བསྟན་རྩིས་རེའུ་མིག
བསྟན་རྩིས་རེའུ་མིག་བཀོད་པ་བཞུགས་སོ། ། རབ་བྱུང་དང་པོ། མེ་མོ་ཡོས། ཤམྦྷ་ལར་རིགས་ལྡན་ཉི་མ་ཁྲིར་ཕེབས། དུས་འཁོར་གྱི་རྒྱུད་འགྲེལ་རྒྱ་གར་དུ་སྤྱན་དྲངས། པོ་ཏོ་བ་འཁྲུངས། ལྷག་མཐོང་གི་བཞི་བརྒྱ་དང་བདུན་པའོ། །ནཱ་རོ་བ་མཁའ་སྤྱོད་དུ་གཤེགས། ས་འབྲུག དུས་འཁོར་རྒྱུད་འགྲེལ་བོད་སྐད་དུ་བསྒྱུར། ས་སྦྲུལ། ལྕགས་རྟ། མཻ་ཏྲི་བས་ཨོ་རྒྱན་དུ་སྔགས་ཀྱི་སྤྱོད་པ་མཛད། ལྕགས་ལུག། པོ་ཏོ་བ་འཁྲུངས་པར་དེབ་སྔོན་པ་གསུངས། ཕུ་ཆུང་བ་འཁྲུངས། ཆུ་སྤྲེལ། སྟོད་ལུང་བ་ཆེན་པོ་འཁྲུངས། ཆུ་བྱ། སྤྱན་སྔ་བ་འཁྲུངས་པར་ཕལ་ཆེར་འདོད། ཤིང་ཁྱི། ཇོ་བོས་རྟོག་གེ་འབར་བ་གསུངས་དུས་ད་ནི་ལོ་ཉི་ཤུ་ན་བོད་དུ་གདུང་འཇོག་གསུངས། འཁོན་དཀོན་མཆོག་རྒྱལ་པོ་འཁྲུངས། ཤིང་ཕག། བླ་ཆེན་དགོངས་པ་རབ་གསལ་གཤེགས། མེ་བྱི། རྔོག་ཆོས་སྐུ་རྡོ་རྗེ་འཁྲུངས། མེ་གླང༌། ནག་ཚོ་ལོ་ཙཱ་བ་ཇོ་བོ་སྤྱན་འདྲེན་པར་བྱོན། བསྟོད་པ་ལྟར་ན་ཇོ་བོ་ཕེབས་པར་བཤད། ས་སྟག། སྤྱན་སྔ་བ་འཁྲུངས་པར་དེབ་སྔོན་ནས་གསུངས། བསྟོད་པ་ལྟར་ན་བལ་བོར་བྱོན། ས་ཡོས། བསྟོད་པ་དང་ལམ་རིམ་སོགས་ལྟར་ན་ཇོ་བོ་ལྷ་ཅིག་མངའ་རིས་སུ་ཕེབས། ལྕགས་འབྲུག། ལམ་ཡིག་དཔར་མ་ལྟར་ན་ཇོ་བོ་བལ་བོ་ནས་བཏེགས། རྗེ་བཙུན་མིད་ལ་དང་བ་རི་ལོ་ཆེན་གཉིས་འཁྲུངས། ལྕགས་སྦྲུལ། ལམ་ཡིག་ཁ་ཅིག་ལྟར་ན་ཇོ་བོ་བལ་པོར་ཕེབས། ལམ་ཡིག་གཞན་ལྟར་ན་པུ་རངས་སུ་ཇོ་བོ་དང་འབྲོམ་རིན་པོ་ཆེ་མཇལ། ཆུ་རྟ། ཁ་ཅིག་ཇོ་བོ་མངའ་རིས་སུ་ཕེབས་ཟེར། ཞང་སྣ་ནམ་པ་དྲུག་ཅུ་རེ་བདུན་དང༌། སྣེའུ་ཟུར་བ་འཁྲུངས། དེབ་སྔོན་པ་རྒྱ་འདུལ་སློབ་གཉེར་མཛད་ཟེར་ཡང་མ་འཁྲུངས་སོ། ། ཆུ་ལུག ཤིང་སྤྲེལ། ཇོ་བོ་པུ་རངས་སུ་བཞུགས་པར་འབྲོམ་རིན་པོ་ཆེ་མཇལ་བ་ཁོ་ནའོ། །རྨ་ལོ་ཙཱ་བ་འཁྲུངས། ཤིང་བྱ། མེ་ཁྱི། བསྟོད་པ་དང་ལམ་རིམ་ལྟར་ན་སྙེ་ཐང་དུ་ཕེབས། འབྲིང་སྟོན་དང་སྲས་ཟླ་གྲགས་འཁྲུངས། མེ་ཕག ཇོ་བོ་རྗེ་བསམ་ཡས་དང་ལོ་དེའི་དགུན་སྙེ་ཐང་དུའང་ཕེབས། བྱམས་འཇམ་དབྱངས་ཀྱིས་བགྲོ་བའི་བུམ་ཆུ་རྙེད། རྒྱ་འདུལ་འཛིན་འཁྲུངས། ས་བྱི། ས་གླང༌། བོ་དོང་ཨེའི་དགོན་པ་བཏབ། ལྕགས་སྟག། འབྲོམ་རིན་པོ་ཆེས་ཇོ་བོ་ལ་འབུལ་ཆེན་ཕུལ། ཕྱག་དར་སྟོན་པས་ཇོ་བོ་ལ་མཇལ། ལྕགས་ཡོས། ཇོ་བོས་བསྟན་རྩིས་མཛད་པར་དུས་འཁོར་ཊཱིཀ་ཆེན་ལས་བཤད། ཆུ་འབྲུག། འཛེང་དྷརྨ་བོ་དྷི་འཁྲུངས། ཆུ་སྦྲུལ། ཤིང་རྟ། ཇོ་བོ་ཆེན་པོ་དགའ་ལྡན་དུ་གཤེགས། གླང་རི་ཐང་པ་རྡོ་རྗེ་སེང་གེ་འཁྲུངས། ཤིང་ལུག། ལོ་ཆེན་རིན་ཆེན་བཟང་པོ་མཁའ་སྤྱོད་དུ་གཤེགས། རྨ་སྒོམ་ཆོས་ཀྱི་ཤེས་རབ། པ་ཚབ་ལོ་ཙཱ་བ་ཉི་མ་གྲགས། ཞང་སྟོན་ཆོས་འབར་རྣམས་འཁྲུངས། མེ་སྤྲེལ། དྲེ་བོ་མཆོག་གི་བླ་མ་འཁྲུངས། རྭ་སྒྲེང་བཏབ་པར་དེབ་སྔོན་ལས་གསུངས། མེ་བྱ། ཀ་མ་པ་ཤེས་རབ་འོད་འཁྲུངས། ལོ་འདིར་རྭ་སྒྲེང་བཏབ་པར་གཞན་འདོད་པ་འདི་ལེགས། ས་ཁྱི། ཕྱག་ཁྲི་མཆོག་གཤེགས། ས་ཕག། རྔོག་བློ་ལྡན་ཤེས་རབ། རྔོག་ཤེས་རབ་རྒྱ་མཚོ། དོལ་བ་ཤེས་རབ་རྒྱལ་མཚན་རྣམས་འཁྲུངས། ཁ་ཅིག་གསང་ཕུ་བཏབ་ཟེར། ལྕགས་བྱི། ཞང་སྣ་ནམ་རྡོ་རྗེ་དབང་ཕྱུག་གཤེགས་ནས་གདན་ས་གླན་ཚུལ་བྱང་གིས་བྱས། རྨ་བྱ་རྣ་ར་བ་ཡང་འཁྲུངས། ལྕགས་གླང༌། ཆུ་སྟག སོ་དགེ་འདུན་འབར། སྐོར་ནི་རུ་པ། མ་ཅིག་ཞ་མ། སོ་ཆུང་ནམ་སྙིང་རྣམས་འཁྲུངས། ཆུ་ཡོས། འབྲོམ་སྟོན་གཤེགས་པར་དགའ་ལྡན་ཆོས་འབྱུང་ལས་བཤད། ཤིང་འབྲུག འབྲོམ་སྟོན་ལོ་འདིར་གཤེགས་པར་དེབ་སྔོན་ལས་གསུངས། ཤིང་སྦྲུལ། འབྲོམ་སྟོན་གཤེགས་ནས་གདན་ས་རྣལ་འབྱོར་པ་ཆེན་པོས་མཛད། མེ་རྟ། མེ་ལུག རྒྱལ་ཚ་བྱང་ཡེ་དང༌། ཤ་བོ་སྒང་པ་པདྨ་ཚུལ་ཁྲིམས་གཉིས་འཁྲུངས། ས་སྤྲེལ། ས་བྱ། ཞ་མའི་མིང་པོ་འཁོན་ཕུ་བ་ཆོས་ཀྱི་རྒྱལ་པོ་འཁྲུངས། ལྕགས་ཁྱི། ཤ་ར་བ་ཡོན་ཏན་གྲགས་འཁྲུངས། ལྕགས་ཕག ཆུ་བྱི། ཆུ་གླང༌། འཁོན་དཀོན་མཆོག་རྒྱལ་པོས་ས་སྐྱ་བཏབ། རྔོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་བཏབ། ཤིང་སྟག འབྲོག་མི་ལོ་ཙཱ་བ་དང་ཟུར་ཆུང་བ་གཉིས་གཤེགས། སྒྲོ་ཕུག་པ་འཁྲུངས། ཤིང་ཡོས། ཁུ་སྟོན་བརྩོན་འགྲུས་གཡུང་དྲུང་གཤེགས། ཁུ་ཤེར་བརྩོན་དང་བྱ་ཡུལ་པ་གཞོན་ནུ་འོད་འཁྲུངས། བྱ་འདུལ་འཁྲུངས་པར་ཁ་ཅིག་བཞེད། མེ་འབྲུག མདའ་བདག་རྩེ་སྡེའི་ཆོས་འཁོར་བྱུང༌། མེ་སྦྲུལ། བྱ་ཡུལ་པའི་སློབ་མ་གཙང་པ་རིན་པོ་ཆེ་དང༌། རྔོག་ཆོས་སྐུ་རྡོ་རྗེ་འཁྲུངས། རྗེ་མིད་ལ་མར་པའི་དྲུང་དུ་བྱོན། ས་རྟ། རྣལ་འབྱོར་པ་ཆེན་པོ་གཤེགས་ནས་གདན་ས་འཛེང་དབང་ཕྱུག་རྒྱལ་མཚན་གྱིས་མཛད། ས་ལུག། དྭགས་པོ་ལྷ་རྗེ་འཁྲུངས། ལྕགས་སྤྲེལ། རྒྱ་འདུལ་འཛིན་གྱིས་དགའ་བ་གདོང་དུ་འདུལ་བར་སྦྱངས། ལྕགས་བྱ། གྲྭ་བ་མངོན་ཤེས་ཀྱིས་གྲྭ་ཐང་གི་རྨང་བཏིང༌། ཆུ་ཁྱི། འཛིང་དགོན་པ་གཤེགས་ནས་པོ་ཏོ་བ་རྭ་སྒྲེང་གི་གདན་སར་ལོ་གཅིག་བཞུགས། ཆུ་ཕག། རྭ་སྒྲེང་ལ་གདན་ས་པ་མེད་པས་ཆོས་ཀྱི་མུ་གེ་བྱུང་ཟེར། མིད་ལ་རི་ཁྲོད་དུ་བྱོན་པའི་ཐོག་མ་ཕ་ཡུལ་རྐང་ཚུག་ཕུག་ཏུ་བྱོན། ཤིང་བྱི། སྣེའུ་ཟུར་བའི་སློབ་མ་བྱང་ཆུབ་དགེ་མཛེས་དང༌། རས་ཆུང་བ་འཁྲུངས། མིད་ལས་བྲག་དཀར་རྟ་སོར་བཅུ་གཉིས་ཆ་བཞིའི་དམ་བཅའ་མཛད། ཤིང་གླང༌། ཁམས་པ་ལུང་པ་འཁྲུངས། མེ་སྟག མིད་ལས་གྲུབ་རྟགས་ཀྱི་ཐོག་མ་བསྟན། གཏུམ་སྟོན་བློ་གྲོས་གྲགས་པ་འཁྲུངས་ཟེར། རབ་བྱུང་གཉིས་པ། མེ་ཡོས། རིགས་ལྡན་ཉི་མས་ཆོས་བསྟན་ནས་རེ་གཅིག་སོང༌། ས་འབྲུག རྒྱ་མ་སངས་རྒྱས་དཔོན་སྟོན་འཁྲུངས། ས་སྦྲུལ། རྨ་ལོ་ཙཱ་བ་དགེ་བའི་བློ་གྲོས་གཤེགས། ལྕགས་རྟ། དགེ་བཤེས་ཚུལ་འཕགས་ངན་ལམ་པ་འཁྲུངས། གྲྭ་བ་མངོན་ཤེས་གཤེགས། དགྱེར་སྒོམ་ཆེན་པོ་དང༌། རྔོག་མདོ་སྡེ་འཁྲུངས། ལྕགས་ལུག། བྱ་འདུལ་འཛིན་འཁྲུངས། ཆུ་སྤྲེལ། ས་ཆེན་ཀུན་དགའ་སྙིང་པོ་འཁྲུངས། ཕ་དམ་པ་ལན་གཉིས་པར་བོད་དུ་བྱོན། ཆུ་བྱ། སྤྱན་སྔ་ཚུལ་ཁྲིམས་འབར་གྱིས་ལོ་ཡི་ལྷ་ཁང་བཞེངས། ཤིང་ཁྱི། ཤིང་ཕག། མེ་བྱི། རིགས་ལྡན་ཉི་མས་ཁྲི་ལོ་བདུན་ཅུ་སོང༌། ཞྭ་དམར་བ་ཚུལ་ཁྲིམས་དཔལ་འཁྲུངས། མེ་གླང༌། ཞང་བཀྲ་ཤིས་རྡོ་རྗེ་འཁྲུངས། མར་པ་ལོ་ཙཱ་བ་གཤེགས། ས་སྟག ས་ཡོས། ཚུལ་ཁྲིམས་རིན་ཆེན་འཁྲུངས། ཁ་ཅིག་ལབ་སྒྲོན་འཁྲུངས་ཟེར། ལྕགས་འབྲུག། ཁྲོམ་གཞེར་རིན་ཆེན་སེང་གེ་དང་དྭགས་པོ་ཆོས་གཡུང་འཁྲུངས། ལྕགས་སྦྲུལ། བྱ་འཆང་ཁ་བ་འཁྲུངས། ཆུ་རྟ། གླན་ཚུལ་བྱང་གཤེགས་ནས་རྒྱལ་ལྷ་ཁང་གི་གདན་ས་འབྲིང་སྟོན་གྱིས་བྱས། འཁོན་དཀོན་མཆོག་རྒྱལ་པོ་གཤེགས། བ་རི་ལོ་ཆེན་གྱིས་ས་སྐྱའི་ཁྲི་མཛད། རྔོག་ཆོས་ཀྱི་རྡོ་རྗེ་གཤེགས། མ་ཅིག་ལབ་སྒྲོན་འཁྲུངས་ཟེར། ལོའི་ལྷ་ཁང་གྲུབ། ཆུ་ལུག། རྒྱལ་བ་ཁྱུང་ཚང་ཐོད་དམར་བ། སྟབས་ཀ་བ། དྭགས་པོ་སློབ་མ་གྲོལ་སྒོམ་ཆོས་གཡུང་གསུམ་འཁྲུངས། རྣམ་ཐར་དྲི་མེད་ཤེལ་ཕྲེང་དུ། ཆུ་ལུག་ལོར་འཁྲུངས་པར་བཤད་པ་འདི་ལེགས། སྐྱེས་རབས་བརྒྱད་ཡང་ཡོད། སྤྱན་སྔ་བ་གཤེགས། ཤིང་སྤྲེལ། དྭགས་པོ་བསྙེན་རྫོགས་མཛད། ཤིང་བྱ། པོ་ཏོ་བ་གཤེགས། མེ་ཁྱི། ཕུ་ཆུང་བ་གཤེགས། གཏུམ་སྟོན་དང༌། ཚུལ་ཁྲིམས་དཔལ་འཁྲུངས། མེ་ཕག སྟེང་པ་ལོ་ཙཱ་བ་ཚུལ་ཁྲིམས་འབྱུང་གནས་འཁྲུངས། ས་བྱི། རིགས་ལྡན་ཉི་མ་ཁྲིར་ཕེབས་ནས་གྱ་གཉིས་སོང༌། ས་གླང༌། རྔོག་ལོ་ཙཱ་བ་བློ་ལྡན་ཤེས་རབ་གཤེགས། ཆ་པ་ཆོས་ཀྱི་སེང་གེ་འཁྲུངས། དྭགས་པོ་ལྷ་རྗེ་མིད་ལའི་དྲུང་དུ་བྱོན། ལྕགས་སྟག བདེ་གཤེགས་ཕག་མོ་གྲུ་པ་དང་ཀརྨ་དུས་གསུམ་མཁྱེན་པ་གཉིས་འཁྲུངས། དྭགས་པོ་མིད་ལའི་དྲུང་ནས་དབུས་སུ་བྱོན། ལྕགས་ཡོས། ཀུན་སྙིང་གིས་ས་སྐྱའི་གདན་ས་བསྐྱངས། ཆུ་འབྲུག། དྭགས་པོས་འོལ་ཁར་སྒྲུབ་པ་མཛད། ཆུ་སྦྲུལ། བྱ་ཡུལ་གྱི་དགོན་པ་བཏབ། ཕ་དམ་པ་བོད་དུ་བྱོན་པའི་རྗེས་མའོ། ། ཤིང་རྟ། ལབ་སྒྲོན་གྱིས་དགེ་བཤེས་ཨ་སྟོན་ལས་གསན་སྦྱོང་མཛད། ཤིང་ལུག། རྔོག་ཇོ་ཚུལ་ཁྲིམས་ཤེས་རབ་དང་ཁྱུང་ཚང་བ་གཉིས་འཁྲུངས། མེ་སྦྲེལ། སྟོད་ལུང་བ་ཆེན་པོ་གཤེགས། རྒྱལ་བ་ཡེ་གྲགས་ས་དམར་བ། དྭགས་པོ་སྒོམ་ཚུལ། སེ་སྟོན་ཀུན་རིག་རྣམས་འཁྲུངས། མེ་བྱ། ས་ཁྱི། སྣེའུ་ཟུར་པ་གཤེགས། ཁྲོ་ཕུ་རྒྱལ་ཚ་འཁྲུངས། དྭགས་པོ་འོ་དེ་གུང་རྒྱལ་དུ་བྱོན། ས་ཕག། འབྲིང་སྟོན་གཤེགས། རྒྱ་མ་རིན་ཆེན་སྒང་གི་ལྷ་ཁང་བཞེངས། ལྕགས་བྱི། རྒྱལ་གྱི་གདན་སར་རྨ་བྱ་རྣ་ར་བ་ཕེབས། རྔོག་མདོ་སྡེའི་སྲས་ཐོགས་མེད་གྲགས་པ་འཁྲུངས། ལྷག་མཐོང་ལེའུ་རྫོགས། ལྕགས་གླང༌། ཏིང་ངེ་འཛིན་ལེའུ་མགོ་ཚུགས། སེ་སྤྱིལ་བུ་བ་འཁྲུངས། དྭགས་པོ་རིན་པོ་ཆེས་སྒམ་པོ་ཞབས་ཀྱིས་བཅགས། ཆུ་སྟག། རྔོག་ཐོགས་མེད་གྲགས་ཀྱི་གཅུང་ཇོ་འོད་འཁྲུངས། ཆུ་ཡོས། མིང་པོའི་སྲས་ལྷ་རྗེ་ཟླ་བའི་འོད་ཟེར། གླང་ལུང་པ། བླ་མ་ཞང་རྣམས་འཁྲུངས། གླང་རི་ཐང་པ་དང༌། མིད་ལ་རས་པ་གཤེགས། ཤིང་འབྲུག མངའ་བདག་ཉང་རལ་བ་འཁྲུངས། ཤིང་སྦྲུལ། དྲེ་བོ་མཆོག་གི་བླ་མ་ལས་ཀརྨ་དུས་གསུམ་མཁྱེན་པ་རབ་ཏུ་བྱུང༌། མེ་རྟ། རིགས་ལྡན་ཉི་མ་ཁྲིར་འཁོད་ནས་བརྒྱ་སོང༌། ཀཾ་ཀཾ་སྐྱོ་སྟོན་དང་སྲས་རྒྱལ་བ་དོན་གྲུབ་འཁྲུངས། མེ་ལུག རིགས་ལྡན་སྣ་ཚོགས་གཟུགས་སེང་གེ་ཁྲིར་ཕེབས། རྒྱལ་བ་རྟེ་ནེ་དང་པཎ་ཆེན་ཤཱཀྱ་ཤྲཱི་འཁྲུངས། ས་སྤྲེལ། དགེ་བཤེས་གླན་དང༌། གླིང་རས་པ་འཁྲུངས། ས་བྱ། རྔོག་རྔོ་བསོད་དང་ཐོད་པ་བསམ་གྲུབ། ཀཾ་ཀཾ་བ་དགེ་བཤེས་སྐྱོ་སྟོན། སྦལ་ཏི་རྣམས་འཁྲུངས། རྨ་བྱ་རྣ་ར་བ་གཤེགས། ལྕགས་ཁྱི། རྒྱལ་ཚ་བྱང་ཡེ་རྒྱལ་ལྷ་ཁང་གི་གདན་སར་བྱོན། དྭགས་པོ་སྒོམ་པ་ཤེས་རབ་འཁྲུངས། ལྕགས་ཕག རོང་ཤེས་རབ་རྒྱ་མཚོ་དང་ཤ་བོ་སྒང་པ། ཀ་མ་པ། རྒྱ་འདུལ་འཛིན་རྣམས་གཤེགས། ཕག་མོ་གྲུ་པ་མདོ་སྨད་ནས་དབུས་སུ་བྱོན། ཆུ་བྱི། ཞྭ་དམར་བ་ཚུལ་ཁྲིམས་དཔལ་གཤེགས། བཙུན་པ་བསོད་ནམས་རྩེ་མོ་འཁྲུངས་པར་ཁ་ཅིག་འདོད། ཆུ་གླང༌། རྔོག་ཇོ་བསོད་ཀྱི་གཅུང་སྟོན་ཆུང་དབང་མོ་དང༌། ཞྭ་དམར་ནམ་མཁའ་འོད་འཁྲུངས། དུས་གསུམ་མཁྱེན་པ་བསྙེན་པར་རྫོགས། ཤིང་སྟག ཕག་མོ་གྲུ་པ་བྱ་འདུལ་འཛིན་ལས་བསྙེན་པར་རྫོགས། འགྲོ་མགོན་སངས་རྒྱས་ཡེ་ཤེས་འཁྲུངས། གསང་བདག་སྒྲོ་ཕུག་པ་དང་ཞང་སྟོན་ཆོས་འབར་གཤེགས། སྒམ་པོ་བ་མཁན་པོ་འདུལ་འཛིན་འཁྲུངས། ཤིང་ཡོས། རྔོག་ཇོ་བདེ་འཁྲུངས། སྒོམ་པ་ཚུལ་ཁྲིམས་སྙིང་པོ་བསྙེན་པར་རྫོགས། མེ་འབྲུག རིགས་ལྡན་སྣ་ཚོགས་གཟུགས་ཁྲིར་ཕེབས་ནས་ལོ་བཅུ་པ་འདིའོ། མེ་སྦྲུལ། ཁྲོམ་གཞེར་ཆེན་པོས་ཀམ་ཀཾ་གྱི་གཙུག་ལག་ཁང་བཏབ། ས་རྟ། བྱ་ཡུལ་བ་གཞོན་ནུ་འོད་གཤེགས། རྒྱ་མ་དབོན་སྟོན་དང་རྔོག་བཀྲ་ཤིས་གྲགས་འཁྲུངས། ས་ལུག རྒྱལ་ཚ་བྱང་ཡེ་གཤེགས། དུས་གསུམ་མཁྱེན་པ་དྭགས་པོ་དང་མཇལ། ལྕགས་སྤྲེལ། འབྲིང་སྟོན་རྒྱལ་གྱི་གདན་སར་ཕེབས། བུདྡྷ་ཤྲཱི་འཁྲུངས། ལྕགས་བྱ། ཤ་ར་བ་ཡོན་ཏན་གྲགས་གཤེགས། ཆུ་ཁྱི། བསོད་ནམས་རྩེ་མོ་འཁྲུངས་པར་དེབ་སྔོན་ལས་བཤད། སྟག་ལུང་ཐང་བ་འཁྲུངས། ཆུ་ཕག འབྲིང་སྟོན་གཤེགས་ནས་ཤིང་བྱི་ནས་ཆུ་སྤྲེལ་བར་ཨར་ཆེན་པོ་དབྱར་ཐོག་གཅིག་བཞུགས་པ་མ་གཏོགས་ལོ་དགུར་རྒྱལ་གྱི་གདན་ས་སྟོངས། ཁུ་ཤེར་བརྩོན་གཤེགས། འབྲི་གུང་སྐྱོབ་པ་འཇིག་རྟེན་མགོན་པོ་དང༌། རྟོག་ལྡན་ནམ་མཁའ་འོད་གཉིས་འཁྲུངས། ཤིང་བྱི། མང་པོ་འཁོན་ཕུ་བ་གཤེགས། ཤིང་གླང༌། རྔོག་ཇོ་བསོད་རྔོག་སྟོན་ཆུང་དབང་མོ་རྔོག་ཇོ་བདེ་རྣམས་གཤེགས། མེ་སྟག། རྔོག་ཇོ་འོད་གཤེགས། རྔོག་ཐོགས་མེད་གྲགས་ཀྱི་སྲས་རྒྱལ་ཚར་མོ་འཁྲུངས། རབ་བྱུང་གསུམ་པ། མེ་ཡོས། ས་སྐྱའི་རྗེ་བཙུན་གྲགས་པ་རྒྱལ་མཚན་དང༌། ཞང་གི་སློབ་མ་མཉམ་མེད་ཤཱཀྱ་ཡེ་ཤེས་འཁྲུངས། ས་འབྲུག