བདེ་གཤེགས་བདུན་གྱི་མཆོད་པའི་ཆོག་བསྒྲིགས་ཡིད་བཞིན་དབང་རྒྱལ། ངག་དབང་བློ་བཟང་རྒྱ་མཚོ།

བདེ་གཤེགས་བདུན་གྱི་མཆོད་པའི་ཆོག་བསྒྲིགས་ཡིད་བཞིན་དབང་རྒྱལ་ཞེས་བྱ་བ་བཞུགས་སོ། །ངོ་མཚར་བཀོད་པའི་ཞིང་ཁམས་བདུན་དུ་མཚན་དཔེའི་དཀྱིལ་འཁོར་རྟག་གསལ་ཡང་། །ཆེར་སྙིགས་ལྔ་བདོའི་སྨག་རུམ་བཅིལ་ལ་ལྷག་པར་ཐུགས་རྗེ་ཆེན་པོའི་ཉི། །ཉེར་བསྐྱོད་རླུང་གི་ཤིང་རྟས་རབ་དྲངས་འགྲོ་བློའི་ནམ་མཁར་ཡོངས་ཤར་ལས། །ཕན་བདེའི་སྣང་བས་གཅིག་ཏུ་ཁྱབ་མཛད་བདེར་གཤེགས་མཆེད་བདུན་གཏན་གྱི་སྐྱབས། །གང་གི་ཁྱད་པར་སྨོན་ལམ་ཚངས་པའི་དབྱངས། །དཔལ་གྱི་མགྲིན་པའི་གཡས་འཁྱིལ་དུང་དཀར་སྒྲས། །བྱང་ཆེན་དེ་སྲིད་རྣ་བར་སྙན་པོའི་གཏམ། །སྦྱིན་མཛད་ཤཱཀྱ་སེང་གེས་འགྲོ་འདི་སྐྱོངས། །ཐུབ་གསུང་བརྒྱད་བརྒྱའི་འདབ་སྟོང་བཞད་ཚལ་ནས། །རྣམ་དཔྱོད་བུང་བས་སྙིང་པོའི་ཟེའུ་འབྲུའི་བཅུད། །ལེགས་ཕྱུང་མདོ་ཆོག་སྦྲང་རྩི་བདེ་སྐྱིད་ལུས། །བརྟས་བྱེད་མཁན་ཆེན་ཞི་འཚོ་ཕྱག་གི་ཡུལ། །འཇམ་དཔལ་སྒྱུ་དྲྭ་ལྷ་གཅིག་ཁྲི་སྲོང་རྗེ། །འབངས་བཅས་འདི་ཕྱི་གཏན་འདུན་འགྲུབ་ནུས་སྨན། །རྣམ་རྒྱལ་འཕྲེང་སྤེལ་མཁས་གྲུབ་རིམ་བརྒྱུད་པ། །བཤེས་གཉེན་དམ་པའི་ཚོགས་ལ་སྙིང་ནས་དད། །ཁྱད་པར་ཆོས་འདིའི་བདུད་རྩི་རོ་བདའ་བ། །བདག་བློའི་ཟ་མ་ཏོག་ཏུ་འཁྱིལ་མཛད་པའོ། །ཡོངས་འཛིན་རྣམ་གསུམ་བཀའ་དྲིན་བྱང་ཆུབ་བར། །གཞལ་བའི་སྙིང་སྟོབས་སྤོབས་པ་གཟེངས་སུ་མཐོ། །འཁོར་བ་མྱ་ངན་ཤུལ་རིང་དུབ་པའི་མགྲོན། །རིས་མེད་འགྲོ་ཀུན་མྱང་འདས་སིམ་པའི་གྲོང་། །འཁྲིད་པའི་ས་མཁན་བདེར་གཤེགས་བརྒྱད་མཆོད་སྒོ། །འབྱེད་པའི་ལྡེ་མིག་ཆོག་བསྒྲིབས་འདི་ཀོ་མཚར། །རྡུལ་བྲལ་སྟོན་ཟླ་ལྟར་དཀར་ལྷག་བསམ་གྱིས། །ལེགས་དྲངས་ཐོས་བསམ་ཡིད་བཞིན་དབང་