་ཁ་གསོ་ལས་གཞི་དུས་ཀྱི་བསྙེན་པའི་གོ་ནི་མི་ཆོད་དོ། །ཞེས་གསུངས་སོ། །དེ་ལྟར་བསྙེན་པའི་དགོས་པ་ནི། བཟང་པོ་ཡོངས་གཟུང་ལས། བསྙེན་པས་བགེགས་ཀྱི་ཚོགས་བཅོམ་སྟེ། །ཞེས་དང་། རིན་ཆེན་འབར་བ་ལས། ཚོགས་འཕེལ་བགེགས་ཞི་དོན་གྲུབ་པའོ། །ཞེས་གསུངས་པ་ལྟར་ཤེས་པར་བྱའོ། །གསུམ་པ་སའི་ཆོ་ག་ནི། སྤྱིར་རྣམ་པར་བཞག་པ་དྲུག་སྟེ། སའི་ཕྱོགས་ལ་སོགས་པ་བརྟགས་པ་དང་། བློས་ཡོངས་སུ་གཟུང་བ་དང་། ས་བསླང་བ་དང་། ས་སྦྱང་བ་དང་། སྟངས་སྟབས་ཀྱི་བཀོད་པ་ལ་སོགས་པས་ས་གཟུང་བ་དང་། བགེགས་མི་འཇུག་པར་བྱ་བའི་ཕྱིར་ས་བསྲུང་བའོ། །དེ་ལ་གཙུག་ལག་ཁང་ལ་སོགས་པ་སྔར་སའི་ཆོ་ག་ལེགས་པར་བྱས་པའམ། སློབ་དཔོན་གཞན་གྱི་དཀྱིལ་འཁོར་གྱི་ཁང་པ་རྙིང་པའམ། རང་གི་དཀྱིལ་འཁོར་གྱི་ཁང་པ་རྙིང་པ་རྣམས་སུ་སའི་ཆོ་ག་གང་ཡང་བྱ་མི་དགོས་གསུངས། ནུས་ན་སྟངས་སྟབས་ཀྱི་བཀོད་པ་དང་། ས་བསྲུང་བ་དང་གཉིས་ཙམ་བྱས་ཀྱང་ལེགས་སོ། །གཞན་ཡང་། དྲང་སྲོང་གནས་དང་བ་གླང་སླས། །ཕུག་དང་རི་ཡི་རྩེ་མོ་དང་། །ས་གཞི་གང་ན་འཐས་པ་དང་། །ཁང་ཐོག་དང་ནི་རྡོ་ལེབ་དང་། །མཆོད་རྟེན་དྲུང་དང་འབབ་ཆུའི་གླིང་། །མཚོ་རྣམས་ཀྱི་ནི་འགྲམ་དག་ཏུ། །ས་གཞི་སྦྱང་དང་བརྟག་པ་དང་། །ནན་ཏན་དུ་ནི་བྱ་མི་དགོས། །དེར་ནི་ཟུག་རྔུ་དབྱུང་མི་དགོས། །འཐས་པར་བཅག་ཀྱང་དེར་མི་དགོས། །མཐོ་དམན་ལ་སོགས་སྐྱོན་རྣམས་ནི། །དེར་ནི་དོགས་པ་བསྐྱེད་མི་དགོས། །ཞེས་གསང་བ་སྤྱི་རྒྱུད་ལས་འབྱུང་བས། བརྟག་པ་དང་སྦྱང་བ་གཉིས་མི་དགོས་ཀྱི་ཆོ་ག་གཞན་རྣམས་བྱའོ། །དེ་ལྟ་བུ་མ་ཡིན་པའི་ས་ཕྱོགས་རྣམས་སུ་ཆོ་ག་ཐམས་ཅད་ཡོངས་སུ་རྫོགས་པར་བྱའོ། །དེ་ལས་བརྟག་པའི་ཆོ་ག་ལ་དྲུག་སྟེ། ཕྱོགས་ཀྱི་སྒོ་ནས་བརྟག་པ། ས་སས་བརྟག་པ། ས་མཚན་མས་བརྟག་པ། ཟུག་རྔུ་ཡོད་མེད་ཀྱིས་བརྟག་པ། ཉེ་འཁོར་གྱི་འབྱོར་པས་བརྟག་པ། ཁ་དོག་གི་སྒོ་ནས་བརྟག་པའོ། །དང་པོ་ནི། གྲོང་ཁྱེར་གྱི་བྱང་ཤར་གྱི་ཕྱོགས་ཤར་དང་བྱང་གཞོལ་ཞིང་དབུས་མཐོ་བ་བསྔགས་ཏེ། སྤྱི་རྒྱུད་ལས། ཤར་དང་བྱང་དུ་གཞོལ་བ་ཡི། །ས་གཞི་ལས་རྣམས་ཀུན་ལ་ཤིས། །ཞེས་དང་། བཟང་པོ་ཡོངས་གཟུང་ལས། ཤར་དང་བྱང་དུ་གཞོལ་བའི་ས། །ཟུར་ནི་བཞི་སྟེ་དཀར་འདྲ་བ། །ཞེས་དང་། རིན་ཆེན་འབར་བ་ལས། ཤར་དང་བྱང་དམའ་བ་དཀར་སོགས་གྲུ་བཞི་སོགས། ཞེས་དང་། ནས་གླིང་མར། ཤར་དང་བྱང་དུ་གཞོལ་ན་རྣལ་འབྱོར་པ་རྣམས་ཀྱི་དངོས་གྲུབ་ཏུ་འགྱུར་རོ། །དབུས་མཐོ་ན་ཕྱག་རྒྱ་ཆེན་པོའི་རིགས་འཛིན་གྱི་ས་ཐོབ་པར་འགྱུར་རོ། །བྱང་མཐོ་ན་མཁའ་འགྲོ་མ་རྣམས་ཀྱི་རྗེས་སུ་འབྲང་བར་འགྱུར་རོ། །ཤར་མཐོ་ན་རིགས་བཞི་དང་ལྔ་ལ་སོགས་པ་རྟོགས་པ་ཟད་པར་བྱེད་པར་འགྱུར་རོ། །ས་གཞི་དབུས་དམའ་ན་སྔགས་པ་འཇིགས་པ་དང་བཅས་པར་འགྱུར་རོ། །ཞེས་སོ། །གཉིས་པ་ནི། ས་དེར་པུས་མོ་ནུབ་ཙམ་བརྐོས་ལ་ས་དེས་བཀང་ལ་ལྷག་པར་འགྱུར་ན་བཟང་ཞིང་། གཞན་དུ་སྤངས་བར་བྱ་བ་ཡིན་ཏེ། སྤྱི་རྒྱུད་ལས། དང་པོ་པུས་ནུབ་ཙམ་བརྐོས་ལ། །ས་དེ་ཉིད་ཀྱིས་དགང་བར་བྱ། །གལ་ཏེ་ལྷག་པར་གྱུར་ན་ནི། དངོས་གྲུབ་དག་ནི་ཡོད་པར་འགྱུར། །དེ་ལས་ལྡོག་པར་གྱུར་ན་ནི། །སྒྲུབ་པ་པོས་ནི་ལས་མི་བརྩམས། །ཞེས་དང་། བཟང་པོ་ཡོངས་གཟུང་ལས། བརྐོས་ནས་དེས་བཀང་ལྷག་གྱུར་པའོ། །ཞེས་དང་། རིན་ཆེན་འབར་བ་ལས། བརྐོས་ནས་སླར་བཀང་ལྷག་གྱུར་པ། །ཞེས་སོ། །གསུམ་པ་ནི། ཁྲུ་ཕྱེད་བརྐོས་ཏེ་འཐས་པར་བཅགས་ཏེ། ཆུས་བཀང་ནས་གོམ་པ་བརྒྱར་སོང་སྟེ་མྱུར་བར་འོངས་པའི་ཚེ་སྔར་གི་དེ་བཞིན་དུ་འདུག་ན་བཟང་སྟེ། སྤྱི་རྒྱུད་ལས། ཁྲུ་ཕྱེད་བརྐོས་ནས་ཆུ་ཡིས་བཀང་། །གོམ་པ་བརྒྱ་རུ་འགྲོ་བར་བྱ། །མྱུར་དུ་འོངས་ནས་བལྟ་བྱ་སྟེ། །དེ་བཞིན་འདུག་ན་ལྷག་པར་བསྔགས། །ཞེས་སོ། །བཞི་པ་ནི། རུས་པ་དང་ཐལ་བ་ལ་སོགས་པའི་ཟུག་རྔུ་མེད་པ་ནི་བསྔགས་ཏེ། སྤྱི་རྒྱུད་ལས། མཐོ་དམན་ཅན་དང་ཚེར་མ་ཅན། །གྱོ་མོ་དུམ་བུ་ཅན་དག་དང་། །ངམ་གྲོགས་རུས་པ་སྡོང་དུམ་ཁུང་། །གྲོགས་མཁར་ཐལ་བ་ཚ་སྒོ་ཅན། །གསེགས་མ་རྡུལ་དང་རྡོ་དང་སྐྲ། །སྲིན་འབུ་གྲོགས་སྦུར་ལ་སོགས་མང་། །དེ་ལྟ་བུ་ཡི་ས་གཞི་ནི། །མཁས་པས་ལས་རྣམས་ཀུན་ལ་སྤངས། །ཞེས་དང་། བཟང་པོ་ཡོངས་གཟུང་ལས། རུས་པ་ཐལ་བ་ཟུག་རྔུ་རྡོ། །བཤང་བས་མ་དག་གཞན་དུ་བགྲོད། །ཨུ་དུམྦཱ་ར་ནྱ་གྲོ་ཨ་ཤྭཏྠ། །པ་ལ་ཤ་དང་བ་ཀུ་ཨརྫུ་ན། །ལྡན་པས་རུས་སྦལ་རྒྱབ་དང་འདྲ་བ་ཡི། །ས་ནི་དྲུག་པོ་རྣམ་པར་སྤང་བར་བྱ། །ཞེས་སོ། །དྲུག་པོ་ནི་སྔར་གྱི་བཞི། ཤིང་དང་ལྔ། རུས་པ་དང་དྲུག་ལ་འཆད་པ་ཡོད་ཀྱང་རིན་ཆེན་འབར་བའི་དགོངས་པ། ཤིང་དྲུག་པོ་གང་རུང་དང་ལྡན་པའི་རུས་སྦལ་གྱི་རྒྱབ་འདྲ་བ་དྲུག་ལ་བཞེད་པར་སྣང་སྟེ། ཨུ་དུམྦཱ་ར་ནྱ་གྲོ་དང་། །ཨ་ཤྭཏྠ་དང་པ་ལ་ཤ །བ་ཀུ་ལ་དང་ཨརྫུ་ནར། །བཅས་པ་རུས་སྦལ་རྒྱབ་འདྲ་སྤང་། །ཞེས་གསུངས་པས་སོ། །ལྔ་པ་ནི། ཉེ་འཁོར་དུ་ཆུ་དང་མེ་ཏོག་དང་འབྲས་བུ་ལོ་མར་ལྡན་པའི་ལྗོན་ཤིང་མོད་པ་དང་། ཆུ་བོ་གཡས་བསྐོར་དུ་འབབ་པ་བསྔགས་ཏེ། སྤྱི་རྒྱུད་ལས། དཀྱིལ་འཁོར་ས་ནི་གང་གང་གི །ཉེ་འཁོར་དག་ན་ཆུ་མོད་པ། །དེ་ནི་ཤིས་ཤིང་དངོས་གྲུབ་ཐོབ། །ཆུ་དཀོན་པ་ནི་མཁས་པས་སྨད། །ཁོ་ར་ཁོར་ཡུག་སྣ་ཚོགས་ཤིང་། །མེ་ཏོག་འབྲས་བུ་ལོ་མར་ལྡན། །འོ་མ་ཅན་གྱི་ཤིང་ཡོད་པར། །དཀྱིལ་འཁོར་དག་ལ་རབ་ཏུ་ཤིས། །ཞེས་དང་། བཟང་པོ་ཡོངས་གཟུང་ལས། ཆུ་ནི་གཡས་སུ་འཁོར་བ་དང་། །ཞེས་དང་། རིན་ཆེན་འབར་བ་ལས་ཀྱང་དེ་ལྟར་གསུངས་སོ། །དྲུག་པ་ནི། སྤྱི་རྒྱུད་ལས། ཞི་བའི་ལས་ལ་ས་གཞི་ནི། །དཀར་པོ་དག་ལ་བརྟག་པར་བྱ། །རྒྱས་པའི་ཆེད་དུ་དམར་ལ་སེར། །དྲག་ཤུལ་སྤྱོད་ལ་ནག་པོ་ཤིས། །ཞེས་གསུངས་ལ། གཞུང་གཞན་རྣམས་ལས་ནི། ས་དཀར་ཞིང་སྣུམ་པ་ཞེས་པ་ཙམ་ལས་གཞན་གསལ་ཁ་མི་སྣང་ངོ་། །གཉིས་པ་བློས་ཡོངས་སུ་གཟུང་བ་ནི། སྤྱི་རྒྱུད་ལས། མདོར་ན་ས་གཞི་མཉམ་པ་དང་། །མདངས་སྣུམ་ཤར་དུ་གཞོལ་བར་བཞེད། །ཆུ་མང་ལྡན་པའི་གནས་དང་ནི། །ལྗོན་ཤིང་བཟང་པོས་བརྒྱན་པ་དང་། །བདག་གི་མིག་ཡིད་མགུ་བ་དང་། །འཚེ་མེད་ཟུག་རྔུ་སྤངས་པ་ནི། །དཀྱིལ་འཁོར་གནས་སུ་ཤིས་པ་སྟེ། །མི་ཡི་དངོས་གྲུབ་ཀུན་ཐོབ་བྱེད། །ཅེས་གསུངས་པ་ལྟར་གྱི་མཚན་ཉིད་དང་ལྡན་པའི་ས་ཕྱོགས་མཐོང་ནས། ས་ཕྱོགས་འདིར་དཀྱིལ་འཁོར་བཞེངས་པར་བྱའོ་སྙམ་དུ་བློས་ཡོངས་སུ་གཟུང་བའོ། །གསུམ་པ་ས་བསླང་བ་ལ་གཉིས་ཏེ། སྣང་བ་ལས་སློང་བ་དང་། མི་སྣང་བ་ལས་སློང་བའོ། །དང་པོ་ནི། སའི་ཕྱོགས་དེར་རྒྱལ་པོའམ། བློན་པོ་ལ་སོགས་པས་དབང་དུ་བྱས་པ་ཡིན་ན་དེ་ལས་སློང་སྟེ། སའི་བདག་པོ་ཁྱོད་གསོན་ཅིག བདག་སློབ་དཔོན་ཆེ་གེ་མོ་ཞེས་བྱ་བ་ལ། སློབ་མ་ཆེ་གེ་མོ་ཞེས་བྱ་བས་གསོལ་བ་བཏབ་ནས། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་ཧེ་ཞེས་བྱ་བའི་དཀྱིལ་འཁོར་ཆེན་པོ་བཞེངས་པས། ཁྱེད་ཀྱིས་གནང་བའི་སྐབས་བྱིན་ཅིག་ཅེས་བྱས་ལ་སློང་ངོ་། །ཡང་ཚིག་གཞན་གྱིས་ཀྱང་རུང་སྟེ། གནས་སྐབས་རང་དབང་བར་ཡོད་པར་བྱའོ། །གཉིས་པ་མི་སྣང་བའི་སའི་བདག་པོ་ལ་བསླང་བ་ནི། ས་ཕྱོགས་དེར་མཎྜལ་བྱས་ཏེ། དེའི་དབུས་སུ་དྲིའི་ཐིག་ལེ་དང་། མེ་ཏོག་གི་ཚོམ་བུ་བྱ། དེའི་མཐར་ཆུ་བཞི་སྔོན་དུ་འགྲོ་བའི་ཉེར་སྤྱོད་འོག་ནས་འཆད་པ་ལྟར་བཤམས། ཤར་ཕྱོགས་སུ་བཟེད་ཞལ་གྱི་སྣོད་དང་། གཏོར་མ་གཉིས་ཀྱང་བཤམ་མོ། །དེ་ནས་རང་དཔའ་བོ་གཅིག་པའི་རྣལ་འབྱོར་རྫོགས་པར་བསྒོམ་ཞེས་གསུངས་པའི་དོན། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ། ཡེ་ཤེས་ཀྱི་ཚོགས་བསགས་པ་རྣམས་སྔོན་དུ་སོང་ནས། སྟོང་པའི་ངང་ལས་པཾ་ལས་པདྨ་དང་། རཾ་ལས་ཉི་མ་དང་། བདུད་བཞི་བརྩེགས་པའི་གདན་གྱི་སྟེང་དུ། ཧཱུྃ་ལས་ཐོད་པ་དཀར་པོ་དུམ་བུ་གསུམ་པ་དཔྲལ་བར་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་གི་ཡུ་བ་ལ་ཨཾ་གིས་མཚན་པ། དེ་ལས་འོད་ཟེར་འཕྲོས། ཀྱེ་རྡོ་རྗེའི་གོ་འཕང་ལ་བཀོད། ཚུར་འདུས་ཡོངས་སུ་གྱུར་པ་ལས། རང་ཉིད་ཀྱེ་རྡོ་རྗེ་སྐུ་མདོག་སྔོན་པོ་ཞལ་བརྒྱད་ཕྱག་བཅུ་དྲུག་པ་ཞེས་པ་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་བར་ཡབ་ཡུམ་གཉིས་གསལ་གདབ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ། ཡེ་ཤེས་པ་སྤྱན་དྲངས་ཏེ། ལྷ་མོ་བཞིས་དགུག་གཞུག་བྱ། ཡང་དབང་ལྷ་སྤྱན་དྲངས། དབང་བསྐུར་ནས་ཡབ་ཡུམ་གཉིས་ཀ་ལ་མི་བསྐྱོད་པས་རྒྱས་གདབ་སྟེ། རྩ་སྔགས་ཉི་ཤུ་རྩ་གཅིག་ཙམ་བཟླ་བ་ཕྱག་ལེན་ལ་མཛད་པ་ནི་ཤིན་ཏུ་ལེགས་ཏེ། རྒྱུད་གསུམ་ནས་གསུངས་པའི་དཔའ་བོ་གཅིག་པའི་རྣལ་འབྱོར་རྣམས་བསྐྱེད་ཆོག་འདི་ལྟ་བུ་དང་། ས་བོན་ལས་བསྐྱེད་པ་འདམ་ཁ་ཅན་དུ་གསུངས་པའི་ཕྱིར་རོ། །དེ་ནས་མདུན་གྱི་མཆོད་པ་རྣམས་བསང་སྦྱང་བྱིན་གྱིས་བརླབས་ཏེ། མཎྜལ་ཨ་མྲྀ་ཏས་བསངས། སྭ་བྷ་ཝས་སྦྱངས། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བའི་སྟེང་དུ་བཾ་ལས་སའི་ལྷ་མོ་མདོག་སེར་མོ་ཞི་བའི་ཆ་ལུགས་དང་རྒྱན་གྱིས་བཀླུབས་པ། ཕྱག་གཉིས་ཀྱིས་རིན་པོ་ཆེའི་བུམ་པ་སྙིང་གར་བཟུང་བ་གཅིག་བསྐྱེད་དེ། སྐྱེ་མཆེད་དྲུག་དང་སྐུ་གསུང་ཐུགས་བྱིན་གྱིས་བརླབས་པར་བྱ། དེ་ནས་རང་གི་སྙིང་གའི་ཧཱུྃ་གི་འོད་ཀྱིས་ས་འོག་ནས་ཡེ་ཤེས་ཀྱི་ལྷ་མོ་དེ་འདྲ་བ་ཞིག་སྤྱན་དྲངས་ཏེ། གཽ་རཱི་ལ་སོགས་པའི་ལྷ་མོ་བཞིས་དགུག་གཞུག་བཅིང་དབང་དུ་བྱ། དེ་ནས་དབང་བསྐུར་གྱི་ལྷ་སྤྱན་དྲངས་ལ་དབང་བསྐུར་བར་གསོལ་བ་བཏབ་པ་དང་། དབང་བསྐུར་ནས་ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ། དེ་ལྟར་ཡན་ལག་བཞི་རྫོགས་པ་དང་། བཟེད་ཞལ་གཅིག་མདུན་དུ་བཞག་ལ། ཞབས་བསིལ་བླངས་ཏེ། ཨོཾ་པྲྀ་ཐཱི་ཝཱི་དེ་ཝཱི་ནི་རི་ཧཱུྃ་ཁཾ་ཞེས་བརྗོད་དེ་བཟེད་ཞལ་དུ་བླུགས་ཏེ། ལྷ་མོའི་ཞབས་བཀྲུས་པར་བསམ། དེ་བཞིན་དུ་ཞལ་བསིལ་བླངས་ཏེ། ཨོཾ་པྲྀ་ཐཱི་ཝཱི་དེ་ཝཱི་ནེ་ཝཱི་དྱེ་ཧཱུྃ། ཞེས་བྱ་བས་བཟེད་ཞལ་དུ་བླུགས་ཏེ་ཞལ་བསིལ་གྱིས་ལྷ་མོའི་ཞལ་བསིལ་བར་བསམ། ཡང་འཐོར་འཐུང་བླངས་ཏེ། ཨོཾ་པྲྀ་ཐཱི་ཝཱི་དེ་ཝཱི་སརྦ་སཾ་ཤོ་དྷ་ནི་ཧཱུྃ། ཞེས་བླུགས་ཏེ་ཕྱག་བསིལ་ནས་ལྷ་མོའི་ལུས་ལ་གཏོར་བར་བསམ། མཆོད་ཡོན་བླངས་ཏེ། ཨོཾ་པྲྀ་ཐཱི་ཝཱི་དེ་ཝཱི་ཛཿཧཱུྃ་བཾ་ཧོཿཁཾ་རཾ་ཞེས་བརྗོད་དེ་བཟེད་ཞལ་དུ་བླུགས་ཏེ་ལྷ་མོའི་ཕྱག་ཏུ་ཕུལ་བར་བསམ། དེ་བཞིན་དུ་མེ་ཏོག་ལ་སོགས་པ་རྣམས་ལའང་ཨོཾ་པྲྀ་ཐཱི་ཝཱི་དེ་ཝཱི་ཨོཾ་བཛྲ་པུཥྤེ་ཨཱཿཧཱུྃ། ཞེས་པས་མེ་ཏོག་དབུལ། དེ་བཞིན་དུ་བདུག་སྤོས་ལ་སོགས་པ་སོ་སོའི་སྔགས་ཀྱིས་རོལ་མོའི་བར་དུ་དབུལ་ལོ། །སྐབས་འདིར་ནང་མཆོད་འབུལ་བ་རྗེ་བཙུན་རྩེ་མོས་དབང་ཆུ་གསུམ་དང་། རྗེ་བཙུན་གྱིས་བདེ་མཆོག་ནག་པོ་དཀྱིལ་ཆོག་རྣམས་སུ་མ་གསུངས་པ་ནི་མཆོད་གཏོར་བསྡུས་པའི་སྐབས་ལ་དགོངས་པས་འདི་ཙམ་གྱིས་ཆོག་ལ། ཕྱག་ལེན་འགའ་ཞིག་ལ་ནང་མཆོད་འབུལ་བ་མཛད་པ་ནི། ཡུལ་གྱི་ངོས་ནས་མི་ཐོབ་པ་མ་ཡིན་པས་ལྷག་སྐྱོན་ཡང་མེད་པ་འདྲའོ། །དེ་ནས་གཏོར་མ་ལ་ཆང་དང་ཆུ་ལ་སོགས་པ་བླུགས་ཏེ། མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་པའམ། ཇི་སྐད་བཤད་པའི་དབང་ཆུ་རྣམས་ལས་ནི་འདི་ཙམ་ཞིག་གསུངས་ཏེ། ཨོཾ་ཨཱཿཧཱུྃ་ཞེས་བྱ་བས་ཁ་དོག་དང་དྲི་དང་རོ་དང་ནུས་པའི་མཐུ་ཕུན་སུམ་ཚོགས་པ་དྭང་ཤིང་ཐོག་པ་མེད་པ་འདོད་པའི་ཡོན་ཏན་ལྔ་དང་ལྡན་པ་བདུད་རྩིའི་རང་བཞིན་དུ་བསམས་ལ། ལག་པ་གཡས་པ་མཆོག་སྦྱིན་དུ་བྱས་ཏེ་ཨོཾ་པྲྀ་ཐཱི་ཝཱི་དེ་ཝཱི་ཨ་ཀ་རོ་མུ་ཁ་སརྦ་དྷརྨཱ་ཎཾ་ཨཱ་དྱ་ནུཏྤན་ན་ཏྭཏཿཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་བྱ་བ་ལན་གསུམ་གྱིས་ལྷ་མོའི་ལྗགས་ལས་འོད་ཟེར་བྱུང་སྟེ་གསོལ་བར་བསམས་ལ་སེ་གོལ་ལན་གསུམ་བྱ། དེ་ནས་རྡོ་རྗེ་དྲིལ་བུ་གསིལ་ཞིང་། མ་མ་རིན་ཆེན་སྣ་ཚོགས་འཛིན། །ཀྱེ་ཡི་རྡོ་རྗེ་ཁྲོས་མཆོད་པས། །ལྷ་མོ་ཁྱོད་ནི་དཔང་དུ་གྱུར། །ས་འདིར་དཀྱིལ་འཁོར་བྲི་བར་བྱ། །ཞེས་ལན་གསུམ་བརྗོད་ལ། བདག་རྡོ་རྗེ་སློབ་དཔོན་ཆེ་གེ་མོ་ཞེས་བྱ་བ་ལ་སློབ་མ་ཆེ་གེ་མོ་ཞེས་བྱ་བས་བསྐུལ་ཏེ། སེམས་ཅན་ཐམས་ཅད་ཀྱི་དོན་དུ་དཀྱིལ་འཁོར་ཆེན་པོ་འབྲི་ན་དེ་ལ་བདག་གིས་སྔོན་དུ་བསྙེན་པ་རྫོགས་ཀྱིས་དེ་ལ་བར་དུ་གཅོད་པ་ཐམས་ཅད་ལ་བསྙེན་པ་རྫོགས་པའི་དཔང་པོ་ལྷ་མོ་ཁྱོད་ཀྱིས་གྱིས་ལ། སའི་ཕྱོགས་འདིར་དཀྱིལ་འཁོར་འབྲི་བར་གནང་བ་བྱིན་ཅིག་ཅེས་བླངས་ལ། སའི་ལྷ་མོ་ནི་ཡིད་ཀྱིས་ནམ་མཁའ་ལ་བཏེགས་ཏེ། དཔང་པོར་བྱོན་པར་བསམ། དེ་ནས་གཏོར་མ་ཅིག་ཤོས་སྔར་ལྟར་བྱིན་གྱིས་བརླབས་ལ། རང་གི་སྙིང་གའི་ས་བོན་ལས་འོད་ཟེར་འཕྲོས་པས་ཕྱོགས་སྐྱོང་བ་རྣམས་བཀུག་པར་བསམ་སྟེ། ལུས་ཀྱིས་ལྕགས་ཀྱུའི་ཕྱག་རྒྱ་དང་། འདོད་རྒྱལ་གྱི་ཕྱག་རྒྱ་གང་རུང་བཅའ། ངག་ཏུ་ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨ་ཀརྵ་ཡ་ཛཿཞེས་པས་སྤྱན་དྲངས། དེ་ནས་ལག་པ་གཡས་པ་མཆོག་སྦྱིན་དུ་བྱས་ལ། ཨོཾ་ཤ་ད་དིཀ་ལོ་ཀ་པཱ་ལ་ས་པ་རི་ཝཱ་ར་ཨ་ཀཱ་རོ་མུ་ཁཾ་ཞེས་སོགས་ལན་གསུམ་གྱིས་ཕུལ། དེ་ནས་གཏོར་མ་ལྷག་མ་ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏེ་སོགས་ལན་གསུམ་བརྗོད་པས་བགེགས་ལ་སྦྱིན། སྔར་གྱི་གསོལ་གདབ་ཀྱི་ཚིག་ལ་སའི་ལྷ་མོ་ཁྱོད་ཀྱིས་ཞེས་པའི་ཚབ་ཏུ། ཕྱོགས་སྐྱོང་བ་ཁྱེད་རྣམས་ཀྱིས་ཞེས་པ་སྦྱར་ཏེ་ས་སློང་། བགེགས་གདུག་པ་ཅན་སྔགས་དང་ཕྱག་རྒྱ་བལྟ་བར་མི་དབང་བ་རྣམས་ལ་གཡས་པས་བསྡིགས་མཛུབ་དང་བཅས་ཏེ། རྡོ་རྗེ་ནུ་མའི་ཐད་དུ་གཟུང་། གཡོན་པས་དྲིལ་བུ་བཅད་གཏུབས་སུ་དཀྲོལ་ཏེ། ས་ཕྱོགས་འདིར་ནི་སློབ་དཔོན་བདག །དཀྱིལ་འཁོར་རྒྱལ་པོ་ཀྱེ་རྡོ་རྗེ། །བཞེངས་ཀྱི་འདི་ན་གནས་པའི་བགེགས། །འདི་ནས་གཞན་དུ་འགྲོ་བར་གྱིས། །ཞེས་པ་ལན་གསུམ་གྱིས་བཀའ་བསྒོ་ཞིང་། ཁྲོ་བོའི་སྔགས་དང་། གུ་གུལ་གྱི་དུད་པ་དང་། ཡུངས་དཀར་གྱི་ཐུན་དང་། རོལ་མོའི་སྒྲ་དྲག་པོ་དང་བཅས་ཏེ་བསྐྲད་པར་བྱའོ། །བཞི་པ་ས་སྦྱང་བ་ལ་གཉིས་ཏེ། ལས་དང་བྱ་བས་སྐྱོན་སྦྱང་བ་དང་། ཏིང་ངེ་འཛིན་གྱིས་བགེགས་སྦྱང་བའོ། །དང་པོ་ལ་ཐོག་མར་ལྟོ་འཕྱེ་བརྟག་པ་ནི། བཟང་པོ་ཡོངས་གཟུང་ལས། དགུན་ཟླ་ར་བ་ལ་སོགས་ནས། །བརྩམས་ཏེ་ཟླ་བ་གསུམ་གསུམ་དུ། །ལྟོ་འཕྱེ་ལྷོ་དང་ནུབ་དང་བྱང་། །ཤར་དུ་དེ་ཡི་མགོ་བོ་སྟེ། །གཡོན་པའི་ཟུར་གྱིས་ཉལ་བ་ཡིན། །ཕྱི་ཡི་ལྟོ་བ་ཤེས་ནས་བརྐོ། །མགོ་དང་རྒྱབ་སོགས་ནས་བརྐོས་པའི། །སྐྱོན་ནི་རྒྱས་པ་ལས་ཤེས་བྱ། །ཞེས་པ་ཙམ་ལས་མ་གསུངས་ཀྱང་། ལེགས་གྲུབ་ཀྱི་རྒྱུད་ཆེན་པོའི་ལུང་། རཏྣ་རཀྵི་ཏ་དང་། ཞང་གྲུབ་པ་དཔལ་གྱིས་བསྒྱུར་བ་ལས། ལྷ་ཁང་མཆོད་རྟེན་ཁང་བཟང་ཁང་བརྩེགས་དང་། །རབ་གནས་དཀྱིལ་འཁོར་ལ་སོགས་བྱེད་འདོད་པས། །འདིར་ནི་ས་ཡི་ལྟོ་འཕྱེ་བརྟག་བྱ་སྟེ། །ས་གཞི་གང་ཡིན་དེ་ནི་གྲུ་བཞིར་བྱ། །ཟླ་བ་གསུམ་གྱི་ཉིན་མོའི་གྲངས་ཀྱིས་འདིར། །ཕྱོགས་ནི་སོ་སོར་ས་དེ་རྣམ་པར་དབྱེ། །དབང་ལྡན་ནས་ནི་མེ་ཡི་མཚམས་ཀྱི་བར། །ཤར་གྱི་ས་དེ་དགུ་བཅུར་རྣམ་པར་དབྱེ། །མེ་ནས་བདེན་བྲལ་མཚམས་ཀྱི་བར་དང་ནི། །བདེན་བྲལ་ནས་ནི་རླུང་གི་མཚམས་བར་དང་། །རླུང་ནས་འབྱུང་པོའི་བདག་པོའི་མཚམས་ཀྱི་བར། །དེ་བཞིན་ཁོ་ནར་དགུ་བཅུར་རྣམ་དབྱེར་བྱ། །སྟོན་ཟླ་ར་བ་འབྲིང་དང་ཐ་མའི་བར། །དབང་ལྡན་མཚམས་ལ་སོགས་པ་མགོ་བོ་ནས། །བདེན་བྲལ་མཚམས་སོགས་མཇུག་མའི་ཆ་རུ་གནས། །གསང་བའི་གནས་ནི་ས་ཡིས་དབུས་སུ་བཞག །ལྟེ་བ་མན་ཆད་ལྟོ་འཕྱེའི་ལུས་སུ་གནས། །སྟོད་ན་གདེངས་ཀ་དང་ལྡན་མི་ཡི་ལུས། །ལྷོར་བལྟས་ལག་པ་གཡོན་པ་རྣ་བར་བཞག །གཡས་པ་རིན་ཆེན་དང་བཅས་དཀུ་རུ་བཞག །ས་ཡི་ཆ་དགུ་ཁྱབ་པར་ཉལ་ནས་གནས། །ཀླུ་རྒྱལ་དེ་ཡི་ལུས་ཚད་མཐོ་བཅུའོ། །ཤར་དང་ནུབ་ལ་སོགས་པར་གནས་པ་ཡང་། །ས་ཡི་དུམ་བུ་དེ་ནི་གཞལ་བ་ལྟར། །ཉི་མའི་བགྲོད་པའི་ཆོས་གཅིག་ལ་སོགས་པར། །ཉིན་ཞག་རེ་རེ་ཞིང་ཡང་ཆ་རེ་རེར། །ཇི་ལྟར་རིགས་པས་ཤར་གྱི་ཆ་རུ་རྒྱུ། །ལྷོ་དང་ནུབ་དང་བྱང་དུའང་དེ་བཞིན་ནོ། །དགུན་ཟླ་ར་བ་འབྲིང་དང་ཐ་མ་ཡི། །དཀར་ཕྱོགས་ལ་སོགས་ནུབ་ཏུ་ཁ་མིག་བལྟ། །མེ་ཡི་མཚམས་སུ་ཡན་ལག་མཆོག་བསྟན་ཅིང་། །མཇུག་མ་རླུང་མཚམས་ལ་སོགས་དག་ཏུ་གནས། །དཔྱིད་ཟླ་ར་བ་འབྲིང་དང་ཐ་མ་དེའི། །གནོད་སྦྱིན་བདག་པོར་ཁ་མིག་བལྟ་བ་སྟེ། །བདེན་བྲལ་མཚམས་ལ་སོགས་པར་མགོ་བོ་གནས། །མཇུག་མ་དབང་ལྡན་ལ་སོགས་དག་ཏུ་གནས། །དབྱར་ཟླ་ར་བ་འབྲིང་དང་ཐ་མའི་བར། །དབང་པོའི་ཕྱོགས་སུ་ཁ་མིག་བལྟ་བ་སྟེ། །རླུང་གི་ཕྱོགས་སུ་ཡན་ལག་མཆོག་བསྟན་ཅིང་། །མེ་ཡི་མཚམས་ལ་སོགས་པར་མཇུག་མའི་ཆ། །ལོ་གཅིག་དུས་ལ་ས་གཞི་ཐ་དག་ཏུ། །འཁོར་གཅིག་གིས་ནི་འབད་པས་ཀུན་ཏུ་ཁྱབ། །ས་བདག་ལྟོ་འཕྱེ་རྒྱུ་བའི་དབྱེ་བས་ནི། །ཟླ་བ་རེ་རེའི་བྱེ་བྲག་ཤེས་ནས་སུ། །མཐའ་ཡས་ལ་སོགས་ཀླུ་ཡི་བདག་པོ་བརྒྱད། །མཇུག་མ་ལ་སོགས་རིམ་གྱིས་བསམ་ནས་ནི། །དེ་ཡི་ལུས་ལ་ཀླུ་ཡི་བདག་པོ་བརྒྱད། །འོ་མ་ལ་སོགས་ཉེར་སྤྱོད་རྣམས་ཀྱིས་མཆོད། །མཇུག་མའི་རྩེ་མོ་རིགས་ལྡན་ཤིན་ཏུ་སྔོ། །གསང་གནས་ཨུཏྤལ་ལྟར་ལྗང་སྟོབས་ཀྱི་རྒྱུ། །ལྟེ་བར་དུང་སྐྱོང་པདྨའི་རྩ་བ་བཞིན། །དཔུང་པར་པདྨ་ཆེན་པོ་གསེར་དང་མཚུངས། །ནོར་རྒྱས་སྙིང་གར་གནས་ལ་ལྗང་གུ་སྟེ། །འཇོག་པོ་ཞེས་བྱ་དམར་པོ་མགྲིན་པར་གནས། །པདྨ་དཀར་པོ་རྣ་བར་འོད་ཟེར་འཕྲོ། །སྤྱི་བོ་ཉིད་དུ་མཐའ་ཡས་སྔོན་པོ་གནས། །དེ་སྤྱོད་མི་ནི་བགེགས་མཐར་བྱེད་དུ་བསྒོམ། །དཔའ་བོའི་ལག་པ་རྟོག་རྩེ་རྡོ་རྗེས་མཚན། །ལག་པ་གཡོན་པ་འོག་ཏུ་བྱས་ལ་གཟུང་། །དེ་ཡིས་བདུད་ཀྱི་ཚོགས་རྣམས་བསྐྲད་ཅིང་བཟློག །ཤར་དང་བྱང་གི་ཕྱོགས་སུ་ཁ་བལྟས་པས། །ཏོག་རྩེ་ཁམ་བཞི་བརྒྱབས་ནས་བླངས་པའི་ས། །ཞི་བའི་སེམས་ཀྱིས་གཏོར་མའི་ནང་ཉིད་དུ། །བཞག་པའམ་ཕྱི་རོལ་མེ་ཡི་མཚམས་སུ་དོར། །འབད་པས་དེ་ཡི་ཁམ་ལྔ་བླངས་པའི་ས། །ས་ཡི་དབུས་སུ་ལེགས་པར་ཡིད་ཀྱིས་དགྲམ། །ཁམ་ལྔ་འདས་ནས་དེ་ལ་དུ་མ་ཡིས། །ཕྱོགས་དང་ཕྱོགས་མཚམས་ཀུན་ནས་བརྐོ་བར་བྱ། །ཤར་ནས་ཆ་ནི་ཉི་ཤུ་རྩ་བདུན་དོར། །བྱང་ནས་ཕྱེད་དང་བཅུ་བཞིའི་ཆ་དོར་བར། །ཤར་ནུབ་ཆ་དགུ་ལྷོ་བྱང་ཕྱེད་དང་ལྔ། །འདི་ནི་མཆན་གྱི་མདུན་དུ་ཐོག་མར་བརྐོ། །དེ་ཡིས་ཆོས་ནོར་འདོད་དོན་འཕེལ་ཞིང་འགྲུབ། །གལ་ཏེ་ལྟོ་འཕྱེའི་རྒྱལ་པོ་གནས་པ་ཡི། །ཆ་དགུའི་ས་ལ་བརྐོས་པར་གྱུར་པ་ན། །ཕ་དང་མ་དང་བུ་དང་བུ་མོ་དང་། སྤུན་དང་ཆུང་མ་གནའ་མ་རང་གི་ནི། །མཛའ་བཤེས་ལ་སོགས་རིམ་པ་བཞིན་དུ་འཆི། །གལ་ཏེ་རྒྱབ་ཏུ་བརྐོས་ན་རང་ཉིད་འཆི། །ཡང་ན་གནས་ནས་འཕོ་འམ་ནོར་ཉམས་འགྱུར། །མཇུག་མ་ལ་བརྐོས་གླང་ཆེན་རྟ་དང་ནི། །མ་ཧེ་བ་ལང་འཆི་ཞིང་སྟོབས་ཉམས་འགྱུར། །གལ་ཏེ་ཁམ་ལྔའི་ནང་དུ་ཤིང་དང་ནི། །གྲོག་མཁར་སྐྲ་སེན་ཐལ་བས་གནོད་པ་འབྱུང་། །རྡོ་བས་རླུང་གིས་འཇིག་སྟེ་ཕུབ་མ་དང་། །མགལ་དུམ་གྱིས་ནི་རིམ་བསྐྱེད་རུས་པ་ཡིས། །ཟུག་གཟེར་འབྱུང་བས་དེ་ཕྱིར་སྤང་བར་བྱ། །ཞེས་པ་དང་། ཕྱོགས་རེ་རེ་རེའུ་མིག་དགུ་བཅུ་སྟེ། །རེ་མིག་དགུ་ལ་ས་བདག་གི །སོར་ནི་བཅུ་གཉིས་ཤེས་པར་བྱ། །ཞལ་གང་དག་གམ་མཐོ་གང་ངོ་། །གདེངས་ཀ་མགོ་དང་སྙིང་ག་དང་། །ལྟེ་བ་རྣམས་ནི་ཞལ་རེ་སྟེ། །མགྲིན་པ་ལྟོ་མཚམས་གསང་བ་གསུམ། །སོར་ནི་བཞི་བཞི་ཞལ་གང་སྟེ། །དེ་ལྟར་སྐུ་སྟོད་ཞལ་ལྔ་པ། །དེ་ཡི་ཚད་ཀྱིས་སྦྲུལ་མཇུག་ཡིན། །དེ་ཕྱིར་ལུས་ཚད་མཐོ་བཅུ་པ། །ས་གཞི་དེར་ཁྱབ་ལྟོ་འཕྱེའི་གཟུགས། །འགྱུར་བས་དགེ་དང་མི་དགེ་བསྐྱེད། །ཅེས་བྱ་བ་བླ་མ་པཎྜི་ཏའི་ཞལ་ནས་ཞང་གིས་ཐོས་སོ། །ས་བདག་ལྟོ་འཕྱེའི་རྒྱལ་པོ་ནི། །སྐར་མ་ཁྲུམས་ལ་ཉལ་བ་ལ། །སྟོན་ཟླ་ར་བར་རྩིས་པ་ཡིས། །བུ་མོའི་ཁྱིམ་ན་པདྨོའི་གཉེན། །གནས་པའི་ཟླ་བ་དེ་ལ་ནི། བྱང་ཤར་མཚམས་ནས་བཟུང་ནས་སུ། །ཞག་རེར་ཆ་རེ་གནས་པ་ཡིས། །ཞག་ནི་དགུ་བཅུ་འདས་པ་ན། །མེ་ཡི་མཚམས་སུ་ངེས་པར་གནས། །སྟོན་ཟླ་འབྲིང་དང་ཐ་མར་རོ། །དགུན་གསུམ་གཤིན་རྗེའི་ཕྱོགས་སུ་སྟེ། །དཔྱིད་གསུམ་ཆུ་བདག་ཕྱོགས་སུ་གནས། །དབྱར་གསུམ་ནོར་སྦྱིན་ཕྱོགས་སུའོ། །དེ་ལྟར་ཕྱོགས་རེར་དགུ་བཅུ་སྟེ། །ལོ་གཅིག་གིས་ནི་འཁོར་གཅིག་ཁྱབ། །དེ་ལྟའི་ངེས་པ་ཤེས་ནས་སུ། །ལྟོ་འཕྱེའི་རྒྱལ་པོའི་ལྟོ་བ་ལ། །དངོས་གྲུབ་འདོད་པས་ས་བླང་བྱ། །གཞན་དུ་དེ་ལས་བཟློག་པ་འབྱུང་། །ཞེས་ཞང་ཉིད་ཀྱིས་བྲིས་པ་སྟེ། འདིར་ཡང་ལྟོ་བ་ཞེས་དང་། བཟང་པོ་ཡོངས་གཟུང་དང་། རིན་ཆེན་འབར་བ་གཉིས་ལས་ཀྱང་ལྟོ་བ་ནས་བརྐོ་བར་གསུངས་པའི་དོན། ལྟོ་བའི་ཕྱོགས་ཞེས་པ་ལ་འབྲུ་མནན་དགོས་ཏེ། ལྟོ་འཕྱེ་ཉིད་ཀྱི་ལུས་ཆ་དགུ་ལ་བརྐོ་བའི་ཉེས་དམིགས་གསུངས་པའི་ཕྱིར་དང་། ལུས་བསྣད་དུ་མི་རུང་བ་ཀུན་མཐུན་པའི་ཕྱིར་རོ། །འདི་དག་ལག་ཏུ་བླང་བའི་རིམ་པ་ནི། ཆོས་རྗེ་ཤར་པའི་གུར་གྱི་ཡིག་ཆ་བཞིན་དུ་ཤེས་པར་བྱའོ། །གང་དག་ལྟོ་ཕྱེ་ནམ་མཁར་གནས་ནས་དེའི་གཟུགས་བརྙན་ས་གཞི་ལ་འཆར་བ་དང་། ལྟོ་འཕྱེའི་ལུས་ཟླུམ་བསྐོར་གྱི་ཤོག་ཁྲ་བྱེད་པ་སོགས་དོན་མེད་པའི་རྟོག་བརྟག་རྣམས་ནི་ཉམས་སུ་ལེན་པ་པོ་ལ་གནོད་པས་སྤང་བར་བྱའོ། །ཚད་ཇི་ཙམ་བརྐོ་ན་དངོས་གྲུབ་རབ་དང་། འབྲིང་དང་། ཐ་མའི་ཆེད་དུ་རྐེད་པ་དང་། ལྟེ་བ་དང་། པུས་མོ་ནུབ་ཙམ་དུ་བརྐོ་བར་བཤད་དེ། བཟང་པོ་ཡོངས་གཟུང་ལས། པུས་མོ་ལྟེ་བ་རྐེད་ཙམ་དུ། །དངོས་གྲུབ་རྗེས་མཐུན་བརྐོ་བར་བྱ། །ཞེས་དང་། རིན་ཆེན་འབར་བ་ལས། གཞན་འདྲ་བ་ལས། དངོས་གྲུབ་རྗེས་མཐུན་ལྟོ་ནས་བརྐོ། །ཞེས་གསུངས་པའི་ཕྱིར་རོ། །འདིའི་རྐེད་པའི་དོན་དབང་ཆུ་དང་། བཟང་པོ་ཡོངས་གཟུང་གི་མཆན་ལས་སྙིང་ག་ལ་བཤད་དོ། །ནས་གླིང་མར། དེ་ནས་ལྟོ་འཕྱེའི་རིམ་པ་ཤེས་པར་བྱས་ནས། དངོས་གྲུབ་རབ་འབྲིང་ཐ་གསུམ་གྱི་དོན་དུ། མགྲིན་པ་དང་། ལྟེ་བ་དང་། པུས་མོ་ཡན་ཆད་དུ་བརྐོ་བར་བྱའོ། །ཞེས་པ་ནི་སྔ་མ་དང་ཅུང་ཟད་མི་འདྲ་བར་སྣང་ཞིང་། ནག་པོ་དཀྱིལ་ཆོག་ལས། པུས་མོ་ནུབ་ཙམ་དུ་བརྐོ་བར་ཡང་གསུངས་སོ། །དེ་ལྟར་ལེགས་པར་བརྐོས་ནས་ཕུབ་མ་དང་། གྱོ་མོ་དང་། རྡོ་བ་དང་། གསེག་མ་དང་། རུས་པ་ལ་སོགས་པ་བསལ་ལ། རིན་པོ་ཆེ་ལྔ་ལ་སོགས་པའི་གཏེར་ཏེ་བུམ་གཏེར་བཅུག་སྟེ། ས་དཔལ་བཟང་པོ་གཞན་དང་བསྲེས། དྲི་ཞིམ་པོའི་ཆུས་ལེགས་པར་སྦྲུས་ལ་ལེགས་པར་བཀང་སྟེ། རིན་པོ་ཆེ་ལ་སོགས་པའང་བརྡར་ཏེ་བསྟར་ཞིང་འཐས་པར་བྱའོ། །གལ་ཏེ་སྐྱོན་དེ་དག་བསལ་གྱིས་མི་ལང་ཞིང་གཅོང་རོང་མང་བར་གྱུར་ན། རང་ལྷའི་ང་རྒྱལ་དང་ལྡན་པས་ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུྃ་ཕཊ་ཅེས་བརྒྱ་རྩ་བརྒྱད་བཟླའོ། །ཡང་ས་དེ་ནམ་མཁའི་རང་བཞིན་ལྟར་དག་པར་བསྒོམ་སྟེ། ཨོཾ་བྷཱུ་ཁཾ་སྭཱ་ཧཱ། ཞེས་བརྗོད་པར་བྱའོ། །ཞེས་དབང་ཆུ་ལས་གསུངས་ལ། ལག་ལེན་པ་ཕྱི་མ་དག་སྔགས་སྔ་མས་ས་ཕྱོགས་རྡོ་རྗེའི་རང་བཞིན་དུ་བསམ་ཞིང་ཕྱི་མས་ནམ་མཁའི་རང་བཞིན་དུ་བསམ་ཞེས་འཆད་པ་ནི་མ་དག་པར་སྣང་སྟེ། རིན་ཆེན་འབར་བ་ལས། གལ་ཏེ་དེ་ལྟར་མ་ནུས་ན། །མཁར་བསམ་ལག་མནན་སྔགས་འདི་བཟླ། །ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཅེས་གསུངས་པའི་ཕྱིར་རོ། །དེ་ནས་སྔགས་ཕྱི་མ་ནི་རྡོ་རྗེ་གུར་ལས་ནམ་མཁར་བསམ་པའི་སྔགས་སུ་གསུངས་པས་གཉིས་ཀའང་ནམ་མཁར་བསམ་པའི་སྔགས་སུ་སྣང་ངོ་། །གཉིས་པ་ནི། ས་ཕྱོགས་དེ་བསང་སྦྱངས་སྟོང་པའི་ངང་ལས་པཾ་ལས་པདྨ། རཾ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ་ལས་འོད་འཕྲོས་པས། རྡོ་རྗེའི་ས་གཞི་དང་། རྭ་བ་དང་། གུར་དང་། བླ་བྲེ་རྣམས་བསམས་ལ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྗོད་པར་བྱའོ། །དེར་ཁྲོ་བོ་བཅུའི་སྲུང་བའི་འཁོར་ལོའང་བསྒོམ་པར་བྱའི་ཞེས་གསུངས་ཏེ། ཧཱུྃ་མཛད་དབུས་སུ་བྱས་པའམ། ཡང་ན་དབུས་ཀྱི་ཁྲོ་བོ་མེད་ཀྱང་རུང་སྟེ། མདུན་བསྐྱེད་ཀྱི་ཚུལ་དུ་བསྒོམས་ནས་ཡན་ལག་བཞི་རྫོགས་བྱའོ། །ལྔ་པ་སྟངས་སྟབས་ཀྱི་བཀོད་པས་ས་བཟུང་བ་ནི། དེ་ནས་དེར་དཀྱིལ་འཁོར་གྱི་ཁང་པ་ཇི་ལྟར་མཚམས་པ། ཇི་ལྟར་འབྱོར་བ་བརྩིགས་ལ་དེའི་དབུས་སུ་དཀྱིལ་འཁོར་གྱི་ས་སྟེགས་བྱས་ལ། ཉེ་འཁོར་ཀུན་ཏུ་བའི་ལྕི་བ་དང་། དྲི་ཞིམ་པོས་བྱུགས་པར་བྱའོ། །བླ་བྲེ་དང་། བ་དན་ལ་སོགས་པས་ཀྱང་བརྒྱན། བྲིས་སྐུ་དང་། ལུགས་སྐུ་ལ་སོགས་པ་རྣམས་ཇི་ལྟར་མཚམས་པའི་གནས་སུ་བཀྲམ་སྟེ་བཀྲ་ཤིས་ཤིང་མཛེས་པར་བྱས་ལ། སློབ་དཔོན་དཀྱིལ་འཁོར་གྱི་དབུས་སུ་སྟན་ནང་ཚངས་ཅན་ལ་འདུག ཕྱོགས་བཞིར་ཡང་གཽ་རཱི་ལ་སོགས་པའི་ང་རྒྱལ་འཛིན་པའི་སློབ་མ་བཞི་བཞག སློབ་དཔོན་གྱི་མདུན་དུ་རྡོ་རྗེ་དྲིལ་བུ་ནང་མཆོད་བཞག ཕྱོགས་བཞིའི་སློབ་དཔོན་བཞིའི་མདུན་དུ་ཆུ་བཞི་སྔོན་དུ་འགྲོ་བའི་ཉེར་སྤྱོད་སྒྲིང་ཚར་དང་། ནང་ངོས་སུ་རྡོ་རྗེ་དྲིལ་བུ་ནང་མཆོད་བཤམས་པ་ནི་དབང་ཆུར། མཆོད་པ་ཅི་མཛེས་སུ་བཤམ་སྟེ་ཞེས་པའི་དོན་ཏོ། །དེ་ནས་ཕྱོགས་བཞིའི་སློབ་དཔོན་གྱིས། དགའ་ཆེན་ཁྱོད་བདག་ལན་གསུམ་གྱིས་གཙོ་བོ་ལ་གསོལ་བ་བཏབ། དཔོན་སློབ་ཀུན་གྱིས་བདག་བསྐྱེད་ཡོངས་སུ་རྫོགས་པ་བཟླས་པ་དང་བཅས་པ་བྱ་སྟེ། ཕྱོགས་བཞིའི་སློབ་དཔོན་གྱིས་ལྷ་སྟ་གོན་ལ་མི་འཇུག་ན། དཀྱིལ་འཁོར་གྱིས་འཁོར་ལོ་བསྡུས། འཇུག་ན་འོག་ཏུ་གཙོ་བོ་དང་མཉམ་དུ་དཀྱིལ་འཁོར་ནམ་མཁར་འདེགས་པར་བྱ་བ་ཡིན་པས། མཆོད་པ་བྱིན་བརླབས་སྔོན་དུ་འགྲོ་བའི་ཕྱི་མཆོད་དང་ནང་མཆོད་ཀྱིས་མཆོད། དེ་བཞིན་གཤེགས་པ་ཀུན་ཞི་བ། །ཞེས་སོགས་ཚིགས་བཅད་བཞིས་རིམ་པ་བཞིན་གསོལ་བ་གདབ། དེ་ནས་གཙོ་བོའམ་སློབ་དཔོན་ལྔ་ཆར་གྱིས་རྡོ་རྗེ་ཁུ་ཚུར་གྱིས་མཐེའུ་ཆུང་གཉིས་སྦྲེལ། མཛུབ་མོ་གཉིས་རྩེ་སྤྲད་པའི་ཕྱག་རྒྱ་སྤྱི་བོར་བཟློག་སྟེ། ཧཱུྃ་བཛྲ་ཨུཏྟིཥྛ། རང་གིས་བསྒོམས་པའི་རྟེན་དང་བརྟེན་པར་བཅས་པའི་དཀྱིལ་འཁོར་ནམ་མཁར་བཞུགས་ཏེ། རང་གཙོ་བོ་ལས་བྱེ་བའི་ཧེ་རུ་ཀ་ཞལ་གཅིག་ཕྱག་གཉིས་པར་གྱུར། ཞེས་བརྗོད་ལ། རྣམ་ལྔ་འདོད་སྐོར་སྔོན་དུ་འགྲོ་བས། ཨོཾ་མ་ཧཱ་བཛྲ་ཧཱུྃ་ཞེས་པས་རྡོ་རྗེ་བླངས། ཨོཾ་བཛྲ་གྷཎྜེ་ཨཿཞེས་པས་དྲིལ་བུ་བླངས་ཏེ། པད་བསྐོར་བྱ་ཞིང་རྡོ་རྗེ་གསོར་ཏེ་སྐྱེལ་ཀྲུང་གཡས་པ་བཤིག པད་བསྐོར་བྱ་ཞིང་དྲིལ་བུ་གསིལ་ཏེ་སྐྱིལ་ཀྲུང་གཡོན་པ་བཤིག རྣམ་ལྔ་འདོད་སྐོར་གྱིས་ལངས་ཏེ། གཡས་སྔོན་འགྲོའི་གཞི་བཅའ་དང་། མཉམ་པའི་རྐང་སྟབས་ཀྱིས་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་དཀུར་བཟུང་སྟེ། རང་གི་མིག་གཡས་པ་མ་ལས་ཉི་མ། གཡོན་པ་ཊ་ལས་ཟླ་བའི་དཀྱིལ་འཁོར། མིག་འབྲས་གཉིས་ཧཱུྃ་གཉིས་ལས་བསྐལ་པའི་མེ་ལྟ་བུ། རྐང་པའི་མཐིལ་དུ་ཧཱུྃ་ལས་བྱུང་བའི་སྣ་ཚོགས་རྡོ་རྗེ་གདེངས་པ་རེ་རེ་བསྒོམས་ལ། ཁྲོ་བོའི་ལྟ་བས་གཡོན་ཕྱོགས་ནས་རྒྱབ་དྲང་པོར་བལྟས་ཏེ། གཡས་སུ་བསྐོར་བས་མིག་གཡས་པས་བགེགས་རྣམས་ཚར་བཅད་པར་བསམ། ཡང་གཡས་ཕྱོགས་ནས་རྒྱབ་དྲང་པོར་བལྟས་ཏེ། གཡོན་དུ་སྐོར་བས་གཡོན་པའི་ཟླ་བ་ལས་བདུད་རྩི་བབས་པས་སླར་གསོས་པར་བསམ་སྟེ། དེ་ཚེ་ཧཱུྃ་རིང་པོ་རེ་རེ་བརྗོད་པར་བྱའོ། །དབང་ཆུའི་དཔེ་ཁ་ཅིག་ལས། སྔ་མ་ལ་གཡོན་དུ་བསྐོར་བ་དང་ཕྱི་མ་ལ་གཡས་སུ་བསྐོར་བ་ཞེས་འབྱུང་བ་ནི་དཔེ་མ་དག་པ་སྟེ། དཔེ་དག་པ་རྣམས་ལས་སྔ་མ་ལ་གཡོན་ནས་གཡས་སུ་བསྐོར་བ་དང་། ཕྱི་མ་ལ་གཡས་ནས་གཡོན་དུ་བསྐོར་བ་ཞེས་འབྱུང་བའི་ཕྱིར་དང་། བཟང་པོ་ཡོངས་གཟུང་ལས། གཡས་དང་གཡོན་གྱི་མིག་དག་ལ། །མ་ལས་ཉི་མ་ཊ་ལས་ཟླ། །རྐང་འོག་རྡོ་རྗེ་སྤྲོ་བ་ཡི། །འོད་ཟེར་རྣམས་ཀྱིས་ཀླུ་སོགས་བསྐྲད། །ཞེས་དང་། རིན་ཆེན་འབར་བ་ལས། ཡི་གེ་མ་ཊས་ཉི་ཟླའི་མིག །ཕྱོགས་དུས་ཐམས་ཅད་སྤར་བ་དང་། བློ་ལྡན་འགྲོ་ལ་བལྟས་ནས་ནི། །འཁོར་ལོའི་ས་ནི་ཡོངས་སུ་སྐོར། །ཞེས་པ་ཙམ་ལས་གཡས་བསྐོར་གཡོན་བསྐོར་གྱི་གསལ་ཁ་མི་སྣང་ཡང་། ཌོམྦཱི་ལུགས་ཀྱི་དབང་ཆུར། རྡོ་རྗེའི་ལྟ་བས་གཡས་སུ་བལྟས་པས། བགེགས་ཐམས་ཅད་བསྐྲད་ལ། གཡོན་དུ་བལྟས་པས་གསོས་པར་བསམ་མོ། །ཞེས་གསུངས་པས་སོ། །མཚོ་སྐྱེས་ལུགས་ཀྱི་དབང་ཆུར། གཡས་ནས་གཡོན་དུ་བསྒྱུར་བས་ཉི་མ་ལས་འོད་ཟེར་མེ་ལྟ་བུ་བྱུང་སྟེ་དེས་བགེགས་ཐམས་ཅད་བསྲེགས་ནས་ཚར་བཅད། གཡོན་པས་གཡས་སུ་བསྒྱུར་བས་ཟླ་བ་ལས་འོད་ཟེར་བསིལ་བ་བདུད་རྩི་ལྟ་བུ་འཕྲོས་པས་གསོས་ཏེ། རྗེས་སུ་བཟུང་ལ་ཞེས་གསུངས་པ་ནི་དཀྱིལ་ཆོག་འདི། བདེ་མཆོག་ནག་པོ་དཀྱིལ་ཆོག་དང་ཚུལ་མཚུངས་པར་སྣང་བས། དེའི་སྐོར་ཚུལ་གྱི་དབང་དུ་བྱས་པ་སྟེ། དཔེར་ན་རྣམ་ལྔ་འདོད་སྐོར་གྱི་གོ་རིམ་བཞིན་ནོ། །དེ་ནས་སློབ་དཔོན་དགའ་བ་ཡོངས་འགྱུར་གྱིས་དབང་ལྡན་དུ་སོང་སྟེ། ཁ་ནང་དུ་ཕྱོགས་ནས་གར་སློང་བ་དང་། གར་གྱི་འགྱིངས་བཙལ་བ་དང་། གར་བསྡིགས་པ་ལན་གསུམ་གསུམ་བྱའོ། །དགའ་བ་ཡོངས་འགྱུར་ནི། ངག་ཏུ་ཨོཾ་ཞེས་དང་། རྐང་པ་གཡོན་པ་གཡས་པའི་མགོར་རྐང་མགོ་གཡས་སུ་བསྟན་ཏེ་བཞག ནཻ་ཞེས་དང་རྐང་པ་གཡས་པའི་མགོ་གཡོན་པའི་རྒྱབ་ཕྱོགས་སུ་བཞག་སུཾ་བྷ་ཞེས་དང་། གཡོན་པའི་དཀྱིལ་གཡས་པའི་རྟིང་པ་ལ་བཞག བཛྲ་ཞེས་དང་། གཡས་པ་གཡོན་པའི་མདུན་དུ་མགོ་གཡོན་དུ་བསྟན་ཏེ་གཞག ཧཱུྃ་ཞེས་དང་གཡོན་པའི་མགོ་གཡས་པའི་རྒྱབ་ཏུ་གཞག ཕཊ་ཅེས་དང་གཡས་པའི་དཀྱིལ་གཡོན་པའི་རྟིང་པར་བཞག་པའོ། །གར་སློང་བ་ནི། ལུས་གཡོ་བ་དང་བཅས་ཏེ། གར་སྐོར་གྱི་རྗེས་སུ་རྡོ་རྗེ་གསོར། དྲིལ་བུ་གསིལ་བའོ། །འགྱིང་བཙལ་བ་ནི་རྐང་པ་གཡས་པ་གཡོན་པའི་མདུན་ནས་བསྐོར་ཏེ་སྔར་ཤུལ་དུ་གཞག་པ་དང་། གར་བསྐོར་གྱི་རྗེས་སུ་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་དཀུར་གཞག་པའམ། ཁུ་ཚུར་གཉིས་ཁ་གྱེན་དུ་བསྟན་ནས་རྐེད་པར་འཇོག་པ་གང་རུང་བྱའོ། །བསྡིགས་པ་ནི་རྐང་པ་གཡས་པ་མདུན་ནས་བསྐོར་ཏེ་ས་ལ་བརྡབ་པ་དང་། གར་སྐོར་གྱི་རྗེས་སུ་ལག་གཡས་རྡོ་རྗེ་དང་བཅས་ཏེ་བསྣུན་པ་དུས་མཉམ་དུ་བྱའོ། །དེ་ནས་དབང་ཆུ་ལས། གཡས་བསྐོར་དུ་ཞི་བའི་འགྲོས་དང་། ཁྲོ་བོའི་འགྲོས་གཉིས་ཀྱིས་ཀུན་ཏུ་བཅགས་ཏེ། དེའི་དུས་སུ་རྐང་པའི་རྗེས་ཐམས་ཅད་རྡོ་རྗེའི་སར་མོས་པར་བྱ་ཞིང་། ངག་ཏུ་ཧཱུྃ་ཧཱུྃ་ཞེས་བརྗོད་པར་བྱའོ། །ཞེས་གསུངས་པའི་དོན་ལ་ལག་ལེན་པ་ཕྱི་མ་དག ཞི་འགྲོས་ནི་བཛྲ་ས་ཏྭ་བརྗོད་ཅིང་རྡོ་རྗེ་རྩེ་གཅིག་པའི་འགྲོས་དང་། ཁྲོ་འགྲོས་ནི་ཨ་མྲྀ་ཏ་བརྗོད་ཅིང་། རྡོ་རྗེ་རྩེ་གསུམ་པའི་འགྲོས་ལ་འཆད་པ་ནི་མི་འཐད་དེ། ཞི་འགྲོས་ཁྲོ་འགྲོས་དེ་འདྲ་བ་ལག་ལེན་གཞན་གྱི་ལུགས་འཁྱུགས་པ་ཡིན་གྱི། རྒྱུད་གསུམ་འདིར་མ་གསུངས་པའི་ཕྱིར་དང་། འདི་དང་ཌོམྦཱི་ལུགས་ཀྱི་དབང་ཆུ་གཉིས་ཆར་དུ། ངག་ཏུ་ཧཱུྃ་ཧཱུྃ་བརྗོད་པར་བྱའོ། །ཞེས་གསུངས་པ་དང་དངོས་སུ་འགལ་བའི་ཕྱིར་རོ། །དེ་ནས་ཞི་འགྲོས་ནི་གུར་ལས་གསུངས་པའི་རྒྱ་མཚོ་བསྐྱོད་པ་དང་། རི་བོ་འདེགས་པ་དང་། མཛེས་པའི་གོམ་པ་གསུམ་དང་། ཁྲོ་འགྲོས་ནི་ཁྲོ་བོའི་གོམ་པ་ཡིན་ཏེ། བཟང་པོ་ཡོངས་གཟུང་ལས། རྐང་སྟབས་བརྒྱད་དུ་ཆོ་ག་ཡིས། །རྡོ་རྗེ་གོམ་པར་གར་བྱའོ། །ཞེས་པའི་རྒྱས་བཤད་དུ། རྐང་སྟབས་བརྒྱད་བཤད་ཟིན་པའི་རྗེས་སུ། རྒྱ་མཚོ་བསྐྱོད་པ་དང་། རི་བོ་འདེགས་པ་དང་། མཛེས་པའི་གོམ་པ་དང་། ཁྲོ་བོའི་གོམ་པ་སྟེ་རྐང་སྟབས་ཀྱི་བཀོད་པའོ། །ཞེས་དང་། རིན་ཆེན་འབར་བ་ལས་ཀྱང་དེ་ཁོ་ན་ལྟར་གསུངས་པའི་ཕྱིར་རོ། །དེ་ལ་ཞི་འགྲོས་གསུམ། རྒྱ་མཚོ་བསྐྱོད་པ་ནི་ལག་པ་གར་བསྐོར་དང་། རྐང་པ་གཉིས་རེས་མོས་ཀྱིས་མདུན་ནས་བསྐོར་ཏེ་གཡབ་ཀྱིན་འགྲོ་བའོ། །རི་བོ་འདེགས་པ་ནི། གོམ་པ་གཡོན་པ་མདུན་དུ་གཡབ་ཀྱིན་སྤོ་བའི་ཚེ་ལག་པ་གར་བསྐོར་གྱི་རྗེས་སུ། གཡས་ཕྱོགས་སུ་རི་བོ་འདེགས་པའི་ཚུལ་བྱ་ཞིང་། གཡས་པ་སྤོ་བའི་ཚེ་གཡོན་ཕྱོགས་སུ་བྱ་བ་རེས་མོས་སུ་བྱའོ། །མཛེས་པའི་གོམ་པ་ནི། མདུན་དུ་སྤོ་བ་ངོས་མདུན་ནས་གཡབ་ཅིང་མི་སྤོ་བ་ངོས་ཀྱི་བརླ་ལ་བཙུགས་ནས་ཁྱིམ་བྱའི་གོམ་པ་ལྟར་བྱས་ཏེ་འགྲོ་བའོ། །ཁྲོ་བོའི་གོམ་པ་ནི་རྐང་པ་གཡོན་མདུན་དུ་བརྡབ་པའི་ཚེ་ལག་གཡས་རྡོ་རྗེ་དང་བཅས་ཏེ་བརྐྱངས་ནས་གཡོན་དྲིལ་བུ་སྙིང་གར་གསིལ། རྐང་པ་གཡས་པ་མདུན་དུ་བརྡབ་པའི་ཚེ་ལག་གཡས་རྡོ་རྗེ་སྙིང་གར་གཟུང་ཞིང་། གཡོན་དྲིལ་བུ་དང་བཅས་པ་བརྐྱང་སྟེ་གསིལ་བར་རེས་མོས་ཀྱིས་འགྲོ་བའོ། །གོམ་སྟབས་བཞི་པོ་འདི་དག་ལ་ཧུཾ་ཐུང་རེ་རེ་བརྗོད་པར་བྱའོ། །དེ་ནས་དབང་ཆུར། རྐང་སྟབས་ཀྱི་བཀོད་པ་རྣམས་བྱ་སྟེ། རྒྱས་པར་ནི་རྡོ་རྗེ་གུར་དང་། དཀྱིལ་འཁོར་གྱི་ཆོ་ག་དག་ལས་ཤེས་པར་བྱའོ། །ཞེས་གསུངས་པའི་དོན་ལ་སྤྱི་འགྲོ་ནི། དགའ་བ་ཡོངས་འགྱུར་གྱིས་འགྲོ། ཕྱོགས་རེ་རེ་ལ་གར་བཅའ་བ་གསུམ། བསྒྲུབ་པ་གསུམ། བསྡུ་བ་གསུམ་སྟེ་དགུ་དགུ་བྱ། རྐང་སྟབས་བརྒྱད་ལ་བསྒྲུབ་པའི་ཚེ་ཕྱག་རྒྱ་གཅིག་ལ་གནས་ནས་གཡས་གཡོན་དབུས་གསུམ་དུ་བལྟ། ཚུལ་དང་པོ་ལྔ་ལ་ཕྱག་རྒྱ་རེ་རེའང་བཅའ་ཐེབས་ལན་གསུམ་གསུམ་བྱ། དབུས་སུ་མདུང་གི་ཚུལ་ཡང་དེ་དང་འདྲ། ཕྱོགས་བཞིའི་ཚུལ་གསུམ་གསུམ་དང་། མཚམས་བཞིའི་མཆོད་པ་གསུམ་གསུམ་ནི་བསྒྲུབ་པའི་ཚེ་ཕྱག་རྒྱ་རེ་རེ་སོ་སོར་འཆའ་བའོ། །ཚུལ་བཅུ་དྲུག་མན་ཆད་ཀྱི་རྐང་སྟབས་ནི་དབུས་དང་མཚམས་བཞིར་མཉམ་པ་དང་། ཕྱོགས་བཞིར་གཡས་བརྐྱང་སོགས་རྩ་བའི་རྐང་སྟབས་བྱ། བཅའ་བའི་ཚེ་གང་སྔོན་དུ་འགྲོ་བའི་རྐང་པ་མདུན་ནས་སྐོར་ཅིག་བསྐོར་ཏེ། ཅིག་ཤོས་ཀྱི་མདུན་དུ། མགོ་ཕྱིར་བསྟན་ནས་གཞག དེ་ནས་ཅིག་ཤོས་མདུན་ནས་བསྐོར་ཏེ་རྐང་སྟབས་གང་ཡིན་པ་དེའི་ཚུལ་དུ་གཞག དེ་ནས་སྔ་མ་མདུན་ནས་བསྐོར་ཏེ་རྐང་སྟབས་དེ་ཉིད་ལ་གནས། དེ་ལྟ་བུའི་བཅའ་བ་གསུམ་དང་། བསྒྲུབ་པ་གསུམ་དང་། བསྡུ་བ་དང་པོ་གཉིས་ལ་ཧཱུྃ་ངར་སྒྲ་དང་བཅས་པ་རིང་བར་བརྗོད། བསྡུ་བ་ཕྱི་མ་ལ་ཧུཾ་ཐུང་བརྗོད། བསྡུ་བའི་ཚེ་སྔོན་ལ་གང་འགྲོ་དང་པོར་བསྡུས་ཏེ་སྔར་ཤུལ་དུ་བཞག དེ་ནས་ཅིག་ཤོས་མདུན་ནས་བསྐོར་ཏེ་སྔར་ཤུལ་དུ་གཞག སླར་ཡང་སྔ་མ་མདུན་ནས་བསྐོར་ཏེ་སྔར་ཤུལ་དུ་གཞག་པའོ། །ད་ནི་སོ་སོའི་ངོ་བོ་བཤད་པར་བྱ་སྟེ། གཡས་བརྐྱང་ནི་གཡས་སྔོན་འགྲོའི་མཐོ་ལྔ་རྣམ་པར་བརྒྱངས་པའི་གཡས་བརྐྱང་དང་། ལག་པ་གཉིས་རྒྱབ་སྦྱར་བའི་མཛུབ་མོ་གཉིས་དང་། མཐེའུ་ཆུང་གཉིས་སྦྲེལ་ནས་བཞིན་ཁྲོས་པའི་ཚུལ་ལོ། །གཡོན་བརྐྱངས་ནི་གཡོན་སྔོན་འགྲོའི་མཐོ་ལྔ་རྣམ་པར་བརྒྱངས་པའི་གཡོན་བརྐྱང་དང་། ཕྱག་རྒྱ་སྔར་གྱི་ལས་མཛུབ་མོ་སྒྲེང་བ་དང་བཞིན་ཁྲོས་པའོ། །ས་ག་ནི་གཡོན་སྔོན་འགྲོའི་རྐང་པ་གཉིས་ཅུང་ཟད་བགྲད་པའི་བར་ཁྲུ་གང་དང་། སོར་གཉིས་སུ་བྱས་ཏེ་པུས་མོ་དྲང་པོར་བསྲང་སྟེ། གཡས་རྡོ་རྗེ་སྙིང་ག་དང་། གཡོན་དྲིལ་བུ་དཀུར་གཟུང་ནས་བཞིན་ཞི་བའོ། །ཟླུམ་པོ་ནི་གཡས་སྔོན་འགྲོའི་རྐང་པ་བགྲད་པའི་པུས་མོ་གཉིས་ཀྱི་བར་ཁྲུ་དོར་བྱས་ཏེ་ངང་པའི་གཤོག་པ་ལྟ་བུ་དང་། ལག་པ་གཉིས་ཕྱོགས་མཚམས་ཐམས་ཅད་དུ་གར་བྱེད་ཅིང་བཞིན་སྐྲག་པའི་ཚུལ་ལོ། །རྡོ་རྗེ་ནི་གཡས་སྔོན་འགྲོའི་རྐང་པ་གཡས་ཀྱི་རྟིང་པ་གཡོན་གྱི་མཐིལ་དུ་བཙུགས་པ་དང་། ཕྱག་རྒྱ་ས་ག་དང་འདྲའོ། །མཉམ་པ་ནི་གཡས་སྔོན་འགྲོའི་རྐང་པ་གཉིས་གཤིབས་ཏེ་བསྲང་བ་དང་། ལག་གཉིས་རྡོ་རྗེ་དྲིལ་བུ་དཀུར་གཟུང་བའོ། །འདིར་ཌོཾམྦཱིའི་དཀྱིལ་ཆོག་གཉིས་དང་། ཤར་པ་རྡོ་རྗེ། འོད་ཟེར་གྱིས་མཉམ་པའི་རྐང་སྟབས་ཐོག་མར་འཆད་ཀྱང་། གུར་དང་། གུར་རྒྱན་ལས་རྡོ་རྗེའི་རྐང་སྟབས་ཐོག་མར་འབྱུང་བས་དེའི་དབང་དུ་བྱས་པའོ། །རུས་སྦལ་ནི་གཡས་སྔོན་འགྲོའི་རྐང་པ་གཡོན་པའི་བོལ་གོང་དུ་གཡས་པའི་མཐིལ་བཞག་ནས་ལག་གཉིས་དཔུང་པའི་ཐད་ཀར་བསྐུམ་མེ་བྱས་པའོ། །བུང་བ་ནི་གཡོན་སྔོན་འགྲོའི་བརླ་གཡོན་པར་གཡས་པའི་མཐིལ་གཏད་ནས། ལག་གཉིས་མཐིལ་གདེངས་པ་དང་སྒེག་པའི་བཞིན་ནོ། །རྡོ་རྗེ་ནི་ལག་གཡོན་སྙིང་གར་བསྡིགས་མཛུབ་དང་། གཡས་པས་རྡོ་རྗེ་འཕྱར་བའི་ཚུལ་ལོ། །འཁོར་ལོ་ནི་སྙིང་གར་རྡོ་རྗེ་ཁུ་ཚུར་གཉིས་ཁ་གྱེན་ལ་བསྟན། མཐེའུ་ཆུང་དང་མཛུབ་མོ་གཉིས་ཕན་ཚུན་སྦྲེལ་བ་འཁོར་ལོ་བསྐོར་བ་ལྟར་བྱས་ནས་གཡས་ཕྱོགས་སུ་གྱེན་ལ་འཕྱར་བའི་ཚུལ་ལོ། །རིན་པོ་ཆེ་ནི་རིན་པོ་ཆེའི་ཕྱག་རྒྱ་ཁུ་ཚུར་གཉིས་སྦྱར་བའི་གུང་མོ་གཉིས་སྒྲེང་ནས་མཐེབ་མཛུབ་སྦྱར་ཏེ་དཔྲལ་བར་འཇོག་པའོ། །པདྨ་ནི་སྙིམ་པ་པདྨ་ཁ་ཕྱེ་བའི་ཚུལ་ལོ། །རལ་གྲི་ནི་གཡས་པའི་མཐེ་བོང་སྲིན་ལག་དང་མཐེའུ་ཆུང་གིས་མནན་ནས་གཡོན་པའི་རྡོ་རྗེ་ཁུ་ཚུར་གྱི་ཤུབས་ནས་ཕྱུང་ནས་འཕྱར་བའོ། །མདུང་ནི་རྡོ་རྗེ་ཁུ་ཚུར་གྱི་མཛུབ་མོ་གཉིས་སྒྲེང་ནས་གཡས་གཡོན་དབུས་གསུམ་དུ་བསྣུན་པའི་ཚུལ་ལོ། །གཞུ་ནི་གཞུ་འགེངས་པའི་ཚུལ་ལོ། །དབྱུགས་པ་ནི་གཡོན་བསྡིགས་མཛུབ། གཡས་པ་དབྱུག་པ་འཕྱར་བའི་ཚུལ་ལོ། །ཐོ་བ་ནི་ལག་པ་གཉིས་ཐོ་བ་འདེགས་པའི་ཚུལ་ལོ། །གཏུན་ཤིང་ནི་གཏུན་ཤིང་གིས་འབྲས་དྲུ་བའི་ཚུལ་ལོ། །རྡོ་རྗེ་རྩེ་གཅིག་པ་ནི་རྡོ་རྗེ་བསྡམས་པའི་གུང་མོ་གཉིས་སྒྲེང་བའོ། །ཁ་བཅུ་པ་ནི་སྙིམ་པའི་སོར་མོ་བཅུ་ཕྱོགས་བཅུར་གདེངས་ནས་བསྐྱོད་པའོ། །ཆུ་གྲི་ནི་གཡས་པས་ཆུ་གྲིས་གཅོད་པ་ལྟ་བུའོ། །སྣ་ཚོགས་དབྱིག་པ་ནི་ཕྱོགས་ཀུན་ཏུ་དབྱིག་པ་བསྐོར་ཏེ་བརྡེག་པའི་ཚུལ་ལོ། །མདུང་ཐུང་ནི་གཡོན་བསྡིགས་མཛུབ། གཡས་ཁུ་ཚུར་གྱིས་མདུང་ཐུང་གཡས་སུ་བསྣུན་པའི་ཚུལ་ལོ། །མཚོན་རྩེ་གཅིག་ནི་གསོར་མདུང་འཕེན་པའི་ཚུལ་ཏེ་ཚུལ་བཅུ་དྲུག་གོ །བ་དན་གཉིས་དང་གསུམ་ནི་གཡས་པའི་སོར་མོ་གཉིས་དང་གསུམ་སྟོན་པའོ། །མཆོད་པ་བཅུ་གཉིས་ནི་རྡོ་རྗེ་ཁུ་ཚུར་གཉིས་ཁ་གྱེན་དུ་འཐོར་བ་དང་། ཐུར་དུ་སྦུབ་པ་དང་། མཐེ་བོང་གཉིས་སྒྲེང་བ་དང་བྱུག་པའི་ཚུལ་ལོ། །ཡང་རྡོ་རྗེ་ཁུ་ཚུར་གཉིས་དཀུར་གཞག་ནས་མགོ་གཡོན་དུ་འདུད་པ་དང་། ཕྲེང་བ་འབུལ་བ་དང་། ཁུ་ཚུར་གཉིས་སྦྱར་ནས་ཁ་ནས་འདྲེན་པ་དང་། སྤྱི་བོར་གར་བྱེད་པའི་ཚུལ་ལོ། །ཡང་ལག་པ་གཉིས་ཀྱིས་གླིང་བུ་བསྒྱུར་བ་དང་། པི་ཝཾ་སྒྲེང་བ་དང་། རྫ་རྔ་བརྡུང་བ་དང་། མུ་ཀུ་ཌ་བརྡུང་བའི་ཚུལ་ལོ། །ལུས་ཀྱི་འདུག་སྟངས་བཅུ་ནི། ངག་ཏུ་ཧཱུྃ་བརྗོད་ཅིང་སེམས་ཀྱིས་རྡོ་རྗེའི་ས་གཞིར་བསྒོམ་མོ། །རྡོ་རྗེ་སྐྱིལ་ཀྲུང་ནི་གཡས་པའི་བྱིན་པ་དང་། བརླ་སྦྱར་བའི་སྟེང་དུ་གཡོན་པའི་བོལ་བཞག་ནས་ཕྱི་ནས་གཡས་པ་གཡོན་གྱི་སྟེང་དུ་གཞག་ཅིང་ལག་པ་གཉིས་ཀ་ས་གནོན་གྱི་ཕྱག་རྒྱ་དང་། ཞི་བའི་བཞིན་ནོ། །སེམས་དཔའ་ནི་བརླ་གཡོན་གྱི་སྟེང་དུ་གཡས་ཀྱི་བོལ་བཞག་ནས། ཕྱི་ནས་གཡོན་གྱི་བྱིན་པ་རྐང་འོག་ཏུ་གཞག་ནས་མཆོག་སྦྱིན་གྱི་ཕྱག་རྒྱ་དང་། སྙིང་རྗེའི་བཞིན་ནོ། །པདྨ་ནི་ལོང་བུ་གཉིས་བསྣོལ་ནས་བོལ་གཉིས་མ་རེག་པར་མཐེ་བོང་གཉིས་རྩེ་སྤྲད་དེ། པུས་མོ་གཉིས་ས་ལ་སྦྱོར་བའམ། ཅུང་ཟད་བཏེག་ཅིང་། ཏིང་ངེ་འཛིན་གྱི་ཕྱག་རྒྱ་དང་། སྙིང་རྗེའི་བཞིན་ནོ། །ཕྱེད་པ་ནི་གཡོན་གྱི་བརླ་ལ་གཡས་པའི་བོལ་གཞག་ནས་གཡོན་བརྐྱང་སྟེ་གཉིས་ཀ་མཆོག་སྦྱིན་གྱིས་ཕྱག་རྒྱ་དང་སྙིང་རྗེའི་བཞིན་ནོ། །བཟང་པོ་ནི་རྐང་པ་གཉིས་སྟན་མཐོ་བའི་སྟེང་ནས་བརྐྱངས་ཏེ། མཐིལ་ཕབ་ནས་གཉིས་ཀ་སྐྱབས་སྦྱིན་གྱི་ཕྱག་རྒྱ་དང་སྙིང་རྗེའི་བཞིན་ནོ། །བཀྲ་ཤིས་ནི་རྐང་པ་གཉིས་བར་མཐོ་གང་ཙམ་དུ་བྱ་སྟེ་ཙོག་པུ་བ་འཇོ་བའི་ཚུལ་དུ་འདུག་ནས་ལག་པ་གཉིས་པུས་མོ་སོ་སོའི་སྟེང་དུ་སྐྱལ་བ་དང་། རྨད་དུ་བྱུང་བའི་ཞལ་ལོ། །དཔའ་བོ་ནི་གཡས་པ་ས་ལ་བཙུགས་པའི་ལོང་བུ་ལ་གཡོན་པའི་མཐིལ་གཏད་དེ་ལག་པ་སོ་སོའི་སྟེང་དུ་གཞག་པ་དང་། དཔའ་བོའི་བཞིན་ནོ། །རོལ་པ་ནི་རྐང་པ་གཡས་ཕྱེད་སྐྱིལ་དུ་བྱས་ཏེ། གཡོན་ཅུང་ཟད་ཅིག་མདུན་དུ་བརྐྱངས་ནས་ལག་པ་གཡོན་པའི་མཐིལ་རྒྱབ་གཡོན་དུ་ས་ལ་བཙུགས་ཏེ། གཡས་པས་ཕྱག་མཚན་འཛིན་པའི་ཚུལ་དུ་པུས་མོ་གཡས་པའི་སྟེང་དུ་གཞག་པ་དང་རྨད་དུ་བྱུང་བའི་ཞལ་ལོ། །མདུན་དུ་བལྟ་བ་ནི་འདུག་སྟངས་དེ་ཉིད་ལ་གནས་པས་ལག་པ་གཉིས་བརླར་བཅས་ཏེ་མིག་མདུན་དུ་བལྟས་ཏེ། རྡོ་རྗེའི་ས་གཞིར་བསྒོམས་ཏེ་ཁྲོ་བོའི་བཞིན་ནོ། །ཕྱིར་བལྟས་ཡང་ལག་པ་གཉིས་བརླར་བཅས་ཏེ་གཞན་འདྲ་བ་ལས། མིག་གཡས་གཡོན་ནས་རྒྱབ་ཏུ་བལྟ་བའོ། །རྒྱུད་དང་སྐྱིལ་ཆོག་གཉིས་ལས་འདུག་སྟངས་དང་པོ་དྲུག་ལས་མ་གསུངས་ཀྱང་ཤར་པ་རྡོ་རྗེ་འོད་ཟེར་གྱིས་རྣམ་སྣང་སྒྱུ་དྲྭ་ནས་གསུངས་པའི་ཕྱི་མ་བཞི་ཁ་སྐོང་བ་ནི་རྗེ་བཙུན་རྩེ་མོས་གནད་ཀྱི་གསལ་བྱེད་དུ་བཞི་པོ་ཁ་སྐོང་བར་གསུངས་པས་ཤིན་དུ་ལེགས་པ་ཡིན་ནོ། །ཉམས་དགུ་ལ་སྒེག་པ་ནི་ཡ་སོས་མ་མཆུ་ཅུང་ཟད་མནན་ཅིང་འཛུམ་པའོ། །དཔའ་བོ་ནི་མིག་དཔངས་སྟོད་དེ་ཉམ་ང་བ་དང་བག་ཚ་བ་མེད་པའོ། །མི་སྡུག་པ་ནི་བཞིན་ཤིན་ཏུ་བསྡུས་པའོ། །དགོད་པ་ནི་ཁ་གདངས་ནས་ཧ་ཧའི་སྒྲ་སྒྲོགས་པའོ། །དྲག་ཤུལ་ནི་བརྡེག་པའམ་ཤིན་ཏུ་ཁྲོས་པའོ། །འཇིགས་སུ་རུང་བ་ནི་འཇིགས་པའི་རྣམ་པ་ཅན་ནོ། །སྙིང་རྗེ་དང་རྔམ་པ་ནི་བྱམས་པ་སྟེ་མིག་ཟིན་པ་དང་བཅས་པའོ། །ཞི་བ་ནི་བཞིན་དྲང་པོར་འཇོག་པའོ། །གླུའི་བཀོད་པ་རྣམས་ཀྱང་རང་རང་གི་ཉམས་ཇི་ལྟ་བ་བཞིན་བྱའོ། །དེ་ཙམ་མི་ནུས་པས་མདོར་བསྡུས་ན་ཤར་དུ་གཡས་བརྐྱང་། ལྷོར་གཡོན་བརྐྱང་། ནུབ་ཏུ་ས་ག བྱང་དུ་ཟླུམ་པོ་ཙམ་བྱའོ། །དེ་ནས་དཀྱིལ་འཁོར་གྱི་དབུས་སམ་དབང་ལྡན་གྱི་ཕྱོགས་སུ་གནས་ནས་བགེགས་ལ་བཀའ་བསྒོ་སྟེ། ཧཱུྃ་ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་རྣམས་ང་ལ་ཉོན། །ང་ནི་དཔལ་ལྡན་སྙིང་རྗེའི་སྟོབས། །སྲུང་བའི་འཁོར་ལོ་རབ་སྦྱོར་བས། །རྡོ་རྗེ་འབར་བའི་ལུས་འདི་ཡིས། །སྐུ་གསུམ་ལས་བྱུང་དགས་པར་བྱ། །གལ་ཏེ་བདག་ཚིག་ལས་འདས་ན། །ཞིག་འགྱུར་འདི་ནི་ཐེ་ཚོམ་མེད། །ཅེས་བྱ་བ་བརྗོད་ནས་སླར་ཡང་འདི་སྐད་དུ། རྡོ་རྗེ་སེམས་དཔའ་བདེ་བ་ཆེན་པོའི་ཡེ་ཤེས་ལས་བྱུང་བའི་ལས་བརྩམ་གྱི། གང་སུའང་རུང་བ་ལུས་སྲུལ་པོ་ལ་སོགས་པ་བགེགས་ཀྱི་ཚོགས་ཆེན་པོ་རྣམས་འདིར་མ་གནས་པར་དེངས་ཤིག གལ་ཏེ་མི་འགྲོ་བར་གྱུར་ན་ཡེ་ཤེས་ཀྱི་རྡོ་རྗེ་འབར་ཞིང་ཀུན་ཏུ་འབར་བས་མགོ་བོ་ཚལ་པ་བརྒྱར་འགས་པར་བྱའོ། །ཞེས་བྱ་བ་དང་། ཁྲོ་བོའི་སྔགས་དང་། ཡུངས་ཀར་གྱི་ཐུན་དང་། གུ་གུལ་གྱི་དུད་པ་དང་། རོལ་ཆེན་དྲག་ཏུ་བྱ་བ་རྣམས་ལན་གསུམ་བྱའོ། །འདི་དག་ནི་གཙོ་བོ་དཀྱིལ་འཁོར་གྱི་དབུས་སུ་གནས་ན་ཁ་ཤར་དུ་བལྟ། དབང་ལྡན་གྱི་མཚམས་སུ་གནས་ན་ཁ་ནང་དུ་བལྟས་ཏེ་བྱའོ། །དྲུག་པ་སླར་བགེགས་མི་འཇུག་པར་བྱ་བའི་ཕྱིར་ས་བསྲུང་བ་ནི། རང་གི་མདུན་དུ་སེང་ལྡེང་ལ་སོགས་པའི་ཕུར་བུ་བཅུ། མགུལ་དུ་ཡུངས་ཀར་གྱི་ཐུམ་བུ་དང་དར་དམར་པོའི་ཅོད་པཎ་གྱིས་བརྒྱན་པ་བཅུ་འདུས་བྱས། དཀྱིལ་འཁོར་གྱི་ཁང་པའི་ཤར་ལ་སོགས་པའི་ཕྱོགས་བཞི། དབང་ལྡན་ལ་སོགས་པའི་མཚམས་བཞི་ཤར་གྱི་གཡས། ནུབ་ཀྱི་གཡོན་རྣམས་སུ་ཕུར་ཁུང་བཀོད། དེ་ནས་དབང་ཆུར། རང་གི་སྙིང་གའི་ས་བོན་ལས་ཁྲོ་བོ་བདུད་རྩི་འཁྱིལ་པ་ཞལ་གཅིག་ཕྱག་གཉིས་པ། སྐུ་སྨད་ཕུར་བུའི་གཟུགས་ཅན་བཅུ་ཕྱུང་ལ་ལག་ཏུ་གཏད་པར་བསམ། ཡང་སྙིང་གའི་ས་བོན་གྱི་འོད་ཀྱིས་དབང་པོ་ལ་སོགས་པའི་ཕྱོགས་སྐྱོང་བཅུ་བཀུག་ལ། ཤར་ཕྱོགས་ནས་འོག་གི་མཐར་ཐུག་པར་གཡོན་པའི་རྡོ་རྗེ་ཁུ་ཚུར་གྱིས་ཕུར་བུ་གཟུང་ལ། གཡས་པ་རྡོ་རྗེ་ཐོ་བ་ཐོགས་པས་དེ་རྣམས་ཀྱི་སྙིང་གར་བཏབ་པར་བསམ་ལ། ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུཥྚཱན་ཧཱུྃ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་ར་ཨཛྙཱ་པ་ཡ་ཏི་ཀཱ་ཡ་ཝཱཀྐ་ཙིཏྟ་བཛྲ་ཀཱི་ལ་ཡ་ཧཱུྃ་ཧཱུྃ་ཧཱུྃ་ཕཊ་ཅེས་པ་དང་། ཨོཾ་བཛྲ་མུད་ཀ་ར་བཛྲ་ཀཱི་ལ་ཡ། ཨ་ཀོ་ཊ་ཡ་ཧཱུྃ་ཕཊ། ཞེས་བརྗོད་ལ་གདབ་བོ། །ཁྱད་པར་དུ་སྟེང་གི་ཕུར་པ་ཤར་གྱི་གཡས། འོག་གི་ཕུར་པ་ནུབ་གྱི་གཡོན་དུའོ། །ཞེས་གསུངས་པ་འདི་ཙམ་གྱིས་ཆོག་པར་སྣང་ལ། དེའི་དོན་ཡང་རང་གི་སྙིང་ག་ནས་རྡོ་རྗེ་ཕུར་བུ་སྟོད་བདུད་རྩི་འཁྱིལ་པའི་རྣམ་པ་ཅན་སྨད་ཕུར་བུའི་གཟུགས་ཅན་བཅུ་སྤྲོས་ཏེ་དབང་པོ་ལ་སོགས་པའི་ཕྱོགས་སྐྱོང་བཅུ་བཀུག་ནས་དེའི་སྤྱི་བོར་ཟུག་པར་བསམ་ཞིང་། དངོས་སུ་རང་གི་ལག་པ་གཡོན་པས་ཕུར་བུ་གཟུང་ནས་ཕུར་ཁུང་དུ་བཅུག གཡས་པས་རྡོ་རྗེ་ཐོ་བས་སྤྱི་བོ་ནས་བརྡུང་ཏེ་སྔགས་གཉིས་པོ་སྦྲེལ་བ་བརྗོད་ཅིང་རོལ་མོའི་སྒྲ་བྱའོ། །དེས་ན་ཕུར་བུ་བཙུགས་པ་དམིགས་པའི་རྟེན་ཙམ་ཡིན་གྱི། དམིགས་པ་རང་གི་ངོ་བོ་སྙིང་ག་ནས་སྤྲོས་པའི་ཕུར་བུ་བཙུགས་པ་ཡིན་པས། ཕུར་བུ་ལ་ཡན་ལག་བཞི་རྫོགས་ཀྱི་བསྐྱེད་ཆོག་བྱེད་པ་ནི་མ་དག་པ་ཡིན་ནོ། །དེའི་ཚེ་རྡོ་རྗེའི་འགྲོས་ཀྱིས་ཕུར་ཁུང་སོ་སོའི་མདུན་དུ་འགྲོ་ཞིང་། གདབ་པའི་ཚེ་རྐང་པ་གཡས་པའི་མཐིལ་དང་། གཡོན་པའི་པུས་མོ་ས་ལ་བཙུགས་པའི་ཀུན་སྤྱོད་བྱའོ། །སྔགས་དང་པོ་ཕུར་བུ་བསྒྲིལ་སྔགས་དང་། ཕྱི་མ་གདབ་སྔགས་སུ་བྱེད་པ་ནི། སྒྲུབ་དཀྱིལ་གཞན་རྣམས་ལས་འབྱུང་ཡང་། འདིར་གཉིས་ཀ་གདབ་སྔགས་སུ་བྱེད་པའི་ལུགས་ཏེ། བཟང་པོ་ཡོངས་གཟུང་ལས། སྔགས་དང་པོ་ལ་ཚན་པ་གསུམ་དུ་གཅད་པ་དང་། ཕྱི་མ་དང་བཞི་མཚམས་ཀྱི་ཕུར་བུ་བཞི་བརྡུང་བའི་སྔགས་སུ་སོ་སོར་བྱས་པ་དེ་ཉིད་འདིར་ཕྱོགས་གཅིག་ཏུ་བསྡུས་ནས་བརྡུང་སྔགས་སུ་བྱེད་པའི་ལུགས་ཡིན་པའི་ཕྱིར་རོ། །དེ་ནས་ཕུར་བུ་དང་། བགེགས་ཀྱི་རོ་ལས་འོད་བྱུང་བའི་ཚུལ་གྱིས་སྐད་ཅིག་གིས་རྡོ་རྗེའི་རྭ་བ་ལ་སོགས་པའི་ཐུན་མོང་བའི་སྲུང་འཁོར་དང་། དེའི་ནང་དུ་ཁྲོ་བོ་བཅུའི་སྲུང་འཁོར་ཡང་ཡན་ལག་བཞི་རྫོགས་སུ་བསྒོམས་ནས། རཀྵ་ལ་སོགས་པའི་སྔགས་ཀྱིས་བརྟན་པར་བྱའོ། །འདིར་ཡང་ཕྱོགས་བཅུར་ཁྲོ་བོ་བཅུས་བསྲུང་ཞིང་། དབུས་སུ་དཀྱིལ་འཁོར་བཞེངས་པའི་དབང་དུ་བྱས་པས། དབུས་ཀྱི་ཁྲོ་བོ་བསྒོམ་མི་དགོས་སོ། །དེ་དག་གིས་ནི་སའི་ཆོ་ག་བསྟན་ཟིན་ཏོ། །བཞི་པ་སྟ་གོན་དུ་གནས་པའི་ཆོ་ག་ལ་གཉིས་ཏེ། ས་ཆོག་དང་སྦྲེལ་ནས་བྱ་བའི་ལུགས་དང་། དཀྱིལ་འཁོར་གྱི་ཁང་པ་རྙིང་པར་བྱ་བའི་ལུགས་སོ། །དང་པོ་ནི། དེ་ལྟར་སྔ་དྲོ་ས་ཆོག་བྱས་མ་ཐག་སྟ་གོན་བྱེད་ན། གང་དུ་བྱ་བའི་གནས་དེར་ཐིག་ཆེན་བརྒྱད་ཙམ་བཏབ་ནས། འོག་ནས་འཆད་པར་འགྱུར་བའི་མཆོད་གཏོར་རྒྱས་པར་བཤམ། བདག་གི་རྣལ་འབྱོར་དྲན་པ་ཙམ་གྱིས་གསལ་བཏབ་པས་ཆོག་གི་བདག་བསྐྱེད་རྒྱས་པར་བསྒོམས་ནི་མི་དགོས་སོ། །ལུགས་འདི་ལ་སྔར་དཔོན་སློབ་རྣམས་ཀྱིས་བདག་བསྐྱེད་བསྒོམ་པའི་སྔོན་དུ། སྔོན་འགྲོ་གཏོར་མ་དང་། གནས་ཡོ་བྱིན་གྱིས་བརླབ་པ་དགོས་ཤིང་། དགའ་ཆེན་ཁྱོད་བདག་གིས་གསོལ་བ་བཏབ་པ་ཡོད་པས། མཎྜལ་ཞུ་འབུལ་ནི་མི་དགོས་སོ། །དེ་ལྟར་བདག་བསྐྱེད་གསལ་གདབ་ནས། དཀྱིལ་འཁོར་གྱི་དབུས་སུ་དྲིའི་ཐིག་ལེ་ལ་མེ་ཏོག་གི་ཚོམ་བུ་བཀོད་པ་ལ། སའི་ལྷ་མོ་ནམ་མཁའ་ནས་ཕབ་སྟེ། ཞལ་ཕྱག་གསལ་གདབ། མཆོད་པ་དང་། གཏོར་མ་དང་། མཁྱེན་པར་གསོལ་བ་རྣམས་སྔར་ས་ཆོག་གི་སྐབས་བཞིན་དུ་བྱས་ལ། ཨོཾ་པྲི་ཐཱི་ཝཱི་དེ་ཝཱི་བཛྲ་མུཿ ཞེས་པས་སའི་ལྷ་མོ་ས་དེ་ཉིད་ལ་ཐིམ་པར་བསམ་མོ། །དེ་ནས་སའི་ལྷ་མོའི་ཚོམ་བུ་དང་། མཆོད་གཏོར་དམན་པ་རྣམས་བསལ་ནས། ལྷ་དགུའི་གནས་སུ་དྲིའི་ཐིག་ལེ་དང་། མེ་ཏོག་གི་ཚོམ་བུ་བཀོད་པ་ལ་སྔར་ས་ཆོག་གི་སྐབས་སུ་ནམ་མཁར་བཏེག་པའི་དཀྱིལ་འཁོར་ཕབ་ནས་རྟེན་དང་བརྟེན་པར་བཅས་པ་གསལ་བཏབ་སྟེ། མཆོད་པ་ནས་སྙན་གསན་དབབ་པའི་བར་ལྷ་སྟ་གོན་དང་། བུམ་པ་སྟ་གོན་དང་། སློབ་མ་སྟ་གོན་རྣམས་འོག་ནས་འཆད་པ་ལྟར་ཡོངས་སུ་རྫོགས་པར་བྱའོ། །གཉིས་པ་ལ་གཉིས་ཏེ། སྤྱིའི་རྣམ་པར་གཞག་པ་དང་། ལག་ལེན་གྱི་རིམ་པ་བྱེ་བྲག་ཏུ་བཤད་པའོ། །དང་པོ་ནི། དབང་ཆུར་སྟ་གོན་ཞེས་བྱ་བ་འོག་ཏུ་དགོས་པའི་ཡོ་བྱད་ལ་སོགས་པ་གོང་དུ་འཚོག་ཆས་བྱེད་པ་ཡིན་པས་ཞེས་གསུངས་པའང་དངོས་གཞིའི་སྐབས་སུ་དཀྱིལ་འཁོར་འབྲི་བ་ལ་སོགས་པ་ས་ལ་ལོངས་སྤྱོད་དགོས་པས་དེ་འཚོག་ཆས་བྱེད་པ་སའི་ལྷ་མོ་སྟ་གོན། དངོས་གཞིའི་སྐབས་སུ་དཀྱིལ་འཁོར་སྒྲུབ་པའི་ཚེ་སྙན་གསན་ཕབ་པའི་ཡེ་ཤེས་པ་དགོས་པས། དེ་འཚོག་ཆས་བྱེད་པ་སྟ་གོན། དངོས་གཞིའི་སྐབས་སུ་ཚུལ་བཞིན་བསྒྲུབས་པའི་བུམ་ཆུ་དགོས་པས་དེ་འཚོག་ཆས་བྱེད་པ་བུམ་པ་སྟ་གོན། །དངོས་གཞིའི་སྐབས་སུ་དཀྱིལ་འཁོར་དུ་འཇུག་ཏུ་རུང་བའི་སློབ་མ་དགོས་པས་དེ་འཚོག་ཆས་བྱེད་པ་སློབ་མ་སྟ་གོན་ནོ། །འདི་དག་གི་གོ་རིམ་ཡང་དང་པོ་གཉིས་ནི་ས་ལ་དབང་བར་བྱེད་པ་དང་། དབང་བའི་ས་ལ་ལོངས་སྤྱོད་པ་ཡིན་པས་གོ་རིམ་དེ་ལྟར་ངེས་ལ། ཌོཾ་བི་ལུགས་ཀྱི་དབང་ཆུར་ནི་བདག་བསྐྱེད་ཏིང་ངེ་འཛིན་གྱི་དཀྱིལ་འཁོར་མ་བསྒོམས་པའི་སྔོན་དུ་སའི་ལྷ་མོ་སྟ་གོན་བྱ་བར་ཡང་བཤད་དོ། །ཕྱི་མ་གཉིས་ཀྱི་གོ་རིམ་ནི་དཀྱིལ་ཆོག་ཕལ་ཆེར་ལས་བུམ་པ་སྟ་གོན་སྔོན་ལ་བཤད་ཅིང་། མཚོ་སྐྱེས་ལུགས་ཀྱི་དཀྱིལ་ཆོག་དང་། བདེ་མཆོག་ནག་པོ་དཀྱིལ་ཆོག་ལས། སློབ་མ་སྟ་གོན་སྔོན་ལ་བཤད་པས། གོ་རིམ་ངེས་པ་མི་སྣང་ལ། སྒྲུབ་མཆོད་ཞག་མང་པོར་སྦྲེལ་བའི་ཚེ། དངོས་གཞི་གཉིས་པ་མན་ཆད་ཀྱི་བུམ་བསྐྱེད་གང་དུ་བྱ་བ་ནི་འོག་ཏུ་འཆད་དོ། །གཉིས་པ་ལ་ལྔ་སྟེ། སྟ་གོན་གྱི་ཡོ་བྱད་འཚོག་ཆས་བྱ་བ། སྔོན་འགྲོ་རྣམ་གསུམ་བྱ་བ། ཏིང་ངེ་འཛིན་གྱི་དཀྱིལ་འཁོར་བསྒོམ་པ། སྟ་གོན་གྱི་ཆོ་ག་དངོས། སྟ་གོན་གྱི་མཇུག་གི་ཆོ་གའོ། །དང་པོ་ནི། ཕལ་ཆེར་དུ་ནི་གཉུག་མར་གནས་པའི་ས་ཡིན་པས། སའི་ཆོ་ག་དེ་དག་མི་དགོས་པས། སྟ་གོན་ལ་གནས་པའི་ཆོ་ག་ཉིད་ནས་བརྩམས་ཏེ་ཕྱག་ལེན་མཛད་དོ། །སྟ་གོན་དེ་ཉིད་ལའང་འོག་ཏུ་དགོས་པ་རྣམས་གོང་དུ་འཚོག་ཆས་བྱ་དགོས་པས། དེའི་ཆོ་ག་ནི་ཇི་ལྟར་འོས་པའི་དཀྱིལ་འཁོར་གྱི་ཁང་པ་ཕྱག་དར་དང་སྐྱང་ནུལ་བྱ། བླ་རེ་ལ་སོགས་པའི་རྒྱན་གྱིས་མཛེས་པར་བྱ། བྲིས་སྐུ་དང་ལུགས་སྐུ་ལ་སོགས་པ་སངས་རྒྱས་དང་བྱང་ཆུབ་སེམས་དཔའི་རྟེན་རྣམས་ཀྱང་ཇི་ལྟར་འཚམས་པའི་གནས་སུ་བཞུགས་སུ་གཞུག དཀྱིལ་འཁོར་ལའང་ཐིག་ཆེན་བརྒྱད་སྐྱ་ཐིག་ཏུ་བཏབ་ལ། པཉྩ་རེ་ཁཱའི་རྩིག་པའི་ནང་ཕན་ཆད་སྟོང་པར་གཞག་པའམ། སྟ་གོན་ཟིན་མ་ཐག་ཐིག་ཚོན་བྱིན་གྱིས་བརླབས་ནས་དཀྱིལ་འཁོར་འབྲི་བ་དང་བསྟུན་ན། སྐབས་འདིར་སྐྱ་ཐིག་རྫོགས་པར་བཏབ་པ་བདེ་བས། ཕྱག་ལེན་ལ་ནི་འདི་ཉིད་མཛད་དོ། །མཆོད་པ་བཤམ་པའི་ཚུལ་ལ་དབང་ཆུར། དེའི་ཕྱི་རོལ་ནས་མཆོད་པའི་ཡོ་བྱད་ཐམས་ཅད་ཁོ་ར་ཁོར་ཡུག་ཏུ་བཤམ་མོ། །མཆོད་པའང་རྒྱ་ཆེར་འབྱོར་པ་ལ་ནི་ཚད་མེད་ལ། འབྱོར་པ་ཆུང་བས་ཀྱང་ཞབས་བསིལ་དང་། ཞལ་བསིལ་དང་། འཐོར་འཐུང་དང་། མཆོད་ཡོན་དང་། མེ་ཏོག་དང་། སྤོས་དང་། མར་མེ་དང་། དྲི་དང་། ལྷ་བཤོས་སོ། །དེ་རྣམས་བཅུ་གཅིག་བཅུ་གཅིག་པས་མི་ཉུང་བར་བཤམ་སྟེ། དཀྱིལ་འཁོར་གྱི་ཁོར་ཡུག་ཏུ་ཇི་ལྟར་མཛེས་པར་བཤམ་མོ། །ཞེས་གསུངས་པའི་དོན་མན་ངག་གི་བཤམ་ཚུལ་ཏེ། བཅུ་གཅིག་ནི་སྤྱི་མཆོད་དང་། ལྷ་བཅུའི་སྒོས་མཆོད་ཡིན་ལ། དེ་དག་ཚད་མར་བཤམ་ནའང་སྤྱི་མཆོད་ནི་ཕྱི་རོལ་དུ་དབང་ལྡན་དུ་མཚམས་འཛིན་གྱི་མེ་ཏོག ཤར་དྲང་པོར་ཞབས་བསིལ་དྲི་བཟང་པོའི་ཆུ་དང་། ཞལ་བསིལ་ཆུ་ལ་འོ་མའམ་མར་བླུགས་པ་གཉིས། མེར་འཐོར་འཐུང་ཆུ་གཙང་མ། ལྷོར་མཆོད་ཡོན་ཆུ་གཙང་མ་ལ་མེ་ཏོག་དཀར་པོ་བཏབ་པ། སྲིན་པོར་མེ་ཏོག ནུབ་ཏུ་བདུག་སྤོས་དང་། མར་མེ་གཉིས། རླུང་དུ་དྲི་ཆབ། བྱང་དུ་ཞལ་ཟས་རྣམས་བཤམ། སྒོས་མཆོད་རྣམས་དེའི་ནང་དུ་རང་རང་གི་མདུན་གྱི་ཕྱོགས་མཚམས་རྣམས་སུ་བཤམ་མོ། །འདི་ལའང་སྒོས་མཆོད་ཀྱི་ཆུ་གསུམ་ནི་སྤྱི་མཆོད་ཀྱི་ཆུ་གསུམ་གྱི་བཟེད་ཞལ་གྱི་ནང་དུ་བླུགས་པས་འགྲུབ། འཐོར་འཐུང་དང་དྲི་ཆབ་ཀྱང་སྤྱི་མཆོད་ཀྱི་དེ་ཉིད་འཐོར་གཡབ་ཀྱིས་འཐོར་བས་འགྲུབ། མེ་ཏོག་ཀྱང་སྤྱི་མཆོད་ཀྱི་དེ་ཉིད་འཐོར་བས་འགྲུབ་པ་ལ་དགོངས་ནས། སྒོས་མཆོད་ལ་སྤོས། མར་མེ། ལྷ་བཤོས་ཚན་པ་གསུམ་ལྷ་གྲངས་དང་མཉམ་པ། འདོད་སྣམ་གྱི་སྟེང་གི་ཕྱོགས་མཚམས་བརྒྱད་དང་། ཤར་ནུབ་ཀྱི་ནང་ངོས་སུ་གཙོ་བོ་ཡབ་ཡུམ་གྱི་མཆོད་པ་གཉིས་ཏེ་བཅུ་བཤམ་མོ། །ཡང་སཾ་བུ་ཊ་ལས། གཡས་པ་དག་ཏུ་ཆུ་ཡི་སྣོད། །གཡོན་དུ་ཉེ་བར་དགོས་པ་རྣམས། །ཞེས་མདུན་བསྐྱེད་ཀྱི་དབང་དུ་བྱས་པ་དང་། བཟང་པོ་ཡོངས་གཟུང་ལས། མེ་ཏོག་སྤོས་དང་མར་མེ་དང་། །དྲི་ཡི་དུང་ཆོས་གཡས་སུ་གཞག །གཡོན་དུ་སྔགས་ཀྱི་མཆོད་ཡོན་སྣོད། །མདུན་དུ་ཡང་ནི་སྣོད་གཞག་བྱ། །ཞེས་བདག་བསྐྱེད་ཀྱི་དབང་དུ་བྱས་ནས་གསུང་པ་ལྟར་ན། རང་གི་གཡོན་མདུན་བསྐྱེད་ཀྱི་གཡས་ཕྱོགས་སུ་ཆུ་བཞི་རིམ་པ་བཞིན་མདུན་ནས་རྒྱབ་ཏུ་བསྒྲིག རང་གི་གཡས་མདུན་བསྐྱེད་ཀྱི་གཡོན་གྱི་ཕྱོགས་སུ་ཉེར་སྤྱོད་ལྔ་མདུན་ནས་རྒྱབ་ཏུ་རིམ་པ་བཞིན་བསྒྲིག མདུན་ཕྱོགས་སུ་བཟེད་ཞལ་གྱི་སྣོད་གསུམ་མེ་ཏོག་ཅུང་ཟད་དང་བཅས་པ་བཤམ་སྟེ། བཟང་པོ་ཡོངས་གཟུང་ལས། ཞབས་བསིལ་ཞལ་བསིལ་བཟེད་ཞལ་ནི། །ཆོལ་ཟངས་སམ་ནི་ལྕགས་ཀྱི་སྣོད། །གསེར་དང་དངུལ་སོགས་རྫས་གཞན་ལས། །བྱས་པའི་སྣོད་ནི་མཉྫིར་གཞག །ཅེས་གསུངས་པས་སོ། །སྤྱི་མཆོད་ཀྱི་ནང་དུ་སྒོས་མཆོད་བཤམ་པའི་ཚུལ་སྔ་མ་དང་འདྲ་སྟེ། འདི་དག་རྒྱུད་ཀྱི་དངོས་བསྟན་ཡིན་ཅིང་། རྗེ་བཙུན་རྩེ་མོས་མཆོད་གཏོར་གྱི་རྣལ་འབྱོར་གྱི་སྐབས་དང་། ཕྱི་རོལ་མཆོད་པའི་སྐབས་སུའང་འདི་བཞིན་དུ་གསུངས་པས། ལུགས་གཉིས་ཆར་གྱི་ཐུན་མོང་བ་ཡིན་གྱི། འགྲེལ་པ་ལུགས་ཁོ་ནའི་ཁྱད་ཆོས་སུ་མི་གཟུང་ངོ་། །ཆུ་བཞི་ཆར་ཡང་མཆོད་ཡོན་གྱི་ཡན་ལག་ཡིན་པའི་ཕྱིར། མཆོད་ཡོན་གྱི་སྒྲས་བཤད་པའང་ཡོད་དེ། བཟང་པོ་ཡོངས་གཟུང་ལས། ཞབས་བསིལ་ཞལ་བསིལ་བསང་གཏོར་སོགས། །རིམ་པ་བཞིན་དུ་དབུལ་བར་བྱ། །འདི་ཀུན་མཆོད་ཡོན་ཡན་ལག་ཕྱིར། །མཆོད་ཡོན་སྒྲ་རུ་བཤད་པ་ཡིན། །ཞེས་དང་། ཆོས་རྗེ་ས་པཎ་གྱིས་ཚོགས་འཁོར་རྩོད་སྤོང་ལས་ཀྱང་དེ་ལྟར་གསུངས་སོ། །གཞན་ཡང་དཀྱིལ་འཁོར་ལ་བྱུག་པའི་རྫས་བའི་རྣམ་པ་ལྔ་དང་། དྲི་ཞིམ་པོའི་ལྡེ་གུའང་བཤམ། ལས་ཐམས་ཅད་པའི་མེ་ཏོག་དང་། སྤོས་དང་། མར་མེ་དང་། དྲི་དང་། ལྷ་བཤོས་ཀྱང་བཤམ་པར་བྱའོ། །ཞེས་གསུངས་པའི་དོན་ཁ་ཅིག་ཡེ་ཤེས་པ་དང་། དབང་ལྷའི་མཆོད་པ་ཡིན་ནོ་ཞེས་འདོད་པ་ནི་མི་འཐད་དེ། དེ་དག་ལ་མཆོད་པ་ལོགས་སུ་བཤམ་པའི་ལུགས་མེད་པའི་ཕྱིར་དང་། ཌོཾ་བི་དཀྱིལ་ཆོག་ཏུ། ཡེ་ཤེས་པ་ལ་ཆུ་བཞི་ཕུལ་ནས་མཆོད་པ་དངོས་གཞིའི་སྐབས་སུ་མེ་ཏོག་ནས་བརྩམས་ཏེ་འབུལ་བར་བཤད་པས་ཀྱང་ལོགས་སུ་བཤམ་མི་དགོས་པར་འགྲུབ་པའི་ཕྱིར་རོ། །དབང་ཆུར་སའི་ལྷ་མོ་ལ་སྒོས་མཆོད་དངོས་སུ་མ་བཤད་པས། དེ་ཉིད་ཡིན་ནམ་སྙམ་ན་དེའང་མ་ཡིན་ཏེ། དམན་མ་བསྡུ་བའི་སྐབས་སུ། དེ་ནས་གཏོར་མ་ས་གཙང་སར་བསྐྱལ། མེ་ཏོག་ཚོམ་བུ་བསལ་ལ། ཞེས་གསུངས་པས་སྒོས་མཆོད་བསྡུ་བ་ཉིད་ཀྱང་མ་གསུངས་པས་བཤམ་མི་དགོས་པར་གྲུབ་པའི་ཕྱིར་རོ། །སློབ་མ་སྟ་གོན་གྱི་མཆོད་པའང་མ་ཡིན་ཏེ། བཤམ་ཚུལ་ལོགས་སུ་གསུངས་པའི་ཕྱིར་རོ། །ཁ་ཅིག་ལས་བུམ་གྱི་མཆོད་པར་འདོད་པ་དང་། གཞན་དག་ཐིག་ཚོན་གྱི་ལྷ་ལ་འབུལ་བར་འདོད་པའང་མི་འཐད་དེ། དངོས་གཞིའི་དཀྱིལ་འཁོར་བྲིས་ཟིན་ནས་མཆོད་པ་བཤམ་པའི་སྐབས་སུ་འདི་ཉིད་བཤམ་པར་གསུངས་པའི་ཕྱིར་རོ། །འོ་ན་ཇི་ལྟར་སྙམ་ན། སྟ་གོན་དང་དངོས་གཞིའི་བར་དུ་ཚོགས་འཁོར་བྱེད་པར་དབང་ཆུ་ཉིད་ལས་གསུངས་པས། དེའི་ཚེ་ལས་ཀྱི་རྡོ་རྗེས་གསོལ་གདབ་ཀྱི་གོང་དུ་ཉེར་སྤྱོད་རོལ་མོ་དང་བཅས་པ་འབུལ་དགོས་པས་དེ་ཉིད་འདིར་བཤམ་པ་ཡིན་ཏེ། ཌོཾ་བི་བའི་ཚོགས་འཁོར་གྱི་གཞུང་ལས། རྡོ་རྗེས་ཀུན་ལ་མཆོད་པའི་ཚོགས། །ཡོངས་སུ་དག་པ་ཀུན་ཏུ་གཞག །མེ་ཏོག་ཐོགས་པ་མདུན་འདུག་ནས། །བྱང་ཆུབ་ཏུ་ནི་སེམས་བསྐྱེད་དེ། །རྡོ་རྗེ་འཛིན་སོགས་དགོངས་སུ་གསོལ། །ཞེས་སོགས་གསུངས་ཤིང་། ཕྱག་ལེན་ལ་ནི་ཆུ་བཞིའང་བསྣན་པར་མཛད་དོ། །བུམ་པ་སྟ་གོན་གྱི་བུམ་པ་རྣམས་ཀྱང་འདིར་བཤམ་དགོས་པས་འདི་ལ་གཉིས་ཏེ། བུམ་པའི་མཚན་ཉིད་དང་། དེ་ཇི་ལྟར་བཤམ་པའི་ཚུལ་ལོ། །དང་པོ་ནི། བཟང་པོ་ཡོངས་གཟུང་ལས། བུམ་པ་རྩ་བ་ནག་པོ་སོགས། །སྤངས་པ་མདུན་དུ་དགོད་པར་བྱ། །མགྲིན་པ་རིང་བ་ལྟོ་ཆེ་བ། །ཡལ་ག་བཟང་པོས་ཁ་རྣམས་མཛེས། །འོ་མ་དྲི་ཆུ་ལ་སོགས་པས། གང་བ་མགུལ་པར་རས་ཀྱིས་དཀྲིས། །རྗེས་སུ་མཐུན་པའི་སྟན་བྱས་ཏེ། །དཀྱིལ་འཁོར་ཁང་པར་གཞག་པར་བྱ། །ཞེས་གསུངས་ཏེ། རྩ་བ་སྤངས་པ་ནི་ཟུང་འཇུག་གསལ་བ་ལས། རྩ་བ་དོར་ཞིང་མ་འབྱར་བ་ཞེས་གསུངས་པ་ལྟར་འོག་གཞིར་འཇོག་པའི་ཚེ་དགོས་པ་ཡིན་གྱི། འདིར་ལེན་པའི་ཚེ་མ་འབྱར་བའོ། །ནག་པོ་སོགས་སྤངས་པ་ནི། ནག་པོ་ར་རི་མེད་པ་སྟེ། དཀྱིལ་ཆོག་གཉིས་ཆར་ལས། རྡོ་རྒྱུས་བཏག་པའི་ཆུས་བྱུག་པར་བྱའོ། །མགྲིན་པ་རིང་བ་ནི་འདིར་ཚད་བཤད་པ་མི་སྣང་ཞིང་། ཟུང་འཇུག་གསལ་བ་ལས། ལྟོ་བའི་སྟེང་ནས་སོར་བརྒྱད་རིང་བ་སྟེ། དེའི་སྟེང་དུ་ཕྱི་རོལ་དུ་ཁ་ཡོད་པ་དང་། དེའི་ཕྱི་རོལ་མཆུ་འཕྱང་བའོ། །ལྟོ་བ་ཆེ་བ་ནི་གཤིན་རྗེའི་གཤེད་ཀྱི་དཀྱིལ་ཆོག་ལས། བྲེ་ཚད་པ་ཞེས་གསུངས་ཤིང་། ཟུང་འཇུག་གསལ་བར། ལྟོ་བའི་རྒྱར་ནི་མཐོ་ལྔ་པ། །ཞེས་བཤད་པའང་ཡོད་དོ། །ལྷག་མ་རྣམས་ནི་ཁ་རྒྱན་སོགས་ཏེ་འོག་ཏུ་འཆད་དོ། །མདོར་ན་བུམ་པའི་རྒྱུ་ཚད། ཁྱད་པར་གྱི་ཆོས་རྣམས་ཟུང་འཇུག་གསལ་བ་ལས། དེ་ལ་གསེར་རམ་ཡང་ན་དངུལ། །ཟངས་སམ་འཇིམ་པའི་ངོ་བོའང་རུང་། །ཇི་ལྟར་རྙེད་པའི་བུམ་པ་ཞིག །བླངས་ཏེ་བརྟུལ་ཞུགས་ཅན་གྱིས་གཞག །བུམ་པ་དེ་དག་ནང་ནས་ནི། །རྣམ་རྒྱལ་མཚན་ཉིད་ལྡན་པར་བྱ། །སོར་མོ་བརྒྱད་ཀྱི་ཚད་ཀྱིས་ནི། །མགྲིན་པ་མཐོ་ཞིང་རྣམ་པར་མཛེས། །སོར་མོ་གཉིས་ཀྱི་མཆུ་འཕྱང་བ། །ལྟོ་བའི་རྒྱར་ནི་མཐོ་ལྔ་པའོ། །གལ་ཏེ་དེ་ལས་ཚད་གཞན་ན། །ཡོན་བདག་དགེ་བར་འགྱུར་མ་ཡིན། །ནག་པོ་རྣམ་པར་སྤངས་པ་དང་། །རྩ་བ་དོར་ཞིང་མ་འབྱར་བ། །བུ་ག་རྣམ་པར་སྤངས་པ་དང་། །དེ་བཞིན་གས་པ་མེད་པ་གཟུང་། །ཞེས་གསུངས་པ་འདི་ཉིད་གསལ་བར་སྣང་ངོ་། །གཉིས་པ་ནི། མཚན་ཉིད་དེ་དང་ལྡན་པའི་བུམ་པ་བཅུ་ལེགས་པར་བཀྲུས་ལ། རྣམ་པར་རྒྱལ་བའི་བུམ་པ་ལ་པདྨའི་སྟེང་དུ་ཐོད་པ་ལ་སྣ་ཚོགས་རྡོ་རྗེས་མཚན་པ་དང་། གྲི་གུག་བྲི། ལྷ་མོ་རྣམས་ཀྱི་བུམ་པ་ལ་རང་རང་གི་ཕྱག་མཚན་གཡས་པ་བྲི། ལས་ཐམས་ཅད་པ་ལ་སྣ་ཚོགས་རྡོ་རྗེ་བྲི་བར་དབང་ཆུར་གསུངས་ལ། བཟང་པོ་ཡོངས་གཟུང་ལས། རིགས་ཀྱི་མཚན་མས་མཚན་པ་སྟེ། །རྒྱལ་བ་བཞི་ཡི་མཚན་མ་ཡིས། །ལྟོ་བའི་ལོགས་བཞི་ལྡན་བྱས་ལ། །རྣམ་པར་རྒྱལ་བའི་བུམ་པར་བྱ། །གཞན་ཡང་དེ་འདྲ་འོན་ཀྱང་ཆུང་། །རིགས་ཀྱི་མཚན་མ་རེ་རེ་ཡིན། །ཞེས་གསུངས་སོ། །དེ་ནས་ལྷའི་ཁ་དོག་དང་མཐུན་པའི་རས་སམ་དར་དཀར་པོ་ཁ་ཚར་མ་ཉམས་པས་མགུལ་ཆིངས་པྲོག་ལྔ་པའམ། གསུམ་པའམ། བདུན་པ་བྱས་ལ། བདུད་རྩི་འཁྱིལ་པའི་སྔགས་བཟླས་ཏེ། གུ་གུལ་ནག་པོའི་དུད་པས་བདུག ཡུངས་ཀར་གྱིས་བརྡེག་ཅིང་བུམ་པའི་བགེགས་བསལ། དེ་ནས་བུམ་པའི་ནང་དུ་བཅུད་གཞུག་སྟེ། ནས་དང་། གྲོ་དང་། སྲན་མ་དང་། འབྲས་སོ་བ་དང་། ཏིལ་ཏེ་འབྲུ་ལྔ་དང་། གསེར་དང་། དངུལ་དང་། བྱེ་རུ་དང་། མུ་ཏིག་དང་། དུང་སྟེ་རིན་པོ་ཆེ་ལྔ་དང་། བྲི་ཧ་སྟི་དང་། ཀཎྜ་ཀ་རི་དང་། ཨ་པ་ར་ཙི་ཏ་དཀར་པོ་སྟེ་ཤུ་དག་དང་། ཧ་ས་སྟེ་རྒྱ་མཚོ་ལྦུ་བ་དང་། ཧ་ས་དེ་ཝ་དབང་པོ་ལག་པ་སྟེ་སྨན་ལྔ་དང་། ལན་ཚྭ་དང་། བུ་རམ་དང་། འོ་མ་དང་། མར་དང་། སྦྲང་རྩི་སྟེ་སྙིང་པོ་ལྔ་དང་། ཙནྡན་དཀར་པོ་དང་། དམར་པོ་དང་། གུར་གུམ་དང་། ག་བུར་དང་། ཛཱ་ཏི་སྟེ་དྲི་ལྔ་དང་། ཤ་ལྔ་དང་། བདུད་རྩི་ལྔ་ནི་བདུད་རྩི་རིལ་བུ་ལ་ཚང་བས། རྫས་སུམ་ཅུ་སོ་ལྔ་པོ་ཐམས་ཅད་ཇི་ལྟར་འབྱོར་པ་ཧྲོམ་བརྡུང་བྱ་སྟེ། བླུག་པའམ། རིལ་བུར་བྱ་སྟེ་གཞུག་པ་གང་རུང་བྱའོ། །ལུ་མ་དང་འབབ་ཆུ་ལ་སོགས་པ་དྲི་ཞིམ་པོའི་ཆུས་ཅི་རིགས་པར་བཀང་སྟེ། བཟང་པོ་ཡོངས་གཟུང་ལས། དངོས་གྲུབ་བརྒྱད་དུ་འདོད་བྱེད་ཕྱིར། །ལན་བདུན་བར་དུ་བཟླ་བ་ཡིན། །ཨོཾ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། གདྒཱའི་ཆུ་འགུགས་པའི་སྔགས་སོ། །ཞེས་གསུངས་པ་ལྟར། སྙིང་ག་ནས་ལྷ་མོ་སྤྲོས་ནས་ཆུ་བོ་གདྒཱ་ནས་ཆུ་བླུགས་པར་བསམ་སྟེ། སྔགས་ལན་བདུན་བཟླ་བར་བཤད་དོ། །ཤིང་ལོ་རློན་པའམ། དེ་མིན་ན་ཀུ་ཤ་རློན་པས་ཁ་བརྒྱན་ཏེ། བཟང་པོ་ཡོངས་གཟུང་ལས། ཨོཾ་ཧཱུྃ་སྭཱ་ཧཱ། ཞེས་པས་ཁ་རྒྱན་འཇོག་པར་བཤད། ཟུང་འཇུག་གསལ་བ་ལས། ཨ་མྲ་ཨུ་དུམྦཱ་ར་དང་། །མྱ་ངན་འཚེ་དང་ཨ་ཤྭཏྠ། །དེ་ནི་ལྷོ་སྐྱེས་ལོ་འདབ་ལྔ། །བུམ་པ་རྣམས་ཀྱི་ཁ་མཛེས་པའོ། །ཞེས་བཤད་དོ། །དེ་རྣམས་དཀྱིལ་འཁོར་གྱི་ཕྱི་རོལ་ལོགས་གཅིག་ཏུ་གནས་མཛེས་པ་ཞིག་ཏུ། རས་སམ། དར་རམ། སྣམ་བུ་ལ་སོགས་པའི་གདན་ལ་ལྷའི་བཀོད་པ་ཇི་ལྟ་བ་བཞིན་དུ་བཀོད་ལ་གཞག ལས་ཐམས་ཅད་པའི་བུམ་པ་བྱང་ཤར་གྱི་པུཀྐ་སཱིའི་བུམ་པའི་དྲུང་དུ་བཞག་པར་དབང་ཆུར་གསུངས་ལ། བཟང་པོ་ཡོངས་གཟུང་ལས། འཁོར་ལོ་ཡི་ནི་སྒོ་བཞི་རུ། །ཤར་ཕྱོགས་སྒོ་ནས་བརྩམས་བྱས་ཏེ། །བུམ་པ་རྣམས་ནི་དགོད་པར་བྱ། །རྒྱལ་བ་དང་ནི་བཀྲ་ཤིས་ཞེས། །བྱ་བ་ཤར་སྒོའི་ལོགས་གཉིས་ལ། །ལྷོ་རུ་དངོས་གྲུབ་བསྲུང་བར་བཤད། །ནུབ་ཏུ་རྒྱལ་དང་ཞི་བ་སྟེ། །བྱང་དུ་དངོས་གྲུབ་རྫུ་འཕྲུལ་ཏེ། །དངོས་གྲུབ་རིན་ཆེན་བུམ་པའོ། །ཞེས་གསུངས་པའི་དོན། རྗེ་བཙུན་རྩེ་མོས་རིགས་བསྡུས་པ་ལ་ཕྱོགས་བཞིར་རིགས་རེ་རེ་དང་། དེའི་ཡུམ་རེ་རེ་སྟེ་གཉིས་གཉིས་བཀོད་པ་ཡིན་ལ། རིགས་རྐྱང་ལ་སྔར་གྱི་འགོད་ཚུལ་དེ་ཉིད་ཀྱིས་ཆོག་པར་བཤད་དོ། །དེ་ནས་རྣམ་པར་རྒྱལ་བའི་བུམ་པའི་སྟེང་དུ་ཐོད་པའམ། དུང་ཆོས་ཀྱི་ནང་དུ་དྲི་ཞིམ་པོའི་ཆུ་དང་། འོ་མ་དང་བདུད་རྩི་རིལ་བུ་སྦྱར་བས་བཀང་ལ། དེའི་སྟེང་དུ་རྡོ་རྗེ་ལ་གཟུངས་ཐག་བཏགས་ལ་གཞག་གོ །ཞེས་པ་ཙམ་ཞིག་དབང་ཆུར་གསུངས་ཤིང་། བཟང་པོ་ཡོངས་གཟུང་ལས། ཧཱུྃ་བདུན་བཟླས་པའི་སྲད་བུ་དཀར། །མེ་ཏོག་ཕྲེང་བ་ལྷག་པར་བཅིངས། །ཙནྡན་དཀར་པོའི་དྲི་ཆུར་བཅུག །ཕྲེང་བའི་མགོ་བོ་ལག་གཟུང་ནས། །རྡོ་རྗེའི་དབུས་བཅིངས་སྟེང་གཞག་ལ། །ཞེས་གསུངས་ཏེ། དེང་སང་སྐུད་པ་སྣ་ལྔ་བསྒྲིལ་བ་ལ་གཟུངས་ཐག་བྱེད་པ་ནི་མེ་ཏོག་ཕྲེང་བའི་དོད་ཡིན་ཞེས་བླ་མ་རྣམས་གསུང་ངོ་། །དེ་འདྲ་བའི་གཟུངས་ཐག་དེ་རྣམ་རྒྱལ་བུམ་པའི་སྟེང་ནས་བུམ་པ་དུ་ཡོད་ཀྱི་ཁ་ལ་གཡས་སྐོར་དུ་བསྐོར་བ། སྣ་གཅིག་རང་གི་ལག་ཏུ་འོང་བའི་ཚད་ཙམ་དུ་གཞག་གོ །གཞན་ཡང་སློབ་མ་སྟ་གོན་ལ་ཉེ་བར་མཁོ་བའི་ཡོ་བྱད་སློབ་མ་གྲངས་དུ་ཡོད་པ་ལ་མཆོད་པ་ལྔ་དགོས་ཏེ། མེ་ཏོག་དང་བདུག་སྤོས་འབུལ་པའི་དུས་སུ་སོ་སོར་ཕུལ་བས་སྣོད་རེ་རེས་ཆོག དྲིའི་འདེ་གུ་ལས་ཐམས་ཅད་པ་འདི་ཉིད་ཀྱིས་འབུལ་བས་ན་སྣོད་གཅིག་གིས་ཆོག མར་མེའི་སྣོད་དང་། ལྷ་བཤོས་ཀྱི་སྣོད་སོ་སོར་བཤམས་ཏེ། མཚོ་སྐྱེས་ལུགས་ཀྱི་དབང་ཆུར། མར་མེ་ཉེར་ལྔ་དང་། ལྷ་བཤོས་ཉེར་ལྔ་དགོས་པར་གསུངས་པ་ལྟ་བུའོ། །སོ་ཤིང་སོར་བཅུ་གཉིས་པའི་ཚད་ཅང་མ་ལ་སོགས་པའི་ཤིང་འཇམ་པ་དྲང་བ། རྩི་མ་ཉམས་པར་བྱས་པ་རྩེ་མོར་མེ་ཏོག་གིས་བཅིངས་པ་སློབ་མའི་གྲངས་དང་མཉམ་པ་དང་། ཀུ་ཤའི་ཆུན་པོ་ཆེ་ཆུང་གཉིས་ཀྱང་སློབ་མའི་གྲངས་དང་མཉམ་པ་དགོས། སྲུང་སྐུད་དམར་པོའི་བེའུ་སློབ་མའི་ལུས་ཚད་བས་མཐོ་རེ་ཙམ་གྱིས་ལྷག་པ་སུམ་སྒྲིལ་དུ་བྱས་པ་སློབ་མའི་གྲངས་དང་མཉམ་པ་དང་། ཁ་བཤལ་བའི་ཆུ་དྲི་ཞིམ་པོའང་སྟ་གོན་བྱའོ། །གཞན་ཡང་དང་པོར་འཇིག་རྟེན་ལས་འདས་པ་ལ་འབུལ་བའི་གཏོར་མ་ཕུད་ལས་ཆུང་བར་གཞག འབྱུང་པོ་བརྒྱད་གསུམ་ཉེར་བཞི་དང་། ཆོས་སྐྱོང་ལ་འབུལ་པའི་གཏོར་མ་ལྷག་མ་ལས་ཆེ་བར་བྱ། སའི་ལྷ་མོའི་གཏོར་མ་དང་། སྔོན་འགྲོའི་གཏོར་མ་སྟེ་བཞི་པོའང་བཤམ། ཞེས་གསུངས་པས་དཀྱིལ་འཁོར་གྱི་མདུན་དུ་གཏོར་མ་གཉིས་བཤམས་ནས། དང་པོ་འདས་གཏོར་ཡིན་པས་རྒྱུ་ཕུད་ལས་བྱ་ཞིང་མཆོད་པ་གཙོ་བོ་ཡིན་གྱི་གཏོར་མ་གཙོ་བོ་མ་ཡིན་པས་ངོ་བོ་ཆུང་བར་བྱ། གཉིས་པ་འཇིག་རྟེན་པའི་གཏོར་མ་ཡིན་པས་རྒྱུ་ལྷག་མ་ལས་བྱ་ཞིང་། གཏོར་མ་གཙོ་བོ་ཡིན་པས་ངོ་བོ་ཆེ་བར་བྱ། གཉིས་པོ་འདི་ཙམ་གྱིས་ཆོག་པར་སྣང་སྟེ། ཕྱི་མ་འདི་ཉིད་ཆོས་སྐྱོང་ལའང་འབུལ་བར་བཤད་པས་སོ། །ཕྱག་ལེན་ལ་འདས་གཏོར་དང་། མགོན་པོ་ལྕམ་དྲལ་དང་། གདོང་བཞི་པ་དང་ལས་མགོན་གྱི་གཏོར་མ་དང་། མཁའ་འགྲོ་སྤྱི་གཏོར་ཏེ་ལྔ་མཛད་ཅིང་། དཀྱིལ་འཁོར་གྱི་ཤར་ཕྱོགས་སུ་གཡས་སྐོར་དུ་བཤམ་པ་ཉིད་མཛད་དོ། །བདེ་མཆོག་ལ་གཡོན་གྱི་ཀུན་སྤྱོད་གཙོ་བོ་ཡིན་པས་གཡོན་སྐོར་དུ་བཤམ་པ་མ་གཏོགས་གཞན་རྣམས་ལ་མཆོད་གཏོར་གཉིས་ཀའང་ལས་འཇམ་པོ་གསུམ་ལ་གཡས་སྐོར་དང་། དྲག་པོ་ལ་གཡོན་སྐོར་དུ་བཤམ་པ་ཞབས་ཀྱི་སྟངས་སྟབས་དང་། འཁོར་ལོའི་སྐོར་ཚུལ་དང་། སྦྱིན་སྲེག་གི་མཆོད་རྫས་བཤམ་ཚུལ་གྱིས་གྲུབ་པས་སོ། །དེས་ན་ལག་ལེན་པ་འགའ་ཞིག་མཆོད་འགོ་གཡས་ལ་གཏོར་འགོ་གཡོན། །ཞེས་པ་ནི་རང་དགའི་ཚིག་ཡིན་པར་ཤེས་པར་བྱའོ། །གཏོར་མའི་སྣོད་ཀྱང་ལྕགས་མ་ཡིན་པ་གསེར་ལ་སོགས་པ་ལ་པདྨའི་རྣམ་པ་ཅན་ནོ། །གཏོར་མའི་གཟུགས་བརྙན་ལ། རིན་པོ་ཆེ་བུ་སྟོན་པས། རྒྱུད་དང་རྒྱ་གཞུང་ནས་འདི་བྱེད་མ་བཤད་པས་ངེས་པ་མེད་དོ། །ཞེས་གསུངས་ཡང་། རྡོ་རྗེ་མཆུའི་དམ་ཚིག་གི་གཟུངས་ལས། རྒྱུ་ནི་ནས་ཟན་དང་། འབྲས་ཟན་དང་། སྦྲང་རྩི་དང་། བུ་རམ་དང་། ཀ་ར་ལ་སོགས་པ་བཟའ་བའི་བྱེ་བྲག་ཁ་ན་མ་ཐོ་བ་མེད་པ་རྣམས་སོ། །གཏོར་རྒྱན་སོགས་སྔགས་པས་དཀོན་མཆོག་ལ་འབུལ་བ་དང་། རང་ལོངས་སྤྱོད་པའི་ཤ་ནི་ཤི་ཤ་ཁོ་ནར་སྒྲོན་གསལ་དང་། དུས་འཁོར་དུ་གསལ་བར་བཤད་པས་དེ་བཞིན་བྱའི། བསད་ཤ་ལ་ནི་མི་བྱའོ། །བརྟག་གཉིས་ལས། རྒྱལ་མཚན་དང་ནི་མཚོན་བསྣུན་དང་། །ལན་བདུན་པ་ཡང་བཟའ་བར་བྱ། །ཐམས་ཅད་གདུག་པ་གཞུག་པ་སྟེ། །ཞེས་པ་ནི་སྤྱོད་པའི་གནས་སྐབས་ཀྱི་ཚོགས་རྫས་སུ་བཤད་ཀྱིས་ལས་དང་པོ་པའི་ཁ་ཟས་དང་། དཀོན་མཆོག་གི་མཆོད་པར་མ་བཤད་ལ། སྤྱོད་པའི་གནས་སྐབས་སུའང་ཤའི་ཆེད་དུ་བསད་པ་ནི་མ་ཡིན་ནོ། །ནས་ཀྱི་ཟན་ལ་གཏོར་མ་པདྨའི་དབྱིབས་ཅན་བྱས་ཏེ་འབུལ་བར་བཤད་པས། སྙིང་པོ་ཟླུམ་པོ་རྩེ་མོ་ཅུང་ཟད་རྣོ་བའི་མཐའ་མ་མཐེབ་ཀྱུས་བསྐོར་བ་ལ། པདྨའི་རྣམ་པ་ཡོད་པས་དེ་ལྟར་བྱའོ། །གྲུ་གསུམ་ལ་སོགས་པ་བྱེད་པ་ནི་མ་དག་པ་ཡིན་ནོ། །དེ་ལ་གཏོར་དར་ཡང་བཙུགས་པས་རུང་སྟེ། ཡེ་ཤེས་ཐིག་ལེའི་རྒྱུད་ལས། གཏོར་མ་གདུགས་དང་། བ་དན་དང་། རྔ་ཡབ་ལ་སོགས་པས་བརྒྱན་པར་བཤད་པའི་ཕྱིར་རོ། །རྣལ་འབྱོར་པ་རྣམས་ཀྱི་གྲལ་ཇི་ལྟར་མཛེས་པའི་གནས་སུ་གདན་བཤམ། སྦྱིན་སྲེག་བྱེད་ན་སྦྱིན་སྲེག་གི་ཡོ་བྱད་ཀྱང་བཤམ། ཡང་ནང་གི་སྦྱིན་སྲེག་གི་ཡོ་བྱད་ཀྱང་བཤམ། དེ་ལ་སོགས་པ་གང་དགོས་པ་བཤམ་སྟེ། འདི་དག་ནི་སྟ་གོན་གྱི་གནས་སྐབས་སུ་ཉེ་བར་མཁོ་བའི་ཡོ་བྱད་འཚོག་ཆས་བྱེད་པ་ཡིན་པས་སྟ་གོན་གྱི་སྦྱོར་བ་ཡིན་ལ། ས་ཆོག་མ་བྱས་ན་ས་ཆོག་གི་དོད་ཀྱང་ཡིན་ཞེས་གསུངས་སོ། །གཉིས་པ་སྔོན་འགྲོ་རྣམ་གསུམ་བྱ་བ་ལ། ཌོཾ་བི་ལུགས་ཀྱི་དབང་ཆུར་ཐོག་མར་མཎྜལ་ཞུ་འབུལ། དེ་ནས་སྔོན་འགྲོ་གཏོར་མ། མཆོད་པ་བྱིན་དབབ་པ་རྣམས་གསུངས་ལ། འདིར་ནི་མཎྜལ་ཞུ་འབུལ་ཐ་མར་གསུངས་པའི་ལུགས་དང་པོ་ནི། ཐོག་མར་ལྷའི་རྣལ་འབྱོར་ལ་གནས་པར་ཁས་བླངས་ནས་ཆོ་ག་ལ་འཇུག་པའི་དབང་དུ་བྱས་ལ། ཕྱི་མ་ནི་གཉིས་མེད་ཏིང་འཛིན་དག་ལ་གནས་པར་མཛོད། །ཅེས་པའི་ཏིང་ངེ་འཛིན་དེའང་བསྐྱེད་རྫོགས་ཉིད་ཡིན་པས་དེ་དང་སྦྲེལ་བའི་དབང་དུ་བྱས་པའོ། །འདིར་ཕྱི་མ་ལྟར་བཤད་ན་དབང་ཆུར་དང་པོར་བར་དུ་གཅོད་པ་ཐམས་ཅད་ཞི་བར་བྱ་བའི་ཕྱིར་སྔོན་དུ་འགྲོ་བའི་གཏོར་མ་བཏང་སྟེ། དེའི་ཆོ་ག་ནི་འབྱུང་པོ་སྤྱིའི་གཏོར་མའམ། མཁའ་འགྲོ་སྤྱི་གཏོར་གྱིས་གཏོང་ཞེས་གསུངས་པའི་འབྱུང་པོ་སྤྱིའི་གཏོར་མ་ནི། སྟེགས་ཀྱི་སྟེང་དུ་གཏོར་མ་བཤམ་སྟེ། ཆུ་དང་ཆང་གིས་བྲན། རྡོ་རྗེའི་རྩེས་ནང་མཆོད་ནས་གཏོར་ཏེ། ཨ་མྲྀ་ཏས་བསང་། སྭ་བྷཱ་ཝས་སྦྱངས། ལག་པ་གཡས་དང་། གཡོན་དང་། གཉིས་ཀ་བསྟན་ཏེ། ཨོཾ་ཨཱཿཧཱུྃ་ཞེས་དང་། བྱ་ཁྱུང་གི་ཕྱག་རྒྱ་བཅས་ཏེ་ཧོ་ཞེས་དང་། སླར་ཡང་ཧ་ཧོ་ཧྲཱིཿལན་གསུམ་བརྗོད་དེ་བདུད་རྩིའི་རང་བཞིན་དུ་བསམ། ལུས་ཀྱིས་ལྕགས་ཀྱུའི་ཕྱག་རྒྱའམ། འདོད་རྒྱལ་གྱི་ཕྱག་རྒྱ་གང་རུང་བཅས་ལ། རང་གི་སྙིང་ག་ནས་འོད་ཟེར་འཕྲོས་པས་འབྱུང་པོ་ཉེར་བཞི་སྤྱན་དྲངས་པར་བསམ་སྟེ། ཨོཾ་མ་ཧཱ་བྷཱུ་ཏ་ས་པ་རི་ཝཱ་ར་ཨཱ་ཀརྵ་ཡ་ཛཿཞེས་བརྗོད། ཨོཾ་ཨིནྡ་སོགས་ལན་གསུམ་མམ། ལྔའམ། བདུན་གྱིས་ཕུལ། ཆུ་བཞི་དང་ཉེར་སྤྱོད་ལྔས་མཆོད། ཨོཾ་མ་ཧཱ་བྷཱུ་ཏ་ས་པ་རི་ཝཱ་ར་ཨོཾ་ཨཱཿཧཱུྃ་ཞེས་པས་ནང་མཆོད་ཕུལ། དྲིལ་བུ་སུམ་བརྡུང་དང་། དཀར་མོ་རི་དྭགས་སོགས་བརྗོད་ལ། ཐམས་ཅད་རིགས་ལྔའི་རང་བཞིན་དུ་མོས་ནས། མི་བསྐྱོད་རྡོ་རྗེ་སོགས་ཀྱིས་བསྟོད། དྲིལ་བུ་ཆིག་བརྡུང་དང་། ལྷ་ཡི་ཚོགས་རྣམས་ནས་ཀུན་འགྲུབ་ཤོག་གི་བར་བརྗོད། སླར་ཡང་སུམ་བརྡུང་དང་། དཔལ་ལྡན་བླ་མ་དམ་པ་རྣམས་ཀྱི་ཐུགས་དགོངས་རྫོགས་པ་དང་། སེམས་ཅན་ཐམས་ཅད་ཀྱི་དོན་དུ་ཕྱག་ཆེན་མཆོག་གི་དངོས་གྲུབ་ཐོབ་པར་བྱ་བའི་ཕྱིར་སྙིང་པོ་ཀྱེ་རྡོ་རྗེའི་དཀྱིལ་འཁོར་སྒྲུབ་ཅིང་མཆོད་པ་དང་། བདག་ཉིད་འཇུག་ཅིང་དབང་བླང་བར་འཚལ་ན་ཞེས་པའམ། སློབ་མ་གཞུག་ཅིང་དབང་བསྐུར་བར་འཚལ་ན་ཞེས་སྐབས་ཐོབ་དང་སྦྱར་ཏེ། སྲུང་མའི་དབང་པོ་ཁྱད་པར་ཅན་ཁྱེད་རྣམས་ཀྱིས་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ། བར་དུ་གཅོད་པ་ཐམས་ཅད་ལས་བསྲུང་དུ་གསོལ། དེ་ནས་ཀྱང་བྱང་ཆུབ་མ་ཐོབ་ཀྱི་བར་དུ་བསྲུང་བ་དང་། བསྐྱབ་པ་དང་། སྦ་བར་མཛད་དུ་གསོལ། ཞེས་བརྗོད་དེ་གཏོར་མ་ཕྱི་རོལ་དུ་བསྐྱལ། རྡོ་རྗེ་གསོར། དྲིལ་བུ་དྲག་ཏུ་དཀྲོལ་ཏེ། གང་དག་ནག་པོའི་ཕྱོགས་ལ་མངོན་པར་དགའ་བ། གསང་སྤྱོད་བལྟ་བར་མི་དབང་བའི་འབྱུང་པོ་དེ་དག་འདིར་མ་གནས་པར་གཞན་དུ་སོང་ཤིག ཅེས་བརྗོད་དེ་ལས་ཐམས་ཅད་པའི་སྔགས་དང་། རྩ་སྔགས་དྲག་ཏུ་བརྗོད་དོ། །ཁ་ཅིག་འདིར་གཏོར་མགྲོན་བསྐྲད་པར་འདོད་པ་དང་། གཞན་དག་གཏོར་མགྲོན་ཡེ་ཤེས་པ་ཡིན་པས། འདིར་མི་དགོས་པར་སྨྲ་བ་གཉིས་ཀས་ནི། གཏོར་མགྲོན་འཇིག་རྟེན་པའི་ཚུལ་སྟོན་པའི་རྗེས་སུ། འཇིག་རྟེན་རང་རྒྱུད་པ་འོང་བས་དེ་བསྐྲད་དགོས་པའི་དོན་མ་རྟོགས་པའོ། །གཉིས་པ་མཆོད་པ་བྱིན་དབབ་པ་ནི་འདིར་དེ་ནས་མཆོད་པའི་ཡོ་བྱད་ཐམས་ཅད་དྭངས་ཤིང་ཐོགས་པ་མེད་པ། ནམ་མཁའི་མཐའ་དང་མཉམ་པར་བྱིན་གྱིས་བརླབས་ཏེ། དྲིལ་བུ་ལ་སོགས་པ་རོལ་མོའི་ཡོ་བྱད་ཐམས་ཅད་འབུད་དཀྲོལ་བྱ་ཞིང་། ཨོཾ་བཛྲ་གྷཎྜེ་ར་ཎི་ལ་སོགས་པའི་སྔགས་ལན་གསུམ་བརྗོད་དེ། མཆོད་པ་བྱིན་དབབ་བོ་ཞེས་གསུངས་ཤིང་། ཌོཾ་བི་ལུགས་ཀྱི་དབང་ཆུ་དང་། བདེ་མཆོག་ནག་པོ་དཀྱིལ་ཆོག་ལས་ཀྱང་འདི་དང་འདྲ་བར། མཆོད་པ་བྱིན་དབབ་པ་ཙམ་མ་གཏོགས། གནས་ཁང་བྱིན་རླབས་གསུང་བ་མི་སྣང་ཡང་། བླ་ཆེན་འཕགས་པས་གནས་དང་ཡོ་བྱད་གཉིས་ཀ་བྱིན་རླབས་མཛད་པ་ནི། བཟང་པོ་ཡོངས་གཟུང་ལས། རྫས་ལྔ་སྟ་གོན་གྱི་སྐབས་སུ། ཐོག་མར་གནས་ཁང་མི་དམིགས་ཏེ། སྟོང་པའི་ངང་ལས་འབྱུང་བཞི་འཁོར་ལོ་དང་བཅས་པ་ལ། རྣམ་སྣང་ཡབ་ཡུམ་སྙོམས་པར་ཞུགས་ཏེ་ཞུ་བ་འདྲེས་པས་རྐྱེན་བྱས་ནས། གནས་ཁང་གཞལ་ཡས་ཁང་བྱིན་གྱིས་བརླབས། དེ་ནས་རྫས་ལྔ་སྟ་གོན་སོགས་སྟ་གོན་དང་དངོས་གཞིའི་བྱ་བ་ཐམས་ཅད་བྱེད་པར་བཤད་པ་དེ། ཆོ་ག་ཐམས་ཅད་ལ་མདོར་བསྡུས་པའི་ཚུལ་གྱིས་སྦྱར་བར་སྣང་བས་ཤིན་ཏུ་ལེགས་པའོ། །རྗེ་བཙུན་གོང་མས་སྐབས་འདིར་དངོས་སུ་མ་གསུངས་པ་ནི། ལྡང་བའི་རྣལ་འབྱོར་གྱི་སྐབས་སུ་སྣོད་ཐམས་ཅད་གཞལ་ཡས་ཁང་དུ་ལྟ་བའི་རྒྱུན་ཡོད་བཞིན་པའི་དབང་དུ་བྱས་ལ། དྲན་པ་གསོ་བའི་ཆེད་དུ་འདིར་བརྗོད་པ་ནི་ལེགས་པའོ། །ཇི་ལྟར་བྱ་བའི་ཆོ་ག་ནི། གནས་དང་མཆོད་པའི་ཡོ་བྱད་རྣམས་ལ་བདུད་རྩི་གཏོར་ཏེ། ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་གནས་ཁང་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ་སྒོ་བཞི་པ། རྟ་བབས་བཞི་དང་ལྡན་པ། མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་ཞབས་བསིལ། ཞལ་བསིལ། འཐོར་འཐུང་། མཆོད་ཡོན། མེ་ཏོག བདུག་སྤོས། མར་མེ། དྲི། ཞལ་ཟས། རོལ་མོ་ལ་སོགས་པའི་མཆོད་པའི་ཡོ་བྱད་རྣམས་དྭངས་ཤིང་ཐོགས་པ་མེད་པ། ནམ་མཁའི་མཐའ་ཀླས་པར་གྱུར་ཞེས་པའམ། སྤྲོ་ན་དྭངས་ཤིང་ཐོགས་པ་མེད་པ། ས་དང་ནམ་མཁའ་བར་སྣང་ཐམས་ཅད་ཁྱབ་པ། འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པར་གྱུར་ཅེས་པའམ། ཡང་སྤྲོ་ན། དྭངས་ཤིང་ཐོགས་པ་མེད་པ། རྒྱུ་འཇིག་རྟེན་དང་འཇིག་རྟེན་ལས་འདས་པའི་དགེ་བའི་རྩ་བ་ལས་གྲུབ་པ། ངོ་བོ་བཟང་ཞིང་གཙང་བ། ཡུལ་ནམ་མཁའི་མཐའ་ཁྱབ་པ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་མི་ཆད་པར་གྱུར་ཅེས་པ་གསུམ་པོ་གང་རུང་བརྗོད་ནས། གྷཎྜེ་ར་ཎི་ལན་གསུམ་དང་། རོལ་མོའི་ཡོ་བྱད་ཐམས་ཅད་འབུད་དཀྲོལ་གྱིས་བྱིན་དབབ་བོ། །གྷཎྜེ་ར་ཎི་ལན་གསུམ་གྱི་དང་པོས་ཕྱོགས་བཅུའི་སངས་རྒྱས་ཐམས་ཅད་མདུན་གྱི་ནམ་མཁར་སྤྱན་དྲངས། གཉིས་པས་དེ་དག་གིས་གནས་ཁང་གཞལ་ཡས་ཁང་དུ་རང་གི་བྱིན་གྱིས་བརླབས་པ་ལྟར་དུ་བྱིན་གྱིས་བརླབས། གསུམ་པས་མཆོད་རྫས་རང་གིས་བྱིན་གྱིས་བརླབས་པ་ལྟར་བྱིན་གྱིས་བརླབས་པར་བསམ་གསུང་ངོ་། །དཀྱིལ་ཆོག་གཞན་ལ་སྦྱར་ནའང་། ཆུའི་གྲངས་འདོན་པ་བསྒྱུར་བ་མ་གཏོགས་པ་གཞན་འདྲའོ། །གསུམ་པ་མཎྜལ་ཞུ་འབུལ་ནི་དབང་ཆུ་གཉིས་ལས། དེ་ནས་ལས་ཀྱི་རྡོ་རྗེས་སྤྱིར་མཎྜལ་ཕུལ། སོ་སོར་མེ་ཏོག་ཕུལ་ཏེ། ལྷའི་རྣལ་འབྱོར་ལ་གནས་པར་གསོལ་བ་བཏབ་ཅེས་པ་ཙམ་ལས་མ་གསུངས་ཀྱང་། རྗེ་བཙུན་དང་། ས་པཎ་གྱི་ཚོགས་འཁོར་གྱི་གཞུང་གཉིས་ལས་དེའི་རྗེས་སུ་སོ་སོའི་མེ་ཏོག་བསྡུས་ཏེ། ཐུན་མོང་དུ་གཙོ་བོ་ལ་མཎྜལ་དབུལ། གཙོ་བོས་ཀྱང་མཎྜལ་ཡིད་ཀྱིས་བླ་མ་ལ་འབུལ་བར་གསུངས་པའི་ཕྱག་ལེན་གྱི་རིམ་པ་ནི། ལས་ཀྱི་རྡོ་རྗེས་ཐོག་མར་ཕྱག་ལན་གསུམ་འཚལ་ཏེ། མཎྜལ་ཚོམ་བུ་བཤམས་ནས། དཔལ་ལྡན་བླ་མ་དམ་པ་དང་། འདིར་འདུས་པའི་རིག་པ་འཛིན་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཞེས་སོགས་བརྗོད། ཡང་ཕྱག་གསུམ་དང་། གཙོ་བོའི་མདུན་དུ་ཏིང་ཕོར་མེ་ཏོག་གིས་བཀང་བ་སྤོས་རེང་དང་བཅས་པ་བཞག