 སྔ་འགྱུར་བཀའ་མའི་ཆོས་སྡེའི་གླེགས་བམ་དང་པོ།གླེགས་བམ། ཀ༽སློབ་དཔོན་ཆེན་པོ་དྲི་མེད་བཤེས་གཉེན། དཔལ་གྱི་སེང་གེ ལོ་ཆེན་དྷཱརྨ་ཤྲཱི། ཡེ་ཤེས་རྡོ་རྗེ། སློབ་དཔོན་དཔའ་བོ། འབྲི་གུང་སྐྱོབ་པ་འཇིག་རྟེན་གསུམ་མགོན། འཕགས་པ་ཀླུ་སྒྲུབ། འཇམ་དབྱངས་མཁྱེན་བརྩེའི་དབང་པོ། མི་ཕམ་འཇམ་དབྱངས་རྣམ་རྒྱལ། ཀུན་མཁྱེན་ལྔ་པ་ཆེན་པོ། སློབ་དཔོན་པུཎྱེ་ཤྲཱི། འགྱུར་མེད་རྡོ་རྗེ། འཇིགས་བྲལ་ཡེ་ཤེས་རྡོ་རྗེ། རྒྱལ་སྲས་ཆེན་པོ་ཞི་བ་ལྷ། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ། རིག་འཛིན་གཏེར་བདག་གླིང་པ།སི་ཁྲོན་མི་རིགས་དཔེ་བསྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། མགོ་བརྗོད།རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར། ཐུགས་རྗེ་ཆེ་ཞུ།ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས། སྐྱབས་འགྲོ་ཡན་ལག་དྲུག་པ། སློབ་དཔོན་ཆེན་པོ་དྲི་མེད་བཤེས་གཉེན།ཥ ཌཱ ངྒ ཤ ར ཎ མྣཱ མ བི ཧ ར ཏི སྨ། ། སྐྱབས་འགྲོ་ཡན་ལག་དྲུག་པ་དང་བདུན་ཅུ་པའི་ཆོས་ཀྱི་བདག་པོ་རྣམས་ལ་གསོལ་འདེབས་བརྒྱུད་ལྡན་བླ་མའི་བྱིན་རླབས་དཔལ་སྟེར། དཔལ་གྱི་སེང་གེསྐྱབས་འགྲོ་ཡན་ལག་དྲུག་པ་དང་བདུན་ཅུ་པའི་ཆོས་ཀྱི་བདག་པོ་རྣམས་ལ་གསོལ་འདེབས་བརྒྱུད་ལྡན་བླ་མའི་བྱིན་རླབས་དཔལ་སྟེར་ཞེས་བྱ་བ་བཞུགས་སོ། །ན་མོ་གུ་ར་ཝེ། བསྐལ་པ་བཟང་པོར་ལུང་རྟོགས་ཆོས་འཁོར་ཆེས། །སྲིད་གསུམ་ཞི་བར་འདྲེན་མཛད་བཞི་པ་རུ། །མངོན་བསྒྱུར་བསྟན་པའི་བདག་པོ་ཤཱཀྱའི་རྒྱལ། །དེ་སྲས་སྤྱན་རས་གཟིགས་དབང་འཕགས་ཡུལ་གྱི། །པཎ་ཆེན་ཟླ་བྲལ་བི་མ་མི་ཏྲའི་ཞབས། །ལོ་ཆེན་ཛྙཱ་ན་ཀུ་མཱར་གསོལ་བ་འདེབས། །གང་གི་ཐུགས་སྲས་ཚོགས་ལས་རྣམ་གསུམ་ལུགས། །ཨ་རོ་ལས་བརྒྱུད་ཁམས་ལུགས་ཞེས་གྲགས་དང་། །མཆོག་རབ་གཞོན་ནུ་ལས་བརྒྱུད་ཉང་ལུགས་དང་། །སོག་པོ་དཔལ་ཡེ་ལས་བརྒྱུད་རོང་ལུགས་ཏེ། །དེ་ལས་གནུབས་དང་ཟུར་ཆེན་ཤཱཀྱ་འབྱུང་། །ཟུར་ཆུང་ཤེས་རབ་གྲགས་ལ་གསོལ་བ་འདེབས། །ཀ་བ་བཞི་དང་གསང་བདག་སྒྲོ་ཕུག་པ། །གང་གི་སློབ་བུ་གདུགས་ཐོགས་སྟོང་གི་ནང་། ཐུགས་ཟིན་སློབ་མ་བཅུ་གཉིས་སོགས་བརྒྱུད་དང་། །གཞན་ཡང་ཀུན་མཁྱེན་རོང་ཟོམ་ལས་བརྒྱུད་པའི། །ཆུ་བོ་ཀུན་འདུས་གྲུབ་ཆེན་ཐང་སྟོང་རྒྱལ། །འགོས་ལོ་གཞོན་ནུ་དཔལ་ལ་གསོལ་བ་འདེབས། །ཡབ་རྗེ་འཇམ་དབྱངས་རིན་ཆེན་རྒྱལ་མཚན་ཞབས། །མངའ་རིས་པཎ་ཆེན་རིན་ཆེན་ཕུན་ཚོགས་དང་། །རྩེ་ལེ་རིག་འཛིན་སྣ་ཚོགས་རང་གྲོལ་སོགས། །གཞན་ཕན་མཐའ་ཡས་བར་དུ་བརྒྱུད་གྱུར་པ། །སྐྱབས་འགྲོ་ཡན་ལག་དྲུག་པའི་བརྒྱུད་རིམ་དུ། །ལེགས་བཞུགས་དམ་པ་རྣམས་ལ་གསོལ་བ་འདེབས། །གཞན་ཡང་སྐྱབས་འགྲོ་བདུན་ཅུའི་བརྒྱུད་པའི་རིམ། །བསྟན་པའི་བདག་པོ་ཉིད་ལས་འཇམ་དཔལ་དབྱངས། །འཕགས་པ་ཀླུ་སྒྲུབ་སློབ་དཔོན་ཟླ་བ་གྲགས། །རིག་པའི་ཁུ་བྱུག་ཀུ་སཱ་ལ་ཆེ་ཆུང་། །ཨ་ཏི་ཤ་དང་ཐང་ཛ་ཨ་བྷྱ་ཀར། །ཟླ་རྒྱལ་གྲོ་ལུང་པ་ལ་གསོལ་བ་འདེབས། །བྱང་ཆུབ་འོད་རྨ་ཤཱཀྱ་སེངྒེ་དང་། །ནམ་མཁའ་གྲགས་དང་སྨོན་ཚུལ་བྱང་ཆུབ་གྲུབ། །གཞོན་ནུ་རྡོ་རྗེ་ཀུན་མཁྱེན་ཆོས་རྗེའི་ཞབས། །ཁྱབ་གདལ་ལྷུན་གྲུབ་བདེ་ལེགས་རྒྱ་མཚོ་དང་། །བྱ་བྲལ་ཆོས་རྗེ་འཇམ་དབྱངས་གྲགས་པ་འོད། །སངས་རྒྱས་དབོན་པོ་རྣམས་ལ་གསོལ་བ་འདེབས། །ལྡན་སྒོམ་ཆོས་གྲགས་ཤེས་རབ་རྒྱ་མཚོ་དང་། །ཐུགས་སྲས་ཟླ་གྲགས་སོགས་ལ་རྙིང་བརྒྱུད་དང་། །རང་བྱུང་རྡོ་རྗེ་ཉིད་ལས་བརྒྱུད་པ་དང་། མཁས་པ་བུ་སྟོན་ཉིད་ལས་ལེགས་བརྒྱུད་པ། །ཀུན་འདུས་རྒྱལ་སྲས་གཞན་ཕན་མཐའ་ཡས་དང་། །པདྨ་བཛྲ་ཞབས་ལ་གསོལ་བ་འདེབས། །སྐྱབས་འགྲོ་སྤྱི་ཡི་བཤད་བརྒྱུད་ཀུན་དང་ལྡན། །སློབ་དཔོན་གཉིས་ཀྱི་གཞུང་མཆོག་ལུང་གི་རྒྱུན། །ཟམ་མ་ཆད་པར་རྙེད ཅིང་རྣམ་བཤད་ལ། །བྱིན་རླབས་སྤོབས་ཐོབ་དཔལ་གྱི་སེངྒེར་བཅས། །གསོལ་བཏབ་དབང་གིས་ཆོས་མཆོག་སྐྱབས་འགྲོ་ལ། །བཤད་ཉན་སྒོམ་སྒྲུབ་ཕུན་སུམ་ཚོགས་འཕེལ་ཤོག །སྐྱབས་འགྲོའི་དངོས་དང་བརྒྱུད་པའི་ཉེར་ལེན་ཅན། །བརྡར་བཏགས་ཆོས་ཉིད་དག་ལས་འཐོབ་པ་ཡི། །སྐྱབས་འགྲོའི་ལམ་གྱིས་ཚོགས་གཉིས་མཐར་ཕྱིན་ཏེ། །འབྲས་བུའི་སྐྱབས་གནས་རྫོགས་སངས་རྒྱས་འཐོབ་ཤོག །ཅེས་པ་འདིའང་དཔལ་གྱི་སེངྒེས་སྦྱར་བའོ།། །། སྐྱབས་འགྲོ་ཡན་ལག་དྲུག་པའི་ཕྱག་ཡུལ་དང་སྐྱབས་གནས་གསལ་འདེབས། དཔལ་གྱི་སེང་གེསྐྱབས་འགྲོ་ཡན་ལག་དྲུག་པའི་ཕྱག་ཡུལ་དང་སྐྱབས་གནས་གསལ་འདེབས་བཞུགས་སོ། །ཨེ་མ་ཧོཿ རང་གནས་འོག་མིན་དག་པའི་ཞིང་མཆོག་ལྔ་ལྡན་ཡེ་ཤེས་རྩལ་སྣང་ལས་གྲུབ་རཏྣའི་ས་གཞི་ཡངས་པའི་དབུས། །དཔག་བསམ་ལྗོན་ཤིང་ཡལ་ག་ལྔ་ལྡན་ལོ་འདབ་མེ་ཏོག་འབྲས་བུའི་མཛེས་འཛུམ་མཁའ་དབྱིངས་རྒྱ་ཆེའི་རྒྱན་གྱུར་པའི། །དབུས་ཀྱི་ཡལ་སྟེང་སེངྒེས་བཏེགས་པའི་རིན་ཆེན་ཁྲི་ཁར་སྣ་ཚོགས་པདྨ་འདབ་སྟོང་གཡོ་བར་ཉི་ཟླའི་སྟེང་། །བདེ་གཤེགས་ཀུན་འདུས་མཚོ་སྐྱེས་རྡོ་རྗེ་དཀར་དམར་མདངས་འཕྲོ་རྡོ་རྗེ་ཐོད་འཛིན་ཐེག་གསུམ་རྟགས་རྫོགས་སྐྱིལ་ཀྲུང་བཞུགས། །དེ་གཙུག་ནམ་མཁར་བི་མ་མི་ཏྲ་ལྗང་སེར་སྐྱིལ་ཀྲུང་མཉམ་བཞག་ཐོད་འཛིན་རབ་བྱུང་ཆས་རྫོགས་པཎ་ཞྭ་གསོལ། །དེ་གཙུག་མཁའ་དབུས་ཛྙཱ་ན་སཱུ་ཏྲ་དཀར་དམར་སྐྱིལ་ཀྲུང་མཉམ་བཞག་སྟེང་གླེགས་བམ་རབ་བྱུང་ཆས་རྫོགས་པཎ་ཞྭ་གསོལ། །དེ་གཙུག་མཁའ་ཀློང་ཤྲཱི་སེང་དམར་སྨུག་ཧེ་རུ་ཀ་པའི་ཆས་རོལ་ཕྱག་གཡས་སྡིགས་མཛུབ་མཁར་གཏད་གཡོན་ཐོད་འཛིན། །དེ་གཙུག་དག་མཁར་འཇམ་དཔལ་བཤེས་གཉེན་དམར་གསལ་ཧེ་རུ་ཀ་པའི་ཆས་རོལ་ཕྱག་གཡས་ཌཱ་རུ་གཡོན་ཐོད་འཛིན། །དེ་གཙུག་དྭངས་མཁར་དགའ་རབ་རྡོ་རྗེ་དཀར་གསལ་སྐྱིལ་ཀྲུང་རྡོར་དྲིལ་བསྣོལ་ཐབས་རབ་བྱུང་ཆས་རྫོགས་མཚན་དཔེས་སྤྲས། །དེ་གཙུག་མཁའ་དབྱིངས་རྡོར་སེམས་ཡབ་ཡུམ་དཀར་མཛེས་སྐྱིལ་ཀྲུང་རྡོར་དྲིལ་འཛིན་སྦྱོར་ལོངས་སྤྱོད་རྫོགས་པའི་རྒྱན་ཆས་བརྒྱན། །དེ་གཙུག་དབྱིངས་སུ་ཀུན་བཟང་ཡབ་མཐིང་ཡུམ་མཆོག་མཐིང་སྐྱ་གཅེར་བུ་མཉམ་བཞག་སྐྱིལ་ཀྲུང་འཁྲིལ་སྦྱོར་མཚན་དཔེ་འབར། ༈ །འཁོར་ལོའི་དབང་ཕྱུག་བླ་མ་དེ་ཀུན་གྱི། །མཚན་དཔེའི་སྐུ་ཡི་འོད་ལྔས་མཁའ་ཁྱབ་ཀློང་། །འཕགས་ཡུལ་རྒྱན་མཆོག་པཎ་གྲུབ་ཐམས་ཅད་དང་། །བོད་ཀྱི་གསར་རྙིང་བཀའ་བརྒྱུད་བླ་མའི་ཚོགས། །བྱིན་རླབས་ཐུགས་རྗེའི་གཟི་བྱིན་ལྡན་པར་བསྒོམ། ༈ །མདུན་གྱི་ཡལ་སྟེང་སེང་ཁྲི་པད་ཟླའི་གདན་ལ་སྟོན་པ་ཤཱཀྱ་སེངྒེ་གསེར་མདོག་མཚན་བཟང་དཔེ་བྱད་འབར། །མཐའ་བསྐོར་ཕྱོགས་བཅུ་དུས་བཞིའི་སངས་རྒྱས་དཀོན་མཆོག་ཇི་སྙེད་སྤྲིན་ཕུང་འཁྲིགས་ལྟར་ལྷང་ངེ་ལྷམ་མེ་ལྷན་ནེར་བཞུགས། །གཡས་ཀྱི་ཡལ་སྟེང་པད་ཟླའི་གདན་ལ་ཉེ་སྲས་ཆེན་པོ་བརྒྱད་སོགས་ཆོས་ཀྱི་སྤྲིན་མཐར་གནས་པའི་སེམས་དཔའ་ལ། །བྱང་སེམས་འཕགས་ཚོགས་མ་ལུས་ཀྱིས་བསྐོར་ཀུན་ཀྱང་ལོངས་སྤྱོད་རྫོགས་པའི་རྒྱན་ཆས་སྤྲས་ཤིང་བཞེངས་པའི་སྟབས་ཀྱིས་བཞུགས། །གཡོན་གྱི་ཡལ་སྟེང་ཉན་ཐོས་ཆེན་པོ་མཆོག་བརྒྱད་ལ་སོགས་ཉན་རང་དགྲ་བཅོམ་རྣམས་ཀྱིས་གཙོར་བྱས་མཐའ་བསྐོར་དུ། །ཐེག་དམན་སློབ་པའི་འཕགས་ཚོགས་བཞུགས་པ་ཀུན་ཀྱང་མཁར་བསིལ་ལྷུང་བཟེད་བསྣམས་ཤིང་རབ་ཏུ་བྱུང་བའི་ཆས་ཀྱིས་སྤྲས། །རྒྱབ་ཀྱི་ཡལ་སྟེང་པད་ཉི་ཟླ་བར་རྟོགས་པའི་རྣམ་རོལ་ཡུམ་ཆེན་གསེར་མདངས་ལོངས་སྤྱོད་ཆས་རྫོགས་བཞུགས་པའི་སྐུའི། །གཡས་གཡོན་སྟེང་དུ་འོད་ལྔའི་དྲྭ་མིག་འཁྱིལ་ཀློང་ལུང་གི་བདག་ཉིད་གླེགས་བམ་རྣམ་པས་ཆོས་སྒྲ་སྒྲོགས་པར་གསལ། ༈ །ཕྱོགས་ཀྱི་བར་མཚམས་བཞི་པོ་ཐམས་ཅད་ནི། །ཡེ་ཤེས་ལས་གྲུབ་རྡོ་རྗེའི་དམ་ཚིག་ཅན། །བསྟན་སྲུང་རྒྱ་མཚོའི་སྤྲིན་ལྟར་གཏམས་པ་ཡིས། །བྱང་ཆུབ་སྒྲུབ་པའི་གེགས་རྣམས་བསལ་བར་མཛད། །སྐྱབས་གནས་ཀུན་གྱིས་བདག་སོགས་སེམས་ཅན་ལ། །ཐུགས་ཀྱིས་དགོངས་ཤིང་ཞལ་གྱིས་རབ་ཏུ་ཕྱོགས། །སྤྱན་རས་གཟིགས་ཏེ་བྱང་ཆུབ་ལ་འགོད་ཕྱིར། །འདྲེན་པའི་དེད་དཔོན་ཆེན་པོར་བཞུགས་པར་བསྒོམ། །ཕ་མ་དགྲ་བགེགས་གཉིས་ཀྱིས་གཙོར་བྱས་པའི། །བདག་སོགས་མ་གྱུར་མཁའ་མཉམ་སེམས་ཅན་ཀུན། །ཁྱེད་ཤེས་དད་པས་སྒོ་གསུམ་གུས་བཏུད་དེ། །དད་མོས་དྲག་པོས་ཕྱག་འཚལ་སྐྱབས་སུ་མཆི། །ཞེས་པ་འདི་ཡང་དཔལ་གྱི་སེངྒེས་སྦྱར་བའོ།། །། སྐྱབས་འགྲོའི་ལུང་སྦྱོར་ཟླ་བའི་ཕྲེང་མཛེས། དཔལ་གྱི་སེང་གེསྐྱབས་འགྲོའི་ལུང་སྦྱོར་ཟླ་བའི་ཕྲེང་མཛེས་ཞེས་བྱ་བ་བཞུགས་སོ། །སྐྱབས་འགྲོ་ཡན་ལག་དྲུག་པའི་ལང་ཚོ་རྒྱས་བྱེད་ཟླ་བའི་ཕྲེང་མཛེས་ཞེས་བྱ་བ། ན་མོ་ཤྲཱི་གུ་རུ་རཏྣ་ཏྲ་ཡཱ་ཡ། པཎ་ཆེན་བི་མའི་མཁྱེན་སྤོབས་ལྷའི་ལམ་དུ། །རབ་གནས་སྨྲ་དབང་ཟླ་བྲལ་འདེགས་རླུང་གཞིར། །ཡན་ལག་རྨད་བྱུང་སྐྱབས་འགྲོའི་མཚོ་འཁྱིལ་བ། །མཆོག་གསུམ་ཡིད་བཞིན་སྤྲིན་ཚོགས་འཕྲོ་ལ་འདུད། །འདིར་གཏན་ལ་དབབ་པར་བྱ་བའི་ཆོས་མཆོག་སྐྱབས་འགྲོ་ཡན་ལག་དྲུག་པ་བརྩམ་པར་དམ་བཅའ་བའི་སྐབས་སུ། སྐྱབས་འགྲོའི་ངོ་བོ་འདོད་པའི་དད་པ་དང་མོས་པ་གཉིས་ཡིན་ཏེ། །ཟླ་བ་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་བའི་སྲས་ཀྱི་སྤྱོད་ལ་དད་བྱེད་ལ། །བྱང་ཆུབ་བླ་ན་མེད་ལ་དད་གྱུར་ན། །སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། །ཞེས་དང་། མདོ་རྒྱན་ལས། འདིར་ནི་དེ་དངོས་འདོད་པས་ཁས་ལེན། ཞེས་དང་། སློབ་དཔོན་ཟླ་བ་གྲགས་པའི་སྐྱབས་འགྲོ་བདུན་ཅུ་པ་ལས། ཐུབ་དབང་གི་ནི་སྐུ་གསུམ་དང་། །མྱ་ངན་འདས་དང་གང་ཟག་བརྒྱད། །སྡོམ་བརྩོན་བཅས་ལ་མོས་པ་ཡིས། །གང་ཞིག་གསུམ་ལ་སྐྱབས་འགྲོ་བ། །ཞེས་གསུངས་སོ། །ངེས་ཚིག་ནི། ས་ར་ཎཾ་ཞེས་པ་སྐྱབས་སམ་དཔུང་གཉེན་ནམ་རྟེན་དུ་བྱེད་པ་ལ་འཇུག་གོ། །མཚན་ཉིད་ལ་སྤྱིའི་མཚན་ཉིད་ནི། འཇིགས་པ་སྤང་བའི་དོན་དུ་སྐྱབས་གནས་ལ་བརྟེན་པར་དམ་བཅའ་བའོ། །བྱེ་བྲག་ཐེག་ཆེན་སྐྱབས་འགྲོའི་མཚན་ཉིད་ནི། །སེམས་ཅན་ཐམས་ཅད་ཀྱི་དོན་དུ་རང་ཉིད་སངས་རྒྱས་ཐོབ་པར་འདོད་པའི་བློས་གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་སྟོན་པ་ལམ་གྲོགས་སུ་ཁས་ལེན་པའོ། །དབྱེ་བ་ནི། རྒྱུ་དང་འབྲས་བུས་ཕྱེ་བ་བརྡར་བཏགས་པ་ཀུན་རྫོབ་སྐྱབས་འགྲོ་དང་། རང་བཞིན་ཆོས་ཉིད་ཀྱི་ཐོབ་པ་དོན་དམ་སྐྱབས་འགྲོ་གཉིས་ཡིན་ཏེ། མདོ་རྒྱན་ལས། བརྡར་བཏགས་ཆོས་ཉིད་ཐོབ་པ་བློ་ལྡན་རྣམས་ཀྱི་སྐྱབས་འགྲོ་འདི་མཆོག་ཡིན། །ཞེས་སོ། །རྒྱུ་ཅིས་སྐྱབས་སུ་འགྲོ་དགོས་པའི་སྐབས་སུ། བརྒྱུད་པའི་ཉེར་ལེན་བདེ་གཤེགས་སྙིང་པོ་ཡིན་ཏེ། རྒྱུད་བླ་མ་ལས། དྲི་བཅས་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛད། །གང་ལས་དཀོན་མཆོག་དགེ་བ་གསུམ་འབྱུང་བ། །དོན་དམ་གཟིགས་པ་རྣམས་ཀྱི་ཡུལ་ཉིད་དོ། །དཀོན་མཆོག་གསུམ་པོ་འདི་ཡི་རིགས། །ཐམས་ཅད་གཟིགས་པ་རྣམས་ཀྱི་ཡུལ། །དེ་ཡང་རྣམ་བཞི་གོ་རིམ་བཞིན། །རྒྱུ་བཞི་ཡིས་ནི་བསམ་མི་ཁྱབ། །དག་དང་ཉོན་མོངས་དང་ལྡན་ཕྱིར། །ཀུན་ནས་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོག་ཕྱིར། །རྟོགས་བྱ་རྟོགས་པ་དེ་ཡི་ནི། །ཡན་ལག་རྟོགས་པར་བྱེད་ཕྱིར་ཏེ། །གོ་རིམ་ཇི་བཞིན་གནས་གཅིག་དེ། །དག་རྒྱུ་གསུམ་ནི་རྐྱེན་ཡིན་ནོ། །རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་སོ། །དངོས་ཀྱི་ཉེར་ལེན་དད་མོས་སྤྱི་ལ་གནས་པ་ཡིན་ཏེ། མདོ་རྒྱན་ལས། །སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་སོ། །ཐུན་མོང་མ་ཡིན་པའི་ལྷན་ཅིག་བྱེད་རྐྱེན་འཇིགས་པ་དྲན་པ་ལས། འདུས་བྱས་འཁོར་བའི་འཇིགས་པ་དྲན་པ་ལ་གསུམ་སྟེ། རྒྱུ་ཉོན་མོངས་ཅན་གྱི་མ་རིག་པ་བརྟེན་པར་བཅས་པའི་འཇིག་པ་དྲན་པ་ནི། སྐྱབས་འགྲོ་བདུན་ཅུ་པ་ལས། མ་རིག་ཉོན་མོངས་ཅན་བྱས་རྟོག །རང་གི་ངོ་བོ་སྒྲོ་བཏགས་འདོད། །བྱིས་པ་རྣམས་ཀྱི་འཁོར་བའི་རྒྱུ། །དེ་རྟོག་གྱུར་པ་ལོག་ཤེས་ཡིན། །ཞེས་སོ། །འདི་མན་གྱི་ཚིགས་སུ་བཅད་པ་ཁུང་མ་སྨོས་པ་ཐམས་ཅད་སྐྱབས་འགྲོ་བདུན་ཅུ་པ་ཡིན་པར་ཤེས་པར་བྱའོ། །ངོ་བོ་བསླུ་ཞིང་མི་རྟག་པའི་འཇིགས་པ་དྲན་པ་ནི། ཐོག་མཐའ་མེད་པའི་སྲིད་པ་རུ། །མ་རིག་གཉིད་ཀྱིས་ལོག་པ་ཡིས། །འགྲོ་ལ་གང་གང་སྣང་བ་དེ། །བརྫུས་ཏེ་རྨི་ལམ་ལྟ་བུར་འདོད། །ཅེས་སོ། །འབྲས་བུ་སྡུག་བསྔལ་དུ་གྱུར་པའི་འཇིགས་པ་དྲན་པ་ནི། སློབ་དཔོན་འཕགས་པ་ལྷས། མི་རྟག་པ་ལ་ངེས་པར་གནོད། །གང་ལ་གནོད་ཡོད་དེ་བདེ་མིན། །དེའི་ཕྱིར་གང་ཞིག་མི་རྟག་པ། །དེ་དག་ཐམས་ཅད་སྡུག་བསྔལ་འགྱུར། །ཞེས་སོ། །འདུས་མ་བྱས་མྱང་འདས་འཇིགས་པ་དྲན་པ་ལའང་གསུམ་སྟེ། རྒྱུ་གང་ཟག་གི་བདག་མེད་དང་ཉོན་མོངས་སྤོང་ཐབས་ཙམ་གྱི་ཆོས་ཀྱི་བདག་མེད་ལ་བརྟེན་ཅིང་སྙིང་རྗེ་ཆེན་པོ་བྲལ་བ་རང་དོན་ཡིད་བྱེད་དང་བཅས་པའི་འཇིགས་པ་དྲན་པ་ནི། དེ་འདིར་ཐར་པའི་ཆ་ནས་ནི། །བརྩམས་ཏེ་རྟག་ཏུ་དགེ་བ་ལ། །ཉན་ཐོས་ཉིད་ཕྱིར་འབད་ན་ནི། །རིམ་གྱིས་ཉན་ཐོས་ཉིད་དུ་འགྱུར། །གང་ཞིག་རང་བྱུང་ཡེ་ཤེས་འདོད། །རང་རྒྱལ་བྱང་ཆུབ་དོན་གཉེར་བ། །རྩོམ་པ་དེ་ཡང་རང་རྒྱལ་གྱི། །བྱང་ཆུབ་ཁོ་ན་ངེས་འཐོབ་བོ། །རང་དོན་ལ་གཞོལ་འདི་དག་ནི། །སྙིང་རྗེ་ཆེན་པོ་དང་བྲལ་བས། །རང་རྒྱལ་རྒྱལ་བའི་གསུང་ལས་སྐྱེས། །ཐེག་པ་ཆེན་པོར་མི་བསྔགས་སོ། །ཞེས་སོ། །ངོ་བོ་ཉེས་དམིགས་ལྔ་དང་ལྡན་པའི་འཇིགས་པ་དྲན་པ་ལ་ལྔ་སྟེ། སངས་རྒྱས་བྱང་སེམས་ཀྱི་ཁྱད་ཆོས་མེད་པའི་ཉེས་པ་ནི། རྒྱལ་བའི་ཡོན་ཏན་མཐའ་ཡས་པ། །ཐེག་པ་ཆེ་ལས་གསུངས་པ་དང་། །བྱང་ཆུབ་སེམས་དཔའི་མཐུ་ཐོས་ནས། །དེ་ནི་སྣོད་ཉིད་འགྱུར་བ་ཡིན། །ཞེས་སོ། །གཞན་དོན་མེད་པའི་ཉེས་པ་ནི། དེས་ནི་ཐེག་པ་ཆེན་པོའི་ཤིང་། །མ་ལུས་རང་གིས་ལམ་གྱིས་བསྲེགས། །བྱང་ཆུབ་སེམས་དཔའ་ནང་དུ་ནི། །སྐྱེས་བུ་དབུལ་པོ་ལྟ་བུར་གནས། །ཞེས་སོ། །རང་སྡུག་བསྔལ་ལ་སྐྲག་པས་སྲིད་པ་སྤང་བའི་ཉེས་པ་ནི། འདི་དག་སྲིད་པས་སྐྲག་པ་ཡི། །ཡིད་ཀྱིས་བྱང་ཆུབ་གཉིས་ཐོབ་པ། །ཞེས་སོ། །འཇིགས་སྲེད་དང་བཅས་པའི་ཉེས་པ་ནི། ཚེ་ཟད་པར་ནི་དགར་འགྱུར་ཞིང་། །ཞེས་སོ། །དམིགས་པ་དང་བཅས་པས་མཐར་ཐུག་གི་མྱང་འདས་མེད་པའི་ཉེས་པ་ནི། མྱ་ངན་འདས་ཐོབ་འདུ་ཤེས་ཅན། །དེ་ལ་མྱ་ངན་འདས་ཡོད་མིན། །ཞེས་སོ། །འབྲས་བུ་ཉོན་མོངས་ཅན་མ་ཡིན་པའི་མ་རིག་པ་ལྡན་པས་རྣམ་མཁྱེན་སྤང་ཞིང་ཆད་པའི་མྱང་འདས་ལ་གནས་པའི་འཇིགས་པ་དྲན་པ་ནི། མ་རིག་ཉོན་མོངས་མེད་ཡོད་པས། །རྣམ་པ་ཀུན་མཁྱེན་སྤངས་པ་ཉིད། །སློབ་མ་རང་སངས་རྒྱས་དག་གི། །བྱང་ཆུབ་དངོས་པོ་མེད་པ་ཡིན། །ཞེས་སོ། །འཇིགས་པ་ལ་བརྟེན་ནས་སྙིང་རྗེ་ཆེན་པོ་བསྐྱེད་པ་ལ། རྒྱུ་མཚན་ནི་མདོ་རྒྱན་ལས། དེ་ཡང་སྙིང་བརྩེ་ལས་རིག་བྱ། །ཞེས་སོ། །སྙིང་རྗེ་ཆེན་པོ་བསྐྱེད་པའི་ཡུལ་སེམས་ཅན་ཐམས་ཅད་མ་ངེས་པར་ཡིན་པ་ལ་ཡིན་པར་ཤེས་པ་ནི། སློབ་དཔོན་འཕགས་པ་ཀླུ་སྒྲུབ་ཀྱིས། གང་གིས་མངལ་དུ་ལན་གཅིག་མིན་པར་བདག །མ་གནས་པའམ་བདག་ལ་གང་མ་གནས། །སེམས་ཅན་དེ་ནི་འདི་ན་འགའ་ཡང་མེད། །དེའི་ཕྱིར་ཐམས་ཅད་གཉེན་དུ་གྱུར་པ་ཡིན། །ཞེས་སོ། །སྙིང་རྗེ་ཆེན་པོ་སྐྱེད་ཚུལ་ནི་ཚད་མེད་བཞི་སྟེ། དེ་ཡང་མདོ་རྒྱན་ལས། སེམས་ཅན་རྣམས་ལ་བརྩེ་བ་ཅན། །ཕྲད་དང་བྲལ་བའི་དགོངས་པ་ཅན། །མི་འབྲལ་བ་ཡི་དགོངས་པ་ཅན། །ཕན་བདེའི་དགོངས་ཁྱོད་ལ་ཕྱག་འཚལ། །ཞེས་སོ། །ཐུན་མོང་གི་ལྷན་ཅིག་བྱེད་རྐྱེན་ཡོན་ཏན་དྲན་པ་ལ་གཉིས་ཏེ། དཀོན་མཆོག་གསུམ་སོ་སོའི་ཡོན་ཏན་བཀའ་ལྟར་དྲན་པ་ནི། དཀོན་མཆོག་རྗེས་སུ་དྲན་པའི་མདོ་ལྟར་རོ། །དཀོན་མཆོག་གསུམ་ཐུན་མོང་གི་ཡོན་ཏན་བསྟན་བཅོས་ལྟར་དྲན་པ་ནི། ཡོན་ཏན་དམ་པ་རེ་རེ་ཞིང་། །བསམ་ཡས་དེ་ནི་མཁའ་དང་མཉམ། །བྱང་ཆུབ་སེམས་ལ་རྟག་ཕྱག་འཚལ། །བློ་ལྡན་བྱང་ཆུབ་ལ་སྐྱབས་མཆི། །ཞེས་སོ། །གང་ལ་སྐྱབས་སུ་འགྲོ་བའི་ཡུལ་གྱི་སྐབས་སུ། ཡུལ་དཀོན་མཆོག་གི་ངོ་བོ་ནི། དམ་པའི་ཆོས་དང་འཕགས་པའི་གང་ཟག་གོ། །ངེས་ཚིག་ནི། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཉིད་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །མཚན་ཉིད་ནི། ཐར་འདོད་རྣམས་ཀྱི་སྐྱབས་བླ་ན་མེད་པར་གནས་པ་ཡིན་ཏེ། སངས་རྒྱས་དེ་ཆོས་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་སོ། །དབྱེ་བ་ནི། སྤྱོད་འཇུག་ལས། དུས་གསུམ་གཤེགས་པའི་སངས་རྒྱས་དང་། །ཆོས་དང་ཚོགས་ཀྱི་མཆོག་བཅས་ལ། །ཞེས་སོ། །དབྱེ་བའི་གྲངས་ངེས་ནི། རྒྱུད་བླ་མ་ལས། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་སོ། །གོ་རིམ་ངེས་པ་ནི། དེ་ཉིད་ལས། སངས་རྒྱས་ལས་ཆོས་ཆོས་ལས་འཕགས་པའི་ཚོགས། །ཞེས་སོ། །དབྱེ་བ་སོ་སོ་ནས་རྒྱས་པར་བཤད་པ་ལ། སངས་རྒྱས་དཀོན་མཆོག་གི་ངོ་བོ་ནི། རང་ཉིད་སྤང་རྟོགས་མཐར་ཕྱིན་ནས་གཞན་སྤངས་རྟོགས་ལ་འགོད་པའི་འཕགས་པ་སྟེ། མ་རིག་གཉིད་ནི་རྒྱུན་ཆད་ཅིང་། །ཡང་དག་ཡེ་ཤེས་ངེས་བྱུང་བས། །གང་ཞིག་རྣམས་སད་དེ་སངས་རྒྱས། །སྐྱེས་བུ་གཉིད་སད་ཅི་བཞིན་ནོ། །ཡེ་ཤེས་བླ་ན་མེད་པ་ཡིས། །ཡང་དག་དེ་ཉིད་ཐུགས་ཆུད་པའམ། །ཞི་བ་ཉིད་ཀྱིས་རྟོགས་སངས་རྒྱས། །དེ་བས་སངས་རྒྱས་སངས་རྒྱས་འདོད། །ཅེས་དང་། ཡང་དག་དེ་ཉིད་སྟོན་མཛད་ཅིང་། །མི་མཁས་སེམས་ཅན་རྟོགས་མཛད་པས། །དེས་ཀྱང་སངས་རྒྱས་སངས་རྒྱས་དང་། །དེ་ཡང་སངས་རྒྱས་དང་མཚུངས་འདོད། །ཅེས་སོ། །ངེས་ཚིག་ནི། དུས་གསུམ་ལམ་ལས་ངེས་གྲོལ་ཞིང་། །མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ནི་བློ་རྒྱས་ཕྱིར། །སངས་རྒྱས་པདྨ་ལྟར་རྣམ་རྒྱས། །ཞེས་སོ། །མཚན་ཉིད་ནི། རྒྱུད་བླ་མ་ལས། །འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་སོ། །དབྱེ་བ་ལ་མདོར་བསྟན་པ་ནི། རྣམ་པར་མི་རྟོག་པའི་ཡེ་ཤེས་ཆོས་སྐུ། །མཚན་དཔེའི་གཟུགས་བླ་ན་མེད་པ་མངའ་བ་ལོངས་སྐུ། འཇིག་རྟེན་གསུམ་གྱི་འགྲོ་བ་ཐམས་ཅད་ཀྱི་སྟོན་པར་གྱུར་པ་སྤྲུལ་སྐུ་སྟེ། སངས་རྒྱས་རྟོག་པ་མི་མངའ་བའི། །གཟུགས་ཀྱི་སྐུ་ཡི་ཡང་དག་འབྱུང་། །སྤྲུལ་པའི་སྐུ་ནི་ས་སྟེང་དུའང་། །ཡང་དག་བྱང་ཆུབ་སྟོན་པར་མཛད། །ཐུབ་དབང་རྣམས་ཀྱི་སྐུ་གསུམ་སྟེ། །ཆོས་དང་ལོངས་སྤྱོད་རྫོགས་སྤྲུལ་པ། །མདོར་བསྡུས་ནས་ནི་བཤད་པ་འདི། །གུས་པས་བློ་ལ་བཞག་པ་བགྱི། །ཞེས་སོ། །རྒྱས་པར་བཤད་པ་ལ་གསུམ་སྟེ། རྟེན་སྐུ་གསུམ་དང་། བརྟེན་ཡེ་ཤེས་གསུམ་དང་། འབད་མེད་ཀྱི་མཛད་པ་བཤད་པའོ། །དང་པོ་ལའང་གསུམ་ལས། ཆོས་སྐུ་ངོ་བོ་རྒྱུ་དང་བཅས་པ་ནི། ཡེ་ཤེས་སྤྲོས་པ་མེད་པ་གང་། །ཤེས་བྱ་སྐྱེ་བ་མེད་ལས་བྱུང་། །སངས་རྒྱས་རྣམས་ཀྱི་ཆོས་སྐུ་དེ། །ཡེ་ཤེས་ཚོགས་ལས་བྱུང་བ་ཡིན། །ཞེས་སོ། །གཟུགས་སྐུའི་རྒྱུ་དང་བཅས་ཏེ་ལོངས་སྐུ་ཁྱད་པར་དུ་བཤད་པ་ནི། བསོད་ནམས་ཚོགས་ནི་ཚད་མེད་ལས། །འཁྲུལ་པ་དེ་ནི་རྒྱལ་བའི་སྲས། །ས་བཅུ་ལ་ནི་གནས་རྣམས་ཀྱི། །མཐོ་བར་གྱུར་ན་སྐུ་དེ་ཡིས། །ཆོས་ཀྱི་རྫོགས་ལོངས་སྤྱོད་འདི་ནི། །རྒྱལ་སྲས་རྣམས་ནི་སྤྱོད་པ་ཡིན། །རྒྱལ་བ་སྐུ་དེ་ལ་བཞུགས་ནས། །བླ་མེད་བྱང་ཆུབ་ཐུགས་སུ་ཆུད། །ཅེས་སོ། །གཟུགས་སྐུའི་ངོ་བོ་དང་བཅས་ཏེ་སྤྲུལ་སྐུ་ཁྱད་པར་དུ་བཤད་པ་ནི། སངས་རྒྱས་ཀྱི་ནི་གཟུགས་ཀྱི་སྐུ། །མཚན་དང་དཔེ་བྱད་དག་གིས་འབར། །འགྲོ་བ་རང་གི་མོས་པ་ཡི། །དབང་གིས་སྣ་ཚོགས་སྐུ་འཛིན་གང་། །ཞེས་སོ། །གཉིས་པ་བརྟེན་པ་ཡེ་ཤེས་བཤད་པ་ལ་གསུམ་ལས། ཀུན་རྫོབ་ཆོས་ཀྱི་ཡུལ་ཅན་ཇི་སྙེད་མཁྱེན་པའི་ཡེ་ཤེས་ནི། སངས་རྒྱས་རྣམས་ཀྱི་མ་འདྲེས་ཆོས། །ཁྱད་པ་འཕགས་པ་བཅོ་བརྒྱད་དང་། །སངས་རྒྱས་རྣམས་ཀྱི་སྟོབས་སོགས་ཀྱིས། །ཡེ་ཤེས་དེ་ནི་ཡང་དག་བརྒྱན། །ཅེས་སོ། །ཆོས་ཉིད་དོན་དམ་པའི་ཡུལ་ཅན་ཇི་ལྟ་བ་མཁྱེན་པའི་ཡེ་ཤེས་ནི། ཆོས་རྣམས་ཉིད་ཀྱི་ངོ་བོ་ནི། ཐམས་ཅད་ཡོད་པ་མ་ཡིན་ཏེ། །དེའི་ཕྱིར་སྐད་ཅིག་གཅིག་གིས་ནི། །བདེ་གཤེགས་ཐམས་ཅད་མཁྱེན་པར་འདོད། །ཅེས་སོ། །སྲིད་ཞི་མཉམ་པར་མཁྱེན་པ་ལས་བྱུང་བ་ཡུལ་ཡུལ་ཅན་ལས་འདས་པ་གཉིས་མེད་སྤྲོས་བྲལ་གྱི་ཡེ་ཤེས་ནི། རྒྱལ་བས་དངོས་པོ་དེ་རྣམས་ནི། །གཟུགས་བརྙན་དང་ཡང་འདྲར་མཁྱེན་པས། །གཉིས་མེད་ཡེ་ཤེས་མ་རིག་ཟད། །ཤེས་བྱ་སྐྱེ་མེད་པས་རབ་ཕྱེ། །དེ་བས་དེ་ནི་ཅུང་ཟད་ཀྱང་། །མི་མཁྱེན་ཅི་ཡང་སྟོན་མི་མཛད། །སངས་རྒྱས་ནམ་མཁའ་ཇི་བཞིན་དུ། །དེ་ལྟར་ཆོས་ཉིད་ལ་རབ་བཞུགས། །ཞེས་སོ། །གསུམ་པ་འབད་མེད་ཀྱི་མཛད་པ་བཤད་པ་ནི། ཡིད་བཞིན་ནོར་བུ་ཅི་ཡང་ནི། །མི་བྱེད་རྟོག་པ་མེད་ན་ཡང་། །འགྲོ་བའི་བསམ་པ་ཇི་བཞིན་དུ། །ཚིམ་པར་བྱེད་པ་ཡིན་པར་བཤད། །རྫོགས་སངས་ཐུགས་ཀྱི་རིན་ཆེན་ནི། །རང་གི་མོས་བཞིན་དགོངས་མཛད་པས། །འགྲོ་བའི་བྱ་བ་བྱེད་དེ་ལས། དེ་བཞིན་མཛད་པར་གོ་བ་ཡིན། །དེ་ཉིད་ཕྱིར་ན་འཕགས་པ་རྣམས། །བསམ་མི་ཁྱབ་པའི་རྐྱེན་ལས་འཁྲུངས། །ཡིད་བཞིན་ནོར་བུ་བྱ་བ་ནི། །མཐོང་བ་འབད་པ་ཡོད་མ་ཡིན། །ཞེས་སོ། །སངས་རྒྱས་རྣམས་ནི་རང་བཞིན་དང་གང་དུ་བརྙེས་པའི་གནས་བཅས་བསྟན་ཏེ་དོན་བསྡུ་བ་ནི། ཆོས་རྣམས་དངོས་མེད་ཉིད་ལ་ནི། །བློ་གནས་སངས་རྒྱས་ཡིན་པར་བཤད། །འོག་མིན་གཞལ་ཡས་ཁང་དུ་ནི། །ཡང་དག་མངོན་སུམ་མཛད་པར་འདོད། །ཅེས་སོ། །ཆོས་དཀོན་མཆོག་གི་ངོ་བོ་ནི། གཉེན་པོ་བསླུ་མེད་འདུས་མ་བྱས་མྱང་འདས་ཚིག་དོན་ཏེ། །གང་ཞིག་རྨི་ལམ་སྒྱུ་མ་དང་། །ཆུ་ཟླ་ལྟ་བུ་བསླུ་བྱེད་པ། །སྐྱེ་སོགས་དང་ལྡན་དེ་སྤང་བྱའི། །ཆོས་སྤང་བར་ནི་རིགས་མ་ཡིན། །ཞེས་སོ། །ངེས་ཚིག་ནི། སྔོན་མེད་པ་ལས་སླར་བྱུང་ཞིང་། །བྱུང་ནས་ཀྱང་ནི་ཡང་དག་མེད། །རང་གི་ངོ་བོ་འཛིན་པས་ཆོས། །དོན་དམ་པ་ནི་མི་བརྗོད་དོ། །ཞེས་སོ། །ཀུན་རྫོབ་སྒྱུ་མ་ལྟ་བུར་སྐྱེ་ཞིང་འཇིག་པའི་མཚན་ཉིད་འཛིན་པ་དང་། དོན་དམ་བརྗོད་དུ་མེད་པའི་མཚན་ཉིད་འཛིན་པས་ནའོ། །མཚན་ཉིད་ནི། རྒྱུད་བླ་མ་ལས། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱི། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཞེས་སོ། །དབྱེ་བ་ལ་ལུང་རྟོགས་གཉིས་ཀྱི། ལུང་གི་ཆོས་ལ་སྤྱིར་བསྟན་པ་ནི། ཐུབ་པ་རྣམས་ཀྱིས་ཡང་དག་གསུངས། །དེ་ཡི་རྒྱུ་ལས་སྐྱེ་འགྱུར་པས། །དེས་ནི་མངོན་སུམ་དག་ཏུ་གཟིགས། །ཞེས་སོ། །དམན་མཆོག་གི་ལུང་གི་ཆོས་ཀྱི་རྣམ་གྲངས་ངེས་པ་བྱེ་བྲག་ཏུ་བསྟན་པ་ནི། ཉན་ཐོས་རྣམས་ཀྱི་དབང་མཛད་ནས། །སྡེ་སྣོད་གསུམ་དུ་འདོད་པ་ཡིན། །བྱང་ཆུབ་སེམས་དཔའི་གནས་སྐབས་ཀྱི། །ངེས་པ་དེར་ནི་ཡོད་མ་ཡིན། །འཕགས་པ་ནུབ་ཀྱི་རིར་བཤད་དང་། །ཤར་གྱི་རི་པའི་ཉན་ཐོས་ཀྱིས། །བྱང་ཆུབ་སེམས་དཔའི་དབང་བྱས་པ། །སྡེ་སྣོད་བདུན་དུ་བཤད་པ་ཡིན། །བྱང་ཆུབ་སེམས་དཔའི་སྡེ་སྣོད་དང་། །དེ་བཞིན་རིག་འཛིན་ཞེས་བྱ་དང་། །མདོ་སྡེ་ཆོས་མངོན་འདུལ་བ་དང་། །རྒྱས་དང་དེ་བཞིན་སྐྱེས་པའི་རབས། །དེ་ལྟར་སྡེ་སྣོད་བདུན་པོ་ནི། །ལུང་ནི་གཉིས་ལས་བསྟན་པ་ཡིན། །གང་ལ་དེ་ནི་ཚད་མིན་འགྱུར། །དེ་ནི་དགྲ་བཅོམ་སྤངས་པ་ཉིད། །ཅེས་སོ། །རྟོགས་པའི་ཆོས་འགོག་ལམ་གཉིས་ནི། །དུས་གསུམ་དུ་ཡང་དངོས་གཅིག་ཕྱིར། །ངོ་བོ་ཉིད་ཀྱིིས་རྟག་ཏུ་བྱུང་། །རྒ་ཤི་དག་ལས་གྲོལ་བ་ཉིད། །ཆོས་རྣམས་དུ་ནི་ཆོས་ཞེས་བཤད། །ཟད་དང་ཆགས་བྲལ་མྱ་ངན་འདས། །འགོག་དང་སྟོང་པ་ཉིད་ཞི་བ། །དེ་བཞིན་ཉིད་དང་ཆོས་རྣམས་ཀྱིས། །གང་གི་ངོ་བོར་དེ་ཉིད་བཤད། །ཅེས་དང་། ལམ་གང་མྱ་ངན་འདས་འགྲོ་བ། །ཞེས་སོ། །དགེ་འདུན་དཀོན་མཆོག་གི་ངོ་བོ་ནི། གྲོལ་དང་གྲོལ་ལམ་ལ་གནས་ཤིང་སྤངས་རྟོགས་མཐར་མ་ཕྱིན་པའི་གང་ཟག་འཕགས་པ་སྟེ། སྟོན་པའི་སློབ་མའི་ཚོགས་འདི་ནི། །གྲོལ་དང་གྲོལ་བའི་ལམ་ལ་གནས། །ཞེས་སོ། །ངེས་ཚིག་ནི། སངས་རྒྱས་ཆོས་དང་དགེ་འདུན་ནི། །བདུད་རྣམས་བྱེ་བ་བརྒྱ་ཡིས་ཀྱང་། །གང་ཕྱིར་དབྱེ་བར་མི་ནུས་པས། །དེའི་ཕྱིར་དགེ་འདུན་ཞེས་བཤད་དོ། །ཞེས་སོ། །མཚན་ཉིད་ནི། རྒྱུད་བླ་མ་ལས། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཞེས་སོ། །དབྱེ་བ་ལ་གསུམ་སྟེ། ཐེག་དམན་དང་ཐེག་ཆེན་དགེ་འདུན་གཉིས་སུ་དབྱེ་བ་དང་། འཕགས་བཞིའི་མཐུའི་ཁྱད་པར་བཤད་ཅིང་ཉན་རང་དགྲ་བཅོམ་དང་སེམས་དཔའ་སངས་རྒྱས་ལས་གཞན་དགེ་འདུན་དུ་སྒྲུབ་པ་དང་། སྐྱབས་འགྲོའི་ཡུལ་འཕགས་པ་ཁོ་ན་ལས་སློབ་མི་སློབ་གང་ཡང་མིན་པའི་ལམ་ཞུགས་ཀྱི་སོ་སྐྱེ་མ་ཡིན་པར་བཤད་པའོ། །དང་པོ་ལ་གསུམ་ལས། ཐེག་དམན་གྱི་དགེ་འདུན་ཟུང་བཞི་ཡ་བརྒྱད་བསྟན་པ་ནི། འཕགས་པའི་བདེན་པ་རྣམ་པ་བཞི། །རྟོགས་ཏེ་ཤེས་ནས་དད་གྱུར་པ། །སྐྱེས་བུ་གང་ཟག་ཡ་བརྒྱད་པོ། །མི་ཕྱེད་དགེ་འདུན་ཞེས་བཤད་དོ། །ཉོན་མོངས་གཞོམ་ཕྱིར་སློབ་པས་ན། །གང་ཟག་བདུན་ནི་སློབ་པ་ཡིན། །ཉེས་པ་མ་ལུས་ཟད་པའི་ཕྱིར། །བརྒྱད་པ་མི་སློབ་པར་བཤད་དོ། །དེ་རྣམས་འབྲས་བུར་གནས་པ་བཞི། །བཞི་ནི་ཞུགས་པ་པོ་ཡིན་ལ། །ཞེས་སོ། །ཐེག་ཆེན་གྱི་དགེ་འདུན་སར་གནས་བྱང་སེམས་བསྟན་པ་ནི། །རབ་ཏུ་དགའ་བ་ཐོབ་པ་ན། །ཀུན་སྦྱོར་གསུམ་པོ་ལེགས་ཟད་པས། །བྱང་ཆུབ་སེམས་དཔའ་འཕགས་འགྱུར་ཞིང་། །རྫོགས་སངས་རིགས་ལས་བྱུང་བ་ཡིན། །ས་ནི་གོང་མ་གོང་མ་ལ། །བྱང་ཆུབ་སེམས་པའི་ཡོན་ཏན་དང་། །ཉེས་ཟད་གང་ཡིན་ས་བཅུ་པའི། །མདོ་ཉིད་ལས་ནི་ཤེས་པར་བྱ། །ཞེས་སོ། །བྱང་སེམས་བསྔགས་འོས་མཆོག་ཏུ་བསྟན་པ་ནི། ཤེས་བྱ་མཐའ་ཡས་དབང་གིས་ནི། །འཁོར་བ་ན་ནི་སྐད་ཅིག་ཡོད། །གལ་ཏེ་རེ་རེའི་དབྱེ་བས་རིང་། །དེ་བཞིན་འདི་ཡང་སྲིད་མཚུངས་འགྱུར། །བྱ་བ་རྒྱ་ཆེན་བྱེད་པའི་ཕྱིར། །སྲིད་པ་རིང་སྙམ་མི་སེམས་སོ། །བསོད་ནམས་ཡེ་ཤེས་སྟོབས་ཀྱིས་ནི། །ལུས་སེམས་སྡུག་བསྔལ་གྱིས་མི་ནོན། །དེས་ན་རྣམ་པ་ཐམས་ཅད་དུ། །བྱང་ཆུབ་སེམས་དཔའ་སྨད་མི་བྱ། །ཞེས་སོ། །གཉིས་པ་ལའང་གསུམ་ལས། འཕགས་བཞིའི་མཐུའི་ཁྱད་པར་བཤད་པ་ནི། ཁམས་གསུམ་སར་གཏོགས་ཉོན་མོངས་ཟད། །བྱང་ཆུབ་ཀྱི་ནི་སྣོད་འགྱུར་ཉིད། །ཕུང་པོ་ཁམས་དང་སྐྱེ་མཆེད་ནི། །གཟུགས་བརྙན་མཚུངས་པར་མཐོང་བས་ན། །ཉན་ཐོས་རང་སངས་རྒྱས་དག་གིས། །སྟོང་ནི་གཉིས་དང་གསུམ་པོ་མཐོང་། །རྣམ་ཀུན་མཁྱེན་པའི་ཡེ་ཤེས་ནི། །རྫོགས་སངས་རྒྱས་ཀྱི་ཡིན་པར་བཤད། །རྒྱལ་བའི་ལམ་གྱི་རྣམ་པ་ཤེས། །བྱང་ཆུབ་སེམས་དཔའི་ཡིན་པར་གསུངས། །ཞེས་སོ། །ཉན་རང་དགྲ་བཅོམ་སངས་རྒྱས་ལས། །གཞན་དགེ་འདུན་དུ་སྒྲུབ་པ་ནི། །དེ་ལ་མྱ་ངན་འདས་ཡོད་མིན། །འོན་ཀྱང་སྲིད་གསུམ་སྐྱེ་བ་ནི། །དེ་དག་ལ་ནི་ཡོད་མིན་གྱི། །ཟད་པ་མེད་པའི་དབྱིངས་ན་འཁོད། །མི་ཤེས་ཉོན་མོངས་མུན་པར་བྱིང་། །ཕྱིས་ནི་སངས་རྒྱས་ཀྱིས་བསྐུལ་བས། །བྱང་ཆུབ་ཀྱིས་ནི་ཚོགས་བསགས་ནས། །དེ་ཡང་འཇིག་རྟེན་འདྲེན་པར་འགྱུར། །ཞེས་སོ། །གཞན་འདོད་བཀོད་ཅིང་དེ་དགག་པ་དང་བཅས་པས་བྱང་སེམས་སངས་རྒྱས་ལས་གཞན་དགེ་འདུན་དཀོན་མཆོག་ཏུ་སྒྲུབ་པ་ནི། །འཁོར་ལོས་བསྒྱུར་བའི་རྒྱལ་པོ་ཡི། །མཚན་གྱིས་ཡང་དག་བརྒྱན་པ་ལ། །བློ་དང་ལྡན་པའི་བློན་པོ་ཡིས། །རྒྱལ་པོ་ལྟ་བུ་མཐོ་བར་མཐོང་། །ཉན་ཐོས་རང་སངས་རྒྱས་དག་གིས། །རྫོགས་སངས་རྒྱས་ཀྱི་རིགས་བྱུང་བའི། །བྱང་ཆུབ་སེམས་དཔའ་བློ་ལྡན་ཡང་། །ཐུབ་པའི་དབང་པོ་ལྟ་བུ་མཐོང་། །བྱང་ཆུབ་སེམས་ནི་ལེགས་བསྐྱེད་པའི། །སྡོམ་བརྩོན་མཆིལ་ལྷྭམ་ཁུར་བ་ལ། །བྱང་ཆུབ་སེམས་སོགས་ལ་གུས་པས། །དགྲ་བཅོམ་པ་ཡིས་མཆོད་པར་བཤད། །ཤར་རིའི་ལུང་ལས་དགྲ་བཅོམ་པས། །བྱང་ཆུབ་སེམས་དཔར་ཕྱག་འཚལ་ཉིད། །འདི་དག་དཀོན་མཆོག་གསུམ་གཞན་མིན། །སངས་རྒྱས་ཁོངས་སུ་གཏོགས་པར་འདོད། །ཅེས་དང་། ཇི་ལྟར་དགྲ་བཅོམ་ཟད་ཡེ་ཤེས། །ས་བདུན་སྔོན་དུ་འགྲོ་བ་ཅན། །དེ་བཞིན་རྫོགས་སངས་རྒྱས་ཡེ་ཤེས། །ས་བཅུ་སྔོན་དུ་འགྲོ་བ་ཡིན། །འདི་དག་གཅིག་པུ་མི་འགྲོ་ཡི། །ས་བཅུ་པོ་ནི་སྦྱོང་བྱེད་དེ། །གང་ཕྱིར་ཕ་རོལ་ཕྱིན་པ་བཅུ། །ས་དེ་རྣམས་ལ་རྫོགས་པར་བྱེད། །འབྲས་བུར་གནས་དང་ཞུགས་པ་ནི། །འཕགས་པའི་ལམ་གྱིས་རབ་ཕྱེ་བའི། །སློབ་པ་རྣམས་ཀྱི་ས་བདུན་ནི། །མངོན་པའི་ཆོས་ལས་ཇི་སྐད་བཤད། །དེ་བཞིན་སྡེ་སྣོད་རྒྱས་པ་ལས། །ས་བཅུའི་བསྔགས་པ་བརྗོད་པ་ཡིན། །ཞེས་སོ། །གསུམ་པ་ནི། །ཐམས་ཅད་འཕགས་ལམ་བདག་ཉིད་ཅན། །དེ་བས་འཕགས་མིན་ཇི་ལྟར་འགྱུར། །ཞེས་དང་། གང་ཞིག་འཕགས་ལམ་མ་སྐྱེས་པའི། །བྱིས་རྨོངས་སོ་སོའི་སྐྱེ་བོ་དག །དེ་ནི་སློབ་དང་མི་སློབ་པ། །མིན་ཞེས་བསྟན་བཅོས་ལས་བཤད་དོ། །ཞེས་སོ། །དེ་གནས་སྐབས་སྐྱབས་གསུམ་དུ་འཇུག་ཚུལ་སོང་ངོ་། །ད་ནི་མཐར་ཐུག་གི་སྐྱབས་གནས་སངས་རྒྱས་གཅིག་པུ་ཉིད་ལས་སློབ་ལམ་གྱིས་བསྡུས་པའི་འགོག་བདེན་དང་བཅས་ཆོས་དང་དགེ་འདུན་ཀུན་མཐར་ཐུག་གི་སྐྱབས་མ་ཡིན་པར་བཤད་པ་ནི། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་གནས་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་སྟེ། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཡིན། །ཞེས་གསུངས་སོ། །སྐྱབས་སུ་སོང་བའི་ཕན་ཡོན་གྱི་སྐབས་སུ། མདོ་རྒྱན་ལས་ཀྱང་། དེ་ལས་རྣམ་པ་ཀུན་མཁྱེན་ཕན་དང་བདེ་བྱེད་དཀའ་ལ་སྐྱོ་བ་མེད། །ངེས་པར་འབྱུང་ལ་ཐེག་པ་ཀུན་གྱི་རྟོན་པའི་ཡོན་ཏན་རྟག་ཏུ་ལྡན། །ཞེས་སོ། །རྟེན་དུ་འགྱུར། ཞེས་པ་ནི། དགེ་བསྙེན་གསུམ་ལ་སྐྱབས་འགྲོ་བ། །དེ་ནི་སྡོམ་བརྒྱད་རྩ་བ་ཡིན། །ཞེས་སོ། །སྡོམ་པ་བརྒྱད་ནི། མངོན་མཛོད་ལས། སོ་སོར་ཐར་ཅེས་བྱ་རྣམས་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བར་མནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཚད་དང་དགེ་སློང་ཉིད། །ཅེས་སོ། །སྐྱབས་སུ་སོང་བའི་གང་ཟག་གི་བསླབ་བྱ་བསྲུང་སྡོམ་གྱི་རིམ་པ་བསྟན་པའི་སྐབས་སུ། གནོད་སྦྱིན་མི་བརྟེན་ཕྱག་མི་འཚལ། །ཅེས་པའི་གནོད་སྦྱིན་ནི། ཡཀྵའི་སྒྲ་ཡ ཀ་ཙིད་ཅེས་པ་གང་སུ་ཡང་རུང་བ་ལ་འཇུག །ཀྵི་ནནྟྲ་ཏི་ཞེས་པ་གནོད་བྱེད་ལ་འཇུག་ཅིང་། གང་སུ་ཡང་རུང་བ་ལ་གནོད་པ་བྱེད་པས་གནོད་ཅེས་པ་སྦྱར། ཡང་ཡཀྵ་པུ་ཛ་ཡན་ཞེས་པ་ཀུན་གྱིས་མཆོད་པ་སྦྱིན་པའི་ཡུལ་དུ་གྱུར་པར་འཇུག་པས་སྦྱིན་ཞེས་པ་སྦྱར། སྒྲ་དོན་བསྡུས་ཏེ་གནོད་སྦྱིན་དུ་བཏགས་པ་སྟེ། འཇིག་རྟེན་པའི་ལྷ་དང་བཅས་པར་འཇུག་ལ། དེ་ཡང་། མཁའ་རྒྱུའི་ཡི་དྭགས་སུ་གྱུར་པ། འདྲེ་རྣམས་དང་བཙན་དང་གནོད་སྦྱིན་སྲིན་པོ་རྒྱལ་པོ་སོགས་འབྱུང་པོ་སྤྱིའི་མིང་སྒྲ་ཡངས་པའི་དབང་དུ་བྱས་པའོ། །འབྱུང་པོ་བརྟེན་པ་རྣམས་ལ་མ་རུངས་པའི་ཕུང་བ་ངན་མཐའ་བཅོ་བརྒྱད་ཀྱི་གྲངས་ཡོད་པའི་ཚུལ་ནི། འབྱུང་པོ་རྣམས་བསམ་ངན་དང་ལས་ངན་རྒྱུན་མ་ཆད་པ་འཁྲུགས་བཞིན་འཆི་ཁའི་ནད་ཀྱིས་རྟག་ཏུ་༡བཏབས་ཤིང་༢ཡི་དྭགས་ཀྱི་སྡུག་བསྔལ་དཔག་མེད་ཡོད་པ་དེ་འདྲ་བརྟེན་མཁན་ལའང་སློང་བའི་ཕུང་བ། འབྱུང་པོ་ལ་རྫོགས་བྱེད་ཀྱི་དགེ་བ་སྨོན་ལམ་ལོག་པས་དཀྲུགས་པ་ཡོད་པའི་སྟོབས་ཀྱིས་བརྟེན་པ་པོ་དེ་ལ་བསོད་ནམས་ཟད་བྱེད་སྟོབས་གཟི་བརྗིད་མངའ་ཐང་སོགས་༣དང་ང་རྒྱལ་༤ཆགས་སྡང་སོགས་བདུད་ཀྱི་བསླུ་བ་མ་རུངས་པ་སྐྱེས་བའི་ཕུང་བ། འབྱུང་པོའི་ལས་ངན་བསམ་སྦྱོར་ངན་པའི་གྲིབ་མས་བརྟེན་པ་པོའི་དགེ་བ་འཛེད་ཅིང་སྡིག་༦ པ་ངང་གིས་འཕེལ་བའི་ཕུང་བ། འབྱུང་པོ་ལ་འདོད་འདུན་བསྐྱེད་པའི་ཉེར་ལེན་ངན་པ་ཅན་ཀུན། ཤི་མ་ཐག་མཁའ་རྒྱུའི་ཡི་དྭགས་དངོས་སམ་ངན་སོང་༧གཞན་དུ་སྐྱེ་བ་དང་༨མཐོ་རིས་སུ་བྱུང་ཡང་། བཀྲ་མི་ཤིས་པའི་སྡིག་སྤྱོད་ཅན་དུ་སྐྱེ་བའི་ཕུང་བ། འབྱུང་པོ་བརྟེན་པ་པོ་དེའི་རྐྱེན་གྱིས། དེ་གནས་པའི་ཡུལ་ཁམས་ལའང་ནད་འཁྲུགས་རྩོད་སོགས་༩སྡུག་བསྔལ་སྣ་ཚོགས་དང་༡༠སྡིག་སྤྱོད་སྣ་ཚོགས་སློང་བའི་ཕུང་བ། འབྱུང་པོ་གནོད་ཚེ་ནུས་པའི་ཡོན་ཏན་ལ་བསྟོད་པ་དང་བཅས་ནས་དེ་ལ་སེམས་འདུན་སྐྱེད་པའི་སྨོན་ལོག་ཅན་དེས་བསླབ་གསུམ་གྱི་དགེ་ཚོགས་གང་བྱས་གདུག་ཅན་གྱི་གོ་འཕང་ཐོབ་བྱེད་ཀྱི་རྐྱེན་དུ་༡༡འགྱུར་ཞིང་༡༢གནོད་པ་མ་རུངས་པའི་ལམ་དུ་ཞུགས་པ་དེ་ལ་སངས་རྒྱས་བྱང་སེམས་ཀུན་དགྱེས་པ་བྲལ་བའི་ཕུང་བ། འབྱུང་པོ་བརྟེན་པ་དེས་མཐོ་རིས་ཀྱི་ལུས་མཆོག་ལ་གནས་པའང་མ་ཤེས་ཤིང་ངན་སོང་དམན་པའི་ཉེས་པའང་མ་ཤེས་པས་དལ་འབྱོར་རྙེད་དཀའ་༡༣དང་འཁོར་བའི་༡༤ཉེས་དམིགས་ཤེས་པ་ལ་རྒྱབ་ཀྱིས་ཕྱོགས་པའི་ཕུང་པ། འབྱུང་པོ་མི་དགེའི་རྒྱུས་འཕངས་པ་མི་དགེའི་འབྲས་བུར་སྤྱོད་པ་ལས་བདེ་དགེ་འཚོལ་ཞིང་། ཞེ་སྡང་རྒྱུ་འབྲས་ཅན་རྟེན་དུ་བྱས་ཚེ་སངས་རྒྱས་ལུགས་ལ་རྒྱབ་ཀྱིས་༡༥ཕྱོགས་ཤིང་༡༦སྙིང་རྗེ་རྩད་ནས་འཇོམས་པའི་ཕུང་བ། འབྱུང་པོ་ལ་ཕྱག་འཚལ་མཆོད་ཅིང་བརྟེན་པས་སྐྱབས་འགྲོའི་བསླབ་པ་དང་བྲལ་ནས་སྡོམ་པ་ཐམས་ཅད་༡༧ ཞིག་ཅིང་༡༨མུ་སྟེགས་ཀླ་ཀློ་དང་ཁྱད་མེད་དུ་གྱུར་པའི་ཕུང་བ་སྟེ་ས་བཅས་དགུ་པོ་རེ་རེར་གཉིས་གཉིས་གནས་པ་འབྱུང་པོ་བརྟེན་པ་ལ་ཕུང་བ་བཅོ་བརྒྱད་ཅེས་བྱའོ། །དེང་སང་གི་དུས་ན་གཏི་མུག་གི་ལྟ་བ་ངན་པའི་དབང་གིས། མཐོ་རིས་དང་ངན་སོང་གི་རིས་གང་ཡིན་ཙམ་ཡང་མི་ཤེས་པ་རྣམས་ཀྱིས། ངན་སོང་གི་འགྲོ་བ་གདོན་རིགས་ལྷའི་གཟུགས་སུ་བྱས་ནས་སྐྱབས་འཚོལ་བ་མང་དུ་སྣང་ཡང་དེ་དག་གིས་སྐྱབས་མི་ནུས་པའི་སྟེང་འདི་ཕྱི་ཀུན་ཏུ་གནོད་པར་འདུག་པས་བདག་ལེགས་སུ་འདོད་པ་རྣམས་ཀྱིས་དཀོན་མཆོག་ཁོ་ནར་བློ་གཏད་བྱེད་པ། མཐོ་རིས་མི་རུ་སྐྱེ་བ་རང་ཉིད་སེམས་ཅན་འབྱུང་པོ་ཀུན་གྱི་སྐྱབས་སུ་ཤེས་པར་བྱའོ། །རྩ་བའི་བསླབ་བྱ་གསུམ་སོ་སོར་བཤད་པ་ནི། ཤིན་ཏུ་རྒྱས་པའི་མདོ་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུ་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་སོང་ན། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ནི་སྐྱབས་སོང་བ། །མུ་སྟེགས་ཅན་དང་འགྲོགས་མི་བྱ། །ཞེས་སོ། །ཐུན་མོང་སོགས་ཀྱི་བསླབ་བྱའི་ཆ་ཤས་ནི། དགེ་བསྙེན་དུ་ནི་དམ་འཆའ་བས། །སྐྱབས་ནི་གསུམ་པོ་བསྲུང་བར་བྱ། །མུ་སྟེགས་ཀུན་ལ་གུས་པ་ཡིས། །མཆོད་དང་ཕྱག་འཚལ་མི་བྱའོ། །རྟེན་གྱི་དམ་པ་བླང་ནས་ནི། །སླར་ཡང་དམན་པ་བརྟེན་གྱུར་ན། །ཉེས་བཅས་ཕྱོགས་ལ་གནས་པའི་ཕྱིར། །དེ་ནི་དམ་པའི་བཞད་གད་འགྱུར། །ཞེས་སོ། །སྐྱབས་སྡོམ་ཚུལ་ཇི་ལྟར་བླངས་བའི་སྐབས་སུ། རང་བཞིན་དོན་དམ་པའི་སྐྱབས་འགྲོ་གཏན་ལ་དབབ་པ་གཉིས་སུ་ཡོད་པ་ལ། མེད་དགག་གཏན་ཚིགས་སུ་བཀོད་པ་གཅིག་དུ་བྲལ་གྱིས་བདག་མེད་གཉིས་ཐུན་མོང་དུ་གཏན་ལ་དབབ་པ་ནི། ཇི་ལྟར་འཁོར་ལོ་ལ་སོགས་པ། །ཉེར་བཟུང་ཤིང་རྟར་བརྟགས་པ་ནི། རང་དང་གཞན་དུ་རྣམ་དཔྱད་པས། །རྣམ་པ་ཀུན་ཏུ་མི་དམིགས་སོ། །དེ་བཞིན་ཕུང་པོ་ནས་བརྩམས་ཏེ། །སེམས་ཅན་དུ་ནི་བརྟགས་པ་ཡང་། །རང་དང་གཞན་དུ་རྣམ་དཔྱད་པས། །ཅི་ནས་ཀྱང་ནི་དམིགས་མི་འགྱུར། །ཞེས་སོ། །མ་ཡིན་དགག་གཏན་ཚིགས་སུ་བཀོད་པ་རྟེན་འབྲེལ་ཆེན་པོས་ཆོས་ཀྱི་བདག་མེད་ཁྱད་པར་དུ་གཏན་ལ་དབབ་པ་ནི། ངོ་བོ་ཉིད་ནི་རྒྱུ་རྐྱེན་ལས། །འབྱུང་བ་ཡིན་པར་རིགས་མིན་ཏེ། །རྒྱུ་དང་རྐྱེན་ལས་བྱུང་བ་ནི། །རང་བཞིན་བཅོས་མ་ཡིན་པར་འགྱུར། །ངོ་བོ་ཉིད་ནི་བཅོས་མ་རུ། །ཇི་ལྟར་ཡང་ནི་གྱུར་པ་ཡིན། །བཅོས་མ་མ་ཡིན་ངོ་བོ་ནི། །གཞན་ལ་ལྟོས་པ་ཡོད་མ་ཡིན། །ཆོས་རྣམས་ཉིད་ཀྱི་ངོ་བོ་ནི། །ཐམས་ཅད་ཡོད་པ་མ་ཡིན་ཏེ། །ཞེས་སོ། །བསྔོ་བའི་སྐབས་སུ་བསྔོ་ཚུལ་ཡང་། ཐེག་ཆེན་ཚུལ་ལ་བརྟེན་ནས་ནི། །སྐྱབས་གསུམ་རྣམ་པར་ཕྱེ་བ་ལས། །བསོད་ནམས་གང་དེས་སྐྱེ་བོ་རྣམས། །དཀོན་མཆོག་གསུམ་ལ་གཞོལ་བར་ཤོག །ཅེས་སྐྱབས་འགྲོ་བདུན་ཅུ་པ་ལས་གསུངས་པ་ཇི་བཞིན་ཏེ། གཞུང་དོན་ཚང་བར་སྦྱོར་བ་ཡོངས་སུ་རྫོགས་པ་གྲུབ་པར་གྱུར་ཏོ། །སླར་སྨྲས་པ། བདེ་དགེ་མ་ལུས་དཀོན་མཆོག་གསུམ་པོ་དང་། །གང་གི་རིགས་ཡོད་ཁོ་ནའི་རྟེན་འབྲེལ་དབང་། །རང་ཁམས་འབྲས་བུར་འཆར་བྱེད་ཐབས་ཀུན་གཞི། །སྐྱབས་འགྲོར་རག་ན་འདིར་བརྩོན་སུ་མི་སྒྲིམ། །དེའི་ཕྱིར་ལམ་ཀུན་གཞི་རྟེན་ཆེས་བརྟན་ཕྱིར། །ཐར་འདོད་སྐྱེ་མང་བློ་མིག་རྒྱས་བྱའི་ཕྱིར། །ཤིང་རྟ་ཆེན་པོ་རྣམས་ཀྱི་གཞུང་སྦྲེལ་བའི། །ལེགས་བཤད་དཔལ་གྱི་སེང་གེས་བརྩོན་པས་སྦྱར། །དེ་ལས་བྱུང་དགེ་དུས་གསུམ་རྣམ་དཀར་བཅས། །གྲུབ་མཐའ་ཕྱོགས་རེ་སེམས་ཅན་འགའ་འགའི་ཕྱིར། །ཡོངས་སུ་ཆད་པའི་བསྔོ་བ་ལོག་སྤངས་ཏེ། །སངས་རྒྱས་བསྟན་འཕེལ་འགྲོ་ཀུན་ཐར་ཕྱིར་བསྔོ།། །། སྐྱབས་འགྲོ་ཡན་ལག་དྲུག་པའི་ལུང་སྦྱོར་སྒྲོན་མེའི་ཕྲེང་མཛེས། དཔལ་གྱི་སེང་གེསྐྱབས་འགྲོ་ཡན་ལག་དྲུག་པའི་ལུང་སྦྱོར་སྒྲོན་མེའི་ཕྲེང་མཛེས་ཞེས་བྱ་བ་བཞུགས་སོ། །སྐྱབས་འགྲོ་ཡན་ལག་དྲུག་པའི་ལང་ཚོ་གསལ་བྱེད་སྒྲོན་མེའི་ཕྲེང་མཛེས་ཞེས་བྱ་བ། ན་མོ་རཏྣ་ཏྲ་ཡཱ་ཡ། གདུལ་དཀའི་སྒྲིབ་སྐེམས་ཟས་གཙང་སྲས་ཉིན་བྱེད། །པདྨ་སྐྱེས་ཀྱི་གཟི་འབར་འགྲོ་གླིང་མཁར། །ཆེས་གསལ་མར་མེ་མཛད་དཔལ་ཡེ་ཤེས་སྒྲོན། །གསུམ་དེར་གཏན་སྐྱབས་ཉིད་གསོལ་གུས་ཕྱག་འབུལ། །དེ་ལ་འདིར་ཐར་པའི་ལམ་ཐམས་ཅད་ཀྱི་ཐོག་མར་འབྱུང་ཁུངས་ཀྱི་གཞི། བར་དུ་གནས་པའི་རྟེན་སྐྱབས་འགྲོའི་ཆོས་ལེགས་པར་བསྟན་པ་པཎ་ཆེན་བི་མ་ལ་མི་ཏྲའི་གཞུང་འདི་ཉིད་བཤད་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་གསུམ་ལས། དང་པོ་ལ་མཚན་སྨོས་པ། མཆོད་པར་བརྗོད་པ། བརྩམ་པར་དམ་བཅའ་བ་གསུམ་ལས། དང་པོ་ནི་བྱེད་པའི་མུ་བཞི་ལས། གང་གིས་མཚན་གསོལ་ན། པཎ་ཆེན་བི་མ་མི་ཏྲས་སོ། །གང་ལ་ན། རང་གིས་བརྩམས་པའི་བསྟན་བཅོས་ལའོ། །ཚུལ་ཇི་ལྟར་ན་གཉིས་ལས། སྐད་ཅི་ལྟ་བུས་གསོལ་ན། རྒྱ་སྐད་ལྟར་སྨོས་པ་རྒྱ་གར་སོགས། བོད་སྐད་ལྟར་སྨོས་པ་བོད་སྐད་དུ་སོགས་ཀྱིས་བསྟན་ཅིང་སྐད་གཉིས་ཤན་སྦྱར་ནས་ཀྱང་ཤེས་པར་བྱའོ། །འདོགས་ཚུལ་ཇི་ལྟ་བུས་གསོལ་ན། འདོགས་ཚུལ་ལྔ་ལས། དོན་གྱི་ངོ་བོས་གསོལ་བ་ཇོ་བོ་ཆེན་པོས་སྐྱབས་འགྲོ་བསྟན་པ་ཞེས་གསུངས་པ་ལྟ་བུ་ཡིན་ཀྱང་། འདིར་དོན་གྱི་རྣམ་གྲངས་ལས་གསོལ་བ་སྟེ་སྐྱབས་འགྲོ་ལ་ཡན་ལག་གི་རྣམ་གྲངས་དྲུག་ཏུ་བསྟན་པའོ། །དགོས་པ་ཅིའི་ཕྱིར་གསོལ་ན་གསུམ་སྟེ། སྤྱིར་མིང་ཙམ་བཏགས་པའི་དགོས་པ་ལང་ཀར་གཤེགས་པ་ལས་གསུངས་པ་དང་། བྱེ་བྲག་ཏུ་བཀའ་བསྟན་བཅོས་ལ་དཔེ་དང་དོན་གྱི་གསོལ་བས་དབང་པོ་རབ་ཀྱི་དབུ་ཞབས་ཀྱི་དོན་རྟོགས་པ་སོགས་གསུམ་འབྱུང་བ་དང་། དམིགས་བསལ་བོད་དུ་བསྒྱུར་བའི་གཞུང་གི་དབུར་མཚན་རྒྱ་སྐད་སྨོས་པ་ལ་སྐད་ལ་བག་ཆགས་འཇོག་པ་སོགས་དགོས་པ་བཞི་དང་ལྡན་པའོ། །གཉིས་པ་མཆོད་བརྗོད་ཀྱང་བཞིར་སྦྱར་བ་ལ། གང་གིས་མཆོད་པར་བརྗོད་ན། པཎ་ཆེན་བི་མ་ལས་སོ། །གང་ལ་ན། དཀོན་མཆོག་གསུམ་ལ། ཚུལ་ཇི་ལྟར་ན། ཡོན་ཏན་བསྡུས་ཏེ་བརྗོད་པ་དཀོན་མཆོག་གསུམ་ལ་ཕྱག་འཚལ་ལོ། །ཞེས་པ་སྟེ། ཕྱིས་སུ་ཇོ་བོ་ཨ་ཏི་ཤས་མཛད་པའི་སྐྱབས་འགྲོ་བསྟན་པའི་དབུར་བསྡུས་བརྗོད་འདི་བཀོད་རྗེས། ཚིགས་བཅད་ཀྱིས། ངན་སོང་གསུམ་དང་འགྲོ་བ་ལྔའི། །སྡུག་བསྔལ་མ་ལུས་སེལ་མཛད་ཅིང་། །མཐོ་རིས་མྱ་ངན་འདས་པ་ཡི། །བདེ་བ་སྩོལ་མཛད་དེ་ལ་འདུད། །ཅེས་གསུངས་འདུག་གོ། །དེ་ཡང་དཀོན་མཆོག་ཅེས་པས་རྒྱུའི་སྒོ་ནས་ཡོན་ཏན་བརྗོད་པ་སྟེ། འཇིག་རྟེན་དུ་སེམས་མེད་བེམ་པོའི་ནང་དཀོན་པ་ཡིད་བཞིན་ནོར་བུ་དང་། སེམས་ཅན་ནང་དཀོན་པ་ཚངས་དབང་འཁོར་ལོས་སྒྱུར་རྒྱལ་འདི་དག་ཀྱང་དཀོན་མཆོག་གི་རྐྱེན་ལས་བྱུང་བ་དང་། དལ་འབྱོར་ལུས་རྟེན་དཀོན་པར་གསུངས་པའང་། དཀོན་མཆོག་འཇོག་བྱེད་དུ་གནས་པས་སོ། །གསུམ་ལ་ཞེས་པས་ངོ་བོའི་སྒོ་ནས་ཡོན་ཏན་བརྗོད་པ་སྟེ། སྟོན་སྐྱོབ་འདྲེན་པའི་ཡོན་ཏན་བླ་མེད་ལྡན་པ་མཆོག་གསུམ་ཉིད་ལས་བཞི་པ་སོགས་མི་སྲིད་པས་སོ། །ཕྱག་འཚལ་ལོ་ཞེས་པས་འབྲས་བུའི་སྒོ་ནས་ཡོན་ཏན་བརྗོད་པ་སྟེ། མཆོག་གསུམ་ལ་དམིགས་ཏེ་ལུས་ཕྱག་གཅིག་བྱས་པའི་འབྲས་བུ་འོག་གི་ས་དང་རྒྱ་མཚོའི་རྡུལ་སྙེད་ཀྱི་འཁོར་ལོས་སྒྱུར་རྒྱལ་ཐོབ་ཅིང་མཐར་བྱང་ཆུབ་འགྲུབ་པ་དང་། ཡང་དད་དགའ་ཐེ་ཚོམ་ངོ་བསྲུང་ཕྱིར་གུས་ཕྱག་བྱས་ཀྱང་གནས་སྐབས་ཚངས་སོགས་ལྷའི་བདེ་ཚོགས་དང་མཐར་ལྷའི་མཆོག་རྫོགས་སངས་འགྲུབ་པས་སོ། །ཅིའི་ཕྱིར་མཆོད་པར་བརྗོད་པ་ནི། རང་དང་གཞན་དང་གཉིས་ཀས་ཐོབ་པའི་དགོས་པ་གསུམ་དང་ལྡན་ནོ། །གསུམ་པ་བརྩམ་པར་དམ་བཅའ་བ་ནི། ཆིངས་ཆེན་པོ་ལྔ་ཡི་སྒོ་ནས་བཤད་པ་ལ། དགོས་དོན་དགོས་སོགས་ཆོས་བཞི་བརྗོད་པ། བསྡུས་དོན་ལ་ཚིག་གི་བསྡུས་དོན་ས་བཅད། དོན་གྱི་བསྡུས་དོན་དོན་གྱི་གཙོ་བོ་འགའ་ཞིག་གི་ནང་དུ་བསྡུ་བ་སྟེ། འདིར་སྐྱབས་འགྲོའི་རང་བཞིན་ཤེས་པའི་ཤེས་རབ་དང་། མི་ལྡོག་པའི་བརྩོན་འགྲུས་དང་གཉིས་སུ་ཡན་ལག་དྲུག་འདུ་བ་ལྟ་བུའོ། །ཚིག་དོན་ལ། སྐྱབས་འགྲོའི་མཚན་གཞིའི་ངོ་བོ་དད་མོས་གཉིས་སོ། མཚོན་བྱའི་ངེས་ཚིག་ནི། སྐྱབས་འགྲོ་བསྟན་པ་ལས། འབངས་ཡིན་པའམ་དེ་ལས་གཞན་པའི་ཇོ་བོ་མི་ཚོལ་བས་སྐྱབས་སུ་སོང་བའོ། །ཞེས་གསུངས་པ་བཞིན། དཀོན་མཆོག་གསུམ་ལས་གཞན་པའི་སྐྱབས་ཀྱི་གཙོ་བོ་མི་འཚོལ་བས་སྐྱབས། དེའི་འབངས་སུ་རང་ཉིད་གཏན་དུ་ཕུལ་བས་འགྲོ་བའོ། །མཚོན་བྱེད་ཀྱི་ཆོས་ལ། མཚོན་བྱེད་མཚན་ཉིད་དང་། མཚོན་བྱེད་དཔེ་བཀོད་པ་གཉིས་ལས། སྤྱི་དང་ཁྱད་པར་གྱི་མཚན་ཉིད་ཟླ་ཕྲེང་སོགས་ལས་ཤེས་པར་བྱའོ། །དཔེ་ནི་བསྟན་པ་ལས། རྒྱལ་པོའམ་བློན་པོའི་འབངས་དག །དེ་ཡི་བཀའ་ལས་མི་འདའ་ཞིང་ཅི་ནས་ཀྱང་དེ་མགུ་བར་བྱེད་པ་བཞིན་ནོ། །ཞེས་གསུངས་པ་ལྟར། །བསླབ་གསུམ་གང་ལ་བསླབ་ཀྱང་རྫོགས་སངས་རྒྱས་ཀྱི་གསུང་ཆོས་དཀོན་མཆོག་གི་ཚུལ་དུ་མི་འདའ་བར་འབད་པ་དང་། འཕགས་པ་རྣམས་དགྱེས་པའི་རྣམ་དག་གི་ཚུལ་ཁྲིམས་སོགས་ལ་རྟག་ཏུ་གནས་པར་བྱེད་པའོ། །དབྱེ་བ་ལ། སྐྱབས་འགྲོ་ཉི་ཚེ་བ་དང་། སྐྱབས་འགྲོ་མཚན་ཉིད་པ་གཉིས། ཉི་ཚེ་བ་ལའང་གཉིས་ཏེ། བློ་དང་ཡུལ་གཉིས་ཀ་འཇིག་རྟེན་པར་སོང་བ་གྲུབ་མཐར་མ་ཞུགས་པའི་སྐྱབས་འགྲོ་དང་། བློ་འཇིག་རྟེན་འདས་པའི་ཕྱོགས་ཡུལ་འཇིག་རྟེན་པར་སོང་བ་མུ་སྟེགས་པའི་སྐྱབས་འགྲོ་སྟེ། དང་པོ་ནི། འཇིགས་པ་བརྒྱད་ལྟ་བུ་ལས་ཐར་པའི་ཕྱིར་རི་དང་ལྗོན་ཤིང་སོགས་ཀྱི་དངོས་པོ་དང་། མིའི་དབང་པོ་དང་ལྷ་ལྷ་མིན་འབྱུང་པོ་ལ་སྐྱབས་ཚོལ་བའོ། །གཉིས་པ་ནི། འཁོར་བ་ལས་ཐར་འདོད་ཀྱིས་ཚངས་དབང་ཁྱབ་འཇུག་སོགས་ལ་སྐྱབས་ཚོལ་བའོ། །མཚན་ཉིད་པ་ལའང་གཉིས་ཏེ། བློ་འཇིག་རྟེན་པ་ཡུལ་འཇིག་རྟེན་ལས་འདས་པ་དང་། བློ་ཡུལ་གཉིས་ཀ་འཇིག་རྟེན་ལས་འདས་པར་སོང་བ་ལས། དང་པོ་ནི། སྐྱེས་བུ་ཆུང་ངུའི་སྐྱབས་འགྲོའོ། །གཉིས་པ་ནི། འབྲིང་དང་ཆེན་པོའི་སྐྱབས་འགྲོ་སྟེ། །འདི་ལའང་བརྡར་བཏགས་པ་ཀུན་རྫོབ་སྐྱབས་འགྲོ། ཆོས་ཉིད་ཀྱིས་ཐོབ་པ་དོན་དམ་སྐྱབས་འགྲོ་གཉིས། ཀུན་རྫོབ་སྐྱབས་འགྲོ་ལའང་། ཐུན་མོང་བ་རྒྱུའི་སྐྱབས་འགྲོ། ཐུན་མོང་མིན་པ་འབྲས་བུའི་སྐྱབས་འགྲོ་གཉིས་ཡིན་ཏེ། བསྟན་པ་ལས། དབྱེ་བ་ནི། ཐུན་མོང་བ་དང་། ཐུན་མོང་མ་ཡིན་པའི་བྱེ་བྲག་གོ། །ཞེས་གསུངས་སོ། །ཡན་ལག་ལས་གཞན་ཡན་ལག་ཅན་མེད་པ་འདུས་པའི་ཡན་ལག་ཏུ་བྱས་ཏེ་ཡན་ལག་དྲུག་པ། དམ་པའི་ཁས་ལེན་གྱིས་རྩོམ་པ་མཐར་ཕྱིན་བྱེད་བརྩམ་པར་དམ་བཅའ་བའི་ཚིག་བཤད་ཅེས་པའོ། །རྣམ་པར་བརྟགས་པའི་གོ་རིམ་དང་མི་འགལ་བར་ཡན་ལག་དྲུག་རིམ་བཞིན་བཞག་པ་མཚམས་སྦྱར་གྱི་དོན་ཏོ། །མངོན་གསུམ་རྗེས་དཔག་གི་རིགས་པ་དང་། དམ་བཅའ་སྔ་ཕྱི་མི་འགལ་བར་གཏན་ལ་ཕབས་པ་བརྒལ་ལན་གྱི་དོན་ཡིན་པ་ལ་སྐབས་སུ་བབས་པའི་བརྒལ་ལན་ནི། སྟོན་པས་གསུང་རྗེས་སུ་བསྟན་པའི་ཆོ་འཕྲུལ་མཆོག་བཞག་པ་སྡེ་སྣོད་རིན་པོ་ཆེ་གསུམ་ལ་ནི་གཞན་གང་ཟག་གིས་ཟུར་ཙམ་ལའང་བསྣན་དོར་གྱིས་དཀྲུགས་མི་རུང་སྟེ། ཆོས་སྟོན་ཚུལ་སངས་རྒྱས་ཉིད་ལས་གཞན་འཕགས་གསུམ་གྱི་སྤྱོད་ཡུལ་མིན་པ་བཤིགས་ནས་དམ་ཆོས་ལ་གནོད་པ་བྱས་པ་ཆོས་སྤངས་པའི་ལས་ངན་མཐར་ཐུག་པར་གྱུར་ཕྱིར་ཏེ། རྒྱལ་ཚབ་བྱམས་པས། རྒྱལ་ལས་ཆེས་མཁས་འཇིག་རྟེན་འདི་ལ་འགའ་ཡང་ཡོད་མིན་པས། །མ་ལུས་དེ་ཉིད་མཆོག་ནི་ཇི་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེའི་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས། །ཐུབ་ཚུལ་བཤིག་ཕྱིར་དེ་ཡང་དམ་པའི་ཆོས་ལ་གནོད་པ་བྱས་པར་འགྱུར། །ཞེས་གསུངས་སོ། །གཞན་ཡང་འཕགས་ཡུལ་གྱི་བསྟན་བཅོས་རྣམས་ནི་ཕྱི་པའི་གཞུང་ཡན་ཆད་སྡེབ་སྦྱོར་དང་བསྟུན་ནས་བསྲེ་བསླད་བྱེད་དུ་མེད་པ་ཡིན་ཀྱང་། བོད་འདིར་དབུས་གཙང་གི་གསར་རྙིང་ཕྱོགས་ཀྱི་ལོ་ཙཱ་དང་མཁས་པའི་སློབ་དཔོན་ཚད་མར་གྱུར་པ་རྣམས་ཀྱིས་བཀའ་བསྟན་ལ་བཟོ་བཅོས་མ་མཛད་མོད། ད་ལྟར་ཡང་རབ་བྱུང་བཅོ་ལྔ་པའི་སྟོད་ནས་བྱུང་བའི་མཐའ་མི་བླུན་པོ་མཁས་རློམ་གྱི་ང་རྒྱལ་ཅན་འགས་འཕགས་ཡུལ་གྱི་སློབ་དཔོན་ཆེན་པོ་བི་མའི་གཞུང་འདིར་རང་བཟོས་བསླད་པ་ནི། དགོས་པ་འོག་ཏུ་བུད་ནས་འབྲེལ་མེད་ལ་སྦྱར་ཏེ་ཡན་ལག་བདུན་པར་སོང་བས་གྲངས་ཉམས་པ་དང་། ཆེ་བའི་ཡོན་ཏན་རྟག་ཏུ་དྲན། །ཟས་དག་གིས་ནི་མཆོད་པ་ཡིན། །ཞེས་ཁ་ཕྲལ་བས་སྙན་དངགས་ཀྱི་རིམ་པ་ཅན་གྱི་རྒྱན་ཉམས་པར་བྱས་པ་དང་། མཚན་དྲི་མེད་བཤེས་གཉེན་ཅེས་བོད་སྐད་དུ་བསྣན་ནས་བསྒྱུར་བས་སློབ་དཔོན་གཞན་དང་མི་ནོར་བའི་རྒྱ་སྐད་ཉམས་པ་དང་། འགྱུར་བྱང་མི་འདུག་ཅེས། བསྒྱུར་མཛད་ལོ་ཙཱ་མངོན་སུམ་ངོས་བཟུང་བ་ལས་ཉམས་པ་དང་། ཆོས་ཆུང་ན་བཞུགས་པས་ཡིད་ཆེའི་གནས་ཡིན་ཞེས། སྒྲུབ་བྱེད་ཕྱིན་ཅི་ལོག་བཀོད་པས། ཇོ་བོའི་ཆོས་ཆུང་མ་བྱུང་བའི་ཚེ། སྔ་འགྱུར་གྱི་གཞུང་ཡང་དག་ཡིན་པ་ཉམས་པར་བྱས་པ་ལྟ་བུ་དེ་ནི་མུ་སྟེགས་སོགས་ཀྱི་ཕྱོགས་བཟུང་ནས་སངས་རྒྱས་ཆོས་ལ་སྐུར་བ་བཏབ་ནས་སྤོང་བ་ལས་ཆེས་ཐུ་བ། རང་གཞུང་ལ་བསྣན་དོར་གྱིས་བཀའ་བཀའ་མིན་བྱེད་པ་དང་། འཕགས་ཡུལ་པཎ་གྲུབ་ཀྱི་གསུང་བརྫུས་མར་སྒྱུར་བ། བསྟན་པ་འཇིག་པའི་རྐྱེན་མ་རུངས་པ་བྱེད་པ་ནི། བདེ་བར་གཤེགས་པའི་བསྟན་པ་གཅེས་སྤྲས་སྐྱོང་མཛད་སྐྱེ་མཆོག་དམ་པ་རྣམས་ཀྱིས་བཏང་སྙོམས་སུ་འཇོག་ཇི་ལྟར་རིགས་ན། །མཁྱེན་པའི་སྤྱན་རས་གཟིགས་ཤིག །གཉིས་པ་བར་དུ་དགེ་བ་གཞུང་གི་དོན་ལ་གཉིས་ཏེ། རྩ་བའི་སྡོམ་བསྟན་པ་དང་། སྡོམ་གྱི་དོན་རྒྱས་པར་བཤད་པའོ། །དང་པོ་ནི། ཅིས་འགྲོ་སོགས་རྐང་པ་གསུམ། དེ་ལས་རྩ་བ་ཞེས་པ་འོག་ན་གནས་པ་དང་བརྟན་པ་སྟེ། དཔེ་ལྗོན་ཤིང་སོགས་ཀྱི་རྩ་བ་བཞིན་ནོ། །འདིར་ཡང་དང་པོར་བྱུང་བ་གང་གིས་འགྲེལ་ཚུལ་ཇི་ལྟར་བྱས་ཀྱང་གཞིར་བྱུང་བའི་ཚིག་གི་ཟུར་ཙམ་ཡང་བསྒྱུར་དུ་མེད་པས་རྩ་བ་སྟེ་གཞུང་གི་ཚོགས་ཡིན་ལ། དེ་རྣམས་ཡན་ལག་དྲུག་གི་ཆིངས་ཀྱིས་བཅིངས་ཏེ་སྡོམ་ཐོག་མར་བསྟན་པའོ། །གཉིས་པ་ལ་ཡན་ལག་དྲུག་ལས། དང་པོ་སྐྱབས་སུ་རྒྱུ་ཅིས་འགྲོ་དགོས་པ་ལ། ཉེར་ལེན་དང་། ལྷན་ཅིག་བྱེད་རྐྱེན་གྱི་རྒྱུ་གཉིས་ལས། སྔ་མ་ལ། སྐྱབས་འགྲོའི་བརྒྱུད་པའི་ཉེར་ལེན་དང་། དངོས་ཀྱི་ཉེར་ལེན་གཉིས་ཀྱི་དང་པོ་ནི། འཕགས་པ་ཀླུ་སྒྲུབ་ཀྱིས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྐད་གསུངས་པ་སྟེ། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ཞེས་གསུངས་པའོ། །དངོས་ཀྱི་ཉེར་ལེན་ལ། བསྟན་པ་ལས། རྟེན་གྱི་གང་ཟག་ནི་གཉིས་ཏེ། །ཐེག་པ་ཆེན་པོའི་རིགས་ཅན་དང་། །ཐེག་པ་ཆུང་ངུའི་རིགས་ཅན་ནོ། །ཞེས་གསུངས་པ་ཁམས་སམ་རིགས་ཀྱི་མཐུ་ལས་རིམ་པར་སྙིང་རྗེ་ཆེ་བ་དང་། འཁོར་བ་ལ་སྐྱོ་ཤས་ཆེ་བའང་དངོས་ཀྱི་ཉེར་ལེན་དུ་འགྱུར་ཏེ། མངོན་རྟོགས་རྒྱན་ལས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བརྗོད། །ཅེས་གསུངས་པས་སོ། །ཡང་སྔ་མ་ལས། རང་བཞིན་ནི་ངོ་ཚ་ཤེས་པ་དང་། ཁྲེལ་ཡོད་པ་དང་ལྡན་པ་དང་རྣམ་པར་རིག་བྱེད་མ་ཡིན་པ་སྐྱེས་པའོ། །ཞེས་དགེ་བའི་རྩ་བ་གཉིས་མངོན་གྱུར་དང་སྐྱབས་སུ་འགྲོ་བའི་ཚད་ལྡང་རུང་གི་ཚུལ་དུ་ཡོད་པའང་དངོས་ཀྱི་ཉེར་ལེན་ནོ། །ལྷན་ཅིག་བྱེད་རྐྱེན་ལ་གཉིས་ལས། ཐུན་མོང་མིན་པའི་ལྷན་ཅིག་བྱེད་རྐྱེན་ནི། འཇིགས་པ་དྲན་པ་ཡིན་ཏེ། སྐྱེས་བུ་གསུམ་རང་རང་སོ་སོར་འཇིགས་པ་དྲན་པ་རེ་རེ་འབྱུང་བ་ནི། ཀུན་མཁྱེན་ཆོས་རྗེས། སྐྱེས་བུ་ཆུང་རྣམས་ངན་འགྲོས་འཇིགས་པ་དང་། །འབྲིང་གཉིས་སྲིད་པས་འཇིགས་དང་ཆེན་པོ་རྣམས། །གཞན་གྱི་སྡུག་བསྔལ་མི་བཟོད་ཞི་བདེས་འཇིགས། །ཞེས་གསུངས་སོ། །དེ་ཡང་བསྟན་པ་ལས། དགོས་པ་ནི་བཅོམ་ལྡན་འདས་ཀྱིས། ཇི་སྐད་དུ། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ཀུན་དགའ་དང་ནི་མཆོད་གནས་ཀྱི། །ལྗོན་ཤིང་རྣམས་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཞིང་། །སྐྱབས་དེ་མཆོག་གྱུར་མ་ཡིན་ལ། །སྐྱབས་དེ་ལ་ནི་བརྟེན་ནས་སུ། །སྡུག་བསྔལ་ཀུན་ལས་མི་གྲོལ་ཞིང་། །གང་ཚེ་གང་ཞིག་སངས་རྒྱས་དང་། །ཆོས་དང་དགེ་འདུན་སྐྱབས་སོང་ནས། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འདས་པ་དང་། འཕགས་ལམ་ཡན་ལག་བརྒྱད་བདེ་བ། །མྱ་ངན་འདས་པར་འགྲོ་འགྱུར་དང་། །འཕགས་པའི་བདེན་པ་བཞི་པོ་དག །ཤེས་རབ་ཀྱིས་ནི་ལྟ་བྱེད་པ། །སྐྱབས་དེ་གཙོ་བོ་ཡིན་པ་སྟེ། །སྐྱབས་དེ་མཆོག་ཏུ་གྱུར་པ་ཡིན། །སྐྱབས་དེ་ལ་ནི་བརྟེན་ནས་ཀྱང་། །སྡུག་བསྔལ་ཀུན་ལས་གྲོལ་བར་འགྱུར། །ཞེས་གསུངས་སོ། །སྐྱབས་སུ་འགྲོ་བའི་དགོས་པ་ནི་དེ་ལྟ་བུའོ། །ཞེས་གསུངས་པའི་ལུང་གི་དོན་ལྟར་ན། འཇིགས་པས་སྐྲག་པ་སོགས་ནས། ལྗོན་ཤིང་རྣམས་ལ་སྐྱབས་སུ་འགྲོ། །ཞེས་པའི་ཚིག་དང་། འཇིགས་པས་སྐྲག་པ་གང་གི་ཚེ་ན་མི་གང་ཞིག་མཆོག་གསུམ་ལ་སྐྱབས་སུ་སོང་ནས་ཞེས་པ་འདི་གཉིས་ཀྱིས་རྒྱུ་བསྟན་པ་དང་། སྐྱབས་བེམ་པོ་ལས་ལྷག་པའམ་ངན་སོང་གི་སྡུག་བསྔལ་སེལ་བས་གཙོ་བོ། འགྲོ་བ་ཀུན་ལས་ལྷག་པའམ་འཁོར་བའི་སྡུག་བསྔལ་ཐམས་ཅད་སེལ་བས་མཆོག་དེར་བརྟེན་ནས། སྡུག་བསྔལ་ཀུན་ལས་གྲོལ་བར་འགྱུར། །ཞེས་པས་འབྲས་བུ་བསྟན་པས་ན། དགོས་པ་རྒྱུ་འབྲས་གང་ལ་སྦྱར་ཀྱང་རིགས་མོད། གཞུང་འདིར་འཇིགས་པ་དྲན་པས་སྐྱབས་སུ་འགྲོ་དགོས་ཞེས་རྒྱུ་ལ་སྦྱར་བའོ། །དེ་ལྟར་ལས་འདིར་ཐེག་པ་ཆེན་པོའི་སྐྱབས་འགྲོའི་རྒྱུ་རུ་འདུས་བྱས་འཁོར་བའི་འཇིགས་པ་དྲན་པ། འདུས་མ་བྱས་མྱང་འདས་འཇིགས་པ་དྲན་པ། འཇིགས་པ་ལ་བརྟེན་ཏེ་སྙིང་རྗེ་ཆེན་པོ་བསྐྱེད་པ་གསུམ་མོ། །སྙིང་རྗེ་ཆེན་པོ་བསྐྱེད་པ་འདི་ནི་བསྟན་པ་ལས། བསམ་པ་ནི་ཐེག་པ་ཆེན་པོ་པས་ནི། སེམས་ཅན་མ་ལུས་པའི་དོན་དུ་སེམས་པའོ། །གཅིག་ནི་བདག་འབའ་ཞིག་གི་དོན་དུ་སེམས་པའོ། །ཞེས་གསུངས་པའི་ཐེག་ཆེན་གྱི་བསམ་པའི་ཁྱད་པར་སྙིང་རྗེས་གཞན་དོན་ལ་དམིགས་པ་ཡིན་ནོ། །ཐུན་མོང་གི་ལྷན་ཅིག་བྱེད་རྐྱེན་ཡོན་ཏན་དྲན་པ་ནི་བཀའ་དང་བསྟན་བཅོས་བཞིན་ནོ། །གཉིས་པ་གང་ལ་སྐྱབས་སུ་འགྲོ་བའི་ཡུལ་ལ། བརྟེན་བྱ་མིན་པའི་ཡུལ་དང་། བརྟེན་པའི་ཡུལ་གཉིས་ལས། དང་པོ་ལ་བེམ་པོ་དང་། འགྲོ་བས་བསྡུས་པའི་བརྟེན་བྱ་མིན་པ་གཉིས་ལས། བེམ་པོ་ནི། རི་དང་ནགས་ཚལ་སོགས་གོང་གི་ལུང་བཞིན་ནོ། །འགྲོ་བས་བསྡུས་པ་ལ་མི་དང་། མི་མིན་གཉིས་ལས། མི་ལ་གྲུབ་མཐས་བློ་བསྒྱུར་བ་མུ་སྟེགས་ཀྱི་སྟོན་པ་སོགས་དང་། མ་བསྒྱུར་བ། རྒྱལ་པོ་དཔོན་པོ་སོགས་དབང་ཆེ་བ་རྣམས་སོ། །མི་མིན་ནི་ལྷ་ཀླུ་སོགས་མཐོ་རིས་དང་ངན་སོང་གི་འགྲོ་བ་རྣམས་སོ། །བརྟེན་པའི་ཡུལ་ལ་གནས་སྐབས་སྐྱབས་གསུམ་དུ་བཞག་པ་དང་། མཐར་ཐུག་སྐྱབས་གཅིག་ཏུ་སྒྲུབ་པ་གཉིས་ལས། དང་པོ་ལ་ཐེག་དམན་དང་། ཐེག་ཆེན་གྱི་ལུགས་གཉིས་ཀྱི། དང་པོ་ལ། ཉན་ཐོས་བྱེ་བྲག་སྨྲ་བས་ཆོས་ལམ་བདེན་སངས་རྒྱས་དགེ་འདུན་ལ་འདོད་ཀྱི། དེ་དག་གི་གཟུགས་ཕུང་སོགས་རྟེན་དུ་སྣང་བ་རྣམ་སྨིན་ལས་སྐྱེས་པ་དེ་དག་ཏུ་མི་འདོད་དེ། མཛོད་ལས། གང་ཞིག་གསུམ་ལ་སྐྱབས་འགྲོ་བ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་པ་ལ། མདོ་སྡེ་པས་རྟེན་ལ་བརྟེན་པས་བསླབ་ཕྱིར་རྟེན་ཀྱང་དེ་དག་ཏུ་འདུ་བར་འདོད་ཅིང་གཉིས་ཀས་ཆོས་འགོག་བདེན་ལ་འཇོག་གོ། །ཐེག་ཆེན་ལུགས་ལ་མཆོག་གསུམ་སྤྱིར་བཤད་པ། བྱེ་བྲག་སོ་སོར་བཤད་པ་གཉིས་ཀྱི། དང་པོ་ལ། དཀོན་མཆོག་གསུམ་གྱི་ངོ་བོ། ངེས་ཚིག །མཚན་ཉིད་རྣམས་ཟླ་ཕྲེང་ལས་ཤེས་པར་བྱ་ཞིང་། དབྱེ་བ་ནི། བསྟན་པ་ལས། ཐེག་པ་ཆེན་པོ་པའི་གཞུང་གིས། དཀོན་མཆོག་གསུམ་འདི་ལྟ་བུ་ཡིན་ཏེ། དེ་ཁོ་ན་ཉིད་ཀྱི་དཀོན་མཆོག་གསུམ་དང་། མངོན་པར་རྟོགས་པའི་དཀོན་མཆོག་གསུམ་དང་། མདུན་དུ་བཞུགས་པའི་དཀོན་མཆོག་གསུམ་མོ། །ཞེས་གསུངས་པའི། དེ་ཁོ་ན་ཉིད་ཀྱི་སངས་རྒྱས་དཀོན་མཆོག་ནི། དེ་ཉིད་ལས། ཤེས་བྱ་ཕྱིན་ཅི་མ་ལོག་པར་མཁྱེན་པ། རྣམ་པར་མི་རྟོག་པ་གཉིས་སུ་མེད་པའི་ཡེ་ཤེས། ཆོས་ཀྱི་དབྱིངས་ལ་གནས་པ་དང་། ཞེས་གསུངས་པས། ཤེས་བྱ་བདེན་གཉིས་ཡང་དག་གཟིགས་པ་ཇི་ལྟ་ཇི་སྙེད་མཁྱེན་པའི་ཡེ་ཤེས་གཉིས་དང་། སྤྲོས་པའི་རྟོག་ཚོགས་ལས་འདས་པའི་མཁྱེན་པ་གཉིས་མེད་མཁྱེན་པའི་ཡེ་ཤེས་ཏེ་ཡེ་ཤེས་གསུམ་རྟག་མི་རྟག་གི་མཐའ་མ་གོས་པ་ཆོས་ཀྱི་དབྱིངས་ལ་དབྱེར་མི་ཕྱེད་པར་གནས་པ་སྟེ། དབྱིངས་ཡེ་ཤེས་དབྱེར་མེད་ཀྱི་ཆོས་སྐུའོ། །དེ་ཁོ་ན་ཉིད་ཀྱི་ཆོས་དཀོན་མཆོག་ནི། བསྟན་པ་ལས། ཆོས་ཀྱི་དབྱིངས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཉིད་དང་། ཞེས་པའོ། །དེ་ཁོ་ན་ཉིད་ཀྱི་དགེ་འདུན་དཀོན་མཆོག་ནི། དེ་ཉིད་ལས། མཉམ་པར་བཞག་པའི་དུས་སུ་ཆོས་ཐམས་ཅད་ནམ་མཁའི་དཀྱིལ་ལྟ་བུར་ཤེས་པའི་བྱང་ཆུབ་སེམས་དཔའ་ས་ཆེན་པོ་ལ་གནས་པ་དང་། ཞེས་གསུངས་པའོ། །ཡང་མངོན་པར་རྟོག་པའི་སངས་རྒྱས་དཀོན་མཆོག་ནི། བསྟན་པ་ལས། གཟུགས་ཀྱི་སྐུ་རྣམ་པ་གཉིས་དང་། ཞེས་གསུངས་སོ། །མངོན་པར་རྟོགས་པའི་ཆོས་དཀོན་མཆོག་ནི། དེ་ཉིད་ལས། བདེན་པ་བཞི་དང་། བྱང་ཆུབ་ཀྱི་ཕྱོགས་སུམ་ཅུ་རྩ་བདུན་དང་། ས་དང་ཕ་རོལ་དུ་ཕྱིན་པ་ལ་སོགས་པའི་ཆོས་རྒྱུད་ལ་གནས་པ་དང་། ཞེས་གསུངས་སོ། །མངོན་པར་རྟོགས་པའི་དགེ་འདུན་དཀོན་མཆོག་ནི། བསྟན་པ་ལས། སྦྱོར་བའི་ལམ་པའི་བྱང་ཆུབ་སེམས་དཔའ་དང་། ཞེས་གསུངས་པའོ། །མདུན་དུ་བཞུགས་པའི་སངས་རྒྱས་དཀོན་མཆོག་ནི། །དེ་ཉིད་ལས། རི་མོར་བྲིས་པ་དང་། འབུར་དུ་བཏོད་པ་དང་། ལུགས་མ་དང་། ལྡེར་སོ་ལ་སོགས་པ་དང་། ཞེས་གསུངས་སོ། །མདུན་དུ་བཞུགས་པའི་ཆོས་དཀོན་མཆོག་ནི། བསྟན་པ་ལས། གསུང་རབ་ཡན་ལག་དགུའི་པོ་ཏི་དང་། གླེགས་བམ་ལ་སོགས་པ་དང་། ཞེས་གསུངས་སོ ། །མདུན་དུ་བཞུགས་པའི་དགེ་འདུན་དཀོན་མཆོག་ནི། དེ་ཉིད་ལས། ཚོགས་ལམ་པའི་བྱང་ཆུབ་སེམས་དཔའ་འོ། །ཞེས་གསུངས་པའོ། །གོ་རིམ་ངེས་པ་དང་། གྲངས་ངེས་པའང་ཟླ་ཕྲེང་ལས་ཤེས་པར་བྱ་ཞིང་བྱེ་བྲག་སོ་སོར་བཤད་པའང་། དེར་དབྱེ་བ་སོ་སོ་ནས་རྒྱས་པར་བཤད་པ་ཉིད་དུ་ཤེས་པར་བྱ་ཞིང་། མཐར་ཐུག་སྐྱབས་གཅིག་ཏུ་སྒྲུབ་པའང་དེ་རུ་བཀོད་ཟིན་ཏོ། །གསུམ་པ་ཅི་ཙམ་དུ་སྐྱབས་སུ་འགྲོ་བའི་དུས་ནི། ཉིན་ཞག་གི་དང་། ཇི་སྲིད་འཚོའི་དང་། བྱང་ཆུབ་ཀྱི་མཐའ་ཅན་གསུམ་ཡོད་པ་ལ་བསྟན་པ་ལས། དུས་ནི་ཐེག་པ་ཆེན་པོ་པས་ནི་བྱང་ཆུབ་སྙིང་པོའི་བར་དུའོ། །གཅིག་ནི་ཇི་སྲིད་འཚོའི་བར་དུ་དམ་འཆའ་བའོ། །ཞེས་གསུངས་སོ། །བཞི་པ་བསྐྱབས་འགྲོ་རྒྱུད་ལ་བསྟེན་པའི་ཕན་ཡོན་ལ། སྤྱི་དོན་དང་། གཞུང་དོན་གཉིས་ཀྱི། དང་པོ་ནི། བསྟན་པ་ལས། ཕན་ཡོན་ནི་གསུམ་སྟེ། རྒྱུའི་དུས་ཀྱི་ཕན་ཡོན་དང་། ལམ་གྱི་དུས་ཀྱི་ཕན་ཡོན་དང་། འབྲས་བུའིདུས་ཀྱི་ཕན་ཡོན་ནོ། །རྒྱུའི་དུས་ཀྱི་ལ་ཚེ་འདི་དང་། ཚེ་རབས་གཞན་གྱིའོ། །ཚེ་འ དིའི་ཕན་ཡོན་ནི། འཇིགས་པ་ཆེན་པོ་བརྒྱད་ལས་ཐར་བར་བྱེད་པ་དང་། བར་ཆད་མེད་པ་དང་། བསྟན་པ་ལ་དགའ་བའི་ལྷ་དག་སྡོང་གྲོགས་བྱེད་པ་དང་། འཆི་བའི་དུས་སུ་ཡིད་དགའ་བ་ལ་སོགས་པའོ། །ཚེ་རབས་གཞན་གྱི་ནི། འཁོར་བའི་སྡུག་བསྔལ་དང་ངན་སོང་གི་སྡུག་བསྔལ་ལས་འདྲེན་པར་མཛད་པ་དང་། མྱ་ངན་ལས་འདས་པ་དང་། མཐོ་རིས་ཀྱི་བདེ་བ་རྩོལ་བའོ། །ལམ་གྱི་ཕན་ཡོན་བདེན་པ་བཞི་དང་། འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཡན་ལག་བདུན་ལ་སོགས་པ་ལ་སྦྱོར་བར་མཛད་པའོ། །འབྲས་བུའི་ཕན་ཡོན་ནི། མྱ་ངན་ལས་འདས་པ་གཉིས་དང་། སྐུ་གསུམ་ཐོབ་པར་བྱེད་པའོ། །ཞེས་གསུངས་སོ། །གཞུང་དོན་ལ་ལྔ་ལས། རྒྱུ་མཐུན་གྱི་འབྲས་བུར་གྱུར་པའི་ཕན་ཡོན་ལ་གཉིས་ལས། མྱོང་བ་རྒྱུ་མཐུན་ནི། གསུམ་ལ་སྐྱབས་བྱས་པས་རིམ་བཞིན། །རང་ཉིད་སངས་རྒྱས་ཆོས་འཁོར་བསྐོར། །འཕགས་ཚོགས་དགེ་འདུན་ལྡན་པའོ། །བྱེད་པ་རྒྱུ་མཐུན་ནི། ཚེ་རབས་ཐམས་ཅད་དུ་མུ་སྟེགས་པའི་སྤྱོད་པ་ལས་ལོག་ཅིང་སངས་རྒྱས་པའི་ཆོས་བཞིན་སྤྱོད་པ་ཅན་དུ་སྐྱེ་བ་ཡིན་ནོ། །དེའང་མུ་སྟེགས་ལ་ཆད་ལྟ་སྡེ་གཅིག །རྟག་ལྟ་སྡེ་བཞིའི་དང་པོ་རྒྱང་འཕེན་པ་སྟེ། འདིའི་གྲུབ་མཐའ་ལྷའི་བླ་མ་དྲང་སྲོང་ཕུར་བུས་བྱས་ཤིང་། ལུས་བུམ་པ་རྩིག་པ་ལྟ་བུར་གློ་བུར་བར་འཇོག་སྟེ། གློ་བུར་དང་གཉུག་མའི་དོན། ཐོག་མཐའ་གཉིས་ཀ་མེད་པ་གཉུག་མ། མུ་གཞན་གསུམ་གློ་བུར་བར་འཇོག་པ་ལས། ལུས་སེམས་ལ་ཐོག་མཐའ་གཉིས་ཀ་ལྡན་པས་གློ་བུར་བ་ཡིན་པ་ལྟར་སེམས་ཅན་ཀྱང་གློ་བུར་བར་སྒྲུབ་བྱེད། ཚུལ་གསུམ་ནི། བུམ་པ་ཆོས་ཅན། ལུས་སེམས་རྫས་གཅིག་གི་སྐྱེས་བུ་དང་བུམ་པ་གང་རུང་གི་ཟླ་དང་བཅས་པ་ཡིན་ཏེ། ཨུཏྤལ་མ་ཡིན་པའི་དངོས་པོ་ཡིན་པའི་ཕྱིར། རྩིག་རྩར་བུམ་པ་བཞག་པ་བཞིན། ཅེས་རྫ་མཁན་དང་བཟོ་བོས་ལྟོ་ལྡིར་སོགས་ས་དང་རྡོ་དུ་མ་བརྩིག་པར་བྱས་པ་བུམ་རྩིག་ཞིག་ན་རྒྱུན་འཆད་པ་གློ་བུར་ལ། ཐོག་མཐའ་མེད་འཇུག་ཨུཏྤལ་ནི་རྒྱུན་ལྡན་གྱི་ཆོས་གཉུག་མ་སྟེ། རྟགས་སུ་དེ་བཀོད་པས་རིགས་འདྲ་གཞན་ས་ལུའི་ས་མྱུག་སོགས་གོ་བྱེད་ཚིག་སྦྱོར་བཅུ་ལས་ཕྱོགས་མཚམས་སྟོན་པའི་སྦྱོར་བ་སྟེ། རིགས་འདྲ་གཅིག་གིས་ཐམས་ཅད་གོ་བ་ལས་རིགས་ཀྱི་ཚད་འཛིན་སྤྱི་མིན་པའོ། །དེ་དགག་པ་ནི་བཟློག་ན་འགྲུབ་སྟེ། ཨུཏྤལ་ཆོས་ཅན། ལུས་སེམས་རྫས་ཐ་དད་ཀྱི་སྐྱེས་བུའི་སེམས་རྒྱུན་ལྡན་དང་། ཨུཏྤ ལ་གང་རུང་གི་ཟླ་དང་བཅས་པ་ཡིན་ཏེ། བུམ་པ་མ་ཡིན་པའི་དངོས་པོ་ཡིན་པའི་ཕྱིར། རྡོའི་རྩར་ཨུཏྤལ་སྐྱེ་བ་བཞིན། ཞེས་རྡོ་རྒྱུན་ལྡན་ནོ། །ཚུལ་གསུམ་འགོད་ཚུལ་འདིའི་སྦྱོར་བ་ཤིན་ཏུ་ལེགས་ཤིང་རྟོགས་དཀའ་བ་ཞིག་སྟེ་ཐུན་མོང་དུ་འགྱུར་རོ། །རྟག་ལྟ་སྡེ་བཞིའི་འདོད་ཚུལ་སོགས་ཁྱད་པར་འཕགས་བསྟོད་བཞིན་ལས། འགོག་ཚུལ་ནི། ད་ལྟར་གྱི་ཤེས་པ་མི་རྟག་པར་སྣང་བ་ཆོས་ཅན། གྲངས་ཅན་ནམ་སེར་སྐྱས་བདག་ཤེས་རིགས་ལྡན་པར་བརྟགས་པ་དང་ད་ལྟའི་ཤེས་པ་གང་རུང་གི་ཟླ་དང་བཅས་པ་ཡིན་ཏེ། ནམ་མཁའ་མིན་པའི་དངོས་པོ་ཡིན་པའི་ཕྱིར། གློག་གི་རྩར་ད་ལྟའི་ཤེས་པ་བཞག་པ་བཞིན་ནོ། །ཡང་། བུམ་པ་ཆོས་ཅན་བྱེ་བྲག་པའམ་གཟེགས་ཟན་པས་བདག་བེམ་པོར་བརྟགས་པ་དང་བུམ་པ་གང་རུང་གི་ཟླ་དང་བཅས་པ་ཡིན་ཏེ། སེམས་པ་མིན་པའི་དངོས་པོ་ཡིན་པའི་ཕྱིར། ཤིང་གི་རྩར་བུམ་པ་བཞག་པ་བཞིན་ནོ། །ཡང་། མྱུ་གུ་འཇིག་སྡོང་པོའི་དབྱིབས་སྐྱེ་བ་ཆོས་ཅན། གཅེར་བུས་ལུས་ཚད་བཞིན་སྲོག་རྟག་པ་ཞུམ་རྒྱས་སུ་འདོད་པ་དང་། མྱུ་གུ་འཇིག་སྡོང་དབྱིབས་སྐྱེ་བ་གང་རུང་གི་ཟླ་དང་བཅས་པ་ཡིན་ཏེ་གནམ་ལྕགས་ཀྱི་རྡོ་ལ་རི་མོ་བྲིས་པ་མིན་པའི་དངོས་པོ་ཡིན་པའི་ཕྱིར། ཆུའི་དབུ་བ་ཆུང་ངུ་འཇིག་ཆེན་པོར་སྐྱེ་བའི་མི་རྟག་པའི་རྩར་མྱུ་གུ་འཇིག་སྡོང་དབྱིབས་སྐྱེ་བ་བཞག་པ་བཞིན་ནོ། །ཡང་། ས་ལའི་ས་བོན་ཆོས་ཅན། ཁྱབ་འཇུག་པའམ་བྲམ་ཟེས། འགྲོ་བའི་རྒྱུ་སྐྱེས་བུ་རྟག་པར་འདོད་པ་དང་། ས་བོན་མི་རྟག་པ་གང་རུང་གི་ཟླ་དང་བཅས་པ་ཡིན་ཏེ། ཁྱབ་འཇུག་གི་ཕ་དངོས་མེད་ཉིད་དེ་མིན་པ་རྒྱུ་མིན་པ་མིན་པའི་ཕྱིར། སེར་པོར་འགྱུར་བའི་ལོ་མ་སྔོན་པོའི་རྩར་ས་བོན་བཞག་པ་བཞིན་ནོ། །རྣམ་སྨིན་གྱི་འབྲས་བུར་གྱུར་པའི་ཕན་ཡོན་ནི། ངན་སོང་གསུམ་གྱི་སྡུག་བསྔལ་འདྲེན་པར་མཛད་པས་དེ་གསུམ་དུ་མི་སྐྱེ་ཞིང་མཐོ་རིས་ཀྱི་བདེ་བ་རྩོལ་བའོ། །བྱེད་པའི་འབྲས་བུར་གྱུར་པའི་ཕན་ཡོན་ལ་བཞི་ལས། རྟེན་དུ་འགྱུར་བར་བྱེད་པ་ནི། བསྟན་པ་ལས། ལས་ནི་བྱང་ཆུབ་ཀྱི་སེམས་ཀྱི་ལྗོན་ཤིང་སྐྱེ་བའི་རྩ་བར་གྱུར་པ་དང་། ཐར་པའི་གྲོང་ཁྱེར་ཆེན་པོའི་སྒོར་གྱུར་པ་དང་། བསྙེན་གནས་ལ་སོགས་པའི་སྡོམ་པ་ཐམས་ཅད་ཀྱི་རྟེན་བྱེད་པའོ། །ཞེས་གསུངས་པ་བཞིན་བསྙེན་གནས་སོགས་སོ་ཐར་རིགས་བརྒྱད་དང་། བྱང་སེམས་ཀྱི་སྡོམ་པ་དང་ཐར་པའི་སྒོ་འབྱེད་པའི་རྟེན་སྐྱབས་འགྲོ་ཁོ་ནའོ། །བར་ཆད་མེད་པར་བྱེད་པ་ནི། འཇིགས་ཆེན་བརྒྱད་དང་། བདུད་དང་བདུད་རིས་ཀྱི་འབྱུང་པོའི་བར་ཆད་ཀྱིས་མི་ཚུགས་ལ་བསྟན་ལ་དགའ་བའི་ལྷས་སྲུང་སྐྱོབ་བྱེད་པའོ། །ནད་ཉུང་བར་བྱེད་པ་ནི། ནང་འབྱུང་འཁྲུགས་པ་དང་། ཕྱིའི་འགོ་ནད་སེལ་བའོ། །ཚེ་རིང་བར་བྱེད་པ་ནི་ཚེ་དང་ལས་དང་བསོད་ནམས་ལ་སྟོབས་བསྐྱེད་དེ་ཡུན་རིང་གནས་ཤིང་འཆི་བའི་ཚེའང་འཁྲུལ་སྣང་སོགས་མེད་ཅིང་ཡིད་དགའ་བ་དང་དཀོན་མཆོག་གསུམ་གྱི་སྣང་བ་དང་མི་འབྲལ་ཞིང་སྙིང་རྗེ་སོགས་དགེ་སེམས་ཀྱི་དུས་བྱེད་པའོ། །བྲལ་བའི་འབྲས་བུར་གྱུར་བའི་ཕན་ཡོན་ནི། ལམ་གསུམ་གྱིས་བསྡུས་པའི་འཁོར་བ་སྡུག་བསྔལ་པའི་འཁོར་བ་སྡུག་བསྔལ་གྱི་རང་བཞིན་ཉོན་མོངས་པའི་སྒྲིབ་པའམ་ཤེས་བྱའི་སྒྲིབ་པ་གཉིས་པོ་འབྱང་བའོ། །བདག་པོའི་འབྲས་བུར་གྱུར་པའི་ཕན་ཡོན་ནི། །བདེན་བཞི་འཕགས་ལམ་ཡན་ལག་བརྒྱད་བྱང་ཆུབ་ཀྱི་ཡན་ལན་བདུན་སོགས་ལ་སྦྱོར་བར་མཛད་པས་ཚོགས་གཉིས་རྫོགས་པར་རང་རྒྱུད་ལ་སོགས་པ་རྒྱུ་མ་ཚང་བ་མེད་པ་ལས་འབྲས་བུ་ལྷག་བཅས་ལྷག་མེད་ཀྱི་མྱང་འདས་གཉིས་དང་སངས་རྒྱས་སྐུ་གསུམ་ཐོབ་པའོ། །དེའང་ཐེག་ཆེན་གྱིས་སྤྲུལ་སྐུ་ལྷག་བཅས། ཆོས་ལོངས་གཉིས་ལྷག་མེད་དུ་བཞེད་དོ། །ལྔ་པ་སྐྱབས་འགྲོ་མི་ཉམས་པར་བྱེད་པ་བསླབ་བྱ་ནི། བསྟན་པ་ལས། བསླབ་པ་ནི་ཐུན་མོང་དང་ཐུན་མོང་མ་ཡིན་པ་སྟེ་བླ་མའི་ཞལ་སྔ་ནས་ཤེས་པར་འགྱུར་རོ། །ཞེས་གསུངས་པ་ལྟར། ཐུན་མོང་མ་ཡིན་པ་སྐྱབས་གསུམ་སོ་སོའི་བསླབ་བྱ་དང་། ཐུན་མོང་གི་བསླབ་བྱ་བཤད་པ་གཉིས་ལས། དང་པོ་ལའང་། རྩ་བའི་བསླབ་བྱ་གསུམ་སོ་སོར་དང་། ཡན་ལག་གི་བསླབ་བྱ་གསུམ་སོ་སོར་བཤད་པ་གཉིས་ཀྱི། དང་པོ་ལ་གསུམ་ལས། སངས་རྒྱས་ཀྱི་རྩ་བའི་བསླབ་བྱ་ནི། དགག་བྱ་གནོད་སྦྱིན། འགོག་ཚུལ་སྐྱབས་སུ་མི་བརྟེན་གུས་པས་ཕྱག་མི་འཚལ་ལོ། །ཆོས་ཀྱི་རྩ་བའི་བསླབ་བྱ་ནི། དགག་གཞི་སེམས་ཅན་ཐམས་ཅད་ལ། དགག་བྱ་ལུས་ངག་གི་མི་དགེ་བདུན་གྱི་འཚེ་བ་དང་། ཡིད་ཀྱི་གནོད་སེམས་འགོག་ཚུལ་རིམ་པ་བཞིན་འཚེ་བ་སྤང་བ་དང་། བརྩེ་བའི་སྙིང་རྗེ་བསྐྱེད་དོ། །ལོག་ལྟ་མི་བགྲངས་པ་ནི་སྐྱབས་འགྲོའི་གཏོང་རྒྱུ་ཡིན་པས་ཏེ། ཀུན་མཁྱེན་ཆེན་པོས། གཏོང་རྒྱུ་བཏགས་པ་ཁས་ལེན་འདས་པ་དང་། །མཚན་ཉིད་པ་ནི་ལོག་ལྟ་སྐྱེས་པས་གཏོང་། །ཞེས་སོ། །བརྣབ་སེམས་ནི་བསྡམ་བྱའི་ཉེས་པའོ། །དགེ་འདུན་གྱི་རྩ་བའི་བསླབ་བྱ་ནི། དགག་གཞི་བདག་དང་གཞན་གྱི་ཡུལ། དགག་བྱ་སྡིག་པ་ཅན་གྱི་གང་ཟག་སྟེ། འདི་ལ་གཉིས། ཆོས་སྒོར་ཞུགས་པ་དང་། ཆོས་སྒོར་མ་ཞུགས་པའི་སྡིག་པ་ཅན་ནོ། །དང་པོ་ལའང་གཉིས་ཏེ། ཕྱི་རོལ་པའི་ཆོས་ལ་ཞུགས་པ་ད ང་། ནང་པའི་ཆོས་ལ་ཞུགས་པའི་སྡིག་ཅན་ནོ། །དང་པོ་ནི་ཏལྐ་སྡེ་ལྔའོ། །གཉིས་པ་ལའང་གཉིས་ཏེ། ལུང་གི་ཆོས་ལོག་པར་སྤྱོད་པ་དང་། རྟོགས་པའི་ཆོས་ལོག་པར་སྤྱོད་པ་གཉིས་ཀྱི། དང་པོ་ནི། སྡེ་སྣོད་གསུམ་གྱི་ཚིག་དཀྲུགས་པའོ། །གཉིས་པ་ནི། ཉོན་མོངས་རྣམ་རྟོག་མ་སྤངས་པར་འགོག་བདེན་སྟོང་ཉིད་ཡོད་པར་རློམ་པ་དང་། ལམ་བདེན་ལྟ་སྒོམ་སྤྱོད་གསུམ་ཕྱིན་ཅི་ལོག་ཏུ་སྤྱོད་པ་འདུལ་རྫུ་འདུལ་ལོག་སོགས་སོ། །ཆོས་སྒོར་མ་ཞུགས་པའི་སྡིག་ཅན་ཀྱང་གཉིས་ཏེ། ཆོས་ཀྱི་མིང་ཁས་མི་ལེན་ཅིང་། །སྟོན་པ་ཐ་དད་པ་ཁས་ལེན་པའི་ལུགས་དང་། ཆོས་མ་ཡིན་པ་ལ་གནས་པའི་སྐྱེ་བོའོ། །དང་པོ་ནི། ཀླ་ཀློ་སྟག་གཟིག་པ་སྟེ་འདྲེ་གདོན་ལྷའི་གཟུགས་སུ་འཆོས་པ་དང་། ཤི་གཤེད་གཤིན་པོའི་གཟུགས་སུ་རྫུར་འཇུག་པ་དང་། སེམས་ཅན་གསོད་པའི་དམར་མཆོད་སོགས་བྱེད་པ་སྟེ་ཞང་ཞུང་དང་བོད་དུ་དར་བའོ། །གཉིས་པ་ནི། སྡོམ་མིན་ལ་དང་། བར་མའི་སྡིག་པར་གནས་པའོ། །དེ་དག་འགོག་ཚུལ་ལ། དང་པོ་རྣམས་ནི་ཚུལ་འདི་ཤེས་པས་ཁེགས་ཏེ་མཁས་པ་དང་། གྲུབ་པའི་མངོན་ཤེས་དང་། རྫུ་འཕྲུལ་དང་། ནུས་སྟོབས་ཆེ་བ་དང་། སྐྱེ་བོ་ཕལ་པར་ཐམས་ཅད་མཁྱེན་པ་ཡིན་པའི་གུས་པ་དང་། ཐམས་ཅད་མཁྱེན་པ་ཐམས་ཅད་མཁྱེན་པ་མིན་པར་ལྟ་བ་དང་། བླ་མའི་ཞབས་ཏོག་ཡུན་རིང་སྒྲུབ་པ་དང་། རིགས་རྒྱུད་དམ་གདུང་མཐོ་བ་ནི་དགེ་སློང་ལེགས་པའི་སྐར་མ་ལ་ཡོད་པ་ཡིན་ཏེ་རིམ་པར་སྡེ་སྣོད་བཅུ་གཉིས་བཤད་པ་སངས་རྒྱས་ལས་ཁོ་མཁས་པར་རློམ་པ་དང་། སྔོན་གྱི་སྐྱེ་རབས་འགའམ་མ་འོངས་ལུང་སྟོན་པའམ་ཡི་དྭགས་སུ་སྐྱེས་པའི་གཅེར་བུ་བསྡུག་བསྔལ་འགྱུར་མཐོང་ནས་ལྷན་ཅིག་གཏམ་སྨྲ་བ་དང་། ནམ་མཁའ་ལ་བྱ་ལྟར་འཕུར་བས་དཀོན་བརྩེགས་ལས། དགེ་སློང་སྐར་བཟང་ནམ་མཁའ་ལ་འགྲོ་བ་ལ་ལྟོས་ཤིག །ཅེས་གསུངས་པ་དང་། མུ་སྟེགས་སྟོང་ཚར་བཅད་ནས་ནང་པར་བཀོད་པ་དང་། གཅེར་བུ་བ་སྡུག་བསྔལ་འགྱུར་གསོན་ཚེ་ཐམས་ཅད་མཁྱེན་པར་འཇོག་པ་དང་། བཅོམ་ལྡན་འདས་གླེན་རྨོངས་སུ་རྩི་བ་དང་། ལོ་ཉི་ཤུ་རྩ་བཞིར་སངས་རྒྱས་ཀྱི་ཉེ་གནས་བྱས་པ་དང་། བཅོམ་ལྡན་འདས་ཀྱི་སྐུ་མཆེད་དུ་གྱུར་པ་ལྟ་བུ་དེ་རྣམས་ལ་ཡང་ཡོན་ཏན་ལྟར་སྣང་བ་ཅི་ཡོད་ཀྱང་སྙིང་པོ་མེད་པར་ཤེས་ནས་ཡིད་དགའ་བ་བྱས་ནས་དང་། ལུས་ངག་གིས་བག་ཕེབས་ནས་འགྲོགས་པ་མིན་ནོ། །གཉིས་པ་རྣམས་ནི་ཡིད་དང་ལུས་ངག་གིས་དེ་བཞིན་མི་འགྲོགས་པས་འགོགས་པའོ། །དགག་པའི་བསླབ་བྱ་གསུམ་དེ་རྩ་བ་ཡིན་ཡན་ལག་མིན་པའི་མུའོ། །གཉིས་པ་ཡན་ལག་གི་བསླབ་བྱ་གསུམ་སོ་སོར་བཤད་པ་ལའང་གསུམ་ལས། སངས་རྒྱས་ལ་སྐྱབས་སུ་སོང་བའི་ཡན་ལག་གི་བསླབ་བྱ་ནི། གང་ལ་གུས་པ་སྒྲུབ་ན་སྐུ་གཟུགས་ཚིགས་བཅད་ལྷན་པ་སེར་པོ་བཏབ་པ་ལའོ། །གང་གིས་ན་དད་མོས་སོ། །ཚུལ་ཇི་ལྟར་ན་སྟོན་པར་བརྟགས་པས་སོ། །ཆོས་ལ་སོང་བའི་ཡན་ལག་གི་ནི། གང་ལ་ན་བདེ་བར་གཤེགས་པའི་ཞལ་གསུངས་ཐེག་རིམ་དགུའི་ཆོས་མཐའ་དག་གདུལ་བྱ་ཐ་དད་དང་། ཐར་འདོད་རེ་རེའི་རྟོག་པའི་སྤྲོས་པ་རིམ་པར་གཅོད་བྱེད་ཀྱི་ལམ་མཆོག་ཏུ་གྱུར་པ་ལའོ། །ཚུལ་ཇི་ལྟར་ན་རྒྱ་གར་དུ་ཉན་ཐོས་ཁོ་ནའི་ལུགས་བཟུང་ནས་ཐེག་ཆེན་གྱི་ཆོས་སྐུར་འདེབས་ཀྱིས་སྤོང་བ་ཡོད་ཀྱང་བོད་འདིར་ཐེག་དམན་དུ་ཁས་ལེན་པ་ལྟ་ཞོག །ཐེག་ཆེན་སེམས་ཙམ་གྱི་གྲུབ་མཐའ་ཡིན་པར་ཁས་མི་ལེན་ཅིང་དབུ་མ་ཆེན་པོ་དང་སྔགས་ཀྱི་ཆོས་རློམ་སེམས་ཀྱི་རྒྱུར་གྱུར་ཏེ། གང་ཟག་རང་བློར་མི་ཤོང་བའི་བཀའ་བསྟན་ཚད་མར་གྱུར་བའི་མདོ་རྒྱུད་མང་པོ་སྐུར་འདེབས་ཀྱིས་སྤོང་བ་ནི། བཞི་བརྒྱ་པ་ལས། སེམས་ཅན་རློམ་པ་ཅན་མིན་དཀོན། །རློམ་ཅན་སྙིང་རྗེ་ལྡན་པ་མེད། །དེས་ན་སྣང་བ་ནས་སྣང་བར། །འགྲོ་བ་ཤིན་ཏུ་རྙེད་དཀར་གསུངས། །ཞེས་གསུངས་ན། སོ་སྐྱེ་རྟོག་སྐྱོན་ཅན་གྱི་རྗེས་སུ་འབྲངས་ཏེ་མ་རྟོགས་ཕྱོགས་རྟོགས་ལོག་རྟོགས་ཀྱིས་སྐུར་བ་མི་གདབ་པར་ཤེས་རབ་གསུམ་གྱིས་གུས་པས་སྤྱི་བོར་བླང་བའོ། །དགེ་འདུན་ལ་སོང་བའི་ནི། གང་ལ་ན་སྤྱིར་མཐོ་རིས་དང་ངན་སོང་གི་འགྲོ་བ་གཉིས་སམ། ཆོས་ཞུགས་ཚུལ་ལྡན་དང་ཚུལ་འཆལ་གཉིས་ལྟ་བུ་གང་ཟག་དག་མ་དག་ལའོ། །ཚུལ་ཇི་ལྟར་ན། དམ་པ་བྱང་ཆུབ་སེམས་དཔའ་ལ་སོགས་འཕགས་པའི་དགེ་འདུན་མ་ངེས་པའི་ཕུང་པོར་གནས་པ་ཡིན་པ་བལྟ་བར་བྱ་སྟེ་མ་དག་པ་ངན་སོང་ལས་བྱང་ཆུབ་སེམས་དཔའ་ཁྱིའི་སྐྱེ་བ་བཞེས་པ་ཞིག་གིས་རྟའི་ཤིང་རྟ་ལ་དགའ་བའི་རྒྱལ་པོ་བཏུལ་བར་སློབ་དཔོན་ཟླ་གྲགས་ཀྱིས་བཞི་བརྒྱ་པའི་འགྲེལ་དུ་བཀོད་པ་ལྟར་རོ། །སྒྲུབ་པའི་བསླབ་བྱ་གསུམ་དེ་ཡན་ལག་ཡིན་རྩ་བ་མིན་པའི་མུས་བསྡུས་སོ། །གཉིས་པ་ཐུན་མོང་གི་བསླབ་བྱ་བཤད་པ་ནི། གྲངས་ལྔ་ལས་ལུས་སྲོག་ཕྱིར་ཡང་གསུམ་མི་སྤང་བ་འདིའི་བཟློག་ཕྱོགས་ནི་སྐྱབས་སྡོམ་གཏོང་བྱེད་དུ་ངེས་ཤིང་། དུས་འདིར་རྐྱེན་རྣམས་ཅི་བྱུང་ཡང་མགོན་སྐྱབས་གཞན་དུ་བཙལ་བ་མིན་པའི་བཟློག་ཟླ་ཡང་གཏོང་བྱེད་ཡིན་པ་བྱུང་བའི་སྐྱོན་ནི། བསྟན་པ་ལས། ཉེས་དམིགས་ནི་གཉིས་ཏེ་སྐྱབས་ཉམས་པའམ། མི་ཤེས་པའོ། །སྤངས་པའམ་ཉམས་པ་ནི་ཇི་སྐད་དུ་ཟླ་གྲངས་ཀྱི་ཞལ་སྔ་ནས། རྟེན་གྱི་དམ་པས་བླངས་ནས་ནི། །སླར་ཡང་དམན་ལ་བསྟན་གྱུར་ན། །ཉེས་བཅས་ཕྱོགས་ལ་གནས་པས་ན། །དེ་ན་དམ་པས་བཞད་གད་འགྱུར། ཞེས་གསུངས་ཏེ་མཚོན་པ་ཙམ་མོ། །ཞེས་གསུངས་པ་ཉེས་དམིགས་གཉིས་ནི། སྐྱབས་ཀྱི་མཆོག་སྤངས་ཏེ་འཇིག་རྟེན་པའི་ལྷ་སོགས་དམན་པ་སྐྱབས་སུ་བཙལ་ན་སྐྱབས་ཉམས་པའོ། །དམན་པ་དེ་དག་ལ་ཟག་མེད་ཀྱི་ཡོན་ཏན་དང་བྲལ་བ་སྒྲིབ་པའི་སྐྱོན་མང་པོ་དང་བཅས་པས་སྐྱབས་མི་ནུས་པའི་ཁར་གནོད་པ་དང་སྡིག་པ་སྐྱེད་ཅིང་། སྐྱོབ་པའི་ཐབས་ཡང་དག་པ་སྒྲུབ་ཚུལ་མ་རྨོངས་པས་མི་ཤེས་པའོ། །ཆེ་བའི་ཡོན་ཏན་རྟག་ཏུ་དྲན་པ་དང་། ཟས་དག་གིས་རྟག་ཏུ་མཆོད་པ་དང་། དབང་རབ་ཀྱི་ཆུ་བོའི་རྒྱུན་བཞིན་རྒྱུན་གྱི་སྐྱབས་འགྲོ་བརྗོད་པར་བྱ་དགོས་པ་དང་། འབྲིང་གི་དུས་དྲུག་བརྗོད་པའི་རྒྱུན་གྱི་ཚུལ་ལ་མི་འདའ་བ་དང་། ཐ་མས་དུས་གསུམ་སོགས་བརྗོད་པའི་རྒྱུན་གྱི་ཚུལ་ལ་གནས་དགོས་ཤིང་། རྒྱུན་དུ་གཞན་ལའང་སྐྱབས་འགྲོ་བྱེད་པའི་སྐུལ་མ་གདབ་དགོས་སོ། །ལྔ་པོ་དེའི་དང་པོ་གཉིས་རྩ་བ་དང་གསུམ་ཡན་ལག་ཏུ་འགྱུར་བས་རྩ་བ་ཡན་ལག་གཉིས་ཀའི་བསླབ་བྱ་ཡིན་པའི་མུའོ། །དྲུག་པ་སྐྱབས་སྡོམ་རང་རྒྱུད་ལ་ཆོ་གས་བླང་བའི་ཚུལ་ནི། བསྟན་པ་ལས། ཚུལ་ནི་སྐྱབས་སུ་འགྲོ་བའི་ཆོ་ག་ཡིན་ཏེ། དེ་ནི་བླ་མ་ལ་ཞུ་བར་བྱའོ། །ཞེས་གསུངས་པའི་ཆོ་ག་ལ་མ་ཐོབ་པ་གསར་དུ་ལེན་ཚུལ། ཐོབ་ཟིན་ཡང་ཡང་ལེན་ཚུལ་གཉིས་ཀྱི། སྔ་མ་ལ། དང་པོ་གསར་དུ་རང་སྟོབས་ཀྱི་ཤེས་པས་ལེན་པ་དང་། གཞན་སྟོབས་ཀྱི་བྱ་བས་ལེན་པ་ན། སྦྱོར་བ་ཚོགས་བསགས་པ། དངོས་གཞི་སྐྱབས་སུ་འགྲོ་བ། མཇུག་ཡིད་དམ་དངོས་སུ་ཐབས་ལེགས་བྱ་བའོ། །ཕྱི་མ་ནི་ཚེ་འདིར་འཇིགས་བརྒྱད་དང་ཚེ་རབས་གཞན་དུ་ངན་སོང་འཁོར་བའི་འཇིགས་པ་རང་གཞན་ལ་འབྱུང་བའི་དོགས་པ་སྐྱེས་པའམ། དངོས་སུ་བྱུང་བའི་ཚེ་རྒྱུ་སྐུལ་བ་ཡིན་པར་ཤེས་པས་སྐྱབས་འགྲོ་བྱེད་པའོ། །སྐྱབས་འགྲོ་དེ་རྒྱུད་ལ་སྐྱེས་པའི་ཚད་ནི་ཇི་ལྟ་བུ་ཞེ་ན། བསྟན་པ་ལས། ཚད་ནི་ཁས་བླངས་པ་དང་། སྐྱབས་བྱེད་པ་དང་། རྣམ་པར་རིག་བྱེད་སྐྱེས་པའོ། །ཞེས་གསུངས་པ་ལྟར། བསམ་པས་སྐྱབས་གནས་སུ་རྟེན་པར་བྱེད་པའི་བློ་སྐྱེ་བའི་རྣམ་འགྱུར་ལུས་ལ་བྱུང་བ་མིག་གིས་རིག་ཅིང་མཐོང་དུ་ཡོད་པ་དང་། བརྗོད་པས་སྐྱབས་སུ་ཁས་བླངས་པའི་ཚིག་གི་ཚོགས་རང་གཞན་གྱི་རྣ་བར་སྒྲའི་རྣམ་པར་རིག་ཅིང་ཐོས་པར་བྱེད་པ་སྟེ། མངོན་མཛོད་རང་འགྲེལ་ལས་ཀྱང་སྐྱབས་སུ་འགྲོ་བའི་མཚན་ཉིད་ཅི་ཞེ་ན། ངག་གི་རྣམ་པར་རིག་བྱེད་དག་ཀྱང་ཡིན་ནོ། །ཞེས་གསུངས་སོ། །དེ་ཡན་གྱིས་སྐྱབས་འགྲོ་བསྟན་པ་ལས་ཇི་སྐད་གསུངས་པའི་སྡོམ་དོན་རྣམས་རྫོགས་པར་ཡན་ལག་དྲུག་པོར་སྦྱར་བ་གྲུབ་ལ་སྡོམ་ནི་བསྟན་པ་ལས། རྟེན་དང་གནས་དང་བསམ་པ་དང་། །དུས་དང་རང་བཞིན་ཚད་དང་ནི། ཚུལ་དག་བསླབ་པ་ངེས་པའི་ཚིག །ལས་དང་དཔེ་དང་དབྱེ་བ་དང་། །ཉེས་དམིགས་དགོས་པ་ཕན་ཡོན་ཏེ། །རྣམ་པ་བཅོ་ལྔ་དག་ཏུ་བརྗོད། །ཅེས་གསུངས་པ་བཞིན་ནོ། །སྨྲས་པ། ཕན་པའི་ཆོས་ཀྱང་དམྱལ་སོགས་འཇིགས་སྟེར་གྱི། །རྙེད་སོགས་གསོག་སྲུང་ཆེད་དུ་བསྟེན་གྱུར་ལས། །སྲིད་འབྱོར་རྫུན་ཆེན་བདེན་བདེན་འདྲར་བྱུང་ཀུན། །ཟ་བྱེད་སྲིན་མོས་བསུ་ཚེའི་འཛུམ་དཀར་བཞིན། །འབྱུང་པོ་མྱུར་སྟོབས་ལྷ་མི་བཙན་ཕྱུག་ཆེའི། །ཝུ་བ་བདག་གཅེས་ཞེན་འཐུག་རླུང་ཅན་རྣམས། །ཆུ་བོ་བཞིར་བྱིངས་བྱིས་གཞན་མཐོ་ལེགས་ཀྱི། །སྐམ་སར་འཁྲིད་ནུས་སྐྱབས་སུ་ཇི་ལྟར་འགྱུར། །དེའི་ཕྱིར་མི་རྟག་སྡུག་བསྔལ་སྲིན་མོའི་ཚང་། །འཁོར་བའི་འཇིགས་ལས་རང་གཞན་བརྒལ་འདོད་ཅིང་། །རྟག་བརྟན་བདེ་སྦྱིན་མཆོག་གསུམ་སྐྱབས་བསྟེན་པར། །བློ་རྩེ་གཉིས་སྤངས་གཅིག་ཏུ་འདྲིལ་བར་རིགས། །བདག་བློ་བྱིས་སྐྱོན་རློམ་སེམས་ཆེ་བས་ནི། །འཕགས་གཞུང་ཚིག་དོན་རང་བཟོས་དཀྲུགས་པའི་སྡིག །ཤེས་རབ་ཆུང་བས་དོན་ཟབ་སྤང་བའི་ཉེས། །མངོན་སུམ་ཡོངས་གཟིགས་རྒྱལ་སྲས་སྤྱན་སྔར་བཤགས། །འདི་ལྟར་བརྩོན་བྱས་བསོད་ནམས་གྱུར་གྱི་སྣང་། །ཟླ་འོད་བས་ཆེས་གསལ་དེས་བདེ་གཤེགས་བསྟན། །ཕྱོགས་བཅུར་འཕེལ་གནས་འགྲོ་ཀུན་མཐོ་རིས་དང་། །ཐར་པའི་རྒྱུ་འབྲས་ཁོ་ནས་འཚོ་བར་ཤོག །ཅེས་པ་འདི་ཡང་དཔལ་གྱི་སེང་གེའི་མིང་དུ་འབོད་པས་སྦྱར་བའོ། །དགེའོ། །དགེའོ། །དགེའོ།། །། སྐྱབས་འགྲོ་ཡན་ལག་དྲུག་པའི་སྤྱི་དོན། དཔལ་གྱི་སེང་གེསྐྱབས་འགྲོ་ཡན་ལག་དྲུག་པའི་སྤྱི་དོན་བཞུགས་སོ། །དཔལ་ལྡན་བླ་མ་དམ་པ་རྣམས་དང་དཀོན་མཆོག་བླ་མེད་གསུམ་ལ་ཕྱག་འཚལ་ལོ། །དེ་ཡང་ཀློང་ཆེན་རབ་འབྱམས་པའི་ཞལ་ནས། ཐར་པའི་ལམ་ལ་རིམ་གྱིས་བསླབ་པར་བྱ། །ལམ་རྣམས་ཀུན་གྱི་གཞི་རྟེན་སྐྱབས་སུ་འགྲོ། །ཞེས་གསུངས་པ་བཞིན། ཐར་པ་དང་ཐམས་ཅད་མཁྱེན་པའི་ལམ་རྣམས་ཀུན་གྱི་ཐོག་མ་འབྱུང་ཁུང་གི་གཞིར་གྱུར་པ། བར་དུ་གནས་པའི་རྟེན་དུ་གྱུར་པ་སྐྱབས་འགྲོའི་རྣམ་བཞག་ལེགས་པར་བསྟན་པ་པཎ་ཆེན་བི་མ་ལ་མི་ཏྲའི་སྐྱབས་འགྲོ་ཡན་ལག་དྲུག་པའི་བསྟན་བཅོས་འདི་བཤད་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ཡོད་པ་ལ། དང་པོ་ལ། མཚན་སྨོས་པ་དང་། མཆོད་པར་བརྗོད་པ་དང་། རྩོམ་པར་དམ་བཅའ་བ་གསུམ་གྱི། ཕྱི་མའི་སྐབས་སུ་སྐྱབས་འགྲོ་ཞེས་པ་ལ་ལྔ་ལས། སྐྱབས་འགྲོའི་ངོ་བོ་ནི། འདོད་པའི་དད་པ་དང་མོས་པའོ། །ངེས་ཚིག་ནི། ས་ར་ཎཾ་ཞེས་པའི་སྒྲ་སྐྱབས་སུ་བྱེད་པའམ་རྟེན་དུ་བྱེད་པའམ་དཔུང་གཉེན་དུ་བྱེད་པ་ལ་འཇུག་གོ། །མཚན་ཉིད་ལ། སྤྱིའི་མཚན་ཉིད་ནི། འཇིགས་པ་སྤང་བའི་དོན་དུ་སྐྱབས་གནས་ལ་བརྟེན་པར་དམ་བཅའོ། །ཁྱད་པར་ཐེག་ཆེན་སྐྱབས་འགྲོའི་མཚན་ཉིད་ནི། སེམས་ཅན་ཐམས་ཅད་ཀྱི་དོན་དུ་རང་ཉིད་སངས་རྒྱས་ཐོབ་པ་འདོད་པའི་བློས་གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་སྟོན་པ་ལམ་གྲོགས་སུ་ཁས་ལེན་པའོ། །དབྱེ་ན་རྒྱུ་དང་འབྲས་བུའི་སྐྱབས་འགྲོ་གཉིས་སོ། །རང་བཞིན་ནི། སྐྱབས་སུ་འགྲོ་བའི་འཁོར་གསུམ་གྱི་དམིགས་པ་རྣམ་པར་དག་པ་འོད་གསལ་སྤྲོས་བྲལ་གྱི་དོན་ལ་མཉམ་པར་འཇོག་པའོ། །བར་དུ་དགེ་བ་གཞུང་གི་དོན་ལ་རྩ་བའི་སྡོམ་བསྟན་པ་དང་། སྡོམ་གྱི་དོན་རྒྱས་པར་བཤད་པ་གཉིས་ཀྱི། ཕྱི་མ་ལ་དྲུག་ལས། ཅིའི་འགྲོ་དགོས་པ་རྒྱུའི་སྐབས་སུ་ལྔ་སྟེ། རྒྱུའི་ངོ་བོ་ནི། རྟེན་ཅིང་འབྲེལ་བའོ། །ངེས་ཚིག་ནི། རང་འབྲས་སྒྲུབ་བྱེད་དུ་འཇུག་ཅིང་རྒྱུ་བས་ནའོ། །མཚན་ཉིད་ནི། རང་འབྲས་སྒྲུབ་བྱེད་དུ་གྱུར་པ་རྒྱུའི་མཚན་ཉིད་དོ། །དབྱེ་ན་ཉེར་ལེན་དང་། ལྷན་ཅིག་བྱེད་རྐྱེན་གྱི་རྒྱུ་གཉིས་ཀྱི། རེ་རེ་ལའང་གཉིས་གཉིས་ཡོད་པ་ལས། སྐྱབས་འགྲོའི་སྐབས་འདིར། བརྒྱུད་པའི་ཉེར་ལེན་བདེ་གཤེགས་སྙིང་པོའོ། །དངོས་ཀྱི་ཉེར་ལེན་དད་མོས་སོ། །ཐུན་མོང་མ་ཡིན་པའི་ལྷན་ཅིག་བྱེད་རྐྱེན་འཇིགས་པ་དྲན་པའོ། །ཐུན་མོང་གི་ལྷན་ཅིག་བྱེད་རྐྱེན་ཡོན་ཏན་དྲན་པའོ། །རང་བཞིན་ནི། སྐྱེ་བ་མེད་པའོ། །ཡུལ་གྱི་སྐབས་སུ་ལྔ་སྟེ། ཡུལ་གྱི་ངོ་བོ་ནི། ཕྱོགས་བཅུ་ཐམས་ཅད་ན་ཡོད་པའོ། །ངེས་ཚིག་ནི། དམིགས་བྱར་གྱུར་པས་སོ། །མཚན་ཉིད་ནི། ཤེས་པའི་དམིགས་བྱར་བྱ་བ་ཡུལ་གྱི་མཚན་ཉིད་དོ། །དབྱེ་ན་བསྟེན་བྱར་གྱུར་པའི་ཡུལ་དང་། སྤང་བྱར་གྱུར་པའི་ཡུལ་གཉིས་ལས། སྐྱབས་འགྲོའི་སྐབས་འདིར། བསྟེན་བྱ་བསླུ་བ་མེད་པའི་ཡུལ་དཀོན་མཆོག་གསུམ་ལ་ཐེག་དམན་ཐེག་ཆེན་སྐྱབས་ཡུལ་གྱི་ཁྱད་པར་གཉིས་ཡོད་པ་ལས། ཐེག་དམན་གྱི་སྐྱབས་སུ་འགྲོ་བའི་ཡུལ་སངས་རྒྱས་དཀོན་མཆོག་ནི་སྤྲུལ་སྐུ་ཁོ་ན་ལས་ལོངས་སྐུ་དང་ཆོས་སྐུ་གཞན་ཡོད་པར་མི་འདོད། སྤྲུལ་སྐུ་དེའང་ལྷག་བཅས་ཀྱི་དུས་ན་ལས་ཀྱི་རྣམ་སྨིན་མ་སྤངས་ཤིང་ལྷག་མེད་དུ་འགྲོ་དོན་རྒྱུན་ཆད་པར་འདོད། བྱང་སེམས་འཕགས་པ་ཡང་སངས་རྒྱས་ཁོངས་སུ་གཏོགས་པར་འདོད། ཉན་ཐོས་ཕལ་ཆེར་གྱི་ཉན་རང་དགྲ་བཅོམ་པའང་སངས་རྒྱས་སུ་གཏོགས་པར་འདོད། ཆོས་དཀོན་མཆོག་གི་འགོག་བདེན་མྱ་ངན་ལས་འདས་པ་ཁོ་ནར་འདོད། དགེ་འདུན་དཀོན་མཆོག་ནི་རྒྱུན་ཞུགས། ཕྱིར་འོང་། ཕྱིར་མི་འོང་། དེ་དག་ལ་ཞུགས་གནས་གཉིས་གཉིས་སུ་ཕྱེ་བས་དྲུག །དགྲ་བཅོམ་ཞུགས་པ་དང་བདུན་དུ་འདོད་དོ། །དེ་ཡང་མཛོད་ལས་ནི། གང་ཞིག་གསུམ་ལ་སྐྱབས་འགྲོ་ལ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་པ་ཁ་ཆེ་བྱེ་བྲག་སྨྲ་བའི་ཉན་ཐོས་པའི་ལུགས་ཡིན་ཏེ། སངས་རྒྱས་སུ་བྱེད་པའི་ཆོས་མི་སློབ་པས་བསྡུས་པའི་ལམ་བདེན་སངས་རྒྱས་དཀོན་མཆོག་གམ། །དགེ་འདུན་དུ་བྱེད་པའི་ཆོས་སློབ་མི་སློབ་གཉིས་ཀས་བསྡུས་པའི་ལམ་བདེན་དགེ་འདུན་དཀོན་མཆོག་གམ། སངས་རྒྱས་དགེ་འདུན་ཐམས་ཅད་ཀྱི་ཐུགས་རྒྱུད་ཀྱི་འགོག་བདེན་མྱ་ངན་ལས་འདས་པ་ཆོས་དཀོན་མཆོག་ཏུ་བཞེད་དོ། །དེ་དག་ལས་ཁྱད་པར་དུ་གྱུར་པ་ཐེག་ཆེན་གྱི་སྐྱབས་ཡུལ་ལ། །གནས་སྐབས་སྐྱབས་གསུམ་དུ་བཞག་པ་དང་། མཐར་ཐུག་སྐྱབས་གཅིག་ཏུ་སྒྲུབ་པ་གཉིས་ལས། དང་པོ་ལ་མཆོག་གསུམ་སྤྱིར་བསྟན་པ་དང་། བྱེ་བྲག་སོ་སོར་བཤད་པ་གཉིས་ཀྱི། དང་པོ་ལ་དྲུག་སྟེ། དཀོན་མཆོག་གསུམ་གྱི་ངོ་བོ་ནི། དམ་པའི་ཆོས་དང་འཕགས་པའི་གང་ཟག་གོ། །ངེས་ཚིག་ནི། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཉིད་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །མཚན་ཉིད་ནི། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་གསུངས་པ་བཞིན། ཐར་འདོད་རྣམས་ཀྱི་སྐྱབས་བླ་ན་མེད་པ་དཀོན་མཆོག་གསུམ་གྱི་མཚན་ཉིད་དོ། །དབྱེ་ན་སངས་རྒྱས་ཆོས་དང་དགེ་འདུན་གསུམ་མོ། །གྲངས་ངེས་ནི། རྒྱུད་བླ་མ་ལས། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱིས་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་སོ། །གོ་རིམ་ངེས་པ་ནི། དེ་ཉིད་ལས། སངས་རྒྱས་ལས་ཆོས་ཆོས་ལས་འཕགས་པའི་ཚོགས། །ཞེས་སོ། །གཉིས་པ་ལ་གསུམ་སྟེ། སངས་རྒྱས་དང་། ཆོས་དང་། དགེ་འདུན་དཀོན་མཆོག་བྱེ་བྲག་ཏུ་བཤད་པ་ལས། དང་པོ་ལ་ལྔ་སྟེ། སངས་རྒྱས་དཀོན་མཆོག་གི་ངོ་བོ་ནི། སྤངས་རྟོགས་མཐར་ཕྱིན་པའི་འཕགས་པའི་གང་ཟག་གོ །ངེས་ཚིག་ནི། བུདྡྷ་ཞེས་པའི་སྒྲ་ཆོས་ཐམས་ཅད་ཐུགས་སུ་ཆུད་ཅིང་མ་ལུས་པར་བྱང་ཆུབ་པ་ལའང་འཇུག །དེ་ཡང་སྐྱབས་འགྲོ་བདུན་ཅུ་པ་ལས། དུས་གསུམ་ལམ་ལས་ངེས་གྲོལ་ཞིང་། །མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ནི་བློ་རྒྱས་ཕྱིར། །སངས་རྒྱས་པདྨ་ལྟར་རྣམ་རྒྱས། །ཞེས་སོ། །མཚན་ཉིད་ནི། སྟོན་པ་བླ་ན་མེད་པ་གང་ཞིག་དོན་གཉིས་མཐར་ཕྱིན་པ་སངས་རྒྱས་དཀོན་མཆོག་གི་མཚན་ཉིད་དེ། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་སོ། །དབྱེ་ན་རྟེན་སྐུ་བཞིའམ་གསུམ་དང་། བརྟེན་པ་ཡེ་ཤེས་ལྔ་དང་། མཛད་པ་ཕྲིན་ལས་གཉིས་ཏེ་གསུམ་གྱི། དང་པོ་ལ་དབྱེ་བ་གྲངས་ངེས་གཉིས་ལས། དབྱེ་བ་ནི། དབྱིངས་དག་མཉམ་སྤྲོས་བྲལ་ངོ་བོ་ཉིད་སྐུ། ཡེ་ཤེས་ཀྱི་རང་བཞིན་ཡོན་ཏན་ཕུན་སུམ་ཚོགས་པ་ཆོས་སྐུ། ངེས་པ་ལྔ་ལྡན་གྱི་བདག་ཉིད་ལོངས་སྐུ། བཟོ་དང་སྐྱེ་བ་བྱང་ཆུབ་མཆོག་གི་རྣམ་པར་འཕྲུལ་པ་སྤྲུལ་སྐུའོ། །དེ་དག་གསུམ་དུ་འདུའོ། །གྲངས་ངེས་ནི། རང་གཞན་གྱི་དོན་ཕུན་སུམ་ཚོགས་པ་ལ་ལྟོས་ཏེ་སྐུ་གསུམ་དུ་ངེས་སོ། །གཉིས་པ་ནི། སྟོབས་དང་མི་འཇིགས་ལ་སོགས་འཕགས་ཆོས་ཐམས་ཅད་སྐྱེ་ཞིང་འབྱུང་བའི་དབྱིངས་སྐྱེ་མེད་སྤྲོས་བྲལ་ཆོས་དབྱིངས་ཡེ་ཤེས། ཤེས་བྱའི་གཟུགས་བརྙན་ཐམས་ཅད་ཅིག་ཅར་སྣང་བ་རང་བྱུང་འོད་གསལ་འགག་མེད་ཆེན་པོ་མེ་ལོང་ལྟ་བུའི་ཡེ་ཤེས། འདི་གཉིས་ཆོས་སྐུས་བསྡུས་སོ། །བྱམས་དང་ཐུགས་རྗེ་ཆེན་པོས་རྟག་ཏུ་གང་ཞིང་བདག་གཞན་ཆགས་སྡང་བྲལ་བ་མཉམ་ཉིད་ཡེ་ཤེས། གཟུངས་དང་ཏིང་འཛིན་བསམ་གཏན་སྙོམས་འཇུག་ཀུན་གྱི་གཞིར་གྱུར་ཅིང་ཤེས་བྱ་ཀུན་ཐོགས་མེད་འབྱེད་པ་སོར་རྟོག་ཡེ་ཤེས། འདི་གཉིས་ལོངས་སྐུས་བསྡུས་སོ། །འཇིག་རྟེན་གྱི་ཁམས་ཀུན་ཏུ་ཐབས་སྣ་ཚོགས་དཔག་ཏུ་མེད་པས་སེམས་ཅན་མང་པོའི་དོན་མཛད་པའི་གཞིར་གྱུར་པ་བྱ་གྲུབ་ཡེ་ཤེས། འདི་སྤྲུལ་སྐུས་བསྡུས་སོ། །གསུམ་པ་མཛད་པ་ཕྲིན་ལས་གཉིས་ནི། སངས་རྒྱས་རང་ངོར་ལྟོས་པ་ལྷུན་གྱིས་གྲུབ་པ་དང་རྒྱུན་མི་འཆད་པའི་མཛད་པའོ། །གདུལ་བྱ་གཞན་ངོར་ལྟོས་པ་ལམ་གྱི་རྟེན་དང་། ལམ་དངོས་དང་། ལམ་གྱི་འབྲས་བུར་འགོད་པ་རྣམས་སོ། །རང་བཞིན་ནི། ཤེས་དང་ཤེས་བྱ་ལས་རྣམ་པར་གྲོལ་བའི་ཆོས་ཉིད་དོ། །ཆོས་དཀོན་མཆོག་བྱེ་བྲག་ཏུ་བཤད་པ་ལ་ལྔ་སྟེ། ཆོས་དཀོན་མཆོག་གི་ངོ་བོ་ནི། ཚིག་དང་དོན་དུ་གནས་པའི་དམ་ཆོས། ངེས་ཚིག་ནི། དྷརྨ་ཞེས་པའི་སྒྲ་འཛིན་པ་ལ་འཇུག །དེ་ཡང་སྐྱབས་འགྲོ་བདུན་ཅུ་པ་ལས། སྔོན་མེད་པ་ལས་སླར་བྱུང་ཞིང་། །བྱུང་ནས་ཀྱང་ནི་ཡང་དག་མེད། །རང་གི་མཚན་ཉིད་འཛིན་པས་ཆོས། །དོན་དམ་པ་ནི་མི་བརྗོད་དོ། །ཞེས་སོ། །མཚན་ཉིད་ནི། སྐྱོབ་པ་བླ་ན་མེད་པ་གང་ཞིག་བདེན་པ་དམ་པ་གཉིས་ལ་བརྟེན་པའི་ཚིག་དོན་དུ་གྱུར་པ་ཆོས་དཀོན་མཆོག་གི་མཚན་ཉིད་དེ། རྒྱུད་བླ་མ་ལས། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱི། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཞེས་སོ། །དབྱེ་ན་ལུང་དང་རྟོགས་པའི་ཆོས་གཉིས་ཀྱི། ལུང་གི་ཆོས་ལའང་། སྤྱིར་གསུང་རབ་ཡན་ལག་བཅུ་གཉིས་དང་། བྱེ་བྲག་ཏུ་སྡེ་སྣོད་གསུམ་དང་བདུན་ཏེ་གཉིས་སུ་ཡོད་པ་ལས། དང་པོ་ནི། བརྒྱད་སྟོང་པའི་འགྲེལ་པ་སྙིང་མཆོག་ལས། མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟར་བྱུང་བ་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པ་དག །གསུང་རབས་ཡན་ལག་བཅུ་གཉིས་ཡིན། །ཞེས་པ་དེ་དག་ཀྱང་སྡེ་སྣོད་གསུམ་དུ་འདུའོ། །གཉིས་པ་ནི། སྐྱབས་འགྲོ་བདུན་ཅུ་པ་ལས། ཉན་ཐོས་རྣམས་ཀྱི་དབང་བྱས་ནས། །སྡེ་སྣོད་གསུམ་དུ་བསྟན་པ་ཡིན། །བྱང་ཆུབ་སེམས་དཔའི་གནས་སྐབས་ཀྱིས། །ངེས་པ་དེ་ནི་ཡོད་མིན་ཏེ། །འཕགས་པ་ནུབ་ཀྱི་རིར་བཤད་དང་། །ཤར་གྱི་རི་པའི་ཉན་ཐོས་པས། །བྱང་ཆུབ་སེམས་དཔའི་དབང་བྱས་ནས། །སྡེ་སྣོད་བདུན་དུ་བཤད་པ་ཡིན། །བྱང་ཆུབ་སེམས་དཔའི་སྡེ་སྣོད་དང་། །དེ་བཞིན་རིག་འཛིན་ཞེས་བྱ་དང་། །མདོ་སྡེ་ཆོས་མངོན་འདུལ་བ་དང་། །རྒྱས་དང་དེ་བཞིན་སྐྱེས་པའི་རབས། །དེ་ལྟར་སྡེ་སྣོད་བདུན་པོ་ནི། །ལུང་ནི་གཉིས་ལས་བསྟན་པ་ཡིན། །གང་ལ་དེ་ནི་ཚད་མིན་གྱུར། །དེས་ནི་དགྲ་བཅོམ་སྤང་བ་ཉིད། །ཅེས་སོ། །རྟོགས་པའི་ཆོས་ལ་ས་དང་ལམ་གྱི་རང་བཞིན་གཉིས་སུ་ཡོད་པ་ལས། དང་པོ་ནི། རིན་ཆེན་ཕྲེང་བ་ལས། ཇི་ལྟར་ཉན་ཐོས་ཐེག་པ་ལས། །ཉན་ཐོས་པ་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལས། །བྱང་ཆུབ་སེམས་དཔའི་ས་བཅུའོ། །ཞེས་གསུངས་པ་ལྟར། ཉན་ཐོས་ཀྱི་ས་བརྒྱད་ནི། རིགས་ཀྱི་ས། བརྒྱད་པའི་ས། མཐོང་བའི་ས། བསྲབ་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། ཉན་ཐོས་ཀྱི་ས། རང་སངས་རྒྱས་ཀྱི་ས་རྣམས་སོ། །བྱང་ཆུབ་སེམས་དཔའི་ས་བཅུ་ནི། ས་དང་པོ་རབ་ཏུ་དགའ་བ་སྟེ། འདིར་ཡོན་ཏན་བརྒྱ་ཕྲག་བཅུ་གཉིས་སྐད་ཅིག་གཅིག་ལ་མངོན་དུ་བྱེད་པ་ནི། སངས་རྒྱས་བརྒྱ་མཐོང་། དེ་དག་གིས་བྱིན་གྱིས་བརླབས་པར་ཤེས། བསྐལ་པ་བརྒྱར་གནས་པ་སྟོན། སྔོན་དང་ཕྱི་མའི་མཐའ་བརྒྱར་མངོན་ཤེས་འཇུག །ཏིང་ངེ་འཛིན་བརྒྱར་མཉམ་པར་འཇོག་ཅིང་ལྡང་། ཞིང་ཁམས་བརྒྱ་གཡོ་ནུས། ཞིང་བརྒྱ་འོད་ཀྱིས་སྣང་བར་བྱེད། སེམས་ཅན་བརྒྱ་སྨིན་པར་བྱེད། ཞིང་བརྒྱར་འགྲོ། ཆོས་སྒོ་བརྒྱ་འབྱེད། ལུས་བརྒྱ་སྟོན། ལུས་རེ་རེ་ལ་འཁོར་བརྒྱས་བསྐོར་བ་སྟོན་པའོ། །ས་གཉིས་པ་དྲི་མ་མེད་པར་སྟོང་ཕྲག་བཅུ་གཉིས། ས་གསུམ་པ་འོད་བྱེད་པར་འབུམ་ཕྲག་བཅུ་གཉིས། ས་བཞི་པ་འོད་འཕྲོ་བར་བྱེ་བ་ཕྲག་བཅུ་གཉིས། ས་ལྔ་པ་སྦྱངས་དཀའ་བར་བྱེ་བ་སྟོང་ཕྲག་བཅུ་གཉིས། ས་དྲུག་པ་མངོན་དུ་གྱུར་པར་བྱེ་བ་འབུམ་ཕྲག་བཅུ་གཉིས། ས་བདུན་པ་རིང་དུ་སོང་བར་བྱེ་བ་ཁྲག་ཁྲིག་འབུམ་ཕྲག་བཅུ་གཉིས། ས་བརྒྱད་པ་མི་གཡོ་བར་སྟོང་ཆེན་འཇིག་རྟེན་འབུམ་ཕྲག་གཅིག་གི་རྡུལ་གྲངས་དང་མཉམ་པའི་ཡོན་ཏན་བཅུ་གཉིས་ཐོབ། །ས་དགུ་པ་ལེགས་པའི་བློ་གྲོས་སུ་སྟོང་ཆེན་གྱི་འཇིག་རྟེན་གྲངས་མེད་པ་འབུམ་ཕྲག་བཅུ་གཉིས་ཀྱི་རྡུལ་དང་མཉམ་པའི་ཡོན་ཏན་བཅུ་གཉིས་པོ་ཐོབ། ས་བཅུ་པ་ཆོས་ཀྱི་སྤྲིན་དུ་སངས་རྒྱས་ཞིང་བརྗོད་དུ་མེད་པའི་རྡུལ་དང་མཉམ་པའི་ཡོན་ཏན་བཅུ་གཉིས་པོ་ཐོབ་བོ། །གཉིས་པ་ལམ་ལྔ་ལས། ཚོགས་ལམ་ལ་ཆེ་འབྲིང་ཆུང་གསུམ་ཡོད་པ་ལ། ཚོགས་ལམ་ཆུང་ངུ་ལ་བཞི་སྟེ། དམིགས་པ་ནི། བདག་གི་གནས་དང་ལོངས་སྤྱོད་དང་། །བདག་དང་ཀུན་ནས་ཉོན་མོངས་པའམ། །རྣམ་པར་བྱང་བའི་དངོས་པོ་བཞིའོ། །ངོ་བོ་ཤེས་རབ་དང་དྲན་པའོ། །བསྒོམ་ཚུལ་ནི། ནང་གི་ལུས་སོགས་ལ། ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེར་བཞག་བཞི་བསྒོམ་པའོ། །འབྲས་བུ་ནི། ཕྱིན་ཅི་ལོག་བཞི་སྤོང་བ་དང་བདེན་བཞི་ལ་འཇུག་པ་ལུས་སོགས་དང་བྲལ་བའོ། །ཚོགས་ལམ་འབྲིང་པོ་ལའང་བཞི་སྟེ། དམིགས་ཡུལ་ནི། མི་མཐུན་ཕྱོགས་དང་གཉེན་པོའི་ཕྱོགས་བཞིའོ། །ངོ་བོ་ནི་བརྩོན་འགྲུས་པོ། །སྒོམ་པ་ནི། གནོད་སེམས་སོགས་སྒྲིབ་པ་ལྔ་མི་དགེ་བ་མ་སྐྱེས་པ་མི་སྐྱེད་པ་དང་། སྐྱེས་པ་རྒྱུན་གཅོད་པ་དང་། དགེ་བ་མ་སྐྱེས་པ་སྐྱེད་པ་དང་། སྐྱེས་པ་སྤེལ་བའི་ཕྱིར་འདུན་པ་བསྐྱེད་དོ། །འབད་དོ། །བརྩོན་འགྲུས་བརྩམ་མོ། །སེམས་རབ་ཏུ་འཛིན་ཏོ། །སེམས་རབ་ཏུ་འཇོག་གོ། །ཞེས་པ་བརྩོན་འགྲུས་བསྒོམ་པ་གནས་དང་བཅས་པ་ཡིན་ནོ། །འབྲས་བུ་ནི། མི་མཐུན་ཕྱོགས་ཀུན་ཉམས་པ་དང་། གཉེན་པོ་ཐོབ་པ་དང་འཕེལ་བའོ། །ཚོགས་ལམ་ཆེན་པོ་ལ་བཞི་སྟེ། དམིགས་པ་ནི། ཏིང་ངེ་འཛིན་གྱིས་བསྒྲུབ་པར་བྱ་བའོ། །ངོ་བོ་ནི་ཏིང་ངེ་འཛིན་ནོ། །བསྒོམ་ཚུལ་ནི། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ། སེམས་དཔའི་ཏིང་ངེ་འཛིན། དཔྱོོད་པའི་ཏིང་ངེ་འཛིན། བརྩོན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་སྟེ་བཞིའི་ཚུལ་གྱིས་སོ། །དེ་ཡང་སྤོང་བའི་འདུ་བྱེད་བརྒྱད་ནི། ལེ་ལོའི་གཉེན་པོ་བརྩོན་འགྲུས། བརྩོན་འགྲུས་ཀྱི་རྒྱུ་དད་པ་དང་འདུན་པ། འབྲས་བུ་ཤིན་སྦྱངས། གདམས་ངག་བརྗེད་པའི་གཉེན་པོ་དྲན་པ། བྱིང་རྒོད་ཀྱི་གཉེན་པོ་ཤེས་བཞིན། འདུ་མི་བྱེད་པའི་གཉེན་པོ་སེམས་པ། འདུ་བྱེད་པའི་གཉེན་པོ་བཏང་སྙོམས་ཡིན་ནོ། །བསྒོམ་པའི་འབྲས་བུ་ནི། ཏིང་ངེ་འཛིན་རྣམ་པར་དག་པས་མངོན་པར་འདོད་པའི་རྫུ་འཕྲུལ་སོགས་འགྲུབ་པའོ། །སྦྱོར་ལམ་ཆུང་འབྲིང་ཆེ་གསུམ་གྱི་ཆུང་ངུ་དྲོད་རྩེ་གཉིས་སུ་དབང་པོ་ལྔ་ཡོད་པ་དེ་ལ་བཞི་སྟེ། དམིགས་པ་ནི། འཕགས་པའི་བདེན་པ་བཞི་ཡིན་ནོ། །ངོ་བོ་ནི་དད་སོགས་བཞིའོ། །བསྒོམ་པ་ནི། དད་པའི་དབང་པོ་བདེན་པ་རྣམས་ལ་མངོན་པར་ཡིད་ཆེས་པའི་ཚུལ་གྱིས་བསྒོམ། བརྩོན་འགྲུས་ཀྱི་དབང་པོ་བདེན་པ་མངོན་པར་རྟོགས་ཕྱིར་སྤྲོ་བའི་ཚུལ་གྱིས་བསྒོམ། དྲན་པའི་དབང་པོ་བདེན་པ་རྣམས་ལ་ཉེ་བར་གནས་པ་མི་བརྗེད་པའི་ཚུལ་གྱིས་བསྒོམ། ཏིང་ངེ་འཛིན་གྱི་དབང་པོ་བདེན་པ་ལ་སེམས་རྩེ་གཅིག་པའི་ཚུལ་གྱིས་བསྒོམ། ཤེས་རབ་ཀྱི་དབང་པོ་རབ་ཏུ་རྣམ་པར་བྱེད་པའི་ཚུལ་གྱིས་བསྒོམ་པ་ཡིན་ནོ། །འབྲས་བུ་ནི། བདེན་པ་མྱུར་དུ་མངོན་སུམ་རྟོགས་པར་བྱེད་དོ། །སྦྱོར་ལམ་འབྲིང་བཟོད་པ་དང་ཆེན་པོ་ཆོས་མཆོག་གཉིས་སུ་མི་མཐུན་ཕྱོགས་ཀྱིས་མི་བརྫི་ཞིང་མི་མཐུན་ཕྱོགས་ངེས་པར་སྲབ་པར་བྱེད་པ་སྟོབས་ལྔ་ཡོད་པའི་དམིགས་པ་སོགས་དབང་པོ་ལྔ་དང་འདྲའོ། །མཐོང་ལམ་ཡེ་ཤེས་བཅུ་དྲུག་གི་བདག་ཉིད་སྐྱེ་བའི་ཚེ་ན། བྱང་ཆུབ་ཀྱི་ཡན་ལག་སོགས་བདུན་ཡོད་པ་ལའང་བཞི་སྟེ། དམིགས་པ་ནི། འཕགས་པའི་བདེན་པ་བཞིའི་ཆོས་ཉིད་ཇི་ལྟར་གནས་པའོ། །ངོ་བོ་ནི། དྲན་པ་ཡང་དག་བྱང་ཆུབ་ཀྱི་ཡན་ལག་སོགས་བདུན་ནོ། །དེ་ཡང་ལྔའི་ཚུལ་གྱིས་ཡན་ལག་ཏུ་འགྱུར་ཏེ། རང་བཞིན་གྱི་ཡན་ལག་ཆོས་རབ་རྣམ་འབྱེད། གནས་ཀྱི་ཡན་ལག་དྲན་པ། ངེས་འབྱུང་གི་ཡན་ལག་བརྩོམ་འགྲུས། ཕན་ཡོན་གྱི་ཡན་ལག་དགའ་བ། ཉོན་མོངས་པ་མེད་པའི་ཡན་ལག་གསུམ་ལས། ཤིན་སྦྱང་ཉོན་མོངས་མེད་པའི་གཞི་ཡིན་ལ། ཏིང་ངེ་འཛིན་ཉོན་མོངས་མེད་པའི་གནས་ཡིན་ཅིང་། བཏང་སྙོམས་ཉོན་མོངས་མེད་པའི་ངོ་བོ་ཡིན་ནོ། །བསྒོམ་ཚུལ་ནི། དྲན་པ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བའི་གཉེན་པོ་ཡོངས་སུ་དབང་བསྒྱུར་བར་བསྒོམ་པ་སྟེ་གཞན་ལའང་སྦྱར་རོ། །འབྲས་བུ་མཐོང་སྤང་རྣམས་སྤོང་བ་ཡིན་ལ། དེ་ཡང་མཐོང་སྤང་ངོས་བཟུང་བ་དང་། ཇི་ལྟར་སྤོང་ཚུལ་བསྟན་པ་གཉིས་ཀྱི། དང་པོ་ལ། སྤྱིར་ཐར་པ་ལ་བར་དུ་གཅོད་པ་ཉོན་སྒྲིབ། ཐམས་ཅད་མཁྱེན་པ་ལ་བར་དུ་གཅོད་པ་ཤེས་སྒྲིབ་གཉིས་ཡོད་པའི། ཉོན་སྒྲིབ་ཀུན་བརྟགས་མཐོང་སྤང་། ལྷན་སྐྱེས་སྒོམ་སྤང་། ཤེས་སྒྲིབ་རགས་པ་མཐོང་སྤང་། ཕྲ་བ་སྒོམ་སྤང་དུ་འཇོག་གོ། །མཐོང་སྤང་གི་ཉོན་མོངས་སྲིད་པའི་ཕྲ་རྒྱས་བཅུ་ནི། འཇིགས་ལྟ་སོགས་ལྟ་བ་ལྔ་དང་། འདོད་ཆགས་སོགས་ལྟ་མིན་ལྔ་སྟེ་བཅུའོ། །འདི་དག་བདེན་བཞི་ལ་ལོག་པར་འཇུག་ཚུལ་ལ། སྡུག་ཀུན་གཉིས་ཀྱི་དོན་རང་མཚན་མ་དམིགས། འགོག་ལམ་གཉིས་ཀྱི་མིང་ལ་དམིགས་ཤིང་གཡང་སར་འདུ་ཤེས་པས་སྐྲག་སྟེ་སྤོང་བར་བྱེད་པའི་སྒོ་ནས་ལོག་པར་འཇུག་པ་དེ་ཡང་ལྟ་བ་ལྔ་ལས། བདེན་བཞི་ལ་དམིགས་ཏེ་འཇིག་ལྟས་བདག་དང་བདག་གིར་ལྟ། མཐར་ལྟས་རྟག་ཆད་དུ་ལྟ། ལོག་ལྟས་མེད་པར་ལྟ། ལྟ་བ་དེ་རྣམས་ལ་དམིགས་ཏེ། ལྟ་བ་མཆོག་འཛིན་གྱིས་དམ་པར་ལྟ། ཚུལ་ཁྲིམས་བརྟུལ་ཞུགས་མཆོག་འཛིན་གྱིས་དག་གྲོལ་དུ་ལྟའོ། །ལྟ་མིན་ལྔ་ལས་ལྟ་བ་རྣམས་ལ་དམིགས་ཏེ། ལྟ་བ་ངན་པ་དེ་དག་ལ་འདོད་ཆགས་ཀྱིས་ཞེན་ཅིང་ཆགས། ང་རྒྱལ་གྱིས་རློམ་ཞིང་ཁེངས། ཁོང་ཁྲོས་རང་གི་ལྟ་བ་དང་མི་མཐུན་པ་ལ་ཁྲོ། བདེན་པ་དང་བཅས་ལ་དམིགས་ཏེ། མ་རིག་པས་མཚན་ཉིད་མི་ཤེས་པར་རྨོངས། ཐེ་ཚོམ་གྱིས་གཉེན་པོ་ལ་ཡིད་མི་ཆེའོ། །འདི་དག་འདོད་ཁམས་སུ་བདེན་བཞི་རེ་རེ་ལའང་བཅུ་རེ་འཇུག་པས་བཞི་བཅུ། ཁམས་གོང་མ་གཉིས་སུ་ཁོང་ཁྲོ་མ་གཏོགས་པ་དགུ་རེ་བདེན་བཞིར་འཇུག་པས་སོ་དྲུག་པ་གཉིས་ཏེ། ཐམས་ཅད་བསྡོམ་ན་མཐོང་སྤང་བརྒྱ་དང་བཅུ་གཉིས་ཡིན་ནོ། །གཉིས་པ་ཇི་ལྟར་སྤོང་ཚུལ་ནི། མཐོང་ལམ་གྱི་སྦྱོར་བ་དང་། དངོས་གཞི་ཡེ་ཤེས་བཅུ་དྲུག་མཇུག་དང་བཅས་པ་གཉེན་པོ་བཞིར་གནས་པ་ལ་བརྟེན་ཏེ། སྤོང་ལམ་བཞིའི་མཚན་ཉིད་དང་ལྡན་པས་སྤོང་སྟེ། དེ་ལ་གཉེན་པོ་བཞི་ནི། སུན་འབྱིན་པ་དང་། སྤོང་བ་དང་། རྟེན་གྱི་དང་། ཐག་བསྲིང་བའི་གཉེན་པོའོ། །སུན་འབྱིན་ལ་མགོ་གནོན་གྱི་གཉེན་པོ་དང་། རྩད་འདོན་གྱི་གཉེན་པོ་སྟེ་གཉིས་ཡོད་དོ། །སྤོང་ལམ་བཞི་ནི། སྦྱོར་ལམ། བར་ཆད་མེད་ལམ། རྣམ་གྲོལ་ལམ། ཁྱད་པར་ལམ་མོ། །དངོས་གཞི་ཡེ་ཤེས་བཅུ་དྲུག་གིས་སྤོང་ཚུལ་ཡང་། ཁམས་གོང་འོག་གི་གཉེན་པོ་སོ་སོར་སྐྱེས་པ་དང་། སྤང་བྱ་ཀུན་དྲིལ་ཏེ་ཅིག་ཆར་སྤོང་ཚུལ་གཉིས་སུ་འདོད་པ་ཡོད། སྒོམ་ལམ་དགུར་འཕགས་ལམ་ཡན་ལག་བརྒྱད་ཀྱི་དམིགས་པ་ནི། མཐོང་ལམ་གྱི་འོག་ཏུ་འཕགས་པའི་བདེན་པ་བཞིའི་ཆོས་ཉིད་ཇི་ལྟར་གནས་པའོ། །ངོ་བོ་ནི། ཡང་དག་པའི་ལྟ་བ་སོགས་བརྒྱད་དོ། །དེ་ཡང་བཞིའི་དབང་གིས་ཡན་ལག་ཏུ་འགྱུར་ཏེ། ཡོངས་སུ་གཅོད་པའི་ཡན་ལག་ཡང་དག་པའི་ལྟ་བ། གཞན་ལ་གོ་བར་བྱེད་པའི་ཡན་ལག་ཡང་དག་པའི་རྟོགས་པ། གཞན་ཡིད་ཆེས་པར་བྱེད་པའི་ཡན་ལག་ཡང་དག་པའི་ངག །ལས་མཐའ། འཚོ་བ་གསུམ་གྱིས་ལྟ་དང་ཚུལ་ཁྲིམས་འཚོ་བ་རྣམ་དག་ཏུ་ཡིད་ཆེས་པར་བྱེད་དོ། །མི་མཐུན་ཕྱོགས་ཀྱི་གཉེན་པོའི་ཡན་ལག་གསུམ་སྟེ། ཉོན་མོངས་པའི་གཉེན་པོ་ཡང་དག་པའི་རྩོལ་བ་དང་། ཉེ་ཉོན་གྱི་གཉེན་པོ་ཡང་དག་པའི་དྲན་པ། ཡོན་ཏན་ཁྱད་པར་ཅན་ལ་སྒྲིབ་པའི་གཉེན་པོ་ཡང་དག་པའི་ཏིང་ངེ་འཛིན་ཏོ། །བསྒོམ་ཚུལ་བྱང་ཆུབ་ཡན་ལག་ལྟར་རོ། །འབྲས་བུ་སྒོམ་སྤང་རྣམ་སྤོང་བ་སྟེ། དེ་ཡང་སྒོམ་སྤང་ངོས་བཟུང་བ་དང་། ཇི་ལྟར་སྤོང་ཚུལ་གཉིས། དང་པོ་ལ་ཉོན་སྒྲིབ་ལྷན་སྐྱེས་དྲུག་ནི། འཇིགས་ལྟ། མཐར་ལྟ། འདོད་ཆགས། ཁྲོང་ཁྲོ། ང་རྒྱལ། མ་རིག་པ་འདི་དག་འདོད་ཁམས་ན་ཆེ་འབྲིང་ཆུང་གསུམ་དགུ་རེ་ཡོད་པའི་ལྔ་བཅུ་རྩ་བཞི། ཁམས་གོང་མའི་ས་བརྒྱད་ན་ཁོང་ཁྲོ་མ་གཏོགས་ལྔ་རེ་ལ་ཆུང་འབྲིང་ཆེ་གསུམ་དགུར་ཕྱེ་བས། ཞེ་ལྔ་པ་བརྒྱད་ཡོད་པ་བཅས་ཐམས་ཅད་བསྡོམས་པས་སྒོམ་སྤང་བཞི་བརྒྱ་བཅུ་བཞི་ཡིན་ནོ། །གཉིས་པ་ཇི་ལྟར་སྤོང་ཚུལ་ནི། གཉེན་པོ་ཆུང་འབྲིང་ཆེ་གསུམ་དགུས་སྤང་བྱ་ཆེ་འབྲིང་ཆུང་གསུམ་དགུ་རེ་རེ་བཞིན་སྤོང་ལམ་བཞི་རེས་སྤོང་བ་ཡིན་ནོ། །མི་སློབ་ལམ་ནི། མི་སློབ་པའི་ཆོས་བཅུ་སྟེ་དེ་ཡང་ཟག་མེད་ཀྱི་ཕུང་པོ་ལྔས་བསྡུས་པའོ། །ཆོས་དཀོན་མཆོག་གི་རང་བཞིན་ནི་འོད་གསལ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དགེ་འདུན་དཀོན་མཆོག་བྱེ་བྲག་ཏུ་བཤད་པ་ལ་ལྔ་སྟེ། དགེ་འདུན་དཀོན་མཆོག་གི་ངོ་བོ་ནི། སྤངས་རྟོགས་མཐར་མ་ཕྱིན་པའི་འཕགས་པའི་གང་ཟག་གོ། །ངེས་ཚིག་སངྒ་ཞེས་པའི་སྒྲ་གཅིག་ཏུ་འདུས་ཤིང་མི་ཕྱེད་པ་ལ་འཇུག །དེ་ཡང་སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །བདུད་རྣམས་བྱེ་བ་བརྒྱ་ཡིས་ཀྱང་། །གང་ཕྱིར་དབྱེ་བ་མི་ནུས་པ། །དེ་ཕྱིར་དགེ་འདུན་ཞེས་བརྗོད་དོ། །ཞེས་སོ། །མཚན་ཉིད་ནི། འདྲེན་པ་བླ་ན་མེད་པ་གང་ཞིག་རིག་གྲོལ་གཉིས་ལ་གནས་པའི་རྒྱལ་སྲས་འཕགས་པ་དགེ་འདུན་དཀོན་མཆོག་གི་མཚན་ཉིད་དེ། རྒྱུད་བླ་མ་ལས། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་སོ། །དབྱེ་ན་ཐེག་དམན་ཉན་རང་གི་དགེ་འདུན་དང་། ཐེག་ཆེན་བྱང་ཆུབ་སེམས་དཔའི་དགེ་འདུན་གཉིས་ཀྱི། དང་པོ་ལ་ཟུང་བཞི་ཡ་བརྒྱད་ལས། མཐོང་ལམ་སྐད་ཅིག་བཅོ་ལྔ་ལ་གནས་པ་རྒྱུན་ཞུགས་ཞུགས་པ་ཡིན། བཅུ་དྲུག་པ་ལ་གནས་པ་འབྲས་གནས་སོ། །འདོད་པའི་ཉོན་མོངས་པ་འབྲིང་པོའི་འབྲིང་པོ་མན་ཆད་ཅི་རིགས་སྤང་བ་ལན་ཅིག་ཕྱིར་འོང་གི་ཞུགས་པ་ཡིན། འབྲིང་པོའི་ཆུང་ངུ་སྤང་བ་དེའི་འབྲས་གནས་སོ། །འདོད་ཉོན་ཆུང་ངུ་གསུམ་སྤང་བ་ལ་ཞུགས་པ་ཕྱིར་མི་འོང་ཞུགས་པ་ཡིན། ཆུང་ངུའི་ཆུང་ངུ་ཡང་སྤང་བ་དེའི་འབྲས་གནས་སོ། །ཁམས་གོང་མ་གཉིས་ཀྱི་ཉོན་མོངས་དགུ་རྣམས་ཕལ་ཆེར་སྤང་བ་དགྲ་བཅོམ་ཞུགས་པ་ཡིན། སྲིད་རྩེའི་ཉོན་མོངས་ཀྱང་སྤང་བ་དེའི་འབྲས་གནས་ལགས་སོ། །གཉིས་པ་ནི་ས་བཅུ་ལ་གནས་པའི་གང་ཟག་ཐམས་ཅད་ཡིན་ནོ། །རང་བཞིན་ནི། ཆོས་ཉིད་འདུས་མ་བྱས་ལ་གནས་པའོ། །གཉིས་པ་མཐར་ཐུག་སྐྱབས་གཅིག་ཏུ་སྒྲུབ་པ་ནི། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིག་དང་བཅས་པའི་ཕྱིར། ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་གནས་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་སྟེ། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཡིན། །ཅེས་སོ། །ཡུལ་གྱི་རང་བཞིན་ཤེས་བྱ་སྐྱེ་མེད་དོ། །དུས་ཀྱི་སྐབས་སུའང་ལྔ་ལས། དུས་ཀྱི་ངོ་བོ་ནི། འདུས་བྱས་རྣམས་ཀྱི་རྒྱུན་ནོ། །ངེས་ཚིག་ནི། འདུས་ཤིང་བསགས་པས་ནའོ། །མཚན་ཉིད་ནི། རྒྱུ་འབྲས་སྤྱད་ཟིན་པའམ་སྤྱད་པར་འགྱུར་བའམ། སྤྱད་བཞིན་པ་དུས་ཀྱི་མཚན་ཉིད། །དབྱེ་ན་འདས་མ་འོངས་ད་ལྟའི་དུས་གསུམ་ལས། སྐྱབས་འགྲོའི་སྐབས་འདིར། ད་ལྟ་དང་མ་འོངས་པའི་དུས་གཉིས་ཀྱིས་བསྡུས་པ། ཐེག་དམན་ལྟར་ན་འདི་ནས་ཇི་སྲིད་འཚོ་དང་ཉན་རང་གི་བྱང་ཆུབ་མ་ཐོབ་བར་དུ་ཁས་ལེན། དེ་ལས་ཁྱད་པར་དུ་ཐེག་པ་ཆེན་པོས་སངས་རྒྱས་མ་ཐོབ་བར་དུ་ཁས་ལེན་ནོ། །རང་བཞིན་ནི། འཕོ་འགྱུར་མེད་པའི་ཆོས་ཉིད་འདུས་མ་བྱས་སོ། །ཕན་ཡོན་གྱི་སྐབས་སུའང་ལྔ་ལས། ཕན་ཡོན་གྱི་ངོ་བོ་ནི། ཡིད་དུ་འོང་བའི་འབྲས་བུའོ། །ངེས་ཚིག་ནི། ཕན་པར་བྱེད་པའི་ཡོན་ཏན་དུ་གྱུར་པས་ནའོ། །མཚན་ཉིད་ནི། དགེ་བ་ལས་བྱུང་བའི་ཕན་བདེའི་སྣང་བ་ཕན་ཡོན་གྱི་མཚན་ཉིད་དོ། །དབྱེ་ན་ལྔ་སྟེ་རྒྱུ་མཐུན་གྱི་འབྲས་བུར་གྱུར་པའི་ཕན་ཡོན། རྣམ་སྨིན་གྱི་འབྲས་བུར་གྱུར་པའི་ཕན་ཡོན། །སྐྱེས་བུ་བྱེད་པའི་འབྲས་བུར་གྱུར་པའི་ཕན་ཡོན། བྲལ་བའི་འབྲས་བུར་གྱུར་པའི་ཕན་ཡོན། བདག་པོའི་འབྲས་བུར་གྱུར་བའི་ཕན་ཡོན་ནོ། །སྐྱབས་འགྲོའི་སྐབས་འདིར་ལྔ་པོ་རིམ་པ་བཞིན། མུ་སྟེགས་སྤྱོད་ལས་ལོག་པ་ཡིན། །ཞེས་དང་། གསུམ་དུ་མི་སྐྱེ་ཞེས་དང་། རྟེན་དུ་འགྱུར། །བར་ཆད་མེད་པས་ནད་ཉུང་རིང་། །ཞེས་དང་། འབྱངས་ཤིང་ཞེས་དང་། སོགས་པའི་ཕན་ཡོན་ནོ། །ཞེས་པས་བསྟན་ཏོ། །རང་བཞིན་ནི། ཆོས་ཉིད་ཟབ་མོའི་མཐུ་ལས་ཕན་བདེ་ལེགས་ཚོགས་ཐམས་ཅད་འབད་མེད་དུ་འབྱུང་བའོ། །བསླབ་བྱའི་སྐབས་སུ་ལྔ་ནི། བསླབ་བྱའི་ངོ་བོ་བག་ཡོད་བྱ་བའི་གཞིའོ། །ངེས་ཚིག་བསླབ་ཅིང་གཞོལ་བའི་གཞིར་གྱུར་པས་ནའོ། །མཚན་ཉིད་ནི། སྡོམ་པའི་ཆོ་གས་བླང་བྱར་གྱུར་པ་བསླབ་བྱའི་མཚན་ཉིད་དོ། །དབྱེ་ན་དགག་པའི་བསླབ་བྱ་དང་། བསྒྲུབ་པའི་བསླབ་བྱ་གཉིས་ལས། སྐྱབས་འགྲོའི་སྐབས་འདིར་དེ་གཉིས་ཀྱིས་བསྡུས་པ་སྐྱབས་གསུམ་སོ་སོའི་བསླབ་བྱ་དང་། ཐུན་མོང་གི་བསླབ་བྱ་གཉིས་ཀྱི། དང་པོ་ལའང་གཉིས་ཏེ། རྩ་བའི་བསླབ་བྱ་གསུམ་སོ་སོར་བསྟན་པ་དང་། ཡན་ལག་གི་བསླབ་བྱ་གསུམ་སོ་སོར་བསྟན་པའོ། །དང་པོ་ནི་སྐྱབས་གསུམ་སོགས། གཉིས་པ་ནི། སྐུ་གཟུགས་སོགས། །གསུམ་པ་ནི་ལུས་སྲོག་སོགས། རང་བཞིན་ནི། དགག་སྒྲུབ་ལས་འདས་པའི་ཆོས་ཉིད་རྣམ་པར་དག་པའོ། །བླང་བའི་སྐབས་སུ་ལྔ་ནི། བླང་བའི་ངོ་བོ་མི་ལྡོག་པའི་བརྩོན་འགྲུས་སོ། །ངེས་ཚིག་སྡོམ་པ་རང་རྒྱུད་དུ་ལེན་པས་ནའོ། །མཚན་ཉིད་ནི། རང་སྟོབས་གཞན་སྟོབས་གང་རུང་གི་ཆོ་ག་ལ་བརྟེན་ཏེ་སྡོམ་པ་རང་རྒྱུད་དུ་ལེན་པ་བླང་བའི་མཚན་ཉིད་དོ། །དབྱེ་ན་མ་ཐོབ་པ་གསར་དུ་ལེན་པ་དང་། ཐོབ་ཟིན་ཡང་ཡང་དུ་ལེན་པ་གཉིས་ཡོད་པ་ལས། སྐྱབས་འགྲོའི་སྐབས་འདིར། དང་པོ་ནི། བླང་བ་སོགས་ཀྱིས་བསྟན། གཉིས་པ་ནི། འཇིགས་པ་སོགས་ཀྱིས་བསྟན་ནོ། །རང་བཞིན་ལ། གང་ཟག་གི་བདག་མེད་པའི་ངོ་བོ་དང་། ཆོས་བདག་མེད་པའི་ངོ་བོ་གཏན་ལ་དབབ་པ་གཉིས་ལས། དང་པོ་ནི། སྐྱབས་འགྲོ་བདུན་ཅུ་པ་ལས། ཇི་ལྟར་འཁོར་ལོ་ལ་སོགས་པ། །ཉེར་བཟུང་ཤིང་རྟར་བརྟགས་པ་ནི། །རང་དང་གཞན་དུ་རྣམ་དཔྱད་པས། །རྣམ་པ་ཀུན་ཏུ་མི་དམིགས་སོ། །དེ་བཞིན་ཕུང་པོ་ནས་བརྩམས་ཏེ། །སེམས་ཅན་དུ་ནི་བརྟགས་པ་ཡང་། །ཡང་དག་གཞན་དུ་རྣམ་དཔྱད་པས། །ཅི་ནས་ཀྱང་ནི་དམིགས་མི་འགྱུར། །ཅེས་སོ། །གཉིས་པ་ནི་དེ་ཉིད་ལས། ངོ་བོ་ཉིད་ནི་རྒྱུ་རྐྱེན་ལས། །འབྱུང་བ་ཡིན་པར་རིགས་མིན་ཏེ། །རྒྱུ་དང་རྐྱེན་ལས་བྱུང་བ་ནི། །རང་བཞིན་བཅོས་མ་ཡིན་པར་འགྱུར། །ངོ་བོ་ཉིད་ནི་བཅོས་མ་རུ། །ཇི་ལྟར་ཡང་ནི་གྱུར་པ་ཡིན། །བཅོས་མ་མ་ཡིན་ངོ་བོ་ནི། །གཞན་ལ་ལྟོས་པ་ཡོད་མ་ཡིན། །ཆོས་རྣམས་ཉིད་ཀྱི་ངོ་བོ་ནི། །ཐམས་ཅད་ཡོད་པ་མ་ཡིན་ཏེ། །དེའི་ཕྱིར་སྐད་ཅིག་གཅིག་གིས་ནི། །བདེ་གཤེགས་ཐམས་ཅད་མཁྱེན་པར་འདོད། །ཅེས་སོ། །ཐ་མར་དགེ་བར་མཇུག་གི་དོན་ལ་ལྔ་སྟེ། རྩོམ་པ་པོའི་གང་ཟག་གི་ཆེ་བ་ནི། རྒྱུད་ལ་སོགས། བསྟན་བཅོས་ཇི་ལྟར་བརྩམས་ཚུལ་ནི། རྒྱལ་བློན་སོགས། ཡི་གེ་འབྲི་བ་པོའི་ལོ་ཙཱ་བསྟན་པ་ནི། ལེགས་པར་སོགས། དགེ་ཚོགས་གཞན་དོན་དུ་བསྔོ་བས་རྒྱས་གདབ་པ་ནི། བསོད་ནམས་སོགས། མཛད་པ་པོ་སློབ་དཔོན་གྱི་མཚན་དོན་བསྟན་པ་ནི། སྐྱབས་འགྲོ་སོགས་ཀྱིས་ལེགས་པར་བསྟན་ཏོ། །ཞེས་པ་འདིའང་དཔལ་གྱི་སེང་གེའི་མིང་ཅན་གྱིས་སྦྱར་བ་སྟེ་འདིས་ཀྱང་འགྲོ་བ་མ་ལུས་པ་དཀོན་མཆོག་གསུམ་ལ་གཞོལ་བར་གྱུར་ཅིག། །།དགེའོ། །དགེའོ། །དགེའོ།། །། སྐྱབས་འགྲོ་ཡན་ལག་དྲུག་པའི་བརྒྱུད་འདེབས་བསྡུས་པ་བྱིན་རླབས་དཔལ་སྐྱེད། དཔལ་གྱི་སེང་གེ༈ སྐྱབས་འགྲོ་ཡན་ལག་དྲུག་པའི་བརྒྱུད་འདེབས་བསྡུས་པ་བྱིན་རླབས་དཔལ་སྐྱེད་ཅེས་བྱ་བ་དགེ། སྟོན་མཆོག་ཤཱཀྱ་སེངྒེ་སྤྱན་རས་གཟིགས། །པཎ་ཆེན་བི་མ་ཛྙཱ་ན་ཀུ་མཱ་ར། །སོ་ཟུར་གནུབས་གསུམ་ཀུན་མཁྱེན་རོང་ཀློང་ཟུང་། །གཏེར་བདག་གླིང་པ་ལོ་ཆེན་ཆོས་དཔལ་ནས། །རྩ་བའི་བླ་མའི་བར་བྱོན་སྐྱབས་འགྲོའི་གཞུང་། །ཡན་ལག་དྲུག་པའི་ཆོས་ཀྱི་མངའ་བདག་ལ། །གསོལ་བ་འདེབས་སོ་ཐོས་བསམ་སྒོམ་སྒྲུབ་ཀྱིས། །རང་རྒྱུད་སྨིན་གྲོལ་འཆད་རྩོད་རྩོམ་པ་ཡིས། །གཞན་ཕན་བྱེད་སྟོབས་ཐུབ་བསྟན་ཇི་སྲིད་བར། །འཛམ་གླིང་མཛེས་པའི་རྒྱན་དུ་འཕེལ་རྒྱས་ཤོག །ཆོས་གྲྭ་ཆེན་པོ་ཨོ་རྒྱན་སྨིན་གྲོལ་གླིང་དུ་དཔལ་གྱི་སེངྒེས་གསོལ་བ་བཏབ་པའོ། །བཀྲ་ཤིས། །དགེའོ།། །། སྐྱབས་འགྲོ་ཡན་ལག་དྲུག་པ་ལག་ཏུ་བླང་ནས་རིམ་པར་ཀློག་པའི་ཐབས། དཔལ་གྱི་སེང་གེསྐྱབས་འགྲོ་ཡན་ལག་དྲུག་པ་ལག་ཏུ་བླང་ནས་རིམ་པར་ཀློག་པའི་ཐབས་ནི། ཐོག་མར་བརྒྱུད་འདེབས་བྱས་རྗེས། རྒྱ་གར་སྐད་དུ་ནས། སྐྱབས་འགྲོ་ཡན་ལག་དྲུག་པ་ཞེས་པའི་བར་བརྗོད་རྗེས། ཚོགས་ཞིང་གསལ་གདབ། ཨེ་མ་ཧོཿ རང་གནས་འོག་མིན་ནས། ཕྱག་འཚལ་སྐྱབས་སུ་མཆི། ཞེས་པའི་བར་བརྗོད་རྗེས། ལངས་ཏེ་ཕྱག་འཚལ་བཞིན། དཀོན་མཆོག་གསུམ་ལ་ཕྱག་འཚལ་ལོ། །དང་། ངན་སོང་གསུམ་དང་འགྲོ་བ་ལྔའི། །སྡུག་བསྔལ་མ་ལུས་སེལ་མཛད་ཅིང་། །སོགས་ཤླ་ཀ་གཅིག་དཔལ་ཇོ་བོ་ཨ་ཏི་ཤའི་སྐྱབས་འགྲོ་བསྟན་པའི་མཆོད་སྤྱོད་དུ་གསུངས་པ་འདི་དང་ལྷན་ཅིག་བརྗོད་བཞིན་ཕྱག་གང་མང་བྱས་རྗེས། ཕྱག་འཇོག་ཁར། མགོན་པོ་ཐུགས་རྗེ་ཆེ་ལྡན་པ། །སོགས་ནས། དགེ་འདུན་ལ་ཡང་ཕྱག་འཚལ་ལོ། །བར་བརྗོད་རྗེས། སྟོན་པ་བླ་མེད་སངས་རྒྱས་རིན་པོ་ཆེ། །སོགས་ཤླ་ཀ་དང་། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །སོགས་ཤླ་ཀ་བརྗོད་རྗེས། མཛད་པ་བཅུ་གཉིས་བརྗོད་རྗེས། ཟག་མེད་ཀྱི་ཆོས་སྡེ་ཉེར་གཅིག་མདོ་རྒྱན་ནས་གསུངས་པ་གོ་རིམ་མི་འདྲ་བ། སྐྱབས་འགྲོ་འདི་བཤད་པའི་དབང་དུ་བྱས་ཤིང་། ཕར་ཕྱིན་དྲུག་གིས་བསྟོད་པ་ནས། དཀོན་མཆོག་རྗེས་དྲན་དང་སྦྱར་ནས་བཤད་པའི་གོ་རིམ་ཡིན་པས་དེ་རྣམས་ལྟར་བརྗོད་རྗེས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །སོགས་ཤླ་ཀ་བརྗོད་རྗེས། འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །སོགས་ཤླ་ཀ་དང་། ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །སོགས་ནས། གནས་བརྟན་ཆེན་པོ་བཅུ་དྲུག་ལ་ཕྱག་འཚལ། བར་བརྗོད་ཇེས། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཇི་ཉེད་སུ་དག་སོགས་ནས། བདེ་བར་གཤེགས་པ་ཐམས་ཅད་བདག་གིས་བསྟོད། །བར་བརྗོད་རྗེས། སྟན་བདེ་བ་ལ་འདུག་སྟེ། སྐྱབས་འགྲོ་ཡན་ལག་དྲུག་པ་བཤད། །སོགས་ནས། འཇིགས་དང་ཡོན་ཏན་དྲན་པས་འགྲོ། །བར་བརྗོད་ཅིང་། རྐང་པ་གཅིག་པོ་འདི་ལན་གསུམ་བརྗོད་རྗེས། སེམས་ཅན་ཐམས་ཅད་བདེ་བ་དང་། །བདེ་བའི་རྒྱུ་དང་ལྡན་པར་གྱུར་ཅིག །སོགས་ཤླ་ཀ་ལན་གསུམ་བརྗོད་རྗེས། །འདི་ལྟར་སངས་རྒྱས་སོགས་ནས། ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །བར་བརྗོད་རྗེས། བདུན་ཅུ་པ་ལས་གསུངས་པ། ཡོན་ཏན་དམ་པ་རེ་རེ་བཞིན། །སོགས་ཤླ་ཀ་ལན་གསུམ། བར་འདིར། འདི་ནས་ཉི་མ་ལྷོ་ནུབ་མ་བརྗོད་རྗེས། མ་ལུས་སེམས་ཅན་སོགས་དང་། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། སོགས་ཀྱིས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །སོགས་ཀྱིས་བཞུགས་སུ་གསོལ་རྗེས། གནས་གསུམ་བསྟེན་པའི་ཡུལ་དེ་ལ། །ལན་གསུམ་གྱི་རྗེས། འདི་ནས་བྱང་ཆུབ་སོགས་ནས། བསྐུལ་མ་ཡིན། །བར་བརྗོད་ནས། སྐབས་འདིར་མཆོད་པ་བྱིན་རླབས་བྱ་ཞིང་མཆོད་པའི་སྤྲིན་གྱིས་གཟུངས་འདོན། དེ་ནས་མཎྜལ་ཕུལ་ཞིང་། མེ་ཏོག་དམ་པ་སོགས་བཟང་སྤྱོད་ཡན་ལག་བདུན་པ་ཚང་བར་བརྗོད་རྗེས། བླང་བ་དང་པོར་ཤེས་བྱ་བ། །འཇིགས་པ་བྱུང་ཚེ་བསྐུལ་མ་ཡིན། །ལན་གསུམ་བརྗོད་རྗེས། བདག་མིང་འདི་སོགས་རྒྱུའི་སྐྱབས་འགྲོ་གང་མང་གྲུབ་རྗེས། བྱང་ཆུབ་ལྟུང་བཤགས་ཀྱི་རྒྱུའི་སྐྱབས་འགྲོ། བདག་མིང་འདི་ཞེས་བགྱི་བ། སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ་རྗེས་གཞུང་ཐམས་ཅད་བརྗོད་རྗེས། འབྲས་བུའི་སྐྱབས་འགྲོ། མི་མཆོག་རྒྱལ་བ་སོགས་ཤླ་ཀ་དེ་གྲངས་གསོག་པར་བྱའོ། །ཐུན་འཇོག་ཁར་དོན་དམ་སྐྱབས་འགྲོ་ལ་མཉམ་པར་བཞག་ཅིང་རྗེས་སུ། རྒྱུད་ལ་ཤེས་བྱ་སོགས་ནས། རྫོགས་སོའི་བར་བརྗོད་རྗེས། བདུན་ཅུ་པའི་བསྔོ་བ། ཐེག་ཆེན་ཚུལ་ལ་སོགས་ཤླ་ཀ་བརྗོད་མཐར། སངས་རྒྱས་དམ་ཆོས་དགེ་འདུན་དང་། སོགས་འཕགས་པ་ཀླུ་སྒྲུབ་ཀྱི་སྨོན་ལམ་ཉི་ཤུ་པ་འདོན་པར་བྱའོ། །ཅེས་པ་འདིའང་དཔལ་གྱི་སེངྒེས་སྦྱར་བའོ། །དགེ་ལེགས་འཕེལ།། །། སྐྱབས་འགྲོ་ཡན་ལག་དྲུག་པ་བཤད་པའི་བསྐྱུད་བྱང་ཟིན་མ་ཊཱི་ཀ །ལོ་ཆེན་དྷཱརྨ་ཤྲཱི།སྐྱབས་འགྲོ་ཡན་ལག་དྲུག་པ་བཤད་པའི་བསྐྱུད་བྱང་ཟིན་མ་ཊཱི་ཀ་བཞུགས་སོ། །ན་མོ་རཏྣ་ཏྲ་ཡཱ་ཡ། རྒྱ་གར་ནུབ་ཕྱོགས་གླང་པོ་སྒང་དུ་སྐུ་འཁྲུངས་པའི་པཎྜི་ཏ་ཆེན་པོ་བི་མ་ལ་མི་ཏྲས་མཛད་པའི་སྐྱབས་འགྲོ་ཡན་ལག་དྲུག་པ་འཆད་པ་ལ་གསུམ་སྟེ། ཀླད་དང་། གཞུང་དང་། མཇུག་གི་དོན་ནོ། །དང་པོ་ལ། ཕྱག་དང་། དམ་བཅའ་བའོ། །དང་པོ་ནི། །དཀོན་མཆོག་གསུམ་ལ་ཕྱག་འཚལ་ལོ། །ཞེས་པའི་སྐབས་སུ་བྱེད་པའི་མུ་བཞི་དང་སྦྱར་ན། ཕྱག་གང་གིས། གང་ལ། ཚུལ་ཇི་ལྟར། དགོས་ཆེད་ཅིའི་ཕྱིར་བཙལ་བའོ། །དང་པོ་གང་གིས་ན། པཎ་ཆེན་བི་མ་ལས་བསྟན་བཅོས་རྩོམ་པའི་ཐོག་མར་རོ། །གང་ལ་ན། གཞུང་གི་བརྗོད་བྱ་དང་བསྟུན་ཏེ་དཀོན་མཆོག་གསུམ་ལའོ། །ཚུལ་ཇི་ལྟར་ན། སྒོ་གསུམ་གུས་པའི་ཚུལ་གྱིས་སོ། །དགོས་ཆེད་ཅིའི་ཕྱིར་ན། རང་ཉིད་ཡ་རབས་ཀྱི་ཚུལ་དང་མཐུན་ཞིང་རང་གཞན་གྱི་རྒྱུད་ལ་ཕན་ཡོན་ཁྱད་པར་ཅན་ཐོབ་པའི་ཆེད་དུའོ། །གཉིས་པ་ནི། སྐྱབས་འགྲོ་ཡན་ལག་དྲུག་པ་བཤད། ཅེས་པའི་སྐབས་སུའང་། གང་གིས་ན་བི་མ་ལས། གང་འཆད་ན་སྐྱབས་འགྲོའི་རང་བཞིན་དང་བསླབ་བྱ་རྣམས། ཇི་ལྟར་ན་ཡན་ལག་དྲུག་གི་སྡོམས་སུ་བསྡུས་ནས་འཆད་བཞེད་པས། ཅིའི་ཕྱིར་ན་བརྩམས་པ་མཐར་ཕྱིན་པར་བྱ་བའི་ཆེད་དུའོ། །གཉིས་པ་ལ། ས་བཅད་ཀྱི་སྒོ་ནས་མདོར་བསྟན་པ་དང་། ཚིག་དོན་བཀྲལ་བའི་སྒོ་ནས་རྒྱ་ཆེར་བཤད་པའོ། །དང་པོ་ནི། ཅིས་འགྲོ་དགོས་དང་ཡུལ་དུས་དང་། །ཕན་ཡོན་བསླབ་བྱ་བླང་བ་རྣམས། །རྩ་བའི་སྡོམས་སུ་བཤད་པ་ཡིན། །ཞེས་པས་དྲུག་སྟེ། ཅིའི་ཕྱིར་སྐྱབས་སུ་འགྲོ་བའི་དགོས་པ། གང་ལ་སྐྱབས་སུ་འགྲོ་བའི་ཡུལ། ཇི་ཙམ་སྐྱབས་སུ་འགྲོ་བའི་དུས། དེ་ལྟར་སྐྱབས་སུ་སོང་བའི་ཕན་ཡོན། གང་ལ་སྐྱབས་སུ་སོང་བའི་བསླབ་བྱ། ཇི་ལྟར་སྐྱབས་འགྲོ་བླང་བའི་ཆོ་གའོ། །གཉིས་པ་ལ། སྤྱིར་སྐྱབས་འགྲོའི་ངོ་བོ་ནི། ཡུལ་མཆོག་ལ་བརྟེན་པར་ཁས་ལེན་པའི་སེམས་པ་ས་བོན་དང་བཅས་པའོ། །སྒྲ་དོན་ནི། ཤར་ཎགཙྪ་མི། ཞེས་བྱ་བ་སྐྱོབ་པས་ན་སྐྱབས། དེ་ལ་བརྟེན་པར་བསྙེན་པས་ན་འགྲོ་བའོ། །དབྱེ་ན། འཇིག་རྟེན་དང་། འཇིག་རྟེན་ལས་འདས་པ་གཉིས། དང་པོ་ལ། བློ་འཇིག་རྟེན་པ་དང་། ཡུལ་འཇིག་རྟེན་པ་གཉིས། གཉིས་པ་ལ། ཐེག་པ་ཆུང་ངུ་དང་། ཆེན་པོ་གཉིས་ཏེ་བཞིའོ། །དེ་དག་གཏན་ལ་དབབ་པ་ལ་དྲུག་ལས། དང་པོ་ཅིའི་ཕྱིར་སྐྱབས་སུ་འགྲོ་བའི་དགོས་པ་ནི། འཇིགས་དང་ཡོན་ཏན་དྲན་པས་འགྲོ། །ཞེས་པའི་སྐབས་སུ། སྐྱབས་སུ་འགྲོ་བའི་རྒྱུ་འཇིགས་པས་ཉེན་པ་སྟེ། རང་ལ་འཇིགས་སྐྲག་གང་ཡང་མེད་ཅིང་། རང་དབང་ཐོབ་པར་ཡོད་ན་སུ་ལའང་སྐྱབས་འཚོལ་མི་དགོས་པའི་ཕྱིར། འཇིགས་པ་ལས་སྐྱོབ་པའི་ཆེད་དུ་སྐྱབ་ནུས་པའི་ཡོན་ཏན་དྲན་པས་འགྲོ་བའོ། །དེ་ལའང་གང་ཟག་གི་རིགས་གསུམ་སྟེ། ཆུང་ངུ་ནི་ངན་སོང་ལ་འཇིགས་ནས་མཐོ་རིས་ཀྱི་བདེ་འབྲས་འདོད་པས་སྐྱེལ་མ་ལྟ་བུའི་ཚུལ་གྱིས་འགྲོ། འབྲིང་ནི་འཁོར་བས་སྐྲག་ནས་རང་དོན་དུ་ཞི་བདེ་འདོད་པས་འགྲོ། ཆེན་པོ་ནི་སྲིད་ཞིའི་འཇིགས་པས་ཉེན་ནས་མི་གནས་པའི་མྱང་འདས་འདོད་པའི་ཕྱིར་འགྲོ་བའོ། །དང་པོ་ནི། རྒྱུ་འཇིགས་པ་འདོད་པ་གཙོ་ཆེ་བའི་གང་ཟག་གྲུབ་མཐའ་ལ་མ་ཞུགས་པ་དང་། ཞུགས་ནའང་ཕྱི་རོལ་པ་དང་། ནང་པའི་ཁོངས་སུ་གཏོགས་ཙམ་གྱི་རིགས་ཅན་ནོ། །གཉིས་པ་ནི། རྒྱུ་སྔ་མ་གཉིས་ཀྱི་སྟེང་དུ་དད་པ་གཙོ་ཆེ་བའི་ཉན་རང་གི་རིགས་ཅན་ནོ། །གསུམ་པ་ནི། རྒྱུ་སྔ་མ་གསུམ་གྱི་སྟེང་དུ་སྙིང་རྗེ་གཙོ་ཆེ་བའི་ཐེག་ཆེན་གྱི་རིགས་ཅན་ནོ། །དེ་ལྟར་ཡང་ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །རང་རྒྱུད་རྟོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་སོ། །གཉིས་པ་གང་ལ་འགྲོ་བའི་ཡུལ་ནི། གནས་གསུམ་བསྟན་པའི་ཡུལ་དེ་ལ། །ཞེས་པའི་སྐབས་སུ། ཡུལ་གྱི་ཁྱད་པར་ལ། འཇིག་རྟེན་དང་། འཇིག་རྟེན་ལས་འདས་པ་གཉིས། དང་པོ་ལ། ཡུལ་དམན་པ་དང་། མཆོག་གཉིས། དང་པོ་ནི། རི་དང་རྫོང་ལ་སོགས་པ་སེམས་མེད་དང་། ལྷ་མཐུ་བོ་ཆེ་ལ་སོགས་ཏེ་མི་མ་ཡིན་དང་། རྒྱལ་པོ་སོགས་མིའི་འགྲོ་བ་ཁ་དྲག་པ་རྣམས་སོ། །དེ་དག་གིས་འཁོར་བ་ལས་སྐྱོབ་མི་ནུས་པས་ན་འཇིག་རྟེན་པ་སྟེ། རང་ཉིད་ཀྱང་འཁོར་བའི་བཙོན་ར་ལས་མ་ཐར་པའི་ཕྱིར། དེ་ལྟར་ཡང་མདོ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ལྗོན་ཤིང་དག་ལ་སྐྱབས་འགྲོ་སྟེ། །སྐྱབས་དེ་གཙོ་བོ་མ་ཡིན་ཞིང་། །སྐྱབས་དེ་དག་ལ་བརྟེན་ནས་ནི། །འཇིགས་པ་ཀུན་ལས་ཐར་མི་འགྱུར། །ཞེས་སོ། །གཉིས་པ་ནི། འཇིགས་སྐྱོབ་དང་། ལེགས་སྨོན་ཙམ་ལ་བརྟེན་པ་བློ་འཇིག་རྟེན་པས་ཡུལ་དུ་བཞག་པའི་དཀོན་མཆོག་གསུམ་ལྟ་བུའོ། །གཉིས་པ་ནི། རྣམ་གྲོལ་དོན་གཉེར་གྱི་སྐྱབས་ཡུལ་དཀོན་མཆོག་གསུམ་སྟེ། གནས་སྐབས་འཁོར་བའི་འཇིགས་པ་ལས་སྐྱོབ་ནས། མཐར་ཐུག་ངེས་ལེགས་ལ་འགོད་ནུས་པས་བསླུ་བ་མེད་པའི་སྐྱབས་ཡིན་པའི་ཕྱིར་ཏེ། སློབ་དཔོན་ཆེན་པོས། འཁོར་བའི་དཔོན་འདི་ཇི་ལྟར་བཟང་ཡང་བསླུ༔ སྐྱབས་གནས་དཀོན་མཆོག་གསུམ་ལ་བསླུ་བ་མེད༔ ཅེས་གསུངས་པའི་ཕྱིར། འགྲོ་ཚུལ་ཡང་། ཉན་ཐོས་པས་དགེ་འདུན་གྱི་གཙོ་བྱས་པའི། རང་རྒྱལ་གྱིས་ཆོས་ཀྱི་གཙོ་བྱས་པའི། ཐེག་ཆེན་ནི་སངས་རྒྱས་ཀྱི་གཙོ་བྱས་པའི་དཀོན་མཆོག་གསུམ་ལ་སྐྱབས་སུ་འགྲོ་བའོ། །ཐེག་པ་ཆེ་ཆུང་གཉིས་སྐྱབས་ཡུལ་གྱི་ངོས་འཛིན་ལུགས་ཀྱང་མི་འདྲ་སྟེ། ཐེག་དམན་གྱི་ལུགས་ནི། སངས་རྒྱས་སུ་བྱེད་པའི་ཆོས་ཐེག་ཆེན་མི་སློབ་པའི་ལམ་བདེན། དགེ་འདུན་དུ་བྱེད་པའི་ཆོས་ཐེག་ཆེན་སློབ་པ་དང་ཐེག་དམན་མི་སློབ་པའི་ལམ་བདེན། ཆོས་མྱང་འདས་ཀྱི་བསྡུས་པའི་འགོག་བདེན་ཏེ། མཛོད་ལས། གང་ཞིག་གསུམ་ལ་སྐྱབས་འགྲོ་སྟེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །དེ་ལའང་བྱེ་བྲག་ཏུ་སྨྲ་བ་ལྟར་ན། སངས་རྒྱས་དང་དགེ་འདུན་གཉིས་ཀྱི་རྟེན་གཟུགས་སྐུ་སྐྱབས་གནས་སུ་མི་འདོད། མདོ་སྡེ་པ་བརྟེན་པ་ལམ་བདེན་རྟེན་གཟུགས་སྐུ་དང་བཅས་པ་སྐྱབས་གནས་སུ་འདོད་དོ། །ཐེག་པ་ཆེན་པོ་ལའང་བཞེད་ལུགས་ཐ་དད་པ་ཡོད་ཀྱང་། འདིར་སྤྱི་ཐུན་མོང་བའི་དབང་དུ་བྱས་ན། མདོ་སྔགས་གཉིས་འདྲ་བ་ཡིན་ཏེ། དེ་ལ་གསུམ། མངོན་པར་རྟོགས་པའི་ཡུལ། འདུན་བཞག་གི་ཡུལ། དེ་ཁོ་ན་ཉིད་ཀྱི་ཡུལ་ལོ། །དང་པོ་ནི། སངས་རྒྱས་དཀོན་མཆོག་ནི་སྐུ་གསུམ་གྱི་བདག་ཉིད་དག་པ་གཉིས་ལྡན་མཐར་ཐུག་པ་དོན་གཉིས་ཕུན་སུམ་ཚོགས་པའོ། །ཆོས་དཀོན་མཆོག་ལ། རྟོགས་པའི་དམ་ཆོས་ངོ་བོ་སྨྲ་བསམ་བརྗོད་མེད། རང་བཞིན་སངས་རྒྱས་སུ་འགྲོ་བའི་ལམ། རྣམ་པ་འགོག་ལམ་གྱི་མཚན་ཉིད་ཅན་ནོ། །ལུང་གི་དམ་ཆོས་ནི། རྟོགས་པའི་དམ་ཆོས་བརྗོད་བྱར་སྟོན་པའི་རྣམ་དཀར་གྱི་ལེགས་བཤད་མིང་ཚིག་ཡི་གེར་སྣང་བའི་རྣམ་པ་ཅན། དགེ་བདུན་ནི། ས་ཆེན་པོ་ལ་བཞུགས་པའི་བྱང་འཕགས་དང་། རྗེས་མཐུན་ཐེག་ཆེན་ཚོགས་སྦྱོར་ལ་གནས་པ་དང་། ཐེག་ཆུང་གི་གང་ཟག་ཟུང་བཞི་ཡ་བརྒྱད་རྣམས་སོ། །གཉིས་པ་ནི། སྐུ་གཟུགས། གླེགས་བམ། སོ་སྐྱེའི་དགེ་འདུན་ཁྲིམས་ལྡན་རྣམས་དཀོན་མཆོག་གསུམ་དངོས་ཡིན་པར་མོས་པའོ། །གསུམ་པ་ནི། སངས་རྒྱས་ཁོ་ན་མཐར་ཐུག་གི་སྐྱབས་ཡིན་གྱི། གཞན་གཉིས་ནི་མ་ཡིན་ཏེ། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཞེས་སོ། །སངས་རྒྱས་ཀྱང་ཆོས་སྐུ་ཁོ་ན་ཡིན་ཏེ། ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་སོ། །ཆོས་སྐུ་དེ་ཡང་གཞན་རྒྱུད་ལ་བྱོན་ཟིན་པ་ནི་རྒྱུའི་སྐྱབས་ཡིན་ལ། འབྲས་བུའི་སྐྱབས་ནི། རང་གི་སེམས་ཀྱི་ཆོས་ཉིད་དཀོན་མཆོག་གསུམ་གྱི་རང་བཞིན་དུ་གནས་པ་སྟེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་སོ། །དཀོན་མཆོག་གི་སྒྲ་དོན་ནི། རཏྣ་ཞེས་པའི་སྒྲ་ལས། རིན་པོ་ཆེ་དང་ཆོས་མཐུན་པ་དྲུག་གིས་དཀོན་མཆོག་ཏུ་བཞག་སྟེ། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །གསུམ་པ་ཇི་ཙམ་སྐྱབས་སུ་འགྲོ་བའི་དུས་ནི། འདི་ནས་བྱང་ཆུབ་ཐུག་བར་དུ། །ཞེས་པའི་སྐབས་སུ། སྤྱིར་དུས་ཀྱི་ཁྱད་པར་ནི། འཇིག་རྟེན་པ་ཚེ་འདི་ཕྱིའི་རང་དོན་ཕྲ་མོ་མ་ཐོབ་ཀྱི་བར་དང་། ཉན་རང་གཉིས་ཚེ་ཇི་སྲིད་འཚོའི་བར་དུ་འགྲོ་བར་འདོད། འདིར་ཐེག་པ་ཆེན་པོ་ནི། བྱང་ཆུབ་མ་ཐོབ་ཀྱི་བར་དེ་སྲིད་དུ་འགྲོ་སྟེ། སྤྱོད་འཇུག་ལས། བྱང་ཆུབ་སྙིང་པོར་མཆིས་ཀྱི་བར། །ཞེས་སོ། །བཞི་པ་སྐྱབས་སུ་སོང་བའི་ཕན་ཡོན་ནི། མུ་སྟེགས་སྤྱོད་ལས་ལོག་པ་ཡི། །གསུམ་དུ་མི་སྐྱེ་རྟེན་དུ་འགྱུར། །བར་ཆད་མེད་ཅིང་ནད་ཉུང་རིང་། །འབྱང་ཞིང་བསགས་པའི་ཕན་ཡོན་ནོ། །ཞེས་པས་བདུན་ཏེ། ནང་པ་སངས་རྒྱས་པའི་གྲལ་དུ་ཚུད་པ། ངན་སོང་དུ་མི་ལྟུང་བ། སྡོམ་པ་ཐམས་ཅད་ཀྱི་རྟེན་དུ་གྱུར་པ། མི་དང་མི་མ་ཡིན་གྱི་བར་ཆད་ཀྱིས་མི་ཚུགས་པ། ནད་ཉུང་ཞིང་ཚེ་རིང་བ། སྔར་བྱས་ཀྱི་ལས་སྒྲིབ་འབྱང་བ། རྒྱུ་ཚོགས་གཉིས་རྫོགས་པས་མྱུར་དུ་འཚང་རྒྱ་བའོ། །དང་པོ་ནི། ཚངས་པ་དང་བརྒྱ་བྱིན་ལ་སྐྱབས་འཆའ་བ་སོགས་མུ་སྟེགས་ཀྱི་སྤྱོད་པ་ལས་ལོག་ནས་དཀོན་མཆོག་གསུམ་སྐྱབས་གནས་སུ་འཛིན་པས་ཏེ། ཕྱི་ནང་སྐྱབས་འགྲོས་འབྱེད་པར་མཁས་པ་རྣམས་བཞེད་པའི་ཕྱིར་རོ། །གཉིས་པ་ནི། ལྷའི་བུ་ཕག་ཏུ་སྐྱེ་བར་འགྱུར་བ་སྐྱབས་འགྲོ་བྱས་པས་ལྡོག་པར་གསུངས་པ་བཞིན་ཏེ། ཕག་གི་རྟོགས་བརྗོད་ལས། གང་དག་སངས་རྒྱས་སྐྱབས་སོང་བ། །དེ་དག་ངན་འགྲོར་འགྲོ་མི་འགྱུར། །ཞེས་སོགས་གསུངས་སོ། །གསུམ་པ་ནི། སྐྱབས་འགྲོའི་སྡོམ་པའི་རྒྱུ་མྱང་འདས་ཀྱི་བསམ་པ་བརྟན་པར་བྱེད་པའི་ཕྱིར། སྐྱབས་འགྲོ་བདུན་ཅུ་པ་ལས། དགེ་བསྙེན་གསུམ་ལ་སྐྱབས་འགྲོ་བ། དེ་ནི་སྡོམ་བརྒྱད་རྩ་བ་ཡིན། །ཞེས་སོ། །བཞི་པ་ནི། མདོ་ཉི་མའི་སྙིང་པོ་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་བསད་པར་མི་ནུས་ཏེ། །ཞེས་སོ། །ལྔ་པ་ནི། མདོ་སྡེ་རྒྱན་ལས། ཉེས་པར་སྤྱོད་པ་ཐམས་ཅད་དང་། །རྒ་ན་འཆི་བ་དག་ལས་ཀྱང་། །སངས་རྒྱས་ཉིད་ཀྱི་ཡོངས་སུ་སྐྱོབ། །ཅེས་སོ། །དྲུག་པ་ནི། སྔོན་བསགས་ཀྱི་ལས་སྒྲིབ་རྣམས་བསྲབས་ཤིང་ཟད་པར་འགྱུར་བའི་ཕྱིར་རོ། །བདུན་པ་ནི། མྱང་འདས་ལས། གསུམ་ལ་སྐྱབས་སུ་འགྲོ་བ་གང་། །བསོད་ནམས་ཡེ་ཤེས་དམ་པའི་ཚོགས། །འཇིག་རྟེན་རྒྱལ་བའི་ཆོས་འཕེལ་བས། །སངས་རྒྱས་ཉིད་ནི་ཐོབ་པར་འགྱུར། །ཞེས་སོ། །མདོར་ན་དཀོན་མཆོག་གསུམ་ལ་སྐྱབས་སུ་སོང་བས་རིམ་པ་ལྟར། མཐར་ཐུགས་སངས་རྒྱས་འགྲུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཕྱིར་མི་ལྡོག་པའི་དགེ་འདུན་འདུ་བའི་རྟེན་འབྲེལ་དུ་འགྱུར་བ་ཡིན་ནོ། །ལྔ་པ་གང་ལ་སྐྱབས་སུ་སོང་བའི་བསླབ་བྱ་ལ་གཉིས། ཐུན་མོང་མ་ཡིན་པའི་བསླབ་བྱ་དང་། ཐུན་མོང་གི་བསླབ་བྱའོ། །དང་པོ་ལ། དགག་པ་དང་། སྒྲུབ་པའི་བསླབ་བྱའོ། །དང་པོ་ནི། སྐྱབས་གསུམ་དང་པོའི་བསླབ་བྱ་ནི། །གནོད་སྦྱིན་མི་བརྟེན་ཕྱག་མི་འཚལ། །གཉིས་པ་སེམས་ཅན་ཐམས་ཅད་ལ། །འཚེ་བ་སྤང་ཞིང་བརྩེ་བར་བྱ། །གསུམ་པ་བདག་དང་གཞན་གྱི་ཡུལ། །སྡིག་པ་ཅན་དང་འགྲོགས་པ་མིན། །ཞེས་པ་སྟེ། སངས་རྒྱས་ལ་སྐྱབས་སུ་སོང་ནས་འཇིག་རྟེན་ལྷ་ལ་རེ་ལྟོས་བཀལ་ནས་སྐྱབས་སུ་མི་བརྟེན་ཅིང་ཕྱག་མི་འཚལ་ཏེ། གནས་སྐབས་ཆོས་ལྡན་གྱི་བྱ་བ་འགའ་ཞིག་འཆོལ་བའི་ཕྱིར་ཕྱག་མཆོད་བྱས་པ་ཙམ་ལ་ནི་འགལ་བ་མེད་དོ། །ཆོས་ལ་སྐྱབས་སུ་སོང་ནས་སེམས་ཅན་ལ་བརྡེག་པ་དང་འཆིང་བ་སོགས་གནོད་འཚེའི་བསམ་སྦྱོར་སྤངས་ཏེ་བརྩེ་བར་བྱ། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་དངོས་སམ་ནང་པར་རློམ་ནའང་དཀོན་མཆོག་གསུམ་ལ་ཡིད་མི་ཆེས་པའི་སྡིག་ལྟ་ཅན་དང་འགྲོགས་པར་བྱ་བ་མ་ཡིན་ནོ། །དེ་ལྟར་ཡང་མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལའང་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་སོ། །གཉིས་པ་ནི། སྐུ་གཟུགས་ཚིགས་སུ་བཅད་པ་དང་། །ལྷན་བ་སེར་པོ་བཏབ་པ་ལ། །དད་མོས་སྒོ་ནས་སྟོན་པར་བལྟ། །ཞལ་ནས་གསུངས་པ་མཐའ་དག་ལ། །སྐུར་པ་མི་གདབ་སྤྱི་བོར་བླང་། །གང་ཟག་དག་དང་མ་དག་ལ། །དམ་པར་ལྟ་བར་བྱ་བ་ཡིན། །ཞེས་པ་སྟེ། ཐ་ན་སྐུ་གཟུགས་ཀྱི་ཆགས་དུམ་ཙམ་དང་། གསུང་རབ་ཚིགས་སུ་བཅད་པ་གཅིག་ཙམ་དང་། དགེ་འདུན་གྱི་ན་བཟའ་ལྷན་པ་སེར་པོ་བཏབ་པ་ཙམ་ལའང་གུས་པར་བྱ་དགོས་ན་གཞན་ལྟ་སྨོས་ཀྱང་ཅི་དགོས་ཏེ། དེའི་ཕྱིར་སངས་རྒྱས་ལ་སྐྱབས་སུ་སོང་ནས་སྐུ་གཟུགས་ལེགས་ཉེས་ཅི་འདྲ་ཞིག་ལའང་མ་གུས་པ་དང་བརྙས་པ་སྤངས་ནས་སྟོན་པ་ལྟར་བཀུར་བའི་ཞིང་དུ་བཟུང་བར་བྱ་སྟེ། བཤེས་སྤྲིངས་ལས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །ཅེས་སོ། །ཆོས་ལ་སྐྱབས་སུ་སོང་ནས་བཀའ་དགོངས་འགྲེལ་དང་བཅས་པའི་གླེགས་བམ་ཐམས་ཅད་ལ་སྐུར་འདེབས་ལ་སོགས་པའི་ལས་སྤངས་ནས་གུས་པར་བྱ་བ་སྟེ། སྙན་གྱི་གོང་རྒྱན་ལས། ལྔ་བརྒྱ་ཐ་མར་གྱུར་བ་ན། །ང་ནི་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་གྱིས། །ཞེས་སོ། །དགེ་འདུན་ལ་སྐྱབས་སུ་སོང་ནས་གང་ཟག་དག་པ་སྡོམ་བརྩོན་དང་སྡེ་སྣོད་འཛིན་པ་རྣམས་སུ་མ་ཟད་ཐ་ན་རབ་བྱུང་གི་རྟགས་ཙམ་འཛིན་པའི་གང་ཟག་མ་དག་པ་ཡན་ཆད་ལ་ཡང་བརྙས་པ་དང་རིས་སུ་གཅོད་པ་སོགས་སྤངས་ནས་དགེ་འདུན་དངོས་ཀྱི་འདུ་ཤེས་བསྐྱེད་ནས་གུས་པར་བྱ་སྟེ། ལྷག་བསམ་བསྐུལ་བའི་མདོ་ལས། ཡོན་ཏན་འདོད་པ་ནང་ན་གནས་པ་ཡི། །ཕ་རོལ་དག་གི་སྐྱོན་ལ་བརྟག་མི་བྱ། །བདག་ནི་ཁྱད་པར་འཕགས་ཤིང་བདག་མཆོག་ཅེས། །དེ་སྙམ་དུ་ནི་སེམས་བསྐྱེད་མི་བྱའོ། །རྒྱགས་འདི་བག་མེད་ཀུན་གྱི་རྩ་བ་སྟེ། །དགེ་སློང་དམན་ལ་བརྙས་པར་ཡོངས་མི་བྱ། །ཞེས་སོ། །གཉིས་པ་ཐུན་མོང་གི་བསླབ་བྱ་ལ་བཞི་སྟེ། ཁེ་ཇི་ལྟར་ཆེ་ཡང་དཀོན་མཆོག་མི་སྤང་བ། ཅི་ལ་ཐུག་ཀྱང་སྐྱབས་གཞན་ནས་མི་འཚོལ་བ། རྟག་ཏུ་ཡོད་ཏན་དྲན་ཞིང་མཆོད་པ། ཕན་ཡོན་དྲན་པས་དུས་དྲུག་ཏུ་སྐྱབས་འགྲོ་བྱ་བའོ། །དང་པོ་ནི། ལུས་སྲོག་གཙིགས་དང་བྱ་དགའི་ཕྱིར། །དཀོན་མཆོག་གསུམ་པོ་མི་སྤང་ངོ་། །ཞེས་པ་སྟེ། འདུལ་བ་ལུང་ལས། ཁྱོད་ཀྱིས་སྲོག་དང་། རྒྱལ་སྲིད་དང་། ཐ་ན་བཞད་གད་ཀྱི་ཕྱིར་དུའང་དཀོན་མཆོག་གསུམ་སྤང་བར་མི་བྱའོ། །ཞེས་སོ། །གཉིས་པ་ནི། དུས་འདིར་རྐྱེན་རྣམས་ཅི་བྱུང་ཡང་། །མགོན་སྐྱབས་གཞན་དུ་བཙལ་བ་མིན། །ཞེས་པས། ནད་སྡུག་བསྔལ་སོགས་རྐྱེན་ཅི་བྱུང་ཡང་དཀོན་མཆོག་གསུམ་ལ་བློ་གཏོད་པ་ལས་འཇིག་རྟེན་པའི་ཐབས་གཞན་མི་འཚོལ་བའོ། །འོ་ན་ནད་ཀྱིས་བཏབ་པའི་རིམ་གྲོར་སྔགས་བཟླ་ཀློག་འདོན་སྨན་དཔྱད་སོགས་ཀྱང་བྱར་མི་རིགས་སོ་ཞེ་ན། སྐྱོན་མེད་དེ། དེ་དག་ཆོས་དཀོན་མཆོག་གི་ཡན་ལག་ཡིན་པའི་ཕྱིར་སྐུར་པ་མི་གདབ་པར་འབད་པར་བྱའོ། །གསུམ་པ་ནི། ཆེ་བའི་ཡོན་ཏན་ཟས་དག་གིས། །རྟག་ཏུ་དྲན་ཞིང་མཆོད་པ་ཡིན། །ཞེས་པས་གཉིས་ཏེ། དུས་རྟག་ཏུ་ཡོན་ཏན་དྲན་པར་བྱ་བ་དང་། ཟས་ཀྱི་མཆོད་པའོ། །དང་པོ་ལ་དཀོན་མཆོག་གསུམ་ལས། སངས་རྒྱས་ཀྱི་ཡོན་ཏན་ནི། མདོ་ལས། འདི་ལྟར་སངས་རྒྱས་བཅོམ་ལྡན་འདས། དེ་བཞིན་གཤེགས་པ། དགྲ་བཅོམ་པ། ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སོ། །ཞེས་སོ། །ཆོས་ཀྱི་ཡོན་ཏན་ནི། བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ། ཞེས་སོ། །དགེ་འདུན་གྱི་ཡོན་ཏན་ནི། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི། ལེགས་པར་ཞུགས་པ། དྲང་པོར་ཞུགས་པ། རིག་པར་ཞུགས་པ། མཐུན་པར་ཞུགས་པ། ཐལ་མོ་སྦྱར་བའི་འོས་སུ་གྱུར་བ། ཞེས་སོགས་གསུངས་སོ། །དེ་ལྟར་དྲན་པའི་སྒོ་ནས་བྱ་བ་ཅི་དང་ཅི་བྱེད་ཀྱང་། དཀོན་མཆོག་གསུམ་གྱི་ཞབས་ཏོག་ལ་བསླབ་པ་དང་། གར་འགྲོའི་ཕྱོགས་ཀྱི་སངས་རྒྱས་ལ་ཕྱག་འཚལ་བ་སོགས་ལ་འབད་དོ། །གཉིས་པ་ནི། བཀའ་དྲིན་རྗེས་སུ་དྲན་པས་རྟག་ཏུ་མཆོད་ཅིང་། ཐ་ནའང་ཅི་ཟ་ཅི་འཐུང་གི་ཕུད་ཀྱི་མཆོད་པ་ལ་བསླབ་པར་བྱའོ། །བཞི་པ་ནི། རྒྱུན་གྱི་སྐྱབས་འགྲོ་བརྗོད་བྱ་བ། །དུས་དྲུག་རྒྱུན་གྱི་བསྐུལ་མ་ཡིན། །ཞེས་པས་ཕན་ཡོན་དྲན་པའི་སྒོ་ནས་ཉིན་ལན་གསུམ་མཚན་ལན་གསུམ་དུ་སྐྱབས་འགྲོ་བྱ་ཞིང་། ཉེ་འབྲེལ་འཁོར་གཡོག་དང་བཅས་པ་ཐམས་ཅད་ཀྱང་ཅི་ནུས་ཀྱིས་སྐྱབས་སུ་འགྲོར་གཞུག་པའོ། །དྲུག་པ་སྐྱབས་འགྲོ་བླང་བའི་ཆོ་ག་ནི། བླང་བྱ་དང་པོར་ཤེས་བྱ་བ། །དག་པའི་ཡུལ་ལས་བླང་བར་བྱ། །འཇིགས་པ་བྱུང་ཚེ་བསྐུལ་མ་ཡིན། །ཞེས་པས། ཐོག་མར་དག་པའི་ཡུལ་དགེ་བའི་བཤེས་གཉེན་ལས་བླང་དགོས་པས་དེ་ལ་གསོལ་བ་གདབ། དེས་ཀྱང་ཁས་བླངས་ཏེ། དཀོན་མཆོག་གི་རྟེན་གྱི་དྲུང་དུ་མཆོད་པ་བཤམ། འདུན་བཞག་གི་ཡུལ་ལ་དཀོན་མཆོག་དངོས་ཀྱི་འདུ་ཤེས་བསྐྱེད་ནས་ཕྱག་མཆོད་བྱེད་དུ་བཅུག་ལ་དགོངས་གསོལ་སྔོན་དུ་འགྲོ་བས། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་ལན་གསུམ་བརྗོད་དུ་གཞུག་གོ། །དེ་ནི་བརྡ་ལས་ཐོབ་པ་ཀུན་རྫོབ་ཏུ་དམིགས་པ་དང་བཅས་པ་རྒྱུའི་སྐྱབས་འགྲོའོ། །དེའི་རྗེས་སུ་འགྲོ་བྱ་འགྲོ་བྱེད་ཐམས་ཅད་རང་གི་སེམས་ཀྱི་ཆོ་འཕྲུལ། སེམས་ཉིད་གང་དུའང་མི་དམིགས་པ་སྤྲོས་པ་དང་བྲལ་བའི་ངང་ལ་བཞག་པས་སྐྱེ་མེད་ཀྱི་དོན་ཁོང་དུ་ཆུད་པ་ནི་དོན་དམ་པའི་སྐྱབས་འགྲོ་སྟེ་ཆོས་ཉིད་ཀྱིས་ཐོབ་པ་སྨོན་པ་མེད་པ་འབྲས་བུའི་སྐྱབས་འགྲོའོ། །དེ་ལྟར་ཡང་ཡུམ་བར་མ་ལས། རབ་འབྱོར། གང་ལ་སངས་རྒྱས་ཀྱང་མི་དམིགས་ལ། ཆོས་དང་དགེ་འདུན་ཡང་མི་སེམས་ན། འདི་ནི་ཡང་དག་པའི་སྐྱབས་འགྲོའོ། །ཞེས་སོ། །དེའང་དང་པོར་ཡུལ་དགེ་བའི་བཤེས་གཉེན་ལས་བླངས་ལ། ཕྱིས་འཇིགས་པས་བསྐུལ་མ་བྱས་ཏེ་བློ་བུར་དུ་བླང་བ་དང་། དུས་དྲུག་ཏུ་བླང་བ་རྣམས་ནི་ཡུལ་རང་བློས་བསམ་པའི་མདུན་དུ་བླང་ངོ་། །གསུམ་པ་མཇུག་གི་དོན་ལ་བཞི། མཛད་བྱང་སྨོས་པ། ལོ་ཙྭ་བ་ལ་གཏད་པ། དགེ་བ་བསྔོ་བ། མཐར་ཕྱིན་པའི་བྱ་བ་རྫོགས་བྱང་ངོ་། །དང་པོ་ནི། རྒྱུད་ལ་ཤེས་བྱ་མང་མཆིས་ཀྱང་། །རྒྱལ་བློན་ཡིད་ཆེས་མ་གྱུར་ནས། །སྐྱབས་འགྲོའི་ཆོ་ག་བདག་གིས་བཤད། །ཅེས་པས། སློབ་དཔོན་ནི་གནས་ལྔ་རིག་པའི་པཎ་ཆེན་ཡིན་པའི་ཕྱིར། ཐུགས་རྒྱུད་ལ་ཤེས་བྱ་མང་དུ་བཞུགས་མོད་ཀྱང་། འདིར་རྒྱལ་བློན་རྣམས་ཕྱི་ནང་གང་གི་པཎྜི་ཏ་ཡིན་ནམ་སྙམ་དུ་ཐེ་ཚོམ་སྐྱེས་པ་བསལ་བའི་ཆེད་དུ། རེ་ཞིག་འདི་ཙམ་ཞིག་བཤད་ཅེས་པའོ། །གཉིས་པ་ནི། ལེགས་པར་བྲིས་ཤིག་ཀུ་མཱ་ཱར། །ཞེས་པས། གཉགས་ལོ་ཆེན་པོ་ལ་གཏད་ཅིང་། །དེས་ལེགས་པར་བསྒྱུར་ནས། རྒྱལ་བློན་རྣམས་ལ་བསྟན་ཏེ་ཐེ་ཚོམ་བསལ་ལོ། །གསུམ་པ་ནི། བསོད་ནམས་འགྲོ་བ་ཡོངས་ལ་བསྔོ། །ཞེས་པས། ཐེག་ཆེན་སྐྱེས་བུའི་སྤྱོད་པ་ལས་མི་འདའ་བའི་ཕྱིར་བརྩམས་པའི་དགེ་བ་གཞན་དོན་དུ་བསྔོ་བར་མཛད་པའོ། །བཞི་པ་ནི། སྐྱབས་འགྲོ་ཡན་ལག་དྲུག་པ་རྫོགས་སོ། །ཞེས་པ་སྟེ། རེ་ཞིག་དེ་ཙམ་གྱིས་རྫོགས་པས་བཤད་དུ་མེད་པའི་དོན་ནོ། །དེ་ལྟར་པཎ་ཆེན་བི་མ་ལས་བོད་དུ་བསྟན་བཅོས་མཛད་པའི་ཐོག་མ་སྐྱབས་འགྲོ་ཡན་ལག་དྲུག་པ་ཞེས་བྱ་བའི་གཞུང་དོན་རང་བློས་གང་སྤོབས་བཀྲལ་ནས་ཚོགས་ཆོས་སུ་བཤད་པའི་ཚེ་བརྗེད་ཐོའི་ཟིན་རིས་སུ་སྤེལ་བ་སྟེ་དྷརྨ་ཤྲཱིས་སོ།། །།ཤུབྷཾ།། ཞེས་པ་འདི་ཡང་སྒྲ་བསྒྱུར་གྱི་ལོ་ཆེན་མཁན་ཆེན་དྷརྨ་ཤྲཱིའི་གསུང་འབུམ་ལས་བར་དུ་དཔེ་རྒྱུན་ཆེར་མ་དར་བས་ཕྱིར་ཁྱབ་བདག་དཔལ་གྱི་སེདྒེ་བཀའི་འཁོར་ལོ་སྤྱི་བོར་ཕེབས་པས་ཨོ་རྒྱན་སྨིན་གྲོལ་གླིང་དུ་འགྱུར་མེད་ཀུན་ཁྱབ་ཀྱི་པར་དུ་བསྐུན་པས་ལུང་རྟོགས་ཀྱི་བསྟན་པ་རིན་པོ་ཆེ་དར་ཞིང་རྒྱས་པའི་རྒྱུར་གྱུར་ཅིག། །། སྐྱབས་འགྲོ་ཡན་ལག་དྲུག་པའི་ས་བཅད་ཁོལ་དུ་ཕྱུངས་པ། ཡེ་ཤེས་རྡོ་རྗེ།སྐྱབས་འགྲོ་ཡན་ལག་དྲུག་པའི་ས་བཅད་ཁོལ་དུ་ཕྱུངས་པ་བཞུགས་སོ། །ༀ་སྭ་སྟི། རྒྱ་གར་ནུབ་ཕྱོགས་གླང་པོ་སྒང་དུ་སྐུ་འཁྲུངས་པའི་པཎྚི་ཏ་ཆེན་པོ་བི་མ་ལ་མི་ཏྲས་མཛད་པའི་སྐྱབས་འགྲོ་ཡན་ལག་དྲུག་པ་འདི་ཉིད་འཆད་པ་ལ་གསུམ་སྟེ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། མཐའ་མར་དགེ་བ་མཇུག་གི་དོན་ནོ། །དང་པོ་ལ་གཉིས། ཕྱག་དང་དམ་བཅའ་བའོ། །དང་པོ་ནི། དཀོན་མཆོག་གསུམ་ལ་ཕྱག་འཚལ་ལོ། །གཉིས་པ་ནི། སྐྱབས་འགྲོ་ཡན་ལག་དྲུག་པ་བཤད། །གཉིས་པ་བར་དུ་དགེ་བ་གཞུང་གི་དོན་ལ་གཉིས། སྡོམ་ཀྱིས་མདོར་བསྟན། རྣམ་གྲངས་རྒྱས་པར་བཤད་པའོ། །དང་པོ་ནི། ཅིས་འགྲོ་དགོས་དང་ཡུལ་དུས་དང་། །ཕན་ཡོན་བསླབ་བྱ་བླང་བ་རྣམས། །རྩ་བའི་སྡོམས་སུ་བཤད་པ་ཡིན། །གཉིས་པ་ལ་དྲུག་ལས། དང་པོ་ཅིའི་ཕྱིར་སྐྱབས་སུ་འགྲོ་བའི་དགོས་པ་ནི། འཇིགས་དང་ཡོན་ཏན་དྲན་པས་འགྲོ། །གཉིས་པ་གང་ལ་སྐྱབས་སུ་འགྲོ་བའི་ཡུལ་ནི། གནས་གསུམ་བསྟན་པའི་ཡུལ་དེ་ལ། །གསུམ་པ་ཇི་ཙམ་འགྲོ་བའི་དུས་ནི། འདི་ནས་བྱང་ཆུབ་ཐུག་བར་དུ། །བཞི་པ་སྐྱབས་སུ་སོང་བའི་ཕན་ཡོན་ནི། མུ་སྟེགས་སྤྱོད་ལས་ལོག་པ་ཡི། །གསུམ་དུ་མི་སྐྱེ་རྟེན་དུ་འགྱུར། །བར་ཆད་མེད་ཅིང་ནད་ཉུང་རིང་། །འབྱང་ཞིང་བསགས་པའི་ཕན་ཡོན་ནོ། །ལྔ་པ་བསླབ་བྱ་བསྟན་པ་ལ་གཉིས། སོ་སོའི་བསླབ་བྱ་དང་། ཐུན་མོང་གི་བསླབ་བྱའོ། །དང་པོ་ལ། དགག་པ་དང་། སྒྲུབ་པའི་བསླབ་བྱ་གཉིས་ལས། དང་པོ་ནི། སྐྱབས་གསུམ་དང་པོའི་བསླབ་བྱ་ནི། གནོད་སྦྱིན་མི་བརྟེན་ཕྱག་མི་འཚལ། །གཉིས་པ་སེམས་ཅན་ཐམས་ཅད་ལ། །འཚེ་བ་སྤང་ཞིང་བརྩེ་བར་བྱ། །གསུམ་པ་བདག་དང་གཞན་གྱི་ཡུལ། །སྡིག་པ་ཅན་དང་འགྲོགས་པ་མིན། །གཉིས་པ་ནི། སྐུ་གཟུགས་ཚིགས་སུ་བཅད་པ་དང་། །ལྷན་པ་སེར་པོ་བཏབ་པ་ལ། །དད་མོས་སྒོ་ནས་སྟོན་པར་བལྟ། །ཞལ་ནས་གསུངས་པ་མཐའ་དག་ལ། །སྐུར་པ་མི་གདབ་སྤྱི་བོར་བླངས། །གང་ཟག་དག་དང་མ་དག་ལ། །དམ་པར་བལྟ་བར་བྱ་བ་ཡིན། །གཉིས་པ་ཐུན་མོང་གི་བསླབ་བྱ་ལ་བཞི་ལས། དང་པོ་ཁེ་ཇི་ལྟར་ཆེ་ཡང་དཀོན་མཆོག་མི་སྤང་པ་ནི། ལུས་སྲོག་གཙིགས་དང་བྱ་དགའི་ཕྱིར། །དཀོན་མཆོག་གསུམ་པོ་མི་སྤང་ངོ་། །གཉིས་པ་ཅི་ལ་ཐུག་ཀྱང་སྐྱབས་གཞན་མི་འཚོལ་བ་ནི། དུས་འདིར་རྐྱེན་རྣམས་ཅི་བྱུང་ཡང་། །མགོན་སྐྱབས་གཞན་དུ་བཙལ་བ་མིན། །གསུམ་པ་རྟག་ཏུ་ཡོན་ཏན་དྲན་ཞིང་མཆོད་པ་ནི། ཆེ་བའི་ཡོན་ཏན་ཟས་དག་གིས། །རྟག་ཏུ་དྲན་ཅིང་མཆོད་པ་ཡིན། །བཞི་པ་ཕན་ཡོན་དྲན་པས་དུས་དྲུག་ཏུ་སྐྱབས་སུ་འགྲོ་བྱ་བ་ནི། རྒྱུན་གྱི་སྐྱབས་འགྲོ་བརྗོད་བྱ་བ། །དུས་དྲུག་རྒྱུན་གྱི་བསྐུལ་མ་ཡིན། །དྲུག་པ་སྐྱབ ས་འགྲོ་བླང་བའི་ཆོ་ག་ནི། བླང་བྱ་དང་པོར་ཤེས་བྱ་བ། །དག་པའི་ཡུལ་ལས་བླང་བར་བྱ། །འཇིགས་པ་བྱུང་ཚེ་བསྐུལ་མ་ཡིན། །གསུམ་པ་མཐའ་མར་དགེ་བ་མཇུག་གི་དོན་ལ་བཞི། མཛད་བྱང་སྨོས་པ། ལོ་ཙཱ་བ་ལ་གཏད་པ། དགེ་བ་བསྔོ་བ། མཐར་ཕྱིན་རྫོགས་བྱང་ངོ་། །དང་པོ་ནི། རྒྱུད་ལ་ཤེས་བྱ་མང་མཆིས་ཀྱང་། །རྒྱལ་བློན་ཡིད་ཆེས་མ་གྱུར་ནས། །སྐྱབས་འགྲོའི་ཆོ་ག་བདག་གིས་བཤད། །གཉིས་པ་ནི། ལེགས་པར་བྲིས་ཤིག་ཀུ་མཱ་ར། །གསུམ་པ་ནི། བསོད་ནམས་འགྲོ་བ་ཡོངས་ལ་བསྔོ། །བཞི་པ་ནི། སྐྱབས་འགྲོ་ཡན་ལག་དྲུག་པ་རྫོགས་སོ། །ཞེས་པའང་བློ་འཛིན་བདེ་བའི་ཕྱིར་ལོ་ཆེན་དྷརྨ་ཤྲཱིའི་ཟིན་མ་ཊི་ཀ་ལས་ས་བཅད་ཁོལ་དུ་ཕྱུངས་པ་སྟེ་འཇིགས་བྲལ་ཡེ་ཤེས་རྡོ་རྗེས་སོ།། །།སརྦ་མདྒ་ལཾ།། ཟག་མེད་ཀྱི་ཆོས་སྡེ་ཚན་ཉེར་གཅིག་གིས་བསྟོད་པ། སློབ་དཔོན་དཔའ་བོ།ཟག་མེད་ཀྱི་ཆོས་སྡེ་ཚན་ཉེར་གཅིག་གིས་བསྟོད་པ་བཞུགས་སོ། །མདོ་རྒྱན་ལས། འཛིན་ཕར་ཕྱིན་དྲུག་པ་མི་མངའ་ཉེས་མི་མངའ། །རྙོག་པ་མི་མངའ་མི་གནས་པ། །མི་གཡོ་ཆོས་རྣམས་ཐམས་ཅད་ལ། །སྤྲོས་མེད་ཁྱོད་ལ་ཕྱག་འཚལ་ལོ། །མཚན་དཔེ་ལུས་ཅན་ཀུན་གྱིས་ཁྱོད་མཐོང་ན། །སྐྱེས་བུ་དམ་པ་ལེགས་པར་འཚལ། །མཐོང་བ་ཙམ་གྱིས་རབ་དྭངས་པར། །མཛད་པ་ཁྱོད་ལ་ཕྱག་འཚལ་ལོ། །མི་འཇིགས་བཞི་རང་གཞན་དོན་དུ་ཡེ་ཤེས་དང་། །སྤངས་དང་ངེས་འབྱུང་གེགས་བྱེད་པ། །སྟོན་དང་མུ་སྟེགས་གཞན་དག་གིས། །མི་བརྫི་ཁྱོད་ལ་ཕྱག་འཚལ་ལོ། །སྟོབས་བཅུ། ཐབས་དང་སྐྱབས་དང་དག་པ་དང་། །ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ལ་རབ་བསླུ་བའི། །བདུད་བཅོམ་ཁྱོད་ལ་ཕྱག་འཚལ་ལོ། །སྨོན་མཁྱེན། ལྷུན་གྱིས་གྲུབ་ཅིང་ཆགས་མི་མངའ། །ཐོག་པ་མི་མངའ་རྟག་པར་ནི། །མཉམ་པར་བཞག་ཅིག་འདྲི་ཀུན་གྱི། །ལན་ལྡོག་ཁྱོད་ལ་ཕྱག་འཚལ་ལོ། །བསྲུང་མེད་གསུམ། བསྲུང་མེད་བསྙེལ་མི་བ་མངའ་བས། །འཁོར་གྱི་ནང་དུ་བག་བརྐྱང་གསུངས། །དྲན་པ་ཉེར་བཞག་གསུམ། ཀུན་ནས་ཉོན་མོངས་གཉིས་སྤངས་པས། །འཁོར་སྡུད་ཁྱོད་ལ་ཕྱག་འཚལ་ལོ། །བག་ཆགས་ཡང་དག་བཅོམ་པ། ཀུན་མཁྱེན་ཁྱོད་ནི་རྒྱུ་བ་དང་། །གནས་པ་ཀུན་ལ་རྟག་པར་ནི། །ཀུན་མཁྱེན་མིན་སྤྱོད་མི་མངའ་སྟེ། །ཡང་དག་དོན་ལྡན་ཁྱོད་ཕྱག་འཚལ། །བསྙེལ་བ་མེད་པའི་ཆོས་ཉིད། སེམས་ཅན་ཀུན་གྱི་བྱ་བ་ལ། །ཁྱོད་ནི་དུས་ལས་མི་འདའ་བས། །མཛད་པ་རྟག་ཏུ་དོན་མངའ་བ། །མི་བསྙེལ་ཁྱོད་ལ་ཕྱག་འཚལ་ལོ། །ཡོངས་སུ་དག་པ་བཞི། ལེན་དང་གནས་དང་གཏོང་བ་དང་། །སྤྲུལ་དང་ཡོངས་སུ་བསྒྱུར་བ་དང་། །ཏིང་ངེ་འཛིན་དང་ཡེ་ཤེས་ལ། །མངའ་བརྙེས་ཁྱོད་ལ་ཕྱག་འཚལ་ལོ། །མ་འདྲེས་བཅོ་བརྒྱད། སྤྱོད་པ་དང་ནི་རྟོགས་པ་དང་། །ཡེ་ཤེས་དང་ནི་ཕྲིན་ལས་ཀྱིས། །ཉན་ཐོས་རང་སངས་རྒྱས་ཀུན་གྱི། །བླ་མ་ཁྱོད་ལ་ཕྱག་འཚལ་ལོ། །ཉོན་མོངས་མེད་པའི་ཏིང་འཛིན། སེམས་ཅན་དག་ནི་ཐམས་ཅད་ཀྱིས། །ཉོན་མོངས་མ་ལུས་ཐམས་ཅད་འདུལ། །ཉོན་མོངས་འཇོམས་མཛད་ཉོན་མོངས་ལ། །བརྩེར་བཅས་ཁྱོད་ལ་ཕྱག་འཚལ་ལོ། །རྣམ་མཁྱེན། སྐུ་གསུམ་དག་གིས་བྱང་ཆུབ་ཆེ། །རྣམ་པ་ཀུན་བརྙེས་ཐམས་ཅད་དུ། །སེམས་ཅན་ཀུན་གྱི་ཐེ་ཚོམ་དག །གཅོད་པ་ཁྱོད་ལ་ཕྱག་འཚལ་ལོ། །མངོན་ཤེས་དྲུག གཤེགས་ནས་སྤྱོད་པ་མཁྱེན་མཛད་དེ། །དེ་དག་སྐད་ཀྱིས་སེམས་ཅན་ལ། །འོང་དང་འགྲོ་དང་ངེས་འབྱུང་ལ། །ལེགས་འདོམས་ཁྱོད་ལ་ཕྱག་འཚལ་ལོ། །སོ་སོར་ཡང་དག་བཞི། རྟེན་དང་བརྟེན་པ་བཤད་བྱ་དང་། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟགས་ཐོགས་མི་མངའ་བ། །ལེགས་སྟོན་ཁྱོད་ལ་ཕྱག་འཚལ་ལོ། །རྣམ་ཐར་༨ཟད་པ་༡༠ཟིལ་གནོན་གྱིས་བསྟོད་པ། ཐུབ་པ་སྒྲིབ་ཀུན་ངེས་པར་གྲོལ། །འཇིག་རྟེན་ཐམས་ཅད་ཟིལ་གྱིས་གནོན། །ཁྱོད་ཀྱི་མཁྱེན་པས་ཤེས་བྱ་ཁྱབ། །ཐུགས་གྲོལ་ཁྱོད་ལ་ཕྱག་འཚལ་ལོ། །ཐུགས་རྗེ་ཆེན་པོ། འཇིག་རྟེན་ཀུན་ལ་ཉིན་མཚན་དུ། །ལན་དྲུག་ཏུ་ནི་སོ་སོར་གཟིགས། །ཐུགས་རྗེ་ཆེན་པོ་དག་དང་ལྡན། །ཕན་དགོངས་ཁྱོད་ལ་ཕྱག་འཚལ་ལོ། །ཚད་མེད་བཞིས་བསྟོད་པ། སེམས་ཅན་རྣམས་ལ་བརྩེ་བ་ཅན། །འཕྲད་དང་བྲལ་བའི་དགོངས་པ་ཅན། །མི་འབྲལ་བ་ཡི་དགོངས་པ་ཅན། །ཕན་བདེའི་དགོངས་ཁྱོད་ལ་ཕྱག་འཚལ། ༈ །ངན་སོང་གསུམ་དང་འགྲོ་བ་ལྔའི། །སྡུག་བསྔལ་མ་ལུས་སེལ་མཛད་ཅིང་། །མཐོ་རིས་མྱ་ངན་འདས་པ་ཡི། །བདེ་བ་སྩོལ་མཛད་དེ་ལ་འདུད། ༈ །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུང་། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །དང་པོ་དགའ་ལྡན་ལྷ་ཡི་ཡུལ་ནས་བྱོན། །རྒྱལ་པོའི་ཁབ་ཏུ་ཡུམ་གྱི་ལྷུམས་སུ་ཞུགས། །ལུམྦི་ནི་ཡི་ཚལ་དུ་ཐུབ་པ་བལྟམས། །བཅོམ་ལྡན་ལྷ་ཡི་ལྷ་ལ་ཕྱག་འཚལ་ལོ། །གཞལ་ཡས་ཁང་དུ་མ་མ་བརྒྱད་བཞིས་མཆོད། །ཤཱཀྱའི་དྲུང་དུ་གཞོན་ནུ་རོལ་རྩེད་མཛད། །སེར་སྐྱའི་གནས་སུ་ས་འཚོ་ཁབ་ཏུ་བཞེས། །སྲིད་གསུམ་མཚུངས་མེད་སྐུ་ལ་ཕྱག་འཚལ་ལོ། །གྲོང་ཁྱེར་སྒོ་བཞིར་སྐྱོ་བའི་ཚུལ་བསྟན་ནས། །མཆོད་རྟེན་རྣམ་དག་དྲུང་དུ་དབུ་སྐྲ་བསིལ། །ནཻ་རཉྫ་ནའི་འགྲམ་དུ་དཀའ་ཐུབ་མཛད། །སྒྲིབ་གཉིས་སྐྱོན་དང་བྲལ་ལ་ཕྱག་འཚལ་ལོ། །རྒྱལ་པོའི་ཁབ་ཏུ་གླང་ཆེན་སྨྱོན་པ་བཏུལ། །ཡངས་པ་ཅན་དུ་སྤྲེའུས་སྦྲང་རྩི་ཕུལ། །མ་ག་དྷ་རུ་ཐུབ་པ་མངོན་སངས་རྒྱས། །མཁྱེན་པའི་ཡེ་ཤེས་འབར་ལ་ཕྱག་འཚལ་ལོ། །ཝ་ར་ཎཱ་སིར་ཆོས་ཀྱི་འཁོར་ལོ་བསྐོར། །ཛེ་ཏའི་ཚལ་དུ་ཆོ་འཕྲུལ་ཆེན་པོ་བསྟན། །རྩྭ་མཆོག་གྲོང་དུ་དགོངས་པ་མྱ་ངན་འདས། །ཐུགས་ནི་ནམ་མཁའ་འདྲ་ལ་ཕྱག་འཚལ་ལོ། །འདི་ལྟར་བསྟན་པའི་བདག་པོ་བཅོམ་ལྡན་འདས། །མཛད་པའི་ཚུལ་ལ་མདོ་ཙམ་བསྟོད་པ་ཡིས། །དགེ་བས་འགྲོ་བ་ཀུན་གྱི་སྤྱོད་པ་ཡང་། །བདེ་གཤེགས་ཉིད་ཀྱི་མཛད་དང་མཚུངས་པར་ཤོག །ཅེས་པ་འདི་ཡང་སློབ་དཔོན་དཔའ་བོས་མཛད་པའོ། ། ཐུབ་བསྟོད་ཐབས་མཁས་ཐུགས་རྗེས་ཤཱཀྱའི་སོགས། འབྲི་གུང་སྐྱོབ་པ་འཇིག་རྟེན་གསུམ་མགོན།༈ ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། ཤཱཀྱའི་རྒྱལ་པོ་ཁྱོད་ལ་ཕྱག་འཚལ་ལོ། །གང་གིས་དང་པོ་བྱང་ཆུབ་ཐུགས་བསྐྱེད་ནས། །བསོད་ནམས་ཡེ་ཤེས་ཚོགས་གཉིས་རྫོགས་མཛད་ཅིང་། །དུས་འདིར་མཛད་པ་རྒྱ་ཆེན་འགྲོ་བ་ཡིས། །མགོན་གྱུར་ཁྱོད་ལ་བདག་གིས་བསྟོད་པར་བགྱི། །ལྷ་རྣམས་དོན་མཛད་འདུལ་བའི་དུས་མཁྱེན་ནས། །ལྷ་ལས་བབས་ནས་གླང་ཆེན་ལྟར་གཤེགས་ཤིང་། །རིགས་ལ་གཟིགས་ནས་ལྷ་མོ་སྒྱུ་འཕྲུལ་མའི། །ལྷུམས་སུ་ཞུགས་པར་མཛད་པ་ཕྱག་འཚལ་ལོ། །ཟླ་བ་བཅུ་རྫོགས་ཤཱཀྱའི་སྲས་པོ་ནི། །བཀྲ་ཤིས་ལུམྦིའི་ཚལ་དུ་བལྟམས་པའི་ཚེ། ཚངས་དང་བརྒྱ་བྱིན་གྱིས་བཏུད་མཚན་མཆོག་ནི། །བྱང་ཆུབ་རིགས་སུ་ངེས་མཛད་ཕྱག་འཚལ་ལོ། །གཞོན་དུ་སྟོབས་ལྡན་མི་ཡི་སེངྒེ་དེས། །ཨ་གྷ་མ་ག་དྷ་ནི་སྒྱུ་རྩལ་བསྟན། །སྐྱེ་བོ་དྲེགས་པ་ཅན་རྣམས་ཚར་བཅད་ནས། །འགྲན་ཟླ་མེད་པར་མཛད་པ་ཕྱག་འཚལ་ལོ། །འཇིག་ཆེན་ཆོས་དང་མཐུན་པར་བྱ་བ་དང་། །ཁ་ན་མཐོ་སྤང་ཕྱིར་བཙུན་མོ་ཡི། །འཁོར་དང་ལྡན་མཛད་ཐབས་ལ་མཁས་པ་ཡིས། །རྒྱལ་སྲིད་སྐྱོང་བར་མཛད་ལ་ཕྱག་འཚལ་ལོ། །འཁོར་བའི་བྱ་བར་སྙིང་པོ་མེད་གཟིགས་ནས། །ཁྱིམ་ནས་བྱུང་སྟེ་མཁའ་ལ་གཤེགས་ནས་ཀྱང་། །མཆོད་རྟེན་རྣམ་དག་དྲུང་དུ་ཉིད་ལས་ཉིད། །རབ་ཏུ་བྱུང་བར་མཛད་པ་ཕྱག་འཚལ་ལོ། །བརྩོན་པས་བྱང་ཆུབ་སྒྲུབ་པར་དགོངས་ནས་ནི། །ཉེ་རཉྫ་ནའི་འགྲམ་དུ་ལོ་དྲུག་ཏུ། །དཀའ་བ་སྤྱད་མཛད་བརྩོན་འགྲུས་མཐར་ཕྱིན་པས། །བསམ་གཏན་མཆོག་བརྙེས་མཛད་ལ་ཕྱག་འཚལ་ལོ། །ཐོག་མ་མེད་ནས་འབད་པ་དོན་ཡོད་ཕྱིར། །མ་ག་དྷ་ཡི་བྱང་ཆུབ་ཤིང་དྲུང་དུ། །སྐྱིལ་ཀྲུང་མི་གཡོ་མངོན་པར་སངས་རྒྱས་ནས། །བྱང་ཆུབ་རྫོགས་པར་མཛད་པ་ཕྱག་འཚལ་ལོ། །ཐུགས་རྗེས་འགྲོ་ལ་མྱུར་དུ་གཟིགས་ནས་ནི། །ཝ་ར་ཎཱ་སི་ལ་སོགས་གནས་མཆོག་ཏུ། །ཆོས་ཀྱི་འཁོར་ལོ་བསྐོར་ནས་གདུལ་བྱ་རྣམས། །ཐེག་པ་གསུམ་ལ་འགོད་མཛད་ཕྱག་འཚལ་ལོ། །གཞན་གྱི་རྒོལ་བ་ངན་པ་ཚར་བཅད་ཕྱིར། །མུ་སྟེགས་སྟོན་པ་དྲུག་དང་ལྷས་སྦྱིན་སོགས། །འཁོར་མོ་འཇིག་གི་ཡུལ་དུ་བདུད་རྣམས་བཏུལ། །ཐུབ་པ་གཡུལ་ལས་རྒྱལ་ཕྱག་འཚལ་ལོ། །སྲིད་པ་གསུམ་ན་དཔེ་མེད་ཡོན་ཏན་གྱི། །མཉན་དུ་ཡོད་པར་ཆོ་འཕྲུལ་ཆེན་པོ་བསྟན། །ལྷ་མི་འགྲོ་བ་ཀུན་གྱིས་རབ་མཆོད་པ། །བསྟན་པ་རྒྱས་པར་མཛད་པ་ཕྱག་འཚལ་ལོ། །ལེ་ལོ་ཅན་རྣམས་ཆོས་ལ་བསྐུལ་བྱའི་ཕྱིར། །རྩྭ་མཆོག་གྲོང་གི་ས་གཞི་གཙང་མ་རུ། །འཆི་མེད་རྡོ་རྗེ་ལྟ་བུའི་སྐུ་གཤེགས་ནས། །མྱ་ངན་འདའ་བར་མཛད་ལ་ཕྱག་འཚལ་ལོ། །ཡང་དག་ཉིད་དུ་འཇིག་པ་མེད་ཕྱིར་དང་། །མ་འོངས་སེམས་ཅན་བསོད་ནམས་ཐོབ་བྱའི་ཕྱིར། །དེ་ཉིད་དུ་ནི་རིང་བསྲེལ་མང་སྤྲུལ་ནས། །སྐུ་གདུང་ཆ་བརྒྱད་མཛད་ལ་ཕྱག་འཚལ་ལོ། །ཅེས་པ་འདི་ཡང་འབྲི་གུང་སྐྱོབས་པས་མཛད་པའོ།། །། དེ་བཞིན་གཤེགས་པ་ཁྱེད་སྐུ་སོགས་ཤིས་སྨོན།༈ དེ་བཞིན་གཤེགས་པ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །ཁྱེད་ལ་བསྟོད་ཅིང་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་དེར། །ནད་དང་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། ། སྨོན་ལམ་ཉི་ཤུ་པ། འཕགས་པ་ཀླུ་སྒྲུབ།འཕགས་པ་ཀླུ་སྒྲུབ་ཀྱིས་མཛད་པའི་སྨོན་ལམ་ཉི་ཤུ་པ་བཞུགས་སོ། །རིན་ཆེན་ཕྲེང་བ་ལས། སངས་རྒྱས་དམ་ཆོས་དགེ་འདུན་དང་། །བྱང་ཆུབ་སེམས་དཔའ་རྣམས་ལ་ཡང་། །རྣམ་ཀུན་བཏུད་དེ་སྐྱབས་མཆི་ན། །མཆོད་འོས་རྣམས་ལ་ཕྱག་འཚལ་ལོ། །སྡིག་པ་ལས་ནི་བཟློག་བགྱི་ཞིང་། །བསོད་ནམས་ཐམས་ཅད་ཡོངས་སུ་གཟུང་། །ལུས་ཅན་ཀུན་གྱི་བསོད་ནམས་དག །ཀུན་ལ་རྗེས་སུ་ཡི་རང་ངོ་། །བདག་ནི་སྤྱི་བཏུད་ཐལ་སྦྱར་ཏེ། །ཆོས་ཀྱི་འཁོར་ལོ་བསྐོར་སླད་དང་། །འགྲོ་གནས་བར་དུ་བཞུགས་སླད་དུ། །རྫོགས་པའི་སངས་རྒྱས་རྣམས་ལ་གསོལ། །དེ་ལྟར་བགྱིས་པའི་བསོད་ནམས་དང་། །བདག་གི་བགྱིས་དང་མ་བགྱིས་གང་། །དེས་ནི་སེམས་ཅན་ཐམས་ཅད་ཀུན། །བླ་མེད་བྱང་ཆུབ་སེམས་ལྡན་ཤོག །སེམས་ཅན་ཐམས་ཅད་དྲི་མེད་དབང་། །ཡོངས་རྫོགས་མི་ཁོམ་ཀུན་འདས་ཞིང་། །སྤྱོད་པ་རང་དབང་ཡོད་པ་དང་། །འཚོ་བ་བཟང་དང་ལྡན་པར་ཤོག །ལུས་ཅན་དག་ནི་ཐམས་ཅད་ཀྱང་། །ལག་ན་རིན་ཆེན་ཉིད་ལྡན་ཞིང་། །ཡོ་བྱད་ཐམས་ཅད་མཐའ་ཡས་པ། །འཁོར་བ་སྲིད་དུ་མི་ཟད་ཤོག །བུད་མེད་ཐམས་ཅད་དུས་ཀུན་ཏུ། །སྐྱེས་མཆོག་ཉིད་དུ་འགྱུར་བར་ཤོག །ལུས་ཅན་ཐམས་ཅད་རིགས་པ་དང་། །རྐང་པར་ལྡན་པ་ཉིད་དུ་ཤོག །ལུས་ཅན་ཁ་དོག་ལྡན་པ་དང་། །གཟུགས་བཟང་གཟི་བརྗིད་ཆེ་བ་དང་། །ལྟ་ན་སྡུག་ཅིང་ནད་མེད་དང་། །སྟོབས་ཆེན་ཚེ་དང་ལྡན་པར་ཤོག །ཐམས་ཅད་ཐབས་ལ་མཁས་གྱུར་ཏེ། །སྡུག་བསྔལ་འཇིགས་ཀུན་ལས་ཐར་ཞིང་། །དཀོན་མཆོག་གསུམ་ལ་གཞོལ་བ་དང་། །སངས་རྒྱས་ཆོས་ནོར་ཆེར་ལྡན་ཤོག །བྱམས་དང་སྙིང་རྗེ་དགའ་བ་དང་། །ཉོན་མོངས་བཏང་སྙོམས་གནས་པ་དང་། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཀྱིས་བརྒྱན་ཅིང་། །ཚོགས་རྣམས་ཐམས་ཅད་རབ་རྫོགས་ཏེ། །མཚན་དང་དཔེ་བྱད་གསལ་བ་དང་། །བསམ་གྱི་མི་ཁྱབ་ས་བཅུ་དང་། །དབང་ཕྱུག་དག་ནི་ཐོབ་པར་ཤོག །བདག་ཀྱང་ཡོན་ཏན་དེ་དག་དང་། །གཞན་ཀུན་གྱིས་ཀྱང་རབ་བརྒྱན་ཏེ། །ཉེས་པ་ཀུན་ལས་གྲོལ་བ་དང་། །སེམས་ཅན་ཀུན་མཆོག་བྱམས་པ་དང་། །སེམས་ཅན་ཀུན་ཡིད་རེ་བ་ཡི། །དགེ་བ་ཐམས་ཅད་རྫོགས་བགྱིད་ཅིང་། །རྟག་ཏུ་ལུས་ཅན་ཐམས་ཅད་ཀྱི། །སྡུག་བསྔལ་སེལ་བར་བགྱིད་པར་ཤོག །འཇིག་རྟེན་ཀུན་ན་སྐྱེ་བོ་གང་། །སུ་དག་འཇིགས་པས་སྐྱེ་བ་དེ། །བདག་གི་མིང་ཙམ་ཐོས་པས་ཀྱང་། །ཤིན་ཏུ་འཇིགས་པ་མེད་པར་ཤོག །བདག་ནི་མཐོང་དང་དྲན་པ་དང་། །མིང་ཙམ་ཐོས་པས་སྐྱེ་བོ་རྣམས། །རབ་དང་འཁྲུག་མེད་རྣལ་མ་དང་། །རྫོགས་པའི་བྱང་ཆུབ་ངེས་པ་དང་། །ཚེ་རབས་ཀུན་ཏུ་རྗེས་འབྲང་བའི། །མངོན་ཤེས་ལྔ་བོ་ཐོབ་པར་ཤོག །སེམས་ཅན་ཀུན་ལ་རྣམ་ཀུན་ཏུ། །རྟག་ཏུ་ཕན་བདེ་བགྱིད་པར་ཤོག །འཇིག་རྟེན་ན་ནི་སྐྱེ་བོ་གང་། །སྡིག་པ་བྱེད་པར་འདོད་གྱུར་པ། །དེ་དག་ཐམས་ཅད་གནོད་མེད་པར། །རྟག་ཏུ་ཅིག་ཅར་བཟློག་གྱུར་ཅིག །ས་དང་ཆུ་དང་མེ་དང་རླུང་། །སྨན་དང་དགོན་པའི་ཤིང་བཞིན་དུ། །རྟག་ཏུ་སེམས་ཅན་ཐམས་ཅད་ཀྱི། །རང་དགར་དགག་མེད་སྤྱད་བྱར་ཤོག །སེམས་ཅན་རྣམས་ནི་སྲོག་བཞིན་ཕངས། །དེ་དག་བདག་ལའང་ཆེར་ཕངས་ཤོག །བདག་ལ་དེ་དག་སྡིག་སྨིན་ཞིང་། །བདག་དགེ་མ་ལུས་དེར་སྨིན་ཤོག །ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །ཅེས་ཉིན་ལན་གསུམ་མཚན་ལན་གསུམ་དུ་བརྗོད་ན་བསོད་ནམས་ཚད་མེད་པ་ཐོབ་པར། དེ་ཉིད་ལས། དེ་ཕྱིར་སྐུ་གཟུགས་མཆོད་རྟེན་གྱི། །སྤྱན་སྔའམ་ཡང་ན་གཞན་ཡང་རུང་། །ཚིག་སུ་བཅད་པ་ཉི་ཤུ་འདི། །ཉིན་མཚན་ཀུན་ཏུ་ལན་གསུམ་བརྗོད། །ཅེས་པ་དང་། དེ་སྐད་བརྗོད་པའི་བསོད་ནམས་གང་། །གལ་ཏེ་དེ་ནི་གཟུགས་ཅན་ན། །གང་གཱའི་བྱེ་མ་སྙེད་ཀྱི་ནི། །འཇིག་རྟེན་ཁམས་སུ་ཤོང་མི་འགྱུར། །དེ་ནི་བཅོམ་ལྡན་འདས་ཀྱིས་གསུངས། ༈ །བསྔོ་བ་ནི། ཐེག་ཆེན་ཚུལ་ལ་བརྟེན་ནས་ནི། །སྐྱབས་གསུམ་རྣམ་པར་ཕྱེ་བ་ལས། །བསོད་ནམས་གང་དེས་སྐྱེ་བོ་རྣམས། །དཀོན་མཆོག་གསུམ་ལ་གཞོལ་བར་ཤོག །སརྦ་མངྒ་ལཾ།། །། འཕགས་པ་དཀོན་མཆོག་གསུམ་རྗེས་སུ་དྲན་པའི་མདོ།རྒྱ་གར་སྐད་དུ། ཨརྱ་རཏྣ་ཏྲ་ཡ་ཨ་ནུ་སྨྲི་ཏི་སུ་ཏྲ། བོད་སྐད་དུ། འཕགས་པ་དཀོན་མཆོག་གསུམ་རྗེས་སུ་དྲན་པའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཏེ། དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ། དགེ་བའི་རྩ་བ་རྣམས་ཆུད་མི་ཟ་བ། བཟོད་པ་དག་གིས་རབ་ཏུ་བརྒྱན་པ། བསོད་ནམས་གྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་རྣམས་ཀྱི་མེ་ཏོག་རྒྱས་པ། སྤྱོད་ཡུལ་རན་པར་མཐུན་པ། མཐོང་ན་མི་མཐུན་པ་མེད་པ། དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱིས་མི་གནོན་པ། སྟོབས་རྣམས་ལ་རྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་པ་དག་གིས་མ་གོས་པ། གཟུགས་དག་གི་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། སྡུག་བསྔལ་དག་ལས་རྣམ་པར་གྲོལ་བ། ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲིད་པ་ལས་གྲོལ་བ། ཆུ་བོ་ལས་བརྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་འདས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། བཅོམ་ལྡན་འདས་ཀྱིས་ཆོས་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོར་རང་གིས་རིག་པར་བྱ་བ། བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལ་ལེགས་པར་སྟོན་པ། ངེས་པར་འབྱུང་བ། རྫོགས་པའི་བྱང་ཆུབ་ཏུ་འགྲོ་བར་བྱེད་པ། མི་མཐུན་པ་མེད་ཅིང་འདུས་པ་དང་ལྡན་པ། བརྟེན་པ་ཡོད་པ་རྒྱུ་བ་བཅད་པའོ། །ཐེག་པ་ཆེན་པོའི་དགེ་འདུན་ནི། ལེགས་པར་ཞུགས་པ། རིག་པར་ཞུགས་པ། དྲང་པོར་ཞུགས་པ། མཐུན་པར་ཞུགས་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་དཔལ་གྱི་ཞིང་། ཡོན་ཡོངས་སུ་སྦྱོང་བ་ཆེན་པོ། སྦྱིན་པའི་གནས་སུ་གྱུར་པ། ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། ༈ །སྐྱབས་འགྲོ་བདུན་ཅུ་པ་ལས། ཡོན་ཏན་དམ་པ་རེ་རེ་ཞིང་། །བསམ་ཡས་དེ་ནི་མཁའ་དང་མཉམ། །བྱང་ཆུབ་སེམས་ལ་རྟག་ཕྱག་འཚལ། །བློ་ལྡན་བྱང་ཆུབ་ལ་སྐྱབས་མཆི། ཞེས་སོ། །སརྦ་མངྒ་ལཾ། །དགེའོ། །དགེའོ། །དགེའོ།། །། དཀོན་མཆོག་རྗེས་དྲན་གྱི་བསྡུས་དོན་བསྟན་དོན་ལེགས་པར་བཤད་པ། དཔལ་གྱི་སེང་གེདཀོན་མཆོག་རྗེས་དྲན་གྱི་བསྡུས་དོན་བསྟན་དོན་ལེགས་པར་བཤད་པ་ཞེས་བྱ་བ། ན་མོ་རཏྣ་ཏྲ་ཡཱ་ཡ། རྒྱལ་གཞན་གྱིས་སྤངས་ལྔ་བདོའི་འགྲོ་མཐར་ཡང་། །ཕན་བདེའི་རང་བཞིན་བསྟན་པ་མཆོག་སྣང་བ། །བསྟན་པའི་མངའ་བདག་ཤཱཀྱ་སེང་གེའི་མཐུ། །གཅིག་པོར་ཤེས་ཏེ་རྟག་ཏུ་གུས་ཕྱག་འཚལ། །དེ་ལ་འདིར་དཀོན་མཆོག་གསུམ་རྗེས་སུ་དྲན་པའི་མདོ་འདི་ཉིད་བཤད་པ་ལ། མཚམས་སྦྱར་བའི་ཚིག་གིས་ཡོན་ཏན་དྲན་པར་བསྐུལ་བ་དང་། རྣམ་བཞག་བསྟན་པའི་ཚིག་གིས་ཡོན་ཏན་དྲན་པ་བསྐྱེད་པ་གཉིས་ལས། དང་པོ་ནི། འདི་ལྟར་ཞེས་པས་བསྟན། གཉིས་པ་ལ། སངས་རྒྱས་དང་། ཆོས་དང་། དགེ་འདུན་དཀོན་མཆོག་གི་ཡོན་ཏན་དྲན་ཚུལ་གསུམ་ལས། དང་པོ་ལ། རྗོད་བྱེད་མཚན་གྱི་རྣམ་གྲངས་ཀྱིས་ཡོན་ཏན་དྲན་པ་དང་། བརྗོད་བྱ་དོན་གྱི་ངོ་བོས་ཡོན་ཏན་དྲན་ཚུལ་གཉིས་ལས། དང་པོ་ལའང་གཉིས་ལས། རང་དོན་ཕུན་ཚོགས་ཀྱི་མཚན་བདུན་ནི། སངས་རྒྱས་སོགས་ནས། བདེ་བར་གཤེགས་པ་ཞེས་པའི་བར་རོ། །གཞན་དོན་ཕུན་ཚོགས་ཀྱི་མཚན་གསུམ་ནི། འཇིག་རྟེན་མཁྱེན་པ་སོགས་སོ། །གཉིས་པ་ལ། རྒྱས་པར་བཤད་པ་དང་། དོན་བསྡུ་བ་གཉིས་ལས། དང་པོ་ལ། གཟུགས་སྐུའི་ཡོན་ཏན་དྲན་པ་དང་། །ཆོས་སྐུའི་ཡོན་ཏན་དྲན་པ་གཉིས་ཀྱི། དང་པོ་ལ། །གཟུགས་སྐུའི་རྒྱུ་ཕུན་སུམ་ཚོགས་པའི་ཡོན་ཏན་དང་། གཟུགས་སྐུ་རང་གི་ངོ་བོའི་ཡོན་ཏན་དྲན་པ་གཉིས་ལས། དང་པོ་ལ་བཞི་ལས། སྦྱིན་པའི་ཕར་ཕྱིན་གྱི་ཡོན་ཏན་ནི། དེ་བཞིན་གཤེགས་སོགས། ཚུལ་ཁྲིམས་ཕར་ཕྱིན་གྱི་ཡོན་ཏན་ནི། དགེ་བའི་སོགས། བཟོད་པའི་ཕར་ཕྱིན་གྱི་ཡོན་ཏན་ནི། བཟོད་པས་སོགས། བརྩོན་འགྲུས་ཕར་ཕྱིན་གྱི་ཡོན་ཏན་ནི། བསོད་ནམས་སོགས། གཉིས་པ་ལ། ལོངས་སྐུའི་ཡོན་ཏན་དྲན་པ་དང་། སྤྲུལ་སྐུའི་ཡོན་ཏན་དྲན་པ་གཉིས་ལས། དང་པོ་ལ་གསུམ་སྟེ། མཚན་དཔེས་སྤྲས་པ་སྐུའི་ཡོན་ཏན། བརྡས་གོ་བ་གསུང་གི་ཡོན་ཏན། བླ་ན་མེད་པ་ཐུགས་ཀྱི་ཡོན་ཏན་ནོ། །དང་པོ་ནི། དཔེ་བྱད་སོགས། གཉིས་པ་ནི། སྤྱོད་ཡུལ་སོགས། གསུམ་པ་ནི། །ཤེས་རབ་སོགས། གཉིས་པ་ལ་བཞི་ལས། མཛད་པ་རྨད་བྱུང་ཕྲིན་ལས་ཡོན་ཏན་ནི། སེམས་ཅན་སོགས། མཁྱེན་རབ་མཐའ་ཡས་ཐུགས་ཀྱི་ཡོན་ཏན་ནི། །ཡེ་ཤེས་སོགས། ཚངས་དབྱངས་ལྡན་པ་གསུང་གི་ཡོན་ཏན་ནི། གསུང་རྣམ་པར་སོགས། ཤིན་ཏུ་མཛེས་པ་སྐུའི་ཡོན་ཏན་ནི། སྐུ་བྱད་སོགས། གཉིས་པ་ཆོས་སྐུའི་ཡོན་ཏན་དྲན་པ་ལའང་གཉིས་ཏེ། ཆོས་སྐུའི་རྒྱུ་ཕུན་ཚོགས་ཀྱི་ཡོན་ཏན་དྲན་པ་དང་། ཆོས་སྐུ་རང་གི་ངོ་བོའི་ཡོན་ཏན་དྲན་པ་གཉིས་ལས། དང་པོ་ལའང་ཏིང་འཛིན་གསུམ་གྱི་བདག་ཉིད་བསམ་གཏན་གྱི་ཕ་རོལ་ཏུ་ཕྱིན་པའི་ཡོན་ཏན་དང་། རྣམ་ཐར་གསུམ་སོགས་ཀྱི་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་ཡོན་ཏན་གཉིས་ཀྱི། དང་པོ་ལའང་སྒྱུ་མ་ལྟ་བུའི་ཏིང་ངེ་འཛིན། དཔའ་བར་འགྲོ་བའི་ཏིང་ངེ་འཛིན། རྡོ་རྗེ་ལྟ་བུའི་ཏིང་ངེ་འཛིན་དང་གསུམ་ལས། དང་པོ་ནི། འདོད་པ་སོགས། །གཉིས་པ་ནི། མདུད་པ་སོགས། གསུམ་པ་ནི། ཆུ་བོ་སོགས། གཉིས་པ་ནི། ཡེ་ཤེས་སོགས། གཉིས་པ་ལ་གསུམ་སྟེ། རང་བཞིན་འོད་གསལ་བའི་ཡོན་ཏན། །ངོ་བོ་སྤྲོས་བྲལ་གྱི་ཡོན་ཏན། །ཀུན་ཁྱབ་ཐུགས་རྗེའི་ཡོན་ཏན་ནོ། །དང་པོ་ནི། འདས་པ་སོགས།་གཉིས་པ་ནི། མྱ་ངན་སོགས། གསུམ་པ་ནི། སེམས་ཅན་སོགས། གཉིས་པ་དོན་བསྡུ་བ་ནི། འདི་དག་ནི་སོགས། ཆོས་དཀོན་མཆོག་གི་ཡོན་ཏན་དྲན་ཚུལ་ལ་གཉིས་ཏེ། ལུང་གི་ཆོས་ཀྱི་ཡོན་ཏན་དྲན་པ་དང་། རྟོགས་པའི་ཆོས་ཀྱི་ཡོན་ཏན་དྲན་ཚུལ་གཉིས་ལས། དང་པོ་ནི། དམ་པའི་སོགས། གཉིས་པ་ལ། མཚན་ཉིད་བཞི་ལྡན་འགོག་བདེན་གྱི་ཡོན་ཏན་དང་། མཚན་ཉིད་བཞི་ལྡན་ལམ་བདེན་གྱི་ཡོན་ཏན་གཉིས་ལས། དང་པོ་ལ་བཞི་ལས། འགོགས་པ་ནི། ཡང་དག་སོགས། ཞི་བ་ནི། དུས་སོགས། གྱ་ནོམ་པ་ནི། འདི་མཐོང་སོགས། ངེས་པར་འབྱུང་བ་ནི། བཅོམ་ལྡན་སོགས། གཉིས་པ་ལའང་བཞི་ལས། ལམ་ནི། རྫོགས་པའི་སོགས། རིགས་པ་ནི། མི་མཐུན་སོགས། སྒྲུབ་པ་ནི། བརྟེན་པ་སོགས། ངེས་པར་འབྱིན་པ་ནི། རྒྱུ་བ་སོགས། དགེ་འདུན་དཀོན་མཆོག་གི་ཡོན་ཏན་དྲན་ཚུལ་ལ་གཉིས་ཏེ། རང་ངོར་རྫོགས་པ་འཕགས་ལམ་དང་མི་ཕྱེད་པར་ལྡན་པའི་ཡོན་ཏན་དང་། གཞན་ངོར་འབྱུང་བ་གུས་བསྟེན་མཆོད་ཡུལ་མཆོག་ཏུ་གྱུར་པའི་ཡོན་ཏན་ནོ། །དང་པོ་ནི། ཐེག་པ་སོགས། གཉིས་པ་ལ་གསུམ་ལས། གུས་པའི་ཡུལ་མཆོག་ཏུ་གྱུར་པ་ནི། ཐལ་མོ་སོགས། བརྟེན་པའི་ཡུལ་མཆོག་ཏུ་གྱུར་པ་ནི། བསོད་ནམས་སོགས། མཆོད་པའི་ཡུལ་མཆོག་ཏུ་གྱུར་པ་ནི། སྦྱིན་པའི་སོགས་སོ། །སྨྲས་པ། ཤཱཀྱའི་རྒྱལ་པོའི་ཕྲིན་ལས་ཡོངས་རྫོགས་དབང་། །པདྨ་སྐྱེས་ཀྱི་བྱིན་རླབས་སྙིང་སིམ་པ། །དཔལ་གྱི་སེང་གེས་བསྡུས་དོན་རབ་སྦྱར་དགེས། །འགྲོ་ཀུན་རིན་ཆེན་གསུམ་ལ་གཞོལ་གྱུར་ཅིག། །།དགེའོ། །དགེའོ། །དགེའོ།། །། ཐུབ་དབང་ཉེ་སྲས་བརྒྱད་ལ་ཕྱག་མཆོད་བྱ་ཚུལ་མདོར་བསྡུས་ཕན་བདེའི་སྙིང་པོ། འཇམ་དབྱངས་མཁྱེན་བརྩེའི་དབང་པོ།ༀ་སྭ་སྟི་སིདྡྷི། འདིར་སྟོན་པ་ཐུབ་པའི་དབང་པོ་འཁོར་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་བཅས་པ་ལ་ཕྱག་མཆོད་གསོལ་བ་གདབ་པར་འདོད་པས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་གྱིས་སྐྱབས་སེམས་བྱ། སྐྱབས་གནས་དཀོན་མཆོག་གསུམ་གྱི་བདེན་པ་དང་། །རྒྱལ་བ་སྲས་བཅས་རྣམས་ཀྱི་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་དག་སྟོབས་ཀྱིས། །སྣོད་བཅུད་བདེ་ཅན་ཞིང་གི་བཀོད་པའི་དབུས། །ཡིད་འཕྲོག་ནོར་བུའི་གཞལ་མེད་ཁང་ཆེན་པར། །རིན་ཆེན་སེང་ཁྲི་པད་ཟླའི་གདན་མཆོག་དང་། །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །ཅེས་པས་གཞི་དང་གནས་ཡོ་བྱིན་གྱིས་བརླབས་དེ་ནས་བདུན་པ་རྩེ་གཅིག་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་ཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །ཐུབ་དབང་སྲས་བཅས་གནས་འདིར་གཤེགས་སུ་གསོལ། །ནོར་བུའི་ཕོ་བྲང་དཔག་ཡས་མཆོད་སྤྲིན་དབུས། །རིན་ཆེན་སེང་ཁྲི་པད་ཟླའི་གདན་སྟེང་དུ། །བདག་ཅག་བསོད་ནམས་ཡེ་ཤེས་ཚོགས་རྫོགས་ཕྱིར། །དམིགས་མེད་ཐུགས་རྗེས་དགོངས་ཏེ་དགྱེས་པར་བཞུགས། །ཞེས་སྤྱན་དྲངས་ཤིང་བཞུགས་སུ་གསོལ་བའི་སྤྱན་སྔར། ཡང་དག་རྫོགས་པའི་སངས་རྒྱས་འཇིག་རྟེན་མཁྱེན། །དངོས་པོ་འདི་དག་ཅི་འདྲ་དེ་བཞིན་གསུངས། །བདུད་ཀྱི་སྟོབས་བཅོམ་མཆོད་པའི་གནས་སུ་འོས། །བདེ་གཤེགས་རིགས་པ་གསུམ་དང་ཞབས་སུ་ལྡན། །འདུལ་འོས་ཁ་ལོ་བསྒྱུར་བ་བླ་ན་མེད། །སངས་རྒྱས་བཅོམ་ལྡན་འདས་ཀྱི་ཞབས་པདྨོར། །སྒོ་གསུམ་གུས་པས་ཕྱག་འཚལ་གསོལ་བ་འདེབས། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །བཅོམ་ལྡན་སྤྱན་རས་དབང་པོ་འཇིག་རྟེན་མགོན། །ཐུགས་རྗེ་ཆེ་ལ་གུས་པས་ཕྱག་འཚལ་ལོ། །བཅོམ་ལྡན་མི་ཕམ་རྒྱལ་ཚབ་ཐམས་ཅད་གསོལ། །བྱམས་མཆོག་གཏིང་ལ་གུས་པས་ཕྱག་འཚལ་ལོ། །བཅོམ་ལྡན་ནམ་མཁའི་སྙིང་པོ་སྐྱོན་མི་ཆགས། །མཐའ་ཡས་བློ་ལ་གུས་པས་ཕྱག་འཚལ་ལོ། །བཅོམ་ལྡན་ཀུན་ཏུ་བཟང་པོ་སྲས་ཀྱི་གཙོ། །རྒྱ་མཚོའི་སྤྱོད་ལ་གུས་པས་ཕྱག་འཚལ་ལོ། །བཅོམ་ལྡན་འཇིགས་འཇོམས་ཕྱག་ན་རྡོ་རྗེ་བསྣམས། །དཔའ་བརྩོན་གཙོ་ལ་གུས་པས་ཕྱག་འཚལ་ལོ། །བཅོམ་ལྡན་འཇམ་དཔལ་བླ་མེད་དཔལ་གྱི་བདག །དགེ་བཤེས་གཙོ་ལ་གུས་པས་ཕྱག་འཚལ་ལོ། །བཅོམ་ལྡན་སྒྲིབ་པའི་ཤུགས་དྲག་བཟོད་དཀའ་གནོན། །རྒྱལ་སྲས་མཆོག་ལ་གུས་པས་ཕྱག་འཚལ་ལོ། །བཅོམ་ལྡན་ས་ཡི་སྙིང་པོ་འབྱུང་གནས་མཆོག །གཟུངས་རབ་བསྟན་ལ་གུས་པས་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། །བདག་དང་མཁའ་མཉམ་འགྲོ་བ་མ་ལུས་ཀུན། །ལུས་འདིས་ཞིང་རྡུལ་མཉམ་པར་རབ་སྤྲུལ་ནས། །རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །དངོས་བཤམས་གཟུངས་རིགས་མོས་སྟོབས་ཀྱིས་སྤྲུལ་པའི། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རངས་བསྐུལ་ཞིང་གསོལ་བ་འདེབས། །འདི་མཚོན་དགེ་བ་བྱང་ཆུབ་ཆེན་པོར་བསྔོ། །ཞེས་ཡན་ལག་བདུན་པ་འབུལ། སྤྲོ་ན་ཐུབ་དབང་ཉེ་སྲས་བརྒྱད་ཀྱིས་མཚན་བརྒྱའི་རིགས་དང་། བསྟོད་པ་ཇི་ལྟར་རིགས་པ་བཀླག །བྱང་སྡོམ་བླང་བར་མོས་ན། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའི་ཡི། །ཚོགས་ལའང་དེ་བཞིན་སྐྱབས་སུ་མཆི། །ལན་གསུམ་གྱིས་སྐྱབས་སུ་འགྲོ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ལན་གསུམ་གྱིས་བྱང་སྡོམ་བླང་། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་ཏོ། །ཞེས་རང་དགའ་བ་བསྒོམ་པ་དང་། བདག་གིས་དེ་རིང་སྐྱོབས་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་གཞན་དགའ་བ་བསྒོམ་དུ་གཞུག །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །ཅེས་སྨོན་ལམ་གདབ། བཅོམ་ལྡན་གདན་འཛོམས་ཆེན་པོ་དགོངས་སུ་གསོལ། །ཐུབ་དབང་མཆོག་དང་ཉེ་བའི་སྲས་རྣམས་ཀྱི། །མཚན་མཆོག་ཐོས་དང་དྲན་བརྗོད་ཕྱག་མཆོད་མཐུས། །བདག་ཅག་ལ་སོགས་སེམས་ཅན་གང་དང་གང་། །གནས་སྐབས་མཐར་ཐུག་མི་མཐུན་ཕྱོགས་ཀུན་ཞི། །བདེ་སྐྱིད་ཆོས་ལྡན་དཔལ་འབྱོར་རབ་ཏུ་འཕེལ། །ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས། །གསུང་གི་བདུད་རྩིས་འཚོ་བར་བྱིན་གྱིས་རློབས། །ཚུལ་ཁྲིམས་དག་ཅིང་ཐོས་བསམ་སྒོམ་པར་ལྡན། །ངེས་པར་འབྱུང་དང་བྱང་ཆུབ་སེམས་གཉིས་འབྱོངས། །རྟག་ཏུ་གཞན་ཕན་སྤྱོད་ལས་མི་གཡེལ་བས། །རྣམ་མཁྱེན་གོ་འཕང་ཐོབ་པར་བྱིན་གྱིས་རློབས། །རྒྱལ་བསྟན་དྲི་མེད་ཕྱོགས་བཅུར་དར་ཞིང་རྒྱས། །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན། །འཇིག་རྟེན་དགེ་ལེགས་ཆེན་པོས་ཁྱབ་པ་དང་། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་གསོལ་བ་གདབ་ཅིང་བཀྲ་ཤིས་པའི་ཚིག་གིས་མཐའ་བརྒྱན། ཐུབ་པའི་དབང་པོ་སྲས་དང་བཅས་པའི་མཚན་དཔའི་གཟུགས་སྐུ་དང་། ཚངས་པའི་དབྱངས་དང་། ཇི་ལྟ་དང་ཇི་སྙེད་པ་མཁྱེན་པའི་ཡེ་ཤེས་ལ་སེམས་འཛིན་པའི་ཚུལ་གྱིས་ཡིད་གཏད་ཅིང་ཡོན་ཏན་རྗེས་སུ་དྲན་པས་གསོལ་བ་བཏབ་པ་ལ་བརྟེན། སྐུ་གསུང་ཐུགས་ཀྱི་གནས་ནས་བདུད་རྩིའི་འོད་ཟེར་དང་བཅས་པ་བྱུང་། བདག་དང་སེམས་ཅན་ཐམས་ཅད་ཀྱི་ལུས་དང་སེམས་ལ་ཞུགས། ནད་གདོན་སྡིག་སྒྲིབ་བག་ཆགས་དང་བཅས་པ་སྦྱངས། ཚེ་བསོད་དཔལ་འབྱོར་ལུང་རྟོགས་ཀྱི་ཡོན་ཏན་འཕེལ། སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པས་བྱིན་གྱིས་བརླབས་པར་བསམ་ལ་དེ་ཁོ་ན་ཉིད་ཡིད་ལ་བྱེད་པའི་ཚུལ་གྱིས་མཉམ་པར་བཞག་གོ། །ཞེས་པའང་རྗེ་བཙུན་འཇམ་པའི་དབྱངས་ཀྱི་རྣམ་པར་འཕྲུལ་པ་ཆོས་རྒྱལ་ཁྲི་སྲོང་ལྡེའུ་བཙན་གྱི་གསུང་གི་རྗེས་སུ་འབྲངས་ཏེ་མཁྱེན་བརྩེའི་དབང་པོས་གསོལ་བ་བཏབ་པ་དགེ་ལེགས་སུ་གྱུར་ཅིག། །། ཐུབ་དབང་གནས་བརྟན་འཁོར་བཅས་ལ་ཕྱག་མཆོད་བྱ་ཚུལ་མདོར་བསྡུས་པ་ཡིད་བཞིན་ནོར་བུའི་སྙིང་པོ། འཇམ་དབྱངས་མཁྱེན་བརྩེའི་དབང་པོ།ཐུབ་དབང་གནས་བརྟན་འཁོར་བཅས་ལ་ཕྱག་མཆོད་བྱ་ཚུལ་མདོར་བསྡུས་པ་ཡིད་བཞིན་ནོར་བུའི་སྙིང་པོ་ཞེས་བྱ་བ་བཞུགས་སོ། །ༀ་སྭ་སྟི། ཐུབ་དབང་གནས་བརྟན་བཅུ་དྲུག་ལ་ཕྱག་མཆོད་གསོལ་བ་གདབ་པར་འདོད་པས། འབྱོར་ན་ཐུབ་པའི་དབང་པོ་གཙོ་འཁོར་གྱི་སྣང་བསྙེན་མདུན་མཆོད་པ་ཇི་ལྟར་རིགས་པ་གཙང་ཞིང་བཀོད་པས་མཛེས་པར་བཤམ། མ་གྲུབ་ན་ཡིད་ཀྱི་ཆོ་ག་བྱ། གང་ལྟར་ཡང་། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་གྱིས་སྐྱབས་སེམས་བྱ། སྐྱབས་གནས་དཀོན་མཆོག་གསུམ་གྱི་བདེན་པ་དང་། །རྒྱལ་བ་སྲས་བཅས་རྣམས་ཀྱི་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་དག་སྟོབས་ཀྱིས། །སྣོད་བཅུད་བདེ་ཅན་ཞིང་གི་བཀོད་པའི་དབུས། །ཡིད་འཕྲོག་ནོར་བུའི་གཞལ་མེད་ཁང་ཆེན་པོར། །རིན་ཆེན་སེང་ཁྲི་པད་ཟླའི་གདན་མཆོག་དང་། །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །ཅེས་ས་གཞི་དང་གནས་ཡོ་བྱིན་གྱིས་བརླབས། དེ་ནས་འདུན་པ་རྩེ་གཅིག་པས། ལག་མཐིལ་ལྟར་མཉམ་རིན་ཆེན་གྱིས་སྤྲས་པ། །ལྗོན་ཤིང་ཆུ་མཚོས་བརྒྱན་པའི་ས་གཞི་དབུས། །རིན་ཆེན་ལས་གྲུབ་གྲུ་བཞི་སྒོ་བཞི་པ། །པདྨ་ཉི་ཟླས་བརྒྱན་པའི་གདན་སྟེང་དུ། །ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །རྣམ་གྲོལ་ལམ་ལ་འགོད་མཛད་འགྲོ་བའི་མགོན། །ཐུབ་པ་མཆོག་དང་གནས་བརྟན་ཆེན་པོ་རྣམས། །འཁོར་དང་བཅས་པ་གནས་འདིར་གཤེགས་སུ་གསོལ། །ཅེས་སྤྱན་དྲངས། སྤྲོ་ན་གནས་བརྟན་ཕྱག་མཆོད་ཚིགས་བཅད་ལྷུག་གང་རིགས་བྱ། བསྡུ་ན། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོའི་ཞབས་ལ་ཕྱག་འཚལ་ལོ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོ་བུ་བཟང་པོ་དང་། །གསེར་བེའུ་བྷ་ར་དྷཱ་ཛ་གསེར་ཅན་མཆོག །འཕགས་པ་བ་ཀུ་ལ་དང་སྒྲ་ཅན་འཛིན། །ལམ་ཕྲན་བྷ་ར་དྷཱ་ཛ་བསོད་སྙོམས་ལེན། །ལམ་བསྟན་ཀླུའི་སྡེ་སྦེད་བྱེད་མི་ཕྱེད་པ། །དགེ་བསྙེན་དྷརྨ་ཏཱ་དང་རྒྱལ་ཆེན་བཞི། །འཁོར་དང་བཅས་པའི་ཞབས་ཀྱི་པད་མོ་ལ། །ཕྱག་འཚལ་སྐྱབས་མཆི་སྙིང་ནས་གསོལ་བ་འདེབས། །ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་གཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རངས་བསྐུལ་ཞིང་གསོལ་བ་འདེབས། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །ཞེས་ཡན་ལག་བདུན་པ་འབུལ། དགེ་སློང་ཡིན་ན་སྐབས་འདིར་གསོ་སྦྱོངས་བྱིན་རླབས་དང་། དུས་དྲན་བསྟེན་པ་སོགས་དགོས་པ་ཡོད་ན་བྱས་ཀྱང་ལེགས། བཅོམ་ལྡན་གདན་འཛོམས་ཆེན་པོ་དགོངས་སུ་གསོལ། །ཐུབ་དབང་གནས་བརྟན་འཕགས་པའི་ཚོགས་རྣམས་ཀྱི། །མཚན་མཆོག་ཐོས་དང་དྲན་བརྗོད་ཕྱག་མཆོད་མཐུས། །བདག་ཅག་ལ་སོགས་སེམས་ཅན་གང་དང་གང་། །གནས་སྐབས་མཐར་ཐུག་མི་མཐུན་ཕྱོགས་ཀུན་ཞི། །བདེ་སྐྱིད་ཆོས་ལྡན་དཔལ་འབྱོར་རབ་ཏུ་འཕེལ། །ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས། །གསུང་གི་བདུད་རྩིས་འཚོ་བར་བྱིན་གྱིས་རློབས། །ཚུལ་ཁྲིམས་དག་ཅིང་ཐོས་བསམ་སྒོམ་པར་ལྡན། །ངེས་པར་འབྱུང་དང་བྱང་ཆུབ་སེམས་གཉིས་འབྱོངས། །རྟག་ཏུ་གཞན་ཕན་སྤྱོད་ལ་མི་གཡེལ་བས། །མ་མཁྱེན་གོ་འཕང་ཐོབ་པར་བྱིན་གྱིས་རློབས། །རྒྱལ་བསྟན་དྲི་མེད་ཕྱོགས་བཅུར་དར་ཞིང་རྒྱས། །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བསྟན། །འཇིག་རྟེན་དགེ་ལེགས་ཆེན་པོས་ཁྱབ་པ་དང་། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་གསོལ་བ་གདབ་ཅིང་བཀྲ་ཤིས་པའི་ཚིག་གིས་མཐའ་བརྒྱན་པར་བྱའོ། །ཞེས་པ་པའང་དང་པ་དང་ལྡན་པ་རྣམས་ཀྱི་ཆེད་དུ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག ། ཨོ་རྒྱན་རྗེ་འབངས་ཉེར་ལྔ་འཁོར་བཅས་ལ་གསོལ་བ་འདེབས་པ་མདོར་བསྡུས་བྱིན་རླབས་སྙིང་པོ། འཇམ་དབྱངས་མཁྱེན་བརྩེའི་དབང་པོ།ཨོ་རྒྱན་རྗེ་འབངས་ཉེར་ལྔ་འཁོར་བཅས་ལ་གསོལ་བ་འདེབས་པ་མདོར་བསྡུས་བྱིན་རླབས་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་བྷྱ༔ འདིར་ཨོ་རྒྱན་རིན་པོ་ཆེ་སྤྲུལ་པའི་ཐོད་ཕྲེང་རིགས་ལྔ་གུ་རུ་མཚན་བརྒྱད་རྗེ་འབངས་ཉེར་ལྔ་བཅས་ལ་མདོར་བསྡུས་ཏེ་གསོལ་བ་གདབ་པར་འདོད་པས། བདག་སོགས་འགྲོ་ཀུན་དེང་ནས་བྱང་ཆུབ་བར། །དཀོན་མཆོག་རྩ་བ་གསུམ་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་ཐོབ་བྱའི་ཕྱིར། །སྨོན་དང་འཇུག་པའི་བྱང་ཆུབ་སེམས་བསྐྱེད་དོ། །ལན་གསུམ་གྱིས་སྐྱབས་སེམས་བྱ། མདུན་གྱི་ནམ་མཁར་ཡིད་འཕྲོག་མཆོད་སྤྲིན་དབུས། །རིན་ཆེན་སེང་ཁྲི་པད་མ་ཉི་ཟླའི་སྟེང་། །རྩ་བའི་བླ་མ་ཨོ་རྒྱན་རིན་པོ་ཆེ། །སྐུ་མདོག་དཀར་དམར་གཞོན་ཚུལ་གཟི་བརྗིད་འབར། །ཕྱག་གཡས་རྡོ་རྗེ་གཡོན་པས་ཐོད་བུམ་དང་། །གསང་བའི་ཡུམ་མཆོག་སྦས་ཚུལ་ཁ་ཊཱཾ་འཁྱུད། །སྐུ་ལ་གསང་ཕོད་ཆོས་གོས་ཟབ་བེར་གསོལ། །དབུ་ལ་ཤེའུའི་སྙན་ཞུ་མཐོང་གྲོལ་མཛེས། །ཞབས་ཟུང་རྡོ་རྗེའི་སྐྱིལ་ཀྲུང་དྲང་པོར་བཞགས། །གསང་གསུམ་ལས་སྐྱེས་འཇའ་ཟེར་འོད་ཕུང་ཀློང་། །ཐོད་ཕྲེང་སྡེ་ལྔ་སྤྲུལ་པའི་མཚན་བརྒྱད་དང་། །ཐུགས་སྲས་མི་རྗེ་འབངས་རིགས་ཉེར་ལྔ་སོགས། །རིག་འཛིན་བླ་མ་རྒྱ་མཚོའི་སྤྲིན་ཕུང་འཕྲོ། །གནས་གསུམ་འབྲུ་གསུམ་མཚན་པའི་འོད་ཟེར་གྱིས། །ཡེ་ཤེས་སྤྱན་དྲངས་གཉིས་སུ་མེད་པར་གྱུར། །ཅེས་གསལ་གདབ། ཧཱུྃ། བཞེངས་ཤིག་པད་མ་འབྱུང་གནས་མཁའ་འགྲོའི་ཚོགས། །དགོངས་ཤིག་ཕྱོགས་བཅུ་དུས་གསུམ་བདེ་གཤེགས་རྣམས། །རྗེ་བཙུན་ཆེན་པོ་པད་མ་ཐོད་ཕྲེང་རྩལ། །རིག་འཛིན་མཁའ་འགྲོའི་གནས་ནས་གཤེགས་སུ་གསོལ། །ཞེས་ཡེ་ཤེས་པ་སྤྱན་དྲངས་ཤིང་བསྟིམ། སེང་ཁྲི་པད་མ་ཉི་ཟླའི་གདན་ལ་བཞུགས། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །ཕྱི་ནང་གསང་བ་བླ་མེད་མཆོད་སྤྲིན་འབུལ། །དུས་གསུམ་བསགས་པའི་སྡིག་སྒྲིབ་མཐོལ་ཞིང་བཤགས། །འཕགས་དང་སོ་སྐྱེའི་དགེ་བར་རྗེས་ཡི་རང་། །ཟབ་རྒྱས་ཆོས་ཀྱི་འཁོར་ལོ་བསྐོལ་བར་བསྐུལ། །མྱ་ངན་མི་འདའ་རྟག་ཏུ་བཞུགས་གསོལ་འདེབས། །བསོད་ནམས་དངོས་ཀུན་བྱང་ཆུབ་ཆེན་པོར་བསྔོ། །ཞེས་ཚོགས་བསག །དུས་གསུམ་རྒྱལ་བ་ཀུན་དངོས་རིགས་ཀྱི་བདག །ཕྲིན་ལས་རྣམ་བཞི་འཁོར་ལོས་སྒྱུར་བ་པོ། །སྣང་སྲིད་དབང་དུ་སྡུད་པའི་མཐུ་སྟོབས་ཅན། །པདྨ་འབྱུང་གནས་ཞབས་ལ་གསོལ་བ་འདེབས། །རྡོ་རྗེ་རིན་ཆེན་པདྨ་ཀརྨ་དང་། །བྷུདྷ་ཐོད་ཕྲེང་རིགས་མཆོག་རྣམ་པ་ལྔ། །འཆི་མེད་པད་འབྱུང་པདྨ་སཾ་བྷ་བ། །བློ་ལྡན་མཆོག་སྲེད་པད་མ་རྒྱལ་པོ་རྒྱལ། །ཤཱཀྱ་སེང་གེ་ཉི་མ་འོད་ཟེར་དང་། །སེང་གེ་སྒྲ་སྒྲོགས་རྡོ་རྗེ་གྲོ་ལོད་སོགས། །གང་འདུལ་སྒྱུ་འཕྲུལ་དྲྭ་བའི་ཚུལ་འཆང་བ། །སྐྱབས་གནས་ཀུན་འདུས་མཆོག་ལ་གསོལ་བ་འདེབས། །སངས་རྒྱས་ཡེ་ཤེས་རྒྱལ་བ་མཆོག་དབྱངས་སྡེ། །ནམ་མཁའི་སྙིང་པོ་ཛྙ་ན་ཀུ་མཱ་ར། །ཡེ་ཤེས་མཚོ་རྒྱལ་དཔལ་གྱི་ཡེ་ཤེས་ཞབས། །དཔལ་གྱི་སེང་གེ་རྣམས་ལ་གསོལ་བ་འདེབས། །བེ་རོ་ཙཱ་ན་ཆོས་རྒྱལ་ཁྲི་སྲུང་ཞབས། །གཡུ་སྒྲ་སྙིང་པོ་རྡོ་རྗེ་བདུད་འཇོམས་རྩལ། །ཡེ་ཤེས་དབྱངས་དང་སོག་པོ་ལྷ་དཔལ་སྡེ། །སྣ་ནམ་ཡེ་ཤེས་རྣམས་ལ་གསོལ་བ་འདེབས། །དཔལ་གྱི་དབང་ཕྱུག་ལྡན་མ་རྩེ་མང་དང་། །སྐ་བ་དཔལ་བརྩེགས་ཤུད་བུ་དཔལ་གྱི་སེང་། །རྒྱལ་བའི་བློ་གྲོས་འབྲོག་བན་ལོ་ཙཱ་བ། །དྲན་པ་ནམ་མཁའ་རྣམས་ལ་གསོལ་བ་འདེབས། །འོ་བྲན་དབང་ཕྱུག་རྨ་བན་རིན་ཆེན་མཆོག །དཔལ་གྱི་རྡོ་རྗེ་ལང་གྲོ་དཀོན་མཆོག་འབྱུང་། །རྒྱལ་བ་བྱང་ཆུབ་དགོངས་པ་མངོན་གྱུར་པའི། །ཐུགས་སྲས་རིག་འཛིན་རྣམས་ལ་གསོལ་བ་འདེབས། །གསོལ་བ་འདེབས་སོ་ཨོ་རྒྱན་རིན་པོ་ཆེ། །བྱིན་གྱིས་རློབས་ཤིགས་རིག་འཛིན་སྤྲུལ་པའི་ཚོགས། །ཕྱི་ནང་གསང་བའི་བར་ཆད་ཞི་བ་དང་། །བསམ་པ་ལྷུན་གྱིས་འགྲུབ་པར་མཛད་དུ་གསོལ། །ལུས་ངག་ཡིད་ལ་རྡོ་རྗེའི་དབང་བཞི་སྐུར། །ནད་གདོན་སྡིག་སྒྲིབ་པར་ཆད་དབྱིངས་སུ་སོལ། །སྐུ་གསུང་ཐུགས་ཡོན་ཕྲིན་ལས་དངོས་གྲུབ་སྩོལ། །རྣམ་གྲོལ་སྐུ་བཞི་ཐོབ་པར་བྱིན་གྱིས་རློབས། །ཞེས་ཕུར་ཚུགས་སུ་གསོལ་བ་གདབ། སྤྲོ་ན་ལེའུ་བདུན་མ་དང་། བསམ་པ་ལྷུན་གྲུབ། བར་ཆད་ལམ་སེལ་སོགས་གསོལ་འདེབས་རིགས་གང་ཤེས་སྐབས་འདིར་བྱ། གསོལ་འདེབས་ཀྱི་བསྙེན་པ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་ཅི་ནུས་སུ་བཟླས་མཐར། རིག་འཛིན་བླ་མའི་སྐུ་ཡི་གནས་བཞི་ནས། །འོད་ཟེར་བྱུང་བ་བདག་གི་གནས་བཞིར་ཐིམ། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡིས། །བྱིན་གྱིས་བརླབས་ནས་དབང་བཞི་ཐོབ་པར་གྱུར། །མཐར་ནི་ཚོགས་ཞིང་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །འཁོར་འདས་རོ་གཅིག་འོད་གསལ་ཐིག་ལེའི་ཀློང་། །དོན་གཉིས་འབྲས་བུ་སྨིན་པའི་བཀྲ་ཤིས་སྩོལ། །ཅེས་དབང་བླངས་ཤིང་བསྔོ་སྨོན་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པའང་དད་ལྡན་ན་ཐཱའི་མིང་ཅན་གྱིས་གསོལ་བ་བཏབ་པ་ལྟར། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩིའི་དབང་པོས་བྲིས་པ་སིདྡྷིར་སྟུ།། །། གནས་བརྟན་ཕྱག་མཆོད་དང་འབྲེལ་བར་ཆོ་ག་མདོར་བསྡུས་བྱ་ཚུལ། འཇམ་དབྱངས་མཁྱེན་བརྩེའི་དབང་པོ།གནས་བརྟན་ཕྱག་མཆོད་དང་འབྲེལ་བར་ཆོ་ག་མདོར་བསྡུས་བྱ་ཚུལ་བཞུགས། ༀ་སྭ་སྟི། པཎ་ཆེན་ཤཱཀྱ་ཤྲིས་མཛད་པར་གྲགས་པའི་གནས་བརྟན་ཕྱག་མཆོད་དང་འབྲེལ་བར་ཆོ་ག་མདོར་བསྡུས་ཙམ་བྱ་ཚུལ་གྱི་ངག་འདོན་ནི། སངས་རྒྱས་ཆོས་ཚོགས་ལན་གསུམ། སེམས་ཅན་ཐམས་ཅད་བདེ་བ་དང་སོགས། སྐྱབས་གནས་དཀོན་མཆོག་གསུམ་གྱི་བདེན་པ་དང་། །རྒྱལ་བ་སྲས་བཅས་རྣམས་ཀྱི་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་དག་སྟོབས་ཀྱིས། །སྣོད་བཅུད་བདེ་ཅན་ཞིང་གི་བཀོད་པའི་དབུས། །ཡིད་འཕྲོག་ནོར་བུའི་གཞལ་མེད་ཁང་ཆེན་པོར། །རིན་ཆེན་སེང་ཁྲི་པད་ཟླའི་གདན་མཆོག་དང་། །དངོས་བཤམས་གཟུངས་རིག་མོས་སྟོབས་ཀྱིས་སྤྲུལ་པའི། །མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །ཅེས་དང་། ན་མོ་རཏྣ་ཏྲ་ཡཱ་ཡ་སོགས་མཆོད་པའི་སྤྲིན་གྱི་སྔགས་ལན་གསུམ་རོལ་མོ་བཅས་བྱ། སྤོས་བཏུལ་ཞིང་གདངས་དང་བཅས། ལག་མཐིལ་ལྟར་མཉམ་རིན་ཆེན་གྱིས་སྤྲས་པ། །ལྗོན་ཤིང་ཆུ་མཚོས་བརྒྱན་པའི་ས་གཞིའི་དབུས། །རིན་ཆེན་ལས་གྲུབ་གྲུ་བཞི་སྒོ་བཞི་པ། །པདྨ་ཉི་ཟླས་བརྒྱན་པའི་གདན་སྟེང་དུ། །ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །རྣམ་གྲོལ་ལམ་ལ་འགོད་མཛད་འགྲོ་བའི་མགོན། །ཐུབ་པ་མཆོག་དང་གནས་བརྟེན་ཆེན་པོ་རྣམས། །འཁོར་དང་བཅས་པ་གནས་འདིར་གཤེགས་སུ་གསོལ། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །ཤེས་རབ་མེ་འབར་ཉོན་མོངས་མཚོ་སྐེམས་ཤིང་། །རྣམ་གྲོལ་བསོད་ནམས་ཞིང་དུ་བཀའ་སྡོད་པ། །ཕྱོགས་བཅུའི་ཉན་ཐོས་དགེ་འདུན་བཞུགས་སོ་འཚལ། །ཡོན་སྦྱོར་མཆོད་པའི་གནས་སུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །འགྲོ་བའི་མགོན་པོ་ཤཱཀྱ་སེང་གེ་ཡིས། །སངས་རྒྱས་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་ཁ་འབྱེད་པའི། །ཆོས་སྐྱོང་དགྲ་བཅོམ་ཆེན་པོ་བཞུགས་སོ་འཚལ། །དམ་ཆོས་སྤེལ་བའི་སླད་དུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མི་ཕམ་ནག་ན་གནས། །དུས་ལྡན་རྡོ་རྗེ་མོ་བུ་བཟང་པོ་དང་། །གསེར་བེའུ་བྷ་ར་དྷྭ་ཛ་གསེར་ཅན་མཆོག །འཕགས་པ་བ་ཀུ་ལ་དང་སྒྲ་ཅན་འཛིན། །ལམ་བསྟན་བྷ་ར་དྷྭ་ཛ་བསོད་སྙོམས་ལེན། །ལམ་བསྟན་ཀླུའི་སྡེ་སྦེད་བྱེད་མི་བྱེད་པ། །དགྲ་བཅོམ་གནས་བརྟེན་ཆེན་པོ་དེ་དག་ནི། །བསོད་ནམས་རིན་ཆེན་གླིང་དུ་སྤྱན་འདྲེན་གྱིས། །གོང་གི་ཚིག་རྐང་འདི་གཉིས་ཆད་དམ་སྙམ། འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྤང་དང་ཡེ་ཤེས་ཕུན་ཚོགས་སངས་རྒྱས་ཀྱང་། །གདུལ་བྱའི་དབང་གིས་ཉན་ཐོས་ཚུལ་འཛིན་པ། །ཁྱད་པར་ཅན་གྱི་ཕྲིན་ལ་ཆོས་སྐྱོང་བའི། །གནས་བརྟན་བཅུ་དྲུག་འདིར་བྱོན་གདན་ལ་བཞུགས། །བདེ་གཤེགས་བཀའ་ལུང་གཙོར་མཛད་བསྟན་པ་སྲུང་། །རང་དོན་དོར་ནས་འཁོར་བའི་ནགས་ཚལ་དུ། །གཞན་དོན་ལྷུར་མཛད་གནས་བརྟན་བཅུ་དྲུག་པོ། །དམ་བཅས་ཐུགས་རྗེའི་དབང་གིས་གནས་འདིར་གཤེགས། །དགེ་བསྙེན་སྐྱབས་གསོལ་བདེན་པའི་ཚིག་བརྟན་པ། །དཀོན་མཆོག་གསུམ་གྱི་ཞབས་འབྲིང་མཆིས་སོ་འཚལ། །བསོད་ནམས་རིན་ཆེན་ཞིང་དུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །རོལ་མོ་བཅས་སྤྱན་དྲང་། ཇི་སྙེད་སུ་དག་སོགས་ནས། བདག་གིས་བསྟོད། དེ་ནས། མཚུངས་མེད་ལྟ་བས་མི་ངམས་ཤིང་། །གསེར་གྱི་མདོག་ཅན་མཛེས་པའི་སྐུ། །ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །ས་གནོན་མཉམ་བཞག་མཛད་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །གངས་རི་ཆེན་པོ་ཏི་སེ་ལ། །འཕགས་པའི་གནས་བརྟན་ཡན་ལག་འབྱུང་། །དགྲ་བཅོམ་སྟོང་དང་སུམ་བརྒྱས་བསྐོར། །སྤོས་ཕོར་རྔ་ཡབ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱི་རློབས། །དྲང་སྲོང་རི་ཡི་ཤེལ་ནགས་ན། །འཕགས་པའི་གནས་བརྟན་མི་ཕམ་པ། །དགྲ་བཅོམ་བརྒྱ་ཕྲག་གཅིག་གིས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །ལོ་མ་བདུན་པའི་རི་ཕུག་ན། །འཕགས་པའི་གནས་བརྟན་ནགས་ན་གནས། །དགྲ་བཅོམ་སྟོང་དང་བཞི་བརྒྱས་བསྐོར། །སྡིག་འཛུབ་རྔ་ཡབ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །འཛམ་བུ་གླིང་གི་ཟངས་གླིང་ན། །འཕགས་པའི་གནས་བརྟན་དུས་ལྡན་ནི། །དགྲ་བཅོམ་སྟོང་དང་ཆིག་བརྒྱས་བསྐོར། །གསེར་གྱི་རྣ་ཀོར་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱི་རློབས། །སིངྒ་ལ་ཡི་གླིང་ན་ནི། །གནས་བརྟན་རྡོ་རྗེ་མོ་ཡི་བུ། །དགྲ་བཅོམ་ཆེན་པོ་སྟོང་གིས་བསྐོར། །སྡིག་མཛུབ་རྔ་ཡབ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །ཆུ་བོ་ཡ་མུ་ན་གླིང་ན། །འཕགས་པའི་གནས་བསྟན་བཟང་པོ་ནི། །དགྲ་བཅོམ་སྟོང་དང་ཉིས་བརྒྱས་བསྐོར། །ཆོས་འཆད་མཉམ་བཞག་མཛད་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །གནས་མཆོག་ཁ་ཆེའི་ཡུལ་ན་ནི། །འཕགས་པའི་གནས་བརྟན་གསེར་བེའུ། །དགྲ་བཅོམ་ཆེན་པོ་ལྔ་བརྒྱས་བསྐོར། །རིན་ཆེན་ཞགས་པ་འཛིན་ཕྱག་འཚལ། །བླ་མའི་སྐུ་ཚེ་བསྟན་པ་དང་། །བསྟན་པ་རྒྱས་པར་བྱིན་གྱིས་རློབས། །ནུབ་ཀྱི་བ་ལང་སྤྱོད་ན་ནི། །བྷ་ར་དྷྭ་ཛ་གསེར་ཅན་ལ། །དགྲ་བཅོམ་ཆེན་པོ་བདུན་བརྒྱས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །བྱང་གི་སྒྲ་མི་སྙན་ན་ནི། །འཕགས་པའི་གནས་བརྟན་བ་ཀུ་ལ། །དགྲ་བཅོམ་ཆེན་པོ་དགུ་བརྒྱས་བསྐོར། །ཕྱག་གཉིས་ནེའུ་ལེ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །པྲི་ཡང་ཀུ་ཡི་གླིང་ན་ནི། །འཕགས་པའི་གནས་བརྟན་སྒྲ་གཅན་འཛིན། །དགྲ་བཅོམ་སྟོང་དང་ཆིག་བརྒྱས་བསྐོར། །རིན་ཆེན་སྲོག་ཞུ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །བྱ་རྒོད་ཕུང་པོའི་རི་བོ་ལ། །འཕགས་པའི་གནས་བརྟན་ལམ་ཕྲན་བསྟན། །དགྲ་བཅོམ་སྟོང་དང་དྲུག་བརྒྱས་བསྐོར། །ཕྱག་གཉིས་མཉམ་བཞག་མཛད་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །ཤར་གྱི་ལུས་འཕགས་གླིང་ན་ནི། །བྷ་ར་དྷྭ་ཛ་བསོད་སྙོམས་ལེན། །དགྲ་བཅོམ་སྟོང་ཕྲག་གཅིག་གིས་བསྐོར། །གླེགས་བམ་ལྷུང་བཟེད་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །ལྷ་གནས་སུམ་ཅུ་རྩ་གསུམ་ན། །འཕགས་པའི་གནས་བརྟན་ལམ་བསྟན་ནི། །དགྲ་བཅོམ་ཆེན་པོ་དགུ་བརྒྱས་བསྐོར། །ཆོས་འཆད་གླེགས་བམ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །རི་ཡི་རྒྱལ་པོ་ངོས་ཡངས་ལ། །འཕགས་པའི་གནས་བརྟན་ཀླུ་ཡི་སྡེ། །དགྲ་བཅོམ་སྟོང་དང་ཉིས་བརྒྱས་བསྐོར། །བུམ་པ་འཁར་གསིལ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །རི་ཡི་རྒྱལ་པོ་བྷི་ཧུ་ལར། །འཕགས་པའི་གནས་བརྟན་སྦེད་བྱེད་ནི། །དགྲ་བཅོམ་སྟོང་དང་བཞི་བརྒྱས་བསྐོར། །ཕྱག་གཉིས་གླེགས་བམ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །རི་ཡིས་རྒྱལ་པོ་གངས་ཅན་ལ། །འཕགས་པའི་གནས་བརྟན་མི་ཕྱེད་པ། །དགྲ་བཅོམ་སྟོང་ཕྲག་གཅིག་གིས་བསྐོར། །བྱང་ཆུབ་མཆོད་རྟེན་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་བསྟན་པར་བྱིན་གྱིས་རློབས། །འཕགས་པའི་དགེ་བསྙེན་དྷར་རྨཱ་ཏ། །རལ་པ་ཐོད་བཅིངས་གླེགས་བམ་ཁུར། །སྣང་མཐའ་མདུན་གྱི་མཁའ་ལ་གཟིགས། །རྔ་ཡབ་བུམ་པ་འཛིན་ཕྱག་འཚལ། །བླ་མའི་སྐུ་ཚེ་བརྟན་པ་དང་། །བསྟན་པ་རྒྱས་པར་བྱིན་གྱིས་རློབས། །བརྩོན་པས་གོ་བགོས་མཐུ་སྟོབས་ལྡན། །སངས་རྒྱས་བསྟན་པ་ལེགས་བསྲུང་བ། །ཤར་ལྷོ་ནུབ་བྱང་ཕྱོགས་བཞི་ཡི། །རྒྱལ་ཆེན་བཞི་ལ་ཕྱག་འཚལ་ལོ། །ཞེས་ཚར་གསུམ་སོགས་ཅི་ནུས། མེ་ཏོག་དམ་པ་སོགས་ནས། མཆོད་པར་བགྱི། །ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝ་ཏེ་བཛྲ་ས་ར་པྲ་མརྡྷ་ནེ། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀྶཾ་བུདྡྷ་ཡ། ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜ་པ་སཾ་ཀྲ་མ་ཎ་བཛྲེ་སརྦ་ཀརྨ་ཨཱ་བ་ར་ཎ་བི་ཤོ་དྷ་ནི་བཛྲེ་སྭཱ་ཧཱ། སྔགས་དང་རོལ་མོ་བཅས་བྱ། སྤྲོ་ན་མཎྜལ་ཅི་ནུས་འབུལ། འདོད་ཆགས་ཞེ་སྡང་སོགས་ནས། ཕྱི་བསྔོའོ། །གཟུངས་བཟླ་བར་སྤྲོན། ཐུབ་དབང་འཁོར་བཅས་ཀྱི་མཚན་ནས་བོས་ཏེ་ཐུགས་དམ་བསྐུལ་བར་བསམས་པས་མོས་གུས་རྩེ་གཅིག་པས། ཏདྱཱ་ཐཱ། ༀ་མུ་ནི་མུ་ནི་མ་ཧཱ་མུ་ནེ་ཤཱཀྱ་མུ་ན་ཡེ་སྭཱ་ཧཱ། ཞེས་བརྒྱ་རྩ་སོགས་ཅི་ནུས་བཟླས་མཐར། སངས་རྒྱས་སྦྲུལ་པ་དགྲ་བཅོམ་འཕགས་པའི་ཚོགས། །འགྲོ་བའི་དོན་དུ་བསྟན་པ་སྐྱོང་མཛད་པ། །དཀོན་མཆོག་གསུམ་དངོས་གནས་བརྟན་བཅུ་དྲུག་གིས། །བསྟན་པ་ཡུན་རིང་གནས་པར་བྱིན་གྱིས་རློབས། །ཐུགས་རྗེའི་བདག་ཉིད་གནས་བརྟན་བཅུ་དྲུག་གིས། །འཁོར་ཚོགས་སྲིད་མཚོ་ལས་བརྒལ་ཉོན་མོངས་མེད། །ཁྲི་དང་དྲུག་སྟོང་བཞི་བརྒྱའི་ཚོགས་རྣམས་ཀྱིས། །བསྟན་པ་ཡུན་རིང་གནས་པར་བྱིན་གྱིས་རློབས། །སེམས་ཅན་ཀུན་གྱི་གསོད་གྱུར་དགྲ་བཅོམ་པ། །རིགས་དང་ཞབས་ལྡན་སྐྱེ་དགུའི་སྦྱིན་གནས་ཆེ། །འཕགས་པའི་གང་ཟག་ཆེན་པོ་ཁྱེད་རྣམས་ཀྱིས། །བསྟན་པ་ཡུན་རིང་གནས་པར་བྱིན་གྱིས་རླབས། །བདག་གཞན་དགེ་བའི་རྩ་བ་འདི་ཡིས་ནི། །ཕན་བདེའི་འབྱུང་གནས་བསྟན་པ་འཕེལ་འགྱུར་ཞིང་། །སྡུག་བསྔལ་ཀུན་འབྱུང་མ་ལུས་རབ་སྤངས་ནས། །སྲིད་པའི་རྒྱ་མཚོ་མྱུར་དུ་སྐེམས་པར་ཤོག །བསོད་ནམས་རྒྱ་མཚོ་ཡོངས་སུ་རྫོགས་བྱེད་ཅིང་། །ཡེ་ཤེས་རྒྱ་མཚོ་རྣམ་པར་དག་གྱུར་ནས། །སྨོན་ལམ་རྒྱ་མཚོ་མ་ལུས་ཡོངས་རྫོགས་ནས། །ལུས་ཅན་ཀུན་ལས་ཁྱད་པར་འཕགས་པར་ཤོག །ཚོགས་གཉིས་མཐར་ཕྱིན་དུས་གསུམ་རྒྱལ་བ་ཡི། །ཕྲིན་ལས་བསྒྲུབ་ཅིང་ཡོན་ཏན་རྣམ་དབྱེ་མེད། །སྐལ་པ་མཉམ་པའི་གདུལ་བྱ་སྨིན་མཛད་པར། །མཉམ་མེད་བླ་མ་མཆོག་གི་བཀྲ་ཤིས་ཤོག །དུས་གསུམ་རྒྱལ་བ་སྲས་བཅས་ཐུགས་རྗེ་ཡིས། །ཉན་ཐོས་ཚུལ་དུ་སྲིད་པ་ཇི་སྲིད་པར། །བསྟན་པ་སྐྱོང་ཞིང་འགྲོ་བའི་དོན་མཛད་པ། །གནས་བརྟེན་ཆེན་པོ་རྣམས་ཀྱི་བཀྲ་ཤིས་ཤོག །ཟབ་ཅིང་རྒྱ་ཆེའི་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ཡི་བཀྲ་ཤིས་ཤོག །ཕན་བདེ་འབྱུང་བའི་གནས་གཅིག་པོ། །བསྟན་པ་ཡུན་རིང་གནས་པ་དང་། །བསྟན་འཛིན་སྐྱེས་བུ་དམ་པ་རྣམས། །སྐུ་ཚེའི་རྒྱལ་མཚན་བརྟན་གྱུར་ཅིག །སྟོན་པ་འཇིག་རྟེན་ཁམས་སུ་བྱོན་པ་དང་། །བསྟན་པ་ཉི་འོད་བཞིན་དུ་གསལ་བ་དང་། །བསྟན་འཛིན་བུ་སློབ་དགེ་འདུན་མཐུན་པ་ཡིས། །བསྟན་པ་ཡུན་རིང་གནས་པའི་བཀྲ་ཤིས་ཤོག །ཅེས་སོགས་ཀྱི་བཀྲ་ཤིས་ཅི་རིགས་བརྗོད་མཐར་རོལ་མོ་བྱའོ། །ཞེས་པའང་མཉྫུ་གྷོ་ཥས་བྲིས་པ་དགེ། སརྦ་མངྒ་ལཾ།། །། ཐུབ་ཆོག་བྱིན་རླབས་གཏེར་མཛོད། མི་ཕམ་འཇམ་དབྱངས་རྣམ་རྒྱལ།ཨ དྷི ཥྵི ཏ ནི དྷི ཀོ ཥཿ མུ ནི བི དྷི བི ཧ ར ཏི སྨ། ། ཐུབ་བསྟོད་བཅོམ་ལྡན་མ། མི་ཕམ་འཇམ་དབྱངས་རྣམ་རྒྱལ།ཐུབ་བསྟོད་བཅོམ་ལྡན་མ་བཞུགས་སོ། །བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །སྲིད་པ་སྣ་ཚོགས་སྒྱུ་མའི་གྲོང་ཁྱེར་ན། །སྒྱུ་མར་མཁྱེན་པའི་སྙིང་རྗེ་ཆེན་པོའི་ཐུགས། །འཇིགས་མེད་སེང་གེ་ལྟ་བུར་རྣམ་བསྒྱིངས་པ། །ཕྱོགས་ལས་རྣམ་པར་རྒྱལ་ལ་ཕྱག་འཚལ་ལོ། །དྭངས་པའི་མཁའ་ལ་ཉ་རྒྱས་ཟླ་ལྟར་ཆོས་དབྱིངས་ཞི་བའི་དཀྱིལ་འཁོར་ན། །མཚན་དཔེའི་ཆ་རྫོགས་ལྟ་བས་མི་ངོམས་ལྷུན་གྲུབ་གཟུགས་སྐུའི་རང་བཞིན་ནི། །རྟག་བརྟན་མི་གཡོ་དྲན་པས་སྙིང་ལ་བདུད་རྩིའི་དཔལ་སྟེར་བཅོམ་ལྡན་འདས། །མི་ཕྱེད་རྡོ་རྗེ་ཡེ་ཤེས་སྐུ་བརྙེས་ཤཱཀྱ་སེང་གེ་ཁྱོད་ལ་འདུད། །ཁྱོད་ནི་སྙིང་རྗེ་ཆེན་པོའི་གཞན་དབང་གིས། །བདག་ཅག་སྙིགས་མ་ལྔ་ཡི་སྐྱེ་བོ་ཀུན། །གཟུང་སླད་མ་དག་ཞིང་གི་འདམ་དུ་ཡང་། །སངས་རྒྱས་པདྨ་རྒྱས་པའི་རྣམ་པར་རོལ། །སྲིད་པ་གསུམ་པོ་མཐའ་དག་འདི། །གཟུགས་མི་མཚུངས་ཤིང་དེ་བཞིན་དུ། །འབྱོར་དང་ཤེས་རབ་བདེ་སྡུག་སོགས། །མི་མཚུངས་རྣམ་པ་སྣ་ཚོགས་ཀྱང་། །འདོད་དང་རྨོངས་དང་ཞེ་སྡང་དང་། །འཇིགས་པ་ཡི་ནི་ཞགས་པ་ཡིས། །ཀུན་ནས་དམ་པོར་བཅིངས་གྱུར་པ། །ཚུལ་འདི་ལ་ནི་ཀུན་ཀྱང་མཉམ། །མི་དང་འཁོར་ལོས་སྒྱུར་བ་དང་། །ལྷ་དང་ཚངས་པའི་འབྱོར་པ་ནི། །ཡིད་འོང་ལྟ་བུར་གང་གནས་པ། །དེ་ཉིད་དེ་ཡིས་རྣམ་པར་འཆིངས། །གོམ་པ་གཅིག་གིས་ས་ཆེན་འདི་མནན་ཞིང་། །དགྲ་སྟྭ་རལ་གྲི་གདེངས་པའི་ལག་སྟབས་ཀྱིས། །གཞན་སྟོབས་ཕྱེ་མར་བརླག་པའི་མཐུ་བོ་ཆེ། །དེ་ཡང་སྡང་བ་ཁོ་ནའི་བྲན་དུ་གྱུར། །སྲིད་ལ་རྣམ་དཔྱོད་ཆགས་པའི་སྲིད་པ་ཡི། །འཇིགས་དུས་མཐའ་དང་སྲིད་པའི་སྒྱུ་རྩལ་ལ། །བློ་གྲོས་རིང་ནས་འདྲིས་པ་དེ་དག་ཀྱང་། །རྨོངས་པའི་སྨག་ཆེན་དག་ཏུ་རྣམ་པར་འཁྱམས། །ལྷ་དང་མི་ཡི་ཆེ་དགུའི་ཅོད་པན་གྱིས། །རྐང་སྟེགས་ནོར་བུའི་ཁྲི་ལ་ཉེར་མཆོད་པ། །མངོན་མཐོའི་ཁེངས་པས་རློམས་པ་དེ་དག་ཀྱང་། །མི་བཟློག་འཇིགས་པའི་དུས་ཀྱི་ཕྱི་བཞིན་འབྲངས། །དེ་སླད་ཚངས་དང་དབང་པོ་དབང་ཕྱུག་དང་། །ཁྱབ་འཇུག་ལ་སོགས་སྲིད་ན་མཆོད་བྱ་བ། །དེ་དག་འདོད་དང་ཁྲོ་བའི་སྟོབས་མཆོག་ཏུ། །མཐོང་བས་བྱིས་པ་རྣམས་ཀྱི་སྐྱབས་སུ་བཟུང་། །གང་ཞིག་བདག་དང་བདག་གིར་རྣམ་བལྟ་བ། །འདི་ནི་སྲིད་པ་ཀུན་གྱི་ཚུལ་ལ་གནས། །འདི་ལ་གནས་རྣམས་རྒྱ་ཡིས་ཉ་བཞིན་དུ། །འདོད་རྨོངས་ཁྲོ་བ་འཇིགས་པའི་རུམ་དུ་འཆིང་། །ཆུ་ལ་མེ་དང་སྨག་ལ་སྣང་བ་བཞིན། །སྲིད་ན་འདི་ལས་བརྒལ་བའི་བློ་མེད་དེ། །དེ་ཕྱིར་བློ་ངན་འདི་ཡིས་མཚུངས་བཅིངས་པ། །སུ་ལ་བརྟེན་ནས་སུ་ཞིག་གྲོལ་བར་འགྱུར། །གང་གིས་བདག་མེད་སེང་གེའི་ང་རོ་ཡིས། །སྲིད་པའི་ཆོས་ཚུལ་ཀུན་ནས་རབ་བཤིག་ནས། །མཐའ་བཞིའི་བློ་ངན་མུན་པའི་གནས་མེད་པ། །རྟེན་འབྱུང་དྲི་མེད་བློ་གྲོས་སྣང་བའི་ལམ། །སྟོན་པ་རྒྱལ་བ་ཁྱོད་ལ་ནི། །བརྟེན་ན་རྣམ་པར་གྲོལ་འགྱུར་བ། །མཐོང་ནས་ཡིད་ཆེས་ཚིག་གིས་ནི། །སྐྱོན་བྲལ་ཁྱོད་ལ་ཅུང་ཟད་བསྟོད། །སྲིད་གསུམ་སྙིང་ལ་བདུད་རྩི་ཡི། །དཔལ་སྟེར་མཛེས་པའི་ཟླ་བ་དེའི། །འོད་ཀྱིས་འཇིག་རྟེན་གསུམ་པོ་འདི། །རྒྱུ་སྐར་བཞིན་དུ་རྣམ་པར་མནན། །དེ་ཚེ་ཡེ་ཤེས་མེ་རྣོན་ཟེར། །སྲིད་པའི་ནགས་ཚལ་རྣམས་ཟ་བ། །མ་བཟོད་དུང་ཕྱུར་བདུད་ཀྱི་དམག །རི་དང་ནགས་ནས་བཤོར་བ་བཞིན། །སྟོབས་ཆེན་གད་རྒྱང་དགོད་པ་ཡིས། །རི་བོ་རྡུལ་ཕྲན་བཞིན་དུ་འཐོར། །དགྲ་སྟྭ་རལ་གྲི་མདའ་དང་མདུང་། །སྣ་ཚོགས་སོ་རྣོན་མཚོན་གྱིས་གཟས། །དུག་དང་མེ་དང་རྡོ་རྗེའི་ཐོག །སེང་གེ་གླང་ཆེན་གདུག་པའི་སྦྲུལ། །མི་བཟད་འཇིགས་པ་སྣ་ཚོགས་དང་། །རི་རབ་འཕེན་ཅིང་རྒྱ་མཚོ་དྲངས། །སྲིད་པ་འདི་ན་འཇིགས་སོ་ཅོག །སྣ་ཚོགས་སྟོང་དུ་བསྡོམས་པ་ཡིས། །སེམས་མེད་མཁའ་ཡང་གཡོ་ནུས་པའི། །འཇིགས་པ་ཆེན་པོ་དེ་དག་ཀྱང་། །ལྷ་ལ་ལྷ་ཡི་མེ་ཏོག་གིས། །མཆོད་པ་བཞིན་དུ་བདེ་གཤེགས་ལ། །ལེགས་པ་ཁོ་ནར་གྱུར་པ་ཡིས། །དཔུང་བཅས་འདི་ནི་རྣམ་ཕར་བཏུལ། །རབ་འབར་དམྱལ་བའི་མེ་དཔུང་ཡང་། །གང་གིས་གཟིགས་པའི་མོད་ཉིད་ལ། །བདུད་རྩིའི་པད་ཚལ་ཉིད་འགྱུར་ན། །འཇིགས་པ་གང་གིས་དེ་ལ་འཇིགས། །ཁྱོད་སྔོན་ལམ་གྱི་སྐབས་ན་ཡང་། །ལུས་ལ་མཚོན་ཆ་རྣོན་པོ་ཡིས། །དྲས་ཤིང་དྲས་ཤིང་བཅད་གྱུར་པས། །བུད་ཤིང་བསྣན་པའི་མེ་བཞིན་དུ། །ཕྱིར་ཞིང་སྙིང་རྗེ་འཕེལ་གྱུར་ན། །དམིགས་མེད་སྙིང་རྗེའི་ཆ་རྫོགས་པ། །མི་ཕྱེད་རྡོ་རྗེའི་སྐུ་བརྙེས་ཚེ། །འཇིགས་པ་མེད་པར་ལྟ་ཅི་སྨོས། །གང་གིས་ཤེས་བྱའི་དངོས་པོ་ཀུན། །སྒྱུ་མ་ལྟ་བུར་རྣམ་རྟོགས་པ། །ཤེས་བྱ་གང་གིས་དེ་ཉིད་ལ། །འཇིགས་པ་རབ་ཏུ་སྐྱེད་བར་ནུས། །སྟོང་དང་སྙིང་རྗེ་ཆེན་པོའི་མཐར་ཐུག་པ། །མཉམ་པ་ཉིད་བརྙེས་མི་ཕྱེད་རྡོ་རྗེའི་སྐུ། །འཇིགས་པ་ཀུན་ལས་དབུགས་འབྱིན་མཛད་པ་པོ། །འཇིགས་མེད་ཞི་བའི་དབྱིངས་ལ་ཕྱག་འཚལ་ལོ། །ཁྱོད་ལ་བལྟ་ཞིང་ཟུར་གྱིས་འཛུམ་པ་སྒེག་པའི་འགྲོས་ལྡན་སྨིན་ལེགས་མ། །ཡིད་འོང་ཟླ་བ་པདྨ་དང་ནི་ཀུ་མུད་ཀུནྡ་ལྟ་བུའི་གདོང་། །འཆར་ཁའི་གཟི་འབར་ནོར་བུའི་དོ་ཤལ་སིལ་སིལ་འཁྲོལ་བའི་འཇོ་སྒེག་གིས། །བརླ་ཡི་འཁྲི་ཤིང་ལྡེམ་ལྡེམ་གཡོ་བའི་རྫུ་བག་ངོམ་པའི་ལྷ་མོ་རྣམས། །མཐོན་མཐིང་སྤྲིན་ལས་གློག་ཕྲེང་ལྟར་འཁྱུག་ཙནྡན་ཏ་བའི་དྲི་བཟང་བཅས། །མི་བརྟན་གཡོ་བའི་ཟློས་གར་རྩེ་ཞིང་སྙིང་དུ་སྡུག་སྡུག་ལྟར་འཇུག་པའི། །འདོད་པའི་ཚིག་གིས་ཡང་ཡང་བྲིད་ཀྱང་ཁྱོད་ཀྱི་བ་སྤུའི་རྩེ་མ་གཡོས། །དེ་ཚེ་དེ་རྣམས་མཁའ་ལ་རེག་ལྟར་རེ་བ་མེད་པའི་སེམས་ཀྱིས་སོང་། །ཁ་བ་ལྟར་དཀར་གླང་པོ་ཆེ་དང་རྨ་བྱའི་མགྲིན་པ་ལྟར་སྔོ་བའི། །རྟ་མཆོག་རིན་ཆེན་གསེར་གྱི་འཁོར་ལོ་པདྨའི་མིག་ཅན་ཡིད་འོང་མ། །བསམ་འཕེལ་ནོར་འཛིན་བློན་པོ་དང་ནི་དཔུང་བཅས་དམག་དཔོན་ལྡན་པ་ཡི། །རྒྱལ་སྲིད་མཆོག་ཀྱང་རུལ་པའི་རོ་ལྟར་རྣམ་པར་སྤངས་ནས་གཅིག་པུར་གཤེགས། །རྣག་ཅན་སྲིད་པའི་རང་མཚངས་རིག་ཅིང་དེ་ཡང་སྒྱུ་མ་ལྟར་མཁྱེན་པ། །སྲིད་ཞི་མཉམ་ཉིད་ཞི་བའི་དབྱིངས་སུ་དགོངས་པ་མཉམ་པ་ཉིད་གྱུར་ཕྱིར། །མཁའ་འདི་བྲལ་ནས་སྣ་ཚོགས་ཡོ་བྱད་ཉེ་བར་བསྒྲུབས་པར་ནུས་མོད་ཀྱི། །འོན་ཀྱང་ཁྱོད་ཐུགས་ཆགས་དང་བྲལ་ལ་ནམ་ཡང་ཆགས་པས་བསླུ་མི་ནུས། །འབྱོར་པས་བརྒྱན་པའི་གླིང་བཞི་དང་ནི་བུ་དང་བུ་མོ་ཆུང་མ་རྟ་དང་ཤིང་རྟ་དང་། །རྒྱལ་སྲིད་མཆོག་དང་རིན་ཆེན་སྣ་ཚོགས་འཇིག་རྟེན་ཡོད་རྒུའི་དངོས་གཞན་ཐམས་ཅད་དང་ནི་ཡང་། །མགོ་དང་ཡན་ལག་ལུས་གཏོང་བ་ཡི་གཞན་ལ་ཕན་པ་སློབ་པའི་ཚེ་ན་ཁྱོད་མཛད་ན། །སྒྲིབ་གཉིས་མ་ལུས་ཡང་དག་ཟད་པ་དེ་ཡི་ཚེ་ན་ཆགས་དང་བྲལ་བ་སྨོས་ཅི་འཚལ། །མདོར་ན་མ་ལུས་སྲིད་པ་ཐམས་ཅད་ཀྱི། །ཆགས་པ་ཀུན་ལས་རྣམ་པར་གྲོལ་ན་ཡང་། །ཐུགས་རྗེས་འགྲོ་ལ་རྗེས་སུ་ཆགས་པའི་ཐུགས། །མཁའ་ལྟར་འཛད་པ་མེད་པ་ཁྱོད་ལ་འདུད། །གཞན་ལ་ཕན་པ་ཁོ་ན་ལྷུར་མཛད་པའི། །མཐོང་ན་མངོན་པར་དགའ་བའི་སྐུ་མཆོག་ཀྱང་། །རྨོངས་པས་དཀྲུགས་པས་བཤིག་ལ་མངོན་ཞེན་པ། །སྡང་བ་རྣམས་ཀྱང་བྱམས་པས་བུ་བཞིན་བསྐྱངས། །དྲེགས་པའི་གླང་པོ་མྱོས་པ་རྣམས་རྦད་ཅིང་། །མི་བཟད་དུག་གིས་སྐུ་ལ་བྱུགས་བྱས་ནས། །དྲག་པོའི་རྦབ་ཀྱིས་བསྣུན་པ་དེ་དག་ཀྱང་། །སྒྲ་གཅན་ཟིན་དང་མཚུངས་པར་ཀུན་ཏུ་གཟིགས། །སྡང་བའི་མེ་འབར་གདུག་པའི་སྦྲུལ་གྱི་ཁའི། །མི་བཟད་དུག་གི་ཚང་ཚིང་རབ་འཁྲིགས་ནས། །རྣོ་དབལ་ཤུགས་དྲག་མཚོན་ཆའི་ཆར་པ་ཡང་། །བྱམས་པའི་སྟོབས་ཀྱིས་མེ་ཏོག་སྤྲིན་དུ་ཆགས། །ཕྱོགས་བཅུ་དག་ན་དུས་གསུམ་ཀུན་ཏུ་ཡང་། །མཁའ་ལས་བརྒལ་བའི་སྐྱེ་བོ་འགའ་མེད་པ། །དེ་བཞིན་བྱམས་ཆེན་ཁྱོད་ཀྱིས་མ་བཟུང་བ། །སྲིད་པའི་རིས་ན་འགྲོ་བ་སུ་ཡང་མེད། །བཟོད་བླགས་འཇིགས་པ་མི་བཟད་དམྱལ་བའི་མེ། །བྱམས་པའི་མཐུ་ཡིས་བདུད་རྩི་ལྟ་བུར་བསིལ། །བསམ་གྱིས་མི་ཁྱབ་བརྩེ་བ་ཆེན་པོ་ལ། །དཔེ་རུ་བྱས་ན་ནམ་མཁའ་ཉིད་ཀྱང་ཆུང་། །བདུད་རྩི་མཆོག་གི་གོ་འཕང་མ་བརྙེས་ཀྱང་། །དཔའ་བོ་ཁྱོད་ནི་སློབ་པ་ལམ་གྱི་དུས། །བདག་ཉིད་གཅེས་པར་འཛིན་པའི་བློ་ངན་ཀུན། །རབ་འབར་སྣང་བས་མུན་པ་བཞིན་དུ་བཅོམ། །བདག་གཞན་མཉམ་པ་ཉིད་དུ་མཐོང་ནས་ཀྱང་། །བདག་བཞིན་སྒྱུ་མའི་དོན་ལ་མི་མཁས་པའི། །བདག་ལྷའི་སྐྱེ་བོ་ཀུན་ལ་སྙིང་རྗེའི་སེམས། །བདག་ལ་བདག་གིས་བྱམས་པ་ལས་ཀྱང་ལྷག །རིང་ནས་སྲོག་ལ་རྔམ་པའི་མཚོན་རྣོན་གྱིས། །འདེབས་བཞིན་དུ་ཡང་སྡང་བའི་མེ་འབར་བ། །ཕྱིར་ཞིང་རང་གི་སྲོག་གིས་དེ་བསྲུངས་ནས། །ཕན་པའི་ཐབས་ཚུལ་སྟོང་ལ་རྣམ་པར་སྦྱར། །མི་བཟད་སྲིད་པ་འདི་ཡི་སྡུག་བསྔལ་ཀུན། །བདག་ཉིད་གཅིག་པུས་སྐལ་བར་ནོད་སྙམ་པའི། །སྙིང་སྟོབས་ཚུགས་མེད་རྡོ་རྗེའི་རང་བཞིན་ཅན། །དེ་ཡི་བྱམས་པ་གང་གིས་འཇོམས་པར་འགྱུར། །དེ་ལྟར་བསྐལ་པ་དུ་མར་ཡང་དང་ཡང་། །རྨད་བྱུང་གོམས་པ་མཆོག་གི་མཐར་ཕྱིན་ནས། །སྒྲིབ་གཉིས་ཀུན་ཟད་བྱམས་པའི་དཀྱིལ་འཁོར་ཆ། །ཡོངས་རྫོགས་རྒྱལ་བའི་དབང་པོ་སྨོས་ཅི་འཚལ། །བརྩེ་བ་མི་བཟད་བདུད་རྩིའི་སྤྲིན་ཆེན་གང་། །སྟོང་ཉིད་ཞི་བའི་དབྱིངས་སུ་རོ་གཅིག་པའི། །བསམ་གྱིས་མི་ཁྱབ་ཐུགས་རྗེའི་བདག་ཉིད་མཆོག །མགོན་པོ་སྟོབས་བཅུ་མངའ་བ་ཁྱོད་ལ་འདུད། །ཁྱོད་ཀྱི་ཡེ་ཤེས་ཆེན་པོ་ཡིས། །ཇི་ལྟ་ཇི་སྙེད་ཤེས་བྱའི་དོན། །མངོན་སུམ་ཉིད་དུ་གཟིགས་པས་ན། །ཐམས་ཅད་མཁྱེན་ཅེས་ཀུན་ཏུ་གྲགས། །གདུལ་བྱའི་ཁམས་དབང་བསམ་པ་དང་། །བག་ལ་ཉལ་བཅས་ལེགས་གཟིགས་ནས། །མཐུན་པའི་ཆོས་ཀྱིས་འགྲོ་བ་ཀུན། །ཐར་བ་མཆོག་གི་གནས་སུ་བཀོད། །གང་གིས་ཇི་སྙེད་གསུང་བ་ཀུན། །ཆུ་གཏེར་ལ་ནི་ཆུ་བོ་བཞིན། །ཀུན་མཁྱེན་ཡེ་ཤེས་རྒྱ་མཚོ་ལ། །རྣམ་པ་ཀུན་ཏུ་གཞོལ་ཞིང་འབབ། །ནམ་མཁའི་ཁམས་ལས་བརྒལ་བ་ཡི། །འཇིག་རྟེན་གང་ན་ཡོད་མིན་པ། །དེ་བཞིན་ཕྱོགས་དུས་ཤེས་བྱའི་ཆོས། །ཁྱོད་ཀྱིས་མི་མཁྱེན་གང་ཡང་མེད། །མཁྱེན་པ་དེ་ཡང་སྒྲིབ་གཉིས་ཀྱི། །དྲི་མ་ཀུན་ལས་རྣམ་གྲོལ་བའི། །ལག་མཐིལ་སྐྱུ་རུ་ར་བཞིན་དུ། །མ་ནོར་ཡང་དག་པར་ནི་གཟིགས། །མཁྱེན་པའི་སྐར་ཅིག་གཅིག་གིས་ནི། །ཤེས་བྱའི་དཀྱིལ་འཁོར་ཀུན་ཁྱབ་པ། །མེ་ལོང་ལ་ནི་གཟུགས་བརྙེན་བཞིན། །འབད་པ་མེད་པར་ངང་གིས་མཁྱེན། །སྒྲིབ་པ་ཀུན་ལས་ངེས་གྲོལ་ནས། །ཆོས་ཀྱི་དབྱིངས་དང་རོ་མཉམ་པའི། །རང་བྱུང་ཡེ་ཤེས་དེ་ལ་ནི། །རིས་མེད་ཕྱིར་ན་གང་མི་མཁྱེན། །སྲིད་པ་འདི་དག་ཐམས་ཅད་ཀྱི། །སྣ་ཚོགས་གཞལ་བར་དཀའ་པའི་ཚུལ། །དུས་གཅིག་ཉིད་དུ་དྲིས་ན་ཡང་། །གསུང་གཅིག་དབྱངས་ཀྱིས་སོ་སོར་བརྗོད། །དགེ་སྦྱོང་བྲམ་ཟེ་ལྷ་དང་ནི། །ཚངས་སོགས་སྲིད་པའི་བློ་ལྡན་ཀུན། །འབད་དེ་བརྟགས་པར་གྱུར་ན་ཡང་། །ཀུན་མཁྱེན་མིན་སྤྱོད་དམིགས་སུ་མེད། །དེ་ཕྱིར་ཡང་དག་རིག་པ་བཞིའི། །སྤོབས་པའི་མཐུ་ཡིས་འཇིག་རྟེན་དུ། །སྤངས་དང་རྟོགས་དང་སྤང་བླང་ལ། །མི་འཇིགས་སེང་གེའི་སྒྲ་དབྱངས་སྒྲོགས། །མེ་ཡི་རང་བཞིན་ཚ་བ་ལྟར། །བདག་ཏུ་ལྟ་བ་འཁོར་བའི་གཤིས། །བུད་ཤིང་ཟད་པའི་མེ་བཞིན་དུ། །བདག་མི་ལྟ་ན་སྲིད་པ་འཇིག །དེ་ཕྱིར་བདག་ལྟའི་རྒྱ་མཚོ་ལ། །གནས་པའི་ཚངས་སོགས་ན་ཀྲ་རྣམས། །དཔྱོད་པའི་ཟློས་གར་རྩེ་ན་ཡང་། །ལྟ་བའི་ཆུ་དང་བྲལ་མི་ནུས། །སྣ་ཚོགས་འཇིག་རྟེན་འདི་དག་ནི། །གང་ལས་བྱུང་ཞིང་གང་གིས་འགག །དེ་ལྟར་རྣམ་པར་དཔྱད་པ་ན། །མཐའ་གཉིས་གཅིག་ལས་ཅི་ལྟར་བརྒལ། །ལ་ལས་ཚངས་སོགས་རྟག་པ་ཡི། །རྒྱུ་ལས་འཇིག་རྟེན་བྱུང་བར་འདོད། །ཚངས་སོགས་དེ་དག་སྐྱེས་ན་ནི། །སྐྱེས་ཕྱིར་རྟེན་པའི་དམ་བཅའ་འཇིག །མ་སྐྱེས་ཉིད་ན་མཁའ་བཞིན་དུ། །དེ་ཡོད་པར་ནི་ཅི་ཡིས་འགྲུབ། །མ་སྐྱེས་ཉིད་ཀྱི་གཏན་ཚིགས་ཀྱིས། །དངོས་པོ་མེད་པར་གྲུབ་པ་ཡིན། །དངོས་ཀུན་གཅིག་ཆར་མི་སྲིད་ཅིང་། །རིམ་གྱིས་སྐྱེ་ཞིང་འགག་འགྱུར་བས། །དངོས་པོ་དེ་ཀུན་བྱེད་ན་ནི། །རྒྱུ་ཡང་མི་རྟག་ཉིད་དུ་འགྱུར། །རྒྱུ་ལ་འགྱུར་བ་ཡོངས་མེད་ན། །ཇི་ལྟར་སྔར་བཞིན་ཕྱིས་དེ་བཞིན། །ནམ་མཁས་པདྨོ་མི་བསྐྱེད་པ། །དེ་ལྟར་རྟག་པའི་རྒྱུ་ཡིས་ནི། །མི་རྟག་འབྲས་བུ་བསྐྱེད་ཅེས་པ། །མི་འབྲེལ་མོ་གཤམ་བུ་བཞིན་ནོ། །ལ་ལས་འཇིག་རྟེན་སྣ་ཚོགས་པ། །རྒྱུ་མེད་ངོ་བོས་བྱུང་ཞེས་ཟེར། །འཇིག་རྟེན་ན་ནི་རྒྱུ་མེད་པའི། །དངོས་པོ་འགའ་ཡང་མ་མཐོང་བས། །མངོན་སུམ་ཉིད་དང་འགལ་བ་ལས། །རྒྱུ་མེད་ཅི་ཡི་ཕྱིར་ན་སྨྲ། །གལ་ཏེ་ངེས་པར་རྒྱུ་མེད་ན། །འབྲས་རྣམས་རྒྱུ་ལ་མི་ལྟོས་པའི། །མར་མེ་ལས་ཀྱང་མུན་པ་དང་། །མཁའ་ལས་ཨུཏྤལ་ཅིས་མི་སྐྱེ། །དངོས་པོ་མ་ལུས་དུས་ཀུན་ཏུ། །ཡོད་པར་ཅི་ཡི་ཕྱིར་མི་འགྱུར། །ཡང་ན་མཁའ་ལས་ཨུཏྤལ་ལྟར། །ཅི་ཡང་རྒྱུ་ཡིས་མི་བསྐྱེད་ཕྱིར། །རྒྱུ་ལ་བརྟེན་ཏེ་བྱུང་བ་ཡི། །དངོས་ཀུན་རྟག་ཏུ་མེད་པར་འགྱུར། །དེ་ལྟ་ན་ནི་འཇིག་རྟེན་དུ། །འབྲས་ཕྱིར་ས་བོན་གདབ་པ་སོགས། །རྩོམ་པ་ཐམས་ཅད་དོན་མེད་པས། །སུ་ཞིག་དེ་ལ་འཇུག་པར་འགྱུར། །དེ་ཕྱིར་རྟག་ཆད་མཐའ་བྲལ་བའི། །དངོས་པོའི་གཤིས་ལུགས་མ་ནོར་བར། །སྨྲ་བ་འཇིག་རྟེན་འདིར་མེད་ཀྱང་། །དགེ་སྦྱོང་ཆེན་པོས་འདི་སྐད་དུ། །ཆོས་རྣམས་ཐམས་ཅད་རྒྱུ་ལས་བྱུང་། །རྒྱུ་དང་དེ་འགོག་པ་ཡི་ལམ། །རྟེན་ཅིང་འབྲེལ་བར་འབྱུང་བ་ཡིས། །སྲིད་པ་སྐྱེ་ཞིང་འགག་པར་གསུངས། །མ་ཚང་མེད་པའི་རྒྱུ་ལས་ནི། །འབྲས་བུ་གང་གིས་ལྡོག་པར་འགྱུར། །གང་དུ་རྒྱུ་མ་ཚང་གྱུར་ན། །འབྲས་བུ་ཅི་ཡི་ཕྱིར་ན་སྐྱེ། །དེ་ལྟར་རྒྱུ་རྐྱེན་རྟེན་འབྲེལ་ལས། །སྲིད་པའི་འཁོར་ལོ་རབ་བརྒྱུད་པ། །དེ་ཡི་རྩ་བ་མ་རིག་སྟེ། །ཚུལ་བཞིན་རིག་པས་དེ་ལྡོག་གོ། །འདི་ལ་བདག་ནི་ཡོད་མིན་ཏེ། །ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲའི། །ཚུལ་དུ་ཕུང་པོ་ཉིང་མཚམས་སྦྱོར། །དངོས་པོའི་ཆོས་རྣམས་གང་ལགས་པ། །དེ་ཀུན་བརྟེན་ནས་རྣམ་པར་སྐྱེས། །དངོས་མེད་དངོས་པོ་ལ་ལྟོས་ཏེ། །རྣམ་བཅད་སྒོ་ནས་ཉེ་བར་བཏགས། །དེ་ཕྱིར་རྟེན་འབྱུང་མ་ཡིན་པའི། །ཤེས་བྱ་གང་ཡང་ཡོད་མིན་ཞིང་། །རྟེན་ཅིང་འབྲེལ་བར་གང་བྱུང་བ། །དེ་ནི་བདེན་པས་རྣམ་པར་སྟོང་། །གང་ཞིག་རྐྱེན་ལས་སྐྱེས་པ་དེ་དག་ནི། །འགྲོ་འོང་བྲལ་ཞིང་རང་དབང་རྣམ་སྤང་བ། །ངོ་བོས་མ་གྲུབ་བཅོས་མའི་གསོབ་ཡིན་ཏེ། །སྒྱུ་སོགས་རྣམས་དང་ཁྱད་པར་ཅུང་ཟད་མེད། །རྟེན་ནས་འབྱུང་གང་སྟོང་པ་ཁོ་ན་སྟེ། །སྟོང་བཞིན་སྣང་བར་ཤར་བ་དེ་མཐོང་ནས། །སྣང་སྟོང་མཉམ་པ་ཉིད་དུ་ངེས་ཤེས་པ། །འདི་ནི་ཡང་དག་ལྟ་བ་མཆོག་ཡིན་ཏེ། །བློ་གྲོས་མཆོག་འདི་རྒྱལ་བ་དེས་བསྟན་ཅིང་། །འདི་ལ་གང་གནས་རྒྱལ་བའི་ལམ་དུ་འགྲོ། །འདི་ནི་སྨྲ་བ་བླ་ན་མེད་པ་སྟེ། །འདི་ལས་སྟོན་པའི་མཆོག་ཏུ་ཡིད་ཆེས་འཁྲུངས། །ཁྱོད་སྔོན་བསྐལ་པ་དུ་མར་ཡང་དང་ཡང་། །གཅེས་པའི་སྲོག་མང་བཏང་ནས་བཟུང་བ་ཡི། །རིན་ཆེན་ཆོས་མཆོག་སྙིང་པོའི་མཐར་ཐུག་འདི། །བརྩེ་བའི་ཐུགས་ཀྱིས་འགྲོ་བ་ཀུན་ལ་གདམས། །མཁའ་ལ་ཐོགས་རེག་དངོས་པོ་མི་གནས་པ། །དེ་བཞིན་སྒྲིབ་པའི་མཐའ་དག་སྤངས་པའི་ཐུགས། །ཇི་ལྟ་ཇི་སྙེད་ཤེས་བྱའི་དཀྱིལ་འཁོར་ཀུན། །ཆགས་ཐོགས་བྲལ་བར་གཟིགས་པ་ཁྱོད་ལ་འདུད། །མ་ལུས་ཤེས་བྱ་ཀུན་གྱི་དེ་ཁོ་ན། །སྣང་སྟོང་མཉམ་པ་ཉིད་ཀྱི་ཆོས་དབྱིངས་སུ། །མངོན་པར་བྱང་ཆུབ་རྡོ་རྗེའི་བདག་ཉིད་ཆེ། །རང་བྱུང་ཡེ་ཤེས་སྐུ་ཅན་ཁྱོད་ལ་འདུད། །དེ་ལྟར་རབ་གུས་ཡིད་ཀྱིས་རྒྱལ་བ་ཉི་མ་དགྱེས་པའི་ཞབས་པད་ལ། །མགོ་བོས་བཏུད་དེ་དོན་བཞིན་བསྟོད་པའི་ཚིག་གི་མེ་ཏོག་ལེགས་འཐོར་བ། །དེ་ཡི་དགེ་བས་སྐྱེ་བ་ཀུན་ཏུ་མཉམ་མེད་ཤཱཀྱ་སེང་གེ་ཡི། །རྗེས་སུ་བཟུང་ནས་བྱང་ཆུབ་མཆོག་གི་གོ་འཕང་བླ་མེད་བརྙེས་གྱུར་ཅིག །འདི་ན་བདུན་དང་རྨོངས་པ་ཞེ་སྡང་འཇིགས་པའི་མེ་ཡིས་རབ་གཙེས་པའི། །འགྲོ་བ་ཀུན་ལ་བསྟོད་པ་འདི་ཡིས་སྟོན་པའི་བྱ་བ་ཉིད་བྱས་ནས། །མཆོག་གི་སྟོན་པར་རྒྱུ་མཚན་ཤེས་ནས་དད་པས་དེ་ཡི་བསྟན་པ་ལ། །ལེགས་ཞུགས་བསྒྲུབ་པ་སྙིང་པོར་བྱས་ནས་འཇིགས་དང་ཉོན་མོངས་སེལ་བར་ཤོག །གང་གི་འདི་ཡི་ཚིག་ཙམ་ཐོས་པ་ཡང་། །སྙིང་གི་པདྨོ་རྣམ་པར་བཞད་པ་རུ། །འཇམ་མགོན་ཡེ་ཤེས་ཉི་མ་རབ་ཞུགས་ནས། །མཚུངས་མེད་བློ་གྲོས་སྣང་བ་རྒྱས་པར་ཤོག །དེ་ལྟར་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་མཉམ་མེད་ཤཱཀྱའི་རྒྱལ་པོ་ལ་བསྟོད་པ་འདི་ནི། གཞན་གྱིས་མ་བསྐུལ་བར་རང་གི་ཡིད་ལ་སྟོན་པའི་རྣམ་པར་ཐར་པ་ཅུང་ཟད་དྲན་པས་གུས་པ་ཚད་མེད་པའི་ངང་ནས་གང་ཤར་ཤར་མར་བྲིས་པ་སྟེ། རྩོམ་པ་པོའི་མིང་དུ་མི་ཕམ་བློ་གྲོས་དྲི་མེད་ཅེས་གདགས་པ་ན་ཚོད་གཞོན་ནུར་གྱུར་པ་དེས་སོ། །མངྒ་ལཾ།། །།#div1 སོ་ཐར་སྡོམ་བརྒྱུད་གསོལ་འདེབས། ཀུན་མཁྱེན་ལྔ་པ་ཆེན་པོ། སོ་ཐར་སྡོམ་བརྒྱུད་ཀྱི་གསོལ་འདེབས་བཞུགས། མཚན་དཔེའི་གཟུགས་སྐུ་མཐོང་དང་ཚངས་དབྱངས་གསུང་། །ལྷན་ཅིག་ཐོས་པའི་མོད་ལ་སྲིད་ཞིའི་གདུང་། །རབ་བསལ་ཁྱོད་ཐུགས་རྣམ་མཁྱེན་ལ་སྦྱོར་བ། །ཀུན་མཁྱེན་ཉི་མའི་གཉེན་ལ་གསོལ་བ་འདེབས། །ཤཱ་རིའི་བུ་དང་རྒྱལ་རིགས་སྒྲ་གཅན་འཛིན། །བྲམ་ཟེའི་བཙུན་པ་རཱ་ཧུ་ལ་གུཔྟ། །འཕགས་མཆོག་ཀླུ་སྒྲུབ་སློབ་དཔོན་ལེགས་ལྡན་འབྱེད། །དཔལ་སྦས་ཡེ་ཤེས་སྙིང་པོར་གསོལ་བ་འདེབས། །གངས་ཅན་བསྟན་པའི་ཉི་མ་ཞི་བ་འཚོ། །རྦ་རིགས་རཏྣ་གཙང་པ་རབ་གསལ་ཞབས། །ཤཱཀྱ་མུ་ནེ་གཡོར་པོ་དགེ་བ་འབྱུང་། །དགོངས་པ་རབ་གསལ་ཞབས་ལ་གསོལ་བ་འདེབས། །ཀླུ་མེས་ཚུལ་ཤེ་རྡོ་རྗེ་རྒྱལ་མཚན་དང་། །སྣེ་པོ་གྲགས་རྒྱལ་འབྲེ་ཆེན་ཤེས་རབ་འབར། །བརྩོན་འགྲུས་འབར་དང་གཞོན་ནུ་སེང་གེའི་ཞབས། །གྲོ་སྟོན་བདུད་རྩི་གྲགས་ལ་གསོལ་བ་འདེབས། །མཆིམས་ཆེན་ནམ་མཁའ་གྲགས་དང་གྲགས་ཤེར་བ། །མཆིམས་སྟོན་བློ་བཟང་གྲགས་པ་ཀུན་རྒྱལ་རྗེ། །གྲུབ་པ་ཤེས་རབ་པཎ་ཆེན་དགེ་འདུན་གྲུབ། །གནས་སྙིང་ཀུན་དགའི་མཚན་ལ་གསོལ་བ་འདེབས། །དགེ་འདུན་རྒྱ་མཚོ་དགེ་ལེགས་དཔལ་བཟང་པོ། །དཔལ་འབྱོར་རྒྱ་མཚོ་དཀོན་མཆོག་ཆོས་འཕེལ་དང་། །དཀོན་མཆོག་བསྟན་འཛིན་ངག་དབང་ཆོས་ཀྱི་དཔལ། །ཆོས་ཀྱི་གྲགས་པ་རྣམས་ལ་གསོལ་བ་འདེབས། །འགྱུར་མེད་ཆོས་ལྡན་ཨོ་རྒྱན་བསྟན་འཛིན་རྗེ། །རིག་འཛིན་བཟང་པོ་པདྨ་མདྒ་ལ། །ཐུབ་བསྟན་ཉིན་བྱེད་གཞན་ཕན་མཐའ་ཡས་སྡེ། །ཐུབ་བསྟན་རྒྱལ་མཚན་ཞབས་ལ་གསོལ་བ་འདེབས། །མཚུངས་མེད་ཀུན་དགའ་ཚུལ་ཁྲིམས་རྡོ་རྗེའི་ཞབས། །རྡོ་རྗེ་འཛིན་པ་ངག་དབང་ནོར་བུའི་དཔལ། །བཀའ་དྲིན་མཉམ་མེད་ཕན་བདེའི་འོད་ཟེར་ཏེ། །མཁན་བརྒྱུད་དམ་པ་རྣམས་ལ་གསོལ་བ་འདེབས། །ངན་སོང་གནས་གསུམ་སྡུག་བསྔལ་དྲག་པོས་མནར། །མི་དང་འདོད་ལྷ་འགྱུར་བའི་དུཿཁས་གཟིར། །གཟུགས་དང་གཟུགས་མེད་འདུ་བྱེད་འཆིངས་བས་བཅིངས། །འཁོར་བའི་རང་མཚན་མངོན་སུམ་མཐོང་བར་ཤོག །ཚུལ་དེས་བཅོས་མིན་ཡིད་འབྱུང་ངེས་པ་ལྔ། །ཡོངས་བྲལ་ད་ཆོག་སྒོ་ནས་གསོལ་བཞིའི་ལས། །འཁྲུལ་མེད་ཆོ་གས་ཚངས་སྤྱོད་དཔལ་ཐོབ་སྟེ། །ངུར་སྨྲིག་འཛིན་པའི་མཆོག་ཏུ་འགྱུར་བར་ཤོག །མཐའ་གཉིས་སྤངས་པའི་བསོད་སྙོམས་ཟས་ཀྱིས་འཚོ། །ཤིང་དྲུང་ཅོག་པུ་ཙམ་གྱི་གནས་མལ་དང་། །རྙེད་སླ་ཕྱག་བདར་ཁྲོད་པའི་དུར་སྨྲིག་གོས། །གཞན་གྱིས་སྤྱད་ཟིན་སྨན་ལ་བསྟེན་པར་ཤོག །ཕམ་པ་བཞི་དང་ལྷག་མ་བཅུ་གསུམ་གྲངས། །སྤང་ལྟུང་སུམ་ཅུ་ལྟུང་བྱེད་བཅུ་ཕྲག་དགུ །སོར་བཤགས་བཞི་དང་ཉེས་བྱས་བརྒྱ་བཅུ་གཉིས། །བག་ཡོད་བརྟན་པོས་ཚུལ་བཞིན་བསྲུང་བར་ཤོག །གཞན་གྱིས་ཁྲོ་དང་མཚོན་སོགས་ཉེ་བར་བརྡེག །གཤེགས་དང་མཚང་འདྲུ་ལ་སོགས་གནོད་ཀུན་ལ། །དྲན་ཤེས་བརྟན་པོས་གཉེན་པོ་ལེགས་བསྟེན་ནས། །རྟག་ཏུ་བཟོད་པའི་གོ་ཆ་བགོ་བར་ཤོག །མཁན་སློབ་དགེ་བའི་བཤེས་ལ་མཆོག་ཏུ་དད། །ཚངས་པ་མཚུངས་པར་སྤྱོད་ལ་གཅིག་ཏུ་གུས། །སྡེ་སྣོད་ལུང་ལ་རབ་སྦྱངས་བསླབ་པ་གསུམ། །མངོན་པར་རྟོག་པས་བདག་རྒྱུད་ཕྱུག་པར་ཤོག །བག་ཡོད་མཐུན་པའི་རླུང་གིས་ཚུལ་ཁྲིམས་གཟིངས། །མངོན་མཐོའི་རིན་ཆེན་གླིང་བགྲོད་ཐར་བའི་ནོར། །ལྷག་བསམ་རྒྱལ་མཚན་རྩེ་མོར་ཡོངས་བཀོད་ནས། །འགྲོ་རྣམས་ཕན་བདེའི་འདོད་རྒུས་ཚིམ་བྱེད་ཤོག །ཅེས་ཀུན་མཁྱེན་ལྔ་པ་ཆེན་པོས་མཛད་པའི་སྡོམ་རྒྱུན་གསོལ་འདེབས་ལས། བརྒྱུད་པའི་ཁྱད་པར་གྱི་ཞི་འཚོ་ཡབ་སྲས་ཀྱི་ཤློ་ཀ་གཅིག་དང་། དགེ་འདུན་རྒྱ་མཚོ་མན་གྱི་ཤློ་ཀ་གཅིག་བཅས་ལོ་ཆེན་དྷརྨ་ཤྲཱིས་བསྒྱུར་བར་མཛད་པ་དང་དེ་ནས་བརྒྱུད་པའི་རིམ་པ་ཁ་བསྐང་བ་པོ་ནི་ཛྙཱ་ནའོ།། །། དགེ་བསྙེན་གྱི་སྡོམ་པའི་རྣམ་པར་བཞག་པ་ཚིགས་སུ་བཅད་པ། སློབ་དཔོན་པུཎྱེ་ཤྲཱི།༈ ༀ་སྭ་སྟི། སློབ་དཔོན་ཆེན་པོ་རྡོ་རྗེ་གདན་པ་ཇོ་བོ་པུཎྱེ་ཤྲཱིས་མཛད་པའི་དགེ་བསྙེན་གྱི་སྡོམ་པའི་རྣམ་པར་བཞག་པ་ཚིགས་སུ་བཅད་པ་འདི་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན་ཏོ། །དང་པོ་ནི། རྒྱ་གར་སྐད་དུ། ཨུ་པ་སཱི་ཀ་སམྤརཱཥྚཀ །བོད་སྐད་དུ། དགེ་བསྙེན་གྱི་སྡོམ་པ་བརྒྱད་པ། གཉིས་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གསུམ་པ་ལ་བཞི། དང་བོ་མ་ཐོབ་པ་ཐོབ་པར་བྱེད་པ་བླང་བའི་ཚུལ་འཕྲོས་དོན་དང་བཅས་པ་ནི། སྡོམ་གནས་བླ་མ་མཁས་པ་ལས། །གསུམ་ལ་སྐྱབས་འགྲོ་བླངས་ནས་ནི། །ཇི་སྲིད་འཚོ་བར་གསོད་དང་འཕྲོག །ལོག་པར་སྤྱོད་དང་བརྫུན་གྱི་ཚིག །ཆང་གི་བཏུང་བ་དག་ལས་ལྡོག །ཡན་ལག་ཚང་བ་ཆོ་ག་བཞིན། །བརྫུན་གྱི་ཚིག་ལས་ལྡོག་པ་ཡིས། །དེ་ཡི་སྐྱོན་ནི་གཞན་ལས་ཀྱང་། །ལྡོག་པར་བྱས་ཏེ་ལྡོག་བཤད་པས། །དེ་ཡང་ཤིན་ཏུ་སྨད་པའི་ཕྱིར། །གང་ཕྱིར་ལུས་ངག་མི་དགེ་ལས། །ལྡོག་པ་ཡིད་ཀྱི་དགེ་བ་ལས། །དེ་ཕྱིར་བརྣབ་སེམས་གནོད་པའི་སེམས། །ལྟ་ལས་ལྡོག་རྣམས་གྲུབ་པ་ཡིན། །ཡན་ལག་ལྔ་ཡི་སྡོམ་བཤད་ཉིད། །གཞུག་པ་རུ་ནི་འདོད་པས་སོ། །གཉིས་པ་བར་དུ་མི་ཉམས་པར་བསྲུང་བའི་ཐབས་ལྟུང་བའི་དངོས་གཞི་བསྟན་པ་ནི། མི་གསོད་པ་དང་དངོས་པོ་རྐུ། །ཡོངས་སུ་རྫོགས་དང་གཞན་བུད་མེད། །བདག་གིར་བྱེད་དང་བརྫུན་ཚིག་སྨྲ། །སྡོམ་པ་ཉམས་པའི་རྒྱུ་རྣམས་སོ། །གསུམ་པ་ཉམས་ན་ཕྱིར་བཅོས་པ་ནི། སྡོམ་པ་སླར་ཡང་བླང་བར་བྱ། །དེ་འདྲའི་གང་ཟག་ཉིད་ལས་སོ། །གཞན་དག་ཇི་ལྟ་བར་ནི་བཤགས། །མཁས་པ་རྣམས་ལ་ཡང་དག་བསྡམ། །བཞི་པ་བསྲུང་ཚུལ་ཕན་ཡོན་དང་བཅས་པས་མཇུག་བསྡུ་བ་ནི། འདི་ལྟར་སྡོམ་པའི་ཚུལ་ཁྲིམས་གནས། །འཇུག་པ་ལ་ཡང་སྟོབས་ཇི་ལྟར། །གུས་པར་བྱས་ཏེ་དེའི་སྦྱོར་བས། །འབྲས་བུ་སྣ་ཚོགས་དེས་ནི་སྟེར། །འདི་ལ་འབད་དེ་སྦྱར་བར་བྱ། །བདེ་འགྲོ་ཡང་ནི་འདོད་པ་ཡིས། །ཁྲེ་ཡི་མྱུ་གུའི་རྒྱུ་ལས་ནི། །སཱ་ལུའི་འབྲས་བུ་གང་དུ་མཐོང་། །བཞི་པ་མཇུག་དོན་ནི། དགེ་བསྙེན་གྱི་སྡོམ་པ་བརྒྱད་པ། སློབ་དཔོན་ཆེན་པོ་པུཎྱེ་ཤྲཱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་དར་མ་གྲགས་ཀྱིས་བསྒྱུར་བའོ། །འདིའི་འགྲེལ་པའང་འདི་ཉིད་ཀྱིས་མཛད་པ་ཡོད། དཔེ་འདིའང་སྤར་རྙིང་རྩ་ཆེན་མཁན་ཚུལ་ཁྲིམས་མཐར་ཕྱིན་གྱི་ཕྱག་དཔེ་ལས་ཁོ་བོ་བྱང་ཆུབ་རྒྱ་མཚོས་རྙེད་དེ་འཛུད་པའོ། ། སློབ་དཔོན་ཆེན་པོ་རྡོ་རྗེ་གདན་པ་ཇོ་བོ་པུཎྱེ་ཤྲིས་མཛད་པའི་དགེ་བསྙེན་སྡོམ་པའི་རྣམ་པར་བཞག་པ་ཚིགས་སུ་བཅད་པ་བརྒྱད་པ་འཆད་པ། མི་ཕམ་འཇམ་དབྱངས་རྣམ་རྒྱལ།ༀ་སྭ་སྟི། སློབ་དཔོན་ཆེན་པོ་རྡོ་རྗེ་གདན་པ་ཇོ་བོ་པུཎྱེ་ཤྲིས་མཛད་པའི་དགེ་བསྙེན་སྡོམ་པའི་རྣམ་པར་བཞག་པ་ཚིགས་སུ་བཅད་པ་བརྒྱད་པ་འདི་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ཏོ། །དང་པོ་ནི། རྒྱ་གར་སྐད་དུ། ཨུ་པ་སཱི་ཀ་དགེ་བསྙེན་གྱི་ས མྦ་སྡོམ་པ་ཨཱཥྚཀ་བརྒྱད་པ། བོད་སྐད་དུ། དགེ་བསྙེན་གྱི་སྡོམ་པ་བརྒྱད་པ། གཉིས་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གསུམ་པ་ལ་བཞི། དང་པོ་མ་ཐོབ་པ་ཐོབ་པར་བྱེད་པ་བླང་བའི་ཚུལ། འཕྲོས་དོན་དང་བཅས་པ་ནི། བླང་ཡུལ་ནི་སྡོམ་གནས་བླ་མ་སྡོམ་པ་སྟེར་བ་ལ་མཁས་པ་ལས། སྡོམ་པ་ཐམས་ཅད་ཀྱི་སྒོ་དཀོན་མཆོག་གསུམ་ལ་སྐྱབས་འགྲོ་བླངས་ནས་ནི། དུས་ནི་སྲོག་གི་མཐའ་སྟེ་ཇི་སྲིད་འཚོ་ཡི་བར་དུ་འདུ་ཤེས་མ་འཁྲུལ་བས་ཆེད་དུ་བསམ་སྟེ། གསོད་པ་དང་དངོས་སམ་ལྐོག་ཏུ་གཞན་ཡོ་བྱད་འཕྲོག་པ་དང་། བགྲོད་བྱ་ཡན་ལག་ཡུལ་དུས་མིན་པར་འདོད་པས་ལོག་པར་སྤྱོད་དང་ངག་གི་བརྫུན་གྱི་ཚིག་སྨྲ་བ་དང་། མྱོས་བྱེད་ཆང་གི་བཏུང་བ་དག་ལས་ལྡོག་པར་བྱེད་པའི་བསླབ་པའི་ཡན་ལག་ལྔ་པོ་ཚང་པ་ཡོངས་རྫོགས་དགེ་བསྙེན་གྱི་སྡོམ་པ་དག་གསོལ་གདབ་ནས་སྐྱབས་འགྲོ་བསླབ་པ་ཁས་ལེན་ཏེ་ཆོ་ག་བཞིན་དུ་བླང་བར་བྱས་ཟིན་ནས། དེ་ཡང་ངག་གི་བརྫུན་གྱི་ཚིག་ལས་ལྡོག་པ་ཡིས་མཚོན་ནས། ངག་དེ་ཡི་སྐྱོན་ནི་གཞན་ཕྲ་མ་ཚིག་རྩུབ། ངག་རྐྱལ་ལས་ཀྱང་། ལྡོག་པར་བྱས་པ་ཤེས་པར་བྱས་ཏེ་སྐབས་འདིར་ལྡོག་པར་བཤད་པས་རྫུན་ཁོ་ན་སྨྲོས་པ་ནི། རྫུན་ཞེས་པ་དེ་ཡང་ཤིན་ཏུ་སྨད་པའི་ཕྱིར་དེ་གཙོ་བོར་བཟུང་ངོ་། །གང་ཕྱིར་དེ་ལྟར་ལུས་དག་གི་མི་དགེ་བ་བདུན་ལས། ཡང་དག་པར་ལྡོག་པ་ན་ཆགས་སྡང་རྨོངས་མེད་ཡིད་ཀྱིས་དགེ་བའི་ལས་ཡིན་ནོ། །ཡིད་དགེ་བ་དང་ལྡན་པ་དེ་ཕྱིར་དགེ་སེམས་དེའི་འགལ་ཟླ་བརྣབ་སེམས་གནོད་པའི་སེམས་དང་། ཐམས་ཅད་ཀྱི་སྒོ་ནས་ལས་འབྲས་ཡིད་ཆེས་པས་ལོག་པར་ལྟ་བ་ལས་ལྡོག་པ་རྣམས་ཀྱང་དོན་གྱིས་གྲུབ་པ་ཡིན་ནོ། །དེ་ལྟ་ན་མི་དགེ་བ་བཅུ་དང་ཆང་དང་བཅུ་གཅིག་སྤོང་བར་འགྱུར་ན་དགེ་བསྙེན་གྱི་བསླབ་གཞི་ཡན་ལག་ལྔར་ཅིའི་ཕྱིར་བསྟན་ནམ་སྙམ་ན་ཡན་ལག་ལྔ་ཡི་སྡོམ་པ་ཙམ་དུ་བཅོམ་ལྡན་འདས་ཀྱིས་བཤད་པ་ཉིད། ཉུང་བས་བློ་ཆུང་བ་རྣམས་བསླབ་པ་ལ་མི་སྐྲག་པར་སྡོམ་པར་ལ་གཞུག་པ་རུ་ནི་འདོད་པས་སོ། །དེ་ཡང་དོན་གྱི་མི་དགེ་བ་གཞན་ལས་ཀྱང་རིམ་པས་ལྡོག་པར་དགོངས་སོ། །གཉིས་པ་བར་དུ་མི་ཉམས་པར་བསྲུང་བའི་ཐབས་ལྟུང་བའི་དངོས་གཞི་བསྟན་པ་ནི། ལྟོ་ན་གནས་པའམ་བཙས་ཟིན་པའི་མི་སྲོག་གི་འཚོ་བ་བསྟུང་སྟེ་གསོད་པ་དང་མིའི་བདག་བཟུང་གི་དངོས་པོ་རྐུ། ཞིང་དེ་ཡང་མ་ཤ་ཀ་ལྔ་ཙམ་གྱི་རིན་ཐང་ཡོངས་སུ་རྫོགས་དང་གཞན་གྱི་བུད་མེད་སྟོབས་ཀྱིས་སམ་དེ་འདོད་པས་ཁས་ལེན་པ་བདག་གིར་བྱེད་ཅིང་འཁྲིག་པ་དང་མི་ཆོས་བླ་མའི་བརྫུན་ཚིག་སྨྲ་བ་སྟེ་གང་རུང་བྱུང་ན། སྡོམ་པ་རྩ་བ་ནས་ཉམས་པའི་རྒྱུ་རྣམས་སོ། །གསུམ་པ་ཉམས་ན་ཕྱིར་བཅོས་པ་ནི། དེ་ལྟ་བུ་བྱུང་ན་སྡོམ་པ་སླར་ཡང་བླངས་བར་བྱ་སྟེ་དེ་ཡང་སུ་ལས་ལེན་ན་སྔར་བཤད་པ་དེ་འདྲའི་གང་ཟག་ཉིད་ལས་བླང་གི་བྱང་སེམས་ཀྱི་སྡོམ་པ་བཞིན་དུ་རང་གི་བླང་ནས་མི་ཐོབས་སོ། །ཕས་ཕམ་ལས་གཞན་དག་བྱུང་ན་ལྟུང་བ་ཤེས་ནས་མཐོང་སྡོམ་གྱི་ཆོ་ག་ཇི་ལྟ་བར་ནི་བཤགས། དེ་ཡང་བཤགས་ཡུལ་སྡོམ་ལྡན་མཁས་པ་ལ་གང་ཡང་རུང་བ་ཡན་ལག་མ་ཚང་བ་རྣམས་ཡང་བ་ལ་ཡིད་ཀྱིས་ཕྱིན་ཆད་མི་བགྱིད་པར་ཡང་དག་པར་བསྡོམ། བཞི་པ་བསྲུང་ཚུལ་ཕན་ཡོན་དང་བཅས་པ་མཇུག་བསྡུ་བ་ནི། བཤད་མ་ཐག་པ་འདི་ལྟར་སྤང་བྱ་ལས་ལྡོག་པ་སྡོམ་པའི་ཚུལ་ཁྲིམས་ལ་ཡང་དག་པར་གནས་ནས་ཐོས་བསམ་སོགས་ཀྱི་སྦྱིན་སོགས་ཀྱི་དངོས་པོར་འཇུག་པ་ལ་ཡང་རང་ནུས་སམ་སྟོབས་ཇི་ལྟར་ཡོད་པས། གུས་པར་བྱས་ཏེ་དེ་ལྟ་ན་ཚུལ་ཁྲིམས་གཉིས་པོ་དེ་ལ་ཞུགས་པའམ་དེའི་སྦྱོར་བས། གནས་སྐབས་དང་མཐར་ཐུག་གི་ཕན་བདེའི་འབྲས་བུ་སྣ་ཚོགས་པ་དེས་ནི་སྟེར་བ་དེ་ཕྱིར་ཚུལ་ཁྲིམས་འདི་ལ་འབད་དེ་རང་ཉམས་སུ་ཇི་ལྟར་ནུས་པ་བརྩོན་པའམ་སྦྱར་བ་བྱའོ། །ཐར་པ་ཕར་ཞོག་བདེ་འགྲོ་ཡང་ནི་འདོད་པ་ཡིས་ཀྱང་ཚུལ་ཁྲིམས་འདི་ལ་འབད་དེ་སྦྱར་བར་བྱ་དགོས་ཏེ། རྒྱུ་མཚན་དཔེར་ན། ཁྲེ་ཡི་མྱུ་གུའི་རྒྱུ་ལས་ནི། འབྲས་ས་ལུའི་འབྲས་བུ་འགྱུར་བ་ཡུལ་དུས་གང་དུ་མི་མཐོབ་བ་དེ་བཞིན་དུ་ཚུལ་ལྡན་ལ་ངན་འགྲོ་དང་ཚུལ་འཆལ་ལ་བདེ་འགྲོ་ཡང་དེ་དང་འདྲའོ་ཞེས་དོན་གྱིས་གོའོ། །བཞི་བ་མཇུག་གི་དོན་ནི། དགེ་བསྙེན་གྱི་སྡོམ་པ་ཚིགས་སུ་བཅད་པ་བརྒྱད་པ། ཞེས་པ་སློབ་དཔོན་ཆེན་པོ་པུཎྱེ་ཤྲཱིས་མཛད་པ་རྫོགས་སོ། །རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་དར་མ་གྲགས་ཀྱིས་བསྒྱུར་བའོ། །འདིའི་འགྲེལ་པའང་འདི་ཉིད་ཀྱིས་མཛད་པ་ཡོད། ཞེས་མཆན་འགྲེལ་ཉུང་ངུ་རྒྱ་གཞུང་རང་འགྲེལ་གྱི་དགོངས་པ་ཁོ་ནར་མ་ནོར་བ། མཁན་པྲཛྷཱ་ཀཱི་རྟིའི་གསུངས་ངོར་མི་ཕམ་རྣམ་པར་རྒྱལ་བས་བྲིས་པ་དགེ།། ཁྱིམ་པ་རྗེས་སུ་འཛིན་པ་སོ་སོར་ཐར་པའི་སྡོམ་པའི་ཆོ་ག་ཐར་ལམ་རབ་གསལ། འགྱུར་མེད་རྡོ་རྗེ།ཁྱིམ་པ་རྗེས་སུ་འཛིན་པ་སོ་སོར་ཐར་པའི་སྡོམ་པའི་ཆོ་ག་ཐར་ལམ་རབ་གསལ་ཞེས་བྱ་བ་བཞུགས་སོ། །ༀ་སྭ་སྟི། རྣམ་གྲོལ་བྱང་ཆུབ་མཆོག་བརྙེས་ནས། །ཐུགས་རྗེས་གདུལ་བྱ་སྐལ་པ་བཞིན། །འདུལ་མཛད་ཐམས་ཅད་མཁྱེན་དེ་ལ། །དངོས་པོ་ཀུན་གྱིས་ཕྱག་བགྱིའོ། །ཚུལ་ཁྲིམས་གྲུ་གཟིངས་ལ་བརྟེན་ནས། །མྱང་འདས་རིན་ཆེན་གླིང་མཆོག་ཏུ། །བགྲོད་བྱེད་མ་སྨད་ཆོ་གའི་ཁྲིགས། །ཉུང་གསལ་འཇུག་བདེ་ཉིད་དུ་སྤེལ། །འདིར་སྐྱབས་འགྲོའི་སྡོམ་པ་དོན་དུ་གཉེན་བ་དག་འོངས་པ་ན། གནས་གཙང་མར་ཐུབ་པ་ཆེན་པོའི་སྐུ་གཟུགས་སོགས་དཀོན་མཆོག་གི་རྟེན་དང་མཆོད་པ་ཅི་འབྱོར་པ་བཤམས་པའི་མདུན་དུ། བླ་མ་སྟན་མཐོ་བ་ལ་འདུག་པའི་དྲུང་དུ་སློབ་མས་རྟེན་དང་བླ་མ་ལ་ཕྱག་གསུམ་གསུམ་བྱས་ནས་ཙོག་པུའམ་པུས་མོ་བཙུགས་ཐལ་མོ་སྦྱར་ཏེ་འདུག་པ་ལ། བླ་མས། འོ། རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་དག་གིས་དོན་དུ་གཉེར་བྱ་ནི། སངས་རྒྱས་ཀྱི་བསྟན་པ་ལ་ནན་ཏན་སྙིང་པོར་བྱ་བ་ཉིད་ཡིན་ལ། དེ་ལ་ཡོན་ཏན་ཐམས་ཅད་ཀྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང་། དེའི་རྩ་བ་ཡང་སྐྱབས་སུ་འགྲོ་བའི་སྡོམ་པ་ཉིད་ལ་རག་ལས་པ་ཡིན་ཏེ། ཇི་སྐད་དུ། དཀོན་མཆོག་གསུམ་ལ་སྐྱབས་འགྲོ་བ། །འཇིགས་པ་མེད་པ་ཐོབ་པར་འགྱུར། །ཞེས་གསུངས་པས་ཕན་ཡོན་ཤིན་ཏུ་ཆེ་བ་ཡིན། དེ་ཡང་བླ་མའི་རྗེས་སུ་བཟློས་ནས་བླངས་ན་ངོ་ཚ་ཁྲེལ་ཡོད་ཀྱི་རྟེན་སོགས་དགོས་པ་ཁྱད་པར་ཅན་ཡོད་པས་འདིའི་རྗེས་ཟློས་མཛོད། ཅེས་བརྡ་སྤྲད་ལ། ཆོས་འབྲེལ་མེད་ན་བཙུན་པ་ཞེས་དང་། ཡོད་ན། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ༴ ཚོགས་རྣམས་ཀྱི་མཆོག །དགེ་འདུན་ལ༴ བདག་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་བཟུང་དུ་གསོལ། ཞེས་ལན་གཉིས་ལན་གསུམ་དུ་བརྗོད་ནས། སློབ་དཔོན་གྱིས། ཐབས་ཡིན་ནོ། །སློབ་མས། ལེགས་སོ། །ཞེས་བརྗོད་པར་བྱའོ། །དེ་ནས་བསླབ་བྱ་བཤད་པར་བྱ་སྟེ། དེ་ལྟར་སྐྱབས་འགྲོའི་སྡོམ་པ་ཐོབ་པ་ཙམ་གྱིས་མི་ཆོག །བསླབ་བྱ་ལ་བསླབ་དགོས། བསླབ་བྱའི་ཆོས་དེ་ཡང་ཇི་ལྟ་བུ་ཡིན་སྙམ་ན། དགག་པའི་བསླབ་བྱ་གསུམ་དང་། སྒྲུབ་པའི་བསླབ་བྱ་གསུམ་དང་། ཆ་མཐུན་གྱི་བསླབ་བྱ་གསུམ་སྟེ་དགུའོ། །དང་པོ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་འགྲོ་མི་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ལ་མི་བརྟེན་པའོ། །དེ་ཡང་བོད་འདིར་མུ་སྟེགས་དངོས་སུ་མི་འབྱུང་ཡང་སྡིག་ཅན་གྱི་གྲོགས་དེ་དང་འདྲ་བས་མི་བརྟེན་པའོ། །གཉིས་པ་ནི། སངས་རྒྱས་ལ་སྐྱབས་སུ་སོང་ནས་བདེ་བར་གཤེགས་པའི་སྐུ་གཟུགས་ཀྱི་རྟེན་ཐ་ན་སཙྪའི་ཆག་དུམ་ཡན་ཆད་ལ་སངས་རྒྱས་དངོས་ཀྱི་འདུ་ཤེས་བཞག་ནས་ཕྱག་མཆོད་བཀུར་སྟི་སོགས་གུས་པར་བྱེད། ཆོས་ལ་སྐྱབས་སུ་སོང་ནས་ཆོས་དཀོན་མཆོག་གི་རྟེན་གསུང་རབ་ཀྱི་རྟེན་ཐ་ན་ཡིག་འབྲུ་གཅིག་ཡན་ཆད་ལ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔ་མ་ལྟར་བྱའོ། །དགེ་འདུན་ལ་སྐྱབས་སུ་སོང་ནས་དགེ་འདུན་དཀོན་མཆོག་གི་རྟེན་རབ་ཏུ་བྱུང་བ་ནས་ཐ་ན་ལྷན་པ་སེར་པོ་བཏབ་པ་ཡན་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔར་ལྟར་བྱའོ། །གསུམ་པ་ནི། དུས་རྟག་ཏུ་དཀོན་མཆོག་མཆོད་པ་ལ་བརྩོན་པར་བྱ་སྟེ་ཐ་ན་ཅི་ཟ་ཅི་འཐུང་གི་ཕུད་ཀྱི་མཆོད་པ་དང་། ནང་ནུབ་སོགས་སུ་སྐྱབས་འགྲོ་བཟླ་བ་ལ་བརྩོན་པ་དང་། སྐྱེས་བུ་དམ་པ་ལ་བརྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་དང་མཐུན་པའི་སྤྱོད་པ་ལ་བསླབ་པར་བྱའོ། །དེ་ལྟ་བུའི་བསླབ་བྱ་རྣམས་ཡིད་ལ་བཟུང་སྟེ་དྲན་ཤེས་དང་ལྡན་པས་དུས་རྟག་ཏུ་སློབ་པར་གྱིས་ཤིག །ཅེས་བརྗོད་ནས། ཕྱག་གསུམ་འཚལ་དུ་བཅུག །བསྔོ་བ་དང་སྨོན་ལམ་བྱས་ནས་རང་གི་གནས་སུ་གཏང་ངོ་། །སྐྱབས་འགྲོའི་སྡོམ་པ་སྦྱིན་པའི་ཆོ་གའོ།། ༈ །།སྭ་སྟི། སྟོབས་བཅུའི་སྟོབས་ཀྱིས་བདུད་བཅོམ་ནས། །ཐུགས་རྗེས་འགྲོ་བའི་དོན་མཛད་པ། །ཟས་གཙང་སྲས་ལ་གུས་བཏུད་ནས། །དགེ་བསྙེན་སྡོམ་པའི་ཆོ་ག་བཤད། །འདིར་ཡོངས་སུ་རྫོགས་པའི་དགེ་བསྙེན་གྱི་སྡོམ་པའི་ཆོ་ག་འཆད་པ་ལ། ཐོག་མར་སྡོམ་པ་ལེན་པའི་ཚུལ། བར་དུ་མི་ཉམས་པར་བསྲུང་བའི་ཚུལ། མཐར་ཉམས་ན་ཕྱིར་བཅོས་པའི་ཚུལ། སྡོམ་པའི་ཕན་ཡོན་བཤད་པ་དང་བཞི་ལས། དང་པོ་ནི། དེ་བཞིན་གཤེགས་པའི་སྐུ་གཟུགས་ཀྱི་མདུན་དུ་མཆོད་པ་ཅི་འབྱོར་པ་བཤམས། སློབ་དཔོན་ཁྲི་སྟན་ལ་འཁོད་པའི་མདུད་དུ་བསྒྲུབ་བྱས་རྟེན་དང་བླ་མ་ལ་ཕྱག་གསུམ་གསུམ་བྱས་ནས་ཙོག་པུའམ་པུས་བཙུགས་ཀྱིས་ཐལ་མོ་སྦྱར་བས་འདུག་པ་ལ། འོ་རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་རྣམས་ཀྱིས་དོན་དུ་གཉེན་བྱ་ནི་སངས་རྒྱས་ཀྱི་བསྟན་པ་ལ་ནན་ཏན་སྙིང་པོར་བྱ་བ་ཉིད་ཡིན་ལ། དེ་ལ་ཡོན་ཏན་ཐམས་ཅད་ཀྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང་། དེ་ཡང་སོ་སོར་ཐར་པ་གཞིར་བཞག་གི་དབང་དུ་བྱས་ན་སྡོམ་པ་རིགས་བདུན་ནམ་བརྒྱད་དུ་གསུངས་པའི་ནང་ནས་སྐྱབས་འགྲོ་ནས་ཡོངས་རྫོགས་ཀྱི་བར་སྔར་གསུངས་པ་ལས། འདིར་ཡོངས་རྫོགས་དགེ་བསྙེན་གྱི་དངོས་པོར་སྒྲུབ་པ་ཡིན་པས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཕྱིར་དུ་དགེ་བསྙེན་ཡོངས་རྫོགས་ཀྱི་བསླབ་པ་བླངས་ནས་བསྲུང་སྙམ་པས་འདིའི་རྗེས་ཟློས་གྱིས་ཤིག །ཅེས་བརྡ་སྦྱར་ལ། བཙུན་པའམ་སློབ་དཔོན་དགོངས་གསོལ་དང་། རྐང་གཉིས་རྣམས་ཀྱི་ནས། དགེ་འདུན་ལ་སྐྱབས་སུ་མཆིའོའི་བར་དང་། བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་དགེ་བསྙེན་དུ་བཙུན་པའམ་སློབ་དཔོན་གྱིས་བཟུང་དུ་གསོལ། ཞེས་ལན་གསུམ་དང་ཐབས་ལེགས་བྱ། དེ་ལྟར་ཁྱོད་ཀྱིས་དགེ་བསྙེན་གྱི་སྡོམ་པ་ཐོབ་ནས་བསྲུང་དགོས་པས། བསྲུང་ཚུལ་ཀྱང་སྤང་བྱ་ལྔ་པོ་འདི་ཡིད་ཀྱི་སྒོ་ནས་སྤང་། ལུས་ངག་གི་སྒོ་ནས་སླར་ལོག་པར་བྱེད། དེ་ཡང་སྔོན་གྱི་དགྲ་བཅོམ་པ་རྣམས་ཀྱི་རྗེས་སུ་འབྲངས་ནས་བསྲུང་སྙམ་པ་གྱིས་ལ་འདིའི་རྗེས་ཟློས་གྱིས་ཞེས་བརྡ་སྦྱར་ལ། སློབ་དཔོན་དགོངས་སུ་གསོལ། ཇི་ལྟར་སྔོན་གྱིས་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་སྔོན་གྱི་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་། མྱོས་པར་འགྱུར་པ། བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། ཞེས་པ་ནས་བག་མེད་པའི་གནས་ལས་སླར་ལོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ། ཞེས་པ་ནས། རྗེས་སུ་བགྱིད་དོའི་བར་ལན་གཅིག་བརྗོད། དེ་ལྟར་ཁྱོད་ཀྱིས་ཡོངས་རྫོགས་དགེ་བསྙེན་གྱི་སྡོམ་པ་ལེན་བའི་ཆོ་ག་དངོས་དང་། བསླབ་པ་བརྗོད་པ་གཉིས་ཀྱི་སྒོ་ནས་ལེགས་པར་ཐོབ་པ་ཡིན་པས། དེ་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་གྱིས་ཤིག །ཅེས་བརྗོད་ནས་བསྔོ་བ་བྱའོ། །གཉིས་པ་བར་དུ་མི་ཉམས་པར་བསྲུང་བའི་ཚུལ་ནི་བསླབ་བྱ་ཤེས་པ་ལ་རག་ལས་པས། དེ་ཉིད་འཆད་པར་འདོད་ན་ཐོག་མར་སྡོམ་པ་གང་དང་གང་ལེན་ཀྱང་སྐྱབས་འགྲོ་རྩོམ་བྱེད་དུ་དགོས་པས་སྐྱབས་འགྲོའི་བསླབ་བྱ་འདི་རྣམས་ལ་བསླབ་དགོས། ཞེས་སྐྱབས་སྡོམ་གྱི་ཆོ་གར་སྨོས་པའི་བསླབ་བྱ་རྣམས་བརྗོད་ནས། དགེ་བསྙེན་གྱི་བསླབ་བྱ་ལ་དངོས་ཀྱི་སྤང་བྱ་ཡན་ལག་ལྔ་དང་། ཕྱོགས་མཐུན་གྱི་བསླབ་བྱ་དང་། ཐབས་མཁས་ཀྱི་སྒོ་ལས་ཉེས་མེད་དང་གསུམ། དང་པོ་ཡན་ལག་ལྔ་ལས། སྲོག་གཅོད་ནི་གཞི་མིའམ་མིར་ཆགས་པ་ལ་དེར་འདུ་ཤེས་པ། ཀུན་སློང་ཞེ་སྡང་། བསམ་པ་གསོད་སེམས། སྦྱོར་བ་མཚོན་བརྩམས་པ་ལ་སོགས་པ། མཐར་ཐུག་སྦྱོར་བ་བརྩམས་མ་ཐག་པའམ་གཞན་གྱིས་ཚེ་ཡང་རུང་གསོད་པ་བོ་བདག་ཉིད་མ་ཤི་བའི་སྔ་རོལ་དུ་ཕ་རོལ་པོ་སྲོག་དང་བྲལ་ན་ཡན་ལག་རྫོགས་པའོ། །མ་བྱིན་པར་ལེན་པ་ནི། གཞི་གཞན་གྱིས་བདག་གིར་བཟུང་བའི་དངོས་པོ་གསེར་ཞོ་ཕྱེད་ཀྱི་རིན་ཐང་ཚང་བ་ཡན་ཆད་དེར་འདུ་ཤེས་པ། ཀུན་སློང་ཆགས་པ། བསམ་པ་བརྐུ་སེམས། སྦྱོར་བ་མཐུའམ་གཡོ་དང་འཇབ་བུས་གནས་ནས་སྤོས་པ། མཐར་ཐུག་ཐོབ་བློ་སྐྱེས་པས་ཡན་ལག་རྫོགས་པའོ། །ལོག་གཡེམ་ནི། གཞི་རང་གི་ཆུང་མ་མ་ཡིན་པའི་བུད་མེད་རུས་བདུན་བརྒྱུད་ལས་མ་འདས་པ་དང་། སྡོམ་པ་དང་ཕ་མ་སོགས་ཀྱིས་བསྲུང་བ་དང་། གཞན་གྱི་གླ་རྔན་མ་སྦྱངས་པ་དང་། ནང་བུ་ཅན་སོགས་ཡུལ་དང་། དུས་མ་ཡིན་པ་ཉིན་མོ་སོགས་དང་། གནས་མ་ཡིན་པ་ཕ་མ་དང་དཀོན་མཆོག་ལ་སོགས་པའི་གནས་དང་། ཡན་ལག་མ་ཡིན་པ་ཁ་དང་གཤང་སྒོ་ལ་སོགས་པ་རྣམས་སོ། །ཀུན་སློང་འདོད་ཆགས། བསམ་པ་འཁྲིག་པར་སེམས་པ། སྦྱོར་བ་བཅུག་རེག་ལ་སོགས་པས་འཁྲིག་པ། མཐར་ཐུག་བདེ་བའི་ཚོར་བ་ཉམས་སུ་མྱོང་བ་སྲེད་པས་བདག་གིར་བྱས་པས་ཡན་ལག་རྫོགས་པའོ། །རྫུན་དུ་སྨྲ་བ་ནི། གཞི་སྨྲ་ཤེས་དོན་གོའི་མི་རང་ལས་གཞན་པ་ལ། བདེན་བཞིའི་དོན་རྟོགས་པ་སོགས་ཡོན་ཏན་གོང་མ་དང་། ལྷ་ཀླུ་ལ་སོགས་པ་མཐོང་ངོ་ཞེས་པ་རྣམས་སོ། །ཀུན་སློང་དུག་གསུམ་གང་རུང་ལས་གཏི་མུག་གཙོ་བོར་གྱུར་པའོ། །བསམ་པ་མངོན་ཤེས་རྫུ་འཕྲུལ་སོགས་མེད་པར་ཤེས་བཞིན་དུ་གཞན་བསླུ་སེམས་ཀྱིས་ཡོད་པར་འདུ་ཤེས་བསྒྱུར་བ། སྦྱོར་བ་ལུས་ངག་གི་རྣམ་རིག་ཏུ་ཐོན་པས་བརྡ་སྤྲོད་པ། མཐར་ཐུག་སྨྲས་པའི་ཡུལ་དེ་ལ་བརྡ་འཕྲོད་པས་ཡན་ལག་རྫོགས་པའོ། །ཆང་འཐུང་བ་ནི། གཞི་ནས་དང་འབྲས་ལ་སོགས་པ་འབྲུ་དང་། མེ་ཏོག་དང་། རྒུན་འབྲུམ་དང་། བུར་སྦྲང་གི་ཁུ་བ་སོགས་ལས་བྱས་པའི་མྱོས་པར་འགྱུར་པ། ཀུན་སློང་སྲེད་པ་ཏེ་ཆགས་པའོ། །བསམ་པ་ནི་བག་མེད་པར་འཐུང་བར་སེམས་པའོ། །སྦྱོར་བ་ནི་ཆང་འཐུང་བ་ལུས་ངག་གི་ལས་སོ། །མཐར་ཐུག་མྱོས་པར་གྱུར་པ་ན་ཡན་ལག་རྫོགས་པའོ། །གཞན་ཡང་རྩ་བ་བཞིར་མ་ལོངས་པ་ལ་ཕྲ་མོ་ཞེས་བཏགས་པ་སྟེ། མིའམ་མིར་ཆགས་པ་མ་ཡིན་པ་དུད་འགྲོ་ལ་སོགས་པ་བསད་པ་དང་། བསད་བྱ་མིའམ་མིར་ཆགས་ཀྱང་བསད་བྱ་མ་ཤི་བའི་གོང་དུ་འགྱོད་པ་སོགས་དང་། མ་བྱིན་ལེན་རིན་ཐང་མ་རྫོགས་པ་དང་། ལོག་གཡེམ་རང་ཉིད་ཀྱིས་སམ་སྤྱད་པར་མི་བཟོད་པའི་ཡུལ་ལས་ཁུ་བ་ཕྱུང་བ་དང་། རྫུན་སྨྲ་ནི་མི་ཆོས་བླ་མ་སྨྲ་བ་མ་ཡིན་པ་རྣམས་སོ། །གཉིས་པ་ཕྱོགས་མཐུན་ནི། མི་དགེ་བ་བཅུ་ལས་གོང་གི་བཞི་པོ་མ་གཏོགས་པའི་ལྷག་མ་དྲུག་སྟེ། ཕྲ་མ་ནི་དབྱེན་ཚིག་སྨྲ་བའོ། །ཚིག་རྩུབ་ནི་གཞན་གྱི་གནད་དུ་ཕོག་པའོ། །བཀྱལ་པ་ནི་བྲེ་མོ་དང་ཀླུ་དང་བསྟན་བཅོས་ངན་པ་སྨྲ་བའོ། །བརྣབ་སེམས་ནི་གཞན་གྱི་རྫས་ལ་ཐོབ་འདོད་བསྐྱེད་པའོ། །གནོད་སེམས་ནི་གཞན་ལ་གསོད་ཅིང་བརྡེག་པར་སེམས་པ་སོགས་སོ། །ལོག་ལྟ་ནི་ལས་འབྲས་མི་བདེན་པར་ལྟ་བའོ། །དྲུག་པོ་འདི་དག་ཀྱང་མི་དགེ་བའི་ལས་ལམ་དུ་རྫོགས་པ་ལ་གཞི་ཀུན་སློང་འདུ་ཤེས་སྦྱོར་བ་མཐར་ཐུག་གི་ཡན་ལག་ལྔ་པོ་རྩ་བ་བཞི་ལ་ཡོད་པ་ལྟར་ཚང་དགོས་ཀྱང་འདིར་ནི་ཡིད་ཀྱི་བསྡམ་བྱ་ཙམ་སྨོས་པའོ། །དེ་དག་ཇི་ལྟར་སྤོང་བ་ལ་བསླབ་པའི་ཚུལ་ནི། དེ་ལྟར་སྤང་བྱ་ལྔ་ཕྱོགས་མཐུན་དང་བཅས་པ་དེ་དག་ཡིད་ཀྱིས་བསྡམ་ཞིང་། ལུས་ངག་གིས་སླར་ལོག་པ་ལ་བསླབ་པ་ཡིན་ཏེ། བླང་དོར་གྱི་གནས་མི་བརྗེད་པའི་དྲན་པ། སྒོ་གསུམ་གྱི་བྱ་བ་ལ་སྐྱོན་ཡོན་རྟོག་པའི་ཤེས་བཞིན། ལུས་ངག་ཡིད་གསུམ་ཆོས་བཞིན་ལྷུར་བྱེད་པའི་བག་ཡོད་དེ། ཆོས་གསུམ་ལ་ནན་ཏན་ལྷུར་བྱེད་པའི་བརྩོན་འགྲུས་དང་ལྡན་པ་ལ་བསླབ་བོ། །གསུམ་པ་ཐབས་ལ་མཁས་པས་ཉེས་མེད་དུ་འགྱུར་པ་ནི། སྙིང་བརྩེ་ལྡན་དང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་གསུངས་པ་ལྟར། རང་དོན་གྱི་འཁྲི་བ་མེད་པའི་གཞན་ལ་ཕན་པར་འདོད་པའི་བྱམས་པ་དང་། སྡུག་བསྔལ་བྲལ་འདོད་ཀྱི་སྙིང་རྗེས་ཀུན་ནས་བསླང་སྟེ། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པའི་བསམ་པ་ཅན་ལ་ཡིད་ཀྱི་གསུམ་མམ་ལོག་ལྟ་མ་གཏོགས་པ། ལུས་ང ག་གི་མི་དགེ་བ་བདུན་པོ་གནང་བ་ཡིན་ཏེ། བསམ་པ་བྱང་ཆུབ་སེམས་དཔའ་ལ། །དགེ་འམ་ཡང་ན་མི་དགེའང་རུང་། །ཐམས་ཅད་བདེ་དགེ་ཉིད་དུ་འགྱུར། །ཞེས་གསུངས་པས། ཀུན་སློང་དགེ་བ་འབའ་ཞིག་ཡིན་ཀྱང་། ལུས་ངག་གི་སྦྱོར་བ་མི་དགེ་བ་ལྟར་སྣང་བས་མི་དགེ་བ་ཞེས་བཏག་པའོ། །འོན་ཀྱང་སྲོག་གཅོད་ཀྱི་ལས་ལམ་རྫོགས་པར་གནང་བ་ནི་ས་ཐོབ་པ་ཡན་གྱི་དབང་དུ་བྱས་པའོ། །གསུམ་པ་ཉམས་ན་ཕྱིར་འཆོས་པའི་ཚུལ་ནི། རྩ་བ་བཞི་ཉམས་ན་དགེ་བསྙེན་ཡན་ཆད་སྡོམ་ལྡན་གྱི་དྲུང་དུ་བསྐྱར་ལ་བླང་དགོས་ཤིང་། ཡན་ལག་མ་ཚང་བ་བྱུང་ན་བཤགས་བྱའི་ཉེས་པ་ཡིན་པས་ཡུལ་སྔ་མ་རྣམས་ཀྱི་མདུན་དུ། ཕྱག་དང་དགོངས་གསོལ་བྱས་ནས། བདག་མིང་འདི་ཞེས་བྱ་བ་ལ་ཇི་ལྟར་ཡོངས་སུ་གྲགས་པའི་ལྟུང་བ་འདི་ལྟ་བུ་བྱུང་བ་དེ་བཤགས་པར་བགྱིའོ། །མི་འཆབ་བོ། །མི་སྦེད་དོ། །ཞེས་ལན་གསུམ་གྱིས་བཤགས་ཤིང་། ཕྱོགས་མཐུན་རྣམས་ནི་ཡིད་ཀྱིས་བསྡམས་པས་ཀྱང་ཆོག་གོ། །བཞི་པ་ཕན་ཡོན་ནི། སའི་སྙིང་པོ་འཁོར་ལོ་བཅུ་པའི་མདོ་ལས། གལ་ཏེ་རང་བཞིན་གྱི་སྡིག་པའི་རྩ་བ་བཞི་པོ་དེ་བསྲུངས་ན། དེ་ནི་ཟག་པ་དང་བཅས་པ་དང་། ཟག་པ་མེད་པའི་དགེ་བའི་ཆོས་ཐམས་ཅད་ཀྱི་རྒྱུའི་མཆོག་དམ་པ་རྣམ་པར་བཞག་པ་ཡིན་ནོ། །དེ་བས་ན་ཆོས་རྣམ་པ་བཞི་བསྲུང་བ་ནི་དགེ་བའི་ཆོས་ཐམས་ཅད་ཀྱི་རྩ་བ་ཞེས་བྱའོ། །འདི་ལྟ་སྟེ། ས་ཆེན་པོ་འདི་ལ་བརྟེན་ནས་རྩི་ཤིང་དང་། མེ་ཏོག་དང་། ཤིང་གེལ་པ་དང་། ནགས་ཚལ་ལ་སོགས་པ་ཐམས་ཅད་སྐྱེའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་འདི་བསྲུངས་པ་ལ་བརྟེན་ནས་དགེ་བའི་ཆོས་ཐམས་ཅད་འཕེལ་ཞིང་སྐྱེ་བར་འགྱུར་རོ། །ཞེས་སོགས་གསུངས་པ་དང་། གཞན་ཡང་། དང་པོར་བསླབ་པའི་གཞི་ལྔ་རྣམས། །གསོ་སྦྱོང་སོགས་དང་ཡང་དག་ལྡན། །མི་དགེ་བཅུ་ནི་ཡོངས་སྤོང་བ། །བྱིན་ནས་དགེ་བསྙེན་ཉིད་དུ་བྱ། །ཞེས་གསུངས་པས། དགེ་བསྙེན་གྱི་བསླབ་པ་ནི། མི་དགེ་བཅུ་སྤོང་གི་སྡོམ་པ་ཡིན་པའི་ཕྱིར། སྡོམ་པ་གོང་མ་ཐམས་ཅད་ཀྱི་གཞིའམ་རྩ་བར་གྱུར་པ་ཡིན་ལ། ཆང་ནི་མྱོས་པར་འཐུང་བ་ལས་བག་མེད་པར་འགྱུར་ཏེ། ཉེས་པ་གཞན་མཐའ་དག་འདྲེན་པའི་ཕྱིར་བཅས་པའི་ཁ་ན་མ་ཐོ་བ་རྣམས་ཀྱི་ནང་ནས་ཆེས་ལྕི་བ་ཡིན་པས་སྡོམ་ལྡན་གྱི་ནད་པས་ཀྱང་རྩ་རྩེའི་ཐིག་པ་ཙམ་ཡང་མི་འཐུང་བར་གསུངས་སོ། །དེ་ལྟར་ཡོངས་རྫོགས་དགེ་བསྙེན་གྱི་བསླབ་བྱ་ཆ་ཙམ་བཤད་པ་འདིས་ནི། སྣ་གཅིག་སྤྱོད་པ་དང་། ཕྱོགས་གཅིག་སྤྱོད་པ་དང་། ཕལ་ཆེར་སྤྱོད་པའི་དགེ་གཉེན་གྱི་བསླབ་བྱའང་ཤེས་པར་འགྱུར་ཞིང་། ཡན་ལག་ལྔ་ལས་ལོག་གཡེམ་གྱི་དོད་དུ་མི་ཚངས་སྤྱོད་སྤོང་བ་ཚངས་སྤྱོད་དགེ་བསྙེན་དང་། བསྙེན་གནས་ཡན་ལག་བརྒྱད་ཇི་སྲིད་འཚོའི་བར་དུ་བསྲུང་བ་གོ་མིའི་དགེ་བསྙེན་དུ་གྲགས་པ་སྟེ་གཞན་དུ་ཤེས་པར་བྱའོ། །སྐྱབས་འགྲོའི་དགེ་བསྙེན་གྱི་བསླབ་བྱ་ནི་ཐམས་ཅད་ཀྱི་ཐུན་མོང་པའོ། །དེ་ལྟར་ཡང་ཆོས་འདུལ་བ་ལས། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ། །ཞེས་གསུངས་པས་སངས་རྒྱས་ཀྱི་བསྟན་པའི་བསླབ་པ་ཐམས་ཅད་ཀྱི་རྩ་བར་གྱུར་པའོ། །དེ་དག་ལས་རྒྱས་པ་ནི་བསླབ་བྱའི་བཤམ་གྱི་ནན་ཏན་ལྷུར་བྱེད་པའི་བརྩོན་འགྲུས་དང་ལྡན་པ་ལ་བསླབ་བོ། །ཞེས་པའི་བར་ཚང་བར་བཤད་ནས་དགེ་བ་བསྔོ་བར་བྱའོ། །འབྲིང་དུ་ན་ཡན་ལག་བཞི་ཆང་དང་བཅས་ལྔ་པོ་སྤོང་དགོས་ཚུལ་མདོར་བསྡུས་ཙམ་ཞིག་བཤད་ནས་བསྔོ་བ་བྱའོ། །ཡོངས་རྫོགས་དགེ་བསྙེན་གྱི་སྡོམ་པ་བྱིན་པའི་ཆོ་གའོ།། ༈ །།སྭ་སྟི། ལྷ་མིའི་སྟོན་པ་ཟས་གཙང་སྲས། །ཐུགས་རྗེའི་བདག་ཉིད་དེར་བཏུད་ནས། །ཡན་ལག་བརྒྱད་པའི་བསྙེན་གནས་ཀྱི། །ཆོ་ག་མདོ་ཙམ་བཤད་པར་བྱ། །འདིར་ཡན་ལག་བརྒྱད་བའི་བསྙེན་གནས་ཀྱི་ཆོ་ག་སྒྲུབ་པ་ལ། ལེན་པའི་ཆོ་ག་སྒྲུབ་པ་ལ། ལེན་པའི་ཆོ་ག །བླངས་པའི་བསླབ་བྱ། འཐད་པ་བཤད་པ་དང་གསུམ་ལས། དང་པོ་སྡོམ་པ་བླང་བའི་ཆོ་ག་ནི། དཀོན་མཆོག་གི་རྟེན་དང་མཆོད་པ་ཅི་འབྱོར་བ་བཤམས་པའི་དྲུང་དུ། སློབ་དཔོན་སྟན་མཐོ་བ་ལ་འདུག །སློབ་མས་མཆིལ་ལྷྭམ་ཕུད། ཡན་ལག་ལྔའི་ཁྲུས་བྱས། རྟེན་དང་བླ་མ་ལ་ཕྱག་བྱས་ནས་ཙོག་པུའམ་པུས་མོ་བཙུགས་ཐལ་མོ་སྦྱར་ཏེ་འཁོད་པ་ལ། སློབ་དཔོན་གྱི་སེམས་བསྐྱེད་གསལ་བཏབ་ནས། དལ་འབྱོར་རྙེད་དཀའ་འཆི་བ་མི་རྟག་པ་ལས་རྒྱུ་འབྲས་འཁོར་བའི་ཉེས་དམིགས་རྣམས་རྒྱས་བསྡུས་ཅི་རིགས་པར་བཤད་ནས་བློ་བཅོས་པའམ། ཁྱོད་བསྙེན་གནས་ཀྱི་སྡོམ་པ་ལེན་པར་འདོད་པ་དེ་ལེགས། ལེགས་པའི་རྒྱུ་མཚན་ཡང་། མགོན་པོ་ཀླུ་སྒྲུབ་ཀྱིས། རྒྱ་མཚོ་ཆེར་གཡེངས་གཉའ་ཤིག་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་དང་། ཚེ་འདི་གནོད་མང་རླུང་གིས་བཏབ་པ་ཡིས། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་རྔུབས་དབུགས་དབྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གསུངས་པ་ལྟར་དལ་འབྱོར་གྱི་མི་ལུས་རིན་པོ་ཆེ་རྙེད་པར་དཀའ་ཞིང་རྙེད་ཀྱང་ཡུན་རིང་དུ་མི་གནས་པར་སྐད་ཅིག་གིས་ཀྱང་འཇིག་པའི་ཆོས་ཅན་འདི་ཉིད་ད་ལྟ་ཅུང་ཟད་ཙམ་གནས་པའི་སྐབས་འདིར་སྙིང་པོ་ལོངས་པ་ཞིག་ཅི་ནས་ཀྱང་བགྱིད་དགོས་ཤིང་། ལེན་ཐབས་ཀྱང་ཚོགས་བསགས་ཤིང་སྒྲིབ་པ་སྦྱང་བ་ལ་རག་ལས་པ་ཡིན་ལ། དེ་ཡང་ཚེགས་ཆུང་ལ་ཕན་ཡོན་ཆེ་བ་བསྙེན་གནས་ཀྱི་སྡོམ་པ་བླངས་ནས་བསྲུང་བ་ཡིན་ཏེ། གནས་འཇོག་གི་མདོ་ལས། གངྒཱ་ལ་སོགས་པའི་ཆུ་ཀླུང་ཆེན་པོ་ལྔ་དང་། རྒྱ་མཚོ་ཆེན་པོའི་ཆུ་བུམ་པའི་གྲངས་ཀྱིས་བཟུང་བར་ནུས་ཀྱིས། བསྙེན་གནས་ཀྱི་ཕན་ཡོན་གྱི་ཚད་བཟུང་བར་མི་ནུས་ཤིང་། འཛམ་བུ་གླིང་གང་བའི་དགྲ་བཅོམ་པ་ལ་རིན་པོ་ཆེ་ལ་སོགས་པའི་ཡོ་བྱད་ཐམས་ཅད་བྱིན་པའི་བསོད་ནམས་ཀྱིས། བསྙེན་གནས་ཀྱི་བསོད་ནམས་ཀྱི་བརྒྱའི་ཆར་ཡང་མི་འགྲོ། སྟོང་གི་ཆར་ཡང་མི་འགྲོ་བར་གསུངས་ཤིང་། འཇིག་རྟེན་གདགས་པ་ལས་ཀྱང་ལྷའི་དབང་པོ་བརྒྱ་བྱིན་གྱིས། ཟླ་བ་ཡར་གྱི་ཚེས་བརྒྱད་དང་། ཆོ་འཕྲུལ་གྱི་ནི་ཟླ་བ་ལ། བསྙེན་གནས་ཡན་ལག་བརྒྱད་བསྲུང་ན། །དེ་ནི་ང་དང་ང་འདྲར་འགྱུར། །ཞེས་སྨྲས་པས། བཅོམ་ལྡན་འདས་ཀྱི་བཀའ་སྩལ་པ། ཀོའུ་ཤི་ཀ་ཁྱོད་དེ་སྐད་མ་ཟེར་ཅིག །ཟླ་བ་ཡར་གྱི་ཚེས་བརྒྱད་དང་། །ཞེས་པ་ནས། དེ་ནི་ང་དང་ང་འདྲར་འགྱུར། །ཞེས་བསྙེན་གནས་ཁོ་ནས་སངས་རྒྱས་ཐོས་པར་གསུངས་པས་བསམ་པ་འདི་བཞིན་དུ་མཛོད། དེ་ཡང་འཁོར་བ་འདི་ན་སེམས་ཅན་ཐམས་ཅད་གནས་གྲོགས་ལོགས་སྤྱོད་བྱ་བ་ཅི་དང་ཅི་བྱེད་པ་ཐམས་ཅད་སྡུག་བསྔལ་གྱི་ཡོ་ལང་དང་སྡུག་བསྔལ་སྒྲུབ་ཐབས་འབའ་ཞིག་པར་ལོངས་སྤྱོད་པར་འདུག་པས་སྙིང་རེ་རྗེ། དེ་རྣམས་སངས་རྒྱས་ཀྱི་ས་ལ་འགོད་བར་བྱ། དེའི་ཆེད་དུ་སངས་རྒྱས་ལ་སྐྱབས་ཞུ། ཆོས་ལ་ལམ་ཞུ། དགེ་འདུན་པ་ལ་ལམ་སྒྲུབ་པའི་གྲོགས་ཞུ་སྙམ་པས་འདིའི་རྗེས་ཟློས་མཛོད། ཅེས་བརྡ་སྦྱར་ལ། བཙུན་པའམ་སློབ་དཔོན་དགོངས་སུ་གསོལ། རྟེན་ལས་ལེན་ན། སྟོན་པ་དགོངས་སུ་གསོལ། ཞེས་སྦྱར། བདག་མིང་འདི་ཞེས་བྱ་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ་ནས། དགེ་འདུན་ལ་སྐྱབས་སུ་མཆིའོ། །ཞེས་པའི་བར་དང་། བདག་དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་ཇི་སྲིད་འཚོའི་བར་དུས་བཟང་གསུམ་ཀ་ལ་གཏན་ལེན་བྱེད་ན། ཇི་སྲིད་འཚོའི་བར་དུ་ཟླ་བ་བྱུང་ངོ་ཅོག་གི་ཚེས་བརྒྱད་དང་། བཅོ་ལྔ་དང་། གནམ་གང་ལ་བསྙེན་གནས་ཡན་ལག་བརྒྱད་པར་ཞེས་སྦྱར། བསྙེན་གནས་ཡན་ལག་བརྒྱད་པར་སློབ་དཔོན་གྱིས་བཟུང་དུ་གསོལ། ཞེས་ལན་གསུམ་བརྗོད་ནས། གསུམ་པའི་ཡན་ལག་བརྒྱད་པར་ཞེས་པའི་ཚིག་རྫོགས་པ་དང་སྡོམ་པ་ཐོབ་ཤེས་བསྐྱེད་ཅིང་། སློབ་དཔོན་གྱིས་ཐབས་ཡིན་ནོ། །སློབ་མས་ལེགས་སོ་ཞེས་བརྗོད། ཡང་སློབ་དཔོན་གྱིས། དེས་ཁྱོད་ཀྱི་རྒྱུད་ལ་བསྙེན་གནས་ཀྱི་སྡོམ་པ་ལེགས་པར་ཐོབ་པ་ཡིན། ཐོབ་པས་མི་ཆོག་བསྲུང་དགོས། དེ་ལ་བསྙེན་གནས་ཀྱི་སྐབས་སུ་བཤད་པའི་བསྲུང་བྱ་བརྒྱད་པོ་འདི་ཡིད་ཀྱི་སྒོ་ནས་སྤང་། ལུས་ངག་གི་སྒོ་ནས་སླར་ལོག་པར་བྱེད། དེ་ཡང་སྔོན་གྱི་འཕགས་པ་དགྲ་བཅོམ་པ་རྣམས་གྱི་རྗེས་སུ་འབྲངས་ནས་བསྲུང་སྙམ་པས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་འཕགས་པ་དགྲ་བཅོམ་པ་དེ་དག་གིས་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་སྔོན་གྱི་འཕགས་པ་དགྲ་བཅོམ་པ་དེ་དག་གིས་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་པ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ། དུས་མ་ཡིན་པའི་ཁ་ཟས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་མ་བྱིན་པར་ལེན་པ་དང་། ཞེས་པ་ནས། སླར་ལོག་པར་བགྱིའོའི་བར་དང་། ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་ནས། རྗེས་སུ་བགྱིད་དོའི་བར་ལན་གཅིག་བརྗོད་ནས། ཐབས་ལེགས་བྱའོ། །གཉིས་པ་ཐོབ་པ་མི་ཉམས་པར་བསྲུང་བ་ནི། བསླབ་བྱ་ཤེས་པ་ལ་རག་ལས་པས། སྐྱབས་འགྲོའི་བསླབ་བྱ་ནི། གཞན་དུ་བརྗོད་པ་བཞིན་བཤད་ནས། བསྙེན་གནས་རང་གི་བསླབ་བྱ་ཡན་ལག་བརྒྱད་དེ། དེ་ཡང་མིའམ་མིར་ཆགས་པའི་སྲོག་མི་བཅད་ཅིང་སྲོག་ཆགས་ཕྲ་མོ་ལའང་མི་འཚེ། གཞན་གྱི་ནོར་རིན་ཐང་ཚང་བར་མ་ཟད་དངོས་པོ་ཕྲ་མོ་ཙམ་ཡང་མ་བྱིན་པར་མི་ལེན། མི་ཚངས་པར་སྤྱོད་པ་ལྟ་ཅི་ཐ་ན་ཆགས་སྲེད་ཀྱི་གཞན་གྱི་ལུས་ལ་རེག་པའང་མི་བྱ། མི་ཆོས་བླ་མའི་རྫུན་དུ་མ་ཟད་རྩེ་མོའི་ཆེད་དུ་ཡང་རྫུན་མི་སྨྲ། མྱོས་བར་འགྱུར་བའི་ཆང་ཐིག་པ་གཅིག་ཡན་ཆད་མི་བཏུང་། གར་སོགས་ཕྲེང་སོགས་སྡོམས་པས་གཅིག་སྟེ་སེམས་རྒོད་ཅིང་ལུས་སྒེག་པས་བརྟུལ་ཞུགས་ཉམས་པའི་ལས་མི་བྱ། ཁྲི་སྟན་ཆེ་མཐོ་མི་བརྟེན། དུས་མ་ཡིན་པ་སྟེ་ཕྱི་དྲོའི་ཁ་ཟས་སྤོང་བ་དང་བརྒྱད་པོ་འདི་བསྲུང་དགོས་ཤིང་། དེར་མ་ཟད་ཇོ་བོ་རྗེའི་ཕྱག་ལེན་ཟས་དཀར་གསུམ་ལ་བརྟེན་ཅིང་ཤ་ཁྲག་གི་དྲི་ཙམ་ཡང་མི་བརྟེན་པ་དང་། དྲན་ཤེས་བཞིན་བག་ཡོད་ཀྱི་སླད་དུ་ཆབ་ལེན་པ་སོགས་ཀྱང་བྱ་བར་གསུངས་སོ། །དེ་ལྟར་སྤང་བྱ་རྣམས་ཚུལ་བཞིན་དུ་མ་བསྲུང་ན་སྡོམ་པ་བླངས་ཀྱང་ཕན་ཡོན་མི་འབྱུང་བར་སྟོན་པའི་བཅས་པ་དང་འགལ་བའི་ཉེས་དམིགས་བསམ་གྱིས་མི་ཁྱབ་སྟེ། ལུང་རྣམ་འབྱེད་ལས། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨིག་ཚལ་བྲེགས་པས་ཨ་མྲའི་ཚལ་ཉམས་བཞིན། །ཞེས་སོགས་གསུངས་པ་དང་། ཚུལ་བཞིན་བསྲུངས་པ་ལ་ཕན་ཡོན་ཤིན་ཏུ་ཆེ་སྟེ། སོ་ཐར་གྱི་མདོ་ལས། འདི་ནི་ཐར་པའི་གྲོང་འཇུག་པའི། །ཐེས་སྐས་གཞི་དང་འདྲ་བར་གནས། །ཞེས་དང་། སྔར་ཡང་བཤད་པ་བཞིན་ཕན་ཡོན་བསམ་གྱིས་མི་ཁྱབ་པར་དང་ལྡན་པར་འགྱུར་ཞིང་། དེ་ཡང་ངོ་ཚ་ཁྲེལ་ཡོད་ཀྱི་བསམ་པ་སྐྱེ་བ་སོགས་དགོས་པ་དུ་མ་དང་ལྡན་པས། ཐོག་མར་སློབ་དཔོན་ལས་བླང་བར་བྱ་ཞིང་། བསྙེན་གནས་ཀྱི་སྡོམ་པ་ནི་ཉིན་ཞག་གི་མཐའ་ཅན་ཡིན་པས། ནང་པར་སྐྱ་རེངས་ཤར་བའི་ཚེ་སྡོམ་པ་གཏོང་བའི་ཕྱིར་སླར་ཡང་ནམ་བསྲུང་བསྲུང་གི་བར་བླ་མ་ལས་ནོད་པའམ། བླ་མ་མ་འབྱོར་ན་རྟེན་གྱི་དྲུང་དུ་གསོ་སྦྱོང་རང་གིས་བླང་བའི་ཆོ་ག་ལ་བརྟེན་ནས་བླངས་ཏེ། དུས་བཟང་རྣམས་ལ་ཅི་ནུས་སུ་བསླབ་པར་གྱིས་ཤིག །ཅེས་བརྗོད་པར་བཀའ་དྲིན་དྲན་པས་ཕྱག་བྱའོ། །གསུམ་པ་འཐད་པ་བཤད་པ་ནི། མཛོད་ལས། བསྙེན་གནས་ཡན་ལག་ཚང་བར་ནི། །དང་པོ་གཞན་ལས་ནོད་པར་བྱ། །ཞེས་གསུངས་པས། ཐོག་མར་རབ་ཏུ་བྱུང་བའམ། ཁྱིམ་པ་གསོ་སྦྱོང་ལ་གནས་པ་ཞིག་ལ་ཇི་སྲིད་འཚོའི་བར་གྱི་ཉ་སྟོང་བརྒྱད་གསུམ་གའི་བསྙེན་གནས་ཀྱི་སྡོམ་པ་དུས་གཅིག་ལ་བླངས་ནས། དེ་ཕྱིན་ཆད་སྡོམ་པ་ལེན་ཡུལ་གྱི་གང་ཟག་མ་རྙེད་ན། རང་ཉིད་ཀྱིས་རྟེན་གྱི་དྲུང་དུ་ལེན་པ་ཡིན་གྱི། སྔར་གང་ཟག་ལས་ལེན་མ་མྱོང་ན་རྟེན་གྱི་དྲུང་དུ་བླངས་ཀྱང་སྡོམ་པ་མི་སྐྱེ། སྔར་ལེན་མྱོང་བ་དག་གིས་ཀྱང་བསྲུང་རྒྱུའི་དུས་ཚེས་གང་ཡིན་དེ་ལ་རང་གིས་རྟེན་གྱི་དྲུང་དུ་བླང་བར་བྱ་ཡིས་མ་བླངས་པར་མི་རུང་ངོ་། །དེ་ཡང་ལེན་ཡུལ་ལས་རང་ཉིད་སྟན་མཐོ་བ་དང་། དབང་པོ་མ་བསྡམས་པ་དང་། མ་གུས་པ་དང་། རྗེས་ཟློས་ཁ་གཅམས་པ་དང་། ཉི་མ་ཤར་བ་དང་། རྒྱན་གསར་དུ་གདགས་པ་རྣམས་ནི་སྡོམ་པ་སྐྱེ་བའི་གེགས་ཡིན་ལ། སང་གི་ཉི་མ་ཤར་བ། དེའི་གོང་དུ་ཤི་བ། ལོག་ལྟ་སྐྱེས་པ། ཕུལ་བ་རྣམས་ནི་སྡོམ་པའི་གཏོང་རྒྱུའོ། །སྐྱེ་བའི་རྒྱུ་ནི་ངེས་འབྱུང་གི་བསམ་པའོ། །གནས་པའི་ཐབས་ནི་དྲན་པ་དང་ཤེས་བཞིན་གྱིས་བསླབ་བྱ་རྣམས་ལེགས་པར་བསྲུང་བར་བྱའོ། །སྡོམ་པ་དེ་ཉིད་ཚེ་གང་དུ་བླངས་ནས་བསྲུང་བ་ནི་སློབ་དཔོན་ཆེན་པོ་ཙནྡྲ་གོ་མི་ལྟར་གོ་མིའི་དགེ་བསྙེན་དུ་འགྱུར་རོ། །དེ་ལྟར་གནས་སྐབས་ལྷ་མི་དང་། །མཐར་ཐུག་འབྲས་བུ་བྱང་ཆུབ་གསུམ། །སྒྲུབ་བྱེད་ཡན་ལག་བརྒྱད་པ་ཡི། །ཆོ་ག་ཉུང་གསལ་འཇུག་བདེར་སྤེལ། །ཁྱིམ་པ་རྗེས་སུ་འཛིན་པ་སོ་སོ་ཐར་པའི་སྡོམ་པའི་ཆོ་ག་ཐར་ལམ་རབ་གསལ་ཞེས་བྱ་བ་འདི་ནི། ཉེ་བར་གནས་པ་ཨོ་རྒྱན་རྣམ་གྲོལ་གྱིས་བསྐུལ་བའི་ངོར་ཤཱཀྱའི་དགེ་བསྙེན་འགྱུར་མེད་རྡོ་རྗེས་ཨོ་རྒྱན་སྨིན་གྲོལ་གླིང་དུ་སྤེལ་བའོ།། །། འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ།འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ། རྒྱ་གར་སྐད་དུ། ཨཱརྻ་མཱུ་ལ་སརྦ་ཨསྟི་བཱ་དི་ཤྲ་མ་ཎེ་ར་ཀཱ་རི་ཀཱ། བོད་སྐད་དུ། འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ། ཐམས་ཅད་མཁྱེན་པ་ལ་ཕྱག་འཚལ་ལོ། །གཞུང་འདི་ལ་སྤྱི་དོན་བརྒྱད། བསྟོད་ཅིང་ཕྱག་འཚལ་བ། མགོན་པོ་ཐམས་ཅད་མཁྱེན་དང་ཆོས། །འཕགས་པའི་ཚོགས་ལ་ཕྱག་འཚལ་ཏེ། །དགེ་ཚུལ་གྱི་ནི་ཆོ་ག་རྣམས། །མདོ་ཙམ་ངེས་པར་བཤད་པར་བྱ། །བསླབ་པ་ཉམས་སུ་བླང་བར་བསྟན། ཤཱཀྱ་སེང་གེའི་བསྟན་པ་ལ། །དད་པས་རབ་ཏུ་བྱུང་ནས་ནི། །བརྟུལ་ཞུགས་བརྟན་པས་རབ་བསྒྲིམས་ཏེ། །བདག་གི་ལུས་བཞིན་བསླབ་པ་བསྲུང་། །སྔ་དྲོའི་དུས་ན་ལས་གང་བྱ་བསྟན། ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་འཚལ། །བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་འདྲི། །འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཉ་ཕྱིས་ལ་སོགས་ཆུ་བརྟག་སྟེ། །སྟེང་དང་བར་གཏིང་རིམ་བཞིན་ནོ། །ཉ་ཕྱིས་ལ་སོགས་མེད་ན་ཡང་། །ཁྱོར་བའམ་འདབ་མས་བུམ་པ་དགང་། །ཆུ་ཡི་སྐྱེ་བོ་ཆེ་ཆུང་རྣམས། །ཡུན་ནི་རིང་བར་ནན་ཏན་བརྟག །སྙིང་རྗེ་ཅན་གྱིས་ཁུ་བ་རྣམས། །རབ་ཏུ་བརྟགས་ཏེ་སྤྱད་པར་བྱ། །སྲོག་ཆགས་ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །རྩྭ་དང་ལྕི་བ་ཤིང་ལ་སོགས། །དགོས་པ་ཐམས་ཅད་གང་ཡང་རུང་། །དེ་དག་སྲོག་ཆགས་མེད་པར་བྱ། །སྡོམ་པས་སྲོག་ཆགས་བསད་པ་སྲུངས། །སྟན་ཆུ་ས་དང་སོ་ཤིང་དང་། །འདག་པའི་ཆལ་ཡང་སྟ་གོན་བྱ། །ལྷུང་བཟེད་བཀྲུ་བ་སོགས་པ་དང་། །བླ་མའི་དགོས་པ་ཐམས་ཅད་བྱ། །དེ་ནས་དུས་རིག་ཕྱག་བྱས་ཏེ། །དེ་བཞིན་གུས་པས་ཐལ་སྦྱར་ནས། །འཚལ་མ་འཚལ་ཞེས་བླ་མ་ལ། །བརྟུལ་ཞུགས་ཅན་གྱིས་དེ་ལྟར་ཞུ། །ལག་པ་བཀྲུས་ནས་ཚུལ་བཞིན་དུ། །དེ་ནས་མི་སྨྲ་ཚོད་རིག་པས། །བྲུ་བའི་ནད་ལས་བཟློག་པའི་ཕྱིར། །བཟའོ་སྙམ་པའི་སེམས་ཀྱིས་བཟའ། །ཟོས་ཤིང་དེ་བཞིན་འཐུང་བ་དང་། །རུང་བའི་ཆུ་ནི་དེ་འོག་ཏུ། །སྦྱིན་པ་ཡང་དག་སྤེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཟས་ཀྱི་བྱ་བ་བྱས་པའི་འོག་ཏུ་ལས་གང་བྱ་བ་བསྟན་པ། མན་ངག་ཡོད་ན་བསམ་གཏན་བྱ། །རབ་ཏུ་འབད་དེ་བཀླག་པར་བྱ། །སྡོམ་དང་ཆོ་ག་མཁས་པ་དང་། །སྒྲུབ་པ་དག་ལ་བརྩོན་པར་བྱ། །ཕས་ཕམ་གྱི་གནས་བསྟན། བརྟུལ་ཞུགས་གནས་སེམས་མ་ཉམས་པས། །ཆེད་དུ་བསམས་ཏེ་མ་ནོར་བར། །མི་གཞན་བདག་གམ་གཞན་རྣམས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཚུལ་ཁྲིམས་ལྡན་ནམ་ཚུལ་ཁྲིིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམས་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །སྨན་དང་སྔགས་དང་རིག་པ་དང་། །འཆི་བའི་ཕྱོགས་སུ་བཏང་བ་དང་། །མི་གཞན་ཐབས་རྣམས་སྣ་ཚོགས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །དུད་འགྲོ་དང་ནི་སེམས་དམྱལ་དང་། །ཡི་དྭགས་འོན་ཏེ་ལྷ་ཡང་རུང་། །བསད་ན་ངན་འགྲོར་ལྟུང་བ་ཡི། །སྡིག་པ་སྦོམ་པོ་ཐོབ་པར་འགྱུར། །བརྟུལ་ཞུགས་ཅན་གྱིས་བསད་སྙམ་སྟེ། །ལུས་དང་ང ག་གིས་བཤམས་པ་ལས། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །རྡོ་དབྱུག་ཁུ་ཚུར་འཚོགས་པ་དང་། །དེ་ལས་གཞན་པའི་གནོད་པ་དང་། །བ་ལང་ལ་སོགས་གནོད་མི་བྱ། །རྟ་ལ་སོགས་པ་མི་ཞོན་ནོ། །དགེ་ཚུལ་བདག་གམ་གཞན་རྣམས་ཀྱིས། །རྐུ་སེམས་མཐུ་དང་འཇབ་བུ་ཡིས། །འཁྲུལ་པ་མེད་པར་མི་གཞན་གྱི། །གནས་ནས་མ་ཤ་ལྔ་ཙམ་མམ། །རང་གི་ཡུལ་ནས་བྱུང་བ་གང་། །ཀཱཪྵཱ་པ་ཎ་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །སྦྱོར་བའི་ཚེ་ན་ཉེས་བྱས་སོ། །རྡོག་གུའི་རྩ་བ་འབྲས་བུའི་ཤིང་། །སྡོང་པོ་ལོ་མ་ཤུན་པ་ཆུ། །མེ་ཏོག་ཆུ་སྐྱེས་ཐང་སྐྱེས་དང་། །ཞིང་དང་ལོ་ཏོག་ས་གཞི་དང་། །གྲུ་དང་ཤིང་དང་ཤོ་གམ་དང་། །དེ་བཞིན་གྲུ་ཡི་བཙས་རྣམས་དང་། །སྲོག་ཆགས་རྐང་པ་མེད་པ་དང་། །རྐང་གཉིས་རྐང་མང་རྐུ་བ་དང་། །བརྟུལ་ཞུགས་ཅན་གྱིས་མི་ཡི་ནོར། །དབྱིག་ལ་སོགས་པ་གང་ཡང་རུང་། །རྐུ་བའི་སེམས་ཀྱིས་གང་བརྐུས་ཀྱང་། །རིན་ཐང་ཚང་ན་སྡོམ་པ་ཞིག །ལྷུང་བཟེད་ལ་སོགས་རྐུན་ཁྱེར་ན། །ཆོས་བཤད་ནས་ནི་བསྒྲུབ་པར་བྱ། །ཡང་ན་རི་བའི་རིན་གྱིས་བླུ། །དེ་ལྟར་མ་བྱས་ཉེས་བྱས་སོ། །སྡོམ་ཅན་ཉེས་པ་མེད་སེམས་ཀྱིས། །ཉམས་པ་མེད་པའི་སྒོ་གསུམ་དུ། །ཆགས་པས་ནོར་བུ་ནང་དུ་འདས། །དགའ་བ་ཚོར་ན་བརྟུལ་ཞུགས་ཉམས། །སྐྱེས་པ་བུད་མེད་མ་ནིང་གི། །ཚན་ཀར་བོར་ཏེ་མནན་པ་ལས། །གང་གི་བདེ་བའི་རོ་མྱོང་བ། །དེ་ཡང་སྡོམ་པ་ཞིག་པར་འགྱུར། །ཡན་ལག་སྐྱེས་ནས་བདེ་འདོད་པས། །གདུག་པ་སྦྲུལ་གྱི་ཁར་བཅུག་སླ། །ལུས་ལ་སྡོམ་པ་མི་གཞིག་ཅེས། །རྫོགས་སངས་རྒྱས་ཀྱིས་བཀའ་སྩལ་ཏོ། །གལ་ཏེ་སྦྲུལ་གྱིས་བསད་གྱུར་ཀྱང་། །ཚུལ་ཁྲིམས་གནས་ལ་དེ་ཕན་ཏེ། །ཚུལ་ཁྲིམས་ཉམས་པ་སྡུག་བསྔལ་ཡིན། །མྱ་ངན་འདས་ལའང་སྒྲིབ་པར་འགྱུར། །ལྷ་དག་མཐོང་ཞེས་དེ་ཡི་སྒྲ། །ཐོས་པར་གྱུར་དང་ཀུན་སྨྲ་དང་། །གང་ན་བདག་འདུག་ལྷ་འོང་ཞིང་། །བདག་ཀྱང་དེ་ཡི་དྲུང་འགྲོ་དང་། །དེ་བཞིན་དྲི་ཟ་གྲུལ་བུམ་ཀླུ། །གནོད་སྦྱིན་ལྟོ་འཕྱེ་ཆེན་པོ་དང་། །ཤ་ཟ་ཡི་དྭགས་མིའམ་ཅི། །མཐོང་ངོ་ཞེས་ལ་སོགས་སྨྲས་དང་། །བསམ་གཏན་མངོན་ཤེས་ཚད་མེད་དང་། །རྒྱུན་ཞུགས་ལ་སོགས་འབྲས་བུ་དང་། །ལམ་ལ་རབ་ཏུ་ཞུགས་པའང་རུང་། །བདག་གིས་ཐོབ་ཅེས་སྨྲས་ནས་ནི། །དོན་རིག་པ་ལ་རྫུན་པའི་ཚིག །ཁྱད་པར་ཐོབ་པའི་བདག་ཉིད་ཅན། །མ་ཉམས་ང་རྒྱལ་མེད་བཞིན་དུ། །སྨྲས་ན་བརྟུལ་ཞུགས་ཉམས་པར་འགྱུར། །ཁྱད་པར་ཐོབ་པ་མ་གཏོགས་པར། །དེ་ལས་གཞན་པའི་རྫུན་ཚིག་རྣམས། །དེ་དག་ཐམས་ཅད་སྡིག་མང་འགྱུར། །དེས་ནི་འོག་མར་ལྟུང་བར་འགྱུར། །ཇི་ལྟར་མཛའ་བོ་འབྱེད་འགྱུར་བ། །ཕྲ་མའི་ཚིག་རྣམས་སྨྲ་མི་བྱ། །ཐུན་ཚགས་སུ་ནི་སྨྲ་བ་དང་། །ཚིག་རྩུབ་སྨྲ་བར་མི་བྱའོ། ། ངན་དུ་ཟེར་ལ་ངན་མི་བརྗོད། །གཤེ་བ་ལ་ཡང་སླར་མི་གཤེ། །མཚང་བྲུ་བ་ལ་སླར་མི་བྲུ། །བརྡེག་པ་ལ་ཡང་སླར་མི་བརྡེག །བློ་ལྡན་བསླབ་པ་འདོད་པ་ཡིས། །བསྒྲིམས་ཏེ་ངག་གི་སྐྱོན་རྣམས་སྤང་། །དེ་ལྟར་འགྱུར་བར་རིག་ནས་ནི། །ངག་རྣམས་ཤིན་ཏུ་བསྡམ་པར་བྱ། །བསླབ་པ་ཕྲ་མོའི་གནས་བསྟན་ནོ། ། འབྲུ་བཏགས་ཕབ་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང་། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཙོས་པའི་ཆང་། །དེས་ནི་མྱོས་པར་འགྱུར་རིག་ནས། །སྡོམ་ཅན་ཕན་འདོད་མི་བཏུང་ངོ་། །དེ་འཐུངས་ན་ནི་དྲན་ཉམས་ཤིང་། །བརྟུལ་ཞུགས་ལྡན་པ་བག་མེད་འགྱུར། །བག་མེད་པ་ལས་བརྟུལ་ཞུགས་ཉམས། །དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་འགྱུར་བ། །རྩྭ་མཆོག་གིས་ཀྱང་མི་བཏུང་ངོ་། །གླུ་གར་དང་ནི་སིལ་སྙན་རྣམས། །སྡོམ་ལ་གནས་པས་མི་བྱའོ། །ལུས་ལ་སྤོས་ཀྱིས་མི་བྱུག་གོ། །ཙནྡན་ལ་སོགས་མི་བསྐུའོ། །ཡུང་དང་གུར་གུམ་ལ་སོགས་པ། །ཁ་དོག་རྣམས་སུ་བྲི་མི་བྱ། ། མེ་ཏོག་མགོ་རྒྱན་ཕྲེང་བ་དག །བརྟུལ་ཞུགས་ཅན་གྱིས་གདགས་མི་བྱ། །གསེར་ལ་སོགས་པའི་རྒྱན་རྣམས་ཀྱིས། །བདག་ལ་བརྒྱན་པར་མི་བྱའོ། །དུད་པ་ལ་སོགས་མིག་སྨན་རྣམས། །མིག་མི་ན་བར་མི་བྱུག་གོ། །ཤིང་ཁྲི་ཁྲུ་གང་མཐོ་བ་དང་། །བ་སོ་ལ་སོགས་བརྒྱན་པའི་ཁྲི། །དམའ་ཡང་ཉལ་ཁྲི་བཟང་པོ་ལ། །ཉལ་བ་ལ་སོགས་མི་བྱའོ། །གླུ་གར་ལ་སོགས་བསྟན་པ་དང་། །གང་ལ་དྲེགས་པ་སྐྱེ་འགྱུར་བ། །དྲེགས་པའི་ཡན་ལག་སྤངས་ནས་ནི། །བརྟུལ་ཞུགས་གནས་ཞེས་བརྗོད་པ་ཡིན། །ཉི་མ་ཕྱེད་མཚམས་མན་ཆད་ནས། །སྐྱ་རེངས་མ་ཤར་བར་དུ་ནི། །དེ་ནི་རྒྱལ་བས་དུས་མིན་གསུངས། །སྡོམ་ཅན་གྱིས་ནི་དེར་མི་བཟའ། །སྐྱ་རེངས་ཤར་ནས་ཕྱེད་ཀྱི་བར། །དེ་ཡི་སྐབས་སུ་ཟོས་པ་ནི། །དེ་ནི་བདག་ཤེས་སྡོམ་པ་སྟེ། །བཟའ་བའི་དུས་སུ་ཟོས་པ་ཡིན། །དུས་མིན་དུས་སུ་འདུ་ཤེས་པ། །ནམ་ཡང་བཟའ་བར་མི་བྱའོ། །སྨན་པས་ཉོན་མོངས་བསྒོས་ན་ནི། །ནད་པས་ཉེས་པར་མི་འགྱུར་རོ། །ས་ལེ་སྦྲམ་ནི་གསེར་ཡིན་ཏེ། །དངུལ་ཞེས་བྱ་བ་དངུལ་ཉིད་དོ། །སྤྱིན་བདག་རྣམས་ནི་དེ་བྱིན་ན། །བརྟུལ་ཞུགས་ཅན་གྱིས་མི་བླང་ངོ། །བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་སྙམ་དུ། །ད་ལྟར་མངོན་པར་བསམས་ནས་ནི། །དེ་ནས་གཞན་ཞིག་ལེན་དུ་གཞུག །དཀོན་མཆོག་གསུམ་གྱི་ཆེད་ཀ་དང་། །ཚངས་པ་མཚུངས་པར་སྤྱོད་རྣམས་ཀྱིས། །གསེར་དང་དངུལ་ལ་རེག་གྱུར་ཀྱང་། །ཉེས་པར་བགྱུར་བ་མ་ཡིན་ནོ། །འདོད་པས་བར་དུ་གཅོད་བྱེད་ཅེས། །རྫོགས་སངས་རྒྱས་ཀྱིས་གསུངས་པ་དེ། །བར་དུ་གཅོད་པར་མི་འགྱུར་ཞེས། །དགེ་ཚུལ་གཏི་མུག་མ་སྨྲ་ཞིག །དེ་སྐད་སྨྲ་ན་དགེ་འདུན་གྱི། །ལོངས་སྤྱོད་ཀུན་དང་ཕྲལ་ནས་ནི། །གཙུག་ལག་ཁང་ནས་བསྐྲད་པར་བྱ། །དེ་ནས་རོ་དང་འདྲ་བར་འགྱུར། །འཕྱར་དང་རྟ་གང་བྱེད་ལ་སོགས། །འཆི་བར་བསམས་ཏེ་མི་བྱའོ། །གླལ་ཚེ་ལག་པ་སོགས་པ་ཡིས། །ཁ་དགབ་པར་ཡང་ནན་ཏན་བྱ། །རྒན་ལ་སྦྲིད་བྱུང་ཕྱག་བྱ་སྟེ། །གཞོན་ལ་ནད་མེད་གྱུར་ཅེས་བརྗོད། །ཁྱིམ་པ་སྦྲིད་པ་བྱུང་བ་ལ། །ཡུན་རིང་འཚོ་ཞེས་བརྗོད་པར་བྱ། །བླ་མ་གནས་པའི་མདུན་དག་ཏུ། །སྣབས་དང་མཆིལ་མ་མི་འདོར་ཞིང་། །སོ་ཤིང་བཅའ་བར་མི་བྱའོ། །དེ་བཞིན་སྟན་ལ་མི་འདུག་གོ། །མདུན་དུ་གཅག་པར་མི་བྱའོ། །ཁྱེད་རེངས་སུ་ཡང་མི་དབྱུང་ངོ་། །རྒན་ལ་སོགས་པའི་སྡོམ་ཅན་ལ། །གུས་བཅས་ཞེ་སར་བཅས་པར་བྱ། །ལག་པ་དག་པར་བསྙལ་ནས་ནི། །བུམ་པ་ལ་སོགས་རྡུལ་མེད་བྱ། །ཆུ་ཡང་ཡོངས་སུ་བཙགས་ནས་སུ། །བརྟགས་ནས་རུང་བ་བླང་བར་བྱ། །གནས་མ་བཅས་པར་གནས་མི་བྱ། །ཕྱི་དྲོ་ཕན་ཆད་ཀྱི་བྱ་བ་བསྟན་ནོ། །དགེ་འདུན་མལ་ཆ་ལ་སོགས་པར། །དྲན་པ་མེད་པར་འདུག་མི་བྱ། །དྲན་དང་ལྡན་ན་ཉེས་མེད་དོ། །སོ་བྲུ་བ་དང་ཆུ་བཏུང་དང་། །གཤང་གཅི་བྱེད་དུ་འགྲོ་བ་དང་། །མཚམས་ནང་སྟོན་ལ་ཕྱག་བྱ་བ། །དེ་དག་མ་ཞུས་ཉེས་མེད་དོ། །བརྟུལ་ཞུགས་ཅན་གྱིས་བྱ་བ་གཞན། །དེ་དག་ཐམས་ཅད་མ་ལུས་པ། །གལ་ཏེ་བླ་མར་མ་ཞུས་པར། །བྱས་ན་དེ་ལ་ཉེས་བྱས་སོ། །མཆོད་རྟེན་ལ་སོགས་ཕྱག་བྱས་ཏེ། །མི་ཉལ་བྱས་ནས་དེ་འོག་ཏུ། །བླ་མའི་རྐང་བཀྲུས་བླ་མ་ལ། །བརྟུལ་ཞུགས་ཅན་གྱིས་ཀུན་ཞུས་ཏེ། །རྐང་པ་གཉིས་ཀ་བཀྲུས་ནས་ནི། །ནམ་གྱི་ཆ་སྟོད་ཆ་སྨད་ལ། །བསྒྲིམས་ཏེ་མི་ཉལ་བ་བྱས་ཏེ། །དེས་ནི་བདེན་པར་སྨྲ་བར་བྱ། །ལྡང་དང་སྣང་བའི་འདུ་ཤེས་ཀྱིས། །སེང་གེ་ཉལ་ཐབས་བཞིན་དུ་བྱ། །དྲན་དང་ལྡན་ཞིང་དགེ་རྒྱུད་དང་། །དེ་བཞིན་མྱུར་དུ་སད་ནས་ནི། །ཇི་སྐད་བསྟན་པ་བཞིན་དུ་བྱ། །འདིས་འབྲས་བུ་བསྟན་ནོ། །ཇི་ལྟར་ཉོན་མོངས་མྱུར་ཟད་དང་། །བྱང་ཆུབ་དམ་པ་ཐོབ་འགྱུར་པ། །དེ་ལྟར་བསྒྲིམས་དང་ལྡན་པར་བྱ། །ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ་སློབ་དཔོན་ཀླུ་སྒྲུབ་ཀྱིས་མཛད་པ་རྫོགས་སོ། །རྒྱ་གར་གྱི་མཁན་པོ་མུ་ནི་བརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །འདིའི་འགྲེལ་པ་ཀ་མ་ལ་ཤཱི་ལས་མཛད་པ་དང་། ཡང་མཛད་པ་པོ་མི་གསལ་བ་བཅས་གཉིས་སྣང་ངོ་། །ཚུལ་ཁྲིམས་རྒྱ་མཚོས་སྤར་དུ་བསྒྲུབས་པའོ།། །།དཔེ་འདིའང་སྤར་རྙིང་རྩ་ཆེན་མཁན་ཚུལ་ཁྲིམས་མཐར་ཕྱིན་གྱི་ཕྱག་དཔེ་ལས་ཁོ་བོ་བྱང་ཆུབ་རྒྱ་མཚོས་རྙེད་དེ་གསར་དུ་འཛུད་པའོ། ། དགེ་སློང་ཕའི་སོ་སོར་ཐར་པའི་མདོ།དགེ་སློང་ཕའི་སོ་སོར་ཐར་པའི་མདོ་བཞུགས་སོ། །རྒྱ་གར་སྐད་དུ། པྲ་ཏི་མོཀྵ་སཱུ་ཏྲ། བོད་སྐད་དུ། སོ་སོར་ཐར་པའི་མདོ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །སྙན་པའི་བ་དན་འཇིག་རྟེན་གསུམ་དུ་གྲགས། །དམ་པའི་ཆོས་སྒྲ་སེང་གེའི་སྒྲ་བསྒྲགས་པ། །ཐམས་ཅད་མཁྱེན་པ་དཀོན་མཆོག་མཛོད་བརྙེས་པ། །ཞབས་ལ་ཚངས་དབང་གཙུག་གི་ནོར་བུས་གཏུགས། །སྡུག་བསྔལ་རྒྱ་མཚོ་གཏིང་མཐའ་མེད་བརྒལ་བ། །འགྲོ་བའི་གཙོ་ལ་སྤྱི་བོས་ཕྱག་འཚལ་ཏེ། །ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །སངས་རྒྱས་འདུལ་བ་གངས་ཆེན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ནི། །སོ་སོར་ཐར་པ་འདི་ཡིན་ནོ། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པ་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །གདུག་པ་རྣམས་སེལ་སྨན་འདི་ཡིན། །འདི་ནི་ལང་ཚོ་རྣམ་འཁྲུལ་བའི། །རྐང་གཉིས་གཞོན་ནུའི་ལྕགས་ཀྱུ་ཡིན། །མཚོ་བས་ཟབ་པའི་འཁོར་བ་ལས། །སྒྲོལ་བའི་བརྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་ཡི་ནི་འདྲེན་པ་མཆོག །འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ན། །འདི་ནི་ཁྱེད་ཀྱི་སྟོན་པའི་ཞེས། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་འདུན་བསྟོད། །སངས་རྒྱས་ཞེས་བྱའི་སྒྲ་འདི་ཡང་། །འཇིག་རྟེན་བདག་ན་རབ་ཏུ་དཀོན། །མི་ཉིད་རྙེད་པ་ཤིན་ཏུ་དཀའ། །རབ་ཏུ་བྱུང་བ་ཤིན་ཏུ་དཀོན། །དེ་བཞིན་རབ་ཏུ་བྱུང་རྣམས་ཀྱི། །ཚུལ་ཁྲིམས་ཕུན་སུམ་ཚོགས་རབ་དཀོན། །ཚུལ་ཁྲིམས་ཡོངས་སུ་དག་གྱུར་ཀྱང་། །གྲོགས་བཟང་ཤིན་ཏུ་རྙེད་པར་དཀའ། །འཇིག་རྟེན་སངས་རྒྱས་འབྱུང་བ་དང་། །མི་དང་རབ་ཏུ་བྱུང་བ་དང་། །ཚུལ་ཁྲིམས་ཕུན་སུམ་ཚོགས་པ་དང་། །གྲོགས་བཟང་རྙེད་དཀའ་རྙེད་གྱུར་ནས། །མཁས་པ་དག་ལ་ལེགས་འདོད་ཅིང་། །དེ་དང་འབྲས་བཅས་བྱེད་འདོད་པའི། །སྡོམ་བརྩོན་རྣམས་ཀྱིས་སོ་སོར་ཐར། །མཉམ་པའི་ཕྱིར་ནི་འབད་པར་བྱ། །དགེ་སློང་དབང་དུལ་ཀུན་དབང་པོ། །སངས་རྒྱས་མི་འགྱུར་རབ་བྱུང་བ། །ངེས་པར་ཐར་བ་འདོད་རྣམས་ཀྱིས། །སོ་སོར་ཐར་པ་རྟག་ཏུ་སྲུངས། །བསྐལ་པ་བྱེ་བ་རྣམས་སུ་ཡང་། །སོ་སོར་ཐར་པ་ཐོས་པ་དང་། །གཟུང་དང་འཛིན་པ་རྙེད་དཀའ་སྟེ། །སྒྲུབ་པའང་ཤིན་ཏུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་བདེ། །ཆོས་བསྟན་པ་ཡང་བདེ་བ་ཡིན། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །འཕགས་པ་རྣམས་ནི་མཐོང་བ་བདེ། །དམ་པ་དག་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་བ་ཡི། །དགྲ་བཅོམ་པ་དག་མཐོང་བ་བདེ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ངའོ་ང་རྒྱལ་ཟད་པ་བདེ། །ངེས་པར་བྱས་ཤིང་དབང་པོ་ཐུལ་བ་དག །དགོན་པ་ཞི་བ་རྣམས་སུ་རྒས་གྱུར་དང་། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱི་གནས་པ་བདེ། །ཚེ་དང་ལྡན་པ་དག་སོ་ཀ་རྣམས་ཀྱི་འདས་པ་དང་། ལྷག་མ་ཇི་ཙམ་པ་དེ་ཙམ་མོ། །ཚེ་དང་ལྡན་པ་དག་རྒ་བ་དང་འཆི་བ་མངོན་པར་འོང་ཞིང་སྟོན་པའི་བསྟན་པ་ཡང་འཇིག་པར་འགྱུར་པས། ཚེ་དང་ལྡན་པ་དག་གིས་བག་ཡོད་པས་རྣལ་འབྱོར་དུ་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པ་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་འཐོབ་བོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་དོན་ཉུང་བ་དང་བྱ་བ་ཉུང་བ་ཡིན་པས་དགེ་འདུན་གྱི་ཐོག་མར་བྱ་བ་ཅི་ཡོད། ཚེ་དང་ལྡན་པ་དག་མ་ལྷགས་པ་རྣམས་ལ་འདུན་པ་དང་ཡོངས་སུ་དག་པ་དྲིས་ཤིག །དྲིས་ནས་ཀྱང་བརྗོད་པར་བྱའོ། །ཤཱཀྱ་སེང་གེ་དེ་ལ་ནི། །སོར་མོ་བཅུ་ཡི་ཐལ་སྦྱར་ཏེ། །སོ་སོར་ཐར་པ་འདོན་པར་བྱ། །གདུལ་བའི་དོན་དུ་ང་ལས་ཉོན། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུངས་བཞིན་བསྒྲུབ་བྱ་ཞིང་། །ཁ་ན་མ་ཐོ་ཕྲ་རྣམས་ལ། །རྟུན་ཅིང་བྱེད་པ་ཉིད་དུ་གྱིས། །རྟག་ཏུ་འབད་པས་འདའ་པ་ཡི། །སེམས་རྟ་ཁ་བླན་དཀའ་བ་ལ། །མཐུན་པ་གཟེར་རྣོན་བརྒྱ་པ་ཡི། །སྲབ་ནི་སོ་སོར་ཐར་འདི་ཡིན། །ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒྱལ་འགྱུར། །སུ་ལ་སྲབ་འདི་མེད་པ་དང་། །ནམ་དུའང་འདོད་པར་མི་འགྱུར་བ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་རྣམ་པར་འཁྱམ་པར་འགྱུར། །དགེ་འདུན་བཙུན་པ་རྣམས་གསན་དུ་གསོལ། །དེང་དགེ་འདུན་གྱིས་གསོ་སྦྱོང་བཅུ་བཞི་པའམ་བཅོ་ལྔ་པ་སྟེ། །གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱི་གནང་བར་མཛོད་ཅིག་དང་། དེང་དགེ་འདུན་གསོ་སྦྱོང་མཛད་དེ་སོ་སོར་ཐར་པའི་མདོ་གདོན་པ་གདོན་ཏོ། །འདི་ནི་གསོལ་བའོ། །ཚེ་དང་ལྡན་པ་དག་བདག་ཅག་གསོ་སྦྱོང་བྱ་སྟེ། །སོ་སོར་ཐར་པའི་མདོ་གདོན་པ་གདོན་གྱིས། ཁྱེད་ཅག་སུ་ལ་ལྟུང་བ་ཡོད་པ་དེས་མཐོལ་ཅིག །ལྟུང་བ་མེད་ན་ཅང་མ་སྨྲ་ཞིག །ཅང་མི་སྨྲ་ན་བདག་གིས་ཚེ་དང་ལྡན་པ་དག་ཡོངས་སུ་དག་པར་རིག་པར་བྱའོ། །ཇི་ལྟར་སོ་སོར་དྲིས་ནས་དགེ་སློང་གིས་ལན་བཏབ་པ་དེ་བཞིན་དུ་དགེ་སློང་གི་འཁོར་འདི་ལྟ་བུར་ཡང་ལན་གསུམ་གྱི་བར་དུ་བསྒྲག་པར་བྱ་བ་ཡིན་ནོ། །ཡང་དགེ་སློང་གང་དགེ་སློང་གི་འཁོར་འདི་ལྟར་བུར་ལན་གསུམ་གྱི་བར་དུ་བསྒྲགས་པ་ན་ལྟུང་བ་ཡོད་ལ་དྲན་བཞིན་དུ་མི་མཐོལ་ན་དེ་ཤེས་བཞིན་དུ་རྫུན་དུ་སྨྲ་བ་ཡིན་ནོ། །ཚེ་དང་ལྡན་པ་དག་ཤེས་བཞིན་དུ་རྫུན་དུ་སྨྲ་བ་ནི་བཅོམ་ལྡན་འདས་ཀྱི་བར་དུ་གཅོད་པའི་ཆོས་སུ་གསུངས་སོ། །དེ་བས་ན་དགེ་སློང་གང་ལྟུང་བ་བྱུང་བ་རྣམ་པར་དག་པར་འདོད་པས་ལྟུང་བ་ཡོད་ལ་དྲན་ཞིང་མཐོང་བ་མཐོལ་བར་བྱའོ། །མཐོལ་ན་དེ་བདེ་བ་ལ་རེག་པར་གནས་པར་འགྱུར་རོ། །མ་མཐོལ་མ་བཤགས་ན་ནི་མི་འགྱུར་རོ། །ཚེ་དང་ལྡན་པ་དག་བདག་གིས་སོ་སོར་ཐར་པའི་མདོ་གདོན་པའི་གླེང་གཞི་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱོད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། མི་ཚངས་སྤྱོད་དང་རྐུ་བ་དང་། །མི་ལ་བསད་པར་མི་བྱ་བ། །རྫུན་དུ་སྨྲ་དང་བཅས་པ་ཡི། །ཆོས་བཞི་འདི་ནི་གསུངས་པ་ཡིན། །ཚེ་དང་ལྡན་པ་དག་ཕམ་པར་འགྱུར་བའི་ཆོས་བཞི་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་བས་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན། ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཕམ་པར་གྱུར་པ་ཡིན་གྱི་གནས་པར་མི་བྱའོ། །ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པར་རྐུ་བའི་གྲངས་སུ་གཏོགས་པ་བླངས་ན། ཇི་ཙམ་མ་བྱིན་པར་བླངས་པས་དེ་རྒྱལ་པོའམ། བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །བརྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུགས་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་མིའམ་མིར་ཆགས་པ་ལ་བསམས་བཞིན་དུ་རང་གི་ལག་དར་ཏེ་སྲོག་བཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་སླའོ་ཟེར་ཞིང་། སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རེག་པར་སྤྱོད་བ་མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་འདི་སྐད་ཅེས། ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་རྫུན་དུ་སྨྲས་སོ་ཞེས་ཟེར་ན། མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ། །ཚེ་དང་ལྡན་པ་དག་བདག་གིས་ཕམ་པར་གྱུར་པའི་ཆོས་བཞི་པོ་དག་བཏོན་ཟིན་ཏོ། །དགེ་སློང་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན་ཐོག་མ་ཇི་ལྟ་བར་ཕྱིས་ཀྱང་དེ་བཞིན་དུ་ཕམ་པར་གྱུར་པ་ཡིན་ཏེ། དགེ་སློང་རྣམས་དང་ལྷན་ཅིག་གནས་པ་དང་ལོངས་སྤྱོད་དུ་མི་དབང་གིས་གནས་པར་མི་བྱའོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། ཁུ་བ་འཛིན་པ་འཁྲིག་ཚིག་བསྙེན་བཀུར་སྨྱན། །ཁང་བ་ཁང་ཆེན་དང་ནི་གཞི་མེད་པ། །བག་ཙམ་དགེ་འདུན་དབྱེན་དང་དེ་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཚེ་དང་ལྡན་པ་དག་དགེ་འདུན་ལྷག་མའི་ཆོས་བཅུ་གསུམ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །བསམས་བཞིན་དུ་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ་དགེ་འདུན་ལྷག་མའོ། །ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་དང་ལྡན་ཅིག་ལུས་རེག་པར་བྱེད་དམ། ལག་པ་ནས་བཟུང་ངམ། དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་དང་ཉིད་ལག་གང་ཡང་རུང་བ་ལ་ནོམ་པ་དང་ཉུག་པ་བདག་གིར་བྱེད་ན་དགེ་འདུན་ལྷག་མའོ། །ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཡུལ་དང་ལྷན་ཅིག་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་ལས་བྱུང་བ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲས་ན་དགེ་འདུན་ལྷག་མའོ། །ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་དཀྱིལ་ལུས་ཀྱི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་བྱ་བའི་ཕྱིར་འདི་ལྟ་སྟེ། ང་ལྟ་བུའི་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་ལས་བྱུང་བ་དང་ལྡན་པའི་ཆོས་འདིས་བསྙེན་བཀུར་བྱས་ན། སུ་འདི་ནི་བསྙེན་བཀུར་བྱས་པ་རྣམས་ཀྱི་ནང་ན་མཆོག་ཡིན་ནོ་ཞེས་བསྔགས་པ་བརྗོད་ན་དགེ་འདུན་ལྷག་མའོ། །ཡང་དགེ་སློང་གང་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན་ཐ་ན་ཐང་འགའ་འཕྲད་པ་ལ་ཡང་རུང་སྟེ་དགེ་འདུན་ལྷག་མའོ། །དགེ་སློང་གིས་བདག་གིས་བསླངས་པ། བདག་པོ་མེད་པ། བདག་གི་ཕྱིར་ཁང་པ་རྩིག་ཏུ་འཇུག་ན་དགེ་སློང་དེས་ཁང་པ་ཚད་བཞིན་དུ་རྩིག་ཏུ་ཆུག་ཅིག །དེ་ལ་ཁང་པའི་ཚད་ནི་འདི་ཡིན་ཏེ། ནང་གི་སྲིད་དུ་བདེ་བར་གཤེགས་པའི་མཐོའི་མཐོ་བཅུ་གཉིས། ཞེང་དུ་མཐོ་བདུན་ནོ། །གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བར་བདག་གིས་བསླངས་པ་བདག་པོ་མེད་པ་བདག་གི་ཕྱིར་ཁང་པ་རྩིག་ཏུ་འཇུག་གམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ཏམ། ཚད་ལས་འདས་ན་དགེ་འདུན་ལྷག་མའོ། །དགེ་སློང་གིས་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་ན་གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བར་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་གམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ན་དགེ་འདུན་ལྷག་མའོ། །ཡང་དགེ་སློང་གང་ཁྲོས་ཤིང་ཞེ་སྡང་པར་གྱུར་ནས། ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས། དགེ་སློང་དག་པ་ལྟུང་བ་མེད་པ་ལ། གཞི་མེད་པར་ཕམ་པར་གྱུར་པའི་ཆོས་ཀྱིས་སྐུར་པ་ལས་དེ་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། རྩོད་པ་དེ་ཡང་གཞི་མེད་པ་ཡིན་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་དགེ་འདུན་ལྷག་མའོ། །ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས་ཅི་ནས་ཀྱང་འདི་ཚངས་པར་སྤྱོད་དང་དབྲལ་ལོ་སྙམ་ནས། དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་མ་ཡིན་པ་དང་མཐུན་པ་ཕམ་པར་གྱུར་པའི་ཆོས་ཀྱིས་སྐུར་པ་ལས། དེང་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། རྩོད་པ་དེ་ཡང་གཞན་གྱི་ཆ་མ་ཡིན་པ་དང་མཐུན་པ་ཡིན་ལ། རྩོད་པ་དེ་གཞན་གྱི་ཆ་མ་ཡིན་པ་དང་མཐུན་པས་བག་ཙམ་ལས་བསམ་པ་ཙམ་གྱིས་ཆོས་འགའ་ཞིག་བླངས་པར་གྱུར་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་དགེ་འདུན་ལྷག་མའོ། །ཡང་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་། དབྱེན་བྱེད་པར་འགྱུར་བའི་རྩོད་པ་ཡང་དགེ་བར་བླངས་ནས་རབ་ཏུ་བཟུང་སྟེ་འདུག་ན། དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ་ཁྱོད་དགེ་འདུན་མཐུན་པར་བྱེད་བའི་ཕྱིར་རྟུལ་བར་མ་བྱེད་ཅིང་། དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཅིག །ཚེ་དང་ལྡན་པ་དགེ་འདུན་དང་ལྷན་ཅིག་མཐུན་པར་གྱིས་ཤིག །དགེ་འདུན་མཐུན་མི་བྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་ཡང་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན། གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །དགེ་སློང་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་གཅིག་གམ་གཉིས་སམ་མང་པོ་དག་ཡོད་ཅིང་། གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་རུང་། སྡིག་ཀྱང་རུང་། དགེ་སློང་འདི་ལ་ཅི་ཡང་མ་སྨྲ་ཞིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་ཟེར་ན། དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དེ་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་རུང་། སྡིག་ཀྱང་རུང་། དགེ་སློང་འདི་ལ་ཅི་ཡང་མ་སྨྲ་ཞིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་ལ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པར་སྨྲ་བ། འདུལ་བ་མ་ཡིན་པར་སྨྲ་བ། དགེ་སློང་འདི་ནི་ཆོས་མ་ཡིན་པ་དང་འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་བ། དགེ་སློང་འདི་ནི་མི་ཤེས་བཞིན་སྨྲའི་ཤེས་པར་སྨྲ་བ་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །ཚེ་དང་ལྡན་པ་དག་ཁྱོད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་བྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །དགེ་སློང་དེ་དག་ལ་དགེ་སློང་དེ་རྣམས་ཀྱིས་དེ་སྐད་ཅེས་བསྒོ་བ་ན། གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །དགེ་སློང་རབ་ཏུ་མང་པོ་དག་གྲོང་ངམ་གྲོང་བརྡལ་ཞིག་ན་ཉེ་བར་རྟེན་ཅིང་གནས་པར་གྱུར་ལ། དེ་དག་ཀྱང་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པར་གྱུར་ཅིང་། དེ་དག་གིས་ཁྱིམ་དག་སུན་ཕྱུང་བར་མཐོང་ངམ། ཐོས་སམ། རབ་ཏུ་ཤེས། དེ་དག་སྡིག་པ་ཀུན་ཏུ་སྤྱོད་པ་མཐོང་ངམ། ཐོས་སམ། རབ་ཏུ་ཤེས་ན་དགེ་སློང་དེ་དག་ལ་དགེ་སློང་རྣམས་ཀྱི་འདི་སྐད་ཅེས། ཚེ་དང་ལྡན་པ་དག་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་དག་ཡིན་ཏེ། ཁྱེད་ཀྱིས་ཁྱིམ་དག་སུན་བྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས། ཁྱོད་སྡིག་པ་ཀུན་ཏུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་ཀྱིས། ཚེ་དང་ལྡན་པ་དག་ཁྱོད་འདི་ན་གནས་པས་ཆོག་གིས། གནས་འདི་ནས་དེངས་ཤིག་ཅེས་བསྒོ་བར་བྱའོ། །གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་ཟེར་ན། དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ་དག་ཁྱེད་དེ་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། དགེ་སློང་དེ་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་ཏུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དགེ་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་ཅེས་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟར་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལ ན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟར་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །འདི་ན་དགེ་སློང་འགའ་ཞིག་བཀའ་བློ་མི་བདེ་བའི་རང་བཞིན་ཅན་དུ་གྱུར་ལ། དེ་ལ་དགེ་སློང་རྣམས་ཀྱིས་གདོན་པར་གཏོགས་པ་བསླབས་པའི་གཞི་རྣམས་དང་། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དང་། འདུལ་བ་དང་མཐུན་པར་སྨྲས་པ་ན། ཚེ་དང་ལྡན་པ་དག་ཁྱེད་ཅག་དགེ་ཡང་རུང་། སྡིག་ཀྱང་རུང་། བདག་ལ་ཅི་ཡང་མ་སྨྲ་ཞིག །བདག་ཀྱང་དགེ་ཡང་རུང་། སྡིག་ཀྱང་རུང་། ཚེ་དང་ལྡན་པ་དག་ལ་ཅིའང་མི་སྨྲའོ། །ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཞིག །ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ་ཞེས་བདག་ཉིད་བརྗོད་པར་བྱ་བ་མ་ཡིན་པར་བྱེད་ན། དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པར་བསླབ་པའི་གཞི་རྣམས་དང་། བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དག །འདུལ་བ་དང་མཐུན་པར་སྨྲས་པ་ན། བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར། ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག །དགེ་སློང་རྣམས་ཚེ་དང་ལྡན་པ་ལ་ཆོས་དང་མཐུན་པ་དང་། འདུལ་བ་དང་མཐུན་པར་སྨྲས་པ་ན། ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་མཐུན་པ་དང་། འདུལ་བ་དང་མཐུན་པར་སྨྲོས་ཤིག །དེ་ཅིའི་ཕྱིར་ཞེ་ན། འདི་ལྟ་སྟེ། གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང་། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང་། གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་གྱུར་གྱིས། ཚེ་དང་ལྡན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་འདུན་ལྷག་མའོ། །ཚེ་དང་ལྡན་པ་དག་བདག་གིས་དགེ་འདུན་ལྷག་མའི་ཆོས་བཅུ་གསུམ་པོ་དག་བཏོན་ཟིན་ཏོ། །དེ་དག་ལས་དགུ་ནི་ལྟུང་བ་དང་པོ་དག་ཉིད་ཀྱིས་སོ། །བཞི་ནི་ལན་གསུམ་གྱི་བར་གྱིས་སོ། །དགེ་སློང་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ལ། ཇི་སྲིད་དུ་ཤེས་པ་ཞིན་དུ་འཆབ་པར་བྱེད་པ་དེ་སྲིད་དུ་དེས་མི་འདོད་བཞིན་དུ་སྤོ་བར་བྱའོ། །དགེ་སློང་གིས་མི་འདོད་བཞིན་དུ་སྤོ་བ་བྱས་ནས་དེའི་འོག་ཏུ་ཞག་དྲུག་གི་བར་དུ་དགེ་འདུན་མགུ་བར་བྱ་བ་སྤྱད་པར་བྱའོ། །དགེ་སློང་གིས་མགུ་བར་བྱ་བ་སྤྱད་ནས་དབྱུང་བར་བྱ་བ་ལ་ཐོགས་ཏེ་ཆོས་དང་མཐུན་པར་བྱས་ལ། དགེ་སློང་གིས་དགེ་འདུན་གྱི་སེམས་མགུ་བར་བྱས་ན་གང་ན་དགེ་སློང་ཉི་ཤུའི་ཚོགས་ཀྱི་དགེ་འདུན་ཡོད་པ་དེར་དགེ་སློང་དེ་དབྱུང་བར་བྱའོ། །གལ་ཏེ་དགེ་སློང་ཉི་ཤུར་གཅིག་གིས་མ་ཚང་བའི་ཚོགས་ཀྱི་དགེ་འདུན་གྱིས་དགེ་སློང་དེ་འབྱིན་པར་བྱེད་ན། དགེ་སློང་དེ་ཡང་མ་ཕྱིན་ལ་དགེ་སློང་དེ་དག་ཀྱང་སྨད་པར་བྱ་བ་ཡིན་ཏེ་དེ་ལ་དེ་ནི་ཆོ་ག་ཡིན་ནོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། དབེན་པ་སྐྱབས་ཡོད་འདུག་པའོ། །ཚེ་དང་ལྡན་པ་དག་མ་ངེས་པའི་ཆོས་གཉིས་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འདོད་པ་བྱར་རུང་བར་སྟན་ལ་འདུག་པར་བྱེད་ཅིང་། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གསུམ་པོ་ཕམ་པར་གྱུར་པའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པར་ཁས་བླངས་ན་ཆོས་གསུམ་པོ་ཕམ་པར་གྱུར་བའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་བྱེད་དུ་གཞུག་ཅིང་། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་དེ་བྱེད་དུ་གཞུག་སྟེ། དེ་ནི་མ་ངེས་པའི་ཆོས་སོ། །ཡང་དགེ་སློང་གང་བུད་མེད་ཀྱི་ཡུལ་དང་ལྟན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འདོད་པ་བྱར་མི་རུང་བར་སྟན་ལ་འདུག་པར་བྱེད་ཅིང་། དེ་ལ་གལ་ཏེ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས། ཆོས་གཉིས་པོ་དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་སྨྲས་པར་གྱུར་ལ། དགེ་སློང་གིས་འདུག་པར་ཁས་བླངས་ན་ཆོས་གཉིས་པ་དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་འབྱེད་དུ་གཞུག་ཅིང་། དགེ་སློང་དེ་ལ་དགེ་བསྙེན་མ་ཡིད་ཆེས་པའི་ཚིག་དང་ལྡན་པས་ཆོས་གང་དང་གང་གིས་སྨྲས་པར་གྱུར་པའི་དེ་དང་དེས་དགེ་སློང་དེ་བྱེད་དུ་གཞུག་སྟེ། དེ་ཡང་མ་ངེས་པའི་ཆོས་སོ། །ཚེ་དང་ལྡན་པ་དག་བདག་གིས་མ་ངེས་པའི་ཆོས་གཉིས་པོ་དག་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། འཆང་བ་འབྲལ་བ་འཇོག་པ་དང་། །འཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཚེ་དང་ལྡན་པ་དག་སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །དགེ་སློང་ཆོས་གོས་ཟིན་བས་སྲ་བརྐྱང་ཕྱུང་ན། ཞག་བཅུའི་བར་དུ་གོས་ལྷག་པ་རྣམ་པར་མ་བརྟགས་པ་བཅང་བར་བྱའོ། །དེ་ལས་འདས་པར་བཅངས་ན་སྤང་བའི་ལྟུང་བྱེད་དོ། །དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན། གལ་ཏེ་ནུབ་གཅིག་ཀྱང་ཆོས་གོས་གསུམ་ལས་ཆོས་གོས་གང་ཡང་རུང་བ་དང་། མཚམས་ཀྱི་ཕྱི་རོལ་དུ་འབྲལ་བར་བྱེད་ན། དགེ་འདུན་གྱི་གནང་བ་མ་གཏོགས་ཏེ་སྤང་བའི་ལྟུང་བྱེད་དོ། །དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན། དུས་མ་ཡིན་པའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གལ་ཏེ་ལངས་ན་མྱུར་བ་ཁོ་ནར་གོས་སུ་བྱས་ལ་བཅང་བར་བྱའོ། །གལ་ཏེ་མི་ལངས་ལ་ཁམས་ལངས་པ་ཁ་སྐོང་བའི་གོས་ལ་རེ་བ་ཡོད་ན་དགེ་སློང་དེས་གོས་དེ་ཟླ་བ་གཅིག་གི་མཐར་བཞག་པར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དོ། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཇུག་གམ། འཚེད་དུ་འཇུག་གམ། འཆག་ཏུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན། བརྗེས་པ་མ་གཏོགས་ཏེ་སྤང་བའི་ལྟུང་བྱེད་དོ། །ཡང་དགེ་སློང་གང་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ། གོས་སློང་ན་དུས་མ་གཏོགས་ཏེ་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ། །དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ། གོས་བསླང་བར་བྱའོ། །དེ་ལ་གལ་ཏེ་བྲམ་ཟེའམ། ཁྱིམ་བདག་དད་པ་ཅན་ཞིག་གིས་དུས་ཀྱིས་གོས་མང་པོ་དག་སྟོབས་ལ་འདོད་ན་དགེ་སློང་དེས་དེ་ལས་གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པར་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་དག་སྤགས་ནས་བདག་གིས་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཞིག་ཉོས་ལ། དགེ་སློང་མིང་འདི་ཞེས་བྱ་བ་འོངས་ན། དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ལ་གལ་ཏེ་དགེ་སློང་དེ་ལ་སྔར་མ་བསྟབས་བར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་དེའི་གན་དུ་སོང་ནས་འདི་སྐད་ཅེས། ཚེ་དང་ལྡན་པས་བདག་གི་ཕྱིར་གོས་ཀྱི་རིན་གང་དག་སྤགས་པའི་གོས་ཀྱི་རིན་དེ་དག་གིས་ཚེ་དང་ལྡན་པ་གོས་འདི་དང་འདི་ལྟ་བུ་ཞིག་ཉོས་ལ། བདག་ལ་གོས་རུང་བ་དུས་སུ་ལེགས་པར་སྐོན་ཅིག་ཅེས་སྨྲས་ཏེ། གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཁྱིམ་བདག་དང་ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་སོ་སོ་བ་དེ་དག་སྤགས་ནས། བདག་ཅག་གཉིས་ཀྱིས་གོས་ཀྱི་རིན་སོ་སོ་བ་འདི་དག་གིས་གོས་འདི་དང་འདི་ལྟ་བུ་སོ་སོ་བ་དག་ཉོས་ལ། དགེ་སློང་མིང་འདི་ཞེས་བྱ་བ་འོངས་པ་དང་། བདག་ཅག་གཉིས་ཀྱི་སོ་སོ་ནས་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས་དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་དང་། ཁྱིམ་བདག་གི་ཆུང་མ་ཉེ་དུ་མ་ཡིན་པ་དེ་དག་གི་གན་དུ་སོང་ནས་འདི་སྐད་ཅེས། ཚེ་དང་ལྡན་པ་དག་གིས་བདག་གི་ཕྱིར་གོས་ཀྱི་རིན་སོ་སོ་བ་གང་དག་སྤགས་པའི་གོས་ཀྱི་རིན་དེ་དག་གིས་ཚེ་དང་ལྡན་པ་དག་གོས་འདི་དག་འདི་ལྟ་བུ་སོ་སོ་བ་དག་ཉོས་ལ་གཉི་ག་འདུས་ཏེ། བདག་ལ་གོས་རུང་བ་ཅིག་དུས་སུ་ལེགས་པར་སྐོན་ཅིག་ཅེས་སྨྲས་ཏེ། གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་རྒྱལ་པོའམ་བློན་པོ་ཆེན་པོའམ། བྲམ་ཟེའམ། ཁྱིམ་བདག་གམ། གྲོང་བརྡལ་གྱི་མི་འམ། ཡུལ་མིའམ། ནོར་ཅན་ནམ། ཚོང་དཔོན་ནམ། དེད་དཔོན་གྱིས་ཕོ་ཉའི་ལག་ཏུ་གོས་ཀྱིརིན་དག་བསྐུར་བར་གྱུར་ལ། དེ་ནས་ཕོ་ཉ་དེ་གོས་ཀྱི་རིན་དེ་དག་ཁྱེར་ནས་དགེ་སློང་དེའི་ག་ལ་བ་དེར་སོང་སྟེ་ཕྱིན་ནས་དགེ་སློང་དེ་ལ་འདི་སྐད་ཅེས་འཕགས་པ་མཁྱེན་པར་མཛོད་ཅིག །ཁྱོད་ལ་རྒྱལ་པོའམ། བློན་པོ་ཆེན་པོའམ། བྲམ་ཟེའམ། ཁྱིམ་བདག་གམ། གྲོང་བརྡལ་གྱི་མིའམ། ཡུལ་མིའམ། ནོར་ཅན་ནམ། ཚོང་དཔོན་ནམ། དེད་དཔོན་ཆེ་གེ་མོས་གོས་ཀྱི་རིན་འདི་དག་བསྐུར་གྱིས། འཕགས་པས་ཐུགས་བརྩེ་བའི་སླད་དུ་འདི་དག་བཞེས་ཤིག་ཅེས་ཟེར་ན་དགེ་སློང་དེས་ཕོ་ཉ་དེ་ལ་འདི་སྐད་ཅེས། ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ། བདག་ཅག་གོས་རུང་བ་དུས་སུ་རྙེད་ན་ནི་ལེན་ཏོ་ཞེས་བརྗོད་པར་བྱའོ། །གལ་ཏེ་ཕོ་ཉ་དེས་དགེ་སློང་དེ་ལ་འདི་སྐད་ཅེས། འཕགས་པ་རྣམས་ཀྱི་ཞལ་ཏ་བགྱིད་པ་འཕགས་པ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ་འགའ་མཆིས་སམ་ཞེས་ཟེར་ན། དགེ་སློང་གོས་འདོད་པས་ཕོ་ཉ་ལ་འདི་སྐད་ཅེས། ཚེ་དང་ལྡན་པ་ཕོ་ཉ་འདི་ནི་དགེ་སློང་རྣམས་ཀྱི་ཞལ་ཏ་བྱེད་པ་སྟེ། འདི་ནི་དགེ་སློང་རྣམས་ཀྱི་ཞལ་ཏ་ཉམས་སུ་ལེན་པའོ་ཞེས་ཀུན་དགའི་ར་བ་པའམ། དགེ་བསྙེན་ཞལ་ཏ་བྱེད་པ་བསྟན་པར་བྱའོ། །དེ་ནས་ཕོ་ཉ་དེས་གོས་ཀྱི་རིན་དེ་དག་ཁྱེར་ནས་ཞལ་ཏ་བྱེད་པ་ག་ལ་བ་དེར་འགྲོ་བར་བྱ་ཞིང་། ཕྱིན་ནས་ཞལ་ཏ་བྱེད་པ་དེ་ལ་འདི་སྐད་ཅེས། ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག ཁྱོད་ཀྱིས་གོས་ཀྱི་རིན་དེ་དག་གིས་གོས་འདི་དང་འདི་ལྟ་བུ་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་པ་དང་། དེ་ལ་གོས་རུང་བ་དུས་སུ་སྐོན་ཅིག་ཅེས་བརྗོད་པར་བྱའོ། །དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ་ཞིང་། ཡང་དག་པར་བསྟན་ནས། དགེ་སློང་དེས་ག་ལ་བ་དེར་འགྲོ་བར་བྱ་ཞིང་ཕྱིན་ནས་དགེ་སློང་དེ་ལ་འདི་སྐད་ཅེས། འཕགས་པ་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་ལགས་ཀྱིས་དེའི་གན་དུ་བཞུད་ཅིག་དང་། དེས་ཁྱོད་ལ་གོས་རུང་བ་དུས་སུ་སྐོན་པར་འགྱུར་རོ་ཞེས་བརྗོད་པར་བྱའོ། །དགེ་སློང་གོས་འདོད་པས་ཞལ་ཏ་བྱེད་པའི་གན་དུ་སོང་ལ་ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ། །ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ། དྲན་བར་བྱའོ། །ལན་གཉིས་ལན་གསུམ་དུ་བསྐུལ་ཞིང་དྲན་པར་བྱས་པ་ན་གལ་ཏེ་གོས་དེ་གྲུབ་ན་དེ་ལྟ་ན་ལེགས། གལ་ཏེ་མ་གྲུབ་ན་ལན་བཞི་ལན་ལྔ་ལན་དྲུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ལན་བཞི་ལན་ལྔ་ལན་དྲུག་བར་དུ་ཕྱོགས་སུ་ཅང་མི་སྨྲ་བར་བསྡད་པ་ན། གལ་ཏེ་གོས་དེ་གྲུབ་ན་དེ་ལྟ་ན་ལེགས། གལ་ཏེ་མ་གྲུབ་ན་དེའི་འོག་ཏུ་གོས་བསྒྲུབ་པའི་ཕྱིར་བཙལ་ཏེ་གོས་གྲུབ་ན་སྤང་བའི་ལྟུང་བྱེད་དོ། །གལ་ཏེ་མ་གྲུབ་ན་ཕྱོགས་གང་ནས་གོས་ཀྱི་རིན་དེ་དག་འོངས་པ་དེར་བདག་འགྲོ་བར་བྱའོ། །ཡང་ན་ཡིད་བརྟན་པའི་ཕོ་ཉ་ལས་ཚེ་དང་ལྡན་པ་དག་གིས་དགེ་སློང་ཆེ་གེ་མོའི་ཕྱིར་གོས་ཀྱི་རིན་གང་དག་བསྐུར་བ་དེ་དག་ནི་དགེ་སློང་དེའི་ཕྱིར་ཡང་མ་གྲུབ་ཀྱིས་ཤེས་པར་གྱིས་ཤིག །ཚེ་དང་ལྡན་པ་དག་གིས་རང་གི་ནོར་ཆུད་མ་གསན་ཅིག་ཅེས་སྤྲིང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །སྡོམ་ལ། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་དང་། །མངོན་མཚན་ཅན་དང་ཉོ་ཚོང་ངོ་། །ཡང་དགེ་སློང་གང་སྲིན་བལ་གྱི་སྟན་གསར་པ་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ལུག་བལ་ནག་པོ་འབའ་ཞིག་གི་སྟན་གསར་པ་བྱེད་ན་སྤང་བའི་ལྟུང་བྱེད་དོ། །དགེ་སློང་གིས་སྟན་གསར་པ་བྱེད་ན་ཆ་གཉིས་ནི་ལུག་བལ་ནག་པོ་འབའ་ཞིག་ལས་གཞུག་པར་བྱ། གསུམ་པ་ནི་དཀར་པོ་ལས། བཞི་པ་ནི་འཁོབ་བལ་ལས་གཞུག་པར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཞིག་ལས་མ་བཅུག་གམ། གསུམ་པ་དཀར་པོ་ལས། བཞི་པ་ནི་འཁོབ་བལ་ལས་མ་བཅུག་པར་སྟན་གསར་པ་བྱེད་ན་སྤང་བའི་ལྟུང་བྱེད་དོ། །དགེ་སློང་གིས་སྟན་གསར་པ་བྱེད་ན་མི་འདོད་བཞིན་དུ་ལོ་དྲུག་ཏུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་སྤངས་ཀྱང་རུང་། མ་སྤངས་ཀྱང་རུང་། སྟན་གསར་པ་གཞན་བྱེད་ན་དགེ་འདུན་གྱིས་གནང་བ་མ་གཏོགས་ཏེ་སྤང་བའི་ལྟུང་བྱེད་དོ། །དགེ་སློང་གིས་གདིང་བ་གསར་པ་བྱེད་ན་གསར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་གླན་པར་བྱའོ། གལ་ཏེ་དགེ་སློང་གིས་གདིང་བ་གསར་པ་ཁ་དོག་མི་སྡུག་པར་བྱ་བའི་ཕྱིར། གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་མ་གླན་པར་གདིང་བ་གསར་བ་སྤྱོད་ན་སྤང་བའི་ལྟུང་བྱེད་དོ། །དགེ་སློང་ལམ་དུ་ཞུགས་པས་ལུག་བལ་དག་རྙེད་ལ་འདོད་ན་དགེ་སློང་དེས་བླང་བར་བྱའོ། །བླངས་ནས་ཁྱེར་བ་མེད་ན་དཔག་ཚད་གསུམ་གྱི་མཐའ་བར་དུ་བདག་ཉིད་ཀྱིས་བསྐུར་བར་བྱའོ། །དེ་ལས་འདས་པར་ཁྱེར་ན་སྤང་བའི་ལྟུང་བྱེད་དོ། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་ལུག་བལ་འཁྲུར་འཇུག་གམ། འཚེད་དུ་འཇུག་གམ། རྨེལ་དུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་གང་རང་གི་ལག་གིས་གསེར་དང་། དངུལ་ལེན་ཏམ། ལེན་དུ་འཇུག་ན་སྤང་བའི་ལྟུང་བྱེད་དོ། །ཡང་དགེ་སློང་གང་མངོན་མཚན་ཅན་གྱི་སྤྱོད་པ་རྣམས་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཉོ་ཚོང་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །སྡོམ་ལ། ལྷུང་བཟེད་གཉིས་དང་ཐ་ག་གཉིས། །བྱིན་ཕྲོགས་སྟོན་ཟླ་ཐ་ཆུང་དང་། །དགོན་པ་བ་དང་རས་ཆེན་དང་། །བསྔོས་པ་དང་ནི་གསོག་འཇོག་གོ། །ཡང་དགེ་སློང་གིས་ལྷུང་བཟེད་ལྷག་པ་ཞག་བཅུར་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ། །ཡང་དགེ་སློང་གང་ལྷུང་བཟེད་ལྷན་པ་ལྔ་མེད་པ་སྤྱད་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་གསར་པ་གཟན་ཚོལ་ཞིང་ལྷུང་བཟེད་གྲུབ་ན་སྤང་བའི་ལྟུང་བྱེད་དོ། །དགེ་སློང་དེས་ལྷུང་བཟེད་དེ་དགེ་སློང་གི་འཁོར་ལ་དབུལ་བར་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། བཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁ་དཀྱིལ་དལ་བུས་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་རང་གི་ལག་གིས་བསླངས་པའི་དོག་པ་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་འཇུག་ན་གོས་གྲུབ་ན་སྤང་བའི་ལྟུང་བྱེད་དོ། །དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་ཐ་ག་པ་ཉེ་དུ་མ་ཡིན་པ་ལ་གོས་འཐག་ཏུ་བཅུག་པ་ལས། དེ་ལ་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་ནས་ཐ་ག་པ་ཉེ་དུ་མ་ཡིན་པའི་གན་དུ་སོང་སྟེ་འདི་སྐད་ཅེས། ཚེ་དང་ལྡན་པ་ཐ་ག་པ་ཤེས་པར་གྱིས་ཤིག །གོས་འདི་ནི་ཁོ་བོའི་ཕྱིར་འཐག་གིས། ཚེ་དང་ལྡན་པ་ཐ་ག་པ་གོས་འདི་ཞིང་ཆེ་བ་དང་། ཁྲུན་རིང་བ་དང་། ཐར་གྱིས་ཞག་པ་དང་། ཐག་རན་བཟང་བར་ལེགས་པར་གྱིས་ཤིག །ཚེ་དང་ལྡན་པ་ཐ་ག་པ་འདི་ལྟར་ཁོ་བོས་གླ་རྔན་འདི་ལྟ་སྟེ། བཟའ་བའམ། བཅའ་བ་ཙམ་མམ། བཟའ་རྒྱུ་ཅུང་ཟད་ཅིག་སྦྱིན་ནོ་ཞེས་སྨྲས་ནས། དེ་ལ་གལ་ཏེ་དགེ་སློང་དེས་གོས་བསྒྲུབ་པའི་ཕྱིར་གླ་རྔན་འདི་ལྟ་སྟེ། བཟའ་བའམ། བཅའ་བ་ཙམ་མམ། བཟའ་རྒྱུ་ཅུང་ཟད་ཅིག་སྦྱིན་ཞིང་གོས་གྲུབ་ན་སྤང་བའི་ལྟུང་བྱེད་དོ། །ཡང་དགེ་སློང་གང་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་འཕྲོག་གམ། འཕྲོག་ཏུ་འཇུག་ཅིང་དེ་ལ་འདི་སྐད་ཅེས། དགེ་སློང་ཁྱོད་ལ་གོས་མི་སྦྱིན་གྱིས། ཕྱིར་ཕྱིན་ཅིག་ཅེས་ཟེར་ན་དགེ་སློང་དེས་ལྷག་མ་ཡོད་པ་ཕྱིར་སྦྱིན་པར་བྱ་ཞིང་བཏང་ན་སྤང་བའི་ལྟུང་བྱེད་དོ། །དགེ་སློང་གིས་སྟོན་ཟླ་ཐ་ཆུང་ཉར་ཞག་བཅུས་མ་ཚང་བ་ཚུན་ཆད་དུ་བརྟད་པ་ལས་བྱུང་བའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ། །དེ་ལས་འདས་པར་བཅང་ན་སྤང་བའི་ལྟུང་བྱེད་དོ། །དགེ་སློང་རབ་ཏུ་མང་པོ་དག་གནས་མལ་དགོན་པ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་དབྱར་ཕྱི་མར་གྱུར་ལ། དགེ་སློང་དགོན་པས་འདོད་ན་ཆོས་གོས་གསུམ་ལས། ཆོས་གོས་གང་ཡང་རུང་བ་ཁྱིམ་གཞན་དུ་བཞག་པར་བྱའོ། །དགེ་སློང་དགོན་པ་ལ་མཚམས་ཀྱི་ཕྱི་རོལ་དུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ན་དགེ་སློང་དགོན་པ་བ་དེས་ཞག་དྲུག་གི་བར་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་དུ་འབྲལ་བར་བྱའོ། །དེ་ལས་འདས་པར་འབྲལ་ན་སྤང་བའི་ལྟུང་བྱེད་དོ། །དགེ་སློང་རྣམས་ཀྱིས་སོ་ག་རྣམས་ཀྱི་ཟླ་བ་གཅིག་ལུས་པ་ན་དབྱར་གྱི་གོས་རས་ཆེན་བཙལ་བར་བྱའོ། །དབྱར་ཟད་ནས་འོག་ཏུ་ཟླ་བ་ཕྱེད་ཀྱི་བར་དུ་བཅང་བར་བྱའོ། །གལ་ཏེ་དགེ་སློང་གིས་སོ་ག་རྣམས་ཀྱི་ཟླ་བ་གཅིག་ལུས་པའི་སྔོན་རོལ་དུ་དབྱར་གྱི་གོས་རས་ཆེན་ཚོལ་བར་བྱེད་དམ། དབྱར་ཟད་ནས་འོག་ཏུ་ཟླ་ཕྱེད་ལས་ལྷག་པར་འཆང་ན་སྤང་བའི་ལྟུང་བྱེད་དོ། །ཡང་དགེ་སློང་གང་དགེ་འདུན་ལ་བསྡོས་པའི་རྙེད་པ་ཤེས་བཞིན་དུ་གང་ཟག་བདག་ལ་སྒྱུར་དུ་འཇུག་ན་སྤང་བའི་ལྟུང་བྱེད་དོ། །བཅོམ་ལྡན་འདས་ཀྱིས་དགེ་སློང་ན་བ་རྣམས་ལ་ཕན་པ་སོ་སོར་བསྟེན་པར་བྱ་བའི་སྨན་གང་དག་བཀའ་སྩལ་པ་འདི་ལྟ་སྟེ། ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་དེ་དག་ལས་དགེ་སློང་ན་བས་འདོད་ན་རང་གིས་ཞག་བདུན་བར་བྱིན་གྱིས་བརླབས་ཏེ། གསོག་འཇོག་གིས་ཡོངས་སུ་ལོངས་སྤྱོད་པས་ཡོངས་སུ་ལོངས་སྤྱད་པར་བྱའོ། །དེ་ལས་འདས་པར་ཡོངས་སུ་ལོངས་སྤྱོད་པར་བྱེད་ན་སྤང་བའི་ལྟུང་བྱེད་དོ། །ཚེ་དང་ལྡན་པ་དག་བདག་གིས་སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་དག་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །བམ་པོ་གཉིས་པ་སྟེ་ཐ་མའོ། །སྤྱི་སྡོམ་ལ། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་ཡང་དང་། །ཆུ་དང་ཁྱིམ་དང་བསམ་བཞིན་དང་། །འགྲོ་མང་རྐུན་མ་མཆོད་སྟོན་ནོ། །སྡོམ་ལ། བརྫུན་སྐྱོན་དགེ་སློང་ཕྲ་མ་དང་། །སྐྱོ་སྔོགས་བྱེད་དང་སྟོན་པ་དང་། །འདོད་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཚེ་དང་ལྡན་པ་དག་ལྟུང་བྱེད་ཀྱི་ཆོས་དགུ་བཅུ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །ཤེས་བཞིན་དུ་རྫུན་སྨྲ་ན་ལྟུང་བྱེད་དོ། །མིའི་སྐྱོན་ནས་སྨྲ་ན་ལྟུང་བྱེད་དོ། །དགེ་སློང་ལ་ཕྲ་མ་བྱེད་ན་ལྟུང་བྱེད་དོ། །ཡང་དགེ་སློང་གང་དགེ་འདུན་མཐུན་པས་ཆོས་བཞིན་དུ་རྩོད་པ་སྦྱངས་བར་ཤེས་བཞིན་དུ་ཡང་ལས་ཀྱིས་སྐྱོ་སྔོགས་བྱེད་ན་ལྟུང་བྱེད་དོ། །ཡང་དགེ་སློང་གང་བུད་མེད་ཀྱི་ཡུལ་ལ་ཚིག་ལྔའམ་དྲུག་ལས་ལྷག་པར་ཆོས་སྟོན་ན་རིག་པའི་སྐྱེས་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་གང་ཟག་བསྙེན་པར་མ་རྫོགས་པ་དང་ཚིག་གིས་ཆོས་འདོད་ན་ལྟུང་བྱེད་དོ། །ཡང་དགེ་སློང་གང་གང་ཟག་བསྙེན་པར་མ་རྫོགས་པ་ལ་གནས་ངན་ལེན་གྱི་ལྟུང་བ་བརྗོད་ན་དགེ་འདུན་གྱིས་གནང་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་གང་ཟག་བསྙེན་པར་མ་རྫོགས་པ་ལ་མིའི་ཆོས་བླ་མ་བདེན་པ་སྨྲ་ན་ལྟུང་བྱེད་དོ། །ཡང་དགེ་སློང་གང་སྔར་ལེགས་པར་རུང་བར་བྱས་ནས་དེའི་འོག་ཏུ་འདི་སྐད་ཅེས། ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ། དགེ་འདུན་གྱི་རྙེད་པར་བསྔོས་པ་བདག་གི་གང་ཟག་ལ་བསྔོས་སོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས། ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང་། ཡིད་ལ་གཅགས་པ་དང་། གནོད་པར་འགྱུར་བ་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་བཏོན་པ་དག་གིས་ཅི་ཞིག་བྱ་ཞེས་ཟེར་ཞིང་བསླབ་པ་ཁྱད་དུ་གསོད་ན་ལྟུང་བྱེད་དོ། །སྡོམ་ལ། ས་བོན་འཕྱ་བ་བསྒོ་བ་དང་། །ཁྲི་དང་གདིང་དང་སྐྲོད་པ་དང་། །ཕྱིས་གནོན་འབྱུང་བ་འདེབས་པ་དང་། །རིམ་པ་གཉིས་སུ་རྩིག་པའོ། །ས་བོན་གྱི་ཚིགས་དང་འབྱུང་པོའི་གནས་འཇིགས་གམ་འཇིག་ཏུ་འཇུག་ན་ལྟུང་བྱེད་དོ། །འཕྱ་འམ་གཞོགས་ཕྱས་བྱེད་ན་ལྟུང་བྱེད་དོ། །བསྒོ་བ་རྣ་ལ་གཟོན་ན་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་ཁྲིའམ། ཁྲིའུའམ། སྟན་ནང་ཚངས་ཅན་ནམ། ལཱ་བའམ། སྔས་སམ། གོར་བུ་བླ་གབ་མེད་པར་བཏིང་ངམ། འདིང་དུ་བཅུག་ནས་མ་བསྡུས་སམ། སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་དེ་ནས་སོང་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་གཙུག་ལག་ཁང་དུ་རྩྭའི་གདིང་བའམ། ལོ་མའི་གདིང་བ་བཏིང་ངམ། འདིང་དུ་བཅུག་ནས་མ་བསྡུས་སམ། སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་དེ་ནས་སོང་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཁྲིས་འཁྲུགས་རྔམ་པར་གྱུར་ཏེ་ཡི་མ་རངས་ནས་དགེ་འདུན་གྱི་གཙུག་ལག་ཁང་ནས་དགེ་སློང་སྐྲོད་དམ། སྐྲོད་དུ་འཇུག་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོར་པར་ཤེས་བཞིན་དུ་ཕྱིས་འོངས་ནས་སུ་ལ་གནོད་པ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་ཏེ། ཕྱིས་གནོན་བྱས་ཏེ་སྟན་ལ་ཉལ་ལམ་འདུག་ན་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བར་ཁྲིའམ། ཁྲིའུ་རྩ་བ་འབྱུང་བར་ཤེས་བཞིན་དུ་ལྕིད་ཀྱིས་ཕབ་སྟེ་ཉལ་ལམ་འདུག་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩྭའམ། ལྕི་བའམ། ས་ལ་འདེབས་སམ། འདེབས་སུ་འཇུག་ན་ལྟུང་བྱེད་དོ། །ཡང་དགེ་སློང་གིས་གཙུག་ལག་ཁང་ཆེན་པོ་ཞིག་རྩིག་དུ་འཇུག་ན་སྒོའི་སྦུབས་དང་། གཏན་པ་དང་། སྣང་བའི་གནས་ཇི་ཙམ་པའི་འདུ་ཤེས་ཀྱིས་ས་བརྟགས་པ་ནས་བཟུང་སྟེ། ཕ་གུའི་རིམ་པ་འཇིག་པ་དང་བཅས་པ་གཉིས་སམ་སུམ་བརྩིག་པར་བྱའོ། །དེ་ལས་ལྷག་པར་རྩིག་ན་ལྟུང་བྱེད་དོ། །སྡོམ་ལ། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་ཆོས་སྟོན་ལ། ཆོས་འདི་ལྟ་བུ་དང་ལྡན་པ་མ་གཏོགས་ཏེ་ལྟུང་བྱེད་དོ། །དགེ་སློང་གང་དགེ་འདུན་གྱིས་བསྐོས་ཀྱང་ཉི་མ་ནུབ་ཀྱི་བར་དུ་དགེ་སློང་མ་ལ་ཆོས་སྟོན་ན་ལྟུང་བྱེད་དོ། །ཡང་དགེ་སློང་གང་དགེ་སློང་རྣམས་ལ་འདི་སྐད་ཅེས། དགེ་སློང་དག་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་གོས་བྱིན་ན་ལྷུང་བྱེད་དོ། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པའི་གོས་བྱེད་ན་ལྟུང་བྱེད་དོ། །ཡང་དགེ་སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོ་ན་ལམ་དུ་འཇུག་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ལམ་དོན་མཐུན་གྱིས་བགྲོད་པར་བྱ་བ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིག གྱེན་དུ་འགྲོ་བའམ། ཐུར་དུ་འགྲོ་ན་ཐད་ཀར་ཕ་རོལ་དུ་འགྲོ་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ལྟུང་བྱེད་དོ། །ཡང་དགེ་སློང་གང་དགེ་སློང་མ་དང་ལྷན་ཅིག་གཅིག་བུ་གཅིག་དང་དབེན་པ་སྐྱབས་ཡོན་པ་ན་འགྲེང་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་སྔར་ཁྱིམ་དུ་བོས་པ་མ་གཏོགས་ཏེ་ལྟུང་བྱེད་དོ། །སྡོམ་ལ། ཡང་ཡང་དང་ནི་འདུག་གནས་གཅིག །ཕྱེད་དང་བཅའ་དང་སྟོབས་པ་དང་། །འདུས་དང་དུས་མིན་གསོག་འཇོག་དང་། །ཁ་ནས་མིད་དང་བསོད་པ་ཉིད། །ཡང་ཡང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་དུས་སོ། །གོས་སྦྱིན་པའི་ཚེ་དུས་ཏེ། དེ་ལ་དེ་ནི་དུས་ཡིན་ནོ། །འདུག་གནས་གཅིག་ཏུ་ཞག་ལོན་པའི་དགེ་སློང་མིན་པས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པར་བཟའ་ན་ལྟུང་བྱེད་དོ། །དགེ་སློང་རབ་ཏུ་མང་པོ་དག་ཁྱིམ་རྣམས་སུ་དོང་བ་ལས། གལ་ཏེ་དེ་དག་ལ་བྲམ་ཟེ་དང་། ཁྱིམ་བདག་དད་པ་ཅན་བདག་གིས་ཕྱེ་དང་ཁུར་བ་དང་དུས་ཀྱིས་སྟོབས་པར་གྱུར་ལ། འདོད་ན་དགེ་སློང་དེ་དག་གིས་ལྷུང་བཟེད་གང་བ་གཉིས་སམ་གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་གང་བ་གཉིས་སམ་གསུམ་བླངས་ནས་ཕྱི་རོལ་ཀུན་དགའ་ར་བར་སོང་ལ། དགེ་སློང་འཁོད་པ་རྣམས་ལ་ཡང་བགོ་བཤའ་བྱ། བདག་ཅག་ཀྱང་བཟའ་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཟས་ཟོས་ཟིན་ཅིང་སྤངས་པ་ལས་ལྷག་པོར་མ་བྱས་པར་བཅའ་བའམ་བཟའ་བ་འཆའ་འམ་ཟ་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་དགེ་སློང་ཟས་ཟོས་ཟིན་ཅིང་སྤངས་པ་ལ་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ཉིས་བ་འབྱུང་བར་བྱའོ་སྙམ་པ་དེ་ཉིད་རྐྱེན་དུ་བྱས་ནས། ཚེ་དང་ལྡན་པ་འདི་འཆོ་ཞིག་འདི་ཟོ་ཞིག་ཅེས་ལྷག་པོར་མ་བྱས་པའི་བཅའ་བ་དང་བཟའ་བ་དུས་ཀྱི་སྟོབས་ན་ལྟུང་བྱེད་དོ། །འདུས་ཤིང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་དུས་སོ། །གྲུར་ཞུགས་པ་དང་། འདུས་པ་ཆེན་པོ་དང་། དགེ་སྦྱོང་གི་ཟས་དུས་ཏེ་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་དུས་མ་ཡིན་པར་བཅའ་བའམ། བཟའ་བ་འཆའ་བའམ་ཟ་ན་ལྟུང་བྱེད་དོ། །ཡང་དགེ་སློང་གང་བཅའ་བ་དང་བཟའ་བ་གསོག་འཇོག་བྱས་པ་འཆའ་འམ་ཟ་ན་ལྟུང་བྱེད་དོ། །ཡང་དགེ་སློང་གང་མ་བྱིན་པར་ཁ་ནས་མིད་པའི་ཟས་ཟ་ན་ཆུ་དང་སོ་ཤིང་མ་གཏོགས་ཏེ་ལྟུང་བྱེད་དོ། །བཅོམ་ལྡན་འདས་ཀྱིས་དགེ་སློང་རྣམས་ཀྱི་ཟས་བསོད་པ་གང་དག་གསུངས་པ་འདི་ལྟ་སྟེ། འོ་མ་དང་། ཞོ་དང་། མར་དང་། ཉ་ཤ་དང་། ཤ་དང་། ཤ་སྐམ་དག་སྟེ། དགེ་སློང་མིན་པ་བདག་ཉིད་ཀྱི་ཕྱིར་ཟས་བསོད་པ་དེ་ལྟ་བུ་དག་གཞན་གྱི་ཁྱིམ་དག་ནས་བསླངས་ཏེ་འཆའ་འམ་ཟ་ན་ལྟུང་བྱེད་དོ། །སྡོམ་ལ། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་བཤམ་དཀྲུགས་འགྲོ་བ་དང་། །རྡེག་དང་གཟའ་དང་གནས་ངན་ལེན། །ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ། སྟན་ལ་འདུག་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས་ཡོད་པར་འགྲེང་ན་ལྟུང་བྱེད་དོ། །ཡང་དགེ་སློང་གང་གཅེར་བུ་པའམ། གཅེར་བུ་མ་ཀུན་ཏུ་རྒྱུ་བའམ། ཀུན་ཏུ་རྒྱུ་མོ་ལ་རང་གི་ལག་ནས་བཅའ་བའམ་བཟའ་བ་བྱེད་ན་ལྟུང་བྱེད་དོ། །ཡང་དགེ་སློང་གང་དམག་ཆས་པ་ལ་ལྟར་འགྲོ་ན་ལྟུང་བྱེད་དོ། །ཡང་དགེ་སློང་གང་དམག་ཆས་པར་ལྟར་འགྲོ་བ་དེ་ལྟ་བུའི་རྐྱེན་ཞིག་བྱུང་ན། དགེ་སློང་དེས་དམག་དེའི་ནང་དུ་ཞག་གཉིས་ཚུན་ཆད་གནས་པར་བྱའོ། །དེ་ལས་ལྷག་པར་གནས་ན་ལྟུང་བྱེད་དོ། །དགེ་སློང་ཞག་གཉིས་དམག་དེའི་ནང་ན་གནས་པའི་ཚེ་ན་ཡང་གལ་ཏེ་བཤམས་པ་དཀྲུག་ཏུ་འགྲོའམ། རྒྱལ་མཚན་གྱི་མཆོག་གམ། དཔུང་གི་མཆོག་གམ། གཡུལ་བཤམས་པའི་དམག་ལ་ལྟ་བ་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་དགེ་སློང་གང་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་དགེ་སློང་ལ་རྡེག་ན་ལྟུང་བྱེད་དོ། །ཡང་དགེ་སློང་གང་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་དགེ་སློང་ལ་བརྡེགས་པར་གཟས་ན་ཐ་ན་ཐལ་མོས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་དགེ་སློང་གི་གནས་ངན་ལེན་གྱི་ལྟུང་བ་འཆབ་ན་ལྟུང་བྱེད་དོ། །སྡོམ་ལ། བདེ་དང་མེད་དང་འདུན་པ་དང་། །བསྙེན་པར་མ་རྫོགས་ཆོས་དང་སྨྲ། །དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཡང་དགེ་སློང་གང་ཀླན་ཀ་ཚོལ་ཞིང་ཅི་ནས་ཀྱང་དགེ་སློང་འདི་ལ་ཀླན་ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་ཏེ། དགེ་སློང་ལ་འདི་སྐད་ཅེས། ཚེ་དང་ལྡན་པ་ཚུར་ཤོག །ཁྱིམ་དག་ཏུ་འདོད་དང་དེར་ཁྱོད་ལ་བཅའ་བ་དང་། བཟའ་བ་བསོད་པ་ཅི་ཙམ་འདོད་པ་སྦྱིན་དུ་གཞུག་གོ་ཞེས་སྨྲས་ནས་དེས་དེ་ལ་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས། ཚེ་དང་ལྡན་པ་ཁོ་བོ་ལ་ཁྱོད་དང་ལྷན་ཅིག་སྨྲ་བའམ། འདུག་པ་བདེ་བ་མ་ཡིན་གྱི། འདི་ལྟར་ཁོ་བོ་གཅིག་པུ་ཁོ་ན་སྨྲའམ། འདུག་ན་བདེས་ཁྱོད་ཉིད་སོངས་ཤིག་ཅེས་ཟེར་ན་ལྟུང་བྱེད་དོ། །ཡང་དགེ་སློང་གང་མི་ན་བར་བདག་ཉིད་ཀྱི་ཕྱིར་མེ་ལ་རེག་གམ། རེག་ཏུ་འཇུག་ན་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་བྱ་བ་ཆོས་དང་ལྡན་པ་ལ་དགེ་སློང་ལ་འདུན་པ་ཕུལ་ནས་དེའི་འོག་ཏུ་ཁྲོས་འཁྲུགས་རྔམ་པར་གྱུར་ཏེ། ཡི་མ་རངས་ནས་སློང་བའི་ཆོས་སུ་བྱེད་ཅིང་འདི་སྐད་ཅེས། དགེ་སློང་འདུན་པ་ཕྱིར་བྱིན་ཅིག །ཁྱོད་ལ་མི་སྦྱིན་ནོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་གང་ཟག་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་ན་ལྟུང་བྱེད་དོ། །ཡང་དགེ་སློང་གང་འདི་སྐད་ཅེས། འདི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་ན། དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ་ཁྱོད་འདི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱི་ཆོས་བསྟན་པ་བདག་གིས་ཤེས་སོ་ཞེས་དེ་སྐད་ཅེས་མ་ཟེར་ཅིག །བཅོམ་ལྡན་འདས་ལ་སྐུར་པ་མ་འདེབས་ཤིག །བཅོམ་ལྡན་འདས་ལ་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ་། །ཚེ་དང་ལྡན་པ་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས། ཚེ་དང་ལྡན་པ་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་ཐོང་ཞིག་ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱི་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལྟུང་བྱེད་དོ། །ཡང་དགེ་སློང་གང་ཤེས་བཞིན་དུ་དེ་སྐད་ཟེར་བའི་གང་ཟག་ཆོས་བཞིན་དུ་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་ཏུ་གནས་པར་བྱེད། ཀུན་ཏུ་ལོངས་སྤྱོད་བར་བྱེད་ཅིང་། དེ་དང་ལྷན་ཅིག་གནས་གཅིག་ཏུ་ཉལ་ནའང་ལྟུང་བྱེད་དོ། །དགེ་ཚུལ་ཞིག་ཀྱང་འདི་སྐད་ཅེས། ཇི་ལྟར་བཅོམ་ལྡན་འདས་ཀྱི་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་ན། དགེ་ཚུལ་དེ་ལ་དགེ་སློང་རྣམས་ཀྱིས་འདི་སྐད་ཅེས། དགེ་ཚུལ་ཁྱོད་ཇི་ལྟར་བཅོམ་ལྡན་འདས་ཀྱི་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱི་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཅིག །བཅོམ་ལྡན་འདས་ལ་སྐུར་པ་མ་འདེབས་ཤིག །བཅོམ་ལྡན་འདས་སྐུར་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ་། །ཚེ་དང་ལྡན་པ་དགེ་ཚུལ་འདོད་པ་བར་དུ་གཅོད་པ་རྣམས་ནི་བར་དུ་གཅོད་པ་ཉིད་དོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས། དགེ་ཚུལ་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །དགེ་ཚུལ་དེ་ལ་དགེ་སློང་རྣམས་ཀྱིས་དེ་སྐ ད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་བཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་ཚུལ་དེ་ལ་དགེ་སློང་རྣམས་ཀྱིས་དེང་ཕྱིན་ཆད་དགེ་ཚུལ་ཁྱོད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག །ཚངས་པ་མཚུངས་པར་སྤྱད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་དུ་ཡང་མ་འགྲོ་ཞིག །དགེ་སློང་རྣམས་དང་དགེ་ཚུལ་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་དུ་དབང་བ་གང་ཡིན་ལ་དེ་ཡང་དེང་ཕྱིན་ཆད་ཁྱོད་ལ་མེད་དེ། མི་གཏི་མུག་ཅན་ཁྱོད་བསྙིལ་གྱིས་གཞན་དུ་སོངས་ཤིག་ཅེས་བསྒོ་བར་བྱའོ། །ཡང་དགེ་སློང་གང་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པར་བྱེད་དམ། ཉེ་བར་བསྟེན་པར་བྱེད་དམ། དེ་དང་ལྷན་ཅིག་གནས་གཅིག་ཏུ་ཉལ་ན་ལྟུང་བྱེད་དོ། །དགེ་སློང་གིས་གོས་གསར་པ་ཞིག་རྙེད་ན་ཁ་བསྒྱུར་བ་གསུམ་པོ་སྔོན་པོའམ། དམར་པོའམ། དུར་སྨྲིག་ལས་གང་ཡང་རུང་བས་ཁ་བསྒྱུར་བར་བྱའོ། །གལ་ཏེ་དགེ་སློང་གི་གོས་གསར་བ་ཁ་བསྒྱུར་བ་གསུམ་པོ་སྔོན་པོའམ། དམར་པོའམ། དུར་སྨྲིག་ལས་གང་ཡང་རུང་བར་ཁ་མ་བསྒྱུར་བར་ལོངས་སྤྱོད་ན་ལྟུང་བྱེད་དོ། །ཡང་དགེ་སློང་གང་རིན་པོ་ཆེའམ། རིན་པོ་ཆེར་སྨོས་པ་རང་གིས་ལག་གིས་ལེན་ཏམ། ལེན་དུ་འཇུག་ན་ཀུན་དགའ་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ། །དགེ་སློང་གིས་ཀུན་དགའ་ར་བར་གཏོགས་པའམ། གནས་ཁང་དུ་གཏོགས་པ་ནི་རིན་པོ་ཆེའམ། རིན་པོ་ཆེར་སྨོས་པ་འདུག་པ་ལ་འདི་སུ་ཡི་ཡིན་པ་དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱི་བླང་བར་བྱ་སྟེ། །དེ་ལ་དེ་ནི་ཆོ་ག་ཡིན་ནོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱ་བར་གསུངས་པ་དེ་ལས་འདུམས་པར་བྱེད་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་། དབྱར་རྣམས་ཀྱི་དང་པོ་ཟླ་བ་ཕྱེད་དང་གསུམ་པོ་དེ་དག་ནི་ཚ་བའི་དུས་སོ། །ལྷག་མ་ནི་ན་བ་དུས་སོ། །ལས་དུས་སོ། །ལམ་དུས་སོ། །རླུང་དུས་སོ། །ཆར་དུས་སོ། །རྫི་ཆར་དུས་ཏེ། དེ་ལ་དེ་ནི་དུས་ཡིན་ནོ། །སྡོམ་ལ། དུད་འགྲོ་འགྱོད་པ་སོར་མོ་དང་། རྩེ་དང་ལྷན་ཅིག་སྔགས་བྱེད་དང་། །སྦེད་དང་རྡིང་མེད་གཞི་མེད་དང་། །སྐྱེས་པ་མེད་པར་ལམ་འགྲོ་བའོ། །ཡང་དགེ་སློང་གང་བསམ་བཞིན་དུ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་གསོད་ན་ལྟུང་བྱེད་དོ། །ཡང་དགེ་སློང་གང་བསམས་བཞིན་དུ་ཅི་ནས་ཀྱང་། དགེ་སློང་འདི་ཡུད་ཙམ་ཞིག་ཀྱང་བདེ་བ་ལ་མི་རེག་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ། དགེ་སློང་ལ་འགྱོད་པ་སྐྱེད་ན་ལྟུང་བྱེད་དོ། །སོར་མོས་གག་ཚིལ་བྱེད་ན་ལྟུང་བྱེད་དོ། །ཆུ་ལ་རྩེ་ན་ལྟུང་བྱེད་དོ། །ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གནས་སུ་ཉལ་ན་ལྟུང་བྱེད་དོ། །ཡང་དགེ་སློང་གང་དགེ་སློང་ལ་སྔངས་པར་བྱེད་དམ། སྔངས་པར་བྱེད་དུ་འཇུག་ན་ཐ་ན་བཞད་གད་བྱ་བར་བསམས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་གང་དགེ་སློང་ངམ། དགེ་སློང་མའམ། དགེ་སློབ་མའམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་སྦེད་དམ། སྦེད་དུ་འཇུག་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་དགེ་སློང་ལ་གོས་བྱིན་ནས། དེའི་འོག་ཏུ་རྡིང་མེད་པར་སྤྱོད་ན་ལྟུང་བྱེད་དོ། །ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས། དགེ་སློང་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་ན་ལྟུར་བྱེད་དོ། །ཡང་དགེ་སློང་གང་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །སྡོམ་ལ། རྐུ་དང་ཉི་ཤུ་མ་ལོན་དང་། རྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མི་གུས་ཆང་འཐུང་དུས་མིན་པའོ། །ཡང་དགེ་སློང་གང་དོན་མཐུན་དུ་རྐུན་མ་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང་དགེ་སློང་གང་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་བསྙེན་པར་རྫོགས་པར་བྱས་ན་ལྟུང་བྱེད་དོ། །གང་ཟག་དེ་ཡང་བསྙེན་པར་རྫོགས་པར་མི་འགྱུར་ལ། དགེ་སློང་དེ་དག་ཀྱང་སྨད་པར་འགྱུར་བ་ཡིན་ཏེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་རང་གི་ལག་གིས་ས་རྐོའམ་རྐོར་འཇུག་ན་ལྟུང་བྱེད་དོ། །དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །སོ་སོར་མགྲོན་དུ་བོས་པ་དང་། ཡང་དང་ཡང་མགྲོན་དུ་བོས་པ་དང་། དུས་ཀྱིས་མགྲོན་དུ་བོས་པ་དང་། རྟག་ཏུ་མགྲོན་དུ་བོས་པ་ནི་མ་གཏོགས་ཏེ་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་དགེ་སློང་རྣམས་ཀྱི་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས། བདག་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་འདྲི་བའི་བར་དུ་བྱིས་པ་རྨོངས་པ་མི་གསལ་བ་མི་མཁས་པ་ཁྱོད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་འདི་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་ཡང་དྲི་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་དགེ་སློང་རྣམས་འཐབ་པར་འགྱུར། མཚང་འདྲུ་བར་གྱུར། མི་མཐུན་པར་གྱུར། རྩོད་པར་གྱུར་ཅིང་འཁོད་པ་ལས། དགེ་སློང་འདི་དག་ཇི་སྐད་ཟེར་བ་དེ་བདག་གིས་མ་ཉན་ཏེ། དེ་དེ་ལྟར་རྗེས་སུ་ཐ་སྙད་གདགས་པར་བྱའོ། །སྙམ་པ་དེ་ཉིད་རྐྱེན་དུ་བྱས་ཏེ། ཅང་མི་སྨྲ་བར་ཉན་ནས་འདུག་ན་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན། ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན། དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །གུས་པར་མི་བྱེད་ན་ལྟུང་བྱེད་དོ། །འབྲུའི་ཆང་དང་། བཙོས་པའི་ཆང་མྱོས་པར་འགྱུར་བ་འཐུང་ན་ལྟུང་བྱེད་དོ། །ཡང་དགེ་སློང་གང་དུས་མ་ཡིན་པར་གྲོང་དུ་འཇུག་ཅིང་དགེ་སློང་འདུག་པ་ལ་མི་སྨྲ་ན། དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །སྡོམ་ལ། ཟས་བཅས་སྐྱ་རེངས་ད་གདོད་དང་། །ཁབ་རལ་དང་ནི་ཁྲི་རྐང་དང་། །བདལ་དང་གདིང་དང་གཡན་པ་དང་། །རས་ཆེན་བདེ་གཤེགས་ཆོས་གོས་སོ། །ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་ཕྱི་དྲོ་ཁྱིམ་དག་ཏུ་རྒྱུ་ཞིང་ཁྱིམ་པ་འདུག་པ་ལ་མི་བསྒོ་ན། དེ་འདྲ་བའི་རྐྱེན་མ་གཏོགས་ཏེ་ལྷུང་བྱེད་དོ། །ཡང་དགེ་སློང་གང་ནམ་མ་ལངས་སྐྱ་རེངས་མ་ཤར་བ་རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེ་འཁོར་ལས་འདས་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་འདི་སྐད་ཅེས། ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ན། དེ་ལ་གལ་ཏེ་དགེ་སློང་རྣམས་ཀྱིས་ཀྱང་ཚེ་དང་ལྡན་པ་འདི་སྔོན་གསོ་སྦྱོང་གི་ལས་ལ་ལན་གཉིས་སམ་གསུམ་གྱི་ཚེ་འདུག་པར་ཤེས་ཤིང་ལན་མང་དུ་ལྟ་ཅི་སྨོས་ན། ཚེ་དང་ལྡན་པ་དེ་མི་ཤེས་པས་མི་འགྲོ་བས་དེ་ལྟུང་བ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་གི་སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་གདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱི་བསམས་ཏེ་ཆོས་ཉན་པར་མི་བྱེད་པར་ཚེ་དང་ལྡན་པ་ཁྱོད་ཀྱི་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་དེ་ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ། །ཚེ་དང་ལྡན་དེ་ལ་འགྱོད་པར་བྱ་བ་ནི་དེ་ཡིན་ཏེ་ལྟུང་བྱེད་དོ། །ཡང་དགེ་སློང་གང་བ་སོའམ། རུས་པའམ། རྭའི་ཁབ་རལ་བྱེད་དམ་བྱེད་དུ་འཇུག་ན་བཅང་ནས་ལྟུང་བྱེད་དོ། །ཡང་དགེ་སློང་གིས་དགེ་འདུན་གྱི་ཁྲིའམ་ཁྲིའུ་བྱེད་དུ་འཇུག་ན་རྩ་བ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུགས་པར་བྱའོ། །དེ་ལས་ལྷག་པར་བྱེད་དུ་འཇུག་ན་བཅང་ནས་ལྟུང་བྱེད་དོ། །ཡང་དགེ་སློང་གང་དགེ་འདུན་གྱི་ཁྲིའམ་ཁྲིའུ་ལ་ཤིང་བལ་བདལ་ལམ། བདལ་དུ་འཇུག་ན་བསྡུས་ནས་ལྟུང་བྱེད་དོ། །དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཅིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐའི་མཐོ་དོ། ཞེང་དུ་མཐོ་ཕྱེད་དང་དོ། སྲིད་དུ་མཐོ་གང་གིས་སྲིངས་ཤིག །དེ་ལས་ལྷག་པར་བྱེད་དུ་འཇུག་ན་བཅང་ནས་ལྟུང་བྱེད་དོ། །ཡང་དགེ་སློང་གིས་གཡན་པ་དགབ་པ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཅིག །དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི། ཞེང་དུ་མཐོ་དོ། དེ་ལས་ལྷག་པར་བྱེད་དུ་འཇུག་ན་བཅང་ནས་ལྟུང་བྱེད་དོ། །དགེ་སློང་གིས་དབྱར་གྱི་གོས་རས་ཆེན་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཅིག །དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དྲུག །ཞེང་དུ་མཐོ་ཕྱེད་དང་གསུམ་མོ། །དེ་ལས་ལྷག་པར་བྱེད་དུ་འཇུག་ན་བཅང་ནས་ལྟུང་བྱེད་དོ། །ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ། བདེ་བར་གཤེགས་པའི་ཆོས་གོས་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཅུ། ཆུ་ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ། །ཚེ་དང་ལྡན་པ་དང་བདག་གིས་ལྟུང་བྱེད་ཀྱི་ཆོས་དགུ་བཅུ་པོ་དག་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱོད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱོད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། གྲོང་དང་ཁྱིམ་གཞན་ཉིད་དང་ནི། །བསླབ་པ་རྣམས་དང་དགོན་པ་ནི། །སངས་རྒྱས་ཕན་པ་གསུངས་པ་ཡིས། །སོ་སོར་བཤགས་པར་བྱ་བར་གསུངས། །ཚེ་དང་ལྡན་པ་དག་སོ་སོར་བཤགས་པར་བྱ་བའི་ཆོས་བཞི་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆའ་བའམ། ཟ་ན་དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པར་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ནི་སོ་སོར་བཤགས་པར་བྱ་བའོ། །དགེ་སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ནས་ཟན་ཟ་བའི་ཚེ་ན། གལ་ཏེ་དགེ་སློང་མ་ཞིག་འདི་ལ་ནི་བཅའ་བ་བྱིན་ཅིག །འདི་ལ་ནི་འབྲས་ཆན་བྱིན་ཅིག །འདི་ལ་ནི་སྲན་ཚོད་བྱིན་ཅིག །འདི་ལ་ནི་བཏུང་བ་བྱིན་ཅིག །ཡང་བྱིན་ཅིག་ཅེས་བསྒོ་ཞིང་འདུག་ན། དགེ་སློང་མ་དེ་ལ་དགེ་སློང་དེ་རྣམས་ཀྱིས་འདི་སྐད་ཅེས། སྲིང་མོ་ཁྱེད་དགེ་སློང་རྣམས་ཟན་ཟ་བའི་བར་དུ་རེ་ཞིག་སྡོད་ཅིག་ཅེས་བསྒོ་བར་བྱའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་ཅེས་སྨྲ་མ་སྤོབས་ན། དགེ་སློང་དེ་དག་ཐམས་ཅད་ཀྱིས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ཅག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །སློབ་པ་དག་གིས་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པར་གྱུར་ལ། ཡང་དགེ་སློང་གང་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་སྔར་མགྲོན་དུ་མ་བོས་པར་སོང་སྟེ། རང་གི་ལག་གིས་བཅའ་བ་དང་བཟའ་བ་བླངས་ནས་འཆའ་བའམ་ཟ་ན། དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་འགྱུར་ལ། ཡང་དགེ་སློང་གང་དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་ཏུ་སྔར་མ་ཉུལ་བར་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན། དགེ་སློང་དེ་ཕྱི་རོལ་ཀུན་དགའ་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །ཚེ་དང་ལྡན་པ་དག་བདག་གིས་སོ་སོར་བཤགས་པར་བྱ་བའི་ཆོས་བཞི་པོ་དག་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱོད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱོད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། ཤམ་ཐབས་ལ་ནི་རྣམ་བདུན་དང་། །སྟོད་གཡོགས་ལ་ཡང་རྣམ་གསུམ་དང་། །ཤིན་ཏུ་བསྡམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །མཆོང་ལ་སོགས་པ་རྣམ་ལྔ་དང་། །ལུས་ལ་སོགས་པ་རྣམ་པ་ལྔ། །འདུག་པར་བྱ་བ་དགུ་དག་དང་། །བྱིན་ལེན་བྱ་བ་བརྒྱད་རྣམས་སོ། །ཚེ་དང་ལྡན་པ་དང་བསླབ་པའི་ཆོས་མང་པོ་འདི་དག་རྣམས་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །ཤམ་ཐབས་ཟླུམ་པོར་བགོ་བར་བསླབ་པར་བྱ། ཤམ་ཐབས་ཧ་ཅང་རྩེངས་པ་མ་ཡིན་པ་དང་། ཧ་ཅང་འཇོལ་བ་མ་ཡིན་པ་དང་། གླང་པོ་ཆེའི་སྣ་ལྟར་མ་ཡིན་པ་དང་། ཏ་ལའི་ལོ་མ་ལྟར་བལྟབ་པ་མ་ཡིན་པ་དང་། འབྲུའི་ཕུར་མ་ལྟར་མ་ཡིན་པ་དང་། སྤྲུལ་མགོའི་གདེངས་ཀ་ལྟར་མ་ཡིན་པར་བགོ་བར་བསླབ་པར་བྱའོ། །ཆོས་གོས་ཟླུམ་པོར་བགོ་བར་བསླབ་པར་བྱའོ། །ཆོས་གོས་ཧ་ཅང་རྩེངས་པ་མ་ཡིན་པ་དང་། ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ། །ཤིན་ཏུ་བསྡམས་པ་དང་། ལེགས་པར་བགོས་པ་དང་། བསྐྱུང་བ་དང་། མིག་གཡེངས་བར་མི་བྱ་བ་དང་། གཉའ་ཤིང་གང་ཙམ་དུ་བལྟ་ཞིང་ཁྱིམ་གཞན་དག་ཏུ་འགྲོ་བར་བསླབ་པར་བྱའོ། །མགོ་མི་གཡོགས་པ་དང་། མི་བརྫེ་བ་དང་། མི་གཟར་བ་དང་། གཉའ་གོང་དུ་མི་བསྣོལ་བ་དང་། ལྟག་པར་མི་བསྣོལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །མི་མཆོང་བ་དང་། མི་བརྐྱང་བ་དང་། ཙོག་པུས་མ་ཡིན་པ་དང་། བྲང་བས་མ་ཡིན་པ་དང་། དཀུར་མི་བརྟེན་པར་ཁྱིམ་གཞན་དུ་འགྲོ་བར་བསླབ་པར་བྱའོ། །ལུས་མི་བསྒྱུར་བ་དང་། ལག་པ་མི་དཀྱོག་པ་དང་། མགོ་མི་བསྒྱུར་བ་དང་། ཕྲག་པ་མི་སྤྲད་པ་དང་། ལག་པ་མི་སྦྲེལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །མ་བསྒོ་བར་ཁྱིམ་གཞན་དུ་སྟན་ལ་མི་འདུག་པར་བསླབ་པར་བྱ། སྟན་ལ་མ་བརྟགས་པར་དང་ལུས་ཐམས་ཅད་ཀྱི་ལྗིད་ཀྱིས་མི་དབབ་པ་དང་། རྐང་པ་མི་བསྣོལ་བ་དང་། བརླ་མི་བསྣོལ་བ་དང་། ལོང་བུའི་སྟེང་དུ་ལོང་བུ་མི་གཞག་པ་དང་། རྐང་པ་མི་དགུག་པ་དང་། རྐང་པ་མི་གདང་བ་དང་། འདོམས་མི་སྣང་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །ལེགས་པར་ཟས་བླང་བར་བསླབ་པར་བྱ། མུ་དང་ཁ་ད་ཆད་དུ་མ་ཡིན་པ་དང་། ཚོད་མ་དང་མཉམ་པར་མ་ཡིན་པ་དང་། མཐར་ཆགས་སུ་དང་ལྷུང་བཟེད་ལ་བལྟ་བ་དང་། བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པ་དང་། ཡང་འདོད་པའི་ཕྱིར་འབྲས་ཆན་གྱིས་ཚོད་མ་ནི་དགབ། ཚོད་མས་འབྲས་ཆན་མི་དགབ་པར་དང་། བཅའ་བ་དང་བཟའ་པའི་སྟེང་དུ་ལྷུང་བཟེད་མི་གཟུང་བར་བསླབ་པར་བྱའོ། །སྡོམ་ལ། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ ། །ལག་པ་བལྡག་ལ་སོགས་པ་ལྔ། །ལེགས་པར་ཟས་བཟའ་བར་བསླབ་པར་བྱ། ཁམ་ཧ་ཅང་ཆུང་བ་མ་ཡིན་པ་དང་། ཁམ་ཧ་ཅང་ཆེ་བ་མ་ཡིན་པ་དང་། ཁམ་རན་པ་དང་། ཁམས་མ་གཟས་པར་ཁ་མི་གདང་བ་དང་། ཁ་ཁམ་གྱིས་བཀང་སྟེ་མི་སྨྲ་བར་བསླབ་པར་བྱའོ། །ཙུག་ཙུག་མི་བྱ་བ་དང་། བལྕག་བལྕག་མི་བྱ་བ་དང་། ཧུ་ཧུ་མི་བྱ་བ་དང་། ཕུ་ཕུ་མི་བྱ་བ་དང་། ལྕེ་ཕྱུང་སྟེ་ཟས་མི་བཟའ་བར་བསླབ་པར་བྱའོ། །འབྲུ་ནས་ཐ་དད་དུ་མི་བྱ་བ་དང་། འཕྱས་མི་གདགས་པ་དང་། མཁུར་བ་མི་སྤོ་བ་དང་། རྐན་མི་གཏོགས་པ་དང་། ཁམ་འཕྲོར་མི་བཅད་པར་ཟས་བཟའ་བར་བསླབ་པར་བྱའོ། །ལག་པ་མི་བལྡག་པ་དང་། ལྷུང་བཟེད་མི་ཕྱོགས་པ་དང་། ལག་པ་མི་སྤྲུག་པ་དང་། ལྷུང་བཟེད་མི་བསྐྱོམ་པ་དང་། མཆོད་རྟེན་འདྲ་བར་བཅོས་ཏེ་ཟས་མི་བཟའ་བར་བསླབ་པར་བྱའོ། །སྡོམ་ལ། འཕྱ་ལ་སོག་པ་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །འགྲེང་བར་བྱེད་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །དོ་ཀེར་ཅན་ལ་སོགས་པ་ལྔ། །གླང་ཆེན་ལ་སོགས་བཞོན་པ་ལྔ། །ལག་ན་འཁར་བ་ལ་སོགས་དྲུག །ན་བ་རྣམས་པ་བཞི་རྣམས་སོ། །དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བར་བསླབ་པར་བྱ། ལག་པ་ཟས་དང་འབགས་པས་ཆུ་སྣོད་ལ་མི་གཟུང་བར་བསླབ་པར་བྱ། དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་བར་བསླབ་པར་བྱ། ཁྱིམ་པ་འདུག་པ་ལ་མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་བསླབ་པར་བྱའོ། །འོག་གཞི་མེད་པའི་ས་ཕྱོགས་སུ་ལྷུང་བཟེད་མི་བཞག་པར་བསླབ་པར་བྱ། གད་ཀ་མ་ཡིན་པ་དང་། གཡང་ས་མ་ཡིན་པ་དང་། དཀན་གཟར་པོ་མ་ཡིན་པར་ལྷུང་བཟེད་བཞག་པར་བསླབ་པར་བྱ། འགྲེང་སྟེ་ལྟུང་བཟེད་མི་བཀྲུ་བར་བསླབ་པར་བྱ། གད་ཀ་མ་ཡིན་པ་དང་། གཡང་ས་མ་ཡིན་པ་དང་། དཀན་གཟར་པོ་མ་ཡིན་པར་བཀྲུ་བར་བསླབ་པར་བྱ། འབབ་ཆུ་དྲག་པོའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུ་མི་བཅུ་བར་བསླབ་པར་བྱའོ། །མི་ན་བར་འདུག་པ་ལ་འགྲེང་སྟེ་ཆོས་མི་བཤད་པས་བསླབ་པར་བྱ། མི་ན་བར་ཉལ་བར་འདུག་སྟེ་ཆོས་མི་བཤད་པ་བསླབ་པར་བྱ། མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་མི་བཤད་པར་བསླབ་པར་བྱ། མི་ན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱ། མི་ན་བར་ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླར་པར་བྱའོ། །མི་ན་བར་མགོ་གཡོགས་པ་དང་། བརྫེས་པ་དང་། གཟར་བ་དང་། གཉའ་གོང་དུ་བསྣོལ་བ་དང་། ལྟག་པར་བསྣོལ་བ་ལ་ཆོས་མི་བཤད་པར་བསླབ་པར་བྱའོ། །མི་ན་བར་སྐྲ་དོ་ཀོར་ཅན་དང་། ཞྭ་གྱོན་པ་དང་། མགོ་ཅོད་པན་ཅན་དང་། མགོ་ཕྲེང་བ་ཅན་དང་། མགོ་དཀྲིས་པ་ལ་ཆོས་མི་བཤད་པར་བསླབ་པར་བྱའོ། །མི་ན་བར་གླང་པོ་ཆེ་བཞོན་པ་དང་། རྟ་ཞོན་པ་དང་། ཁྱོགས་ན་འདུག་པ་དང་། བཞོན་པའི་སྟེ ང་ན་འདུག་བ་དང་། མཆིལ་ལྷྭམ་གྱོན་པ་ལ་ཆོས་མི་བཤད་པར་བསླབ་པར་བྱའོ། །མི་ན་བར་ལག་ན་འཁར་བ་ཐོགས་པ་དང་། ལག་ན་གདུགས་ཐོག་པ་དང་། ལག་ན་མཚོག་ཐོག་པ་དང་། ལག་ན་རལ་གྲི་ཐོག་པ་དང་། ལག་ན་དགྲ་སྟྭ་ཐོག་པ་དང་། གོ་ཆ་གྱོན་པ་ལ་ཆོས་མི་བཤད་པར་བསླབ་པར་བྱའོ། །མི་ན་བར་འགྲེང་སྟེ་གཤང་གཅི་མི་བྱ་བར་བསླབ་པར་བྱའོ། །མི་ན་བར་ཆུའི་ནང་དུ་གཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། རླུགས་པ་མི་དོར་བར་བསླབ་པར་བྱ། མི་ན་བར་རྩ་སྔོན་པོ་ཡོད་པའི་ས་ཕྱོགས་སུ་གཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། རླུགས་པ་མི་དོར་བར་བསླབ་པར་བྱ། གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོར་མི་འཛེག་པར་བསླབ་པར་བྱའོ། །ཚེ་དང་ལྡན་པ་དག་བདག་གིས་བསླབ་པའི་ཆོས་མང་པོ་རྣམས་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱོད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱོད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །སྡོམ་ལ། མངོན་སུམ་དྲན་པ་མ་མྱོས་དང་། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླང་པར་ཡང་བྱ་བའོ། །ཚེ་དང་ལྡན་པ་དག་རྩོད་པ་ཞི་བར་བྱ་བའི་ཆོས་བདུན་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་། །མངོན་སུམ་གྱིས་འདུལ་བར་འོས་པ་ལ་མངོན་སུམ་གྱིས་འདུལ་བ་སྦྱིན་ནོ། །དྲན་པས་འདུལ་བར་འོས་པ་ལ་དྲན་པས་འདུལ་བ་སྦྱིན་ནོ། །མ་མྱོས་པས་འདུལ་བར་འོས་པ་ལ་མ་མྱོས་པས་འདུལ་བ་སྦྱིན་ནོ། །གང་ཚུལ་ཤིང་མང་པོ་སྦྱིན་པར་འོས་པ་ལ་ཚུལ་ཤིང་མང་པོ་སྦྱིན་ནོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་ལ་དེའི་ངོ་བོ་ཉིད་བཙལ་བ་སྦྱིན་ནོ། །རྩྭ་བཀྲམ་པ་ལྟ་བུ་འོས་པ་ལ་རྩྭ་བཀྲམ་པ་ལྟ་བུ་སྦྱིན་ནོ། །གང་ཁས་བླང་པར་འོས་པ་ལ་ཁས་བླང་པ་སྦྱིན་པར་བྱའོ། །རྩོད་པ་བྱུང་བར་གྱུར་པ་རྣམས་རྩོད་པ་ཞི་བར་བྱ་བའི་ཆོས་བདུན་པོ་འདི་དག་གིས་ཆོས་དང་། འདུལ་བ་དང་སྟོན་པའི་བསྟན་པ་བཞིན་དུ་དུལ་བར་བྱ། ཞི་བར་བྱ། རྣམ་པར་ཞི་བར་བྱའོ། །ཚེ་དང་ལྡན་པ་དག་བདག་གིས་རྩོད་པ་ཞི་བར་བྱ་བའི་ཆོས་བདུན་པོ་དག་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས། ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ། །ཚེ་དང་ལྡན་པ་དག་བདག་གིས་སོ་སོར་ཐར་པའི་མདོ་འདོན་པའི་གླེང་གཞི་བཏོན་ཟིན་ཏོ། །ཕམ་པར་གྱུར་པའི་ཆོས་བཞི་དང་། དགེ་འདུན་ལྷག་མའི་ཆོས་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བྱེད་ཀྱི་ཆོས་སུམ་ཅུ་དང་། ལྟུང་བྱེད་ཀྱི་ཆོས་དགུ་བཅུ་དང་། སོ་སོར་བཤགས་པའི་བྱ་བའི་ཆོས་བཞི་དང་། བསླབ་པའི་ཆོས་མང་པོ་དང་རྩོད་པ་ཞི་བར་བྱ་བའི་ཆོས་བདུན་པོ་དག་བཏོན་ཟིན་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་མདོར་གཏོགས་ཤིང་མདོར་བསྡུས་པ་ནི་འདི་དག་གོ། །གང་གཞན་ནས་འབྱུང་བའི་ཆོས་ཀྱི་རྗེས་སུ་མཐུན་པའི་ཆོས་དེ་ལ་ཡང་ཁྱེད་རྣམས་འདུན་པ་དང་མཐུན་པ་དང་དགའ་བ་དང་། མི་རྩོད་པར་སེམས་ཀུན་ཏུ་སྲུང་བ་དང་དྲན་པ་དང་བག་ཡོད་པས་རྣལ་འབྱོར་དུ་བྱའོ། །བཟོད་པ་དཀའ་ཐུབ་དམ་པ་བཟོད་པ་ནི། །མྱ་ངན་འདས་པ་མཆོག་ཅེས་སངས་རྒྱས་གསུངས། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སློང་མ་ཡིན་ནོ། །མིག་ལྡན་འགྲོ་བ་ཡོད་པ་ཡིས། །ཉམ་ང་བ་དག་ཇི་བཞིན་དུ། །མཁས་པས་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤོང་། །སྐུར་པ་མི་གདབ་གནོད་མི་བྱ། །སོ་སོར་ཐར་པའང་བསྡམ་པར་བྱ། །ཟས་ཀྱི་ཚོད་ཀྱང་རིག་པར་བྱ། །བས་མཐའི་གནས་སུ་གནས་པར་བྱ། །ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །བདག་གིས་རིགས་དང་མི་རིགས་ལ། །བརྟག་པར་བྱ་སྟེ་གཞན་རྣམས་ཀྱི། །མི་མཐུན་པ་དག་གཞན་དག་གི། །བྱས་དང་མ་བྱས་རྣམས་ལ་མིན། །ལྷག་པའི་སེམས་ལ་བག་བྱ་སྟེ། །ཐུབ་པའི་ཐུབ་གཞི་རྣམས་ལ་བསླབ། །ཉེར་ཞི་རྟག་ཏུ་དྲན་ལྡན་པའོ། །སྐྱོབ་པ་མྱ་ངན་མེད་པ་ཡིན། །སྦྱིན་པས་བསོད་ནམས་རབ་ཏུ་འཕེལ། །ལེགས་བསྡམས་དགྲ་སོགས་མི་འགྱུར་རོ། །དགེ་དང་ལྡན་པས་སྡིག་པ་སྤོང་། །ཉོན་མོངས་ཟད་པས་མྱ་ངན་འདའ། །སྡིག་པ་ཐམས་ཅད་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམ་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱི་རབ་བསྡམས་ཏེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུང་དང་། །ཤཱཀྱ་ཐུབ་པ་ག་ཏམ་ལྷ་ཡི་ལྷ། །མི་འདུལ་ཁ་ལོ་སྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པ་མཆོག །སངས་རྒྱས་དཔའ་བོ་བདུན་པོ་དག །གྲགས་ལྡན་རྣམས་ཀྱི་སོ་སོར་ཐར། །འདི་ནི་རབ་ཏུ་རྒྱས་པར་བཏོན། །འདི་ལ་སངས་རྒྱས་རྣམས་དང་གང། །སངས་རྒྱས་ཉན་ཐོས་རྣམས་ཀྱང་གུས། །འདི་ལ་གུས་དང་བཅས་གྱུར་པས། །འདུས་མ་བྱས་པ་ཐོབ་པར་གྱིས། །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ན་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཕན་ཚུན་ཚུལ་ཁྲིམས་བསྲུང་བ་དང་། །བསྟན་པ་འཕེལ་བར་བྱ་བའི་ཕྱིར། །སོ་སོར་ཐར་པ་འདི་བཏོན་པས། །དགེ་འདུན་གྱིས་ནི་གསོ་སྤྱོང་བྱས། །གང་གི་ཕྱིར་ནི་མདོ་བཏོན་དང་། །གང་ཕྱིར་གསོ་སྦྱོང་བྱས་གྱུར་པ། །ཚུལ་ཁྲིམས་དེ་ནི་བསྲུང་བྱ་སྟེ། །གཡག་རྔའི་རྩེ་མོ་ཇི་བཞིན་ནོ། །སོ་སོར་ཐར་པ་བཏོན་པ་ཡི། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །སོ་སོར་ཐར་པའི་མདོ་རྫོགས་སོ། །དབང་ཕྱུག་དམ་པའི་མངའ་བདག་དཔལ་ལྷ་བཙན་པོའི་བཀའ་ལུང་གིས་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་སློབ་དཔོན་ཛི་ན་མི་ཏྲ་དང་། ཞུས་ཆེན་གྱི་ལོ་ཙཱ་བ་བནྡེ་ཅོག་རོ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སོ་སོར་ཐར་པའི་མདོ་འདི་ཉིད་སྤྱིར་བཏང་དགེ་སློང་ཐམས་ཅད་ཀྱིས་བློ་ལ་གཟུང་དགོས་པའི་ཕྱིར་མཁོ་གལ་ཆེ་བ་ཙམ་དུ་མ་ཟད། སྐབས་འདིར་ཡང་ཉན་ཐོས་ཀྱི་ཐེག་པའི་ཡན་ལག་གཞི་གསུམ་གྱི་ཆོ་ག་ལས། གསོ་སྦྱོང་གི་གཞིའི་སྐབས་ཀྱི་མདོ་འདོན་པ་ལྷག་མ་བཞི་པོའི་དུས་སུ་མེད་དུ་མི་རུང་བ་ཡིན་པའི་ཕྱིར། དེ་ཉིད་ཀྱི་ཆ་ལག་ཏུ་དམིགས་ཏེ་ཆོས་སྨྲ་བའི་བཙུན་པ་གཞན་ཕན་མཐའ་ཡས་པས་སྔ་འགྱུར་བཀའ་མ་ཐེག་རིམ་དགུའི་ཡན་ལག་གི་ཆོ་ག་མཐའ་དག་ཕྱོགས་གཅིག་ཏུ་བསྒྲིགས་ནས་སྤར་དུ་ཉེ་བར་སྒྲུབ་སྐབས་སུ་གཞུང་ཕྱི་མོ་འགྲེལ་པ་དང་བཅས་པ་ལ་གཏུགས་ནས་ཞུས་ཤིང་དག་པར་བྱས་ཏེ་ལེགས་པར་གཏན་ལ་ཕབ་པའོ།། །། རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས། ལོ་ཆེན་དྷརྨ་ཤྲཱི།རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས་ཞེས་བྱ་བ་བཞུགས་སོ། །རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས་ཞེས་བྱ་བ། སྟོན་པ་ཐམས་ཅད་མཁྱེན་པ་ལ་ཕྱག་འཚལ་ལོ། །མཁྱེན་པས་སྲིད་ལས་རྣམ་གྲོལ་ཞིང་། །སྙིང་རྗེས་གདུལ་བྱ་འདུལ་བའི་ཐབས། །སྟོན་མཛད་ཐུབ་དབང་ལྷ་ཡི་ལྷ། །ཀུན་མཁྱེན་འགྲོ་བའི་བླ་མར་འདུད། །འབུམ་ཕྲག་འདུལ་གཞུང་འོད་བརྒྱ་བས། །འཁོར་བའི་རྨོངས་མུན་བསལ་མཛད་པ། །ཡོད་ཏན་འོད་མངའ་ཞི་བ་འཚོ། །དགོངས་པ་རབ་ཏུ་གསལ་དེས་སྐྱོངས། །ངེས་འབྱུང་ཚུལ་ཁྲིམས་མ་སྨད་པའི། །རིན་ཆེན་ཐེམ་སྐས་ལ་འཛེགས་ནས། །རྣམ་གྲོལ་ཁང་བཟང་ཉམས་དགའ་བར། །འཁྲིད་ཐབས་ལས་ཀྱི་ཆོ་ག་བཤད། །འདི་ལ་གཉིས་ཏེ། ཚིགས་སྔ་མ་དགེ་ཚུལ་དུ་སྒྲུབ་པའི་དང་། ཕྱི་མ་བསྙེན་རྫོགས་སུ་སྒྲུབ་པའི་ཆོ་གའོ། །དང་པོ་ནི། ཐོག་མར་སྟོན་པའི་སྐུ་གཟུགས་ཀྱི་སྤྱན་སྔར་མཆོད་བཤམ། ཆོས་གོས་གཉིས། ལྷུང་བཟེད། གདིང་བ། ཆུ་ཚགས་སོགས་སྟ་གོན་བྱས་ནས། བསྒྲུབ་བྱ་དེ་མདུན་དུ་ཙོག་ཙོག་པོར་འདུག་ཏུ་བཅུག་པ་ལ། མཁན་པོ་ཉིད་དུ་ཕྱོགས་པའི་དགེ་སློང་དེས་བར་ཆད་དྲི་སྟེ། ཁྱོད་སྔོན་གྱི་དགེ་བ་དང་སྨོན་ལམ་གྱི་དབང་གིས་མཐོ་རིས་ཀྱི་རྟེན་ཕུན་སུམ་ཚོགས་པ་ཐོབ་པ་དོན་ཡོད་པར་བྱ་བའི་ཆེད་དུ་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་བྱེད་པ་ནི་ཤིན་ཏུ་སྐལ་བ་བཟང་པོ་ཡིན། དེ་ལ་བསྟན་པའི་སྙིང་པོ་ཚུལ་ཁྲིམས་ཀྱི་བསླབ་པ་འདི་བར་ཆད་དང་མི་ལྡན་པའི་གང་ཟག་རྒྱུད་དག་བ་ཞིག་ལ་སྦྱིན་དགོས། བར་ཆད་ཡོད་མེད་ཁོ་བོས་དྲིས་པ་ལས་རྟོགས་པས་དྲི་བ་འདི་རྣམས་ལ་ལན་དྲང་པོར་ཐོབ་ཅིག །ཁྱོད་མུ་སྟེགས་ཅན་མ་ཡིན་ནམ། ལོ་བཅོ་ལྔ་མ་ལོན་པ་མ་ཡིན་ནམ། ལོ་བཅོ་ལྔ་ལོན་པ་བྱ་རོག་སྐྲོད་མི་ནུས་པ་མ་ཡིན་ནམ། བྱ་རོག་སྐྲོད་ནུས་པ་ལོ་བདུན་མ་ལོན་པ༴ བྲན་ལ་སོགས་པ་མ༴ བུ་ལོན་ཆགས་པ་མ༴ ཕ་མས་མ་གནང་བ་མ༴ ཕ་མས་མ་གནང་བ་ཡུལ་ཐག་མི་རིང་བ་མ༴ ནད་པ་མ༴ དགེ་སློང་མ་སུན་ཕྱུང་བ་མ༴ རྐུ་ཐབས་སུ་གནས་པ་མ༴ ཐ་དད་དུ་གནས་པ་མ༴ གནས་པར་མི་བྱ་བ་མ༴ ཟ་མ་མ༴ མ་ནིང་མ༴ སྤྲུལ་པ་མ༴ དུད་འགྲོ་མ༴ མུ་སྟེགས་ཅན་ཞུགས་པ་མ༴ མ་བསད་པ་མ༴ ཕ་བསད་པ་མ༴ དགྲ་བཅོམ་པ་བསད་པ་མ༴ དགེ་འདུན་གྱི་དབྱེན་བྱས་པ་མ༴ དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ༴ ཕ མ་པར་གྱུར་པའི་ལྟུང་བ་བཞི་པོ་དག་ལས་གང་ཡང་རུང་བ་བྱུང་བ་མ༴ རྒྱུ་ལས་ཟློག་པའི་ཆད་པ་ཁས་མི་ལེན་པ་གནས་ནས་ཕྱུང་བ་མ༴ ལག་རྡུམ་ལ་སོགས་པ་མ༴ སྐྲ་སེར་ལ་སོགས་པ་མ༴ སེན་མོ་གཅིག་པ་ལ་སོག་པ་མ༴ རྒྱལ་པོས་བཀྲབས་པ་ལ་སོགས་པ༴ རྒྱལ་པོས་མ་གནང་བ་མ༴ རྒྱལ་པོས་མ་གནང་བ་ཡུལ་ཐག་མི་རིང་བ་མ༴ ཆོམ་རྐུན་པར་གྲགས་པ་མ༴ ཕུང་ཀྲོལ་བ་མ༴ ལྷྭམ་མཁན༴ གདོལ་པ་མ༴ གཡུང་པོ་མ༴ མི་མ་ཡིན་པའི་འགྲོ་བ་མིར་བརྫུ་བ་མ༴ བྱང་གི་སྒྲ་མི་སྙན་པ་མ༴ མཚན་ལན་གསུམ་དུ་འགྱུར་པ་མ༴ སྐྱེས་པ་འདྲ་བའི་བུད་མེད་མ༴ སྡིག་སྡིག་ལྟ་བུའི་མཚན་ཉིད་ཅན་མ༴ གླིང་གཞན་ནས་སྐྱེས་པའི་ཚུལ་བྱད་མི་འདྲ་བ་མ་ཡིན་ནམ། ཞེས་དྲིས་པས། མ་ཡིན་ལགས། ཟེར་ན། འོ་ན་ཁོ་བོས་ཁྱོད་རབ་ཏུ་དབྱུང་བར་བྱའོ། །ཞེས་སྐབས་དབྱེའོ། །དེ་ནས་སྒྲུབ་བྱེད་སྟོན་པ་དང་རང་ལ་ཕྱག་གསུམ་གསུམ་འཚལ་དུ་བཅུག་ག ནས། མདུན་དུ་ཙོག་ཙོག་པོར་འདུག་ཅིང་ཐལ་མོ་སྙིང་ཁར་སྦྱར་དུ་བཅུག་སྟེ། ཁྱོད་རབ་ཏུ་འབྱུང་བར་བྱེད་པ་ལ་འགལ་རྐྱེན་བར་ཆད་དང་བྲལ་བ་གཅིག་བུས་མི་ཆོག་གི། མཐུན་རྐྱེན་ཆོ་ག་རྣམ་པར་དག་པ་ལ་བརྟེན་དགོས་ཤིང་། དེ་ཡང་སངས་རྒྱས་ཀྱི་བསྟན་པ་ལ་རིམ་གྱིས་བསླབ་པའི་དོན་དུ་ཐོག་མར་དགེ་བསྙེན་གྱི་སྡོམ་པ་བླང་དགོས་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས་འཁོར་བ་སྤངས་ཏེ་རྣམ་གྲོལ་གཏན་གྱི་བདེ་བ་སྒྲུབ། དེའི་ཆེད་དུ་དཀོན་མཆོག་གསུམ་སྐྱབས་གནས་སུ་བཟུང་ནས་ཡོངས་རྫོགས་དགེ་བསྙེན་གྱི་སྡོམ་པ་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པ་གྱིས་ལ་རྗེས་ཟློས་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་བཟུང་དུ་གསོལ། ཞེས་ལན་གཉིས་བཟླས། ལན་གསུམ་པ་འདི་ལ་སྐྱབས་བརྗོད་དང་བདག་བརྗོད་གཉིས་རྫོགས་པ་དགེ་བསྙེན་དུ་ཞེས་པའི་སྐབས་སུ་ཁོ་བོས་སེ་གོལ་གྱི་བརྡ་བྱས་པ་དང་མཉམ་དུ་སྡོམ་པ་སྐྱེ་བ་ཡིན་པས། དུས་དེར་སྡོམ་པ་ཐོབ་སྙམ་པ་དང་། དེ་ནས་ངེད་ལའང་སློབ་དཔོན་ཞེས་བརྗོད་དགོས་པས་དེ་ཡིད་ལ་ཞོག་ལ་རྗེས་ཟློས་གྱིས། ཞེས་དང་། མཇུག་ཏུ་སློབ་དཔོན་གྱིས། ཐབས་ཡིན་ནོ། །ཞེས་པའ ི་ལན་དུ་སློབ་མས། ལེགས་སོ། །ཞེས་བརྗོད། དེས་ཁྱོད་ཀྱིས་དགེ་བསྙེན་གྱི་སྡོམ་པ་ཐོབ་པ་ཡིན་པས། དེའི་བསླབ་པའི་གཞི་ལྔ་པོ་འཕགས་བ་དགྲ་བཅོམ་པ་རྣམས་ཀྱིས་ཇི་ལྟར་བསྲུངས་པ་བཞིན་དུ་བདག་གིས་ཀྱང་བསྲུང་སྙམ་པས་རྗེས་ཟློས་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོའི་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྗུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་གནས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པར་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གཅིག་གི་མཐར་སྔར་བཞིན་ཐབས་ལེགས་བྱའོ། ༈ །དེ་ལྟར་མཁན་པོར་ཕྱོགས་པས་བར་ཆད་དྲིས་ནས་བསྒྲུབ་བྱ་རྒྱུད་དག་པར་གྲུབ་པ་དེ་རང་གིས་དགེ་བསྙེན་དུ་བསྒྲུབས་པའི་རྗེས་དེ་ནས་ཞུ་བ་བྱེད་བའི་དགེ་སློང་ཆོས་བཅུ་ལྡན་ཞིག་ལ། དགེ་སློང་དགེ་བའི་བཤེས་གཉེན་ཆེ་གེ་མོས། ཚེ་དང་ལྡན་པ་འདི་དགེ་འདུན་ལ་རབ་ཏུ་འབྱུང་བའི་ཞུ་བ་མཛོད་ཅིག །ཅེས་གཏད། དགེ་སློང་དེས། ཅི་ཚེ་དང་ལྡན་པ་འདིའི་བར་ཆད་ཀྱི་ཆོས་རྣམས་ཡོངས་སུ་དག་གམ། ཞེས་དྲིས་པ་ལ། མཁན་པོར་ཕྱོགས་པས། ཡོངས་སུ་དག་གོ་ཞེས་ཁོ་ན་ཉིད་མཆི་ཡིན་གདའི། ཞེས་ལན་གདབ། དེ་ནས་བསྐོས་པ་དེ་བསྒྲུབ་བྱེད་ཁྲིད་ནས་གནས་ཁང་སོ་སོར་འཁོད་པའི་དགེ་འདུན་ལ་ཞུས་ཀྱང་རུང་མོད། །དེང་སང་དགེ་འདུན་ཐམས་ཅད་གནས་ཁང་གཅིག་ཏུ་འདུས་པ་ལ་ཞུ་བ་ཉིད་ཕྱག་ལེན་དུ་མཛད་པས། བསྒྲུབ་བྱ་དེ་མཁན་པོ་མ་གཏོགས་དགེ་སློང་རྒན་རིམ་ནས་ཕྱག་གསུམ་གསུམ་འཚལ་དུ་བཅུག་ལ། གོས་དཀར་པོ་དང་ལྡན་པས་ཙོག་ཙོག་པོར་འདུག་ཅིང་ཐལ་མོ་སྦྱོར་དུ་བཅུག་སྟེ། རང་རྒན་པའི་མཐར་ལོགས་སུ་འགྲེངས་ཏེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། ཁྱིམ་པ་གོས་དཀར་པོ་ཅན་སྐྲ་དང་ཁ་སྤུ་མ་བྲེགས་པ་ལས། ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་ཏེ། མིང་འདི་ཞེས་བགྱི་བ་འདི་རབ་ཏུ་འབྱུང་བར་འཚལ་ཞིང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་སྟེ། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ནས། ཅི་དེ་རབ་ཏུ་དབྱུང་ངམ། ཞེས་པའི་ལན་དུ་དགེ་འདུན་རྣམས་ཀྱིས། གལ་ཏེ་ཡོངས་སུ་དག་ནའོ། །ཞེས་བརྗོད། དེ་ཡང་འདིར་བསྒྲུབ་བྱ་གཅིག་གི་དབང་དུ་བྱས་པ་སྟེ། གཉིས་ཡོད་ན། སྔར་འདི་ཞེས་ལ་འདི་དག །དེ་ཡང་ལ་དེ་དག་ཀྱང་། ཅི་དེ་ལ་ཅི་དེ་དག །ཁོ་ན་ཉིད་ལ་ཁོང་དག་ཉིད། ཅེས་དང་། གསུམ་ཡོད་ན། དག་ཞེས་པའི་གནས་སུ་རྣམས་ཞེས་བསྒྱུར་ཞིང་། མིང་འདི་ཞེས་བགྱི་བ་ལས་ཞེས་བདེ། རང་གི་མཁན་པོ་ཡིན་ན། དོན་གྱི་སླད་དུ་མཚན་ནས་སྨོས་ན་མཁན་པོ་མིང་འདི་ཞེས་བགྱི་བ་ཞེས་དང་། སློབ་དཔོན་ཡིན་ན། སློབ་དཔོན། རང་གི་མཁན་སློབ་མིན་ན། གནས་བརྟན་ནམ། དགེ་བའི་བཤེས་གཉེན་ཞེས་ཉེ་ཚིག་གིས་བརྗོད་པ་སོགས་རྣམ་དབྱེ་དང་ཚིག་ཕྲད་སྐབས་ཐོབ་ཀྱིས་བསྒྱུར་ཚུལ་གོང་འོག་ཐམས་ཅད་དུ་འཁྱེར་ཤེས་པར་བྱའོ། ༈ །དེ་ནས་མཁན་པོར་ཕྱོགས་པས་བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་རབ་ཏུ་བྱུང་བ་བྱེད་པ་དེ་རང་ཞུགས་སུ་བྱས་པས་མི་ཡོང་བས་བྱེད་པ་པོར་གྱུར་པའི་མཁན་པོ་ཞིག་དགོས། དེའི་རྒྱུ་མཚན་སྔོན་སྟོན་པ་རྫོགས་སངས་རྒྱས་ནས་རིང་པོ་མ་ལོན་པའི་དུས་ཀྱི་གདུལ་བྱ་རྣམས་ནི་རང་བཞིན་གྱིས་དབང་པོ་དུལ་ཞིང་བག་དང་ལྡན་ལ། ན་ཚ་སོགས་ཀྱང་འབྱུང་དཀོན་པས་འཁྲིད་ཅིང་སྐྱོང་བར་བྱེད་པ་ལ་མི་ལྟོས་པའི་ཕྱིར་མཁན་སློབ་མེད་པར་རྫོགས་པ་ཡིན་གྱི། དུས་ཕྱིས་ཀྱི་གང་ཟག་རྣམས་དེ་ལྟ་བུ་མ་ཡིན་པས་ད་ལྟར་གྱི་ཆོ་གས་རབ་ཏུ་འབྱུང་བའི་མཐུན་རྐྱེན་གྱི་གཙོ་བོ་མཁན་པོ་ཡིན། མཁན་པོའི་དོན་ཡང་། ཨུ་པ་ཉེ་བ། དྷ་ར་འཛིན་པ། སནྡྷི་སྦྱོར་བ། བི་ཀཱ་ར་ཎ་ལུང་འབོགས་པ་སྟེ། བརྩེ་བས་འཁོར་བར་ལྟུང་བ་ལས་ཉེ་བར་འཛིན་ལ། བསླབ་པ་རིན་པོ་ཆེ་ལ་ཉེ་བར་སྦྱོར་བའི་རྐྱེན་སྒྲུབ་ཅིང་། འཇུག་ལྡོག་གི་བསླབ་བྱ་རྣམས་ཉེ་བར་ལུང་འབོགས་པར་བྱེད་པ་ཞིག་ཡིན། དེ་ཡང་བཙུན་པ་བརྟན་པའི་ཡོན་ཏན་དང་། མཁས་ཤིང་ཕན་ཐོགས་པའི་ཡོན་ཏན་ཏེ། བརྟན་མཁས་ཀྱི་ཡོན་ཏན་གཉིས་དང་ལྡན་པ་ཞིག་དགོས་པ་ཁོ་བོས་འགྲུབ་རུང་དུ་ཡོད་པས། སྔར་དགེ་བསྙེན་གྱི་སློབ་དཔོན་ལ་ད་རབ་བྱུང་གི་མཁན་པོ་ཞུ་སྙམ་པ་གྱིས་ལ་འདིའི་རྗེས་ཟློས་གྱིས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱི། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་རབ་ཏུ་དབྱུང་བར་བགྱིའོ། །ཞེས་ལན་གསུམ་བཟླས་པའི་གསུམ་པ། མཁན་པོ་མཁན་པོས་ཞེས་བསྒྱུར་ཞིང་། ཐབས་ལེགས་བྱའོ། ༈ །དེ་ནས་མཁན་པོས་གྲོགས་དན་ལ། དགེ་སློང་འདི་ཞེས་བྱ་བས་ཚེ་དང་ལྡན་པ་འདིའི་སྐྲ་དང་ཁ་སྤུ་ཞེས་སམ། བྲེགས་ཚར་ན་གཙུག་ཕུད་འབྲེག་པར་མཛོད་ཅིག །ཅེས་བཅོལ། དེས་ཀྱང་སྐྲ་དང་ཁ་སྤུ་འབྲེག་དགོས་ན་གཙུག་ཕུད་མ་གཏོགས་པ་བྲེགས་ནས། དེའི་འོག་ཏུ་ཅི་གཙུག་ཕུད་འབྲེག་པར་སྤྲོའམ་ཞེས་དྲི། སྤྲོ་ལགས་ཟེར་ན་བྲེགས་ཏེ་ཁྲུས་བྱེད་དུ་བཅུག་ལ། མཁན་པོའི་ཞབས་ལ་གཏུགས་པའི་ཕྱག་བྱས་ཏེ། མདུན་དུ་ཙོག་ཙོག་པོར་འདུག་པ་ལ་མཁན་པོས་བླ་གོས་གཏད་དེ་གཉིས་ཀས་བཟུང་ནས། འདི་སྟོད་དུ་རྒྱུན་དུ་གྱོན་པར་བྱེད་པའི་ཆོས་གོས་བླ་གོས་ཞེས་བྱ་བ། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོ། ཚ་གྲང་གི་རེག་པ་ལས་སྐྱོབ་པའི་གོས་སུ་གནང་བས། སྟོན་པ་སངས་རྒྱས་ཀྱིས་ཇི་ལྟར་བསྣམས་པ་བཞིན་དུ་གྱོན་ནས་སེམས་ཞི་དུལ་དང་ལྡན་པར་གྱིས་ཤིག །མཐང་གོས་གཏད་དེ། འདི་སྨད་ཀྱི་ནང་དུ་གྱོན་པར་བྱེད་པའི་ཆོས་གོས་མཐང་གོས་ཞེས་བྱ་བ། སྨད་གཅེར་བ་དང་། ཚ་གྲང་གི་རེག་པ་ལས་སྐྱོབ། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོ་བའི་གོས་སུ་གནང་བས། སྟོན་པ་སངས་རྒྱས་ཀྱིས་སོགས་སྔར་ལྟར། ལྷུང་བཟེད་གཏད་དེ། འདི་ལྷུང་བཟེད་ཅེས་བྱ་བ་ཁྱིམ་པ་དང་མུ་སྟེགས་བྱེད་སོགས་ལས་སྣོད་སྤྱད་ཀྱི་རྟགས་ཁྱད་པར་དུ་གྱུར། འདི་ཟས་ཀྱི་འགེངས་པ་བཞིན་དུ་རང་གི་ཤེས་རྒྱུད་ཡོན་ཏན་གྱིས་འགེང་། འདིའི་ནང་ནས་ཟས་ལ་ལོངས་སྤྱོད་པ་བཞིན་དུ་ཆོས་ལ་སྤྱོད་པའི་བརྡར། བསོད་སྙོམས་ཀྱི་ཟས་ལྷུང་བ་བཟེད་པའི་དོན་དུ་གནང་བས། འཆང་བར་གྱིས་ཤིག །གདིང་བ་གཏད་དེ། འདི་ཆོས་གོས་གདིང་བ་ཞེས་བྱ་བ། དགེ་འདུན་གྱི་རྩྭའི་གདན་མ་གཏོགས་པའི་གནས་མལ་དང་། ཁྱིམ་པའི་དཀར་པོ། གང་ཟག་གི་ཁྲ་བོ་ཕལ་ཆེར་མ་ཉམས་པ་ལ་སྤྱོད་པ་ན། འདིས་སྐྱོབས་ཏེ་ཆུད་མ་ཟོས་པར་སྤྱོད་དགོས་པས། དེའི་ཆེད་དུ་འཆང་བར་གྱིས་ཤིག །ཆུ་ཚགས་གཏད་དེ། འདི་ཆུ་ཚགས་ཞེས་བྱ་བ་ཡིན་ཏེ། རབ་ཏུ་འབྱུང་བ་རྣམས་ནི་སེམས་ཅན་ལ་གནོད་པ་གཞི་དང་བཅས་པ་ལས་ལྡོག་དགོས་པས། སྤྱི་སེམས་ཅན་ཐམས་ཅད་ལ་གནོད་པ་སྤང་དགོས་ཤིང་། ཁྱད་པར་ཆུ་ལ་ལོངས་སྤྱོད་པའི་ཚེ་འདིས་སྲོག་ཆགས་རྣམས་རང་གི་གནས་སུ་དོར་ནས་ཆུ་གཙང་མ་ལ་ལོངས་སྤྱོད་པའི་ཆེད་དུ་གནང་བ་ཡིན་པས་འཆང་བར་གྱིས་ཤིག །ཅེས་སྦྱིན། འདིར་མདོ་རྩར་གོས་ངུར་སྨྲིག་སྟེར་བ་ཙམ་ལས་མ་གསུངས་ཀྱང་། ལུང་དང་ཀརྨ་ཤ་ཏཾ་ལས་ལྷུང་བཟེད་སྦྱིན་པར་གསུངས་ཤིང་། གདིང་བ་ཆུ་ཚགས་གཉིས་སྟེར་དགོས་པའི་གསལ་ཁ་མེད་ཀྱང་སྟེར་བ་ཕྱག་ལེན་ནོ། །དེ་ལྟར་གོས་སྦྱིན་ནས་མཁན་པོ་རང་ཉིད་ཀྱིས་བསྐོན་ཞིང་། ཞར་ལ་མཚན་མ་ཚོར་བར་བརྟག །གཞན་ལ་འཆོལ་ན། དགེ་སློང་ཆེ་གེ་མོས། འདིའི་གོས་ཚགས་སློབ་པ་དང་བདག་གི་བྱ་བ་ཡང་སྒྲུབས་མཛོད་ཅིག །ཅེས་བསྒོ། དེས་ཀྱང་གོན་ལུགས་བསླབ་ཅིང་མཚན་བརྟགས་པས་སྐྱོན་མེད་ན། བར་ཆད་དང་མི་ལྡན་པར་གདའ་ཞེས་བརྡ་སྤྲད། གོས་བསྐོན་པའ ི་ཚེ་གཞུང་ནས་མ་བཤད་ཀྱང་ཕྱག་ལེན་ལ། ཀུན་གྱིས་མེ་ཏོག་འཐོར་བ་དང་བཅས། ཐར་པའི་རྒྱལ་མཚན་བརྟན་པར་གྱུར་ཅིག །ཚངས་པར་སྤྱོད་པ་ཚེ་མཐར་ཕྱིན་པར་གྱུར་ཅིག །ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་གྱུར་ཅིག །ཚེ་རབས་ཐམས་ཅད་དུ་རབ་ཏུ་འབྱུང་བ་ཐོབ་པར་གྱུར་ཅིག །ཅེས་སྨོན་ལམ་གདབ་བོ། ༈ །དེ་ནས་བསྒྲུབ་བྱ་དེ་སྟོན་པ་དང་མཁན་པོ་ལ་ཕྱག་གསུམ་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་འདུག་ཅིང་ཐལ་མོ་སྙིང་གར་སྦྱོར་དུ་བཅུག་སྟེ། ཁྱོད་རབ་ཏུ་འབྱུང་བར་འདོད་པ་དེ་ལེགས། ལེགས་པའི་རྒྱུ་མཚན། དགའ་བོ་རབ་ཏུ་བྱུང་བའི་མདོ་ལས། ཁྱིམ་པ་རྣམས་ནི་མེའི་འོབས་ན་གནས་པ་ལྟ་བུའོ། །རབ་ཏུ་བྱུང་བ་རྣམས་ནི་བསིལ་ཁང་ན་གནས་པ་ལྟ་བུའོ། །ཞེས་སོགས་གསུངས་ཤིང་། ཆོ་འཕྲུལ་ཆེན་པོ་བསྟན་པའི་མདོ་ལས་ཀྱང་། སྨད་པར་བྱ་བའི་ཁྱིམ་ལ་བརྟེན་པ་དེ། །བླ་མེད་བྱང་ཆུབ་དམ་པ་གཞར་མི་ཐོབ། །ཅེས་དང་། ཁྱིམ་གྱིས་སྐྲག་སྟེ་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །ཞེས་གསུངས་པ་ལྟར་ཁྱིམ་པ་རྣམས་ནི་འདོད་ཡོན་གྱིས་བཅིངས་པས་བྱང་ཆུབ་ཐོབ་དཀའ་ཞིང་། རབ་ཏུ་བྱུང་བ་རྣམས་ནི་འདོད་ཡོན་ལ་རང་གི་ངང་གིས་ཆགས་པ་དང་བྲལ་བར་བྱེད་ནུས་པའི་དབང་གིས་བྱང་ཆུབ་དམ་པ་རྙེད་སླ་བ་ཡིན་པས། དུས་གསུམ་གྱི་སངས་རྒྱས་ཐམས་ཅད་ཀྱང་རབ་ཏུ་བྱུང་བའི་རྟེན་ལས་སངས་རྒྱས་ཤིང་རྒྱ་བར་འགྱུར་ལ། རྒྱུ་མཚན་དེས་རབ་ཏུ་བྱུང་བ་ནི་དོན་ཆེ་ཞིང་བསོད་ནམས་ཆེ་སྟེ། དགའ་བོ་རབ་ཏུ་བྱུང་བའི་མདོ་ལས། སྟོང་གསུམ་གྱི་སེམས་ཅན་ཐམས་ཅད་ཀྱིས་བསྐལ་པའི་བར་དུ་བུ་དང་ཆུང་མ་སྦྱིན་པར་བཏང་བའི་བསོད་ནམས་བས་རབ་ཏུ་འབྱུང་བའི་བསམ་པས་དགོན་པར་གོམ་པ་གཅིག་བོར་བ་བསོད་ནམས་ཆེ། ཞེས་སོགས་གསུངས་པས། བསོད་ནམས་ཅན་གྱི་རབ་བྱུང་དུ་སྒྲུབ་པའི་སྐབས་འདིར་བརྗེ་བ་རྣམ་པ་གསུམ་བྱ་སྟེ། རྟགས་བརྗེ་བ། མིང་བརྗེ་བ། བསམ་པ་བརྗེ་བའོ། །རྟགས་བརྗེ་བ་ནི། ཁྱིམ་པའི་རྟགས་ཆ་ལུགས་རྣམས་སྤངས་ཤིང་། ལུས་ཀྱི་བྱི་བྱང་དང་། གོས་དང་། སྣོད་སྤྱད་ཀྱི་རྟགས་གསུམ་གྱི་སྒོ་ནས་རབ་ཏུ་བྱུང་བའི་རྟགས་ཆ་ལུགས་སུ་བསྒྲུབ་པ་ཞིག་དགོས་དེ་ཚང་། མིང་བརྗེ་བ་ནི། སྔོན་གྱི་མཁན་པོའི་མིང་གི་མཐའ་ཅན། དཔལ་དང་། འོད་དང་། གྲགས་པ་དང་། བཟང་པོ་སྟེ་བཞི་འམ། ད་ལྟར་གྱི་མཁན་པོའི་མིང་གི་མཐའ་ཅན་གང་རུང་དུ་སྤོ་དགོས་པས། ཁྱོད་ཀྱི་མིང་འདི་ཞེས་བྱ་བ་གྱིས་ཤིག །རྟགས་དང་མིང་བརྗེས་པའི་དགོས་པ་ཡང་བསམ་པ་བརྗེ་བ་ཡིན་པས། སྔར་ཕན་ཆད་ཚེ་འདིའི་བདེ་འབྱོར་སྙན་གྲགས་སོགས་བསྒྲུབ་བྱར་བྱེད་པ་དེ་སྤངས་ནས། ད་ཕྱིན་ཆད་སྐྱེ་བ་ཕྱི་མ་ཕན་ཆད་ཀྱི་དོན་སྒྲུབ་པ་གལ་ཆེ་སྟེ། དེའི་རྒྱུ་མཚན་འཁོར་བ་འདིར་ལྷ་མིའི་ལུས་ཐོབ་ཀྱང་སྡུག་བསྔལ་ལས་མ་འདས་པས་འཁོར་བ་རྒྱུ་དང་བཅས་པ་སྤངས་ཏེ། རྣམ་གྲོལ་གཏན་གྱི་བདེ་བ་སྒྲུབ། དེ་ཡང་རང་གཅིག་པུའི་དོན་དུ་མ་ཡིན། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཐབས་སུ་འོ་སྐོལ་གྱི་སྟོན་པས་རྒྱལ་སྲིད་ཀྱི་འབྱོར་པའང་མཆིལ་མའི་ཐལ་བ་ལྟར་བོར་ནས་རབ་ཏུ་བྱུང་བ་བཞིན་དུ་བདག་ཀྱང་དེའི་རྣམ་ཐར་གྱི་རྗེས་སུ་ཞུགས་ཏེ་རབ་ཏུ་འབྱུང་བ་ཡིན་པས། འཁོར་པ་ལས་སྐྱོབ་པའི་སྐྱབས་དཀོན་མཆོག་གསུམ་ལ་སྐྱབས་སུ་འགྲོ་བའི་སྒོ་ནས་རབ་ཏུ་བྱུང་བའི་རྟགས་ཆ་ལུགས་ཡང་དག་པར་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པས་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི༴ ཆོས་ལ༴ ཚོགས་རྣམས་ཀྱི༴ དགེ་འདུན༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ། ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་འབྱུང་སྟེ། ཁྱིམ་པའི་རྟགས་སྤོང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །ཞེས་ལན་གསུམ་བཟླས་པའི་མཐར་ཐབས་ལེགས་བྱའོ། །རབ་བྱུང་འདི་བར་མ་དགེ་བ་ཙམ་ལས་སྡོམ་པ་དངོས་མ་ཡིན་པས་སྐྱེ་བའི་བར་ཆད་ཅན་ལའང་སྐྱེ་ཞིང་། དགེ་བསྙེན་དང་དགེ་ཚུལ་གྱི་སྡོམ་པ་སོགས་མི་ལེན་པར་འདི་རྐྱང་པ་བྱིན་ཀྱང་སྐྱེ་བར་བཤད་དོ། །དེ་ནས་མཁན་པོས་དགེ་སློང་དགེ་ཚུལ་གྱི་ཆོ་ག་ལ་མཁས་པ་སོགས་ཆོས་བཅུ་ལྡན་ཞིག་ལ། དགེ་སློང་ཆེ་གེ་མོས་ཚེ་དང་ལྡན་པ་འདི་དགེ་ཚུལ་ཉིད་དུ་ཉེ་བར་སྒྲུབས་ཤིག །ཅེས་གཏད། དེས་ཅི་ཚེ་དང་ལྡན་པ་འདིའི་བར་ཆད་ཀྱི་ཆོས་རྣམས་ཡོངས་སུ་དག་གམ། ཞེས་དྲིས་པ་ལ། མཁན་པོས། ཡོངས་སུ་དག་གོ་ཞེས་ཁོ་ན་ཉིད་མཆི་ཡིན་གདའ། ཞེས་ལན་གདབ། དེ་ནས་སློབ་དཔོན་གྱིས་བསྒྲུབ་བྱ་དེ་སྟོན་པ་དང་རང་ལ་ཕྱག་གསུམ་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་དགེ་ཚུལ་དུ་སྒྲུབ་པར་བྱེད་པ་ལ། ཆོ་ག་སྦྱོར་བ་དང་། དངོས་གཞི་དང་། མཇུག་གསུམ་ལས། དེ་ཡན་ཆད་ཀྱིས་སྦྱོར་བའི་ཆོས་རྣམས་སོང་ནས། དངོས་གཞིའི་སྐབས་ཡིན། དེ་ཡང་འགལ་རྐྱེན་མེད་ཅིང་མཐུན་རྐྱེན་ཚང་བ་ལས་སྐྱེ་བས་ན། འགལ་རྐྱེན་སྡོམ་པ་སྐྱེ་བ་དང་། གནས་པ་དང་། ཁྱད་པར་དུ་འགྱུར་བ་དང་། མཛེས་པ་ལ་བར་དུ་གཅོད་པ་སྟེ་བཞི་མེད་པ་ཞིག་དགོས་ཏེ། སྔར་མཁན་པོས་དྲིས་ཤིང་ཁྱེད་རང་གིས་ལན་བཏབ་པའི་སྒོ་ནས་བར་ཆད་དང་མི་ལྡན་པར་རྟོགས་པ་དེ་ཡིན། མཐུན་རྐྱེན་ལ་ལྔ་ལས། ཡུལ་མཐུན་པའི་རྐྱེན་ལ་སྐྱབས་འགྲོའི་ཡུལ་དུ་གྱུར་པའི་དཀོན་མཆོག་གསུམ། མཛོད་ལས། སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་གསུངས་པ་ལྟར་འགོགས་ལམ་གྱི་སྟེང་ནས་འཇོག་པས། དེ་ལ་ཡིད་ཆེས་ཀྱི་དད་པ་དང་ལྡན་པའི་སྒོ་ནས། དེ་མཚོན་བྱེད་སངས་རྒྱས་སྟོན་པའི་སྐུ་གཟུགས་དང་། ཆོས་སྤྱིར་སངས་རྒྱས་ཀྱི་བསྟན་པ་གནས་ཤིང་། ཁྱད་པར་འདུལ་བའི་བསླབ་པ་ལ་ནན་ཏན་དུ་བྱེད་པ་དང་། ལས་ཀྱི་ཆོ་ག་ཡོད་པ་དགོས་དེ་ཚང་། དགེ་ཚུལ་གྱི་སྡོམ་པ་གང་ཟག་ལས་སྐྱེ་བས་མེད་ཀ་མེད་ཀྱི་ཡན་ལག་མ་ཡིན་ཀྱང་ངོ་ཚ་ཁྲེལ་ཡོད་ཀྱི་རྟེན་དུ་དགེ་འདུན་དང་བཅས་པ་བཞུགས། མཁན་པོ་བརྟན་མཁས་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པ་ལ་གསོལ་བ་བཏབ་ཅིང་ཞལ་གྱིས་བཞེས་པ་ཞིག་དགོས་ན་དེ་ཡང་ཚང་། སློབ་དཔོན་བསྙེན་རྫོགས་ཀྱི་སྡོམ་པ་དང་ལྡན་ཅིང་དགེ་ཚུལ་གྱི་སྡོམ་པ་འབོགས་པའི་ཆོ་ག་བརྡ་སྤྲོད་པ་ལ་མཁས་པ་ཞིག་དགོས་ཏེ། དེ་བདག་གིས་སྒྲུབ་པས་ཡུལ་དུ་གང་དགོས་ཐམས་ཅད་ཚང་། རྒྱུད་སྣོད་དུ་རུང་བ་མཐུན་པའི་རྐྱེན་ཡང་། བསྒྲུབ་བྱ་བཞིར་མ་ལོངས་ཤིང་། དགེ་ཚུལ་གྱི་སྡོན་པ་དང་སྡོམ་རོས་རྒྱུད་མ་བཀག་པ། ཉེས་མེད་ཀྱི་སྡོམ་པ་སྐྱེ་བ་ལ་ཚིགས་སྔ་མ་དགེ་བསྙེན་སོགས་ཐོབ་ཅིང་མ་ཉམས་པ་དགོས་ན་ཐམས་ཅད་ཚང་། རྟགས་མཐུན་པའི་རྐྱེན་ལའང་། ལུས་བྱི་བྱད་དང་གོས་དང་སྣོད་སྤྱད་གསུམ་གྱི་སྒོ་ནས་རབ་ཏུ་བྱུང་བའི་རྟགས་ཆ་ལུགས་དང་ལྡན་པ་ཞིག་དགོས་ན་བརྙན་པོ་ཚུན་ཆད་ཀྱི་ཐམས་ཅད་ཚང་། བསམ་པ་མཐུན་པའི་རྐྱེན་ལ། རྒྱུའི་ཀུན་སློང་ཞེ་ཐག་པ་ནས་སྡོམ་པ་ལེན་འདོད་དགོས་ཏེ། ཁྱེད་རང་གིས་དོན་དུ་གཉེར་ནས་སྒྲུབ་པས་ཚང་ཞིང་། དུས་ཀྱི་ཀུན་སློང་སྡོམ་པ་ཐོབ་དུས་ཐོབ་ཤེས་ཀྱི་བསམ་པ་སྐྱེ་རུང་ཞིག་དགོས་ཏེ། དེ་ཡང་ཁྱོད་ལ་སྐྱེ་རུང་དུ་ཡོད་ཅིང་། ངེད་ཀྱིས་ཀྱང་བརྡ་སྤྲོད་པ་ཡིན། འགལ་རྐྱེན་ངེས་པ་ལྔ་བྲལ་ཆ་འདྲ་ཞིག་དགོས་ཏེ། སེམས་ཅན་ཆེ་གེ་མོ་ཞིག་ལ་སྤོང་ཞེས་པ་ལྟ་བུ་སེམས་ཅན་ངེས་པ་དང་། ཡུལ་ག་གེ་མོ་ཞིག་ཏུ་བསྲུང་ཞེས་པ་ལྟ་བུ་ཡུལ་ངེས་པ་དང་། ཟླ་བ་གཅིག་གམ་ལོ་གཅིག་གི་བར་དུ་བསྲུང་ཞེས་པ་ལྟ་བུ་དུས་ངེས་པ་དང་། འཐབ་རྩོད་ཀྱི་ཚེ་མ་གཏོགས་བསྲུང་ཞེས་པ་ལྟ་བུ་ཚེ་ངེས་པ་དང་། སྤང་བྱ་བཅུའི་ནང་ནས་འདི་བསྲུང་འདི་མི་བསྲུང་ཞེས་པ་ལྟ་བུ་ཡན་ལག་ངེས་པ་སྟེ། ངེས་པ་དེ་རྣམས་དང་བྲལ་བ་ཞིག་དགོས། དེ་ཐམས་ཅད་མྱང་འདས་ཀྱི་བསམ་པས་ཟིན་པ་ཞིག་དགོས་ཏེ། ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གི་སྡུག་བསྔལ་ལས་སྐྱོབ་པའི་ཆེད་དུ་ལེན་པ་འཇིགས་སྐྱོབ་ཀྱི་ཚུལ་ཁྲིམས་དང་། ཚེ་འདིའི་བདེ་སྐྱིད་ཐོབ་འདོད་དམ། ཕྱི་མར་ལྷ་མིའི་བདེ་འབྲས་འདོད་ནས་ལེན་པ་ལེགས་སྨོན་གྱི་ཚུལ་ཁྲིམས་ཙམ་ལས། དེ་གཉིས་སོ་ཐར་གྱི་སྡོམ་པ་མི་འགྱུར་ཏེ། སོ་སོ་ཐར་པའི་སྡོམ་པ་འདི་ནི་ངེས་པར་འབྱུང་བའི་ཚུལ་ཁྲིམས་ཡིན་པས་སྡུག་བསྔལ་ཅན་གྱི་འཁོར་བ་ལས་ཐར་པ་མྱང་འདས་ཐོབ་པའི་ཆེད་དུ་བླང་དགོས། དེ་ཡང་ཐར་པའི་མཆོག་རྫོགས་པའི་སངས་རྒྱས་ཀྱི་གོ་འཕང་ཡིན་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་ནི་རྒྱུ་བའི་སེམས་ཅན་འདི་ཐམས་ཅད་འདོད་པ་བདེ་བ་འདོད་ཀྱང་ཐབས་མི་མཁས་པས་ལ་ལ་ནི་སྡུག་བསྔལ་གྱི་རྒྱུ་མི་དགེ་བ་རྔམས་པོ་ཆེ་ལ་སྤྱོད། ལ་ལ་ནི་ལས་ངན་གྱི་འབྲས་བུ་སྡུག་བསྔལ་དངོས་ཀྱི་ཡོ་ལང་ལ་སྤྱོད་པས་ཉམ་ཐག་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་མི་ཕན་རྣམ་གྲོལ་གཏན་གྱི་བདེ་བ་ལ་འགོད་དགོས། དེའི་ནུས་པ་ད་ལྟ་བདག་ལ་མི་འདུག་པས་འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་དགེ་ཚུལ་གྱི་སྡོམ་པ་བླང་སྙམ་པའི་བསམ་པ་དུང་དུང་བ་བསྐྱེད་འཚལ། ཆོ་ག་མཐུན་པའི་རྐྱེན་ལ་སྦྱོར་བ་སྔར་སོང་། དངོས་གཞི་དང་། རྗེས་དེ་ལྟ་ཉིད་དུ་སྒྲུབ་པས། དཀོན་མཆོག་གསུམ་སྐྱབས་གནས་སུ་བཟུང་ནས་དགེ་ཚུལ་གྱི་སྡོམ་པ་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པ་གྱིས་ལ་རྗེས་ཟློས་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་དུ། བཙུན་པས་བཟུང་དུ་གསོལ། ཞེས་ལན་གཉིས་བཟླས། ལན་གསུམ་པ་འདི་ལ་སྐྱབས་བརྗོད་དང་བདག་བརྗོད་གཉིས་རྫོགས་མཚམས་གཞན་བརྗོད་ཀྱི་ཐོག་མར་བདག་གིས་སེ་གོལ་གྱི་བརྡ་བྱས་པ་དང་མཉམ་དུ་སྡོམ་པ་སྐྱེ་བ་ཡིན་པས། དུས་དེར་སྡོམ་པ་ཐོབ་སྙམ་པ་དང་། དེ་ནས་ངེད་ལའང་སློབ་དཔོན་ཞེས་བརྗོད་དགོས་པ་། དེ་ཡིད་ལ་ཞོག་ལ་རྗེས་ཟློས་གྱིས། ཞེས་དང་། མཇུག་ཏུ་ཐབས་ལེགས་བྱའོ། །དེས་དངོས་གཞི་གྲུབ་ནས་མཇུག་གི་ཆོ་ག་ལ་གཉིས་ཡོད་པའི། དང་པོ་ཐོབ་པའི་དུས་གོ་བ་དེ་དགེ་སློང་ཆེ་གེ་མོས་མཛོད་ཅིག །ཅེས་བསྒོ། དེས་ཀྱང་ཉི་མ་རྫོགས་པའི་སར་ཕྱིན་ཏེ་གྲིབ་ཚོད་གཞལ། དུས་ཚོད་དང་ཉིན་མཚན་གྱི་ཆ་རྣམས་ངེས་པར་བྱས་ནས། ཁྱོད་དགེ་ཚུལ་དུ་སྒྲུབ་པའི་ཆོ་ག་ལ་སྦྱོར་དངོས་རྗེས་གསུམ་ཡོད་པའི། སྦྱོར་དངོས་གཉིས་ཀྱིས་ཁྱོད་ཀྱི་རྒྱུད་ལ་དགེ་ཚུལ་གྱི་སྡོམ་པ་ཐོབ་པ་ཡིན། ད་མཇུག་ཆོ་ག་ལ་གཉིས་ཡོད་པའི། དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་ཐོབ་པའི་དུས་གོ་བའི་དབང་དུ་བྱས་ན། ལུང་དང་ཀརྨ་ཤ་ཏཾ་དང་། མདོ་རྩ་བ་རྣམས་སུ་ཕྲ་རིམ་ནས་གསུངས་ཀྱང་། གཞི་འབྲེལ་མཁན་པོས་ཕྲ་རིམ་ནས་བཙལ་ནས་རགས་རིམ་ནས་བརྗོད་པར་གསུངས་ཤིང་། ལོ་ཚིགས་ཤེས་པའི་ཕྱིར་ལོ་ཡང་བརྗོད་དགོས་པར་གསུངས་པ་དང་བསྟུན་ན། ད་ལོའི་ལོ་འདི་ཆེ་གེའི་ལོ་ཡིན། དེ་ལ་ལོ་འགོ་འཛིན་ལུགས་མི་འདྲ་བ་མང་ཡང་ཀརྨ་ཤ་ཏཾ་ལས། དུས་ཚོད་ནི་ལྔ་སྟེ། དགུན་གྱི་དུས་དང་། ཞེས་སོགས་གསུངས་ཤིང་དེ་ཡང་ཧོར་ཟླ་དང་སྦྱར་ན། ཉེ་སྙིང་ལས། བདག་གི་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །འདིར་ནི་རབ་ཏུ་བརྗོད་པ་ཡིན། །ཞེས་གསུངས་པས་སྨིན་དྲུག་ཟླ་བའི་ཕྱེད་སྔ་མས་སྟོན་ཟླ་ཐ་ཆུང་རྫོགས་ནས། དེའི་ཕྱེད་ཕྱི་མ་ནས་ལོ་འགོ་འཛིན་པའི་དབང་དུ་བྱས་ཏེ། དགུན་གྱི་དུས་ཟླ་བ་བཞི། དཔྱིད་ཀྱི་དུས་ཟླ་བ་བཞི། དབྱར་གྱི་དུས་ཟླ་བ་གཅིག །དབྱར་ཐུང་ངུ་ཉིན་ཞག་གཅིག །དབྱར་རིང་པོ་གསུམ་དུ་ཞག་གཅིག་གིས་མ་ཚང་བ་རྣམས་སུ་ཡོད་པ་ལས་ཆེ་གེ་ཡིན། ཟླ་བ་ལའང་ཡར་ངོ་མར་ངོ་གཉིས་ལས་ཆེ་གེ་ཡིན། དེ་ལའང་ཡར་ངོའི་གྲལ་ཚེས་བཅོ་ལྔ་དང་། མར་ངོའི་བཅོ་ལྔའམ་བཅུ་བཞི་ལས་ཆེ་གེ་ཡིན། དེ་ལ་ཉིན་མཚན་གྱི་ཆ་ཉི་ཤུ་རྩ་གཉིས་ཡོད་དེ། སྔ་དྲོ་དང་། གུང་དང་། ཕྱི་དྲོ་དང་། མཚན་མོའི་ཐུན་དང་པོ་དང་། ཐུན་དང་པོའི་ཕྱེད་དང་། གུང་ཐུན་དང་། གུང་ཐུན་གྱི་ཕྱེད་དང་། ཐུན་ཐ་མ་དང་། ཐུན་ཐ་མའི་ཕྱེད་དང་། སྐྱ་རེངས་མ་ཤར་བ་དང་། སྐྱ་རེངས་ཤར་བ་དང་། ཉི་མ་མ་ཤར་བ་དང་། ཉི་མ་ཤར་བ་དང་། ཉི་མ་བརྒྱད་ཆ་ཤར་བ་དང་། ཉི་མ་བཞི་ཆ་ཤར་བ་དང་། གུང་ཚིགས་མ་ཡོལ་བ་དང་། ཉི་མ་བཞི་ཆ་ལུས་པ་དང་། ཉི་མ་བརྒྱད་ཆ་ལུས་པ་དང་། ཉི་མ་མ་ནུབ་པ་དང་། ཉི་མ་ནུབ་པ་དང་། རྒྱུ་སྐར་རྣམས་མ་ཤར་བ་དང་། རྒྱུ་སྐར་རྣམས་ཤར་བ་སྟེ་ཉི་ཤུ་རྩ་གཉིས་ལས། ཆེ་གེའི་དུས། ཉིན་མོ་ཡིན་ན། གྲིབ་ཚོད་སྐྱེས་བུ་ཆེ་གེ་དང་། རྐང་པ་ཆེ་གེའི་དུས་སུ། བཀྲ་ཤིས་པའི་གཙུག་ལག་ཁང་ངམ་གནས་འདི་ཞེས་བྱ་བར། མཁན་པོ་ཆེ་གེ་དང་། སློབ་དཔོན་ཆེ་གེ་ལས་དགེ་ཚུལ་གྱི་སྡོམ་པ་ཐོབ་པ་ཡིན་པས། དེ་ངེས་པར་བྱས་ནས། བསྙེན་བཀུར་གྱི་གནས་ནི། དགེ་སློང་ཐམས་ཅད་དང་། དགེ་ཚུལ་རང་བས་བསླབ་པ་རྒན་པ་རྣམས་ཡིན། གནས་མ་ཡིན་པ་ནི། དགེ་ཚུལ་རང་བས་བསླབ་པ་གཞོན་པ་རྣམས་དང་། རྟེན་དམན་པ་དགེ་སློང་མ་སོགས་བུད་མེད་རབ་ཏུ་བྱུང་བ་ཐམས་ཅད་དང་། དགེ་བསྙེན་མན་ཆད་ཁྱིམ་པ་ཐམས་ཅད་ཡིན། དེ་ཡང་རྒན་གཞོན་གྱི་ཁྱད་པར་རགས་པ་ལོ་ཟླ་འཇོག་པར་མ་ཟད། ཐ་ན་གྲིབ་མ་སོར་གཅིག་ཡན་ཆད་ཀྱིས་ཀྱང་འཇོག་པས། དེ་ལྟར་ཤེས་པར་བྱས་ནས། བསྙེན་བཀུར་གྱི་གནས་རྣམས་གྲལ་གོང་དུ་ཞོགས། རྙེད་པ་དང་པོར་ཕུལ། ཕྱག་འཚལ། སྔོན་ལ་ལྡང་བ་སོགས་གུས་པའི་ལས་རྣམས་ཡར་སྟོབས། གནས་མ་ཡིན་པ་རྣམས་རང་གི་གྲལ་འོག་ཏུ་ཞོགས། ཕྱག་དང་བསྙེན་བཀུར་སྟོབ་པ་བྱུང་ན་དང་དུ་ལོང་། འོན་ཀྱང་དགེ་སློབ་མ་དང་དགེ་སློང་མ་གཉིས་བསླབ་ཚིགས་མཐོ་བས་དེ་གཉིས་ཀྱི་ཕྱག་མ་ལེན། དེ་ལྟར་བརྩིས་པས་དགེ་ཚུལ་ནང་དུས་མཉམ་པ་བྱུང་ན་གཅིག་གིས་གཅིག་ལ་ཕྱག་བྱ་མི་དགོས་ཤིང་། གྲལ་ཡང་མགྱོགས་གྲལ་དུ་བྱས་པས་ཆོག །དེ་ལྟར་བྱས་པས་གནས་སྐབས་སུ་སྡོམ་པ་ཐོབ་པའི་དུས་ཤེས་ཤིང་རྒན་པ་ལ་བསྙེན་བཀུར་བས་གཞན་རྒྱུད་ཀྱི་བསླབ་པ་ལ་གུས་པ་དང་། གཞོན་པའི་བསྙེན་བཀུར་དང་དུ་བླངས་པས་རང་རྒྱུད་ཀྱི་བསླབ་པ་ལ་གུས་པ་དང་། གྲལ་འཁྲུག་ལོང་དུ་མི་འགྱུར། སྦྱིན་བདག་དང་བ་འདྲེན་ཅིང་། ཡ་རབས་ཀྱི་ལུགས་དང་མཐུན། མཐར་ཐུག་སྟོན་པའི་བཅས་པ་བཞིན་དུ་བསླབ་པས། རྣམ་པ་ཐམས་ཅད་མཁྱེན་པ་སངས་རྒྱས་ཐོབ་པའི་དགོས་པ་ཡོད་པས། དེ་རྣམས་ཐུགས་ལ་བཞག་ནས་ཕྱག་ལེན་ལ་ཐེབས་པ་མཛོད། དེ་མཇུག་ཆོག་དང་པོ་ལགས། གཉིས་པ་དགེ་བའི་བཤེས་གཉེན་པས་གསུངས་པར་འགྱུར་བས་དེ་ལ་གསན་པས་མཆི་བར་གདའ། དེ་ནས་སློབ་དཔོན་གྱིས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་སེམས་ལ་གཞག་ནས་ལག་ལེན་ལ་ཐེབས་པ་བྱ་དགོས། ད་མཇུག་ཆོག་གཉིས་པ་མི་ཉམས་ཤིང་འཕེལ་བར་བྱ་བའི་ཕྱིར་བསླབ་པ་བརྗོད་པ་ནི། སྡོམ་པ་ཐོབ་པ་ཙམ་གྱིས་མི་ཆོག་གཅེས་སྤྲས་ཀྱི་སྒོ་ནས་བསྲུང་དགོས། བསྲུང་ལུགས་བསླབ་བྱ་བཅུ་པོ་འཁོར་དང་བཅས་པ་འཕགས་པ་དགྲ་བཅོམ་པ་རྣམས་ཀྱི་ཇི་ལྟར་བསྲུངས་པ་བཞིན་དུ་བདག་གིས་ཀྱང་བསྲུང་སྙམ་པས་རྗེས་ཟློས་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པ་འདིས་བདག་འཕགས་པ་དགྲ་བཅོམ་པ་དེ་དག་གིས་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གཅིག་གི་རྗེས་སུ་ཐབས་ལེགས་བྱའོ། །དེ་རྣམས་བསླབ་བྱ་བརྗོད་པ་ཡིན་པས་ཇི་ལྟར་ཁས་བླངས་པ་བཞིན་ལེགས་པར་སྲུངས་ཤིག །དེ་ལྟར་དགེ་ཚུལ་དུ་གྱུར་ནས་ཁྱིམ་པ་ཐམས་ཅད་ཀྱིས་ཕྱག་བྱ་བའི་གནས་ཐོབ་པ་ཡིན་ཏེ། ས་གའི་ལྷས། དེ་ལྟར་དགེ་ཚུལ་བྱས་མ་ཐག །འདི་ལ་ཁྱིམ་པ་ཐམས་ཅད་ཀྱིས། །ཕྱག་འཚལ་སྨོན་པར་འགྱུར་བ་སྟེ། །གང་ཕྱིར་ཁྱིམ་གྱི་འཆིང་གྲོལ་ཕྱིར། །ཞེས་གསུངས་པ་ལྟར་ཕན་ཡོན་ཆེན་པོ་མངའ་བས་དགའ་བ་སྒོམས། དེ་མཁན་པོའི་སྐུ་དྲིན་ཡིན་པས་བཏང་རག་གི་ཕྱག་གསུམ་འཚོལ་ལ་བཀའ་དྲིན་ཆེ་ལགས་ཞེས་བརྗོད་ཅིག །མེ་ཏོག་འཐོར་བཞིན་དུ་ཐམས་ཅད་ཀྱིས་སྨོན་ལམ་རྣམ་བཞི་གདབ་བོ། །དགེ་ཚུལ་དུ་སྒྲུབ་པའི་ཆོ་གའོ། ༈ །གཉིས་པ་ཚིགས་ཕྱི་མ་བསྙེན་རྫོགས་སུ་སྒྲུབ་པའི་ཆོ་ག་ནི། བསྒྲུབ་བྱ་དེ་ལོ་ཉི་ཤུ་ལོན་ཞིང་བསྙེན་རྫོགས་འདོད་ན། སྟོན་པའི་སྐུ་གཟུགས་ཀྱི་སྤྱན་སྔར་མཆོད་པ་བཤམ། ཆོས་གོས་སོགས་ཡོ་བྱད་རྣམས་བརྙན་པོ་ཚུན་ཆད་ཀྱིས་བཙལ་ལ། ཆོས་གོས་རྣམས་བྱི་ནང་མགོ་མཇུག་མ་ལོག་པར་བཞི་ལྟབ་ཏུ་བྱས་ཏེ་བརྐྱང་པ་དང་། ལྷུང་བཟེད། གདིང་བ། ཆུ་ཚགས་རྣམས་མཁན་པོ་དང་ཉེ་བར་བཞག །མེ་ཏོག་དང་། སྟན་གྱི་རྩྭ་ཕ་གུ་དང་བཅས་པ་སྟ་གོན་བྱ། ལས་ཀྱི་གནས་དེར་འདུ་བའི་དགེ་སློང་ཐམས་ཅད་ཀྱི་རང་རྒྱུད་ལ་བརྟགས་ཏེ། ལྟུང་བ་ཡོད་ན་བཤགས་བསྡམ་བྱིན་གྱི་རློབ་པ་སོགས་གང་ལ་གང་འོས་ཀྱིས་ཕྱིར་བཅོས་པས་རྒྱུད་དག་བར་བྱས་ཏེ་ལས་གྲལ་དུ་འདུས་པ་དང་། བསྒྲུབ་བྱ་དེ་ཕ་གུའི་སྟེང་དུ་རྩྭ་བཏིང་བ་ལ་བཞག་མཁན་པོ་ཉིད་དུ་ཕྱོགས་པ་དེས་དགེ་འདུན་ཐམས་ཅད་ལ་མེ་ཏོག་ཕུལ་ནས་འགྲེངས་ཏེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི། དགེ་འདུན་ལས་བསྙེན་པར་རྫོགས་པར་འཚལ་ནས། དགེ་འདུན་ལས་བསྙེན་པར་རྫོགས་པར་གསོལ་ན། དགེ་སློང་དགེ་བའི་བཤེས་གཉེན་ཆེ་གེ་མོས་ལས་ཀྱི་སློབ་དཔོན་བཀས་གནང་བ་ཞུ། དགེ་སློང་ཆེ་གེ་མོས་གསང་སྟེ་སྟོན་པའི་སློབ་དཔོན་བཀས་གནང་ཞུ། དགེ་སློང་ཆེ་གེ་མོས་དབུ་མཛད་པ་རྣམས་ཀྱིས་ལས་ཀྱི་ཁ་སྐོང་བར་མཛད་ནས། ཚེ་དང་ལྡན་པ་འདི་ལ་བསྙེན་པར་རྫོགས་པའི་སྡོམ་པ་བཀས་གནང་བ་ཞུ། དངོས་དེ་ལྟར་གཡར་ངོ་འཕྱར་ཞིང་མཆིས་ལགས། ཞེས་གསོལ་བ་གདབ། འདི་ལས་གྲལ་དུ་འདུས་ནས་མཛད་པ་ཕྱག་ལེན་ཏེ། བསྟན་པའི་རྣམ་བཞག་མ་ཉམས་ཙམ་ཡིན་གྱི། གཞུང་གི་འགྲོས་དང་བསྟུན་ན་ལས་གྲལ་དུ་མ་འདུས་གོང་དུ་ཚིག་གིས་གསོལ་བ་བཏབ་པས་ཆོག་པར་གསུངས་སོ། །དེ་ནས་བསྒྲུབ་བྱ་ལ། སྟོན་པའི་སྐུ་གཟུགས་འདི་ལ་སྟོན་པ་དངོས་ཀྱི་འདུ་ཤེས་ཞོག་ལ་ཕྱག་གསུམ་གྱིས་ཞེས་འཚལ་དུ་གཞུག །རང་ཉིད་དགེ་འདུན་གྱི་ནང་དུ་འཇུག་པའི་དོན་དུ་དགེ་སློང་རེ་རེ་ལ་ཕྱག་གསུམ་གསུམ་གྱིས། ཞེས་ཡན་ལག་ལྔ་ས་ལ་གཏུགས་པའམ་སྒྱིད་པ་ལ་འཁྱུད་དེ་མགོ་བོས་རྐང་པ་ལ་གཏུགས་པའི་ཕྱག་གཉིས་གང་ཡང་རུང་པ་འཚལ་དུ་གཞུག་ཅིང་། ཕྱག་འཚལ་བའི་ཚེ་དགེ་སློང་རེ་རེས་ཀྱང་། བསྙེན་པར་རྫོགས་པ་དགེ་སློང་གི་སྡོམ་པ་མྱུར་དུ་ཐོབ་པར་གྱུར་ཅིག །ཅེས་སྨོན་ལམ་གདབ་ཅིང་མེ་ཏོག་འཐོར་རོ། ༈ །དེ་ནས་བསྒྲུབ་བྱ་དེ་རྩྭའི་སྟེང་ནས་མཁན་པོ་ལ་ཕྱག་གསུམ་འཚལ་དུ་བཅུག་ནས། ཕ་གུའི་སྟེང་དུ་རྩྭ་བཏིང་བ་ལ་རྟིང་བ་གཉིས་ཀྱིས་མནན་ནས་ཙོག་ཙོག་པོས་སྙིང་གར་ཐལ་སྦྱར་གྱི་འདུག་ཏུ་བཅུག་སྟེ། ཁྱོད་སྔོན་གྱི་དགེ་བ་དང་སྨོན་ལམ་གྱི་དབང་གིས་རྟེན་ཕུན་སུམ་ཚོགས་པ་མི་ལུས་རིན་པོ་ཆེ་ཐོབ་ཅིང་། སངས་རྒྱས་ཀྱི་བསྟན་པ་ལ་རིམ་གྱིས་བསླབས་ཏེ། བསྙེན་པར་རྫོགས་པ་དགེ་སློང་གི་སྡོམ་པ་ནོད་པར་འདོད་པ་དེ་ཤིན་ཏུ་ལེགས། ལེགས་པའི་རྒྱུ་མཚན། ད་རེས་ཁམས་གསུམ་འཁོར་བ་སྡུག་བསྔལ་གྱི་རང་བཞིན་ཅན་འདི་ལས་ཐར་བ་རྣམ་གྲོལ་གཏན་གྱི་བདེ་བ་ཐོབ་པའི་ཆེད་དུ་རྒྱལ་བའི་བསྟན་པ་ལ་བསླབ་དགོས་ཤིང་། བསྟན་པའི་སྙིང་པོ་སྡེ་སྣོད་གསུམ་གྱི་ཉམས་སུ་བླང་བྱ་བསླབ་པ་རིན་པོ་ཆེ་རྣམ་པ་གསུམ་ཡིན། དེ་ཡང་འཁོར་བ་དངོས་ཀྱི་གཉེན་པོ་རྣམ་པར་མི་རྟོག་པའི་ཤེས་རབ་ནི་ལམ་གྱི་གཙོ་བོ་ཡིན་མོད་ཀྱི། དེའི་རྒྱུ་ཡང་དམིགས་པ་ལ་རྩེ་གཅིག་པའི་ཏིང་ངེ་འཛིན་དགོས་ལ། དེ་ཡང་འགྱོད་པ་མེད་པའི་ཚུལ་ཁྲིམས་རྣམ་པར་དག་པ་ལས་འགྲུབ་ཅིང་། ཚུལ་ཁྲིམས་ཀྱང་འདིར་སོ་སོ་ཐར་པའི་སྡོམ་པ་རིགས་བརྒྱད་ལས་མཆོག་ཏུ་གྱུར་པ་དགེ་སློང་གི་སྡོམ་པ་ཡིན་ཏེ། ལུང་ལས། སངས་རྒྱས་བསྟན་པ་རིན་ཆེན་སྒྲོན། །འབར་བའི་སྣོད་ནི་དཀའ་ཐུབ་ཅན། །དུར་སྨིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་གསུངས། དེ་ལྟ་བུའི་ཕན་ཡོན་ཅན་གྱི་བསྙེན་རྫོགས་སུ་སྒྲུབ་པའི་ཚུལ་ཡང་། སྔོན་སྟོན་པ་རྫོགས་སངས་རྒྱས་ནས་རིང་པོ་མ་ལོན་པའི་དུས་ཀྱི་གདུལ་བྱ་རྣམས་ནི་ཉོན་མོངས་པ་དང་། རྣམ་པར་སྨིན་པ་དང་། ལས་ཀྱི་སྒྲིབ་པ་གསུམ་ཤས་ཆུང་ཞིང་། ཤེས་རབ་དང ། རྒྱུད་དབང་པོ་དང་། དགེ་བའི་རྩ་བ་སྨིན་པ་ཤས་ཆེ་བས་འཁྲིག་ཅིང་སྐྱོང་བར་བྱེད་པ་ལ་ལྟོས་མི་དགོས་པའི་ཕྱིར་ཚུལ་ཤོག་ལ་སོགས་པ་ཐབས་སླ་བ་མང་པོ་དང་། མཁན་སློབ་མེད་པར་དགེ་འདུན་གྱིས་གསོལ་བཞིའི་ལས་ཀྱིས་རབ་བྱུང་བསྙེན་རྫོགས་གཅིག་ཅར་དུ་སྒྲུབ་པ་སོགས་སྔོན་གྱི་ཆོ་ག་རྣམས་གསུངས་མོད་ཀྱི། དུས་ཕྱིས་སེམས་ཅན་སྨིན་ཤས་ཆུང་ཞིང་སྒྲིབ་གསུམ་ཤས་ཆེ་བས་ཀུན་ཏུ་སྤྱོད་པའི་ཁྱད་པར་མི་ཤེས་པ་སློབ་དགོས་པར་འགྱུར་ཞིང་། ལུས་ཀྱི་འབྱུང་བ་ཆ་མ་སྙོམས་པས་ན་བར་གྱུར་པ་དག་ལ་ནད་གཡོགས་དགོས་པ་སོགས་འཁྲིད་ཅིང་སྐྱོང་བ་ལ་ལྟོས་པའི་ཕྱིར་ཚེགས་དང་བཅས་པ་ད་ལྟར་གྱི་ཆོ་གའི་སྒོ་ནས་བསྙེན་པར་རྫོགས་པ་སྒྲུབ་འཚལ། དེ་ལའང་ཆོ་ག་སྦྱོར་དངོས་རྗེས་གསུམ་གྱི་སྦྱོར་བ་ལའང་དྲུག་ལས། ཡོ་བྱད་ཚགས་སུ་གཞུག་ཅིང་དཀོན་མཆོག་གསུམ་དང་སློབ་དཔོན་མངོན་དུ་འགྱུར་བར་བྱ་བའི་ཕྱིར་དང་པོར་བྱ་བ་སོང་ནས། ད་མཁན་པོ་མངོན་དུ་འགྱུར་བར་བྱ་བའི་ཕྱིར། སྦྱོར་ཆོག་གཉིས་པ་མཁན་པོར་གསོལ་བ་འདེབས་པའི་སྐབས་ཡིན། མཁན་པོའི་དོན་ཡང་། ཉེ་བསྒྱུར་ཨུ་པ་སྔོན་མའི། དྷ་ར། སནྡྷི། བི་ཀཱ་ར་ཎ་ཞེས་པས། ཉེ་བར་འཛིན། ཉེ་བར་སྦྱོར། ཉེ་བར་ལུང་འབོགས་པའི་དོན་ཏེ། བརྩེ་བས་འཁོར་བར་ལྟུང་བ་ལས་ཉེ་བར་བཟུང་ནས། བསླབ་པ་རིན་པོ་ཆེ་ལ་ཉེ་བར་སྦྱར་ཏེ། འཇུག་ལྡོག་གི་བསླབ་བྱ་དག་ཉེ་བར་ལུང་འབོགས་པར་བྱེད་པས་ན་མཁན་པོ་ཞེས་བྱ། དེ་ཡང་བཙུན་པ་བརྟན་པའི་ཡན་ལག་ཏུ་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་དང་། མཁས་ཤིང་ཕན་ཐོགས་པའི་ཡན་ལག་ཏུ་ལྔ་ཕྲུགས་ཉི་ཤུ་རྩ་གཅིག་ལས་གང་རུང་དང་ལྡན་པ་སྟེ། བརྟན་མཁས་ཀྱི་ཡོན་ཏན་གཉིས་དང་ལྡན་པ་ཞིག་དགོས་པ་ཁོ་བོས་འགྲུབ་རུང་དུ་ཡོད་པས། བཙུན་པའམ་སྔར་གྱི་མཁན་སློབ་ཡིན་ན་དགེ་ཚུལ་གྱི་སློབ་དཔོན་ནམ། རབ་བྱུང་གི་མཁན་པོ་ལ་ད་བསྙེན་རྫོགས་ཀྱི་མཁན་པོ་ཞུ་སྙམ་པ་གྱིས་ལ་རྗེས་ཟློས་གྱིས། བཙུན་པའམ་སློབ་དཔོན་ནམ་མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ། བཙུན་པའམ་སློབ་དཔོན་ནམ་མཁན་པོ་ལ་མཁན་པོར་གསོལ་གྱི། བཙུན་པའམ་སློབ་དཔོན་ནམ་མཁན་པོ། བདག་གི་མཁན་པོ་མཛད་དུ་གསོལ། བཙུན་པའམ་སློབ་དཔོན་ནམ་མཁན་པོས་བསྙེན་པར་རྫོགས་པར་བགྱིའོ། །ལན་གཉིས་བཟླས་ནས། ལན་གསུམ་པའི་ཆ་གསུམ་པ་ལ་གང་ཡིན་ཀྱང་མཁན་པོ་མཁན་པོས་ཞེས་བརྗོད་ཅིང་། མཇུག་ཏུ་ཐབས་ལེགས་བྱའོ། །དེ་ནས་ཡོ་བྱད་མངོན་དུ་འགྱུར་བར་བྱ་བའི་ཕྱིར་སྦྱོར་ཆོག་གསུམ་པ་རྟགས་དང་ཆ་ལུགས་སྦྱིན་པ་ཡིན་པས་ཕྱག་གསུམ་འཚོལ་ལ་ངེད་ཀྱི་མདུན་དུ་ཤོག་ཅིག །ཅེས་བསྒོ། གྲོགས་དན་གྱི་ཆོས་གོས་གསུམ་སོ་སོར་བལྟབ་སྟེ་བསྒྲུབ་བྱའི་ཕྲག་པ་གཡོན་ལ་བཀལ་ནས། འདི་ལ་དངོས་དང་། འདི་ལ་རྒྱུའི་བྱིན་རླབས་འཆགས་པར་གདའ་ཞེས་བརྡ་སྤྲད། མཁན་པོས་ཀྱང་དེ་ལ། ཚེ་དང་ལྡན་པ་འདིའི་ལྷུང་བཟེད་དགེ་འདུན་ལ་སྟོན་ཅིག །ཅེས་བསྒོ། དེ་ནས་མཁན་པོ་དང་བསྒྲུབ་བྱ་གཉིས་ཀ་འགྲེང་སྟེ་གཉིས་ཀའི་ལག་གཡོན་འོག་དང་གཡས་སྟེང་དུ་བྱས་པས་སྣམ་སྦྱར་བཟུང་ནས། འདི་སྣམ་ཕྲན་དང་གླེགས་བུ་འཐུད་ཅིང་སྦྱར་བས་སྣམ་སྦྱར་ཞེས་བྱ་བ། ཁྱིམ་པ་དང་མུ་སྟེགས་ཅན་དང་རབ་ཏུ་བྱུང་ཡང་བསྙེན་པར་མ་རྫོགས་པ་དགེ་ཚུལ་མན་ཆད་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོལ། ངོ་ཚ་དང་ཁྲེལ་ཡོད་ཀྱི་བསམ་པ་ཁྱད་པར་ཅན་བསྐྱེད། ལྷ་དང་བཅས་པའི་མཆོད་རྟེན་དུ་འགྱུར་པའི་ཕྱིར་གནང་བས། འདི་དགེ་སློང་གི་འཚོ་བའི་ཡོ་བྱད་སྣམ་སྦྱར་དུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ། རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ལན་གསུམ་བཟླ། ཐབས་ལེགས་བྱས་ལ་ཕྲག་པ་གཡས་སུ་སྤོ་བ་འོག་མ་རྣམས་ལའང་འགྲེ། དེ་བཞིན་དུ་བླ་གོས་བཟུང་ནས། འདི་སྟོད་དུ་རྒྱུན་དུ་གྱོན་པར་བྱེད་པའི་ཞེས་པ་ནས་གོས་སུ་གནང་བས་ཞེས་པའི་བར་རབ་བྱུང་གི་སྐབས་ལྟར་ལས། འདི་བླ་གོས་སུ་བྱིན་གྱིས་བརླབ་སྙམ་པ་གྱིས་ལ་རྗེས་བློས་གྱིས་བྱ། སྔར་གྱི་སྣམ་སྦྱར་ཅེས་པའི་གནས་སུ་བླ་གོས་ཞེས་འདོན་པ་བསྒྱུར། མཐང་གོས་བཟུང་ནས། འདི་སྨད་ཀྱི་ནང་དུ་གྱོན་པར་བྱེད་པའི་ནས། གོས་སུ་གནང་བས། འདི་མཐང་གོས་སུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས་བྱ། སྣམ་སྦྱར་ཞེས་པ་མཐང་གོས་ཞེས་བསྒྱུར། དེ་ནས་མཐང་གོས་བཀོན་རྗེས། བླ་གོས་དང་སྣམ་སྦྱར་སྦྲགས་ཏེ་མཁན་པོས་བཀོན་པར་བྱ་ཞིང་། ཐམས་ཅད་ཀྱིས་སྨོན་ལམ་བཞི་གདབ། དེས་ཀྱང་སྣམ་སྦྱར་དང་བཅས་པ་ཉིད་ཡིན་ན་རྩྭ་འམ་གདིང་པའི་སྟེང་ནས་བསྙེན་པར་རྫོགས་པའི་ཕྱིར་འདུས་པའི་དགེ་འདུན་ལ་ཕྱག་གསུམ་བྱའོ། །གལ་ཏེ་རེ་ཞིག་ཆོས་གོས་གསུམ་དངོས་ཀྱི་བྱིན་རླབས་འཆགས་པ་མེད་ན། རྒྱུ་དང་ཁ་དོག་གིས་རུང་བའི་གོས་ཁྲུ་གང་ཡན་ཆད་ལ་རྒྱུའི་བྱིན་རླབས་བྱ་སྟེ། སྔར་བཞིན་བཟུང་ལ། བཤད་པ་གཞན་འདྲ་བ་ལས། འདི་སྣམ་སྦྱར་རྒྱུར་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱི་སྟེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བར་ཆད་མ་བྱུང་ན། བཀྲུའོ། །བརྐྱང་ངོ་། །དྲའོ། །ལྟེབ་བོ། །གཟུངས་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་ནི་རུང་བ་སྤྱད་པར་འོས་པའོ། །ལན་གསུམ་བཟླས་ཞིང་ཐབས་ལེགས་བྱ། གཞན་གཉིས་ཀྱང་དེ་དང་འདྲ་བ་ལས། སྣམ་སྦྱར་ཞེས་པའི་གནས་སུ་བླ་གོས་ཞེས་དང་། སྣམ་ཕྲན་བདུན་པར་བགྱི་སྟེ། གླེགས་བུ་ཕྱེད་དང་གསུམ་པར་བགྱིའོ། །ཞེས་དང་། སྣམ་སྦྱར་ཞེས་པ་མཐང་གོས་དང་། སྣམ་ཕྲན་ལྔ་པར་བགྱི་སྟེ། གླེགས་བུ་ཕྱེད་དང་གཉིས་པར་བགྱིའོ། །ཞེས་བརྗེའོ། །ཡང་ཁྱིམ་པའི་གོས་ལ་སོགས་པའམ་ཆོས་གོས་སུ་དྲུབས་ཟིན་ནའང་ཚད་ལས་ཆེ་ཆུང་དུ་གྱུར་པ་དང་རྒྱུ་དང་ཁ་དོག་གིས་མི་ཆུང་བ་རྣམས་ལ་དངོས་དང་རྒྱུའི་བྱིན་རླབས་མི་འཆགས་པས་རྐྱེན་དབང་གིས་བྱིན་གྱིས་བརླབས་ཏེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བས་གོས་འདི་སྣམ་སྦྱང་དུ་བྱིན་གྱིས་བརླབ་བོ། །ལན་གསུམ་བཟླས་ཤིང་ཐབས་ལེགས་བྱ། བླ་གོས་དང་མཐང་གོས་ལའང་འདོན་པ་བསྒྱུར། དེ་ནས་ལྟུང་བཟེད་སྟོན་པར་བསྒོས་པ་དེས། ལྟུང་བཟེད་དུ་སྨན་ནམ་མེ་ཏོག་ཅུང་ཟད་བཅུག་ལ་ལག་གཡོན་པར་བཞག །གཡས་པས་བཀབ་སྟེ། དགེ་སློང་རེ་རེའི་མདུན་དུ་འགྲེང་སྟེ་འདུད་པ་དང་བཅས་པས། རྒན་ན་བཙུན་པའམ། གཞོན་ན་ཚེ་དང་ལྡན་པ་དགོས་སུ་གསོལ། ཚེ་དང་ལྡན་པ་མིང་འདི་ཞེས་བགྱི་བའི་ལྷུང་བཟེད་འདི་མི་ཆུད་དམ། མི་ཆེའམ། མི་སྐྱའམ། ཞེས་དྲི། དེ་ལྟ་བུ་མ་ཡིན་ན་རེ་རེ་ནས་ལྷུང་བཟེད་བཟང་ངོ་། །ཞེས་བརྗོད། མ་བརྗོད་ན་ཉེས་བྱས་སོ། །དེ་ནས་ལྷུང་བཟེད་དེ་མཁན་པོ་དང་བསྒྲུབ་བྱ་གཉིས་ཀ་འགྲེང་བའི་ལག་གཡོན་པར་བཞག །གཡས་པས་བཀབ་ལ། འདི་ལྷུང་བཟེད་ཅེས་བྱ་བ། ཞེས་པ་ནས། ཟས་ལྷུང་བ་བཟེད་པའི་དོན་དུ་གནང་བ་འདི་དགེ་སློང་གི་འཚོ་བའི་ཡོ་བྱད་ལྷུང་བཟེད་དུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་བསླང་བའི་སྣོད་དུ་བྱིན་གྱིས་བརླབ་བོ། །ལན་གསུམ་བཟླས། ཐབས་ལེགས་བྱའོ། །གདིང་པ་གཏད་དེ། འདི་ཆོས་གོས་གདིང་བ་ཞེས་བྱ་བ་ནས། སྤྱོད་དགོས་པས། གདིང་བ་འདི་ལྟ་བུ་བྱིན་གྱིས་བརླབས་ནས་འཆང་བར་གྱིས་ཤིག །དེས་མཚོན་ནས་གཞན་གྱི་ལོངས་སྤྱོད་གང་ལ་ཡང་འཕངས་མེད་དུ་སྤྱོད་པ་ཐམས་ཅད་སྤང་དགོས། ཆུ་ཚགས་གཏད་དེ། འདི་ཆུ་ཚགས་ཞེས་བྱ་བ་ཡིན་ཏེ་ནས་གནང་བ་ཡིན་པས་ཆུ་ཚགས་འདི་ལྟ་བུ་བྱིན་གྱིས་བརླབས་ནས་འཆང་བར་གྱིས་ཤིག །དེས་མཚོན་ནས་ཡོ་བྱད་གང་ལའང་སེམས་ཅན་ལ་མི་གནོད་པར་བྱ་དགོས། དེས་ཡོ་བྱད་མངོན་དུ་གྱུར་པ་བྱས་ཟིན་པས། རེ་ཞིག་དགེ་སློང་འདིའི་ཕྱི་ལ་སོང་ཞིག །ཅེས་བསྒོ། གྲོགས་བྱེད་པའི་དགེ་སློང་དེས་ཀྱང་བསྒྲུབ་བྱ་དེ་ལས་མི་ཐོས་ཤིང་ལས་གྲོལ་ནས་མཐོང་བའི་སར་གདིང་བའི་སྟེང་དུ་ཚོགས་ལ་མངོན་དུ་ཕྱོགས་པར་འགྲེང་སྟེ་ཐལ་སྦྱར་གྱིས་བཞག་ལ། རང་ཉིད་ལས་གྲལ་དུ་འཁོད་དོ། །དེ་ནས་ལས་སློབ་ཏུ་མངོན་དུ་ཕྱོགས་པའི་དགེ་སློང་དེས། གསང་སྟོན་བསྐོ་བའི་ཐོག་མར་ཡུལ་དུས་ཀྱི་སྟོབས་ཀྱིས་བཤགས་པར་མ་ནུས་པའི་ལྟུང་བ་ཐུན་མོང་བ་རྣམས་ཀྱིས་ལས་ལ་མི་སྒྲིབ་པར་བྱ་བའི་ཕྱིར། གསོལ་བའི་ལས་ཀྱི་བྱིན་གྱིས་བརླབ་པར་བགྱི་བས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ལགས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན། གང་གི་མདུན་དུ་བདག་ཅག་ལྟུང་བ་དེ་ཆོས་བཞིན་དུ་སླར་བགྱི་བ། བདག་ཅག་ལས་དགེ་སློང་གནས་གཞན་དུ་མཆིས་ལ། དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་བྱིན་གྱིས་བརླབས་ཏེ་བསྙེན་པར་རྫོགས་པའི་ཕྲིན་ལས་མཛད་ལ། སླད་ཀྱིས་དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །དེ་ནས་སྔར་གནས་ལ་བློ་མཐུན་བྱས་པ་ཞིག་པའམ། མ་བྱས་པ་ཡིན་ན་འདི་ལྟར་བྱ་སྟེ། གནས་ལ་བློ་མཐུན་བགྱི་བས། ལས་མཛད་པའི་གནས་འདི་ཉེ་འཁོར་དང་བཅས་པ་ཚུན་ཆད་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་དང་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བཞེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། དགེ་འདུན་གྱི་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བཞེད་དེ། དེའི་སླད་དུ་དགེ་འདུན་གྱིས། གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་བར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །འདིར་གྲུབ་པ་ནི། བྲག་གི་བྱ་སྐྱིབས་ལྟ་བུ་རང་གྲུབ། བགྱིས་པ་ནི་སྐྱེས་བུས་བྱས་ལ་མ་ཟིན་པ། ལགས་པ་ནི་ཟིན་པ་སྟེ་ཚགས་སུ་ཚུད་པ་ཡིན་པས་སྐབས་སུ་གང་བབས་བརྗོད་དོ། །དེ་ནས་ལས་བྱེད་པས་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བའི་གསང་སྟེ་སྟོན་པར་གསོལ་བ་བཏབ་པ་གང་ཡིན། ཞེས་དྲི། དེས་བདག་དགེ་སློང་མིང་འདི་ཞེས་བགྱི་བ་ལགས། ཞེས་ལན་གདབ། དགེ་སློང་མིང་འདི་ཞེས་བྱ་བ་ཁྱོད་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བ་ལ་གསང་སྟེ་སྟོན་པར་སྤྲོའམ། ཞེས་དྲི། དེས་སྤྲོ་ལགས་ཞེས་ལན་གདབ། ཁོང་སྤྲོ་བར་གདའ་བས་ཡོངས་སུ་དག་པ་མངོན་དུ་འགྱུར་བར་བྱ་བའི་ཕྱིར་སྦྱོར་ཆོག་བཞི་པ་ལྐོག་ཏུ་བར་ཆད་དྲི་བའི་ཆེད་དུ་གསང་སྟེ་སྟོན་པ་བསྐོ་བ་ལ་ཐུགས་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བྱ་བས་མིང་འདི་ཞེས་བགྱི་བ་ལ་གསང་སྟེ་སྟོན་ཏོ། །འདི་ནི་གསོལ་བའོ། །དེ་ནས་གསང་སྟོན་ཕྱི་རོལ་དུ་སོང་སྟེ། བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་བསྙེན་པར་རྫོགས་པར་བྱེད་པ་ལ། འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་ཁོ་བོས་དྲིས་པ་ལས་རྟོགས་པས། དྲི་བ་འདི་རྣམས་ལ་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་ཅིག་དྲི་ཡི། ཁྱོད་མ་འཛེམ་པར་བྱོས་ལ། ཡིན་པ་ལ་ཡིན་ཞེས་སྨྲོས་ཤིག །མ་ཡིན་པ་ལ་མ་ཡིན་ཞེས་ལན་ཐོབ་ཅིག །ཁྱོད་སྐྱེས་པ་ཡིན་ནམ། དེས་ཡིན་ལགས། སྐྱེས་པའི་དབང་པོ་དང་ལྡན་ནམ། དེས་ལྡན་ལགས། ལོ་ཉི་ཤུ་ལོན་ནམ། ལོན་ལགས། ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། ཚང་ལགས། ཁྱོད་ཀྱི་ཕ་མ་གསོན་ནམ། གསོན་ཟེར་ན། ཁྱོད་ཕ་མས་གནང་ངམ། གནང་ལགས། གལ་ཏེ་ཤི་ཟེར་ན། ཁྱོད་བྲན་མ་ཡིན་ནམ། བརྐུས་པ་མ་ཡིན་ནམ། རྙེད་བཙོན་མ་ཡིན་ནམ། རྩོད་པ་ཅན་མ༴ བཙོངས་པ་མ༴ རྒྱལ་པོས་བཀྲབས་པ་མ༴ རྒྱལ་པོ་ལ་བསྡིགས་པ་མ༴ རྒྱལ་པོ་ལ་གནོད་པའི་ལས་བྱེད་པ་མ༴ རྒྱལ་པོ་ལ་གནོད་པའི་ལས་བྱས་སམ་བྱེད་དུ་བཅུག་པ་མ༴ ཆོམ་རྐུན་པར་གྲགས་པ་མ༴ ཟ་མ་མ༴ མ་ནིང་མ༴ དགེ་སློང་མ་སུན་ཕྱུངས་པ་མ༴ རྐུ་ཐབས་སུ་གནས་པ་མ༴ ཐ་དད་དུ་གནས་པ་མ༴ གནས་པར་མི་བྱ་བ་མ༴ མུ་སྟེགས་ཅན་མ༴ མུ་སྟེགས་ཅན་ཞུགས་པ་མ༴ ཕ་བསད་པ་མ༴ མ་བསད་པ་མ༴ དགྲ་བཅོམ་པ་བསད་པ་མ༴ དགེ་འདུན་གྱི་དབྱེན་བྱས་པ་མ༴ དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུངས་པ་མ༴ སྤྲུལ་པ་མ༴ དུད་འགྲོ་མ་ཡིན་ནམ་ཞེས་དྲི། དེས་མ་ཡིན་ལགས། ཞེས་བརྗོད། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ། ཆགས་ཟེར་ན། ཁྱོད་བསྙེན་པར་རྫོགས་ནས་འཇལ་ནུས་སམ། ནུས་ཟེར་ན། ཁྱོད་སྔོན་རབ་ཏུ་བྱུང་བ་མ་ཡིན་ནམ། རབ་ཏུ་བྱུང་ཟེར་ན། ཁྱོད་ལ་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཁྱོད་འབབ་པ་ན་བསླབ་པ་ལེགས་པར་ཕུལ་ལམ། ལྟུང་བ་བྱུང་ངོ་། །ཟེར་ན། འོ་ན་སོང་ཞིག །མ་བྱུང་ཟེར་ན། ཇི་ལྟར་ཁྱོད་ད་ལྟར་རབ་ཏུ་བྱུང་བ་ཡིན་ནམ། དེས་ཡིན་ལགས། ཁྱོད་ཀྱིས་ཚངས་པར་སྤྱོད་པ་ལེགས་པར་སྤྱད་དམ། སྤྱད་ལགས། ཁྱོད་ཀྱི་མིང་ཅི། དེས་བདག་གི་མིང་འདི་ཞེས་བགྱི་བ་ལགས། ཁྱོད་ཀྱི་མཁན་པོའི་མིང་ཅི། དོན་གྱི་སླང་དུ་མཚན་ནས་སྨོས་ཏེ་བདག་གིས་མཁན་པོའི་མིང་འདི་ཞེས་བགྱི་བ་ལགས། ཞེས་བརྗོད། ཚེ་དང་ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་རྣམས་པ་འདི་ལྟ་བུ་འདི་དག་འབྱུང་བ་འདི་ལྟ་སྟེ། མཛེ་དང་། འབྲས་དང་། ཕོལ་མིག་དང་། འབྲུམ་ཕྲན་དང་། ཤ་བཀྲ་དང་། ཁྱི་རྡོ་དང་། གཡའ་བ་དང་། རློག་པ་དང་། རྐང་ཤུ་དང། སྐེམ་ནད་དང་། སྐེམ་པ་དང་། བརྗེད་བྱེད་དང་། བཀྲེས་ངབ་དང་། སྐྱ་སྤབ་དང་། རྐང་བམ་དང་། མཚན་པར་རྡོལ་བ་དང་། རིམས་དང་། རིམས་དྲག་པོ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། རིམ་ཉིན་རེ་བ་དང་། རྟག་པའི་རིམས་དང་། རིམས་ལྡང་དུབ་པ་དང་། ཤུ་བ་དང་། གསུད་པ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུག་བྲོ་བ་དང་། ཆུ་འགགས་པ་དང་། ངལ་བ་དང་། ལུས་ཚ་བ་དང་། རྩིབ་ལོགས་ཚ་བ་དང་། རུས་པ་ལ་ཟུག་པ་སྟེ། ལུས་ཀྱི་ནད་འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མ་མཆིས་ཞེས་བརྗོད། ཚེ་དང་ལྡན་པ་ཁྱོད་ཉོན་ཅིག །ཁྱོད་ལ་ད་ལྟ་ངས་གང་དྲིས་པ་དེ་ཉིད་དགེ་འདུན་གྱི་དབུས་སུ་ཡང་ཚངས་པ་མཚུངས་པར་སྤྱོད་པ་མཁས་པ་རྣམས་ཁྱོད་ལ་འདྲི་ཡིས། དེར་ཡང་ཁྱོད་ཀྱིས་མ་འཛེམ་པར་བྱོས་ལ། ཡིན་པ་ལ་ཡིན་ཞེས་སྨྲོས་ཤིག །མ་ཡིན་པ་ལ་མ་ཡིན་ཞེས་ལན་ཐོབ་ཅིག །ཁྱོད་མ་བོས་ཀྱི་བར་དུ་མ་འོང་བར་སྡོད་ཅིག །ངས་དགེ་འདུན་ལ་ཞུས་ལ་འོང་གི་ཞེས་བརྗོད། དགེ་འདུན་གྱི་ནང་དུ་འོངས་ཏེ་རྒན་པའི་མཐའ་ལོགས་སུ་འགྲེང་སྟེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། བདག་གིས་མཁན་པོ་མིང་འདི་ཞེས་བགྱི་བས། མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་མཆི་ཞིག་གམ། ཐམས་ཅད་ཀྱིས། གལ་ཏེ་ཡོངས་སུ་དག་ནའོ། །ཞེས་བརྗོད། མ་བརྗོད་ན་ཉེས་བྱས་སོ། །དེས་བསྒྲུབ་བྱ་ལ། དགེ་འདུན་གྱིས་གནང་གིས་ཤོག་ཅིག །ཅེས་བོས་ལ། ནང་དུ་གདིང་བའི་སྟེང་ནས་དགེ་འདུན་ལ་འཇུག་ཡོན་གྱི་ཕྱག་གསུམ་འཚལ་དུ་བཅུག་སྟེ། རང་གྲལ་དུ་འཁོད་དོ། །དེ་ནས་ལས་བྱེད་པས། བསྒྲུབ་བྱ་དེ་སྟོན་པ་དང་། དགེ་འདུན་དང་། རང་ལ་ཕྱག་གསུམ་གསུམ་འཚལ་དུ་བཅུག་སྟེ། རང་གི་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་བསྙེན་པར་རྫོགས་པར་འདོད་པ་དེ་དགེ་འདུན་གྱི་ལས་ཀྱིས་སྒྲུབ་དགོས། དེ་ལ་འདི་བསྙེན་རྫོགས་ཀྱི་སྡོམ་པ་སྦྱིན་པའི་ལས་ཡིན་པས། སྦྱིན་ལས་མཚན་ཉིད་པ་ཐམས་ཅད་ལ་གསོལ་བ་གདབ་པ་སྔོན་དུ་འགྲོ་དགོས་པར་གསུངས་ཤིང་། དེར་མ་ཟད་བསྙེན་པར་རྫོགས་པ་དགེ་སློང་གི་སྡོམ་པ་དེ་མངོན་གྱུར་བཅུ་ཚང་བ་ལས་སྐྱེ་བས། འདིར་གསོལ་བ་མངོན་དུ་འགྱུར་བར་བྱ་བའི་ཕྱིར། སྦྱོར་ཆོག་ལྔ་པ་གསོལ་བ་འདེབས་པའི་སྐབས་ཡིན། དེ་ཡང་མཁན་པོས་ངོ་ཆེན་མཛད་དེ། ལས་བྱེད་པའི་ཚིག་གིས་ཐོག་དྲངས་ནས། གང་ལས་སྡོམ་པ་ཐོབ་པར་འགྱུར་བའི་དགེ་འདུན་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་སྟེ་མཚན་ཉིད་གསུམ་ལྡན་ལ་གསོལ་བ་འདེབས། དེ་ལ་ཆོ་གའི་ཚིག་ལ་ཟུར་ལྔ་ཡོད་དེ། ཉེས་པ་མ་ལུས་པ་སྤངས་ཤིང་ཡོན་ཏན་མཐའ་དག་རྫོགས་པའི་རྣམ་པར་གྲོལ་བ་ལ་བསྙེན་པ་དགེ་སློང་གི་དངོས་པོར་སྒྲུབ་ཏུ་གསོལ། འཁོར་བའི་གནས་བརྒལ་དཀའ་བ་འདམ་རྫབ་དང་འདྲ་བ་ནས་དྲང་དུ་གསོལ། སྔར་མ་ཐོབ་པའི་སྡོམ་པ་སྦྱིན་པའི་སྒོ་ནས་སོ་སོ་ཐར་པའི་སྡོམ་པ་མཆོག་དང་ལྡན་པར་བཟུང་དུ་གསོལ། དེའི་བླང་དོར་གྱི་ཐབས་མ་ནོར་བ་བསྟན་དུ་གསོལ། རྙེད་པ་དང་བཀུར་སྟི་ལ་མི་གཟིགས་པར་ཐུགས་བརྩེ་བས་ཀུན་ནས་བསླངས་ཏེ་བསྙེན་པར་རྫོགས་པ་དགེ་སློང་གི་སྡོམ་པ་གནང་བར་མཛད་དུ་གསོལ་སྙམ་པས་ཐམས་ཅད་ཀྱིས་གསན་པའི་རྗེས་ཟློས་གསལ་དག་འཐོན་པར་གྱིས་ཤིག །དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་མཛད་དུ་གསོལ། དགེ་འདུན་བཙུན་པ་རྣམས་ཀྱིས་བདག་དྲང་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་བཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ཞེས་ལན་གསུམ་བཟླས། དེ་ལྟར་གསོལ་བ་བཏབ་པས། དགེ་འདུན་གྱིས་ཀྱང་ཅང་མི་གསུང་བའི་སྒོ་ནས་གནང་བ་བྱིན་པ་ཡིན་ནོ། །དེ་ནས་དགེ་སློང་ལས་བྱེད་པས། ཡོངས་སུ་དག་པར་དགེ་འདུན་ཐུགས་ཆེས་པའི་ཕྱིར་སྦྱོར་ཆོག་དྲུག་པ་ནང་དུ་བར་ཆད་དྲི་བའི་ཐོག་མར་སྔོན་འགྲོ་གསོལ་བའི་ལས་བགྱིད་པས། ཁྱེད་རང་རྗེས་ཟློས་བྱ་མི་དགོས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་ཚལ་ཏེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། བདག་གིས་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་དྲི་བར་བྱའོ། །འདི་ནི་གསོལ་བའོ། །དེ་ནས་བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་སྟེ་སྔར་བཞིན་འདུག་ཏུ་བཅུག་ལ། ཁྱོད་བསྙེན་པར་རྫོགས་པར་བྱེད་པ་ལ་འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་བརྟགས་པའི་ཆེད་དུ་སྔར་གསང་སྟོན་གྱིས་ལྐོག་ཏུ་དྲིས་ཤིང་དགེ་འདུན་གྱི་དབུས་སུ་བར་ཆད་དང་མི་ལྡན་པར་བརྡ་སྤྲད་པ་ཡིན་མོད་ཀྱི། འོན་ཀྱང་བར་ཆད་གློ་བུར་བ་ཡིན་པས་གསར་དུ་བྱུང་བའང་སྲིད། སྔར་མ་དྲན་པ་དྲན་པའང་སྲིད་པ་དང་། གཙོ་བོར་དགེ་འདུན་ཐུགས་ཆེས་པ་ལ་སོགས་ཏེ་དགོས་པ་འགའ་ཞིག་ལ་ལྟོས་ནས་འདིར་ཡང་འདྲི་བ་ཡིན་པས་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཞེས་པ་ནས། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། ཞེས་པའི་བར་སྔར་བཞིན་དྲི་བར་བྱའོ། ༈ །དེ་ཡན་ཆད་ཀྱིས་སྦྱོར་བའི་ཆོས་རྣམས་ལེགས་པར་སོང་ནས། ད་འདིར་དངོས་གཞིའི་ཆོ་གའི་སྐབས་ཡིན། དེ་ལ་བསྙེན་པར་རྫོགས་པའི་སྡོམ་པ་འདི་ཆོས་ཉིད་ཀྱིས་ཐོབ་པ་མ་ཡིན་ཞིང་། ཡང་དག་པར་བླངས་པར་བརྡ་ལས་བྱུང་བ་ཡིན་པས་ཆོ་ག་ཕུན་སུམ་ཚོགས་པ་ལ་བརྟེན་ནས་བླང་དགོས། དེ་ཡང་ལུང་གཅིག་ལས་འཕྲོས་པ་བཅུ་པའི་སྐབས་ལས། མངོན་དུ་གྱུར་པ་རྣམ་པ་བཅུ་ལས་སྐྱེ་བར་གསུངས་ཏེ། བཅུ་གང་ཞེ་ན། སངས་རྒྱས་ཆོས་དང་སྟོན་པ་དང་། །མཁན་པོ་སློབ་དཔོན་བསྙེན་རྫོགས་འདོད། །ཡོ་བྱད་ཡོངས་སུ་དག་པ་དང་། །གསོལ་དང་ལས་ནི་མངོན་སུམ་མོ། །ཞེས་བསྡུས་པའི་དོན་འགལ་རྐྱེན་སྤངས་ཤིང་མཐུན་རྐྱེན་ཚང་བ་ལ་འདུ་ཡང་རེ་རེ་ནས་བརྡ་སྤྲོད་པའི་དབང་དུ་བྱས་ན། དོན་དམ་པའི་དཀོན་མཆོག་གསུམ་ནི། སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སྐྱབས་འགྲོའི་ཡུལ་དུ་གྱུར་པའི་དཀོན་མཆོག་གསུམ་སྟེ། འགོག་ལམ་གྱི་སྟེང་ནས་འཇོག་པས། དེ་ལ་ཡིད་ཆེས་ཀྱི་དད་པ་དང་ལྡན་པའི་སྒོ་ནས། འདིར་མངོན་སུམ་དུ་གྱུར་པ་ནི་བརྡར་བཏགས་པའི་དཀོན་མཆོག་གསུམ་སྟེ། དེ་ལ་སངས་རྒྱས་མངོན་དུ་གྱུར་པ་ནི། སྟོན་པའི་སྐུ་གཟུགས་བྱིན་བརླབས་ཀྱི་གཟི་འོད་འབར་བར་བཞུགས་པ་འདི་ལ་སངས་རྒྱས་དངོས་ཀྱི་འདུ་ཤེས་ཞོག །ཆོས་མངོན་དུ་གྱུར་པ་ནི། འདིར་བཞུགས་པའི་དགེ་སློང་རྣམས་བསླབ་པ་རིན་པོ་ཆེ་ལ་ནན་ཏན་སྙིང་པོར་མཛད་པས་སྒྲུབ་པའི་ཆོས་དང་། ལུང་གི་ཆོས་ཀྱང་ལས་ཀྱི་ཆོ་ག་དངོས་སུ་ཡོད་པ་འདིས་ཚང་། སྟོན་པ་མངོན་དུ་གྱུར་པ་ནི་སངས་རྒྱས་དང་ཟློས་པས་དགེ་འདུན་ལ་འཆད་ཅིང་། དེ་ཡང་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་དགོས་པ་ལས། གྲངས་ནི་ཡུལ་དབུས་དང་མཐའ་ཁོབ་ཀྱི་ཁྱད་པར་གྱིས། བཅུ་ཚོགས་དང་ལྔ་ཚོགས་ཡན་ཆད་ཚང་དགོས་པ་ལ། བོད་འདི་མཐའ་ཁོབ་ཡིན་ཀྱང་དགེ་འདུན་གྱི་གྲངས་ཡུལ་དབུས་དང་མཐུན་པར་བཞུགས། ཞེས་སམ། གལ་ཏེ་ལྔ་ཚོགས་ཡིན་ན། བོད་འདི་མཐའ་ཁོབ་ཡིན་པས་གྲངས་ཚང་བར་བཞུགས། ཞེས་བརྗོད། ཁ་སྐོང་གི་ཆོས་ལ་འདི་ཆོས་ཕྱོགས་པའི་ལས་ཡིན་པས་མི་འདུག་པར་འགྲེང་བ་མ་ཡིན་པ་སོགས་བཅུ་གསུམ་དང་ལྡན་དགོས་ཤིང་། དེའི་ནང་ནས་ཀྱང་དཀའ་ཤོས་འཁྲུལ་བཅས་མ་ཡིན་པ་ཞེས་བསྡམ་བྱའི་ཉེས་བྱས་ཚུན་ཆོད་ཀྱིས་མ་གོས་པ་དགོས་ཏེ། ལྟུང་མཐུན་བྱིན་བརླབས་བྱས་པ་ཚུན་ཆད་ཀྱིས་ཚང་། མ་འདུས་པ་དང་འདུས་པ་ཕྱིར་བཟློག་གི་མི་མཐུན་པ་གཉིས་དང་བྲལ་བ་དགོས་ཏེ། འདིར་འདུ་འོས་ཐམས་ཅད་འདུས་ཤིང་། འདུས་པ་རྣམས་ཀྱང་ཅང་མི་གསུངས་པའི་ཚུལ་གྱིས་གནང་བ་སྟེར་བར་བཞུགས་པས་ཚང་། མཁན་པོ་མངོན་དུ་གྱུར་པ་ནི། བརྟན་མཁས་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པ་ལ་གསོལ་བ་བཏབ་ཅིང་ཞལ་གྱིས་བཞེས་པ་ཞིག་དགོས་ན་དེ་ཡང་ཚང་། སློབ་དཔོན་མངོན་དུ་གྱུར་པ་ལ་གཉིས་ལས། གསང་སྟེ་སྟོན་པའི་སློབ་དཔོན་ཁ་སྐོང་གི་ཆོས་དང་ལྡན་ཞིང་། འགྲོ་བ་བཞི་དང་བྲལ་བ། ལྐོག་ཏུ་བར་ཆད་དྲིས་ནས་ནང་དུ་འོང་བ་ཞུ་བ་ལ་མཁས་པ། དགེ་འདུན་གྱི་ལས་ཀྱི་བསྐོས་ཤིང་ཆགས་པ་དགོས་ན་དེ་ཡང་ཚང་། ལས་ཀྱི་སློབ་དཔོན་ཁ་སྐོང་བར་འོས་པ་དགེ་འདུན་གྱི་དབུས་སུ་ལས་ཀྱི་ཆོ་ག་བརྡ་སྤྲོད་པ་ལ་མཁས་པ་ཞིག་དགོས་ཏེ་བདག་གིས་བགྱིད་པས། གང་ལས་བླང་བའི་ཡུལ་རྣམས་མངོན་སུམ་དུ་གྱུར་པར་བཞུགས་པ་ཡིན། ལེན་པ་པོ་བསྙེན་པར་རྫོགས་འདོད་མངོན་དུ་གྱུར་པ་ནི། ཁྱེད་རང་གི་སྟེང་ནས་རྩི་སྟེ། དེ་ལ་གཉིས་ལས། ལུས་རྟེན་ནི། བསྒྲུབ་བྱ་བཞིར་མ་ལོངས་ཤིང་། བསྙེན་རྫོགས་ཀྱི་སྡོམ་པ་དང་སྡོམ་རོས་རྒྱུད་མ་བཀག་པ། ཉེས་མེད་ཀྱི་སྡོམ་པ་སྐྱེ་བ་ལ་ཚིག་སྔ་མ་དགེ་ཚུལ་མན་ཆད་ཐོབ་ཅིང་མ་ཉམས་པ་དགོས་ན་ཐམས་ཅད་ཚང་། བསམ་རྟེན་ལ་རྒྱུའི་ཀུན་སློང་ཞེ་ཐག་པ་ནས་སྡོམ་པ་ལེན་འདོད་དགོས་ཏེ། ཁྱོད་རང་གིས་དོན་དུ་གཉེར་ནས་བསྒྲུབས་པས་ཚང་ཞིང་། དུས་ཀྱི་ཀུན་སློང་སྡོམ་པ་ཐོབ་དུས་ཐོབ་ཤེས་ཀྱི་བསམ་པ་སྐྱེ་རུང་ཞིག་དགོས་ཏེ། དེ་ཡང་ཁྱེད་ལ་སྐྱེ་རུང་དུ་ཡོད་ཅིང་། ངེད་ཀྱིས་ཀྱང་བརྡ་སྤྲོད་པ་ཡིན། འགལ་རྐྱེན་ངེས་པ་ལྔ་དང་བྲལ་བ་ཞིག་དགོས་ཏེ། སེམས་ཅན་ཆེ་གེ་མོ་ཞིག་ལ་སྤོང་ངོ་ཞེས་པ་ལྟ་བུ་སེམས་ཅན་ངེས་པ་དང་། ཡུལ་ག་གེ་མོ་ཞིག་ཏུ་བསྲུང་ངོ་ཞེས་པ་ལྟ་བུ་ཡུལ་ངེས་པ་དང་། ཟླ་བ་གཅིག་གམ་ལོ་གཅིག་གི་བར་དུ་བསྲུང་ངོ་ཞེས་པ་ལྟ་བུ་དུས་ངེས་པ་དང་། འཐབ་རྩོད་ཀྱི་ཚེ་མ་གཏོགས་བསྲུང་ངོ་ཞེས་པ་ལྟ་བུ་ཚེ་ངེས་པ་དང་། དགེ་སློང་གི་བསླབ་བྱ་ལས་ཕྲ་ཞིང་ཕྲ་བ་རྣམས་བསྲུང་མི་ནུས་པས་རགས་པ་འགའ་ཞིག་བསྲུང་སྙམ་པ་ལྟ་བུ་ཡན་ལག་ངེས་པ་སྟེ། ངེས་པ་དེ་རྣམས་དང་བྲལ་བ་ཞིག་དགོས། མཐུན་རྐྱེན་ཕུན་ཚོགས་གསུམ་དང་ལྡན་པ་ཞིག་དགོས་ཏེ། བླང་བྱའི་ཡུལ་མཁན་སློབ་དགེ་འདུན་དང་བཅས་པ་དང་། བྱེད་པ་ལས་ཀྱི་ཆོ་ག་ལ་སྡོམ་པ་སྐྱེ་བའི་ནུས་པ་ཡོད་སྙམ་པ་ཡིད་ཆེས་ཀྱི་དད་པ་དང་ལྡན་ཞིང་། རང་ཉིད་ཀྱིས་ཀྱང་བསླབ་བྱ་ལ་ཚུལ་བཞིན་དུ་སློབ་ནུས་སོ་སྙམ་པའི་བསམ་པ་དང་ལྡན་པ་ཞིག་དགོས། དེ་ཐམས་ཅད་མྱང་འདས་ཀྱི་བསམ་པས་ཟིན་པ་ཞིག་དགོས་ཏེ་ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གི་སྡུག་བསྔལ་ལས་སྐྱོབ་པའི་ཆེད་དུ་ལེན་པ་འཇིགས་སྐྱོབ་ཀྱི་ཚུལ་ཁྲིམས་དང་། ཚེ་འདིའི་བདེ་སྐྱིད་ཐོབ་འདོད་དམ། ཕྱི་མར་ལྷ་མིའི་བདེ་འབྲས་འདོད་ནས་ལེན་པ་ལེགས་སྨོན་ཀྱི་ཚུལ་ཁྲིམས་ཙམ་ལས། དེ་གཉིས་སོ་ཐར་གྱི་སྡོམ་པར་མི་འགྱུར་ཏེ། སོ་སོར་ཐར་བའི་སྡོམ་པ་འདི་ནི་ངེས་པར་འབྱུང་བའི་ཚུལ་ཁྲིམས་ཡིན་པས། སྡུག་བསྔལ་ཅན་གྱི་འཁོར་བ་ལས་ཐར་པ་མྱང་འདས་ཐོབ་པའི་ཆེད་དུ་བླང་དགོས། དེ་ཡང་ཐར་པའི་མཆོག་རྫོགས་པའི་སངས་རྒྱས་ཀྱི་གོ་འཕང་ཡིན་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་ན་རྒྱུ་བའི་སེམས་ཅན་འདི་ཐམས་ཅད་འདོད་པ་བདེ་བ་འདོད་ཀྱང་ཐམས་མི་མཁས་པས། ལ་ལ་ནི་སྡུག་བསྔལ་གྱི་རྒྱུ་མི་དགེ་བ་རྔམ་པོ་ཆེ་ལ་སྤྱོད། ལ་ལ་ནི་ལས་ངན་གྱི་འབྲས་བུ་སྡུག་བསྔལ་དངོས་ཀྱི་ཡོ་ལང་ལ་སྤྱོད་པས་ཉམ་ཐག་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་མི་ཕན་རྣམ་གྲོལ་གཏན་གྱི་བདེ་བ་ལ་འགོད་དགོས། དེའི་ནུས་པ་ད་ལྟ་བདག་ལ་མི་འདུག་པས། འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེ་ཐོབ་བར་བྱེད་པ་ལ། རྒྱུ་ཚོགས་རྒྱ་ཆེན་པོ་བསགས། སྤང་བྱ་སྒྲིབ་པ་མ་ལུས་པ་སྤོང་དགོས། དེའི་སྤང་གཉེན་ཏིང་ངེ་འཛིན་ལས་བྱུང་བའི་ཟག་མེད་ཀྱི་ཤེས་རབ་བསྐྱེད་པའི་གཞི་ནི་ཚུལ་ཁྲིམས་རྣམ་པར་དག་པ་ལ་རག་ལས་པ་ཡིན་ཏེ། མདོ་ལས། ཚུལ་ཁྲིམས་ལ་བརྟེན་ཚུལ་ཁྲིམས་ལ་གནས་ན། །རིམ་གྱིས་འཕགས་པའི་བདེན་པ་བཞི་པོ་དག །ཡང་དག་ཇི་ལྟ་བ་བཞིན་རྟོགས་པར་འགྱུར། །ཞེས་གསུངས། དེས་ན་སོ་སོར་ཐར་པའི་སྡོམ་པའི་མཆོག་བ སྙེན་པར་རྫོགས་པ་དགེ་སློང་གི་སྡོམ་པ་ཡིན་པས། དེ་བླངས་ལ་ཇི་སྲིད་འཚོའི་བར་དུ་ལེགས་པར་བསྲུང་སྙམ་པ་གྱིས། ཡོ་བྱད་མངོན་དུ་གྱུར་པ་ནི། ཆོས་གོས་གསུམ་དངོས་སམ་རྒྱུར་རུང་བ་དང་། ལྷུང་བཟེད་རུང་བ་ཚད་ལྡན་དགེ་འདུན་ལ་བསྟན་པ་རྣམས་མཁན་པོས་བྱིན་གྱིས་བརླབས་ཏེ། གནང་བ་དང་། གདིང་པ་དང་ཆུ་ཚགས་ཀྱང་མཁན་པོས་ཚིག་གིས་གནང་བ་དགོས་ཏེ། བརྙན་པོ་ཚུན་ཆད་ཀྱིས་ཚང་བ་ཡིན། ཡོངས་སུ་དག་པ་མངོན་དུ་གྱུར་པ་ནི། འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས་ཏེ། གསང་སྟོན་གྱི་ལྐོག་ཏུ་དྲིས་ཤིང་། ཁོ་བོས་ཀྱང་དགེ་འདུན་གྱི་དབུས་སུ་དྲིས་པ་ལ་ཁྱེད་རང་གིས་ལན་བཏབ་པའི་སྒོ་ནས་བར་ཆད་མེད་པར་རྟོགས་པས་ཚངས་བ་ཡིན། གསོལ་བ་མངོན་དུ་གྱུར་པ་ནི། བསྙེན་པར་རྫོགས་པའི་ཕྱིར་བསམ་པ་ཐག་པ་ནས་དགེ་འདུན་ལ་གསོལ་བ་ལན་གསུམ་བཏབ་པ་དེས་ཚང་བ་ཡིན། ལས་མངོན་དུ་གྱུར་པ་ནི། གསོལ་བ་དང་བཞིའི་ལས་ཀྱི་ཆོ་ག་ཚང་ལ་མ་ནོར་མ་འཁྲུགས་པ་ཞིག་དགོས་ཏེ། ད་ལྟ་ཉིད་དུ་ཁོ་བོས་སྒྲུབ་པས་ཚང་བར་གདའ། དེ་ལྟར་ན་མངོན་དུ་གྱུར་པ་བཅུས་སྡོམ་པ་སྐྱེ་བའི་རྒྱུ་ཚོགས་ཐམས་ཅད་ཚང་བ་ཡིན། དེ་ལ་མདོ་སྡེ་པ་ཡན་ཆད། ངེས་འབྱུང་གི་བསམ་པས་ཉེར་ལེན་གྱི་རྒྱུ་བྱས། མངོན་དུ་གྱུར་པ་བཅུས་ལྷན་ཅིག་བྱེད་རྐྱེན་བྱས་ཏེ། དགེ་སློང་གི་སྡོམ་པ་སེམས་པ་དགེ་བ་ས་བོན་དང་བཅས་པའི་ངོ་བོར་སྐྱེ་བར་བཞེད་ནའང་། གཞི་ཐམས་ཅད་ཡོད་པར་སྨྲ་བའི་སྡེ་པ་རང་གི་གྲུབ་མཐའ་དང་བསྟུན་ན། རྒྱུ་དྲུག་དང་རྐྱེན་བཞི་ལས། རྒྱུའི་རྐྱེན་རང་རྒྱུད་ཀྱི་འབྱུང་བ་བཞི་དང་། བདག་པོའི་རྐྱེན་གཞན་གྱི་རྣམ་པར་རིག་བྱེད་དེ་རྐྱེན་གཉིས་ལ་བརྟེན་ནས། བྱེད་རྒྱུ་དང་། ལྷན་ཅིག་འབྱུང་བ་དང་། སྐལ་མཉམ་སྟེ་རྒྱུ་གསུམ་གྱིས་བསྙེན་པར་རྫོགས་པ་དགེ་སློང་གི་སྡོམ་པ་རྣམ་པར་རིག་བྱེད་དང་རིག་བྱེད་མ་ཡིན་པ་གཉིས་ཀྱིས་བསྡུས་པའི་གཟུགས་རྫས་བདུན་ནམ་སྤོང་བ་བདུན་ལྡན་གྱི་ངོ་བོར་སྐྱེ་བ་ཡིན་ནོ། །ད་ཧྲིལ་གྱིས་དྲིལ་ན། དཀོན་མཆོག་གསུམ་མཁན་སློབ་དགེ་འདུན་དང་བཅས་པ་ལ་སེམས་དང་བའི་སྒོ་ནས། སེམས་ཅན་ཐམས་ཅད་ཀྱི་དོན་དུ་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་བསྙེན་རྫོགས་ཀྱི་སྡོམ་པ་བླངས་ལ། དུས་དེང་ནས་ཇི་སྲིད་མ་ཤིའི་བར་དུ་དགེ་སློང་གི་སྤང་བྱ་མཐའ་དག་ནི་སྤང་། གཉེན་པོ་མཐའ་དག་ནི་རྒྱུད་ལ་བསྟེན་པར་བྱ་སྙམ་དུ་ལེན་སེམས་དང་བསྲུང་སེམས་ཀྱི་བསམ་པ་མ་ཡེངས་པར་གྱིས། རྗེས་ཟློས་བྱ་མི་དགོས། ཆོ་ག་ལས་འདས་ན་ལས་མི་འཆགས་སོ་ཞེས་གསུངས་པས་དགེ་འདུན་རྣམས་སྤྱོད་ལམ་བསྟུན། བསྟན་པ་དང་བསྒྲུབ་བྱ་ལ་ཕན་སེམས་དང་། བསམ་པ་ཐག་པ་ནས་ལས་བྱེད་འདོད་དང་། ངེས་འབྱུང་གི་བསམ་པས་ཟིན་པ་སྟེ་ཐུགས་དགོངས་གསུམ་གསལ་བཏབ་ནས་གསོལ་བའི་ལས་ལ་ཐུགས་གཏད་པར་ཞུ་ཞིང་། ཆད་ལྷག་བྱུང་ན་གསོ་བར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་དོ། །འདི་ནི་གསོལ་བའོ། །གསོལ་བ་ཐལ། ལས་བྱེད་པ་དང་པོ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པ་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །ལས་བརྗོད་པ་དང་པོ་ཐལ། གཉིས་པ་ལ་ཐུགས་གཏད་པར་ཞུ་བྱས་ལ། གཉིས་པ་བཟླས་ཏེ། ལས་བརྗོད་པ་གཉིས་པ་ཐལ། གསུམ་པའི་སྐབས་སུ་ལས་འཆགས་པ་ཡིན་ཏེ། མདོ་རྩར། བརྗོད་པ་ཐ་མ་གང་ཡིན་པའི་ཆ་གསུམ་པ་ལ་གྲུབ་པ་ཉིད་དོ། །ཞེས་གསུངས་པས། ཁོ་ན་ཉིད་མཆི་སྟེ་ཡན་ཆད་ངོ་བོ་བརྗོད་པ། དེ་ནས་བསྙེན་པར་རྫོགས་པར་གསོལ་ན་ཞེས་པའི་བྱ་བ་བརྗོད་པ། དེའི་སླད་དུ་མན་ཆད་བྱེད་པ་བརྗོད་པ་ཡིན་པས། བརྗོད་པ་དང་པོ་གཉིས་རྫོགས་པ་གསོལ་ན། ཞེས་པ་དེ་འགག་པ་དང་མཉམ་དུ་ཁྱོད་ལ་སྡོམ་པ་སྐྱེ། ངེད་སློབ་དཔོན་དུ་འགྱུར་བ་ཡིན། དེའི་སླད་དུ་ཞེས་པའི་ཚིག་བྱུང་བ་ན་སྡོམ་པ་སྐྱེས་ཚར་བས་བདག་དགེ་སློང་དུ་གྱུར་སྙམ་དུ་རྫོགས་པའི་འདུ་ཤེས་བསྐྱེད་པ་གལ་ཆེ་བས་སེམས་མ་ཡེངས་པར་གཏད་མཛོད། དགེ་འདུན་རྣམས་བརྗོད་པ་གསུམ་པ་ལ་ཐུགས་གཏད་པར་ཞུ་བྱས་ལ། གསུམ་པ་བཟླས་ཏེ། ལས་བརྗོད་པ་གསུམ་པ་ཐལ། ལས་ཀྱི་མཇུག་སྡུད་ལ་ཐུགས་གཏད་པར་ཞུ། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ནོ། །གལ་ཏེ་ཆོ་ག་ནོར་བའམ་དགེ་སློང་སོང་བ་ལ་སོགས་པས་ལས་འཁྲུགས་ནས་གསོལ་བ་བསྐྱར་དགོས་ན། བཙུན་པ་དག་ཡང་གསོལ་བ་བགྱིའོ། །བྱས་ལ་སྐྱོར། བརྗོད་པ་སྐྱོར་ན། བཙུན་པ་དག་ཡང་རྗེས་སུ་སྒྲོག་གོ་བྱས་ལ་སྐྱོར། གཉིས་པ་སྐྱོར་ན། བཙུན་པ་དག་ཡང་གསོལ་བ་བགྱི་ཞིང་རྗེས་སུ་ཡང་སྒྲོག་གོ་བྱས་བ་བསྐྱར་རོ། །དེ་ལྟར་ན་ཁྱེད་ཀྱི་རྒྱུད་ལ་བསྙེན་པར་རྫོགས་པའི་སྡོམ་པ་འཆལ་ཚུལ་གྱི་རྒྱུན་སྡོམ་ཞིང་འགོག་པ་ཆུའི་ཆུ་ལོན་ལྟ་བུ་དེ་ཐོབ་ཅིང་མངོན་དུ་གྱུར་པ་ཡིན་པས་བདག་དགེ་སློང་གི་དངོས་པོར་གྱུར་ཏོ་སྙམ་དུ་དགའ་བ་སྒོམས་ཤིག །དེས་དངོས་གཞི་གྲུབ་ནས་མཇུག་གི་ཆོ་ག་ལ་གཉིས་ཡོད་པའི། དང་པོ་རྫོགས་པའི་དུས་གོ་བ་དེ་དགེ་སློང་ཆེ་གེ་མོས་མཛོད་ཅིག །ཅེས་བསྒོ། དེས་ཀྱང་ཉིན་མོ་ཡིན་ན་ཉི་མ་རྫོགས་པའི་སར་ཕྱིན་ཏེ། ཐུར་མ་སོར་བཞི་པས་གཞལ་ཞིང་། གྲིབ་མ་སོར་རེ་ལ་རྐང་པ་དང་། བཞི་ལ་སྐྱེས་བུ་ཞེས་བྱ་བའི་ཐ་སྙད་དང་སྔ་ཕྱིའི་ཆ་ཡང་ངེས་པར་བྱ། མཚན་མོ་ཡིན་ན་སྐར་ཁོངས་ཀྱིས་ཐུན་ཚད་ངེས་པར་བྱས་ནས། ཁྱོད་བསྙེན་པར་རྫོགས་པ་དགེ་སློང་དུ་སྒྲུབ་པའི་ཆོ་ག་ལ་སྦྱོར་དངོས་རྗེས་གསུམ་ཡོད་པའི། སྦྱོར་དངོས་གཉིས་ཀྱིས་ཁྱོད་ཀྱི་རྒྱུད་ལ་དགེ་སློང་གི་སྡོམ་པ་ཐོབ་པ་ཡིན། ད་མཇུག་ཆོག་ལ་གཉིས་ཡོད་པའི་དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་རྫོགས་པའི་དུས་གོ་བའི་དབང་དུ་བྱས་ན། ཞེས་པ་ནས། མཁན་པོ་ཆེ་གེ་དང་། ཞེས་པའི་བར་སྔར་ལྟར་ལས། དེ་ནས་ལས་ཀྱི་སློབ་དཔོན་ཆེ་གེ་དང་། གསང་སྟེ་སྟོན་པའི་སློབ་དཔོན་ཆེ་གེ་དང་། དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས་པའི་སྡོམ་པ་ཐོབ་པ་ཡིན་པས། དེ་ངེས་པར་བྱས་ནས། བསྙེན་བཀུར་གྱི་གནས་ནི། རང་བས་བསླབ་པ་རྒན་པས་རང་བཞིན་དུ་གནས་པའི་དགེ་སློང་མཚན་མཐུན་པ་རྣམས་ཡིན། གནས་མ་ཡིན་པ་ནི། རང་ལས་དུས་ཀྱིས་གཞོན་པའི་དགེ་སློང་རྣམས་དང་། རྒན་ཡངས་གཞན་ན་གནས་པ་སོགས་དམིགས་བསལ་གསུང་པ་རྣམས་དང་། དགེ་སློང་མ་རྒན་གཞོན་ཐམས་ཅད་དང་། བསྙེན་པར་མ་རྫོགས་པའི་རབ་བྱུང་རྣམས་དང་། དགེ་བསྙེན་མན་ཆད་ཁྱིམ་པ་ཐམས་ཅད་ཡིན། དེ་ཡང་རྒན་གཞོན་གྱི་ཁྱད་པར་ཞེས་པ་ནས། ཕྱག་དང་བསྙེན་བཀུར་སྟོབ་པ་བྱུང་ན་དང་དུ་ལོང་། དེ་ལྟར་རྩིས་པས་དགེ་སློང་ནང་དུས་མཉམ་པ་བྱུང་ན། ཞེས་པ་ནས། དེ་ལ་གསན་པས་མཆི་བར་གདའ། ཞེས་པའི་བར་སྔར་ལྟར་རོ། །དེ་ནས་ལས་བྱེད་པས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་སེམས་ལ་བཞག་ནས་ལག་ལེན་ལ་ཐེབས་པ་བྱ་དགོས། ད་མཇུག་ཆོག་གཉིས་པ་ཐོབ་པ་མི་ཉམས་ཤིང་འཕེལ་བར་བྱ་བའི་ཆེད་དུ་གདམས་ངག་བརྗོད་པའི་སྐབས་ཡིན། དེ་ཡང་ཁྱོད་ཀྱིས་དགེ་སློང་གི་སྡོམ་པ་ཐོབ་པ་ཙམ་གྱིས་མི་ཆོག །གཅེས་སྤྲས་ཀྱི་སྒོ་ནས་བསྲུང་དགོས་ལ། དེའི་བླང་དོར་རྣམས་ཤེས་པའི་དོན་དུ་གདམས་ངག་བཅུ་གཅིག་གསུངས་པ་རྣམས་ཀྱང་། བསླབ་བྱ་ཡུལ་དང་། ཡུལ་ཅན་གཉེན་པོ་ལ་གདམས་པ་གཉིས་སུ་འདུ་ཞིང་། བསླབ་བྱ་ཡུལ་ལ་གདམས་པ་ལའང་། བསླབ་བྱའི་གཙོ་བོ་རྣམས་དངོས་སུ་བརྗོད་པ་དང་། མ་བརྗོད་པ་གཞན་དུ་ཁ་འཕངས་པ་གཉིས་ལས། ཐོག་མར་བསླབ་བྱའི་གཙོ་བོ་རྣམས་དངོས་སུ་བརྗོད་པའི་སྐབས་ཡིན། དེ་ལ་རྣམ་དག་རྣམ་པ་བཞི་ལས། དང་པོ་བརྟེན་བྱ་འཚོ་བ་རྣམ་དག་ལ་གདམས་པ་ནི། དེ་ལྟར་ལེགས་པར་ཐོབ་པའི་ཚངས་སྤྱོད་མི་ཉམས་པའི་ཆེད་དུ་མཐའ་གཉིས་སྤངས་པའི་གནས་བཞི་ལ་བརྟེན་དགོས་ཞེས་སྤྱིར་འདོམས་པ་ནི་འདི་ཡིན་ཏེ། ཚེ་དང་ལྡན་པ་མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་གནས་སུ་གསུངས་ཏེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །བྱེ་བྲག་ཏུ་གདམས་པ་ལ་བཞི་ལས། གོས་མཐའ་གཉིས་སུ་མ་ལྟུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བའི་འདོད་པ་བསོད་ཉམས་ཀྱི་མཐའ་སྤངས་ཏེ། གོས་ངན་ངོན་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། བཞི་གང་ཞེ་ན། གོས་ཀྱི་ནང་ན་ཕྱག་དར་ཁྲོད་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་ཕྱག་དར་ཁྲོད་ཀྱི་གོས་ཀྱིས་འཚོ་བར་སྤྲོའམ། དེས་སྤྲོ་ལགས། ཞེས་བརྗོད། གོས་བཟང་པོ་ཀཪྵ་པ་ན་འབུམ་རི་བ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་དར་རམ། རས་ཡུག་ཆེན་ནམ། བེའུ་རས་སམ། དར་ལའམ། མོན་དར་རམ། བེའུ་རས་ཡུག་ཆེན་ནམ། བེའུ་རས་དམར་པོའམ། བེའུ་ཕྲུག་གམ། ལ་དམར་རམ། ཡུལ་ཀ་ཤི་ཀའི་རས་ཕྲན་ནམ། ཁ་དོག་རན་པའམ། ཁ་དོག་ངན་པའམ། བལ་གོས་སམ། ཤ་ནའི་རས་སམ། ཟར་མའི་རས་སམ། རས་གོས་སམ། དུ་གུ་ལའི་རས་སམ། ཀོ་ཏཾ་པའི་རས་སམ། ཉི་འོག་གི་གོས་སམ། གཞན་ཡང་གོས་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། ཞེས་བརྗོད། གཉིས་པ་ཟས་མཐའ་གཉིས་སུ་མ་ལྷུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བའི་འདོད་པ་བསོད་ཉམས་ཀྱི་མཐའ་སྤངས་ཏེ་ཟས་ངན་ངོན་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །ཟས་ཀྱི་ནང་ན་བསོད་སྙོམས་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་བསོད་སྙོམས་ཀྱི་ཟས་ཀྱིས་འཚོ་བར་སྤྲོའམ། དེས་སྤྲོ་ལགས། ཟས་བཟང་པོ་རོ་བརྒྱ་པ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་འབྲས་ཆེན་ནམ། སྐྱོ་མའམ། ཐུག་པའམ། ལྔ་སྟོན་ནམ། བརྒྱད་སྟོན་ནམ། བཅུ་བཞི་སྟོན་ནམ། ཉ་སྟོན་ནམ། རྟག་རེས་འཁོར་རམ། མགྲོན་དུ་བོས་པའམ། འཕྲལ་ལ་བོས་པའམ། སྦགས་པའམ། གཞན་ཡང་ཟས་རུང་བ་གང་དགེ་འདུན་ནམ་གང་ཟག་ལས་རྙེད་ན་དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། གསུམ་པ་གནས་མལ་མཐའ་གཉིས་སུ་མ་ལྷུངས་པ་བརྟེན་པར་གདམས་པ་ལའང། བཟང་པོ་དོན་དུ་གཉེར་བ་འདོད་པ་བསོད་ཉམས་ཀྱི་མཐའ་སྤངས་ཏེ་ཤིང་དྲུང་གི་གནས་མལ་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །གནས་མལ་གྱི་ནང་ན་ཤིང་དྲུང་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་ཤིང་དྲུང་གི་གནས་མལ་གྱིས་འཚོ་བར་སྤྲོའམ། དེས་སྤྲོ་ལགས། ཁང་པ་བརྩེགས་པ་ལྔ་བརྒྱ་པ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་ཁང་པའམ། སྔ་ཁང་ངམ། ཁང་པ་བརྩེགས་པའམ། བསིལ་ཁང་ངམ། སབ་མོས་བསྐོར་བའམ། བ་གམ་མམ། ཁང་བཟང་ངམ། སྒོ་ཁང་གི་སྟེང་གི་བསིལ་ཁང་ངམ། ཁང་སྟེང་གི་ཡོལ་ཁང་ངམ། ཡོལ་ཁང་ངམ། སྤང་ལེབ་ཁང་ངམ། ས་ཕུག་གམ། བྲག་ཕུག་གམ། རི་ཕུག་གམ། རྩྭའི་སྤྱིལ་བུའམ། ལོ་མའི་སྤྱིལ་བུའམ། འཆག་སར་བྱས་པའམ། འཆག་སར་མ་བྱས་པའམ། བྱ་སྐྱིབས་སུ་བྱས་པའམ། བྱ་སྐྱིབས་སུ་མ་བྱས་པའམ། གཞན་ཡང་གནས་མལ་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། བཞི་པ་སྨན་མཐའ་གཉིས་སུ་མ་ལྷུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བ་འདོད་པ་བསོད་ཉམས་ཀྱི་མཐའ་སྤངས་ཏེ་གཞན་གྱིས་ཁུ་བ་བཀུས་ཤིང་བོར་བ་སྙིགས་མ་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །སྨན་གྱི་ནང་ན་བཀུས་ཏེ་བོར་བ་ནི་རུང་བརྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་བཀུས་ཏེ་བོར་བའི་སྨན་གྱིས་འཚོ་བར་སྤྲོའམ། དེས་སྤྲོ་ལགས། སྨན་བཟང་པོ་རོ་ནུས་ཕུན་སུམ་ཚོགས་པའང་འབད་རྩོལ་མེད་པར་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤང་བར་གདམས་པ་ནི། ལྷག་པར་རྙེད་ན་ཞུན་མར་རམ། འབྲུ་མར་རམ། སྤྲང་རྩིའམ། བུ་རམ་གྱི་དབུ་བའམ། དུས་སུ་རུང་བའམ། ཐུན་ཚོད་དུ་རུང་བའམ། ཞག་བདུན་པའམ། འཚོ་བའི་བར་དུ་བཅང་པའམ། རྩ་བའི་སྨན་ནམ། སྡོང་བུའི་སྨན་ནམ། ལོ་མའི་སྨན་ནམ། མེ་ཏོག་གི་སྨན་ནམ། འབྲས་བུའི་སྨན་ནམ། གཞན་ཡང་སྨན་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། ཞེས་བརྗོད། དེ་རྣམས་ཀྱིས་བརྟེན་བྱ་འཚོ་བ་རྣམ་དག་ལ་གདམས་པ་སོང་ནས། གཉིས་པ་བསྲུང་བྱ་ཚུལ་ཁྲིམས་རྣམ་དག་ལ་གདམས་པ་ནི། དགེ་སློང་གི་དངོས་པོ་འཇིག་པར་བྱེད་པ་ཕས་ཕམ་བཞི་ཆ་དང་བཅས་པ་སྤང་དགོས་སོ་ཞེས་འདོམས་པ་ལ་སྤྱི་དང་བྱེ་བྲག་གཉིས་ལས། སྤྱིར་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་ལྟུང་བར་འགྱུར་པའི་ཆོས་སུ་གསུངས་ཏེ། དགེ་སློང་གིས་དེ་དག་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་སུ་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །བྱེ་བྲག་ཏུ་གདམས་པ་ལ་བཞི་ལས། དང་པོ་ནང་སེམས་ཅན་ལ་ཆགས་པ་མི་ཚངས་སྤྱོད་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། བཞི་གང་ཞེ་ན། འདོད་པ་དང་། འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །འདོད་པ་སྤངས་པ་ནི་བསྔགས་ཏེ། བོར་བ་དང་། བསལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགོག་པ་དང་། ཉེ་བར་ཞི་བ་དང་། ནུབ་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཆགས་པའི་སེམས་ཀྱི་བུད་མེད་ཀྱི་ཡུལ་ལ་མིག་གཏད་དེ། མིག་གིས་བལྟ་བར་ཡང་མི་བྱ་ན། གཉིས་ཀྱིས། གཉིས་སྤྲད་དེ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས། བསླབ་པ་མ་ཕུལ། བསླབ་པ་ཉམས་པར་མ་བྱས་པར། མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེས་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་། བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། ཞེས་བརྗོད། གཉིས་པ་ཕྱི་རོལ་ཡོ་བྱད་ལ་ཆགས་པས་ཀུན་ནས་བསླངས་པ་མ་བྱིན་ལེན་གྱི་ཕམ་པ་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །མ་བྱིན་པར་ལེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །མ་བྱིན་པར་ལེན་པ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་རྐུ་སེམས་ཀྱིས་གཞན་གྱི་རྫས་ཏིལ་གྱི་ཕུབ་མ་ཙམ་ཡང་མ་བྱིན་པར་མི་བླང་ན་མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པར་རྐུ་བའི་གྲངས་སུ་གཏོགས་པ་བླངས་ན། ཇི་ཙམ་མ་བྱིན་པར་བླངས་པ་དེ་རྒྱལ་པོའམ་བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ་དགེ་སློང་དེ་ལྟར་མ་བྱིན་པར་ལེན་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་འདི་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་དང་། སྤྱད་པ་མ་ཡིན་པ་སྤངས་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། གསུམ་པ་ཞེ་སྡང་གིས་ཀུན་ནས་བསླངས་པ་སྲོག་གཅོད་ཀྱི་ཕམ་པ་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །སྲོག་གཅོད་པ་ནི་བཅོམ་ལྡན་འདས་ཀྱི་རྣམ་གྲངས་དུ་མས་སྨད་དོ། །སྲོག་གཅོད་པ་སྤང་བ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་བསམ་བཞིན་དུ་སྲོག་ཆགས་གྲོག་སྦུར་ཙམ་ཡང་བསད་པར་མི་བྱ་ན། མིའམ་མིར་ཆགས་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་ཡང་དགེ་སློང་གང་མིའམ་མིར་ཆགས་པ་ལ་བསམ་བཞིན་དུ་རང་གིས་ལག་དར་ཏེ་སྲོག་གཅོད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བ་སླའོ་ཞེས་ཟེར་ཞིང་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲང་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤངས་པ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། བཞི་པ་དུག་གསུམ་གང་རུང་གིས་ཀུན་ནས་བསླངས་པ་རྫུན་དུ་སྨྲ་བའི་ཕམ་པ་ཆ་དང་བཅས་པ་སྤང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །རྫུན་དུ་སྨྲ་བ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །རྫུན་དུ་སྨྲ་བ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཐ་ན་བཞད་གད་བྱ་བར་བསམས་ཏེ། ཤེས་བཞིན་དུ་བརྫུན་དུ་སྨྲ་བར་ཡང་མི་བྱ་ན། བསམ་བཞིན་དུ་མིའི་ཆོས་བླ་མ་སྨྲ་བ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རིག་པར་སྤྱོད་པ་མེད་ལ། མེད་བཞིན་དུ་འདི་ཤེས་སོ། །འདི་མཐོང་ངོ་། །ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། འདི་སྐད་ཅེས། ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་། །ཞེས་སྨྲས་ཏེ། གསོ་བ་གསོག་རྫུན་དུ་སྨྲས་སོ་ཞེས་ཟེར་ན། མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། ཅི་ཞིག་ཤེས་ཞེ་ན། སྡུག་བསྔལ་ཤེས་སོ། །ཀུན་འབྱུང་བ་དང་། འགོག་པ་དང་། ལམ་ཤེས་སོ། །ཅི་ཞིག་མཐོང་ཞེ་ན། ལྷ་རྣམས་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་མཐོང་ངོ་། །ལྷ་རྣམས་ཀྱིས་ཀྱང་བདག་མཐོང་ངོ་། །ཀླུ་རྣམས་དང་། ཞེས་པ་ནས་རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་མཐོང་ངོ་། །ཞེས་པའི་བར་གྱིས་འོག་མ་རྣམས་ལའང་འགྲེའོ། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོའོ། །ཀླུ་རྣམས་དང་ནས། རྡུལ་ཁྲོད་ཀྱི་ཟ་ཤ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ་། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་བདག་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ༴ ཕེབས་པར༴ སོ་སོར༴ རྟག་ཏུ་ཡང་༴ ཀླུ་རྣམས་དང་ཞེས་པ་ནས། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར༴ སོ་སོར༴ རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཞེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི༴ རྣམ་པར་སྔོས་པའི༴ རྣམ་པར་བརྣག་པའི༴ རྣམ་པར་ཕམ་པའི༴ རྣམ་པར་འབུས་གཞིགས་པའི༴ རྣམ་པར་ཟོས་པའི༴ རྣམ་པར་དམར་བའི༴ རྣམ་པར་འཐོར་བའི༴ རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་བོ། །མ་ཐོབ་བཞིན་དུ་བདག་གིས་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས༴ ཅི་ཡང་མེད་པའི༴ འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི༴ ཕྱིར་མི་འོང་བའི༴ དགྲ་བཅོམ་པ་ཉིད་ཀྱི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་འཕོ་བ་དང་། སྐྱེ་བ་དང་། ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་། གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ། །ཞེས་བྱ་བ་སྟེ་དགེ་སློང་གིས་གནས་འདི་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པའི་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། ཞེས་བརྗོད། དེ་རྣམས་ཀྱིས་བསྲུང་བྱ་ཚུལ་ཁྲིམས་རྣམ་དག་ལ་གདམས་པ་སོང་ནས། གསུམ་པ་ཉམས་ལེན་སྤྱོད་པ་རྣམ་དག་ལ་གདམས་པ་ལ་ལྔ་ཡོད་པའི། དང་པོ་སེམས་ཅན་ལ་ཕར་མི་གནོད་པར་མ་ཟད་ཚུར་ལ་གནོད་པ་འབྱུང་ཡང་ལན་མི་བྱེད་པར་བཟོད་པར་བྱ་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དགེ་སྦྱོང་དུ་བྱེད་པའི་ཆོས་སུ་གསུངས་ཏེ། བཞི་གང་ཞེ་ན། ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་གཤེ་ཡང་སླར་མི་གཤེ་བར་བྱ་བ་དང་། ཁྲོས་ཀྱང་སླར་མི་ཁྲོ་བར་བྱ་བ་དང་། བརྡེགས་ཀྱང་སླར་མི་རྡེག་པར་བྱ་བ་དང་། མཚང་བྲུས་ཀྱང་ལར་མཚང་མི་འབྲུ་བར་བྱའོ། །ཇི་ལྟར་གནས་འདི་ལྟ་བུ་ལ་སྤྱོད་དམ། དེས་སྤྱོད་ལགས་ཞེས་བརྗོད། གཉིས་པ་བླང་དོར་གྱི་གནས་དེ་རྣམས་ཉམས་སུ་ལེན་པ་ཤིན་ཏུ་དཀའ་བས་བདག་གིས་མི་ནུས་སྙམ་ན། གཞན་གྱིས་དབང་མེད་དུ་ལེན་དུ་བཅུག་པ་མ་ཡིན་གྱི། ཁྱོད་རང་སྔ་མོ་ནས་མཆོག་ཏུ་འདོད་ཅིང་དོན་དུ་གཉེར་བ་གང་ཡིན་པ་དེ་གྲུབ་པ་ཡིན་པས། ད་གཉེན་པོ་བསྐྱེད་ནས་སྲུངས་ཤིག་ཅེས་མཆོག་ཏུ་འདོད་པའི་དོན་གྲུབ་པར་གདམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །ཁྱོད་སྔོན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ཀྱང་ཅི་མ་རུང་སྙམ་དུ་སྨོན་པ་གང་ཡིན་པ་དེ། ད་ཁྱོད་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་མཐུན་པ་དང་། གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །གསུམ་པ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་དང་ཁྱོད་གཉིས་དོན་གསུམ་གྱིས་མཉམ་པ་ཡིན་པས། གནས་བརྟན་བསྒྲེས་པོ་རྣམས་ཀྱིས་ཇི་ལྟར་སློབ་པ་བཞིན་དུ་བསླབ་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེ་རིང་བསྙེན་པར་རྫོགས་པས་ཀྱང་བསླབ་བོ། །དེ་རིང་བསྙེན་པར་རྫོགས་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་བསླབ་བོ། །དེ་ལྟར་ན་ཚུལ་ཁྲིམས་ཉིད་ཀྱིས་མཉམ་པ་དང་། བསླབ་པ་ཉིད་ཀྱི་མཉམ་པ་དང་། སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་དེ་ཁྱོད་ཀྱིས་དེང་ཕྱིན་ཆད་བསྒྲུབ་པར་བྱའི་མི་བསྒྲུབ་པར་མི་བྱའོ། །བཞི་པ་འཇིག་རྟེ ན་ཕ་དང་བུ་མཛང་པས་ཕན་ཚུན་ཇི་ལྟར་བསྟེན་པ་བཞིན་དུ། ཁྱོད་ཀྱིས་མཁན་པོ་ལ་རིམ་གྲོ་བསྐྱེད་དེ་བསྟེན་པར་གྱིས་ཤིག་དང་། དེས་ཀྱང་ཁྱོད་རྗེས་སུ་འཛིན་པར་འགྱུར་རོ་ཞེས་འདོམས་པ་ནི་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་བཞག་པར་བྱའོ། །མཁན་པོས་ཀྱང་ཁྱོད་བུའི་འདུ་ཤེས་ཉེ་བར་བཞག་པར་བྱའོ། །ཁྱོད་ཀྱིས་དེང་ཕྱིན་ཆད་མཁན་པོ་ལ་ཇི་སྲིད་འཚོ་བའི་བར་དུ་བསྙེན་བཀུར་བྱའོ། །མཁན་པོས་ཀྱང་ཁྱོད་ཤིའམ་སོས་ཀྱི་བར་དུ་ནད་གཡོག་བྱའོ། །ལྔ་པ་མཁན་པོར་མ་ཟད་གྲོགས་ཚངས་པ་མཚུངས་པར་སྤྱོད་པ་གཞན་རྣམས་ལའང་གུས་པའི་སྒོ་ནས་རིམ་གྲོ་བ་བསྐྱེད་པར་གྱིས་ཤིག་ཅེས་འདོམས་པ་ནི་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་ཚངས་པ་མཚུངས་པར་སྤྱོད་པ་རྣམས་དང་། གནས་བརྟན་རྣམས་དང་། བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པ་དང་། འཇིགས་པ་དང་བཅས་པའི་དབང་དུ་འགྱུར་བར་གནས་པར་བྱའོ། །དེ་རྣམས་ཀྱིས་ཉམས་ལེན་སྤྱོད་པ་རྣམ་དག་ལ་གདམས་པ་སོང་ནས། བཞི་པ་རྟོགས་དོན་ལྟ་བ་རྣམ་དག་ལ་གདམས་པ་ནི། ཁྱོད་དགེ་སློང་གི་དངོས་པོར་བསྒྲུབ་པ་འདི་སངས་རྒྱས་ཀྱི་བསྟན་པ་ལ་ཞུགས་པ་ཡོངས་སུ་རྫོགས་པ་ཡིན་པས། སོས་དལ་དུ་བསྡད་པས་མི་ཡོང་། དེའི་བྱ་བ་ཐོས་བསམ་སྒོམ་གསུམ་ལ་བརྩོན་པར་བྱས་ནས། ལུང་སྡེ་སྣོད་གསུམ་ལ་མཁས་པ་དང་། མངོན་རྟོགས་བསླབ་པ་གསུམ་གྱི་རྒྱུད་ཕྱུག་པར་བྱེད་དགོས་ཞེས་སྟོན་པ་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་ལུང་ནོད་པར་བྱ། བཀླག་པར་བྱ། ཁ་ཏོན་དུ་བྱའོ། །ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་ཕྱིར་ཁྱོད་ཀྱིས་བརྩོན་པ་མི་འདོར་བར་བྱའོ། །དེ་ལྟར་རྣམ་དག་བཞི་པོ་དེ་བསྒྲུབ་བྱའི་གཙོ་བོ་ཡིན་པས། ཇི་ལྟར་གདམས་པ་བཞིན་དུ་འབད་པས་བསླབ་དགོས་པ་ཡིན་ལ། ད་གཉིས་པ་དངོས་སུ་མ་བརྗོད་པ་གཞན་དུ་ཁ་འཕངས་པ་ནི། སྔར་སྨོས་པའི་བསླབ་གཞི་དེ་ཙམ་དུ་མ་ཟད་དགག་སྒྲུབ་ཀྱི་བསླབ་བྱ་དངོས་སུ་མ་བརྗོད་པ་རྣམས་ཀྱང་མཁན་སློབ་སོགས་ཀྱི་སྟོན་པར་འགྱུར་བས་ཤེས་པར་བྱས་ལ་ཕྲ་ཞིང་ཕྲ་བ་ནས་བླང་དོར་མ་ནོར་བར་གྱིས་ཤིག་ཆེས་འདོམས་པ་འདི་ཡིན་ཏེ། འདི་དག་ནི་ཁོ་བོས་ཁྱོད་ལ་བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་པར་ཟད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་ཐོས་པར་འགྱུར་རོ། །གཞན་དག་ཀྱང་སློབ་དཔོན་དང་། མཁན་པོ་དང་། མཁན་པོ་གཅིག་པ་དང་། སློབ་དཔོན་གཅིག་པ་དང་། གཏམ་འདྲིས་པ་དང་། ཕེབས་པར་སྨྲ་བ་དང་། སྨོས་འདྲིན་དང་། འགྲོགས་བཤེས་རྣམས་ཀྱིས་ཀྱང་རྒྱ་ཆེར་སྟོན་པར་འགྱུར་རོ། །གཉིས་པ་ཡུལ་ཅན་གཉེན་པོ་ལ་གདམས་པ་ལ་གཉིས་ཀྱི། དང་པོ་བསླབ་པ་ལ་གུས་པར་སྦྱར་བ་སྟེ། ཉིད་ཀྱིས་དལ་འབྱོར་གྱི་རྟེན་ཕུན་སུམ་ཚོགས་པ་ཐོབ་ཅིང་། སངས་རྒྱས་ཀྱི་བསྟན་པ་རིན་པོ་ཆེ་དང་མཇལ་ནས། བསྟན་པའི་སྙིང་པོ་བསྙེན་རྫོགས་ཀྱི་སྡོམ་པ་ཐོབ་པ་འདི་ལྟ་བུ་ཤིན་ཏུ་རྙེད་པར་དཀའ་བ་ཡིན་པས། བསླབ་པ་རིན་པོ་ཆེ་ལ་མིག་གི་འབྲས་བུ་ལྟར་གཅེས་སྤྲས་ཀྱི་སྒོ་ནས་གུས་པ་བསྐྱེད་དེ་ཚུལ་བཞིན་དུ་སྒྲུབས་ཤིག་ཅེས་འདོམས་པ་ནི་འདི་ཡིན་ཏེ། ཤེས་རབ་མཆོག་གི་བསྟན་པ་ལ། །ཁྱོད་ནི་བསྙེན་པར་རྫོགས་པར་གྱུར། །དལ་དང་འབྱོར་པ་རྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། །མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །གཉིས་པ་ཐབས་བག་ཡོད་པ་ལ་སྦྱར་བ་ནི། དེ་ལྟར་བསླབ་པ་ལ་གུས་པ་བསྐྱེད་དེ། བག་ཡོད་པའི་ཐབས་ཀྱིས་དགེ་སྦྱོང་གི་ཚུལ་སྒྲུབས་ཤིག་ཅེས་འདོམས་པ་ཡིན་ཏེ། ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས་བག་ཡོད་པར་སྒྲུབས་ཤིག །འདི་ནི་ཚིག་ཉུང་ཡང་དོན་རྒྱ་ཆེ་སྟེ། བླང་དོར་གྱི་གནས་ལ་འཇུག་ལྡོག་མ་ནོར་བར་བྱེད་པ་ནི་བག་ཡོད་པ་ཡིན་ལ། སྒོ་གསུམ་གྱི་སྤྱོད་པ་བག་ཡོད་པས་དམ་པའི་ཆོས་འདུལ་བ་འདི་ལ་སྤྱད་ན་རྣམ་གྲོལ་གཏན་གྱི་བདེ་བ་ཐོབ་པར་འགྱུར་ཏེ། སོ་སོར་ཐར་པ་ལས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པའི་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་འཐོབ་བོ། །ཞེས་གསུངས་པ་ལྟར་ཕན་ཡོན་ཆེན་པོ་མངའ་བས་ལེགས་པར་སྒྲུབ་ཤིག །དེ་ལྟར་སྦྱོར་དངོས་རྗེས་གསུམ་གྱིས་ཁྱོད་བསྙེན་པར་རྫོགས་པའི་ཆོ་ག་དེ་གྲུབ་པ་ཡིན། དེ་ཡང་གཙོ་བོར་མཁན་པོའི་བདག་རྐྱེན་ལས་བྱུང་བ་ཡིན་ཏེ། རང་གིས་མཛད་འོས་རང་གིས་མཛད། གཞན་གྱིས་བྱེད་དགོས་པ་རྣམས་དེ་དང་དེ་ལ་བསྐོས་ནས་མཛད་པས་གཏང་རག་གི་ཕྱག་གསུམ་འཚོལ་ལ་བཀའ་དྲིན་ཆེ་ལག་ཞེས་བརྗོད་ཅིག །ཐམས་ཅད་ཀྱིས་མེ་ཏོག་འཐོར་བཞིན་དུ་སྨོན་ལམ་རྣམ་བཞི་གདབ་བོ། །ཐར་མཆོག་ཞི་བའི་ཁང་བཟང་དུ། །འཇུག་བྱེད་ལས་ཀྱི་ཆོ་གའི་ཁྲིགས། །རིན་ཆེན་ཐེམ་སྐས་ལྟ་བུ་འདི། །དགེ་སློང་དྷརྨ་ཤྲཱིས་སྦྱར། །རྣམ་དཔྱོད་ཤར་རིའི་བ་གམ་ལ། །འཛེགས་པའི་ལེགས་བཤད་འོད་བརྒྱ་པ། །ཞི་འཚོའི་རིང་ལུགས་སྣང་བ་ཆེ། །ཡུན་རིང་བསྟན་པའི་དཔལ་གྱུར་ཅིག །དགེ་འདིས་མཐའ་ཡས་འགྲོ་བ་ཀུན། །ཚངས་སྤྱོད་ཡོན་ཏན་བདུད་རྩིའི་ཆུས། །ཉེས་བརྒྱའི་དྲི་མ་དྲུང་ཕྱུངས་ཏེ། །མི་གནས་མྱ་ངན་འདས་ཐོབ་ཤོག །ཅེས་པ་འདི་ནི་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་ཁྱུ་མཆོག་གི་ལོ་ལ་ཨོ་རྒྱན་སྨིན་གྲོལ་གླིང་གི་ཆོས་གྲྭར་སྦྱར་བའོ།། །།དགེའོ།། །། ལོ་མིང་རེའུ་མིགསྡོམ་པ་འབུལ་ཆོགའབུལ་ཆོག་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །འདིར་བསླབ་པ་བསྲུང་མི་ནུས་པས་སླར་འབུལ་བར་འདོད་ན། གང་ལ་འབུལ་བའི་ཡུལ། མིའི་འགྲོ་བ་ཡིན་པ། སྨྲ་ཤེས། དོན་གོ། ཤེས་པ་རང་བཞིན་དུ་གནས་པ། མ་ནིང་དང་མཚན་གཉིས་མ་ཡིན་པ་སྟེ་ཐ་སྙད་ལྔ་དང་ལྡན་པའི་གང་ཟག་སོ་སྐྱེས་ཕལ་པ་ལྟ་བུ། གི་དྲུང་དུ་དབེན་པ་མ་ཡིན་པའི་གནས་སུ། གང་གི་འབུལ་བ་པོ་སྨྱོ་བ་སེམས་འཁྲུག་པ། མྱོས་པ། གླེན་པ། ལྐུག་པ། འོན་པ། གཉིད་ལོག་པ། སྙོམས་འཇུག །སྤྲུལ་པ། དུད་འགྲོའི་གཟུགས་བརྙན། དབེན་པ། སོགས་མ་ཡིན་པའི་གང་ཟག་གིས་འབུལ་འདོད་ཀྱི་ཀུན་སློང་དང་ལྡན་པས་སླར་འབུལ་བར་བྱ་སྟེ། དེའི་འབུལ་ཆོག་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བྱ་བས་དགེ་ཚུལ་གྱི་སྡོམ་པ་འབུལ་ལོ། །བདག་དགེ་བསྙེན་དུ་བཟུང་དུ་གསོལ་ཞེས་བརྗོད་དུ་གཞུག །དེ་ལྟར་ཕུལ་བའི་ཕན་ཡོན་ཀྱང་། ཇི་སྐད་དུ། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཆང་བ་ལས། །བསླབ་ལ་མི་གནས་སྐད་ཅིག་ལ། །གཟུགས་བོར་ཁྱིམ་པར་གནས་པ་བཟང་། །ཞེས་དང་། བདེ་བར་གཤེགས་པའི་རྒྱལ་མཚན་འཛིན། །གཟུགས་ཙམ་ལ་ནི་བརྟེན་ནས་སུ། །གླང་ཆེན་སྣ་ལ་རལ་བཏགས་སམ། །སྦྲུམ་མ་སྐྱུར་རྩི་འཐུངས་པ་ལྟར། །མི་དེ་ཉི་མ་གཅིག་ལ་ཡང་། །སྡིག་པའི་ས་བོན་དཔག་མེད་དང་། །རང་ལ་གནོད་པ་སྣ་ཚོགས་པ། །བྱེད་པར་འགྱུར་བ་ཁོ་ན་ཡིན། །ཞེས་གསུངས་པ་ལྟར་སྡོམ་པ་སླར་བླང་དུ་ཡོད་པ་དང་། རྒྱུད་གསོར་མི་རུང་དུ་མི་འགྱུར་བ་ལ་སོགས་པའི་ཕན་ཡོན་ཡོད་དོ། །འདིར་དགེ་ཚུལ་འབུལ་ཆོག་ཙམ་བརྗོད་ཀྱི་གཞན་དུ་དགེ་སློང་འབུལ་ན། དགེ་སློང་གི་སྡོམ་པ་འབུལ་ལོ། །བདག་དགེ་ཚུལ་དུ་བཟུང་དུ་གསོལ། །ཞེས་དང་། གཞན་ཡང་སྡོམ་པའི་ངོ་བོ་དང་༡། ༡བསླབ་པ་འབུལ་ལོ། །༢རྩ་བ་དང་། ༢སངས་རྒྱས་འབུལ་ལོ། །༣རྒྱུ་དང་། ༣འདུལ་བ་འབུལ་ལོ་ཞེས་སོགས། ཉེ་སྦྱོར་འབུལ་བ༤། ༤སློབ་དཔོན་འབུལ་ལོ་ཞེས་སོགས། བསླབ་པའི་བཏང་མཚམས༥། ༥བདག་ཟ་མའོ་ཞེས་སོགས། ༦གྲོགས་སྤང་བའི་༦བདག་ཚངས་པར་འབུལ་ལོ་ཞེས་སོགས། །མཆན། ཆོ་ག་རྣམས་ཀྱང་གསུངས་ཏེ་དགོས་ན་ཇི་ལྟར་རིགས་པར་སྦྱར་རོ། །ཕམ་པ་འཆབ་བཅས་ཅན་ལའང་སྡོམ་པ་ཡོད་པ་འབུལ་དུ་རུང་ཞིང་། རྒྱུད་གསོར་མི་རུང་དུ་ཉམས་པའི་ཕྱིར་འབུལ་ཀྱང་། སླར་སྐྱེ་བ་ནི་མ་ཡིན་པས་ཁྱད་པར་ཡོད་ལ། འོན་ཀྱང་བར་མ་རབ་བྱུང་ཙམ་ལེན་དུ་རུང་བར་བཞེད་དོ། །ཞེས་པའང་དྷརྨཱ་ཤྲཱིས་ཟིན་བྲིས་སུ་བྱས་པའོ། ༈ །དགེ་སློང་མི་འདོད་པའམ། མངོན་པར་མི་དགའ་བའམ། སྒྱིད་ལུག་པའམ། དམུས་ཕྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་བཏང་བར་འདོད་པས། འདི་སྐད་ཅེས། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བས་བསླབ་ངོ་བོ། པ་འབུལ་ལོ། །ཞེས་ཟེར་ན་བསླབ་པ་འབུལ་བ་ཡིན་ནོ། །སངས་རྒྱས་དང་ཆོས་རྩ་བ་དང་དགེ་འདུན་འབུལ་ལོ། །ཟེར་ན་བསླབ་པ་ཕུལ་བ་ཡིན་ནོ། །མདོ་རྒྱུ་སྡེ་དང་འདུལ་བ། མ་མོ་འབུལ་ལོ། །ཟེར་ན་བསླབ་པ་འབུལ་བ་ཡིན་ནོ། །མཁན་ཉེ་སྦྱོར་པོ་དང་སློབ་དཔོན་ཉེ་སྦྱོར། འབུལ་ལོ། །ཟེར་ན་བསླབ་པ་ཕུལ་བ་ཡིན་ནོ། །བདག་ཁྱིམ་པའམ། དགེ་ཚུལ་ལམ། བསླབ་པའི་གཏོང་མཚམས། མ་ནིང་ངམ། དགེ་སློང་མ་སུན་ཕྱུང་བའམ། ཕ་མ་དགྲ་བཅོམ་བསད་པའམ། དགེ་འདུན་དབྱེན་ནམ། ཁྲག་འབྱིན། མུ་སྟེགས། མུ་སྟེགས་ཞུགས། རྐུ་ཐབས། ཐ་དད་པ། གནས་པར་མི་བྱ་བར་བཟུང་དུ་གསོལ། ཟེར་ན་བསླབ་པ་ཕུལ་བ་ཡིན་ནོ། །ཚེ་དང་ལྡན་པ་དགོངས་སུ་གསོལ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱིད་དཀའོ། །སོགས་ཟེར་ཡང་། གོང་མ་འདི་རྣམས་གང་རུང་མ་ཟེར་བས། བསླབ་པ་ཉམས་པར་བྱས་ལ་བསླབ་པ་ཕུལ་བ་མ་ཡིན་ནོ། ༈ །སྔ་ཕྱི་གཉིས་ཀ་ཟེར་ན། བསླབ་པ་ཉམས་པར་ཡང་བྱས་ལ་ཕུལ་བའང་ཡིན་ནོ། །བསླབ་པ་མ་ཕུལ་ཞིང་བསླབ་པ་ཉམས་པ་མ་བྱས་པ་ནི། །རྣམ་པ་དེ་དག་ལས་ལྡོག་པའོ། །ཞར་བྱུང་གི་ཉེར་མཁོ་ཡིན་ནོ།། །། བསླབ་པ་ཡོངས་སུ་སྦྱོང་བ་གཞི་གསུམ་གྱི་ཆོ་ག་ཐར་གླིང་དུ་བགྲོད་པའི་གྲུ་ཆེན་དུས་བརྗོད་རེའུ་མིག་བཅས། ལོ་ཆེན་དྷརྨ་ཤྲཱི།བསླབ་པ་ཡོངས་སུ་སྦྱོང་བ་གཞི་གསུམ་གྱི་ཆོ་ག་ཐར་གླིང་དུ་བགྲོད་པའི་གྲུ་ཆེན་ཞེས་བྱ་བ་བཞུགས་སོ། །ན་མཿསརྦ་ཛྙཱ་ཡ། དགེ་ལེགས་ཡོན་ཏན་ཀུན་གྱི་གཏེར། །སྲིད་མཚོར་བྱིང་བ་རྣམས་ཀྱི་སྐྱབས། །ཀུན་མཁྱེན་འགྲོ་བའི་བླ་མ་ལ། །རྟག་ཏུ་དང་བས་ཕྱག་བྱས་ཏེ། །ཉེས་བརྒྱའི་ཆུ་གཏེར་རབ་བསྒལ་ནས། །ཐར་པའི་གླིང་དུ་བགྲོད་བྱེད་པའི། །བསླབ་པ་ཡོངས་སྦྱོང་གཞི་གསུམ་གྱི། །ཆོ་ག་ལེགས་བཤད་གྲུ་ཆེན་བྱ། །འདི་ལ་གསུམ་སྟེ། གསོ་སྦྱོང་། དབྱར་གནས། དགག་དབྱེའོ། །དང་པོ་ནི། དུས་ངེས་པ་ཅན་དང་འབྲེལ་བ་མཐུན་པའི་གསོ་སྦྱོང་གི་དབང་དུ་བྱས་ཏེ། ཐོག་མར་ཚེས་གྲངས་ངེས་པའི་ཕྱིར་སྐུད་པ་ལ་སྨྱིག་མའི་ཐུར་མ་བཅོ་ལྔ་བརྒྱུས་པ་ཉི་མ་རེ་རེ་ཞིང་སྤོ་བས་ཟླ་བའི་མིང་གྲངས་ཡ་དྲུག་གི་མར་ངོའི་ཉིན་ཞག་བཅོ་ལྔ་པ་དོར་ཞིང་གཞན་རྣམས་མ་ཆད་པར་བགྲང་། གལ་ཏེ་ཟླ་བཤོལ་ཡོད་ཚེ་གང་ལ་བཤོལ་དོན་པའི་ཟླ་བ་དེ་ཐུབ་མི་ཐུབ་གང་ཡིན་ཀྱང་རུང་སྟེ། ཉིས་བརྩེགས་ཀྱི་ཕྱི་མ་ཉིད་ཐུབ་པར་རྩིས་ཏེ་བགྲང་ཚུལ་ངེས་པར་བྱས་ལ། དགེ་བསྐོས་ཀྱིས་དེ་ལ་བརྟགས་ནས་ཉིན་རེ་ཞིང་དགེ་འདུན་ལ་བརྗོད་ཅིང་མདོ་བསྐུལ་བར་བྱའོ། །དེ་ནས་གསོ་སྦྱོང་གི་དུས་ལ་བབས་པ་ན། སྦྱོར་བ་ནི། གཙུག་ལག་ཁང་སོགས་འདུ་བའི་གནས་བྱི་དོར་གྱིས་དག་པར་བྱ། དྲི་གཙང་ཁང་གི་དབུས་ལྟ་བུ་མདོ་འདོན་པ་པོའི་གོང་དུ་སྟོན་པའི་སྐུ་གཟུགས་ཁྲི་ལ་སྤྱན་དྲངས་པའི་སྤྱན་སྔར་མཆོད་པ་རྒྱས་པར་བཤམ། གཞི་བདག་ལ་དཀར་གཏོར་གཙང་མ་དང་། མདོ་འདོན་པ་པོའི་སེང་ཁྲི་སོགས་སྟན་རུང་བ་གོ་རིམ་བཞིན་དུ་བཤམ། དགེ་འདུན་བསྡུ་བའི་ཕྱིར། དགེ་ཚུལ་སློང་ངམ། གསོ་སྦྱོང་ལ་གནས་པའི་དགེ་བསྙེན་གྱིས་ཀྱང་རུང་སྟེ། གཎྜི་བརྡུང་བའི་གནས་སུ་སོང་ལ། དཀོན་མཆོག་ལ་ཕྱག་བྱས་ནས་ཤང་ཙ་ལན་གསུམ་སྔོན་དུ་འགྲོ་བས་ལས་ཀྱི་གཎྜི་རྒྱུད་གཅིག་དང་ཏོག་གསུམ་པ་བརྡུང་། ཅིའི་ཕྱིར་བརྡུང་ཞེ་ན། གསོ་སྦྱོང་གི་ཕྱིར་རོ། །ཞེས་གོ་བར་བྱ། དེ་ཡང་འདུ་བའི་སྔ་རོལ་དུ། དགེ་འདུན་རྣམས་ཀྱིས། གསོ་སྦྱོང་སྔ་མ་འདས་པའི་མཐའ་ཚུན་ཆད་ཀྱི་རང་རྒྱུད་ཀྱི་ལྟུང་བ་ལ་སོ་སོར་བརྟགས་ཏེ། ལྟུང་བ་བྱུང་བར་ཤེས་ན་བཤགས་བསྡམ་བྱིན་གྱིས་བརླབས་པ་གང་ལ་གང་འོས་ཀྱིས་ཕྱིར་བཅོས་ཏེ་འདུ་དགོས་པས། དེ་དག་གི་སྔགས་ནི། ལྷག་མའི་སྦོམ་པོ་ཡང་བ་དང་། ལྟུང་བྱེད་འབའ་ཞིག་པ། སོར་བཤགས། ཉེས་བྱས་ཀྱི་སྡེ་ཚན་ལས་གང་རུང་ཞིག་ཤེས་ན། དེས་ལྟུང་བ་ནང་མི་མཐུན་པའི་དགེ་སློང་གཅིག་གི་དྲུང་དུ་ཕྱིན་ཏེ། མཆིལ་ལྷྭམ་ཕུད། རྒན་ན་ཕྱག་བྱས། ཙོག་པུར་ཐལ་མོ་སྦྱར་ནས། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་འདི་ལྟ་བུ་འདི་བྱུང་སྟེ། དེ་དག་པའི་མཐའ་ཚུན་ཆད་ནས་བཟུང་སྟེ་ཚེ་དང་ལྡན་པའི་མདུན་དུ་མཐོལ་ལོ་ཞེས་སོགས་འོག་ནས་འབྱུང་བ་ལྟར་ལན་གསུམ་དང་མཐོང་སྡོམ་དྲི་ཞིང་ཐབས་ལེགས་བྱ། དེ་བཞིན་དུ་ཕམ་པའི་སྦོམ་པོ་ལྕི་ཡང་དང་། ལྷག་མའི་སྦོམ་པོ་ལྕི་བ་ནི་རིམ་པ་ལྟར་དགེ་སློང་དྲུག་དང་། ལྔ་དང་། བཞི་ཡན་ཆད་ཀྱི་མདུན་དུ་བཤགས་ཚིགས་དེ་ཁོ་ནས་བཤགས། གལ་ཏེ་དོགས་པ་དང་ཡིད་གཉིས་ཟ་ན་དགེ་སློང་སྡེ་སྣོད་འཛིན་པ་ལ་དྲིས་ཏེ་ཕྱིར་བཅོས་བྱ། དགེ་འདུན་ལྷག་མ་དང་སྤང་ལྟུང་ནི་གང་ཟག་ཁྱད་པར་ཅན་གྱིས་བཤགས་པས་འདག་ནའང་། གཞན་གྱིས་ཆད་ལས་ཀྱི་སྒོ་ནས་བཤགས་དགོས་པ་མ་གྲུབ་པར་ལས་ཀྱི་ཁ་སྐོངས་ལ་འདུན་ལྟུང་བ་དེ་ཐུན་མོང་པ་མིན་ཞིང་། བཤགས་པས་ཀྱང་མི་འདག་པས་ཐུན་མོང་མིན་པའི་བྱིན་བརླབ་བྱ་དགོས་ཏེ། ལྟུང་བ་མི་མཐུན་པའི་དགེ་སློང་གི་དྲུང་དུ་གཞན་སྔར་ལྟར་ལས། འདི་ལྟ་བུ་འདི་བྱུང་སྟེ། ལྟུང་བ་དེ་ཚེ་དང་ལྡན་པའི་མདུན་དུ་བྱིན་གྱིས་བརླབ་བོ། །དེང་ལྟུང་བ་སོགས་འོག་ནས་འབྱུང་བ་ལྟར་ལན་གསུམ་བཟླས་ལ་ཐབས་ལེགས་བྱའོ། །ཡང་ལས་གྲལ་དུ་འདུག་མ་ཐག་ཏུ་བྲན་ནམ། ཡིད་གཉིས་ཟ་ན་དྲུང་ན་མོ་ལ་བྱིན་གྱིས་བརླབ་ཚུལ་སྔར་ལྟར་དང་། ལས་བྱེད་པས་ནི་སེམས་ཀྱིས་བརླབ་པར་བཤད་དོ། །བསྡམ་བྱའི་ཉེས་བྱས་རྣམས་ནི་སྔར་བྱས་ལ་གནོད་འགྱོད་དང་ཕྱིས་མི་ཉམས་པར་བསྲུང་ཞིང་བསྡམ་པར་བྱའོ་སྙམ་དུ་བསམ་ཞིང་། དེ་ནས་ལས་དེ་མ་གྲུབ་བར་དུ་ཉེས་ལྟུང་གིས་མ་གོས་པར་བྱའོ། །དེ་ཡང་སྤྱིར་ཆོས་འདི་པའི་ཕྱིར་བཅོས་བྱེད་ཚུལ་ནི། ཕམ་པ་འཆབ་མེད་ལ་བསླབ་བྱིན་གྱིས་བཅོས། ལྷག་མ་འཆབ་བཅས་ལ་སྤོ་མགུ་དབྱུང་བ་སྟེར་སྤང་ལྟུང་དངོས་པོ་སྤངས་ལ་བཤགས། སོར་བཤགས་མཚམས་ཀྱི་ཕྱི་རོལ་དུ་སྨྲེ་སྔགས་དང་བཅས་པས་བཤགས། ལྟུང་བྱེད་འབའ་ཞིག་པ་དང་བཤགས་བྱའི་ཉེས་བྱས་རྣམས་རང་རང་གི་མིང་གིས་བཤགས། བསྡམ་བྱའི་ཉེས་བྱས་བསྡམ། བཤག་ཡུལ་མ་རྙེད་ན་བྱིན་གྱིས་བརླབ་པ་སྟེ། རང་རང་གི་ཆོ་གས་བཅོས་དགོས་པ་ཉིད་དོ། །དེ་ལྟ་ནའང་ལྟུང་བའི་མིང་རིགས་སོ་སོར་འབྱེད་མི་ནུས་པ་སོགས་ཀྱིས་དེ་རྣམས་ཇི་བཞིན་པ་མ་གྲུབ་པས། དེས་སང་གི་ཕྱག་ལེན་ལྟར་གནས་ཁང་གཅིག་ཏུ་འདུས་ནས་ཕན་ཚུན་བརྗོད་རེས་ཀྱིས་ཐམས་ཅད་དགེ་འདུན་ལས་བཤགས་ན། འོས་པའི་ཕྱག་དང་འདུག་ཚུལ་སྔར་ལྟ་བུས། དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་བྱིས་པ་ཉིད་དང་། མི་ཤེས་པ་ཉིད་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས། ཕམ་ལྷག་གི་སྦོམ་པོ་ལྕི་ཡང་གཉིས་དང་། ལྟུང་བྱེད་འབའ་ཞིག་པ་དང་། སོ་སོར་བཤགས་པར་བྱ་བ་དང་། ཉེས་བྱས་ཀྱི་སྡེ་ཚན་རྣམས་ལས་ཁ་ན་མ་ཐོ་བ་གང་དང་གང་བྱུང་བ་དེ་དང་དེ་དག་པའི་མཐའ་ཚུན་ཆད་ནས་བཟུང་སྟེ། དགེ་འདུན་བཙུན་པ་རྣམས་ཀྱི་མདུན་དུ་མཐོལ་ལོ། །འཆགས་སོ། །མཐོལ་ཞིང་བཤགས་ན་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་བཟླ། ཉེས་ལྟུང་དེ་དག་ལ་ཉེས་ལྟུང་དེ་དག་ཏུ་གཟིགས་ལགས་སམ་ཞེས་དྲི། འཆགས་པ་པོས་མཐོང་ལགས། ལེན་པ་པོས་ཕྱིན་ཆད་ལེགས་པར་སྡོམ་ལགས་སམ། འཆགས་པ་པོས་སྡོམ་ལགས། ཞེས་དང་ཐབས་ལེགས་བྱ། དེ་བཞིན་དུ་བྱིན་རླབས་ལའང་དགེ་འདུན་བཙུན་པ་རྣམས་དགོངས་སུ་གསོལ། བདག་དགེ་སློང་སོགས་ནས་ཉོན་མོངས་པ་མང་བའི་དབང་གིས། དགེ་འདུན་ལྷག་མའི་ཆོས་བཅུ་གསུམ་དང་། སྤང་ལྟུང་སུམ་ཅུ་ལས་གང་ཡང་རུང་བ་བྱུང་བ་དེ། དགེ་འདུན་བཙུན་པ་རྣམས་ཀྱི་མདུན་དུ་བྱིན་གྱིས་བརླབ་བོ། །དེང་ལྟུང་བ་དེ་བྱིན་གྱིས་བརླབས་ཏེ་དགེ་འདུན་གྱི་གསོ་སྦྱོང་མཛད་ལ། སླད་ཀྱིས་ལྟུང་བ་དེ་ཆོས་བཞིན་དུ་སླར་བགྱིའོ། །ཞེས་ལན་གསུམ་བཟླས་ལ་ཐབས་ལེགས་བྱའོ། །དེ་ལྟར་རྒྱུད་དག་པར་བྱས་ནས་གསོ་སྦྱོང་གི་གནས་དེར་དགེ་འདུན་ཐམས་ཅད་ཚོགས་ཏེ་མཆིལ་ལྷྭམ་ཕུད་ཅིང་གྲལ་ལ་འཁོད་པ་ན། དགེ་བསྐོས་ཀྱི་སྤྱོད་ལམ་འགྲེང་། ཐལ་སྦྱར་འདུད་པ་དང་བཅས་ཏེ། བསྟན་པ་རིན་པོ་ཆེའི་རྩ་ལག་དམ་པར་གྱུར་པ་མཁན་པོའམ། སློབ་དཔོན་ནམ། གནས་བརྟན་པའི་ཞལ་སྔ་ནས་གཙོ་མཛད་དགེ་འདུན་བཙུན་པ་རྣམས་གསན་དུ་གསོལ། དེང་ཟླ་བ་ཡར་གྱི་ངོའི་གྲལ་ཚེས་བཅོ་ལྔ་པའམ། མར་གྱི་ངོའི་བཅུ་བཞི་པའམ་བཅོ་ལྔ་མངོན་དུ་གྱུར་པ་ལགས་ཏེ། གཙུག་ལག་ཁང་གི་བདག་པོ་དང་གཙུག་ལག་ཁང་གི་ལྷ་རྣམས་ཀྱི་སླད་དུ་ཞལ་ནས་གསུངས་པའི་ཚིགས་སུ་བཅད་པ་དེ་ཀློག་ཏུ་གསོལ། ཞེས་བསྐུལ་བས་དགེ་འདུན་རྣམས་བཞེངས། སྣམ་སྦྱར་གྱོན་ནས་རྒྱུད་ཆ་གསུམ་པ་འདོན་པར་བྱ་སྟེ། དེ་ལ་ཐོག་མར་ཕྱག་འཚལ་བའི་རྒྱུད་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱའི་རྒྱལ་པོའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་གཏུགས་ཏེ་གུས་པས་ཕྱག་འཚལ་ལོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་གཞི། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །ཞེས་དང་། སྤྲོ་ན། ཇི་སྙེད་སུ་དག་ཅེས་སོགས་ཀྱི་ཡན་ལག་བདུན་པའང་བྱའོ། །དེ་ནས་མདོ་གདོན་པའི་རྒྱུན་ནི། ཤེས་རབ་སྙིང་པོ་ལྟ་བུ་ཞིག་གི་མཇུག་ཏུ། དགེ་བར་གསུངས་ཤིག །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་ལྟ། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུང་། །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །དེ་ནས་བསྔོ་བའི་རྒྱུད་རྣམས་ནི། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །ཀླུ་རྒྱལ་དགའ་བོ་ཉེར་དགའ་བོ། །གཞན་ཡང་གྲོང་ཁྱེར་གནས་པ་རྣམས། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་པར་ཤོག །ཅེས་བརྗོད། དེ་ནས་གཏོར་མ་བཏང་བ་ནི། ཆབ་བྲན་ལ། རང་རང་གི་སྤྱོད་ཡུལ་དུ་གྱུར་པའི་གཏོར་སྣོད་ཀྱི་ནང་དུ་གཟུགས་སྒྲ་དྲི་རོ་རེག་བྱའི་སྐྱེ་མཆེད་ཀྱི་ངོ་བོར་གྱུར་པའི་བཟའ་བཏུང་འདོད་པའི་ཡོན་ཏན་དུ་མས་གང་བར་གྱུར། ༀ་ཨ་ཀཱ་རོ་མུ་ཁཾ་སརྦ་དྷ རྨཱ་ཎཱཾ་ཨཱདྱ་ནུཏྤནྣ་ཏོཏྟེ་ༀ་ཨཱཿཧཱུཾ་ཕཊ་སྭཱ་ཧཱ། ཞེས་ལན་གསུམ་གྱིས་བྱིན་གྱིས་བརླབས་ནས། གཉུག་མར་གནས་པའི་ལྷ་མོ་འཕྲོག་མ་ལ་སོགས་པ་གནས་དང་གཞིའི་བདག་པོ་དང་། གཞན་ཡང་ནགས་ཚལ་དང་། རི་བོ་དང་། ཆུ་ཀླུང་དང་། ངམ་གྲོག་ལ་སོགས་པར་འཁོད་པའི་འབྱུང་པོ་གཏོར་མ་ཟ་བར་འདོད་པ་རྣམས་ཀྱི་ཞལ་དུ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ཕུལ་ནས། འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། དེ་ནས་དགེ་བསྐོས་ཀྱིས་སྤྱོད་ལམ་སྔར་ལྟར་འགྲེང་སྟེ། བསྟན་པ་རིན་པོ་ཆེའི་རྩ་ལག་དམ་པར་གྱུར་པ་མཁན་པོའམ། སློབ་དཔོན་ནམ། གནས་བརྟན་མིང་འདི་ཞེས་བགྱི་བ་གསན་དུ་གསོལ། དེང་དུས་བཟང་པོ་ལ་བདག་ཅག་འདིར་འདུས་ཤིང་ཚོགས་པ་རྣམས་ལ་ཐུགས་བརྩེ་བས་ཉེ་བར་དགོངས་ཏེ་སྟོན་པའི་བཀའི་ཆོས་ཉན་པ་སྦྱིན་དུ་གསོལ། ཅེས་བསྐུལ་ནས། ཐམས་ཅད་སྤྱོད་ལམ་བསྟུན། ཐལ་མོ་བསྣོལ། མདོ་འདོན་པ་པོ་ཁྲི་འཛེགས་ཏེ་འདི་སྐད་ཅེས། དེ་ཡང་སློབ་དཔོན་སངས་རྒྱས་གཉིས་པའི་ཞལ་ནས། དགེ་བ་མཐའ་དག་ཡང་དག་གསོ་བྱེད་ཅིང་། །སྡིག་པ་མཐའ་དག་ཡང་དག་འདིར་སྦྱོང་བ། །དགེ་གསོ་ཕྱིར་དང་སྡིག་པ་རྣམས་སྦྱོང་ཕྱིར། །དེ་བཞིན་གཤེག་པས་གསོ་སྦྱོང་ཞེས་གསུངས་སོ། །ཞེས་པས་གཉེན་པོས་བསླབ་པ་གསོ་ཞིང་། སྤང་བྱ་སྡིག་པ་སྦྱོང་བས་ན་གསོ་སྦྱོང་ཞེས་བྱ། གསོ་སྦྱོང་ལའང་ཞི་གནས་ཀྱི་གསོ་སྦྱོང་དང་། མཐུན་པའི་གསོ་སྦྱོང་གཉིས་ལས་འདིར་ཕྱི་མ། དེ་ལའང་དུས་ངེས་ཅན་དང་། དུས་མ་ངེས་པར་བྱ་བ་གཉིས་ལས། འདིར་བཅོམ་ལྡན་འདས་ཀྱིས་གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །ཞེས་གསུངས་པ་ལྟར་ཕྱག་ལེན་དུ་བགྱིད་པ་ལ། སྦྱོར་དངོས་རྗེས་གསུམ་ལས། སྦྱོར་བ་ལའང་གཎྜི་བརྡུང་བ། དགེ་འདུན་བསྡུ་བ། དྲིས་པའི་ཚིག་གིས་ལན་གདབ་པ། སྟན་སྟབས་མི་ཉམས་པར་བྱ་བ་རྣམས་སྔོན་དུ་སོང་ནས། ཆོས་འཆད་ཉན་ཉམས་སུ་མྱོང་བ་ཆོས་སྒྲགས་ཀྱི་མདོ་དང་། དུས་བཟང་གི་མདོའི་དོད་ཚུལ་ཁྲིམས་ཡང་དག་པར་ལྡན་པའི་མདོ་ལ་མཛད་པ་ཕྱག་ལེན་དུ་གདའ་བས་གསན་པར་ཞུ། གང་ཞིག་གསེར་མཆོག་རང་བཞིན་རི་རབ་ལ་གནས་མནྡྷ་ར་དང་ལྷར་བཅས་གནོད་སྦྱིན་དང་། གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། དེ་དག་ཐམས་ཅད་ཐར་པ་དམ་པའི་སྒོར་གྱུར་ཐུབ་པའི་གསུང་མཉན་ཕྱིར་ནི་འདིར་གཤེགས་ཤིག །ལྷ་དང་ལྷ་མིན་མི་དང་མིའམ་ཅི་ཡི་དབང་པོ་དང་། །བརྒྱ་བྱིན་ལ་སོགས་ཆོས་ཀྱི་ཕྱོགས་ལ་བྱ་བ་བྱས་པ་རྣམས། །སངས་རྒྱས་གསུང་རབ་རབ་ཏུ་ཞི་ཞིང་བདེ་བའི་རྒྱུར་གྱུར་པ། །འདི་དག་བཤད་ཀྱིས་དམ་པའི་ཆོས་མཉན་ཕྱིར་ནི་འདིར་གཤེགས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པས་ཆོས་ཀྱི་ཆར་འབེབས་ཀྱི། །ཉན་པར་འདོད་པ་ཐམས་ཅད་འདིར་གཤེགས་ཤིག །རྒྱ་གར་སྐད་དུ། ཤཱི་ལ་སཾ་ཡུཀྟ་སཱུ་ཏྲ། བོད་སྐད་དུ། ཚུལ་ཁྲིམས་ཡང་དག་པར་ལྡན་པའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤེས་པ་ནི་འགྲིབ། སྲོག་ནི་ཆད། ཚེའི་འདུ་བྱེད་ནི་འདོར། སྟོན་པའི་བསྟན་པ་ཡང་ངེས་པར་འཇིག་པར་འགྱུར་ན། ཅིའི་ཕྱིར་བརྩོན་འགྲུས་དང་བརྟུལ་བ་བརྟན་པོས་སྒྲུབ་པར་མི་བྱེད། མིའི་ལུས་ནི་ཤིན་ཏུ་རྙེད་པར་དཀའ་བ། དེ་ཐོབ་ནས་དེས་རྙེད་པའི་རྒྱལ་བའི་བསྟན་པ་ལ་རབ་ཏུ་བྱུང་བ་ཡང་རྙེད་ནས་ཐར་པའི་དོན་དང་མི་མཐུན་པ་དག་གིས་བསླུས་ཏེ་སྡུག་བསྔལ་བར་གྱུར་ཏ་རེ། དགེ་སློང་དག་སྲོག་དང་བྲལ་ཞིང་ཤི་བ་ནི་སླའི། ཚུལ་ཁྲིམས་ཉམས་ཤིང་ཞིགས་པ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། སྲོག་དང་བྲལ་ཞིང་ཤི་བས་ནི་ཚེ་འདི་ཉིད་ཀྱི་སྐྱེ་བ་ཟད་པར་འགྱུར་གྱི། ཚུལ་ཁྲིམས་ཉམས་ཤིང་ཞིག་པས་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤང་ཏེ་རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །དེ་ཕྱིར་སྟོན་པས་ཚུལ་ཁྲིམས་རབ་བསྔགས་ཤིང་། །ཚུལ་ཁྲིམས་ལྡན་པ་སངས་རྒྱས་འབྱུང་བ་འཕྲད། །ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག །ཚུལ་ཁྲིམས་ལྡན་པ་དྲི་དང་བྱུག་པ་ཡིན། །ཚུལ་ཁྲིམས་ལྡན་པ་དགའ་བ་ཀུན་གྱི་གནས། །ཚུལ་ཁྲིམས་ལྡན་པ་གདུང་བ་བསིལ་བའི་ཆུ། །ཚུལ་ཁྲིམས་ལྡན་པ་འཇིག་རྟེན་ཀུན་གྱིས་བསྟོད། །ཚུལ་ཁྲིམས་དག་གིས་འགྲོ་བ་དམ་པ་མནོས། །ཇི་ལྟར་སྦྲུལ་གདུག་ཀླུ་ཆེན་ནག་པོ་ཡང་། །ཚུལ་ཁྲིམས་ལྡན་ལ་གནོད་མེད་གཞན་ཅི་སྨོས། །ཚུལ་ཁྲིམས་ལྡན་པའི་དགེ་སློང་འོད་དང་ལྡན། །ཚུལ་ཁྲིམས་ལྡན་པ་གྲགས་འགྱུར་བདེ་བ་ཐོབ། །ཇི་ལྟར་མིག་མེད་གཟུགས་མཐོང་མི་རུང་ལྟར། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཇི་ལྟར་བུམ་པ་བཟང་པོ་རིན་ཆེན་སྣོད། །དེ་བཞིན་ཚུལ་ཁྲིམས་ཆོས་རྣམས་སྐྱེད་པའི་གཞི། །ཇི་ལྟར་བུམ་ཆག་རིན་ཆེན་སྣོད་མི་རུང་། །དེ་བཞིན་ཚུལ་ཁྲིམས་རལ་པས་ཆོས་ཀུན་གཏུགས། །དང་པོ་ཚུལ་ཁྲིམས་མེད་པར་གྱུར་པ་དེ། །ཕྱི་ནས་མྱ་ངན་འདས་པ་ཐོབ་སྙམ་མམ། །སྣ་མེད་སྣ་རྡུམ་ལ་སོགས་གང་ཡིན་པ། །དེ་ལ་མེ་ལོང་དག་ནི་དགོས་མི་འགྱུར། །རྣ་བས་མ་ཐོས་མིག་སྔར་མ་མཐོང་ཡང་། །བསྟན་བསྲུང་མི་དེ་མཐོ་རིས་འགྲོ་བར་འགྱུར། །ཐོས་མང་ཐོས་ལྡན་ཐོས་བསྲུང་མཐོ་རིས་ཉིད། །བུད་མེད་བསྟེན་དུ་ག་ལ་རུང་། །རྒྱལ་པོའི་ཕོ་བྲང་ག་ལ་དགའ། །ལོངས་སྤྱོད་རྟག་པ་ག་ལ་ཡོད། །དབུ་བ་སྙིང་པོ་ག་ལ་ཡོད། །བུད་མེད་དག་ལ་རུང་བ་མེད། །རྒྱལ་སྲིད་དག་ལ་དགའ་བ་མེད། །ལྦུ་བ་དག་ལ་སྙིང་པོ་མེད། །ལོངས་སྤྱོད་དག་ལ་སྙིང་པོ་མེད། །ལོངས་སྤྱོད་དག་ནི་འབབ་ཆུ་བཞིན། །གྲུ་དེ་ཅི་འདྲ་ཁྱིམ་དེ་འདྲ། །མེ་ཏོག་ཅི་འདྲ་གཟུགས་དེ་བཞིན། །སྲོག་ནི་ཆུ་བུར་འདྲ་བ་ཡིན། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཉེ་བར་འཁོར་ལ་སོགས་པའི་དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་བཏོན་ནས། ཆོས་བཤད་པ་ལས་བྱུང་བ་ཡི། །དགེ་བ་གྲུབ་པ་གང་ཡོད་པ། །དེས་ནི་མར་གྱུར་འགྲོ་བ་ཀུན། །སྲིད་པའི་མཚོ་ལས་སྒྲོལ་བར་ཤོག །ཅེས་བསྔོའོ། །དེ་ནས་སྐབས་འདིར་དགེ་ཚུལ་གྱི་གསོ་སྦྱོང་མཛད་པ་ནི། མདོ་དང་ཀརྨ་ཤ་ཏཾ་དུ་མ་བཤད་ཀྱང་། སུམ་བརྒྱ་པ་ལས། གལ་ཏེ་མངོན་སུམ་གསུངས་པ་མེད་གྱུར་ཀྱང་། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །ཅེས་གསུངས་པ་ལྟར་ཏེ། དེ་ཡང་རྒྱུད་ཉེས་བྱས་ཀྱིས་མ་གོས་ན་དེས་ཆོག །གལ་ཏེ་གོས་ན་དེ་བཤགས་ཏེ་གསོ་སྦྱོང་བྱ་དགོས་པས། ཐོག་མར་ཉེས་བ་དེ་བྱུང་མ་ཐག་ཏུ་དགེ་སློང་གང་ཡང་རུང་བ་ཞིག་གི་དྲུང་དུ་སོང་སྟེ་བཤགས། དེ་ལྟར་མ་གྲུབ་ན་འདིར་དགེ་འདུན་གྱི་ནང་དུ་དགེ་སློང་ཞིག་གི་མདུན་དུ་བཤགས་ནའང་རུང་བས་ཕྱག་བྱས། ཙོག་པུར་འདུག་སྟེ་མཁན་པོའམ། སློབ་དཔོན་ནམ། གནས་བརྟན་ནམ། ཚེ་དང་ལྡན་པ་དགོངས་སུ་གསོལ། བདག་དགེ་ཚུལ་མིང་འདི་ཞེས་བགྱི་བ་ལ་འདི་ལྟ་བུའི་ཉེས་བྱས་འདི་བྱུང་སྟེ། ཞེས་སམ་དེ་ལྟར་མི་ནུས་ན། བདག་དགེ་ཚུལ་མིང་འདི་ཞེས་བགྱི་བ་བྱིས་པ་ཉིད་དང་། མི་ཤེས་པ་ཉིད་དང་། མ་གུས་པ་དང་། བག་མ་མཆིས་པ་དང་། ཉོན་མོངས་པ་མང་བའི་དབང་གིས་ཉེས་བྱས་གང་དང་གང་བྱུང་བ་དེ་དག་པའི་མཐའ་ཚུན་ཆད་ནས་བཟུང་སྟེ། མཁན་པོའམ་ནས། ཚེ་དང་ལྡན་པའི་མདུན་དུ་མཐོལ་ལོ་འཆགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་དང་མཐོང་སྡོམ་ཐབས་ལེགས་བྱ། དེ་ནས་དངོས་གཞི་ནི། དགེ་སློང་ཞིག་གི་མདུན་དུ་ཕྱག་བྱས་ཙོག་པུར་འདུག་སྟེ། སྔར་ལྟར་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་ཡང་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ལ། བདག་དགེ་ཚུལ་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཀྱིས་ཡོངས་སུ་དག་གོ་ཞེས་བདག་མཆི་ན། བདག་བར་ཆད་ཀྱི་ཆོས་རྣམས་ཀྱིས་ཡོངས་སུ་དག་པར་མཁན་པོ་སོགས་ཀྱིས་གཟུང་དུ་གསོལ། །ཞེས་ལན་གསུམ་དང་། ཐབས་ལེགས་བྱས་ནས། ཐོས་པའི་ཉེ་འཁོར་ལས་ལོགས་སུ་བཀར་རོ། །དེ་ནས་དགེ་སློང་གི་གསོ་སྦྱོང་ནི། ལྟུང་བ་ཐུན་མོང་མ་ཡིན་པ་ཕྱིར་བཅོས་དགོས་པ་རྣམས་གོང་དུ་མ་གྲུབ་ན་འདིར་བྱ། གལ་ཏེ་ལྟུང་བ་ནང་མཐུན་པས་བཤགས་ཡུལ་མ་རྙེད་པ་རྣམས་ནི་ཐུན་མོང་གི་བྱིན་བརླབ་བྱ་སྟེ། དེའི་སྔགས་ནི་མདོ་འདོན་པ་པོས་ཐོག་མར་ཡུལ་དུས་ཀྱི་སྟོབས་ཀྱིས་བཤགས་པར་མ་ནུས་པའི་ལྟུང་བ་ཐུན་མོང་བ་རྣམས་ཀྱིས་ལས་ལ་མི་སྒྲིབ་པར་བྱ་བའི་ཕྱིར་གསོལ་བའི་ལས་ཀྱིས་བྱིན་གྱིས་བརླབ་པར་བགྱི་བས་དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན། གང་གི་མདུན་དུ་བདག་ཅག་གི་ལྟུང་བ་དེ་ཆོས་བཞིན་དུ་སླར་བགྱི་བ། བདག་ཅག་ལས་དགེ་སློང་གནས་གཞན་དུ་མཆིས་ལ། དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱི་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་དེ་བྱིན་གྱིས་བརླབས་ཏེ་གསོ་སྦྱོང་མཛད་ལ། སླད་ཀྱིས་དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །དེ་ནས་སྔར་གནས་ལ་བློ་མཐུན་བྱས་པ་ཞིག་པའམ་མ་བྱས་པ་ཡིན་ན་འདི་ལྟར་བྱ་སྟེ། གནས་པ་བློ་མཐུན་བགྱི་བས། ལས་མཛད་པའི་གནས་འདི་ཉེ་འཁོར་དང་བཅས་པ་ཚུན་ཆད་གསོ་སྦྱོང་གི་གནས་སུ་བློ་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བཞེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། དགེ་འདུན་གྱི་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ནས། འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བཞེད་དེ། དེའི་སླད་དུ་དགེ་འདུན་གྱིས། གནས་ཐམས་ཅད་ནས། འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་ནས། འདོམ་གང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱི་གནས་ཐམས་ཅད་ནས། འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །འདིར་གྲུབ་པ་ནི་བྲག་སྐྱིབས་ལྟ་བུ་རང་གྲུབ། བགྱིས་པ་ནི་སྐྱེས་བུའི་བྱེད་འཕྲོ། ལགས་པ་ནི་བྱས་ནས་ཟིན་པ་སྟེ་སྐབས་སུ་གང་བབ་བརྗོད་དོ། །དེ་དག་ནི་སྦྱོར་བའི་ཆོས་ཏེ། དེ་ལས་རྒྱུད་ཆ་གསུམ་འདོན་པ་དང་གཏོར་མ་བཏང་བ་ནི་ཉིན་རེ་ཞིང་ཡང་བྱར་རུང་ལ། ཆོས་བཤད་ཉན་ནི་ཉ་སྟོང་ཚེས་བརྒྱད་ཀྱི་དུས་བཟང་པོ་རྣམས་ཀྱི་མཚན་མོ་བྱ་བར་གསུང་པས་གསོ་སྦྱོང་གི་སྔ་ཕྱི་གང་དུ་བྱས་ཀྱང་རུང་བའི་ཕྱིར་མེད་མི་རུང་གི་སྦྱོར་བ་མ་ཡིན་ནའང་། འདིར་གསོ་སྦྱོང་གི་སྔོན་དུ་འབྲེལ་ཆགས་སུ་མཛད་པའི་ཕྱག་ལེན་ལྟར་སྦྱར་བས་སྦྱོར་བར་སོང་ཞིང་། ཐུན་མིན་གྱི་ལྟུང་བ་བཤགས་བསྡམས་བརླབ་པ་དང་། ཐུན་མོང་བ་གསོལ་བ་འབའ་ཞིག་གིས་བརླབ་པ་རྣམས་ནི་ལྟུང་བ་ཅན་དགེ་འདུན་གྱི་ལས་ལ་འཇུག་པ་ཐམས་ཅད་ཀྱི་སྔོན་འགྲོར་མེད་མི་རུང་གི་ཡན་ལག་ཏུ་སྣང་བས་གསོ་སྦྱོང་གིའང་སྦྱོར་ཆོག་གལ་ཆེ་ཤོས་ཏེ། འོན་ཀྱང་ལྟུང་བས་མ་གོས་པའི་གང་ཟག་ཁྱད་པར་ཅན་ལ་མི་དགོས་པས་མཐའ་གཅིག་ཏུ་ངེས་པར་དགོས་པའི་སྦྱོར་བར་མི་འགྱུར་ལ། གནས་ཀྱི་བློ་མཐུན་ནི། གཉུག་མར་གནས་པའི་དགེ་འདུན་གྱི་གཙུག་ལག་ཁང་ལྟ་བུ་བློ་མཐུན་མ་ཞིག་པ་ཡིན་ནམ་བྱས་ཀྱང་ཆོག །གཞན་དུ་ན་མེད་མི་རུང་གི་སྦྱོར་བར་འགྱུར་ཞིང་། ལས་ཀྱི་མཚམས་ཆེ་ཆུང་གང་རུང་གཅོད་པ་སོགས་ནི་འདིར་བཏང་སྙོམས་སུ་བྱས་སོ། །དེ་ནས་གསོ་སྦྱོང་གི་གཞི་དངོས་ལ། སྤྱིར་བཏང་དང་། དམིགས་བསལ་གཉིས་ལས། དང་པོ་ནི་མདོ་འདོན་ཅིང་ཉན་པ་སྟེ། གནས་བརྟན་གྱིས། སོ་སོ་ཐར་པ་ལ་སྟོན་པའི་འདུ་ཤེས། རང་ཉིད་ཀྱི་བསླབ་པ་ལ་གཅེས་སྤྲས་སུ་བྱེད་པའི་འདུ་ཤེས། ཚུལ་འདི་ལ་བརྟེན་ན་རྒྱལ་བའི་བསྟན་པ་ཡུན་རིང་དུ་གནས་པའི་འདུ་ཤེས་ཏེ། དེ་ལྟར་ཐུགས་ལ་བཞག་ནས་གསན་པར་ཞུ། ཞེས་བརྗོད་ལ། མཆོད་བརྗོད་རྣམས་ཀྱི་དུས་ཐལ་མོ་སྦྱོར་ཞིང། གཞན་གྱི་ཚེ་ཐལ་མོ་བསྣོལ་ནས་རབ་ཏུ་ཞི་བའི་ཚུལ་གྱིས། རྒྱ་གར་སྐད་དུ། པྲ་ཏི་མོ་ཀྵ་སཱུ་ཏྲ། བོད་སྐད་དུ། སོ་སོ་ཐར་པའི་མདོ། ཐམས་ཅད་མཁྱེན་པ་ལ་ཕྱག་འཚལ་ལོ། །སྙན་པའི་བ་དན་འཇིག་རྟེན་གསུམ་དུ་གྲགས། །དམ་པའི་ཆོས་སྒྲ་སེདྒེའི་སྒྲ་བསྒྲགས་པས། །ཐམས་ཅད་མཁྱེན་པ་དཀོན་ཅོག་མཛོད་བསྙེས་པ། །ཞབས་ལ་ཚངས་དབང་གཙུག་གི་ནོར་བུས་གཏུགས། །སྡུག་བསྔལ་རྒྱ་མཚོ་གཏིང་མཐའ་མེད་བརྒལ་བ། །འགྲོ་བའི་གཙོ་ལ་སྤྱི་བོས་ཕྱག་འཚལ་ཏེ། །ཐམས་ཅད་མཁྱེན་པའི་བསླབ་གཞི་དཀོན་ཅོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །སངས་རྒྱས་འདུལ་བ་གངས་ཅན་མཚོ། །གཏིང་མཐའ་མེད་པ་ཐམས་ཅད་ཀྱི། །གནས་པའི་སྙིང་དང་སྙིང་པོ་ནི། །སོ་སོར་ཐར་པ་འདི་ཡིན་ནོ། །འདི་ནི་དམ་ཆོས་རྒྱལ་པོ་ཡི། །ཆོས་ཀུན་གྱི་ནི་འདྲེན་པ་མཆོག །འདི་ནི་དགེ་སློང་ཚོང་ཚོགས་ཀྱི། །བསླབ་ཟོང་ཚོང་ཁང་ཆེན་པོ་ཡིན། །ཚུལ་ཁྲིམས་འཆལ་བས་ཟིན་རྣམས་ཀྱི། །གདུག་པ་རྣམས་སེལ་སྨན་འདི་ཡིན། །འདི་ནི་ལང་ཚོས་རྣམ་འཁྲུལ་པའི། །རྐང་གཉིས་གཞོན་ནུའི་ལྕགས་ཀྱུ་ཡིན། །མཚོ་བ་ཟབ་པའི་འཁོར་བ་ལས། །སྒྲོལ་བའི་བརྒལ་ཐབས་འདི་ཡིན་ཏེ། །འདི་ནི་བཟང་འགྲོར་འགྲོ་བ་ཡི། །ངེས་པའི་ཆུ་ལོན་ཟམ་པ་ཡིན། །འདི་ནི་ཉོན་མོངས་ཕམ་བྱེད་ལམ། །རྒྱལ་པོ་ཡི་ནི་འདྲེན་པ་མཆོག །འདི་ནི་ཐར་པའི་གྲོང་འཇུག་པའི། །ཐེམ་སྐས་གཞི་དང་འདྲ་བར་གནས། །ང་ནི་མྱ་ངན་འདས་གྱུར་ན། །འདི་ནི་ཁྱོད་ཀྱི་སྟོན་པའོ། །རང་བྱུང་ཉིད་ཀྱིས་གུས་བཅས་པར། །ནན་ཏན་དགེ་སློང་ཚོགས་འདུན་བསྟོད། །སངས་རྒྱས་ཞེས་བྱའི་སྒྲ་འདི་ཡང་། །འཇིག་རྟེན་དག་ན་རབ་ཏུ་དཀོན། །མི་ཉིད་རྙེད་པ་ཤིན་ཏུ་དཀའ། །རབ་ཏུ་བྱུང་བ་ཤིན་ཏུ་དཀོན། །དེ་བཞིན་རབ་ཏུ་བྱུང་རྣམས་ཀྱི། །ཚུལ་ཁྲིམས་ཕུན་སུམ་ཚོགས་རབ་དཀོན། །ཚུལ་ཁྲིམས་ཡོངས་སུ་དག་གྱུར་ཀྱང། །གྲོགས་བཟང་ཤིན་ཏུ་རྙེད་པར་དཀའ། །འཇིག་རྟེན་སངས་རྒྱས་འབྱུང་བ་དང་། །མི་དང་རབ་ཏུ་འབྱུང་བ་དང་། །ཚུལ་ཁྲིམས་ཕུན་སུམ་ཚོགས་པ་དང་། །གྲོགས་བཟང་རྙེད་དཀའ་རྙེད་གྱུར་ནས། །མཁས་པ་དག་ལ་ལེགས་འདོད་ཅིང་། །དེ་དག་འབྲས་བཅས་བྱེད་འདོད་པའི། །སྡོམ་བརྩོན་རྣམས་ཀྱིས་སོ་སོ་ཐར། །མཉམ་པའི་ཕྱིར་ནི་འབད་པར་བགྱི། །དགེ་སློང་དབང་དུལ་ཀུན་དབང་པོ། །སངས་རྒྱས་མི་འགྱུར་རབ་བྱུང་བ། །ངེས་པར་ཐར་པ་འདོད་རྣམས་ཀྱིས། །སོ་སོར་ཐར་པ་རྟག་ཏུ་སྲུངས། །བསྐལ་པ་བྱེ་བ་རྣམས་སུ་ཡང་། །སོ་སོ་ཐར་པ་ཐོས་པ་དང་། །བཟུང་དང་འཛིན་པ་རྙེད་དཀའ་སྟེ། །སྒྲུབ་པའང་ཤིན་ཏུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་བདེ། །ཆོས་བསྟན་པ་ཡང་བདེ་བ་ཡིན། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །འཕགས་པ་རྣམས་ནི་མཐོང་བ་བདེ། །དམ་པ་རྣམས་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་བ་ཡི། །དགྲ་བཅོམ་པ་དག་མཐོང་བ་བདེ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ངའོ་ང་རྒྱལ་ཟད་པ་བདེ། །ངེས་པར་བྱས་ཤིང་དབང་པོ་ཐུལ་བ་དག །དགོན་པ་ཞི་བ་རྣམས་སུ་རྒས་གྱུར་ཅིང་། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱིས་གནས་པ་བདེ། །ཚེ་དང་ལྡན་པ་དག་སོ་ཀ་རྣམས་ཀྱི་འདས་པ་དང་། ལྷག་མ་ཇི་ཙམ་པ་དེ་ཙམ་མོ། །ཞེས་པའི་སྐབས་ཀྱི་དུས་བརྗོད་ཚུལ་ནི། ཧོར་ཟླ་བཅུ་པའི་ཚེས་བཅོ་ལྔས་སྟོན་ཟླ་རྫོགས་པས། དེའི་ཕྱི་ཉིན་ཚེས་བཅུ་དྲུག་ནས་དགུན་ཟླ་དང་པོ་ཤར་བའི་ཕྱིར། དེ་ནས་ལོ་འགོ་འཛིན་པའི་དབང་དུ་བྱས་ནས་འདི་ལྟར་བརྗོད་པར་བྱ་སྟེ། ཧོར་ཟླ་བཅུ་པའི་མར་ངོ་ལ། ཚེ་དང་ལྡན་པ་དག་སང་གི་སྐྱ་རེངས་ཤར་བའི་ཚེ་དགུན་སྟོད་རྣམས་ཀྱི་ཟླ་བ་ཕྱེད་ནི་འདས་སོ། །ཟླ་བ་ཕྱེད་དང་གཉིས་ནི་ལུས་སོ། །བཅུ་གཅིག་པའི་ཡར་ངོ་ལ། གཅིག་ནི་འདས་སོ། །གཅིག་ནི་ལུས་སོ། །དེའི་མར་ངོ་ལ་ཕྱེད་དང་གཉིས་འདས། ཕྱེད་ལུས། བཅུ་གཉིས་པའི་ཡར་ངོ་ལ། དགུན་སྟོད་རྣམས་ཀྱི་ཟླ་བ་གཉིས་འདས་ཏེ་ལྷག་མ་མ་ལུས་སོ། །ཞེས་བརྗོད། དེ་བཞིན་དུ། དགུན་སྨད་ཀྱི་ཟླ་བ་གཉིས་དང་། དཔྱིད་ཟླ་བ་གཉིས། སོ་ཀའི་ཟླ་བ་གཉིས། དབྱར་ཟླ་བ་གཉིས། སྟོན་ཟླ་བ་གཉིས་རྣམས་རིགས་འགྲེ་ཤེས་པར་བྱ། གལ་ཏེ་ཟླ་ལྷག་ཡོད་ཚེ་གང་ལྷག་པའི་དུས་ཚིགས་དེ་ལ་བཤོལ་དང་བཅས་པའི་ཟླ་བ་ཕྱེད་ནི་འདས་སོ། །ཕྱེད་དང་གསུམ་ནི་ལུས་སོ། །ཞེས་པ་ལྟ་བུ་སྐབས་དང་བསྟུན་ཏེ་བརྗོད་དོ། །ཚེ་དང་ལྡན་པ་དག་རྒ་བ་དང་འཆི་བ་མངོན་པར་འོང་ཞིང་སྟོན་པའི་བསྟན་པའང་འཇིག་པར་འགྱུར་བས་ཚེ་དང་ལྡན་པ་དག་གིས་བག་ཡོད་པ་རྣལ་འབྱོར་དུ་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པའི་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་འཐོབ་བོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་དོན་ཉུང་བ་བྱ་བ་ཉུང་བ་ཡིན་པས། དགེ་འདུན་གྱི་ཐོག་མར་བྱ་བ་ཅི་ཡོད། ཚེ་དང་ལྡན་པ་དག་མ་ལྷགས་པ་རྣམས་ལ་འདུན་པ་དང་ཡོངས་སུ་དག་པ་དྲིས་ཤིག །དྲིས་ནས་ཀྱང་བརྗོད་པར་བྱའོ། །ཞེས་བརྗོད་མ་ཐག་དགེ་བསྐོས་ཀྱིས་བརྟགས་པས། མཚམས་ནང་གི་དགེ་སློང་ན་བ་སོགས་རྐྱེན་དབང་གིས་འདུ་མ་ནུས་པ་ཡོད་ན་འདུན་དག་ལེན་པའི་དགེ་སློང་བསྐོས་ལ། དེས་དེར་ཕྱིན་ནས་འདུན་དག་ལེན་ཏེ། དེ་འབུལ་བའི་སྔགས་ནི། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ལ། བདག་དགེ་སློང་བྲོ་འཚལ་བའམ། དབང་མེད་པའམ། ཆོས་ལྡན་གྱི་བྱ་བས་གཡེངས་པ་མིང་འདི་ཞེས་བགྱི་བའི་ཡང་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། བདག་དགེ་སློང་བྲོ་འཚལ་བ་སོགས་མིང་འདི་ཞེས་བགྱི་བའི་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །བདག་གི་གསོ་སྦྱོང་ཡང་ཡོངས་སུ་དག་གོ། །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །ཞེས་ལན་གསུམ་བཟླས། དེ་ནས་ལེན་པ་པོས་ནང་དུ་འོངས་ཏེ་དགེ་འདུན་ལ་བརྗོད་པ་ནི། དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སོག་མིང་འདི་ཞེས་བགྱི་བའི་ཡང་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། དགེ་སློང་བྲོ་འཚལ་བ་སོགས་མིང་འདི་ཞེས་བགྱི་བ་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །དེའི་གསོ་སྦྱོང་ཡང་ཡོངས་སུ་དག་གོ། །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིའོ། །ཞེས་ལན་གཅིག་བརྗོད། དེ་ནས་གནས་བརྟན་གྱིས། ཤཱཀྱ་སེང་གེ་དེ་ལ་ནི། །སོར་མོ་བཅུ་ཡིས་ཐལ་སྦྱར་ཏེ། །སོ་སོ་ཐར་པ་གདོན་པར་བྱ། །འདུལ་བའི་དོན་དུ་ང་ལས་ཉོན། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུང་བཞིན་བསྒྲུབ་བྱ་ཞིང་། །ཁ་ན་མ་ཐོ་ཕྲ་རྣམས་ལ། །རྟུན་ཅིང་བྱེད་པ་ཉིད་དུ་གྱིས། །རྟག་ཏུ་འབད་པས་འགའ་བ་ཡི། །སེམས་རྟ་ཁ་བླན་དཀའ་བ་ལ། །མཐུན་པའི་གཟེར་རྣོན་བརྒྱ་པ་ཡི། །སྲབ་ནི་སོ་སོ་ཐར་འདི་ཡིན། །ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒྱལ་འགྱུར། །སུ་ལ་སྲབ་འདི་མེད་པ་དང་། །ནམ་དུའང་འདོད་པར་མི་འགྱུར་བ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་རྣམ་པར་འཁྱམས་པར་འགྱུར། །དགེ་འདུན་བཙུན་པ་རྣམས་གསན་དུ་གསོལ། །དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་ལགས་ཏེ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། དེང་དགེ་འདུན་གསོ་སྦྱོང་མཛད་དེ། སོ་སོ་ཐར་པའི་མདོ་གདོན་པ་གདོན་ཏོ། །རང་ནི་གསོལ་བའོ། །ཚེ་དང་ལྡན་པ་དག་བདག་ཅག་གསོ་སྦྱོང་བྱ་སྟེ། སོ་སོ་ཐར་པའི་མདོ་འདོན་པ་གདོན་གྱི། ཁྱེད་ཅག་སུ་ལ་ལྟུང་བ་ཡོད་པ་དེ་མཐོལ་ཞིང་། ལྟུང་བ་མེད་ན་ཅང་མ་སྨྲ་ཞིག །ཅང་མི་སྨྲ་ན་བདག་གིས་ཚེ་དང་ལྡན་པ་དག་ཡོངས་སུ་དག་པར་རིག་པར་བྱའོ། །དེ་ལྟར་སོ་སོར་དྲིས་ནས་དགེ་སློང་གིས་ལན་བཏབ་པ་དེ་བཞིན་དུ་དགེ་སློང་གི་འཁོར་འདི་ལྟ་བུར་ཡང་ལན་གསུམ་གྱི་བར་དུ་བསྒྲགས་པར་བྱ་བ་ཡིན་ནོ། །ཡང་དགེ་སློང་གང་དགེ་སློང་གི་འཁོར་འདི་ལྟ་བུར་ལན་གསུམ་གྱི་བར་དུ་བསྒྲགས་པ་ན་ལྟུང་བ་ཡོད་ལ་དྲན་བཞིན་དུ་མི་མཐོལ་ན་དེ་ཤེས་བཞིན་དུ་བརྫུན་དུ་སྨྲ་བ་ཡིན་ནོ། །ཚེ་དང་ལྡན་པ་དག་ཤེས་བཞིན་དུ་རྫུན་དུ་སྨྲ་བ་ནི་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་སོ། །དེ་བས་ན་དགེ་སློང་ལྟུང་བ་བྱུང་བ་རྣམ་པར་དག་པར་འདོད་པས་ལྟུང་བ་ཡོད་ལ་དྲན་ཞིང་མཐོང་བ་མཐོལ་བར་བྱའོ། །མཐོལ་ཞིང་བཤགས་ན་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་མི་འགྱུར་རོ། །ཚེ་དང་ལྡན་པ་དག་བདག་གིས་སོ་སོ་ཐར་པའི་མདོ་འདོན་པའི་གླེང་གཞི་བཏོན་ཟིན་ཏོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན། འདི་ལྟར་ཅང་མི་སྨྲ་བ་དེས་དེ་བཞིན་དུ་འཛིན་ཏོ། །ལྷག་མ་ཐོས་པ་བསྒྲགས་པས་ཀྱང་རུང་བས་འདི་སྐད་ཅེས། ཚེ་དང་ལྡན་པ་དག །སླད་མ་ཕམ་པར་འགྱུར་བའི་ཆོས་བཞི་དང་། དགེ་འདུན་ལྷག་མའི་ཆོས་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བ་ལྟུང་བྱེད་ཀྱི་ཆོས་སུམ་ཅུ་དང་། ལྟུང་བྱེད་འབའ་ཞིག་པ་དགུ་བཅུ་དང་། སོ་སོར་བཤགས་པར་བྱ་བའི་ཆོས་བཞི་དང་། བསླབ་པར་བྱ་བའི་ཆོས་མང་པོ་དང་། རྩོད་པ་ཞི་བར་བྱ་བའི་ཆོས་བདུན་པོ་རྣམས་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་བས་སྔར་གསན་པའམ། ཕྱིས་ཀྱང་གསན་པར་འགྱུར་རོ། །ཞེས་མདོའི་ཆེ་བ་དང་མ་ལྷགས་པའི་འདུན་དག་ལེན་བརྗོད། གསོལ་བ་དང་རྣམ་བཞག་འཛིན་དུ་གཞུག་པ་སྔར་བྱ་བས་དངོས་གཞི་མདོ་འདོན་པ་ལ་སྔར་གསུངས་པ་ལས། འདིར་དིང་སང་གི་ཕྱག་ལེན་ལྟར་གླེང་གཞི་ཡན་རྫོགས་པར་བཏོན། དེ་མན་ཕམ་ལྷག་མ་ངེས་པ་དང་རིལ་འདོན་བཞི་པོ་ཐོས་པ་བསྒྲགས་པའི་དབང་དུ་བྱས་པ་སྟེ། སྤྲོ་ཞིང་ནུས་ན་ཇི་ལྟར་རིགས་པ་གདོན་པར་བྱའོ། །དེ་ནས་མཇུག་གི་བྱ་བ་ནི། སོ་སོར་ཐར་པ་བཏོན་པ་ཡིས། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་སྤྱོད་གྱུར་པ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཕན་ཚུན་ཚུལ་ཁྲིམས་བསྲུང་བ་དང་། །བསྟན་པ་འཕེལ་བར་བྱ་བའི་ཕྱིར། །སོ་སོར་ཐར་པ་འདི་བཏོན་པས། །དགེ་འདུན་གྱིས་ནི་གསོ་སྦྱོང་བྱས། །གང་གི་ཕྱིར་ནི་མདོ་བཏོན་དང་། །གང་ཕྱིར་གསོ་སྦྱོང་བྱས་གྱུར་པའི། །ཚུལ་ཁྲིམས་འདི་ནི་བསྲུང་བྱ་སྟེ། །གཡག་རྔའི་རྩེ་མོ་ཇི་བཞིན་ནོ། །ཞེས་དང་། གཞན་ཡང་བསྔོ་སྨོན་དང་བཀྲ་ཤིས་ཅི་རིགས་པ་བརྗོད་པར་བྱའོ། །གཉིས་པ་དམིགས་བསལ་གྱི་གསོ་སྦྱོང་ནི། རྐྱེན་དབང་གིས་ལམ་དུ་ཡིད་ཀྱིས་བྱིན་གྱིས་བརླབས་པའམ། གནས་གཅིག་ན་རང་གཅིག་པུ་ལས་མེད་ན་འདུག་ལ། ལྷ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་གསོ་སྦྱོང་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཀྱིས་ཡོངས་སུ་དག་གོ་ཞེས་བདག་མཆི་ན་བདག་ཡོངས་སུ་དག་པར་ལྷ་རྣམས་ཀྱིས་བཟུང་དུ་གསོལ། བདག་དགེ་སློང་མིང་འདི་ཞེས་བགྱི་བ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར། དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་གསོ་སྦྱོང་རྒྱ་ཆེར་ཉམས་སུ་མྱོངས་བར་བྱ་ཞིང་། སོ་སོ་ཐར་པའི་མདོ་འདོན་པ་ཡང་གདོན་པར་བགྱིའོ། །ཞེས་ལན་གསུམ་བརྗོད་ཅིང་ཡིད་ལ་བསམ་མོ། །ཡང་དགེ་སློང་གཉིས་དང་གསུམ་ཡོད་ན་ཕན་ཚུན་གཅིག་གི་མདུན་དུ་གཅིག་འདུག་སྟེ། བཙུན་པ་དགོངས་སུ་གསོལ། ཞེས་དང་། མཐར་བཙུན་པས་བཟུང་དུ་གསོལ་ཞེས་བརྗེ་ཞིང་ཐབས་ལེགས་བྱ། དེ་ཙམ་ཡང་མ་གྲུབ་ན། གསོ་སྦྱོང་གི་དུས་ལ་བབ་པ་དང་། ཆོས་རྣམས་ཐམས་ཅད་རྒྱུ་ལས་བྱུང་། །ཞེས་སོགས་སྔོན་དུ་བཏང་སྟེ། ཐུབ་པའི་སྔོན་གྱི་གསོ་སྦྱོང་། སྡིག་པ་ཅི་ཡང་མི་བྱ་སྟེ། །ཞེས་སོགས་དང་། ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ཞེས་པ་ཙམ་འདོན་ནོ། །དེ་དག་ནི་དུས་ངེས་པ་ཅན་གྱི་གསོ་སྦྱོང་སྟེ། གཞན་དུ་ངེས་མེད་བཀྲ་ཤིས་པའི་དང་། གནོད་པ་བཟློག་པའི་དང་། རྩོད་པ་བཟློག་པའི་གསོ་སྦྱོང་གསུམ་པ་ལ་ནི། སྦྱོར་དངོས་མཇུག་གསུམ་གྱི་ཆོ་ག་ཐམས་ཅད་སྔར་དང་འདྲ་བ་ལས། གསོལ་བའི་ལས་ཀྱི་ཚེ་གོས་སྦྱོང་བཅོ་ལྔ་པ་སྟེ། ཞེས་པའི་དོད་ལ། བཀྲ་ཤིས་ཀྱི་གོས་སྦྱོང་སྟེ། ཞེས་པ་ལྟ་བུ་དང་། དུས་བརྗོད་དུས། ཧོར་ཟླ་བཅུ་པའི་ཚེས་བཅོ་བརྒྱད་ལྟ་བུ་ལ། དགུན་སྟོད་རྣམས་ཀྱི་ཟླ་བ་དང་པོའི་བར་ཞག་གསུམ་ནི་འདས་སོ། །ཟླ་བ་གཅིག་དང་ཞག་ཉི་ཤུ་རྩ་བདུན་ནི་ལུས་སོ། །ཞེས་བརྗོད་པ་ཙམ་ཁྱད་པར་རོ།། །།གཉིས་པ་དབྱར་གྱི་གཞིའི་ཆོ་ག་ལ། སྦྱོར་བ་ནི། སྔོན་དུ་གཙུག་ལག་ཁང་བྱི་དོར་བྱ་བ་དང་། རྟེན་དགྲམ་པ་སོགས་བྱ་ཞིང་། གནས་མལ་གྱི་གདན་སྤྱད་སོགས་སྟོབ་རྒྱུ་ཡིད་ན་སྟ་གོན་བྱས་ལ། དབྱར་སྔ་མ་ཡིན་ན། དབྱར་ཟླ་འབྲིང་པོ་ཆུ་སྟོད་ཀྱི་ཟླ་བ་རྫོགས་པ་ཧོར་ཟླ་དྲུག་པའི་ཉ་དང་། ཕྱི་མ་ཡིན་ན་དབྱར་ཟླ་ཐ་ཆུང་གྲོ་ཞུན་གྱི་ཟླ་བ་རྫོགས་པ་ཧོར་ཟླ་བདུན་པའི་ཉིའི་ཉིན་པར་སྔར་བཞིན་གསོ་སྦྱོང་བྱས་ཚར་མ་ཐག་གནས་མལ་སྟོབས་པའི་དགེ་སློང་གཅིག་གམ་དུ་མ་བསྐོ་བར་བྱ་སྟེ། ཇི་ལྟར་ན་ལས་བྱེད་པས། དགེ་སློང་མིང་འདི་ཞེས་བགྱི་བ་ཁྱོད། དགེ་འདུན་ལ་དབྱར་གྱི་གནས་མལ་སྟོབས་པར་སྤྲོའམ། ཞེས་དྲིས་པའི་ལན་དུ། དེས་ཀྱང་སྤྲོ་ལགས་ཞེས་བརྗོད། དེ་ནས་ལས་བྱེད་པས། ཁོང་སྤྲོ་བར་གདའ་བས་གནས་མལ་སྟོབ་པ་བསྐོ་བ་ལ་གསོལ་བ་དང་གཉིས་ཀྱི་ལས་བགྱི་བས་དགེ་འདུན་རྣམས་སྤྱོད་ལམ་བསྟུན་ནས། ཐོག་མར་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབ་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནས་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་མལ་སྟོབ་པར་བསྐོས་ཏེ། དགེ་སློང་གནས་མལ་སྟོབ་པ་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབ་བོ། །འདི་ནི་གསོལ་བའོ། །བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་ནས་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབ་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་གནས་མལ་སྟོབ་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་གནས་མལ་སྟོབ་པར་བསྐོ་བར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་དགེ་སློང་མིང་འདི་ཞེས་བགྱི་བ་གནས་མལ་སྟོབ་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ཞེས་བརྗོད། དེ་ལྟར་བསྐོས་པའི་དགེ་སློང་དེས་གནས་མལ་སྟོབས་པ་དང་ཚུལ་ཤིང་བྲིམ་པ་ཡང་བྱའོ། །གལ་ཏེ་གནས་མལ་སྟོབ་མི་དགོས་ན་ཚུལ་ཤིང་བྲིམ་པ་བསྐོ་བའི་ཆོ་ག་ནི། རྩོད་པ་ཞི་བྱེད་ནས་འབྱུང་བ་ལྟར་བརྗོད་དེ། ལས་བྱེད་པས། དགེ་སློང་མིང་འདི་ཞེས་བགྱི་བ་ཁྱོད་དགེ་འདུན་ལ་ཚུལ་ཤིང་བྲིམ་པར་སྤྲོའམ། ཞེས་དྲི། སྤྲོ་ཟེར་ན། སྔར་གྱི་དབྱར་གྱི་གནས་མལ་སྟོབ་པ་ཞེས་པའི་དོད་དུ་དགེ་འདུན་ལ་ཚུལ་ཤིང་བྲིམ་པར་ཞེས་བསྒྱུར་བས་གསོལ་གཉིས་ཀྱི་ལས་མཇུག་སྡུད་དང་བཅས་པ་བརྗོད་དོ། །དེས་ཚུལ་ཤིང་འཇམ་ཞིང་དྲང་བ་སྲིད་དུ་ཁྲུ་གང་པ་དྲི་བཟང་པོས་ཁ་བསྒྱུར་བ་དགེ་འདུན་གྱིས་གྲངས་ལས་མི་ཉུང་བ་རྣམས་གཟེབ་ཀྱི་སྲོག་མར་རས་དཀར་བཏིང་བས་དཀྲིས་པ་རྒན་པའི་མཐའ་བཞག་ལ། རང་ཉིད་འགྲེང་སྟེ་ཐལ་མོ་སྤྱར་ནས་དབྱར་གྱི་ཁྲིམས་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བཀྲ་ཤིས་ཀྱི་གཙུག་ལག་ཁང་མིང་འདི་ཞེས་བྱ་བ་འདི་ན་ཁྲིམས་སུ་བྱ་བ། དགེ་སྦྱོང་གི་ཆོས་བཞི་ལས་མི་འདའ་བར་བྱ་བ་འདི་དང་། ཆོས་སྤྱོད་བཅུའི་བྱ་བ་ལ་བརྩོན་པས་བསླབ་པར་བྱ་བ་འདི་དང་། དབྱར་དགེ་འདུན་གྱི་ནང་དུ་འཁྲུག་ལོང་མི་བསྐྱེད་པར་བྱ་བ་འདི་དང་། ལྟུང་བ་གླེང་དྲན་མི་བྱ་བ་འདི་དང་། ཆད་པས་གཅོད་པའི་ལས་མི་བྱ་བ་འདི་དང་། གནས་རལ་བ་དང་གྲུམ་པ་བཅོས་པར་བྱ་བ་འདི་དང་། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱ་བ་འདི་དང་། དགེ་འདུན་གྱི་སྤྱི་གདན་ལ་ཞབས་རྗེན་པར་མི་འཇོག་པ་འདི་དང་། ཞལ་བཤལ་བའི་ཆུ་དགེ་འདུན་གྱི་གཙུག་ལག་ཁང་དུ་མི་འདོར་བར་བྱ་བ་ལ་སོགས་པ་འདི་ཡོད་དེ། ཁྱེད་ཅག་ལས་གང་ཁྲིམས་སུ་བྱ་བ་འདི་དང་འདིས། གནས་འདིར་གནས་པར་སྤྲོ་བ་དེས་ནི་ཚུལ་ཤིང་བཞེས་ཤིག །ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལ་ཅུང་ཟད་ཤེས་པ་དེས་སྨོས་ཤིག །ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལ་འཁྲུག་ལོང་བསྐྱེད་པར་འགྱུར་བ་དེ་ལ། དགེ་འདུན་གྱི་ཕྱིས་ཉེ་བར་བརྟག་པར་དགོངས་སོ། །ཞེས་བརྗོད་ནས་གྲལ་དུ་འདུག་གོ། །དེ་ནས་ལས་བྱེད་པས། ཚུལ་ཤིང་བཞེས་པ་དང་དབྱར་གནས་པར་ཞལ་གྱིས་བཞེས་པའི་སླད་དུ་དགེ་འདུན་རྣམས་ཐུགས་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའམ་ཐ་ཆུང་གི་ཚེས་བཅོ་ལྔ་ལགས་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ཚུལ་ཤིང་བཞེས་ཏེ། སང་ནང་བར་དབྱར་གནས་པར་ཁས་བླང་ངོ་། །འདི་ནི་གསོལ་བའོ། །དེ་ནས་བྲིམ་པ་པོས་དང་པོར་སྟོན་པའི་ཚུལ་ཤིང་དར་དང་མེ་ཏོག་གིས་དཀྲིས་པ་ལག་པའི་གུང་སྲིན་གཉིས་ཀྱིས་སྣ་གཉིས་ནས་བླངས་ཏེ་སྤྱི་བོར་རེག་གནས། འདི་ནི་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་དེས་བཞེས་པར་མཛད་དོ། །ཞེས་བརྗོད་དེ་སྟོན་པའི་སྤྱན་སྔར་དབུལ། དེ་ནས་སོག་མ་སོ་སོའི་མདུན་དུ་ཁྱེར་ཏེ་གནས་བརྟན་ནས་རིམ་པར་བྲིམ་ཞིང་། ལེན་པ་པོ་རྣམས་ཀྱིས་ཀྱང་ཅང་མི་སྨྲ་བར་སྟན་ལས་ཕྱེད་འཕགས་ཏེ་རང་རང་གི་ཚུལ་ཤིང་བླངས་ནས་དལ་བུས་པང་དུ་བཞག །དགེ་སློང་རྫོགས་པ་དང་དགེ་ཚུལ་རྣམས་ཀྱི་ཚུལ་ཤིང་ནི། འདི་ནི་དགེ་ཚུལ་འདི་དང་འདིའི་འོ། །ཞེས་རང་རང་གི་མཁན་སློབ་ཀྱིས་བླང། མཇུག་ཏུ་འདི་ནི་གཙུག་ལག་ཁང་འདི་ན་གཉུག་མར་གནས་པའི་ལྷའི་འོ་ཞེས་གནས་བརྟན་གྱིས་བླང་། དེ་ནས་དགེ་སློང་དང་དགེ་ཚུལ་གཉིས་རིམ་པར་མ་འདྲེས་པར་བསྡུས་ནས་གྲངས་བཟུང་སྟེ། བྲིམ་པ་པོས་འགྲེང་སྟེ་ཐལ་མོ་སྦྱར་ནས། དགེ་འདུན་བཙུན་པ་རྣམས་གསན་དུ་གསོལ། བཀྲ་ཤིས་ཀྱི་གཙུག་ལག་ཁང་འདི་ཞེས་བྱ་བ་འདིར་དགེ་སློང་འདི་སྙེད་ཀྱིས་ཚུལ་ཤིང་བཞེས་སོ། །ཞེས་གོ་བར་བྱ་ཞིང་། གྲལ་ན་གནས་པ་རྣམས་ཀྱིས་བཞེས་སོ་ཞེས་ལན་ཟེར་བ་དགག་དབྱེའི་རིགས་འགྲེ་ལས་བཤད་ཁུངས་མེད་པས་མ་དག་གསུངས། དགེ་ཚུལ་འདི་ཉིད་ཀྱིས་བླངས་ཞེས་བརྗོད་པ་ནི་མདོར་མ་བཤད་ཀྱང་མཆིམས་ཆེན་གྱི་ཡི་གེ་ལྟར་ཕྱག་ལེན་དུ་མཛད་དོ། །དེའི་འོག་ཏུ་གནས་མལ་སྟོབ་པ་ནི། སྤྱིར་གནས་ཁང་དང་མལ་སྟན་སོགས་གཉུག་མར་གནས་པ་རྣམས་ལ་བསྟབས་ཟིན་པ་དག་ཡིན་མོད་ཀྱི། འོན་ཀྱང་གློ་བུར་བ་ལ་གསར་སྟོབ་དགོས་པ་དང་། དེར་མ་ཟད་སྟོབ་རྒྱུ་ཡོད་ན་སོ་སོར་སྟོབ་པར་བྱ་བ་སྟེ་བསྐོས་པས་གནས་ཁང་གི་སྒོ་ལྕགས་དང་ལྡེ་མིག་བཟུང་ནས། དང་པོར་གནས་བརྟན་གྱི་མདུན་དུ་འདུག་སྟེ། མཁན་པོའམ་སློབ་དཔོན་ནམ་གནས་བརྟན་གཙུག་ལག་ཁང་འདི་ནི་གོས་ཀྱི་རྙེད་པ་སོགས་ཡོ་བྱད་དང་ལྡན་པ་ལགས་ཀྱི་བཞེས་ཤིག །ཅེས་རྒན་རིམ་ནས་དགེ་ཚུལ་གྱི་མཐའི་བར་དུའང་རང་རང་གི་གནས་ཁང་གི་སྒོ་ལྕགས་དང་ལྡེ་མིག་གཏད་ཅིང་། ལེན་པ་པོ་རྣམས་ཀྱིས་ཀྱང་ཅང་མི་སྨྲ་བར་ལྷུང་བཟེད་ལྟར་བླང་ངོ་། །དེ་ནས་མལ་སྟན་ཡང་རིམ་པ་བཞིན་དུ། གདན་ཆ་འདི་ལ་དབྱར་ཚུལ་དང་མཐུན་པར་ལོངས་སྤྱོད་ཅིག །ཅེས་བྲིམས་ཚར་བའི་རྗེས་སུ་སྟོབ་པ་པོས་དགེ་འདུན་གྱི་མཐར་འགྲེང་སྟེ་ཐལ་མོ་སྦྱར་ནས། དགེ་འདུན་བཙུན་པ་རྣམས་གསན་དུ་གསོལ། ཁྱེད་ཅག་ལས་གང་གིས་ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱད་པར་མི་བྱ། གདིང་བ་རུང་བ་མ་ཡིན་པས་ལོངས་སྤྱོད་པར་མི་བྱ། གདིང་བ་དྲི་མ་ཅན་གྱིས་ལོངས་སྤྱད་པར་མི་བྱའོ། །ཞེས་གོ་བར་བྱས་ནས། སྤྱོད་ལམ་དེ་ཉིད་ཀྱིས་དབྱར་ཁས་བླང་བ་གོ་བར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་འདུན་སང་གི་གདུགས་ལ། སྦྱིན་བདག་འདི་ཞེས་བྱ་བའམ་དམིགས་བསལ་མེད་ན་སྐྱེ་བོའི་ཚོགས་ལྷ་དང་མི་དང་ཀླུ་དང་གནོད་སྦྱིན་དུ་བཅས་པ་དུ་མ་དང་། ཞལ་ཏ་པ་འདི་ཞེས་བྱ་བ་དང་། སྤྱོད་ཡུལ་གྱི་གྲོང་འདི་ཞེས་བྱ་བ་དང་། བྲོ་གཡོག་པ་འདི་ཞེས་བྱ་བའམ་སོ་སོར་སྨོས་པ་འདི་རྣམས་ལ་བརྟེན་ཏེ་དབྱར་གནས་པར་ཞལ་གྱིས་བཞེས་པར་འགྱུར་རོ། །ཞེས་བརྗོད། དེ་ནས་བསྔོ་སྨོན་དང་ཤིས་བརྗོད་བྱས་ནས་གྲོལ་ཏེ་དབྱར་གྱི་སྦྱོར་བ་ཚུལ་འཇུག་གི་ཆོ་གའོ། །དེ་ནས་དབྱར་ཁས་བླང་བ་དངོས་གཞིའི་ཆོ་ག་ནི། དེའི་ཕྱི་ཉིན་ཚེས་བཅུ་དྲུག་གི་ནང་པར་རང་རང་སོ་སོའི་གནས་སྟེང་གཡོགས་དང་བཅས་པར་དགེ་སློང་གི་མདུན་དུ་ཁས་བླང་བར་བཤད་ཀྱང་། དེང་སང་འདུས་ནས་མཛད་པ་ཕྱག་ལེན་དུ་གདའ་བ་གཎྜི་བརྡུངས་ཏེ་འདུས་པ་དང་། དེང་དབྱར་སྔ་མ་ཞལ་གྱིས་བཞེས་པའི་དུས་ལགས་ཏེ། གཙུག་ལག་ཁང་གི་བདག་པོ་དང་། ཞེས་སོགས་ཀྱིས་རྒྱུད་ཆ་གསུམ་པ་དང་གཞི་བདག་ལ་གཏོར་མ་བཏང་། དེ་ནས་དགེ་འདུན་དུ་མ་ལོངས་པའི་དགེ་སློང་གི་མདུན་དུ་ཙོག་པུར་འདུག་ཅིང་ཐལ་མོ་སྦྱར་ཏེ། བཙུན་པ་དགོངས་དུ་གསོལ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར། གནས་རལ་བ་དང་གྲུམ་པ་བཅོས་པའི་སླད་དུ་དབྱར་སྔ་མ་ཟླ་བ་གསུམ་གནས་པར་ཁས་བླང་ངོ་། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་བརྗོད་ནས་ཐབས་ལེགས་བྱ། དབྱར་ཕྱི་མ་ཡིན་ན་དབྱར་ཕྱི་མ་ཟླ་བ་གསུམ་ཞེས་བསྒྱུར། སྦྱིན་བདག་སོགས་ཡོད་ན། གྲུམ་པ་བཅོས་པའི་སླད་དུ་ཞེས་པའི་མཇུག་ཏུ། སྦྱིན་བདག་མིང་འདི་ཞེས་བགྱི་བ་དང་། ཞལ་ཏ་བ་མིང་འདི་ཞེས་བགྱི་བ་དང། སྤྱོད་ཡུལ་གྱི་གྲོང་འདི་ཞེས་བགྱི་བ་དང་། བྲོ་གཡོག་པ་འདི་ཞེས་བགྱི་བས། དབྱར་སྔ་མ་ཟླ་བ་གསུམ་ཞེས་སྦྱར་རོ། །དམིགས་བསལ་ཡུལ་མེད་ན་གནས་འདིར་དབྱར་ཟླ་བ་གསུམ་གནས་པར་བྱའོ་སྙམ་དུ་དམ་བཅས་པས་ཀྱང་གནས་པར་འགྱུར་ཏེ། གནས་པར་ཁས་མ་བླངས་པས་གནས་མི་གཏོང་ན་གནས་པ་ཉིད་ཡིན་ནོ། །ཞེས་སོ། །དེ་ལྟར་དབྱར་ཁས་བླངས་པའི་རྗེས་སུ་ཇི་ལྟར་བསྒྲུབ་པའི་བྱ་བ་ནི། ཟླ་བ་ཕྱེད་ཕྱེད་ཅིང་གནས་མལ་ལ་ལོག་པར་སྤྱད་མ་སྤྱད་བརྟག་པ་སོགས་བསྐོས་པའི་གང་ཟག་གི་བྱ་བ་དང་། དགེ་འདུན་སྤྱིའི་བྱ་བ་ཀློག་པ་ཐོས་བསམ་དང་སྒྲུབ་པ་བསམ་གཏན་ལ་བརྩོན་ཅིང་། ལྷུང་བཟེད་ཁ་སྒྱུར་བ་སོགས་དོན་མང་བ་དང་བྱ་བ་མང་བ་སྤང་། འཁྲུག་སློང་གི་རྒྱུ་ལྟུང་བ་གླེང་བ། རྙེད་པ་བགོ་བ། འཐབ་རྩོད་བྱེད་པ་སྤང་། གཙུག་ལག་ཁང་ཐིགས་ཚགས་སོགས་ཀྱིས་བསྐྱང་། མཚམས་ཀྱི་ཕྱི་རོལ་ཏུ་ཞག་ཏུ་མི་སྡོད། འོན་ཀྱང་ཆོས་ལྡན་གྱི་དགོས་པའི་དབང་གིས་མཚམས་ཀྱི་ཕྱིར་ཞག་སྡོད་བྱེད་དགོས་ན་དབྱར་མི་རལ་བའི་སླད་དུ་བྱིན་གྱིས་བརླབས་ནས་འགྲོ་སྟེ། དེ་ལ་དབྱར་གྱི་མཐའི་ཞག་དྲུག་མ་གཏོགས་པ་གང་ཟག་ལས་ཞག་གཅིག་ནས་བདུན་གྱི་བར་གང་རུང་བྱིན་གྱིས་བརླབ་པའི་ཆོ་ག་ནི། མཚམས་ནང་དུ་དགེ་སློང་ཆོས་དགུ་ལྡན་གྱི་དྲུང་དུ་ཙོག་པུར་འདུག་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར། དབྱར་སྔ་མ་ཟླ་བ་གསུམ་གནས་པར་ཁས་བླངས་པ་ལས། བདག་མིང་འདི་ཞེས་བགྱི་བ་ཆོས་ལྡན་གྱི་བྱ་བ་འགའ་ཞིག་གི་སླད་དུ། དགུང་བདུན་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་བྱིན་གྱིས་བརླབ་བོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་དང་ཐབས་ལེགས་བྱའོ། །དེ་བཞིན་དུ་ཞག་གཅིག་དང་གཉིས་སོགས་གང་ཡིན་འདོན་པ་བརྗེ་བར་བྱའོ། །གལ་ཏེ་ཞག་བདུན་གྱིས་མི་འགྲུབ་པའི་དགེ་འདུན་ལ་སོགས་པའི་ཆོས་ལྡན་གྱི་ཆེད་དུ་འགྲོ་དགོས་ན། དགེ་འདུན་ལས་ཞག་བཞི་བཅུའི་གནང་བ་ཐོབ་པར་བྱས་རྗེས་ཞག་བརྒྱད་ནས་བཞི་བཅུའི་བར་གང་དགོས་བྱིན་གྱིས་བརླབས་ནས་འགྲོ་སྟེ། དེའི་ཆོ་ག་ནི། དགེ་འདུན་གྱི་ཆེད་ཡིན་ན། ལས་བྱེད་པས། ཚེ་དང་ལྡན་པ་ཁྱོད་དགེ་འདུན་གྱི་ཆེད་དུ་ཞག་བཞི་བཅུ་བྱིན་གྱིས་བརླབས་ཏེ་མཚམས་ཀྱི་ཕྱི་རོལ་ཏུ་འགྲོ་བར་སྤྲོའམ་དྲི། དེས་ཀྱང་སྤྲོ་ལགས་ཞེས་བྱ། རང་དོན་ཡིན་ན་དྲི་མི་དགོས་ཞེས་གཉགས་དབོན་གསུང་། དེ་ནས་རང་གིས་དགེ་འདུན་ལ་ཞག་བཞི་བཅུའི་གནང་བ་གསོལ་བའི་ཕྱིར་དགེ་འདུན་ལ་ཕྱག་བྱས་ཏེ་རྒན་པའི་མཐར་ཙོག་པུར་འདུག་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར་དབྱར་སྔ་མའམ་ཕྱི་མ་ཟླ་བ་གསུམ་གནས་པར་ཁས་བླངས་ཏེ། བདག་དབྱར་འདི་ན་མཆིས་ཤིང་། བདག་གི་དབྱར་གྱི་གནས་ནི་འདི་ལགས་པ་ལས། བདག་མིང་འདི་ཞེས་བགྱི་བ་ཞག་བཞི་བཅུ་བྱིན་གྱིས་བརླབས་ཏེ། དགེ་འདུན་ན མ་ཆོས་ལྡན་གྱི་ཆེད་དུ་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་སྤྲོ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་དུ་གསོལ། ཞེས་ལན་གསུམ་གྱིས་གསོལ་བ་བཏབ་ནས། གནང་བ་སྦྱིན་པའི་ལས་དངོས་ནི། ལས་བྱེད་པས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་ནང་མཚམས་དང་བཅས་པའི་གནས་འདིར་དབྱར་སྔ་མའམ་ཕྱི་མ་ཟླ་བ་གསུམ་གནས་པར་ཁས་བླངས་ཏེ། འདི་དབྱར་འདི་ན་མཆིས་ཤིང་། འདིའི་དབྱར་གྱིས་གནས་འདི་ལགས་པ་ལས། མིང་འདི་ཞེས་བགྱི་བ་འདི་དགེ་འདུན་ནམ་ཆོས་ལྡན་གྱི་ཆེད་དུ་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་དགེ་འདུན་ལ་ཞག་བཞི་བཅུའི་གནང་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང ། འདི་དབྱར་འདི་ན་མཆིས་ཤིང་འདིའི་དབྱར་གྱི་གནས་འདི་ལགས་པ་ལས། དགེ་འདུན་ནམ་ཆོས་ལྡན་གྱི་ཆེད་ལ་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་ཀྱིས་སླར་མཆི་བར་མིང་འདི་ཞེས་བགྱི་བ་ལ་དགེ་འདུན་གྱིས་ཞག་བཞི་བཅུའི་གནང་བ་སྩལ་ཏོ། །འདི་ནི་གསོལ་པའོ། །བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་ནང་མཚམས་དང་། ཞེས་པ་ནས། དགེ་འདུན་ལ་ཞག་བཞི་བཅུའི་གནང་བ་ཞེས་པའི་བར་སྔར་ལྟར་ལས། གསོལ་ཏེ། དེའི་སླད་དུ། འདི་དབྱར་འདི་ན་མཆིས་ཤིང་། འདིའི་དབྱར་གྱི་གནས་འདི་ལགས་པ་ལས། དགེ་འདུན་ནམ་ཆོས་ལྡན་གྱི་ཆེད་ལ་ཞེས་པ་ནས། གནང་བ་སྩོལ་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མིང་འདི་ཞེས་བགྱི་བ་ལ་ཞག་བཞི་བཅུའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་འཛིན་ཏོ། །ཞེས་བརྗོད། དེ་ལྟར་དགེ་འདུན་ལས་གནང་བ་ཐོབ་པ་དེས་ཀྱང་ནམ་འགྲོ་བའི་ཚེ་མཚམས་ནང་གི་དགེ་སློང་ཞིག་གི་མདུན་དུ་བྱིན་གྱིས་བརླབས་ནས་འགྲོ་སྟེ། དེའི་སྔགས་ནི། སྔར་གྱི་ཞག་བདུན་པའི་ཆོ་ག་དེ་ཉིད་ལ། ཆོས་ལྡན་གྱི་བྱ་བ་ཞིག་གི་སླད་དུ་དགུང་བདུན་ཞེས་པའི་ཚབ་ཏུ། དགེ་འདུན་ནམ་ཆོས་ལྡན་སླད་དུ་དགུང་བརྒྱད་དམ་བཞི་བཅུ་མཚམས་ཀྱི་སླད་རོལ་དུ་མཆི་བ་དང་། ཞེས་བསྒྱུར་བ་ཙམ་ཁྱད་པར་རོ།། །།གསུམ་པ་དགག་དབྱེའི་གཞིའི་ཆོ་ག་ལ། སྦྱོར་བ་ནི། དགག་དབྱེ་འབྱུང་བའི་ཞག་བདུན་ལ་སོགས་པའི་སྔ་རོལ་ནས་སྤྱོད་ཡུལ་གྱི་གྲོང་དུ་གོ་བར་བྱ་བ་དང་། འཁོན་ཡོད་ན་བཟོད་པར་གསོལ་བ་དང་། གཙུག་ལག་ཁང་བརྒྱན་པ་སོགས་བྱས་ལ། དབྱར་སྔ་མ་ཡིན་ན་སྟོན་ཟླ་འབྲིང་པོ་དབྱུག་པའི་ཟླ་བའམ། ཕྱི་མ་ཡིན་ན་སྟོན་ཟླ་ཐ་ཆུང་སྨིན་དྲུག་ཟླ་བའི་ཚེས་བཅུ་བཞིའི་མཚན་ཐོག་ཐག་འཆད་ནུས་པའི་དགེ་སློང་སྡེ་སྣོད་འཛིན་པ་ཡོད་ན་ཁྱིམ་པ་རྣམས་ཀྱང་ཉན་པར་བསྐུལ་ཏེ་ཆོས་བསྟན། དེ་ཙམ་མི་ནུས་ན་ཚེས་གྲང་བརྗོད་དེ་བསྐུལ་ནས་དུས་བཟང་གི་མདོ་འདོན་པ་ཙམ་ངེས་པར་བྱ་ཞེས་མཁན་པོ་མཆིམས་ཆེན་པོ་གསུང་། བཅུ་བཞི་མཚན་མོའི་ཐ་རྫོགས་པ་སྐྱ་རེངས་ཤར་བའི་མདུན་ནས་བརྩམས་ཏེ་ཉིན་ཞག་བཅོ་ལྔ་པར་གྱུར་བའི་སྔ་དྲོའི་དུས་སུ་རྩྭ་ཟོར་བ་སྟ་གོན་བྱ། ལས་ཀྱི་གཎྜིས་རྡུངས་ཏེ་དགེ་འདུན་ཐམས་ཅད་འདུས་པ་ན། ཐམས་ཅད་ཀྱིས་ཕན་ཚུན་དུ་ཕྱག་ཟིང་པོར་བྱས་ལ། འགྲེང་སྟེ་འདུད་པ་དང་བཅས་པས། དབྱར་དགེ་འདུན་གྱི་ནང་དུ་ཚུལ་བཞིན་མ་གྱུར་པས་ཐུགས་དང་འགལ་བ་ཐམས་ཅད་བཟོད་པར་གསོལ་ལོ། །ཞེས་བྱས་ལ་འདུག་སྟེ། དེང་དགེ་འདུན་གྱི་དབྱར་སྔ་མ་ཞལ་གྱིས་བཞེས་པའི་དགག་དབྱེ་བཅོ་ལྔ་པ་ལགས་ཏེ། ཞེས་བསྐུལ་ནས། རྒྱུད་ཆ་གསུམ་པ་ནས་ཚུལ་ཁྲིམས་རྣམ་དག་གི་མདོ་གདོན་པ་ཡན་ཆད་གསོ་སྦྱོང་བཞིན་བྱས་པའི་རྗེས་སུ་དགེ་ཚུལ་རྣམས་ཀྱི་བཤགས་པ་བྱེད་དགོས་ནའང་བྱས་ལ། དགེ་ཚུལ་རྣམས་བཀར་ཏེ། དེའི་འོག་ཏུ་མཚམས་ནང་དེ་ན་ཡོད་པའི་དགེ་སློང་ན་བ་ལ་སོགས་པའི་རྐྱེན་གྱིས་ལས་ཀྱི་གནས་སུ་འདུ་བར་མ་ནུས་པས་འདུན་པ་དང་དགག་དབྱེ་གཉིས་ཀ་འབུལ་བའི་སྔགས་ནི། དགེ་འདུན་གྱིས་བསྐོས་པའི་ལེན་པ་པོའི་དྲུང་དུ། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་སློང་བྲོ་འཚལ་བ་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་བྲོ་འཚལ་བ་མིང་འདི་ཞེས་བགྱི་བ་དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །བདག་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་དོ། །འདུན་པ་དང་དགག་དབྱེ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །ཞེས་ལན་གསུམ་བཟླས། ལེན་པ་པོས་དགེ་འདུན་ལ་བརྗོད་པ་ནི། དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་འདི་ཞེས་བགྱི་བ་དེ་དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །མཐོང་བ་དང་ཐོས་པ་དང་དོགས་པའི་གནས་གསུམ་གྱི་དབྱར་གནས་པའི་དགེ་འདུན་ལ་དགག་དབྱེ་བགྱིད་དོ། །འདུན་པ་དང་དགག་དབྱེ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །ཞེས་ལན་གཅིག་བརྗོད། དེ་ནས་ལྟུང་བ་ཤེས་པ་རྣམས་བཤགས་བསྡམ་བྱིན་གྱིས་བརླབ་པ་གང་ལ་གང་འོས་བྱ་སྟེ། དེ་ཡང་གསོ་སྦྱོང་གི་སྐབས་ལྟར་ལས་གྲལ་ལ་འདུ་བའི་སྔ་རོལ་དུ་བྱ་ཞིང་། དེར་མ་གྲུབ་ན་འདིར་བྱས་ལ། ལྟུང་བ་ཐུན་མོང་པ་རྣམས་ཀྱི་བྱིན་རླབས་ཀྱང་བྱའོ། །དེ་རྗེས་སྔ་རབས་པ་རྣམས་གནས་ཀྱི་བློ་མཐུན་མཛད་མོད། དེ་ལ་མཁས་པ་ཁ་ཅིག །དགག་དབྱེའི་ལས་དངོས་གཞི་དེ་གང་ཟག་གི་ལས་ཡིན་གྱི། དགེ་འདུན་གྱི་ལས་དངོས་མ་ཡིན་པས། དགེ་འདུན་གྱི་དགག་དབྱེའི་གནས་སུ་བློ་མཐུན་པར་བགྱིའོ། །ཞེས་འདོན་མི་རིགས་པའི་ཕྱིར་མི་འཐད་གསུང་། གང་ལྟར་ཀྱང་གསོ་སྦྱོང་གི་གནས་སུ་བློ་མཐུན་པར་བྱས་པ་དེ་ཉིད་ལས་གཞན་ཐམས་ཅད་ཀྱི་གནས་ཡིན་པས། དེ་མ་ཞིག་ན་ངས་གཞན་བྱེད་པ་ལ་བློ་མཐུན་བསྐྱར་ནས་བྱེད་མི་དགོས་པ་གསལ་བར་གསུངས་པས་གསོ་སྦྱོང་གི་ལག་ལེན་ཡོད་པའི་གཉུག་མར་གནས་པའི་དགེ་འདུན་གྱི་གནས་རྣམས་སུ་བྱེད་མི་དགོས་པར་གྲུབ་བོ། །དེ་ནས་དགག་དབྱེ་བྱེད་པ་པོ་བསྐོ་སྟེ། ལས་བྱེད་ལས། དགེ་སློང་མིང་འདི་ཞེས་བགྱི་བ་ཁྱོད་དབྱར་གནས་པའི་དགེ་འདུན་ལ་དགག་དབྱེ་བྱེད་པར་སྤྲོའམ་ཞེས་དྲི། དེས་ཀྱང་སྤྲོ་ལགས་ཞེས་བརྗོད། ཡང་ལས་བྱེད་པས། ཁོང་སྤྲོ་བར་གདའ་བས་དགག་དབྱེ་བྱེད་པ་པོ་བསྐོ་བ་ལ་གསོལ་བ་དང་གཉིས་ཀྱི་ལས་བགྱི་བས་དགེ་འདུན་རྣམས་སྤྱོད་ལམ་བསྟུན་ནས། ཐོག་མར་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགག་དབྱེ་བྱེད་པར་བསྐོས་ཏེ། དགེ་སློང་དགག་དབྱེ་བགྱིད་པ་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་འགྱུར་རོ། །འདི་ནི་གསོལ་བའོ། །བརྗོད་པ་མཇུག་བསྡུ་དང་བཅས་པ་ལ་ཐུགས་གཏད་པར་ཞུ། དགེ་འདུན་ནས་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིས་པར་སྤྲོ་སྟེ། དེའི་སླད་དུ་དགེ་འདུན་གྱི་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་བ་བཟོད་པ་དེ་དག་ནི་ཅང་མ་གསུངས་ཞིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱི་བཟོད་ཅིང་གནང་ནས། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ཞེས་བརྗོད། ཡང་ལས་བྱེད་པས། དགག་དབྱེ་བྱ་བའི་ཕྱིར་དགེ་འདུན་ཐུགས་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བ་མཛོད་ཅིག་དང་། དེང་དགེ་འདུན་གྱི་དགག་དབྱེ་མཛད་དོ། །འདི་ནི་གསོལ་བའོ། །ཞེས་བརྗོད། དེ་ནས་དགག་དབྱེ་དངོས་གཞིའི་ཆོ་ག་ལ། སྤྱིར་བཏང་དང་། དམིགས་བསལ་གཉིས། དང་པོ་ལའང་གཉིས་ལས། ཐོག་མར་ཚུལ་ཁྲིམས་དང་ཆོས་རྣམས་པར་དག་པའི་ཕྱིར་ལྟུང་བའི་དགག་དབྱེ་བྱ་སྟེ། བསྐོས་པའི་དགེ་སློང་དེས་རྩྭ་ཟོར་བ་དགེ་འདུན་ཐམས་ཅད་ལ་ཁྱབ་པར་བྲེམས། དེ་རྗེས་དགེ་སློང་གསུམ་གསུམ་མན་ཆད་ཀྱིས་བསྐོས་པ་དེ་རྒན་ན་ཕྱག་བྱས། ཙོག་པུར་འདུག་སྟེ་ཡུལ་རྟེན་གཉིས་ཀས་རྩྭ་ཆུན་རྒྱ་གྲམ་དེའི་རྩ་བ་རང་རང་གི་རྐང་པས་མནན། རྩེ་མོ་ལག་གཉིས་ཀྱིས་བཟུང་སྟེ། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ན། བདག་དགེ་སློང་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བགྱིད་ཀྱི། ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བཟུང་དུ་གསོལ། ཐུགས་བརྩེ་བ་ཅན་ཚེ་དང་ལྡན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་འདུལ་བ་བཞིན་སླར་བགྱིའོ། །ཞེས་ལན་གསུམ་མམ། རྐྱེན་དབང་གིས་མ་འགྲུབ་ན་གཉིས་སམ་གཅིག་བརྗོད་པས་ཀྱང་ཆོག །མཇུག་ཏུ་ཐབས་ལེགས་བྱའོ། །དེ་ནས་བསྐོས་པ་དེས་ཀྱང་གཞན་ཞིག་གི་དྲུང་དུ་དགག་དབྱེ་བྱས་རྗེས་རྩྭ་ཆུན་རྣམས་བསྡུས་པ་བགྲངས་ནས། འགྲེང་སྟེ་འདུད་པས། དགེ་འདུན་བཙུན་པ་རྣམས་གསན་དུ་གསོལ། བཀྲ་ཤིས་ཀྱི་གཙུག་ལག་ཁང་འདི་ཞེས་བྱ་འདིར་དགེ་སློང་འདི་སྙེད་ཀྱི་དགག་དབྱེ་མཛད་དོ། །ཞེས་གོ་བར་བྱས་པའི་རྗེས་སུ་གྲལ་ན་འཁོད་པ་རྣམས་ཀྱིས། ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ། །ཞེས་བརྗོད། དེ་ནས་རྙེད་པའི་སྒོ་དབྱེ་བའི་ཕྱིར་རྫས་ཀྱི་དགག་དབྱེ་བྱ་སྟེ། བསྐོས་པའི་དགེ་སློང་དེས་རང་གི་རྫས་ཁབ་ཡན་ཆད་གང་རུང་ཞིག་ཐོགས་ཏེ། དགེ་འདུན་བཙུན་པ་རྣམས་གསན་དུ་གསོལ། རྫས་འདི་ལྟ་བུས་ཀྱང་དབྱར་གནས་པའི་དགེ་འདུན་ལ་དགག་དབྱེ་བགྱིར་རུང་ངམ། ཞེས་བརྗོད་པས། ཐམས་ཅད་ཀྱིས་ལེགས་པར་རུང་ངོ་། ཤིན་ཏུ་རུང་ངོ་། །ཞེས་བརྗོད། དེའི་འོག་ཏུ་དགེ་ཚུལ་རྣམས་བོས་ཏེ་དགག་དབྱེ་སྔར་བཞིན་བྱེད་དུ་བཅུག་ནས་དགེ་འདུན་ལ་གོ་བར་བྱའོ། །དེ་ནས་མཇུག་གི་བྱ་བ་ནི། བསྐོས་པ་དེས་དགེ་སློང་དང་དགེ་ཚུལ་གྱི་དབྱར་རྙེད་རྣམས་བསྡུས་ཏེ་ལྷན་གཅིག་ཏུ་བགོ་བར་བྱ་ཞིང་། བསྔོ་བ་དང་ཤིས་བརྗོད་བྱས་ནས་ལྡང་བ་ནི་དགག་དབྱེའོ། །དེ་ཉིན་ཚེས་བཅོ་ལྔ་ཡིན་ཀྱང་གསོ་སྦྱོང་བྱ་མི་དགོས་ཏེ། དགག་དབྱེ་བྱས་པས་གསོ་སྦྱོང་ཡང་དེས་འགྲུབ་པའི་ཕྱིར། དེ་ལྟར་ཡང་ས་གའི་ལྷས། སྡིག་པ་དམན་གྱི་གསོ་སྦྱོང་ནི། །དགག་དབྱེ་བྱས་ནས་ཡང་མི་བྱ། །གསོ་སྦྱོང་དག་པར་བྱ་ཕྱིར་ཏེ། །དགག་དབྱེ་ཡང་ནི་དེ་ཉིད་ཡིན། །ཞེས་སོ། །རྒྱུ་མཚན་དེས་དབྱར་ཁས་མ་བླངས་པའི་རབ་བྱུང་དེ་ཉིད་གློ་བུར་དུ་ལྷགས་པ་གཞན་ཡོད་ནའང་དགག་དབྱེ་བྱེད་དགོས་པར་གྲུབ་བོ། །དེའི་ཕྱི་ཉིན་ཚེས་བཅུ་དྲུག་ལ་གནས་ལ་ལྷག་པར་ཆགས་པ་དང་དུབ་པ་སོགས་སྤང་བའི་ཕྱིར་རྒྱང་གྲགས་གཅིག་ཕན་ཆད་དུ་ལྗོངས་རྒྱུ་ཞིང་འགྲོ་བར་བྱའོ། །གཉིས་པ་དམིགས་བསལ་གྱི་དགག་དབྱེ་ནི། རྐྱེན་དབང་གིས་དབྱར་ཟླ་བ་གསུམ་གནས་པར་མི་ནུས་ན་ཟླ་བ་གཅིག་གམ་ཕྱེད་དང་གཉིས་འདས་པའི་ཉ་ཤི་གང་རུང་ལ་དགག་དབྱེ་བྱར་རུང་སྟེ། མདོ་རྩ་བར། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ། །ཞེས་སོ། །ཡང་གསོ་སྦྱོང་གཉིས་སོགས་མ་སོང་བ་དང་ཉ་སྟོང་མ་ཡིན་པའི་དུས་སུའང་དམག་འཁྲུགས་སོགས་ཀྱི་རྐྱེན་གྱིས་གློ་བུར་དུ་དགེ་འདུན་ཐམས་ཅད་གྱེས་དགོས་ན། དགེ་སློང་རྣམས་ཕན་ཚུན་གཅིག་གི་གཅིག་ལ་ཕྱག་བྱས་ཏེ། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་ལགས་ཏེ། བདག་མིང་འདི་ཞེས་བགྱི་བའི་ཡང་དགག་དབྱེ་ལགས་ན། བདག་མིང་འདི་ཞེས་བགྱི་བ་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་ཚོགས་པའི་དགག་དབྱེ་བགྱིད་ཀྱི། ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཞེས་པ་ནས། ཆོས་བཞིན་འདུལ་བ་བཞིན་སླར་བགྱིའོ། །ཞེས་པའི་བར་གསུམ་དང་། ཐབས་ལེགས་བྱའོ། །དགེ་འདུན་ཐམས་ཅད་མི་གྱེས་པར་གང་ཟག་འགའ་ཞིག་རྐྱེན་དབང་གིས་འགྲོ་དགོས་ནའང་རང་གི་མིག་སྔའི་སྤྱོད་ཡུལ་དུ་གྱུར་པའི་དགེ་སློང་ཞིག་གི་དྲུང་དུ་ཆོ་ག་འདི་བྱར་རུང་བ་ཡིན་ནོ། །དེ་ནི་ཚོགས་ཀྱི་དགག་དབྱེའོ། །ཡང་དབྱར་བྱིན་གྱིས་བརླབས་ཏེ་སོང་བ་ལས་མཚམས་གཞན་གྱི་གཙུག་ལག་ཁང་དུ་དགག་དབྱེ་བྱེད་པ་དང་ཐུག་ན་དེ་དག་དང་ལྷན་ཅིག་དགག་དབྱེ་བྱས་ནའང་འཆགས་ཤིང་ཉེས་པ་མེད་དོ། །ཡང་དགག་དབྱེ་གང་དུ་བྱ་བའི་གནས་དེ་ན་དགེ་སློང་བཞི་ལས་མེད་ན། དགག་དབྱེ་བྱེད་པ་པོ་བསྐོར་མི་རུང་བས་མི་བསྐོ་བར། གསོལ་བའི་ལས་དང་དགག་དབྱེ་དངོས་གོང་ལྟར་བྱ་ཞིང་། དགེ་སློང་གསུམ་མམ་གཉིས་ལས་མེད་ན་དགག་དབྱེ་བྱིན་གྱིས་བརླབ་སྟེ། ཕན་ཚུན་བརྗོད་རེས་ཀྱིས། བཙུན་པ་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བས་དགག་དབྱེ་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་མ་རྙེད་པ་དེའི་ཚེ་བདག་ལ་མཐོང་བ་དང་ཐོས་པ་དང་དོགས་པའི་གནས་གསུམ་གྱིས་དབྱར་གནས་པའི་དགེ་འདུན་ལ་དགག་དབྱེ་བྱའོ། །ཞེས་ལན་གསུམ་དང་ཐབས་ལེགས་བྱ། རང་གཅིག་པུ་ཡིན་ན་དངོས་གཞི་ཙམ་ལན་གསུམ་བརྗོད་དོ། །དེ་ནི་དགག་དབྱེ་བྱིན་གྱིས་བརླབ་པའི་ཆོ་གའོ། །གང་ཡང་འགྲོ་ལ་ཕན་བདེ་ཡི། །འབྱུང་གནས་ཐུབ་བསྟན་རིན་པོ་ཆེའི། །གཞིར་གྱུར་ལྷག་པ་ཚུལ་ཁྲིམས་ཀྱི། །སྙིང་པོ་དག་ཅིང་སྤེལ་པའི་ཕྱིར། །གཞི་གསུམ་ཆོ་ག་ཐར་གླིང་དུ། །བགྲོད་པའི་གྲུ་ཆེན་བཟང་པོ་འདི། །གཉོས་བཙུན་དྷརྨ་ཤྲཱིས་བསྡེབས། །བསྟན་དང་འགྲོ་ལ་ཕན་པར་ཤོག །ཅེས་པ་འདི་ནི་དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐྱབས་མགོན་བླ་མ་མཆོག་གི་བཀའ་སྩལ་མ་ཆོག་པར་བརྟེན་དགེ་སློང་རྨོངས་པ་དྷརྨས་རབ་མྱོས་ཀྱི་ལོ་ལ་ཨོ་རྒྱན་སྨིན་གྲོལ་གླིང་གི་ཆོས་གྲྭར་སྦྱར་བའི་ཡི་གེ་པ་ནི་དགེ་སློང་ཨོ་རྒྱན་དཔལ་འབྱོར་རོ། །ཕྱིས་མྱོས་ལྡན་ས་ཡོས་ཀྱི་ལོ་རྩོམ་པ་པོ་རང་ཉིད་ཀྱིས་དབྲི་བསྣན་ཅུང་ཟད་བགྱིས་སོ།། །། སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེ། ལོ་ཆེན་དྷརྨ་ཤྲཱི།སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེ་ཞེས་བྱ་བ་བཞུགས་སོ། །མཁན་ཆེན་ཞི་བ་འཚོའི་སྡོམ་རྒྱུན་སྨད་འདུལ་བའི་མཁན་བརྒྱུད་ཀྱི་རྣམ་ཐར་ཡིད་ཆེས་ངོ་མཚར་བའི་གཏམ་ཉུང་གསལ་སྒྲོན་མེ་ཞེས་བྱ་བ། སྟོན་པ་བཅོམ་ལྡན་འདས་སྲས་དང་སློབ་མར་བཅས་པ་ལ་ཕྱག་འཚལ་ལོ། །ཐམས་ཅད་མཁྱེན་པ་ལྷ་ཡི་ལྷར་གྱུར་པ། །ཐུབ་ཆེན་འགྲོ་བའི་བླ་མ་ཟས་གཙང་སྲས། །གང་གི་རིང་ལུགས་ཞིང་འདིར་གསལ་མཛད་པ། །མཁན་ཆེན་ཞི་འཚོ་བརྒྱུད་པར་བཅས་ལ་འདུད། །ཐབས་མཁས་ཤིང་རྟས་གདུལ་བྱ་ཐར་གླིང་དང་། །འཁྲིད་མཁས་མཁན་བརྒྱུད་རིམ་པར་བྱོན་པའི་ཚུལ། །ཉུང་ངུའི་ངག་གིས་ཡིད་ཆེས་ངོ་མཚར་གཏམ། །རྒྱ་ཆེན་གསལ་ནུས་ལེགས་བཤད་སྒྲོན་མེ་བྱ། །དེ་ལ་འདིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པའི་གཞི་མ་སོ་སོར་ཐར་པའི་སྡོམ་རྒྱུན་ནི་བོད་ཡུལ་གྱི་འདུལ་བ་འཛིན་པ་ཐམས་ཅད་སྡེ་པ་གཞི་ཐམས་ཅད་ཡོད་པར་སྨྲ་བའི་ལུགས་གཅིག་པུ་ཡིན། དེ་ལྟར་ནའང་སྡོམ་རྒྱུན་རིམ་པ་གསུམ་བྱུང་སྟེ། དང་པོ་ནི། མཁན་ཆེན་ཞི་བ་འཚོའི་སྡོམ་རྒྱུན་བསྟན་པའི་ཉི་མ་བླ་ཆེན་པོ་ལ་བརྒྱུད་པ་སྨད་འདུལ་བའི་ལུགས། གཉིས་པ་ནི། ཤར་ཕྱོགས་ཀྱི་པཎྜི་ཏ་དྷརྨཱ་པཱ་ལ་ནས་པཱ་ལ་རྣམ་གསུམ་སོགས་ལ་བརྒྱུད་པ་སྟོད་འདུལ་བའི་ལུགས། གསུམ་པ་ནི། ཁ་ཆེའི་པཎྜི་ཏ་ཤཱཀྱ་ཤྲཱི་ནས་བྱང་རྡོར་ས་གསུམ་ལ་བརྒྱུད་པ་ཁ་ཆེའི་ལུགས་དང་གསུམ་ལས། འདིར་སྨད་འདུལ་བའི་མཁན་བརྒྱུད་འདུལ་འཛིན་གསེར་རིའི་ཕྲེང་བ་ལྟར་རིམ་པར་བྱོན་ཚུལ་བརྗོད་པར་བྱ་སྟེ། དེ་ལ་ཐོག་མར་བདག་ཅག་གི་སྟོན་པ་འདི་བསྐལ་པ་གྲངས་མེད་དཔག་ཏུ་མེད་པའི་སྔོན་རོལ་ཏུ་སངས་རྒྱས་ནས་སླར་ཡང་འཚང་རྒྱ་ཚུལ་སྟོན་པ་སོགས་གང་ལ་གང་འདུལ་གྱི་བཀོད་པ་ཚད་མེད་པར་སྟོན་པར་གསུངས་པ་དང་། ཡང་གྲངས་མེད་གསུམ་གྱི་བར་དུ་སློབ་ལམ་བཞིའི་མཐར་ཐུག་ས་བཅུ་པ་མན་ཆད་བགྲོད་དེ་འཛམ་བུའི་གླིང་འདིར་སངས་རྒྱས་པ་བཞིན་དུ་བྱེ་བ་ཕྲག་བརྒྱའི་ཞིང་ཀུན་ཏུ་སྐུ་མཉམ་དུ་བསྟན་ནས་དོན་མཛད་པར་གསུངས་པ་ལ་སོགས་པའི་ཚུལ་དུ་མ་ཡོད་ཀྱང་། འདིར་སྐབས་སུ་བབ་པ་ལུང་དང་སྔོན་འབྱུང་སོགས་འཁོར་ལོ་དང་པོའི་བཀའ་དགོངས་འགྲེལ་དང་བཅས་པ་ལས་འབྱུང་བ་ནི་སྔོན་རྒྱལ་པོ་འོད་ལྡན་དུ་གྱུར་པའི་ཚེ་སངས་རྒྱས་ཤཱཀྱ་ཐུབ་པ་ཆེན་པོའི་དྲུང་དུ་སེམས་བསྐྱེད། དེ་ནས་བཟུང་སྟེ་ཚོགས་ལམ་གྱི་བསྡུས་པའི་ཚོགས་བསྐལ་པ་གྲངས་མེད་གསུམ་དུ་བསགས་ཏེ། མཛོད་ལས། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པ་ཡིན། །ཞེས་སོ། །དེ་ནས་བསྐལ་པ་བརྒྱར་མཚན་བཟང་གི་རྒྱུ་བསྒྲུབས་ནས་དགའ་ལྡན་གྱི་གནས་སུ་དམ་པ་ཏོག་དཀར་པོར་འཁྲུངས། དེ་ནས་ཡུལ་དང་རིགས་དང་དུས་དང་བརྒྱུད་དང་བུད་མེད་དེ་ལྔ་ལ་གཟིགས་ནས་ཆུ་སྟོད་ཟླ་བའི་ཉ་ལ་གླང་པོ་ཆེ་ཐལ་དཀར་གྱི་རྣམ་པས་ཡུམ་གྱི་ལྷུམས་སུ་ཞུགས་ནས། ཟླ་བ་བཅུ་ཕལ་ཆེར་རྫོགས་པར་དཔྱིད་ཟླ་ཐ་ཆུང་གི་ཚེས་བདུན་སྐར་མ་རྒྱལ་ལ་བབས་པ་ན་ལུམྦིའི་ནགས་ཚལ་དུ་བལྟམས་ཏེ། སྒྱུ་རྩལ་གྱིས་དྲེགས་པ་ཅན་རྣམས་ཚར་བཅད་ནས་བཙུན་མོའི་འཁོར་དང་བཅས་ཏེ་དགུང་ལོ་ཉི་ཤུ་རྩ་དགུའི་བར་དུ་ཁབ་ཏུ་བཞུགས་སོ། །དེ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ཞིང་ལོ་དྲུག་ཏུ་དཀའ་བ་སྤྱད་དེ། རྡོ་རྗེ་གདན་དུ་བྱང་ཆུབ་ཀྱི་ཤིང་དྲུང་དུ་བཞུགས་ནས་དགུང་ལོ་སོ་ལྔ་པ་ལ་ས་ག་ཟླ་བའི་ཉའི་སྲོད་ལ་བདུད་བཏུལ་ཞིང་སྐྱ་རེངས་འཆར་བར་ཕྱོགས་པ་ན། མངོན་པར་རྫོགས་པར་སངས་རྒྱས་ཏེ། དེའི་ཚེ་རང་བྱུང་གི་བསྙེན་པར་རྫོགས་པར་གྱུར་ཏོ། །དེའང་ཚོགས་ལམ་ཆེན་པོའི་རྟེན་ལ་སྦྱོར་ལམ་དྲོད་ནས་ཟད་མི་སྐྱེ་ཤེས་པའི་བྱང་ཆུབ་ཀྱི་བར་སྟན་ཐོག་གཅིག་ལ་མངོན་དུ་མཛད་པ་སྟེ། མཛོད་ལས། སྟོན་དང་བསེ་རུ་བྱང་ཆུབ་པ། །བསམ་གཏན་མཐར་བརྟེན་གཅིག་ལ་ཀུན། །དེ་ཡི་སྔོན་དུ་ཐར་ཆ་མཐུན། །ཞེས་སོ། །དེ་ནས་ཞག་ཞེ་དགུ་འདས་པ་ཆུ་སྟོད་ཟླ་བའི་ཚེས་བཞི་ལ་ཝཱ་རཱ་ཎ་སཱིར་ལྔ་སྡེ་ལས་བརྩམས་ཏེ་བདེན་བཞིའི་ཆོས་ཀྱི་འཁོར་ལོ་བཟླས་པ་རྣམ་པ་བཅུ་གཉིས་སུ་བསྐོར་བས་ལྔ་སྡེས་དགྲ་བཅོམ་པ་ཐོབ་བོ། །ལྷ་བརྒྱད་ཁྲིས་བདེན་པ་མཐོང་། དེ་ནས་ཉེ་བའི་ལྔ་སྡེ་ལ་སོགས་པ་ནས་རབ་བཟང་གི་བར་བཏུལ་ཏེ་དགུང་ལོ་བརྒྱད་ཅུ་པ་ས་གའི་ཉ་ལ་གྱད་ཡུལ་རྩྭ་མཆོག་གི་གནས་ཤིང་སཱ་ལ་ཟུང་གི་ཚལ་དུ་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས་པར་སྟོན་པར་མཛད་དོ། །དེ་ལྟར་སྟོན་པ་སངས་རྒྱས་ལས་སྡོམ་རྒྱུན་ཇི་ལྟར་བརྒྱུད་ཚུལ་ནི། སྤྱིར་ས་གའི་ལྷས། གང་ཕྱིར་བསྙེན་པར་རྫོགས་པ་ནི། །གཞན་ཡང་བྱེ་བྲག་སྨྲ་བར་བརྗོད། །ཇི་ལྟར་གནས་པ་མཁྱེན་པས་ན། །འདྲེན་པ་རང་རྒྱལ་རང་བྱུང་གིས། །འཕགས་པ་ཀ་ཌཱི་ནྱ་སོགས། །ལྔ་སྡེ་རྣམས་ནི་ངེས་པ་ལས། །གང་ཞིག་སློབ་མ་བཟང་སྡེ་རྣམས། །ཐམས་ཅད་སྐྱབས་སུ་འགྲོ་བས་ཐོབ། །ཕོ་ཉ་ཡིས་ནི་མཆོད་སྦྱིན་མ། །ཚུར་ཤོག་དགེ་སློང་ཞེས་བྱས་ཀྱང་། །སྟོན་པར་ཁས་བླངས་པ་ལས་ནི། །དགེ་སློང་འོད་སྲུང་བདག་ཉིད་ཆེ། །དྲི་བས་མཉེས་པ་ཉིད་ཀྱིས་ནི། །སློབ་མ་ལེགས་སྦྱིན་དེ་བཞིན་ནོ། །དབུས་དང་མཐའ་འཁོབ་ས་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་ལས་ལྷག་པས་ཀྱང་ནས་རུང་། །དེ་བཞིན་འཁོར་ཚོགས་བཅས་པ་ཡི། །གའུ་ཏ་མ་ལྕི་ཆོས་ཀྱི། །ཞེས་བསྙེན་པར་རྫོགས་ཚུལ་བཅུ་གསུངས་པ་ལས། རང་བྱུང་གི་བསྙེན་རྫོགས་ནི། ཡུལ་གཞན་ལ་མ་བརྟེན་པར་སྲིད་པ་ཐ་མ་པའི་གང་ཟག་ཟད་མི་སྐྱེ་ཤེས་པའི་བྱང་ཆུབ་བརྙེས་པའི་ཚེ་རང་གི་ངང་གིས་རྫོགས་པ་ཡིན་ལ། འཕྲིན་དང་བཅུའམ་ལྔའི་ཚོགས་ཀྱིས་རྫོགས་པ་གཉིས་ནི་ཆོ་གའི་རིགས་བྱེད་ལ་བསྟེན་པ་ཡིན་ཞིང་། དེ་ལྷག་བདུན་པོ་སྟོན་པའི་ཐུགས་རྗེ་ལ་བརྟེན་ནས་རང་གི་ངང་གིས་བསྙེན་པར་རྫོགས་པ་ཡིན་པས་ཡུལ་སྟོན་པ་སངས་རྒྱས་ལ་བརྟེན་པའི་བསྙེན་རྫོགས་ཏེ་དེ་ལས་འདིར་ནི་ཚུར་ཤོག་གི་སྒོ་ནས་བསྙེན་པར་རྫོགས་པ་ཤཱ་རིའི་བུ་ལས་བརྒྱུད་པ་ཡིན་ནོ། ༈ །དེ་ལས་ཤེས་རབ་ཅན་གྱི་མཆོག་འཕགས་པ་ཤཱ་རིའི་བུ་ནི། ཡབ་བྲམ་ཟེ་སྐར་རྒྱལ་དང་། ཡུམ་བྲམ་ཟེ་མོ་ཤཱ་ཱརི་ཀའི་སྲས་སུ་འཁྲུངས། མཚན་ཀུན་ཏུ་རྒྱུ་ཉེ་རྒྱལ། ཆུང་ངུ་ནས་རིག་བྱེད་ཐམས་ཅད་ལ་མཁས། མཁན་པོ་ཡང་དག་རྒྱལ་བའི་ཐད་དུ་ཚངས་པར་སྤྱོད་ཅིང་། སློབ་མ་བསྐྱང་བའི་ཚེ། མཁན་པོ་འདས་ཁར་སངས་རྒྱས་ལས་རབ་ཏུ་ཕྱུངས་ཤིག་ཅེས་ཁ་ཆེམས་བཞག་པ་དང་། རྒྱལ་པོའི་ཁབ་ཏུ་སོང་བ་ན་འཕགས་པ་རྟ་ཐུལ་མཐོང་བས་དད་དེ། ཁྱོད་ཀྱི་སྟོན་པ་གང། ཅིའི་ཕྱིར་རབ་ཏུ་བྱུང་། སུའི་ཆོས་ལ་དགའ་ཞེས་དྲིས་པ་ལ་ཨ་ལན་བཏབ་པས། ཉེ་རྒྱལ་གྱིས་དེའི་ཆོས་སྟོན་ཅིག །རྟ་ཐུལ་གྱིས་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང་། ཞེས་སོགས་གསུངས་པས་རྒྱུན་ཞུགས་ཀྱི་འབྲས་བུ་ཐོབ་སྟེ་བཅོམ་ལྡན་འདས་ཀྱི་ཆོས་ཀྱི་སྐུ་མཐོང་ནའང་། གཟུགས་ཀྱི་སྐུ་བལྟ་བའི་ཕྱིར་འགྲོའི་ཞེས་མའུ་གལ་གྱི་བུ་དང་འགྲོགས་ནས་སོང་བ་ལས། བཅོམ་ལྡན་འདས་འོད་མའི་ཚལ་ན་བཞུགས་པ་མཐོང་ནས་ལྷག་པར་དད་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཚུར་ཤོག་ལ་ཚངས་པ་མཚུངས་པར་སྤྱད་པར་སྤྱོད་ཅིག་ཅེས་གསུངས་པ་ཙམ་གྱིས། སྐྲ་དང་ཁ་སྤུ་རང་བྱི་ཆོས་གོས་གསུམ་གྱོན་ཞིང་ལག་ན་ལྷུང་བཟེད་དང་བྱ་མ་བུམ་ཐོགས་པ་བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུའི་སྤྱོད་ལམ་ཤིན་ཏུ་དུལ་བར་གྱུར་ཏེ་ཚུར་ཤོག་གི་སྒོ་ནས་བསྙེན་པར་རྫོགས་སོ། །དེའི་ཚེ་བར་སྣང་གི་ལྷས། བཅོམ་ལྡན་འདས་ཀྱིས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་གྱུར། །མོད་ལ་དབང་པོ་རབ་ཞི་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཞེས་ཆེད་དུ་བརྗོད་དོ། །དེ་ནས་ཟླ་བ་ཕྱེད་འདས་པ་ན་བཅོམ་ལྡན་འདས་ཀྱིས་ཀུན་ཏུ་རྒྱུ་སེན་རིང་ལ་ཆོས་བསྟན་པས་ཆོས་མིག་ཐོབ་ཅིག་ཚུར་ཤོག་གི་དགེ་སློང་དུ་གྱུར་པའི་ཚེ་ཆོས་དེ་ཐོས་པས་ཤཱ་རི་བུས་ཀྱང་དགྲ་བཅོམ་པའི་འབྲས་བུ་མངོན་དུ་བསྙེན་པར་གྱུར་ཏོ། ༈ །དེའི་མཁན་བུ་སྟོན་པའི་སྲས་འཕགས་པ་སྒྲ་གཅན་འཛིན་བཟང་པོ་ནི། ཡབ་རྒྱལ་བུ་དོན་གྲུབ་སྟེ་རབ་ཏུ་བྱུང་ཁར་གྲགས་འཛིན་མའི་མངལ་དུ་བཞག་ནས་བཅོམ་ལྡན་འདས་སངས་རྒྱས་པའི་ཚེ་བལྟམས་ཤིང་དེའི་ཚེ་ཟླ་བ་སྒྲ་གཅན་གྱིས་ཟིན་པས་ཁྱེའུའི་མིང་སྒྲ་གཅན་འཛིན་དུ་བཏགས། ལོ་དྲུག་པ་ལ་བཅོམ་ལྡན་འདས་བཙུན་མོའི་ཁྱིམ་དུ་གདུགས་ཚོད་ལ་བྱིན་པའི་ཚེ་ཞབས་ཕྱིར་འབྲངས་པ་བཅོམ་ལྡན་འདས་ཀྱི་བཀའ་སྩལ་ནས་འཕགས་པ་ཤཱ་རིའི་བུ་ལས་རབ་ཏུ་བྱུང་བ་དང་བསྙེན་པར་རྫོགས་པར་མཛད། སྟོན་པ་ལས་ཆོས་མང་དུ་བླངས་ཤིང་བསྒྲུབས་པས་གཉིས་ཀའི་ཆ་ལས་རྣམ་པར་གྲོལ་བའི་དགྲ་བཅོམ་གྱུར་ཏེ། ཐུབ་པ་ཆེན་པོས་བཀའ་བསྒོས་པ་བཞིན་དུ་སྐུ་ཚེའི་འདུ་བྱེད་བྱིན་གྱིས་བརླབས་ནས་འཁོར་དགྲ་བཅོམ་པ་སྟོང་ཆིག་བརྒྱ་དང་བཅས་ཏེ་པྲི་ཡངྐུའི་གླིང་ན་བསྟན་པ་སྐྱོང་བཞིན་དུ་བཞུགས་སོ། ༈ །དེའི་མཁན་བུ་བྲམ་ཟེའི་བཙུན་པ་སྒྲ་གཅན་འཛིན་བཟང་པོ་ནི། ཡུལ་ཨོ་ཌི་བི་ཤར་བྲམ་ཟེའི་རིགས་སུ་འཁྲུངས། གཞོན་ནུ་ནས་རིག་བྱེད་ཡན་ལག་དང་བཅས་པ་དང་རིག་པའི་གནས་བཅོ་བརྒྱད་སོགས་ལ་མཁས་པས་བྲམ་ཟེའི་ཁྱེའུ་རྣམས་ལ་གསང་ཚིག་ཀློག་ཅིང་གསན་པ་ལས། ནམ་ཞིག་རྡོ་རྗེ་རྣལ་འབྱོར་མས་བྱིན་གྱིས་བརླབས་པས་ནང་གི་ནུས་པ་བརྙེས། དེའི་ཚེ་བྲམ་ཟེ་རྣམས་ཀྱིས་མྱོས་བྱེད་གསོལ་བ་ལ་བརྟེན་ནས་དམའ་དབབ་པར་འདོད་པ་ན་ཐམས་ཅད་ནུས་པས་ཚར་བཅད། དེ་ནས་ཡུལ་དབུས་སུ་བྱོན་ཏེ་འཕགས་པ་སྒྲ་གཅན་འཛིན་བཟང་པོ་ལས་རབ་ཏུ་བྱུང་ཞིང་བསྙེན་པར་རྫོགས། རིང་པོ་མ་ཐོགས་པར་དགེ་སློང་སྡེ་སྣོད་འཛིན་པ་ཆེས་མཆོག་ཏུ་གྱུར་ནས་སྔོན་འཕགས་པ་ཤཱ་རིའི་བུ་འཁྲུངས་པའི་སར་གཙུག་ལག་ཁང་བརྩིགས་པ་ནཱ་ལེནྡྲར་གྲགས་པ་སྟེ་ཐོག་མར་མྱ་ངན་མེད་ཀྱིས་བརྩིགས་ཤིང་དེ་རྗེས་ཐོ་བཙུན་སྐུ་མཆེད་ཀྱིས་ཆོས་གཞི་དར་བར་མཛད་པ་དེའི་མཁན་པོར་གྱུར་ནས་བསྟན་པ་ཆེས་ཆེར་རྒྱས་པར་མཛད། ཕྱིས་རིག་པ་བརྟུལ་ཞུགས་ཀྱི་སྤྱོད་པས་ཡུལ་ཀུན་ཏུ་རྒྱུ་བ་ན། མ་ར་ཧ་ཊར་ཞིང་གི་རྣལ་འབྱོར་མ་མདའ་མཁན་གྱི་བུ་མོའི་ཚུལ་དུ་གཟིགས་ཏེ་དེ་ཉིད་ཕྱག་རྒྱར་བརྟེན་པས་མདའ་བསྲང་བའི་བརྡ་ཐབས་ཀྱིས་ཀྱང་ངོ་སྤྲད་བ་ལྟར་གྱུར་ཏེ་མཆོག་གི་དངོས་གྲུབ་བརྙེས། མཚན་ཡང་ས་ར་ཧར་གྲགས་ཏེ། དོ་ཧ་རྡོ་རྗེའི་གླུ་མང་དུ་མཛད་ཅིང་དཔལ་གྱི་རི་ལ་གཤེགས་ནས་ད་ལྟའང་བཞུགས་ཞེས་ཟེར་ལ། ཡང་སྐུ་ལུས་དེ་ཉིད་ཀྱིས་སངས་རྒྱས་ཀྱི་ཞིང་གཞན་དུ་བཞུད་པ་ཡིན་ཡང་གསུངས། སློབ་དཔོན་འདིའི་སྐུ་ཚེའི་རིང་ལ་ཤེར་ཕྱིན་འབུམ་པ་མ་གཏོགས་ཐེག་ཆེན་གྱི་མདོ་སྡེ་ཕལ་ཆེ་བ་བྱུང་ཞེས་གྲགས་སོ། ༈ །དེའི་མཁན་བུ་འཕགས་པ་ཀླུ་སྒྲུབ་ནི། སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་ན་ལྷོ་ཕྱོགས་བཻ་དརྦྷར་བྲམ་ཟེའི་རིགས་སུ་འཁྲུངས། ལྟས་མཁན་གྱིས་སྐྱེ་བོ་བརྒྱ་བྲམ་ཟེ་བརྒྱ་དགེ་སློང་བརྒྱ་རྣམས་ལ་སྟོན་མོ་དྲངས་ན་རིམ་པར་ཞག་བདུན། ཟླ་བ་བདུན། ལོ་བདུན་དུ་འཚོ། དེ་ལས་ལྷག་པའི་ཐབས་མེད་ཟེར་བ་ལྟར་ཕ་མས་ཀྱང་ཚུལ་བཞིན་བསྒྲུབས་ནས། དེ་སྲིད་དུ་རིག་བྱེད་ཀྱང་མཁས་པར་བསླབ། དུས་དེ་རྣམས་རྫོགས་སུ་ཉེ་བ་ན་གཡོག་དང་བཅས་ཏེ་འཁྱམས་སུ་བཏང་བས་ནཱ་ལེནྡྲར་སླེབ། མཁན་པོ་སྒྲ་གཅན་འཛིན་གྱིས་ཚེ་དཔག་མེད་ཀྱི་རིག་སྔགས་བཟླར་བཅུག་པས་འཆི་བའི་འཇིགས་པ་ལས་གྲོལ། དེར་རབ་ཏུ་བྱུང་ནས་ཐེག་པ་ཆེ་ཆུང་གི་སྡེ་སྣོད་མཐའ་དག་དང་། རིག་པའི་གནས་ཐམས་ཅད་ལ་མཁས་པར་སྦྱང་། ལོ་ལོན་ནས་སྔར་གྱི་མཁན་པོ་ལས་བསྙེན་པར་རྫོགས་ཏེ་བསྟན་པ་བསྐྱང་། དབུ་མའི་ཚུལ་ལུགས་དར་བར་མཛད། ཉན་ཐོས་རྣམས་ལའང་ཕན་ཆེར་བཏགས། ཁྱད་པར་དུ་དགེ་ཚུལ་སློང་བསླབ་འཆལ་མང་པོ་དགེ་འདུན་གྱི་ནང་ན་དབང་ཆེན་གྱིས་གནས་པ་ཐམས་ཅད་བསྐྲད་པས་སྟོང་ཕྲག་བརྒྱད་ཙམ་བྱུང་བར་གྲགས། སྡེ་པ་ཀུན་གྱི་བདག་པོ་མཛད། བཅུད་ལེན་སོགས་ཐུན་མོང་གི་དངོས་གྲུབ་མང་པོ་དང་བསད་གསོ་སོགས་ཀྱི་ནུས་པ་ཐམས་ཅད་ཀྱང་གྲུབ། ནཱ་ལེནྡྲར་ཐེག་ཆེན་གྱི་ཆོས་སྨྲ་བ་ལྔ་བརྒྱ་ལ་ལོ་མང་པོར་གསེར་འགྱུར་གྱི་རྩིའི་སྦྱོར་བ་ལ་བརྟེན་ཏེ་འཚོ་བ་སྦྱར། རྨ་བྱ་ཆེན་མོའི་རིག་སྔགས་གྲུབ་པས་ཀླུ་ཡུལ་དུ་བྱོན་ནས་ཡུན་རིང་པོར་བཞུགས་ཤིང་ཆོས་གསུངས། ཤེར་ཕྱིན་རྒྱས་པ་སོགས་སྤྱན་དྲངས་ཏེ་མི་ཡུལ་དུ་བྱོན། སྔར་མཚན་དགེ་སློང་དཔལ་དང་ལྡན་པ་ཞེས་བྱ་བ་ཡིན་པ་ལས་དེ་ཕྱིན་ཀླུ་སྒྲུབ་ཅེས་གྲགས། རིགས་ཚོགས་སོགས་བསྟན་བཅོས་ཀྱང་མང་དུ་མཛད། མུ་སྟེགས་པའི་རྒོལ་བ་དང་ཐེག་ཆེན་ལ་སྡང་བའི་དགེ་སློང་བདེ་བྱེད་སོགས་རྩོད་པས་ཚར་བཅད། ལྷ་ཁང་དང་མཆོད་རྟེན་གྱིས་ཀྱང་ས་ཕྱོགས་ཐམས་ཅད་ཁྱབ་པར་མཛད། ཕྱིས་དཔལ་གྱི་རི་ལ་ལོ་ཉིས་བརྒྱ་ཙམ་གནོད་སྦྱིན་མོ་རྣམས་ཀྱིས་འཁོར་དང་བཅས་ཏེ་སྔགས་སྤྱོད་ཀྱིས་བཞུགས་པས་མཆོག་གི་དངོས་གྲུབ་བརྙེས་ཏེ་སྐུ་ལ་མཚན་བཟང་པོ་སོ་གཉིས་ཀྱིས་བརྒྱན་པར་གྱུར། རྒྱལ་པོ་བདེ་བྱེད་ཀྱི་བུ་ཆུང་ངུ་སུ་ཤཀྟིའི་དོན་དུ་མགུལ་ཀུ་ཤས་བཅད་དེ་དབུ་སྦྱིན་པར་བཏང་ནས་བདེ་བ་ཅན་དུ་གཤེགས་སོ། །གང་དག་བྲམ་ཟེ་སྒྲ་གཅན་འཛིན་གྱི་མཁན་པོ་གནས་བརྟན་ནག་པོ་བ་བྱ་བ་ཡིན་ཞེས་འབྱུང་བ་དང་། ཀླུ་སྒྲུབ་ཀྱི་མཁན་པོ་དྲི་མ་མེད་པའི་གཟི་བརྗིད་ཅན་ཞེས་སྦྱོར་ལམ་པ་ཞིག་ཡིནཞེས་བ་དང་། སྒྲ་གཅན་འཛིན་གཉིས་ཀྱི་བར་དུ་ཐེག་ཆེན་དཔལ་གྱི་གྲགས་པ་ཞེས་བྱ་བ་བརྒྱུད་དགོས་གསུངས་ནའང་། སྔར་གྱི་མཁན་བརྒྱུད་སྔ་ཕྱི་ཐམས་ཅད་ཀྱི་ལོ་རྒྱུས་ལ་འདིར་བཤད་པ་ལྟར་ཡོད་ཅིང་། ཤཱ་རིའི་བུ། སྒྲ་གཅན་འཛིན་གཉིས། ཀླུ་སྒྲུབ། ལེགས་ལྡན་འབྱེད། དཔལ་སྦས། ཡེ་ཤེས་སྙིང་པོ། བོ་དྷི་ས་ཏྭ་རྣམས་བསམ་ཡས་ཀྱི་གྱང་རིས་ལ་ཡོད་ཅེས་ཀུན་མཁྱེན་བུ་སྟོན་གསུང་བས་ཀྱང་འདི་ཁོ་ནར་དག་པར་སེམས་སོ། ༈ །འཕགས་པ་ཀླུ་སྒྲུབ་ཀྱི་མཁན་བུ་སློབ་དཔོན་ལེག་ལྡན་འབྱེད་ནི། ཡུལ་ལྷོ་ཕྱོགས་མ་ལ་ཡར་རྒྱལ་རིགས་སུ་འཁྲུངས། ཀླུ་སྒྲུབ་ལས་རབ་ཏུ་བྱུང་ཞིང་བསྙེན་པར་རྫོགས། སྡེ་སྣོད་གསུམ་ལ་མཁས་པར་གྱུར། ཏིང་ངེ་འཛིན་ཁྱད་པར་ཅན་ཡང་གྲུབ། ལྷོ་ཕྱོགས་ཀྱི་གཙུག་ལག་ཁང་ལྔ་བཅུ་ཙམ་གྱི་བདག་པོ་མཛད་དེ་བསྟན་པ་བསྐྱངས། དབུ་མ་རྩ་བ་ཤེས་རབ་ལ་སངས་རྒྱས་བསྐྱངས་ཀྱིས་བཞེད་པ་སུན་ཕྱུངས་ཏེ་འགྲེལ་པ་མཛད། དགེ་སློང་སྟོང་ཕྲག་དུ་མ་རྗེས་སུ་འབྲངས་པས་ལུགས་དེ་ཤིན་ཏུ་དར་བར་གྱུར། རིལ་བུའི་དངོས་གྲུབ་བསྒྲུབས་པས་གྲུབ་ཅིང་། མཐར་རྣམ་སྨིན་གྱི་སྐུ་ལུས་བོར་ནས་རིགས་སྔགས་འཆང་གི་གནས་སུ་གཤེགས་སོ། ༈ །དེའི་མཁན་བུ་སློབ་དཔོན་དཔལ་སྦས་ནི། ཡུལ་ཤར་ཕྱོགས་པ་སློབ་དཔོན་ལེགས་ལྡན་འབྱེད་ལས་རབ་ཏུ་བྱུང་ཞིང་བསྙེན་པར་རྫོགས། གསུང་རབ་མཐའ་དག་ལ་སྦྱངས་པས་ཤིན་ཏུ་མཁས། རང་རྒྱུད་གོང་མའི་གྲུབ་མཐའ་འཛིན་པའི་དབུ་མ་པ་ཆེན་པོར་གྱུར། ཉན་ཐོས་དང་ཕྱི་རོལ་པའི་རྒོལ་བ་ཐམས་ཅད་སྨྲ་བས་ཟིལ་གྱིས་མནན། ཐེག་པ་ཆེན་པོའི་ལུང་རྟོགས་ཀྱི་བསྟན་པ་རྒྱས་པར་མཛད་དོ། ༈ །དེའི་མཁན་བུ་སློབ་དཔོན་ཡེ་ཤེས་སྙིང་པོ་ནི། ཨོ་ཌི་བི་ཤའི་ཡུལ་དུ་འཁྲུངས་ཤིང་། ཆུང་ངུ་ནས་རིག་པའི་གནས་མཐའ་དག་ལ་མཁས་པར་གྱུར་པ་ཞིག་བྷངྒ་ལར་དཔལ་སྦས་ཀྱི་དྲུང་དུ་བྱོན་ཏེ། རབ་ཏུ་བྱུང་ཞིང་བསྙེན་པར་རྫོགས་ནས་ཆོས་ཉན་པས། ལེགས་ལྡན་འབྱེད་ཀྱི་སྲོལ་འཛིན་དབུ་མ་པ་ཆེན་པོར་འགྱུར། དབུ་མ་བདེན་གཉིས་ལ་སོགས་བསྟན་བཅོས་ཀྱང་མཛད། འཕགས་པ་སྤྱན་རས་གཟིགས་ཡུན་རིང་པོར་བསྒྲུབས་པས་མཐར་ཡིད་བཞིན་ནོར་བུའི་འཁོར་ལོར་བསྒྱུར་བ་ཞལ་གཟིགས་ཏེ་མངོན་ཤེས་ཀྱང་གྲུབ། མདོ་སྡེ་དུ་མ་ཐུགས་ནས་འདོན་ཞིང་མུ་སྟེགས་ཀྱི་རྒོལ་བ་རྣམས་ཀྱང་རྩོད་པས་ཕམ་པར་མཛད་པ་ཡིན་ནོ། ༈ །དེའི་མཁན་བུ་གངས་ཅན་བསྟན་པའི་ཉི་མ་ཨཱ་ཙར་བློ་དྷི་སཏྭ་ནི། ཤར་ཕྱོགས་བྷདྒ་ལའི་ཡུལ་དུ་ས་ཧོ་རའི་རིགས་སུ་འཁྲུངས། སློབ་དཔོན་ཡེ་ཤེས་སྙིང་པོ་ལས་རབ་ཏུ་བྱུང་ཞིང་བསྙེན་པར་རྫོགས། མཚན་ཡོངས་གྲགས་ཤཱནྟ་རཀྵི་ཏ་སྟེ་ཞི་བ་འཚོའམ། དྷརྨཱ་ཤཱནྟི་གྷོ་ཥ་སྟེ་ཆོས་ཀྱི་ཞི་བའི་དབྱངས་ཞེས་ཀྱང་བྱ། ཐུན་མོང་གི་སྡེ་སྣོད་གསུམ་དང་ཁྱད་པར་ཐེག་པ་ཆེན་པོའི་མདོ་སྡེ་ཐམས་ཅད་ཐུགས་སུ་ཆུད། རིག་པའི་གནས་སུ་གྱུར་པ་མཐར་དག་ཀྱང་མཁྱེན་པར་མཛད། ལྷག་པར་རང་རྒྱུད་གོང་མའི་རིག་ལུགས་འཛིན་པའི་དབུ་མ་བ་ཆེན་པོར་གྱུར། དབུ་མ་རྒྱན་ལ་སོགས་པའི་བསྟན་བཅོས་ཀྱང་མཛད་དེ་འཕགས་ཡུལ་དུ་བསྟན་པ་ཡུན་རིངས་སུ་བསྐྱངས། དེ་ནས་སྤྲུལ་པའི་རྒྱལ་པོ་ཁྲི་སྲོང་ལྡེའུ་བཙན་གྱིས་བོད་ཡུལ་དུ་སངས་རྒྱས་ཀྱི་བསྟན་པ་འཛུགས་པར་བཞེད་པ་ན། སང་ཤི་དང་གསལ་སྣང་གིས་རྒྱ་ནག་ཏུ་ཕྱིན་ཏེ་ཆོས་བམ་པོ་སྟོང་ཙམ་བླངས་ཀྱང་མ་ཞང་གི་ཆད་པས་འཇིག་ནས་སྦས། ཕྱིས་རྦ་གསལ་སྣང་མང་ཡུལ་གྱི་ཁད་དཔོན་ལ་བསྐོས་པས། དེར་གཙུག་ལག་ཁང་གཉིས་བརྩིགས་ཤིང་རྐྱེན་རིས་ཀྱང་བཅད། བལ་པོར་མཁན་པོ་ཞི་བ་འཚོ་བཞུགས་པ་མཇལ་དུ་ཕྱིན་ནས་སེམས་བསྐྱེད་ཞུས། བོད་ཡུལ་དུ་འབྱོན་པར་གསོལ་བས། བོད་ངའི་གདུལ་ཞིང་ཡིན་ཡང་ཁྲི་སྲོང་ལྡེའུ་བཙན་དང་ཁྱོད་མ་སྐྱེས་པས། ངས་འདི་ན་བོད་ཀྱི་རྒྱལ་རབས་དགུའི་བར་དུ་སྒུག་གིན་བསྡད་པ་ཡིན། ད་ཁྱོད་གཉིས་ཀྱང་ནར་སོན་པས་འོ་སྐོལ་རྣམས་ཀྱིས་བོད་དུ་བསྟན་པ་འཛུགས་པའི་དུས་ལ་བབ་ཅེས་གསུངས། དེ་ནས་རྡོ་རྗེ་གདན་དུ་མ་ཧཱ་བོ་དྷི་ལ་མཆོད་པ་ཆེན་པོ་བྱེད་དུ་ཕྱིན། སླར་ལོག་སྟེ་དབུས་སུ་འོང་ནས། བཙན་པོ་ལ་མཁན་པོའི་གསུང་རྣམས་གསོལ་བས། བཙན་པོའི་ཞལ་ནས་མ་ཞང་གིས་ཆད་པ་བཅད་དོགས་ཡོད་པས་ཁྱོད་རང་མྱུར་དུ་སོང་། ངས་ལྐོག་ཏུ་འགོས་རྒན་དང་གྲོས་བྱས་ནས་ཐབས་ཀྱིས་སྤྱན་འདྲེན་དུ་བཏང་གི་གསུངས། དེ་ནས་འགོས་རྒན་གྱིས་གཡོ་ཆེན་པོས་མ་ཞང་གསོན་དུར་དུ་བཅུག་སྟེ། ཕོ་ཉ་མངགས་པས་གསལ་སྣང་གིས་མཁན་པོ་སྤྱན་དྲངས་ནས་ལྷ་སར་ཆགས་ཕེབས། བཙན་པོས་བློན་པོ་རྣམས་ལ་ཨཱ་ཙརྱ་དེ་ཇི་ལྟར་འདུག་ལྟོས་ལ་ཤོག་ཅིག་བཟང་པོ་ཞིག་འདུག་ན་འདིར་ཡང་སྤྱན་འདྲེན་ནོ་གསུངས། བློན་པོ་རྣམས་ཀྱིས་ཕྱིན་ཏེ་དྲིས་པས་མཁན་པོའི་ཞལ་ནས། ཁོ་བོའི་ཆོས་ལུགས་ནི་རིགས་པས་བརྟགས་ནས་གང་འཐད་པ་དེ་བྱེད། མི་འཐད་པ་དེ་མི་བྱེད་པ་ཡིན་གསུངས། དེར་རྒྱལ་བློན་མཐུན་པ་སྤྱན་དྲངས་ཏེ་འོམ་བུའི་ཚལ་དུ་མཇལ། བཙན་པོས་ཕྱག་མཛད་པའི་ཚེ་ཨཱ་ཙརྱའི་ཞལ་ནས། འོ་སྐོལ་འོད་སྲུང་གི་བསྟན་པ་ལ་བལ་པོའི་མཆོད་རྟེན་གྱི་དྲུང་དུ་བོད་དུ་དམ་ཆོས་སྤེལ་བར་སྨོན་ལམ་བཏབ་པ་དེ་རྒྱལ་པོས་བསྙེལ་ལམ་གསུངས་པའི་ལན་དུ་མ་འཚལ་ཞུས་པ་ན་མཁན་པོས་བྱིན་གྱིས་བརླབས་ཏེ་བཙན་པོས་སྔོན་གྱི་སྐྱེ་བ་ཡང་དག་པར་རྗེས་སུ་དྲན། དེ་ནས་ཕོ་བྲང་རླུང་འཚུབས་ཀྱི་ཡང་ཐོག་ཏུ་དར་གྱི་གུར་ཕུབ་པར་བཞུག་སུ་བཅུག །ཟླ་བ་བཞིར་ཁ་ཆེ་ཨཱ་ནནྟས་ལོ་ཙཱ་བྱས་ནས་བཙན་པོ་ལ་དགེ་བ་བཅུ་དང་རྟེན་འབྲེལ་བཅུ་གཉིས་ཁམས་བཅོ་བརྒྱད་རྣམས་ལས་བརྩམས་ཏེ་ཆོས་བཤད་པས། བོད་འདྲེ་རྣམས་ཁྲོས་ཏེ་ཕོ་བྲང་ཕང་ཐང་ཆུས་ཁྱེར། དམར་པོ་རིའི་ཕོ་བྲང་ལ་ཐོག་བརྒྱབ། ཡུལ་ཁམས་རྣམས་སུ་ལོ་ཉེས་དང་མི་ནད་ཆེན་པོ་བྱུང་བས། བོད་འབངས་ཐམས་ཅད་ཀྱིས་ཆོས་བྱས་པས་ལན་ཟེར་ཆོས་བྱར་མ་བཏུབ་ནས། བཙན་པོས་མཁན་པོ་ལ་གསེར་ཕྱེ་བྲེ་གང་གི་ཡོན་ལན་གསུམ་ཕུལ་ནས། འདི་སྐད་ཅེས་ཨཱ་ཱཙརྱ་རེ་ཞིག་བལ་ཡུལ་དུ་བཞུད་ལ། དེ་བར་བོད་མི་རྣམས་ལྷ་ཆོས་མི་བྱེད་དུ་མི་རུང་བར་གླེངས་ཤིང་བརྔན་པ་རེ་སྦྱིན། ཞང་བློན་རྣམས་ཐབས་ཀྱིས་བྲིད་ནས་ཆོས་བྱར་བཏུབ་པའི་ཚེ་སླར་སྤྱན་འདྲེན་ནོ་ཞུས་པས། མཁན་པོའི་ཞལ་ནས། བོད་ཀྱི་འདྲེ་སྲིན་འདུལ་བ་ལ་སློབ་དཔོན་པདྨ་པཾ་བྷ་ཝ་བྱ་བ་ད་ལྟ་ས་སྟེང་ན་མཐུ་ཆེ་ཤེས་ཏེ་སྤྱན་དྲངས་ན་བཙན་པོའི་བསམ་པ་འགྲུབ་གསུང་། གསེར་འཁྱོར་བ་གང་བལ་པོའི་རྒྱལ་པོས་སྦྱིན་དགོས་གསུངས་ནས་བསྣམས། ལྷག་མ་རྣམས་བཙན་པོ་ལ་གཏད་དེ་ཕྱི་ལྟར་ན་བསྐྲད་པ་ལྟར་བྱས་ཏེ་གསལ་སྣང་དང་ལང་གྲོ་སྣ་རས་པལ་ཡུལ་གྱི་བར་དུ་བསྐྱལ། སླར་ལོག་ནས་གསལ་སྣང་ཆོས་ཀྱི་སྤྱན་པར་བསྐོས་ཏེ་འཁོར་སུམ་ཅུ་དང་བཅས་རྒྱ་ནག་ཏུ་ཕོ་ཉར་ཕྱིན། དེ་བར་ཞང་བློན་ཐམས་ཅད་བསྡུས་ནས་ཆོས་བྱེད་པའི་ཆས་སོ་གྲུབ་བའི་ཚེ་རྒྱ་རྗེས་ཕོ་ཉ་རྣམས་ལ་བྱ་དགའ་ཆེན་པོ་དང་། བཙན་པོ་ལ་དར་ཡུག་ཁྲི་ཕྲག་སོགས་སྐྱེས་མང་པོ་དང་བཅས་ཏེ་སླེབ། དེ་ནས་བལ་ཡུལ་དུ་སྤྱན་འདྲེན་གྱི་ཕོ་ཉ་བཏང་བས། སློབ་དཔོན་རྣམ་གཉིས་བྱོན་ཏེ་སློབ་དཔོན་ཆེན་པོ་པདྨས་བོད་འདྲེ་ཐམས་ཅད་བཏུལ་ནས། ད་ཕྱིན་ཆད་ལྷ་ཆོས་ཅི་དར་མཛོད། གཙུག་ལག་ཁང་དགོངས་པ་བཞིན་དུ་བརྩིགས་ཤིག་གསུངས་པ་ལྟར། བསམ་ཡས་ཀྱི་གཙུག་ལག་ཁང་བརྩིགས་པས་ལོ་ལྔ་ལ་ལེགས་པར་འབྱོངས། དེ་རྗེས་བི་ཀྲ་མ་ཤཱི་ལའི་གཙུག་ལག་ཁང་ནས་གཞི་ཐམས་ཅད་ཡོད་པར་སྨྲ་བའི་དགེ་སློང་བཅུ་གཉིས་སྤྱན་དྲངས་ཏེ། ལུག་གི་ལོ་ལ། ཨཱ་ཙརྱ་བོ་དྷི་སཏྭས་མཁན་པོ་མཛད་དེ་སད་མི་མི་བདུན་རབ་ཏུ་བྱུང་ཞིང་བསྙེན་པར་རྫོགས། དེ་ནས་ཀྱང་དད་པ་ཅན་དང་ཤེས་རབ་ཅན་མང་པོ་རབ་ཏུ་བྱུང་ནས་ཁྲི་སྲོང་གི་རིང་ལ་བོད་ཀྱི་ཡུལ་འདིར་ཆོས་གྲྭ་ཆེན་པོ་བཅུ་གཉིས་དང་། ཡེར་པ་༡༠༨དང་ཡེར་པའི་སྒོམ་ཆེན་བརྒྱ་དང་བརྒྱད་ལས་དཔལ་གྱི་རྡོ་རྗེ་མ་གཏོགས་ཐམས་ཅད་འོད་ལུས་སུ་གྲུབ་བོ། །ལས་རྒྱུ་འབྲས་འདི་ཧ་ཅང་གིས་སྐྲག་གསུངས། མཆན། ཆུ་བོ་རི་༡༠༨དང་མཆིམས་ཕུ་༢༥རྣམས་སུ་སྒོམ་གྲྭ་ཆེན་པོ་རེ་བཙུགས་ཏེ་རབ་བྱུང་ཐམས་ཅད་ཀྱི་འཚོ་བ་བླ་ནས་སྦྱར། སྔགས་མཚན་ཉིད་ཀྱི་ཆོས་ཕལ་མོ་ཆེ་བསྒྱུར་ཞིང་ཉན་བཤད་ཀྱིས་གཏན་ལ་ཕབ། མཁས་པ་དང་གྲུབ་པ་བརྙེས་པའི་སྐྱེས་བུས་གངས་ཅན་གྱི་ཡུལ་ཐམས་ཅད་མཛེས་པར་བྱས་སོ། །དུས་ཕྱིས་ཇོ་བོ་དཱི་པཾ་ཀ་རས་བསམ་ཡས་སུ་ཕེབས་ནས་པེ་ཧར་གླིང་དུ་བཞུགས། རྒྱ་དཔེ་མང་པོ་འདུག་པ་གཟིགས་པས་ཤིན་ཏུ་དགྱེས་ཏེ། སྔོན་བོད་དུ་བསྟན་པ་བྱུང་བ་འདྲ་བ་རྒྱ་གར་དུ་ཡང་མ་བྱུང་བར་འདུག་ཅེས་བསྔགས་པ་མཛད། མཁན་པོ་དགུང་ལོ་དགུ་བརྒྱ་བཞེས་པའི་ཚེ་བོད་ཡུལ་དུ་བྱོན་ཞེས་གྲགས་པ་ནི་མཁན་པོ་ཉིད་ལྷ་ཐོ་ཐོ་རི་གཉན་བཙན་དང་དུས་མཉམ་དང་དུས་མཉམ་པ་ཙམ་བྱས་ན་བོད་དུ་ཕེབས་པའི་བར་ལ་རགས་རྩིས་ལོ་བཞི་བརྒྱ་ལྷག་ཙམ་སོང་བས་དགུ་བརྒྱ་ཞེས་པ་ནི་ཕྱེད་ལོ་ཡིན་པར་མངོན་ལ། དེ་ལྟར་ན་ཐོ་ཐོ་རིའི་དུས་ལོ་ཙཱ་བ་ལི་ཐེ་སེས་སྤྱན་དྲངས་པའི་པཎྜི་ཏ་བློ་སེམས་འཚོ་ཞེས་པ་དེ་ཡང་བློ་སེམས་དང་། འཚོ་ཞེས་པ་ཞི་འཚོ་ལ་འབྱོར་བ་མཁན་པོ་ཡིན་པར། འགོས་ལོ་ཙཱ་ཆེན་པོའི་བཞེད་པ་དང་། བོད་ཀྱི་རྒྱལ་རབས་དགུའི་བར་ཁྲི་སྲོང་སྒུག་གིན་བཞུགས་པ་སོགས་དང་ཡང་སྒྲིག་ནུས་སོ། །དེ་ནས་བོད་ཀྱི་ཡུལ་འདིར་ཡང་ལོ་བཞི་བཅུའི་བར་དུ་བསྟན་པར་བསྐྱངས། མཐར་བྲག་དམར་གྱི་ཕོ་བྲང་དུ་རྟས་ཕྲ་བརྒྱབ་པས་རྐྱེན་བྱས་ཏེ་སྐུ་གཤེགས་པའི་ཚུལ་བསྟན་ནས་སྐུ་གདུང་ཧས་པོ་རིའི་རྒྱབ་ཏུ་མཆོད་རྟེན་བཞེངས་པར་བཞུགས་སུ་གསོལ་རབ་བྱུང་གི་སྡེ་དབྱར་མཚོ་ལྟར་འཕེལ་ཞིང་རྒྱུན་མི་ཆད་པའི་ཕྱིར་དུ་མཆོད་རྟེན་གྱི་ཤར་ཕྱོགས་སུ་སྐུ་གདུང་འཇོག་པ་ཡིན་གསུངས། མཆན། ༈ དེའི་མཁན་བུ་རྦ་རཏྣ་ནི། ཡུལ་ཡར་ལུང་པ་ཡིན་ཟེར། རུས་རྦ། ཨཱ་ཙརྱ་བོ་དྷི་སཏྭ་སོགས་ལས་ཆོས་མང་དུ་སློབ་པའི་ཞང་བློན་དད་པ་དང་ཤེས་རབ་ཕུན་སུམ་ཚོགས་བར་མངའ་བ་ཞིག་ཡིན། ནམ་ཞིག་གི་ཚེ་བཙན་པོའི་ཞལ་ནས། ངའི་བོད་ལ་དགེ་སློང་མེད་པས་ངའི་ཞང་བློན་དག་ལ་དགེ་སློང་བཏུབ་བམ་ཞེས་ཞུས་པས། མཁན་པོའི་ཞལ་ནས། བཏུབ་བམ་སད་པར་བྱ་གསུངས་ཏེ། ལུག་གི་ལོ་དཔྱིད་ལ་ར་བའི་ཚེས་བརྒྱད་ཀྱི་ཉིན་ཨཱ་ཱཙཱརྱ་ཞི་བ་འཚོས་མཁན་པོ། དཱ་ན་ཤཱི་ལ་དང་། ཛི་ན་མི་ཏྲ་གཉིས་ཀྱིས་ལས་སློབ་དང་གསང་སྟོན། པཎྜི་ཏ་གཞན་བཅུ་པོས་ཁ་སྐོང་བྱས་ཏེ། བོད་མི་ལ་དད་པ་ཆེ་བ་རྦ་ཁྲི་གཟིགས་རབ་ཏུ་བྱུང་ཞིང་བསྙེན་པར་རྫོགས་མ་ཐག་ལྷའི་མངོན་ཤེས་དང་ལྡན་པས་བཙན་པོ་དགྱེས་ཏེ། དེའི་ཞབས་སྤྱི་བོར་བླངས་ནས་ཁྱོད་བོད་ཀྱི་རཏྣ་ཡིན་ནོ་ཞེས་བཀའ་སྩལ་པས་མཚན་རྦ་རཏྣ་ཞེས་གྲགས། མཚན་དངོས་དཔལ་དབྱངས་ཡིན་ཞེས་རྦ་བཞེད་ཆེ་བ་ནས་འབྱུང་གསུངས་ཏེ། བོད་ཀྱི་རབ་ཏུ་བྱུང་བ་ལ་སྔ་བ་འདི་ཡིན་ནོ། །བཙན་པོས་ད་དུང་རབ་ཏུ་བྱུངས་ཤིག་ཞུས་པས། སད་པར་བགྱི་གསུངས་ནས་རྦ་གསལ་སྣང་དང་པ་གོར་ཧེ་འདོད་ཀྱི་བུ་སོགས་རབ་ཏུ་བྱུང་ཞིང་། མཚན་ཡེ་ཤེས་དབང་པོ་དང་བཻ་རོ་ཙ་ན་རཀྵི་ཏ་སོགས་བཏགས་པར་བཤད། དེ་ནས་རྦ་རཏྣ་གནས་བརྟན་སྡེ་སྣོད་འཛིན་པ་ཆེན་པོར་གྱུར་ནས་བསམ་ཡས་ཀྱི་པྲ་ཏི་ཧ་ནའི་མཆོད་པ་ཆེན་པོའི་དུས་སུ་དད་པ་ཅན་སུམ་བརྒྱ་ཙམ་རབ་ཏུ་བྱུང་བའི་མཁན་པོ་མཛད་པ་སོགས་བསྟན་པའི་བྱ་བ་རྒྱ་ཆེན་པོས་ཡུན་རིང་དུ་བསྐྱངས་པའི་མཐར་ཇོ་མོ་ཡིད་བཞིན་འཁོར་ལོས་སྒྱུར་བའི་སྐུ་གཟུགས་ཀྱིས་སྤྱན་ཆབ་ཕྱུང་བ་སོགས་ངོ་མཚར་བའི་རྟགས་མང་པོ་བསྟན་ནས་སྐུ་གཤེགས་སོ། ༈ །དེའི་མཁན་བུ་ནི་བསྟན་པ་ཕྱི་དར་གྱི་རྩ་བ་སྨར་གཡོ་གཙང་གསུམ་ཞེས་གྲགས་ཤིང་གྲུབ་པ་དེ་ཉིད་ཡིན་ཏེ། འཛད་ཀྱི་གྱེར་མི་གཙང་རབ་གསལ། བོ་དོང་བ་གཡོ་དགེ་འབྱུང་། སྟོད་ལུང་བ་སྨར་ཤཱཀྱ་མུ་ནི་གསུམ་གྱིས་རྦ་རཏྣ་ལས་རབ་ཏུ་བྱུང་ཞིང་བསྙེན་པར་རྫོགས་ནས་ཛི་ན་མི་ཏྲ་དང་། དཱ་ན་ཤྲཱི་ལ་དང་། ཅོག་གྲུ་ཀླུ་དང་རང་གི་མཁན་པོ་སོགས་ལས་གསུང་རབ་ལ་སྦྱངས་པས་དགེ་སློང་སྡེ་སྣོད་འཛིན་པ་ཆེན་པོར་གྱུར་ཏེ། དཔལ་ཆུ་བོ་རིའི་སྒོམ་གྲྭ་ན་བསམ་གཏན་སྒོམ་ཞིང་བཞུགས་པ་ལས། ལྕགས་བྱ་ལ་ཁྲིའུ་དུམ་བཙན་དར་མས་བསྟན་པ་བསྣུབས་པའི་ཚེ་ཀརྨ་ཤ་ཏམ་སོགས་འདུལ་མངོན་གྱི་དཔེ་ཆ་དགོས་པ་རྣམས་ཁྱེར་ནས། དང་པོར་སྟོད་ཕྱོགས་ལ་བྲོས། རྒྱལ་པོའི་ཁྲིམས་ཀྱིས་ཁྱབ་པས་འཇིགས་ཏེ་ཉིན་པར་ཡིབ་ཅིང་མཚན་མོ་ལམ་བཅད་དེ་སོང་བས་མངའ་རིས་སུ་སླེབ། དེར་ཡང་བཞུགས་མ་ནུས་པར་གར་ལོག་ནས་ཐོན་ཏེ་བྱང་སྟོད་བརྒྱུད་ཧོར་ཡུལ་དུ་བྲོས། ཧོར་གྱི་དགེ་བསྙེན་ཤཱཀྱ་ཤེས་རབ་ལ་བརྟེན་ནས་བཞུགས་ཏེ་བསྟན་པ་དར་བར་བྱེད་དགོས་སྙམ་ནས་འབད་ཀྱང་དར་བར་མ་ནུས་པས་མདོ་སྨད་ལྷོ་ངོས་ཀྱི་བེ་རི་ཚ་མཚོ་ནས་ཚུར་ཐོན་ཏེ། རྨ་ཆུའི་བརྒྱུད་མདོ་སྨད་ཀྱི་དན་ཏིག་ཤེལ་གྱི་ཡང་དགོན་དུ་སྒོམ་ཞིང་བཞུགས་སོ། ༈ །དེ་ནས་གཙང་རབ་གསལ་གྱི་མཁན་བུ་བླ་ཆེན་པོ་ནི། སྐྱེ་བ་སྔ་མ་རྒྱལ་པོའི་ཆོས་བློན་འབྲོ་སྟག་སྣང་ཁྲིད་གསུམ་རྗེ་ཞེས་པ་ཞིག་གི་ལོ་སོ་ལྔ་པ་ལ་སྨོན་ལམ་བཏབ་ནས་ཚེ་འཕོས་པ་ཡིན་ཟེར། དོན་ལ་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་ཞིག་ཆུ་ཕོ་བྱི་བའི་ལོ་ལ་ཡུལ་ཙོང་ཁ་བདེ་ཁམས་སུ་འཁྲུངས། མཚན་མུ་ཟི་གསལ་འབར་དུ་བཏགས། ཆུང་ངུ་ནས་རིགས་སད་དེ་ནོན་འཇམ་དཔལ་ལས་བཟླས་ལུང་བླངས། ཁང་རིན་ཆེན་རྡོ་རྗེ་ལས་བྱང་ཆུབ་ཏུ་སེམས་བསྐྱེད། སྐྱི་ལས་དབུ་ཚད་དང་། ནམ་དགའ་ལྡན་ལས་ཡོ་ག་གསན་ནས་མཁྱེན་པར་མཛད། ནམ་ཞིག་རྨ་ཆུ་ཁའི་ཕྱུགས་རྗིས་སྨར་གཡོ་གཙང་གསུམ་དན་ཏིག་ན་བཞུགས་པ་མཐོང་ནས། འདི་ལྟར་འདུག་ཅེས་མི་རྣམས་ལ་སྨྲས་པ་ཐོས་ཏེ། མུ་ཟི་གསལ་འབར་གྱིས་བལྟར་ཕྱིན་པས་མཐོང་ཙམ་གྱིས་དད་ནས། འཁོར་བའི་སྡུག་བསྔལ་བ སལ་ནས་ཐར་བ་ཡི། །བདུད་རྩིས་འགྲོ་བའི་སྡུག་བསྔལ་ཞི་བྱེད་པའི། །བསྟན་པ་ཕྱོགས་བཅུར་རྒྱས་པར་བྱ་བའི་ཕྱིར། །དང་པོར་བདག་གིས་རབ་ཏུ་དབྱུང་བར་བྱ། །སྙམ་དུ་དགོངས་ཏེ་རབ་ཏུ་བྱུང་པར་གསོལ་བས། འདུལ་བའི་པུ་སྟི་ཞིག་གཏད་ནས། འདི་ལྟོས་ལ་དད་ན་རབ་ཏུ་བྱུང་བར་བྱའོ་གསུངས། བལྟས་པས་ཆེས་དད་དེ་མཆི་མ་ཕྱུངས་ནས་ཞུས་པས། དེར་གཙང་གིས་མཁན་པོ་དང་གཡོས་སློབ་དཔོན་བྱས་ཏེ་དགེ་ཚུལ་དུ་བསྒྲུབས་ཤིང་། མཁན་སློབ་ཀྱི་མཚན་ལས་གྲག་ཏེ་དགེ་པ་རབ་གསལ་དུ་བཏགས། ཕྱིས་ཐུགས་རབ་ཆེ་བས་དགོངས་པ་རབ་གསལ་དུ་གྲགས་སྐད། དེ་ནས་བསྙེན་རྫོགས་ཞུས་པ་ལས་དགེ་སློང་ལྔ་མ་ཚང་བས་མི་འོང་གསུངས་པ་ལ། སྔར་ལྷ་ལུང་དཔལ་རྡོར་ཅན་གསུམ་ཀླང་ཐང་ན་འདུག་པ་མཐོང་ནས་འཚོལ་དུ་ཕྱིན་པས་རྙེད་དེ། འབྱོན་པར་ཞུས་པས་དཔལ་གྱི་རྡོ་རྗེའི་གསུང་ནས། ངས་རྒྱལ་པོ་སྡིག་ཅན་དངོས་སུ་གསད་པས་ཁ་སྐོང་མི་འོང་གི། ངས་བཙལ་ལ་བཏང་གིས་གསུངས་ཏེ། རྒྱ་ནག་གི་དགེ་སློང་ཉེ་ཝང་དང་གྱི་བན་བྱ་བ་གཉིས་འབད་པས་བཙལ་བས་རྙེད་དེ་བཏང་ངོ་། །དེ་ནས་སྔར་གྱི་མཁན་སློབ་གཉིས་ཀྱིས་མཁན་པོ་དང་ལས་སློབ། སྨར་གྱིས་གསང་སྟོན། རྒྱའི་དགེ་སློང་གཉིས་ཀྱིས་ཁ་སྐོང་བྱས་ནས་བསྙེན་པར་རྫོགས་ཏེ་ངུར་སྨྲིག་གི་རྒྱལ་མཚན་འཛིན་པ་ཆེན་པོར་གྱུར། འདུལ་བའི་བཤད་པ་དང་ལག་ལེན་ལ་མཁས་པར་སྦྱངས། བསྙེན་པར་རྫོགས་ནས་ལོ་ལྔ་ལོན་པའི་ཚེ། དབུས་གཙང་གི་མི་བཅུ་མདོ་ཁམས་སུ་ཕྱིན་ནས་གཙང་ལ། བསྙེན་རྫོགས་ཞུས་པས། ང་རྒན་པས་མཁན་བུ་མི་འཁྱོངས་པས་བླ་ཆེན་པོ་ལ་ཞུས་ཤིག་གསུངས་པ་ལྟར་ཞུས་པས། ངས་བསྙེན་པར་རྫོགས་ནས་ལོ་ལྔ་ལས་མ་ལོན་པས་མི་བཏུབ་གསུངས་པ་ལ་གཙང་གི་ཞལ་ནས། དམིགས་བསལ་ལ་གང་ཟག་ཁྱད་པར་ཅན་གྱིས་བཏུབ་པས་གྱིས་གསུངས་ཏེ། བླ་ཆེན་གྱིས་མཁན་པོ་མཛད་ནས་ཆིག་རྫོགས་པར་མཛད་དོ། །དེ་ལ་ནུས་པ་ཅན་གྱི་མི་བཅུ་ནི་དབུས་ནས་ཀླགས་པ་ལམ་པ་ཀླུ་མེས་ཚུལ་ཁྲིམས་ཤེས་རབ། གཉལ་བ་པ་འབྲིང་ཡེ་ཤེས་ཡོན་ཏན། གཡོ་རུ་བ་རྦ་ཚུལ་ཁྲིམས་བློ་གྲོས། རཀྴི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློས་གྲོས་དང་ལྔའོ། །གཙང་ནས་མགུར་མོང་རབ་ཁ་བ་ལོ་སྟོན་རྡོ་རྗེ་དབང་ཕྱུག །ཤབ་སྒོ་ལྔ་པ་ཚོང་བཙུན་ཤེས་རབ་སེང་གེ། མངའ་རིས་པ་འོ་བརྒྱད་སྤུན་གཉིས། བོ་དོང་པ་ཨུ་པ་དེ་ཀར་དང་ལྔའོ། །དེ་ནས་ལོ་བཅུ་ཙམ་སོང་ནས་མེ་ཉག་སྒའི་ཡུལ་དུ་བྱོན་ཏེ། གོ་རོང་སེང་གེ་གྲགས་ལའང་འདུལ་བ་གསན་པས། ལུང་སྡེ་བཞི་བསྟན་བཅོས་དང་བཅས་པའི་གླེགས་བམ་བླ་ཆེན་པོ་ལ་སྦྱིན་ནས་བསྟན་པ་གསལ་བར་གྱིས་ཤིག་ཅེས་གདམས། དེ་ནས་དབུས་སུ་བྱོན་པར་བཞེད་པ་ལ་ལྷོ་བལ་ཡུལ་དུ་ཆོས་མང་པོར་སྦྱངས་པའི་ཀྭ་འོད་མཆོག་གྲགས་པ་བྱ་བ་ཁམས་སུ་བྱོན་ཟེར་བ་གསན་ནས་སླར་བཟློག་སྟེ། ཕར་ཕྱིན་དང་བྱང་ས་སོགས་ཐེག་པ་ཆེན་པོའི་ཆོས་མང་པོ་ལ་སྦྱངས། བཻ་རོའི་སློབ་མ་གཡུ་སྒྲ་སྙིང་པོ་ལ་རྫོགས་ཆེན་སེམས་ཕྱོགས་གསན་ཏེ། དེ་ལས་བརྒྱུད་པར་རོང་ཟོམ་ལ་མངའ་བར་གྲགས་ཤིང་། ཀུན་བྱེད་རྒྱལ་པོ་བཤད་རྒྱུད་བཞི་དང་བཅས་པ་ཨ་རོའི་ལུགས་ཀྱང་བླ་ཆེན་པོ་ནས་གྲུམ་ཤིང་གླག་ཅན་ལ་བརྒྱུད་དེ་དེང་སང་གི་བར་དུ་དར་བ་ཡོད་དོ། །ནམ་ཞིག་གི་ཚེ་མནལ་ལམ་དུ་གླང་ཆེན་ལ་ཆིབས་ཤིང་ནོར་བུ་བསྣམས་ནས་ཚོང་འདུས་ཀུན་ཏུ་བྱོན་པ་ལ་མི་ཀུན་ན་རེ། བཙུན་པ་ཁྱེད་ཀྱི་ནོར་བུ་བཟང་སྟེ། རེ་ཞིག་ཉོ་བའང་མེད་རིན་ཡང་མི་ཐེག་ཟེར། མནལ་སད་ནས་རེ་ཞིང་སྒྲུབ་པ་མཛད་པར་དགོངས་པ་ན། གཞི་བདག་གི་མི་མ་ཡིན་རྣམས་ཀྱིས་དད་པ་ཆེན་པོས་འབྱོན་པར་ཞུས་པ་ལྟར་དན་ཏིག་ཏུ་བྱོན་ནས་སྒོམ་པ་ལ་བཞུགས་ཤིང་། ས་ཕྱོགས་དེ་དག་ཏུ་གཙུག་ལག་ཁང་དང་མཆོད་རྟེན་མང་པོ་ཡང་བཞེངས་སོ། །དད་པ་ཅན་མང་པོ་རབ་ཏུ་བྱུང་བའི་མཁན་པོའང་མཛད། བརྒྱ་བྱིན་སོགས་ལྷ་རྣམས་ཆོས་ཉན་དུ་འོང་བར་གྲགས། འཁོར་རྣམས་ཀྱིས་ཀྱང་མདངས་ངོ་མཚར་བའི་སྣང་བ་འདི་དང་མི་འདྲ་བ་སྣང་བས་བླ་ཆེན་ཉིད་ངེས་པར་སྤྲུལ་པའི་སྐུ་ལགས་སམ་ཞུས་པས། ལན་དུ་སྤྲུལ་པ་མ་ཡིན། བདག་ནི་ཐེག་པ་ཆེན་པོའི་སྦྱོར་ལམ་པ་སྣང་བ་ཐོབ་པ་ལ་ཞུགས་པའི་བནྡེ་དགེ་བ་རབ་གསལ་ཡིན། ཞེས་གསུངས། དགུང་ལོ་བརྒྱད་ཅུ་རྩ་བཞི་པ་ཤིང་ཕག་གི་ལོ་ལ་སྐུ་གཤེགས་ཀར་བཀའ་འཕགས་པ་ཐོགས་མེད་དང་མཆེ་བའི་སྡེ་གཉིས་ཀྱིས་ཡུམ་གྱི་དགོངས་པ་མི་འདྲ་བར་བཀྲལ་བར། དེ་ཁོ་བོས་བྱམས་མགོན་ལ་དྲི་དགོས་ཏེ། སློབ་དཔོན་དེ་གཉིས་ཀྱང་ད་ལྟ་དགའ་ལྡན་ན་བཞུགས་ཞེས་གསུངས། ཡང་ཁོ་བོ་བྱམས་པ་མགོན་པོ་འཛམ་བུའི་གླིང་འདིར་མ་བྱོན་གྱི་བར་དུའང་འདི་དག་ཏུ་སྐྱེ་བ་བརྒྱད་ཙམ་ལེན་དགོས་གསུངས་ནས་དགའ་ལྡན་དུ་གཤེགས་སོ། ༈ །དེ་ཡང་བླ་ཆེན་པོའི་ཞལ་ནས། ཀླུ་མེས་བཙུན་པས་མཁན་པོ་གྱིས། ཚོང་གེ་བློ་རྣོ་བས་སྟོན་པ་གྱིས། འབྲིང་བསྐོས་མཁས་པས་གནས་གཞི་ཟུངས། ལོ་སྟོན་མཐུ་ཆེ་བས་བསྟན་བསྲུང་གྱིས། ཞེས་གསུངས་པ་ལྟར། དབུས་གཙང་གི་མི་བཅུའི་ནང་ནས་མཁན་པོར་མངའ་གསོལ་བ་ཀླུ་མེས་ཚུལ་ཁྲིམས་ཤེས་རབ་ཡིན་ཏེ། མདོ་སྨད་ཀྱི་ཕྱོགས་ནས་མཁན་སློབ་ཀྱི་བཀའ་བརྒྱུད་མ་ཆད་པར་འདུག་ཅེས་ཐོས་པ་དད་ནས་མི་དགུ་དང་འགྲོགས་ཏེ་མདོ་སྨད་དུ་སྡོམ་པ་ལེན་དུ་ཕྱིན་ཞེས་ཀྱང་གྲགས། བསམ་ཡས་ནས་མངའ་བདག་ཡེ་ཤེས་རྒྱལ་མཚན་གྱིས་མི་བཅུ་ཁམས་སུ་བརྫངས་ཞེས་ཀྱང་འབྱུང་། གང་ལྟར་ཡང་མདོ་སྨད་སོང་སྟེ། བླ་ཆེན་པོས་མཁན་པོ། གཙང་རབ་གསལ་གྱིས་ལས་སློབ། གཡོ་དགེ་འབྱུང་གིས་གསང་སྟོན། སྨར་ཤཱཀྱ་མུ་ནི་དང་རྒྱའི་དགེ་སློང་གཉིས་ཀྱིས་ཁ་བསྐངས་ཏེ་ཚིགས་གསུམ་དུས་གཅིག་ལ་བར་མ་ཆད་པས་བསྙེན་པར་རྫོགས། སྡེ་སྣོད་ཀྱི་གཞུང་ལུགས་དང་འདུལ་བའི་ལག་ལེན་ལ་མཁས་པར་སྦྱངས། གདམས་ངག་མང་པོའང་ནོས་ཏེ། ཀླུ་མེས་ཀྱིས་མཁན་པོར། ཁོ་བོ་ཅག་དབུས་གཙང་འགྲོ་བས་མཆོད་གནས་ཤིག་ཞུ་བྱས་པས། དབུ་ཞྭ་བཞེས་འཕྲོ་དེ་ཀ་ཕུད་ནས་འདི་གྱོན་ལ་ང་རྗེས་སུ་དྲན་པར་གྱིས་ཤིག་གསུངས་ཏེ་དབུ་ལ་བསྐོན། ཡར་བྱོན་ཏེ་བསམ་ཡས་ན་བཙན་པོ་ཁྲི་བྱ་བ་བཞུགས་པ་ལ་སྣ་གཏད་ནས་དེར་ཕྱགས་ཕབས་པས། བཙན་པོས་ཀྱང་སྣ་ལེན་བྱས་ཏེ་ཁྱེད་རྣམས་ཀྱི་དཔོན་གང་ཡིན་ཟེར་བ་ལ་ཀླུ་མེས་ཡིན་ཞེས་སྨྲས་བས་དབུ་རྩེའི་ལྡེ་མིག་གཏད་དེ་དཀོར་མཛོད་ཀྱིས་གང་བར་གཟིགས་ནས་དེར་འདོན་མི་ཐུབ་པའི་ཅ་ག་མཛད་དེ། ངེད་མཁན་པོར་མངགས་པས་མཁན་པོ་དཀོར་ལ་འབགས་པ་མི་རིགས་པས་འདི་མི་འཛིན་ཞེས་བཙན་པོ་ལ་ལྡེ་མིག་གཏད། དེ་ནས་ཁམས་གསུམ་ཕུལ་བས་ཀྱང་མ་བཞེས། ཀ་ཆུ་ཕུལ་བས་གཡུ་རུའི་ལམ་རྒྱགས་བྱ་ཡི་གསུངས་ནས་བཞེས། ཕྱིས་ཀླུ་མེས་ཀྱིས་ཡོ་བྱད་མང་པོ་སྟ་གོན་བྱས་ཏེ་དབུ་རྩེ་གསོ་བར་བཞེད་པ་ན། སྦ་རག་གཉིས་ཀྱིས་བཟུང་བས་གསོར་མ་བཅུག །དེར་བཙན་པོས་བར་བྱས་ཏེ་ཀླུ་མེས་ཀྱིས་གསོས། ཕྱག་རྗེས་སྦ་རག་ལ་གཏོད་པར་བྱས་ཏེ་ལེགས་པར་གསོས། དབུ་རུར་ལ་མོ་ཆག་དེའུ། མི་ཆོས་ཀྱི་ས་ཁུལ་དུ་བ་གནས། གཞན་ཡང་ལ་མོ་ར་སྒྱེལ། ཡེར་པ་བ་རོངས། ཚོང་འདུས་གནས་སོགས་མཐའ་ཡས་པ་བརྩིགས་པས་ས་སྟེང་ཐམས་ཅད་ཀླུ་མེས་དཔོན་སློབ་ཀྱིས་གནས་ཡམ་ཤུད་ཀྱི་མཁན་བུ་དགེ་བཤེས་གྲྭ་པས་ཀྱང་གནས་གཞི་བརྒྱ་དང་རྩ་བརྒྱད་གཏིང་བར་གྲགས་གསུངས། མཆན། གཞིས་ཁྱབ་པ་ལྟར་གྱུར། སྔགས་འཆང་ཇོ་སྲས་རྣམས་ཀྱིས་སྔོན་འགྱུར་བའི་བཀའ་བསྟན་གྱི་གླེགས་བམ་ཆུད་མ་ཟོས་པར་སྦས་ཏེ་བཟུང་བ་རྣམས་དེ་དག་ཏུ་སྤྱན་དྲངས། དད་པ་ཅན་མང་པོ་མཚོ་ལ་ངང་པ་འདུ་བ་ལྟར་འདུས་ནས་ཉིན་རེ་བཞིན་ཡང་རབ་ཏུ་བྱུང་བའི་དགེ་འདུན་གྱི་སྡེ་མང་པོ་འཕེལ་སྟེ། དེ་ཡང་གཙོ་བོར་ཀླུ་མེས་དང་སྣ་སྣམ་སོགས་ཀ་བ་བཞི། གདུང་མ་བརྒྱད། ཕྱམ་སོ་གཉིས། དྲལ་མ་གྲངས་ལས་བརྒལ་བ་བྱུང་བར་གྲགས། དེ་ལྟར་བསྟན་པ་ཡུན་རིང་དུ་བསྐྱངས་མཐར་ཚེ་སྤོང་གི་སེར་ཕུག་པར་བཞུགས་ནས་ཐང་དུ་བྱོན་པའི་ལམ་དུ་སྐུ་གཤེགས་ཏེ། གདུང་མཆོད་རྟེན་འོད་ཅན་མཉམས་པར་བཞུགས་སོ། ༈ །དེའི་མཁན་བུ་ཀ་ཆུ་བ་གཟུས་རྡོ་རྗེ་རྒྱལ་མཚན་ནི། གཞོན་ནུ་ནས་གཞི་དད་པ་རྐྱེན་གྱིས་སད་དེ། ཡོངས་ཀྱི་དགེ་བའི་བཤེས་གཉེན་ཀླུ་མེས་ཀྱིས་མཁན་པོ་དང་། གྲུ་མེར་གྱིས་ལས་སློབ་བྱས་ཏེ་རབ་ཏུ་བྱུང་ཞིང་བསྙེན་པར་རྫོགས། མཁན་པོའི་དྲུང་དུ་རྒྱ་ཆེར་འགྲེལ་དང་བམ་པོ་ལྔ་བཅུ་པ་ལ་སོགས་འགྲེལ་ཆེན་རྣམས་ལ་སྦྱངས་པས་མཁས་པ་ཆེན་པོར་གྱུར། དུས་ཕྱིས་རང་གི་མཆེད་གྲོགས། ལོ་ཙཱ་བ་རླུང་སྐྱོ་རྣམ་གཉིས་ལའང་འཆད་ཉན་མཛད་སྐད། རོང་ཟོམ་དང་པོའི་གནས་གཞི་ངང་ཆུང་དཔལ་གྱི་རྒྱལ་མོས་བཞེངས། གསོས་ཏེ་གཙུག་ལག་ཁང་བཞེངས་ཤིང་། དེར་འདུལ་བའི་བཤད་གྲྭ་གཙུགས་པ་སོགས་བཤད་སྒྲུབ་ཀྱི་བྱ་བས་བསྟན་པ་བསྐྱངས་ཏེ། སེམས་ཅན་རྣམས་བདེ་བ་ལ་བཀོད། སློབ་མའང་བསམ་གྱིས་མི་ཁྱབ་པ་ལས་ཐུགས་ཟིན་གྱི་བུ་ཆེན་བཞི་ནི། འཛིན་པ་ཤེར་འོད། སྣེ་པོ། གླེན་ཚུལ་བྱང་། སྦོ་ཆུང་ཚུལ་ཁྲིམས་འབྱུང་གནས་རྣམས་སོ། ༈ །དེའི་མཁན་བུ་སྣེ་པོ་གྲགས་པ་རྒྱལ་མཚན་ནི། ཡུལ་རོང་ལྷོ་ཚ་བ། རུས་ཞང་། གཟུས་ལས་རབ་ཏུ་བྱུང་ཤིང་བསྙེན་པར་རྫོགས། འདུལ་བའི་སྡེ་སྣོད་ལ་སྦྱངས་ཏེ་མཁས་པར་བྱས་ནས། མཁར་ཕུག་དང་། དམུར་འདུལ་བའི་བཤད་གྲྭ་གཙུག །སློབ་མ་སོག་ཚུལ་ཁྲིམས་བླ་མ་མཁས་པ་མང་པོ་ཐོན། ༈ །དེའི་མཁན་བུ་འབྲེ་ཤེས་རབ་འབར་ནི། སྣེ་པོ་ལས་རབ་ཏུ་བྱུང་ཞིིིང་བསྙེན་པར་རྫོགས། འདུལ་བའི་སྡེ་སྣོད་ལ་མཁས་པར་སྦྱངས། རྔོག་ལེགས་ཤེར་དང་། ཁུ་སྟོན་བརྩོན་འགྲུས་གཡུང་དྲུང་གཉིས་དང་བསྡེབས་ནས་ཁམས་སུ་བྱོན་ཏེ། ཇོ་བོ་སེ་བཙུན་ལ་ཆོས་མང་དུ་གསན། ཁྱད་པར་དུ་བསྟན་པ་སྔ་དར་གྱི་ཕ་རོལ་ཏུ་ཕྱིན་པའི་བཤད་འགྲོས་ལ་མཆོག་ཏུ་མཁས། ཕྱིས་རྔོག་ལོ་ཆེན་པོ་ལ་ཡང་ཤེར་ཕྱིན་འཆད་ཉན་མཛད་པས་རྔོག་ལོའི་ཐུགས་སྲས་དམ་པར་གྱུར། སྐྱོ་གནས་སྙིང་སོགས་སུ་ཆོས་གཞི་བསྐོར་ཞིང་། ཤེར་ཕྱིན་མདོ་བསྟན་གཉིས་ཀ་ལ་བཤད་པ་རྒྱ་ཆེར་མཛད། ཆོས་འཆད་པའི་ཚེ་ལྷ་རྣམས་ཆོས་ཉན་དུ་འོང་བར་ཡང་གྲགས། སློབ་མ་ཡང་ཨར་བྱང་ཆུབ་ཡེ་ཤེས་སོགས་བསྟན་པའི་བདག་པོ་མཐའ་ཡས་པ་ཐོན་ཏོ། ༈ །དེའི་མཁན་བུ་བྱ་འདུལ་བ་འཛིན་པ་བརྩོན་འགྲུས་འབར་ནི། གཙང་རོང་གཡུང་དུ་ལྕགས་ལུག་ལ་འཁྲུངས། འབྲེ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས་སོག་ཚུལ་ཁྲིམས་བླ་མ་ལ་འདུལ་བ་གསན། ཁོང་གཤེགས་རྟིང་རྒྱ་འདུལ་དང་རྨ་ཚོ་བླ་ཟུར་དུ་བྱས་བའི་དྲུང་དུ་སྦྱངས་པས་མཁས་པར་མཁྱེན་ཏེ། འདུལ་བ་བྱ་ལ་ཐུགས་ཞེས་པའི་ཁ་སྐད་ཀྱང་བྱུང་། གཞན་ཡང་ཞང་གཡེལ་བ་ལས་དབུ་ཚད། ཟངས་མཁར་ལོ་ཙཱ་བ་ལ་ཡོ་ག །སྟོད་ལུང་པ་ཆེན་པོ་ལ་བཀའ་གདམས་རྣམས་གསན། དེ་རྗེས་ཟུལ་ཕུར་བཤད་གྲྭ་བཙུགས། བེ་ཧར་གྱི་བཙུན་ཆུང་ངུ་སྤྲུལ་ནས་ཞབས་ཏོག་བྱས་པས་འདུལ་བ་དང་འགལ་བ་ན་བཟའི་སྤུ་ཕྱིར་བསྟན་གཅིག་པུ་ལས་མ་མཐོང་བས་དད་དེ་བྱ་ཊི་ཀ་ལ་སློབ་གཉེར་བྱེད་པ་རྣམས་ཀྱིས་གྲོགས་བྱེད་པར་ཁས་བླངས། ལོ་དགུར་ཚོགས་པ་བསྐྱངས་རྗེས་སྒྲུབ་པ་ལ་བཞུགས། སློབ་མ་འགྲོ་དོན་ནུས་པ་བདུན་ཅུ་རྩ་དྲུག་ཙམ་བྱུང་། དགུང་ལོ་དོན་དྲུག་པ་ལ་ཟུལ་ཕུའི་གཟིམ་ཆུང་དུ་སྐུ་གཤེགས། ༈ །དེའི་མཁན་བུ་རྩིས་འདུལ་བ་འཛིན་པ་གཞོན་ནུ་སེང་གེ་ནི། བྱ་འདུལ་ལས་རབ་ཏུ་བྱུང་ཞིང་བསྙེན་པར་རྫོགས། འདུལ་བའི་སྡེ་སྣོད་ལ་སྦྱངས་པས་ཤིན་ཏུ་མཁས་པར་གྱུར་ཏེ། བྱ་འདུལ་ཕྱི་སློབ་མའི་གཙོ་བོ་ཡིན། ཉང་སྟོད་མཁར་ལུང་དུ་འདུལ་གྲྭ་བསྐྱངས་པས། བྱའི་སྣག་དབོན་ཟུལ་ཕུའི་གདན་ས་བ་རོག་འདིའི་སློབ་མ་ན་བཟའ་འཕྲེང་གསོལ་བར་གྲགས་པ་དེ་ཡིན། ཆོས་དབང་སོགས་སློབ་མ་གཤེས་གཉེན་མང་པོ་ཐོན་ཏོ། ༈ །དེའི་མཁན་བུ་དཔལ་ལྡན་གྲོ་མོ་ཆེ་བ་ནི། བྱའི་ལོ་ལ་ཆུ་སྒར་དུ་འཁྲུངས། གདུང་རུས་གྲོ། རྩིས་འདུལ་བ་ལས་རབ་ཏུ་བྱུང་ཞིང་བསྙེན་པར་རྫོགས་ནས་འདུལ་བའི་སྡེ་སྣོད་ལ་སྦྱངས། མཚན་བདུད་རྩི་གྲགས། རྡོ་སྟོན་དང་ཞང་བཙུན་ལས་ཤ་ར་བའི་གདམས་པ་རྣམས་ནོས་ཤིང་། ཆུ་མིག་པ་ཤེར་གྲགས། མུ་སྨན་པ། སངས་རྒྱས་དབོན་སྟོན། ལྷ་སྤྱིལ་བུ་པ། རས་པ་དར་རྒྱལ། གྲགས་ཕུ་ལུང་པ་འཇམ་དབྱངས་རྒྱལ་མཚན། དྲེའུ་ལྷས་པ། འགོས་རིང་། ཆུ་ནག་པ་རྨར་ཤཱག་སེང་། གཙང་ནག་པ་སོགས་ལས་གསན་པ་རྒྱ་ཆེར་མཛད། སངས་རྒྱས་སོ་ལྔ་དང་རྗེ་བཙུན་སྒྲོལ་མ་སོགས་ལྷག་པའི་ལྷ་མང་པོའི་ཞལ་གཟིགས། སྣར་གདན་རབས་བཞི་པ་ཡིན། ཐང་གི་གདན་སར་ཕེབས་ནས་ལོ་སུམ་བཅུ་རྩ་དགུའི་བར་དུ་འཕྲིན་ལས་བསྐྱངས། དགུང་ལོ་བརྒྱད་ཅུ་པ་ལ་གཤེགས་སོ། ༈ །དེའི་མཁན་བུ་མཆིམས་ཆེན་ནམ་མཁའ་གྲགས་ནི། ཉང་སྟོད་སྟག་ཚལ་དུ་རྟའི་ལོ་ལ་འཁྲུངས། གཞོན་ནུ་ནས་དཔལ་ལྡན་གྲོ་ལས་རབ་ཏུ་བྱུང་ཞིང་བསྙེན་པར་རྫོགས། སྡེ་སྣོད་ཀྱི་གཞུང་རྣམས་མཁས་བར་སྦྱངས། མཛོད་ཀྱི་ཊཱིཀ་ཆེན་སོགས་བསྟན་བཅོས་ཀྱང་མང་དུ་མཛད། དཔལ་ལྡན་གྲོ། ཞང་སྟོན། མཆིམས་བློ་བརྟན་སངས་རྒྱས་གདན་རབས་དྲུག་པ། སྒོམ་པ་སྟེ་བཞི་ལ་བཀའ་གདམས་ཀྱི་སྐོར་དང་། བཀྲ་ཤིས་སྒང་པ་ལ་བྱང་སེམས་ཟླ་རྒྱལ་བའི་དབུ་མའི་གདམས་པ་སོགས་གསན། ཆུ་མིག་ཆོས་འཁོར་གྱི་གྲལ་གྱི་གཙོ་བོ་མཛད། འགྲོ་མགོན་འཕགས་པ་སོགས་ཆེ་དགུ་ཐམས་ཅད་ཀྱིས་བཀུར། ལྷག་པའི་ལྷ་དུ་མའི་ཞལ་གཟིགས། སྣར་ཐང་གི་གདན་སར་ལོ་སུམ་གདན་རབས་བདུན་པ་ཡིན། ཅུ་རྩ་དྲུག་གི་བར་དུ་ཚོགས་པ་བསྐྱངས་ནས་བྱི་བའི་ལོ་ལ་སྐུ་གཤེགས་སོ། ༈ །དེའི་མཁན་བུ་གྲགས་པ་ཤེས་རབ་ནི། ཉང་སྟོད་དུ་ལུག་གི་ལོ་ལ་འཁྲུངས། གདུང་ཟེའུ་སྟེ། མཁན་ཆེན་འདུལ་བ་འཛིན་པ་གྲགས་པ་བརྩོན་འགྲུས་ཀྱི་གཅུང་པོ་ཡིན། མཆིམས་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས། མཁན་པོ་དང་གཅེན་ལས་གཞུང་བཤད་དང་གདམས་པ་མཐའ་ཆོད་པ་གསན། གཅེན་འདུལ་འཛིན་གྱི་རྗེས་སུ་མཁན་པོར་བཞུགས་ནས་ལོ་བཅུ་གཉིས་ཀྱི་བར་དུ་གདན་སྣར་ཐང་གི་གདན་རབས་བཅུ་གཅིག་པ་ཡིན། ས་བསྐྱངས་སོ། ༈ །དེའི་མཁན་བུ་མཁན་ཆེན་བློ་བཟང་གྲགས་པ་ནི། ཉང་སྟོད་སྨོན་གྲོའི་ཕུ་ཁའུར་འཁྲུངས། གདུང་རུས་མཆིམས་སམ་ཟེའུ་པ། གྲགས་ཤེ་ལས་རབ་ཏུ་བྱུང་ཞིང་བསྙེན་པར་རྫོགས། ཟེའུ་པ་སྐུ་མཆེད་དང་། རྒྱང་རོ་བྱང་ཆུབ་འབུམ་སོགས་བླ་མར་བརྟེན། མདོ་སྔགས་ཀྱི་གཞུང་གདམས་ངག་མ་ལུས་པ་ལ་མཁྱེན་རྟོགས་རྒྱས། གྲགས་ཤེས་བས་གདན་ས་གཏད་ནས་ལོ་སོ་དགུའི་བར་དུ་བཤད་སྒྲུབ་ཀྱི་བསྟན་པ་བསྐྱངས། གྲྭ་སར་ཤ་ཁྲིམས་དང་གླིང་ནང་དུ་ཁམས་པ་མི་བརྟེན་པ་སོགས་བཅའ་ཁྲིམས་ཀྱང་དམ་པར་མཛད་དེ་ཡོས་ལོ་ལ་སྐུ་གཤེགས། ༈ །དེའི་མཁན་བུ་ཀུན་དགའ་རྒྱལ་མཚན་ནི། ཆུ་སྒོའི་ལུང་བྱ་བར་སྟག་གི་ལོ་ལྕགས་རི་ཆེན་མོ་ཡང་དཔོན་སྙན་གྲགས་ཀྱིས་འདི་དུས་བརྩིགས། ལ་འཁྲུངས། གདུང་རུས་གྲོ། མཆིམས་བློ་བཟང་གྲགས་པ་ལས་རབ་ཏུ་བྱུང་ཞིང་བསྙེན་པར་རྫོགས་ནས། གཞུང་གདམས་ངག་ཐམས་ཅད་དང་བཀའ་བཅུ་གཞོན་སེང་སོགས་ལས་ཀྱང་ཆོས་མང་དུ་གསན། མཁན་པོ་གཤེགས་པའི་ལོ་དེ་ཀ་ལ་གདན་སར་ཕེབས་ནས་ལོ་ཉི་ཤུ་རྩ་བདུན་གྱི་བར་དུ་བསྐྱངས་ཤིང་། བསླབ་བཏུས་ཀྱི་ཊཱི་ཀ་སོགས་བརྩམས་པའང་མང་དུ་མཛད་ནས་སྦྲུལ་ལོ་ལ་གཤེགས། ༈ །དེའི་མཁན་བུ་གྲུབ་པ་ཤེས་རབ་ནི། སྣར་ཐང་གི་ཉེ་འཁོར་རོང་གུ་ཞེས་པར་མེ་བྱ་ལ་འཁྲུངས། གདུང་རུས་དབང་ཡིན། དགུང་ལོ་བཅུ་པ་ལ་ཀུན་རྒྱལ་པ་ལས་རབ་ཏུ་བྱུང་ཞིང་མཚན་གྲུབ་པ་ཤེས་རབ་ཏུ་བཏགས། ཉི་ཤུ་པ་ལ་མཁན་པོ་དེ་ཉིད་དང་། སློབ་དཔོན་གྲགས་པ་རྒྱ་མཚོ་སོགས་དགེ་འདུན་གྱི་དབུས་སུ་བསྙེན་པར་རྫོགས། མཁན་སློབ་གཉིས་དང་། ཡོན་ཏན་འོད། སློབ་དཔོན་སྐལ་བཟང་པ་སོགས་བླ་མ་མང་པོ་བསྟེན་ནས་མོད་སྔགས་ཀྱི་གཞུང་ལུགས་གདམས་ངག་དང་བཅས་པ་ཐུགས་སུ་ཆུད་པར་མཛད། དགུང་ལོ་སོ་གཉིས་པ་ལ་མཁན་སར་ཕེབས་ནས་ལོ་སུམ་ཅུ་བསྐྱངས། དེ་རྟིང་ཉིད་ཀྱི་དབོན་པོ་བསོད་ནམས་མཆོག་གྲུབ་ལ་གདན་ས་གཏད་དེ་ལོ་ལྔ་ཟུར་བཞུགས་མཛད་ནས་རེ་བདུན་ལ་སྐུ་གཤེགས། དེ་ལྟར་གྲོ་མོ་ཆེ་པ་ནས་གྲུབ་ཤེའི་བར་སྣར་ཐང་གི་གདན་སར་ཕེབས་པ་ཤ་སྟག་སྟེ། དཔལ་དཱི་པཾ་ཀ་རས་སྣར་ཐང་གི་སའི་ཐད་དེར་ཕྱག་མཛུབ་གཏད་དེ། ས་ཕ་གིར་གནས་བརྟན་ཆེན་པོ་བཅུ་དྲུག་བྱོན། ཞེས་ལུང་བསྟན་པ་ལྟར་གནས་བརྟན་གྱི་རྣམ་འཕྲུལ་འབའ་ཞིག་ཡིན་པར་གསུངས་སོ། ༈ །དེའི་མཁན་བུ་འཕགས་མཆོག་སྤྱན་རས་གཟིགས་ཀྱི་རྣམ་འཕྲུལ་པཎ་ཆེན་དགེ་འདུན་གྲུབ་ནི། རུ་ལག་གི་ས་ཆ་གུར་མ་རུ་བར་ལྕགས་ལུག་ལ་འཁྲུངས། གདུང་རུས་ངར་ཚོ། མཚན་པདྨ་རྡོ་རྗེ། དགུང་ལོ་བཅོ་ལྔ་པ་ལ་སྣར་ཐར་དུ་མཁན་པོ་གྲུབ་པ་ཤེས་རབ་དང་། སློབ་དཔོན་གྱང་པའི་ཆེན་པོ་བློ་ལྡན་པས་མཛད་དེ་དགེ་ཚུལ་དུ་བསྒྲུབས། མཚན་དགེ་འདུན་གྲུབ་པ་དཔལ་བཟང་པོ་ཞེས་བཏགས། དགུང་ལོ་ཉི་ཤུ་པ་ལ་སྔར་གྱི་མཁན་སློབ་གཉིས་ཀྱི་སྟེང་གསང་སྟོན་གྲགས་པ་ཤེས་རབ་དང་། དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས་པ་དགེ་སློང་གི་དངོས་པོ་བཞེས། ཐུགས་སྦྱོང་མཛད་པའི་ཡོངས་འཛིན་གྱི་གཙོ་བོ་མཁན་ཆེན་གྲུབ་པ་ཤེས་རབ་དང་། སྣར་ཐང་པ་ཤེས་རབ་སེང་གེ། ལས་སྨོན་གྱིས་འབྲེལ་པ་རྗེ་རིན་པོ་ཆེ་ཡབ་སྲས་ཡིན། གཞན་ཡང་ཀུན་བཟང་ངོར་སྟོན། བོ་དོང་པཎ་ཆེན། སེམས་དཔའ་ཐུགས་རྗེ་དཔལ་བ། སཾ་གྷ་ཤྲཱི། གྲོ་སའི་དམར་སྟོན་ཁུ་དབོན། ཐང་ཆེན་ཉི་མ་རྒྱལ་མཚན། ཨ་བྷ་ཡ་དོན་ཡོད་པས་ལུང་བསྟན་པའི་བླ་མ་འཆད་ཀའི་ལྷ་རིན་པོ་ཆེ་དང་། སྒྲོལ་ཆེན་བསམ་འགྲུབ་རྡོ་རྗེ་གཉིས་ཏེ། དེ་ལ་སོགས་པའི་བཤེས་གཉེན་ལྔ་བཅུ་ཙམ་བརྟེན་ནས་མདོ་སྔགས་རིགས་གནས་དང་བཅས་པའི་གཞུང་ལུགས་ཐམས་ཅད་ལ་མཁྱེན་པ་རྒྱས་ཤིང་རིག་པའི་དབང་ཕྱུག་ཆེན་པོར་གྱུར་པས་བོ་དོང་པཎ་ཆེན་གྱིས་ཐམས་ཅད་མཁྱེན་པ་ཞེས་མཚན་གསོལ། སྣར་ཐང་བྱང་ཆེན་དུ་སྒྲུབ་པ་མཛད་པས་ཉམས་རྟོགས་ཀྱང་མཐར་ཕྱིན་པ་བརྙེས། འཇིགས་བྱེད་དང་སྒྲོལ་མའི་ཞལ་གཟིགས། འདོད་ཁམས་མ་བྲན་དུ་ཁོལ། རྩ་བར་སྣར་ཐང་པའི་དགེ་བཤེས། ཕྱིས་རྗེའི་གྲུབ་མཐའ་འཛིན་པར་བྱུང་ཡང་། སྡེ་རིས་དང་གྲུབ་མཐའི་ཕྱོགས་རིས་མི་མཛད་པར་ཀུན་ལ་དག་སྣང་སྦྱོང་། མཁས་པའི་བྱ་བ་དབུ་ཚད་འདུལ་བ་སོགས་གཞུང་ལུགས་མང་པོར་དགོངས་འགྲེལ་བརྩམས། བཀྲ་ཤིས་ལྷུན་པོའི་གཙུག་ལག་ཁང་དང་ལྷ་ཆེན་བཞེངས་ཤིང་དགེ་འདུན་མང་དུ་བསྡུས་ཏེ། སྐུ་ཚེ་ཧྲིལ་པོར་འཆད་ཉན་གྱིས་བསྟན་པ་བསྐྱངས་ནས། དགུང་ལོ་གྱ་ལྔ་པ་ཤིང་རྟ་ལ་དགའ་ལྡན་དུ་གཤེགས་སོ། ༈ །དེའི་མཁན་བུ་གནས་སྙིང་བ་ཀུན་དགའ་བདེ་ལེགས་ནི། སྔོན་སློབ་དཔོན་པདྨ་སམྦྷ་ཝའི་དངོས་སློབ་རྒྱང་འཇམ་དཔལ་གསང་བའི་གདུང་རབས་བརྒྱད་ཅུ་རྩ་བརྒྱད་ཀྱི་བར་ཐུགས་རྗེ་ཆེན་པོའི་བྱིན་གྱིས་བརླབས་པའི་གདུང་རིམ་པར་བྱོན་པ་ལས་ཡབ་རིན་ཆེན་རྣམས་གཉིས་ཀྱི་སྲས་སུ་ཉང་སྟོད་དུ་འཁྲུངས། པཎ་ཆེན་དགེ་འདུན་གྲུབ་ལས་རབ་ཏུ་བྱུང་ཞིང་བསྙེན་པར་རྫོགས། མཚན་ཀུན་དགའ་བདེ་ལེགས་རིན་ཆེན་རྒྱལ་མཚན་དཔལ་བཟང་པོ་བསྩལ། མཁན་པོའི་དྲུང་དུ་གཞུང་ལུགས་གདམས་ངག་དང་བཅས་པ་ལ་མཁས་པར་སྦྱངས། འབྲས་སྤུངས་དང་འོལ་དགའ་སོགས་སུ་ཡང་ཕེབས། ཉང་སྟོད་ཕྱོགས་སུ་བློ་གསལ་མང་པོའི་དོན་མཛད་དོ། ༈ །དེའི་མཁན་བུ་ཐམས་ཅད་མཁྱེན་པ་དགེ་འདུན་རྒྱ་མཚོ་ནི། རྟ་ནག་རྡོ་རྗེ་གདན་དུ་ཀུན་དགའ་རྒྱལ་མཚན་པའི་སྲས་སུ་འཁྲུངས། དགུང་ལོ་བཅུ་པ་ལ་པཎ་ཆེན་ལུང་རིག་རྒྱ་མཚོར་གཙུག་ཕུད་ཕུལ། མཚན་དགེ་འདུན་རྒྱ་མཚོ་ཞེས་བསྩལ། ལོ་དེ་ཉིད་ཀྱི་ནང་དུ་ཀུན་དཀའ་བདེ་ལེགས་པས་མཁན་པོ། པཎ་ཆེན་ལུང་རིག་རྒྱ་མཚོས་སློབ་དཔོན། དབུ་མཛད་སངས་ཚུལ་བས་དུས་གོ་བ་མཛད་དེ་དགེ་ཚུལ་བཞེས། དགུང་ལོ་ཉི་ཤུ་པ་ཡོས་ལོ་དབོ་ཟླའི་ཚེས་བརྒྱད་ལ་མཁན་པོ་སྔ་མ་ཉིད་དང་། ལས་སློབ་འཇམ་དབྱངས་ལེགས་པ་ཆོས་འབྱོར། གསང་སྟོན་སངས་རྒྱས་དཔལ་བཟང་། དུས་གོ་བ་འོ་ལ་དགའ་སངས་བཟང་སོགས་དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། ཚིགས་སྔ་ཕྱིའི་མཁན་སློབ་རྣམས་དང་། པཎ་ཆེན་ནོར་བཟང་རྒྱ་མཚོ། ཡབ་ཀུན་རྒྱལ་བ། པཎ་ཆེན་ཡེ་ཤེས་རྩེ་མོ། ཐོན་ཡོན་རྒྱམ་སོགས་བཤེས་གཉེན་མང་པོ་བསྟེན་ཏེ། མདོ་སྔགས་རིག་གནས་དང་བཅས་པའི་གཞུང་ལུགས་རབ་འབྱམས་ལ་སྦྱངས་པས། ཚིག་དོན་མཐའ་དག་ཐུགས་སུ་ཆུད། རྒྱལ་མེ་ཏོག་ཐང་གི་ཆོས་གྲྭ་བཏབ། སེ་འབྲས་བཀྲ་ཤིས་ལྷུན་པོ་རྣམས་ཀྱི་ཁྲིར་ཕེབས་ནས་འཆད་རྩོད་རྩོམ་གསུམ་གྱི་བྱ་བས་གདུལ་བྱ་བསྐྱངས། དགུང་ལོ་རེ་བརྒྱད་པ་ཆུ་སྟག་ནག་ཟླའི་ཚེས་བརྒྱད་ལ་དག་པའི་ཞིང་དུ་སྐུ་གཤེགས། ༈ །དེའི་མཁན་བུ་བདེ་བ་ཅན་པ་དགེ་ལེགས་དཔལ་བཟང་ནི། ཡུལ་འོལ་དགའ་གྱང་གསར་དུ་ཤིང་གླང་ལོར་འཁྲུངས། ཐམས་ཅད་མཁྱེན་པ་དགེ་འདུན་རྒྱ་མཚོ་ལས་རབ་ཏུ་བྱུང་ཞིང་བསྙེན་པར་རྫོགས། བསམ་གཏན་གླིང་། སེ་ར་སྨད། རྒྱུད་སྟོད་རྣམས་སུ་མདོ་སྔགས་ཀྱི་གཞུང་ལུགས་ལ་སྦྱངས། རྒྱུད་སྟོད་དང་ཤར་རྩེའི་གདན་ས་ནས་དགུང་ལོ་ང་བཞི་པ་ལ་དགའ་ལྡན་གྱི་ཁྲིར་ཕེབས། ཐམས་ཅད་མཁྱེན་པ་བསོད་ནམས་རྒྱ་མཚོའི་བསྙེན་རྫོགས་བཞེས་པའི་མཁན་པོའང་ཡིན། དྲུག་ཅུ་པ་ལ་བདེ་བ་ཅན་དུ་ཟུར་བཞུགས་མཛད། རེ་གསུམ་པ་ལ་སྐུ་གཤེགས་སོ། ༈ །དེའི་མཁན་བུ་རྒྱལ་ཁང་རྩེ་པ་དཔལ་འབྱོར་རྒྱ་མཚོ་ནི། ཡུལ་སྟོད་ལུང་རམ་པའི་གད་པ་ཁར་མེ་ཁྱི་ལ་འཁྲུངས། བདེ་བ་ཅན་པ་ལས་རབ་ཏུ་བྱུང་ཞིང་བསྙེན་པར་རྫོགས། སྐྱོར་མོ་ལུང་། ར་བ་སྟོད་རྒྱུད་རྣམས་ཀྱི་གྲྭ་སར་གཞུང་ལུགས་ལ་སྦྱངས་པས་འཇིགས་པ་མེད་པའི་སྤོབ་པ་ཐོབ། ར་བ་སྟོད་ཀྱི་འཆད་ཉན་རྒྱུད་སྟོད་དང་ཤར་རྩེ་སྦྲེལ་བའི་བླ་ནས་ང་བདུན་པ་ལ་དགའ་ལྡན་གྱི་ཁྲིར་ཕེབས། རེ་བཞི་པ་ལ་རྒྱལ་ཁང་རྩེར་ཟུར་བཞུགས་མཛད་དེ་ཕྲིན་ལས་རྣམ་པར་དཀར་བའི་ངང་ནས་དགུང་ལོ་དོན་བཞི་པ་ལ་སྐུ་གཤེགས། ༈ །དེའི་མཁན་བུ་འཇམ་དབྱངས་དཀོན་མཆོག་ཆོས་འཕེལ་ནི། གྲྭ་བྱམས་པ་གླིང་གི་དགོན་ཞོལ་དུ་ཆུ་བྱ་ལ་འཁྲུངས། ཆུང་ངུ་ནས་དྭགས་པོ་གྲྭ་ཚང་དུ་གསན་སྦྱོངས་ལ་ཕེབས། དེའི་སློབ་དཔོན་བློ་བཟང་ཆོས་འཕེལ་ལས་རབ་ཏུ་བྱུང་སྟེ། མཚན་དཀོན་མཆོག་ཆོས་འཕེལ་དུ་བཏགས། དེ་རྗེས་ར་བ་སྟོད་དང་རྒྱུད་སོགས་ཀློག་པའི་གྲྭ་མང་པོར་བྱོན་ཏེ་འཆད་ཉན་མཛད་པས་གཞུང་ལུགས་རབ་འབྱམས་སྨྲ་བའི་དབང་ཕྱུག་ཏུ་གྱུར། དགུང་ལོ་ཉི་ཤུ་རྩ་བཞི་པ་ལ་རྒྱལ་ཁང་རྩེ་པ་ལས་བསྙེན་པར་རྫོགས། ར་བ་སྟོད་དང་རྒྱུད་སྟོད་བློ་གསལ་གླིང་རྣམས་ཀྱི་འཆད་ཉན། གསང་ཕུ་གླིང་གླིང་སྨད་ཀྱི་ཁྲིར་ཤར་རྩེ་དང་དགའ་ལྡན་གྱི་ཁྲི་རྣམས་སུ་ཕེབས། རྗེ་ཐམས་ཅད་མཁྱེན་པ་རྒྱལ་མཆོག་ལྔ་པས་མཚན་ཉིད་ཀྱི་གཞུང་ལུགས་རྣམས་གསན་ནས་ཏི་ཤྲཱིར་བཀུར། འཆད་མཁས་ཤིང་ཐུགས་དགོངས་བཟང་བས་ཞལ་སློབ་དགེ་བའི་བཤེས་གཉེན་མང་དུ་ཐོན། རྗེས་སུ་སློབ་མ་ཐམས་ཅད་ཚུལ་གནས་ལུང་རིགས་སྨྲ་བ་ལ་སྦྱོར། སྡེ་རིས་ཀྱི་ཆགས་སྡང་མི་མངའ་བའི་དབང་གིས་སྡེ་གཟར་སློང་བའི་གྲོས་ལ་རང་མི་འཇུག་ཅིང་གཞན་དག་ཀྱང་བསྲུང་བར་མཛད་པས་རང་ཕྱོགས་པ་རྣམས་ཀྱིས་ཀྱང་གཙང་ཞེན་པ་ཞེས་ཕྱོགས་འབུལ་ཞུ་བ་བྱུང་ཞེས་རྗེ་ཐམས་ཅད་མཁྱེན་པས་བསྔགས་པར་མཛད་པ་ཡིན་ནོ། །དགུང་ལོ་དོན་བཞི་པ་མེ་ཁྱི་ལ་དབུར་སྟོད་གསང་སྔགས་མཁར་དུ་སྐུ་གཤེགས། ༈ །དེའི་མཁན་བུ་དོན་གྱི་སླད་དུ་མཚན་སྨོས་ན་བདག་གི་མཁན་པོ་དཀོན་མཆོག་བསྟན་འཛིན་ནི། ཆུ་མོ་ཕག་གི་ལོ་ལ་དབུ་རུ་ཁ་རག་ཏུ་སྐུ་འཁྲུངས། འཇམ་དབྱངས་བླ་མ་དཀོན་མཆོག་ཆོས་འཕེལ་ལས་རབ་ཏུ་བྱུང་ཞིང་བསྙེན་པར་རྫོགས། སྐུ་ན་ཕྲ་མོ་གྲྭ་སར་བཞུགས་དུས་ནས་བཅས་དང་རང་བཞིན་གྱི་ཁ་ན་མ་ཐོ་བ་དུས་དབང་གིས་འབྱུང་བར་ཉེ་བ་རྣམས་ཀྱིས་ཀྱང་མ་གོས་པས་བཙུན་གཅིག་མར་གྲགས། ར་བ་བསྟོད་དང་བློ་གསལ་གླིང་སོགས་སུ་མཚན་ཉིད་ཀྱི་གཞུང་ལུགས་རྣམས་ལ་མཁས་པར་སྦྱངས། རྗེ་རྒྱལ་བའི་དབང་པོ་ལྔ་པ་ཆེན་པོ་དང་རང་གི་མཁན་པོ་ཁྲི་རིན་པོ་ཆེ་སོགས་བཤེས་གཉེན་དུ་མ་ལས་གཞུང་གདམས་ངག་མང་དུ་གསན་ནས་ཐུགས་སུ་ཆུད་པར་མཛད། གཉལ་སྡེ་དྲུག་གི་མཁན་པོ་ལོ་བཅོ་ལྔ་སྐོར་དང་། དེ་རྗེས་ཉང་སྟོད་དཔལ་འཁོར་ལོ་བདེ་ཆེན་གྱི་མཁན་པོར་ཕེབས་ནས་གྲུབ་མཐའི་ཕྱོགས་ཆ་དང་བྲལ་བར་ཡུན་རིང་དུ་བསྐྱངས་པས་ས་ཞལ་དགེ་གསུམ་གྱི་གྲྭ་པ་ཐམས་ཅད་ཀྱིས་སྤྱི་མི་ལྟར་བཀུར་ཞིང་བསྔགས། དེ་ནས་གདན་ས་ཡང་སྟོད་པ་ངག་དབང་ཕྲིན་ལས་ལ་གཏད་དེ་དབུར་སྟོད་གསང་སྔགས་མཁར་དུ་ལོ་ཤས་ཐུགས་དམ་ལ་བཞུགས་ནས་དགུང་ལོ་རེ་གཉིས་པ་ཤིང་ཕོ་བྱི་བ་ལ་སྐུ་གཤེགས་སོ། ༈ །དེ་ཉིད་ཀྱི་སྡོམ་ཕྲུག་བདག་མཁན་པོའི་མིང་བཏགས་གཉོས་ཀྱི་དགེ་སློང་དྷརྨ་ཤྲཱི་ནི། མཆོག་གི་དངོས་གྲུབ་བརྙེས་པ་ཡེ་ཤེས་ཀྱི་སྐུ་ཅན་རྗེ་བཙུན་ཐམས་ཅད་མཁྱེན་པ་གཏེར་ཆེན་ཆོས་ཀྱི་རྒྱལ་པོ་དང་སྡོམ་བརྩོན་མཁན་ཆེན་པོ་རྒྱལ་སྲས་བསྟན་པའི་ཉི་མ་གཉིས་ཀྱི་རིགས་ཀྱི་གཅུང་དུ་སྐྱེེས། གཅེན་རྣམ་གཉིས་ཀྱི་བཀའ་དྲིན་གྱི་ཆུང་ངུ་ནས་རྒྱལ་བའི་བསྟན་པ་རིན་པོ་ཆེ་དང་མཇལ། ཁྱད་པར་རང་ལོ་ཉི་ཤུ་རྩ་བདུན་པ་ལྕགས་ཕོ་སྤྲེའུའི་ལོའི་དུས་ཚིགས་ལྔ་ལས་དབྱིད་ཟླ་དང་པོའི་དུས། དཔྱིད་འབྲིང་ནག་ཟླའི་ཡར་ངོའི་ཚེས་བཅུ་གསུམ། ཉིན་གྱི་དུས་སུ་ཕྱི་དྲོའི་ཉི་མ་བརྒྱད་ཆ་ལུས་པ་གྲིབ་ཚོད་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ་མཁན་སློབ་སྦྲགས་མ་དོན་གྱི་སླད་དུ་མཚན་ནས་སྨོས་ན་མཁན་ཆེན་དཀོན་མཆོག་བསྟན་འཛིན། གསང་སྟོན་རབ་འབྱམས་པ་བློ་བཟང་སྐྱེས་མཆོག །དུས་གོ་བ་རབ་འབྱམས་པ་ཕུན་ཚོགས་ལེགས་འབྱོར། གྲོགས་དན་པ་དགེ་སློང་བློ་བཟང་ཀུན་དགའ། ཁ་སྐོང་བ་དགེ་སློང་ངག་དབང་ཆོས་འཛིན་ཏེ། དད་པའི་དགེ་འདུན་གྲངས་ཚང་བའི་དབུས་སུ། རང་བྱུང་འཕགས་པའི་གཙུག་ལག་ཁང་ཆེན་པོ་པོ་ཊ་ལར། གྲོགས་རང་གི་གཅུང་དང་དགེ་སློང་བཟོད་པ་བཅས་ཚིགས་གསུམ་དུས་གཅིག་ལ་བར་མ་ཆད་པའི་ཆོ་གས་བསྙེན་པར་རྫོགས་པས་དགེ་སློང་གི་དངོས་པོ་ཐོབ། དེ་ཉིན་བསྒྲུབ་བྱ་གཉིས་བྱུང་བའི་ངེད་རྣམས་དང་པོ་ཡིན། ཆ་གཉིས་པ་ལ་རྟ་ཚབ་རྗེ་དྲུང་རིན་པོ་ཆེའི་ཞབས་ཕྱི་བ་དགེ་སློང་ངག་དབང་ཚུལ་ཁྲིམས་དང་བློ་གསལ་རྒྱ་མཚོ་གཉིས་སོ། །མཆན། འདུལ་བའི་བརྡའ་ཆད་དང་ལག་ལེན་ཕྲན་བུ་གཅེན་རྒྱལ་པའི་སྲས་པོ་དང་གུང་ཐང་པཎ་ཆེན་གཉིས་ལས་སྦྱངས་ཏེ་སྔོན་ནས་ཅུང་ཟད་ཤེས་ཤིང་། བསྙེན་པར་རྫོགས་པའི་ཕྱི་ལོ་དེར་གཞུང་ལུགས་རབ་འབྱམས་སྨྲ་བ་སངས་རྒྱས་ཆོས་དར་ལས་འདུལ་བའི་བཤད་ཡམ་ཙམ་ཞིག་ཉན་ནས་བསམ་པའི་ཤེས་རབ་ཀྱིས་ཅུང་ཟད་བསྐྱངས་པས། གོ་བའི་སྣེ་ཟིན་ཙམ་གྱི་བག་ཆགས་བཞག་པ་ལགས་སོ། ༈ །ད་ནི་འཕྲོས་དོན་ཐོར་བུ་བརྗོད་པར་བྱ་སྟེ། བརྒྱུད་ཡིག་རྙིང་པ་ཁ་ཅིག་ཏུ་རྦ་རཏྣ་ནས་སྨར་ཤཱཀྱ་མུ་ནེ། གཡོ་དགེ་འབྱུང་བླ་ཆེན་པོ་ཞེས་འདྲེན་པ་ནི། སྨར་གཡོ་གཙང་གསུམ་བཀའ་དྲིན་ཆེ་བས་ངོ་མཚར་བརྒྱུད་པ་ལྟ་བུར་གསུམ་ཀ་བགྲངས་པ་ལས། བླ་ཆེན་གྱི་མཚན་མཐར་རབ་གསལ་གྱི་འཁྲུལ་གཞི་བྱས་ནས་གཙང་རབ་གསལ་ཆད་པར་སྣང་བས་ཡི་གེ་བྲིས་ནོར་འབྱམས་པ་ཡིན་ལ། ཁ་ཅིག་ཏུ་སྨར་དང་གཡོའི་བར་དུའང་ལེགས་རིན་ཆེན་ནམ་མཁའ་མཛོད་ཟེར་བ་ནི་སྨར་གཡོ་གཙང་གསུམ་ཀ་རཏྣའི་མཁན་བུ་ཡིན་པར་ཡོངས་སུ་གྲགས་པས་གནོད་དོ། །ཡང་བླ་ཆེན་པོ་ནས། སྦ་ཡེ་ཤེས་གཡུ་དྲུང་། གྲུམ་ཡེ་ཤེས་རྒྱལ་མཚན། ཀླུ་མེས་ཟེར་བ་ནི། ཡིག་ཚང་འགའ་ཞིག་ཏུ། དབུས་གཙང་གི་མི་བཅུས། བླ་ཆེན་པོ་ལ་སྡོམ་པ་བླངས་ནས་བྱིངས་ཡར་ལོག །ཀླུ་མེས་ཀྱིས་གྲུམ་ལས་འདུལ་བ་ཉན་ཞིང་བསྡད་དོ། །ཞེས་འབྱུང་བའི་གཏམ་རྒྱུད་ཐོས་ཤིང་ཇི་བཞིན་པ་མ་འཁྱོལ་བའི་འཆལ་གཏམ་མོ། །ཡང་ཕྱོགས་གཏམ་ཅན་ཁ་ཅིག་ན་རེ། བླ་ཆེན་མཁན་བརྒྱུད་མ་དག་སྟེ། དེའི་རྒྱུ་མཚན་བླ་ཆེན་བསྙེན་པར་རྫོགས་པའི་ལས་ཀྱི་ཁ་སྐོང་ལ་རྒྱ་ནག་གི་དགེ་སློང་གཉིས་ཡོད་པ་དེ་རྣམ་དག་ཡིན་མིན་མི་ཤེས་པས། ལས་ཆགས་མ་ཆགས་ཐེ་ཚོམ་ཟ་བས། བླ་ཆེན་པོ་ལ། སྡོམ་པ་འཁྲུངས་མ་འཁྲུངས་ཐེ་ཚོམ་ཟ། ཁ་ཆེན་པཎ་ཆེན་ནས་བརྒྱུད་པ་ལ་དེ་འདྲའི་སྐྱོན་མེད་པས་སྡོམ་བརྒྱུད་དག་པ་ཡིན་ནོ། །ཞེས་སྨྲ་བ་མི་རིགས་ཏེ་སྤྱིར་རྒྱའི་དགེ་སློང་ཡིན་པས་རྣམ་དག་མ་ཡིན་པར་སྒྲུབ་མི་ནུས་ཤིང་། ཁྱད་པར་དེ་གཉིས་ལྷ་ལུང་དཔལ་གྱི་རྡོ་རྗེ་ཆོས་རྒྱུས་ཤིན་ཏུ་ཆེ་ཞིང་བསྟན་པ་རིན་པོ་ཆེ་མིག་གི་འབྲས་བུ་ལྟར་གཅེས་སྤྲས་སུ་མཛད་པ་དེས། རང་ཉིད་རྒྱལ་པོ་སྡིག་ཅན་བསད་པས་ལས་ཀྱི་ཁ་སྐོང་མི་བཏུབ་པར་གཟིགས་ཏེ་ཁ་སྐོང་བར་འོས་པའི་དགེ་སློང་འབད་པ་ཆེན་པོས་བཙལ་ནས་བཏང་བར་ཡོངས་སུ་གྲགས་ཤིང་གྲུབ་པས་ན། རྣམ་དག་ཡིན་མིན་གྱི་ཐེ་ཚོམ་ག་ལ་དགོས། ལར་དུས་ཕྱིས་ཀྱི་མི་ཐེ་ཚོམ་ཆེ་ཟོས་པས་སྔོན་བླ་ཆེན་པོའི་ཐུགས་རྒྱུད་ལ་སྡོམ་པ་རྣམ་དག་མ་འཁྲུངས་པར་སྒྲུབ་པ་ནི་བཞད་གད་ཀྱི་གནས་སོ། །དེར་མ་ཟད་བླ་ཆེན་བརྒྱུད་པ་མ་དག་ན། ཁ་ཆེའི་པཎ་ཆེན་གྱིས་བྱང་རྡོར་རྣམ་གཉིས་དང་འཇམ་དབྱངས་ས་པཎ་གསུམ་བསྙེན་པར་རྫོགས་པ་ལའང་ལས་མ་ཆགས་པར་འགྱུར་ཏེ། རྒྱུ་མཚན་བྱང་ཆུབ་དཔལ་བའི་ལས་སློབ་ཤངས་པ་ཇོ་སྟོན་དང་། གསང་སྟོན་རྒྱང་རོ་གཞོན་རིན། རྡོ་རྗེ་དཔལ་བའི་ལས་སློབ་གཙང་པོ་པ་དང་། གསང་སྟོན་བསོད་རྒྱན། འཇམ་དབྱངས་ས་པཎ་གྱི་ལས་སློབ་སྤྱི་བོ་ལྷས་པ་དང་། གསང་སྟོན་མོ་རི་བ་རྣམས་པཎ་ཆེན་བོད་དུ་མ་བྱོན་གོང་དུ་བསྙེན་པར་རྫོགས་ཟིན་པའི་བླ་ཆེན་བརྒྱུད་པ་ཡིན་དགོས་ལ་དེ་ཡིན་ན་ཁྱོད་རང་གི་རིགས་པ་དེས་པཎ་ཆེན་སྡོམ་རྒྱུན་ཀྱང་མ་དག་པར་ཁས་བླངས་པར་འགྱུར་རོ། །ཡང་ཁ་ཅིག་བླ་ཆེན་དང་ཀླུ་མེས་ཀྱི་སྡོམ་པ་གང་ལས་བླངས་པའི་མཁན་པོ་ལ་མི་མཐུན་པའི་ལོ་རྒྱུས་སྣ་ཚོགས་བྱུང་བའི་ཕྱིར། ཡིད་ཆེས་བའི་གནས་སུ་རུང་བ་ཡེ་མི་འདུག་པས། ཁ་ཆེ་པཎ་ཆེན་ཤཱཀྱ་ཤྲཱིའི་མཁན་བརྒྱུད་ལ་མཁས་པ་རྣམས་ཐུགས་རྩིས་ཆེན་པོ་མཛད་ཅེས་བྲིས་ནས་དེའི་སྒྲུབ་བྱེད་ལ། འཇམ་དབྱངས་ས་པཎ་དང་། བདག་ཉིད་ཆེན་པོ་བཟང་པོ་དཔལ་དང་། ཏི་ཤྲཱི་ཀུན་བློ་དང་། མཁས་མཆོག་བུ་སྟོན་རྣམས་ཀྱིས་པཎ་ཆེན་སྡོམ་བརྒྱུད་ལས་བསྙེན་རྫོགས་བཞེས་པ་བཀོད་དོ། །དེ་ཡང་ཕྱོགས་གཏམ་སྟེ། ལོ་རྒྱུས་མི་འདྲ་བ་ནི་པཎ་ཆེན་སྡོམ་བརྒྱུད་ལའང་མང་སྟེ། རཏྣ་མི་ཏྲའི་རྗེས་སུ་དྷརྨ་པཱ་ལ་སྟེ་ཆོས་སྐྱོང་ཞེས་ཡིན་པ་ལ་ཆོས་བཟང་ཟེར་བ་དང་དེ་རྗེས་སུ་གུ་ཎ་པ་ཏི་སྟེ་ཡོན་ཏན་བདག་པོ་ཞེས་པ་ལ། ཡོན་ཏན་རྒྱ་མཚོ་ཞེས་ཁ་ཅིག་ཏུ་འབྱུང་བ་དང་། བྱང་རྡོར་རྣམ་གཉིས་ཆུ་ཤུལ་གྱི་སྤྲོག་མ་དགོན་པར་དུས་གཅིག་ལ་བསྙེན་པར་རྫོགས་པར་འདོད་པ་དང་། ཡང་བྱང་ཆུབ་དཔལ་བ་ཁྲོ་ཕུ་ལོ་ཙཱ་བའི་གཟིམ་ཁང་དུ་རྫོགས་ལ། རྡོ་རྗེ་དཔལ་པ་ཕྱིས་རྒྱན་གོང་དུ་རྫོགས་པས་དུས་མི་གཅིག་ཟེར་བ་དང་། ཡང་ཚོགས་ཆེན་པོའི་མཁན་པོ་ཡར་འབྲོག་སྒྲགས་མངའ་བ་བཀྲ་ཤིས་ཚུལ་ཁྲིམས་སམ་རྩིས་པ་ཤེར་མགོན་པའི་སྡོམ་ཕྲུག་ཏུ་འདོད་པ་དང་། སྙེ་མོ་བ་བསོད་ནམས་དཔལ་གྱི་སྡོམ་ཕྲུག་ཏུ་འདོད་པ་གཉིས་ཀྱང་འགལ་བ་སོགས་དེ་རིགས་ཀྱི་གཏམ་རྒྱུད་མ་དག་པ་གཉིས་ཀ་ལ་ཡོད་བཞིན་དུ་བླ་ཆེན་སྡོམ་བརྒྱུད་ཁོ་ན་ལ་སྐྱོན་འདོགས་པ་ནི། གཞན་ལ་བལྟ་བའི་མིག་ཡོད་ཀྱང་། རང་ཉིད་བལྟ་ན་མེ་ལོང་དགོས་པས་བཙལ་བར་རིགས་སོ། །བདག་ཉིད་ཆེན་པོ་ས་སྐྱ་པཎྜི་ཏ་དང་ཀུན་མཁྱེན་བུ་སྟོན་ཁ་ཆེ་པཎ་ཆེན་བརྒྱུད་པ་ལས་བསྙེན་རྫོགས་བཞེས་པ་བདེན་མོད། དེ་ལྟ་བུའི་མཁས་གྲུབ་བླ་ཆེན་བརྒྱུད་པ་ལའང་ཆེས་མང་སྟེ། རྒྱ་འདུལ་སོག་འཛིན། རྨ་ཚོ་བྱང་རྡོར། བྱ་འབྲེ་ཤེས་འབར། འདུལ་འཛིན། བརྩོན་འགྲུས་འབར། ཤ་མི་སྨོན་ལམ་རྡོ་རྗེ་སོགས་འདུལ་འཛིན་ཁྱད་པར་ཅན་མང་པོ་དང་། ལོ་ཆེན་མཁན་པོ་ཡེ་ཤེས་བཟང་པོ། རིན་ཆེན་བཟང་པོ། པུ་མཁན་པོ་རྒྱ་ལྷ་ཁང་པའི་གླན། ཏོ་བ། ཕུ་ཆུང་མཁན་པོ་རྒྱལ་ལྷ་ཁང་པའི་ཞང་། པ། ཤ་ར་བ་མཁན་པོ་བོ་ཏོ་བ། རྔོག་ལོ་ཙཱ་བ་ཆེན་པོ་བློ་ལྡན་ཤེས་རབ། འབྲིང་གི་མཁན་པོ་རྔོག་ལེགས་ཤེས། འབྲེ་ཤེས་རབ་འབར། སྣེ་པོ་གྲགས་པ་རྒྱལ་མཚན། དྭགས་མཁན་པོ་ཤ་བ་གླིང་པ། པོ་ལྷ་རྗེ། འགྲོ་མགོན་མཁན་པོ་བྱ་འདུལ། ཕག་གྲུ། བཅོམ་ལྡན་འདས་རིག་རལ་སོགས་མཐའ་ཡས་སོ། །དེས་ན་སྔོན་གྱི་མཁས་གྲུབ་རྒྱལ་བ་གཉིས་པ་ལྟ་བུའི་སྐྱེས་མཆོག་ཁྱད་པར་ཅན་རྣམས་ཀྱི་ཐུགས་རྒྱུད་ལ་སྡོམ་པ་རྣམ་དག་འཁྲུངས་མ་འཁྲུངས་ཀྱི་ཁ་ཚོན་གཅོད་པ་ནི་མཐའ་བྲལ་གྱི་ནམ་མཁའ་ཁབ་མིག་ཏུ་འཛུད་པར་འདོད་པ་དང་འདྲ་བས་མཛངས་པ་མ་ཡིན་ནོ། །མདོར་ན་སྔར་བསྟན་པ་རྒྱས་པའི་དུས་སུ་སྟོད་འདུལ་སྨད་འདུལ། ཁ་ཆེ་བརྒྱུད་པའི་སྡོམ་རྒྱུན་ཐམས་ཅད་ལ་གནས་བརྟན་སྡེ་སྣོད་འཛིན་པ་ཆེས་ཆེར་མཆོག་ཏུ་གྱུར་པའི་མཁན་རབས་མང་དུ་བྱུང་མོད། དེ་ལས་སྟོད་འདུལ་བ་པཱ་ལ་རྣམ་གསུམ་གྱི་སྡོམ་རྒྱུན་ནི་སྔོན་གྱི་དུས་སུའང་རྒྱུན་བྲེང་ངེ་བ་གཅིག་ལས་རྒྱ་ཆེར་མ་འཕེལ་ཞིང་དིང་སང་ནི་ཡོད་པའི་སྒྲ་མི་གྲག་གོ། །པཎ་ཆེན་སྡོམ་རྒྱུན་ཀྱང་ཚོགས་སྡེ་བཞི་ལས། དེང་སང་བྱིངས་རྫིང་བའི་སྡོམ་རྒྱུད་ཕྱོགས་གང་ན་ཡང་ཡོད་པ་མ་ཐོས་ཤིང་། གཞན་གསུམ་གྱི་སྡོམ་རྒྱུན་རང་རང་གི་ཚོགས་དེར་མ་ཆད་མོད། དེ་ལྟ་ནའང་། དགེ་འདུན་སྒང་པའི་སྡོམ་རྒྱུན་ཀར་ལུགས་པ་དང་། ཆོས་ལུང་པའི་སྡོམ་རྒྱུན་འབྲུག་ལུགས་པ་འདྲ་ལ་མ་ཆད་པ་ཙམ་ཡོད་པར་གྲགས་ཤིང་། ཚལ་མིག་པའི་སྡོམ་རྒྱུན་ངོར་ཆེན་རྡོ་རྗེ་འཆང་ཀུན་དགའ་བཟང་པོ་ལས་བརྒྱུད་ནས་དེང་སངས་ལུགས་པ་རྣམས་ལ་དར་རྒྱས་ཆེ། ཁ་ཆེ་པཎ་ཆེན་གྱི་ལུགས་འཇམ་དབྱངས་ས་སྐྱ་པཎྜི་ཏ་ནས་བརྒྱུད་དེ་ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོའི་ཕྲིན་ལས་ཀྱིས་རྒྱས་པར་མཛད་པ་དང་། སྨད་འདུལ་བའི་སྡོམ་རྒྱུན་ཐམས་ཅད་མཁྱེན་པ་བསོད་ནམས་རྒྱ་མཚོ་ནས་བརྒྱུད་པ་པཎ་ཆེན་ཆོས་ཀྱི་རྒྱལ་པོའི་ཕྲིན་ལས་ཀྱིས་རྒྱས་པར་སྤེལ་བ་སྟེ། དེ་ལྟར་སྡོམ་རྒྱུན་གཉིས་པོ་འདི་དེང་སངས་རྒྱ་བོད་ཧོར་གསུམ་སོགས་ཕྱོགས་ཐམས་ཅད་དུ་དར་ཞིང་རྒྱས་པར་སྣང་ལ། སྨད་འདུལ་བའི་ལུགས་དེ་ལས་བརྒྱུད་པའི་ཁྱད་པར་ཅུང་ཟད་མི་འདྲ་བ་འདི་ཉིད་ཤིན་ཏུ་ཉག་ཕྲ་བར་གྱུར་པ་ན་གོང་མ་ཐམས་ཅད་མཁྱེན་གཟིགས་རྒྱལ་མཆོག་ལྔ་པ་ཆེན་པོའི་བཀའ་ལུང་གིས་བླ་ཆེན་སྡོམ་རྒྱུན་རྣམ་པར་དག་པ་ཁ་རག་ཞལ་སྔ་ནས་ལ་བཞུགས་ཤིང་། ཁོང་འདུལ་བའི་ངང་ཚུལ་ཤིན་ཏུ་གཙང་བས་སྔ་འགྱུར་གྱི་བསྟན་པའི་འབྲེལ་དང་བཅས་ཁྱེད་ཀྱིས་ཞུས་ནས་མ་ནུབ་པར་གྱིས་ཤིག་ཅེས་སྩལ་བ་ལྟར་བསྒྲུབས་པས་འདུན་མ་ལེགས་པ་ཡིན་ནོ། །དེས་ན་འདི་བསམ་པར་རིགས་ཏེ། འཇམ་དབྱངས་ས་པཎ་ནས་བརྒྱུད་པ་འདི་ཉིད་སྔོན་དུས་སྐྱེས་ཆེན་མང་དུ་བྱོན་ཞིང་། ད་ལྟའི་དུས་སུ་ནི་གནས་བརྟན་སྡེ་སྣོད་འཛིན་པའི་སྐྱེས་མཆོག་དམ་པ་མང་དུ་སྣང་མོད་ཀྱིས། འོན་ཀྱང་བར་སྐབས་ཀྱི་མཁན་རབས་འགའ་ཞིག་མཚན་མ་ནུབ་ཙམ་ལས་ཀུན་གྱིས་མཐུན་སྣང་དུ་གྲུབ་པའི་བཤེས་གཉེན་གྲགས་ཆེ་བ་མ་བྱུང་བ་དང་། ངོར་ལུགས་ཀྱི་མཁན་བརྒྱུད་རྣམས་ཀྱང་སྔགས་ཀྱི་རྡོ་རྗེ་འཛིན་པའི་བཤེས་གཉེན་བརྒྱུད་མར་བྱོན་ཀྱང་འདུལ་བའི་ཕྱོགས་ལ་ཕྱག་བཞེས་ཅུང་ཟད་ལྷོད་པ་བཅས། དེ་རྣམས་དང་བསྟུན་ན་ད་ལྟའི་དུས་འདིར་བླ་ཆེན་པོའི་སྡོམ་རྒྱུན་ཁྱད་པར་ཅན་འདི་ཉིད་ཆེས་འཕགས་པར་གྲུབ་སྟེ། དོན་གྱི་སླད་དུ་མཚན་ནས་སྨོས་ན་བདག་གི་མཁན་པོ་དཀོན་མཆོག་བསྟན་འཛིན་ཡན་ཆད་མཁན་བརྒྱུད་ཐམས་ཅད་གནས་བརྟན་སྡེ་སྣོད་འཛིན་པ་ཤ་སྟག་གསེར་རིའི་ཕྲེང་བ་ལྟར་བཟང་ཟ་ར་ཚགས་སུ་བྱོན་པ་ནི་ཀུན་གྱི་མཐུན་སྣང་དུ་གྲུབ་པ་འདི་ཡིན་ཞིང་། གཞན་དུ་ན་སྡོམ་རྒྱུན་ལུགས་སོ་སོ་དེ་དང་དེའི་མཁན་བརྒྱུད་ལ་བཞུགས་པའི་བླ་མ་རྣམས་ཀྱི་ཐུགས་རྒྱུད་ཀྱི་སྤངས་རྟོགས་སྐྱེ་འཕགས་གང་ཡིན་ནི་བདག་ཅག་སོ་སྐྱེས་རྣམས་ཀྱི་སུ་ཅི་ཞིག་གཞལ་བར་ནུས་ཏེ། འཕགས་པའི་སྤྱོད་ཡུལ་ལས་གཞན་གྱིས་རྟོགས་པར་མི་ནུས་པའི་ཕྱིར་རོ། །གཞན་ཡང་སྨད་འདུལ་བ་འདི་ལ་སྡོམ་རྒྱུན་ཙམ་དུ་མ་ཟད། སྔོན་གྱི་སྐྱེས་མཆོག་རྣམས་ཀྱི་ཐུགས་བསྐྱེད་རྨད་དུ་བྱུང་བའི་མཐུ་ལས་བཤད་རྒྱུད་ཀྱང་དུས་ཀྱི་ཐ་མའི་ཐ་མ་ད་ལྟའི་བར་དུ་དར་ཤིང་རྒྱས་པར་ཡོད་ཅིང་། སྟོད་འདུལ་བའི་བཤད་རྒྱུད་ཀྱང་གཟུས་རྡོ་རྗེ་རྒྱལ་མཚན་གྱིས་ལོ་ཙཱ་བ་རླུང་སྐྱོགས་གཉིས་ལ་འཆད་ཉན་མཛད་པས་སྨད་འདུལ་བའི་བཤད་རྒྱུན་ལ་འདྲེས་པའི་ཕྱིར་མ་ཆད་པར་སྣང་ངོ་། །དེ་ལྟར་ན་དངོས་ཅག་གིས་ཀྱང་རང་ལ་ནུས་པ་མ་མཆིས་རུང་། དམ་པ་རྣམས་ཀྱི་བྱིན་རླབས་ཅུང་ཟད་ཞུགས་པས་མཁན་པོའི་གཡར་ཁྲལ་བླངས་ནས་གང་སྤོབས་ཀྱིས་སྤེལ་ལོ་བགྱིས་པར། ད་ལྟའི་ལྕགས་སྦྲུལ་གྱི་ལོ་འདི་ཡན་ལ་སྡོམ་ཕྲུག་དགེ་སློང་ཉིས་བརྒྱ་ལྷག་ཙམ་དང་། དགེ་ཚུལ་སྟོང་ཕྲག་བརྒལ་བ་ཙམ་དུ་ཟིན་པ་ནི་ཆོས་ལྡན་གྱི་ཕྲིན་ལས་སུ་རློམས་པ་ལགས་པས། ཕྱིས་ནས་ཀྱང་དགེ་བའི་བཤེས་གཉེན་མཁས་བཙུན་བཟང་པོའི་ཡོན་ཏན་མངའ་བ་རྣམས་ཀྱིས་གཅིག་ཏུ་བསྟན་པ་ལ་དགོངས་ཏེ། མཁན་པོ་གཏན་མེད་ཀྱི་ལུང་ཙམ་ལ་འཁྲིས་ནས་དགེ་སློང་བཞི་ཚོགས་ཀྱིས་བསྙེན་རྫོགས་འབོགས་པ་དང་། བསྒྲུབ་བྱ་ལོ་བདུན་དང་ཉི་ཤུ་མ་ལོན་པར་རབ་བྱུང་བསྙེན་རྫོགས་སྟེར་བ་དང་། བསྒྲུབ་བྱ་གསུམ་ལས་མང་བར་དུས་གཅིག་ཏུ་སྡོམ་པ་འབོགས་པ་དང་། གོས་བྱིན་རླབས་མཁན་པོ་ལས་གཞན་དག་གིས་ཀྱང་བྱེད་པ་དང་། ལས་ཆོ་ག་དཔེ་ཀློག་བྱེད་པ་དང་། ལས་གྲྭ་རྣམས་ཀྱིསཀྱང་ཆོ་ག་ལ་ཐུགས་མི་གཏོད་པར། འགྲོ་འདུག་དང་། ངག་བཟླས་བྱེད་པ་དང་། ལས་གྲྭ་གྱེས་ནས་ལས་སློབ་ཀྱི་གདམས་ངག་ཟུར་དུ་འདེབས་པ་སོགས་ཟོར་ཡང་མི་མཛད་པར་ཕྲ་ཞིབ་ཀྱི་ཕྱག་ལེན་རྣམ་པར་དག་བ་འདི་ཉིད་མི་ཉམས་ཤིང་གོང་འཕེལ་དུ་འགྱུར་བའི་སྒོ་ནས་སྤྱིར་རྒྱལ་བའི་བསྟན་པ་སྤྱིར་དང་ཁྱད་པར་མཁན་ཆེན་ཞི་བ་འཚོའི་རིང་ལུགས་རྒྱས་པར་བྱ་བའི་ཕྱིར་དང་། ངེས་འབྱུང་གི་ཚུལ་ཁྲིམས་དོན་དུ་གཉེར་བའི་བློ་ལྡན་རྣམས་ཀྱི་རྒྱུད་ཆུད་མི་གཟོན་པར་བསྐྱང་བ་ལ་ནན་ཏན་དུ་མཛོད་ཅིག་ཅེས་གསོལ་བ་འདེབས་སོ། །དེ་ལྟར་ཉུང་ངུའི་ངག་གི་སྦྱོར་བ་ཡིས། །ངོ་མཚར་རྒྱ་ཆེན་གཏམ་ལ་དབང་བསྒྱུར་བའི། །མཁན་བརྒྱུད་རྣམ་པར་གསལ་བྱེད་སྒྲོན་མེ་འདི། །ཆོས་ཁུངས་བལྟ་འདོད་དཔལ་དུ་འགྱུར་སྙམ་སྤེལ། །དགེ་འདིས་ངེས་འབྱུང་ཚུལ་ཁྲིམས་གྲུར་ཞུགས་ཏེ། །བག་ཡོད་མཐུན་པའི་རླུང་གིས་ལེགས་བསྐུལ་ནས། །དོན་མཐུན་མ་གྱུར་འགྲོ་དང་ལྷན་ཅིག་ཏུ། །རྣམ་གྲོལ་གླིང་དུ་བ དེ་བར་ཕྱིན་གྱུར་ཅིག །ཅེས་སྔ་འགྱུར་སྡོམ་རྒྱུན་གྱི་མཁན་བརྒྱུད་ཇི་ལྟར་བྱོན་པའི་གཏམ་ཉུང་གསལ་སྒྲོན་མེ་ཞེས་བྱ་བ་འདི་ནི་རྣམ་པར་དཔྱོད་པའི་བློ་ཅན་རྣམ་ལ་ཆོས་ཁུངས་ཀྱི་ངེས་བ་སྦྱིན་པའི་སླད་དུ་ཚུལ་འདི་ལྟ་བུ་ཞིག་རྩོམ་ཞེས་རྒྱལ་ཀུན་སྤྱི་གཟུགས་སྐྱབས་མགོན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་བཀའ་གནང་བ་སྩལ་བ་སྤྱི་བོས་བླངས་ཏེ། གང་གི་བཀའ་དྲིན་གྱིས་འཚོ་བའི་སྨྱོས་ཀྱི་དགེ་སློང་དྷརྨ་ཤྲཱིས་ཨོ་རྒྱན་སྨིན་གྲོལ་གླིང་གི་ཆོས་གྲྭར་ཁྱུ་མཆོག་གི་ལོ་ལ་སྦྱར་བའོ། །འདིས་ཀྱང་མཁན་ཆེན་ཞི་བ་འཚོའི་རིང་ལུགས་རྣམ་པར་དག་པ་ཡུན་རིང་དུ་གནས་ཤིང་རྒྱས་པར་གྱུར་ཅིག། །།མདྒ་ལཾ།། །། སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེའི་ཁ་སྐོང་ངེས་ཤེས་འདྲེན་པའི་ཕོ་ཉ། འཇིགས་བྲལ་ཡེ་ཤེས་རྡོ་རྗེ།སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེའི་ཁ་སྐོང་ངེས་ཤེས་འདྲེན་པའི་ཕོ་ཉ་ཞེས་བྱ་བ་བཞུགས་སོ། །ༀ་སྭ་སྟི། རྣམ་འདྲེན་སྟོང་རྩའི་དབུས་ན་པད་དཀར་ལྟར། །ངོ་མཚར་ཐུགས་བསྐྱེད་ཕྲིན་ལས་ཆེས་འཕགས་པ། །རྩོད་ལྡན་འགྲོ་བའི་སྐྱབས་གཅིག་ཟས་གཙང་སྲས། །ཁྱོད་ཞབས་ཡན་ལག་དང་པོའི་རྒྱན་དུ་མཆོད། །གངས་ལྗོངས་མུན་གླིང་མཆོད་ཡོན་ཐུགས་བསྐྱེད་གཟི། །ཉི་ཟླའི་སྣང་བས་མཛེས་ལས་ཐུབ་པའི་བསྟན། །ངུར་སྨྲིག་རྒྱལ་མཚན་ཐོག་མར་སྒྲེང་མཛད་མགོན། །མཁན་ཆེན་ཞི་འཚོའི་བཀའ་དྲིན་བསམ་གྱིན་དད། །རྒྱལ་བའི་གདུང་འཛིན་སྡོམ་བརྩོན་དམ་པའི་ཕུལ། །ལྔ་རིག་སྨྲ་བའི་དབང་པོ་དྷརྨ་ཤྲཱི། །རིམ་བྱོན་མཁན་རབས་གསེར་རིའི་ཕྲེང་བ་ལ། །ཀུན་ནས་མོས་བློས་བསྟོད་ཕྱག་ལན་བརྒྱར་འབུལ། །འདི་ན་བསྟན་རྩ་སོ་ཐར་འདུལ་བའི་ཁྲིམས། །ཐམས་ཅད་ཡོད་སྨྲའི་ལུགས་བཟང་གསེར་འགྱུར་རྩིས། །རྣམ་མང་མོས་ལྡན་ལྕགས་ཁམས་རིན་ཆེན་དུ། །བསྒྲུབས་པའི་ལོ་རྒྱུས་ཁ་སྐོང་མདོ་ཙམ་གླེང་། །དེའང་གངས་ཅན་བོད་ཀྱི་ལྗོངས་སུ་མངའ་བདག་ཆོས་རྒྱལ་ཁྲི་སྲོང་ལྡེའུ་བཙན་གྱི་རྒྱ་གར་འཕགས་པའི་ཡུལ་ནས་མཁན་སློབ་པཎ་གྲུབ་མང་པོ་སྤྱན་དྲངས་ཏེ་སངས་རྒྱས་ཀྱི་བསྟན་པ་གཞིར་བཞེངས་སུ་བཙུགས་པར་མཛད་པ་ན། མཁན་ཆེན་ཞི་བ་འཚོའི་ཞལ་སྔ་ནས་སད་མི་མི་བདུན་ལ་སོགས་པ་རབ་ཏུ་བྱུང་བར་མཛད་པ་ནས་བཟུང་བསྟན་རྩ་འདུལ་བ་འཛིན་པའི་སྡེ་ཆེན་པོ་བྱུང་། བར་སྐབས་རྒྱལ་པོ་གླང་དར་མས་བསྟན་པ་བསྣུབ་པར་ཕྱོགས་པ་ན་སྨར་གཡོ་གཙང་གསུམ་གྱིས་འདུལ་བའི་ཕྱག་དཔེ་བསྣམས་ནས་ཁམས་སུ་བྲོས་ཏེ་བཞུགས། གླང་དར་བཀྲོང་རྗེས་བླ་ཆེན་དང་དབུས་གཙང་གི་མི་བཅུས་སྡོམ་རྒྱུན་བླངས་ནས་སླར་དབུས་གཙང་དུ་འདུལ་བསྟན་ཉམས་པ་གསོས་ཤིང་རིམ་པར་འཕེལ་རྒྱས་བྱུང་པ་ལ་སྨད་འདུལ་དུ་གྲགས་ཏེ་དོན་ལ་དཔལ་ལྡན་ཞི་འཚོའི་སྡོམ་རྒྱུན་འདི་ལ་ཟེར། དེ་ལྟར་སྨད་འདུལ་སྡོམ་རྒྱུན་དབུས་གཙང་སྟོད་སྨད་དང་། ཀཿཐོག་པ་དམ་པ་བདེ་གཤེགས་སོགས་ཀྱིས་སྤེལ་བ་ནས་མདོ་ཁམས་ཕྱོགས་སུ་མ་ཉམས་པར་གནས་བཞིན་པའི་ཐོག །ཕྱིས་རིག་འཛིན་གཏེར་བདག་གླིང་པས་གཡོ་རུ་གྲྭ་ཕྱིར་སྔ་འགྱུར་གྱི་ཆོས་སྡེ་ཨོ་རྒྱན་སྨིན་གྲོལ་གླིང་གསར་དུ་ཕྱག་བཏབ་ཟིན་རྗེས་སྐུའི་གཅུང་ལོ་ཆེན་དྷརྨ་ཤྲཱི་ཉིད་སྔར་དགུང་གྲངས་ཉི་ཤུ་པར་༧གོང་ས་ཀུན་མཁྱེན་ལྔ་པ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས་ཟིན་ནའང་། ཕྱིས་རྒྱལ་མཆོག་ལྔ་པ་ཆེན་པོ་རང་གི་ལུང་ལས་སྔ་འགྱུར་གྱི་བསྟན་པའི་འབྲེལ་དང་བཅས་སྨད་འདུལ་བའི་སྡོམ་རྒྱུན་འཛིན་དགོས་པ་ཡིན་པས། དེའི་སྡོམ་རྒྱུན་ཁ་རག་ཞལ་སྔ་ནས་ལ་བཞུགས་ཤིང་ཁོང་འདུལ་བའི་ངང་ཚུགས་ཀྱང་ཤིན་ཏུ་བཟང་བས་དེར་བསྐྱར་བསྒྲུབ་གྱིས་ཞེས་བཀས་བསྐུལ་བ་ལྟར་ལོ་ཆེན་དགུང་ལོ་ཉེར་བདུན་པར་སླར་ཡང་མཁན་ཆེན་དཀོན་མཆོག་བསྟན་འཛིན་ལས་དད་པའི་དགེ་འདུན་གྲངས་ཚང་བའི་དབུས་སུ་ཚིག་གསུམ་བར་མ་ཆད་པའི་ཆོ་གས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས། གུང་ཐང་པཎ་ཆེན་ལ་སོགས་པ་བཤེས་གཉེན་གཞན་དུ་མ་ལས་འདུལ་བའི་བཤད་རྒྱུན་དང་བརྡ་ཆད་ཕྱག་ལེན་སོགས་མཁས་པར་གསན། ཕྱིས་ཨོ་རྒྱན་སྨིན་གྲོལ་གླིང་གི་གཙང་གྲྭ་གསར་བཙུག་གི་མཁན་པོའི་ཁྲིར་ཕེབས་ཏེ་གཞི་གསུམ་གྱི་ཕྱག་ལེན་རྣམ་པར་གཙང་བས་ཆོས་སྡེ་ཆེན་པོ་བསྐྱངས་ཤིང་། སྔ་འགྱུར་མཁན་བརྒྱུད་རྣམ་ཐར་དང་། གཞི་གསུམ་གྱི་ཆོ་ག་སོགས་སོ་ཐར་འདུལ་བའི་ཕྱོགས་སུ་གལ་ཆེ་བའི་ཡིག་ཆའང་མང་དུ་མཛད་པ་བཅས་ཀྱི་དམ་ཆོས་འདུལ་བའི་བསྟན་རྒྱུན་ལ་ཆེས་བཀའ་དྲིན་གྱི་ཕུལ་དུ་གྱུར། གཞན་ཐུན་མོང་དང་ཐུན་མོང་མ་ཡིན་པའི་ལོ་རྒྱུས་རྣམ་ཐར་ཞིབ་ཏུ་ནི་རྗེ་ཉིད་ཀྱི་མཛད་རྣམ་ཞལ་གསུངས་མ་ལྟར་དང་། འདིར་དམིགས་གསལ་དུ་བརྗོད་བྱ་ལོ་ཆེན་རང་ཉིད་ལ་ཐུག་གི་བར་སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་དཀྱུས་བཞིན་ཤེས་པར་བྱས་ལ། ༈ །དེ་ནས་དྷརྨ་ཤྲཱིའི་མཁན་བུ་རབ་འབྱམས་པ་འགྱུར་མེད་ཨོ་རྒྱན་ཆོས་གྲགས་ནི། གཡོ་རུ་གྲྭ་ཕྱིན་སྐུ་འཁྲུངས་ཤིང་། གཞོན་ནུ་ཉིད་ནས་ཨོ་རྒྱན་སྨིན་གྲོལ་གླིང་གི་ཆོས་གྲྭར་ཞུགས་ཏེ་ཡོན་ཏན་ཐམས་ཅད་ཀྱི་ཕྱི་མོ་ཡི་གེ་འབྲི་ཀློག་ནས་བརྩམས་རིམ་པར་ཆོ་ག་ཆོས་སྤྱོད་བློར་འཛིན་གདངས་དབྱངས་ཕྱག་རྒྱ་རོལ་མོ་དཀྱིལ་འཁོར་བྲིས་ཐིག་གཏོར་བཟོས་མཚོན་པའི་ཕྱག་ལེན་ཆེ་ཕྲ་གང་ལའང་བྱང་ཆུབ་ཅིང་རང་རྐྱ་ཕེར་བ་བསྟན་པའི་མིག་རྒྱན་དུ་གྱུར། མཁན་ཆེན་རྡོ་རྗེ་འཛིན་པ་ལོ་ཆེན་ཆོས་དཔལ་རྒྱ་མཚོ་གཙུག་གི་ནོར་བུར་བསྟེན་ནས་བསྟན་པའི་གཞི་མ་འདུལ་བ་སོ་ཐར་གྱི་སྡོམ་རྒྱུན་གསན་ཅིང་། གཞི་གསུམ་གྱི་ཕྱག་ལེན་ལ་སྦྱངས་བརྩོན་ཕུལ་དུ་ཕྱིན་པར་མཛད། ལྷག་པར་གཏེར་ཆེན་ཆོས་ཀྱི་རྒྱལ་པོ་ལས་སྔ་འགྱུར་བཀའ་གཏེར་ཆོས་སྒོ་རབ་འབྱམས་ཀྱི་སྨིན་གྲོལ་རྒྱབ་བརྟེན་གྱི་རིམ་པ་ཤིན་ཏུ་མང་བར་གསན། ལོ་ཆེན་དྷརྨ་ཤྲཱི་ལས་རྒྱུད་རྒྱལ་གསང་བ་སྙིང་པོའི་བཤད་ཁྲིད་ཁོ་ནའང་ལོ་བཅུ་གཉིས་ཀྱི་བར་དུ་ལོ་རེར་ཚར་གཉིས་རེ་གསན་ཅིང་། དེ་རྗེས་ཆོས་གྲྭ་ཆེན་པོར་ལོ་མང་དུ་སྐྱོར་དཔོན་གྱི་ཁུར་བཞེས་ཏེ་རྒྱུད་ཀྱི་བཤད་ཁྲིད་མན་ངག་མཐའ་དཔྱད་དང་བཅས་པ་ལ་གཞན་དྲིང་མི་འཇོག་པའི་མཁས་པ་ཆེན་པོར་གྱུར་ཏེ་སྔགས་རབ་འབྱམས་པའི་མཚན་སྙན་ཕྱོགས་ཀུན་ཏུ་ཁྱབ། གཞན་ཡང་བཀའ་གཏེར་དུ་མའི་སྒྲུབ་པ་ཕྱག་བཞེས་དང་འབྲེལ་བའི་མན་ངག་ལ་རང་བྱན་ཚུད་པས་ཨོ་རྒྱན་སྨིན་གྲོལ་གླིང་གི་བསྟན་པ་བླར་འདེགས་པའི་ཞབས་ཏོག་ཕུལ་དུ་ཕྱིན་ཏེ་གཏེར་ཆེན་སྐུ་མཆེད་ཀྱི་ཐུགས་ཟིན་སྲས་ཀྱི་དྭངས་མར་གྱུར་ཏོ། ༈ །དེའི་མཁན་བུ་སྨིན་གླིང་རྡོར་འཛིན་འགྱུར་མེད་ཆོས་ལྡན་ནི། འཁྲུངས་ཡུལ་གྲྭ་ཕྱི། གཞོན་ནུའི་དུས་ནས་སྨིན་གླིང་གི་གྲྭ་སར་ཞུགས་ཏེ་དཔེ་ཆ་འབྲི་ཀློག་དང་ཚོགས་འདོན་བློར་འཛིན་གྱིས་མཚོན་སློབ་སྦྱོང་མང་པོས་ཤེས་རབ་ཀྱི་སྒོ་ཕྱེས། ཅུང་ནར་སོན་ནས་ཐུན་མོང་རིག་གནས་དང་། ཐུན་མོང་གཞུང་ལུགས་མང་པོར་གསན་སྦྱོང་མཛད། དགུང་ལོ་ཉེར་གཅིག་པར་མཁན་པོ་རབ་འབྱམས་པ་ཨོ་རྒྱན་ཆོས་གྲགས་ལས་རང་ལུགས་འདུལ་བའི་སྡོམ་རྒྱུན་གྱི་བསྙེན་པར་རྫོགས་པ་གསན་ཅིང་། གཞི་གསུམ་གྱི་ཆོ་ག་སོགས་མདོ་ཕྱོགས་ཀྱི་བཤད་ཁྲིད་ལག་ལེན་དང་། ཁྱད་པར་སྒྱུ་འཕྲུལ་གསང་སྙིང་སོགས་སྔགས་རྒྱུད་ཀྱི་བཤད་པ་ལ་རྩལ་དུ་བཏོན་པས་སྔགས་རམ་པའི་མཚན་ཐོགས་ཤིང་བསྟན་པ་ལ་མཛད་རྗེས་ཆེ། ལྷག་པར་བོད་དུ་བསྟན་དགྲ་སོག་པོ་ཇུན་གར་བའི་རྒོལ་ངན་སླེབས་ཏེ་རང་བསྟན་ལ་ཡོ་འཁྱོམ་ཅི་རིགས་འབྱུང་སྐབས་གོང་གི་སྔགས་རམ་པ་ཨོ་རྒྱན་ཆོས་གྲགས་དང་འདི་གཉིས་ཀྱིས་སྨིན་གླིང་གི་བསྟན་པའི་སྲོག་རྩ་བཟུང་བས་ན་སྐུ་དྲིན་ཤིན་ཏུ་ཆེའོ། ༈ །དེའི་མཁན་བུ་ཨོ་རྒྱན་བསྟན་འཛིན་རྡོ་རྗེ་ནི། སྨྱོས་གདུང་རྒྱལ་སྲས་དྲིན་ཆེན་རིན་ཆེན་རྣམ་རྒྱལ་གྱི་སྲས་སུ་སྐུ་བལྟམས། སྐུ་གཞོན་ནུ་ནས་དགེ་བའི་བཤེས་གཉེན་དུ་མའི་ཞབས་ལ་བསྟེན་ནས་གསན་བསམ་ཕྱོགས་མེད་དུ་མཛད། ཐུན་མོང་རིག་གནས་དང་། ཐུན་མིན་གཞུང་ལུགས་མཐའ་དག་ལ་སྦྱངས་བརྩོན་ཕུལ་དུ་བྱུང་བས་མཁས་པའི་རྩེ་མོར་སོན། དགུང་ལོ་བཅོ་ལྔ་པར་རབ་འབྱམས་པ་འཕེལ་རྒྱས་ལས་དགེ་ཚུལ་གྱི་སྡོམ་པ་ནོས། དགུང་ལོ་ཉི་ཤུ་པར་རབ་འབྱམ་པ་འགྱུར་མེད་ཆོས་ལྡན་ལས་བསྙེན་པར་རྫོགས་པ་གསན། འདུལ་བའི་བརྡ་ཆད་དང་ཕྱག་ལེན་ལ་བྱང་ཆུབ་པས་མཁས་བཙུན་བཟང་པོའི་ཁྱུ་མཆོག་ཏུ་གྱུར། ཁྱད་པར་ཡབ་རྗེ་དྲིན་ཆེན་རིན་ཆེན་རྣམ་རྒྱལ་ལས་མདོ་སྒྱུ་སེམས་གསུམ་གཙོ་བོར་གྱུར་པའི་བཀའ་མ། བཀའ་དགོངས་ཕུར་གསུམ་གཙོ་བོར་གྱུར་པའི་གཏེར་མའི་ཕྱོགས་མང་པོའི་སྨིན་གྲོལ་མན་ངག་རྒྱབ་བརྟེན་དང་བཅས་པ་གསན། རང་དོན་ཉམས་བཞེས་དང་གཞན་དོན་འཆད་སྤེལ་གྱི་ཕྲིན་ལས་ཤིན་ཏུ་རྒྱ་ཆེ་ཞིང་། ལྷག་པར་ཨོ་རྒྱན་སྨིན་གྲོལ་གླིང་གི་བསྟན་པ་བཤད་སྒྲུབ་གཉིས་ལྡན་གྱི་སྒོ་ནས་བསྐྱངས་པས་སྔ་འགྱུར་བ་སྤྱི་ལ་བཀའ་དྲིན་ཕུལ་དུ་བྱུང་བ་ཡིན་ནོ། ༈ །དེའི་མཁན་བུ་རྒྱལ་སྲས་རིག་འཛིན་བཟང་པོ་ནི། དཔལ་ལྡན་སྨྱོས་ཀྱི་གདུང་བརྒྱུད་དུ་སྐུ་འཁྲུངས། སྐུ་གཞོན་ནུའི་དུས་དགེ་བའི་བཤེས་གཉེན་དུ་མ་ལས་གསན་བསམ་རྒྱ་ཆེན་པོ་མཛད། དགུང་ལོ་ཉེར་གཅིག་པར་མཁན་ཆེན་ཨོ་རྒྱན་བསྟན་འཛིན་རྡོ་རྗེ་ལས་རབ་ཏུ་བྱུང་སྟེ་བསྙེན་པར་རྫོགས་ཤིང་། གཞི་གསུམ་གྱི་ཕྱག་ལེན་སོགས་མདོ་ཕྱོགས་ལ་གསན་སྦྱོང་ཞིབ། ཁྱད་པར་རང་ལུགས་བཀའ་གཏེར་རྒྱ་མཚོའི་སྨིན་གྲོལ་རྒྱབ་བརྟེན་དང་བཅས་པ་བུམ་པ་གང་བྱོས་སུ་ནོས། ཨོ་རྒྱན་སྨིན་གྲོལ་གླིང་གི་མཁན་ཁྲི་ལ་བཞུགས་སྐབས་མདོ་ཁམས་སྡེ་དགེ་ནས་འཇམ་དབྱངས་མཁྱེན་བརྩེའི་དབང་པོ་དགུང་ལོ་ཉེར་གཅིག་བཞེས་པ་དབུས་ཕེབས་སྐབས་མཁན་ཆེན་རིག་འཛིན་བཟང་པོ་འདི་ཉིད་ཀྱི་གཙོས་དད་པའི་དགེ་འདུན་གྲངས་ཚང་བའི་མདུན་ནས་བསྙེན་རྫོགས་ཀྱི་སྡོམ་པ་བཞེས་པ་སོགས་བསྟན་པ་འཕེལ་རྒྱས་ཀྱི་སོན་རྩ་ལྟ་བུར་གྱུར་ཏེ་མཁས་བཙུན་བཟང་པོའི་མཛད་པ་ཕུལ་དུ་བྱུང་བ་ཡོངས་ལ་གྲགས་སོ། ༈ །དེའི་མཁན་བུ་མཁན་ཆེན་པདྨ་བཀྲ་ཤིས་ནི། མདོད་ཁམས་སྒང་དུ་སྐུ་འཁྲུངས། སྐུ་གཞོན་ནུའི་དུས་ནས་དམ་པའི་རིགས་སད་དེ་ཡོན་ཏན་གསན་སྦྱོང་ལ་དོན་གཉེར་ཆེ། རུ་དམ་བསམ་གཏན་ཆོས་གླིང་དུ་གཞུང་ལུགས་རབ་འབྱམས་ལ་གསན་བསམ་རྒྱ་ཆེན་པོ་མཛད། དགུང་ལོ་ཉི་ཤུ་པར་རྒྱལ་སྲས་རིག་འཛིན་བཟང་པོ་ལས་རབ་ཏུ་བྱུང་སྟེ་བསྙེན་པར་རྫོགས། མདོ་སྔགས་རིག་གཞུང་དང་བཅས་པ་ལ་གཞན་དྲིང་མི་འཇོག་པའི་མཁྱེན་རབ་ཀྱི་རྩལ་རྫོགས། མཁས་བཙུན་བཟང་པོའི་ཡོན་ཏན་རྨད་དུ་བྱུང་བ་མངའ་ཞིང་། མདོ་ཁམས་རྫོགས་ཆེན་པའི་མཁན་པོའི་ཁྲི་ལ་ཡུན་རིང་པོར་བཞུགས་ཏེ་བཤད་སྒྲུབ་ལས་གསུམ་གྱི་སྒོ་ནས་མདོ་སྔགས་བསྟན་པའི་ཕྲིན་ལས་རྒྱ་ཆེར་སྤེལ། སྐུ་ཚེའི་སྨད་ལ་ཡང་དག་སྤོང་བ་པའི་བརྟུལ་ཞུགས་དང་དུ་བཞེས་ཏེ་ངེས་མེད་དབེན་པའི་གནས་སུ་ཚེ་དང་སྒྲུབ་པ་མཉམ་པར་མཛད་དོ། ༈ །དེའི་མཁན་བུ་ཐུབ་བསྟན་པདྨ་རྒྱས་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ནི། མོད་ཁམས་རྫ་སྟོད་དགེ་མང་གི་ཕྱོགས་སུ་སྐུ་འཁྲུངས། འདི་ཉིད་མཁན་ཆེན་བོ་དྷི་སཏྭ་དང་ལོ་ཆེན་བཻ་རོ་ཙ་ན་ཟུང་འཇུག་གི་རྣམ་འཕྲུལ་དུ་དམ་པའི་ལུང་གིས་ཟིན། སྐུ་ཆུང་ངུའི་དུས་ནས་ཡི་གེ་འབྲི་ཀློག་སོགས་བརྡ་བསྟན་པ་ཙམ་གྱིས་མཁྱེན། ཐེག་པ་ཆེན་པོའི་རིགས་སད་ཅིང་མཁྱེན་རབ་ཀྱི་རྩལ་ཁ་ཤིན་ཏུ་ཆེ། རིམ་པར་མི་འགྱུར་ནམ་མཁའི་རྡོ་རྗེ། འཇིགས་མེད་རྒྱལ་བའི་མྱུ་གུ། རྡོ་གྲུབ་ཀུན་བཟང་གཞན་ཕན་སོགས་ཁམས་ཕྱོགས་དང་། ཡུལ་དབུས་སུ་བྱོན་ནས། སྨིན་གླིང་ཁྲི་མཁན། རྡོ་བྲག་རིག་འཛིན་ཆེན་པོ་ཡབ་སྲས། ལྷོ་བྲག་ལྷ་ལུང་གསུང་སྤྲུལ་ཡབ་སྲས་སོགས་ཕུལ་བྱུང་མཁས་བཙུན་གྲུབ་པའི་རྣམ་ཐར་བསམ་མི་ཁྱབ་པ་ལ་མངའ་དབང་འབྱོར་བའི་སློབ་དཔོན་དགེ་བའི་བཤེས་གཉེན་མང་དུ་བསྟེན་ནས། ཐུན་མོང་རིག་གནས། ཐུན་མིན་མདོ་སྔགས་གཞུང་ལུགས། ཁྱད་པར་གསང་སྔགས་རྡོ་རྗེ་ཐེག་པ་མདོ་སྒྱུ་སེམས་གསུམ་གཙོ་བོར་གྱུར་པའི་བཀའ་མ་དང་། བཀའ་དགོངས་ཕུར་གསུམ་གཙོ་བོར་གྱུར་བའི་གཏེར་མའི་ཕྱོགས་རྣམས་ཀྱི་དབང་ལུང་མན་ངག་བཤད་ཁྲིད་མཐའ་ཡས་པ་གསན་ཅིང་བརྒྱུད་འཛིན་བཀའ་བབས་ལུང་ཐོབ་ཀྱི་བདག་པོར་མངའ་བརྙེས། བར་སྐབས་སུ་སྟོད་གངས་རི་ཏི་སེ་ནས་སྨད་རྒྱ་ནག་གླང་ཆེན་འགྱིང་རི་ཡན་སྒྲུབ་གནས་ཁག་ཏུ་གནས་འབྲེལ་བསྙེན་སྒྲུབ་ལ་གཞོལ་ཏེ་གྲུབ་པའི་ས་མཐོར་གཤེགས། ཚངས་སྤྱོད་རྣམ་དག་གོས་དཀར་ལྕང་ལོའི་ཆ་ལུགས་སུ་བཞུགས་ཤིང་། ངེས་མེད་ཀྱི་གནས་སུ་སྒྲུབ་པའི་རྒྱལ་མཚན་ཁོ་ན་འཛུག་པར་དགོངས་བཞིན་ཡོད་ནའང་། ཉིན་གཅིག་གི་ཚེ་ན་འདི་ལྟར་བསྟན་པ་སྤྱིའི་ལམ་སྲོལ་སྔར་ཆོས་རྒྱལ་ཆེན་པོས་བཀའ་བཅད་པ་བཞིན་སྤྱོད་པ་མཁན་པོ། ལྟ་བ་ཀླུ་སྒྲུབ། ཉམས་ལེན་པདྨ་དང་བི་མ་ལའི་ལུགས་ལྟར་བྱས་ན་སྔ་འགྱུར་བའི་བསྟན་པ་འདི་ཉིད་དུས་ཀྱི་མཐར་ཡང་ཅུང་ཞིག་མི་ནུབ་དར་རྒྱས་སུ་འགྱུར་ངེས་སྙམ་པ་ཐུགས་ལ་གློ་བུར་དུ་འཁྲུངས་པ་ལྟར་དེ་ཁོ་ན་ཕྱག་བཞེས་སུ་བསྟར་རྒྱུའི་ཐུགས་དམ་བཅས་པ་བཞིན། རྫོགས་ཆེན་མཁན་རབས་དང་པོ་པདྨ་བཀྲིས་ལས་རབ་ཏུ་བྱུང་ཞིང་བསྙེན་པར་རྫོགས་ཏེ་འདུལ་བའི་གནང་བཀག་ལ་ཚུལ་བཞིན་བསླབ་པས་ངང་གིས་ཉེས་ལྟུང་ཕྲ་མོས་ཀྱང་མ་གོས་པ་འཕགས་པ་ཉེ་བར་འཁོར་དང་མཚུངས་པར་བསྔགས་འོས་སུ་གྱུར། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་ལུང་བསྟན་པ་ལྟར་རུ་དམ་རྫོགས་ཆེན་དགོན་དུ་ཕེབས་པ་དང་། རྫོགས་སྤྲུལ་མི་འགྱུར་ནམ་མཁའི་རྡོ་རྗེའི་ཞལ་སྔ་ནས་ཉིད་རྫོགས་ཆེན་དགོན་དུ་བཞུགས་ནས་བསྟན་པ་བཤད་སྒྲུབ་ཀྱི་གཞུང་སྲོང་དགོས་པའི་བཀའ་ལུང་གནང་བ་ལྟར། མདོ་སྔགས་བསྟན་བཅོས་ཀྱི་གཞུང་བཤད་ཅི་རིགས་དང་། རྒྱལ་བའི་བཀའ་འགྱུར་རོ་ཅོག་གི་ལྗགས་ལུང་། འདུལ་བ་གཞི་གསུམ་གྱི་ཕྱག་བཞེས་བཟང་པོའི་རྒྱུན་བསྐྱངས་པས་མདོ་ཁམས་ཕྱོགས་ཀྱི་རྙིང་ཕྱོགས་རྣམས་སྨོས་ཅི། གྲུབ་མཐའ་གཞན་གྱི་དགོན་སྡེ་སྔར་དབྱར་གནས་སོགས་མེད་པ་རྣམས་སུའང་ངང་གིས་ཁྱབ་ཅིང་། བཀའ་འགྱུར་རོ་ཅོག་གི་ལུང་རྒྱུན་ཀྱང་ཇེ་འཕེལ་དུ་གྱུར། ལྷག་པར་སྔ་འགྱུར་བཀའ་མའི་ཆོས་སྡེ་མོད་སྒྱུ་སེམས་གསུམ་གྱིས་གཙོས་པའི་རྒྱུད་ལུང་མན་ངག་སྒྲུབ་ཕྲིན་སྐོར་རྣམས་བཀའི་བསྡུ་བ་གནང་ཞིང་འཕྲུལ་སྤར་དུ་བསྐྲུན་ཏེ་འཆད་སྤེལ་ཡང་དང་ཡང་དུ་གནས་བ་ལ་བརྟེན་ནས་ད་ལྟའི་བར་སྔ་འགྱུར་གྱི་བསྟན་པ་རིན་པོ་ཆེ་མི་ནུབ་དར་ཞིང་རྒྱས་པའི་གསོས་སུ་གྱུར་པ་ནི་དམ་པའི་ཐུགས་བསྐྱེད་སྨོན་ལམ་གྱི་མཐུ་ཁོ་ནར་ངེས། མཐར་ཞིང་བརྗེ་ཁར་ཁོ་བོ་སྟོན་པ་མཆོག་དེའི་བརྟུལ་ཞུགས་ཀྱི་རྗེས་སུ་སློབ་པའི་རྟེན་འདི་ལས་མ་འགྱུར་བར་ཤི་ན་རང་དོན་དུ་འགྱོད་པ་གང་ཡང་མེད་ལ། གཞན་དོན་དུ་ནི་ཕྱོགས་གང་ནས་ཀྱང་བསྟན་པའི་བྱ་བ་དེའི་འཕྲོ་མཐུད་དེ་བརྩོན་པ་མི་ལྷོད་པ་སྨོན་ལམ་གྱི་དབང་གིས་འོང་ཞེས་འདའ་ཁའི་ཞལ་ཆེམས་སྩལ་ཏེ་ཞིང་ཁམས་སུ་གཤེགས་སོ། ༈ །དེའི་མཁན་བུ་ཐུབ་བསྟན་རྒྱལ་མཚན་ནི། མོད་ཁམས་རྫོགས་ཆེན་གླིང་སྤྲུལ་སྐུ་ཕྲེང་རིམ་བྱོན་གྱི་སྐྱེས་བུ་དམ་པའི་གོ་སར་བཞུགས། གཞོན་ནུའི་དུས་ནས་ཐུན་མོང་རིག་གནས། ཐུན་མིན་གཞུང་ལུགས། ཁྱད་པར་བཀའ་གཏེར་ཟབ་དོན་རྒྱ་མཚོའི་མན་ངག་ཡོངས་སུ་རྫོགས་པ་གཞན་དྲིང་མི་འཇོག་པར་གསན། ལྷག་པར་རྒྱལ་སྲས་གཞན་ཕན་མཐའ་ཡས་ལས་འདུལ་བ་སོ་ཐར་གྱི་སྡོམ་རྒྱུན་རང་ལུགས་ཞི་འཚོའི་བཀའ་སྲོལ་ཉིད་གསན་ཅིང་། གནང་བཀག་བསླབ་པའི་ཚུལ་ལ་ཕྱག་ལེན་ཤིན་ཏུ་གཙང་། རང་དོན་ཉམས་བཞེས། གཞན་དོན་འཆད་སྤེལ་སོགས་མཛད་པ་ཕྲིན་ལས་རྒྱ་ཆེ་ཞིང་། མདོ་སྔགས་ཀྱི་བསྟན་པ་རིན་པོ་ཆེ་མཐའ་དབུས་ཀུན་ཏུ་སྤེལ་བར་མཛད་པའི་བཀའ་དྲིན་བསམ་གྱིས་མི་ཁྱབ་པ་ཉིད་དོ། ༈ །དེའི་མཁན་བུ་ཚུལ་ཁྲིམས་རྡོ་རྗེ་ནི། དཔལ་ལྡན་སྨྱོས་རིགས་སུ་སྐུ་བལྟམས། གསན་བསམ་རྒྱ་མཚོའི་ཕ་མཐར་སོན་ཅིང་། དགུང་ལོའི་དུས་སྐབས་དང་བསྟུན་ཏེ་མཁན་ཆེན་ཐུབ་བསྟན་རྒྱལ་མཚན་ལས་བསྙེན་པར་རྫོགས་ནས་ཨོ་རྒྱན་སྨིན་གྲོལ་གླིང་གི་མཁན་ཁྲི་ལ་བཞུགས། སྤྱིར་མདོ་སྔགས་ཆོས་ཚུལ་རབ་འབྱམས་འཆད་སྤེལ་སོགས་བསྟན་པ་ལ་མཛད་པ་རྒྱ་ཆེ། ལྷག་པར་དགོན་སྡེ་ནང་གི་དགེ་འདུན་གསར་བུས་མཚོན་ཁམས་བོད་ཕྱོགས་ཀུན་ནས་རང་ལུགས་སྡོམ་རྒྱུན་དོན་དུ་གཉེར་བ་རྣམས་ལ་བསླབ་ནོར་གྱི་རྒྱུན་སྤེལ་བར་མཛད་པས་བསྟན་པ་མི་ནུབ་ཡུན་དུ་གནས་པའི་བཙས་སུ་གྱུར་ཏོ། ༈ །དེའི་མཁན་བུ་འགྱུར་མེད་ངག་དབང་ནོར་བུ་ནི། གཡོ་རུ་གྲྭའི་ཕྱོགས་སུ་སྐུ་འཁྲུངས། གཞོན་ནུའི་དུས་ནས་སྨིན་གྲོལ་གླིང་གི་གྲྭ་སར་བཞུགས་ཏེ་འབྲི་ཀློག་ནས་བརྩམས་ཐུན་མོང་གི་བཅའ་སྒྲིག་སློབ་གཉེར་ཆོ་ག་ཆོས་སྤྱོད་བློར་འཛིན་གར་ཐིག་དབྱངས་རོལ་གཏོར་བཟོ་སོགས་ཀྱིས་མཚོན་དགོན་སྡེའི་ཕྱག་ལེན་ཆེ་ཕྲ་གང་ལའང་མཁས་པའི་རྩེར་སོན་ཏེ་བསྟན་པའི་མིག་རྒྱན་དུ་གྱུར། ཐུན་མོང་མ་ཡིན་པའི་རིག་གཞུང་སྨིན་གྲོལ་བསྐྱེད་རྫོགས་ཟབ་གནད་ལ་ཐོས་བསམ་སྒོམ་གསུམ་གྱི་རྩལ་རྫོགས། ལྷག་པར་མཁན་ཆེན་ཚུལ་ཁྲིམས་རྡོ་རྗེ་གཙོ་བོར་གྱུར་པའི་དགེ་བའི་བཤེས་གཉེན་རྣམས་ལས་སྡོམ་པ་གསུམ་གྱི་བདུན་རྩིས་ཐུགས་རྒྱུན་གཏམས། མདོ་སྔགས་གཉིས་ཀྱི་གཞུང་དང་བཀའ་གཏེར་མན་ངག་ལས་ཁྲིགས་ཀྱི་སྐོར་ལ་མཁས་པའི་ཕུལ་དུ་ཕྱིན། ཚོགས་ཆེན་གྱི་བྱང་འདྲེན་བགྲང་བྱ་བཅུ་ཕྲག་ལྷག་པ་མཛད་ཅིང་། དེ་ནས་རྡོར་འཛིན་མཁན་པོའི་གོ་སར་ཕེབས་ཏེ་ཨོ་རྒྱན་སྨིན་གྲོལ་གླིང་གི་འདུས་སྡེས་མཚོན་ལྔ་འགྱུར་ཆོས་སྡེ་རྣམས་སུ་མདོ་སྔགས་ཀྱི་ཕྱག་བཞེས་གཙང་མ་རང་ལུགས་མ་ཉམས་པའི་རྒྱུན་བསྐྱངས་པར་མཛད་དོ། ༈ །དེའི་མཁན་བུ་གཅུང་འགྱུར་མེད་ངག་དབང་ཆོས་ཀྱི་གྲགས་པ་ནི། བཻ་རོ་དངོས་སྣང་སྨིན་གླིང་གཏེར་ཆེན་མཆོག་གི་གདུང་རབས་ཆོས་རྒྱུན་དང་བཅས་པ་མི་ཉམས་འཛིན་སྤེལ་གྱི་བཀའ་བབས་གཏེར་སྟོན་རང་རིག་རྡོ་རྗེའི་རིགས་དབོན་དུ་སྐུ་འཁྲུངས། གཞོན་ནུ་ཉིད་ནས་ཁམས་དབུས་ཀྱི་བཤེས་གཉེན་མང་པོ་ཚུལ་བཞིན་བསྟེན་ནས་སྨིན་གྲོལ་མན་ངག་རྒྱ་མཚོ་ལྟ་བུ་གསན་བསམ་སྒོམ་གསུམ་མཛད་ཅིང་། དགུང་ལོ་ཉེར་གཅིག་པར་རྡོར་འཛིན་མཁན་ཆེན་ངག་དབང་ནོར་བུ་ལས་བསྙེན་པར་རྫོགས་ཏེ་འདུལ་བའི་ཀུན་སྤྱོད་ཤིན་ཏུ་གཙང་མ་ལ་རྟག་ཏུ་ཐུགས་གཞོལ། ཇི་ཞིག་ན་སྨིན་གླིང་ཁྲི་ཚབས་ཀྱི་མཚན་གནས་བཞེས་དགོས་བྱུང་བ་ལ་བརྟེན་ནས་སྨིན་དགོན་མ་ལག་དང་བཅས་པར་གཟིགས་བསྐྱངས་ཀྱིས་སྣོད་བཅུད་གང་སར་ཉམས་པ་སོར་ཆུད་མི་ཉམས་གོང་འཕེལ་གྱི་འཛིན་སྤྲས་ཕུལ་དུ་བྱུང་བས་བསྟན་པ་རྨང་ནས་གསོས་སོ། ༈ །དེའི་མཁན་བུ་ངག་དབང་ཆོས་ཀྱི་བློ་གྲོས་ནི། ཞྭ་དེའུ་འཁྲུལ་ཞིག་མདོ་སྔགས་གླིང་པའི་ཡང་སྲིད་དེ་མ་ཐག་པ་སྟེ། ཡར་འབྲོག་ཕྱོགས་སུ་སྐུ་བལྟམས། གཞོན་ནུའི་དུས་ནས་རབ་ཏུ་བྱུང་བ་ལ་དགྱེས་ཤིང་དགུང་གྲངས་སོན་ནས་རྡོར་འཛིན་མཁན་པོ་ངག་དབང་ནོར་བུའི་མཁན་བུ་སྨིན་གླིང་གདུང་བརྒྱུད་ཀྱི་གཅུང་འགྱུར་མེད་ངག་དབང་ཆོས་ཀྱི་གྲགས་པ་ལས་བསྙེན་པར་རྫོགས། གཞན་ཡང་གྲུབ་མཐའ་རིས་སུ་མ་ཆད་པའི་ཡོངས་འཛིན་དུ་མ་ལས་མདོ་སྔགས་སྨིན་གྲོལ་རྒྱབ་བརྟེན་དང་བཅས་པ་ཤིན་ཏུ་མང་བར་གསན་བཞེས་དང་། འཁོར་ལོ་གསུམ་གྱི་མཛད་པ་བཟང་པོ་བསྟན་པའི་ལྷག་ཞབས་འདི་ལ་དཔེར་འོས་པ་མཛད། ལྷག་པར་སྔ་འགྱུར་ཞི་འཚོའི་འདུལ་བའི་སྡོམ་རྒྱུན་གྱི་སྲོག་རྩ་འཛིན་པར་མཛད་པས་ན་ཆོས་བཀའ་དྲིན་གྱི་ཕུལ་དུ་ཕྱིན་པ་ཡིན་ལ། ད་དུང་ཞབས་པད་བསྐལ་པ་རྒྱ་མཚོར་བརྟན་ནས་བསྟན་པའི་སྒྲོན་མེ་ཡུན་རིང་དུ་མཛད་པར་སྙིང་ནས་སྨོན་ནོ། ༈ །ཡང་ཡར་འབྲོག་སྟག་ལུང་བྱང་གཏེར་གྱི་ཆོས་སྡེ་སྐྱོང་བ་རྔོག་ཆོས་སྐུ་རྡོ་རྗེའི་རྣམ་འཕྲུལ་ཀུན་བཟང་ཆོས་སྐུ། དེའི་ཡང་སྲིད་སྐུ་ཕྲེང་གཉིས་པ་ཐུབ་བསྟན་ཆོས་ཀྱི་ཉི་མ། སྐུ་ཕྲེང་གསུམ་པ་བཤད་སྒྲུབ་ཉིན་བྱེད་ཕྲིན་ལས་བཟང་པོའམ། ཡོངས་གྲགས་སུ་སྟག་ལུང་རྩེ་སྤྲུལ་རིན་པོ་ཆེར་གྲགས་པ་འདི་ཉིད་སྤྱིར་སྐུ་གཞོན་ནུའི་དུས་ནས་མ་དགོན་ཐུབ་བསྟན་རྡོ་རྗེ་བྲག་ཏུ་སྒྲིག་ཞུགས་ཐོག་རང་ཁོངས་སྐུ་ཡོན་གྱི་རིགས་རྣམས་གསན་སྦྱོང་མཐར་ཐོན་ཅིང་། ཡོངས་འཛིན་དགེ་བའི་བཤེས་གཉེན་མང་དུ་བསྟེན་པ་ལས་ཐུན་མོང་རིག་གཞུང་། ཐུན་མིན་རྒྱུད་ལུང་མན་ངག་གི་སྨིན་གྲོལ་གསན་བསམ་རྒྱ་ཆེ། ལྷག་པར་རྡོར་འཛིན་འགྱུར་མེད་ངག་དབང་ནོར་བུའི་མཁན་བུ་སྨིན་གླིང་གདུང་བརྒྱུད་ཀྱི་གཅེན་མཁན་ཁྲི་འགྱུར་མེད་མཁྱེན་བརྩེ་ནོར་བུའི་དྲུང་ནས་རང་ལུགས་ཞི་འཚོའི་སྡོམ་རྒྱུན་གྱི་བསྙེན་པར་རྫོགས་པ་བཞེས་ཤིང་། གཞི་གསུམ་གྱི་ཕྱག་ལེན་ཤིན་ཏུ་ཞིབ། རིམ་བཞིན་རང་གཞན་དགོན་སྡེ་མང་པོའི་དགེ་འདུན་སོགས་ཕྱོགས་མཐའི་དོན་གཉེར་ཅན་རྣམས་ལ་བསྙེན་པར་རྫོགས་པའི་བསླབ་ནོར་གྱི་དགའ་སྟོན་ཅི་དགར་སྩལ་བས་དཔལ་ལྡན་ཞི་བ་འཚོའི་ཕྲིན་ལས་རྒྱ་ཆེར་སྤེལ་བའི་ཐུགས་བསྐྱེད་ལྷུར་བཞེས་པའི་ངང་ནས་ད་ལྟ་འཚོ་ཞིང་གཞེས་བཞིན་པ་འདི་ལགས་ཏེ། ད་དུང་བགྲང་བྱ་བརྒྱ་ཕྲག་བརྒལ་བར་ཞབས་པད་བརྟན་ཅིང་མཁན་སློབ་གཉིས་ཀྱི་བསྟན་པའི་སྒྲོན་མེ་ཡུན་རིང་དུ་སྤོར་བར་མཛད་པར་སྙིང་ནས་སྨོན་ནོ། །ཡང་སྔར་ཀཿདམ་པ་བདེ་གཤེགས་སོགས་ནས་བཟུང་ཁྱད་པར་འཕགས་པའི་སྐྱེས་ཆེན་རིམ་པར་བྱོན་པ་རྣམས་ཀྱི་བཀའ་དྲིན་ལ་བརྟེན་མདོ་ཁམས་བོད་ཆེན་པོའི་ཕྱོགས་ཀྱི་སྔ་འགྱུར་དགོན་གནས་ཆོས་སྡེ་རྣམས་སུ་མདོ་སྔགས་ཀྱི་བསྟན་པ་རིན་པོ་ཆེ་སྤྱི་དང་བྱེ་བྲག་སོ་ཐར་གྱི་ཕྱོགས་ལ་རང་ལུགས་ཞི་འཚོའི་སྡོམ་རྒྱུན་མ་ཉམས་པར་གནས་བཞིན་པ་ལ། བར་ལམ་རྒྱལ་སྲས་གཞན་ཕན་མཐའ་ཡས་སོགས་ཀྱི་སྐབས་ནས་བརྒྱུད་པའི་བཀའ་སྲོལ་ཤིན་ཏུ་མང་བར་གྱེས་པའི་རྣམ་གྲངས་མཐའ་ཡས་པ་ནི་འདིར་བསྡུ་ཞིང་བརྗོད་པའི་སྐབས་མ་རྙེད་མོད། ད་ལྟའི་དུས་སུ་མདོ་སྔགས་བསྟན་པའི་སྲོག་རྩ་མི་ཆད་པའི་སླད་དུ་འཁོར་ལོ་གསུམ་གྱི་ཕྲིན་ལས་སྤེལ་བ་ལ་ནམ་ཡང་ཞུམ་པ་མེད་པའི་ཐུགས་བསྐྱེད་ཅན་ནི་དཔལ་ཡུལ་རྣམ་རྒྱལ་བྱང་ཆུབ་གླིང་གི་བསྟན་པའི་མངའ་བདག་གྲུབ་དབང་པདྨ་ནོར་བུའི་མཆོག་སྤྲུལ་འཇིགས་མེད་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་དཔལ་བཟང་པོ་ཞེས་བསྟན་འགྲོའི་དཔུང་གཉེན་དམ་པར་འཚོ་གཞེས་ཀྱི་སྐལ་བཟང་ཀུན་གྱི་མཐུན་སྣང་དུ་གྲུབ་པ་འདི་ལགས་ན། ད་དུང་ཡང་སྐུ་ཚེའི་འདུ་བྱེད་འཚི་མེད་རྡོ་རྗེའི་ངོ་བོར་བདག་གིར་བཞེས་ཏེ་མཁན་སློབ་ཆོས་གསུམ་གྱི་བསྟན་པའི་འོད་སྟོང་ནམ་མཁའ་ཇི་སྲིད་དུ་བརྡལ་བར་གསོལ་བ་འདེབས་པ་ལགས་སོ། །མཚུངས་མེད་སྟོན་པའི་ཞལ་སྐྱིན་མཁན་རབས་ཕྲེང་། །ཇི་ལྟར་བྱོན་པའི་ལོ་རྒྱུས་ཏམྦུ་ར། །སྐལ་བཟང་རྣ་བར་འཇེབས་ལས་ཡིད་ཆེས་ཀྱིས། །ངེས་ཤེས་འདྲེན་པའི་ཕོ་ཉར་འགྱུར་ལ་རེ། །ཚུལ་འདི་ངུར་སྨྲིག་འཛིན་པའི་བཤེས་རྣམས་ལས། །རྨོངས་བླུན་ཕ་ཇོ་བདག་ལྟའི་ཁུར་མིན་ཀྱང་། །དམ་པའི་རྣམ་ཐར་དབྱིངས་སུ་ཡལ་དོགས་ནས། །གསུང་སྒྲོས་ཡི་གེར་བཀོད་ལ་ཉེས་མེད་སྙམ། །འོན་ཀྱང་ནོར་བ་མཆིས་ན་རང་གི་སྐྱོན། །ལགས་ཕྱིར་མཁས་དབང་ཚོགས་ཀྱིས་བཟོད་བཞེས་གསོལ། །དོན་མཐུན་དངོས་པོའི་ཚུལ་བརྗོད་དགེ་བ་གང་། །བསྟན་པ་རིན་ཆེན་རྒྱས་པའི་དཔལ་དུ་ཤོག །རབ་མཛེས་ཆོས་གོས་གསུམ་གྱིས་ལུས་བརྒྱན་ཅིང་། །ལེགས་གསུང་སྡེ་སྣོད་གསུམ་གྱིས་ངག་རབ་བརྒྱན། །ཁྱད་ནོར་བསླབ་པ་གསུམ་གྱིས་སེམས་བརྒྱན་ཏེ། །སྲིད་ན་ཟླ་བྲལ་འཕགས་པའི་ས་ཐོབ་ཤོག །ཅེས་སྔ་འགྱུར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ཉུང་གསལ་སྒྲོན་མེའི་ཁ་སྐོང་ངེས་ཤེས་འདྲེན་པའི་ཕོ་ཉ་ཞེས་བྱ་བ་འདིའང་། བསྐལ་ངན་དུས་ཀྱི་རླུང་དམར་ཆེས་ཆེར་འཚུབས་པའི་སྐབས་འདིར་བསྟན་པའི་སྒྲོན་མེ་བཟང་པོ་ཡུན་དུ་མི་མནལ་བའི་ཆ་རྐྱེན་ཁོ་ནར་དམིགས་ཏེ། སྔ་འགྱུར་བཀའ་མའི་ཆོས་སྡེ་ཡོངས་རྫོགས་ཀྱི་བཀའི་བསྡུ་བ་ལྷུར་ལེན་པའི་སྐབས་ཐོག་མའི་གཞི་རྩ་མདོ་ཕྱོགས་འདུལ་བའི་ཡིག་ཆ་སོ་ཐར་སྡོམ་རྒྱུན་མཁན་བརྒྱུད་ཀྱི་རྣམ་ཐར་ལོ་ཆེན་དྷརྨ་ཤྲཱིའི་གསུང་གི་ཁ་སྐོང་དུ་ད་ལྟའི་བར་གྱི་མཁན་རབས་ཀྱི་ལོ་རྒྱུས་ས་བོན་ཙམ་མེད་དུ་མི་རུང་བར་མཐོང་ནས། རང་གི་འདྲེན་པ་བཤེས་གཉེན་དམ་པ་རྣམས་ཀྱི་གསུང་སྒྲོས་ལ་སྒྲོ་སྐུར་གྱིས་མ་བསླད་པར་མདོར་བསྡུས་སྙིང་པོར་དྲིལ་བའི་ཚུལ་གྱིས་བྲིས་པ་སྟེ། ལྷ་རིགས་ཤཱཀྱའི་དགེ་བསྙེན་འཇིགས་བྲལ་ཡེ་ཤེས་རྡོ་རྗེས་སྦྱར་བ་ལས། ཐོག་མའི་ཡི་གེ་པ་ནི་ཤར་ཕྱོགས་མོན་གྱི་དགེ་བསྙེན་ཀུན་བཟང་དབང་འདུས་སོ། །འདིས་ཀྱང་བསྟན་པ་རིན་པོ་ཆེ་མི་ཉམས་གོང་ནས་གོ ང་དུ་འཕེལ་བའི་རྒྱུར་གྱུར་ཅིག །སརྦ་དཱ་མདྒ་ལཾ།། །། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཆེན་པོ་ཞི་བ་ལྷ།བོ དྷི ས ཏྭ ཙ ཪྱཱ བ ཏ ར ནཱ མ ཤཱ སྟྲ མྦི ཧ ར ཏི སྨ། ། སྤྱོད་འཇུག་བརྒྱུད་པའི་གསོལ་འདེབས། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ།སྤྱོད་འཇུག་བརྒྱུད་པའི་གསོལ་འདེབས་བཞུགས་སོ། །སྟོན་མཆོག་ལྷ་མིའི་བླ་མ་ཤཱཀྱའི་གཙོ། །རྒྱལ་སྲས་འཇམ་དཔལ་དབྱངས་དང་ཞི་བ་ལྷ། །ཛེ་ཏཱ་རི་དང་ཟླ་གྲགས་ཆུང་བའི་ཞབས། །ཇོ་བོ་གུ་ཎ་ཤྲཱི་ལ་གསོལ་བ་འདེབས། །ཀ་ན་ཀ་ཤྲཱི་སུ་མ་ཧི་ཀཱི་རྟི། །བློ་ལྡན་ཤེས་རབ་སློབ་དཔོན་ཇོ་བཙུན་པ། །མཁས་པ་བུ་སྟོན་ཐུགས་སྲས་ལོ་ཙཱ་བ། །གཡག་ཕྲུག་སངས་རྒྱས་དཔལ་ལ་གསོལ་བ་འདེབས། །སངས་རྒྱས་འཕེལ་དང་ཕྲིན་ལས་མི་བསྐྱོད་རྗེ། །དཀོན་མཆོག་འབྱུང་གནས་ཀརྨ་ཆགས་མེད་ཞབས། །གྲུབ་པའི་དབང་ཕྱུག་པདྨ་རིག་འཛིན་རྗེར། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །ནམ་མཁའ་འོད་གསལ་ཐེག་མཆོག་བསྟན་འཛིན་ཞབས། །བཀྲ་ཤིས་རྒྱ་མཚོ་རིག་འཛིན་བཟང་པོ་དང་། །སེམས་དཔའ་ཆེན་པོ་པདྨ་བཀྲ་ཤིས་ལ། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །རྒྱལ་བའི་སྲས་པོ་གཞན་ཕན་མཐའ་ཡས་དང་། །དྲིན་ཆེན་བླ་མ་འཇིགས་མེད་ངོ་མཚར་དཔལ། །བྱང་ཆུབ་སེམས་ཀྱི་མངའ་བདག་ཐམས་ཅད་ལ། །གསོལ་བ་འདེབས་སོ་ཐུགས་རྗེས་བྱིན་གྱིས་རློབས། །ཚད་མེད་བཞི་ཡི་ཞིང་ས་གཤིན་པོ་ལ། །བྱང་ཆུབ་སེམས་ཀྱི་མྱུ་གུ་རབ་ཏུ་འཁྲུངས། །ཕྱིན་དྲུག་ལམ་གྱི་འབྲས་བཟང་ཆེར་སྨིན་ནས། །ཁམས་གསུམ་འགྲོ་བའི་ཉེར་འཚོའི་གཞིར་གྱུར་ཅིག །བདག་གཞན་མཉམ་ཉིད་རྟོགས་པའི་ཡེ་ཤེས་ཀྱིས། །བདག་དོན་གཉིས་འཛིན་འཆིང་བ་ཀུན་བཅད་ནས། །རང་གཞན་དོན་གཉིས་ལྷུན་གྱིས་གྲུབ་པ་དང་། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །དཔལ་སྤྲུལ་པས་སྨྲས་སོ། ། བྱང་ཆུབ་སེམས་བསྐྱེད་ཀྱི་སྡོམ་པའི་བརྒྱུད་འདེབས། རིག་འཛིན་གཏེར་བདག་གླིང་པ།༈ བྱང་ཆུབ་སེམས་བསྐྱེད་ཀྱི་སྡོམ་པའི་བརྒྱུད་འདེབས་ལ། ཐོག་མར་འཕགས་པ་འཇམ་དཔལ་ནས་ཀླུ་སྒྲུབ་ལ་སྩལ་བའི་དབུ་མ་ལུགས་ཀྱི་བརྒྱུད་པའི་གསོལ་འདེབས་ནི། རྣམ་འདྲེན་སྟོབས་བཅུའི་མངའ་བདག་ཟས་གཙང་སྲས། །རྒྱལ་སྲས་འཇམ་དཔལ་ཀླུ་སྒྲུབ་ཟླ་བ་གྲགས། །རིག་པའི་ཁུ་བྱུག་ཀུ་སཱ་ལ་ཆེ་ཆུང་། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །ཇོ་བོ་ཐང་བ་ཛ་དང་འཇིགས་མེད་འབྱུང་། །ཟླ་རྒྱལ་གྲོ་ལུང་པ་དང་བྱང་ཆུབ་འོད། །རྨ་བྱ་ཤཱཀ་སེང་མཆིམས་ཆེན་སྨོན་ཚུལ་པ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །བྱང་ཆུབ་གྲུབ་པ་གཞོན་རྡོར་ཀུན་མཁྱེན་རྗེ། །ཁྱབ་བརྡལ་ལྷུན་གྲུབ་གྲགས་འོད་སངས་རྒྱས་དབོན། །ཟླ་གྲགས་ཀུན་བཟང་རྡོ་རྗེ་རྒྱལ་མཚན་དཔལ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །སྣ་ཚོགས་རང་གྲོལ་བསྟན་འཛིན་གྲགས་པའི་ཞབས། །མདོ་སྔགས་བསྟན་འཛིན་འཕྲིན་ལས་ལྷུན་གྲུབ་དཔལ། །འགྱུར་མེད་རྡོ་རྗེ་ངག་དབང་ཆོས་དཔལ་སྡེ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །ཡིད་བཞིན་ལེགས་གྲུབ་རིན་ཆེན་རྣམ་པར་རྒྱལ། །ཨ་ཌི་ཡཱ་ན་གསང་སྔགས་བསྟན་འཛིན་རྗེ། །པདྨ་དབང་རྒྱལ་སངས་རྒྱས་ཀུན་དགའི་ཞབས། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །མཁྱེན་བརྩེའི་དབང་པོ་ཚེ་དབང་ནོར་བུའི་དཔལ། །རྒྱལ་སྲས་ཨོ་རྒྱན་རྣམ་གྲོལ་རྒྱ་མཚོའི་སྡེ། །རིན་ཆེན་བྱང་ཆུབ་སེམས་བརྒྱུད་བླ་མ་ལ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །ཡོན་ཏན་གཞིར་གྱུར་བཤེས་གཉེན་གུས་བརྟེན་ནས། །རྙེད་དཀའི་རྟེན་ལས་སྙིང་པོ་ལེན་སྤྲོ་ཞིང་། །མི་རྟག་འཆི་བ་རྗེས་དྲན་དཀར་ནག་གི། །ལས་འབྲས་སྤང་བླང་ཚུལ་བཞིན་སྤྱོད་པར་ཤོག །སྲིད་བདེ་འཁྲུལ་པར་ཤེས་ནས་ཐར་པའི་སྒོར། །བག་ཡོད་ཁྲིམས་ཀྱི་འཇུག་ཅིང་འཁོར་མཚོ་ལས། །འགྲོ་ཀུན་འདྲེན་པའི་ཁུར་ཁྱེར་ཚད་མེད་ཀྱི། །བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །སྐྱེ་བར་ཚུལ་གནས་ཐོས་བསམ་སྒོམ་པར་བརྩོན། །རྒྱལ་བའི་བསྟན་ལ་བྱ་བ་ཆེར་འགྲུབ་ཅིང་། །སྒོ་གསུམ་གཞན་ཕན་སྤྱོད་ལས་མི་གཡེལ་བས། །འགྲོ་ཀུན་བྱང་ཆེན་ལམ་ལ་འགོད་པར་ཤོག །རྒྱལ་ཚབ་མ་ཕམ་པ་ནས་འཕགས་པ་ཐོགས་མེད་ལ་སྩལ་བའི་སེམས་ཙམ་ལུགས་ཀྱི་བརྒྱུད་པའི་ཁྱད་པར་ནི། དོན་གཉིས་མཐར་ཕྱིན་རྣམ་འདྲེན་ཟས་གཙང་སྲས། །རྒྱལ་ཚབ་མ་ཕམ་ཐོགས་མེད་དབྱིག་གི་གཉེན། །རྣམ་གྲོལ་གྲོལ་སྡེ་མཆོག་སྡེ་དུལ་བའི་སྡེ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །སྣང་མཛད་སེང་བཟངས་སངས་རྒྱས་ཡེ་ཤེས་ཞབས། །གུ་ཎ་མི་ཏྲ་རིན་ཆེན་ཟླ་བ་དང་། །བསྟན་སྐྱོང་རྔོག་ལོ་འབྲེ་ཆེན་ཤེས་རབ་འབར། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །བྱང་ཆུབ་ཡེ་ཤེས་གཞོན་ཚུལ་ཞང་གཡེ་བ། །གཉལ་ཞིག་འཆིང་རུ་ཆུ་མིག་སེང་གེ་དཔལ། །ལྷོ་བྲག་པ་དང་བཙན་དགོན་དབེན་དགེ་བ། །གསོལ་བ་འདེབས་སོ་གཞན་ཕན་མཐར་ཕྱིན་ཤོག །ཆོས་དཔལ་རྒྱལ་མཚན་ཀུན་མཁྱེན་ཆོས་ཀྱི་རྗེ། །ཁྱབ་བརྡལ་ལྷུན་གྲུབ་མན་འདྲ། འདི་གཉིས་རིག་འཛིན་གཏེར་བདག་གླིང་པས་མཛད་པ་ལ་བརྒྱུད་པའི་ཁྱད་པར་ཁ་བསྐང་བ་པོ་ནི་ཛྙཱ་ནའོ།། །། ཐེག་པ་ཆེན་པོ་དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག་རྒྱལ་སྲས་ལམ་བཟང་། འགྱུར་མེད་རྡོ་རྗེ།ཐེག་པ་ཆེན་པོ་དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག་རྒྱལ་སྲས་ལམ་བཟང་ཞེས་བྱ་བ་བཞུགས་སོ། །ༀ་སྭ་སྟི། འགྲོ་ཀུན་དོན་དུ་ཐུགས་བསྐྱེད་ནས། །བྱང་ཆུབ་མངོན་མཛད་རྫོགས་སངས་རྒྱས། །སྲས་དང་བཅས་ལ་གུས་བཏུད་ནས། །སེམས་བསྐྱེད་ཆོ་ག་མདོ་ཙམ་བཤད། །འདིར་བྱང་ཆུབ་ཆེན་པོར་སེམས་བསྐྱེད་པའི་ཆོ་ག་རྒྱལ་སྲས་ཞི་བ་ལྷའི་ལུགས་བཞིན་དུ་བསྒྲུབ་པ་ལ། སྦྱོར་བ་དངོས་གཞི་རྗེས་ཀྱི་བྱ་བ་དང་གསུམ་ལས། དང་པོ་སྦྱོར་བ་གཞི་བཅའ་བ་ནི། གཙང་ཞིང་ཡིད་དུ་འོང་བའི་གནས་ཁང་རྒྱན་གྱི་ཁྱད་པར་དུ་མས་མཛེས་པར་བརྒྱན། ཐུབ་པ་ཆེན་པོའི་སྐུ་གཟུགས་སོགས་རྟེན་ཁྱད་པར་ཅན་གྱི་དྲུང་དུ་མཆོད་པའི་རྫས་རྒྱ་ཆེན་པོ་དང་གཏོར་མ་གསུམ་ལ་སོགས་པ་བཤམས་ཏེ། སློབ་དཔོན་ཁྲི་སྟན་བཟང་པོ་ལ་འདུག་ནས། ཆོས་ཐམས་ཅད་སྟོང་ཉིད་དུ་རྟོགས་པའི་ཤེས་རབ་དང་། སེམས་ཅན་ཐམས་ཅད་ཕན་བདེ་ལ་འགོད་པར་འདོད་པའི་བརྩེ་བ་དང་། ཁྱད་པར་སློབ་མ་རྣམས་ལ་བྱང་ཆུབ་ཀྱི་སེམས་བསྐྱེད་པར་འདོད་པའི་ལྷག་བསམ་དང་ལྡན་པས་འདི་སྐད་ཅེས་བརྗོད་པར་བྱའོ། །འོ་སྐོལ་རྣམས་རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་རིན་པོ་ཆེ་དང་མཇལ། འཁོར་འདས་ཀྱི་འདམ་ཁ་རང་དབང་ཐོབ་པའི་དུས་འདིར་དལ་འབྱོར་ལ་སྙིང་པོ་ལོན་པ་ཞིག་ཅི་ནས་ཀྱང་འབད་དགོས་ཏེ། མགོན་པོ་ཀླུ་སྒྲུབ་ཀྱིས། རྒྱ་མཚོ་ཆེར་གཡེངས་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེ་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་གསུངས་ཤིང་། དམ་པའི་ཆོས་ཀྱི་ནང་ནས་ཀྱང་རང་གཞན་ཐམས་ཅད་སྡུག་བསྔལ་ལས་སྒྲོལ་ཞིང་། གནས་སྐབས་དང་མཐར་ཐུག་གི་བདེ་བ་དམ་པ་ཐོབ་པར་བྱེད་པའི་རྒྱུའི་གཙོ་བོ་བྱང་ཆུབ་ཀྱི་སེམས་ཡིན་ཏེ། བསླབ་བཏུས་ལས། སྡུག་བསྔལ་མཐར་ཕྱིན་འདོད་པ་དང་། །བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བརྟན་བྱས་ཏེ། །བྱང་ཆུབ་ལ་ནི་བློ་བརྟན་བྱ། །ཞེས་གསུངས་པས། དེ་ལྟ་བུའི་ཡོན་ཏན་ལྡན་པའི་སེམས་བསྐྱེད་ཀྱི་ཆོ་ག་བསྒྲུབ་པ་ལའང་། སྡོང་པོ་བཀོད་པ་དང་། ནམ་མཁའ་སྙིང་པོའི་མདོ་ལ་སོགས་པའི་རྗེས་སུ་འབྲངས་པ། འཕགས་པ་འཇམ་དཔལ་ནས་བརྒྱུད་དེ་མགོན་པོ་ཀླུ་སྒྲུབ་ཡབ་སྲས་དང་རྒྱལ་སྲས་ཞི་བ་ལྷ་སོགས་ཀྱི་ཕྱག་བཞེས་དབུ་མ་ལུགས་སུ་གྲགས་པ་དང་། བྱང་ཆུབ་སེམས་དཔའི་ས་ཆེན་པོའི་མདོ་ལ་སོགས་པའི་རྗེས་སུ་འབྲངས་པ། མགོན་པོ་བྱམས་པ་ནས་བརྒྱུད་དེ་འཕགས་པ་ཐོགས་མེད་སྐུ་མཆེད་དང་། སློབ་དཔོན་ཆེན་པོ་ཙནྡྲ་གོ་མི་དང་ཇོ་བོ་ཨ་ཏི་ཤ་སོགས་ཀྱི་ཕྱག་བཞེས་སེམས་ཙམ་ལུགས་སུ་གྲགས་པ་གཉིས་ཡོད་པ་ལས་འདིར་སྔ་མ་བཞིན་དུ་སྒྲུབ་པར་བགྱིད་པས། དེ་ལ་ཐོགས་མར་སྡོམ་པ་ལེན་པའི་ཚུལ། བར་དུ་མི་ཉམས་པར་བསྲུང་བའི་ཚུལ། མཐར་ཉམས་ན་ཕྱིར་བཅོས་པའི་ཚུལ། སྡོམ་པའི་རང་བཞིན་གཏན་ལ་དབབ་པའི་ཚུལ་དང་བཞི་ལས། དང་པོ་ལ་གང་ལས་བླང་བའི་ཡུལ། གང་གིས་ལེན་པའི་གང་ཟག །ཇི་ལྟར་ལེན་པའི་ཆོ་ག་དངོས་བཤད་པའོ། །དང་པོ་ནི། ཐེག་པ་ཆེན་པོ་ལ་མོས་ཤིང་བྱང་ཆུབ་སེམས་དཔའི་སྡོམ་པ་ལ་གནས་པ། བྱང་སེམས་ཀྱི་སྡེ་སྣོད་སྤྱི་དང་ཁྱད་པར་བྱང་སྡོམ་འབོགས་པ་དང་བསླབ་བྱ་ལ་དཀྲི་མཁས་ཤིང་། ཕར་ཕྱིན་དྲུག་གི་མི་མཐུན་ཕྱོགས་སེར་སྣ་སོགས་དང་བྲལ་བ་སྟེ། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ་། །ཞེས་གསུངས་སོ། །ལུགས་འདི་ལ་སེམས་བསྐྱེད་གསར་དུ་ལེན་པ་དང་ཉམས་པ་གསོ་བ་གཉིས་ཀ་སློབ་དཔོན་མ་འབྱོར་ན་རྟེན་གྱི་དྲུང་དུ་བླངས་པས་ཀྱང་རུང་བཤད་དོ། །གཉིས་པ་ནི། གཟུགས་མེད་ཁམས་པ་དང་འདུ་ཤེས་མེད་པའི་ལྷ་མ་གཏོགས་སེམས་ཅན་བརྡ་ཤེས་ཤིང་སྡོམ་པ་ལེན་འདོད་ཡོད་པ་ཀུན་ལ་སྐྱེ་བར་བཤད་པ་དང་། ཁྱད་པར་ཤེས་རབ་ཀྱི་བྱང་སེམས་ཀྱི་སྤྱོད་པ་རླབས་པོ་ཆེ་རྣམས་རྟོགས་ཤིང་། སྙིང་རྗེས་འགྲོ་ཀུན་ཕན་བདེ་ལ་འགོད་འདོད་ཀྱི་བྱམས་སྙིང་རྗེ་ཁྱད་པར་ཅན་དང་ལྡན་པས་བྱང་སེམས་ཀྱི་བསླབ་པ་ལ་སློབ་པར་འདོད་བཞིན་དགོས་སོ། །གསུམ་པ་ཇི་ལྟར་ལེན་པའི་ཆོ་ག་ལ་སྦྱོར་བ། དངོས་གཞི། རྗེས་སོ། །སྦྱོར་བ་ལ་བཞི་སྟེ། གདམས་ངག་ཁྱད་པར་ཅན་གྱིས་བློ་བཅོས་པ། ཡུལ་ཁྱད་པར་ཅན་ལ་གསོལ་བ་གདབ་པ། རྟེན་ཁྱད་པར་ཅན་ལ་སྐྱབས་སུ་འགྲོ་བ། ཐབས་ཁྱད་པར་ཅན་གྱི་ཚོགས་བསགས་པའོ། །དང་པོ་ལའང་སྡུག་བསྔལ་འཁོར་བའི་མཐའ་ལ་སྐྱོ་བ་བསྐྱེད་པ། ཞི་བ་མྱང་འདས་ཀྱི་མཐའ་ལ་ཤེས་པ་དགག་པ། མཐའ་གཉིས་སྤངས་པའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པ་དང་གསུམ་གྱི་དང་པོ་ནི། ཚེ་འདིའི་སྤྱོད་ཡུལ་ལ་ཆགས་པའི་གཉེན་པོར་མི་རྟག་པ་དང་། སྲིད་པའི་བདེ་བ་ལ་ཆགས་པའི་གཉེན་པོར་འཁོར་བ་སྤྱི་དང་བྱེ་བྲག་གི་ཉེས་དམིགས་རྣམས་དྲན་པར་བྱ་སྟེ། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པས་ན་ཚུལ་དེའི་ཕྱིར་བཤེས་སྤྲིང་དང་། མགོའམ་གོས་ལ་གློ་བུར་མེ་ཤོར་ན། །དེ་དག་བཟློག་ཕྱིར་བགྱི་བ་གཏང་ནས་ཀྱང་། །ཡང་སྲིད་མེད་པར་བགྱིད་སླད་འབད་འཚལ་ཏེ། །འདི་ལས་ཆེས་མཆོག་དགོས་པ་གཞན་མ་མཆིས། །ཞེས་གསུངས་བ་ལྟར་འཁོར་བ་ལས་ངེས་པར་འབྱུང་ཞིང་དམ་ཆོས་སྒྲུབ་པ་ལ་སྤྲོ་ཤུགས་ཆེན་པོས་བློ་འཁུར་བར་བྱའོ། །གཉིས་པ་ནི། ཞི་བའི་བདེ་བ་ལ་ཆགས་པའི་གཉེན་པོར་སེམས་ཅན་ཐམས་ཅད་ལ་བྱམས་སྙིང་རྗེ་སྒོམ་པ་སྟེ། འཁོར་བ་སྡུག་བསྔལ་གྱི་རང་བཞིན་དུ་འདུག་པས། དེ་སྤངས་ནས་རང་ཉིད་ཕུང་པོ་ལྷག་མེད་ཀྱི་མྱང་འདས་ཐོབ་པར་བྱ་བ་ཡིན་ནམ་སྙམ་ན་མ་ཡིན་ཏེ། དེས་གཞན་དོན་མི་ནུས་ལ། འཁོར་བའི་སེམས་ཅན་ཐམས་ཅད་ཐོག་མ་མེད་པ་ནས་མ་བྱས་པའི་དྲིན་ཅན་ཡིན་པས། དེ་རྣམས་ཀྱི་དོན་མི་བྱེད་པར་རང་ཉིད་ཞི་བདེ་སྒྲུབ་པ་ནི་དྲིན་མི་ཤེས་པས་ཁྲེལ་མེད་པའི་སྤྱོད་པར་འགྱུར་ཏེ། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ཁོང་དུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤིས་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་མཐར་བྱེད་ན་དེ་བས་ཁྲེལ་བོར་མེད། །ཅེས་གསུངས་པས་གཞན་དོན་བོར་ནས་རང་ཉིད་གཅིག་པུ་ཞི་བདེ་དོན་གཉེར་གྱི་བློ་སྤང་བ་ལ་ནན་ཏན་དུ་བྱའོ། །གསུམ་པ་ནི། སངས་རྒྱས་སྒྲུབ་པའི་ཐབས་མི་ཤེས་པའི་གཉེན་པོར་བྱང་ཆུབ་ཀྱི་སེམས་གཉིས་སྒོམ་པ་སྟེ། འོ་ན་འཁོར་བ་སྡུག་བསྔལ་གྱི་རང་བཞིན་ཡིན་པས་སྤངས་དགོས་ཤིང་སྡུག་བསྔལ་སྤངས་པའི་མྱང་འདས་དེ་ཡང་ཐོབ་པར་མི་བྱེད་ན། ཅི་ཞིག་ཐོབ་པར་བྱ་བ་ཡིན་སྙམ་ན། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བསལ་ནས། སེམས་ཅན་སིང་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་རྩེ་བྱང་ཆུབ་ཐོབ་བརྟན་ནས། །འཕགས་པ་འཁོར་བ་མྱ་ངན་འདས་མི་འགྲོ། །ཞེས་གསུངས་པ་ལྟར་ཤེས་རབ་ཆེན་པོས་འཁོར་བའི་མཐའ་ལ་མི་གནས། སྙིང་རྗེ་ཆེན་པོས་མྱ་ངན་ལས་འདས་པའི་མཐའ་ལ་མི་གནས་པའི་བྱང་ཆུབ་ནི་ཡང་དག་པར་རྫོགས་པའི་སངས་རྒྱས་ཡིན་ལ། དེ་ཐོབ་ན་རང་དོན་སྤང་རྟོགས་མཐར་ཕྱིན། གཞན་དོན་མཁའ་ཁྱབ་ཀྱི་ཕྲིན་ལས་འཁོར་བ་ཇི་སྲིད་པར་འབད་མེད་ལྷུན་གྲུབ་ཏུ་འབྱུང་བས། དོན་གཉིས་མཐར་ཕྱིན་པ་དེ་ཉིད་ཐོབ་བྱ་ཡིན་ཅིང་། དེ་ཐོབ་བྱེད་ཀྱི་རྒྱུའི་གཙོ་བོ་བྱང་ཆུབ་ཏུ་སེམས་བསྐྱེད་པ་ཡིན་ཏེ། རྣམ་སྣང་མངོན་བྱང་ལས། གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་ནི་བྱང་ཆུབ་ཀྱི་སེམས་སོ། །ཞེས་དང་། སྡུད་པ་ལས། དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་རྟེན་འདི་དང་ཀུན་ཏུ་ག་ལ་འབྱུང་། །ཞེས་གསུངས་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བྱའོ་སྙམ་པའི་སྤྲོ་བ་ཤུགས་དྲག་ཏུ་བསྐྱེད་པ་རྣམས་ནི་ལམ་འདིའི་གཞི་ཡིན་པས་རྒྱས་བསྡུས་ཅི་རིགས་པས་སློབ་མའི་བརྒྱུད་ལ་འབྱོར་ངེས་སུ་བརྡ་སྤྲད་པར་བྱའོ། །གཉིས་པ་ནི། ཡུལ་ཁྱད་པར་ཅན་ལ་གསོལ་བ་གདབ་པ་སྟེ། སློབ་དཔོན་ལ་སྟོན་པའི་འདུ་ཤེས་བསྐྱེད་ནས་མཎྜལ་ཕུལ་ལ། བདག་ཅག་ལ་བྱང་ཆུབ་མཆོག་ཏུ་སེམས་བསྐྱེད་བསྩོལ་དུ་གསོལ་སྙམ་པའི་འདུན་པ་ཆེན་པོ་དང་ལྡན་པས་འདིའི་རྗེས་ཟློས་མཛོད་ཅིག །སློབ་དཔོན་དགོངས་སུ་གསོལ། རིགས་ཀྱི་བུ་བདག་ལ་དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་སྐྱབས་གསུམ་སྔོན་དུ་འགྲོ་བ་ཅན་གྱི་བྱང་ཆུབ་ཏུ་སེམས་བསྐྱེད་པ་སྩོལ་དུ་གསོལ། ཞེས་ལན་གསུམ་གྱིས་གསོལ་བ་གདབ་བོ། །གསུམ་པ་ནི། རྟེན་ཁྱད་པར་ཅན་ལ་སྐྱབས་སུ་འགྲོ་བ་སྟེ། སྐྱབས་འགྲོའི་ཡུལ་སངས་རྒྱས་སྐུ་གསུམ་གྱི་བདག་ཉིད། ཆོས་ཐེག་པ་ཆེན་པོའི་ལུང་དང་རྟོགས་པ། དགེ་འདུན་བྱང་སེམས་འཕགས་པ་ཕྱིར་མི་ལྡོག་པ་རྣམས་ཡིན། དུས་བྱང་ཆུབ་སྙིང་པོ་མ་ཐོབ་ཀྱི་བར། རྒྱུ་སེམས་ཅན་ཐམས་ཅད་སྡུག་བསྔལ་ལས་བསྒྲལ་བར་འདོད་པའི་སྙིང་རྗེ་ཀུན་ནས་བླངས་ཏེ། ངོ་བོ་སེམས་ཅན་རྣམས་སྡུག་བསྔལ་ལས་སྐྱོབ་པ་ལ་སངས་རྒྱས་ཐོབ་དགོས། དེ་ཐོབ་པ་དཀོན་མཆོག་གསུམ་ལ་རག་ལས་པས། བདག་གིས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པ་དཀོན་མཆོག་གསུམ་པོ་མཁྱེན་སྙམ་པའི་དད་པ་ཆེན་པོ་དང་ལྡན་པའི་སྒོ་ནས་འདིའི་རྗེས་ཟློས་མཛོད་ཅིག །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། རང་རང་གི་མིང་ནས་བརྗོད་ལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་ལན་གསུམ་བརྗོད། དེང་ཕྱིན་ཆད་སངས་རྒྱས་ལ་སྟོན་པ། ཐེག་ཆེན་གྱི་ཆོས་ལ་ལམ། བྱང་སེམས་འཕགས་པ་རྣམས་ལ་ལམ་སྒྲུབ་པའི་གྲོགས་སུ་བཟུང་བར་བགྱིའོ་སྙམ་པ་ལ་བློ་བརྟན་པར་མཛོད། བཞི་པ་ནི། ཐབས་ཁྱད་པར་ཅན་གྱིས་ཚོགས་བསགས་པ་སྟེ། ཚོགས་ཀྱི་ཞིང་མདུན་གྱི་ནམ་མཁར་སེང་གེའི་ཁྲི་སྟན་བཀོད་པ་ཕུན་སུམ་ཚོགས་པའི་སྟེང་དུ། སྟོན་པ་བཅོམ་ལྡན་འདས་ཤཱ་ཀྱའི་དབང་པོ་ལ་འཁོར་ཉེ་བའི་སྲས་བརྒྱད་ལ་སོགས་པས་བསྐོར་བས་གཙོ་བྱས་ཕྱོགས་བཅུའི་ཞིང་རབ་འབྱམས་ཀྱི་སངས་རྒྱས་བྱང་སེམས་ཐམས་ཅད་སྤྲིན་ཕུང་གཏིབས་པ་ལྟར་བཞུགས་པར་བསམ་ནས། དེ་དག་གི་ཞབས་ཀྱི་རྡུལ་ཕྲ་རབ་རེ་རེ་ལའང་། རང་གི་ལུས་ཞིང་ཁམས་རྒྱ་མཚོའི་རྡུལ་སྙེད་དུ་སྤྲུལ་མཁའ་མཉམ་སེམས་ཅན་ཐམས་ཅད་དང་ལྷན་ཅིག་ཏུ་ཕྱག་འཚལ་བར་བསམས་ནས་གནས་ལྔ་ས་ལ་གཏུགས་པའི་ཕྱག་དང་བཅས་པ་འདིའི་རྗེས་ཟློས་མཛོད་ཅིག །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་དག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །ཅེས་བརྗོད་ཅིང་ཕྱག་བྱ། འདི་ནི་ང་རྒྱལ་གྱི་གཉེན་པོ་ཕྱག་འཚལ་བའི་ཡན་ལག་གོ། །དེ་ནས་རང་གཞན་ཐམས་ཅད་ཀྱི་ལུས་དང་ལོངས་སྤྱོད་དགེ་རྩ་དང་བཅས་པ་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་སྤྲིན་རྒྱ་མཚོ་རྒྱ་ནམ་མཁའི་མཐའ་དང་མཉམ་པ། ངོ་བོ་བཟང་ཞིང་དགེ་བ། དུས་འཁོར་བ་མ་སྟོངས་ཀྱི་བར་དུ་རྒྱུན་མི་ཆད་པར་འབྱུང་བ་རྣམས་ཀྱིས་ཡང་དག་པར་མཆོད་པར་མོས་ལ་འདིའི་རྗེས་ཟློས་མཛོད་ཅིག །མེ་ཏོག་དམ་པ་ཕྲེང་བ་དམ་པ་དང་། །སིལ་སྙམ་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་ཆབ་དང་། །ཕྱེ་མ་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདི་ནི་འདོད་ཆགས་ཀྱི་གཉེན་པོ་སྟེ་མཆོད་པའི་ཡན་ལག་གོ། །དེ་ནས་རང་གཞན་ཐམས་ཅད་ཀྱི་བཅས་པ་དང་རང་བཞིན་གྱི་སྡིག་ལྟུང་སྔར་བྱས་ལ་འགྱོད་པ་དུག་འཐུང་བ་ལྟ་བུ་དང་། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་བརྟན་པོ་དང་ལྡན་པས་བདག་སོགས་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་དག་པ་དཀོན་མཆོག་རིན་པོ་ཆེ་མཁྱེན་སྙམ་ནས་བཤགས་པས་སྡིག་སྒྲིབ་ཐམས་ཅད་སངས་ཀྱིས་དག་པར་མོས་ནས་འདིའི་རྗེས་ཟློས་མཛོད། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །འདི་ནི་ཞེ་སྡང་གི་གཉེན་པོ་སྟེ་བཤགས་པའི་ཡན་ལག་གོ། །དེ་ནས་འཕགས་པ་དང་སོ་སྐྱེའི་རྒྱུད་ཀྱི་བསྡུས་པའི་ཟག་བཅས་དང་ཟག་མེད་ཀྱི་དགེ་བའི་རྩ་བ་ཐམས་ཅད་ལ་ཤིན་ཏུ་དགའ་ཞིང་ཡིད་རང་བའི་བློ་བསྐྱེད་ལ་འདིའི་རྗེས་ཟློས་མཛོད། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །འདི་ནི་ཕྲག་དོག་གི་གཉེན་པོ་སྟེ་རྗེས་སུ་ཡི་རང་བའི་ཡན་ལག་གོ། །ཕྱོགས་བཅུ་འཇིག་རྟེན་གྱི་ཁམས་བདེ་བར་གཤེགས་པ་གང་དག་གདུལ་བྱའི་རྐྱེན་དབང་གིས་ཆོས་ཀྱི་འཁོར་ལོ་མི་བསྐོར་བར་བཞུགས་པ་རྣམས་ལ་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བར་མཛད་དུ་གསོལ་སྙམ་པའི་གསོལ་བ་འདེབས་པ་འདིའི་རྗེས་ཟློས་མཛོད། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །འདི་ནི་གཏི་མུག་གི་གཉེན་པོ་ཆོས་ཀྱི་འཁོར་ལོ་བསྐོར་བའི་ཡན་ལག་གོ། །ཕྱོགས་བཅུའི་འཇིག་རྟེན་གྱི་ཁམས་ན་བདེ་བར་གཤེགས་པ་འགའ་ཞིག་སངས་རྒྱས་ལ་དཀོན་པའི་འདུ་ཤེས་བསྐྱེད་པའི་ཆེད་དུ་མྱ་ངན་ལས་འདའ་བའི་ཚུལ་སྟོན་པ་རྣམས་ལ་འཁོར་བ་ཇི་སྲིད་པ་དེ་སྲིད་དུ་མྱ་ངན་ལས་མི་འདའ་བར་གསོལ་བ་གདབ་པའི་བསམ་པས་འདིའི་རྗེས་ཟློས་མཛོད། མྱ་ངན་འདས་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་བ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །འདི་ནི་ལོག་ལྟའི་གཉེན་པོ་སྟེ་གསོལ་བ་གདབ་པའི་ཡན་ལག་གོ། །དེ་ལྟར་བསོད་ནམས་ཀྱི་ཚོགས་སུ་གྱུར་པ་དེ་དག་གིས་མཚོན་ཏེ་བདག་གཞན་འཁོར་འདས་ཐམས་ཅད་ཀྱིས་དུས་གསུམ་བསགས་ཡོད་ཀྱི་དགེ་བ་ཐམས་ཅད་སེམས་ཅན་གྱི་དོན་དུ་བླ་ན་མེད་པའི་བྱང་ཆུབ་ཆེན་པོར་ཡོངས་སུ་བསྔོ་བར་བགྱིའོ་སྙམ་པས་འདིའི་རྗེས་ཟློས་མཛོད། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡིས། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །འདི་ནི་ཐེ་ཚོམ་གྱི་གཉེན་པོ་སྟེ་བསྔོ་བའི་ཡན་ལག་གོ། །དེ་དག་གིས་ནི་སྦྱོར་བའི་ཆོ་ག་རྣམས་གྲུབ་པ་ལགས། གཉིས་པ་དངོས་གཞི་ལ། བློ་སྦྱོང་བ་དང་། དམ་བཅའ་བ་སྟེ་གཉིས་ལས། དང་པོ་ནི། འཁོར་བ་ཐོག་མ་མེད་པ་ནས་ཡང་ནས་ཡང་དུ་ཕ་མར་གྱུར་པའི་དྲིན་ཅན་གྱི་སེམས་ཅན་འདི་དག་འཁོར་བ་ན་སྡུག་བསྔལ་དཔག་ཏུ་མེད་བས་གཟིར་ཏེ་འདུག་པས། འདི་རྣམས་ཀྱི་སྡུག་བསྔལ་མ་ལུས་པ་བསལ་ཞིང་བདེ་བ་བླ་ན་མེད་པ་ལ་འགོད་པའི་ཆེད་དུ་བདག་གི་ལུས་དང་ལོངས་སྤྱོད་དགེ་རྩ་ཐམས་ཅད་དེ་དག་གི་དོན་ཀུན་འགྲུབ་པའི་རྒྱུར་འཕངས་པ་མེད་པར་གཏོང་ཞིང་། དཀའ་སྤྱད་དང་སྡུག་བསྔལ་ཐམས་ཅད་དགའ་ཞིང་སྤྲོ་བས་དང་དུ་བླང་བར་བྱའོ་སྙམ་པས་འདིའི་རྗེས་ཟློས་མཛོད་ཅིག །ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་བསྒྲུབ་ཕྱིར། །འཕངས་པ་མེད་པར་བཏང་བར་བྱ། །ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་རྒྱུར་ཡང་ཤོག །ཅེས་བློ་སྦྱངས་ནས། གཉིས་པ་དམ་བཅའ་བ་སེམས་བསྐྱེད་པ་ནི། ཆོས་ཐམས་ཅད་དོན་དམ་སྤྲོས་པའི་མཐའ་ལས་འདས་ཀྱང་། ཀུན་རྫོབ་བདག་གཞན་བདེ་སྡུག་ལ་སོགས་པ་སྣ་ཚོགས་སུ་སྣང་བ་སྟེ། ཏིང་ངེ་འཛིན་རྒྱལ་པོ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་འདྲར་ཤེས་པར་གྱིས། །ཞེས་གསུངས་པ་ལྟར་ཆོས་ཐམས་ཅད་བདེན་མེད་ཡིན་ཡང་། དེ་ལྟར་མ་ཤེས་པར་བདེན་འཛིན་ཨ་འཐས་པས་འཁོར་བ་ན་སྡུག་བསྔལ་མི་ཟད་པས་རྟག་ཏུ་མནར་བའི་སེམས་ཅན་འདི་དག་ཐོག་མ་མེད་པ་ནས་ཡང་ནས་ཡང་དུ་ཕ་མ་བྱས་ཏེ། ཕན་བདེ་མཐའ་དག་ནི་བསྒྲུབས། གནོད་འཚེ་ཐམས་ཅད་ལས་ནི་སྐྱབས། བསམ་རྒྱུ་དང་དྲན་རྒྱུ་ནི་རང་རེ་ལས་མེད་པར་བྱས། རང་རེའི་ཆེད་དུ་ཡང་ལུས་སྲོག་གྲངས་མེད་པར་གཏང་བའི་དྲིན་ཅན་ཤ་སྟག་ཡིན་ཀྱང་། བདེ་བ་འདོད་བཞིན་དུ་བདེ་བ་དང་ནི་བྲལ། སྡུག་བསྔལ་མི་འདོད་བཞིན་དུ་སྡུག་བསྔལ་དང་ནི་ལྡན། བདེ་བ་སྒྲུབ་ཅིང་སྡུག་བསྔལ་འདོར་བའི་ཐབས་མི་ཤེས་པའི་རྨོངས་པ་འདི་དག་སྡུག་བསྔལ་ཅན་གྱི་འཁོར་བ་ལས་སྒྲོལ་དགོས། དེ་ཡང་ད་ལྟ་བདག་ལ་དེའི་ནུས་པ་མེད་པས། ནུས་པ་དང་ལྡན་པའི་སངས་རྒྱས་དེ་ཉིད་ཐོབ་དགོས་པར་འདུག །དེའི་ཕྱིར་བླ་ན་མེད་པའི་བྱང་ཆུབ་ཏུ་སྨོན་པའི་སེམས་བསྐྱེད་ནས། འཇུག་པ་བྱང་ཆུབ་སེམས་དཔའི་བསླབ་བྱ་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ལ། ཇི་ལྟར་སྔོན་གྱི་རྒྱལ་བ་སྲས་དང་བཅས་པ་རྣམས་ཀྱིས་ཡོངས་སུ་བསླབས་པ་བཞིན་དུ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་ཚོགས་གཉིས་དང་ལྡན། སྡུག་བསྔལ་དང་སྡུག་བསྔལ་གྱི་རྒྱུ་སྒྲིབ་གཉིས་དང་བྲལ་ནས། ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱའོ་སྙམ་དུ་བསམ་ཞིང་དགོངས་གསོལ་བརྗོད་པ་ན་སངས་རྒྱས་བྱང་སེམས་རྣམས་ཀྱིས་བདག་གི་བསམ་སྦྱོར་ཇི་ལྟ་བཞིན་དུ་མཁྱེན་ངེས་སྙམ་དུ་བླ་མ་དཀོན་མཆོག་ལ་དད་པ་ཆེན་པོ། སེམས་ཅན་ལ་སྙིང་རྗེ་ཆེན་པོ། སངས་རྒྱས་ལ་ཐོབ་འདོད་ཀྱི་འདུན་པ་ཆེན་པོ་སྟེ་འདུ་ཤེས་གསུམ་དང་མ་བྲལ་བའི་སེམས་རྩེ་གཅིག་པས་འདིའི་རྗེས་ཟློས་མཛོད་ཅིག །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། རང་རང་གི་མིང་ནས་བརྗོད་དེ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་དང་། ཀུན་སློང་བཅོས་པ་སྔར་སྨོས་པ་ལས་སྙིང་པོ་ཙམ་བརྗོད་ནས། གཉིས་པ་དང་གསུམ་པའི་རྗེས་ཟློས་ཀྱང་སྔར་བཞིན་བྱ་སྟེ། མཚམས་སྦྱོར་རྣམས་བརྡ་འཕྲོད་པ་དང་། ཚིགས་བཅད་རྣམས་དལ་ཞིང་སྐབས་ཕྱེད་པར་བརྗོད་དོ། །གསུམ་པའི་རྗེས་ཟློས་རྫོགས་པ་དང་། དེས་ཁྱེད་ཀྱི་རྒྱུད་ལ་སྨོན་པ་དང་། འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་རིན་པོ་ཆེ་སྐྱེས་པ་ཡིན་པས་ཐོབ་ཤེས་ཀྱི་དགའ་བ་མཛད་འཚལ། ཞེས་བརྗོད་པར་བྱའོ། །གསུམ་པ་མཇུག་གི་ཆོ་ག་ལ་དགའ་བ་བསྒོམ་པ་དང་། གཏང་རག་འབུལ་བ་གཉིས་ལས། དང་པོ་ལ་རང་དགའ་བ་བསྒོམ་པ་དང་། གཞན་དགའ་བ་བསྐྱེད་པ་གཉིས་ལས། དང་པོ་རང་དགའ་བ་བསྒོམ་པ་ནི། བདག་གི་ཐོག་མ་མེད་པ་ནས་ལུས་དཔག་ཏུ་མེད་པ་ཞིག་བླངས་ཀྱང་སེམས་དང་མ་ལྡན་པས་དོན་མེད་པ་ཁོ་ནར་སོང་། ད་རེས་རང་གཞན་ཐམས་ཅད་ཀྱི་ཕན་བདེའི་རྒྱུ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་པས་དོན་ཆེན་པོ་གྲུབ་སྙམ་དུ་དགའ་བ་བསྒོམ་པར་བྱའོ། །དེ་ཙམ་དགའ་བ་བསྒོམས་པའི་ཕན་ཡོན་ཅི་ཡོད་སྙམ་ན་མཐའ་ཡས་པའི་ཕྱིར་བརྗོད་པར་མི་ནུས་མོད། ཆ་ཤས་ཙམ་བརྗོད་ན་མིང་དོན་འཕོ་བ། སྡིག་པ་སྟོབས་ཆེན་སྦྱོང་པ། ཕན་ཡོན་དཔེས་བསྟན་པ། བསོད་ནམས་རྒྱུད་ཆགས་སུ་འབྱུང་བ། ཕན་ཡོན་མཐའ་ཡས་པ་རྣམས་ལས། དང་པོ་ནི། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ན་སྐད་ཅིག་གིས། །འཁོར་བའི་བརྩོན་རར་ཆུད་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་སོ། །གཉིས་པ་ནི། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་གྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གིས་ནི་ངེས་པར་བསྲེག་པར་བྱེད། །ཅེས་གསུངས་སོ། །གསུམ་པ་ནི། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་གསུངས་སོ། །བཞི་པ་ནི། གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་སྒྲོལ་བའི་ཕྱིར། །ནམ་ཡང་ལྡོག་པ་མེད་སེམས་ཀྱིས། །སེམས་དེ་ཡང་དག་བླངས་གྱུར་པ། །དེ་ནས་བརྩམས་ཏེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་སོ། །ལྔ་པ་ནི། དཔལ་སྦྱིན་གྱིས་ཞུས་པའི་མདོར། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་འདི་ལ་གཟུགས་མཆིས་ན། །ནམ་མཁའ་ཁམས་ནི་ཀུན་གང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་དང་། བློ་གྲོས་རྒྱ་མཚོས་ཞུས་པའི་མདོར། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་ཡོན་ཏན་མཐའ་མེད་དེ། །དེ་དག་མཐའ་ནི་རྒྱལ་བས་མི་གསུང་ངོ་། །ཞེས་སོགས་རྒྱ་ཆེར་གསུངས་ཤིང་། གཞན་ཡང་བྱང་ཆུབ་ཆེན་པོའི་རྒྱུ་འབྲས་ཀྱི་ཕན་ཡོན་དཔག་ཏུ་མེད་པའི་བྱང་ཆུབ་ཀྱི་སེམས་བསྐྱེད་པ་དེ་ལ་དགའ་སྤྲོ་དང་ལྡན་པས་འདིའི་རྗེས་ཟློས་མཛོད་ཅིག །དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །དེ་བཞིན་ཅི་ཞིག་ལྟར་ལྟས་ན། །བྱང་ཆུབ་སེམས་ནི་བདག་ལ་རྙེད། །ཅེས་ལན་གཅིག་བརྗོད། གཉིས་པ་གཞན་དགའ་བ་བསྐྱེད་པ་ནི། བདག་གིས་རྒྱལ་བ་སྲས་དང་བཅས་པ་རྣམས་ཀྱི་སྤྱན་སྔར་འགྲོ་བ་ཐམས་ཅད་གནས་སྐབས་དང་མཐར་ཐུག་གི་བདེ་བ་ལ་མགྲོན་དུ་བོས་པ་ཡིན་པས་དགའ་བར་གྱིས་ཤིག་སྙམ་པས་འདིའི་རྗེས་ཟློས་མཛོད་ཅིག །བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་བརྗོད་དོ། །གཉིས་པ་གཏང་རག་འབུལ་བ་ནི། དེ་ལྟར་བྱང་ཆུབ་ཀྱི་སེམས་སྐྱེས་པ་དེ་བླ་མ་དང་དཀོན་མཆོག་གི་བཀའ་དྲིན་ཡིན་པས། བཀའ་དྲིན་རྗེས་སུ་དྲན་པས་བླ་མ་དང་དཀོན་མཆོག་ལ་ཕྱག་དང་མཆོད་པ་རྒྱས་བསྡུས་ཅི་རིགས་པ་དང་ལུས་དབུལ་བ་རྣམས་བྱས་ནས། གཏོར་མ་གསུམ་གྱི་དང་པོ་བླ་མ་དཀོན་མཆོག །གཉིས་པ་ཆོས་སྐྱོང་སྲུང་མ། གསུམ་པ་གནས་དང་གཞིའི་བདག་པོ་རྣམས་ལ་ཕུལ་ནས་འདོད་པའི་དོན་ལ་གསོལ་བ་གདབ་པར་བྱའོ། །གཉིས་པ་བར་དུ་མི་ཉམས་པར་བསྲུང་བའི་ཚུལ་ལ། བསླབ་བྱ་ངོས་བཟུང་བ་དང་། དེ་ཉིད་བསྲུང་ཚུལ་གྱིས་འགག་བསྡུ་བའོ། །དང་པོ་ལ་སྨོན་འཇུག་སྤྱིའི་བསླབ་བྱ་དང་། བྱེ་བྲག་སོ་སོའི་བསླབ་བྱའོ། །དང་པོ་སྤྱིའི་བསླབ་བྱ་ལ་བསྒྲུབ་པར་བྱ་བའི་ཆོས་གསུམ་དང་། ཤེས་པར་བྱ་བའི་ཆོས་བཞི་ལས། དང་པོ་ནི། དགེ་བའི་བཤེས་གཉེན་ལ་བསྟེན་ཅིང་དེ་ལ་འདུན་པ་དང་། དཀོན་མཆོག་གསུམ་གྱི་གདུང་རྒྱུན་མི་གཅོད་པ་དང་། སེམས་ཅན་བློས་མི་འདོར་བའོ། །དེར་མ་ཟད་བྱང་ཆུབ་ཏུ་སེམས་བསྐྱེད་ནས་དེ་མི་ཉམས་པར་བསྲུང་བ་དང་། བྱང་ཆུབ་སེམས་དཔའི་སྡེ་སྣོད་ཀློག་པ་དང་། རྒྱུན་དུ་བག་ཡོད་བསྟེན་པའོ། །གཉིས་པ་ནི། ལྟུང་བ་དང ། ལྟུང་བ་མེད་པ་དང་། ལྟུང་བའི་གཟུགས་བརྙན་དང་། ལྟུང་མེད་ཀྱི་གཟུགས་བརྙན་རྣམས་ལེགས་པར་ཤེས་པར་བྱའོ། །མདོར་ན་བྱང་ཆུབ་སེམས་དཔས་བསྒྲུབ་པའི་བསླབ་བྱ་བསམ་གྱིས་མི་ཁྱབ་ཀྱང་བསྡུ་ན་གསུམ་ཡིན་ཏེ། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བའོ། །གཉིས་པ་བྱེ་བྲག་གི་བསླབ་བྱ་ལ་སྨོན་པ་དང་འཇུག་པའི་བསླབ་བྱ་གཉིས་ལས། དང་པོ་ལ་སྐྱེས་བུ་དམ་པའི་སྨོན་པ་གསུམ་དང་། སྤང་བྱ་ནག་པོའི་ཆོས་བཞི་དང་། བསྒྲུབ་བྱ་དཀར་ཆོས་བཞི་ལ་བསླབ་པའོ། །དང་པོ་ནི། སེམས་ཅན་གྱི་དོན་དུ་རྫོགས་བྱང་ཐོབ་པར་བྱའོ་སྙམ་པ་འབྲས་བུ་ལ་སྨོན་པ་དང་། སང་ལམ་ཐམས་ཅད་ལ་བསླབ་པར་བྱའོ་སྙམ་པ་ཐབས་ལ་སྨོན་པ་དང་། སེམས་ཅན་ཐམས་ཅད་ཀྱི་རེ་བ་བསྐང་བར་བྱའོ་སྙམ་པ་ཕྲིན་ལས་ལ་སྨོན་པའོ། །གཉིས་པ་ནི། བླ་མ་དང་སྦྱིན་གནས་བསླུ་བ་དང་། ཐེག་པ་ཆེན་པོའི་གང་ཟག་ལ་མི་བསྔགས་པར་བརྗོད་པ་དང་། སེམས་ཅན་ལ་གཡོ་སྒྱུ་བྱེད་པ་དང་། འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་པ་སྟེ་ནག་པོའི་ཆོས་བཞི་པོ་དེ་སྤོང་བ་ལ་ནན་ཏན་དུ་བྱའོ། །གསུམ་པ་ནི། སྲོག་གི་ཕྱིར་ཡང་ཤེས་བཞིན་དུ་རྫུན་མི་སྨྲ་བ་དང་། བྱང་ཆུབ་སེམས་དཔའ་རྣམས་ལ་སྟོན་པའི་འདུ་ཤེས་བསྐྱེད་ཅིང་དེ་དག་གི་ཡོན་ཏན་གྱི་བསྔགས་པ་བརྗོད་པ་དང་། གཡོ་སྒྱུ་སྤངས་ཏེ་ལྷག་པའི་བསམ་པས་གནས་པ་དང་། གདུལ་བར་བྱ་བའི་སེམས་ཅན་ཐམས་ཅད་ཐེག་པ་ཆེན་པའི་དགེ་བ་ལ་འགོད་པ་སྟེ། དེ་ལྟར་དཀར་པོའི་ཆོས་བཞི་པོ་དེ་ལ་བསླབ་པས་ནི་ནག་པོའི་ཆོས་བཞི་པོ་དེ་ཡང་ཤུགས་ལ་ཁེགས་པ་ཡིན་ནོ། །གཉིས་པ་འཇུག་པའི་བསླབ་བྱ་ལ། སྤང་བྱ་དང་བསྒྲུབ་བྱ་གཉིས། དང་པོ་ལ་རྩ་བའི་ལྟུང་བ་དང་ཡན་ལག་གི་ལྟུང་བའོ། །དང་པོ་ལ། བྱང་སེམས་རྒྱལ་པོ་ལ་འབྱུང་ཉེ་བ་ལྔ་དང་། བློན་པོ་ལ་འབྱུང་ཉེ་བ་ལྔ། ལས་དང་པོ་པ་ལ་འབྱུང་ཉེ་བ་པ་བརྒྱད། ཐུན་མོང་དུ་སྨོན་སེམས་བཏང་བའོ། །ལྡུང་བ་དེ་དག་འབྱུང་བའི་རྟེན་ནི་བྱང་སེམས་ཀྱི་སྡོམ་ལྡན། སྨྱོ་བ་དང་སེམས་འཁྲུགས་པ་དང་ཚོར་བས་གཟིར་བ་སོགས་མ་ཡིན་པ་ཞིག་དགོས་ཏེ་སྨྱོ་བ་སོགས་ཀྱི་རྟེན་ལ་རྩ་ལྟུང་གང་ཡང་མི་འབྱུང་ཞིང་། འདི་དག་ལ་ཀུན་སློང་ཉོན་མོངས་མི་དགོས་ཏེ། བྱ་བར་འོས་པ་དང་མི་འོས་པའི་འཇུག་ལྡོག་ལོག་པ་ལས་ལྟུང་བར་འགྱུར་བའི་ཕྱིར་རོ། །དེ་ལ་དང་པོ་རྒྱལ་པོ་ལ་འབྱུང་བར་ཉེ་བ་ལྔ་ནི། དཀོན་མཆོག་གསུམ་གྱི་དཀོར་འཕྲོག་པའམ་རྐུ་བ་དང་། དམ་པའི་ཆོས་སྤོང་བའམ་སྤོང་དུ་འཇུག་པ། དགེ་སློང་རབ་ཏུ་འབྱུང་བ་ལ་ཡོ་བྱད་འཕྲོག་པ་སོགས་ཀྱི་སྒོ་ནས་གནོད་པར་བྱེད་པ་དང་། མཚམས་མེད་ཀྱི་ལས་ལྔ་པོ་དག་ལས་གང་ཡང་རུང་བ་བྱས་པ། ལོག་ལྟས་རང་མི་དགེ་བཅུ་ལ་སྤྱོད་ཅིང་གཞན་ཡང་དེ་ལ་འགོད་པ་དང་ལྔ་ཡིན་ཏེ། ནམ་མཁའི་སྙིང་པོའི་མདོར་གསུངས་པའི་དོན་བསླབ་བཏུས་ལས། དཀོན་མཆོག་གསུམ་གྱི་དཀོར་འཕྲོག་པ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་རྒྱལ་བས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལའང་། །ངུར་སྨྲིག་འཕྲོག་དང་རྡེག་པ་དང་། །བཙོན་རར་གཞུག་པར་བྱེད་པ་དང་། །རབ་ཏུ་བྱུང་ལས་འབེབས་པ་དང་། །སྲོག་འབྲལ་བྱེད་པ་གསུམ་པ་ཡིན། །མཚམས་མེད་ལྔ་པོ་བྱེད་པ་དང་། །ལོག་པར་ལྟ་བ་འཛིན་པ་དང་། །ཞེས་གསུངས་ཤིང་། དགེ་འདུན་ལས་འཕྲོག་པ་ནི་རྩ་ལྟུང་དང་པོར་འདུ་བས་གསུམ་པར་དགེ་སློང་ཞེས་བཀར་ཏེ་གསུངས་པའོ། །བློན་པོ་ལ་འབྱུང་ཉེ་བའི་ལྟུང་བ་ལྔ་ནི། སྔ་མ་བཞི་ཐུན་མོང་བ་དང་། ལོག་ལྟ་འཛིན་པའི་ཚབ་ལ། གྲོང་ངམ། གྲོང་ཁྱེར་སོགས་འཇོགས་པར་བྱེད་པ་རྣམས་སྔར་ལྟར་གཅིག་ཏུ་བགྲང་པས་ལྔ་ཡིན་ཏེ། གྲོང་ལ་སོགས་པ་འཇིག་པ་ཡང་། །རྩ་བའི་ལྟུང་བར་རྒྱལ་བས་གསུངས། །ཞེས་སོ། །ལས་དང་པོ་པ་ལ་འབྱུང་བར་ཉེ་བ་བརྒྱད་ནི། དང་པོ་རིམ་གྱིས་ཐེག་ཆེན་ལ་བློ་མ་སྦྱངས་པར་སྟོང་པ་ཉིད་བསྟན་པས་སྐྲག་ནས་དེའི་བྱང་སེམས་ཉམས་པར་བྱེད་པ་དང་། གཉིས་པ་རྫོགས་བྱང་སྒྲུབ་པའི་བསམ་སྦྱོར་ལ་ཞུགས་པ་ལས་ཕྱིར་ལྡོག་པར་བྱེད་པ་དང་། གསུམ་པ་ཉན་ཐོས་ཀྱི་རིགས་ཅན་སོ་སོ་ཐར་པ་ལ་སློབ་པ་དག་ལ་དགོས་པ་ཁྱད་པར་ཅན་མེད་པར་དེ་སྤངས་ནས་ཐེག་ཆེན་ལ་སྦྱོར་བ་དང་། བཞི་པ་ཉན་ཐོས་ཀྱི་ཐེག་པས་ཉོན་མོངས་སྤོང་མི་ནུས་པར་རང་ཉིད་འཛིན་ཅིང་གཞན་ཡང་འཛིན་དུ་བཅུག་ནས་དེའི་བཤད་ཉན་འགོག་པ་དང་། ལྔ་པ་རྙེད་བཀུར་གྱི་ཕྱིར་རྙེད་བཀུར་ཅན་གཞན་ལ་ཕྲག་དོག་གིས་བདག་ལ་བསྟོད་ཅིང་གཞན་ལ་སྨོད་པ་དང་། དྲུག་པ་སྟོང་ཉིད་མ་རྟོགས་ཀྱང་རྟོགས་སོ་ཞེས་མི་ཆོས་བླ་མའི་རྫུན་སྨྲས་པ་དང་། བདུན་པ་དགེ་སྦྱོང་དང་རྒྱལ་རིགས་ཕྱེ་ནས་དགེ་སྦྱོང་ལ་ནོར་གྱི་ཆད་པ་གཅོད་དུ་འཇུག་པ་དང་འབྲེལ་བའི་ལྟུང་བ་དང་། བརྒྱད་པ་ཆོས་ལྡན་གྱིས་དགེ་སྦྱོང་ལ་གནོན་པའི་ཁྲིམས་ངན་བཅས་ཏེ་ཞི་གནས་ཀྱིས་མཚན་པའི་རྣལ་འབྱོར་འདོར་བར་བྱེད་པ་དང་། དགེ་སློང་ཡང་དག་འཇོག་གི་ནོར་འཕྲོགས་ནས་ཁ་ཏོན་པ་ལ་སྟེར་བ་རྣམས་ཏེ། བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང་། །ཞེས་པ་ནས། དེ་དག་རྩ་བའི་ལྟུང་བ་སྟེ། སེམས་ཅན་དམྱལ་བ་ཆེན་པོའི་རྒྱུ། །ཞེས་པའི་བར་ཤོ་ལོ་ཀ་ལྔ་དང་རྐང་པ་གཉིས་ཀྱིས་བསྟན་པ་རྣམས་སོ། །དེ་ལྟར་ན་རྟེན་གྱི་སྒོ་ནས་བཅོ་བརྒྱད་དུ་གསུངས་ཀྱང་རྫས་ཀྱི་སྒོ་ནས་བཅུ་བཞིར་ངེས་པའོ། །ཐུན་མོང་དུ་སྨོན་སེམས་གཏང་བ་ནི་རང་དོན་དུ་ཞི་བདེ་དོན་གཉེར་གྱི་བློ་སྐྱེས་ན་ལྟུང་བའི་ནང་ནས་ལྕི་ཤོས་ཡིན་ཏེ། སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས་པས་བཅུ་དགུ་དང་། དེའི་སྟེང་དུ་དཀོན་བརྩེགས་ལས། འཇུག་སེམས་སྤང་ཏེ་དགེ་ལ་མི་སྦྱོར་བ་དང་ཉི་ཤུ་ཡིན་ནོ། །ཞེས་ཀྱང་འབྱུང་ངོ་། །གཉིས་པ་ཡན་ལག་གི་ལྟུང་བ་ནི། རྩ་བར་མ་གཏོགས་པའི་ལུས་དང་ངག་དང་ཡིད་ཀྱི་བསླབ་བྱ་ལས་ཉམས་པ་རྣམས་ཏེ། དང་པོ་ནི། མིག་ཕབ་སྟེ་ལྟ་བར་བྱ་བ་སོགས་བསྒྲུབ་བྱ་དང་། དོན་མེད་རྒྱུག་མཆོང་སོགས་དགག་བྱ་ལས་ཉམས་པའོ། །གཉིས་པ་ནི། ལེགས་པར་འོངས་སོ་ཞེས་བྱ་བ་སོགས་བསྒྲུབ་བྱ་དང་། བྲེ་མོའི་གཏམ་སྨྲ་བ་སོགས་དགག་བྱ་ལས་ཉམས་པའོ། །གསུམ་པ་ནི། བྱམས་སྙིང་རྗེ་དང་དྲན་ཤེས་བག་ཡོད་བརྟེན་པ་སོགས་བསྒྲུབ་བྱ་དང་། ཆགས་སྡང་མི་སྤོང་བ་སོགས་དགག་བྱའི་བསླབ་བྱ་ལས་ཉམས་པ་སྟེ་དབང་པོ་འབྲིང་རྟུལ་གྱི་ཡན་ལག་གི་ཉེས་པ་རྣམས་ཀྱང་དེ་དག་ཏུ་འདུ་པར་བཤད་དོ། །དེ་ཡང་རྩ་ལྟུང་རྣམས་ལ་ཀུན་སློང་ཉོན་མོངས་དྲག་ཞན་སོགས་ཀྱི་དབྱེ་བ་མེད་ཀྱང་རྩ་ལྟུང་དེ་དག་བྱེད་ནས་ཐུན་ཚོད་ལས་འདས་ན་འཇུག་པ་སེམས་བསྐྱེད་ཀྱི་སྡོམ་པ་ནི་གཏོང་ལ། སྨོན་པ་སེམས་བསྐྱེད་ཀྱི་སྡོམ་པ་ནི་ཇི་སྲིད་རྫོགས་བྱང་ལས་བློ་མ་ལོག་པ་དེ་སྲིད་དུ་མི་གཏོང་ངོ་། །དེས་ན་སྨོན་སེམས་བཏང་བ་རྩ་ལྟུང་དང་སྡོམ་པའི་གཏོང་རྒྱུ་གཉིས་ཀར་འདོད་པ་དབུ་མ་པའི་ལུགས་སོ། །རྩ་ལྟུང་བྱུང་ཡང་ཐུན་ཚོད་ལས་མ་འདས་གོང་དུ་འགྱོད་པ་སྐྱེས་ན་སྡོམ་པ་མི་གཏོང་ལ། ཐུན་ཚོད་ནི་ཉིན་ཞག་གཅིག་གི་དྲུག་ཆའི་མཐའོ། །ཉེས་བྱས་ནི་ཉིན་ཞག་གཅིག་འདས་ན་ལྟུང་བར་འགྱུར་རོ། །གཉིས་པ་བསྒྲུབ་པའི་བསླབ་བྱ་ནི། ཇི་སྐད་བཤད་པའི་ལྟུང་བ་རྣམས་སྤོང་བའི་སེམས་པ་ས་བོན་དང་བཅས་པ་ནི་ཉེས་སྤྱོད་སྡོམ་པའི་ཚུལ་ཁྲིམས་དང་། ཕ་རོལ་ཏུ་ཕྱིན་པ་དྲུག་གིས་བསྡུས་པའི་དགེ་ཚོགས་སྒྲུབ་པ་ལ་བསླབ་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་རྣམས་ཀྱི་གནས་སྐབས་དང་མཐར་ཐུག་གི་ཕན་བདེ་སྒྲུབ་པར་འདོད་པའི་སེམས་དཔའ་ས་བོན་དང་བཅས་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཏེ་ཚུལ་ཁྲིམས་གསུམ་པོ་དེ་ལ་ནན་ཏན་དུ་བསླབ་པར་བྱ་སྟེ། ཡུལ་བར་མ་ལས། གང་ཁ་ན་མ་ཐོ་བ་སྡོམ་པའི་སེམས་དང་། དགེ་བའི་ཆོས་སྡུད་པའི་སེམས་དང་། སེམས་ཅན་སྨིན་པར་བྱེད་པའི་སེམས་ཏེ། སེམས་བསྐྱེད་པ་འདི་གསུམ་ལ་ནན་ཏན་དུ་བྱའོ། །ཞེས་དང་། བྱང་ས་ལས། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་ནི་གསུམ་པོ་འདི་དག་ཙམ་ཁོ་ནར་ཟད་དེ། ཞེས་བྱང་སེམས་ཀྱི་བསླབ་བྱ་ཐམས་ཅད་དེ་གསུམ་དུ་འདུས་པས། དེའི་སྤང་བྱ་རྣམས་སྤོང་ཞིང་། བསྒྲུབ་བྱ་རྣམས་ལ་རྩེ་གཅིག་ཏུ་བསླབ་པར་བྱའོ། །གཉིས་པ་དེ་ཉིད་བསྲུང་བ་ལ། ཉེས་དམིགས་བསམ་པ་དང་། བསྲུང་ཚུལ་དངོས་སོ། །དང་པོ་ལ་ཁས་བླངས་ཉམས་པ། མིང་དོན་ཤོར་བ། ངན་སོང་དུ་ལྟུང་བའོ། །དང་པོ་ནི། སྟོན་པ་སངས་རྒྱས་བསླུས་པས་སངས་རྒྱས་མི་མཉེས། ཡུལ་སེམས་ཅན་བསླུས་པས་སེམས་ཅན་མི་མགུ། རང་ཆེད་དུ་བསླུས་པས་རང་དོན་ཉམས་ཤིང་ལྷ་དང་བཅས་པའི་འཇིག་རྟེན་གྱིས་སྨད་པ་སྟེ། བློ་གྲོས་རྒྱ་མཚོའི་མདོར། བྱང་ཆུབ་སེམས་དཔའ་དེ་ལྟར་སེམས་བསྐྱེད་ནས་ཇི་སྐད་སྨྲས་པ་བཞིན་མི་བྱེད་ན་ལྷ་དང་བཅས་པའི་འཇིག་རྟེན་བསླུས་པ་ཡིན་ནོ། །ཞེས་སོགས་གསུངས་པ་དང་། གཉིས་པ་ནི། རྒྱལ་པོ་རྒྱལ་སྲིད་ཤོར་བ་ལྟར་ཚེ་འདིར་བཀྲ་མི་ཤིས་པ་སྣ་ཚོགས་འབྱུང་ཞིང་། འཆི་ཁར་མྱ་ངན་གྱིས་གདུང་བར་མདོ་ལས་གསུངས་སོ། །གསུམ་པ་ནི། ཕྱི་མར་ངན་སོང་དུ་འགྲོ་ཞིང་དེ་ལས་ཀྱང་ཐར་བར་དཀའ་བ་དང་། རྩ་ལྟུང་གི་ཉེས་པས་ནི་སྔོན་དུ་བསྐྱེད་པའི་བྱང་སེམས་ཀྱི་དགེ་རྩ་ཐམས་ཅད་འཇིག་པ་དང་། དཀོན་མཆོག་ལྷ་དང་བཅས་པ་བསླུས་པས་སྤྱིར་ངན་འགྲོ་དང་། ཁྱད་པར་དམྱལ་བར་སྐྱེ་བར་གསུངས་ཏེ། སེམས་ཅན་དམྱལ་བ་ཆེན་པོའི་རྒྱུ། །ཞེས་གསུངས་པ་ལྟར་རོ། །གཉིས་པ་ནི། དེ་ལྟ་བུའི་ཉེས་དམིགས་ཅན་གྱི་ལྟུང་བ་དེ་འབྱུང་བའི་རྒྱུ་ནི། མི་ཤེས་པ་དང་། བག་མེད་པ་དང་། ཉོན་མོངས་པ་མང་བ་དང་། མ་གུས་པའོ། །དེ་ལ་མི་ཤེས་པ་ནི་བསླབ་པ་ལ་འབད་ཀྱང་ལྟུང་བའི་མཚན་ཉིད་མི་ཤེས་ལྟུང་བ་འབྱུང་བ་སྟེ། དེའི་གཉེན་པོར་བསླབ་བྱ་རྣམས་ཉན་ནས་ཤེས་པར་བྱའོ། །བག་མེད་པ་ནི་ལྟུང་བ་ཤེས་ཀྱང་ཉེས་དམིགས་མ་མཐོང་བའམ། མཐོང་ཡང་དྲན་ཤེས་མེད་པས་ལྟུང་བ་འབྱུང་བ་སྟེ། དེའི་གཉེན་པོར་བླང་དོར་གྱི་དམིགས་རྣམ་མ་བརྗེད་པའི་དྲན་པ་དང་སྒོ་གསུམ་ལ་སོ་སོར་བརྟག་ཅིང་ལེགས་ཉེས་གང་ལ་འཇུག་ལྡོག་ཤེས་པར་བྱེད་པའི་ཤེས་བཞིན་དང་། བདག་གམ་ཆོས་ཀྱི་དབང་དུ་བྱས་ནས་ཉེས་པ་ལ་འཛེམ་པའི་ངོ་ཚ་ཤེས་པ་དང་། གཞན་གྱིས་སྨད་དུ་འོང་སྙམ་ནས་འཛེམ་པའི་ཁྲེལ་ཡོད་དང་ཉེས་སྤྱོད་ཀྱི་རྣམ་སྨིན་ལ་འཇིགས་ནས་བག་ཡོད་ལ་བསླབ་པར་བྱའོ། །ཉོན་མོངས་པ་མང་བ་ནི། འཛེམ་བག་ཅུང་ཟད་སྐྱེས་ཀྱང་དུག་གསུམ་ཤས་ཆེ་བས་ཉོན་མོངས་པ་ལས་ལྟུང་བ་འབྱུང་བ་སྟེ། དེའི་གཉེན་པོར་རང་རྒྱུད་ལ་བརྟགས་ཏེ་ཉོན་མོངས་གང་ཤས་ཆེ་བ་ལ་གཉེན་པོ་འབད་ནས་བརྟེན་ཅིང་འདི་ཙམ་འགལ་ཡང་ཉེས་པ་ཆུང་ངོ་སྙམ་པའི་བག་ཡངས་ཀྱི་ཚོད་ཡོད་མི་བྱའོ། །མ་གུས་པ་ནི། ལྟུང་བ་སོགས་ཤེས་ཀྱང་དམན་པ་ལ་མོས་ནསབསླབ་པ་ལ་མི་འཇུག་པས་ལྟུང་བ་འབྱུང་བ་སྟེ། དེའི་གཉེན་པོར་སྟོན་པ་དང་། དེའི་བཅས་པ་རྣམས་ལ་གུས་པར་བྱའོ། །དེ་ཡང་མི་ཤེས་པ་དང་། བག་མེད་པས་ལྟུང་བ་ཆུང་ངུ་། ཉོན་མོངས་པ་མང་བ་ལ་འབྲིང་། མ་གུས་པ་ལ་ཆེན་པོ་འབྱུང་ཞིང་ཞིང་བསམ་གྱི་ཁྱད་པར་གྱི་ཅི་རིགས་བར་འགྱུར་བའང་ཡོད་དོ། །དེས་ན་བླང་དོར་གྱི་གནས་རྣམས་ལ་སྲོག་བརྡོས་བྱས་ནས་བསླབ་པ་ལ་ནན་ཏན་དུ་བྱ་སྟེ། ཏིང་འཛིན་རྒྱལ་པོ་ལས། ཁྱིམ་པ་སྐྱ་བོའི་གོས་གྱོན་ལ། །ངས་ནི་བསླབ་པ་གང་བཤད་པ། །དེ་ཚེ་དགེ་སློང་དེ་དག་ལ། །བསླབ་པ་དེ་ཡང་མེད་པར་འགྱུར། །ཞེས་དགེ་བསྙེན་ལ་གསུངས་པའི་བསླབ་གཞི་ལྔ་པོ་དགེ་སློང་གིས་ཀྱང་བསྲུང་བ་མེད་པའི་དུས་འདིར་བསླབ་པ་ལ་བརྩོན་པ་ནི་འབྲས་བུ་ལྷག་པར་ཡང་ཆེ་བ་སྟེ། དེ་ཉིད་ལས། གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་དགག་པར་གྱུར་པའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་གསུངས་སོ། །གསུམ་པ་ཉམས་པ་ཕྱིར་འཆོས་པ་ལ། ཉེས་པ་བཤགས་པའི་ཚུལ་དང་། སྡོམ་པ་གཏང་ནས་སླར་བླང་བའི་ཚུལ་ལོ། །དང་པོ་ལ་ཐེག་ཆེན་སྤྱིའི་ལུགས་དང་། དབུ་མ་རང་ལུགས་ཀྱི་བཤགས་པའོ། །དང་པོ་ནི། བཤགས་བྱའི་ཡུལ་ལྟུང་བས་མ་གོས་པའི་བྱང་སེམས་སམ། རྟེན་གྱི་དྲུང་དུ་སྔར་བྱས་ཀྱི་ཉེས་པ་ལ་འགྱོད་སེམས་དང་། ཕྱིན་ཆད་མི་བྱ་བའི་སྡོམ་སེམས་དང་ལྡན་པའི་སྒོ་ནས་བཏུད་དེ། དགོངས་གསོལ་བྱས་ནས། བདག་བྱང་ཆུབ་སེམས་དཔའ་འདི་ཞེས་བགྱི་བ་ལ་ཉེས་པ་འདི་ལྟ་བུ་ཞིག་བྱུང་སྟེ། བདག་བྱང་ཆུབ་སེམས་དཔའ་མིང་འདི་ཞེས་བགྱི་བའི་ཉེས་པ་དེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་མཐོལ་ཞིང་བཤགས་སོ། །མཐོལ་ཞིང་བཤམས་ན་བདག་བདེ་བ་ལ་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་རོ། །ཞེས་ལན་གསུམ་དང་ཐབས་ལེགས་བྱའོ། །གཉིས་པ་ནི། ངན་སོང་དུ་ལྟུང་བས་འཇིགས་ཏེ་འགྱོད་པ་ཆེན་པོས་འཕགས་པ་ནམ་མཁའི་སྙིང་པོ་མཐོང་བར་ནུས་ན་དེ་ལ་དངོས་སུ་བཤགས་པ་དང་། དེ་ལྟར་མི་ནུས་ན་ཐོ་རངས་ལངས་ལ་གཙང་སྦྲ་དང་ལྡན་པས་ཤར་དུ་ཕྱོགས་ཏེ་མཆོད་ཅིང་ལྷའི་བུ་སྐྱ་རེངས་ལ་ཕྲིན་གསོལ་ནས། རྨི་ལམ་དུ་དེའི་མདུན་དུ་ལྟུང་བ་བཤགས་པ་དང་། ཕྱག་བྱ་བ་དང་། གཟུངས་སྔགས་བཟླ་བ་སོགས་ཀྱི་སྒོ་ནས་འཕགས་པ་དེ་མངོན་སུམ་དུ་མཐོང་བའམ། སྡིག་པ་དག་པའི་རྟགས་མ་བྱུང་གི་བར་དུ་བཤགས་པར་བྱ་སྟེ། བསླབ་བཏུས་སུ། རྨི་ལམ་འཕགས་པ་ནམ་སྙིང་པོའི། །མདུན་དུ་འདུག་སྟེ་བཤགས་པར་བྱ། །ཞེས་དང་། སྤྱོད་འཇུག་ལས། ཉིན་དང་མཚམས་མོ་ལན་གསུམ་དུ། །ཕུང་པོ་གསུམ་པ་འདོན་བྱ་ཞིང་། །རྒྱལ་དང་བྱང་ཆུབ་སེམས་བརྟེན་ནས། །ལྟུང་བའི་ལྷག་མ་དེས་ཞི་བྱ། །ཞེས་དང་། ཆོས་བཞི་བསྟན་པའི་མདོ་ལས་ཀྱང་། བྱང་ཆུབ་སེམས་དཔའི་སྡིག་པ་ཐམས་ཅད་སྟོབས་བཞིས་འདག་པར་གསུངས་པས་སྐུ་གཟུགས་ལ་སོགས་པའི་སྤྱན་སྔར་ཅི་འབྱོར་པའི་མཆོད་པ་དང་བཅས་པས་སམ། དཀོན་མཆོག་གསུམ་ལ་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ཡོངས་སུ་མི་གཏོང་བ་ནི་རྟེན་གྱི་སྟོབས་དང་། སྔར་བྱས་ཀྱི་ཉེས་པ་ལ་དུག་འཐུང་བ་ལྟ་བུའི་འགྱོད་པ་དྲག་པོ་སྐྱེས་པ་ནི་རྣམ་པར་སུན་འབྱིན་པའི་སྟོབས་དང་། ལྟུང་བའི་གཉེན་པོར་སྐུ་གཟུགས་བཞེངས་པ་དང་ཕྱག་མཆོད་བསྐོར་བ་བཟླས་བརྗོད་དང་ཏིང་ངེ་འཛིན་དང་སྟོང་ཉིད་སྒོམ་པ་སོགས་དགེ་བ་ལ་བརྩོན་པ་ནི་གཉེན་པོ་ཀུན་ཏུ་སྤྱོད་པའི་སྟོབས་དང་། ཕྱིན་ཆད་སྲོག་ལ་བབ་ཀྱང་སྡིག་པའི་ལས་འདི་དག་མི་བྱའོ་སྙམ་དུ་དམ་བཅའ་བརྟན་པར་བྱེད་པ་ཉེས་པ་ལས་ལྡོག་པའི་སྟོབས་ཏེ་བཞི་ཡིན་ནོ། །གཉིས་པ་སྡོམ་པ་གཏང་ནས་བླང་བའི་ཚུལ་ནི། རྩ་ལྟུང་བྱུང་ནས་ཐུན་ཚོད་ལས་འདས་ན་སྡོམ་པ་གཏོང་བས་ལེན་དགོས་ལ། ལེན་ཡུལ་དགེ་བའི་བཤེས་གཉེན་མ་རྙེད་ན་རྟེན་གྱི་དྲུང་དུ་སྔར་བཞིན་བླངས་པས་སྐྱེ་བ་ཡིན་ནོ། །མདོར་ན་དབུ་མ་ལུགས་ཀྱི་བསླབ་བྱ་ནི། རང་གི་ལུས་ལོངས་སྤྱོད་དགེ་ཚོགས་དང་བཅས་པ་སེམས་ཅན་ཀུན་ལ་གཏང་བ་དང་། དེ་དག་མི་ཉམས་པར་བསྲུང་བ་དང་། དྲི་མ་དག་པར་བྱ་བ་དང་། གོང་ནས་གོང་དུ་སྤེལ་བར་བྱ་བ་རྣམས་ཡིན་ཏེ། བསླབ་བཏུས་ལས། གང་གིས་ལྟུང་བར་མི་འགྱུར་བའི། །གནད་ཀྱི་གནད་རྣམས་འདིར་རིགས་བྱ། །གནད་ཀྱི་གནད་དེ་གང་ཞེ་ན། །བདག་གི་ལུས་དང་ལོངས་སྤྱོད་དང་། །དགེ་བ་དུས་གསུམ་སྐྱེས་པ་རྣམས། །སེམས་ཅན་རྣམས་ལ་གཏང་བ་དང་། །དེ་བསྲུང་དགེ་བ་སྤེལ་བའོ། །ཞེས་དང་། དེ་ཐམས་ཅད་ཀྱི་རྩ་བ་ཡང་སེམས་བསྲུང་བ་ལ་ཐུག་སྟེ། སྤྱོད་འཇུག་ལས། བསླབ་པ་བསྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་བསྲུང་སྟེ། །ཞེས་གསུངས་ཤིང་། སེམས་བསྲུང་བའི་ཐབས་ཀྱང་དེ་ཉིད་ལས། །སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དང་། །སྲོག་ལ་བབ་ཀྱང་སྲུངས་ཤིག་ཅེས། །དེ་ལྟར་བདག་ནི་ཐལ་མོ་སྦྱོར། །ཞེས་དང་། རྔ་སྒྲའི་ཚིགས་བཅད་ལས་ཀྱང་། །བདག་གི་ནོར་ནི་གཏང་ལ་ལུས་བསྲུང་ངོ་། །ནོར་དང་ལུས་ཀྱང་གཏང་ལ་སྲོག་བསྲུང་ངོ་། །ནོར་དང་ལུས་དང་དེ་བཞིན་སྲོག་རྣམས་ཀྱང་། །ཐམས་ཅད་གཏང་ལ་འདིར་ནི་ཆོས་བསྲུང་ངོ་། །ཞེས་གསུངས་པ་ལྟར་བསླབ་པ་ལ་འབད་པར་བྱའོ། །བཞི་པ་རང་བཞིན་གཏན་ལ་དབབ་པ་ནི། སེམས་བསྐྱེད་ཀྱི་ངོ་བོ། །དབྱེ་བ། སོ་སོའི་ས་མཚམས། སེམས་བསྐྱེད་ཀྱི་རྒྱུ། ཕན་ཡོན། ཉེས་དམིགས་རྣམས་ལས། དང་པོ་ནི། གཞན་དོན་དུ་སངས་རྒྱས་ཐོབ་པར་འདོད་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང་། མདོ་སྡེ་རྒྱན་ལས། དོན་གཉིས་ལྡན་པའི་སེམས་འབྱུང་བ། །ཞེས་གསུངས་པ་བཞིན་ནོ། །གཉིས་པ་དབྱེ་བ་ནི། གཞན་དོན་དུ་བྱང་ཆུབ་ཐོབ་པར་འདོད་པ་སྨོན་པ་དང་། གཞན་དོན་དུ་བྱང་ཆུབ་ཏུ་འགྲོ་བཞིན་པ་ནི་འཇུག་པ་སྟེ། བསམ་པས་འགྲོ་འདོད་དང་སྦྱོར་བས་འགྲོ་བཞིན་པ་ལྟ་བུར་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་དང་། ཀུན་རྫོབ་དང་དོན་དམ་པའི་སྒོ་ནས་ཀྱང་རྣམ་པ་གཉིས་ཏེ། མྱང་འདས་ལས། ཀུན་རྫོབ་དོན་དམ་དབྱེ་བ་ཡི། །བྱང་ཆུབ་སེམས་དེ་རྣམ་པ་གཉིས། །ཞེས་པས། ཕྱི་རོལ་སེམས་ཅན་ལ་དམིགས་ཏེ་སོ་སྐྱེ་ལ་གཙོ་བོར་སྐྱེ་བ་ཀུན་རྫོབ་སེམས་བསྐྱེད་དང་། ནང་སེམས་ཉིད་ལ་དམིགས་ཏེ་གཙོ་བོར་འཕགས་རྒྱུད་ལ་སྐྱེ་བ་དོན་དམ་སེམས་བསྐྱེད་ཡིན་ནོ། །དེས་ན་སྨོན་པ་བྱང་ཆུབ་ཀྱི་སེམས་ནི་བྱང་ཆུབ་ཏུ་སྨོན་པ་ཙམ་ལས་ཀྱང་སྐྱེ་ཞིང་། འཇུག་པའི་སེམས་བསྐྱེད་ནི་ཆོ་ག་ལས་སྐྱེས་པའི་སྡོམ་པ་ཡིན་ཏེ། དེ་གཉིས་ཀའང་ཀུན་རྫོབ་སེམས་བསྐྱེད་དུ་འདུ་ལ། དོན་དམ་སེམས་བསྐྱེད་ནི་དེའི་ཆོས་ཉིད་གོམས་པའི་སྟོབས་ལས་སོ། །གསུམ་པ་ས་མཚམས་ལ། སྨོན་སེམས་ནི། དང་པོ་སེམས་བསྐྱེེད་མ་ཐག་ནས་སྡོམ་པ་མ་བཟུང་བར་གྱི་ཚོགས་ལམ་ཆུང་ངུ་ནས་ཡོད་ལ། འཇུག་སེམས་ནི། འཇུག་སྡོམ་བཟུང་ནས་རྒྱུན་མཐའ་བར་ན་ཡོད་དེ། འགྲོ་བར་འདོད་དང་འགྲོ་བ་ཡི། །ཞེས་སོགས་ཀྱིས་འགྲུབ་ཅིང་། གལ་ཏེ་འཇུག་སེམས་འཕགས་ལམ་ཁོ་ནར་ཡོད་དམ་ཞེ་ན་མ་ངེས་ཏེ། སྡོམ་པའི་རྟེན་སོ་སྐྱེའི་རྟེན་ཅན་དུ་གྲུབ་པ་དང་། གཞན་དུ་འཇུག་སྡོམ་བླངས་ནས་རྩ་ལྟུང་གཅོད་པ་མི་སྲིད་པར་འགྱུར་བའི་ཕྱིར་རོ། །བཞི་པ་སེམས་བསྐྱེད་ཀྱི་རྒྱུ་ནི། སངས་རྒྱས་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་ཆུབ་སེམས་ཀྱི་ཕན་ཡོན་ཤེས་ནས་ཐོབ་པར་འདོད་པ་སྟེ་གསུམ་ལས་སྐྱེ་བར་མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བརྟན་པའི་སེམས་བསྐྱེད་བཤད། །ཅེས་པའི་གྲོགས་དགེ་བའི་བཤེས་གཉེན་ལ་བརྟེན་ཅིང་ཐོས་པ་བྱས་པ་ལས་སྨོན་པ་སེམས་བསྐྱེད་བརྟན་པའི་རྒྱུ་དང་པོར་འབྱུང་ཞིང་། རང་གིས་དགེ་བ་གོམས་པ་དང་། རྒྱུ་རིགས་སད་པ་དང་། རྩ་བ་སྙིང་རྗེ་སྐྱེས་པ་ལས། འཇུག་པ་སེམས་བསྐྱེད་བརྟན་པོར་སྐྱེ་བའི་རྒྱུར་གསུངས་སོ། །ལྔ་པ་སེམས་བསྐྱེད་པའི་ཕན་ཡོན་ནི། སྨོན་པ་སེམས་བསྐྱེད་ཀྱིས་ཉན་རང་གི་སེམས་བསྐྱེད་པ་ལ་སོགས་པའི་བསོད་ནམས་ཐམས་ཅད་ཟིལ་གྱིས་ནོན་ཅིང་། འཇུག་སེམས་ཀྱི་རྩ་ལྟུང་མ་བྱུང་ན་གཉིད་འཐུག་པོ་ལོག་པའམ། བག་མེད་པར་གྱུར་ཀྱང་བསོད་ནམས་རྒྱུན་མི་ཆད་པར་འབྱུང་བ་སྟེ། སྤྱོད་འཇུག་ལས། དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་སོགས་མཐའ་ཡས་པར་གསུངས་པ་ལས་ཆ་ཤས་ཙམ་སྔར་བརྗོད་ཟིན་ཏོ། །དྲུག་པ་སེམས་མ་བསྐྱེད་པའི་ཉེས་དམིགས་ནི། གཙོ་བོར་འཁོར་བ་དང་ངན་སོང་དུ་ལྟུང་བ་རྒྱུན་མི་ཆད་ཅིང་། ཇི་ལྟར་ཆོས་ལ་འབད་ཀྱང་ཉན་རང་དུ་གོལ་བ་དང་། དམྱལ་བར་ལྟུང་བ་བྱང་ཆུབ་ཀྱི་གཏན་གེགས་མ་ཡིན་ཀྱང་། ཉན་རང་དགྲ་བཅོམ་དུ་ལྟུང་བ་ནི་གྲངས་མེད་པའི་བསྐལ་བར་བླ་ན་མེད་པ་རྫོགས་བྱང་གི་གེགས་ཡིན་པའི་ཕྱིར་རོ། །བདུན་པ་ཆོ་གའི་ཁྱད་པར་ནི། མགོན་པོ་བྱམས་པ་ལས་བརྒྱུད་པ་སེམས་ཙམ་ལུགས་སུ་གྲགས་པ་དང་། འཕགས་པ་འཇམ་དཔལ་ལས་བརྒྱུད་པ་དབུ་མ་ལུགས་སུ་གྲགས་པ་སྟེ། དེ་དག་ཀྱང་བླང་བྱའི་ཡུལ་གྱི་ཁྱད་པར། ལེན་པ་པོ་གང་ཟག་གི་ཁྱད་པར། ལེན་བྱེད་ཆོ་གའི་ཁྱད་པར། མི་ཉམས་པར་བསྲུང་བའི་ཁྱད་པར་རྣམས་ཀྱིས་བསྟན་པ་སྟེ། དེ་དག་ནི་ཐེག་པ་ཆེན་པོའི་མདོ་སྡེ་རྣམས་དང་བསྟན་བཅོམ་རྣམས་ལས་ཤེས་པར་བྱ་བ་ཡིན་ནོ། །འདིར་ནི་དབུ་མའི་ལུགས་སུ་བྱས་པ་སྟེ། དེ་ལ་ཡང་རྒྱས་འབྲིང་བསྡུས་གསུམ་ལས། རྒྱས་པ་ནི། སྔར་བཤད་མ་ཐག་པའི་ཆོ་ག་ཇི་ལྟ་བ་ཉིད་ཀྱི་འགོར་རང་བཞིན་གཏན་ལ་དབབ་པའི་སྐབས་སུ་བརྗོད་པའི་སེམས་བསྐྱེད་ཀྱི་ངོ་བོ་དང་དབྱེ་བ་ལ་སོགས་པའང་མཚམས་སྦྱོར་དུ་སྦྲེལ་ཞིང་། ཐོབ་པ་མི་ཉམས་པར་བསྲུང་ཚུལ་ཡན་ཆད་ཚང་བར་བཤད་ནས་མཐར་དགེ་བ་བསྔོ་བ་རྣམས་བྱའོ། །འབྲིང་པོ་ནི། སྦྱོར་བ་གསོལ་བཏབ་སྐྱབས་འགྲོ་ཡན་ལག་བདུན་པ་རྣམས་བྱས། དངོས་གཞི་སྔར་དང་འདྲ། རྗེས་གཞན་དགའ་བ་བསྐྱེད་པའི་བར་བྱས་ནས་བསྔོ་བ་བྱའོ། །བསྡུལ་པ་ནི། ཡན་ལག་བདུན་པ་བྱས་ནས། བྱང་ཆུབ་སྙིང་པོར་མཆིས་ཀྱི་བར། །སོགས་དང་། ཇི་ལྟར་སྔོན་གྱི་བདེ་གཤེགས་ཀྱིས། །སོགས་སྔར་ལྟར་བརྗོད་པའི་རྗེས་སུ་རང་གཞན་དགའ་བ་བསྐྱེད་པ་སྔར་ལྟར་བྱས་པས་ཀྱང་འགྲུབ་བོ། །དེ་དག་གང་གི་ཚེ་ན་ཡང་མཐར། བསོད་ནམས་འདི་ཡིས་ཐམས་ཅད་གཟིགས་པ་ཉིད། །སོགས་དང་། བྱང་ཆུབ་སེམས་ཉིད་རིན་པོ་ཆེ། །སོགས་དང་། སེམས་ཅན་ཐམས་ཅད་བདེ་དང་ལྡན་གྱུར་ཅིག །ཞེས་སོགས་བརྗོད་པར་བྱའོ། །སྲིད་འདིར་ཕྱིན་ཅི་ལོག་བློས་རྟག་འཁྱམས་འགྲོར། །ཚད་མེད་སྙིང་རྗེས་དྲངས་ནས་བྱང་ཆུབ་ཏུ། །སེམས་བསྐྱེད་སྡོམ་པའི་ཆོ་ག་བཀླག་ཆོག་ཏུ། །བཀོད་འདི་འགྲོ་ཀུན་བྱང་ཆུབ་ཐོབ་རྒྱུར་སྔོ། །ཐེག་པ་ཆེན་པོ་དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག་རྒྱལ་སྲས་ལམ་བཟང་ཞེས་བྱ་བ་འདི་ནི། རང་ལུགས་སུ་སྔོན་ཆད་སྡོམ་པ་འབོགས་ཆོག་ལམ་རིམ་རྒྱས་པ་རྣམས་ནས་མཛུབ་ཚུགས་སུ་བསྡུ་བ་ལས། བཀླག་ཆོག་ཏུ་བཀོད་པ་མི་འདུག་པས་རྗེས་འཇུག་རྣམས་ལ་ཕན་འདོད་ཀྱིས་སྔོན་ནས་འབྲི་བར་བསམ་པ་ལས། ཉེ་ཆར་དད་འདུན་གྱི་ནོར་ཅན་ཨོ་རྒྱན་རྣམ་གྲོལ་གྱི་བསྐུལ་བ་དང་། རྨི་ལམ་དུ་དགེ་བའི་མཚན་མའང་ཅུང་ཟད་མཐོང་བས་རྐྱེན་བྱས་ཏེ། བྱང་ཆུབ་སེམས་དཔའི་མིང་ཙམ་འཛིན་པ་འགྱུར་མེད་རྡོ་རྗེས་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོར་བྲིས་པའོ། །སྭ་སྟི། ཟབ་མོ་ལྟ་བའི་ཆུ་གཏེར་བསྲུབས་པ་ལས། །རྒྱལ་སྲས་ལམ་བཟང་རྨད་བྱུང་བྱང་སྡོམ་གྱི། །ཆོ་ག་གཅིག་ལས་དུ་མའི་ཆར་འབེབས་སྤྲིན། །སྨིན་གྲོལ་ཆོས་སྒྲ་སྒྲོག་པའི་མཁའ་ལས་སྤྲོས།། །། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ་བཞུགས་སོ། །རྒྱ་གར་སྐད་དུ། ཨཱརྱ་པྲཛྙཱ་པ་ར་མི་ཏཱ་སཉྩ་ཡ་གཱ་ཐཱ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ནས་ཡང་བཅོམ་ལྡན་འདས་ཀྱིས་འཁོར་བཞི་པོ་དེ་དག་ཡང་དག་པར་རབ་ཏུ་དགའ་བར་མཛད་པའི་ཕྱིར། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྟོན་ཅིང་། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགའ་དང་གུས་དང་དད་པའི་མཆོག་ནི་ཉེར་བཞག་སྟེ། །སྒྲིབ་པ་ཉོན་མོངས་བསལ་ནས་དྲི་མ་ལས་འདས་པ། །འགྲོ་དོན་མངོན་ཞུགས་ངེས་པའི་ཤེས་རབ་ཕ་རོལ་ཕྱིན། །གང་ལ་དཔའ་རྣམས་སྤྱོད་པ་དེ་ནི་མཉན་པར་གྱིས། །འཛམ་བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང་། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །མ་དྲོས་གནས་པའི་ཀླུ་དབང་ཀླུ་བདག་རྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིགས་པ་དག་དང་བདེན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པ་སྐྱེས་བུའི་མཐུ། །ཅི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་པས་མངོན་བསླབས་ཤིང་། །མངོན་སུམ་བྱས་ནས་བསླབས་པ་ཇི་བཞིན་སྟོན་བྱེད་དེ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །གང་ལ་ཤེས་རབ་ཕ་རོལ་ཕྱིན་མཆོག་མི་དམིགས་ཤིང་། །བྱང་ཆུབ་སེམས་དཔའ་མི་དམིགས་བྱང་ཆུབ་སེམས་མི་དམིགས། །དེ་སྐད་ཐོས་ནས་རྨོངས་པ་མེད་ཅིང་མི་སྐྲག་པ། །བྱང་ཆུབ་སེམས་དཔའ་དེ་ནི་བདེ་གཤེགས་ཤེས་རབ་སྤྱོད། །གཟུགས་མེད་ཚོར་བ་མེད་ཅིང་འདུ་ཤེས་སེམས་པ་མེད། །དེ་ལ་རྣམ་ཤེས་གནས་ནི་རྡུལ་ཙམ་ཡོད་པ་མིན། །དེ་ཆོས་ཀུན་ལ་མི་གནས་གནས་པ་མེད་པར་སྤྱོད། །ཡོངས་སུ་གཟུང་མེད་བདེ་གཤེགས་རྣམས་ཀྱི་བྱང་ཆུབ་འཐོབ། །ཇི་ལྟར་ཀུན་ཏུ་རྒྱུ་བ་ཕྲེང་ཅན་ཤེས་པ་ཡིས། །དམིགས་མེད་ཕུང་པོ་རྣམ་པར་འཇིག་པ་འབྱུང་བ་ལྟར། །བྱང་ཆུབ་སེམས་དཔའ་གང་ཞིག་དེ་ལྟར་ཆོས་ཤེས་པ། །མྱ་ངན་འདས་ལ་མི་རེག་དེ་ནི་ཤེས་རབ་གནས། །ཡང་འདི་ཤེས་རབ་འདི་ནི་གང་ཡིན་སུ་ཡི་ཡིན། །གང་ལས་ཡིན་ཞེས་ཆོས་འདི་ཐམས་ཅད་སྟོང་པར་རྟོགས། །ཉེ་བར་བརྟགས་ནས་ཞུམ་པ་མེད་ཅིང་སྐྲག་མེད་པ། །བྱང་ཆུབ་སེམས་དཔའ་དེ་ནི་བྱང་ཆུབ་ཉེ་བ་ཡིན། །གལ་ཏེ་མི་ཤེས་བཞིན་དུ་གཟུགས་སུ་འདུ་ཤེས་ཤིང་། །ཚོར་བ་སེམས་པ་རྣམ་ཤེས་ཕུང་པོར་སྤྱོད་བྱེད་ན། །ཕུང་འདི་སྟོང་ཞེས་རྟོགས་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །གང་ཞིག་གཟུགས་མིན་ཚོར་མིན་འདུ་ཤེས་སེམས་པ་མིན། །རྣམ་པར་ཤེས་ལ་མི་སྤྱོད་གནས་པ་མེད་པར་སྤྱོད། །དེ་ནི་སྤྱོད་ཅེས་བྱ་བར་མི་དམིགས་ཤེས་རབ་བརྟན། །སྐྱེ་མེད་བློ་ལྡན་ཏིང་འཛིན་ཞི་བ་མཆོག་ལ་རེག །བྱང་ཆུབ་སེམས་གང་དེ་ལྟར་འདིར་བདག་ཞིར་གནས་པ། །དེ་ནི་སྔོན་གྱི་དེ་བཞིན་གཤེགས་པས་ལུང་བསྟན་ཡིན། །བདག་ནི་མཉམ་པར་གཞག་ཅེའམ་ལངས་ཞེས་རློམ་སེམས་མེད། །ཅི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། །དེ་ལྟར་སྤྱོད་ན་བདེ་གཤེགས་རྣམས་ཀྱི་ཤེས་རབ་སྤྱོད། །དེས་ནི་སྤྱོད་མེད་སྤྱོད་པ་ཡིན་པར་རབ་ཤེས་ཕྱིར། །ཆོས་གང་སྤྱོད་པ་དེ་ཡང་དམིགས་པར་མི་འགྱུར་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེར་བརྟགས་ཡོད་དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །གང་འདིར་ཕུང་པོ་ལྔ་དག་སྒྱུ་མ་འདྲར་ཤེས་ཤིང་། །སྒྱུ་མ་ཞན་དང་ཕུང་པོ་གཞན་དུ་མི་བྱེད་ལ། །སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །དགེ་བའི་བཤེས་དང་ལྡན་ཞིང་ལྷག་མཐོང་ལྡན་གྱུར་པ། །རྒྱལ་བ་རྣམས་ཀྱི་ཡུམ་ཐོས་སྐྲག་པར་ཡོངས་མི་འགྱུར། །གང་ཞིག་སྡིག་པའི་གྲོགས་ལྡན་གཞན་གྱི་དྲིང་འཇོག་པ། །དེ་ནི་སྣོད་སོ་མ་བཏང་ཆུས་རེག་ཞིག་པ་བཞིན། །ཅི་ཕྱིར་འདི་ནི་བྱང་ཆུབ་སེམས་དཔའ་བྱ་ཞེ་ན། །ཆགས་པ་གཅོད་བྱེད་ཀུན་ལ་ཆགས་པ་ཟད་པར་འདོད། །རྒྱལ་བ་རྣམས་ཀྱི་བྱང་ཆུབ་ཆགས་མེད་གྱུར་ལ་རེག །དེས་ན་འདི་ནི་བྱང་ཆུབ་སེམས་དཔའི་མིང་ཐོབ་བོ། །ཅི་ཕྱིར་དེ་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང་། །སེམས་ཅན་ཁམས་ཀྱི་ལྟ་རྣམས་ཆེན་པོ་གཅོད་པ་སྟེ། །དེ་ཕྱིར་སེམས་དཔའ་ཆེན་པོ་ཞེས་ནི་རབ་བརྗོད་དོ། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང་། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང་། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་རབ་ཏུ་བརྗོད། །དཔེར་ན་སྒྱུ་མ་མཁན་གྱིས་བཞི་མདོར་སྤྲུལ་བྱས་ཏེ། །སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་པའོ། །བསད་བྱ་དེ་དག་ཅི་འདྲ་དེ་ལྟར་བྱང་ཆུབ་སེམས། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །གཟུགས་དང་འདུ་ཤེས་ཚོར་བ་དང་ནི་སེམས་པ་དང་། །རྣམ་པར་ཤེས་པ་མ་བཅིངས་མ་གྲོལ་ཡོད་པ་མིན། །དེ་ལྟར་བྱང་ཆུབ་ལ་འཇུག་བཞུམ་པའི་སེམས་མེད་པ། །འདི་ནི་གང་ཟག་དམ་པ་རྣམས་ཀྱི་གོ་ཆ་མཆོག །ཅི་ཕྱིར་འདི་ནི་བྱང་ཆུབ་ཐེག་ཆེན་བྱ་ཞེ་ན། །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །གང་ཞིག་ཞོན་ནས་ཕྱོགས་སུ་འགྲོ་བ་དམིགས་སུ་མེད། །མྱ་ངན་འདས་པར་འགྲོ་བར་གསུངས་པ་འགྲོ་མི་དམིགས། །དཔེར་ན་མི་ཤི་དེ་ཡི་འགྲོ་རྒྱུ་མེད་པ་བཞིན། །རྒྱུ་དེས་དེ་ནི་མྱ་ངན་འདས་ཞེས་རབ་ཏུ་བརྗོད། །བྱང་ཆུབ་སེམས་དཔའ་སྔོན་གྱི་མཐའ་དང་ཕྱི་མཐའ་དང་། །ད་ལྟར་བྱུང་བར་མི་དམིགས་དུས་གསུམ་དག་པ་སྟེ། །གང་དག་དེ་ནི་འདུས་མ་བྱས་ཡིན་སྤྲོས་མེད་དེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །བྱང་ཆུབ་སེམས་མཁས་རིག་པ་གང་གི་དུས་ཀྱི་ཚེ། །སྐྱེ་མེད་རྣམ་པར་བསམས་ཏེ་འདི་ལྟར་སྤྱོད་བྱེད་ཅིང་། །སྙིང་རྗེ་ཆེན་པོ་བསྐྱེད་ཀྱང་སེམས་ཅན་འདུ་ཤེས་མེད། །འདི་ནི་ཤེས་རབ་པ་རོལ་ཕྱིན་མཆོག་སྤྱོད་པ་ཡིན། །གལ་ཏེ་སེམས་ཅན་འདུ་ཤེས་སྡུག་བསྔལ་འདུ་ཤེས་སྐྱེད། །འགྲོ་བ་རྣམས་ཀྱི་དོན་བྱ་སྡུག་བསྔལ་སྤང་སྙམ་སྟེ། །བདག་དང་སེམས་ཅན་ཡོངས་རྟོགས་བྱང་ཆུབ་སེམས་དཔའ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་མ་ཡིན། །བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས། །སེམས་ཅན་ཐམས་ཅད་ཅི་འདྲ་དེ་འདྲར་ཆོས་ཀུན་ཤེས། །སྐྱེ་བ་མེད་དང་སྐྱེ་བ་གཉིས་ཀར་མི་རྟོག་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །འཇིག་རྟེན་དག་ན་ཆོས་མིང་ཇི་སྙེད་ཡོངས་བརྗོད་པ། །ཀུན་ལ་སྐྱེ་བ་དང་ནི་ཡང་དག་འདས་སྤངས་ནས། །ཡེ་ཤེས་འཆི་མེད་དམ་པ་དེ་ལས་གཞན་མེད་ཐོབ། །དེ་ཕྱིར་འདི་ནི་ཤེས་རབ་ཕ་རོལ་ཕྱིན་ཅེས་བྱ། །བྱང་ཆུབ་སེམས་དཔའ་གང་ཞིག་དོགས་མེད་དེ་ལྟར་སྤྱོད། །ཤེས་རབ་ལྡན་དེ་མཉམ་ཉིད་གནས་པར་ཤེས་པར་བྱའོ། །ཆོས་རྣམས་རང་བཞིན་མེད་པར་ཡོངས་སུ་ཤེས་གྱུར་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །སྐབས་དང་པོའོ།། །།གང་ཞིག་གཟུགས་ལ་མི་གནས་ཚོར་ལ་མི་གནས་ཤིང་། །གང་ཞིག་འདུ་ཤེས་མི་གནས་སེམས་པར་མི་གནས་ལ། །རྣམ་ཤེས་གང་མི་གནས་པ་ཆོས་ཉིད་གནས་པ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །རྟག་དང་མི་རྟག་བདེ་དང་སྡུག་བསྔལ་སྡུག་མི་སྡུག །བདག་དང་བདག་མེད་དེ་བཞིན་ཉིད་དང་དེ་བཞིན་སྟོང་། །འབྲས་བུ་ཐོབ་དང་དགྲ་བཅོམ་ས་ལ་མི་གནས་ཤིང་། །རང་རྒྱལ་ས་དང་དེ་བཞིན་སངས་རྒྱས་སར་མི་གནས། །ཇི་ལྟར་འདྲེན་པ་འདུས་མ་བྱས་ཁམས་མི་གནས་ཤིང་། །དེ་བཞིན་འདུས་བྱས་ལ་ཡང་མི་གནས་གནས་མེད་སྤྱོད། །དེ་ལྟར་བྱང་ཆུབ་སེམས་དཔའ་གནས་ལ་གནས་མེད་གནས། །གནས་མེད་གནས་ཡིན་འདི་ནི་རྒྱལ་བས་གནས་པར་གསུངས། །གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཕ་རོལ་ཚུ་རོལ་འགྲོ་ངོགས་མི་མཐོང་བཞིན། །ཆོས་འཆད་པ་དང་ཉན་དང་བཤད་བྱ་གང་ཡིན་དང་། །འབྲས་བུ་ཐོབ་དང་རྐྱེན་རྒྱལ་དེ་བཞིན་འཇིག་རྟེན་མགོན། །མཁས་པ་གསལ་བ་ཐོབ་པའི་མྱ་ངན་འདས་གང་ཡིན། །དེ་ཀུན་སྒྱུ་མ་ལྟ་བུར་དེ་བཞིན་གཤེགས་པའི་བསྟན། །གང་ཟག་བཞི་པོ་འདི་དག་དེ་ལ་མི་སྐྲག་སྟེ། །རྒྱལ་སྲས་བདེན་ལ་མཁས་དང་ཕྱིར་མི་ལྡོག་པ་དང་། །དགྲ་བཅོམ་དྲི་མ་གསལ་ཞིང་སོམ་ཉི་སངས་པ་དང་། །བཞི་པ་དགེ་བའི་བཤེས་ཀྱི་ཡོངས་སུ་ཟིན་པའོ། །བྱང་ཆུབ་སེམས་དཔའ་མཁས་རིག་དེ་ལྟར་སྤྱོད་པ་ནི། །དགྲ་བཅོམ་ས་ལ་མི་སློབ་རྐྱེན་རྟོག་ས་ལ་མིན། །ཐམས་ཅད་མཁྱེན་ཉིད་ཆེད་དུ་སངས་རྒྱས་ཆོས་རྗེས་སློབ། །གང་ཞིག་སློབ་མི་སློབ་ལ་མི་སློབ་དེ་སློབ་ཡིན། །གཟུགས་འཕེལ་ཡོངས་སུ་ཉམས་དང་ཡོངས་སུ་གཟུང་ཕྱིར་མིན། །ཆོས་རྣམས་སྣ་ཚོགས་ཡོངས་སུ་གཟུང་ཕྱིར་མི་སློབ་པར། །སློབ་ཅིང་ཐམས་ཅད་མཁྱེན་པ་ཉིད་ཀྱང་ཡོངས་ཟིན་ལ། །ངེས་འབྱུང་གང་ཡིན་འདི་ནི་ཡོན་ཏན་དགའ་བའི་སློབ། །གཟུགས་ནི་ཤེས་རབ་མ་ཡིན་གཟུགས་ལ་ཤེས་རབ་མེད། །རྣམ་ཤེས་འདུ་ཤེས་ཚོར་དང་སེམས་པ་འདི་དག་ནི། །ཤེས་རབ་མ་ཡིན་འདི་དག་ལ་ཡང་ཤེས་རབ་མེད། །འདི་ནི་ནམ་མཁའི་ཁམས་དང་མཚུངས་ཏེ་ཐ་དད་མེད། །དམིགས་པ་རྣམས་ཀྱི་རང་བཞིན་དེ་ནི་ཕ་མཐའ་མེད། །སེམས་ཅན་རང་བཞིན་གང་ཡིན་དེ་ཡང་ཕ་མཐའ་མེད། །ནམ་མཁའི་ཁམས་ཀྱི་རང་བཞིན་དེ་ཡང་ཕ་མཐའ་མེད། །འཇིག་རྟེན་མཁྱེན་པའི་ཤེས་རབ་དེ་ཡང་ཕ་མཐའ་མེད། །འདུ་ཤེས་ཚུ་རོལ་ཡིན་ཞེས་འདྲེན་པས་ཡོངས་སུ་བསྒྲགས། །འདུ་ཤེས་རྣམ་པར་བཤིགས་ནས་སྤོང་བ་ཕ་རོལ་འགྲོ། །གང་དག་འདུ་ཤེས་བྲལ་བ་འདི་ནི་རྗེས་ཐོབ་པ། །དེ་དག་ཕ་རོལ་ཕྱིན་ནས་སྟོན་པའི་བཀའ་ལ་གནས། །གལ་ཏེ་སྟོན་པས་ཀྱང་ནི་གངྒཱའི་བྱེ་སྙེད་ཀྱི། །བསྐལ་པར་བཞུགས་ཏེ་སེམས་ཅན་ཞེས་སྒྲ་ཡོངས་བསྒྲགས་ཀྱང་། །གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །གང་ཚེ་ང་ནི་ཕ་རོལ་ཕྱིན་པའི་མཆོག་འདི་དང་། །མཐུན་པར་སྨྲ་གྱུར་དེ་ཚེ་སྔོན་གྱི་སྐྱེ་མཆོག་གིས། །མ་འོངས་པ་ཡི་དུས་ན་སངས་རྒྱས་འགྱུར་རོ་ཞེས། །ང་ལུང་བསྟན་པར་གྱུར་ཅེས་རྒྱལ་བ་དེ་སྐད་གསུངས། །ཤེས་རབ་ཕ་རོལ་ཕྱིན་པ་གང་ལ་མགོན་སྤྱོད་པ། །འདི་ནི་གང་ཞིག་གུས་བྱས་འཛིན་དང་ཆུབ་བྱེད་པ། །དེ་ལ་དུག་དང་མཚོན་དང་མེ་དང་ཆུས་མི་ཚུགས། །བདུད་དང་བདུད་ཀྱི་ཕྱོགས་ཀྱི་གླགས་ཀྱང་རྙེད་མི་འགྱུར། །ལ་ལས་བདེ་གཤེགས་ཡོངས་སུ་མྱ་ངན་འདས་པ་ཡི། །མཆོད་རྟེན་རིན་ཆེན་བདུན་ལས་བྱས་ཤིང་མཆོད་བྱེད་ལ། །བདེ་བར་གཤེགས་པའི་མཆོད་རྟེན་དེ་དག་གངྒཱ་ཡི། །བྱེ་མ་སྙེད་ཀྱིས་བྱེ་བ་ཕྲག་སྟོང་ཞིང་བཀང་སྟེ། །ཡོངས་སུ་བརྟག་བཟུང་ཞིང་རྣམས་བྱེ་བ་མཐའ་ཡས་ན། །སེམས་ཅན་ཇི་སྙེད་འཁོད་པ་དེ་དག་ཐམས་ཅད་ཀྱིས། །ལས་གཞན་མི་བྱེད་ལྷ་ཡི་མེ་ཏོག་སྤོས་རབ་དང་། །བྱུག་པས་དུས་གསུམ་བསྐལ་བའམ་དེ་བས་ལྷག་མཆོད་ལ། །གང་ཞིག་གང་ལས་རྣམ་འདྲེན་སྟོབས་བཅུ་འབྱུང་འགྱུར་བ། །བདེ་བར་གཤེགས་ཀྱི་ཡུམ་འདི་གླེགས་བམ་ལ་བྲིས་ཏེ། །འཆང་ཞིང་མེ་ཏོག་བྱུག་པས་བསྟི་སྟང་བྱེད་གྱུར་ན། །མཆོད་རྟེན་བྱས་མཆོད་བསོད་ནམས་དེས་ནི་ཆར་མི་ཕོད། །རྒྱལ་བའི་ཤེས་རབ་ཕ་རོལ་ཕྱིན་འདི་རིག་སྔགས་ཆེ། །སེམས་ཅན་ཁམས་མང་མྱ་ངན་སྡུག་བསྔལ་ཆོས་ཞི་བྱེད། །གང་དག་འདས་དང་གང་དག་ཕྱོགས་བཅུའི་འཇིག་རྟེན་མགོན། །རིག་སྔགས་འདི་བསླབས་སྨན་པའི་རྒྱལ་པོ་བླ་མེད་འགྱུར། །གང་དག་ཕན་དང་སྙིང་བརྩེར་བཅས་པས་སྤྱད་སྤྱོད་པ། །རིག་སྔགས་འདི་ལ་བསླབས་ནས་མཁས་པ་བྱང་ཆུབ་རེག །འདུས་བྱས་བདེ་དང་འདུས་མ་བྱས་བདེ་གང་ཡིན་པ། །བདེ་བ་དེ་ཀུན་འདི་ལས་བྱུང་བར་རིག་པར་བྱ། །ས་བོན་བཏབ་ནས་ས་ལ་གནས་ཏེ་འབྱུང་འགྱུར་བ། །ཚོགས་པ་རྙེད་ནས་རྣམ་མང་གཟུགས་དག་རྣམ་པར་སྐྱེ། །ཕ་རོལ་ཕྱིན་ལྔ་བྱང་ཆུབ་ཡོན་ཏན་ཇི་སྙེད་པ། །དེ་དག་ཀུན་ཀྱང་ཤེས་རབ་ཕ་རོལ་ཕྱིན་ལས་སྐྱེ། །འཁོར་ལོས་བསྒྱུར་རྒྱལ་ལམ་གང་ནས་ནི་རྟག་འགྲོ་བ། །ལམ་དེ་ཉིད་ནས་རིན་ཆེན་བདུན་དང་དཔུང་ཚོགས་ཀུན། །གང་ནས་རྒྱལ་བའི་ཤེས་རབ་ཕ་རོལ་ཕྱིན་འདི་འགྲོ། །དེ་ཉིད་ནས་ནི་ཡོན་ཏན་ཆོས་ཀུ ན་འགྲོ་བར་འགྱུར། །རྒྱལ་བས་བརྒྱ་བྱིན་དྲི་བ་ཡོངས་དྲིས་ལན་གསོལ་བ། །གལ་ཏེ་གངྒཱའི་བྱེ་སྙེད་སངས་རྒྱས་ཞིང་གྱུར་ལ། །དེ་ཀུན་རྒྱལ་བའི་རིང་བསྲེལ་བྱུར་བུར་གཏམས་གྱུར་ཀྱང་། །བདག་ནི་ཤེས་རབ་ཕ་རོལ་ཕྱིན་པ་འདི་ཉིད་ལེན། །ཅི་སླད་ཅེ་ན་སྐུ་གདུང་མི་གུས་བདག་མ་ལགས། །འོན་ཀྱང་ཤེས་རབ་ཡོངས་སུ་བསྒོམ་པས་མཆོད་པར་བགྱི། །དཔེར་ན་རྒྱལ་པོ་རྟེན་མི་རིམ་གྲོ་ཐོབ་པ་ལྟར། །སངས་རྒྱས་རིང་བསྲེལ་ཤེས་རབ་ཕ་རོལ་ཕྱིན་ལ་བརྟེན། །ནོར་བུ་རིན་ཆེན་ཡོན་ཏན་ཀུན་ལྡན་རིན་ཐང་མེད། །གང་ཚེ་གང་དུ་སྩལ་བ་དེ་ནི་ཕྱག་བགྱི་འོས། །དེ་ཕྱུང་གྱུར་ཀྱང་གབ་ཚེ་ལ་ནི་དགའ་བགྱིད་དེ། །གཡོན་ཏན་དེ་དག་ནོར་བུ་རིན་ཆེན་དེ་ཡི་ལགས། །དེ་བཞིན་ཤེས་རབ་ཕ་རོལ་ཕྱིན་མཆོག་ཡོན་ཏན་གྱིས། །རྒྱལ་བ་མྱ་ངན་འདས་ཀྱང་རིང་བསྲེལ་མཆོད་པ་བསྙེས། །དེ་ལྟས་གང་ཞིག་རྒྱལ་བའི་ཡོན་ཏན་འཛིན་འཚལ་དེས། །ཤེས་རབ་ཕ་རོལ་ཕྱིན་བླང་འདི་ནི་ཐར་པ་ལགས། །སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དེ་བཞིན་ནོ། །དགེ་ཆོས་ཆུད་མི་གསན་ཕྱིར་ཡོངས་སུ་འཛིན་པ་ཡིན། །འདི་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། །དཔེར་ན་འཛམ་བུའི་གླིང་ན་ཤིང་རྣམས་བྱེ་བ་སྟོང་། །རྣམ་པ་སྣ་ཚོགས་རྣམ་པ་དུ་མ་གཟུགས་མང་བ། །གྲིབ་མར་གྱུར་པའི་གྲངས་སུ་བརྗོད་པ་མ་གཏོགས་པར། །དྲི་མ་སྣ་ཚོགས་མེད་ཅིང་བྱེ་བྲག་ཡོད་མ་ཡིན། །དེ་བཞིན་རྒྱལ་བའི་ཕ་རོལ་ཕྱིན་ལྔ་འདི་དག་ཀྱང་། །ཤེས་རབ་ཕ་རོལ་ཕྱིན་པའི་མིང་ཉིད་འཐོབ་པར་འགྱུར། །ཐམས་ཅད་མཁྱེན་པ་ཉིད་ཕྱིར་ཡོངས་སུ་བསྔོས་བྱས་ན། །བྱང་ཆུབ་ཅེས་བྱ་དྲུག་པོ་འདི་ཀུན་རོ་གཅིག་འགྱུར། །བྱང་ཆུབ་སེམས་དཔའ་གལ་ཏེ་རབ་ཏུ་མི་ཤེས་བཞིན། །གཟུགས་དང་འདུ་ཤེས་ཚོར་དང་སེམས་པ་རྣམ་པར་ཤེས། །མི་རྟག་ཡོངས་སུ་སྟོན་པ་བཅོས་ལ་སྤྱོད་པ་སྟེ། །མཁས་པ་ནམ་ཡང་ཆོས་རྣམས་འཇིག་པར་མི་བྱེད་དོ། །གང་ལ་གཟུགས་མིན་ཚོར་མིན་འདུ་ཤེས་མི་དམིགས་ཤིང་། །རྣམ་པར་ཤེས་པ་མ་ཡིན་སེམས་པ་མི་དམིགས་ལ། །ཆོས་ཀུན་སྐྱེ་མེད་སྟོང་པའི་ཚུལ་དུ་རབ་ཤེས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ལ་ལས་གངྒཱའི་ཀླུང་གི་བྱེ་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་ཀུན་དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཅི་ཕྱིར་ཞེ་ན་སྨྲ་མཆོག་དེ་དག་འདིར་བསླབས་ནས། །ཆོས་རྣམས་མཐའ་དག་སྟོང་པ་ཉིད་དུ་འདིར་སྟོན་བྱེད། །དེ་ཐོས་ཉན་ཐོས་མྱུར་དུ་རྣམ་པར་གྲོལ་ལ་རེག །རང་རྒྱལ་བྱང་ཆུབ་དང་ནི་སངས་རྒྱས་བྱང་ཆུབ་རེག །མྱུ་གུ་མེད་པར་འཇིག་རྟེན་སྡོང་འབྱུང་ཡོད་མེད་ནི། །དེ་ལ་ཡལ་འདབ་མེ་ཏོག་འབྲས་བུ་ག་ལ་འབྱུང་། །བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མེད་ན། །འབྲས་བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང་། །ཉི་མའི་དཀྱིལ་འཁོར་གང་ཚེ་འོད་ཀྱི་དྲྭ་བ་འགྱེད། །དེ་ཚེ་སེམས་ཅན་ལས་བྱེད་བརྩོན་པ་དེ་བཞིན་དུ། །མཁས་པ་ཤེས་ཕྱིར་འཇིག་རྟེན་བྱང་ཆུབ་སེམས་བྱུང་ན། །ཡེ་ཤེས་ཀྱིས་ནི་སེམས་ཅན་ཡོན་ཏན་ཆོས་དང་ལྡན། །དཔེར་ན་མ་དྲོས་མཚོ་ལ་ཀླུ་བདག་མེད་གྱུར་ན། །འཛམ་བུའི་གླིའི་འདིར་ཆུ་ཀླུང་འབབ་པར་ག་ལ་འགྱུར། །ཆུ་ཀླུང་མེད་ན་མེ་ཏོག་འབྲས་བུ་འབྱུང་མི་འགྱུར། །རྒྱ་མཚོ་ལ་ཡང་རིན་ཆེན་གཟུགས་མང་མེད་པར་འགྱུར། །དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་རྟེན་དེ་དག་ཀུན་ཏུ་ག་ལ་འབྱུང་། །ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །འཇིག་རྟེན་འདི་ན་སྣང་བྱེད་སྲོག་ཆགས་ཇི་སྙེད་པ། །ཀུན་གྱིས་སྣང་བར་བྱ་ཕྱིར་འོད་རྣམས་ཕྱུང་བ་བས། །ཉི་མའི་དཀྱིལ་འཁོར་འོད་ཟེར་གཅིག་ཕྱུང་ཆོས་མཆོག་སྟེ། །སྣང་བྱེད་ཚོགས་ཀྱི་འོད་རྣམས་ཀུན་གྱི་ཆར་མི་ཕོད། །ཉན་ཐོས་ཚོགས་རྣམས་ཇི་སྙེད་སྦྱིན་དང་ཚུལ་ཁྲིམས་དང་། །སྒོམ་དང་རབ་ཏུ་ལྡན་པའི་བསོད་ནམས་ཚོགས་བསྐྱེད་པའང་། །བྱང་ཆུབ་སེམས་དཔའི་རྗེས་སུ་ཡི་རང་སེམས་གཅིག་ལ། །ཉན་ཐོས་ཚོགས་ཀྱི་བསོད་ནམས་ཕུང་པོས་ཆར་མི་ཕོད། །འདས་དུས་སྔོན་གྱི་སངས་རྒྱས་བྱེ་བ་ཁྲག་ཁྲིག་གང་། །ཞིང་མང་མཐའ་ཡས་བྱེ་སྟོང་དག་ན་གང་བཞུགས་དང་། །གང་ཡང་མྱ་ངན་འདས་པའི་འཇིག་རྟེན་མགོན་པོ་རྣམས། །སྔུག་བསྔལ་ཟད་པར་བྱ་ཕྱིར་རིན་ཆེན་ཆོས་སྟོན་པ། །དང་པོ་བྱང་ཆུབ་མཆོག་ཏུ་སེམས་བསྐྱེད་བསྐྱེད་པ་ནས། །རྣམ་པར་འདྲེན་པ་རྣམས་ཀྱི་དམ་ཆོས་ཟད་ཀྱི་དུས། །དེ་བར་རྒྱལ་བ་དེ་དག་བསོད་ནམས་གང་ཡིན་པ། །ཕ་རོལ་ཕྱིན་དང་ལྡན་དང་སངས་རྒྱས་ཆོས་གང་དང་། །གང་ཡང་སངས་རྒྱས་སྲས་རྣམས་དང་ནི་ཉན་ཐོས་དང་། །སློབ་དང་མི་སློབ་དགེ་བ་ཟག་བཅས་ཟག་མེད་པ། །བསྡུས་ནས་བྱང་ཆུབ་སེམས་དཔའ་རྗེས་སུ་ཡི་རང་ཞིང་། །འགྲོ་བའི་དོན་རྒྱུ་བྱང་ཆུབ་ཕྱིར་ནི་ཐམས་ཅད་བསྔོ། །ཡོངས་བསྔོ་གལ་ཏེ་སེམས་སུ་འདུ་ཤེས་འབྱུང་འགྱུར་ཞིང་། །བྱང་ཆུབ་འདུ་ཤེས་ཡོངས་བསྔོ་སེམས་ཅན་འདུ་ཤེས་ན། །འདུ་ཤེས་ཕྱིར་ན་ལྟ་གནས་སེམས་ནི་གསུམ་ལ་ཆགས། །དམིགས་པ་ཡོད་པས་ཡོངས་སུ་བསྔོས་པར་ཆུད་མ་ཡིན། །གལ་ཏེ་འདི་ལྟར་ཆོས་འདི་འགགས་ཤིང་ཟད་པ་དང་། །གང་དུ་ཡོངས་སུ་བསྔོ་བ་དེ་ཡང་ཟད་པ་དང་། །ཆོས་ཀྱིས་ཆོས་ལ་ནམ་ཡང་མི་བསྔོ་ཤེས་གྱུར་ན། །དེ་ལྟར་རབ་ཏུ་ཤེས་པས་ཡོངས་སུ་བསྔོས་པ་ཡིན། །གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །དེ་ལྟར་འདི་ལྟ་ཡོངས་སུ་བསྔོ་བ་བསླབ་བྱ་སྟེ། །ཇི་ལྟར་རྒྱལ་བ་དེ་དག་དགེ་བ་དེ་མཁྱེན་པའི། །རྣམ་པ་གང་ཡི ན་འབྱུང་གང་མཚན་ཉིད་གང་ཡིན་ལ། །རྗེས་སུ་ཡི་རང་དེ་ལྟ་དེ་ལྟར་ཡོངས་སུ་བསྔོ། །དེ་ལྟར་བསོད་ནམས་བྱང་ཆུབ་ཡོངས་སུ་བསྔོ་བྱེད་ན། །དུག་མེད་སངས་རྒྱས་མི་སྤོང་རྒྱལ་བས་གསུངས་པ་སྨྲ། །དེ་ལྟར་ཡོངས་བསྔོ་དཔའ་བོ་འཇིག་རྟེན་དམིགས་ཅན་གྱིས། །བྱང་ཆུབ་སེམས་དཔའ་ཇི་སྙེད་ཐམས་ཅད་ཟིལ་གྱིས་གནོན། །དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་དམིགས་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་བོ། །དཔེར་ན་རི་མོའི་ལས་ནི་ཡོངས་ཟིན་མིག་མེད་པ། །ཇི་སྲིད་མིག་མ་བྲིས་པར་རྔན་པ་མི་ཐོབ་བཞིན། །གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་ལའང་ཅུང་ཟད་མི་གནས་དེ་དང་འདྲ། །གལ་ཏེ་བདག་ནི་རྒྱལ་བའི་ཤེས་རབ་སྤྱད་བྱ་ཞིང་། །སེམས་ཅན་སྡུག་བསྔལ་རེག་པ་ཁྲག་ཁྲིག་མང་དགྲོལ་སེམས། །སེམས་ཅན་འདུ་ཤེས་ཡོངས་རྟོག་བྱང་ཆུབ་སེམས་དཔའ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་མ་ཡིན། །བྱང་ཆུབ་སེམས་དཔའ་གང་ཞིག་སྔོན་སྤྱད་སྤྱོད་པའི་ཚེ། །ཕ་རོལ་ཕྱིན་འདིར་སྤྱོད་པ་མཁས་པ་སོམ་ཉི་མེད། །ཐོས་མ་ཐག་ཏུ་དེ་ནི་སྟོན་པའི་འདུ་ཤེས་སྐྱེད། །དེས་ནི་བྱང་ཆུབ་ཞི་བ་མྱུར་དུ་རྟོགས་པར་འགྱུར། །སྔོན་སྤྱོད་ཚེ་ན་སངས་རྒྱས་ཁྲག་ཁྲིག་བཀུར་བྱས་ཀྱང་། །རྒྱལ་བའི་ཤེས་རབ་ཕ་རོལ་ཕྱིན་ལ་མ་དད་ན། །ཐོས་ནས་བློ་ཆུང་དེ་ཡིས་འདི་ནི་སྤོང་བྱེད་དེ། །སྤངས་ནས་སྐྱབས་མེད་གྱུར་པ་དེ་ནི་མནར་མེད་འགྲོ། །དེ་ལྟ་བས་ན་གལ་ཏེ་སངས་རྒྱས་ཡེ་ཤེས་མཆོག །རེག་པར་འདོད་ན་རྒྱལ་བའི་ཡུམ་འདིར་དད་པར་གྱིས། །དཔེར་ན་ཚོང་པ་རིན་ཆེན་གླིང་དུ་སོང་ནས་ནི། །ཟོང་ཟད་སླར་ལོག་ལྟ་བུར་གྱུར་ན་མི་རུང་ངོ་། །གཟུགས་ཀྱི་དག་པ་འབྲས་བུ་དག་པར་རིག་པར་བྱ། །འབྲས་བུ་གཟུགས་དག་ཐམས་ཅད་མཁྱེན་ཉིད་དག་པར་འགྱུར། །ཐམས་ཅད་མཁྱེན་ཉིད་འབྲས་བུ་དག་དང་གཟུགས་དག་པ། །ནམ་མཁའི་ཁམས་དང་མཚུངས་ཏེ་དབྱེར་མེད་བཅད་དུ་མེད། །སྐབས་གཉིས་པའོ།། །།དཔའ་བོ་གར་སྤྱོད་ཤེས་རབ་ཕ་རོལ་ཕྱིན་པ་ཡིས། །ཁམས་གསུམ་ཡང་དག་འདས་ལ་རྣམ་པར་གྲོལ་བའང་མེད། །ཉོན་མོངས་བསལ་བར་གྱུར་ཀྱང་སྐྱེ་བ་སྟོན་པར་བྱེད། །རྒ་དང་ན་དང་འཆི་བ་མེད་ཀྱང་འཆི་འཕོ་སྟོན། །འགྲོ་བ་འདི་དག་མིང་དང་གཟུགས་ཀྱི་འདམ་ལ་ཆགས། །རླུང་གི་འཁོར་ལོ་ལྟ་བུའི་འཁོར་བའི་འཁོར་ལོར་འཁྱམས། །འགྲོ་བ་འཁྲུལ་པ་རི་དྭགས་རྒྱར་ཆུད་འདྲར་ཤེས་ནས། །ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །སྤྱོད་པ་ཡོངས་དག་གང་ཞིག་གཟུགས་ལ་མི་སྤྱོད་ཅིང་། །རྣམ་ཤེས་འདུ་ཤེས་ཚོར་བ་སེམས་པར་མི་སྤྱོད་ན། །དེ་ལྟར་སྤྱོད་པ་ཆགས་པ་ཐམས་ཅད་ཡོངས་སྤོང་ཞིང་། །ཆགས་ལས་རྣམ་གྲོལ་བདེ་གཤེགས་རྣམས་ཀྱི་ཤེས་རབ་སྤྱོད། །དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་བ། །ཆགས་པ་བཅད་ནས་གྲོལ་ལ་ཆགས་པ་མེད་པར་འགྲོ། །ཉི་མ་སྒྲ་ཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་སྲེག་པ་བཞིན། །ཆོས་རྣམས་ཐམས་ཅད་རང་བཞིན་དག་ཅིང་ཡོངས་དག་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །སྐབས་གསུམ་པའོ།། །།རྒྱལ་བ་ལ་ནི་ལྷ་རྒྱལ་བརྒྱ་བྱིན་གྱིས་ཞུས་པ། །བྱང་ཆུབ་སེམས་དཔའ་ཤེས་རབ་སྤྱོད་པ་ཇི་ལྟར་བརྩོན། །ཕུང་པོ་ཁམས་ལ་རྡུལ་ཙམ་བརྩོན་པར་མི་བྱེད་ཅིང་། །ཕུང་པོར་མི་བརྩོན་དེ་ནི་བྱང་ཆུབ་སེམས་དཔར་བརྩོན། །གང་ཞིག་ཆོས་འདི་སྤྲུལ་དང་སྒྱུ་མ་འདྲར་ཐོས་ནས། །སོམ་ཉི་མེད་ཅིང་སློབ་ལ་ཕྱིར་ཞིང་སྦྱོར་བྱེད་པ། །སེམས་ཅན་དེ་ནི་རིང་ནས་ཐེག་ཆེན་ཞུགས་རིག་བྱ། །སངས་རྒྱས་བྱེ་བ་ཁྲག་ཁྲིག་མང་ལ་ལྷག་བྱས་ཡིན། །དགོན་པའི་ལམ་ནི་དཔག་ཚད་མང་པོར་ཞུགས་པའི་མིས། །གནག་རྫི་མཚམས་ཀྱི་ནགས་ཚལ་ཕུན་སུམ་ཚོགས་མཐོང་ན། །འདི་དག་གྲོང་དང་གྲོང་ཁྱེར་ཉེ་བའི་རྟགས་སྙམ་སྟེ། །དབུགས་ཕྱིན་རྙེད་པར་གྱུར་ཅིང་ཆོམ་རྐུན་འཇིགས་པ་མེད། །དེ་བཞིན་བྱང་ཆུབ་ཡོངས་སུ་ཚོལ་ཚེ་རྒྱལ་རྣམས་ཀྱི། །ཤེས་རབ་ཕ་རོལ་ཕྱིན་འདི་མཉམ་པ་གང་ཐོབ་པ། །དེ་ནི་དབུགས་ཕྱིན་ཐོབ་པར་གྱུར་ཅིང་འཇིགས་མེད་དེ། །དགྲ་བཅོམ་ས་ལ་མ་ཡིན་རྐྱེན་རྟོག་ས་ལ་མིན། །མི་ཞིག་རྒྱ་མཚོའི་ཆུ་ནི་ལྟ་ཕྱིར་འགྲོ་བ་ཡིས། །གལ་ཏེ་ཤིང་དང་ནག་ཚལ་རི་མཐོང་ད་དུང་རིང་། །ཅི་སྟེ་རྟགས་མ་མཐོང་ན་རྒྱ་མཚོ་ཆེན་པོ་ནི། །ཉེ་བར་གྱུར་ཏོ་སྙམ་སྟེ་དེ་ལ་སོམ་ཉི་མེད། །དེ་ལྟར་བྱང་ཆུབ་དམ་པར་རབ་ཞུགས་རྒྱལ་བ་ཡི། །ཤེས་རབ་ཕ་རོལ་ཕྱིན་པ་འདི་ཉན་རིག་པར་བྱ། །རྣམ་པར་འདྲེན་པས་མངོན་སུམ་ལུང་བསྟན་མ་གྱུར་ཀྱང་། །སངས་རྒྱས་བྱང་ཆུབ་རིང་པོར་མི་ཐོགས་བདག་རེག་འགྱུར། །དཔྱིད་དུས་བཟང་ལ་སྡོང་པོ་ལོ་མ་ལྷགས་གྱུར་ན། །ཡལ་གས་རིང་པོར་མ་ཐོགས་ལོ་འབྲས་མེ་ཏོག་བསྐྲུན། །ཤེས་རབ་ཕ་རོལ་ཕྱིན་འདི་སུ་ཡི་ལག་ཐོབ་པ། །རིང་པོར་མི་ཐོགས་འདྲེན་པ་རྣམས་ཀྱི་བྱང་ཆུབ་ཐོབ། །དཔེར་ན་བུད་མེད་སྦྲུམ་གང་སྡུག་བསྔལ་ཉེན་གྱུར་ན། །དེ་ནི་དེ་ཡི་བཙའ་བའི་དུས་ལ་བབ་ཅེས་བྱ། །དེ་བཞིན་བྱང་ཆུབ་སེམས་དཔའ་རྒྱལ་བའི་ཤེས་རབ་ཉན། །དགའ་དང་འདུན་པ་བསྐྱེད་པ་མྱུར་དུ་བྱང་ཆུབ་རིག །ཤེས་རབ་ཕ་རོལ་ཕྱིན་མཆོག་སྤྱོད་ཚེ་རྣལ་འབྱོར་པ། །གཟུགས་ཀྱི་འཕེལ་བ་དང་ནི་ཡོངས་སུ་འགྲིབ་མི་མཐོང་། །གང་ཞིག་ཆོས་དང་ཆོས་མིན་ཆོས་དབྱིངས་མི་མཐོང་ཞིང་། །མྱ་ངན་འདས་ལ་མི་རེག་དེ་ནི་ཤེས་རབ་གནས། །གང་ཞིག་འདིར་སྤྱོད་སངས་རྒྱས་ཆོས་རྣམས་མི་རྟོག་སྟེ། །སྟོབས་དང་རྫུ་འཕྲུལ་རྐང་པ་བྱང་ཆུབ་ཞི་མི་རྟོག །རྣམ་པར་མི་རྟོག་རྟོག་བྲལ་བྱིན་གྱི་རླབས་ཀྱིས་སྤྱོད། །འདི་ནི་ཤེས་རབ་པ་རོལ་ཕྱིན་མཆོག་སྤྱོད་པ་ཡིན། །སྨྲ་བའི་ཟླ་བ་སངས་རྒྱས་ལ་ནི་རབ་འབྱོར་ཞུས། །ཡོན་ཏན་དགའ་བ་རྣམས་ཀྱི་བར་དུ་གཅོད་གང་ལགས། །སྟོན་པས་བཀའ་སྩལ་བར་དུ་གཅོད་པར་འགྱུར་མང་སྟེ། །དེ་ལས་རེ་ཞིག་ཅུང་ཟད་ཙང་ཞིག་ཡོངས་སུ་བརྗོད། །རྒྱལ་བའི་ཤེས་རབ་ཕ་རོལ་ཕྱིན་འདི་ཡིག་འདྲི་ཚེ། །སྤོབས་པ་ཐ་དད་རྣམ་པ་དུ་མ་འབྱུང་འགྱུར་ཞིང་། །འགྲོ་བའི་དོན་མ་བྱས་པར་གློག་བཞིན་མྱུར་དུ་ཡང་། །ཡོངས་སུ་ཉམས་པར་འགྱུར་པ་འདི་ནི་བདུད་ཀྱི་ལས། །འདི་བཤད་ཚེ་ན་ཁ་ཅིག་སོམ་ཉི་ཟ་འགྱུར་ཏེ། །འདྲེན་པས་འདིར་ནི་བདག་གི་མིང་ཡང་ཡོངས་མ་བརྗོད། །རིགས་དང་ས་དང་རུས་ཀྱང་ཡོངས་སུ་མ་བརྗོད་ཅེས། །དེ་ནི་ཉན་པར་མི་འགྱུར་སྤོང་འགྱུར་བདུད་ཀྱི་ལས། །དེ་ལྟར་མི་ཤེས་དེ་དག་རྩ་བ་བོར་ནས་ནི། །རྨོངས་པས་ཡལ་ག་དག་དང་འདབ་མ་འཚོལ་བར་འགྱུར། །གླང་པོ་རྙེད་ཀྱང་གླང་པོའི་རྗེས་ནི་འཚོལ་བ་ལྟར། །ཤེས་རབ་ཕ་རོལ་ཕྱིན་ཐོས་མདོ་ཚོལ་དེ་བཞིན་ནོ། །དཔེར་ན་ལ་ལས་རོ་བརྒྱ་ལྡན་པའི་ཟས་རྙེད་ལ། །ཟས་མཆོག་རྙེད་ནས་ཟས་ངན་འཚོལ་བར་བྱེད་པ་ལྟར། །བྱང་ཆུབ་སེམས་དཔའ་ཕ་རོལ་ཕྱིན་པ་འདི་རྙེད་ནས། །དགྲ་བཅོམ་ས་ཡི་བྱང་ཆུབ་འཚོལ་བྱེད་དེ་བཞིན་ནོ། །བསྟི་སྟང་འདོད་པར་འགྱུར་ཞིང་རྙེད་པ་འདོད་འགྱུར་དང་། །ལྟ་དང་བཅས་པའི་སེམས་ཀྱི་ཁྱིམ་འདྲིས་བྱེད་ལྡན་ཞིང་། །ཆོས་བཏང་ནས་ནི་ཆོས་མིན་བྱ་བ་སྤྱོད་འགྱུར་བ། །ལམ་བོར་ལམ་གོལ་འགྲོ་བ་འདི་ནི་བདུད་ཀྱི་ལས། །གང་དག་དེ་ཡི་ཚེ་ན་འདུན་ཅིང་དད་གྱུར་ན། །ཆོས་ཀྱི་དམ་པ་འདི་ནི་ཉན་དུ་སོང་བ་ལས། །དེ་དག་གིས་ནི་ཆོས་སྨྲ་བྱ་བར་ལྡན་རིག་ནས། །དགའ་བ་མེད་ཅིང་ཡིད་མི་བདེ་བར་གྱུར་ནས་འགྲོ། །དེ་ཡི་ཚེ་ན་བདུད་ཀྱི་ལས་འདི་འབྱུང་བར་འགྱུར། །དེ་ཚེ་གང་དག་གིས་ནི་དགེ་སློང་མང་དཀྲུགས་ནས། །ཤེས་རབ་ཕ་རོལ་ཕྱིན་འདི་འཛིན་པར་མི་འགྱུར་བའོ། །བར་དུ་གཅོད་པ་རྣམས་མང་གཞན་ཡང་འབྱུང་བར་འགྱུར། །རིན་ཆེན་རིན་ཐང་མེད་པ་རྙེད་འགྱུར་གང་དག་ཡིན། །དེ་དག་དཀོན་ལ་དུས་རྣམས་རྟག་ཏུ་འཚེ་བའང་མང་། །དེ་བཞིན་རྒྱལ་བའི་ཤེས་རབ་ཕ་རོལ་ཕྱིན་པ་མཆོག །རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང་། །ཐེག་པ་གསར་དུ་ཞུགས་པའི་སེམས་ཅན་བློ་ཆུང་བ། །གང་ཞིག་དཀོན་པའི་རིན་ཆེན་འདི་ནི་མ་རྙེད་པ། །དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། །ཕྱོགས་བཅུའི་སངས་རྒྱས་དེ་དག་ཡོངས་སུ་འཛིན་ལ་སྦྱོར། །མ་ཞིག་ན་བར་གྱུར་ལ་བུ་ནི་མང་ཡོད་པ། །དེ་ཀུན་ཡིད་མི་བདེ་ཞིང་དེ་ལ་རིམ་གྲོ་བྱེད། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཀྱང་། །ཡུམ་གྱུར་ཤེས་རབ་དམ་པ་འདི་ལ་དགོངས་པ་མཛད། །གང་དག་འདས་དང་ཕྱོགས་བཅུའི་འཇིག་རྟེན་མགོན་གང་དང་། །མ་འོངས་དུས་ན་འབྱུང་འགྱུར་དེ་དག་འདི་ལས་འབྱུང་། །འཇིག་རྟེན་སྟོན་པ་རྒྱལ་བ་རྣམས་ཀྱི་སྐྱེད་བྱེད་ཡུམ། །སེམས་ཅན་གཞན་གྱི་སེམས་ཀྱི་སྤྱོད་པ་སྟོན་པར་བྱེད། །འཇིག་རྟེན་དེ་བཞིན་ཉིད་དང་དགྲ་བཅོམ་དེ་བཞིན་ཉིད། །རང་རྒྱལ་དེ་བཞིན་ཉིད་དང་རྒྱལ་སྲས་དེ་བཞིན་ཉིད། །གཅིག་པ་ཉིད་དེ་དངོས་བྲལ་གཞན་མིན་དེ་བཞིན་ཉིད། །ཤེས་རབ་ཕ་རོལ་ཕྱིན་པ་དེ་བཞིན་གཤེགས་པས་མཁྱེན། །མཁས་པ་འཇིག་རྟེན་གནས་སམ་མྱ་ངན་འདས་ཀྱང་རུང་། །ཆོས་ཉིད་སྐྱོན་མེད་ཆོས་རྣམས་སྟོང་པ་འདི་གནས་ཏེ། །བྱང་ཆུབ་སེམས་དཔས་དེ་བཞིན་ཉིད་འདི་རྗེས་སུ་རྟོགས། །དེ་ཕྱིར་དེ་བཞིན་གཤེགས་ཞེས་སངས་རྒྱལ་མཚན་གསོལ་ཏོ། །ཤེས་རབ་ཕ་རོལ་ཕྱིན་པ་དགའ་འཚལ་ལ་བརྟེན་པ། །སྟོབས་བཅུ་རྣམ་འདྲེན་རྣམས་ཀྱི་སྤྱོད་ཡུལ་འདི་ཡིན་ཏེ། །སེམས་ཅན་སྡུག་བསྔལ་ངན་སོང་གསུམ་ལས་ཡོངས་འདོན་ཀྱང་། །དེ་དག་ནམ་ཡང་སེམས་ཅན་འདུ་ཤེས་འགྱུར་བ་མེད། །དཔེར་ན་སེང་གེ་རི་སུལ་བརྟེན་ནས་འཇིགས་མེད་པར། །རི་དྭགས་ཕྲ་མོ་མང་སྐྲག་བྱེད་ཅིང་སྒྲ་སྒྲོགས་ལྟར། །མི་ཡི་སེང་གེ་ཤེས་རབ་ཕ་རོལ་ཕྱིན་བརྟེན་ནས། །མུ་སྟེགས་ཅན་མང་སྐྲག་ཕྱིར་འཇིག་རྟེན་སྒྲ་ཡང་སྒྲོག །དཔེར་ན་ནམ་མཁར་གནས་པའི་ཉི་མའི་འོད་ཟེར་ནི། །ས་འདི་སྐེམ་པར་བྱེད་ཅིང་གཟུགས་ཀྱང་རབ་ཏུ་སྟོན། །དེ་བཞིན་ཆོས་རྒྱལ་ཤེས་རབ་ཕ་རོལ་ཕྱིན་བརྟེན་ནས། །སྲིད་པའི་ཆུ་ཀླུང་སྐེམས་ཤིང་ཆོས་ཀྱང་རབ་ཏུ་སྟོན། །གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་དེ་བཞིན་གཤེགས་པས་བསྟན། །ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །གང་གིས་དེ་ལྟར་མཐོང་བ་དེ་ཡིས་ཆོས་ཀུན་མཐོང་། །རྒྱལ་པོ་བཏང་སྙོམས་འདུག་ཅིང་བློན་པོ་ཀུན་བྱེད་ལྟར། །སངས་རྒྱས་མཛད་དང་ཉན་ཐོས་ཆོས་རྣམས་ཇི་སྙེད་པ། །དེ་དག་ཐམས་ཅད་ཤེས་རབ་ཕ་རོལ་ཕྱིན་པ་བྱེད། །རྒྱལ་པོ་གྲོང་དུ་མི་འགྲོ་ཡུལ་འཁོར་མི་འགྲོ་བར། །རང་གི་ཡུལ་ནས་འདུ་བ་ཐམས་ཅད་སྡུད་པ་ལྟར། །བྱང་ཆུབ་སེམས་དཔའ་ཆོས་ཉིད་གང་དུའང་མི་འགྲོ་ལ། །སངས་རྒྱས་པ་ཡི་ཡོན་ཏན་གང་ཡིན་ཐམས་ཅད་སྡུད། །གང་ལ་བདེ་གཤེགས་བྱང་ཆུབ་སེམས་དཔའ་དད་བརྟན་ཡོད། །ཤེས་རབ་ཕ་རོལ་ཕྱིན་པ་མཆོག་ལ་བསམ་སྦྱོར་བ། །ཉན་ཐོས་རང་རྒྱལ་ས་གཉིས་ཤིན་ཏུ་འདས་བྱས་ནས། །ཟིལ་གྱིས་མི་ནོན་རྒྱལ་བའི་བྱང་ཆུབ་མྱུར་དུ་ཐོབ། །དཔེར་ན་རྒྱ་མཚོར་འཇུག་པའི་གྲུ་ནི་ཆག་གྱུར་ལ། །མི་གང་རོའམ་རྩྭའམ་ཤིང་ནི་མི་འཛིན་པ། །ཆུ་དབུས་འཇིག་པར་འགྱུར་ཏེ་ངོགས་སུ་ཕྱིན་མི་འགྱུར། །གང་ཞིག་འཛིན་པ་རྒྱ་མཚོའ་ཕ་རོལ་ཕྱིན་པར་འགྱུར། །དེ་ལྟར་དད་ལྡན་ད ང་བ་ཐོབ་པ་གང་ཞིག་ནི། །ཤེས་རབ་ཕ་རོལ་ཕྱིན་ཡུམ་རྗེས་སུ་མི་འཇུག་མིན། །སྐྱེ་རྒ་འཆི་དང་མྱ་ངན་རྦ་རླབས་འཁྲུགས་པ་ཡིས། །འཁོར་བའི་རྒྱ་མཚོ་དེར་ནི་རྟག་ཏུ་འཁོར་འགྱུར་བ། །གང་དེ་ཤེས་རབ་མཆོག་གི་ཡོངས་སུ་ཟིན་པ་ན། །དངོས་པོའི་རང་བཞིན་མཁས་ཤིང་དོན་དམ་སྟོན་པར་བྱེད། །དེ་དག་ཐབས་ཀྱི་ཡོན་ཏན་ཤེས་རབ་ཡོངས་ཟིན་ན། །མཆོག་ཏུ་རྨད་བྱུང་བདེ་གཤེགས་བྱང་ཆུབ་མྱུར་དུ་རེག །དཔེར་ན་ལ་ལས་རྫ་སོ་མ་བཏང་ཆུ་སྐྱེད་ན། །ཉམ་ཆུང་ཕྱིར་ན་མྱུར་དུ་འཇིག་པར་རིག་པར་བྱ། །སོ་བཏང་བུམ་པར་ཆུ་སྐྱེས་ལམ་དུ་འཇིག་པ་ཡི། །འཇིགས་པ་མེད་ཅིང་བདེ་བར་ཁྱིམ་དུ་ཕྱིན་པར་འགྱུར། །དེ་བཞིན་བྱང་ཆུབ་སེམས་དཔའ་དད་པ་མང་གྱུར་ཀྱང་། །ཤེས་རབ་རྣམ་པར་ཉམས་ན་མྱུར་དུ་མ་རུངས་འགྱུར། །དད་པས་ཤེས་རབ་དེ་ནི་ཡོངས་སུ་ཟིན་གྱུར་ན། །ས་གཉིས་ཤིན་ཏུ་འདས་ཏེ་བྱང་ཆུབ་མཆོག་ཐོབ་འགྱུར། །དཔེར་ན་བཅོས་ལེགས་མ་བྱས་གྲུ་ནི་རྒྱ་མཚོའི་ནང་། །ནོར་དང་བཅས་ཤིང་ཚོང་པར་བཅས་ཏེ་འཇིགས་པར་འགྱུར། །གྲུ་དེ་ལེགས་པར་བཅོས་ལེགས་བྱས་དང་ལྡན་གྱུར་ན། །མི་འཇིག་ནོར་དང་བཅས་པར་ངོགས་སུ་ཕྱིན་པར་འགྱུར། །དེ་ལྟར་བྱང་ཆུབ་སེམས་དཔའ་དད་པས་ཡོངས་བསྒོས་ཀྱང་། །ཤེས་རབ་མེད་ན་བྱང་ཆུབ་ལས་ནི་མྱུར་ཉམས་འགྱུར། །དེ་ཉིད་ཤེས་རབ་ཕ་རོལ་ཕྱིན་པ་མཆོག་ལྡན་ན། །མ་སྨས་མ་ཉམས་རྒྱལ་བའི་བྱང་ཆུབ་རེག་པར་འགྱུར། །ལོ་བརྒྱ་ཉི་ཤུ་ལོན་ཏེ་རྒས་ཤིང་སྡུག་བསྔལ་མི། །ལངས་ཀྱང་བདག་ཉིད་འགྲོ་བར་ནུས་པ་མ་ཡིན་ཏེ། །དེ་ནི་གཡས་གཡོན་གཉིས་ནས་མི་ཡིས་བརྟེན་བྱས་ནས། །འགྱེལ་བའི་འཇིགས་པ་མེད་ཅིང་བདེ་བླག་འགྲོ་བར་འགྱུར། །དེ་བཞིན་བྱང་ཆུབ་སེམས་དཔའ་ཤེས་རབ་སྟོབས་ཆུང་བ། །རབ་ཏུ་ཞུགས་པར་གྱུར་ཀྱང་བར་དུ་ཉམས་པར་འགྱུར། །དེ་ཉིད་ཐབས་དང་ཤེས་རབ་མཆོག་གིས་ཡོངས་ཟིན་ན། །མི་ཉམས་དེ་བཞིན་གཤེགས་ཀྱི་བྱང་ཆུབ་རིག་པར་འགྱུར། །བྱང་ཆུབ་སེམས་དཔའ་དང་པོའི་ལས་ཀྱི་སར་གནས་གང་། །ལྷག་པའི་བསམ་པས་སངས་རྒྱས་བྱང་ཆུབ་མཆོག་ཞུགས་པ། །སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེ ན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུང་། །སྦྱིན་དང་ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང་། །བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་གྱིས། །བྱང་ཆུབ་ཕུང་པོར་ཞེན་ནས་མཆོག་འཛིན་མ་བྱེད་ཅེས། །དང་པོའི་ལས་ཅན་དེ་ལ་དེ་སྐད་བསྟན་པར་བྱ། །དེ་ལྟར་སྤྱོད་པ་ལེགས་འཚོ་སྨྲ་བའི་ཟླ་བ་རྣམས། །འགྲོ་བའི་སྐྱབས་དང་དཔུང་གཉེན་དང་ནི་གནས་ཡིན་ཏེ། །རྟེན་དང་བློ་དང་གླིང་དང་ཡོངས་འདྲེན་དོན་འདོད་པ། །གསལ་བྱེད་སྒྲོན་མ་ཆོས་མཆོག་སྨྲ་བ་མི་འཁྲུགས་ཡིན། །གྲགས་ཆེན་ལྡན་རྣམས་བྱ་དཀའ་གོ་ཆ་གྱོན་བྱེད་དེ། །ཕུང་པོ་ཁམས་དང་སྐྱེ་མཆེད་རྣམས་ཀྱི་གོ་ཆ་མིན། །ཐེག་གསུམ་འདུ་ཤེས་བྲལ་ཞིང་ཡོངས་སུ་བཟུང་བ་མེད། །མི་ལྡོག་གཡོ་བ་མེད་ཅིང་མི་འཁྲུགས་ཆོས་ཅན་ཡིན། །དེ་དག་འདི་འདྲའི་ཆོས་དང་ལྡན་ཞིང་སྤྲོས་པ་མེད། །ཐེ་ཚོམ་སོམ་ཉི་ཡིད་གཉིས་བྲལ་ཞིང་དོན་དང་ལྡན། །ཤེས་རབ་ཕ་རོལ་ཕྱིན་པ་ཐོས་ན་མི་ནུར་བ། །གཞན་གྱི་དྲིང་མི་འཇོག་ཅིང་མི་ལྡོག་རིག་པར་བྱ། །འདྲེན་པ་རྣམས་ཀྱི་ཆོས་འདི་ཟབ་སྟེ་མཐོང་བར་དཀའ། །སུས་ཀྱང་རྟོགས་པ་མེད་ཅིང་ཐོབ་པར་འགྱུར་མེད་པ། །དེ་ཕྱིར་ཕན་མཛད་བརྩེར་ལྡན་བྱང་ཆུབ་བརྙེས་ནས་འདི། །སེམས་ཅན་ཚོགས་སུས་ཤེས་སྙམ་ཐུགས་ཁྲེལ་ཆུང་བར་མཛད། །སེམས་ཅན་རྣམས་ནི་གནས་ལ་དགའ་ཞིང་ཡུལ་རྣམས་འདོད། །འཛིན་ལ་གནས་ཤིང་མི་མཁས་བླུན་རྨོངས་མུན་པ་བཞིན། །ཐོབ་པར་བྱ་བའི་ཆོས་ནི་གནས་མེད་འཛིན་མེད་དེ། །དེས་ན་འཇིག་རྟེན་དག་དང་རྩོད་པ་འབྱུང་བ་ཡིན། །ནམ་མཁའི་ཁམས་ནི་ཤར་གྱི་ཕྱོགས་དང་ལྷོ་ཕྱོགས་དང་། །དེ་བཞིན་ནུབ་ཀྱི་ཕྱོགས་དང་བྱང་ཕྱོགས་ཕ་མཐའ་ཡས། །སྟེང་དང་འོག་དང་ཕྱོགས་བཅུ་ཇི་སྙེད་རྣམས་ནའང་ཡོད། །ཐ་དད་གྱུར་པ་མེད་ཅིང་བྱེ་བྲག་གྱུར་པ་མེད། །འདས་པའི་དེ་བཞིན་ཉིད་གང་མ་བྱིན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །བདེ་གཤེགས་བྱང་ཆུབ་ཐ་དད་ཆོས་དང་བྲལ་གྱུར་པ། །འདི་ནི་བྱང་ཆུབ་སེམས་དཔའི་གང་ཞིག་ཐོབ་འདོད་པ། །ཐབས་དང་ལྡན་པས་ཤེས་རབ་ཕ་རོལ་ཕྱིན་ལ་སྦྱོར། །འདྲེན་པའི་ཤེས་རབ་མེད་ན་ཐོབ་པར་འགྱུར་མ་ཡིན། །བྱ་ཞིག་ལུས་ཆེ་དཔག་ཚད་བརྒྱ་རྩ་ལྔ་བཅུ་བར། །གྱུར་ལ་འདབ་གཤོག་ཟད་དེ་ཉམས་རྩལ་ཡོད་མིན་ན། །དེ་ཡིས་སུམ་ཅུ་རྩ་གསུམ་གནས་ནས་འཛམ་གླིང་འདིར། །བདག་ཉིད་མཆོངས་ན་དེར་ནི་ཉམས་ཉེས་འགྱུར་བ་ཡིན། །རྒྱལ་བ་རྣམས་ཀྱི་ཕ་རོལ་ཕྱིན་པ་ལྔ་འདི་ཡང་། །བསྐལ་པ་བྱེ་བ་ཁྲག་ཁྲིག་མང་པོར་བསྒྲུབས་བྱས་ཤིང་། །སྨོན་ལམ་མཐའ་ཡས་རྒྱ་ཆེན་འཇིག་རྟེན་རྟག་བསྟེན་ཀྱང་། །ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྟུང་། །སངས་རྒྱས་ཐེག་པ་འདི་ལ་ངེས་པར་འབྱུང་འདོད་གང་། །འགྲོ་བ་ཀུན་ལ་སེམས་སྙོམས་ཕ་མའི་འདུ་ཤེས་དང་། །ཕན་པའི་སེམས་དང་བྱམས་པའི་ཡིད་ཀྱི་བརྟུལ་བྱ་ཞིང་། །ཐ་བ་མེད་ཅིང་དྲང་ལ་ཚིག་འཇམ་སྨྲ་བར་བྱ། །འཇིག་རྟེན་མགོན་ལ་གནས་བརྟན་རབ་འབྱོར་ཡོངས་ཞུས་པ། །ཡོན་ཏན་རྒྱ་མཚོ་ཉོན་མོངས་མ་མཆིས་རྟགས་བསྟན་གསོལ། །མཐུ་ཆེ་བ་དག་ཇི་ལྟར་སླར་ལྡོག་མི་འགྱུར་བ། །དེ་ལྟར་ཡོན་ཏན་ཕྱོགས་ཙམ་རྒྱལ་བས་ལུང་བསྟན་གསོལ། །ཐ་དད་འདུ་ཤེས་འབྲལ་ཞིང་རིག་པ་ལྡན་ཚིག་སྨྲ། །དགེ་སྦྱོང་དག་དང་བྲམ་ཟེ་གཞན་ལ་རྟེན་མི་བྱེད། །མཁས་པས་དུས་རྣམས་རྟག་ཏུ་ངན་སོང་གསུམ་པོ་སྤངས། །དེ་དག་དགེ་བཅུའི་ལས་ཀྱི་ལམ་ལ་མངོན་པར་བརྩོན། །ཟང་ཟིང་མེད་པར་འགྲོ་ལ་ཆོས་ནི་རྗེས་སུ་སྟོན། །ཆོས་ལ་གཅིག་ཏུ་དགའ་ཞིང་རྟག་ཏུ་ཚིག་འཇམ་ལྡན། །འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །གཉའ་ཤིང་གང་ཙམ་བལྟ་ཞིང་འགྲོ་ལ་སེམས་འཁྲུལ་མེད། །གཙང་བྱས་གཙང་མའི་གོས་འཆང་གསུམ་པོ་དབེན་ཞིང་དག །རྙེད་འདོད་མ་ཡིན་ཁྱུ་མཆོག་རྟག་ཏུ་ཆོས་འདོད་པ། །བདུད་ཀྱི་གཡུལ་ལས་འདས་ཤིང་གཞན་གྱིས་དྲིང་མི་འཇོག །བསམ་གཏན་བཞི་ལ་བསམ་གཏན་བསམ་གཏན་དེར་མི་གནས། །གྲགས་པ་འདོད་པ་མ་ཡིན་ཁྲོ་བས་སེམས་དཀྲིས་མེད། །ཁྱིམ་པར་གྱུར་ཀྱང་རྟག་ཏུ་དངོས་པོ་ཀུན་མ་ཆགས། །འཚོ་བའི་ཕྱིར་ནི་ཡ་ངས་ལོངས་སྤྱོད་ཚོལ་མི་བྱེད། །དྲག་ཤུལ་སྤྱོད་སྔགས་མི་བྱེད་བུད་མེད་སྤྱོད་སྔགས་མིན། །འདོད་པའི་ལས་ཅན་ཕོ་མོར་གྱུར་ཞེས་སྟོན་མི་བྱེད། །རབ་ཏུ་དབེན་པའི་ཤེས་རབ་ཕ་རོལ་ཕྱིན་མཆོག་བརྩོན། །འཐབ་དང་རྩོད་དང་བྲལ་ཞིང་བྱམས་པའི་སེམས་ཀྱང་བརྟན། །ཀུན་མཁྱེན་འདོད་ཅིང་བསྟན་ལ་རྟག་ཏུ་གཞོལ་སེམས་ལྡན། །མཐའ་འཁོབ་ཀླ་ཀློ་སྐྱེ་བོའི་ཡུལ་མཐའ་རྣམ་པར་སྤངས། །རང་གི་ས་ལ་དོགས་མེད་རྟག་ཏུ་རི་རབ་འདྲ། །ཆོས་ཕྱིར་སྲོག་ཀྱང་འདོར་ཞིང་རྣལ་འབྱོར་རབ་ཏུ་བརྩོན། མི་ལྡོག་རྟགས་ནི་འདི་དག་ཡིན་པར་ཤེས་པར་བྱ། །གཟུགས་དང་ཚོར་དང་འདུ་ཤེས་སེམས་པ་རྣམ་ཤེས་རྣམས། །ཟབ་སྟེ་རང་བཞིན་མཚན་མ་མེད་ཅིང་རབ་ཞི་བ། །དཔེར་ན་མདའ་ཡིས་རྒྱ་མཚོའི་གཏིང་ཐུག་ཚོལ་བ་ལྟར། །ཤེས་རབ་ཀྱིས་ནི་བརྟགས་ན་ཕུང་པོའི་གཏིང་མི་རྙེད། །བྱང་ཆུབ་སེམས་དཔའ་གང་ཞིག་དེ་ལྟར་ཟབ་གྱུར་ཅིང་། །ཐེག་པ་དོན་དམ་ཆགས་མེད་གང་ལ་ཕུང་པོ་དང་། །ཁམས་དང་སྐྱེ་མཆེད་ཡོད་མིན་ཆོས་འདི་རྟོགས་པ་དེའི། །བསོད་ནམས་ཡང་དག་གྲུབ་པ་དེ་ལས་ཅི་ཞིག་ཡོད། །དཔེར་ན་འདོད་ཆགས་ཆོས་ལ་སྤྱོད་པའི་སྐྱེས་བུ་ཞིག །བུད་མེད་དུས་བཏབ་དེ་དང་མ་ཕྲད་དེ་ཡི་ནི། །ཉིན་གཅིག་སེམས་ཀྱི་རྣམ་རྟོག་སྤྱོད་པ་ཇི་སྙེད་པ། །དེ་སྙེད་བསྐལ་པར་བྱང་ཆུབ་སེམས་དཔས་ཐོབ་པར་འགྱུར། །བྱང་ཆུབ་སེམས་དཔའ་གང་ཞིག་བསྐལ་མང་བྱེ་སྟོང་དུ། །དགྲ་བཅོམ་རང་རྒྱལ་སྦྱིན་བྱེད་ཚུལ་ཁྲིམས་སྲུང་བྱེད་ཀྱང་། །གང་གིས་ཤེས་རབ་ཕ་རོལ་ཕྱིན་མཆོག་ལྡན་པའི་ཆོས། །བརྗོད་པའི་ལེགས་ལ་སྦྱིན་དང་ཚུལ་ཁྲིམས་ཆར་མི་ཕོད། །བྱང་ཆུབ་སེམས་དཔའ་གང་ཞིག་ཤེས་རབ་མཆོག་བསྒོམས་ཏེ། །དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་། །དེ་ཡང་འགྲོ་བའི་དོན་དུ་བྱང་ཆུབ་རྒྱུར་བསྔོ་ན། །དགེ་བ་དེ་དང་མཉམ་པ་འཇིག་རྟེན་གསུམ་ན་མེད། །བསོད་ནམས་དེ་ཡང་གསོག་དང་དེ་བཞིན་སྟོང་པ་དང་། །གསོབ་དང་ཡ་མ་བརླ་དང་སྙིང་པོ་མེད་ཤེས་པར། །དེ་ལྟར་བདེ་གཤེགས་རྣམས་ཀྱི་ཤེས་རབ་སྤྱད་སྤྱོད་ན། །སྤྱོད་ཚེ་བསོད་ནམས་དཔག་ཏུ་མེད་པ་ཡོངས་སུ་འཛིན། །སངས་རྒྱས་ཀྱིས་བཤད་རབ་ཏུ་སྦྱར་ཞིང་རབ་བསྟན་པའི། །ཆོས་འདི་ཐམས་ཅད་བརྗོད་པ་ཙམ་དུ་ཟད་ཤེས་ན། །བསྐལ་པ་བྱེ་བ་ཁྲག་ཁྲིག་མང་པོར་བརྗོད་བྱས་ཀྱང་། །ཆོས་ཀྱི་དབྱིངས་ལ་ཟད་པ་མེད་ཅིང་འཕེལ་བ་མེད། །རྒྱལ་བ་རྣམས་ཀྱི་ཕ་རོལ་ཕྱིན་ཅེས་བྱ་བ་དང་། །ཆོས་དེ་རྣམས་ཀྱང་མིང་ཙམ་དུ་ནི་ཡོངས་སུ་བསྒྲགས། །ཡོངས་བསྔོ་རློམ་སེམས་མེད་པའི་བྱང་ཆུབ་སེམས་དཔའ་ནི། །ཉམས་པ་མེད་ཅིང་སངས་རྒྱས་བྱང་ཆུབ་མཆོག་རེག་འགྱུར། །འབྲུ་མར་སྙིང་པོ་འབར་བ་ཕྲད་པ་དང་པོ་ཡིས། །སྙིང་པོ་ཚིག་མིན་དེ་མེད་པར་ཡང་དེ་མི་ཚིག །མེ་ལྕེ་ཕྲད་པ་ཐ་མས་སྙིང་པོ་ཚིག་མིན་ལ། །མེ་ལྕེ་ཐ་མ་མེད་པར་སྙིང་པོ་ཚིག་མིན་ལྟར། །དང་པོའི་སེམས་ཀྱིས་བྱང་ཆུབ་མཆོག་རེག་མ་ཡིན་ལ། །དེ་མེད་པར་ཡང་དེ་ལ་རེག་པར་ནུས་མ་ཡིན། །ཐ་མའི་སེམས་ཀྱི་བྱང་ཆུབ་ཞི་བ་ཐོབ་མིན་ལ། །དེ་མེད་པར་ཡང་དེ་ཐོབ་ནུས་པ་མ་ཡིན་ནོ། །ས་བོན་ལས་ནི་མྱུ་གུ་མེ་ཏོག་འབྲས་བུ་འབྱུང་། །དེ་ཡང་འགག་ལ་ཤིང་ཡང་མེད་པ་དེ་མིན་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་རྒྱུ་ཡིན་ཏེ། །དེ་ཡང་འགགས་ལ་བྱང་ཆུབ་མེད་པ་དེ་མ་ཡིན། །ས་བོན་རྙེད་ནས་འབྲུ་དང་ས་ལུ་ལ་སོགས་འབྱུང་། །དེ་ཡི་འབྲས་བུ་དེ་ལ་ཡོད་མིན་མེད་པའང་མིན། །རྒྱལ་བ་རྣམས་ཀྱི་བྱང་ཆུབ་འདི་ནི་འབྱུང་བར་འགྱུར། །དངོས་པོའི་རང་བཞིན་བྲལ་བས་སྒྱུ་མ་འབྱུང་བར་འགྱུར། །ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱིས་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་མཆོག་རྒྱུ་སྟེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །སྟོང་པ་མཚན་མེད་སྨོན་པ་མེད་པར་ཆོས་སྤྱོད་ཅིང་། །མྱ་ངན་འདས་ལ་མི་རེག་མཚན་མར་མི་སྤྱོད་པ། །དཔེར་ན་མཉན་པ་མཁས་པ་ཕར་འགྲོ་ཚུར་འགྲོ་ཡང་། །མཐའ་གཉིས་མི་གནས་རྒྱ་མཚོར་གནས་པ་མེད་པ་བཞིན། །དེ་ལྟར་སྤྱོད་པའི་བྱང་ཆུབ་སེམས་དཔའ་འདི་སྙམ་བདག །སྟོབས་བཅུས་ལུང་བསྟན་བྱང་ཆུབ་རེག་གྱུར་རློམ་སེམས་མེད། །འདི་ལ་ཅི་ཡང་མེད་ཅེས་བྱང་ཆུབ་སྐྲག་པ་མེད། །དེ་ལྟར་སྤྱོད་པ་བདེ་གཤེགས་ཤེས་རབ་སྤྱོད་པ་ཡིན། །འཇིག་རྟེན་དགོན་པའི་ལམ་དང་མུ་གེའི་ནད་བཅས་པར། །མཐོང་ནས་སྐྲག་པ་མེད་ཅིང་དེ་ནས་གོ་གྱོན་ཏེ། །ཕྱི་མའི་མུ་མཐའ་རྟག་ཏུ་བརྩོན་ཞིང་རབ་ཤེས་ནས། །ཡོངས་སུ་སྐྱོ་བའི་ཡིད་ནི་རྡུལ་ཙམ་བསྐྱེད་མི་བྱེད། །བྱང་ཆུབ་སེམས་དཔའ་རྒྱལ་བའི་ཤེས་རབ་སྤྱོད་བྱེད་ལ། །ཕུང་པོ་འདི་དག་གདོན་ནས་སྟོང་ཞིང་སྐྱེ་མེད་ཤེས། །མཉམ་པར་མ་བཞག་སེམས་ཅན་ཁམས་ལ་སྙིང་རྗེ་འཇུག །བར་སྐབས་དེར་ཡང་སངས་རྒྱས་ཆོས་ལས་ཡོངས་མི་ཉམས། །དཔེར་ན་སྐྱེས་བུ་མཁས་པ་ཡོན་ཏན་ཀུན་ལྡན་ཞིང་། །སྟོབས་ལྡན་མི་ཐུབ་བརྩོན་བྱས་སྒྱུ་རྩལ་ཆོ་ག་ཤེས། །འཕོང་དང་བཟོ་གནས་མང་པོའི་ཕ་རོལ་ཕྱིན་གྱུར་ཅིང་། །སྒྱུ་མ་སྒྲུབ་ཤེས་འགྲོ་དོན་རབ་ཏུ་འདོད་པ་ཞིག །ཕ་དང་མ་དང་ཆུང་མར་བཅས་པ་ཡོངས་བསྡུས་ནས། །དགྲ་བྱད་མང་བ་དགོན་པའི་ལམ་དུ་ཕྱིན་པ་དང་། །དེ་ཡིས་དཔའ་ཞིང་བརྟུལ་ཕོད་སྐྱེས་བུ་མང་སྤྲུལ་ཏེ། །བདེ་བར་སོང་ཞིང་སླར་ཡང་ཁྱིམ་དུ་འོང་བ་ལྟར། །དེ་བཞིན་དེ་ཚེ་བྱང་ཆུབ་སེམས་དཔའ་མཁས་པ་ཡང་། །སེམས་ཅན་ཁམས་རྣམས་ཀུན་ཏུ་སྙིང་རྗེ་ཆེ་བསྐྱེད་ཅིང་། །བདུད་བཞི་དག་དང་ས་གཉིས་ལས་ཀྱང་རབ་འདས་ནས། །ཏིང་འཛིན་མཆོག་ལ་གནས་ཤིང་བྱང་ཆུབ་རེག་མི་བྱེད། །མཁས་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །སེམས་ཅན་ལས་ལ་སྤྱོད་པའི་རྒྱུ་ནི་དེ་འདྲ་སྟེ། །ནམ་མཁའ་གང་ལ་གནས་ཡིན་དོན་འདི་བསམ་པར་གྱིས། །དེ་བཞིན་བྱང་ཆུབ་སེམས་དཔའ་སྟོང་པ་ཉིད་གནས་པ། །འགྲོ་ལ་སེམས་ཅན་ཤེས་པའི་སྨོན་ལམ་རྟེན་ཅན་གྱིས། །བྱ་བ་རྣམ་པ་སྣ་ཚོགས་དུ་མ་སྟོན་བྱེད་ཅིང་། །མྱ་ངན་འདས་ལ་མི་རེག་སྟོང་པར་གནས་པ་མེད། །གང་གི་ཚེ་ན་བྱང་ཆུབ་སེམས་དཔའ་མཁས་གསལ་བ། །སྟོང་པ་ཞི་བའི་ཏིང་འཛིན་དམ་པ་འདི་སྤྱོད་པ། །བར་སྐབས་དེར་ནི་མཚན་མ་རབ་ཏུ་སྒོམ་མི་བྱེད། །མཚན་མ་མེད་པར་གནས་ཤིང་ཞི་ལ་རབ་ཞི་སྤྱོད། །བར་སྣང་འཕུར་བའི་བྱ་ལ་གནས་ཡོད་མ་ཡིན་ཏེ། །དེ་ན་གནས་པ་མ་ཡིན་ས་ལ་ལྟུང་མི་འགྱུར། །དེ་ལྟར་བྱང་ཆུབ་སེམས་དཔའ་རྣམ་ཐར་སྒོར་སྤྱོད་པ། །མྱ་ངན་འདས་ལ་མི་རེག་མཚན་མར་སྤྱོད་མ་ཡིན། །དཔེར་ན་འཕོང་བསླབས་སྐྱེས་བུས་གནམ་དུ་མདའ་འཕངས་ཏེ། །མདའ་གཞན་དག་ནི་ཕྱིར་བཞིན་རྒྱུད་མར་ཡོངས་བཏགས་ནས། །སྔ་མའི་མདའ་དེ་ས་ལ་ལྷུང་བའི་སྐབས་མི་རྙེད། །མི་དེ་འདོད་ན་མདའ་དེ་ས་ལ་ལྷུང་བར་འགྱུར། །དེ་ལྟར་ཤེས་རབ་ཕ་རོལ་ཕྱིན་པ་མཆོག་སྤྱོད་པ། །ཤེས་རབ་ཐབས་སྟོབས་རྫུ་འཕྲུལ་གྱིས་ནི་རྣམ་དཔྱོད་པ། །དེ་དག་དགེ་བའི་རྩ་བ་ཇི་སྲིད་མ་རྫོགས་པར། །དེ་སྲིད་སྟོང་ཉིད་དམ་པ་དེ་ནི་ཐོབ་མི་བྱེད། །དཔེར་ན་དགེ་སློང་རྫུ་འཕྲུལ་སྟོབས་མཆོག་ལྡན་པ་ཞིག །ནམ་མཁར་གནས་ཏེ་ཅིག་ཅར་ཆོ་འཕྲུལ་རྣམ་པར་འཕྲུལ། །འགྲོ་དང་འཆག་པ་དང་ནི་ཉལ་དང་འདུག་པ་སྟོན། །དེ་ནི་སྐྱོ་བ་མེད་ཅིང་དེ་ལ་དུབ་པ་མེད། །དེ་བཞིན་བྱང་ཆུབ་སེམས་དཔའ་མཁས་པ་སྟོང་གནས་ཤིང་། །ཡེ་ཤེས་རྫུ་འཕྲུལ་ཕ་རོལ་སོན་ལ་གནས་པ་མེད། །འགྲོ་བ་དག་ལ་བྱ་བ་རྣམ་པ་མཐའ་ཡས་སྟོན། །བསྐལ་པ་བྱེ་བར་སྐྱོ་བ་མེད་ཅིང་དུབ་པ་མེད། །དཔེར་ན་མི་འགའ་གཡང་ས་ཆེན་པོར་འཇུག་བྱེད་ཅིང་། །ལག་པ་གཉིས་ཀས་གདུགས་གཉིས་འཛིན་ཅིང་ནམ་མཁའ་ལ། །མཆོང་བར་བྱེད་ཅིང་གཡང་ས་ཆེན་པོར་ལུས་བོར་ནས། །ལྟུང་བར་མི་འགྱུར་ཇི་སྲིད་དེར་ནི་འགྲོ་བར་འགྱུར། །དེ་བཞིན་བྱང་ཆུབ་སེམས་དཔའ་མཁས་པ་སྙིང་རྗེར་གནས། །ཐབས་དང་ཤེས་རབ་གཉིས་ཀྱི་གདུགས་ནི་ཡོངས་བཟུང་སྟེ། །ཆོས་རྣམས་སྟོང་པ་མཚན་མེད་སྨོན་པ་མེད་རྟོག་ཅིང་། །མྱ་ངན་འདས་ལ་རེག་པ་མེད་ལ་ཆོས་ཀྱང་མཐོང་། །དཔེར་ན་རིན་ཆེན་འདོད་པ་རིན་ཆེན་གླིང་སོང་སྟེ། །རིན་ཆེན་རྙེད་ནས་ཕྱིར་ཡང་ཁྱིམ་དུ་འོང་འགྱུར་བ། །དེར་ན་དེད་དཔོན་འབའ་ཞིག་བདེ་བར་འཚོ་བྱེད་ཅིང་། །གཉེན་བཤེས་ཚོགས་ཡིད་མི་བདེར་འཇོག་པ་མིན་པ་ལྟར། །དེ་བཞིན་བྱང་ཆུབ་སེམས་དཔའ་སྟོང་ཉིད་རིན་ཆེན་གྱི། །གླིང་དུ་སོང་སྟེ་བསམ་གཏན་དབང་པོ་སྟོབས་ཐོབ་པ། །མྱ་ངན་འདས་ལ་རེག་པ་འབའ་ཞིག་མངོན་དགའ་ཞིང་། །སེམས་ཅན་སྡུག་བསྔལ་ཡིད་དུ་འཇོག་པར་འགྱུར་མ་ཡིན། །དཔེར་ན་དོན་གཉེན་ཚོངས་པ་རྒྱུ་ཤེས་བྱ་བའི་ཕྱིར། །བར་གྱི་གྲོང་ཁྱེར་གྲོང་རྡལ་གྲོང་གང་ཡིན་པར་འགྲོ། །དེར་ཡང་མི་གནས་རིན་ཆེན་གླིང་དུའང་མི་གནས་ལ། །རིག་པ་ཁྱིམ་དུ་མི་གནས་ལམ་ལ་མཁས་པར་འགྱུར། །དེ་བཞིན་བྱང་ཆུབ་སེམས་དཔའ་གསལ་དེ་ཉན་ཐོས་དང་། །རང་རྒྱལ་རྣམས་ཀྱི་ཤེས་པ་རྣམ་གྲོལ་ཀུན་ལ་མཁས། །དེ་ལ་མི་གནས་སངས་རྒྱས་ཡེ་ཤེས་གནས་མ་ཡིན། །འདུས་མ་བྱས་ལ་མི་གནས་ལམ་གྱི་ཚུལ་ཤེས་ཡིན། །གང་ཚེ་འགྲོ་ལ་བྱམས་པ་རྗེས་སུ་འབྲེལ་བྱས་ནས། །ཏིང་འཛིན་སྟོང་པ་མཚན་མེད་སྨོན་པ་མེད་སྤྱོད་པ། །དེ་ནི་མྱ་ངན་འདས་པ་ཐོབ་པར་འགྱུར་ཞེའམ། །འདུས་བྱས་ཡིན་པར་གདགས་ནུས་དེ་ནི་གནས་མེད་དོ། །དཔེར་ན་སྤྲུལ་པའི་མི་ལུས་མི་སྣང་མ་ཡིན་ཞིང་། །དེ་ནི་མིང་གིས་ཀྱ ང་ནི་གདགས་པར་ནུས་པ་ལྟར། །དེ་བཞིན་བྱང་ཆུབ་སེམས་དཔའ་རྣམ་ཐར་སྒོར་སྤྱོད་པ། །དེ་ནི་མིང་གིས་ཀྱང་ནི་གདགས་པར་ནུས་པ་ཡིན། །གལ་ཏེ་སྤྱོད་པ་དང་ནི་དབང་པོ་ཡོངས་དྲིས་ལ། །བྱང་ཆུབ་སེམས་དཔའ་སྟོང་པ་མཚན་མ་མེད་པའི་ཆོས། །ཡོངས་སུ་མི་སྟོན་ཕྱིར་མི་ལྡོག་པ་ས་ཡི་ཆོས། །མི་འཆད་དེ་ནི་ལུང་མ་བསྟན་པ་ཡིན་རིག་བྱ། །སྐབས་བཞི་པའོ།། །།དགྲ་བཅོམ་ས་དང་རྐྱེན་གྱི་སངས་རྒྱས་ཡེ་ཤེས་དང་། །ཁམས་གསུམ་དག་ན་རྨི་ལམ་ན་ཡང་མི་འདོད་ཅིང་། །སངས་རྒྱས་རྣམས་མཐོང་འགྲོ་ལ་ཆོས་ཀྱང་སྟོན་བྱེད་པ། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །རྨི་ལམ་ན་ནི་སེམས་ཅན་ངན་སོང་གསུམ་གནས་མཐོང་། །སྐད་ཅིག་དེ་ལ་ངན་སོང་རྒྱུན་གཅོད་སྨོན་ལམ་འདེབས། །བདེན་པའི་བྱིན་གྱི་རླབས་ཀྱིས་མེ་ཡི་ཕུང་པོ་ཞི། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །མི་ཡི་འཇིག་རྟེན་འབྱུང་པོའི་གདོན་དང་ནད་མང་བ། །ཕན་དང་སྙིང་བརྩེར་ལྡན་པའི་བདེན་པའི་བྱིན་གྱིས་ཞི། །འོན་ཀྱང་རློམ་སེམས་མེད་ཅིང་ང་རྒྱལ་སྐྱེ་མེད་པ། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །ཅི་སྟེ་དེ་ནི་བདེན་པའི་བྱིན་རླབས་སྣ་ཚོགས་དག །འབྱོར་པས་བདག་ལུང་བསྟན་སྙམ་རློམ་སེམས་འབྱུང་བའམ། །གལ་ཏེ་བྱང་ཆུབ་སེམས་དཔའ་གཞན་གྱི་ལུང་བསྟན་རློམ། །རློམ་སེམས་གནས་པ་དེ་ནི་བློ་ཆུང་ཤེས་པར་བྱ། །མིང་གི་གཞི་ལས་བདུད་ནི་ཉེ་བར་འོངས་གྱུར་ནས། །འདི་སྐད་སྨྲས་ཏེ་འདི་ནི་ཁྱོད་དང་ཕ་མ་དང་། །ཁྱོད་ཀྱི་བདུན་མེས་བརྒྱུད་ཀྱི་བར་གྱི་མིང་ཡིན་ཞིང་། །གང་ཚེ་ཁྱོད་ནི་སངས་རྒྱས་འགྱུར་པའི་མིང་འདི་ཡིན། །སྦྱངས་སྡོམ་རྣལ་འབྱོར་ལྡན་པ་ཅི་འདྲ་འབྱུང་འགྱུར་ལ། །ཁྱོད་སྔོན་ཡོན་ཏན་ཚུལ་ཡང་འདི་འདྲའོ་ཞེས་བརྗོད་དེ། །དེ་སྐད་གང་ཐོས་རློམ་སེམས་བྱང་ཆུབ་སེམས་དཔའ་ནི། །བདུད་ཀྱི་ཡོངས་སུ་བསླང་ཞིང་བློ་ཆུང་རིག་པར་བྱ། །རབ་ཏུ་དབེན་པའི་གྲོང་དང་གྲོང་ཁྱེར་རི་སུལ་དང་། །དགོན་པ་དབེན་པའི་ནགས་ཁྲོད་རབ་ཏུ་སྟེན་བྱེད་ཅིང་། །བདག་བསྟོད་གཞན་ལ་སྨོད་པའི་བྱང་ཆུབ་སེམས་དཔའ་ནི། །བདུད་ཀྱིས་ཡོངས་སུ་བསླང་ཞིང་བློ་ཆུང་རིག་པར་བྱ། །རྟག་ཏུ་གྲོང་དང་ཡུལ་འཁོར་གྲོང་རྡལ་གནས་བྱེད་ཅིང་། །སེམས་ཅན་སྨིན་བྱེད་བྱང་ཆུབ་བརྩོན་པ་མ་གཏོགས་པ། །དེ་ནི་དགྲ་བཅོམ་རང་རྒྱལ་འདོད་པ་གཞར་མི་སྐྱེད། །འདི་ནི་བདེ་བར་གཤེགས་པའི་སྲས་ཀྱི་དཔེན་པར་གསུངས། །གང་ཞིག་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱིས་གང་བར་ལོ་མང་བྱེ་བར་གནས་བྱེད་ཀྱང་། །དབེན་པ་འདི་མི་ཤེས་པའི་བྱང་ཆུབ་སེམས་དཔའ་དེ། །ལྷག་པའི་ང་རྒྱལ་རྙེད་ནས་འདྲེ་བར་གནས་པ་ཡིན། །བྱང་ཆུབ་སེམས་དཔའ་འགྲོ་བའི་དོན་བརྩོན་བསམ་གཏན་དང་། །སྟོབས་དང་དབང་པོ་རྣམ་ཐར་ཏིང་འཛིན་ཐོབ་དེ་ལ། །འདི་ནི་དགོན་དབེན་སྤྱོད་པ་མིན་སྙམ་བརྙས་བྱེད་པ། །དེ་ནི་བདུད་ཀྱི་སྤྱོད་ཡུལ་གནས་ཞེས་རྒྱལ་བས་གསུངས། །གང་ཞིག་གྲོང་ངམ་འོན་ཏེ་དགོན་པར་གནས་ཀྱང་རུང་། །ཐེག་པ་གཉིས་ཀྱི་སེམས་བྲལ་བྱང་ཆུབ་མཆོག་ངེས་ན། །འདི་ནི་འགྲོ་དོན་ཞུགས་པ་རྣམས་ཀྱི་དབེན་པ་སྟེ། །བྱང་ཆུབ་སེམས་དཔའ་དྲོད་སྙོམས་དེ་ནི་བདག་ཉིད་ཉམས། །དེ་ལྟ་བས་ན་བྱང་ཆུབ་དམ་པ་ཚོལ་བ་ཡི། །བསམ་པ་དྲག་ལྡན་མཁས་པས་ང་རྒྱལ་ངེས་བཅོམ་སྟེ། ། ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །སངས་རྒྱས་བྱང་ཆུབ་མཆོག་ཞུགས་བྱང་ཆུབ་སེམས་དཔའ་དག །ཕ་རོལ་ཕྱིན་དང་བཅས་ཏེ་དགེ་བའི་བཤེས་སུ་བསྟེན། །དེ་དག་རྗེས་སུ་སྟོན་བྱེད་འདི་ནི་བསྒྲུབ་པའི་ས། །རྒྱུ་རྣམ་གཉིས་ཀྱིས་སངས་རྒྱས་བྱང་ཆུབ་མྱུར་དུ་རྟོགས། །རྒྱལ་བ་འདས་དང་མ་བྱོན་ཕྱོགས་བཅུ་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཕ་རོལ་ཕྱིན་འདི་བྱང་ཆུབ་མཆོག་ལ་ཞུགས་རྣམས་ཀྱི། །གསལ་དང་སྒྲོན་དང་སྣང་དང་སྟོན་མཆོག་ཡིན་ཞེས་བཤད། །ཇི་ལྟར་ཤེས་རབ་ཕ་རོལ་ཕྱིན་པ་མཚན་ཉིད་སྟོང་། །ཆོས་འདི་ཐམས་ཅད་མཚན་ཉིད་དེ་དང་འདྲ་ཤེས་ཤིང་། །ཆོས་རྣམས་སྟོང་ཞིང་མཚན་མ་མེད་པར་རབ་ཤེས་ན། །དེ་ལྟར་སྤྱོད་པ་བདེ་གཤེགས་ཤེས་རབ་སྤྱོད་པ་ཡིན། །སེམས་ཅན་ཡོངས་སུ་ལྟོག་པས་ཟས་ལ་འདོད་བྱེད་ཅིང་། །འཁོར་བར་ཆགས་པའི་ཡིད་དང་ལྡན་རྣམས་རྟག་ཏུ་འཁོར། །བདག་དང་བདག་གི་ཆོས་གཉིས་ཡང་དག་མིན་སྟོང་སྟེ། །བྱིས་པ་བདག་ཉིད་ཀྱི་ནི་མཁའ་ལ་མདུད་པ་བོར། །དཔེར་ན་དོགས་པའི་འདུ་ཤེས་ཀྱིས་ནི་དུག་ལངས་པ། །དུག་དེ་ཁོང་དུ་སོང་བ་མེད་ཀྱང་བརྒྱལ་བར་འགྱུར། །དེ་བཞིན་བྱིས་པ་བདག་དང་བདག་གིར་ཁས་ལེན་པ། །བདག་དེར་འདུ་ཤེས་ཡང་དག་མིན་རྟོག་སྐྱེ་ཞིང་འཇིག །ཇི་ལྟར་འཛིན་པ་དེ་ལྟར་ཀུན་ནས་ཉོན་མོངས་བསྟན། །བདག་དང་བདག་གིར་མི་དམིགས་རྣམ་པར་བྱང་བར་གསུངས། །འདི་ལ་གང་ཡང་ཉོན་མོངས་རྣམ་དག་འགྱུར་མེད་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་པ་རྟོགས། །འཛམ་བུའི་གླིང་ན་སེམས་ཅན་ཇི་སྙེད་མ་ལུས་པ། །དེ་དག་ཐམས་ཅད་བྱང་ཆུབ་མཆོག་ཏུ་སེམས་བསྐྱེད་ནས། །ལོ་སྟོང་བྱེ་བ་མང་པོར་སྦྱིན་པ་བྱིན་བྱས་ལ། །ཀུན་ཀྱང་འགྲོ་བའི་དོན་ཕྱིར་བྱང་ཆུབ་རྒྱུ་བསྔོ་ཡང་། །གང་ཞིག་ཤེས་རབ་ཕ་རོལ་ཕྱིན་ལ་མངོན་བརྩོན་པ། །ཐ་ན་ཉི་མ་གཅིག་ཅིག་རྗེས་སུ་མཐུན་བྱེད་ན། །དེ་ལ་སྦྱིན་པའི་ཕུང་པོས་བསོད་ནམས་ཆར་མི་ཕོད། །དེ་ཕྱིར་གཡེལ་མེད་རྟག་ཏུ་ཤེས་རབ་འཇུག་པར་བྱ། །ཤེས་རབ་ཕ་རོལ་ཕྱིན་མཆོག་སྤྱོད་པའི་རྣལ་འབྱོར་པ། །སྙིང་རྗེ་ཆེན་པོ་བསྐྱེད་ཅིང་སེམས་ཅན་འདུ་ཤེས་མེད། །དེ་ཚེ་མཁས་པ་འགྲོ་བ་ཀུན་གྱི་སྦྱིན་གནས་འགྱུར། །རྟག་ཏུ་ཡུལ་འཁོར་བསོད་སྙོམས་དོན་ཡོད་ཡོངས་སུ་སྤྱོད། །བྱང་ཆུབ་སེམས་དཔའ་གང་འདིར་ཡུན་རིང་འབྲེལ་བ་ཡི། །ལྷ་མི་ངན་སོང་གསུམ་གྱི་སེམས་ཅན་དགྲོལ་བའི་ཕྱིར། །ལམ་ཡང་ཕ་རོལ་སེམས་ཅན་ཁམས་ལ་སྟོན་འདོད་པ། །ཉིན་མཚན་ཤེས་རབ་ཕ་རོལ་ཕྱིན་ལ་བརྩོན་པར་བྱ། །མི་ཞིག་སྔོན་ཆད་མ་རྙེད་པ་ཡི་རིན་ཆེན་མཆོག །དུས་གཞན་ཞིག་ན་རྙེད་པར་གྱུར་ཏེ་དགའ་བ་ལས། །རྙེད་མ་ཐག་ཏུ་བག་མེད་གྱུར་ཏེ་སྟོར་ན་ནི། །སྟོར་བས་རིན་ཆེན་མངོན་འདོད་རྟག་ཏུ་སྡུག་བསྔལ་ལོ། །དེ་ལྟར་བྱང་ཆུབ་མཆོག་ཞུགས་རིན་ཆེན་ལྟ་བུ་ཡི། །ཤེས་རབ་ཕ་རོལ་ཕྱིན་ལ་རྣལ་འབྱོར་དོར་མི་བྱ། །རིན་ཆེན་རྙེད་ནས་བླངས་ཏེ་རབ་ཏུ་བརྩོན་དཀྲིས་ནས། །མྱུར་དུ་འགྲོ་བར་བྱེད་པ་ཞི་བར་འགྱུར་བ་བཞིན། །ཉི་མ་སྤྲིན་དང་བྲལ་བའི་འོད་ཟེར་དྲྭ་བ་ཅན། །མུན་ནག་འཐིམ་པོའི་མུན་པ་ཐམས་ཅད་འཇོམས་འཆར་བ། །སྲིན་བུ་མེ་ཁྱེར་སྲོག་ཆགས་འབྱུང་པོ་ཐམས་ཅད་དང་། །སྐར་མའི་ཚོགས་དང་ཟླ་བའི་འོད་ཀུན་ཟིལ་གྱིས་གནོན། །དེ་བཞིན་བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན། །མཆོག་སྤྱོད་སྟོང་པ་དང་ནི་མཚན་མ་མེད་སྤྱོད་པ། །མཁས་པས་ལྟ་བའི་འཐིབས་པོ་བཅོམ་ནས་འགྲོ་ཀུན་དང་། །དགྲ་བཅོམ་རང་རྒྱལ་བྱང་ཆུབ་སེམས་མང་ཟིལ་གྱིས་གནོན། །དཔེར་ན་རྒྱལ་པོའི་བུ་ཞིག་ནོར་གཏོང་དོན་འདོད་པ། །ཀུན་གྱི་གཙོ་བོར་གྱུར་ཏེ་མངོན་པར་འགྲོ་བྱ་འོས། །འདི་ནི་དེ་ལྟ་ན་ཡང་སེམས་ཅན་མང་དགའ་བྱེད། །ཐབས་ཐོབ་གྱུར་ཏེ་རྒྱལ་སྲིད་གནས་ན་སྨོས་ཅི་དགོས། །དེ་ལྟར་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །བདུན་རྩི་སྦྱིན་པར་བྱེད་ཅིང་ལྷ་དང་མི་རྣམས་དགའ། །འདི་ནི་ད་ལྟ་ན་ཡང་སེམས་ཅན་མང་ཕན་བརྩོན། །ཆོས་ཀྱི་རྒྱལ་པོར་གནས་པར་གྱུར་ན་སྨོས་ཅི་དགོས། །དེ་ཡི་ཚེ་ན་བདུད་ནི་ཟུག་རྔུ་ལྡན་པར་འགྱུར། །མྱ་ངན་ཉམ་ཐག་སྡུག་བསྔལ་ཡིད་མི་བདེ་ཉམ་ཆུང་། །ཇི་ལྟར་བྱང་ཆུབ་སེམས་དཔའ་འདི་ཡིད་ནུར་འགྱུར་ཞེས། །འཇིགས་པ་བསྟན་ཕྱིར་ཕྱོགས་རྣམས་སྲེག་ཅིང་སྐར་མདའ་གཏོང་། །གང་ཚེ་མཁས་པ་དེ་དག་བསམ་པ་རབ་ལྡན་ཞིང་། །ཉིན་མཚན་ཤེས་རབ་ཕ་རོལ་ཕྱིན་པ་མཆོག་དོན་ལྟ། །དེ་ཚེ་ལུས་སེམས་དག་ནི་མཁའ་འགྲོ་བྱ་ལྟར་རྒྱུ། །ནག་པོའི་རྩ་ལག་རྣམས་ཀྱིས་གླགས་རྙེད་ག་ལ་འགྱུར། །གང་ཚེ་བྱང་ཆུབ་སེམས་དཔའ་འཐབ་དང་རྩོད་གྱུར་ཞིང་། །ཕན་ཚུན་མི་མཐུན་ཁྲོས་པའི་སེམས་དང་ལྡན་གྱུར་པ། །དེ་ཚེ་བདུད་ནི་མཆོག་ཏུ་དགའ་ཞིང་ཉམས་བདེར་འགྱུར། །དེ་གཉིས་རྒྱལ་བའི་ཡེ་ཤེས་ལས་ནི་རིང་འགྱུར་སྙམ། །དེ་གཉིས་རིང་དུ་འགྱུར་ཞིང་ཤ་ཟ་འདྲ་བར་འགྱུར། །གཉིས་ག་རང་གི་དམ་བཅས་ཉམས་པར་བྱེད་པར་འགྱུར། །སྡང་ཞིང་བཟོད་དང་བྲལ་ལ་བྱང་ཆུབ་ག་ལ་ཡོད། །དེ་ཚེ་བདུད་རྣམས་ཕྱོགས་དང་བཅས་ཏེ་དགའ་བར་འགྱུར། །ལུང་བསྟན་མ་ཐོབ་བྱང་ཆུབ་སེམས་དཔའ་གང་ཞིག་གིས། །ལུང་བསྟན་ཐོབ་ལ་སེམས་ཁྲོས་རྩོད་པ་རྩོམ་བྱེད་ན། །ཐ་བ་སྐྱོན་ལྡན་སེམས་ཀྱི་སྐད་ཅིག་ཇི་སྙེད་པ། །དེ་སྙེད་བསྐལ་པར་གཞི་ནས་གོ་ཆ་བགོ་དགོས་སོ། །སངས་རྒྱས་བཟོད་པའི་ཕ་རོལ་ཕྱིན་པས་བྱང་ཆུབ་རེག །སེམས་འདི་བཟང་བ་མིན་སྙམ་དྲན་པ་སྐྱེད་བྱེད་ཅིང་། །སོ་སོར་འཆགས་པར་བྱེད་ཅིང་ཕྱིས་ཀྱང་སྡོམ་བྱེད་ལ། །དགའ་བར་མི་བྱེད་དེ་ནི་སངས་རྒྱས་ཆོས་འདིར་སློབ། །གང་ཞིག་སློབ་ཚེ་བསླབ་པ་གང་ཡང་ཁས་མི་ལེན། །སློབ་པ་པོ་དང་བསླབ་པའི་ཆོས་རྣམས་མི་དམིགས་ཤིང་། །བསླབ་དང་བསླབ་པ་མ་ཡིན་འདི་གཉིས་མི་རྟོགས་པ། །དེ་ལྟར་གང་སློང་དེ་ནི་སངས་རྒྱས་ཆོས་འདིར་སློབ། །བྱང་ཆུབ་སེམས་དཔའ་གང་ཞིག་དེ་ལྟའི་བསླབ་འདི་ཤེས། །དེ་ནི་གཞར་ཡང་བསླབ་ཉམས་ཚུལ་ཁྲིམས་འཆལ་མི་འགྱུར། །དེ་ནི་སངས་རྒྱས་ཆོས་བརྙེད་བྱ་ཕྱིར་འདི་ལ་སློབ། །དེ་ནི་བསླབ་ལྷག་བསླབ་ལ་མཁས་ཏེ་དམིགས་པ་མེད། །མཁས་པ་འོད་བྱེད་རྣམས་ཀྱི་ཤེས་རབ་དེ་ལྟར་སློབ། །དགེ་བ་མ་ཡིན་སེམས་གཅིག་ཙམ་ཡང་བསྐྱེད་མི་བྱེད། །ཉི་མ་མཁའ་ལ་འགྲོ་བའི་གཟེར་གྱིས་ཟིལ་གནོན་པའི། །མདུན་གྱི་བར་སྣང་ལ་ནི་མུན་པ་མི་གནས་བཞིན། །ཤེས་རབ་ཕ་རོལ་ཕྱིན་ལ་བསླབ་པ་བྱས་རྣམས་ཀྱི། །ཕ་རོལ་ཕྱིན་པ་ཐམས་ཅད་འདིར་ནི་འདུས་པར་འགྱུར། །འཇིགས་ཚོགས་ལྟ་བར་ལྟ་བ་དྲུག་ཅུ་གཉིས་འདུས་ལྟར། །དེ་བཞིན་ཕ་རོལ་ཕྱིན་པ་འདི་དག་འདུས་པར་གསུངས། །དཔེར་ན་སྲོག་གི་དབང་པོ་འགགས་ན་དབང་པོ་གཞན། །གང་དག་ཇི་སྙེད་ཡོད་པ་ཐམས་ཅད་འགག་པར་འགྱུར། །དེ་ལྟར་ཤེས་རབ་སྤྱོད་པ་མཁས་པ་མཆོག་རྣམས་ཀྱི། །ཕ་རོལ་ཕྱིན་པ་ཐམས་ཅད་འདིར་ནི་འདུས་པར་གསུངས། །བྱུང་ཆུབ་སེམས་མཁས་ཉན་ཐོས་ཡོན་ཏན་གང་དག་དང་། །དེ་བཞིན་རང་རྒྱལ་ཡོན་ཏན་ཀུན་ལ་སློབ་བྱེད་ཅིང་། །དེ་དག་དེ་ལ་མི་གནས་འདོད་པ་མི་བསྐྱེད་དེ། །འདི་ནི་བདག་གིས་བསླབ་བྱ་ཡིན་སྙམ་དེ་ཕྱིར་སློབ། །མི་ལྡོག་བྱང་ཆུབ་མཆོག་ལ་རབ་ཏུ་ཞུགས་པ་ཡི། །སེམས་བསྐྱེད་པ་ལ་བསམ་པ་ཐག་པས་ཡི་རང་བ། །སྟོང་གསུམ་རི་རབ་སྲང་ལ་གཞལ་བས་ཚང་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །དགེ་བ་དོན་གཉེར་ཕན་འདོད་སེམས་ཅན་ཇི་སྙེད་པ། །ཀུན་གྱི་བསོད་ནམས་ཕུང་པོ་ལ་ཡང་ཡི་རང་འགྱུར། །དེ་ཕྱིར་དེ་དག་རྒྱལ་བའི་ཡོན་ཏན་ཐོབ་གྱུར་ནས། །སྡུག་བསྔལ་ཟད་པར་བྱ་ཕྱིར་འཇིག་རྟེན་ཆོས་སྦྱིན་བྱེད། །བྱང་ཆུབ་སེམས་དཔའ་གང་ཞིག་མི་རྟོག་ཆོས་རྣམས་ཀུན། །སྟོང་དང་མཚན་མ་མེད་དང་སྤྲོས་མེད་ཡོངས་ཤེས་པ། །དེ་ནི་ཤེས་རབ་གཉིས་ཀྱིས་བྱང་ཆུབ་ཚོལ་མི་བྱེད། །རྣལ་འབྱོར་པ་དེ་ཤེས་རབ་ཕ་རོལ་ཕྱིན་མཆོག་བརྩོན། །ནམ་མཁའི་ཁམས་དེ་དང་ནི་ནམ་མཁའ་དེར་འགལ་བ། །ཡོད་པ་མ་ཡིན་གང་གིས་ཀྱང་ནི་དེ་མ་ཐོབ། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །ནམ་མཁའ་ལྟ་བུ་ཡིན་ཏེ་ཉེ་བར་ཞི་བ་སྤྱོད། །སྐྱེ་བོའི་དབུས་ན་སྒྱུ་མའི་སྐྱེས་བུ་འདི་སྙམ་དུ། །སྐྱེ་བོ་འདིས་མགུ་བྱ་སྙམ་མི་སེམས་དེ་ཡང་བྱེད། །རྫུ་འཕྲུལ་སྣ་ཚོགས་རབ་ཏུ་སྟོན་པར་བྱེད་མཐོང་ཡང་། །དེ་ལ་ལུས་མེད་སེམས་མེད་མིང་ཡང་ཡོད་མ་ཡིན། །དེ་བཞིན་ཤེས་རབ་སྤྱོད་པ་ནམ་ཡང་འདི་སྙམ་དུ། །བྱང་ཆུབ་རྟོགས་ནས་འགྲོ་བ་ཡོངས་སུ་དགྲོལ་མི་སེམས། །སྐྱེ་བ་སྣ་ཚོགས་དག་ནི་བྱ་བ་མང་ལྡན་པ། །སྒྱུ་མ་ལྟ་བུར་སྟོན་ཀྱང་རྣམ་པར་མི་རྟོག་སྤྱོད། །དཔེར་ན་སངས་རྒྱས་སྤྲུལ་པ་སངས་རྒྱས་མཛད་པ་བྱེད། །བྱེད་པ་དེ་ལ་དྲེགས་པ་ཅུང་ཟད་སྐྱེ་མི་འགྱུར། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །སྤྲུལ་པ་སྒྱུ་མ་བཞིན་དུ་བྱ་བ་ཐམས་ཅད་སྟོན། །ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང་། །འདྲ་བའི་བཟོ་བྱས་དེ་ཡང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །དེ་ལྟར་སྤྱོད་མཁས་རྣམས་ལ་ལྷ་ཚོགས་མང་པོ་དག །ཐལ་མོ་སྦྱར་བ་བཏུད་ནས་ཕྱག་ཀྱང་འཚལ་བར་བྱེད། །ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཇི་སྙེད་པའང་། །ཡོན་ཏན་བསྔགས་པའི་ཕྲེང་བ་ཡོངས་སུ་བརྗོད་པ་མཛད། །གངྒཱའི་ཀླུང་མཉམ་ཞིང་ན་སེམས་ཅན་ཇི་སྙེད་པ། །དེ་ཀུན་ཡོངས་སུ་བརྟག་པར་ཟུང་སྟེ་བདུད་གྱུར་ལ། །བ་སྤུ་ཉག་རེ་ལས་ཀྱང་དེ་སྙེད་སྤྲུལ་བྱས་ཀྱང་། །དེ་དག་ཀུན་གྱིས་མཁས་ལ་བར་ཆད་བྱ་མི་ནུས། །རྒྱུ་རྣམ་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིན་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨས་བཞིན་བྱེད་དང་བདེ་གཤེགས་བྱིན་རླབས་ཅན། །དེ་བཞིན་གཤེགས་ཡུམ་ཤེས་རབ་ཕ་རོལ་ཕྱིན་པ་འདི། །འཆད་ཚེ་བྱང་ཆུབ་སེམས་དཔའ་གང་ཞིག་མོས་བྱེད་ཅིང་། །བསམ་པ་ཐག་པས་བསྒྲུབ་པར་མངོན་པར་བརྩོན་བྱེད་ན། །ངེས་པ་ཐམས་ཅད་མཁྱེན་པ་ཉིད་ལ་ཞུགས་རིག་བྱ། །ཆོས་དབྱིངས་དེ་བཞིན་ཉིད་ལ་གསན་པ་མི་འགྱུར་ཞིང་། །དཔེར་ན་བར་སྣང་སྤྲིན་བཞིན་གནས་པ་མེད་པར་གནས། །རིག་སྔགས་འཆང་བ་གནས་མེད་མཁའ་རྒྱུ་གནས་འདོད་པ། །སྔགས་མཐུན་དུས་མིན་མེ་ཏོག་ལྡན་ཞིང་བྱིན་གྱིས་རློབ། །དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་བ། །རྟོགས་པར་བྱེད་དང་སངས་རྒྱས་ཆོས་རྣམས་དམིགས་མི་འགྱུར། །འཆད་པར་བྱེད་དང་ཆོས་འདོད་ལྟ་བར་བྱེད་མི་དམིགས། །འདི་ནི་ཞི་འདོད་ཡོན་ཏན་དགའ་བའི་གནས་པ་ཡིན། །དགྲ་བཅོམ་རྣམ་ཐར་དེ་བཞིན་གཤེགས་ཀྱི་མ་གཏོགས་པར། །གནས་པ་འདི་ནི་ཉན་ཐོས་རང་རྒྱལ་བཅོས་པ་ཡི། །གནས་པ་ཞི་བའི་ཏིང་འཛིན་རབ་ཞི་བདེ་ལྡན་པ། །ཇི་སྙེད་ཀུན་གྱི་མཆོག་དང་གོང་ན་མེད་པ་ཡིན། །འདབ་ཆགས་མཁའ་ལ་གནས་ཀྱང་ལྟུང་བར་འགྱུར་མ་ཡིན། །ཉ་ནི་ཆུ་ལ་གནས་ཀྱང་འཚུབས་ཏེ་འཆི་བ་མེད། །དེ་ལྟར་བྱང་ཆུབ་སེམས་དཔའ་བསམ་གཏན་སྟོབས་དག་གིས། །ཕ་རོལ་སོན་པ་སྟོང་གནས་མྱ་ངན་འདས་མི་འགྱུར། །སེམས་ཅན་ཀུན་གྱི་ཡོན་ཏན་མཆོག་ཏུ་འགྲོ་བ་དང་། སངས་རྒྱས་ཡེ་ཤེས་མཆོག་ཏུ་རྨད་བྱུང་མཆོག་རེག་དང་། །ཆོས་ཀྱི་སྦྱིན་པ་རབ་མཆོག་དམ་པ་སྦྱིན་འདོད་གང་། །ཕན་མཛད་རྣམས་ཀྱི་གནས་མཆོག་འདི་ལ་བརྟེན་པར་བགྱི། །བསླབ་པ་འདི་ནི་འདྲེན་པའི་བསླབ་པ་ཡོངས་བརྗོད་པ། །བསླབ་པ་ཇི་སྙེད་ཀུན་གྱི་མཆོག་དང་གོང་ན་མེད། །མཁས་པ་གང་ཞིག་བསླབ་ཀུན་ཕ་རོལ་འགྲོ་འདོད་པས། །སངས་རྒྱས་བསླབ་པ་ཤེས་རབ་ཕ་རོལ་ཕྱིན་འདིར་སློབ། །འདི་ནི་ཆོས་གཏེར་མཆོག་དང་ཆོས་མཛད་དམ་པ་ཡིན། །སངས་རྒྱས་རིགས་ཡིན་འགྲོ་བའི་བདེ་དང་སྐྱིད་པའི་མཛོད། །འདས་དང་མ་བྱོན་ཕྱོགས་བཅུའི་འཇིག་རྟེན་མགོན་པོ་རྣམས། །དེ་དག་འདི་ལས་འཁྲུངས་ཀྱང་ཆོས་དབྱིངས་ཟད་མི་འགྱུར། །ཤིང་དང་འབྲས་བུ་མེ་ཏོག་ནགས་ཚལ་ཇི་སྙེད་པ། །དེ་དག་ཐམས་ཅད་ས་ལས་ཡང་དག་འབྱུང་ཞིང་འཐོན། །འོན་ཀྱང་ས་ལ་ཟད་པ་མེད་ཅིང་འཕེལ་བ་མེད། །ཡོངས་སུ་མི་ཉམས་རྣམ་པར་མི་རྟོག་སྐྱོ་བ་མེད། །སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཤེས་རབ་རྣམས་ཀྱང་ཟད་པ་མེད་ཅིང་འཕེལ་བ་མེད། །སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། །རྐྱེན་རྣམས་ཚོགས་ནས་སྡུག་བསྔལ་འཁྲུལ་འཁོར་རབ་ཏུ་འབྱུང་། །མ་རིག་འཁྲུལ་འཁོར་དེ་ནི་ཟད་མེད་འཕེལ་བ་མེད། །ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །རྐྱེན་རྣམས་ཚོགས་ནས་ཡེ་ཤེས་འཁྲུལ་འཁོར་རབ་ཏུ་འབྱུང་། །ཤེས་རབ་ཕ་རོལ་ཕྱིན་ལ་ཟད་མེད་འཕེལ་བ་མེད། །བྱང་ཆུབ་སེམས་དཔའ་གང་ཞིག་རྟེན་ཅིང་འབྲེལ་འབྱུང་ལ། །སྐྱེ་མེད་ཟད་པ་མེད་པར་ཤེས་རབ་འདི་ཤེས་ཏེ། །ཉི་མ་སྤྲིན་མེད་འོད་ཟེར་འཕྲོ་བས་མུན་བསལ་ལྟར། །མ་རིག་འཐིབ་པོ་བཅོམ་ནས་རང་བྱུང་ཐོབ་པར་འགྱུར། །མཐུ་ཆེན་ལྡན་པ་བསམ་གཏན་བཞིས་ཀྱང་གསན་བྱེད་ལ། །རྟེན་པར་བྱེད་པ་མ་ཡིན་གནས་པར་བྱེད་པ་མེད། །འོན་ཀྱང་བསམ་གཏན་ཡན་ལག་བཅས་པ་བཞི་པོ་འདི། །བྱང་ཆུབ་དམ་པ་མཆོག་ཐོབ་པ་ཡི་རྟེན་དུ་འགྱུར། །ཤེས་རབ་མཆོག་ཐོབ་བསམ་གཏན་དག་ལ་གནས་པ་ནི། །གཟུགས་མེད་ཏིང་འཛིན་དམ་པ་བཞི་ཡང་ཉམས་སུ་མྱོང་། །བསམ་གཏན་འདི་དག་བྱང་ཆུབ་དམ་པ་མཆོག་ལ་ཕན། །བྱང་ཆུབ་སེམས་དཔའ་ཟག་པ་ཟད་ཕྱིར་སློབ་པ་མིན། །འདི་ནི་ཡོན་ཏན་སོགས་པའི་ངོ་མཚར་རྨད་བྱུང་སྟེ། །བསམ་གཏན་ཏིང་ངེ་འཛིན་ལ་གནས་ནས་མཚན་མ་མེད། །དེ་ལ་གནས་རྣམས་གལ་ཏེ་ལུས་ནི་ཞིག་གྱུར་ན། །བསམ་པ་ཇི་བཞིན་འདོད་པའི་ཁམས་སུ་ཡང་སྐྱེ་བ། །དཔེར་ན་འཛམ་གླིང་མི་ཞིག་སྔོན་ཆད་ལྷ་ཡུལ་གྱི། །ལྷ་ཡི་གྲོང་ཁྱེར་མཆོག་ཏུ་མ་ཕྱིན་ཕྱིས་སོང་སྟེ། །དེ་ན་ཡོངས་སུ་གཟུང་བའི་ཡུལ་དེ་རྣམས་མཐོང་ནས། །ཕྱིས་འདིར་འོང་བར་གྱུར་ན་ཆགས་པར་མི་བྱེད་ལྟར། །དེ་བཞིན་བྱང་ཆུབ་སེམས་དཔའི་ཡོན་ཏན་མཆོག་འཆང་བ། །རྣལ་འབྱོར་བརྩོན་ཏེ་བསམ་གཏན་ཏིང་འཛིན་ལ་གནས་ནས། །ཕྱིར་ཡང་འདོད་པའི་ཁམས་སུ་གནས་ཏེ་ཆགས་པ་མེད། །ཆུ་ཡི་པདྨ་བཞིན་དུ་བྱིས་པའི་ཆོས་མི་གནས། །བདག་ཉིད་ཆེན་པོ་སེམས་ཅན་ཡོངས་སུ་སྨིན་བྱ་དང་། །ཞིང་སྦྱངས་ཕ་རོལ་ཕྱིན་རྫོགས་དོན་བྱེད་ཁོ་ནར་ཟད། །བྱང་ཆུབ་ཡོན་ཏན་ཕ་རོལ་ཕྱིན་ཉམས་འགྱུར་འོང་ཞེས། །གཟུགས་མེད་ཁམས་སུ་སྐྱེ་བ་དོན་དུ་གཉེར་མི་བྱེད། །དཔེར་ན་མི་ཞིག་རིན་ཆེན་གཏེར་རྣམས་རྙེད་གྱུར་ན། །དེ་ལ་འདོད་པའི་བློ་ནི་བསྐྱེད་པར་མ་བྱས་ལ། །དེས་ཀྱང་དུས་གཞན་ཞིག་ན་དེ་དག་ཡོངས་བླངས་ཤིང་། །བླངས་ནས་ཁྱིམ་དུ་སོང་སྟེ་ཆགས་པར་མི་བྱེད་ལྟར། །དེ་བཞིན་བྱང་ཆུབ་སེམས་དཔའ་མཁས་པ་དགའ་བ་དང་། །དེ་སྦྱིན་བསམ་གཏན་ཏིང་འཛིན་ཞི་བ་བཞི་ཐོབ་ནས། །བསམ་གཏན་བདེ་ལྡན་བསམ་གཏན་ཏིང་འཛིན་ཐོབ་བཏང་སྟེ། །འགྲོ་ལ་སྙིང་བརྩེར་ལྡན་པ་ཕྱིར་ཡང་འདོད་ཁམས་འཇུག །གལ་ཏེ་བྱང་ཆུབ་སེམས་དཔའ་ཏིང་འཛིན་བསམ་གཏན་གནས། །དགྲ་བཅོམ་རང་རྒྱལ་ཐེག་པར་འདོད་པའི་བློ་བསྐྱེད་ན། །མཉམ་པར་མ་བཞག་རྒོད་ཅིང་སེམས་གཡེངས་གྱུར་པ་སྟེ། །སངས་རྒྱས་ཡོན་ཏན་ཡོངས་ཉམས་མཉན་པ་གྲུ་ཞིག་བཞིན། །གཞན་ཡང་གཟུགས་དང་སྒྲ་དང་དེ་བཞིན་དྲི་དང་རོ། །རེག་དང་འདོད་ཡོན་ལྔ་ལ་མངོན་པར་བརྩོན་གྱུར་ཀྱང་། །དགྲ་བཅོམ་རང་རྒྱལ་ཐེག་བྲལ་བྱང་ཆུབ་སེམས་དགའ་ན། །དཔའ་བོ་རྟག་ཏུ་མཉམ་བཞག་ཡིན་པར་ཤེས་པར་བྱ། །སེམས་ཅན་གང་དག་གཞན་ཕྱིར་སེམས་དཔའ་རྣམ་དག་པ། །བརྩོན་འགྲུས་ཕ་རོལ་ཕྱིན་ལ་མངོན་བརྩོན་རྣམ་པར་སྤྱོད། །དཔེར་ན་བྲན་མོ་ཆུ་ཆུན་དབང་མེད་རྗེ་བོའི་དབང་། །དེ་བཞིན་དཔའ་རྣམས་སེམས་ཅན་ཀུན་གྱི་དབང་གིས་འགྲོ། །སྤྱོ་བ་བྱས་སམ་འོན་ཏེ་རྟག་ཏུ་བརྡེགས་ཀྱང་རུང་། །བྲན་མོ་རྗེ་བོ་ལ་ནི་ལོག་ཚིག་མི་སྨྲ་ཡི། །འདི་ཡིས་བདག་ནི་བསད་པར་འགྱུར་དུ་འོང་སྙམ་ནས། །ཤིན་ཏུ་སྐྲག་པའི་ཡིད་ཀྱིས་འཇིགས་བཅས་ཟིལ་གྱིས་གནོན། །དེ་བཞིན་བྱང་ཆུབ་ཆེད་དུ་བྱང་ཆུབ་མཆོག་ཞུགས་པ། །འགྲོ་བ་ཀུན་ལ་བྲན་གྱུར་བཞིན་དུ་གནས་པར་བྱ། །འདི་ལས་བྱང་ཆུབ་ཐོབ་ཅིག་ཡོན་ཏན་རྫོགས་པར་འགྱུར། །རྩྭ་དང་ཤིང་ལས་མེ་བྱུང་བས་ནི་དེ་ཉིད་སྲེག །བདག་གི་བདེ་བ་བཏང་ནས་རེ་བ་མེད་སེམས་ཀྱིས། །སེམས་ཅན་གཞན་གྱི་དགོས་ལ་ཉིན་མཚན་མངོན་པར་བརྩོན། །བུ་གཅིག་པ་ལ་མ་ནི་རིམ་གྲོལ་བྱེད་པ་ལྟར། །བསམ་པ་ཐག་པས་རྣམ་པར་སྐྱོ་མེད་གནས་པར་བྱ། །བྱང་ཆུབ་སེམས་དཔའ་གང་ཞིག་ཡུན་རིང་འཁོར་འདོད་ཅིང་། །སེམས་ཅན་དོན་དང་ཞིང་སྦྱོང་བརྩོན་པའི་རྣལ་འབྱོར་པ། །སྐྱོ་བའི་བློ་ནི་རྡུལ་ཙམ་སྐྱེ་བར་མི་འགྱུར་ན། །དེ་ནི་བརྩོན་འགྲུས་ཕ་རོལ་ཕྱིན་ལྡན་གཡེལ་བ་མེད། ། བྱང་ཆུབ་སེམས་དཔའ་མི་མཁས་བསྐལ་པ་བྱེ་བ་བགྲང་། །གལ་ཏེ་རིང་པར་འདུ་ཤེས་སྡུག་བསྔལ་བྱང་ཆུབ་སྒྲུབ། །ཡང་དག་ཆོས་སྒྲུབ་བྱེད་ཚེ་ཡུན་རིང་སྡུག་བསྔལ་འགྱུར། །དེས་ན་བརྩོན་འགྲུས་ཕ་རོལ་ཕྱིན་ཉམས་ལེ་ལོ་ཅན། །བྱང་ཆུབ་མཆོག་ཏུ་སེམས་བསྐྱེད་དང་པོ་ནས་བཟུང་སྟེ། །བྱང་ཆུབ་བླ་ན་མེད་པ་ཐོབ་པར་འགྱུར་གྱི་བར། །ཉིན་མཚན་གཅིག་ཙམ་དུ་ནི་ཡིད་ལ་སེམས་བྱེད་ན། །མཁས་པ་གསལ་བས་བརྩོན་འགྲུས་བརྩམས་པར་རིག་པར་བྱ། །གལ་ཏེ་འགའ་ཞིག་འདི་སྐད་རི་རབ་རི་བཤིག་པའི། །རྗེས་ལ་བྱང་ཆུབ་མཆོག་ཐོབ་འགྱུར་ཞེས་སྨྲ་བ་ལས། །ཇི་སྟེ་སྐྱོ་བའི་བློ་སྐྱེད་ཚད་ཀྱང་སེམས་བྱེད་ན། །དེ་ཚེ་བྱང་ཆུབ་སེམས་དཔའ་ལེ་ལོར་གྱུར་པ་ཡིན། །ཇི་སྟེ་དེ་ནི་འདི་ཙམ་ཚོད་ལྟ་ཅི་དཀའ་ཞེས། །སྐད་ཅིག་ཙམ་ལ་རི་རབ་ཐལ་བར་རླག་སེམས་སྐྱེད། །བྱང་ཆུབ་སེམས་དཔའ་མཁས་པ་བརྩོན་འགྲུས་བརྩམས་པ་སྟེ། །རིང་པོར་མི་ཐོགས་འདྲེན་པའི་བྱང་ཆུབ་མཆོག་ཐོབ་འགྱུར། །འགྲོ་བ་ཡོངས་སུ་སྨིན་པར་བྱས་ནས་དོན་བྱ་ཞེས། །གལ་ཏེ་ལུས་དང་ངག་དང་ཡིད་ཀྱིས་བརྩོན་བྱེད་ན། །བདག་ཏུ་འདུ་ཤེས་གནས་པས་ལེ་ལོར་གྱུར་པ་སྟེ། །ཐམས་ཅད་མཁྱེན་པ་ཉིད་ལས་རིང་འགྱུར་གནམ་ས་བཞིན། །གང་ཚེ་ལུས་དང་སེམས་དང་སེམས་ཅན་འདུ་ཤེས་མེད། །འདུ་ཤེས་རྣམ་པར་ལོག་ནས་གཉིས་སུ་མེད་ཆོས་སྤྱོད། །འདི་ནི་བྱང་ཆུབ་ཞི་བ་མི་ཉམས་མཆོག་འདོད་པའི། །བརྩོན་འགྲུས་ཕ་རོལ་ཕྱིན་ཅེས་ཕན་པ་མཛད་པས་གསུངས། །གལ་ཏེ་གཞན་ལས་ངན་བརྗོད་ཚིག་རྩུབ་ཐོས་གྱུར་ན། །བདག་བདེ་ཡིན་ཞེས་བྱང་ཆུབ་སེམས་དཔའ་མཁས་པ་དགའ། །སུ་སྨྲ་སུས་ཐོས་གང་གིས་གང་ཞིག་གང་གི་ཕྱིར། །བཟོད་པའི་ཕ་རོལ་ཕྱིན་མཆོག་ལྡན་པ་མཛངས་པ་ཡིན། །བྱང་ཆུབ་སེམས་དཔའ་གང་ཞིག་བཟོད་པའི་ལེགས་ཆོས་ལྡན། །གང་ཞིག་སྟོང་གསུམ་རིན་ཆེན་བཀང་སྟེ་འཇིག་རྟེན་མཁྱེན། །སངས་རྒྱས་རྣམས་དང་དགྲ་བཅོམ་རང་རྒྱལ་ཕུལ་བྱས་པ། །སྦྱིན་པའི་ཕུང་པོས་དེ་ལ་བསོད་ནམས་ཆར་མི་ཕོད། །བཟོད་ལ་གནས་པའི་ལུས་ནི་ཡོངས་སུ་དག་འགྱུར་ཏེ། །སུམ་ཅུ་རྩ་གཉིས་མཚན་དང་མཐུ་སྟོབས་ཕ་མཐའ་ཡས། །སེམས་ཅན་རྣམས་ལ་ཆོས་རབ་སྟོང་པ་སྒྲོགས་པར་བྱེད། །འདི་ནི་བཟོད་ལྡན་དེ་ལ་འགྲོ་བ་དགར་འགྱུར་མཁས། །གལ་ཏེ་སེམས་ཅན་ལ་ལས་ཙནྡན་ཕུར་མ་བླངས། །རབ་གུས་བྱང་ཆུབ་སེམས་དཔའ་ལ་ནི་ཉུག་བྱེད་ལ། །གཞན་ཞིག་མེ་མདག་མགོ་ལ་འཐོར་བྱེད་གཉིས་ཀ་ལ། །དེ་ཡིས་མཉམ་ཞིང་སྙོམས་པའི་སེམས་ནི་བསྐྱེད་པར་བྱ། །བྱང་ཆུབ་སེམས་དཔའ་མཁས་པས་དེ་ལྟར་བཟོད་བྱས་ནས། །སེམས་བསྐྱེད་དེ་ནི་བྱང་ཆུབ་མཆོག་ཏུ་ཡོངས་བསྔོས་ན། །དཔའ་བོ་འཇིག་རྟེན་ཀུན་ལ་བཟོད་པས་དགྲ་བཅོམ་དང་། །རང་རྒྱལ་སེམས་ཅན་ཁམས་མང་ཇི་སྙེད་ཟིལ་གྱིས་གནོན། །བཟོད་བྱེད་འདི་སྙམ་དུ་ཡང་སེམས་ནི་བསྐྱེད་བྱ་སྟེ། །སེམས་དམྱལ་དུད་འགྲོ་གཤིན་རྗེས་འཇིག་རྟེན་སྡུག་བསྔལ་མང་། །འདོད་པའི་ཡོན་ཏན་རྒྱུ་ཡིས་དབང་མེད་གནོད་མྱོང་ན། །བྱང་ཆུབ་ཆེད་དུ་ཅི་ཕྱིར་ད་བཟོད་མི་བྱ་སྙམ། །ལྕག་དབྱུག་མཚོན་དང་བསད་དང་བཅིངས་དང་བརྡེག་པ་དང་། །མགོ་གཅོད་པ་དང་རྣ་བ་རྐང་ལག་སྣ་གཅོད་དང་། །འཇིག་རྟེན་སྡུག་བསྔལ་ཇི་སྙེད་བདག་གིས་བཟོད་སྙམ་པ། །བྱང་ཆུབ་སེམས་དཔའ་བཟོད་པའི་ཕ་རོལ་ཕྱིན་ལ་གནས། །ཚུལ་ཁྲིམས་ཀྱིས་ནི་ཞི་བ་འདོད་རྣམས་འཕགས་པར་འགྱུར། །སྟོབས་བཅུའི་སྤྱོད་ཡུལ་གནས་ཤིང་ཚུལ་ཁྲིམས་ཉམས་པ་མེད། །སྡོམ་པ་བྱ་བ་ཇི་སྙེད་ཀུན་གྱི་རྗེས་སུ་འཇུག །སེམས་ཅན་ཀུན་ལ་ཕན་ཕྱིར་དེ་ཡང་བྱང་ཆུབ་བསྔོ། །གལ་ཏེ་རང་རྒྱལ་དགྲ་བཅོམ་བྱང་ཆུབ་རེག་འདོད་ན། །ཚུལ་ཁྲིམས་འཆལ་ཅིང་མི་མཁས་དེ་བཞིན་སྤྱོད་པ་ཉམས། །ཇི་སྟེ་བྱང་ཆུབ་ཞི་བ་མཆོག་ཏུ་ཡོངས་བསྔོ་ན། །འདོད་ཡོན་བརྩོན་ཡང་ཚུལ་ཁྲིམས་ཕ་རོལ་ཕྱིན་ལ་གནས། །ཆོས་གང་ངེས་པའི་བྱང་ཆུབ་ཡོན་ཏན་འབྱུང་འགྱུར་པ། །དེ་ནི་ཡོན་ཏན་ཆོས་ལྡན་རྣམས་ཀྱི་ཚུལ་ཁྲིམས་དོན། །ཆོས་གང་ཕན་བྱེད་རྣམས་ཀྱི་བྱང་ཆུབ་ཡོངས་ཉམས་པ། །འདི་ནི་ཚུལ་ཁྲིམས་འཆལ་ཅེས་རྣམ་པར་འདྲེན་པས་གསུངས། །གལ་ཏེ་བྱང་ཆུབ་སེམ་དཔའ་འདོད་ཡོན་ལྔ་སྤྱོད་ཀྱང་། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་འགྲུབ་བྱ་སྙམ་དུ་ཀུན་མཁྱེན་ཡིད་བྱེད་ན། །མཁས་པ་ཚུལ་ཁྲིམས་ཕ་རོལ་ཕྱིན་གནས་རིག་པར་བྱ། །གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་སྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཚུལ་ཁྲིམས་སྲུང་ཞིང་བྱང་ཆུབ་མཆོག་ཏུ་ཡོངས་བསྔོ་ལ། །དེ་ཡིས་རློམ་སེམས་མེད་ཅིང་བདག་བསྟོད་མི་བྱེད་ལ། །ང་ཡི་འདུ་ཤེས་སེམས་ཅན་འདུ་ཤེས་ཡོངས་སུ་སྤངས། །བྱང་ཆུབ་སེམས་དཔའ་ཚུལ་ཁྲིམས་ཕ་རོལ་ཕྱིན་གནས་བརྗོད། །གལ་ཏེ་བྱང་ཆུབ་སེམས་དཔའ་རྒྱལ་བའི་ལམ་སྤྱོད་པ། །སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཅེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཚུལ་ཁྲིམས་འཆལ། །ཚུལ་ཁྲིམས་ཉམས་ཤིང་དེ་ལ་ཡོངས་དག་ཚུལ་ཁྲིམས་མེད། །གང་ལ་བདག་གི་འདུ་ཤེས་སེམས་ཅན་འདུ་ཤེས་མེད། །འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད། །གང་ལ་སྡོམ་དང་སྡོམ་པ་མ་ཡིན་རློམ་སེམས་མེད། །འདི་ནི་ཚུལ་ཁྲིམས་སྡོམ་པར་རྣམ་པར་འདྲེན་པས་གསུངས། །སེམས་ཅན་དག་པ་གང་ཞིག་དེ་ལྟར་ཁྲིམས་ལྡན་པ། །སྡུག་དང་མི་སྡུག་ཀུན་ལ་ལྟ་བ་མེད་པ་ཡིན། །མགོ་དང་རྐང་ལག་གཏོང་ཞིང་ཞུམ་པའི་སེམས་ཀྱང་མེད། །བདོག་པ་ཐམས་ཅད་གཏོང་ཞིང་རྟག་ཏུ་ཞེན་པ་མེད། །ཆོས་རྣམས་རང་བཞིན་བདག་མེད་ཡ་མ་བརླར་ཤེས་ནས། །བདག་གི་ཤ་ཡང་གཏོང་ལ་ཞུམ་པའི་སེམས་མེད་ན། །དེ་ཚེ་ཕྱི་རོལ་དངོས་པོ་གཏོང་བ་སྨོས་ཅི་དགོས། །གལ་ཏེ་སེར་སྣ་བྱེད་པ་དེ་ནི་གནས་མེད་དོ། །བདག་ཏུ་འདུ་ཤེས་དངོས་ལ་བདག་གིར་འཛིན་པས་ཆགས། །བླུན་པོ་རྣམས་ལ་གཏོང་བའི་བློ་ལྟ་ག་ལ་ཡོད། །སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །ཇི་སྟེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །དེ་ཚེ་བྱང་ཆུབ་སེམས་དཔའ་སེམས་ཅན་དབུལ་ཤེས་ནས། །གཏོང་ལ་མོས་པར་འགྱུར་ཞིང་རྟག་ཏུ་ལྷུག་པར་གཏོང་། །གླིང་བཞི་ལེགས་པར་བརྒྱན་པ་མཆིལ་མའི་ཐལ་བ་འདྲ། །བྱིན་ནས་དགའ་བར་འགྱུར་གྱིས་གླིང་ཐོབ་དེ་ལྟ་མིན། །བྱང་ཆུབ་སེམས་དཔའ་མཁས་པ་གསལ་བ་སྲིད་གསུམ་གྱི། །སེམས་ཅན་ཇི་སྙེད་དེ་དག་ཀུན་ལ་སྦྱིན་པ་འདི། །བྱིན་པར་གྱུར་ཅིག་སྙམ་དུ་བསམས་ནས་སྦྱིན་བྱིན་ལ། །དེ་ཡང་འགྲོ་བའི་དོན་དུ་བྱང་ཆུབ་མཆོག་ཏུ་བསྔོ། །སྦྱིན་པ་བྱིན་ནས་དངོས་ལ་གནས་པར་བྱེད་པ་མེད། །དེ་ནི་ནམ་དུའང་རྣམ་པར་སྨིན་ལ་རེ་བ་མེད། །དེ་ལྟར་གཏོང་ལ་མཁས་པ་ཐམས་ཅད་གཏོང་བ་སྟེ། །ཆུང་ངུ་བཏང་ལ་མང་པོ་དཔག་ཏུ་མེད་པར་འགྱུར། །སྲིད་པ་གསུམ་ན་སེམས་ཅན་མ་ལུས་ཇི་སྙེད་པ། །ཡོངས་སུ་བརྟག་པ་བཟུང་སྟེ་དེ་དག་ཐམས་ཅད་ཀྱིས། །འཇིག་རྟེན་མཁྱེན་པ་སངས་རྒྱས་དགྲ་བཅོམ་རང་རྒྱལ་ལ། །བསྐལ་པ་མཐའ་ཡས་སྦྱིན་བྱིན་ཉན་ཐོས་ལེགས་ཚོལ་ན། །བྱང་ཆུབ་སེམས་དཔའ་མཁས་པ་ཐབས་མཁས་གང་ཞིག་གིས། །དེ་དག་བསོད་ནམས་བྱ་བའི་དངོས་ལ་ཡི་རང་ནས། །སེམས་ཅན་དོན་དུ་བྱང་ཆུབ་མཆོག་རབ་ཡོངས་བསྔོ་ན། །ཡོངས་སུ་བསྔོ་བས་འགྲོ་བ་ཐམས་ཅད་ཟིལ་གྱིས་གནོན། །ནོར་བུ་མཆིང་བུའི་ཕུང་པོ་ཆེན་པོར་གྱུར་པ་ཡང་། །རིན་ཆེན་བཻ་ཌཱུརྱ་གཅིག་དེ་ཀུན་ཟིལ་གྱིས་གནོན། །དེ་བཞིན་འགྲོ་ཀུན་སྦྱིན་པའི་ཕུང་པོ་རྒྱ་ཆེན་ཀུན། །རྗེས་སུ་ཡི་རང་བྱང་ཆུབ་སེམས་དཔའ་ཟིལ་གྱིས་གནོན། །གལ་ཏེ་བྱང་ཆུབ་སེམས་དཔས་འགྲོ་ལ་སྦྱིན་བྱིན་ནས། །དེ་ལ་བདག་གིར་མི་བྱེད་དངོས་པོ་འཕངས་མེད་ན། །དེ་ལས་དགེ་བའི་རྩ་བ་མཐུ་ཆེན་འཕེལ་འགྱུར་ཏེ། །སྤྲིན་མེད་འོད་ལྡན་ཟླ་དཀྱིལ་ཡར་གྱི་ངོ་བཞིན་ནོ། །སྐབས་ལྔ་པའོ།། །།བྱང་ཆུབ་སེམས་དཔའ་སྦྱིན་པས་ཡི་དྭགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། །སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར། །སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད། །ཁྲིམས་ཀྱི་དུད་འགྲོའི་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་དེ་ཡིས་དལ་བ་བརྟག་ཏུ་རྙེད། །བཟོད་པས་གཟུགས་བཟང་དམ་པ་རྒྱ་ཆེན་ཐོབ་འགྱུར་ཏེ། །གསེར་མདོག་སྡུག་ཅིང་འགྲོ་བས་ལྟ་བའི་འོས་སུ་འགྱུར། །བརྩོན་འགྲུས་ཀྱི་ནི་དཀར་པོའི་ཡོན་ཏན་འགྲིབ་མི་འགྱུར། །ཡེ་ཤེས་མཐའ་ཡས་རྒྱལ་བའི་བང་མཛོད་རྙེད་པར་འགྱུར། །བསམ་གཏན་གྱིས་ནི་འདོད་པའི་ཡོན་ཏན་སྨོན་པ་འདོར། །རིག་དང་མངོན་པར་ཤེས་དང་ཏིང་འཛིན་མངོན་པར་སྒྲུབ། །ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། །ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །མི་ཡི་ཁྱུ་མཆོག་འཁོར་ལོ་རིན་ཆེན་བསྐོར་བྱས་ནས། །སྡུག་བསྔལ་ཟད་པར་བྱ་ཕྱིར་འགྲོ་ལ་ཆོས་ཀྱང་སྟོན། །སྐབས་དྲུག་པའོ།། །།ཆོས་འདི་ཡོངས་རྫོགས་བྱས་ནས་བྱང་ཆུབ་སེམས་དཔའ་དེ། །སྐབས་བདུན་པའོ།། །།ཡོངས་དག་ཞིང་དང་སེམས་ཅན་དག་པ་ཡོངས་སུ་འཛིན། །སངས་རྒྱས་རྒྱུད་དང་ཆོས་ཀྱི་རྒྱུད་ཀྱང་ཡོངས་སུ་འཛིན། །དེ་བཞིན་དགེ་འདུན་རྒྱུད་དང་ཆོས་ཀུན་ཡོངས་སུ་འཛིན། །འགྲོ་བའི་ནད་གསོ་མཛད་པ་སྨན་པའི་མཆོག་གྱུར་པ། །ཤེས་རབ་བསྟན་པ་བྱང་ཆུབ་ལམ་ལྡན་འདི་གསུངས་ཏེ། །མིང་ནི་ཡོན་ཏན་རིན་ཆེན་སྡུད་པ་བྱང་ཆུབ་ལམ། །ལམ་འདི་སེམས་ཅན་ཀུན་གྱིས་ཐོབ་པར་བྱ་ཕྱིར་བཤད། །སྐབས་བརྒྱད་པའོ།། །།འཕགས་པ་ཤེས་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་སིང་ཧ་དང་། ཞུ་ཆེན་གྱི་ལོ་ཙཱ་བ་བན་དེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ།ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ཞེས་བྱ་བ་བཞུགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ནི། རྒྱ་གར་སྐད་དུ། བྷ་ག་ཝ་ཏི་པྲཛྙཱ་པ་ར་མི་ཏ་ཧྲྀ་ད་ཡ། བོད་སྐད་དུ། བཅོམ་ལྡན་འདས་མ་ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ། བམ་པོ་གཅིག་གོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་ཉིད་ལ་རྣམ་པར་བལྟ་ཞིང་ཕུང་པོ་ལྔ་པོ་དེ་དག་ལ་ཡང་རང་བཞིན་གྱིས་སྟོང་པར་རྣམ་པར་བལྟའོ། །དེ་ནས་སངས་རྒྱས་ཀྱི་མཐུས། ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས་ཇི་ལྟར་བསླབ་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །ཤཱ་རིའི་བུ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས་འདི་ལྟར་རྣམ་པ ར་བལྟ་བར་བྱ་སྟེ། ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པར་རྣམ་པར་ཡང་དག་པར་རྗེས་སུ་བལྟའོ། །གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སྟོང་པའོ། །ཤཱ་རིའི་བུ། དེ་ལྟར་ཆོས་ཐམས་ཅད་སྟོང་པ་ཉིད་དེ། མཚན་ཉིད་མེད། མ་སྐྱེས་པ། མ་འགགས་པ། དྲི་མ་མེད་པ། དྲི་མ་དང་བྲལ་བ། བྲི་བ་མེད་པ། གང་བ་མེད་པའོ། །ཤཱ་རིའི་བུ། དེ་ལྟ་བས་ན་སྟོང་པ་ཉིད་ལ་གཟུགས་མེད། ཚོར་བ་མེད། འདུ་ཤེས་མེད། འདུ་བྱེད་རྣམས་མེད། རྣམ་པར་ཤེས་པ་མེད། མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། གཟུགས་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད་དོ། །མིག་གི་ཁམས་མེད་པ་ནས་ཡིད་ཀྱི་ཁམས་མེད། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་མེད་དོ། །མ་རིག་པ་མེད། མ་རིག་པ་ཟད་པ་མེད་པ་ནས་རྒ་ཤི་མེད། རྒ་ཤི་ཟད་པའི་བར་དུའང་མེད་དོ། །དེ་བཞིན་དུ་སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པའང་མེད་དོ། །ཤཱ་རིའི་བུ། དེ་ལྟ་བས་ན་བྱང་ཆུབ་སེམས་དཔའ་རྣམས་ཐོབ་པ་མེད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་ཏེ་སེམས་ལ་སྒྲིབ་པ་མེད་པས་སྐྲག་པ་མེད་དེ། ཕྱིན་ཅི་ལོག་ལས་ཤིན་ཏུ་འདས་ནས་མྱ་ངན་ལས་འདས་པར་མཐར་ཕྱིན་ཏོ། །དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། །རིག་པ་ཆེན་པོའི་སྔགས། བླ་ན་མེད་པའི་སྔགས། མི་མཉམ་པ་དང་མཉམ་པར་བྱེད་པའི་སྔགས། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། མི་རྫུན་པས་ན་བདེན་པར་ཤེས་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་སྨྲས་པ། ཏདྱ་ཐཱ། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བསླབ་པར་བྱའོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། ལེགས་སོ། །ལེགས་སོ། །རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཇི་ལྟར་ཁྱོད་ཀྱིས་བསྟན་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་སྤྱད་པར་བྱ་སྟེ། དེ་བཞིན་གཤེགས་པ་རྣམས་ཀྱང་རྗེས་སུ་ཡི་རང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་ར་དྭ་ཏིའི་བུ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་རྫོགས་སོ།། །།རྒྱ་གར་གྱི་མཁན་པོ་བི་མ་ལ་མི་ཏྲ་དང་། ལོ་ཙཱ་བ་དགེ་སློང་རིན་ཆེན་སྡེས་བསྒྱུར་ཅིང་། ཞུ་ཆེན་གྱི་ལོ་ཙཱ་བ་དགེ་བློ་དང་ནམ་མཁའ་ལ་སོགས་པས་ཞུས་ཏེ་གཏན་ལ་ཕབ་པ། དཔལ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་གི་དགེ་རྒྱས་བྱེ་མ་གླིང་གི་རྩིག་ངོས་ལ་བྲིས་པ་དང་ཞུས་དག་ལེགས་པར་བགྱིས་སོ།། །།༈ སློབ་དཔོན་ཆེན་པོའི་བསྟོད་པ་སྐུ་གསུམ་མ་ཞེས་བྱ་བ་བཞུགས་སོ། ། སྐུ་གསུམ་རྒྱལ་བ་ཡོངས་ཀྱི་ཐུགས་རྗེའི་ཤུགས། །གཅིག་བསྡུས་རིག་འཛིན་རྒྱལ་པོའི་ཚུལ་འཆང་བ། །བདེ་ཆེན་མཁའ་འགྲོའི་དབང་ཕྱུག་རྡོ་རྗེའི་སྐུ། །པདྨ་ཐོད་ཕྲེང་རྩལ་ལ་ཕྱག་འཚལ་བསྟོད། ༡ །སྣང་བ་མཐའ་ཡས་མགོན་པོ་སྤྱན་རས་གཟིགས། །དབྱེར་མེད་སིནྡྷུའི་དྭངས་མཚོར་སྤྲུལ་པའི་སྐུ། །འཇིག་རྟེན་གསུམ་ན་ཆེ་བའི་རིག་སྔགས་འཆང་། །མཉམ་མེད་བླ་མ་ཁྱེད་ལ་ཕྱག་འཚལ་བསྟོད། ༢ །པདྨ་ལས་འཁྲུངས་པདྨ་བཞད་པའི་ཞལ། །མཚན་དཔེའི་གཟི་འབར་རྒྱལ་ཀུན་ཞལ་སྐྱིན་མཆོག །འཇིག་རྟེན་མངའ་བསྒྱུར་མཚུངས་མེད་རྒྱལ་བའི་སྲས། །བདེ་མཆོག་པདྨ་རྒྱལ་པོར་ཕྱག་འཚལ་བསྟོད། ༣ །གནས་ཡུལ་རྣམས་སུ་བརྟུལ་ཞུགས་སྤྱོད་པ་བསྐྱངས། །མ་ཚོགས་དྲེགས་པ་དབང་བསྡུས་ལས་ལ་བཀོལ། །ས་སྟེང་ཀུན་ཏུ་གསང་སྔགས་བསྟན་པ་སྤེལ། །ཉི་མ་འོད་ཟེར་ཞབས་ལ་ཕྱག་འཚལ་བསྟོད། ༤ །ཤེས་བྱའི་གནས་རྣམས་གཟིགས་པ་ཙམ་གྱིས་རྟོགས། །ལྔ་རིག་ཀུན་མཁྱེན་མཁས་པའི་ཕུལ་དུ་ཕྱིན། །འཇམ་པའི་དབྱངས་དང་དབྱེར་མེད་རྒྱལ་བའི་སྲས། །བློ་ལྡན་མཆོག་སྲེད་ཁྱེད་ལ་ཕྱག་འཚལ་བསྟོད། ༥ །སྡེ་སྣོད་གསུམ་དང་རྒྱུད་སྡེ་རྣམ་དྲུག་གི། །དགོངས་སྤྱོད་མཐར་ཕྱིན་རྒྱལ་དང་རྒྱལ་སྲས་ཀྱི། །རྣམ་ཐར་རྒྱ་མཚོའི་ཚུལ་ལ་མངའ་དབང་བརྙེས། །པདྨ་སཾ་བྷ་བ་ལ་ཕྱག་འཚལ་བསྟོད། ༦ །རྒྱལ་བ་མཆོག་ཉིད་སླར་ཡང་བྱོན་པ་བཞིན། །རྣམ་དག་ཕུང་པོ་ལྔ་འཆང་མཆོག་སྤྲུལ་ཚུལ། །ཆོས་མཆོག་སེང་གེའི་སྒྲ་དབྱངས་ས་གསུམ་བསྒྲགས། །ཤཱཀྱ་སེང་གེ་ཁྱོད་ལ་ཕྱག་འཚལ་བསྟོད། ༧ །འཆི་མེད་རྡོ་རྗེའི་ཚེ་དང་རིག་འཛིན་ས། །དངོས་གྲུབ་ཀུན་གྱི་མངའ་དབང་དམ་པ་བརྙེས། །དཀྱིལ་འཁོར་ཀུན་གྱི་གཙོ་དང་གཉིས་སུ་མེད། །པདྨ་འབྱུང་གནས་ཁྱེད་ལ་ཕྱག་འཚལ་བསྟོད། ༨ །བདུད་དང་མུ་སྟེགས་ཕས་ཀྱི་རྒོལ་བ་རྣམས། །རྫུ་འཕྲུལ་ཆེན་པོས་མིང་གི་ལྷག་མར་བྱས། །ཆེ་བཙན་འགྲན་མེད་རྡོ་རྗེའི་མཐུ་སྟོབས་བདག །སེང་གེ་སྒྲ་སྒྲོགས་ཁྱེད་ལ་ཕྱག་འཚལ་བསྟོད། ༩ །གངས་ཅན་ལྗོངས་སུ་རྒྱལ་བའི་བསྟན་པ་སྤེལ། །ནག་པོའི་རྩ་ལག་རྡོ་རྗེའི་མཐུ་ཡིས་བཏུལ། །ས་སྟེང་ཐམས་ཅད་ཟབ་མོའི་གཏེར་གྱིས་བཀང་། །རྡོ་རྗེ་གྲོ་ལོད་རྩལ་ལ་ཕྱག་འཚལ་བསྟོད། ༡༠ །སྐུ་གཅིག་མཚན་བརྒྱད་འཕྲུལ་མཚན་ཉི་ཤུ་དང་། །མི་འཇེད་འཇིག་རྟེན་སོ་དྲུག་ལ་སོགས་པར། །མཐའ་ཡས་སྤྲུལ་པའི་ཞིང་ཁམས་ཀུན་ཏུ་ཁྱབ། །སྒྱུ་འཕྲུལ་རྒྱལ་པོ་ཁྱེད་ལ་ཕྱག་འཚལ་བསྟོད། ༡༡ །རྒྱལ་སྲས་སེམས་དཔའ་བརྒྱད་དང་སྒྲུབ་སྡེ་བརྒྱད། །ལ་སོགས་རྒྱལ་བ་རྒྱལ་སྲས་རྒྱ་མཚོ་དང་། །དབྱེར་མེད་བླ་མ་དཀྱིལ་འཁོར་ཀུན་གྱི་བདག །མཚུངས་མེད་འདྲེན་པ་ཁྱོད་ལ་ཕྱག་འཚལ་བསྟོད། ༡༢ །སངས་རྒྱས་ཀུན་གྱི་ཐུགས་རྗེ་གཅིག་བསྡུས་ནས། །སྙིགས་མའི་འགྲོ་བ་བསྐྱབ་པར་མཛད་པའི་ཕྱིར། །བྱིན་རླབས་ཐུགས་རྗེ་ལྷག་པར་མྱུར་བ་ཡིས། །ལས་ཅན་རྗེས་སུ་འཛིན་ལ་ཕྱག་འཚལ་བསྟོད། ༡༣ །དཔལ་ལྡན་རྫོགས་པའི་སངས་རྒྱས་པདྨ་སྐྱེས། །རྣམ་པ་ཀུན་མཁྱེན་ཡེ་ཤེས་མཛོད་འཛིན་པ། །རིག་འཛིན་རྒྱལ་པོ་སྒྱུ་འཕྲུལ་སྣ་ཚོགས་སྟོན། །ཀུན་ལས་ཆེ་བ་སངས་རྒྱས་རིག་སྔགས་འཆང་། ༡༤ །རང་བྱུང་ཀུན་ཏུ་བཟང་པོ་ཁྱོད་ཉིད་ལ། །མི་ཕྱེད་དད་པས་ལེགས་པར་བསྟོད་པ་ཡི། །བསོད་ནམས་ཉིན་མོར་བྱེད་པའི་འོད་ཟེར་གྱིས། །མཚོ་སྐྱེས་བསྟན་པའི་པད་ཚལ་རྒྱས་གྱུར་ཅིག ༡༥ །སྣོད་བཅུད་རྒུད་པ་མཐའ་དག་རབ་ཏུ་ཞི། །དཔལ་དང་གྲགས་པ་བཀྲ་ཤིས་བདེ་ལེགས་འཕེལ། །འགྲོ་ཀུན་མཚུངས་མེད་གུ་རུས་རྗེས་བཟུང་ནས། །རང་བྱུང་པདྨའི་གོ་འཕང་མཆོག་ཐོབ་ཤོག ༡༦ །ཅེས་ཚིགས་སུ་བཅད་པ་དགའ་བ་བཅུ་དྲུག་གི་གྲངས་ལྡན་འདི་ནི་ཟིལ་གནོན་མེ་རྟ་ཟླ་བ་བརྒྱད་པའི་ཚེས་ཉེར་བདུན་ལ་མི་ཕམ་འཇམ་དཔལ་དགྱེས་པས་སྤེལ་བ་དགེ་ལེགས་འཕེལ།། ༈ མཁན་ཆེན་བསྟོད་པ་འཇམ་དཔལ་མ་ཞེས་བྱ་བ་བཞུགས་སོ། ། འཇམ་དཔལ་དཔའ་བོའི་ཞབས་པད་དྲི་མེད་ཉིད། །ཡན་ལག་མཆོག་གི་པདྨར་རབ་བཀོད་ནས། །ཟབ་རྒྱས་ཆོས་ཚུལ་དངོས་སུ་ལེགས་ནོད་པ། །མཁན་ཆེན་ཞི་བ་འཚོལ་ཕྱག་འཚལ་བསྟོད། ༡ །བསྟན་པའི་རྩ་བ་སོ་སོར་ཐར་པ་ཡི། །ཚུལ་ཁྲིམས་རྣམ་དག་ངུར་སྨྲིགས་རྒྱལ་མཚན་འཆང་། །སྡོམ་བརྩོན་སྡེ་སྣོད་འཛིན་པའི་རྒྱལ་པོར་བསྔགས། །ཤཱཀྱའི་སྲས་གཅིག་ཁྱེད་ལ་ཕྱག་འཚལ་བསྟོད། ༢ །ཟབ་ཡངས་ཏིང་འཛིན་རྒྱ་མཚོ་ཆེན་པོའི་ཀློང་། །མངོན་ཤེས་ལ་སོགས་ཡོན་ཏན་ནོར་བུའི་གཏེར། །རྒྱལ་སྲས་སྤྱོད་པའི་རླབས་ཕྲེང་ཆེར་གཡོ་བ། །བྱང་ཆུབ་སེམས་དཔའི་མཆོག་ལ་ཕྱག་འཚལ་བསྟོད། ༣ །གཞལ་བྱ་བདེན་པ་གཉིས་ཀྱི་ཆོས་ཚུལ་ཀུན། །ཡང་དག་རིགས་པའི་ལམ་ནས་གསལ་མཛད་པའི། །ཤེས་རབ་ཉི་ཟླའི་འོད་ཀྱིས་ས་སྟེང་ཁྱབ། །མཁས་པའི་དབང་པོ་ཁྱེད་ལ་ཕྱག་འཚལ་བསྟོད། ༤ །རང་གཞན་གྲུབ་མཐའ་རྒྱ་མཚོའི་ཕ་རོལ་ཕྱིན། །དབུ་སེམས་ཟུང་འཇུག་ཤིང་རྟའི་ལམ་སྲོལ་ཕྱེས། །འཕགས་པའི་ཡུལ་ན་ཉི་ཟླ་ལྟ་བུར་གྲགས། །བསྟན་པའི་རྒྱན་གཅིག་ཁྱེད་ལ་ཕྱག་འཚལ་བསྟོད། ༥ །གངས་ཅན་མུན་པའི་ཁྲོད་དུ་རྒྱལ་བསྟན་མཆོག །སྣང་བའི་སྒོ་ཆེན་ཐོག་མར་ཁྱོད་ཀྱིས་ཕྱེས། །ཡང་དག་ལུང་དང་རིགས་པའི་རྒྱལ་རྔ་བསྒྲགས། །མཁན་ཆེན་ཆོས་ཀྱི་རྒྱལ་པོར་ཕྱག་འཚལ་བསྟོད། ༦ །བགྲང་བྱ་བརྒྱ་ཕྲག་དགུ་ཡི་གྲངས་བཞུགས་ཏེ། །འཕགས་ཡུལ་རྒྱ་ནག་གངས་ཅན་ལ་སོགས་པར། །བསྟན་པའི་རྒྱལ་མཚན་ཕྱོགས་བཅུར་རབ་ཏུ་བསྒྲེང་། །བསྟན་འཛིན་རྒྱལ་པོ་ཁྱེད་ལ་ཕྱག་འཚལ་བསྟོད། ༧ །རྨད་བྱུང་ཐུགས་བསྐྱེད་སྨོན་ལམ་རྒྱ་མཚོ་དང་། །ཐབས་ལ་མཁས་པའི་རྣམ་རོལ་སྣ་ཚོགས་ཀྱིས། །བཟང་པོའི་ཕྲིན་ལས་ས་སྟེང་ཀུན་ཏུ་ཁྱབ། །བཀའ་དྲིན་འགྲན་མེད་ཁྱེད་ལ་ཕྱག་འཚལ་བསྟོད། ༨ །མཐུ་སྟོབས་བདག་པོར་གྱུར་ཀྱང་བྱམས་བརྩེའི་ངང་། །ཡོན་ཏན་རྒྱ་མཚོས་དབྱོར་ཀྱང་སྙེམས་མེད་ཞི། །གསང་སྔགས་ས་ལམ་རྫོགས་ཀྱང་དགེ་སྦྱོང་ཚུལ། །དམན་རྣམས་རྗེས་སུ་འཛིན་ལ་ཕྱག་འཚལ་བསྟོད། ༩ །བོད་འདིར་རྒྱལ་བསྟན་ཇི་སྲིད་གནས་ཀྱི་བར། །སྤྲུལ་པའི་བསྟན་འཛིན་ཡང་ཡང་འབྱོན་པ་དང་། །བསྟན་ལ་བྱ་བ་བྱེད་པར་ཞལ་གྱིས་བཞེས། །གངས་ཅན་མགོན་པོ་ཁྱེད་ལ་ཕྱག་འཚལ་བསྟོད། ༡༠ །གང་སྐུ་བསྒོམ་པས་བསྟན་པའི་མངའ་ཐང་འཕེལ། །ཚུལ་ཁྲིམས་རྣམ་དག་ཏིང་འཛིན་ཤེས་རབ་རྒྱས། །མཐར་གྱིས་རྡོ་རྗེ་འཛིན་རྒྱལ་འགྱུར་ཞེས་གསུངས། །དཔག་མེད་ཐུགས་རྗེའི་གཏེར་ལ་ཕྱག་འཚལ་བསྟོད། ༡༡ །དུས་མཐར་རྒྱལ་བའི་བསྟན་པ་ཉམས་དམའ་ཞིང་། །བསྟན་རྗེས་འཇུག་རྣམས་ཤིན་ཏུ་ཉམ་ཐག་ཚེ། །ཁྱེད་ཉིད་དྲན་པས་སྐྱོབས་པར་འགྱུར་རོ་ཞེས། །ཞལ་བཞེས་རྗེས་སུ་དྲན་ནོ་ཐུགས་རྗེ་ཅན། ༡༢ །དེང་དུས་སྙིགས་མ་ལྔས་བཅོམ་འགྲོ་བ་རྣམས། །ཡང་དག་ལྟ་བའི་དམིགས་རྣམ་རྙེད་དཀའ་ཞིང་། །ཚུལ་ཁྲིམས་ཏིང་འཛིན་བདུད་རྩིའི་སྐལ་བས་དབེན། །བསྟན་ལ་འཚེ་བའི་ཕྱོགས་རྣམས་ཆེས་ཆེར་བདོ། ༡༣ །ཆར་ལྡན་དུས་བཟང་རྫོགས་པའི་ནམ་གཞུག་བཞིན། །ཅི་ལ་བསམས་ཀྱང་སྐྱོ་བའི་དུས་འདི་ན། །རྒྱལ་ཀུན་མཐུ་སྟོབས་དབང་ཕྱུག་རྡོ་རྗེ་འཛིན། །མགོན་པོ་ཁྱོད་ཀྱི་དམ་བཅའ་མ་བསྙེལ་ཅིག ༡༤ །སྡེ་སྣོད་རྒྱུད་སྡེའི་འཆད་ཉན་དར་བ་དང་། །བསླབ་གསུམ་རིམ་གཉིས་རྣལ་འབྱོར་གོང་དུ་འཕེལ། །ལུང་རྟོགས་བསྟན་པའི་མངའ་ཐང་རབ་རྒྱས་པའི། །རྫོགས་ལྡན་དུས་བཟང་གསར་དུ་ངོམས་པར་མཛོད། ༡༥ །སྐྱེ་བ་ཀུན་ཏུ་ཁྱེད་ཀྱིས་རྗེས་བཟུང་ནས། །རྒྱལ་བ་དགྱེས་པའི་ལམ་ལས་མི་གཡོ་ཞིང་། །མཐའ་ཡས་འགྲོ་བ་ཀུན་ཀྱང་རྒྱལ་ཀུན་གྱི། །གསང་འཛིན་གསང་བའི་བདག་པོ་ཉིད་གྱུར་ཅིག ༡༦ །ཅེས་ཚིགས་སུ་བཅད་པ་དེ་ཉིད་རྣམ་པ་བཅུ་དྲུག་གི་གྲངས་ལྡན་འདི་ནི་མེ་རྟ་ཟླ་བ་དགུ་པའི་ཚེས་ལྔ་ལ་མི་ཕམ་འཇམ་དཔལ་དགྱེས་པས་བཀོད་པ་དགེ་ལེགས་འཕེལ།། ༈ ཆོས་རྒྱལ་ཆེན་པོའི་བསྟོད་པ་གངས་ཅན་མ་ཞེས་བྱ་བ་བཞུགས་སོ། ། གངས་ཅན་འགྲོ་བ་ཐབས་ཀྱིས་གདུལ་བྱའི་ཕྱིར། །རྒྱལ་སྲས་ཐུ་བོ་རྗེ་བཙུན་འཇམ་པའི་དབྱངས། །བོད་ཡུལ་རྒྱལ་པོའི་ཚུལ་དུ་ལེགས་སྣང་བ། །ཁྲི་སྲོང་ལྡེའུ་བཙན་ཞབས་ལ་ཕྱག་འཚལ་བསྟོད། ༡ །ཉི་ཟླ་ཟུང་འདྲའི་མཁན་སློབ་རྣམ་གཉིས་སོགས། །རྒྱ་གར་པཎ་གྲུབ་བོད་ཀྱི་ལོ་ཙཱ་བ། །གངས་ཅན་ཕན་བདེའི་བྱེད་པོ་སྤྲུལ་པའི་སྐུ། །རྣམ་མང་བསྡུ་བར་མཛད་ལ་ཕྱག་འཚལ་བསྟོད། ༢ །རིག་པའི་གནས་དང་མདོ་རྒྱུད་བསྟན་བཅོས་གཞུང་། །མ་ནོར་བསྒྱུར་ཞུས་གཏན་ལ་ཕབ་མཛད་ཅིང་། །བཤད་སྒྲུབ་བསྟན་པའི་རྒྱལ་མཚན་རབ་ཏུ་བསྒྲེངས། །མངའ་བདག་ཆེན་པོ་ཁྱེད་ལ་ཕྱག་འཚལ་བསྟོད། ༣ །མཐའ་བཞིའི་རྒྱལ་ཁམས་སྟོབས་ཀྱིས་དབང་དུ་བསྡུས། །གཙུག་ལག་ཁང་དང་སྐུ་གསུང་ཐུགས་ཀྱི་རྟེན། །མདོ་སྔགས་འཛིན་པའི་སྡེ་གཉིས་བོད་དུ་བཀོད། །བོད་ཡུལ་སྐྱོང་མཛད་ཁྱེད་ལ་ཕྱག་འཚལ་བསྟོད། ༤ །སྣ་ཚོགས་ཐབས་ཀྱིས་ཆོས་སྲིད་ཟུང་དུ་སྐྱོང་། །བཀའ་བཙན་སྲོལ་བཟང་རྒྱལ་ཁམས་བདེ་ལ་བཀོད། །མངའ་བདག་ཚངས་པ་ལྷ་ཡི་མེ་ཏོག་ཅེས། །སྙན་པས་ས་སྟེང་ཁྱབ་ལ་ཕྱག་འཚལ་བསྟོད། ༥ །ཆེ་མཆོག་བདུད་རྩིའི་གྲུབ་པ་མངོན་དུ་གྱུར། །ཏིང་འཛིན་གཡོ་མེད་དགོངས་པའི་རྩལ་ཆེན་རྫོགས། །ཚད་མ་ལ་སོགས་ལེགས་བཤད་བསྟན་བཅོས་སྤེལ། །ཆོས་ཀྱི་རྒྱལ་པོ་ཁྱེད་ལ་ཕྱག་འཚལ་བསྟོད། ༦ །སངས་རྒྱས་ལས་ཀྱང་ཆེས་དཀོན་གསང་སྔགས་ཀྱི། །གཞུང་ལུགས་རྣམས་དང་དེ་ཡི་གདམས་ངག་གིས། །བྷོ་ཊའི་ཡུལ་འདི་ཨོ་ཌཱི་ཡཱ་ན་དང་། །མཚུངས་པར་མཛད་པ་ཁྱེད་ལ་ཕྱག་འཚལ་བསྟོད། ༧ །དབྱིངས་ཀྱི་མཁའ་འགྲོས་རྒྱས་བཏབ་ཟབ་གསང་ཆོས། །སུས་ཀྱང་རྙེད་པར་དཀའ་བ་ནང་རྒྱུད་གསུམ། །གྲུབ་མཆོག་རྣམས་ཀྱིས་ཡོངས་བླངས་ནོར་བུའི་གཏེར། །ས་འདིར་འགོད་མཛད་ཁྱེད་ལ་ཕྱག་འཚལ་བསྟོད། ༨ །བསིལ་ལྡན་ར་བ་དཀར་པོའི་ལྗོངས་འདི་ན། །རྒྱལ་བའི་བསྟན་དང་དེ་འཛིན་འདུས་པའི་སྡེ། །ཇི་སྙེད་བྱུང་བ་མགོན་པོ་ཁྱོད་ཀྱི་དྲིན། །བཀའ་དྲིན་འགྲན་བྲལ་ཁྱེད་ལ་ཕྱག་འཚལ་བསྟོད། ༩ །ད་དུང་སངས་རྒྱས་བསྟན་པ་གནས་ཀྱི་བར། །སྣ་ཚོགས་སྤྲུལ་པས་རྒྱལ་བའི་བསྟན་པ་དང་། །གངས་ཅན་ཕན་བདེ་སྤེལ་བར་མཛད་པ་ཡི། །ཐུགས་བསྐྱེད་མཉམ་མེད་ཁྱེད་ལ་ཕྱག་འཚལ་བསྟོད། ༡༠ །བདག་ཅག་གངས་རིའི་ཁྲོད་གནས་མི་རྣམས་ཀྱིས། །རྒྱལ་བསྟན་རིན་ཆེན་ཆོས་ཀྱི་སྒྲ་ཙམ་ཡང་། །རྣ་བར་ཐོས་པ་ཁྱོད་ཀྱི་དྲིན་ཡིན་ན། །བློ་ལྡན་སུ་ཞིག་ཁྱེད་ལ་ཅིས་མི་གུས། ༡༡ །དེ་ཕྱིར་བདག་ནི་དད་མོས་རྩེ་གཅིས་པས། །མགོན་པོ་ཁྱོད་ལ་བསྟོད་ཅིང་ཕྱག་འཚལ་ན། །སྔོན་གྱི་ཐུགས་བསྐྱེད་དམ་བཅའ་ཆེན་པོ་ཡིས། །བདག་ཅག་རྗེས་བཟུང་བྱིན་གྱིས་བརླབ་པར་མཛོད། ༡༢ །ཕྱོགས་བཅུའི་རྒྱལ་བས་དབང་བསྐུར་ལུང་བསྟན་ཅིང་། །སྤྱན་རས་གཟིགས་ཀྱི་ཐུགས་བསྐྱེད་མཐུ་བཙན་པས། །འཇམ་དཔལ་སྤྲུལ་པའི་རྒྱལ་པོའི་ཐུགས་བཞེད་བཞིན། །རྒྱལ་བསྟན་ཡུན་དུ་གནས་པ་ཉིད་གྱུར་ཅིག ༡༣ །མཐའ་ཡས་འགྲོ་ཀུན་ཐུགས་བརྩེས་ཡོངས་སུ་བཟུང་། །ནམ་མཁའ་ཇི་སྲིད་གཞན་ཕན་ཕྲིན་ལས་སྤྱོད། །རྒྱལ་སྲས་དཔའ་བོ་རྣམས་ཀྱི་གཙུག་གི་རྒྱན། །མགོན་པོ་ཁྱེད་དང་མཚུངས་པར་བདག་གྱུར་ཅིག ༡༤ །ཁྱེད་ལ་ཚིགས་བཅད་འདི་ཆོས་རྒྱལ་ཆེན་པོ་ཉིད་ཀྱི་གསུང་ཡིན་པར་གྲགས། བསྟོད་ཅིང་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་དེར། །ནད་དང་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། ༡༥ །རྒྱལ་དང་རྒྱལ་བའི་སྲས་ཀྱི་སྨོན་ལམ་དང་། །བདག་ཅག་མོས་དགེ་རྣམ་པར་དཀར་བའི་མཐུས། །མངའ་བདག་ཆོས་ཀྱི་རྒྱལ་པོ་ཁྲི་སྲོང་རྗེའི། །ཐུགས་བསྐྱེད་བསྟན་པ་མཐར་རྒྱས་བཀྲ་ཤིས་ཤོག ༡༦ །ཅེས་ཚིགས་སུ་བཅད་པ་མཆོད་པའི་ལྷ་མོ་བཅུ་དྲུག་གི་གྲངས་ལྡན་འདི་ནི་མེ་རྟ་ཟླ་བ་བརྒྱད་པའི་ཚེས་ཉེར་བདུན་ལ་མི་ཕམ་འཇམ་དཔལ་དགྱེས་པས་བཀོད་པ་དགེ་ལེགས་འཕེལ། ༈ བྱང་ཆུབ་སེམས་ཀྱི་གཞི་རྩར་ལེགས་བཟུང་ནས། །བྱང་ཆུབ་སྤྱོད་པའི་ཟབ་ལམ་ཁྱད་འཕགས་ཞིག །བྱང་ཆུབ་མཆོག་གི་འབྲས་བུ་ལ་གཞོལ་ཕྱིར། །བྱང་ཆུབ་རྒྱ་མཚོས་འཕྲུལ་པར་བསྐྲུན་སྤེལ་དགེ། ། |