ཁྱིམ་པ་རྗེས་སུ་འཛིན་པ་སོ་སོར་ཐར་པའི་སྡོམ་པའི་ཆོ་ག་ཐར་ལམ་རབ་གསལ། འགྱུར་མེད་རྡོ་རྗེ།

ཁྱིམ་པ་རྗེས་སུ་འཛིན་པ་སོ་སོར་ཐར་པའི་སྡོམ་པའི་ཆོ་ག་ཐར་ལམ་རབ་གསལ་ཞེས་བྱ་བ་བཞུགས་སོ། །ༀ་སྭ་སྟི། རྣམ་གྲོལ་བྱང་ཆུབ་མཆོག་བརྙེས་ནས། །ཐུགས་རྗེས་གདུལ་བྱ་སྐལ་པ་བཞིན། །འདུལ་མཛད་ཐམས་ཅད་མཁྱེན་དེ་ལ། །དངོས་པོ་ཀུན་གྱིས་ཕྱག་བགྱིའོ། །ཚུལ་ཁྲིམས་གྲུ་གཟིངས་ལ་བརྟེན་ནས། །མྱང་འདས་རིན་ཆེན་གླིང་མཆོག་ཏུ། །བགྲོད་བྱེད་མ་སྨད་ཆོ་གའི་ཁྲིགས། །ཉུང་གསལ་འཇུག་བདེ་ཉིད་དུ་སྤེལ། །འདིར་སྐྱབས་འགྲོའི་སྡོམ་པ་དོན་དུ་གཉེན་བ་དག་འོངས་པ་ན། གནས་གཙང་མར་ཐུབ་པ་ཆེན་པོའི་སྐུ་གཟུགས་སོགས་དཀོན་མཆོག་གི་རྟེན་དང་མཆོད་པ་ཅི་འབྱོར་པ་བཤམས་པའི་མདུན་དུ། བླ་མ་སྟན་མཐོ་བ་ལ་འདུག་པའི་དྲུང་དུ་སློབ་མས་རྟེན་དང་བླ་མ་ལ་ཕྱག་གསུམ་གསུམ་བྱས་ནས་ཙོག་པུའམ་པུས་མོ་བཙུགས་ཐལ་མོ་སྦྱར་ཏེ་འདུག་པ་ལ། བླ་མས། འོ། རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་དག་གིས་དོན་དུ་གཉེར་བྱ་ནི། སངས་རྒྱས་ཀྱི་བསྟན་པ་ལ་ནན་ཏན་སྙིང་པོར་བྱ་བ་ཉིད་ཡིན་ལ། དེ་ལ་ཡོན་ཏན་ཐམས་ཅད་ཀྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང་། དེའི་རྩ་བ་ཡང་སྐྱབས་སུ་འགྲོ་བའི་སྡོམ་པ་ཉིད་ལ་རག་ལས་པ་ཡིན་ཏེ། ཇི་སྐད་དུ། དཀོན་མཆོག་གསུམ་ལ་སྐྱབས་འགྲོ་བ། །འཇིགས་པ་མེད་པ་ཐོབ་པར་འགྱུར། །ཞེས་གསུངས་པས་ཕན་ཡོན་ཤིན་ཏུ་ཆེ་བ་ཡིན། དེ་ཡང་བླ་མའི་རྗེས་སུ་བཟློས་ནས་བླངས་ན་ངོ་ཚ་ཁྲེལ་ཡོད་ཀྱི་རྟེན་སོགས་དགོས་པ་ཁྱད་པར་ཅན་ཡོད་པས་འདིའི་རྗེས་ཟློས་མཛོད། ཅེས་བརྡ་སྤྲད་ལ། ཆོས་འབྲེལ་མེད་ན་བཙུན་པ་ཞེས་དང་། ཡོད་ན། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ༴ ཚོགས་རྣམས་ཀྱི་མཆོག །དགེ་འདུན་ལ༴ བདག་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་བཟུང་དུ་གསོལ། ཞེས་ལན་གཉིས་ལན་གསུམ་དུ་བརྗོད་ནས། སློབ་དཔོན་གྱིས། ཐབས་ཡིན་ནོ། །སློབ་མས། ལེགས་སོ། །ཞེས་བརྗོད་པར་བྱའོ། །དེ་ནས་བསླབ་བྱ་བཤད་པར་བྱ་སྟེ། དེ་ལྟར་སྐྱབས་འགྲོའི་སྡོམ་པ་ཐོབ་པ་ཙམ་གྱིས་མི་ཆོག །བསླབ་བྱ་ལ་བསླབ་དགོས། བསླབ་བྱའི་ཆོས་དེ་ཡང་ཇི་ལྟ་བུ་ཡིན་སྙམ་ན། དགག་པའི་བསླབ་བྱ་གསུམ་དང་། སྒྲུབ་པའི་བསླབ་བྱ་གསུམ་དང་། ཆ་མཐུན་གྱི་བསླབ་བྱ་གསུམ་སྟེ་དགུའོ། །དང་པོ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་འགྲོ་མི་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ལ་མི་བརྟེན་པའོ། །དེ་ཡང་བོད་འདིར་མུ་སྟེགས་དངོས་སུ་མི་འབྱུང་ཡང་སྡིག་ཅན་གྱི་གྲོགས་དེ་དང་འདྲ་བས་མི་བརྟེན་པའོ། །གཉིས་པ་ནི། སངས་རྒྱས་ལ་སྐྱབས་སུ་སོང་ནས་བདེ་བར་གཤེགས་པའི་སྐུ་གཟུགས་ཀྱི་རྟེན་ཐ་ན་སཙྪའི་ཆག་དུམ་ཡན་ཆད་ལ་སངས་རྒྱས་དངོས་ཀྱི་འདུ་ཤེས་བཞག་ནས་ཕྱག་མཆོད་བཀུར་སྟི་སོགས་གུས་པར་བྱེད། ཆོས་ལ་སྐྱབས་སུ་སོང་ནས་ཆོས་དཀོན་མཆོག་གི་རྟེན་གསུང་རབ་ཀྱི་རྟེན་ཐ་ན་ཡིག་འབྲུ་གཅིག་ཡན་ཆད་ལ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔ་མ་ལྟར་བྱའོ། །དགེ་འདུན་ལ་སྐྱབས་སུ་སོང་ནས་དགེ་འདུན་དཀོན་མཆོག་གི་རྟེན་རབ་ཏུ་བྱུང་བ་ནས་ཐ་ན་ལྷན་པ་སེར་པོ་བཏབ་པ་ཡན་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔར་ལྟར་བྱའོ། །གསུམ་པ་ནི། དུས་རྟག་ཏུ་དཀོན་མཆོག་མཆོད་པ་ལ་བརྩོན་པར་བྱ་སྟེ་ཐ་ན་ཅི་ཟ་ཅི་འཐུང་གི་ཕུད་ཀྱི་མཆོད་པ་དང་། ནང་ནུབ་སོགས་སུ་སྐྱབས་འགྲོ་བཟླ་བ་ལ་བརྩོན་པ་དང་། སྐྱེས་བུ་དམ་པ་ལ་བརྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་དང་མཐུན་པའི་སྤྱོད་པ་ལ་བསླབ་པར་བྱའོ། །དེ་ལྟ་བུའི་བསླབ་བྱ་རྣམས་ཡིད་ལ་བཟུང་སྟེ་དྲན་ཤེས་དང་ལྡན་པས་དུས་རྟག་ཏུ་སློབ་པར་གྱིས་ཤིག །ཅེས་བརྗོད་ནས། ཕྱག་གསུམ་འཚལ་དུ་བཅུག །བསྔོ་བ་དང་སྨོན་ལམ་བྱས་ནས་རང་གི་གནས་སུ་གཏང་ངོ་། །སྐྱབས་འགྲོའི་སྡོམ་པ་སྦྱིན་པའི་ཆོ་གའོ།། ༈ །།སྭ་སྟི། སྟོབས་བཅུའི་སྟོབས་ཀྱིས་བདུད་བཅོམ་ནས། །ཐུགས་རྗེས་འགྲོ་བའི་དོན་མཛད་པ། །ཟས་གཙང་སྲས་ལ་གུས་བཏུད་ནས། །དགེ་བསྙེན་སྡོམ་པའི་ཆོ་ག་བཤད། །འདིར་ཡོངས་སུ་རྫོགས་པའི་དགེ་བསྙེན་གྱི་སྡོམ་པའི་ཆོ་ག་འཆད་པ་ལ། ཐོག་མར་སྡོམ་པ་ལེན་པའི་ཚུལ། བར་དུ་མི་ཉམས་པར་བསྲུང་བའི་ཚུལ། མཐར་ཉམས་ན་ཕྱིར་བཅོས་པའི་ཚུལ། སྡོམ་པའི་ཕན་ཡོན་བཤད་པ་དང་བཞི་ལས། དང་པོ་ནི། དེ་བཞིན་གཤེགས་པའི་སྐུ་གཟུགས་ཀྱི་མདུན་དུ་མཆོད་པ་ཅི་འབྱོར་པ་བཤམས། སློབ་དཔོན་ཁྲི་སྟན་ལ་འཁོད་པའི་མདུད་དུ་བསྒྲུབ་བྱས་རྟེན་དང་བླ་མ་ལ་ཕྱག་གསུམ་གསུམ་བྱས་ནས་ཙོག་པུའམ་པུས་བཙུགས་ཀྱིས་ཐལ་མོ་སྦྱར་བས་འདུག་པ་ལ། འོ་རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་རྣམས་ཀྱིས་དོན་དུ་གཉེན་བྱ་ནི་སངས་རྒྱས་ཀྱི་བསྟན་པ་ལ་ནན་ཏན་སྙིང་པོར་བྱ་བ་ཉིད་ཡིན་ལ། དེ་ལ་ཡོན་ཏན་ཐམས་ཅད་ཀྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང་། དེ་ཡང་སོ་སོར་ཐར་པ་གཞིར་བཞག་གི་དབང་དུ་བྱས་ན་སྡོམ་པ་རིགས་བདུན་ནམ་བརྒྱད་དུ་གསུངས་པའི་ནང་ནས་སྐྱབས་འགྲོ་ནས་ཡོངས་རྫོགས་ཀྱི་བར་སྔར་གསུངས་པ་ལས། འདིར་ཡོངས་རྫོགས་དགེ་བསྙེན་གྱི་དངོས་པོར་སྒྲུབ་པ་ཡིན་པས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཕྱིར་དུ་དགེ་བསྙེན་ཡོངས་རྫོགས་ཀྱི་བསླབ་པ་བླངས་ནས་བསྲུང་སྙམ་པས་འདིའི་རྗེས་ཟློས་གྱིས་ཤིག །ཅེས་བརྡ་སྦྱར་ལ། བཙུན་པའམ་སློབ་དཔོན་དགོངས་གསོལ་དང་། རྐང་གཉིས་རྣམས་ཀྱི་ནས། དགེ་འདུན་ལ་སྐྱབས་སུ་མཆིའོའི་བར་དང་། བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་དགེ་བསྙེན་དུ་བཙུན་པའམ་སློབ་དཔོན་གྱིས་བཟུང་དུ་གསོལ། ཞེས་ལན་གསུམ་དང་ཐབས་ལེགས་བྱ། དེ་ལྟར་ཁྱོད་ཀྱིས་དགེ་བསྙེན་གྱི་སྡོམ་པ་ཐོབ་ནས་བསྲུང་དགོས་པས། བསྲུང་ཚུལ་ཀྱང་སྤང་བྱ་ལྔ་པོ་འདི་ཡིད་ཀྱི་སྒོ་ནས་སྤང་། ལུས་ངག་གི་སྒོ་ནས་སླར་ལོག་པར་བྱེད། དེ་ཡང་སྔོན་གྱི་དགྲ་བཅོམ་པ་རྣམས་ཀྱི་རྗེས་སུ་འབྲངས་ནས་བསྲུང་སྙམ་པ་གྱིས་ལ་འདིའི་རྗེས་ཟློས་