གཞན་རྣམས་ལ་སོ་སོར་མེ་ཏོག་བཀྲམ། ཡང་ཕྱག་གསུམ་དང་། འགྲེང་སྟེ་འདུད་པ་དང་བཅས་པའམ། པུས་མོ་བཙུགས་པ་གང་རུང་གིས་ཐལ་མོ་སྦྱར་བའི་བར་དུ་མེ་ཏོག་བཟུང་ནས། ཀུན་བཟང་རྣམ་འཕྲུལ་མཆོད་པའི་སྤྲིན་ཕུང་གིས། །དཔའ་བོ་རྣལ་འབྱོར་མ་རྣམས་མཆོད་པ་དང་། །ཡོན་བདག་བགེགས་ཞི་ཚོགས་གཉིས་རྫོགས་བྱའི་ཕྱིར། །གཉིས་མེད་ཏིང་འཛིན་དག་ལ་གནས་པར་མཛོད། །ཞེས་བརྗོད་ནས་མེ་ཏོག་དོར་བ་ལན་གསུམ་བྱའོ། །ཡང་ཕྱག་གསུམ་དང་། གཙོ་བོ་མ་གཏོགས་པའི་མེ་ཏོག་རྣམས་མཐའ་ནས་རིམ་གྱིས་བསྡུའོ། །ཡང་ཕྱག་གསུམ་དང་། ཐམས་ཅད་ཀྱིས་ཐུན་མོང་དུ་གཙོ་བོ་ལ་ཚོགས་ཀྱི་སློབ་དཔོན་ཞུ་བའི་ཆེད་དུ་མཎྜལ་དབུལ་ནས། མཎྜལ་ཚོམ་བུ་དང་བཅས་པ་གཙོ་བོའི་དྲུང་དུ་བཞག གཙོ་བོས་ཀྱང་སྔར་གྱི་མེ་ཏོག་ཚོམ་བུ་བསྣན་ནས། མ་ཚང་བ་མེད་པ་འདི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་བྱང་ཆུབ་སེམས་དཔའ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་ཕྱིར་བཞེས་སུ་གསོལ། །ཞེས་སོགས་བརྗོད་ལ། ལས་ཀྱི་རྡོ་རྗེས་མཎྜལ་རྟེན་གྱི་དྲུང་དུ་བཞག་གོ །ཡང་ཕྱག་གསུམ་བྱས་ནས་རང་ཉིད་གྲལ་དུ་འདུག་སྟེ། ལག་ལེན་པ་དག་འདི་ལ། ཕྱག་གསུམ་འཚལ་ནས་མཎྜལ་བཤམ། །ཕྱག་གསུམ་འཚལ་ནས་མེ་ཏོག་བཀྲམ། །ཕྱག་གསུམ་འཚལ་ནས་ཞུ་འབུལ་བྱེད། །ཕྱག་གསུམ་འཚལ་ནས་མེ་ཏོག་བསྡུ། །ཕྱག་གསུམ་འཚལ་ནས་མཎྜལ་དབུལ། །ཕྱག་གསུམ་འཚལ་ནས་གྲལ་དུ་འདུག །ཅེས་པའི་བསྡུ་བའི་ཚིགས་བཅད་ཀྱང་མཛད་དོ། །གསུམ་པ་སྔོན་འགྲོ་ཏིང་ངེ་འཛིན་གྱི་དཀྱིལ་འཁོར་བསྒོམ་པ་ནི། དབང་ཆུར། དམ་ཚིག་ཉམས་ཆག་བསྐང་བའི་ཕྱིར། །ཡི་གེ་བརྒྱ་པ་ཅི་ནུས་བཟླས། །བར་ཆད་ཉེ་བར་ཞི་བར་བྱ་བའི་ཕྱིར། སྲུང་བའི་འཁོར་ལོའི་བསྒོམ་བཟླས་ཅུང་ཟད་བྱས་ལ། ཐམས་ཅད་ཀྱིས་དཀྱིལ་འཁོར་གྱི་འཁོར་ལོའི་ལྷའི་རྣལ་འབྱོར་སྒྲུབ་ཐབས་འབྲིང་པོ་ཡན་ལག་དྲུག་པ་ཡོངས་སུ་རྫོགས་པར་བསྒོམ་པ་དང་། བཟླས་པ་ཅུང་ཟད་བྱས་ཏེ། མཆོད་པའི་ཡོ་བྱད་ཐམས་ཅད་བསང་ཞིང་བྱིན་གྱིས་བརླབས་ལ་གཞག་གོ །དེ་ནས་རང་གི་དཀྱིལ་འཁོར་གྱི་འཁོར་ལོ་དེ་ནམ་མཁར་བཏེག་པའམ། ཡང་ན་རང་གི་སྙིང་གར་བསྡུས་ཏེ། རང་ཕྱག་གཉིས་པའི་ང་རྒྱལ་གྱིས་ལངས་ལ་སྟ་གོན་དུ་གནས་པའི་ཆོ་ག་རྣམས་བྱའོ། །ཞེས་དང་། ཡང་དབང་ཆུའི་དཔེ་ཁ་ཅིག་ལས། གཞན་རྣམས་འདྲ་བ་ལས། མཆོད་པའི་ཡོ་བྱད་ཐམས་ཅད་བསང་ཞིང་བྱིན་གྱིས་བརླབས་ལ་བདག་གིས་བསྒོམས་པའི་དཀྱིལ་འཁོར་ལ་ཕྱི་དང་། ནང་དང་། ཡིད་ལས་བྱུང་བ་དང་། བསྟོད་པའི་མཆོད་པ་རྣམས་བྱའོ། །དེ་ནས་རང་གི་དཀྱིལ་འཁོར་གྱི་འཁོར་ལོ་དེ་ཞེས་སོགས་གསུངས་པའི་དཔེ་གཉིས་སྣང་བ་ལས། སྔ་མ་ནི་བར་སྐབས་ཀྱི་ཚིག་འབྲུ་དེ་དག་ཆད་ནས་བཞག་གོ་ཞེས་པའི་ཚིག་བསྣན་པར་སྣང་བས། མ་དག་པ་ཡིན་ཏེ། འདིར་མཆོད་པའི་ཡོ་བྱད་བྱིན་གྱིས་བརླབ་པ་དེ་བདག་བསྐྱེད་ཀྱི་ཡིན་ནམ་མདུན་བསྐྱེད་ཀྱི་ཡིན། དང་པོ་ལྟར་ན་བདག་བསྐྱེད་ལ་འབུལ་བ་མེད་པ་དང་འགལ་ལ། ཕྱི་མ་ལྟར་ན་ཡན་ལག་བཞི་རྫོགས་སུ་བསྐྱེད་ཟིན་པའི་རྗེས་སུ་བྱིན་རླབས་བཤད་པ་དང་ཟློས་པའི་སྐྱོན་ཡོད་པའི་ཕྱིར་རོ། །གལ་ཏེ་སྐབས་དེར་བྱིན་རླབས་སྔར་བྱས་ཟིན་པ་དེའི་དུས་སུའང་བསང་བ་དང་སྦྱང་བ་དང་། སྐད་ཅིག་ཙམ་གྱིས་བྱིན་གྱིས་བརླབས་ལ་ཞེས་གསུངས་པའི་སྔར་བྱས་ཟིན་པ་འདི་ཉིད་ལ་སྙེག་གོ་སྙམ་ན་དེ་ནི་མ་ཡིན་ཏེ། སྔར་བྱས་ཟིན་པའི་དོན་སྔོན་འགྲོའི་སྐབས་སུ་བྱས་ཟིན་པ་ལ་དགོངས་པ་ཡིན་གྱི་ལན་གསུམ་བྱེད་པའི་དོན་མ་ཡིན་པའི་ཕྱིར་རོ། །དེ་ནས་ཕྱི་མ་ལྟར་དག་སྟེ། འདིར་དཔེ་དག་པ་ལས་དེ་བཞིན་དུ་འབྱུང་བའི་ཕྱིར་དང་། ཌོཾ་བི་ལུགས་ཀྱི་དབང་ཆུར་ཡང་། བདག་བསྐྱེད་མཆོད་བསྟོད་ཀྱི་བར་བྱས་ནས། དཀྱིལ་འཁོར་བསྡུ་བར་གསུངས་པའང་འདི་དང་མཐུན་པའི་ཕྱིར་དང་། རྗེ་བཙུན་གྱིས་ལས་བཞིའི་སྦྱིན་སྲེག་ལས་ཀྱང་། བཟླས་པའི་རྗེས་སུ་མཆོད་པ་ཅི་ནུས་བྱས་ལ། དཀྱིལ་འཁོར་བསྡུ་བར་གསུངས་པའི་ཕྱིར་དང་། བདེ་མཆོག་ནག་པོ་པའི་སྒྲུབ་ཐབས་ནར་མ་ལ། ས་ཆེན་གྱིས། ཕྱི་དང་། ནང་དང་། དེ་ཁོ་ན་ཉིད་ཀྱི་མཆོད་པ་གསུམ་ལས་མ་གསུངས་ཀྱང་། ནག་པོ་དཀྱིལ་ཆོག་ལས། མདུན་བསྐྱེད་དང་འབྲེལ་བའི་ཚེ་བདག་བསྐྱེད་ལའང་མཆོད་པ་དྲུག་ཆར་བྱེད་པར་གསུངས་པའང་འདི་དང་མཐུན་པའི་ཕྱིར་རོ། །དེས་ན་སྒྲུབ་ཐབས་ཡན་ལག་བཞི་དྲུག་གཉིས་ལས། ཐོ་རངས་ཀྱི་ཐུན་ནས་བསྒོམ་པའི་དབང་དུ་བྱས་ནས་ཡི་གེ་བརྒྱ་པའི་བཟླས་པ་མ་གསུངས་ཀྱང་། འདིར་ཕྱི་མ་རེད་དམ། སྲོད་ཀྱི་དུས་སུ་བསྒོམ་པའི་དབང་དུ་བྱས་ནས། སྐྱབས་འགྲོ་སེམས་བསྐྱེད་ཡི་གེ་བརྒྱ་པའི་བསྒོམ་བཟླས་ཀྱང་སྦྱར། སྒྲུབ་ཐབས་གཉིས་ལས། ཐུན་མོང་མ་ཡིན་པའི་སྲུང་འཁོར་གྱི་བསྒོམ་བཟླས་མ་གསུངས་ཀྱང་། འདིར་དེའང་སྦྱར་ཏེ། སྒྲུབ་ཐབས་ཡན་ལག་དྲུག་པ་རྫོགས་པར་བསྒོམས་ནས། བཟླས་པ་ཅུང་ཟད་བྱས་ལ། མདུན་གྱི་མཆོད་པ་རྣམས་བསང་སྦྱང་བྱིན་གྱིས་བརླབས་ཏེ། མཚན་སྔགས་སྔོན་དུ་འགྲོ་བའི་སྔགས་ཙམ་གྱིས་ཆུ་བཞི་ཉེར་སྤྱོད་རོལ་མོ་དང་བཅས་པ་དབུལ། ལྷ་དགུའི་ས་བོན་ཙམ་གྱིས་ནང་མཆོད་དང་ཡིད་བྱུང་དང་། བསྟོད་ཐུང་རྣམས་ཀྱིས་ཀྱང་བདག་བསྐྱེད་ལ་མཆོད་པ་ནི་མདུན་བསྐྱེད་དང་འབྲེལ་བའི་ཚེ་བདག་བསྐྱེད་ལའང་མཆོད་བསྟོད་རྒྱུན་དུ་བྱ་བའི་དོན་ཏེ། འདིའི་རིགས་ཞིབ་ཏུ་དཔྱད་ན་མང་པོ་ཞིག་ཡོད་དོ། །མཆོད་བསྟོད་འདི་ལ་རོལ་མོ་དངོས་སུ་བྱས་ཀྱང་འགལ་བ་མི་སྣང་སྟེ། རྗེ་བཙུན་གྱི་ཚོགས་འཁོར་གྱི་གཞུང་ལས་བདག་བསྐྱེད་ཀྱི་དཀྱིལ་འཁོར་མཆོད་པ་ལའང་ཐུན་མཚམས་ཀྱི་སྐབས་སུ་བཤད་པ་བཞིན་རྒྱས་པར་བྱ་བར་གསུངས་པའི་ཕྱིར་དང་། བདག་བསྐྱེད་ལ་རོལ་མོ་མི་བྱེད་པར་བཤད་པ་ནི་བཟླས་པ་མ་ཚར་གྱི་བར་ལ་དགོངས་པའི་ཕྱིར་རོ། །དེ་ལྟར་མཆོད་བསྟོད་ཟིན་ནས་དཀྱིལ་འཁོར་གྱི་འཁོར་ལོ་བསྡུས་ཏེ། ཕྱག་གཉིས་པའི་ང་རྒྱལ་གྱིས་སྟ་གོན་གྱི་བྱ་བ་རྣམས་བྱའོ། །བཞི་པ་སྟ་གོན་གྱི་ཆོ་ག་དངོས་ལ་བཞི་ལས། དང་པོ་སའི་ལྷ་མོ་སྟ་གོན་ནི། སྔར་གྱི་མཎྜལ་གྱི་གནས་བསྲུང་བསལ་ནས། དྲི་བཟང་གི་ཐིག་ལེ་བྱས་ལ། མེ་ཏོག་གི་ཚོམ་བུ་བཀོད་དེ་དེར་ལྷ་མོ་ཡན་ལག་བཞི་རྫོགས་སུ་བསྐྱེད་པ་སོགས་ས་ཆོག་གི་སྐབས་སུ་བཤད་པ་བཞིན་བྱ་བ་ལས། མཁྱེན་པར་གསོལ་བའི་སྐབས་སུ་སྔར་གྱི་ཚིགས་བཅད་ཀྱི་རྗེས་སུ། སྐྱོབ་པ་སངས་རྒྱས་ཐམས་ཅད་ཀྱི། །ཞེས་སོགས་ཚིགས་བཅད་གཅིག་སྦྱར་བར་བྱའོ། །སའི་ལྷ་མོ་སྟ་གོན་ལ་སྤྱིར་ཡན་ལག་བཞི་རྫོགས་སུ་བསྐྱེད་པ་དང་། རང་གི་ལག་པ་གཡས་པའི་མཐིལ་དུ་ཧཱུྃ་ཡིག་འབར་བ་བསྒོམས་ནས། སོར་མོ་དབུས་མ་གསུམ་ས་ལ་བརྡབས་པས་སའི་ལྷ་མོ་བྱོན་པར་བསམས་པ་དང་། རང་གི་ལག་པ་གཡས་པའམ། གཡོན་པའི་སྲིན་ལག་གི་རྩ་བར་ཧཱུྃ་ཡིག་བསྒོམས་ནས་སྔ་མ་བཞིན་བསམས་པ་དང་། རང་གི་སྙིང་གར་བསྐྱེད་ནས་མདུན་དུ་བྱོན་པར་བསམ་པ་རྣམས་སུ་ཡོད་པ་ལས། འདིར་ནི་དང་པོའི་དབང་དུ་བྱས་པའོ། །མཁྱེན་གསོལ་བྱེད་པའི་ཚེ། འགའ་ཞིག་སའི་ལྷ་མོ་ལ་པུས་མོ་མི་འཛུགས་ཟེར་ཀྱང་། རྣམ་སྣང་མངོན་བྱང་ལས། པུས་མོ་གཡས་པའི་ལྷ་ང་ས་ལ་བཙུགས་ཏེ། རྡོ་རྗེ་དྲིལ་བུ་སྤོས་དང་བཅས་པ་བཟུང་སྟེ། སྐྱོབ་བ་སངས་རྒྱས་ཐམས་ཅད་ཀྱི། །ཞེས་སོགས་བྱེད་པར་གསུངས་པས་དེ་བཞིན་དུ་བྱའོ། །མཁྱེན་གསོལ་བྱས་པའི་རྗེས་སུ། རིག་པ་འཛིན་པ་ཁྱོད་ཀྱིས་དཀྱིལ་འཁོར་བྲིས་ཤིག་ཅེས་པའི་གནང་བ་བྱིན་ནས་ཡེ་ཤེས་པ་དེ་ཉིད་ལ་ཐིམ་པར་བྱའོ། །དེ་ནས་སའི་ལྷ་མོའི་གཏོར་མ་ས་གཙང་སར་བསྐྱལ། མེ་ཏོག་གི་ཚོམ་བུ་བསལ་བར་བྱའོ། །གཉིས་པ་ལྷ་སྟ་གོན་ལ་བཞི་སྟེ། རྟེན་བསྐྱེད་པ། བརྟེན་པ་བསྐྱེད་པ། མཆོད་བསྟོད་བྱ་བ། སྙན་གསན་དབབ་པའོ། །དང་པོ་ནི། དབང་ཆུར། བའི་རྣམ་ལྔ་དང་། བདུད་རྩི་ལྔ་དང་། དྲི་ལྔ་སྦྱར་བ་དབང་ལྡན་གྱི་མཚམས་སུ་བླུགས་ལ། དབང་ལྡན་གྱི་མཚམས་དེ་ཉིད་ནས་ལག་པ་གཡས་པས་གཡས་སྐོར་དུ་བྱུགས་ཏེ། ཨོཾ་མེ་དཱི་ནི་བཛྲཱི་བྷ་ཝ་བནྡྷ་ཧཱུྃ་ཧཱུྃ་ཧཱུྃ་ཕཊ། ཅེས་བརྗོད་ཅིང་། པཉྩ་རེ་ཁཱའི་རྩིག་པའི་ནང་ཕན་ཆད་དུ་བྱུགས་པས། འོག་ཐམས་ཅད་རྡོ་རྗེའི་ས་གཞིར་བསམ་མོ། །ཡང་མཐའ་མ་ལེགས་པར་བསྐོར་ནས་བྱུགས་ཤིང་། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ། ཅེས་བརྗོད་པས་སྲུང་བའི་འཁོར་ལོ། རྡོ་རྗེའི་རྭ་བ་དང་། གུར་དང་། བླ་བྲེ་དང་། དྲྭ་བ་ལ་སོགས་པ་དང་། དུར་ཁྲོད་བརྒྱད་ཀྱང་གསལ་བར་བསམ། བྱུགས་པ་རྫོགས་ཟིན་པ་དང་། ལག་པ་མ་བཏེགས་པར་དེར་མེ་ཏོག་བསྐྱུར་ཏེ། དེར་དཀྱིལ་འཁོར་གྱི་འཁོར་ལོ་གཞལ་ཡས་ཁང་གདན་དང་བཅས་པ་སྐད་ཅིག་གིས་བསམ་མོ། །ཡང་ན་སྲུང་བའི་འཁོར་ལོ་དང་གཞལ་ཡས་ཁང་གི་བར་འབྲིང་གི་མངོན་རྟོགས་བཞིན་དུ་བསྒོམ་པར་བྱ་སྟེ། གཙོ་བོར་འདི་མཛད་དོ། །ཞེས་གསུངས་ཏེ། ཕྱག་ལེན་ལ་ཐོག་མར་ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་བསྒོམས་ནས། ཧཱུྃ་ལས་འོད་འཕྲོས་པའི་ཚུལ་གྱིས་སྔ་མ་ལྟར་སྲུང་བའི་འཁོར་ལོ་བསྒོམ་པར་མཛད་པ་ནི་ལེགས་ཏེ། ས་ཆེན་གྱིས་སྣང་བའི་དངོས་པོ་རེ་ཞིག་མ་བསལ་ན་ལྷ་བསྐྱེད་མི་རུང་བར་གསུངས་པས། སྭ་བྷཱ་ཝའི་སྔགས་ཀྱིས་སྟོང་པར་སྦྱང་དགོས། དེའི་སྔོན་དུ་བུམ་བསྐྱེད་ཀྱི་སྐབས་སུ་གསུངས་པ་ལྟར་བགེགས་བསལ་དགོས་པའི་ཕྱིར་དང་། སྲུང་འཁོར་གང་ལས་སྤྲོ་བའི་གཞི་སྣ་ཚོགས་རྡོ་རྗེའང་ངེས་པར་དགོས་པའི་ཕྱིར། སྲུང་འཁོར་གྱི་ནང་དུ་ཤར་དུ་གཏུམ་དྲག་གི་དུར་ཁྲོད། ཅེས་སོགས་དུར་ཁྲོད་སྐད་ཅིག་གིས་བསྐྱེད་ཅིང་ངག་ཏུ་གསལ་བཏབ། དེའི་ནང་དུ་ཆོས་འབྱུང་བདག་བསྐྱེད་ལྟར་བསྐྱེད་ནས། དེར་གཞལ་ཡས་ཁང་སྐད་ཅིག་གིས་བསྐྱེད་པ་དང་། འབྲིང་པོ་ཡན་ལག་དྲུག་པ་ལྟར་བསྐྱེད་པ་གང་རུང་བྱ་བར་གསུངས་པ་ལས། གཙོ་བོར་འདི་མཛད་ཅེས་གསུངས་པའི་དོན་ནི། རྩ་རྒྱུད་ཕྱི་མའི་ལྔ་པ་ལས། གཞལ་ཡས་ཁང་སྐད་ཅིག་གིས་བསྐྱེད་པར་གསུངས་པ་དེ། མངོན་རྟོགས་ཚུལ་བཅུ་བཞིའི་ས་བོན་ལས་བསྐྱེད་པ་དང་། སྐད་ཅིག་གིས་བསྐྱེད་པ་གཉིས་ལ་སྦྱར་བ་ལྟར་མདུན་བསྐྱེད་ལའང་རུང་བ་དང་། དང་པོའི་བརྒྱད་པ་ལས། འབྱུང་བཞི་འཁོར་ལོ་དང་བཅས་པ་ལ་བར་དོ་འདྲེས་པ་ལས་གཞལ་ཡས་ཁང་བསྐྱེད་པར་གསུངས་པ་དེ། ཚུལ་བཅུ་བཞིའི་ཡན་ལག་དྲུག་པའི་ཕྱོགས་ཀྱི་མངོན་རྟོགས་དྲུག་ལ་སྦྱར་བ་ལྟར་མདུན་བསྐྱེད་ལའང་རུང་བ་ལས། འདིར་བདག་བསྐྱེད་ལ་ཡན་ལག་དྲུག་པ་བསྒོམ་པའི་སྐབས་ཡིན་པས། མདུན་བསྐྱེད་ལའང་གཞལ་ཡས་ཁང་ཡན་ལག་དྲུག་པ་ལྟར་བསྒོམ་པ་གཙོ་བོར་མཛད་ཅེས་པའི་དོན་ཏོ། །འདིར་ལག་ལེན་པ་ཁ་ཅིག་མདུན་བསྐྱེད་ཀྱི་གཞལ་ཡས་ཁང་ལ་བར་དོ་བསྲེ་བ་མི་རིགས་ཏེ། མདུན་བསྐྱེད་ཀྱི་གཞལ་ཡས་ཁང་ཡིན་པའི་ཕྱིར་ཞེས་སྨྲའོ། །དེ་ནི་ཤིན་ཏུ་མི་འཐད་དེ། སྤྱིར་གཞལ་ཡས་ཁང་ཡིན་པ་ཙམ་གྱིས་བར་དོ་བསྲེ་བར་མི་རིགས་ན། གཞན་ལུགས་ཀྱི་བླ་མ་ཁ་ཅིག་དེ་ལྟར་སྨྲ་བ་ལ། གནད་ཀྱི་ཟླ་ཟེར་ལས། ཇི་ལྟར་སྒོམ་པ་པོ་འབྱུང་བའང་། །ཞེས་པའི་དོན་བར་སྲིད་བསྲེ་བ་ལ་མི་འདོད་པའི་རྒྱ་གར་བ་སུའང་མེད་པའི་ལུང་དང་། གཟུགས་ཀྱི་རྣམ་པ་གཞལ་ཡས་ཁང་ཡིན་ཀྱང་ངོ་བོ་རྣམ་སྣང་ཡིན་པས། བར་སྲིད་བསྲེ་བ་མི་འགལ་བའི་རིགས་པ་གསུངས་པ་དེ་ཁས་ལེན་ན་དེ་ཇི་ལྟར་འཆད། ཁས་མི་ལེན་ན་ལན་ཇི་ལྟར་འདེབས། དབང་ཆུར། གཞལ་ཡས་ཁང་འབྲིང་པོ་ཡན་ལག་དྲུག་པ་ལྟར་བསྐྱེད་པར་གསུངས་པའང་གཞི་དང་། རྒྱུ་དང་། རྐྱེན་དང་། གནས་ཐབས་ཀྱི་ཡན་ལག་བཞི་པོ་ཡན་ལག་དྲུག་པ་ལྟར་ཚང་དགོས་པར་གསུངས་པའི་དོན་ཡིན་པས། བར་དོ་མི་བསྲེ་ན་རྐྱེན་གྱི་ཡན་ལག་ཆད་པས་ཆོ་གའི་གཙོ་བོ་ཆད་པར་མི་འགྱུར་རམ། གལ་ཏེ་མདུན་བསྐྱེད་ཡིན་པས་བར་དོ་བསྲེ་བར་མི་རུང་ན། སྟ་གོན་གྱི་སྐབས་སུ་བདག་བསྐྱེད་ཀྱི་དཀྱིལ་འཁོར་ནམ་མཁར་བཏེག་པའི་ཚེ་དེ་ཉིད་མདུན་བསྐྱེད་ལ་བསྲེ་དགོས་པས། བར་དོ་གཤེགས་གསོལ་བྱས་ནས་བསྲེ་དགོས་པར་འགྱུར་ཞིང་། སྤྱིར་མདུན་བསྐྱེད་ལ་བར་དོའི་སྦྱོང་བྱེད་མེད་ན། མདུན་སྐྱེད་འགའ་ཞིག་མངོན་བྱང་ལས་བསྐྱེད་པའི་ཚེ་མངོན་བྱང་གསུམ་པ་བར་དོའི་སྦྱོང་བྱེད་མིན་པར་འགྱུར་ལ། བར་དོའི་སྦྱོང་བྱེད་ཡིན་ན་ནི། རྟེན་གཞལ་ཡས་ཁང་ལའང་ཇི་ལྟར་འགལ་ལེགས་པར་སོམས་ཤིག གལ་ཏེ་ཇི་ལྟར་སྒོམ་པ་པོ་འབྱུང་བའང་། ཞེས་པ་བདག་བསྐྱེད་ཀྱི་ཁྱད་ཆོས་ཡིན་པས་མདུན་བསྐྱེད་ལ་མི་འཇུག་གོ་སྙམ་ན། ཌོཾ་བི་ལུགས་ཀྱི་དབང་ཆུར་དངོས་གཞིའི་སྐབས་སུ། འཁོར་ལོ་ས་དང་ཆུ་ནི་སྔོན། །ཅི་ལྟར་རིགས་པས་བྱིན་ཟ་དང་། །ལྷ་རྣམས་ཀྱིས་ནི་རླུང་ཆེན་དང་། །ཇི་ལྟར་སྒོམ་པ་པོ་འབྱུང་བའང་། །ཆོས་འབྱུང་ལས་སྐྱེས་འཁོར་ལོ་ནི། །གྲུ་བཞི་པ་ལ་སྒོ་བཞི་པ། །ཞེས་དྲངས་པའི་ཚེ་ཇི་ལྟར་སྒོམ་པ་པོ་འབྱུང་བའང་། ཞེས་པའི་ཚིག་དྲངས་པར་མི་རུང་བར་འགྱུར་ཏེ། འདིར་ཡབ་ཀྱི་སྐབས་ཡིན་པས། འཕར་མ་གཉིས་དག་སྐྱོན་མེད་པ། །ཞེས་པ་མ་དྲངས་པར། དེའི་ཚབ་ཏུ། གྲུ་བཞི་པ་ལ་སྒོ་བཞི་པ། །ཞེས་གསུངས་པ་བཞིན་ནོ། །བདག་མདུན་ཐ་མི་དད་དུ་བསྒྲུབ་པའི་ཚེ་བདག་བསྐྱེད་ཀྱི་གཞལ་ཡས་ཁང་མདུན་བསྐྱེད་ལ་བསྲེས་པའི་ཚེ། དེ་མདུན་བསྐྱེད་ཀྱི་གཞལ་ཡས་ཁང་མ་ཡིན་པར་འགྱུར་ཏེ། བར་དོ་བསྲེས་པའི་གཞལ་ཡས་ཁང་ཡིན་པའི་ཕྱིར། གཞན་ཡང་ས་ཆོག་གིས་སྐབས་སུ་གཙོ་བོས་གཞལ་ཡས་ཁང་ནམ་མཁར་བཏེག་པ། ལྷ་སྟ་གོན་གྱི་ཚེ་ཕབ་པ་དེའང་མདུན་བསྐྱེད་ཀྱི་གཞལ་ཡས་ཁང་མ་ཡིན་པར་འགྱུར་ཏེ། བར་དོ་བསྲེས་པའི་ཕྱིར། དེས་ན་མདུན་བསྐྱེད་ལ་བར་དོ་མི་བསྲེ་བར་འདོད་པ་ན་ི་ལུང་རིགས་མན་ངག་གང་ཡང་མེད་མོད་ཀྱི་སྐྱེ་འཆི་བར་དོ་གསུམ་མམ། སྐྱེ་གནས་བཞི་འམ། ཐ་མལ་པའི་སྣང་བ་ཐམས་ཅད་སྦྱང་གཞིར་བྱས་ནས་སྦྱོང་བྱེད་བདག་བསྐྱེད་དང་མདུན་བསྐྱེད་གང་བསྒོམ་ཀྱང་སྦྱང་གཞི་སྦྱོང་བ་ལ་ཁྱད་མེད་པའི་གནད་མ་རྟོགས་པའི་བརླབ་ཆོལ་ཡིན་ནོ། །མདོར་ན་རྗེ་བཙུན་རྩེ་མོའི་དབང་ཆུ་གཉིས་ལས། མདུན་བསྐྱེད་ལ་བར་དོ་བསྲེ་བར་དངོས་སུ་གསུངས་པ་དེ་ཉིད་ཚད་མར་མཛོད་ལ། ལག་ལེན་གྱི་གཙོ་བོ་མི་གཅོད་པར་ཞུ་ཞེས་ལག་ལེན་པ་རྣམས་ལ་ཐལ་མོ་སྦྱར་ནས་གསོལ་བ་འདེབས་སོ། །དེས་ན་སྲུང་འཁོར་དུར་ཁྲོད་དང་བཅས་པ་བསྒོམས་པའི་རྗེས་སུ། གཞལ་ཡས་ཁང་ཡན་ལག་བཞི་ལྡན་དུ་བསྐྱེད་ནས། རྒྱན་དུ་མས་བརྒྱན་པའི་གཞལ་ཡས་ཁང་གི་ནང་གི་ལྷ་སྣམ་ཤར་དཀར་ཞེས་སོགས་ནས། གདན་བསྒོམ་པ་ལ་འཇུག་པའམ། སྲུང་འཁོར་གྱི་ནང་དུ་གཞལ་ཡས་ཁང་ཡན་ལག་བཞི་ལྡན་དུ་བསྐྱེད་ནས། ལྷ་སྣམ་གྱི་གོང་དུ་དུར་ཁྲོད་བརྒྱད་བསྐྱེད་པ་བདག་བསྐྱེད་ལྟར་ཡང་རུང་སྟེ། གང་ལྟར་ཡང་དུར་ཁྲོད་ནི་སྐད་ཅིག་གིས་བསྐྱེད་པའོ། །བསྒོམ་པའི་གནས་ནི་རྡོ་རྗེ་མཁའ་འགྲོའི་དགོངས་པ་ལྟར་རྡོ་རྗེ་རྭ་བའི་ཕྱི་རོལ་དུ་བསྒོམ་པ་དང་། སྡོམ་འབྱུང་གི་དགོངས་པ་རྡོ་རྗེ་རྭ་བའི་ནང་དུ་བསྒོམ་པ་གཉིས་ཡོད་པ་ལས། རྗེ་བཙུན་གྱིས་རྒ་སྟོན་སྤྲིང་ཡིག་ལས། འཁོར་འདས་དབྱེར་མེད་ཡིན་པས་དེ་གཉིས་ཁྱད་པར་མེད་པར་གསུངས་སོ། །གཉིས་པ་ནི། དེ་ནས་ལག་པ་བཀྲུས་ཏེ། དབུས་སུ་དྲིའི་ཐིག་ལེ་གྲུ་བཞི་པ་བྱས་པའི་སྟེང་དུ་མེ་ཏོག་ཚོམ་བུ་གཅིག་བཞག་སྟེ། ཧཱུྃ་ཤྲཱི་ཧེ་བཛྲ་ཡ་ན་མཿཞེས་བརྗོད་པ་ཙམ་གྱིས་དཔལ་ཀྱེ་རྡོ་རྗེ་སྐད་ཅིག་གིས་བསྐྱེད། ཡང་དེ་ཉིད་དུ་མེ་ཏོག་ཚོམ་བུ་གཅིག་བཞག་སྟེ། ནྃ་ནཻ་རཱཏྨ་ན་མཿཞེས་བརྗོད་པས་ཡུམ་རྡོ་རྗེ་བདག་མེད་མ་སྐད་ཅིག་གིས་བསྐྱེད་དེ། ཡབ་ཡུམ་གཉིས་ཀ་གསལ་གདབ། དེ་བཞིན་དུ་ཤར་ལ་སོགས་པར་དྲིའི་ཐིག་ལེ་ཟླུམ་པོ་རེ་རེའི་སྟེང་དུ། གྃ་གཽ་རཱི་ན་མཿཞེས་བྱ་བ་ལ་སོགས་པ་བརྗོད་ཅིང་མེ་ཏོག་ཚོམ་བུ་རེ་བཞག་ལ་ལྷ་མོ་བརྒྱད་པོའང་སྙིང་པོ་ཚིག་ཙམ་གྱིས་བསྐྱེད་དེ་གསལ་གདབ་པ་ནི་དམ་ཚིག་སེམས་དཔའ་བསྐྱེད་པ་ཡན་ལག་དང་པོ་བསྙེན་པའོ། །འདིར་གཙོ་བོ་ལ་དྲིའི་ཐིག་ལེ་གྲུ་བཞི་དང་། འཁོར་རྣམས་ཟླུམ་པོར་གསུངས་པའི་དོན་ལ་ཁ་ཅིག་གཙོ་བོ་ཆོས་དབྱིངས་ཡེ་ཤེས་ལ་དམིགས་པའི་གྲུ་བཞི་བྱེད་པ་ཡིན་ཞེས་སྨྲ་བ་ནི་མི་འཐད་དེ། ཆོས་དབྱིངས་ཡེ་ཤེས་ལ་དམིགས་མ་དམིགས་པའི་ཁྱད་པར་མེད་པའི་ཕྱིར་དང་། གྲུ་བཞི་ལ་ཆོས་དབྱིངས་ཡེ་ཤེས་ཀྱི་མཚོན་དོན་བཤད་དུའང་མེད་པའི་ཕྱིར་རོ། །འོ་ན་ཇི་ལྟར་སྙམ་ན། སྤྱིར་གཙོ་འཁོར་ཀུན་ལ་དྲིའི་ཐིག་ལེ་ཟླུམ་པོས་ཆོག་ཀྱང་གཙོ་བོ་ལ་གྲུ་བཞིར་བྱེད་པ་ནི་ཕྱོགས་མི་འཛོལ་བའི་ཆེད་ཡིན་ཞེས་གསུང་ངོ་། །མེ་ཏོག་གི་ཚོམ་བུ་བཞག་ནས། དབུས་སུ་ཧཱུྃ་ཤྲཱི་ཧེ་བཛྲ་ཡ་ན་མཿདཔལ་ཀྱེ་རྡོ་རྗེ་ཞེས་སོགས་ཕྱོགས་སྔོན་ལ་བརྗོད་པ་དང་། སྔགས་ཐོག་མར་བརྗོད་ནས་དབུས་སུ་དཔལ་ཀྱེ་རྡོ་རྗེ་ཞེས་སོགས་ཕྱོགས་རྗེས་ལ་བརྗོད་པའི་ངག་འདོན་གཉིས་ལ་ཁྱད་པར་གང་ཡང་མེད་དེ། སྙིང་པོ་ཚིག་ཙམ་གྱིས་བསྐྱེད་པ་ཞེས་བྱ་བ་སྔགས་བརྗོད་པ་ཙམ་གྱིས་ལྷ་སྐད་ཅིག་གིས་བསྐྱེད་པ་ཡིན་གྱི། སྔགས་དེ་ཡོངས་སུ་གྱུར་པ་ལས་ལྷ་བསྐྱེད་པ་མ་ཡིན་པའི་ཕྱིར་རོ། །སམྦཱུ་ཊའི་ཊཱི་ཀར་སྙིང་པོ་ཚིག་ཙམ་ལས་བསྐྱེད་པ་ཞེས་གསུངས་པ་རྣམས་ནི་ས་བོན་ལས་བསྐྱེད་པའི་མིང་གི་རྣམ་གྲངས་སུ་སྣང་བས། སྙིང་པོ་ཚིག་ཙམ་གྱིས་བསྐྱེད་པ་དང་དོན་མི་གཅིག་གོ །ཡན་ལག་གཉིས་པ་ཉེ་བར་སྒྲུབ་པ་ནི་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའོ། །ཡན་ལག་གསུམ་པ་སྒྲུབ་པ་ནི་སྔར་གྱི་ནམ་མཁའ་ལ་བཏེག་པ་དེ་དགུག་པའོ་ཞེས་གསུངས་པ་ནི་འདི་ཉིད་ཀྱི་བདག་བསྐྱེད་ཀྱི་སྐབས་སུ་ལུགས་གཉིས་གསུངས་པའི་དང་པོ་དེ་ཉིད་ཡིན་གྱི། ས་ཆོག་གི་སྐབས་ཀྱི་ནམ་མཁའ་ལ་འདེགས་པ་ལ་དགོངས་པ་ནི་མ་ཡིན་ཏེ། དེ་ཡོད་ན་དེ་ཉིད་ཕབ་ནས་གསལ་བཏབ་པས་ཆོག་གི སྐབས་འདིར་ཡན་ལག་བཞི་རྫོགས་མི་དགོས་པའི་ཕྱིར་རོ། །སྔར་ནམ་མཁའ་ལ་བཏེག་པ་མེད་ན། རང་གི་སྙིང་གའི་ཧཱུྃ་གི་འོད་ཀྱིས་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ལ། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བའོ། །ཡན་ལག་བཞི་པ་སྒྲུབ་པ་ཆེན་པོ་ནི་དབང་བསྐུར་གི་ལྷ་སྤྱན་དྲངས་ལ་དབང་བསྐུར་བར་གསོལ་བ་བཏབ་སྟེ། དབང་བསྐུར་ནས་རིགས་ཀྱི་བདག་པོས་དབུར་བརྒྱན་པར་བྱ་བའོ། །འདི་དང་འོག་དངོས་གཞིའི་ཡེ་ཤེས་པ་དང་། དབང་ལྷ་ལ་མཆོད་པ་གསལ་བར་མ་གསུངས་ཀྱང་། ཡེ་ཤེས་པ་གཉིས་ལ་ཆུ་བཞི་སྔོན་དུ་འགྲོ་བའི་ཉེར་སྤྱོད་དང་། ཡིད་བྱུང་དང་། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་པ་མཛད་ཅིང་། དབང་ལྷ་གཉིས་ལ་མཆོད་པ་གཉིས་འདྲ་བ་ལས། ཞེ་སྡང་རྡོ་རྗེར་ཕྱག་འཚལ་བསྟོད། །སོགས་ཀྱིས་བསྟོད་པ་མཛད་པ་ནི་ཆོ་ག་རྒྱས་པའི་སྐབས་ཡིན་པས་མཆོད་བསྟོད་རྒྱས་པར་བྱ་བ་ཉིད་ཤིན་ཏུ་ལེགས་པ་ཡིན་ནོ། །གསུམ་པ་ནི། དེ་ལྟར་ཡན་ལག་བཞི་རྫོགས་བྱས་ལ། དེ་ནས་མཆོད་པ་བྱ་སྟེ། འདིར་ལག་ལེན་པ་ཁ་ཅིག མཆོད་ཡུལ་ཁྱད་པར་བ་སྤྱན་འདྲེན་པར་བྱེད་པ་ནི། རྗེ་བཙུན་རྩེ་མོས། ཐུན་མཚམས་ཀྱི་བྱ་བའི་སྐབས་སུ། དཀྱིལ་འཁོར་གྱི་གཙོ་བོ་དེ་ཉིད་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཀྱི་ངོ་བོར་མོས་ལ། ཕྱག་དང་མཆོད་པ་སོགས་བྱ་བར་གསུངས་པ་དང་འགལ་བས་འདིའི་ལུགས་མ་ཡིན་ནོ། །དེ་ནས་མར་མེ་ལ་སོགས་པ་ཐམས་ཅད་ལེགས་པར་སྦར་བ་ལ་སོགས་པ་བྱས་ལ། བྱིན་རླབས་སྔར་སྔོན་འགྲོའི་སྐབས་སུ་བྱས་ཟིན་པ་དེ་ཉིད་དྲན་པའི་ཆེད་དུ། སྐབས་འདིར་ཡང་བསང་སྦྱང་བྱིན་རླབས་བྱས་ཏེ། ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོའི་བར་ཚིགས་བཅད་དང་སྔགས་སྔར་ལས་དང་པོ་པའི་བྱ་བའི་སྐབས་སུ་བཤད་ཟིན་པ་ལྟར་བྱའོ། །ཁྱད་པར་དུ་སྐབས་འདིར་ན་བཟའི་མཆོད་པ་བྱ་སྟེ། འབྱོར་པ་ཡོད་ན་ལྷ་རེ་རེ་ལ་ན་བཟའ་ཟུང་དུ་སྦྱར་བ་རེ་དབུལ། མ་འབྱོར་ན་ཐམས་ཅད་ཀྱི་སྤྱིར་ན་བཟའ་གཅིག་བཞག་ལ། དེ་ལ་བདུད་རྩིས་བསང་སྦྱངས་སྔོན་དུ་འགྲོ་བའི་བྱིན་རླབས་བྱས་ལ། སྲབ་འཇམ་ཡང་བ་ལྷ་ཡི་གོས། །ཞེས་སོགས་ཀྱི་ཚིགས་བཅད་སྔགས་དང་བཅས་པས་དབུལ་ལོ། །འདི་ནི་ནག་པོ་དཀྱིལ་ཆོག་དང་མཐུན་པར་སྣང་ལ། ཌོཾ་བི་ལུགས་ཀྱི་དཀྱིལ་ཆོག་རྣམས་ལས། ན་བཟའི་མཆོད་པ་འདི་ཐོག་མར་འབྱུང་སྟེ། བཟང་པོ་ཡོངས་གཟུང་ལས། ཡན་ལག་བཞི་རྫོགས་སུ་བྱས་པའི་དེ་མ་ཐག་ཏུ། དེ་ནས་གོས་ཟུང་དང་བཅས་པའི། །སྣོད་རྣམས་ཇི་བཞིན་གནས་པ་ལ། །གོས་འབུལ་བ་ཡི་སྔགས་ཀྱིས་ནི། །སོ་སོར་ལྷ་ལ་དབུལ་བར་བྱ། །ཨོཾ་བཛྲ་ཝསཏྲ་ཡེ་ཧཱུྃ་སྭཱ་ཧཱ། སྔར་བསང་བྱས་པ་གཙང་མ་ཡི། །མཆོད་ཡོན་ལ་སོགས་མཆོད་པར་བྱ། །དེ་ནས་བསྟོད་པ་ངེས་བརྗོད་དེ། །ཞེས་དང་། རིན་ཆེན་འབར་བ་ལས་ཀྱང་དེ་བཞིན་གསུང་པའི་དོན། རྗེ་བཙུན་རྩེ་མོས། གོས་ཟུང་གི་མཆོད་པ་ཐོག་མར་གསུངས་པའི་ཕྱིར་རོ། །དེ་ནས་ནང་བདུད་རྩིའི་མཆོད་པ་དང་། ཡིད་བྱུང་དང་། བསྟོད་ཐུང་དང་། བསྟོད་རིང་རྣམས་ནི་ལས་དང་པོ་པས་བྱ་བའི་སྐབས་སུ་བཤད་པ་བཞིན་བྱའོ། །ནག་པོའི་དཀྱིལ་ཆོག་ལས། བསྟོད་པ་ལ་དེ་ཉིད་ལྔ་པ་མཛད་ལ། ཌོཾ་བི་ལུགས་ཀྱི་དཀྱིལ་ཆོག་ལས་ནི། དེ་ཝ་དྷ་ཏུའི་བསྟོད་པ་ཁོ་ན་མཛད་པར་སྣང་ངོ་། །བཞི་པ་ནི་ལག་པ་གཡས་པས་རྡོ་རྗེ་དང་བཅས་པས་སྤོས་རེང་བཟུང་། གཡོན་པས་དྲིལ་བུ་གཅད་གཏུབས་སུ་དཀྲོལ། པུས་མོ་གཡས་པའི་ལྷ་ང་ས་ལ་བཙུགས་ནས། ཧཱུྃ་ཧེ་རུ་ཀ་དཔལ་དཔའ་བོ་ཆེ། །ཞེས་སོགས་ཀྱིས་ལྷ་ལ་སྙན་གསན་དབབ་སྟེ། ཚིགས་འདི་དག་གསང་བ་སྤྱི་རྒྱུད་ལས། ཤཱཀྱ་ཐུབ་པ་བཅོམ་ལྡན་འདས། །རིག་པའི་རྒྱལ་པོར་ཕྱག་འཚལ་བསྟོད། །ཞེས་སོགས་འབྱུང་བ་དཀྱིལ་འཁོར་སོ་སོ་ལ་འདོན་པ་ཁ་སྤོ་བ་ཡིན་ཅིང་། བཟང་པོ་ཡོངས་གཟུང་ལས། རྡོ་རྗེ་འཆང་ཆེན་བདག་མིང་འདི། །ཞེས་སོགས་ཚིགས་བཅད་གཉིས་ཀྱིས་སྙན་གསན་དབབ་པར་གསུངས་ཀྱང་། རིན་ཆེན་འབར་བ་དང་། ནག་པོ་པའི་དཀྱིལ་ཆོག་གཉིས་ཆར་ལས་ཚིག་འདི་ཁོ་ན་བཞིན་འབྱུང་བའི་དོན་བཤད་ན། ཚིག་རྐང་དང་པོ་གཉིས་ཀྱིས་དཀྱིལ་འཁོར་གྱི་གཙོ་བོ་ལ་ཕྱག་འཚལ་ནས་ལྷག་མ་རྣམས་ཀྱིས་བཀའ་དྲིན་ཞུ་བ་སྟོན་ཏེ། འདི་ལ་བསམ་པའི་སྒོ་ནས་བཀའ་དྲིན་ཞུ་བ་དང་། སྦྱོར་བའི་སྒོ་ནས་བཀའ་དྲིན་ཞུ་བ་གཉིས་ལས། དང་པོ་ལ། དངོས་ཀྱི་བསམ་པ། ཆེད་དུ་བྱ་བའི་བསམ་པ། དེས་ན་བཀའ་དྲིན་གནང་བར་རིགས་པ་གསུམ་ནི། དཀྱིལ་འཁོར་ཐུགས་རྗེའི་བདག་ཉིད་ཅན། །ཞེས་སོགས་ཚིག་རྐང་གཉིས་དང་། གསུམ་དང་། གཅིག་གིས་སྟོན་ནོ། །གཉིས་པ་ལ་གང་ལ་བཀའ་དྲིན་ཞུ་བའི་ཡུལ་དང་། གང་གི་ཆེད་དུ་བཀའ་དྲིན་ཞུ་བའི་སྦྱོར་བ་དང་། བཀའ་དྲིན་རང་གི་ངོ་བོ་དང་གསུམ་ལས། དང་པོ་ནི། འགྲོ་བ་འཁོར་ལོས་དོན་མཛད་པའི། །ཞེས་སོགས་ཚིག་རྐང་དགུ་སྟེ། དང་པོ་གཉིས་ཀྱིས་ནི་དངོས་སུ་བསྐྱེད་པའི་དཀྱིལ་འཁོར་སྟོན་ཏེ། དེ་ཉིད་བདག་ལ་དགོངས་སུ་གསོལ། །ཞེས་པའོ། །གཞུང་གཞན་ལས། སངས་རྒྱས་འགྲོ་འཁོར་བྱ་དོན་རྩོལ། །ཞེས་འབྱུང་བ་དང་དོན་གཅིག་སྟེ། དཀྱིལ་འཁོར་གྱི་འཁོར་ལོའི་སྒོ་ནས་འགྲོ་བའི་དོན་མཛད་པ་ཞེས་པའི་དོན་ཡིན་གྱི། འཁོར་ལོ་འགྲོ་བའི་ཁྱད་ཆོས་སུ་སྦྱར་བར་བྱ་བ་ནི་མ་ཡིན་ནོ། །འབྲས་གནས་བྱང་ཆུབ་སེམས་དཔའ་ནི་རྫོགས་པའི་སངས་རྒྱས་ས་དང་པོ་རབ་ཏུ་དགའ་བ་སོགས་ལ་གནས་པའི་ཚུལ་སྟོན་པའོ། །སྔགས་ཀྱི་ལྷ་གཞན་ནི་དཀྱིལ་འཁོར་འདི་མ་ཡིན་པའི་རྒྱུད་སྡེའི་ལྷ་གཞན་ནོ། །འཇིག་རྟེན་སྐྱོང་བའི་ལྷ་རྣམས་ནི་རྫོགས་པའི་སངས་རྒྱས་དབང་པོ་ལ་སོགས་པའི་ཚུལ་སྟོན་པའོ། །འབྱུང་པོ་མཐུ་ཆེན་ནི་རྫོགས་པའི་སངས་རྒྱས་དབང་ཕྱུག་དང་། ཁྱབ་འཇུག་ལ་སོགས་པའི་ཚུལ་སྟོན་པའོ། །སེམས་ཅན་བསྟན་ལ་དགའ་བ་ནི་རྫོགས་པའི་སངས་རྒྱས་བསྟན་པ་ལ་དགའ་བའི་ལྷ་ལ་སོགས་པའི་ཚུལ་སྟོན་པའོ། །རྡོ་རྗེ་འཛིན་པ་ནི་རྫོགས་པའི་སངས་རྒྱས་སོ་སོ་སྐྱེ་བོའི་རྡོ་རྗེ་སློབ་དཔོན་གྱི་ཚུལ་སྟོན་པའོ། །ཡང་ཚིག་རྐང་འདི་གཉིས་ལ། རིན་ཆེན་འབར་བ་ལས། གང་སུ་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །ཞེས་འབྱུང་བ་ལྟར་ན། བསྟན་པ་ལ་དགའ་བའི་ལྷའི་ཁྱད་ཆོས་སུ་སྦྱར་རོ། །ཇི་སྐད་བཤད་པ་འདི་དག་ཀྱང་རྫོགས་པའི་སངས་རྒྱས་དེ་དང་དེའི་ཚུལ་སྟོན་པ་ཁོ་ནར་བཟུང་གི་རང་རྒྱུད་པར་ནི་མི་བཟུང་སྟེ། མདུན་བསྐྱེད་ཀྱི་དཀྱིལ་འཁོར་བསྒྲུབ་པ་དང་། རབ་ཏུ་གནས་པ་དོན་གཅིག་པས། འབྱུང་པོ་རང་རྒྱུད་པ་དེར་སྟིམ་དུ་མི་རུང་བའི་ཕྱིར་རོ། །འོག་དངོས་གཞིའི་སྐབས་སུ། སྟ་གོན་གྱི་ལྷ་གཞུག་པའི་ཚེ། ཡེ་ཤེས་པའི་ཕྱི་འབྲང་གི་བགེགས་བསྐྲད་དགོས་པའི་གནད་ཀྱང་འདི་ཉིད་ཡིན་ཏེ། རྫོགས་པའི་སངས་རྒྱས་འཇིག་རྟེན་པའི་ཚུལ་སྟོན་པའི་དགོས་པའང་། འཇིག་རྟེན་རང་རྒྱུད་པའི་འཁོར་དངོས་སུ་འདུལ་བའི་ཆེད་ཡིན་པས། དེ་དག་གང་དུ་གཤེགས་པའི་སར་འཇིག་རྟེན་པའི་འཁོར་རྫུ་འཕྲུལ་ཐོབ་པ་རྣམས་ཀྱང་འོང་བས་དེ་དག་བསྐྲད་དགོས་པའི་ཕྱིར་རོ། །དངོས་གཞི་དཀྱིལ་འཁོར་བསྒྲུབ་པའི་ཚེ་ཚུལ་སྟོན་པ་དེ་དག་ཀྱང་བསྟིམ་དགོས་པའི་རྒྱུ་མཚན་ཅི་སྙམ་ན། སངས་རྒྱས་ཐམས་ཅད་དཀྱིལ་འཁོར་དེའི་ངོ་བོར་བསྒྲུབ་དགོས་པར་སཾ་བུ་ཊའི་རྒྱུད་ལས་བཤད་ལ། དེ་ལའང་དོན་དམ་ཆོས་སྐུ་ལ་ནི་བསྟིམ་བྱ་སྟིམ་བྱེད་དང་། བསྒྲུབ་བྱ་སྒྲུབ་བྱེད་སོགས་ཀྱི་སྤྲོས་པ་མེད་པས། ཀུན་རྫོབ་གཟུགས་སྐུས་བསྡུས་པ་ཐམས་ཅད་སྒྲུབ་དགོས། དེ་ལ་ལོངས་སྐུ་དང་སྤྲུལ་སྐུ་གཉིས་ལས། ཕྱི་མ་ལ་མཆོག་གི་སྤྲུལ་སྐུ་ནས། རིགས་དྲུག་གི་གཟུགས་སུ་སྟོན་པའི་བར་གང་ལ་གང་འདུལ་གྱི་སྐུ་བསམ་གྱིས་མི་ཁྱབ་པ་ཡོད་པས། དེ་ཐམས་ཅད་བསྟིམ་དགོས་པའི་དོན་ཏེ། རབ་གནས་ཀྱི་རྒྱུད་ལས། སངས་རྒྱས་ཀུན་ན་རབ་ཏུ་བཞུགས། །རབ་ཏུ་གནས་པ་གང་ཡང་མེད། །ཀུན་ཏུ་མཁའ་ལྟར་གནས་པ་ལ། །ཅིག་ཤོས་ཀྱིས་ནི་རབ་ཏུ་བརྟག །འཇིག་རྟེན་ཀུན་རྫོབ་ལ་བརྟེན་ནས། །རབ་ཏུ་གནས་པ་རབ་ཏུ་བརྟགས། །དམ་པའི་དོན་དུ་དཔྱད་པ་ན། །གང་ཞིག་གང་གིས་རབ་ཏུ་བརྟག །གཟོད་མ་ནས་ཞི་སྐྱེ་མེད་ལ། །ཅི་འདྲས་ཅི་ལྟར་རབ་ཏུ་གནས། །དང་པོའི་ལས་ཅན་སེམས་ཅན་རྣམས། །རྟོགས་པའི་རྒྱུ་རུ་མཛད་པར་ཟད། །ཅེས་དང་། རྩ་རྒྱུད་ལས། སངས་རྒྱས་ཐམས་ཅད་གཅིག་བསྡུས་པའི། །རབ་གནས་མཚན་ཉིད་བཟང་པོ་ཉིད། །ཅེས་གསུངས་པས་སོ། །གཉིས་པ་ནི། བདག་མིང་འདི་ཞེས་བགྱི་བ་ཡིས། །ཞེས་སོགས་ཚིགས་བཅད་གཅིག་སྟེ། སང་དངོས་གཞིའི་སྐབས་སུ། ཀྱེ་རྡོ་རྗེའི་དཀྱིལ་འཁོར་བསྒྲུབ་པའི་ཆེད་དུ་ཞེས་པའི་དོན་ཏོ། །གསུམ་པ་ནི། བདག་དང་སློབ་མར་བཅས་པ་ལ། །ཞེས་སོགས་ཚིགས་བཅད་གཅིག་སྟེ། རྡོ་རྗེ་སློབ་དཔོན་བདག་དང་སློབ་མར་བཅས་པ་རྣམས་ལ་འདི་ལྟ་བུའི་བསམ་པ་དང་། སྦྱོར་བ་ཡོད་པར་ཐུགས་རྗེས་དགོངས་པར་མཛད་ནས་དཀྱིལ་འཁོར་པ་དངོས་སུ་བསྐྱེད་པའི་སྟ་གོན་གྱི་ལྷ་དང་། དེར་བཅས་པ་འབྲས་གནས་བྱང་ཆུབ་སེམས་དཔའི་ཚུལ་སྟོན་པ་སོགས་རྣམས་ཀྱིས་ཐུགས་རྗེས་དགོངས་ནས་སང་དཀྱིལ་འཁོར་བསྒྲུབ་པའི་ཚེ་ཉེ་བར་མཛད་དུ་གསོལ་ཅེས་པའོ། །ཡང་རིན་ཆེན་འབར་བར། དཀྱིལ་འཁོར་དུ་ནི་ཚོགས་པ་ཀུན། །བྱིན་གྱིས་བརླབས་པར་མཛད་དུ་གསོལ། །ཞེས་འབྱུང་བ་ལྟར་ན། དཀྱིལ་འཁོར་ནི་གང་བསྟིམ་པའི་གཞི་ལ་འཆད་དགོས་པར་སྣང་ངོ་། །སྙན་གསན་དབབ་པའི་དོན་དཀྱིལ་ཆོག་སོ་སོ་རྣམས་ན་ཚིག་མང་ཉུང་དང་། འགྱུར་མི་གཅིག་པ་ཇི་སྙེད་འབྱུང་ཡང་དོན་གྱི་གོ་བ་འདི་བཞིན་དུ་ཤེས་དགོས་ལ། གཏོར་མགྲོན་གྱི་སྐབས་སུ་འཇིག་རྟེན་པ་ཐམས་ཅད་རྣམ་དག་གི་ཚུལ་གྱིས་ལྷའི་ངོ་བོར་བསྒོམས་ནས་གཏོར་མ་འབུལ་བ་དང་། དཀྱིལ་འཁོར་བསྒྲུབ་པ་དང་། རབ་གནས་ཀྱི་ཚེ་སངས་རྒྱས་གཟུགས་སྐུས་བསྡུས་པ་ཁོ་ན་བསྟིམ་དགོས་པའི་ཁྱད་པར་ཕྱེད་པ་གལ་ཆེའོ། །གསུམ་པ་བུམ་པ་སྟ་གོན་ནི། བུམ་པའི་གདན་པདྨ་དང་ཟླ་བ་ཀུན་མཐུན་ལ། ས་བོན་ནི་ཨ་བྷྱ་ལ་སོགས་པས་བྃ་ལས་བསྐྱེད་པ་དང་། པཎྜི་ཏ་ཉི་མ་སྦས་པས་སྒྲོལ་མ་ལྷ་བཅུ་གསུམ་མའི་དཀྱིལ་ཆོག་ཏུ་བྷྲཱུྃ་ལས་བསྐྱེད་པར་བཤད་ལ། དང་པོ་བཅུད་དང་། གཉིས་པ་སྣོད་ཀྱིས་ས་བོན་དུ་སྣང་ཞེས་བླ་མ་དག་བཞེད་དོ། །ཌོཾ་བི་ལུགས་ཀྱི་དཀྱིལ་ཆོག་གཉིས་ལས། ས་བོན་བཤད་པ་མི་སྣང་ཡང་། འདིར་ནི་བྷྲཱུྃ་ལས་བསྐྱེད་པར་གསུངས་སོ། །བསྐྱེད་ཚུལ་ཡང་ཨ་བྷྱ་རྗེས་འབྲང་དང་བཅས་པས་དང་པོར་བུམ་པ་བསྐྱེད་ནས། བུམ་པ་ཡོངས་སུ་གྱུར་པ་ལས་གཞལ་ཡས་ཁང་ལྷ་དང་བཅས་པ་བསྐྱེད། ཁ་ཅིག་ཕྱི་བུམ་པའི་རྣམ་པ་ལ། ནང་གཞལ་ཡས་ཁང་གི་རྣམ་པ་ཅན་ཞེས་ཟེར་བ་ནི་མི་འཐད་དེ། དེ་དག་གི་དོན་བུམ་པའི་ནང་དུ་གཞལ་ཡས་ཁང་བསྐྱེད་པ་ཡིན་ན། བུམ་པ་བསྐྱེད་ནས་དེའི་ནང་དུ་གཞལ་ཡས་ཁང་པ་ཞེས་པས་ཆོག་པ་ཡིན་པས། གོང་གི་ཚིག་དེ་རྣམས་དོན་མེད་ལ། ཡང་ཚྭ་ཚྭའི་རྐོས་ཕོར་ལྟ་བུ་ལ་བློ་རྩེ་གཏོད་ན། དེ་ལྟ་བུའི་བཤད་པ་གང་ནའང་མེད་པས་མི་འཐད་དོ། །བུམ་པའི་ནང་དུ་ལྷ་ཁོ་ན་བསྐྱེད་པའི་ལུགས་ལའང་། བདག་འཇུག་དཔལ་འབྱུང་མ་ལྟར་ན། བུམ་པ་བསྐྱེད་ནས་དེའི་ནང་དུ་པྃ་ལས་སྣ་ཚོགས་པདྨ་འདབ་མ་བརྒྱད་པའི་དབུས་དང་། འདབ་མ་བརྒྱད་ལ་ཉི་མའི་དཀྱིལ་འཁོར་གྱི་གདན་དང་བཅས་པ། སྟེང་དུ་ཨཱ་ལི་ལས་ཟླ་བ་དང་། ཀཱ་ལི་ལས་ཉི་མ། དབུས་ཀྱི་ཉི་ཟླ་ཁ་སྦྱོར་གྱི་བར་དུ་ཧཱུྃ་ལས་ཐོད་པ་དཀར་པོ་དུམ་བུ་གསུམ་པའི་དཔྲལ་བར་སྣ་ཚོགས་རྡོ་རྗེའི་ལྟེ་བར་ཧཱུྃ་གིས་མཚན་པ། དེའི་གཡོན་དུ་ཨཾ་ལས་གྲི་གུག་སྔོ་ནག་ཡུ་བར་ཨཾ་གིས་མཚན་པ། ཟླ་ཉི་ཕྱག་མཚན་རོ་གཅིག་ཏུ་འདྲེས་པ་ལས། གཙོ་བོ་ཡབ་ཡུམ་དུ་བསྐྱེད་ནས། འཁོར་རྣམས་ཡུམ་གྱི་མཁའ་ནས་ཐིག་ལེ་འགྲོས་ཀྱི་ཚུལ་གྱིས་འབྱིན་ནས། སོ་སོའི་ཉི་ཟླ་ཁ་སྦྱོར་གྱི་བར་དུ་སོང་། དེ་ལས་ས་བོན་ཕྱག་མཚན་ས་བོན་སོགས་སྒྲུབ་ཐབས་བཞིན་དུ་བསྐྱེད་པ་ཡིན་ལ། ཇིམ་གི་མ་ལྟར་ན་གཙོ་འཁོར་ཐམས་ཅད་མངོན་བྱང་ལས་བསྐྱེད་པ་ཡིན་ནོ། །དེ་ལ་ཁ་ཅིག་དཔལ་འབྱུང་མ་ཡན་ལག་དྲུག་པ་དང་མཐུན། ཇིམ་གི་མ་ཡན་ལག་བཞི་པ་དང་མཐུན་ཟེར་བ་ནི་མི་འཐད་དེ། ཡན་ལག་དྲུག་པ་ལ་འཁོར་ལ་མངོན་བྱང་མེད་པའི་ཕྱིར་དང་། ཡན་ལག་བཞི་པར་འཁོར་ལ་མངོན་བྱང་ཡོད་ཀྱང་གཙོ་འཁོར་ཐམས་ཅད་ཀྱི་མངོན་བྱང་ལྔ་ཀར་དུས་ཉམས་དུ་མེད་པའི་ཕྱིར་རོ། །དེས་ན་དཔལ་འབྱུང་མ་མངོན་རྟོགས་ཡིད་བཞིན་ནོར་བུ་དང་མཐུན་ལ། ཇིམ་གི་མ་ནི་རྗེ་བཙུན་ཡབ་ཀྱི་ཕྱོགས་ལ་རྒྱུ་རྡོ་རྗེ་འཆང་གི་དཀྱིལ་འཁོར་དང་མཐུན་ཅིང་། ཡུམ་གྱི་ཕྱོགས་དང་མཐུན་པ་ཙམ་ཡིན་ནོ། །རང་ལུགས་དབང་ཆུ་ཆེན་མོའི་དགོངས་པ་ལྟར་ན། བུམ་པ་ལ་བརྟེན་པའི་བསྙེན་པའི་སྐབས་ཀྱི་བསྐྱེད་ཚུལ་དང་། བུམ་པ་སྟ་གོན་གྱི་བསྐྱེད་ཚུལ་གཉིས་ལས། དང་པོ་ལ་བུམ་པའི་ནང་དུ་སྲུང་འཁོར་དུར་ཁྲོད་གཞལ་ཡས་ཁང་སྐད་ཅིག་མས་བསྐྱེད་ནས། དེར་གཙོ་བོ་མངོན་བྱང་ལྔ་ལས་བསྐྱེད། འཁོར་རྣམས་འབྱིན་པའི་ཚུལ་དུ་བསྐྱེད། ཡན་ལག་བཞི་རྫོགས་སུ་བྱས་ཏེ་མཆོད་བསྟོད་བྱས་ནས་སྔགས་བཟླ་བའོ། །གཉིས་པ་ནི་དབང་ཆུར་རང་ལྷའི་ང་རྒྱལ་དང་ལྡན་པས་བདུད་རྩི་འཁྱིལ་པའི་སྔགས་བརྗོད་ཅིང་ལཾས་ཀྱི་ཾརྡོ་རྗེའམ། ཀུ་ཤའི་ཆུན་པོས་བདུད་རྩིའམ། བསང་ཆུས་བུམ་པ་རྣམས་ལ་གཏོར་ཏེ་བགེགས་བསལ། སྭཱ་བྷཱ་ཝའི་སྔགས་བརྗོད་དེ་སྟོང་པར་བསམས་ལ་ཞེས་གསུངས་པ་ནི། སྟ་གོན་དང་པོ་གཉིས་ལ་སོགས་པ་བསང་སྦྱང་དངོས་སུ་མ་གསུངས་པ་རྣམས་ལའང་འདིས་མཚོན་ནས་ཤེས་པར་བྱའོ། །དེ་ནས་སྟོང་པའི་ངང་ལས་པྃ་བཅུ་ལས་པདྨ་བཅུའི་སྟེང་དུ་ཨ་ལས་ཟླ་བའི་དཀྱིལ་འཁོར་བཅུ། དེ་རྣམས་ཀྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་དང་ལྡན་པ་བསྐྱེད་དེ། དེ་ནས་རྣམ་རྒྱལ་བུམ་པའི་ནང་དུ་མངོན་པར་བྱང་ཆུབ་པ་ལྔས་གཙོ་བོ་ཡབ་ཡུམ་བསྐྱེད། མཁའ་གསང་བྱིན་གྱིས་བརླབ་པ་ནས་བཟུང་སྟེ། མངལ་དུ་ལྷ་མོ་བརྒྱད་ཁྲོ་བོ་བདུད་རྩི་འཁྱིལ་པ་དང་དགུ་ས་བོན་ལས་བསྐྱེད་དེ། ཕྱིར་སྤྲོས་ཏེ་སོ་སོའི་བུམ་པའི་ནང་དུ་གཞག་པར་བྱའོ། །ཁ་ཅིག་འདི་ལའང་རྣམ་རྒྱལ་བུམ་པའི་ནང་དུའང་ལྷ་མོ་བརྒྱད་དང་། སོ་སོའི་བུམ་པའི་ནང་དུའང་ལྷ་མོ་བརྒྱད་དེ་ཚན་པ་གཉིས་བསྐྱེད་པ་ལུང་གཞན་གྱིས་བསྒྲུབ་པ་ནི། རྗེ་བཙུན་བསོད་ནམས་རྩེ་མོའི་གསུང་དང་མི་མཐུན་ལ། བུམ་པ་གཉིས་སུ་བསྡུ་ན། རྣམ་རྒྱལ་བུམ་པའི་ནང་དུ་པྃ་ལས་སྣ་ཚོགས་པདྨ་འདབ་མ་བརྒྱད་པའི་དབུས་སུ་ཉི་མ་དང་། འདབ་མ་བརྒྱད་ལ་ཟླ་བའི་དཀྱིལ་འཁོར། དེ་རྣམས་ཀྱི་སྟེང་དུ་བདུད་བཞི་ལ་སོགས་པའི་གདན་སྒྲུབ་ཐབས་བཞིན་དང་། ལས་བུམ་དུ་སྣ་ཚོགས་པདྨ་དང་ཉི་མའི་གདན་བསམས་ལ། རྣམ་རྒྱལ་བུམ་པའི་དབུས་ཀྱི་གདན་གྱི་སྟེང་དུ་གཙོ་བོ་ཡབ་ཡུམ་མངོན་བྱང་ལྔས་བསྐྱེད་ནས། འཁོར་རྣམས་དང་བདུད་རྩི་འཁྱིལ་པ་ཡུམ་གྱི་མཁའ་ནས་འབྱིན་པའི་ཚུལ་གྱིས་བསྐྱེད་པ་ནི་བསྙེན་པའོ། །དེ་ནས་ཡན་ལག་ལྷག་པ་གསུམ་ཚང་བར་བྱས་ཏེ། ཆུ་བཞི་སྔོན་དུ་འགྲོ་བའི་ཉེར་སྤྱོད་དང་། ས་བོན་ཙམ་གྱིས་ནང་བདུད་རྩི་དང་། ཡིད་བྱུང་དང་། བསྟོད་ཐུང་རྣམས་ཀྱིས་བསྟོད་ནས། པད་སྐོར་དང་བཅས་པས་གཟུངས་ཐག་བླངས་ཏེ། སྔགས་རྣམས་བཟླ། མཇུག་ཏུའང་མཆོད་བསྟོད་སྔ་མ་བཞིན་བྱ་སྟེ། འདིར་མ་བཤད་ཀྱང་བདེ་མཆོག་ནག་པོ་དཀྱིལ་ཆོག་ལས། ཡི་གེ་བརྒྱ་པ་ལན་གསུམ་གྱི་མཐར། མ་འབྱོར་པ་དང་ཉམས་པ་དང་། །སོགས་ཀྱིས་ནོངས་པ་བཟོད་པར་གསོལ་བར་བཤད་པ་ལྟར་བྱས་ལ། དུང་ཆོས་ཀྱི་ཆུ་བུམ་པ་རྣམས་སུ་ཐིགས་རེ་བླུགས་ནས། བུམ་པའི་ལྷ་རྣམས་འོད་དུ་ཞུ་བར་བསམ། སྔགས་བཟླ་བའི་ཚེ་ཁ་ཅིག རྣམ་རྒྱལ་བུམ་པའི་སྔགས་བཟླས་ཚར་ནས་ལས་བུམ་གྱི་སྔགས་བཟླས་པའི་ཚེ། རྣམ་རྒྱལ་བུམ་པའི་སྟེང་གི་དུང་ཆོས་དང་མེ་ཏོག་གི་ཕྲེང་བ་ལས་བུམ་གྱི་སྟེང་དུ་སྤོ་བའང་ཡོད་དེ། དེ་ལ་སྤྱིར་ཨ་བྷ་ཡ་ལ་སོགས་པས་དུང་ཆོས་དང་། མེ་ཏོག་གི་ཕྲེང་བ་སྤོ་བའི་ལག་ལེན་ཡོད་མོད། འོན་ཀྱང་དེ་ནི་དང་པོ་རྣམ་རྒྱལ་བུམ་པ་གཅིག་པུ་བསྐྱེད་ནས། དེའི་བཟླས་པ་ཚར་བ་དང་། དེ་ནས་ལས་བུམ་དུ་དུང་ཆོས་སྤོས་ནས། ལས་བུམ་བསྐྱེད་པ་བུམ་པ་རེ་རེ་ནས་བསྐྱེད་བཟླས་སོགས་རྐྱང་འདོན་བྱེད་པའི་ལུགས་ཡིན་ལ། འདིར་རྣམ་རྒྱལ་དང་ལས་བུམ་དུས་གཅིག་ལ་བསྐྱེད་པ་ཡིན་པས་དུང་ཆོས་སོགས་སྤོ་མི་དགོས་པའི་དོན་མ་རྟོགས་པ་ཡིན་ནོ།།་་་་་སྒྲུབ་མཆོད་ཞག་གྲངས་མང་པོར་སྦྲེལ་ནས་བྱེད་ན། དངོས་གཞིའི་ཉི་མ་གཉིས་པ་ཕན་ཆད་དུ་ནི་ཕྱི་རོལ་པའི་གཏོར་མའི་རྗེས་སུ། དཀྱིལ་འཁོར་ལ་བཟོད་གསོལ་ཚར་ནས་བྱ་བ་ཡིན་གྱི། ཕྱི་རོལ་པའི་གཏོར་མའི་གོང་དུ་བྱ་བར་ནི་མི་རིགས་ཏེ། བཟོད་གསོལ་མ་ཚར་བར་མདུན་བསྐྱེད་སྒྲུབ་མཆོད་ཀྱི་ཁོངས་སུ་གཏོགས་པའི་ཕྱིར་རོ། །ཀྱེ་རྡོ་ལ་སོགས་པ་དཀྱིལ་འཁོར་ཕལ་ཆེར་ལ། ཕྱི་རོལ་པའི་གཏོར་མ་དང་། ནོངས་པ་བཟོད་པར་གསོལ་ཚར་ནས་བདག་འཇུག་མ་བླངས་པའི་གོང་དུ་བྱ་བ་ཡིན་ཏེ། ནོངས་པ་བཟོད་པར་གསོལ་བ་ཡན་མདུན་བསྐྱེད་སྒྲུབ་མཆོད་ཀྱི་ཁོངས་སུ་གཏོགས་པས། དེ་དག་གི་བར་སྐབས་སུ་ཆོ་ག་རིགས་མི་མཐུན་གྱིས་གཅད་པ་མི་འཐད་པའི་ཕྱིར་རོ། །གསང་འདུས་འཕགས་ལུགས་ལ་ནི་ཕྱི་རོལ་པའི་གཏོར་མ་ཚར་ནས། དཀྱིལ་འཁོར་ལ་བསྐོར་བ་དང་། སྒོ་དབྱེ་བ་མ་བྱས་པའི་སྐབས་དེར་བྱས་ན་ལེགས་པར་སྣང་སྟེ། ཕྱི་རོལ་པའི་གཏོར་མ་ནི་ཆོ་ག་བཅུ་གཅིག་པ་ལྷ་རྣམས་སྤྱན་དྲང་བའི་ཁོངས་སུ་གཏོགས་ལ། དཀྱིལ་འཁོར་ལ་བསྐོར་བ་དང་། སྒོ་དབྱེ་བ་ནས་བརྩམས་ཏེ་སློབ་དཔོན་བདག་འཇུག་དང་། སློབ་མ་ཡོལ་བའི་ཕྱི་འཇུག་མན་ཆད་ཆོ་ག་བཅུ་གཉིས་པ་སློབ་མ་གཞུག་པའི་ཁོངས་སུ་གཏོགས་པས། དེ་དག་གི་བར་སྐབས་སུ་ཆོ་ག་རིགས་མི་མཐུན་གྱིས་གཅད་པ་མི་འཐད་པའི་ཕྱིར་རོ། །གལ་ཏེ་ཕྱི་རོལ་པའི་གཏོར་མ་དང་། དཀྱིལ་འཁོར་ལ་བསྐོར་བ་སྦྲེལ་བར་འདོད་ན། ཕྱི་རོལ་པའི་གཏོར་མའི་གོང་ལ་སྒོ་ཕྱེས་ཟིན་པའི་རྗེས་སུ་བྱེད་པ་ལ་ནི་ཁྱད་པར་མེད་དོ། །གོང་གི་རྟགས་ནས་འདིའི་བར་མཆན། དེ་ལྟར་བུམ་པ་སྟ་གོན་ཟིན་པའི་རྗེས་སུ་སྔར་གཏོར་མ་མ་བཏང་ན་སྐབས་འདིར་གཏོར་མ་གཉིས་པོ་གཏང་། རྣལ་འབྱོར་པ་རྣམས་མཉེས་པར་བྱ་བའི་ཕྱིར་ཚོགས་ཀྱི་བཟའ་བ་དང་བཏུང་བ་བླངས་ལ་བྱིན་གྱིས་བརླབས་ལ། ཕུད་དབུལ་བ་ལ་སོགས་པ་ནས་ལྷག་མ་གཏང་བའི་བར་དུ་ཚོགས་ཀྱི་འཁོར་ལོའི་ཆོ་ག་བཞིན་བྱ། སློབ་མ་སྟ་གོན་དཀྱིལ་འཁོར་གྱི་ཁང་པ་དེ་ཉིད་དུ་བྱེད་ན་བྲིས་སྐུ་ལ་སོགས་པ་ཞལ་དགབ། ལྷ་སྟ་གོན་གྱི་མེ་ཏོག་གི་ཚོམ་བུ་ལ་སོགས་པ་ལ་མེ་ཏོག་གཏོར་ཏེ་མི་མཐོང་བར་བྱ། ཡང་ན་དར་ལ་སོགས་པས་དགབ། བུམ་པ་རྣམས་ཀྱང་ཞལ་བཀབ་ལ་མི་མཐོང་བར་བྱའོ། །འཇིག་རྟེན་པའི་གཏོར་མའང་གཏང་། འདས་པའི་གཏོར་མ་བར་ཆད་ཞི་བར་བྱ་བའི་ཕྱིར་གཞག་གོ །བཞི་པ་སློབ་མ་སྟ་གོན་ལ་དོན་བཞི་སྟེ། གང་ལ་བྱ་བའི་སློབ་མ། ཇི་ལྟར་བྱ་བའི་ཆོ་ག དེ་ལས་སྡོམ་པ་ཇི་ཙམ་ཐོབ་པ། དེ་ཉིད་སྟ་གོན་དུ་འགྲོ་བའི་ཚུལ་ལོ། །དང་པོ་ནི། གསང་བ་སྤྱི་རྒྱུད་ལས། གཅིག་ནས་ཉི་ཤུ་རྩ་ལྔའི་བར། །ཟུང་དུ་མ་གྱུར་སློབ་མ་གཟུང་། །དེ་བས་ལྷག་པའི་སློབ་མ་ནི། །ཡོངས་སུ་གཟུང་བར་མི་ཤེས་སོ། །ཞེས་གསུངས་པ་ལྟར་སྔར་སློབ་མ་རྗེས་འཛིན་བྱས་པའི་སློབ་མ་དེ་དག་གོ །དེ་དག་ལས་གང་རུང་གཅིག་ཤི་ནས་ཟུང་དུ་གྱུར་པའི་ཚེ་ཇི་ལྟར་བྱ་སྙམ་ན། དེ་ཉིད་ལས། སློབ་མ་ཡོངས་སུ་བཟུང་བ་གང་། །སྟ་གོན་གནས་ཚེ་མེད་ན་ནི། །དེ་ཡི་གཟུགས་བརྙན་བྲིས་ནས་ནི། །ཇི་སྐད་བཤད་པ་ཐམས་ཅད་བྱ། །ཞེས་གསུངས་པ་ལྟར་དེའི་གཟུགས་བརྙན་བྲིས་ནས་རྟེན་བསྐྱེད་པ་དང་། རྣམ་ཤེས་བཀུག་པ་བྱས་ནས་དེ་ཉིད་གྲལ་དུ་བཞག་སྟེ་དེ་དང་བཅས་པ་ལ་དབང་བསྐུར་རོ། །འདི་ལ་དགོས་པ་ཁྱད་པར་ཅན་གཉིས་ཡོད་དེ། དེ་ཉིད་ལ་སྡིག་སྦྱོང་གི་སྒོ་ཁྱད་པར་ཅན་དུ་འགྱུར་བ་དང་། གཞན་རྣམས་ལ་ཟུང་དུ་གྱུར་པའི་སྐྱོན་སྤོང་བའོ། །གལ་ཏེ་སློབ་མ་གང་རུང་གཅིག་རྐྱེན་འགའ་ཞིག་གིས་སྟ་གོན་གྱི་གནས་དེར་འོངས་པར་མ་གྱུར་ན་ཅི་ལྟར་བྱ་སྙམ་ན། དེ་ཉིད་ལས། སློབ་མ་ཡོངས་སུ་བཟུང་བ་གང་། །གལ་ཏེ་རྐྱེན་འགའ་ཞིག་གིས་ནི། །དེར་ནི་འོངས་པར་མ་གྱུར་ན། །གཞན་དག་དེ་ཡི་སྐྱིན་པར་གཞུག །ཅེས་གསུངས་པ་ལྟར། གཞན་གང་རུང་ཅིག་དེའི་ཚབ་ཏུ་འཇུག་སྟེ། འདིས་སློབ་མ་རྗེས་འཛིན་མ་བྱས་པ་ལའང་སྟ་གོན་བྱེད་དུ་རུང་བའི་དམིགས་བསལ་བསྟན་ནོ། །འདི་ལའང་དགོས་པ་ཁྱད་པར་ཅན་གཉིས་ཡོད་དེ། དེ་ཉིད་ཀྱིས་དབང་བསྐུར་ཐོབ་པ་དང་། གཞན་རྣམས་ཟུང་དུ་གྱུར་པའི་སྐྱོན་སྤོང་བའོ། །གང་དག་ལུང་འདི་དག་གི་སྟ་གོན་མ་བྱས་ཀྱང་དངོས་གཞི་རུང་བའི་དོན་དུ་འཆད་པ་ནི། སྟ་གོན་གནས་ཚེ་མེད་ན་ནི། །ཞེས་པའི་ཚིག་ཙམ་ཡང་བློ་ཡུལ་དུ་མ་ཤར་ཞིང་། ཇི་སྐད་བཤད་པ་ཐམས་ཅད་བྱ། །ཞེས་པའི་དོན་སྟ་གོན་དང་དངོས་གཞི་གཉིས་ཀ་ལ་འཇུག་པའི་དོན་ཡང་གཞལ་བྱར་མ་བྱས་པའོ། །གཉིས་པ་ནི། རྗེ་བཙུན་རིན་པོ་ཆེས། བྱ་རྒྱུད་ཀྱི་སྟ་གོན་འགའ་ཞིག་ཏུ། ལུས་དང་སེམས་ཀྱི་བྱ་བ་དང་། ལུས་དང་ངག་གི་བྱ་བ་དང་། དངོས་གྲུབ་ཀྱི་མཚན་ལྟས་བརྟག་པ་དང་གསུམ་དུ་མཛད་ཅིང་། བླ་མེད་ཀྱི་ཆོ་ག་ལ་དོན་ཚན་བཅུ་བཞིར་མཛད་པ་དང་། བཅུ་གསུམ་དུ་མཛད་པ་དང་། བཅུ་གཉིས་སུ་མཛད་པ་སོགས་དུ་མ་ཡོད་པ་ལས། འདིར་བཅུ་བཞིར་མཛད་པའི་དང་པོ་ལུས་ཀྱི་བྱ་བ་ནི་དམ་པའི་ཆོས་ལ་མ་གུས་པ་སྤོང་ཞིང་། གུས་པ་བསྐྱེད་པའི་ཆེད་དུ་སློབ་མ་རྣམས་ཁྲུས་བྱས། ཡོན་དང་མཎྜལ་ཕུལ། སྤྱོད་ལམ་གུས་པ་དང་བཅས་པས་འདུག་པའོ། །ལྷག་མ་བཅུ་གསུམ་བསྡུ་ན་གསུམ་དུ་འདུས་ཏེ། ཁྱད་པར་ཅན་གྱི་བསམ་པ་བསྐྱེད་པ་དང་། ཁྱད་པར་གྱི་དོན་ཞུ་བ་དང་། དངོས་གྲུབ་ཀྱི་མཚན་ལྟས་བརྟག་པའོ། །དང་པོ་ལ་དོན་དུ་གཉེར་བྱའི་འབྲས་བུ་ངོས་གཟུང་། དེའི་མི་མཐུན་ཕྱོགས་ངོས་གཟུང་། དེ་སྤངས་ནས་དོན་དུ་གཉེར་བྱའི་འབྲས་བུ་ལ་སེམས་གཞོལ་བར་གདམས་པ་དང་གསུམ་ལས། དང་པོ་ལའང་གཉིས་ཏེ། རབ་སྔགས་ཀྱི་དངོས་གྲུབ་དང་། དེ་མ་བྱུང་ན་འཇིག་རྟེན་ཕ་རོལ་ལ་ཡང་རུང་བར་བསྟན་པའོ། །དང་པོ་ནི། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་གཞུག་པར་བྱ། །ཞེས་པ་སྟེ་སྔགས་ཀྱི་སྐད་དོད་མནྟྲ་ཞེས་པའི་མ་ནོ་ཡིད་དང་ཏ་ར་སྐྱོབ་པ་ལ་འཇུག གང་ལས་སྐྱོབ་པའི་མི་མཐུན་ཕྱོགས་དང་བཅས་ཏེ་བརྗོད་ན། ཡིད་མཚན་རྟོག་ལས་སྐྱོབ་པ་སྟེ། འདིའང་རྒྱུད་གསུམ་ལ་འཇུག་པ་ལས། རྒྱུ་རྒྱུད་ནི་ཡིད་མཚན་རྟོག་ལས་རང་བཞིན་གྱིས་སྐྱོབ་པས་ན་སྔགས། ཐབས་རྒྱུད་ནི་ཡིད་མཚན་རྟོག་ལས་སྐྱོབ་པར་བྱེད་པའི་ཐབས་ཡིན་པས་ན་སྔགས། འབྲས་བུའི་རྒྱུད་ནི་ཡིད་མཚན་རྟོག་མ་ལུས་པ་ལས་བསྐྱབས་ཟིན་པས་ན་སྔགས་ཀྱི་སྒྲ་འཇུག་གོ །འདིར་ནི་དངོས་གྲུབ་ཅེས་པའི་ཚིག་དང་འབྲེལ་བའི་ཚེ་ཕྱི་མ་ཉིད་ལ་འཇུག་པས་སེམས་ཅན་གྱི་དོན་དུ་ཕྱག་ཆེན་མཆོག་གི་དངོས་གྲུབ་བཅུ་གསུམ་རྡོ་རྗེ་འཛིན་པའི་ས་ཐོབ་པར་འདོད་པའི་བློ་བསྐྱེད་པའོ། །གཉིས་པ་ནི། བསོད་ནམས་འདོད་པས་དེ་ལས་གཞན། །ཞེས་སོགས་ཚིག་རྐང་ལྔ་སྟེ། བསམ་པ་དེ་ཙམ་མ་བྱུང་ནའང་འཁོར་བ་སྤངས་ནས་མྱང་འདས་ཐོབ་པའི་བློ་ཡོད་ན། དཀྱིལ་འཁོར་དུ་གཞུག་པར་བྱ་ཞེས་པ་སྟེ། འདིར་འཇིག་རྟེན་ཕ་རོལ་ནི་སྐྱེ་བ་ཕྱི་མ་ལྷ་མིའི་གོ་འཕང་འདོད་པ་སོགས་མ་ཡིན་གྱི། མྱ་ངན་ལས་འདས་པ་ཙམ་གྱི་བློའོ། །གཉིས་པ་ནི། འདི་ཡི་འབྲས་བུ་གཉེར་མི་བྱ། །ཞེས་སོགས་ཚིག་རྐང་གསུམ་སྟེ། འདིའི་འབྲས་བུ་ནི་སྔར་གྱི་འཇིག་རྟེན་ཕ་རོལ་གྱི་ཟླས་དྲངས་པ་སྟེ། འདི་དང་ཕྱི་མར་འཁོར་བའི་བདེ་འབྲས་འདོད་པའོ། །དེ་ལྟར་ཡང་དབང་ཆུར། མདོར་བསྡུ་ན་ཚེ་འདི་ཞེས་བྱ་བ་ནི་ཚེ་འདིར་ཚེ་རིང་བ་དང་། ནད་མེད་པ་ལ་སོགས་པ་དང་། སྐྱེ་བ་ཕྱི་མར་ལྷ་དང་མི་ལ་སོགས་པའི་བདེ་བ་འཐོབ་པར་འདོད་པ་མ་ཡིན་གྱི་ཞེས་གསུངས་པས་སོ། །ཡང་ན་ཚིག་རྐང་དང་པོ་གཉིས་ཀྱི་དོན་ཚེ་འདིར་ཕྱག་ཆེན་མཆོག་གི་དངོས་གྲུབ་འདོད་པ་དང་། བསོད་ནམས་འདོད་པ་དེ་ལས་གཞན། །ཞེས་པ་མན་ཆད་ཀྱིས་སྐྱེ་བ་ཕྱི་མ་ཕན་ཆད་དུ་ཕྱག་ཆེན་མཆོག་གི་དངོས་གྲུབ་འདོད་པ་ལ་སྦྱར་ནས་འཇིག་རྟེན་ཕ་རོལ་དང་། སྔགས་ཀྱི་དངོས་གྲུབ་དོན་གཅིག་ཏུ་བཤད་པ་གང་རུང་བྱ་སྟེ། གཞན་དུ་ན། དེ་ལས་གཞན་ཞེས་པའི་ཚིག་བཤད་དུ་མི་རུང་ངོ་། །གསུམ་པ་ནི། འཇིག་རྟེན་ཕ་རོལ་ལ་དམིགས་ན། །ཞེས་སོགས་ཚིག་རྐང་གཉིས་ཏེ། དབང་ཆུར། སྔགས་ཀྱི་དངོས་གྲུབ་ཅེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས་བྱ་བ་དེ་འདོད་པར་བྱ་དགོས་ཏེ། དེ་དོན་དུ་གཉེར་ན་ཚེ་འདིར་དང་སྐྱེ་བ་གཞན་གྱི་ཕུན་སུམ་ཚོགས་པ་དང་། ཉན་ཐོས་དང་རང་སངས་རྒྱས་ཀྱི་རྣམ་པར་གྲོལ་བའང་འབད་པ་མེད་པར་འཐོབ་སྟེ། དཔེར་ན་འབྲས་ཀྱི་ལོ་ལེགས་ན་ཕུབ་མ་ལ་སོགས་པ་ཞོར་ལ་འབྱུང་བ་དང་འདྲའོ། །ཞེས་རྒྱས་པར་བཤད་པར་བྱའོ་ཞེས་གསུངས་ཏེ། ཚུལ་འདི་ལྟར་ན་སྔར་གྱི་བཤད་པ་ཕྱི་མ་གཉིས་དགོས་པར་སྣང་ངོ་། །གཉིས་པ་ལ་ལྔ་སྟེ། ཁྱད་པར་ཅན་གྱི་དོན་ཞུ་བ་པོར་བསྒྲུབ་པ། ཁྱད་པར་ཅན་གྱི་དོན་ལ་གསོལ་བ་གདབ་པ། ཁྱད་པར་ཅན་གྱི་དོན་ལ་སྤྲོ་བ་བསྐྱེད་པ། ཁྱད་པར་ཅན་གྱི་དོན་ཉིད་བསྒྲུབ་པ། དེ་ཉིད་བསྲུངས་ནས་མཆོད་པ་བྱའོ། །དང་པོ་ནི། ནང་གི་དབང་བསྐུར་བ་སྟེ། བུ་ཚུར་ཐེག་པ་ཆེན་པོ་ལ། །ཞེས་དང་། བུ་ཡིས་བློ་གྲོས་འདི་གྱིས་ཤིག །ཅེས་པའི་བུར་སྒྲུབ་པའི་ཆོ་ག་ལ་འདི་དགོས་པར་དཀྱིལ་ཆོག་འགའ་ཞིག་ལས་གསུངས་ཤིང་། ཌོམྦི་ལུགས་ཀྱི་དཀྱིལ་ཆོག་གཉིས་ལ་སོགས་པ་དཀྱིལ་ཆོག་མང་པོར་འདི་མེད་པའང་སྣང་སྟེ། ཐེག་པ་ཆེན་པོའི་རིགས་སུ་སྐྱེས་པ་ཙམ་གྱིས་བུར་གྲུབ་པའི་དབང་དུ་བྱས་པའོ། །གཉིས་པ་ནི། བདག་མེད་མ་ཡིས་མགྲིན་འཁྱུད་པའི། །དགའ་ཆེན་ཁྱོད་བདག་སྟོན་པ་སྟེ། །ཞེས་སོགས་ཏེ། ཚིག་རྐང་དང་པོ་ནི་ནང་དབང་བསྐུར་བ་སྔོན་དུ་སོང་བས་དྲིན་དྲན་པའི་ཚུལ་གྱིས་བསྣན་པ་སྟེ། གཞན་དུ་ན། མཱ་མ་ཀཱི་དང་ལྷན་ཅིག་སྦྱོར། །ཞེས་འབྱུང་བ་དང་དོན་གཅིག་གོ །ཚིག་ལྷག་མ་རྣམས་ནི་གསང་བ་སྤྱི་རྒྱུད་ལས་འབྱུང་བ་དཀྱིལ་ཆོག་ཕལ་ཆེར་ལ་སྦྱར་བར་སྣང་ཞིང་། ཌོམྦི་ལུགས་ཀྱི་དཀྱིལ་ཆོག་གཉིས་ལའང་། བཟང་པོ་ཡོངས་གཟུང་ལས། སྐྱེ་རྒ་ན་དང་འཆི་བ་ཡི། །ཆུ་སྲིན་ལ་སོགས་འཇིགས་བཅས་པ། །སྲིད་པའི་རྒྱ་མཚོར་བྱིང་བ་ལས། །འདོན་པར་མཛད་པ་ཁྱོད་འབའ་ཞིག །དགའ་ཆེན་ཁྱོད་བདག་སྟོན་པ་བས། །ཞེས་སོགས་གསུངས་པ་ནི་སྡོམ་འབྱུང་གི་ཚིག་ཏུ་སྣང་ངོ་། །རིན་ཆེན་འབར་བ་ལས་ནི་སྤྱི་རྒྱུད་དང་མཐུན་པར་གསུངས་སོ། །དེ་དག་གི་དོན་འཆད་པ་ཚིགས་བཅད་དང་པོས་ནི་དགོངས་སུ་གསོལ་བ་དང་། དོན་དུ་གཉེར་བྱའི་འབྲས་བུ་མཆོག་སྨོས་ནས། དེ་འཐོབ་པར་བྱེད་པའི་ཐབས། དམ་ཚིག་དེ་ཉིད་བདག་ལ་རྩོལ། །ཞེས་པ་ནི་ཁྱད་པར་ཅན་གྱི་དོན་གྱི་གཙོ་བོ་སྔགས་ཀྱི་དམ་ཚིག་སྟེ། རྒྱུད་སྡེ་གང་ལ་སྦྱར་ཡང་དབང་གི་ཆོ་ག་ལས་ཐོབ་པའི་སྔགས་ཀྱི་དམ་ཚིག་གོ །དེའི་རྟེན་དུ་བྱང་སེམས་ཀྱི་སྡོམ་པ་དགོས་པས། བྱང་ཆུབ་སེམས་ཀྱང་བདག་ལ་སྩོལ། །ཞེས་པ་དང་། དེའི་རྟེན་དུ་སོ་ཐར་གྱི་སྡོམ་པ་དགོས་པས། སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཞེས་པ་སྟེ་འདི་གཉིས་ནི་རྒྱུན་བཤགས་ཀྱི་སྐབས་སུ་འཐོབ་པར་འགྱུར་བའི་བྱང་སེམས་དང་སོ་ཐར་ཁོ་ན་ཡིན་གྱི། སྔར་ཆོ་ག་ཐུན་མོང་བས་ཐོབ་ཟིན་པ་ནི་མ་ཡིན་ནོ། །དེ་ལྟར་སྡོམ་པ་གསུམ་སྩོལ་བའི་སྒོ་ནས་ཐར་པ་ཆེན་པོའི་གྲོང་ཁྱེར་དུ་འཇུག་པ་ནི་ཁྱད་པར་ཅན་གྱི་དོན་ཡིན་པས། དེའི་ཆེད་དུ་གསོལ་བ་གདབ་པའོ། །གསུམ་པ་ནི། བུ་ཚུར་ཐེག་པ་ཆེན་པོ་ལ། །ཞེས་སོགས་ཏེ། ཐེག་པ་ཆེན་པོ་ནི་ཕ་རོལ་ཏུ་ཕྱིན་པ་དང་། གསང་སྔགས་གཉིས་ཀ་ལ་འཇུག་པའི་སྤྱི་ཡིན་ལ། དེའི་ནང་ནས་གསང་སྔགས་ཁྱོད་ལ་བསྟན་པར་བྱའོ། །གསང་སྔགས་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཞིང་། བྱེ་བྲག་ཏུ་སྟོན་པ་འདིས་ཀྱང་གསང་སྔགས་ཀྱི་ཐེག་པ་ལ་བརྟེན་ནས་མངོན་པར་རྫོགས་པར་སངས་རྒྱས་པ་ཡིན་པས་སྤྲོ་བ་མ་སྐྱེས་པ་རྣམས་བསྐྱེད་ཅིང་། སྐྱེས་པ་རྣམས་དེ་ལས་བློ་གཞན་དུ་མི་འགྱུར་བར་བྱེད་པའོ། །སྟོན་པ་འདིས་གསང་སྔགས་ལ་བརྟེན་ནས་མངོན་པར་རྫོགས་པར་སངས་རྒྱས་པའི་དུས་གང་ཡིན་སྙམ་ན། དེའི་དུས་ནི་སུས་ཀྱང་གཟུང་བར་མི་ནུས་ཏེ། དབུ་མ་འཇུག་པ་ལས། བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཞིང་དག་ན། །ཕྲ་རབ་རྡུལ་གྱི་རྡུལ་རྣམས་བདོག་པར་གྱུར་པ་ཇི་སྙེད་པ། །བྱང་ཆུབ་མཆོག་རབ་དམ་པར་གཤེགས་པའི་སྐལ་བའང་དེ་སྙེད་དེ། །འོན་ཀྱང་ཁྱོད་ཀྱི་གསང་བ་འདི་ནི་བསྙད་བགྱིས་མ་ལགས་སོ། །ཞེས་གསུངས་པ་ལྟར་རོ། །འོ་ན་དེ་ཉིད་གདུལ་བྱ་སྤྲོ་བ་སྐྱེད་པའི་རྒྱུར་མི་རུང་ངོ་སྙམ་ན། དེ་རུང་བའི་ཆེད་དུ་དྲང་དོན་དུ་སྔགས་ལ་བརྟེན་ནས་སངས་རྒྱས་པའི་ཚུལ་སྟོན་པ་ནི། ཆུ་བོ་ནཻ་རཉྫ་རའི་འགྲམ་དུ་དཀའ་བ་སྤྱད་པ་ན། རྣམ་སྨིན་གྱི་ལུས་དེར་བཞག་ནས་ཡིད་ཀྱི་ལུས་འོག་མིན་དུ་སངས་རྒྱས་པ་སྟེ། དེ་ཉིད་བསྡུས་པའི་རྒྱུད་ལས། དེ་ནས་དེ་བཞིན་གཤེགས་པ་ཐམས་ཅད་ཀྱིས་སངས་རྒྱས་ཀྱི་ཞིང་འདི་དཔེར་ན་ཏིལ་གྱི་གོང་བུ་བཞིན་དུ་ཡོངས་སུ་གང་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་ཞེས་བྱ་བ་བྱང་ཆུབ་པའི་སྙིང་པོར་ཞུགས་པ་གང་ན་བ་དེར་གཤེགས་ཏེ། བྱང་ཆུབ་སེམས་དཔའ་དེ་ལ་ཆེད་དུ་ལོངས་སྤྱོད་རྫོགས་པའི་སྐུ་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མངོན་པར་མ་རྟོགས་པར་དཀའ་བ་སྤྱད་པ་ཐམས་ཅད་ལ་སྤྲོ་བ་སྐྱེད་ཅིང་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱ་སྙམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་དེ་བཞིན་གཤེགས་པ་ཐམས་ཅད་ཀྱིས་བསྐུལ་བས་མི་གཡོ་བའི་ཏིང་ངེ་འཛིན་དེ་ལས་བཞེངས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་དེ་ཁོ་ན་ཉིད་ནི་ཇི་ལྟ་བུ་ལགས། ཇི་ལྟར་ན་བསྒྲུབ་པར་བགྱི། བཀའ་སྩལ་བར་གསོལ། དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུང་གཅིག་ཏུ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རང་གི་སེམས་ལ་སོ་སོར་རྟོག་ཅིང་མཉམ་པར་ཞོག་ལ། རང་བཞིན་གྱིས་གྲུབ་པའི་སྔགས་འདི་ཅི་དགར་བཟླས་ཤིང་བསྒྲུབ་པར་གྱིས་ཤིག ཨོཾ་ཙིཏྟ་པྲ་ཏི་ཞེས་སོགས་མངོན་པར་བྱང་ཆུབ་པ་ལྔ་གསུངས་སོ། །ཞེས་གསུངས་པའི་དོན་ཡོ་ག་བ་ཤཱཀྱ་བཤེས་གཉེན་གྱིས་རང་རྒྱུད་པར་འཆད་པ། གྲུབ་ཆེན་ཀུན་དགའ་སྙིང་པོས་ལུང་དང་རིགས་པས་བཀག་ནས། ཚུལ་སྟོན་པ་འབའ་ཞིག་ཏུ་འཆད་དོ། །དེ་བཞིན་དུ་ཀླུ་སྒྲུབ་ཡབ་སྲས་དང་། ཡེ་ཤེས་ཞབས་རྗེས་འབྲང་དང་བཅས་པ་དང་། ས་སྐྱ་པའི་རྗེ་བཙུན་གོང་མ་རྣམས་ཀྱིས་ཀྱང་། ཚུལ་སྟོན་པ་འབའ་ཞིག་ཏུ་འཆད་པ་ནི་རྡོ་རྗེ་ཐེག་པའི་རྒྱུད་སྡེའི་དགོངས་པ་ཡིན་པས། གདུལ་བྱ་གསང་སྔགས་ལ་སྤྲོ་བ་སྐྱེད་པའི་ཆེད་དུ་ཡིན་ནོ། །མདོར་ན་ཉན་ཐོས་སྡེ་པས་བྱང་ཆུབ་ཀྱི་ཤིང་དྲུང་དུ་སངས་རྒྱས་པ་རང་རྒྱུད་པར་འཆད་པ་དང་། ཤཱཀྱ་བཤེས་གཉེན་གྱི་ནཻ་རན་ཛ་རའི་འགྲམ་གྱི་དྲུང་དུ་སངས་རྒྱས་པ་རང་རྒྱུད་པར་འཆད་པ་གཉིས་མ་གཏོགས། ཐེག་པ་ཆེན་པོ་བ་མཐའ་དག་རྒྱལ་བུ་དོན་འགྲུབ་ཀྱི་རྟེན་ལ་སངས་རྒྱས་པ་ནི་ཚུལ་སྟོན་པར་འཆད་ཅིང་། ཚུལ་སྟོན་པ་ལ་སྔ་ཕྱི་གང་དུ་སངས་རྒྱས་ཀྱང་འགལ་བ་མེད་དེ། ཚུལ་སྟོན་པ་ཡིན་པའི་ཕྱིར་རོ། །བཞི་པ་ལ་ཁྱད་པར་ཅན་གྱི་དོན་གྱི་རྟེན་བསྐྱེད་པ་དང་། དེ་ཉིད་བསྲུང་ཞིང་ཁྱད་པར་གྱི་དོན་གྱི་ས་བོན་བཏབ་པ་གཉིས་ལས། དང་པོ་ནི། རྒྱུན་བཤགས་བྱ་བ་སྟེ། འདི་ལ་བཟང་པོ་ཡོངས་གཟུང་ལས། དེ་ལྟར་སློབ་མ་ལ་གདམས་ནས། །བཤགས་དང་ཡི་རང་སོགས་བྱ་ཞིང་། །དང་པོར་གསུམ་ལ་སྐྱབས་སུ་གཏང་། །དེ་ནས་བྱང་ཆུབ་སེམས་བསྐྱེད་བྱ། །ཞེས་པ་ཙམ་ལས་མ་གསུངས་ཀྱང་། རྗེ་བཙུན་རྩེ་མོས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོ་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་རྣམ་སྣང་སྒྱུ་དྲྭ་ནས་འབྱུང་བའི་བསྡུས་པ་བྱ་བའམ། རྒྱས་པར་སྤྲོ་ན། སྡིག་པ་བཤགས་པ། དགེ་བ་ལ་རྗེས་སུ་ཡི་རང་བ། ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་འདེབས་པ། དགེ་བའི་རྩ་བ་བསྔོ་བ། གསུམ་ལ་སྐྱབས་སུ་འགྲོ་བ། སྨོན་འཇུག་གི་སེམས་བསྐྱེད་གཟུང་བ་རྣམས་བྱ་བར་གསུང་ཤིང་། དབང་ཆུ་འདིར་ནི། གུར་ནས་འབྱུང་བའི་རྒྱུན་བཤགས་མཛད་ལ། རིན་ཆེན་འབར་བ་ལས། གུར་དང་མཐུན་པའི་ཚིགས་བཅད་ལོགས་སུ་མཛད་ཅིང་གང་ལྟར་ཡང་ཡན་ལག་གཞན་གྱི་རྒྱས་བསྡུས་མ་གཏོགས་པ་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་ངེས་པར་དགོས་པ་ཡིན་ལ། རྒྱུད་སྡེ་བཞི་ཆར་གྱི་རྒྱུན་བཤགས་འདྲ་བར་སྣང་ངོ་། །དེ་ན་ཀླུའི་བློས་དཀྱིལ་ཆོག་ཉི་ཤུ་པ་དང་། ནག་པོ་པའི་གཞུང་འགྲེལ་ལས། རྣམ་སྣང་སྒྱུ་དྲྭ་ནས་གསུངས་པའི་ཚིགས་བཅད་གཅིག་པོ་དེ་ཉིད་འབྱུང་བ་ལའང་། སང་རྒྱས་བྱང་ཆུབ་ཡིད་ཀྱིས་གཟུང་། །ཞེས་པའི་ཚིག་དེས་ཐུན་མོང་མ་ཡིན་པའི་སྐྱབས་འགྲོ་དང་། སྨོན་འཇུག་གི་སེམས་བསྐྱེད་བསྟན་དགོས་པར་སྣང་ངོ་། །གཉིས་པ་ནི། གནས་གསུམ་དུ་དྲི་བཟང་གི་ཆུས་ཐིག་ལེ་བྱས་ནས། ས་བོན་ལས་ཕྱག་མཚན་ས་བོན་གྱིས་མཚན་པར་བསམ་པ་སྟེ། འདི་ལ་དབང་ཆུར་ས་བོན་ལས་ཕྱག་མཚན་ས་བོན་གྱིས་མཚན་པའམ། དེ་དག་ལས་སྐུ་རྡོ་རྗེ་སོགས་བསམ་པ་གསུམཾ་གདམ་ཁ་ཅན་དུ་གསུངས་ཤིང་། ཐོག་མར་ཡས་རིམ། དེ་ནས་མས་རིམ། སླར་ཡང་ཡས་རིམ་དུ་རེག་པས་སྔ་མ་དེ་ཉིད་གསལ་གདབ་པར་གསུང་ལ། ལག་ལེན་པ་དག་དང་པོས་ས་བོན། གཉིས་པས་ཕྱག་མཚན། གསུམ་པས་ས་བོན་གྱིས་མཚན་པར་བསྒོམ་གསུངས་པ་ནི་དཀྱིལ་ཆོག་རྣམས་ན་གསལ་ཁ་མི་སྣང་ཞིང་། ཐུགས་རྡོ་རྗེ་སོགས་སྒོམ་པའི་ཚེ་ན་ལན་བཞིར་ཡང་རེག་པར་འགྱུར་རོ། །འདི་ནི་སྔར་གྱི་བྱང་ཆུབ་ཀྱི་སེམས་དེ་ཉིད་བསྲུང་བ་གཙོ་བོ་ཡིན་ཏེ། དབང་ཆུར། དེ་ལྟར་བྱང་ཆུབ་ཀྱི་སེམས་བསྐྱེད་པ་ལ་བར་ཆད་མི་འབྱུང་བར་བྱ་བའི་ཕྱིར་སྔགས་ཀྱིས་བསྲུང་ཞིང་ལྷར་བསྐྱེད་ཅིང་བྱིན་གྱིས་བརླབ་པ་ནི་ཞེས་དང་། བདེ་མཆོག་ནག་པོ་དཀྱིལ་ཆོག་ལས། དེ་ནས་བྱང་ཆུབ་ཀྱི་སེམས་དེ་ཉིད་བསྲུང་བའི་ཕྱིར་ཞེས་དང་། རིན་ཆེན་འབར་བ་ལས། དེ་ནས་བླ་མས་བྱང་ཆུབ་སེམས། །མ་སྐྱེས་པ་ནི་བསྐྱེད་པར་བྱ། །སྐྱེས་པ་སླར་ཡང་དྲན་དུ་གཞུག །ལས་ཀུན་བྱེད་པས་བསྲུངས་ནས་ནི། །ཞེས་གསུངས་པས་སོ། །འདི་ལ་བཟང་པོ་ཡོངས་གཟུང་ལས། སྙིང་གར་རྡོ་རྗེ་རྩེ་ལྔ་པ་དང་། སྤྱི་བོར་སྣ་ཚོགས་རྡོ་རྗེ་དང་། མགྲིན་པར་པདྨ་བསམ་པ་ཙམ་ཞིག་གསུངས་ཤིང་། ས་བོན་ལས་བསྐྱེད་པ་དང་། ས་བོན་གྱིས་མཚན་པ་གཉིས་ནི་མི་སྣང་ལ། རིན་ཆེན་འབར་བ་ལས། སྙིང་ག་ལྐོག་མ་སྤྱི་བོ་རུ། །རྡོ་རྗེ་པདྨ་འཁོར་ལོ་རྣམས། །ཧཱུྃ་ཨཱཿཨོཾ་ལས་དེ་དག་དགོད། །སྤོས་ཆུ་རྡོ་རྗེ་ཁུ་ཚུར་དག །སྙིང་ག་ལྐོག་མ་སྤྱི་བོར་གཏུག །དེ་བཞིན་ཧཱུྃ་ཨཱཿཨོཾ་བརྗོད་བྱ། །ཞེས་ས་བོན་ལས་བསྐྱེད་པ་དང་། མས་རིམ་ནས་རེག་པ་ཁོ་ནར་གསུངས་སོ། །ནག་པོ་པའི་གཞུང་ལས། ཨོཾ་ཨཱཿཧཱུྃ་ཞེས་པས་སྤྱི་བོ་དང་། མགྲིན་པ་དང་། སྙིང་ག་རྣམས་སུ་ས་སྤྱོད་མ་དང་། མཁའ་སྤྱོད་མ་དང་། བདག་མེད་མ་རྣམས་བལྟས་ལ། རེག་པའི་ཚེ་མས་རིམ་ནས་རེག་པ་ཁོ་ནར་གསུངས་སོ། །འདི་དག་ནི་སྔར་གྱི་བྱང་ཆུབ་ཀྱི་སེམས་བསྲུང་ཞིང་། རྡོ་རྗེ་གསུམ་གྱི་ས་བོན་བཏབ་པས་ཁྱད་པར་ཅན་གྱི་དོན་སྔགས་ཀྱི་དམ་ཚིག་གི་ས་བོན་བཏབ་པ་ཡིན་ལ། དེ་ལ་མཆོད་པ་བྱ་བ་ནི། དཀྱིལ་ཆོག་བཟང་པོ་ཡོངས་གཟུང་ལས། དེ་ནས་མེ་ཏོག་སྤོས་སོགས་ཀྱིས། །མཆོད་པ་བྱས་ནས་འདུག་ཏུ་གཞུག །ཅེས་པ་ཙམ་ལས་མ་གསུངས་ཀྱང་། རིན་ཆེན་འབར་བ་དང་། ནག་པོ་པའི་གཞུང་འགྲེལ་གཉིས་ལས། སྤྱི་བོར་མེ་ཏོག་མདུན་དུ་སྤོས། །མར་མེ་དྲི་ནི་སྙིང་ག་རུ། །ཀུན་བྱེད་བཟླས་ནས་གུས་པ་ཡིས། །སློབ་མ་རྣམས་ལ་སྦྱིན་པར་བྱ། །ཞེས་མཆོད་པའི་རྣམ་གྲངས་བཞི་གསུངས་པའི་སྟེང་དུ། རྗེ་བཙུན་རྩེ་མོས་དབང་ཆུ་གཉིས་ཆར་ལས་ཞལ་ཟས་འབུལ་བར་གསུང་། གྲུབ་ཆེན་ས་ར་ཧས་སངས་རྒྱས་ཐོད་པའི་དཀྱིལ་ཆོག་ཏུ་དེའི་སྟེང་དུ་རོལ་མོ་འབུལ་བར་ཡང་བཤད་དོ། །གསུམ་པ་དངོས་གྲུབ་ཀྱི་མཚན་ལྟས་བརྟག་པ་ལ་གཉིས་ཏེ། སོ་ཤིང་གི་སྒོ་ནས་བརྟག་པ་དང་། རྨི་ལམ་གྱི་སྒོ་ནས་བརྟག་པའོ། །དང་པོ་ལ་བཞི་སྟེ། གང་དུ་དོར་བའི་གཞི། གང་དོར་བའི་དངོས་པོ། ཇི་ལྟར་དོར་བའི་ཚུལ། དེ་ལས་མཚན་མ་བརྟག་པའི་ཚུལ་ལོ། །དང་པོ་ནི། བཟང་པོ་ཡོངས་གཟུང་ལས། བ་ལང་པགས་པའི་ཚད་ཙམ་གྱི། །ས་ཡི་ཕྱོགས་སུ་རབ་ཏུ་དོར། །ཞེས་དང་། རིན་ཆེན་འབར་བ་ལས། བ་ཀོ་ཙམ་དུ་བྱུགས་པར་དོར། །ཞི་བ་ལ་སོགས་དངོས་གྲུབ་བསྟན། །ཞེས་དང་། ནག་པོ་པས་བ་ལང་གི་ཀོ་བ་ཙམ་གྱིས་མཎྜལ་བྱུགས་ལ། ཁ་ཤར་དུ་བལྟས་ཏེ་དྲང་པོར་དོར་རོ་ཞེས་སོགས་དཀྱིལ་ཆོག་མང་པོར་བ་ལང་གི་ཀོ་བའི་ཚད་ཙམ་གསུངས་པའི་དོན་བུ་སྟོན་གྱིས། རྒྱ་ཁྱོན་ལ་འཆད་པ་དང་། སྔ་རབས་པ་དག་རྔམས་དང་རྒྱ་ཁྱོན་གཉིས་ཀ་ལ་འཆད་པ་ཡོད་ཀྱང་། དབང་ཆུར་ནི། རྒྱར་ཁྲུ་གང་གྲུ་བཞི་དང་། རྔམས་སུ་དྲི་བཟང་གི་ཆུ་བ་བྱུང་ལྔ་དང་བསྲེས་པས་བྱུགས་པ་ལ་འཆད་པ་ཉིད་གཞུང་གི་དགོངས་པར་སྣང་སྟེ། ནག་པོ་པས་མཎྜལ་ལ་བྱུགས་པར་བཤད་པ་དང་མཐུན་ནོ། །དེར་མེ་ཏོག་གི་ཚོམ་བུ་གཅིག་དང་། ལྔ་དང་། དགུ་འགོད་པར་གསུངས་པ་རྣམས་ཕྱོགས་མི་འཁྲུལ་བའི་ཆེད་ཡིན་པས་གང་ལའང་འགལ་བ་མེད་དོ། །གཉིས་པ་ནི། རིན་ཆེན་འབར་བ་ལས། ཨ་ཤྭད་ཨུ་དུམ་ཝཱ་ར་ཡི། །སོ་ཤིང་སོར་ནི་བཅུ་གཉིས་པ། །མ་ཡོ་མ་གས་སྲོག་ཆགས་མེད། །རྩེ་མོ་མེ་ཏོག་བཅས་པ་སྦྱིན། །ཞེས་པ་ལྟར་རམ། རྒྱུ་དེ་ལྟ་བུ་མ་འབྱོར་ན། དབང་ཆུར་ལྕང་མ་ལ་སོགས་པའི་ཤིང་འཇམ་པ། དྲང་བ། རྩི་མ་ཉམས་པར་བྱས་པ་ཞེས་གསུངས་པ་ལྟར་རོ། །གསུམ་པ་ནི་ནག་པོ་པས། ཁ་ཤར་དུ་བལྟས་ཏེ་དོར་བར་གསུངས་ལ། བཟང་པོ་ཡོངས་གཟུང་ལས། བྱང་དུ་བལྟས་པར་གསུངས་ཀྱང་། རིན་ཆེན་འབར་བར། ཤར་རམ་བྱང་དུ་ཁ་བལྟས་བཞག །ཅེས་པ་ལྟར། དབང་ཆུ་གཉིས་ལས་ཀྱང་དེ་ལྟར་གསུངས་སོ། །དེའང་སློབ་མ་ལ་གཏད་པའི་ཚེ་སློབ་དཔོན་གྱིས་རྩ་བའི་སྔགས་ཀྱིས་མངོན་པར་བསྔགས་ནས། ཨོཾ་ཨཱཿཛི་ཧ་བཛྲ་སཾ་བ་ར་ཏ་ན་ནི་ཧཱུྃ་ཞེས་པས་སློབ་མའི་ཐལ་མོ་སྦྱར་བའི་བར་དུ་འཛིན་དུ་བཅུག་ལ། འདི་རིན་པོ་ཆེ་གསེར་རམ་དངུལ་ལས་བྱས་པར་མོས་ཤིག དེ་སོ་ཡིས་ནེམ་ནེམ་བཅའ་བ་དང་། བྲུད་པ་བཞིན་གྱིས་ཤིག སྨན་པ་མཁས་པས་སྐྱུག་སྨན་བཏང་བ་བཞིན་དུ་བདག་ཉིད་ཀྱི་སྡིག་སྒྲིབ་ཐམས་ཅད་ཕྱིར་ཕྱུང་བར་བསྒོམ། དབུས་སུ་ཐལ་མོ་ཁ་ཕྱེ་ལ་དོར་ཅིག་ཅེས་བརྗོད་དོ། །ཞེས་པ་ལྟར་བྱའོ། །བཞི་པ་ནི། རིན་ཆེན་འབར་བར། ཞི་བ་ལ་སོགས་དངོས་གྲུབ་བསྟན། །ཞེས་པ་དང་། བཟང་པོ་ཡོངས་གཟུང་ལས། སྟེང་ཕྲེད་ཁ་ཚུར་བལྟས་ལྷུང་ན། །ཤིན་ཏུ་སྐལ་བ་བཟང་པོར་འགྱུར། །ཕྱི་རིམ་ཁ་ཕར་བལྟས་པ་རུ། །ལྷུང་ན་སྐལ་བ་མེད་པར་འགྱུར། །ཞེས་དང་། ནག་པོ་པས། བདག་ཉིད་ལ་རྩེ་མོ་བལྟས་ན་ནི་མཆོག་འགྲུབ་ལ། ཤར་དུ་བལྟས་ན་ནི་འབྲིང་འགྲུབ་བོ། །གཞན་དག་གིས་ནི་འཇིག་རྟེན་པའི་དངོས་གྲུབ་ཐོབ་ཅེས་གསུངས་ཀྱང་། དབང་ཆུར་ནི། བདག་ཉིད་ལ་རྩེ་མོ་བལྟས་ན་མཆོག་འགྲུབ། ཐུར་དུ་བལྟས་ན་ས་འོག སྟེང་དུ་བལྟས་ན་མཁའ་སྤྱོད་ལ་སོགས་པ་འབྲིང་འགྲུབ། གཞན་དག་གིས་ནི་དངོས་གྲུབ་ཕྲན་ཚེགས་གང་ཡང་རུང་བ་འགྲུབ་སྟེ། ཤར་དུ་ཞི་བ། ལྷོར་མངོན་སྤྱོད། ནུབ་ཏུ་དབང་། བྱང་དུ་རྒྱས་པ། མཚམས་རྣམས་སུ་དངོས་གྲུབ་གང་ཡང་རུང་བ་ཕྲན་ཚེགས་འགྲུབ་ཅེས་བསྟན་ནོ། །ཞེས་གསུངས་སོ། །གཉིས་པ་རྨི་ལམ་གྱི་སྒོ་ནས་བརྟག་པ་ལ་གསུམ་སྟེ། རྨི་ལམ་གྱི་སྔོན་དུ་འགྲོ་བ། བརྟག་པ་དངོས། ངན་ན་བསྲུང་བ་བྱ་བའོ། །དང་པོ་ལ་བཞི་སྟེ། རྨི་ལམ་གསལ་པོ་འབྱུང་བར་བྱ་བའི་ཕྱིར་ཁྱོར་ཆུ་བླུད་པ། རྨི་ལམ་མི་འཁྲུག་པར་བྱ་བའི་ཕྱིར་ཀུ་ཤ་སྦྱིན་པ། རྨི་ལམ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་སྐུད་བཅིང་བ། ཞག་གིས་ཆོད་པ་ན་ཕྱིར་མི་ལྡོག་པར་བྱ་བའི་ཕྱིར་ཆོས་ཟབ་མོ་བཤད་པའོ། །དང་པོ་ནི། སྤྱིར་ཁྱོར་ཆུ་དང་། ཀུ་ཤ་དང་། སྲུང་སྐུད་གསུམ་ལ། གོ་རིམ་ངེས་པ་མེད་ཀྱང་བརྗོད་པའི་གོ་རིམ་གྱི་དབང་དུ་བྱས་ནས། དང་པོར་ཁ་དག་པར་བྱ་བ་དང་། ངག་གི་སྒྲིབ་པ་སྦྱང་བ་དང་། སྔར་གྱི་དགོས་པ་དང་གསུམ་གྱི་ཆེད་དུ་ཁྱོར་ཆུ་སྦྱིན་པ་ནི་དྲི་ཞིམ་པོའི་ཆུ་ལ་ཨོཾ་ཧྲཱི་ཞེས་སོགས་གསང་བ་སྤྱི་རྒྱུད་ནས་འབྱུང་བའི་སྔགས་ཀྱིས་མངོན་པར་བསྔགས་ཏེ། གཡས་པའི་ཁྱོར་བར་ལན་གསུམ་འཐུང་དུ་གཞུག་གོ །སྔགས་དོན་ལ་ཨོཾ་ནི་སྔགས་ཀྱི་མགོ་འདྲེན་པ། ཧྲཱིཿནི་ངོ་ཚ་ཤེས་པ། བི་ཤུདྡྷེ་ནི་རྣམ་པར་དག་པ། སརྦ་དྷརྨ་ནི་ཆོས་ཐམས་ཅད། སརྦ་པཱ་པཾ་ནི་སྡིག་པ་ཐམས་ཅད། ནི་ནི་ངེས་པ། ཙ་ནི་འབྱེད་པ་སྟེ་དང་ཞེས་པའོ། །སཾ་ཤོ་དྷ་ནི་ཡང་དག་པར་སྦྱོང་བ། སརྦ་བི་ཀལྤ་ནི་རྣམ་པར་རྟོག་པ་ཐམས་ཅད། ཨ་པ་ན་ནི་བྲལ་བ་སྟེ། ངོ་ཚ་ཤེས་པའི་ཆུ་འདིས་ཆོས་ཐམས་ཅད་རྣམ་པར་དག་ཅིང་། ངེས་པའི་སྡིག་པ་ཐམས་ཅད་དང་། རྣམ་པར་རྟོག་པ་ཐམས་ཅད་བྲལ་བར་གྱིས་ཞེས་པའོ། །གཉིས་པ་ནི། བཟང་པོ་ཡོངས་གཟུང་དང་། རིན་ཆེན་འབར་བ་གཉིས་ལས། ཀུ་ཤའི་ཆུན་པོ་ཆེ་ཆུང་གཉིས་ཀ་དྷཱིཿལས་བསྐྱེད་པར་གསུངས་ཤིང་སྟེར་བའི་སྔགས་མ་གསུངས་པ་ནི་ཟབ་མོའི་ཆོས་བཤད་པ་ཡན་ཆད་ཚར་ནས། སློབ་མ་དཀྱིལ་འཁོར་གྱི་ཁང་པ་དེར་ཉལ་དུ་གཞུག་པའི་ཚེ་སློབ་དཔོན་གྱིས་ཀུ་ཤ་སྔས་གདན་དུ་བཞག་པའི་དབང་དུ་བྱས་པ་ཡིན་ལ། དེང་སང་ཕྱག་ལེན་ནི་མན་ངག་ལུགས་ལྟར་མཛད་པར་སྣང་ངོ་། །ནག་པོ་པས། དྷཱིཿབཟླས་པའི་ཀུ་ཤ་ཆུང་བ་ལག་པ་གཡས་དང་། ཧ་བཟླས་པའི་ཀུ་ཤ་ཆེ་བ་ལག་པ་གཡོན་དུ་སྟེར་བར་གསུངས་པ་ལྟར་དབང་ཆུར་ཡང་། ཡི་གེ་དྷཱིཿབཟླས་པའི་ཀུ་ཤ་ཆུང་བ་ལག་པ་གཡས་དང་སྔས་སུ་སྦྱིན་ཞིང་། ཡི་གེ་ཧ་བཟླས་པའི་ཆེ་བ་གཡོན་དང་གདན་དུ་གདིང་ངོ་ཞེས་གསུངས་པ་ནི། ཐོག་མར་ལག་པ་གཡས་གཡོན་དུ་སྦྱིན་ནས། སློབ་མ་རང་ཉིད་ཀྱིས་གདན་དང་སྔས་སུ་གདིང་བའི་དབང་དུ་བྱས་པ་སྟེ། འདི་ལ་བསྐྱེད་ཆོག་དངོས་སུ་མ་གསུངས་ཀྱང་ཕྱག་ལེན་ལ་བསང་སྦྱངས་སྟོང་པའི་ངང་ལས་ཧཱུྃ་ལས་བསྐྱེད་པར་མཛད་དོ། །གསུམ་པ་ནི། བཟང་པོ་ཡོངས་གཟུང་ལས། བསྲུང་བའི་དོན་དུ་སྲད་བུ་ལ། །བདུད་རྩི་འཁྱིལ་པའི་སྔགས་ཀྱིས་བཟླ། །དེ་ནས་མདུད་པ་གསུམ་བྱ་སྟེ། །སློབ་མའི་དཔུང་པ་གཡས་པར་བཅིང་། །ཞེས་དང་། རིན་ཆེན་འབར་བ་ལས། བདུད་རྩི་འཁྱིལ་སྔགས་བཟླས་པ་ཡི། །སྲུང་སྐུད་དཔུང་པ་གཡས་པར་གདགས། །ཞེས་སྐྱེས་པ་དང་བུད་མེད་སོ་སོར་མ་ཕྱེ་བར་གཡས་པར་གདགས་པར་གསུངས་ཀྱང་། རྗེ་བཙུན་རྩེ་མོས། ཌོཾ་བི་ལུགས་ཀྱི་དབང་ཆུར་ནི་གཡོན་པར་གདགས་པར་གསུངས་སོ། །ནག་པོ་པས། ཡི་གེ་ཧཱུྃ་བཟླས་པའི་སྐུད་པ་མདུད་པ་གསུམ་དང་ལྡན་པ་དཔུང་པར་བཏགས་ལ་ཞེས་གཡས་གཡོན་མ་ཕྱེ་བར་གསུངས་པ་དང་། འདུས་པ་འཕགས་ལུགས་ཀྱི་དཀྱིལ་ཆོག་ལས། སྐྱེས་པའི་དཔུང་པ་གཡས་དང་བུད་མེད་ཀྱི་གཡོན་དུ་གདགས་པར་གསུངས་པ་དང་། མཚོ་སྐྱེས་དང་། མན་ངག་ལུགས་ཀྱི་དཀྱིལ་ཆོག་ལས་དེ་ལས་བཟློག་སྟེ་གསུངས་པ་དུ་མ་ཞིག་སྣང་ཡང་། འདི་དག་གི་དགོས་པ་ནི་ཁམས་ཀྱི་བར་ཆད་བསྲུང་བའི་ཆེད་ཡིན་ལ། སྐྱེས་པ་ལ་ཁམས་དཀར་པོའི་བར་ཆད་གཙོ་ཆེ་བས་གཡོན་དང་། བུད་མེད་ལ་ཁམས་དམར་པོའི་བར་ཆད་གཙོ་ཆེ་བས་གཡས་སུ་འཆིང་བ་མང་ཡང་། དེ་ལས་བཟློག་པའང་སྲིད་པས་བཟློག་སྟེ་འཆིང་བའང་གསུངས་སོ། །མདོར་ན་སྐྱེས་པ་དང་བུད་མེད་གང་ལའང་གཡས་དང་གཡོན་དུ་འཆིང་བ་གང་ལ་ཡང་འགལ་བ་མེད་པར་ཤེས་པར་བྱའོ། །སྲུང་སྐུད་ཀྱི་རྒྱུ་ནི་རས་བལ་སོགས་ལས་བྱས་པ། སློབ་མའི་ལུས་ཚད་ཙམ་དུ་གསུངས་པ་ནི་སློབ་མའི་ལུས་དང་མཉམ་པའི་དོན་ཡིན་པས་ཁྲུ་ཕྱེད་དང་བཞི་འབྱུང་ལ་འདིར་མཐོ་རེས་ལྷག་པར་གསུང་པ་ནི་ཁྲུ་བཞིར་འགྱུར་བས་ལུས་མི་མཉམ་པ་མེད་པ་གྲུ་བཞི་མཚོན་ནོ། །སུམ་སྒྲིལ་དུ་བྱེད་པ་ནི་སྦྱང་གཞི་སློབ་མའི་ལུས་ངག་ཡིད་གསུམ་གྱི་རྟེན་འབྲེལ་མཚོན་པའི་ཆེད་དང་རྡོ་རྗེའི་མདུད་པ་གསུམ་འདེབས་པ་ནི་ལུས་ངག་ཡིད་གསུམ་གྱི་བར་ཆད་གསུམ་བསྲུང་བ། ཁ་དོག་དམར་པོར་བྱེད་པ་ནི་སློབ་དཔོན་སྙིང་རྗེ་ཆེན་པོ་དང་ལྡན་པས་སློབ་མའི་དོན་ལ་རྗེས་སུ་ཆགས་པ། འཆིང་བའི་ཚེ་ཉིས་སྐོར་དུ་བྱེད་པ་ནི་ཉིན་མཚན་གཉིས་སམ། ཕྱི་ནང་གི་བར་ཆད་བསྲུང་བ་མཚོན། ལག་ལེན་པ་ཁ་ཅིག ཐོག་མར་སུམ་སྒྲིལ་དུ་བྱས་པའི་དྲུ་བུ་ལ་ཇི་ཙམ་རན་པ་བཅད་པ་ནི་མི་འཐད་དེ། ལུས་ངག་ཡིད་གསུམ་གྱི་རྟེན་འབྲེལ་ཉམས་པར་འགྱུར་བའི་ཕྱིར། འོ་ན་དབང་ཆུར་སྲུང་སྐུད་དམར་པོའི་བེའུ་སློབ་མའི་ལུས་ཚད་དང་ཉམས་པའམ་མཐོ་རེ་ཙམ་གྱིས་ལྷག་པའི་ཚད་སློབ་མའི་གྲངས་དང་མཉམ་པ་དྲུ་བུར་བྱེད་པ་དང་ཞེས་གསུངས་པ་དང་འགལ་ལོ་སྙམ་ན། མི་འགལ་བ་ནི་ཚིག་དེ་ཉིད་ལ་དཔྱད་པས་གསལ་ལོ། །སློབ་དཔོན་གྱིས་སྲུང་འཁོར་བཟླས་པའི་སྐབས་སུ་སྲུང་སྐུད་ལ་དབུས་དང་། གཡས་གཡོན་གཉིས་ཀྱི་དཀྱིལ་དུ་རྡོ་རྗེའི་མདུད་པ་རེ་གདབ། བདེ་མཆོག་སོགས་གཞན་ཡིན་ན་གཙོ་བོའི་སྔགས་བཟླས་པའི་ཚེ་གདབ་པའམ། གནས་སྐབས་གཞན་དུ་ན་ལྷའི་ང་རྒྱལ་དང་ལྡན་པས་ཧཱུྃ་ཟློས་ཤིང་གདབ་བོ། །སྟེར་བའི་ཚེ་ཐལ་མོའི་བར་དུ་བཅུག་ལ། མི་དམིགས་ཏེ་སྟོང་པའི་ངང་ལས་ཧཱུྃ་ལས་བྱུང་བའི་སྐུད་པར་བསྐྱེད་ལ། རང་གི་སྙིང་གའི་ས་བོན་གྱི་འོད་ཀྱིས་སྟ་གོན་གྱི་ལྷ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་སྐུད་པ་བཀུག་སྟེ་བསྟིམས་ལ། རྩ་བའི་སྔགས་བཟླས་ཤིང་དེ་ལ་ལག་པ་གཉིས་འཇུས་ཏེ། གུར་ནས་འབྱུང་བའི་ཡི་གེ་བརྒྱ་པ་བརྗོད་པར་གསུངས་ལ། དཀྱིལ་ཆོག་གཉིས་ལས་ནི་ལས་ཐམས་ཅད་པའི་སྔགས་ཀྱིས་བཅིང་བར་བཤད་དོ། །བཞི་པ་ནི། རྣམ་སྣང་མངོན་བྱང་ལས་འབྱུང་བའི། །འཇིག་རྟེན་དུ་ནི་ཀུན་མཁྱེན་དག །ཅེས་སོགས་ཀྱི་དོན་བཤད་པ་སྟེ། འདི་ལ་དཔེའི་སྒོ་ནས་རྙེད་པར་དཀོན་པར་བསྟན་པ་དང་། དཀོན་ཡང་ཕན་ཡོན་ཆེ་བར་བསྟན་པ་དང་། དེས་ན་སྤྲོ་བ་བསྐྱེད་པར་གདམས་པ་དང་གསུམ་ལས། དང་པོ་ནི། ཚིགས་བཅད་ཕྱེད་དང་གཉིས་ཏེ། འདི་ལ་རྗེ་བཙུན་རྩེ་མོས། དེའི་དོན་ནི་འདི་ཡིན་ཏེ། ལོ་ཀ་ན་གང་དཀོན་ན་སངས་རྒྱས་འབྱུང་བ་དཀོན་ཏེ། དཔེར་ན་ཨུ་དུམ་ཝཱ་རའི་མེ་ཏོག་བཞིན། དེའང་སངས་རྒྱས་གཅིག་ལོ་ཀ་ན་བྱོན་ན། ཨུ་དུམ་བཱ་རའི་མེ་ཏོག་གཅིག་འབྱུང་། དེའང་རྒྱལ་རིགས་ལ་སངས་རྒྱས་བྱོན་ན་དཀར་པོ། བྲམ་ཟེའི་རིགས་ལ་སངས་རྒྱས་བྱོན་ན་སེར་པོ་འབྱུང་ལ། དེ་ཡུམ་གྱི་ལྷུམས་སུ་འཇུག་ན་ཁ་འབུས། བལྟམས་ན་ཁ་བྱེ། གཞོན་ནུ་རོལ་རྩེད་མཛད་པ་ན་རྒྱས། དཀའ་ཐུབ་མཛད་པ་ན་རིད། ཆོས་ཀྱི་འཁོར་ལོ་བསྐོར་བ་ན་ཤིན་ཏུ་རྒྱས། མྱ་ངན་ལས་འདས་པ་ན་དེ་བསྐམས་ནས་འགྲོའོ། །སངས་རྒྱས་པས་ཀྱང་གསང་སྔགས་དཀོན་ཏེ། གསང་བ་འདུས་པ་ལས། ཐུབ་པ་ཆེན་པོ་མར་མེ་མཛད་ནས་ཐུབ་པ་ཆེན་པོ་འོད་སྲུང་གི་བར་གྱིས་ཀྱང་གསང་སྔགས་མ་གསུངས། མ་བྱོན་པའི་སངས་རྒྱས་བྱམས་པ་ནས་མོས་པའི་བར་གྱིས་ཀྱང་མི་གསུང་། ཤཱཀྱ་ཐུབ་པ་འདི་ཁོ་ནས་སྨོན་ལམ་གྱི་སྟོབས་ཀྱིས་གསུངས་པ་ཡིན་པས་ཤིན་ཏུ་དཀོན་ནོ། །དཀོན་པས་ཅི་སྟོ། དཀོན་པ་དག་གི་རི་བོང་གི་རྭ་དང་། ནམ་མཁའི་མེ་ཏོག་ཀྱང་དཀོན་ཏེ། དེས་ཅི་བྱ་སྙམ་ན་འདི་ཕན་ཡོན་མེད་པ་མ་ཡིན་ཏེ། བསྐལ་པ་དཔག་ཏུ་མེད་པའི་སྡིག་པ་ཐམས་ཅད་ཟད་པར་བྱེད་པ་ཡིན། དཔེར་ན་བྲག་ཕུག་སྟོང་པ་ཁ་བྱང་བལྟས་སུ་སྔར་སྣང་བ་གཏན་འོང་མ་མྱོང་བ་ལོ་སྟོང་ཕྲག་མང་པོ་ལོན་པ་དེར། མར་མེ་གཅིག་བཏེག་པ་ན་མུན་པ་དེ་ན་རེ། དཔུངས་ཆེ་གྲངས་མང་བ་ལོ་མང་པོ་བསྡད་པ་ཡིན་པས། ཁྱོད་ཀྱིས་བསལ་བར་མི་ནུས་མི་ཟེར་བར། མར་མེ་ཆུང་ངུ་དེ་སྐྱེས་མ་ཐག་ཏུ་མུན་པ་མེད་པར་བྱེད་པ་ཆོས་ཉིད་ཡིན་ནོ། །དཔེ་དེ་བཞིན་དུ་བསྐལ་པ་དཔག་ཏུ་མེད་པར་སྡིག་པ་བྱས་པ་ཐམས་ཅད་སང་ནུབ་དཀྱིལ་འཁོར་ཆེན་པོ་མཐོང་མ་ཐག་ཏུ་ཟད་པར་བྱེད་པ་ཡིན་ནོ་ཞེས་གསུངས་སོ། །གཉིས་པ་ལ་བཞི་སྟེ། ཕན་ཡོན་སྤྱིར་བསྟན་པ། སྔགས་ཀྱི་སྤྱོད་པ་ལ་གནས་པའི་ཕན་ཡོན། གསང་སྔགས་བཟླས་པའི་ཕན་ཡོན། སྤྱོད་པ་ལས་མི་འགྱུར་བའི་ཕན་ཡོན་དང་བཞི་ལས། དང་པོ་ནི། གང་གིས་ཞེས་སོགས་ཚིག་རྐང་གཉིས་སོ། །གཉིས་པ་ནི། གྲགས་པ་མཐའ་ཡས་ཞེས་སོགས་གཉིས་སོ། །གསུམ་པ་ནི། སྐྱོབ་པའི་གསང་སྔགས་ཞེས་སོགས་གཉིས་སོ། །བཞི་པ་ནི། གང་གི་སྤྱོད་པ་ཞེས་སོགས་ཚིགས་བཅད་གཅིག་གོ །གསུམ་པ་ནི། བདག་ཉིད་ཆེན་པོ་ཞེས་སོགས་ཚིགས་བཅད་ཕྱེད་དང་བཞི་སྟེ། དེ་ལྟར་དཀྱིལ་འཁོར་ཆེན་པོ་མཐོང་བ་ལ་ཕན་ཡོན་དེ་ཙམ་ཡོད་ན། གསང་སྔགས་ཀྱི་ལམ་དུ་ཞུགས་པ་ལྟ་སྨོས་ཀྱང་ཅི་དགོས། དེ་ལྟ་བུའི་རྙེད་དཀའ་ལ་ཕན་ཡོན་ཆེ་བའི་གསང་སྔགས་ཁྱོད་ཀྱིས་དེ་རིང་ཐོག་མར་རྙེད་ཅིང་། སང་ཉིན་དེའི་རིགས་སུ་སྐྱེ་བར་འགྱུར་བས། ལམ་འདི་ཉམས་སུ་བླངས་ན་ཐམས་ཅད་མཁྱེན་པའི་གོ་འཕང་འགྲུབ་པས་ཁྱེད་དགའ་བར་གྱིས་ཤིག་ཅེས་པའོ། །བཟང་པོ་ཡོངས་གཟུང་དང་། ཆོ་ག་ཉི་ཤུ་པ་སོགས་དཀྱིལ་ཆོག་འགའ་ཞིག་ལས་འདིའི་མཇུག་ཏུ། ཡོད་དང་མེད་ལས་རྣམ་པར་འདས། །ཞེས་སོགས་ཚིགས་བཅད་འགའ་ཞིག་འབྱུང་བ་ནི་འཐོབ་པར་འགྱུར་བའི་གོ་འཕང་དེའང་ཟུང་འཇུག་ཡིན་པའི་དོན་རྒྱས་པར་བཤད་པའོ། །སྔར་སྤྲོ་བ་བསྐྱེད་པ་བཤད་ཟིན་ནས། འདིར་ཡང་བརྗོད་པ་ལ་དགོས་པ་ཅི་ཞིག་ཡོད་སྙམ་ན། སྤྲོ་བ་སྐྱེས་ཏེ་ཉལ་བ་ན་རྨི་ལམ་དུ་མཚན་མ་བཟང་པོ་འབྱུང་བའི་དགོས་པ་དང་། ཞག་གིས་ཆོད་པ་ན་སྡིག་གྲོགས་སོགས་ཀྱི་དབང་གིས་ཕྱིར་ལྡོག་པ་སྲེད་པས་དེ་དགག་པའི་ཆེད་ཡིན་ཏེ། བཟང་པོ་ཡོངས་གཟུང་ལས། དེ་ནི་ཕྱིར་མི་ལྡོག་བྱའི་ཕྱིར། །སློབ་མ་རྣམས་ལ་སྤྲོ་བ་བསྐྱེད། །ཐེག་པ་དམན་ལས་ལྡོག་བྱའི་ཕྱིར། །ཐེག་པ་ཆེན་པོའི་ཆེ་བ་བརྗོད། །ཅེས་སོ། །གཉིས་པ་རྨི་ལམ་བརྟག་པ་དངོས་ནི། སློབ་མ་རྣམས་ལ་ཁྱོད་དཀྱིལ་འཁོར་ཆེན་པོའི་དྲུང་ལ་སོགས་པ་ཅི་བདེ་བའི་གནས་སུ་སྔར་བསྟན་པའི་ཀུ་ཤ་ཆུང་བ་སྔས་སུ་ཆུག ཀུ་ཤ་ཆེ་བ་གདན་དུ་ཐིང་ལ་ཕན་ཚུན་གཅིག་ལ་གཅིག་མ་རེག་པར་གྱིས་ལ། སེང་གེའི་ཉལ་སྟབས་ཞེས་བྱ་བ་བློ་གཡས་པ་ཕོབ་ལ་ཉོལ་ཞིག བསམ་པའང་སང་ནུབ་དཀྱིལ་འཁོར་ཆེན་པོ་ཇི་ལྟ་བུ་ཞིག་མཐོང་སྙམ་པ་དང་། ལྷ་དང་བླ་མ་ལ་གུས་པ་ཡིད་ལ་གྱིས་ལ་གཞན་འདོད་ཆགས་ལ་སོགས་པའི་སེམས་མ་བསྐྱེད་ཅིག རྨི་ལམ་མཐོང་བ་ང་ལ་སྨོས་ཤིག ཅེས་བསྒོས་ལ་གཏང་ངོ་། །སློབ་མས་སློབ་དཔོན་ལ་ཕྱག་འཚལ་ཏེ། ཇི་ལྟར་བདེ་བའི་གནས་སུ་སོང་ལ་སློབ་དཔོན་གྱིས་ཇི་ལྟར་བསྒོ་བ་བཞིན་ཉལ་བར་བྱའོ། །གསུམ་པ་ངན་ན་བསྲུང་བ་བྱ་བ་ནི། བཟང་པོ་ཡོངས་གཟུང་ལས། རྨི་ལམ་ཅི་མཐོང་འདྲི་བར་བྱ། །ཐོས་ནས་བཟང་ངམ་མི་བཟང་བ། །ཐེ་ཚོམ་མེད་པར་བཤད་པར་བྱ། །དགེ་བས་དངོས་གྲུབ་རྣམ་གསུམ་འགྲུབ། །མི་དགེ་སྦྱིན་སྲེག་སོགས་ཞི་བྱ། །ཞེས་གསུངས་པ་ལྟར་དབང་ཆུར་ཡང་། དེ་ནས་སློབ་མ་རྣམས་གང་ཡང་རུང་བའམ། གནས་དེར་བོས་ལ་ཁྱོད་ཀྱིས་རྨི་ལམ་ཇི་ལྟ་བུ་མཐོང་ཞེས་འདྲི་བར་བྱའོ། །སློབ་མས་ཇི་ལྟ་བ་སྨྲ་བར་བྱས་པ་དང་། ཐོས་ནས་བཟང་དང་མི་བཟང་བ། །ཐེ་ཚོམ་མེད་པར་བཤད་པར་བྱ། །རྨི་ལམ་ཐམས་ཅད་བདེན་མིན་ཡང་། །དེ་ལ་མ་དད་རིགས་མ་ཡིན། །དེ་ལ་རྨི་ལམ་གྱི་ལྟས་བཟང་པོ་རྣམས་གསང་བ་སྤྱི་རྒྱུད་ལས་འབྱུང་བར། རྨི་ལམ་སངས་རྒྱས་མཐོང་ན་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་མཐོང་། །དེ་ལ་མཆོད་པར་རྩོམ་པ་དང་། །དགེ་སློང་དག་ལས་ཆོས་ཉན་ཏམ། ཡང་ན་མི་ཉན་ན་ཡང་རུང་། །ཆོས་ནི་རྣམ་པར་སྤྱོད་པ་དང་། །དེ་བཞིན་མདོ་སྡེ་ཀློག་པ་དང་། །རྨི་ལམ་དགེ་འདུན་མཐོང་བ་དང་། །ཡང་ན་དགེ་སློང་གཅིག་པུ་མཐོང་། །དེ་དང་འགྲོགས་ཤིང་གཏམ་ཟེར་དང་། །ཡང་ན་དགེ་སློང་དངོས་པོར་འགྱུར། །གཙུག་ལག་ཁང་དག་མཐོང་བ་དང་། །ཡང་ན་དགེ་སློང་མ་དག་མཐོང་། །རྒྱལ་བའི་སྲས་དག་མཐོང་བ་དང་། །དེ་བཞིན་ཕ་མ་བླ་མ་རྣམས། །མཛའ་བོ་རྣམ་པ་སྣ་ཚོགས་དག །རྨི་ལམ་དག་ཏུ་མཐོང་ན་ཤིས། །རིག་སྔགས་དང་ནི་དངོས་གྲུབ་ཐོབ། །དེ་བཞིན་སློབ་མ་འཛིན་པ་དང་། །ཀུན་དགའ་རྣམ་པ་སྣ་ཚོགས་དང་། །འབབ་ཆུ་རྣམས་དང་རྒྱ་མཚོ་དང་། །རི་དང་གླང་པོ་ཆེ་དག་དང་། །མཐོང་ན་ཡང་ནི་བཟང་པར་བསྒྲགས། །ཞེས་བྱ་བ་ལ་སོགས་པ་རྒྱལ་པོར་དབང་བསྐུར་བ་དང་། །བཞོན་པ་ལ་ཞོན་པ་དང་། ནོར་དང་། འབྲུ་དང་། ཟས་མཆོག་ཏུ་གྱུར་པ་ལ་སོགས་པ་རྣམ་པ་མང་པོ་ཤེས་པར་བྱའོ། །མི་དགེ་བའི་ལྟས་ནི། རྒྱ་སྐྱེགས་ཀྱི་རི་ལ་འཛེགས་པ་དང་། ཀ་ར་བི་རའི་མེ་ཏོག་རྒྱས་པ་འཐུ་བ་དང་། མཆོད་སྡོང་དང་། བྱེ་མའམ། ཐལ་ཕུང་ལ་འཛེགས་པ་དང་། བོང་བུ་ལ་ཞོན་ནས་ཁ་ལྷོར་བལྟས་ནས་སོང་སྟེ་མ་ལོག་པ་དང་། སྤྲེའུ་ལ་ཞོན་ནས་ལྷོའམ་ཤར་དུ་འགྲོ་བའམ། བུད་མེད་ནག་མོ་རབ་ཏུ་ཁྲོས་པའམ། བུད་མེད་ནག་མོ་གོས་ནག་ཅན་ལ་འདོད་པ་སྤྱོད་ཅིང་ཀ་ར་བི་རའི་མེ་ཏོག་གི་ཕྲེང་བ་བཅིངས་པ་དང་། གཡང་ས་དང་། གཅོང་རོང་དུ་འཇུག་པ་དང་། ཤིང་ལས་ལྟུང་བ་དང་། ལྗོན་ཤིང་འབྲས་བུ་མེད་པ་སྐམ་པོ་མཐོང་བ་དང་། ཁྱི་དང་། ཁྭ་དང་། སྲིན་པོ་ལ་སོགས་པས་ཟོས་པ་དང་། ཕག་དང་། རྔ་མོ་དང་། མ་ཧེ་ལ་ཞོན་པ་དང་། མི་ནག་པོ་ལྕགས་ཀྱི་དབྱུག་པ་ཐོགས་པས་བསྡིགས་པ་དང་། ལུས་ཏིལ་མར་གྱིས་བྱུགས་ནས་ཕྲེང་བ་དམར་པོས་བཅིངས་པ་དང་། སྐྲ་བྲེགས་ནས་ཕྲེང་བ་དམར་པོས་བཅིངས་པ་ལ་སོགས་པ་རྣམས་ནི་མི་དགེ་བའི་ལྟས་སོ། །དེ་ལྟར་དགེ་བའི་ལྟས་རྣམས་ལ་སྔགས་ཀྱི་དངོས་གྲུབ་རབ་འབྲིང་གསུམ་དུ་འགྲུབ་པར་བསྟན་ཏོ། །མི་དགེ་བའི་ལྟས་རྣམས་ལ་ཆོས་ཐམས་ཅད་སྒྱུ་མ་ལྟ་བུའི་རང་བཞིན་དུ་བསྟན་ལ་རྩ་བའི་སྔགས་བརྒྱ་རྩ་བརྒྱད་ཀྱིས་བསྲུངས་ལ། སངས་རྒྱས་སྤྱན་གྱིས་རྣལ་འབྱོར་མན་ངག་ཇི་ལྟ་བ་བཞིན་དུ་བྱིན་ལ། བསྲེག་བླུགས་བརྒྱ་རྩ་བརྒྱད་དུ་ཞི་བའི་སྦྱིན་སྲེག་བྱའོ། །སངས་རྒྱས་སྤྱན་གྱི་བསྒོམ་བཟླས་ནི། བླ་མ་དམ་པའི་ཞབས་ལ་ཕྱག་འཚལ་ལོ། །སྐྱབས་འགྲོ་དང་བྱང་ཆུབ་ཀྱི་སེམས་བསྒོམ། སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ལྃ་བསམ། དེ་ལས་འོད་བྱུང་བས་ཕྱི་ནང་གི་སྒྲིབ་པ་ཐམས་ཅད་བྱང་། དེ་ནས་བདག་རང་སངས་རྒྱས་སྤྱན་སྐུ་མདོག་དཀར་མོ་པད་ཟླའི་སྟེང་ན་བཞུགས་པ། གཡས་འཁོར་ལོའི་སྟེང་ན་མིག་གི་འབྲས་བུ་འཛིན་པ། གཡོན་པདྨའི་དབུས་ན་མིག་གི་འབྲས་བུ་འཛིན་པའི་སྐུར་བསྒོམ། ཐུགས་ཀར་ཟླ་བ་ཁ་སྦྱར་གྱི་བར་དུ་རང་གི་མིང་བསམ། དེ་རུ་རུ་སྥུ་རུའི་སྔགས་ཀྱིས་རྒྱ་གྲམ་དུ་དཀྲིས་པར་བསྒོམ། དེ་ནས་ཨོཾ་རུ་རུ་སྥུ་རུ་ཛྭ་ལ་ཏིཥྛཿསིདྡྷི་ལོ་ཙ་ནི་སརྦ་ཨརྠ་སདྷ་ནི་སྭཱ་ཧཱ། ཞེས་བཟླས་ལ་མཐར་འཇོག་ཁར། སྤྱན་ནི་འཁོར་ལོ་མཛེས་མ་སྟེ། །འཆི་བ་སློང་བར་བྱེད་པའི་མཆོག །བདག་ཅག་སྡུག་བསྔལ་ཉེན་པ་ལ། །བྱིན་གྱིས་བརླབ་པར་མཛད་དུ་གསོལ། །ཞེས་གསོལ་བ་གདབ། རླུང་བུམ་པ་ཅན་ཅི་རིགས་པར་བསྒོམ། དབང་དུས་སུ་རྨི་ལམ་ངན་པ་བཟློག་པ་དང་། ཐུན་མོང་འཆི་བ་ཐུབ་པ་ཡང་ངོ་། །རྗེ་བཙུན་ས་སྐྱ་པའི་འོ། །ཞེས་གསུངས་པ་ལྟར་བྱའོ། །སློབ་མ་སྟ་གོན་འདི་དག་གི་རྗེས་སུ་དཀྱིལ་ཆོག་མང་པོར། སང་ནུབ་རྡོ་རྗེ་སློབ་མའི་དབང་ལས་མི་བསྐུར་ན། སྟ་གོན་དེ་ཙམ་གྱིས་ཆོག་ལ། རྡོ་རྗེ་སློབ་དཔོན་གྱི་དབང་བསྐུར་ན། མཎྜལ་ཕུལ་ནས་དབང་བསྐུར་བར་གསོལ་བ་གདབ་པ་དང་། ཁ་ཅིག་ལས། དེའི་སྟེང་དུ་རིགས་ལྔའི་སྡོམ་པ་གཟུང་བའང་བཤད་པ་ནི། སངས་རྒྱས་ཡེ་ཤེས་ཞབས་རྗེས་འབྲང་དང་བཅས་པའི་ཕྱག་ལེན་དུ་སྣང་སྟེ། དཀྱིལ་ཆོག་བཞི་བརྒྱ་ལྔ་བཅུ་པ་ལས་དེ་ལྟར་བཤད་ཅིང་། དེའི་རྗེས་འབྲང་གྲུབ་ཆེན་དཔལ་འཛིན་གྱི་གཞུང་རྣམས་ལས་བཤད་པའི་ཕྱིར་རོ། །འདིའི་དགོངས་པའང་ཡོ་ག་དང་སྒོ་བསྟུན་པ་སྟེ། རྡོ་རྗེ་འབྱུང་བར། རྡོ་རྗེ་སློབ་མའི་དབང་གི་སྐབས་སུ། མེ་ཏོག་གང་ཕོག་གི་ལྷའི་རྟེན་ལ་རིག་པའི་དབང་ལྔ་བསྐུར་བ་ཡོད་ཀྱང་། དེར་རིགས་ལྔའི་སྡོམ་པ་འདི་དག་མི་ཐོབ་ལ། རྡོ་རྗེ་སློབ་དཔོན་གྱི་དབང་གི་སྐབས་སུ། དཀྱིལ་འཁོར་གྱི་གཙོ་བོའི་རྟེན་ལ་རིག་པའི་དབང་ལྔ་བསྐུར་བ་ལས། རིགས་ལྔའི་སྡོམ་པ་འདི་དག་ཐོབ་པར་གསུངས་པ་ལྟར། ལུགས་འདིས་ཀྱང་རིགས་ལྔའི་སྡོམ་པ་ཐོབ་ཚུལ་དེ་ལྟར་བཞེད་པར་སྣང་ངོ་། །ཀྱེ་རྡོ་རྗེ་བིརྺ་པའི་ལུགས་གཉིས་དང་། བདེ་མཆོག་ནག་པོ་དཀྱིལ་ཆོག་རྣམས་ལས་རྡོ་རྗེ་སློབ་མའི་དབང་གི་སྐབས་སུ་ཡོ་གའི་རྡོ་རྗེ་སློབ་དཔོན་གྱི་དབང་གི་སྐབས་སུ་ཐོབ་པའི་སྡོམ་པ་དང་ན་མཉམས་པ་ངེས་པར་ཐོབ་པ་ལ་དགོངས་ནས་རྡོ་རྗེ་སློབ་མའི་དབང་ཙམ་ལས་མི་བསྐུར་ནའང་། སྟ་གོན་དང་འཇུག་པའི་སྐབས་སུ་རིགས་ལྔའི་སྡོམ་བཟུང་མཛད་པར་སྣང་བས་སྲོལ་ཆེན་པོ་གཉིས་སུ་ཤེས་པར་བྱའོ། །གསུམ་པ་དེ་ལས་སྡོམ་པ་ཇི་ཙམ་ཐོབ་པ་ནི་རྩ་ལྟུང་འཁྲུལ་སྤོང་ལས། སྔར་སོ་ཐར་དང་བྱང་སེམས་ཀྱི་སྡོམ་པ་མ་ཐོབ་པ་ཞིག་ཡིན་ན། སྟ་གོན་ནམ་འཇུག་པའི་སྐབས་སུ་དེ་གཉིས་ཐོབ་པར་གསུངས་པའི་དོན་ནི་རྒྱུན་བཤགས་ཀྱི་ཚེ་དེ་གཉིས་ཐོབ་ལ། དེའང་སྔགས་ཀྱི་ཆོ་ག་ལས་ཐོབ་པས་སྔགས་སྡོམ་གྱི་ངོ་བོར་སྐྱེ་བའོ། །སྔར་ཕ་རོལ་ཏུ་ཕྱིན་པ་རྐྱང་པས་དེ་གཉིས་ཐོབ་པ་ཡིན་ན། འདིར་སྔགས་སྡོམ་གྱི་ངོ་བོར་གནས་འགྱུར་བརྩི་དགོས་སོ། །སྡོམ་པ་གསུམ་གྱི་བཟླས་ཕྱེ་བའི་སྔགས་སྡོམ་ནི་གནས་གསུམ་བྱིན་གྱིས་བརླབས་པའི་ཚེ་རྡོ་རྗེ་གསུམ་གྱི་ས་བོན་ཐེབས་པ་ཙམ་ཞིག་ཐོབ་ལ། སོ་ཤིང་འདོར་བ་ལ་སོགས་པའི་ཆོ་ག་རྣམས་ལས་ཀྱང་། རང་རང་གི་ངོ་སྐལ་གྱི་སྔགས་སྡོམ་ཅུང་ཟད་རེ་ཐོབ་སྟེ། དབང་བསྐུར་གྱི་ཆོ་ག་ཡིན་པའི་ཕྱིར། བཞི་པ་དེ་ཉིད་སྟ་གོན་དུ་ཇི་ལྟར་འགྲོ་བའི་ཚུལ་ནི། སང་སློབ་མའི་རྒྱུད་ལ་དབང་བསྐུར་གྱི་དངོས་གཞི་བསྒྲུབ་པ་ལ་དོ་ནུབ་བསམ་པ་ཁྱད་པར་ཅན་མྱ་ངན་ལས་འདས་པའི་སེམས་བསྐྱེད་པ་དང་། སྡོམ་པ་འོག་མ་གཉིས་ལ་གནས་པ་དང་། རྡོ་རྗེ་གསུམ་གྱི་ས་བོན་ཐེབས་པ་དང་། དངོས་གྲུབ་ཀྱི་མཚན་ལྟས་བརྟག་པ་དང་། སྤྱིར་གསང་སྔགས་ལ་སྤྲོ་བ་བསྐྱེད་ཅིང་། ཁྱད་པར་ཞག་གིས་ཆོད་པ་ན་ཕྱིར་མི་ལྡོག་པར་བྱ་བའི་ཕྱིར་ཟབ་མོའི་ཆོས་བཤད་པ་རྣམས་འཚོག་ཆས་བྱེད་པས་ན་སློབ་མའི་རྒྱུད་ཀྱི་སྟ་གོན་ཅེས་པའི་དོན་ཏོ། །ལྔ་པ་སྟ་གོན་གྱི་མཇུག་གི་ཆོ་ག་ནི། དབང་ཆུར། སློབ་མ་རྣམས་ཉལ་དུ་གཞུག་པའི་རྗེས་སུ་སློབ་དཔོན་ཉལ་པའི་རྣལ་འབྱོར་གྱིས་ཉལ་ནས་ཐོ་རངས་དག་པ་གསུམ་གྱི་སྔགས་བརྗོད་པའི་རྗེས་སུ་མཇུག་གི་ཆོ་ག་བྱས་ནས། སློབ་མ་རྣམས་བོས་ཏེ་རྨི་ལམ་དྲི་བར་གསུངས་ལ། སྟ་གོན་གྱི་རྗེས་ཐོག་དེ་མ་ཐག་ཏུ་དཀྱིལ་འཁོར་འབྲི་ན། སྐབས་འདིར་རྗེས་ཆོག་བྱས་ཀྱང་ཆོག་ལ། སློབ་མ་སྟ་གོན་གྱི་གོང་དུ་དཀྱིལ་འཁོར་འབྲི་ན་ལྷ་སྟ་གོན་གྱི་རྗེས་སུ་བྱས་ཀྱང་ཆོག་གོ །གང་ལྟར་ཡང་མཆོད་པ་རྙིང་པ་རྣམས་བསལ། གསར་པ་རྣམས་བཤམས་ཏེ། བྱིན་གྱིས་བརླབས་ནས་བུམ་པ་སྟ་གོན་གྱི་སྐབས་ལྟར་ཕྱི་མཆོད། ནང་མཆོད། ཡིད་བྱུང་། བསྟོད་ཐུང་རྣམས་བྱ་སྟེ། འདིར་སྣ་ཚོགས་རོལ་མོ་གཉིས། དེ་ནས་དངོས་གྲུབ་བླང་། ལྷག་ཆད་ཁ་བསྐང་། ནོངས་པ་བཟོད་པར་གསོལ་ལ། ཧཱུྃ་བཛྲོད་ཏིཥྛ་ཞེས་ཕྱག་རྒྱ་དང་བཅས་པས་སྟ་གོན་གྱི་དཀྱིལ་འཁོར་ནམ་མཁར་བཏེག་ལ། སྔར་བཞིན་ཕྱི་མཆོད་ནས་བསྟོད་ཐུང་གི་བར་བྱ། འདིར་ཡང་སྣ་ཚོགས་རོལ་མོ་གཉིས་སོ། །སྔར་གྱི་འདེགས་པའི་སྔགས་ཀྱི་རྗེས་སུ་བཅོམ་ལྡན་འདས་འཁོར་དང་བཅས་པ་སང་དཀྱིལ་འཁོར་དུ་སྤྱན་མ་དྲངས་ཀྱི་བར་དུ། ནམ་མཁའི་ཁམས་འདིར་བརྟན་པར་བཞུགས་ནས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ་ཞེས་བརྗོད་དོ། །འདིར་ནི་སྟ་གོན་གྱི་ལྷ་ནམ་མཁར་འདེགས་པར་གསུངས་ལ། སྤྱིར་དཀྱིལ་ཆོག་རྣམས་ལས། ནམ་མཁར་འདེགས་པ་དང་རང་བཞིན་གྱི་གནས་སུ་གཤེགས་སུ་གསོལ་བ་དང་། སྙིང་གར་བསྡུ་བའི་ཚུལ་གསུམ་གསུངས་པས། གང་དུ་བཤད་པ་དེ་ཉིད་དུ་ཉམས་སུ་བླང་བར་བྱའོ། །ལྔ་པ་དཀྱིལ་འཁོར་བྲི་ཞིང་རྒྱན་དགྲམ་པ་ལ་གསུམ་སྟེ། ཐིག་གིས་བྲི་བ། ཚོན་གྱིས་བྲི་བ། རྒྱན་དགྲམ་པའོ། །དང་པོ་ལ་ལས་ཐིག་གིས་ཆ་བགོ་བ་དང་། ཡེ་ཐིག་གིས་བྱིན་གྱིས་བརླབ་པ་གཉིས་ལས། འདི་གཉིས་ཀྱི་གོ་རིམ་ལ་བཟང་པོ་ཡོངས་གཟུང་ལས། ཡེ་ཤེས་ཀྱི་ཐིག་གིས་བྱིན་གྱིས་བརླབས་ནས་བཏབ་པ་མ་གཏོགས། ལས་ཐིག་གིས་ཆ་བགོ་བ་གསལ་བར་མ་གསུངས་ལ། ཁ་ཅིག་ཐིག་སྐུད་གདབ་པའི་རིམ་པ་བཞིན། ཡེ་ཤེས་ཐིག་སྐུད་རབ་ཏུ་བརྐྱང་། །ཞེས་པའི་ཚིག་རྐང་དང་པོས་ལས་ཐིག་ཟིན་ནོ་ཞེས་གསུངས་ཡང་། དེ་ནི་གཡས་སྐོར་གྱི་རིམ་པ་བཞིན། ཡེ་ཐིག་གདབ་ཅེས་པའི་དོན་དུ་སྣང་ངོ་། །གཡས་ཀྱི་ཕྱོགས་སུ་བསྐོར་བ་ཡིས། །ཇི་ལྟར་གསུངས་པའི་ཐིག་བཏབ་པས། །དཀྱིལ་འཁོར་སྤྲུལ་པའི་ཐིག་ལ་ཡང་། །ཡེ་ཤེས་ཐིག་སྐུད་རབ་ཏུ་གདབ། །ཅེས་པའི་ཚིག་རྐང་གསུམ་པས་ལས་ཐིག་ཟིན་པ་འདྲའོ། །རིན་ཆེན་འབར་བ་དང་། ནག་པོ་པའི་གཞུང་འགྲེལ་དང་། བཞི་བརྒྱ་ལྔ་བཅུ་པ་དང་། དངོས་གྲུབ་འབྱུང་བའི་གཏེར་རྣམས་ལས། ཡེ་ཤེས་ཀྱི་ཐིག་སྐུད་བྱིན་གྱིས་བརླབས་ནས་ས་གཞི་དང་ནམ་མཁར་ཡེ་ཤེས་ཀྱི་ཐིག་གདབ་སྟེ། ཐིག་སྐུད་དེ་ཉིད་ཀྱིས་ཆ་བགོ་བ་མ་གཏོགས། ལས་ཐིག་ལོགས་སུ་གསུངས་པ་མི་སྣང་ངོ་། །བདེ་མཆོག་ནག་པོ་དཀྱིལ་ཆོག་ལས། དང་པོར་རྡོ་རྒྱུས་ཐིག་སོགས་པས། །ཐིག་རྣམས་ཐམས་ཅད་ངེས་པར་བྱ། །དེ་ཡི་སྟེང་དུ་ཡེ་ཤེས་ཐིག །ཀུན་ནས་ཡོངས་སུ་བརྐྱང་བར་བྱ། །ཞེས་ལས་ཐིག་དང་། ཡེ་ཐིག་གི་གོ་རིམ་གསུངས་ལ། དེང་སང་གི་ཕྱག་ལེན་ཕལ་ཆེར་འདིའི་དབང་དུ་བྱས་པ་ཡིན་ནོ། །འདི་དག་གི་དོན་བསྡུས་ནས། དབང་ཆུར། ཐིག་གཉིས་པོ་འདི་ལ་གོ་རིམ་ལ་ངེས་པ་མེད་དེ། དང་པོ་ཡེ་ཤེས་ཀྱི་ཐིག་བཏབ་ནས། དེ་ནས་ལས་ཀྱི་ཐིག་བཏབ་ཀྱང་ཆོག དང་པོ་ལས་ཐིག་བཏབ་སྟེ། དེ་ནས་ཡེ་ཤེས་ཀྱི་ཐིག་གིས་བྱིན་གྱིས་བརླབས་ཀྱང་བཏུབ་སྟེ་གང་བདེར་བྱའོ། །ཞེས་གསུངས་ཏེ། དེའི་རྒྱུ་མཚན་ཡང་ལས་ཐིག་ནི་དཀྱིལ་འཁོར་གྱི་ཆ་བགོ་བའི་ཆེད་ཡིན་ལ། ཡེ་ཤེས་ཀྱི་ཐིག་ནི་ས་གཞི་དང་། ནམ་མཁའ་ཐམས་ཅད་ཡེ་ཤེས་ལྔའི་རང་བཞིན་གྱིས་དཀྱིལ་འཁོར་དུ་བྱིན་གྱིས་བརླབ་པའི་ཆེད་ཡིན་གྱི། ལས་ཐིག་ཁོ་ན་བྱིན་གྱིས་བརླབ་པའི་ཆེད་མ་ཡིན་པའི་ཕྱིར་རོ། །འདིར་ཕྱག་ལེན་དང་བཤད་པའི་གོ་རིམ་གཉིས་ཀ་ལ་ལས་ཐིག་དང་པོར་བཤད་པ་བདེ་བས་འདི་ལ་ལྔ་སྟེ། གང་དུ་གདབ་པའི་གཞི། གང་གི་ཚེ་གདབ་པའི་དུས། གང་གིས་འདེབས་པའི་ཐིག་སྐུད། ཇི་ཙམ་འདེབས་པའི་ཚད། ཇི་ལྟར་འདེབས་པའི་ཆ་བགོ་ཚུལ་ལོ། །དང་པོ་ནི། རིན་ཆེན་འབར་བར། མཁས་པས་མཉམ་ཞིང་ཡིད་འོང་ས། །བ་ཡི་ལྔ་དང་བདུད་རྩི་ལྔ། །དྲི་ཞིམ་ཆུ་ཡིས་ལེགས་བྱུགས་ལ། །ཞེས་གསུངས་པ་ལྟར། ས་ཆོག་མི་དགོས་པའི་སའམ། དགོས་ན་ལེགས་པར་བྱས་པའི་སར། བསྟར་ཞིང་མཉམ་པ་བྱས་ལ། བ་བྱུང་ལྔ་དང་། དྲི་ཞིམ་པོའི་ཆུས་གཙང་བར་བྱས་པའོ། །གཉིས་པ་ནི་བཟང་པོ་ཡོངས་གཟུང་ལས། དཀྱིལ་འཁོར་ཉི་མ་ལྔ་པར་བྱས་པའི་ཉི་མ་བཞི་པའི་ཞག་ལ་གཟའ་སྐར་དང་། ཚེས་གྲངས་བཟང་བ་ལ་ཐིག་གདབ་ཅིང་འབྲི་བར་གསུངས་ཏེ། དེ་ཉིད་ལས། ཉི་མ་བཞི་པའི་ཞག་ལ་ཡང་། །བླ་མས་སྦྱིན་སྲེག་བྱས་ནས་ནི། །སློབ་མར་བཅས་པས་དཀྱིལ་འཁོར་བརྩམ། །ཟླ་བ་དྲུག་དང་གཟའ་བཞི་དང་། །རྒྱུ་སྐར་བཅུ་བཞི་གང་ཡིན་དང་། །ཚེས་གྲངས་བདུན་གྱི་གྲངས་ཉིད་ལ། །རྒྱལ་བ་རབ་གནས་ལ་སོགས་བསྔགས། །དཔྱིད་འབྲིང་ཐ་དང་དབྱར་ཐའོ། །སྟོན་ཐ་དགུན་གྱི་འབྲིང་ཐ་མ། །གཟའ་ལྷག་ཕུར་བུ་པ་བ་སངས། །ཟླ་བའི་གཟའ་དང་འདི་དག་བཟང་། །ཚེས་གཉིས་དང་ནི་ཚེས་གསུམ་དང་། །ལྔ་དང་བདུན་དང་བཅུ་པ་དང་། །བཅུ་གསུམ་པ་དང་ཟླ་གང་བ། །ཞག་བདུན་པོ་ནི་བཟང་པོ་ཡིན། །རྒྱལ་དང་མེ་བཞི་ལྷ་མཚམས་དབོ། །སྣར་མ་བྱི་བཞིན་མགོ་དང་ལག །སྣྲོན་སྣྲུབས་ཆུ་སྟོད་ཆུ་སྨད་དང་། །ཁྲུམས་སྟོད་ཁྲུམས་སྨད་སྐར་མ་རྣམས། །སྐར་མ་དབོ་ལ་རབ་གནས་བྱ། །དེས་ནི་ཤེས་རབ་འཕེལ་བར་འགྱུར། །སེམས་ལ་གང་ཅི་བསམ་པ་ཡི། །དངོས་གྲུབ་མེ་བཞིས་འགྲུབ་པར་འགྱུར། །སྣྲུབས་དང་བྱི་བཞིན་དག་གིས་ནི། །བཀའ་རྣམས་ཡོངས་སུ་ཤེས་པར་འགྱུར། །ལག་པ་སྐལ་བ་བཟང་པོར་འགྱུར། །སྣར་མས་ནོར་རྣམས་འབྱུང་བར་འགྱུར། །མགོ་ལ་ཞི་བ་བརྗོད་པ་ཡིན། །ཆུ་སྟོད་ཆུ་སྨད་བུ་འཕེལ་འགྱུར། །ཁྲུམས་སྟོད་ཁྲུམས་སྨད་འཕེལ་བར་འགྱུར། །རྒྱལ་ལ་ཐམས་ཅད་དུ་ནི་རྒྱལ། །སྣྲོན་ལ་བདེ་བ་ཡང་དག་སྩོལ། །ལྷ་མཚམས་མཆོག་ནི་ཡང་དག་སྟེར། །དུས་དང་གཟའ་བཟང་ལ་བརྟེན་ནས། །བྱ་བ་འདི་ནི་ལྷག་གནས་ཡིན། །ཞེས་གསུངས་པས་སོ། །རབ་གནས་ཀྱི་རྒྱུད་ལས། གནམ་སྟོང་དང་ནི་དེ་བཞིན་དུ། །བཅུ་བཞི་ལ་ནི་བྱ་བ་མིན། །ཞེས་པའི་དོན་ཁ་ཅིག་ཉི་ཤུ་དགུ་དང་གནམ་སྟོང་ལ་རབ་གནས་ཀྱི་དངོས་གཞི་བྱ་བར་མི་རུང་བ་ཡིན་གྱི། དབང་བསྐུར་གྱི་དངོས་གཞི་མི་རུང་བ་མ་ཡིན་ནོ་ཞེས་སྨྲ་བ་ཡོད་ཀྱང་། དབང་བསྐུར་གྱི་དངོས་གཞིའང་མི་རུང་བར་གསལ་ཏེ། རབ་གནས་ཀྱི་རྒྱུད་ལས་གསུངས་པའི་ཚེས་གྲངས་རྣམས་འདིར་དཀྱིལ་འཁོར་བྲི་བ་དང་། དབང་བསྐུར་བའི་དུས་ལ་སྦྱར་འདུག་པའི་ཕྱིར་རོ། །གསུམ་པ་ནི། རྩ་རྒྱུད་ལས། རང་འདོད་ལྷ་ཡི་རྣལ་འབྱོར་གྱིས། །སར་པ་ལེགས་པར་བཀལ་བ་དང་། །ཤིན་ཏུ་ཚད་མ་མཛེས་པ་ཡི། །སྲད་བུས་ཤེས་རབ་ཅན་གྱིས་གདབ། །ཅེས་གསུངས་པའི་སར་པ་ནི་དཀྱིལ་འཁོར་གཞན་དུ་ལོངས་མ་སྤྱད་པའོ། །ལེགས་པར་བཀལ་བ་ནི་འཇུར་མདུད་སོགས་མེད་པའོ། །ཤིན་ཏུ་ཚད་མ་ནི་སྦོམས་སུ་སྒོའི་ཉི་ཤུའི་ཆ་དང་། དཀྱུས་སུ་དཀྱིལ་འཁོར་གྱི་ཉིས་འགྱུར་ཏེ། འདི་ལ་ཨ་བྷྱས་རྟ་བབས་སྒོ་ཚད་གསུམ་དཔངས་སུ་བྱས་པའི་ཚེ་དཀྱིལ་འཁོར་རྩ་ཐིག་ལ་འབྲུ་མནན་ན། དེ་ཉིས་འགྱུར་གྱིས་རྭ་རྩེ་མ་སྙོགས་པས་དཀྱིལ་འཁོར་མདའ་ཐིག་ལ་བྱས་ནས་དེ་ཉིས་འགྱུར་ཆ་ཕྲན་དགུ་བཅུ་གོ་དྲུག་ཏུ་འགྱུར་བས་དུར་ཁྲོད་མེད་པའི་དབང་དུ་བྱས་ནས། འོད་ཕྲེང་ཚུན་གྱི་ཚད་དུ་འདོད་པ་དང་། ཤྲདྡྷས་དཀྱིལ་འཁོར་རྩ་ཐིག་ལ་བྱས་ནས་རྟ་བབས་སུ་སྒོ་ཚད་གཅིག་མ་བྱས་ཏེ། རྭ་རྩེ་ཚུལ་གྱི་ཚད་དུ་འདོད་པ་གཉིས་ཡོད་པ་ལས། ཕྱི་མ་འདི་ཉིད་རྒྱུད་གཞུང་རྣམས་ཀྱི་དགོངས་པར་སྣང་སྟེ། ཟླུམ་ཐིག་བརྐྱང་པའི་ཐིག་ལ་མི་ལྟོས་པའི་ཕྱིར་དང་། གལ་ཏེ་ལྟོས་ན་དུར་ཁྲོད་ཡོད་པ་རྣམས་ལ་དེའི་ས་བསྐོར་དུ་མེད་པར་འགྱུར་བའི་ཕྱིར་དང་། སྡོམ་འབྱུང་ལས། ཐིག་གི་མཚན་མ་དྲུག་ཅུ་བཞི། །ཞེས་དང་། བདེ་མཆོག་ནག་པོའི་དཀྱིལ་ཆོག་ལས། མཚམས་ཀྱི་ཐིག་ནི་བསྐོར་བ་དག །རྟ་བབས་ཀྱི་ནི་གནས་སུ་བཤད། །ཅེས་པ་དག་གིས་ཀྱང་ལུགས་ཕྱི་མ་དེ་ཉིད་སྟོན་པའི་ཕྱིར་རོ། །མཛེས་པ་ནི་སྦོམ་ཕྲ་སོགས་མེད་པའོ། །ཐིག་གི་མཚན་ཉིད་བཞི་པོ་འདི་རྩ་རྒྱུད་ལས་ཀྱང་། ཐིག་གཉིས་པོ་གང་གི་ཡིན་མི་གསལ་ཞིང་། དཀྱིལ་ཆོག་རྣམས་ལས་ཀྱང་ཡེ་ཤེས་ཀྱི་ཐིག་གི་མཚན་ཉིད་དུ་བཤད་པའི་ཚེ་དེ་ཉིད་ཀྱི་ཆ་བགོ་བར་གསུངས་པས། གཉིས་ཀའི་མཚན་ཉིད་དུ་འགྲོ་དགོས་ཏེ། ཤིན་ཏུ་ཚད་མའི་དོན་ལས་ཐིག་ལ་གཙོ་བོར་མཁོ་བའི་ཕྱིར་དང་། ཁ་དོག་ལྔའམ་ཉི་ཤུ་རྩ་ལྔ་དགོས་མི་དགོས་ཀྱི་ཁྱད་པར་མ་གཏོགས། མཚན་ཉིད་གཞན་རྣམས་ཁྱད་པར་མེད་པའི་ཕྱིར་རོ། །ཡེ་ཐིག་གི་ཆ་བགོ་བའི་ཚེ་ཁ་དོག་གི་ཁྱད་པར་མེད་ཀྱང་དང་པོར་རྡོ་རྒྱུས་ཐིག་སོགས་པས། ཞེས་གསུངས་པ་ལྟར། ལས་ཐིག་ལོགས་སུ་བྱས་པའི་ཚེ་རྡོ་རྒྱུ་སོགས་ཀྱིས་དཀར་པོར་བྱས་པ་ཡིན་པས་ཁ་དོག་གི་ཁྱད་པར་ཡོད་དོ། །བཞི་པ་ལ་གསུམ་སྟེ། ཚད་ངེས་པའི་དོན། ཚད་ལས་ལྷག་པའི་དོན། ཚད་མ་ངེས་པའི་དོན་ནོ། །དང་པོ་ནི། གུར་ལེའུ་གཉིས་པ་ལས། རྡོ་རྗེ་ཅན་གྱི་ཁྲུ་གསུམ་སྟེ། །སངས་རྒྱས་དཀྱིལ་འཁོར་ཁྲུ་བཞི་པ། །སྣང་བྱེད་ལ་ནི་ཁྲུ་ལྔ་ཉིད། །པདྨ་གར་དབང་དྲུག་པ་སྟེ། །ལྕགས་ཀྱི་རྒྱལ་པོ་དེ་བཞིན་བདུན། །ཞེས་གསུངས་ཤིང་། དེའི་དོན་གུར་རྒྱན་ལས། དཀྱིལ་འཁོར་གྱི་ཚད་ནི་ནང་དོན་ལ་དགོངས་པ་སྟེ། མི་བསྐྱོད་པ་ཐུགས་ཡིན་པའི་ཕྱིར། ཡེ་ཤེས་ཞུ་བདེ་མི་རྟོག་པ་གསུམ་མཚོན་པ་དང་། རྣམ་སྣང་སྐུ་ཡིན་པས་ལུས་འདོམ་གང་གྲུ་བཞི་པ་དང་། རིན་འབྱུང་ཡོན་ཏན་ཡིན་ཏེ་བདུད་རྩི་ལྔའི་ཡོན་ཏན་ལས་འབྱུང་བ་དང་། འོད་དཔག་མེད་ནི་བདེ་བ་ཡིན་ཏེ་བདུད་རྩི་ལྔ་བདེ་བ་དང་དྲུག་ཡིན་ནོ། །དོན་ཡོད་གྲུབ་པའི་ཕྲིན་ལས་ནི་བདུད་རྩི་ལྔ་དགའ་བྲལ་ལྷན་སྐྱེས་ཏེ་བདུན་ཡིན་ནོ་ཞེས་གསུངས་སོ། །འདུས་པ་རྩ་བའི་རྒྱུད་ཀྱི་ལེའུ་བཞི་པར། ཐུགས་ཀྱི་དཀྱིལ་འཁོར་ལ་ཁྲུ་བཅུ་གཉིས་དང་། ལེའུ་བཅུ་དྲུག་པར་སྐུའི་དཀྱིལ་འཁོར་ལ་ཁྲུ་བཅུ་དྲུག་དང་། གསུང་གི་དཀྱིལ་འཁོར་ལ་ཁྲུ་ཉི་ཤུ་པར་གསུངས་པའི་དོན། སྒྲོན་གསལ་ལས། དེ་དག་ངོས་མ་ལུས་པའི་དབང་དུ་བྱས་པ་ཡིན་གྱི། ངོས་རེ་ལ་ཁྲུ་གསུམ་པ་སོགས་སུ་འགྱུར་བར་བཤད་པ་ཙམ་མ་གཏོགས་མཚོན་དོན་གསུངས་པ་མི་སྣང་ལ། སློབ་དཔོན་སྨན་པའི་ཞབས་ཀྱིས་དེ་ལ་ཁྲུ་བཅུ་གཉིས་ནི་སྒེག་སོགས་བཞི་དང་། བདུག་པ་མོ་སོགས་བཞི་དང་། ལྕགས་ཀྱུ་མ་སོགས་བཞི་སྟེ་ལྷ་མོ་བཅུ་གཉིས་རྣམ་པར་དག་པ་དང་། ཁྲུ་བཅུ་དྲུག་ནི་རྡོ་རྗེ་སེམས་དཔའ་ལ་སོགས་པའི་སེམས་དཔའ་བཅུ་དྲུག་རྣམ་པར་དག་པ་དང་། ཁྲུ་ཉི་ཤུ་ནི་དེའི་སྟེང་དུ་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་སྟེ་ཉི་ཤུ་རྣམ་པར་དག་པའི་རང་བཞིན་ཡིན་ལ། དེ་རྣམས་ས་བཅུ་རྣམ་པར་དག་པ་སྟེ། ས་བཅུ་ནི་ཡེ་ཤེས་ལྔའི་རྟེན་ཏུ་གྱུར་པའི་ཕྱིར་རོ། །ཞེས་བཤད་དོ། །གཉིས་པ་ནི། རྩ་རྒྱུད་དང་པོའི་བཅུ་པར། དེ་ནས་དཀྱིལ་འཁོར་ཁྲུ་གསུམ་དང་། །མཐེ་བོང་གསུམ་ནི་ལྷག་པར་བྱ། །ཞེས་དང་། ཁ་སྦྱོར་གྱི་གཉིས་པའི་དང་པོར། །དཀྱིལ་འཁོར་ཁྲུ་གསུམ་བྱ་བ་དང་། །མཐེ་བོང་གསུམ་མམ་ལྷག་པར་བྱ། །ཞེས་མཐེ་བོང་གསུམ་ལྷག་པའི་དོན། ཕྱི་མ་དག་ཕལ་ཆེར་ཡབ་ཡུམ་གི་ཁྱད་པར་དུ་འདོད་པ་ནི་མི་འཐད་དེ། དེ་ལྟར་ན་རྩ་བའི་རྒྱུད་ཉིད་ལས། ཡུམ་གྱི་སྐབས་སུ། འཕར་མ་གཉིས་བཟང་རྣམས་བྲིས་ནས། །ཞེས་པ་ལ་ཕྱི་མའི་ལྔ་པར། འཕར་མ་གཅིག་དང་སྒོ་བཞི་པ། །ཞེས་མི་འདྲ་བའི་ཁྱད་པར་གསུངས་པ་ལྟར། འདི་ལའང་གསུང་རིགས་པ་ལས་མ་གསུངས་པའི་ཕྱིར་དང་། ཁ་སྦྱོར་གྱི་གཉིས་པའི་དང་པོ་ནི། གཙོ་བོར་རྡོ་རྗེ་དབྱིངས་ཀྱི་དཀྱིལ་འཁོར་གྱི་དབང་ཆོག་སྟོན་པའི་སྐབས་ཡིན་པའི་ཕྱིར་དང་། རིན་ཆེན་འབར་བར་ཡབ་ཀྱི་སྐབས་སུའང་། ཕྱི་ཡི་རྒྱ་ནི་ཁྲུ་བདུན་པ། །ནང་གི་ཁྲུ་གསུམ་མཐེ་བོང་གསུམ། །ཞེས་གསུངས་པས་སོ། །འོ་ན་ཇི་ལྟར་སྙམ་ན། བླ་མ་མངའ་རིས་པའི་ཚིག་འགྲེལ་ལས། མཐེ་བོང་གསུམ་ནི་ཡབ་ཀྱི་རྡོ་རྗེ་ནོར་བུའི་ཡུ་བ་ལ་མཐེབ་སོར་གསུམ་ཡོད་པ་མཚོན། ཞེས་གསུངས་པའི་དོན་ཉེ་རྒྱུའི་སྤྱོད་པའི་ཚེ་ལས་རྒྱ་བསྟེན་དགོས་པས་ཡབ་ཀྱི་རྡོ་རྗེ་དང་། ཡུམ་གྱི་པདྨ་གཉིས་ཀ་ངེས་པར་དགོས་ཞེས་པའི་དོན་ཏོ། །ཉེ་རྒྱུའི་སྤྱོད་པ་ཡུམ་ལ་ཇི་ལྟར་ཡོད་སྙམ་ན། ཡུམ་ཉིད་ཀྱི་བསྐྱེད་རིམ་ལ་བརྟེན་ནས་བུད་མེད་ཀྱི་རྟེན་ཅན་ས་བཅུ་པ་ཐོབ་པའི་ཚེ་རང་དང་རྟོགས་པ་མཉམ་པའི་ཐབས་རྙེད་ན་དེའི་ཉེ་རྒྱུའི་སྤྱོད་པའི་རྟེན་བྱས་པས་རྒྱུད་གཉིས་ཅིག་ཅར་དུ་གྲོལ་བར་འགྱུར་ལ། མ་རྙེད་ན་རང་ཉིད་སྐྱེས་པར་བསྒྱུར་ནས་ཉེ་རྒྱུད་སྤྱོད་དགོས་པས། དེའི་ཚེ་རྡོ་རྗེ་ནོར་བུའི་ཡུ་བ་སོར་གསུམ་པ་མཚོན་པའི་ཆེད་དུ་རྩ་རྒྱུད་ལས། ཡུམ་གྱི་སྐབས་སུ་དངོས་སུ་གསུངས་ཤིང་ཡབ་ལ་དོན་གྱིས་གོ་བ་ལ་དགོངས་ནས་ཚད་དེ་ཉིད་ལས་གཞན་མ་གསུངས་སོ། །སཾ་བུ་ཊའི་དོན་ནི། རྣལ་འབྱོར་དབང་ཕྱུག་གི་བཞེད་པས་རྒྱུད་གསུམ་མངོན་པར་རྟོགས་པ་གཅིག་ཏུ་བསྲེས་པའི་ཚེ། ཚེ་གཅིག་གི་སྟེང་དུ་ལས་དང་པོ་པ་ནས་ཉེ་རྒྱུའི་སྤྱོད་པའི་བར་གྱི་བསྐྱེད་རིམ་གྱི་གཙོ་བོ་ནི། བདག་མེད་རྣལ་འབྱོར་ལྡན་པའམ། །ཡང་ན་ཧེ་རུ་ཀ་དཔལ་བརྩོན། །ཞེས་པའི་སྐབས་ནས་བསྟན་པ་གཉིས་པོ་ཁོ་ན་ཡིན་པས། དེའི་ནང་དུ་འདུས་ཀྱང་ཁ་སྦྱོར་རང་ཉིད་རྒྱུད་གཞན་ལ་མ་ལྟོས་པར། ཚེ་གཅིག་ལ་ཕྱག་ཆེན་མཆོག་གི་དངོས་གྲུབ་བསྒྲུབ་པའི་མངོན་རྟོགས་རང་རྐང་ཚུགས་པར་སྦྱར་བའི་ཚེ། བསྐྱེད་རིམ་གྱི་གཙོ་བོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཡིན་པས་དེ་ལ་མཐེ་བོང་གསུམ་གྱིས་ལྷག་པ་དགོས་པའི་མཚོན་དོན་སྒྲིག་ཚུལ་ནི་སྔ་མ་དང་འདྲ་ལ། འམ་ཞེས་པ་ནི་རྩ་བཤད་གཉིས་ཀ་ལའང་། འདི་ནི་མ་ཐ་ཡིན་གྱི་དེ་ལས་ལྷག་པ་ཇི་སྙེད་ཀྱི་བར་དུ་རུང་ཞེས་པའི་དོན་ཏོ། །དེ་ལྟར་བྱས་ན་རྩ་རྒྱུད་ཀྱིས་ཡབ་ཡུམ་གཉིས་དང་། སཾ་བུ་ཊིའི་རང་རྐང་ཚུགས་པ་ལྟར་ན་རྡོ་རྗེ་དབྱིངས་ཀྱི་དཀྱིལ་འཁོར་དང་གསུམ་ལ་མཐེ་བོང་གསུམ་གྱིས་ལྷག་པ་དགོས་ཤིང་། གཞན་རྣམས་ལ་མི་དགོས་པ་དང་། རིན་ཆེན་འབར་བར་ཡབ་ཀྱི་སྐབས་སུའང་མཐེ་བོང་གསུམ་གྱིས་ལྷག་པ་གསུངས་པ་དང་། མི་ཐུབ་ཟླ་བས་འབྲས་བུ་འབྱུང་བ་མེད་པའི་ཕྱིར་དང་། དཔལ་གྱི་འོས་མ་ཡིན་པའི་ཕྱིར་ན་རྣམ་པ་གཞན་ནི་བཀག་གོ་ཞེས་དང་། རྗེ་བཙུན་རྩེ་མོས། སློབ་དཔོན་མི་ཐུབ་ཟླ་བ་ནི་ཧེ་རུ་ཀ་གསུམ་ནི་ལས་དང་པོ་པའི་བསྒོམ་བྱ་ཙམ་དུ་བཞེད་དོ། །ཞེས་གསུངས་པ་རྣམས་ཀྱི་དོན་ཕྱོགས་གཅིག་ཏུ་འགྲིག་ཅིང་། མན་ངག་ཟབ་མོའི་གནད་རྣམས་ཀྱང་རྟོགས་པར་འགྱུར་རོ། །གསུམ་པ་ནི་བཞི་བརྒྱ་ལྔ་བཅུ་པ་ལས། སེམས་ཅན་བསམ་པ་ལ་བརྟེན་ནས། །ཚད་ལ་སོགས་པ་ངེས་མཛད་ཀྱི། །ཐབས་ཤེས་ལས་བྱུང་དངོས་གྲུབ་ལ། །ཚད་སོགས་ངེས་པ་ཅི་ཞིག་བྱ། །དེ་ནི་ཁྲུ་གཅིག་ནས་བརྩམས་ཏེ། །ཇི་སྲིད་ཁྲུ་སྟོང་བར་དུ་འོ། །ཞེས་དང་། དངོས་གྲུབ་འབྱུང་བའི་གཏེར་ལས། མདོར་ན་ཟབ་གསལ་གཉིས་མེད་ལས། །གྲུབ་པའི་ཁྱད་པར་འབྱུང་བས་ན། །རིགས་དང་ཚད་སོགས་ངེས་མེད་པས། །ཁྲུ་གང་ནས་བརྩམས་སྟོང་ཕྲག་བྱ། །ཞེས་གསུངས་ཏེ། ཐུགས་ཀྱི་དཀྱིལ་འཁོར་ཁྲུ་བཅུ་གཉིས་པ་ལ་སོགས་པ་ཚད་ངེས་པ་ཅན་གསུངས་པ་ནི་གདུལ་བྱའི་བསམ་པའི་བྱེ་བྲག་གིས། ཀུན་རྫོབ་ཏུ་མཚོན་བྱ་མཚོན་པའི་ཆེད་དུ་གསུངས་པ་ཡིན་ལ། ཡང་དག་པར་ན། ཟབ་གསལ་གཉིས་མེད་ལས་བྱུང་བའི་དངོས་གྲུབ་བསྒྲུབ་པ་ལ་མཚོན་དོན་མཐའ་གཅིག་ཏུ་ངེས་པ་མེད་པས། འབྱོར་བའི་བྱེ་བྲག་གིས་ཁྲུ་གང་ནས་ཁྲུ་སྟོང་གི་བར་ཇི་ལྟར་ནུས་པར་བྱ། ཞེས་པའི་དོན་ནོ། །ལྔ་པ་ནི་དབང་ཆུར་དེ་ལ་ལས་ཀྱི་ཐིག་འདེབས་པར་འདོད་ན་དེའི་ཚུལ་ནི་འདི་ཡིན་ཏེ། དཀྱིལ་འཁོར་བྱུགས་ལ་ལྷ་སྟ་གོན་གྱི་གནས་མི་འཁྲུགས་པར་ངོ་ཤེས་པར་བྱས་ལ་དང་པོ་ཚངས་ཐིག་གདབ་སྟེ། དེའི་དབུས་ངོ་ཤེས་པར་བྱ། དེ་ནས་ཤར་དང་ནུབ་ཏུ་པཉྩ་རེ་ཁཱའི་མཚམས་དེར་རི་མོ་རེ་བྱ། དེ་ནས་ཕྱིའི་མཚམས་གཉིས་ཀྱང་དེ་དང་མཉམ་པར་བྱ་སྟེ་མཉམ་པོ་བཞི་འགྱུར་དུ་བྱའོ། །དེ་ནས་པཉྩ་རེ་ཁཱའི་ནང་གཉིས་པོ་དཀྱིལ་འཁོར་གྱི་ཚད་དེ་གཉིས་སྡོམ་པའི་ཐ་གུ་པཉྩ་རེ་ཁཱའི་མཚམས་དེར་བཟུང་སྟེ་ལྷོ་བྱང་གཉིས་སུ་བྱ་རོག་རྗེས་བྱ། དེ་ལ་ཚངས་ཐིག་གཉིས་པ་གདབ། ཚད་དེ་ཉིད་ཀྱིས་ཚངས་ཐིག་གི་ཕྱོགས་བཞི་ཀ་མཉམ། མཉམ་པའི་ཚད་དེ་ཉིད་བཟུང་ཏེ་ཟུར་བཞིར་བྱ་རོག་རྗེས་བྱ། དེ་ཉིད་ལ་ཟུར་ཐིག་དང་ཕྱིའི་གྲུ་བཞི་བྱ། གྲུ་བཞི་གྲུ་ཆོད་དུ་བྱས་ལ་ཕྱི་ཕྱེད་ནང་ཕྱེད་དུ་བྱས་པ་ནི་རྩ་བའི་ཐིག་གོ །དེ་བཞིན་དུ་གྲུ་ཆོད་དུ་བྱས་ཤིང་ཕྱེད་ཕྱེད་དུ་གཤགས་ལ་ཆ་ཆེན་བཅུ་དྲུག་ཏུ་གཏང་ངོ་། །དེ་ལྟར་ཆ་ཆེན་བཅུ་དྲུག་ཏུ་ཐོངས་པ་དང་། དཀྱིལ་འཁོར་གྱི་ཆ་ཕྲ་མོ་བགོ་བར་བྱ་སྟེ། ཚངས་པའི་ཐིག་གི་དྲུང་ནས་ཆ་ཆེན་དང་པོ་ཞེས་བྱ་བ་ནས་བཟུང་སྟེ་གཡས་བརྒྱད་གཡོན་བརྒྱད་ཡིན་པས་བཅུ་དྲུག་ཡིན་ལ། དེའང་ཕྱོགས་གཅིག་གིས་ཤེས་པས་ཕྱོགས་བཞི་ཀ་དེས་འགྲེའོ། །དེ་ལ་ཕྱོགས་གཅིག་གི་དབང་དུ་བྱས་ན་ཆ་ཆེན་དང་པོ་ཕྱེད་དུ་གདབ། དེ་ནི་སྒོ་དང་ཉི་དཀྱིལ་འཁོར། །དེ་ཡི་ཕྱི་ཡང་ཕྱེད་དུ་གདབ། །དེ་ལ་སྒོ་ཁྱུད་པདྨའི་ལྟེ། །ཆ་ཆེན་གཉིས་པ་ཕྱེད་དུ་གདབ། །དེ་ཡི་ནང་མ་ཕྱེད་དུ་གདབ། །དེ་ལ་སྒོ་ལོགས་ནམ་མཁའ་དང་། །དཀྱིལ་འཁོར་ནང་དུ་པད་ཟེའུ་འབྲུ། །གཉིས་པའི་ཕྱི་མ་ཕྱེད་དུ་གདབ། །དེ་ལ་ཀ་བ་ཀ་ཞུ་འབྱུང་། །ཆ་ཆེན་གསུམ་པ་ཚུན་ཆོད་ལ། །པདྨ་དང་ནི་རྡོ་རྗེ་ཡི། །རྭ་བ་མེ་རི་བཅས་པ་འབྱུང་། །ཆ་ཆེན་བཞི་པ་ལྷ་སྣམ་འདོད། །ནང་གི་ཆ་ཡིས་དབྱེ་བ་འདི། །འཕར་མ་གཉིས་པའི་ལུགས་ཡིན་གྱི། །ཡང་ན་ཆ་གཉིས་ལྟེ་བ་སྟེ། ཆ་གཉིས་པདྨའི་འདབ་མ་ཡིན། །ཆ་ཆེན་ལྔ་པ་གང་ཡིན་པའི། །མཐའ་གཉིས་གདབ་ཅིང་དབུས་གཉིས་དོར། །ནང་མ་ངོས་ནི་རྩིག་རིང་སྟེ། །དབུས་མ་གཉིས་པོ་འདོད་ཡོན་ལ། །ཕྱི་མ་སྒོ་འགྲམ་རྩིག་པ་དང་། །དེ་བཞིན་རིན་ཆེན་ཕ་གུ་ཡིན། །ཆ་ཆེན་དྲུག་པ་ཕྱེད་བཏབ་ལ། །ནང་མ་དྲྭ་བ་དྲྭ་ཕྱེད་དེ། །དེ་ཡི་ཕྱི་ཡང་ཕྱེད་བཏབ་པའི། །ནང་མ་ཡ་ཕུབ་རྩིག་པ་དང་། །དེ་བཞིན་དུ་ནི་མདའ་ཡབ་བོ། །དེ་ཡི་ཕྱི་མ་ནམ་མཁའ་འོ། །ཆ་ཆེན་བདུན་པ་ཆ་བཞིར་བགོ །དེ་དག་རྟ་བབས་ཆ་བཞི་ཡིན། །བརྒྱད་པ་ལ་འང་ཆ་བཞི་ཡིན། །ནང་གི་ཆ་གཅིག་པདྨ་ལ། །དབུས་མ་གཉིས་པོ་འཁོར་ལོ་སྟེ། །ཆ་ཆུང་ཕྱི་མ་གདུགས་མཛེས་པ་འོ། །དེ་ལྟར་ཕྱོགས་བཞིར་ཐིག་བཏབ་ལ། །ཆ་ཆེན་ཕྱེད་ཕྱེད་རྡོ་རྭ་དང་མེ་རིས་བསྐོར། དེ་དག་གིས་ནི་ལས་ཀྱི་ཐིག་བཏབ་པ་བསྟན་ཏོ། །ཞེས་གསུངས་སོ། །འདིར་འཕར་མ་གཉིས་པ་དང་། གཅིག་པ་གཉིས་ཁ་ཅིག་ཡབ་ཀྱི་རྣམ་གྲངས་པར་འཆད་པ་ནི་མི་འཐད་དེ། རྒྱུད་ལས། དེ་གཉིས་ཡུམ་དང་ཡབ་ཀྱི་ཁྱད་པར་དུ་གསལ་བར་གསུངས་པས་སོ། །སྤྱིར་ལྷ་སྣམ་ཆ་ཆེན་གཅིག་བཞག་པ་ཙམ་གྱིས་འཕར་མ་གཉིས་པར་འགྲོ་བ་ནི་མ་ཡིན་ཏེ། རྣལ་འབྱོར་དབང་ཕྱུག་གི་ལུགས་གཉིས་ཀྱི་བཞེད་པས། འཁོར་གྱི་ལྷ་མོའི་གནས་རྡོ་རྭ་མེ་རིས་བསྐོར་བ་ཉིས་སྦྲགས་ལ་འཕར་མ་གཉིས་དང་། གཅིག་ལ་འཕར་མ་གཅིག་ཏུ་བཞེད་པའི་ཕྱིར་དང་། རིན་ཆེན་འབར་བར། ཡབ་ཀྱི་སྐབས་སུའང་ལྷ་སྣམ་བཞག་པར་གསུངས་པའི་ཕྱིར་རོ། །དེས་ན་འདིར་འཕར་མ་གཉིས་པར་གསུངས་པ་ནི་དཀྱིལ་ཆོག་འདི་ཡབ་ཡུམ་གཉིས་ཀའི་ཐུན་མོང་བ་ཡིན་པས་ཡུམ་ལ་དགོངས་ཏེ། དབུས་ཀྱི་ཆ་ཆེན་དྲུག་ལ་ནང་གི་རྣལ་འབྱོར་མ་ལྔ་པདྨ་དང་། རྡོ་རྭ་མེ་རིས་བསྐོར་བ་འཕར་མ་གཅིག་དང་། ལྷ་སྣམ་ལ་རྣལ་འབྱོར་མ་བཅུ་ལ་ཕྱིའི་རྡོ་རྭ་མེ་རིས་བསྐོར་བ་འཕར་མ་གཅིག་ཏུ་བཞེད་པའི་ཕྱིར་རོ། །ཡ་ཕུབ་དང་སྒོ་ལོགས་ཀྱི་རྩིག་པའི་ཕྱི་རོལ་ཆ་ཕྲན་གཅིག་གིས་བསྐོར་བ་ལ་འདིར་ནམ་མཁའ་ཞེས་པའི་ཐ་སྙད་མཛད་ཅིང་། ཤྲདྡྷའི་ཐིག་རྩ་རྩ་འགྲེལ་ལས་ཆ་ཆུང་གཅིག་བཞག་པར་གསུངས་པ་ཙམ་མ་གཏོགས་ཐ་སྙད་མི་སྣང་ལ། དེང་སང་མུན་སྣམ་ཞེས་པའི་ཐ་སྙད་བྱེད་པ་ནི། ཨ་བྷྱ་རྟ་བབས་སྣམ་བུ་བཅུ་གཅིག་མའི་ཚེ་མུན་པའི་སྣམ་བུ་དང་། ལོང་བའི་སྣམ་བུ་ཞེས་པའི་ཐ་སྙད་མཛད་པ་དེ་ཉིད་འདིར་སྦྱར་བར་སྣང་སྟེ། སྒོ་ཁང་གི་རྩིག་པ་དང་རྟ་བབས་ཀྱི་གདུང་གི་བར། བར་སྟོང་ཆ་ཕྲན་གཅིག་ཡོད་པ་དེ་ཉིད་མཚོན་པའི་ཕྱིར་རོ། །དེང་སང་སྒོ་ལོགས་ཀྱི་ཕྱི་མཐའ་དང་། ཀ་བའི་བར་སྟོང་དང་། མདུན་གྱི་རྟ་བབས་ཀྱི་འོག་གི་བར་སྟོང་མཚོན་པར་འདོད་པ་ནི་འདིའི་དོན་མ་ཡིན་པར་སྣང་སྟེ། གོང་འོག་བརྩེགས་པའི་བར་སྟོང་ལ། ནམ་མཁའ་དང་མུན་སྣམ་གྱི་ཐ་སྙད་ཐོབ་ཀྱི། གཡས་གཡོན་གྱི་བར་སྟོང་ལ་དེའི་ཐ་སྙད་གང་ལའང་མི་སྣང་བའི་ཕྱིར་རོ། །དབང་ཆུ་ནས་གསུངས་པ་འདི་ཉིད་ཤྲདྡྷའི་ཐིག་རྩ་དང་། རིན་ཆེན་འབར་བ་གཉིས་ཕལ་ཆེར་མཐུན་པས། དེ་གཉིས་ཀྱི་དབང་དུ་བྱས་ནས་བཤད་པར་སྣང་ཡང་། ཡ་ཕུབ་ཀྱི་ཐ་མ་ལ་ནམ་མཁའི་ཐིག་བྱེད་པ་ནི་ཤྲདྡྷའི་ལུགས་ཡིན་ཅིང་། རིན་ཆེན་འབར་བར། དེ་ལ་གདུང་ཐིག་མཛད་པར་སྣང་སྟེ། ཡ་ཕུབ་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །བརྒྱད་པ་པདྨ་འཁོར་ལོ་གདུག །ཞེས་གསུངས་པས་སོ། །དེས་ན་གདུང་ཐིག་རྟ་བབས་སྣམ་བུ་འོག་མ་དང་དཀྱུས་མཉམ་པར་བྱས་ནས། ཀ་བ་དང་ཀ་རྒྱན་གྱི་དཔངས་ལ་ཆ་ཕྲན་བཞི་ལས་མེད་ལ། སྒོ་ལོགས་ཀྱི་རྒྱབ་དང་། ཀ་བའི་བར་གྱི་ཆ་ཕྲན་གཅིག་ལ་ནི་མེ་ཏོག་གི་ཆུན་འཕྱང་འདྲི་བར་བཞེད་དེ། གཉིས་པ་ཕྱེད་ཕྱེད་དང་པོ་ལ། །ཆ་ལྔར་བྱས་ལ་ལོགས་ཞེས་བྱ། །དེ་རྒྱབ་མེ་ཏོག་ཆུན་འཕྱང་སྟེ། །དེ་རྒྱབ་རྟ་བབས་ཀ་བ་ཡིན། །ཞེས་གསུངས་པས་སོ། །ཤྲདྡྷ་དང་དབང་ཆུའི་ལུགས་ལ་ཀ་བ་དང་ཀ་རྒྱན་ཆ་ཕྲན་ལྔ་པར་བྱས་ནས། མགོ་བོ་རྟ་བབས་ཀྱི་སྣམ་བུ་འོག་མ་ལ་སྦྱར་བ་ནི་ནམ་མཁའི་ཐིག་འཁོར་མར་ཡོད་པའི་དབང་དུ་བྱས་པའོ། །རྟ་བབས་ཀྱི་རྒྱན་ནི་ཤྲདྡྷཱའི་ཐིག་རྩའི་འགྲེལ་བར། དེའང་ཇི་ལྟར་མཛེས་པ་དང་། ཡིད་དུ་འོང་བ་བཞིན་དུ་བྱ་སྟེ། སྐས་ལྟ་བུ་དང་། གླང་པོ་ཆེའི་རྒྱབ་ཅེས་བྱ་བ་དང་། གམྦི་རི་ཞེས་བྱ་བ་དང་། བ་ལ་བི་ཞེས་བྱ་བ་དང་། བྷཾ་ག་ར་དང་། སྲི་ད་ཀ་ཏྲ་དང་། མ་ཀ་ར་དང་། བྱ་ཏི་དང་། ད་ན་ཏི་དང་། ཕྲེང་བ་ཅན་དང་། གདུགས་ཅན་དང་། རྩེ་བྲན་ཅན་དང་། རིག་པ་འཛིན་པ་དང་བཅས་པ་དང་། ངང་པ་ལ་སོགས་པ་བྱ་རྣམས་ཀྱིས་མཚན་པ་སྟེ། དེ་དག་ལ་སོགས་པར་གང་ཡང་རུང་བས་བརྒྱན་པའི་རྟ་བབས་བྱའོ་ཞེས་གསུངས་སོ། །རྟ་བབས་ཀྱི་སྟེང་དུ་པདྨ་ཆ་ཆུང་གཅིག དེའི་སྟེང་དུ་ཆོས་ཀྱི་འཁོར་ལོ་རྩིབས་བརྒྱད་པའམ། བཅུ་གཉིས་པ་ཆ་ཆུང་གཉིས། དེའི་སྟེང་དུ་གདུགས་ཆ་ཆུང་གཅིག་པ་བྱ་ཞིང་། ཆོས་འཁོར་གྱི་གཡས་གཡོན་ཆ་ཆུང་རེ་རེ་དོར་བའི་སར། རི་དྭགས་ཀྲྀཥྞ་སཱ་ར་གཉིས་ཞེང་དུ་ཆ་ཆུང་གཉིས་པ། དཔངས་སུ་ཆ་ཆུང་གཅིག་པ། ཆོས་འཁོར་ལ་ཕྱོགས་པ་བྱའོ། །རི་དྭགས་ཀྱི་གཡས་གཡོན་ཆ་ཆུང་རེ་རེ་དོར་བའི་སར་རྡོ་རྗེ་དང་རིན་པོ་ཆེའི་ཡུ་བ་ཅན་ཞེས་བྱ་བ་ཡུ་བ་ལ་ཆ་ཆུང་གཅིག དེའི་སྟེང་དུ་རིན་པོ་ཆེ་ཆ་ཆུང་ཕྱེད། རྡོ་རྗེ་ཆ་ཆུང་ཕྱེད་པས་མཚན་པར་བྱའོ། །གཞན་ཡང་རྟ་བབས་ཀྱི་མཐའ་མ་ཀ་བའི་ལོགས་དང་ཉེ་བ་ལ་བ་དན་དྲིལ་བུ་དང་ལྡན་པ་གཉིས་གཉིས་ཏེ་བཞི། དྲྭ་ཕྱེད་ཀྱི་སྣམ་བུའི་ཕྱི་ལོགས་ངོས་གཉིས་ལས་ཀྱང་རེ་རེ་སྟེ་ཐམས་ཅད་བརྩིས་ན། བ་དན་ཉི་ཤུ་རྩ་བཞིར་བྱའོ། །བ་དན་ནི་མཚོན་པ་ཙམ་སྟེ། རྒྱལ་མཚན་དང་། དར་དང་། རིན་པོ་ཆེ་དང་། མེ་ཏོག་གི་ཕྲེང་བ་ལ་སོགས་པ་ཇི་ལྟར་འོས་པའི་ལྷའི་མཆོད་པའི་རྫས་སྣ་ཚོགས་བཟང་ཞིང་མཛེས་པ་རྣམས་ཀྱིས་ཀྱང་བརྒྱན་པར་བྱའོ། །ཞེས་སོ། །ཕྱི་རོལ་ཟླུམ་སྐོར་གྱི་ཐིག་ནི་དབང་ཆུར། དེ་ལྟར་ཕྱོགས་བཞིར་ཐིག་བཏབ་ལ། །ཆ་ཆེན་ཕྱེད་ཕྱེད་རྡོ་རྗེ་རྭ་བ་དང་། །མེ་རིས་བསྐོར་ཞེས་པ་ཙམ་ལས། དུར་ཁྲོད་ཀྱི་ཐིག་མ་གསུངས་པ་ནི། རིན་ཆེན་འབར་བ་དང་། ཤྲདྡྷའི་གཞུང་ལས་དུར་ཁྲོད་ཀྱི་ཐིག་མེད་པའི་དབང་དུ་བྱས་པར་སྣང་ལ། ཕྱག་ལེན་ལ་དུར་ཁྲོད་ཀྱི་ཐིག་ཆ་ཆེན་གཅིག་བསྐོར་བར་མཛད་པ་ནི་ཤིན་ཏུ་ལེགས་ཏེ། འབྲི་བའི་ཚེ་དུར་ཁྲོད་འབྲི་ཚུལ་དང་། དཀྱིལ་འཁོར་སྟོན་པའི་ཚེ་དུར་ཁྲོད་སྟོན་པར་དབང་ཆུ་ཉིད་ལས་གསལ་བར་གསུངས་པའི་ཕྱིར་དང་། བདག་མདུན་ཐ་མི་དད་དུ་བསྲེ་བའི་ཚེ་བསྲེ་གཞི་ངེས་པར་དགོས་པའི་ཕྱིར་རོ། །རིན་ཆེན་འབར་བར་དེ་རྒྱབ་ཉི་མའི་དཀྱིལ་འཁོར་རོ། །སྣ་ཚོགས་པདྨ་རྡོ་རྗེ་རྭ། །མེ་འོད་རིམ་བཞིན་བསྐོར་བར་བྱ། །ཞེས་གསུངས་པའི་ཉི་དཀྱིལ་ནི། ཟུར་རྩེ་ནས་ཟླུམ་པོར་བསྐོར་བའི་ཚེ་སྣ་ཚོགས་རྡོ་རྗེའི་རྩེ་མོ་དང་། ཟླུམ་ཐིག་བར་ཆ་ཆུང་གཅིག་ཙམ་འབྱུང་བ་དེ་ཉིད་ཡིན་གྱི། གཞན་མི་དགོས་ལ། པདྨ་དང་། རྡོ་རྭ་དང་། མེ་འོད་གསུམ་ནི་ནང་གི་རྒྱ་ཁྲུ་གསུམ་དང་། མཐེ་བོང་གསུམ་བྱས་པའི་ཚེ་མཐེ་བོང་རེ་ནི་སོར་མོ་ཕལ་པ་གཉིས་ཀྱི་ཚད་ཡིན་པས། རྭ་རྩེ་ནས་རྭ་རྩེའི་བར་ཁྲུ་ཕྱེད་དང་བདུན་ཐོབ་ལ། པདྨ་སོགས་གསུམ་ཕྱོགས་གཉིས་ཆར་བསྡོམས་པས་ཁྲུ་ཕྱེད་ཐོབ་པར་སྣང་ངོ་། །གཉིས་པ་ཡེ་ཤེས་ཀྱི་ཐིག་གདབ་པ་ནི། དང་པོ་ཐིག་སྐུད་བྱིན་གྱིས་བརླབས་ལ་དེ་ནས་གདབ་བོ། །དེ་ལ་ཐིག་དང་ཚོན་བྱིན་གྱིས་བརླབ་པ་སོ་སོར་བྱ་བར་གསུངས་ཀྱང་ཆོ་ག་ཕལ་ཆེར་མཐུན་པས་ཕྱོགས་གཅིག་ཏུ་ཕྱག་ལེན་དུ་མཛད་དོ། །དེའི་ལག་ལེན་ནི། རིན་པོ་ཆེའི་སྣོད་ཀྱི་ནང་དུ་ཚོན་རྩི་ཁ་དོག་ལྔ་ལེགས་པར་འདུས་བྱས་ལ། དུར་ཁྲོད་ཀྱི་རུས་པས་སྦགས་ཏེ། དབུས་སུ་ཚོན་སྔོན་པོ་ལ་ཧཱུྃ་བྲིས་ལ་སྐུད་པ་སྔོན་པོ་བཞག ཤར་དུ་དཀར་པོ་ལ་བྷྲཱུྃ། ལྷོར་སེར་པོ་ལ་ཨཱྃ། ནུབ་ཏུ་དམར་པོ་ལ་ཛྲཱིཾ། བྱང་དུ་ལྗང་གུ་ལ་ཁྃ་བྲིས་ལ། དེ་དག་གི་ཁ་དོག་དང་མཐུན་པར་བསྒྱུར་བའི་སྐུད་པ་རྣམས་ཀྱང་བཞག་པ་སྐྱ་ཐིག་བཏབ་པའི་དཀྱིལ་འཁོར་གྱི་དབུས་སུ་བཤམ་པའམ། རང་གི་མདུན་དུ་སྟེགས་ཀྱི་སྟེང་དུ་བཤམས་ཀྱང་རུང་སྟེ། དེ་དག་གིས་མདུན་དུ་མཆོད་པ་ལྔ་དང་། གཏོར་མ་གཅིག་བྲེང་ཚར་དུ་བཤམ། རང་རྡོ་རྗེ་དྲིལ་བུ་བཟུང་ནས་ཤར་ཕྱོགས་སུ་འདུག་ལ། ལྷའི་རྣལ་འབྱོར་དྲན་པ་ཙམ་གྱིས་གསལ་བཏབ་ལ། ཨོཾ་སྭ་བྷཱ་ཝའི་སྔགས་བརྗོད་པས་ཐིག་ཚོན་སྟོང་པར་བསྒོམ། སྟོང་པའི་ངང་ལས་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་ལྔའི་སྟེང་དུ་ཐིག་ཚོན་སྔོན་པོ་ཧཱུྃ་ལས་མི་བསྐྱོད་པ། དཀར་པོ་བྷྲཱུྃ་ལས་རྣམ་སྣང་། སེར་པོ་ཨཱྃ་ལས་རིན་འབྱུང་། དམར་པོ་ཛྲཱིཾ་ལས་འོད་དཔག་མེད། ལྗང་གུ་ཁྃ་ལས་དོན་ཡོད་གྲུབ་པར་བསྐྱེད་དེ། དེའང་ནུས་ན། རིག་པའི་དབང་ལྔའི་སྐབས་ལྟར་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པ་བསྐྱེད། མི་ནུས་པས་ཀྱང་ཕྱག་གཉིས་པར་བསྐྱེད་པས་ཆོག སྐུ་གསུང་ཐུགས་བྱིན་གྱིས་བརླབ། དེ་ནས་རང་གི་མིག་གཡས་པ་མ་ལས་ཉི་མ་དང་། གཡོན་པ་ཊ་ལས་ཟླ་བ་འོད་འབར་བ། མིག་འབྲས་གཉིས་ཧཱུྃ་ལས་ཁྲོ་བོའི་རྡོ་རྗེར་བྱིན་གྱིས་བརླབས་ཏེ། མིག་གི་རྫི་མ་མྱུར་བར་བརྡབ་ཅིང་། གྱེན་དུ་བལྟ་བ་ནི་ཁྲོ་བོའི་ལྟ་བ་ཞེས་བྱ་བ་སྟེ། དེས་སྟ་གོན་གྱི་ལྷ་དང་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་ཚོན་དང་། སྐུད་པ་ཚོན་སྐུད་ཀྱི་རྣམ་པར་བྱོན་པའམ། ཡང་ན་རིགས་ལྔའི་རྣམ་པར་སྤྱན་དྲངས་ཏེ་བསྐྱེད་པ་ལ་བསྟིམ། ནམ་མཁའ་ནས་སངས་རྒྱས་རྣམས་ཀྱི་དབང་བསྐུར་བར་བསམ་སྟེ། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ་ཞེས་དབང་བསྐུར་བས་ཆུ་ལྷག་མ་ཡར་ལུད་པ་ལས་རིགས་ལྔ་སོ་སོའི་དབུར་བརྒྱན། དེ་ནས་རིགས་ལྔའི་ས་བོན་སྔོན་དུ་འགྲོ་བས། ཨོཾ་བཛྲ་པུཥྤེ་ཨཱཿཧཱུྃ་ཞེས་བྱ་བ་ལ་སོགས་པ་སྔགས་ཙམ་གྱིས་མཆོད་པ་དབུལ། ཤབྡའི་སྐབས་སུ་དྲིལ་བུ་དཀྲོལ། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་སོགས་ཚིགས་བཅད་ལྔས་བསྟོད། གཏོར་མའང་ཆུ་གཙང་གིས་སྦྱངས་ནས། མཁའ་འགྲོ་སྤྱི་གཏོར་ལྟར་བྱིན་གྱིས་བརླབས་ཏེ། རིགས་ལྔའི་ས་བོན་སྔོན་དུ་འགྲོ་བའི། ཨོཾ་ཨ་ཀཱ་རོ་ཞེས་སོགས་ལན་གསུམ་གྱིས་དབུལ་ལོ། །ཆུ་བཞི་དང་། ནང་མཆོད་དང་། རོལ་ཆེན་རྣམས་ནི་ཆོ་ག་བསྡུས་པའི་སྐབས་ཡིན་པས་མི་དགོས་སོ། །དེ་ནས་ཨོཾ་བཛྲ་ཙི་ཀྲ་ས་མ་ཡ་མ་ཏི་ཀྲ་མ་ཧཱུྃ། ཞེས་ལན་བདུན་ནམ་ཉི་ཤུ་རྩ་གཅིག་བཟླས་ཏེ་མཐེ་བོང་དང་སྲིན་ལག་གཉིས་ཀྱིས་ཚོན་རྣམས་ལ་རེག་སྟེ་མཉེས་པས་ལྷ་ཐམས་ཅད་འོད་དུ་ཞུ་སྟེ། དེ་བཞིན་གཤེགས་པའི་རྡུལ་ཕྲ་རབ་ལས་གྲུབ་པའི་ཚོན་དང་ཐིག་སྐུད་དུ་བསམ་མོ། །དེ་ནས་ཐིག་སྐུད་རྣམས་སློབ་དཔོན་གྱི་ལག་པ་གཡོན་པས་བཟུང་ལ། རང་དཔལ་ཀྱེ་རྡོ་རྗེའི་རྣལ་འབྱོར་ལ་གནས་ཏེ། སློབ་མ་གཽ་རཱིར་སྤྲུལ་ལ། ཐིག་སྐུད་ནག་པོ་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་རྣམས་རིམ་གྱིས་བརྐྱངས་ལ། དེ་བཞིན་གཤེགས་པ་སོ་སོར་མོས་ཏེ། ཕན་ཚུན་རྗེས་སུ་རྟོག་པ་སྟེ། ཆོས་ཀུན་ཕན་ཚུན་རྗེས་སུ་འགྲོ། །ཆོས་རྣམས་ཐམས་ཅད་ཤིན་ཏུ་ཡང་། །ཀུན་ཏུ་འགྲོ་བར་ཆོས་ཀུན་བརྗོད། །ཞེས་པའམ། ཡང་ན་དེ་ཉིད་ཀྱི་རྒྱ་སྐད་བརྗོད་ཅིང་སྒྲིལ་ལ། དེ་བཞིན་གཤེགས་པ་ཐམས་ཅད་གཉིས་སུ་མེད་པར་གྱུར་པར་བསམ་སྟེ། རྡོ་རྗེའི་ལྟེ་བ་ལ་དཀྲིས་ཏེ། བདུད་རྩི་ཅུང་ཟད་གཏོར་ཏེ་བཞག་གོ །དེ་ནས་ཚོན་དང་མཆོད་པ་ལ་སོགས་པ་གཞན་དུ་བསལ་ལ། ཡེ་ཤེས་ཀྱི་ཐིག་གིས་ས་གཞི་བྱིན་གྱིས་བརླབས་པའི་ཕྱིར་གདབ་པར་བྱ་སྟེ། རང་ནུབ་ནས་ཤར་དུ་ཁ་བལྟས་ལ་དཔལ་ཀྱེ་རྡོ་རྗེར་བསྐྱེད། སློབ་མ་ཤར་ནས་ནུབ་ཏུ་ཁ་བལྟས་ལ་གཽ་རཱིར་སྤྲུལ་ལ། རང་གི་ལག་པས་རྡོ་རྗེ་ལ་དཀྲིས་པའི་ཐིག་སྐུད་ལྟེ་བའི་ཐད་ཀར་བཟུང་ལ། གཡས་ཀྱིས་ཐིག་སྣ་ནས་བཟུང་ལ། ཛཿཛཿཛཿཞེས་བརྗོད་ཅིང་སློབ་མ་ལ་གཏད། སློབ་མས་ཀྱང་ཛཿཛཿཛཿཞེས་བརྗོད་ཅིང་སྣ་དྲངས་ལ་ལྟེ་བའི་ཐད་ཀར་བཟུང་སྟེ་བརྐྱངས་ལ་བཞག་པ་གཡས་པས་སྟེང་ནས་ཐིག་སྐུད་བཟུང་སྟེ་གཅུས་ཏེ་གྱེན་ལ་གདབ་བོ། །ངག་ཏུ་ཨོཾ་བཛྲ་ས་མ་ཡ་སུ་ཏྲ་མ་ཏི་ཀྲ་མ་ཧཱུྃ་ཞེས་བརྗོད། ཡང་ཐུར་ལའང་དེ་བཞིན་དུ་གདབ། དེའི་ཚེ་སེམས་ཀྱིས་ཐིག་སྐུད་ཀྱི་སྒྲ་དེས། ནམ་མཁའ་གང་བའི་དེ་བཞིན་གཤེགས། །འགྲོ་དོན་མཛད་དུས་འདི་ལགས་པས། །ཁྱེད་རྣམས་འདིར་ནི་གཤེགས་གསོལ་བར། །ཐིག་སྐུད་སྒྲས་ནི་བསྐུལ་མ་འདེབས། །ཞེས་སྒྲ་དེ་གྲགས་པས་དེ་བཞིན་གཤེགས་པ་ཐམས་ཅད་མདུན་གྱི་ནམ་མཁའ་གང་བར་བྱོན་པར་བསམ་ཞིང་ཚངས་ཐིག་དང་པོ་གདབ་བོ། །དེ་བཞིན་དུ་འོག་མ་རྣམས་འདེབས་པའི་ཚེ་ངག་ཏུ་བརྗོད་པ་དང་ཏིང་ངེ་འཛིན་ཡིད་ཀྱིས་བསམ་པར་བྱའོ། །དེ་ནས་གཡས་སྐོར་གྱི་རིམ་པས་སློབ་དཔོན་ལྷོར་འདུག་སྟེ་བྱང་དུ་བལྟ། སློབ་མ་བྱང་དུ་འདུག་པ་དང་ཚངས་ཐིག་གཉིས་པ་གདབ། དེ་བཞིན་དུ་གཡས་སྐོར་དུ་སོང་སྟེ། ཤར་ལྷོར་སློབ་དཔོན་འདུག་སྟེ། བྱང་ཤར་དུ་སློབ་མ་འདུག་པ་དང་ཤར་གྱི་ལོགས་ཐིག་གདབ། གཡས་སྐོར་གྱི་ནུབ་བྱང་ཕྱོགས་སུ་སློབ་དཔོན་འདུག་ལ། ལྷོ་ནུབ་མཚམས་སུ་འདུག་པའི་སློབ་མ་དང་། ནུབ་ཀྱི་ལོགས་ཐིག་གདབ། སློབ་དཔོན་དེ་ཉིད་དུ་འདུག་པ་ལ་སློབ་མ་བྱང་ཤར་དུ་སོང་སྟེ་བྱང་གི་ལོགས་ཐིག་གདབ། ཡང་གཡས་སྐོར་གྱིས་སློབ་དཔོན་ཤར་ལྷོར་སོང་སྟེ། སློབ་མ་ལྷོ་ནུབ་ཏུ་འདུག་པ་དང་། ལྷོའི་ལོགས་ཐིག་གདབ། སློབ་དཔོན་དེ་ཉིད་དུ་འདུག་པ་ལ་སློབ་མ་ནུབ་བྱང་དུ་གནས་པ་དང་མཚམས་ཐིག་དང་པོ་གདབ། སློབ་དཔོན་ལྷོ་ནུབ་ཏུ་སོང་ལ་སློབ་མ་བྱང་ཤར་དུ་སོང་སྟེ་མཚམས་ཐིག་གཉིས་པ་གདབ་བོ། །དེ་ལྟར་སྟེང་དང་འོག་ཏུ་ཐིག་ཆེན་བརྒྱད་པོ་བཏབ་པས་དཀྱིལ་འཁོར་ལམ་དུ་བྱུང་བར་བསམ། དེའི་དཔོན་སློབ་གཉིས་ཀ་འགྲོ་དགོས་པའི་ཚེ། སློབ་དཔོན་ཐོག་མར་འགྲོ་ནས་གནས་དེར་འདུག དེའི་རྗེས་སུ་སློབ་མ་འགྲོ་བ་ཡིན་ལ། དེའི་ཚེ་ཐིག་སྐུད་སྤྱི་བོར་ཁྱེར་ནས་རྒྱབ་སྤྲད་དེ་འགྲོ་དགོས་ཏེ། ནག་པོའི་དཀྱིལ་ཆོག་ལས། བློ་ལྡན་རྒྱབ་ཀྱིས་འགྲོ་བར་བྱ། །ཞེས་གསུངས་པས་སོ། །གང་རུང་ཅིག་འགྲོ་དགོས་པའི་ཚེ་ནའང་དེ་དང་འདྲ་ཞིང་། ཚངས་ཐིག་ཕྱི་མ་གཉིས་ལྟ་བུ་ལ་གཉིས་ཆར་ཅུང་ཟད་ནུར་བས་ཆོག་གི་རྒྱབ་ནས་འགྲོ་མི་དགོས་སོ། །དེ་ནས་ཨོཾ་བཛྲ་བེ་གཱ་ཀྲ་མ་ཧོ་ཞེས་བརྗོད་ཅིང་ཡིད་ཀྱིས་ཡེ་ཤེས་ཀྱི་ཐིག་ནམ་མཁའ་ལ་བཏེག་ལ། ཕྱོགས་བཞིར་སྨིན་མ་གཅུས་ཏེ་ཁྲོ་བོའི་ལྟ་བས་བལྟ་ཞིང་། ཧི་ཧི་ཞེས་བརྗོད་པས་སྒོ་བཞི་དབྱེ་བར་བསམས་ལ། རྡོ་རྗེ་དྲིལ་བུ་དང་བཅས་ཏེ་གུང་མཛུབ་གཉིས་ཀྱིས་དྲི་བཟང་གི་ཆུས་སྒོ་བཞིའི་ཐད་ཀྱི་རྩ་ཐིག་ཕྱིས་ཏེ། ཐར་པའི་སྒོའི་གེགས་སུ་གྱུར་པའི་སྒྲིབ་པ་ཐམས་ཅད་དབྱི་བར་བྱའོ། །ཞེས་བརྗོད་དོ། །གཉིས་པ་ཚོན་གྱིས་བྲི་བ་ནི། དཀྱིལ་འཁོར་གྱི་རྡུལ་ལ་སོགས་པ་ཐམས་ཅད་ཕྱགས་ལ། སློབ་དཔོན་དབུས་སུ་འདུག་ལ་ཚོན་རྩི་རྣམས་བླངས་ཏེ། ལག་པ་གཡོན་པའི་ཁུ་ཚུར་གྱིས་བཟུང་ལ་འདི་སྐད་ཅེས་བརྗོད་དོ། །ཆོས་དབྱིངས་འདི་ནི་རྣམ་པར་དག །སེམས་ཅན་ཁམས་ནི་སྒྲོལ་བར་བྱེད། །ཀྱེ་ཡི་རྡོ་རྗེ་རྒྱལ་ཆེན་གྱིས། །དཀྱིལ་འཁོར་སྙིང་པོ་བྲི་བར་བྱ། །ཨོཾ་བཛྲ་ཙི་ཀྲ་ས་མ་ཡ་མ་ཏི་ཀྲ་མ་ཧཱུྃ། ཞེས་བརྗོད་ཅིང་དབང་ལྡན་མཚམས་ནས་བརྩམས་ཏེ་གཡས་སྐོར་དུ་ཆ་ཆེན་གཅིག་གི་བར་དུ་བྲི་བར་བྱའོ། །དེའི་རིམ་པ་ནི་ནང་ནས་ནག་པོ། ལྗང་གུ། དམར་པོ། སེར་པོ། ཕྱི་རོལ་དག་ཏུ་དཀར་པོ་བྲི་བའམ། ཡང་ན་ནག་པོའི་རྩ་བར་དཀར་པོ། དེ་ནས་སེར་པོ། དམར་པོ། ཕྱི་རོལ་དུ་ལྗང་གུ་བྲི་བ་གང་རུང་བྱ་བར་དབང་ཆུ་ལས་གསུངས་ལ། སྔ་མ་ནི་རྡོ་རྗེ་རྩེ་མོའི་དགོངས་པ་ཕྱོགས་ཀྱི་རིམ་པ་ཡིན་ལ། ཕྱི་མ་ནི་གདན་བཞིའི་དགོངས་པ་ཡེ་ཤེས་ཀྱི་རིམ་པ་ཡིན་ཞེས་གསུངས་སོ། །ཌོཾ་བི་ལུགས་ཀྱིས་སྔ་མ་བཞེད་དེ། རིན་ཆེན་འབར་བ་ལས། དཀར་པོ་རྡོ་རྗེ་རྩེ་རང་བཞིན། །གཉིས་པ་གསེར་ལས་བགྱིས་པ་སྟེ། །པདྨ་རཱ་གའི་རང་བཞིན་རྩེ། །དེ་བཞིན་གཞན་དག་མརྒད་ཡིན། །ནག་པོ་ནང་དུ་ཤེས་བྱས་ཏེ། །འདི་ནི་ཚོན་གྱི་རིམ་པར་བཤད། །ཅེས་སོ། །མཚོ་སྐྱེས་ཀྱིས་ནི་ཕྱི་མ་བཞེད་དེ། ནས་གླིང་མར། དེ་ནས་བྱང་ཤར་མཚམས་ནས་བླ་མས་རིམ་པ་བཞིན་དུ་ནག་པོ། དཀར་པོ། སེར་པོ། དམར་པོ། ལྗང་གུ་ལྔའི་རེ་ཁཱ་ལྔ་ལ་མཉམ་པར་མཐོ་གང་དུ་བྲིས་ཏེ་སྦས་ལ་རེ་ཁཱ་ལ་མཆོད་པ་དབུལ་ཞེས་གསུངས་པས་སོ། །རི་མོའི་ཚད། རིན་ཆེན་འབར་བར། རི་མོ་བར་ནས་ནས་གང་གིས། །མ་རེག་པར་ནི་བྲི་བར་བྱ། །ཞེས་དང་། བཞི་བརྒྱ་ལྔ་བཅུ་པར། རི་མོ་ཕན་ཚུན་ནས་གང་གིས། །མ་རེག་པར་ནི་བྲི་བར་བྱ། །ཞེས་སོགས་འདི་འདྲའི་རིགས་ཅན་མང་དུ་གསུངས་པའི་དོན། བུ་སྟོན་རིན་པོ་ཆེས། རི་མོ་ལྔ་ཆར་ལ་སྒོའི་བཞི་ཆ་གཅིག་ལས་མེད་ཅིང་། སྒོ་ཡི་ཉི་ཤུ་ཆ་རུ་ནི། །རི་མོ་མཉམ་པོར་དགྱེ་བར་བྱ། །ཞེས་མར་མེ་མཛད་བཟང་པོ་རང་ཉིད་ཀྱིས་གསུངས་པས། ནས་གང་གི་བར་སྟོང་བཞག་ས་མེད་པའི་ཕྱིར། གྲུབ་ཆེན་ཉིད་ལ་ནང་འགལ་ཡོད་དོ་ཞེས་གསུངས། རྩོང་ཁ་པས། དེ་ནི་རྩ་ཐིག་ཁྲུ་གང་གིས་དབང་དུ་བྱས་པ་ཡིན་པས། ཆ་ཆེན་གཅིག་ལ་ནས་ཉི་ཤུ་རྩ་གཅིག་ཐོབ་ལ། དེའི་ཚེ་ཆ་ཕྲན་གཅིག་ལ་ནས་ལྔ་དང་བཞི་ཆ་གཅིག་ཐོབ་པ་ལས། ནས་ལྔ་ནི་རི་མོ་ལྔའི་ཞེང་ཚད་སྟོན་ཅིང་། ལྷག་མ་བཞི་ཆ་གཅིག་ལུས་པ་བཏང་སྙོམས་སུ་བྱས་པ་ཡིན་པས། རང་ཉིད་མ་ངེས་བཞིན་དུ་གྲུབ་ཆེན་ལ་དགག་པ་བརྗོད་པ་མི་འཐད་ཅེས་སྨྲའོ། །འདི་ནི་ཤིན་ཏུ་མི་འཐད་དེ། དཀྱིལ་ཆོག་དེར་ཁྲུ་གང་ནས་ཁྲུ་སྟོང་གི་བར་དུ་བྱ་བར་གསུངས་པའི་ཚད་སྟོན་པ་ཡིན་གྱི། ཁྲུ་གང་ཁོ་ནའི་ཚད་སྟོན་པ་མ་ཡིན་པའི་ཕྱིར་དང་། དཀའ་འགྲེལ་པདྨ་ཅན་ལས་དཀྱིལ་འཁོར་ཁྲུ་གསུམ་དང་མཐེ་བོང་གསུམ་དུ་བྱ་བར་གསུངས་པའི་ཚེ་ན། ནས་གང་གི་ཚད་བྲི་བར་གསུངས་པས། ཁྱེད་ཀྱི་གྲུབ་མཐའ་རང་ཤུགས་ཀྱིས་ཞིག་པའི་ཕྱིར་དང་། གཞུང་སྔ་མ་ལས། སྒོའི་ཉི་ཤུ་ཆ་རུ་རི་མོ་བྲི་བར་གསུང་བཞིན་དུ་ཕྱི་མས་སླར་ཡང་ཞེང་ཚད་སྟོན་ན། ཟློས་སྐྱོན་ཡོད་པས་རང་ཉིད་མ་ངེས་བཞིན་དུ་གྲུབ་ཆེན་སྐྱོན་ཅན་དུ་བསྒྲུབ་པ་ཁྱེད་ཀྱིས་ཀྱང་བྱས་འདུག་པའི་ཕྱིར་རོ། །ལུགས་སྔ་མའང་མི་འཐད་དེ། བར་སྟོང་ནས་གང་བཞག་པ་གྲུབ་ཆེན་འདི་དག་གི་དགོངས་པ་ཡིན་ན། གྲུབ་ཆེན་རྣམས་མངོན་གསུམ་ལ་སྙོན་འདིངས་པར་ཐལ་བའི་ཕྱིར་རོ། །འོ་ན་ཇི་ལྟར་ཞེ་ན། འགྱུར་གྱི་ཁྱད་པར་གྱིས་གཞུང་དེ་ལྟར་བྱུང་ཡང་། རི་མོའི་བར་ནི་མ་རེག་པར་བྲི་བར་བྱའོ། །དཔངས་ཚད་ཇི་ཙམ་འབྲི་ན། ནས་གང་གིས་བྲི་བར་བྱ་ཞེས་པའི་དོན་ཏེ། དཀའ་འགྲེལ་པདྨ་ཅན་ལས། འོག་ཏུ་ནས་གང་ཙམ་གྱི་ཚད། །དེ་ལས་དཀྱིལ་འཁོར་བྲི་བར་བྱ། །ཞེས་གསུངས་པས་སོ། །འོ་ན་དཀྱིལ་ཆོག་ནས་གླིང་མར། མཐེའུ་ཆུང་དང་ནི་མཐེ་བོང་འཕངས། །གྲངས་ལ་མཐོ་བར་ཡང་དག་བྲི། །ཞེས་བཤད་པ་དང་འགལ་ལོ་སྙམ་ན། དེ་ནི་དེ་ཙམ་གྱིས་འཕངས་བྲིས་པས། རྩ་བའི་ཞིང་ཚད་ཕན་ཚུན་མི་རེག་པའི་དཀྱིལ་འཁོར་ཆེ་བའི་དབང་དུ་བྱས་པ་ཡིན་གྱི། གཞན་དུ་རྩ་ཐིག་ཁྲུ་གང་བ་ལ་དེ་ཙམ་གྱི་དཔངས་ཚད་བྲི་ན་རྩ་བ་འདྲེས་མ་འདྲེས་མངོན་སུམ་དུ་བལྟས་པས་གསལ་ལོ། །དེ་ལྟར་སློབ་དཔོན་གྱིས་ཆ་ཆེན་གཅིག་གི་བར་དུ་བྲིས་ནས་ཐོད་པས་ཁ་གཅོད་དེ་དེའི་སྟེང་དུ་རྡོ་རྗེ་བཞག་ལ། མཆོད་པ་ལྔས་མཆོད་དེ་བཞག འདི་ནི་སློབ་དཔོན་གྱིས་དང་པོར་དགྱེ་ཞེས་བྱ་བའི་དོན་ཡིན་ཏེ། སློབ་དཔོན་གྱི་ཁྱད་པར་གྱི་ལས་ཡིན་ནོ། །དེ་ནས་དབུས་ཀྱི་ཕུར་བུའི་བུ་གར་འོག་ཏུ་དཀར་པོ་ནས་བརྩམས་ཏེ། ཚོན་རྩི་ལྔ་པོ་རྣམས་ཀྱིས་རིམ་པ་བཞིན་བཀང་ལ། དེ་ནས་སློབ་མ་རྣམས་ཀྱིས་ཇི་ལྟར་བདེ་བར་དགྱེ་བར་བྱའོ། །དཀྱིལ་འཁོར་གྱི་སྟེང་དུ་འགྲོ་བ་དང་། ཕྱིར་འགྲོ་བའི་དུས་ཐམས་ཅད་དུ་ཨོཾ་བཛྲ་བེ་གཱ་ཀྲ་མ་ཧོ། ཞེས་བརྗོད་ཅིང་ཡེ་ཤེས་ཀྱི་ཐིག་དང་། ཚོན་ལ་སོགས་པ་བཏེག་ཅིང་འགྲོ་བར་བྱའོ། །དེ་ལ་སྙིང་པོའི་དཀྱིལ་འཁོར་ས་གཞི་ཐམས་ཅད་སྔོན་པོར་བྱ། དེའི་དབུས་ཀྱི་པདྨའི་ལྟེ་བ་ལ་ཉི་མ་དམར་པོ་བྱ། དེའི་ཕྱི་རོལ་ཏུ་ཆ་ཆུང་གཅིག་པདྨའི་ཟེའུ་འབྲུ་སྣ་ཚོགས་སུ་བྱ། དེའི་ཕྱི་རོལ་ཏུ་པདྨ་འདབ་བརྒྱད་ཀྱི་འདབ་མ་རྣམས་ལྷ་མོའི་ཁ་དོག་དང་མཐུན་པར་བྱ། ཡང་ན་ཕྱོགས་ཚོན་དུ་བྱ། འཕར་མ་གཉིས་པར་བྱེད་ན། དེའི་ཕྱི་རོལ་རྡོ་རྗེའི་རྭ་བ་སྔོན་པོ་མེ་རི་དམར་སེར་དུ་བྱ། དེ་ནས་ཤར་ཕྱོགས་ཀྱི་ལྷ་སྣམ་དང་སྒོ་དཀར་པོར་བྱ། ལྷོ་སེར་པོ། ནུབ་དམར་པོ། བྱང་གི་ལྗང་གུ་བྱ། འཕར་མ་གཅིག་པར་བྱེད་ན་པདྨ་ཆེན་པོ་གཅིག་གིས་སྒོའི་བར་དུ་ཁྱད་པར་བྱས་ལ་དེ་ལ་རྡོ་རྗེའི་རྭ་བ་དང་། མེ་རིས་བྱས་ཀྱང་བཏུབ་བོ། །དེའི་ཕྱི་རོལ་ཏུ་པཉྩ་རེ་ཁཱ་སྔར་བཞིན་བྱ། དེ་ནས་སྔར་གྱི་ཐོད་པ་ཁ་ཕྱེ་ལ་ཚོན་རྩིའི་ལྟས་བཟང་ངན་བརྟག ངན་ན་མཆོད་པ་དང་གཏོར་མ་བྱ། བདུད་རྩི་འཁྱིལ་པས་བསྲུང་བར་བྱའོ། །དེ་ནས་མཚན་མ་འགོད་པ་ནི། རྩ་རྒྱུད་ལས། དབུས་སུ་ཐོད་པ་དཀར་པོ་ཡང་། །སྣ་ཚོགས་རྡོ་རྗེས་མཚན་པ་བྲི། །ཞེས་དང་། དབང་ཆུར། དེ་ལ་དབུས་ཀྱི་པདྨའི་ལྟེ་བ་ལ། པདྨ་ཉི་མ་མེ་རིའི་དབུས་སུ། ཐོད་པ་དཀར་པོ་སྣ་ཚོགས་རྡོ་རྗེས་མཚན་པ་དང་། གྲི་གུག་ནག་པོ་བྲི་ཞེས་གསུངས་པའི་དོན་གཡས་ཕྱོགས་སུ་ཐོད་པ་དཀར་པོ་ཆ་གསུམ་པའི་གདོང་ལ་སྣ་ཚོགས་རྡོ་རྗེས་མཚན་པ་དང་། དེའི་གཡོན་དུ་གྲི་གུག་བྲི་བ་ཡིན་ཏེ། མངོན་བྱང་གསུམ་པའི་སྒོམ་དོན་ལ་དེ་ལྟར་འབྱུང་བའི་ཕྱིར་དང་། རྩ་རྒྱུད་ཀྱི་ཀྱེ་རྡོར་འདི་གུར་ནས་འབྱུང་བའི་རིགས་ལྔ་ཆར་དབྱེ་བའི་གཞི་ཡིན་པ་མཚོན་པའི་ཆེད་དུ། སྤྱི་བོར་སྣ་ཚོགས་རྡོ་རྗེས་མཚན་པ་གསུངས་པའི་དོན་འདིར་བྲི་བ་ཡིན་པའི་ཕྱིར། ལག་ལེན་བ་ཁ་ཅིག ཐོད་པའི་ནང་དུ་སྣ་ཚོགས་རྡོ་རྗེ་དང་། གྲི་གུག་གཉིས་བྲིས་ནས་སྣ་ཚོགས་རྡོ་རྗེ་ནི་ཐོད་པའི་ནང་གི་སྲོག་ཆགས་བཅུ་དྲུག་མཚོན་བྱེད་ཡིན་ནོ། །ཞེས་སྨྲ་བ་ནི་རང་བཟོ་མཁན་གྱིས་རང་གར་བྲིས་པ་ལ་རྟོག་དཔྱོད་མ་ཞུགས་པར་ཟད་དེ། དེ་ལྟར་ན་ཀྱེ་རྡོ་རྗེ་ལ་སྤྱི་བོར་སྣ་ཚོགས་རྡོ་རྗེས་མཚན་པར་གསུངས་པ་དེའང་། ཐོད་པའི་ནང་གི་སྲོག་ཆགས་མཚོན་བྱེད་དུ་འགྱུར་རོ། །གྲི་གུག་བྲི་བའི་ཚུལ་ཡང་། རྡོ་རྗེ་ཕྱེད་པ་གདན་ལ་བཙུགས་ནས་སོ་གྱེན་དུ་བསྟན་པ་བྲི་དགོས་ཏེ། རྗེ་བཙུན་གྱིས་ནག་པོ་དཀྱིལ་ཆོག་ལས། སྒོ་མཚམས་མ་བརྒྱད་ཀྱི་གནས་སུ་གྲི་གུག་རྩེ་མོ་ཕྱིར་བསྟན་པ་བྲི་བར་གསུངས་པའི་ཕྱིར་རོ། །གལ་ཏེ་རྡོ་རྗེ་ཕྱེད་པ་དེ་ཉིད་རྩེ་མོ་ཡིན་ནོ་སྙམ་ན་མ་ཡིན་ཏེ། ཡུ་བ་ཡིན་པའི་ཕྱིར་རོ། །དེ་བཞིན་དུ་པད་འདབ་རྣམས་ལ་ལྷ་མོ་རྣམས་ཀྱི་གནས་སུ་སྣ་ཚོགས་པདྨ་དང་། མེ་རིའི་རྒྱབ་ཡོལ་དང་ཟླ་བའི་དཀྱིལ་འཁོར་རེ་བྱས་པའི་སྟེང་དུ། ལྷ་མོ་སོ་སོའི་ཕྱག་མཚན་གཡས་པ་འགོད་པར་གསུངས་ཤིང་། བཀའ་སྲོལ་གཞན་རྣམས་ལས་ཀྱང་། ཕྱག་མཚན་འགོད་པའི་ཚུལ་ཁོ་ན་གསུངས་པ་ནི་རྩ་རྒྱུད་ལས། སྙིང་པོ་སྐྱེས་པའི་ཐོད་པ་ཉིད། །མདོག་དཀར་ཆ་གསུམ་པ་ནི་བྲི། །དབང་ལྡན་དུ་ནི་ཤ་ར་བྷ། །མེ་ཡི་མཚམས་སུ་དགེ་སློང་བྲི། །བདེན་བྲལ་དུ་ནི་འཁོར་ལོ་བྲི། །རླུང་དུ་རིགས་ཀྱི་བདག་པོ་བྲི། །ཤར་སྒོར་དེ་བཞིན་གྲི་གུག་ཉིད། །གཡས་སུ་ཅང་ཏེའུ་བྲི་བ་ཉིད། །ནུབ་ཏུ་རུས་སྦལ་བྲི་བ་ཉིད། །ལྟོ་འཕྱེ་བྱང་དུ་དེ་བཞིན་ནོ། །ལྷ་མོ་ཁ་དོག་དབྱེ་བ་ཡི། །ཕྱག་མཚན་བརྒྱད་དུ་རབ་ཏུ་གྲགས། །དབུས་སུ་ཐོད་པ་དཀར་པོ་ཡང་། །སྣ་ཚོགས་རྡོ་རྗེས་མཚན་པ་བྲི། །ཞེས་གསུངས་པའི་དོན་དུ་མཛད་པར་སྣང་བས་འདི་གཙོ་བོ་ཡིན་ལ། ནུས་ན་ལེའུ་གཉིས་པར་གསུངས་པ་ལྟར་སྐུ་ཡོངས་རྫོགས་དང་། མ་ནུས་ན་ས་བོན་ཙམ་མམ། ཚོན་སྤུངས་ཙམ་བྲི་བས་ཀྱང་རུང་བ་ནི་སྤྱི་དང་མཐུན་ནོ། །རྩ་རྒྱུད་ལེའུ་ལྔ་པར། བདག་བསྐྱེད་ཀྱི་སྐབས་སུ། ཕྱོགས་ཀྱི་ལྷ་མོ་བཞི། ཤར་གྱི་སྒོ་རུ་ཡང་དག་གནས། །ཞེས་སོགས་སྒོ་བཞི་ལ་གནས་པར་གསུངས་པ་ལ་བརྟེན་ནས། ནག་པོ་པ་སོགས་རྒྱ་གར་གྱི་སློབ་དཔོན་མང་པོས་སྒོ་མཚམས་བརྒྱད་ལ་པདྨ་སོ་སོར་བྱས་ནས་འགོད་པར་མཛད་པ་ནི། སྲོལ་ཆེན་པོ་ཞིག་ཡིན་ལ། འདིར་འདབ་མ་བརྒྱད་ལ་འགོད་པར་གསུངས་པ་ནི། སྙིང་པོར་སྐྱེས་པའི་ཐོད་པ་ཉིད། །ཅེས་གསུངས་པའི་ཤུགས་ལ་འདབ་མ་བརྒྱད་ལ་གཞན་འགོད་རྒྱུ་ཡོད་པར་བསྟན་པའི་སྦས་དོན་ཐུན་མོང་མ་ཡིན་པ་ཡིན་པར་སྣང་ངོ་། །ལྷ་སྣམ་གྱི་སྒོའི་གཡས་གཡོན་དུ་བུམ་པ་རེ་རེ་སྟེ་བརྒྱད་འབྲི་དགོས་ཏེ། རྩ་རྒྱུད་ལས། དེ་ནས་བུམ་པ་བརྒྱད་པོ་བྲི། །ཞེས་གསུངས་སོ། །རྩིག་པའི་ཕྱི་རོལ་ཏུ་འདོད་ཡོན་གྱི་ས་དམར་པོ་བྱ། རིན་ཆེན་ཕ་གུ་སེར་པོར་བྱ། དྲྭ་བ་དྲྭ་ཕྱེད་གཞི་སྔོན་པོ་ལ་དཀར་པོའི་དྲྭ་བ་བྲིའོ། །མདའ་ཡབ་ཁྲ་བོ་བྲི། སྒོའི་ཕྱི་རོལ་ཏུ་ནམ་མཁའ་སྟོང་པ་ཆ་ཆུང་གཅིག་བྲི། དེའི་ཕྱི་རོལ་ཏུ་ཀ་བ་ཀ་ཞུ་དང་བཅས་པས་སྒོ་དང་ཀ་བའི་སྟེང་དུ་རྟ་བབས་ཆ་བཞི། རི་མོའི་ཁ་དོག་ཇི་ལྟར་མཛེས་པ། དེའི་སྟེང་དུ་པདྨ་དང་། འཁོར་ལོ་དང་། གདུགས་ཀྱི་བར་དུ་བྲི། རྟ་བབས་ཀྱི་གཡས་གཡོན་དུ་རྡོ་རྗེའི་རྭ་ཕྱོགས་ཀྱི་ཁ་དོག་དང་བསྟུན་པ་བྲི། གཞན་འོག་གཞི་ཁ་དོག་ཐམས་ཅད་རྡོ་རྗེའི་ས་གཞི་ཡིན་པས་སྔོན་པོར་བྱའོ། །ཡང་ན་ཉི་མའི་དཀྱིལ་འཁོར་ཡིན་པས་ལྗང་སེར་དུ་བྱའོ། །དེའི་ཕྱི་རོལ་ཏུ་རྡོ་རྗེའི་རྭ་བ་བྱ། དེའི་ནང་དུ་དུར་ཁྲོད་བརྒྱད་བྲི། ཕྱོགས་སྐྱོང་བརྒྱད་ཀྱི་མཚན་མ་དང་། ཀླུ་དང་། ཤིང་དང་། སྤྲིན་དང་། ཞིང་སྐྱོང་དང་། མཆོད་རྟེན་དང་། ཆུ་དང་། རྣལ་འབྱོར་མ་དང་། རོ་དང་། འདྲེ་ལ་སོགས་པ་སྒྲུབ་ཐབས་ནས་འབྱུང་བ་བཞིན་ཏེ་ཅི་ནུས་པ་བྲི། ཐ་མས་རོ་བརྒྱད་དང་། དེ་དག་གི་མཚན་མ་ཐིག་ལེ་ཙམ་བྲི། རྡོ་རྗེ་རྭ་བའི་ཕྱི་རོལ་ཏུ་མེ་རི་འབར་བར་གཡས་བསྐོར་དུ་བྲིའོ། །རྡོ་རྗེ་རྭ་བ་ནག་པོ་ལ་དཀར་པོས་བྲི། མེ་རི་སྣ་ཚོགས་སམ་དམར་སེར་དུ་བྲི། དེ་ལྟར་བྲི་བ་ཡོངས་སུ་རྫོགས་པ་དང་། ཚོན་གྱི་ལྷག་མ་དང་། ཡེ་ཤེས་ཀྱི་ཐིག་སྐུད་མདུན་དུ་བཞག་པའི་མདུན་དུ་མཆོད་པ་ལྔ་བཤམས་ལ། ཨོཾ་བཛྲ་པུཥྤེ་ཨཱཿཧཱུྃ་ཞེས་སོགས་ཉེར་སྤྱོད་ལྔ་རོལ་མོ་དང་བཅས་པ་ཕུལ་ཏེ། ཤབྡའི་སྐབས་སུ་དྲིལ་བུ་དཀྲོལ། ཨོཾ་ཨཱཿཧཱུྃ་བཛྲ་མུཿཐིག་ཚོན་གྱི་ཡེ་ཤེས་པ་གཤེགས། དམ་ཚིག་པ་བདག་ལ་བསྡུ། དམན་པ་ཆུ་ལ་དོར་བའམ། གནས་དབེན་པར་བཞག་གོ །དེའི་རྗེས་ལ་དཀྱིལ་འཁོར་གྱི་ཉེ་འཁོར་ཀུན་ཏུ་བའི་རྣམ་ལྔ་དང་། དྲི་ཞིམ་པོས་ལེགས་པར་བྱུགས་ཏེ་མེ་ཏོག་སིལ་མ་དགྲམ། སྤོས་ཅི་འབྱོར་པ་འཐུལ་ཞིང་བཞག་གོ །གསུམ་པ་རྒྱན་དགྲམ་པ་ལ་ཐོག་མར་བུམ་པ་འབུལ་བ་ནི། བུམ་པ་ཀུན་ནས་ཆུ་བསྡུས་ལ་རྣམ་རྒྱལ་བུམ་པའི་ནང་དུ་བླུག་སྟེ། འོག་ཏུ་བུམ་པའི་དབང་བསྐུར་ཙ་ན་བུམ་པ་ཀུན་བླངས་ནས་སོ་སོར་བསྐུར་དགོས་པ་ལས། དེ་མི་དགོས་པར་ཟོར་ཡང་བའི་དོན་དུ་ཡིན་ཡང་། མནའ་ཆུ་ནི་ཐོད་པའི་བདུད་རྩི་ལ་བྱེད་པ་དང་། བུམ་ཆུས་བྱེད་པ་གཉིས་ལས། གཙོ་བོར་གོང་མ་གསལ་ལ། བུམ་ཆུས་བྱེད་ན་དེའི་དོན་དུ་བུམ་པ་ཀུན་ནས་བསྡུས་པའི་ཆུ་ཞིག་རྣམ་རྒྱལ་བུམ་པའི་སྟེང་དུ་གཞག་གོ །དེ་ནས་ལས་ཀྱི་རྡོ་རྗེས་སྤོས་ཕོར་གྱིས་སྣ་དྲངས། སློབ་དཔོན་གྱིས་ལག་པ་གཡས་པས་རྣམ་རྒྱལ་རྡོ་རྗེ་དང་བཅས་པ་གཟུང་། གཡོན་པས་དྲིལ་བུ་དཀྲོལ། དེ་བཞིན་དུ་གཞན་རྣམས་ཀྱིས་བུམ་པ་བརྒྱད་པོ་དང་། ལས་བུམ་རིམ་པ་བཞིན་དུ་བཟུང་སྟེ་དཀྱིལ་འཁོར་ལ་བསྐོར་བ་ལན་གསུམ་བྱ། དེའི་ཚེ་སློབ་དཔོན་གྱིས་གཙོ་བོའི་སྔགས་དང་། གཞན་རྣམས་ཀྱིས་ལྷ་མོ་སོ་སོ་དང་། བདུད་རྩི་འཁྱིལ་པའི་སྔགས་བཟླ་ཞིང་སྣ་ཚོགས་རོལ་མོ་ཅི་འབྱོར་པ་བྱའོ། །དེ་ནས་དཀྱིལ་འཁོར་ཆེ་ཞིང་ཡངས་པར་ཡོད་ན་དཀྱིལ་འཁོར་གྱི་ནང་དུ་བུམ་པ་དབུལ་ཏེ། རྣམ་རྒྱལ་བུམ་པ་ནང་གི་པདྨའི་ཤར་གྱི་འདབ་མའི་སྟེང་དུ་གཞག གཞན་བུམ་པ་བརྒྱད་པོ་ནང་གི་བུམ་པ་བརྒྱད་ཀྱི་སྟེང་ངམ། ལྷ་མོ་ཉིད་ཀྱི་མཚན་མ་ནོན་ཙམ་དུ་གཞག ལས་ཐམས་ཅད་པ་སྒོའི་ཕྱི་རོལ་གཡས་ཕྱོགས་བྱང་ཤར་ལ་ཉེ་བར་གཞག་གོ །དཀྱིལ་འཁོར་ཆུང་བ་ཡིན་ན་ལན་རེ་ལྷའི་མཚན་མའི་སྟེང་དུ་ཕུལ་ལ། ཕྱི་རོལ་ཏེ་རྡོ་རྗེ་རྭ་བའི་ནང་ཙམ་ནས་གཽ་རཱིའི་ཤར་ལྷོ་དང་ཤར་གྱི་བར་དང་། གཞན་ལྷ་མོ་རྣམས་ཀྱི་རང་རང་གི་ཕྱོགས་སུ་གཞག་གོ །རྣམ་རྒྱལ་གྱི་བུམ་པ་ཤར་དུ་གཞག་གོ །དེའི་སྟེང་དུ་བུམ་པ་ཀུན་གྱི་ཆུ་བསྡུས་པའི་དུང་ཆོས་གཞག ལས་ཐམས་ཅད་པ་བྱང་ཤར་དང་ཤར་གྱི་བར་དེར་གཞག་གོ །བུམ་པ་གནས་དེ་དང་དེར་འབུལ་བའི་ཚེ་གཙོ་བོ་ཡབ་ཡུམ་གྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་སོགས་བརྗོད་པ་ནི་ཕྱག་ལེན་ཡིན་ལ། རྣམ་རྒྱལ་དང་ལས་བུམ་གཉིས་ལས་མེད་ན་རྣམ་རྒྱལ་འབུལ་ཐེབས་ལན་དགུར་བྱས་ནས་ཤར་ཕྱོགས་སུ་གཞག ཆོ་ག་གཞན་རྣམས་ནི་འདྲའོ། །བུམ་པ་འབུལ་བ་ནི་བཀའ་བབས་བཞི་ཆར་མཐུན་པར་སྣང་ཞིང་། ཆོ་ག་ནི་ནས་གླིང་མར། དེ་ནས་བུམ་པ་ཐོགས་ལ་སྤོས་ཀྱིས་སྣ་དྲངས་ལ་རོལ་མོའི་ཆ་བྱད་རྣམ་པ་སྣ་ཚོགས་པ་ཐོགས་ཏེ། དཀྱིལ་འཁོར་ལ་ལན་གསུམ་དུ་བསྐོར་ནས་ཚུལ་བཞིན་དུ་དགོད། ལས་ཐམས་ཅད་པ་བྱང་ཤར་དུ་དགོད། ཅེས་གསུངས་པ་འདི་ཉིད་གསལ་བར་སྣང་ངོ་། དེ་ནས་མཆོད་པ་བཤམ་པ་ནི། འབྱོར་པ་ཆེ་བས་ནི་ཚད་མེད་ལ། ཆུང་བས་ཀྱང་སྟ་གོན་གྱི་གནས་སྐབས་ལས་ཉུང་བ་མི་བཏུབ། བཤམ་ཚུལ་སྟ་གོན་གྱི་སྐབས་སུ་ཐིག་གི་སྟེང་དུ་བཤམས་པས་གྲུ་བཞིར་འབྱུང་ལ། འདིར་ནི་མེ་རིའི་ཕྱི་རོལ་ཏུ་སྤྱི་མཆོད་བཤམས་པའི་བར་སྐབས་རྣམས་སུ་སྒོས་མཆོད་བྲེང་ཚར་གཅིག་ཏུ་བཤམས་པས་ཟླུམ་པོར་འབྱུང་། གཞན་འདྲའོ། །དཀྱིལ་འཁོར་གྱི་མཐའི་གཏོར་མའང་སྟ་གོན་དང་འདྲ་ཞིང་། ཕྱི་རོལ་དུ་འབྱུང་པོའི་ཚོགས་ལ་གཏོར་མ་ཤིན་ཏུ་ཆེ་བར་བྱས་པ་དང་། སྔོན་དུ་འགྲོ་བའི་གཏོར་མ་བཤམ། གཏོར་མ་དེ་རྣམས་ལ་འཛུགས་པའི་མར་མེ་དང་། འོག་ཏུ་རིག་པའི་དབང་ལྔ། རྡོ་རྗེ་སློབ་དཔོན་གྱི་དབང་དང་དྲུག་གིས་དུས་སུ་འབུལ་བའི་མཆོད་པ་ལྔ་ཚན་དྲུག་དང་། ལས་ཐམས་ཅད་པའི་མཆོད་པ་ལྔའང་བཤམ་མོ། །གདུགས་དང་། རྒྱལ་མཚན་དང་། བླ་བྲེ་བྲེ་བ་ལ་སོགས་པ་ནི་སྔར་སྟ་གོན་གྱི་དུས་སུ་བཤད་ཟིན་པ་ལྟར་བྱའོ། །གཞན་ཡང་འོག་ཏུ་དགོས་པའི་ཡོ་བྱད་ཐམས་ཅད་སྟ་གོན་བྱ་སྟེ། སློབ་མ་རེ་རེ་ལའང་གདོང་གཡོགས་དང་། མེ་ཏོག་གི་ཕྲེང་བ་དང་། གུ་གུལ་ནག་པོའི་དུད་པ་དང་། ཡུངས་ཀར་དང་། སློབ་མ་རེ་རེ་ལ་དབུ་རྒྱན་དང་། རྡོ་རྗེ། དྲིལ་བུ། ཐུན་མོང་དུ་མེ་ལོང་དང་། མདའ་གཞུ་དང་། པུ་སྟི་དང་། འབུད་དུང་དང་། དབང་སྟེགས་ཀྱི་དཀྱིལ་འཁོར་འབྲི་བའང་རྒྱས་པར་འབྲི་ན་ནི་ཉིན་མོ་ཉིད་འབྲི་དགོས་ལ། བསྡུས་པ་འབྲི་ན་དེ་འབྲི་བའི་རྡུལ་ཚོན་དཀར་པོ་དང་། གཞིར་བྱུག་བའི་རྣམ་ལྔ་དང་། དྲི་སྦྱང་བ་དང་། གཞན་ཡང་ནང་གི་མཆོད་པའི་ཡོ་བྱད་དང་། རྣལ་འབྱོར་པ་རྣམས་མཉེས་པར་བྱ་བའི་ཡོ་བྱད་བཟའ་བ་དང་བཏུང་བ་ལ་སོགས་པ་ཐམས་ཅད་ལེགས་པར་སྟ་གོན་བྱའོ། །དེ་དག་གིས་ནི་དཀྱིལ་འཁོར་བྲི་ཞིང་རྒྱན་དགྲམ་པའི་ཆོ་ག་བསྟན་ཏོ། །དྲུག་པ་སྒྲུབ་ཅིང་མཆོད་པ་ལ་གཉིས་ཏེ། དངོས་དང་། ཞར་བྱུང་ངོ་། །དང་པོ་ལ་ལྔ་སྟེ། སྔོན་དུ་འགྲོ་བ། སྒྲུབ་པའི་ཚུལ། མཆོད་པ་དབུལ་བ། ཕྱི་རོལ་དུ་འབྱུང་པོའི་ཚོགས་ལ་གཏོར་མ་དབུལ་བ། ནང་དུ་འོངས་ནས་ལྷག་ཆད་ཁ་བསྐང་བའོ། །དང་པོ་ནི། ཕྱི་མ་རེད་དམ་སྲོད་ཀྱི་དུས་སུ་ཁྲུས་བྱ། འཁོར་ལོས་སྒྱུར་བའམ་ཧེ་རུ་ཀའི་ཆས་གང་རུང་གིས་བརྒྱན་ཏེ། སློབ་དཔོན་དཀྱིལ་འཁོར་གྱི་ཤར་ཕྱོགས་སུ་སྟན་ལ་འདུག རྣལ་འབྱོར་པ་གཞན་རྣམས་ཇི་ལྟར་བདེ་བའི་གནས་སུ་འདུག་ལ། མདུན་དུ་ནང་མཆོད། རྡོ་རྗེ་དྲིལ་བུ་དང་། རོལ་མོའི་ཆས་རྣམས་ཀྱང་ཅི་འབྱོར་པ་བཤམ་མོ། །དེ་ནས་སྔོན་འགྲོ་གཏོར་མ་སོགས་སྔོན་འགྲོ་གསུམ་དང་། ཡི་གེ་བརྒྱ་པས་ཉམས་ཆགས་བསྐང་བ། ཐུན་མོང་མ་ཡིན་པའི་སྲུང་འཁོར་བསྒོམ་པ་སྟ་གོན་གྱི་སྐབས་ཅི་ལྟ་བ་བཞིན་བྱའོ། །གཉིས་པ་ནི། སྔོན་གྱི་སྔགས་འཆང་དག་གསང་བ་འདུས་པ་ལུགས་གཉིས་ལྟ་བུ་ཐོག་མར་རང་ཉིད་དཀྱིལ་འཁོར་གྱི་དབུས་སུ་ཞུགས་ནས་ཚོགས་ཞིང་སྤྱན་དྲང་བ་ནས་བརྩམས་ཏེ། དཀྱིལ་འཁོར་རྒྱལ་མཆོག་གི་བར་མདུན་བསྐྱེད་དང་བསྲེས་ནས་སྒྲུབ་པ་ལ་བདག་མདུན་ཐ་མི་དད་ཆེན་པོ་དང་། ཀྱེ་རྡོར་མན་ངག་ལུགས་ལྟ་བུ་བདག་བསྐྱེད་བཟླས་པ་དང་བཅས་པ་རྫོགས་པའི་རྗེས་སུ་འཁོར་གྱི་ལྷ་མོ་གཙོ་བོ་ལ་བསྡུས་ནས། རྟེན་སྲུང་འཁོར་དུར་ཁྲོད་གཞལ་ཡས་ཁང་དང་བརྟེན་པ་དཀྱིལ་འཁོར་གྱི་གཙོ་བོ་མདུན་བསྐྱེད་དང་བསྲེ་ཏེ། སླར་ཡང་རྟེན་དང་བརྟེན་པ་མངལ་འབྱིན་གྱི་ཚུལ་དུ་བསྲེ་བ་ལ་བདག་མདུན་ཐ་མི་དད་ཆུང་བ་དང་། གཞན་བདེ་མཆོག་དང་གཤིན་རྗེའི་གཤེད་སོགས་ཕལ་ཆེར་ལ་བདག་མདུན་ཐ་དད་ཀྱིས་ཐ་སྙད་མཛད་པ་ལྟར་ན། འདིར་ཀྱེ་རྡོ་རྗེའི་བཀའ་བབས་བཞི་ལའང་བདག་མདུན་ཐ་དད་ཀྱི་ཚུལ་དུ་གྲུབ་པ་དང་། ཐ་མི་དད་ཀྱི་ཚུལ་དུ་སྒྲུབ་པ་གཉིས་ལས། དང་པོ་ནི། ཌོམྦི་ལུགས་ཀྱི་དཀྱིལ་ཆོག་གཉིས་ཀྱི་དགོངས་པ་སྟེ། བཟང་པོ་ཡོངས་གཟུང་ལས། དེ་ནས་རང་གཙོའི་སྦྱོར་བདག་ཉིད། །སངས་རྒྱས་ཐམས་ཅད་འདུས་པའི་སྐུ །ཡེ་ཤེས་ཕྱག་རྒྱར་སྙོམས་ཞུགས་ཏེ། །ཏིང་ངེ་འཛིན་ལ་དམིགས་པ་བྱ། །ཏིང་ངེ་འཛིན་སྤྲོ་སངས་རྒྱས་རྣམས། །རང་རང་མཚན་མར་དགོད་པར་བྱ། །བྱིན་གྱིས་བརླབ་པ་ལ་སོགས་དང་། །དབང་བསྐུར་བར་དུ་ཡོངས་རྫོགས་བྱ། །ཞེས་དང་། རིན་ཆེན་འབར་བར། དེ་ནས་སློབ་དཔོན་རང་ལྷ་ཡི། །སྦྱོར་རྫོགས་གཙོ་བོའི་བདག་ཉིད་ཀྱི། །དཀྱིལ་འཁོར་སྤྲུལ་པ་རྡུལ་ཚོན་དང་། །གཉིས་མེད་མཁར་གནས་ཀྱང་དེར་གཞུག །བྱིན་གྱིས་བརླབ་དང་དབང་བསྐུར་གྱི། །བར་རྫོགས་བྱས་ལ་འཆད་པ་ཡི། །ཆོ་གས་དཀྱིལ་འཁོར་རབ་ཏུ་མཆོད། །ཅེས་གསུངས་པའི་དོན། རྗེ་བཙུན་རྩེ་མོས། བདག་མདུན་ཐ་དད་ཀྱི་སྒྲུབ་ཚུལ་ཁོ་ན་མཛད་ཅིང་། དེ་ལའང་ཐོག་མར་རྟེན་གཞལ་ཡས་ཁང་པའི་བསྐྱེད་ཆོག་མདུན་བསྐྱེད་ཀྱི་ཚུལ་དུ་བསྒྲུབས་ནས། རྟེན་པ་ལྷ་མངལ་འབྱིན་བྱས་ཏེ། རྡུལ་ཚོན་དང་བསྲེ་བར་མཛད་དོ། །གཉིས་པ་ལ་གསུམ་སྟེ། བདག་མདུན་ཐ་མི་དད་ཆེ་བ་དང་། བར་པ་དང་། ཆུང་བའོ། །དང་པོ་ནི། སློབ་དཔོན་ནག་པོ་པའི་ལུགས་ཏེ། དཀྱིལ་འཁོར་གྱི་ཆོ་ག་གཞུང་འགྲེལ་ལས། དཀྱིལ་འཁོར་གྱི་ཁང་པའི་སྒོའི་ནང་དུ་སློབ་དཔོན་སྟན་འཇམ་པ་ལ་འདུག་སྟེ། རིམ་པ་འདིས་དཀྱིལ་འཁོར་བསྒྲུབ་པ་བརྩམ་པར་བྱའོ། །ལོ་བཅུ་གཉིས་མའམ། ལོ་བཅུ་དྲུག་མའི་རང་གི་རིགས་ཀྱི་བུ་མོའམ། གཞན་ཡང་རུང་སྟེ་མ་ལ་སོགས་པའི་ཡོན་ཏན་དང་ལྡན་པ་བཟུང་ལ་བསྒྲུབ་པའམ། མ་འབྱོར་ན་ཏིང་ངེ་འཛིན་གྱིས་ཀྱང་རུང་སྟེ། དབང་བསྐུར་བའི་བར་དུ་སྒྲུབ་ཐབས་ལས་འབྱུང་བ་བཞིན་བསྐྱེད་ནས་རྡོ་རྗེ་དང་། པདྨ་བྱིན་གྱིས་བརླབས་པ་སྔོན་དུ་འགྲོ་བས་ཤེས་རབ་དང་སྙོམས་པར་འཇུག་པའི་བདེ་བའི་སྒྲས་དེ་བཞིན་གཤེགས་པ་ཐམས་ཅད་བཀུག་སྟེ། རང་གི་ལུས་ལ་བཅུག་ནས་དཀྱིལ་འཁོར་གྱི་འཁོར་ལོའི་ཚུལ་དུ་ནམ་མཁའ་ཐམས་ཅད་ཁྱབ་པར་སྤྲོས་ཏེ། སླར་ཡང་བཀུག་ནས་དཀྱིལ་འཁོར་གྱི་སྟེང་དུ་བཞག་ལ། ཞལ་བརྒྱད་པའི་སྔགས་ཀྱིས་བགེགས་བསལ་ཏེ། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ། ཨོཾ་བཛྲ་བེ་ཏ་ལཱི་བནྡྷ་བཾ། ཨོཾ་བཛྲ་གྷསྨ་རཱི་ཝ་ཤྃ་ཀུ་རུ་ཧོ། ཞེས་བྱ་བའི་སྔགས་རྣམས་ཀྱིས་ལྕགས་ཀྱུ་ལ་སོགས་པ་ཐོགས་པའི་གཽ་རཱི་ལ་སོགས་པས་ནམ་མཁའ་ལས་ཡེ་ཤེས་ཀྱི་དཀྱིལ་འཁོར་རང་རང་གི་མཚན་མའི་ལྷ་ལ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ལ། ཡི་གེ་བརྒྱ་པས་བརྟན་པར་བྱའོ་ཞེས་གསུངས་ཏེ། ཐོག་མར་ཏིང་ངེ་འཛིན་གསུམ་པོ་མདུན་བསྐྱེད་དང་བསྲེས་ནས་བསྒྲུབས་ནས། སླར་ཡང་ཡེ་ཤེས་པ་མངལ་འབྱིན་གྱིས་ཚུལ་དུ་བསྒྲུབ་པ་སྔར་གྱི་དཀྱིལ་འཁོར་གྱི་ལྷ་ལ་དགུག་གཞུག་བྱེད་པ་གསང་འདུས་འཕགས་ལུགས་དང་ཆ་འདྲ་བར་གསུངས་སོ། །གལ་ཏེ་དབང་བསྐུར་བའི་བར་དུ་སྒྲུབ་ཐབས་ལས་འབྱུང་བ་བཞིན་བསྐྱེད་ནས་ཞེས་པ་ཡན་ཆད་ཀྱིས་བདག་བསྐྱེད་པ་དང་། རྡོ་རྗེ་དང་པདྨ་ཞེས་པ་མན་ཆད་ཀྱིས་མདུན་བསྐྱེད་བསྒྲུབ་ཚུལ་བསྟན་པས། བདག་མདུན་ཐ་དད་ཡིན་ནོ་སྙམ་ན་མ་ཡིན་ཏེ། རང་རང་གི་མཚན་མའི་ལྷ་ལ་ཞེས་གསུངས་པས་སོ། །གཉིས་པ་ནི། གྲུབ་ཆེན་མཚོ་སྐྱེས་ཀྱི་ལུགས་ཏེ། ནས་གླིང་མར། དེ་ནས་སྟན་བདེ་བ་ལ་འདུག་ལ། ཙཎྜ་ལཱི་དང་ལྷན་ཅིག་ཏུ་བསྒྲུབ་པར་བྱ། མེད་ན་ཏིང་ངེ་འཛིན་གྱིས་བྱ། དེ་ནས་བླ་མ་ཡན་ལག་དྲུག་དང་ལྡན་པས། ལྷའི་འཁོར་ལོ་རྫོགས་པར་ཚུལ་བཞིན་དུ་བསྐྱེད་ལ། དེ་ནས་གཽ་རཱི་ལ་བཀའ་བསྒོ་ལ། ལྷ་རྣམས་སྤྱན་དྲངས། སྤྱན་དྲངས་པ་དེ་ལ་མཆོད་པ་རྣམས་དབུལ། དེ་ནས་གཞུག་པ་དང་། བཅིང་བ་དང་། དགེས་པ་བསྐྱེད་པ་རྣམས་བྱས་ལ་གཉིས་སུ་མེད་པར་བསྟིམ་ཞེས་གསུངས་པའི་དོན། རྗེ་བཙུན་རྩེ་མོས། ཚོགས་ཞིང་སྤྱན་དྲངས་པ་ནས་ཡེ་ཤེས་ཚོགས་བསག་གི་བར་བདག་བསྐྱེད་ལྟར་བྱས་ནས། སྲུང་འཁོར་ནས་བརྩམས་ཏེ། འཁོར་གྱི་ལྷ་མོ་རྣམས་རང་རང་གི་གདན་ལ་འཁོད་པའི་བར་བདག་མདུན་ཐ་མི་དད་དུ་བསྲེས་པ་ལ། ཡན་ལག་ལྷག་མ་གསུམ་རྫོགས་པར་བྱས་ནས། གཙོ་བོའི་ཐུགས་ཀ་ནས་བྱེ་སྟེ། མཆོད་བསྟོད་བྱ་བར་གསུངས་སོ། །གསུམ་པ་ནི་མན་ངག་ལུགས་ཏེ། འདི་ལ་བདག་འཇུག་གཉིས་ཀྱི་སྒྲུབ་ཚུལ་དང་། དབང་ཆུ་ཆེན་མོའི་སྒྲུབ་ཚུལ་དང་། དངོས་གཞི་ཞག་གྲངས་སྦྲེལ་བའི་ཚུལ་ལ་དོགས་པ་གཅད་པ་དང་གསུམ་ལས། དང་པོ་ལ། ཇིམ་གིན་མ་ལྟར་ན་ཐོག་མར་བདག་བསྐྱེད་བཟླས་པ་དང་བཅས་པ་བྱས་ནས། སྲུང་བའི་འཁོར་ལོ་ལ་བསྡུ་བ་ཙམ་བྱ། མཆོད་པ་རྣམས་བསང་སྦྱངས་ཤབྡའི་བར་གྱིས་བྱིན་གྱིས་བརླབ། དཀྱིལ་འཁོར་ལ་རྡོ་རྗེའི་རྩེས་ནང་མཆོད་གཏོར། ཨ་མྲྀ་ཏས་བསང་ནས་གདོང་གྱེན་དུ་ཕྱོགས་པའི་བར་གོང་ལྟར་བསྐྱེད། འདབ་དགུའི་སྟེང་དུ་མངོན་བྱང་ཚན་པ་དགུ་ལས་ལྷ་དགུ་བསྐྱེད་པ་བུམ་བསྐྱེད་ལྟར་བྱ། དེ་ནས་ཨོཾ་ཨཱཿཧཱུྃ། བདག་གིས་བསྒོམས་པའི་དཀྱིལ་འཁོར་དང་། མདུན་བསྐྱེད་ཀྱི་དཀྱིལ་འཁོར་གཉིས་ལྷ་དགུ་དང་། ལྷ་དགུ་གཉིས་གཉིས་སུ་མེད། གཞལ་ཡས་ཁང་དང་གཞལ་ཡས་ཁང་། དུར་ཁྲོད་བརྒྱད་དང་དུར་ཁྲོད་བརྒྱད། སྲུང་བའི་འཁོར་ལོ་དང་སྲུང་བའི་འཁོར་ལོ་གཉིས་སུ་མེད་པར་འགྱུར། རང་ཉིད་རས་བྲིས་ཀྱི་དཀྱིལ་འཁོར་གྱི་དབུས་སུ་གཙོ་བོ་ཡབ་ཡུམ་དུ་གནས་པའི་ཡུམ་གྱི་མཁའ་ཞེས་པ་ནས། ཡུམ་གྱི་མཁར་བབས་པ་ལས། བཅོམ་ལྡན་འདས་ཀྱེ་རྡོ་རྗེ་ལྷ་དགུའི་དཀྱིལ་འཁོར་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་གྱུར། ཨོཾ་ཨཱཿཧཱུྃ་མཁའ་ནང་གི་གཙོ་བོ་ཡབ་ཡུམ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ཞེ་སྡང་དང་། རྣམ་པར་ཤེས་པའི་ཕུང་པོ་སྦྱངས། ཆོས་ཀྱི་དབྱིངས་ཀྱི་ཡེ་ཤེས་ལ་བཀོད། ཚུར་འདུས་རང་ཉིད་གཙོ་བོ་ཡབ་ཡུམ་དུ་གནས་པ་ལ་ཐིམ། མཁའ་ནང་གི་གཽ་རཱི་དཔག་ཏུ་མེད་པ་འཕྲོས། སེམས་ཅན་ཐམས་ཅད་ཀྱི་གཏི་མུག་དང་། གཟུགས་ཀྱི་ཕུང་པོ་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། ཚུར་འདུས་གཽ་རཱི་ལ་ཐིམ་ཞེས་པ་ནས། གཡུང་མོའི་བར་འདྲ། མཁའ་ནང་གི་གཞལ་ཡས་ཁང་དཔག་ཏུ་མེད་པ་སྤྲོས། མ་དག་པའི་སྣོད་ཀྱི་འཇིག་རྟེན་སྦྱངས། ལམ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རྟོགས་པ་ལ་བཀོད། ཚུར་འདུས་སོགས། དུར་ཁྲོད་བརྒྱད་དཔག་ཏུ་མེད་པ་སྤྲོས། ལུས་ཀྱི་བུ་ག་དགུ་དང་། འཇིག་རྟེན་ཆོས་བརྒྱད་ཀྱི་རྣམ་རྟོག་སྦྱངས། སྒྱུ་མའི་དཔེ་བརྒྱད་ཀྱི་རྟོགས་པ་དང་། འཁོར་འདས་གཉིས་མེད་དུ་ཤེས་པ་ལ་བཀོད། ཚུར་འདུས་སོགས། མཁའ་ནང་གི་སྲུང་བའི་འཁོར་ལོ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་མི་མཐུན་པའི་ཕྱོགས་ཐམས་ཅད་ཚར་བཅད། སྐུ་གསུང་ཐུགས་རྡོ་རྗེའི་རང་བཞིན་ལ་བཀོད། ཚུར་འདུས་སོགས་སོ། །དཔལ་འབྱུང་མའི་ལུགས་ལྟར་ན། མངོན་བྱང་དང་པོ་གཉིས་སྔ་མ་དང་འདྲ་ལ། མངོན་བྱང་གསུམ་པའི་ཚེ་དབུས་ཀྱི་ཉི་ཟླ་ཁ་སྦྱོར་གྱི་བར་དུ་ཧཱུྃ་ལས་ཐོད་པ་དཀར་པོ་ཞེས་སོགས་ནས། གཙོ་བོ་ཡབ་ཡུམ་མདུན་བསྐྱེད་ཀྱི་དབུས་སུ་བསྐྱེད། མཁའ་གསང་བྱིན་གྱིས་བརླབས་པ་ནས་ཡུམ་གྱི་མཁར་ཐིག་ལེ་བརྒྱད་དུ་གྱུར་པ། ཕྱོགས་མཚམས་ཀྱི་ཉི་ཟླ་ཁ་སྦྱོར་གྱི་བར་དུ་སྤྲོས་པ་ལས། ས་བོན་ལས་ཕྱག་མཚན་ས་བོན་གྱིས་མཚན་པ་སོགས་མངོན་བྱང་ལྔ་ལས་ལྷ་མོ་བརྒྱད་བསྐྱེད། དེ་ནས་བདག་མདུན་བསྲེ་བ་ཇིམ་གིན་མའི་ལུགས་ལྟར་མཛད་དོ། །དེ་ལ་ལུགས་སྔ་མ་ནི། གཙོ་འཁོར་ཐམས་ཅད་མི་མཉམ་སྦྱོར་གྱི་མངོན་བྱང་ལས་དུས་གཅིག་ཏུ་བསྐྱེད་པ་བདག་མེད་མའི་བསྐྱེད་ཆོག་དང་སྒོ་བསྟུན་པ་ཡབ་ལ་སྦྱར་བར་སྣང་ཞིང་། ལུགས་ཕྱི་མ་ནི་མངོན་རྟོགས་ཡན་ལག་བཞི་པ་དང་སྒོ་བསྟུན་པར་སྣང་མོད། མདུན་བསྐྱེད་བསྒྲུབ་པ་ལ་ཚུལ་དེ་ལྟར་བྱེད་པ་གོང་མའི་གསུང་རབ་ལ་མི་གསལ་ཡང་། དབང་ཆུར་བདག་བསྐྱེད་ཡན་ལག་དྲུག་པ་བསྒོམ་པའི་དབང་དུ་བྱས་ནས། ལྷ་མོ་བརྒྱད་མདུན་བསྐྱེད་ཀྱི་གཙོ་བོའི་མངལ་འབྱིན་གྱིས་བྱེད་པའི་རིགས་འགྲོས་སྦྱར་བར་སྣང་ངོ་། །འོན་ཀྱང་འདི་ལ་གཞལ་ཡས་ཁང་དུར་ཁྲོད་སྲུང་འཁོར་རྣམས་བདག་མདུན་བསྲེས་པའི་རྗེས་ལ་རྟེན་དང་བརྟེན་པ་མངལ་འབྱིན་བྱས་ནས་བསྲེ་བ་ཡིན་ལ། བདག་འཇུག་གཉིས་ཀྱི་ལུགས་ལ་མངལ་འབྱིན་གྱི་རྗེས་སུ་བསྲེ་བར་སྣང་བས་གོ་རིམ་ཡང་མི་འདྲ་བར་སྣང་ལ། མཚོ་སྐྱེས་ལུགས་ལ་བདག་བསྐྱེད་ཡན་ལག་བཞི་པ་བསྒོམ་པའི་ཚེའང་མདུན་བསྐྱེད་མངལ་ནས་འབྱིན་པའི་ཚུལ། ཡན་ལག་དྲུག་པ་དང་འདྲ་བར་མཛད་པས། ལུགས་འདི་ལའང་བདག་བསྐྱེད་ཡན་ལག་བཞི་དྲུག་གང་བསྒོམས་ཀྱང་། མདུན་བསྐྱེད་བསྒྲུབ་པའི་ཚུལ་དབང་ཆུ་ལྟར་མཛད་པ་གོང་མའི་དགོངས་པར་སྣང་ངོ་། །གཉིས་པ་དབང་ཆུ་ཆེན་མོའི་བསྒྲུབ་ཚུལ་ལ་གསུམ་སྟེ། བསྲེ་བ་དང་བསྒྲུབ་པའི་ཚུལ་མདོར་བསྟན། དེ་ཉིད་རྒྱས་པར་བཤད། མཇུག་བརྟན་བྱེད་ཀྱི་སྔགས་བཟླ་བའི་ཚུལ་ལོ། །དང་པོ་ནི། དབང་ཆུར། དེ་ནས་སྲུང་བའི་འཁོར་ལོ་སྔོན་དུ་འགྲོ་བས་ཡན་ལག་དྲུག་ཚང་བར་བསྒོམས་ཏེ། དེའི་རྗེས་ལ་སློབ་དཔོན་གྱིས་དཀྱིལ་འཁོར་བསྒྲུབ་པར་བྱ། སྒྲུབ་པའི་གྲོགས་གཞན་དཀྱིལ་འཁོར་སྒྲུབ་ཤེས་པ་རྣམས་ཀྱིས་དཀྱིལ་འཁོར་བསྒྲུབ་པའི་གྲོགས་བྱ། མི་ཤེས་པ་རྣམས་ཀྱིས་རང་རང་གི་རྣལ་འབྱོར་གང་ཡིན་པ་ལ་གནས་པར་བྱ་བ་ཡིན་པས་སློབ་དཔོན་གྱིས་སྒྲུབ་པའི་གྲོགས་རྣམས་ལའང་དེ་ལྟར་གྱིས་ཤིག་ཅེས་བསྒོ་ལ་རྣལ་འབྱོར་ལ་འཇུག་པར་བྱའོ། །དེ་ལ་དཀྱིལ་འཁོར་སྒྲུབ་པའི་ཆོ་ག་ནི་འདི་ཡིན་ཏེ། དེ་ལྟར་བདག་གི་རྣལ་འབྱོར་ཚར་ནས་ཁམས་གསུམ་སྣོད་བཅུད་སྲུང་བའི་འཁོར་ལོ་ལ་བསྡུ། ཁྱད་པར་དུ་སྲུང་བའི་འཁོར་ལོ་དང་། དུར་ཁྲོད་བརྒྱད་གཞལ་ཡས་ཁང་པ་མི་བསྡུ་བར་བཞག ལྷ་མོ་བརྒྱད་ཞལ་བརྒྱད་ལ་བསྡུས་ལ། དེ་ནས་མདུན་བསྐྱེད་རྒྱས་པར་མི་བྱེད་ན། བདག་གིས་བསྒོམས་པའི་སྲུང་འཁོར་དང་། བྲིས་པའི་སྲུང་བའི་འཁོར་ལོ་ཐ་མི་དད་སྙམ་དུ་བསྲེས་ལ་སྲུང་བའི་འཁོར་ལོ་གསལ་གདབ། དེ་བཞིན་དུར་ཁྲོད་བརྒྱད་དང་། གཞལ་ཡས་ཁང་པའམ་ཐ་མི་དད་དུ་བསམས་ལ་གསལ་གདབ། རྒྱས་པར་བྱེད་ན་སྭ་བྷཱ་ཝས་རྡུལ་ཚོན་སྟོང་པར་བསྒོམས་ལ། བདག་གི་མངོན་པར་རྟོགས་པ་དང་མཐུན་པར་སྲུང་བའི་འཁོར་ལོ་དང་། དུར་ཁྲོད་བརྒྱད་དང་གཞལ་ཡས་ཁང་པ་བསྒོམས་ལ། བདག་གིས་བསྒོམས་པའི་སྲུང་འཁོར་དང་གཞལ་ཡས་ཁང་གི་བར་དུ་རྡུལ་ཚོན་གྱིས་བསྐྱེད་པ་དང་བསྲེས་ལ་གསལ་གདབ། རྡུལ་ཚོན་གྱི་དཀྱིལ་འཁོར་དང་། མངལ་ནས་སྐྱེས་པ་གཉིས་བསྲེས་སྟ་གོན་གི་ལྷ་བསྐྱེད་པ་དེ་ལ་ཡེ་ཤེས་པ་བཀུག་ནས་བཅུག་པ་དང་གཉིས་དེ་ལ་བསྟིམས་པས་བཞི་བསྲེས་ལ་དེ་ལ་ཡེ་ཤེས་པ་གཅིག་སྤྱན་དྲངས་ནས་ལྔ་བསྲེས་སུ་བྱ། སྲུང་འཁོར་དུར་ཁྲོད་གཞལ་ཡས་ཁང་དང་བཅས་པ་ནི་བྲིས་པ་ལ་མདུན་དུ་བསྐྱེད་པ་དང་། སྔར་བདག་གི་བསྐྱེད་པ་དང་གཉིས་བསྲེས་པས་བདུན་བསྲེས་སུ་འགྲོའོ་ཞེས་གསུངས་ཏེ། འདི་དག་གི་དོན་མདུན་བསྐྱེད་རྒྱས་པར་མི་བྱེད་པ་ལ་རྟེན་དྲུག་བསྲེས་དང་། རྒྱས་པར་བྱེད་པ་ལ་བདུན་བསྲེས་སུ་འགྲོ་བ་དེ་གཉིས་ཀྱི་ཁྱད་པར་དུ་སྣང་སྟེ། སྔ་མ་ལ་རྡུལ་ཚོན་ལ་བདག་གིས་བསྒོམས་པ་བསྲེས་པས་གཉིས་བསྲེས། དེ་ལ་མངལ་འབྱིན་བསྲེས་པས་གསུམ་བསྲེས། དེ་ལ་སྟ་གོན་གྱི་དམ་ཚིག་པ་དང་། ཡེ་ཤེས་པ་གཉིས་བསྲེས་པས་ལྔ་བསྲེས། དེ་ལ་ཡེ་ཤེས་པ་གཅིག་བསྲེས་པས་དྲུག་བསྲེས་སུ་འགྲོའོ། །ཕྱི་མ་ལ་རྡུལ་ཚོན་ལ་གསར་དུ་བསྐྱེད་པ་བསྲེས་པས་གཉིས་བསྲེས། དེ་ལ་བདག་གིས་བསྒོམས་པ་བསྲེས་པས་གསུམ་བསྲེས། དེ་ལ་མངལ་འབྱིན་མན་ཆད་སྔ་མ་བཞིན་དུ་བརྩིས་པས་བདུན་བསྲེས་སུ་འགྲོའོ། །འདི་ལ་ཁ་ཅིག་བྲིས་པ་དང་། བསྐྱེད་པ་གཉིས་ལ་བསྲེ་བའི་དོན་མི་གནས་པས། དེ་གཉིས་གཅིག་ཏུ་བརྩིས་ནས་བདག་བསྐྱེད་ཀྱི་རྟེན་ལ་ཡེ་ཤེས་པ་དང་། དམ་ཚིག་པ་གཉིས་བསྲེས་པས་བདུན་བསྲེས་སུ་འགྲོ་ཞེས་པ་ནི་དོན་མ་རྟོགས་པ་སྟེ། བྲིས་པ་ལ་མདུན་དུ་བསྐྱེད་པ་དང་། སྔར་བདག་གིས་བསྐྱེད་པ་དང་། གཉིས་བསྲེས་པས་བདུན་བསྲེས་སུ་འགྲོ་ཞེས་པ་དང་དངོས་སུ་འགལ་བའི་ཕྱིར་དང་། མདུན་བསྐྱེད་རྒྱས་པར་མི་བྱེད་པའི་ལུགས་ལའང་ཁྱོད་ལྟར་ན་བདུན་བསྲེས་ཚང་དགོས་པས་རྒྱས་པར་བྱེད་མི་བྱེད་ཀྱི་ཁྱད་པར་མེད་པར་ཐལ་བའི་ཕྱིར་དང་། བློ་ངོར་རྡུལ་ཚོན་སྟོང་པར་སྦྱངས་ཟིན་པས་གསར་དུ་བསྐྱེད་པ་བསྲེ་བའི་གཞི་མེད་པར་འདོད་ན་ནི་ལྷ་མོ་བརྒྱད་ལའང་མཚུངས་པས་ལྔ་བསྲེས་མ་ཚང་བར་ཐལ་བའི་ཕྱིར་རོ། །འོ་ན་བྲིས་པ་དང་བསྐྱེད་པ་གཉིས་ལ་བསྲེ་བའི་དོན་ཇི་ལྟར་གནས་སྙམ་ན། སྔར་རྡུལ་ཚོན་སྟོང་པར་སྦྱངས་ནས་ཕྱིས་རྡུལ་ཚོན་དེ་གཉིས་གཞལ་ཡས་ཁང་གི་རྣམ་པར་བསྒོམ་པ་བསྲེ་བའི་དོན་ཡིན་ཏེ། ལྷ་མོ་བརྒྱད་ལའང་བྲིས་པ་སྟོང་པར་སྦྱངས་ནས་གདན་གྱི་སྟེང་དུ་མངལ་འབྱིན་གྱི་ལྷ་མོ་བཞག་པ་ཉིད་ལ་བྲིས་པ་དང་། མངལ་འབྱིན་བསྲེ་བའི་དོན་ཚང་བ་བཞིན་ནོ། །དེས་ན་རྗེ་བཙུན་རྩེ་མོ་ཉིད་ཀྱིས་དབང་ཆུ་འདི་དང་། མཚོ་སྐྱེས་ལུགས་ཀྱི་དབང་ཆུ་གཉིས་ཆར་དུ་གདན་གྱི་སྟེང་དུ་མངལ་འབྱིན་གྱི་ལྷ་མོ་བཞག་པ་ལ་ཁྱད་པར་མེད་པ་ལ། འདིར་ཤར་ཕྱོགས་ཀྱི་གདན་ཚངས་པའི་སྟེང་དུ་བཞག་ཅེས་པ་ནས། ཐགས་བཟངས་རིས་ཀྱི་སྟེང་དུ་བཞག་ཅེས་གསུངས་ལ། མཚོ་སྐྱེས་ལུགས་ཀྱི་དབང་ཆུར་ནི་ཤར་གྱི་མཚན་མ་དང་རོ་གཅིག་ཏུ་འདྲེས་པ་ལས་གཽ་རཱི་ཞེས་སོགས་གསུངས་པས། སྔར་གྱི་རྡུལ་ཚོན་དེ་ཉིད་ལྷའམ་གཞལ་ཡས་ཁང་གི་ངོ་བོ་བསྒོམ་པ་ཉིད་ལ་བསྲེ་བའི་དོན་དུ་བཞེད་པར་གདོན་མི་ཟའོ། །དཔེ་ཁ་ཅིག་ལས། སྲུང་འཁོར་དུར་ཁྲོད་གཞལ་ཡས་ཁང་དང་བཅས་པ་ནི་བྲིས་པ་ལ་མདུན་དུ་བསྐྱེད་པ་ལ་ནི་སྔར་བདག་གིས་བསྐྱེད་པ་གཉིས་བསྲེས་པས། ཞེས་འབྱུང་བ་ནི་འབྲུ་མ་ནོན་པ་ཞིག་གིས་བཅོས་པར་སྣང་བས་མ་དག་པར་ཤེས་པར་བྱའོ། །འཁོར་གྱི་ལྷ་མོའི་ལྔ་བསྲེས་བརྩི་བ་ནི་གོ་སླ་ལ། གཙོ་བོ་ལ་བསྲེ་ཚུལ་གྱི་གྲངས་མ་གསུངས་པ་ནི་ཤར་ཕྱོགས་ཀྱི་སྒོ་ཁང་ན་གནས་ནས་བསྒྲུབ་པ་དང་། དཀྱིལ་འཁོར་གྱི་དབུས་སུ་གནས་ནས་བསྒྲུབ་པ་གཉིས་ཡོད་པ་ལས། དང་པོ་ལ་ལྔ་བསྲེས་དང་། ཕྱི་མ་ལ་དྲུག་བསྲེས་ཚང་བ་ཤུགས་ལ་གོ་བ་ལ་དགོངས་སོ། །སྟ་གོན་གཉིས་སུ་བགྲངས་ནས་བདག་བསྐྱེད་གཉིས་སུ་མི་བགྲངས་པ་ནི་མདུན་བསྐྱེད་ལ་ཆོ་ག་ཚར་ནས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་བ་ཡོད་ལ། བདག་བསྐྱེད་ལ་དེ་མེད་པའི་གནད་ཀྱིས་སོ། །གཉིས་པ་ལ་བཞི་སྟེ། དམ་ཚིག་གི་དཀྱིལ་འཁོར་འབྱིན་པའི་ཚུལ་གྱིས་བསྒྲུབ་པ། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའི་ཚུལ་གྱིས་བསྒྲུབ་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བའི་ཚུལ་གྱིས་བསྒྲུབ་པ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའི་ཚུལ་གྱིས་བསྒྲུབ་པའོ། །དང་པོ་ལ་གསུམ་སྟེ། མངལ་དུ་དཀྱིལ་འཁོར་བསྐྱེད་པའི་ཚུལ། ཕྱིར་སྤྲོ་བའི་ཚུལ། མངལ་འབྱིན་གྱི་དགོས་པ་བསྟན་པའོ། །དང་པོ་ནི། བདག་བསྐྱེད་བཟླས་པ་དང་བཅས་པ་ཚར་ནས། ཁམས་གསུམ་སྣོད་བཅུད་སྲུང་བའི་འཁོར་ལོ་ལ་ཐིམ། ལྷ་མོ་བརྒྱད་ཞལ་བརྒྱད་ལ་ཐིམ། ཞེས་བརྗོད་ལ། དེ་ནས་མདུན་གྱི་རྡུལ་ཚོན་ཨ་མྲྀ་ཏས་བསང་། སྭཱ་བྷཱ་ཝས་སྦྱངས། སྟོང་པའི་ངང་ལས་ཐུན་མོང་བའི་སྲུང་འཁོར་ནས་གཞལ་ཡས་ཁང་དུར་ཁྲོད་གདན་དང་བཅས་པ་བདག་གི་མངོན་པར་རྟོགས་པ་དང་མཐུན་པར་བསྒོམ་མོ། །འདིར་ཡང་བར་དོ་བསྲེ་བ་ཆད་ན་བདག་གི་མངོན་པར་རྟོགས་པ་དང་མཐུན་པར་མི་འབྱུང་སྟེ། རྐྱེན་གྱི་ཡན་ལག་མ་ཚང་བའི་ཕྱིར་རོ། །དེ་ནས་བདག་གིས་བསྒོམས་པའི་སྲུང་བའི་འཁོར་ལོ་མདུན་བསྐྱེད་ཀྱི་སྲུང་བའི་འཁོར་ལོ་དང་གཉིས་སུ་མེད་པར་གྱུར། བདག་གིས་བསྒོམས་པའི་དུར་ཁྲོད་བརྒྱད་མདུན་བསྐྱེད་ཀྱི་དུར་ཁྲོད་བརྒྱད་དང་གཉིས་སུ་མེད་པར་གྱུར། བདག་གིས་བསྒོམས་པའི་གཞལ་ཡས་ཁང་གདན་དང་བཅས་པ་མདུན་བསྐྱེད་ཀྱི་གཞལ་ཡས་ཁང་གདན་དང་བཅས་པ་དང་གཉིས་སུ་མེད་པར་གྱུར། རང་ཉིད་དཀྱིལ་འཁོར་གྱི་དབུས་སུ་གཙོ་བོ་ཡབ་ཡུམ་གྱི་སྐུར་གསལ་བའི་ཡུམ་གྱི་མཁའ་ཨཱཿལས་པདྨ་ཞེས་པ་ནས། རྡོ་རྗེའི་ལམ་ནས་ཡུམ་གྱི་མཁར་བབས་པ་ཞེས་པའི་བར་བདག་བསྐྱེད་བཞིན་བྱས་ལ། ཐིག་ལེ་དེ་ཐིག་ལེ་ཆ་གཉིས་སུ་གྱུར། ཆ་གཅིག་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་སྒོ་བཞི་པ་རྟ་བབས་བཞི་དང་ལྡན་པ། རྒྱན་ཐམས་ཅད་ཀྱིས་བརྒྱན་པ་མཚན་ཉིད་ཐམས་ཅད་ཡོངས་སུ་རྫོགས་པ། ལྷའི་གདན་དང་བཅས་པ་ཕྱི་རོལ་དུར་ཁྲོད་ཆེན་པོ་བརྒྱད་སྲུང་བའི་འཁོར་ལོ་དང་བཅས་པར་གྱུར། ཆ་གཅིག་ཆ་དགུར་གྱུར་ནས་སོ་སོའི་གདན་གྱི་སྟེང་དུ་འཁོད་པ་ལས། དབུས་ཀྱི་ཐིག་ལེ་བཅོམ་ལྡན་འདས་སྙིང་པོ་ཀྱེ་རྡོ་རྗེ་ཡབ་ཡུམ། ཤར་གྱི་ཐིག་ལེ་གཽ་རཱི་ཞེས་པ་ནས་ནུབ་བྱང་གི་ཐིག་ལེ་གཡུང་མོ་ཞེས་པའི་བར་མིང་ཙམ་བརྗོད་ཅིང་གསལ་གདབ་པ་ནི་ལས་དང་པོ་པར་རྣམ་པ་གསལ་བའི་ཆེད་དུ་ཡིན་ནོ་ཞེས་རྗེ་བླ་མའི་ཕྱག་ལེན་ཡིན་ནོ། །དབང་ཆུར་བྱང་ཆུབ་ཀྱི་སེམས་ཀྱི་ཐིག་ལེའི་རྣམ་པ་ཡུམ་གྱི་བྷ་གར་ཕབ་སྟེ། དེ་ནས་དཀྱིལ་འཁོར་གྱི་འཁོར་ལོ་རྟེན་དང་བརྟེན་པར་བཅས་པ་ཡུམ་གྱི་མཁར་ཡོངས་སུ་རྫོགས་པར་བསྐྱེད་ཅེས་གསུངས་པས་སྔ་མ་ལྟར་རམ། ཡང་ན་རྡོ་རྗེའི་ལམ་ནས་ཡུམ་གྱི་མཁར་བབས་པས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པ་ཅིག་ཅར་དུ་གྱུར་པ་ནི་རིན་པོ་ཆེ་སྣ་ཚོགས་ལས་གྲུབ་བའི་གཞལ་ཡས་ཁང་པ་ཞེས་སོགས་སྔ་མ་ལྟར་དང་། དབུས་སུ་བཅོམ་ལྡན་འདས་སྙིང་པོ་ཀྱེ་རྡོ་རྗེ་ཡབ་ཡུམ་ཞེས་པ་ནས་ནུབ་བྱང་དུ་གཡུང་མོ་ཞེས་པའི་བར་མིང་ཙམ་གྱིས་གསལ་གདབ་པའང་རུང་བར་སྣང་ངོ་། །གཉིས་པ་ལ་གཉིས་ཏེ། ལྷ་རེ་རེ་ནས་རྐང་ཐོན་དུ་སྤྲོ་བ་དང་། དཀྱིལ་འཁོར་ཡོངས་སུ་རྫོགས་པ་བྱུང་རྫོགས་སུ་སྤྲོ་བའོ། །དང་པོ་ནི། མཁའ་ནང་གི་གཙོ་བོ་ཡབ་ཡུམ་དཔག་ཏུ་མེད་པ་སྤྲོས། ནམ་མཁའི་ཁམས་ཐམས་ཅད་ཁྱབ་སྟེ། སེམས་ཅན་ཐམས་ཅད་ཀྱི་ཞེ་སྡང་དང་། རྣམ་པར་ཤེས་པའི་ཕུང་པོ་སྦྱངས། ཆོས་དབྱིངས་ཡེ་ཤེས་ལ་བཀོད། སླར་འདུས་རང་ལ་ཐིམ་པ་ནི་རང་ཉིད་ཀྱེ་རྡོ་རྗེ་སྐུ་མདོག་སྔོན་པོ་ཞེས་པ་ནས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཞེས་པའི་བར་ཞལ་ཕྱག་རྒྱས་པར་གསལ་གདབ་དགོས་ཏེ། དང་པོར་བདག་བསྐྱེད་གསལ་གདབ་ཟིན་པ་ཡིན་ཡང་། སྐབས་འདིར་མདུན་བསྐྱེད་ཀྱི་གཙོ་བོ་གསལ་གདབ་དགོས་པའི་ཕྱིར་མཁའ་ནང་གི་གཽ་རཱི་དཔག་ཏུ་མེད་པ་སྤྲོས། ནམ་མཁའི་ཁམས་ཐམས་ཅད་ཁྱབ་སྟེ། སེམས་ཅན་ཐམས་ཅད་ཀྱི་གཏི་མུག་དང་གཟུགས་ཀྱི་ཕུང་པོ་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། སླར་འདུས་ཏེ་ཤར་དུ་ཚངས་པའི་གདན་ལ་འཁོད་པ་ནི་གཽ་རཱི་ནག་མོ་གཡས་གྲི་གུག གཡོན་ཉ་རོ་ཧི་ཏ་འཛིན་པ་ཞེས་སོགས་སོ། །ཡང་འདི་ལ་ཤར་གྱི་མཚན་མ་དང་རོ་གཅིག་ཏུ་འདྲེས་པ་ལས་གཽ་རཱི་ནག་མོ་ཞེས་སོགས་ཀྱང་རུང་སྟེ། རྒྱུ་མཚན་ནི་སྔར་བཤད་ཟིན་ཏོ། །དེ་བཞིན་དུ་ལྷ་མོ་གཞན་གསུམ་ལའང་ཉོན་མོངས་པ་དང་། ཕུང་པོ་དང་། ཡེ་ཤེས་ལྷག་མ་གསུམ་དང་སྦྱར་བ་ནི་རིགས་འགྲེའོ། །མཚམས་ཀྱི་ལྷ་མོ་བཞི་ལ་སྦྱངས་བཞི་འབྱུང་བ་བཞི་དང་། སྦྱོང་བྱེད་ཚད་མེད་བཞི་དང་སྦྱར་བའང་འགྲེའོ། །མཁའ་ནང་གི་གཞལ་ཡས་ཁང་དཔག་ཏུ་མེད་པ་སྤྲོས། མ་དག་པའི་སྣོད་ཀྱི་འཇིག་རྟེན་སྦྱངས། ལམ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཀྱི་རྟོགས་པ་ལ་བཀོད། ཚུར་འདུས་སྔར་གྱི་གཞལ་ཡས་ཁང་ལ་ཐིམ། མཁའ་ནང་གི་དུར་ཁྲོད་བརྒྱད་དཔག་ཏུ་མེད་པ་སྤྲོས། ལུས་ཀྱི་བུ་ག་དགུ་དང་། འཇིག་རྟེན་ཆོས་བརྒྱད་ཀྱི་རྣམ་པར་རྟོག་པ་སྦྱངས། སྒྱུ་མའི་དཔེ་བརྒྱད་ཀྱི་རྟོགས་པ་དང་། འཁོར་འདས་དབྱེར་མེད་ཀྱི་རྟོགས་པ་ལ་བཀོད། ཚུར་འདུས་སྔར་གྱི་དུར་ཁྲོད་བརྒྱད་ལ་ཐིམ། མཁའ་ནང་གི་སྲུང་བའི་འཁོར་ལོ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་མི་མཐུན་པའི་ཕྱོགས་ཐམས་ཅད་ཚར་བཅད། ཚུར་འདུས་སྔར་གྱི་སྲུང་བའི་འཁོར་ལོ་ལ་ཐིམ་ཞེས་པ་ཙམ་གྱིས་ཀྱང་ཆོག་ལ། དེའི་ཚེ་གསལ་གདབ་པ་བྱུང་ནའང་ལས་དང་པོ་པ་ལ་རྣམ་པ་གསལ་བས་ཤིན་ཏུ་ལེགས་པའོ། །རྟེན་སྤྲོ་ཚུལ་འཕགས་པས་དེ་ལྟར་མཛད་པ་ནི་དབང་ཆུར། རྟེན་དཀྱིལ་འཁོར་དཔག་ཏུ་མེད་པ་སྤྲོས་ཏེ་སེམས་ཅན་ཐམས་ཅད་ཀྱི་དོན་བྱས་ནས་སླར་འདུས་ཏེ་སྔར་བསྐྱེད་པའི་དཀྱིལ་འཁོར་ལ་བསྟིམས་པར་བྱའོ། །ཞེས་པ་ཙམ་ལས་མ་འབྱུང་ཡང་། དེའི་དོན་མན་ངག་གིས་སྦྱངས་གཞི་སྦྱོང་བྱེད་སྦྱར་བར་སྣང་བས་ཤིན་ཏུ་ལེགས་ཤིང་དེང་སང་གི་བར་དུ་ཕྱག་ལེན་ལ་ཡོད་པའོ། །གཉིས་པ་ནི། དབང་ཆུར་དཀྱིལ་འཁོར་ཡོངས་སུ་རྫོགས་པར་སྤྲོ་ན། ཡུམ་གྱི་བྷ་ག་ནས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་དཔག་ཏུ་མེད་པ་སྤྲོས། ནམ་མཁའི་ཁམས་ཐམས་ཅད་ཁྱབ་སྟེ། སེམས་ཅན་ཐམས་ཅད་ཀྱི་དོན་བྱས་ནས་སླར་ཚུར་འདུས་ཏེ། སྔར་བསྐྱེད་པའི་དཀྱིལ་འཁོར་ལ་བསྟིམ་པར་བྱའོ། །ཞེས་གསུངས་སྟེ། དེ་ལྟར་བསྟིམས་པའི་རྗེས་སུ་ལྷ་དགུ་ནི་མདུན་དུ་སྔར་གསལ་མ་བཏབ་པས་ངེས་པར་གསལ་གདབ་དགོས་ལ། རྟེན་ནི་སྔར་བསྐྱེད་ཟིན་ན། འདིར་གསལ་གདབ་མི་དགོས་ལ། བསྐྱེད་ཆོག་རྒྱས་པར་མི་བྱེད་པའི་ལུགས་ལ་ནི་འདིར་གསལ་གདབ་དགོས་སོ། །བྱུང་རྫོགས་སུ་སྤྲོ་བའི་ལུགས་འདི་ནི་གང་ཟག་དམིགས་པ་གསལ་བ་ལ་ནི་ཐམས་ཅད་དུ་རུང་ཞིང་། གཞན་ལའང་ལོང་སྐབས་མེད་པར་བསྡུ་དགོས་པའི་ཚེ་རུང་བར་སྣང་ངོ་། །གསུམ་པ་ནི། བདག་བསྐྱེད་ལ་ལྷ་མོ་བརྒྱད་མངལ་ནས་འབྱིན་པ་རྒྱུད་ལས་དངོས་སུ་གསུངས་པས་དགོས་ཀྱང་། མདུན་བསྐྱེད་ས་བོན་ནམ། རྡོ་རྗེ་ཆོ་ག་གསུམ་མམ། མངོན་བྱང་ལས་བསྐྱེད་ནས་མཆོད་པས་ཆོག་གི་མངལ་འབྱིན་ཅི་དགོས་སྙམ་ན། གདུལ་བྱ་འདོད་ཆགས་ཅན་རྗེས་སུ་གཟུང་བ་དང་། བདེ་ཆེན་གྱི་ཡེ་ཤེས་ལམ་དུ་བྱེད་པ་དང་། ཆོས་སྐུ་སྐྱེ་བ་མེད་པ་ལས་སྐྱེ་བའི་རྣམ་འཕྲུལ་བསྟན་པ་མཚོན་པའི་ཆེད་དུ་མངལ་འབྱིན་གྱིས་བསྒྲུབ་ཚུལ་འབྱུང་བ་ཡིན་ཏེ། རྩ་རྒྱུད་ཕྱི་མའི་ལྔ་པར། རྗེ་བཙུན་ཡབ་ཀྱི་སྐབས་སུ། བཅུ་གཉིས་བརྒྱད་གཉིས་ལོན་པ་ཡི། །རིག་མ་བདེ་ཆེན་བརྒྱད་པོ་ཉིད། །དོ་ཤལ་རྐང་གདུབ་ཀྱིས་བརྒྱན་ནས། །དཀྱིལ་འཁོར་དུ་ནི་རབ་ཏུ་གཞུག །ཅེས་གསུངས་པས་སོ། །དང་པོའི་བཅུ་པར། རྗེ་བཙུན་ཡུམ་གྱི་སྐབས་སུ། དེར་ནི་རིགས་ལྔ་ལས་བྱུང་བའི། །རིག་མ་བཟང་པོ་རྣམ་པར་གཞུག །ཡང་ན་ཇི་ལྟར་གང་རྙེད་དེ། །དེ་ལྟར་བཅུ་དྲུག་ལོན་པ་ཉིད། །ཅེས་གསུངས་པ་ནི། དབང་གི་རྟེན་ཡིན་གྱི། དཀྱིལ་འཁོར་བསྒྲུབ་པའི་རྟེན་ནི་མ་ཡིན་ཏེ། ལུང་དེ་ཉིད་ཀྱི་མཇུག་ཏུ། ཇི་སྲིད་ཁུ་བ་ལྡན་གྱུར་པ། །དེ་སྲིད་ཕྱག་རྒྱ་བསྟེན་པར་བྱ། །ཕྱག་རྒྱའི་གདོང་ཡང་བཅིང་བ་དང་། །ཐབས་ཀྱི་གདོང་ཡང་དེ་བཞིན་ནོ། །བསྟེན་པ་དེ་ལས་གང་བྱུང་བ། སློབ་མའི་ཁར་ནི་ལྟུང་བར་བྱ། །རོ་མཉམ་སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་བྱ། །ཞེས་གསང་དབང་དང་ཤེས་རབ་ཡེ་ཤེས་ཀྱི་དབང་གི་རྟེན་ཉིད་དུ་གསུངས་པའི་ཕྱིར་དང་། དབང་དུས་སུ་ལང་ཚོ་གཙོ་ཆེ་བས། ལོ་བཅུ་དྲུག་མ་ཁོ་ནར་གསུངས་པའང་འདི་ལ་དགོངས་པའི་ཕྱིར་རོ། །དེས་ན་འདི་ལ་དཀྱིལ་འཁོར་བསྒྲུབ་པའི་ཚུལ། ཧེ་རུ་ཀ་ཞལ་གཅིག་ཕྱག་གཉིས་པའི་སྙིང་གར་དཀྱིལ་འཁོར་བསྒྲུབས་ནས་ཕྱིར་སྤྲོས་ཏེ། རྡུལ་ཚོན་དང་བསྲེ་བར་རྗེ་བཙུན་རྩེ་མོས་བཤད་དོ། །ཕྱི་མའི་ལྔ་པར། དམ་འཁྱུད་ཙུམྦྷ་ན་བྱེད་པས། །འདི་རྣམས་རྣལ་འབྱོར་པ་ཡིས་མཆོད། །དེ་ལས་ག་པུར་བཏུང་བ་ཉིད། །དེས་ནི་དཀྱིལ་འཁོར་བསང་གཏོར་བྱ། །དེ་རྣམས་རྣལ་འབྱོར་པས་བཏུང་བྱ། །དངོས་གྲུབ་མྱུར་དུ་ཐོབ་པར་འགྱུར། །ཞེས་སྙོམས་འཇུག་གི་རྫས་ཀྱིས་དཀྱིལ་འཁོར་ལ་བསང་གཏོར་དང་། རང་ཉིད་ཀྱི་ལྕེ་ལ་མྱང་བ་ལས་དགོས་པ་གཞན་མ་གསུངས་ཀྱང་། ལོ་ཉི་ཤུ་མ་དང་། བཅུ་དྲུག་མ་གཉིས་གསུངས་པས་དཀྱིལ་འཁོར་བསྒྲུབ་པའི་རྟེན་དང་། དབང་གི་རྟེན་གཉིས་ཀ་བསྟན་ཅིང་། རྗེ་བཙུན་ཡབ་ཀྱི་སྐབས་སུ་བདག་བསྐྱེད་མངལ་ནས་འབྱིན་པ་ཉིད་ཀྱིས་མདུན་བསྐྱེད་ལའང་མངལ་འབྱིན་ཡོད་པར་གྲུབ་བོ། །འོ་ན་མདུན་བསྐྱེད་ལ་རྒྱུ་རྡོ་རྗེ་འཆང་ཞུ་བ་ལ་གླུས་བསྐུལ་བ་དང་། དེ་ལས་འབྲས་བུ་རྡོ་རྗེ་འཆང་བཞེངས་པའང་ཡོད་པར་འགྱུར་རོ་སྙམ་ན། མཚོ་སྐྱེས་ལུགས་ལྟ་བུ་སྲུང་འཁོར་ནས་བརྩམས་ཏེ། བདག་མདུན་ཐ་མི་དད་དང་བསྲེ་བ་ལ་དེ་དག་ཡོད་ཀྱང་། འདིར་བདག་བསྐྱེད་བཟླས་པ་དང་བཅས་པ་ཟིན་པའི་རྗེས་སུ་བསྲེ་བ་ཡིན་པས་དཀྱིལ་འཁོར་གྱི་གཙོ་བོ་འབྲས་བུ་རྡོ་རྗེ་འཛིན་པ་ཉིད་དང་པོ་ནས་བསྐྱེད་པས་ཆོག་པ་ལ་དགོངས་ནས་དེ་དག་མ་མཛད་པའོ། །གཉིས་པ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པའི་ཚུལ་གྱིས་བསྒྲུབ་པ་ནི་སྟ་གོན་གྱི་སྐབས་བཞིན་ནོ། །གསུམ་པ་ཡེ་ཤེས་ཀྱི་འཁོར་ལོ་དགུག་གཞུག་བྱ་བའི་ཚུལ་གྱིས་བསྒྲུབ་པ་ལ་གཉིས་ལས། དང་པོ་སྟ་གོན་གྱི་དུས་སུ་ནམ་མཁའ་ལ་བཏེག་པ་དེ་ཉིད་དགུག་གཞུག་བྱེད་པ་ནི་ཐོག་མར་ཡེ་ཤེས་སེམས་དཔའི་ཕྱི་ནས་འབྲངས་པའི་བགེགས་བསྐྲད་པར་བྱ་བའི་ཕྱིར་ལུས་ཀྱིས་རྡོ་རྗེ་གསོར་ཞིང་། སེམས་ཀྱི་སྙིང་གའི་ཧཱུྃ་གི་འོད་ཀྱི་གཟི་བརྗིད་ཀྱིས་བགེགས་བསྐྲད་ཅིང་། ངག་གིས་རྩ་བའི་སྔགས་ལན་གསུམ་མམ། ལྔ་འམ། བདུན་བཟླས་སོ། །དེ་ནས་མདུན་གྱི་ནམ་མཁའ་ལ་བཞུགས་པ་དེ་ལ་དང་པོར་ཞབས་བཀྲུ་དབུལ་ཏེ། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ནི་རཱི་ཏི་ཧཱུྃ་ཁྃ། ཞེས་བརྗོད་དེ། དངོས་སུ་ཞབས་བསིལ་བཟེད་ཞལ་དུ་བླུགས་ཅིང་ཞབས་བཀྲུས་པར་བསམ། ཡང་། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ནི་ཝཱི་ཏི་ཨཱཿཧཱུྃ། ཞེས་པས་ཞལ་བསིལ་གྱིས་ཞལ་བསིལ་བར་བསམ། ཨོཾ་སརྦ་སཾ་ཤོ་དྷ་ནི་ཧཱུྃ་ཞེས་བརྗོད་པས་འཐོར་འཐུང་གིས་གཏོར། ཡང་མཆོད་ཡོན་ལག་ཏུ་བཟུང་ལ་ལྷ་རྣམས་ཀྱི་ཕྱག་ཏུ་གཏད་པར་བསམ་ཞིང་། ཨོཾ་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ཛཿཧཱུྃ་བཾ་ཧོཿཁྃ་རྃ་ཞེས་བརྗོད་དོ། །དེའང་དངོས་སུ་འབུལ་བར་མི་ནུས་ན་སྔགས་དང་ཏིང་ངེ་འཛིན་ཙམ་གྱིས་དབུལ་བར་བྱའོ། །དེ་ནས་གཽ་རཱི་ལ་སོགས་པ་རྣལ་འབྱོར་མ་བཞི་སྤྲོས་ཏེ། ལུས་ཀྱིས་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་སྟེ་བཞིའི་ཕྱག་རྒྱ་བཅའ་ཞིང་། ངག་ཏུ་ཨོཾ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་ཧེ་བཛྲ་ས་པ་རི་ཝཱ་ར་ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿ ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུྃ། ཨོཾ་བཛྲ་བེ་ཏ་ལཱི་བནྡྷ་བཾ། ཨོཾ་བཛྲ་གྷསྨ་རཱི་ཝ་ཤྃ་ཀུ་རུ་ཧོཿཞེས་བརྗོད་ཅིང་སེམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བའོ། །གཉིས་པ་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ནས་དགུག་གཞུག་བྱ་བ་ནི་སྟ་གོན་གྱི་གནས་སྐབས་བཞིན་དུ་བྱའོ། །བཞི་པ་དབང་བསྐུར་ནས་རིགས་ཀྱི་བདག་པོས་རྒྱས་གདབ་པའི་ཚུལ་གྱིས་བསྒྲུབ་པ་ནི་དབང་ལྷ་སྤྱན་དྲངས་པ་ནས་རྒྱས་གདབ་པའི་བར་སྟ་གོན་བཞིན་བྱའོ། །སྒྲུབ་པའི་ཚུལ་འདི་ལ་སྟ་གོན་གྱི་ལྷ་ནམ་མཁར་བཏེག་པ་ལ་ཆུ་བཞི་ཁོ་ནས་མཆོད་པ་ནི། འདི་དང་ཌོམྦི་ལུགས་ཀྱི་དཀྱིལ་ཆོག་གཉིས་ཆར་མཐུན་ལ། ཌོམྦི་ལུགས་ལ་ཆུ་བཞི་འདིར་ཕུལ་ཟིན་པ་ལ་དགོངས་ནས་མཆོད་པ་དངོས་གཞིའི་སྐབས་སུ་མེ་ཏོག་སོགས་ཀྱིས་མཆོད་པ་མཛད་ཅིང་། འདིར་ནི་དངོས་གི་ལའང་ཆུ་བཞི་ནས་བརྩམས་ཏེ་མཆོད་པ་ནི་ཁྱད་པར་རོ། །རྩ་སྔགས་བརྗོད་ཅིང་རྡོ་རྗེ་གསོར་བ་ཁ་ཅིག་རྭ་གུར་གྱི་སྦྱོར་བ་བཤིག་པ་ལ་འཆད་པ་ནི། ལ་ལི་ཏ་བཛྲས་མཛད་པའི་གཤིན་རྗེའི་གཤེད་འབྱུང་བ་ལས། དེ་ལྟར་བཤད་པ་མ་གཏོགས་གཞན་གང་ནས་ཀྱང་བཤད་པ་མེད་ཅིང་། འདིར་ཡེ་ཤེས་སེམས་དཔའི་ཕྱི་འབྲང་གི་བགེགས་བསྐྲད་པའི་ཆེད་ཡིན་པར་དངོས་སུ་གསུངས་པས་མི་འཐད་དོ། །གསུམ་པ་མཇུག་བརྟན་བྱེད་ཀྱི་སྔགས་བཟླ་བའི་ཚུལ་ནི་དབང་ཆུར། དེ་ནས་དེ་དག་བརྟན་པར་བྱ་བའི་ཕྱིར། ལྷ་རེ་རེ་ལ་དམིགས་པས་ཡི་གེ་བརྒྱ་པ་བཟླ་བར་བྱ་སྟེ། ཨོཾ་ཧཱུྃ་ཤྲཱི་ཧེ་བཛྲཱ་ཡ། བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། བཛྲ་ཧེ་རུ་ཀ་ཞེས་བྱ་བ་ལ་སོགས་པ་ཚང་བར་བརྗོད། དེ་བཞིན་དུ་ཨོཾ་ནྃ་ནཻ་རཱཏྱཏྨབཛྲ་ཧེ་རུ་ཀ་ས་མ་ཡ་ཞེས་བྱ་བ་ལ་སོགས་པ་དང་། དེ་བཞིན་དུ་ཨོཾ་གྃ་གཽ་རཱི་བཛྲ་ཧེ་རུ་ཀ་ཞེས་བྱ་བ་ལ་སོགས་པ་དང་། དེ་བཞིན་དུ་ཐམས་ཅད་ལ་ཤེས་པར་བྱ་སྟེ། ཌྃ་ཌོམྦི་ནཱི་བཛྲ་ཧེ་རུ་ཀ་ཞེས་བྱ་བ་ལ་སོགས་པའི་བར་དུ་བྱའོ། །ཞེས་དང་། ནག་པོ་པས་ཀྱང་ཡི་གེ་བརྒྱ་པས་བརྟན་པར་བྱའོ་ཞེས་བཤད་དོ། །འདི་དག་གི་དོན་བླ་ཆེན་འཕགས་པས་གོང་འོག་གི་ཧེ་རུ་ཀ་བཞིའི་ཚབ་ཏུ་ལྷ་སོ་སོའི་མཚན་བཅུག་ནས་བཞི་སྤེལ་ཞེས་པའི་ཐ་སྙད་མཛད་པ་དང་། ཡང་དང་པོ་ལ་མི་སྤེལ་བར་ཕྱི་མ་གསུམ་ལ་སྤེལ་ནས་གསུམ་སྤེལ་ཞེས་པའི་ཐ་སྙད་མཛད་པ་ནི་ཨ་བྷི་དྷ་ནར། ཧེ་རུ་ཀའི་ཡི་གེ་བརྒྱ་པ། ལྷ་སོ་སོའི་ཡི་གེ་བརྒྱ་པ། རྡོ་རྗེ་སེམས་དཔའི་ཡི་གེ་བརྒྱ་པ་གསུམ་གསུངས་པའི་བར་མའི་དབང་དུ་བྱས་པ་ཡིན་ན། དེ་ལྟར་བྱེད་དགོས་པར་སྣང་ཡང་། དབང་ཆུའི་དགོངས་པ་ནི་དང་པོའི་དབང་དུ་བྱས་པ་ཡིན་ཏེ། རྒྱུད་དེ་ཉིད་ལས། དམ་ཚིག་ཉམས་པ་བསྐང་བའི་ཕྱིར། །ཐོག་མ་བར་དང་ཐ་མར་ནི། །ཡི་གེ་བརྒྱ་པའི་གསང་སྔགས་བརྗོད། །དཔའ་བོ་དང་ནི་རྣལ་འབྱོར་མ། །ལྷ་རྣམས་ཐམས་ཅད་བརྟན་པར་བྱེད། །ཅེས་ཧེ་རུ་ཀའི་ཡི་གེ་བརྒྱ་པ་ལ་དམ་ཚིག་ཉམས་པ་བསྐང་བ་དང་། དཀྱིལ་འཁོར་གྱི་ལྷ་བརྟན་པའི་དགོས་པ་གཉིས་གསུངས་པའི་ཕྱི་མ་དེ་ཉིད་འདིར་ཉམས་སུ་ལེན་པ་ཡིན་པའི་ཕྱིར་རོ། །དེ་ཉིད་ལྷ་སོ་སོའི་ཡི་གེ་བརྒྱ་པ་ལ་དགོངས་སོ་སྙམ་ན་མ་ཡིན་ཏེ། དབང་ཆུ་ཉིད་ལས་ལྷ་སོ་སོ་ལ་དམིགས་པའི་ཡི་གེ་བརྒྱ་པ་ཚང་བར་བརྗོད་ཅེས་གསུངས་ཀྱི། སྤེལ་ཞེས་པའི་ཚིག་མི་སྣང་བའི་ཕྱིར་དང་། སྤེལ་བའི་དོགས་པ་བཅད་པའི་ཆེད་དུ། གཙོ་བོའི་སྐབས་སུ་ཧེ་རུ་ཀ་ཞེས་པ་དང་པོ་གཉིས་ཆར་ལ་མ་སྤེལ་བ་ཉིད་གསུངས་པ་དང་། ལྷ་མོ་རྣམས་ཀྱི་སྐབས་སུའང་བཛྲ་ཧེ་རུ་ཀ་ཞེས་པ་མན་ཆད་མ་སྤེལ་བ་ཉིད་གསུངས་པའི་ཕྱིར་རོ། །དེས་ན་གནད་ཀྱི་དོན་ནི་བདེ་མཆོག་གི་སྐབས་སུ་དབྱུག་པའི་རྩེ་མོར་རྡོ་རྗེ་བཏགས་པ་ལྷ་སོ་སོའི་མཚན་མའི་ཐད་དུ་བཟུང་ནས། ཨོཾ་ནས་བཟུང་སྟེ་ཡི་གེ་བརྒྱ་པ་ཚང་མར་བརྗོད་པས་བརྟན་པར་མཛད། འདིར་དེའི་ཚབ་ཏུ་ལྷ་སོ་སོའི་མཚན་བརྗོད་པ་སྔོན་དུ་འགྲོ་བས། ཨོཾ་ནས་བཟུང་སྟེ་ཡི་གེ་བརྒྱ་པ་ཚང་མར་བརྗོད་པས་བརྟན་པར་མཛད་པ་ནི་རྗེ་བཙུན་གོང་མའི་དགོངས་པ་དཔྱིས་ཕྱིན་པའོ། །དེས་ན་དབང་ཆུའི་དཔེ་ལ་ལར་སྔར་དྲངས་པ་ལྟར་ཨོཾ་མཚན་སྔགས་ཀྱི་མགོར་ཡོད་པ་དང་། ཁ་ཅིག་ཏུ་ཧཱུྃ་ཤྲཱི་ཧེ་བཛྲ་ཡ། ཨོཾ་བཛྲ་ཧེ་རུ་ཀ་ཞེས་སོགས་མཚན་སྔགས་ཀྱི་མཇུག་ཏུ་ཡོད་པ་དང་། ཕལ་ཆེར་ལས་ཧཱུྃ་ཤྲཱི་ཧེ་བཛྲ་ཡ་བཛྲ་ཧེ་རུ་ཀ་ཞེས་སོགས་ཨོཾ་གཏན་ནས་མེད་པ་གསུམ་འབྱུང་ཡང་། བར་མ་དེ་ཉིད་དག་པར་ཤེས་པར་བྱའོ། །འདིར་གསང་སྔགས་རང་བཟོར་བྱེད་པ་ཁ་ཅིག དཀྱིལ་འཁོར་བརྟན་བཞུགས་ལ། རང་གི་བཤད་རྒྱུད་གུར་ན་ཡོད་པའི་ཡིག་བརྒྱ་མི་བརྗོད་པར། ཨ་བྷི་དྷ་ནའི་ཡིག་བརྒྱ་བརྗོད་པ་ནི་ཡོད་པའི་སྒོ་བོར་ནས་མེད་པའི་སྲང་འཆག་པའོ། །ཞེས་སྨྲའོ། །དེས་ནི་ཨ་བྷི་དྷ་ནའི་ཡི་གེ་བརྒྱ་པ་དཀྱིལ་འཁོར་བརྟན་བྱེད་ཀྱི་སྔགས་སུ་གསུངས་པ་དང་། གུར་གྱི་ཡི་གེ་བརྒྱ་པ་གཏོར་མགྲོན་གཤེགས་གསོལ་གྱི་སྔགས་སུ་གསུངས་པ་གཉིས་མ་ཕྱེད་བཞིན་དུ་རང་དགར་སྨྲས་པའོ། །གསུམ་པ་དངོས་གཞི་ཞག་གྲངས་སྦྲེལ་བའི་ཚུལ་ལ་དོགས་པ་གཅོད་པ་ནི། དེ་དག་ནི་སྒྲུབ་མཆོད་ཚར་གཅིག་གི་དབང་དུ་བྱས་པའི་བསྒྲུབ་ཚུལ་ཡིན་ལ། དངོས་གཞི་ཞག་མང་པོར་སྦྲེལ་ནས་བྱེད་པའི་ཚེ་སྟ་གོན་གྱི་ལྷ་བསྟིམ་པའི་ཚུལ་ཇི་ལྟར་བྱ་སྙམ་ན། འདི་ལ་ནམ་མཁར་བཞག་ནས་མར་མེ་གཅིག་ལས་གཉིས་ཆད་ཀྱི་ཚུལ་དུ་བསྟིམ་པ་དང་། སྒྲུབ་མཆོད་སྔ་མའི་རྗེས་སུ་བཏེག་ནས་ཕྱི་མ་ལ་བསྟིམ་པ་དང་། ལན་གཅིག་བསྟིམས་ནས་ཕྱི་མ་རྣམས་ལ་ཡན་ལག་བཞི་རྫོགས་དཀྱུས་མ་བྱེད་པའི་ཚུལ་གསུམ་ལས། དང་པོ་ནི། འཕགས་པའི་དངོས་སློབ་སྲུ་ལུང་ཀུན་སྨོན་དང་། དགའ་ལྡན་པ་བཀྲ་ཤིས་དཔལ་ལ་སོགས་པ་བདུན་ཙམ་གྱི་ལུགས་ཏེ། ནུབ་དང་པོ་རྣམས་ལ་སྟ་གོན་གྱི་ལྷ་ནམ་མཁར་གནས་པ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་བསྲེས། ནུབ་ཐ་མ་ལ་ཡོངས་སུ་རྫོགས་པར་བསྟིམ་པར་བཞེད་དོ། །བླ་ཆེན་འཕགས་པས་དེ་ལྟར་དངོས་སུ་གསུངས་པ་མེད་ཀྱང་། ཇིམ་གིན་མར། དེ་ནས་དཀྱིལ་འཁོར་གྱི་ལྷ་ནམ་མཁར་གནས་པ་རྣམས་ལ་མར་མེ་ལ་སོགས་པའི་མཆོད་པ་རྒྱུན་མ་ཆད་པར་བཤམ་མོ། །ཞེས་གསུངས་པས་ཐུགས་བཞེད་དང་། ཕྱག་ལེན་ཡིན་པར་གསལ་ལོ། །གཉིས་པ་ནི། རིན་པོ་ཆེ་བུ་སྟོན་གྱིས་སྐུ་ཚེའི་སྟོད་ལ། དཀྱིལ་འཁོར་ལ་རྟེན་བཞུགས་བྱས་ཚར་བའི་རྗེས་ལ་དཀྱིལ་འཁོར་བཏེག་ནས། འདི་ཞེས་བྱ་བའི་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །ཞེས་པ་ནས། ནངས་པར་དཀྱིལ་འཁོར་བསྒྲུབ་པར་འཚལ། །ཞེས་སྙན་གསན་འབེབས་པར་མཛད། ཕྱིས་རྟིང་བརྟན་བཞུགས་ཀྱི་དུས་སུ་དཀྱིལ་འཁོར་འདི་མ་བཤིག་གི་བར་དུ་ཡེ་ཤེས་པ་རྣམས་བརྟན་པར་བཞུགས་སུ་གསོལ་ཞེས་བརྗོད་ཟིན་པས། དེ་མ་ཐག་ཏུ་དཀྱིལ་འཁོར་བཏེག་ན་རྡུལ་ཚོན་གྱི་དཀྱིལ་འཁོར་བཤིག་ན་ནི་སང་ནས་སྒྲུབ་མཆོད་ནར་མར་བྱེད་པ་མི་ཡོང་། མ་བཤིག་ན་ནི་བརྟན་བཞུགས་ཀྱི་ཚིག་དང་འགལ་འགྲོ་བར་འདུག་སྙམ་དུ་དགོངས་ནས། བརྟན་བཞུགས་ཀྱི་དོད་དུ། ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཞེས་སྦྱར་ནས་དེ་མ་ཐག་ཏུ་དཀྱིལ་འཁོར་འདེགས་པར་མཛད། སྐུ་ཚེའི་སྨད་ལ་དཀྱིལ་འཁོར་བཏེག་ནས་ཞག་ཏུ་བཞག་ན་རྡུལ་ཚོན་གྱི་བཀྲག་འཚོར་བར་འདུག་ཟེར་ནས་དཀྱིལ་འཁོར་སྒྲུབ་པའི་གོང་དུ་སྔ་མ་བཏེག་སྟེ། འདི་ཞེས་བྱ་བའི་བཅོམ་ལྡན་འདས་ནས། ད་ལྟ་དཀྱིལ་འཁོར་བསྒྲུབ་པར་འཚལ། །ཞེས་པས་སྙན་གསན་ཕབ་སྟེ། མདུན་བསྐྱེད་བསྐྱེད་ཚར་བ་དང་། དཀྱིལ་འཁོར་བཏེག་པ་ཕབ་སྟེ་བསྲེ་བར་མཛད་དོ། །འདི་ནི་སྟ་གོན་དང་། དངོས་གཞི་ཉི་མ་གཅིག་ལ་སྦྲེལ་ནས་བྱེད་པའི་ལུགས་ལ། སྙན་གསན་དབབ་པའི་ཚིག་དེ་ལྟར་བྱེད་པ་འགལ་བ་མི་སྣང་ནའང་། དཀྱིལ་འཁོར་ལ་བཅུག་ཟིན་པའི་སྟ་གོན་བཏེག་ནས། དེ་འདྲའི་སྙན་གསན་དབབ་པ་ནི་གང་ནའང་མ་བཤད་པས་མི་འཐད་དོ། །དགོས་པའང་མེད་དེ། འཇིག་རྟེན་ན་དང་པོར་བསྙེན་བཀུར་བྱེད་པར་སྙན་གསན་ཕབ་ནས། ནང་དུ་བོས་ཏེ་བསྙེན་བཀུར་ལན་གཅིག་ལས་མི་བྱེད་ན། དེར་རྗེས་གཤེགས་སུ་གསོལ་ཞིང་ཞག་སྦྲེལ་ནས་བྱེད་ན། དང་པོར་སྙན་གསན་ལན་གཅིག་དབབ་པས་ཕྱིས་བསྙེན་བཀུར་ཡང་ཡང་བྱས་པས་ཆོག་གི ཞག་རེ་ལ་སྙན་གསན་རེ་རེ་དབབ་ནས་ཕྱིར་གཏོང་ཐེབས་རེ་རེ་མི་དགོས་པ་བཞིན། འདིར་ཡང་ཚུལ་མཚུངས་པའི་ཕྱིར་ཏེ། གསང་སྔགས་ཀྱི་ཆོ་ག་ཕལ་ཆེར་འཇིག་རྟེན་གྱི་རྒྱལ་པོའི་ལུགས་དང་བསྟུན་པར་བཤད་པའི་ཕྱིར་རོ། །ཁྱད་པར་དཀྱིལ་འཁོར་འདེགས་ཚུལ་དེ་ཉིད་རས་བྲིས་ལ་བརྟེན་པའི་ཚེ་རས་བྲིས་ཀྱི་རབ་གནས་བཤིག་པར་འགྱུར་བས་ཉེས་དམིགས་ཀྱང་ཆེ་ལ། ལྷ་སྟ་གོན་མི་བྱེད་བཞིན་དུ། སྙན་གསན་དབབ་པ་སྒྲུབ་མཆོད་ཚར་རེ་ལ་དགོས་ན། སའི་ལྷ་མོ་མཁྱེན་པར་གསོལ་བའང་ཚར་རེ་ལ་དགོས་པར་མཚུངས་པས་ལུགས་འདི་མི་འཐད་པ་ཁོ་ནའོ། །གསུམ་པ་ནི། རྒྱ་གར་གྱི་གཞུང་རྣམས་ལས་མི་གསལ་ཡང་། རྗེ་བཙུན་རྩེ་མོས་ཌོམྦི་ལུགས་ཀྱི་དབང་ཆུར། སྤྱིར་དཀྱིལ་འཁོར་ནུབ་ལྔ་པར་བྱེད་པའི་ཚེ། དངོས་གཞི་ལ་ནུབ་གཉིས་སུ་བྱས་པའི་ནུབ་དང་པོ་ལ་སྒྲུབ་མཆོད་རྫོགས་པར་བྱས་ནས། རབ་གནས་བྱེད་ན་དེའི་སྟ་གོན་ལ་འཇུག རབ་གནས་མི་བྱེད་ན་ཁང་པ་དེ་ཉིད་དམ་གཞན་དུའང་རུང་སྟེ། ནང་གི་སྦྱིན་སྲེག་བྱས་ལ། དེའི་མཚན་མོ་ཉལ་བའི་རྣལ་འབྱོར་གྱིས་ཉལ། ཕྱི་དེ་ཉིན་མོ་ནངས་པར་སྔ་བར་ལངས་ལ། ཕྱི་དང་ནང་གི་ཁྲུས་བྱས་ནས་རྒྱས་པའི་སྦྱིན་སྲེག་བྱ། དེ་ནས་སློབ་མ་དབང་བསྐུར་གྱི་ཡོ་བྱད་རྣམས་འཚོགས་པ་དང་། ཕྱི་དྲོའི་དུས་སུ་མཆོད་གཏོར་རྒྱས་པར་བཤམ། དཔོན་སློབ་ཐམས་ཅད་ཡན་ལག་དྲུག་ཡོངས་སུ་རྫོགས་པར་བྱས། རང་ལྷའི་རྣལ་འབྱོར་དང་ལྡན་པས། དཀྱིལ་འཁོར་གྱི་འཁོར་ལོ་མངོན་སུམ་ལྟ་བུར་དམིགས་ལ། ཕྱི་དང་ཡིད་ལས་བྱུང་བ་ལ་སོགས་པ་རབ་ཏུ་རྒྱ་ཆེ་བའི་མཆོད་པ་བྱ། དེའི་འོག་ཏུ་འབྱུང་པོ་རྣམས་ལ་གཏོར་མ་བྱིན་ནས། ནང་གི་སྦྱིན་སྲེག་བྱ་སྟེ། སློབ་དཔོན་བདག་ཉིད་འཇུག་པ་དང་། སློབ་མ་ལ་དབང་བསྐུར་བར་བྱ་བར་གསུངས་པ་འདི་ཉིད་གསལ་བར་སྣང་ངོ་། །དེས་ན་ལུགས་འདི་ལ་ནུབ་སྔ་མ་ལ་སྟ་གོན་གྱི་ལྷ་རྫོགས་པར་བསྲེས་ནས། ནུབ་ཕྱི་མ་རྣམས་ལ་བདག་བསྐྱེད་བཟླས་པ་དང་བཅས་པའི་རྗེས་སུ་མདུན་གྱི་དཀྱིལ་འཁོར་གསལ་བཏབ་པ་ཙམ་བྱས་ནས་མཆོད་པ་མན་ཆད་ལ་འཇུག་པ་ཡིན་ཞིང་མན་ངག་ལུགས་ཀྱི་དབང་ཆུར་ཡང་དངོས་གཞི་ནུབ་གཅིག་པར་བྱེད་པ་དང་། ནུབ་གཉིས་པར་བྱེད་པ་གཉིས་གསུངས་པའི་ཕྱི་མའང་འདི་ཉིད་དང་འདྲའོ། །རབ་གནས་དོན་གསལ་ལས། རབ་གནས་རྒྱས་པ་ནུབ་གསུམ་པར་བྱེད་པའི་ཚེ། སྡོམ་ཚིག་ལས། ཐོ་རངས་བདག་བསྐྱེད་མདུན་བསྐྱེད་མཆོད། །ཅེས་པའི་ཐད་དུ་འདི་ལ་དོན་བཅུ་གསུམ་སྟེ། བདག་བསྐྱེད་ལ་མཆོད་ནས་མདུན་གྱི་དཀྱིལ་འཁོར་ཡོད་ན་གསལ་གདབ་སྟེ་མཆོད་པ་དང་ཞེས་པའི་ས་བཅད་དང་དེའི་ཐད་དུ་དེ་ལ་དང་པོ་བདག་བསྐྱེད་པ་ནི། ཐོ་རངས་ཀྱི་ཆ་ལ་མཆོད་པ་དང་གཏོར་མ་རྒྱ་ཆེན་པོ་གསར་པ་སྔ་མ་བཞིན་དུ་བཤམས་ལ་བདག་གི་རྣལ་འབྱོར་རྡོ་རྗེ་སེམས་དཔའ་འམ། འབྱུང་བ་ལ་སོགས་པའི་རྣལ་འབྱོར་རྫོགས་པར་བྱས་ལ། མདུན་བསྐྱེད་ཀྱི་དཀྱིལ་འཁོར་ཡོད་ན་གསལ་བཏབ་ལ་མཆོད་བསྟོད་བྱ། ཞེས་གསུངས་པའང་ནུབ་བར་པ་ལ་སྒྲུབ་མཆོད་རྫོགས་པར་བྱས་ཟིན་པའི་དབང་དུ་བྱས་པ་ཡིན་པས་ཐམས་ཅད་གནད་གཅིག་ཏུ་སྣང་ངོ་། །དེ་དག་གི་དོན་ཞག་མང་པོར་སྦྲེལ་ན་ནུབ་སྔ་མ་ལ་སྟ་གོན་གི་ལྷ་རྫོགས་པར་བསྲེ་བ་ཡིན་པར་གསལ་ཏེ། ནུབ་ཕྱི་མ་རྣམས་ལ་དཀྱིལ་འཁོར་གྱི་འཁོར་ལོ་གསལ་བཏབ་ནས་མཆོད་པ་ཡིན་པར་གསུངས་པའི་ཕྱིར་རོ། །འོ་ན་ནུབ་ཕྱི་མ་རྣམས་ལ་བསྐྱེད་ཆོག་རྒྱས་པར་མི་རུང་ངམ་སྙམ་ན། དེ་ནི་ལོང་སྐབས་ཡོད་པ་དང་སྤྲོས་པ་ལ་དགའ་ན་རུང་ཞིང་མཆོག་ཏུ་གྱུར་པ་ཡིན་ཏེ། རས་བྲིས་ལ་བརྟེན་པའི་ཚེ་སྔར་རབ་གནས་བྱས་ཟིན་པ་དེ་ཉིད་བསང་སྦྱང་བྱས་ནས་བསྐྱེད་ཆོག་རྒྱས་པ་བྱེད་པ་དང་ཚུལ་མཚུངས་ཤིང་། ལས་དང་པོ་པ་ལ་བསྐྱེད་ཆོག་རྒྱས་པ་ཉིད་བློའི་རྣམ་པ་གསལ་བའི་ཕྱིར་རོ། །འདི་ལའང་སྟ་གོན་གྱི་བསྲེ་ཚུལ་ནི་སྔ་མ་དང་འདྲ་སྟེ། སྒྲུབ་མཆོད་དང་པོ་ལ་དགོས་པ་སྙན་གསན་དབབ་པ་ནི་བཀུར་སྟིའི་ཚུལ་ཡིན་ཞིང་། མར་མེ་གཅིག་ལས་གཉིས་ཆད་ལ་སྙན་གསན་དབབ་པ་མ་ཚང་། བཏེག་ནས་སྙན་གསན་དབབ་པ་ལ་དགོས་པ་ལྷག་པོ་མེད་པའི་ཕྱིར་རོ། །དེས་ན་སྒྲུབ་མཆོད་རྒྱུན་གཅིག་ལ་སའི་ལྷ་མོ་མཁྱེན་པར་གསོལ་བ་དང་། སྙན་གསན་དབབ་པའི་དགོས་པ་ཤེས་ན་གཅིག་ཉིད་ཀྱིས་ཆོག་པར་གྲུབ་ཅིང་། སློབ་མའི་རྒྱུན་གཅིག་ལ་དངོས་གཞི་སྦྲེལ་ནས་མང་དུ་བྱེད་པ་ལའང་། སློབ་མ་སྟ་གོན་གཅིག་ཉིད་ཀྱིས་ཆོག་པ་དང་འདྲའོ། །གསུམ་པ་མཆོད་པ་འབུལ་བ་ནི་མར་མེ་ལ་སོགས་པ་རྣམས་སྦར་ཏེ། སྔོན་འགྲོའི་སྐབས་སུ་མཆོད་པ་བྱིན་གྱིས་བརླབས་ཟིན་པ་དེ་དྲན་པའི་ཆེད་དུ། སྐབས་འདིར་མཆོད་པ་བསང་སྦྱང་བྱིན་བརླབ་བྱས་ཏེ། ཆུ་བཞི་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པ་དང་། ན་བཟའི་མཆོད་པ་དང་། ནང་གི་མཆོད་པ་དང་། ཡིད་ལས་བྱུང་བ་དང་། བསྟོད་པའི་མཆོད་པ་རྣམས་སྟ་གོན་གྱི་གནས་སྐབས་ཇི་ལྟ་བ་བཞིན་བྱའོ། །དེ་ནས་སྐབས་འདིར་རང་གི་ལྕེ་ལ་བདུད་རྩི་མྱོང་བས་སྙིང་གའི་ཧཱུྃ་ཡིག་ཡི་དམ་ཐམས་ཅད་འདུས་པའི་ངོ་བོར་བསམས་པ་མཉེས་པར་བྱ་དགོས་ཏེ། དབང་ཆུར། དེ་ལྟར་མཆོད་པའི་ཁྱད་པར་རྣམས་ཀྱིས་དཀྱིལ་འཁོར་གྱི་འཁོར་ལོ་མཆོད་པས་མཉེས་པར་བྱས་ལ། རང་གི་ལྕེ་ལ་བདུད་རྩི་མྱངས་ལ། རང་གི་སྙིང་གའི་དཀྱིལ་འཁོར་ཡང་མཉེས་པར་བྱའོ། །ཞེས་དང་། བཟང་པོ་ཡོངས་གཟུང་ལས། དེ་བ་དྷཱ་ཏུའི་བསྟོད་པའི་རྗེས་སུ། རླུང་མེའི་དཀྱིལ་འཁོར་ལ་གནས་ལ། །ཨོཾ་གྱི་བྱིན་བརླབས་བདུད་རྩི་ལྔ། །རབ་སྦར་རྗེས་སུ་ཡེ་ཤེས་ཀྱི། །བདུད་རྩིར་བསམ་ཞིང་ཡིག་གསུམ་བཟླ། །ནང་བཞུགས་ཐུབ་དབང་དཔག་མེད་ལ། །ཧཱུྃ་བྱུང་རྡོ་རྗེར་བཅས་པའི་ལྕེས། །སྙིང་གའི་ཟླ་བར་རྒྱལ་བ་ཡི། །དཀྱིལ་འཁོར་མ་ལུས་ཚིམ་པར་བྱ། །ཞེས་དང་། རིན་ཆེན་འབར་བར། བྱིན་གྱིས་བརླབ་དང་དབང་བསྐུར་གྱི། །བར་རྫོགས་བྱས་ལ་མཆོད་པ་ཡི། །ཆོ་གས་དཀྱིལ་འཁོར་རབ་ཏུ་མཆོད། །རང་ལྕེ་རྡོ་རྗེ་བདུད་རྩི་མྱང་། །ཕྱི་རོལ་འབྱུང་པོའི་གཏོར་མ་སྦྱིན། །ཞེས་དང་། དེའི་དོན་ཌོམྦི་ལུགས་ཀྱི་དབང་ཆུར། དྲུག་པ་ནི། བདུད་རྩི་རིལ་བུ་ཆང་ལ་ལེགས་པར་སྦྱར་ལ་སྦྱང་བ་དང་། སྦར་བ་ལ་སོགས་པས་བྱིན་གྱིས་བརླབས་ལ། བདག་ཉིད་ཀྱི་ལྕེ་ལ་མྱང་བར་བྱའོ། །ཞེས་གསུངས་པ་རྣམས་དོན་གཅིག་ཏུ་སྣང་བས། སྐབས་འདིར་འདི་མ་ཆད་པ་གལ་ཆེ་བར་སྣང་ངོ་། །འོ་ན་སྔར་ནང་མཆོད་འབུལ་བའི་སྐབས་སུ་བདག་ཉིད་ཀྱི་ལྕེ་ལ་མྱོང་བ་ཡོད་པས། དེ་དང་ཁྱད་པར་ཅི་ཡོད་སྙམ་ན། སྔ་མ་ནི་ཕུང་ཁམས་སྐྱེ་མཆེད་ལྷར་གསལ་བ་དེ་ཉིད་མཆོད་པ་ཡིན་ལ། འདིར་ནི་སྙིང་གའི་ཧཱུྃ་ཡིག་དཀྱིལ་འཁོར་མ་ལུས་པའི་ངོ་བོར་བསྒོམས་ནས་མཆོད་པ་ཡིན་པ་སྔར་གྱི་གཞུང་རྣམས་ཀྱི་དོན་དུ་གསལ་བས་ཁྱད་པར་ཆེའོ། །བཞི་པ་ཕྱི་རོལ་ཏུ་འབྱུང་པོའི་ཚོགས་ལ་གཏོར་མ་འབུལ་བ་ལ་ལྔ་སྟེ། གང་ལ་འབུལ་བའི་ཡུལ། གང་དུ་འབུལ་བའི་གནས། གང་གི་ཚེ་འབུལ་བའི་དུས། ཇི་ལྟར་འབུལ་བའི་ཆོ་ག དེ་ལྟར་ཕུལ་བའི་དགོས་པའོ། །དང་པོ་ནི། རྡོ་རྗེ་གུར་ལེའུ་བཞི་པ་ལས། ནམ་མཁའི་ཁམས་ཀྱི་དབུས་གནས་པར། །པདྨ་འདབ་བརྒྱད་བསྒོམ་པར་བྱ། །དབང་པོ་ཤར་གྱི་འདབ་མར་བསམ། །མཐར་བྱེད་ལྷོར་ནི་དགོད་པར་བྱ། །ཆུ་བདག་ནུབ་ཀྱི་འདབ་མ་ལ། །བྱང་དུ་ནོར་སྦྱིན་དགོད་པར་བྱ། །མེར་ནི་བྱིན་ཟ་ཆེན་པོ་ཉིད། །བདེན་བྲལ་མཚམས་སྐྱོང་དེ་བཞིན་ནོ། །རླུང་དུ་གནས་མེད་བསམ་པར་བྱ། །དབང་ལྡན་དུ་ནི་འབྱུང་པོའི་གཙོ། །ཉི་ཟླ་ཚངས་པ་ལ་སོགས་དང་། །ཚངས་པའི་རིས་ནི་དམ་པ་དང་། །ཚངས་པ་མདུན་ན་འདོན་ཉིད་དང་། །དགའ་ལྡན་འཐབ་བྲལ་གནས་པ་དང་། །རྒྱལ་པོ་ཆེན་པོར་གྱུར་པ་དང་། །གཞན་འཕྲུལ་དབང་བྱེད་ཉིད་དང་ནི། །གང་ཞིག་འཕྲུལ་དགའི་ལྷ་རྣམས་དང་། །དགའ་བའི་གནས་སུ་གང་གནས་དང་། །བདེ་བ་ཅན་ན་འདུག་པ་དང་། །འོག་མིན་དུ་ནི་གནས་པ་དང་། །འོད་ཟེར་ཅན་གྱི་འཇིག་རྟེན་ཁམས། །སུམ་ཅུ་རྩ་གསུམ་གནས་པ་དང་། །དེ་ཀུན་སྟེང་དུ་བསམས་པར་བྱ། །ཆོས་འབྱུང་ནང་དུ་ས་བོན་ནི། །སྟོབས་ཀྱི་རྒྱུ་དང་དུང་སྐྱོང་དང་། །དེ་བཞིན་མཐའ་ཡས་ནོར་རྒྱས་བུ། །འཇོག་པོ་དང་ནི་རིགས་ལྡན་ཉིད། །པད་ཆེན་པདྨ་བཟང་པོ་ཅན། །ལྷ་མི་དམྱལ་བ་སེམས་ཅན་རྣམས། །ཆོས་ཀྱི་འབྱུང་གནས་འོག་ཏུ་འོ། །ཞེས་གསུངས་པའི་འབྱུང་པོ་བརྒྱད་གསུམ་ཉི་ཤུ་རྩ་བཞི་ལའོ། །འདི་དག་ཀྱང་རྡོ་རྗེ་འཆང་གི་ཐུགས་ཡེ་ཤེས་ཀྱི་རྣམ་འཕྲུལ་འཇིག་རྟེན་པའི་ཚུལ་བཟུང་ནས་རྒྱུད་ཀྱི་སྲུང་མར་བསྐོས་པ་ཡིན་གྱི། འཇིག་རྟེན་པ་རང་རྒྱུད་པ་ལ་རྡོ་རྗེ་ཐེག་པའི་ཉམས་ལེན་གྱི་བར་ཆད་ཞི་བའི་ཕྲིན་ལས་བཅོལ་བའི་ལུགས་ནི་མེད་དོ། །འཇིག་རྟེན་པའི་ཚུལ་བཟུང་བ་ལའང་། མིང་གི་ཐ་སྙད་ལོ་ཀའི་ཚུལ་བཟུང་བ་དང་། རྣམ་པ་ལོ་ཀའི་ཚུལ་བཟུང་བ་གཉིས་ལས་འདིར་ནི་དང་པོའི་དབང་དུ་བྱས་པ་སྟེ། རྣམ་པ་ནི་སྐུ་གསུང་ཐུགས་ཀྱི་རྡོ་རྗེ་གསུམ་དང་ཁྱད་པར་མེད་དོ། །གཉིས་པ་ནི། རྣལ་འབྱོར་པ་འགའ་ཞིག དཀྱིལ་འཁོར་བསྲུང་བར་བྱ་བའི་ཕྱིར་རྩ་བའི་སྔགས་ཟློས་སུ་བཅུག་ལ། སྒྲུབ་གཡོག་གིས་གཏོར་མ་ཆེན་པོ་ལ་མར་མེ་སྦར་བ་དང་། དུང་དང་ཆ་ལང་ལ་སོགས་པ་ཁྱེར་ལ་སློབ་དཔོན་རང་རྡོ་རྗེ་དང་དྲིལ་བུ་ཟུང་བ་སྒོ་ལས་ཕྱི་རོལ་ཏུ་སོང་སྟེ་འདུག་པར་བྱའོ། །འདིའི་དགོས་པའང་ཁ་ཅིག་གསང་སྤྱོད་བལྟ་བར་མི་དབང་བས་ཕྱི་རོལ་ཏུ་གཏང་བ་ཡིན་ནོ། །ཞེས་སྨྲ་བ་ནི་འདི་དག་རྡོ་རྗེ་འཆང་གིས་རྒྱུད་ཀྱི་སྲུང་མར་བསྐོས་པ་ཡིན་པས། གསང་སྤྱོད་བལྟ་བར་མི་དབང་བ་འགལ་ལ། ཆོ་གའི་ཐོག་མཐར་གསང་སྤྱོད་བལྟ་བར་དབང་ནས། སྐབས་འདིར་གསང་སྤྱོད་བལྟ་བར་མི་དབང་བ་ལ་ནི་རྒྱུ་མཚན་ཅིའང་མེད་དོ། །དེས་ན་བར་ཆད་བསྲུང་བའི་བྱ་བ་ལ་ཁུར་ཆེ་བའི་ཆེད་དུ་གུས་པའི་ཚུལ་ཡིན་ཏེ། སྔོན་འགྲོ་གཏོར་མའི་སྐབས་སུ་ནང་དུ་གཏོར་མ་ཕུལ་ནས། དཀྱིལ་འཁོར་གྱི་བྱ་བ་མཐར་མ་ཕྱིན་གྱི་བར་དུ་ཁང་པའི་ཕྱི་རོལ་ཏུ་བར་ཆད་སྲུང་གིན་བཞུགས་པ་ལ། སྐབས་འདིར་གོང་དུ་བཞུགས་པ་དེ་ཉིད་དུ་གཏོར་མ་འབུལ་བ་འཇིག་རྟེན་པའི་ཚུལ་ལུགས་དང་སྒོ་བསྟུན་པའོ། །ཁང་པའི་ཕྱི་རོལ་ཏུ་དམ་ཚིག་དང་མི་ལྡན་པའི་སྐྱེ་བོས་དབེན་པ་མེད་ན་ཁང་པའི་ནང་དུ་གཏོང་ཡང་འགལ་བ་མེད་དོ། །གསུམ་པ་ནི་དཀྱིལ་འཁོར་གྱི་བྱ་བའི་ཐོག་མཐའ་བར་གསུམ་དུ་གཏོར་མ་འབུལ་དགོས་པ་ལས་འདིར་ནི་བར་མའི་དབང་དུ་བྱས་པའོ། །བཞི་པ་ནི། རང་གི་མདུན་སྟེགས་ཀྱི་སྟེང་དུ་གཏོར་མ་ཆེན་པོ་བཞག དེའི་གཡས་རང་གི་གཡོན་ཕྱོགས་ནས་ཕར་ལ་ཞབས་བསིལ་ལ་སོགས་པའི་ཆུ་བཞི་རིམ་པ་བཞིན་བཤམ། དེའི་གཡོན་རང་གི་གཡས་ཕྱོགས་ནས་ཕར་ལ་མེ་ཏོག་ལ་སོགས་པའི་ཉེར་སྤྱོད་ལྔ་བཤམ། མདུན་དུ་ནང་མཆོད་ཀྱི་བར་ཕུད་ཏིང་ཕོར་ལ་སོགས་པའི་ནང་དུ་བཤམ། དེ་ནས་གཏོར་མ་ནང་མཆོད་ཆུ་ཆང་གིས་སྦྱངས་ལ་ཐོག་མར་མཆོད་པ་བྱིན་རླབས་དང་། དེ་ནས་གཏོར་མ་བྱིན་རླབས་ཆོ་ག་བཞིན་བྱ། མགྲོན་བསྐྱེད་པ་ནི། ཆོས་འབྱུང་སུམ་བརྩེགས་ཀྱི་སྟེང་མ་ལ་ཨོཾ་དགུ་ལས་སྐུ་རྡོ་རྗེ་ལྷ་ཆེན་བརྒྱད་དང་བཅས་པ་བསྐྱེད། བར་མ་ལ་ཧཱུྃ་དགུ་ལས་ཐུགས་རྡོ་རྗེ་ཕྱོགས་སྐྱོང་བརྒྱད་དང་བཅས་པ་བསྐྱེད། འོག་མ་ལ་ཨཱཿདགུ་ལས་གསུང་རྡོ་རྗེ་ཀླུ་ཆེན་བརྒྱད་དང་བཅས་པ་བསྐྱེད་དེ་མགྲོན་དགུག་པ་དང་། སྐྱེ་མཆེད་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་རྣམས་བྱ། དེ་ནས་སྔགས་ཙམ་གྱིས་ཆུ་བཞི་ཕུལ་ནས་གཏོར་སྔགས་ལ། ཨོཾ་བྷ་ག་ཝཱན་ནས། ཀཱ་ཡ་ཝཱ་ཀ་ཙིཏྟ་ཡན་ཆད་མི་དགོས། ཨིནྡྲ་མན་ཆད་ལན་གསུམ་མམ་ལྔས་ཕུལ། སྔགས་ཙམ་གྱིས་ཉེར་སྤྱོད་ལྔ་ཕུལ་ནས། མ་ཧཱ་བྷཱུ་ཏ་ས་པ་རི་ཝཱ་ར་ཨོཾ་ཨཱཿཧཱུྃ་ཞེས་པས་ནང་མཆོད་དང་། དཀར་མོ་རི་དྭགས་སོགས་ཀྱིས་ཡིད་ལས་བྱུང་བའི་མཆོད་པས་མཆོད། བསྟོད་པའང་ཁྱོད་ནི་རྣལ་འབྱོར་མ་ཚོགས་མི་དགོས་པར། མི་བསྐྱོད་པ་ནི་ཡེ་ཤེས་ཆེ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་ཕྲིན་ལས་བཅོལ་བའི་བར་དུ་ཡང་བྱས་ལ། ཁྱད་པར་དུ་ཕྱོགས་སྐྱོང་བ་ཁྱེད་རྣམས་ཀྱིས་བདག་ཅག་སློབ་དཔོན་ཆེ་གེ་མོ་ཞེས་བྱ་བ་ལ་སློབ་མ་ཆེ་གེ་མོ་ཞེས་བྱ་བས་གསོལ་བ་བཏབ་སྟེ། སེམས་ཅན་ཐམས་ཅད་ཀྱི་དོན་དུ་དཀྱིལ་འཁོར་ཆེན་པོ་བཞེངས་སུ་གསོལ་ཏེ། སློབ་མའི་ཚོགས་ཡོངས་སུ་སྨིན་པར་བྱེད་ཀྱི་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་གྱི་བར་དུ་བར་གཅོད་ཐམས་ཅད་བསྲུང་བར་གྱིས་ཤིག དེ་ནས་ཀྱང་བདག་ཅག་རྣལ་འབྱོར་པ་འཁོར་དང་བཅས་པ་ཐམས་ཅད་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ་བསྲུང་བ་དང་། སྟོངས་གྲོགས་མཛོད་ཅིག ཅེས་ཕྲིན་ལས་བཅོལ་ལ། རྡོ་རྗེའི་གླུ་དང་། བཀྲ་ཤིས་ཀྱི་ཚིགས་བཅད་གསུམ་དང་། སྨོན་ལམ་ཚིགས་བཅད་གསུམ་བཏབ་སྟེ། མཆོད་ཡོན་གྱི་ཕྱག་རྒྱ་བཅས་ནས་ཨོཾ་ཧྲཱིཿབི་ཤུད་དྷ་ཞེས་སོགས་ཀྱིས་ཁ་བཤལ་ཆུ་བྱིན་ལ་གུར་ནས་འབྱུང་བའི་ཡི་གེ་བརྒྱ་པའི་མཐར་བཛྲ་མུཿཞེས་བརྗོད་པས་ཡེ་ཤེས་པ་གཤེགས་སུ་གསོལ། དམ་ཚིག་པ་བདག་ལ་བསྡུས་ཏེ། བདག་དང་སྒྲུབ་པའི་གྲོགས་རྣམས་ཀྱི་སྤྱི་བོར་ཨོཾ་ཞེས་སོགས་གནས་གསུམ་བསྲུང་བ་བྱས་ལ་ཆ་ལང་དང་། དུང་ལ་སོགས་པས་སྣ་དྲངས་ཏེ། གཏོར་མ་འབབ་ཆུའམ་རྒྱ་མཚོ་ལ་སོགས་པ་ཡོད་ན་དེར་དོར། མེད་ན་ལམ་གྱི་བཞི་མདོ་ཆེན་པོར་དོར་བར་བྱའོ། །དེ་ནས་ཐམས་ཅད་རྩ་བའི་སྔགས་ཟློས་བཞིན་པས་དཀྱིལ་འཁོར་གྱི་ཁང་པའི་ནང་དུ་ལོག་སྟེ། ཆོ་ག་ལྷག་ཆད་དང་། ཡོ་བྱད་མ་འབྱོར་པ་ལ་སོགས་པ་ཐམས་ཅད་བཤགས་ཚུལ་འོག་ནས་འབྱུང་བ་ལྟར་བྱའོ། །འདིར་དབང་ཆུར་གཏོར་སྔགས་ལ་ཀཱ་ཡ་ཝཱ་ཀ་ཙིཏྟ་ཡན་ཆད་མི་དགོས་ཞེས་པའི་དོན་ལ། མཁས་པ་ཁ་ཅིག སྐུ་གསུང་ཐུགས་ཀྱི་རྡོ་རྗེ་གསུམ་པོ། འབྱུང་པོ་བརྒྱད་གསུམ་ཉི་ཤུ་རྩ་བཞིའི་གཉའ་གནོན་གྱི་ཚུལ་དུ་བསྐྱེད་པ་ཡིན་གྱི། གཏོར་མ་མི་འབུལ་བར་བཞེད་པ་ཡོད་ཀྱང་། གནད་ཀྱི་གསལ་བྱེད་ལས། ཆོས་འབྱུང་གྲུ་གསུམ་གི་ནང་། དཀྱིལ་འཁོར་གྲུ་བཞི་པར་བྱས་ནས། དེ་ལ་ལེ་ཚེ་དགུར་བྱས་པའི་དབུས་མ་ལ་མཆོག་སྒྲུབ་པའི་དཀྱིལ་འཁོར་བཅུ་གཉིས་པོ་གང་བྱེད་ཀྱི་ཚོམ་བུ་དགོད། ལེ་ཚེ་བརྒྱད་ལ་ཞིང་སྐྱོང་ཆུང་མ་དང་བཅས་པ་བཞི་བཅུ་རྩ་བརྒྱད་ཀྱི་ཚོམ་བུ་བཀོད་ནས་གཏོར་མ་འབུལ་བའི་ཚེ་འཇིག་རྟེན་ལས་འདས་པ་ལ་ཕྱི་མཆོད། ནང་མཆོད། གཏོར་མའི་མཆོད་པ་གསུམ་ཚར་བའི་རྗེས་སུ་དེ་ལྟར་བདུད་རྩི་སྦྱར་བའི་ལྷག་མ་དེ་གཏོར་མ་ལ་བླུགས་ལ། གཏོར་མ་དེ་བདུད་རྩི་ཇི་ལྟ་བ་བཞིན་དུ་བྱིན་གྱིས་བརླབས་ལ། དེའི་ཕུད་ཀྱང་ཡེ་ཤེས་ཀྱི་དཀྱིལ་འཁོར་དེ་ཉིད་ལ་དབུལ་བར་བྱའོ། །དེ་ཡི་ལྷག་མས་མཆོད་པ་ཡིན་པས། ལྷག་མ་ལ་སོགས་ཞེས་བྱའོ། །ཞེས་དང་། དེ་ལ་ཞིང་སྐྱོང་བའི་གཙོ་བོ་བརྒྱད། མཁའ་འགྲོ་སུམ་ཅུ་རྩ་གཉིས་དང་བཅས་པ་རྣམས་ཀྱི་མིང་ནི་དྲག་པོ་ནག་པོ་ཞེས་བྱ་བ་ལ་སོགས་པ་སྨོས་ཏེ། དེ་ལ་འདི་རྣམས་ཀྱི་སྐུ་མདོག་ཕྱག་མཚན་བརྒྱ་བྱིན་ལ་སོགས་པ་དང་འདྲ་སྟེ། བརྒྱ་བྱིན་ལ་སོགས་པ་འདུལ་བར་བྱེད་པའམ། དེ་རྣམས་ཉིད་བཏུལ་བའི་རང་བཞིན་ཞིང་སྐྱོང་བ་ཡིན་གྱི། འདི་རྣམས་ནི་ལོ་ཀ་པ་ཉིད་ཁོ་ནར་བལྟ་བར་མི་བྱའོ། །དེ་བས་ན་འདི་རྣམས་མཆོད་པས་སྐྱོན་དུ་ག་ལ་འགྱུར། ཡང་འདི་རྣམས་འཇིག་རྟེན་པའི་ཚུལ་འཛིན་པ་ཉིད་ཀྱིས་ནི། ལྷག་མས་སྦྱིན་པར་བྱ་བའང་ཡིན་ནོ་ཞེས་གསུངས་པས། སྐུ་གསུང་ཐུགས་ཀྱི་རྡོ་རྗེ་གསུམ་ལའང་གཏོར་མའི་ཕུད་འབུལ་བར་གསལ་ཏེ། ཞིང་སྐྱོང་བཞི་བཅུ་རྩ་བརྒྱད་ཀྱི་གཏོར་སྔགས་ལ་ལེ་ཚེ་དབུས་མའི་གཏོར་སྔགས་མེད་ཀྱང་། ཕུད་ལེ་ཚེ་དབུས་མ་ལ་འབུལ་བར་གསུངས་པའི་ཕྱིར་རོ། །དེས་ན་རྩ་རྒྱུད་ཀྱི་སྐབས་འདིར་ལྷ་དང་འབྱུང་པོ་ཐ་མི་དད་ཀྱི་གཏོར་མའི་ཚེ་གཏོར་སྔགས་གཉིས་ཆར་དང་། འབྱུང་པོ་རྐྱང་པའི་གཏོར་མའི་ཚེ་འཇིག་རྟེན་པའི་གཏོར་སྔགས་ཁོ་ན་བརྗོད་ཀྱང་། ཕུད་འདས་པ་ལ་འབུལ་བ་རྗེ་བཙུན་རྩེ་མོའི་དགོངས་པར་སྣང་བས་ཚུལ་འདི་གཞན་ལའང་སྦྱར་བར་བྱའོ། །གནད་ཀྱི་གསལ་བྱེད་ཀྱི་ལུང་འདིས་འཇིག་རྟེན་པའི་ཚུལ་སྟོན་པའི་དགོས་པ་དང་། དེ་ལ་ཕྱག་མཆོད་དང་ལྷག་མས་སྦྱིན་པ་གཉིས་ཀ་མི་འགལ་བའི་ཚུལ་གསལ་བར་གསུངས་པ་འདིའང་དེང་སང་གི་རྡོ་རྗེ་འཛིན་པ་རྣམས་ཀྱིས་ངེས་པར་མཛད་དུ་གསོལ་ལོ། །ལྔ་པ་ནི། རྩ་རྒྱུད་ཕྱི་མའི་བཞི་པར། གལ་ཏེ་འདིས་གཏོར་མས་འབྱུང་པོ་ཐམས་ཅད་མཆོད་པར་བྱེད་ན། རྣལ་འབྱོར་པ་རྣམས་ལེགས་པར་འགྱུར་རོ། །དེ་རྣམས་ཀྱི་བདེ་བ་དྲི་མ་མེད་པ་དང་། ལྷ་མོ་རྣམས་དང་། འགྲོ་བ་རབ་ཏུ་འབྱོར་པ་རྣམས་དགའ་བར་འགྱུར་རོ། །གལ་ཏེ་འདིས་འབྱུང་པོའི་ཚོགས་ཀྱི་ཕྱིར་རྟག་ཏུ་གཏོར་མ་བྱིན་ན། དབང་དང་། མངོན་སྤྱོད་དང་། དགྲའི་སྡེ་འཇིག་པ་དང་། བསྐྲད་པ་དང་། གསད་པ་དང་། དགུག་པ་དང་། ཞི་བ་དང་། རྒྱས་པར་ཡང་འགྱུར་རོ། །ཞེས་གསུངས་ཏེ། རྣལ་འབྱོར་པ་རྣམས་ལེགས་པར་འགྱུར་རོ། །ཞེས་པ་ནི། ཕན་ཡོན་ཐམས་ཅད་ཀྱི་མདོར་བསྟན་ཡིན་པས། འདིར་ནི་དཀྱིལ་འཁོར་ལ་བརྟེན་པའི་ལས་གང་ཡིན་པ་མཐར་མ་ཕྱིན་གྱི་བར་དུ་བར་གཅོད་ཞི་བ་གཙོ་བོར་གཟུང་ངོ་། །ལྔ་པ་ནང་དུ་འོངས་ནས་ལྷག་ཆད་ཁ་བསྐང་བ་ནི། དེ་ལྟར་ཕྱི་རོལ་པའི་གཏོར་མ་བཏང་ཟིན་ནས། དཀྱིལ་འཁོར་གྱི་ཁང་པའི་ནང་དུ་ལོག་སྟེ། དངོས་སུ་དཀྱིལ་འཁོར་ལ་བསྐོར་བ་ཤོང་ན། རྡོ་རྗེ་དྲིལ་བུ་གསིལ་ཞིང་ལན་བདུན་བསྐོར་བ་བྱ། དངོས་སུ་མི་ཤོང་ན་ཡིད་ཀྱིས་འདོད་ཡོན་གྱི་ས་ནས་བསྐོར་བར་བྱེད་པར་བསམས་ལ། ཤར་ཕྱོགས་སུ་འགྲེང་སྟེ། རྡོ་རྗེ་དྲིལ་བུ་དཀྲོལ་ཞིང་། ངག་ཏུ་ཡི་གེ་བརྒྱ་པ་ཅི་ནུས་པ་བཟླས་པར་བྱ་སྟེ། ཕྱག་ལེན་ལ་ནི་རོལ་མོ་ཆེན་མོ་དང་བཅས་ཏེ་མཛད་དོ། །དེའི་རྗེས་སུ་རྡོ་རྗེ་དྲིལ་བུ་དང་བཅས་ཏེ་ཐལ་མོ་སྦྱར་ནས། བདག་ཅག་ལས་དང་པོ་པའི་རྟེན་གྱི་གང་ཟག་ཏུ་གྱུར་པས་ཏིང་ངེ་འཛིན་མི་གསལ་བ་དང་། བྱིང་བ་དང་རྒོད་པའི་དབང་དུ་གྱུར་པ་ཐམས་ཅད་དང་། ཆོ་ག་ལྷག་པ་དང་། མ་ཚང་བར་གྱུར་པ་དང་། མཆོད་པའི་ཡོ་བྱད་མ་འབྱོར་པ་དང་། ཉམས་པ་དང་། དཀྱིལ་འཁོར་འབྲི་བ་ལ་སོགས་པ་ལ་སྐྱོན་དུ་གྱུར་པ་ལ་སོགས་པ་གང་ཡིན་པ་དེ་དག་ཐམས་ཅད་བཟོད་པར་མཛད་དེ། ལྷག་ཆད་ཁ་བསྐང་བར་མཛད་དུ་གསོལ། ཞེས་གསོལ་བ་གདབ་སྟེ། ཕྱག་འཚལ་ནས་གྲལ་ལ་འདུག་གོ །ཇི་སྐད་བཤད་པའི་ཕྱི་རོལ་པའི་གཏོར་མ་དང་། ལྷག་ཆད་ཁ་བསྐང་བ་འདི་གཉིས་ནི་ནག་པོ་ལུགས་ཀྱི་ཀྱེ་རྡོ་རྗེ་ལའང་འདྲ་ཞིང་། ཌོམྦི་དཀྱིལ་ཆོག་ཏུའང་ཡན་ལག་བར་པ་གཉིས་གོ་བསྣོར་བ་ཙམ་མ་གཏོགས་གཞན་ཆོ་ག་ཁྱད་པར་མེད་དོ། །མཚོ་སྐྱེས་ལུགས་ལ་ནི་གཉིས་ཀ་མ་བཤད་ཅིང་། དཀྱིལ་འཁོར་བྲིས་ཚར་བའི་རྗེས་སུ་ཕྱི་རོལ་ཏུ་ཕྱོགས་སྐྱོང་གི་ཐོ་རྣམས་བཙུགས་ཏེ། ཕྱོགས་སྐྱོང་སོ་སོར་བསྐྱེད་ལ། དེ་ནས་སྤྱན་དྲངས་ལ་བསྟིམས་ལ་གཞག་ཅེས་པ་ནི་ཆོ་ག་མ་ཚར་གྱི་བར་དུ་བར་ཆད་ཞི་བའི་ཆེད་དུ་བསྐྱེད་ཆོག་བྱས་ནས་གཞག་པ་ཙམ་ཡིན་གྱི། ཕྱི་རོལ་པའི་གཏོར་མ་འབུལ་བའི་ཡུལ་ནི་མ་ཡིན་ནོ། །དེ་དག་གི་ནི་དཀྱིལ་འཁོར་སྒྲུབ་ཅིང་མཆོད་པ་དངོས་བསྟན་ཟིན་ཏོ། །གཉིས་པ་ཞར་ལས་བྱུང་བ་ལ་གསུམ་སྟེ། དངོས་གཞིའི་ཞག་གྲངས་ལ་དོགས་པ་གཅད་པ། དེ་དང་འབྲེལ་བའི་བུམ་བསྐྱེད་ལ་དོགས་པ་གཅད་པ། སློབ་མ་དབང་བསྐུར་ལ་དོགས་པ་གཅད་པའོ། །དང་པོ་ནི། དབང་ཆུར། འདིར་ས་ཆོག་ནུབ་གཅིག སྟ་གོན་ནུབ་གཅིག དངོས་གཞི་ནུབ་གཅིག་སྟེ་ནུབ་གསུམ་པར་བྱེད་པའི་ལུགས་གཅིག་དང་། ཡང་དངོས་གཞི་ནུབ་གཉིས་ཏེ་ནུབ་བཞི་པར་བྱེད་པའི་ལུགས་གཉིས་ལས། ཕྱི་མ་འདི་དང་ཌོམྦི་དཀྱིལ་ཆོག་ཏུ་ས་ཆོག་ནུབ་གཉིས་སུ་བྱས་པའི་ནུབ་ལྔ་པ་གཉིས་དོན་གཅིག་པས། འདི་གཉིས་ཆར་ལ་དངོས་གཞི་ནུབ་དང་པོའི་ལྷག་ཆད་ཁ་བསྐང་པའི་རྗེས་སུ། རྒྱས་པའི་སྦྱིན་སྲེག་བྱེད་པར་འདོད་ན་སྦྱིན་སྲེག་གི་ཆོ་ག་ལས་འབྱུང་བ་ལྟར་སྦྱིན་སྲེག་བྱ། གལ་ཏེ་རབ་ཏུ་གནས་པ་བྱེད་པ་ཡིན་ནའང་། དེའི་ཚེ་རབ་གནས་ཀྱི་སྟ་གོན་བྱ། ཕྱི་ཉིན་རབ་གནས་ཀྱི་དངོས་གཞི་དང་རྒྱས་པའི་སྦྱིན་སྲེག་བྱས་ལ། དེའི་ནུབ་མོ་སློབ་དཔོན་བདག་ཉིད་འཇུག་ཅིང་དབང་བླང་བ་དང་། སློབ་མ་གཞུག་ཅིང་དབང་བསྐུར་བའི་བར་དུ་བྱའོ། །གལ་ཏེ་རྒྱས་པའི་སྦྱིན་སྲེག་དང་རབ་གནས་ཀྱང་མི་བྱེད་དངོས་གཞི་ནུབ་གཉིས་པའང་མི་བྱེད་ན། ལྷག་ཆད་ཁ་བསྐང་བའི་རྗེས་ཐོག་ཁོ་ནར། སློབ་དཔོན་བདག་ཉིད་འཇུག་ཅིང་དབང་བླང་བ་དང་། སློབ་མ་གཞུག་ཅིང་དབང་བསྐུར་བའི་བར་དུ་བྱའོ། །གཉིས་པ་ནི། སློབ་མ་དབང་བསྐུར་ཞག་གྲངས་མང་པོར་སྦྲེལ་བའི་ཚེ། གཉིས་པ་མན་ཆད་ཀྱི་བུམ་བསྐྱེད་གནས་སྐབས་གང་དུ་བྱ་སྙམ་ན། འདི་ལ་གནས་སྐབས་བཞི་སྟེ། བདག་བསྐྱེད་ཀྱི་རྗེས་ཐོག་ཁོ་ནར་བྱ་བ་དང་། ཕྱི་རོལ་པའི་གཏོར་མའི་རྗེས་ཐོག་ཁོ་ནར་བྱ་བ་དང་། ལྷག་ཆད་ཁ་བསྐང་བའི་རྗེས་ཐོག་ཁོ་ནར་བྱ་བ་དང་། བདག་བསྐྱེད་དང་མདུན་བསྐྱེད་གང་གི་རྗེས་སུ་བྱས་ཀྱང་འགལ་བ་མེད་པ་དང་བཞིའོ། །དང་པོ་ནི། བདེ་མཆོག་མཁའ་འགྲོ་རྒྱ་མཚོ་ལྟ་བུ་སྟེ། བདག་འཇུག་གི་གོང་དུ་བུམ་བསྐྱེད་ཟིན་པ་དགོས་ཤིང་། ལུགས་འདིའི་བདག་འཇུག་གི་རྗེས་སུ་སླར་ཡང་བདག་མདུན་ཐ་མི་དད་དུ་བསྒྲུབ་པ་ནས། ཕྱི་རོལ་པའི་གཏོར་མ་མ་ཚར་གྱི་བར་དུ་མདུན་བསྐྱེད་ཀྱི་སྒྲུབ་མཆོད་མ་རྫོགས་པས། དེ་དག་གི་བར་སྐབས་སུ་ཆོ་ག་རིགས་མི་མཐུན་བུམ་བསྐྱེད་ཀྱིས་བཅད་པ་མི་རུང་བའི་ཕྱིར་རོ། །གཉིས་པ་ནི། ཀླུའི་བློས་མཛད་པའི་འདུས་པའི་དཀྱིལ་འཁོར་གྱི་ཆོ་ག་ཉི་ཤུ་པ་ལྟ་བུ་སྟེ། ལུགས་དེ་ལ་ཕྱི་རོལ་པའི་གཏོར་མ་ནི། ལྷ་རྣམས་སྤྱན་དྲངས་ཉིད་དང་ནི། །ཞེས་ཆོ་ག་བཅུ་གཅིག་པའི་ཁོངས་སུ་གཏོགས། གཙོ་བོ་ལ་མེ་ཏོག་ཕུལ་ནས་སྒོ་དབྱེ་བ་མན་ཆད་སློབ་མ་གཞུག་པ་ཞེས་པ་ཆོ་ག་བཅུ་གཉིས་པའི་ཁོངས་སུ་གཏོགས་ཤིང་། ཆོ་ག་བཅུ་གཅིག་པ་ཡན་ཆད་བདག་མདུན་ཐ་མི་དད་དུ་སྒྲུབ་ཅིང་མཆོད་པའི་ཆོ་ག་ཡིན་པས་ཆོ་ག་རིགས་མི་མཐུན་གྱིས་བར་དུ་བཅད་པ་མི་འཐད། སློབ་མ་གཞུག་པའི་ཆོ་ག་ལ་ནི་བུམ་བསྐྱེད་སྔོན་དུ་འགྲོ་དགོས་པའི་ཕྱིར་རོ། །གསུམ་པ་ནི། ཀྱེ་རྡོ་རྗེ་མན་ངག་ལུགས་དང་། ནག་པོ་ལུགས་ལྟ་བུ་སྟེ། འདི་གཉིས་ལ་བདག་མདུན་ཐ་མི་དད་དུ་བསྒྲུབ་དགོས་པས་དེ་གཉིས་ཀྱི་བར་དུའང་མི་འཐད། ལྷག་ཆད་ཁ་བསྐང་བ་མ་ཚར་གྱི་བར་དུ་མདུན་བསྐྱེད་ཀྱི་སྒྲུབ་མཆོད་མ་རྫོགས་པས། འདི་དག་གི་བར་སྐབས་སུ་ཆོ་ག་རིགས་མི་མཐུན་གྱིས་བཅད་པའང་མི་འཐད་པའི་ཕྱིར་རོ། །བཞི་པ་ནི། བདེ་མཆོག་ལཱུ་ནག་གཉིས་དང་། ཀྱེ་རྡོར་འགྲེལ་པ་ལུགས་ལྟ་བུ་སྟེ། བདག་འཇུག་གི་གོང་དུ་བུམ་བསྐྱེད་ངེས་པར་དགོས་ཤིང་། བུམ་བསྐྱེད་ལ་བདག་བསྐྱེད་སྔོན་དུ་འགྲོ་དགོས་པ་ཙམ་ཡིན་གྱི། བདག་བསྐྱེད་ཀྱི་རྗེས་དང་། མདུན་བསྐྱེད་ཀྱི་རྗེས་གཉིས་གང་དུ་བྱས་ཀྱང་འགལ་བ་མེད་པའི་ཕྱིར་རོ། །གསུམ་པ་ནི། ཀྱེ་རྡོར་ལུགས་གཉིས་ཀྱི་དངོས་གཞི་ནུབ་གཉིས་པར་བྱེད་པའི་ཚེ་སློབ་མ་སྟ་གོན་དང་། སློབ་མ་དབང་བསྐུར་གཉིས་ཀྱི་བར་དུ་ཞག་གཉིས་ཀྱིས་ཆོད་པས་མི་རུང་ངོ་སྙམ་ན། དེ་ནི་མ་ཡིན་ཏེ། སློབ་མ་སྟ་གོན་ནི་དངོས་གཞིའི་ཆོ་གའི་འཚོག་ཆས་ཙམ་ཡིན་གྱི། ཞག་གྲངས་མང་ཉུང་ལ་རུང་མི་རུང་གི་བྱེ་བྲག་གི་རྒྱུ་མཚན་དང་། བཤད་པ་གང་ཡང་མེད་པའི་ཕྱིར་དང་། དཀྱིལ་ཆོག་གཉིས་དང་། དབང་ཆུ་གཉིས་ལས་རུང་བར་གསུངས་པའི་ཕྱིར་རོ། །དཀྱིལ་འཁོར་སྒྲུབ་ཅིང་མཆོད་པ་བསྟན་ཟིན་ཏོ། །བདུན་པ་འཇུག་ཅིང་དབང་བསྐུར་བ་ལ་གཉིས་ཏེ། སློབ་དཔོན་བདག་ཉིད་འཇུག་ཅིང་དབང་བླང་བ་དང་། སློབ་མ་གཞུག་ཅིང་དབང་བསྐུར་བའོ། །དང་པོ་ནི། སཾ་བུ་ཊའི་གཉིས་པའི་དང་པོ་ལས། སྔགས་ཀྱི་ལམ་ནི་རྗེས་བཙལ་བས། །གང་ཚེ་མཁས་པས་དབང་བསྐུར་བས། །སངས་རྒྱས་ཀུན་གྱིས་མངོན་སུམ་དུ། །དཀྱིལ་འཁོར་བདེ་བར་གཤེགས་གནས་སུ། །འཇིག་རྟེན་ཁམས་ནི་མཐའ་ཡས་དག །བློ་དང་ལྡན་པས་དེ་བཞིན་བླང་། །རང་བྱིན་བརླབས་པའི་གནས་ཐོབ་ནས། །དམ་ཚིག་ཉམས་པས་འཇིགས་པ་ཡིས། །རྫོགས་སངས་རྒྱས་ཀྱི་དོན་དམ་ལས། །སྔགས་ཀྱི་ལམ་ནི་དེ་བཞིན་གསུངས། །ཞེས་གསུངས་པ་ལ་བརྟེན་ནས་སློབ་མ་དབང་བསྐུར་གྱི་སྔོན་དུ་སློབ་དཔོན་བདག་ཉིད་འཇུག་ཅིང་དབང་བླང་བར་མཛད་པར་རྒྱ་བོད་ཀྱི་མཁས་གྲུབ་ཀུན་མཐུན་ནོ། །འདི་འཆད་པ་ལ་གསུམ་སྟེ། གཞུང་གི་འབྲུ་གཉེར་བ། ལག་ལེན་གྱི་རིམ་པ་ཅུང་ཟད་བཤད་པ། འཇུག་དམ་ཚིག་གསུམ་གྱི་གླུའི་སྒོ་ནས་བསྟོད་པའོ། །དང་པོ་ལ། གནས་སྐབས་གང་གི་ཚེ་བླང་བ། ཡུལ་གང་ལས་བླང་བ། གང་ཟག་གང་གིས་བླང་བ། ཆོ་ག་ཇི་ལྟར་བླང་བ། དགོས་པ་གང་གི་ཕྱིར་བླང་བ། དེ་ལྟར་བླང་བའི་འཐད་པ། དབང་གི་རིམ་པ་ངེས་པའི་འཐད་པ་དང་བདུན་ལས། དང་པོ་ནི། སྔགས་ཀྱི་ལམ་ནི། ཞེས་སོགས་ཚིག་རྐང་གཉིས་ཏེ། སྔགས་ཀྱི་ལམ་རྗེས་སུ་བཙལ་བ་ནི་རྗེས་སུ་འབྲང་བ་སྟེ། གསང་སྔགས་ཀྱི་སྒོར་སྤྱད་པ་སྤྱོད་པར་འདོད་པའི་སློབ་མ་རྣམས་སོ། །དེ་ལ་གང་གི་ཚེ་མཁས་པས་དབང་བསྐུར་བའི་ཆོ་གས་ནི་སྔོན་དུ་སྨིན་པར་བྱ་དགོས་ལ། གནས་སྐབས་དེའི་ཚེ་ན་བདག་ཉིད་ཀྱིས་ཀྱང་བླང་དགོས་ཞེས་བྱ་བའི་དོན་ཏོ། །གཉིས་པ་ནི། སངས་རྒྱས་ཀུན་གྱི་ཞེས་སོགས་ཚིག་རྐང་པ་གསུམ་སྟེ། མདུན་དུ་བསྐྱེད་པའི་དཀྱིལ་འཁོར་བླ་མ་དང་ཐ་མི་དད་པ་ནི་བདེ་བར་གཤེགས་པ་སྟེ། དེའི་གནས་སུ་འཇིག་རྟེན་གྱི་ཁམས་མཐའ་ཡས་པ་དག་ན་བཞུགས་པའི་སངས་རྒྱས་ཀུན་གྱིས་མངོན་སུམ་དུ་བྱིན་གྱིས་བརླབས་པ་དེར་རོ། །གསུམ་པ་ནི། བློ་དང་ལྡན་པས་ཞེས་ཏེ། སློབ་མ་ལ་དབང་བསྐུར་བའི་བློ་དང་ལྡན་པ་དེས་སོ། །ཡང་ན། འཇིག་རྟེན་ཁམས་ནི་མཐའ་ཡས་དག །ཅེས་པའང་འདིའི་ཁྱད་ཆོས་སུ་སྦྱར་ཏེ། རང་ཉིད་དབང་བླང་བའི་ཚེ་འཇིག་རྟེན་གྱི་ཁམས་མཐའ་ཡས་པ་ན་ཡོད་པའི་སེམས་ཅན་ཐམས་ཅད་ཀྱིས་ཀྱང་བླང་བར་མོས་པའོ། །བཞི་པ་ནི། དེ་བཞིན་བླང་ཞེས་པ་སྟེ། སློབ་མ་ལ་དབང་ཇི་ཙམ་བསྐུར་བ་དེ་བཞིན་དུ་སློབ་དཔོན་རང་གིས་ཀྱང་བླང་བའོ། །འདི་ལ་སློབ་དཔོན་ཨ་བྷ་ཡས་དཀྱིལ་འཁོར་དུ་འཇུག་པ་དོར་ཏེ། མེ་ཏོག་ཕྲེང་བའི་དབང་མན་ཆད་བདག་འཇུག་གི་ཚུལ་དུ་ལེན་པ་དང་། པཎྜི་ཏ་ཛ་ཡ་སེ་ནས་འཇུག་པ་ཡན་ཆད་དོར་ཏེ་དབང་བཞིའི་ངོ་བོ་ཙམ་བསྡུས་ཏེ་ལེན་པ་ལ་སོགས་ཅི་རིགས་པ་ཡོད་ཀྱང་། གཞན་རྒྱ་གར་བ་ཕལ་ཆེར་དང་། རྗེ་བཙུན་གོང་མའི་བཞེད་པས། སློབ་མ་ལ་དབང་ཇི་ལྟར་བསྐུར་བ་དེ་བཞིན་དུ། དཀྱིལ་འཁོར་དུ་འཇུག་པ་དང་། དབང་གི་ངོ་བོ་གཉིས་ཀར་ལེན་པ་མཛད་དེ། གྲུབ་ཆེན་ས་ར་ཧས། སློབ་མ་གཞུག་པའི་ཆོ་ག་ཡིས། །དང་པོ་ཉིད་དུ་སློབ་དཔོན་འཇུག །ཅེས་དང་། བྷ་བ་བྷ་དྲས། སློབ་མ་གཞུག་པའི་ཆོ་གས་བདག་ཉིད་འཇུག་པ་དང་བཅས་པར་དཀྱིལ་འཁོར་དུ་ཞུགས་ཏེ། བཅོམ་ལྡན་འདས་ལ་ཆུའི་དབང་ལ་སོགས་པ་བླངས་ནས་གནང་བ་ནོས་ཏེ། སློབ་མ་གཞུག་པར་བྱའོ། །ཞེས་དང་། བཟང་པོ་ཡོངས་གཟུང་ལས། ནང་ཞུགས་མཆོད་པ་ཆེར་བྱས་ནས། །འཁོར་བདག་དབང་བླང་བདེན་པ་བརྗོད། །ཅེས་དང་། རིན་ཆེན་འབར་བ་ལས། འཁོར་ལོ་མཆོད་དེ་བདག་ཉིད་ཀྱང་། །སློབ་མའི་རིམ་བཞིན་དབང་བླངས་ལ། །ཞེས་དང་། གྲུབ་ཆེན་མཚོ་སྐྱེས་ཀྱིས་སློབ་མ་གཞུག་པའི་རིམ་པ་བཞིན། སློབ་དཔོན་བདག་ཉིད་ཀྱང་འཇུག་པར་བྱའོ། །ཞེས་དང་། སློབ་དཔོན་ནག་པོ་པས། ནང་དུ་ཞུགས་ཏེ་དཀྱིལ་འཁོར་དུ་བཅུག་པ་ནས་རྗེས་སུ་གནང་བའི་བར་དུ་བློས་བླངས་ལ་ཞེས་དང་། རྗེ་བཙུན་རྩེ་མོས་དབང་ཆུ་གཉིས་དང་། རྗེ་བཙུན་གྱིས་ནག་པོ་དཀྱིལ་ཆོག་རྣམས་ལས་ཀྱང་འདི་ཁོ་ན་ལྟར་གསུངས་སོ། །ལྔ་པ་ནི། རང་བྱིན་བརླབས་པའི་གནས་ཐོབ་ནས། །ཞེས་ཏེ། རང་གིས་ལྷ་ལ་དབང་ཐོབ་པས་ལུས་ངག་ཡིད་གསུམ་གྱི་དྲི་མ་དག་སྟེ་སྐུ་གསུང་ཐུགས་རྡོ་རྗེར་བྱིན་གྱིས་བརླབས་པས་སོ། །དྲུག་པ་ནི། དམ་ཚིག་ཉམས་པས་འཇིགས་པ་ཡིས། །ཞེས་པ་སྟེ། སློབ་མ་ལ་དབང་མ་བསྐུར་ན་སློབ་མ་རྗེས་སུ་མ་བཟུང་བར་འགྲོ་ལ། སློབ་མ་ལ་དབང་བསྐུར་བ་ལ་བདག་ཉིད་དབང་ཡོངས་སུ་མ་རྫོགས་ན་རང་བཟོར་གྱུར་ནས་ལྟུང་བར་འགྱུར་བས་དེས་འཇིགས་པའོ། །བདུན་པ་ནི། རྫོགས་སངས་རྒྱས་ཀྱི་ཞེས་སོགས་ཚིག་རྐང་པ་གཉིས་ཏེ། ལམ་བསྒོམ་པ་ལ་དབང་དགོས་ལ་དབང་ལ་སློབ་དཔོན་བདག་ཉིད་ཕུན་སུམ་ཚོགས་པ་དགོས་པའི་སྔགས་ཀྱི་ལམ་གྱི་རིམ་པ་ནི་རྫོགས་པའི་སངས་རྒྱས་ཀྱི་དོན་དམ་ལས་ཏེ། ངེས་པའི་དོན་དུ་གསུངས་ཞེས་པའོ། །གཉིས་པ་ནི། དཀྱིལ་འཁོར་གྱི་གཙོ་བོ་རང་ཉིད་ལ་དང་པོར་དབང་བསྐུར་བའི་བླ་མ་དང་ཐ་མི་དད་པར་བསྒོམས་ནས་དམིགས་པ་སྤོད་པ་རྣམས་ནི་དེས་མཛད་དེ། དབང་རྫས་འགྲིམ་པ་རྣམས་ནི་དེའི་ཐུགས་ཀ་ནས་བྱེ་བའི་ཧེ་རུ་ཀ་ཞལ་གཅིག་ཕྱག་གཉིས་པ་ཞིག་གིས་མཛད་པར་བསམས་ལ། ཐོག་མར་ལས་བུམ་ནས་ཀུ་ཤའི་རྩེ་མོས་ཆུ་བླངས་པ་ལག་མཐིལ་དུ་བླུགས་པས། ཇི་ལྟར་བལྟམས་པ་ཞེས་སོགས་ཀྱིས་ཁྲུས་བྱ། ལྷག་མ་མཎྜལ་གྱི་སྟེང་དུ་བླུགས་ཏེ། མཎྜལ་ཚོམ་བུ་བདུན་པ་དངོས་སུ་དབུལ། དེ་ནས་གསོལ་བཏབ་ནས་བརྩམས་ཏེ། ལུས་ལོངས་སྤྱོད་འབུལ་བའི་བར་ཚིག་རྣམས་རང་གིས་བརྗོད། མེ་ཏོག་ཕྲེང་བའང་ལས་ཀྱི་རྡོ་རྗེས་གཏད་པར་བསམ་ནས་དངོས་སུ་བླང་། མིག་དར་ནི་རྗེ་བཙུན་གྱིས་བདག་འཇུག་གི་སྐབས་འདིར་ཡིད་ཀྱིས་བཅིང་ཞེས་གསུངས་པས་འཆིང་བའི་ཚུལ་བྱ། བུམ་ཆུས་བསང་གཏོར་དངོས་སུ་བྱ། རྡོ་རྗེ་སྙིང་ག་དང་སྤྱི་བོར་བཞག་དགོས་པ་རྣམས་དང་། དམ་ཚིག་གི་ཆུ་འཐུང་བ་རྣམས་ནི་དངོས་སུ་བྱ། ཡེ་ཤེས་དབབ་པའི་དམིགས་པ་ངག་འདོན་དང་། ཡིད་ཀྱིས་བསམ་པ་གཉིས་ཀ་བྱས་ནས་དྲིལ་བུ་དཀྲོལ་བ་ཙམ་བྱ། མིག་དར་ཕྱེ་བའི་ཚུལ་བྱས་ནས་དཀྱིལ་འཁོར་ལ་མིག་གིས་བལྟ་བ་ཙམ་བྱ་ཡི་སློབ་མ་དབང་བསྐུར་ལྟར་རྟེན་དང་བརྟེན་པའི་ངག་འདོན་ནི་མི་དགོས་སོ། །དངོས་གཞིའི་མཎྜལ་ཕུལ་ཞིང་གསོལ་བ་གདབ་པའི་རྗེས་སུ་རང་ཉིད་དབང་སྟེགས་ཀྱི་སྟེང་དུ་གནས་པར་བསམས་ནས་ཆུ་བཞིའི་སྦྱང་བ་རང་ཉིད་ཀྱིས་སྔགས་དང་ཕྱག་རྒྱ་ཙམ་བྱ། ཏིལ་དང་། ཆུས་སྦྱང་པའང་ཕྱག་རྒྱ་ཙམ་བྱ། བཀྲ་ཤིས་བརྗོད་པའི་ཚེ་ལག་པ་གཡས་རྡོ་རྗེ་དང་བཅས་ཏེ་རྣམ་རྒྱལ་བུམ་པ་བཟུང་། གཡོན་པས་དྲིལ་བུ་གཅད་གཏུབས་སུ་དཀྲོལ་ཏེ་ཚིག་རྣམས་བརྗོད། དངོས་གཞི་རིག་པའི་དབང་ལྔ་ལ་དབང་རྫས་བུམ་པ། དབུ་རྒྱན། རྡོ་རྗེ་དྲིལ་བུ་རྣམས་དངོས་སུ་བླང་། མིང་དབང་གི་སྐབས་སུ་དྲིལ་བུ་སྤྱི་བོར་དཀྲོལ། བརྟུལ་ཞུགས་དང་རྡོ་རྗེ་སློབ་དཔོན་གྱི་དབང་གི་སྐབས་སུ་རྡོ་རྗེ་དང་དྲིལ་བུ་ལེན་པ་དང་། གསོར་བ་དང་། དཀྲོལ་བ་དང་། ཐུགས་ཀར་སྣོལ་བ་རྣམས་དངོས་སུ་བྱ། ཆུ་དབང་བསྐུར་ནས་རིགས་བདག་གི་རྒྱས་གདབ་པའི་རྗེས་སུ་དབང་ལྷ་བསྟིམས་ནས་རང་གི་སྤྱི་བོར་མེ་ཏོག་བཞག་ཏེ་རབ་གནས་བྱ། དཀྱིལ་འཁོར་དང་། ལྷའི་དེ་ཉིད་དང་། རྗེས་གནང་གི་ཚིག་རྣམས་རང་གིས་བརྗོད། མིག་ཕྱེ་བའི་ཚེ་རྡོ་རྗེས་མིག་ཕྱེ་བའི་ཚུལ་ཙམ་མ་གཏོགས། གཞན་རྗེས་གནང་གི་རྫས་རྣམས་དངོས་སུ་མི་ལེན་པར། ལག་པས་ལེན་པའི་ཚུལ་ཙམ་བྱ། དབང་གོང་མ་རྣམས་མཎྜལ་དབུལ་ཞིང་གསོལ་བ་གདབ་པ་དང་། ཚིག་རྣམས་བརྗོད་ཅིང་དམིགས་པ་བྱ། གསང་དབང་གི་སྐབས་སུ་གསང་རྫས་ནང་མཆོད་ནས་བླངས་ཏེ་ལྕེ་ལ་བཞག ལུང་བསྟན་གྱི་སྐབས་སུ་རྡོ་རྗེ་དྲིལ་བུ་སྤྱི་བོར་དཀྲོལ་ནས་ཚིག་རྣམས་བརྗོད་པ་དང་། དབུགས་དབྱུང་དང་གཟེངས་བསྟོད་ལའང་ཚིག་རྣམས་བརྗོད། དབང་གི་དག་པ་རྣམས་ཀྱང་སློབ་མ་ལ་དབང་བསྐུར་བའི་སྐབས་བཞིན་བརྗོད། མཇུག་དམ་ཚིག་དང་སྡོམ་པ་མདོར་བསྡུས་ཏེ་བཟུང་ནས། མཎྜལ་ཚོམ་བུ་བདུན་པ་ཕུལ་ཏེ། ལུས་ལོངས་སྤྱོད་འབུལ་བའི་ཚིགས་བཅད་ལན་གསུམ་བརྗོད། བར་སྐབས་ཀྱི་མཎྜལ་རྣམས་མེ་ཏོག་སྤུངས་ནས་མཎྜལ་གླིང་བཞི་རི་རབ་ཉི་ཟླ་ཟུང་ཅིག་ལྷ་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་ཉིད་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ཡེ་ཤེས་དབབ་པ་ཞུ་བའི་ཡོན་དུ་དབུལ་བར་བགྱིའོ། །ཞེས་སོགས་མདོར་བསྡུས་པ་ཙམ་གྱིས་དབུལ་བ་ཕྱག་ལེན་ལ་མཛད་དོ། །གསུམ་པ་མཇུག་དམ་ཚིག་གསུམ་གྱི་གླུའི་སྒོ་ནས་བསྟོད་པ་ལ་བཞི་སྟེ། དམ་ཚིག་གསུམ་གྱི་གླུ་ཡིས་མཆོད་པ། དེ་ཁོ་ན་ཉིད་བསྒྲག་པ། བདེན་པའི་སྟོབས་བསྒྲག་པ། བདག་འཇུག་རྐྱང་པ་ལ་འདི་དག་དགོས་མི་དགོས་དཔྱད་པའོ། །དང་པོ་ལ་གསུམ་སྟེ། དེ་ཁོ་ན་ཉིད་གསུམ་གྱི་གླུ། ཆོས་ཀྱི་གླུ། ཕྱག་རྒྱའི་གླུའོ། །དང་པོ་ལ་གསུམ་སྟེ། རང་བཞིན་གྱི་དེ་ཁོ་ན་ཉིད། འབྱོར་པའི་དེ་ཁོ་ན་ཉིད། རྣམ་པར་དག་པའི་དེ་ཁོ་ན་ཉིད་དོ། །དང་པོ་ནི། ནམ་མཁའ་སྐྱེ་བའི་ཞེས་སོགས་ཚིགས་བཅད་གཅིག་སྟེ། དེ་ཁོ་ན་ཉིད་གཙོ་བོར་གྱུར་ཅིང་། དེ་ཁོ་ན་ཉིད་དུ་རོ་གཅིག་པ། སྤྲོས་པ་མེད་ལ། རྣམ་པར་མི་རྟོག་པའི་ཡེ་ཤེས་བྱང་ཆུབ་སེམས་ནི་གདུལ་བྱའི་རང་བཞིན་ཡིན་ལ། དེ་ཉིད་བྱང་ཆུབ་སེམས་དཔའ་རྣམས་ཀྱིས་ས་རྣམས་ལ་གློ་བུར་གྱི་དྲི་མ་རིམ་གྱིས་དག་པས་མཐར་ཐུག་པར་རྟོགས་པར་འགྱུར་བ་ཡིན་པས་ན་སེམས་དཔའ་ཡིན་ལ། དེ་ཉིད་རྡོ་རྗེ་འཆང་ཆེན་པོའི་རང་བཞིན་ཏེ། དེ་ལྟ་བུའི་རྡོ་རྗེ་སེམས་དཔར་བདག་གྲུབ་པར་མཛོད་ཅིག སེམས་ཅན་གྱི་སེམས་ལ་ནི་སྐྱེ་བ་ཡོད་པས་འཇིག་པའང་ཡོད་ལ། བཅོམ་ལྡན་འདས་ལ་ནི་ཐོག་མར་སྐྱེ་བ་མེད་པས་ཐ་མར་འཇིག་པའང་མེད་པས་མཆོག་གོ །གང་ཡང་སྒྲིབ་པ་དང་བྲལ་བར་གྱུར་ན་གསལ་བར་འགྱུར་བས་སྐྱེ་བའི་ཐ་སྙད་གདགས་སུ་རུང་སྟེ། དཔེར་ན་ནམ་མཁའི་རྩིག་པ་ལ་སོགས་པ་གསལ་བ་ན་ནམ་མཁའ་སྐྱེའོ་ཞེས་བྱ་བའི་ཐ་སྙད་གདགས་སུ་རུང་བ་དང་འདྲའོ་ཞེ་ན། དེ་ཙམ་གྱིས་ནམ་མཁའ་སྐྱེ་བར་འཇོག་པའི་མཚན་ཉིད་ཀྱི་སྐྱེ་བ་འདི་ལའང་ལྡན་པའི་ཕྱིར་ན་སྐྱེ་བ་མེད་ཀྱང་སྐྱེ་བ་ཉེ་བར་གདགས་སུ་རུང་ངོ་། །གཉིས་པ་ནི། ཀུན་མཆོག་ཅེས་སོགས་ཚིགས་བཅད་གཅིག་སྟེ། ཀུན་མཆོག་ཅེས་པ་ནི། དངོས་གྲུབ་ཆེན་པོ་ཀུན་གྱི་མཆོག་ཡིན་ལ། སྟོབས་བཅུ་དང་། མི་འཇིགས་པ་ལ་སོགས་པའི་ཆོས་ཐམས་ཅད་ལ་དབང་དུ་གྱུར་པས་ན་དབང་ཕྱུག་ཆེན་པོའོ། །འཇིག་རྟེན་པ་ཐམས་ཅད་ལས་ལྷག་པའི་ལྷ་ཉིད་ཡིན་པས་ན་ལྷག་པའི་ལྷ་སྐུ་གསུང་ཐུགས་རྡོ་རྗེ་བརྙེས་པས་རྡོ་རྗེ་འཛིན་པ་ཀུན། སངས་རྒྱས་བྱང་སེམས་ཐམས་ཅད་ཀྱི་ཕུན་སུམ་ཚོགས་པ་དེ་ལ་རག་ལས་པའི་ཕྱིར་རྒྱལ་པོ། རྟག་ཏུ་མི་འགྱུར་བ་ཡིན་པས་ན་མི་འགྱུར་མཆོག་སྟེ། ཆོས་སྐུ་སྐྱེ་བ་མེད་པ་དེའང་གཟུགས་སྐུའི་འབྱོར་པ་འདི་ལྟ་བུ་དང་ལྡན་ཞེས་པའོ། །གསུམ་པ་ནི། ཉེས་པ་མི་མངའ་ཞེས་སོགས་ཚིགས་བཅད་གཅིག་སྟེ། བག་ཆགས་དང་བཅས་པའི་སྒྲིབ་པ་ཐམས་ཅད་སྤངས་པས་ན་ཉེས་པ་མི་མངའ་བ་དེ་ལྟར་ནའང་གནས་པ་དང་། ཕྲིན་ལས་དང་། དམིགས་པ་མེད་པའི་འདོད་ཆགས་དང་། མཚན་མ་མེད་པའི་ཆོས་ཀྱི་དགའ་བ་དང་ལྡན་པ་ཡིན་ནོ། །ཞེས་པ་ནི་རིམ་པ་བཞིན། རྟག་པ་དང་འདོད་ཆགས་ཀུན་གྱི་རྗེས་སུ་ཆགས་པ་དང་། འདོད་ཆགས་ཆེན་པོ་དང་། དགའ་བ་ཆེ་ཞེས་པ་རྣམས་ཀྱིས་བསྟན་ཏོ། །དེས་ན་བཅོམ་ལྡན་འདས་ཚིགས་བཅད་གསུམ་གྱི་བཤད་པ་དེ་ཉིད་ཀྱིས་བདག་ལ་གྲུབ་པར་མཛོད་ཅིག་པའོ། །གསུམ་པོ་འདི་དག་གིས་ནི་རྡོ་རྗེ་ཐུགས་ཀྱི་དམ་ཚིག་བསྟན་པར་སྣང་སྟེ་དེ་ཁོ་ན་ཉིད་ལས་ཤེས་སོ། །གཉིས་པ་ཆོས་ཀྱི་གླུ་ནི། ཤིན་ཏུ་དག་པ་ཞེས་སོགས་ཚིགས་བཅད་གཅིག་སྟེ། ཆོས་ཉིད་ཀྱི་སྐུ་ཐར་པ་ཆེན་པོའི་རང་བཞིན་ཅན་ནི་ཆོས་ཡིན་ལ། དེ་ཉིད་སླར་མི་ལྡོག་པའི་དག་པ་མངའ་བས་ཤིན་ཏུ་དག་པ། མྱ་ངན་ལས་འདས་པའི་མཆོག་སངས་རྒྱས་ཀྱི་མྱ་ངན་ལས་འདས་པ་ཡིན་པས་ཀུན་གྱི་མཆོག་རང་བཞིན་གྱིས་རྣམ་པར་དག་པ་ཡིན་པས་ན་གདོད་ནས་གྲོལ་བ། ཆོས་ཉིད་ཇི་ལྟར་གནས་པ་དེ་ལྟར་ཐུགས་སུ་ཆུད་ཅིང་གཤེགས་པས་ན་དེ་བཞིན་གཤེགས་པ། གདུལ་བྱ་མ་ལུས་པའི་རེ་བ་སྐོང་བས་ན་ཀུན་ཏུ་བཟང་པོ། ཐམས་ཅད་ཀྱི་མཚན་ཉིད་ཡིན་པས་ན་ཀུན་བདག་ཉིད། བྱང་ཆུབ་ཀྱི་བདག་ཉིད་ཅན་གྱི་སེམས་དཔའ་ཡིན་པས་ན་བྱང་ཆུབ་སེམས་དཔའ་སྟེ་དེ་བདག་ལ་གྲུབ་པར་མཛོད་ཅིག་ཅེས་པ་ནི་དྲིལ་བུ་གསུང་གི་དམ་ཚིག་གི་དོན་དུ་སྣང་ངོ་། །གསུམ་པ་ཕྱག་རྒྱའི་དམ་ཚིག་གི་གླུ་ནི། དངོས་གྲུབ་ཆེན་པོ་ཞེས་སོགས་ཚིགས་བཅད་གཅིག་སྟེ། དངོས་གྲུབ་ཆེན་པོ་དེ་དང་ཀུན་གྱི་མཆོག་དང་། དབང་ཕྱུག་ཆེན་པོ་ནི་བཤད་ཟིན་ལ། དེའི་ཕྱག་རྒྱ་ནི་ཡིད་ཀྱི་རང་བཞིན་ཅན་གྱི་རྡོ་རྗེ་སྙེམས་མ་སྟེ། དེའི་བདག་པོ་བདག་ལ་གྲུབ་པར་མཛོད་ཅིག་པའོ། །ཇི་ལྟར་ན་འདི་བདག་པོ་ཡིན་ཞེ་ན། གྲུབ་པ་སྟེ་དང་པོའི་རྡོ་རྗེ་ཆེར་བསྟོད་ཅིང་། ཕྱག་གཡས་པས་གསོར་བའི་ཕྱིར་རོ། །འདི་ནི་ཕྱག་རྒྱ་སྐུའི་དམ་ཚིག་ཏུ་སྣང་ངོ་། །གཉིས་པ་དེ་ཁོ་ན་ཉིད་བསྒྲག་པ་ནི། སེམས་ཅན་ཀུན་གྱི་ཞེས་སོགས་ཚིགས་བཅད་གཅིག་སྟེ། སངས་རྒྱས་ནས་སོ་སྐྱེའི་བར་ནི་སེམས་ཅན་ཀུན་ཡིན་ལ། དེ་དག་གི་སྙིང་ལ་བདེ་བ་རབ་ཏུ་སྩོལ་བ་ཉིད་ཀྱིས་བཞུགས་ཤིང་། རྒྱུ་མཚན་དེས་ན་སེམས་ཅན་ཀུན་གྱི་ཡབ་ཏུ་གྱུར་པ་ཉིད་དོ། །ཡིད་ཁྱབ་པ་ཞེས་པའི་དོན་ནི་བདེ་བ་རབ་ཏུ་སྩོལ་བ་ལ་བཤད་དོ། །བདེ་བ་རབ་ཏུ་སྩོལ་བས་ན་འདོད་ཆགས་མཉམ་པ་སྟེ། དེས་ཕུལ་དུ་བྱུང་བས་ན་མཆོག་གོ །ཅི་ལྟར་ན་འདོད་ཆགས་རབ་ཏུ་མཉམ་ཅེ་ན། བཅོམ་ལྡན་འདས་འདི་ནི་འདོད་པའི་མཆོག་དང་། དམ་ཚིག་རྣམས་ཀྱི་མཆོག་སྟེ་ཡང་དག་པའི་ཡེ་ཤེས་ཡིན་ལ། དེས་སེམས་ཅན་ནས་སངས་རྒྱས་ཀྱི་བར་ལ་མཉམ་པའོ། །འདི་དག་གི་དོན་རྗེ་བཙུན་རྩེ་མོས། དེའང་སྒྲུབ་ཅིང་མཆོད་པའི་དཀྱིལ་འཁོར་སྣང་ལ་རང་བཞིན་མེད་པ་གཟུགས་བརྙན་ཙམ། རྡོ་རྗེ་སློབ་དཔོན་བདག་ཉིད་ཀྱང་ཚུལ་འདི་ཉིད་དུ་བཞུགས་ཤིང་། དབང་བསྐུར་བྱའི་སློབ་མའང་ཚུལ་དེ་ལྟ་བུ་སྟེ། འཁོར་གསུམ་ག་སྣང་ལ་རང་བཞིན་མེད་པ་སྒྱུ་མ་ལྟ་བུ་སྐྱེ་མེད་བདེ་བ་ཆེན་པོའི་ངོ་བོ་ལས་མ་འདས་པ་ཡིན་ལ། ཁྱེད་ཀྱི་མཐུས་བདག་གིས་དེ་ལྟར་རྟོགས་པ་ཡིན་ལ། དཀྱིལ་འཁོར་གྱི་འཁོར་ལོ་ཁྱེད་ཀྱིས་མཁྱེན་ཅིང་སློབ་མ་རྣམས་ཀྱི་རྒྱུད་ལའང་སྐྱེ་བར་མཛོད་ཅིག་ཅེས་གདམས་པར་བྱ་ཞིང་། དེ་ལྟ་བུའི་གླུའི་ཚིག་གིས་མཆོད་པས། སློབ་མ་ལའང་དེ་ལྟ་བུའི་རྟོགས་པ་བསྐྱེད་ཅིག་ཅེས་གསོལ་བ་གདབ་པ་དྲན་པར་བྱས་ལ་ཞེས་གསུངས་པས། ཚིག་འདི་དག་བརྗོད་པའི་ཚེ་དོན་དེ་ལྟ་བུ་དྲན་པ་གནད་དུ་ཆེ་བར་སྣང་ངོ་། །གསུམ་པ་བདེན་པའི་སྟོབས་བསྒྲག་པ་ལ་གཉིས་ཏེ། ཐབས་ཤེས་ཟུང་འཇུག་གི་བདེན་སྟོབས། རྟེན་ཅིང་འབྲེལ་བར་འབྱུང་བའི་བདེ་སྟོབས་བརྗོད་པའོ། །དང་པོ་ནི། རབ་ཏུ་རྫོགས་པར་མཛོད་ཅིག་ཅེས་པ་བཤད་པའི་གཞིའོ། །གང་གི་སྟོབས་ཀྱིས་ན་དཀྱིལ་འཁོར་གྱི་འཁོར་ལོ་ཤེས་རབ་དང་ཐབས་ཟུང་དུ་འཇུག་པའི་བདག་ཉིད་ཡིན་པའི་བདེན་པའི་བྱིན་གྱིས་བརླབས་པ་གང་ཡིན་པ་བདེན་པ་དེ་ཡིས་སོ། །གང་ལ་ན་རྡོ་རྗེ་སློབ་དཔོན་བདག་ལའོ། །གང་ན་མགོན་པོ་ཁྱོད་ཀྱིས་འདོད་པའི་རེ་བ་སྟེ། བདག་གིས་དཀྱིལ་འཁོར་གྱི་འཁོར་ལོ་ཞལ་ཕྱག་གི་རྣམ་པ་ཅན་མཐོང་བ་ལྟར་སློབ་མ་རྣམས་ཀྱིས་ཀྱང་མཐོང་བའོ། །གཉིས་པ་ནི། རྒྱུའི་ཆོས་རྣམས་སྣང་ལ་རང་བཞིན་མེད་པ་གཟུགས་བརྙན་ལྟ་བུ་སྟེ། ཉོན་སྒྲིབ་རང་བཞིན་གྱིས་མེད་པས་དག་ཅིང་། ཤེས་སྒྲིབ་མེད་པས་གསལ་ལ། སྙོམས་འཇུག་གི་སྒྲིབ་པ་མེད་པས་རྙོག་པ་མེད། རྟོག་པས་གཟུང་དུ་མེད་ཅིང་། སྒྲས་བརྗོད་དུ་མེད། ཀུན་རྫོབ་ཏུ་རྒྱུ་མ་རིགས་པ་དང་། ཟག་བཅས་ཀྱི་ལས་ལས་ཀུན་ཏུ་འབྱུང་བ། དེ་བཞིན་དུ་དོན་དམ་པར་དེ་བཞིན་ཉིད་ལས་ངེས་པར་འབྱུང་བའི་བདེན་པ་དེ་ཡིས་དཀྱིལ་འཁོར་གྱི་འཁོར་ལོ་ནི། སྐུ་ཙཀ་ལིའམ། ཚོན་སྤུངས་ལྟ་བུ་མ་ཡིན་པར་ཞལ་ཕྱག་གི་རྣམ་པའི་གཟུགས་བརྙན་དྲི་མ་མེད་པ་རྣམས་སློབ་མ་ཀུན་གྱིས་མཐོང་བར་ཤོག ཅེས་པ་ནི་རྒྱུའི་རྟེན་ཅིང་འབྲེལ་བར་འབྱུང་བའི་བདེན་སྟོབས་ཡིན་ལ། ལམ་ལ་སྦྱར་ན་དཀྱིལ་འཁོར་གྱི་འཁོར་ལོའི་ཆོས་རྣམས་གཟུགས་བརྙན་ལྟ་བུ་སྟེ་ཞེས་སོགས་སྦྱར་ཞིང་། སྒྲིབ་པ་གསུམ་གྱིས་དག་པ་ནི་གློ་བུར་གྱི་དྲི་བྲལ་དང་། རྒྱུ་བླ་མའི་མན་ངག་གམ་ཆོས་ཀྱི་དབྱིངས་དང་། ལམ་བསྒོམས་པའི་ལས་ལས་ཀུན་ཏུ་འབྱུང་ཞེས་སྦྱར་ཞིང་། གཞན་རྣམས་ནི་འདྲའོ། །འདི་དག་གི་དོན་རྗེ་བཙུན་རྩེ་མོས། དཀྱིལ་འཁོར་གྱི་འཁོར་ལོ་གཟུགས་བརྙན་གྱི་ཚུལ་གྱིས་སྣང་བའང་། ཆོས་ཀྱི་སྐུ་སྟོང་པ་དང་། སྙིང་རྗེ་གཉིས་སུ་མེད་པ་ལས་བྱུང་བའི་བདེན་པའི་བྱིན་རླབས་དང་། སློབ་དཔོན་བདག་ཉིད་ཀྱིས་ཀྱང་སྔོན་དུ་བསྙེན་པ་དང་ས་ཡོངས་སུ་བཟུང་བའི་དུས་དང་། སྟ་གོན་དང་། དཀྱིལ་འཁོར་ཆེན་པོ་སྒྲུབ་ཅིང་མཆོད་པའི་དུས་སུའང་དེ་བཞིན་དུ་རྟོགས་པའི་བདེན་པའི་བྱིན་གྱིས་བརླབས་ཀྱིས་རྡོ་རྗེ་སློབ་མ་རྣམས་ཀྱིས་རྡུལ་ཚོན་ནམ། མཚན་མའམ། སྐུ་ཙཀ་ལི་ལ་སོགས་པ་མཐོང་བ་མ་ཡིན་པར་རྟེན་དང་བརྟེན་པར་བཅས་པའི་དཀྱིལ་འཁོར་སྣང་ལ་རང་བཞིན་མེད་པའི་གཟུགས་ཀྱི་སྐུར་མཐོང་བར་ཤོག་ཅིག་ཅེས་དྲན་པར་བྱ་ཞེས་གསུངས་སོ། །བཞི་པ་ནི་འདི་དག་བདག་འཇུག་རྐྱང་པ་ལའང་བྱེད་པའི་ལུགས་དང་། སློབ་མ་དབང་བསྐུར་ཁོ་ན་ལ་བྱེད་པའི་ལུགས་གཉིས་སྣང་བ་ལས། བཟང་པོ་ཡོངས་གཟུང་ལས། བདག་འཇུག་བླངས་ཟིན་ནས་བདེན་པའི་སྟོབས་བརྗོད། ཅེས་པ་ཙམ་ལས་གསལ་ཁ་མི་སྣང་ཡང་། རིན་ཆེན་འབར་བར། གཟུགས་བརྙན་ལྟ་བུའི་འཁོར་ལོ་ལ། །སློབ་མ་གཞུག་ཕྱིར་བདེན་པ་བསྒྲག །ཅེས་པ་དང་། སློབ་དཔོན་ནག་པོ་པས། འཁོར་ལོ་དེ་ཉིད་གཟུགས་བརྙན་བཞིན། །རང་གིས་ཤེས་ནས་སློབ་མ་རྣམས། །གཞུག་ཕྱིར་གཙོ་ལ་གདབ་པར་མཛད། །ཅེས་གསུངས་པ་ལྟར་ན། སློབ་མ་གཞུག་པ་སློབ་མ་དབང་བསྐུར་ཁོ་ན་ལ་དགོས་པར་སྣང་ངོ་། །གལ་ཏེ་སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཞེས་པ་ལྟ་བུ་གཙོ་བོའི་ཐུགས་ཀ་ནས་བྱེ་བའི་ཧེ་རུ་ཀས་གསོལ་བ་གདབ་པར་མོས་ཤིང་། སློབ་མ་ནི་བདག་འཇུག་ལེན་པ་པོ་རང་ཉིད་ལ་བྱར་རུང་ངོ་སྙམ་ན། དེ་ལྟར་ན་བདེ་མཆོག་ནག་པོ་དཀྱིལ་ཆོག་ལྟར་འཇུག་པའི་ཆོས་ཀྱི་ཐོག་མར་འབྱུང་བར་རིགས་ཏེ། བདེན་སྟོབས་ཀྱི་འབྲས་བུས་མིག་དར་ཕྱེ་ནས་རྡུལ་ཚོན་བལྟ་བའི་ཚེ་དགོས་པའི་ཕྱིར་རོ། །གནད་ཀྱི་དོན་ནི་བདེན་སྟོབས་བརྗོད་པའི་ཚིགས་བཅད་གསུམ་པོ་བདག་འཇུག་རྐྱང་པ་ལ་སྐབས་འདིར་བྱེད་པ་ནི་ལྷག་པ་ཡིན་ལ། དམ་ཚིག་གསུམ་གྱི་གླུའི་ཚིགས་བཅད་དྲུག་པོ་བདག་འཇུག་རྐྱང་པ་ལ་མ་བྱས་ཀྱང་ཆད་པའི་སྐྱོན་མེད་ཅིང་། བྱས་ནའང་ལྷག་པའི་སྐྱོན་དུ་མི་འགྱུར་ཏེ། ཚིག་གི་དོན་རྣམས་ཀྱང་འབྲས་བུ་བདག་གིས་འགྲུབ་པའི་གསོལ་གདབ་ཏུ་སྣང་བའི་ཕྱིར་དང་། རྗེ་བཙུན་རྩེ་མོས། ཁྱེད་ཀྱི་མཁྱེན་ཅིང་ཐུགས་སུ་ཆུད་པར་མཛད་དོ། །ཞེས་པ་ཡན་ཆད་བདག་འཇུག་རྐྱང་པ་ལ་རུང་བའི་དོན་དུ་སྣང་བའི་ཕྱིར་རོ། །དེ་ནས་འཇིག་རྟེན་དང་འཇིག་རྟེན་ལས་འདས་པའི་གཏོར་མ་གཉིས་པོ་ཆོ་ག་བཞིན་བཏང་ལ། ཚོགས་ཀྱི་ཡོ་བྱད་བཟའ་བ་དང་། བཏུང་བ་རྣམས་བླངས་ལ་བྱིན་གྱིས་བརླབ་པ་ལ་སོགས་པ་ནས་བརྩམས་ཏེ། དམ་ཚིག་དང་ལྡན་པའི་སྐྱེ་བོ་བཟའ་བ་དང་། བཏུང་བས་ཚིམ་པར་བྱས་ནས་ལྷག་མའི་གཏོར་མའི་བར་དུ་ཚོགས་ཀྱི་འཁོར་ལོའི་ཆོ་ག་བཞིན་དུ་བྱའོ། །དེའི་རྗེས་ལ་ལོ་ཀའི་གཏོར་མའང་གཏང་སྟེ། འདས་པའི་གཏོར་མ་བར་ཆད་ཞི་བར་བྱ་བའི་དོན་དུ་བཞག་ལ། སློབ་མ་གཞུག་པའི་ཆོ་ག་བྱའོ། །གཉིས་པ་སློབ་མ་གཞུག་ཅིང་དབང་བསྐུར་བ་ལ་གཉིས་ཏེ། འཇུག་པ་དང་། དབང་གི་དངོས་གཞིའོ། །དང་པོ་ལ་གསུམ་སྟེ། དཀྱིལ་འཁོར་གྱི་ཁང་པའི་ཕྱི་ནས་ནང་དུ་འཇུག་པ་དང་། ནང་ནས་དཀྱིལ་འཁོར་ཉིད་ལ་འཇུག་པ། དེ་དག་གི་སྐབས་སུ་སྡོམ་པ་གང་ཐོབ་པའོ། །དང་པོ་ལ་ལྔ་སྟེ། ཡོན་དང་མཎྜལ་དབུལ་ཞིང་གསོལ་བ་གདབ་པ། སེམས་བསྐྱེད་ཅིང་སྡོམ་པ་གཟུང་བ། བྱིན་རླབས་ཀྱི་ཆོས་བཞི་བྱ་བ། འདོད་པ་དྲི་ཞིང་ལན་གདབ་པ། སེམས་བསྐྱེད་ལ་གསང་བར་གདམས་ཏེ་གཽ་རཱི་ལ་སོགས་པའི་སྦྱོར་བས་ནང་དུ་འོང་དུ་གཞུག་པའོ། །དང་པོ་ནི། དེ་ནས་རྡོ་རྗེ་དང་། ལས་ཐམས་ཅད་པའི་བུམ་པ་དང་། གདོང་གཡོགས་དང་། མེ་ཏོག་གི་ཕྲེང་བ་ལ་སོགས་པ་ཉེ་བར་མཁོ་བའི་ཡོ་བྱད་ཀུན་བཟུང་ལ། དཀྱིལ་འཁོར་གྱི་ཁང་པ་ཡོད་ན་དེའི་སྒོ་དྲུང་དུ་སོང་ལ་བྱ། དཀྱིལ་འཁོར་གྱི་ཁང་པ་མེད་ན་དཀྱིལ་འཁོར་དང་བར་དུ་ཡོལ་བས་བཅད་ལ་བྱའོ། །དེའང་སློབ་མ་རྣམས་ཁྲུས་བྱས་ཏེ། སྟ་གོན་གྱི་གྲལ་རིམ་བཞིན་འདུག་ཏུ་བཅུག་ལ། གླིང་བཞི་རི་རབ་ཉི་ཟླ་དང་བཅས་པ་སྟེ། མདོར་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ལ་ཇི་ཙམ་དབང་བའི་དཔལ་འབྱོར་རྣམས། དཀྱིལ་འཁོར་དུ་འཇུག་པའི་ཡོན་དུ་དབུལ་བར་མོས་ཤིང་། མཎྜལ་ཚོམ་བུ་བདུན་པ་དབུལ། དེ་ནས་མེ་ཏོག་དང་བཅས་པས་ཐལ་མོ་སྦྱར་ཏེ། དགའ་ཆེན་ཁྱོད་བདག་སྟོན་པ་སྟེ། །ཞེས་སོགས་ལན་གསུམ་གྱིས་གསོལ་བ་གདབ་སྟེ། དོན་ནི་སྔར་སྟ་གོན་གྱི་སྐབས་སུ་བཤད་ཟིན་ཏོ། །དཀྱིལ་ཆོག་གཉིས་དང་། མཁའ་འགྲོ་རྒྱ་མཚོའི་དཀྱིལ་ཆོག་སོགས་མང་པོར། དམ་ཚིག་དེ་ཉིད་བདག་ལ་སྩོལ། །ཞེས་པའི་མཇུག་ཏུ། སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་རོལ་མོ་ལས་བྱུང་བའི། །ཞེས་སོགས་འབྱུང་བའི། སྡོམ་པ་རྣམས་ཀྱང་བདག་ལ་སྩོལ། །ཞེས་པའི་ཚིག་གིས་བྱང་སེམས་དང་། སོ་ཐར་གྱི་སྡོམ་པ་གཙོ་བོར་གསོལ་བ་གདབ་པའི་ཚིག་ཡིན་ལ། ལྷག་མ་རྣམས་ཀྱིས་ནི་དམ་ཚིག་དེ་ཉིད་བདག་ལ་སྩོལ་གྱི་དོན་རྒྱས་པར་བཤད་པའོ། །གཉིས་པ་ལ་གཉིས་ཏེ། སྡོམ་པ་བསྒྲག་པའི་དོན་བཤད་པ་དང་། སྡོམ་པ་གཟུང་བའི་དོན་བཤད་པའོ། །དང་པོ་ནི། སྔར་སྟ་གོན་གྱི་སྐབས་སུ། སྡོམ་པ་གཟུང་བ་རྒྱས་པར་བྱས་ན་སྐབས་འདིར་རྒྱུན་བཤགས་ཙམ་གྱིས་ཆོག་ལ། མ་བྱས་ན་སྐབས་འདིར་སྡོམ་པ་གཟུང་བ་རྒྱས་པར་བྱ་དགོས་པས། དེའི་སྔོན་དུ་སྡོམ་པ་བསྒྲག་པ་དགོས་སོ། །བསྒྲག་པའི་ཚིག་ནི་རྡོ་རྗེ་རྩེ་མོ་ལས་བྱུང་བ། བླ་མེད་ཀྱི་དཀྱིལ་ཆོག་རྣམས་སུ་རྒྱ་གར་བའི་སློབ་དཔོན་ཕལ་ཆེར་གྱིས་བཤད་ཅིང་། དེ་དག་ལ་རིགས་ལྔ་སོ་སོའི་དམ་ཚིག་ཙམ་བསྒྲག་པ་དང་། ཚང་མར་བསྒྲག་པའི་ལུགས་ཅི་རིགས་པ་སྣང་བ་ལས། འདིར་ནི་རིན་ཆེན་འབར་བ་ལས་འབྱུང་བ་ལྟར། ཚང་བར་བསྒྲག་པའི་ལུགས་སོ། །འདི་ལ་གསོལ་བཏབ་ཀྱི་གོ་རིམ་དང་མཐུན་པར་སྔགས་ཀྱི་དམ་ཚིག་བསྒྲག་པ། བྱང་སེམས་ཀྱི་སྡོམ་པ་བསྒྲག་པ། སོ་ཐར་གྱི་སྡོམ་པ་བསྒྲག་པ་དང་གསུམ་དུའང་རུང་བར་སྣང་མོད་ཀྱི། བསྒྲག་གཟུང་གོ་རིམ་མི་མཐུན་པའི་ཁྱད་པར་རྟོགས་པའི་ཆེད་དུ་བཤད་ན་རིགས་ལྔ་སོ་སོའི་དམ་ཚིག་བསྒྲག་པ། སྤྱིའི་དམ་ཚིག་བསྒྲག་པ། སྡོམ་པ་མདོར་བསྡུས་ཏེ་བསྒྲག་པ་དང་གསུམ་ལས། དང་པོ་ལ། རྣམ་པར་སྣང་མཛད་ཀྱི་དམ་ཚིག་ནི། །སངས་རྒྱས་ཆོས་དང་དགེ་འདུན་ཏེ། །ཞེས་སོགས་ཏེ། སངས་རྒྱས་ལ་སོགས་པའི་དཀོན་མཆོག་གསུམ་གཟུང་བའོ། །དེའང་བརྡའི་དཀོན་མཆོག་གསུམ་ནི་གྲགས་པར་ཟད་དོ། །དོན་གྱི་དཀོན་མཆོག་གསུམ་ནི་རང་གི་སེམས་རང་བཞིན་གྱིས་སྒྲིབ་པ་ལས་གྲོལ་བས་སངས་རྒྱས་དང་། དེ་རྟོགས་པ་མེད་པས་རྟོགས་པར་བྱེད་པས་ཆོས་དང་། དེ་ཉིད་ཉམས་སུ་ལེན་པས་དགེ་འདུན་ཏེ་དེ་གཟུང་བར་གྱིས་ཞེས་པའོ། །འདི་ནི་སངས་རྒྱས་རིགས་ཡིད་འོང་། །སྡོམ་པ་བརྟན་པོར་གྱུར་པ་འོ། །ཞེས་པ་ནི་འགྱུར་ཁ་ཅིག་ལས། རིགས་དགའ་བའི་ཞེས་འབྱུང་བ་དོན་གཅིག་ཅིང་། ཁ་ཅིག་ལ་རིགས་དག་པའི་ཞེས་པའང་འབྱུང་ངོ་། །མི་བསྐྱོད་པའི་དམ་ཚིག་ནི། རྡོ་རྗེ་དྲིལ་བུ་ཕྱག་རྒྱ་ཡང་། །ཞེས་སོགས་ཏེ་རྡོ་རྗེ་དང་། དྲིལ་བུ་དང་། ཕྱག་རྒྱ་དང་། དེ་དག་གི་དེ་ཁོ་ན་ཉིད་ཡང་དག་པར་སྟོན་པར་བྱེད་པའི་སློབ་དཔོན་རྣམས་གཟུང་བར་གྱིས་ཞེས་པ་སྟེ། རྡོ་རྗེ་དང་དྲིལ་བུ་ལ་བརྡ་དང་དོན་གཉིས་ལས། བརྡ་ནི་གྲགས་པར་ཟད་ལ། དོན་ནི། བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །ཞེས་པའོ། །ཕྱག་རྒྱ་ནི་ཡོ་གར་སེམས་མ་རྡོ་རྗེ་མའི་ཕྱག་རྒྱ་ལ་སོགས་པ་དམ་ཚིག་གི་ཕྱག་རྒྱ་ལ་འཆད་དགོས་ཀྱང་འདིར་ནི་དེ་དང་། ལས་ཀྱི་ཕྱག་རྒྱ་གཉིས་ཀ་ལ་འཆད་དགོས་སོ། །སློབ་དཔོན་ནི་དབང་བསྐུར་བ་དང་། རྒྱུད་འཆད་པ་དང་། མན་ངག་སྟོན་པ་སྟེ། གང་ཡང་རུང་བ་གཅིག་ལྡན་ནམ། གཉིས་ལྡན་ནམ། སུམ་ལྡན་ནོ། །རིན་པོ་ཆེའི་རིགས་ཀྱི་དམ་ཚིག་ནི། རིན་ཆེན་རིགས་མཆོག་ཆེན་པོ་ལ། །ཞེས་སོགས་ཏེ། ཟང་ཟིང་དང་། མི་འཇིགས་པ་དང་། ཆོས་དང་། བྱམས་པའི་སྦྱིན་པ་སྟེ། དངོས་སུ་བསྒྲུབ་ནུས་པ་རྣམས་དངོས་སུ་བསྒྲུབ་པ་དང་། དངོས་སུ་བསྒྲུབ་མི་ནུས་པ་རྣམས་སེམས་ཀྱི་འཕེན་པའི་སྒོ་ནས་བསྒྲུབ་པའོ། །པདྨའི་རིགས་ཀྱི་དམ་ཚིག་ནི། ཕྱི་དང་གསང་བ་ཐེག་པ་གསུམ། །ཞེས་སོགས་ཏེ། ཕྱི་ཡིས་བསྡུས་པའི་གསང་སྔགས་བྱ་བ་དང་སྤྱོད་པ། གསང་བས་བསྡུས་པའི་གསང་སྔགས་རྣལ་འབྱོར་དང་། རྣལ་འབྱོར་བླ་ན་མེད་པ། ཐེག་པ་གསུམ་པོ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཐེག་པ་སྟེ། མདོར་ན་དམ་པའི་ཆོས་གཟུང་བར་གྱིས་ཞེས་པའོ། །སམྦུ་ཊ་དང་། རྡོ་རྗེ་མཁའ་འགྲོ་གཉིས་ཀ་ལས། ཕྱི་དང་གསང་བ་ཞེས་འབྱུང་ཞིང་། །གནད་ཀྱི་གསལ་བྱེད་དང་། བྷ་ཝ་བྷ་དྲའི་འགྲེལ་པ་གཉིས་ཀ་ལས་ངོས་འཛིན་འདི་ལྟར་འབྱུང་བས་དེང་སང་གི་ཟིན་བྲིས་ཁ་ཅིག་ལས། ཡོ་གའི་སྐབས་སུ་ཕྱི་དང་གསང་བ་ཞེས་དང་། བླ་མེད་ཀྱི་སྐབས་སུ་ཕྱི་ནང་གསང་བ་ཞེས་འདོན་དགོས་སོ། །ཞེས་བྲིས་པ་ལ་ནི་ཤེས་བྱེད་ཅིའང་མི་སྣང་ངོ་། །ལས་ཀྱི་རིགས་ཀྱི་དམ་ཚིག་ནི། ལས་ཀྱི་རིགས་མཆོག་ཆེན་པོ་ལ། །ཞེས་སོགས་ཏེ། སྡོམ་པ་ཐམས་ཅད་གཟུང་བ་དང་། ཁྱད་པར་དུ་མཆོད་པའི་ལས་ཅི་ནུས་སུ་བྱ་བའོ། །དེ་ལ་རྣམ་པར་སྣང་མཛད་ཀྱི་དམ་ཚིག་ནི་དཀོན་མཆོག་གསུམ་གཟུང་བ་གསུམ་དུ་ངེས་ཏེ། རྣམ་པར་སྣང་མཛད་ཀྱིས་སངས་རྒྱས་ཐམས་ཅད་བསྡུས་པ་ལྟར། དཀོན་མཆོག་གསུམ་གྱིས་ཆོས་ཐམས་ཅད་བསྡུས་པའི་ཕྱིར་རོ། །མི་བསྐྱོད་པའི་དམ་ཚིག་ནི་རྡོ་རྗེ་དྲིལ་བུ་གཟུང་བ་སོགས་བཞིར་ངེས་ཏེ། མི་བསྐྱོད་པ་བྱང་ཆུབ་ཀྱི་སེམས་ཀྱི་ངོ་བོ་ཡིན་པའི་ཕྱིར་རོ། །རིན་པོ་ཆེའི་རིགས་ཀྱི་དམ་ཚིག་ནི་སྦྱིན་པ་བཞིར་ངེས་ཏེ། རིན་ཆེན་འབྱུང་ལྡན་སྦྱིན་པའི་ངོ་བོ་ཉིད་ཡིན་པའི་ཕྱིར་རོ། །པདྨའི་རིགས་ཀྱི་དམ་ཚིག་ནི་དམ་པའི་ཆོས་གཟུང་བ་གཅིག་ཏུ་ངེས་ཏེ། འོད་དཔག་ཏུ་མེད་པ་ཤེས་རབ་ཀྱི་ངོ་བོ་ཡིན་པའི་ཕྱིར་རོ། །ལས་ཀྱི་རིགས་ཀྱི་དམ་ཚིག་ནི་སྡོམ་པ་ཐམས་ཅད་གཟུང་བ་སོགས་གཉིས་སུ་ངེས་ཏེ། དོན་ཡོད་གྲུབ་པ་བརྩོན་འགྲུས་ཀྱི་ངོ་བོ་ཉིད་ཡིན་པའི་ཕྱིར་རོ། །ཞེས་རྗེ་བཙུན་རྩེ་མོས་བཤད་དོ། །གཉིས་པ་ལ་གཉིས་ཏེ། ཚུལ་ཁྲིམས་གསུམ་པོ་སྤྱིའི་དམ་ཚིག་ཏུ་བཤད་པ་དང་། སོ་སོའི་དམ་ཚིག་ཏུ་བཤད་པའོ། །དང་པོ་ནི། དེ་ལས་གཞན་ཡང་བཅུ་བཞི་ནི། །ཞེས་སོགས་ཤླཽ་ཀ་གསུམ་སྟེ། འདི་ལ་མི་འཐད་པའི་ཆ་དགག་པ། དོན་ལ་གནས་པའི་ཕྱོགས་བཤད་ལ། དེའི་ཤེས་བྱེད་འགོད་པ་དང་གསུམ་ལས། དང་པོ་ནི། སྔོན་གྱི་ཡོ་ག་བ་ཁ་ཅིག སྐབས་འདིའི་ཕས་ཕམ་པ་བཅུ་བཞི་ནི། རིགས་ལྔ་སོ་སོའི་དམ་ཚིག་གི་ལོག་ཕྱོགས་དཀོན་མཆོག་གསུམ་མ་བཟུང་བ། རྡོ་རྗེ་དང་། དྲིལ་བུ་དང་། སློབ་དཔོན་མ་བཟུང་བ། སྦྱིན་པ་བཞི་མ་བཟུང་བ། ཐེག་པ་གསུམ་མ་བཟུང་བ། སྡོམ་པ་ཐམས་ཅད་དང་། མཆོད་པའི་ལས་མ་བཟུང་བ་གཅིག་ཏུ་བགྲངས་པ་རྣམས་ཡིན་ནོ། །ཞེས་འདོད་པ་ནི་མི་འཐད་དེ། གྲངས་བགྲང་བའི་ཚུལ་ཉིད་ཀྱང་མི་འཐད། མ་བཟུང་བ་ཙམ་ཕམ་པར་མི་འཐད། དེ་དག་སྤོང་བ་ལ་འདོད་ན། དེ་ལས་གཞན་ཡང་ཞེས་པའི་ཚིག་སྦྱོར་མི་འཐད་པའི་སྐྱོན་གསུམ་ཡོད་པའི་ཕྱིར་རོ། །དང་པོ་ནི། མི་བསྐྱོད་པའི་རིགས་ལ་ཕྱག་རྒྱ་མ་བཟུང་བ་མི་བགྲང་བ་མི་འཐད་དེ་གཞུང་ཉིད་ལས་དངོས་སུ་བཤད་པའི་ཕྱིར་རོ། །པདྨའི་རིགས་ལ་ཐེག་པ་གསུམ་སོ་སོར་བགྲངས་ན་ཕྱི་དང་གསང་བའང་སོ་སོར་བགྲང་དགོས་པས་ལྔར་འགྱུར་ལ། དམ་པའི་ཆོས་གཟུང་བ་གཅིག་ཏུ་བགྲངས་ན་ཆོས་ཐམས་ཅད་ཀྱང་དེར་འདུས་པས་ཐེག་པ་གསུམ་སོ་སོར་བགྲང་བ་མི་འཐད་ཅིང་། ལས་ཀྱི་རིགས་ལ་གཉིས་དངོས་སུ་ཡོད་པས་གཅིག་ཏུ་བགྲང་བ་མི་འཐད་དོ། །གཉིས་པ་ནི། དཀོན་མཆོག་གསུམ་ལ་སོགས་པ་མ་བཟུང་བའི་དོན། གཉེན་པོའི་སྟོབས་ཀྱིས་ཇི་ལྟ་བ་བཞིན་གཟུང་བར་མ་ནུས་པ་ལ་འདོད་ན་ཕས་ཕམ་པར་མི་འཐད་དེ། སྦྱིན་པ་རྣམ་བཞི་དངོས་སུ་གཏོང་བར་མ་ནུས་པ་ཙམ་ཕས་ཕམ་པ་ཡིན་ན་ཧ་ཅང་ཐལ་བའི་ཕྱིར་རོ། །གསུམ་པ་ནི། དེ་དག་ཡིད་ཀྱིས་དགོས་པ་མེད་པའི་བློས་སྤོང་བ་ལ་འདོད་པ་ཡིན་ན་ནི། དེ་ལས་གཞན་ཡང་ཞེས་པའི་ཚིག་དང་འགལ་ཏེ། སྤང་ཞིང་དོར་བར་མི་བྱ་སྟེ། །ཞེས་པ་དང་སྦྲེལ་བའི་ཚེ་སྔར་གྱི་དཀོན་མཆོག་གསུམ་ལ་སོགས་པ་ཡིད་ཀྱིས་སྤངས་ཤིང་། ལུས་ངག་གིས་དོར་ན་ཕས་ཕམ་པར་འགྱུར་བར་མ་ཟད། གཞན་ཡང་བཅུ་བཞི་སྤངས་ཤིང་དོར་ན་རྩ་བའི་ལྟུང་བར་བཤད་ཅེས་པའི་དོན་དུ་འཆད་དགོས་པའི་ཕྱིར་ཏེ། དཔལ་མཆོག་དུམ་བུ་གཉིས་པའི་འགྲེལ་ཆེན་ལས། བསམ་པ་ཙམ་གྱིས་འདི་དག་ཐམས་ཅད་འགྲུབ་པ་ཡིན་ཏེ། ཕྱག་རྒྱ་ལ་སོགས་པ་འདི་དག་གིས་ཅི་ཞིག་བྱ། ཞེས་བྱ་བས་འདི་ཡོངས་སུ་སྤངས་ན་ཕམ་པར་འགྱུར་རོ་ཞེས་དང་། ཡང་དེ་ཉིད་ལས། ཐེག་པ་གསུམ་གི་ཆོས་ཡོངས་སུ་སྤང་བར་མི་བྱའོ། །ཞེས་བྱ་བ་ཇི་ལྟར་ཤེས་པར་འགྱུར་ཞེ་ན། ཉན་ཐོས་ཀྱི་ཐེག་པ་ལས་གསུངས་པའམ། རང་སངས་རྒྱས་ཀྱི་ཐེག་པ་ལས་གསུངས་པའམ། ཐེག་པ་ཆེན་པོ་ལས་གསུངས་པའི་དམ་པའི་ཆོས་ལ་སུན་འབྱིན་པས་དགེ་བའི་རྩ་བ་ཐམས་ཅད་འཇིག་པར་བྱེད་ཅིང་། ཕམ་པར་གྱུར་ཅིང་མནར་མེད་པ་ལ་སོགས་པ་ཡིན་ནོ། །ཞེས་འཕགས་པ་ནམ་མཁའ་སྙིང་པོའི་མདོ་ལས་གསུངས་པའི་ཕྱིར་རོ། །ཞེས་སྔར་གྱི་དམ་ཚིག་བཅུ་བཞི་པོ་སྤངས་ཤིང་དོར་བ་ཕས་ཕམ་པར་བཤད་ཅིང་། འདི་དེ་ལས་གཞན་སྤངས་ཤིང་དོར་བ་ལ་འཆད་དགོས་པའི་ཕྱིར་རོ། །ཕྱིས་ཀྱི་བླ་མ་ཁ་ཅིག སྡོམ་པ་བསྒྲག་པའི་ཚིག་འདི་དག་རྡོ་རྗེ་རྩེ་མོ་ལས་འབྱུང་བ་བཞིན། བླ་མེད་ཀྱི་དཀྱིལ་ཆོག་འགའ་ཞིག་ལས་ཀྱང་འབྱུང་ཞིང་། སྡོམ་པ་གཟུང་བའི་ཚིག་རྣམས་རྡོ་རྗེ་རྩེ་མོ་དང་། སམྦུ་ཊ་དང་། རྡོ་རྗེ་མཁའ་འགྲོ་གསུམ་ཆར་ལས་འབྱུང་བས་གཟུང་བྱའི་དམ་ཚིག་དང་སྡོམ་པ་རྣམས་ཀྱང་ཡོ་ག་དང་། རྣལ་འབྱོར་བླ་མེད་གཉིས་ཆར་གྱི་ཐུན་མོང་བ་ཡིན་ནོ། །དེའི་ཕྱིར་སྐབས་འདིར་ཕས་ཕམ་པ་བཅུ་བཞི་ནི་བླ་མེད་ཀྱི་རྩ་བའི་ལྟུང་བ་བཅུ་བཞི་ཡིན་ནོ་ཞེས་སྨྲའོ། །འདི་ནི་རྣམ་པར་འཁྱམས་པ་སྟེ། སྔར་གྱི་སྒྲུབ་བྱེད་དེ་དག་གིས་ཡོ་གའི་སྐབས་སུ་ཇི་ཙམ་གཟུང་བའི་དམ་ཚིག་དང་། སྡོམ་པ་རྣམས་བླ་མེད་དང་ཐུན་མོང་བར་འགྲུབ་ཀྱང་། བླ་མེད་ཀྱི་དམ་ཚིག་དང་སྡོམ་པ་ཡོ་ག་དང་ཐུན་མོང་བར་མི་འགྲུབ་པའི་ཕྱིར་ཏེ། གལ་ཏེ་འགྲུབ་ན་གསང་སྔགས་ཀྱི་དམ་ཚིག་དང་སྡོམ་པ་རྣམས་ཕ་རོལ་ཏུ་ཕྱིན་པ་དང་ཐུན་མོང་བར་འགྲུབ་པར་འགྱུར་ཏེ། ཚུལ་ཁྲིམས་ཀྱི་བསླབ་པ་གསུམ་པོ་གཟུང་བའི་ཚིག་ཕ་རོལ་ཏུ་ཕྱིན་པ་དང་། གསང་སྔགས་ཀྱི་གཞུང་གཉིས་ཆར་ལས་བཤད་པར་མཚུངས་ཤིང་། གསང་སྔགས་ཀྱི་དམ་ཚིག་དང་སྡོམ་པ་རྣམས་ཀྱང་གསུམ་པོ་དེས་མ་བསྡུས་པ་གང་ཡང་མེད་པའི་ཕྱིར་རོ། །བླ་མེད་ཀྱི་རྩ་ལྟུང་བཅུ་བཞི་ཡོ་གའི་རྩ་ལྟུང་དུ་འཆད་པ་སྔར་རྒྱ་བོད་གང་དུའང་མ་བྱུང་ཞིང་། རྩ་ལྟུང་བརྒྱད་པ་དང་། བཅུ་གསུམ་པའི་བསྲུང་རྒྱུ་ཉིད་ཀྱང་ཡོ་ག་ལ་མེད་པས་རང་དགར་སྨྲ་བ་ཁོ་ནར་ཟད་དོ། །གལ་ཏེ་རྩ་ལྟུང་བཅུ་གསུམ་པའི་དོན་བླ་མེད་ཀྱི་སྐབས་སུ་ཚོགས་རྫས་སྤོང་བ་ལ་འཆད་ཅིང་། ཡོ་གར་རྡོ་རྗེ་དྲིལ་བུ་སྤོང་བ་ལ་འཆད་དོ་སྙམ་ན། དེའང་མ་བརྟགས་པ་སྟེ། རྡོ་རྗེ་དྲིལ་བུ་སྤོང་བ་ནི་རིགས་སོ་སོའི་དམ་ཚིག་སྤོང་བའི་ཁོངས་སུ་འདུས་པས། དེ་ཉིད་འདིར་འཆད་ན་གཞན་རྣམས་ཀྱང་འཆད་དགོས་པར་མཚུངས་པའི་ཕྱིར་རོ། །ཡང་ཡོ་ག་པ་ཁ་ཅིག འོག་ནས་འབྱུང་བའི་སྲོག་ཆགས་གསད་པ་སོགས་ལྔ། བྱ་བ་མ་ཡིན་པ་བྱེད་པ། དམ་པ་མི་བསྟེན་པ་དང་། རྣལ་འབྱོར་པ་བསྙེན་མི་བཀུར་བ་གཉིས་གཅིག་ཏུ་བགྲང་། དགེ་བ་བཅུ་མི་སྤྱོད་པ་གཅིག་ཏུ་བགྲང་། ཐེག་པ་དམན་ལ་འདོད་པ་སོགས་བཞི། ལྷ་སོགས་བརྙས་པ་ཕྱག་རྒྱ་སོགས་འགོམ་པ་རྣམས་ལ་འཆད་པའང་མི་འཐད་དེ། ཆང་འཐུང་བ་ཙམ་དང་། དམ་པ་ཉེ་བར་མི་བསྟེན་པ་དང་། རྣལ་འབྱོར་པ་བསྙེན་བཀུར་མི་བྱ་བ་དང་། ཕྱག་རྒྱ་དང་། བཞོན་པ་དང་། མཚོན་བྱ་འགོམ་པ་ཙམ་ལ་ཕས་ཕམ་པར་བྱེད་ན་ཧ་ཅང་ཐལ་བའི་ཕྱིར་དང་། ཕས་ཕམ་པ་ནི་རབ་ཏུ་བཤད། །ཅེས་པས་གཞུང་ལུགས་གཅིག་ཏུ་ཕས་ཕམ་པ་བཅུ་བཞིར་བཤད་པ་སྟོན་ལ། འདི་དག་གཞུང་ལུགས་གཅིག་ཏུ་ཕས་ཕམ་བཅུ་བཞིར་བཤད་པ་གང་ནའང་མེད་པའི་ཕྱིར་རོ། །གཉིས་པ་ནི། སྔགས་གྱི་དམ་ཚིག་བཅུ་བཞི་པོ་སྤོང་བ་དེ་ལས་གཞན་ཡང་བཅུ་བཞི་ནི་ཕས་ཕམ་པར་ནམ་མཁའི་སྙིང་པོའི་མདོ་ལས་རབ་ཏུ་བཤད་དེ། བྱང་ཆུབ་སེམས་དཔའ་རྒྱལ་པོ་ལ་འབྱུང་བ་ལྔ། བློན་པོ་ལ་འབྱུང་བ་ལྔ། ལས་དང་པོ་པ་ལ་འབྱུང་བ་བརྒྱད་དེ། རྟེན་སྒོ་ནས་བཅོ་བརྒྱད་དུ་ཕྱེའང་། ངོ་བོའི་སྒོ་ནས་རྒྱལ་པོའི་དང་པོ་བཞི་དང་། བློན་པོའི་དང་པོ་བཞི་ཁྱད་པར་མེད་པས་བཅུ་བཞིར་འདུས་པའི་ཕྱིར་རོ། །དེས་ན་དེ་དག་སྐབས་འདིར་བསྲུང་མི་དགོས་སོ། །ཞེས་པའི་སྒོ་ནས་དེ་དག་བསྲུང་བ་ཡིད་ཀྱིས་སྤོང་ཞིང་ལུས་ངག་གིས་དོར་བར་མི་བྱ་སྟེ། ཐེག་པ་ཆེན་པོའི་སྡེ་སྣོད་ལས། རྩ་བའི་ལྟུང་བར་བཤད་པའི་ཕྱིར་རོ། །ཞེས་པའོ། །ཉིན་དང་མཚན་མོ་ལན་གསུམ་དུ། །ཞེས་སོགས་ནི་སྲུང་ཚུལ་སྟོན་ཏེ་གོ་སླའོ། །གསུམ་པ་ནི། དེ་ལྟར་ཡིན་པར་ཅིས་ཤེས་ན། སྡོམ་པ་བསྒྲག་པའི་སྐབས་སུ་འདི་ལྟར་བསྒྲག་པ་དེ། གཟུང་བའི་སྐབས་སུ། ཇི་ལྟར་དུས་གསུམ་མགོན་པོ་རྣམས། །ཞེས་སོགས་ཚིགས་བཅད་གཉིས་ལས་གཞན་མེད་ཅིང་། བྱང་ཆུབ་སེམས་དཔའི་ཚུལ་ཁྲིམས་ཀྱི་བསླབ་པ་གསུམ་གྱི་སྤང་བྱའང་སེམས་ཙམ་ལུགས་ཀྱི་རྩ་བའི་ལྟུང་བ་བཞིའམ། དབུ་མ་ལུགས་ཀྱི་རྩ་བའི་ལྟུང་བ་བཅུ་བཞི་ཉིད་ལ་ངོས་གཟུང་དགོས་པའི་ཕྱིར། འདི་ཉིད་རྗེ་བཙུན་རྩེ་མོས། གནད་ཀྱི་གསལ་བྱེད་ལས། བསླབ་པ་ཐམས་ཅད་འདི་གསུམ་དུ་འདུས་པས་འཇུག་པའི་སེམས་བསྐྱེད་པའོ། །འདི་ལས་ཕྱེ་བས་རྡོ་རྗེ་རྩེ་མོ་ལས། ཕས་ཕམ་བཅུ་བཞི་ཞེས་བྱ་བར་ཡོད། །འདི་ལ་སྒྱུར་བྱེད་ཁ་ཅིག་གིས། སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །ཞེས་བྱ་བ་ལ་སོགས་པས་རྣམ་སྣང་གི་དམ་ཚིག་ཏུ་བསྡུས་ཏེ་འཆད་དོ། །དེ་ནི་རིགས་པ་མ་ཡིན་ཏེ། རྡོ་རྗེ་རྩེ་མོ་ལས་སྡོམ་པ་བསྒྲག་པའི་སྐབས་སུ། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་ཡིད་འོང་། །སྡོམ་པ་བརྟན་པར་གྱུར་པ་འོ། །ཞེས་རྣམ་སྣང་ལ་འདི་ཙམ་ལས་མ་གསུངས་པའི་ཕྱིར་དང་། ཡང་། དེ་ལས་གཞན་ཡང་བཅུ་བཞི་ནི། །ཕས་ཕམ་པར་ནི་རབ་ཏུ་བཤད། །ཅེས་བྱ་བ་ལ་སོགས་པ་བསླབ་པ་གསུངས་པ་དེ་ལ་བསླབ་པ་འདི་གསུམ་མ་ཡིན་པའི་གཟུང་བ་གང་ཡང་མེད་དོ། །ཞེས་གསུངས་པའི་དགོངས་པ་དཔྱིས་ཕྱིན་པའོ། །དེ་ཉིད་གྲུབ་ཆེན་ཀུན་དགའ་སྙིང་པོའི་དགོངས་པའང་ཡིན་ཏེ། དེ་ཉིད་འདུས་པའི་དུམ་བུ་དང་པོའི་འགྲེལ་ཆེན་ལས། དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཞེས་བྱ་བ་ལ་སོགས་པ་ཕས་ཕམ་པ་བཅུ་བཞི་ལས་ལྡོག་པའི་མཚན་ཉིད་ཅན་ནོ། །ཞེས་གསུངས་པས་སོ། །གཉིས་པ་ཚུལ་ཁྲིམས་ཀྱི་བསླབ་པ་གསུམ་པོ་སོ་སོའི་དམ་ཚིག་ལ་གསུམ་ལས། ཉེས་སྤྱོད་སྡོམ་པའི་ཚུལ་ཁྲིམས་ནི། ཁྱོད་ཀྱིས་སྲོག་ཆགས་གསད་མི་བྱ། །ཞེས་སོགས་ཤླཽ་ཀ་གཉིས་ཏེ། བྱང་སའི་ཚུལ་ཁྲིམས་ལེའུར་ཉེས་སྤྱོད་སྤོང་བའི་ཚུལ་ཁྲིམས་བྱང་ཆུབ་སེམས་དཔའི་རྒྱུད་ཀྱི་སོ་ཐར་རིས་བདུན་ལ་ངོས་འཛིན་པ་མཛད་པ་ལས། འདི་ནི་མ་མཐའ་དགེ་བསྙེན་གྱི་བསླབ་པའི་གཞི་ལྔའི་དབང་དུ་བྱས་པའོ། །སེམས་ཅན་འདུལ་ཕྱིར་མ་གཏོགས་པ། །ཞེས་སོགས་ཚིག་རྐང་གཉིས་ནི་སོ་ཐར་དེའང་ཐེག་ཆེན་གྱི་སོ་ཐར་ཡིན་པས། དགོས་པ་ཁྱད་པར་ཅན་ཡོད་ན་གནང་ཞིང་མེད་ན་ཉན་ཐོས་བཞིན་དུ་བསྲུང་དགོས་པའི་དོན་ཏོ། །དགེ་བ་ཆོས་སྡུད་ཀྱི་ཚུལ་ཁྲིམས་ནི། དམ་པ་ཉེ་བར་བསྟེན་བྱ་ཞིང་། །ཞེས་སོགས་ཚིག་རྐང་དྲུག་སྟེ། དང་པོ་གཉིས་ཀྱིས་དགེ་བའི་ཆོས་སྡུད་པའི་རྒྱུ་དང་། ལྷག་མ་རྣམས་ཀྱིས་དགེ་བའི་ཆོས་རང་གི་ངོ་བོ་བསྟན་ཏེ། ཐེག་པ་ཆེན་པོའི་དགེ་བ་བཅུ་དང་སྦྱིན་སོགས་ཕ་རོལ་ཏུ་ཕྱིན་པ་དྲུག་དོན་གཅིག་པའི་ཕྱིར་རོ། །སེམས་ཅན་གྱི་དོན་བྱེད་པའི་ཚུལ་ཁྲིམས་ནི། ཐེག་པ་དམན་ལ་འདོད་མི་བྱ། །ཞེས་སོགས་ཚིགས་བཅད་གཅིག་སྟེ། ཐེག་པ་དམན་ལ་འདོད་པ་སོགས་བཞི་ནི་སེམས་ཅན་གྱི་དོན་བྱེད་པའི་མི་མཐུན་པའི་ཕྱོགས་ཡིན་པའི་ཕྱིར་རོ། །གསུམ་པ་སྡོམ་པ་མདོར་བསྡུས་ཏེ་བསྒྲག་པ་ནི། ལྷ་དང་ལྷ་མིན་གསང་བ་པ། །ཞེས་སོགས་ཏེ། མདོར་བསྡུ་ན། འོག་མའི་སྡོམ་པའི་ནང་དུ་གོང་མ་མ་འདུས་ཀྱང་། གོང་མའི་ནང་དུ་འོག་མ་འདུས་པ་རིགས་པའི་ཚུལ་ཡིན་པས། རྣལ་འབྱོར་དང་རྣལ་འབྱོར་བླ་མེད་ཀྱི་སྡོམ་པ་གཟུང་བའི་ཚེ། རང་རང་གི་གཞུང་ནས་བཤད་པའི་ཐུན་མོང་མ་ཡིན་པའི་སྡོམ་པ་དང་། ཐེག་པ་ཆེན་པོ་ཕ་རོལ་ཏུ་ཕྱིན་པའི་སྡོམ་པ་གཟུང་བར་མ་ཟད། བྱ་སྤྱོད་གཉིས་ནས་བཤད་པའི་སྡོམ་པ་རྣམས་ཀྱང་གཟུང་དགོས་ཞེས་པའི་དོན་ཏེ། རྡོ་རྗེ་རྩེ་མོ་ལས། འཁོར་ལོ་རྡོ་རྗེ་པདྨ་སོགས། །མཚན་མའི་ཕྱག་རྒྱ་གང་ཡིན་པ། འགོམ་པ་ཉིད་དུ་མི་བྱ་ཞིང་། །བཟའ་བར་ཡང་ནི་མི་བྱའོ། །དེ་བཞིན་དམན་མ་ལྷ་ཡི་གྲིབ། །རྐང་པ་དག་གིས་བརྫི་མི་བྱ། །དེ་ཡི་སྟེང་དུ་འདུག་མི་བྱ། །སླར་ཡང་གཞག་པར་མི་བྱ་འོ། །ལྷ་ཡི་ཕྱག་མཚན་བཟང་པོ་དང་། །ལྷ་ཡི་བཞོན་པའི་མཚོན་ཆ་རྣམས། །འགོམ་ཞིང་བརྙས་པར་མི་བྱ་སྟེ། །སེམས་ཅན་ལ་ནི་གནོད་མི་བྱ། །ཞེས་གསུངས་པས་སོ། །རྗེས་མཐུན་སྡོམ་པ་རྒྱ་ཆེར་ནི། །ཞེས་སོགས་དོན་འདིར་མ་འདུས་པ་རྣམས་གསང་བ་སྤྱི་རྒྱུད་དུ་བལྟ་བར་བྱའོ་ཞེས་པའོ། །གཉིས་པ་སྡོམ་པ་གཟུང་བའི་དོན་བཤད་པ་ལ་གསུམ་སྟེ། རིགས་ལྔ་སྤྱིའི་སྡོམ་པ་གཟུང་བ། སོ་སོའི་སྡོམ་པ་གཟུང་བ། སྡོམ་པ་མདོར་བསྡུས་ཏེ་གཟུང་བའོ། །དང་པོ་ནི། ཇི་ལྟར་དུས་གསུམ་མགོན་པོ་རྣམས། །ཞེས་སོགས་ཚིགས་བཅད་གཉིས་ཏེ། སྐབས་འདིར་རིན་ཆེན་འབར་བ་དང་། མན་ངག་ལུགས་ཀྱི་དབང་ཆུ་གཉིས་ལས། གུར་ནས་འབྱུང་བའི་རྒྱུན་བཤགས་མཛད་པ་ལྟར་ན་རིགས་ལྔ་སྤྱིའི་དམ་ཚིག་སོ་ཐར་དང་། སྨོན་འཇུག་གི་སེམས་བསྐྱེད་གཟུང་བ་ཡིན་ལ། ཚིགས་བཅད་འདི་ཉིད་སླར་བརྗོད་པ་དང་། ཟློས་པའི་སྐྱོན་ཡང་མེད་དེ། རྒྱུན་བཤགས་ནི། དངོས་གཞི་སྔགས་སྡོམ་གྱི་ཉམས་ལེན་ལ། སོ་ཐར་དང་བྱང་སེམས་སྔོན་དུ་འགྲོ་དགོས་པའི་ལྡོག་པ་ནས་གཟུང་བ་ཡིན་ཅིང་སླར་ཚིགས་བཅད་གཉིས་བརྗོད་པ་ནི་བསྒྲག་པའི་ཚེ། རིགས་ལྔ་སྤྱིའི་དམ་ཚིག་དང་སོ་སོའི་དམ་ཚིག་གི་རྗེས་ལ་བསྒྲག་པ་དེ་ཉིད་འདིར་ཐོག་མར་གཟུང་བའི་དབང་དུ་བྱས་ལ། ཐེག་པ་ཆེན་པོའི་སྡོམ་པ་གཅིག་ཉིད་ཡང་ཡང་གཟུང་བ་ལ་ལམ་གོང་འཕེལ་དུ་འགྲོ་བའི་དགོས་པ་ཁྱད་པར་ཅན་ཡོད་པའི་ཕྱིར་རོ། །ཚིགས་བཅད་གཉིས་པོ་འདིའི་སྔོན་དུ་དཀྱིལ་ཆོག་ཁ་ཅིག་ལས། སངས་རྒྱས་བྱང་ཆུབ་སེམས་དཔའ་ཀུན། །བདག་ལ་ཡང་དག་དགོངས་སུ་གསོལ། །བདག་མིང་འདི་ཞེས་བགྱི་བ་འདི། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཞེས་པའི་ཚིག་སྦྱོར་བ་དང་། ཁ་ཅིག་ཏུ། ཚིག་རྐང་དང་པོ་གཉིས་པོ་ཁོ་ན་སྦྱར་བ་དང་། ལ་ལར་ཚིག་ལྷུག་པ་སྦྱར་བ་སོགས་མི་འདྲ་བ་དུ་མ་སྣང་ཡང་། འདིར་སྲས་བཅས་སངས་རྒྱས་ཐམས་ཅད་དང་། །ཞེས་སོགས་ཚིགས་རྐང་དྲུག་འབྱུང་བ་ནི། རིན་ཆེན་འབར་བ་ལས་འབྱུང་བ་ལྟར་མཛད་པའོ། །དེ་ལ་ཚིག་རྐང་དང་པོ་གསུམ་གྱིས་སྡོམ་པ་བླང་བའི་ཡུལ་བསྟན། དེ་ནས་གཅིག་གིས་ལེན་པ་པོ་བསྟན། ཕྱི་མ་གཉིས་ཀྱིས་དུས་བསྟན་ཏོ། །སྡོམ་པ་བསྒྲག་པའི་སྐབས་ཀྱི་རིགས་ལྔ་སྤྱིའི་དམ་ཚིག དེ་ལས་གཞན་ཡང་བཅུ་བཞི་ནི། །ཞེས་པ་མན་ཆད་བཟུང་བའི་ཚིག་ཚུལ་ཁྲིམས་ཀྱི་བསླབ་པ་གསུམ་བཟུང་བའི་ཁོངས་སུ་འདུས་པའི་ཚུལ་ནི་བཤད་ཟིན་ཏོ། །གཉིས་པ་ནི། སངས་རྒྱས་ཆོས་དང་དགེ་འདུན་ཏེ། །ཞེས་སོགས་ཚིགས་བཅད་ལྔ་སྟེ། རིགས་ལྔ་སོ་སོའི་དམ་ཚིག་བཅུ་བཞི་བཟུང་བའོ། །འདི་བླ་མེད་ལ་སྦྱར་བའི་ཚེ་བླ་མེད་ཀྱི་རྩ་ལྟུང་བཅུ་བཞི་བསྲུང་བའི་དམ་ཚིག་གཟུང་བའང་འདིའི་ཁོངས་སུ་འདུས་དགོས་ཏེ། འདིར་གཟུང་བའི་དོན་འོག་ཏུ་ཆོ་གས་ཐོབ་བའི་ཚེ། འདི་དག་སྲུང་བར་བྱའོ་ཞེས་ཁས་བླངས་པ་ཙམ་ཡིན་ལ། རྩ་ལྟུང་བཅུ་བཞི་བསྲུང་བའང་འོག་ཏུ་ཆོ་གས་འཐོབ་ཅིང་གཟུང་བའི་ཚིག་འདི་ལས་གཞན་མེད་པའི་ཕྱིར་རོ། །ཇི་ལྟར་འདུས་པའི་ཚུལ། རྩ་ལྟུང་འཁྲུལ་སྤོང་ལས་འབྱུང་མོད་ཀྱི། འདིར་ནི་ཡི་གེ་མང་གིས་དོགས་ནས་མ་བྲིས་སོ། །འོ་ན་ཡོ་ག་ལ་སྦྱར་བའི་ཚེ་ནའང་དེ་དང་གཟུང་བར་མཚུངས་སོ་སྙམ་ན་མི་མཚུངས་ཏེ། ཚུལ་ཁྲིམས་ཀྱི་བསླབ་པ་གསུམ་པོ་གཟུང་བ་ཡོ་ག་དང་བླ་མེད་ལ་སྦྱར་བའི་ཚེ། གསང་སྔགས་ཀྱི་བསླབ་པ་བཟུང་བ་དེའི་ཁོངས་སུ་འདུས་ཀྱང་། ཕ་རོལ་ཏུ་ཕྱིན་པ་ལ་སྦྱར་བའི་ཚེ་མི་འདུས་པ་བཞིན་ནོ། །གསུམ་པ་ནི། བྱང་ཆུབ་སེམས་ནི་བླ་མེད་མཆོག །ཞེས་སོགས་ཚིགས་བཅད་གཉིས་ཏེ། འདིའི་དོན་རྗེ་བཙུན་རྩེ་མོས། དེ་ལྟར་རིགས་ལྔ་སོ་སོའི་སྡོམ་པ་བཟུང་ནས་དེ་དག་ཐམས་ཅད་ཀྱང་བྱང་ཆུབ་ཀྱི་སེམས་ལ་གནས་ཏེ། གཞན་གྱི་དོན་བྱའོ་ཞེས་བྱ་བ་འདི་བསྟན་པའི་ཕྱིར། བྱང་ཆུབ་སེམས་ནི་ཞེས་བྱ་བ་ལ་སོགས་པ་སྨོས་སོ། །དེའང་མ་བསྒྲལ་བ་དག་བསྒྲལ་བ་ལ་སོགས་པ་ནི་གོང་དུ་བརྗོད་པའི་རིགས་ལྔ་སོ་སོའི་སྡོམ་པ་དེ་དག་རེ་རེས་ཀྱང་རང་རང་གི་སྤང་བྱའི་ཆུ་བོ་ལས་སྒྲོལ་བ་ལ་སོགས་པ་རིམ་པ་བཞིས་དོན་བྱེད་པ་སྟེ། རྡོ་རྗེ་རིགས་ཀྱི་སྤང་བྱ་ནི་རྣམ་པར་རྟོག་པ། རིན་ཆེན་རིགས་ཀྱི་སྤང་བྱ་སེར་སྣ། པདྨའི་རིགས་ཀྱི་སྤང་བྱ་འདོད་ཆགས། ལས་ཀྱི་རིགས་ཀྱི་སྤང་བྱ་ལེ་ལོ་སྟེ། དེ་དག་ལ་གཉེན་པོ་བཞིའི་ཚུལ་གྱིས་འཇོམས་པའོ། །ཞེས་སློབ་དཔོན་ཀུན་དགའ་སྙིང་པོས་གསུངས་སོ། །ཞེས་བཤད་དོ། །བདག་འཇུག་རྐྱང་པ་ལ་སྡོམ་པ་བསྒྲག་གཟུང་གཉིས་ཀ་དགོས་སམ་སྙམ་ན། སྡོམ་པ་བསྒྲག་པའི་ཚིག་རྣམས་ཀྱང་བླ་མས་གསུང་བར་བསམས་ཏེ། བརྗོད་ན་ཤིན་ཏུ་ལེགས་པར་སྣང་སྟེ། འདི་འདྲའི་རིགས་ཅན་གོང་འོག་ཀུན་ཏུ་མང་དུ་ཡོད་པའི་ཕྱིར་རོ། །དེ་ལྟར་ནའང་འཕགས་པའི་བདག་འཇུག་གཉིས་དང་། ནུབ་པ་རིག་འཛིན་གྲགས་ཀྱི་བདག་འཇུག་ཏུའང་མ་བཤད་ཅིང་། གནས་སྐབས་གཞན་དུའང་སྡོམ་པ་གཟུང་བ་རྐྱང་པ་བྱེད་པ་མང་དུ་ཡོད་པས་མ་བྱས་ཀྱང་ཆོ་ག་ཆད་པའི་སྐྱོན་ནི་མེད་པ་འདྲའོ། །གསུམ་པ་བྱིན་རླབས་ཀྱི་ཆོས་བཞི་བྱ་བ་ནི། གདོང་བཅིང་བ་དང་། མེ་ཏོག་གི་ཕྲེང་བ་གཏད་པ་དང་། བདུད་རྩི་ལྕེ་ལ་གཞག་པ་དང་། བུམ་ཆུས་བསང་བ་དང་བཞི་ཡིན་ལ། གདོང་བཅིང་བ་ནི། ཨཱ་ཁྃ་ཝཱི་ར་ཧཱུྃ་ཞེས་པས་དར་དམར་པོས་སློབ་མའི་གདོང་བཅིངས་ཏེ། རྡུལ་ཚོན་གྱི་དཀྱིལ་འཁོར་མ་མཐོང་བའི་བརྡ་ཡིན་པས། མིག་གཉིས་བཅིང་དགོས་པ་ཡིན་ནོ། །འདི་ལ་གྲུབ་ཆེན་ལྭ་བ་པས། སློབ་མ་དབང་པོ་རབ་འབྲིང་ཐ་གསུམ་གྱི་རིམ་པས་གདོང་གཡོགས་སྲབ་མོ། འབྲིང་པོ། ཤིན་ཏུ་མཐུག་པོ་གསུམ་བཤད་པའི་རིགས་པས་ཀྱང་མིག་ཕྱེ་ནས་དཀྱིལ་འཁོར་མ་བསྟན་གྱི་བར། དཀྱིལ་འཁོར་བལྟ་བར་མི་རུང་བར་གྲུབ་བོ། །སྔར་དབང་བསྐུར་ཐོབ་པས་རུང་ངོ་སྙམ་ན། དེའང་མ་ཡིན་ཏེ། དེས་ཀྱང་གནས་སྐབས་དེའི་ཆོ་ག་ལས་འདའ་བར་མི་རུང་བའི་ཕྱིར་རོ། །ཡོ་གར་སྟོད་གཡོགས་དང་། སྨད་གཡོགས་དང་། ཁྱིམ་པ་ཡིན་ན་གཙུག་ཏོར་བཅིང་བར་བཤད་ཅིང་། དེ་ཉིད་སློབ་དཔོན་ཨ་བྷ་ཡས་ཕྲེང་བར་བླ་མེད་རྣམས་ལ་སྦྱར་ཡང་། བཟང་པོ་ཡོངས་བཟུང་ལས། གོས་དམར་གྱོན་ལ་རས་དམར་གྱིས། །མིག་དག་དགབ་པར་བྱས་ནས་ནི། །ཞེས་སྟོད་གཡོགས་དམར་པོ་དང་། མིག་དགབ་པར་གསུངས་ཀྱི། གཞན་བཤད་པ་མི་སྣང་ངོ་། །མེ་ཏོག་གི་ཕྲེང་བ་གཏད་པ་ནི། དེ་ཉིད་ལས། མེ་ཏོག་ཁ་དོག་སྣ་ཚོགས་པའི། །ཕྲེང་བ་ལག་པས་བཟུང་བ་ལ། །ཞེས་དང་། རིན་ཆེན་འབར་བ་ལས། མེ་ཏོག་གི་ཕྲེང་བ་གཟུང་ཞེས་པ་ཙམ་གསུངས་ཤིང་། དགྲ་ནག་གི་རྒྱུད་ལས། ཨུ་དུམྦཱ་ར་མནྡ་ར། །ཡོངས་འདུ་དང་ནི་མ་ལི་ཀ །ཀརྞི་ཀ་ཡི་ཕྲེང་བ་ནི། །ལེགས་པར་ལོངས་ལ་བུ་ཡིས་ཟུང་། །ཞེས་མེ་ཏོག་ལྔ་ཆར་རམ། གང་རུང་གི་ཕྲེང་བ་གཏད་པར་བཤད་དོ། །འདིའི་སྔགས་སྔ་མ་ཉིད་ཀྱིས་བྱེད་པར་རྣམ་སྣང་མངོན་བྱང་ལས་བཤད་ཅིང་། འདི་ལ་དཔའ་བོ་འབྲུ་ལྔ་ཞེས་པའི་ཐ་སྙད་ཀྱང་དེར་བཤད་དོ། །བདུད་རྩི་ལྕེ་ལ་བཞག་པ་ནི་སྐབས་འདིར་འབྲུ་གསུམ་བརྗོད་ཅིང་། སློབ་མའི་ལྕེ་ལ་བདུད་རྩི་བཞག་པ་ཌོཾ་བི་ལུགས་ཀྱི་དཀྱིལ་ཆོག་གཉིས་ལས་མ་གསུངས་པས། དབང་ཆུར་ཡང་དེའི་འགྲོས་ཀྱིས་མ་བཤད་ཀྱང་། མན་ངག་ལུགས་ལ་ངེས་པར་དགོས་པར་སྣང་སྟེ། ཨཱཥྚའི་གཞི་བཤད་དུ་བྱིན་རླབས་ཀྱི་ཆོས་བཞིའི་གསུམ་པར་བཤད་པའི་ཕྱིར་རོ། །དེ་ཉིད་བདེ་མཆོག་པའི་འགྲེས་ཤོར་བ་མ་ཡིན་གྱི། བདེ་མཆོག་ནག་པོ་དཀྱིལ་ཆོག་དང་། མན་ངག་ལུགས་ཀྱི་དབང་ཆུ་གཉིས་ཀྱི་ཁྱད་ཆོས་སུ་སྣང་བས་མ་ཆད་པ་གལ་ཆེའོ། །དེ་ནས་བདུད་རྩི་འཁྱིལ་པའི་སྔགས་བཟླས་པའི་ལས་བུམ་གྱི་ཆུས་བསང་བ་ནི་དཀྱིལ་ཆོག་ཀུན་མཐུན་པར་སྣང་ངོ་། །བཞི་པ་འདོད་པ་དྲི་ཞིང་ལན་གདབ་པ་ནི། བཟང་པོ་ཡོངས་གཟུང་ལས། ནང་དུ་གཞུག་པའི་རྗེས་སུ་བཤད་ཀྱང་། རིན་ཆེན་འབར་བ་ལས། སྐབས་འདིར། བུ་སྡུག་ཁྱོད་སུ་ཅི་ལ་དགའ། །སློབ་དཔོན་གྱིས་ནི་གཞུག་ཕྱིར་དྲི། །སྐལ་བཟང་བདེ་ཆེན་བདག་དགའ་འོ་ཞེས། །སློབ་མ་བློ་ཆེན་གྱིས་སྨྲའོ། །ཞེས་འབྱུང་བ་ལྟར། འདིར་ཡང་སྐབས་འདིར་མཛད་དོ། །དཀྱིལ་ཆོག་གཉིས་ཆར་ལས། དྲི་བ་དང་ལན་དང་པོ་ལས་མི་སྣང་ཡང་། འདིར་ནི་དེས་བུ་ལ་ཅི་ཞིག་བྱ། །ཞེས་པའི་དྲི་བ་དང་། སངས་རྒྱས་མཆོག་གི་དམ་ཚིག་གོ །ཅེས་པའི་ལན་ཏེ། དྲིས་ལན་གྱི་རིམ་པ་གཉིས་མཛད་དོ། །འདི་དག་གི་དོན། འཇུག་པའི་སྐབས་འདིར་རྒྱུན་བཤགས་ཀྱིས་ནི་སྔགས་སྡོམ་གྱི་ངོ་བོར་སྐྱེའང་སོ་ཐར་དང་། བྱང་སེམས་ཀྱི་ལྡོག་པ་ནས་བཟུང་བ་ཡིན་ལ། སྡོམ་པ་བསྒྲག་གཟུང་གི་སྐབས་སུ་ནི། བསྲུང་བ་ཁས་བླང་བ་ཙམ་ཡིན་གྱི། གནས་སྐབས་དེ་དང་དེའི་སྡོམ་པ་ཐོབ་པ་མ་ཡིན་པས། སྡོམ་པ་གསུམ་གྱི་ཟླས་ཕྱེ་བའི་སྔགས་སྡོམ་ཆོ་གས་བསྐྱེད་པའི་འགོ་བོ་འདི་ནས་བརྩམ་དགོས་སོ། །དེ་ལ་ཐོག་མར་བྱིན་རླབས་ཀྱི་ཆོས་བཞི་བྱས་ནས་ཆོ་གས་བསྐྱེད་པའི་སྔགས་སྡོམ་ཉིད་ཀྱི་འདོད་པ་དྲི་དགོས་པས། བུ་ཁྱོད་སུ་ཡིན་ཞེས་པ་ནི། སོ་ཐར་དང་བྱང་སེམས་ཙམ་གྱིས་མ་ཚིམས་པར། སྔགས་སྡོམ་འདོད་པའི་སྐལ་ལྡན་ཡིན་ནམ། ཞེས་པ་ཡིན་ལ། སྐལ་བཟང་བདག་ཅེས་པ་ནི་དེ་ཉིད་ཡིན་ཞེས་པའོ། །ཅི་ལ་དགའ་ཞེས་དྲིས་པའི་ལན་དུ། སྡོམ་པ་གསུམ་གྱི་ཟླས་ཕྱེ་བའི་སྔགས་སྡོམ་ལ་བདེ་བ་ཆེན་པོ་ཞེས་པའི་མིང་གིས་བཏགས་ནས་དེ་ལ་དགའ་ཞེས་པའོ། །དེས་བུ་ཁྱོད་ལ་ཅི་ཞིག་བྱ་ཞེས་པའི་ལན་དུ། སངས་རྒྱས་མཆོག་གི་དམ་ཚིག་གོ་ཅེས་པའི་དོན་ནི། འདི་ནས་བཟུང་སྟེ། འཇུག་པའི་ཆོས་ཙམ་མམ། དེའི་སྟེང་དུ་བུམ་དབང་ངམ། དེའི་སྟེང་དུ་དབང་གོང་མའི་སྐབས་སུ་གང་ཐོབ་པའི་སྡོམ་པ་ཐམས་ཅད་སངས་རྒྱས་མཆོག་གི་དམ་ཚིག་ཡིན་པས་དེ་ཉིད་བྱེད་ཅེས་པའོ། །དེས་ན་སཾ་བྷ་ར་ཞེས་པའི་དོན་སྡོམ་པ་དང་། བདེ་བའི་མཆོག་གཉིས་ཀ་ལ་འཇུག་པས། བདེ་བའི་མཆོག་གི་སྒྲ་དོན་སྡོམ་པ་གསུམ་ཆར་ལ་བཤད་དགོས་ཀྱང་། བདེ་བ་ཆེན་པོ་ཞེས་པ་དང་། སངས་རྒྱས་མཆོག་གི་དམ་ཚིག་ཅེས་པ་དང་། བླ་ན་མེད་པའི་བདེ་བ་ཞེས་པ་རྣམས་ནི་སྔགས་སྡོམ་ཁོ་ན་ལ་འཇུག་པས། འདི་ནས་བཟུང་སྟེ་དེ་ཉིད་ཆོ་གའི་སྒོ་ནས་བསྐྱེད་པ་དོན་དུ་གཉེར་ཞེས་པའི་དོན་ཏོ། །ལྔ་པ་སེམས་བསྐྱེད་ལ་གསང་བར་གདམས་ཏེ། གཽ་རཱི་ལ་སོགས་པའི་སྦྱོར་བས་ནང་དུ་འོང་དུ་གཞུག་པ་ལ་གསུམ་ལས། དང་པོ་སེམས་བསྐྱེད་པ་ལ། གང་བསྐྱེད་པར་བྱ་བའི་བྱང་ཆུབ་ཀྱི་སེམས་སངས་རྒྱས་ཀྱི་སའི་བདེན་གཉིས་ཟུང་དུ་འཇུག་པའི་ཀུན་རྫོབ་བྱང་ཆུབ་ཀྱི་སེམས་དང་། དོན་དམ་བྱང་ཆུབ་ཀྱི་སེམས་གཉིས་སོ། །ཇི་ལྟར་བསྐྱེད་པའི་ཚུལ་ནི་ཕ་རོལ་ཏུ་ཕྱིན་པའི་ལུགས་ཀྱི་མོས་པ་ཡིད་བྱེད་ཙམ་མ་ཡིན་གྱི། རྣམ་པ་ཟླ་བ་དང་། རྡོ་རྗེའི་གཟུགས་ཀྱི་སྒོ་ནས་བསྐྱེད་པའོ། །དེ་ལྟར་བསྐྱེད་པའི་དགོས་པའང་ལམ་བྱེད་བཞིའི་སྒོ་ནས་ཕ་རོལ་ཏུ་ཕྱིན་པའི་སྒོམ་ཚུལ་ལས་ཁྱད་པར་འཕགས་པ་སྟེ། རྣམ་པ་གཟུགས་ཀྱི་རྣམ་པར་བསྒོམས་པས་སྒོམ་སླ་བས་རྣམ་པ་ལམ་དུ་བྱེད་པ་ཞེས་བྱ། རྣམ་པ་དེ་ཉིད་ལ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་སུ་མོས་པས་མོས་པ་ལམ་དུ་བྱེད་པ་ཞེས་བྱ། དེ་ཉིད་སངས་རྒྱས་ཀྱི་སའི་འབྲས་བུ་དངོས་ཡིན་པར་བསྒོམས་པས་འབྲས་བུ་ལམ་དུ་བྱེད་པ་ཞེས་བྱ། དེ་ལྟར་བསྒོམ་པས་སངས་རྒྱས་ཀྱི་སའི་བྱང་ཆུབ་ཀྱི་སེམས་གཉིས་ཀྱིས་ཟླ་བ་དང་རྡོ་རྗེ་གཉིས་ལ་བྱིན་གྱིས་བརླབས། དེས་རྣལ་འབྱོར་པའི་སེམས་རྒྱུད་བྱིན་གྱིས་བརླབས་པས་ན། བྱིན་རླབས་ལམ་དུ་བྱེད་པ་ཞེས་བྱའོ། །དེ་ཉིད་ལ་ཞེན་པས་འཇུག་ཅིང་འབྲེལ་བས་མི་བསླུ་བའི་ལམ་ཞེས་བྱ་སྟེ། འབྲས་བུ་དངོས་ལ་ཞེན་ཅིང་། རྣམ་པ་ཟླ་བ་དང་། རྡོ་རྗེ་གཉིས་ལ་འཇུག་པས་དེ་གཉིས་འབྲེལ་བའི་རྒྱུ་མཚན་གྱིས། ནམ་ཞིག་འབྲས་བུ་དངོས་གྲུབ་པ་ལ་མི་བསླུ་བའི་ཕྱིར་རོ། །ཇི་ལྟར་འབྲེལ་ན་ཆོས་ཉིད་དབྱེར་མེད་པ་དང་། སངས་རྒྱས་ཀྱི་སའི་ཀུན་རྫོབ་དང་། དོན་དམ་པའི་བྱང་ཆུབ་ཀྱི་སེམས་གཉིས་གདུལ་བྱའི་ངོར་གཟུགས་སུ་སྟོན་པ་ན་ཟླ་བ་དང་། རྡོ་རྗེའི་རྣམ་པར་སྟོན་པའི་སྒོ་ནས་འབྲེལ་བ་ཡིན་ལ། འོག་ནས་འབྱུང་བའི་ཆོ་ག་ཐམས་ཅད་ལ་འདི་བཞིན་དུ་སྦྱར་བར་བྱའོ། །ཟབ་མོའི་གནད་འདི་དག་ལ་བུམ་འཛིན་རྟོག་པའི་གཟུང་རྣམ་ལ་ཕྱི་རོལ་བུམ་པར་འཁྲུལ་ནས་འཇུག་པ་དཔེར་བྱེད་པའི་སྨྲ་ངན་ལུགས་ངན་དེ་དག་ནི་འཛིན་པ་ལྟ་སྨོས་ཀྱང་ཅི་དགོས་ཐོས་པར་གྱུར་ནའང་རྣ་བ་དགབ་པར་བྱའོ། །དེ་ལྟར་བྱང་ཆུབ་ཀྱི་སེམས་གཉིས་གཟུགས་ཀྱི་རྣམ་པར་བསྒོམས་ནས། ཨོཾ་སརྦ་ཞེས་སོགས་ཀྱི་རྗེས་ཟློས་བྱེད་པའི་སྒོ་ནས་བསྐྱེད་པ་སྟེ། སྔགས་དོན་ནི་སརྦ་ནི་ཐམས་ཅད། ཡོ་ག་ནི་རྣལ་འབྱོར། ཙིཏྟ་ནི་སེམས། ཨུཏྤ་ད་ཡ་ནི་བསྐྱེད་པ། མི་ནི་བདག་སྟེ། འཁོར་འདས་ཀྱི་སྣང་བ་ཐམས་ཅད་བདེན་གཉིས་ཟུང་དུ་འཇུག་པའི་རྣལ་འབྱོར་དུ་བདག་གིས་སེམས་བསྐྱེད་པར་བགྱིའོ། །ཞེས་པའོ། །དེ་ནས་དེ་བརྟན་པའི་ཕྱིར། བླ་མས་སློབ་མའི་སྙིང་གར་རྡོ་རྗེ་བཟུང་སྟེ་སུ་ར་ཏི་ཞེས་སོགས་བརྗོད། སྔགས་དོན་ལ་སུ་ར་ཏི་ནི་ཤིན་ཏུ་དགའ་བ། ས་མ་ཡ་ནི་དམ་ཚིག སྟཾ་ནི་ཁྱོད། ཧོ་ནི་ངོ་མཚར་བ། སིདྡྷི་གྲུབ་པ། བཛྲ་ནི་རྡོ་རྗེ། ཡཱ་ཐ་ནི་ཇི་ལྟ་བ་བཞིན། སུ་ཁ་ནི་བདེ་བ་སྟེ། ཤིན་ཏུ་དགའ་བའི་དམ་ཚིག་བསྐྱེད་པ་ཁྱོད་ངོ་མཚར་གྲུབ་པའི་རྡོ་རྗེ་ཇི་ལྟ་བ་བཞིན་བདེ་བ་ཡིན་ནོ་ཞེས་པ་སྟེ། ཕྲེང་བ་ཕྱི་མ་བ་རྣམས་ཀྱིས། ཤིན་ཏུ་དགའ་བའི་དམ་ཚིག་ཉིད། །དངོས་གྲུབ་རྡོ་རྗེ་ཇི་བཞིན་ཏེ། །ཞེས་བསྒྱུར་བ་དང་། ཡོ་ག་བ་རྣམས། ཤིན་ཏུ་དགའ་བའི་རྡོ་རྗེའི་དམ་ཚིག་ཉིད། ཐབས་ཇི་ལྟ་བ་བཞིན་དུ་བདེ་བ་དང་ལྡན་པས་བསྒྲུབ་པར་གྱིས་ཤིག་ཅེས་པ་ལྟར་རོ། །ལུགས་འདིས་ཧོ་ནི་ཐབས་སུ་བསྒྱུར་པར་སྣང་ངོ་། །གཉིས་པ་གསང་བར་གདམས་པ་ནི། སྤྱི་བོ་རྡོ་རྗེ་བཞག་ལ། དེང་ཁྱོད་ངས་དཀྱིལ་འཁོར་འདིར་བཅུག་ལ་དབང་བསྐུར་ན་དེ་བཞིན་གཤེགས་པ་ཐམས་ཅད་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་པར་འགྱུར་གྱིས། དཀྱིལ་འཁོར་འདི་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་ཆེན་དམ་པ་ཡིན་ན། སོ་སོ་སྐྱེ་བོ་རྣམས་ཀྱི་གསང་བར་བྱ་བ་སྨོས་ཀྱང་ཅི་དགོས། ད་ཁྱོད་ཐེག་པ་ཆེན་པོའི་སེམས་བསྐྱེད་དང་ལྡན་ཞིང་། སྔགས་ཀྱི་སྤྱོད་པ་དང་ལྡན་པར་ཁས་ལེན་གྱིན་འདུག་པས་ངས་དཀྱིལ་འཁོར་འདིར་འཇུག་པ་ཡིན་ནོ། །ཁྱོད་ཀྱིས་དཀྱིལ་འཁོར་འདི་འདྲ་ཞིག་གོ །དབང་བསྐུར་བ་དང་། སྔགས་ཀྱི་སྤྱོད་པ་འདི་འདྲ་ཞིག་གོ་ཅེས། དཀྱིལ་འཁོར་དུ་མ་ཞུགས་པ་རྣམས་དང་། ཞུགས་ཀྱང་རྩ་བའི་ལྟུང་བ་བྱུང་ནས་དམ་ཚིག་ཉམས་པ་དང་། མུ་སྟེགས་བྱེད་དང་། ཉན་ཐོས་ལ་སོགས་པ་རྣམས་ཀྱི་མདུན་དུ་སྨྲ་བར་མ་བྱེད་ཅིག་ཅེས་པའོ། །དམ་གཞག་དང་འདི་ལ་ཁྱད་པར་ཅི་ཡོད་སྙམ་ན། བཟང་པོ་ཡོངས་གཟུང་དང་། ནས་གླིང་མ་གཉིས་ལས། དམ་གཞག་ལས་འདི་ལོགས་སུ་མི་མཛད་ཀྱང་། རིན་ཆེན་འབར་བ་དང་། ནག་པོའི་གཞུང་འགྲེལ་གཉིས་ལས། སྐབས་འདིར་མཛད་པ་ལྟར་དབང་ཆུར་ཡང་། དམ་གཞག་ལས་ལོགས་སུ་སྐབས་འདིར་མཛད་པར་སྣང་བའི་ཁྱད་པར་ནི་འདིར་ཕན་ཡོན་དང་ཉེས་དམིགས་སོགས་ཀྱི་རྒྱུ་མཚན་མ་བཀོད་པར་སྤྱིར་མ་སྨྲ་ཞིག ཅེས་བརྗོད་པ་ཙམ་ཡིན་ལ། དམ་གཞག་གི་སྐབས་སུ་ནི་སྨྲས་པའི་ཉེས་དམིགས་དང་། མ་སྨྲས་པའི་ཕན་ཡོན་བསྟན་པའི་སྒོ་ནས་དམ་ལ་གཞག་པའོ། །གསུམ་པ་གཽ་རཱི་ལ་སོགས་པའི་སྦྱོར་བས་ནང་དུ་འོང་དུ་གཞུག་པ་ནི། དཀྱིལ་འཁོར་ཁང་པ་ཉིས་རིམ་ཡོད་ན་མིག་དར་དང་བཅས་བཞིན་དུ་སློབ་དཔོན་གྱི་ལག་གི་རྡོ་རྗེ་ལ་འཇུས་ནས། ཁང་པ་ནང་མའི་ནང་དུ་ཁྲིད་ནས་གྲལ་རིམ་བཞིན་དུ་བཀོད་པ་ཡིན་ལ། དེ་འདྲ་མེད་ན་ཡོལ་བ་བསལ་ནས་སློབ་དཔོན་གྱི་ལག་གི་རྡོ་རྗེ་ལ་འཇུ་བ་རེ་བྱས་ཏེ། ཧཱུྃ་ཛཿཧཱུྃ་ཞེས་བརྗོད། དེ་ལ་ཧཱུྃ་ནི་ཡི་དམ་ལྷའི་ས་བོན་ཡིན་ལ། ཛཿཧཱུྃ་ནི་དེ་གང་དུ་བཞུགས་པའི་དཀྱིལ་འཁོར་གྱི་སྒོ་དྲུང་དུ་གཞུག་པའི་དོན་ཏོ། །སྤྲོས་པ་ལ་དགའ་ན། ལྷ་མོ་བཞིའི་སྔགས་བརྗོད་དེ། སློབ་དཔོན་གྱིས་ཁྲིད་པ་བཞིན་དུ་ལྷ་མོ་བཞིས་ཀྱང་ཁྲིད་པར་བསམས་ཏེ། རིན་ཆེན་འབར་བ་ལས། གཽ་རཱི་ལ་སོགས་རང་སྔགས་ཀྱིས། །དམ་པས་དགུག་དང་གཞུག་པར་བྱ། །ཡི་གེ་ལྔ་ཡང་དེ་བཞིན་དུ། །བརྗོད་དེ་དམ་ཚིག་མཆོག་འཛིན་གཞུག །ཅེས་གསུངས་པ་དང་མཐུན་ནོ། །དཀྱིལ་ཆོག་འགའ་ཞིག་ཏུ། ཨཱ་ཁྃ་ཝཱི་ར་ཧཱུྃ་གི་སྔགས་བརྗོད་པར་བཤད་པའང་འདི་དང་མཐུན་པར་སྣང་ཞིང་། དཀྱིལ་ཆོག་འདི་ལྟར་ན། གཽ་རཱི་ལ་སོགས་པའི་སྔགས་དང་། འཇུག་སྔགས་གཉིས་ཀ་བརྗོད་དགོས་པར་སྣང་ངོ་། །གཉིས་པ་ཡོལ་བའི་ནང་ནས་དཀྱིལ་འཁོར་དུ་འཇུག་པ་ལ་བཞི་སྟེ། སྔོན་འགྲོ་དམ་ལ་གཞག་པ། དངོས་གཞི་ཡེ་ཤེས་དབབ་ཅིང་བརྟན་པར་བྱ་བ། མེ་ཏོག་གི་ཕྲེང་བ་དབུལ་ཞིང་མགོ་ལ་བཅིང་བ། མིག་ཕྱེ་ནས་དཀྱིལ་འཁོར་བསྟན་པའོ། །དང་པོ་ལ་ཕན་ཡོན། ཉེས་དམིགས། གཉིས་ཀ བླ་མའི་བཀའ་གཉན་པའི་སྒོ་ནས་དམ་ལ་གཞག་པ་བཞི་ལས། དང་པོ་ནི། སློབ་དཔོན་གྱིས་སློབ་མའི་སྤྱི་བོར་རྡོ་རྗེ་བཟུང་ལ། ཡེ་ཤེས་གང་གིས་ཞེས་སོགས་བརྗོད། སློབ་མ་མང་པོ་ཡོད་ན་དེ་བཞིན་དུ་ནི་སློབ་མ་རེ་རེ་ཞིང་བྱ་སྟེ། དེའི་དོན་གོ་བར་བྱའོ། །བདག་མེད་མའི་བྱིན་རླབས་ཀྱི་སྐབས་སུ། དམ་གཞག་ཐུན་མོང་དུ་ཕན་ཡོན་གྱི་སྒོ་ནས་དམ་ལ་གཞག་པ་སོགས་རེ་རེ་བྱེད། སྒོས་སུ་མི་རེ་རེ་ལ་ཚང་བར་མི་མཛད་ཅེས་གསུངས་པ་དང་། དབང་ཆུར་སྔ་མ་ལྟར་གསུངས་པའི་འགྲོས་ཀྱིས། རྒྱུ་དུས་སུ་མི་རེ་རེ་ལ་ཚར་རེ་མཛད་དགོས་པར་སྣང་ངོ་། །ངས་དཀྱིལ་འཁོར་འདིར་བཅུག་ཅིང་དབང་བསྐུར་ན། དབང་གི་ཡེ་ཤེས་སྐྱེས་པ་གང་གིས་ཁྱོད་དེ་བཞིན་གཤེགས་པ་ཐམས་ཅད་དེ། ཕྱག་ཆེན་མཆོག་གི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་རལ་གྲི་དང་། ས་འོག་ལ་སོགས་པ་ཐུན་མོང་གི་དངོས་གྲུབ་ལྟ་སྨོས་ཀྱང་ཅི་དགོས་ཞེས་སོགས་སོ། །གཉིས་པ་ནི། སྙིང་གར་རྡོ་རྗེ་བཞག་ལ། ཧཱུྃ་ཧེ་རུ་ཀ་དཔལ་དེང་ཁྱོད་ཀྱི། །ཞེས་སོགས་བརྗོད། འདི་ལ་དགྲ་ནག་ཞང་ལུགས་པས། དབང་བསྐུར་བའི་དུས་སུ་རྡོ་རྗེ་སེམས་དཔའ་དེང་ཁྱོད་ཀྱི་སྙིང་གི་དཀྱིལ་ན་ཡང་དག་པར་ཞུགས་པར་གྱུར་པ་དེ། དམ་ཚིག་བསྲུངས་ན་སྙིང་གི་དཀྱིལ་དུ་བཞུགས་ལ། མ་བསྲུངས་ན་རྡོ་རྗེ་སེམས་དཔའ་དེ། ཁྲོ་བོ་རྡོ་རྗེ་མེ་དབལ་ཞེས་བྱ་བའི་གནོད་སྦྱིན་ཆེན་པོ་ཞིག་ཏུ་གྱུར་ཏེ། ཁྱོད་ཀྱི་སྙིང་དུམ་བུ་བཞིར་ཕྲལ་ཏེ་གཤེགས། ཞེས་འཆད་པ་དང་། ཡོ་གར་སེམས་མ་རྡོ་རྗེ་མའི་ཕྱག་རྒྱ་སྙིང་གར་གཏུགས་ཏེ། ཚིག་རྐང་དང་པོ་གཉིས་བརྗོད། ཚིག་རྐང་ཕྱི་མ་གཉིས་བརྗོད་པའི་ཚེ་ཕྱག་རྒྱ་བཀྲོལ་ཏེ། སེ་གོལ་གཏོགས་པའང་བཤད་པ་ནི་རྣམ་པ་འཆར་བའི་ཆེད་དུ་བྱེད་པར་སྣང་ངོ་། །སླར་ཡང་སྤྱི་བོར་རྡོ་རྗེ་བཟུང་ལ། འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཞེས་སོགས་བརྗོད་དེ་དོན་ནི་གོ་སླའོ། །གསུམ་པ་ནི། ནང་མཆོད་དམ་བུམ་པ་ཀུན་གྱི་ཆུ་བསྡུས་པ་རྣམ་རྒྱལ་བུམ་པའི་སྟེང་དུ་བཞག་པ་ལ། བདུད་རྩི་ལྔ་བསྲེས་པའམ། ཌོཾ་བི་ལུགས་ཀྱི་དཀྱིལ་ཆོག་ལྟར་ན་ས་ཆོག་གི་སྐབས་སུ་བསྒྲུབས་པའི་བདུད་རྩིའི་ཆུ་སློབ་མའི་ཁྱོར་བ་གཡས་པར་བླུགས་སྟེ། འདི་ནི་ཁྱོད་ཀྱི་དམྱལ་བའི་ཆུ། །ཞེས་སོགས་བརྗོད་དེ། ཚིག་རྐང་དང་པོ་གཉིས་ཀྱིས་མ་བསྲུངས་པའི་ཉེས་དམིགས་དང་། ཕྱི་མ་གཉིས་ཀྱིས་བསྲུངས་པའི་ཕན་ཡོན་བསྟན་ནོ། །སྔགས་དོན་ལ་པཉྩ་ཨ་མྲི་ཏ་བདུད་རྩི་ལྔ། ཨུ་ད་ཀ་ནི་ཆུ། ཋ་གསུམ་ནི་མནའ་དགག་པའི་ཚིག་སྟེ། བྷ་ཝ་བྷ་དྲས། རྡོ་རྗེ་མཁའ་འགྲོའི་འགྲེལ་པ་དང་། བི་བྷུ་ཏ་ཙནྡྲའི་དཀྱིལ་ཆོག་ལས་ཧཱུྃ་གསུམ་དུ་བསྒྱུར་བ་མ་གཏོགས། དཀྱིལ་ཆོག་གཞན་ཕལ་ཆེ་བ་དང་། བླ་མ་གོང་མ་རྣམས་ཀྱི་སྔ་མ་ལྟར་བཤད་དོ། །བཞི་པ་ནི། སློབ་མའི་སྤྱི་བོར་རྡོ་རྗེ་བཟུང་ལ་དེང་ཕྱིན་ཆད་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ཞེས་སོགས་བརྗོད། དེའང་དཀྱིལ་འཁོར་དུ་བཅུད་པ་དང་། དབང་བསྐུར་བར་བྱས་ཕྱིན་ཆད་བྱེད་པ་པོ་དེ་གང་ལ་བརྙས་ན་རྩ་བའི་ལྟུང་བ་འབྱུང་བ་དང་། ཚུལ་བཞིན་དུ་གསོལ་བ་བཏབ་ན་མཆོག་གི་དངོས་གྲུབ་འབྱུང་བའི་ཡུལ་ཡིན་པས། དེས་གང་བསྒོ་བ་ནི་འཕྲལ་གྱི་སྤྱོད་པ་ཕྲན་ཚེགས་ཚུན་ཆད་ཀྱང་ཡིན་མོད་ཀྱི། གཙོ་བོ་ནི་དགེ་མི་དགེའི་བླང་དོར་བསྟན་པའོ། །དེས་ན་ཡུལ་དེ་ལ་བརྙས་ན་རྩ་ལྟུང་དང་པོ་དང་། དེའི་བཀའ་ལས་འདས་ཏེ། སྡོམ་པ་འོག་མ་གཉིས་ཀྱི་རྩ་བ་དང་། ཡན་ལག་གི་ལྟུང་བ་སྦྱོང་ན། བདེ་གཤེགས་བཀའ་འདས་སམ། སྡོམ་པ་གཉིས་ཀྱི་བཅས་པ་ལ། དགོས་པ་མེད་པར་འདའ་བའི་ཡན་ལག་གི་ལྟུང་བ་འབྱུང་བའོ། །དེས་ན་འདི་ནི་དམ་གཞག་གི་གཙོ་བོ་ཡིན་ལ། སྔ་མ་གསུམ་ནི་ཕན་ཡོན་སོགས་བརྗོད་པས་ཡན་ལག་ཡིན་ནོ། །དམ་གཞག་དང་པོའི་རྡོ་རྗེ་ཡེ་ཤེས་དང་། གཉིས་པའི་ཧེ་རུ་ཀ་དཔལ་དང་། གསུམ་པའི་དམ་ཚིག་དང་། བཞི་པའི་གང་བསྒོ་བའི་གཙོ་བོ་རྣམས་ནི་འཇུག་པ་དང་། དབང་གི་དངོས་གཞི་ཇི་ཙམ་བསྐུར་བའི་སྐབས་སུ་ཐོབ་པའི་རྡོ་རྗེ་ཡེ་ཤེས་རྣམས་ལ་ངོས་གཟུང་བ་བྱ་ཡི། ཡེ་ཤེས་དབབ་པ་ཁོ་ནའི་དམ་གཞག་ཏུ་ནི་མི་བལྟའོ། །དམ་གཞག་དང་པོ་གསུམ་གྱི་སྐབས་སུ་རེ་རེ་ལའང་ཕན་ཡོན་དང་། ཉེས་དམིགས་གཉིས་ཀ་བརྗོད་པ་ཡོད་མོད་ཀྱི་གཙོ་ཆེ་བའི་སྒོ་ནས་དེ་དང་དེར་བཞག་པ་ཡིན་ལ། དཀྱིལ་ཆོག་འགའ་ཞིག་ཏུ་དང་པོ་ལ་ཕན་ཡོན་གྱི་སྒོ་ནས་དམ་ལ་གཞག་པ་དང་། གཉིས་པ་ལ་གཉིས་ཀའི་སྒོ་ནས་དམ་ལ་གཞག་པ་དང་། གསུམ་པ་ལ་མནའ་ཆུ་བླུད་བའི་སྒོ་ནས་དམ་ལ་གཞག་པ་ཞེས་པའི་ཐ་སྙད་མཛད་པར་རུང་བའི་གནད་ཀྱང་འདི་ཉིད་ཡིན་ནོ། །ཡོལ་བའི་ཕྱི་འཇུག་དང་། ནང་འཇུག་གི་སྐབས་འདི་དག་ལ། གསང་བར་གདམས་པ་དང་། དམ་གཞག་གཉིས་པོ་གཅིག་ཏུ་མཛད་པ་གྲུབ་ཆེན་དཔལ་འཛིན་གྱི་ལུགས་ལྟ་བུ་དང་། ཡོ་གར་བྱིན་གྱིས་རློབ་པའི་ཕྱག་རྒྱ་བཞི་བྱེད་པ་དང་། གདན་བཞིར་རྡོ་རྗེ་སློབ་དཔོན་ལ་ལུས་འབུལ་བའི་ཕྱིར་དང་། སེམས་ཅན་ཐམས་ཅད་བསྐྱབ་པའི་ཕྱིར་དང་། སློབ་དཔོན་གྱི་དྲིན་དྲན་པའི་ཆེད་དུ་ཕྱག་གསུམ་བྱེད་པར་བཤད་པ་དང་། ཕྲེང་བར་དཀྱིལ་འཁོར་ལྔ་པའི་ཕྱག་བྱེད་པར་བཤད་པ་ལས། རིན་པོ་ཆེ་བུ་སྟོན་གྱིས་དཀྱིལ་ཆོག་གཅིག་གི་སྟེང་དུ་ཐམས་ཅད་མཛད་ཀྱང་གང་བཤད་པ་དེར་བྱ་ཡི། མ་བཤད་པ་དེར་མི་བྱའོ་ཞེས་གསུང་ངོ་། །གཉིས་པ་དངོས་གཞི་ཡེ་ཤེས་དབབ་ཅིང་བརྟན་པར་བྱ་བ་ལ། གང་གིས་འབེབས་པའི་གང་ཟག ཇི་ལྟར་དབབ་པའི་ཆོ་ག མ་ཕེབས་ན་སྤོགས་པའི་ཆོ་ག བབ་པའི་ཡེ་ཤེས་ངོས་གཟུང་བ། མཇུག་བརྟན་པར་བྱ་བ་དང་ལྔ་ལས། དང་པོ་ནི། ཟུང་འཇུག་གསལ་བ་ལས། དེ་ནས་གལ་ཏེ་སློབ་དཔོན་གྱིས་ཡེ་ཤེས་འབེབས་པའི་ཆོ་གའི་ནུས་པ་ཐོབ་པར་གྱུར་ན། དེ་ལྟར་ན་གྲུབ་པའི་སློབ་དཔོན་ཀླུའི་བྱང་ཆུབ་ཀྱིས་རྣམ་པར་སྤེལ་བའི་དཀྱིལ་འཁོར་གྱི་ཆོ་གས་དབབ་སྟེ། དེས་ན་འདིར་ནི་མ་སྨོས་སོ་ཞེས་བཤད་པ་དང་། ཨ་བྷ་ཡས་དངོས་གྲུབ་ལ་སོགས་པ་ངེས་པའི་དོན་དུ། སློབ་མ་དང་སྣོད་ལ་ལྷ་དབབ་པའི་བར་བྱའོ། །དེ་ལ་དང་པོར་རི་ལ་སོགས་པའི་ཡིད་དང་རྗེས་སུ་མཐུན་པའི་གནས་སུ། སྔོན་དུ་བསྙེན་པ་བྱས་ཤིང་སེམས་བརྟན་པས་རྡོ་རྗེ་སེམས་དཔའ་རྣལ་འབྱོར་ཤིན་ཏུ་བརྟན་པར་དམིགས་ནས། དབབ་པའི་ནུས་པ་ཐོབ་པ་ཡིས། མཚན་ཉིད་ཐམས་ཅད་དང་ལྡན་པའི་སློབ་མ་ལ་ལྷ་དབབ་པར་བྱ་ཞེས་བཤད་པས། སློབ་དཔོན་གྱིས་ཡེ་ཤེས་འབེབས་པའི་ནུས་པ་ཐོབ་ན་འབེབས། མ་ཐོབ་ན་མི་དབབ་པར་བཤད་པ་ལྟ་བུར་སྣང་ངོ་། །དེ་བཞིན་དུ་དུས་འཁོར་བ་རྣམས་ལ་ཡེ་ཤེས་འབེབས་པའི་བསྙེན་པའི་སྲོལ་ཡོད་ཅིང་། གྲུབ་ཆེན་དྷ་རི་ཀ་པས། བདེ་མཆོག་གི་དཀྱིལ་ཆོག་ཏུ་ཡེ་ཤེས་འབེབས་པའི་བསྙེན་པ་བྱེད་ཟེར་བའི་བཤད་པ་ཡོད་ཀྱང་། འདི་ལྟར་བྱེད་ཀྱི་གསལ་ཁ་མི་སྣང་ངོ་། །དགྲ་ནག་ཞང་ལུགས་པ་རྣམས་དང་པོར་གཞིའི་བསྙེན་པ་ཁ་བསྐང་དང་བཅས་པ་སོང་ནས། གང་ཟག་དེ་རྡོ་རྗེ་སློབ་དཔོན་བྱེད་པའི་ཁུར་དང་ལྡན་པ་ཡིན་ན། ཡེ་ཤེས་འབེབས་པའི་བསྙེན་པ་བྱེད་དེ། དེའང་རང་ཉིད་འདོད་ཆགས་གཤིན་རྗེའི་གཤེད་དུ་བསྒོམས་པའི་རྐང་པའི་འོག་ཏུ་རླུང་གི་དཀྱིལ་འཁོར་བསྒོམ་པ་སོགས་ཡེ་ཤེས་འབེབས་པའི་དམིགས་པ་རྣམས་བྱས་ལ། ཧྲཱིཿཥྚིའི་རྗེས་སུ་ཏིཥྛ་མ་ཧཱ་ཀྲོ་དྷ་ཨཱ་བེ་ཤ་ཡ་བཏགས་པ་འབུམ་ཕྲག་གཅིག་ཁ་བསྐང་གི་སྦྱིན་སྲེག་དང་བཅས་པ་བྱས་ན་དེས་ཡེ་ཤེས་ཕབ་པའི་ཚེ། སློབ་མ་རྣམས་དང་། ཡུལ་དེ་ན་ཡོད་པའི་དུད་འགྲོ་རྣམས་ལའང་ཡེ་ཤེས་བབས་པ་ཡོད་པར་སྣང་ངོ་། །ལུགས་དེ་གཞན་ལ་སྦྱར་ནའང་རིགས་པར་སྣང་སྟེ། གཞི་བསྙེན་སྔོན་དུ་སོང་ནས་སྐྱབས་འགྲོ་སེམས་བསྐྱེད་དང་། ཚོགས་གཉིས་བསགས་པའི་རྗེས་སུ་རང་ཉིད་འོད་དཔག་མེད་ཀྱི་རིགས་ཀྱི་ལྷ་གང་ཡིན་པར་བསྐྱེད་པའམ། ཀྱེ་རྡོར་དང་བདེ་མཆོག་ལྟ་བུ་དཀྱིལ་འཁོར་གྱི་གཙོ་བོ་བསྒོམས་ནས། ཡེ་ཤེས་འབེབས་པ་ཡོད་པ་རྣམས་ལ་ནི་དེ་ཉིད་ཀ་བསྒོམས་ཏེ། རྐང་པའི་འོག་ཏུ་རླུང་གི་དཀྱིལ་འཁོར་བསྒོམས་པ་ལ་སོགས་ཡེ་ཤེས་འབེབས་པའི་དམིགས་པ་རྣམས་བསྒོམས་ནས། ཡི་དམ་ལྷའི་སྙིང་པོའི་མཇུག་ཏུ་ཡེ་ཤེས་དབབ་པའི་སྔགས་བཏགས་ལ་བསྙེན་པ་བྱས་ན་ཤིན་ཏུ་ལེགས་པར་སྣང་ངོ་། །འོ་ན་ཡེ་ཤེས་འབེབས་པའི་བསྙེན་པ་མ་བྱས་པའམ། ནུས་པ་མ་ཐོབ་པས་ཡེ་ཤེས་ཕབ་པའི་ཆོ་ག་མི་རུང་ངམ་སྙམ་ན། དེ་ནི་མ་ཡིན་ཏེ། དེ་ལྟར་ན་ནང་འཇུག་གི་དངོས་གཞིའི་ཆོ་ག་ཆད་པར་འགྱུར་བའི་ཕྱིར་དང་། བསྙེན་པ་མ་སོང་ཡང་ཆོ་ག་མཚན་ཉིད་དང་ལྡན་པ་བྱས་ནས་སློབ་མ་ལ་ཡེ་ཤེས་བབས་པའི་རྟགས་རྣམས་འབྱུང་བར་ད་ལྟའང་སྣང་བའི་ཕྱིར་རོ། །གཉིས་པ་ནི། ཐོག་མར་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག དཔལ་ཧེ་རུ་ཀ་བདག་ལ་དབབ་ཏུ་གསོལ། ཞེས་སོགས་དཀྱིལ་འཁོར་གྱི་གཙོ་བོ་སོ་སོའི་འདོན་པ་བསྒྱུར་བའི་གསོལ་བ་གདབ་པ་ནི། དཀྱིལ་ཆོག་ཀུན་ཏུ་འབྱུང་ལ། སྐབས་འདིར་མཎྜལ་འབུལ་བ་ནི། ཌོཾ་བི་ལུགས་ཀྱི་དཀྱིལ་ཆོག་གཉིས་དང་། ནག་པོ་པ་དང་། མཚོ་སྐྱེས་ཀྱི་དཀྱིལ་ཆོག་དང་། དབང་ཆུ་གཉིས་དང་། རྗེ་བཙུན་གྱི་ནག་པོའི་དཀྱིལ་ཆོག་རྣམས་ལས་མི་འབྱུང་ཡང་། ཕྱག་ལེན་ལ་མཛད་པར་སྣང་བ་ནི། རྗེ་བཙུན་རྩེ་མོས་དྲིལ་བུ་པའི་དཀྱིལ་ཆོག་ཏུ་དམ་གཞག་གི་སྔོན་དུ་མཎྜལ་འབུལ་བར་བཤད་པས་དེ་ལ་བརྟེན་པར་སྣང་ངོ་། །དེ་ནས་དམིགས་པ་ནི། བཟང་པོ་ཡོངས་གཟུང་ལས། སེམས་ནི་རབ་ཏུ་དགའ་བྱའི་ཕྱིར། །གལ་ཏེ་འབེབས་པར་བྱེད་ན་ནི། །སྙིང་གར་རླུང་གི་དཀྱིལ་འཁོར་ལ། །རླུང་གི་ས་བོན་རྣམ་པར་བསྒོམ། །རྐང་པའི་མཐིལ་ནས་རླུང་གིས་བཏེག །དེ་ཡིས་སྙིང་གར་བསྐུལ་བར་བྱ། །ཞེས་པ་ཙམ་ལས་མ་གསུངས་ཤིང་། སྤྱོད་པའི་རྡོ་རྗེས། བདེ་མཆོག་དཀྱིལ་ཆོག་དང་། ནས་གླིང་མར་སྙིང་གའི་ས་བོན་ལས་འོད་ཟེར་འཕྲོས་ནས། དཀྱིལ་འཁོར་གྱི་ལྷ་ཚོགས་དབབ་པ་ལས་གཞན་མ་གསུངས་སོ། །ནག་པོ་པའི་གཞུང་འགྲེལ་དང་རིན་ཆེན་འབར་བ་ལས། དབང་ཆུ་གཉིས་ལས་འབྱུང་བ་ལྟར་གྱི་དམིགས་པ་གསལ་བར་གསུངས་པ་ལས། དེ་དག་གི་ལྟར་ན་སློབ་དཔོན་གྱིས་སློབ་མ་ལ་འདི་ལྟར་བསྒོ་སྟེ། ཁྱོད་དངོས་པོ་གང་ལའང་སྙིང་པོ་མེད་པར་སོམས་ལ། གང་ལའང་ཡིད་མ་བཞག་ཅིག རྡོ་རྗེ་སློབ་དཔོན་ལ་དཔལ་རྡོ་རྗེ་སེམས་དཔའ་ཡིན་སྙམ་པའི་འདུ་ཤེས་བསྐྱེད་ལ། མོས་གུས་དྲག་ཏུ་བསྐྱེད་པ་གྱིས་ཤིག ལུས་ཀྱི་སྤྱོད་ལམ་ཡང་ཙོག་པུར་ཕན་ཚུན་གཅིག་ལ་གཅིག་མ་རེག་པར་འདུག་ལ་གང་ལའང་མ་སྙེས་པར་སྡོད་ཅིག་སེམས་ཀྱིས་རང་ཉིད་ལངས་ནས་ཡོད་པར་བསྒོམས་ལ་རྐང་པ་གཉིས་བགྲད་པའི་འོག་ཏུ་རླུང་གི་དཀྱིལ་འཁོར་གཞུ་བདུངས་པ་ལྟ་བུ་ཁ་དོག་སྔོན་པོ་ཆང་གཟུང་ཐུར་དུ་བསྟན་པ། དེའི་མཆོག་མ་གཉིས་ཀྱི་སྟེང་དུ་རྐང་པ་བགྲད་ནས་འདུག་པའི་བར་དེར་མེའི་དཀྱིལ་འཁོར་རབ་ཏུ་འབར་བ། རྐང་མཐིལ་དུ་ཡི་གེ་ཛྷྱཻཾ་ཞེས་བྱ་བ་ལྗང་གུ་བསམ། སྙིང་གར་ལྃ་ལས་བྱུང་བའི་སའི་དཀྱིལ་འཁོར་གྲུ་བཞི་པ་ཁ་དོག་སེར་པོ་ཟུར་བརྒྱད་ལ་རྡོ་རྗེ་རྩེ་གསུམ་པས་རྒྱ་གྲམ་གྱིས་མཚན་པའི་ལྟེ་བ་ལ་ཧཱུྃ་བསམ། མགྲིན་པར་བྃ་ལས་བྱུང་བའི་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ་ལ་ཨ་བསམ། སྤྱི་བོར་ཐོད་པ་ལ་ཡྃ་ལས་བྱུང་བའི་རླུང་གི་དཀྱིལ་འཁོར་དུ་བ་འཁྲིགས་པ་ལྟ་བུའི་དབུས་སུ་ཧས་མཚན་པར་བསམ། དེ་ནས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རྐང་འོག་གི་རླུང་གི་བ་དན་ལ་ཕོབ། རླུང་འགུལ་བས་སུམ་མདོའི་མེ་སྦར་བས། མེ་དེས་ཛྷྱཻཾ་མེར་གྱུར་པ་དེ་ལོང་བུའི་རྩ་ནང་ནས་ཡར་ཞུགས་ཏེ། ལྟེ་བའི་འོག་སུམ་མདོའི་གནས་སུ་འཛོམ་སྟེ་འབར་བས། དེའི་སྟོབས་ཀྱིས་སྙིང་གའི་སའང་ཚ་ལམ་གྱིས་བསྲོས་པས། མགྲིན་པའི་ཆུ་བསྐོལ་ཏེ། རྐང་པའི་རླུང་གིས་གྱེན་ལ་འདེགས། སྤྱི་བོའི་རླུང་གིས་ཐུར་ལ་གནོན་པར་བསམས་ལ། དེའི་དུས་སུ་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད་བྱོན་ཏེ། ཁ་བ་ཆེན་པོ་བབས་པ་བཞིན་བ་སྤུའི་བུ་ག་ནས་ལུས་ལ་སིབ་སིབ་ཞུགས་པར་སྒོམས་ཤིག་ཅེས་བསྒོ་ལ། སློབ་མས་ཀྱང་དེ་ལྟར་བསྒོམ། སློབ་དཔོན་གྱིས་སློབ་མ་རེ་རེ་ནས་ཧཱུྃ་ཨ་ཧ་ཛྷྱཻཾ་ཞེས་བརྗོད་དེ་སློབ་མ་རེ་རེ་ནས་སྙིང་གའི་ཧཱུྃ་དང་། མགྲིན་པའི་ཨ་དང་། སྤྱི་བོའི་ཧ་དང་། ལོང་བུའི་ཛྷྱཻཾ་རྣམས་གསལ་བཏབ་ལ། བྱི་ལའི་བྲུན། འདོམས་དཀྲིས་ཀྱི་རས་ཟླ་མཚན་དང་ལྡན་པ་གུ་གུལ་དང་བསྲེས་པའམ། དེ་མེད་ནའང་གུ་གུལ་གྱི་དུད་པས་བདུག་ཅིང་། རྡོ་རྗེ་གསོར་དྲིལ་བུ་གསིལ་ཏེ། ཨཱ་བེ་ཤ་ཡ་སཏྭཾ་བྷ་ཡ། ར་ར་ར་ར་ཙཱ་ལ་ཡ་ཙཱ་ལ་ཡ། ཧཱུྃ་ཨ་ཧ་ཛྷྱཻཾ་ཞེས་བརྗོད་ཅིང་དམིགས་པ་མ་ཡེངས་པར་བྱས་ན་བབས་པར་འགྱུར་རོ། །སྔགས་འདི་གསང་བ་འདུས་པའི་རྒྱུད་ལས་གསུངས་པ་ཡིན་ལ། ཨཱ་བེ་ཤ་ཡ་ནི་ཕོབ་ཅིག་སཏྭཾ་བྷ་ཡ་ནི་རེངས་པ་ལ་འཇུག་ལ། སྒྲོན་གསལ་གྱི་རྩ་ཚིག་འགའ་ཞིག་ལས། སྟོ་པ་ཡ་སྟོ་པ་ཡ་ཞེས་འབྱུང་བ་ལྟར་ན་ལུས་གཏོད་པར་གྱིས་གཏོད་པར་གྱིས། ར་ར་ར་ར་ནི་ངག་སྒྲ་སྒྲོགས་པར་གྱིས་གཉིས། ཙཱ་ལ་ཡ་ཙཱ་ལ་ཡ་ནི་སེམས་བསྐྱོད་པར་གྱིས་གཉིས། ཧཱུྃ་སོགས་ནི་སྔ་མ་བཞིན་ནོ། །ཌོཾ་བི་དཀྱིལ་ཆོག་ལས། གདན་བཞི་ནས་འབྱུང་བའི་ཨོཾ་ལོ་ལི་ལོ་ལི་ཧཱུྃ་ཨ་ཞེས་པས་དབབ་པར་གསུངས་སོ། །འདི་དག་གི་དམིགས་པའི་ཁྱད་པར་ལ་སྙིང་གའི་ས་བསྲོས་པའི་ཚེ་ལུས་དྲོད་ཀྱི་རང་བཞིན་དང་། མགྲིན་པའི་ཆུ་ཁོལ་ཏེ་སའི་དཀྱིལ་འཁོར་ལ་འཛག་པས་ལུས་བདེ་བའི་རང་བཞིན་དུ་གྱུར་ཏེ། བདེ་དྲོད་གཉིས་པོ་དེའི་རྐྱེན་གྱིས་རང་སེམས་དང་ཡུལ་སྣང་ཐམས་ཅད་བདེ་སྟོང་གི་ངང་དུ་ཐིམ་པར་ཅི་ནུས་སུ་བསམ། དེའི་ངང་ལས་སྔར་གྱི་དམིགས་པ་བྱ་བར་གསུངས་སོ། །གསུམ་པ་ནི། དེ་ལྟར་བྱས་ཀྱང་མ་ཕེབས་ན། ལུགས་འདི་ལ་ནི་སྔར་གྱི་དམིགས་པ་བསྐྱར་ནས། སྔར་གྱི་སྔགས་བདུན་ནམ་ཉེར་གཅིག་བཟླ། དེས་ཀྱང་མ་ཕེབས་ན་སྔགས་བརྒྱ་རྩ་བརྒྱད་མ་སོང་གིས་བར་དུ་བསྐྱར་གྱིན་དབབ། དེས་ཀྱང་མ་ཕེབས་ན། བླ་མ་ལ་མི་གུས་པའམ། བགེགས་ཀྱིས་བརླབས་པ་ཡིན་པས་སློབ་མའི་སྤྱི་བོར་བླ་མ་མཉམ་གཞག་གི་ཕྱག་རྒྱ་དང་། སྐྱིལ་མོ་ཀྲུང་གིས་བཞུགས་པར་བསྒོམས་ལ། རྩ་བའི་སྔགས་དྲག་ཏུ་ཉེར་གཅིག་གི་བར་དུ་བཟླས་པས་འབབ་པར་གསུངས། པཎྜི་ཏ་ཛ་ཡ་སེ་ནས་མཁའ་འགྲོ་རྒྱ་མཚོའི་དཀྱིལ་ཆོག་ཏུ་སྤོགས་ཆོག་ཚན་པ་བདུན་ཙམ་བཤད་ཅིང་། ཀླུ་བྱང་གིས་དང་པོར་རོལ་མོ་མི་བྱེད་པར་སེམས་མ་རྡོ་རྗེ་མའི་ཕྱག་རྒྱ་སྙིང་གར་གཏུགས་ཏེ་ཨོཾ་བཛྲ་ཨཱ་བེ་ཤ་ཡ་ཨ་ཨཱ་ཞེས་བརྗོད་ཅིང་དབབ། མ་ཕེབས་ན་སྤོགས་པའི་ཆོ་ག་རོལ་མོ་དང་བཅས་ཏེ་སྔར་གྱི་སྔགས་ཀྱི་སྟེང་དུ་སཏྭཾ་བྷ་ཡ་སོགས་བརྗོད་ཅིང་དབབ་པར་བཤད་དོ། །བཞི་པ་ནི། དེ་ལྟར་བབས་པའི་ཡེ་ཤེས་དེ་གཞན་རྒྱུད་ལ་གྲུབ་ཟིན་པ་ཞིག་བབས་པ་ཡིན་ནམ། རང་རྒྱུད་ཀྱི་ཡེ་ཤེས་གསར་དུ་སྐྱེས་པ་ཡིན། དབང་གི་ཡེ་ཤེས་མཚན་ཉིད་པ་ཡིན་ནམ། བཏགས་པ་བ་ཡིན་སྙམ་ན། གཞན་རྒྱུད་ལ་གྲུབ་ཟིན་པའི་ཡེ་ཤེས་གཟུགས་ཀྱི་རྣམ་པ་ལྷ་ཞལ་ཕྱག་ཅན་ནམ། ཡི་གེ་ཨཱ་ལི་ཀཱ་ལིའི་རྣམ་པས་རང་གི་ལུས་ལ་ཐིམ་པའི་དམིགས་པ་བྱས་པས། རང་གི་སེམས་རྒྱུད་ལ་མྱོང་བ་ཁྱད་པར་ཅན་སྐྱེ་བས་ན། རང་རྒྱུད་ཀྱི་ཡེ་ཤེས་གསར་དུ་སྐྱེས་པ་ཡིན་ནོ། །འོ་ན་ཡེ་ཤེས་ཕབ་པའམ་དབབ་པ་ཞེས་པའི་ཐ་སྙད་མི་འཐད་པར་འགྱུར་རོ་སྙམ་ན། དེ་ནི་དམིགས་པའི་གཙོ་བོ་དེ་ལྟར་བསྒོམས་པའི་ཆ་ནས་མིང་དུ་བཏགས་པ་ཡིན་པས་སྐྱོན་མེད་དོ། །རང་རྒྱུད་ཀྱི་ཡེ་ཤེས་དེའང་དང་པོ་ནས་ཡོད་པ་ཞིག་ཡིན་ནམ། འབྲས་བུ་མཐར་ཐུག་པའི་ཚེ་འབྱུང་བར་འགྱུར་བ་དེ་ཉིད་ཡིན་ནམ། ཞེས་རྒྱུ་འབྲས་སོ་སོར་ཕྱེ་བའི་དཔྱད་པ་ནི་མི་བྱ་སྟེ། དེ་ལྟར་དཔྱད་ན་དེ་ཁོ་ན་ཉིད་ལ་དཔྱོད་པར་སོང་བས་ཐ་སྙད་ཀྱི་རྣམ་གཞག་མི་རྙེད་པར་འགྱུར་བའི་ཕྱིར་ཏེ། དཔལ་ལྡན་ཟླ་བས། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་དུ། །གནས་རྙེད་མ་ཡིན་དེ་ཕྱིར་འཇིག་རྟེན་གྱི། །ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་གསུངས་པས་སོ། །ཡེ་ཤེས་དེ་ཉིད་དབང་གི་ཡེ་ཤེས་མཚན་ཉིད་པ་ཡིན་ཞེས་བརྗོད་པ་ལ་ནི་འགལ་བ་མེད་དེ། དབང་གི་ཡེ་ཤེས་ལ་འཇུག་པའི་སྐབས་སུ་སྐྱེས་པ་དང་། དངོས་གཞིའི་སྐབས་སུ་སྐྱེས་པ་གཉིས་ཡོད་ཅིང་། དེ་ཉིད་རྒྱུ་མཚན་དུ་བྱས་ནས་ཕ་རོལ་ཏུ་ཕྱིན་པ་དང་། གསང་སྔགས་གཉིས་རྟོགས་བྱའི་ལྟ་བ་ལ་ཁྱད་པར་མེད་ཀྱང་། ཡེ་ཤེས་ཕབ་པའི་དུས་ཀྱི་མྱོང་བ་ཁྱད་པར་ཅན་དང་། དབང་གསུམ་པའི་ཡེ་ཤེས་ཀྱི་རྟོག་པ་དང་བྲལ་བའི་ཚུལ་གྱིས་རྟོགས་པ་ཡོད་པས། རྟོགས་ཚུལ་གྱི་སྒོ་ནས་གསང་སྔགས་ཁྱད་པར་དུ་འཕགས་པར་གསུངས་པའི་ཕྱིར་རོ། །བཞི་པ་ནི། སློབ་དཔོན་གྱིས་སློབ་མའི་མགོར་རྡོ་རྗེ་རྒྱ་གྲམ་གྱི་ཚུལ་དུ་བཞག་ནས། ཏིཥྛ་བཛྲ་ཞེས་བརྗོད། འདིར་བཟང་པོ་ཡོངས་གཟུང་ལས། ཨོཾ་ཏིཥྛ་བཛྲ་ས་མ་ཡ་པྲ་ཏི་བ་ལེ་ཏ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་སྭཱ་ཧཱ། ཡེ་ཤེས་ཕབ་པ་ལས་བསྐྱེད་པའི་སྔགས་སོ། །ཞེས་གསུངས་ཤིང་། རིན་ཆེན་འབར་བ་ལས། བབས་པ་དེ་ནི་བརྟན་བྱ་བ། །དེ་ལ་ཏིཥྛ་བཛྲ་བརྗོད། །ཅེས་བརྟན་སྔགས་སུ་གསུངས་སོ། །དེ་དག་གི་དོན་རྗེ་བཙུན་རྩེ་མོས། བརྟན་པར་བྱ་བའི་ཕྱིར་སྤྱི་བོར་རྡོ་རྗེ་བཞག་ལ། སྔགས་འདི་བརྗོད་དེ་དམིགས་པ་གཏོང་དུ་གཞུག་གོ །ཅེས་ཡེ་ཤེས་བརྟན་པ་དང་། དམིགས་པ་གཏོང་བ་གཉིས་ཀའི་སྔགས་སུ་གསུངས་སོ། །གསུམ་པ་མེ་ཏོག་གི་ཕྲེང་བ་དབུལ་ཞིང་མགོ་ལ་བཅིང་བ་ནི། ཐོག་མར་སློབ་དཔོན་གྱིས་དཀྱིལ་འཁོར་གྱི་མདུན་དུ་ལངས་ཏེ། གཡས་རྡོ་རྗེ་དང་བཅས་པས་ཐལ་མོ་དང་། གཡོན་དྲིལ་བུ་བཅད་གཏུབས་སུ་དཀྲོལ་ཏེ། དེ་བཞིན་གཤེགས་པ་ཀུན་གྱི་གནས། །ཞེས་སོགས་ལན་གསུམ་བརྗོད་དོ། །དེ་ལ་ཚིགས་བཅད་དང་པོས་དེ་བཞིན་གཤེགས་པ་ཐམས་ཅད་ཧེ་རུ་ཀའི་རྣམ་པས་བཞུགས་པའི་དཀྱིལ་འཁོར་འདིར་བདག་གིས་སློབ་མ་གཞུག་པར་བྱའོ་ཞེས་གསོལ་བ་བཏབ་པ་ཡིན་ལ། ལྷ་ཡི་རིགས་ཀྱི་རིམ་པ་དང་། །ཞེས་པ་མན་ཆད་ཀྱི་ནི་རིགས་དང་མཐུན་པའི་ལྷ་ལ་མེ་ཏོག་བབས་པ་དང་། དེ་ལ་བརྟེན་པའི་བསོད་ནམས་ཡང་དཀྱིལ་འཁོར་འདིར་ཐོབ་པར་ཤོག་ཅིག ཅེས་བདེན་པའི་སྟོབས་བརྗོད་པའོ། །དེ་ནས་སློབ་མ་དཀྱིལ་འཁོར་གྱི་ཤར་སྒོའི་དྲུང་དུ་ཁྲིད་དེ། དེར་ལངས་ལ་མགོ་བོ་ཅུང་ཟད་རྒུ་བར་བྱ་སྟེ། མིག་ལམ་ན་ཁྲུ་གང་ཚུན་ཆད་ཀྱི་ནམ་མཁའི་ཁ་དོག་དྲི་བར་བྱས་ནས། ཁ་དོག་དང་མཐུན་པའི་ལས་འགྲུབ་པར་ལུང་བསྟན། སླར་ཡང་སློབ་དཔོན་གྱིས། ཞེ་སྡང་རྡོ་རྗེར་ཕྱག་འཚལ་བསྟོད། །ཅེས་སོགས་བརྗོད་པར་དབང་ཆུར་གསུངས་ལ། དཀྱིལ་ཆོག་འགའ་ཞིག་ལས། མེ་ཏོག་འབུལ་བའི་ཚེ་ཐོག་མར་མིག་དར་དང་བཅས་བཞིན་དུ་ནམ་མཁའི་ཁ་དོག་བརྟག དེ་ནས་མེ་ཏོག་དོར་ནས་མིག་ཕྱེ་བ་སློབ་མ་རེ་རེ་བཞིན་བྱ་བར་གསུངས་ཀྱང་། དེང་སང་གྲལ་ན་གནས་པ་ལ་ཁ་དོག་དྲིས་ནས་དེ་དང་མཐུན་པའི་ལས་འགྲུབ་པར་ལུང་བསྟན། དེ་ནས་འདིར་ནི་གཡས་རྡོ་རྗེ་ཐུགས་ཀ་དང་། གཡོན་དྲིལ་བུ་སུམ་བརྡུང་དུ་བྱས་ཏེ། ཞེ་སྡང་རྡོ་རྗེར་སོགས་བརྗོད། དེ་དག་མེད་པ་རྣམས་ལ་མེ་ཏོག་འབུལ་དུ་གཞུག་པ་ནི། ལས་སླའི་དབང་དུ་བྱས་པར་སྣང་ངོ་། །གང་ལྟར་ཡང་མེ་ཏོག་འབུལ་བའི་ཚེ་སྔར་གྱི་མེ་ཏོག་གི་ཕྲེང་བ་སློབ་མའི་ཐལ་མོའི་དབུས་སུ་འཛིན་དུ་བཅུག་པའི་ཐལ་མོ་སྦྱར་བ་བསྐྱོད་དུ་བཅུག་ལ། འདི་སྐད་ཅེས་བསྒོ་སྟེ། འདི་ན་དཀྱིལ་འཁོར་གྱི་འཁོར་ལོ་ལྷ་དགུ་བཞུགས་ཏེ། འདི་རྣམས་ལ་བཟང་ངན་ནམ་ཁྱད་པར་དུ་གྱུར་པ་གང་ཡང་མེད་དེ། སངས་རྒྱས་ཀྱི་ཡེ་ཤེས་ཡོངས་སུ་དག་པ་ཞིག་གི་སྣང་བ་ཡིན། དེ་བས་ན་བསྒྲུབ་ན་གེགས་མེད་ལ། དངོས་གྲུབ་མྱུར་དུ་འབྱུང་ཞིང་འགྲུབ་སླ་བའི་ལས་བསགས་པའི་ལྷ་ཞིག་དང་འཕྲད་པར་ཤོག་ཅིག་སྙམ་པའི་བློས། ཨོཾ་པྲ་ཏཱིཙྪ་བཛྲ་ཧོ་ཞེས་བརྗོད་ལ། ལྟོས་པ་མེད་པར་མེ་ཏོག་གི་ཕྲེང་བ་དོར་ཞིག་ཅེས་བརྗོད་དེ། སློབ་མས་ཀྱང་སྔགས་དེ་བརྗོད་ལ་དོར་བར་བྱའོ། །དེ་ནས་ལྷ་གང་ལ་བབས་པ་དེའི་རིགས་སུ་ཤེས་པར་བྱ་ཞིང་། གཉིས་ཀྱི་བར་དུ་ལྷུང་ན་གང་ལ་ཉེ་བ་དེའི་རིགས་སུ་ཤེས་པར་བྱ། ཉེ་རིང་མེད་ན་བསྐྱར་ཏེ་དོར་དུ་གཞུག རྩིག་པའི་ཕྱི་རོལ་ཏུ་ལྟུང་ནའང་བསྐྱར་ཏེ་དོར་དུ་གཞུག ལན་གསུམ་པ་ལའང་ཕྱི་རོལ་ཏུ་ིལྷུང་ན་མིག་རས་མ་བསལ་བར་ཕྱི་རོལ་ཏུ་ཁྲིད་ལ། རེ་ཞིག་ཡི་དམ་དང་མཇལ་བའི་སྐལ་བ་མི་འདུག་པས། སྡིག་པ་འདག་པའི་ཐབས་ལ་འབད་པར་གྱིས་ཤིག་ཅེས་བསྒོ། བཟང་པོ་ཡོངས་གཟུང་དང་། རིན་ཆེན་འབར་བ་ལས། གལ་ཏེ་བཟང་པོར་མ་ལྷུང་ན། །ལན་གཉིས་བར་དུ་དོར་བར་བྱ། །ཞེས་གསུངས་པ་ནི། དང་པོའི་རྗེས་སུ་ལན་གཉིས་དོར་བ་ཡིན་པས་དོན་འདི་ཉིད་ཡིན་ནོ། །དེ་ནས་བླ་མས་མེ་ཏོག་དེ་བླངས་ཏེ། ཁྱིམ་པ་ཡིན་ན་མགོ་ལ་དཀྲིས་པའི་གཙུག་ཏོར་རམ་གཙུག་ཕུད་ལ་གཟེར། རབ་བྱུང་ཡིན་ན་རྣ་བ་གཡས་པའི་སྟེང་དུ་གཟེར་ལ། ཨོཾ་པྲ་ཏི་གྲྀཧྞ་ཞེས་སོགས་བརྗོད། འདིའི་དོན་བླ་མ་ཕྱི་མ་དག སྔགས་འདི་རྡོ་རྗེ་སློབ་དཔོན་གྱིས། སློབ་མའི་མགོ་ནས་བཟུང་ནས་ཡི་དམ་གྱི་ལྷ་ལ། སེམས་དཔའ་ཆེན་པོ་སྟོབས་པོ་ཆེ། །ཞེས་བོས་ལ། འདི་ཟུང་ཞེས་འབུལ་བའི་སྔགས་ཡིན་པས། འདི་ནི་བྱང་ཆུབ་མ་ཐོབ་ཀྱི་བར་དུ་ཡི་དམ་གྱི་ལྷས་རྗེས་སུ་འཛིན་པའི་གདམས་ངག་ཟབ་མོ་ཞིག་སྣང་ངོ་ཞེས་ཟེར་བ་ནི་མི་འཐད་དེ། ཁྱེད་རང་གིས་ཚད་མར་བྱེད་པའི་སློབ་དཔོན་ཨ་བྷ་ཡས། ཕྲེང་བར། དེ་ནས་མེ་ཏོག་བཟུང་ནས། ཕྲེང་བ་བཅིངས་ཏེ། ཨོཾ་པྲ་ཏི་གྲྀཧྞ་སཏྭྃ། ཨི་མཾ་ས་ཏྭ་མ་ཧཱ་བཱ་ལ་ཞེས་བརྗོད་ཅིང་སློབ་མ་ལ་མགོ་བོར་བཅིང་ངོ་། །ཞེས་དང་། ཟུང་འཇུག་གསལ་བར། དེ་ནས་དེའི་མགོ་ལ་ཕྲེང་བ་སྔགས་འདིས་བཅིང་བར་བྱ་སྟེ། པྲ་ཏི་གྲྀཧྞ་མ་ཧཱ་བཱ་ལ། འདི་ནི་ཕྲེང་བའི་དབང་བསྐུར་བའོ། །དེ་སྐད་དུའང་གྲུབ་པའི་སློབ་དཔོན་ཀླུའི་བྱང་ཆུབ་ཀྱི་ཞལ་སྔ་ནས། མཁས་པས་རིགས་ཀྱི་བྱེ་བྲག་དང་། །མེ་ཏོག་དོར་བས་ཤེས་པར་བྱ། །སྔགས་དང་བཅས་པས་ཕྲེང་བ་ཡི། །དབང་བསྐུར་བ་ནི་སྤྱི་བོར་སྦྱིན། །ཞེས་དང་། བཟང་པོ་ཡོངས་གཟུང་ལས། དེ་ནས་དེ་ཡི་མགོར་བཅིངས་ཏེ། །ཕྲེང་བའི་སྦྱོར་བ་སྦྱིན་པར་བྱ། །ཞེས་དང་། རིན་ཆེན་འབར་བ་ལས། དེ་ནི་སྤྱི་བོར་བཅིང་བར་བྱ། །པྲ་ཏི་གྲིཧྞ་སོགས་གསུངས་པ་རྣམས་ཀྱིས་མེ་ཏོག་མགོ་ལ་བཅིངས་ནས་ཕྲེང་བའི་དབང་བསྐུར་བའི་སྔགས་སུ་གསུངས་པས། སེམས་དཔའ་ཆེན་པོ་སྟོབས་པོ་ཆེ། །ཞེས་པ་ནི་སློབ་མ་ལ་འབོད་པ་དང་། འདི་ནི་ཞེས་པ་མེ་ཏོག་གི་ཕྲེང་བ་དང་། སོ་སོར་གཟུང་ཞེས་པ་ནི་སློབ་མ་རྣམས་ཀྱིས་སོ་སོར་གཟུང་བ་ལ་འཆད་དགོས་པར་སྣང་ངོ་། །བཞི་པ་མིག་ཕྱེ་ནས་དཀྱིལ་འཁོར་བསྟན་པ་ནི། དེ་ནས་སློབ་དཔོན་གྱིས་སློབ་མའི་མིག་དར་ཕྱེ་ནས། ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་ཏེ། །རྡོ་རྗེའི་མིག་ནི་བླ་ན་མེད། །ཧེ་བཛྲ་པཱ་ཤྱ་ཞེས་བརྗོད། འདི་ལ་འཁོར་ཆེན་པ་དག མ་ཧཱ་ཙཀྲ་པཱ་ཤྱ་ཞེས་དང་། བདག་མེད་མའི་དཀྱིལ་ཆོག་གི་མཆན་ཁ་ཅིག་ལས། ནི་རཱཏྨ་པཱ་ཤྱ་ཞེས་འདོན་པ་བསྒྱུར་བ་ཡོད་ཀྱང་ཧེ་ཞེས་པ་ཀྱེ་ཞེས་བོས་ནས། བཛྲ་པཱ་ཤྱ་ནི་རྡོ་རྗེ་ལྟོས་ཤིག་ཅེས་པ་ཡིན་པས་སོ་སོར་བསྒྱུར་མི་དགོས་སོ། །འདིར་དཀྱིལ་ཆོག་མང་པོར། སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ། དཔྲལ་བར་རྃ། མིག་གཉིས་སུ་ཨྃ་ཡིག་འབར་བ་རེ་རེ་བསྒོམས་ནས། མིག་འབྱེད་པར་བཤད་པའི་དོན་ནི། ཧཱུྃ་གིས་རྃ་བསྐུལ། རྃ་གྱིས་ཨྃ་གཉིས་མིག་དར་དང་ལྷན་ཅིག་བསྲེགས་པའི་དོན་ཡིན་པར་གསུངས་ཀྱང་། འདིར་དབང་ཆུ་དང་བཟང་པོ་ཡོངས་གཟུང་ལས་གསལ་ཁ་མ་གསུངས་ཀྱང་། རིན་ཆེན་འབར་བ་ལས། མིག་ཏུ་འབར་བཅས་ཨོཾ་བསམས་ལ། །ཞེས་གསུངས་པའི་དོན། ཌོཾ་བི་ལུགས་ཀྱི་དབང་ཆུར། སློབ་མའི་མིག་གཉིས་སུ་ཨོཾ་རབ་ཏུ་འབར་བ་རེ་བསྒོམས་པར་གསུངས་སོ། །དེ་ལྟར་མིག་ཕྱེ་མ་ཐག་ཐུན་མོང་དུ་འདི་སྐད་བརྗོད་དེ། ཐར་པ་ཆེན་པོའི་གྲོང་ཁྱེར་མཆོག །ཅེས་པ་ནས། སྔགས་རྣམས་ལ་ཡང་བརྩོན་པར་གྱིས། །ཞེས་པའི་བར་བརྗོད་དེ། དེ་ལྟར་བཅུག་ལ། ཁྱོད་ཀྱིས་མེ་ཏོག་ཕོག་པའི་ལྷ་འདི་ཡིན་ནོ་ཞེས་ལྷ་དེ་དང་དེའི་མིང་ཙམ་འཛིན་དུ་བཅུག་སྟེ། འདི་ནི་འོག་ཏུ་མིང་དབང་གི་སྐབས་སུ་དེའི་རིགས་ཀྱི་མིང་བཏགས་པའི་ཆེད་དང་། རྡོ་རྗེ་སློབ་མའི་དབང་ཙམ་ལས་མི་བསྐུར་བ་ལ། མེ་ཏོག་གང་ཕོག་གི་ལྷའི་བསྒོམ་བཟླས་སྦྱིན་དགོས་པས། དེའི་ཚེ་རང་རང་གི་ལྷ་ངོས་ཟིན་པའི་ཆེད་ཡིན་ནོ། །དེ་བཞིན་དུ་སློབ་མ་རྣམས་རིམ་གྱིས་བཙུད་ལ། བླ་མའི་ཞབས་ལ་ཕྱག་འཚལ་ནས་འདི་སྐད་དུ་བརྗོད་དུ་བཅུག་སྟེ། ཨོཾ་རྡོ་རྗེའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །ཨོཾ་རྣལ་འབྱོར་དཀྱིལ་འཁོར་ཆེན་པོ་ཡི། །དཀྱིལ་འཁོར་དེ་རིང་བདག་གིས་མཐོང་། །ཨོཾ་གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །ས་མ་ཡ་ཧོ་ཧོ་ཧོ་ཞེས་བརྗོད་ལ་དཀྱིལ་འཁོར་བསྟན་ནོ། །འདིར་ཌོཾ་བའི་དཀྱིལ་ཆོག་ལས། ཨོཾ་རྡོ་རྗེའི་སོགས་ཚིག་རྐང་དྲུག་པོ་ལན་གསུམ་བརྗོད་པས་སྤྲོ་བ་བསྐྱེད་པ་དང་། དེ་ལྟ་བུའི་དཀྱིལ་འཁོར་གྱི་དམ་ཚིག་མ་ལུས་པ་བཟུང་བར་མོས་པ་བྱས་ལ། ས་མ་ཡ་ཧོ་ཧོ་ཧོ། ཞེས་བརྗོད་པར་གསུངས་པ་ནི་དཀྱིལ་ཆོག་གཞན་ལས་ཀྱང་། རྡུལ་ཚོན་མཐོང་བའི་ཚེ་དཀྱིལ་འཁོར་གྱི་དམ་ཚིག་རྒྱུད་ལ་སྐྱེས་པར་བསམ་པ་ཡོད་པ་དང་མཐུན་ནོ། །དེ་ནས་སློབ་མ་ལ་དཀྱིལ་འཁོར་སྟོན་པའི་ཚུལ་ལ་རྒྱས་པར་བསྟན་པ་དང་། བསྡུས་ཏེ་བསྟན་པ་གཉིས་ལས། དང་པོ་ནི། ཡོ་ག་བ་དག དཀྱིལ་འཁོར་ཕྱི་ནས་བསྟན་པ་དང་། ལྷ་ངོ་ནང་ནས་བསྟན་པ་ཡིན་ཞེས་ཟེར་ཞིང་། ལག་ལེན་པ་ཕལ་ཆེར་འདིའི་རྗེས་སུ་འབྲང་མོད། བརྗོད་བདེ་བ་ཙམ་མ་གཏོགས་ཤེས་བྱེད་གཞན་མི་སྣང་ངོ་། །དེས་ན་འདི་ལ་མེ་རིའམ་དུར་ཁྲོད་ནས་གཙོ་བོའི་བར་ཕྱི་ནས་རིམ་པ་བཞིན་བསྟན་པ་དང་། གཙོ་བོ་ནས་མེ་རིའི་བར་ནང་ནས་རིམ་པ་བཞིན་བསྟན་པ་གཉིས་ལས། རྗེ་བཙུན་གོང་མས། དབང་ཆུ་གཉིས་སུ་སྔ་མ་གསུངས་ལ། བདེ་མཆོག་ནག་པོ་དཀྱིལ་ཆོག་ཏུ་ཕྱི་མ་གསུངས་པས་གང་ལྟར་ཡང་འགལ་བ་མེད་དོ། །མཚོན་དོན་གྱི་ཁྱད་པར་ནི་ཐོག་མར་དུར་ཁྲོད་བསྟན་པ་ནི་རྒྱུ་རྒྱུད་འཁོར་བ། དེ་ནས་གཞལ་ཡས་ཁང་ནི་ལམ་བྱང་ཕྱོགས་སོ་བདུན། དེ་ནས་དཀྱིལ་འཁོར་གི་ལྷ་བསྟན་པ་ནི་འབྲས་བུ་སངས་རྒྱས་ཀྱི་སྐུ་དང་ཡེ་ཤེས་ཏེ། རྒྱུ་ལ་ལམ་དང་། ལམ་ལ་འབྲས་བུས་རྒྱས་གདབ་པ་མཚོན། བསྟན་ཚུལ་ཕྱི་མ་ལྟར་ན། དེའི་རིགས་པས་འབྲས་བུ་ལ་ལམ་དང་། ལམ་ལ་རྒྱུས་རྒྱས་གདབ་པ་མཚོན་པས་རྡོ་རྗེ་ཐེག་པའི་གཞི་ལམ་འབྲས་གསུམ་དབྱེར་མེད་པ་མཚོན་ཏེ། ཐམས་ཅད་གསང་བ་ལས། རྒྱུ་ལ་འབྲས་བུས་རྒྱས་བཏབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །གཞན་དུ་བསྐལ་པ་བྱེ་བར་ནི། །གྲངས་མེད་པར་ཡང་འགྲུབ་མི་འགྱུར། །ཞེས་གསུངས་སོ། །དེ་ལ་ཕྱི་ནས་བསྟན་ན། དེའང་དཀྱིལ་འཁོར་གྱི་མཐའ་སྐོར་དུ། རྡོ་རྗེའི་རྭ་བ་དང་། མེ་རིས་བསྐོར་བ་གནས་སོ། །དེའི་ནང་དུ་དུར་ཁྲོད་ཆེན་པོ་བརྒྱད་གནས་ཏེ། ཤར་ཕྱོགས་ན་འཇིག་སྡེའི་དུར་ཁྲོད་ཅེས་བྱ་བ་ན། ལྷའི་དབང་པོ་བརྒྱ་བྱིན་འཁོར་དང་བཅས་པ་གནས་སོ། །དེ་ན་ཀླུའི་རྒྱལ་པོ་ནོར་རྒྱས་ཀྱི་བུ་མཐའ་ཡས་ཞེས་བྱ་བ་གནས་སོ། །ཤི་རི་ཤའི་ཤིང་ལ་ཞིང་སྐྱོང་བ་ཨ་ཌ་ཧ་ས་ཞེས་བྱ་བ་དང་། ཆར་སྤྲིན་གརྫ་ན་ཞེས་བྱ་བ་གནས། དེ་བཞིན་དུ་གཞན་བདུན་པོའང་བཤད་ལ། དེ་ལྟ་བུའི་དུར་ཁྲོད་ཆེན་པོ་བརྒྱད་ན་ཕྱོགས་སྐྱོང་བ་དང་། ཀླུ་དང་། ཤིང་དང་། ཤིང་གི་ལྷ་དང་། ཆར་སྤྲིན་དང་། མཆོད་རྟེན་དང་། ཆུ་དང་། མེ་དང་། རྣལ་འབྱོར་པ་དང་། རོ་དང་། འདྲེ་དང་། མཁའ་འགྲོ་མ་དང་། འབྱུང་པོའི་ཚོགས་དུ་མས་གང་བ་དང་། ཅེ་སྤྱང་ལ་སོགས་པའི་སྒྲ་རབ་ཏུ་སྒྲོགས་པ་འཇིགས་སུ་རུང་བས་གང་བ་བཞུགས་པའོ། །དེའི་དབུས་སུ་སྣ་ཚོགས་རྡོ་རྗེའི་ལྟེ་བ་ལ་ཐར་པ་ཆེན་པོའི་གྲོང་ཁྱེར་ཞེས་བྱ་བ་གནས་ཏེ། གྲུ་བཞི་སྒོ་བཞི་པ་ཞེས་པ་ནས་རྩེ་མོ་རྡོ་རྗེ་དང་ནོར་བུ་རིན་པོ་ཆེས་བརྒྱན་པ་བཞུགས་སོ། །ཞེས་པའི་བར་མཐའ་ནས་རིམ་པ་བཞིན་གཞལ་ཡས་ཁང་གི་ཆ་ཤས་རྣམས་ཞིབ་ཏུ་བརྗོད་པར་བྱའོ། །དེའི་ནང་ན་ལྷ་དགུའི་དཀྱིལ་འཁོར་བཞུགས་ཏེ། ཤར་གྱི་སྒོ་ཁང་ན་ལྷ་མོ་གཽ་རཱི་ནག་མོ་ཞེས་པ་ནས། དབུས་སུ་བཅོམ་ལྡན་འདས་དཔལ་ཀྱེ་རྡོ་རྗེ་འདི་ལྟར་བཞུགས་སོ། །ཞེས་བྱ་བའི་བར་སྐུ་མདོག་ལ་སོགས་པ་སྒྲུབ་ཐབས་ནས་འབྱུང་བ་བཞིན་རྒྱས་པར་བསྟན་པར་བྱའོ། །གཉིས་པ་ནི། ཌོམྦི་ལུགས་ཀྱི་དབང་ཆུར། དེ་ནས་དཀྱིལ་འཁོར་བསྟན་པ་ནི། ཕྱི་རོལ་གྱི་རྡོ་རྗེའི་རྭ་བ་དང་། དུར་ཁྲོད་ནས་གཞལ་ཡས་ཁང་པ་དང་། ཤར་ཕྱོགས་ཀྱི་སྒོ་སྲུང་ནས་བརྩམས་ཏེ། དཀྱིལ་འཁོར་གྱི་གཙོ་བོའི་བར་དུ་རྟེན་དང་བརྟེན་པར་བཅས་པའི་དཀྱིལ་འཁོར་གྱི་མིང་རྒྱས་པར་བརྗོད་པས་བསྟན་པར་བྱའོ། །ཞེས་གསུངས་པ་ལྟར་མིང་ཙམ་གྱི་སྒོ་ནས་བསྟན་པའོ། །བཟང་པོ་ཡོངས་གཟུང་ལས། དེ་ནས་དཀྱིལ་འཁོར་འཁོར་ལོ་བསྟན། །རིགས་རྒྱལ་ལྷ་མོའི་མཚན་མ་དང་། །འདབ་ལྡན་པདྨར་བཅས་པ་དང་། །ལྷ་ཡི་གནས་རྣམས་བསྟན་པར་བྱ། །ཞེས་དང་། རིན་ཆེན་འབར་བ་ལས། དེ་ནས་གཙོ་བོ་ནས་བརྩམས་ཏེ། དཀྱིལ་འཁོར་མཐའ་ཡི་བར་དུ་བསྟན། །ཞེས་གཙོ་བོ་ནས་རིམ་པ་བཞིན་བསྟན་པར་གསུངས་པ་ནི་སྔར་བཤད་པ་ལྟར་གོ་རིམ་ལ་ཁྱད་པར་མེད་པའི་དོན་དུ། རྗེ་བཙུན་སྐུ་མཆེད་ཀྱིས་འགྲེལ་པའོ། །སློབ་དཔོན་ནག་པོ་པས་དཀྱིལ་འཁོར་ལྟར་གཞུག་སྟེ། སྒོའི་སྲུང་མ་ནས་བརྩམས་ནས་གཙོ་བོའི་བར་དུ་མིང་བརྗོད་པ་སྔོན་དུ་འགྲོ་བས་བསྟན་པར་བྱ་སྟེ། ཞེས་གསུངས་པའང་ཚུལ་དེ་བཞིན་ནོ། །རྗེ་བཙུན་རྩེ་མོས། མན་ངག་ལུགས་ཀྱི་དབང་ཆུར་འདི་དག་ནི་མིང་བརྗོད་པ་ཙམ་ཡིན་གྱི། དེ་ཁོ་ན་ཉིད་སྐབས་འདིར་བཤད་པར་མི་བྱ་སྟེ། དབང་བསྐུར་བ་མ་བྱས་པའི་ཕྱིར་རོ། །དེ་སྐད་དུའང་། དབང་བསྐུར་ནས་ནི་དེ་ཉིད་བསྟན། །གཞན་དུ་ན་ནི་དངོས་གྲུབ་དག །ཤིན་ཏུ་རིང་བར་འགྱུར་རོ་ཞེས། །རྡོ་རྗེ་འཛིན་པ་ཉིད་ཀྱིས་གསུངས། །ཞེས་སྤྱི་རྒྱུད་ལས་བཤད་པས། སློབ་དཔོན་གྱིས་དབང་བསྐུར་བའི་རྗེས་ལ་བཤད་པར་བྱའོ། །ཞེས་གསུངས་ཤིང་། ནག་པོ་པའི་གཞུང་འགྲེལ་ལས་ལུང་དེ་ཉིད་འཇུག་པའི་རྗེས་སུ་དབང་བསྐུར་བ་དགོས་པའི་ཤེས་བྱེད་ཙམ་དུ་གསུངས་ཀྱི། སྐབས་འདིར་དེ་ཁོ་ན་ཉིད་བསྟན་དུ་མི་རུང་བའི་ཤེས་བྱེད་དུ་མ་གསུངས་ཀྱང་། བཞི་བརྒྱ་ལྔ་བཅུ་པའི་འགྲེལ་པར་ཤཱནྟི་པས། དེ་ནས་ཞེས་བྱ་བ་ནི་སློབ་དཔོན་དུ་དབང་བསྐུར་བའི་འོག་ཏུ་བླ་མ་ལས་དེ་ཁོ་ན་ཉིད་ཐོབ་ཅིང་། དཀྱིལ་འཁོར་གྱི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད། སློབ་དཔོན་གྱི་ལས་དང་བཅས་པ་ཐོབ་པར་གྱུར་ནས་ཞེས་བྱ་བའི་ཐ་ཚིག་གོ །འདིར་ནི་དེ་ནས་ཞེས་བྱ་བ་འདིས་ནི་དབང་མ་བསྐུར་བ་ལ་དེ་ཁོ་ན་ཉིད་བཤད་པ་བཀག་པ་ཡིན་ནོ། །ཞེས་གསུངས་པ་འདིས་སྐབས་འདིར་དེ་ཁོ་ན་ཉིད་བསྟན་དུ་མི་རུང་བ་སྔ་མ་དང་མཐུན་པར་བཤད་དོ། །གྲུབ་ཆེན་ཀླུ་བྱང་གིས་འདུས་པའི་དཀྱིལ་ཆོག་དང་། མཚོ་སྐྱེས་ཀྱི་ནས་གླིང་མ་དང་། པཎྜི་ཏ་ཛ་ཡ་སེ་ནས་མཁའ་འགྲོ་རྒྱ་མཚོའི་དཀྱིལ་ཆོག་རྣམས་སུ། སྐབས་འདིར་དེ་ཁོ་ན་ཉིད་བསྟན་པར་གསུངས་པའི་དོན་ལ། བླ་ཆེན་འཕགས་པས་གཞུང་དེ་དག་གི་དགོངས་པ་ཐ་སྙད་ཟོར་ཡང་བའི་ཆེད་དུ་སྐབས་འདིར་བཤད་ཀྱང་། ལག་ལེན་ལ་རྡོ་རྗེ་སློབ་དཔོན་གྱི་དབང་བསྐུར་བའི་རྗེས་སུ་མར་འཐེན་ནས་བྱ་བ་ཡིན་ནོ། །ཞེས་གསུངས་ཀྱང་གཞུང་དེ་དག་གི་དགོངས་པར་འགྲོ་བ་དཀའ་སྟེ། མཚོ་སྐྱེས་ལུགས་ཀྱི་དཀྱིལ་ཆོག་ཏུ་རྗེ་བཙུན་རྩེ་མོ་ཉིད་ཀྱིས་གཞུང་ཇི་ལྟ་བ་བཞིན་དུ་སྐབས་འདིར་དེ་ཁོ་ན་ཉིད་སྟོན་པར་གསུངས་པའི་ཕྱིར་རོ། །བུ་སྟོན་གྱིས་སྐབས་འདིར་དེ་ཁོ་ན་ཉིད་བསྟན་ཀྱང་། གསང་བ་སྤྱི་རྒྱུད་ཀྱི་ལུང་དེ་དང་འགལ་བའི་སྐྱོན་མེད་དེ། དབང་གཏན་ནས་མ་བསྐུར་བ་དག་ལ་བཤད་པ་མ་ཡིན་གྱི། དབང་དང་པོ་མེ་ཏོག་ཕྲེང་བའི་དབང་བསྐུར་ཟིན་པའི་ཕྱིར། ཞེས་གསུངས་པ་ནི་ཞེ་འདོད་ལ་མ་སྙོགས་ཏེ། དབང་བསྐུར་ནས་ནི་དེ་ཉིད་བསྟན། །ཞེས་པའི་དབང་བསྐུར་དེ་རྡོ་རྗེ་སློབ་དཔོན་གྱི་དབང་ལ་འཆད་དགོས་ཀྱི། དབང་བསྐུར་གྱི་མིང་ཡོད་པ་ཙམ་གྱིས་མི་ཆོག་པའི་ཕྱིར་རོ། །འོ་ན་ཇི་ལྟར་ཞེ་ན། རྒྱུད་སྡེ་འོག་མ་དང་སྒོ་བསྟུན་ནས། རྡོ་རྗེ་སློབ་དཔོན་གྱི་དབང་གི་རྗེས་སུ་དཀྱིལ་འཁོར་དང་། ལྷའི་དེ་ཉིད་སྟོན་དགོས་པ་དང་། དཀྱིལ་འཁོར་གྱི་ལྷ་ངོ་བསྟན་པ་དང་མཉམ་དུ་དེ་ཉིད་བསྟན་པས་ཆོག་པའི་ལུགས་གཉིས་ལས། དང་པོ་ནི། ཀྱེ་རྡོར་བིརྺ་པའི་ལུགས་གཉིས་དང་། གསང་འདུས་ཡེ་ཤེས་ཞབས་ལུགས་ལྟ་བུ་སྟེ། འདི་དག་ལ་སྔ་མ་ལ་ནི་དམ་ཚིག་གསུམ་སྦྱིན་པ་རྡོ་རྗེ་སློབ་དཔོན་གྱི་དབང་དུ་བྱས་ནས། དེ་ནས་དེ་ཁོ་ན་ཉིད་སྟོན་པ་ཡོ་ག་དང་སྒོ་བསྟུན་པ་ཡིན་པའི་ཕྱིར་དང་། ཕྱི་མ་ལ་ནི་རྡོ་རྗེ་སློབ་དཔོན་གྱི་དབང་གི་སྐབས་སུའང་། རིག་པའི་དབང་ལྔ་གཉིས་པ་བསྐུར་བ་ཡོ་ག་དང་སྒོ་བསྟུན་པ་ཡིན་པས། དག་པ་སྟོན་པའི་ཚུལ་ཡང་དེ་དང་སྒོ་བསྟུན་དགོས་པའི་ཕྱིར་རོ། །གཉིས་པ་ནི། དཀྱིལ་ཆོག་ཉི་ཤུ་པ་སོགས་ཏེ། ལུགས་འདི་དག་ལའང་སྤྱིར་དབང་བསྐུར་མ་བྱས་པ་སློབ་དཔོན་གྱིས་རང་དགར་དེ་ཉིད་བཤད་དུ་མི་རུང་བ་གསང་བ་སྤྱི་རྒྱུད་ཀྱི་ལུང་གི་དོན་དུ་འདོད་ཀྱང་དབང་བསྐུར་གྱི་ཆོ་གའི་གནས་སྐབས་སུ། དངོས་གཞི་ལ་རྡོ་རྗེ་སློབ་དཔོན་གྱི་དབང་བསྐུར་ན། ཆོ་ག་ཟོར་ཡང་བའི་ཆེད་དུ་སྐབས་འདིར་ལྷ་ངོ་བསྟན་པ་དང་མཉམ་དུ་བཤད་པའམ། འོག་རྡོ་རྗེ་སློབ་དཔོན་གྱི་དབང་གི་རྗེས་སུ་བཤད་པ་གང་བྱས་ཀྱང་ཆོག་པར་བཞེད་དོ། །འདི་ལ་གསང་བ་སྤྱི་རྒྱུད་ཀྱི་ལུང་དང་འགལ་བའི་སྐྱོན་ཡོད་དོ་སྙམ་ན། ཆོ་གའི་སྐབས་སུ་དེ་ལྟར་རུང་བ་ནི་འདུལ་བའི་ལས་ཚིག་སྤྱིར་བསྙེན་པར་མ་རྫོགས་པ་ལ་བསྒྲག་ཏུ་མི་རུང་ཡང་། བསྙེན་རྫོགས་ཀྱི་ཆོ་གའི་སྐབས་སུ་རུང་བ་བཞིན་ནོ། །སྔ་མ་ལ་ནི་མི་མཚུངས་ཏེ། རྡོ་རྗེ་སློབ་དཔོན་གྱི་དབང་གི་གསོལ་གདབ་ཀྱི་སྐབས་སུ། འཁོར་ལོ་ལྷ་ཡི་དེ་ཉིད་དང་། །སློབ་དཔོན་ཕྲིན་ལས་ཡོངས་སུ་གསུངས། །ཞེས་བཤད་པས་སོ། །གསུམ་པ་དེ་དག་གི་སྐབས་སུ་སྡོམ་པ་གང་ཐོབ་པ་ནི། ཕྱི་འཇུག་གི་སྐབས་སུ་རྒྱུན་བཤགས་དང་། རིགས་ལྔའི་སྡོམ་གཟུང་ལས་ཇི་ཙམ་ཐོབ་པ་ནི་སྔར་བཤད་ཟིན་ལ། སྡོམ་པ་གསུམ་གྱི་ཟླས་ཕྱེ་བའི་སྔགས་སྡོམ་ནི། ཟླ་བ་རྡོ་རྗེའི་སེམས་བསྐྱེད་པའི་སྐབས་སུ་བདེན་པ་གཉིས་ཀྱི་བདག་ཉིད་ཅན་གྱི་བྱང་ཆུབ་ཀྱི་སེམས་གཟུགས་ཀྱི་རྣམ་པར་བསྐྱེད་པ་ཙམ་ཞིག་ཐོབ་སྟེ། བྱང་ཆུབ་ཀྱི་སེམས་གཉིས་གཟུགས་ཀྱི་རྣམ་པར་བསྒོམས་པས། ཕ་རོལ་ཏུ་ཕྱིན་པ་དང་ཐུན་མོང་མ་ཡིན་པར་གྲུབ་ལ། ཆོ་གའི་སྒོ་ནས་བསྐྱེད་པས་སྐབས་སུ་བབ་པའི་སྡོམ་པ་ཞིག་ཀྱང་ཐོབ་པའི་ཕྱིར་རོ། །ནང་འཇུག་གི་སྐབས་སུ་དམ་གཞག་གི་ཚེ་ཡིད་ཀྱིས་ཁས་བླངས་པ་ཙམ་ཐོབ་རྒྱུ་ཡོད་ཀྱང་། གཙོ་བོ་ནི་ཡེ་ཤེས་དབབ་པའི་དུས་ཀྱི་མྱོང་བ་ཁྱད་པར་ཅན་དང་། རྡུལ་ཚོན་གྱི་དཀྱིལ་འཁོར་མཐོང་བ་ལས་ཇི་ཙམ་ཐོབ་པའི་སྡོམ་པ་དེ་ཉིད་ཡིན་ཏེ། རྗེ་བཙུན་གྱིས་ཡོལ་བའི་ཕྱི་འཇུག་དང་། ནང་འཇུག་གི་སྐབས་སུ་སྡོམ་པ་ཐོབ་པ་ཡོད་པར་གསུངས་ཤིང་། རྗེ་བཙུན་རྩེ་མོས། ཁྱོད་ཀྱིས་དཀྱིལ་འཁོར་ཆེན་པོའི་ཁ་དོག་དང་། དབྱིབས་མིག་གིས་མཐོང་བ་དང་། ཕྱིའི་འཇུག་པ་བྱས་པ་དང་། ཡེ་ཤེས་དབབ་པའི་ཏིང་ངེ་འཛིན་སྐྱེས་པ་ནི་ནང་གི་འཇུག་པ་ཡིན་ཏེ། དེས་ན་རྡོ་རྗེ་སེམས་དཔའ་ཁྱོད་ཀྱི་སྙིང་ལ་ཞུགས་པ་ཡིན་པས། དེས་ནི་དེང་ནས་ལྷ་དང་སྐལ་བ་མཉམ་པར་བྱས་པ་ཡིན་ནོ། །ཞེས་གསུངས་པའི་ཀྱང་སྐབས་འདིར་ཐོབ་པའི་སྔགས་སྡོམ་ཡོད་པར་བསྟན་ནོ། །དེས་ན་འཇུག་པའི་སྐབས་སུ་སོ་ཐར་དང་། བྱང་སེམས་ནི་རྒྱུན་བཤགས་ཀྱི་སྐབས་སུ་ཐོབ་པ་ཉིད་ཡིན་ལ། སྔགས་སྡོམ་འདོད་པ་དྲི་བ་ནས་བརྩམས་ཏེ། རྡུལ་ཚོན་མཐོང་བའི་བར་དུ་ཐོབ་པ་རྣམས་ལ་ལྷ་དང་སྐལ་བ་མཉམ་པའི་སྔགས་སྡོམ་ཞེས་པའི་ཐ་སྙད་དོན་ལ་གནས་ཤིང་། ཁྱོད་ཀྱང་སངས་རྒྱས་རིགས་སུ་སྐྱེས། །ཞེས་དང་། ཁྱོད་ནི་རྣལ་འབྱོར་མ་རིགས་སྐྱེས། །ཞེས་པ་ལྟར་ན། རིགས་སུ་སྐྱེས་པའི་སྔགས་སྡོམ་ཞེས་པའི་ཐ་སྙད་ཀྱང་རུང་བར་སྣང་ངོ་། །གཉིས་པ་དབང་གི་དངོས་གཞི་ལ་གསུམ་སྟེ། ཡོན་དང་མཎྜལ་ཕུལ་ནས་གསོལ་བ་གདབ་པ། སློབ་མ་དབང་སྟེགས་ཀྱི་སྟེང་དུ་གཞག་ལ་ཤིས་པའི་ཆོ་ག་བྱ་བ། དེ་ལ་དབང་བསྐུར་བ་དངོས་སོ། །དང་པོ་ནི། དེ་ནས་དབང་བསྐུར་བར་བྱ་བའི་ཕྱིར་སློབ་མ་རྣམས་ཀྱིས་མཎྜལ་དབུལ། ཇི་ཙམ་འབྱོར་བའི་ཡོན་ཕུལ་ལ་གསོལ་བ་གདབ་པར་བྱ་སྟེ། དེ་ལ་བྱང་ཆུབ་རྡོ་རྗེ་ནི་སྔོན་གྱི་སངས་རྒྱས་རྡོ་རྗེ་འཆང་ངོ་། །དེས་ད་ལྟར་གྱི་སངས་རྒྱས་ཤཱཀྱ་ཐུབ་པ་ལ་མཆོད་ཆེན་ཏེ་དབང་བསྐུར་བ་ཇི་ལྟར་སྩལ་བ་ལྟར། བདག་ཀྱང་འཁོར་བའི་འདམ་ལས་བསྐྱབ་པའི་དོན་གྱི་ཕྱིར་ནམ་མཁའ་དང་པོ་ནས་ཡོད་ཀྱང་། རྩིག་པ་ལ་སོགས་པའི་སྒྲིབ་བྱེད་བསལ་པའི་ཚེ་ནམ་མཁའ་སྐྱེ་ཞེས་པའི་ཐ་སྙད་གདགས་པ་བཞིན། སེམས་ཉིད་ཐོག་མཐའ་མེད་པའི་སེམས་དཔའ་ཆེན་པོ། དང་པོ་ནས་ཡོད་ཀྱང་གློ་བུར་གྱི་དྲི་མ་བསལ་བའི་ཚེ། སྐྱེ་བའི་ཐ་སྙད་དང་ལྡན་པ་ནི་རྡོ་རྗེ་འཆང་ཡིན་ལ། དེའི་ངོ་བོ་རྡོ་རྗེ་སློབ་དཔོན་གྱི་བདག་ལ་དབང་བསྐུར་བ་སྩལ་དུ་གསོལ་ཞེས་པ་སྟེ། དེས་ལན་གསུམ་གསོལ་བ་གདབ་པར་བྱའོ། །གཉིས་པ་ནི། ཐོག་མར་སློབ་མ་དབང་སྟེགས་ཀྱི་སྟེང་དུ་གཞག་ནས་ཤིས་པ་བྱ་དགོས་པས། དེ་ལ་དབང་སྟེགས་ནི། དཀྱིལ་འཁོར་ཆེན་པོའི་ཤར་ཕྱོགས་ཁྲུ་དོ་ཙམ་གྱི་སར་བྱ་སྟེ། དེའང་རྒྱས་པར་བྱེད་ན་དཀྱིལ་འཁོར་གྱི་ཕྱེད་ཙམ་ཡིན་མོད་ཀྱི་རྩ་བའི་དཀྱིལ་འཁོར་ཇི་ལྟར་བྲིས་པ་བཞིན་ཉིན་བར་བྲི་བར་བྱའོ། །མདོར་བསྡུས་པ་ནི་གསང་བ་སྤྱི་རྒྱུད་ལས། དབང་བསྐུར་དོན་དུ་དཀྱིལ་འཁོར་ནི། །བྱེ་མ་དཀར་པོས་བྲི་བར་བྱ། །ཞེས་འབྱུང་བས་དཀྱིལ་འཁོར་གྱི་ཤར་ཕྱོགས་ཁྲུ་དོ་ཙམ་གྱི་སར་ལེགས་པར་བྱུགས་ལ། ཚོན་དཀར་པོས་ནང་པདྨ་འདབ་བརྒྱད། ཕྱི་གྲུ་བཞི་སྒོ་བཞི་པ། འདོད་ཡོན་དང་། ཕ་གུ་དང་། དྲྭ་བ་དང་། དྲྭ་བ་ཕྱེད་པ་དང་། མདའ་ཡབ་ལ་སོགས་པ་ཐམས་ཅད་ཀྱི་མཚན་མ་ཚང་བ་ཞིག་བྲིས་ལ། དེའི་སྟེང་དུ་ཁྲིའམ། མེད་ནའང་རས་སམ། དར་རམ། སྣམ་བུ་གཙང་མ་བཏིང་སྟེ། དེར་སློབ་མ་དེ་མེ་ཏོག་ཕྲེང་བ་ཕོག་པའི་ལྷའི་རྣམ་པར་བསམ་སྟེ་བདག་ལ་ཁ་བསྟན་ཏེ་གཞག་གོ །དེ་ནས་སློབ་མའི་གཡས། བདག་གི་གཡོན་ནས་ཞབས་བཀྲུ་བའི་ཆུ་དྲི་ཞིམ་པོ་དང་། ཞལ་བཀྲུ་བའི་ཆུ་འོ་མ་དང་མངར་གསུམ་དང་སྦྱར་བ་དང་། བསང་གཏོར་གྱི་ཆུ་གཙང་མ་དང་། མཆོད་ཡོན་གྱི་ཆུ་གཙང་མ་ལ་མེ་ཏོག་དཀར་པོ་བཅུག་པ་སྟེ་ཆུ་བཞི་དང་། ཡུངས་ཀར་དང་། གཞན་ཡང་ཆུ་གཙང་མ་སྟེ་སྦྱོང་བའི་ཡོ་བྱད་གཉིས་ཏེ་དྲུག་བདག་གི་གཡོན་ངོས་ནས་གཞག བདག་གི་གཡས་སློབ་མའི་གཡོན་ནས་སརྫ་རརྫའི་བདུག་སྤོས་ཀྱིས་བདུག མེ་ཏོག་དང་། སྤོས་དང་། མར་མེ་དང་། དྲི་དང་། ལྷ་བཤོས་དང་། མཆོད་པའི་ཡོ་བྱད་ལྔ་བཤམ། མདུན་དུ་བཟེད་ཞལ་གྱི་སྣོད་གཉིས་དང་། མེས་བཀང་བའི་ཁམ་ཕོར་གཞག སྟེང་དུ་བླ་བྲེ་བྲེས་པ་དང་། གཡས་སུ་གདུགས་དཀར་པོ་དང་། གཡོན་དུ་རྒྱལ་མཚན་བསྒྲེང་བ་དང་། དུང་ལ་སོགས་པའི་མཆོད་པའི་ཡོ་བྱད་གཞན་རྣམས་ཀྱང་ཇི་ལྟར་འཚམས་པའི་གནས་སུ་སྟ་གོན་བྱས་ལ་བཞག་གོ །དེ་ནས་སྦྱངས་ཤིང་ཤིས་པར་བྱ་བའི་ཆོ་ག་དངོས་ནི། དང་པོ་སློབ་མ་ལ་རབ་ཏུ་གནས་པའི་ཆོ་ག་བཞིན་དུ་བའི་རྣམ་ལྔ་དང་། དྲི་ལྔ་དང་། མར་ཁུ་དང་། ཤུན་པ་ལྔ་ལ་སོགས་པས་ཁྲུས་བྱ། ཁྲུས་མ་གྲུབ་ནའང་འགལ་བ་མེད་དེ། སློབ་མ་ཁྲིའི་སྟེང་དུ་བཞག་ལ་མེ་ཏོག་ཕོག་པའི་ལྷར་བསྐྱེད་པ་ལ། དང་པོར་ཨོཾ་བཛྲ་ནི་རི་ཏི་ཧཱུྃ་ཁཾ་ཞེས་པས་ཞབས་བཀྲུ། ཨོཾ་བཛྲ་ནི་ཝི་ཏི་ཧཱུྃ་ཁྃ་ཞེས་པས་ཞལ་བཀྲུས་ཏེ་གཉིས་པོ་བཟེད་ཞལ་དུ་བླུག་གོ །ཀུ་ཤའི་ཆུན་པོས་ཨོཾ་སརྦ་སཾ་ཤོ་དྷ་ནི་སྭཱ་ཧཱ། ཞེས་པས་ལུས་ཐམས་ཅད་ལ་གཏོར། ཨོཾ་བཛྲ་ཨརྒྷཱཾ་པྲ་ཏཱིཙྪ་ཧཱུྃ་ཞེས་པས་མཆོད་ཡོན་ཕྱག་ཏུ་གཏད། དེ་ནས་རྡོ་རྗེ་སློབ་མ་རྣམས་ཀྱི་སྡིག་སྒྲིབ་ཐམས་ཅད་སྙིང་གར་ཡི་གེ་ཀྃ་ནག་པོའི་རྣམ་པར་གྱུར་པ་ལས་ཀྱི་རླུང་གིས་དེད་ནས། སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་ཏེ་མདུན་གྱི་ཏིལ་ལམ། ཡུངས་ཀར་ལ་ཐིམ་པར་བསམས་ལ། ཁུ་ཚུར་གཉིས་ཀྱིས་བླངས་ནས། ཨོཾ་སརྦ་པཱ་པྃ་ད་ཧ་ན་བཛྲ་ཡ། བཛྲ་ས་ཏྭ་སྱ། སརྦ་པཱ་པྃ་ད་ཧ་ན་ཞེས་བྱ་བས་ལག་པ་གཡས་ཀྱིས་སློབ་མའི་གཡས་ནས་ལན་གཉིས་བསྐོར། གཡོན་གྱིས་གཡོན་ནས་ལན་གཉིས་བསྐོར། ཁུ་ཚུར་གཉིས་ཆར་བསྒྲིགས་ཏེ་གཡས་སུ་ལན་གཅིག་བསྐོར་ནས་ལག་པ་གཉིས་ཁ་བུབ་ཏུ་བསྣོལ་ཏེ་སློབ་མའི་གཡས་ཀྱི་མེ་ལ་ལག་པ་གཡས་ཀྱི་ཡུངས་ཀར་དང་། གཡོན་གྱི་ཆུ་ལ་གཡོན་པའི་ཡུངས་ཀར་བླུག དེ་བཞིན་དུ་ཁུ་ཚུར་གཉིས་ཀྱིས་ཆུ་བླངས་ནས་སྔ་མ་བཞིན་བསྐོར་ཏེ་བླུགས་པ་ལན་གསུམ་གསུམ་བྱའོ། །རང་ལ་བྱེད་པའི་ཚེ་ལག་པ་གཉིས་བསྣོལ་བ་མི་དགོས་སོ། །བསྐོར་ཚུལ་འདི་དག་བཟང་པོ་ཡོངས་གཟུང་ལས། བདུད་རྩི་འཁྱིལ་སྔགས་ཡུངས་ཀར་བཟླས། །ཁུ་ཚུར་གཉིས་ཀྱིས་འདོད་ལྷ་ལ། །རང་གིས་བསྐོར་བས་རབ་བསྐོར་ཏེ། །གཉིས་གཉིས་རབ་ཏུ་སྦྱར་བར་བྱ། །གཅིག་ཅར་ཁུ་ཚུར་གཉིས་དག་ནི། །གཡས་སུ་བསྐོར་བ་ཡང་བྱའོ། །སྔོན་བཞིན་ཡུངས་ཀར་མེ་སྣོད་ལ། །སྦྱང་བར་བྱ་ཕྱིར་གཞུག་པར་བྱ། །ཨོཾ་སརྦ་པཱ་པྃ་སོགས་དང་། ཡེ་ཤེས་རྣམ་ཤེས་ནང་བཀུག་སྟེ། །སྙིམ་པས་ཆུ་ནི་བླང་བྱས་ནས། །དེ་བཞིན་བསྐོར་ཏེ་སྦྱང་ཕྱིར་མེར། །ཡུངས་ཀར་བཞིན་དུ་གཞུག་པར་བྱ། །ཨོཾ་ཧཱུྃ་ཌ་ཌི་ཏ་ཕཊ། ཉེ་རེག་གི་ཆོ་གའོ། །ཞེས་གསུངས་སོ། །དེ་ནས་སློབ་དཔོན་གྱིས་ཆེ་གེ་མོ་ཞེས་བྱ་བའི་བྱུར་དང་སྐལ་བ་ངན་པ་དང་། བཀྲ་མི་ཤིས་པ་ཐམས་ཅད་ཞི་བར་གྱུར་ཅིག ཅེས་བརྗོད་ལ་སྤྱི་བོར་མེ་ཏོག་རེ་གཞག་པར་བྱའོ། །དེ་ནས་ཞབས་བསིལ་ལ་སོགས་པ་དེ་ཐམས་ཅད་ཁང་པའི་ཕྱིར་རོལ་ཏུ་ཕྱུང་ལ་མེ་ཆུའི་ནང་དུ་བླུག་སྟེ་བསྐྱུར་རོ། །མཆོད་པ་ལ་སོགས་པ་རྣམས་བསལ་ཏེ། ལེགས་པར་བྱས་ལ་དབང་སྟེགས་ནི་མི་བཤིག་པར་དེ་བཞིན་དུ་གཞག་གོ །དེ་ནས་སློབ་མ་རྣམས་རང་རང་གི་གྲལ་ལ་ཉེ་བར་འཁོད་པ་ལ། བཀྲ་ཤིས་ཀྱི་གླུ་བླང་བར་བྱ་སྟེ། སྒྲུབ་གཡོག་དང་བཅས་པས་ལས་ཐམས་ཅད་པའི་བུམ་པ་བཟུང་ལ། རྡོ་རྗེ་དྲིལ་བུ་གསིལ་ཞིང་དབྱངས་དང་བཅས་པས། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་སོགས་བརྗོད་པར་དབང་ཆུའི་དཔེ་མང་པོར་འབྱུང་བ་ལ། ཕྱི་མ་དག་འོག་ནས་འབྱུང་བའི་བྱ་བ་ཐམས་ཅད་རྣམ་རྒྱལ་གྱིས་བྱེད་པས། རྣམ་རྒྱལ་ཉིད་ལ་ལས་ཐམས་ཅད་པའི་བུམ་པ་ཟེར་བ་ཡིན་ཞེས་དང་། ཁ་ཅིག་ལས་བུམ་ཉིད་བཏེག་པར་འདོད་པ་ཡོད་ཀྱང་། དབང་ཆུའི་དཔེ་དག་པ་རྣམས་ལས། ལས་ཐམས་ཅད་པའི་བུམ་པ་དང་། རྣམ་རྒྱལ་གྱི་བུམ་པ་བཟུང་ལ་ཞེས་པ་ཡོད་པས་ཚིག་ཆད་པར་སྣང་ངོ་། །དེས་ན་འདིར་བུམ་པ་གཉིས་ཀ་བཏེག་དགོས་ཤིང་། རྗེ་བཙུན་རྩེ་མོས་དྲིལ་བུ་དཀྱིལ་ཆོག་ཏུའང་བུམ་པ་གཉིས་ཀ་བཏེག་པར་གསུངས་པ་དང་མཐུན་ལ། མཚོ་སྐྱེས་ཀྱི་དབང་ཆུར་ནི། རྣམ་པར་རྒྱལ་བའི་བུམ་པ་ཉིད་བཏེག་པར་གསུངས་པས། གང་བཤད་པ་དེར་སོ་སོར་བྱ་ཡི། མཐའ་གཅིག་ཏུ་མ་ངེས་སོ། །སློབ་མའི་གཡོན་དུ་ཉེར་སྤྱོད་ལྔ་བཤམ་པར་དབང་ཆུ་གཉིས་ཀ་མཐུན་ཀྱང་མན་ངག་ལུགས་ལ་འབུལ་བའི་གསལ་ཁ་མ་བྱུང་ལ། ཌོམྦི་ལུགས་ཀྱི་དབང་ཆུར། སྐབས་འདིར་མེ་ཏོག་ལ་སོགས་པའི་མཆོད་པ་ལྔས་མཆོད་ལ། བུམ་པ་ལག་ཏུ་བླངས་ཏེ་རོལ་མོའི་སྒྲ་དང་བཅས་པས་བཀྲ་ཤིས་ཀྱི་ཚིགས་བཅད་བརྗོད་པར་གསུངས་སོ། །ཚིགས་བཅད་ཀྱང་བསྡུ་ན། དཀོན་མཆོག་གསུམ་གྱི་ཚིགས་སུ་བཅད་པས་ཆོག་ལ། སྤྲོས་པ་ལ་དགའ་ན། དཀྱིལ་ཆོག་གཉིས་ལས་འབྱུང་བ་ལྟར་མཛད་པ་བཅུ་གཉིས་ཀྱི་བཀྲ་ཤིས་ལ་སོགས་པ་ཇི་ལྟར་འདོད་པའི་བཀྲ་ཤིས་ཀྱི་གླུ་བླང་བ་བཀའ་སྲོལ་གཉིས་ཆར་ལའང་འདྲ་བར་སྣང་ངོ་། །མཚོ་སྐྱེས་ལུགས་ལ་ནི་ཚིགས་བཅད་གསུམ་པོའི་སྟེང་དུ། རྒྱལ་བ་སྲས་བཅས་བསོད་ནམས་མཐུ་དག་དང་། །ཞེས་སོགས་ཚིགས་བཅད་བཞི་བརྗོད་པར་རྒྱ་གཞུང་དང་། བོད་གཞུང་གཉིས་ཀ་ལས་གསུངས་སོ། །འདི་དག་ནི་བྱུར་བསལ་བ་དང་། ཤིས་པ་བརྗོད་པའི་ཆོ་ག་རྒྱས་པའི་ལུགས་ཡིན་ལ། བསྡུ་ན་དབང་སྟེགས་ཀྱི་དཀྱིལ་འཁོར་བྲི་བ་མ་གྲུབ་ཀྱང་། སློབ་མའི་གཡས་ཕྱོགས་སུ་ཆུ་བཞི་དང་། གཡོན་དུ་ཉེར་སྤྱོད་ལྔ་དང་། མདུན་དུ་བཟེད་ཞལ་གཉིས་དང་། མེ་དང་། ཆུ་དང་། ཡུངས་ཀར་རྣམས་བཤམས་ནས་དབང་སྟེགས་བྲིས་པ་ལྟར་གྱི་སྟེང་དུ་མེ་ཏོག་གང་ཕོག་གི་ལྷའི་ང་རྒྱལ་གྱིས་གནས་པར་མོས་པ་བྱེད་དུ་བཅུག་ལ། སློབ་དཔོན་གྱི་ལག་པ་གཡས་པས་ཞབས་བསིལ་དང་། གཡོན་པས་བཟེད་ཞལ་བཟུང་ནས། སློབ་མ་རེ་རེའི་མདུན་དུ་བཟེད་ཞལ་གྱི་ནང་དུ་ཆུ་ཙར་བ་རེ་བླུག་སྟེ་ཞབས་བསིལ་བར་བསམ། དེ་བཞིན་དུ་ཞལ་བསིལ་ལ་ཡང་བྱ། འཐོར་འཐུང་ལག་པ་གཡོན་པས་བཟུང་ནས། གཡས་པས་ཀུ་ཤའི་རྩེ་མོས་འཐོར་བ་རེ་བྱེད། མཆོད་ཡོན་ལག་ཏུ་གཏད་པའི་ཚུལ་བྱ། ཡུངས་ཀར་གྱིས་སྦྱང་བ་མན་ཆད་སྔར་བཞིན་བྱའོ། །ཕྲེང་བར་ཡུངས་ཀར་དང་། ཆུ་དང་། ཁམ་ཕོར་དང་། དཱུརྦའི་མྱུ་གུ་དང་བཅས་པའི་བའི་ལྕི་བའི་ཆང་བུ་དང་། ཟན་གྱི་ཆང་བུ་སྒྲོན་མེ་དང་བཅས་པ་དང་། སིང་རས་རྣམས་བཞི་བཞི་སྟེ། དྲུག་བཞི་ལྡན་གྱི་སྦྱང་བ་བྱེད་པ་ནི་ལུགས་དེ་ལ་དགོས་ཀྱི། དེ་ལས་གཞན་རྒྱ་བོད་སུས་ཀྱང་མ་བཤད་དོ། །གསུམ་པ་དེ་ལ་དབང་བསྐུར་བ་དངོས་ལ་གཉིས་ཏེ། དབང་སྤྱིའི་རྣམ་པར་གཞག་པ་དང་། སོ་སོའི་ཆོ་ག་ལ་འཇུག་པའོ། །དང་པོ་ལ་གསུམ་སྟེ། ཀྱེ་རྡོ་རྗེའི་རྒྱུད་ལ་བརྟེན་ནས་བིརྺ་པ་རྗེས་འབྲང་དང་བཅས་པས་ཇི་ལྟར་འགྲེལ་བའི་ཚུལ། གསང་བ་འདུས་པའི་རྒྱུད་ལ་བརྟེན་ནས་ཡེ་ཤེས་ཞབས་ལུགས་པས་ཇི་ལྟར་འགྲེལ་བའི་ཚུལ། འཁོར་ལོ་བདེ་མཆོག་གི་རྒྱུད་ལ་བརྟེན་ནས་མཚོ་སྐྱེས་དང་། སྤྱོད་པའི་རྡོ་རྗེས་ཇི་ལྟར་འགྲེལ་བའི་ཚུལ་ལོ། །དང་པོ་ནི། རྩ་རྒྱུད་ལས། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་བརྗོད། །ཅེས་དང་། རྡོ་རྗེ་ཆེ་དང་དྲིལ་བུ་ཆེ། །ཟུང་ཞིག་རྡོ་རྗེར་བྱིན་གྱིས་བརླབས། །དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཞེས་དང་། སློབ་དཔོན་གསང་བ་ཤེས་རབ་དང་། །བཞི་པ་དེ་ཡང་དེ་བཞིན་ནོ། །ཞེས་དབང་བཞིའི་ཐ་སྙད་མཛད་པའི་ཚེ། སློབ་དཔོན་དང་། གསང་བ་དང་། ཤེས་རབ་ཡེ་ཤེས་དང་། དབང་བཞི་པ་ཞེས་པའི་ཐ་སྙད་མཛད་ཅིང་། སློབ་དཔོན་གྱི་དབང་གི་མཚན་གཞིའང་། དམ་ཚིག་གསུམ་སྦྱིན་པ་ལ་མཛད་པ་ནི་ཚིགས་བཅད་སྔ་མའི་ནང་དུ་རྡོ་རྗེ་དང་། དྲིལ་བུ་དང་། མཉམ་སྦྱོར་བ་ཞེས་དང་། ཕྱི་མའི་ནང་དུ་རྡོ་རྗེ་ཆེ་དང་། དྲིལ་བུ་ཆེ་དང་། རྡོ་རྗེར་བྱིན་གྱིས་བརླབས། །ཞེས་པ་རྣམས་ཀྱིས་བསྟན་ཏོ། །དེ་ལྟར་སློབ་དཔོན་གྱི་དབང་དམ་ཚིག་གསུམ་སྦྱིན་པ་ལ་ངོས་འཛིན་པ་དང་། བརྟུལ་ཞུགས་ཀྱི་དབང་མན་ཆད་རྡོ་རྗེ་སློབ་མའི་དབང་དུ་མཛད་པ་འདི་ནི་ཡོ་ག་དང་སྒོ་བསྟུན་པ་སྟེ། ཡེ་ཤེས་ཐིག་ལེའི་རྒྱུད་ལས། བྱ་རྒྱུད་ལ་ཆུ་དང་ཅོད་པཎ་གཉིས། སྤྱོད་རྒྱུད་ལ་དེའི་སྟེང་དུ་རྡོ་རྗེ་དང་། དྲིལ་བུ་དང་། མིང་དང་ལྔ། རྣལ་འབྱོར་རྒྱུད་ལ། ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་རབ་ཏུ་གྲགས། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །ཞེས་དམ་ཚིག་གསུམ་སྦྱིན་པ་དང་། ལུང་བསྟན། དབུགས་དབྱུང་། གཟེངས་བསྟོད་དེ་དྲུག་ལ་ཕྱིར་མི་ལྡོག་པའི་དབང་ཞེས་དང་། སློབ་དཔོན་གྱི་དབང་ཞེས་པའི་ཐ་སྙད་མཛད་ནས། རྣལ་འབྱོར་ཆེན་པོ་ལ་དེའི་སྟེང་དུ་གསང་བ་དང་། ཤེས་རབ་ཡེ་ཤེས་དང་། དབང་བཞི་པ་སྟེ་དབང་བཞི་ཡོད་པར་གསུངས་པས་དེ་དང་ཐ་སྙད་སྒོ་བསྟུན་པའི་དབང་དུ་བྱས་པར་སྣང་ངོ་། །དེ་ཙམ་ཞིག་ཡོ་ག་དང་ཐུན་མོང་བ་ཡིན་ཀྱང་། ཕྱག་རྒྱ་སྐུའི་དམ་ཚིག་ཕྱག་རྒྱ་དང་མཉམ་པར་སྦྱར་ནས། ལུས་ཀྱི་རིགས་པའི་བདེ་བ་ཉམས་སུ་མྱོང་བ་ལ་འཇོག་པ་ནི་རྣལ་འབྱོར་ཆེན་པོའི་ཐུན་མོང་མ་ཡིན་པའི་རྣམ་གཞག་སྟེ། གནད་ཀྱི་གསལ་བྱེད་ལས། ཡང་ན་རྣལ་འབྱོར་གྱི་རྒྱུད་དང་། ཐུན་མོང་གི་སློབ་དཔོན་གྱི་དབང་གི་བར་ནི་རྒྱུད་འདིར་མ་གསུངས་ཏེ་གཞན་དུ་ཤེས་པར་བྱའོ། །འདིར་ནི་ཐུན་མོང་མ་ཡིན་པའི་སློབ་དཔོན་གྱི་དབང་སྟེ། ཧེ་བཛྲ་ལས། ཤེས་རབ་བཅུ་དྲུག་ལོན་པ་ལ། །ཞེས་སོགས་དྲངས་ནས། ཚིགས་སུ་བཅད་པ་གཉིས་པོ་འདིའང་དེའི་དོན་དང་མཐུན་ནོ་ཞེས་ཁོ་བོའི་རྣམ་པར་རྟོག་པའོ། །ཞེས་གསུངས་པས་སོ། །དོན་འདི་ཉིད་ཀྱི་དབང་དུ་མཛད་ནས་གནད་ཀྱི་གསལ་བྱེད་དང་། མངོན་རྟོགས་ལྗོན་ཤིང་གཉིས་ལས་ཐུན་མོང་གི་དབང་དང་ཐུན་མོང་མ་ཡིན་པའི་དབང་གཉིས་ལས། ཕྱི་མ་ལ་བུམ་པ་གསང་བ་ཤེས་རབ་ཡེ་ཤེས་དབང་བཞི་པ་ཞེས་པའི་ཐ་སྙད་དང་། དབང་ཆུར་ཡང་སློབ་མ་ལ་བྱ་བ་ཐུན་མོང་གི་དབང་བསྐུར་བའི་ཆོ་ག་དང་། ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་བསྐུར་བའི་ཆོ་ག་གཉིས་སུ་མཛད་ནས་ཕྱི་མ་ལ་དབང་བཞིར་ཕྱེ་བར་མཛད་དོ། །དེ་ཡང་སྤྱིར་རིག་པའི་དབང་ལྔ་ནས་རྡོ་རྗེ་སློབ་དཔོན་གྱི་དབང་གི་བར་ཐམས་ཅད་ལ་བུམ་པ་ཆུའི་བྱ་བ་འཇུག་པས་བུམ་པའི་དབང་ཞེས་པ་ཙམ་གྱི་མིང་འཇུག་ཀྱང་དེ་ཙམ་གྱིས་ལུགས་འདིའི་བུམ་པའི་དབང་གི་དོན་མི་རྫོགས་ཏེ། སྒྲ་བཤད་པ་ཙམ་རིག་པའི་དབང་ལྔ་ཆར་ལ་ལྷ་མོ་རྣམས་ཀྱི་ཅོད་པཎ་ལ་དབང་བས་ཅོད་པཎ་གྱི་དབང་ཞེས་པ་ཡང་ཡོད་པས་སོ། །འདིར་ནི་རྡོ་རྗེ་གུར་ལས། ཆུ་ཡི་དབང་བསྐུར་དང་པོ་སྟེ། །གཉིས་པ་དབུ་བརྒྱན་དབང་བསྐུར་རོ། །གསུམ་པ་རྡོ་རྗེའི་དབང་བསྐུར་ལ། །རང་གི་བདག་པོ་བཞི་པ་སྟེ། །ལྔ་པ་མིང་གི་དབང་བསྐུར་རོ། །དྲུག་པ་རྫོགས་པའི་སངས་རྒྱས་ཉིད། །བདུན་པ་བུམ་པའི་དབང་བསྐུར་རོ། །བརྒྱད་པ་གསང་བའི་དབང་བསྐུར་ཏེ། །དགུ་པ་ཤེས་རབ་དབང་བསྐུར་རོ། །དེ་ཉིད་རྡོ་རྗེ་རབ་སྦྱོར་བས། །རྡོ་རྗེ་བརྟུལ་ཞུགས་ཀུན་སྦྱིན་བྱ། །ཞེས་བདུན་པ་ཉིད་ལ་བུམ་པའི་དབང་བསྐུར་དུ་གསུངས་པས། དུས་འཁོར་བ་དག བུམ་པའི་སྒྲས་ཤེས་རབ་མའི་དཀར་འཛིན་ནམ། འོ་འཛིན་ཡོངས་སུ་རྒྱས་པ་ལ་རེག་པ་དང་། ནོམ་པ་དང་། ཉུག་པ་ལ་བརྟེན་ནས་དགའ་བའི་ཡེ་ཤེས་སྐྱེས་པ་གང་ཡིན་པ་དེ་བུམ་པའི་དབང་དུ་འདོད་པ་ལྟར། འདིར་ཡང་། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །ཅེས་ཤེས་རབ་མ་དང་ལུས་ཀྱི་གནས་ཐམས་ཅད་རེག་པ་ལ་བརྟེན་ནས། དགའ་བའི་ཡེ་ཤེས་སྐྱེས་པ་དེ་ཉིད་བུམ་པའི་དབང་དུ་འདོད་དགོས་སོ། །དེས་ན་ཐུན་མོང་མ་ཡིན་པའི་དབང་བཞི་བགྲངས་པའི་ཚེ་བུམ་པའི་དབང་ནས་བགྲངས་པ་དང་། སློབ་དཔོན་གྱི་དབང་ནས་བགྲངས་པ་གཉིས་རྩ་བཤད་གཉིས་ཀྱི་དགོངས་པ་སྦྱར་བའི་ཚེ་ཁྱད་པར་མེད་པར་བཞེད་དོ། །གཉིས་པ་ནི། ཡོ་ག་དང་ཐ་སྙད་སྒོ་མ་བསྟུན་པར་བླ་མེད་རང་རྐང་ལ་དམ་ཚིག་གསུམ་སྦྱིན་པ་ལ་རྡོ་རྗེ་སློབ་དཔོན་གྱི་དབང་དུ་འདོད་པའི་ངེས་པ་མི་སྣང་སྟེ། བཞི་བརྒྱ་ལྔ་བཅུ་པ་ལས་དམ་ཚིག་གསུམ་སྦྱིན་པ་རྡོ་རྗེ་སློབ་མའི་དབང་དུ་བཤད་པའི་ཕྱིར་རོ། །ལུགས་འདི་ལ་རྡོ་རྗེ་སློབ་དཔོན་གྱི་དབང་ཇི་ལྟར་སྙམ་ན་རིག་པའི་དབང་ལྔ་གཉིས་པ་བསྐུར་ནས་བཀྲ་ཤིས་ཀྱི་གླུ་དང་བཅས་ཏེ། ཆུ་དབང་རྒྱས་པ་བསྐུར་ཏེ་རིགས་བདག་གིས་རྒྱས་གདབ་པ་ཉིད་ལ་རྡོ་རྗེ་སློབ་དཔོན་གྱི་དབང་དུ་བཞེད་ཅིང་། དེའི་ཚེ་དམ་ཚིག་གསུམ་སྦྱིན་པ་རྣལ་འབྱོར་རྒྱུད་དང་སྒོ་མི་བསྟུན་ཡང་སློབ་དཔོན་གྱི་དབང་གི་སྐབས་སུ་རིག་པའི་དབང་ལྔ་བསྐྱར་ནས་བསྐུར་བ་རྣལ་འབྱོར་རྒྱུད་དང་སྒོ་བསྟུན་པར་སྣང་ངོ་། །འདི་ཅི་ལྟར་ཤེས་ན་སྨན་པའི་ཞབས་ཀྱིས། སྡོམ་པ་ཡང་ནི་རྣམ་གཉིས་ཏེ། །ཐུན་མོང་སྡོམ་པར་བསྟན་པ་དང་། །ཐུན་མོང་མ་ཡིན་སྡོམ་པའོ། །ཞེས་སྡོམ་པ་གཉིས་སུ་གསུངས་ཤིང་། དེ་གཉིས་ཀྱི་དོན་ཤཱནྟི་པས་དེ་ཡང་རེ་ཞིག་རྣམ་པ་གཉིས་ཏེ། ལ་ལ་ནི་སྤྱིའི་སྡོམ་པའོ། །ལ་ལ་ནི་སློབ་དཔོན་གྱི་སྡོམ་པའོ། །དེ་ལ་སྡོམ་པ་གང་སློབ་དཔོན་མི་བྱེད་ཀྱང་སྦྱིན་པ་དེ་ནི་སྤྱིའི་སྡོམ་པ་ཡིན་ཏེ། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་པ་ཙམ་གྱི་མཚན་ཉིད་ཅན་སྔར་བཤད་པ་ཡིན་ནོ། །སློབ་དཔོན་ཉིད་དུ་བྱེད་པར་བྱིན་པ་གང་ཡིན་པ་དེ་ནི་སློབ་དཔོན་གྱི་སྡོམ་པ་སྟེ། རིགས་ལྔས་ཡང་དག་པར་བསྡུས་པའོ། །ཞེས་གསུངས་པས་སློབ་མའི་དབང་གི་རིག་པའི་དབང་ལྔའི་སྐབས་སུ་རིགས་ལྔའི་སྡོམ་པ་མི་ཐོབ་པར་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་འཛིན་པ་ཙམ་ཡིན་པར་བཞེད་ཅིང་སློབ་དཔོན་གྱི་དབང་གི་རིག་པའི་དབང་ལྔས་རིགས་ལྔའི་སྡོམ་པ་ཐོབ་པར་བཞེད་པས་སོ། །རྣལ་འབྱོར་རྒྱུད་ལ་སྡོམ་པའི་ཐོབ་ཚུལ་འདི་ལྟར་ཡིན་པ་ནི་འོག་ནས་འཆད་པར་འགྱུར་རོ། །གལ་ཏེ་འདི་ལ་ཡང་སྤྱིའི་སྡོམ་པ་སློབ་མའི་སྐབས་ཀྱི་རིག་པའི་དབང་ལྔ་ལས་ཐོབ་པ་མ་ཡིན་ནོ་སྙམ་ན་དེ་ཡང་མི་འཐད་དེ། འགྲེལ་པ་དེ་ཉིད་ལས་ཡང་གང་ཞིག་ལ་རིག་པའི་དབང་བསྐུར་བ་ཙམ་འབའ་ཞིག་སྦྱིན་ཞེ་ན་སློབ་དཔོན་གྱི་དབང་བསྐུར་བ་དོན་དུ་མི་གཉེར་བའམ། དེ་དོན་དུ་གཉེར་བ་སྤྱིའི་སྡོམ་པ་ཉི་ཚེ་ཙམ་ལེན་པར་བྱེད་ཀྱི། སློབ་དཔོན་གྱི་སྡོམ་པ་ནི་མ་ཡིན་པ་དག་ལ་བྱའོ། །ཞེས་སྤྱིའི་སྡོམ་པ་རིག་པའི་དབང་བསྐུར་བ་ལས་ཐོབ་པ་གསལ་བར་གསུངས་པའི་ཕྱིར་རོ། །མདོར་ན་ལུགས་འདི་ལ་སློབ་མའི་སྐབས་ཀྱི་རིག་པའི་དབང་ལྔ་ལས་བྱང་ཆུབ་སེམས་དཔའ་དང་ཐུན་མོང་གི་སྡོམ་པ་དང་། སློབ་དཔོན་གྱི་སྐབས་ཀྱི་རིག་པའི་དབང་ལས་རིགས་ལྔའི་སྡོམ་པ་ཐོབ་ཅིང་དེ་ཉིད་ལ་ཆུ་དབང་རྒྱས་པ་བསྐུར་ནས་ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ་རབ་ཏུ་གནས་པ་བྱས་པས་སློབ་དཔོན་གྱི་དབང་དུ་བཞེད་ཀྱི་དམ་ཚིག་གསུམ་སྦྱིན་པ་ལ་སློབ་དཔོན་གྱི་དབང་དུ་ནི་མི་བཞེད་དོ། །གསུམ་པ་ནི། གྲུབ་ཆེན་མཚོ་སྐྱེས་ཀྱིས་ཀྱེ་རྡོར་གྱི་སྐབས་སུ་ཡང་ཆོ་གའི་འགྲོས་ཕལ་ཆེར་བདེ་མཆོག་ལྟར་མཛད་ཅིང་། རིག་པའི་དབང་ལྔའི་རྡོ་རྗེའི་དབང་གི་སྐབས་སུ་རྡོ་རྗེའི་དེ་ཁོ་ན་ཉིད་བསྒྲགས། དྲིལ་བུའི་དབང་གི་སྐབས་སུ་དྲིལ་བུའི་དེ་ཁོ་ན་ཉིད་བསྒྲགས་ནས་དེའི་རྗེས་སུ་དེ་ལྟར་རྡོ་རྗེ་དྲིལ་བུ་སྦྱིན་ལ་ཕྱག་རྒྱ་ཆེན་པོ་དང་ལྡན་པར་བསམ་མོ། །ཞེས་གསུངས་པ་འདི་ཉིད་ཀྱིས་དམ་ཚིག་གསུམ་སྦྱིན་པ་ཡིན་ཏེ། དེ་ལས་གཞན་དམ་ཚིག་གསུམ་སྦྱིན་པའི་ཚིག་མི་སྣང་བའི་ཕྱིར་རོ། །འདི་ཡང་ཡེ་ཤེས་ཞབས་ལུགས་ལྟར་དམ་ཚིག་གསུམ་སྦྱིན་པ་སློབ་མའི་དབང་གི་སྐབས་སུ་བཤད་པའི་ལུགས་སུ་སྣང་ངོ་། །དེ་ནས་མིང་གི་དབང་བསྐུར་དང་། ཐུན་མོང་དང་ཐུན་མོང་མ་ཡིན་པའི་བརྟུལ་ཞུགས་བྱིན་ནས་གསང་བའི་དབང་བསྐུར་བར་གསུངས་པས་རྡོ་རྗེ་སློབ་མ་དང་། སློབ་དཔོན་གྱི་དབང་གིས་མཚམས་སོ་སོར་ཕྱེ་བ་མི་སྣང་ཡང་ཇི་བཙུན་རྩེ་མོས་ཐུན་མོང་མ་ཡིན་པའི་བརྟུལ་ཞུགས་དང་གསང་དབང་གི་བར་དེར་དམ་ཚིག་གསུམ་སྦྱིན་ནས་ཆུ་དབང་བསྐུར་བ་ཁ་བསྐང་བ་ནི་ཀྱེ་རྡོར་གྱི་རྒྱུད་ལ་བརྟེན་པར་སྣང་སྟེ། རྡོ་རྗེ་རབ་གནས་རྡོ་རྗེ་ཉིད། །ཅེས་པས་ཕྱག་རྒྱ་སྐུའི་དམ་ཚིག་སྦྱིན་པར་གསུངས་པའི་ཕྱིར་རོ། །སྤྱོད་པའི་རྡོ་རྗེས་ནག་པོ་དཀྱིལ་ཆོག་ཏུ་ཡང་ཆོ་གའི་འགྲོས་ནས་གླིང་མ་ཇི་ལྟ་བ་བཞིན་དུ་གསུངས་པའི་དོན་རྗེ་ས་ཆེན་གྱི་རས་བྲིས་ལ་བརྟེན་པའི་དཀྱིལ་ཆོག་ཏུ་ཐུན་མོང་མ་ཡིན་པའི་བརྟུལ་ཞུགས་ཀྱི་རྗེས་སུ་སློབ་དཔོན་གྱི་དབང་ཁ་མི་སྐོང་བར། དབང་བཞི་རྫོགས་པའི་རྗེས་སུ་རྡོ་རྗེ་སློབ་དཔོན་གྱི་དབང་དོན་དུ་གཉེར་བ་ལ་ལོགས་སུ་སྦྱིན་པར་གསུངས་སོ། །ལུགས་འདིའི་བཞེད་པས། རང་དོན་བསྐྱེད་རྫོགས་ཀྱི་སྒྲུབ་པ་གཙོ་བོར་བྱེད་ན་གཞུང་ནས་བཤད་པའི་དབང་བཞི་རྫོགས་པར་ཐོབ་པ་ཙམ་གྱིས་ཆོག་ལ། གཞན་དོན་ཕྲིན་ལས་བྱེད་ན། དེའི་སྟེང་དུ་རྡོ་རྗེ་སློབ་དཔོན་གྱི་དབང་དགོས་པར་བཞེད་པ་འདྲའོ། །རྗེ་བཙུན་གྱི། རྗེ་བཙུན་རྩེ་མོའི་དགོངས་པ་དང་མཐུན་པར། ས་ཆེན་གྱིས་ལོགས་སུ་གསུངས་པའི་རྡོ་རྗེ་སློབ་དཔོན་གྱི་དབང་དེ་ཉིད་ཐུན་མོང་མ་ཡིན་པའི་བརྟུལ་ཞུགས་དང་། གསང་དབང་གི་བར་དུ་སྦྱར་ནས་གསུངས་པས། རྗེ་བཙུན་གོང་མ་འདི་རྣམས་ཀྱིས་སློབ་དཔོན་གྱི་དབང་ལ་ཀྱེ་རྡོ་རྗེའི་དགོངས་པ་ཇི་ལྟ་བ་བཞིན་དམ་ཚིག་གསུམ་སྦྱིན་པ་དགོས་པར་བཞེད་དོ། །ཀླུ་བྱང་གི་དཀྱིལ་ཆོག་ཉི་ཤུ་པར། ཕྱག་མཚན་གྱི་དབང་བསྐུར་དང་། ཕན་ཡོན་གཉིས་ཀྱི་བར་དུ་དམ་ཚིག་གསུམ་སྦྱིན་ནས་ཆུ་དབང་བསྐུར་བའི་རྡོ་རྗེ་སློབ་དཔོན་གྱི་དབང་མ་གསུངས་ཀྱང་། ཟུང་འཇུག་གསལ་བ་ལས། བར་དེར་དམ་ཚིག་གསུམ་བྱིན་ནས་ཆུ་དབང་བསྐུར་བའི་རྡོ་རྗེ་སློབ་དཔོན་གྱི་དབང་ཁ་བསྐང་བར་མཛད་པས། ཁ་བསྐང་ཚུལ་འདི་ནི་འཕགས་ཡུལ་གྱི་སྲོལ་ཆེན་དུའང་སྣང་ངོ་། །ནས་གླིང་མ་དང་ནག་པོ་དཀྱིལ་ཆོག་གཉིས་ཀྱི་འགྲོས་ལ་རྡོ་རྗེ་སློབ་དཔོན་གྱི་དབང་ལ་རང་དོན་སྒྲུབ་པའི་དབང་དུ་བྱས་པ་དང་། གཞན་དོན་སྒྲུབ་པའི་དབང་དུ་བྱས་པ་གཉིས་ལས། སྔ་མ་ནི་གཞུང་ལས་བཤད་པའི་དབང་གོང་མ་གསུམ་དང་། ཕྱི་མ་ནི་ས་ཆེན་ཡབ་སྲས་གསུམ་གྱིས་ཁ་བསྐངས་པ་ཉིད་ལ་ངོས་བཟུང་ན་ལེགས་པར་སྣང་ངོ་། །གཉིས་པ་སོ་སོའི་ཆོ་ག་ལ་འཇུག་པ་ལ་གཉིས་ཏེ། སློབ་མ་ལ་བྱ་བ་ཐུན་མོང་གི་དབང་བསྐུར་བའི་ཆོ་ག ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་བསྐུར་བའི་ཆོ་གའོ། །དང་པོ་ལ་གསུམ་སྟེ། རང་གི་ལྷག་པའི་ལྷའི་རྟེན་ལ་དེ་བཞིན་གཤེགས་པ་ལྔའི་རང་བཞིན་རིག་པའི་དབང་ལྔ་བསྐུར་བ། རྡོ་རྗེ་འཆང་ཆེན་པོའི་རྟེན་ལ་སྐུ་གསུང་ཐུགས་བྱིན་གྱིས་བརླབ་པའི་དབང་བསྐུར་བ། དེས་སྡོམ་པ་གང་ཐོབ་ཅིང་དོན་གང་ལ་དབང་བའོ། །དང་པོ་ལ་བཞི་སྟེ། གང་ལ་བསྐུར་བའི་རྟེན། རང་གི་ལྷག་པའི་ལྷ་ངོས་གཟུང་བ། གང་བསྐུར་བའི་རིག་པའི་དབང་ངོས་གཟུང་བ། ཇི་ལྟར་བསྐུར་བའི་ཆོ་གའི་རྣམ་གཞག