གི་རྒྱལ། །དཔྱད་བཟོད་སྲི་ཞུར་བགྱིད་ལས་ཕན་དང་བདེའི། །འཛད་མེད་འདོད་དགུའི་ཆར་ཆེན་འདི་ན་འབེབས། །དེ་ཡང་འོ་སྐོལ་སྙིགས་མའི་འགྲོ་བ་རྣམས་ལ་ལྷག་པར་ཐུགས་རྗེ་ཆེ་བ་བཅོམ་ལྡན་འདས་སྨན་གྱི་བླ་བདེ་བར་གཤེགས་པ་བརྒྱད་ཀྱི་མཆོད་པའི་ཆོ་ག་འདི་ལ་ཡིད་ཆེས་ཤིང་ཁུངས་བཙུན་པའི་ལོ་རྒྱུས། དད་པ་བསྐྱེད་པར་བྱ་བའི་ཕྱིར་ཕན་ཡོན། མདོ་སྔགས་ཀྱི་ཁྱད་པར་དང་ལོག་རྟོག་གི་བསླད་ཞུགས་པ་རྣམས་ལ་དཔྱད་དེ་འཁྲུལ་པ་བསལ་བ། ཉམས་སུ་བླང་བྱའི་ཆོ་ག་དངོས་བཤད་པ་དང་བཞི་ལས། །དང་པོ་ལོ་རྒྱུས་ལ་མདོ་གསུངས་ཚུལ་དང་། བོད་དུ་དར་ཚུལ་གཉིས། དང་པོ་ནི། ཡང་དག་པར་རྫོགས་པའི་སངས་རྒྱས་ཡངས་པ་ཅན་གྱི་གྲོང་རོལ་མོའི་སྒྲ་ཅན་གྱི་ཤིང་ལྗོན་པའི་དྲུང་ན་འཁོར་དགེ་སློང་བརྒྱད་ཁྲི། བྱང་ཆུབ་སེམས་དཔའ་སྤྱན་རས་གཟིགས། བློ་གྲོས་ཆེན་པོ། བྱམས་པ། སྤོབས་པ་བརྩེགས་པ་ནས་ལག་ན་རྡོ་རྗེའི་བར་མཚན་སྨོས་པ་བཅུ་གཉིས་ལ་སོགས་པ་སུམ་ཁྲི་དྲུག་སྟོང་དང་། གཞན་ཡང་ཐེག་པ་ཆེན་པོ་ལ་ལྷག་པར་མོས་པའི་ལྷ་དང་ལྷ་མ་ཡིན་དང་དྲི་ཟ་དང་ཀླུ་ལ་སོགས་པ་གྲངས་མེད་པའི་ཚོགས་རྣམས་ལ་ཐོག་མ་དང་བར་དང་མཐའ་མར་དགེ་བའི་ཆོས་གསུངས་ཤིང་བཞུགས་པའི་ཚེ་འཕགས་པ་འཇམ་དཔལ་སྟན་ལས་ལངས་ཏེ་གཡས་ཕྱོགས་སུ་བསྐོར་བ་ལན་གསུམ་མཛད་ནས། བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་ཞུས་པ། བཙུན་པ་བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་ཐ་མ་ལ་ཞེས་སོགས་ཀྱིས་གསོལ་བའི་སྒོ་ནས། གང་ཐོས་པ་ཙམ་གྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང་བསམ་པ་ཐམས་ཅད་ཡིད་བཞིན་དུ་འགྲུབ་པར་འགྱུར་བའི་ཡོན་ཏན་དང་ལྡན་པའི་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའམ་ལག་ན་རྡོ་རྗེའི་དམ་བཅས་བའམ། ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་ཞིང་རེ་བ་ཐམས་ཅད་ཡོངས་སུ་སྐོང་བའམ། གནོད་སྦྱིན་གྱི་སྡེ་དཔོན་བཅུ་གཉིས་ཀྱི་དམ་བཅས་པའི་མདོ་སྡེ་སྟེ་མཚན་གྱི་རྣམ་གྲངས་བཞི་དང་ལྡན་པ་ཤིན་ཏུ་རྒྱས་པའི་སྡེ་སྣོད་ཞུས་སོ། །བྱང་ཆུབ་སེམས་དཔའ་སྐྱབས་གྲོལ་གྱིས་ནད་པ་དང་། འཆི་ཁ་མའི་དོན་ཇི་ལྟར་བགྱི་ཞེས་ཞུས་པ་དང་ནད་པའི་རིམ་གྲོ་བྱེད་ལུགས་ལ་སོགས་པ་གསུངས། ཚངས་པ་དང་བརྒྱ་བྱིན་དང་རྒྱལ་པོ་ཆེན་པོ་བཞི་ལ་སོགས་པས་ཀྱང་དེ་བཞིན་གཤེགས་པ་བདུན་གྱི་མཚན་དང་མདོ་སྡེ་འཛིན་པ་དང་མཆོད་པའི་གང་ཟག་ལ་བསྲུང་སྐྱོབ་བྱེད་པར་ཁས་ཀྱིས་འཆེས། གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་གཡོག་བདུན་འབུམ་བདུན་འབུམ་དང་བཅས་པ་རྣམས་ཀྱིས་ཀྱང་དེ་བཞིན་གཤེགས་པ་བདུན་གྱི་མཚན་འཛིན་པ་དང་དེ་དག་ལ་མཆོད་པའི་གང་ཟག་དང་མདོ་སྡེ་རིན་པོ་ཆེ་འདི་གང་ན་བཞུགས་པའི་ས་ཕྱོགས་དེར་བསྲུང་སྐྱོབ་བྱེད་པར་ཁས་བླངས། དེ་ལྟར་བཅོམ་ལྡན་འདས་ཀྱིས་འཇམ་དཔལ། སྐྱབས་གྲོལ། ཀུན་དགའ་བོ་ལ་སོགས་པར་གསུངས་ཤིང་། ཕྱོགས་གང་དུ་གཏོགས་ན་གཞོན་ནུ་དོན་ཐམས་ཅད་གྲུབ་པ་འཚང་རྒྱ་བའི་ཚུལ་བསྟན་པའི་ལོ་ཀུན་དགའ་བོ་འཁྲུངས། དེ་ནས་ལོ་བདུན་གྱི་བར་སྟོན་པའི་ཞལ་མ་མཇལ་བས་བདེན་བཞིའི་ཆོས་འཁོར་གྱི་ཁོངས་སུ་གཏོགས་པའི་དོགས་པ་མེད་ཅིང་འཁོར་ལོ་བར་པ་ལས་ཀྱང་འཕྱི་བའི་རྒྱུ་མཚན་སྤྱོད་ཕྱོགས་རྒྱ་ཆེན་པོ་གཙོ་བོར་སྟོན་པ་ཤིན་ཏུ་རྒྱས་པའི་སྡེ་སྣོད་ཡིན་པས་འཁོར་ལོ་ཐ་མར་གཏོགས་པར་མདོ་ལུགས་གཙོ་བོར་བྱེད་ན་ཁས་ལེན་དགོས་ཤིང་། སྔགས་ལུགས་སུ་བྱེད་ན་བྱ་རྒྱུད་ཀྱི་དེ་གཞིན་གཤེགས་པའི་རིགས་སུ་གཏོགས་སོ། །དེ་ཡང་ཀུན་དགའ་བོས་བཀའ་བསྡུས་པའི་མཐར་ཡི་