ཀུན་ལྡན་རས་པ་འཁྲུངས། ས་སྦྲུལ། ཞིག་པོ་བདུད་རྩི་འཁྲུངས། མ་ཅིག་ཞ་མ་གཤེགས། ཁ་ཆེ་པཎ་ཆེན་རབ་ཏུ་བྱུང་བར་དེབ་སྔོན་ལས་བཤད། ལྕགས་རྟ། དཔལ་ཆེན་འོད་པོ་འཁྲུངས། དྭགས་པོ་སྒོམ་ཚུལ་གདན་སར་ཕེབས། རྔོག་ཤེས་རབ་བླ་མ་འཁྲུངས། ཞང་འོད་འཇོ་གཤེགས། ལྕགས་ལུག། ཕག་མོ་གྲུ་པ་དྭགས་པོ་རིན་པོ་ཆེ་དང་མཇལ། ཆུ་སྤྲེལ། རྔོག་རྡོ་རྗེ་སེང་གེ་འཁྲུངས། ཆུ་བྱ། དགེ་བཤེས་ཚུལ་འཕགས་ངན་ལམ་པ་རྒྱལ་གྱི་གདན་སར་བྱོན། གཏུམ་སྟོན་གྱིས་སྣར་ཐང་བཏབ། དྭགས་པོ་རིན་པོ་ཆེ་གཤེགས། ཆག་དགྲ་བཅོམ་དང་གྲོ་མོ་ཆེ་འཁྲུངས། དར་མ་དབང་ཕྱུག་གིས་འབབ་རི་བོ་བཏབ། ཤིང་ཁྱི། མཁན་ཆེན་རྡོ་རྗེ་ཚུལ་ཁྲིམས་འཁྲུངས། དྭགས་པོས་སྒམ་པོ་བཏབ། ཤིང་ཕག མཚུར་ལྷ་ལུང་གི་གཞི་བཏིང༌། མེ་བྱི། རྔོག་ཐོགས་མེད་གྲགས་པ་གཤེགས། མེ་གླང༌། རྔོག་ཀུན་དགའ་རྡོ་རྗེ་འཁྲུངས། ཕག་མོ་གྲུ་པ་ཕ་དམ་པ་དང་མཇལ། ས་སྟག། ས་ཆེན་ཀུན་སྙིང་དང་རྔོག་ཇོ་ཚུལ་གཤེགས། ཕག་མོ་གྲུ་པས་གདན་ས་མཐིལ་བཏབ། ཉི་འབུམ་དང༌། ལྷ་ལུང་གི་དབང་ཕྱུག་གཉིས་འཁྲུངས། ས་ཡོས། དགེ་བཤེས་ཚུལ་འཕགས་ངན་ལམ་པ་གཤེགས་ནས་ལོ་བཞིར་རྒྱལ་གྱི་གདན་ས་སྟོངས། དུས་མཁྱེན་གྱིས་མཚུར་ཕུ་ཞབས་ཀྱིས་བཅགས། ལྕགས་འབྲུག། དགེ་བཤེས་ལྕགས་རི་བ། ཡང་དབེན་པ། སངས་རྒྱས་སྒོམ་པ་རྣམས་འཁྲུངས། སྒོམ་ཚུལ་གྱིས་ལུང་བསྟན་ལྟར་ལྷ་སའི་ཞིག་གསོ་མཛད། ལྕགས་སྦྲུལ། བྱ་ཡུལ་བའི་སློབ་མ་གཙང་པ་རིན་པོ་ཆེ་རྡོ་རྗེ་མི་བསྐྱོད་དང༌། རས་ཆུང་བ་གཉིས་གཤེགས། གཙང་པ་རྒྱ་རས་འཁྲུངས། ཆུ་རྟ། པཎ་ཆེན་ཤཱཀྱ་ཤྲཱི་རབ་ཏུ་བྱུང་ཞེས་ཁ་ཅིག་ཟེར། ཆུ་ལུག། ཀཾ་ཀཾ་ཇོ་སྲས་དང༌། རྟ་སྟོན་ཇོ་བོ་ཡེ་ཤེས་འཁྲུངས། ཤིང་སྤྲེལ། གཉོས་རྒྱལ་བ་ལྷ་ནང་པ་འཁྲུངས། རྒྱལ་བྱ་ཁྱུང་ཚང་ཐོད་དམར་བ་རྒྱལ་གྱི་གདན་སར་ཕེབས། དུས་མཁྱེན་གྱིས་ཁམས་སུ་ཀཾ་པོ་གནས་ནང་བཏབ། ཤིང་བྱ། མལ་དྲོ་བྱ་འཆད་ཀའི་དགོན་པ་བཏབ། ཕག་མོ་གྲུ་པར་སྟག་ལུང་ཐང་བ་དང༌། གླིང་རས་གཉིས་ཀྱིས་མཇལ། མེ་ཁྱི། གཏུམ་སྟོན་དང༌། རྔོག་མདོ་སྡེ་གཉིས་གཤེགས། མེ་ཕག ཞང་བཀྲ་ཤིས་རྡོ་རྗེ་དང༌། བྱང་ཆུབ་དགེ་མཛེས་གཉིས་གཤེགས། འབྲི་གུང་སྐྱོབ་པས་ཕག་གྲུར་མཇལ། ས་བྱི། འཛིང་དྷརྨཱ་བོ་དྷི་གཤེགས། ས་གླང༌། ཆ་པ་ཆོས་སེང་དང༌། དྭགས་པོ་སྒོམ་ཚུལ་གཉིས་གཤེགས། གཡའ་བཟང་ཆོས་རྗེ་འཁྲུངས། པཎ་ཆེན་ཤཱཀྱ་ཤྲཱི་བསྙེན་པར་རྫོགས། དུས་མཁྱེན་གྱིས་འདོན་སྤང་ཕུག་བཏབ། སྐྱོར་མོ་ལུང་བཏབ། ལྕགས་སྟག བདེ་གཤེགས་ཕག་གྲུ་གཤེགས། བླ་མ་ཞང་གིས་བསྔོ་བ་ཙམ་བྱས་ཀྱང་ཕག་གྲུར་གདན་ས་པ་མེད། ཀཾ་ཀཾ་ཁྲོམ་གཞེར་གཤེགས། སྤོམ་བྲག་པ་དང༌། ཀོ་བྲག་པ་གཉིས་འཁྲུངས། ལྕགས་ཡོས། གྲགས་པ་རྒྱལ་མཚན་གྱིས་ས་སྐྱའི་གདན་ས་བསྐྱངས། ཕག་གྲུར་གདན་ས་པ་མེད། ཡོལ་ཕུང་བཏབ། ཆུ་འབྲུག ཁ་ཅིག་ཁྲོ་ཕུ་ལོ་ཙཱ་བ་འཁྲུངས་ཟེར། ཆུ་སྦྲུལ། ཁྲོ་ཕུ་ལོ་ཙཱ་བ་བྱམས་པ་དཔལ་འཁྲུངས། དྭགས་པོ་སྒོམ་ཆུང་ཤེས་རབ་བྱང་ཆུབ་གཤེགས། ཤིང་རྟ། སྟབས་ཀ་པ་གཤེགས། ཤིང་ལུག། བྱ་འཆད་ཀ་པ་དང༌། ཁམས་ལུང་པ་གཉིས་གཤེགས། དུས་མཁྱེན་གྱི་སློབ་མ་ཆོས་རྗེ་སྒང་པ་འཁྲུངས། ཚལ་གྱི་དགོན་པ་བཏབ། རྒྱལ་བ་ཁྱུང་ཚང་ཐོད་དམར་གཤེགས་ནས་ལོ་གསུམ་རྒྱལ་གྱི་གདན་ས་པ་མེད། མེ་སྤྲེལ། ཁྱུང་ཚང་བ་གཤེགས། མེ་བྱ། དྭགས་པོའི་སློབ་མ་རྣལ་འབྱོར་པ་ཆོས་གཡུང་གཤེགས། འབྲི་གུང་སྐྱོབ་པ་ཕག་གྲུའི་གདན་སར་ཕེབས། འབྲུག་དཔོན་རས་དྷརྨ་སེང་གེ་འཁྲུངས། ས་ཁྱི། ས་ཕག། རྒྱལ་ཡེ་གྲགས་ས་དམར་བ་རྒྱལ་ལྷ་ཁང་གི་གདན་སར་ཕེབས། སྐྱོབ་པ་འབྲི་གུང་དུ་བྱོན། ལྕགས་བྱི། འགར་དམ་པ་ཆོས་སྡིངས་པ་འཁྲུངས། ཕག་གྲུའི་སློབ་མ་བཀྲ་ཤིས་དཔལ་གྱིས་སྟག་ལུང་བཏབ། ལྕགས་གླང༌། ཁ་ཅིག་སྟག་ལུང་བཏབ་ཟེར། ཆུ་སྟག། བསོད་ནམས་རྩེ་མོ་དང་མིང་པོའི་སྲས་ཟླ་འོད། རྔོག་རྒྱལ་ཚར་མོ་རྣམས་གཤེགས། ས་སྐྱ་པཎ་ཆེན་དང༌། ཀོ་བྲག་པ་བསོད་ནམས་རྒྱལ་མཚན་གཉིས་འཁྲུངས། ཆུ་ཡོས། ཤིང་འབྲུག ཟངས་ཚ་བསོད་རྒྱལ་འཁྲུངས། ལབ་སྒྲོན་གྱིས་ཧོར་ཟླ་གསུམ་པའི་ཚེས་བཅུར་གཡའ་རིའི་གཏེར་འདི་སྦས། ལབ་སྒྲོན་ཆུ་རྟར་འཁྲུངས་པའི་གྱ་གསུམ་དང༌། ཡོས་ལོར་འཁྲུངས་པའི་གྱ་དྲུག་གོ ། ཤིང་སྦྲུལ། དུས་མཁྱེན་གྱིས་ཀརྨ་ལྷ་སྟེང་བཏབ། ལབ་སྒྲོན་ཆུ་ལུག་ལ་སྐྱེས་པའི་གྱ་གསུམ་པའོ། ། མེ་རྟ། ལྷ་འགྲོ་བའི་མགོན་པོ། ཁ་རག་གྲགས་རྒྱལ། སྙེ་མདོ་སྨྲ་བའི་སེང་གེ་རྣམས་འཁྲུངས། མེ་ལུག རིགས་ལྡན་སྣ་ཚོགས་གཟུགས་ཀྱིས་ཆོས་བསྟན་ནས་ལོ་རེ་གཅིག་སོང༌། རྒྱལ་བ་ཡེ་གྲགས་ས་དམར་བ་གཤེགས། ལོ་གཅིག་རྒྱལ་གྱི་གདན་ས་སྟོངས། དཔོན་རིན་པོ་ཆེ་དང༌། ཀམ་ཀམ་ཞིག་པོ་འདུལ་གྲྭ་བ་རིན་ཆེན་འབྱུང་གནས། རྒྱལ་བ་ལོ་རས་པ་དབང་ཕྱུག་བརྩོན་འགྲུས་རྣམས་འཁྲུངས། ཞང་གིས་གུང་ཐང་བཏབ་ནས་ལྷ་ཆེན་བཞེངས། ས་སྤྲེལ། གླིང་རས་པ་པད་མ་རྡོ་རྗེ་གཤེགས། རྒྱ་རས་ཀྱིས་རོ་སྙོམ་སྐོར་དྲུག་གི་གཏེར་བཏོན། བྱང་རྟ་རྣ་བཏབ། ས་བྱ། དགེ་བཤེས་གླན་རྒྱལ་གྱི་གདན་སར་ཕེབས། སེ་སྤྱིལ་བུ་བ་གཤེགས། བསམ་གླིང་བ་དང༌། རྒོད་ཚང་བ་མགོན་པོ་རྡོ་རྗེ་གཉིས་འཁྲུངས། དུས་མཁྱེན་གྱིས་མཚུར་ཕུ་བཏབ། ལྕགས་ཁྱི། སྟེང་པ་ལོ་ཙཱ་བ་ཚུལ་ཁྲིམས་གཤེགས། ཡ་ཚེ་རྒྱལ་པོས་ཇོ་བོར་གསེར་ཐོག་ཕུབ། ལྕགས་ཕག དགེ་བཤེས་གླན་གཤེགས་ནས་དགེ་བཤེས་དྲི་འདུལ་གྱིས་རྒྱལ་ལྷ་ཁང་གི་གདན་ས་ལོ་གཅིག་མཛད། བྱ་ཡུལ་ཟེམ་རིན་པོ་ཆེ་དང་སྐུ་ཡུལ་བ་རིན་ཆེན་མགོན་པོ་གཉིས་འཁྲུངས། ཁྲོ་ཕུ་ལོ་ཙཱ་བ་བསྙེན་རྫོགས་མཛད། ཆུ་བྱི། སྨྲ་བས་སྨྲ་དགོན་བཏབ། ཆུ་གླང༌། ཀཾ་ཀཾ་པ་དགེ་བཤེས་སྐྱོ་སྟོན་རྒྱལ་གྱི་གདན་སར་ཕེབས། རིན་པོ་ཆེ་གླང་ལུང་པ། བླ་མ་ཞང་ཀརྨ་དུས་གསུམ་མཁྱེན་པ་རྣམས་གཤེགས། ཤིང་སྟག བླ་མ་ཞང་གི་གདན་སར་མཉམ་མེད་ཤཱཀྱ་ཡེ་ཤེས་ཕེབས། ཤིང་ཡོས། ཁྲོ་ཕུ་རྒྱལ་ཚ་གཤེགས། ཁྲོ་ཕུ་ལོ་ཙཱ་བ་བལ་བོར་བྱོན། མེ་འབྲུག ཞང་ཉི་འབུམ་གྱི་སྲས་ཇོ་འབེར་འཁྲུངས། ཉང་སྟོད་འཇམ་དབྱངས་མགོན་པོ་དང༌། དོན་ཡོད་རྡོ་རྗེ་གཉིས་འཁྲུངས། མེ་སྦྲུལ། ཆག་ཆོས་རྗེ་དཔལ་འཁྲུངས། ཁྲོ་ལོ་མི་ཏྲ་གདན་འདྲེན་དུ་བྱོན། ས་རྟ། འབྲི་གུང་ཆོས་རྗེ་དང༌། སྟག་ལུང་ཆོས་རྗེ་གཉིས་ཀྱིས་ཕག་གྲུའི་གདན་སར་གཙུག་ལག་ཁང་ཆེན་མོ་བཞེངས། མི་ཏྲ་བོད་དུ་ཕེབས་ནས་ཁྲོ་ཕུར་ཟླ་བ་དྲུག་ཙམ་བཞུགས། ས་ལུག ཞིག་པོ་བདུད་རྩི། དྭགས་པོའི་བུ་ཆེན་གྲོལ་སྒོམ་ཞྭ་དམར་ནམ་མཁའ་འོད་རྣམས་གཤེགས། མི་ཏྲ་རྒྱ་གར་དུ་ཕེབས་པའི་ལམ་དུ་རྫུ་འཕྲུལ་དཔག་མེད་བསྟན། ལྕགས་སྤྲེལ། ཀཾ་ཀཾ་པ་དགེ་བཤེས་སྐྱོ་སྟོན་གཤེགས་ནས་རྒྱལ་གྱི་གདན་སར་དགེ་བཤེས་ལྕགས་རི་བ་ཕེབས། ཞྭ་དམར་བཀྲ་ཤིས་གྲགས་པ། འབྲུག་པ་གཞོན་ནུ་སེང་གེ །སྒམ་པོ་སྙི་སྒོམ་ཆེན་རྣམས་འཁྲུངས། བུདྡྷ་ཤྲཱི་ཁྲོ་ལོས་བོད་དུ་སྤྱན་དྲངས། ཁ་ཅིག་ལབ་སྒྲོན་གཤེགས་ཟེར། ལྕགས་བྱ། ལབ་སྒྲོན་ལུག་ལོར་འཁྲུངས་པའི་གོ་དགུ་པ་ལོ་འདིར་གཤེགས་པར་བཤད་པ་ལེགས། ཆུ་ཁྱི། རྔོག་གཟི་བརྗིད་གྲགས་པ་དང་སྤྱན་སྔ་རིན་ཆེན་ལྡན་གཉིས་འཁྲུངས། ཆུ་ཕག དཔལ་ཆེན་འོད་པོ་གཤེགས། རྒྱལ་བ་རིན་ཆེན་ཐོག་རྡུགས་པ། སངས་རྒྱས་ཡར་བྱོན། རོང་བ་རྒ་ལོ་རྣམས་འཁྲུངས། ཤིང་བྱི། ཀརྨ་པཀྴི་འཁྲུངས། ཁ་ཆེ་པཎ་ཆེན་བོད་དུ་བྱོན། ལབ་སྒྲོན་གཤེགས། ཤིང་གླང༌། རྔོག་རྒྱལ་པོ་དགའ་འཁྲུངས། གཉལ་ཞིག་གི་སློབ་མ་རྒྱ་མཆིང་རུ་བས་སྙེ་ཐང་བདེ་བ་ཅན་བཏབ། མེ་སྟག། གཡའ་བཟང་བཏབ། ཁ་ཅིག་ཀརྨ་པཀྴི་འཁྲུངས་ཟེར། རབ་བྱུང་བཞི་པ། མེ་ཡོས། ཟངས་ར་བ་ཡེ་ཤེས་སེང་གེ་དང༌། ཞང་གི་གདན་ས་པ་མཉམ་མེད་ཤཱཀྱ་ཡེ་ཤེས་གཤེགས། ཁ་ཆེ་པཎ་ཆེན་གྱིས་ཐང་པོ་ཆེར་བསྟན་རྩིས་མཛད། སངས་རྒྱས་འདས་ནས་ལོ་སྟོང་དང་བདུན་བརྒྱ་དང་ལྔ་བཅུ་སོང༌། ས་འབྲུག། པཎ་ཆེན་ཤཱཀྱ་ཤྲི་རྭ་སྒྲེང་སོགས་སུ་བྱོན། རྗེ་སྤྱན་སྔ་གྲགས་འབྱུང་ཕག་གྲུའི་གདན་སར་ཕེབས། ལོ་རས་ཀྱི་སློབ་མ་འཇམ་དབྱངས་མགོན་པོ་འཁྲུངས། སློབ་དཔོན་བྱང་ཆུབ་ཡེ་ཤེས་ཞང་གི་གདན་སར་ཕེབས། ཁ་ཆེ་པཎ་ཆེན་གྱི་དྲུང་དུ་ས་པཎ་བསྙེན་རྫོགས་མཛད། ས་སྦྲུལ། ལྕགས་རྟ། རྒྱ་མ་དབོན་སྟོན་གཤེགས། ཁ་ཆེ་པཎ་ཆེན་གྱིས་ས་སྐྱར་དབྱར་གནས་མཛད། སྟག་ལུང་ཐང་པ་དང་སངས་རྒྱས་སྒོམ་པ་གཉིས་གཤེགས། སྐུ་ཡལ་བ་རིན་ཆེན་མགོན་གྱིས་སྟག་ལུང་གི་གདན་ས་མཛད། ལྷ་ཕྱུག་མཁར་བ་ཞང་གི་གདན་སར་ཕེབས། ལྕགས་ལུག གཅུང་དེ་མོ་རྡོ་རྗེ་གྲགས་པ་འཁྲུངས། འགྲོ་མགོན་གཙང་པ་རྒྱ་རས་དང༌། མལ་ཀ་བ་ཅན་གཤེགས། ཆུ་སྤྲེལ། གཏེར་སྟོན་གུ་རུ་ཆོས་ཀྱི་དབང་ཕྱུག་འཁྲུངས། ཁྲོ་ལོས་བྱམས་ཆེན་རབ་གནས་མཛད། ཆུ་བྱ། རྙིང་མའི་སློབ་དཔོན་ཉི་འབུམ་གཤེགས། རྒྱལ་བ་ཡང་དགོན་པ་འཁྲུངས། ཤིང་ཁྱི། ཀཾ་ཀཾ་བསོད་ནམས་རིན་ཆེན་འཁྲུངས། སངས་རྒྱས་འབུམ་པ་ཞང་གི་གདན་སར་ཕེབས། ཁ་ཆེ་པཎ་ཆེན་ཁ་ཆེར་བྱོན། ཤིང་ཕག སེ་ཆེན་རྒྱལ་པོ་འཁྲུངས། སྦལ་ཏི་དགྲ་བཅོམ་གཤེགས། མེ་བྱི། རྗེ་བཙུན་གྲགས་པ་རྒྱལ་མཚན་གཤེགས་ཤིང་བསྟན་རྩིས་མཛད། ཆག་དགྲ་བཅོམ་པ་འདས། མེ་གླང༌། ཡང་དགོན་པ་འབྲི་གུང་འཇིག་རྟེན་མགོན་པོ། རྒྱལ་བ་རྟེན་ནེ། ཀུན་ལྡན་རས་པ་རྣམས་གཤེགས། སྙི་མདོ་ཐམས་ཅད་མཁྱེན་པ་འཁྲུངས། མཁན་པོ་རྡོ་རྗེ་ཚུལ་ཁྲིམས་འབྲི་གུང་གི་གདན་སར་ཕེབས། ས་སྟག། དགེ་བཤེས་ལྕགས་རི་བ་དང༌། དྭགས་པོ་མཁན་པོ་འདུལ་འཛིན་གཉིས་གཤེགས། གཅུང་བཅུ་གཉིས་པ་རིན་ཆེན་རྡོ་རྗེ་འཁྲུངས། ས་ཡོས། གླང་སྟོན་ཤེར་སེང་གིས་རྒྱལ་གྱི་གདན་ས་ལོ་དྲུག་མཛད། རྔོག་རྡོ་རྗེ་སེང་གེ་གཤེགས། ལྕགས་འབྲུག ཀཾ་ཀཾ་ཁྲོམ་གཞེར་ཇོ་སྲས་གཤེགས། ཁམས་ལུང་པ་འཁྲུངས། ལྕགས་སྦྲུལ། འབྲི་གུང་མཁན་པོ་རྡོ་རྗེ་ཚུལ་ཁྲིམས་གཤེགས། ཚལ་བས་ཧོར་ཡུལ་དུ་དཀོན་མཆོག་གི་ཆེ་བ་བཏོན། ཆུ་རྟ། དབོན་རིན་པོ་ཆེ་འབྲི་གུང་གི་གདན་སར་ཕེབས། ཆུ་ལུག འཁྲུལ་ཞིག་དྷརྨཱ་སེང་གེ་དང༌། ཆོས་སྒོ་བ་རྡོ་རྗེ་ཡེ་ཤེས་འཁྲུངས། ཤིང་སྤྲེལ། སྦས་པ་སྟོན་གཞོན་འཁྲུངས། གཉོས་རྒྱལ་བ་ལྷ་ནང་བ་གཤེགས། སྐུ་ཡལ་བ་རིན་ཆེན་མགོན་གྱིས་ལྷ་ཁང་ཆེན་མོ་བཞེངས། ཤིང་བྱ། ནེ་རིང་བ་བདེ་ལེགས་རྒྱལ་མཚན་འཁྲུངས། ཁ་ཆེ་པཎ་ཆེན་གཤེགས། ཞང་སྟོན་འཚེ་མ་པས་རྒྱལ་གྱི་གདན་ས་ལོ་བཅུ་གསུམ་མཛད། མེ་ཁྱི། མེ་ཕག རིགས་ལྡན་སྣ་ཚོགས་གཟུགས་ཀྱིས་ལོ་བརྒྱར་ཆོས་བསྟན་ནས་གཤེགས། ཐོག་ཁ་བ་རིན་ཆེན་འཁྲུངས། ས་བྱི། རིགས་ལྡན་ཟླ་བའི་འོད་ཤམྦྷ་ལའི་ཁྲིར་ཕེབས། ས་གླང༌། བྱ་ཡུལ་པ་སངས་རྒྱས་སྒོམ་པ་གཤེགས། སྒོམ་པ་བ་སྙི་བ་ཇོ་སྲས་འཁྲུངས། ལྕགས་སྟག། རྟ་སྟོན་ཇོ་བོ་ཡེ་ཤེས་གཤེགས། གྲུབ་ཆེན་ཨུ་རྒྱན་པ་འཁྲུངས། ལྕགས་ཡོས། ཇོ་འབེར་གཤེགས། བཀྲ་ཤིས་བླ་མ་འཁྲུངས། སངས་རྒྱས་སྙིང་པོ་ཞང་གི་གདན་སར་ཕེབས། ཆུ་འབྲུག ལྷ་ལུང་གི་དབང་ཕྱུག་གཤེགས། བྱ་ཡུལ་ཁམ་ལུང་པ་དང༌། སངས་རྒྱས་ཇོ་བོ་སྣར་ཐང་བ་ཞང་སྟོན་ཆོས་བློ་གསུམ་འཁྲུངས། ཆུ་སྦྲུལ། གཡའ་བཟང་བ་གཤེགས་ནས་གདན་སར་ཉེ་གནས་ཇོ་སྲས་བཞུགས། རོག་ཤེས་རབ་བླ་མ་གཤེགས། གུ་རུ་ཆོས་དབང་གིས་གནམ་སྐས་བྲག་ནས་གཏེར་བཏོན། ཤིང་རྟ། རྔོག་ཀུན་དགའ་རྡོ་རྗེ་དང༌། དབོན་རིན་པོ་ཆེ་གཉིས་གཤེགས། སྤྱན་སྔ་གྲགས་པ་འབྱུང་གནས་འབྲི་གུང་གི་གདན་སར་ཕེབས། མཁས་གྲུབ་ཤངས་སྟོན་འཁྲུངས། ཤིང་འབྲུག