དབང་གི་དོན་ངོ་སྤྲོད་པའོ། །དང་པོ་ནི། གཞི་སེམས་ཅན་གྱི་རྒྱུད་ཀྱི་ཕུང་པོ་ལྔ་དང་། ཉོན་མོངས་པ་ལྔ་དང་། འབྱུང་བ་ལྔ་དེ་བཞིན་གཤེགས་པ་རིགས་ལྔའི་ངོ་བོར་རང་བཞིན་གྱིས་རྣམ་པར་དག་པ་ནི། རང་བཞིན་རྣམ་དག་གི་ལྷག་པའི་ལྷ་ཡིན་ལ། དེ་ཉིད་སྐབས་འདིར་སློབ་དཔོན་དང་། སློབ་མ་གཉིས་ཀས་ལྷ་ཞལ་ཕྱག་གི་རྣམ་པ་ཅན་དུ་བསྐྱེད་པ་ནི་རང་གི་ལྷག་པའི་ལྷ་ཞེས་བྱ་སྟེ། སྦྱང་གཞི་རང་ལ་ཡོད་པ་ལྷག་པའི་ལྷར་དངོས་སུ་བསྐྱེད་པ་ཡིན་པའི་ཕྱིར་རོ། །ཤཱནྟི་པས་བཞི་བརྒྱ་ལྔ་བཅུ་པའི་འགྲེལ་པར། ཕུང་པོ་ལྔ་ལ་ཆོས་ཉིད་ཀྱི་ཕུང་པོ་ལྔ་ནི་ལྷག་པའི་ལྷ་རང་བཞིན་གྱིས་རྣམ་པར་དག་པ་ཡིན་ལ། ཀུན་བརྟགས་པ་དང་། རྣམ་པར་བརྟགས་པའི་ཕུང་པོ་ལྔ་ནི་ལྷག་པའི་ལྷའི་ངོ་བོ་རང་བཞིན་གྱིས་རྣམ་པར་དག་པ་མ་ཡིན་ནོ། །ཞེས་ཕྱེ་སྟེ་གསུངས་པ་ནི་སེམས་ཙམ་པའི་གྲུབ་མཐའ་རྡོ་རྗེ་ཐེག་པ་ལ་སྦྱར་བ་ཡིན་གྱི། དབུ་མའི་གཞུང་ལུགས་དོན་དམ་བདེན་པ་སྤྲོས་པ་ཐམས་ཅད་དང་བྲལ་ཞིང་། ཀུན་རྫོབ་བདེན་པ་སྤྲོས་བཅས་ལྷར་བསྒོམས་པའི་རྣམ་གཞག་མ་ཡིན་པས་ལུགས་འདི་ལ་སྦྱར་དུ་མི་རུང་ངོ་། །དེ་ཉིད་ཕུགས་སུ་བཅུག་ནས་སེམས་ཙམ་པ་ཞེས་པའི་མིང་འདོགས་གཞན་སྟོང་ཞེས་པར་བསྒྱུར་ཏེ། དབུ་མ་ཆེན་མོའི་ལུགས་སུ་ཇོ་ནང་པ་རྣམས་སྨྲ་ཞིང་། དེང་སང་རྒྱུ་མཚན་མེད་པ་རྣམས་ཀྱང་དེའི་རྗེས་སུ་འབྲང་བར་སྣང་ནའང་། གྲུབ་མཐའ་བཞིའི་རྣམ་དབྱེ་མ་ཕྱེད་པའི་གཏམ་དུ་སྣང་བས། ཁོ་བོས་གཞན་དུ་རྒྱས་པར་བཀག་ཟིན་ཏོ། །གཉིས་པ་ནི། དབང་རྫས་རྣམ་རྒྱལ་བུམ་པའི་ཆུ་ལ་སོགས་པ་རིགས་ལྔའི་ངོ་བོར་རང་བཞིན་གྱིས་རྣམ་པར་དག་པ་དེ་ཉིད། སློབ་དཔོན་གྱིས་རིགས་ལྔ་ཞལ་ཕྱག་གི་རྣམ་པ་ཅན་ཡན་ལག་བཞི་རྫོགས་སུ་བསྐྱེད་ནས། དེ་དག་ཞུ་བ་ལས་བྱུང་བའི་ངོ་བོ་རིགས་ལྔ་ཡིན་པ་ལ། རྣམ་པ་ཆུ་ལ་སོགས་པར་གནས་པ་ནི་གང་བསྐུར་བར་བྱ་བའི་དབང་རྫས་ཡིན་ལ། དེ་དག་སྤྱི་བོར་བླུག་པ་དང་། ལག་ཏུ་གཏད་པ་སོགས་བྱས་པས་སྦྱངས་གཞི་སྔར་བཤད་པ་རྣམས་སྦྱོང་བྱེད་རིགས་ལྔར་སློབ་མའི་བློ་ངོར་གྲུབ་པ་ནི་རིག་པའི་དབང་བསྐུར་བའི་དོན་ཏེ། སློབ་དཔོན་རྡོ་རྗེ་དྲིལ་བུ་པས། དེ་ཡི་དབང་བསྐུར་ལ་སོགས་རིམ། །ཅི་ནས་མ་གྲུབ་ཡང་གྲུབ་བྱེད། །དེ་ཡི་རང་བཞིན་མི་ཤེས་རྣམས། །སྣོད་དུ་བྱ་བར་བཞེད་པ་སྟེ། །དབང་བསྐུར་སོགས་རིམ་ཀུན་རྫོབ་ཏུ། །མངོན་སུམ་དུ་ནི་སྒྲུབ་པ་འོ། །ཞེས་གསུངས་པས་སོ། །མིང་དབང་ལ་དབང་རྫས་ལྷར་བསྐྱེད་པ་མེད་པས། རིག་པའི་དབང་ལྔ་མ་ཚང་བར་འགྱུར་རོ་སྙམ་ན། རྗེ་བཙུན་རྩེ་མོས། དབང་ཆུ་གཉིས་དང་། དྲིལ་བུ་དཀྱིལ་ཆོག་ལས། མིང་དབང་ལ་དབང་རྫས་བྱེད་ན། མེ་ཏོག་གི་ཕྲེང་བའང་རྡོ་རྗེ་དྲིལ་བུ་ལྷར་བསྐྱེད་ཅེས་གསུངས་པས། སྔ་མ་ལྟར་ན། མེ་ཏོག་གི་ཕྲེང་བ་སྤྱི་བོར་བཟུང་ནས་མིང་བཏགས། ཕྱི་མ་ལྟར་ན་རྡོ་རྗེ་དྲིལ་བུ་སྤྱི་བོར་བཟུང་ནས་མིང་བཏགས་པ་ནི། སློབ་མ་ལ་དབང་རྫས་མི་འདུག་གོ་སྙམ་པའི་དོགས་པ་སྐྱེ་ན། དེ་བཟློག་པའི་ཆེད་ཡིན་གྱི། ཕལ་ཆེར་ལ་དབང་རྫས་ཀྱི་བསྐྱེད་ཆོག་མེད་པ་ནི་མིང་དེ་ཉིད་སློབ་དཔོན་གྱི་ཐུགས་ཀ་ནས་བཏོན་པས་རྣམ་སྣང་གི་ངོ་བོར་གྲུབ་པ་ལ་དགོངས་ནས་བསྐྱེད་ཆོག་དངོས་སུ་མ་གསུངས་སོ། །གསུམ་པ་ལ་གསུམ་སྟེ། དམིགས་པ་འཕོ་ཚུལ་གྱི་ཁྱད་པར་དེ་ལས་རྗེ་བཙུན་མཆོག་གི་དགོངས་པ་ངོས་གཟུང་བ། སྐབས་སུ་བབ་པའི་ཆོ་ག་གསལ་བར་བཤད་པའོ། །དང་པོ་ལ་གསུམ་སྟེ། བདག་དང་དབང་རྫས་སློབ་མ་གསུམ་ཆར་དམིགས་པ་འཕོ་བ། སློབ་དཔོན་བདག་ཉིད་མི་འཕོ་བར་སློབ་མ་དང་དབང་རྫས་འཕོ་བ། བདག་དང་སློབ་མ་མི་འཕོ་ཞིང་དབང་རྫས་འཕོ་བའོ། །དང་པོ་ནི། གྲུབ་ཆེན་དྷ་རི་ཀ་པའི་ལུགས་ཏེ། མི་བསྐྱོད་བསམ་གཏན་གསུམ་རྫོགས་ནས། །ཞེས་བཤད་པས། མི་བསྐྱོད་པ་ཆུ་དབང་ནས་མིང་དབང་གི་བར་གསུམ་ཀ་དམིགས་པ་འཕོ་བ་ཡིན་ནོ། །བི་བྷཱུ་ཏ་ཙནྡའི་དཀྱིལ་ཆོག་དང་། སློབ་དཔོན་ཨ་བྷ་ཡའི་ཕྲེང་བར་ཡང་དེ་དང་མཐུན་པར་བཤད་དོ། །གཉིས་པ་ནི། དགྲ་ནག་ཞང་ལུགས་པ་རྣམས་ཀྱིས། སློབ་མ་དབང་སྟེགས་ཀྱི་སྟེང་དུ་མེ་ཏོག་གང་ཕོག་གི་ལྷར་བསྐྱེད་པ་ལ། བྱུར་བསལ་བའི་ཆོ་ག་རྣམས་བྱས་ཏེ་བཞག་ལ། དེ་ནས་དབང་རྫས་བུམ་པའི་ཆུ་སོགས་བཞི་བསང་སྦྱངས་སྟོང་པའི་ངང་ལས། ཆོ་ག་གསུམ་ལས་དེ་བཞིན་གཤེགས་པ་རིགས་བཞིར་དུས་གཅིག་ལ་བསྐྱེད། ཡན་ལག་བཞི་རྫོགས་སུ་བྱས་ལ། ཞུ་བ་ལས་བྱུང་བའི་དབང་རྫས་བུམ་པའི་ཆུ་ནས་དྲིལ་བུའི་བར་དུ་བལྟས་ལ། དེ་ནས་སློབ་མ་ཁྲུས་སྟེགས་ལས་ཕབ་སྟེ། གྲལ་ལ་འཁོད་པ་ལ་མི་བསྐྱོད་པར་བསྐྱེད། ཡན་ལག་དང་པོ་གསུམ་བྱས་ལ། དེ་ནས་དབང་བསྐུར་བ་གསོལ་བ་གདབ་པ། དབང་བསྐུར་མི་བསྐྱོད་པས་དབུ་བརྒྱན་པ་དེ་ལ་མཆོད། དེ་ནས་སློབ་མ་རིན་འབྱུང་དུ་བསྐྱེད་ཅིང་དབང་བསྐུར་བ་སོགས་བྱེད་དོ། །ཚུལ་འདི་ནི་རྗེ་བཙུན་རིན་པོ་ཆེས་དགྲ་ནག་གི་དཀྱིལ་ཆོག་ཏུ་བཤད་དོ། །ཡང་སློབ་དཔོན་ནག་པོ་པའི་དཀྱིལ་ཆོག་གཞུང་འགྲེལ་དུ། དབང་རྫས་བུམ་པའི་ཆུ་མི་བསྐྱོད་པ་མི་བསྐྱེད། ཅོད་པཎ་དང་རྡོ་རྗེ་དྲིལ་བུ་ནི་རིན་འབྱུང་སོགས་སུ་བསྐྱེད་པར་བཤད་ལ། དེའི་གོ་རྒྱུ་ནི་སློབ་མ་ལ་དབང་རྫས་གཏོད་པ་དེ། དབང་རྫས་བྱིན་རླབས་ཅན་ནམ། རབ་གནས་ཅན་དུ་བྱས་པ་ཞིག་གཏོད་པ་ཡིན་པ་ལ། བུམ་པའི་ཆུ་འདིར་ལྷར་མ་བསྐྱེད་ཀྱང་། བུམ་པ་སྟ་གོན་གྱི་སྐབས་སུ་ལྷར་བསྐྱེད་ཟིན་པའི་ཕྱིར་སྙམ་དུ་དགོངས་པའོ། །དེ་བཞིན་དུ་ཁོང་གིས་མཛད་པའི་གསང་འདུས་ཀྱི་དཀྱིལ་ཆོག་ཏུའང་དེ་བཞིན་དུ་བཤད་དོ། །ཡང་སློབ་དཔོན་མི་འཕོ་ཞིང་གཞན་གཉིས་འཕོ་བ་གཞིར་བཞག་ལ། ནང་དབང་ཡོད་པ་དང་། མེད་པའི་ལུགས་གཉིས་ལས། འདིར་ནི་མེད་པའི་ལུགས་ཡིན་ལ། ཡོད་པ་ལའང་དེ་བཞིན་གཤེགས་པ་སྤྱན་དྲངས་ཏེ་ལུས་ལ་གཞུག་པ་ལ་ནང་དབང་དུ་བྱས་པ་དང་། སློབ་མ་འོད་ཀྱི་རང་བཞིན་དུ་བྱས། སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་བཞུ། བྱང་ཆུབ་ཀྱི་སེམས་ཁུ་བར་བྱས་པ་ལ་ནང་དབང་དུ་བྱས་པ་གཉིས་ལས། དང་པོ་ནི། བདེ་མཆོག་རྣལ་འབྱོར་གསང་མཐར་བཤད་པའི་ལུགས་ཏེ། དེའང་མི་བསྐྱོད་པ་ཆུ་དབང་གི་སྐབས་སུ། ཕྱིའི་དབང་བསྐུར་གྱི་རྗེས་ལ། རང་གི་སྙིང་གའི་ས་བོན་གྱི་འོད་ཀྱིས་མི་བསྐྱོད་པ་དཔག་ཏུ་མེད་པ་བཀུག་སྟེ། སློབ་མའི་སྙིང་གར་རྡོ་རྗེ་རྩེ་དགུ་པའམ། ལྔ་པ་བསམ་པའི་བུ་ག་ནས་ཞུགས། ལུས་ཐམས་ཅད་མི་བསྐྱོད་པའི་རྡུལ་ཕྲ་རབ་ཀྱིས་ཁྱབ་པར་བསམ་པ་སོགས་བྱེད་པ་ཡིན་ནོ། །གཉིས་པ་ལ་གསང་འདུས་རྩ་རྒྱུད་ལ་བརྟེན་ཏེ་ཕ་རྒྱུད་པ་རྣམས་ཀྱིས་ནང་དབང་བསྐུར་ཚུལ་དང་། སཾ་བུ་ཊའི་རྒྱུད་ཕྱི་མ་ལ་བརྟེན་ནས་མ་རྒྱུད་པ་རྣམས་ཀྱིས་ནང་དབང་བསྐུར་ཚུལ་གཉིས་ལས། དང་པོ་ནི། གསང་བ་འདུས་པའི་རྒྱུད་དུ། ཡུངས་ཀར་མགོ་བོར་བརྡེག་པར་བྱ། །ཞེས་པ་ལ། ཡེ་ཤེས་ཞབས་ལུགས་པ་རྣམས་དང་སློབ་དཔོན་སྒེག་པའི་རྡོ་རྗེ་སོགས་ཀྱིས་གསང་དབང་ལ་འབྲུ་བསྣན་པ་དང་། བྱང་ཆུབ་ཀྱི་སེམས་ཕྱུང་སྟེ་དཀྱིལ་འཁོར་ལ་བསང་གཏོར་བྱེད་པ་ལ་འབྲུ་བསྣན་པ་སོགས་ཡོད་ཀྱང་། སློབ་དཔོན་ཟླ་བ་གྲགས་པས་སྒྲོན་གསལ་ལེའུ་བཅོ་ལྔ་པར། ནང་དབང་ལ་འབྲུ་བསྣན། དེའི་བྱེད་ཚུལ་ནི། རྣམ་སྣང་ཆུ་དབང་ལྟ་བུ་ལ་སྦྱར་ན། སློབ་དཔོན་གྱི་ཐུགས་ཀའི་ས་བོན་གྱི་འོད་ཟེར་གྱིས། སློབ་མ་རྣམས་འོད་ཀྱི་རང་བཞིན་དུ་བྱས། སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་ཆགས་ཀྱི་མེས་བཞུ། བྱང་ཆུབ་ཀྱི་སེམས་སུ་བྱས་པ་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་མཁར་བབས་པ་ཨོཾ་དང་འཁོར་ལོ་ལས་རྣམ་སྣང་དུ་བསྐྱེད། ཡང་སློབ་དཔོན་གྱི་ཐུགས་ཀའི་ས་བོན་གྱི་འོད་ཟེར་གྱིས་རིགས་ལྔ་ཡབ་ཡུམ་སྤྱན་དྲངས། སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། བྱང་ཆུབ་ཀྱི་སེམས་ཀྱི་ཁུ་བར་བྱས་པ་སློབ་མ་ལ་དབང་བསྐུར་ནས། སློབ་མ་ཡུམ་གྱི་མཁའ་འམ་རྩིབ་ལོགས་གཡོན་པ་ནས་བཏོན་ཏེ། གྲལ་དུ་འཁོད་པ་ལ་ལུས་དཀྱིལ་བསྒོམ་པ་སོགས་བྱེད། དེ་ནས་བུམ་པའི་ཆུ་ཆོ་ག་གསུམ་གྱིས་རྣམ་སྣང་དུ་བསྐྱེད་པ་སོགས་བྱས་ཏེ་ཆུ་དབང་བསྐུར་རོ། །རྗེ་བཙུན་གོང་མ་རྣམས་ནང་དབང་ཞལ་གྱིས་བཞེས་པའི་ཚེའང་འདི་ལྟར་དུ་མཛད་དོ། །སློབ་དཔོན་ཨ་བྷ་ཡས། སཾ་བུ་ཊའི་རྒྱུད་ཕྱི་མ་ལ་བརྟེན་ནས་ཕྲེང་བར་ནང་དབང་བཤད་པ་རྣམས་ཀྱང་དོན་འདི་ཉིད་ཡིན་ཅིང་། མ་རྒྱུད་པ་རྣམས་སཾ་བུ་ཊ་ལ་བརྟེན་ནས་ནང་དབང་བསྐུར་བ་རྣམས་ཀྱང་འདི་ལྟར་དུ་བྱེད་པ་ཡིན་ནོ། །ཡང་ཕྱི་དབང་དང་པོར་བྱས་ཏེ། ནང་དབང་ཕྱིས་བྱེད་པའང་ཡོད་དེ། མི་བསྐྱོད་པ་ཆུ་དབང་ལྟ་བུ་ལ་སྦྱར་ན། དང་པོར་སློབ་མ་དང་དབང་རྫས་གཉིས་ཀ་མི་བསྐྱོད་པར་བསྐྱེད་པ་སོགས་བྱས་ཏེ་ཆུ་དབང་བསྐུར། དེ་ནས་སློབ་མ་འོད་ཀྱི་རང་བཞིན་དུ་བྱས་ལ་སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་བཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས། ཡུམ་གྱི་མཁར་བབས་པ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་མི་བསྐྱོད་པ་རྡོ་རྗེ་འཇིགས་བྱེད་དུ་བསྐྱེད་པ་སོགས་བྱས་ཏེ། ཡུམ་གྱི་མཁའ་ནས་ཕྱིར་འཐོན་ཏེ། གྲལ་ལ་འཁོད་པ་ལ་མཆོད་པ་རྣམས་ཀྱིས་མཆོད། དོན་ལྔའི་རྟོགས་པ་བསྐྱེད་པ་སོགས་བྱེད་དོ། །ལུགས་འདི་ལ་དང་པོར་ཞི་བ་རིགས་ལྔ་དང་། དེ་ནས་ནང་དབང་གི་སྐབས་སུ་ཁྲོ་བོ་རིགས་ལྔར་བསྐྱེད་པ་ཡིན་ནོ། །རིག་པའི་དབང་གི་མཐའ་བརྟེན་ལ་ཆུ་དབང་གི་རྗེས་ལ་གདུགས་དཀར་པོ་བཟུང་ཞིང་དཀྱིལ་འཁོར་ལ་བསྐོར་བ་བྱ་ཞིང་། བདེ་བ་ཆེན་པོ་འདོད་ཆགས་ཆེ། །ཞེས་སོགས་ཀྱིས་གླུ་ལེན་པ་ནི་ཆུའི་དབང་གི་མཐའ་བརྟེན་ནོ། །ཅོད་པཎ་གྱི་དབང་གི་རྗེས་ལ་མ་རྒྱུད་པའི་ལུགས་ལ་དཔའ་བོའི་དར་དཔྱངས། ཕ་རྒྱུད་པ་རྣམས་ལ་སྣ་ལྔ་པའི་དར་དཔྱངས་སྟེར་བ་ཡོད་པ་ནི་དེ་ཉིད་ཀྱི་མཐའ་བརྟེན་ནོ། །རྡོ་རྗེའི་དབང་གི་རྗེས་ལ་གསང་འདུས་འཕགས་ལུགས་ལ་རྡོ་རྗེའི་བརྟུལ་ཞུགས་སྦྱིན་པ་ཡོད་པ་ནི་དེ་ཉིད་ཀྱི་མཐའ་བརྟེན་ནོ། །དྲིལ་བུའི་དབང་གི་མཐའ་བརྟེན་ནི་བདག་པོའི་དབང་ངོ་། །མིང་དབང་གི་རྗེས་ལ་གསང་འདུས་འཕགས་ལུགས་པ་ལུང་བསྟན་བྱེད་པ་ཡོད་པ་ནི་དེ་ཉིད་ཀྱི་མཐའ་བརྟེན་ནོ། །གསུམ་པ་ནི། གྲུབ་ཆེན་བྷ་ཝ་བྷ་དྲས་རྡོ་རྗེ་མཁའ་འགྲོའི་འགྲེལ་པར་སློབ་མ་ཁྲུས་སྟེགས་ཀྱི་དཀྱིལ་འཁོར་གྱི་སྟེང་དུ་མེ་ཏོག་གང་བབས་སམ། དཀྱིལ་འཁོར་གྱི་གཙོ་བོ་རྡོ་རྗེ་མཁའ་འགྲོར་ཆོ་ག་གསུམ་ལས་བསྐྱེད། སྐྱེ་མཆེད་སྐུ་གསུང་ཐུགས་བྱིན་གྱིས་བརླབས། ཡེ་ཤེས་པ་དགུག་གཞུག་བྱས་ལ། དེ་ནས་དབང་རྫས་བུམ་པའི་ཆུ་ཆོ་ག་གསུམ་ལས་མི་བསྐྱོད་པར་བསྐྱེད། ཡན་ལག་བཞི་རྫོགས་སུ་བྱས། ཞུ་བ་ལས་བྱུང་བའི་བུམ་པའི་ཆུར་བལྟས་ལ། སློབ་མས་དེ་བཞིན་གཤེགས་པ་སོགས་ཀྱིས་གསོལ་བ་བཏབ། དེ་ནས་བུམ་པའི་ཆུས་དབང་བསྐུར། སྐུ་གང་བ་སོགས་ནས་སྤྱི་གཙུག་ཏུ་མི་བསྐྱོད་པས་དབུ་བརྒྱན་པའི་བར་དང་། དེ་བཞིན་དུ་ཅོད་པཎ་ལྷར་བསྒྲུབ་པ་སོགས་བྱས་ནས། རྣ་ལྟག་གཡས་སུ་རིན་འབྱུང་། རྡོ་རྗེས་དབང་བསྐུར་ཏེ་ལྟག་པར་འོད་དཔག་མེད། དྲིལ་བུས་དབང་བསྐུར་ཏེ་རྣ་ལྟག་གཡོན་པར་དོན་གྲུབ། རྣམ་སྣང་མིང་དབང་བསྐུར་བའི་རྗེས་ལ་མཚོག་མར་རྣམ་པར་སྣང་མཛད་ཀྱིས་དབུ་བརྒྱན་པར་གསུངས་སོ། །གཉིས་པ་དེ་ལས་རྗེ་བཙུན་མཆོག་གི་དགོངས་པ་ངོས་གཟུང་བ་ནི་རྒྱས་པར་སྤྲོ་ན། སློབ་དཔོན་དང་། སློབ་མ་དང་། དབང་རྫས་གསུམ་ཀ་དམིགས་པ་འཕོ་བ་ཡིན་ཏེ། དབང་ཆུ་གཉིས་ཆར་ལས། ཆུ་ལ་སོགས་པ་རེ་རེ་ལའང་འཁོར་གསུམ་ཡོངས་སུ་དག་པ་བཞིས་དབང་བསྐུར་ཏེ། ཞེས་གསུངས་པའི་འཁོར་གསུམ་ནི་སློབ་དཔོན་དང་། སློབ་མ་དང་། དབང་རྫས་གསུམ་ཡིན་ལ་ཡོངས་སུ་དག་པ་བཞི་ནི། ཡན་ལག་བཞི་རྫོགས་ཡིན་པའི་ཕྱིར་རོ། །བསྡུ་ན་སློབ་དཔོན་བདག་ཉིད་མི་བསྐྱོད་པའི་རྣལ་འབྱོར་ལ་གནས་ནས། སློབ་མ་དང་དབང་རྫས་གཉིས་ཀྱི་དམིགས་པ་འཕོ་བས་ཆོག་སྟེ། དབང་ཆུ་གཉིས་ཆར་ལས། རིག་པའི་དབང་འདི་རྣམས་ལ། སློབ་དཔོན་བདག་ཉིད་མི་བསྐྱོད་པའི་རྣལ་འབྱོར་ཁོ་ནས་ཀྱང་རུང་ངོ་ཞེས་བྱ་བའང་ཤེས་པར་བྱའོ། །ཞེས་གསུངས་པས་སོ། །གསུམ་པ་སྐབས་སུ་བབ་པའི་ཆོ་ག་གསལ་བར་བཤད་པ་ནི། རྣམ་པར་རྒྱལ་བའི་བུམ་པར་བུམ་པ་ཀུན་གྱི་ཆུ་བསྡུས་པ་དང་། རིན་པོ་ཆེ་ལ་སོགས་པ་ལས་གྲུབ་པའི་དབུ་རྒྱན་དང་། རྡོ་རྗེ་དང་། དྲིལ་བུ་གསུམ་སློབ་མའི་གྲངས་དང་མཉམ་པའམ་ཅི་འབྱོར་པ་མདུན་དུ་སྟེགས་ཀྱི་སྟེང་དུ་བསྒྲིགས་ནས་གཞག སློབ་མ་ལ་མཆོད་པར་བྱ་བའི་མཆོད་པ་ལྔ་ཚན་ལྔར་བཤམས་པ་རྣམས་ཀྱང་ཇི་ལྟར་འོས་པའི་གནས་སུ་བཞག་སྟེ། ཐོག་མར་བུམ་པ་ཆུའི་དབང་ལ། སྭ་བྷཱ་ཝའི་སྔགས་ཀྱིས་བདག་དང་སློབ་མ་དབང་རྫས་གསུམ་ཀ་སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་དེ་ལས་འོད་ཟེར་འཕྲོས་འདུས་གཅིག་ཏུ་གྱུར་པ་ལས་མི་བསྐྱོད་པ་དགྱེས་པའི་རྡོ་རྗེ་སྐུ་མདོག་སྔོན་པོ་ཞལ་བརྒྱད་ཕྱག་བཅུ་དྲུག་ཞབས་བཞི་པ། རྩ་བའི་ཞལ་སྔོ་གཡས་དཀར་གཡོན་དམར་བ། སྟེང་ཞལ་དུད་ཁ་ཞལ་ལྷག་མ་རྣམས་ནག་པ། སྤྱན་ཉི་ཤུ་རྩ་བཞིས་ཕྱེ་བ། དབུ་སྐྲ་སེར་པོ་གྱེན་དུ་བརྫེས་པ། རྩ་ཞལ་གྱི་སྤྱི་བོར་རྡོ་རྗེ་ནག་པོས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན། གླང་པོ་ཆེ་དང་། རྟ་དང་། བོང་བུ་དང་། གླང་དང་། རྔ་མོ་དང་། མི་དང་། ཤ་ར་བྷ་དང་། བྱི་ལ་དང་། གཡོན་པ་རྣམས་ན་སའི་དང་། ཆུའི་ལྷའི་དང་། མེའི་ལྷ་དང་། རླུང་གི་ལྷ་དང་། ཟླ་བའི་ལྷ་དང་། ཉི་མའི་ལྷ་དང་། གཤིན་རྗེ་དང་། ནོར་སྦྱིན་རྣམས་འཛིན་པ། དབུ་རེ་རེ་ལ་ཐོད་པ་སྐམ་པོ་ལྔ་ལྔས་དབུ་བརྒྱན་ཅིང་། རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་། གར་གྱི་ཉམས་དགུ་དང་ལྡན་པ། ཡུམ་མཱ་མ་ཀཱི་སྔོན་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ་བསྐྱེད། དེ་བཞིན་དུ་འོག་མ་རྣམས་ལའང་གུར་ནས་འབྱུང་བའི་ཞལ་ཕྱག་ཚང་མར་བསྐྱེད་དེ། ཀྱེ་རྡོ་རྗེའི་ཐུན་མོང་མ་ཡིན་པའི་བཤད་རྒྱུད་རྡོ་རྗེ་གུར་ལས། ཀྱེ་རྡོར་རིགས་ལྔ་འདི་ལྟར་གསུངས་པའི་ཕྱིར་རོ། །རྒྱུ་མཚན་དེ་ཉིད་ཀྱིས་ཀྱེ་རྡོ་རྗེའི་བཀའ་སྲོལ་གཞན་གསུམ་དང་། མན་ངག་ལུགས་ལའང་རྒྱས་པར་སྤྲོ་ན་འདི་ཁོ་ན་ལྟར་མཛད་དོ། །ལུགས་འདིར་བསྡུ་ན་གཡས་བརྒྱད་རྡོ་རྗེ་དང་། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པ་སོགས་དང་། ཡུམ་གྲི་གུག་དང་ཐོད་པ་འཛིན་པ་ཙམ་དུ་བསམས་ཏེ་གཙོ་བོར་འདི་མཛད་དོ། །ཞེས་གསུངས་པའི་དོན་རྩ་རྒྱུད་ཀྱི་ཀྱེ་རྡོ་རྗེ་ནི་སྤྱི་བོར་སྣ་ཚོགས་རྡོ་རྗེ་མཚོན་བྱེད་དུ་ཡོད་པ་དང་། རྒྱུད་གསུང་པ་པོ་སྟོན་པ་རྡོ་རྗེ་འཆང་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ། དེ་ཉིད་རྩ་རྒྱུད་འདིར་རྣམ་པ་ཁོ་ནར་བསྒྱུར་བས། རིགས་ལྔ་ཆར་གྱི་དབྱེ་གཞི་ཡིན་ལ། དེ་ལ་བཤད་རྒྱུད་ཀྱི་ཚེ་གུར་ནས་འབྱུང་བ་ལྟར་རིགས་ལྔར་དབྱེ་ཞིང་། རྩ་རྒྱུད་ཀྱི་ཐུན་མོང་མ་ཡིན་པའི་རིགས་ལྔར་ཕྱེ་བའི་ཚེ། ཕྱག་མཚན་འདི་ཁོ་ན་ལྟར་རིགས་ཞེས་པའི་དོན་ཡིན་ནོ། །གང་ལྟར་ཡང་དེ་དག་ནི་དམ་ཚིག་པ་བསྐྱེད་པ་བསྙེན་པའི་ཡན་ལག་ཡིན་ནོ། །དེ་ནས་མིག་ཏུ་གཏི་མུག་རྡོ་རྗེ་མ་ཞེས་སོགས་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབས་པ་ནི་ཉེར་སྒྲུབ་ཀྱི་ཡན་ལག་གོ །འདིར་བདག་འཇུག་གཉིས་ལས་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ། ཞེས་པ་ཙམ་ལས་མ་མཛད་ཅིང་། ལག་ལེན་པ་ཕྱི་མ་རྣམས་ཀྱང་ལས་སླ་འདི་ལྟར་བྱེད་པ་ནི་མི་འཐད་དེ། འདི་ལྗོན་ཤིང་ནས་གསུངས་པའི་བསྙེན་སྒྲུབ་ཡན་ལག་རྒྱས་པའི་ལུགས་ཡིན་པས། སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་ངེས་པར་དགོས་པ་ལ་དགོངས་ནས་དབང་ཆུ་གཉིས་ལས་ཀྱང་དེ་ཁོ་ན་ལྟར་གསུངས་པའི་ཕྱིར་དང་། གནས་གསུམ་བྱིན་རླབས་ཙམ་ལས་མི་བྱེད་ན། ཡན་ལག་བཞི་པའི་ཚེ་དབང་མི་བསྐུར་བར་དབུ་རྒྱན་རང་ཆས་ཅན་དུ་བསམ་དགོས་པས་བསྡུས་པ་དང་པོར་འགྱུར་པའི་ཕྱིར་དང་། ཆོ་ག་ལས་དབང་བསྐུར་བ་དང་ཡང་འགལ་བའི་ཕྱིར་རོ། །དེ་ནས་སྙིང་གའི་ས་བོན་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མི་བསྐྱོད་པ་ཀྱེ་རྡོ་རྗེ་ཡབ་ཡུམ་གྱི་རྣམ་པར་སྤྱན་དྲངས་ཏེ། ཨོཾ་བཛྲ་གཽ་རཱི་ཨཱ་ཀརྵ་ཡ་ཛཿཞེས་སོགས་ཀྱིས་དགུག་གཞུག་བྱེད་པ་ནི་སྒྲུབ་པའི་ཡན་ལག་སྟེ། འདི་ཡན་ཆད་ཀྱི་ཡན་ལག་གསུམ་པོ་ནི་ཆོ་ག་ཟོར་ཡང་བའི་ཆེད་དུ་འཁོར་གསུམ་ཆར་ལ་ལྷན་ཅིག་ཏུ་བྱས་ནས། ཡན་ལག་བཞི་པ་བྱ་བའི་ཕྱིར་སླར་ཡང་སྙིང་གའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་དབང་བསྐུར་གྱི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག་དང་བཅས་པ་ཨོཾ་བཛྲ་ས་མཱ་ཛཿ ཞེས་པས་རྡུལ་ཚོན་གྱི་དཀྱིལ་འཁོར་གྱི་སྟེང་གི་ནམ་མཁར་སྤྱན་དྲང་ངོ་། །རྣམ་པ་ནི་གཞལ་ཡས་ཁང་གྲུ་བཞི་སྒོ་བཞི་ལྷ་སྣམ་རིམ་པ་གཉིས་དང་ལྡན་པའི་དབུས་སུ་རྡོ་རྗེའི་རྭ་བ་དང་། འོད་ཟེར་ཕྲེང་བས་ཡོངས་སུ་བསྐོར་བའི་ནང་། ལེ་ཚེ་དགུར་གྱུར་བའི་དབུས་མ་ལ་པདྨ་ཉི་མ་བདུད་བཞི་བརྩེགས་པའི་གདན་གྱི་སྟེང་དུ་མི་བསྐྱོད་པ་ཀྱེ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་ཡུམ་དང་བཅས་པ་དང་། ཕྱོགས་བཞིར་རྣམ་སྣང་ལ་སོགས་པའི་རིགས་བཞི་ཡོ་ག་ནས་འབྱུང་བ་ལྟར་ཞལ་གཅིག་ཕྱག་གཉིས་པ་དང་། མཚམས་བཞིར་སྤྱན་མ་ལ་སོགས་པའི་ཡུམ་བཞིའང་ཡོ་ག་ནས་འབྱུང་བ་ལྟར་དང་། དེའི་ཕྱི་རོལ་གྱི་ལྷ་སྣམ་ནང་མ་ལ་མཚམས་བཞིར་ཤར་ལྷོ་ནས་བརྩམས་ཏེ་གཟུགས་རྡོ་རྗེ་མ་མེ་ལོང་འཛིན་པ་སོགས་བཞི་དང་། དེའི་ཕྱི་རོལ་གྱི་ལྷ་སྣམ་ཕྱི་མ་ལ་སྒོ་ཡི་གཡས་གཡོན་དུ་བྱང་ཆུབ་སེམས་དཔའ་རེ་རེ་སྟེ་བརྒྱད་དང་། སྒོ་མཚམས་བརྒྱད་དུ་གཤིན་རྗེའི་གཤེད་ལ་སོགས་པའི་ཁྲོ་བོ་བརྒྱད་དང་། དབུའི་སྟེང་འོག་ཏུ་སྟེང་འོག་གི་ཁྲོ་བོ་གཉིས་ཏེ་གདན་གསུམ་ཚང་བ་བསྒོམ་པར་གསུངས་སོ། །མི་བསྐྱོད་པ་ཆུ་དབང་གི་གསོལ་བ་བཏབ་པའི་རྗེས་སུ་ཕྱོགས་བཞིའི་རིགས་བཞི་པོའང་རྣམ་སྣང་ཀྱེ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་སོགས་ཁྲོ་ཆགས་ཀྱི་རྣམ་པ་ཅན་དུ་གྱུར་ནས་དེ་མན་ཆད་ཀྱི་དབང་བཀུར་བ་མཛད་པ་ནི། རྩ་རྒྱུད་ལས། ཨོཾ་ཨ་བྷི་ཥིཉྩ་ཏ་མཱཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པ་དང་། དེ་བཞིན་གཤེགས་པ་དེ་རྣམས་ཧེ་རུ་ཀའི་གཟུགས་སུ་གྱུར་ཏེ། ཞེས་གསུངས་པའི་དགོངས་པ་ཡིན་ནོ། །ལག་ལེན་པ་ཕྱི་མ་རྣམས་དབང་ལྷ་སྤྱན་འདྲེན་པ་སྦྱང་བའི་གོང་དུ་བྱས་ནས། དེར་རྗེས་སྦྱོང་བ་སོགས་བྱེད་པ་ནི་སྦྱོང་བ་བྱེད་པ་པོ་སྤྱན་འདྲེན་དགོས་སམ་སྙམ་པའི་རྣམ་པ་འཆར་འཆར་ཡིན་པ་འདུག་ནའང་། སྦྱོང་བ་བྱེད་པ་པོ་ནི་བདག་འཇུག་གི་སྐབས་སུ་གཙོ་བོའི་ཐུགས་ཀ་ནས་བྱེ་བའི་ཧེ་རུ་ཀ་དང་། སློབ་མ་དབང་བསྐུར་གྱི་སྐབས་སུ་སློབ་དཔོན་ཉིད་ཡིན་པས་གཞན་མི་དགོས་ལ། བཀྲ་ཤིས་ཀྱི་ཚིགས་བཅད་བརྗོད་པའང་སྤྱིར་ནམ་མཁར་བཞུགས་པའི་སངས་རྒྱས་རྣམས་དང་། དཀྱིལ་འཁོར་གྱི་ལྷ་ཚོགས་རྣམས་ཀྱིས་བརྗོད་པར་བསམ་པས་ཆོག་གོ །དེས་ན་རྗེ་བཙུན་གོང་མའི་བདེ་དགྱེས་ཀྱི་དཀྱིལ་ཆོག་རྣམས་སུ་སྐབས་འདིར་དབང་ལྷ་སྤྱན་འདྲེན་པ་ཁོ་ན་གསུངས་པས་ཕྱག་ལེན་གཙང་མ་འདི་ཉིད་ཡིན་པར་ཤེས་པར་བྱའོ། །དེ་ནས་སློབ་དཔོན་གྱིས་ཀུ་ཤའི་རྩེ་མོས་རྣམ་རྒྱལ་བུམ་པའི་ཆུ་ནས་གཏོར་ཏེ། ནམ་མཁར་བཞུགས་པའི་སངས་རྒྱས་རྣམས་ཀྱིས་བདག་དང་། དབང་རྫས་ཀྱི་ལྷ་ལ་དབང་བསྐུར་བ་ནས་ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་བསམ་པ་ནི་བདག་དང་དབང་རྫས་གཉིས་ཀྱི་ཡན་ལག་བཞི་པའོ། །སློབ་མའི་ཡན་ལག་བཞི་པ་བྱ་བའི་ཕྱིར། བཅོམ་ལྡན་དེ་བཞིན་གཤེགས་པ་ཀུན། །ཞེས་སོགས་ཀྱིས་གསོལ་བ་བཏབ་པས་ནམ་མཁར་བཞུགས་པའི་རྣམ་སྣང་ལ་སོགས་པ་རིགས་བཞི་པོའང་ཧེ་རུ་ཀ་ཞལ་བརྒྱད་ཕྱག་བཅུ་དྲུག་པར་གྱུར་ཏེ། རིགས་ལྔ་ཆར་གྱི་ཕྱག་རྣམས་ན་ཕྱག་མཚན་སྔ་མ་རྣམས་ཀྱི་ཚབ་ཏུ་བུམ་པ་བདུད་རྩི་ལྔས་ཡོངས་སུ་གང་བ་རེ་བཟུང་ནས། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་གསུངས་ཞིང་སློབ་མའི་སྤྱི་བོ་ནས་དབང་བསྐུར། དེའི་ཚེ་རིག་མ་རྣམས་ཀྱིས་ཀོལླ་ཨི་རེཊ་ཋི་ལ་སོགས་པའི་རྡོ་རྗེའི་གླུ་བླང་། བྱང་ཆུབ་སེམས་དཔའ་རྣམས་ཀྱིས། ཕུན་སུམ་ཚོགས་པ་མངའ་བ་ཞེས་སོགས་ཀྱི་བཀྲ་ཤིས་ཀྱི་ཚིགས་བཅད་བརྗོད། གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པ་སྣ་ཚོགས་ཀྱིས་མཆོད། ཁྲོ་བོ་རྣམས་ཀྱིས་བར་ཆད་ཞི་བར་བྱེད་པའི་ཧཱུྃ་ཕཊ་ཀྱི་སྒྲ་འབྲུག་གི་སྒྲ་ལྟར་བསྒྲག་པར་བསམ་མོ། །དེ་ལྟར་བུམ་པའི་ཆུས་དབང་བསྐུར་བས་སྨིན་མཚམས་ཡན་ཆད་གང་བས་བུམ་པའི་དབང་ཐོབ། མགྲིན་པ་ཡན་ཆད་གང་བས་གསང་བའི་དབང་ཐོབ། སྙིང་ག་ཡན་ཆད་གང་བས་ཤེས་རབ་ཡེ་ཤེས་ཀྱི་དབང་ཐོབ། རྐང་མཐིལ་ཡན་ཆད་གང་བས་དབང་བཞི་པ་ཐོབ་པའང་དྲན་པ་ཙམ་བྱས་ལ། ཆུའི་ལྷག་མ་ཡར་ལུད་པ་ལས་སྤྱི་བོར་མི་བསྐྱོད་པས་རྒྱས་བཏབ་པར་བསམ་སྟེ། དེས་ནི་སློབ་མའི་རྣམ་པར་ཤེས་པའི་ཕུང་པོ་གཙོ་བོར་བྱས་པའི་ཕུང་ཁམས་སྐྱེ་མཆེད་ལ་མི་བསྐྱོད་པ་གཙོ་བོར་གྱུར་པའི་གདན་གསུམ་ཚང་བའི་ལྷའི་ས་བོན་ཐོག་མར་བཏབ་པ་དེ་ཉིད་མཆོད་པའི་ཡུལ་དུ་བཟང་བས་ཨོཾ་བཛྲ་པུཥྤེ་ཨཱཿཧཱུྃ། ཞེས་སོགས་ཉེར་སྤྱོད་ལྔས་མཆོད་པར་བྱའོ། །དེ་ནས་དོན་ལྔའི་རྟོགས་པ་བསྐྱེད་པར་བྱ་སྟེ། ཁྱོད་ཀྱིས་དབང་བསྐུར་བ་རྣམ་པ་ལྔ་ལས་ཆུའི་དབང་བསྐུར་བ་ཐོབ། དེས་ནི་ཉོན་མོངས་པ་རྣམ་པ་ལྔ་ལས་ཞེ་སྡང་གི་དྲི་མ་དག་པར་བྱས། ཕུང་པོ་ལྔ་ལས་རྣམ་པར་ཤེས་པའི་ཕུང་པོ་གནས་གྱུར། ཡེ་ཤེས་ལྔ་ལས་མེ་ལོང་ལྟ་བུའི་ཡེ་ཤེས་མངོན་དུ་གྱུར། དེ་བཞིན་གཤེགས་པ་ལྔ་ལས་མི་བསྐྱོད་པའི་བག་ཆགས་དང་ས་བོན་རྒྱུད་ལ་གཞག་པ་ཡིན་ནོ། །ཞེས་ཀྱང་རྟོགས་པ་བསྐྱེད་པར་བྱའོ། །འདིར་མི་བསྐྱོད་པ་མེ་ལོང་ལྟ་བུའི་ཡེ་ཤེས་དང་སྦྱར་བ་ནི་ཚོགས་བརྒྱད་གནས་གྱུར་པ་ལས། ཡེ་ཤེས་ལྔར་གྱུར་པའི་ཚེ་ཀུན་གཞིའི་གསལ་ཆ་མེ་ལོང་ལྟ་བུ་དང་། སྟོང་ཆ་ཆོས་དབྱིངས་ཡེ་ཤེས་སུ་གནས་གྱུར་པར་རྗེ་བཙུན་གྱིས་གསུང་ཤིང་སྣང་བ་སེམས་ཡིན་པའི་སེམས་དེའང་ཀུན་གཞིའི་གསལ་ཆ་ཡིན་པས། དེ་ཉིད་མི་བསྐྱོད་པ་དང་སྦྱར་བ་ཡིན་ནོ། །དེས་ན་ནག་པོ་པའི་གཞུང་འགྲེལ་ལས་ཀྱང་མི་བསྐྱོད་པ་དང་མེ་ལོང་ལྟ་བུའི་ཡེ་ཤེས་སྦྱར་བ་སོགས་རྒྱ་གར་བའི་གཞུང་མང་དུ་ཡོད་དོ། །དེ་དག་ནི་དབང་དང་པོ་ཆུའི་དབང་ངོ་། །ཕྱི་མ་རྣམས་ལའང་། སོ་སོའི་ཁྱད་ཆོས་རྣམས་མ་གཏོགས་བསྐྱེད་ཆོག་གི་ཡན་ལག་དང་། དམིགས་པ་རྣམས་འདི་ཁོ་ན་ལྟར་སྦྱར་བར་བྱ་ཞིང་། ཁྱད་ཆོས་སོ་སོར་བརྗོད་ན་ཅོད་པཎ་གྱི་དབང་གི་སྐབས་སུ་གདན་སྔ་མ་དང་འདྲ་བའི་སྟེང་དུ། ཨཱྃ་ལས་རིན་པོ་ཆེ་ཨཱྃ་གིས་མཚན་པ་ལས་འོད་འཕྲོས་འདུས་ཡོངས་སུ་གྱུར་པ་ལས་རིན་ཆེན་འབྱུང་ལྡན་ཀྱེ་རྡོ་རྗེ་སྐུ་མདོག་སེར་པོ་ཞལ་བརྒྱད་ཕྱག་བཅུ་དྲུག་ཞབས་བཞི་པ། རྩ་ཞལ་སེར་པོ་གཡས་གནག་གཡོན་དམར་བ་ནས་རྩ་ཞལ་གྱི་སྤྱི་བོར་རིན་པོ་ཆེ་ཟུར་བརྒྱད་པས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན། བྱ་ཀ་རནྟ། ངུར་པ། ལུག བྱ་ཙ་ཀོ་ར། བྱེ་ཁྲ། ཧོར་ཁྲ། འོལ་བ། ཉ་ཁྲ། གཡོན་པ་རྣམས་ན་སྟོབས་ཀྱི་རྒྱུ། དུང་སྐྱོང་། རིགས་ལྡན། པདྨ། པདྨ་ཆེན་པོ། འཇོག་པོ། ནོར་རྒྱས། མཐའ་ཡས་རྣམས་འཛིན་པ། ཡུམ་རིན་ཆེན་སྒྲོལ་མ་སེར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བའམ། བསྡུ་ན་ཡབ་ཀྱི་གཡས་བརྒྱད་རིན་པོ་ཆེ་དང་། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པར་བསྐྱེད། འདི་མན་ཆད་ཐམས་ཅད་ལའང་རྒྱན་དང་ཆ་ལུགས་རྒྱས་པར་ན་མི་བསྐྱོད་པའི་སྐབས་སུ་བཤད་པ་ལྟར་རམ། བསྡུ་ན་ཡབ་ཡུམ་གྱི་ཞལ་ཕྱག་གསལ་གདབ་ཟིན་པའི་རྗེས་སུ་གཉིས་ཀའང་རུས་པའི་རྒྱན་གྱིས་བརྒྱན་པ་ཞེས་པ་ཙམ་རུང་ངོ་། །དེ་ནས་ཡན་ལག་དང་པོ་གསུམ་ཕྱོགས་གཅིག་དང་། བདག་དང་དབང་རྫས་ཀྱི་ཡན་ལག་བཞི་པ་བྱས་ནས་དབང་རྫས་ཀྱི་ལྷ་ཞུ་བ་ལས་བྱུང་བའི་དབང་རྫས་ཅོད་པཎ་སོགས་སུ་གྱུར་པ་སློབ་མ་ལ་གཏད་པ་རྣམས་འདྲའོ། །དེ་ལྟར་དབང་རྫས་ཀྱི་དབང་བསྐུར་བའི་རྗེས་སུ་མན་ངག་ལུགས་ལ་ཆུ་དབང་བསྐུར་ནས། ཆུའི་ལྷག་མ་ཡར་ལུད་པ་ལས་སོ་སོའི་རིགས་བདག་གིས་རྒྱས་གདབ་པ་ལ་མཆོད་པ་ལྔ་དང་། དོན་ལྔའི་རྟོགས་པ་བསྐྱེད་པ་རྣམས་མཛད། ཌོམྦི་ལུགས་དང་། མཚོ་སྐྱེས་ལུགས་ལ་བདག་དང་དབང་རྫས་ཀྱི་ལྷ་ལའང་། ནམ་མཁར་བཞུགས་པའི་སངས་རྒྱས་རྣམས་ཀྱིས་དབང་རྫས་གཏད་པས། ཐུགས་རྒྱུད་བདེ་བ་ཆེན་པོས་གང་ནས་རིགས་བདག་གིས་རྒྱས་གདབ་པ་དང་། སློབ་མ་ལའང་དེ་ལྟར་མཛད་ཀྱི། དབང་རྫས་གཏད་པའི་རྗེས་སུ་ཆུ་དབང་བསྐུར་བ་ནི་མི་མཛད་དོ། །འོད་དཔག་མེད་རྡོ་རྗེའི་དབང་གི་སྐབས་སུ། ཛྲཱིཾ་ལས་པདྨ་ཛྲཱིཾ་གིས་མཚན་པ་ལས་འོད་འཕྲོས་འདུས་གཅིག་ཏུ་གྱུར་པ་ལས། འོད་དཔག་མེད་ཀྱེ་རྡོ་རྗེ་སྐུ་མདོག་དམར་པོ་ཞལ་བརྒྱད་ཕྱག་བཅུ་དྲུག ཞབས་བཞི་པ། རྩ་ཞལ་དམར་པོ་གཡས་གནག གཡོན་དཀར་བ་ནས། རྩ་ཞལ་གྱི་སྤྱི་བོར་པདྨ་དམར་པོས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན། དོམ། བྱ་རྒོད། བསེ། བ་མེན། སྟག སྤྲེའུ། ཆུ་སྲིན་ན་བཀྲ། ལྕེ་སྤྱང་། གཡོན་པ་རྣམས་ན་ཁྲ། འུག་པ། བྱ་དཀར། ནེ་ཙོ། སེང་གེ ས་ར་ས། ཀྲྀཥྞ་ས་རི། ཕག་རྣམས་འཛིན་པ། ཡུམ་གོས་དཀར་མོ་དམར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བའམ། བསྡུ་ན་ཡབ་ཀྱི་གཡས་བརྒྱད་པདྨ། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པ་བསྐྱེད་དེ་གཞན་རྣམས་སྔ་མས་འགྲེའོ། །དོན་ཡོད་གྲུབ་པ་དྲིལ་བུའི་དབང་གི་སྐབས་སུ་ཁྃ་ལས་རལ་གྲི་ཁྃ་གིས་མཚན་པ་ལས་འོད་འཕྲོས་འདུས་ཡོངས་སུ་གྱུར་པ་ལས་དོན་ཡོད་གྲུབ་པ་ཀྱེ་རྡོ་རྗེ་སྐུ་མདོག་ལྗང་གུ་ཞལ་བརྒྱད་ཕྱག་བཅུ་དྲུག ཞབས་བཞི་པ། རྩ་ཞལ་ལྗང་གུ། གཡས་གནག གཡོན་དཀར་བ་ནས་རྩ་ཞལ་གྱི་སྤྱི་བོར་རལ་གྲི་དཀར་པོས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན་གཟའ་ལྷག ཕུར་བུ། མཇུག་རིང་། སྒྲ་གཅན། མིག་དམར། པ་སངས། སྤེན་པ། ཁྱབ་འཇུག གཡོན་པ་རྣམས་ན་དབང་པོ། ཚངས་པ། དྲག་པོ། བདུད་སྡིག་ཅན། ཁྱབ་འཇུག་གི་བུ་མོ་གཤོལ་མདའ་འཛིན། ལྷ་རྒྱལ་བ་དམ་པ། ཐགས་བཟང་རིས། ལྷ་མ་ཡིན་སྟོབས་ལྡན་རྣམས་འཛིན་པ། ཡུམ་དམ་ཚིག་སྒྲོལ་མ་ལྗང་གུ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བའམ། བསྡུ་ན་ཡབ་ཀྱི་གཡས་བརྒྱད་རལ་གྲི་དང་། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པར་བསྐྱེད། གཞན་རྣམས་སྔ་མས་འགྲེའོ། །དྲིལ་བུའི་དབང་འདི་ལ་བདག་པོའི་དབང་ཞེས་འབྱུང་བ་ནི་སྔགས་དོན་ལས་ཤེས་ཏེ། ཨོཾ་བཛྲ་ཨ་དྷི་པ་ཏི་སཏྭཾ་ཞེས་པ་ནི་རྡོ་རྗེའི་བདག་པོ་ཁྱོད་ཅེས་པའོ། །ཨ་བྷི་ཥིཉྩ་མི་ནི་མངོན་པར་དབང་བསྐུར་བའོ། །ཏིཥྛ་བཛྲ་ནི་བརྟན་པའི་རྡོ་རྗེ། ས་མ་ཡ་སཏྭཾ་ནི་དམ་ཚིག་ཁྱོད་ཅེས་པའོ། །མིང་གི་དབང་གི་སྐབས་སུ་བྷྲཱུྃ་ལས་འཁོར་ལོ་བྷྲཱུྃ་གྱིས་མཚན་པ་ལས་འོད་འཕྲོས་འདུས་གཅིག་ཏུ་གྱུར་པ་ལས་རྣམ་པར་སྣང་མཛད་ཀྱེ་རྡོ་རྗེ་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ། ཞབས་བཞི་པ། རྩ་བའི་ཞལ་དཀར། གཡས་ནག་གཡོན་དམར་བ་ནས། རྩ་ཞལ་གྱི་སྤྱི་བོར་འཁོར་ལོ་དཀར་པོས་མཚན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་རྣམས་ན་རྨ་བྱ། མ་ཧེ། ཆུ་སྲིན་མ་ཀ་ར། ཉ་རོ་ཧི་ཏ། རུས་སྦལ། འོག་གི་ཀླུ། ངང་སྐྱ། རི་བོང་། གཡོན་པ་རྣམས་ན་སྦལ་པ། སྤྲིན་ཤུགས། སྦྲུལ་ཧ་ལ། རྩངས་པ་ནག་པོ། བྱི་བ། གཡག གླ་བ། བྱ་བཞད་རྣམས་འཛིན་པ། ཡུམ་སངས་རྒྱས་སྤྱན་མ་དཀར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བའམ། བསྡུ་ན་ཡབ་ཀྱི་གཡས་བརྒྱད་འཁོར་ལོ་དང་། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པར་བསྐྱེད། རིག་པའི་དབང་ལྔ་འདི་དག་གིས་བདག་དང་དབང་རྫས་ཀྱིས་ལྷ་ལ་དབང་བསྐུར་བའི་དུས་སུའང་སློབ་མ་ལ་དབང་བསྐུར་བ་ལྟར། ནམ་མཁར་བཞུགས་པའི་སངས་རྒྱས་རྣམས་ཀྱིས་དབང་རྫས་སོ་སོར་གཏད་པ་དང་། བུམ་པའི་ཆུས་དབང་བསྐུར་བ་གཉིས་ཀ་དགོས་པར་དབང་ཆུ་ཉིད་ལས་བཤད་པས་ཚིག་རྣམས་ཀྱང་བརྗོད་དགོས་པར་སྣང་ངོ་། །དེ་ནས་སློབ་མ་ལ་དབང་བསྐུར་བའི་ཚེ་མེ་ཏོག་གི་ཕྲེང་བའམ་རྡོ་རྗེ་དྲིལ་བུ་སྤྱི་བོར་བཟུང་ནས་མེ་ཏོག་གང་ཕོག་གི་ལྷ་ལས་དྲས་པའི་གུར་ནས་འབྱུང་བའི་མིང་བཏགས་ཏེ། སྔགས་འདི་བརྗོད་དོ། །ཨོཾ་བཛྲ་ས་ཏྭ་སཏྭཾ་ནི་རྡོ་རྗེ་སེམས་དཔའ་ཁྱོད་ཅེས་པའོ། །ཨ་བྷི་ཥིཉྩཱ་མི་ནི་མངོན་པར་དབང་བསྐུར་བའོ། །བཛྲ་ནཱ་མ་ནི་རྡོ་རྗེ་མིང་། ཨ་བྷི་ཥེ་ཀ་ཏ་ནི་མངོན་པར་དབང་བསྐུར་བར་བྱའོ། །ཞེས་པ་སྟེ། དེའི་རྗེས་སུ་ཀྱེ་ཞེས་བོས་པའི་ཚེ། སློབ་མས་སྔར་གྱི་གསང་མཚན་ཡོད་ན་དེ་ཉིད་བརྗོད། མེད་ན་སྔར་མེ་ཏོག་གང་ཕོག་པའི་ལྷ་ངོ་སྤྲད་པ་དེ་ཉིད་བརྗོད། སློབ་དཔོན་གྱིས་དེ་རིགས་གང་ཡིན་པའི་རྡོ་རྗེ་གུར་ནས་འབྱུང་བའི་མིང་རྣམས་ལས་གང་ཡང་རུང་བ་ཞིག་འདོགས་པའོ། །དེའང་མེ་ཏོག་གཙོ་བོ་ལ་ཕོག་ན་མི་བསྐྱོད་པའི་རིགས་ཀྱི་མིང་བཅུ་བདུན་ལས་གང་ཡང་རུང་བ་ཞིག་གདགས་སོ། །གཽ་རཱི་དང་པུཀྐ་སཱི་ལ་ཕོག་ན་རྣམ་པར་སྣང་མཛད་ཀྱི་རིགས་ཀྱི་མིང་བཅུ་བདུན་དང་། ཙཽ་རཱི་དང་ཤ་ཝ་རཱི་ལ་ཕོག་ན་རིན་འབྱུང་གི་རིགས་ཀྱི་མིང་བཅུ་གཉིས་དང་། བཻ་ཏ་ལཱི་དང་ཙཎྜ་ལཱི་ལ་ཕོག་ན་འོད་དཔག་མེད་ཀྱི་རིགས་ཀྱི་མིང་བཅུ་གཉིས་དང་། གྷསྨ་རཱི་དང་ཌོམྦི་ནཱི་ལ་ཕོག་ན་དོན་ཡོད་གྲུབ་པའི་རིགས་ཀྱི་མིང་བཅོ་ལྔ་ལས་གང་ཡང་རུང་བ་ཞིག་གདགས། རྡོ་རྗེ་སེམས་དཔའ་དང་རྡོ་རྗེ་ཅན་ལ་སོགས་པའི་མིང་དགུ་ནི་དྲུག་པ་རྡོ་རྗེ་འཆང་གི་མིང་ཡིན་པས་ཐམས་ཅད་ལ་སྦྱར་བའམ། ཡང་ན་རྡོ་རྗེ་རིགས་ཀྱི་མིང་ངོ་། །རིགས་ངོ་མ་ཤེས་ན་ཐམས་ཅད་ལའང་རྡོ་རྗེ་སེམས་དཔའ་ཞེས་བྱ་བའི་མིང་བཏགས་པས་རུང་བར་གསུངས་སོ། །དེ་ལྟར་མིང་གི་རྣམ་གྲངས་དེ་དག་ལ་རྡོ་རྗེ་ཞེས་བྱ་བའི་མིང་མེད་པ་རྣམས་ལ་རྡོ་རྗེ་ཞེས་བྱ་བའི་མིང་དང་པོའམ་མཐའ་བསྟན་གང་བདེ་བར་གདགས་ཤིང་། དེའང་ཐོག་མར་དཔལ་ཞེས་པ་དང་བཅས་ཏེ་གདགས་པར་བྱའོ། །ཁ་ཅིག་དབུ་རྒྱན་དུ་གཽ་རཱི་ལ་མི་བསྐྱོད་པ་ཡོད་པས་གཽ་རཱི་ལ་མི་བསྐྱོད་པའི་རིགས་ཀྱི་མིང་གདགས་ཞེས་ཟེར་བ་ནི་ནོར་ཏེ། དཀྱིལ་འཁོར་རེ་རེའང་དེ་བཞིན་གཤེགས་པ་ལྔ་ལྔ་ཡིན་པས། དེའི་མིང་འདོགས་པར་སྔོན་གྱི་སློབ་དཔོན་རྣམས་དང་། བླ་མ་གོང་མ་རྣམས་དེ་བཞིན་དུ་མཛད་ཅེས་རྗེ་བཙུན་རྩེ་མོས་གསུངས་སོ། །འདུས་པ་འཕགས་ལུགས་ཀྱི་དཀྱིལ་ཆོག་ཟུང་འཇུག་གསལ་བར། གུར་ནས་གསུངས་པའི་རིགས་ཀྱི་མིང་རྣམས་འདོགས་པར་དངོས་སུ་གསུངས་ཤིང་། ཡེ་ཤེས་ཞབས་ལུགས་ཀྱི་བཞི་བརྒྱ་ལྔ་བཅུ་པ་དང་། དངོས་གྲུབ་འབྱུང་བའི་གཏེར་གཉིས་ལས་ཀྱང་ཆེ་གེ་མོ་རྡོ་རྗེ་ཞེས་བྱ་བས་རིགས་ཀྱི་མིང་འདོགས་པར་གསུངས་པ་ལ་ཤཱནྟི་པའི་འགྲེལ་པར། དཀྱིལ་འཁོར་ཐམས་ཅད་སྤྲོ་བ་པོ་ཡིན་པས་གཙོ་བོའི་མིང་གིས་འདོགས་དགོས་པས་འཇམ་པའི་རྡོ་རྗེ་ཞེས་བྱ་བའི་དེ་བཞིན་གཤེགས་པའོ། །ཞེས་འདོགས་དགོས་སོ་ཞེས་བཤད་པ་ནི་སྒྲུབ་བྱེད་དཀྱིལ་འཁོར་གཞན་རྣམས་ལའང་མཚུངས་པས། དེའང་གུར་ནས་བཤད་པའི་མིང་འདོགས་པ་ཉིད་ཡིན་པར་སེམས་སོ། །གསུམ་པ་དབང་གི་དོན་ངོ་སྤྲོད་པ་ནི། འདུས་པ་རྩ་བའི་རྒྱུད་ལས། དངོས་ཀུན་གང་དང་གང་སྣང་བ། །གཙོ་དེ་རང་གི་ལྷག་པའི་ལྷ། །ཆོས་ཀུན་རང་བཞིན་རྙོག་མེད་དག །སངས་རྒྱས་ཡེ་ཤེས་བལྟ་བར་བྱ། །ཞེས་གསུངས་པ་འདི་ཉིད་ཤཱནྟི་པ་དང་། ནག་པོ་དམ་ཚིག་རྡོ་རྗེའི་གཞུང་འགྲེལ་གཉིས་ལས། མིང་གི་དབང་བསྐུར་གྱི་ཁྱད་ཆོས་སུ་འཆད་པ་མ་གཏོགས། གཞན་རྒྱ་བོད་ཀུན་གྱིས་རིགས་པའི་དབང་ལྔ་ཆར་གྱི་ངོ་སྤྲོད་དུ་མཛད་དོ། །དེའང་དངོས་ཀུན་གང་དང་གང་སྣང་བ་ནི། ཕུང་པོ་ལྔ་དང་ཉོན་མོངས་པ་ལྔ་པོ་རྣམས་སོ། །གཙོ་དེ་རང་གི་ལྷག་པའི་ལྷ། །ཞེས་པ་ནི་དེ་བཞིན་གཤེགས་པ་རིགས་ལྔ་ཡི་ངོ་བོར་ཤེས་པར་བྱ་ཞེས་པའོ། །དེའང་རིགས་ལྔ་མ་ཡིན་པ་ལ་ཡིན་པར་ཤེས་པར་བྱའམ་སྙམ་ན་དེ་ནི་མ་ཡིན་ཏེ། ཆོས་ཅན་གྱི་ཆོས་ཀུན་རིགས་ལྔའི་ངོ་བོར་རང་བཞིན་གྱིས་རྙོག་པ་མེད་ཅིང་རྣམ་པར་དག་ཅེས་པའོ། །འོན་ཀྱང་གློ་བུར་གྱི་དྲི་མས་བསྒྲིབས་ནས་མ་མཐོང་བ་དེ་སློབ་དཔོན་གྱི་ཆོ་ག་འདིས་གསལ་བར་བྱས་པས་ལམ་བསྒོམ་པའི་དུས་སངས་རྒྱས་ཀྱི་ཡེ་ཤེས་སུ་བལྟ་བར་བྱ་བའི་སྒོ་ནས་མངོན་སུམ་དུ་མཐོང་བར་གྱིས་ཤིག་ཅེས་པའོ། །འདིར་ཤཱནྟི་པས། སོ་སོར་སྣང་བ་གང་ཅིའང་རུང་བ་དེ་ནི་རང་ཉིད་ཀྱི་དངོས་པོ་ཐམས་ཅད་ཡིན་ཏེ། ཐམས་ཅད་ཀྱང་སེམས་ཀྱི་འབྱོར་བ་ཡིན་ནོ་ཞེས་བྱ་བའི་ཐ་ཚིག་གོ །ཞེས་དང་། སེམས་གང་ཡིན་པ་དེ་ཉིད་ནི་བདག་ཡིན་ལ། ཤེས་པ་དེ་ཉིད་ནི་སེམས་ཡིན་ལ། ཤེས་པ་ལས་ལོགས་ཤིག་ན་སྣང་བ་ཅིའང་མེད་དོ་ཞེས་བྱ་བའི་ཚུལ་གྱིས་སོ། །དེ་བས་ཉིད་ནི་འཇམ་པའི་རྡོ་རྗེའོ་ཞེས་བཤད་ཅིང་། འོག་ཏུ་ལྷའི་དེ་ཁོ་ན་ཉིད་སྟོན་པའི་སྐབས་སུ་སེམས་ཉིད་གཟུགས་ལ་སོགས་པའི་འཁྲུལ་པ་རྣམ་པར་དག་ཅིང་དེ་ལས་ངེས་པར་གྲོལ་བ་ཉིད་ཀྱིས་རབ་ཏུ་བསྒོམས་ཤིང་། དེའི་མཚན་ཉིད་དང་ལྡན་པའི་གཟུགས་ཀྱི་ཕུང་པོ་ལ་སོགས་པ་གང་ཡིན་པ་དེ་ནི་ལྷ་རྣམས་ཀྱི་དེ་ཁོ་ན་ཉིད་ཡིན་གྱི། ཡོངས་སུ་བརྟགས་པའི་ཕུང་པོ་ལ་སོགས་པའམ། ཟག་པ་དང་བཅས་པ་ལ་སོགས་པ་ནི་ལྷའི་དེ་ཁོ་ན་ཉིད་མ་ཡིན་ནོ། །རྣམ་པར་དག་པ་དེའང་སེམས་ལས་ཐ་མི་དད་པ་ཡིན་ལ། དེ་བས་ན་སེམས་དེ་ཉིད་ནི་ཕུང་པོ་ལྔ་ལ་སོགས་པ་ལྷའི་བདག་ཉིད་ཅན་ཡིན་ནོ་ཞེས་བཤད་པ་ནི་གཞན་སྟོང་གི་གྲུབ་མཐའི་དབང་གིས་དེ་ལྟར་སྨྲའང་། ཁས་བླངས་ནང་འགལ་བར་དོགས་ཏེ། ཡོངས་སུ་བརྟགས་པ་དང་། ཟག་པ་དང་བཅས་པའི་གཟུགས་སོགས་སེམས་ལ་སྣང་ངམ་མི་སྣང་། མི་སྣང་ན། སེམས་ལ་ཆོས་ཉིད་ཡོངས་གྲུབ་ཁོ་ན་སྣང་བས། སེམས་ཉིད་འཁྲུལ་པ་མི་སྲིད་པར་འགྱུར་རོ། །སེམས་ལ་སྣང་ན་སེམས་ལས་ཐ་དད་ཡིན་ནམ་མ་ཡིན། དང་པོ་ལྟར་ན་སེམས་ལས་ལོགས་སུ་གྱུར་པའི་ཆོས་ཅུང་ཟད་ཙམ་ཡང་མེད་པར་འདོད་པ་དང་འགལ་ལ། ཐ་དད་མ་ཡིན་ན་ནི་སེམས་ཉིད་ཕུང་པོ་ལ་སོགས་པ་ལྷའི་བདག་ཉིད་ཅན་དུ་ཁས་བླངས་པས། ཡོངས་སུ་བརྟགས་པའི་ཕུང་པོ་དང་། ཟག་པ་དང་བཅས་པ་རྣམས་ཀྱང་སེམས་ལས་ཐ་མི་དད་པ་ཡིན་ལ། དེ་བས་ན་སེམས་དེ་ཉིད་ནི་ཕུང་པོ་ལ་སོགས་པ་ལྷའི་བདག་ཉིད་ཅན་དུ་ཅིའི་ཕྱིར་མི་མཚུངས། འཕགས་ཡུལ་གྱི་མཁས་པ་ཀུན་མཁྱེན་གཉིས་པ་ལྟ་བུ་ཡིན་ན་ཡང་། རྣལ་འབྱོར་པའང་བློ་ཁྱད་ཀྱིས། གོང་མ་གོང་མ་རྣམས་ཀྱིས་གནོད་པའི་ཚེ་འདི་ལྟར་བྱུང་བས་གྲུབ་མཐའི་རྣམ་དབྱེ་ཕྱེད་པ་གལ་ཆེའོ། །ཡང་ཅིའི་ཕྱིར་མི་བསྐྱོད་པ་ལ་ཆུ་དབང་དུ་འཇོག་སྙམ་ན། མི་བསྐྱོད་པ་ནི་སེམས་རྣམ་པར་དག་པ་ཐུགས་རྡོ་རྗེ་ཡིན་ལ། དེས་སེམས་ཀྱི་དྲི་མ་སྦྱོང་བར་བྱེད་པ་ནི་ཆུས་དྲི་མ་འཁྲུད་པ་དང་ཆོས་མཚུངས་པའི་ཕྱིར་རོ། །ཅིའི་ཕྱིར་རིན་འབྱུང་ཅོད་པཎ་གྱི་དབང་དུ་བཞག་ཅེ་ན། རིན་འབྱུང་དེའང་སངས་རྒྱས་ཀྱི་ཡོན་ཏན་གྱི་ཆ་ཡིན་ལ། དེ་བཞིན་གཤེགས་པ་རྣམས་ཀྱི་ཡོན་ཏན་གྱི་གཙོ་བོའང་གདུལ་བྱའི་བསམ་པ་སྐོང་བར་བྱེད་པ་ཡིན་ཅིང་། རིན་པོ་ཆེ་ལ་སོགས་པའི་ཅོད་པཎ་གྱི་སྒོ་ནས་གདུལ་བྱ་ཕལ་ཆེ་བའི་བསམ་པ་འགེངས་པར་བྱེད་པའི་ཕྱིར་རོ། །ཅིའི་ཕྱིར་འོད་དཔག་མེད་རྡོ་རྗེའི་དབང་དུ་བཞག་ཅེ་ན། དེ་བཞིན་གཤེགས་པ་ཐམས་ཅད་ཀྱི་གསུང་རྣམ་པར་དག་པ་ནི་འོད་དཔག་མེད་ཡིན་ལ། གསུང་དེས་གདུལ་བྱ་ལ་ཆོས་སྟོན་པའི་ཚེ་བསྟན་བྱའི་ཆོས་དེ་ལ་གསུང་རབ་ཡན་ལག་བཅུ་གཉིས་ཡོད་པ་ཡན་ལག་དགུར་བསྡུས་ནས། དེ་སྟོན་པ་དེ་རྡོ་རྗེ་རྩེ་དགུ་པས་མཚོན་པར་བྱེད་པའི་ཕྱིར་ཏེ། རྡོ་རྗེ་གུར་ལས། རྡོ་རྗེ་ཆེན་པོ་རྩེ་དགུ་པ། །དེ་ཡི་ལག་པ་གཡས་པར་སྦྱིན། །ཞེས་དང་། དཀྱིལ་ཆོག་གཉིས་ལས་ཀྱང་། རྡོ་རྗེ་རྩེ་དགུ་པ་སྦྱིན་པར་གསུངས་པས་སོ། །སློབ་དཔོན་ལྷའི་རིགས་ཀྱི་བློ་གྲོས་ཀྱིས་འདིར་རྡོ་རྗེ་རྩེ་དགུ་པ་ནི་རྩེ་ལྔ་པ་ལ་ཟེར་ཏེ། སྟེང་འོག་གི་རཱ་བཞི་བཞི་སྟེ་བརྒྱད་དང་། དབུས་སུ་རྭ་ཐལ་བྱུང་དུ་ཡོད་པས་དགུ་ཡིན་པ་སློབ་དཔོན་ཀུན་དགའ་སྙིང་པོས་སངས་རྒྱས་མཉམ་སྦྱོར་གྱི་འགྲེལ་པར། དེ་ལྟར་བཤད་པའི་སྒྲུབ་བྱེད་དང་བཅས་ཏེ་འཆད་མོད། རྡོ་རྗེ་རྩེ་ལྔ་པ་ལའང་སྐབས་འདིར་རྩེ་དགུ་པའི་དོན་ཚང་ཞེས་པའི་དོན་ཡིན་ན་རུང་བར་སྣང་བས་རྩེ་དགུ་པ་རྩེ་བཅུ་བདུན་པར་འགྱུར་རོ་ཞེས་པའི་མཚུངས་པ་མི་རུང་ལ། རྩེ་ལྔ་པ་ཡིན་ན་རྩེ་དགུ་པ་ཡིན་པས་ཁྱབ། ཅེས་པའི་དོན་ཡིན་ན་ནི་མཚུངས་པའང་ཡོད་པ་འདྲའོ། །ཅིའི་ཕྱིར་དོན་ཡོད་གྲུབ་པ་དྲིལ་བུའི་དབང་དུ་བཞག་ཅེ་ན། དོན་ཡོད་གྲུབ་པ་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་རྣམ་པར་དག་པའི་ཆ་ཡིན་ལ། ཕྲིན་ལས་ཀྱི་གཙོ་བོའང་སྒྲ་གྲག་སྟོང་སྒྱུ་མ་ལྟ་བུའི་སྒོ་ནས་གདུལ་བྱ་ལ་ཆོས་སྒྲོགས་པར་བྱེད་པ་ཡིན་པས། དེ་དྲིལ་བུས་མཚོན་པའི་ཕྱིར་རོ། །སྔགས་དོན་ལ་བདག་པོའི་དབང་ཞེས་པའང་ཕྲིན་ལས་ལ་ལྷག་པར་དབང་བྱེད་པས་ན་བདག་པོའི་དབང་སྟེ། བདག་པོ་ཙམ་ལ་པ་ཏི་ཞེས་པ་ལས་མེད་ཀྱང་ཨ་དྷི་པ་ཏི་ལྷག་པར་དབང་བྱེད་པའི་དོན་ཡིན་པའི་ཕྱིར་རོ། །ཅིའི་ཕྱིར་རྣམ་པར་སྣང་མཛད་མིང་གི་དབང་དུ་བཞག་ཅེ་ན། རྣམ་པར་སྣང་མཛད་ནི་གཟུགས་ཕུང་རྣམ་པར་དག་པ་ཡིན་ལ། མིང་འདོགས་པ་དེའང་གཟུགས་སུ་གྲུབ་པ་ཞིག་ལ་མིང་འདོགས་པ་ཤས་ཆེ་བས་དེ་མཚོན་པའི་ཕྱིར་རོ། །གསང་འདུས་འཕགས་ལུགས་པ་རྣམས་རྣམ་སྣང་ལ་ཆུ་དབང་དང་། མི་བསྐྱོད་པ་ལ་མིང་དབང་དུ་བཞག་པའི་དོན་ལ་མཁས་པ་ཕྱི་མ་དག་རྣམ་སྣང་ནི་སྦྱང་གཞི་ལུས་རྣམ་པར་དག་པ་ཡིན་ཞིང་། ལུས་ཀྱི་དྲི་མ་ཆུས་འཁྲུད་དགོས་པས་རྣམ་སྣང་ལ་ཆུ་དབང་དང་། མི་བསྐྱོད་པ་ནི་སྦྱང་གཞི་རྣམ་པར་ཤེས་པའི་ཕུང་པོ་རྣམ་པར་དག་པ་ཡིན་ཞིང་། རྣམ་པར་ཤེས་པའི་ཕུང་པོ་ནི་མིང་གཞིའི་ཕུང་པོའི་ནང་ཚན་ཡིན་པས། མི་བསྐྱོད་པ་ལ་མིང་དབང་བསྐུར་བ་ཡིན་ནོ། །ཞེས་འཆད་པ་ནི་འདྲ་ཆོས་སུ་བསྒྲིགས་པ་ཙམ་དུ་སྣང་མོད་ཀྱི་མིང་གཞིའི་ཕུང་པོ་ཞེས་པའི་མིང་དང་། འདིའི་མིང་དོན་མི་གཅིག་པས་མི་འཐད་ཅིང་། གལ་ཏེ་གཅིག་ན་རིན་འབྱུང་སོགས་ལའང་མིང་དབང་སྦྱར་དགོས་པར་འགྱུར་རོ། །དེས་ན་དཀྱིལ་ཆོག་གཞན་རྣམས་ལས་མི་བསྐྱོད་པ་ལ་ཆུ་དབང་སྦྱར་བ་ནི་སྦྱང་གཞི་དང་སྦྱོང་བྱེད་རིགས་གཅིག་པ་ཡིན་ལ། རྣམ་སྣང་ལ་མིང་དབང་སྦྱར་བའི་རྒྱུ་མཚན་ནི་བཤད་ཟིན་ཅིང་། ཟུང་འཇུག་གསལ་བ་དང་། སྒྲོན་གསལ་གཉིས་ལས། དེ་ལས་བཟློག་སྟེ་བཤད་པ་ནི་སྦྱང་གཞི་ཕུང་པོ་ལྔའི་གོ་རིམ་དང་སྦྱར་བའི་ཚེ་གཟུགས་ཕུང་རྣམ་པར་དག་པ་རྣམ་སྣང་ཡིན་ལ། སྦྱོང་བྱེད་དབང་རྫས་ལྔའི་གོ་རིམ་དང་སྦྱར་བའི་ཚེ་བུམ་པའི་ཆུ་ཐོག་མར་འབྱུང་བས་དེ་ལྟ་བུའི་སྦྱང་གཞི་སྦྱོང་བྱེད་ཟུང་འཇུག་ཏུ་འགྱུར་ཏེ། ཆུ་ནི་སེམས་ཀྱི་རང་བཞིན་ཡིན་པར་ཀྱེ་རྡོ་རྗེའི་རྒྱུད་ལས་གསུངས་པའི་ཕྱིར་རོ། །འདི་ནི་འདུས་པ་རྩ་བའི་རྒྱུད་ཀྱི་ལེའུ་གཉིས་པར་རིགས་ཀྱི་བུ་ཁྱོད་ཀྱི་ལུས་སེམས་ལྟ་བུ་དང་། སེམས་ལུས་ལྟ་བུར་སྐྱེད་ཅིག ཅེས་པའི་དོན་དུ་མཛད་པར་སྣང་སྟེ། སློབ་མ་རྣམ་སྣང་གི་རྟེན་ལ་ཆུ་དབང་བསྐུར་བའི་ཚེ་ལུས་སེམས་ལྟ་བུ་དང་། ཆུ་རྣམ་སྣང་དུ་བསྐྱེད་པའི་ཚེ་སེམས་ལུས་ལྟ་བུར་བསྐྱེད་པའི་དོན་ཚང་བའི་ཕྱིར་རོ། །དེ་ཉིད་ཀྱི་རིགས་པས་མི་བསྐྱོད་པ་ལ་མིང་དབང་དུ་གཞག་པ་ནི། སྦྱང་གཞི་དང་སྦྱོང་བྱེད་ཀྱི་གོ་རིམ་སྔ་མ་ལྟར་སོ་ན་གནས་པ་དང་། རྒྱུ་དང་ལམ་དང་འབྲས་བུའི་གནས་སྐབས་ཐམས་ཅད་དུ་སེམས་གཙོ་བོ་ཡིན་པས། འབྲས་བུའི་དུས་སུའང་མི་བསྐྱོད་པ་གཙོ་བོར་གྲུབ་ཅིང་། དེ་ལ་མིང་དེ་ཉིད་ལྡན་དགོས་པའི་དོན་ཏོ། །འདིའང་སྔར་གི་ལུང་གི་འཕྲོར་སེམས་ཚིག་ཏུ་བརྗོད་པ་ལྟ་བུར་སྐྱེད་ཅིག་ཅེས་པའི་དོན་དུ་སྣང་སྟེ། སློབ་མ་མི་བསྐྱོད་པར་བསྐྱེད་པ་ནི་སེམས་ཡིན་ལ། དེ་ལ་མིང་གི་དབང་བསྐུར་བ་ནི་ཚིག་ཏུ་བརྗོད་པ་ལྟ་བུར་བསྐྱེད་པའི་དོན་ཡིན་པའི་ཕྱིར་རོ། །གཉིས་པ་རྡོ་རྗེ་འཆང་ཆེན་པོའི་རྟེན་ལ་སྐུ་གསུང་ཐུགས་བྱིན་གྱིས་བརླབ་པའི་དབང་ནི་སྤྱིར་བརྟུལ་ཞུགས་ཀྱི་དབང་སྐབས་འདིར་བྱེད་པའི་ལུགས་དང་། སྐབས་འདིའམ་རྡོ་རྗེ་སློབ་དཔོན་གྱི་དབང་གི་མཐའ་རྟེན་གང་རུང་དུ་སྦྱོར་བའི་ལུགས་དང་། རྡོ་རྗེའི་བརྟུལ་ཞུགས་མེད་པའི་ལུགས་དང་གསུམ་ལས། དང་པོ་ལ་བརྟུལ་ཞུགས་ཀྱི་དབང་གཉིས་སུ་བྱེད་པ་དང་། རྡོ་རྗེའི་བརྟུལ་ཞུགས་གཅིག་པོར་བྱེད་པ་གཉིས། དང་པོ་ལའང་ཐུན་མོང་དང་། ཐུན་མོང་མ་ཡིན་པའི་བརྟུལ་ཞུགས་གཉིས་སུ་བྱེད་པ་དང་། ཡབ་ཡུམ་གྱི་བརྟུལ་ཞུགས་གཉིས་སུ་བྱེད་པ་གཉིས་ལས། དང་པོ་ནི། ནས་གླིང་མ་དང་། བདེ་མཆོག་ནག་པོ་དཀྱིལ་ཆོག་ལྟ་བུ་སྟེ། སློབ་མ་མི་བསྐྱོད་པར་བསྐྱེད་པའི་རྟེན་ལ་རྡོ་རྗེའི་བརྟུལ་ཞུགས་སྦྱིན་པ་ཐུན་མོང་གི་བརྟུལ་ཞུགས་དང་། སློབ་མ་དཀྱིལ་འཁོར་གྱི་གཙོ་བོར་བསྐྱེད་པའི་རྟེན་ལ་ཌཱ་མ་རུ་དང་། ཐོད་པ་དང་། ཁ་ཊྭཱཾ་ག་དང་། ཚངས་པའི་སྐུད་པའམ། ནས་གླིང་མ་ལྟར་ན། གྲི་གུག་ཀྱང་སྦྱིན་པ་ཐུན་མོང་མ་ཡིན་པའི་བརྟུལ་ཞུགས་ཏེ། འདི་ནི་སྤྱོད་པའི་བརྟུལ་ཞུགས་སུ་མཛད་དོ། །གཉིས་པ་ནི་མཁའ་འགྲོ་རྒྱ་མཚོའི་དཀྱིལ་ཆོག་ལྟ་བུ་སྟེ། རྒྱུ་རྡོ་རྗེ་འཆང་དཀར་པོ་ཞལ་བཞི་ཕྱག་བཅུ་གཉིས་པར་བསྐྱེད། ཞུ་བ་ལས་བྱུང་བའི་རྡོ་རྗེ་སྦྱིན་པ་རྡོ་རྗེའི་བརྟུལ་ཞུགས་དང་། དྲིལ་བུ་ཡུམ་རྡོ་རྗེ་ཕག་མོ་དཀར་མོ་ཞལ་བཞི་ཕྱག་བཅུ་གཉིས་པར་བསྐྱེད། ཞུ་བ་ལས་བྱུང་བའི་དྲིལ་བུ་སྦྱིན་པ། དྲིལ་བུའི་བརྟུལ་ཞུགས་གཉིས་མཛད་དོ། །གཉིས་པ་རྡོ་རྗེའི་བརྟུལ་ཞུགས་གཅིག་པུར་མཛད་པའི་ལུགས་ནི་བིརྺ་པའི་ལུགས་ཀྱི་བཀའ་སྲོལ་གཉིས་ལྟ་བུའོ། །གཉིས་པ་མཐའ་རྟེན་དུ་མཛད་པའི་ལུགས་ནི་གྲུབ་ཆེན་དཔལ་འཛིན་གྱི་གཤིན་རྗེའི་གཤེད་དམར་ནག་གི་དཀྱིལ་ཆོག་རྣམས་ཏེ། རྗེས་གནང་། བརྟུལ་ཞུགས། ལུང་བསྟན། གསང་བར་གདམས་པ། དབུགས་དབྱུང་སྟེ། ལྔ་པོ་རྡོ་རྗེ་སློབ་མའི་དབང་ཙམ་བསྐུར་ན་དེའི་མཐའ་རྟེན་དང་། བུམ་དབང་རྫོགས་པར་བསྐུར་ན་དེའི་མཐའ་རྟེན་དང་། དབང་བཞི་བསྐུར་ན་དེའི་མཐའ་རྟེན་དུ་སྦྱར་བར་བཤད་དོ། །གསུམ་པ་ནི་ནག་པོ་པའི་གཞུང་འགྲེལ་ལྟ་བུའོ། །དེས་ན་འདིར་དབང་ཆུ་གཉིས་ཀྱི་དགོངས་པ་ནི་སློབ་མ་རྡོ་རྗེ་ཆོ་ག་གསུམ་ལས་རྡོ་རྗེ་འཆང་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ། ཡུམ་རྡོ་རྗེ་སྙེམས་མ་དང་བཅས་པར་བསྐྱེད། ཕྱག་མཚན་མི་བསྐྱོད་པ་ལྟ་བུ་འམ། ཡང་ན་ཕྱག་གཉིས་པ་དཀར་པོ་རྡོ་རྗེ་དང་དྲིལ་བུ་འཛིན་པ་བསྐྱེད། དེ་ལ་ཡན་ལག་གཉིས་པ་དང་། གསུམ་པ་ཡང་སྔར་བཞིན་བྱས་ཏེ། བུམ་པའི་ཆུས་དབང་བསྐུར་ནས་མི་བསྐྱོད་པས་དབུ་བརྒྱན་པའི་ཡན་ལག་བཞི་རྫོགས་སུ་བྱས་པ་ལ་རྡོ་རྗེ་མི་དམིགས་ཏེ་སྟོང་པའི་ངང་ལས། ཧཱུྃ་ཡོངས་སུ་གྱུར་པ་ལས་རྡོ་རྗེར་བསྐྱེད་ལ། དེ་ལ་ལྷ་ཉི་ཤུ་རྩ་བརྒྱད་དངོས་སུ་བསྐྱེད་པའམ། དེར་མོས་པ་བྱས་པས་རུང་སྟེ། སྔགས་དང་ཚིགས་བཅད་ཀྱིས་སློབ་མའི་ལག་པ་གཡས་པར་གཏད། ཚིགས་བཅད་ཀྱི་དོན། འདི་དེ་སངས་རྒྱས་ཐམས་ཅད་ཉིད། །ཅེས་པ་ནི་རྡོ་རྗེ་འདི་སངས་རྒྱས་ལྔ་པོ་ཐམས་ཅད་འདུས་པ་ཡིན་ཞེས་པའི་དོན་ནོ། །རྡོ་རྗེ་སེམས་དཔའི་ཕྱག་ན་གནས་ཞེས་པ་ནི། དེ་ཉིད་བརྡའི་རྡོ་རྗེར་བྱས་པ་ནི་རིགས་དྲུག་པའི་ཕྱག་ན་གནས་པ་དེ་སློབ་མ་ཁྱོད་ཀྱིས་ཀྱང་ནི་རྟག་ཏུ་ཟུང་ཞིག དེས་རྡོ་རྗེ་སེམས་དཔའ་འམ་ཕྱག་ན་རྡོ་རྗེའི་བརྟུལ་ཞུགས་བརྟན་པར་འགྱུར་རོ། །ཞེས་པའོ། །སྔགས་ཀྱི་དོན་ཨོཾ་སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། སིདྡྷི་བཛྲ་ནི་གྲུབ་པའི་རྡོ་རྗེ། ས་མ་ཡ་ནི་དམ་ཚིག ཏིཥྛ་བཛྲ་ནི་བརྟན་པའི་རྡོ་རྗེ། ས་མ་ཡ་སཏྭཾ་ནི་དམ་ཚིག་ཁྱོདཾ། དྷ་ར་ཡཱ་མི་ནི་དེ་ཉིད་གཟུང་བར་གྱིས། ཧི་ལྔ་ནི་ཡེ་ཤེས་ལྔ། ཧཱུྃ་ནི་ལྔ་ཆར་གྱི་དབྱིངས་རིགས་དྲུག་པ་སྟེ། རྡོ་རྗེ་འདི་ནི་དེ་བཞིན་གཤེགས་པ་ཐམས་ཅད་གྲུབ་པའི་རྡོ་རྗེ། དམ་ཚིག་བརྟན་པའི་རྡོ་རྗེ་ཡིན་གྱི། དམ་ཚིག་ཅན་ཁྱོད་ཅེས་སློབ་མ་ལ་བོས་ནས་གཟུང་བར་གྱིས་ཤིག དེས་ཁྱོད་དེ་བཞིན་གཤེགས་པ་ལྔ་པོ་ཐམས་ཅད་ཀྱི་བདག་ཉིད་ཡིན་ནོ། །དེང་ཕྱིན་ཆད་ཐ་མལ་གྱི་སྤྱོད་པ་བརྟུལ་ལ་རྡོ་རྗེ་འཆང་ཆེན་པོའི་སྐུ་གསུང་ཐུགས་ལ་གནས་པར་གྱིས་ཤིག ཅེས་བྱ་བའི་དོན་ཡིན་པས་དེའི་རྟོགས་པ་བསྐྱེད་པར་བྱའོ། །འདིར་དབང་ཆུ་གཉིས་ཆར་ལས་སློབ་མ་མི་དམིགས་ཏེ་སྟོང་པའི་ངང་ལས་ཆོ་ག་གསུམ་ལས་རྡོ་རྗེ་འཆང་དུ་བསྐྱེད་པ་ཙམ་མ་གཏོགས། ཕུང་པོ་ལྔའི་ཆོས་ཉིད་སྦྱང་གཞིར་བྱས་པ་མི་སྣང་ཡང་། བླ་མ་དག་གི་གསུང་སྒྲོས་ལ། ཕུང་པོ་ལྔའི་ཆོས་ཉིད་རིགས་དྲུག་པར་བསྐྱེད་པར་མཛད་པ་ནི་དབང་ཆུ་གཉིས་ཀྱི་དགོངས་པར་སྣང་སྟེ། དབང་ཆུ་གཉིས་ལས་རིག་པའི་དབང་ལྔའི་ངག་འདོན་གྱི་སྐབས་སུའང་སློབ་མ་ལྷ་དེ་དང་དེར་བསྐྱེད་པ་ཙམ་ལས་མ་གསུངས་པའི་འགྲོས་ཀྱིས་འདིར་ཡང་དེ་བཞིན་དུ་བཤད་པ་ཡིན་ལ། སྔ་མ་ལ་ཕུང་པོ་ལྔ་དང་ཉོན་མོངས་པ་ལྔ་སྦྱངས་གཞིར་བྱས་པའི་ཚེ། འདིར་ཡང་དེ་དག་གི་ཆོས་ཉིད་སྦྱང་གཞིར་བྱེད་དགོས་པ་ནི་རྡོ་རྗེའི་བརྟུལ་ཞུགས་ཀྱི་དབང་དོན་ལས་ཀྱང་ཤེས་པའི་ཕྱིར་དང་། རྩ་རྒྱུད་ལས། དངོས་པོ་མེད་པའང་ཡོངས་ཤེས་པས། །ཞེས་པའི་སྐབས་ཀྱིས་སྦྱང་གཞི་དང་སྦྱར་བའི་དོན་ཡིན་པའི་ཕྱིར་རོ། །དེའང་འཕགས་པའི་མཉམ་གཞག་ལ་སྣང་བའི་ཆོས་ཉིད་མཚན་ཉིད་པ་ནི་སྦྱང་གཞི་སྦྱོང་བྱེད་ཀྱི་སྤྲོས་པ་ལས་བྲལ་བས་སྦྱང་གཞིར་མི་རུང་ལ། ཐ་མལ་རྣམ་རྟོག་ལ་ཆོས་ཅན་དང་། ཆོས་ཉིད་གཉིས་སུ་སྣང་བའི་ཆོས་ཉིད་སྦྱང་གཞིར་བྱེད་པ་ཡིན་པས་རྣམ་གྲངས་པའི་དོན་དམ་བདེན་པར་འཇོག་ཀྱང་དོན་ལ་ཀུན་རྫོབ་བདེན་པ་ཡིན་པས་སྦྱང་གཞིར་རུང་ངོ་། །གསུམ་པ་དེས་སྡོམ་པ་གང་ཐོབ་ཅིང་དོན་གང་ལ་དབང་བ་ནི། དབང་ཆུ་ལས། དེ་ནས་སློབ་མ་རྣམས་ལ་འདི་སྐད་ཅེས་བརྗོད་པར་བྱ་སྟེ། ཁྱོད་ཀྱིས་དཀྱིལ་འཁོར་ཆེན་པོའི་ཁ་དོག་དང་། དབྱིབས་མིག་གིས་མཐོང་བ་དང་། ཕྱིའི་འཇུག་པ་བྱས་པ་དང་། ཡེ་ཤེས་དབབ་པའི་ཏིང་ངེ་འཛིན་སྐྱེས་པ་ནི་ནང་གི་འཇུག་པ་ཡིན་ཏེ། དེས་ན་རྡོ་རྗེ་སེམས་དཔའ་ཁྱོད་ཀྱི་སྙིང་ལ་ཞུགས་པ་ཡིན་པས་དེས་ནི་དེང་ནས་ལྷ་དང་སྐལ་བ་མཉམ་པར་བྱས་པ་ཡིན་ནོ། །དེ་ནས་ཁོ་བོ་ཁྱོད་ལ་ཆུ་དང་། ཅོན་པཎ་དང་། རྡོ་རྗེ་དང་། དྲིལ་བུ་དང་། མིང་གི་དབང་རྫས་རྣམས་སྤྱི་བོ་དང་ལག་པར་འཁོར་གསུམ་ཡོངས་སུ་དག་པས་བྱིན་པ་ཡིན་ཏེ། དེས་ནི་ཁྱོད་ཀྱི་ཉོན་མོངས་པ་ལྔ་དང་། ཕུང་པོ་ལྔ་དང་། འབྱུང་བ་ལྔའི་དྲི་མ་ཐམས་ཅད་སྦྱངས་ཏེ། དེ་བཞིན་གཤེགས་པ་ལྔ་དང་ཡེ་ཤེས་ལྔར་བྱིན་གྱིས་བརླབས་པ་ཞེས་བྱ་བ་ཡིན་ནོ། །དེའི་རྗེས་ལ་རྡོ་རྗེའི་བརྟུལ་ཞུགས་བྱིན་པས་ནི་ཁྱོད་ཐ་མལ་པའི་ལུས་ངག་ཡིད་གསུམ་གྱི་སྤྱོད་པ་བརྟུལ་ལ་དེ་བཞིན་གཤེགས་པ་ལྔའི་བདག་ཉིད་རྡོ་རྗེ་འཆང་ཆེན་པོའི་སྐུ་གསུང་ཐུགས་རྡོ་རྗེ་ལ་གནས་པར་གྱིས་ཤིག་ཅེས་བྱ་བའི་དོན་ཡིན་ནོ། །དེ་ལྟ་བུའི་རིག་པའི་དབང་ལྔ་ཐོབ་ཕྱིན་ཆད་ཁྱེད་ཀྱིས་དེ་བཞིན་གཤེགས་པ་སྤྱི་དང་ཁྱད་པར་གྱི་དམ་ཚིག་ཚུལ་ཁྲིམས་ཀྱི་བསླབ་པ་ལ་སོགས་པ་ཐམས་ཅད་བསྲུང་བ་དང་རྟེན་པ་ལ་བསླབ་པར་བྱའོ། །དབང་འདིའི་བརྡའ་ནི། སོར་མོ་ལྔ་ནི་ཕྲལ་ཏེ་བསྟན། །ཅེས་བྱ་བ་ཡིན་ནོ། །དབང་འདི་ཐོབ་པས་ཁྱོད་ཀྱིས་རྟོག་པ་དང་། བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད་མཐའ་དག་ཉན་དུའང་རུང་། རྣལ་འབྱོར་གྱི་རྒྱུད་བཤད་དུ་མི་རུང་ཡང་བྱ་སྤྱོད་ཀྱི་རྒྱུད་བཤད་དུ་རུང་བ་ཡིན་ནོ། །རྣལ་འབྱོར་བླ་མ་དང་། རྣལ་འབྱོར་བླ་ན་མེད་པའི་སྒྲུབ་ཐབས་མཐའ་དག་གི་སྒྲུབ་ཐབས་ལ་སོགས་ཅི་རིགས་ཉན་དུ་རུང་ལ་རྒྱུད་ཀྱི་གཞུང་མ་ལུས་པ་ཉན་པའི་སྐལ་བ་དང་ལྡན་པ་མ་ཡིན་མོད་ཀྱི། དེ་ནས་གསུངས་པའི་དངོས་གྲུབ་ཀྱི་སྒྲུབ་ཐབས་དང་། དྲན་པ་གཅིག་པའི་སྒྲུབ་ཐབས་དང་དཀྱིལ་འཁོར་བྲིས་པ་ལས་དངོས་གྲུབ་སྒྲུབ་པ་གང་འདོད་པ་ཉམས་སུ་བླང་དུ་རུང་བ་ཡིན་ནོ། །དེ་བས་ན་ད་ནི་ཁྱོད་ཀྱི་མེ་ཏོག་ཕོག་པའི་ལྷ་འདི་ཞེས་བྱ་བ་ཡིན་ནོ། །དེའི་སྒྲུབ་ཐབས་འདི་ཡིན་ནོ། །ལྷ་འདི་མཉེས་པར་བྱེད་པའི་ཐབས་སྔོན་དུ་བསྙེན་པ་ལ་བརྩོན་པར་གྱིས་ཤིག འདིར་ལྷ་གཅིག་གི་བསྙེན་པ་ཡོངས་སུ་རྫོགས་ན་དེ་བཞིན་གཤེགས་པ་ཐམས་ཅད་ལ་བསྙེན་པས་མཉེས་པར་འགྱུར་བ་ཡིན་པས་ཁྱོད་ཀྱིས་རིག་པ་འཛིན་པ་དང་། ནམ་མཁའ་ལ་འགྲོ་བ་དང་། གཏེར་མཐོང་བ་ལ་སོགས་པ་དངོས་གྲུབ་གང་འདོད་པ་དེ་ཐམས་ཅད་འགྲུབ་པར་འགྱུར་རོ། །ཞེས་བརྗོད་ལ་སྒྲུབ་པའི་ཐབས་དང་། བཟླས་པའི་ལུང་བླ་མའི་མན་ངག་ལས་འབྱུང་བ་བཞིན་སྦྱིན་པར་བྱའོ། །ཞེས་གསུང་ཞིང་། ཌོཾ་བི་ལུགས་ཀྱི་དཀྱིལ་ཆོག་ལས་ཀྱང་ཆ་འདྲ་བར་གསུངས་སོ། །འདི་དག་གི་དོན་ལ་འཇུག་པའི་སྐབས་སུ་ལྷ་དང་སྐལ་བ་མཉམ་པའི་སྔགས་སྡོམ་ཐོབ་ཚུལ། རིག་པའི་དབང་ལྔའི་སྐབས་སུ་རིགས་ལྔ་སྤྱི་དང་བྱེ་བྲག་གི་དམ་ཚིག་ཐོབ་ཚུལ། བརྟུལ་ཞུགས་ཀྱི་དབང་གི་སྐབས་སུ་རིགས་དྲུག་པའི་སྡོམ་པ་ཐོབ་ཚུལ། དེས་རྒྱུད་ཉན་བཤད་གང་ལ་དབང་བ། ལྷའི་བསྒོམ་བཟླས་དང་དངོས་གྲུབ་སྒྲུབ་པའི་ཐབས་གང་ལ་དབང་བ་དང་ལྔ་ལས། དང་པོ་ནི། ཕྱི་འཇུག་དང་ནང་འཇུག་གི་སྐབས་སུ་ལྷ་དང་སྐལ་བ་མཉམ་པ་ཐོབ་པའི་དོན་སློབ་མས་རྡུལ་ཚོན་གྱི་དཀྱིལ་འཁོར་མཐོང་ནས་སློབ་དཔོན་གྱིས་ལྷ་ངོ་སྤྲོད་པའི་ཚེ་དཀྱིལ་འཁོར་གྱི་ལྷ་ཚོགས་དང་རིགས་འདྲ་བ་དང་། དེའི་བྱ་བ་ལ་ཞུགས་པ་ཡིན་པས་དེ་ཙམ་གྱིས་ཆ་ནས་སྐལ་བ་མཉམ་ཞེས་བྱ་སྟེ། དཔེར་ན་འཇིག་རྟེན་ན་བཟོའི་གྲྭ་དང་ཀློག་པའི་གྲྭ་ལ་སོགས་པར་འཇུག་པར་འདོད་པའི་གང་ཟག་དེ་གང་ཟག་གཞན་ཞིག་གིས་དེའི་གྲྭར་བཅུག་སྟེ། སྟོན་མོ་ལ་སོགས་པ་དེ་ལ་དགོས་པའི་བྱ་བ་བྱས་པའི་ཚེ་དེ་དག་དང་སྐལ་བ་མཉམ་ཞེས་བརྗོད་པ་བཞིན་འདིར་ཡང་རིགས་ལྔའི་སྡོམ་པ་གཟུང་བར་ཁས་བླང་བ་དང་། ཡེ་ཤེས་དབབ་པ་དང་། མེ་ཏོག་དོར་འཆིང་རྣམས་སྔོན་དུ་སོང་ནས་ལྷ་ངོ་སྤྲད་པས་དཔེ་དང་མཐུན་པའོ། །གཉིས་པ་ནི། རིག་པའི་དབང་ལྔ་བསྐུར་བས་ཉོན་མོངས་པ་ལྔ་དང་། ཕུང་པོ་ལྔ་དང་། འབྱུང་བ་ལྔའི་དྲི་མ་ཐམས་ཅད་སྦྱངས་ཏེ། དེ་བཞིན་གཤེགས་པ་ལྔ་དང་། ཡེ་ཤེས་ལྔར་བྱིན་གྱིས་བརླབས་པས་རིགས་ལྔ་སོ་སོའི་སྡོམ་པ་ཐོབ་སྟེ། སྔར་སྟ་གོན་ནམ་འཇུག་པའི་སྐབས་སུ་རིགས་ལྔའི་སྡོམ་གཟུང་ལན་གསུམ་བྱས་པའི་ཚེ་ཁས་བླངས་ཀྱི་སྡོམ་པ་ཐོབ་ཅེས་པའི་དོན་ཡང་ད་གཟོད་ཆོ་གས་བསྐྱེད་ནས་སོ་སོའི་སྡོམ་པ་ཐོབ་པའི་ཚེ་བསྲུང་བར་ཁས་བླངས་པ་ཡིན་ལ། སོ་སོའི་ཆོ་གའང་འདི་ཉིད་ཡིན་པའི་ཕྱིར་རོ། །དེའང་མི་བསྐྱོད་པ་ཆུ་དབང་ལྟ་བུ་ལ་མཚོན་ན། དབུ་རྒྱན་ལ་རིགས་བདག་ཚང་བའི་ཚེ་མི་བསྐྱོད་པའི་སྡོམ་པ་ཐོབ་སྟེ། འདི་ལ་གནས་གང་དུ་སྡོམ་ན། སློབ་མ་མི་བསྐྱོད་པར་བསྒོམ་པའི་གནས་དེ་ཉིད་དུའོ། །གྲངས་ཇི་སྙེད་སྡོམ་ན། སྤྱིར་རྣམ་པར་ཤེས་པའི་ཕུང་པོ་ལ་རིགས་བརྒྱད་དང་། རེ་རེ་ལའང་དུས་ཀྱི་སྒོ་ནས་སྐད་ཅིག་སྔ་ཕྱིར་རབ་ཏུ་མང་པོ་དང་། དེ་བཞིན་དུ་ཞེ་སྡང་གི་རིགས་དང་། སྐད་ཅིག་གིས་གྲངས་ཇི་སྙེད་ཡོད་པ་དང་། ཆུ་ལའང་ཡུལ་དང་དུས་ཀྱི་གྲངས་ཇི་སྙེད་ཡོད་པ་རྣམས་སྡོམ་མོ། །སྤང་བྱ་གང་སྡོམ་ན་སྦྱང་གཞི་དེ་རྣམས་ལ་ཐ་མལ་གྱི་རྣམ་རྟོག་སྡོམ་སྟེ། མི་བསྐྱོད་པ་གཅིག་གི་ངོ་བོར་ཤེས་པའོ། །ཐབས་གང་གིས་སྡོམ་ན། ཆུའི་དབང་གི་ཡན་ལག་བཞི་རྫོགས་ཀྱི་ཐབས་ཀྱིས་ཏེ། རྩ་རྒྱུད་ལས། དབང་བསྐུར་ནས་སྤྱི་བོར་རང་གི་རིགས་ཀྱི་བདག་པོར་འགྱུར་རོ། །འདིས་ནི་ཧེ་རུ་ཀ་རྫོགས་པ་ཉིད་དོ་ཅེས་གསུངས་པ་ལྟར་རོ། །སྡོམ་པ་རང་གི་ངོ་བོ་ནི་དེས་བདེ་བར་གྱུར་པ་སྟེ། ཐ་མལ་གྱི་རྣམ་རྟོག་སྡོམ་པས་བདེ་བར་གྱུར་པ་ཡིན་གྱི་ཚོར་བ་བདེ་བ་དང་། ཤིན་ཏུ་སྦྱང་བའི་བདེ་བ་ལྟ་བུ་ནི་མ་ཡིན་ནོ། །དེས་ན་བདེ་བའི་མཆོག་ཅེས་པ་ནི་སྡོམ་པ་གསུམ་ཆར་ལ་རང་རང་གི་སྤང་བྱ་སྡོམ་པས་བདེ་བ་ལ་བཤད་པར་བྱ་བ་ཡིན་ཅིང་། འདིར་ནི་སྔགས་ཀྱི་སྤང་བྱ་སྡོམ་པའི་ཆ་ནས་བདེ་བ་ཆེན་པོ་ཞེས་པའང་ཁྱད་པར་དུ་ཡོད་དོ། །དེས་དམ་ཚིག་གང་བསྲུང་བ་ལ་དབང་ན། ཚུལ་ཁྲིམས་ཀྱི་བསླབ་པ་སོགས་རིགས་ལྔ་སྤྱིའི་དམ་ཚིག་དང་། སོ་སོའི་དམ་ཚིག་གི་ནང་ནས་རྡོ་རྗེ། དྲིལ་བུ། ཕྱག་རྒྱ། སློབ་དཔོན་བཞི་གཟུང་བའི་དམ་ཚིག་བསྲུང་བ་ལ་དབང་སྟེ། དེ་ཉིད་ཆོ་གའི་སྒོ་ནས་ཐོབ་པའི་ཕྱིར་ཅོད་པཎ་གྱི་དབང་ལ་སོགས་པ་རིག་པའི་དབང་གཞན་བཞི་པོ་ལའང་འདི་ཉིད་ཀྱི་འགྲོས་ཞིབ་ཏུ་སྦྱར་བར་བྱ་ཞིང་རིགས་སོ་སོའི་དམ་ཚིག་ནི་རིན་ཆེན་འབྱུང་ལྡན་གྱི་དམ་ཚིག་ཟང་ཟིང་དང་། མི་འཇིགས་པ་དང་། ཆོས་དང་། བྱམས་པའི་སྦྱིན་པ་བཞི་སྦྱིན་པ་དང་། འོད་དཔག་མེད་ཀྱི་རིགས་ཀྱི་དམ་ཚིག་དམ་པའི་ཆོས་གཟུང་བ་དང་། དོན་ཡོད་གྲུབ་པའི་རིགས་ཀྱི་དམ་ཚིག་སྡོམ་པ་ཅི་ནུས་གཟུང་བ་དང་། མཆོད་པའི་ལས་བྱེད་པ་གཉིས་དང་། རྣམ་སྣང་གི་རིགས་ཀྱི་དམ་ཚིག་བླ་ན་མེད་པའི་དཀོན་མཆོག་གསུམ་གཟུང་བ་གསུམ་སྟེ། དེ་རྣམས་ལ་དབང་བ་ཡིན་ནོ། །གལ་ཏེ་དེ་ལྟར་ན་རྗེ་བཙུན་གྱིས་རྡོ་རྗེ་འབྱུང་བའི་ཊི་ཀར་སྡོམ་པ་འཛིན་པར་ནུས་པ་ལ་འཇུག་པའི་སྐབས་སུ་རིགས་ལྔའི་སྡོམ་པ་བསྒྲག་གཟུང་བྱེད་པ་དང་། སྡོམ་པ་འཛིན་པར་མི་ནུས་པ་ལ་འཇུག་པའི་སྐབས་སུ་དེ་དག་མི་བྱ་བར་བཤད་ཅིང་། སློབ་མའི་དབང་གི་སྐབས་སུ་རིག་པའི་དབང་ལྔ་སྡོམ་པ་འཛིན་མི་འཛིན་གཉིས་ཀ་ལ་ཐུན་མོང་དུ་བྱ་བའི་ཆོ་ག་ཡིན་པར་གསུངས་པ་དང་འགལ་ཏེ། སློབ་མའི་སྐབས་ཀྱི་རིག་པའི་དབང་ལྔ་ལས་རིགས་ལྔ་སོ་སོའི་དམ་ཚིག་ཐོབ་ནས། སྡོམ་པ་མི་འཛིན་ཞེས་པ་དང་འགལ་བའི་ཕྱིར་དང་། གལ་ཏེ་འཛིན་ན་འཇུག་པའི་སྐབས་སུ་སྡོམ་པ་བསྒྲག་གཟུང་དགོས་པར་མཚུངས་པའི་ཕྱིར་དང་། སྡོམ་པ་འཛིན་པ་ལ་རྡོ་རྗེ་སློབ་དཔོན་གྱི་དབང་ངེས་པར་བསྐུར་དགོས་པར་གསུངས་དགོས་པ་དང་འགལ་བའི་ཕྱིར་རོ་ཞེ་ན། དེའི་དོན་འདི་ལྟར་ཡིན་ཏེ། རྗེ་བཙུན་གྱིས་འཇུག་པའི་སྐབས་སུ་སློབ་མས་སློབ་དཔོན་ལ་གསོལ་བ་གདབ་པ་དང་། སློབ་དཔོན་གྱིས་རིགས་ཐམས་ཅད་ལ་གསོལ་བ་གདབ་པ་དང་། སློབ་མ་ལ་འདོད་པ་དྲི་བ་དང་། སློབ་མས་ཁས་བླངས་པ་དང་། སློབ་དཔོན་གྱིས་དམ་ཚིག་བསྒྲག་པ་དང་། སློབ་མས་སྡོམ་པ་ཁས་བླངས་པ་དང་། ཁས་ལེན་པ་དེ་ལ་སློབ་དཔོན་གྱིས་སྡོམ་པ་འབོགས་པ་དང་བདུན་པོ་སྡོམ་པ་གཟུང་བ་ཁོ་ན་ལ་བྱ་བའི་ཆོ་ག་ཡིན་པར་གསུངས་པའི་དོན་རྣལ་འབྱོར་རྒྱུད་ཀྱིས་སློབ་མའི་དབང་གི་སྐབས་སུ་བསྐུར་བའི་རིག་པའི་དབང་ལྔ་ལས་རིགས་ལྔ་སོ་སོའི་སྡོམ་པ་མི་ཐོབ་ཅིང་། སློབ་དཔོན་གྱི་དབང་གི་སྐབས་ཀྱི་རིག་པའི་དབང་ལྔ་ལས་རིགས་ལྔ་སོ་སོའི་སྡོམ་པ་ཐོབ་པར་བཞེད་པར་སྣང་སྟེ། སློབ་མའི་དབང་གི་སྐབས་སུ་སློབ་མ་མེ་ཏོག་གང་ཕོག་གི་ལྷར་བསྐྱེད་པའི་རྟེན་ལ་རིག་པའི་དབང་ལྔ་བསྐུར། དེའི་ཚེ་བུམ་པའང་མེ་ཏོག་གང་ཕོག་གི་བུམ་པས་ཆོག་པ་དང་། ཕྱག་རྒྱའི་དབང་བསྐུར་ཡང་དེ་བཞིན་གཤེགས་པ་ལ་མེ་ཏོག་ཕོག་ན་རྡོ་རྗེ་རིན་ཆེན་གྱི་སྔགས་དང་ཕྱག་རྒྱ་བྱ། རྡོ་རྗེ་སེམས་དཔའ་ལ་ཕོག་ན་རྡོ་རྗེ་དབྱིངས་ཀྱི་དབང་ཕྱུག་མའི་སྔགས་དང་ཕྱག་རྒྱ་བྱ། ཅོད་པཎ་དང་དར་དཔྱངས་ཀྱང་དངོས་སུ་བཀོན། མེ་ཏོག་ཕྲེང་བའི་དབང་ཡང་དཀྱིལ་འཁོར་གྱི་ལྷ་ལ་མེ་ཏོག་འབུལ་བ་ཙམ་ལས་མེད་དོ། །སློབ་དཔོན་སྐབས་ཀྱི་རིག་པའི་དབང་ལྔ་ནི་སློབ་མ་ལྷ་གང་ལ་མེ་ཏོག་ཕོག་ཀྱང་རྡོ་རྗེ་སེམས་དཔར་བསྐྱེད། དེ་ལ་དེ་བཞིན་གཤེགས་པ་ལྔའི་ཕྱག་རྒྱས་གནས་ལྔར་གཏུགས་པ་དང་། རྡོ་རྗེ་སེམས་དཔའ་ནས་རྡོ་རྗེ་འབེབས་པའི་བར་གྱི་ཕྱག་རྒྱ་དང་སེམས་དཔའ་ཉེར་བརྒྱད་ལུས་ལ་བཀོད་པ་བྱས་པའི་རྟེན་ལ་རྡོ་རྗེ་སློབ་དཔོན་གྱི་དབང་གི་དངོས་གཞི་ནི་རྡོ་རྗེ་སེམས་དཔའི་སྐུ་སྤྱི་བོར་བཞག་ལ། ཨོཾ་མ་ཧཱ་སུ་ཁ་ལ་སོགས་པའི་སྔགས་བརྒྱ་རྩ་བརྒྱད་བཟླས་ཤིང་བུམ་པ་ཐམས་ཅད་ཀྱིས་དབང་བསྐུར། ཅོད་པཎ་སོགས་གསུམ་པོའང་སྔར་ནི་མེ་ཏོག་གང་ལ་ཕོག་པའི་ཅོད་པཎ་སོགས་ཡིན་ལ། འདིར་ནི་ལྷ་གང་ལ་མེ་ཏོག་ཕོག་ཀྱང་རྡོ་རྗེ་སེམས་དཔའི་ཅོད་པཎ་དང་། ཕྱག་མཚན་དང་། མིང་གིས་དབང་བསྐུར་བ་ཡིན་ནོ་ཞེས་གསུངས་པས་རྣལ་འབྱོར་རྒྱུད་ཀྱི་སྐབས་སུ་སློབ་མའི་དབང་གི་སྐབས་ཀྱི་རིག་པའི་དབང་ལྔ་ལས་རིགས་ལྔ་སོ་སོའི་སྡོམ་པ་མི་ཐོབ་ཅིང་། སློབ་དཔོན་གྱི་དབང་གི་སྐབས་ཀྱི་རིག་པའི་དབང་ལྔ་ལས་རིགས་ལྔ་སོ་སོའི་སྡོམ་པ་ཐོབ་དགོས་པས་འགལ་བ་མེད་པའི་སྟེང་དུ། རྒྱུད་སྡེ་གོང་འོག་གི་ཆོ་གའི་ནུས་པ་ཆེ་ཆུང་གི་ཁྱད་པར་གསལ་བར་བྱས་ཏེ། བླ་མེད་ཀྱི་སློབ་མའི་དབང་གི་སྐབས་ཀྱི་རིག་པའི་དབང་ལྔ་ཉིད་ལའང་ཡོ་གའི་སློབ་དཔོན་གྱི་སྐབས་ཀྱི་རིག་པའི་དབང་ལྔའི་ནུས་པ་ཚང་བར་བསྟན་པའི་ཕྱིར་རོ། །འདི་ལ་དགོངས་ནས་དབང་གི་བརྡ་ལའང་། སོར་མོ་ལྔ་ནི་ཕྲལ་ཏེ་བསྟན་ཞེས་པ་འདིས་རིག་པའི་དབང་ལྔའི་སྐབས་སུ་རིགས་ལྔ་སོ་སོའི་དམ་ཚིག་ཐོབ་པར་བསྟན་པར་ཤེས་པར་བྱའོ། །ཡེ་ཤེས་ཞབས་ལུགས་པ་དག་ཡོ་ག་དང་སྒོ་བསྟུན་ནས་རིག་པའི་དབང་ལྔ་ལན་གཉིས་བསྐུར་ཞིང་དེ་ལས་སྡོམ་པ་ཇི་ཙམ་ཐོབ་པའི་ཚུལ་ནི་སྔར་བཤད་ཟིན་ཏོ། །གསུམ་པ་ནི་རྟུལ་ཞུགས་ཀྱི་དབང་གི་སྐབས་སུ་ལུས་ངག་ཡིད་གསུམ་གྱི་བྱ་བ་ལ་ཐ་མལ་གྱི་རྣམ་རྟོག་སྤང་བའི་སྡོམ་པ་ཐོབ་པ་ཙམ་ཞིག་གསལ་ཡང་བསྲུང་བྱའི་དམ་ཚིག་ལོགས་སུ་བཤད་པ་ནི་མ་མཐོང་ངོ་། །འདིའང་རིགས་དྲུག་རིགས་ལྔ་དང་། རིགས་ལྔ་རིགས་གསུམ་དང་། རིགས་གསུམ་གསང་ཆེན་རིགས་གཅིག་ཏུ་བསྡུ་བའི་རིམ་པ་ལྟར་ན་རིགས་དྲུག་པའི་རྟེན་ལ་རིགས་ལྔ་རིགས་གསུམ་དུ་སྡོམ་པའི་སྡོམ་པ་སྐབས་འདིར་ཐོབ་ཅིང་རྟེན་དེ་ལ་རིགས་གསུམ་རིགས་གཅིག་ཏུ་བསྡུ་བའི་སྡོམ་པ་ཐོབ་པའི་དོན་དུ་སྣང་སྟེ། རྗེ་བཙུན་རྩེ་མོས་རྡོ་རྗེ་འཆང་ཆེན་པོར་བྱིན་གྱིས་བརླབས་པའི་དབང་ལ་སློབ་དཔོན་དང་སློབ་མ་ཐུན་མོང་གི་དབང་དང་། རྡོ་རྗེ་སློབ་དཔོན་གྱི་ཐུན་མོང་མ་ཡིན་པའི་དབང་བསྐུར་བ་གཉིས་སུ་གསུངས་པ་ལས་ཤེས་སོ། །བཞི་པ་ནི། དབང་འདི་དག་ཐོབ་པས་རྒྱུད་སྡེ་འོག་མ་གསུམ་ཆར་ཉན་དུ་རུང་བ་དང་། རྣལ་འབྱོར་གྱི་རྒྱུད་བཤད་དུ་མི་རུང་ཡང་བྱ་སྤྱོད་ཀྱི་རྒྱུད་བཤད་དུ་རུང་བའི་དོན་ཡང་བྱ་རྒྱུད་ལ་ཆུ་དང་། ཅོད་པཎ་གཉིས་དང་། སྤྱོད་རྒྱུད་ལ་དེའི་སྟེང་དུ་རྡོ་རྗེ་དྲིལ་བུ་མིང་གི་དབང་སྟེ་ལྔ་ཡོད་པར་གསུངས་པའང་འདིའི་ནང་དུ་ཚང་བས་དེ་དག་གི་རྒྱུན་ཉན་བཤད་གཉིས་ཀ་རུང་ལ། རྣལ་འབྱོར་རྒྱུད་ཀྱི་སློབ་མ་དང་སློབ་དཔོན་གྱི་སྐབས་ཀྱི་རིག་པའི་དབང་ལྔའི་ནུས་པ་འདིར་ཚང་ཡང་། རྡོ་རྗེ་སློབ་དཔོན་གྱི་དབང་གི་ནུས་པ་མཐའ་དག་མ་ཚང་བས་ཉན་དུ་རུང་ཞིང་བཤད་དུ་མི་རུང་བའོ། །ཁ་ཅིག་འདི་རྒྱུད་སྡེ་འོག་མ་མཐའ་དག་གི་དབང་བསྐུར་ཐོབ་བའི་ཤེས་བྱེད་དུ་འདྲེན་པ་ནི། བུམ་དབང་ཐོབ་པས་ས་བརྒྱད་པ་ཐོབ། ཅེས་སོགས་ཚད་ལྡན་གྱི་གཞུང་ལས་བཤད་པ་སོགས་དག་བྱ་དག་བྱེད་ངོ་སྤྲད་པ་དང་། རང་གི་ངོ་བོ་ཇི་ལྟ་བ་བཞིན་ཐོབ་པའི་ཁྱད་པར་མ་ཕྱེད་པའོ། །ལྔ་པ་ནི། དབང་འདི་ཐོབ་པས་མེ་ཏོག་གང་ཕོག་གི་ལྷའི་བསྒོམ་བཟླས་ལ་དབང་བར་གསུངས་པ་ནི་དག་ལྡན་ལེའུ་གསུམ་པ་ལས་བཤད་པ་ལྟར། སྐྱབས་འགྲོ་སེམས་བསྐྱེད། ཚད་མེད་བཞི་བསྒོམ། ཡེ་ཤེས་ཚོགས་བསག་སྔོན་དུ་སོང་ནས་ལྷ་དགུ་པོ་གང་ལ་མེ་ཏོག་ཕོག་པའི་ལྷ་དེ་ཉིད་རྡོ་རྗེ་ཆོ་ག་གསུམ་མམ། ས་བོན་ལས་བསྐྱེད། ཡན་ལག་བཞི་རྫོགས་སུ་བྱས་ནས་རང་རང་གི་སྔགས་བཟླ་བ་ཡིན་པས། གང་འདོད་པ་དེ་དང་དེའི་བཟླས་པའི་ལུང་ཡང་སྐབས་འདིར་སྦྱིན་ཏེ། ཡེ་ཤེས་དབབ་པ་ནས་འདིའི་བསྒོམ་བཟླས་ཀྱི་བར་སུ་ལའང་མ་སྨྲ་ཞིག་ཅེས་གསང་བར་གདམས་ཏེ་སློབ་མས་ཀྱང་དེ་བཞིན་དུ་ཁས་བླང་ངོ་། །གཉིས་པ་རྡོ་རྗེ་སློབ་དཔོན་གྱི་དབང་ལ་བཞི་སྟེ། བུམ་དབང་། གསང་དབང་། ཤེས་རབ་ཡེ་ཤེས་ཀྱི་དབང་། དབང་བཞི་པའོ། །དང་པོ་ལ་ལྔ་སྟེ། སྔོན་དུ་འགྲོ་བ། དབང་གི་དངོས་གཞི། དཀྱིལ་འཁོར་དང་ལྷའི་རྣམ་དག མཐའ་རྟེན་སྦྱིན་པ། དབང་གི་རྟོགས་པ་བསྐྱེད་པའོ། །དང་པོ་ནི། རྡོ་རྗེ་སློབ་དཔོན་གྱི་དབང་གི་ཆེད་དུ་མཎྜལ་ཕུལ་ནས། མི་ལྡོག་འཁོར་ལོའི་ཞེས་སོགས་ལན་གསུམ་གྱིས་གསོལ་བ་གདབ་པའོ། །དེ་ལ་ཕྱིར་མི་ལྡོག་པའི་འཁོར་ལོ་ནི། ས་བརྒྱད་པ་ཐོབ་པ་ལ་འཇོག་སྟེ། འཇམ་དཔལ་རྩ་རྒྱུད་ལས། རྒྱལ་བའི་སྲས་པོས་ས་ཐོབ་ཀྱང་། །བློ་བརྟན་པ་ནི་མ་ཡིན་ཏེ། །ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིགས། །ཞེས་གསུངས་པས་ཐེག་པ་དམན་པ་ལ་ཕྱིར་མི་ལྡོག་པ་ཡིན་ལ། ལམ་མཉམ་རྗེས་བར་ཆད་མེད་པར་འཁོར་བས་འཁོར་ལོ་དང་འདྲ་བའི་ཕྱིར་རོ། །དེ་དང་སྐལ་བ་མཉམ་པའི་དབང་བསྐུར་ནི་ཕྱིར་མི་ལྡོག་པ་འཁོར་ལོའི་དབང་ཞེས་བྱ་སྟེ། ཡེ་ཤེས་ཞབས་ལུགས་སོགས་ཚད་ལྡན་གྱི་གཞུང་རྣམས་ལས་འདི་ཐོབ་ནས་ས་བརྒྱད་པ་དང་སྐལ་བ་མཉམ་པར་གསུངས་པའོ། །མགོན་པོ་རྡོ་རྗེ་སློབ་དཔོན་གྱིས་དེ་ལྟ་བུའི་དབང་བསྐུར་བ་བདག་ལ་སྩལ་ནས་ནི་དེ་མ་ཐག་བར་མ་ཆད་པར་དཀྱིལ་འཁོར་གྱི་དེ་ཉིད་དང་། ལྷའི་དེ་ཉིད་དང་། སློབ་དཔོན་གྱི་ཕྲིན་ལས་རྣམས་རྡོ་རྗེ་སློབ་དཔོན་གྱི་དབང་ཐོབ་པའི་ལས་ཡིན་པས་བསྟན་དུ་གསོལ། སངས་རྒྱས་ཀུན་གྱི་དམ་ཚིག་དང་། །ཞེས་སོགས་ཀྱི་དོན་ནི། སྤྱིར་ཟླ་བ་རྡོ་རྗེའི་སེམས་བསྐྱེད་པ་ནས་བཟུང་སྟེ། དབང་བཞི་པའི་བར་ཐོབ་པའི་དམ་ཚིག་དང་། སྡོམ་པ་རྣམས་སྡོམ་པ་གསུམ་གྱི་ཟླས་ཕྱེ་བའི་སྔགས་སྡོམ་ཡིན་པས་སངས་རྒྱས་ཀུན་གྱི་དམ་ཚིག་དང་། སངས་རྒྱས་ཀུན་གྱི་སྡོམ་པ་ཡིན་མོད་ཀྱི་བླ་ན་མེད་པ་ཞེས་པའི་ཚིག་དང་འབྲེལ་བའི་ཚེ་རྡོ་རྗེ་སློབ་དཔོན་གྱི་དབང་གི་སྐབས་སུ་ཐོབ་པའི་བསྐྱེད་རྫོགས་ཀྱི་སྡོམ་པ་ལ་འཇུག་པས། བུམ་དབང་ཙམ་ལས་མི་བསྐུར་ན་བུམ་དབང་གི་རྡོ་རྗེ་སློབ་དཔོན་གྱི་སྐབས་སུ་ཐོབ་པའི་སངས་རྒྱས་ཀུན་གྱི་དམ་ཚིག་དང་སྡོམ་པ་སྩལ་དུ་གསོལ་ཞེས་པ་ཡིན་ལ། དབང་བཞིར་ཆར་བསྐུར་ན། གོང་མ་གསུམ་གྱི་སྐབས་སུ་ཐོབ་པའི་སྡོམ་པའི་གསོལ་གདབ་ཏུའང་འགྱུར་རོ། །དབང་གོང་མའི་སྐབས་སུ་ཐོབ་པའི་སྡོམ་པ་ལ་སངས་རྒྱས་ཀུན་གྱི་སྡོམ་པ་ཞེས་པའི་ཐ་སྙད་ནི། རྩ་རྒྱུད་ཕྱི་མའི་གསུམ་པ་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝྃ་རྣམ་པར་རབ་ཏུ་གནས། །ཨེ་ཝྃ་རྣམ་པ་བདེ་ཆེན་པོ། །དབང་ལས་ཡང་དག་ཤེས་པར་འགྱུར། །ཞེས་པས་ཤེས་སོ། །གཉིས་པ་ནི་དབང་ཆུར། དེ་ནས་སློབ་མ་གཅིག་དབང་སྟེགས་ཀྱི་ཁར་བཞག་ལ་རྡོ་རྗེ་འཆང་ཆེན་པོའི་རྣམ་པར་བསམས་ཏེ། དེ་ལ་དམ་ཚིག་གསུམ་སྦྱིན་པ་ནི་ཞེས་གསུངས་པའི་དོན། བླ་ཆེན་འཕགས་པས། རྡོ་རྗེ་འཆང་སྐུ་མདོག་སྔོན་པོ་བསྐྱེད་ནས། དམ་ཚིག་གསུམ་སྦྱིན་པར་མཛད། དེའི་གོ་དོན་བྲག་ཕུག་པ་དཀོན་རྒྱལ་གྱིས་བརྟུལ་ཞུགས་ཀྱི་དབང་གི་སྐབས་སུ་རྒྱུའི་རྡོ་རྗེ་འཆང་དགོས་པས་སྐུ་མདོག་དཀར་པོར་བྱེད། རྡོ་རྗེ་སློབ་དཔོན་གྱི་དབང་གི་སྐབས་སུ་འབྲས་བུའི་རྡོ་རྗེ་འཆང་དགོས་པས་སྐུ་མདོག་སྔོན་པོར་བྱེད་པ་ཡིན། ཞེས་གསུངས་པ་ནི་ཀྱེ་རྡོར་རྒྱུད་གསུམ་དང་། རྗེ་བཙུན་གོང་མའི་དགོངས་པ་མ་ཡིན་ཏེ། རྒྱུད་གསུམ་པོ་འདིར་རྒྱུད་གསུང་བ་པོ་སྟོན་པ་ལོངས་སྤྱོད་རྫོགས་སྐུ་དེ་ཉིད་ལ་རིགས་དྲུག་པར་བཞག་ནས། རྡོ་རྗེ་འཆང་ངམ། རྡོ་རྗེ་སེམས་དཔའ་ཞེས་པའི་ཐ་སྙད་འདོགས་པ་ཡིན་གྱི། དེ་ལས་གཞན་པའི་རྡོ་རྗེ་འཆང་སྔོན་པོར་གསུངས་པ་མེད་པའི་ཕྱིར་རོ། །རྡོ་རྗེ་འཆང་ཆེན་པོའི་རྣམ་པར་བསམ་ཞེས་པས་ཀྱང་སྐུ་མདོག་སྔོན་པོར་མི་འགྲུབ་སྟེ། རྗེ་བཙུན་རྩེ་མོས་རྡོ་རྗེ་འཆང་ཆེན་པོར་བྱིན་གྱིས་རློབ་པའི་དབང་ལ། སློབ་དཔོན་དང་སློབ་མ་ཐུན་མོང་གི་དབང་དང་། རྡོ་རྗེ་སློབ་དཔོན་གྱི་ཐུན་མོང་མ་ཡིན་པའི་དབང་བསྐུར་བ་གཉིས་སུ་གསུངས་ཤིང་། རྡོ་རྗེ་འཆང་དེའང་རང་གི་ལྷག་པའི་ལྷའི་རྟེན་དང་། རྡོ་རྗེ་འཆང་གི་རྟེན་གཉིས་སུ་ཕྱེ་བའི་ཕྱི་མ་དེ་ཉིད་ཡིན་པས་དཀར་པོ་ལས་འོས་མ་འདས་པའི་ཕྱིར་དང་། ཌོཾ་བི་ལུགས་ཀྱི་དབང་ཆུར། གཞན་བཀྱེ་ལ། ཇི་སྐད་དུ་བཤད་པའི་དབང་སྟེགས་ཀྱི་དཀྱིལ་འཁོར་གྱི་སྟེང་དུ་སློབ་མའི་གཙོ་བོ་སྔར་རྡོ་རྗེའི་བརྟུལ་ཞུགས་ཀྱི་སྐབས་སུ་བསྟན་པའི་རྣམ་པ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་བཞག་ལ་དབང་བསྐུར་བར་བྱའོ། །ཞེས་བརྟུལ་ཞུགས་ཀྱི་དབང་གི་རྟེན་དེ་ཉིད་ལ་དམ་ཚིག་གསུམ་སྦྱིན་པར་གསུངས་པས་དབང་ཆུ་གཉིས་ཀ་དགོངས་པ་མཐུན་པའི་ཕྱིར་རོ། །གཞན་དུ་ན་ཕྱག་རྒྱ་སྐུའི་དམ་ཚིག་གི་སྐབས་སུ་རྡོ་རྗེ་སེམས་དཔའ་དཀར་པོར་དབང་ཆུ་གཉིས་ཆར་ལས་གསུངས་པས་བརྟུལ་ཞུགས་ཀྱི་སྐབས་སུ་རྒྱུའི་རྡོ་རྗེ་འཆང་། དམ་ཚིག་དང་པོ་གཉིས་ཀྱི་སྐབས་སུ་འབྲས་བུའི་རྡོ་རྗེ་འཆང་། དམ་ཚིག་ཕྱི་མའི་སྐབས་སུ། སླར་ཡང་རྒྱུའི་རྡོ་རྗེ་འཆང་དགོས་པ་སོགས་ཧ་ཅང་ཐལ་ལོ། །རྟེན་དེ་ལ་དམ་ཚིག་གསུམ་སྦྱིན་པ་ལ། མན་ངག་ལུགས་ཀྱི་བསྡུས་པའི་ལུགས་དང་། ཌོཾ་བི་ལུགས་ཀྱི་རྒྱས་པའི་ལུགས་གཉིས་ལས། དང་པོ་ནི། རྡོ་རྗེ་ལག་ཏུ་བླངས་ཏེ། ཧཱུྃ་ལས་རྡོ་རྗེའི་དེ་ཁོ་ན་ཉིད་ལྷ་ཉི་ཤུ་རྩ་བརྒྱད་རྫོགས་པར་དྲན་པས་རྡོ་རྗེ་བསྐྱེད་ལ། འདི་དེ་ཞེས་སོགས་ཚིགས་བཅད་དང་སྔགས་ཀྱིས་སློབ་མའི་ལག་པ་གཡས་པར་གཏད། དེ་ཉིད་སྙིང་གར་གཟུང་དུ་བཅུག་སྟེ། ཐོག་མཐའ་མེད་པའི་ཞེས་སོགས་ཀྱིས་རྡོ་རྗེའི་དེ་ཁོ་ན་ཉིད་ངོ་སྤྲད། དེའི་དོན་རྡོ་རྗེ་འདི་ནི་ཆོས་ཀྱི་དབྱིངས་དེ་བཞིན་ཉིད་སྤྲོས་པ་ཐམས་ཅད་དང་བྲལ་བ་རིག་སྟོང་དབྱེར་མེད་ཀྱི་ངོ་བོ་ཡིན་ནོ། །དེ་ནི་སྐྱེ་བ་དང་འགག་པ་མེད་པ་དེ་དང་རོ་གཅིག་པའི་སེམས་དང་སེམས་ལས་བྱུང་བ་རྣམས་དབྱེར་མེད་པ་ཐུགས་རྗེ་ཆེན་པོས་སེམས་ཅན་ལ་རྗེས་སུ་ཆགས་པའི་རང་བཞིན་ཀུན་ནས་བཟང་ཞིང་རིགས་ལྔ་པོ་ཐམས་ཅད་ཀྱི་བདག་པོ་དབྱིངས་རྣམ་པར་དག་པ་རིག་པའི་ལྷ་མོའི་བདག་པོ་ཞེས་བྱ་བ་ཡིན་ནོ། །ཞེས་རྗེ་བཙུན་རྩེ་མོས་གསུངས་སོ། །དེ་ནས་དྲིལ་བུ་བླངས་ལ་ཨའི་ཡི་གེ་ལས་ལྷ་ཉི་ཤུ་རྩ་གསུམ་རྫོགས་པར་དྲན་པས་དྲིལ་བུར་བསྐྱེད་ལ། འདི་ནི་ཞེས་སོགས་ཀྱིས་སློབ་མའི་ལག་པ་གཡོན་པར་གཏད། དཀུར་གཟུང་དུ་བཅུག་ལ། ཨ་སྲིད་པ་ངོ་བོ་ཉིད་ཀྱིས་དག །ཅེས་སོགས་ཚིགས་བཅད་གཅིག་གིས་དེ་ཁོ་ན་ཉིད་བརྗོད། དེའི་དོན་འདི་ཡིན་ཏེ་ཀྱེ་དྲིལ་བུ་འདི་ནི་ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བའི་སྒྲ་ཡིན་ནོ། །དེ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ། །ངོ་བོ་ཉིད་ཀྱིས་མ་སྐྱེས་པའོ། །དེས་དེ་ལྟར་ངོ་བོ་ཉིད་ཀྱིས་གྲོལ་བའོ། །ཞེས་བརྗོད་དོ། །དེ་ནས་སློབ་མ་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ་ཕྱག་མཚན་མི་བསྐྱོད་པ་ལྟ་བུའམ། ཡང་ན་གཡས་བརྒྱད་རྡོ་རྗེ། གཡོན་བརྒྱད་དེས་ཡུ་བ་བྱས་པའི་དྲིལ་བུ་འཛིན་པའམ། མི་ནུས་ན་ཞལ་གཅིག་ཕྱག་གཉིས་པ་གཡས་རྡོ་རྗེ། གཡོན་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པ་ལོ་བཅུ་དྲུག་ལོན་པ་ལྟ་བུས་འཁྱུད་པར་བསྒོམ་དུ་བཅུག་པ་ནི། ཕྱག་རྒྱ་སྐུའི་དམ་ཚིག་གི་དོན་ཡིན་ཏེ། ཤེས་རབ་བཅུ་དྲུག་ལོན་པ་ལ། །ཞེས་སོགས་གསུངས་པ་ཤེས་བྱེད་དུ་དྲངས་ནས་དེ་ལྟར་དྲན་པར་གྱིས་ཤིག་ཅེས་བསྒོ་ལ་ཞེས་གསུངས་པས་སོ། །སླར་ཡང་རྡོ་རྗེ་ཆེ་དང་དྲིལ་བུ་ཆེ། །ཞེས་སོགས་ཚིགས་བཅད་གཅིག་གིས་དེ་ཁོ་ན་ཉིད་དང་རྗེས་སུ་གནང་བ་བསྡུས་པ་བརྗོད་ནས་སློབ་མའི་ལག་པ་གཉིས་འཁྱུད་པའི་སྟངས་ཀ་བྱེད་དུ་བཅུག་སྟེ། ཕྱག་རྒྱའི་དེ་ཁོ་ན་ཉིད་རྒྱས་པར་བརྗོད་པ་ནི། སྲིད་པའི་བདེ་བ་ཤིན་ཏུ་ཆུང་། །ཞེས་སོགས་བརྗོད་དོ། །དེའི་དོན་སྲིད་པའི་བདེ་བ་ནི་སོ་སྐྱེ་ལ་བདེ་བར་སྣང་ཡང་དོན་ལ་བདེ་བ་ཤིན་ཏུ་ཆུང་ཞིང་སྡུག་བསྔལ་ཆེན་པོ་ཡིན་ཏེ། སྡུག་བསྔལ་ཕྱི་མ་གཉིས་ཀྱིས་བསྡུས་པའི་ཕྱིར་རོ། །དེ་དག་པར་བྱ་བ་ལ་ཕ་རོལ་ཏུ་ཕྱིན་པའི་ལུགས་ཀྱིས་གཞི་སྤོང་བའི་ཚུལ་གྱིས་དག་པར་བྱ་བ་དང་། རྡོ་རྗེ་ཐེག་པའི་ལུགས་ཀྱིས་གཞི་མི་སྤོང་བའི་ཚུལ་གྱིས་དག་པར་བྱ་བ་གཉིས་ལས། འདིར་ཕྱི་མ་སྟེ། ཤིན་ཏུ་བདེ་བ་དམ་པའི་ཐབས་སུ་གྱུར་པ། རྡོ་རྗེ་འཆང་ཆེན་པོ་ཁ་སྦྱོར་གྱི་སྐུར་བསྒོམ་པའི་དམ་ཚིག་འདི་ནི་རྟག་ཏུ་བསྐྱེད་ཅིག དེས་ཅིར་འགྱུར་ན་ཡུལ་སྣང་ཐམས་ཅད་ལྷར་གནས་འགྱུར་བས། འདོད་པའི་ལོངས་སྤྱོད་ཐམས་ཅད་ཅི་འདོད་པར་བསྟེན་བཞིན་དུ་རང་གི་ལྷག་པའི་ལྷར་ཤེས་པའི་སྦྱོར་བ་ཡིས་བདག་དང་གཞན་རྡོ་རྗེ་འཆང་ཆེན་པོར་ཤེས་པ་ལ་མཆོད་པར་བྱ་སྟེ། དེས་ལྷས་ལྷ་ལ་ལོངས་སྤྱོད་པས་ཚོགས་མྱུར་དུ་རྫོགས་ནས་རྡོ་རྗེ་འཆང་ཆེན་པོ་ཁ་སྦྱོར་གྱི་སྐུ་ཐོབ་པ་ལས་མི་འདའ་བའོ། །འོ་ན་ཁ་སྦྱོར་གྱི་སྐུར་བསྒོམ་དུ་རུང་ངམ་སྙམ་ན། རང་གི་ཡིད་སྟོང་པ་ཉིད་བཙུན་མོར་སྤྲུལ་ནས་བསྟེན་པ་ནི་དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་མི་མཛད་པས་ཕྱག་རྒྱའི་དམ་ཚིག་ཅེས་སུ་བསྒྲག་པ་ཡིན་ནོ། །ཞེས་བྱ་བའོ། །གཉིས་པ་ནི། ཌོཾ་བི་ལུགས་ཀྱི་དཀྱིལ་ཆོག་གཉིས་ཆར་ལས། ཉེ་འཁོར་བ་དན་རྒྱལ་མཚན་སོགས། །གླུ་དང་རྔ་སོགས་ས་རུ་ནི། །གདུགས་དང་བླ་བྲེ་བྲེས་ནས་སོ། །འདུག་སྟེ་སློབ་མ་ལ་འདི་བརྗོད། །དབང་བསྐུར་རིན་ཆེན་ཆེན་པོ་ལ། །ཁམས་གསུམ་ཀུན་གྱིས་ཕྱག་བྱས་ལ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །བུམ་པའི་དབང་ནི་དང་པོ་སྟེ། །གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་བཞིན་གཤེགས་པ་འོ། །ཐམས་ཅད་ཐབས་ཀྱི་ཆོ་ག་ཡིས། །ཐམས་ཅད་བླ་མེད་མཆོད་པས་མཆོད། །ཅེས་གསུངས་ཏེ། ཚིགས་བཅད་དང་པོས་སློབ་མ་དབང་སྟེགས་ཀྱི་སྟེང་དུ་བཞག་ནས། མཆོད་པའི་ཡོ་བྱད་བཀོད་པ་བསྟན། དེ་ནས་ཚིགས་བཅད་གཅིག་གིས་ཐོག་མར་བུམ་པ་ཆུའི་དབང་བསྐུར་བ་བསྟན། དེ་ནས་ཚིགས་བཅད་གཅིག་གིས་ཆུའི་དབང་བསྐུར་བ་དེ་ཉིད་བུམ་པའི་དབང་དང་། རྡོ་རྗེ་གཏད་པ་གསང་བའི་དབང་དང་། དྲིལ་བུ་གཏད་པ་ཤེས་རབ་ཡེ་ཤེས་ཀྱི་དབང་དང་། ཕྱག་རྒྱ་སྐུའི་དམ་ཚིག་དབང་བཞི་པ་ཡིན་ནོ། །ཞེས་མཆན་ལས་འབྱུང་ཡང་། འདིར་བུམ་པ་ཆུའི་དབང་བསྐུར་བའི་དབང་གི་ཆུ་རྒྱུན་གཅིག་པ་དེ་ཉིད་ལ་དབང་བཞི་ཚང་བ་སྟོན་པར་མངོན་ཏེ། སྤྱིར་དབང་གི་རྐང་གྲངས་ནི་རྡོ་རྗེ་གུར་གྱི་ལུང་དྲངས་ནས་སྔར་བཤད་ཟིན་པས་འདིར་སྐབས་སུ་མ་བབས་ལ། བསྐྱེད་རིམ་གྱི་སྐབས་སུ་དབང་གི་ཆུ་རྒྱུན་གཅིག་ལ་དབང་བཞི་ལེན་པའི་སྨིན་བྱེད་སྐབས་འདིར་ཐོབ་པའི་དོན་ཡིན་པའི་ཕྱིར་རོ། །དེ་ནས། ཐམས་ཅད་ཐབས་ཀྱི་ཆོ་ག་ཡིས། །ཞེས་པས་ཅོད་པཎ་ནས། བརྟུལ་ཞུགས་ཀྱི་བར་གྱི་དབང་ཐམས་ཅད་བསྐུར་བར་བསྟན་ལ། ཚིག་རྐང་ཐ་མས་ནི་དབང་གི་སྐབས་སུ་དེ་ཐམས་ཅད་ལའང་མཆོད་པས་མཆོད་པ་བསྟན་ནོ། །འོ་ན་སྐབས་འདིར་ཐུན་མོང་གི་དབང་དྲུག་པོ་བསྐུར་བ་ངེས་པར་དགོས་སམ་སྙམ་ན་རྗེ་བཙུན་རྩེ་མོས། ཆུ་དབང་ནི་དངོས་སུ་བསྐུར་ཞིང་། གཞན་རྣམས་ཏིང་ངེ་འཛིན་གྱིས་དབང་བསྐུར་བར་བྱ། གལ་ཏེ་སྤྲོས་པ་ལ་དགའ་བས་སྔར་སློབ་མའི་དབང་བསྐུར་བའི་ནུབ་མོ། དབང་མ་བསྐུར་བ་རྣམས་ལ་ནི་དབང་ཐམས་ཅད་ཇི་སྐད་བཤད་པའི་ཏིང་ངེ་འཛིན་དང་ལྡན་པས་དངོས་སུ་དབང་བསྐུར་བར་བྱའོ། །ཞེས་གསུངས་ལ་དེའི་དོན་བསྐྱེད་རིམ་གྱི་སྐབས་སུ་དབང་གི་ཆུ་རྒྱུན་གཅིག་ལ་དབང་བཞི་ལེན་པའི་སྨིན་བྱེད་དགོས་པས་དངོས་སུ་བསྐུར་ཞིང་། གཞན་རྣམས་སློབ་མའི་དབང་དང་། སློབ་དཔོན་གྱི་དབང་ནུབ་གཅིག་ལ་སྦྲེལ་ན་འདིར་དངོས་སུ་མི་དགོས་ཤིང་། ནུབ་སོ་སོར་བསྐུར་ན་དངོས་སུ་དབང་བསྐུར་ཞེས་པའི་དོན་ཏོ། །མན་ངག་ལུགས་ལ་ནི་དམ་ཚིག་གསུམ་གྱི་རྗེས་སུ་ཆུ་དབང་བསྐུར་བ་ཉིད་ལ་དབང་གི་ཆུ་རྒྱུན་གཅིག་ལ་དབང་བཞི་ལེན་པའི་སྨིན་བྱེད་ཚང་བས་འདི་མ་བྱས་ཀྱང་ཆོག་པ་སྤྲོས་པ་ཉུང་བའི་དབང་དུ་བྱས་པའོ། །དེ་ནས་དམ་ཚིག་དང་པོ་གཉིས་སྦྱིན་པ་མན་ངག་ལུགས་དང་འདྲ་བར་སྣང་ཞིང་། ཕྱག་རྒྱ་སྐུའི་དམ་ཚིག་གི་སྐབས་སུ་དེ་ནས་དངོས་སུ་ཡུམ་ཡོད་ན་བླངས་ཀྱང་རུང་། མེད་ན་བསམས་ཀྱང་རུང་སྟེ། ཤེས་རབ་ལོ་གྲངས་བཅུ་དྲུག་མ། །ཞེས་སོགས་ཚིགས་བཅད་གཅིག་དང་། རྡོ་རྗེ་ཆེ་དང་དྲིལ་བུ་ཆེ། །ཞེས་སོགས་ཚིགས་བཅད་གཅིག་བརྗོད་པས་སློབ་མ་རྡོ་རྗེ་འཆང་ཆེན་པོ་ཡབ་ཡུམ་དུ་བྱིན་གྱིས་བརླབས་པར་གཉིས་ཀས་བསམ་མོ། །དེ་ནས་སློབ་དཔོན་གྱིས་དེ་ལ་སྐྱེ་མཆེད་དང་སྐུ་གསུང་ཐུགས་བྱིན་གྱིས་བརླབ་པ་དང་། ཡེ་ཤེས་ཀྱི་འཁོར་ལོ་དགུག་གཞུག་དང་། དབང་བསྐུར་ནས་མི་བསྐྱོད་པས་རྒྱས་གདབ་པའི་བར་བྱས་ལ། སྲིད་པའི་བདེ་བ་ཤིན་ཏུ་ཆུང་། །ཞེས་སོགས་ཀྱིས་ཕྱག་རྒྱའི་དེ་ཁོ་ན་ཉིད་བརྗོད་པར་གསུངས་སོ། །སྐབས་འདིར་ཡན་ལག་བཞི་རྫོགས་སུ་བྱ་བ་མན་ངག་ལུགས་ལའང་གྲུབ་ན་ལེགས་པར་སྣང་སྟེ། ལམ་འབྲས་ཀྱི་དབང་གི་ཆུ་བོ་མ་ནུབ་པར་བསྐུར་བའི་མན་ངག་གི་གནད་ལས། རིག་པའི་དབང་ལྔ་བརྟུལ་ཞུགས་ཀྱི་དབང་། རྡོ་རྗེ་སློབ་དཔོན་གྱི་དབང་དང་བདུན་ལ་འཁོར་གསུམ་ཡོངས་སུ་དག་པ་བཞིས་རྒྱས་གདབ་པར་གསུངས་པའི་ཕྱིར་རོ། །མ་གྲུབ་ནའང་ཆོ་ག་ཆད་པའི་སྐྱོན་མེད་དེ། འདི་དང་སྔར་གྱི་བརྟུལ་ཞུགས་ཀྱི་དབང་གི་རྟེན་གཉིས་རྒྱུན་གཅིག་པས། དེ་ཡན་ལག་བཞི་རྫོགས་སུ་བསྐྱེད་པས་གཉིས་ཀའི་གོ་ཆོད་པའི་ཕྱིར་རོ། །དེ་ལྟར་ན་ལུགས་གཉིས་ཀ་ལ་དམ་ཚིག་གསུམ་མ་བྱིན་པའི་གོང་དུ་ཡན་ལག་བཞི་རྫོགས་སུ་བྱ་བར་རིགས་སོ་སྙམ་ན། འདི་ནི་ཕྱག་རྒྱ་སྐུའི་དམ་ཚིག་ལ་རྒྱས་བསྡུས་གཉིས་སུ་ཡོད་པའི་རྒྱས་པའི་དབང་དུ་བྱས་པས་སྐབས་འདིར་རིགས་སོ། །སླར་ཡང་མཐའ་བརྟེན་གྱི་ཆུ་དབང་བསྐུར་བ་ནི། མཁའ་འགྲོ་ལྔ་དང་ཡང་དག་ལྡན། །མཁའ་འགྲོ་མ་ཡི་ཚོགས་དང་ལྡན། །མཁའ་འགྲོ་ལྔ་ཡིས་ཡོངས་གང་བ། །སློབ་མ་རྡོ་རྗེ་ཅན་དབང་བསྐུར། །ཞེས་བྱ་བའི་དོན་ཡིན་པར་ལུགས་གཉིས་ཀ་མཐུན་ཏེ། སླར་ཡང་ནམ་མཁའི་གདན་གསུམ་ཚང་བའི་ལྷ་ཚོགས་ཀྱིས་རྡོ་རྗེའི་གླུ་དང་། རོལ་མོ་དང་། བཀྲ་ཤིས་ཀྱི་ཚིགས་བཅད་དང་བཅས་པས་དབང་བསྐུར་བར་བསམ་ཞིང་། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་ཚིགས་བཅད་སྔགས་དང་བཅས་པས་དངོས་སུ་དབང་བསྐུར་ཞིང་། ཏིང་ངེ་འཛིན་གྱིས་སྔར་བཤད་པའི་དབང་ཐམས་ཅད་བསྐུར་བར་བསམ་པར་བྱའོ། །སྤྲོས་པ་ལ་དགའ་ན་ཆུ་དབང་རྒྱས་པར་བསྐུར་བར་བྱ་སྟེ། དེའི་ཚུལ་ནི། བཅོམ་ལྡན་འདས་ཀྱེ་རྡོ་རྗེའི་ཆུས། །དེ་རིང་ཁྱོད་ལ་དབང་བསྐུར་བས། །རྣམ་ཤེས་ཕུང་པོའི་སྒྲིབ་སྦྱངས་ནས། །ཀྱེ་ཡི་རྡོ་རྗེ་གྲུབ་པར་མཛོད། །ཨོཾ་ཤྲཱི་ཧེ་རུ་ཀ་བཛྲོད་ཀ་ཨ་བྷི་ཥིཉྩ། གཽ་རཱི་ལ་སོགས་བརྒྱད་རྣམས་ཀྱི། །ཆུ་ཡིས་ཁྱོད་ལ་དབང་བསྐུར་བས། །ཕུང་པོ་བཞི་དང་འབྱུང་བ་བཞི། །ལྷ་མོ་བརྒྱད་དུ་འགྲུབ་པར་ཤོག །ཨོཾ་བཛྲ་གཽ་རཱི་ཨུད་ཀ་ཨ་བྷི་ཥིཉྩ་ཞེས་སོགས་བརྗོད་ཅིང་ཆུ་བླུགས་པས་ལུས་ཐམས་ཅད་གང་སྟེ་བདེ་བ་ཆེན་པོས་ཁྱབ་པ་དྲན་པར་བྱས་ནས་ཆུ་ལྷག་མ་ཡར་ལུད་པ་ལས་མི་བསྐྱོད་པའམ། རྡོ་རྗེ་སེམས་དཔས་དབུ་བརྒྱན་པར་བསམ་སྟེ། ནམ་མཁར་བཞུགས་པའི་དབང་ལྷ་རྣམས་ཀྱང་བསྟིམས་ནས། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྗོད་དེ་སྤྱི་བོར་མེ་ཏོག་གཞག ཇི་ལྟར་འབྱོར་བའི་མཆོད་པ་རྣམས་ཀྱིས་མཆོད་པར་བྱའོ། །གསུམ་པ་ལ་ལྔ་སྟེ། གང་དག་པ། གང་དུ་དག་པ། ཚུལ་ཇི་ལྟར་དག་པ། གཞི་གང་སྟོན་པ། དེ་ལྟར་བསྟན་པའི་དགོས་པའོ། །དང་པོ་ནི། རང་གི་སེམས་གསལ་བ་ཙམ་དང་། དེ་ཉིད་བག་ཆགས་ཀྱི་དབང་གིས་ཕུང་ཁམས་སྐྱེ་མཆེད་སྣ་ཚོགས་སུ་སྣང་བ་འདི་ཉིད་དོ། །གཉིས་པ་ནི། བྱང་ཕྱོགས་སོ་བདུན་དང་། གདན་གསུམ་ཚང་བའི་ལྷ་ཚོགས་སུའོ། །གསུམ་པ་ནི། སངས་རྒྱས་ཀྱི་སར་གློ་བུར་གྱི་དྲི་མ་མ་ལུས་པ་དང་བྲལ་བའི་ཚེ། སེམས་ཉིད་བྱང་ཕྱོགས་སོ་བདུན་དང་། ཕུང་ཁམས་སྐྱེ་མཆེད་རྣམས་གདན་གསུམ་ཚང་བའི་ལྷ་ཚོགས་སུ་མངོན་སུམ་དུ་གསལ་བར་འགྱུར་བས་དེ་ཉིད་དང་པོ་ནས་རང་བཞིན་རྣམ་དག་གི་ཚུལ་དུ་ཡོད་པ་དེ་འདིར་དབང་གི་གནས་སྐབས་སུ་དབང་གི་ངོས་སྐལ་གྱི་དྲི་མ་དག་པར་བྱས་པས་ཅུང་ཟད་གསལ་བར་འགྱུར་བའི་ཚུལ་གྱིས་རྣམ་པར་དག་པའོ། །བཞི་པ་ནི། གང་ལས་དབང་བསྐུར་བའི་རྡུལ་ཚོན་ནམ། རས་བྲིས་ཀྱི་དཀྱིལ་འཁོར་གཞིར་བྱས་ནས་དེ་ཉིད་ལ་སྟོན་ཏེ། དེ་ལྟར་ཁྱེད་ལ་རྡོ་རྗེ་འཆང་ཆེན་པོའི་དབང་བསྐུར་བ་འདིས། ཁྱེད་ཀྱི་ཕུང་པོ་དང་། ཁམས་དང་། སྐྱེ་མཆེད་ཀྱི་དྲི་མ་དག་པར་བྱས་པས། དེ་ཐམས་ཅད་རང་གི་སེམས་ཉིད་ཙམ་དུ་འདུས་ལ། སེམས་དེ་ཉིད་བཅོམ་ལྡན་འདས་མི་བསྐྱོད་པ་ཡིན། དེའི་རང་བཞིན་དཔལ་རྡོ་རྗེ་སེམས་དཔའ་ཡིན་པས་རྡོ་རྗེ་སེམས་དཔའ་མི་བསྐྱོད་པ་ཡིན་པར་མོས་པ་གྱིས་ཤིག དེ་བས་ན་རང་གི་སེམས་རྣམ་པར་དག་པ་ཉིད་དཀྱིལ་འཁོར་གྱི་འཁོར་ལོ་ཡིན་ཏེ། དཀྱིལ་འཁོར་ཞེས་ནི་གང་བཤད་པ། །ཡིད་ཀྱི་དཀྱིལ་འཁོར་དམ་པ་ཡིན། །ཞེས་གསུངས་སོ། །དེ་ལ་སེམས་ཀྱི་བྱེ་བྲག་ཐམས་ཅད་ཀྱི་དབང་དུ་བྱས་ནས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པ་ནི་གཞལ་ཡས་ཁང་གི་སྒོ་དང་། རྒྱན་ལ་སོགས་པ་ཡིན་ནོ། །དེ་བས་ན་སེམས་ཉིད་ནི་རྟེན་གྱི་དཀྱིལ་འཁོར་ཡིན་ལ། སེམས་དེ་ཉིད་ལ་ཕུང་པོ་དང་། ཁམས་དང་། སྐྱེ་མཆེད་ལ་སོགས་པ་ཉིད་གདན་གསུམ་ཚང་བའི་ལྷ་ཡིན་ཏེ། མདོར་ན་ཕུང་པོ་ལྔ་རྒྱལ་བ། དེ་བཞིན་གཤེགས་པ་ཐམས་ཅད་ཡིན། །ཞེས་བྱ་བ་ལ་སོགས་པ་ཐབས་ཀྱི་རྒྱུད་ལས་གསུངས་ལ། འདིར་ཡང་། གཟུགས་ཕུང་རྡོ་རྗེ་མ་ཡིན་ཏེ། །ཞེས་བྱ་བ་ལ་སོགས་པ་གསུངས་ཏེ། དེའང་ཕུང་པོ་ལྔ་ནི་དེ་བཞིན་གཤེགས་པའི་གདན། །ཞེས་པ་ནས། ཉོན་མོངས་པའི་སྒྲིབ་པ་ལ་སོགས་པ་ཟད་པར་བྱེད་པ་ནི་ཁྲོ་བོ་དང་ཁྲོ་མོའི་གདན་ཡིན་ནོ་ཞེས་པའི་བར་གྱིས་དཀྱིལ་འཁོར་དང་ལྷའི་དེ་ཁོ་ན་ཉིད་མདོར་བསྡུས་པ་དེ་ཙམ་བསྟན་པར་བྱའོ། །ཡང་བློ་མཆོག་ཏུ་གྱུར་པ་ལ་རྒྱས་པར་སྟོན་ན། དཀྱིལ་འཁོར་ཞེས་ནི་གང་བཤད་པ། །ཞེས་པ་ནས། དོ་ཤལ་ཕྱེད་པ་ཉིད་དུ་བརྗོད། །ཅེས་པའི་བར་ཚིགས་སུ་བཅད་པ་ཕྱེད་དང་བཅུ། ཐམས་ཅད་གསང་བའི་རྒྱུད་ལས་གསུངས་པ་ལྟར་དང་། ཕུང་པོ་ལྔ་ནི་མདོར་བསྡུས་ན། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེའི་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་པ་གཤིན་རྗེ་མཐར། །དེས་ནི་ཕུང་པོའི་མཐར་བྱེད་དེ། །དེས་ནི་ཤེས་བྱ་མཐར་བྱེད་པའོ། །ཞེ་སྡང་ཞེ་སྡང་ལོངས་སྤྱོད་པས། །ཉེས་པ་ཟད་པས་ཤེས་རབ་མཐར། །དེས་ནི་སེམས་ཀྱི་མཐར་བྱེད་དེ། །དེས་ནི་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པ་པད་མཐར་བྱེད། །དེ་ནི་ངག་གི་མཐར་བྱེད་འགྱུར། །དེ་བཞིན་སྙོམས་འཇུག་མཐར་བྱེད་དོ། །ཉོན་མོངས་ཀུན་ཟད་གང་ཡིན་དང་། །དེ་བཞིན་ལས་ཀུན་ཟད་པ་ཉིད། །སྒྲིབ་པ་ཀུན་ཟད་ཡེ་ཤེས་ནི། །བགེགས་ནི་མཐར་བྱེད་ཅེས་བྱར་བཤད། །ཅེས་བྱ་བ་གསང་བ་འདུས་པའི་རྒྱུད་ལས་གསུངས་པ་རྣམས་བརྗོད་པར་དཀྱིལ་ཆོག་གཉིས་ལས་འབྱུང་བ་ལྟར་བྱའོ། །མན་ངག་ལུགས་ལའང་བསྡུས་ན་སྔ་མ་ལྟར་དང་། རྒྱས་པར་ན་ཚིགས་བཅད་འདི་དག་དང་། སྒྲུབ་པའི་ཐབས་ལས་འབྱུང་བ་ལྟར། །གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་བརྗོད་དགོས་པར་གསུངས་ཤིང་། ཕུང་པོ་ལྔ་ནི་དེ་བཞིན་གཤེགས་པའི་གདན། །ཞེས་སོགས་ནི་གསང་བ་འདུས་པའི་རྒྱུད་ཀྱི་ལུང་ཚིག་དེ་དག་གི་དོན་བསྡུས་པ་ཁོ་ནར་སྣང་ངོ་། །ལྷ་དགུ་ལས་མེད་པས་གདན་གསུམ་ཚང་བ་ཇི་ལྟར་ངོ་སྤྲོད་སྙམ་ན། གདན་གསུམ་དངོས་སུ་ཚང་བ་འདུས་པ་མི་བསྐྱོད་པའི་དཀྱིལ་འཁོར་ལྟ་བུ་དང་། རྣམ་དག་གམ་ཕྲིན་ལས་ཀྱི་ཚུལ་གྱིས་ལྷ་དགུའམ། ལྷ་ལྔའམ། ལྷ་དཔའ་བོ་གཅིག་པ་ལའང་ཚང་བའི་ཚུལ་ནི་མན་ངག་ལས་འབྱུང་བ་སྟེ། འདིར་རྒྱས་པར་མ་སྤྲོས་སོ། །ལྔ་པ་ནི། བུམ་དབང་གི་རྡོ་རྗེ་སློབ་དཔོན་གྱི་དབང་ཐོབ་ནས་དཀྱིལ་འཁོར་གྱི་འཁོར་ལོ་ཡོངས་རྫོགས་བསྒོམ་པ་ལ་དབང་ཞིང་། དེའི་ཚེ་དཀྱིལ་འཁོར་དང་ལྷའི་རྣམ་དག་ཤེས་ནས་བསྒོམ་དགོས་པས་སྐབས་འདིར་བསྟན་དགོས་ཏེ། རྩ་རྒྱུད་ལས། རིན་ཆེན་གཟི་བརྗིད་འབར་བ་ཡི། །ཕྲེང་བ་འཁྲུགས་པ་ལྷ་མོ་ལྟོས། །མ་ཕུག་པས་ནི་སྦྱོར་བྲལ་འགྱུར། །ཕུག་པ་དགའ་བ་སྦྱིན་པ་པོ། །དེ་ལྟར་འཁོར་བ་འདོད་པ་ཡི། །ཡོན་ཏན་ལྔ་ལྡན་རིན་པོ་ཆེ། །མ་དག་པས་ནི་དུག་ཏུ་འགྱུར། །དག་པས་བདུད་རྩི་ལྟ་བུར་འགྱུར། །ཞེས་གསུངས་པས་སོ། །བཞི་པ་མཐའ་བརྟེན་ལ་གཉིས་ཏེ། སྤྱིའི་རྣམ་པར་བཞག་པ། སྐབས་སུ་བབ་པའི་མཐའ་རྟེན་རྗེས་གནང་སྦྱིན་པའོ། །དང་པོ་ནི། བཤད་རྒྱུད་རྡོ་རྗེ་ཕྲེང་བར། ཆུ་ཡི་དབང་སོགས་དབྱེ་བ་ཡིས། །དབང་བསྐུར་རྣམ་པ་བཅུ་བཞི་སྟེ། །དབང་བསྐུར་རེ་རེ་ས་རེའོ། །ཞེས་གསུངས་ཤིང་། དེའི་དོན་གྲུབ་ཆེན་དྲིལ་བུ་པས། སློབ་དཔོན་དབང་སོགས་དབྱེ་བ་ཡིས། །དབང་བསྐུར་རྣམ་པ་བཞིར་བཤད་དེ། །ཆུ་ཡི་དབང་སོགས་དབྱེ་བ་ཡིས། །བཞི་པོ་དེ་ཡང་བཅུ་བཞིའོ། །ཞེས་གསུངས་སོ། །ཡེ་ཤེས་ཐིག་ལེ་ལས། ཆུ་དང་དབུ་རྒྱན་རྡོ་རྗེ་དང་། །དྲིལ་བུ་མིང་དང་བརྟུལ་ཞུགས་དང་། །ལུང་བསྟན་པ་དང་སྐྱབས་སྦྱིན་དང་། །ཕྱག་རྒྱ་སྔགས་དང་ཡེ་ཤེས་སོ། །ཞེས་བུམ་དབང་བཅུ་གཅིག་དང་། དབང་གོང་མ་གསུམ་སྟེ་བཅུ་བཞིར་གསུངས་ལ། ཕྱག་རྒྱ་ཆེན་པོ་ཐིག་ལེ་ལས་ཀྱང་། དབང་བཅུ་བཞིར་གསུངས་སོ། །དེ་ལྟར་བླ་མེད་ཕལ་ཆེ་བ་ལས། དབང་བཅུ་བཞིར་གསུངས་པ་ལྟར་འདིར་ཡང་བུམ་དབང་ལ་རིག་པའི་དབང་ལྔ། རྡོ་རྗེའི་བརྟུལ་ཞུགས། རྡོ་རྗེ་སློབ་དཔོན་གྱི་དབང་། མཐའ་བརྟེན་བཞི་སྟེ་བཅུ་གཅིག དབང་གོང་མ་གསུམ་དང་བཅུ་བཞིའི་རྣམ་གཞག་མཛད་པ་ནི། དབང་རིམ་གྱིས་པའི་གོ་རིམ་ལྟར་ཡིན་ལ། དབང་ཅིག་ཅར་བ་ལྟར་ན་མཐའ་བརྟེན་བཞི་པོ་དབང་བཞི་ལ་སོ་སོར་སྦྱར་ཏེ། གང་ལྟར་ཡང་གྲངས་ནི་འདྲ་བར་སྣང་ངོ་། །དྲིལ་བུ་པའི་ལུགས་ཀྱི་དབང་བཅུ་བཞི་ངོས་འཛིན་པའི་ཚུལ་ལ། མེ་ཏོག་ཕྲེང་བ་དང་། ཆུ་དང་། ཅོད་པཎ་དང་། རྡོ་རྗེ་དང་། དྲིལ་བུ་དང་། མིང་དང་། ཐུན་མོང་གི་བརྟུལ་ཞུགས་དང་། ཐུན་མོང་མ་ཡིན་པའི་བརྟུལ་ཞུགས་དང་། ལུང་བསྟན་དབུགས་དབྱུང་། གཟེངས་བསྟོད། དབང་གོང་མ་གསུམ་སྟེ་བཅུ་བཞིར་བྱེད་པའི་ལུགས་གཅིག་དང་། ཡང་ན་ལུང་བསྟན་སོགས་གསུམ་པོ་བྱ་བ་གཅིག་པས་གཅིག་ཏུ་བགྲངས་ཏེ་དགུ་དང་། རྡོ་རྗེ་སློབ་དཔོན་དང་། དེའི་རྗེས་གནང་མཐའ་བརྟེན་དང་བཅུ་གཅིག དབང་གོང་མ་གསུམ་སྟེ་བཅུ་བཞིར་བྱེད་པའི་ལུགས་དང་། ཡང་ན་བརྟུལ་ཞུགས་གཉིས་གཅིག་ཏུ་བགྲངས་ཏེ་ལུང་བསྟན་སོགས་གསུམ་པོ་སོ་སོར་བགྲང་། རྡོ་རྗེ་སློབ་དཔོན་གྱི་དབང་རྗེས་གནང་དང་བཅས་པ་དང་། དབང་གོང་མ་གསུམ་སྟེ་བཅུ་བཞི་ཡིན་ལ། སློབ་དཔོན་གྱི་དགོངས་པའང་འདི་ཉིད་ཡིན་ཅེས་རྗེ་བཙུན་རྩེ་མོས་གསུང་ངོ་། །དེ་གསུམ་ཆར་ལའང་མེ་ཏོག་ཕྲེང་བ་དང་། སྔགས་ཀྱི་དབང་བསྐུར་ནས་བགྲང་བར་སྣང་ལ། སློབ་དཔོན་གྱི་གཞུང་ལས་ཆུ་ནས་བགྲངས་པ་དང་འགལ་ལོ་སྙམ་ན། ཕྱག་ལེན་ལ་མེ་ཏོག་ཕྲེང་བ་དང་སྔགས་ཀྱི་དབང་བསྐུར་ཐོག་མར་ལེན་པས་དེའི་དབང་དུ་བྱས་པ་ཡིན་ལ། གཞུང་ལས་འོག་བརྟུལ་ཞུགས་ཀྱི་དབང་གི་རྗེས་སུ་འབྱུང་བ་བགྲང་ཚུལ་གསུམ་ཀ་ལའང་རྐང་གྲངས་གཅིག་འཛིན་པས་འགལ་བ་མེད་དོ། །གཉིས་པ་ནི་འདིར་དབང་ཅིག་ཅར་བའི་དབང་དུ་བྱས་ནས་བུམ་དབང་གི་མཐའ་བརྟེན་རྗེས་གནང་སྦྱིན་པ་ལ་བསྡུས་པ་དང་། འབྲིང་དང་། རྒྱས་པ་གསུམ་ལས། དང་པོ་ནི། དེ་རིང་རྡོ་རྗེ་སློབ་དཔོན་འགྱུར། །སློབ་མའི་ཚོགས་རྣམས་བསྡུ་བར་གྱིས། །ཞེས་བྱ་བ་ཡིན་པས། ཐབས་སྣ་ཚོགས་ཀྱིས་སེམས་ཅན་གྱི་དོན་གྱིས་ཤིག་ཅེས་པ་ཙམ་གྱིས་ཆོག་པར་གསུངས་སོ། །གཉིས་པ་ནི་དེའི་སྟེང་དུ་རིགས་ལྔའི་ཆོས་ཀྱི་འཁོར་ལོ་བསྐོར་བའི་ཚིགས་སུ་བཅད་པ་ལྔ་ཙམ་སྦྱར་བའོ། །གསུམ་པ་ནི་སྤྲོས་པ་ལ་དགའ་ན་ལྷ་མཆོད་པ་དང་། སེམས་ཅན་གྱི་དོན་བྱེད་པ་དང་། ཆོས་ཀྱི་འཁོར་ལོ་བསྐོར་བའི་རྗེས་གནང་དེ་ཉིད་བསྡུས་པའི་རྒྱུད་ལས་འབྱུང་བ་ལྟར་རྒྱས་པར་བྱ་བ་ག་ཡ་དྷ་རའི་ཕྱག་ལེན་ལ་འབྱུང་སྟེ། རྩ་རྒྱུད་ལས། ཇི་ལྟར་འདི་ཉིད་བསྡུས་པ་ཡི། །དཀྱིལ་འཁོར་ཆོ་ག་དེ་བཞིན་བྱ། །ཞེས་འདིར་ཆོ་ག་བྱ་དགོས་ཤིང་དངོས་སུ་མ་གསུངས་པ་རྣམས་དེ་ཉིད་བསྡུས་པ་ལྟར་བྱ་བར་གསུངས་པའི་དོན་དུ་སྣང་ངོ་། །དཀྱིལ་ཆོག་གཉིས་ལས་དཀྱིལ་འཁོར་དང་། ལྷའི་དེ་ཁོ་ན་ཉིད་བརྟེན་པའི་རྗེས་སུ་གསང་དབང་བསྐུར་བ་མ་གཏོགས་རྗེས་གནང་གསུང་བ་མི་སྣང་ཡང་། རྗེ་བཙུན་རྩེ་མོས་རྒྱས་འབྲིང་བསྡུས་གསུམ་འདི་ཇི་ལྟ་བ་བཞིན་གསུངས་པའང་། རྩ་རྒྱུད་ཀྱི་ལུང་གི་དོན་དུ་གནས་པ་སྔ་མ་ལྟར་སྣང་ཞིང་རྒྱས་པ་འདི་ནི་ནག་པོ་དཀྱིལ་ཆོག་དང་། ཤཱནྟི་པས་བཞི་བརྒྱ་ལྔ་བཅུ་པའི་འགྲེལ་པ་ལས་ཀྱང་འདི་ཇི་ལྟ་བ་བཞིན་གསུངས་པས། སྤྲོས་པ་ལ་དགའ་ན་བླ་མེད་སྤྱི་ལ་སྦྱར་བས་ཀྱང་ལེགས་པར་སྣང་ངོ་། །གང་དུ་བྱ་བའི་གནས་སྐབས་ཀྱང་ཨ་བྷ་ཡས་སཾ་བུ་ཊ་ལས། བྱང་ཆུབ་སེམས་ཀྱི་དབང་བསྐུར་བའི། །སློབ་མ་སྡིག་དང་བྲལ་བ་ལ། །རྗེས་སུ་གནང་བ་དེ་ནས་སྦྱིན། །ཞེས་གསུངས་པའི་བྱང་ཆུབ་ཀྱི་སེམས་ཀྱི་དབང་བསྐུར་བ་ནི་ནང་དབང་ཡང་མ་ཡིན། གསང་དབང་ཡང་མ་ཡིན་པས་དབང་བཞི་པ་ལ་བྱ་དགོས་ལ། དེས་ན་དབང་བཞི་པའི་རྗེས་སུ་བྱ་དགོས། ཞེས་བཞེད་པ་དང་། གྲུབ་ཆེན་ལྭ་བ་པས་ཀྱང་། ནུབ་གཅིག་ལ་དབང་བཞི་རྫོགས་པར་བསྐུར་ན། མཐའ་རྟེན་ཐམས་ཅད་དབང་བཞི་པའི་མཇུག་ཏུ་སྦྱོར། བུམ་དབང་ལས་མི་བསྐུར་ན་བུམ་དབང་གི་མཇུག་ཏུ་སྦྱོར། རྡོ་རྗེ་སློབ་མའི་དབང་ཙམ་ལས་མི་བསྐུར་ན་མཐའ་བརྟེན་ཐམས་ཅད་དེའི་མཇུག་ཏུ་སྟེར་བར་བཤད་དོ། །འདིར་བུམ་དབང་གི་མཇུག་ཏུ་སྦྱར་ན་ལྷ་མཆོད་པའི་རྗེས་གནང་ནི་སློབ་དཔོན་གྱིས། དེང་ནས་བརྩམས་ཏེ་རྫོགས་སངས་རྒྱས། །ཞེས་སོགས་བརྗོད་ཅིང་ཕྱག་རྒྱ་བཅའ། སློབ་མས་ཚིག་གི་རྗེས་ཟློས་མི་བྱེད་པར་ཕྱག་རྒྱ་བཅའ་སྟེ། དེས་དེ་རིང་ཕྱིན་ཆད་སྒེག་པ་ལ་སོགས་པའི་ལུས་ཀྱི་རྣམ་འགྱུར་ཐམས་ཅད་དཀྱིལ་འཁོར་གྱི་ལྷ་མཆོད་པར་འགྱུར་རོ། །ཞེས་རྗེས་སུ་གནང་བ་སྦྱིན་ནོ། །གཉིས་པ་སེམས་ཅན་གྱི་དོན་བྱེད་པའི་རྗེས་གནང་ལ། ཐོག་མར་མ་རིག་པའི་ལིང་ཐོག་བསལ་བའི་ཆེད་དུ། གསེར་གྱི་ཐུར་མའམ། དེ་མེད་ན་རྡོ་རྗེ་ལ་བཅོམ་ལྡན་འདས་ཀྱི་རྩ་བའི་སྔགས་བརྗོད་དེ། ཇི་ལྟར་མིག་མཁན་རྒྱལ་པོ་ཡིས། །ཞེས་སོགས་བརྗོད་ཅིང་ལིང་ཐོག་བསལ་བའི་ཚུལ་དུ་བྱའོ། །དེ་ལྟར་མ་རིག་པའི་ལིང་ཐོག་བསལ་བས་ཆོས་ཐམས་ཅད་གཟུགས་བརྙན་དང་འདྲ་བར་ཤེས་པར་གྱིས་ཤིག་ཅེས་པ་མེ་ལོང་གི་རྗེས་གནང་དང་། སྒྲ་ཐམས་ཅད་རང་བཞིན་མེད་པར་བསྟན་པ་དྲིལ་བུའི་རྗེས་གནང་ནི་ཤེས་རབ་སྟོང་བ་ཉིད་རྟོགས་པར་གྱིས་ཤིག་ཅེས་པ་ཡིན་ལ། དེ་ལྟར་ཆོས་ཐམས་ཅད་རང་བཞིན་མེད་པར་ཤེས་ནས་ཉན་ཐོས་དང་རང་རྒྱལ་བའི་སེམས་སུ་གྱུར་ན་མི་རུང་བས་ཉན་རང་གི་སེམས་བསད་ནས་དེ་བཞིན་གཤེགས་པ་ཐམས་ཅད་དང་རྗེས་སུ་ཆགས་པར་འགྱུར་བའི་ཆེད་དུ་མདའ་གཞུའི་རྗེས་གནང་སྟེ། སེམས་ཅན་གང་ན་གནས་པའི་གནས་ནི་ཕྱོགས་བཞི་སྟེང་འོག་གཉིས་ཏེ་དྲུག་ཡིན་ལ། དེར་མདའ་རེ་འཕངས་པས་ཉན་རང་གི་སེམས་བསད་ནས་སྙིང་རྗེ་བསྐྱེད་པ་ནི་ཐབས་ཀྱི་ཆའོ། །དེ་ལྟ་བུའི་ཐབས་ཤེས་ཟུང་འཇུག་དེའང་ཕ་རོལ་ཏུ་ཕྱིན་པའི་ཐེག་པ་ལྟར་དོན་སྤྱིའི་ཚུལ་ཙམ་མ་ཡིན་གྱི་སྔར་ཡེ་ཤེས་ཕབ་པའི་དུས་ཀྱི་ཉམས་སུ་མྱང་བ་དེའང་། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་སྣང་ལ་རང་བཞིན་མེད་པའི་ཚུལ་གྱིས་ཞུགས་པ་ཡིན་ནོ། །ཞེས་པ་ནི་མེ་ལོང་གཉིས་པའི་རྗེས་སུ་གནང་བ་སྟེ། མདོར་ན་རྡོ་རྗེ་ཐེག་པའི་འཇུག་པ་དང་། དབང་གི་དངོས་གཞིའི་སྐབས་སུ་སྐྱེས་པའི་ཡེ་ཤེས་ཀྱི་རྟོགས་པའི་ཐབས་ཤེས་ཟུང་འཇུག་ནི་སེམས་ཅན་གྱི་དོན་བྱེད་པའི་རྒྱུ་ཡིན་པས་དེ་ལ་གནས་པར་གྱིས་ཤིག་ཅེས་པ་ནི་སེམས་ཅན་གྱི་དོན་བྱེད་པའི་རྗེས་གནང་ངོ་། །གསུམ་པ་ཆོས་ཀྱི་འཁོར་ལོ་བསྐོར་བའི་རྗེས་གནང་ནི་སེམས་ཅན་གྱི་དོན་ཡང་དོན་ཕལ་པ་ཙམ་མ་ཡིན་གྱི། ཆོས་ཀྱི་འཁོར་ལོ་བསྐོར་དགོས་སོ་ཞེས་ཤེས་པའི་ཆེད་དུ་རྐང་པའི་བར་དུ་འཁོར་ལོ་དང་། ལག་པ་གཡས་སུ་དུང་དང་། གཡོན་དྲིལ་བུ་དང་། ལག་ངར་གཉིས་ཀྱི་སྟེང་དུ་ཧེ་བཛྲའི་རྒྱུད་ཀྱི་པོ་སྟི་བྱིན་ཏེ། དེང་ནས་བརྩམས་ཏེ་སེམས་བསྐྱེད་པ། །ཞེས་སོགས་བརྗོད་པས། སྤྱིར་ཆོས་ཀྱི་འཁོར་ལོ་བསྐོར་བར་གྱིས་ཤིག་ཅེས་རྗེས་སུ་གནང་བའོ། །ཆོས་ཀྱི་འཁོར་ལོ་དེའང་། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་པའི་ཚུལ་གྱིས་གནས་སྐབས་ཐེག་པ་གསུམ་པོ་གང་ལ་གང་འདུལ་སྟོན་དགོས་ཀྱང་མཐར་ཐུག་དེ་བཞིན་གཤེགས་པ་རིགས་ལྔས་བསྡུས་པའི་རྡོ་རྗེ་ཐེག་པ་ལ་སྦྱོར་བར་གྱིས་ཤིག་ཅེས་པ་ནི། རིགས་ལྔའི་སྤྲུལ་བཤད་ཀྱི་རྗེས་གནང་སྟེ། འདི་ལའང་སློབ་དཔོན་གྱིས་ཚིག་བརྗོད་ཅིང་རིགས་ལྔའི་ཕྱག་ཆེན་བཅའ། སློབ་མས་ཚིག་གི་རྗེས་ཟློས་མི་བྱེད་པར་ཕྱག་རྒྱའི་ལད་མོ་བྱེད་པའོ། །ལྔ་པ་དབང་གི་རྟོགས་པ་བསྐྱེད་པ་ནི། དབང་ཆུར། དེ་དག་གིས་ནི་ཁྱོད་ཀྱིས་དཀྱིལ་འཁོར་རྣམ་པ་བཞི་ལས་བསྐྱེད་པ་རྡུལ་ཚོན་གྱི་དཀྱིལ་འཁོར་དུ་ཞུགས་པ་དང་མཐོང་བ་ཡིན་ནོ། །དབང་རྣམ་པ་བཞི་ལས་ནི་རྡོ་རྗེ་སློབ་དཔོན་གྱི་དབང་ཐོབ་བོ། །དབང་འདི་ལ་ཕྱིར་མི་ལྡོག་པའི་དབང་ཞེས་བྱ་སྟེ། དེ་ཁོ་ན་ཉིད་ཐོབ་པས་འདིས་ཐེག་པ་དམན་པར་ཕྱིར་མི་ལྡོག་པས་སོ། །ཡང་དབང་འདི་ལ་བུམ་པའི་དབང་ཞེས་བྱ་སྟེ། ཐམས་ཅད་དུ་བུམ་པའི་བྱ་བ་འཇུག་པའི་ཕྱིར་རོ། །དབང་འདིས་དྲི་མ་བཞི་ལས་ལུས་ཀྱི་དྲི་མ་གཙོ་བོར་གྱུར་པ་དག་པར་བྱས་སོ། །འདིའི་བསྲུང་བའི་དམ་ཚིག་རྩ་བ་དང་ཡན་ལག་གི་དམ་ཚིག་ཉི་ཤུ་རྩ་གཉིས་ལ་སོགས་པ་བསྲུང་བ་ལ་དབང་ངོ་། །སྔར་བསྟན་པའི་བརྡ་བསྟན། ལམ་རྣམ་པ་བཞི་ལས་བསྐྱེད་པའི་རིམ་པ་བསྒོམ་པ་ལ་དབང་བར་བྱས་སོ། །འབྲས་བུ་སངས་རྒྱས་ཀྱི་སྤྲུལ་པའི་སྐུའི་བག་ཆགས་སམ་ས་བོན་རྒྱུད་ལ་བཞག་པ་ཡིན་ནོ། །ཞེས་བྱ་བ་ལ་སོགས་པ་བཅུ་ཚན་བཞིའི་དང་པོའི་རྟོགས་པ་བརྗོད་པར་བྱའོ་ཞེས་གསུངས་ལ། མན་ངག་ཐུན་མོང་མ་ཡིན་པའི་སྐབས་སུ་ནི་བཅོ་ལྔའམ་བཅུ་དྲུག་གི་རྟོགས་པ་བསྐྱེད་པར་ཡང་གསུངས་སོ། །ཌོཾ་བི་ལུགས་ཀྱི་དཀྱིལ་ཆོག་ལས་ནི་དོན་ཚན་བདུན་གྱི་རྟོགས་པ་བསྐྱེད་པར་གསུངས་ཏེ། རྒྱས་བསྡུས་ཀྱི་ཁྱད་པར་ཙམ་མོ། །གཉིས་པ་གསང་བའི་དབང་བསྐུར་བ་ལ་གཉིས་ཏེ། དབང་གོང་མ་གསུམ་གང་ལ་བསྐུར་བའི་ཡུལ། སྐབས་སུ་བབ་པའི་གསང་དབང་བཤད་པའོ། །དབང་པོ་ནི། ཟུང་འཇུག་གསལ་བ་ལས། དེའི་རྗེས་སུ་དབང་བསྐུར་བ་གཉིས་པ་དང་། གསུམ་པ་དང་། བཞི་པའི་རིམ་པ་བཤད་པར་བྱ་སྟེ། རྨོངས་ལ་མ་ཡིན་མུ་སྟེགས་ཅན་ལ་མིན། །རྒྱལ་པོ་ལ་མིན་གཞོན་ནུ་རྣམས་ལ་མིན། །གཅིག་ཏུ་རྟོག་ལ་དགའ་བ་རྣམས་ལ་མིན། །བྱང་ཆུབ་སེམས་ནི་བུ་ལ་མ་ཡིན་ཏེ། །དད་པ་མེད་པ་རྣམས་ལའང་དེ་མ་ཡིན། །ངག་དང་ཡིད་ཀྱི་རྡོ་རྗེ་སྦྱོང་བྱེད་པ། །ཉན་ཐོས་རྣམས་ལ་སྦྱིན་པར་བྱ་བ་མིན། །ཞེས་པའི་དགག་བྱ་རྣམས་སྤང་ནས་བུམ་དབང་སྔོན་དུ་སོང་བ་ལའོ། །གཉིས་པ་ལ་ལྔ་སྟེ། སྔོན་དུ་འགྲོ་བ་དབང་གི་རྫས་བྱང་ཆུབ་ཀྱི་སེམས་བསྒྲུབ་པའི་ཚུལ། དེས་དབང་བསྐུར་བའི་རབ་ཏུ་དབྱེ་བ། མཐའ་བརྟེན་སྦྱིན་པ། དབང་གི་རྟོགས་པ་བསྐྱེད་པའོ། །དང་པོ་ནི། མཎྜལ་ཕུལ་ནས། ཁྱོད་ནི་རྣལ་འབྱོར་མ་ཚོགས་སོགས་ཀྱིས་བསྟོད་ཅིང་། བཅོམ་ལྡན་ཞི་བ་ཆེན་པོ་སོགས་ལན་གསུམ་གྱིས་གསོལ་བ་བཏབ་པའི་རྗེས་སུ་སློབ་མ་ལ་གདོང་རས་བཅིང་ངོ་། །རྗེ་བཙུན་གོང་མའི་དཀྱིལ་ཆོག་གཞན་རྣམས་ལས་དབང་གོང་མ་གསུམ་གྱི་སྐབས་སུ་གདོང་རས་བཅིང་། ཞེས་པ་ཙམ་ལས་དགོས་པ་འདི་ཡིན་གསལ་ཁ་མི་སྣང་ཡང་མཆོག་དབང་གསུམ་གྲོལ་ལམ་ལ་བརྟེན་ཏེ་བསྐུར་བའི་མན་ངག་ལས། སྐབས་འདིར་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡ་ཡིན་པར་གསུངས་ཤིང་། ཌོཾ་བི་དཀྱིལ་ཆོག་ལས། དབང་བཞི་པའི་སྐབས་སུ་དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡ་ཡིན་པར་གསུངས་པའི་རིགས་པས་ཤེས་རབ་ཡེ་ཤེས་ཀྱི་སྐབས་སུ་ཕྱག་རྒྱ་བྷ་གའི་དཀྱིལ་འཁོར་མ་མཐོང་བའི་བརྡ་ཡིན་པར་གྲུབ་བོ། །ཁ་ཅིག ངོ་ཚས་བཅིངས་ན་ཡེ་ཤེས་ངོས་མ་ཟིན་དོགས་པས་དེ་དགག་པའི་ཆེད་ཡིན་པར་གསུངས་པ་ནི། བླ་མ་ཡབ་ཡུམ་གྱི་གསང་རྫས་སྒྲུབ་པའི་ཚེ། ཕྱག་རྒྱའི་གདོང་ཡང་བཅིང་བ་དང་། །ཐབས་ཀྱི་གདོང་ཡང་དེ་བཞིན་བྱ། །ཞེས་གསུངས་པས། དགོས་པ་དེ་ལྟར་རིགས་ཀྱང་འཇུག་པའི་སྐབས་སུ་མིག་བཅིང་བ་རྡུལ་ཚོན་གྱི་དཀྱིལ་འཁོར་མ་མཐོང་བའི་བརྡ་ཡིན་པར་གསུངས་པའི་ཤུགས་ཀྱིས་སློབ་མའི་གདོང་བཅིང་བའི་དགོས་པ་སྔ་མ་ལྟར་གྲུབ་བོ། །འདིར་འབྲུ་གསུམ་བརྗོད་པ་ནི། བར་ཆད་བསྲུང་བའི་ཆེད་ཡིན་ཅིང་། དྲིལ་བུ་དཀྱིལ་ཆོག་ལས། དེའི་སྟེང་དུ་ཡི་གེ་བདུན་པ་བརྗོད་ཅིང་བདུད་རྩི་གཏོར་བའང་བཤད་དོ། །གཉིས་པ་ནི། དངོས་དབང་བསྐུར་ན་སྐབས་འདིར་བླ་མ་ཡབ་ཡུམ་སློབ་མ་དང་བར་དུ་ཡོལ་བ་ལ་སོགས་པས་བཅད་དེ། གསང་བའི་རྫས་སྒྲུབ་པའི་ཆེད་དུ་ཡབ་ཀྱི་བྱང་སེམས་དཀར་པོ་ལ་ཡུམ་གྱི་བྱང་སེམས་དམར་པོ་ཅུང་ཟད་བསྒོས་པའི་གཉིས་ཀའི་བྱང་སེམས་དཀར་བ་འབེབས་པ་ཙམ་གྱིས་བསྟེན་ཚད་བྱས་ནས་བྱང་ཆུབ་ཀྱི་སེམས་ཡབ་ཀྱི་རྡོ་རྗེ་ནོར་བུའི་རྩེ་མོས་ཕབ་པའོ། །གྲོལ་ལམ་ལྟར་ན་དེ་ནས་སློབ་མའི་ཡིད་ཀྱི་ཡུལ་དུ་བླ་མ་དང་ལྷག་པའི་ལྷ་ཐ་མི་དད་དུ་ནམ་མཁའ་ལ་དམིགས་ལ། ཡབ་ཡུམ་ཐབས་ཤེས་སྙོམས་པར་འཇུག་པའི་སྒྲས་དེ་བཞིན་གཤེགས་པ་རྣམས་སྤྱན་དྲངས་ལྷག་པའི་ལྷའི་ཞལ་ནས་ཞུགས། རྗེས་ཆགས་ཀྱི་མེས་འོད་དུ་ཞུ། བྱང་ཆུབ་ཀྱི་སེམས་རྡོ་རྗེ་ནོར་བུའི་ལམ་ནས་ཡུམ་གྱི་མཁར་དབབ། སྦྱོར་མཚམས་ནས་བྱང་སེམས་ཀྱི་ཐིག་ལེ་མུ་ཏིག་གི་རྡོག་མ་ལྟ་བུ་བྱུང་ནས་བདག་གི་ལྕེ་ལ་བཞག་པར་བསམ་ཞིང་དངོས་སུ་བདུད་རྩི་སྟེར་བའོ། །གསུམ་པ་ནི། དངོས་དབང་བསྐུར་ན་གསང་དབང་རྣམ་པ་ལྔར་དབྱེ་སྟེ། རྗེ་བཙུན་ཡབ་ལས་ཐོབ་པ། ཡུམ་ལས་ཐོབ་པ། གྲོལ་བའི་སྟོབས་ལས་ཐོབ་པ་དང་གསུམ་ལས། ཕྱི་མ་ལ་རྣམ་རྟོག་གི་བྱེ་བྲག་གིས་རྣམ་པ་གསུམ་དུ་ཕྱེ་བའོ། །དེ་ལ་ཡབ་ལས་ཐོབ་པ་ནི་སྔར་བཤད་པ་ལྟར་སྙོམས་འཇུག་བྱས་པའི་བྱང་ཆུབ་ཀྱི་སེམས་རྡོ་རྗེ་ནོར་བུའི་རྩེ་མོར་རླུང་གི་སྟོབས་ཀྱིས་བཟུང་བ་དེ་སློབ་དཔོན་རང་གི་མཐེབ་སྲིན་གྱིས་རྡོ་རྗེ་ནོར་བུའི་རྐེ་ནས་བཟུང་སྟེ། སློབ་མའི་ཁར་རིམ་པ་བཞིན་འགྲིམ་པའོ། །ཡུམ་ལས་ཐོབ་པ་ནི་སློབ་དཔོན་གྱིས་བྱང་སེམས་དེ་ལྟར་འཛིན་པར་མ་ནུས་ན། ཡུམ་གྱི་མཁར་ཕབ་སྟེ། མཁའ་ནང་ནས་བླངས་ནས་སློབ་མ་ལ་སྟེར་བའོ། །གྲོལ་བའི་སྟོབས་ལས་ཐོབ་པ་ནི། ཡུམ་གྱིས་ཀྱང་མཁའ་ནང་དུ་འཛིན་པར་མ་ནུས་ན། ཉ་ཕྱིས་ལ་སོགས་པར་བླུག་སྟེ། སློབ་མ་རྣམ་རྟོག་ཤས་ཆུང་བ་ལ་དངོས་སུ་སྦྱིན། རྣམ་རྟོག་འབྲིང་པོ་ལ་མགྲིན་པར་ཉིན་པར་གྱི་ཐིག་ལེ་བྱ། རྣམ་རྟོག་ཤས་ཆེ་བ་ལ་ཞོ་དང་ཆང་ལ་སོགས་པ་ལ་སྦྱར་ནས་སྟེར་ཏེ། སཾ་བུ་ཊ་ལས། གང་ཞིག་མཆོག་རྣམས་ལ་ནི་སངས་རྒྱས་གཅིག་པུའི་བདག་ཉིད་ཀྱིས་སྦྱིན་པར་བྱའོ། །འབྲིང་པོ་ལ་ནི་ཉིན་པར་གྱི་ཐིག་ལེས་སོ། །རྣམ་རྟོག་ཤས་ཆེ་བ་ལ་ནི་ཞོ་དང་ཆང་ལ་སྦྱར་ཏེ་སྦྱིན་པར་བྱའོ། །ཞེས་གསུངས་པས་སོ། །གྲོལ་ལམ་ལ་བརྟེན་ཏེ་བསྐུར་ན་དེ་ལྟ་བུའི་དབྱེ་བ་མེད་ཀྱི། བླ་མ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ཡིན་པར་དམིགས་ནས་ཞོ་དང་ཆང་ལ་སོགས་པ་ལ་བདུད་རྩི་རིལ་བུ་བཏབ་པ་སྦྱིན་ཏེ། ཇི་ལྟར་འདས་པའི་སངས་རྒྱས་ཀྱིས། །ཞེས་སོགས་བརྗོད། སློབ་མས་ཀྱང་ཨོཾ་ཨཱཿཧཱུྃ་ཧོ་ཞེས་བརྗོད་དེ། མིད་པས་མགྲིན་པ་ནས་ཐིག་ལེ་འཕེལ་བས་ལུས་ཐམས་ཅད་གང་བར་བསམ། དམིགས་པ་བརྟན་ན་རང་བཞིན་བརྒྱད་ཅུའི་རྟོག་པར་རགས་རིམ་འགག་གསུང་། དེ་ནས་འབྲུ་གསུམ་བརྗོད་ཅིང་། བདུད་རྩིས་ལུས་ལ་གཏོར་ཏེ་བསྲུང་བ་བྱ། གདོང་གཡོགས་ཕྱེའོ། །བཞི་པ་ནི། བླ་མས་ཆོས་གོས་གྱོན་ཏེ། ལག་པ་གཡོན་པས་ཆོས་གོས་ཀྱི་གྲྭ་གཉིས་ནུ་མ་གཡོན་པའི་ཐད་ཀར་རྡོ་རྗེ་ཁུ་ཚུར་ཁ་གྱེན་དུ་བསྟན་པས་འཛིན་ཅིང་། གཡས་རྡོ་རྗེ་དྲིལ་བུ་དང་བཅས་པའི་མཆོག་སྦྱིན་གྱི་ཕྱག་རྒྱ་སྤྱི་བོར་བཞག་སྟེ། ཨོཾ་འདིར་ནི་ཁྱོད་ལ་ངས་ལུང་བསྟན། །ཞེས་སོགས་ཀྱིས་ལུང་བསྟན་པའོ། །དེའང་ཀྱེ་ཞེས་པ་ནི་སློབ་མ་ལ་བོས་པའི་ཚིག་ཡིན་ལ། མཚན་གྱི་ཐོག་མར་དཔལ་དང་། མཐར་རྡོ་རྗེ་སྦྱར་ཏེ་སྔར་གྱི་གསང་མཚན་དེ་ཉིད་བརྗོད་ནས་ལུང་བསྟན་པའོ། །བྷུར་ཞེས་པ་ནི་ས་འོག བྷུ་ཝ་ཞེས་པ་ནི་ས་སྟེང་། སྭ་ཞེས་པ་ནི་ས་བླ་སྟེ་དེ་བརྗོད་པའི་ཚེ་གཡས་མི་འཇིགས་པའི་ཕྱག་རྒྱར་བསྒྱུར་ཏེ། སློབ་དཔོན་གྱི་ཕྱག་གིས་སྟེང་དུ་འགྱངས་ཚད་དུ་དྲིལ་བུ་གསིལ་ཞིང་། གང་ལ་ངས་ལུང་བསྟན་པ་སོགས་བརྗོད་དོ། །མཁས་པ་ཕྱི་མ་དག་ལུང་བསྟན་གྱི་དུས་སུ། རྡོ་རྗེ་དྲིལ་བུ་འཛིན་པའི་སྒོ་ནས་ལུང་བསྟན་པ་ནི་མི་འཐད་དེ། ཤཱཀྱ་ཐུབ་པའི་ཆ་ལུགས་སུ་བསྒྱུར་བའི་སྒོ་ནས་ལུང་སྟོན་དགོས་ཤིང་རྡོ་རྗེ་དྲིལ་བུ་འཛིན་པའི་ཤཱཀྱ་ཐུབ་པ་མི་ཡོང་བའི་ཕྱིར་ཞེས་གསུངས་པ་ནི། དཀྱིལ་ཆོག་ཕལ་ཆེར་ལས་རྡོ་རྗེ་དྲིལ་བུ་འཛིན་པ་མ་བཤད་ཀྱང་། རིན་ཆེན་འབར་བ་ལས། གཡས་པ་མཆོག་སྦྱིན་ཁུ་ཚུར་གྱིས། །སྙིང་གར་ཆོས་གོས་གྲྭ་ནས་གཟུང་། །ལག་པས་དྲིལ་བུ་མགུལ་དུ་བསྡམས། །བླ་མ་རྡོ་རྗེ་འཆང་བ་ཡི། །དབུགས་དབྱུང་ཐམས་ཅད་ཡང་དག་བླང་། །ཤཱཀྱ་ཐུབ་པ་ཉིད་གྱུར་པས། །སློབ་མ་ཆེན་པོ་ལུང་བསྟན་བྱེད། །ཅེས་ཤཱཀྱ་ཐུབ་པའི་ཆ་ལུགས་ཀྱིས་དྲིལ་བུ་འཛིན་པར་དངོས་སུ་གསུངས་པས་གནོད་ཅིང་། རིགས་པ་ལའང་རབ་བྱུང་གི་ཆ་ལུགས་ཅན་གྱི་རྡོ་རྗེ་དྲིལ་བུ་འཛིན་པ་མི་རུང་བར་ཐལ་བས་གནོད་དོ། །དེས་ན་བིརྺ་པའི་སྲོལ་ཆེན་གཉིས་ལ་ཕྱག་ལེན་འདི་ཉིད་ངེས་པར་དགོས་པར་སྣང་ངོ་། །ལྔ་པ་ནི། ཁྱོད་ཀྱིས་དཀྱིལ་འཁོར་རྣམ་པ་བཞི་ལས་རྫས་གསང་བ་བྱང་ཆུབ་སེམས་ཀྱི་དཀྱིལ་འཁོར་དུ་གཞུག་པ་དང་མཐོང་བ་ཡིན་ནོ། །དབང་བཞི་ལས་གསང་བའི་དབང་ཐོབ། ངག་གི་དྲི་མ་གཙོ་བོར་དག དམ་ཚིག་ཤ་ལྔ་དང་བདུད་རྩི་ལྔའི་རིལ་བུ་བསྟེན་པ་ལ་དབང་། བརྡ་མཐེབ་སྲིན་ཨེ་ལ་རེག་བྱེད་དང་། ལམ་བདག་བྱིན་གྱིས་བརླབས་པའི་རིམ་པ་བསྒོམས་པ་ལ་དབང་། འབྲས་བུ་ལོངས་སྤྱོད་རྫོགས་པའི་སྐུའི་ས་བོན་དང་བག་ཆགས་རྒྱུད་ལ་བཞག ཅེས་པ་ཙམ་གྱིས་རྟོགས་པ་བསྐྱེད་པར་བྱ་ཞིང་། གསུང་ངག་ལས་ནི་དོན་ཚན་བཅོ་ལྔའམ། བཅུ་དྲུག་གིས་རྟོགས་པ་བསྐྱེད་པའང་གསུངས་སོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ལ་ལྔ་སྟེ། སྔོན་དུ་འགྲོ་བ། གང་ལ་བསྐུར་བའི་ཡུལ། དེ་ལ་བསྐུར་བའི་དབང་གི་རབ་དབྱེ། མཐའ་རྟེན་སྦྱིན་པ། དབང་གི་རྟོགས་པ་བསྐྱེད་པའོ། །དང་པོ་ནི། གསང་དབང་གི་སྐབས་སུ་བཤད་པ་བཞིན་མཆོད་བསྟོད་གསོལ་བ་གདབ་པ་རྣམས་བྱས་ནས། གྲུབ་ན་ལུས་ཐམས་ཅད་ས་ལ་ཕབ་པའི་ཕྱག་བྱ། མ་གྲུབ་ན་ཡིད་ཀྱིས་བྱ། དེ་ནས་སྔ་མ་བཞིན་གདོང་བཅིངས་ཤིང་འབྲུ་གསུམ་བརྗོད་པས་བསྲུང་ངོ་། །གཉིས་པ་ནི། གསང་དབང་ཐོབ་པའི་སློབ་མ་ལ་བྱ་བ་ཡིན་གྱི་དེ་མ་ཐོབ་ན་འདི་དོན་མེད་དེ། ས་བོན་མེད་པའི་ཕྱིར་རོ། །གསུང་ངག་གི་དབང་གི་རྟོགས་པ་བསྐྱེད་པའི་སྐབས་དང་། བདེ་མཆོག་གསང་མཐའི་དཀྱིལ་ཆོག་རྣམས་ལས་བུམ་དབང་ཐོབ་པ་ལ་དཔེ་ཞིང་ས་གཤིན་པ་དང་། གསང་དབང་ལ་ས་བོན་བཏབ་པ་དང་། ཤེས་རབ་ཡེ་ཤེས་ལ་མྱུ་གུ་འཁྲུངས་པ་དང་། དབང་བཞི་པ་ལ་སྟོན་ཐོག་འཁྲུངས་པའི་དཔེ་སྦྱར་བའི་རིགས་པས་བླ་མེད་ཀྱི་སྔགས་སྡོམ་གྱི་གཙོ་བོ་ནི་རྫོགས་རིམ་གྱི་སྡོམ་པ་ཡིན་ལ། དེ་བསྐྱེད་པ་ལ་བུམ་དབང་གིས་རྟེན་ཕུང་ཁམས་སྐྱེ་མཆེད་ཐམས་ཅད་ལྷར་བསྒྱུར་བ་དགོས་པས་དཔེ་ཞིང་ས་གཤིན་པ་དང་འདྲ། དེ་ནས་བླ་མའི་བྱང་སེམས་སློབ་མའི་མགྲིན་པར་ཡ་ར་ལ་ཝའི་དབྱིབས་ཅན་གྱི་ཡི་གེའི་ནང་གི་བྱང་སེམས་ལ་ཡེ་ཤེས་པའི་ཚུལ་གྱིས་འདྲེས་པས་བྱང་སེམས་འཕེལ་ནས་ལུས་ཐམས་ཅད་ལ་ཁྱབ་པའི་ཚེ། བདེ་བ་སྐྱེས་པ་ནི་དཔེ་ས་བོན་བཏབ་པ་དང་འདྲ། ཤེས་རབ་ཡེ་ཤེས་ཀྱི་དབང་བསྐུར་བའི་ཚེ། དངོས་སམ་ཡེ་ཤེས་ཀྱི་ཕྱག་རྒྱ་ལ་བརྟེན་ནས་སྔར་གྱི་བྱང་སེམས་དེ་ཉིད་གཙུག་ཏོར་མཆོག་ནས་རྡོ་རྗེ་ནོར་བུའི་རྩེ་མོའི་བར་ཡས་འབབ་ཀྱི་དགའ་བཞི་ཉམས་སུ་མྱོང་བ་ནི་དཔེ་མྱུ་གུ་འཁྲུངས་པ་དང་འདྲ། འདི་ལ་ཌོཾ་བི་ལུགས་ཀྱི་དབང་ཆུར། དཔེ་ཞིང་ས་སྦྱངས་པ་ལ་ས་བོན་བཏབ་པ་ལ་རྐྱེན་ཆུ་ལུད་ཀྱིས་བརླན་པ་བྱས་པ་དང་འདྲ་ཞེས་གསུངས་པ་ནི་སྔར་གསང་དབང་གི་སྐབས་སུ་ས་བོན་ཐེབས་པ་དེ་འཕེལ་བའི་རྐྱེན་བྱེད་པའི་ཆ་ནས་ཆུ་ལུད་ཀྱི་དཔེ་བརྗོད་པར་སྣང་ཞིང་། སྔ་མ་ནི་ཡེ་ཤེས་ཉམས་སུ་མྱོང་བའི་ཆ་ནས་བརྗོད་པར་སྣང་བས་འགལ་བ་མེད་དོ། །དེ་ཉིད་དབང་བཞི་པའི་ཚེ་ཚིག་གི་སྒོ་ནས་འབྲས་བུ་སངས་རྒྱས་ཀྱི་ཡེ་ཤེས་དང་གནས་ལུགས་ཀྱི་དོན་ངོ་སྤྲད་པས་སྔར་གྱི་ཡེ་ཤེས་དེའི་ཐོབ་བྱ་མཐར་ཐུག་ངོ་འཕྲོད་པའི་ཆ་ནས་འབྲས་བུ་སྟོན་ཐོག་འཁྲུངས་པ་དཔེར་བརྗོད་པ་ཡིན་པས་དབང་སྔ་མ་སྔ་མ་མ་བསྐུར་བར་ཕྱི་མ་ཕྱི་མ་བསྐུར་དུ་མེད་པར་གྲུབ་བོ། །སཾ་བུ་ཊ་ལས། དབང་བཞི་པ་བསྐུར་བའི་རྒྱུ་ལ་ཤེས་རབ་ཡེ་ཤེས་ཀྱི་དབང་གི་སྐབས་སུ་བྱང་སེམས་རིགས་ཀྱི་བདག་པོའི་ཁར་བཟུང་བ་དགོས་པར་གསུངས་པ་དང་། སློབ་དཔོན་ངག་གི་དབང་ཕྱུག་གྲགས་པས། དབང་བཞི་རིམ་ཅན་དུ་འབྱུང་བའི་དཔེ་རིས་སུ་བྲིས་པ་རྣམས་ཀྱང་དོན་འདི་ཉིད་དང་མཐུན་པས་དེང་སང་བོད་འདིར་སྤྱིར་དབང་མ་བསྐུར་བར་ལམ་བསྐྱེད་རྫོགས་ཉམས་སུ་ལེན་པ་དང་། ཁྱད་པར་བུམ་དབང་མ་བསྐུར་བར་མཆོག་དབང་གསུམ་བསྐུར་བ་ནི་རྡོ་རྗེ་ཐེག་པའི་བསྟན་པ་མ་ཡིན་ཞིང་། ཉེས་དམིགས་ཀྱང་ཤིན་ཏུ་ཆེའོ། །གསུམ་པ་ལ་ཤེས་རབ་གཏད་པ་དང་། ཡེ་ཤེས་བསྐྱེད་པ་གཉིས་ལས། དང་པོ་ནི། དངོས་དབང་བསྐུར་ན་སྔར་གྱི་གསང་དབང་གི་རྟེན་དེ་ཉིད་གཏད་པར་གསུངས་ཏེ། རྩ་རྒྱུད་ལས། རོ་མཉམ་སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་བྱ། །ཞེས་གསུངས་པས་སོ། །ཡང་སློབ་མ་རང་ཉིད་ཀྱི་ཕྱག་རྒྱ་མཚན་ཉིད་དང་ལྡན་པ་ཡོད་ན་དེ་ཉིད་གཏད་པས་ཀྱང་རུང་སྟེ། གང་ལྟར་ཡང་དབང་བསྐུར་བ་ཐོབ་ཅིང་དམ་ཚིག་དང་སྡོམ་པར་ལྡན་པ། རྫོགས་རིམ་གྱི་ཡེ་ཤེས་བསྐྱེད་པའི་ཉམས་ལེན་གྱི་ཚུལ་ལ་མཁས་པ་ཞིག་དགོས་ཀྱི་གཞན་དུ་ན། མ་གསང་སྦྲུལ་དང་ཆོམ་རྐུན་དང་། །ས་སྤྱོད་མེ་ཡི་སྡུག་བསྔལ་བྱེད། །ཅེས་གསུངས་པའི་ཉེས་དམིགས་སུ་འགྱུར་རོ། །གྲོལ་ལམ་ལ་བརྟེན་ནས་བསྐུར་ན་སློབ་མས་གང་སེམས་ལ་མཛེས་པར་མཐོང་ཞིང་ཡིད་དུ་འོང་བ་དབང་དང་དམ་ཚིག་དང་ལྡན་པ་ཞིག་མདུན་དུ་ཡིད་ལ་བྱེད་དུ་བཅུག་ལ། དགའ་སྟེར་གནས་སྟེར་ལྷ་མོ་འདི། །ཞེས་སོགས་བརྗོད་པས་གཏད་དོ། །གཉིས་པ་ནི་ཕྱག་རྒྱས་རྫོགས་རིམ་གྱི་སྣོད་དུ་རུང་ངམ། ཞེས་པའི་དྲི་བ་དང་། རུང་ངོ་ཞེས་པའི་ལན་དང་། ཕྱག་རྒྱ་དགྱེས་ནས་པང་དུ་བྱོན་པའི་བར་བྱས་ལ། བདག་ཉིད་ལྷག་པའི་ལྷ་དང་། ཕྱག་རྒྱ་ཡུམ་དུ་བསྐྱེད་པ་སྤྲུལ་སྐུར་བྱིན་གྱིས་རློབ་པ་དང་། མཁའ་གསང་བསྣོལ་མར་བྱིན་གྱིས་བརླབས་པ་ལོངས་སྐུར་བྱིན་གྱིས་རློབ་པ་དང་། ཐབས་འདི་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་སྙམ་པ་ཆོས་སྐུར་བྱིན་གྱིས་རློབ་པ་སྟེ། སྐུ་གསུམ་ཐོབ་པའི་རྒྱུ་འདུ་ཤེས་སུམ་ལྡན་སྔོན་དུ་སོང་ནས་ཕྱི་གོ་རིམ་ལ་ལྟོས་པའི་དགའ་བཞི་དང་། ནང་གནས་ལ་ལྟོས་པའི་དགའ་བཞི་ཉམས་སུ་མྱོང་བ་ནི་ཤེས་རབ་ཡེ་ཤེས་ཀྱི་དབང་གི་ངོ་བོའོ། །འདིར་རྗེ་བཙུན་གྱིས། ཐིག་ལེ་དཀར་དམར་གཉིས་སྙོམས་འཇུག་བྱས་པས་གཅིག་ཏུ་གྱུར་པ་ནི་ཟླ་བ་ཉི་མའི་གོས་ཀྱིས་བཀག་པ་ཞེས་ཀྱང་བྱ། ཉི་ཟླ་གཟས་ཟིན་པའི་དུས་ཞེས་ཀྱང་བྱ་སྟེ། སེམས་ཀྱི་གནད་དོ་ཞེས་གསུངས་པའི་དོན་ནི་ཡབ་ཡུམ་གྱི་བྱང་སེམས་དཀར་དམར་ཆ་མཉམ་པ་རིགས་བདག་གི་ཁ་དང་། རྩ་མཛེས་སྤྱིར་དབབ་པའི་ཚེ་ཡབ་ཀྱི་བྱང་སེམས་དཀར་པོ་དེ་ཉིད་ཡུམ་གྱི་བྱང་སེམས་དམར་པོས་རིལ་གྱིས་བཏུམ་པ་ནང་ན་དཀར་པོ་དང་། ཕྱི་ན་དམར་པོ་སོ་སོར་ཡོད་པ། ཤེས་རབ་ཡེ་ཤེས་ཀྱི་ཚེ་ཡབ་ཀྱི་ཟླ་བ་ལྟར་དཀར་ཞིང་། ཡུམ་གྱི་ཉི་མ་ལྟར་དམར་བ་ཞེས་པའི་དོན་ཀྱང་ཚང་། འདིར་རྗེ་བཙུན་གྱིས་གཅིག་ཏུ་གྱུར་པ་ཞེས་པའི་དོན་ཀྱང་ཚང་། རྒྱུ་དུས་སུ་བུ་ཚའི་ལུས་བསྐྱེད་པའི་ཚེ་རུས་པ་རྐང་དང་ཁུ་བ་གསུམ་ཕ་ལས་སྐྱེས་པ་དང་། པགས་པ་ཤ་དང་ཁྲག་གསུམ་མ་ལས་སྐྱེས་པའི་ཕྱི་ནང་གི་རིམ་པའི་དོན་ཀྱང་ཚང་བར་ཤེས་པར་བྱའོ། །ལམ་འབྲས་ཀྱི་གཞུང་བཤད་ལས་ཤེས་རབ་ཡེ་ཤེས་ཀྱི་དབང་ལ་རབ་འབྲིང་ཐ་མ་གསུམ་དུ་ཐོབ་པར་གསུངས་པའི་དང་པོ་ནི། དངོས་ཀྱི་ཕྱག་རྒྱ་ལ་བརྟེན་ནས་མཚོན་བྱེད་དཔེའི་ཡེ་ཤེས་སྐྱེས་པ། གཉིས་པ་ནི། ཡེ་ཤེས་ཀྱི་ཕྱག་རྒྱ་ལ་བརྟེན་ནས་མཚོན་བྱེད་དཔེའི་ཡེ་ཤེས་སྐྱེས་པ། གསུམ་པ་ནི། དེ་ལ་བརྟེན་ནས་ཡེ་ཤེས་མ་སྐྱེས་ཀྱང་ཆོ་ག་ཚུལ་བཞིན་དུ་བྱས་པས་ཉམས་སུ་མྱོང་བ་ཅུང་ཟད་སྐྱེས་པ་སྟེ། རྗེ་བཙུན་གྱིས་སྤྱིར་ཡེ་ཤེས་ཀྱི་ཕྱག་རྒྱ་རྐྱང་པས་ཀྱང་ཁ་ཅིག་ལ་བདེ་སྟོང་གི་ཡེ་ཤེས་སྐྱེས་པའང་སྣང་ལ། ཁ་ཅིག་ལ་མི་སྐྱེ་བའང་ཡོད་དེ་དེ་ལ་དབང་གི་ཆོ་ག་ཙམ་མོ། །ཞེས་གསུངས་པས་སོ། །བཞི་པ་ལ། ལམ་གྱི་དབུགས་དབྱུང་དང་། འབྲས་བུའི་དབུགས་དབྱུང་གཉིས་ལས། དང་པོ་ནི། རྩ་བ་དང་ཡན་ལག་གི་དམ་ཚིག་རྣམས་བརྗོད་པ་སྟེ། དབང་བསྐུར་ཐོབ་པའི་སྟེང་དུ། ལམ་གྱི་གནས་སྐབས་སུ་དམ་ཚིག་འདི་དག་བསྐྱངས་ན། དབུགས་དབྱུང་གི་ཕན་ཡོན་འབྱུང་ཞེས་པའི་དོན་ནོ། །གཉིས་པ་ནི། དབང་བསྐུར་བ་འདི་ཐོབ་ན་སྔར་སྲིད་པའི་སྡུག་བསྔལ་གྱིས་དབུགས་བཏུམ་པ་ལྟ་བུ་ལས་དབྱུང་ནས་ཐར་པ་ཆེན་པོའི་གྲོང་ཁྱེར་དུ་ཞུགས་པ་ཡིན་པས། ད་ནི་ཁྱོད་ཀྱིས་ལེགས་པར་སྦྱངས་ཤིང་ཤེས་པའི་ཚེ་དབང་བསྐུར་བ་ལ་སོགས་པའི་སྒོ་ནས་སེམས་ཅན་གྱི་དོན་གྱིས་ཤིག་ཅེས་པ་སྟེ། དབུགས་དབྱུང་བ་ནི་སྡུག་བསྔལ་ལས་ཐར་བ་དང་། གཟེངས་བསྟོད་པ་ནི་དགའ་བ་ཁྱད་པར་ཅན་སྐྱེས་པ་དང་། ལུང་བསྟན་པ་ནི་མ་འོངས་པ་ན་ཕན་ཡོན་འདི་ལྟར་འབྱུང་ཞེས་པ་ཡིན་པས་དོན་ལ་འདྲ་བ་ཡིན་ནོ་ཞེས་རྗེ་བཙུན་རྩེ་མོས་གསུངས་སོ། །ལྔ་པ་ནི། ཁྱོད་ཀྱིས་དཀྱིལ་འཁོར་བཞི་ལས། ཕྱག་རྒྱའི་བྷ་གའི་དཀྱིལ་འཁོར་མཐོང་ཞེས་སོགས་རྟོགས་པ་བསྐྱེད་པའི་ཚུལ་རྣམས་ནི་སྔ་མ་ལས་བསྒྲེས་ཏེ་ཤེས་པར་བྱའོ། །བཞི་པ་དབང་བཞི་པ་ལ་བཞི་སྟེ། སྔོན་དུ་འགྲོ་བ། དབང་དངོས། མཐའ་བརྟེན་སྦྱིན་པ། དབང་གི་རྟོགས་པ་བསྐྱེད་པའོ། །དང་པོ་ནི། མཎྜལ་ཕུལ་ནས། མགོན་པོ་ཐུགས་རྗེ་ཆེ་ལྡན་པས། །ཞེས་སོགས་ལན་གསུམ་གྱིས་གསོལ་བ་བཏབ། འདིར་གདོང་རས་བཅིང་བའམ། མ་བཅིངས་ཀྱང་རུང་སྟེ་ཞེས་གསུངས་པའི་དོན་གདོང་རས་བཅིངས་ན་སྔ་མ་གསུམ་གྱི་འགྲོས་ཀྱི་དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡ་ཡིན་ལ། མ་བཅིངས་ནའང་དཀྱིལ་འཁོར་གཞན་གསུམ་མིག་གིས་མཐོང་བར་བྱར་ཡོད་ཀྱང་། དོན་དམ་བྱང་ཆུབ་ཀྱི་སེམས་ཀྱི་དཀྱིལ་འཁོར་ལ་མིག་གིས་མཐོང་བར་བྱར་མེད་པས་རུང་ཞེས་པའི་དོན་ཏེ། འབྲུ་གསུམ་བརྗོད་དེ་བསྲུང་བ་བྱ་བ་ནི་འདྲའོ། །གཉིས་པ་ལ་གསུམ་སྟེ། དབང་བཞི་པ་གང་ལ་བསྟན་པའི་ཡུལ། བསྟན་བྱ་དབང་གི་རབ་ཏུ་དབྱེ་བ། ཚིག་གི་ངོ་སྤྲད་པས་རྟོགས་པ་བསྐྱེད་པའི་ཚུལ་ལོ། །དང་པོ་ནི། སཾ་བུ་ཊའི་བརྟག་པ་གཉིས་པའི་རབ་བྱེད་དང་པོར། དབང་ཆོག་འདི་ཡིས་སྦྱིན་པར་བྱ་སྟེ། སློབ་མའི་ལྷག་པར་མོས་པ་དང་། ཟབ་པ་དང་རྒྱ་ཆེ་བའི་རིགས་པས་ལྷག་པར་མོས་པ་ཡིད་ཀྱིས་ཤེས་པར་བྱས་ནས་ཚིགས་དབང་རིན་པོ་ཆེ་སྦྱིན་པར་བྱ་སྟེ། ཞེས་གསུངས་ལ། དེའི་དོན་བུམ་དབང་སོགས་སྔོན་དུ་སོང་ནས་དབང་བཞི་པ་འོག་ནས་འབྱུང་བའི་ཆོ་ག་འདིས་སྦྱིན་པར་བྱའོ། །དབང་དེ་ཐམས་ཅད་ལ་སྦྱིན་པར་བྱའམ་ཞེ་ན། སློབ་མ་བླ་མ་དང་ཤེས་རབ་ཡེ་ཤེས་ཀྱི་ཉམས་མྱོང་ལ་ལྷག་པར་མོས་པ་དང་། ཟབ་མོ་སྟོང་པ་ཉིད་དང་། ཐབས་རྒྱ་ཆེ་བའི་རིགས་པས་རིམ་གཉིས་ལ་ལྷག་པར་མོས་པའི་སློབ་མ་ལ་སྦྱིན་པར་བྱའི། གཞན་ལ་ནི་མ་ཡིན་ཏེ། བླ་མ་ལ་མོས་པ་མེད་ན་བླ་མའི་ཚིག་ལ་མོས་པ་མི་སྐྱེ། དབང་གི་ཉམས་ལ་མོས་པ་མེད་ན་ཕ་རོལ་ཏུ་ཕྱིན་པའི་ཐོས་བསམ་བྱས་པ་དང་ཁྱད་པར་མེད་པར་འགྱུར། སྤྲོས་བྲལ་ལ་མོས་པ་མེད་ན་འདོད་ཆགས་དང་ཁྱད་པར་མེད་དེ་མྱ་ངན་ལས་འདས་པའི་སེམས་མི་སྐྱེ། ཐབས་བསམ་གྱི་མི་ཁྱབ་པ་ལ་མོས་པ་མེད་ན་གཞན་འཛིན་པའི་མཐུ་མེད་པས་ཉན་ཐོས་རང་རྒྱལ་དང་ཁྱད་པར་མེད་པར་འགྱུར་བས་ན་དེ་དག་ལ་མི་སྦྱིན་ནོ། །དེས་ན་དབང་གོང་མ་ནི་གོང་གི་མཚན་ཉིད་དེ་དག་དང་ལྡན་མི་ལྡན་སློབ་དཔོན་གྱི་ཡིད་ཀྱིས་ལེགས་པར་བརྟགས་ལ་ཤེས་པར་བྱས་ཏེ་སྦྱིན་ནོ། །ཤེས་པའི་ཐབས་གང་ཞེ་ན། གྲུབ་ཐོབ་ལྭ་བ་པ་དང་། སྒྲ་གཅན་འཛིན་དཔལ་བཤེས་གཉེན་གཉིས་ཀྱིས། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །བཞིན་གྱིས་པདྨ་རབ་དྭངས་ཤིང་། །དགའ་བས་བ་སྤུ་ལངས་པ་ནི། །མཐོང་ན་མཁས་པ་དེ་ཉིད་ཀྱིས། །སློབ་མ་དམ་པ་ཡོངས་སུ་འཛིན། །ཞེས་གསུངས་པས་སོ། །དེས་ན་ཟུང་འཇུག་གསལ་བ་ལས། སློབ་མའི་མོས་པ་ཡིད་ཀྱིས་ལེགས་བརྟགས་ནས། །ཇི་ལྟར་གསུངས་པའི་ཆོ་གས་དབང་བསྐུར་བ། །ཟབ་དང་རྒྱ་ཆེའི་ཚུལ་ལ་མོས་པ་ལ། །རིན་ཆེན་ཚིག་གི་དབང་ཉིད་སྦྱིན་པར་བྱ། །ཞེས་གསུངས་པའང་སྔ་མའི་དོན་དུ་སྣང་ངོ་། །གཉིས་པ་ནི། ཡེ་ཤེས་ཞབས་ལུགས་ཀྱི་དཀྱིལ་ཆོག་གཉིས་དང་། མཚོ་སྐྱེས་ཀྱི་ནས་གླིང་མ་དང་། བདེ་མཆོག་ནག་པོ་དཀྱིལ་ཆོག་སོགས་མང་པོར། ཤེས་རབ་ཡེ་ཤེས་ཀྱི་དབང་བསྐུར་བའི་དུས་ཉིད་དུ་ཉམས་མྱོང་དེ་ཉིད་ལ་ངོ་སྤྲད་པ་མ་གཏོགས་དབང་བཞི་པའི་ཆོ་ག་ལོགས་སུ་མ་གསུངས་ཀྱང་དབང་བཞི་པ་མི་བཞེད་པའང་མ་ཡིན་ཏེ། དེ་དག་གིས་ཀྱང་། བཞི་པ་དེ་ཡང་དེ་བཞིན་ནོ། །ཞེས་པའི་ལུང་དྲངས་ནས་བཤད་པ་མཛད་ཅིང་སྨིན་བྱེད་ཀྱི་སྐབས་སུ་དབང་བཞི་ཚང་བ་ནི་རྣལ་འབྱོར་ཆེན་པོ་སྤྱིའི་ལུགས་ཡིན་པའི་ཕྱིར་རོ། །དེ་བཞིན་དུ་རིན་ཆེན་འབར་བ་ལས། དབང་གསུམ་པའི་སྐབས་སུ་དབུགས་དབྱུང་གི་རྗེས་སུ། སྟོན་པས་སྨྲས་པ་སེམས་དཔའ་ཆེ། །ཞེས་སོགས་དང་། ཡེ་ཤེས་འདི་ནི་ཆེས་ཕྲ་ཞིང་། །ཞེས་སོགས་དང་། འདི་ཉིད་ཡེ་ཤེས་ཆེན་པོ་སྟེ། །ཞེས་སོགས་བརྗོད་ནས་དབང་བཞི་པ་བླ་མ་དམ་པའི་ཞལ་ལས་ཤེས་པར་གསུངས་པ་དང་། དེ་བཞིན་དུ་ནག་པོ་པའི་གཞུང་འགྲེལ་ལས་ཀྱང་། དབང་གསུམ་པའི་སྐབས་སུ་བླ་མས། ཡེ་ཤེས་འདི་ནི་ཆེས་ཕྲ་ཞིང་། །ཞེས་སོགས་ངོ་སྤྲད་ནས་སླར་ཡང་དབང་བཞི་པའི་དོན་དུ་གསོལ་བ་བཏབ་ཅིང་། ཡོན་ཕུལ་ནས་བླ་མས། ཁྱོད་ཀྱིས་སྲོག་ཆགས་གསད་པར་བྱ། །ཞེས་སོགས་བསྲུང་བའི་དམ་ཚིག་དང་། ན་དང་ག་ཧ་དང་པོ་དང་། །ཞེས་སོགས་བཟའ་བའི་དམ་ཚིག་བསྟན་ཏེ། བཞི་པ་ནི། བླ་མའི་མན་ངག་ལས་ཤེས་པར་བྱ་བས་ན་འདིར་མ་བསྟན་ཏོ། །ཞེས་གསུངས་པ་དག་གིས་ཀྱང་བླ་མའི་མན་ངག་ལ་རག་ལས་པར་ཤེས་པའི་ཆེད་དུ་གསལ་བར་མ་གསུངས་པ་ཡིན་གྱི། དབང་བཞི་པའི་ཆོ་ག་མི་བཞེད་པ་ནི་མ་ཡིན་ནོ། །བཟང་པོ་ཡོངས་གཟུང་དང་། ཟུང་འཇུག་གསལ་བ་དང་། དྲིལ་བུ་དཀྱིལ་ཆོག་རྣམས་ལས་ཆོ་ག་ལོགས་སུའང་གསུངས་པས་གྲུབ་པའི་དབང་ཕྱུག་དེ་དག་དགོངས་པ་གཅིག་པའི་དོན་འདིར་རྣལ་འབྱོར་དབང་ཕྱུག་གི་མན་ངག་ལས་གསལ་བར་གསུངས་པའི་དོན་བཤད་ན། སྦྱང་གཞི་རྒྱུ་རྒྱུད་དབང་བཞིའི་ཚུལ་དུ་གནས་པས་ལམ་སྨིན་བྱེད་དབང་བཞི་བསྐུར། དེའི་རྒྱུ་མཚན་གྱིས་གྲོལ་བྱེད་ཀྱང་དབང་བཞིའི་ཚུལ་དུ་བསྒོམས་པས་ལྟ་བ་དང་། གྲུབ་མཐའ་དང་། འབྲས་བུ་དབང་བཞིའི་ཚུལ་དུ་འབྱུང་བའི་དབང་དུ་བྱས་ནས་དབང་བཞི་ཆར་ཆོ་གའི་སྒོ་ནས་སོ་སོར་བསྐུར་བ་ལ་ཁྱད་པར་མེད་དོ། །འདི་ལ་དབང་བཞི་པའི་རབ་ཏུ་དབྱེ་བ་དང་། དེ་ཉིད་རྩ་བཤད་ཀྱི་དགོངས་པར་བསྟན་པ་དང་། ལུགས་སྔ་མ་དང་དགོངས་པ་གཅིག་པར་སྒྲུབ་པ་དང་གསུམ་ལས། དང་པོ་ནི། དབང་བཞི་པ་བསྟན་ཚུལ་གྱི་སྒོ་ནས་ཕྱེ་ན་ལྔ་སྟེ། ཚིག་གི་བཞི་པ། དོན་གྱི་བཞི་པ། ལམ་དུ་བྱེད་པའི་བཞི་པ། འབྲས་བུ་མངོན་དུ་བྱེད་པའི་བཞི་པ། བཞི་པ་རྟེན་ཅན་ནོ། །དང་པོ་ནི། ཤེས་རབ་ཡེ་ཤེས་ཀྱི་དབང་གི་སྐབས་སུ་ཐོབ་པའི་ཉམས་སུ་མྱོང་བ་ལྷན་ཅིག་སྐྱེས་པའི་ཡེ་ཤེས་དེ་ཉིད་མཚོན་བྱེད་དུ་བྱས་ནས། སངས་རྒྱས་ཀྱི་སྐུའམ་ངོ་བོ་ཉིད་ཀྱི་སྐུ་ཞེས་བྱ་བའང་དབང་དུས་ན་འཆར་བ་འདི་ཉིད་ཡིན་ནོ་ཞེས་ཚིག་གི་སྒོ་ནས་འབྲས་བུ་ལ་ངེས་པ་བསྐྱེད་པའོ། །གཉིས་པ་ནི། ད་ལྟར་ཁྱོད་ཀྱིས་ཉམས་སུ་མྱོང་བའི་ལྷན་ཅིག་སྐྱེས་པའི་ཡེ་ཤེས་མཆོག་དེ་དངོས་པོ་ཐམས་ཅད་ཀྱི་དེ་ཁོ་ན་ཉིད་དང་རང་བཞིན་ལྷན་ཅིག་སྐྱེས་པའི་ཡེ་ཤེས་ཞེས་བྱ་བའང་འདི་ཉིད་ཡིན་ཏེ། འདི་ཉིད་ཡེ་ཤེས་ཆེན་པོ་སྟེ། །ཐམས་ཅད་ལུས་ལ་རྣམ་པར་གནས། །འགྲོ་བ་བརྟན་དང་གཡོ་བའི་བདག །དེ་ཉིད་འདི་ནི་ཀུན་ཁྱབ་བྱེད། །དེ་ཉིད་མི་འགྱུར་དམ་པ་ཉིད། །ཅེས་སོགས་དང་། རང་རིག་ཡེ་ཤེས་ཉིད་དུ་འགྱུར། །རང་གཞན་ཡང་དག་རིག་པ་སྤངས། །ཞེས་སོགས་དང་། ཕྱི་ནས་དེ་ཉིད་ཡང་དག་བཤད། །ཅེས་སོགས་ཀྱི་ཚིག་གི་སྒོ་ནས་གནས་ལུགས་ཀྱི་དེ་ཁོ་ན་ཉིད་ལ་ངེས་པ་བསྐྱེད་པའོ། །གསུམ་པ་ནི། དེ་རིང་ཁྱོད་ལ་དགའ་བ་བཞིའི་ཡེ་ཤེས་བསྐྱེད་ཅིང་ཉམས་སུ་མྱོང་བར་བྱས་པ་ཡིན་གྱི། དེང་ཕྱིན་ཆད་ལམ་གྱི་གནས་སྐབས་ཐམས་ཅད་དུ་ཉམས་སུ་མྱོང་བ་འདི་བསྒོམས་པའི་སྒོ་ནས་མཚོན་བྱ་དོན་གྱི་བཞི་པ་མངོན་དུ་འགྱུར་བར་བྱ་དགོས་ཏེ། ཁྱོད་རང་ཡང་ནི་དེ་ཡི་ཕ། །ཞེས་དང་། ཇི་སྲིད་བྱང་ཆུབ་སྙིང་པོའི་བར། །ཀུན་དུ་རུ་གྱིས་རྡོ་རྗེ་འཛིན། །ཞེས་དང་། སཾ་བུ་ཊ་ལས་ཀྱང་། བཀའི་གནང་བ་རྙེད་ནས་ཞེས་སོགས་གསུངས་པའི་དོན་ཡིན་པས་འདི་ཉིད་ལམ་དུ་གྱིས་ཤིག་ཅེས་པའོ། །བཞི་པ་ནི། མཐར་ས་བཅུ་གསུམ་པའི་ས་ཕྱེད་ལ་ཁྱོད་ཀྱིས་བུམ་དབང་རྩའི་འགྲོས་ལ་སོགས་པ་ཐིམ་པས་སྐུ་ལྔ་མངོན་དུ་འགྱུར་རོ། །ཞེས་འབྲས་བུའི་བཞི་པའང་ཚིག་ཙམ་གྱི་སྒོ་ནས་བསྟན་པའོ། །ལྔ་པ་ནི། དངོས་དབང་བསྐུར་ན་གསུམ་པ་ལ་ཡེ་ཤེས་ངོས་མ་ཟིན་ན། བཞི་པའི་སྐབས་སུ་གསུམ་པ་བསྐྱར་ནས་བསྐུར་བ་ལ་འཆད་པར་ཐམས་ཅད་མཐུན་ཡང་གྲོལ་ལམ་གྱི་སྐབས་སུ་ཁམས་འདུས་པ་ཐ་མ་ལ་བུ་མོ་པདྨ་ཅན་ལུང་བསྟན་པ་ལ་བརྟེན་ནས་ཐོབ་པར་འགྱུར་རོ་ཞེས་བསྟན་པ་ཡིན་པར་རྗེ་བཙུན་གྱིས་གསུངས་སོ། །གཉིས་པ་ནི། རྩ་རྒྱུད་ཕྱི་མའི་བཅུ་གཉིས་པ་ལས། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་མཐའ་སྟེར་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་གསུངས་ཏེ་དེའི་དོན་རྗེ་བཙུན་རྩེ་མོས། ཁྱོད་ཀྱི་ཐབས་དང་ཤེས་རབ་རྡོ་རྗེ་དང་དྲིལ་བུའི་རང་བཞིན་ལས། ལྷན་ཅིག་སྐྱེས་པའི་ཡེ་ཤེས་མྱོང་བ་དེ་ཇི་ལྟ་བུ་ཡིན་པཾ། དེ་ནི་ཡོད་པ་དང་མེད་པ་གཉིས་ཀ་དང་གཉིས་ཀ་མ་ཡིན་པའི་མཐའ་ཐམས་ཅད་ལས་གྲོལ་ལ་བརྗོད་པར་མི་ནུས་པས། སྣང་བ་དང་སྟོང་པ་གཉིས་སུ་མེད་པ། བདེ་བ་དང་སྟོང་པ་གཉིས་སུ་མེད་པ། གསལ་བ་དང་སྟོང་པ་གཉིས་སུ་མེད་པ། འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་བདག་ཉིད་དེ། དེ་ནི་ཟབ་ཅིང་རྟོགས་པར་དཀའ་བས་ན་ཕྲ་བའོ། །མི་ཕྱེད་པས་ན་རྡོ་རྗེའོ། །ཐམས་ཅད་འབྱུང་བས་ན་སྙིང་པོའོ། །གང་དུའང་མ་གྲུབ་པས་ནམ་མཁའོ། །མི་རྟོག་པས་ན་རྡུལ་བྲལ་ལོ། །དེ་མྱ་ངན་ལས་འདས་པས་མཐར་སྟེར་རོ། །རྟོག་པ་ཞི་བས་ན་ཞི་བའོ། །དེ་ལྟ་བུ་དེ་ངས་ཁྱོད་ལ་བརྗོད་པ་ན་ཁྱོད་ཀྱིསཾ་ཇི་ལྟར་རྟོགས་ཀྱིས་ཁྱོད་རང་ཉིད་ལ་བསྐྱེད་པར་བྱའོ། །དེ་ལྟ་བུའི་དོན་དེ་མངོན་དུ་གྱུར་ན་ཆོས་ཀྱི་སྐུ་ནི་དེ་ཉིད་ཡིན་གྱིས་ལམ་གཞན་དང་གཞན་དུ་བཙལ་བས་ཅི་ཞིག་བྱ། སངས་རྒྱས་གཞན་ནས་འབྱུང་བ་མ་ཡིན་ནོ་ཞེས་བསྐྱེད་ལ་དེ་ཁོ་ན་ཉིད་ལ་བློ་གཞག་པར་བྱའོ་ཞེས་གསུངས་སོ། །བཤད་པའི་རྒྱུད་ཀྱི་བརྟག་པ་གཉིས་པའི་རབ་བྱེད་དང་པོར། གང་ཐོབ་དབང་རབ་མཆོག་ནི་རིགས་ཀྱི་བདག་པོར་བཟུང་བ་རྙེད་པར་དཀའ་ཞིང་མཚུངས་པ་མེད་པས་བསྡམས། །ལོངས་སྤྱོད་རྫོགས་པའི་ཞིང་གི་དཔལ་དག་བླང་བར་བྱས་པས་བྱང་ཆུབ་སེམས་དཔའ་ཆེན་པོའི་དབང་བསྐུར་བ། །བཀའ་ཡི་གནང་བ་རྙེད་ནས་འཇིག་རྟེན་གསུམ་གྱི་དགྲ་བོ་ལས་རྒྱལ་བརྩོན་པའི་གོ་བགོས་པ་ཡི་བློས། །བྱང་ཆུབ་དག་ལ་འགོད་པའི་སེམས་རྒྱས་འདིར་ནི་དེ་ཉིད་རྣལ་འབྱོར་པ་ཡིས་དྲི་མ་མེད་པར་སྤྱོད། །ཅེས་གསུངས་ཏེ། འདི་ལ་དབང་གི་ཡེ་ཤེས་སྐྱེ་བའི་རྒྱུ། དབང་དངོས། མཇུག་རྗེས་སུ་གདམས་པ་དང་གསུམ་ལས། དང་པོ་ནི། ཚིག་རྐང་ཕྱེད་དང་གཉིས་ཏེ། ཤེས་རབ་ཡེ་ཤེས་ཀྱི་སྐབས་སུ་གང་ཐོབ་པའི་དབང་རབ་མཆོག་ནི་ཐབས་ཀྱི་རིགས་ཀྱི་བདག་པོའི་ཁ་དང་། ཤེས་རབ་ཀྱི་རྩ་མཛེས་པའི་སྤྱི་བོར་རླུང་འདྲེན་པའི་སྒོ་ནས་ཐིག་ལེ་གཟུང་བ་ཡིན་ལ། དེ་མན་ངག་མེད་པ་རྣམས་ཀྱིས་རྙེད་པར་དཀའ་ཞིང་དབབ་ཟློག་ལ་སོགས་པའི་མན་ངག་མཚུངས་པ་མེད་པས་བསྡམས་པ་ཡིན་ཞིང་དེར་མྱོང་བ་ཅི་སྐྱེ་ན། ལོངས་སྤྱོད་རྫོགས་པ་ནི། ལོངས་སྐུ་དང་ཁ་སྦྱོར་གཉིས་ཡིན་ལ་དེ་བསྐྱེད་པའི་ཞིང་གི་དབལ་ནི་ཆོས་ཀྱི་སྐུ་སྟེ། སྐུ་གསུམ་གྱི་ཉམས་མྱོང་སྐྱེས་པ་ནི་ངོ་སྤྲོད་པའི་རྒྱུའོ། །གཉིས་པ་ནི་མྱོང་བ་དེ་ཅི་ཡིན་སྙམ་ན། བྱང་ཆུབ་སེམས་དཔའ་ཆེན་པོའི། དབང་བསྐུར་བ་ནི་བཞི་པ་སྟེ། ཡེ་ཤེས་དེ་མངོན་དུ་བྱས་པ་ནི་དེ་ཁོ་ན་ཉིད་མཐོང་བ་ཡིན་ཏེ། དེ་དང་ཁྱད་པར་མེད་པའི་ཕྱིར་རོ། །ཞེས་བྱའོ། །གསུམ་པ་ནི། བླ་མ་ལས་བཀའི་གནང་བ་རྙེད་ནས་འཇིག་རྟེན་གསུམ་གྱི་དགྲ་བོ་ནི་ཉོན་མོངས་པ་ཡིན་ལ། དེའི་རྒྱུ་ནི་རྣམ་པར་རྟོག་པ། དེ་ལས་རྒྱལ་བ་ནི་མཚན་མ་དང་། རྣམ་པར་རྟོག་པ་མེད་པ་ལ་འབད་པར་བྱའོ། །ཞེས་བརྩོན་པའི་གོ་བགོས་པ་ནི་མྱ་ངན་ལས་འདས་པའི་སེམས་ཏེ་ཤེས་རབ་བོ། །དེའང་བདག་ཉིད་ཙམ་མ་ཡིན་གྱི་སྙིང་རྗེས་སེམས་ཅན་གཞན་དག་བྱང་ཆུབ་དག་ལ་འགོད་པའི་སེམས་བསྐྱེད་པའི་ཐབས་ཀྱི་སྒོ་ནས་ཉམས་སུ་ལེན་ནོ། །དེ་ལྟར་གཞན་དོན་བྱེད་ཀྱང་སེམས་ཅན་དུ་ཞེན་པ་མེད་པས་ན་རྣལ་འབྱོར་པས་ནི་དྲི་མ་མེད་པར་སྤྱོད་ཅེས་པ་སྟེ། ཚིགས་སུ་བཅད་པ་འདིས་ཀྱང་ཤེས་རབ་ཡེ་ཤེས་ཀྱི་ཉམས་མྱོང་ལ་འབྲས་བུ་དང་། གནས་ལུགས་ཀྱི་དོན་ཚིག་གི་སྒོ་ནས་ངོ་སྤྲོད་པ་དང་། ལམ་དུ་བྱེད་པའི་བཞི་པ་གསུམ་ཚང་བར་བསྟན་ཏོ། །གསུམ་པ་ནི། སློབ་དཔོན་ངག་གི་དབང་ཕྱུག་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་པ་འགོག་པ་མེད། །ཡན་ལག་བདུན་དང་ལྡན་པའི་སངས་རྒྱས་འདི་ཉིད་ནི། །བདག་འདོད་ཚད་མས་ཡོངས་བསྒོས་བློ་ཅན་རྣམས་ཀྱང་འདོད། །ཞེས་སྐུ་གསུམ་ཡན་ལག་བདུན་ལྡན་གྱི་སངས་རྒྱས་དེ་ཉིད་མཚོན་བྱ་དོན་གྱི་དབང་བཞི་པར་བྱས་ནས་རྒྱུད་སྡེ་རིན་པོ་ཆེ་རྣམས་ལས། དེ་ལྟར་དེ་བཞིན་བཞི་པ་ཡང་། །ཞེས་དེ་ལྟར་དང་། དེ་བཞིན་དང་། བཞི་པ་ཞེས་པའི་ཚིག་གསུམ་གྱིས་དབང་གསུམ་པའི་དུས་ཀྱི་ཉམས་མྱོང་དེ་ཉིད་དཔེར་བྱས་ནས་མཚོན་བྱ་དོན་གྱི་དབང་བཞི་པ་དེ་ཉིད་མཚོན་པར་གསུངས་པས་ཀྱང་འབྲས་བུ་དང་། གནས་ལུགས་ཀྱི་དོན་ངོ་སྤྲོད་པ་ཉིད་དུ་སྣང་སྟེ། ལོངས་སྤྱོད་རྫོགས་པ་ནི་མཚན་དཔེ་འབར་བ། དེ་ཙམ་ཕ་རོལ་ཏུ་ཕྱིན་པ་ལའང་ཡོད་པས་ཁ་སྦྱོར་གྱི་སྐུ། ཁ་སྦྱོར་ཙམ་སྒྱུ་མ་མཁན་གྱིས་བྱས་པའི་སྐྱེས་པ་དང་བུད་མེད་ལའང་ཡོད་པས་བདེ་ཆེན། དེ་ཉིད་བདེན་པར་གྲུབ་བམ་སྙམ་ན་རང་བཞིན་གྱིས་སྟོང་ཞིང་བརྫུན་པ་དྲི་ཟའི་གྲོང་ཁྱེར་དང་། ཆུ་ཟླ་ལྟ་བུ། དེའང་སྟོང་པ་ཁོ་ན་མ་ཡིན་པའི་ཕྱིར་དམིགས་པ་མེད་པའི་སྙིང་རྗེའི་རང་བཞིན། དེའང་སྤྲུལ་སྐུ་ལྟར་དུས་རེ་ཞིག་པ་མ་ཡིན་པར་རྟག་ཏུ་རྒྱུན་མ་ཆད་པར་བཞུགས་པ། དེའང་མཐར་མྱ་ངན་ལས་འདའ་བ་མེད་པས་ན་འགོག་པ་མེད་པ་སྟེ། དེ་དག་གི་དོན་ངོ་སྤྲད་པས་འབྲས་བུ་སངས་རྒྱས་ཀྱི་ས་དང་། གནས་ལུགས་ཀྱི་དོན་གཉིས་ཀ་ངོ་སྤྲད་པར་འགྱུར་ཞིང་། སྤྱིར་ཡང་གནས་ལུགས་མངོན་དུ་འགྱུར་བ་ནི་འབྲས་བུ་ཡིན་པས་དེ་གཉིས་གང་རུང་ཞིག་ངོ་སྤྲད་ཀྱང་དོན་གྱིས་གཉིས་ཀ་ངོ་སྤྲད་པར་འགྱུར་བའི་ཕྱིར་རོ། །སློབ་དཔོན་སྨན་པའི་ཞབས་ཀྱིས་ཀྱང་། དབང་དང་པོ་གསུམ་པོ་རེ་རེ་ལའང་སློབ་དཔོན་ད་ང་། ཡོན་དང་། སྡོམ་པ་དང་། དཀྱིལ་འཁོར་དང་། དབང་དང་། རང་གི་ངོ་བོ་དང་། གཉེན་པོ་དང་། ས་དང་། ཆོ་ག་དང་། ལྟ་བ་དང་། ངེས་ཚིག་སྟེ། དོན་ཚན་བཅུ་གཅིག་རེས་མི་འདྲ་བ་སོ་སོར་བཤད་ནས། བཞི་པའི་སྐབས་སུ། རང་བཞིན་གནས་ཕྱིར་སློབ་དཔོན་མེད། །རིན་ཐང་མེད་ཕྱིར་ཡོན་མེད་དེ། །སྡོམ་པ་བས་ན་སྡོམ་པ་མེད། །དེ་ཉིད་དཀྱིལ་འཁོར་དཀྱིལ་འཁོར་མེད། །སྟོབས་ཀྱིས་ཐོབ་ཕྱིར་དབང་མེད་དོ། །སྤྱི་བས་རང་གི་ངོ་བོ་མེད། །ཆོས་ཀུན་གཉེན་པོ་གཉེན་པོ་མེད། །རྡོ་རྗེ་འཛིན་གནས་ས་མེད་དེ། །རང་བཞིན་མེད་ཕྱིར་ཆོ་ག་དང་། །ལྟ་བ་ངས་ཚིག་མེད་པ་རུ། །བླ་མ་ཡིས་ནི་ཡང་དག་བཤད། །ཅེས་གསུངས་པའང་གནས་ལུགས་ཀྱི་དོན་ངོ་སྤྲོད་པའི་དོན་དུ་སྣང་ངོ་། །མདོར་ན་མཁས་གྲུབ་ཀུན་གྱི་དགོངས་པ་དབང་གསུམ་པའི་ཡེ་ཤེས་དེ་ཉིད་རྒྱུར་བྱས་ནས་འབྲས་བུ་དང་གནས་ལུགས་ཀྱི་དོན་ངོ་སྤྲད་པས་སྔ་མ་ལས་མཆོག་ཏུ་གྱུར་པའི་ཡེ་ཤེས་སྐྱེ་བ་ནི་དབང་བཞི་པ་ཆོ་གས་བསྐུར་བའི་དོན་ཡིན་གྱི། དབང་གསུམ་པ་ལས་ལོགས་སུ་ཕྱག་རྒྱ་ལ་བརྟེན་པའི་ཡེ་ཤེས་བསྐྱེད་དུ་མེད་པ་དགོངས་པ་གཅིག་ཏུ་སྣང་སྟེ། ཟུང་འཇུག་གསལ་བ་ལས། དེ་བཞིན་ཞེས་བྱ་བའི་སྒྲས་སྔ་མའི་དངོས་པོ་ལས་གཅོད་པའི་ཕྱིར། གསུམ་པ་ཤེས་རབ་ཡེ་ཤེས་ཀྱི་དབང་གང་ཡིན་པ་དེ་ཉིད་བཞི་པར་འགྱུར་རོ། །ཞེས་དང་། སྨན་པའི་ཞབས་ཀྱིས། ཤེས་རབ་ཡེ་ཤེས་ལས་སྐྱེས་ནི། །བཞི་པ་ཡིན་པར་ཤེས་པར་བྱ། །ཞེས་དང་། གྲུབ་ཆེན་དྲིལ་བུ་པས། རིམ་པ་གསུམ་པོ་དེའི་བླ་མ། །མན་ངག་གིས་ནི་འདིར་ཤེས་བྱ། །འདི་ནི་རང་ཉིད་མཛེས་མ་སྟེ། །ཕྱི་རོལ་ཡུལ་ནི་སྤངས་པའོ། །ཞེས་སོགས་ཏེ། སྔར་དྲངས་པའི་རྩ་བཤད་ཀྱི་རྒྱུད་ཀྱི་དོན། དཀྱིལ་ཆོག་གཉིས་དང་། རྗེ་བཙུན་རྩེ་མོས་འགྲེལ་ཚུལ་ལས་ཤེས་སོ། །གསུམ་པ་ཚིག་གིས་ངོ་སྤྲད་དེ་རྟོགས་པ་བསྐྱེད་པའི་ཚུལ་ནི། རྗེ་བཙུན་གྱིས། དེ་ནས་རྗེས་སུ་བསྟན་པ་ཚིག་ཉིད་ཡིན་ཏེ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་ཀྱི་ཕ་ནི་ཁྱོད་ཉིད་དོ། །ཞེས་པའི་ཚིགས་བཅད་བརྗོད་དེ། དེ་དག་གི་དོན་ཞིབ་ཏུ་བཤད་ལ་རྟོགས་པ་བསྐྱེད། དེ་ནས་དོན་བསྐྱེད་པའི་ཕྱིར་སྣ་རྩེ་ནས་སོར་བཞི་ཙམ་གྱི་ནམ་མཁའ་ལ་བློ་ཅུང་ཟད་བཞག དེ་ནས་སོར་བརྒྱད་ཙམ། དེ་ནས་རིམ་གྱིས་ནམ་མཁའི་མཐའ་བརྟགས་ཏེ། ནམ་མཁའ་ལ་ཐོག་མཐའ་མེད་པ་བཞིན། སེམས་ཀྱི་ཐོག་མཐའ་མེད་པར་བསྟན། ནམ་མཁའ་ལ་འདུས་བྱས་ཀྱི་གནོད་པས་མི་ཚུགས་པ་བཞིན། སེམས་ཀྱང་གློ་བུར་གྱི་རྐྱེན་གྱིས་མི་འཇིག ནམ་མཁས་སྣོད་བཅུད་ཐམས་ཅད་ལ་ཁྱབ་པ་བཞིན། སེམས་ཀྱིས་འཁོར་འདས་ཀྱི་ཆོས་ཐམས་ཅད་ལ་ཁྱབ། ནམ་མཁའ་ཁ་དོག་དང་དབྱིབས་ལ་སོགས་པ་དང་བྲལ་བ་བཞིན། སེམས་གཟུང་འཛིན་ལ་སོགས་པའི་རྣམ་རྟོག་མ་ལུས་པས་སྟོང་པར་བསྟན་ཏོ། །ཡང་ཐོག་མཐའ་མེད། སྐྱེ་འཇིག་མེད། མཐའ་དབུས་མེད། འགྲོ་འོང་མེད། ཅེས་ཀྱང་བརྗོད་དོ། །དེའི་ངང་ལ་འབད་རྩོལ་གློད་དེ་ཅུང་ཞིག་གཞག་གོ །དེ་ནས་སྔར་བཤད་པ་ལྟར་གྱི་ཚིག་གི་བཞི་པ་སོགས་ལྔ་པོ་ངོ་སྤྲད་པར་གསུངས་སོ། །གསུམ་པ་མཐའ་བརྟེན་ནི། མཆོག་ཏུ་གསང་བའི་དཀྱིལ་འཁོར་འདིར། །ཞེས་སོགས་བརྗོད་དེ། དོན་ནི་མདོར་ན་ཁྱོད་སྲིད་པ་ཤིན་ཏུ་དག་པ་བླ་ན་མེད་པའི་བྱང་ཆུབ་ཏུ་འགྱུར་ཞེས་གསུངས་པ་སྟེ། ལུང་བསྟན་པ་དང་། དབུགས་དབྱུང་བ་དང་། གཟེངས་བསྟོད་པ་གསུམ་ཀའང་འདྲ་བ་ཡིན་ནོ། །བཞི་པ་དབང་གི་རྟོགས་པ་བསྐྱེད་པ་ནི། ཁྱོད་ཀྱིས་དཀྱིལ་འཁོར་རྣམ་པ་བཞི་ལས། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་ཞུགས་པ་དང་མཐོང་བ་ཡིན་ནོ། །ཞེས་སོགས་སྔ་མ་ལ་རིགས་བསྒྲེས་ཏེ་ཤེས་པར་བྱའོ། །དེ་ནས་སློབ་མས་དམ་ཚིག་དང་སྡོམ་པ་མདོར་བསྡུས་ཏེ་གཟུང་བ་དང་། གཏང་རག་གི་མཎྜལ་དང་། ལུས་དང་ལོངས་སྤྱོད་འབུལ་བ་རྣམས་བྱས་ནས། བླ་མའི་ཞབས་ལ་ཕྱག་བྱའོ། །བརྒྱད་པ་དཀྱིལ་འཁོར་ཆེན་པོའི་མཇུག་གི་ཆོ་ག་ནི། རིན་ཆེན་འབར་བ་ལས། སློབ་མའི་བྱ་བ་རྫོགས་རྗེས་སུ། །དཀྱིལ་འཁོར་མཆོད་བསྟོད་ལེགས་བྱས་ལ། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བརྗོད་དེ་ལྷ་ཡི་འཁོར་ལོ་གཤེགས། །དམན་མ་ཆུ་བོ་ཆེན་པོར་དོར། །ཨོཾ་གི་ལི་གི་ལི་ཧཱུྃ་ཛཿསྭཱ་ཧཱ། རྡུལ་ཚོན་བསྡུ་བ་དང་། དོར་བའི་སྔགས་སོ། །ཞེས་གསུངས་པ་དང་མཐུན་པར་མཆོད་པ་རྣམས་གསར་པ་བཤམ། བྱིན་རླབས་སྔོན་དུ་འགྲོ་བས་ཕྱི་དང་། ནང་དང་། ཡིད་ལས་འབྱུང་བ་དང་། བསྟོད་པའི་མཆོད་པ་རྣམས་བྱས་ནས། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་ཉམས་པ་དང་། །ཞེས་སོགས་ཀྱིས་ནོངས་པ་བཟོད་པར་གསོལ་ནས། རྡོ་རྗེ་དྲིལ་བུ་འཛིན་པས། རྡུལ་ཚོན་གྱི་དཀྱིལ་འཁོར་གྱི་མདུན་དུ་ལངས་ཏེ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །ཅེས་སོགས་དང་། ཡི་གེ་བརྒྱ་པའི་མཐར་བཛྲ་མུཿ ཞེས་བརྗོད་དེ་དཀྱིལ་འཁོར་དང་བུམ་པའི་ལྷའི་ཡེ་ཤེས་པ་ཐམས་ཅད་ཆོས་ཀྱི་དབྱིངས་སུ་གཤེགས་སུ་གསོལ། ཨོཾ་ཨཱཿཧཱུྃ་ཞེས་བརྗོད་པས་དམ་ཚིག་པ་བདག་གི་ཐུགས་ཀར་བསྡུ། ཨོཾ་ཨ་ཀཱ་རོ་སོགས་དང་། ཨོཾ་གི་ལི་སོགས་བརྗོད་ལ་རྡུལ་ཚོན་དབང་ལྡན་གྱི་རྩིག་པ་དང་པོར་བྲིས་པ་དེ་དང་པོར་གཤེགས་སུ་གསོལ་ལོ། །དེ་ནས་ཅི་བདེ་བར་གཤེགས་སུ་གསོལ་ཏེ། རྡུལ་ཚོན་འདོད་པ་ཡོད་ན་ལྷའི་མཚན་མ་ལས་བླངས་ལ་སྦྱིན། གཞན་ཐམས་ཅད་ཕྱག་ལ་ཆུ་བོ་ཆེན་པོའམ། དེ་མིན་ནའང་ཁྲོན་པ་ལ་སོགས་པར་ཆོ་ག་ཇི་ལྟ་བ་བཞིན་དོར་ཏེ། ཐིག་རྗེས་མི་མངོན་པར་བྱས་ནས་དྲི་ཞིམ་པོས་བྱུགས་པར་བྱའོ། །དེ་ནས་སློབ་མས་དགེ་བའི་རྩ་བ་འཕེལ་བར་བྱ་བའི་ཕྱིར་ཚོགས་ཀྱི་འཁོར་ལོ་དང་། དགེ་འདུན་གྱི་སྟོན་མོ་དང་། བཀྲ་ཤིས་ཀྱི་ཚིགས་བཅད་བརྗོད་པ་ལ་སོགས་པའི་དགའ་སྟོན་ལ་འཇུག་པར་བྱའོ། །རྨད་བྱུང་བརྒྱུད་པའི་གསེར་གྱི་ས་གཞིར་རྣམ་མང་རྒྱུད་སྡེའི་ཆུ་འཛིན་སྟོང་གིས་བསྐྲུན། །མན་ངག་རིན་ཆེན་ཁྲི་ཡི་དཔལ་ཡོན་དང་ལྡན་ཡེ་ཤེས་ཀླུ་དབང་རོལ་པའི་གནས། །དབང་གི་ཆུ་བོའི་རྣམ་བཤད་རྒྱ་མཚོ་འདི་ནི་རང་ཉིད་དྲན་པ་གསོ་ཕྱིར་དང་། །བདག་དང་སྐལ་བ་མཉམ་པ་གཞན་ལ་ཕན་པར་འགྱུར་བའི་བློ་ཡིས་སྦྱར། །ལེ་ལོའི་དབང་གིས་འཇིག་རྟེན་དོན་གཉེར་དང་། །བག་ཆགས་དབང་གིས་སྨྲ་ངན་ལ་ཞེན་རྣམས། །ལེགས་བཤད་འདི་ཡིས་མགུ་བར་མི་འགྱུར་ཡང་། །སྐལ་ལྡན་གཟུར་གནས་འགའ་ལ་ཕན་པར་སེམས། །རང་ལྟ་མཆོག་བཟུང་དྲི་མ་རྒྱང་བསྲིངས་ནས། །གྲུབ་མཐའི་བཀའ་སྲོལ་མཆོག་གི་རྗེས་འབྲང་སྟེ། །རྡོ་རྗེ་འཛིན་པའི་ས་བརྙེས་ཡོངས་འཛིན་གྱི། །གསུང་ལ་བརྟེན་ཕྱིར་ཉེས་པ་མེད་སྙམ་སེམས། །དེ་ལྟ་ན་ཡང་བྱིས་པའི་བློ་གྲོས་ཀྱིས། །ཟབ་ཡངས་རྒྱུད་སྡེའི་གཏིང་མཐའ་མི་དཔོགས་པས། །ཉེས་པ་མཆིས་གང་བླ་མ་མཁའ་འགྲོ་དང་། །གཟུར་གནས་མཁས་པའི་ཚོགས་ལ་བདག་འཆགས་སོ། །འདི་སྦྱར་དགེ་བས་བདག་གཞན་འགྲོ་བ་ཀུན། །བདེ་བ་ཅན་ཞེས་གྲགས་པའི་ཞིང་བཟང་དེར། །པདྨོའི་སྙིང་པོར་རྫུས་ཏེ་སྐྱེས་ནས་ཀྱང་། །འོད་དཔག་མེད་པའི་ཞལ་མཆོག་མཐོང་བར་ཤོག །གནས་སྐབས་ཀུན་ཏུ་རྒྱལ་བས་བསྔགས་པ་ཡི། །མཐུན་རྐྱེན་ཚང་ཞིང་འགལ་རྐྱེན་ཀུན་སྤངས་ནས། །རྒྱལ་བའི་དམ་ཆོས་མ་ལུས་འཛིན་པ་དང་། བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག །དཔལ་ཀྱེ་རྡོ་རྗེའི་དབང་གི་ཆུ་བོ་ཆེན་མོའི་རྣམ་པར་བཤད་པ་བདེ་ཆེན་རྒྱ་མཚོ་ཞེས་བྱ་བ་འདི་ནི། རྒྱལ་བ་ཁྱབ་བདག་རྡོ་རྗེ་འཆང་དང་དབྱེར་མ་མཆིས་པ་རྗེ་བཙུན་དམ་པ་ཀུན་དགའ་བཟང་པོ་ཡབ་སྲས་ཀྱི་གསུང་གི་བཀའ་དྲིན་ལ་བརྟེན་ནས། རྒྱུད་སྡེའི་དོན་ལ་བློ་ཁ་ཅུང་ཟད་ཕྱོགས་པ་མང་དུ་ཐོས་པའི་དགེ་སློང་བསོད་ནམས་སེང་གེས་མེ་མོ་ལུག་གི་ལོ་ཐ་སྐར་ཟླ་བའི་ཚེས་བཅོ་ལྔ་ལ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ། །དགེ་བ་འདི་ཡིས་ནམ་མཁའི་མཐའ་ཀླས་པའི། །ལུས་ཅན་ཀུན་གྱི་བསོད་ནམས་ཡེ་ཤེས་ཚོགས། །མྱུར་དུ་བསྒྲུབས་ནས་ཚེ་འདི་ཁོ་ན་ལ། །རྡོ་རྗེ་འཛིན་པའི་གོ་འཕང་ཐོབ་པར་ཤོག །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །ཇི་ལྟར་མཁའ་ལ་ཉི་ཤར་བཞིན། །ཕྱོགས་དུས་ཀུན་ཏུ་དར་གྱུར་ཅིག། །།

རྒྱུད་སྡེ་བཞི་དང་འབྲེལ་བའི་ལྷག་པའི་ལྷ་སྤྱིའི་བསྙེན་ཐབས་དངོས་གྲུབ་བུམ་བཟང་།

རྒྱུད་སྡེ་བཞི་དང་འབྲེལ་བའི་ལྷག་པའི་ལྷ་སྤྱིའི་བསྙེན་ཐབས་དངོས་གྲུབ་བུམ་བཟང་བཞུགས་སོ།། ཨོཾ་སྭ་སྟི། བླ་མ་ལྷག་པའི་ལྷར་བཅས་ལ། །སྒོ་གསུམ་གུས་པའི་སྤྱི་བོས་འདུད། །རྒྱུད་སྡེ་རྣམ་པ་བཞི་པོ་ལས། །མཆོག་དང་ཐུན་མོང་སྒྲུབ་པའི་ཐབས། །བསྙེན་སྒྲུབ་ལས་གསུམ་ཆོ་ག་གསུངས། །དེ་ཡི་དང་པོ་བསྙེན་པ་ལ། །རབ་འབྲིང་ཐ་གསུམ་རྣམ་དབྱེ་མང་། །འདིར་ནི་གྲངས་ཀྱི་བསྙེན་པ་ཡི། །བྱེད་ཐབས་ཅུང་ཟད་བྲི་བར་བྱ། །དེ་ལའང་རབ་འབྲིང་ཐ་གསུམ་ཡོད། །ཕྱི་མ་གཉིས་ནི་འདིར་མི་གཏོགས། །རབ་ལ་སྦྱོར་དངོས་རྗེས་གསུམ་མོ། །དང་པོ་ནི། གནས་ཁང་དབེན་ཞིང་ཡིད་དུ་འོང་བ་བཀྲ་ཤིས་པའི་ནང་དུ་ཕྱག་དར་སྐྱང་ནུལ་ལེགས་པར་བྱས། རྟེན་མཆོད་རྣམ་པར་དག་པ་ཡང་བཤམ། དེ་ནས་བད་ཀན་དང་ཚ་བ་ཤས་ཆེ་བའི་གང་ཟག་ཡིན་ན། ཁྲུས་ཀྱི་རྣལ་འབྱོར་རང་རང་གི་སྒྲུབ་ཐབས་ནས་བཤད་པ་བཞིན་དུ་བྱ། རླུང་དང་གྲང་བ་ཤས་ཆེ་ན་མ་བྱས་པས་འོང་སྟེ། བསམ་གཏན་གྱི་གྲོགས་སུ་འགྲོ་ན་ཁྲུས་ཀྱི་རྣལ་འབྱོར་བྱ་ཞེས་གསུངས་པའི་དོན་ཡིན་ནོ། །ཁྲུས་ཀྱི་རྣལ་འབྱོར་མ་གྲུབ་ཀྱང་ཐུན་མཚམས་སུ་ཟས་ཟ་བ་དང་། རྩ་ཆུ་འཆག་པ་ནའང་ཆབ་ལ་སོགས་པ་ལེན་དགོས་ཏེ། གྲུབ་ཆེན་ནཱ་རོ་ཏ་པའི་གསུང་གིས། ཁ་མི་བཤལ་བར་སྔགས་ཟློས་སྤང་། །ཞེས་གསུངས་སོ། །དེ་ནས་སྟན་ནང་ཚངས་ཅན་ལ་འཇིག་རྟེན་པའི་ཤར་དུ་ཁ་ཕྱོགས་པར་སྐྱིལ་ཀྲུང་གཉིས་པོ་གང་རུང་ངམ། ཙོག་པུར་སྐྱིལ་ཀྲུང་དུ་འདུག་པ་དང་། ཐོག་མར་རང་གི་བློ་ལ་བརྟག་དཔྱད་ལེགས་པོ་བྱ་དགོས་ཏེ། རྗེ་བླ་མའི་གསུང་གིས། གྱ་ཚོམ་དུ་མི་འཇུག་གསུངས་པའི་དོན། རང་གི་སེམས་ཉོན་མོངས་པ་དང་། རྣམ་རྟོག་གཞན་གྱི་དབང་དུ་འདུག་ན། འཆི་བ་མི་རྟག་པ་ལ་སོགས་པས་བློ་ལེགས་པར་བཅོས་ནས་དགེ་བ་ལ་བསྐུལ་དགོས་ཀྱི། དེ་ལྟར་མ་བྱས་ན་ཉམས་ལེན་ཉོན་མོངས་གྱི་དབང་དུ་འགྲོ་བས་དགེ་བ་མི་འགྲུབ་པས། བླ་མ་དང་དཀོན་མཆོག་ལ་དད་པའི་ཀུན་སློང་བརྟན་པོས་སེམས་དགེ་བ་ལ་བསྐུལ་ནས་དྲན་ཤེས་ཀྱིས་ཡང་ཡང་དུ་སེམས་ཉོན་མོངས་པ་དང་མ་འདྲེས་པ་ཅི་ཐུབ་བྱེད་པ་གལ་ཆེ་སྟེ། ནཱ་རོ་ཏ་པས། དད་པ་མེད་པའི་ལེ་ལོ་སྤང་། །ཞེས་གསུངས་སོ། །གཉིས་པ་དངོས་གཞི་ནི། སྐྱབས་འགྲོ་སེམས་བསྐྱེད་ནས་བརྩམས་ཏེ། མ་རྒྱུད་དང་ཕ་རྒྱུད་སོ་སོའི་ལུགས་ཀྱི་རྡོ་རྗེ་སེམས་དཔའི་བསྒོམ་བཟླས་ཀྱིས་རྒྱུད་དག་པར་བྱེད་ཅིང་། དེ་ནས་མངོན་པར་རྟོགས་པ་སྦྱང་གཞི་དང་སྦྱོང་བྱེད་ངོ་སྤྲོད་པའི་རིམ་པས་དམིགས་པ་གསལ་རུང་མི་གསལ་རུང་། རྣམ་རྟོག་གཞན་གྱི་དབང་དུ་མ་སོང་བར། སེམས་འཇུར་མིག་ནས་དྲངས་ལ་ཤར་རེ་གཤར་འདོན་གྱི་ཚུལ་དུ་འགྲོ་བ་ནི། བིརྺ་པ་ཡབ་སྲས་ཀྱི་མན་ངག་ལས། གསལ་ལ་དྲག་ལ་ཡུན་ཐུང་བ། །བསྐྱེད་པའི་རིམ་པ་གནད་དུ་ཆེ། །ཞེས་གསུངས་པ་ལྟར་རོ། །དེ་ནས་རང་རང་གི་བསྐྱེད་རིམ་ལ་སེམས་འཛིན་པའི་སྐབས་སུ་སླེབ་པ་དང་། རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་དང་། ཁྱད་པར་དུ་ཡང་རང་ཉིད་གཙོ་བོ་དེའི་ཞལ་ཕྱག་རྒྱན་ཆ་ལུགས་བཞུགས་སྟངས་དང་བཅས་པ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུ་ལ་ང་རྒྱལ་ཡུན་རིང་པོའི་བར་དུ་འཛིན། ལས་དང་པོ་པས་དམིགས་པ་གསལ་པོ་མེད་ཀྱང་ལྷ་དེ་ཡིན་སྙམ་པའི་ང་རྒྱལ་བརྟན་པོ་ལ་ཡུན་རིང་མཉམ་པར་བཞག་པ་ལ་ཕན་ཡོན་ཆེ་སྟེ། མཁའ་འགྲོ་མ་རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་དུ་ངེས་པར་འགྲུབ། །འགྲུབ་རྒྱུའི་སངས་རྒྱས་ནི། སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །ཞེས་གསུངས་སོ། །དེ་ནས་ཕྲེང་བ་བྱིན་རླབས་དང་བཅས་པ་བྱས་ལ། རང་རང་གི་གཞུང་ནས་བཤད་པའི་ཞི་རྒྱས་དབང་དྲག་གི་དམིགས་པ་ལ་ནན་ཏན་བསྐྱེད་ཅིང་། སྔགས་ལྷག་ཆད་མེད་པ་དག་པོར་བཟླ་དགོས་ཏེ། ནཱ་རོ་ཏ་པས། སྔགས་ཀྱི་ཡིག་འབྲུ་འཁྱལ་བ་སྤང་། །ཞེས་གསུངས་སོ། །དེ་ལྟར་བཟླས་པའི་སྐབས་ཐམས་ཅད་དུ་འོད་ཟེར་སྤྲོ་བསྡུ་སོགས་ཀྱི་དམིགས་པ་ལ་གཅུན་དགོས་ཏེ། ནཱ་རོ་ཏ་པས། བསམས་པ་མེད་པར་སྔགས་བཟླས་སྤང་། །ཞེས་གསུངས་སོ། །ལྷའི་དམིགས་པ་ཡང་ཡང་དུ་གསལ་གདབ་དགོས་ཏེ། ནཱ་རོ་ཏ་པས། ལྷ་མི་གསལ་བར་སྔགས་བཟླས་སྤང་། །ཞེས་གསུངས་སོ། །དེ་ཡང་ལྷའི་དམིགས་པའམ། འོད་ཟེར་སྤྲོ་བསྡུའམ་ཐ་ན་སྔགས་ཀྱི་སྒྲ་ལྷང་ལྷང་བ་དེ་དང་ཤེས་པ་འདྲེས་པ་ཅི་ཐུབ་ལ་འབད་པ་གལ་ཆེ་ཞིང་། དེ་ལྟར་མ་ཡིན་པའི་ཐ་མལ་པའི་རྣམ་རྟོག་དང་བསྲེས་པའི་ངང་དུ་ཡུན་རིང་པོའི་བར་དུ་བྱས་ཀྱང་ནུས་པ་ཤིན་ཏུ་ཆུང་སྟེ། སྤྱོད་འཇུག་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པས་དོན་མེད་གསུངས། །ཞེས་གསུངས་པ་ལྟར་རོ། །རྒྱུ་མཚན་དེ་བས་ན་བསྙེན་སྒྲུབ་ལ་འཇུག་པའི་ཚེ། བྱིང་རྨུགས་རྣམ་གཡེང་ཐམས་ཅད་དྲག་ཏུ་བཟློག་ནས་མ་འབད་ན་ནུས་པ་འདྲེས་འཕྲོག་པར་བཤད་དེ། ནཱ་རོ་ཏ་པས། གཉིད་ཀྱི་དབང་དུ་གྱུར་པ་སྤང་། །ཞེས་གསུངས་སོ། །སྔགས་ལ་སོགས་པ་གསང་ཞིང་ཤིབ་བུར་བཟླ་དགོས་ཏེ། རྩ་ལྟུང་བདུན་པའི་ཉེས་པ་འོང་བའི་ཕྱིར། ནཱ་རོ་ཏ་པས། གསལ་ཞིང་སྔགས་སྒྲ་ཆེ་བ་སྤང་། །ཞེས་གསུངས་སོ། །དེ་ལྟ་བུའི་སྤྱོད་པས་ཐོ་རངས་དང་། སྔ་དྲོ་དང་། ཕྱི་དྲོ་དང་། སྲོད་ཀྱི་ཐུན་དང་བཞིའི་རིམ་པས་འཇུག་ཅིང་། དེ་ཡང་དང་པོ་སྐྱབས་འགྲོ་ནས་རྗེས་བསྔོ་བ་སྨོན་ལམ་གྱི་བར་ལ་ཐ་མལ་གྱི་ལོང་གཏམ་དང་མི་བསྲེ་བར་སྨྲ་བཅད་ཀྱི་ངང་ནས་བྱ་དགོས་ཤིང་གཞན་དུ་ན་བསྙེན་པའི་དོན་མེད་དེ། ནཱ་རོ་ཏ་པས། ནུས་པ་མྱུར་དུ་སྐྱེ་འདོད་ན། །སྨྲ་བ་བཅད་ན་དངོས་གྲུབ་འཕེལ། །ལོ་གཅིག་སིལ་བུར་བཟླས་པ་བས། །ཟླ་གཅིག་སྨྲ་བཅད་བྱ་བ་གཅེས། །ཞེས་གསུངས་སོ། །དེ་ལྟར་བྱེད་པའི་གནས་ཀྱང་རི་ཁྲོད་དབེན་པར་བྱས་ན་ལེགས་པར་གསུངས་ཏེ། ནཱ་རོ་ཏ་པས། ཡུལ་དགོན་ལོ་གཅིག་བྱས་པ་བས། །རི་ཁྲོད་ཞག་གཅིག་བསྙེན་པ་གཅེས། །ཞེས་གསུངས་སོ། །དེ་ཡང་ཐུན་སྐབས་མ་གཏོགས་འགྲོ་འདུག་བྱེད་པ་སོགས་མི་ཉན་ཅིང་སྟན་གཅིག་གི་སྟེང་དུ་ཚར་དགོས་ཏེ། ནཱ་རོ་ཏ་པས། བསྒྲུབ་སྔགས་འཁྱམས་ཤིང་བཟླ་བ་སྤང་། །ཞེས་སོ། །བསྙེན་པ་མ་ཚར་བར་ལ་སྟན་ཡང་སྤོ་འཇུག་མི་ཉན་ཏེ། ཀླུ་སྒྲུབ་ནས་བརྒྱུད་པའི་མན་ངག་ལས། མལ་སྟན་ནམ་མཁའི་མཐོངས་སུ་སྤྲུགས། །ད་རེས་སྒྲུབ་པ་གང་བྱས་གྱ་བ་ཡིན། །ཞེས་གསུངས་པའོ། །དེ་ལྟ་བུའི་གཙོ་བོ་ཡབ་ཡུམ་ལ་འབུམ་ཕྲག་བཞི་རེ། འཁོར་རྣམས་ལ་ཁྲི་ཕྲག་རེ་རེ་བཟླ་དགོས་ཤིང་། དམིགས་བསལ་ཅན་ལ་དེ་ལས་མང་བ་ཡང་བཟླ་དགོས་པར་བཤད་དོ། །དེ་ལྟར་བཟླས་པའི་ཚེ་ནད་པ་དང་། རྒན་པོ་ཡིན་ན་སྐབས་སུ་ངལ་བསོ་བའི་བར་གཡས་གཡོན་དུ་བག་ཙམ་རེ་སྔས་པ་ལ་ཉེས་པ་མེད་དམ་སེམས། དེ་མ་གཏོགས་པ་གོང་སྦྱོར་བའི་སྐབས་ཀྱི་ལུས་གནད་དང་མི་འབྲལ་བར་དགོས་ཏེ། ནཱ་རོ་ཏ་པས། མི་མོས་ཉལ་སྔགས་བཟླ་བ་སྤང་། །ཞེས་གསུངས་སོ། །གོང་མ་དེ་རྣམས་ཀྱི་དོན་མདོར་བསྡུས་ནས་བརྗོད་ན། བསྙེན་པ་གང་ཡིན་པ་མ་ཚར་གྱི་བར་ལ། ཐུན་ལ་འཇུག་པ་ནས་མཐར་བསྔོ་བའི་བར་ལ། ཉལ་བ་དང་། ལྡང་བ་དང་། བཞད་གད་དང་། རྩ་ཆུ་འཆག་པ་དང་། ཟས་ཟ་བ་དང་། མལ་སྟན་སྤོ་བ་དང་། སྤྲུགས་པ་དང་། མི་དང་ཚིག་བསྲེ་བ་དང་། སྔགས་ཀྱི་སྒྲ་རྒྱུན་བཅད་པ་དང་། ལྷ་དང་སྔགས་འཁོར་གྱི་དམིགས་པ་མི་བྱེད་པ་དང་། འོད་ཟེར་གྱི་སྤྲོ་བསྡུ་མི་བྱེད་པ་དང་། ཕྲེང་བ་མདོ་འཛིན་ལ་ཐུག་ནས། ཕྱིར་མི་ལྡོག་པར་མདོ་འཛིན་འགོམ་ནས་འགྲོ་བ་རྣམས་སྤང་དགོས་ཏེ། སྔགས་རྣམས་བཟླ་བའི་མན་ངག་ནི། ཉལ་ནས་མ་ཡིན་ལངས་ནས་མིན། །དགོད་ཅིང་མ་ཡིན་འཆག་ཅིང་མིན། །ཟ་ཞིང་མ་ཡིན་སྟན་མི་སྤྲུགས། །ཕྱི་ཡི་རྒྱུད་ནི་སྐད་མི་བསྲེ། །ནང་གི་རྒྱུད་ནི་སྒྲ་མི་གཅད། །གསང་བའི་རྒྱུད་ནི་ཏིང་ངེ་འཛིན། །འཕྲོ་འདུ་གཅད་པར་མི་བྱའོ། །ལག་ཕྲེང་མི་འགོམ་མདོ་འཛིན་རྫོགས། །ཞེས་གསུངས་པས་སོ། །དེ་ཡང་བསྙེན་སྒྲུབ་དུས་སུ་ཡིན་གྱི། གཞན་དུ་ན། ནཱ་རོ་ཏ་པས། ཕྱག་རྒྱ་ཆེན་པོ་འདོད་པ་ལ། །དེ་ཉིད་ཞལ་འཁྱམས་རྟག་ཏུ་འདོན། །ཞེས་གསུངས་སོ། །གསུམ་པ་རྗེས་ལ། ཐུན་བཞག་རན་པ་དང་། ཕ་རྒྱུད་མ་རྒྱུད་སོ་སོའི་ཡི་གེ་བརྒྱ་པ་བདུན་ནམ་ལྔ་ལ་སོགས་པ་བཏོན་ནས་ལྷག་ཆད་ཁ་བསྐང་ཞིང་བསྙེན་པ་བསྡུ་བར་བྱ་སྟེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་གྱིས་བརླབ་པར་མཛད་དུ་གསོལ། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། ཕྱག་རྒྱ་ཆེན་པོ་མཆོག་གི་དངོས་གྲུབ་མྱུར་དུ་ཐོབ་པར་མཛད་དུ་གསོལ། ཞེས་སོགས་ཀྱིས་གང་འདོད་པའི་དོན་ལ་གསོལ་བ་དྲག་ཏུ་གདབ། དེ་ནས་བླ་མ་དང་ལྷག་པའི་ལྷ་གང་ཡིན་པ་དང་། གཞན་ཡང་སངས་རྒྱས་དང་བྱང་ཆུབ་སེམས་དཔའ་རྣམས་བདག་ལ་དགོངས་སུ་གསོལ། བདག་གིས་ད་ལྟའི་དུས་འདི་ལ་བཅོམ་ལྡན་འདས་གང་ཡིན་པའི་མཚན་ནས་སྨོས་པ་དང་། དེའི་རྩ་སྔགས་སྙིང་པོ་སོགས་གང་བཟླས་པ་དེ་ལ་གྲངས་མ་ནོར་བར་བྱས་ནས་བརྒྱ་སྟོང་སོགས་འདི་ཚར་བ་དེ་སྐུ་གསུང་ཐུགས་ལ་དབུལ་བར་བགྱིའོ། །བདག་ལ་ཐུགས་བརྩེ་བ་ཆེན་པོའི་སྒོ་ནས་བཞེས་སུ་གསོལ། བཞེས་ནས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་གྲངས་ཡི་དམ་ལ་གཏད་པ་གདམས་པའི་མཆོག་ཡིན་ཏེ། ནཱ་རོ་ཏ་པས། འཕྲལ་གྱི་ནུས་པ་འདོད་པ་ལ། །སྨྲ་བཅད་གྲངས་དང་བཅས་པ་འདོན། །ཞེས་གསུངས་པས་སོ། །དེ་ནས་རྟེན་འབྲེལ་སྙིང་པོའི་རབ་གནས་བྱས་པས་བྱིན་རླབས་མི་ཉམས་ཤིང་ནུས་པ་ཆེ་རུ་འགྲོ་བར་བཤད་པས། ཡེ་དྷརྨཱ་བདུན་ལ་སོགས་པ་ཅི་ནུས་སུ་བགྲང་ངོ་། །དེ་རྗེས་དཀྱིལ་འཁོར་བསྡུས་ནས་གཏོར་མ་གཏང་བའམ། ཐུན་བཞི་ཀ་ལ་གཏོར་མ་འཕྲོད་ན་རབ། དེ་མ་གྲུབ་ཀྱང་སྲོད་ཐུན་གྱི་མཇུག་ཏུ་གཏོར་མ་རྒྱས་པར་གཏང་དགོས་ཤིང་། གཤེགས་སུ་གསོལ་བ་ལ་སོགས་པ་རང་རང་གི་སྒྲུབ་ཐབས་ནས་འབྱུང་བ་བཞིན་བྱ། རྗེས་བསྔོ་བ་སྨོན་ལམ་རྣམ་པར་དག་པ་བཏབ་ཅིང་། ཁ་ཟས་ཀྱི་རྣལ་འབྱོར་ལ་སོགས་པ་སྒྱུ་མ་རྨི་ལམ་ལྟ་བུའི་ཚུལ་གྱིས་ལོངས་སྤྱོད་དོ། །ལྷའི་ང་རྒྱལ་དང་མ་བྲལ་བའི་ངང་ནས། གཏོར་མ་གཏོང་བ། སཙྪྭ་གདབ་པ། མདོ་འདོན་པ་སོགས་དགེ་བས་དུས་འདའ་བར་བྱའོ། །དེ་ལྟར་བསྙེན་པ་ཐམས་ཅད་ཡོངས་སུ་རྫོགས་ནས་སྦྱིན་སྲེག་ཕྱོགས་གཅིག་ཏུ་བླུག་པ་དང་། ཉིན་བཞིན་བསྙེན་པ་བྱེད་ཅིང་མཚན་བཞིན་དེའི་བཅུ་ཆའི་སྦྱིན་སྲེག་བླུགས་ནས་བསྙེན་པ་དང་ཚར་མཉམ་བྱེད་པའི་ལུགས་གཉིས་བཤད་པས་གང་བདེ་བྱས་པས་འོང་ཞིང་། དེའི་ལག་ལེན་མཐོང་བ་བརྒྱུད་པ་བཞིན་ལེགས་པར་བྱ་དགོས་ཏེ། རྡོ་རྗེ་མཁའ་འགྲོ་ལས། གསང་སྔགས་མ་བཟླས་འགྲུབ་པ་མེད། །སྦྱིན་སྲེག་མ་བྱས་འབྲས་མི་འབྱུང་། །གསང་སྔགས་འབུམ་ཕྲག་གཅིག་བཟླས་པས། །སྦྱིན་སྲེག་ཁྲི་ཕྲག་བྱ་བར་བཤད། །ཅེས་གསུངས་སོ། །དེ་ལྟ་བུའི་སྦྱོར་དངོས་རྗེས་གསུམ་གི་སྒོ་ནས་གྲངས་ཀྱི་བསྙེན་པ་ཚད་ལྡན་བྱས་ན་གནས་སྐབས་དང་མཐར་ཐུག་གི་འབྲས་བུ་ཚེགས་མེད་པར་འགྲུབ་པར་གསུངས་ཏེ། གནས་སྐབས་ཀྱི་འབྲས་བུ་དམན་པ་ཞི་སོགས་བཞི། །འབྲིང་གྲུབ་ཆེན་བརྒྱད། འབྲིང་གི་མཆོག་མཁའ་སྤྱོད་རིག་འཛིན། སྟོང་འཁོར་ལོས་སྒྱུར་བ་རྣམས་ཀྱང་བསྙེན་པ་སོང་ནས་སྒྲུབ་པས་འགྲུབ་པར་བཤད། མཆོག་གི་དངོས་གྲུབ་ཀྱང་མྱུར་དུ་འགྲུབ་པར་བཤད་དེ། ནཱ་རོ་ཏ་པས། སྒྲུབ་པ་པོ་ཡི་རྣལ་འབྱོར་པས། །ཉི་ཤུ་རྩ་གཅིག་འདི་ལྡན་ན། །ཚེ་གཅིག་མཆོག་དང་ཐུན་མོང་གི །དངོས་གྲུབ་མྱུར་དུ་འགྲུབ་པར་འགྱུར། །ཞེས་གསུངས་སོ། །རྗེ་བཙུན་གོང་མ་རྣམས་ཀྱིས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ནས་བསྐུལ་བའི་ཕྱིར་བཟླས་པ། ཞེས་གསུངས་པའི་དོན་ཡང་དེ་བཞིན་ཡིན་ཞིང་། བསྐུལ་ལུགས་ཀྱང་རྩ་སྔགས་ཀྱིས་སྐུ། སྙིང་པོས་གསུང་། ཉེ་སྙིང་གིས་ཐུགས་བསྐུལ་ཞིང་འབོད་པར་གསུངས་ཏེ། མཁའ་འགྲོ་མ་རྡོ་རྗེ་གུར་ལས། དཔེ་དང་བཅས་པ་གསུངས་པ་ནི། དཔེར་ན་སྐྱེས་བུ་ལ་ལ་ཞིག །སྐད་ཀྱི་ང་རོས་བོས་པ་ན། །མདུན་དུ་ངེས་པ་འོང་བ་བཞིན། །དེ་བཞིན་གཤེགས་དེ་དེ་བཞིན་ཏེ། །ཞེས་གསུངས་པས་སོ། །དེ་བས་ན་སེམས་ཀྱི་རྣམ་གཡེང་སྤངས་ནས་རྩེ་གཅིག་པའི་སྒོ་ནས་བྱས་ན། རྒྱལ་བ་རྣམས་བྱོན་ནས་རྒྱུད་བྱིན་གྱིས་བརླབ་པ་ལ་ཐེ་ཚོམ་མེད་པར་ཤེས་པར་བྱའོ། །རྒྱུད་སྡེ་འོག་མ་གསུམ་པོའི་བསྙེན་པ་བྱེད་ན་ཡང་། ལྷའི་བསྐྱེད་ཆོག་དང་གཙང་སྦྲའི་ཀུན་སྤྱོད་ལ་སོགས་པ་མི་འདྲ་བའི་དམིགས་བསལ་རྣམས་རང་རང་གི་གཞུང་ལྟར་བྱེད་པ་དང་། གཞན་ཐུན་གྱི་གོ་རིམ་དང་དམིགས་པའི་གཅུན་ཐབས་རྣམས་ལ་ཁྱད་པར་མེད་པས་དེ་ལྟར་ཤེས་པར་བྱའོ། །བསྙེན་ཐབས་དངོས་གྲུབ་བུམ་བཟང་འདི། །ཀུན་དགའ་བཟང་པོ་ལ་སོགས་པ། །དཔལ་ལྡན་བླ་མ་དམ་པ་ཡི། །གསུང་དང་གྲུབ་ཐོབ་རྣམས་ཀྱི་གཞུང་། །རྒྱུད་སྡེ་་་་་་མཁའ་འགྲོ་མ་རྡོ་རྗེ་གུར་སོགས་རྣམ་པར་དག་པ་ཡི། །ལུང་གིས་ཅུང་ཟད་གསལ་བྱས་ནས། །ཤཱཀྱའི་དགེ་སློང་རྒྱལ་ཁམས་པ། །བསོད་ནམས་སེང་གེས་བསྡེབས་པ་ལགས། །རང་བཟོའི་ཉེས་པ་མེད་པར་སེམས། །སྐལ་བཟང་ཐར་པ་དོན་གཉེར་བའི། །རིང་ན་བཞུགས་པའི་་་་་་བུདྡྷ་རཏྣ་བླ་མ་བས། །དགོས་ཞེས་གསུང་འཕྲིན་བྱུང་མོད་ཀྱང་། །ཁྱབ་པ་འདུ་བྱེད་དབང་གྱུར་པས། །ཡུན་རིང་མ་གྲུབ་བཟོད་པར་གསོལ། །མ་ནོར་ལམ་མཆོག་བཟང་པོ་ལ། །དད་པ་ངོ་མཚར་ཤིན་ཏུ་ཆེ། །དཀའ་བ་བརྒྱས་རྙེད་དཀའ་བ་ཡི། །དལ་འབྱོར་རིན་ཆེན་ཐོབ་དུས་འདིར། །སྙིང་པོ་ལེན་པར་མ་བྱས་ན། །ཕྱི་ནས་འདི་འདྲ་འཕྲད་རྙེད་དཀའ། །བརྩོན་པ་ཆེན་པོས་འབད་འཚལ་ལོ། །འདི་བགྱིས་པ་ལས་བྱུང་བ་ཡི། །དགེ་བ་དྲི་མེད་གང་ཐོབ་དེས། །བདག་དང་མར་གྱུར་སེམས་ཅན་རྣམས། །དེང་ནས་བྱང་ཆུབ་སྙིང་པོའི་བར། །རྡོ་རྗེ་ཐེག་པའི་ལམ་མཆོག་དང་། །འབྲལ་མེད་བླ་མས་རྗེས་བཟུང་ཞིང་། །བསྙེན་སྒྲུབ་ཚུལ་བཞིན་བྱེད་པ་དང་། །ལམ་གྱི་བར་ཆད་ཀུན་བྲལ་ནས། །རྡོ་རྗེ་འཆང་གི་གོ་འཕང་དེ། །མྱུར་དུ་ཐོབ་པར་བྱ་ཕྱིར་བསྔོ། །འདིས་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་གནས་གྱུར་ཅིག། །།དགེའོ། །དགེའོ། །དགེའོ།། །།

སོག་པོ་བཀའ་བཅུ་པ། གོ་བོ་སངས་རྒྱས་རྒྱལ་མཚན། དྲུང་ཆེན་ཀུན་སྤངས་པ་རྣམས་ལ་གདམས་པ་རེ་རེ་བཞུགས།

