སྐྱབས་འགྲོ་ཡན་ལག་དྲུག་པ། སློབ་དཔོན་ཆེན་པོ་དྲི་མེད་བཤེས་གཉེན།
ཥ ཌཱ ངྒ ཤ ར ཎ མྣཱ མ བི ཧ ར ཏི སྨ། །
སྐྱབས་འགྲོ་ཡན་ལག་དྲུག་པ་ཞེས་བྱ་བ་བཞུགས་སོ། །
ༀ་སྭ་སྟི། སྐྱབས་འགྲོ་ཡན་ལག་དྲུག་པ་འདི་ལ་དོན་བཞི་ལས། དང་པོ་མཚན་གྱི་དོན། རྒྱ་གར་སྐད་དུ། ཥ་ཌཱ་དྒ་ཤ་ར་ཎཾ། བོད་སྐད་དུ། སྐྱབས་འགྲོ་ཡན་ལག་དྲུག་པ། གཉིས་པ་འགྱུར་གྱི་ཕྱག་དཀོན་མཆོག་གསུམ་ལ་ཕྱག་འཚལ་ལོ། །གསུམ་པ་གཞུང་གི་དོན་ལ་གཉིས། བརྩམ་པར་དམ་བཅའ་བ་བསྡུས་དོན་དང་བཅས་པ་དང། གཞུང་དོན་དངོས་བཤད་པའོ། །དང་པོ་ནི། སྐྱབས་འགྲོ་ཡན་ལག་དྲུག་པ་བཤད། །གཉིས་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཅིས་འགྲོ་ཡུལ་དུས་དགོས་པ་དང་། །ཕན་ཡོན་བསླབ་བྱ་བླང་བ་རྣམས། །རྩ་བ་སྡོམ་དུ་བཤད་པ་ཡིན། །གཉིས་པ་རྒྱས་པར་བཤད་པ་ལ་རིམ་པར། འཁོར་བ་ལ། འཇིགས་དང་དཀོན་མཆོག་གསུམ་གྱི་ཡོན་ཏན་དྲན་པས་སྐྱབས་སུ་འགྲོ། །གནས་གསུམ་བསྟན་པའི་ཡུལ་དེ་ལ། །འདི་ནས་བྱང་ཆུབ་ཐོབ་བར་རོ། །མུ་སྟེགས་སྤྱོད་ལས་ལོག་པ་ཡིན། །ངན་སོང་གསུམ་དུ་མི་སྐྱེ་སྡོམ་པ་གོང་མའི་རྟེན་དུ་འགྱུར། །བར་ཆད་མེད་པས་ནད་ཉུང་ཚེ་རིང་། སྡིག་སྒྲིབ། འབྱང་ཞིང་ཚོགས་སོག་པའི་ཕན་ཡོན་ནོ། །སོ་སོའི་བསླབ་བྱ། སྐྱབས་གསུམ་དང་པོའི་བསླབ་བྱ་ནི། །གནོད་སྦྱིན་མི་བསྟེན་ཕྱག་མི་འཚལ། །གཉིས་པ་སེམས་ཅན་ཐམས་ཅད་ལ། །འཚེ་བ་སྤངས་ཤིང་བརྩེ་བར་བྱ། །གསུམ་པ་བདག་དང་གཞན་གྱི་ཡུལ། །སྡིག་པ་ཅན་དང་འགྲོགས་པ་མིན། །སྐུ་གཟུགས་ཚིགས་སུ་བཅད་པ་དང་། །ལྷན་པ་སེར་པོ་བཏབ་པ་ལ། །དད་མོས་སྒོ་ནས་སྟོན་པར་བརྟག །ཞལ་ནས་གསུངས་པ་མཐའ་དག་ལ། །སྐུར་པ་མི་གདབ་སྤྱི་བོར་བླང། །གང་ཟག་དག་དང་མ་དག་ལས། །དམ་པར་བལྟ་བར་བྱ་བ་ཡིན། །ཐུན་མོང་གི་བསླབ་བྱ། ལུས་སྲོག་ཕྱིར་ཡང་གསུམ་མི་སྤང་། །དུས་འདིར་རྐྱེན་རྣམས་ཅི་བྱུང་ཡང་། །མགོན་སྐྱབས་གཞན་དུ་བཙལ་བ་མིན། །ཆེ་བའི་ཡོན་ཏན་རྟག་ཏུ་དྲན། །ཟས་དག་གིས་ནི་མཆོད་པ་ཡིན། །རྒྱུན་གྱི་སྐྱབས་འགྲོ་བརྗོད་བྱ་བ། །དུས་དྲུག་རྒྱུན་གྱི་བསྐུལ་མ་ཡིན། །བླང་བ་དང་པོར་ཤེས་པར་བྱ། །འཇིགས་པ་བྱུང་ཚེ་བསྐུལ་མ་ཡིན། །བཞི་པ་མཇུག་གི་དོན། རྒྱུད་ལ་ཤེས་བྱ་མང་མཆིས་ཀྱང་། ། རྒྱལ་བློན་ཡིད་ཆེས་མ་གྱུར་པས། །སྐྱབས་འགྲོའི་ཆོ་ག་བདག་གིས་བཤད། །ལེགས་པར་བྲིས་ཤིག་ཀུ་མཱ་ར། །བསོད་ནམས་འགྲོ་བ་ཡོངས་ལ་བསྔོ། །སྐྱབས་འགྲོ་ཡན་ལག་དྲུག་པ། སློབ་དཔོན་ཆེན་པོ་དྲི་མེད་བཤེས་གཉེན་གྱིས་མཛད་པ་རྫོགས་སོ།། །།འདི་ལ་འགྱུར་བྱང་མི་སྣང་ཡང་། ལྟ་གཅིག་དཱི་པཾ་ཀ་རའི་ཐུགས་དམ་ཆོས་ཆུང་བརྒྱ་རྩའི་གྲངས་སུ་བཞུགས་པས་ཚད་མར་བཟུང་ངོ་། །དཔེ་འདི་སྤར་མ་དཔེ་རྙིང་རྩ་ཆེན་ཞིག་མཁན་ཚུལ་ཁྲིམས་མཐར་ཕྱིན་གྱི་ཕྱག་དཔེ་ལས་ཁོ་བོ་བྱང་ཆུབ་རྒྱ་མཚོས་རྙེད་དེ་འཛུད་པའོ། །