གེར་བཏབ་བོ། །གཉིས་པ་བོད་དུ་དར་ཚུལ་ནི། འཕགས་པ་རིགས་གསུམ་མགོན་པོས་ཡེ་ཤེས་ཀྱི་སྤྱན་གྱིས་གཟིགས་པ་ན་སྟོད་མངའ་རིས་ཀྱི་ཆ་གཡའ་རི་དང་གངས་རིས་བསྐོར་ཞིང་གླང་པོ་ཆེ་དང་རི་དྭགས་ཀྱི་ཡུལ། བར་དབུས་གཙང་བྲག་དང་སྤང་ལྗོངས་ཀྱིས་བསྐོར་ཞིང་རི་དྭགས་དང་སྤྲེའུའི་ཡུལ། སྨད་མདོ་ཁམས་རྩི་ཤིང་ནགས་ཚལ་གྱིས་བསྐོར་ཞིང་སྤྲེའུ་དང་བྲག་སྲིན་གྱི་ཡུལ་དུ་ཡོད་པ་ལ་འཕགས་པ་གསུམ་བཀའ་བགྲོས་ནས་ཐུགས་རྗེ་ཆེན་པོ་ཕྱག་ན་པདྨོ་དང་། འཕགས་མ་སྒྲོལ་མས་བྱིན་གྱིས་བརླབས་པའི་སྤྲེའུ་དང་བྲག་སྲིན་མོ་འདུས་པ་ལས་རིགས་དྲུག་ནས་འཕོས་པའི་ཕྲུ་གུ་དྲུག་བྱུང་བ་རྣམས་རིམ་གྱིས་འཕེལ་ཏེ་བོད་མིའི་རྒྱལ་ཁམས་སུ་གྱུར་པ་ལས། རུས་ཆེན་བཞིར་གྱེས་པའི་ཁམས་ཡེ་སང་དཀར་པོ་གནམ་གྱི་འཇུ་ཐག་ཅན་དང་གཅིག །ཡེ་སྨོན་ནག་མོ་ཁྲོ་ཆུའི་ཕ་བོང་འདྲ་བ་གཉིས། སྤྱད་ཁྲིག་ཡེ་ཤེས་ལྷའི་སྒྲོན་མེ་དང་གསུམ། མོན་རྫུ་ནག་པོ་ཁྱིའི་རྔ་ལྗང་ཅན་རྣམས་སུ་དབྱེ་བ་བྱུང་ཞིང་། དེ་ལས་རྒྱལ་ཕྲན་སིལ་མ་མང་དུ་བྱུང་ཡང་བོད་སྤྱི་ལ་དབང་བའི་རྒྱལ་པོ་ཞིག་མེད་ན་བསྟན་པ་མི་ཚུགས་པར་དགོངས་ཏེ་དེ་བཞིན་གཤེགས་པ་དང་དགུང་ཟླ་མཉམ་པའི་རྒྱལ་པོ་ཤར་བའི་བུ་ཐ་ཆུང་སོར་མོ་དྲྭ་བས་འབྲེལ་བ། མིག་མས་འགེབས་དང་གཡུའི་སྨིན་མ་ཅན། དུང་སོ་འཁོར་མར་ཡོད་པ་མི་ལས་འདས་པའི་མཚན་ལྟས་ཁྱད་པར་ཅན་བྱུང་བ་མཚན་མཁན་གྱིས་དཔྱོད་མ་ཤེས་པར་གའུར་བཅུག་སྟེ་གངྒཱའི་ཆུ་ལ་བསྐྱུར་བ་ཡང་ཟེར། ལུགས་གཅིག་ལ་ལྷ་འདྲེའི་སྤྲུལ་པར་དོགས་ནས་སྤྱུགས་པར་གྲགས་པ་གང་ལྟར་ནའང་སྐྱོ་བ་སྐྱེས་ཏེ་བྱང་ཕྱོགས་ཀྱི་ནགས་ཁྲོད་དུ་འཁྱམས་པ་ལས། ཐུགས་རྗེ་ཆེན་པོའི་བྱིན་རླབས་ཀྱི་སྣང་བ་བསྒྱུར་ནས་ལྷ་རི་གྱང་མཐོའི་རྩེ་མོར་བྱོན་ཏེ་གཟིགས་པས་ཡར་ཀླུངས་ཡུལ་ཕུན་སུམ་ཚོགས་པར་མཁྱེན་ནས་བཙན་ཐང་སྒོ་བཞིར་ཕེབ་པ་ཕྱུགས་རྫིས་གཉའ་བར་ཁྲི་བཅས་ཏེ་སྤྱན་དྲངས་པ་གཉའ་ཁྲི་བཙན་པོ་ཡིན་ལ། དེ་ནས་རྒྱལ་རབས་ཉི་ཤུ་རྩ་ལྔར་ལྷ་འདྲེ་རང་གིས་བསླབས་པའི་སྣང་གཤེན་པས་ལྷ་མཆོད་བྱས་ནས་རིམ་གྲོ་སོགས་ཀྱིས་ཆབ་སྲིད་བོན་སྒྲུང་གིས་བསྐྱངས་པར་གྲགས། དེ་ནས་ཀུན་ཏུ་བཟང་པོའི་རྣམ་འཕྲུལ་ལྷ་ཐོ་ཐོ་རི་གཉན་བཙན་གྱི་དུས་ཕོ་བྲང་ཡུམ་བུ་གླ་སྒང་དུ་མདོ་སྡེ་ཟ་མ་ཏོག །སྤང་སྐོང་ཕྱག་རྒྱ་པ། གཙུག་ཏོར་དྲི་མེད། གསེར་གྱི་མཆོད་སྡོང་རྣམས་བབས་པས་དམ་པའི་ཆོས་ཀྱི་དབུ་བརྙེས་ཤིང་རྒྱལ་པོ་འདི་སངས་རྒྱས་སྨན་གྱི་བླའི་སྤྲུལ་པ་ཡིན་པར་ཡང་གྲགས། དེ་ནས་རྒྱལ་རབས་ལྔ་ན་སྤྱན་རས་གཟིགས་ཀྱི་སྤྲུལ་པ་མི་རྗེ་སྲོང་བཙན་སྒམ་པོས་སྒྲོལ་མ་དང་ཁྲོ་གཉེར་ཅན་གྱི་རྣམ་འཕྲུལ་ཀོང་ཇོ་དང་ཁྲི་བཙུན་ཁབ་ཏུ་བཞེས་ཏེ་ཇོ་བོ་རྣམས་གཉིས་སྤྱན་དྲངས། འཕྲུལ་སྣང་དང་ར་མོ་ཆེས་གཙོས་པའི་རྟེན་བརྟེན་པ་མང་དུ་བཞེངས། པཎྜི་ཏ་ཤཱཀྱ་སང་ཧས་མཚོན་པའི་རེ་ཟུང་གདན་དྲངས་ཤིང་། ཐུ་མིས་བོད་ལ་ཡི་གེ་མེད་པ་གསར་དུ་བཟོས། དེ་དག་ལ་ཉེ་བར་མཁོ་བ་སུམ་རྟགས་སོགས་བསྟན་བཅོས་བརྒྱད་མཛད། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་བསྒྱུར། རབ་བྱུང་གི་སྡེ་མ་ཚུགས་ཀྱང་འབངས་རྣམས་དགེ་བ་བཅུའི་ཁྲིམས་ལ་བཀོད་དེ་བསྟན་པའི་སྲོལ་བཏོད། དེ་ནས་རྒྱལ་རབས་ལྔ་ན་འཇམ་དཔལ་གྱི་སྤྲུལ་པ་ལྷ་བཙད་པོ་ཁྲི་སྲོང་ལྡེའུ་བཙན་གྱིས་རྦ་གསལ་སྣང་སྤྱན་འདྲེན་གྱི་ཕོ་ཉར་བརྫངས་པས། ཟ་ཧོར་གྱི་ཡུལ་དུ་འཁྲུངས་ཞིང་ཐམས་ཅད་ཡོད་པར་སྨྲ་བའི་གྲུབ་མཐའ་འཛིན་པ་པཎ་ཆེན་ཞི་བ་འཚོ་ཞེས་བྱ་བ་ཐུགས་དམ་གྱི་ལྷ་འཇམ་དཔལ་དང་འབྲལ་མེད་དུ་འགྲོགས་ཤིང་ཞལ་གཟིགས་པ། རིག་པའི་གནས་ལྔ་ལ་མཁས་པ། སྐུ་ཚེ་