རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས། ལོ་ཆེན་དྷརྨ་ཤྲཱི།

རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས་ཞེས་བྱ་བ་བཞུགས་སོ། །རབ་བྱུང་གི་གཞིའི་ཆོ་ག་རིན་ཆེན་ཐེམ་སྐས་ཞེས་བྱ་བ། སྟོན་པ་ཐམས་ཅད་མཁྱེན་པ་ལ་ཕྱག་འཚལ་ལོ། །མཁྱེན་པས་སྲིད་ལས་རྣམ་གྲོལ་ཞིང་། །སྙིང་རྗེས་གདུལ་བྱ་འདུལ་བའི་ཐབས། །སྟོན་མཛད་ཐུབ་དབང་ལྷ་ཡི་ལྷ། །ཀུན་མཁྱེན་འགྲོ་བའི་བླ་མར་འདུད། །འབུམ་ཕྲག་འདུལ་གཞུང་འོད་བརྒྱ་བས། །འཁོར་བའི་རྨོངས་མུན་བསལ་མཛད་པ། །ཡོད་ཏན་འོད་མངའ་ཞི་བ་འཚོ། །དགོངས་པ་རབ་ཏུ་གསལ་དེས་སྐྱོངས། །ངེས་འབྱུང་ཚུལ་ཁྲིམས་མ་སྨད་པའི། །རིན་ཆེན་ཐེམ་སྐས་ལ་འཛེགས་ནས། །རྣམ་གྲོལ་ཁང་བཟང་ཉམས་དགའ་བར། །འཁྲིད་ཐབས་ལས་ཀྱི་ཆོ་ག་བཤད། །འདི་ལ་གཉིས་ཏེ། ཚིགས་སྔ་མ་དགེ་ཚུལ་དུ་སྒྲུབ་པའི་དང་། ཕྱི་མ་བསྙེན་རྫོགས་སུ་སྒྲུབ་པའི་ཆོ་གའོ། །དང་པོ་ནི། ཐོག་མར་སྟོན་པའི་སྐུ་གཟུགས་ཀྱི་སྤྱན་སྔར་མཆོད་བཤམ། ཆོས་གོས་གཉིས། ལྷུང་བཟེད། གདིང་བ། ཆུ་ཚགས་སོགས་སྟ་གོན་བྱས་ནས། བསྒྲུབ་བྱ་དེ་མདུན་དུ་ཙོག་ཙོག་པོར་འདུག་ཏུ་བཅུག་པ་ལ། མཁན་པོ་ཉིད་དུ་ཕྱོགས་པའི་དགེ་སློང་དེས་བར་ཆད་དྲི་སྟེ། ཁྱོད་སྔོན་གྱི་དགེ་བ་དང་སྨོན་ལམ་གྱི་དབང་གིས་མཐོ་རིས་ཀྱི་རྟེན་ཕུན་སུམ་ཚོགས་པ་ཐོབ་པ་དོན་ཡོད་པར་བྱ་བའི་ཆེད་དུ་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་བྱེད་པ་ནི་ཤིན་ཏུ་སྐལ་བ་བཟང་པོ་ཡིན། དེ་ལ་བསྟན་པའི་སྙིང་པོ་ཚུལ་ཁྲིམས་ཀྱི་བསླབ་པ་འདི་བར་ཆད་དང་མི་ལྡན་པའི་གང་ཟག་རྒྱུད་དག་བ་ཞིག་ལ་སྦྱིན་དགོས། བར་ཆད་ཡོད་མེད་ཁོ་བོས་དྲིས་པ་ལས་རྟོགས་པས་དྲི་བ་འདི་རྣམས་ལ་ལན་དྲང་པོར་ཐོབ་ཅིག །ཁྱོད་མུ་སྟེགས་ཅན་མ་ཡིན་ནམ། ལོ་བཅོ་ལྔ་མ་ལོན་པ་མ་ཡིན་ནམ། ལོ་བཅོ་ལྔ་ལོན་པ་བྱ་རོག་སྐྲོད་མི་ནུས་པ་མ་ཡིན་ནམ། བྱ་རོག་སྐྲོད་ནུས་པ་ལོ་བདུན་མ་ལོན་པ༴ བྲན་ལ་སོགས་པ་མ༴ བུ་ལོན་ཆགས་པ་མ༴ ཕ་མས་མ་གནང་བ་མ༴ ཕ་མས་མ་གནང་བ་ཡུལ་ཐག་མི་རིང་བ་མ༴ ནད་པ་མ༴ དགེ་སློང་མ་སུན་ཕྱུང་བ་མ༴ རྐུ་ཐབས་སུ་གནས་པ་མ༴ ཐ་དད་དུ་གནས་པ་མ༴ གནས་པར་མི་བྱ་བ་མ༴ ཟ་མ་མ༴ མ་ནིང་མ༴ སྤྲུལ་པ་མ༴ དུད་འགྲོ་མ༴ མུ་སྟེགས་ཅན་ཞུགས་པ་མ༴ མ་བསད་པ་མ༴ ཕ་བསད་པ་མ༴ དགྲ་བཅོམ་པ་བསད་པ་མ༴ དགེ་འདུན་གྱི་དབྱེན་བྱས་པ་མ༴ དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ༴ ཕ མ་པར་གྱུར་པའི་ལྟུང་བ་བཞི་པོ་དག་ལས་གང་ཡང་རུང་བ་བྱུང་བ་མ༴ རྒྱུ་ལས་ཟློག་པའི་ཆད་པ་ཁས་མི་ལེན་པ་གནས་ནས་ཕྱུང་བ་མ༴ ལག་རྡུམ་ལ་སོགས་པ་མ༴ སྐྲ་སེར་ལ་སོགས་པ་མ༴ སེན་མོ་གཅིག་པ་ལ་སོག་པ་མ༴ རྒྱལ་པོས་བཀྲབས་པ་ལ་སོགས་པ༴ རྒྱལ་པོས་མ་གནང་བ་མ༴ རྒྱལ་པོས་མ་གནང་བ་ཡུལ་ཐག་མི་རིང་བ་མ༴ ཆོམ་རྐུན་པར་གྲགས་པ་མ༴ ཕུང་ཀྲོལ་བ་མ༴ ལྷྭམ་མཁན༴ གདོལ་པ་མ༴ གཡུང་པོ་མ༴ མི་མ་ཡིན་པའི་འགྲོ་བ་མིར་བརྫུ་བ་མ༴ བྱང་གི་སྒྲ་མི་སྙན་པ་མ༴ མཚན་ལན་གསུམ་དུ་འགྱུར་པ་མ༴ སྐྱེས་པ་འདྲ་བའི་བུད་མེད་མ༴ སྡིག་སྡིག་ལྟ་བུའི་མཚན་ཉིད་ཅན་མ༴ གླིང་གཞན་ནས་སྐྱེས་པའི་ཚུལ་བྱད་མི་འདྲ་བ་མ་ཡིན་ནམ། ཞེས་དྲིས་པས། མ་ཡིན་ལགས། ཟེར་ན། འོ་ན་ཁོ་བོས་ཁྱོད་རབ་ཏུ་དབྱུང་བར་བྱའོ། །ཞེས་སྐབས་དབྱེའོ། །དེ་ནས་སྒྲུབ་བྱེད་སྟོན་པ་དང་རང་ལ་ཕྱག་གསུམ་གསུམ་འཚལ་དུ་བཅུག་ག ནས། མདུན་དུ་ཙོག་ཙོག་པོར་འདུག་ཅིང་ཐལ་མོ་སྙིང་ཁར་སྦྱར་དུ་བཅུག་སྟེ། ཁྱོད་རབ་ཏུ་འབྱུང་བར་བྱེད་པ་ལ་འགལ་རྐྱེན་བར་ཆད་དང་བྲལ་བ་གཅིག་བུས་མི་ཆོག་གི། མཐུན་རྐྱེན་ཆོ་ག་རྣམ་པར་དག་པ་ལ་བརྟེན་དགོས་ཤིང་། དེ་ཡང་སངས་རྒྱས་ཀྱི་བསྟན་པ་ལ་རིམ་གྱིས་བསླབ་པའི་དོན་དུ་ཐོག་མར་དགེ་བསྙེན་གྱི་སྡོམ་པ་བླང་དགོས་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས་འཁོར་བ་སྤངས་ཏེ་རྣམ་གྲོལ་གཏན་གྱི་བདེ་བ་སྒྲུབ། དེའི་ཆེད་དུ་དཀོན་མཆོག་གསུམ་སྐྱབས་གནས་སུ་བཟུང་ནས་ཡོངས་རྫོགས་དགེ་བསྙེན་གྱི་སྡོམ་པ་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པ་གྱིས་ལ་རྗེས་ཟློས་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་བཟུང་དུ་གསོལ། ཞེས་ལན་གཉིས་བཟླས། ལན་གསུམ་པ་འདི་ལ་སྐྱབས་བརྗོད་དང་བདག་བརྗོད་གཉིས་རྫོགས་པ་དགེ་བསྙེན་དུ་ཞེས་པའི་སྐབས་སུ་ཁོ་བོས་སེ་གོལ་གྱི་བརྡ་བྱས་པ་དང་མཉམ་དུ་སྡོམ་པ་སྐྱེ་བ་ཡིན་པས། དུས་དེར་སྡོམ་པ་ཐོབ་སྙམ་པ་དང་། དེ་ནས་ངེད་ལའང་སློབ་དཔོན་ཞེས་བརྗོད་དགོས་པས་དེ་ཡིད་ལ་ཞོག་ལ་རྗེས་ཟློས་གྱིས། ཞེས་དང་། མཇུག་ཏུ་སློབ་དཔོན་གྱིས། ཐབས་ཡིན་ནོ། །ཞེས་པའ ི་ལན་དུ་སློབ་མས། ལེགས་སོ། །ཞེས་བརྗོད། དེས་ཁྱོད་ཀྱིས་དགེ་བསྙེན་གྱི་སྡོམ་པ་ཐོབ་པ་ཡིན་པས། དེའི་བསླབ་པའི་གཞི་ལྔ་པོ་འཕགས་བ་དགྲ་བཅོམ་པ་རྣམས་ཀྱིས་ཇི་ལྟར་བསྲུངས་པ་བཞིན་དུ་བདག་གིས་ཀྱང་བསྲུང་སྙམ་པས་རྗེས་ཟློས་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོའི་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྗུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་གནས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པར་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གཅིག་གི་མཐར་སྔར་བཞིན་ཐབས་ལེགས་བྱའོ། ༈ །དེ་ལྟར་མཁན་པོར་ཕྱོགས་པས་བར་ཆད་དྲིས་ནས་བསྒྲུབ་བྱ་རྒྱུད་དག་པར་གྲུབ་པ་དེ་རང་གིས་དགེ་བསྙེན་དུ་བསྒྲུབས་པའི་རྗེས་དེ་ནས་ཞུ་བ་བྱེད་བའི་དགེ་སློང་ཆོས་བཅུ་ལྡན་ཞིག་ལ། དགེ་སློང་དགེ་བའི་བཤེས་གཉེན་ཆེ་གེ་མོས། ཚེ་དང་ལྡན་པ་འདི་དགེ་འདུན་ལ་རབ་ཏུ་འབྱུང་བའི་ཞུ་བ་མཛོད་ཅིག །ཅེས་གཏད། དགེ་སློང་དེས། ཅི་ཚེ་དང་ལྡན་པ་འདིའི་བར་ཆད་ཀྱི་ཆོས་རྣམས་ཡོངས་སུ་དག་གམ། ཞེས་དྲིས་པ་ལ། མཁན་པོར་ཕྱོགས་པས། ཡོངས་སུ་དག་གོ་ཞེས་ཁོ་ན་ཉིད་མཆི་ཡིན་གདའི། ཞེས་ལན་གདབ། དེ་ནས་བསྐོས་པ་དེ་བསྒྲུབ་བྱེད་ཁྲིད་ནས་གནས་ཁང་སོ་སོར་འཁོད་པའི་དགེ་འདུན་ལ་ཞུས་ཀྱང་རུང་མོད། །དེང་སང་དགེ་འདུན་ཐམས་ཅད་གནས་ཁང་གཅིག་ཏུ་འདུས་པ་ལ་ཞུ་བ་ཉིད་ཕྱག་ལེན་དུ་མཛད་པས། བསྒྲུབ་བྱ་དེ་མཁན་པོ་མ་གཏོགས་དགེ་སློང་རྒན་རིམ་ནས་ཕྱག་གསུམ་གསུམ་འཚལ་དུ་བཅུག་ལ། གོས་དཀར་པོ་དང་ལྡན་པས་ཙོག་ཙོག་པོར་འདུག་ཅིང་ཐལ་མོ་སྦྱོར་དུ་བཅུག་སྟེ། རང་རྒན་པའི་མཐར་ལོགས་སུ་འགྲེངས་ཏེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། ཁྱིམ་པ་གོས་དཀར་པོ་ཅན་སྐྲ་དང་ཁ་སྤུ་མ་བྲེགས་པ་ལས། ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་ཏེ། མིང་འདི་ཞེས་བགྱི་བ་འདི་རབ་ཏུ་འབྱུང་བར་འཚལ་ཞིང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་སྟེ། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ནས། ཅི་དེ་རབ་ཏུ་དབྱུང་ངམ། ཞེས་པའི་ལན་དུ་དགེ་འདུན་རྣམས་ཀྱིས། གལ་ཏེ་ཡོངས་སུ་དག་ནའོ། །ཞེས་བརྗོད། དེ་ཡང་འདིར་བསྒྲུབ་བྱ་གཅིག་གི་དབང་དུ་བྱས་པ་སྟེ། གཉིས་ཡོད་ན། སྔར་འདི་ཞེས་ལ་འདི་དག །དེ་ཡང་ལ་དེ་དག་ཀྱང་། ཅི་དེ་ལ་ཅི་དེ་དག །ཁོ་ན་ཉིད་ལ་ཁོང་དག་ཉིད། ཅེས་དང་། གསུམ་ཡོད་ན། དག་ཞེས་པའི་གནས་སུ་རྣམས་ཞེས་བསྒྱུར་ཞིང་། མིང་འདི་ཞེས་བགྱི་བ་ལས་ཞེས་བདེ། རང་གི་མཁན་པོ་ཡིན་ན། དོན་གྱི་སླད་དུ་མཚན་ནས་སྨོས་ན་མཁན་པོ་མིང་འདི་ཞེས་བགྱི་བ་ཞེས་དང་། སློབ་དཔོན་ཡིན་ན། སློབ་དཔོན། རང་གི་མཁན་སློབ་མིན་ན། གནས་བརྟན་ནམ། དགེ་བའི་བཤེས་གཉེན་ཞེས་ཉེ་ཚིག་གིས་བརྗོད་པ་སོགས་རྣམ་དབྱེ་དང་ཚིག་ཕྲད་སྐབས་ཐོབ་ཀྱིས་བསྒྱུར་ཚུལ་གོང་འོག་ཐམས་ཅད་དུ་འཁྱེར་ཤེས་པར་བྱའོ། ༈ །དེ་ནས་མཁན་པོར་ཕྱོགས་པས་བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་རབ་ཏུ་བྱུང་བ་བྱེད་པ་དེ་རང་ཞུགས་སུ་བྱས་པས་མི་ཡོང་བས་བྱེད་པ་པོར་གྱུར་པའི་མཁན་པོ་ཞིག་དགོས། དེའི་རྒྱུ་མཚན་སྔོན་སྟོན་པ་རྫོགས་སངས་རྒྱས་ནས་རིང་པོ་མ་ལོན་པའི་དུས་ཀྱི་གདུལ་བྱ་རྣམས་ནི་རང་བཞིན་གྱིས་དབང་པོ་དུལ་ཞིང་བག་དང་ལྡན་ལ། ན་ཚ་སོགས་ཀྱང་འབྱུང་དཀོན་པས་འཁྲིད་ཅིང་སྐྱོང་བར་བྱེད་པ་ལ་མི་ལྟོས་པའི་ཕྱིར་མཁན་སློབ་མེད་པར་རྫོགས་པ་ཡིན་གྱི། དུས་ཕྱིས་ཀྱི་གང་ཟག་རྣམས་དེ་ལྟ་བུ་མ་ཡིན་པས་ད་ལྟར་གྱི་ཆོ་གས་རབ་ཏུ་འབྱུང་བའི་མཐུན་རྐྱེན་གྱི་གཙོ་བོ་མཁན་པོ་ཡིན། མཁན་པོའི་དོན་ཡང་། ཨུ་པ་ཉེ་བ། དྷ་ར་འཛིན་པ། སནྡྷི་སྦྱོར་བ། བི་ཀཱ་ར་ཎ་ལུང་འབོགས་པ་སྟེ། བརྩེ་བས་འཁོར་བར་ལྟུང་བ་ལས་ཉེ་བར་འཛིན་ལ། བསླབ་པ་རིན་པོ་ཆེ་ལ་ཉེ་བར་སྦྱོར་བའི་རྐྱེན་སྒྲུབ་ཅིང་། འཇུག་ལྡོག་གི་བསླབ་བྱ་རྣམས་ཉེ་བར་ལུང་འབོགས་པར་བྱེད་པ་ཞིག་ཡིན། དེ་ཡང་བཙུན་པ་བརྟན་པའི་ཡོན་ཏན་དང་། མཁས་ཤིང་ཕན་ཐོགས་པའི་ཡོན་ཏན་ཏེ། བརྟན་མཁས་ཀྱི་ཡོན་ཏན་གཉིས་དང་ལྡན་པ་ཞིག་དགོས་པ་ཁོ་བོས་འགྲུབ་རུང་དུ་ཡོད་པས། སྔར་དགེ་བསྙེན་གྱི་སློབ་དཔོན་ལ་ད་རབ་བྱུང་གི་མཁན་པོ་ཞུ་སྙམ་པ་གྱིས་ལ་འདིའི་རྗེས་ཟློས་གྱིས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱི། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་རབ་ཏུ་དབྱུང་བར་བགྱིའོ། །ཞེས་ལན་གསུམ་བཟླས་པའི་གསུམ་པ། མཁན་པོ་མཁན་པོས་ཞེས་བསྒྱུར་ཞིང་། ཐབས་ལེགས་བྱའོ། ༈ །དེ་ནས་མཁན་པོས་གྲོགས་དན་ལ། དགེ་སློང་འདི་ཞེས་བྱ་བས་ཚེ་དང་ལྡན་པ་འདིའི་སྐྲ་དང་ཁ་སྤུ་ཞེས་སམ། བྲེགས་ཚར་ན་གཙུག་ཕུད་འབྲེག་པར་མཛོད་ཅིག །ཅེས་བཅོལ། དེས་ཀྱང་སྐྲ་དང་ཁ་སྤུ་འབྲེག་དགོས་ན་གཙུག་ཕུད་མ་གཏོགས་པ་བྲེགས་ནས། དེའི་འོག་ཏུ་ཅི་གཙུག་ཕུད་འབྲེག་པར་སྤྲོའམ་ཞེས་དྲི། སྤྲོ་ལགས་ཟེར་ན་བྲེགས་ཏེ་ཁྲུས་བྱེད་དུ་བཅུག་ལ། མཁན་པོའི་ཞབས་ལ་གཏུགས་པའི་ཕྱག་བྱས་ཏེ། མདུན་དུ་ཙོག་ཙོག་པོར་འདུག་པ་ལ་མཁན་པོས་བླ་གོས་གཏད་དེ་གཉིས་ཀས་བཟུང་ནས། འདི་སྟོད་དུ་རྒྱུན་དུ་གྱོན་པར་བྱེད་པའི་ཆོས་གོས་བླ་གོས་ཞེས་བྱ་བ། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོ། ཚ་གྲང་གི་རེག་པ་ལས་སྐྱོབ་པའི་གོས་སུ་གནང་བས། སྟོན་པ་སངས་རྒྱས་ཀྱིས་ཇི་ལྟར་བསྣམས་པ་བཞིན་དུ་གྱོན་ནས་སེམས་ཞི་དུལ་དང་ལྡན་པར་གྱིས་ཤིག །མཐང་གོས་གཏད་དེ། འདི་སྨད་ཀྱི་ནང་དུ་གྱོན་པར་བྱེད་པའི་ཆོས་གོས་མཐང་གོས་ཞེས་བྱ་བ། སྨད་གཅེར་བ་དང་། ཚ་གྲང་གི་རེག་པ་ལས་སྐྱོབ། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོ་བའི་གོས་སུ་གནང་བས། སྟོན་པ་སངས་རྒྱས་ཀྱིས་སོགས་སྔར་ལྟར། ལྷུང་བཟེད་གཏད་དེ། འདི་ལྷུང་བཟེད་ཅེས་བྱ་བ་ཁྱིམ་པ་དང་མུ་སྟེགས་བྱེད་སོགས་ལས་སྣོད་སྤྱད་ཀྱི་རྟགས་ཁྱད་པར་དུ་གྱུར། འདི་ཟས་ཀྱི་འགེངས་པ་བཞིན་དུ་རང་གི་ཤེས་རྒྱུད་ཡོན་ཏན་གྱིས་འགེང་། འདིའི་ནང་ནས་ཟས་ལ་ལོངས་སྤྱོད་པ་བཞིན་དུ་ཆོས་ལ་སྤྱོད་པའི་བརྡར། བསོད་སྙོམས་ཀྱི་ཟས་ལྷུང་བ་བཟེད་པའི་དོན་དུ་གནང་བས། འཆང་བར་གྱིས་ཤིག །གདིང་བ་གཏད་དེ། འདི་ཆོས་གོས་གདིང་བ་ཞེས་བྱ་བ། དགེ་འདུན་གྱི་རྩྭའི་གདན་མ་གཏོགས་པའི་གནས་མལ་དང་། ཁྱིམ་པའི་དཀར་པོ། གང་ཟག་གི་ཁྲ་བོ་ཕལ་ཆེར་མ་ཉམས་པ་ལ་སྤྱོད་པ་ན། འདིས་སྐྱོབས་ཏེ་ཆུད་མ་ཟོས་པར་སྤྱོད་དགོས་པས། དེའི་ཆེད་དུ་འཆང་བར་གྱིས་ཤིག །ཆུ་ཚགས་གཏད་དེ། འདི་ཆུ་ཚགས་ཞེས་བྱ་བ་ཡིན་ཏེ། རབ་ཏུ་འབྱུང་བ་རྣམས་ནི་སེམས་ཅན་ལ་གནོད་པ་གཞི་དང་བཅས་པ་ལས་ལྡོག་དགོས་པས། སྤྱི་སེམས་ཅན་ཐམས་ཅད་ལ་གནོད་པ་སྤང་དགོས་ཤིང་། ཁྱད་པར་ཆུ་ལ་ལོངས་སྤྱོད་པའི་ཚེ་འདིས་སྲོག་ཆགས་རྣམས་རང་གི་གནས་སུ་དོར་ནས་ཆུ་གཙང་མ་ལ་ལོངས་སྤྱོད་པའི་ཆེད་དུ་གནང་བ་ཡིན་པས་འཆང་བར་གྱིས་ཤིག །ཅེས་སྦྱིན། འདིར་མདོ་རྩར་གོས་ངུར་སྨྲིག་སྟེར་བ་ཙམ་ལས་མ་གསུངས་ཀྱང་། ལུང་དང་ཀརྨ་ཤ་ཏཾ་ལས་ལྷུང་བཟེད་སྦྱིན་པར་གསུངས་ཤིང་། གདིང་བ་ཆུ་ཚགས་གཉིས་སྟེར་དགོས་པའི་གསལ་ཁ་མེད་ཀྱང་སྟེར་བ་ཕྱག་ལེན་ནོ། །དེ་ལྟར་གོས་སྦྱིན་ནས་མཁན་པོ་རང་ཉིད་ཀྱིས་བསྐོན་ཞིང་། ཞར་ལ་མཚན་མ་ཚོར་བར་བརྟག །གཞན་ལ་འཆོལ་ན། དགེ་སློང་ཆེ་གེ་མོས། འདིའི་གོས་ཚགས་སློབ་པ་དང་བདག་གི་བྱ་བ་ཡང་སྒྲུབས་མཛོད་ཅིག །ཅེས་བསྒོ། དེས་ཀྱང་གོན་ལུགས་བསླབ་ཅིང་མཚན་བརྟགས་པས་སྐྱོན་མེད་ན། བར་ཆད་དང་མི་ལྡན་པར་གདའ་ཞེས་བརྡ་སྤྲད། གོས་བསྐོན་པའ ི་ཚེ་གཞུང་ནས་མ་བཤད་ཀྱང་ཕྱག་ལེན་ལ། ཀུན་གྱིས་མེ་ཏོག་འཐོར་བ་དང་བཅས། ཐར་པའི་རྒྱལ་མཚན་བརྟན་པར་གྱུར་ཅིག །ཚངས་པར་སྤྱོད་པ་ཚེ་མཐར་ཕྱིན་པར་གྱུར་ཅིག །ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་གྱུར་ཅིག །ཚེ་རབས་ཐམས་ཅད་དུ་རབ་ཏུ་འབྱུང་བ་ཐོབ་པར་གྱུར་ཅིག །ཅེས་སྨོན་ལམ་གདབ་བོ། ༈ །དེ་ནས་བསྒྲུབ་བྱ་དེ་སྟོན་པ་དང་མཁན་པོ་ལ་ཕྱག་གསུམ་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་འདུག་ཅིང་ཐལ་མོ་སྙིང་གར་སྦྱོར་དུ་བཅུག་སྟེ། ཁྱོད་རབ་ཏུ་འབྱུང་བར་འདོད་པ་དེ་ལེགས། ལེགས་པའི་རྒྱུ་མཚན། དགའ་བོ་རབ་ཏུ་བྱུང་བའི་མདོ་ལས། ཁྱིམ་པ་རྣམས་ནི་མེའི་འོབས་ན་གནས་པ་ལྟ་བུའོ། །རབ་ཏུ་བྱུང་བ་རྣམས་ནི་བསིལ་ཁང་ན་གནས་པ་ལྟ་བུའོ། །ཞེས་སོགས་གསུངས་ཤིང་། ཆོ་འཕྲུལ་ཆེན་པོ་བསྟན་པའི་མདོ་ལས་ཀྱང་། སྨད་པར་བྱ་བའི་ཁྱིམ་ལ་བརྟེན་པ་དེ། །བླ་མེད་བྱང་ཆུབ་དམ་པ་གཞར་མི་ཐོབ། །ཅེས་དང་། ཁྱིམ་གྱིས་སྐྲག་སྟེ་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །ཞེས་གསུངས་པ་ལྟར་ཁྱིམ་པ་རྣམས་ནི་འདོད་ཡོན་གྱིས་བཅིངས་པས་བྱང་ཆུབ་ཐོབ་དཀའ་ཞིང་། རབ་ཏུ་བྱུང་བ་རྣམས་ནི་འདོད་ཡོན་ལ་རང་གི་ངང་གིས་ཆགས་པ་དང་བྲལ་བར་བྱེད་ནུས་པའི་དབང་གིས་བྱང་ཆུབ་དམ་པ་རྙེད་སླ་བ་ཡིན་པས། དུས་གསུམ་གྱི་སངས་རྒྱས་ཐམས་ཅད་ཀྱང་རབ་ཏུ་བྱུང་བའི་རྟེན་ལས་སངས་རྒྱས་ཤིང་རྒྱ་བར་འགྱུར་ལ། རྒྱུ་མཚན་དེས་རབ་ཏུ་བྱུང་བ་ནི་དོན་ཆེ་ཞིང་བསོད་ནམས་ཆེ་སྟེ། དགའ་བོ་རབ་ཏུ་བྱུང་བའི་མདོ་ལས། སྟོང་གསུམ་གྱི་སེམས་ཅན་ཐམས་ཅད་ཀྱིས་བསྐལ་པའི་བར་དུ་བུ་དང་ཆུང་མ་སྦྱིན་པར་བཏང་བའི་བསོད་ནམས་བས་རབ་ཏུ་འབྱུང་བའི་བསམ་པས་དགོན་པར་གོམ་པ་གཅིག་བོར་བ་བསོད་ནམས་ཆེ། ཞེས་སོགས་གསུངས་པས། བསོད་ནམས་ཅན་གྱི་རབ་བྱུང་དུ་སྒྲུབ་པའི་སྐབས་འདིར་བརྗེ་བ་རྣམ་པ་གསུམ་བྱ་སྟེ། རྟགས་བརྗེ་བ། མིང་བརྗེ་བ། བསམ་པ་བརྗེ་བའོ། །རྟགས་བརྗེ་བ་ནི། ཁྱིམ་པའི་རྟགས་ཆ་ལུགས་རྣམས་སྤངས་ཤིང་། ལུས་ཀྱི་བྱི་བྱང་དང་། གོས་དང་། སྣོད་སྤྱད་ཀྱི་རྟགས་གསུམ་གྱི་སྒོ་ནས་རབ་ཏུ་བྱུང་བའི་རྟགས་ཆ་ལུགས་སུ་བསྒྲུབ་པ་ཞིག་དགོས་དེ་ཚང་། མིང་བརྗེ་བ་ནི། སྔོན་གྱི་མཁན་པོའི་མིང་གི་མཐའ་ཅན། དཔལ་དང་། འོད་དང་། གྲགས་པ་དང་། བཟང་པོ་སྟེ་བཞི་འམ། ད་ལྟར་གྱི་མཁན་པོའི་མིང་གི་མཐའ་ཅན་གང་རུང་དུ་སྤོ་དགོས་པས། ཁྱོད་ཀྱི་མིང་འདི་ཞེས་བྱ་བ་གྱིས་ཤིག །རྟགས་དང་མིང་བརྗེས་པའི་དགོས་པ་ཡང་བསམ་པ་བརྗེ་བ་ཡིན་པས། སྔར་ཕན་ཆད་ཚེ་འདིའི་བདེ་འབྱོར་སྙན་གྲགས་སོགས་བསྒྲུབ་བྱར་བྱེད་པ་དེ་སྤངས་ནས། ད་ཕྱིན་ཆད་སྐྱེ་བ་ཕྱི་མ་ཕན་ཆད་ཀྱི་དོན་སྒྲུབ་པ་གལ་ཆེ་སྟེ། དེའི་རྒྱུ་མཚན་འཁོར་བ་འདིར་ལྷ་མིའི་ལུས་ཐོབ་ཀྱང་སྡུག་བསྔལ་ལས་མ་འདས་པས་འཁོར་བ་རྒྱུ་དང་བཅས་པ་སྤངས་ཏེ། རྣམ་གྲོལ་གཏན་གྱི་བདེ་བ་སྒྲུབ། དེ་ཡང་རང་གཅིག་པུའི་དོན་དུ་མ་ཡིན། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཐབས་སུ་འོ་སྐོལ་གྱི་སྟོན་པས་རྒྱལ་སྲིད་ཀྱི་འབྱོར་པའང་མཆིལ་མའི་ཐལ་བ་ལྟར་བོར་ནས་རབ་ཏུ་བྱུང་བ་བཞིན་དུ་བདག་ཀྱང་དེའི་རྣམ་ཐར་གྱི་རྗེས་སུ་ཞུགས་ཏེ་རབ་ཏུ་འབྱུང་བ་ཡིན་པས། འཁོར་པ་ལས་སྐྱོབ་པའི་སྐྱབས་དཀོན་མཆོག་གསུམ་ལ་སྐྱབས་སུ་འགྲོ་བའི་སྒོ་ནས་རབ་ཏུ་བྱུང་བའི་རྟགས་ཆ་ལུགས་ཡང་དག་པར་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པས་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི༴ ཆོས་ལ༴ ཚོགས་རྣམས་ཀྱི༴ དགེ་འདུན༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ། ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་འབྱུང་སྟེ། ཁྱིམ་པའི་རྟགས་སྤོང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །ཞེས་ལན་གསུམ་བཟླས་པའི་མཐར་ཐབས་ལེགས་བྱའོ། །རབ་བྱུང་འདི་བར་མ་དགེ་བ་ཙམ་ལས་སྡོམ་པ་དངོས་མ་ཡིན་པས་སྐྱེ་བའི་བར་ཆད་ཅན་ལའང་སྐྱེ་ཞིང་། དགེ་བསྙེན་དང་དགེ་ཚུལ་གྱི་སྡོམ་པ་སོགས་མི་ལེན་པར་འདི་རྐྱང་པ་བྱིན་ཀྱང་སྐྱེ་བར་བཤད་དོ། །དེ་ནས་མཁན་པོས་དགེ་སློང་དགེ་ཚུལ་གྱི་ཆོ་ག་ལ་མཁས་པ་སོགས་ཆོས་བཅུ་ལྡན་ཞིག་ལ། དགེ་སློང་ཆེ་གེ་མོས་ཚེ་དང་ལྡན་པ་འདི་དགེ་ཚུལ་ཉིད་དུ་ཉེ་བར་སྒྲུབས་ཤིག །ཅེས་གཏད། དེས་ཅི་ཚེ་དང་ལྡན་པ་འདིའི་བར་ཆད་ཀྱི་ཆོས་རྣམས་ཡོངས་སུ་དག་གམ། ཞེས་དྲིས་པ་ལ། མཁན་པོས། ཡོངས་སུ་དག་གོ་ཞེས་ཁོ་ན་ཉིད་མཆི་ཡིན་གདའ། ཞེས་ལན་གདབ། དེ་ནས་སློབ་དཔོན་གྱིས་བསྒྲུབ་བྱ་དེ་སྟོན་པ་དང་རང་ལ་ཕྱག་གསུམ་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་དགེ་ཚུལ་དུ་སྒྲུབ་པར་བྱེད་པ་ལ། ཆོ་ག་སྦྱོར་བ་དང་། དངོས་གཞི་དང་། མཇུག་གསུམ་ལས། དེ་ཡན་ཆད་ཀྱིས་སྦྱོར་བའི་ཆོས་རྣམས་སོང་ནས། དངོས་གཞིའི་སྐབས་ཡིན། དེ་ཡང་འགལ་རྐྱེན་མེད་ཅིང་མཐུན་རྐྱེན་ཚང་བ་ལས་སྐྱེ་བས་ན། འགལ་རྐྱེན་སྡོམ་པ་སྐྱེ་བ་དང་། གནས་པ་དང་། ཁྱད་པར་དུ་འགྱུར་བ་དང་། མཛེས་པ་ལ་བར་དུ་གཅོད་པ་སྟེ་བཞི་མེད་པ་ཞིག་དགོས་ཏེ། སྔར་མཁན་པོས་དྲིས་ཤིང་ཁྱེད་རང་གིས་ལན་བཏབ་པའི་སྒོ་ནས་བར་ཆད་དང་མི་ལྡན་པར་རྟོགས་པ་དེ་ཡིན། མཐུན་རྐྱེན་ལ་ལྔ་ལས། ཡུལ་མཐུན་པའི་རྐྱེན་ལ་སྐྱབས་འགྲོའི་ཡུལ་དུ་གྱུར་པའི་དཀོན་མཆོག་གསུམ། མཛོད་ལས། སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་གསུངས་པ་ལྟར་འགོགས་ལམ་གྱི་སྟེང་ནས་འཇོག་པས། དེ་ལ་ཡིད་ཆེས་ཀྱི་དད་པ་དང་ལྡན་པའི་སྒོ་ནས། དེ་མཚོན་བྱེད་སངས་རྒྱས་སྟོན་པའི་སྐུ་གཟུགས་དང་། ཆོས་སྤྱིར་སངས་རྒྱས་ཀྱི་བསྟན་པ་གནས་ཤིང་། ཁྱད་པར་འདུལ་བའི་བསླབ་པ་ལ་ནན་ཏན་དུ་བྱེད་པ་དང་། ལས་ཀྱི་ཆོ་ག་ཡོད་པ་དགོས་དེ་ཚང་། དགེ་ཚུལ་གྱི་སྡོམ་པ་གང་ཟག་ལས་སྐྱེ་བས་མེད་ཀ་མེད་ཀྱི་ཡན་ལག་མ་ཡིན་ཀྱང་ངོ་ཚ་ཁྲེལ་ཡོད་ཀྱི་རྟེན་དུ་དགེ་འདུན་དང་བཅས་པ་བཞུགས། མཁན་པོ་བརྟན་མཁས་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པ་ལ་གསོལ་བ་བཏབ་ཅིང་ཞལ་གྱིས་བཞེས་པ་ཞིག་དགོས་ན་དེ་ཡང་ཚང་། སློབ་དཔོན་བསྙེན་རྫོགས་ཀྱི་སྡོམ་པ་དང་ལྡན་ཅིང་དགེ་ཚུལ་གྱི་སྡོམ་པ་འབོགས་པའི་ཆོ་ག་བརྡ་སྤྲོད་པ་ལ་མཁས་པ་ཞིག་དགོས་ཏེ། དེ་བདག་གིས་སྒྲུབ་པས་ཡུལ་དུ་གང་དགོས་ཐམས་ཅད་ཚང་། རྒྱུད་སྣོད་དུ་རུང་བ་མཐུན་པའི་རྐྱེན་ཡང་། བསྒྲུབ་བྱ་བཞིར་མ་ལོངས་ཤིང་། དགེ་ཚུལ་གྱི་སྡོན་པ་དང་སྡོམ་རོས་རྒྱུད་མ་བཀག་པ། ཉེས་མེད་ཀྱི་སྡོམ་པ་སྐྱེ་བ་ལ་ཚིགས་སྔ་མ་དགེ་བསྙེན་སོགས་ཐོབ་ཅིང་མ་ཉམས་པ་དགོས་ན་ཐམས་ཅད་ཚང་། རྟགས་མཐུན་པའི་རྐྱེན་ལའང་། ལུས་བྱི་བྱད་དང་གོས་དང་སྣོད་སྤྱད་གསུམ་གྱི་སྒོ་ནས་རབ་ཏུ་བྱུང་བའི་རྟགས་ཆ་ལུགས་དང་ལྡན་པ་ཞིག་དགོས་ན་བརྙན་པོ་ཚུན་ཆད་ཀྱི་ཐམས་ཅད་ཚང་། བསམ་པ་མཐུན་པའི་རྐྱེན་ལ། རྒྱུའི་ཀུན་སློང་ཞེ་ཐག་པ་ནས་སྡོམ་པ་ལེན་འདོད་དགོས་ཏེ། ཁྱེད་རང་གིས་དོན་དུ་གཉེར་ནས་སྒྲུབ་པས་ཚང་ཞིང་། དུས་ཀྱི་ཀུན་སློང་སྡོམ་པ་ཐོབ་དུས་ཐོབ་ཤེས་ཀྱི་བསམ་པ་སྐྱེ་རུང་ཞིག་དགོས་ཏེ། དེ་ཡང་ཁྱོད་ལ་སྐྱེ་རུང་དུ་ཡོད་ཅིང་། ངེད་ཀྱིས་ཀྱང་བརྡ་སྤྲོད་པ་ཡིན། འགལ་རྐྱེན་ངེས་པ་ལྔ་བྲལ་ཆ་འདྲ་ཞིག་དགོས་ཏེ། སེམས་ཅན་ཆེ་གེ་མོ་ཞིག་ལ་སྤོང་ཞེས་པ་ལྟ་བུ་སེམས་ཅན་ངེས་པ་དང་། ཡུལ་ག་གེ་མོ་ཞིག་ཏུ་བསྲུང་ཞེས་པ་ལྟ་བུ་ཡུལ་ངེས་པ་དང་། ཟླ་བ་གཅིག་གམ་ལོ་གཅིག་གི་བར་དུ་བསྲུང་ཞེས་པ་ལྟ་བུ་དུས་ངེས་པ་དང་། འཐབ་རྩོད་ཀྱི་ཚེ་མ་གཏོགས་བསྲུང་ཞེས་པ་ལྟ་བུ་ཚེ་ངེས་པ་དང་། སྤང་བྱ་བཅུའི་ནང་ནས་འདི་བསྲུང་འདི་མི་བསྲུང་ཞེས་པ་ལྟ་བུ་ཡན་ལག་ངེས་པ་སྟེ། ངེས་པ་དེ་རྣམས་དང་བྲལ་བ་ཞིག་དགོས། དེ་ཐམས་ཅད་མྱང་འདས་ཀྱི་བསམ་པས་ཟིན་པ་ཞིག་དགོས་ཏེ། ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གི་སྡུག་བསྔལ་ལས་སྐྱོབ་པའི་ཆེད་དུ་ལེན་པ་འཇིགས་སྐྱོབ་ཀྱི་ཚུལ་ཁྲིམས་དང་། ཚེ་འདིའི་བདེ་སྐྱིད་ཐོབ་འདོད་དམ། ཕྱི་མར་ལྷ་མིའི་བདེ་འབྲས་འདོད་ནས་ལེན་པ་ལེགས་སྨོན་གྱི་ཚུལ་ཁྲིམས་ཙམ་ལས། དེ་གཉིས་སོ་ཐར་གྱི་སྡོམ་པ་མི་འགྱུར་ཏེ། སོ་སོ་ཐར་པའི་སྡོམ་པ་འདི་ནི་ངེས་པར་འབྱུང་བའི་ཚུལ་ཁྲིམས་ཡིན་པས་སྡུག་བསྔལ་ཅན་གྱི་འཁོར་བ་ལས་ཐར་པ་མྱང་འདས་ཐོབ་པའི་ཆེད་དུ་བླང་དགོས། དེ་ཡང་ཐར་པའི་མཆོག་རྫོགས་པའི་སངས་རྒྱས་ཀྱི་གོ་འཕང་ཡིན་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་ནི་རྒྱུ་བའི་སེམས་ཅན་འདི་ཐམས་ཅད་འདོད་པ་བདེ་བ་འདོད་ཀྱང་ཐབས་མི་མཁས་པས་ལ་ལ་ནི་སྡུག་བསྔལ་གྱི་རྒྱུ་མི་དགེ་བ་རྔམས་པོ་ཆེ་ལ་སྤྱོད། ལ་ལ་ནི་ལས་ངན་གྱི་འབྲས་བུ་སྡུག་བསྔལ་དངོས་ཀྱི་ཡོ་ལང་ལ་སྤྱོད་པས་ཉམ་ཐག་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་མི་ཕན་རྣམ་གྲོལ་གཏན་གྱི་བདེ་བ་ལ་འགོད་དགོས། དེའི་ནུས་པ་ད་ལྟ་བདག་ལ་མི་འདུག་པས་འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་དགེ་ཚུལ་གྱི་སྡོམ་པ་བླང་སྙམ་པའི་བསམ་པ་དུང་དུང་བ་བསྐྱེད་འཚལ། ཆོ་ག་མཐུན་པའི་རྐྱེན་ལ་སྦྱོར་བ་སྔར་སོང་། དངོས་གཞི་དང་། རྗེས་དེ་ལྟ་ཉིད་དུ་སྒྲུབ་པས། དཀོན་མཆོག་གསུམ་སྐྱབས་གནས་སུ་བཟུང་ནས་དགེ་ཚུལ་གྱི་སྡོམ་པ་བླངས་ཏེ་ཇི་སྲིད་འཚོའི་བར་དུ་བསྲུང་སྙམ་པ་གྱིས་ལ་རྗེས་ཟློས་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་དུ། བཙུན་པས་བཟུང་དུ་གསོལ། ཞེས་ལན་གཉིས་བཟླས། ལན་གསུམ་པ་འདི་ལ་སྐྱབས་བརྗོད་དང་བདག་བརྗོད་གཉིས་རྫོགས་མཚམས་གཞན་བརྗོད་ཀྱི་ཐོག་མར་བདག་གིས་སེ་གོལ་གྱི་བརྡ་བྱས་པ་དང་མཉམ་དུ་སྡོམ་པ་སྐྱེ་བ་ཡིན་པས། དུས་དེར་སྡོམ་པ་ཐོབ་སྙམ་པ་དང་། དེ་ནས་ངེད་ལའང་སློབ་དཔོན་ཞེས་བརྗོད་དགོས་པ་། དེ་ཡིད་ལ་ཞོག་ལ་རྗེས་ཟློས་གྱིས། ཞེས་དང་། མཇུག་ཏུ་ཐབས་ལེགས་བྱའོ། །དེས་དངོས་གཞི་གྲུབ་ནས་མཇུག་གི་ཆོ་ག་ལ་གཉིས་ཡོད་པའི། དང་པོ་ཐོབ་པའི་དུས་གོ་བ་དེ་དགེ་སློང་ཆེ་གེ་མོས་མཛོད་ཅིག །ཅེས་བསྒོ། དེས་ཀྱང་ཉི་མ་རྫོགས་པའི་སར་ཕྱིན་ཏེ་གྲིབ་ཚོད་གཞལ། དུས་ཚོད་དང་ཉིན་མཚན་གྱི་ཆ་རྣམས་ངེས་པར་བྱས་ནས། ཁྱོད་དགེ་ཚུལ་དུ་སྒྲུབ་པའི་ཆོ་ག་ལ་སྦྱོར་དངོས་རྗེས་གསུམ་ཡོད་པའི། སྦྱོར་དངོས་གཉིས་ཀྱིས་ཁྱོད་ཀྱི་རྒྱུད་ལ་དགེ་ཚུལ་གྱི་སྡོམ་པ་ཐོབ་པ་ཡིན། ད་མཇུག་ཆོ་ག་ལ་གཉིས་ཡོད་པའི། དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་ཐོབ་པའི་དུས་གོ་བའི་དབང་དུ་བྱས་ན། ལུང་དང་ཀརྨ་ཤ་ཏཾ་དང་། མདོ་རྩ་བ་རྣམས་སུ་ཕྲ་རིམ་ནས་གསུངས་ཀྱང་། གཞི་འབྲེལ་མཁན་པོས་ཕྲ་རིམ་ནས་བཙལ་ནས་རགས་རིམ་ནས་བརྗོད་པར་གསུངས་ཤིང་། ལོ་ཚིགས་ཤེས་པའི་ཕྱིར་ལོ་ཡང་བརྗོད་དགོས་པར་གསུངས་པ་དང་བསྟུན་ན། ད་ལོའི་ལོ་འདི་ཆེ་གེའི་ལོ་ཡིན། དེ་ལ་ལོ་འགོ་འཛིན་ལུགས་མི་འདྲ་བ་མང་ཡང་ཀརྨ་ཤ་ཏཾ་ལས། དུས་ཚོད་ནི་ལྔ་སྟེ། དགུན་གྱི་དུས་དང་། ཞེས་སོགས་གསུངས་ཤིང་དེ་ཡང་ཧོར་ཟླ་དང་སྦྱར་ན། ཉེ་སྙིང་ལས། བདག་གི་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །འདིར་ནི་རབ་ཏུ་བརྗོད་པ་ཡིན། །ཞེས་གསུངས་པས་སྨིན་དྲུག་ཟླ་བའི་ཕྱེད་སྔ་མས་སྟོན་ཟླ་ཐ་ཆུང་རྫོགས་ནས། དེའི་ཕྱེད་ཕྱི་མ་ནས་ལོ་འགོ་འཛིན་པའི་དབང་དུ་བྱས་ཏེ། དགུན་གྱི་དུས་ཟླ་བ་བཞི། དཔྱིད་ཀྱི་དུས་ཟླ་བ་བཞི། དབྱར་གྱི་དུས་ཟླ་བ་གཅིག །དབྱར་ཐུང་ངུ་ཉིན་ཞག་གཅིག །དབྱར་རིང་པོ་གསུམ་དུ་ཞག་གཅིག་གིས་མ་ཚང་བ་རྣམས་སུ་ཡོད་པ་ལས་ཆེ་གེ་ཡིན། ཟླ་བ་ལའང་ཡར་ངོ་མར་ངོ་གཉིས་ལས་ཆེ་གེ་ཡིན། དེ་ལའང་ཡར་ངོའི་གྲལ་ཚེས་བཅོ་ལྔ་དང་། མར་ངོའི་བཅོ་ལྔའམ་བཅུ་བཞི་ལས་ཆེ་གེ་ཡིན། དེ་ལ་ཉིན་མཚན་གྱི་ཆ་ཉི་ཤུ་རྩ་གཉིས་ཡོད་དེ། སྔ་དྲོ་དང་། གུང་དང་། ཕྱི་དྲོ་དང་། མཚན་མོའི་ཐུན་དང་པོ་དང་། ཐུན་དང་པོའི་ཕྱེད་དང་། གུང་ཐུན་དང་། གུང་ཐུན་གྱི་ཕྱེད་དང་། ཐུན་ཐ་མ་དང་། ཐུན་ཐ་མའི་ཕྱེད་དང་། སྐྱ་རེངས་མ་ཤར་བ་དང་། སྐྱ་རེངས་ཤར་བ་དང་། ཉི་མ་མ་ཤར་བ་དང་། ཉི་མ་ཤར་བ་དང་། ཉི་མ་བརྒྱད་ཆ་ཤར་བ་དང་། ཉི་མ་བཞི་ཆ་ཤར་བ་དང་། གུང་ཚིགས་མ་ཡོལ་བ་དང་། ཉི་མ་བཞི་ཆ་ལུས་པ་དང་། ཉི་མ་བརྒྱད་ཆ་ལུས་པ་དང་། ཉི་མ་མ་ནུབ་པ་དང་། ཉི་མ་ནུབ་པ་དང་། རྒྱུ་སྐར་རྣམས་མ་ཤར་བ་དང་། རྒྱུ་སྐར་རྣམས་ཤར་བ་སྟེ་ཉི་ཤུ་རྩ་གཉིས་ལས། ཆེ་གེའི་དུས། ཉིན་མོ་ཡིན་ན། གྲིབ་ཚོད་སྐྱེས་བུ་ཆེ་གེ་དང་། རྐང་པ་ཆེ་གེའི་དུས་སུ། བཀྲ་ཤིས་པའི་གཙུག་ལག་ཁང་ངམ་གནས་འདི་ཞེས་བྱ་བར། མཁན་པོ་ཆེ་གེ་དང་། སློབ་དཔོན་ཆེ་གེ་ལས་དགེ་ཚུལ་གྱི་སྡོམ་པ་ཐོབ་པ་ཡིན་པས། དེ་ངེས་པར་བྱས་ནས། བསྙེན་བཀུར་གྱི་གནས་ནི། དགེ་སློང་ཐམས་ཅད་དང་། དགེ་ཚུལ་རང་བས་བསླབ་པ་རྒན་པ་རྣམས་ཡིན། གནས་མ་ཡིན་པ་ནི། དགེ་ཚུལ་རང་བས་བསླབ་པ་གཞོན་པ་རྣམས་དང་། རྟེན་དམན་པ་དགེ་སློང་མ་སོགས་བུད་མེད་རབ་ཏུ་བྱུང་བ་ཐམས་ཅད་དང་། དགེ་བསྙེན་མན་ཆད་ཁྱིམ་པ་ཐམས་ཅད་ཡིན། དེ་ཡང་རྒན་གཞོན་གྱི་ཁྱད་པར་རགས་པ་ལོ་ཟླ་འཇོག་པར་མ་ཟད། ཐ་ན་གྲིབ་མ་སོར་གཅིག་ཡན་ཆད་ཀྱིས་ཀྱང་འཇོག་པས། དེ་ལྟར་ཤེས་པར་བྱས་ནས། བསྙེན་བཀུར་གྱི་གནས་རྣམས་གྲལ་གོང་དུ་ཞོགས། རྙེད་པ་དང་པོར་ཕུལ། ཕྱག་འཚལ། སྔོན་ལ་ལྡང་བ་སོགས་གུས་པའི་ལས་རྣམས་ཡར་སྟོབས། གནས་མ་ཡིན་པ་རྣམས་རང་གི་གྲལ་འོག་ཏུ་ཞོགས། ཕྱག་དང་བསྙེན་བཀུར་སྟོབ་པ་བྱུང་ན་དང་དུ་ལོང་། འོན་ཀྱང་དགེ་སློབ་མ་དང་དགེ་སློང་མ་གཉིས་བསླབ་ཚིགས་མཐོ་བས་དེ་གཉིས་ཀྱི་ཕྱག་མ་ལེན། དེ་ལྟར་བརྩིས་པས་དགེ་ཚུལ་ནང་དུས་མཉམ་པ་བྱུང་ན་གཅིག་གིས་གཅིག་ལ་ཕྱག་བྱ་མི་དགོས་ཤིང་། གྲལ་ཡང་མགྱོགས་གྲལ་དུ་བྱས་པས་ཆོག །དེ་ལྟར་བྱས་པས་གནས་སྐབས་སུ་སྡོམ་པ་ཐོབ་པའི་དུས་ཤེས་ཤིང་རྒན་པ་ལ་བསྙེན་བཀུར་བས་གཞན་རྒྱུད་ཀྱི་བསླབ་པ་ལ་གུས་པ་དང་། གཞོན་པའི་བསྙེན་བཀུར་དང་དུ་བླངས་པས་རང་རྒྱུད་ཀྱི་བསླབ་པ་ལ་གུས་པ་དང་། གྲལ་འཁྲུག་ལོང་དུ་མི་འགྱུར། སྦྱིན་བདག་དང་བ་འདྲེན་ཅིང་། ཡ་རབས་ཀྱི་ལུགས་དང་མཐུན། མཐར་ཐུག་སྟོན་པའི་བཅས་པ་བཞིན་དུ་བསླབ་པས། རྣམ་པ་ཐམས་ཅད་མཁྱེན་པ་སངས་རྒྱས་ཐོབ་པའི་དགོས་པ་ཡོད་པས། དེ་རྣམས་ཐུགས་ལ་བཞག་ནས་ཕྱག་ལེན་ལ་ཐེབས་པ་མཛོད། དེ་མཇུག་ཆོག་དང་པོ་ལགས། གཉིས་པ་དགེ་བའི་བཤེས་གཉེན་པས་གསུངས་པར་འགྱུར་བས་དེ་ལ་གསན་པས་མཆི་བར་གདའ། དེ་ནས་སློབ་དཔོན་གྱིས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་སེམས་ལ་གཞག་ནས་ལག་ལེན་ལ་ཐེབས་པ་བྱ་དགོས། ད་མཇུག་ཆོག་གཉིས་པ་མི་ཉམས་ཤིང་འཕེལ་བར་བྱ་བའི་ཕྱིར་བསླབ་པ་བརྗོད་པ་ནི། སྡོམ་པ་ཐོབ་པ་ཙམ་གྱིས་མི་ཆོག་གཅེས་སྤྲས་ཀྱི་སྒོ་ནས་བསྲུང་དགོས། བསྲུང་ལུགས་བསླབ་བྱ་བཅུ་པོ་འཁོར་དང་བཅས་པ་འཕགས་པ་དགྲ་བཅོམ་པ་རྣམས་ཀྱི་ཇི་ལྟར་བསྲུངས་པ་བཞིན་དུ་བདག་གིས་ཀྱང་བསྲུང་སྙམ་པས་རྗེས་ཟློས་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ། བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པ་འདིས་བདག་འཕགས་པ་དགྲ་བཅོམ་པ་དེ་དག་གིས་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གཅིག་གི་རྗེས་སུ་ཐབས་ལེགས་བྱའོ། །དེ་རྣམས་བསླབ་བྱ་བརྗོད་པ་ཡིན་པས་ཇི་ལྟར་ཁས་བླངས་པ་བཞིན་ལེགས་པར་སྲུངས་ཤིག །དེ་ལྟར་དགེ་ཚུལ་དུ་གྱུར་ནས་ཁྱིམ་པ་ཐམས་ཅད་ཀྱིས་ཕྱག་བྱ་བའི་གནས་ཐོབ་པ་ཡིན་ཏེ། ས་གའི་ལྷས། དེ་ལྟར་དགེ་ཚུལ་བྱས་མ་ཐག །འདི་ལ་ཁྱིམ་པ་ཐམས་ཅད་ཀྱིས། །ཕྱག་འཚལ་སྨོན་པར་འགྱུར་བ་སྟེ། །གང་ཕྱིར་ཁྱིམ་གྱི་འཆིང་གྲོལ་ཕྱིར། །ཞེས་གསུངས་པ་ལྟར་ཕན་ཡོན་ཆེན་པོ་མངའ་བས་དགའ་བ་སྒོམས། དེ་མཁན་པོའི་སྐུ་དྲིན་ཡིན་པས་བཏང་རག་གི་ཕྱག་གསུམ་འཚོལ་ལ་བཀའ་དྲིན་ཆེ་ལགས་ཞེས་བརྗོད་ཅིག །མེ་ཏོག་འཐོར་བཞིན་དུ་ཐམས་ཅད་ཀྱིས་སྨོན་ལམ་རྣམ་བཞི་གདབ་བོ། །དགེ་ཚུལ་དུ་སྒྲུབ་པའི་ཆོ་གའོ། ༈ །གཉིས་པ་ཚིགས་ཕྱི་མ་བསྙེན་རྫོགས་སུ་སྒྲུབ་པའི་ཆོ་ག་ནི། བསྒྲུབ་བྱ་དེ་ལོ་ཉི་ཤུ་ལོན་ཞིང་བསྙེན་རྫོགས་འདོད་ན། སྟོན་པའི་སྐུ་གཟུགས་ཀྱི་སྤྱན་སྔར་མཆོད་པ་བཤམ། ཆོས་གོས་སོགས་ཡོ་བྱད་རྣམས་བརྙན་པོ་ཚུན་ཆད་ཀྱིས་བཙལ་ལ། ཆོས་གོས་རྣམས་བྱི་ནང་མགོ་མཇུག་མ་ལོག་པར་བཞི་ལྟབ་ཏུ་བྱས་ཏེ་བརྐྱང་པ་དང་། ལྷུང་བཟེད། གདིང་བ། ཆུ་ཚགས་རྣམས་མཁན་པོ་དང་ཉེ་བར་བཞག །མེ་ཏོག་དང་། སྟན་གྱི་རྩྭ་ཕ་གུ་དང་བཅས་པ་སྟ་གོན་བྱ། ལས་ཀྱི་གནས་དེར་འདུ་བའི་དགེ་སློང་ཐམས་ཅད་ཀྱི་རང་རྒྱུད་ལ་བརྟགས་ཏེ། ལྟུང་བ་ཡོད་ན་བཤགས་བསྡམ་བྱིན་གྱི་རློབ་པ་སོགས་གང་ལ་གང་འོས་ཀྱིས་ཕྱིར་བཅོས་པས་རྒྱུད་དག་བར་བྱས་ཏེ་ལས་གྲལ་དུ་འདུས་པ་དང་། བསྒྲུབ་བྱ་དེ་ཕ་གུའི་སྟེང་དུ་རྩྭ་བཏིང་བ་ལ་བཞག་མཁན་པོ་ཉིད་དུ་ཕྱོགས་པ་དེས་དགེ་འདུན་ཐམས་ཅད་ལ་མེ་ཏོག་ཕུལ་ནས་འགྲེངས་ཏེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི། དགེ་འདུན་ལས་བསྙེན་པར་རྫོགས་པར་འཚལ་ནས། དགེ་འདུན་ལས་བསྙེན་པར་རྫོགས་པར་གསོལ་ན། དགེ་སློང་དགེ་བའི་བཤེས་གཉེན་ཆེ་གེ་མོས་ལས་ཀྱི་སློབ་དཔོན་བཀས་གནང་བ་ཞུ། དགེ་སློང་ཆེ་གེ་མོས་གསང་སྟེ་སྟོན་པའི་སློབ་དཔོན་བཀས་གནང་ཞུ། དགེ་སློང་ཆེ་གེ་མོས་དབུ་མཛད་པ་རྣམས་ཀྱིས་ལས་ཀྱི་ཁ་སྐོང་བར་མཛད་ནས། ཚེ་དང་ལྡན་པ་འདི་ལ་བསྙེན་པར་རྫོགས་པའི་སྡོམ་པ་བཀས་གནང་བ་ཞུ། དངོས་དེ་ལྟར་གཡར་ངོ་འཕྱར་ཞིང་མཆིས་ལགས། ཞེས་གསོལ་བ་གདབ། འདི་ལས་གྲལ་དུ་འདུས་ནས་མཛད་པ་ཕྱག་ལེན་ཏེ། བསྟན་པའི་རྣམ་བཞག་མ་ཉམས་ཙམ་ཡིན་གྱི། གཞུང་གི་འགྲོས་དང་བསྟུན་ན་ལས་གྲལ་དུ་མ་འདུས་གོང་དུ་ཚིག་གིས་གསོལ་བ་བཏབ་པས་ཆོག་པར་གསུངས་སོ། །དེ་ནས་བསྒྲུབ་བྱ་ལ། སྟོན་པའི་སྐུ་གཟུགས་འདི་ལ་སྟོན་པ་དངོས་ཀྱི་འདུ་ཤེས་ཞོག་ལ་ཕྱག་གསུམ་གྱིས་ཞེས་འཚལ་དུ་གཞུག །རང་ཉིད་དགེ་འདུན་གྱི་ནང་དུ་འཇུག་པའི་དོན་དུ་དགེ་སློང་རེ་རེ་ལ་ཕྱག་གསུམ་གསུམ་གྱིས། ཞེས་ཡན་ལག་ལྔ་ས་ལ་གཏུགས་པའམ་སྒྱིད་པ་ལ་འཁྱུད་དེ་མགོ་བོས་རྐང་པ་ལ་གཏུགས་པའི་ཕྱག་གཉིས་གང་ཡང་རུང་པ་འཚལ་དུ་གཞུག་ཅིང་། ཕྱག་འཚལ་བའི་ཚེ་དགེ་སློང་རེ་རེས་ཀྱང་། བསྙེན་པར་རྫོགས་པ་དགེ་སློང་གི་སྡོམ་པ་མྱུར་དུ་ཐོབ་པར་གྱུར་ཅིག །ཅེས་སྨོན་ལམ་གདབ་ཅིང་མེ་ཏོག་འཐོར་རོ། ༈ །དེ་ནས་བསྒྲུབ་བྱ་དེ་རྩྭའི་སྟེང་ནས་མཁན་པོ་ལ་ཕྱག་གསུམ་འཚལ་དུ་བཅུག་ནས། ཕ་གུའི་སྟེང་དུ་རྩྭ་བཏིང་བ་ལ་རྟིང་བ་གཉིས་ཀྱིས་མནན་ནས་ཙོག་ཙོག་པོས་སྙིང་གར་ཐལ་སྦྱར་གྱི་འདུག་ཏུ་བཅུག་སྟེ། ཁྱོད་སྔོན་གྱི་དགེ་བ་དང་སྨོན་ལམ་གྱི་དབང་གིས་རྟེན་ཕུན་སུམ་ཚོགས་པ་མི་ལུས་རིན་པོ་ཆེ་ཐོབ་ཅིང་། སངས་རྒྱས་ཀྱི་བསྟན་པ་ལ་རིམ་གྱིས་བསླབས་ཏེ། བསྙེན་པར་རྫོགས་པ་དགེ་སློང་གི་སྡོམ་པ་ནོད་པར་འདོད་པ་དེ་ཤིན་ཏུ་ལེགས། ལེགས་པའི་རྒྱུ་མཚན། ད་རེས་ཁམས་གསུམ་འཁོར་བ་སྡུག་བསྔལ་གྱི་རང་བཞིན་ཅན་འདི་ལས་ཐར་བ་རྣམ་གྲོལ་གཏན་གྱི་བདེ་བ་ཐོབ་པའི་ཆེད་དུ་རྒྱལ་བའི་བསྟན་པ་ལ་བསླབ་དགོས་ཤིང་། བསྟན་པའི་སྙིང་པོ་སྡེ་སྣོད་གསུམ་གྱི་ཉམས་སུ་བླང་བྱ་བསླབ་པ་རིན་པོ་ཆེ་རྣམ་པ་གསུམ་ཡིན། དེ་ཡང་འཁོར་བ་དངོས་ཀྱི་གཉེན་པོ་རྣམ་པར་མི་རྟོག་པའི་ཤེས་རབ་ནི་ལམ་གྱི་གཙོ་བོ་ཡིན་མོད་ཀྱི། དེའི་རྒྱུ་ཡང་དམིགས་པ་ལ་རྩེ་གཅིག་པའི་ཏིང་ངེ་འཛིན་དགོས་ལ། དེ་ཡང་འགྱོད་པ་མེད་པའི་ཚུལ་ཁྲིམས་རྣམ་པར་དག་པ་ལས་འགྲུབ་ཅིང་། ཚུལ་ཁྲིམས་ཀྱང་འདིར་སོ་སོ་ཐར་པའི་སྡོམ་པ་རིགས་བརྒྱད་ལས་མཆོག་ཏུ་གྱུར་པ་དགེ་སློང་གི་སྡོམ་པ་ཡིན་ཏེ། ལུང་ལས། སངས་རྒྱས་བསྟན་པ་རིན་ཆེན་སྒྲོན། །འབར་བའི་སྣོད་ནི་དཀའ་ཐུབ་ཅན། །དུར་སྨིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་གསུངས། དེ་ལྟ་བུའི་ཕན་ཡོན་ཅན་གྱི་བསྙེན་རྫོགས་སུ་སྒྲུབ་པའི་ཚུལ་ཡང་། སྔོན་སྟོན་པ་རྫོགས་སངས་རྒྱས་ནས་རིང་པོ་མ་ལོན་པའི་དུས་ཀྱི་གདུལ་བྱ་རྣམས་ནི་ཉོན་མོངས་པ་དང་། རྣམ་པར་སྨིན་པ་དང་། ལས་ཀྱི་སྒྲིབ་པ་གསུམ་ཤས་ཆུང་ཞིང་། ཤེས་རབ་དང ། རྒྱུད་དབང་པོ་དང་། དགེ་བའི་རྩ་བ་སྨིན་པ་ཤས་ཆེ་བས་འཁྲིག་ཅིང་སྐྱོང་བར་བྱེད་པ་ལ་ལྟོས་མི་དགོས་པའི་ཕྱིར་ཚུལ་ཤོག་ལ་སོགས་པ་ཐབས་སླ་བ་མང་པོ་དང་། མཁན་སློབ་མེད་པར་དགེ་འདུན་གྱིས་གསོལ་བཞིའི་ལས་ཀྱིས་རབ་བྱུང་བསྙེན་རྫོགས་གཅིག་ཅར་དུ་སྒྲུབ་པ་སོགས་སྔོན་གྱི་ཆོ་ག་རྣམས་གསུངས་མོད་ཀྱི། དུས་ཕྱིས་སེམས་ཅན་སྨིན་ཤས་ཆུང་ཞིང་སྒྲིབ་གསུམ་ཤས་ཆེ་བས་ཀུན་ཏུ་སྤྱོད་པའི་ཁྱད་པར་མི་ཤེས་པ་སློབ་དགོས་པར་འགྱུར་ཞིང་། ལུས་ཀྱི་འབྱུང་བ་ཆ་མ་སྙོམས་པས་ན་བར་གྱུར་པ་དག་ལ་ནད་གཡོགས་དགོས་པ་སོགས་འཁྲིད་ཅིང་སྐྱོང་བ་ལ་ལྟོས་པའི་ཕྱིར་ཚེགས་དང་བཅས་པ་ད་ལྟར་གྱི་ཆོ་གའི་སྒོ་ནས་བསྙེན་པར་རྫོགས་པ་སྒྲུབ་འཚལ། དེ་ལའང་ཆོ་ག་སྦྱོར་དངོས་རྗེས་གསུམ་གྱི་སྦྱོར་བ་ལའང་དྲུག་ལས། ཡོ་བྱད་ཚགས་སུ་གཞུག་ཅིང་དཀོན་མཆོག་གསུམ་དང་སློབ་དཔོན་མངོན་དུ་འགྱུར་བར་བྱ་བའི་ཕྱིར་དང་པོར་བྱ་བ་སོང་ནས། ད་མཁན་པོ་མངོན་དུ་འགྱུར་བར་བྱ་བའི་ཕྱིར། སྦྱོར་ཆོག་གཉིས་པ་མཁན་པོར་གསོལ་བ་འདེབས་པའི་སྐབས་ཡིན། མཁན་པོའི་དོན་ཡང་། ཉེ་བསྒྱུར་ཨུ་པ་སྔོན་མའི། དྷ་ར། སནྡྷི། བི་ཀཱ་ར་ཎ་ཞེས་པས། ཉེ་བར་འཛིན། ཉེ་བར་སྦྱོར། ཉེ་བར་ལུང་འབོགས་པའི་དོན་ཏེ། བརྩེ་བས་འཁོར་བར་ལྟུང་བ་ལས་ཉེ་བར་བཟུང་ནས། བསླབ་པ་རིན་པོ་ཆེ་ལ་ཉེ་བར་སྦྱར་ཏེ། འཇུག་ལྡོག་གི་བསླབ་བྱ་དག་ཉེ་བར་ལུང་འབོགས་པར་བྱེད་པས་ན་མཁན་པོ་ཞེས་བྱ། དེ་ཡང་བཙུན་པ་བརྟན་པའི་ཡན་ལག་ཏུ་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་དང་། མཁས་ཤིང་ཕན་ཐོགས་པའི་ཡན་ལག་ཏུ་ལྔ་ཕྲུགས་ཉི་ཤུ་རྩ་གཅིག་ལས་གང་རུང་དང་ལྡན་པ་སྟེ། བརྟན་མཁས་ཀྱི་ཡོན་ཏན་གཉིས་དང་ལྡན་པ་ཞིག་དགོས་པ་ཁོ་བོས་འགྲུབ་རུང་དུ་ཡོད་པས། བཙུན་པའམ་སྔར་གྱི་མཁན་སློབ་ཡིན་ན་དགེ་ཚུལ་གྱི་སློབ་དཔོན་ནམ། རབ་བྱུང་གི་མཁན་པོ་ལ་ད་བསྙེན་རྫོགས་ཀྱི་མཁན་པོ་ཞུ་སྙམ་པ་གྱིས་ལ་རྗེས་ཟློས་གྱིས། བཙུན་པའམ་སློབ་དཔོན་ནམ་མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ། བཙུན་པའམ་སློབ་དཔོན་ནམ་མཁན་པོ་ལ་མཁན་པོར་གསོལ་གྱི། བཙུན་པའམ་སློབ་དཔོན་ནམ་མཁན་པོ། བདག་གི་མཁན་པོ་མཛད་དུ་གསོལ། བཙུན་པའམ་སློབ་དཔོན་ནམ་མཁན་པོས་བསྙེན་པར་རྫོགས་པར་བགྱིའོ། །ལན་གཉིས་བཟླས་ནས། ལན་གསུམ་པའི་ཆ་གསུམ་པ་ལ་གང་ཡིན་ཀྱང་མཁན་པོ་མཁན་པོས་ཞེས་བརྗོད་ཅིང་། མཇུག་ཏུ་ཐབས་ལེགས་བྱའོ། །དེ་ནས་ཡོ་བྱད་མངོན་དུ་འགྱུར་བར་བྱ་བའི་ཕྱིར་སྦྱོར་ཆོག་གསུམ་པ་རྟགས་དང་ཆ་ལུགས་སྦྱིན་པ་ཡིན་པས་ཕྱག་གསུམ་འཚོལ་ལ་ངེད་ཀྱི་མདུན་དུ་ཤོག་ཅིག །ཅེས་བསྒོ། གྲོགས་དན་གྱི་ཆོས་གོས་གསུམ་སོ་སོར་བལྟབ་སྟེ་བསྒྲུབ་བྱའི་ཕྲག་པ་གཡོན་ལ་བཀལ་ནས། འདི་ལ་དངོས་དང་། འདི་ལ་རྒྱུའི་བྱིན་རླབས་འཆགས་པར་གདའ་ཞེས་བརྡ་སྤྲད། མཁན་པོས་ཀྱང་དེ་ལ། ཚེ་དང་ལྡན་པ་འདིའི་ལྷུང་བཟེད་དགེ་འདུན་ལ་སྟོན་ཅིག །ཅེས་བསྒོ། དེ་ནས་མཁན་པོ་དང་བསྒྲུབ་བྱ་གཉིས་ཀ་འགྲེང་སྟེ་གཉིས་ཀའི་ལག་གཡོན་འོག་དང་གཡས་སྟེང་དུ་བྱས་པས་སྣམ་སྦྱར་བཟུང་ནས། འདི་སྣམ་ཕྲན་དང་གླེགས་བུ་འཐུད་ཅིང་སྦྱར་བས་སྣམ་སྦྱར་ཞེས་བྱ་བ། ཁྱིམ་པ་དང་མུ་སྟེགས་ཅན་དང་རབ་ཏུ་བྱུང་ཡང་བསྙེན་པར་མ་རྫོགས་པ་དགེ་ཚུལ་མན་ཆད་ལས་རྟགས་ཁྱད་པར་དུ་གྱུར། དགེ་སྦྱོང་གི་དྲན་པ་གསོལ། ངོ་ཚ་དང་ཁྲེལ་ཡོད་ཀྱི་བསམ་པ་ཁྱད་པར་ཅན་བསྐྱེད། ལྷ་དང་བཅས་པའི་མཆོད་རྟེན་དུ་འགྱུར་པའི་ཕྱིར་གནང་བས། འདི་དགེ་སློང་གི་འཚོ་བའི་ཡོ་བྱད་སྣམ་སྦྱར་དུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ། རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ལན་གསུམ་བཟླ། ཐབས་ལེགས་བྱས་ལ་ཕྲག་པ་གཡས་སུ་སྤོ་བ་འོག་མ་རྣམས་ལའང་འགྲེ། དེ་བཞིན་དུ་བླ་གོས་བཟུང་ནས། འདི་སྟོད་དུ་རྒྱུན་དུ་གྱོན་པར་བྱེད་པའི་ཞེས་པ་ནས་གོས་སུ་གནང་བས་ཞེས་པའི་བར་རབ་བྱུང་གི་སྐབས་ལྟར་ལས། འདི་བླ་གོས་སུ་བྱིན་གྱིས་བརླབ་སྙམ་པ་གྱིས་ལ་རྗེས་བློས་གྱིས་བྱ། སྔར་གྱི་སྣམ་སྦྱར་ཅེས་པའི་གནས་སུ་བླ་གོས་ཞེས་འདོན་པ་བསྒྱུར། མཐང་གོས་བཟུང་ནས། འདི་སྨད་ཀྱི་ནང་དུ་གྱོན་པར་བྱེད་པའི་ནས། གོས་སུ་གནང་བས། འདི་མཐང་གོས་སུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས་བྱ། སྣམ་སྦྱར་ཞེས་པ་མཐང་གོས་ཞེས་བསྒྱུར། དེ་ནས་མཐང་གོས་བཀོན་རྗེས། བླ་གོས་དང་སྣམ་སྦྱར་སྦྲགས་ཏེ་མཁན་པོས་བཀོན་པར་བྱ་ཞིང་། ཐམས་ཅད་ཀྱིས་སྨོན་ལམ་བཞི་གདབ། དེས་ཀྱང་སྣམ་སྦྱར་དང་བཅས་པ་ཉིད་ཡིན་ན་རྩྭ་འམ་གདིང་པའི་སྟེང་ནས་བསྙེན་པར་རྫོགས་པའི་ཕྱིར་འདུས་པའི་དགེ་འདུན་ལ་ཕྱག་གསུམ་བྱའོ། །གལ་ཏེ་རེ་ཞིག་ཆོས་གོས་གསུམ་དངོས་ཀྱི་བྱིན་རླབས་འཆགས་པ་མེད་ན། རྒྱུ་དང་ཁ་དོག་གིས་རུང་བའི་གོས་ཁྲུ་གང་ཡན་ཆད་ལ་རྒྱུའི་བྱིན་རླབས་བྱ་སྟེ། སྔར་བཞིན་བཟུང་ལ། བཤད་པ་གཞན་འདྲ་བ་ལས། འདི་སྣམ་སྦྱར་རྒྱུར་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱི་སྟེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བར་ཆད་མ་བྱུང་ན། བཀྲུའོ། །བརྐྱང་ངོ་། །དྲའོ། །ལྟེབ་བོ། །གཟུངས་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་ནི་རུང་བ་སྤྱད་པར་འོས་པའོ། །ལན་གསུམ་བཟླས་ཞིང་ཐབས་ལེགས་བྱ། གཞན་གཉིས་ཀྱང་དེ་དང་འདྲ་བ་ལས། སྣམ་སྦྱར་ཞེས་པའི་གནས་སུ་བླ་གོས་ཞེས་དང་། སྣམ་ཕྲན་བདུན་པར་བགྱི་སྟེ། གླེགས་བུ་ཕྱེད་དང་གསུམ་པར་བགྱིའོ། །ཞེས་དང་། སྣམ་སྦྱར་ཞེས་པ་མཐང་གོས་དང་། སྣམ་ཕྲན་ལྔ་པར་བགྱི་སྟེ། གླེགས་བུ་ཕྱེད་དང་གཉིས་པར་བགྱིའོ། །ཞེས་བརྗེའོ། །ཡང་ཁྱིམ་པའི་གོས་ལ་སོགས་པའམ་ཆོས་གོས་སུ་དྲུབས་ཟིན་ནའང་ཚད་ལས་ཆེ་ཆུང་དུ་གྱུར་པ་དང་རྒྱུ་དང་ཁ་དོག་གིས་མི་ཆུང་བ་རྣམས་ལ་དངོས་དང་རྒྱུའི་བྱིན་རླབས་མི་འཆགས་པས་རྐྱེན་དབང་གིས་བྱིན་གྱིས་བརླབས་ཏེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བས་གོས་འདི་སྣམ་སྦྱང་དུ་བྱིན་གྱིས་བརླབ་བོ། །ལན་གསུམ་བཟླས་ཤིང་ཐབས་ལེགས་བྱ། བླ་གོས་དང་མཐང་གོས་ལའང་འདོན་པ་བསྒྱུར། དེ་ནས་ལྟུང་བཟེད་སྟོན་པར་བསྒོས་པ་དེས། ལྟུང་བཟེད་དུ་སྨན་ནམ་མེ་ཏོག་ཅུང་ཟད་བཅུག་ལ་ལག་གཡོན་པར་བཞག །གཡས་པས་བཀབ་སྟེ། དགེ་སློང་རེ་རེའི་མདུན་དུ་འགྲེང་སྟེ་འདུད་པ་དང་བཅས་པས། རྒན་ན་བཙུན་པའམ། གཞོན་ན་ཚེ་དང་ལྡན་པ་དགོས་སུ་གསོལ། ཚེ་དང་ལྡན་པ་མིང་འདི་ཞེས་བགྱི་བའི་ལྷུང་བཟེད་འདི་མི་ཆུད་དམ། མི་ཆེའམ། མི་སྐྱའམ། ཞེས་དྲི། དེ་ལྟ་བུ་མ་ཡིན་ན་རེ་རེ་ནས་ལྷུང་བཟེད་བཟང་ངོ་། །ཞེས་བརྗོད། མ་བརྗོད་ན་ཉེས་བྱས་སོ། །དེ་ནས་ལྷུང་བཟེད་དེ་མཁན་པོ་དང་བསྒྲུབ་བྱ་གཉིས་ཀ་འགྲེང་བའི་ལག་གཡོན་པར་བཞག །གཡས་པས་བཀབ་ལ། འདི་ལྷུང་བཟེད་ཅེས་བྱ་བ། ཞེས་པ་ནས། ཟས་ལྷུང་བ་བཟེད་པའི་དོན་དུ་གནང་བ་འདི་དགེ་སློང་གི་འཚོ་བའི་ཡོ་བྱད་ལྷུང་བཟེད་དུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་བསླང་བའི་སྣོད་དུ་བྱིན་གྱིས་བརླབ་བོ། །ལན་གསུམ་བཟླས། ཐབས་ལེགས་བྱའོ། །གདིང་པ་གཏད་དེ། འདི་ཆོས་གོས་གདིང་བ་ཞེས་བྱ་བ་ནས། སྤྱོད་དགོས་པས། གདིང་བ་འདི་ལྟ་བུ་བྱིན་གྱིས་བརླབས་ནས་འཆང་བར་གྱིས་ཤིག །དེས་མཚོན་ནས་གཞན་གྱི་ལོངས་སྤྱོད་གང་ལ་ཡང་འཕངས་མེད་དུ་སྤྱོད་པ་ཐམས་ཅད་སྤང་དགོས། ཆུ་ཚགས་གཏད་དེ། འདི་ཆུ་ཚགས་ཞེས་བྱ་བ་ཡིན་ཏེ་ནས་གནང་བ་ཡིན་པས་ཆུ་ཚགས་འདི་ལྟ་བུ་བྱིན་གྱིས་བརླབས་ནས་འཆང་བར་གྱིས་ཤིག །དེས་མཚོན་ནས་ཡོ་བྱད་གང་ལའང་སེམས་ཅན་ལ་མི་གནོད་པར་བྱ་དགོས། དེས་ཡོ་བྱད་མངོན་དུ་གྱུར་པ་བྱས་ཟིན་པས། རེ་ཞིག་དགེ་སློང་འདིའི་ཕྱི་ལ་སོང་ཞིག །ཅེས་བསྒོ། གྲོགས་བྱེད་པའི་དགེ་སློང་དེས་ཀྱང་བསྒྲུབ་བྱ་དེ་ལས་མི་ཐོས་ཤིང་ལས་གྲོལ་ནས་མཐོང་བའི་སར་གདིང་བའི་སྟེང་དུ་ཚོགས་ལ་མངོན་དུ་ཕྱོགས་པར་འགྲེང་སྟེ་ཐལ་སྦྱར་གྱིས་བཞག་ལ། རང་ཉིད་ལས་གྲལ་དུ་འཁོད་དོ། །དེ་ནས་ལས་སློབ་ཏུ་མངོན་དུ་ཕྱོགས་པའི་དགེ་སློང་དེས། གསང་སྟོན་བསྐོ་བའི་ཐོག་མར་ཡུལ་དུས་ཀྱི་སྟོབས་ཀྱིས་བཤགས་པར་མ་ནུས་པའི་ལྟུང་བ་ཐུན་མོང་བ་རྣམས་ཀྱིས་ལས་ལ་མི་སྒྲིབ་པར་བྱ་བའི་ཕྱིར། གསོལ་བའི་ལས་ཀྱི་བྱིན་གྱིས་བརླབ་པར་བགྱི་བས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ལགས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན། གང་གི་མདུན་དུ་བདག་ཅག་ལྟུང་བ་དེ་ཆོས་བཞིན་དུ་སླར་བགྱི་བ། བདག་ཅག་ལས་དགེ་སློང་གནས་གཞན་དུ་མཆིས་ལ། དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་བྱིན་གྱིས་བརླབས་ཏེ་བསྙེན་པར་རྫོགས་པའི་ཕྲིན་ལས་མཛད་ལ། སླད་ཀྱིས་དགེ་སློང་གི་མདུན་དུ་ལྟུང་བ་དེ་དག་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །དེ་ནས་སྔར་གནས་ལ་བློ་མཐུན་བྱས་པ་ཞིག་པའམ། མ་བྱས་པ་ཡིན་ན་འདི་ལྟར་བྱ་སྟེ། གནས་ལ་བློ་མཐུན་བགྱི་བས། ལས་མཛད་པའི་གནས་འདི་ཉེ་འཁོར་དང་བཅས་པ་ཚུན་ཆད་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་དང་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བཞེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། དགེ་འདུན་གྱི་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །བརྗོད་པ་མཇུག་སྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བཞེད་དེ། དེའི་སླད་དུ་དགེ་འདུན་གྱིས། གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་བར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་གནས་ཐམས་ཅད་ནས་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་ཕྲིན་ལས་ཀྱི་གནས་སུ་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །འདིར་གྲུབ་པ་ནི། བྲག་གི་བྱ་སྐྱིབས་ལྟ་བུ་རང་གྲུབ། བགྱིས་པ་ནི་སྐྱེས་བུས་བྱས་ལ་མ་ཟིན་པ། ལགས་པ་ནི་ཟིན་པ་སྟེ་ཚགས་སུ་ཚུད་པ་ཡིན་པས་སྐབས་སུ་གང་བབས་བརྗོད་དོ། །དེ་ནས་ལས་བྱེད་པས་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བའི་གསང་སྟེ་སྟོན་པར་གསོལ་བ་བཏབ་པ་གང་ཡིན། ཞེས་དྲི། དེས་བདག་དགེ་སློང་མིང་འདི་ཞེས་བགྱི་བ་ལགས། ཞེས་ལན་གདབ། དགེ་སློང་མིང་འདི་ཞེས་བྱ་བ་ཁྱོད་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བ་ལ་གསང་སྟེ་སྟོན་པར་སྤྲོའམ། ཞེས་དྲི། དེས་སྤྲོ་ལགས་ཞེས་ལན་གདབ། ཁོང་སྤྲོ་བར་གདའ་བས་ཡོངས་སུ་དག་པ་མངོན་དུ་འགྱུར་བར་བྱ་བའི་ཕྱིར་སྦྱོར་ཆོག་བཞི་པ་ལྐོག་ཏུ་བར་ཆད་དྲི་བའི་ཆེད་དུ་གསང་སྟེ་སྟོན་པ་བསྐོ་བ་ལ་ཐུགས་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བྱ་བས་མིང་འདི་ཞེས་བགྱི་བ་ལ་གསང་སྟེ་སྟོན་ཏོ། །འདི་ནི་གསོལ་བའོ། །དེ་ནས་གསང་སྟོན་ཕྱི་རོལ་དུ་སོང་སྟེ། བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་ནས། མདུན་དུ་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་བསྙེན་པར་རྫོགས་པར་བྱེད་པ་ལ། འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་ཁོ་བོས་དྲིས་པ་ལས་རྟོགས་པས། དྲི་བ་འདི་རྣམས་ལ་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་ཅིག་དྲི་ཡི། ཁྱོད་མ་འཛེམ་པར་བྱོས་ལ། ཡིན་པ་ལ་ཡིན་ཞེས་སྨྲོས་ཤིག །མ་ཡིན་པ་ལ་མ་ཡིན་ཞེས་ལན་ཐོབ་ཅིག །ཁྱོད་སྐྱེས་པ་ཡིན་ནམ། དེས་ཡིན་ལགས། སྐྱེས་པའི་དབང་པོ་དང་ལྡན་ནམ། དེས་ལྡན་ལགས། ལོ་ཉི་ཤུ་ལོན་ནམ། ལོན་ལགས། ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། ཚང་ལགས། ཁྱོད་ཀྱི་ཕ་མ་གསོན་ནམ། གསོན་ཟེར་ན། ཁྱོད་ཕ་མས་གནང་ངམ། གནང་ལགས། གལ་ཏེ་ཤི་ཟེར་ན། ཁྱོད་བྲན་མ་ཡིན་ནམ། བརྐུས་པ་མ་ཡིན་ནམ། རྙེད་བཙོན་མ་ཡིན་ནམ། རྩོད་པ་ཅན་མ༴ བཙོངས་པ་མ༴ རྒྱལ་པོས་བཀྲབས་པ་མ༴ རྒྱལ་པོ་ལ་བསྡིགས་པ་མ༴ རྒྱལ་པོ་ལ་གནོད་པའི་ལས་བྱེད་པ་མ༴ རྒྱལ་པོ་ལ་གནོད་པའི་ལས་བྱས་སམ་བྱེད་དུ་བཅུག་པ་མ༴ ཆོམ་རྐུན་པར་གྲགས་པ་མ༴ ཟ་མ་མ༴ མ་ནིང་མ༴ དགེ་སློང་མ་སུན་ཕྱུངས་པ་མ༴ རྐུ་ཐབས་སུ་གནས་པ་མ༴ ཐ་དད་དུ་གནས་པ་མ༴ གནས་པར་མི་བྱ་བ་མ༴ མུ་སྟེགས་ཅན་མ༴ མུ་སྟེགས་ཅན་ཞུགས་པ་མ༴ ཕ་བསད་པ་མ༴ མ་བསད་པ་མ༴ དགྲ་བཅོམ་པ་བསད་པ་མ༴ དགེ་འདུན་གྱི་དབྱེན་བྱས་པ་མ༴ དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུངས་པ་མ༴ སྤྲུལ་པ་མ༴ དུད་འགྲོ་མ་ཡིན་ནམ་ཞེས་དྲི། དེས་མ་ཡིན་ལགས། ཞེས་བརྗོད། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ། ཆགས་ཟེར་ན། ཁྱོད་བསྙེན་པར་རྫོགས་ནས་འཇལ་ནུས་སམ། ནུས་ཟེར་ན། ཁྱོད་སྔོན་རབ་ཏུ་བྱུང་བ་མ་ཡིན་ནམ། རབ་ཏུ་བྱུང་ཟེར་ན། ཁྱོད་ལ་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཁྱོད་འབབ་པ་ན་བསླབ་པ་ལེགས་པར་ཕུལ་ལམ། ལྟུང་བ་བྱུང་ངོ་། །ཟེར་ན། འོ་ན་སོང་ཞིག །མ་བྱུང་ཟེར་ན། ཇི་ལྟར་ཁྱོད་ད་ལྟར་རབ་ཏུ་བྱུང་བ་ཡིན་ནམ། དེས་ཡིན་ལགས། ཁྱོད་ཀྱིས་ཚངས་པར་སྤྱོད་པ་ལེགས་པར་སྤྱད་དམ། སྤྱད་ལགས། ཁྱོད་ཀྱི་མིང་ཅི། དེས་བདག་གི་མིང་འདི་ཞེས་བགྱི་བ་ལགས། ཁྱོད་ཀྱི་མཁན་པོའི་མིང་ཅི། དོན་གྱི་སླང་དུ་མཚན་ནས་སྨོས་ཏེ་བདག་གིས་མཁན་པོའི་མིང་འདི་ཞེས་བགྱི་བ་ལགས། ཞེས་བརྗོད། ཚེ་དང་ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་རྣམས་པ་འདི་ལྟ་བུ་འདི་དག་འབྱུང་བ་འདི་ལྟ་སྟེ། མཛེ་དང་། འབྲས་དང་། ཕོལ་མིག་དང་། འབྲུམ་ཕྲན་དང་། ཤ་བཀྲ་དང་། ཁྱི་རྡོ་དང་། གཡའ་བ་དང་། རློག་པ་དང་། རྐང་ཤུ་དང། སྐེམ་ནད་དང་། སྐེམ་པ་དང་། བརྗེད་བྱེད་དང་། བཀྲེས་ངབ་དང་། སྐྱ་སྤབ་དང་། རྐང་བམ་དང་། མཚན་པར་རྡོལ་བ་དང་། རིམས་དང་། རིམས་དྲག་པོ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། རིམ་ཉིན་རེ་བ་དང་། རྟག་པའི་རིམས་དང་། རིམས་ལྡང་དུབ་པ་དང་། ཤུ་བ་དང་། གསུད་པ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུག་བྲོ་བ་དང་། ཆུ་འགགས་པ་དང་། ངལ་བ་དང་། ལུས་ཚ་བ་དང་། རྩིབ་ལོགས་ཚ་བ་དང་། རུས་པ་ལ་ཟུག་པ་སྟེ། ལུས་ཀྱི་ནད་འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མ་མཆིས་ཞེས་བརྗོད། ཚེ་དང་ལྡན་པ་ཁྱོད་ཉོན་ཅིག །ཁྱོད་ལ་ད་ལྟ་ངས་གང་དྲིས་པ་དེ་ཉིད་དགེ་འདུན་གྱི་དབུས་སུ་ཡང་ཚངས་པ་མཚུངས་པར་སྤྱོད་པ་མཁས་པ་རྣམས་ཁྱོད་ལ་འདྲི་ཡིས། དེར་ཡང་ཁྱོད་ཀྱིས་མ་འཛེམ་པར་བྱོས་ལ། ཡིན་པ་ལ་ཡིན་ཞེས་སྨྲོས་ཤིག །མ་ཡིན་པ་ལ་མ་ཡིན་ཞེས་ལན་ཐོབ་ཅིག །ཁྱོད་མ་བོས་ཀྱི་བར་དུ་མ་འོང་བར་སྡོད་ཅིག །ངས་དགེ་འདུན་ལ་ཞུས་ལ་འོང་གི་ཞེས་བརྗོད། དགེ་འདུན་གྱི་ནང་དུ་འོངས་ཏེ་རྒན་པའི་མཐའ་ལོགས་སུ་འགྲེང་སྟེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། བདག་གིས་མཁན་པོ་མིང་འདི་ཞེས་བགྱི་བས། མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་མཆི་ཞིག་གམ། ཐམས་ཅད་ཀྱིས། གལ་ཏེ་ཡོངས་སུ་དག་ནའོ། །ཞེས་བརྗོད། མ་བརྗོད་ན་ཉེས་བྱས་སོ། །དེས་བསྒྲུབ་བྱ་ལ། དགེ་འདུན་གྱིས་གནང་གིས་ཤོག་ཅིག །ཅེས་བོས་ལ། ནང་དུ་གདིང་བའི་སྟེང་ནས་དགེ་འདུན་ལ་འཇུག་ཡོན་གྱི་ཕྱག་གསུམ་འཚལ་དུ་བཅུག་སྟེ། རང་གྲལ་དུ་འཁོད་དོ། །དེ་ནས་ལས་བྱེད་པས། བསྒྲུབ་བྱ་དེ་སྟོན་པ་དང་། དགེ་འདུན་དང་། རང་ལ་ཕྱག་གསུམ་གསུམ་འཚལ་དུ་བཅུག་སྟེ། རང་གི་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པོར་ཐལ་སྦྱར་གྱིས་འདུག་ཏུ་བཅུག་སྟེ། ཁྱོད་བསྙེན་པར་རྫོགས་པར་འདོད་པ་དེ་དགེ་འདུན་གྱི་ལས་ཀྱིས་སྒྲུབ་དགོས། དེ་ལ་འདི་བསྙེན་རྫོགས་ཀྱི་སྡོམ་པ་སྦྱིན་པའི་ལས་ཡིན་པས། སྦྱིན་ལས་མཚན་ཉིད་པ་ཐམས་ཅད་ལ་གསོལ་བ་གདབ་པ་སྔོན་དུ་འགྲོ་དགོས་པར་གསུངས་ཤིང་། དེར་མ་ཟད་བསྙེན་པར་རྫོགས་པ་དགེ་སློང་གི་སྡོམ་པ་དེ་མངོན་གྱུར་བཅུ་ཚང་བ་ལས་སྐྱེ་བས། འདིར་གསོལ་བ་མངོན་དུ་འགྱུར་བར་བྱ་བའི་ཕྱིར། སྦྱོར་ཆོག་ལྔ་པ་གསོལ་བ་འདེབས་པའི་སྐབས་ཡིན། དེ་ཡང་མཁན་པོས་ངོ་ཆེན་མཛད་དེ། ལས་བྱེད་པའི་ཚིག་གིས་ཐོག་དྲངས་ནས། གང་ལས་སྡོམ་པ་ཐོབ་པར་འགྱུར་བའི་དགེ་འདུན་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་སྟེ་མཚན་ཉིད་གསུམ་ལྡན་ལ་གསོལ་བ་འདེབས། དེ་ལ་ཆོ་གའི་ཚིག་ལ་ཟུར་ལྔ་ཡོད་དེ། ཉེས་པ་མ་ལུས་པ་སྤངས་ཤིང་ཡོན་ཏན་མཐའ་དག་རྫོགས་པའི་རྣམ་པར་གྲོལ་བ་ལ་བསྙེན་པ་དགེ་སློང་གི་དངོས་པོར་སྒྲུབ་ཏུ་གསོལ། འཁོར་བའི་གནས་བརྒལ་དཀའ་བ་འདམ་རྫབ་དང་འདྲ་བ་ནས་དྲང་དུ་གསོལ། སྔར་མ་ཐོབ་པའི་སྡོམ་པ་སྦྱིན་པའི་སྒོ་ནས་སོ་སོ་ཐར་པའི་སྡོམ་པ་མཆོག་དང་ལྡན་པར་བཟུང་དུ་གསོལ། དེའི་བླང་དོར་གྱི་ཐབས་མ་ནོར་བ་བསྟན་དུ་གསོལ། རྙེད་པ་དང་བཀུར་སྟི་ལ་མི་གཟིགས་པར་ཐུགས་བརྩེ་བས་ཀུན་ནས་བསླངས་ཏེ་བསྙེན་པར་རྫོགས་པ་དགེ་སློང་གི་སྡོམ་པ་གནང་བར་མཛད་དུ་གསོལ་སྙམ་པས་ཐམས་ཅད་ཀྱིས་གསན་པའི་རྗེས་ཟློས་གསལ་དག་འཐོན་པར་གྱིས་ཤིག །དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་མཛད་དུ་གསོལ། དགེ་འདུན་བཙུན་པ་རྣམས་ཀྱིས་བདག་དྲང་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་བཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ཞེས་ལན་གསུམ་བཟླས། དེ་ལྟར་གསོལ་བ་བཏབ་པས། དགེ་འདུན་གྱིས་ཀྱང་ཅང་མི་གསུང་བའི་སྒོ་ནས་གནང་བ་བྱིན་པ་ཡིན་ནོ། །དེ་ནས་དགེ་སློང་ལས་བྱེད་པས། ཡོངས་སུ་དག་པར་དགེ་འདུན་ཐུགས་ཆེས་པའི་ཕྱིར་སྦྱོར་ཆོག་དྲུག་པ་ནང་དུ་བར་ཆད་དྲི་བའི་ཐོག་མར་སྔོན་འགྲོ་གསོལ་བའི་ལས་བགྱིད་པས། ཁྱེད་རང་རྗེས་ཟློས་བྱ་མི་དགོས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་ཚལ་ཏེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱི་གནང་བར་མཛོད་ཅིག་དང་། བདག་གིས་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་དྲི་བར་བྱའོ། །འདི་ནི་གསོལ་བའོ། །དེ་ནས་བསྒྲུབ་བྱ་དེ་རང་ལ་ཕྱག་གསུམ་འཚལ་དུ་བཅུག་སྟེ་སྔར་བཞིན་འདུག་ཏུ་བཅུག་ལ། ཁྱོད་བསྙེན་པར་རྫོགས་པར་བྱེད་པ་ལ་འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་བརྟགས་པའི་ཆེད་དུ་སྔར་གསང་སྟོན་གྱིས་ལྐོག་ཏུ་དྲིས་ཤིང་དགེ་འདུན་གྱི་དབུས་སུ་བར་ཆད་དང་མི་ལྡན་པར་བརྡ་སྤྲད་པ་ཡིན་མོད་ཀྱི། འོན་ཀྱང་བར་ཆད་གློ་བུར་བ་ཡིན་པས་གསར་དུ་བྱུང་བའང་སྲིད། སྔར་མ་དྲན་པ་དྲན་པའང་སྲིད་པ་དང་། གཙོ་བོར་དགེ་འདུན་ཐུགས་ཆེས་པ་ལ་སོགས་ཏེ་དགོས་པ་འགའ་ཞིག་ལ་ལྟོས་ནས་འདིར་ཡང་འདྲི་བ་ཡིན་པས་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཞེས་པ་ནས། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། ཞེས་པའི་བར་སྔར་བཞིན་དྲི་བར་བྱའོ། ༈ །དེ་ཡན་ཆད་ཀྱིས་སྦྱོར་བའི་ཆོས་རྣམས་ལེགས་པར་སོང་ནས། ད་འདིར་དངོས་གཞིའི་ཆོ་གའི་སྐབས་ཡིན། དེ་ལ་བསྙེན་པར་རྫོགས་པའི་སྡོམ་པ་འདི་ཆོས་ཉིད་ཀྱིས་ཐོབ་པ་མ་ཡིན་ཞིང་། ཡང་དག་པར་བླངས་པར་བརྡ་ལས་བྱུང་བ་ཡིན་པས་ཆོ་ག་ཕུན་སུམ་ཚོགས་པ་ལ་བརྟེན་ནས་བླང་དགོས། དེ་ཡང་ལུང་གཅིག་ལས་འཕྲོས་པ་བཅུ་པའི་སྐབས་ལས། མངོན་དུ་གྱུར་པ་རྣམ་པ་བཅུ་ལས་སྐྱེ་བར་གསུངས་ཏེ། བཅུ་གང་ཞེ་ན། སངས་རྒྱས་ཆོས་དང་སྟོན་པ་དང་། །མཁན་པོ་སློབ་དཔོན་བསྙེན་རྫོགས་འདོད། །ཡོ་བྱད་ཡོངས་སུ་དག་པ་དང་། །གསོལ་དང་ལས་ནི་མངོན་སུམ་མོ། །ཞེས་བསྡུས་པའི་དོན་འགལ་རྐྱེན་སྤངས་ཤིང་མཐུན་རྐྱེན་ཚང་བ་ལ་འདུ་ཡང་རེ་རེ་ནས་བརྡ་སྤྲོད་པའི་དབང་དུ་བྱས་ན། དོན་དམ་པའི་དཀོན་མཆོག་གསུམ་ནི། སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སྐྱབས་འགྲོའི་ཡུལ་དུ་གྱུར་པའི་དཀོན་མཆོག་གསུམ་སྟེ། འགོག་ལམ་གྱི་སྟེང་ནས་འཇོག་པས། དེ་ལ་ཡིད་ཆེས་ཀྱི་དད་པ་དང་ལྡན་པའི་སྒོ་ནས། འདིར་མངོན་སུམ་དུ་གྱུར་པ་ནི་བརྡར་བཏགས་པའི་དཀོན་མཆོག་གསུམ་སྟེ། དེ་ལ་སངས་རྒྱས་མངོན་དུ་གྱུར་པ་ནི། སྟོན་པའི་སྐུ་གཟུགས་བྱིན་བརླབས་ཀྱི་གཟི་འོད་འབར་བར་བཞུགས་པ་འདི་ལ་སངས་རྒྱས་དངོས་ཀྱི་འདུ་ཤེས་ཞོག །ཆོས་མངོན་དུ་གྱུར་པ་ནི། འདིར་བཞུགས་པའི་དགེ་སློང་རྣམས་བསླབ་པ་རིན་པོ་ཆེ་ལ་ནན་ཏན་སྙིང་པོར་མཛད་པས་སྒྲུབ་པའི་ཆོས་དང་། ལུང་གི་ཆོས་ཀྱང་ལས་ཀྱི་ཆོ་ག་དངོས་སུ་ཡོད་པ་འདིས་ཚང་། སྟོན་པ་མངོན་དུ་གྱུར་པ་ནི་སངས་རྒྱས་དང་ཟློས་པས་དགེ་འདུན་ལ་འཆད་ཅིང་། དེ་ཡང་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་དགོས་པ་ལས། གྲངས་ནི་ཡུལ་དབུས་དང་མཐའ་ཁོབ་ཀྱི་ཁྱད་པར་གྱིས། བཅུ་ཚོགས་དང་ལྔ་ཚོགས་ཡན་ཆད་ཚང་དགོས་པ་ལ། བོད་འདི་མཐའ་ཁོབ་ཡིན་ཀྱང་དགེ་འདུན་གྱི་གྲངས་ཡུལ་དབུས་དང་མཐུན་པར་བཞུགས། ཞེས་སམ། གལ་ཏེ་ལྔ་ཚོགས་ཡིན་ན། བོད་འདི་མཐའ་ཁོབ་ཡིན་པས་གྲངས་ཚང་བར་བཞུགས། ཞེས་བརྗོད། ཁ་སྐོང་གི་ཆོས་ལ་འདི་ཆོས་ཕྱོགས་པའི་ལས་ཡིན་པས་མི་འདུག་པར་འགྲེང་བ་མ་ཡིན་པ་སོགས་བཅུ་གསུམ་དང་ལྡན་དགོས་ཤིང་། དེའི་ནང་ནས་ཀྱང་དཀའ་ཤོས་འཁྲུལ་བཅས་མ་ཡིན་པ་ཞེས་བསྡམ་བྱའི་ཉེས་བྱས་ཚུན་ཆོད་ཀྱིས་མ་གོས་པ་དགོས་ཏེ། ལྟུང་མཐུན་བྱིན་བརླབས་བྱས་པ་ཚུན་ཆད་ཀྱིས་ཚང་། མ་འདུས་པ་དང་འདུས་པ་ཕྱིར་བཟློག་གི་མི་མཐུན་པ་གཉིས་དང་བྲལ་བ་དགོས་ཏེ། འདིར་འདུ་འོས་ཐམས་ཅད་འདུས་ཤིང་། འདུས་པ་རྣམས་ཀྱང་ཅང་མི་གསུངས་པའི་ཚུལ་གྱིས་གནང་བ་སྟེར་བར་བཞུགས་པས་ཚང་། མཁན་པོ་མངོན་དུ་གྱུར་པ་ནི། བརྟན་མཁས་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པ་ལ་གསོལ་བ་བཏབ་ཅིང་ཞལ་གྱིས་བཞེས་པ་ཞིག་དགོས་ན་དེ་ཡང་ཚང་། སློབ་དཔོན་མངོན་དུ་གྱུར་པ་ལ་གཉིས་ལས། གསང་སྟེ་སྟོན་པའི་སློབ་དཔོན་ཁ་སྐོང་གི་ཆོས་དང་ལྡན་ཞིང་། འགྲོ་བ་བཞི་དང་བྲལ་བ། ལྐོག་ཏུ་བར་ཆད་དྲིས་ནས་ནང་དུ་འོང་བ་ཞུ་བ་ལ་མཁས་པ། དགེ་འདུན་གྱི་ལས་ཀྱི་བསྐོས་ཤིང་ཆགས་པ་དགོས་ན་དེ་ཡང་ཚང་། ལས་ཀྱི་སློབ་དཔོན་ཁ་སྐོང་བར་འོས་པ་དགེ་འདུན་གྱི་དབུས་སུ་ལས་ཀྱི་ཆོ་ག་བརྡ་སྤྲོད་པ་ལ་མཁས་པ་ཞིག་དགོས་ཏེ་བདག་གིས་བགྱིད་པས། གང་ལས་བླང་བའི་ཡུལ་རྣམས་མངོན་སུམ་དུ་གྱུར་པར་བཞུགས་པ་ཡིན། ལེན་པ་པོ་བསྙེན་པར་རྫོགས་འདོད་མངོན་དུ་གྱུར་པ་ནི། ཁྱེད་རང་གི་སྟེང་ནས་རྩི་སྟེ། དེ་ལ་གཉིས་ལས། ལུས་རྟེན་ནི། བསྒྲུབ་བྱ་བཞིར་མ་ལོངས་ཤིང་། བསྙེན་རྫོགས་ཀྱི་སྡོམ་པ་དང་སྡོམ་རོས་རྒྱུད་མ་བཀག་པ། ཉེས་མེད་ཀྱི་སྡོམ་པ་སྐྱེ་བ་ལ་ཚིག་སྔ་མ་དགེ་ཚུལ་མན་ཆད་ཐོབ་ཅིང་མ་ཉམས་པ་དགོས་ན་ཐམས་ཅད་ཚང་། བསམ་རྟེན་ལ་རྒྱུའི་ཀུན་སློང་ཞེ་ཐག་པ་ནས་སྡོམ་པ་ལེན་འདོད་དགོས་ཏེ། ཁྱོད་རང་གིས་དོན་དུ་གཉེར་ནས་བསྒྲུབས་པས་ཚང་ཞིང་། དུས་ཀྱི་ཀུན་སློང་སྡོམ་པ་ཐོབ་དུས་ཐོབ་ཤེས་ཀྱི་བསམ་པ་སྐྱེ་རུང་ཞིག་དགོས་ཏེ། དེ་ཡང་ཁྱེད་ལ་སྐྱེ་རུང་དུ་ཡོད་ཅིང་། ངེད་ཀྱིས་ཀྱང་བརྡ་སྤྲོད་པ་ཡིན། འགལ་རྐྱེན་ངེས་པ་ལྔ་དང་བྲལ་བ་ཞིག་དགོས་ཏེ། སེམས་ཅན་ཆེ་གེ་མོ་ཞིག་ལ་སྤོང་ངོ་ཞེས་པ་ལྟ་བུ་སེམས་ཅན་ངེས་པ་དང་། ཡུལ་ག་གེ་མོ་ཞིག་ཏུ་བསྲུང་ངོ་ཞེས་པ་ལྟ་བུ་ཡུལ་ངེས་པ་དང་། ཟླ་བ་གཅིག་གམ་ལོ་གཅིག་གི་བར་དུ་བསྲུང་ངོ་ཞེས་པ་ལྟ་བུ་དུས་ངེས་པ་དང་། འཐབ་རྩོད་ཀྱི་ཚེ་མ་གཏོགས་བསྲུང་ངོ་ཞེས་པ་ལྟ་བུ་ཚེ་ངེས་པ་དང་། དགེ་སློང་གི་བསླབ་བྱ་ལས་ཕྲ་ཞིང་ཕྲ་བ་རྣམས་བསྲུང་མི་ནུས་པས་རགས་པ་འགའ་ཞིག་བསྲུང་སྙམ་པ་ལྟ་བུ་ཡན་ལག་ངེས་པ་སྟེ། ངེས་པ་དེ་རྣམས་དང་བྲལ་བ་ཞིག་དགོས། མཐུན་རྐྱེན་ཕུན་ཚོགས་གསུམ་དང་ལྡན་པ་ཞིག་དགོས་ཏེ། བླང་བྱའི་ཡུལ་མཁན་སློབ་དགེ་འདུན་དང་བཅས་པ་དང་། བྱེད་པ་ལས་ཀྱི་ཆོ་ག་ལ་སྡོམ་པ་སྐྱེ་བའི་ནུས་པ་ཡོད་སྙམ་པ་ཡིད་ཆེས་ཀྱི་དད་པ་དང་ལྡན་ཞིང་། རང་ཉིད་ཀྱིས་ཀྱང་བསླབ་བྱ་ལ་ཚུལ་བཞིན་དུ་སློབ་ནུས་སོ་སྙམ་པའི་བསམ་པ་དང་ལྡན་པ་ཞིག་དགོས། དེ་ཐམས་ཅད་མྱང་འདས་ཀྱི་བསམ་པས་ཟིན་པ་ཞིག་དགོས་ཏེ་ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གི་སྡུག་བསྔལ་ལས་སྐྱོབ་པའི་ཆེད་དུ་ལེན་པ་འཇིགས་སྐྱོབ་ཀྱི་ཚུལ་ཁྲིམས་དང་། ཚེ་འདིའི་བདེ་སྐྱིད་ཐོབ་འདོད་དམ། ཕྱི་མར་ལྷ་མིའི་བདེ་འབྲས་འདོད་ནས་ལེན་པ་ལེགས་སྨོན་ཀྱི་ཚུལ་ཁྲིམས་ཙམ་ལས། དེ་གཉིས་སོ་ཐར་གྱི་སྡོམ་པར་མི་འགྱུར་ཏེ། སོ་སོར་ཐར་བའི་སྡོམ་པ་འདི་ནི་ངེས་པར་འབྱུང་བའི་ཚུལ་ཁྲིམས་ཡིན་པས། སྡུག་བསྔལ་ཅན་གྱི་འཁོར་བ་ལས་ཐར་པ་མྱང་འདས་ཐོབ་པའི་ཆེད་དུ་བླང་དགོས། དེ་ཡང་ཐར་པའི་མཆོག་རྫོགས་པའི་སངས་རྒྱས་ཀྱི་གོ་འཕང་ཡིན་པས་བསམ་པ་འདི་བཞིན་དུ་གྱིས། ཁམས་གསུམ་འཁོར་བ་ན་རྒྱུ་བའི་སེམས་ཅན་འདི་ཐམས་ཅད་འདོད་པ་བདེ་བ་འདོད་ཀྱང་ཐམས་མི་མཁས་པས། ལ་ལ་ནི་སྡུག་བསྔལ་གྱི་རྒྱུ་མི་དགེ་བ་རྔམ་པོ་ཆེ་ལ་སྤྱོད། ལ་ལ་ནི་ལས་ངན་གྱི་འབྲས་བུ་སྡུག་བསྔལ་དངོས་ཀྱི་ཡོ་ལང་ལ་སྤྱོད་པས་ཉམ་ཐག་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་མི་ཕན་རྣམ་གྲོལ་གཏན་གྱི་བདེ་བ་ལ་འགོད་དགོས། དེའི་ནུས་པ་ད་ལྟ་བདག་ལ་མི་འདུག་པས། འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེ་ཐོབ་བར་བྱེད་པ་ལ། རྒྱུ་ཚོགས་རྒྱ་ཆེན་པོ་བསགས། སྤང་བྱ་སྒྲིབ་པ་མ་ལུས་པ་སྤོང་དགོས། དེའི་སྤང་གཉེན་ཏིང་ངེ་འཛིན་ལས་བྱུང་བའི་ཟག་མེད་ཀྱི་ཤེས་རབ་བསྐྱེད་པའི་གཞི་ནི་ཚུལ་ཁྲིམས་རྣམ་པར་དག་པ་ལ་རག་ལས་པ་ཡིན་ཏེ། མདོ་ལས། ཚུལ་ཁྲིམས་ལ་བརྟེན་ཚུལ་ཁྲིམས་ལ་གནས་ན། །རིམ་གྱིས་འཕགས་པའི་བདེན་པ་བཞི་པོ་དག །ཡང་དག་ཇི་ལྟ་བ་བཞིན་རྟོགས་པར་འགྱུར། །ཞེས་གསུངས། དེས་ན་སོ་སོར་ཐར་པའི་སྡོམ་པའི་མཆོག་བ སྙེན་པར་རྫོགས་པ་དགེ་སློང་གི་སྡོམ་པ་ཡིན་པས། དེ་བླངས་ལ་ཇི་སྲིད་འཚོའི་བར་དུ་ལེགས་པར་བསྲུང་སྙམ་པ་གྱིས། ཡོ་བྱད་མངོན་དུ་གྱུར་པ་ནི། ཆོས་གོས་གསུམ་དངོས་སམ་རྒྱུར་རུང་བ་དང་། ལྷུང་བཟེད་རུང་བ་ཚད་ལྡན་དགེ་འདུན་ལ་བསྟན་པ་རྣམས་མཁན་པོས་བྱིན་གྱིས་བརླབས་ཏེ། གནང་བ་དང་། གདིང་པ་དང་ཆུ་ཚགས་ཀྱང་མཁན་པོས་ཚིག་གིས་གནང་བ་དགོས་ཏེ། བརྙན་པོ་ཚུན་ཆད་ཀྱིས་ཚང་བ་ཡིན། ཡོངས་སུ་དག་པ་མངོན་དུ་གྱུར་པ་ནི། འགལ་རྐྱེན་བར་ཆད་ཀྱི་ཆོས་དང་མི་ལྡན་པ་ཞིག་དགོས་ཏེ། གསང་སྟོན་གྱི་ལྐོག་ཏུ་དྲིས་ཤིང་། ཁོ་བོས་ཀྱང་དགེ་འདུན་གྱི་དབུས་སུ་དྲིས་པ་ལ་ཁྱེད་རང་གིས་ལན་བཏབ་པའི་སྒོ་ནས་བར་ཆད་མེད་པར་རྟོགས་པས་ཚངས་བ་ཡིན། གསོལ་བ་མངོན་དུ་གྱུར་པ་ནི། བསྙེན་པར་རྫོགས་པའི་ཕྱིར་བསམ་པ་ཐག་པ་ནས་དགེ་འདུན་ལ་གསོལ་བ་ལན་གསུམ་བཏབ་པ་དེས་ཚང་བ་ཡིན། ལས་མངོན་དུ་གྱུར་པ་ནི། གསོལ་བ་དང་བཞིའི་ལས་ཀྱི་ཆོ་ག་ཚང་ལ་མ་ནོར་མ་འཁྲུགས་པ་ཞིག་དགོས་ཏེ། ད་ལྟ་ཉིད་དུ་ཁོ་བོས་སྒྲུབ་པས་ཚང་བར་གདའ། དེ་ལྟར་ན་མངོན་དུ་གྱུར་པ་བཅུས་སྡོམ་པ་སྐྱེ་བའི་རྒྱུ་ཚོགས་ཐམས་ཅད་ཚང་བ་ཡིན། དེ་ལ་མདོ་སྡེ་པ་ཡན་ཆད། ངེས་འབྱུང་གི་བསམ་པས་ཉེར་ལེན་གྱི་རྒྱུ་བྱས། མངོན་དུ་གྱུར་པ་བཅུས་ལྷན་ཅིག་བྱེད་རྐྱེན་བྱས་ཏེ། དགེ་སློང་གི་སྡོམ་པ་སེམས་པ་དགེ་བ་ས་བོན་དང་བཅས་པའི་ངོ་བོར་སྐྱེ་བར་བཞེད་ནའང་། གཞི་ཐམས་ཅད་ཡོད་པར་སྨྲ་བའི་སྡེ་པ་རང་གི་གྲུབ་མཐའ་དང་བསྟུན་ན། རྒྱུ་དྲུག་དང་རྐྱེན་བཞི་ལས། རྒྱུའི་རྐྱེན་རང་རྒྱུད་ཀྱི་འབྱུང་བ་བཞི་དང་། བདག་པོའི་རྐྱེན་གཞན་གྱི་རྣམ་པར་རིག་བྱེད་དེ་རྐྱེན་གཉིས་ལ་བརྟེན་ནས། བྱེད་རྒྱུ་དང་། ལྷན་ཅིག་འབྱུང་བ་དང་། སྐལ་མཉམ་སྟེ་རྒྱུ་གསུམ་གྱིས་བསྙེན་པར་རྫོགས་པ་དགེ་སློང་གི་སྡོམ་པ་རྣམ་པར་རིག་བྱེད་དང་རིག་བྱེད་མ་ཡིན་པ་གཉིས་ཀྱིས་བསྡུས་པའི་གཟུགས་རྫས་བདུན་ནམ་སྤོང་བ་བདུན་ལྡན་གྱི་ངོ་བོར་སྐྱེ་བ་ཡིན་ནོ། །ད་ཧྲིལ་གྱིས་དྲིལ་ན། དཀོན་མཆོག་གསུམ་མཁན་སློབ་དགེ་འདུན་དང་བཅས་པ་ལ་སེམས་དང་བའི་སྒོ་ནས། སེམས་ཅན་ཐམས་ཅད་ཀྱི་དོན་དུ་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་བསྙེན་རྫོགས་ཀྱི་སྡོམ་པ་བླངས་ལ། དུས་དེང་ནས་ཇི་སྲིད་མ་ཤིའི་བར་དུ་དགེ་སློང་གི་སྤང་བྱ་མཐའ་དག་ནི་སྤང་། གཉེན་པོ་མཐའ་དག་ནི་རྒྱུད་ལ་བསྟེན་པར་བྱ་སྙམ་དུ་ལེན་སེམས་དང་བསྲུང་སེམས་ཀྱི་བསམ་པ་མ་ཡེངས་པར་གྱིས། རྗེས་ཟློས་བྱ་མི་དགོས། ཆོ་ག་ལས་འདས་ན་ལས་མི་འཆགས་སོ་ཞེས་གསུངས་པས་དགེ་འདུན་རྣམས་སྤྱོད་ལམ་བསྟུན། བསྟན་པ་དང་བསྒྲུབ་བྱ་ལ་ཕན་སེམས་དང་། བསམ་པ་ཐག་པ་ནས་ལས་བྱེད་འདོད་དང་། ངེས་འབྱུང་གི་བསམ་པས་ཟིན་པ་སྟེ་ཐུགས་དགོངས་གསུམ་གསལ་བཏབ་ནས་གསོལ་བའི་ལས་ལ་ཐུགས་གཏད་པར་ཞུ་ཞིང་། ཆད་ལྷག་བྱུང་ན་གསོ་བར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་དོ། །འདི་ནི་གསོལ་བའོ། །གསོལ་བ་ཐལ། ལས་བྱེད་པ་དང་པོ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པ་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །ལས་བརྗོད་པ་དང་པོ་ཐལ། གཉིས་པ་ལ་ཐུགས་གཏད་པར་ཞུ་བྱས་ལ། གཉིས་པ་བཟླས་ཏེ། ལས་བརྗོད་པ་གཉིས་པ་ཐལ། གསུམ་པའི་སྐབས་སུ་ལས་འཆགས་པ་ཡིན་ཏེ། མདོ་རྩར། བརྗོད་པ་ཐ་མ་གང་ཡིན་པའི་ཆ་གསུམ་པ་ལ་གྲུབ་པ་ཉིད་དོ། །ཞེས་གསུངས་པས། ཁོ་ན་ཉིད་མཆི་སྟེ་ཡན་ཆད་ངོ་བོ་བརྗོད་པ། དེ་ནས་བསྙེན་པར་རྫོགས་པར་གསོལ་ན་ཞེས་པའི་བྱ་བ་བརྗོད་པ། དེའི་སླད་དུ་མན་ཆད་བྱེད་པ་བརྗོད་པ་ཡིན་པས། བརྗོད་པ་དང་པོ་གཉིས་རྫོགས་པ་གསོལ་ན། ཞེས་པ་དེ་འགག་པ་དང་མཉམ་དུ་ཁྱོད་ལ་སྡོམ་པ་སྐྱེ། ངེད་སློབ་དཔོན་དུ་འགྱུར་བ་ཡིན། དེའི་སླད་དུ་ཞེས་པའི་ཚིག་བྱུང་བ་ན་སྡོམ་པ་སྐྱེས་ཚར་བས་བདག་དགེ་སློང་དུ་གྱུར་སྙམ་དུ་རྫོགས་པའི་འདུ་ཤེས་བསྐྱེད་པ་གལ་ཆེ་བས་སེམས་མ་ཡེངས་པར་གཏད་མཛོད། དགེ་འདུན་རྣམས་བརྗོད་པ་གསུམ་པ་ལ་ཐུགས་གཏད་པར་ཞུ་བྱས་ལ། གསུམ་པ་བཟླས་ཏེ། ལས་བརྗོད་པ་གསུམ་པ་ཐལ། ལས་ཀྱི་མཇུག་སྡུད་ལ་ཐུགས་གཏད་པར་ཞུ། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ནོ། །གལ་ཏེ་ཆོ་ག་ནོར་བའམ་དགེ་སློང་སོང་བ་ལ་སོགས་པས་ལས་འཁྲུགས་ནས་གསོལ་བ་བསྐྱར་དགོས་ན། བཙུན་པ་དག་ཡང་གསོལ་བ་བགྱིའོ། །བྱས་ལ་སྐྱོར། བརྗོད་པ་སྐྱོར་ན། བཙུན་པ་དག་ཡང་རྗེས་སུ་སྒྲོག་གོ་བྱས་ལ་སྐྱོར། གཉིས་པ་སྐྱོར་ན། བཙུན་པ་དག་ཡང་གསོལ་བ་བགྱི་ཞིང་རྗེས་སུ་ཡང་སྒྲོག་གོ་བྱས་བ་བསྐྱར་རོ། །དེ་ལྟར་ན་ཁྱེད་ཀྱི་རྒྱུད་ལ་བསྙེན་པར་རྫོགས་པའི་སྡོམ་པ་འཆལ་ཚུལ་གྱི་རྒྱུན་སྡོམ་ཞིང་འགོག་པ་ཆུའི་ཆུ་ལོན་ལྟ་བུ་དེ་ཐོབ་ཅིང་མངོན་དུ་གྱུར་པ་ཡིན་པས་བདག་དགེ་སློང་གི་དངོས་པོར་གྱུར་ཏོ་སྙམ་དུ་དགའ་བ་སྒོམས་ཤིག །དེས་དངོས་གཞི་གྲུབ་ནས་མཇུག་གི་ཆོ་ག་ལ་གཉིས་ཡོད་པའི། དང་པོ་རྫོགས་པའི་དུས་གོ་བ་དེ་དགེ་སློང་ཆེ་གེ་མོས་མཛོད་ཅིག །ཅེས་བསྒོ། དེས་ཀྱང་ཉིན་མོ་ཡིན་ན་ཉི་མ་རྫོགས་པའི་སར་ཕྱིན་ཏེ། ཐུར་མ་སོར་བཞི་པས་གཞལ་ཞིང་། གྲིབ་མ་སོར་རེ་ལ་རྐང་པ་དང་། བཞི་ལ་སྐྱེས་བུ་ཞེས་བྱ་བའི་ཐ་སྙད་དང་སྔ་ཕྱིའི་ཆ་ཡང་ངེས་པར་བྱ། མཚན་མོ་ཡིན་ན་སྐར་ཁོངས་ཀྱིས་ཐུན་ཚད་ངེས་པར་བྱས་ནས། ཁྱོད་བསྙེན་པར་རྫོགས་པ་དགེ་སློང་དུ་སྒྲུབ་པའི་ཆོ་ག་ལ་སྦྱོར་དངོས་རྗེས་གསུམ་ཡོད་པའི། སྦྱོར་དངོས་གཉིས་ཀྱིས་ཁྱོད་ཀྱི་རྒྱུད་ལ་དགེ་སློང་གི་སྡོམ་པ་ཐོབ་པ་ཡིན། ད་མཇུག་ཆོག་ལ་གཉིས་ཡོད་པའི་དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་རྫོགས་པའི་དུས་གོ་བའི་དབང་དུ་བྱས་ན། ཞེས་པ་ནས། མཁན་པོ་ཆེ་གེ་དང་། ཞེས་པའི་བར་སྔར་ལྟར་ལས། དེ་ནས་ལས་ཀྱི་སློབ་དཔོན་ཆེ་གེ་དང་། གསང་སྟེ་སྟོན་པའི་སློབ་དཔོན་ཆེ་གེ་དང་། དད་པའི་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས་པའི་སྡོམ་པ་ཐོབ་པ་ཡིན་པས། དེ་ངེས་པར་བྱས་ནས། བསྙེན་བཀུར་གྱི་གནས་ནི། རང་བས་བསླབ་པ་རྒན་པས་རང་བཞིན་དུ་གནས་པའི་དགེ་སློང་མཚན་མཐུན་པ་རྣམས་ཡིན། གནས་མ་ཡིན་པ་ནི། རང་ལས་དུས་ཀྱིས་གཞོན་པའི་དགེ་སློང་རྣམས་དང་། རྒན་ཡངས་གཞན་ན་གནས་པ་སོགས་དམིགས་བསལ་གསུང་པ་རྣམས་དང་། དགེ་སློང་མ་རྒན་གཞོན་ཐམས་ཅད་དང་། བསྙེན་པར་མ་རྫོགས་པའི་རབ་བྱུང་རྣམས་དང་། དགེ་བསྙེན་མན་ཆད་ཁྱིམ་པ་ཐམས་ཅད་ཡིན། དེ་ཡང་རྒན་གཞོན་གྱི་ཁྱད་པར་ཞེས་པ་ནས། ཕྱག་དང་བསྙེན་བཀུར་སྟོབ་པ་བྱུང་ན་དང་དུ་ལོང་། དེ་ལྟར་རྩིས་པས་དགེ་སློང་ནང་དུས་མཉམ་པ་བྱུང་ན། ཞེས་པ་ནས། དེ་ལ་གསན་པས་མཆི་བར་གདའ། ཞེས་པའི་བར་སྔར་ལྟར་རོ། །དེ་ནས་ལས་བྱེད་པས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་སེམས་ལ་བཞག་ནས་ལག་ལེན་ལ་ཐེབས་པ་བྱ་དགོས། ད་མཇུག་ཆོག་གཉིས་པ་ཐོབ་པ་མི་ཉམས་ཤིང་འཕེལ་བར་བྱ་བའི་ཆེད་དུ་གདམས་ངག་བརྗོད་པའི་སྐབས་ཡིན། དེ་ཡང་ཁྱོད་ཀྱིས་དགེ་སློང་གི་སྡོམ་པ་ཐོབ་པ་ཙམ་གྱིས་མི་ཆོག །གཅེས་སྤྲས་ཀྱི་སྒོ་ནས་བསྲུང་དགོས་ལ། དེའི་བླང་དོར་རྣམས་ཤེས་པའི་དོན་དུ་གདམས་ངག་བཅུ་གཅིག་གསུངས་པ་རྣམས་ཀྱང་། བསླབ་བྱ་ཡུལ་དང་། ཡུལ་ཅན་གཉེན་པོ་ལ་གདམས་པ་གཉིས་སུ་འདུ་ཞིང་། བསླབ་བྱ་ཡུལ་ལ་གདམས་པ་ལའང་། བསླབ་བྱའི་གཙོ་བོ་རྣམས་དངོས་སུ་བརྗོད་པ་དང་། མ་བརྗོད་པ་གཞན་དུ་ཁ་འཕངས་པ་གཉིས་ལས། ཐོག་མར་བསླབ་བྱའི་གཙོ་བོ་རྣམས་དངོས་སུ་བརྗོད་པའི་སྐབས་ཡིན། དེ་ལ་རྣམ་དག་རྣམ་པ་བཞི་ལས། དང་པོ་བརྟེན་བྱ་འཚོ་བ་རྣམ་དག་ལ་གདམས་པ་ནི། དེ་ལྟར་ལེགས་པར་ཐོབ་པའི་ཚངས་སྤྱོད་མི་ཉམས་པའི་ཆེད་དུ་མཐའ་གཉིས་སྤངས་པའི་གནས་བཞི་ལ་བརྟེན་དགོས་ཞེས་སྤྱིར་འདོམས་པ་ནི་འདི་ཡིན་ཏེ། ཚེ་དང་ལྡན་པ་མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་གནས་སུ་གསུངས་ཏེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །བྱེ་བྲག་ཏུ་གདམས་པ་ལ་བཞི་ལས། གོས་མཐའ་གཉིས་སུ་མ་ལྟུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བའི་འདོད་པ་བསོད་ཉམས་ཀྱི་མཐའ་སྤངས་ཏེ། གོས་ངན་ངོན་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། བཞི་གང་ཞེ་ན། གོས་ཀྱི་ནང་ན་ཕྱག་དར་ཁྲོད་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་ཕྱག་དར་ཁྲོད་ཀྱི་གོས་ཀྱིས་འཚོ་བར་སྤྲོའམ། དེས་སྤྲོ་ལགས། ཞེས་བརྗོད། གོས་བཟང་པོ་ཀཪྵ་པ་ན་འབུམ་རི་བ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་དར་རམ། རས་ཡུག་ཆེན་ནམ། བེའུ་རས་སམ། དར་ལའམ། མོན་དར་རམ། བེའུ་རས་ཡུག་ཆེན་ནམ། བེའུ་རས་དམར་པོའམ། བེའུ་ཕྲུག་གམ། ལ་དམར་རམ། ཡུལ་ཀ་ཤི་ཀའི་རས་ཕྲན་ནམ། ཁ་དོག་རན་པའམ། ཁ་དོག་ངན་པའམ། བལ་གོས་སམ། ཤ་ནའི་རས་སམ། ཟར་མའི་རས་སམ། རས་གོས་སམ། དུ་གུ་ལའི་རས་སམ། ཀོ་ཏཾ་པའི་རས་སམ། ཉི་འོག་གི་གོས་སམ། གཞན་ཡང་གོས་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། ཞེས་བརྗོད། གཉིས་པ་ཟས་མཐའ་གཉིས་སུ་མ་ལྷུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བའི་འདོད་པ་བསོད་ཉམས་ཀྱི་མཐའ་སྤངས་ཏེ་ཟས་ངན་ངོན་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །ཟས་ཀྱི་ནང་ན་བསོད་སྙོམས་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་བསོད་སྙོམས་ཀྱི་ཟས་ཀྱིས་འཚོ་བར་སྤྲོའམ། དེས་སྤྲོ་ལགས། ཟས་བཟང་པོ་རོ་བརྒྱ་པ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་འབྲས་ཆེན་ནམ། སྐྱོ་མའམ། ཐུག་པའམ། ལྔ་སྟོན་ནམ། བརྒྱད་སྟོན་ནམ། བཅུ་བཞི་སྟོན་ནམ། ཉ་སྟོན་ནམ། རྟག་རེས་འཁོར་རམ། མགྲོན་དུ་བོས་པའམ། འཕྲལ་ལ་བོས་པའམ། སྦགས་པའམ། གཞན་ཡང་ཟས་རུང་བ་གང་དགེ་འདུན་ནམ་གང་ཟག་ལས་རྙེད་ན་དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། གསུམ་པ་གནས་མལ་མཐའ་གཉིས་སུ་མ་ལྷུངས་པ་བརྟེན་པར་གདམས་པ་ལའང། བཟང་པོ་དོན་དུ་གཉེར་བ་འདོད་པ་བསོད་ཉམས་ཀྱི་མཐའ་སྤངས་ཏེ་ཤིང་དྲུང་གི་གནས་མལ་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །གནས་མལ་གྱི་ནང་ན་ཤིང་དྲུང་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་ཤིང་དྲུང་གི་གནས་མལ་གྱིས་འཚོ་བར་སྤྲོའམ། དེས་སྤྲོ་ལགས། ཁང་པ་བརྩེགས་པ་ལྔ་བརྒྱ་པ་ཡང་འབད་རྩོལ་མེད་པས་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱོད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤོང་བར་གདམས་པ་ནི། ལྷག་པར་རྙེད་ན་ཁང་པའམ། སྔ་ཁང་ངམ། ཁང་པ་བརྩེགས་པའམ། བསིལ་ཁང་ངམ། སབ་མོས་བསྐོར་བའམ། བ་གམ་མམ། ཁང་བཟང་ངམ། སྒོ་ཁང་གི་སྟེང་གི་བསིལ་ཁང་ངམ། ཁང་སྟེང་གི་ཡོལ་ཁང་ངམ། ཡོལ་ཁང་ངམ། སྤང་ལེབ་ཁང་ངམ། ས་ཕུག་གམ། བྲག་ཕུག་གམ། རི་ཕུག་གམ། རྩྭའི་སྤྱིལ་བུའམ། ལོ་མའི་སྤྱིལ་བུའམ། འཆག་སར་བྱས་པའམ། འཆག་སར་མ་བྱས་པའམ། བྱ་སྐྱིབས་སུ་བྱས་པའམ། བྱ་སྐྱིབས་སུ་མ་བྱས་པའམ། གཞན་ཡང་གནས་མལ་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། བཞི་པ་སྨན་མཐའ་གཉིས་སུ་མ་ལྷུང་བ་བསྟེན་པར་གདམས་པ་ལའང་། བཟང་པོ་དོན་དུ་གཉེར་བ་འདོད་པ་བསོད་ཉམས་ཀྱི་མཐའ་སྤངས་ཏེ་གཞན་གྱིས་ཁུ་བ་བཀུས་ཤིང་བོར་བ་སྙིགས་མ་ཙམ་གྱིས་ཆོག་ཤེས་པར་གྱིས་ཤིག་ཅེས་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །སྨན་གྱི་ནང་ན་བཀུས་ཏེ་བོར་བ་ནི་རུང་བརྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོ་བའི་བར་དུ་བཀུས་ཏེ་བོར་བའི་སྨན་གྱིས་འཚོ་བར་སྤྲོའམ། དེས་སྤྲོ་ལགས། སྨན་བཟང་པོ་རོ་ནུས་ཕུན་སུམ་ཚོགས་པའང་འབད་རྩོལ་མེད་པར་རྙེད་ཅིང་ཞེན་ཆགས་མི་སྐྱེ་ན་ལོངས་སྤྱད་པས་ཆོག་གོ་ཞེས་ངལ་ཞིང་དུབ་པའི་མཐའ་སྤང་བར་གདམས་པ་ནི། ལྷག་པར་རྙེད་ན་ཞུན་མར་རམ། འབྲུ་མར་རམ། སྤྲང་རྩིའམ། བུ་རམ་གྱི་དབུ་བའམ། དུས་སུ་རུང་བའམ། ཐུན་ཚོད་དུ་རུང་བའམ། ཞག་བདུན་པའམ། འཚོ་བའི་བར་དུ་བཅང་པའམ། རྩ་བའི་སྨན་ནམ། སྡོང་བུའི་སྨན་ནམ། ལོ་མའི་སྨན་ནམ། མེ་ཏོག་གི་སྨན་ནམ། འབྲས་བུའི་སྨན་ནམ། གཞན་ཡང་སྨན་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོངས་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་འཆའ་ལགས། ཞེས་བརྗོད། དེ་རྣམས་ཀྱིས་བརྟེན་བྱ་འཚོ་བ་རྣམ་དག་ལ་གདམས་པ་སོང་ནས། གཉིས་པ་བསྲུང་བྱ་ཚུལ་ཁྲིམས་རྣམ་དག་ལ་གདམས་པ་ནི། དགེ་སློང་གི་དངོས་པོ་འཇིག་པར་བྱེད་པ་ཕས་ཕམ་བཞི་ཆ་དང་བཅས་པ་སྤང་དགོས་སོ་ཞེས་འདོམས་པ་ལ་སྤྱི་དང་བྱེ་བྲག་གཉིས་ལས། སྤྱིར་འདོམས་པ་ནི། མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་ལྟུང་བར་འགྱུར་པའི་ཆོས་སུ་གསུངས་ཏེ། དགེ་སློང་གིས་དེ་དག་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་སུ་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །བྱེ་བྲག་ཏུ་གདམས་པ་ལ་བཞི་ལས། དང་པོ་ནང་སེམས་ཅན་ལ་ཆགས་པ་མི་ཚངས་སྤྱོད་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། བཞི་གང་ཞེ་ན། འདོད་པ་དང་། འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །འདོད་པ་སྤངས་པ་ནི་བསྔགས་ཏེ། བོར་བ་དང་། བསལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགོག་པ་དང་། ཉེ་བར་ཞི་བ་དང་། ནུབ་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཆགས་པའི་སེམས་ཀྱི་བུད་མེད་ཀྱི་ཡུལ་ལ་མིག་གཏད་དེ། མིག་གིས་བལྟ་བར་ཡང་མི་བྱ་ན། གཉིས་ཀྱིས། གཉིས་སྤྲད་དེ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས། བསླབ་པ་མ་ཕུལ། བསླབ་པ་ཉམས་པར་མ་བྱས་པར། མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེས་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་། བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། ཞེས་བརྗོད། གཉིས་པ་ཕྱི་རོལ་ཡོ་བྱད་ལ་ཆགས་པས་ཀུན་ནས་བསླངས་པ་མ་བྱིན་ལེན་གྱི་ཕམ་པ་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །མ་བྱིན་པར་ལེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །མ་བྱིན་པར་ལེན་པ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་རྐུ་སེམས་ཀྱིས་གཞན་གྱི་རྫས་ཏིལ་གྱི་ཕུབ་མ་ཙམ་ཡང་མ་བྱིན་པར་མི་བླང་ན་མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པར་རྐུ་བའི་གྲངས་སུ་གཏོགས་པ་བླངས་ན། ཇི་ཙམ་མ་བྱིན་པར་བླངས་པ་དེ་རྒྱལ་པོའམ་བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ་དགེ་སློང་དེ་ལྟར་མ་བྱིན་པར་ལེན་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་འདི་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་དང་། སྤྱད་པ་མ་ཡིན་པ་སྤངས་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། གསུམ་པ་ཞེ་སྡང་གིས་ཀུན་ནས་བསླངས་པ་སྲོག་གཅོད་ཀྱི་ཕམ་པ་ཆ་དང་བཅས་པ་སྤོང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །སྲོག་གཅོད་པ་ནི་བཅོམ་ལྡན་འདས་ཀྱི་རྣམ་གྲངས་དུ་མས་སྨད་དོ། །སྲོག་གཅོད་པ་སྤང་བ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་བསམ་བཞིན་དུ་སྲོག་ཆགས་གྲོག་སྦུར་ཙམ་ཡང་བསད་པར་མི་བྱ་ན། མིའམ་མིར་ཆགས་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་ཡང་དགེ་སློང་གང་མིའམ་མིར་ཆགས་པ་ལ་བསམ་བཞིན་དུ་རང་གིས་ལག་དར་ཏེ་སྲོག་གཅོད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བ་སླའོ་ཞེས་ཟེར་ཞིང་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲང་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤངས་པ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། བཞི་པ་དུག་གསུམ་གང་རུང་གིས་ཀུན་ནས་བསླངས་པ་རྫུན་དུ་སྨྲ་བའི་ཕམ་པ་ཆ་དང་བཅས་པ་སྤང་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །རྫུན་དུ་སྨྲ་བ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །རྫུན་དུ་སྨྲ་བ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཐ་ན་བཞད་གད་བྱ་བར་བསམས་ཏེ། ཤེས་བཞིན་དུ་བརྫུན་དུ་སྨྲ་བར་ཡང་མི་བྱ་ན། བསམ་བཞིན་དུ་མིའི་ཆོས་བླ་མ་སྨྲ་བ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རིག་པར་སྤྱོད་པ་མེད་ལ། མེད་བཞིན་དུ་འདི་ཤེས་སོ། །འདི་མཐོང་ངོ་། །ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། འདི་སྐད་ཅེས། ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་། །ཞེས་སྨྲས་ཏེ། གསོ་བ་གསོག་རྫུན་དུ་སྨྲས་སོ་ཞེས་ཟེར་ན། མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། ཅི་ཞིག་ཤེས་ཞེ་ན། སྡུག་བསྔལ་ཤེས་སོ། །ཀུན་འབྱུང་བ་དང་། འགོག་པ་དང་། ལམ་ཤེས་སོ། །ཅི་ཞིག་མཐོང་ཞེ་ན། ལྷ་རྣམས་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་མཐོང་ངོ་། །ལྷ་རྣམས་ཀྱིས་ཀྱང་བདག་མཐོང་ངོ་། །ཀླུ་རྣམས་དང་། ཞེས་པ་ནས་རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་མཐོང་ངོ་། །ཞེས་པའི་བར་གྱིས་འོག་མ་རྣམས་ལའང་འགྲེའོ། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོའོ། །ཀླུ་རྣམས་དང་ནས། རྡུལ་ཁྲོད་ཀྱི་ཟ་ཤ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ་། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་བདག་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་ནས། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ༴ ཕེབས་པར༴ སོ་སོར༴ རྟག་ཏུ་ཡང་༴ ཀླུ་རྣམས་དང་ཞེས་པ་ནས། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར༴ སོ་སོར༴ རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཞེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི༴ རྣམ་པར་སྔོས་པའི༴ རྣམ་པར་བརྣག་པའི༴ རྣམ་པར་ཕམ་པའི༴ རྣམ་པར་འབུས་གཞིགས་པའི༴ རྣམ་པར་ཟོས་པའི༴ རྣམ་པར་དམར་བའི༴ རྣམ་པར་འཐོར་བའི༴ རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་བོ། །མ་ཐོབ་བཞིན་དུ་བདག་གིས་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས༴ ཅི་ཡང་མེད་པའི༴ འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི༴ ཕྱིར་མི་འོང་བའི༴ དགྲ་བཅོམ་པ་ཉིད་ཀྱི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་འཕོ་བ་དང་། སྐྱེ་བ་དང་། ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་། གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ། །ཞེས་བྱ་བ་སྟེ་དགེ་སློང་གིས་གནས་འདི་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱོད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པའི་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས། ཞེས་བརྗོད། དེ་རྣམས་ཀྱིས་བསྲུང་བྱ་ཚུལ་ཁྲིམས་རྣམ་དག་ལ་གདམས་པ་སོང་ནས། གསུམ་པ་ཉམས་ལེན་སྤྱོད་པ་རྣམ་དག་ལ་གདམས་པ་ལ་ལྔ་ཡོད་པའི། དང་པོ་སེམས་ཅན་ལ་ཕར་མི་གནོད་པར་མ་ཟད་ཚུར་ལ་གནོད་པ་འབྱུང་ཡང་ལན་མི་བྱེད་པར་བཟོད་པར་བྱ་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དགེ་སྦྱོང་དུ་བྱེད་པའི་ཆོས་སུ་གསུངས་ཏེ། བཞི་གང་ཞེ་ན། ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་གཤེ་ཡང་སླར་མི་གཤེ་བར་བྱ་བ་དང་། ཁྲོས་ཀྱང་སླར་མི་ཁྲོ་བར་བྱ་བ་དང་། བརྡེགས་ཀྱང་སླར་མི་རྡེག་པར་བྱ་བ་དང་། མཚང་བྲུས་ཀྱང་ལར་མཚང་མི་འབྲུ་བར་བྱའོ། །ཇི་ལྟར་གནས་འདི་ལྟ་བུ་ལ་སྤྱོད་དམ། དེས་སྤྱོད་ལགས་ཞེས་བརྗོད། གཉིས་པ་བླང་དོར་གྱི་གནས་དེ་རྣམས་ཉམས་སུ་ལེན་པ་ཤིན་ཏུ་དཀའ་བས་བདག་གིས་མི་ནུས་སྙམ་ན། གཞན་གྱིས་དབང་མེད་དུ་ལེན་དུ་བཅུག་པ་མ་ཡིན་གྱི། ཁྱོད་རང་སྔ་མོ་ནས་མཆོག་ཏུ་འདོད་ཅིང་དོན་དུ་གཉེར་བ་གང་ཡིན་པ་དེ་གྲུབ་པ་ཡིན་པས། ད་གཉེན་པོ་བསྐྱེད་ནས་སྲུངས་ཤིག་ཅེས་མཆོག་ཏུ་འདོད་པའི་དོན་གྲུབ་པར་གདམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །ཁྱོད་སྔོན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ཀྱང་ཅི་མ་རུང་སྙམ་དུ་སྨོན་པ་གང་ཡིན་པ་དེ། ད་ཁྱོད་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་མཐུན་པ་དང་། གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །གསུམ་པ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་དང་ཁྱོད་གཉིས་དོན་གསུམ་གྱིས་མཉམ་པ་ཡིན་པས། གནས་བརྟན་བསྒྲེས་པོ་རྣམས་ཀྱིས་ཇི་ལྟར་སློབ་པ་བཞིན་དུ་བསླབ་དགོས་ཞེས་འདོམས་པ་ནི་འདི་ཡིན་ཏེ། ཚེ་དང་ལྡན་པ་ཁྱོད་ཉོན་ཅིག །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེ་རིང་བསྙེན་པར་རྫོགས་པས་ཀྱང་བསླབ་བོ། །དེ་རིང་བསྙེན་པར་རྫོགས་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་བསླབ་བོ། །དེ་ལྟར་ན་ཚུལ་ཁྲིམས་ཉིད་ཀྱིས་མཉམ་པ་དང་། བསླབ་པ་ཉིད་ཀྱི་མཉམ་པ་དང་། སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་དེ་ཁྱོད་ཀྱིས་དེང་ཕྱིན་ཆད་བསྒྲུབ་པར་བྱའི་མི་བསྒྲུབ་པར་མི་བྱའོ། །བཞི་པ་འཇིག་རྟེ ན་ཕ་དང་བུ་མཛང་པས་ཕན་ཚུན་ཇི་ལྟར་བསྟེན་པ་བཞིན་དུ། ཁྱོད་ཀྱིས་མཁན་པོ་ལ་རིམ་གྲོ་བསྐྱེད་དེ་བསྟེན་པར་གྱིས་ཤིག་དང་། དེས་ཀྱང་ཁྱོད་རྗེས་སུ་འཛིན་པར་འགྱུར་རོ་ཞེས་འདོམས་པ་ནི་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་བཞག་པར་བྱའོ། །མཁན་པོས་ཀྱང་ཁྱོད་བུའི་འདུ་ཤེས་ཉེ་བར་བཞག་པར་བྱའོ། །ཁྱོད་ཀྱིས་དེང་ཕྱིན་ཆད་མཁན་པོ་ལ་ཇི་སྲིད་འཚོ་བའི་བར་དུ་བསྙེན་བཀུར་བྱའོ། །མཁན་པོས་ཀྱང་ཁྱོད་ཤིའམ་སོས་ཀྱི་བར་དུ་ནད་གཡོག་བྱའོ། །ལྔ་པ་མཁན་པོར་མ་ཟད་གྲོགས་ཚངས་པ་མཚུངས་པར་སྤྱོད་པ་གཞན་རྣམས་ལའང་གུས་པའི་སྒོ་ནས་རིམ་གྲོ་བ་བསྐྱེད་པར་གྱིས་ཤིག་ཅེས་འདོམས་པ་ནི་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་ཚངས་པ་མཚུངས་པར་སྤྱོད་པ་རྣམས་དང་། གནས་བརྟན་རྣམས་དང་། བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པ་དང་། འཇིགས་པ་དང་བཅས་པའི་དབང་དུ་འགྱུར་བར་གནས་པར་བྱའོ། །དེ་རྣམས་ཀྱིས་ཉམས་ལེན་སྤྱོད་པ་རྣམ་དག་ལ་གདམས་པ་སོང་ནས། བཞི་པ་རྟོགས་དོན་ལྟ་བ་རྣམ་དག་ལ་གདམས་པ་ནི། ཁྱོད་དགེ་སློང་གི་དངོས་པོར་བསྒྲུབ་པ་འདི་སངས་རྒྱས་ཀྱི་བསྟན་པ་ལ་ཞུགས་པ་ཡོངས་སུ་རྫོགས་པ་ཡིན་པས། སོས་དལ་དུ་བསྡད་པས་མི་ཡོང་། དེའི་བྱ་བ་ཐོས་བསམ་སྒོམ་གསུམ་ལ་བརྩོན་པར་བྱས་ནས། ལུང་སྡེ་སྣོད་གསུམ་ལ་མཁས་པ་དང་། མངོན་རྟོགས་བསླབ་པ་གསུམ་གྱི་རྒྱུད་ཕྱུག་པར་བྱེད་དགོས་ཞེས་སྟོན་པ་འདི་ཡིན་ཏེ། དེང་ཕྱིན་ཆད་ཁྱོད་ཀྱིས་ལུང་ནོད་པར་བྱ། བཀླག་པར་བྱ། ཁ་ཏོན་དུ་བྱའོ། །ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་ཕྱིར་ཁྱོད་ཀྱིས་བརྩོན་པ་མི་འདོར་བར་བྱའོ། །དེ་ལྟར་རྣམ་དག་བཞི་པོ་དེ་བསྒྲུབ་བྱའི་གཙོ་བོ་ཡིན་པས། ཇི་ལྟར་གདམས་པ་བཞིན་དུ་འབད་པས་བསླབ་དགོས་པ་ཡིན་ལ། ད་གཉིས་པ་དངོས་སུ་མ་བརྗོད་པ་གཞན་དུ་ཁ་འཕངས་པ་ནི། སྔར་སྨོས་པའི་བསླབ་གཞི་དེ་ཙམ་དུ་མ་ཟད་དགག་སྒྲུབ་ཀྱི་བསླབ་བྱ་དངོས་སུ་མ་བརྗོད་པ་རྣམས་ཀྱང་མཁན་སློབ་སོགས་ཀྱི་སྟོན་པར་འགྱུར་བས་ཤེས་པར་བྱས་ལ་ཕྲ་ཞིང་ཕྲ་བ་ནས་བླང་དོར་མ་ནོར་བར་གྱིས་ཤིག་ཆེས་འདོམས་པ་འདི་ཡིན་ཏེ། འདི་དག་ནི་ཁོ་བོས་ཁྱོད་ལ་བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་པར་ཟད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་ཐོས་པར་འགྱུར་རོ། །གཞན་དག་ཀྱང་སློབ་དཔོན་དང་། མཁན་པོ་དང་། མཁན་པོ་གཅིག་པ་དང་། སློབ་དཔོན་གཅིག་པ་དང་། གཏམ་འདྲིས་པ་དང་། ཕེབས་པར་སྨྲ་བ་དང་། སྨོས་འདྲིན་དང་། འགྲོགས་བཤེས་རྣམས་ཀྱིས་ཀྱང་རྒྱ་ཆེར་སྟོན་པར་འགྱུར་རོ། །གཉིས་པ་ཡུལ་ཅན་གཉེན་པོ་ལ་གདམས་པ་ལ་གཉིས་ཀྱི། དང་པོ་བསླབ་པ་ལ་གུས་པར་སྦྱར་བ་སྟེ། ཉིད་ཀྱིས་དལ་འབྱོར་གྱི་རྟེན་ཕུན་སུམ་ཚོགས་པ་ཐོབ་ཅིང་། སངས་རྒྱས་ཀྱི་བསྟན་པ་རིན་པོ་ཆེ་དང་མཇལ་ནས། བསྟན་པའི་སྙིང་པོ་བསྙེན་རྫོགས་ཀྱི་སྡོམ་པ་ཐོབ་པ་འདི་ལྟ་བུ་ཤིན་ཏུ་རྙེད་པར་དཀའ་བ་ཡིན་པས། བསླབ་པ་རིན་པོ་ཆེ་ལ་མིག་གི་འབྲས་བུ་ལྟར་གཅེས་སྤྲས་ཀྱི་སྒོ་ནས་གུས་པ་བསྐྱེད་དེ་ཚུལ་བཞིན་དུ་སྒྲུབས་ཤིག་ཅེས་འདོམས་པ་ནི་འདི་ཡིན་ཏེ། ཤེས་རབ་མཆོག་གི་བསྟན་པ་ལ། །ཁྱོད་ནི་བསྙེན་པར་རྫོགས་པར་གྱུར། །དལ་དང་འབྱོར་པ་རྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། །མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །གཉིས་པ་ཐབས་བག་ཡོད་པ་ལ་སྦྱར་བ་ནི། དེ་ལྟར་བསླབ་པ་ལ་གུས་པ་བསྐྱེད་དེ། བག་ཡོད་པའི་ཐབས་ཀྱིས་དགེ་སྦྱོང་གི་ཚུལ་སྒྲུབས་ཤིག་ཅེས་འདོམས་པ་ཡིན་ཏེ། ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས་བག་ཡོད་པར་སྒྲུབས་ཤིག །འདི་ནི་ཚིག་ཉུང་ཡང་དོན་རྒྱ་ཆེ་སྟེ། བླང་དོར་གྱི་གནས་ལ་འཇུག་ལྡོག་མ་ནོར་བར་བྱེད་པ་ནི་བག་ཡོད་པ་ཡིན་ལ། སྒོ་གསུམ་གྱི་སྤྱོད་པ་བག་ཡོད་པས་དམ་པའི་ཆོས་འདུལ་བ་འདི་ལ་སྤྱད་ན་རྣམ་གྲོལ་གཏན་གྱི་བདེ་བ་ཐོབ་པར་འགྱུར་ཏེ། སོ་སོར་ཐར་པ་ལས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པའི་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་འཐོབ་བོ། །ཞེས་གསུངས་པ་ལྟར་ཕན་ཡོན་ཆེན་པོ་མངའ་བས་ལེགས་པར་སྒྲུབ་ཤིག །དེ་ལྟར་སྦྱོར་དངོས་རྗེས་གསུམ་གྱིས་ཁྱོད་བསྙེན་པར་རྫོགས་པའི་ཆོ་ག་དེ་གྲུབ་པ་ཡིན། དེ་ཡང་གཙོ་བོར་མཁན་པོའི་བདག་རྐྱེན་ལས་བྱུང་བ་ཡིན་ཏེ། རང་གིས་མཛད་འོས་རང་གིས་མཛད། གཞན་གྱིས་བྱེད་དགོས་པ་རྣམས་དེ་དང་དེ་ལ་བསྐོས་ནས་མཛད་པས་གཏང་རག་གི་ཕྱག་གསུམ་འཚོལ་ལ་བཀའ་དྲིན་ཆེ་ལག་ཞེས་བརྗོད་ཅིག །ཐམས་ཅད་ཀྱིས་མེ་ཏོག་འཐོར་བཞིན་དུ་སྨོན་ལམ་རྣམ་བཞི་གདབ་བོ། །ཐར་མཆོག་ཞི་བའི་ཁང་བཟང་དུ། །འཇུག་བྱེད་ལས་ཀྱི་ཆོ་གའི་ཁྲིགས། །རིན་ཆེན་ཐེམ་སྐས་ལྟ་བུ་འདི། །དགེ་སློང་དྷརྨ་ཤྲཱིས་སྦྱར། །རྣམ་དཔྱོད་ཤར་རིའི་བ་གམ་ལ། །འཛེགས་པའི་ལེགས་བཤད་འོད་བརྒྱ་པ། །ཞི་འཚོའི་རིང་ལུགས་སྣང་བ་ཆེ། །ཡུན་རིང་བསྟན་པའི་དཔལ་གྱུར་ཅིག །དགེ་འདིས་མཐའ་ཡས་འགྲོ་བ་ཀུན། །ཚངས་སྤྱོད་ཡོན་ཏན་བདུད་རྩིའི་ཆུས། །ཉེས་བརྒྱའི་དྲི་མ་དྲུང་ཕྱུངས་ཏེ། །མི་གནས་མྱ་ངན་འདས་ཐོབ་ཤོག །ཅེས་པ་འདི་ནི་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་ཁྱུ་མཆོག་གི་ལོ་ལ་ཨོ་རྒྱན་སྨིན་གྲོལ་གླིང་གི་ཆོས་གྲྭར་སྦྱར་བའོ།། །།དགེའོ།། །།