སྐྱབས་འགྲོ་ཡན་ལག་དྲུག་པ་ལག་ཏུ་བླང་ནས་རིམ་པར་ཀློག་པའི་ཐབས། དཔལ་གྱི་སེང་གེ
སྐྱབས་འགྲོ་ཡན་ལག་དྲུག་པ་ལག་ཏུ་བླང་ནས་རིམ་པར་ཀློག་པའི་ཐབས་ནི། ཐོག་མར་བརྒྱུད་འདེབས་བྱས་རྗེས། རྒྱ་གར་སྐད་དུ་ནས། སྐྱབས་འགྲོ་ཡན་ལག་དྲུག་པ་ཞེས་པའི་བར་བརྗོད་རྗེས། ཚོགས་ཞིང་གསལ་གདབ། ཨེ་མ་ཧོཿ རང་གནས་འོག་མིན་ནས། ཕྱག་འཚལ་སྐྱབས་སུ་མཆི། ཞེས་པའི་བར་བརྗོད་རྗེས། ལངས་ཏེ་ཕྱག་འཚལ་བཞིན། དཀོན་མཆོག་གསུམ་ལ་ཕྱག་འཚལ་ལོ། །དང་། ངན་སོང་གསུམ་དང་འགྲོ་བ་ལྔའི། །སྡུག་བསྔལ་མ་ལུས་སེལ་མཛད་ཅིང་། །སོགས་ཤླ་ཀ་གཅིག་དཔལ་ཇོ་བོ་ཨ་ཏི་ཤའི་སྐྱབས་འགྲོ་བསྟན་པའི་མཆོད་སྤྱོད་དུ་གསུངས་པ་འདི་དང་ལྷན་ཅིག་བརྗོད་བཞིན་ཕྱག་གང་མང་བྱས་རྗེས། ཕྱག་འཇོག་ཁར། མགོན་པོ་ཐུགས་རྗེ་ཆེ་ལྡན་པ། །སོགས་ནས། དགེ་འདུན་ལ་ཡང་ཕྱག་འཚལ་ལོ། །བར་བརྗོད་རྗེས། སྟོན་པ་བླ་མེད་སངས་རྒྱས་རིན་པོ་ཆེ། །སོགས་ཤླ་ཀ་དང་། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །སོགས་ཤླ་ཀ་བརྗོད་རྗེས། མཛད་པ་བཅུ་གཉིས་བརྗོད་རྗེས། ཟག་མེད་ཀྱི་ཆོས་སྡེ་ཉེར་གཅིག་མདོ་རྒྱན་ནས་གསུངས་པ་གོ་རིམ་མི་འདྲ་བ། སྐྱབས་འགྲོ་འདི་བཤད་པའི་དབང་དུ་བྱས་ཤིང་། ཕར་ཕྱིན་དྲུག་གིས་བསྟོད་པ་ནས། དཀོན་མཆོག་རྗེས་དྲན་དང་སྦྱར་ནས་བཤད་པའི་གོ་རིམ་ཡིན་པས་དེ་རྣམས་ལྟར་བརྗོད་རྗེས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །སོགས་ཤླ་ཀ་བརྗོད་རྗེས། འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །སོགས་ཤླ་ཀ་དང་། ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །སོགས་ནས། གནས་བརྟན་ཆེན་པོ་བཅུ་དྲུག་ལ་ཕྱག་འཚལ། བར་བརྗོད་ཇེས། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཇི་ཉེད་སུ་དག་སོགས་ནས། བདེ་བར་གཤེགས་པ་ཐམས་ཅད་བདག་གིས་བསྟོད། །བར་བརྗོད་རྗེས། སྟན་བདེ་བ་ལ་འདུག་སྟེ། སྐྱབས་འགྲོ་ཡན་ལག་དྲུག་པ་བཤད། །སོགས་ནས། འཇིགས་དང་ཡོན་ཏན་དྲན་པས་འགྲོ། །བར་བརྗོད་ཅིང་། རྐང་པ་གཅིག་པོ་འདི་ལན་གསུམ་བརྗོད་རྗེས། སེམས་ཅན་ཐམས་ཅད་བདེ་བ་དང་། །བདེ་བའི་རྒྱུ་དང་ལྡན་པར་གྱུར་ཅིག །སོགས་ཤླ་ཀ་ལན་གསུམ་བརྗོད་རྗེས། །འདི་ལྟར་སངས་རྒྱས་སོགས་ནས། ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །བར་བརྗོད་རྗེས། བདུན་ཅུ་པ་ལས་གསུངས་པ། ཡོན་ཏན་དམ་པ་རེ་རེ་བཞིན། །སོགས་ཤླ་ཀ་ལན་གསུམ། བར་འདིར། འདི་ནས་ཉི་མ་ལྷོ་ནུབ་མ་བརྗོད་རྗེས། མ་ལུས་སེམས་ཅན་སོགས་དང་། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། སོགས་ཀྱིས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །སོགས་ཀྱིས་བཞུགས་སུ་གསོལ་རྗེས། གནས་གསུམ་བསྟེན་པའི་ཡུལ་དེ་ལ། །ལན་གསུམ་གྱི་རྗེས། འདི་ནས་བྱང་ཆུབ་སོགས་ནས། བསྐུལ་མ་ཡིན། །བར་བརྗོད་ནས། སྐབས་འདིར་མཆོད་པ་བྱིན་རླབས་བྱ་ཞིང་མཆོད་པའི་སྤྲིན་གྱིས་གཟུངས་འདོན། དེ་ནས་མཎྜལ་ཕུལ་ཞིང་། མེ་ཏོག་དམ་པ་སོགས་བཟང་སྤྱོད་ཡན་ལག་བདུན་པ་ཚང་བར་བརྗོད་རྗེས། བླང་བ་དང་པོར་ཤེས་བྱ་བ། །འཇིགས་པ་བྱུང་ཚེ་བསྐུལ་མ་ཡིན། །ལན་གསུམ་བརྗོད་རྗེས། བདག་མིང་འདི་སོགས་རྒྱུའི་སྐྱབས་འགྲོ་གང་མང་གྲུབ་རྗེས། བྱང་ཆུབ་ལྟུང་བཤགས་ཀྱི་རྒྱུའི་སྐྱབས་འགྲོ། བདག་མིང་འདི་ཞེས་བགྱི་བ། སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ལན་གསུམ་རྗེས་གཞུང་ཐམས་ཅད་བརྗོད་རྗེས། འབྲས་བུའི་སྐྱབས་འགྲོ། མི་མཆོག་རྒྱལ་བ་སོགས་ཤླ་ཀ་དེ་གྲངས་གསོག་པར་བྱའོ། །ཐུན་འཇོག་ཁར་དོན་དམ་སྐྱབས་འགྲོ་ལ་མཉམ་པར་བཞག་ཅིང་རྗེས་སུ། རྒྱུད་ལ་ཤེས་བྱ་སོགས་ནས། རྫོགས་སོའི་བར་བརྗོད་རྗེས། བདུན་ཅུ་པའི་བསྔོ་བ། ཐེག་ཆེན་ཚུལ་ལ་སོགས་ཤླ་ཀ་བརྗོད་མཐར། སངས་རྒྱས་དམ་ཆོས་དགེ་འདུན་དང་། སོགས་འཕགས་པ་ཀླུ་སྒྲུབ་ཀྱི་སྨོན་ལམ་ཉི་ཤུ་པ་འདོན་པར་བྱའོ། །ཅེས་པ་འདིའང་དཔལ་གྱི་སེངྒེས་སྦྱར་བའོ། །དགེ་ལེགས་འཕེལ།། །།