འགྲོ་མགོན་འཕགས་པ་དང༌། རྔོག་སེང་གེ་སྒྲ་གཉིས་འཁྲུངས། རྒྱལ་བ་རིན་ཆེན་ཐོག་རྡུགས་པ་གྲགས་པ་བརྩོན་འགྲུས་ཕག་གྲུའི་གདན་སར་ཕེབས། མེ་སྤྲེལ། སྐུ་ཡལ་རིན་ཆེན་མགོན་གཤེགས་ནས་སངས་རྒྱས་ཡར་བྱོན་ཤེས་རབ་བླ་མ་སྟག་ལུང་གི་གདན་སར་ཕེབས། སྒོམ་བདེ་པས་སྐུ་འབུམ་རྩ་བཞེངས། སྒམ་པོ་བ་སྙི་སྒོམ་ཆེན་པོ་གཤེགས། མེ་བྱ། འབྲུག་པ་དབོན་རས་དྷརྨ་སེང་གེ་གཤེགས། ས་ཁྱི། རྒྱལ་གྱི་གདན་ས་སྟོངས། ས་སྐྱ་པ་རིན་ཆེན་རྒྱལ་མཚན་དང༌། ཡེ་ཤེས་འབྱུང་གནས་ལྷོ་བྲག་ཁ་པ་བློ་གྲོས་ཡེ་ཤེས་རྣམས་འཁྲུངས། སངས་རྒྱས་གཞོན་ནུ་ཞང་གི་གདན་སར་ཕེབས། ཁ་ཅིག་མཚམས་བཅད་པ་འཁྲུངས་ཟེར། ས་ཕག ཟངས་ཚ་བསོད་ནམས་རྒྱལ་མཚན་གཤེགས། འགྲོ་མགོན་ཕྱག་ན་འཁྲུངས། ལྕགས་བྱི། རིན་ཆེན་གྲགས་པ་ཡེ་ཤེས། མཚམས་བཅད་པ། ཞང་དཀོན་མཆོག་དཔལ་རྣམས་འཁྲུངས། ལོ་འདིར་ཧོར་དམག་གིས་རྒྱལ་ལྷ་ཁང་མེས་བསྲེགས་པར་རྗེས་སུ་ཧོར་འགྱོད་ནས་གསེར་བྲེ་དངུལ་བྲེ་མང་པོ་བྱིན་ནས་ལྷ་ཁང་ཞིག་གསོ་བྱས། ལྕགས་གླང༌། དབོན་ཤེར་འབྱུང་གཤེགས། ཆུ་སྟག ཉེ་གནས་ཇོ་སྲས་གཤེགས། སྙེ་ཐང་གྲགས་སེང་གིས་བསྟན་རྩིས་མཛད། ཆུ་ཡོས། རྙིང་མའི་གྲུབ་ཐོབ་མེ་ལོང་རྡོ་རྗེ། རྔོག་རིན་ཆེན་བཟང་པོ་གཉིས་འཁྲུངས། རྟོགས་ལྡན་རྒྱལ་པོ་དགེ་མཛེས་འོད་གཡའ་བཟང་གདན་སར་ཕེབས། ཨོ་གོ་ཏས་ཧོར་གྱི་རྒྱལ་སར་འཁོད། ཚལ་བ་གདན་དྲངས་ཤིང་འཇའ་ས་བྱིན། ཤིང་འབྲུག། ས་སྐྱ་པཎ་ཆེན་རྒྱ་ནག་ཏུ་བྱོན། འཕགས་པ་དང༌། ཕྱག་ན་གཉིས་ཀྱང་ཕེབས། ཤིང་སྦྲུལ། མེ་རྟ། རྔོག་སློབ་དཔོན་ཆོས་རྡོར་འཁྲུངས། མེ་ལུག ས་སྤྲེལ། ཨོ་གོ་ཏའི་བུ་གོ་ཡུག་ཟླ་བ་དྲུག་རྒྱལ་སར་བསྡད། མོང་གོལ་ཧན་ཁྲིར་འཁོད། ས་པཎ་ལ་ཉམས་སད་བྱས། པདྨ་ལས་འཕྲེང་རྩལ་འཁྲུངས། ས་བྱ། དུས་མཁྱེན་གྱི་སློབ་མ་གངས་པ་དང༌། སྤོམ་བྲག་པ་གཉིས་གཤེགས། ལྕགས་ཁྱི། སྤྱན་སྔ་རིན་པོ་ཆེ་གཉིས་མཆོད་པ་གྲགས་པ་རིན་ཆེན་དང་ཞང་དཀོན་མཆོག་དཔལ་གཉིས་འཁྲུངས། ལོ་རས་པ་གཤེགས། ལྕགས་ཕག སངས་རྒྱས་དབོན་གྲགས་པ་དཔལ་དང་འབྲུག་པ་ཉི་མ་སེང་གེ་གཉིས་འཁྲུངས། གོ་དན་གྱི་སར་ས་པཎ་གཤེགས། ཆུ་བྱི། སྣར་ཐང་པ་མཆིམས་ནམ་མཁའ་གྲགས་འཁྲུངས། ཆུ་གླང༌། འཕགས་པས་ཧོར་གྱི་བླ་མཆོད་མཛད། ས་པཎ་གཤེགས་པའི་གདུང་ངོ་མཚར་ཅན་བྱོན་པ་ལ་ཧོ་བེ་ལ་སོགས་དད་ནས་འཕགས་པ་ལ་དབང་ཞུས་དགེ་བཤེས་གནས་བརྟན་གྱིས་རྒྱལ་གྱི་གདན་ས་ལོ་བཞི་མཛད། ཤིང་སྟག ཀམ་ཀམ་ཞིག་པོ་འདུལ་གྲྭ་བ་གཤེགས། རྣམ་སྲས་མདུང་དམར་ཅན་གྱིས་བསྐུལ་བ་ལྟར། ཀརྨ་པཀྴི་རྒྱ་ནག་ཏུ་བྱོན། འཕགས་པས་བྱང་དུ་སྐུ་འབུམ་མཛད། ཤིང་ཡོས། སྙེ་ཐང་མཁན་པོ་གྲགས་པ་སེང་གེ་ལས་འཕགས་པ་དགུང་ལོ་ཉེར་གཅིག་པ་བསྙེན་པར་རྫོགས། ཀཾ་ཀཾ་རིན་ཆེན་གཞོན་ནུ་འཁྲུངས། སྤྱན་སྔ་གྲགས་འབྱུང་གཤེགས། གཅུང་དེ་མོ་འབྲི་གུང་གི་གདན་སར་ཕེབས། མེ་འབྲུག། བྱ་ཡུལ་ཟེམ་རིན་པོ་ཆེ་གཤེགས། གུ་རུ་ཆོས་དབང་གིས་ཆོས་དྲུག་མཁར་ཁང་མ་གཏེར་ནས་སྤྱན་དྲངས། མེ་སྦྲུལ། གླང་སྟོན་སེང་གེ་འབུམ་གྱིས་རྒྱལ་གྱི་གདན་ས་ལོ་ཉི་ཤུ་རྩ་གསུམ་མཛད། ཆོས་རྗེ་དཔལ་བཟང་པོ་འཁྲུངས། ཀརྨ་པཀྴིས་རྫུ་འཕྲུལ་གྱིས་ཧོར་རྒྱལ་པོ་གོ་དན་ཆོས་ལ་བཙུད་ཅིང༌། གྲུབ་རྟགས་དང་པོ་བསྟན། ས་རྟ། འབྲུག་པ་སེང་གེ་རིན་ཆེན་འཁྲུངས། ཆོས་རྗེ་རྒོད་ཚང་པ་མགོན་པོ་རྡོ་རྗེ་དང་རྒྱལ་བ་ཡང་དགོན་པ་གཉིས་གཤེགས། ས་ལུག ལྷ་འགྲོ་བའི་མགོན་པོ་གཤེགས། ནེ་རིང་བཏབ། ལྕགས་སྦྲེལ། ཧོ་བི་ལི་སེ་ཆེན་ཧན་རྒྱལ་སར་འཁོད། འཕགས་པ་གོང་མའི་བླ་མར་གྱུར། བསམ་གླིང་བ་རིན་པོ་ཆེ་གཤེགས། ཀརྨ་པཀྴི་མེ་ཆུ་གཡང་གསུམ་དུ་བསྐྱུར་ཡང་མ་ཚུགས་པའི་གྲུབ་རྟགས་བར་མ་བསྟན། ལྕགས་བྱ། ཀོ་བྲག་པ་བསོད་ནམས་རྒྱལ་མཚན་གཤེགས། མཁས་བཙུན་རྒྱལ་མཚན་འབུམ་འཁྲུངས། ཀརྨ་པཀྴིས་རྒྱལ་ཁམས་ཐམས་ཅད་ནད་དང་མེ་ཆུའི་འཇིགས་པ་ལས་བསྐྱབ་སྟེ་གྲུབ་རྟགས་ཐ་མ་བསྟན། ཆུ་ཁྱི། བདག་ཆེན་བཟང་པོ་དཔལ་འཁྲུངས། ས་སྐྱའི་གསེར་ཐོག་ཐང་རྟེན་ཐུབ་སྐུ་གསེར་འབུམ་རྣམས་བཞེངས། ཆུ་ཕག ཀརྨ་པཀྴིས་ཉེ་གནས་སྔོན་ལ་བཏང་ནས་མཚུར་ཕུར་ལྷ་ཁང་བཞེངས། ཤིང་བྱི། ཆག་ཆོས་རྗེ་དཔལ་གཤེགས། གྲུབ་ཐོབ་སྨན་ལུང་བ་རྒྱ་གར་དུ་བྱོན། ཤིང་གླང། འཕགས་པ་བོད་དུ་བྱོན། མེ་སྟག། མེ་ལོང་རྡོ་རྗེའི་སློབ་མ་ཀུ་མཱ་ར་ཛཱ་དང༌། འབྲུག་པ་གཞོན་ནུ་སེང་གེ་གཉིས་འཁྲུངས། རབ་བྱུང་ལྔ་པ། མེ་ཡོས། སེ་ཆེན་ཧན་གྱིས་རྒྱལ་བ་ཐོག་རྡུགས་པ་ལ་འབུལ་མོ་ཆེ་བྱས་ཏེ་འབྲི་གདན་གྱི་ཡོན་བདག་ཏུ་གྱུར། འགྲོ་མགོན་ཕྱག་ན་དང་ཐོག་རྡུགས་པ་གཉིས་ཀྱང་གཤེགས། གཅུང་བཅུ་གཉིས་པ་རིན་ཆེན་རྡོ་རྗེ་ཕག་གྲུའི་གདན་སར་ཕེབས། མཆིམས་ནམ་མཁའ་གྲགས་གཤེགས། ས་འབྲུག སྙེ་མདོ་ཀུན་དགའ་དོན་གྲུབ་དང༌། ཕྱག་ནའི་སྲས་དྷརྨ་པཱ་ལ་རཀྵི་ཏ་སངས་རྒྱས་སྒོམ་པ་གསར་མ་གསུམ་འཁྲུངས། ས་སྦྲུལ། འཕགས་པ་སླར་ཡང་རྒྱ་ནག་ཏུ་བྱོན། ཧོར་གྱིས་བོད་ལ་མི་འཚེ་བའི་འཇམ་ལམ་བཏོད། ཁ་ཅིག་རྒྱལ་བ་ཐོག་རྡུགས་པ་གཤེགས་ཟེར། ལྕགས་རྟ། ཁ་ཅིག་རྒྱལ་བ་ཐོག་རྡུགས་པ་གཤེགས་ཟེར། ལྕགས་ལུག ཁ་རག་གྲགས་རྒྱལ་བ་གཤེགས། ཆུ་སྤྲེལ། སངས་རྒྱས་ཡར་བྱོན་གཤེགས་ནས་མངྒ་ལ་གུ་རུ་སྟག་ལུང་གི་གདན་སར་ཕེབས། ཆུ་བྱ། གུ་རུ་ཆོས་དབང་དཔོན་སློབ་གསུམ་པོ་ཏ་ལ་ནས་གཤེགས། ཤིང་ཁྱི། ས་སྐྱ་པ་ཡེ་འབྱུང་གཤེགས། བལ་བོད་མཚམས་སུ་ཐར་པ་གླིང་བཏབ། ཤིང་ཕག འཇམ་དབྱངས་བློ་གྲོས་སེང་གེས་མདོ་རྒྱུད་ལུང་གསལ་བརྩམས་བསྟན་རྩིས་མཛད། མེ་བྱི། འཕགས་པ་སླར་ཡང་བོད་དུ་ཕེབས་ནས་གཙང་ཆུ་མིག་རིང་མོར་དགེ་འདུན་ཁྲི་ཕྲག་བདུན་ལ་བསྙེན་བཀུར་ཏེ་ཆུ་མིག་ཆོས་འཁོར་མཛད། དཔང་ལོ་ཙཱ་བ་བློ་གྲོས་བརྟན་པ་འཁྲུངས། སངས་རྒྱས་དབོན་གྱིས་རི་བོ་ཆེ་བཏབ། མེ་གླང༌། ལྷ་ཟུར་ཁང་པ་དང༌། གྲུབ་ཆེན་གྲགས་པ་བསོད་ནམས་དཔལ་གཉིས་འཁྲུངས། ཁ་ཅིག་རི་བོ་ཆེ་བཏབ་ཟེར། ས་སྟག རིན་པོ་ཆེ་རྡོར་རིན་པ་འཁྲུངས། ས་ཡོས། ས་སྐྱ་པ་རིན་ཆེན་རྒྱལ་མཚན་པ་གཤེགས། གཅུང་དེ་མོ་གཤེགས་ནས་ཐོག་ཁ་པ་རིན་ཆེན་སེང་གེ་འབྲི་གུང་གི་གདན་སར་ཕེབས། སྒམ་པོ་བ་ཆོས་ཀྱི་རྒྱལ་མཚན་འཁྲུངས། ལྕགས་འབྲུག འཁོན་པོ་བར་པས་རྒྱལ་གྱི་གདན་ས་ལོ་དགུ་མཛད། འགྲོ་མགོན་འཕགས་པ། སངས་རྒྱས་རས་པ། གཅུང་བཅུ་གཉིས་པ་རིན་ཆེན་རྡོ་རྗེ། རྟོགས་ལྡན་རྒྱལ་བ་སེང་གེ་མཛེས་འོད་བཞི་གཤེགས། ལྕགས་སྦྲུལ། རྔོག་གཟི་བརྗིད་གྲགས་པ་དང༌། ནེ་རིང་བ་བདེ་ལེགས་རྒྱལ་མཚན་གཉིས་གཤེགས། རིན་པོ་ཆེ་གྲགས་པ་ཡེ་ཤེས་ཀྱིས་ཕག་གྲུའི་གདན་ས་མཛད། གཡའ་བཟང་གདན་སར་མཁར་ཆུ་བ་ཆོས་བསམ་འོད་ཕེབས། ཧོར་དམག་གིས་བྱ་རོག་རྫོང་བཅོམ་ནས་དཔོན་ཆེན་ཀུན་དགའ་བཟང་བོ་བསད། ཆུ་རྟ། བྱ་ཡུལ་ཁམས་ལུང་བ་དང་ཞྭ་དམར་བཀྲ་ཤིས་གྲགས་པ་གཉིས་གཤེགས། གྲུབ་ཆེན་ཨོ་རྒྱན་པས་བསམ་ཡས་སུ་བསྟན་རྩིས་མཛད། ཆུ་ལུག རྔོག་ཆོས་ཀྱི་རྒྱལ་མཚན་དང༌། ཞྭ་དམར་བ་རྟོགས་ལྡན་གྲགས་པ་སེང་གེ་གཉིས་འཁྲུངས། ཀརྨ་པཀྴི་གཤེགས། ཤིང་སྤྲེལ། བྱ་ཡུལ་སངས་རྒྱས་སྒོམ་པ་ཕྱི་མ། ཀརྨ་རང་བྱུང་རྡོ་རྗེ། འབྲི་གུང་ཉེར་བརྒྱད་པ། རྡོ་རྗེ་རྒྱལ་པོ་བཞི་འཁྲུངས། རྔོག་རྒྱལ་པོ་དགའ་གཤེགས། ཤིང་བྱ། འབྲི་གུང་བས་བྱ་ཡུལ་མེས་བསྲེགས། གཙང་སྟོན་པ་གྲོང༌། ཐོག་ཁ་བ་རིན་ཆེན་སེང་གེ་གཤེགས་ནས་མཚམས་བཅད་པ་འབྲི་གུང་གི་གདན་སར་ཕེབས། མེ་ཁྱི། ཀམ་ཀམ་བསོད་ནམས་རིན་ཆེན་གཤེགས། མེ་ཕག། ས་སྐྱ་དྷརྨ་པཱ་ལ་དང༌། འབྲུག་པ་ཉི་མ་སེང་གེ་གཉིས་གཤེགས། རྒྱལ་བ་གཡུང་སྟོན་འཁྲུངས། སྐྱོ་སྟོན་པས་སྣར་ཐང་བཟུང༌། ས་བྱི། རིགས་ལྡན་ཟླ་བའི་འོད་ཀྱིས་ཆོས་བསྟན་ནས་རེ་གཅིག་སོང༌། རིན་ཆེན་གྲགས་པ་ཡེ་ཤེས་འདས། མཚམས་བཅད་པ་གྲགས་པ་བསོད་ནམས་གཤེགས་ནས་ཆོས་སྒོ་བ་རྡོ་རྗེ་ཡེ་ཤེས་འབྲི་གུང་གི་གདན་སར་ཕེབས། རཏྣ་གུ་རུ་འཁྲུངས། ས་གླང༌། བྱང་ཆུབ་སེམས་དཔས་རྒྱལ་གྱི་གདན་ས་ལོ་བཅོ་བརྒྱད་མཛད། རིན་པོ་ཆེ་གཉིས་མཆོད་པ་ཕག་གྲུའི་གདན་སར་ཕེབས། འབྲུག་པ་སེང་གེ་རྒྱལ་པོ་འཁྲུངས། ལྕགས་སྟག བུ་སྟོན་རིན་པོ་ཆེ་དང༌། ཤེའི་རྒྱལ་སྲས་ལེགས་ལྡན་པ། གཟི་བརྗིད་རྒྱལ་མཚན་པ་རྣམས་འཁྲུངས། འབྲི་གུང་གླིང་ལོག་བྱུང༌། ས་སྐྱ་པའི་དམག་གིས་འབྲི་གུང་བཅོམ། ལྕགས་ཡོས། སངས་རྒྱས་ཇོ་བོས་བྱ་ཡུལ་ཞིག་གསོ་མཛད། ཆུ་འབྲུག ཀུན་མཁྱེན་དོལ་བོ་ཤེས་རབ་རྒྱལ་མཚན་འཁྲུངས། སེ་ཆེན་གྱིས་གྲུབ་ཆེན་ཨུ་རྒྱན་པ་གདན་དྲངས། ཆུ་སྦྲུལ། ཚེས་བཞི་རྙིང་མ་འཁྲུངས། ཆོས་སྒོ་བ་རྡོ་རྗེ་ཡེ་ཤེས་གཤེགས་ནས་རིན་པོ་ཆེ་རྡོར་རིན་པ་འབྲི་གུང་གི་གདན་སར་ཕེབས། ཨུ་རྒྱན་མགོན་འཁྲུངས། ཤིང་རྟ། མཁན་པོ་ཛྙཱ་ན་པྲཛྙཱ་འཁྲུངས། ཨོལ་ཇོས་ཐུ་རྒྱལ་སར་འཁོད། ཤིང་ལུག འཇམ་དབྱངས་བསམ་གྲུབ་རྡོ་རྗེ་དང༌། རྒྱལ་སྲས་ཐོགས་མེད་པ་དང༌། སྤང་མཁན་ཆེན་འོད་ཟེར་བླ་མ་གསུམ་འཁྲུངས། མེ་སྤྲེལ། ཆོས་རྗེ་ཀློང་ཆེན་པ་འཁྲུངས། སངས་རྒྱས་དབོན་གྲགས་པ་དཔལ་དང༌། སྒམ་པོ་པ་སྙི་ཇོ་སྲས་གཉིས་གཤེགས། མེ་བྱ། མངྒ་ལ་གུ་རུ་གཤེགས་ནས་ཆོས་རྗེ་དཔལ་བཟང་པོ་སྟག་ལུང་གི་གདན་སར་ཕེབས། ས་ཁྱི། མཁར་ཆུ་པ་ཆོས་བསམ་འོད་གཤེགས། རྒྱལ་བ་གཡུང་སྟོན་རྒྱ་ནག་ཏུ་སྤྱན་དྲངས། ས་ཕག ས་སྐྱ་པ་ཀུན་བློ་དང་གཡག་སྡེ་པཎ་ཆེན་གཉིས་འཁྲུངས། གཡའ་བཟང་གི་གདན་སར་ཟྭ་ར་བ་བདེ་ལེགས་འོད་ཕེབས། ལྕགས་བྱི། ཆོས་རྗེ་རཏྣ་ཀ་ར་འཁྲུངས། ལྕགས་གླང༌། ཆུ་སྟག ཏའི་སི་ཏུ་བྱང་ཆུབ་རྒྱལ་མཚན་དང༌། ལོ་ཆེན་བྱང་ཆུབ་རྩེ་མོ་གཉིས་འཁྲུངས། ཆུ་ཡོས། གྲུབ་ཐོབ་མེ་ལོང་རྡོ་རྗེ་གཤེགས། རང་བྱུང་རྡོ་རྗེས་ལྷ་སྟེང་བཏབ། ཤིང་འབྲུག ཤིང་སྦྲུལ། བདག་ཆེན་ནམ་མཁའ་ལེགས་པ་དང༌། ཀམ་ཀམ་རིན་ཆེན་སེང་གེ་འཁྲུངས། མེ་རྟ། བདག་ཆེན་བཟང་པོ་དཔལ་ས་སྐྱའི་གདན་སར་ཕེབས། མེ་ལུག། ཀུན་སྤངས་ལྷ་རི་བས་རྒྱལ་གྱི་གདན་ས་ལོ་བཅོ་བརྒྱད་མཛད། ས་སྤྲེལ། རྔོག་སེང་གེ་སྒྲ་གཤེགས། ས་བྱ། ཆོས་རྗེ་དཔལ་བཟང་པོས་རཏྣ་གུ་རུ་སྟག་ལུང་གི་གདན་སར་བཀོད་ནས་རང་ཉིད་ཀུན་སྤང་མཛད། གྲུབ་ཆེན་ཨུ་རྒྱན་པ་དང་མཁས་གྲུབ་ཤངས་སྟོན་གཉིས་གཤེགས། ལྕགས་ཁྱི། ཏི་ཤྲི་ཀུན་དགའ་རྒྱལ་མཚན། བཅུ་གཉིས་གསར་མ། ཆོས་རྗེ་འབའ་ར་བ། འཇག་ཆེན་བྱམས་པ་དཔལ་རྣམས་འཁྲུངས། རིན་པོ་ཆེ་གཉིས་མཆོད་པ་དང༌། ཆོས་རྗེ་དཔལ་བཟང་པོ་གཉིས་གཤེགས། ལྕགས་ཕག རྔོག་སློབ་དཔོན་ཆོས་རྡོར་གཤེགས། ཆུ་བྱི། བྱ་ཡུལ་པ་སངས་རྒྱས་ཇོ་བོ་གཤེགས། བླ་མ་དམ་པ་བསོད་ནམས་རྒྱལ་མཚན་འཁྲུངས། ཆུ་གླང༌། ཀམ་ཀམ་བརྩོན་འགྲུས་བཟང་པོ་འཁྲུངས། འབྲུག་པ་སེང་གེ་རིན་ཆེན་གཤེགས། ཤིང་སྟག་མཁན་ཆེན་འཇམ་དཔལ་ཡེ་ཤེས་དང༌། འབྲུག་པ་ཀུན་དགའ་སེང་གེ་གཉིས་འཁྲུངས། ཤིང་ཡོས། རིན་པོ་ཆེ་རྡོར་རིན་པ་གཤེགས་ནས་རྡོ་རྗེ་རྒྱལ་པོ་འབྲི་གུང་གི་གདན་སར་ཕེབས། ལྷ་ཁང་ཆེན་མོ་བཞེངས། མེ་འབྲུག མེ་སྦྲུལ། ཞང་དཀོན་མཆོག་དཔལ་པ་གཤེགས། ས་རྟ། རང་བྱུང་རྡོ་རྗེས་རྩིས་ཀུན་ལས་བསྡུས་པ་མཛད། ཆོས་རྡོར་པས་སྙིང་ཐིག །རྒྱལ་སྲས་ལེགས་ལྡན་པ་ལ་གཏད། ས་ལུག