སོག་པོ་བཀའ་བཅུ་པ། གོ་བོ་སངས་རྒྱས་རྒྱལ་མཚན། དྲུང་ཆེན་ཀུན་སྤངས་པ་རྣམས་ལ་གདམས་པ་རེ་རེ་བཞུགས།། བློ་ཆོས་ལ་བསྐུལ་བའི་གདམས་པ་དགོས་གསུང་བ། ཉིད་མདོ་སྔགས་ཀྱི་གཞུང་ལུགས་ལ་བབས་ཀྱི་གོ་བ་བཟང་བ་ཡིན་པས་དེ་ཐོག་ནས་གང་ཐོན་མཛད་པས་ཁྱབ། གནད་ཕྲལ་དུ་མཁོ་བ་འགའ་ཞིག་བརྗོད་ན། ཟག་བཅས་འཁོར་བའི་འཁྲུལ་སྣང་འདི་ཉིད་ལ། །འཕྲལ་དུ་ཕུན་ཚོགས་བླང་བྱར་སྣང་བ་ཀུན། །འདུ་བྱེད་སྡུག་བསྔལ་ཉིད་དུ་རྟོགས་བྱས་ནས། །ངེས་པར་འབྱུང་བ་ཐར་ལམ་རྩ་བ་ཡིན། །མར་གྱུར་འགྲོ་བ་འཁོར་བའི་རྒྱ་མཚོ་ཆེར། །སྡུག་བསྔལ་ཆུ་སྲིན་མཆེ་རྣོན་གཙིགས་པ་ཡིས། །རྒྱུན་དུ་བཟུང་བ་འདི་དག་ཐར་འདོད་པའི། །སྙིང་རྗེ་གོམ་པ་ཐེག་ཆེན་རྩ་བ་ཡིན། །དབང་བཞི་རྫོགས་པར་བསྐུར་བའི་བླ་མ་མཆོག །སངས་རྒྱས་ཐམས་ཅད་གདན་གསུམ་ཚང་བ་ཡི། །ལྷ་ཚོགས་སུ་འདུས་གང་གི་སྐུར་མཐོང་ནས། །གསོལ་བ་འདེབས་པ་བྱིན་རླབས་རྩ་བ་ཡིན། །མ་དག་འཁོར་བའི་སྣོད་བཅུད་སྣང་བ་རྣམས། །ལྷག་པའི་ལྷ་ཡི་ངོ་བོར་རང་བཞིན་གྱིས། །རྣམ་པར་དག་ཀྱང་མཚན་རྟོག་བསལ་བའི་ཕྱིར། །ལྷ་རུ་བསྒོམ་པ་བསྐྱེད་རིམ་རྩ་བ་ཡིན། །དམིགས་བཅས་དམིགས་མེད་ཐབས་ལམ་གང་རུང་གིས། །ཡེ་ཤེས་སྐྱེས་ཚེ་དེ་ཡིས་སྣང་བ་ཀུན། །བྱིན་གྱིས་བརླབས་ནས་ཐམས་ཅད་ཡེ་ཤེས་སུ། །བསྒོམ་པ་འདི་ནི་རྫོགས་རིམ་རྩ་བ་ཡིན། །ནང་དུ་ལྟ་བ་སྤྲོས་བྲལ་རྟོགས་གྱུར་ཀྱང་། །ཡི་དམ་ལྷ་བསྒོམ་སྔགས་ཀྱི་བཟླས་པ་སོགས། །ཐབས་ལམ་ཟབ་མོ་ཁྱད་དུ་མི་གསོད་པར། །བརྩོན་པས་བསྒྲུབ་པ་དངོས་གྲུབ་རྩ་བ་ཡིན། །ཐེག་པ་གོང་འོག་ཉམས་ལེན་གནད་རྣམས་ཀུན། །གང་དུ་འདུས་པའི་རྩ་བ་རྟོགས་གྱུར་ཀྱང་། །བག་ཆགས་མཐུག་པོ་རྐྱེན་གྱིས་བསླང་བའི་ཚེ། །ཤིན་ཏུ་གཅེས་པའི་མན་ངག་དྲན་པ་དགོས། །རྙེད་བཀུར་གྲགས་པ་འདོད་པའི་བློ་སྐྱེས་ཏེ། །བདག་ནི་རྙེད་མང་བཀུར་སྟི་དང་བཅས་ཤིང་། །མང་པོ་དགའ་བའི་སྙེམས་པ་བྱུང་གྱུར་ན། །འཆི་ཚེ་འཇིགས་པ་སྐྱེ་བས་སྤོང་བ་གཅེས། །སྙིགས་དུས་ཉོན་མོངས་དྲག་པོས་གང་བ་ཡིས། །འཁོར་ཚོགས་བསྡུ་ཚེ་ལོག་སྒྲུབ་བྱུང་བ་ན། །ཁྱིམ་དུ་གཏེར་ལྟར་དགའ་བའི་བློ་སྐྱེས་ནས། །བཟོད་པས་བྱང་ཆུབ་ལམ་དུ་བསྒྱུར་བ་གཅེས། །བདག་ཉིད་མཐོ་ཞིང་གཞན་དག་དམའ་བར་ནི། །འདོད་པའི་བློ་ལ་འབྲས་བུ་བཟློག་པའི་ཕྱིར། །འགྲོ་ཀུན་སྤྱི་བོའི་ཐོད་བཞིན་ཁུར་བྱས་ནས། །རྟག་ཏུ་དམན་ཆ་འཛིན་པ་ཤིན་ཏུ་གཅེས། །བསམ་པས་དམན་ས་འཛིན་པར་འདོད་ན་ཡང་། །བསོད་ནམས་ཞིང་མཆོག་དགེ་འདུན་འདུས་པའི་ཚེ། །གཙོ་བོ་བསྟན་པའི་རྒྱན་དུ་ཆེ་བའི་ཕྱིར། །གཞན་ངོར་བཀུར་སྟི་དྭང་དུ་ལེན་པ་གཅེས། །དྲན་པ་ཉེར་གཞག་གསུམ་པོ་སངས་རྒྱས་ཀྱི། །ཁྱད་ཆོས་ཡིན་ཡང་མོས་སྤྱི་བསྒྲུབ་དགོས་པས། །འཁོར་གྱི་ཆོན་ཉན་ཀུན་སྤྱོད་རྣམ་པ་གཉིས། །ཆགས་སྡང་ཁོང་ཁྲོས་དབེན་པ་ཤིན་ཏུ་གཅེས། །ནང་དུ་ཐོས་བསམ་སྒོམ་པའི་ཉམས་ལེན་དང་། །ཕྱི་རུ་འཆད་རྩོད་རྩོམ་པའི་ཕྲིན་ལས་རྣམས། །རློམ་སེམས་སྐྱེས་ན་དེ་ཉིད་ཕན་ཆུང་བས། །བྱས་ཞེས་སྙམ་པའི་རློམ་སེམས་མེད་པ་གཅེས། །དེང་སང་དམ་ཆོས་ཚུལ་བཞིན་བསྒྲུབ་པ་ལ། །དུས་ཀྱི་ཤུགས་ཀྱི་བར་ཆོད་སྟོབས་ཆེ་བས། །དེ་དག་བཟློག་ཕྱིར་མཁའ་འགྲོ་ཆོས་སྐྱོང་གི །བསྙེན་སྒྲུབ་མཆོད་གཏོར་རྒྱུན་དུ་བྱ་བ་གཅེས། །ལམ་གྱི་རྩ་བ་རྣམ་བདུན་དང་། །དེ་ལ་གཅེས་པ་རྣམ་བདུན་ལ། །བློ་ཆེན་ཁྱེད་ཀྱིས་འབད་གྱུར་ན། །འདོད་པའི་དོན་མཆོག་འཐོབ་པར་འགྱུར། །ཞེས་ཡི་གེའི་རྟེན་མཚོན་པར་རྗེ་སེམས་དཔའ་ཆེན་པོའི་གདུང་ཐལ་ལས་གྲུབ་པའི་སྤྱན་རས་གཟིགས་ཀྱི་སྐུ་གཅིག་དང་བདུད་རྩི་རིལ་བུ་གཅིག་ལ་རྟགས་འདི་འབྱར་བ་ཕུལ། ཧོར་ཟླ་ལྔ་པའི་ཉེར་བཞི་ལ་ཐུབ་བསྟན་རྣམ་རྒྱལ་ནས་ཕུལ་བ་དགེ་ལེགས་འཕེལ་བར་གྱུར་ཅིག། །།དགེའོ།། ༄། །དགེ་བཤེས་སངས་རྒྱས་རྒྱལ་མཚན་གྱི་ཕྱག་ཏུ་ཕུལ་བ། ཁྱེད་ཁམས་བཟང་པར་ཡུལ་ཕྱོགས་སུ་སླེབ་ཡོད་འདུག་བ་ལེགས། སྤྱིར་སྤྲོས་པ་ཐམས་ཅད་བཅད་ནས་དགེ་སྦྱོར་ལ་དྲིལ་བ་འཐད། འཇིག་རྟེན་ཆོས་བརྒྱད་ཀྱི་རྣམ་རྟོག་བྱུང་བའི་ཚེ་དྲན་ཤེས་བཞིན་གྱིས་ཟིན་པར་བྱས་ནས་མགོ་སྙོམས་པ་འཐད། རློམ་སེམས་བྱུང་ན་དགེ་རྩ་ཆུད་ཟོས་སུ་འགྲོ་བས་ངའོ་སྙམ་པའི་རྣམ་རྟོག་མེད་པ་འཐད། མི་སེམས་དང་བསྟུན་དྲགས་ན་གཞན་གྱི་ངོ་མི་ཟིན་པའི་སྟེང་དུ་རང་དོན་ཉམས་པས་བློ་ཐག་གཅད་པ་འཐད། ཧ་ཅང་གཞན་དང་མ་མཐུན་ན་མཐའ་མི་འཁྱོངས་པས་གཞན་དང་འགྲོགས་དུས་རང་ལུགས་སུ་གཞག་པ་འཐད། གསང་སྔགས་ཀྱི་ཉམས་ལེན་ཐམས་ཅད་ཀྱི་རྩ་བ་ཡིན་པས་དམ་ཚིག་ཚུལ་བཞིན་དུ་བསྲུང་བ་འཐད། དངོས་གྲུབ་ཐམས་ཅད་ཀྱི་རྩ་བ་བླ་མའི་རྣལ་འབྱོར་ལ་འབད་པ་བྱེད་པ་འཐད། སྙིགས་མའི་དུས་སུ་ཆོས་ཚུལ་བཞིན་དུ་བྱེད་པ་ལ་བར་ཆད་འབྱུང་བས་མཁའ་འགྲོ་ཆོས་སྐྱོང་ལ་བསྙེན་སྒྲུབ་བྱེད་པ་འཐད། གདམས་པའི་རྒྱལ་པོ་འཐད་པ་བརྒྱད་ལྡན་འདི། །དད་ཅིང་བརྩོན་པས་ཚུལ་བཞིན་ཉམས་བླངས་ན། །གང་དུ་གནས་ཀྱང་རང་སེམས་བཤེས་གཉེན་ཡིན། །དལ་འབྱོར་ལུས་ལ་འདུན་མ་གྲུབ་པར་མཛོད། །དད་པའི་རྟེན་དུ་སེམས་དཔའ་ཆེན་པོའི་གདུང་ཐལ་ལས་གྲུབ་པའི་སྤྱན་རས་གཟིགས་ཀྱི་སྐུ་དངུལ་གྱིས་བརྒྱན་པ་གཅིག་ཡོད། ཁྱི་ལོ་ཧོར་ཟླ་ལྔ་པའི་ཚེ་བཅུ་ལ་ཐུབ་བསྟན་རྣམ་རྒྱལ་ནས་ཕུལ། །དགེའོ།། ༄། །ན་མོ་གུ་ར་ཝེ། མཐའ་ཡས་འགྲོ་ལ་དམིགས་པའི་ཐུགས་རྗེ་དང་། །མཐའ་བྲལ་ཡང་དག་ལྟ་བའི་གོམ་སྟབས་ཀྱིས། །མཐའ་མེད་འཁོར་བའི་ཕ་མཐའ་བགྲོད་མཁས་པ། །དེད་དཔོན་མཚུངས་མེད་རྗེ་བཙུན་བླ་མ་རྒྱལ། །གང་ཞིག་རྟོགས་ཤིང་གོམས་དང་ལེགས་སྤྱད་ན། །འཁྲུལ་མེད་ལམ་གྱི་ཐེམ་སྐས་ལེགས་འཛེགས་ནས། །རྣམ་གྲོལ་ཐར་པའི་ཁང་བཟང་རྩེར་སོན་པའི། །ལྟ་སྒོམ་སྤྱོད་པའི་གདམས་པ་བཤད་པར་བྱ། །ཉིན་པར་བག་ཆགས་གཉིད་ཀྱིས་བསླད་པ་ལས། །རྨི་ལམ་འཁྲུལ་སྣང་བྱུང་བ་དཔེར་བྱས་ནས། །ཇི་ལྟར་སྣང་བ་འདི་དག་ཐོག་མེད་པའི། །བག་ཆགས་ལས་བྱུང་སེམས་སྣང་ཡིན་པར་སྤྱད། །རྫས་སྔགས་ཀྱིས་ནི་སྣ་ཚོགས་སྒྱུ་མ་ཡི། །རྣམ་འཕྲུལ་ཇི་སྙེད་འབྱུང་བ་དཔེར་བྱས་ནས། །སེམས་སྣང་འདི་དག་ལས་ཀྱི་རྒྱུ་རྐྱེན་གྱིས། །སྣང་བ་ཙམ་ཡིན་ངོ་བོ་ཉིད་ཀྱིས་སྟོང་། །ངོ་བོས་སྟོང་པའི་རང་སེམས་ཡོད་མེད་དང་། །བདེན་དང་མི་བདེན་རྟག་ཆད་སྐྱེ་འགག་སོགས། །གཉིས་འཛིན་སྤྲོས་པའི་མཐའ་ཀུན་དང་བྲལ་བ། །ཐོས་བསམ་ཚུལ་གྱིས་རྟོགས་བྱའི་ལྟ་བ་ཡིན། །ལྟ་བ་དེ་ཉིད་དབང་དང་རིམ་གཉིས་ལས། །བྱུང་བའི་ཡེ་ཤེས་བླ་མའི་བྱིན་རླབས་ཀྱིས། །ནང་ནས་འཆར་བའི་ཉམས་མྱོང་ལ་བརྟེན་ནས། །རྟོགས་ཚུལ་འདི་ནི་རྡོ་རྗེ་ཐེག་པའི་ལུགས། །དེ་ཉིད་གཡོ་བ་མེད་པའི་ཞི་གནས་ཀྱིས། །བྱིང་རྒོད་ལ་སོགས་སྐྱོན་རྣམས་སྤང་བྱས་ནས། །གཟུང་འཇུག་གསལ་དང་རྒྱུན་ཆད་མེད་པར་ནི། །དབེན་པའི་གནས་སུ་གོམས་པ་སྒོམ་པ་ཡིན། །ལྟ་བའི་གནས་ལུགས་རྟོགས་པའི་ཡན་ལག་ཏུ། །སྡོམ་པ་གསུམ་གྱི་བསླབ་བྱའི་དམ་ཚིག་རྣམས། །རྒྱལ་བའི་གསུང་བཞིན་བླང་དོར་མ་ནོར་བར། །ཚུལ་བཞིན་བསྲུང་བ་དང་པོའི་སྤྱོད་པ་ཡིན། །དེ་ལྟར་གོམས་པས་མཉམ་པར་གཞག་པའི་ཚེ། །ཆོས་བརྒྱད་མགོ་སྙོམས་ཉོན་མོངས་བཟློག་པ་ན། །བསླབ་དང་དབང་དང་གྲོལ་བའི་སྤྱོད་པ་ཡིས། །བླང་དོར་མེད་པ་སྤྱོད་པའི་མཆོག་ཡིན་ནོ། །ལྟ་སྒོམ་སྤྱོད་པ་མཐར་ཕྱིན་གྱུར་པའི་ཚེ། །ཤེས་བྱ་ཀུན་ལ་རང་སྣང་ཡེ་ཤེས་ཀྱིས། །སྲིད་དང་ཞི་བ་མཉམ་ཉིད་མངོན་གྱུར་པ། །འདི་ནི་རེ་དོགས་མེད་པ་འབྲས་བུའི་མཆོག །ཚེ་འདིར་སྲེད་ན་འཆི་བ་མི་རྟག་བསྒོམ། །རང་དོན་གཉེར་ན་བདག་གཞན་བརྗེ་བ་བསྒོམ། །བར་ཆད་བྱུང་ན་བླ་མའི་རྣལ་འབྱོར་བསྒོམ། །འདི་དག་སྔར་གྱི་ལམ་གྱི་ཡན་ལག་ཡིན། །ལྟ་སྒོམ་སྤྱོད་འབྲས་ལམ་གྱི་ཡན་ལག་བཅས། །ཉམས་ལེན་གནད་ཀྱི་གདམས་པ་དང་ལྡན་ལ། །ཚུལ་བཞིན་སྦྱིན་པའི་དགེ་ཚོགས་ཅི་མཆིས་པ། །མཁའ་མཉམ་འགྲོ་བས་བྱུང་ཆུབ་ཐོབ་ཕྱིར་བསྔོ། །ཞེས་པ་འདི་ནི་འཇིག་རྟེན་གྱི་བྱ་བ་སྤངས་ནས་ལམ་མཆོག་སྒྲུབ་པ་ལ་དད་པ་དང་ལྡན་པ་དྲུང་ཆེན་ཀུན་སྤངས་པ་ལ། ཤཱཀྱའི་དགེ་སློང་བསོད་ནམས་སེང་གེས་ཕུལ་བའོ། །དགེའོ།། ༄། །མདོ་ཁམས་ལ་འབུལ་སྡུད་རྫོང་དུས་ཀྱི་ཡི་གེ ཨོཾ་སྭ་སྟི། གསུང་རབ་ཀུན་གྱི་རྒྱ་མཚོར་གནས་བཅས་ཤིང་། །དགའ་བཞིའི་ནོར་བུས་རིམ་གཉིས་སྤྱི་བོར་མཛེས། །ཕྲིན་ལས་བཟང་པོའི་ནོར་ལ་དབང་འབྱོར་པ། །རྗེ་བཙུན་བླ་མ་གདེངས་ཅན་དབང་པོ་རྒྱལ། །ཉེས་པའི་དགྲ་ཚོགས་འདམ་བུའི་གྲོང་ཁྱེར་བཅོམ། །སྲིད་ཞིའི་དཔལ་འབྱོར་གསེར་གྱི་དྲྭ་བས་སྤྲས། །ཟུང་འཇུག་བདེ་བའི་ཡན་ལག་བདུན་ལྡན་པ། །སྟོན་པ་གླང་པོ་དེ་ལ་གུས་ཕྱག་འཚལ། །གང་ཞིག་ཐོས་ན་མུ་སྟེགས་རི་དྭགས་བུ། །སྐྲག་མཛད་བདག་མེད་སེང་གེའི་སྒྲ་སྒྲོགས་ཤིང་། །སྐལ་བཟང་གདུལ་བྱའི་གངས་རི་ཉེར་མཛེས་པ། །དམ་ཆོས་སེང་གེའི་སྒྲ་དབྱངས་དེ་ལ་འདུད། །བདུད་དཔུང་བྱེ་བས་སྐེམ་པར་མི་ནུས་ཤིང་། །རྣམ་དག་བསླབ་གསུམ་པདྨོའི་ཕྲེང་བས་བརྒྱན། །འབྱོར་ལྡན་བསོད་ནམས་ཆུ་བོ་འདུ་བའི་གཞི། །དགེ་འདུན་པད་མཚོ་ཆེ་ལ་གུས་ཕྱག་འཚལ། །དེ་ལྟར་བླ་མ་དང་དཀོན་མཆོག་གསུམ་ལ་མཆོད་པར་བརྗོད་པ་སྔོན་དུ་བཏང་སྟེ་དཔལ་ཨེ་ཝྃ་ཆོས་ལྡན་གྱི་གཙུག་ལག་ཁང་ནས་མང་དུ་ཐོས་པའི་དགེ་སློང་བསོད་ནམས་སེང་གེས་མདོ་ཁམས་ཀྱི་སའི་ཆར་བཞུགས་པའི་དཔལ་ལྡན་ས་སྐྱ་པའི་བསྟན་པ་འཛིན་པའི་དགེ་བའི་བཤེས་གཉེན་རྣམས་ཀྱི་སྙན་དུ་ཕུལ་བ། རྗེ་བླ་མ་རྡོ་རྗེ་འཆང་ཆེན་པོ་སངས་རྒྱས་མིའི་གཟུགས་སུ་སྤྲུལ་པ་དེས། བདེ་བར་གཤེགས་པའི་བསྟན་པ་ཡོངས་སུ་རྫོགས་པའི་བཤད་སྒྲུབ་འདུས་པ་དཔལ་ལྡན་ས་སྐྱ་པའི་བཀའ་སྲོལ་མི་ཉམས་པར་བྱ་བའི་ཕྱིར་དང་། ཁམས་གསུམ་གྱི་སེམས་ཅན་ལ་ཕན་བདེ་འབྱུང་བའི་ཕྱིར་དུ་ཡི་དམ་ལྷའི་ལུང་བསྟན་བཞིན་དཔལ་ཨེ་ཝྃ་ཆོས་ལྡན་གྱི་དགོན་པ་བཏབ། རྒྱ་བོད་ཀྱི་རྟེན་བྱིན་རླབས་ཅན་ཕྱག་ཏུ་བྱུང་བ་རྣམས་དང་། གསར་དུ་བཞེངས་པ་ལམ་འབྲས་བླ་མ་བརྒྱུད་པའི་སྐུ་ཚན་པ་གསུམ་དང་། བསྟན་པའི་གཙོ་བོའི་གསེར་སྐུ་ཆེས་ཆེ་བ་ལ་སོགས་པའི་རྟེན་གསུམ་ངོ་མཚར་བ་བྱིན་རླབས་ཀྱི་དཔལ་འབར་བ་རྣམས་ཀྱི་དྲུང་དུ་མར་མེའི་ཕྲེང་བ་ལ་སོགས་པའི་མཆོད་རྫས་ཕུལ་དུ་བྱུང་བ་དང་། རྗེ་བཙུན་གོང་མ་བཞིའི་དུས་ཆེན་གྱི་རྒྱུན་འཛུགས་པར་མཛད། རྗེ་བླ་མ་བདེ་བ་ཅན་དུ་གཤེགས་པའི་རྗེས་སུ། ཆོས་རྗེ་མུས་ཆེན་དཀོན་མཆོག་རྒྱལ་མཚན་ཞེས་མཚན་ཡོངས་སུ་གྲགས་པ་རྣལ་འབྱོར་དབང་ཕྱུག་དང་། ས་ཆེན་གྱི་ཞལ་གཟིགས་པ་དེ་དང་། རྗེ་བླ་མ་ཡབ་སྲས་དེ་གཉིས་ཀྱིས་དུས་གསུམ་མཁྱེན་པའི་མངོན་ཤེས་ཀྱིས་རྒྱལ་ཚབ་དམ་པར་བསྐོས་པ་ཆོས་རྗེ་ཀུན་དགའ་དབང་ཕྱུག་པ་དང་དཔོན་སློབ་གཉིས་ཀྱིས་རྗེ་རྡོ་རྗེ་འཆང་ཆེན་པོའི་ནང་རྟེན་རྗེ་ཉིད་ཀྱི་སྐུ་འདྲ་དང་། སྟོན་པའི་གསེར་སྐུ་ཆེས་ཆེ་བ་དང་། ཕྱི་རྟེན་བདེ་གཤེགས་མཆོད་རྟེན་བརྒྱད། གཙང་ཁང་གི་ནང་དུ་གསེར་འབུམ་དང་བཅས་པ་བཞེངས་ཏེ་དེ་དག་གི་དྲུང་དུའང་མར་མེའི་ཕྲེང་བ་ལ་སོགས་པའི་མཆོད་རྫས་གསར་དུ་བཙུགས། ཟླ་བ་བྱུང་ངོ་ཅོག་གི་ཉེར་ལྔ་ལ་ཟླ་མཆོད་དང་། དུས་ཆེན་ལ་བདེ་དགྱེས་གསང་གསུམ་ལ་སོགས་པའི་དཀྱིལ་འཁོར་ཆེན་པོ་ལྔའི་སྒྲུབ་མཆོད་ཞག་གྲངས་མང་པོ་སྦྲེལ་བ་བཙུགས་པ་འདི་ནི་མཐོང་བ་ཐམས་ཅད་ཀྱིས་མངོན་སུམ་དུ་གྲུབ་ཀྱང་དད་ལྡན་རྣམས་ཀྱི་དད་པ་གསལ་འདེབས་པའི་ཕྱིར་བྲིས་པ་ཡིན། ངེད་ཀྱང་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་པའི་དགོན་པར་སྡེ་སྣོད་གཙོ་བོར་གྱུར་པའི་མདོ་སྔགས་ཀྱི་བཤད་ཉན་སྟོབས་ཆེ་བ་ཚུགས་ཡོད་ནའང་། ངོར་པའི་སློབ་དཔོན་ཆེ་སྒྲེས། ལས་ཚན་གྱི་གྲྭ་པ་ཐམས་ཅད་ཀྱི་གདན་ས་བྱེད་དགོས་གསུང་བ་ནན་ཆེས་བས་བཟློག་མ་ནུས་པ་དང་། རྗེ་བླ་མ་ཡབ་སྲས་ཀྱིས་སངས་རྒྱས་གྱི་བསྟན་པ་ལ་བྱ་བ་བྱེད་ཚུལ་ཆ་ཤས་རེ་ལ་བསམས་ནའང་སྐུ་དྲིན་འཁོར་མེད་དྲན་ནས་མ་འོངས་པ་ན་འདིར་འགྱུར་གྱི་ལྷུས་ཐིངས་པ་མེད་ཀྱང་། གཞན་བྱ་ཐབས་ཀྱང་མ་རྙེད། བློས་དོར་ཡང་མ་ནུས་པས་ཡོས་ལོ་ཧོར་ཟླ་དང་པོའི་ཚེས་ལྔའི་ཉིན་ནས་གདན་སའི་ཁུར་བླངས་པ་ཡིན། ངེད་ཀྱིས་རང་སར་བབ་པའི་ཁུར་ཁུར་བ་འདི་བཞིན་དུ། དད་ལྡན་གྱི་སློབ་ཚོགས་དམ་ཚིག་གི་རྒྱན་གྱིས་མཛེས་ཤིང་རྣམ་དཔྱོད་ཀྱི་བཞིན་རས་གསལ་བ་ཐམས་ཅད་ཀྱིས་ཀྱང་རང་སར་བབ་པའི་ཁུར་ཁུར་དགོས། དེའི་དོན་སྤྱིར་དམ་པའི་ཆོས་ཀྱི་བཤད་སྒྲུབ་ལ་བརྩོན་པ་ཡིན་ནའང་། ད་ལན་སྐབས་སུ་བབ་པ་སྔར་གི་དཀོན་མཆོག་གི་མཆོད་པ་དང་། དུས་མཆོད་ཀྱི་རྒྱུན་རྣམས་མི་ཉམས་པའི་ཕྱིར་དང་། དེ་ལ་བརྟེན་ནས་བསྟན་པ་དར་བ་དང་། སེམས་ཅན་ལ་བདེ་སྐྱེད་འབྱུང་བའི་ཕྱིར་དང་། འབྱོར་ལྡན་རྣམས་ཀྱི་རྒྱུ་ཆེ་ཆུང་གང་ཕུལ་ཡང་ཇི་སྲིད་དཀར་མེ་དང་། དུས་མཆོད་ཀྱི་རྒྱུན་མ་ཆད་ཀྱི་བར་དུ་རྒྱ་མཚོ་ཆེན་པོ་ལ་ཆུ་ཐིགས་ལྟར་དབྱེར་མེད་དུ་འདྲེས་པར་འགྱུར་བས་དེ་དག་ལའང་ཕན་གདགས་པའི་ཕྱིར་དུ་འབུལ་སྡུད་ལ་ས་སྐྱ་བཀའ་བཅུ་པ་སངས་རྒྱས་རྒྱལ་མཚན་དཔོན་སློབ་བཏང་ཡོད་པ་ལ་རང་རང་གི་ཕྱག་རྫས་གང་འབྱོར་འབུལ་བ། སྐབས་སུ་བབ་པའི་སྦྱིན་བདག་བསྐུལ་བ། འགྲོ་འདུག་གི་སྐྱེལ་བསུ། གྲོགས་ལྡན་གྱི་མི་གོ་ཆོད་གང་དགོས་སར་གཏོང་བ་རྣམས་མཛད་པར་ཞུ། འདུས་བྱས་ཀྱི་དགེ་རྩ་རྣམས་ཀྱི་ནང་ནས། བླ་མ་ཞལ་བཞུགས་པའི་དུས་སུ་བསྙེན་བཀུར་ཞབས་ཐོག་དང་། འདས་པའི་རྗེས་སུ་དུས་ཀྱི་མཆོད་པ་གཟུང་བ་འདི་ཉིད་བསོད་ནམས་ཆེ་བ་ཡིན་ཏེ། རྩ་རྒྱུད་བརྟག་གཉིས། གུར། བདེ་མཆོག་རྩ་རྒྱུད་དང་། གསང་བ་འདུས་པའི་རྒྱུད་ལ་སོགས་པ་རྣམས་ལས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་བླ་མ་ལ་རག་ལས་པ་དང་། དུས་གསུམ་གྱི་སངས་རྒྱས་ཐམས་ཅད་མཆོད་པའི་བསོད་ནམས་བླ་མའི་བ་སྤུའི་ཁུང་བུ་གཅིག་ལ་མཐོང་བ་ལ་སོགས་མང་དུ་གསུངས། ཀླུ་སྒྲུབ་ཡབ་སྲས་ཀྱིས་ཀྱང་། མཆོད་པ་ཐམས་ཅད་སྤངས་ནས་ནི། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་འཐོབ་པར་འགྱུར། །གང་གིས་བསྐལ་པ་བྱེ་བར་ནི། །བརྒྱ་ཕྲག་ཏུ་ཡང་རྙེད་དཀའ་བ། །དེ་ཉིད་སངས་རྒྱས་བརྩོན་ལྡན་ལ། །སྐྱེ་བ་འདིར་ནི་སྩོལ་བར་མཛད། །ཅེས་སོགས་མང་དུ་གསུངས། དཔལ་ལྡན་ས་སྐྱ་པཎྜི་ཏའི་ཞལ་ནས་ཀྱང་། དུས་གསུམ་གྱི་སངས་རྒྱས་ཐམས་ཅད་བླ་མ་ལ་འདུས་པས་བླ་མ་གཅིག་པུ་ལ་གསོལ་བ་བཏབ་པས་དུས་གསུམ་གྱི་སངས་རྒྱས་ཐམས་ཅད་ལ་གསོལ་བ་བཏབ་པར་འགྱུར་བའི་ཕྱིར་དང་། རྟེན་འབྲེལ་ཐམས་ཅད་རང་འགྲིག་ཏུ་འགྲོ་བའི་རྒྱུ་མཚན་དེ་ཡིན་ཞེས་གསུངས། དེ་ལྟར་ན་འདི་དཔོན་སློབ་ཀྱི་ལག་ཏུ་གང་འཕྲོད་ཨེ་ཝྃ་དུ་འཕྲོད་ངེས་ཡིན་པས་ཆུད་མི་ཟ། ཨེ་ཝྃ་དུ་གང་འཕྲོད་བླ་མ་སངས་རྒྱས་མཆོད་པས་ངོ་བོ་བཟང་བ་དང་། དུས་མཆོད་ཀྱི་རྒྱུན་ལ་འདྲེས་པས་ཐབས་རྒྱ་ཆེ་བར་ཤེས་པར་བྱས་ནས་རང་རང་གི་འབྱོར་པའི་སྟོབས་བཞིན་དད་པ་དང་བརྩོན་པས་དགེ་བའི་རྩ་བ་ཕུན་སུམ་ཚོགས་པ་བསྒྲུབ་པར་མཛོད་ཅིག ཟླ་གམ་དབང་གི་དཀྱིལ་འཁོར་དབུས་གནས་ཤིང་། །ཡན་ལག་རབ་རྒྱས་རིན་ཆེན་རྒྱན་ཕྲེང་ལྡན། །ཁམས་གསུམ་འདོད་པ་ཀུན་ལ་དབང་སྒྱུར་བ། །འདོད་པའི་རྒྱལ་པོས་དོན་འདི་དགེ་ལེགས་མཛོད། །འོད་ཟེར་དམར་པོའི་ཕྲེང་བས་སྲིད་གསུམ་གསལ། །ཨུཏྤལ་དམར་པོའི་མདའ་གཞུས་ཁམས་གསུམ་འགུགས། །ཁྲོ་ཆགས་བཞད་པའི་སྤྱན་ཟུར་གཡོ་བ་ཅན། །རིག་བྱེད་ལྷ་མོ་དེ་ཡིས་དགེ་ལེགས་མཛོད། །གླང་ཆེན་ཞལ་ལྡན་འཛུམ་ཁྲོའི་མཆེ་བ་གཙིགས། །གཞོན་ནུ་ལང་ཚོ་དར་དམར་ཅོད་པཎ་བཅིངས། །བཅུ་གཉིས་ཕྱག་ཅན་ཞབས་གཉིས་འགྱིང་བག་ཅན། །ཁྲོ་རྒྱལ་དེ་ཡིས་དོན་འདིའི་དགེ་ལེགས་མཛོད། །རྗེ་བཙུན་བརྒྱུད་པར་བཅས་པ་ཐམས་ཅད་ཀྱིས། །བསྟན་དང་བསྟན་འཛིན་བསྲུང་བར་བཀའ་བསྒོས་པའི། །སྲུང་མའི་དབང་པོ་བགྲང་ཡས་ཐམས་ཅད་ཀྱིས། །འགལ་རྐྱེན་བསལ་ཞིང་མཐུན་རྐྱེན་གྲུབ་པར་མཛོད། །ཡོས་ལོ་ཧོར་ཟླ་ལྔ་པའི་ཚེས་གསུམ་གྱི་ཉིན་དགེ་ཞིང་བཀྲ་ཤིས་པའི་ཡི་གེ་འདི་མདོ་ཁམས་ཤར་གྱི་ཕྱོགས་སུ་ཕུལ་བ་དགེ། །།དགེའོ།། ༄། དཀོན་མཆོག་གསུམ་ལ་ཕྱག་འཚལ་ལོ། །གྱད་གཉེར་དགེ་རུ་གསུམ་གྱི་ཡོན་བདག་རྣམས་ཀྱིས་ཐུབ་བསྟན་རྣམ་རྒྱལ་དུ་སྔར་འབྲི་འབུལ་བའི་ཆེད་མཛད་པ་རྣམས་དང་། ད་དུང་འབུལ་བར་འགྱུར་བ་རྣམས་ངོ་མཚར་ཆེ་ཞིང་རྗེས་སུ་ཡི་རང་། འཕྲལ་དུ་ངེད་འཆད་ཉན་བྱེད་པའི་མཐུན་རྐྱེན་དུ་འགྲོ་བས་ཕན་ཞིང་། ཕུགས་ཁྱེད་རང་རྣམས་ལ་ཕན་པ་ཡིན། དེའི་རྒྱུ་མཚན་ལོངས་སྤྱོད་དོན་ཡོད་པ་སྦྱིན་པ་ཡིན། ལུས་དོན་ཡོད་པ་ཕྱག་དང་བསྐོར་བ་ཡིན། ངག་དོན་ཡོད་པ་གཟུངས་སྔགས་ཟབ་མོའི་བཟླས་བརྗོད་ཡིན། སེམས་དོན་ཡོད་པ་དད་པ་དང་སྙིང་རྗེ་བསྒོམ་པ་ཡིན། དལ་འབྱོར་དོན་ཡོད་པ་ཆོས་ཚུལ་བཞིན་སྒྲུབ་པ་ཡིན། ཆོས་སྒྲུབ་པ་ལའང་ཁྱིམ་པའི་རྟེན་ལ་སྒྲུབ་པ་དང་རབ་བྱུང་གི་རྟེན་ལ་སྒྲུབ་པ་གཉིས་ལས། ཕྱི་མ་ཐོས་བསམ་སྒོམ་གསུམ་ལ་གཙོ་བོར་འབད་པ་ཡིན་ཀྱང་དེ་ཁྱིམ་པ་རྣམས་ཀྱིས་མི་ཡོང་། ཁྱིམ་པའི་རྟེན་ལ་བསྒྲུབ་རྒྱུ་དོན་ཡོད་དང་པོ་བཞི་པོ་ཡིན། ལོངས་སྤྱོད་དོན་ཡོད་པའི་སྦྱིན་པའང་སྦྱིན་པ་རྣམ་དག་ཅིག་དགོས། སྦྱིན་པ་རྣམ་དག་ཏུ་འགྱུར་བའི་ཚད་སྦྱིན་བདག་དད་པ་དང་ལྡན་པ་དང་། དངོས་པོ་བཟང་ཞིང་ཕུན་སུམ་ཚོགས་པ་དང་། ཞིང་ཁྱད་པར་དུ་འཕགས་པ་གསུམ་ཡིན་པར་མདོ་ལས་བཤད། དེའི་དང་པོ་ནི་ཁྱེད་རང་རྣམས་འབྲི་འབུལ་བའི་ཀུན་སློང་བླ་མ་དང་དཀོན་མཆོག་ལ་དད་པ་དང་། ཉེ་འབྲེལ་དུས་ལས་འདས་པ་རྣམས་འཁོར་བའི་སྡུག་བསྔལ་ལས་ཐོན་པ་དང་། རང་ཉིད་ཀྱང་ཐར་པའི་ལམ་སྣ་ཟིན་པའི་ཆེད་དུ་འབུལ་བར་བྱའོ་སྙམ་པ་དེ་ཡིན། དངོས་པོ་ཕུན་སུམ་ཚོགས་པ་ནི་དཀོན་མཆོག་གི་དཀར་མེ་དང་། དགེ་འདུན་གྱི་གསོལ་ཚའི་རྡོར་ལ་སོགས་པ་འབྱུང་བའི་གཞི་འབྲི་བཟང་པོ་ཕུལ་བ་དེ་ཡིན། ཞིང་ཕུན་སུམ་ཚོགས་པ་ནི་འཕགས་པའི་གང་ཟག་དང་། ཕ་མ་དང་། ནད་པ་དང་། ཆོས་སྨྲ་བ་ལ་ཕུལ་བའི་ཡོན་གཞལ་དུ་མེད་པར་གསུངས་པའི་ནང་ནས། འདིར་བཞུགས་པའི་དགེ་འདུན་རྣམས་སངས་རྒྱས་ཀྱི་བསྟན་པ་ལ་འཆད་ཉན་འབའ་ཞིག་བྱེད་པའི་ཆོས་སྨྲ་བ་ཤ་དག་ཡིན་པས་སྦྱིན་པའི་ཞིང་ཤིན་ཏུ་བཟང་བ་ཡིན། དེ་ལྟར་སྦྱིན་བདག་དད་པས་ཀུན་ནས་བསླངས་པ། དངོས་པོ་བཟང་པོ་རང་དབང་བའི་ནོར་ཡིན་པ། ཞིང་དམ་པ་ཆོས་སྨྲ་བའི་གང་ཟག་ལ་ཕུལ་བའི་སྦྱིན་པ་འདི་ནི་ཚེ་ཕྱི་མར་ཡི་དྭགས་སུ་སྐྱེ་བ་གཅོད། མིར་སྐྱེས་ནའང་དབུལ་ཞིང་ཕོངས་པ་རྣམས་གཅོད། སྐྱེ་བ་ཐམས་ཅད་དུ་ལོངས་སྤྱོད་ཕུན་སུམ་ཚོགས་པ་ཐོབ། མཐར་ཐུག་སངས་རྒྱས་པའི་ཚེ་ན་ཆོས་དང་ཟང་ཟིང་གི་སྦྱིན་པའི་སྒོ་ནས་སེམས་ཅན་མང་པོ་སྡུད་པའི་རྒྱུར་འགྱུར་བ་ཡིན་ཏེ། མདོ་བསྡུས་པ་ལས། བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། །སྤྱོད་ཚེ་ལོངས་སྤྱོད་མཐའ་ཡས་རྒྱས་པ་འཐོབ་པར་འགྱུར། །སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད། །ཅེས་རྫོགས་པའི་སངས་རྒྱས་གདུལ་བྱ་ཐམས་ཅད་ལ་ཐུགས་བརྩེ་བ་ཅན་དེས་གསུངས་པའོ། །དེས་ན་ཡོན་བདག་རྣམས་ཀྱང་རབ་ཏུ་བྱུང་ནས་ཐོས་བསམ་བྱེད་པ་མ་བྱུང་ཡང་དལ་འབྱོར་གྱི་མི་ལུས་ཐོབ་པ་ཡིན་པས། ཆོས་བྱེད་ལུགས་མང་དུ་ཡོད་པ་ཡིན་ཏེ། བློ་ཕུགས་སྐྱབས་གནས་བླ་མ་དང་དཀོན་མཆོག་ལ་གཏོད། སྐྱབས་འགྲོ་མང་དུ་གྱིས། ཚེ་ཕྱི་མ་འཁོར་བ་དང་ངན་སོང་གི་འཇིགས་པ་ལས་སྐྱོབ། ཚེ་འདིའི་འགལ་རྐྱེན་ཞི་བ་ཡིན། ནམ་དལ་དུས་སུ་མ་ཎི་པདྨེ་བགྲོངས། ཐུགས་རྗེ་ཆེན་པོ་འདི་བོད་ཀྱི་ལྷ་སྐལ་ཡིན་པས་བྱིན་རླབས་ཚད་ལས་མྱུར་བ་ཡིན། དགེ་འདུན་ཞིང་དག་པ་ལ་བསྙེན་བཀུར་གྱིས། བསོད་ནམས་བསག་པའི་ཞིང་མཆོག་ཡིན་པར་སངས་རྒྱས་ཀྱིས་གསུངས་པ་ཡིན། བཀྲེན་པ་དང་། དབུལ་ཕོངས་དང་། ནད་པ་རྣམས་ལ་སྦྱིན་པ་གཏོང་བ་སོགས་ཕན་གང་ཐོགས་གྱིས། ཞིང་ངན་ཡང་བསམ་པ་རྣམ་པར་དག་པས་འབྲས་བུ་བཟང་པོ་འབྱུང་བར་སློབ་དཔོན་དབྱིག་གཉེན་གྱིས་གསུངས་པ་ཡིན། ཕ་མ་རྒན་རྒོན་ལ་ཞབས་ཏོག་ཚུལ་བཞིན་དུ་གྱིས། འདི་སྟོང་ཉིད་སྙིང་རྗེའི་སྙིང་པོ་ཅན་བསྒོམས་པ་དང་བསོད་ནམས་མཉམ་པར་ཇོ་བོ་རྗེས་གསུངས་པ་ཡིན། དོན་མེད་པའི་རི་དྭགས་གསོད་པ་སོགས་སྲོག་གཅོད། ལམ་འགྲུལ་ཉམ་ཆུང་བརྡུང་བ་སོགས་མ་བྱེད། སྲོག་གཅོད་དང་མ་བྱིན་ལེན་ལ་སོགས་པ་མི་དགེ་བ་བཅུའི་འབྲས་བུ་ངན་སོང་དུ་སྐྱེ་བར་གསུངས་པ་ཡིན། མདོར་ན་ལུས་ངག་ཡིད་གསུམ་གྱི་སྒོ་ནས་གཞན་ལ་གནོད་པ་སྤོང་ཅི་ནུས་དང་། གཞན་ལ་ཕན་པ་སྒྲུབ་པ་ཅི་ནུས་གྱིས། ཆོས་ཀྱི་ངོ་བོ་གཞན་ལ་མི་གནོད་པ་དང་གཞན་ལ་ཕན་པ་ཡིན། འདི་དག་ལ་གོ་བ་སྐྱེས་ནས་ཉམས་ལེན་བྱས་ན་རང་ཉིད་འཇིག་རྟེན་གྱི་ཉེ་འབྲེལ་དང་འཇིག་རྟེན་གྱི་བྱ་བ་མ་སྤངས་བཞིན་དུ་ཚེ་ཕྱི་མ་རང་ལ་ཕན་པའི་ཆོས་འགྲུབ་པ་ཡིན། འདི་ངེད་ཀྱི་རང་འདོད་ལ་བརྟེན་པའི་ཁ་མཁས་མཁས་མིན། ད་ལན་གྱད་གཉེར་དགེ་རུ་གསུམ་གྱི་རྒན་གཞོན་ཐམས་ཅད་ཀྱི་མདུན་དུ་ཚར་རེ་བཀླགས་པས་གོ་བ་ཡོད་པ་རྣམས་ལ་དགེ་བའི་བག་ཆགས་གཞག ངེད་ཀྱིས་ཀྱང་ཆོས་བཤད་པའི་སྐལ་བར་འགྲོ་བ་ཡིན། དཀོན་མཆོག་རིན་ཆེན་གསུམ་གྱི་བྱིན་རླབས་དང་། །བདག་གིས་དུས་གསུམ་བསགས་པའི་དགེ་རྩ་ཡིས། །གྱད་གཉེར་དགེ་གསུམ་ཡོན་བདག་ཕོ་མོ་རྣམས། །ངན་སོང་གསུམ་གྱི་གནས་ལས་ཐར་བར་ཤོག །ཁྱད་པར་རྣམ་དག་སྦྱིན་པ་གཏོང་བ་དང་། །དཀོན་མཆོག་སྐྱབས་འགྲོ་གཟུངས་སྔགས་བགྲང་བ་དང་། །གཞན་ལ་གནོད་པ་སྤོང་བའི་སྐྱེ་བོ་རྣམས། །བདེ་ཆེན་ཐར་པའི་ལམ་སྣ་ཟིན་པར་ཤོག །ཚེ་འདིར་དགྲ་དང་ཆོམ་རྐུན་གནོད་པ་དང་། །ཡམས་ནད་ལ་སོགས་ཉེར་འཚེ་ཀུན་ཞི་ནས། །ཇི་ལྟར་འདོད་པའི་ལོངས་སྤྱོད་འཕེལ་བ་དང་། །ཚེ་དང་རིགས་རྒྱུད་རྟག་ཏུ་རྒྱས་པར་ཤོག །ས་ཕོ་ཁྱིའི་ལོ་ཧོར་ཟླ་དྲུག་པའི་ཚེས་བཅོ་བརྒྱད་ལ་ཐུབ་བསྟན་རྣམ་པར་རྒྱལ་བའི་དགོན་པ་ནས་དགེ། །། ༄། །དཔོན་དྲུང་ཆེན་པོའི་དྲུང་དུ་ཞུ་བ། དེང་སང་སྐུ་ཁམས་བཟང་བར་བཞུགས་ལགས་སམ། སྔ་སོར་ཞུ་ཡིག་རེ་ཙམ་འབུལ་འདོད་ཡོད་ལགས་ནའང་། འཕྲོད་དཀའ་བར་འདུག་ཟེར་བ་ཐོས་ནས་མ་ཕུལ་བ་ལགས། ད་ནང་སོ་ནས་ཀྱང་ཐུགས་ཚས་དོར་བ་ཅིག་ནམ་ཡང་མི་འཆར། རྒྱལ་མཁར་རྩེ་ནས་ཀྱང་བཟུ་མེད་དུ་གཏོང་བའི་དགོངས་པ་ཅིག་ཡེ་མེད་མཆི་ནའང་། བྱ་འགྲོ་ས་གཞི་ཆེས་པའི་སྟོབས་ཀྱིས་མྱུར་ལམ་དུ་ཐོན་པ་ཅིག་མ་བྱུང་། ད་དུང་ཀྱང་ཟླ་བ་གཅིག་གཉིས་ཙམ་འགྱང་ཚོད་དུ་འདུག་ན་ཡང་། ཕུགས་སྐྱོན་དུ་འགྲོ་བ་རང་གཅིག་མི་ཡོང་ལས་ཆེ་ལགས། སྤྱིར་འཇིག་རྟེན་གྱི་བྱ་བ་ལ་ཚེ་ཕྱི་མ་ལྟ་སྨོས་ཀྱང་ཅི་དགོས། ཚེ་འདི་ལ་ཡང་སྙིང་པོ་མེད་པ་འདི་གས་གསལ། སྙིང་པོ་ཡོད་ན་དགུང་ལོ་བདུན་ཅུ་ཕན་ཆད་ལ་ཁ་དྲག་པ། དབང་ཆེ་བ། འཁོར་གཡོག་དང་ནོར་རྫས་འཛོམ་པ་ཉམས་སུ་མྱོང་ཡང་། ད་འདི་འདྲ་ཅིག་ཏུ་ཡོད་ཙ་ན་དེ་དག་གང་གིས་ཀྱང་ཕན་པ་མེད་པའི་སྟེང་དུ་གནོད་པ་འབའ་ཞིག་འགྲོ་བ་ལགས། དེ་བས་ཀྱང་ཚེ་ཕྱི་མ་ཤུལ་ཐག་རིང་། འཁོར་བའི་རྒྱ་མཚོ་མཐའ་མེད། ལས་བཟང་ངན་གང་བསགས་ཀྱི་རྣམ་སྨིན་རང་གིས་མྱོང་དགོས། དེར་བཞུགས་པ་དང་། ཚུར་ཐོན་པ་གང་བྱུང་ཀྱང་ད་ཚེ་མཇུག་འདི་ལ་ཡུན་རིང་པོ་མེད། རྒྱུ་མཚན་དེས་ན་ད་སྤྱིར་བདག་འཛིན་དང་ཁྱད་པར་ཚེ་འདི་བློས་ཐོང་། ན་ནིང་ཟླ་བ་བརྒྱད་པ་ནས་དེང་སང་གི་བར་དུ་སྡིག་པ་ཚབས་པོ་ཆེ་བསོག་མི་དགོས་པ་འདི་ཡང་། དཀོན་མཆོག་གི་ཐུགས་རྗེ་ཡིན་སྙམ་པ་མཛོད་ལ། བླ་མ་དང་དཀོན་མཆོག་ལ་ཡིད་ཆེས་པའི་དད་པས་སྐྱབས་འགྲོ་ལན་མང་དུ་བྱ། དེ་རྗེས་ཐོག་མ་མེད་པ་ནས་འཁོར་བའི་སྡུག་བསྔལ་དཔག་ཏུ་མེད་པ་མྱོང་བ་བདག་ཏུ་འཛིན་པས་ལན། ནམ་མཁའི་མཐས་ཁྱབ་ཚད་ཀྱི་སེམས་ཅན་ཐམས་ཅད་དྲིན་ཅན་གྱི་ཕ་མ་འབའ་ཞིག་ཡིན་པས་བདག་འཛིན་ཐུལ་བ་དང་། དྲིན་ལན་གཞལ་དགོས་སྙམ་དུ་བསམ། དེ་ལ་ཐབས་གཞན་མི་འདུག་པས། སེམས་ཅན་ཐམས་ཅད་ཀྱི་རྒྱུ་མི་དགེ་བ་དང་། འབྲས་བུ་སྡུག་བསྔལ་ཐམས་ཅད་བདག་ལ་སྨིན་པར་གྱུར་ཅིག བདག་གི་དགེ་བ་དང་བདེ་བ་ཐམས་ཅད་སེམས་ཅན་ལ་སྨིན་པར་གྱུར་ཅིག་སྙམ་དུ་ཞེ་ཐག་པ་ནས་བསྒོམས། འདི་བསྒོམ་སླ་ཞིང་ཐེག་པ་ཆེན་པོའི་ཆོས་ཀྱི་ཡང་སྙིང་ཡང་ཡིན། ཇོ་བོ་རྗེས་འབྲོམ་སྟོན་པ་ཁོ་ན་ལ་གནང་བའི་ཆོས་ཀྱང་འདི་ཡིན། སློབ་དཔོན་ཀླུ་སྒྲུབ་ཀྱིས། བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཞེས་གསུངས། ཞི་བ་ལྷས། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་གསུངས། གྲུབ་ཆེན་བི་རཱུ་པས། སེམས་ཅན་ཀུན་གྱི་སྡུག་བསྔལ་བདག་ལ་སྨིན། །བདག་གི་བདེ་བས་དེ་དག་བདེ་ཐོབ་ཤོག །ཅེས་གསུངས་པའི་དོན་ཡང་འདི་ཡིན་པས། ཐུགས་དམ་གྱི་སྙིང་པོ་མཛད་པར་ཞུ། དྲུང་འཚོ་བྱེད་པ་དང་ཕྱོགས་ཅིག་ཏུ་བཞུགས་ཡོད་འདུག་པ་ཡི་གེ་ཟུར་པ་མེད་པས་འདི་ག་སྟོན་པར་ཞུ། ད་ལན་གསོལ་ཇ་ཞོ་གང་དང་། གསོལ་བུར་སྒར་མཚོན་གཅིག་ལ་རྟགས་འབྱར་ཆོས་རྗེ་རྐྱང་འདུར་བ་བརྒྱུད་ནས་ཕུལ་ཡོད་པ་འཕྲོད་དུ་རེ། སྦྲུལ་ལོ་ཧོར་ཟླ་བཞི་པའི་ཉེར་བརྒྱད་ལ་ཨེ་ཝཾ་ནས་ཞུས། ན་ནིང་དབུས་ནས་ཕེབས་འཕྲལ་ཕྱག་རྫས་གང་ཡོད་ཀྱི་ཕྱེད་ཙམ་དགེ་རྩ་ལ་བཏང་ན་འདི་ལ་མ་ཐུག་ཙམ་ཅིག་ཡོང་བ་ཡིན་ནའང་དེ་དུས་སྙན་བསྐུལ་འགྲོ་བའི་སྒོ་མི་འདུག ད་ལན་གྱི་ཐུགས་དམ་གྱི་བསྐུལ་མ་འདི་རྣམས་ཐུགས་ལ་འཆང་བ་ཞུ། ཞེས་དཔོན་དྲུང་གཡུང་པ་ལ་གདམས་པའོ། །དགེའོ།། །།

ཀུན་མཁྱེན་བླ་མའི་གསུང་འབུམ་སྨོན་ལམ་གྱི་སྐོར།

ཀུན་མཁྱེན་བླ་མའི་གསུང་འབུམ་སྨོན་ལམ་གྱི་སྐོར་བཞུགས་སོ།། སྭ་སྟི། སངས་རྒྱས་ཀུན་གྱི་གསང་གསུམ་གཅིག་བསྡུས་ནས། །མཐའ་དག་འགྲོ་ལ་དགའ་བདེའི་དཔལ་སྟེར་ཞིང་། །གདམས་པའི་སྙིང་པོས་སྐལ་ལྡན་རྗེས་འཛིན་པ། །བླ་ཆེན་ས་སྐྱ་པ་ལ་མགོས་ཕྱག་འཚལ། །གང་སྐུ་བྱིན་རླབས་རྒྱ་མཚོའི་དཔལ་མངའ་ཞིང་། །གཟི་བརྗིད་ཕུང་པོ་བརྟན་པར་བཞུགས་པ་ཡི། །གཡས་ཕྱོགས་མཁྱེན་པའི་སྒོ་འབྱེད་འཇམ་པའི་དབྱངས། །གཡོན་དུ་གདམས་པས་རྒྱུད་གཏམས་བི་རཱུ་པ། །དེ་དག་མདུན་དུ་འདྲེན་མཆོག་བླ་མ་དང་། །ཚེ་དང་འོད་ཟེར་དཔག་མེད་ལྷ་མཆོག་གཉིས། །འོད་ཟེར་དྲྭ་བས་མཛེས་པའི་གུར་ནང་དུ། །རྗེ་བཙུན་མལ་གྱོ་ཞང་སྟོན་ཆོས་འབར་དང་། །དཀོན་མཆོག་རྒྱལ་པོ་བ་རི་ཐུགས་རྗེ་ཅན། །རྗེ་བཙུན་སྐུ་མཆེད་ཆོས་རྗེ་ཁུ་དཔོན་བཞུགས། །དེ་དག་ཁ་སྐོང་དང་བཅས་བརྒྱུད་པའི་རིམ། །གོང་བསྟར་རིན་ཆེན་མཛེས་པའི་ཁྲི་སྟེང་ན། །སྙན་བརྒྱུད་གདམས་པའི་དཔལ་གྱི་བརྒྱུད་རིམ་དང་། །གཡས་བསྟར་གསེར་གྱི་བ་གམ་བརྩེགས་པའི་སྟེང་། །རྣལ་འབྱོར་གསང་མཐའི་བརྒྱུད་པའི་རིམ་པ་བཞུགས། །གཡོན་བསྟར་ཟླ་དཀར་ཕྲེང་བ་བསྒྲིགས་པའི་སྟེང་། །བྱང་སེམས་སྨོན་འཇུག་བརྒྱུད་པའི་རིམ་པ་དང་། །ཀུན་གྱི་བསྟན་སྲུང་ནག་པོ་ཆེན་པོ་རྣམས། །ཚུལ་བཞིན་བཞེངས་པའི་རྣམ་དཀར་དགེ་བའི་ཚོགས། །གངས་རིའི་ཕུང་པོ་ལྟར་དཀར་གང་ཐོབ་དེ། །འདྲེན་མཆོག་རྩ་བའི་བླ་མ་རྡོ་རྗེ་འཆང་། །ཀུན་མཁྱེན་ཀུན་དགའ་བཟང་པོ་ཡབ་སྲས་གྱི། །ཐུགས་ཀྱི་དགོངས་པ་ཇི་བཞིན་ལེགས་རྫོགས་ནས། །མཁའ་མཉམ་འགྲོ་ལ་བྱིན་རླབས་འཇུག་ཕྱིར་བསྔོ། །ཨེ་ཝྃ་ཆོས་ཀྱི་འབྱུང་གནས་གནས་མཆོག་འདི། །དམ་པའི་ཆོས་དང་ལོངས་སྤྱོན་ཀུན་ལྡན་ཞིང་། །ཉེ་བར་འཚེ་བ་མཐའ་དག་རབ་ཞི་ནས། །སྲིད་ཞིའི་དཔལ་འབྱོར་མ་ལུས་རྒྱས་པར་ཤོག །ས་ཕོ་འབྲུག་གི་ལོ་ལ་ཤཱཀྱའི་དགེ་སློང་བསོད་ནམས་སེང་གེས་བསྒྲུབ་པའོ།། །།དགེའོ།། ༈ །།བླ་མ་ཉིད་ཀྱིས་བཞེངས་པའི་གསུང་ངག་བརྒྱུད་པའི་བྲིས་སྐུའི་ངོས་ནས་བཤུས་ཏེ་བྲིས་པའི་བརྒྱུད་འདེབས།། ༄༅། །ཨོྃ་སྭ་སྟི། ཟུང་འཇུག་མཆོག་གི་ས་བརྙེས་རྡོ་རྗེ་འཆང་། །གསང་བ་ཀུན་བདག་ཡེ་ཤེས་མཁའ་འགྲོའི་གཙོ། །ཕུང་སོགས་རྣམ་དག་གདན་གསུམ་ཚང་བ་ཡི། །སྐུར་བསྐྱེད་དཀྱིལ་འཁོར་ལྷ་ལ་གུས་ཕྱག་འཚལ། །མཐུ་སྟོབས་བསམ་ཡས་དཔལ་ལྡན་བིརྺ་པ། །རྡོ་རྗེའི་ཚིག་གིས་རྣམ་གྲོལ་ནག་པོ་པ། །བདེ་སྟོང་མཆོག་གི་དབང་ཕྱུག་ཌཱ་མ་རུ། །གཉིས་སྤངས་སྤྱོད་པ་མཛད་ལ་གུས་ཕྱག་འཚལ། །གངས་ཅན་འདུལ་མཛད་ག་ཡ་དྷ་ར་དཔལ། །དམ་ཆོས་གཏེར་མཛོད་བླ་ཆེན་འབྲོག་མིའི་ཞབས། །ནུས་མཐུ་མཐར་ཕྱིན་སེ་སྟོན་ཀུན་རིག་དང་། །ཡོན་ཏན་མངའ་བརྙེས་ཆོས་འབར་ལ་ཕྱག་འཚལ། །འགྲོ་ཀུན་ཐུགས་རྗེས་དགའ་མཛད་སྤྱན་རས་གཟིགས། །རྒྱལ་བའི་ཡེ་ཤེས་སྙིང་པོ་འཇམ་པའི་དབྱངས། །གསང་གསུམ་ཀུན་འདུས་གསང་བདག་རྡོ་རྗེ་འཛིན། །རྗེ་བཙུན་ས་སྐྱ་པ་ལ་གུས་ཕྱག་འཚལ། །མི་ཐུབ་ཟླ་བའི་སྤྲུལ་པ་བསོད་ནམས་རྩེ། །རྡོ་རྗེ་འཛིན་ས་བདུན་བརྙེས་གྲགས་པའི་མཚན། །འཇམ་དབྱངས་མི་ཡི་དོན་མཛད་ཆོས་ཀྱི་རྗེ། །བླ་ཆེན་འཕགས་པའི་ཞབས་ལ་གུས་ཕྱག་འཚལ། །སྒྲུབ་པའི་རྒྱལ་མཚན་ལེགས་འཛིན་ཚོགས་སྒོམ་པ། །ཉམས་དང་རྟོགས་པ་མཐར་ཕྱིན་ཉན་ཆེན་པ། །སྙན་བརྒྱུད་གདམས་པའི་མཛོད་འཛིན་དཀོན་མཆོག་དཔལ། །རིམ་གཉིས་མཐར་ཕྱིན་བྲག་ཕུག་པ་ལ་འདུད། །འགྲོ་བའི་བླ་མ་བསོད་ནམས་རྒྱལ་མཚན་དཔལ། །མདོ་རྒྱུད་ཀུན་མཁྱེན་མཚུངས་མེད་རི་ཁྲོད་པ། །སྙན་བརྒྱུད་གདམས་པའི་བདག་པོ་དཔལ་ལྡན་པ། །སྦས་པའི་རྣལ་འབྱོར་བུདྡྷ་ཤྲཱི་ལ་འདུད། །གསུང་རབ་ཀུན་འཛིན་མཁྱེན་པའི་གཏེར་མངའ་བ། །ཀུན་དགའ་བཟང་པོའི་ཞབས་ལ་ཕྱག་འཚལ་ལོ། །འགྲོ་བ་ཀུན་འཛིན་ཐུགས་རྗེའི་གཏེར་མངའ་བ། །དཀོན་མཆོག་རྒྱལ་མཚན་ཞབས་ལ་ཕྱག་འཚལ་ལོ། །གྲོང་ཁྱེར་གསུམ་འཇིག་ཐུབ་བསྟན་གྲོང་ཁྱེར་སྐྱོང་། །འཇིགས་རུང་ཞལ་གདངས་འཇིགས་རུང་གད་རྒྱང་སྒྲོགས། །དཔུང་ཆེན་ནུས་མཐུས་བདུད་ཀྱི་དཔུང་ཆེན་འཇོམས། །བསྟན་སྲུང་ཁྱོད་ཀྱིས་བསྟན་པ་འདི་སྐྱོང་ཤིག། ༈ །།སྡེ་པ་ཨ་སེང་པས་གསུང་ངག་བརྒྱུད་པའི་གསེར་སྐུ་ཕུལ་དུས་ཀྱི་ཕྱག་རྟགས།། ༄༅། །ན་མོ་གུ་ར་ཝེ། དཀྱིལ་འཁོར་ཀུན་གྱི་དབང་བསྐུར་གནས་སུ་ནི། །རོལ་བས་དགའ་བའི་རིགས་བདག་ཚུལ་འཛིན་ཅིང་། །དངོས་གྲུབ་བཟང་པོའི་དཔལ་གྱིས་ལྷམ་མེ་བ། །འདྲེན་མཆོག་བླ་མའི་ཞབས་རྡུལ་སྤྱི་བོས་མཆོད། །ཆེ་བ་གསུམ་ལྡན་འབྲས་བུ་མཆོག་བརྙེས་རྒྱལ་བའི་ཡབ་གཅིག་རྡོ་རྗེ་འཆང་། །འབྲས་དུས་དབང་གི་ཆུ་བོའི་འབྱུང་གནས་རོལ་བའི་ཡུམ་གྱུར་བདག་མེད་མ། །བདེ་སྟོང་ཆེན་པོའི་གྲུབ་མཐས་འགྲོས་བཞི་ཐིམ་མཛད་རྣལ་འབྱོར་དབང་ཕྱུག་ཞབས། །རྡོ་རྗེའི་ཚིག་གིས་བདེ་སྟོང་ཆུང་ངུའི་གྲུབ་པའི་མཐའ་བརྙེས་ནག་པོ་པ། །སྐད་ཅིག་མ་འདྲེས་གསུང་རབ་ཡོངས་རྫོགས་སྒྲོག་མཛད་ཌཱ་མ་རུ་པ་བ། །འཁོར་འདས་དབྱེར་མེད་གྲུབ་མཐའི་རྩེ་བས་བྱིས་པའི་ཁྲོད་གནས་གཉིས་སྤངས་ཞབས། །མ་དག་སྣང་བ་ཉམས་ཀྱིས་དག་པར་སྒྱུར་མཛད་ག་ཡ་དྷ་ར་དཔལ། །སྐད་གཉིས་སྨྲ་བས་རྒྱུད་གསུམ་ཉམས་ལེན་གཏེར་གྱི་སྒོ་འབྱེད་བླ་ཆེན་འབྲོག །ཚད་མ་བཞི་ལྡན་གདམས་པའི་རྒྱལ་པོས་འགྲོ་བའི་དོན་མཛད་རྗེ་བཙུན་སེ། །ལྟ་སྒོམ་གཉིས་ཀྱི་གདམས་པ་དྲུག་གིས་རང་རྒྱུད་རྣམ་གྲོལ་འབར་བའི་མཚན། །སྙན་བརྒྱུད་བཞི་ལྡན་གདམས་པས་གངས་ཅན་གསལ་མཛད་བརྩེ་ཆེན་ས་སྐྱ་པ། །ཕྱི་ནང་གསང་སོགས་རྟེན་འབྲེལ་ལྔ་ཡིས་ལམ་གྱི་མཐར་སོན་བསོད་ནམས་རྩེ། །ཕྱོགས་ལྷུང་རྣམ་སྤང་ཟུང་འཇུག་ལམ་གྱིས་བདུད་ལས་རྣམ་རྒྱལ་གྲགས་པའི་མཚན། །འདུ་ལུགས་གསུམ་གྱིས་སྒྲོ་སྐུར་བྲལ་བའི་ལམ་བརྙེས་ཆོས་རྗེ་པཎྜི་ཏ། །ཏིང་འཛིན་ཉེ་རྒྱུ་གནས་ལུགས་གསུམ་གྱིས་ཏིང་འཛིན་མཆོག་བརྙེས་འཕགས་པའི་ཞབས། །ཉམས་གསུམ་སྒོ་ནས་གང་ཡང་ཏིང་ངེ་འཛིན་དུ་སྲེལ་མཛད་དཀོན་མཆོག་དཔལ། །བྱུང་རྒྱལ་གནད་ཀྱི་དྲོད་གསུམ་ཚུལ་བཞིན་སྐྱོང་མཛད་རྗེ་བཙུན་བསོད་ནམས་དཔལ། །ཁྲིད་ལུགས་གསུམ་གྱིས་ཏིང་འཛིན་བྱེ་བྲག་རྟོགས་པ་བསོད་ནམས་རྒྱལ་མཚན་དཔལ། །འདུས་པ་གསུམ་གྱིས་ས་མཚམས་ཡིད་གཉིས་བྲལ་བ་དཔལ་ལྡན་པ། །རྟེན་འབྲེལ་རྣམ་གསུམ་རང་ལ་འཇོམ་པས་རེ་དོགས་བྲལ་བ་བུདྡྷ་ཤྲཱི། །དམ་ཚིག་རྣམ་དག་ཟབ་མོའི་ལམ་གྱིས་གསུང་རབ་ཀུན་མཁྱེན་བླ་མ་རྗེ། །མི་མཐུན་ཕྱོགས་སྤངས་བྱིན་རླབས་རྒྱུན་གྱིས་གཞན་གྱི་དོན་མཛད་མུས་པ་རྗེ། །དབང་བཞིའི་བརྡ་ཡིས་དོན་གཉིས་ལྷུན་གྲུབ་ཀུན་དགའི་དབང་ཕྱུག་རྒྱལ་ཚབ་མཆོག །དམ་པའི་མགོན་གྱིས་བཟུང་ཞིང་བརྒྱུད་པའི་སྲོལ་འཛིན་པུཎྱ་སིཾ་ཧ་བདག །རྡོ་རྗེ་མཁའ་འགྲོའི་ཐུགས་རྗེའི་གདེང་གཡོས་ཀུན་གྱི་བསྟན་སྲུང་གཙོ་བོའི་སྐུ། །སྣ་ཚོགས་རིན་ཆེན་ལས་གྲུབ་མཛེས་ཤིང་བརྗིད་པའི་རྣམ་འགྱུར་ཅིར་ཡང་སྟོན། །རིང་བསྲེལ་རྣམ་བཞིའི་སྙིང་པོར་ལྡན་ཞིང་ནོར་སྦྱིན་ཕོ་མོའི་འཁོར་ལོ་བཅས། །རྨད་བྱུང་ཆོ་གས་ལེགས་པར་རབ་གནས་བྱིན་རླབས་གཟི་འོད་འབར་བ་འདི། །བརྗོད་པ་ཀུན་གྱི་རྒྱུར་གྱུར་ཨ་ཡིག་དང་། །རི་དྭགས་ཀུན་གྱི་དབང་པོ་སེང་གེ་དང་། །དོན་མཚོན་བརྡ་ཡི་མཆོག་གྱུར་རྡོ་རྗེ་ལྟར། །ཁྲིམས་གཉིས་བརྟན་པ་མི་ཡི་དབང་པོ་དེས། །སྨོན་ཐང་དཔལ་འབྱོར་རྒྱས་པའི་ཕོ་བྲང་ནས། །ཨེ་ཝྃ་ཆོས་ཀྱིས་མཐོ་བའི་ཁང་བཟང་དུ། །མང་ཐོས་དོན་བཞིན་སྨྲ་བའི་དགེ་སློང་ལ། །རྣམ་དཀར་དད་དང་བརྩོན་པའི་སྟོབས་ཀྱིས་ཕུལ། །འདི་ལས་བསྒྲུབས་པའི་དགེ་ཚོགས་གངྒའི་རྒྱུན། །སྐྱེ་འཕགས་ཀུན་གྱིས་བསྒྲུབས་པའི་བསོད་ནམས་དང་། །མཉམ་དུ་འདྲེས་ནས་འགྲོ་བ་རེ་རེའི་ཕྱིར། །ཀུན་མཁྱེན་རྒྱ་མཚོ་ཆེན་པོར་འཇུག་ཕྱིར་བསྔོ། །གནས་སྐབས་ཀུན་ཏུ་མི་དབང་འཁོར་དང་བཅས། །སྐུ་ཚེ་རིང་ཞིང་ཆབ་སྲིད་རྒྱས་པ་དང་། །སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་སྟོབས་ཀྱིས་སྐྱོང་བར་ཤོག །ཚེ་རབས་ཀུན་ཏུ་འདྲེན་མཆོག་བླ་མའི་ཚོགས། །རྙེད་དང་བཀུར་སྟི་སྒྲུབ་པས་མཆོད་བྱས་ནས། །ཡང་དག་གདམས་པའི་དཔལ་ལ་ལོངས་སྤྱོད་དེ། །རྡོ་རྗེ་འཛིན་ས་མངོན་དུ་འགྱུར་བར་ཤོག །མན་ངག་རྒྱལ་པོ་འདི་ཡང་སྲིད་མཐའི་བར། །རྟག་ཏུ་མི་ཉམས་རྒྱ་མཚོའི་གོས་ཅན་གྱི། །ཕྱོགས་ཀྱི་ཐ་གྲུ་ཀུན་ཏུ་དར་བ་དང་། །རྣམ་མང་འགྲོ་བས་ཉམས་སུ་ལེན་པར་ཤོག །མདའ་གཞུ་ཨུཏྤལ་ལྕགས་ཀྱུས་ཁམས་གསུམ་འགུགས་མཛད་རིག་བྱེད་ལྷ་མོ་དང་། །ཟླ་གམ་དབང་གི་དཀྱིལ་འཁོར་དབུས་གནས་དཔལ་འབྱོར་རྒྱས་མཛད་འདོད་པའི་རྒྱལ། །གླང་ཆེན་ཞལ་ལྡན་འགྱིང་བའི་གར་གྱིས་སྒེག་ལ་དབང་སྒྱུར་ཚོགས་ཀྱིས་བདག །ལྷ་མཆོག་གསུམ་གྱིས་ཨ་སེང་རྡོ་རྗེ་བརྟན་པའི་དགེ་ལེགས་བསྒྲུབ་པར་མཛོད། །འཇིགས་བྱེད་ཞལ་བཞད་ཁྲོས་པའི་གད་རྒྱང་སྒྲོགས་པ་བསྟན་སྲུང་གཙོ་དེ་དང་། །ཤུགས་ཆེན་མ་མཆུ་འཕྱང་བས་དྲག་པོའི་ལས་སྒྲུབ་གདོང་བཞི་གཉན་པའི་མགོན། །རྔམ་ཞིང་མྱུར་བའི་གར་གྱིས་ལས་རྣམས་གྲུབ་མཛད་ཕོ་ཉའི་ཚོགས་རྣམས་ཀྱིས། །ཨ་སེང་རྡོ་རྗེ་བརྟན་པ་མི་མཐུན་ཕྱོགས་ལས་རྣམ་པར་རྒྱལ་བར་མཛོད། །འདི་ཉིད་ཐོག་མར་བསྐུལ་ཞིང་མཐར་ཕྱིན་ནས། །སླར་ཡང་གནས་འདིར་སྤྱན་འདྲེན་རྒྱལ་མཚན་དཔལ། །འདོད་པའི་དོན་རྣམས་ཡིད་བཞིན་འགྲུབ་པ་དང་། །བླ་མའི་ཚོགས་ཀྱི་བྱིན་རླབས་འཇུག་པར་ཤོག། ༈ །།ལམ་འབྲས་ཀྱི་སྨོན་ལམ་བཞུགས།། ༄༅། །ཕུན་ཚོགས་དགེ་ལེགས་ཀུན་འབྱུང་དྲིན་ཅན་རྗེ། །ཕུལ་བྱུང་མཚན་དཔེའི་དཔལ་འབར་རྡོ་རྗེ་འཆང་། །ཕས་རྒོལ་ཚར་གཅོད་མཐུ་སྟོབས་དབང་ཕྱུག་ཞབས། །ཕན་བདེའི་ལམ་སྟོན་རྗེ་བཙུན་ས་སྐྱ་པ། །བརྒྱུད་པར་བཅས་པའི་མཁྱེན་བརྩེའི་སྤྱན་རས་ཀྱིས། །བུ་གཅིག་པ་ལ་བརྩེ་བའི་མ་བཞིན་དུ། །རྣལ་འབྱོར་བདག་ལ་རྒྱུན་དུ་ལེགས་གཟིགས་ནས། །ཡིད་ལ་སྨོན་པའི་གནས་འདི་འགྲུབ་པར་མཛོད། །སྣང་བ་གསུམ་གྱི་མ་དག་པའི་སྣང་བ་འཁོར་བའི་ཉེས་དམིགས་ནི།་་་་་སྲིད་གསུམ་འཁོར་བར་མཐའ་མེད་འགྲོ་བ་རྣམས། །སྡུག་བསྔལ་འདུ་བྱེད་འགྱུར་བའི་སྡུག་བསྔལ་གྱིས། །རྒྱུན་དུ་གཙེས་ཤིང་བདེ་བའི་སྐབས་མེད་པར། །ངེས་འབྱུང་དྲག་པོ་གཏིང་ནས་སྐྱེ་བར་ཤོག །དལ་འབྱོར་རྙེད་དཀའ་ལེགས་བརྒྱས་བསྒྲུབས་པའི་ལུས་རྟེན་ཕུན་ཚོགས་འདི། །རྙེད་པར་དཀའ་ཞིང་འཇིག་པར་སླ་བ་ཡི། །རང་བཞིན་རྟོགས་ནས་སྐད་ཅིག་གཡེལ་མེད་པར། །དལ་འབྱོར་ལུས་ལ་སྙིང་པོ་ལེན་པར་ཤོག །ལས་རྒྱུ་འབྲས།་་་་་ཀུན་རྫོབ་འཁྲུལ་བའི་བདེ་སྡུག་སྣང་བ་རྣམས། །སྔོན་བསགས་ལས་ཀྱི་རྗེས་སུ་འབྲང་བ་ཡི། །ལས་འབྲས་བསླུ་བ་མེད་པའི་ཚུལ་རྟོགས་ནས། །དགེ་སྡིག་བླང་དོར་ཚུལ་བཞིན་བྱེད་པར་ཤོག །སྡུག་བསྔལ་རྒྱ་མཚོར་དྲིན་ཅན་ཕ་མ་རྣམས། །ལས་ཀྱི་ཆུ་བོ་ཆེན་པོས་ཁྱེར་མཐོང་ནས། །ཉམས་ཀྱི་སྣང་བ་ལ་གསུམ་སྨོན་པ་བྱང་ཆུབ་ཀྱི་སེམས།་་་་་བཅོས་མིན་བྱམས་དང་སྙིང་རྗེས་དྲངས་པ་ཡི། །བྱང་ཆུབ་སྨོན་པའི་སེམས་མཆོག་བསྐྱེད་པར་ཤོག །འཇུག་པ་བྱང་ཆུབ་ཀྱི་སེམས།་་་་་ཐེག་ཆེན་ལམ་གྱི་རྩ་བ་ཚུལ་ཁྲིམས་གསུམ། །བདག་གཞན་མཉམ་དང་བརྗེ་བའི་བྱང་ཆུབ་སེམས། །ཕ་རོལ་ཕྱིན་དྲུག་བསྡུ་དངོས་བཞི་ལ་སོགས། །རྒྱ་ཆེན་བྱང་ཆུབ་སྤྱོད་ལ་འཇུག་པར་ཤོག །དོན་དམ་བྱང་ཆུབ་ཀྱི་སེམས།་་་་་རྩེ་གཅིག་གཡོ་བ་མེད་པའི་ཞི་གནས་དང་། །གནས་ལུགས་འཁྲུལ་མེད་རྟོགས་པའི་ལྷག་མཐོང་གཉིས། །ཟུང་འཇུག་ཆུ་བོའི་རྒྱུན་ལྟར་བསྒོམས་པ་ཡིས། །དངོས་འཛིན་འཁྲུལ་པའི་དྲི་མ་སེལ་བར་ཤོག །དག་བའི་སྣང་བ་ནི་འབྲས་བུའི་སྐབས་སུ་འབྱུང་བས་འདིར་མ་བྲིས་ལ། མདོ་སྔགས་མཚམས་སྦྱོར་བ་ནི།་་་་་ཕ་རོལ་ཕྱིན་པའི་ལམ་གྱིས་རྒྱུད་སྦྱངས་ནས། །བརྒྱུད་པའི་བཀའ་ལྡན་རྒྱུད་དོན་མ་ལུས་རིག །སྙིང་རྗེར་ལྡན་ཞིང་དམ་ཚིག་མཆོག་སྲུང་བའི། །རྡོ་རྗེ་སློབ་དཔོན་ཚུལ་བཞིན་མཉེས་བྱེད་ཤོག །སྨིན་བྱེད་ཀྱི་དབང་།་་་་་དེ་སོགས་མཚན་ཉིད་ཀུན་ལྡན་བླ་མ་ཡིས། །རང་ལུས་གཞིར་གནས་དཀྱིལ་འཁོར་རྣམ་བཞི་ལ། །རྨད་བྱུང་ཆོ་གས་དབང་བཞི་བསྐུར་པ་ཡིས། །ལམ་བཟང་བཞི་ཡི་སྣོད་དུ་འགྱུར་བར་ཤོག །དབང་གི་དམ་ཚིག་་་་་དབང་ལས་ཐོབ་པའི་དམ་ཚིག་སྡོམ་པའི་ཚོགས། །སྲོག་དང་བསྡོས་ཏེ་ཚུལ་བཞིན་བསྲུངས་པ་ཡིས། །འགལ་རྐྱེན་ཉེས་ཚོགས་མཐའ་དག་རབ་བཅོམ་ནས། །སྔགས་ཀྱི་ལམ་རྣམས་འགྲུབ་པའི་གཞིར་གྱུར་ཤོག །ལྟ་བ།་་་་་ཕྱི་ནང་དངོས་ཀུན་རང་སེམས་སྣང་བ་ཙམ། །སེམས་འདི་ངོ་བོ་ཉིད་མིན་སྒྱུ་མ་བཞིན། །དེ་ཡང་སྤྲོས་པའི་མཐའ་དང་བྲལ་བ་ཡི། །དབང་གིས་མཚན་པའི་ལྟ་བ་རྟོགས་པར་ཤོག །ཕྱི་བསྐྱེད་རིམ།་་་་་ཐོག་མེད་འཁོར་བའི་བག་ཆགས་ཀྱིས་བསླད་པའི། །མ་དག་འཁྲུལ་བའི་སྣོད་བཅུད་སྣང་བ་རྣམས། །ཐབས་ལ་མཁས་པས་ལྷག་པའི་ལྷར་བསྒོམས་པས། །རྟེན་དང་བརྟེན་པའི་འཁོར་ལོར་འཆར་བར་ཤོག །ནང་བསྐྱེད་རིམ།་་་་་མ་བཅོས་ལྷུན་གྱིས་གྲུབ་པའི་ལུས་ཀྱི་རྩ། །གདན་གསུམ་ཚང་བའི་ལྷ་རུ་བསྒོམས་པ་ཡིས། །རྩ་རླུང་རྒྱལ་བས་བྱིན་གྱིས་བརླབས་བྱས་ནས། །བུམ་དབང་གི་ལྟ་བ།་་་་་སྣང་སྟོང་ཟུང་འཇུག་ཡེ་ཤེས་སྐྱེ་བར་ཤོག །གསང་དབང་གི་ལམ་རླུང་དང་གཏུམ་མོ།་་་་་སྣ་ཚོགས་ཀུན་རྟོག་སྐྱེད་བྱེད་ལས་ཀྱི་རླུང་། །སྦྱོར་བ་བདུན་གྱིས་དབང་དུ་བྱས་པ་ཡིས། །གཏུམ་མོའི་མེ་དྲོད་ཕྱོགས་མེད་རབ་སྦར་ནས། །ལྟ་བ།་་་་་གསལ་སྟོང་ཟུང་འཇུག་ཡེ་ཤེས་སྐྱེ་བར་ཤོག །གསུམ་པའི་ལམ།་་་་་ལས་ཀྱི་ཕྱག་རྒྱ་དངོས་སམ་ཡེ་ཤེས་ལ། །འདུ་ཤེས་གསུམ་ལྡན་སྦྱོར་བས་སྙོམས་ཞུགས་ནས། །ཡས་འབབ་དགའ་བ་བཞི་ཡི་རིམ་གྱིས་ནི། །ལྟ་བ།་་་་་བདེ་སྟོང་ཟུང་འཇུག་ཡེ་ཤེས་སྐྱེ་བར་ཤོག །དབང་བཞི་པའི་ལམ།་་་་་ལུས་དང་ངག་གི་རྦ་རླབས་དབང་གྱུར་ནས། །ཏིང་འཛིན་སེམས་ཀྱི་རྦ་རླབས་གསུམ་བསྒོམས་པས། །གཟུང་འཛིན་གཉིས་ཀྱི་རྦ་རླབས་རེངས་པ་ཡིས། །ལྟ་བ།་་་་་བདེ་སྟོང་མཆོག་གི་ཡེ་ཤེས་སྐྱེ་བར་ཤོག །འདུས་པ་གསུམ་ལ་མཐར་ཕྱིན་ནས་འཕགས་བའི་ས་ལམ་མཚམས་སྦྱོར་བ་ནི།་་་་་དེ་ལྟར་རིམ་གཉིས་བསམ་གཏན་བསྒོམས་པ་ལས། །རང་ལུས་དག་ལ་ཉམས་གསུམ་སྐྱེས་པ་ཡིས། །འདུས་པ་གསུམ་གྱི་ལམ་རྣམས་མཐར་ཕྱིན་ནས། །པད་ཅན་ལུང་བསྟན་སྤྲུལ་སྐུའི་ཞལ་མཐོང་ཤོག །གྲུབ་མཐའ་སྙོགས་ཏེ་བླ་མ་ན་འཕོ་བ་ན་གྲུབ་མཐའ་རེ་རེ་ལ་བླ་མ་གང་ལས། དབང་གང་བླང་། དཀྱིལ་འཁོར་གང་གནས་གྱུར། ཡོན་ཏན་གང་ཐོབ། གྲུབ་མཐའ་གང་སྙོགས་པ་སྟེ་ལྔ་ལྔ་ཡོད་པ་ལས། གྲུབ་མཐའ་དང་པོའི་ལྔ་ནི།་་་་་སྣ་ཚོགས་སྤྲུལ་སྐུར་དབང་བཞི་བླངས་པ་ཡིས། །ཡན་ལག་བདུན་གྱིས་རྩ་རྣམས་མངོན་གྱུར་ནས། །ཡོན་ཏན་བརྒྱ་ཕྲག་བདུན་གྱིས་བརྒྱན་པ་ཡི། །འཁོར་འདས་དབྱེར་མེད་གྲུབ་མཐའ་སྙོགས་པར་ཤོག །གྲུབ་མཐའ་གཉིས་པའི་ལྔ་ནི།་་་་་ཟུང་འཇུག་ལོངས་སྐུར་དབང་བཞི་བླངས་པ་ཡིས། །ཡི་གེ་བྷ་གའི་དཀྱིལ་འཁོར་མངོན་གྱུར་ནས། །རིགས་དྲུག་སོ་སོའི་སྐད་དུ་ཆོས་སྟོན་པའི། །མ་འདྲེས་ཡོངས་རྫོགས་གྲུབ་མཐའ་སྙོགས་པར་ཤོག །གྲུབ་མཐའ་གསུམ་པའི་ལྔ་ནི།་་་་་བདེ་ཆེན་ཆོས་སྐུར་དབང་བཞི་བླངས་པ་ཡིས། །གསང་བ་བདུད་རྩིའི་དཀྱིལ་འཁོར་མངོན་གྱུར་ནས། །ཉི་ཁྲི་ཆིག་སྟོང་རྒྱུ་བ་འགགས་པ་ཡིས། །བདེ་སྟོང་ཆུང་ངུའི་གྲུབ་མཐའ་སྙོགས་པར་ཤོག །གྲུབ་མཐའ་བཞི་པ་ལྔ་ནི།་་་་་དབྱེར་མེད་སྐུ་ལས་དབང་བཞི་བླངས་པ་ཡིས། །ཀུན་ཁྱབ་རླུང་གི་དཀྱིལ་འཁོར་མངོན་གྱུར་ནས། །རྣམ་ཐར་གཉིས་ཀྱི་འབྲས་བུས་བརྒྱན་པ་ཡིས། །བདེ་སྟོང་ཆེན་པོའི་གྲུབ་མཐའ་སྙོགས་པར་ཤོག །ཉེ་རྒྱུས་འབྲས་བུ་ལ་མཚམས་སྦྱོར་བ་ནི།་་་་་བཅུ་གཉིས་ས་ཐོབ་ཕྱག་རྒྱའི་བྷ་གར་ནི། །དུས་གསུམ་བདེ་གཤེགས་བཅུད་འདུས་ཐིག་ལེ་ལས། །འབྲས་དུས་དབང་གི་ཆུ་བོ་བླངས་པ་ཡིས། །གཙུག་ཏོར་མཆོག་ཏུ་འགྲོས་བཞི་ཐིམ་པར་ཤོག །འབྲས་བུ་ལ་གསུམ་ལས། རང་དོན་གྱི་ཆེ་བ་ནི།་་་་་རྟེན་དང་བརྟེན་པ་སྐུ་ལྔར་གནས་གྱུར་ཅིང་། །གཞན་དོན་གྱི་ཆེ་བ་ནི།་་་་་སྣ་ཚོགས་གདུལ་བྱའི་འདོད་རྒུའི་དཔལ་འབྱོར་སྐོང་། །བདག་གཞན་གཉིས་ཀའི་ཆེ་བ་ནི།་་་་་བདག་གཞན་མཉམ་དུ་མངོན་པར་འཚང་རྒྱ་བའི། །དཔག་ཡས་ཡོན་ཏན་ཚོགས་ལ་དབང་འབྱོར་ཤོག །གོ་འཕང་མཆོག་དེ་མ་ཐོབ་དེ་སྲིད་དུ། །ཀུན་མཁྱེན་བླ་མའི་དྲུང་དུ་བདག་སྐྱེ་ཞིང་། །ཉིད་ཐུགས་བརྩེ་བ་ཆེན་པོས་རྗེས་བཟུང་སྟེ། །ལམ་བཟང་འདི་དོན་སྒོམ་པའི་སྐལ་ལྡན་ཤོག །ཚེ་འདི་ཉིད་ལའང་འགལ་རྐྱེན་ཀུན་སྤངས་ཤིང་། །དམ་པས་བསྔགས་པའི་མཐུན་རྐྱེན་ཀུན་ཚང་ནས། །མདོ་རྒྱུད་རྒྱ་མཚོའི་དགོངས་པ་མཐར་ཕྱིན་ཏེ། །བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག །དྲིན་ཆེན་བླ་མ་རྣམས་ཀྱི་བྱིན་རླབས་དང་། །སྐྱབས་ཆེན་དཀོན་མཆོག་གསུམ་གྱི་བདེན་པ་དང་། །དཔལ་ཆེན་ཆོས་སྐྱོང་སྲུང་མའི་ནུས་མཐུ་ཡིས། །རླབས་ཆེན་སྨོན་ལམ་འདི་དག་མྱུར་འགྲུབ་ཤོག །ཅེས་ལམ་འབྲས་བུ་དང་བཅས་པའི་ལམ་གྱི་རིམ་པ་རྣམས་རྒྱུད་ལ་སྐྱེ་བར་སྨོན་ལམ་འདེབས་པ་འདི་ནི་རྗེ་བཙུན་བླ་མ་རྣམས་ཀྱི་བྲན་དུ་གྱུར་པ་དགེ་སློང་རྒྱལ་ཁམས་པ་སེང་གེའི་མཐའ་ཅན་གྱིས་སྦྱར་བའོ།། །།དགེའོ།། ༈ །།རྩ་རྒྱུད་ཕྱི་མའི་བརྒྱད་པར་གསུངས་པའི་སྨོན་ལམ་དབང་བཞི་ལ་སྦྱར་བ།། ༄༅། །ཞལ་བརྒྱད་བཅུ་དྲུག་ཕྱག་ཅན་རིགས་སུ་སྐྱེ། །རྩ་བ་ཡན་ལག་སྲུང་བའི་དམ་ཚིག་ཅན། །ཐ་མལ་རྣམ་པར་རྟོག་པས་སྨྱོ་མེད་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །ཀྱེ་ཡི་རྡོ་རྗེ་ངོ་བོ་ཉིད་གསུམ་སྟོན། །བུམ་དབང་བསྐུར་བའི་བླ་མ་ལ་གུས་ཤིང་། །སེམས་ཅན་ཀུན་ལ་སྙིང་རྗེ་དང་ལྡན་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྡོ་རྗེ་དྲིལ་བུ་འཛིན་དང་མི་འབྲལ་ཞིང་། །ཟབ་མོའི་རྒྱུད་རྒྱལ་ཆོས་ནི་ཀློག་པ་དང་། །བཙུན་མོའི་ཁུ་བ་བདུད་རྩི་ལྔ་ལ་སྤྱོད། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྩ་ཡིག་སྐྱོན་མེད་གསང་དབང་རིགས་སུ་སྐྱེ། །ཐུན་ཆགས་རྣམ་རྟོགས་ལས་སྲུང་དམ་ཚིག་ཅན། །བསམ་གཏན་སྒྲིབ་པ་ཀུན་གྱིས་སྨྱོ་མེད་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །ཀྱེ་ཡི་རྡོ་རྗེ་རང་བྱུང་ཡེ་ཤེས་སྟོན། །གསང་དབང་བསྐུར་བའི་བླ་མ་ལ་གུས་ཤིང་། །སེམས་ཅན་ཀུན་ལ་སྙིང་རྗེ་དང་ལྡན་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྡོ་རྗེ་དྲིལ་བུ་རོ་རྐྱང་དབུ་མར་འཛུད། །ཟབ་མོའི་དྲིལ་ཆེན་སྒྲ་ནི་སྒྲོགས་པ་དང་། །བཙུན་མོའི་ཁུ་བ་ཁམས་དགུ་འདུས་པ་ཅན། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །བདུད་རྩི་སྐྱོན་མེད་གསུམ་པའི་རིགས་སུ་སྐྱེ། །ཐིག་ལེར་གནོད་པ་རྣམ་སྤོང་དམ་ཚིག་ཅན། །གསུམ་པའི་ཉམས་དང་མ་བྲལ་སྨྱོ་མེད་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །ཀྱེ་ཡི་རྡོ་རྗེ་ལྷན་སྐྱེས་ཡེ་ཤེས་སྟོན། །གསུམ་པ་བསྐུར་བའི་བླ་མ་ལ་གུས་ཤིང་། །སེམས་ཅན་ཀུན་ལ་སྙིང་རྗེ་དང་ལྡན་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྡོ་རྗེ་དྲིལ་བུ་མཁའ་གསང་མཉམ་པར་སྦྱོར། །ཟབ་མོ་བདེ་བའི་ཉམས་དང་མི་འབྲལ་ཞིང་། །བཙུན་མོ་ཕྱག་རྒྱ་བསྟེན་དང་མི་འབྲལ་བ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །སྙིང་པོ་སྐྱོན་མེད་བཞི་པའི་རིགས་སུ་སྐྱེ། །ཐིག་ལེ་འཛག་པ་སྲུང་བའི་དམ་ཚིག་ཅན། །སྒྲིབ་པ་གསུམ་དང་བྲལ་བས་སྨྱོ་མེད་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །ཀྱེ་ཡི་རྡོ་རྗེ་ཤིན་ཏུ་རྣམ་དག་སྟོན། །བཞི་པ་བསྐུར་བའི་བླ་མ་ལ་གུས་ཤིང་། །སེམས་ཅན་ཀུན་ལ་སྙིང་རྗེ་དང་ལྡན་པ། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྡོ་རྗེ་དྲིལ་བུ་པད་ཅན་མཁའ་གསང་སྦྱོར། །ཟབ་མོ་བདེ་བའི་ཉམས་དང་མི་འབྲལ་ཞིང་། །བཙུན་མོ་པདྨ་ཅན་གྱི་ཐིག་ལེ་འདྲེན། །སྐྱེ་ཞིང་སྐྱེ་བ་ཀུན་ཏུ་འགྱུར་བར་ཤོག །རྩ་རྒྱུད་ཕྱི་མའི་བརྒྱད་པར་གསུངས་པའི་སྨོན་ལམ་གྱི་ཚིགས་བཅད་གཉིས་པོ་དབང་བཞི་ལ་སྦྱར་བ་རྣལ་འབྱོར་གྱི་དབང་ཕྱུག་ས་སྐྱ་པ་ཆེན་པོའི་གསུང་བཞིན་དུ། ཐར་ལམ་བླ་མ་ལ་རེ་བ་བསོད་ནམས་སེང་གེས་སྦྱར་བའོ།། །།དགེའོ།། ༈ །།བདེ་བ་ཅན་གྱི་སྨོན་ལམ་བཞུགས།། ༄༅། །རྗེ་བཙུན་བླ་མ་ཐུགས་རྗེ་ཆེན་པོ་དང་ལྡན་པ་རྣམས་ལ་ཕྱག་ཚལ་ལོ། །མི་མཇེད་ཞིང་གི་སྟོན་པ་རྫོགས་སངས་རྒྱས། །ཤཱཀྱའི་རྒྱལ་པོས་འཁོར་ཚོགས་རྒྱ་མཚོ་ལ། །སངས་རྒྱས་ཞིང་གིས་བསྔགས་པ་བརྗོད་རྣམས་ལས། །མཆོག་གྱུར་བདེ་བ་ཅན་ལ་གུས་ཕྱག་འཚལ། །ཞིང་དེའི་དབུས་སུ་རིན་ཆེན་ལྗོན་པའི་དྲུང་། །ལྷ་མིའི་སྟོན་པ་འདྲེན་མཆོག་འོད་དཔག་མེད། །པདྨ་རཱ་གའི་ལྷུན་པོ་ལྟར་བརྗིད་ཅིང་། །འོད་ཟེར་བྱེ་བས་བརྒྱན་ལ་གུས་ཕྱག་འཚལ། །ཚངས་པའི་དབྱངས་ཀྱིས་འདུས་པའི་ཚོགས་རྣམས་ལ། །ཐེག་མཆོག་བསྟན་ཚེ་ཏིང་འཛིན་གྱིས་མྱོས་པའི། །དགྲ་བཅོམ་རྣམས་ཀྱང་དམན་པའི་སེམས་སྤངས་ནས། །བྱང་ཆུབ་མཆོག་ཏུ་སྦྱོར་མཛད་ལ་ཕྱག་འཚལ། །སྣ་ཚོགས་སྤྲུལ་པས་སྐད་ཅིག་རེ་རེ་ཞིང་། །སྣ་ཚོགས་ཞིང་གི་མགོན་མེད་འགྲོ་རྣམས་ལ། །སྣ་ཚོགས་མཛད་པས་ཕན་བདེ་ཀུན་སྩོལ་བའི། །ཕྲིན་ལས་བསམ་མི་ཁྱབ་ལ་གུས་ཕྱག་འཚལ། །སྤྱན་རས་གཟིགས་དང་མཐུ་ཆེན་ཐོབ་ལ་སོགས། །སྲས་བཅས་རྒྱལ་བ་ནམ་མཁའི་ལྟོས་གང་ཞིང་། །ཉན་ཐོས་དགེ་འདུན་རྒྱ་མཚོའི་རྡུལ་རྙེད་ཀྱི། །གྲངས་དང་མཉམ་པའི་འཁོར་ཚོགས་ལ་ཕྱག་འཚལ། །རྣལ་འབྱོར་དབང་ཕྱུག་བརྩེ་ཆེན་ས་སྐྱ་པ། །བརྒྱུད་པར་བཅས་པའི་ཡོངས་འཛིན་རྒྱ་མཚོའི་ཚོགས། །རྣམ་མང་དགེ་ཚོགས་རྣམ་དག་སྨོན་ལམ་མཐུས། །ཞིང་དེར་བརྫུས་ཏེ་འཁྲུངས་ལ་མགོས་ཕྱག་འཚལ། །བདག་གཞན་དུས་གསུམ་བསགས་པའི་དགེ་ཚོགས་དང་། །རྩ་བརྒྱུད་བླ་མའི་ཐུགས་རྗེའི་བྱིན་རླབས་དང་། །འོད་དཔག་མེད་མགོན་ཐུགས་བསྐྱེད་རྒྱ་མཚོའི་མཐུས། །བདག་དང་སྲིད་མཚོར་འཁྱམས་པའི་འགྲོ་བ་རྣམས། །ནམ་ཞིག་ཚེ་འདིའི་སྣང་བ་ནུབ་པའི་ཚེ། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་ཞེས་གྲགས་པ་དེར་སྐྱེས་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །མཐོང་མ་ཐག་ཏུ་གསུང་དབྱངས་རྒྱ་མཚོ་ལས། །ཟབ་ཅིང་རྒྱ་ཆེའི་ཐེག་མཆོག་ཐོས་གྱུར་ནས། །དད་དང་ཤེས་རབ་གཟུངས་དང་ཏིང་འཛིན་སོགས། །ཡོན་ཏན་ཚོགས་ཀྱིས་བདག་རྒྱུད་གང་བར་ཤོག །རང་ལུས་ཞིང་གི་རྡུལ་སྙེད་སྤྲུལ་པ་ཡིས། །སྐད་ཅིག་རེ་རེར་ཕྱོགས་བཅུའི་ཞིང་བསྒྲོད་ནས། །ཀུན་ཏུ་བཟང་པོའི་མཆོད་སྤྲིན་རྒྱ་ཆེན་གྱིས། །སངས་རྒྱས་སྲས་བཅས་མ་ལུས་མཆོད་པར་ཤོག །སླར་ཡང་དག་པའི་ཞིང་དེར་མགོན་པོ་དང་། །འདྲེན་མཆོག་བླ་མའི་ཚོགས་རྣམས་མཆོད་བྱས་ནས། །ཐེག་ཆེན་ཆོས་ཚུལ་ཟབ་མོ་ལེགས་ཐོབ་སྟེ། །བྱང་ཆུབ་སྤྱོད་པ་མ་ལུས་མཐར་ཕྱིན་ཤོག །སྙིང་རྗེས་མ་དག་ཞིང་གི་འགྲོ་རྣམས་ལ། །སོ་སོའི་ཡིད་བཞིན་འདོད་རྒུས་ཚིམ་བྱས་ཏེ། །སྐལ་བ་ཇི་བཞིན་ཐེག་པ་གསུམ་བསྟན་ནས། །རྣམ་གྲོལ་ཐར་པའི་ལམ་དུ་འཇོག་པར་ཤོག །ནམ་ཞིག་གོ་འཕང་དམ་པ་མངོན་གྱུར་ཚེ། །འཁོར་དུ་བསྡུས་ནས་ཐེག་མཆོག་བསྟན་པ་ཡིས། །བྱང་ཆུབ་སྤྱོད་པའི་ས་ལ་བཞག་བྱས་ནས། །སངས་རྒྱས་ཡེ་ཤེས་མཆོག་ལ་འགོད་པར་ཤོག །རྒྱལ་བ་འཇིག་རྟེན་དབང་ཕྱུག་ཞབས་འབྲིང་དུ། །ཆོས་ཀྱི་འབྱུང་གནས་ཞེས་བྱའི་དགེ་སློང་གིས། །སངས་རྒྱས་ཞིང་གི་བཀོད་པ་བཟུང་བ་ལྟར། །སྣོད་བཅུད་དག་པའི་ཞིང་བཟང་ཐོབ་པར་ཤོག །རབ་དགའི་སར་གནས་རྒྱལ་བའི་སྲས་རྣམས་ཀྱིས། །དགོངས་པ་གཅིག་ཏུ་བཏབ་པའི་སྨོན་ལམ་མཆོག །བཟང་པོ་སྤྱོད་པའི་སྨོན་ལམ་ཇི་ལྟ་བར། །བདག་དང་འགྲོ་བས་མྱུར་དུ་འགྲུབ་པར་ཤོག །ཅེས་པ་འདི་ནི་འདུན་ཅིང་སྨོན་པའི་གནས་ཐོབ་པར་བྱ་བའི་ཆེད་དུ་ཤཱཀྱའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་ཆོས་གྲྭ་ཆེན་པོར་སྦྱར་བའོ།། །།དགེའོ།། ༈ །།བསྔོ་བ་མདོར་བསྡུས་དང་སྨོན་ལམ་ཆེན་པོ་བཅུ་པ་བཞུགས་སོ།། ༄༅། །བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །ཚོགས་དཔོན་བྱེད་པར་འདོད་པའི་བླ་མ་བདག་གིས། དགེ་འདུན་རྣམས་ཆོས་སྤྱོད་ལེགས་པར་ཟིན། རང་གི་མདུན་དུ་བསྔོ་རྟེན་བཞག་ནས། སྦྱིན་བདག་པུས་མོ་བཙུགས། ཐལ་མོ་སྦྱར་ཏེ་འཁོད་པའི་ཚེ། འདི་སྐད་ཅེས་བརྗོད་པར་བྱ་སྟེ། འོ་དཀོན་མཆོག་རིན་པོ་ཆེ་རྣམ་པ་གསུམ་གྱི་སྐྱབས་ཀྱི་འོག་ནས་འདི་ལྟར་ཞལ་མངོན་སུམ་དུ་གྱུར་པའི་དགེ་འདུན་རྣམས་ལ་ཚ་བའི་བསྙེན་བཀུར་ཞེས་པའམ། གུང་ཚིགས་ཞེས་པའམ། གྲལ་འགྱེད་དང་བཅས་པ་སོགས་གང་ཡོད་ཀྱི་སྐབས་ཐོབ་དང་སྦྱར་ཏེ། བསྔོ་བ་ཞུ་བའི་རྟེན་དང་བཅས་པ་བསྒྲུབས་པའི་སྐབས་དོན་སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། སེམས་ཅན་ཐམས་ཅད་ལ་ཕན་བདེ་འབྱུང་བ་དང་། ཁྱད་པར་དམིགས་པའི་ཡུལ་འདི་ཞེས་བྱ་བའི་སྔོན་འགྲོའམ། གཤེགས་རྫོང་ལ་དམིགས་ནས་བསྒྲུབ་པར་གདའ་བས་རྗེས་སུ་ཡི་རང་། དེ་ལས་བྱུང་བའི་དགེ་བ་བླ་མེད་རྫོགས་པའི་བྱང་ཆུབ་ཏུ་བསྔོ་བར་བགྱིད་པས། དགེ་འདུན་རྣམས་ཀྱིས་བསྔོ་བའི་མཐུན་འགྱུར་ཐུགས་ལ་འདོགས་པར་ཞུ། ཕྱོགས་བཅུ་ན་ཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྦྱིན་པའི་བདག་པོ་ལ་དགོངས་སུ་གསོལ། སྦྱིན་པའི་བདག་པོས་འདི་ལྟར་བགྱིས་པའི་དགེ་བའི་རྩ་བ་འདིས་མཚོན་ནས། གང་དག་ཕྱོགས་བཅུའི་འཇིག་རྟེན་གྱི་ཁམས་ན་འཁོར་བ་དང་མྱ་ངན་ལས་འདས་པས་བསྡུས་པ་རང་དང་གཞན་གྱིས་དུས་གསུམ་དུ་བསགས་པའི་དགེ་བའི་རྩ་བ་ཇི་སྙེད་ཡོད་པ་ཐམས་ཅད་ཕྱོགས་གཅིག་ཏུ་བསྡོམས་པའི་མཐུ་ལ་བརྟེན་ནས། ཚེ་ལས་འདས་པ་རྣམས་ཀྱི་མིང་ནས་སྨོས་ཏེ། འདི་རྣམས་ཀྱིས་ཐོག་དྲངས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག བསོད་ནམས་དང་ཡེ་ཤེས་ཀྱི་ཚོགས་གཉིས་རླབས་པོ་ཆེ་ཡོངས་སུ་རྫོགས་པར་གྱུར་ཅིག རང་དང་གཞན་གྱི་དོན་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་མྱུར་དུ་ཐོབ་པར་གྱུར་ཅིག ཅེས་པ་ལན་གསུམ་བརྗོད། དེ་ལྟ་བུའི་གོ་འཕང་མ་ཐོབ་པའི་སྐྱེ་བ་དང་སྲིད་པ་ཐམས་ཅད་དུ་དམ་པའི་ཆོས་སྒྲུབ་པའི་རྟེན་རྣམ་པར་དག་པ་དལ་འབྱོར་གྱི་ཆོས་བཅོ་བརྒྱད་དང་ལྡན་པའི་མིའི་ལུས་རིན་པོ་ཆེ་ཐོབ་པར་གྱུར་ཅིག རྟེན་དེར་ཡང་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་སྐལ་བ་དང་ལྡན་པར་གྱུར་ཅིག རབ་ཏུ་བྱུང་ནས་ཉེས་ལྟུང་ཕྲ་ཞིང་ཕྲ་བས་ཀྱང་མ་གོས་པར་ཚུལ་ཁྲིམས་ཀྱི་ཕུང་པོ་མཐར་ཕྱིན་པར་གྱུར་ཅིག གཞི་ཚུལ་ཁྲིམས་ལ་གནས་ནས་བདེ་བར་གཤེགས་པའི་གསུང་རབ་ལ་ཐོས་པ་དང་། བསམ་པ་དང་། སྒོམ་པ་ཕྱིན་ཅི་མ་ལོག་པ་སྒྲུབ་པར་གྱུར་ཅིག བསྒྲུབས་པའི་འབྲས་བུས་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག ཅེས་བརྗོད། ཡང་གཤིན་པོར་དགེ་རྩ་རྒྱ་ཆེན་བསྒྲུབས་ནས་བསྔོ་བ་རྒྱས་པར་བྱེད་དགོས་ན། དགོངས་གསོལ་སྔར་དང་འདྲ། སྦྱིན་པའི་བདག་པོས་འདི་ལྟར་བགྱིས་པའི་དགེ་བའི་རྩ་བ་འདིས་མཚོན་ནས། གང་དག་ཕྱོགས་བཅུའི་འཇིག་རྟེན་གྱི་ཁམས་ན་སྦྱིན་པ་ལས་བྱུང་བ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བའི་དགེ་བའི་རྩ་བ་ཇི་སྙེད་ཡོད་པ་རྣམས་དང་། དམིགས་པའི་ཡུལ་རང་ཉིད་ཀྱིས་མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པས་བསྡུས་པའི་དགེ་བའི་རྩ་བ་ཇི་སྙེད་བསགས་པ་རྣམས་དང་། དེ་དག་གི་འབྲེལ་པ་ཤུལ་ན་མཆིས་པ་རྣམས་ཀྱིས་འདིའི་ཆེད་དུ་བླ་མ་དང་དཀོན་མཆོག་ལ་མཆོད་པ་ཕུལ་བ་དང་། དགེ་འདུན་ལ་བསྙེན་བཀུར་བགྱིས་པ་དང་། སྐྱེ་བོའི་ཚོགས་ལ་སྦྱིན་གཏོང་བགྱིས་པ་དང་། དཀྱིལ་འཁོར་ཟབ་མོའི་སྒྲུབ་མཆོད་བགྱིས་པ་དང་། གཟུངས་སྔགས་ཟབ་མོའི་བཟླས་བརྗོད་བགྱིས་པ་ལ་སོགས་པ་རྣམ་དཀར་གྱི་དགེ་བ་ཇི་སྙེད་བསགས་པ་ཐམས་ཅད་ཕྱོགས་གཅིག་ཏུ་བསྡོམས་ཏེ། དམིགས་པའི་ཡུལ་འདི་ཞེས་བྱ་བའི་ཕྱི་བཞིན་དུ་འབྲང་ཞིང་ཕྱི་བཞིན་དུ་རྗེས་སུ་འཇུག་པར་གྱུར་ཅིག རྗེས་སུ་ཞུགས་ནས་རིགས་དྲུག་སོ་སོའི་སྡུག་བསྔལ་བར་དོ་དང་བཅས་པ་ལས་གྲོལ་ནས་མྱུར་དུ་མངོན་པར་རྫོགས་པར་སངས་རྒྱ་བར་གྱུར་ཅིག ཅེས་ལན་གསུམ་བརྗོད། དེ་ལྟ་བུའི་གོ་འཕང་མ་ཐོབ་པའི་སྐྱེ་བ་དང་། སྲིད་པ་ཐམས་ཅད་དུ་དམ་པའི་ཆོས་སྒྲུབ་པའི་རྟེན་རྣམ་པར་དག་པ་ལྷའམ་མིའི་ལུས་རིན་པོ་ཆེ་ཐོབ་པར་གྱུར་ཅིག རྟེན་དེར་ཡང་བསམ་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང་མི་འབྲལ་བར་གྱུར་ཅིག སྦྱོར་བ་ཕ་རོལ་ཏུ་ཕྱིན་པ་དྲུག་ཉམས་སུ་ལེན་པ་དང་མི་འབྲལ་བར་གྱུར་ཅིག ལྟ་བ་རྣམ་པར་དག་པ་བདེན་གཉིས་ཟུང་དུ་འཇུག་པའི་དོན་རྟོགས་པར་གྱུར་ཅིག སྒོམ་པ་རྣམ་པར་དག་པ་ཞི་ལྷག་ཟུང་འབྲེལ་གྱི་ཏིང་ངེ་འཛིན་ལ་གནས་པར་གྱུར་ཅིག སྤྱོད་པ་རྣམ་པར་དག་པ་ཐབས་ཤེས་ཟུང་འཇུག་གི་སྤྱོད་པས་རང་གཞན་གྱི་དོན་སྒྲུབ་པར་གྱུར་ཅིག འབྲས་བུ་རྣམ་པར་དག་པ་སྐུ་གཉིས་ཟུང་དུ་འཇུག་པས་ཕྲིན་ལས་རྒྱུན་མི་ཆད་པར་གྱུར་ཅིག ཅེས་བརྗོད། ཡང་སྤྲོ་ན། རྟེན་དེར་ཡང་གཞི་དད་པ་བརྟན་པོ་དང་ལྡན་པར་གྱུར་ཅིག རྒྱུ་སྙིང་རྗེ་ཆེན་པོ་དང་ལྡན་པར་གྱུར་ཅིག གྲོགས་བརྩོན་འགྲུབ་དྲག་པོ་དང་ལྡན་པར་གྱུར་ཅིག ངོ་བོ་ཤེས་རབ་དྲི་མ་མེད་པ་དང་ལྡན་པར་གྱུར་ཅིག གུས་པ་བསམ་གྱིས་མི་ཁྱབ་པས་བླ་མ་དང་ལྷག་པའི་ལྷ་མཉེས་པར་བྱེད་ནུས་པར་གྱུར་ཅིག ཏིང་ངེ་འཛིན་མུ་མཐའ་མེད་པས་ཞི་གནས་དང་ལྷག་མཐོང་ཟུང་དུ་འཇུག་པར་གྱུར་ཅིག ཐབས་རྨད་དུ་བྱུང་བས་སངས་རྒྱས་ཀྱི་ཞིང་ཡོངས་སུ་སྦྱོང་བར་གྱུར་ཅིག ཕྲིན་ལས་གཞལ་དུ་མེད་པས་སེམས་ཅན་གྱི་རེ་འདོད་ཡིད་བཞིན་དུ་སྐོང་བར་གྱུར་ཅིག ཅེས་བརྗོད། ཡང་སྤྲོ་ན། རྟེན་དེར་ཡང་ཐེག་པ་ཆེན་པོའི་དགེ་བའི་བཤེས་གཉེན་དམ་པ་རྣམས་དང་མཇལ་ཞིང་དེ་དག་རྟག་ཏུ་མཉེས་པར་བྱེད་ནུས་པར་གྱུར་ཅིག ཐེག་པ་ཆེན་པོ་ཟབ་པ་དང་རྒྱ་ཆེ་བ་སྟོན་པའི་དམ་པའི་ཆོས་དང་མི་འབྲལ་ཞིང་དེ་དག་ལ་རྟག་ཏུ་ལོངས་སྤྱོད་པར་གྱུར་ཅིག ཀུན་རྫོབ་དང་དོན་དམ་པའི་བདག་ཉིད་ཅན་གྱི་བྱང་ཆུབ་ཀྱི་སེམས་གཉིས་དང་མི་འབྲལ་བར་གྱུར་ཅིག ལམ་སྒྲུབ་པའི་འགལ་རྐྱེན་བར་དུ་གཅོད་པ་ཕྱི་དང་ནང་གི་འཚེ་བ་ཐམས་ཅད་ཉེ་བར་ཞི་བར་གྱུར་ཅིག ཅེས་བརྗོད་དེ་སྐབས་ཐོབ་དང་སྦྱར་རོ། །ཡང་གང་ཟག་མཆོག་འཇིག་རྟེན་གྱི་འདྲེན་པར་གྲགས་པའི་ཆེད་དུ་བསྔོ་ན། དགོངས་གསོལ་སྔར་དང་འདྲ། སྦྱིན་པའི་བདག་པོས་འདི་ལྟར་བགྱིས་པའི་དགེ་བའི་རྩ་བ་འདིས་མཚོན་ནས། གཞན་ཡང་ཐོས་པ་དང་། བསམ་པ་དང་། སྒོམ་པས་བསྡུས་པའི་དགེ་བའི་རྩ་བ་རང་དང་གཞན་གྱིས་ཇི་སྙེད་བསགས་པ་དང་། ལུས་ལོངས་སྤྱོད་དུས་གསུམ་གྱི་དངོས་པོ་ཐམས་ཅད་གདུལ་བྱའི་དོན་དུ་ཞིང་ཁམས་གཞན་དུ་གཤེགས་པ་དམིགས་པ་མེད་པའི་ཐུགས་རྗེ་དང་མཁྱེན་རབ་ཀྱི་མངའ་བདག་ཆོས་ཀྱི་རྗེ་འདི་ཞེས་བགྱི་བས་ཐོག་དྲངས་བླ་མ་གོང་མ་བདེ་བར་གཤེགས་པ་རྣམས་ཀྱི་སྤྱན་སྔར་དབུལ་བར་བགྱིའོ། །དེ་ལྟར་ཕུལ་བ་ལ་བརྟེན་ནས་རྗེ་བཙུན་དཔལ་ལྡན་བླ་མ་དམ་པ་དེ་དག་གི་ཟག་པ་མེད་པའི་ཐུགས་ཀྱི་དགོངས་པ་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པར་གྱུར་ཅིག སྦྱིན་བདག་གིས་ཐོག་དྲངས་སེམས་ཅན་ཐམས་ཅད་ཀྱི་རྒྱུད་ལ་ཡེ་ཤེས་གཟིགས་པའི་བྱིན་རླབས་དམ་པ་འཇུག་པར་གྱུར་ཅིག དེའི་རྗེས་སུ་ཚེ་འདས་གཞན་གྱི་བསྔོ་བ་དང་སྦྲེལ་དགོས་ན། དེ་དག་གི་བྱིན་གྱིས་རླབས་དང་། འདི་ལྟར་བགྱིས་པའི་དགེ་བའི་རྩ་བའི་མཐུ་ལ་བརྟེན་ནས་ཞེས་སོགས་སྔར་གྱི་གཤིན་བསྔོ་གོང་མ་དང་སྦྲེལ་བ་ལན་གསུམ་བརྗོད། མི་དགོས་ན་སྔ་མ་ཉིད་ལན་གསུམ་བརྗོད། ཡང་མཆོག་བསྔོའི་ཐ་སྙད་དགོས་ཀྱང་དོན་ལ་དཀོར་ལ་སྤྱོད་པ་སྙིང་རྗེའི་ཡུལ་ཡིན་ན། དགོངས་གསོལ་སྔ་མ་དང་འདྲ། བསྔོ་རྒྱུའི་དགེ་རྩ་ཡང་སྔར་གྱི་གཤིན་བསྔོ་གཉིས་པོ་གང་རུང་ཞིག་སྨྲོས་ནས། བླ་མ་འདི་ཞེས་བྱ་བའི་ཐུགས་ཀྱི་དགོངས་པ་ཡོངས་སུ་རྫོགས་པར་གྱུར་ཅིག སྐུ་ཚེ་ཐོགས་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག ས་དང་ལམ་སྒྲུབ་པའི་འགལ་རྐྱེན་བར་དུ་གཅོད་པ་ཐམས་ཅད་ཉེ་བར་ཞི་བར་འགྱུར་ཅིག ས་དང་ལམ་ཐམས་ཅད་བདེ་བླག་ཏུ་བསྒྲོད་ནས་སྐུ་བཞི་ཡེ་ཤེས་ལྔ་དང་ལྡན་པའི་རྒྱལ་བ་རྡོ་རྗེ་འཆང་གི་གོ་འཕངས་ཐམས་ཅད་མྱུར་དུ་མངོན་དུ་བྱེད་ནུས་པ་གྱུར་ཅིག ཅེས་ལན་གསུམ་བརྗོད། དེ་ནས་གསོན་པོའི་དོན་དུ་བསྔོ་ན་དགོངས་གསོལ་མི་དགོས། གཞན་ཡང་འདི་ལྟར་བགྱིས་པའི་དགེ་བའི་རྩ་བ་འདི་དག་གི་མཐུ་དང་ནུས་པ་ལ་བརྟེན་ནས། སྦྱིན་བདག་མིང་འདི་ཞེས་བགྱི་བ་འཁོར་དང་བཅས་པའི་གནས་སྐབས་ཀྱི་འགལ་རྐྱེན་བར་དུ་གཅོད་པ་ཐམས་ཅད་ཉེ་བར་ཞི་བར་གྱུར་ཅིག རླུང་མཁྲིས་དང་བན་ཀན་ལ་སོགས་པའི་ནད་ཐམས་ཅད་ཉེ་བར་ཞི་བར་གྱུར་ཅིག གདོན་བགེགས་དང་འབྱུང་པོ་ལ་སོགས་པའི་གནོད་པ་ཐམས་ཅད་ཉེ་བར་ཞི་བར་འགྱུར་ཅིག འཕྲལ་གྱི་རྐྱེན་དུ་གྱུར་པའི་རྨི་ལམ་ངན་པ་དང་། མཚན་མ་ངན་པ་དང་། བཀྲ་མི་ཤིས་པ་ཐམས་ཅད་ཉེ་བར་ཞི་བར་གྱུར་ཅིག མཐུན་པའི་རྐྱེན་ཚེ་དང་བསོད་ནམས་དང་། དཔལ་དང་འབྱོར་པ་ཐམས་ཅད་ཟླ་བ་ཡར་གྱི་ངོ་བཞིན་དུ་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག ཇི་ལྟར་བསམ་པའི་དོན་ཐམས་ཅད་ཆོས་དང་ལྡན་པ་ཡིད་བཞིན་དུ་འགྲུབ་པར་གྱུར་ཅིག ཡང་གང་ཟག་མཆོག་གི་སྐུ་རིམ་བྱེད་དུས་ཡིན་ན། དཔལ་ལྡན་བླ་མ་དམ་པ་འདི་ཞེས་བྱ་བའམ། ཡང་དག་པའི་དགེ་བའི་བཤེས་གཉེན་འདི་ཞེས་བྱ་བའི་སྐུ་གསུང་ཐུགས་ཀྱི་འགལ་རྐྱེན་བར་དུ་གཅོད་པ་ཐམས་ཅད་ཉེ་བར་ཞི་བར་གྱུར་ཅིག ཅེས་སོགས་གོང་བཞིན་སྦྱར། དེ་ཐམས་ཅད་ཀྱི་མཇུག་ཏུ། གཞན་ཡང་འདི་ལྟར་བགྱིས་པའི་དགེ་བའི་རྩ་བ་འདི་དང་། རང་གཞན་གྱིས་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་ཕྱོགས་གཅིག་ཏུ་བསྡོམས་པའི་མཐུ་ལ་བརྟེན་ནས་ཕན་བདེ་ཐམས་ཅད་ཀྱི་འབྱུང་གནས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག བསྟན་པ་འཛིན་པའི་བླ་མ་གོང་མ་བདེ་བར་གཤེགས་པ་རྣམས་ཀྱི་ཟག་པ་མེད་པའི་ཐུགས་ཀྱི་དགོངས་པ་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པར་གྱུར་ཅིག ད་ལྟ་ཞལ་བཞུགས་པའི་བསྟན་པ་འཛིན་པའི་སྐྱེས་བུ་ཐམས་ཅད་སྐུ་ཁམས་བཟང་ཞིང་སྐུ་ཚེ་རིང་བར་གྱུར་ཅིག རྣམ་པར་དཀའ་བའི་ཕྲིན་ལས་དང་འགྲོ་དོན་ཕྱོགས་བཅུ་ཐམས་ཅད་དུ་དར་ཞིང་རྒྱས་པར་གྱུར་ཅིག ཕྱོགས་བཅུའི་དགེ་འདུན་གྱི་སྡེ་འཕེལ་ཞིང་ཆོས་སྤྱོད་བཅུའི་སྒྲུབ་པ་ཁྱད་པར་ཅན་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག དེ་དག་གི་བྱིན་གྱིས་རླབས་ལ་བརྟེན་ནས་མཁའ་མཉམ་སེམས་ཅན་ཐམས་ཅད་ལ་བདེ་སྐྱིད་ཀྱི་དཔལ་ཕུན་སུམ་ཚོགས་པ་འབྱུང་བར་གྱུར་ཅིག ས་ཕྱོགས་འདི་ཉིད་ཀྱིས་གཙོར་བྱས་ཡངས་པའི་རྒྱལ་ཁམས་ཆེན་པོ་རྣམས་སུ་ཆར་ཆུ་དུས་སུ་འབབ་པར་གྱུར་ཅིག ལོ་ཕྱུགས་རྟག་ཏུ་ལེགས་པར་གྱུར་ཅིག མི་ནད་དང་ཕྱུགས་ནད་ཐམས་ཅད་རྒྱུན་ཆད་པར་གྱུར་ཅིག མཚོན་གྱི་བསྐལ་པ་ཐམས་ཅད་ཉེ་བར་ཞི་བར་གྱུར་ཅིག འཐབ་རྩོད་དང་འཁྲུག་ལོང་ཐམས་ཅད་ཉེ་བར་ཞི་བར་གྱུར་ཅིག སེམས་ཅན་ཐམས་ཅད་ཕན་ཚུན་ཕ་མ་ལྟར་བྱམས་པ་ལ་གནས་པར་གྱུར་ཅིག སེམས་ཅན་ཐམས་ཅད་རང་རང་གི་རྫས་དང་ལོངས་སྤྱོད་དང་དབང་ཕྱུག་དག་གིས་ཆོག་ཤེས་པར་གྱུར་ཅིག ཚོགས་རྫོགས་སྒྲིབ་པ་བྱང་ནས་མྱུར་དུ་མངོན་པར་རྫོགས་པར་སངས་རྒྱ་བར་གྱུར་ཅིག ཅེས་བརྗོད། དེ་ནས། བསོད་ནམས་འདི་ཡིས་ཐམས་ཅད་གཟིགས་ཞེས་སོགས་དང་། འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་སོགས་དང་། འཇམ་དཔལ་ཇི་ལྟར་ཞེས་སོགས་ཚིགས་བཅད་གཉིས་དང་། རྒྱལ་བ་ཀུན་གྱི་སྲས་ཀྱི་ཞེས་སོགས་ལོང་སྐབས་དང་བསྟུན་ནས་བརྗོད། ཁྱད་པར་དུ་གཤིན་དོན་དུ་ཡིན་ན། ངན་སོང་སྡུག་བསྔལ་མི་མྱོང་ཞིང་། །ཞེས་སོགས་དང་། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །ཞེས་སོགས་ཚིགས་བཅད་གཉིས་དང་། བྱང་ཆུབ་སེམས་ནི་རིན་པོ་ཆེ། །ཞེས་སོགས་བརྗོད། མཆོག་བསྔོ་དང་པོ་ལྟ་བུ་ལ་ཡིན་ན། སྐྱེ་བ་ཀུན་ཏུ་ཡང་དག་བླ་མ་དང་། །ཞེས་སོགས་དང་། དགེ་བ་འདི་ཡིས་སྐྱེ་བོ་ཀུན། །ཞེས་སོགས་བརྗོད། དེ་ནས། བསོད་ནམས་སྟོབས་ཆེན་ཞེས་སོགས་དང་། སེམས་ཅན་དེ་དག་ཐམས་ཅད་ནི། །ཞེས་སོགས་དང་། ཐམས་ཅད་ནམ་མཁའི་མཛོད་བཞིན་དུ། །ཞེས་སོགས་བརྗོད། དེ་ནས་འགྲོ་བའི་སྡུག་བསྔལ་སྨན་གཅིག་པོ། །ཞེས་སོགས་བསྟན་པ་དར་ཞིང་རྒྱས་པ་དང་། སེམས་ཅན་ལ་བདེ་སྐྱིད་འབྱུང་བའི་བསྔོ་བ། སྨོན་ལམ། བཀྲ་ཤིས་ཀྱི་མཐའ་རྟེན་དང་བཅས་པ་ཅི་ཤེས་བརྗོད། ནམ་མཁའ་དང་མཉམ་དགེ་རྩ་རྣམས། །ནམ་མཁའི་མཁའ་ཀླས་སེམས་ཅན་ལ། །ནམ་མཁའ་ལྟ་བུར་བསྔོ་བའི་ཚུལ། །ནམ་མཁའ་བཟང་པོས་བསྐུལ་ནས་བྲིས།། །།དགེའོ།། ༄༅། །ཨོཾ་སྭ་སྟི། ཚེ་རབས་ཀུན་ཏུ་དེ་བཞིན་གཤེགས་པ་ལ། །བཀུར་སྟི་རྙེད་དང་སྒྲུབ་པའི་མཆོད་པ་དང་། །རིམ་གྲོ་བྱ་བའི་རྣམ་པ་དཔག་མེད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༡ །རྒྱལ་བའི་དམ་ཆོས་ཀུན་གྱི་ཚིག་དོན་རྣམས། །གཟུང་ཞིང་ཉམས་པ་མེད་པར་བསྲུང་བ་དང་། །ཆོས་ཚུལ་ཟབ་མོ་ཡང་དག་གཟུང་བ་ཡི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༢ །དགའ་ལྡན་གནས་ན་བཞུགས་པ་ནས་བརྩམས་ཏེ། །མྱང་འདས་བར་གྱི་མཛད་པ་ཀུན་སྟོན་པ། །དྲུང་དུ་འགྲོ་ཞིང་ཆོས་ཀུན་སྡུད་བྱེད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༣ །གཞན་དོན་སྒྲུབ་བྱེད་བསྡུ་དངོས་རྣམ་བཞི་དང་། །སངས་རྒྱས་ཆོས་རྣམས་རྫོགས་བྱེད་ཕྱིན་དྲུག་སོགས། །རྒྱལ་སྲས་སྤྱོད་པ་ཐམས་ཅད་ལེགས་སྤྱད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༤ །སེམས་ཅན་ཀུན་ལ་དམ་པའི་ཆོས་བསྟན་པས། །དད་སོགས་དབང་པོས་སྨིན་ནས་འཕགས་པའི་ལམ། །དངོས་སུ་སྐྱེ་ཞིང་སྒྲིབ་པ་སྤོང་རུང་བའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༥ །བ་སྤུའི་ཁུང་བུར་ཞིང་གི་རྡུལ་སྙེད་ཀྱི། །འཇིག་རྟེན་ཁམས་ཀུན་སྤྲུལ་ནས་དེ་དག་ཏུ། །རྒྱལ་དང་རྒྱལ་སྲས་སྤྱོད་པ་ཀུན་སྟོན་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༦ །སྣོད་བཅུད་ཞིང་གི་སྐྱོན་རྣམས་རབ་སྤངས་ནས། །གསེར་གྱི་གཞི་དང་དགེ་བཅུ་སྤྱོད་པ་སོགས། །སངས་རྒྱས་ཞིང་གི་ཡོན་ཏན་ཀུན་ལྡན་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༧ །ཐེག་པ་མཆོག་ལ་འཇུག་ཕྱིར་བྱང་སེམས་དང་། །གཅིག་ཏུ་གཞན་ལ་ཕན་པའི་བསམ་སྦྱོར་ཀུན། །རྣམ་པ་ཀུན་ཏུ་གཅིག་པར་བྱ་བ་ཡི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༨ །ཐོག་མར་སེམས་མཆོག་བསྐྱེད་པ་ནས་བཟུང་སྟེ། །བར་དུ་ཡང་དག་ལམ་གྱི་སྦྱོར་བ་ཀུན། །ཐ་མར་འབྲས་བུ་མཆོག་གི་དོན་ཡོད་པའི། །སྨོན་ལམ་ཆེན་མོ་མྱུར་དུ་འགྲུབ་པར་ཤོག །ཚོགས་གཉིས་རྒྱ་མཚོའི་དཔལ་ལས་ལེགས་བྱུང་བའི། །དོན་གཉིས་མཐར་ཕྱིན་བླ་མེད་རྫོགས་བྱང་ཆུབ། །འགྲོ་བའི་དོན་དུ་མངོན་པར་འཚང་རྒྱ་བའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག ༡༠ །ཐེག་པ་ཆེན་པོའི་མདོ་སྡེ་ལས་ས་དང་པོ་ལ་གནས་པའི་བྱང་སེམས་ཀྱི་སྨོན་ལམ་འབུམ་ཕྲག་གྲངས་མེད་བཅུ་བཏབ་པ་ཐམས་ཅད་སྨོན་ལམ་ཆེན་པོ་བཅུར་འདུས་པར་གསུངས་པའི་དོན་བྱང་ས་དང་། མདོ་སྡེ་རྒྱན་དང་། འཇུག་འགྲེལ་གྱི་དགོངས་པ་ཇི་ལྟ་བ་བཞིན་དུ་གཞན་ཕན་གྱི་བསམ་པ་ཅུང་ཟད་དང་ལྡན་པ་བསོད་ནམས་སེང་གེས་ཆོ་འཕྲུལ་ཆེན་པོའི་རྒྱལ་ཕུར་འཛོམ་པའི་ཉི་མ་ལ་ཚིགས་བཅད་དུ་བསྡེབས་པ་འདི་ཀུན་གྱིས་འཛིན་པ་དང་ཁ་འདོན་དུ་མཛད་པར་ཞུ།། དགེའོ།། ༈ །།སྨོན་ལམ་ཆེན་པོ་བཅུ་པ་བཞུགས།། ༄༅། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །ཁམས་གསུམ་འགྲོ་ལ་བྱིན་རླབས་ཆར་རྒྱུན་གྱིས། །དགེ་ལེགས་ལོ་ཐོག་རྒྱས་མཛད་དྲིན་ཅན་རྗེ། །མཚུངས་མེད་བླ་མ་བརྒྱུད་པར་བཅས་རྣམས་དང་། །ཁྱབ་བདག་རྒྱལ་བ་སྲས་དང་སློབ་མར་བཅས། །སྒྲིབ་མེད་མཁྱེན་པའི་སྤྱན་གྱིས་ལེགས་གཟིགས་ནས། །མཐའ་དག་འགྲོ་ལ་ཕན་དང་བདེ་བའི་ཕྱིར། །སྨོན་ལམ་རྒྱལ་པོ་འདི་ལྟར་བཏབ་པ་རྣམས། །ཚུལ་བཞིན་འགྲུབ་པར་བྱིན་གྱིས་བརླབ་ཏུ་གསོལ། །དུས་གསུམ་གཤེགས་ཤིང་བཞུགས་པའི་སངས་རྒྱས་དང་། །དེ་སྲས་ས་ཆེན་ལ་བཞུགས་བྱང་སེམས་རྣམས། །སྨོན་ལམ་འབུམ་ཕྲག་གྲངས་མེད་བཅུ་བཏབ་པ། །སྨོན་ལམ་ཆེན་པོ་བཅུར་འདུས་འདིར་བརྗོད་བྱ།། ༈ །།བདག་དང་གཞན་གྱིས་འདི་ལྟར་བགྱིས་པའི་རྣམ་དཀར་དགེ་བའི་རྩ་བ་འདི་དག་གིས་ཉེ་བར་མཚོན་ནས། གང་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སོ་སོའི་སྐྱེ་བོ་དང་། འཕགས་པ་ཉན་ཐོས་དང་། རང་སངས་རྒྱས་དང་། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་དང་། བླ་ན་མེད་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མཛད་པའི་དགེ་བའི་རྩ་བ་འཁོར་བ་དང་མྱ་ངན་ལས་འདས་པས་བསྡུས་པའམ། ཟག་པ་དང་བཅས་པ་དང་ཟག་པ་མེད་པས་བསྡུས་པའམ། ཐོས་པ་དང་། བསམ་པ་དང་། སྒོམ་པ་ལས་བྱུང་བའམ། འཆད་པ་དང་། རྩོད་པ་དང་། རྩོམ་པ་ལས་བྱུང་བའམ། སྦྱིན་པ་དང་། ཚུལ་ཁྲིམས་དང་། སྒོམ་པ་ལས་བྱུང་བ་གང་ཅི་ཡང་རུང་སྟེ། འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་དུ་བྱས་པ་དང་། བྱེད་པར་འགྱུར་བ་དང་། དེ་བཞིན་དུ་བྱེད་པའི་བསོད་ནམས་ཐམས་ཅད་གཅིག་ཏུ་བསྡུས་པའི་མཐུ་ལ་བརྟེན་ནས། བདག་ཅག་རྣམས་དང་། དམིགས་པའི་ཡུལ་ཆེ་གེ་མོས་ཐོག་དྲངས་པའི་མར་གྱུར་ནམ་མཁའི་མཐས་གཏུགས་པའི་སེམས་ཅན་ཐམས་ཅད་སྐྱེ་བ་དང་ཚེ་རབས་ཐམས་ཅད་དུ་སངས་རྒྱས་མ་ལུས་པ་ལ་མཆོད་པ་དང་། རིམ་གྲོ་ལྷག་མ་མེད་པ་མཐའ་དག་བྱ་བའི་ཕྱིར་རྣམ་པ་ཐམས་ཅད་ཀྱི་མཆོག་དང་ལྡན་པ་མོས་པ་རྒྱ་ཆེན་པོས་རྣམ་པར་དག་པ་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སངས་རྒྱས་འབྱུང་བ་བགྲངས་པ་ཐམས་ཅད་ལ་མཆོད་པ་དང་། རིམ་གྲོ་ཆེན་པོ་བྱ་བ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག ཚེ་རབས་ཀུན་ཏུ་དེ་བཞིན་གཤེགས་པ་ལ། །བཀུར་སྟི་རྙེད་དང་སྒྲུབ་པའི་མཆོད་པ་དང་། །རིམ་གྲོ་བྱ་བའི་རྣམ་པ་དཔག་མེད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་འགྲོ་བའི་དོན་སླད་དུ། །སྨོན་ལམ་རྒྱལ་པོ་དང་པོ་བཏབ་པ་ལྟར། །བདག་ཀྱང་ལྷག་བསམ་དག་པས་ཚུལ་བཞིན་འདེབས། །འགྲོ་བའི་དོན་ཕྱིར་མྱུར་དུ་འགྲུབ་པར་ཤོག །སངས་རྒྱས་ཕྲིན་ལས་འགྲོ་ལ་འཇུག་པ་དང་། །ཆོས་དབྱིངས་མཁའ་ལྟར་ཀུན་ལ་ཁྱབ་པ་དང་། །ཀུན་རྫོབ་བརྟེན་འབྲེལ་བསླུ་བ་མེད་པའི་མཐུས། །རྒྱ་ཆེན་སྨོན་ལམ་འདི་དག་མྱུར་འགྲུབ་ཤོག ༡ དེ་ལྟར་སངས་རྒྱས་འབྱུང་བ་མཉེས་པར་བྱས་ནས་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་ཆོས་ཀྱི་ཚུལ་ཡང་དག་པར་གཟུང་བ་དང་། སངས་རྒྱས་ཐམས་ཅད་ཀྱི་བྱང་ཆུབ་ཡང་དག་པར་ཡོངས་སུ་གཟུང་བ་དང་། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་བསྟན་པ་ཡོངས་སུ་བསྲུང་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སངས་རྒྱས་འབྱུང་བ་བགྲངས་པ་ཐམས་ཅད་ཀྱི་དམ་པའི་ཆོས་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག རྒྱལ་བའི་དམ་ཆོས་ཀུན་གྱི་ཚིག་དོན་རྣམས། །གཟུང་ཞིང་ཉམས་པ་མེད་པར་བསྲུང་བ་དང་། །ཆོས་ཚུལ་ཟབ་མོ་ཡང་དག་གཟུང་བ་ཡི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། གཉིས་པ་ཞེས་སྦྱར་རོ། ༢ །དེ་ལྟར་དམ་པའི་ཆོས་གཟུང་བའི་སླད་དུ་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་དུ་སངས་རྒྱས་འབྱུང་བ་ཐམས་ཅད་ཀྱིས་དགའ་ལྡན་གྱི་ཕོ་བྲང་ན་བཞུགས་པ་ཐོག་མར་མཛད་དེ། འཕོ་བ་དང་། གཤེགས་པ་དང་། ལྷུམས་ན་བཞུགས་པ་དང་། བལྟམས་པ་དང་། གཞོན་ནུ་རོལ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་། མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། ཡོངས་སུ་མྱ་ངན་ལས་འདས་པ་ཆེན་པོ་སྟོན་པའི་དྲུང་དུ་འགྲོ་ཞིང་མཆོད་པ་དང་། ཆོས་ཀྱིས་ཡང་དག་པར་བསྡུ་བའི་སྦྱོར་བ་སྔོན་དུ་འགྲོ་བར་ཐམས་ཅད་དུས་གཅིག་ཏུ་བསྒྲུབ་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སངས་རྒྱས་འབྱུང་བ་བགྲངས་པ་ཐམས་ཅད་ཀྱི་གཞན་དོན་དུ་འགྲོ་བ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག དགའ་ལྡན་གནས་ན་བཞུགས་པ་ནས་བརྩམས་ཏེ། །མྱང་འདས་བར་གྱི་མཛད་པ་ཀུན་སྟོན་པ། །དྲུང་དུ་འགྲོ་ཞིང་ཆོས་ཀུན་སྡུད་བྱེད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། གསུམ་པ་ཞེས་སྦྱར་རོ། ༣ །དེ་ལྟར་རྒྱལ་བའི་དམ་ཆོས་མ་ལུས་པ་བསྡུས་ནས། བྱང་ཆུབ་སེམས་དཔའི་སྤྱོད་པ་ཐམས་ཅད་ཤིན་ཏུ་རྒྱས་པ། ཆེ་བ། ཚད་མེད་པ། ཐ་མི་དད་པ། ཕ་རོལ་ཏུ་ཕྱིན་པ་ཐམས་ཅད་ཀྱིས་བསྡུས་པ། ཡོངས་སུ་སྦྱོང་བ། ཡན་ལག་དང་། ཉེ་བའི་ཡན་ལག་ཏུ་བཅས་པ། སྒྲུབ་པ་དང་། མཚན་ཉིད་འདྲ་བ་དང་། མཚན་ཉིད་མི་འདྲ་བ་དང་། འདུ་བ་དང་། རྒྱས་པ་དང་བཅས་པ། བྱང་ཆུབ་སེམས་དཔའི་སྤྱོད་པར་གྱུར་པའི་ས་ལམ་ཐམས་ཅད་ཇི་ལྟ་བ་བཞིན་དུ་སྟོན་པས། ཕ་རོལ་ཏུ་ཕྱིན་པ་ཡོངས་སུ་སྦྱང་བར་བྱ་བའི་གདམས་ངག་དང་། རྗེས་སུ་བསྟན་པ་རབ་ཏུ་སྦྱིན་པས་བསྟན་པའི་སེམས་བསྐྱེད་པ་མངོན་པར་བསྒྲུབ་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སྤྱོད་པ་བགྲངས་པ་ཐམས་ཅད་དུ་རྒྱུན་མི་ཆད་པར་མངོན་པར་བསྒྲུབ་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག བྱང་སེམས་སྤྱོད་པ་ཚད་མེད་རྒྱ་ཆེ་བ། །སངས་རྒྱས་ཆོས་རྣམས་རྫོགས་བྱེད་ཕྱིན་དྲུག་སོགས། །རྒྱལ་སྲས་ས་ལམ་ཐམས་ཅད་ལེགས་བསྒྲུབ་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། །བཞི་པ་ཞེས་སྦྱར་རོ། ༤ །དེ་ལྟར་རང་དོན་ཕ་རོལ་ཏུ་ཕྱིན་པ་དྲུག་རྫོགས་ནས། སེམས་ཅན་གྱི་ཁམས་མ་ལུས་པ་ཐམས་ཅད་གཟུགས་ཅན་དང་། གཟུགས་མེད་པ་དང་། འདུ་ཤེས་ཅན་དང་། འདུ་ཤེས་མེད་པ་དང་། འདུ་ཤེས་མེད་འདུ་ཤེས་མེད་མིན་དང་། སྒོ་ང་ལས་སྐྱེས་པ་དང་། མངལ་ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། ཁམས་གསུམ་དུ་གཏོགས་པ། འགྲོ་བ་དྲུག་ཏུ་འདུས་པ། སྐྱེ་བ་ཐམས་ཅད་དུ་གཏོགས་པ། མིང་དང་གཟུགས་ཀྱིས་བསྡུས་པའི་སེམས་ཅན་མ་ལུས་པ་ཐམས་ཅད་ཡོངས་སུ་སྨིན་པར་བྱ་བར་སངས་རྒྱས་ཀྱི་ཆོས་ལ་གཟུད་པ་དང་། འགྲོ་བ་བགྲངས་པ་ཐམས་ཅད་རྣམ་པར་གཅད་པ་དང་། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་དགོད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སེམས་ཅན་གྱི་ཁམས་བགྲངས་པ་ཐམས་ཅད་ཡོངས་སུ་སྨིན་པར་བྱ་བ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག སེམས་ཅན་ཀུན་ལ་དམ་པའི་ཆོས་བསྟན་པས། །དད་སོགས་དབང་པོ་སྨིན་ནས་འཕགས་པའི་ལམ། །དངོས་སུ་སྐྱེ་ཞིང་སྒྲིབ་པ་སྤོང་རུང་བའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། ལྔ་པ་ཞེས་སྦྱར་རོ། ༥ །དེ་ལྟར་སེམས་ཅན་སྨིན་པར་བྱེད་པའི་ཐབས་སུ་འཇིག་རྟེན་གྱི་ཁམས་ཤིན་ཏུ་རྒྱས་པ་དང་། ཐ་གྲུ་ཆེ་བ་དང་། ཚད་མེད་པ་དང་། ཕྲ་བ་དང་། རགས་པ་དང་། སྣྲེལ་ཞི་དང་། སྤྱིའུ་ཚུགས་དང་། ངོས་ཕྱལ་བ་དང་། འཇུག་པའི་ཁྱིམ་ཅན་དང་། མིག་འཕྲུལ་ལྟར་རྣམ་པར་འབྱེད་པ་དང་། ཕྱོགས་བཅུ་རྣམ་པ་ཐ་དད་པ་རྣམ་པར་འབྱེད་པ་ལ་འཇུག་པ་མ་ལུས་པ་ཡེ་ཤེས་ཀྱི་ཁོང་དུ་ཆུད་པར་མངོན་སུམ་དུ་འགྱུར་བར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་འཇིག་རྟེན་གྱི་ཁམས་བགྲངས་པ་ཐམས་ཅད་དུ་འཇུག་པ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག ཤིན་ཏུ་རྒྱས་ཤིང་ཐ་གྲུ་ཆེ་བ་སོགས། །མིག་འཕྲུལ་ལྟར་འབྱེད་ཕྱོགས་བཅུའི་འཇིག་རྟེན་ཁམས། །རྣམ་པར་འབྱེད་ལ་འཇུག་པ་ཐོགས་མེད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། དྲུག་པ་ཞེས་སྦྱར་རོ། ༦ །དེ་ལྟར་འཇིག་རྟེན་གྱི་ཁམས་ཡང་དག་པར་བསྟན་ནས། ཞིང་ཐམས་ཅད་ཞིང་གཅིག་དང་། ཞིང་ཐམས་ཅད་དུ་ཡང་དག་པར་གཞོལ་བར་བྱ་བ་ཡོངས་སུ་སྦྱོང་བ་དང་། སངས་རྒྱས་ཐམས་ཅད་ཀྱི་ཞིང་ཚད་མེད་པ་དག་འོད་རྣམ་པར་བཀོད་པའི་རྒྱན་གྱིས་རབ་ཏུ་བརྒྱན་པ་དང་། ཡོངས་སུ་དག་པའི་ལམ་དང་ལྡན་པས་ཉོན་མོངས་པ་ཐམས་ཅད་བསལ་བ་དང་། སེམས་ཅན་ཡེ་ཤེས་ཀྱི་འབྱུང་གནས་ཚད་མེད་པས་རབ་ཏུ་གང་བ་དང་། སངས་རྒྱས་ཀྱི་ཡུལ་རྒྱ་ཆེན་པོ་ལ་ཡང་དག་པར་གཞོལ་བ་དང་། སེམས་ཅན་གྱི་བསམ་པ་ཇི་ལྟ་བ་བཞིན་དུ་ཡང་དག་པར་བསྟན་ཅིང་ཤིན་ཏུ་ཚིམ་པར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སངས་རྒྱས་ཀྱི་ཞིང་བགྲངས་པ་ཐམས་ཅད་དུ་ཡོངས་སུ་སྦྱོང་བ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག སྣོད་བཅུད་ཞིང་གི་སྐྱོན་རྣམས་རབ་སྤངས་ནས། །གསེར་གྱི་གཞི་དང་དགེ་བཅུ་སྤྱོད་པ་སོགས། །སངས་རྒྱས་ཞིང་གི་ཡོན་ཏན་ཀུན་ལྡན་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། བདུན་པ་ཞེས་སྦྱར་རོ། ༧ །དེ་ལྟར་སངས་རྒྱས་ཀྱི་ཞིང་དག་པར་བྱས་ནས། བྱང་ཆུབ་སེམས་དཔའ་ཐམས་ཅད་དང་བསམ་པ་དང་སྦྱོར་བ་གཅིག་པར་བྱ་བ་དང་། འགྲན་ཟླ་མེད་པའི་དགེ་བའི་རྩ་བ་གསག་པར་བྱ་བ་དང་། བྱང་ཆུབ་སེམས་དཔའ་ཐམས་ཅད་དང་དམིགས་པ་གཅིག་པས་མཉམ་པ་ཉིད་དུ་བྱ་བ་དང་། རྟག་ཏུ་རྒྱུན་མི་ཆད་པར་བྱང་ཆུབ་སེམས་དཔའ་དང་འགྲོགས་ཤིང་མི་འབྲལ་བར་བྱ་བ་དང་། སངས་རྒྱས་འབྱུང་བ་ཅི་དགར་བསྟནཾ་པར་བྱ་བ་དང་། རང་གི་སེམས་བསྐྱེད་པས་དེ་བཞིན་གཤེགས་པའི་མཐུ་ཡེ་ཤེས་ཀྱི་ཁོང་དུ་ཆུད་པར་བྱ་བ་དང་། མ་ཉམས་ཤིང་རྗེས་སུ་འགྲོ་བའི་མངོན་པར་ཤེས་པ་རབ་ཏུ་ཐོབ་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་དུ་རྣམ་པར་རྒྱུ་བར་བྱ་བ་དང་། འཁོར་གྱི་དཀྱིལ་འཁོར་ཐམས་ཅད་དུ་སྣང་བ་ཐོབ་པར་བྱ་བ་དང་། སྐྱེ་བ་ཐམས་ཅད་དུ་རང་གི་ལུས་རྗེས་སུ་འགྲོ་བར་བྱ་བ་དང་། ཐེག་པ་ཆེན་པོས་བསམ་གྱིས་མི་ཁྱབ་པ་དང་ལྡན་པར་བྱ་བ་དང་། བྱང་ཆུབ་སེམས་དཔའི་སྤྱོད་པ་སྤྱད་པར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སྤྱོད་པ་བགྲངས་པ་ཐམས་ཅད་དུ་ཐེག་པ་ཆེན་པོ་ལ་འཛུད་པ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག ཐེག་པ་མཆོག་ལ་འཇུག་ཕྱིར་བྱང་སེམས་དང་། །གཅིག་ཏུ་གཞན་ལ་ཕན་པའི་བསམ་སྦྱོར་ཀུན། །རྣམ་པ་ཀུན་ཏུ་གཅིག་པར་བྱ་བ་ཡི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། བརྒྱད་པ་ཞེས་སྦྱར་རོ། ༨ །དེ་ལྟར་གཞན་དོན་འདྲེས་ཤིང་ཉེ་བར་འདྲེས་པའི་མཐུ་ལ་བརྟེན་ནས་ཕྱིར་མི་ལྡོག་པའི་འཁོར་ལོ་ལ་ཡང་དག་པར་གནས་པའི་བྱང་ཆུབ་སེམས་དཔའི་སྤྱོད་པ་སྤྱད་པར་བྱ་བ་དང་། ལུས་དང་། ངག་དང་། ཡིད་ཀྱི་ལས་དོན་ཡོད་པར་བྱ་བ་དང་། མཐོང་མ་ཐག་ཏུ་སངས་རྒྱས་ཀྱི་ཆོས་ངེས་པར་འཐོབ་པར་བྱ་བ་དང་། དབྱངས་བརྗོད་མ་ཐག་ཏུ་ཡེ་ཤེས་ཁོང་དུ་ཆུད་པར་བྱ་བ་དང་། དད་པར་གྱུར་མ་ཐག་ཏུ་ཉོན་མོངས་པ་ལྡོག་པར་བྱ་བ་དང་། སྨན་གྱི་རྒྱལ་པོ་ཆེན་པོ་ལྟ་བུའི་ལུས་ཐོབ་པར་བྱ་བ་དང་། ཡིད་བཞིན་གྱི་ནོར་བུ་ལྟ་བུའི་ལུས་ཐོབ་པར་བྱ་བ་དང་། བྱང་ཆུབ་སེམས་དཔའ་ཆེན་པོའི་སྤྱོད་པ་སྤྱད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་སྤྱོད་པ་བགྲངས་པ་ཐམས་ཅད་དུ་དོན་ཡོད་པ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག ཐོག་མར་སེམས་མཆོག་བསྐྱེད་པ་ནས་བཟུང་སྟེ། །བར་དུ་ཡང་དག་ལམ་གྱི་སྦྱོར་བ་ཀུན། །ཐ་མར་འབྲས་བུ་མཆོག་གི་དོན་ཡོད་པའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། དགུ་པ་ཞེས་སྦྱར་རོ། ༩ །དེ་ལྟར་ཚོགས་གཉིས་རྒྱ་མཚོ་མངོན་པར་བསྒྲུབས་པའི་མཐུ་ལས། འཇིག་རྟེན་གྱི་ཁམས་ཐམས་ཅད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བ་དང་། བྱིས་པའི་ལམ་གཅིག་དང་ཐ་མི་དད་པར་བྱིས་པའི་ལམ་ཐམས་ཅད་དུ་ཚེཾ་སྐྱེ་བ་དང་། བྱང་ཆུབ་ཀྱི་སྙིང་པོར་གཤེགས་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་བསྟན་པར་བྱ་བ་དང་། སངས་རྒྱས་ཀྱི་ཡུལ་ཆེན་པོ་མཐུ་དང་ཡེ་ཤེས་ཀྱི་རྗེས་སུ་འགྲོ་བས་སེམས་ཅན་གྱི་ཁམས་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་སངས་རྒྱས་འབྱུང་བར་དཀྱིལ་འཁོར་གདལ་བ་ལ་རྟོགས་པར་བྱེད། ཞི་བར་བྱེད། འཐོབ་པར་བྱེད་ཅིང་བསྟན་པར་བྱ་བ་དང་། གཅིག་མངོན་དུ་ཡང་དག་པར་རྟོགས་པས་ཆོས་ཀྱི་དབྱིངས་ཐམས་ཅད་མྱ་ངན་ལས་འདས་པས་རྒྱས་པར་བྱ་བ་དང་། དབྱངས་གཅིག་བརྗོད་པས་སེམས་ཅན་ཐམས་ཅད་ཀྱི་སེམས་ཚིམ་པར་བྱ་བ་དང་། ཡོངས་སུ་མྱ་ངན་ལས་འདས་པ་ཆེན་པོ་བསྟན་ཀྱང་སྤྱོད་པའི་སྟོབས་རྒྱུན་མི་ཆད་པ་དང་། ཡེ་ཤེས་ཆེན་པོས་ཆོས་ཐམས་ཅད་འབྱུང་བར་བྱེད་པ་བསྟན་པར་བྱ་བ་དང་། ཆོས་ཤེས་པ་དང་། རྫུ་འཕྲུལ་དང་། སྒྱུ་མའི་མངོན་པར་ཤེས་པས་འཇིག་རྟེན་གྱི་ཁམས་ཐམས་ཅད་རྒྱས་པར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པ། བསྐལ་པ་བགྲངས་པར་མངོན་པར་རྫོགས་པར་བྱང་ཆུབ་པ་བགྲངས་པ་ཐམས་ཅད་དུ་ཐེག་པ་ཆེན་པོ་མངོན་པར་སྒྲུབ་པ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་འགྲུབ་པར་གྱུར་ཅིག ཚོགས་གཉིས་རྒྱ་མཚོའི་དཔལ་ལས་ལེགས་བྱུང་བའི། །དོན་གཉིས་མཐར་ཕྱིན་བླ་མེད་རྫོགས་བྱང་ཆུབ། །འགྲོ་བའི་དོན་དུ་མངོན་པར་འཚང་རྒྱ་བའི། །སྨོན་ལམ་ཆེན་པོ་མྱུར་དུ་འགྲུབ་པར་ཤོག །སྲས་བཅས་རྒྱལ་བས་སོགས་ཚིགས་བཅད་གཉིས་འགྲེ་སྟེ། བཅུ་པ་ཞེས་སྦྱར་རོ། ༡༠ །གཞན་ཡང་གནས་སྐབས་ཀུན་ཏུ་ཕན་བདེའི་འབྱུང་གནས་ལུང་དང་རྟོགས་པས་བསྡུས་པའི་རྒྱལ་བའི་བསྟན་པ་ཕྱོགས་ཀྱི་ཐ་གྲུ་ཀུན་ཏུ་རྒྱས་ཤིང་སྲིད་མཐའི་བར་དུ་གནས་པ་དང་། བསྟན་པའི་འབྱུང་གནས་ཡོངས་འཛིན་གོང་མ་བརྒྱུད་པར་བཅས་པ་ཐམས་ཅད་ཀྱིས་གཞན་དོན་མཛད་པའི་ཐུགས་ཀྱི་བཞེད་པ་ཇི་ལྟ་བ་བཞིན་དུ་འགྲུབ་པ་དང་། ད་ལྟར་ཐོས་བསམ་བསྒོམས་པས་རང་རྒྱུད་སྦྱངས་ནས་འཆད་རྩོད་རྩོམ་པའི་འོད་ཀྱིས་ཐུབ་བསྟན་གསལ་བར་མཛད་པའི་སྐྱེས་ཆེན་ཐམས་ཅད་སྐུ་ཚེ་བརྟན་ཞིང་ཕྲིན་ལས་ཉི་མའི་འོད་ཀྱིས་ཐུབ་བསྟན་པད་མཚོ་ཀུན་ཏུ་ཁྱབ་པ་དང་། དགེ་འདུན་ཐམས་ཅད་རྣམ་པར་དཀར་བའི་ཚུལ་ཁྲིམས་ཕུན་སུམ་ཚོགས་པ་ལ་གནས་ནས་ཆོས་སྤྱོད་བཅུའི་སྒོ་ནས་སྐྱེ་རྒུ་ཀུན་གྱིས་མཆོད་པའི་འོས་སུ་གྱུར་ཏེ། དད་པ་དང་འབྱོར་པར་ལྡན་པའི་འགྲོ་བ་དུ་མས་རྙེད་པ་དང་། བཀུར་སྟི་དང་། རིམ་གྲོ་དཔག་ཏུ་མེད་པས་མཆོད་པ་ལ་བརྟེན་ནས་ཡངས་པའི་རྒྱལ་ཁམས་ཀུན་ཏུ་ཉེར་འཚེ་མཐའ་དག་ཞི་ཞིང་། བཀྲ་ཤིས་དགེ་ལེགས་ཕུན་སུམ་ཚོགས་པའི་དཔལ་གྱིས་ཁྱབ་པར་གྱུར་ཅིག རྒྱལ་བའི་བསྟན་པ་ཕྱོགས་བཅུར་རྒྱས་པ་དང་། །རྒྱལ་སྲས་རྣམས་ཀྱི་སྨོན་ལམ་འགྲུབ་པ་དང་། །རྒྱལ་ཁམས་ཀུན་ཏུ་དཔལ་འབྱོར་ཕུན་ཚོགས་རྣམས། །རྒྱལ་བས་བསྔགས་པ་ཇི་བཞིན་འབྱོར་གྱུར་ཅིག །དགེ་འདུན་ཐམས་ཅད་རྣམ་དཀར་ཚུལ་ཁྲིམས་ལ། །ལེགས་པར་གནས་ཤིང་ཐོས་དང་བསམ་ལྡན་པས། །ཞི་ལྷག་ཟུང་འབྲེལ་རྣལ་འབྱོར་བསྒོམ་པའི་མཐུས། །རྟོགས་པའི་ཡོན་ཏན་འཕེལ་ཞིང་རྒྱས་པར་ཤོག །ཡི་གེ་འབྲི་མཆོད་སྦྱིན་པ་ལ་སོགས་པ། །ཆོས་སྤྱོད་རྣམ་བཅུས་བསྟན་དང་འགྲོ་བའི་དོན། །ཚུལ་བཞིན་བསྒྲུབས་པས་སྐྱེ་རྒུས་མཆོད་གྱུར་ཏེ། །ཆོས་དང་དགེ་ལེགས་ཕྱོགས་བཅུར་རྒྱས་པར་ཤོག །སྲས་བཅས་རྒྱལ་བས་འགྲོ་བའི་དོན་སླད་དུ། །རྒྱ་ཆེན་སྨོན་ལམ་རྣམ་མང་བཏབ་པ་ལྟར། །བདག་ཀྱང་ལྷག་བསམ་དག་པས་ཚུལ་བཞིན་འདེབས། །འགྲོ་བའི་དོན་ཕྱིར་མྱུར་དུ་འགྲུབ་པར་ཤོག །སངས་རྒྱས་ཕྲིན་ལས་འགྲོ་ལ་འཇུག་པ་དང་། །ཆོས་དབྱིངས་མཁའ་ལྟར་ཀུན་ལ་ཁྱབ་པ་དང་། །ཀུན་རྫོབ་རྟེན་འབྲེལ་བསླུ་བ་མེད་པའི་མཐུས། །རྒྱ་ཆེན་སྨོན་ལམ་འདི་དག་མྱུར་འགྲུབ་ཤོག །བྱང་ས་དང་། མདོ་སྟེ་རྒྱན་གྱི་འགྲེལ་པ་དང་། བསླབ་བཏུས་དང་། འཇུག་འགྲེལ་རྣམས་ལས་ས་ལ་གནས་པའི་བྱང་སེམས་ཀྱིས་སྨོན་ལམ་འབུམ་ཕྲག་གྲངས་མེད་བཅུ་བཏབ་པ་རྣམས་སྨོན་ལམ་ཆེན་པོ་བཅུར་འདུས་པར་གསུངས་པའི་སྨོན་ལམ་བཅུ་པོའི་ཚིག་གི་ངོ་བོ་རྣམས་མདོ་སྡེ་ས་བཅུ་པའི་ལུང་ཇི་ལྟ་བ་བཞིན་བྲིས་ཤིང་། མཚམས་སྦྱོར་གྱི་ཚིག་ཙམ་སྦྱར་བ་འདི་ནི་དབུ་མར་སྨྲ་བ་བསོད་ནམས་སེང་གེས་ཐུབ་བསྟན་རྣམ་རྒྱལ་གྱི་དགོན་པར་སྦྱར་བའོ།། །།དགེའོ།། །