གྱིས་ཞེས་བརྡ་སྦྱར་ལ། སློབ་དཔོན་དགོངས་སུ་གསོལ། ཇི་ལྟར་སྔོན་གྱིས་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་སྔོན་གྱི་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་། མྱོས་པར་འགྱུར་པ། བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། ཞེས་པ་ནས་བག་མེད་པའི་གནས་ལས་སླར་ལོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ། ཞེས་པ་ནས། རྗེས་སུ་བགྱིད་དོའི་བར་ལན་གཅིག་བརྗོད། དེ་ལྟར་ཁྱོད་ཀྱིས་ཡོངས་རྫོགས་དགེ་བསྙེན་གྱི་སྡོམ་པ་ལེན་བའི་ཆོ་ག་དངོས་དང་། བསླབ་པ་བརྗོད་པ་གཉིས་ཀྱི་སྒོ་ནས་ལེགས་པར་ཐོབ་པ་ཡིན་པས། དེ་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་འགྲུབ་པར་གྱིས་ཤིག །ཅེས་བརྗོད་ནས་བསྔོ་བ་བྱའོ། །གཉིས་པ་བར་དུ་མི་ཉམས་པར་བསྲུང་བའི་ཚུལ་ནི་བསླབ་བྱ་ཤེས་པ་ལ་རག་ལས་པས། དེ་ཉིད་འཆད་པར་འདོད་ན་ཐོག་མར་སྡོམ་པ་གང་དང་གང་ལེན་ཀྱང་སྐྱབས་འགྲོ་རྩོམ་བྱེད་དུ་དགོས་པས་སྐྱབས་འགྲོའི་བསླབ་བྱ་འདི་རྣམས་ལ་བསླབ་དགོས། ཞེས་སྐྱབས་སྡོམ་གྱི་ཆོ་གར་སྨོས་པའི་བསླབ་བྱ་རྣམས་བརྗོད་ནས། དགེ་བསྙེན་གྱི་བསླབ་བྱ་ལ་དངོས་ཀྱི་སྤང་བྱ་ཡན་ལག་ལྔ་དང་། ཕྱོགས་མཐུན་གྱི་བསླབ་བྱ་དང་། ཐབས་མཁས་ཀྱི་སྒོ་ལས་ཉེས་མེད་དང་གསུམ། དང་པོ་ཡན་ལག་ལྔ་ལས། སྲོག་གཅོད་ནི་གཞི་མིའམ་མིར་ཆགས་པ་ལ་དེར་འདུ་ཤེས་པ། ཀུན་སློང་ཞེ་སྡང་། བསམ་པ་གསོད་སེམས། སྦྱོར་བ་མཚོན་བརྩམས་པ་ལ་སོགས་པ། མཐར་ཐུག་སྦྱོར་བ་བརྩམས་མ་ཐག་པའམ་གཞན་གྱིས་ཚེ་ཡང་རུང་གསོད་པ་བོ་བདག་ཉིད་མ་ཤི་བའི་སྔ་རོལ་དུ་ཕ་རོལ་པོ་སྲོག་དང་བྲལ་ན་ཡན་ལག་རྫོགས་པའོ། །མ་བྱིན་པར་ལེན་པ་ནི། གཞི་གཞན་གྱིས་བདག་གིར་བཟུང་བའི་དངོས་པོ་གསེར་ཞོ་ཕྱེད་ཀྱི་རིན་ཐང་ཚང་བ་ཡན་ཆད་དེར་འདུ་ཤེས་པ། ཀུན་སློང་ཆགས་པ། བསམ་པ་བརྐུ་སེམས། སྦྱོར་བ་མཐུའམ་གཡོ་དང་འཇབ་བུས་གནས་ནས་སྤོས་པ། མཐར་ཐུག་ཐོབ་བློ་སྐྱེས་པས་ཡན་ལག་རྫོགས་པའོ། །ལོག་གཡེམ་ནི། གཞི་རང་གི་ཆུང་མ་མ་ཡིན་པའི་བུད་མེད་རུས་བདུན་བརྒྱུད་ལས་མ་འདས་པ་དང་། སྡོམ་པ་དང་ཕ་མ་སོགས་ཀྱིས་བསྲུང་བ་དང་། གཞན་གྱི་གླ་རྔན་མ་སྦྱངས་པ་དང་། ནང་བུ་ཅན་སོགས་ཡུལ་དང་། དུས་མ་ཡིན་པ་ཉིན་མོ་སོགས་དང་། གནས་མ་ཡིན་པ་ཕ་མ་དང་དཀོན་མཆོག་ལ་སོགས་པའི་གནས་དང་། ཡན་ལག་མ་ཡིན་པ་ཁ་དང་གཤང་སྒོ་ལ་སོགས་པ་རྣམས་སོ། །ཀུན་སློང་འདོད་ཆགས། བསམ་པ་འཁྲིག་པར་སེམས་པ། སྦྱོར་བ་བཅུག་རེག་ལ་སོགས་པས་འཁྲིག་པ། མཐར་ཐུག་བདེ་བའི་ཚོར་བ་ཉམས་སུ་མྱོང་བ་སྲེད་པས་བདག་གིར་བྱས་པས་ཡན་ལག་རྫོགས་པའོ། །རྫུན་དུ་སྨྲ་བ་ནི། གཞི་སྨྲ་ཤེས་དོན་གོའི་མི་རང་ལས་གཞན་པ་ལ། བདེན་བཞིའི་དོན་རྟོགས་པ་སོགས་ཡོན་ཏན་གོང་མ་དང་། ལྷ་ཀླུ་ལ་སོགས་པ་མཐོང་ངོ་ཞེས་པ་རྣམས་སོ། །ཀུན་སློང་དུག་གསུམ་གང་རུང་ལས་གཏི་མུག་གཙོ་བོར་གྱུར་པའོ། །བསམ་པ་མངོན་ཤེས་རྫུ་འཕྲུལ་སོགས་མེད་པར་ཤེས་བཞིན་དུ་གཞན་བསླུ་སེམས་ཀྱིས་ཡོད་པར་འདུ་ཤེས་བསྒྱུར་བ། སྦྱོར་བ་ལུས་ངག་གི་རྣམ་རིག་ཏུ་ཐོན་པས་བརྡ་སྤྲོད་པ། མཐར་ཐུག་སྨྲས་པའི་ཡུལ་དེ་ལ་བརྡ་འཕྲོད་པས་ཡན་ལག་རྫོགས་པའོ། །ཆང་འཐུང་བ་ནི། གཞི་ནས་དང་འབྲས་ལ་སོགས་པ་འབྲུ་དང་། མེ་ཏོག་དང་། རྒུན་འབྲུམ་དང་། བུར་སྦྲང་གི་ཁུ་བ་སོགས་ལས་བྱས་པའི་མྱོས་པར་འགྱུར་པ། ཀུན་སློང་སྲེད་པ་ཏེ་ཆགས་པའོ། །བསམ་པ་ནི་བག་མེད་པར་འཐུང་བར་སེམས་པའོ། །སྦྱོར་བ་ནི་ཆང་འཐུང་བ་ལུས་ངག་གི་ལས་སོ། །མཐར་ཐུག་མྱོས་པར་གྱུར་པ་ན་ཡན་ལག་རྫོགས་པའོ། །གཞན་ཡང་རྩ་བ་བཞིར་མ་ལོངས་པ་ལ་ཕྲ་མོ་ཞེས་བཏགས་པ་སྟེ། མིའམ་མིར་ཆགས་པ་མ་ཡིན་པ་དུད་འགྲོ་ལ་སོགས་པ་བསད་པ་དང་། བསད་བྱ་མིའམ་མིར་ཆགས་ཀྱང་བསད་བྱ་མ་ཤི་བའི་གོང་དུ་འགྱོད་པ་སོགས་དང་། མ་བྱིན་ལེན་རིན་ཐང་མ་རྫོགས་པ་དང་། ལོག་གཡེམ་རང་ཉིད་ཀྱིས་སམ་སྤྱད་པར་མི་བཟོད་པའི་ཡུལ་ལས་ཁུ་བ་ཕྱུང་བ་དང་། རྫུན་སྨྲ་ནི་མི་ཆོས་བླ་མ་སྨྲ་བ་མ་ཡིན་པ་རྣམས་སོ། །གཉིས་པ་ཕྱོགས་མཐུན་ནི། མི་དགེ་བ་བཅུ་ལས་གོང་གི་བཞི་པོ་མ་གཏོགས་པའི་ལྷག་མ་དྲུག་སྟེ། ཕྲ་མ་ནི་དབྱེན་ཚིག་སྨྲ་བའོ། །ཚིག་རྩུབ་ནི་གཞན་གྱི་གནད་དུ་ཕོག་པའོ། །བཀྱལ་པ་ནི་བྲེ་མོ་དང་ཀླུ་དང་བསྟན་བཅོས་ངན་པ་སྨྲ་བའོ། །བརྣབ་སེམས་ནི་གཞན་གྱི་རྫས་ལ་ཐོབ་འདོད་བསྐྱེད་པའོ། །གནོད་སེམས་ནི་གཞན་ལ་གསོད་ཅིང་བརྡེག་པར་སེམས་པ་སོགས་སོ། །ལོག་ལྟ་ནི་ལས་འབྲས་མི་བདེན་པར་ལྟ་བའོ། །དྲུག་པོ་འདི་དག་ཀྱང་མི་དགེ་བའི་ལས་ལམ་དུ་རྫོགས་པ་ལ་གཞི་ཀུན་སློང་འདུ་ཤེས་སྦྱོར་བ་མཐར་ཐུག་གི་ཡན་ལག་ལྔ་པོ་རྩ་བ་བཞི་ལ་ཡོད་པ་ལྟར་ཚང་དགོས་ཀྱང་འདིར་ནི་ཡིད་ཀྱི་བསྡམ་བྱ་ཙམ་སྨོས་པའོ། །དེ་དག་ཇི་ལྟར་སྤོང་བ་ལ་བསླབ་པའི་ཚུལ་ནི། དེ་ལྟར་སྤང་བྱ་ལྔ་ཕྱོགས་མཐུན་དང་བཅས་པ་དེ་དག་ཡིད་ཀྱིས་བསྡམ་ཞིང་། ལུས་ངག་གིས་སླར་ལོག་པ་ལ་བསླབ་པ་ཡིན་ཏེ། བླང་དོར་གྱི་གནས་མི་བརྗེད་པའི་དྲན་པ། སྒོ་གསུམ་གྱི་བྱ་བ་ལ་སྐྱོན་ཡོན་རྟོག་པའི་ཤེས་བཞིན། ལུས་ངག་ཡིད་གསུམ་ཆོས་བཞིན་ལྷུར་བྱེད་པའི་བག་ཡོད་དེ། ཆོས་གསུམ་ལ་ནན་ཏན་ལྷུར་བྱེད་པའི་བརྩོན་འགྲུས་དང་ལྡན་པ་ལ་བསླབ་བོ། །གསུམ་པ་ཐབས་ལ་མཁས་པས་ཉེས་མེད་དུ་འགྱུར་པ་ནི། སྙིང་བརྩེ་ལྡན་དང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་གསུངས་པ་ལྟར། རང་དོན་གྱི་འཁྲི་བ་མེད་པའི་གཞན་ལ་ཕན་པར་འདོད་པའི་བྱམས་པ་དང་། སྡུག་བསྔལ་བྲལ་འདོད་ཀྱི་སྙིང་རྗེས་ཀུན་ནས་བསླང་སྟེ། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པའི་བསམ་པ་ཅན་ལ་ཡིད་ཀྱི་གསུམ་མམ་ལོག་ལྟ་མ་གཏོགས་པ། ལུས་ང ག་གི་མི་དགེ་བ་བདུན་པོ་གནང་བ་ཡིན་ཏེ། བསམ་པ་བྱང་ཆུབ་སེམས་དཔའ་ལ། །དགེ་འམ་ཡང་ན་མི་དགེའང་རུང་། །ཐམས་ཅད་བདེ་དགེ་ཉིད་དུ་འགྱུར། །ཞེས་གསུངས་པས། ཀུན་སློང་དགེ་བ་འབའ་ཞིག་ཡིན་ཀྱང་། ལུས་ངག་གི་སྦྱོར་བ་མི་དགེ་བ་ལྟར་སྣང་བས་མི་དགེ་བ་ཞེས་བཏག་པའོ། །འོན་ཀྱང་སྲོག་གཅོད་ཀྱི་ལས་ལམ་རྫོགས་པར་གནང་བ་ནི་ས་ཐོབ་པ་ཡན་གྱི་དབང་དུ་བྱས་པའོ། །གསུམ་པ་ཉམས་ན་ཕྱིར་འཆོས་པའི་ཚུལ་ནི། རྩ་བ་བཞི་ཉམས་ན་དགེ་བསྙེན་ཡན་ཆད་སྡོམ་ལྡན་གྱི་དྲུང་དུ་བསྐྱར་ལ་བླང་དགོས་ཤིང་། ཡན་ལག་མ་ཚང་བ་བྱུང་ན་བཤགས་བྱའི་ཉེས་པ་ཡིན་པས་ཡུལ་སྔ་མ་རྣམས་ཀྱི་མདུན་དུ། ཕྱག་དང་དགོངས་གསོལ་བྱས་ནས། བདག་མིང་འདི་ཞེས་བྱ་བ་ལ་ཇི་ལྟར་ཡོངས་སུ་གྲགས་པའི་ལྟུང་བ་འདི་ལྟ་བུ་བྱུང་བ་དེ་བཤགས་པར་བགྱིའོ། །མི་འཆབ་བོ། །མི་སྦེད་དོ། །ཞེས་ལན་གསུམ་གྱིས་བཤགས་ཤིང་། ཕྱོགས་མཐུན་རྣམས་ནི་ཡིད་ཀྱིས་བསྡམས་པས་ཀྱང་ཆོག་གོ། །བཞི་པ་ཕན་ཡོན་ནི། སའི་སྙིང་པོ་འཁོར་ལོ་བཅུ་པའི་མདོ་ལས། གལ་ཏེ་རང་བཞིན་གྱི་སྡིག་པའི་རྩ་བ་བཞི་པོ་དེ་བསྲུངས་ན། དེ་ནི་ཟག་པ་དང་བཅས་པ་དང་། ཟག་པ་མེད་པའི་དགེ་བའི་ཆོས་ཐམས་ཅད་ཀྱི་རྒྱུའི་མཆོག་དམ་པ་རྣམ་པར་བཞག་པ་ཡིན་ནོ། །དེ་བས་ན་ཆོས་རྣམ་པ་བཞི་བསྲུང་བ་ནི་དགེ་བའི་ཆོས་ཐམས་ཅད་ཀྱི་རྩ་བ་ཞེས་བྱའོ། །འདི་ལྟ་སྟེ། ས་ཆེན་པོ་འདི་ལ་བརྟེན་ནས་རྩི་ཤིང་དང་། མེ་ཏོག་དང་། ཤིང་གེལ་པ་དང་། ནགས་ཚལ་ལ་སོགས་པ་ཐམས་ཅད་སྐྱེའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་འདི་བསྲུངས་པ་ལ་བརྟེན་ནས་དགེ་བའི་ཆོས་ཐམས་ཅད་འཕེལ་ཞིང་སྐྱེ་བར་འགྱུར་རོ། །ཞེས་སོགས་གསུངས་པ་དང་། གཞན་ཡང་། དང་པོར་བསླབ་པའི་གཞི་ལྔ་རྣམས། །གསོ་སྦྱོང་སོགས་དང་ཡང་དག་ལྡན། །མི་དགེ་བཅུ་ནི་ཡོངས་སྤོང་བ། །བྱིན་ནས་དགེ་བསྙེན་ཉིད་དུ་བྱ། །ཞེས་གསུངས་པས། དགེ་བསྙེན་གྱི་བསླབ་པ་ནི། མི་དགེ་བཅུ་སྤོང་གི་སྡོམ་པ་ཡིན་པའི་ཕྱིར། སྡོམ་པ་གོང་མ་ཐམས་ཅད་ཀྱི་གཞིའམ་རྩ་བར་གྱུར་པ་ཡིན་ལ། ཆང་ནི་མྱོས་པར་འཐུང་བ་ལས་བག་མེད་པར་འགྱུར་ཏེ། ཉེས་པ་གཞན་མཐའ་དག་འདྲེན་པའི་ཕྱིར་བཅས་པའི་ཁ་ན་མ་ཐོ་བ་རྣམས་ཀྱི་ནང་ནས་ཆེས་ལྕི་བ་ཡིན་པས་སྡོམ་ལྡན་གྱི་ནད་པས་ཀྱང་རྩ་རྩེའི་ཐིག་པ་ཙམ་ཡང་མི་འཐུང་བར་གསུངས་སོ། །དེ་ལྟར་ཡོངས་རྫོགས་དགེ་བསྙེན་གྱི་བསླབ་བྱ་ཆ་ཙམ་བཤད་པ་འདིས་ནི། སྣ་གཅིག་སྤྱོད་པ་དང་། ཕྱོགས་གཅིག་སྤྱོད་པ་དང་། ཕལ་ཆེར་སྤྱོད་པའི་དགེ་གཉེན་གྱི་བསླབ་བྱའང་ཤེས་པར་འགྱུར་ཞིང་། ཡན་ལག་ལྔ་ལས་ལོག་གཡེམ་གྱི་དོད་དུ་མི་ཚངས་སྤྱོད་སྤོང་བ་ཚངས་སྤྱོད་དགེ་བསྙེན་དང་། བསྙེན་གནས་ཡན་ལག་བརྒྱད་ཇི་སྲིད་འཚོའི་བར་དུ་བསྲུང་བ་གོ་མིའི་དགེ་བསྙེན་དུ་གྲགས་པ་སྟེ་གཞན་དུ་ཤེས་པར་བྱའོ། །སྐྱབས་འགྲོའི་དགེ་བསྙེན་གྱི་བསླབ་བྱ་ནི་ཐམས་ཅད་ཀྱི་ཐུན་མོང་པའོ། །དེ་ལྟར་ཡང་ཆོས་འདུལ་བ་ལས། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ། །ཞེས་གསུངས་པས་སངས་རྒྱས་ཀྱི་བསྟན་པའི་བསླབ་པ་ཐམས་ཅད་ཀྱི་རྩ་བར་གྱུར་པའོ། །དེ་དག་ལས་རྒྱས་པ་ནི་བསླབ་བྱའི་བཤམ་གྱི་ནན་ཏན་ལྷུར་བྱེད་པའི་བརྩོན་འགྲུས་དང་ལྡན་པ་ལ་བསླབ་བོ། །ཞེས་པའི་བར་ཚང་བར་བཤད་ནས་དགེ་བ་བསྔོ་བར་བྱའོ། །འབྲིང་དུ་ན་ཡན་ལག་བཞི་ཆང་དང་བཅས་ལྔ་པོ་སྤོང་དགོས་ཚུལ་མདོར་བསྡུས་ཙམ་ཞིག་བཤད་ནས་བསྔོ་བ་བྱའོ། །ཡོངས་རྫོགས་དགེ་བསྙེན་གྱི་སྡོམ་པ་བྱིན་པའི་ཆོ་གའོ།། ༈ །།སྭ་སྟི། ལྷ་མིའི་སྟོན་པ་ཟས་གཙང་སྲས། །ཐུགས་རྗེའི་བདག་ཉིད་དེར་བཏུད་ནས། །ཡན་ལག་བརྒྱད་པའི་བསྙེན་གནས་ཀྱི། །ཆོ་ག་མདོ་ཙམ་བཤད་པར་བྱ། །འདིར་ཡན་ལག་བརྒྱད་བའི་བསྙེན་གནས་ཀྱི་ཆོ་ག་སྒྲུབ་པ་ལ། ལེན་པའི་ཆོ་ག་སྒྲུབ་པ་ལ། ལེན་པའི་ཆོ་ག །བླངས་པའི་བསླབ་བྱ། འཐད་པ་བཤད་པ་དང་གསུམ་ལས། དང་པོ་སྡོམ་པ་བླང་བའི་ཆོ་ག་ནི། དཀོན་མཆོག་གི་རྟེན་དང་མཆོད་པ་ཅི་འབྱོར་བ་བཤམས་པའི་དྲུང་དུ། སློབ་དཔོན་སྟན་མཐོ་བ་ལ་འདུག །སློབ་མས་མཆིལ་ལྷྭམ་ཕུད། ཡན་ལག་ལྔའི་ཁྲུས་བྱས། རྟེན་དང་བླ་མ་ལ་ཕྱག་བྱས་ནས་ཙོག་པུའམ་པུས་མོ་བཙུགས་ཐལ་མོ་སྦྱར་ཏེ་འཁོད་པ་ལ། སློབ་དཔོན་གྱི་སེམས་བསྐྱེད་གསལ་བཏབ་ནས། དལ་འབྱོར་རྙེད་དཀའ་འཆི་བ་མི་རྟག་པ་ལས་རྒྱུ་འབྲས་འཁོར་བའི་ཉེས་དམིགས་རྣམས་རྒྱས་བསྡུས་ཅི་རིགས་པར་བཤད་ནས་བློ་བཅོས་པའམ། ཁྱོད་བསྙེན་གནས་ཀྱི་སྡོམ་པ་ལེན་པར་འདོད་པ་དེ་ལེགས། ལེགས་པའི་རྒྱུ་མཚན་ཡང་། མགོན་པོ་ཀླུ་སྒྲུབ་ཀྱིས། རྒྱ་མཚོ་ཆེར་གཡེངས་གཉའ་ཤིག་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་དང་། ཚེ་འདི་གནོད་མང་རླུང་གིས་བཏབ་པ་ཡིས། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་རྔུབས་དབུགས་དབྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གསུངས་པ་ལྟར་དལ་འབྱོར་གྱི་མི་ལུས་རིན་པོ་ཆེ་རྙེད་པར་དཀའ་ཞིང་རྙེད་ཀྱང་ཡུན་རིང་དུ་མི་གནས་པར་སྐད་ཅིག་གིས་ཀྱང་འཇིག་པའི་ཆོས་ཅན་འདི་ཉིད་ད་ལྟ་ཅུང་ཟད་ཙམ་གནས་པའི་སྐབས་འདིར་སྙིང་པོ་ལོངས་པ་ཞིག་ཅི་ནས་ཀྱང་བགྱིད་དགོས་ཤིང་། ལེན་ཐབས་ཀྱང་ཚོགས་བསགས་ཤིང་སྒྲིབ་པ་སྦྱང་བ་ལ་རག་ལས་པ་ཡིན་ལ། དེ་ཡང་ཚེགས་ཆུང་ལ་ཕན་ཡོན་ཆེ་བ་བསྙེན་གནས་ཀྱི་སྡོམ་པ་བླངས་ནས་བསྲུང་བ་ཡིན་ཏེ། གནས་འཇོག་གི་མདོ་ལས། གངྒཱ་ལ་སོགས་པའི་ཆུ་ཀླུང་ཆེན་པོ་ལྔ་དང་། རྒྱ་མཚོ་ཆེན་པོའི་ཆུ་བུམ་པའི་གྲངས་ཀྱིས་བཟུང་བར་ནུས་ཀྱིས། བསྙེན་གནས་ཀྱི་ཕན་ཡོན་གྱི་ཚད་བཟུང་བར་མི་ནུས་ཤིང་། འཛམ་བུ་གླིང་གང་བའི་དགྲ་བཅོམ་པ་ལ་རིན་པོ་ཆེ་ལ་སོགས་པའི་ཡོ་བྱད་ཐམས་ཅད་བྱིན་པའི་བསོད་ནམས་ཀྱིས། བསྙེན་གནས་ཀྱི་བསོད་ནམས་ཀྱི་བརྒྱའི་ཆར་ཡང་མི་འགྲོ། སྟོང་གི་ཆར་ཡང་མི་འགྲོ་བར་གསུངས་ཤིང་། འཇིག་རྟེན་གདགས་པ་ལས་ཀྱང་ལྷའི་དབང་པོ་བརྒྱ་བྱིན་གྱིས། ཟླ་བ་ཡར་གྱི་ཚེས་བརྒྱད་དང་། ཆོ་འཕྲུལ་གྱི་ནི་ཟླ་བ་ལ། བསྙེན་གནས་ཡན་ལག་བརྒྱད་བསྲུང་ན། །དེ་ནི་ང་དང་ང་འདྲར་འགྱུར། །ཞེས་སྨྲས་པས། བཅོམ་ལྡན་འདས་ཀྱི་བཀའ་སྩལ་པ། ཀོའུ་ཤི་ཀ་ཁྱོད་དེ་སྐད་མ་ཟེར་ཅིག །ཟླ་བ་ཡར་གྱི་ཚེས་བརྒྱད་དང་། །ཞེས་པ་ནས། དེ་ནི་ང་དང་ང་འདྲར་འགྱུར། །ཞེས་བསྙེན་གནས་ཁོ་ནས་སངས་རྒྱས་ཐོས་པར་གསུངས་པས་བསམ་པ་འདི་བཞིན་དུ་མཛོད། དེ་ཡང་འཁོར་བ་འདི་ན་སེམས་ཅན་ཐམས་ཅད་གནས་གྲོགས་ལོགས་སྤྱོད་བྱ་བ་ཅི་དང་ཅི་བྱེད་པ་ཐམས་ཅད་སྡུག་བསྔལ་གྱི་ཡོ་ལང་དང་སྡུག་བསྔལ་སྒྲུབ་ཐབས་འབའ་ཞིག་པར་ལོངས་སྤྱོད་པར་འདུག་པས་སྙིང་རེ་རྗེ། དེ་རྣམས་སངས་རྒྱས་ཀྱི་ས་ལ་འགོད་བར་བྱ། དེའི་ཆེད་དུ་སངས་རྒྱས་ལ་སྐྱབས་ཞུ། ཆོས་ལ་ལམ་ཞུ། དགེ་འདུན་པ་ལ་ལམ་སྒྲུབ་པའི་གྲོགས་ཞུ་སྙམ་པས་འདིའི་རྗེས་ཟློས་མཛོད། ཅེས་བརྡ་སྦྱར་ལ། བཙུན་པའམ་སློབ་དཔོན་དགོངས་སུ་གསོལ། རྟེན་ལས་ལེན་ན། སྟོན་པ་དགོངས་སུ་གསོལ། ཞེས་སྦྱར། བདག་མིང་འདི་ཞེས་བྱ་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ་ནས། དགེ་འདུན་ལ་སྐྱབས་སུ་མཆིའོ། །ཞེས་པའི་བར་དང་། བདག་དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་ཇི་སྲིད་འཚོའི་བར་དུས་བཟང་གསུམ་ཀ་ལ་གཏན་ལེན་བྱེད་ན། ཇི་སྲིད་འཚོའི་བར་དུ་ཟླ་བ་བྱུང་ངོ་ཅོག་གི་ཚེས་བརྒྱད་དང་། བཅོ་ལྔ་དང་། གནམ་གང་ལ་བསྙེན་གནས་ཡན་ལག་བརྒྱད་པར་ཞེས་སྦྱར། བསྙེན་གནས་ཡན་ལག་བརྒྱད་པར་སློབ་དཔོན་གྱིས་བཟུང་དུ་གསོལ། ཞེས་ལན་གསུམ་བརྗོད་ནས། གསུམ་པའི་ཡན་ལག་བརྒྱད་པར་ཞེས་པའི་ཚིག་རྫོགས་པ་དང་སྡོམ་པ་ཐོབ་ཤེས་བསྐྱེད་ཅིང་། སློབ་དཔོན་གྱིས་ཐབས་ཡིན་ནོ། །སློབ་མས་ལེགས་སོ་ཞེས་བརྗོད། ཡང་སློབ་དཔོན་གྱིས། དེས་ཁྱོད་ཀྱི་རྒྱུད་ལ་བསྙེན་གནས་ཀྱི་སྡོམ་པ་ལེགས་པར་ཐོབ་པ་ཡིན། ཐོབ་པས་མི་ཆོག་བསྲུང་དགོས། དེ་ལ་བསྙེན་གནས་ཀྱི་སྐབས་སུ་བཤད་པའི་བསྲུང་བྱ་བརྒྱད་པོ་འདི་ཡིད་ཀྱི་སྒོ་ནས་སྤང་། ལུས་ངག་གི་སྒོ་ནས་སླར་ལོག་པར་བྱེད། དེ་ཡང་སྔོན་གྱི་འཕགས་པ་དགྲ་བཅོམ་པ་རྣམས་གྱི་རྗེས་སུ་འབྲངས་ནས་བསྲུང་སྙམ་པས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་འཕགས་པ་དགྲ་བཅོམ་པ་དེ་དག་གིས་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་སྔོན་གྱི་འཕགས་པ་དགྲ་བཅོམ་པ་དེ་དག་གིས་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་པ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ། དུས་མ་ཡིན་པའི་ཁ་ཟས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་མ་བྱིན་པར་ལེན་པ་དང་། ཞེས་པ་ནས། སླར་ལོག་པར་བགྱིའོའི་བར་དང་། ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་ནས། རྗེས་སུ་བགྱིད་དོའི་བར་ལན་གཅིག་བརྗོད་ནས། ཐབས་ལེགས་བྱའོ། །གཉིས་པ་ཐོབ་པ་མི་ཉམས་པར་བསྲུང་བ་ནི། བསླབ་བྱ་ཤེས་པ་ལ་རག་ལས་པས། སྐྱབས་འགྲོའི་བསླབ་བྱ་ནི། གཞན་དུ་བརྗོད་པ་བཞིན་བཤད་ནས། བསྙེན་གནས་རང་གི་བསླབ་བྱ་ཡན་ལག་བརྒྱད་དེ། དེ་ཡང་མིའམ་མིར་ཆགས་པའི་སྲོག་མི་བཅད་ཅིང་སྲོག་ཆགས་ཕྲ་མོ་ལའང་མི་འཚེ། གཞན་གྱི་ནོར་རིན་ཐང་ཚང་བར་མ་ཟད་དངོས་པོ་ཕྲ་མོ་ཙམ་ཡང་མ་བྱིན་པར་མི་ལེན། མི་ཚངས་པར་སྤྱོད་པ་ལྟ་ཅི་ཐ་ན་ཆགས་སྲེད་ཀྱི་གཞན་གྱི་ལུས་ལ་རེག་པའང་མི་བྱ། མི་ཆོས་བླ་མའི་རྫུན་དུ་མ་ཟད་རྩེ་མོའི་ཆེད་དུ་ཡང་རྫུན་མི་སྨྲ། མྱོས་བར་འགྱུར་བའི་ཆང་ཐིག་པ་གཅིག་ཡན་ཆད་མི་བཏུང་། གར་སོགས་ཕྲེང་སོགས་སྡོམས་པས་གཅིག་སྟེ་སེམས་རྒོད་ཅིང་ལུས་སྒེག་པས་བརྟུལ་ཞུགས་ཉམས་པའི་ལས་མི་བྱ། ཁྲི་སྟན་ཆེ་མཐོ་མི་བརྟེན། དུས་མ་ཡིན་པ་སྟེ་ཕྱི་དྲོའི་ཁ་ཟས་སྤོང་བ་དང་བརྒྱད་པོ་འདི་བསྲུང་དགོས་ཤིང་། དེར་མ་ཟད་ཇོ་བོ་རྗེའི་ཕྱག་ལེན་ཟས་དཀར་གསུམ་ལ་བརྟེན་ཅིང་ཤ་ཁྲག་གི་དྲི་ཙམ་ཡང་མི་བརྟེན་པ་དང་། དྲན་ཤེས་བཞིན་བག་ཡོད་ཀྱི་སླད་དུ་ཆབ་ལེན་པ་སོགས་ཀྱང་བྱ་བར་གསུངས་སོ། །དེ་ལྟར་སྤང་བྱ་རྣམས་ཚུལ་བཞིན་དུ་མ་བསྲུང་ན་སྡོམ་པ་བླངས་ཀྱང་ཕན་ཡོན་མི་འབྱུང་བར་སྟོན་པའི་བཅས་པ་དང་འགལ་བའི་ཉེས་དམིགས་བསམ་གྱིས་མི་ཁྱབ་སྟེ། ལུང་རྣམ་འབྱེད་ལས། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨིག་ཚལ་བྲེགས་པས་ཨ་མྲའི་ཚལ་ཉམས་བཞིན། །ཞེས་སོགས་གསུངས་པ་དང་། ཚུལ་བཞིན་བསྲུངས་པ་ལ་ཕན་ཡོན་ཤིན་ཏུ་ཆེ་སྟེ། སོ་ཐར་གྱི་མདོ་ལས། འདི་ནི་ཐར་པའི་གྲོང་འཇུག་པའི། །ཐེས་སྐས་གཞི་དང་འདྲ་བར་གནས། །ཞེས་དང་། སྔར་ཡང་བཤད་པ་བཞིན་ཕན་ཡོན་བསམ་གྱིས་མི་ཁྱབ་པར་དང་ལྡན་པར་འགྱུར་ཞིང་། དེ་ཡང་ངོ་ཚ་ཁྲེལ་ཡོད་ཀྱི་བསམ་པ་སྐྱེ་བ་སོགས་དགོས་པ་དུ་མ་དང་ལྡན་པས། ཐོག་མར་སློབ་དཔོན་ལས་བླང་བར་བྱ་ཞིང་། བསྙེན་གནས་ཀྱི་སྡོམ་པ་ནི་ཉིན་ཞག་གི་མཐའ་ཅན་ཡིན་པས། ནང་པར་སྐྱ་རེངས་ཤར་བའི་ཚེ་སྡོམ་པ་གཏོང་བའི་ཕྱིར་སླར་ཡང་ནམ་བསྲུང་བསྲུང་གི་བར་བླ་མ་ལས་ནོད་པའམ། བླ་མ་མ་འབྱོར་ན་རྟེན་གྱི་དྲུང་དུ་གསོ་སྦྱོང་རང་གིས་བླང་བའི་ཆོ་ག་ལ་བརྟེན་ནས་བླངས་ཏེ། དུས་བཟང་རྣམས་ལ་ཅི་ནུས་སུ་བསླབ་པར་གྱིས་ཤིག །ཅེས་བརྗོད་པར་བཀའ་དྲིན་དྲན་པས་ཕྱག་བྱའོ། །གསུམ་པ་འཐད་པ་བཤད་པ་ནི། མཛོད་ལས། བསྙེན་གནས་ཡན་ལག་ཚང་བར་ནི། །དང་པོ་གཞན་ལས་ནོད་པར་བྱ། །ཞེས་གསུངས་པས། ཐོག་མར་རབ་ཏུ་བྱུང་བའམ། ཁྱིམ་པ་གསོ་སྦྱོང་ལ་གནས་པ་ཞིག་ལ་ཇི་སྲིད་འཚོའི་བར་གྱི་ཉ་སྟོང་བརྒྱད་གསུམ་གའི་བསྙེན་གནས་ཀྱི་སྡོམ་པ་དུས་གཅིག་ལ་བླངས་ནས། དེ་ཕྱིན་ཆད་སྡོམ་པ་ལེན་ཡུལ་གྱི་གང་ཟག་མ་རྙེད་ན། རང་ཉིད་ཀྱིས་རྟེན་གྱི་དྲུང་དུ་ལེན་པ་ཡིན་གྱི། སྔར་གང་ཟག་ལས་ལེན་མ་མྱོང་ན་རྟེན་གྱི་དྲུང་དུ་བླངས་ཀྱང་སྡོམ་པ་མི་སྐྱེ། སྔར་ལེན་མྱོང་བ་དག་གིས་ཀྱང་བསྲུང་རྒྱུའི་དུས་ཚེས་གང་ཡིན་དེ་ལ་རང་གིས་རྟེན་གྱི་དྲུང་དུ་བླང་བར་བྱ་ཡིས་མ་བླངས་པར་མི་རུང་ངོ་། །དེ་ཡང་ལེན་ཡུལ་ལས་རང་ཉིད་སྟན་མཐོ་བ་དང་། དབང་པོ་མ་བསྡམས་པ་དང་། མ་གུས་པ་དང་། རྗེས་ཟློས་ཁ་གཅམས་པ་དང་། ཉི་མ་ཤར་བ་དང་། རྒྱན་གསར་དུ་གདགས་པ་རྣམས་ནི་སྡོམ་པ་སྐྱེ་བའི་གེགས་ཡིན་ལ། སང་གི་ཉི་མ་ཤར་བ། དེའི་གོང་དུ་ཤི་བ། ལོག་ལྟ་སྐྱེས་པ། ཕུལ་བ་རྣམས་ནི་སྡོམ་པའི་གཏོང་རྒྱུའོ། །སྐྱེ་བའི་རྒྱུ་ནི་ངེས་འབྱུང་གི་བསམ་པའོ། །གནས་པའི་ཐབས་ནི་དྲན་པ་དང་ཤེས་བཞིན་གྱིས་བསླབ་བྱ་རྣམས་ལེགས་པར་བསྲུང་བར་བྱའོ། །སྡོམ་པ་དེ་ཉིད་ཚེ་གང་དུ་བླངས་ནས་བསྲུང་བ་ནི་སློབ་དཔོན་ཆེན་པོ་ཙནྡྲ་གོ་མི་ལྟར་གོ་མིའི་དགེ་བསྙེན་དུ་འགྱུར་རོ། །དེ་ལྟར་གནས་སྐབས་ལྷ་མི་དང་། །མཐར་ཐུག་འབྲས་བུ་བྱང་ཆུབ་གསུམ། །སྒྲུབ་བྱེད་ཡན་ལག་བརྒྱད་པ་ཡི། །ཆོ་ག་ཉུང་གསལ་འཇུག་བདེར་སྤེལ། །ཁྱིམ་པ་རྗེས་སུ་འཛིན་པ་སོ་སོ་ཐར་པའི་སྡོམ་པའི་ཆོ་ག་ཐར་ལམ་རབ་གསལ་ཞེས་བྱ་བ་འདི་ནི། ཉེ་བར་གནས་པ་ཨོ་རྒྱན་རྣམ་གྲོལ་གྱིས་བསྐུལ་བའི་ངོར་ཤཱཀྱའི་དགེ་བསྙེན་འགྱུར་མེད་རྡོ་རྗེས་ཨོ་རྒྱན་སྨིན་གྲོལ་གླིང་དུ་སྤེལ་བའོ།། །།