རྔོག་རིན་ཆེན་བཟང་པོ་གཤེགས། སྒམ་པོ་པ་སངས་རྒྱས་ཆོས་ཀྱི་སེང་གེ་འཁྲུངས། ལྕགས་སྤྲེལ། ཨུ་རྒྱན་མགོན་པོས་རི་བོ་ཆེའི་གཙུག་ལག་ཁང་བཞེངས། ལྕགས་བྱ། ཆུ་ཁྱི། བུ་སྟོན་རིན་པོ་ཆེས་བསྟན་རྩིས་མཛད། པཎ་ཆེན་གྱིས་བརྩིས་ནས་བརྒྱ་དང་དོན་དྲུག་སོང༌། བདག་ཆེན་བཟང་པོ་དཔལ་དང༌། ཟྭ་ར་བ་བདེ་ལེགས་འོད་གཉིས་གཤེགས། ཆུ་ཕག བཀྲ་ཤིས་འོད་གཡའ་བཟང་གདན་སར་ཕེབས། ཤིང་བྱི། ཤིང་གླང༌། མཁན་ཆེན་ཛྙཱ་ན་པྲཛྙཱ་རྒྱལ་གྱི་གདན་སར་ཕེབས། བདག་ཆེན་ནམ་མཁའ་ལེགས་པས་ས་སྐྱའི་གདན་ས་མཛད། འབྲུག་པ་སེང་གེ་རྒྱལ་པོ་གཤེགས། མེ་སྟག། ལྷོ་བྲག་གྲུབ་ཆེན་ནམ་མཁའ་རྒྱལ་མཚན་འཁྲུངས། དུས་འཁོར་རྩ་རྒྱུད་གསུངས་ནས་ལོ་ཉིས་སྟོང་ཉིས་བརྒྱ་དང་བཞི་འདས་པར་བུ་སྟོན་གསུངས། རབ་བྱུང་དྲུག་པ། མེ་ཡོས། རིགས་ལྡན་ཟླ་འོད་ཀྱིས་ཆོས་བསྟན་ནས་ལོ་བརྒྱ་སོང༌། ས་སྐྱ་པ་ཀུན་བློ་དང༌། ཀམ་ཀམ་རིན་ཆེན་གཞོན་ནུ་གཉིས་གཤེགས། ས་འབྲུག རིགས་ལྡན་མཐའ་ཡས་ཤམྦྷ་ལའི་ཁྲིར་འཁོད། ས་སྦྲུལ། ལྕགས་རྟ། མཁན་པོ་ཡེ་ཤེས་བསོད་ནམས་རྒྱལ་མཚན་འཁྲུངས། ལྕགས་ལུག། རྔོག་དོན་གྲུབ་དཔལ་པ་འཁྲུངས། ཤེའི་ལེགས་ལྡན་དང་རང་བྱུང་བས་སྙིང་ཐིག་ཤོག་སེར་ལས་བསྒྱུར། རང་བྱུང་བ་ཧོར་ཡུལ་དུ་བྱོན། ཆུ་སྤྲེལ། ཆུ་བྱ། ཆོས་རྗེ་ནམ་མཁའ་དཔལ་བཟང་པོ། འབྲི་གུང་དོན་གྲུབ་རྒྱལ་པོ། དཔལ་ལྡན་ཚུལ་ཁྲིམས་གསུམ་འཁྲུངས། ཧོར་ཐོ་གན་ཐུ་མུར་ཐུ་རྒྱལ་སར་འཁོད། ཤིང་ཁྱི། མཁས་བཙུན་རྒྱལ་མཚན་འབུམ་གཤེགས། རྗེ་རང་བྱུང་བ་རི་བོ་རྩེ་ལྔར་ཕེབས་ཤིང་ཐུགས་རྗེ་ཆེན་པོ་ཞལ་གཟིགས་པས་བསྐུལ་ནས་བོད་དུ་ཕེབས། ཤིང་ཕག འབྲི་གུང་ཆོས་ཀྱི་རྒྱལ་པོ་དང་ལྷ་གྲགས་འོད་པ་གཉིས་འཁྲུངས། རང་བྱུང་བས་མི་ཉག་གི་ཡུལ་དུ་བསྟན་པ་ཞིག་གསོ་མཛད། མེ་བྱི། སྒམ་པོ་བ་ཆོས་ཀྱི་རྒྱལ་མཚན་གཤེགས། མེ་གླང༌། ལྷ་ཟུར་ཁང་པ་གཤེགས། ས་སྟག སངས་རྒྱས་སྒོམ་པ་ཕྱི་མ་གཤེགས། ས་ཡོས། ཀརྨ་པ་རང་བྱུང་རྡོ་རྗེ་རྒྱ་ནག་ཏུ་གཤེགས། རཏྣ་གུ་རུ་འདས། རཏྣ་ཀཱ་ར་སྟག་ལུང་གདན་སར་ཕེབས། གྲུབ་ཆེན་སངས་རྒྱས་དཔལ་འཁྲུངས། ལྕགས་འབྲུག ཀརྨ་རོལ་པའི་རྡོ་རྗེ་འཁྲུངས། ལྕགས་སྦྲུལ། ཆུ་རྟ། ཀུན་སྤང་ཆེན་པོ་བསོད་ནམས་རྒྱལ་མཚན་འཁྲུངས། དཔང་ལོ་ཙཱ་བ་གཤེགས། ཆུ་ལུག རིག་འཛིན་ཀུ་མཱ་ར་རཱ་ཛཱ་དང་། བདག་ཆེན་ནམ་མཁའ་ལེགས་པ་གཉིས་གཤེགས། ཤིང་སྤྲེལ། རྒྱ་སྟོན་པས་བསྟན་རྩིས་མཛད་ཅིང་ལུང་གི་མངོན་པ་སོང་ནས་མདོ་སྡེའི་དུས་ཀྱི་མགོ་བརྩམས་པར་འདོད ཤིང་བྱ། འབྲུག་པ་བློ་གྲོས་སེང་གེ་འཁྲུངས། མེ་ཁྱི། ཀམ་ཀམ་སངས་རྒྱས་འོད་ཟེར་འཁྲུངས། མེ་ཕག ལྷོ་རིན་པོ་ཆེ་གྲགས་པ་ཡོན་ཏན་འཁྲུངས། འབྲུག་པ་ཀུན་དགའ་སེང་གེ་གཤེགས། ས་བྱི། ས་གླང་། ཏའི་སི་ཏུ་བྱང་ཆུབ་རྒྱལ་མཚན་གྱིས་དབུས་གཙང་ལ་དབང་བསྒྱུར། ཞྭ་དམར་རྟོགས་ལྡན་གྲགས་པ་སེང་གེ་གཤེགས། རྗེ་བཙུན་རེད་མདའ་བ། ཐེག་ཆེན་ཆོས་ཀྱི་རྒྱལ་པོ་གཉིས་འཁྲུངས། ལྕགས་སྟག སངས་རྒྱས་རིན་ཆེན་རྒྱལ་མཚན་དཔལ་བཟང་པོ། གཡག་ཕྲུག་སངས་རྒྱས་དཔལ། མཁན་ཆེན་རིན་པོ་ཆེ་རྒྱལ་བཟང་བ། ཞྭ་དམར་མཁའ་སྤྱོད་དབང་པོ་རྣམས་འཁྲུངས། བཀྲ་ཤིས་འོད་ཀྱིས་ལྷ་བྲག་འོད་པ་ལ་གཡའ་བཟང་གདན་ས་གཏད་ནས་ཀུན་སྤང་མཛད། ལྕགས་ཡོས། འབྲི་གུང་ཉེར་བརྒྱད་པ་རྡོ་རྗེ་རྒྱལ་པ་གཤེགས་ནས་ཆོས་ཀྱི་རྒྱལ་པོ་འབྲི་གུང་གི་གདན་སར་ཕེབས། འཇག་ཆེན་བྱམས་པའི་སློབ་མ་གྲུབ་ཐོབ་ཤེར་འབྱུང་བ་འཁྲུངས། ཏའི་སི་ཏུ་བྱང་ཆུང་རྒྱལ་མཚན་གྱིས་རྩེས་ཐང་བཏབ། ཆུ་འབྲུག མཁན་ཆེན་ཛྙཱ་ན་པྲཛྙཱ་གཤེགས། ཆུ་སྦྲུལ། མཁན་ཆེན་འཇམ་དཔལ་ཡེ་ཤེས་ཀྱིས་ལོ་གཅིག་རྒྱལ་གྱི་གདན་ས་མཛད། ཤིང་རྟ། མཁན་པོ་ཡེ་ཤེས་བསོད་ནམས་རྒྱ་མཚོ་རྒྱལ་གྱི་གདན་སར་ཕེབས། ཤར་རིན་པོ་ཆེ་འཁྲུངས། ཤིང་ལུག། རྒྱལ་ལྷ་ཁང་བློ་གྲོས་སེང་གེ་སོགས་ཀྱིས་མངོན་པའི་མགོ་བརྩམས་པར་འདོད། མེ་སྤྲེལ། ཚེས་བཞི་གསར་མ་སྤྱན་སྔ་གྲགས་པ་བྱང་ཆུབ་དང༌། བླ་མ་རྟོགས་ལྡན་འཇམ་དཔལ་རྒྱ་མཚོ་གཉིས་འཁྲུངས། མེ་བྱ། རྒྱལ་བ་བློ་བཟང་གྲགས་པ་སྐུ་འཁྲུངས། ཕུལ་བྱུང་ནས་ནི་སུམ་བརྒྱ་དང་བཅུ་འདས་སོ། །རྭ་སྒྲེང་པ་ཤཱཀྱ་བསོད་ནམས་དང༌། སྤྱན་སྔ་བསོད་ནམས་གྲགས་པ་གཉིས་འཁྲུངས། ས་ཁྱི། ས་ཕག ཀརྨ་རོལ་པའི་རྡོ་རྗེའི་དྲུང་དུ་རྗེ་ཙོང་ཁ་པ་དགེ་བསྙེན་མཛད། རྔོག་ཆོས་ཀྱི་རྒྱལ་མཚན་གཤེགས། ཆོས་རྗེ་བསོད་ནམས་གྲགས་པ་དང༌། བཀྲ་ཤིས་དཔལ་བརྩེགས་གཉིས་འཁྲུངས། གཡག་སྡེ་པཎ་ཆེན་གྱིས་ཨེ་ཝཾ་བཏབ། ལྕགས་བྱི། རྔོག་བྱང་ཆུབ་དཔལ་པ་དང༌། འབའ་ར་བའི་སློབ་མ་གཙང་པ་བློ་གྲོས་བཟང་པོ་གཉིས་འཁྲུངས། ཀརྨ་རོལ་པའི་རྡོ་རྗེ་རྒྱ་ནག་ཏུ་བྱོན། ཚེས་བཞི་རྙིང་མ་གྲགས་པ་རྒྱལ་མཚན་གཤེགས། བཅུ་གཉིས་གསར་མ་པ་གྲགས་པ་ཤེས་རབ་ཕག་གྲུའི་གདན་སར་ཕེབས། ལྕགས་གླང༌། ཀུན་མཁྱེན་ཇོ་མོ་ནང་པ་གཤེགས། རཏྣ་ཀཱ་ར་གཤེགས་ནས་ཆོས་རྗེ་ནམ་མཁའ་དཔལ་བཟང་སྟག་ལུང་གི་གདན་སར་ཕེབས། ཆུ་སྟག།། ཆོས་རྗེ་དོན་གྲུབ་རིན་ཆེན་གྱིས་རྗེ་ཙོང་ཁ་པ་ལ་དབང་བསྐུར་ཏེ་གསང་མཚན་དོན་ཡོད་རྡོ་རྗེར་གསོལ། ཆོས་རྗེ་རི་མི་འབབ་པ་འཁྲུངས། ཆུ་ཡོས། རྗེ་ཙོང་ཁ་པ་དགེ་ཚུལ་བསྒྲུབས་ཏེ་བློ་བཟང་གྲགས་པར་མཚན་གསོལ། རྫོགས་ཆེན་པ་ཚུལ་ཁྲིམས་བློ་གྲོས་གཤེགས། ཀརྨ་རོལ་པའི་རྡོ་རྗེ་བོད་དུ་ཕེབས། རྒོད་ཕྲུག་རས་པ་འཁྲུངས། ཤིང་འབྲུག བུ་སྟོན་རིན་པོ་ཆེ་གཤེགས། རྒྱལ་ཚབ་དར་མ་རིན་ཆེན་དང༌། འབྲུག་པ་ཡེ་ཤེས་རིན་ཆེན་གཉིས་འཁྲུངས། ཤིང་སྦྲུལ། ཀམ་ཀམ་པ་རིན་ཆེན་སེང་གེ་གཤེགས། ཀཾ་ཀཾ་དོན་གྲུབ་དཔལ་པ་འཁྲུངས། མེ་རྟ། རྟོགས་ལྡན་བསམ་གཏན་དཔལ་གཤེགས། ཡེ་ཤེས་དཀོན་མཆོག་གླིང་བཏབ། དྲུང་གཞོན་ནུ་བྱང་ཆུབ་དང་བྱང་སེམས་ཀུན་དགའ་བཟང་པོ་གཉིས་འཁྲུངས། མེ་ལུག རོང་སྟོན་ཤཱཀྱ་རྒྱལ་མཚན་འཁྲུངས། ས་སྤྲེལ། ཧོར་རྒྱལ་ཐ་མ་ཐོ་གན་ཐུ་མུར་གྱིས་རྒྱལ་ས་ཤོར་ནས་ཧོར་ཡུལ་དུ་བྲོས་ཏའི་མིང་ཐོག་མ་ཧཱུང་ཝུ་རྒྱལ་སར་འཁོད། ས་བྱ། ཀམ་ཀམ་སངས་རྒྱས་འོད་ཟེར་དང༌། རྒྱལ་སྲས་ཐོགས་མེད་པ་གཉིས་གཤེགས། ཧཱུང་ཝུ་རྒྱལ་པོས་གནས་བརྟན་བཅུ་དྲུག་རྒྱ་ནག་ཏུ་གདན་དྲངས། ལྕགས་ཁྱི། བཅུ་གཉིས་གསར་མ་གཤེགས། དྲུང་མཁའ་སྤྱོད་པ་ནམ་མཁའ་རྒྱལ་མཚན་འཁྲུངས། ལྕགས་ཕག ཚེས་བཞི་གསར་མ་ཕག་གྲུའི་གདན་སར་ཕེབས། འབྲུག་པ་ཤེས་རབ་སེང་གེ་དང༌། སྒམ་པོ་བ་ཆོས་ཀྱི་དབང་ཕྱུག་གཉིས་འཁྲུངས། ཆུ་བྱི། རྗེ་རིན་པོ་ཆེ་དབུས་སུ་བྱོན་པར་བརྩམས། ཆུ་གླང༌། རྗེ་ཙོང་ཁ་པ་མདོ་སྨད་ནས་བཏེག །སྟོན་འབྲི་གུང་དུ་ཕེབས། དགུན་ཆོས་ལ་སྙེ་ཐང་བདེ་བ་ཅན་དུ་ཕར་ཕྱིན་གསན། ཧོར་སྟོན་ནམ་མཁའ་དཔལ་བ་འཁྲུངས། ཤིང་སྟག འདུལ་བ་འཛིན་པ་གྲགས་པ་རྒྱལ་མཚན་འཁྲུངས། ཤིང་ཡོས། རྗེ་རིན་པོ་ཆེས་གྲྭ་སྐོར་མཛད། བླ་མ་དམ་པ་བསོད་ནམས་རྒྱལ་མཚན་གཤེགས། ཞྭ་ལུ་བ་ལེགས་པ་རྒྱལ་མཚན་དང་། བོ་དོང་ཕྱོགས་ལས་རྣམ་རྒྱལ་གཉིས་འཁྲུངས། མེ་འབྲུག རྗེ་རིན་པོ་ཆེས་ཆོས་འཁོར་ཐོག་མ་གནང༌། འཇམ་དབྱངས་བསམ་གྲུབ་རྡོ་རྗེ་གཤེགས། བཀྲ་ཤིས་དཔལ་བརྩེགས་སྟག་ལུང་གི་གདན་སར་བཀོད་ནས། ཆོས་རྗེ་ནམ་མཁའ་དཔལ་བཟང་པོ་རང་ཉིད་སེ་ལེར་བྱོན། མེ་སྦྲུལ། ས་རྟ། གཡག་སྡེ་པཎ་ཆེན་གཤེགས། ས་ལུག། མཁན་པོ་ཡེ་ཤེས་བསོད་ནམས་རྒྱ་མཚོས་ཀུན་སྤངས་མཛད་ནས་རྒྱལ་གྱི་གདན་སར་ཀུན་སྤངས་ཆེན་པོ་བསོད་ནམས་རྒྱལ་མཚན་ཕེབས། ཆོས་རྗེ་ནམ་མཁའ་དཔལ་བཟང་པོ་གཤེགས། འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་འཁྲུངས། ལྕགས་སྤྲེལ། མཁན་པོ་ཡེ་ཤེས་བསོད་ནམས་རྒྱ་མཚོ་གཤེགས། སྤྱན་སྔ་བསོད་ནམས་བཟང་པོ་འཁྲུངས། ལྕགས་བྱ། ཆུ་ཁྱི། ངོར་ཆེན་ཀུན་དགའ་བཟང་པོ་འཁྲུངས། ཆུ་ཕག ཀརྨ་རོལ་པའི་རྡོ་རྗེ་གཤེགས། སྤྱན་སྔ་དཔལ་ལྡན་བཟང་པོ་དང༌། གུང་རུ་རྒྱལ་མཚན་བཟང་པོ་གཉིས་འཁྲུངས། ཤིང་བྱི། ཀརྨ་པ་དེ་བཞིན་གཤེགས་པ་འཁྲུངས། སྟག་ལུང་གི་མཆོད་ཁང་དམར་པོ་བཞེངས། ཤིང་གླང༌། ཀམ་ཀམ་བརྩོན་འགྲུས་བཟང་པོ་གཤེགས། མཁས་གྲུབ་ཆོས་རྗེ་དགེ་ལེགས་དཔལ་བཟང་པོ་འཁྲུངས། མེ་སྟག། ཚེས་བཞི་གསར་མ་གཤེགས། ཆོས་རྗེ་བསོད་ནམས་གྲགས་པ་ཕག་གྲུའི་གདན་སར་ཕེབས། ཆོས་རྗེ་ཉེར་གཉིས་པ་འཁྲུངས། དགའ་མ་མོའི་དགོན་པ་བཟུང༌། རྨ་སེ་རྟོགས་ལྡན་དང༌། ཀུ་ཅོར་རྟོགས་ལྡན་གཉིས་འཁྲུངས། རབ་བྱུང༌བདུན་པ། མེ་ཡོས། ས་འབྲུག རིགས་ལྡན་མཐའ་ཡས་ཀྱིས་ཆོས་བསྟན་ནས་ལོ་རེ་གཅིག་སོང༌། མུས་ཆེན་དཀོན་མཆོག་རྒྱལ་མཚན་འཁྲུངས། ས་སྦྲུལ། རྗེ་བློ་གྲོས་ཆོས་སྐྱོང་འཁྲུངས། ཁ་ཅིག་ཡིད་བཟང་རྩེ་བ་འཁྲུངས་ཟེར། འདི་ལ་འདྲ་མིན་གསུམ་བྱུང༌། ལྕགས་རྟ། མཁན་ཆེན་འཇམ་དཔལ་ཡེ་ཤེས་དང༌། འབྲུག་པ་བློ་གྲོས་སེང་གེ་གཉིས་གཤེགས། ཀུན་སྤངས་ཆེན་པོ་བསོད་ནམས་རྒྱལ་མཚན་པས་རྒྱལ་གྱི་གདན་ས་དབོན་པོ་བསོད་ནམས་གྲགས་པ་ལ་གཏད་ནས་ཀུན་སྤངས་མཛད། ལྕགས་ལུག འབའ་ར་བ་དང་འཇག་ཆེན་བྱམས་པ་དཔལ་གཉིས་གཤེགས། རྒྱལ་བ་དགེ་འདུན་གྲུབ་འཁྲུངས། ཆུ་སྤྲེལ། རྗེ་ཙོང་ཁ་པས་འཇམ་དབྱངས་ཞལ་གཟིགས། འཁོར་དག་པ་རྣམ་བརྒྱད་ཁྲིད་དེ་འོལ་ཁར་ཕེབས། འབྲུག་པ་ཤེས་རབ་སེང་གེ་གཤེགས། ཡིད་བཟང་རྩེ་བ་གཞོན་ནུ་དཔལ་དང༌། སེམས་དཔའ་ཆེན་པོ་བློ་གྲོས་རྒྱལ་མཚན་གཉིས་འཁྲུངས། ཆུ་བྱ། རྗེ་ཙོང་ཁ་པས་འོལ་ཁར་རྫིང་ཕྱི་ཞིག་གསོ་མཛད། རྒྱ་སོག་ཕུར་འཇིགས་བྱེད་ཞལ་གཟིགས། ཤིང་ཁྱི། ཤིང་ཕག རྗེ་རིན་པོ་ཆེ་དང༌། ལྷོ་བྲག་གྲུབ་ཆེན་གཉིས་མཇལ། བྱང་སེམས་ཆོས་རྗེ་ཤེས་རབ་བཟང་པོ་འཁྲུངས། མེ་བྱི། རྒྱལ་ཚབ་དར་མ་རིན་ཆེན་གྱིས་རྗེ་ཙོང་ཁ་པ་བསྟེན། གཉལ་གྱི་ལུང་ར་ཚུགས། མེ་གླང༌། ས་སྟག རྔོག་དོན་འགྲུབ་དཔལ་གཤེགས། འབྲུག་པ་ནམ་མཁའ་དཔལ་བཟང་དང༌། དྭགས་པོ་པཎ་ཆེན་བཀྲ་ཤིས་རྣམ་རྒྱལ་གཉིས་འཁྲུངས། ས་ཡོས། མཁན་ཆེན་བསོད་ནམས་མཆོག་གྲུབ་འཁྲུངས། ལྕགས་འབྲུག འདུལ་འཛིན་གྲགས་པ་དཔལ་ལྡན་དང༌། པཎ་ཆེན་བྱམས་པ་གླིང་པ་གཉིས་འཁྲུངས། ལྕགས་སྦྲུལ། ལྷོ་བྲག་གྲུབ་ཆེན་ནམ་མཁའ་རྒྱལ་མཚན་གཤེགས། བྱང་སེམས་པའི་དགེ་བསྙེན་མཛད། ཆུ་རྟ། བ་སོ་ཆོས་ཀྱི་རྒྱལ་མཚན་དང༌། རྗེ་བློ་གྲོས་བརྟན་པ། འདུལ་ནག་པ་དཔལ་ལྡན་བཟང་པོ་གསུམ་འཁྲུངས། སྒམ་པོ་སངས་རྒྱས་ཆོས་ཀྱི་སེང་གེ་གཤེགས། ཆུ་ལུག ཆོས་རྗེ་བྱང་ཆུབ་རྒྱ་མཚོ་དང་གཏེར་སྟོན་རཏྣ་གླིང་པ་གཉིས་འཁྲུངས། ཏའི་མིང་ཡུང་ལོ་ཁྲིར་འཁོད། ཤིང་སྤྲེལ། ལྷ་གྲགས་འོད་པ་གཤེགས་ནས་ལྷ་བསོད་ནམས་འོད་ཟེར་གཡའ་བཟང་གི་གདན་སར་ཕེབས། ས་རྐང་རྣམ་རྒྱལ་གླིང་བཏབ། ཤིང་བྱ། མཁན་ཆེན་གྲུབ་པ་ཤེས་རབ་པའི་དྲུང་དུ་དགེ་འདུན་གྲུབ་རབ་ཏུ་བྱུང༌། མཁས་གྲུབ་རྗེ་བསྙེན་པར་རྫོགས། ཞྭ་དམར་རྟོགས་ལྡན་མཁའ་སྤྱོད་དབང་པོ་གཤེགས། ཆོས་རྗེ་བསོད་ནམས་གྲགས་པས་སྤྱན་སྔ་དཔལ་ལྡན་བཟང་པོ་ལ་ཕག་གྲུའི་གདན་ས་གཏད། མེ་ཁྱི། ཞྭ་དམར་པ་ཆོས་དཔལ་ཡེ་ཤེས་འཁྲུངས། མེ་ཕག ཆོས་རྗེ་མཁས་གྲུབ་པ་རྗེ་ཙོང་ཁ་པ་དང་མཇལ། སྤྱན་སྔ་དཔལ་ལྡན་བཟང་པོ་གཤེགས། ཀརྨ་པ་ཏའི་མིང་གིས་སྤྱན་དྲངས། ས་བྱི། ཆོས་རྗེ་བསོད་ནམས་གྲགས་པ་དང༌། གྲུབ་ཐོབ་ཤེར་འབྱུང་བ་གཉིས་གཤེགས། སྤྱན་སྔ་བསོད་ནམས་བཟང་པོ་ཕག་གྲུའི་གདན་སར་ཕེབས། ཆོས་རྗེ་བཀྲ་ཤིས་དཔལ་འོད་འཁྲུངས། བྱམས་ཆེན་ཆོས་རྗེ་ཏའི་མིང་རྒྱལ་པོས་སྤྱན་དྲངས། ས་གླང༌། རྗེ་ཙོང་ཁ་པས་ལྷ་ས་སྨོན་ལམ་ཆེན་མོ་དང༌། འབྲོག་རི་བོ་དགའ་ལྡན་བཏབ། ཀུན་སྤངས་ཆེན་པོ་བསོད་ནམས་རྒྱལ་མཚན་གཤེགས། ལྕགས་སྟག། པཎ་ཆེན་བཟང་པོ་བཀྲ་ཤིས་འཁྲུངས། གྲུབ་པ་ཤེས་རབ་པའི་དྲུང་དུ་དགེ་འདུན་གྲུབ་པ་བསྙེན་པར་རྫོགས། ལྕགས་ཡོས། བྱམས་ཆེན་རབ་འབྱམས་པ་སངས་རྒྱས་འཕེལ་འཁྲུངས། ཆུ་འབྲུག