སྔོན་གླེང་།
གོ་ལའི་ཤར་ནུབ་ཀུན་ཏུ་རྫས་འགྱུར་འཕྲུལ་རིག་གི་ཚ་རླབས་དྲག་ཏུ་འཕྱོ་ཞིང་། ཆོག་མི་ཤེས་པའི་འདོད་རྔམ་བདུད་ཀྱི་གཡབ་མོས་ཀུན་ནས་བསླུས་པའི་འཛམ་གླིང་འགྲོ་བ་མིའི་རིགས་ཀྱི་སྤྱི་ཚོགས་འདི། དུས་རབས་སྔོན་མ་དག་ལས་ཕྱི་དངོས་པོའི་མཐུན་རྐྱེན་ཐད་སྣ་ཇེ་འཛོམས་དང་སྟབས་ཇེ་བདེར་གྱུར་ཡོད་པ་ནི་ཡར་རྒྱས་དང་བཟང་ཕྱོགས་ཀྱི་རྣམ་པ་ཞིག་ཡིན་པར་མཁས་བླུན་སུས་ཀྱང་བསྙོན་དུ་མེད། འོན་ཏེ་ཕྱོགས་གཞན་ཞིག་ནས་བསམ་ན། གནའ་དེང་སྤྱི་ཚོགས་ཀྱི་བར་ན་དོ་མི་མཉམ་ཞིང་ཁོད་སྙོམས་དཀའ་བའི་ཧེ་བག་ཆེན་པོ་ཞིག་ཡོད་པའང་ཀུན་གྱི་སེམས་ངོ་ན་གསལ་ཐང་ངེར་ཡོད་པ། དཔེར་ན། དུས་རབས་སྔོན་མ་དག་གི་སྐབས་སུ་བཀའ་བསྟན་གྱི་གླེགས་བམ་རྣམས་ཏ་ལའི་ལོ་མ་དང་རྒྱུ་བཟང་པོའི་རས་སུ་བྲིས་པ། དེ་ཡང་གསེར་བཟང་པོའི་རྩི་སོགས་རིན་པོ་ཆེའི་ལྡེ་གུས་བྲིས་པ། གཞན་ཡང་ཙན་དན་དང་ཨ་ཀར་སོགས་སུ་བརྐོས་ཏེ་ཡི་གེར་ཕབ་པ། མདོར་ན་ཤིང་བརྐོས་ལས་བཀའ་བསྟན་གསུང་རབ་དག་པར་དུ་བཞེངས་ཏེ་དུས་རབས་ཉི་ཤུ་བའི་ལོ་རབས་ལྔ་བཅུའི་བར་སྔར་སྲོལ་མ་ཉམས་པར་ཡོད། དུས་རབས་ཉི་ཤུའི་སྨད་ཙམ་ནས་བཀའ་བསྟན་གསུང་རབ་གླེགས་བམ་གྱི་དབྱིབས་གཟུགས་འགྱུར་འགོ་ཚུགས་ཏེ་དུས་ད་ལྟའི་བར་དེབ་གཟུགས་སུ་མ་འགྱུར་བའི་གླེགས་བམ་ཧ་ལམ་ལྷག་མེད་པ་ལྟ་བུར་སྣང་། དེ་བས་འགྱུར་འགྲོས་ཧ་ཅང་མྱུར་ཞིང་རྒྱ་ཁྱབ་ཏུ་འཕེལ་བའི་དེང་གི་དུས་སུ་རྒྱུག་ཆེ་བའི་(གློག་རྡུལ་འཕྲུལ་དེབ་)འདི་སྔ་མ་སྔ་མའི་གླེགས་བམ་དག་ལ་ལྟོས་ཏེ་བཤད་ན་རིན་ཐང་ཆེར་མེད་མོད། འོན་ཀྱང་གདན་ས་གྲྭ་ཚང་དང་བོད་ཀྱི་གསུང་རབ་དཔེ་མཛོད་ཁང་སོགས་དང་ཁ་ཐག་རིང་བའི་ཡུལ་ལུང་ཁུག་ཀྱོག་དག་ན་བཞུགས་པའི་ཀློག་པ་པོ་རྣམས་དང་། ཁྱད་པར་དུ་ཁོམ་ལོང་ཆེར་མེད་པའི་གདན་སའི་དཔེ་ཀློག་པ་ཞིག་གིས་གཞུང་ཚིག་དང་ཁུངས་ལུང་བཙལ་བ་སོགས་ལ་ཤིན་ཏུ་ནས་སྟབས་བདེ་དང་ཕན་རླབས་ཆེ་བས། འདི་ནས་ཀྱང་དུས་རབས་ཀྱི་འགྲོས་དང་བསྟུན་ཁུལ་གྱིས་(ཀུན་མཁྱེན་བླ་མ་འཇམ་དབྱངས་བཞད་པའི་གསུང་འབུམ་)འདིས་མཚོན། པར་རྩ་གང་བཞུགས་རྣམས་རིམ་གྱིས་གློག་རྡུལ་འཕྲུལ་དེབ་ཀྱི་ལམ་ནས་རྒྱ་ཆེའི་ཀློག་པ་པོ་རྣམས་ལ་གཟིགས་རྟེན་གྱི་སྐྱེས་སུ་ཕུལ་དང་འབུལ་འགྱུར་དུ་ཡོད་པའི་དགེ་རྩ་གང་མཆིས་རྣམས། ༸གོང་ས་༸སྐྱབས་མགོན་རྒྱལ་བའི་དབང་པོའི་ཞལ་སྔ་ནས་དགུང་གྲངས་བརྒྱད་ཅུ་བཞེས་པའི་དགའ་སྟོན་དང་བཀའ་དྲིན་རྗེས་དྲན། མགོན་པོ་གང་ཉིད་བསྟན་པ་དང་འགྲོ་བའི་སླད་དུ་སྐུ་ཚེ་བསྐལ་བརྒྱར་བརྟན་པའི་རྒྱུར་འགྲོ་བའི་སྨོན་པ་དང་བཅས།
དཔལ་ལྡན་འབྲས་སྤུངས་སྒོ་མང་དཔེ་མཛོད་འགན་འཛིན་དགེ་བཤེས་འཇིགས་མེད་བསྟན་འཕེལ་གྱིས་༢༠༡༥ཟླ་༡༡ཚེས་༢༨ལའོ། །