གཅོད་ཀྱི་གདམས་པ་ཉམས་སུ་ལེན་ཚུལ།

གཅོད་ཀྱི་གདམས་པ་གདན་ཐོག་གཅིག་ཏུ་དྲིལ་ནས་ཉམས་སུ་ལེན་ཚུལ་བཞུགས་སོ། །
ན་མོ་དེ་བ་ཌཱ་ཀི་ནི་ཡེ། གཅོད་ཀྱི་གདམས་པ་གདན་ཐོག་གཅིག་ཏུ་དྲིལ་ནས་ཉམས་སུ་ལེན་པར་འདོད་པས་སྐྱབས་ཡུལ་གསལ་འདེབས་ནི། ཕཊཿ མདུན་གྱི་ནམ་མཁར་སེང་ཁྲིའི་པད་ཟླའི་སྟེང༌། །བླ་མ་ཡུམ་ཆེན་ལབ་སྒྲོན་དབྱེར་མེད་ལ། །རྩ་བརྒྱུད་བླ་མ་མཆོག་གསུམ་ཡི་དམ་དང༌། །མཁའ་འགྲོ་ཆོས་སྐྱོང་ཚོགས་ཀྱིས་བསྐོར་ནས་བཞུགས། །ཕཊ་ བདག་སོགས་འགྲོ་རྣམས་བྱང་ཆུབ་སྙིང་པོའི་བར། །བླ་མ་དཀོན་མཆོག་གསུམ་ལ་སྐྱབས་སུ་འཆི། །འགྲོ་ཀུན་འཁོར་བའི་རྒྱ་མཚོ་ལས་བསྒྲལ་ཏེ། །རྫོགས་པའི་སངས་རྒྱས་ས་ལ་འགོད་པར་བྱ། །ལན་གསུམ་བརྗོད། ཕཊ་ རང་གི་སྤྱི་བོར་པདྨ་ཉི་ཟླའི་སྟེང༌། །རྩ་བའི་བླ་མ་ལབ་སྒྲོན་དབྱེར་མེད་ལ། །རྣམ་པ་རྗེ་བཙུན་རྡོ་རྗེ་རྣལ་འབྱོར་མ། །དམར་མོ་ཁྲོ་འཛུམ་ཕྱག་གཡས་གྲི་གུག་འཕྱར། །གཡོན་པ་ཐོད་ཁྲག་ཁ་ཊཱཾ་མཆན་ཁུང་བརྟེན། །གཅེར་མོ་སྐྲ་ཀྲོལ་ཐོད་སྐམ་དབུ་རྒྱན་དང༌། །ཐོད་རློན་དོ་ཤལ་རུས་བརྒྱན་གཡས་བརྐྱངས་བཞུགས། །ཕཊ་ སྟོན་པ་སངས་རྒྱས་རྗེ་བཙུན་འཇམ་དབྱངས་དང༌། །ཨརྻ་དཱེ་བ་ཕ་ཅིག་དམ་པ་སོགས། །ཕ་རྒྱུད་ཐབས་ཀྱི་བརྒྱུད་པའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡུམ་ཆེན་ཤེར་ཕྱིན་རྗེ་བཙུན་སྒྲོལ་མ་དང༌། །སུ་ཁ་སིདྡྷི་མ་ཅིག་ལབ་སྒྲོན་སོགས། །མ་རྒྱུད་ཤེས་རབ་བརྒྱུད་པའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྗེ་བཙུན་འཇམ་དབྱངས་དཔའ་བོ་རྡོ་རྗེ་དང༌། །བློ་བཟང་གྲགས་པ་འཇམ་དཔལ་རྒྱ་མཚོ་སོགས། །ཉེ་བརྒྱུད་བྱིན་རླབས་བརྒྱུད་པའི་བླ་མ་ལ། །གསོལ་བ་འདེབས་སོ྾། །སྐྱབས་གནས་ཀུན་འདུས་རྡོ་རྗེ་རྣལ་འབྱོར་དང༌། །ཡུམ་ཆེན་ལབ་སྒྲོན་ཉིད་ལ་གསོལ་བ་འདེབས། །མི་རྟག་འཆི་བ་དྲན་པར་བྱིན་གྱིས་རློབས། །ཚེ་འདི་བློ་ཡི་ཐོངས་པར྾། །བདག་འཛིན་རྩད་ནས་ཆོད་པར་྾། །ཉམས་དང་རྟོགས་པ་འཆར་བར༌྾། །དེ་ལྟར་གསོལ་བ་བཏབ་པས་རྗེ་བཙུན་མའི། །སྐུ་ལས་བདུད་རྩིའི་རྒྱུན་བབས་རང་ཉིད་ཀྱི། །སྤྱི་གཙུག་ནས་ཞུགས་ལུས་གང་སྒྲིབ་ཀུན་དག །ཤེལ་སྒོང་ལྟར་དཀར་དབུ་མ་འདའ་སྙུག་ཙམ། །ཡར་སྣ་ཚངས་བུག་མར་སྣ་ལྟེ་འོག་ཏུ། །སོར་བཞིའི་ཚད་དུ་རང་སེམས་བྱ་སྒོང་ཙམ། །དཀར་འཚེར་འོད་ཀྱི་ཕུང་པོ་འཕར་ལ་ཁད། །བླ་མའི་ཐུགས་ཀར་འཕོ་སྙམ་འདུན་པ་བཟུང༌། །ཕཊ་ ཕཊ་ ཕཊ་ ཕཊ། དྲག་ཏུ་བརྗོད་པས་སྤྱི་བོར་རྒྱངས་ཏེ་ཐོན། །རྗེ་བཙུན་རྣལ་འབྱོར་མ་ཡི་ཐུགས་ཀར་ཐིམ། །རང་ལུས་རྙིང་པ་ཤིང་སྡོང་བཅད་པ་བཞིན། །ལངས་ཏེ་འགྱེལ་བས་སྟོང་གསུམ་ཁྱོན་གང་བའི། །རང་སེམས་མཁའ་འགྲོ་དམར་མོའི་གྲི་གུག་གིས། །སུམ་ཕྲག་ནས་བཟུང་རྐང་ལག་རྩེ་བར་གཤག །ཤ་ཁྲག་དམར་ཉིལ་སོང་བའི་དྭངས་མ་རྣམས། །འདོད་ཡོན་ལྔ་ལྡན་བདུད་རྩིའི་རྒྱ་མཚོར་གྱུར། །ཕཊ་རྩ་བརྒྱུད་བླ་མ་ཡི་དམ་ཞི་ཁྲོ་ལྷ། །དཔའ་བོ་དཔའ་མོ་ཆོས་སྐྱོང་སྲུང་མའི་ཚོགས། །དཀོན་མཆོག་སྲིད་ཞུའི་མགྲོན་ལ་མཆོད་པ་འབུལ། །མགོན་པོ་ཡོན་ཏན་མགྲོན་ལ་གཏང་རག་གཏོང༌། །རིགས་དྲུག་སྙིང་རྗེའི་མགྲོན་ལ་སྦྱིན་པ་གཏོང༌། །གནོད་བྱེད་ལན་ཆགས་མགྲོན་ལ་བུ་ལོན་འཇལ། །གནོད་པའི་སེམས་ཞི་ཕན་པའི་སེམས་ལྡན་ཤོག །ཕཊ་ཕཊ། རྩིགས་མ་ཤ་དང་རུས་པའི་རི་རབ་དང༌། །ཁྲག་ཆེན་རྒྱ་མཚོར་གྱུར་པས་སྟོང་གསུམ་གང༌། །རང་སེམས་མཁའ་འགྲོ་ཕྱག་གཉིས་གྲི་གུག་དང༌། །ཐོད་ཁྲག་འཛིན་པས་ཕྱོགས་བཅུར་འབོད་རྒྱངས་སྒྲོགས། །ཕཊ་ཕཊ། མཐོ་བ་སྲིད་པའི་རྩེ་མོ་མན་ཆད་དང༌། །དམའ་བ་ན་རག་དམྱལ་བ་ཡན་ཆད་ན། །གནས་པའི་སྣང་སྲིད་ལྷ་འདྲེ་ཆེ་དགུ་དང༌། །གཉན་དགུ་དྲེགས་དགུ་ཐམས་ཅད་འདིར་ཚོགས་ཤིག །ཕཊ་ལྷ་ཀླུ་བཙན་བདུད་མ་མོ་གཤིན་རྗེ་དང༌། །རྒྱལ་པོ་བསེན་མོ་དམ་སྲི་རྦད་འདྲེའི་རིགས། །གནོད་འཚེའི་སེམས་ལྡན་ཡོད་དོ་ཅོག་རྣམས་ཀུན། །མྱུར་དུ་འདིར་འཚོགས་འདིར་འདུས་འདིར་བྱོན་ཅིག །ཕཊ་སྒྱུ་མའི་ལུས་འདི་སྤྱིར་གྱིས་འགྲོ་དྲུག་དང༌། །ཡང་དགོས་ཕ་མ་རྩ་བའི་བླ་མ་ཡི། །སྐུ་ཡི་གླུད་དུ་འབུལ་ལོ་གནོད་བྱེད་ཀུན། །ཤ་ལ་དགའ་བ་རྣམས་ཀྱིས་ཤ་ཟོ་ཞིག །ཁྲག་ལ་དགའ་བ་རྣམས་ཀྱིས་ཁྲག་འཐུང་ཞིག །རུས་པ་ལ་དགའ་ལྷ་འདྲེས་རུས་པ་མུར། །དོན་སྙིང་ནང་རོལ་རྩ་རྒྱུས་ཀླད་པ་སོགས། །མ་ལུས་ལུས་པ་མེད་པར་ཟོ་ཞིག་འཐུང༌། །ཁྱེར་ཞིག་རོལ་ཅིག་སྣོམས་ཤིག་དགྱེས་པར་མཛོད། །ཕཊ་ཕཊ། པགས་པ་དུམ་བུར་གཏུབས་པ་འཇིག་རྟེན་དང༌། །འཇིག་རྟེན་ལས་འདས་མཁོ་དགུའི་ཡོ་བྱད་དུ། །གྱུར་པ་སྣང་སྲིད་ལྷ་འདྲེ་སོ་སོ་རུ། །གངས་དཀར་རྩེ་དང་རི་རབ་ནམ་མཁའི་མཐོང༌། །རྒྱ་མཚོའི་གཏིང་དང་གླིང་དང་གླིང་ཕྲན་བརྒྱད། །རང་རང་གནས་སུ་བྱ་བརྒྱ་འུར་གཅིག་གིས། །བདས་པ་བཞིན་དུ་རང་གནས་སོང་བར་གྱུར། །ཕཊ་ཕཊ། སྦྱིན་བྱ་སྦྱིན་ཡུལ་སྦྱིན་པ་གཏོང་མཁན་རྣམས། །མིང་བརྡས་བཞག་ཙམ་མ་གཏོགས་ཡུལ་སྟེང་ནས། །གྲུབ་པ་མེད་ཕྱིར་འཁོར་འདས་ཆོས་རྣམས་ཀུན། །གང་སྣང་རྨི་ལམ་ཡུལ་གྱི་སྐྱེས་བུ་བཞིན། བར་འདིར་ཤེར་སྙིང་འདོན་དོན་ལ་མཉམ་པར་བཞག ། དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་སྐོང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ཤ་འཁོན་སྡིག་སྒྲིབ་དག་གྱུར་ཅིག །འབྱུང་པོ་གང་དག་འདིར་ནི་ལྷགས་གྱུར་ཏེ། །སའམ་འོན་ཏེ་བར་སྣང་འཁོད་ཀྱང་རུང༌། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང༌། །ཉིན་དང་མཚན་དུ་ཆོས་ལ་སྤྱོད་པར་ཤོག །ཅེས་སོགས་བསྔོ་སྨོན་གྱིས་རྒྱས་འདེབས་པར་བྱའོ། །ཅེས་པ་འདི་ནི་ཤཱཀྱའི་དགེ་སློང་ྋའཇམ་དབྱངས་བཞད་པའི་རྡོ་རྗེས་བཀྲ་ཤིས་འཁྱིལ་ནས་སྦྱར་བའོ།། །།ཤུབྷཾ།།