རྗེ་རེད་མདའ་བ་གཤེགས། ཆུ་སྦྲུལ། འབྲུག་པ་ཡེ་ཤེས་རིན་ཆེན་གཤེགས། སེམས་དཔའ་བློ་གྲོས་རྒྱལ་མཚན་འཁྲུངས། ཁ་ཅིག་ཡིད་བཟང་རྩེར་འཁྲུངས་ཟེར། སྤྱན་སྔ་བ་བསོད་ནམས་གྲགས་པ་རྒྱལ་གྱི་གདན་སར་ལོ་ཉི་ཤུ་རྩ་གཉིས་སོང་ཞིང༌། དེ་ནས་ཤིང་ཁྱི་བར་ལོ་ཞེ་གཉིས་ལ། ཡེ་ཤེས་གྲགས་བཟང་པོ་ལོ་གསུམ། ཀུན་དགའ་རྒྱལ་མཚན་པ་ལོ་བཅུ་གསུམ། ཀུན་རྡོར་བ་ལོ་བཅུ་གསུམ། བློ་གྲོས་རྒྱལ་མཚན་པས་ལོ་གསུམ་མཛད། ཤིང་རྟ། ལྷ་རིན་པོ་ཆེ་གྲགས་པ་ཡོན་ཏན་གཤེགས། སྨོན་ལམ་དཔལ་ལེགས་པའི་བློ་གྲོས་དང་དྲུང་པ་སངས་རྒྱས་དཔལ་གཉིས་འཁྲུངས། ཤིང་ལུག ཀརྨ་པ་དེ་བཞིན་གཤེགས་པ་གཤེགས། བྱང་སེམས་ཤེས་རབ་བཟང་པོ་དབུས་སུ་བྱོན། ཆོས་རྗེ་ཡེ་ཤེས་བཟང་པོ་འཁྲུངས། རྗེ་དགེ་འདུན་གྲུབ་པ་དབུས་སུ་བྱོན། མེ་སྤྲེལ། ཀརྨ་པ་མཐོང་བ་དོན་ལྡན་དང༌། སྒམ་པོ་བ་བསོད་ནམས་རིན་ཆེན། རྟོགས་ལྡན་བྱང་ཆུབ་བཟང་པོ་གསུམ་འཁྲུངས། སྤྱན་སྔ་བསོད་ནམས་བཟང་པོ་གཤེགས། དཔལ་ལྡན་འབྲས་སྤུངས་བཏབ། མེ་བྱ། ཀམ་ཀམ་པ་སྤྱན་སྔ་དོན་གྲུབ་དཔལ་བས་ཆོས་འབྱུང་བསྟན་པ་རིན་པོ་ཆེའི་གསལ་བྱེད་བརྩམས། པཎ་ཆེན་ལྟར་ན་འདས་ལོ་སྟོང་དང ྋཉིས་བརྒྱ་དང་བཅུ་གཅིག །ྋཔཎ་ཆེན་བརྩིས་ན་ཉིས་བརྒྱ་དང་གཅིག །དགུ་བརྒྱ་དྲུག་ཅུ། ཆོས་རྗེ་ཉེར་གཉིས་པ་ཕག་གྲུའི་གདན་སར་ཕེབས། གཙང་གི་ཁྱུང་པོ་བྱ་བྲལ་དགེ་འདུན་བཟང་པོ་འཁྲུངས། ས་ཁྱི། སྟག་ལུང་བ་ངག་དབང་གྲགས་པ་དཔལ་བཟང་པོ་འཁྲུངས། ས་ཕག རྗེ་རིན་པོ་ཆེ་ཞི་བར་གཤེགས། རྒྱལ་ཚབ་དར་མ་རིན་ཆེན་ཁྲིར་ཕེབས། རྒྱུད་པ་ཀུན་དགའ་དོན་གྲུབ་འཁྲུངས། སེ་ར་ཐེག་ཆེན་གླིང་བཏབ། ལྕགས་བྱི། རིགས་ལྡན་ས་སྐྱོང་འཁྲུངས། ལྕགས་གླང༌། གསང་སྔགས་མཁར་བཏབ། ཆུ་སྟག། གྲགས་པ་རིན་ཆེན་གསེར་ཡིག་པས་པོ་ཏོའི་དགོན་བཏབ། ཆུ་ཡོས། འབའ་ར་བའི་སློབ་མ་གཙང་པ་བཀྲ་ཤིས་དཔལ་བརྩེགས། བློ་གྲོས་བཟང་པོ། སྒམ་པོ་ཆོས་ཀྱི་དབང་ཕྱུག་རྣམས་གཤེགས། རྨ་སེ་རྟོགས་ལྡན་གྱིས་ཟུར་མང་དགོན་བཟུང༌། མཁས་གྲུབ་ནོར་བཟང་རྒྱ་མཚོ་འཁྲུངས། ཤིང་འབྲུག ཆོས་རྗེ་བྱང་ཆུབ་རྒྱ་མཚོ་སྟག་ལུང་གི་གདན་སར་ཕེབས། ཤིང་སྦྲུལ། འབྲུག་པ་ནམ་མཁའ་དཔལ་གཤེགས། མཚུར་ཕུ་བས་བྱེད་རྩིས་ཀྱི་མགོ་བརྩམས། མེ་རྟ། ལྷ་བསོད་ནམས་འོད་ཟེར་གཤེགས། བྱང་སེམས་ཤེས་རབ་བཟང་པོ་ཆབ་མདོར་ཕེབས། མེ་ལུག རིགས་ལྡན་མཐའ་ཡས་ཀྱི་ཆོས་བསྟན་ནས་ལོ་བརྒྱ་སོང༌། ཤ་ར་བ་རིན་ཆེན་རྒྱལ་མཚན་གཤེགས། སྤྱན་སྔ་བསོད་ནམས་འོད་མཛེས་གཡའ་བཟང་གི་གདན་སར་ཕེབས། རྗེ་དྲུང་ཤེས་རབ་དཔལ་བརྩེགས་དང༌། གཉལ་སྟོན་དཔལ་འབྱོར་ལྷུན་གྲུབ་གཉིས་འཁྲུངས། རིགས་ལྡན་ས་སྐྱོང་ཤམྦྷ་ལའི་ཁྲིར་ཕེབས་པར་ཊཱིཀ་ཆེན་ལས་བཤད། ས་སྤྲེལ། རིགས་ལྡན་ས་སྐྱོང་སེང་ཁྲིར་ཆོས་གསུངས། རྟོགས་ལྡན་འཇམ་དཔལ་རྒྱ་མཚོ་གཤེགས། འབྲུག་པ་རྒྱལ་དབང་ཆོས་རྗེ་པཎ་ཆེན་ཤཱཀྱ་མཆོག་ལྡན། སྐྱོ་མདའ་ཆོས་རྗེ་འགྲོ་མགོན་བློ་གྲོས་བཟང་པོ་གསུམ་འཁྲུངས། ས་བྱ། འདར་སྟོན་བློ་བཟང་གྲགས་པ། འཇམ་དབྱངས་དགའ་བའི་བློ་གྲོས། གོ་བོ་རབ་འབྱམས་པ་བསོད་ནམས་སེང་གེ །རྩེ་བ་ཤེར་བཟང་བཞི་འཁྲུངས། ངོར་དགོན་པ་བཏབ། མཚུར་ཕུ་བས་གྲུབ་རྩིས་གཟའ་གནས་དྲུག་པའི་མགོ་བརྩམས། ལྕགས་ཁྱི། ཆོས་རྗེ་བྱང་ཆུབ་རྒྱ་མཚོ་ཀུན་སྤང་མཛད་ནས་བཀྲ་ཤིས་དཔལ་འོད་སྟག་ལུང་གདན་སར་ཕེབས། དགེ་འདུན་གྲུབ་ཀྱིས་འཇུག་ཊཱིཀ་བརྩམས། ལྕགས་ཕག། སངས་རྒྱས་རིན་ཆེན་རྒྱལ་མཚན་དཔལ་བཟང་པོ་གཤེགས། མཁས་གྲུབ་རྗེ་ཁྲིར་ཕེབས། ཆུ་བྱི། རྒྱལ་ཚབ་ཆོས་རྗེ་དར་མ་རིན་ཆེན་གཤེགས། དགེ་འདུན་གྲུབ་ཀྱིས་རྣམ་འགྲེལ་ཊཱིཀ་ཆུང་བརྩམས། རཏྣ་གླིང་བས་ཁྱུང་ཚང་བྲག་ནས་གཏེར་དང་པོ་རྣམས་བཏོན། ཆུ་གླང༌། རྗེ་ཤེས་རབ་སེང་གེས་སྨད་རྒྱུད་བཙུགས། པཎ་ཆེན་ཡེ་ཤེས་རྩེ་མོ་དང༌། འཇམ་དབྱངས་ཀུན་དགའ་ཆོས་བཟང་གཉིས་འཁྲུངས། མཁའ་སྤྱོད་པ་གཤེགས། དགེ་འདུན་གྲུབ་ཀྱིས་རྩ་ཤེའི་ཊཱིཀྐ་མཛད། ཤིང་སྟག ། ཊཱིཀ་ཆེན་ལྟར་ན་བསྟན་པ་ལོ་ཉིས་སྟོང་སུམ་བརྒྱ་བཅུ་གཉིས་སོང་ཞིང༌། གཉིས་ལྡན་གྱི་སྟེང་ནས་དྲུག་བརྒྱ་དང་ལྔ་ལྷག་འདས་བརྒྱ་དང་ཕྱེད་རྩ་དགུ་ལྷག་ལུས་ཤིང༌། ས་སྐྱོང་གིས་ཆོས་བསྟན་ནས་ལོ་བརྒྱ་འགྲོ་གསུངས་ཀྱང་རགས་བཤད་ཙམ་མོ། །ཉེར་གཉིས་པ་ཆོས་རྗེ་བསོད་ནམས་རྒྱལ་མཚན་གཤེགས་ནས་ཕག་གྲུའི་གདན་ས་ལོ་ཉི་ཤུར་སྟོངས། འདུལ་འཛིན་གྲགས་པ་རྒྱལ་མཚན་གཤེགས། ཤིང་ཡོས། མཁས་གྲུབ་ནོར་བཟང་རྒྱ་མཚོ་རབ་ཏུ་བྱུང༌། མེ་འབྲུག མུས་ཆེན་དཀོན་མཆོག་རྒྱལ་མཚན་གྱིས་སྟག་མོ་གླིང་ཁ་བཏབ། མེ་སྦྲུལ། དགེ་འདུན་གྲུབ་ཀྱིས་ཚད་མ་རིགས་རྒྱན་མཛད། ས་རྟ། མཁས་གྲུབ་ཆོས་རྗེ་དགེ་ལེགས་དཔལ་བཟང་པོ་གཤེགས། རྗེ་དགེ་འདུན་གྲུབ་པ་དབུས་སུ་ཕེབས། འཇམ་དབྱངས་གཞོན་ནུ་འཁྲུངས། ས་ལུག ཞྭ་ལུ་བ་དགའ་ལྡན་གྱི་ཁྲིར་ཕེབས། རྒྱལ་བ་འཕགས་པ་ལྷ་དང༌། རྗེའི་དབོན་པོ་བློ་བཟང་ཉི་མ་གཉིས་འཁྲུངས། ལྕགས་སྤྲེལ། དགེ་འདུན་གྲུབ་ཤེས་རབ་སེང་གེ་དང་ལྷན་དུ་སླར་གཙང་ལ་ཕེབས། འདུལ་བའི་གླེང་འབུམ་དང༌། སོ་ཐར་གྱི་ཊཱིཀྐ་བརྩམས། ལྕགས་བྱ། ཞྭ་ལུ་ལོ་ཙྭ་བ་ཆོས་སྐྱོང་བཟང་པོ་འཁྲུངས། ཆུ་ཁྱི། ཆུ་ཕག ། མཁས་བཙུན་ཡོན་ཏན་རྒྱ་མཚོ་འཁྲུངས། དགེ་འདུན་གྲུབ་ཀྱིས་བཅའ་ཡིག་ཆེན་མོ་བརྩམས། ཡིད་བཟང་རྩེ་བས་རྩིས་ཀྱི་བསྟན་བཅོས་འཁྲུལ་སེལ་མཛད། ཤིང་བྱི། ཆབ་མདོ་བྱམས་པ་གླིང་བཏབ། བདག་ཆེན་བློ་གྲོས་རྒྱལ་མཚན་འཁྲུངས། བྱང་སེམས་ཀུན་དགའ་བཟང་པོ་གཤེགས། ཤིང་གླང༌། སེ་ར་དོན་ཡོད་དཔལ་ལྡན་འཁྲུངས། རྗེ་ཤེས་རབ་སེང་གེ་གཤེགས། ཀུ་ཅོར་རྟོགས་ལྡན་གཤེགས། མེ་སྟག། རྔོག་སྟོན་བྱང་ཆུབ་དཔལ་དང་གནས་རྙིང་རིན་པོ་ཆེ་ཀུན་དགའ་བདེ་ལེགས་གཉིས་གཤེགས། རྒྱུད་པ་དཔོན་སློབ་ལྷ་རི་བ་དང༌། ལྷ་དབང་དཔལ་འབྱོར་གཉིས་འཁྲུངས། རིན་ཆེན་རྒྱལ་མཚན་དཔལ་བཟང་པོ་འཁྲུངས། རབ་བྱུང་བརྒྱད་པ། མེ་ཡོས། བཀྲ་ཤིས་ལྷུན་པོ་བཏབ། གྲ་ཕུག་པ་ལྷུན་གྲུབ་རྒྱ་མཚོས་པད་དཀར་ཞལ་ལུང་མཛད། ཧོར་སྟོན་ནམ་མཁའ་དཔལ་གཤེགས། ཆག་ལོ་རིན་ཆེན་ཆོས་རྒྱལ་འཁྲུངས། ས་འབྲུག ཆོས་རྗེ་བྱང་ཆུབ་རྒྱ་མཚོ་གཤེགས། ས་སྦྲུལ། འཇམ་དབྱངས་ཆོས་རྗེ་གཤེགས། ཀུན་མཁྱེན་རོང་པོ་གཤེགས། རྡོ་རིང་བ་ཀུན་བཟང་ཆོས་ཀྱི་ཉི་མ་འཁྲུངས། འབྲས་ཡུལ་སྐྱེད་ཚལ་བཏབ། ལྕགས་རྟ། ཞྭ་ལུ་བ་ལེགས་པ་རྒྱལ་མཚན་དང༌། གུང་རུ་རྒྱལ་མཚན་བཟང་པོ་གཤེགས། བློ་གྲོས་ཆོས་སྐྱོང་དགའ་ལྡན་ཁྲིར་ཕེབས། ཤེས་རབ་དར་ལེགས་པའི་བློ་གྲོས་འཁྲུངས། རྗེ་དགེ་འདུན་གྲུབ་དགའ་ལྡན་ཁྲིར་གདན་དྲངས་ཀྱང་མ་ཕེབས། ལྕགས་ལུག། རྗེ་དྲུང་ཀུན་དགའ་དཔལ་པ་དང༌། སྒམ་པོ་གྲགས་པ་རྒྱལ་མཚན་སྒམ་སྨྱོན་དུ་འབོད་པ་གཉིས་འཁྲུངས། སྟེང་ཆེན་དགོན་བཏབ། ཆུ་སྤྲེལ། ཞྭ་དམར་པ་ཆོས་དཔལ་ཡེ་ཤེས། སྤྱན་སྔ་བསོད་ནམས་འོད་མཛེས། མཁན་ཆེན་བསོད་ནམས་མཆོག་གྲུབ་གཤེགས། རྒྱ་ནག་ཏུ་བན་འཇུག་གིས་གདན་ས་མཛད། ཆུ་བྱ། ཀརྨ་པ་མཐོང་བ་དོན་ལྡན་དང་ཆོས་རྗེ་རི་མི་འབབ་པ་གཉིས་གཤེགས། ཞྭ་དམར་ཆོས་ཀྱི་གྲགས་པ་དང་ཞལ་སྔ་ནས་དྷརྨཱ་མི་ཏྲ་དང༌། རིན་པོ་ཆེ་འོད་ཟེར་རྣམས་འཁྲུངས། ཤིང་ཁྱི། ཀརྨ་ཆོས་གྲགས་རྒྱ་མཚོ་དང་སྒམ་པོ་བ་བསོད་ནམས་རྒྱལ་མཚན་གཉིས་འཁྲུངས། ཕག་གྲུའི་གདན་སར་ཆོས་རྗེ་རིན་པོ་ཆེ་དཔལ་ངག་གི་དབང་པོ་ཕེབས། སྤྱན་སྔ་རྡོ་རྗེ་རྒྱལ་མཚན་གཡའ་བཟང་གདན་སར་ཕེབས། ཤིང་ཕག སྤྱན་སྔ་ཡོན་ཏན་རྒྱལ་མཚན་རྒྱལ་གྱི་གདན་སར་ཕེབས། དཔའ་བོ་ཆོས་དབང་ལྷུན་གྲུབ་འཁྲུངས། མེ་བྱི། ཀརྨ་འཕྲིན་ལས་པ་འཁྲུངས། ངོར་པ་རྡོ་རྗེ་འཆང་གཤེགས། མེ་གླང༌། བྱང་སེམས་ཆོས་རྗེ་ཤེས་རབ་བཟང་པོ་གཤེགས། རྗེ་དྲུང་ཀུན་དགའ་དཔལ་ལྡན་དང༌། མཉན་པ་གྲུབ་ཐོབ་གཉིས་སྐུ་འཁྲུངས། ས་སྟག ཞང་ཞུང་པ་ཆོས་དབང་གྲགས་པ་ཆབ་མདོའི་ཁྲིར་ཕེབས། རྒྱུད་སྟོད་དཔོན་སློབ་ཆོས་ལྡན་བློ་གྲོས་དང༌། གཉུག་ལ་པཎ་ཆེན་གཉིས་འཁྲུངས། དྭགས་པོ་པཎ་ཆེན་བཀྲ་ཤིས་རྣམ་རྒྱལ་གཤེགས། ས་ཡོས། མཁས་གྲུབ་ནོར་བཟང་རྒྱ་མཚོ་འོལ་ཁར་ཕེབས། ལྕགས་འབྲུག ཆོས་རྗེ་བཀྲ་ཤིས་དཔལ་འོད་གཤེགས་ནས་ངག་དབང་གྲགས་པ་དཔལ་བཟང་པོ་སྟག་ལུང་གི་གདན་སར་ཕེབས། ཕྲ་མོ་བྲག་གི་གཏེར་བཏོན། ལྕགས་སྦྲུལ། ཆོས་རྗེ་བཀྲ་ཤིས་དཔལ་འཁྲུངས། ཆུ་རྟ། ཆུ་ལུག བ་སོ་ཆོས་ཀྱི་རྒྱལ་མཚན་དགའ་ལྡན་གྱི་ཁྲིར་ཕེབས། བློ་གྲོས་ཆོས་སྐྱོང་གཤེགས། མཚུར་སྟོན་ནམ་མཁའ་དཔལ་པ་ཆབ་མདོའི་ཁྲིར་ཕེབས། བཀྲ་ཤིས་ལྷུན་པོར་བྱམས་ཆེན་གྲུབ། ཤིང་སྤྲེལ། རྗེ་དགེ་འདུན་གྲུབ་པས་བཀའ་འགྱུར་བཞེངས། ཤིང་བྱ། སྐྱོ་མང་བཏབ། མེ་ཁྱི། ཉི་སྟེང་བཏབ། སེ་རག་དགོན་བཏབ། སྒམ་པོ་བསོད་ནམས་རིན་ཆེན་གཤེགས། མེ་ཕག ས་བྱི། རྗེ་དགེ་འདུན་གྲུབ་པས་སྟོན་པའི་གོས་སྐུ་བཞེངས། ས་གླང༌། ཆོས་དབང་གྲགས་པ་གཤེགས། སེ་ར་བ་ཆོས་ཀྱི་རྒྱལ་མཚན་འཁྲུངས། རྗེ་དགེ་འདུན་གྲུབ་པས་འདུལ་ཊཱིཀ་རིན་ཆེན་ཕྲེང་བ་བརྩམས། ལྕགས་སྟག སེམས་དཔའ་ཆེན་པོ་བློ་གྲོས་རྒྱལ་མཚན་གཤེགས། ལྕགས་ཡོས། རྗེ་དྲུང་ཤེས་རབ་དཔལ་བརྩེགས་ཆབ་མདོའི་ཁྲིར་ཕེབས། སེམས་དཔའ་སྤྲུལ་སྐུ་སྨོན་ལམ་བློ་གྲོས་འཁྲུངས། ཆུ་འབྲུག ཆུ་སྦྲུལ། རྗེ་བློ་གྲོས་བསྟན་པ་ཁྲིར་ཕེབས། ཆོས་སྐྱོང་རྒྱ་མཚོ་དང༌། ཆོས་རྗེ་རྒྱལ་མཚན་དཔལ་བཟང་པོ་གཉིས་འཁྲུངས། ངག་དབང་གྲགས་པ་དཔལ་བཟང་པོས་ཆོས་རྗེ་བཀྲ་ཤིས་དཔལ་པ་སྟག་ལུང་གདན་སར་བཀོད་ནས་ཀུན་སྤངས་མཛད། སྤྱན་སྔ་རྡོ་རྗེ་རྒྱལ་མཚན་དང་བ་སོ་ཆོས་རྗེ་གཉིས་གཤེགས། རྟ་ནག་ཐུབ་བསྟན་རྣམ་རྒྱལ་བཏབ། ཤིང་རྟ། ཀུན་དགའ་དོན་གྲུབ་ཀྱིས་རྒྱུད་སྟོད་གྲྭ་ཚང་བཙུགས། རྗེ་དགེ་འདུན་གྲུབ་པ་གཤེགས། དུལ་མོ་བཀྲ་ཤིས་འོད་ཟེར་འཁྲུངས། པཎ་ཆེན་བཟང་པོ་བཀྲ་ཤིས་ལྷུན་པོའི་གདན་སར་འཁོད། ཤིང་ལུག བློ་གྲོས་སྦས་པ་གཤེགས། ཟུར་མང་བདེ་ཆེན་རྩེའི་སྒྲུབ་སྡེ་བཏབ། སྒམ་པོ་བ་བསོད་ནམས་རྒྱ་མཚོ་འཁྲུངས། མེ་སྤྲེལ། རྗེ་ཐམས་ཅད་མཁྱེན་པ་དགེ་འདུན་རྒྱ་མཚོ་དང༌། སྟོང་འཁོར་ཟླ་བ་རྒྱལ་མཚན་གཉིས་འཁྲུངས། རྒྱལ་དབང་ཆོས་རྗེ་གཤེགས། དེབ་སྔོན་བརྩམས། མེ་བྱ། སྒོ་རུམ་པ་ཀུན་དགའ་ལེགས་པའི་བློ་གྲོས་འཁྲུངས། ས་ཁྱི། བློ་གྲོས་བསྟན་པ་དང་པཎ་ཆེན་བཟང་པོ་བཀྲ་ཤིས་གཉིས་གཤེགས། པཎ་ཆེན་ལུང་རིགས་རྒྱ་མཚོ་བཀྲ་ཤིས་ལྷུན་པོའི་གདན་སར་ཕེབས། ཀརྨ་ཐུབ་ཆེན་གདན་ས་བཏབ། ས་ཕག འབྲི་གུང་ཁྲ་བ་ཁའི་དགོན་པ་བཏབ། ཟུར་མང་བྱ་བཏང་འཁྲུངས། ལྕགས་བྱི། ཆོས་རྗེ་སྨོན་ལམ་དཔལ་པ་ཁྲིར་ཕེབས། ལྕགས་གླང༌། ཡིད་བཟང་རྩེ་པ་གཤེགས། གཉལ་སྟོན་དཔལ་འབྱོར་ལྷུན་གྲུབ་སེ་རའི་ཁྲིར་ཕེབས། ཆུ་སྟག ཆུ་ཡོས། རྗེ་དྲུང་ཀུན་དགའ་བློ་གྲོས་འཁྲུངས། བསྟན་པ་ལོ་ཉིས་སྟོང་དང་སུམ་བརྒྱ་བརྒྱད་ཅུ། ཊཱིཀ་ཆེན་ལྟར་ན་གཉིས་ལྡན་ནས་བདུན་བརྒྱ་དང་བཞི་སོང༌། མཁས་གྲུབ་ནོར་བཟང་རྒྱ་མཚོས་གཉིས་ལྡན་གྱི་སྟེང་ནས་ལོ་བདུན་བརྒྱ་དང་བཅུ་གཉིས་འདས་ཤིང༌། བརྒྱ་དང་བཅུ་གཉིས་ལུས་པ་རིགས་ལྡན་ས་སྐྱོང་གིས་ཆོས་བསྟན་ནས་ལོ་ང་བདུན་སོང་ཞེས་གསུངས། ཤིང་འབྲུག ཞོ་ཁ་རྐོང་འཕྲད། ཕག་གྲུམ། ཚལ་སོགས་སྒྲུབ་སྡེ་རྣམས་བཏབ། ཤིང་སྦྲུལ། ཤཱཀ་མཆོག་པས་ཤཱཀྱ་ཤྲཱི་བསྟན་རྩིས་མུ་ལ་ཉིས་སྟོང་བདུན་བརྒྱ་དང་དགུ་སོང་ཟེར། བྱམས་ཆེན་རབ་འབྱམས་པ་གཤེགས། མེ་རྟ། སྔགས་རམ་པ་དགེ་འདུན་བཀྲ་ཤིས་འཁྲུངས། རྒྱུད་པ་ཀུན་དགའ་དོན་གྲུབ་གཤེགས། པཎ་ཆེན་ཡེ་ཤེས་རྩེ་མོ་བཀྲ་ཤིས་ལྷུན་པོའི་གདན་སར་ཕེབས། རྗེ་དགེ་འདུན་རྒྱ་མཚོ་རབ་ཏུ་བྱུང༌། མེ་ལུག རྒྱལ་བ་འཕགས་པ་ལྷ་གཤེགས། རྒྱལ་ཚབ་བཀྲ་ཤིས་རྣམ་རྒྱལ་འཁྲུངས། ཊཱིཀ་ཆེན་ལྟར་ན་ས་སྐྱོང་གིས་ཆོས་བསྟན་ནས་རེ་གཅིག་ལོན། ས་སྤྲེལ། རིགས་ལྡན་ས་སྐྱོང་གིས་ཆོས་བསྟན་ནས་རེ་གཅིག་ལོན་དགའ་མ་མོའི་གཙུག་ལག་ཁང་བཞེངས། སྒམ་པོ་བསོད་ནམས་རྒྱལ་མཚན་གཤེགས། སྒམ་པོ་བ་བསོད་ནམས་ལྷུན་གྲུབ་འཁྲུངས། ས་བྱ། གོ་བོ་རབ་འབྱམས་པ་གཤེགས། ལྕགས་ཁྱི། རྗེ་དབོན་བློ་བཟང་ཉི་མ་ཁྲིར་ཕེབས། ལྕགས་ཕག སྨོན་ལམ་དཔལ་ལེགས་པའི་བློ་གྲོས་དང༌། སེམས་དཔའ་ཆེན་པོ་བློ་གྲོས་རྒྱལ་མཚན་གཉིས་གཤེགས། ཆོས་རྗེ་མི་ཉག་རྡོ་རྗེ་བཟང་པོ་འཁྲུངས། ཆུ་བྱི། རྗེ་དབོན་བློ་བཟང་ཉི་མ་གཤེགས། ཆུ་གླང༌། ཞྭ་དམར་བས་གདན་ས་མཐིལ་གྱི་ཁུར་བཞེས། གསེར་མདོག་ནོར་བཟང་པས་ཆོས་གླིང་བཏབ། ཆོས་རྗེ་ལྡན་མ་ཡེ་ཤེས་བཟང་པོ་ཁྲིར་ཕེབས། སྟག་ཕུ་པ་ཆོས་གྲགས་བཟང་པོ་དང་ཆོས་རྗེ་བསྟན་པ་དར་རྒྱས་གཉིས་འཁྲུངས། ཤིང་སྟག ཡེ་ཤེས་རྩེ་མོས་ཐམས་ཅད་མཁྱེན་པ་དགེ་འདུན་གྲུབ་པའི་རྣམ་ཐར་བརྩམས། ལས་ཆེན་ཀུན་དགའ་རྒྱལ་མཚན་གྱིས་བཀའ་གདམས་ཆོས་འབྱུང་མཛད། ཤིང་ཡོས། རྒྱལ་བ་དགེ་འདུན་རྒྱ་མཚོ་གནས་རྙིང་ཀུན་དགའ་བདེ་ལེགས་ལས་བསྙེན་པར་རྫོགས། བདག་ཆེན་བློ་གྲོས་རྒྱལ་མཚན་དང་ཁྱུང་པོ་བྱ་བྲལ་གཉིས་གཤེགས། མེ་འབྲུག གནས་རྙིང་པ་ཀུན་དགའ་བདེ་ལེགས་གཤེགས། ཙ་རི་གསར་མ་བཀྲ་ཤིས་རྫོང་གི་གནས་སྒོ་མང་པོ་ཕྱེ། མེ་སྦྲུལ། རྗེ་དྲུང་མི་གཡོ་སྙིང་པོ་དང༌། ཁྲི་པ་རྒྱལ་མཚན་བཟང་པོ་གཉིས་འཁྲུངས། ས་རྟ། ཁྲི་པ་ཡེ་ཤེས་བཟང་པོ་གཤེགས། ས་ལུག མཉན་པ་གྲུབ་ཐོབ་པས་ཨོ་རྒྱན་རི་ཁྲོད་སོགས་བཏབ། ལྕགས་སྤྲེལ། རྒྱལ་བ་དགེ་འདུན་རྒྱ་མཚོས་དྲང་ངེས་རྣམ་འབྱེད་ཀྱི་དཀའ་འགྲེལ་བརྩམས། འདར་སྟོན་པ་ཁྲིར་ཕེབས། ལྕགས་བྱ། ལྷོ་གྲོ་བོ་ལུང་དུ་དཔའ་བོ་བསྐོས། ཁྲི་པ་ངག་དབང་ཆོས་གྲགས་འཁྲུངས། ཆུ་ཁྱི། རྗེ་དྲུང་འཇམ་དབྱངས་བཤེས་གཉེན་དང༌། ཚར་ཆེན་བློ་གསལ་རྒྱ་མཚོ་གཉིས་འཁྲུངས། སྒམ་སྨྱོན་གྲགས་པ་རྒྱལ་མཚན་གཤེགས། ཆུ་ཕག འཇམ་དབྱངས་དགའ་བློ་དང་དཔའ་བོ་ཆོས་དབང་ལྷུན་གྲུབ། འཇམ་དབྱངས་ཀུན་དགའ་ཆོས་བཟང་རྣམས་གཤེགས། ཞྭ་དམར་པ་བཞི་པས་ཡངས་པ་ཅན་གྱི་དགོན་དང༌། ལྷ་སར་ཐུབ་བསྟན་ཆོས་འཁོར་བཏབ། ཤིང་བྱི། དཔའ་བོ་གཙུག་ལག་ཕྲེང་བ་འཁྲུངས། ཤིང་གླང༌། རྒྱལ་བ་བློ་བཟང་དོན་གྲུབ་དང༌། མཁན་ཆེན་བློ་གྲོས་ཕྱོགས་ལས་རྣམ་རྒྱལ་གཉིས་འཁྲུངས། མེ་སྟག རབ་བྱུང་དགུ་པ། མེ་ཡོས། རྗེ་དྲུང་ཤེས་རབ་དཔལ་བརྩེགས་དང་ཤཱཀ་མཆོག་པ་གཉིས་གཤེགས། རྗེ་དྲུང་ཀུན་དགའ་དཔལ་ཆབ་མདོའི་ཁྲིར་ཕེབས། ཀརྨ་པ་མི་བསྐྱོད་རྡོ་རྗེ་དང༌། འཕགས་པ་སངས་རྒྱས་གཉིས་འཁྲུངས། ས་འབྲུག ས་སྦྲུལ། རྒྱལ་མེ་ཏོག་ཐང་བཏབ། རིན་ཆེན་ཕུན་ཚོགས་འཁྲུངས། འཇམ་དབྱངས་གཞོན་ནུ་གཤེགས། ལྕགས་རྟ། ལྕགས་ལུག ཆོས་རྗེ་འདར་སྟོན་པ་དང་རྒྱུད་པ་ཆོས་ལྡན་བློ་གྲོས་སྒམ་པོ་བ་བསོད་ནམས་རྒྱ་མཚོ་གསུམ་གཤེགས། རྗེ་བཙུན་སེ་ར་བྱེས་ཆོས་ཁྲིར་འཁོད། ཤེས་རབ་དར་ཁྲིར་ཕེབས། ཆུ་སྤྲེལ། སི་དྷུ་བཀྲ་ཤིས་དཔལ་འབྱོར་གཤེགས། རྒྱལ་བ་དགེ་འདུན་རྒྱ་མཚོ་བཀྲ་ཤིས་ལྷུན་པོའི་གདན་སར་ཕེབས། ཆུ་བྱ། མཁས་གྲུབ་ནོར་བཟང་རྒྱ་མཚོ་གཤེགས། སི་དྷུ་ཆོས་ཀྱི་གོ་ཆ་དང་སྒམ་པོ་བཀྲ་ཤིས་རྣམ་རྒྱལ་གཉིས་འཁྲུངས། ཤིང་ཁྱི། རྗེ་དྲུང་ཀུན་དགའ་དཔལ་དང༌། གཉལ་སྟོན་དཔལ་འབྱོར་ལྷུན་གྲུབ་གཉིས་གཤེགས། ཤིང་ཕག གཉུག་ལ་པཎ་ཆེན་གཤེགས། ཀརྨ་བློ་གྲོས་འཁྲུངས། མེ་བྱི། རྒྱུད་པ་དཔོན་སློབ་ལྷ་རི་བ་གཤེགས། སྤྲུལ་སྐུ་གྲགས་པ་དཔལ་འབྱོར། སྒམ་པོ་བ་བསོད་ནམས་དབང་རྒྱལ། ཆོས་རྗེ་བྱམས་པ་རྒྱ་མཚོ་གསུམ་འཁྲུངས། བློ་བཟང་བསྟན་པ་བཀྲ་ཤིས་ལྷུན་པོའི་གདན་སར་ཕེབས། ཆོས་ཀྱི་བཤེས་གཉེན་ཁྲིར་ཕེབས། རྒྱུད་གསུངས་ནས་ཉིས་སྟོང་སུམ་བརྒྱ་གོ་ལྔ་འདས། སངས་རྒྱས་ནས་ཉིས་སྟོང་སུམ་བརྒྱ་གོ་དྲུག་འདས་ཤིང་ཞི་བར་གཤེགས་ནས་ཉིས་སྟོང་སུམ་བརྒྱ་ང་གཅིག་འདས། ང་གཉིས་པའི་སྟེང་ནས་ཁྲི་རིན་པོ་ཆེ་འོད་ཟེར་གྱིས་བསྟན་རྩིས་བྱས། པཎ་ཆེན་གྱིས་ལོ་ཉིས་སྟོང་དྲུག་ཅུ། ཀམ་ཀམ་ནས་བརྒྱ་དང༌། དོན་ཡོད་དཔལ་ལྡན་སེ་རའི་ཁྲིར་ཕེབས། མེ་གླང༌། རྒྱལ་བ་དགེ་འདུན་རྒྱ་མཚོ་འབྲས་སྤུངས་ཀྱི་མཁན་པོ་མཛད། ས་སྟག སི་དྷུ་བསོད་ནམས་རྣམ་རྒྱལ་ཀརྨའི་གདན་སར་ཕེབས། རྒྱལ་བ་དགེ་འདུན་རྒྱ་མཚོས་སྨོན་ལམ་གྱི་ཚོགས་དབུ་མཛད། ས་ཡོས། རྗེ་དྲུང་ཀུན་དགའ་ཆབ་མདོའི་ཁྲིར་ཕེབས། སྒམ་པོ་བ་ཐུབ་དབང་བསྟན་འཛིན་འཁྲུངས། ལྕགས་འབྲུག གཉན་པ་སྤྲུལ་སྐུ་དང༌། ཁྲི་པ་ཚེ་བརྟན་རྒྱ་མཚོ་གཉིས་འཁྲུངས། ལྕགས་སྦྲུལ། ཐོན་པ་མཁས་བཙུན་ཡོན་ཏན་རྒྱ་མཚོ་གཤེགས། ཆུ་རྟ། ཟུར་མང་བྱ་བཏང་བས་མ་ཎི་རིལ་བུ་བསྒྲུབས། རིན་ཆེན་འོད་ཟེར་ཁྲིར་ཕེབས། ཆུ་ལུག རྒྱལ་མེ་ཏོག་ཐང་གི་བྱམས་ཆེན་བཞེངས་པའི་དབུ་བཙུགས། དམ་ཆོས་དཔལ་འབར་དང༌། མང་ཐོས་ཀླུ་སྒྲུབ་རྒྱ་མཚོ་གཉིས་འཁྲུངས། ཤིང་སྤྲེལ། རྡོ་རིང་བ་དང་སེ་ར་དོན་དཔལ་ལྡན་གཉིས་གཤེགས། འཇམ་དབྱངས་མཁྱེན་བརྩེའི་དབང་ཕྱུག་འཁྲུངས། རྗེ་དྲུང་ཤེས་རབ་དབང་པོ་དགོན་པར་བླ་མ་མཛད། ཤིང་བྱ། མཁས་གྲུབ་སངས་རྒྱས་ཡེ་ཤེས་འཁྲུངས། རྒྱལ་བ་དགེ་འདུན་རྒྱ་མཚོ་སེ་རའི་མཁན་པོ་མཛད། མེ་ཁྱི། ཞྭ་དམར་པ་དཀོན་མཆོག་ཡན་ལག །བོད་མཁར་མཻ་ཏྲི་དོན་གྲུབ་རྒྱལ་མཚན། མཁན་ཆེན་བསླབ་གསུམ་རྒྱལ་མཚན། ཆོས་རྗེ་དཔལ་འབྱོར་རྒྱ་མཚོ་བཞི་འཁྲུངས། མེ་ཕག ཞྭ་ལུ་ལོ་ཆེན་གཤེགས། འབྲུག་པ་པདྨ་དཀར་པོ། དགོན་གསར་པ་བསོད་ནམས་ཆོས་འཕེལ། སྤྱང་ལུང་པ་མཁན་ཆེན་གཞོན་ནུ་བློ་གྲོས་གསུམ་འཁྲུངས། རིགས་ལྡན་ས་སྐྱོང་ཁྲིར་ཕེབས་ནས་ལོ་བརྒྱར་ཆོས་བསྟན། ས་བྱི། རིགས་ལྡན་དཔལ་སྐྱོང་སེང་ཁྲིར་ཕེབས་ནས་ཆོས་བསྟན། ས་གླང༌། པཎ་ཆེན་བསོད་ནམས་གྲགས་པ་ཁྲིར་ཕེབས་ནས་དགའ་ལྡན་ཆོས་འབྱུང་མཛད། ལྕགས་སྟག ཆོས་རྗེ་ཤེས་རབ་དར་ལེགས་པའི་བློ་གྲོས་གཤེགས། ལྕགས་ཡོས། འཕགས་པ་སངས་རྒྱས་ཀྱིས་ཉང་པོར་བཀྲ་ཤིས་ཕན་བདེའི་དགོན་པ་བཏབ། ཆུ་འབྲུག སྒོམ་བདེ་ནམ་མཁའ་རྒྱལ་མཚན་དང༌། ཁྲི་པ་དགེ་འདུན་རྒྱལ་མཚན་གཉིས་འཁྲུངས། ཆུ་སྦྲུལ། བསོད་ནམས་ཆོས་འཕེལ་དང་སློབ་དཔོན་དགེ་ལེགས་རྒྱ་མཚོ་གཉིས་འཁྲུངས། ཤིང་རྟ། སྤང་དཀར་རིན་པོ་ཆེ་འཁྲུངས། ཤིང་ལུག ཆོས་རྗེ་ཆོས་སྐྱོང་རྒྱ་མཚོ་ཁྲིར་ཕེབས། གྲུབ་ཆེན་ན་ཁ་བ་ཐར་པའི་རྒྱལ་མཚན་འཁྲུངས། མེ་སྤྲེལ། རྗེ་དྲུང་ཤེས་རབ་དབང་པོ་སྤོ་ཏི་མའི་བླ་མར་བསྐོས། མེ་བྱ། རྗེ་དྲུང་ལྷ་དབང་ཆོས་ཀྱི་རྒྱལ་མཚན་འཁྲུངས། རྗེ་བཙུན་པ་སེ་རིའི་ཁྲིར་ཕེབས། ས་ཁྱི། ཀརྨ་པ་མི་བསྐྱོད་རྡོ་རྗེའི་ཕར་ཕྱིན་གྱི་འགྲེལ་བཤད་སེ་འབྲས་སུ་འབྱོར། ས་ཕག། ཀརྨ་འཕྲིན་ལས་པ་དང་ཆོས་རྗེ་ཆོས་སྐྱོང་རྒྱ་མཚོ་གཉིས་གཤེགས། མི་ཉག་རྡོ་རྗེ་བཟང་པོ་ཁྲིར་ཕེབས། ལྕགས་བྱི། རྗེ་དྲུང་ཀུན་དགའ་དཔལ་ལྡན། ཟུར་མང་བྱ་བཏང་བ། ཁྲི་པ་དྷརྨཱ་མི་ཏྲ། ཁྲི་པ་རིན་ཆེན་འོད་ཟེར་བཞི་གཤེགས། ཁྲི་པ་སངས་རྒྱས་རིན་ཆེན་འཁྲུངས། ལྕགས་གླང༌། སྤྲུལ་སྐུ་ལེགས་བཤད་པ། མཁན་པོ་ནམ་མཁའ་རྒྱ་མཚོ། རྒྱུད་པ་རྣམ་རྒྱལ་དཔལ་བཟང་གསུམ་འཁྲུངས། མངའ་རིས་གྲྭ་ཚང་བཙུགས། ཆུ་སྟག རྒྱལ་བ་དགེ་འདུན་རྒྱ་མཚོ་ཞི་བར་གཤེགས། ཡར་སྟོད་དགའ་ཚལ་བཏབ། ཆུ་ཡོས། ཆོས་རྗེ་རྒྱལ་མཚན་བཟང་པོ་ཁྲིར་ཕེབས། རྗེ་དྲུང་ཀུན་དགའ་བློ་གྲོས་ཆབ་མདོའི་ཁྲིར་ཕེབས། རྒྱལ་བ་བསོད་ནམས་རྒྱ་མཚོ། དབོན་དྲུང་སངས་རྒྱས་འབྱུང་གནས་གཉིས་འཁྲུངས། འཕགས་པ་སངས་རྒྱས་ཕན་བདེའི་དགོན་དུ་ཕེབས། ཤིང་འབྲུག སྒོ་རུམ་ཀུན་དགའ་ལེགས་བཤད་གཤེགས། རྣམ་འཇོམས་ཕུན་ཚོགས་འཁྲུངས། ཕན་བདེར་གྲྭ་ཚང་བཙུགས། ན་ཁ་གྲུབ་ཆེན་རབ་ཏུ་བྱུང༌། ཤིང་སྦྲུལ། རྗེ་དྲུང་ཀུན་དགའ་བློ་གྲོས་ཆབ་མདོ་ནས་ཡར་བྱོན། མེ་རྟ། སྔགས་རམ་པ་དགེ་འདུན་བཀྲ་ཤིས་ཆབ་མདོའི་གདན་སར་ཕེབས། རྒྱལ་མཚན་བཟང་པོ་ཁྲིར་ཕེབས། སྟག་ལུང་བྲག་པ་བློ་གྲོས་རྒྱ་མཚོ། ཆོས་རྗེ་དམ་ཆོས་དཔལ་བཟང༌། ཆོས་རྗེ་སྙན་གྲགས་པ་འཁྲུངས། རྒྱལ་བ་བསོད་ནམས་རྒྱ་མཚོ་འབྲས་སྤུངས་སུ་གདན་དྲངས། ཚལ་གུང་ཐང་མེས་བཞེས། སེ་ར་རྗེ་བཙུན་པ་སྐུ་གཤེགས། མེ་ལུག ཆོས་རྒྱལ་ཕུན་ཚོགས་འཁྲུངས། ས་སྤྲེལ། རྗེ་དྲུང་ཤེས་རབ་དབང་པོས་དར་རྒྱས་དགོན་བཏབ། ཆོས་རྗེ་རྒྱལ་མཚན་བཟང་པོ་གཤེགས། ངག་དབང་ཆོས་ཀྱི་གྲགས་པ་ཁྲིར་ཕེབས། ས་བྱ། གསུང་རབ་རྒྱ་མཚོའི་གླིང་བཏབ། རྒྱལ་བ་བསོད་ནམས་རྒྱ་མཚོ་རབ་བྱུང་མཛད། ལྕགས་ཁྱི། བཤད་སྒྲུབ་གླིང་བཏབ། དྭགས་པོ་གཞོན་ནུ་རྡོ་རྗེ། ཤེས་རབ་དཔལ་བཟང་གཉིས་འཁྲུངས། ལྕགས་ཕག། ཁྲི་པ་ངག་དབང་ཆོས་གྲགས་གཤེགས། ཆུ་བྱི། སྒམ་པོ་བསོད་ནམས་ལྷུན་གྲུབ་གཤེགས། སྟག་ཕུ་པ་ཆོས་གྲགས་བཟང་པོ་ཁྲིར་ཕེབས། ཆུ་གླང༌། རྗེ་དྲུང་མི་གཡོ་བ་ཆབ་མདོའི་ཁྲིར་ཕེབས། སེམས་དཔའ་སྤྲུལ་སྐུ་སྨོན་ལམ་བློ་གྲོས་དང༌། སྒམ་པོ་བསོད་ནམས་དབང་རྒྱལ་གཉིས་གཤེགས། དཔལ་འབྱོར་བསོད་ནམས་ལྷུན་གྲུབ་འཁྲུངས། སྔགས་རམ་པས་ཐུབ་ཆེན་བཞེངས་པ་རབ་གནས་དང་བཅས་པ་གྲུབ། ཤིང་སྟག ཀརྨ་པ་མི་བསྐྱོད་རྡོ་རྗེ་དང༌། པཎ་ཆེན་བསོད་ནམས་གྲགས་པ། མི་ཉག་རྡོ་རྗེ་བཟང་པོ་གསུམ་གཤེགས། སེམས་དཔའ་སྤྲུལ་སྐུ་གྲགས་པ་རྒྱལ་མཚན་འཁྲུངས། ཤིང་ཡོས། འཕགས་པ་སངས་རྒྱས་ཀྱི་ཡབ་སངས་རྒྱས་བཀྲ་ཤིས་གཤེགས། མེ་འབྲུག ཀརྨ་དབང་ཕྱུག་རྡོ་རྗེ་དང༌། སྤྲུལ་སྐུ་བསོད་ནམས་ཡེ་ཤེས་དབང་པོ་གཉིས་འཁྲུངས། སྟོང་འཁོར་ཟླ་བ་རྒྱལ་མཚན་གཤེགས། མེ་སྦྲུལ། རྗེ་དྲུང་ཀུན་དགའ་བཀྲ་ཤིས་གཤེགས། སྟོང་འཁོར་ཡོན་ཏན་རྒྱ་མཚོ་འཁྲུངས། ས་རྟ འཕྲིན་ལས་ལྷུན་གྲུབ་དང་དབང་ཕྱུག་རབ་བརྟན་གཉིས་འཁྲུངས། ཆོས་རྗེ་བདེ་བ་ཅན་པ་དགེ་ལེགས་དཔལ་བཟང་ཁྲིར་ཕེབས། ས་ལུག ཁྲི་པ་ཆོས་གྲགས་བཟང་པོ་གཤེགས། སྲད་རྒྱུད་ཆེན་དཀོན་མཆོག་རྒྱ་མཚོ་འཁྲུངས། ལྕགས་སྤྲེལ། རྗེ་དྲུང་ཤེས་རབ་དབང་པོ་ཆབ་མདོའི་ཁྲིར་ཕེབས། ལྕགས་བྱ། འཁོན་སྟོན་དཔལ་འབྱོར་ལྷུན་གྲུབ་དང༌། ཁྲི་པ་ཚུལ་ཁྲིམས་ཆོས་འཕེལ་གཉིས་འཁྲུངས། ཆུ་ཁྱི། སྒམ་པོ་ཐུབ་དབང་བསྟན་འཛིན་གཤེགས། ཆུ་ཕག ལོ་ཆེན་རཏྣ་བྷ་ཏྲ་གཤེགས། ཕན་བདེ་སློབ་དཔོན་འཕགས་པ་དར་རྒྱས་འཁྲུངས། ཤིང་བྱི། རྗེ་དྲུང་མི་གཡོ་སྙིང་པོ་གཤེགས། སྤྲུལ་སྐུ་སངས་རྒྱས་ཆོས་འཛིན་འཁྲུངས། ཤིང་གླང༌། རྒྱལ་བ་བློ་བཟང་དོན་གྲུབ་གཤེགས། ཆོས་རྗེ་དགེ་འདུན་བསྟན་པ་དར་རྒྱས་ཁྲིར་ཕེབས། མེ་སྟག རྗེ་དྲུང་འཇམ་དབྱངས་བཤེས་གཉེན་ཆབ་མདོའི་ཁྲིར་ཕེབས། རྗེ་དྲུང་ཀུན་དགའ་བློ་གྲོས་དང༌། འཕགས་པ་སངས་རྒྱས་གཉིས་གཤེགས། སི་ཏུ་ནོར་བུ་བསམ་འཕེལ་དང༌། རྒྱ་ར་བ་ཤེས་རབ་ཕུན་ཚོགས་གཉིས་འཁྲུངས། རབ་བྱུང་བཅུ་པ། མེ་ཡོས། ཁྲི་པ་དགེ་ལེགས་དཔལ་བཟང་དང་ཚར་ཆེན་བློ་གསལ་རྒྱ་མཚོ་གཉིས་གཤེགས། འཕགས་པ་མཐོང་བ་དོན་ལྡན་དང་རི་བོ་ཆེ་པདྨ་རྒྱལ་པོའི་སྐུ་སྐྱེ་གཉིས་འཁྲུངས། ན་ཁ་གྲུབ་ཆེན་རྒྱུད་དུ་ཕེབས། ས་འབྲུག ཆོས་རྗེ་ཚེ་བརྟན་རྒྱ་མཚོ་ཁྲིར་ཕེབས། དཔའ་བོ་གཙུག་ལག་རྒྱ་མཚོ་འཁྲུངས། ཁྲི་པ་དགེ་འདུན་བསྟན་པ་དར་རྒྱས་དང༌། འཇམ་དབྱངས་མཁན་ཆེན་གཉིས་གཤེགས། ས་སྦྲུལ། རྗེ་དྲུང་འཇམ་དབྱངས་བཤེས་གཉེན་གཤེགས། ལྕགས་རྟ། པཎ་ཆེན་བློ་བཟང་ཆོས་ཀྱི་རྒྱལ་མཚན་འཁྲུངས། དཔལ་འབྱོར་ལྷུན་གྲུབ་ཀྱིས་རྗེ་བསོད་ནམས་རྒྱ་མཚོ་མཇལ། ལྕགས་ལུག སྟག་ལུང་ངག་དབང་རྣམ་རྒྱལ་འཁྲུངས། ཆུ་སྤྲེལ། སྒམ་པོ་ཁྲི་ཆེན་བཀྲ་ཤིས་ཀུན་གྲགས་དང༌། མཁན་ཆེན་ངག་དབང་ཆོས་གྲགས་གཉིས་འཁྲུངས། སེམས་དཔའ་སྤྲུལ་སྐུ་གྲགས་པ་རྒྱལ་མཚན་གཤེགས། ཆུ་བྱ། གླིང་སྨད་ཞབས་དྲུང་དཀོན་མཆོག་ཆོས་འཕེལ་དང༌། སེམས་དཔའ་སྤྲུལ་སྐུ་ངག་དབང་གྲགས་པ་རྒྱ་མཚོ་གཉིས་འཁྲུངས། ཤིང་ཁྱི། སི་ཏུ་ཀརྨ་ཆོས་ཀྱི་རྒྱལ་མཚན་འཁྲུངས། ཕན་བདེའི་མཁན་པོར་ནམ་མཁའ་རྒྱ་མཚོ་དང༌། སློབ་དཔོན་དགེ་ལེགས་རྒྱ་མཚོ་འཁོད། ཤིང་ཕག། དྭགས་པོ་གཞོན་ནུ་རྡོ་རྗེ་གཤེགས། ཆོས་རྗེ་བྱམས་པ་རྒྱ་མཚོ་ཁྲིར་ཕེབས། འཕགས་པ་མཐོང་བ་དོན་ལྡན་ཁམས་སུ་ཕེབས། རྗེ་བཙུན་ཏཱ་ར་ན་ཐ་དང༌། གསས་ཁང་སྐུ་སྐྱེ་གཉིས་འཁྲུངས། མེ་བྱི། ཞལ་སྔ་སྒར་བའི་གྲྭ་ཚང་འཆད་ཉན་པར་སློབ་དཔོན་ཆོས་དར་རྒྱ་མཚོ་བསྐོས། ཁྲི་པ་ཚེ་བརྟན་རྒྱ་མཚོ་གཤེགས། མེ་གླང༌། རྒྱལ་བ་བསོད་ནམས་རྒྱ་མཚོ་སོག་ཡུལ་དུ་བྱོན། དེའི་དྲུང་དུ་དཔལ་འབྱོར་ལྷུན་གྲུབ་རབ་ཏུ་བྱུང༌། འཕགས་པ་མཐོང་བ་དོན་ལྡན་ཆབ་མདོར་ཕེབས། ས་སྟག འགར་དམ་པ་བསྟན་འཛིན་ཕུན་ཚོགས་འཁྲུངས། རྗེ་བསོད་ནམས་རྒྱ་མཚོ་དང་ཨལ་ཐན་རྒྱལ་པོ་མཆོད་ཡོན་ཐེག་ཆེན་གླིང་དུ་ཞལ་འཛོམས། ས་ཡོས། རྗེ་བསོད་ནམས་རྒྱ་མཚོ་དང༌། ཨལ་ཐན་རྒྱལ་པོས་བྱང་ཆེན་ཆོས་འཁོར་གླིང་བཏབ། ལྕགས་འབྲུག། རྗེ་དྲུང་ལྷ་དབང་ཆོས་ཀྱི་རྒྱལ་མཚན་ཆབ་མདོའི་ཁྲིར་ཕེབས། ལི་ཐང་ཆོས་འཁོར་གླིང་བཏབ། འཁོན་སྟོན་དྭགས་པོ་གྲྭ་ཚང་དུ་བྱོན། བྱང་བདག་ངག་གི་དབང་པོ་འཁྲུངས། ལྕགས་སྦྲུལ། རྒྱལ་བ་བསོད་ནམས་རྒྱ་མཚོ་ཆབ་མདོའི་ཁྲིར་ཕེབས། ཆུ་རྟ། པཎ་ཆེན་རིན་པོ་ཆེ་དབོན་དགོན་དུ་ཕེབས་ནས་རབ་བྱུང་མཛད། བསྟན་འཛིན་ཆོས་ཀྱི་རྒྱལ་པོ་སྐུ་འཁྲུངས། ཆོས་རྗེ་དཔལ་འབྱོར་རྒྱ་མཚོ་ཁྲིར་ཕེབས། ཆུ་ལུག། ངག་དབང་སྤྲུལ་སྐུ་འཁྲུངས། ཤིང་སྤྲེལ། ཞྭ་དམར་ངག་དབང་ཆོས་ཀྱི་དབང་ཕྱུག་འཁྲུངས། ན་ཁ་གྲུབ་ཆེན་གྱིས་རྒྱལ་ལྷ་ཐོག་ཏུ་ལོ་བཅུ་གཉིས་ཟླ་བ་བཅུ་གཉིས་ཞག་བཅུ་གཉིས་ཟ་མ་བཅུ་གཉིས་བཅུ་གཉིས་ཕྲག་བཞིར་སྒྲུབ་པ་མཛད། ཤིང་བྱ། མཁན་ཆེན་བློ་གྲོས་ཕྱོགས་ལས་རྣམ་རྒྱལ་གཤེགས། གྲུབ་ཆེན་གྱིས་དྭགས་པོ་གྲྭ་ཚང་བླ་མ་ནམ་མཁའ་རྒྱ་མཚོར་འཕྲིན་བཅོལ་མཛད། དབོན་དྲུང་དར་རྩེ་མདོར་ཕེབས། མེ་ཁྱི། རྗེ་དྲུང་ཤེས་རབ་དབང་པོ་གཤེགས། མཁས་གྲུབ་ཤཱཀྱ་ལྷ་དབང་འཁྲུངས། འཕགས་པ་མཐོང་བ་དོན་ལྡན་འཇང་ས་དམ་གྱི་ཡུལ་དུ་ཕེབས། པཎ་ཆེན་རིན་པོ་ཆེ་བཀྲ་ཤིས་ལྷུན་པོའི་ཆོས་གྲྭར་བྱོན། གྲུབ་ཆེན་གྱིས་རྗེ་ཐམས་ཅད་མཁྱེན་པའི་སྐུ་རིམ་རྒྱལ་དུ་ཆོས་ཁྲི་བརྩིགས། མེ་ཕག སྒམ་པོ་བ་བཀྲ་ཤིས་རྣམ་རྒྱལ། བོད་མཁར་པ་མཻ་ཏྲི་དོན་གྲུབ་རྒྱལ་མཚན། སྟོང་འཁོར་ཡོན་ཏན་རྒྱ་མཚོ་གསུམ་གཤེགས། སྒོམ་སྡེས་བསྟན་རྩིས་མཛད། རིགས་ལྡན་དཔལ་སྐྱོང་ཁྲིར་འཁོད་ནས་རེ་གཅིག་ལོན། ས་བྱི། རྒྱལ་བ་བསོད་ནམས་རྒྱ་མཚོ་གཤེགས། སྟོང་འཁོར་འཇམ་དབྱངས་རྒྱ་མཚོ་དང་རྒྱལ་བ་རྒྱ་མཚོ་གཉིས་འཁྲུངས། ས་གླང༌། རྒྱལ་བ་ཡོན་ཏན་རྒྱ་མཚོ་མཁར་སྔོན་པོར་འཁྲུངས། སྒམ་པོ་ཞབས་དྲུང་ནོར་བུ་རྒྱལ་མཚན་པའང་སྐུ་བལྟམས། ཆོས་རྗེ་དམ་ཆོས་དཔལ་འབར་ཁྲིར་ཕེབས། ན་ཁ་གྲུབ་ཆེན་གཤེགས། ལྕགས་སྟག ཆོས་རྗེ་བྱམས་པ་རྒྱ་མཚོ་གཤེགས། དྭགས་པོ་ཆོས་རྗེས་ན་ཁ་གྲུབ་ཆེན་གྱི་རྣམ་ཐར་མཛད། ལྕགས་ཡོས། དབེན་ས་པ་མཁས་གྲུབ་སངས་རྒྱས་ཡེ་ཤེས་སྐུ་གཤེགས། མཁན་ཆེན་བློ་གྲོས་གཞོན་ནུ་མཆོད་ཡོན་གྱིས་བཀྲ་ཤིས་རྩེའི་ཆོས་སྡེ་བཏབ། དམ་ཆོས་ཡར་འཕེལ་ལས་པཎ་ཆེན་ཆོས་རྒྱན་བསྙེན་པར་རྫོགས། བྱམས་པ་སྤྲུལ་སྐུ་འཁྲུངས། པཎ་ཆེན་རིན་པོ་ཆེ་རི་བོ་དགའ་ལྡན་དུ་བྱོན། ཆུ་འབྲུག སྒོམ་སྡེ་ནམ་མཁའ་རྒྱལ་མཚན་དང༌། སྤྲུལ་སྐུ་བསོད་ནམས་ཡེ་ཤེས་དབང་པོ་གཉིས་གཤེགས། སྒམ་པོ་བསོད་ནམས་རབ་བརྟན་དང༌། དབེན་ས་སྤྲུལ་སྐུ་ཡེ་ཤེས་རྒྱ་མཚོ་གཉིས་འཁྲུངས། ཆུ་སྦྲུལ། སྒམ་པོ་བ་བསོད་ནམས་འཕྲིན་ལས་འཁྲུངས། དཀོན་མཆོག་ཆོས་འཕེལ་གྱིས་རྩེ་ཐང་དུ་གྲྭ་སྐོར་མཛད། ཤིང་རྟ། འཕགས་པ་མཐོང་བ་དོན་ལྡན་ཆབ་མདོའི་ཁྲིར་ཕེབས། བསྟན་འཛིན་ཆོས་ཀྱི་རྒྱལ་པོས་མགོ་དཀར་བཅོམ། དཀོན་མཆོག་ཆོས་འཕེལ་གྱིས་ར་བ་སྟོད་དུ་སྟག་ལུང་བྲག་པ་བློ་གྲོས་རྒྱ་མཚོར་གཏུག །སྤྲུལ་སྐུ་བསོད་ནམས་དགེ་ལེགས་དཔལ་བཟང་འཁྲུངས། དཔལ་འབྱོར་རྒྱ་མཚོ་ལས་འཁོན་སྟོན་བསྙེན་པར་རྫོགས། ཤིང་ལུག དཀོན་མཆོག་ཕུན་ཚོགས། སྨན་ལུང་པ་བློ་མཆོག་རྡོ་རྗེ། སྡེ་སྲིད་བསོད་ནམས་རབ་བརྟན་གསུམ་འཁྲུངས། མེ་སྤྲེལ། དཔལ་འབྱོར་རྒྱ་མཚོ་ལས་དཀོན་མཆོག་ཆོས་འཕེལ་བསྙེན་པར་རྫོགས། ཆོས་རྗེ་སངས་རྒྱས་རིན་ཆེན་ཁྲིར་ཕེབས། མེ་བྱ། ས་ཁྱི། པཎ་ཆེན་ཆོས་རྒྱན་གངས་ཅན་ཆོས་འཕེལ་གྱི་ཁྲིར་ཕེབས། ས་ཕག ཁྲི་ཆེན་བཀྲ་ཤིས་ཀུན་གྲགས། ཆོས་རྗེ་དཔལ་འབྱོར་རྒྱ་མཚོ། ཁྲི་པ་དམ་ཆོས་དཔལ་འབར། མཁན་ཆེན་གཞོན་ནུ་བློ་གྲོས་བཞི་གཤེགས། ལྕགས་བྱི། མཁན་པོ་ནམ་མཁའ་རྒྱ་མཚོ་གཤེགས། ངག་དབང་བཀྲ་ཤིས་དཔལ་གྲུབ་འཁྲུངས། པཎ་ཆེན་བློ་བཟང་ཆོས་རྒྱན་བཀྲ་ཤིས་ལྷུན་པོའི་ཁྲིར་ཕེབས། དཀོན་མཆོག་ཆོས་འཕེལ་ཁམས་སུ་བྱོན། ལྕགས་གླང༌། དཔལ་འབྱོར་ལྷུན་གྲུབ་ཉི་མ་ཐང་གི་འཆད་ཉན་པར་ཕེབས། རྒྱལ་ཁང་རྩེ་སྤྲུལ་སྐུ་འཁྲུངས། ཆུ་སྟག དཀོན་མཆོག་ཆོས་འཕེལ་རྭ་བ་སྟོད་ཀྱི་འཆད་ཉན་པར་ཕེབས། ཞྭ་ལུ་མཁན་ཆེན་བསོད་ནམས་མཆོག་གྲུབ་དང༌། སྲད་རྒྱུད་རྡོ་རྗེ་འཆང་དཀོན་མཆོག་ཡར་འཕེལ་གཉིས་འཁྲུངས། རྒྱུད་ཆེན་རྣམ་རྒྱལ་དཔལ་བཟང་གཤེགས། ཆུ་ཡོས། རྒྱལ་བ་ཡོན་ཏན་རྒྱ་མཚོ་དབུས་སུ་ཕེབས། ཁྲི་པ་དགེ་འདུན་རྒྱལ་མཚན་ལས་རབ་ཏུ་བྱུང་། ཀརྨ་པ་དབང་ཕྱུག་རྡོ་རྗེ་གཤེགས། ཆོས་རྗེ་དགེ་འདུན་རྒྱལ་མཚན་ཁྲིར་ཕེབས། མགོན་པོ་བསོད་ནམས་མཆོག་ལྡན་འཁྲུངས། ཤིང་འབྲུག འཕགས་པ་མཐོང་བ་དོན་ལྡན། སེམས་དཔའ་སྤྲུལ་སྐུ་ངག་དབང་གྲགས་པ་རྒྱ་མཚོ། དབེན་ས་སྤྲུལ་སྐུ་ཡེ་ཤེས་རྒྱ་མཚོ། རྗེ་དྲུང་ལྷ་དབང་ཆོས་ཀྱི་རྒྱལ་མཚན་བཞི་གཤེགས། དབོན་དྲུང་སངས་རྒྱས་འབྱུང་གནས་ཆབ་མདོའི་ཁྲིར་ཕེབས། ཆོས་དབྱིངས་རྡོ་རྗེ་དང༌། ཟུར་ཆོས་དབྱིངས་རང་གྲོལ་གཉིས་འཁྲུངས། རྒྱལ་སྲས་དོན་ཡོད་ཆོས་ཀྱི་རྒྱ་མཚོས་དགོན་ལུང་བཏབ། རྒྱལ་བ་ཡོན་ཏན་རྒྱ་མཚོས་སྨོན་ལམ་གྱི་ཚོགས་དབུ་མཛད། མཁས་གྲུབ་ཤཱཀྱ་ལྷ་དབང་གིས་ཕན་བདེའི་གདན་ས་མཛད། ཤིང་སྦྲུལ། འཕགས་པ་ཆོས་ཀྱི་རྒྱལ་པོ། དབེན་ས་སྤྲུལ་སྐུ་བློ་བཟང་བསྟན་འཛིན་རྒྱ་མཚོ། སེམས་དཔའ་སྤྲུལ་སྐུ་ངག་དབང་ཕུན་ཚོགས་རྣམ་རྒྱལ་དབང་པོའི་སྡེ་རྣམས་འཁྲུངས། དཔལ་འབྱོར་ལྷུན་གྲུབ་སེ་ར་བྱེས་ཀྱི་འཆད་ཉན་པར་ཕེབས། མེ་རྟ། བ་སོ་རྗེ་དྲུང་ངག་དབང་ཆོས་ཀྱི་དབང་ཕྱུག་འཁྲུངས། བསྟན་འཛིན་ཆོས་ཀྱི་རྒྱལ་པོས་ཁལ་ཁ་དང་ཨོ་རོད་གཞུང་འདུམ་པར་མཛད་པས་ཀོ་ཤྲཱིའི་ཆོ་ལོ་ཐོབ། མེ་ལུག རྗེ་ངག་དབང་འཕྲིན་ལས་བཟང་པོ་འཁྲུངས། ཁྲི་པ་དགེ་འདུན་རྒྱལ་མཚན་གཤེགས། འཕགས་པ་དར་རྒྱས་ཕན་བདེ་སློབ་དཔོན་པར་འཁོད། གསེར་གདུང་གི་རྨང་བཏིང༌། ཆོས་རྗེ་ཆོས་སྙན་གྲགས་པ་ཁྲིར་ཕེབས། རྒྱལ་བ་ཡོན་ཏན་རྒྱ་མཚོ་གཙང་དུ་ཕེབས། ས་སྤྲེལ། སྤངས་དཀར་རིན་པོ་ཆེ་གཤེགས། བཀྲ་ཤིས་ལྷུན་པོར་དབྱེན་ཟླུམ་མཆོད་རྟེན་བཞེངས། པཎ་ཆེན་རིན་པོ་ཆེ་དགེ་འཕེལ་གྱི་ཁྲིར་ཕེབས། སྤྲུལ་སྐུ་དཔལ་འབྱོར་རྒྱ་མཚོ་འཁྲུངས། ས་བྱ། སྲད་རྡོ་རྗེ་འཆང་དཀོན་མཆོག་རྒྱ་མཚོ་ལས་རྒྱུད་ཆེན་དཀོན་མཆོག་ཡར་འཕེལ་རབ་ཏུ་བྱུང༌། ལྕགས་ཁྱི། བསོད་ནམས་ཆོས་འཕེལ་དང་སློབ་དཔོན་དགེ་ལེགས་རྒྱ་མཚོ་གཉིས་གཤེགས། སྒམ་པོ་བ་བཀྲ་ཤིས་གྲགས་པ་རྒྱ་མཚོ་འཁྲུངས། ཞྭ་ལུ་མཁན་ཆེན་གྱིས་དབང་རབ་ལ་གཙུག་ཕུད་ཕུལ། སྤྲུལ་སྐུ་དོན་ཡོད་རྒྱ་མཚོ་དབུས་སུ་བྱོན། ལྕགས་ཕག། པཎ་ཆེན་བློ་བཟང་ཆོས་རྒྱན་གྱིས་འབྲས་སྤུངས་སུ་རྡོ་རྗེའི་འཕྲེང་བ་སོགས་ཆོས་ཀྱི་ཆར་ཕབ། ཆུ་བྱི། སྒམ་པོ་བ་རིན་ཆེན་འཁྲུངས། པཎ་ཆེན་རིན་པོ་ཆེས་བྱམས་པའི་གསེར་ཐོག་བཞེངས། ཆོས་རྗེ་སངས་རྒྱས་རིན་ཆེན་གཤེགས། དཀོན་མཆོག་ཆོས་འཕེལ་རྒྱུད་སྟོད་ཀྱི་ཁྲིར་ཕེབས། འདུལ་བ་ཆོས་རྗེ་འོད་ཟེར་རྒྱ་མཚོས་སྐུ་འབུམ་དུ་མཚན་ཉིད་གྲྭ་ཚང་བཙུགས། ཆུ་གླང༌། ལོ་འདི་ནས་བཟུང་སྟེ་ལོ་དྲུག་གི་རིང་པཎ་ཆེན་ཆོས་རྒྱན་གྱིས་སྨོན་ལམ་ཆེན་མོའི་དབུ་མཛད། ཤིང་སྟག པཎ་ཆེན་ཆོས་རྒྱན་ལས་རྒྱལ་བ་ཡོན་ཏན་རྒྱ་མཚོ་བསྙེན་པར་རྫོགས། ཆོས་རྗེ་ཆོས་སྙན་གྲགས་པ་གཤེགས། ཕ་བོང་ཁ་པས་བསྟན་རྩིས་མཛད། ཤིང་ཡོས། སྟག་ལུང་བྲག་པ་བློ་གྲོས་རྒྱ་མཚོ་ཁྲིར་ཕེབས། སྤྲུལ་སྐུ་བསོད་ནམས་དགེ་ལེགས་དཔལ་བཟང་པོ་གཤེགས། དཀོན་མཆོག་ཆོས་འཕེལ་རིན་ཆེན་གླིང་གི་ཁྲིར་ཕེབས། མེ་འབྲུག རྒྱལ་བ་ཡོན་ཏན་རྒྱ་མཚོ་གཤེགས། མེ་སྦྲུལ། རྗེ་ཐམས་ཅད་མཁྱེན་པ་བློ་བཟང་རྒྱ་མཚོ་འཁྲུངས། ཡབ་སངས་རྒྱས་ཆོས་འཛིན་གཤེགས། ཀརྨ་པ་བསམ་འགྲུབ་རྩེར་ཕེབས། པཎ་ཆེན་རིན་པོ་ཆེ་སེར་འབྲས་གཉིས་ཀྱི་ཁྲིར་ཕེབས། ས་རྟ། ཧོར་ཟླ་བདུན་པར་སེར་འབྲས་གླིང་ལོག་བྱུང༌། ཆོས་རྗེ་བློ་གྲོས་རྒྱ་མཚོ་དང༌། སྒམ་པོ་བསོད་ནམས་རབ་བརྟན་གཉིས་གཤེགས། ཆོས་རྗེ་དམ་ཆོས་དཔལ་བཟང་ཁྲིར་ཕེབས། ཡབ་སངས་རྒྱས་ཡེ་ཤེས་འཁྲུངས། དཀོན་མཆོག་ཆོས་འཕེལ་སྐྱོར་མོ་ལུང་གི་ཁྲིར་ཕེབས། ལྷ་ས་དང་དབུ་རིར་འཁྲུག།།སྡེ་པ་ཞབས་དྲུང་མདོ་སྨད་དུ་ཕེབས། པཎ་ཆེན་རིན་པོ་ཆེ་མངའ་རིས་སུ་ཕེབས། ས་ལུག དཀོན་མཆོག་ཆོས་འཕེལ་གསང་ཕུའི་ཁྲིར་ཕེབས། དཔལ་འབྱོར་ལྷུན་གྲུབ་ཕ་བོང་ཁར་བཞུགས། སྤྲུལ་སྐུ་གྲགས་པ་རྒྱལ་མཚན་འཁྲུངས། ཆོས་རྗེ་དགེ་འདུན་རིན་ཆེན་གྱིས་ཐང་རིང་ཆོས་སྡེ་བཏབ། རྒྱལ་ཁང་རྩེ་སྤྲུལ་སྐུ་གཤེགས། ཆོས་རྗེ་ཤེས་རབ་མཆོག་ལྡན་གྱིས་གྲོ་ཚང་དགོན་བཏབ། ལྕགས་སྤྲེལ། དབོན་དྲུང་གཤེགས་ནས་འཕགས་པ་ཆོས་ཀྱི་རྒྱལ་པོ་ཆབ་མདོའི་ཁྲིར་ཕེབས། དཀོན་མཆོག་ཆོས་འཕེལ་རྫིང་ཕྱིའི་ཁྲིར་ཕེབས། ཆོས་རྗེ་དམ་ཆོས་དཔལ་གཤེགས། ཆོས་རྗེ་ཚུལ་ཁྲིམས་ཆོས་འཕེལ་ཁྲིར་ཕེབས་ཏིང་འཛིན་ལེའུ་ཚང༌། ལྕགས་བྱ། ཟུར་ཆེན་ཆོས་རྗེས་འཁོན་སྟོན་བསྟེན། ལྷ་ས་པཎ་ཆེན་རིན་པོ་ཆེར་ཕུལ། མཁར་པ་སྡེངས་བཏབ། ཚུལ་ཁྲིམས་ལེའུ་མགོ་ཚུགས། ཆུ་ཁྱི། རྒྱལ་བ་ངག་དབང་བློ་བཟང་རྒྱ་མཚོ་འབྲས་སྤུངས་སུ་གདན་དྲངས། རྗེ་འཕྲིན་ལས་ལྷུན་གྲུབ་པ་འཁྲུངས། ཆུ་ཕག ཆོས་རྗེ་ཚུལ་ཁྲིམས་ཆོས་འཕེལ་གཤེགས། ཆོས་རྗེ་གྲགས་པ་རྒྱ་མཚོ་ཁྲིར་ཕེབས་ནས་རིང་པོ་མ་ལོན་པར་གཤེགས་ཤིང་ཆོས་རྗེ་ངག་དབང་ཆོས་ཀྱི་རྒྱལ་མཚན་ཁྲིར་ཕེབས་ཏེ་ལོ་གཉིས་སོང་མཚམས་ཁྲི་ཐོག་པཎ་ཆེན་རིན་པོ་ཆེ་ལ་ཕུལ། དཀོན་མཆོག་ཆོས་འཕེལ་བློ་གསལ་གླིང་གི་འཆད་ཉན་པར་ཕེབས། པཎ་ཆེན་རིན་པོ་ཆེས་བཅུ་གཅིག་ཞལ་གྱི་གསེར་ཐོག་བཞེངས། ཆོས་རྗེ་བསྟན་པ་རིན་ཆེན་གྱིས་བྱ་ཁྱུང་དུ་མཚན་ཉིད་བཙུགས། ཤིང་བྱི། དཔལ་འབྱོར་འཕྲིན་ལས་རབ་རྒྱས་ཀྱིས་རྩིས་དཀར་ནག་གི་དྲི་བ་མཛད། ལྔ་བ་ཆེན་པོ་དགེ་ཚུལ་བསྒྲུབས། ལྷོ་དཀོན་མཆོག་འཕྲིན་ལས་རྣམ་རྒྱལ་འཁྲུངས། ཤིང་གླང༌། འཕགས་པ་ཞི་བ་བཟང་པོ་འཁྲུངས། རྗེ་ཡོན་ཏན་རྒྱ་མཚོའི་དངུལ་གདུང་གྲུབ། དཀོན་མཆོག་ཆོས་འཕེལ་ཤར་རྩེར་ཕེབས། མེ་སྟག། པཎ་ཆེན་རིན་པོ་ཆེ་བྱང་རྩེར་ཕེབས། སྤྲུལ་སྐུ་ངག་དབང་འཕགས་པ་རྒྱ་མཚོ་རབ་ཏུ་བྱུང༌། དཀོན་མཆོག་ཆོས་འཕེལ་ཁྲིར་ཕེབས། རིགས་ལྡན་དཔལ་སྐྱོང་གིས་ཆོས་བསྟན་ནས་ལོ་བརྒྱ་སོང། ལི་ཐང་མཁན་པོ་ཉག་རི་ཆོས་གྲགས་འཁྲུངས། ཆོས་རྗེ་ཀུན་ལེགས་པས་རྡོ་སི་ཏུ་གྲྭ་ཚང༌། རབ་བྱུང་བཅུ་གཅིག་པ། མེ་ཡོས། དཀོན་མཆོག་ཆོས་འཕེལ་གྱིས་རྒྱལ་དབང་མཆོག་གི་དབུ་བླ་དང་སྨོན་ལམ་གྱི་ཚོགས་དབུ་མཛད། རིགས་ལྡན་སེང་གེ་ཤམྦྷ་ལའི་ཁྲིར་ཕེབས། ས་འབྲུག ཉི་འོད་ཉམས་པའི་དུས་རྟགས་བྱུང་སྟེ་འཁོན་སྟོན་གྱིས་ལུང་བསྟན་མཛད། རྒྱུད་ཆེན་དཀོན་མཆོག་རྒྱ་མཚོ་གཤེགས། ས་སྤྲུལ། པཎ་ཆེན་རིན་པོ་ཆེས་དགེ་ལྡན་གསེར་ཐོག་བཞེངས། ལྕགས་རྟ། འཕགས་པ་དཔལ་འབྱོར་རྒྱ་མཚོ་བསྙེན་པར་རྫོགས། སློབ་དཔོན་གྲུབ་ཆེན་སྐལ་ལྡན་རྒྱ་མཚོས་རོང་པོར་གྲྭ་ཚང་བཙུགས། ལྕགས་ལུག། ཞྭ་དམར་བདུན་པ་དང་དེ་མོ་ངག་དབང་དགེ་ལེགས་རྒྱལ་མཚན་གཉིས་འཁྲུངས། ཆུ་སྤྲེལ། རྒྱ་ར་བ་ཤེས་རབ་ཕུན་ཚོགས་གཤེགས། ཆོས་རྗེ་ཀོང་པོ་བསྟན་འཛིན་ལེགས་བཤད་ཁྲིར་ཕེབས། ཆུ་བྱ། ཞབས་དྲུང་ནོར་བུ་རྒྱལ་མཚན་པ་དང༌། སློབ་དཔོན་ཤེས་རབ་དཔལ་བཟང་གཉིས་གཤེགས། ཚེར་ལུང་པ་འཁྲུངས། ལྔ་པ་ཆེན་པོས་འཁོན་སྟོན་ལས་ཆོས་གསན། ཤིང་ཁྱི། ཤིང་ཕག ཞྭ་ལུ་མཁན་ཆེན་བསྙེན་པར་རྫོགས། ཨ་བ་ལཱ་དབུས་སུ་ཕེབས། མེ་བྱི། སྒམ་པོ་བཀྲ་ཤིས་གྲགས་པ་རྒྱལ་མཚན་དང༌། རྡོ་རྗེ་འཆང་དབང་ཕྱུག་རབ་བརྟན་གཉིས་གཤེགས། བཟང་པོ་རྡོ་རྗེ་འཁྲུངས། གཙང་དཔུང་གནམ་མཚོར་སླེབས། མེ་གླང༌། དགེ་ལེགས་སྐུ་སྐྱེ་ཆབ་མདོར་བསྙེན་པར་རྫོགས། ཕན་བདེ་སློབ་དཔོན་འཕགས་དར་དང་དཔལ་འབྱོར་ལྷུན་གྲུབ་གཉིས་གཤེགས། བསྟན་འཛིན་ཆོས་ཀྱི་རྒྱལ་པོས་ཆོག་ཐུ་བཅོམ་ནས་དབུས་སུ་ཕེབས། ས་སྟག སྤྲུལ་སྐུ་དཔལ་འབྱོར་རྒྱ་མཚོས་ཕན་བདེའི་སློབ་དཔོན་མཛད། ཆོས་རྗེ་དགེ་འདུན་རིན་ཆེན་རྒྱལ་མཚན་ཁྲིར་ཕེབས། བློ་བཟང་ཆོས་རྒྱན་ལས་རྒྱལ་བ་བློ་བཟང་རྒྱ་མཚོ་ཉེར་གཉིས་པར་བསྙེན་པར་རྫོགས། ས་ཡོས། ཧོར་ཟླ་ལྔ་པར་བསྟན་འཛིན་ཆོས་ཀྱི་རྒྱལ་པོ་སྨྲར་ཁམས་སུ་ཕེབས། བྱང་བདག་ངག་གི་དབང་པོ་གཤེགས། སྐྱིད་ཤོད་ཞབས་དྲུང་ངག་དབང་བསྟན་འཛིན་འཕྲིན་ལས་ཆོས་དབང་གྲགས་པའི་སྡེ་འཁྲུངས། ལྕགས་འབྲུག བསྟན་འཛིན་ཆོས་ཀྱི་རྒྱལ་པོས་ཧོར་ཟླ་བཅུ་གཅིག་པར་བེ་རི་རྒྱལ་པོ་ཁྲིམས་དོང་དུ་བཙུད། ཤཱཀྱ་ལྷ་དབང་གི་ཞལ་སྔ་ནས་བཀའ་བརྒྱུད་ཆོས་འབྱུང་བརྩམས། ལྕགས་སྦྲུལ། མཁན་ཆེན་ངག་དབང་ཆོས་གྲགས་གཤེགས། ཕན་བདེར་དཔལ་འབྱོར་རྒྱ་མཚོ་སློབ་དཔོན་དུ་བསྐོས། ཆུ་རྟ། ཞི་བ་བཟང་པོ་ཆབ་མདོའི་ཁྲིར་འཁོད། ཆོས་རྗེ་རིན་ཆེན་རྒྱལ་མཚན་གཤེགས། བསྟན་འཛིན་ཆོས་རྒྱལ་གྱིས་བསམ་གྲུབ་རྩེ་སོགས་དབུས་གཙང་མཐའ་དག་མངའ་འོག་ཏུ་བཅུག ། ལྕང་སྐྱ་རྡོ་རྗེ་འཆང་ངག་དབང་ཆོས་ལྡན་འཁྲུངས། ཆུ་ལུག འཕགས་པ་ཆོས་ཀྱི་རྒྱལ་པོ་གཤེགས། རྒྱལ་དབང་ལྔ་པ་ཆེན་པོས་དེབ་ཐེར་བརྩམས། དྭགས་པོ་བ་སོ་ཆོས་རྒྱལ་ཁྲིར་ཕེབས། ཤིང་སྤྲེལ། འཕགས་པ་རྒྱལ་བ་རྒྱ་མཚོ་འཁྲུངས། རྒྱ་ནག་གི་རྒྱལ་ས་ལོའུ་རྩིས་བླངས། གླིང་སྨད་ཞབས་དྲུང་གི་རྣམ་ཐར་བརྩམས། ཤིང་བྱ། ཕ་བོང་ཁ་པའི་རྣམ་ཐར་བརྩམས། པོ་ཏ་ལར་ཕོ་བྲང་བཞེངས། རྒྱ་ནག་གི་རྒྱལ་ས་ཇུར་ཇིང་གིས་ཐོབ། མེ་ཁྱི། དཀོན་མཆོག་ཆོས་འཕེལ་གཤེགས། ལ་མོ་བློ་གྲོས་རྒྱ་མཚོས་རྨད་གུར་དུ་དགོན་དང་འཆད་ཉན་བཙུགས། ཆོས་རྒྱལ་གཏེར་བདག་གླིང་པ་འགྱུར་མེད་རྡོ་རྗེ། རྒྱ་ར་སྤྲུལ་སྐུ། དཀོན་མཆོག་བསྟན་འཛིན་གྲགས་པ་གསུམ་འཁྲུངས། མཛོད་ཊཱིཀ་ཏུ་ཚུལ་ཁྲིམས་ལེའུ་ཉེར་བདུན་ལ་སླེབས་གསུངས། མེ་ཕག ཉག་རི་སྤྲུལ་སྐུ་འཁྲུངས། རྒྱལ་དབང་ལྔ་པ་ཆེན་པོས་སྙན་ངག་མེ་ལོང་གི་དཀའ་འགྲེལ་མཛད། དེར་སྟོན་པ་འཁྲུངས་ནས་ཉིས་སྟོང་དྲུག་བརྒྱ་དང་དྲུག་གསུངས་ཀྱང་ཉིས་སྟོང་ལྔ་བརྒྱ་དང་རེ་གཅིག་སོང༌། ཆོས་རྗེ་དྭགས་པོ་ཆོས་རྒྱལ་གཤེགས ས་བྱི། ཆོས་རྗེ་དཀོན་མཆོག་ཆོས་བཟང་ཁྲིར་ཕེབས། ས་གླང༌། སྒམ་པོ་བ་རིན་ཆེན་རྡོ་རྗེ་གཤེགས། སེ་ཆེན་ཧུང་ཐའི་ཇིས་སྦྱིན་བདག་བགྱིས་ཏེ་བཙན་པོ་དོན་གྲུབ་རྒྱ་མཚོས་དགའ་ལྡན་དམ་ཆོས་གླིང་བཏབ། ལྕགས་སྟག ལྕགས་ཡོས། པཎ་ཆེན་ཆོས་རྒྱན་གྱ་གཉིས་པར་ཞྭ་ལུ་མ་ཧེར་བཀའ་བསྒོ་མཛད། འཕགས་པ་རྒྱལ་བ་རྒྱ་མཚོས་རྒྱལ་བ་ཡོན་ཏན་རྒྱ་མཚོ་ལ་གཙུག་ཕུད་ཕུལ། ཆོས་རྗེ་ལེགས་པ་རྒྱ་མཚོས་སྐུ་འབུམ་དུ་རྒྱུད་གྲྭ་བཙུགས། ཆུ་འབྲུག ཟླ་བ་གསུམ་པའི་ཚེས་བཅོ་ལྔ་ལ་རྒྱལ་དབང་ལྔ་པ་ཆེན་པོ་རྒྱ་ནག་ཕོ་བྲང་དུ་ཆིབས་ཁ་བསྒྱུར། ཆུ་སྦྲུལ། ལྔ་མཆོད་སྐབས་རྒྱལ་དབང་ལྔ་པ་ཆེན་པོ་རྒྱ་ནག་ནས་དབུས་སུ་བྱོན། ཤིང་རྟ། བསྟན་འཛིན་ཆོས་ཀྱི་རྒྱལ་པོ་གཤེགས། ཤིང་ལུག མཁས་གྲུབ་ཤཱཀྱ་ལྷ་དབང་གཤེགས། ཆོས་རྗེ་མངའ་རིས་པ་བསྟན་པ་རྒྱལ་མཚན་ཁྲིར་ཕེབས། མེ་སྤྲེལ། དཀོན་མཆོག་འཕྲིན་ལས་བཟང་པོ་འཁྲུངས། དྲིས་ལན་ཉིན་བྱེད་དབང་པོ་བརྩམས། སྤྲུལ་སྐུ་གྲགས་པ་རྒྱལ་མཚན་གཤེགས། མེ་བྱ། སྡེ་སྲིད་བསོད་ནམས་རབ་བརྟན་དང༌། ཟུར་ཆོས་དབྱིངས་རང་གྲོལ་གཉིས་གཤེགས། ས་ཁྱི། ས་ཕག། གནས་གསར་པ་མགོན་པོ་བསོད་ནམས་མཆོག་ལྡན་གཤེགས། ལྕགས་བྱི། ཇེས་སང་སྡེ་པ་ཁྲིམས་བདག་ཆེན་པོར་བསྐོས། ལྕགས་གླང༌། ཆུ་སྟག པཎ་ཆེན་བློ་བཟང་ཆོས་རྒྱན་གོ་གསུམ་པ་ནག་ཟླའི་བཅུ་གསུམ་ལ་ཞི་བར་གཤེགས། ཞི་བ་བཟང་པོ་ཀེ་ར་ནས་ཡར་ཕེབས། བློ་བཟང་རྒྱལ་མཚན་ཁྲིར་ཕེབས། ཆུ་ཡོས། པཎ་ཆེན་བློ་བཟང་ཡེ་ཤེས་ཐོབ་རྒྱལ་དུ་སྐུ་འཁྲུངས། གཡའ་མ་ལུང་གི་གཏེར་བཏོན། ཤིང་འབྲུག འཕགས་པ་རྒྱལ་བ་རྒྱ་མཚོ་བསྙེན་པར་རྫོགས། ཤིང་སྦྲུལ། བཙན་པོ་དོན་གྲུབ་རྒྱ་མཚོ་གཤེགས། མེ་རྟ། མེ་ལུག ཆོས་རྗེ་ངག་དབང་འཕྲིན་ལས་བཟང་པོ་སྐུ་གཤེགས། འཕགས་པ་རྒྱལ་བ་རྒྱ་མཚོ་སླར་དབུས་སུ་ཕེབས། ཤེལ་བྲག་གི་གཏེར་བཏོན། ས་སྤྲེལ། ཆོས་རྗེ་རྣམ་དག་རྡོ་རྗེ་ཁྲིར་ཕེབས། དེ་མོ་སྤྲུལ་སྐུ་ལྷ་དབང་དགེ་ལེགས་རྒྱལ་མཚན། ཇེས་སང་སྡེ་པ། བསྟན་འཛིན་ད་ཡན་རྒྱལ་པོ་གསུམ་གཤེགས། ས་བྱ། འཕགས་པ་རྒྱལ་བ་རྒྱ་མཚོ་ལྕགས་རིའི་དངུལ་གདུང་ཆེན་མོ་གྲུབ། དགེ་སློང་མཆོད་དཔོན་ལགས་འཛམ་གླིང་གི་དཔོན་པོར་བསྐོས། ལྕགས་ཁྱི། ལྔ་པ་ཆེན་པོས་གསན་ཡིག་གངྒའི་ཆུ་རྒྱུན་མཛད། བསམ་གྲུབ་གཞུང་དགོན་པའི་རབ་གནས་མཛད། ལྕགས་ཕག བསྟན་འཛིན་ད་ལའི་ཧན་ཁྲིར་ཕེབས། སྨན་ལུང་པ་བློ་མཆོག་རྡོ་རྗེ་དང༌། སྟག་ལུང་པ་ངག་དབང་བཀྲ་ཤིས་དཔལ་སྒྲུབ་གཉིས་གཤེགས། ངག་དབང་བསྟན་འཛིན་ལྷུན་གྲུབ་འཁྲུངས། ཆུ་བྱི། རྒྱལ་དབང་མཆོག་གིས་རི་ཐང་མཚམས་ཀྱི་ནད་བརྒྱ་འཇོམས་པའི་སྨན་གཅིག་བརྩམས། བཞེད་རྩ་སྡེ་པ་དང༌། ཁྲི་རིན་པོ་ཆེ་བློ་བཟང་རྒྱལ་མཚན་གཉིས་གཤེགས། ཆུ་གླང༌། ཞྭ་དམར་ནག་གཉིས་ཡར་གདན་དྲངས། ཁྲི་པ་དཀོན་མཆོག་ཆོས་བཟང་གཤེགས། ཤིང་སྟག ཀརྨ་ཆོས་དབྱིངས་རྡོ་རྗེ་གཤེགས། ཤིང་ཡོས། ཆོས་རྗེ་བྱམས་པ་བཀྲ་ཤིས་ཁྲིར་ཕེབས། ངག་དབང་བསྟན་འཛིན་ལྷུན་གྲུབ་གདན་དྲངས། མེ་འབྲུག གནམ་ལྕགས་བྲག་གི་གཏེར་བཏོན། ཨོ་རྒྱན་སྨིན་གྲོལ་གླིང་གི་གནྔྷོ་ལ་བཞེངས། མེ་སྦྲུལ། ས་རྟ། རྡོ་རྗེ་འཆང་འཕྲིན་ལས་ལྷུན་གྲུབ་པ་དབུས་སུ་བྱོན། ས་ལུག སྡེ་སྲིད་སངས་རྒྱས་རྒྱ་མཚོ་ཁྲིར་ཕེབས། འཕགས་པ་རྒྱལ་བ་རྒྱ་མཚོ་དབུས་སུ་བྱོན། ལྕགས་སྤྲེལ། ལྕགས་བྱ། རྗེ་བློ་གྲོས་རྒྱ་མཚོས་རྡོ་རྗེ་འཕྲེང་བའི་དབང་བསྐུར། ཆུ་ཁྱི། རྒྱལ་དབང་ལྔ་པ་ཆེན་པོ་དང་སྐྱིད་ཤོད་ཞབས་དྲུང་ངག་དབང་བསྟན་འཛིན་འཕྲིན་ལས་གཉིས་གཤེགས། ཆོས་རྗེ་ཀླུ་འབུམ་བློ་གྲོས་རྒྱ་མཚོ་ཁྲིར་ཕེབས། ཆུ་ཕག རྒྱལ་བ་བློ་བཟང་རིན་ཆེན་ཚངས་དབྱངས་རྒྱ་མཚོ་འཁྲུངས། ཆབ་མདོར་བཀའ་འགྱུར་བཞེངས་པར་བརྩམས། ཤིང་བྱི། ཤིང་གླང༌། ཆོས་རྗེ་ཀླུ་འབུམ་བློ་གྲོས་རྒྱ་མཚོ་རྒྱ་ནག་ཏུ་ཕེབས། ཆོས་རྗེ་ཚུལ་ཁྲིམས་དར་རྒྱས་ཁྲིར་ཕེབས། མེ་སྟག། པད་དཀར་འཛིན་པ་ངག་དབང་ཡེ་ཤེས་རྒྱ་མཚོ་འཁྲུངས། ཁྲི་པ་བློ་གྲོས་རྒྱ་མཚོས་ཧལ་ཧ་དང་ཨོ་རོད་ཀྱི་ཆིངས་མཛད། རྗེ་འཕྲིན་ལས་ལྷུན་གྲུབ་པ་སླར་ཡང་དབུས་སུ་ཕེབས། རབ་བྱུང་བཅུ་གཉིས་པ། མེ་ཡོས། ཁྲི་པ་བློ་གྲོས་རྒྱ་མཚོ་གོང་མ་དང་མཇལ་འཕྲད་མཛད། རིགས་ལྡན་སེང་གེ་ཤམྦྷ་ལའི་ཁྲིར་ཕེབས་ནས་རེ་གཅིག་ལོན། ས་འབྲུག ཁྲི་ཆེན་བློ་གྲོས་རྒྱ་མཚོ་ཞི་བར་གཤེགས། ལྕང་སྐྱ་རྡོ་རྗེ་འཆང་ངག་དབང་བློ་བཟང་ཆོས་ལྡན་དགོན་ལུང་གི་ཁྲིར་ཕེབས། ས་སྦྲུལ། ལྕགས་རྟ། ལྕགས་ལུག ཆུ་སྤྲེལ། པཎ་ཆེན་བཀའ་འགྱུར་བ་སྦྱིན་པ་རྒྱ་མཚོ་ཁྲིར་ཕེབས། ཆུ་བྱ། ཤིང་ཁྱི། རྗེ་འཕྲིན་ལས་ལྷུན་གྲུབ་པ་དོན་གསུམ་སྐབས་དབུས་སུ་བྱོན། ཤིང་ཕག མེ་བྱི། མེ་གླང༌། རྒྱལ་བ་ཚངས་དབྱངས་རྒྱ་མཚོ་རབ་བྱུང་མཛད། ས་སྟག ས་ཡོས། རྗེ་འཕྲིན་ལས་ལྷུན་གྲུབ་པ་གཤེགས། ལྕགས་འབྲུག ལྕགས་སྦྲུལ། དོན་ཡོན་རྒྱ་མཚོ་ཁྲིར་ཕེབས། ཆུ་རྟ། སྡེ་སྲིད་སངས་རྒྱ་མཚོ་ཟུར་བཞུགས་མཛད། ཆུ་ལུག ཤིང་སྤྲེལ། ཤིང་བྱ། མཆོད་ཡོན་གཉིས་འཁྲུགས། བོད་དམག་བཞི་བརྒྱ་བསད། སྡེ་སྲིད་སངས་རྒྱས་རྒྱ་མཚོ་བཀྲོངས། སེར་ཚོགས་བྱས། མེ་ཁྱི། རིན་ཆེན་འོད་ཟེར་གྱི་རྩིས་ལོ་ཉིས་བརྒྱ་དང་དོན་གཉིས་ཊཱིཀ་ཆེན་ལས་དྲུག་ཅུ་སྐོར་བཞི་དང་ཉག་པོ་གསུམ། མེ་བྱི་ནས་དྲུག་ཅུ་གསུམ་དང་བཅུ་སྟེ་བརྒྱ་དགུ་བཅུ། སྟོན་པ་ཞི་བར་གཤེགས་ནས་ཉིས་སྟོང་ལྔ་བརྒྱ་ཞེ་གཅིག་འདས། ཞེ་གཉིས་འདིའོ། མེ་ཕག ས་བྱི། ས་གླང༌། ལྕགས་སྟག ལྕགས་ཡོས། ཆུ་འབྲུག འཕགས་པ་རྒྱལ་བ་རྒྱ་མཚོ་གཤེགས། ཆུ་སྦྲུལ། ཤིང་རྟ། ཤིང་ལུག རིག་ལྡན་སེང་གེ་ཤམྦྷ་ལའི་ཁྲིར་འཁོད་ནས་གྱ་དགུ་ལོན། སྨྲས་པ། ཕན་བདེ་འབྱུང་གནས་རྒྱལ་བའི་བསྟན་པ་མཆོག ། ས་གསུམ་རིན་ཆེན་གཅིག་པུ་འདི་ཡིན་ཅིང༌། ། དེ་འཛིན་ཆོས་རྒྱལ་རྣམས་དང་མཁས་རྣམས་ཀྱི། ། བྱུང་ཚུལ་རེ་མིག་མེ་ལོང་འདི་ན་གསལ། ། དམ་པའི་བསྟན་རྩིས་ལེགས་བཤད་ཆེས་མང་ཡང༌། །དང་པོ་བཅུད་ཀྱི་འགྲོ་བའི་བྱུང་ཚུལ་དང༌། །དམ་པའི་ལོ་ཚིགས་ཉུང་ངུ་རབ་གསལ་འདི། །རྐང་འཐུང་ཁྲོད་ཀྱི་ཡོངས་འདུ་ཇི་བཞིན་དུ། །ལུང་རིགས་རིན་ཆེན་འཕྲེང་བས་རབ་ཏུ་མཛེས། །ལེགས་བཤད་ཚིག་གི་སྒྲ་དོན་མེ་ཏོག་བཀྲ། །སྔོན་བྱུང་གཏམ་གྱི་ཚོན་རིས་བྱེ་བས་སྤྲས། །བལྟས་པས་ཀུན་གསལ་མེ་ལོང་འཕྲུལ་འདི་མཚར། །འདིར་འབད་དགེ་བས་ཐུབ་བསྟན་དར་ཞིང་རྒྱས། །མ་ལུས་འགྲོ་རྣམས་མངོན་མཐོ་ངེས་ལེགས་རྙེད། །སྐྱེས་བུ་དམ་པ་རྣམས་ཀྱི་སྐུ་ཚེ་བརྟན། །སྐྱིད་པའི་ཉི་མ་དགུང་ནས་གསལ་བར་ཤོག །ཅེས་པ་འདི་ཡང་རྫོགས་པའི་སངས་རྒྱས་བལྟམས་ནས་ལོ་ཉིས་སྟོང་དྲུག་བརྒྱ་དང་སུམ་ཅུ་སོ་གཅིག་དང༌། སངས་རྒྱས་ནས་ལོ་ཉིས་སྟོང་ལྔ་བརྒྱ་གོ་དྲུག་དང༌། རྩ་རྒྱུད་གསུངས་ནས་ལོ་ཉིས་སྟོང་ལྔ་བརྒྱ་གོ་ལྔ་དང༌། མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་དང་སུམ་ཅུ་རྩ་གཅིག་དང༌། གྲགས་པས་བསྡུས་རྒྱུད་མཛད་ནས་ལོ་སྟོང་དང་དགུ་བརྒྱ་དང་དགུ་ཅུ་རྩ་དགུ་དང༌། ཀླ་ཀློ་ཞུགས་ནས་སྟོང་དང་གོ་གསུམ་དང༌། རྒྱལ་དཀས་བྱེད་རྩིས་བརྩམས་ནས་དགུ་བརྒྱ་དང་ཉག་མ་བཅུ་སོང་བ་དང༌། རབ་བྱུང་སོགས་ཀྱི་ལོ་དྲུག་བརྒྱ་དང་གྱ་དགུ་དང༌། བསྟན་པ་ལྔ་བརྒྱ་པ་ཕྲག་བཅུའི་ཚུལ་ཁྲིམས་ལེའུའི་སྟེང་ནས་ང་གཅིག་འདས་པ་རབ་བྱུང་བཅུ་གཉིས་པའི་མེ་སྤྲེལ་གྱི་ཆོ་འཕྲུལ་ཟླ་བའི་ཚེས་བཅུ་བཞི་ལ་མང་དུ་ཐོས་པའི་དགེ་སློང་ྋའཇམ་དབྱངས་བཞད་པའི་རྡོ་རྗེས་བྲིས་པ་དགེ་ལེགས་འཕེལ།། །།མངྒ་ལཾ།
|