ལ་མངའ་བརྙེས་པས་དགུང་ལོ་དགུ་བརྒྱ་ལྷག་བཅས་བཞེས་པ། རྫུ་འཕྲུལ་གྱི་བཻ་ཌཱུརྱའི་ཞིང་དུ་བྱོན་པའི་མངོན་ཤེས་ཅན་དེ་གསོལ་བ་བཏབ་པ་བཞིན་ཕེབས། དགེ་བཅུ་དང་ཁམས་བཅོ་བརྒྱད་ལས་བརྩམས་པའི་ཆོས་གསུངས་ཀྱང་བོད་ཀྱི་ལྷ་སྲིན་གདུག་པ་ཅན་རྣམས་ཁྲོས་ཏེ་མི་ཤིས་པ་མང་དུ་བྱུང་བས་ཞི་འཚོས་ལུང་བསྟན་པ་བཞིན་འཛམ་བུ་གླིང་ན་ཆེ་བའི་སྔགས་མཁན་སངས་རྒྱས་གཉིས་པ་པདྨ་ཐོད་ཕྲེང་གདན་དྲངས། ལྷ་སྲིན་དམ་ལ་བཏགས་ཤིང་ས་གཞི་བཏུལ་བས་ཟན་ཡང་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེད་པ་བཞིན་བསྒྲུབས་ནས་ཆོས་བྱེད་པ་ལ་བར་ཆད་མེད་པར་བརྟེན། མཁན་པོས་སད་མི་མི་བདུན་སོགས་ཤེས་རབ་ཅན་སུམ་བརྒྱ་རབ་ཏུ་བྱུང་བའི་མཁན་པོ་མཛད་པས་མཁན་ཆེན་དང་བྱང་ཆུབ་ཀྱི་ཐུགས་ལྷག་པར་འབྱོངས་པས་བོ་དྷི་སཏྭར་གྲགས། འདིའི་རྒྱལ་པོའི་སྐུ་རིམ་ལ་གཙུག་ཏོར་དྲི་མེད་ཀྱི་གཟུགས་ཆོ་ག་དང་སྨན་བླའི་མདོ་ཆོག་གཉིས་མཛད་པའི་ཆོ་ག་འདི་ཉིད་ཤིན་ཏུ་རྒྱས་པའི་སྡེ་སྣོད་མདོ་བརྒྱད་བརྒྱ་པ་ལས་སྔོན་འགྲོ་བཤམ་ཞིང་བསྒོམ་པ་ལ་འགལ་རྐྱེན་སེལ་བ་ཕྱི་ནང་གི་ཁྲུས་དང་མཐུན་རྐྱེན་བསྒྲུབ་པ་དཀྱིལ་འཁོར། མཆོད་པ། ལྷ་བསྒོམ་ཞིང་སྤྱན་དྲངས་པ། དངོས་གཞིའི་སྐབས་མདོར་བསྟན་སྤྱིའི་ཕྱག །རྒྱས་བཤད་སོ་སོའི་ཕྱག་མཆོད་སྨོན་ལམ། མཇུག་ཆོག་གཏང་རག་གི་ཕྱག་སོགས་སྦྱོར་དངོས་མཇུག་གསུམ་གྱི་སྒོ་ནས་བསྡུས་ཏེ་ལག་ལེན་ཁྲིགས་ཆགས་སུ་མཛད་པ་འདི་ཉིད་ཀྱི་རྫས་དང་ཡོ་བྱད་བཤད་ཚོད་བཞིན་དུ་རྒྱལ་པོས་བསྒྲུབས་ཏེ་ཚེས་བརྒྱད་བྱུང་རེས་ཀྱི་མ་ཆག་པར་གནང་། སྨན་བླའི་ཏིང་ངེ་འཛིན་གྱི་ཡེ་ཤེས་པ་གདན་དྲངས་ནས་བསམ་ཡས་དབུ་རྩེའི་ལྷ་ཚོགས་རྣམས་རབ་ཏུ་གནས། ཆོ་ག་འདི་མ་ཆག་པའི་མཐུས་རྒྱལ་པོ་སྐུ་ཚེ་རིང་། མངའ་ཐང་མཐོ་ཞིང་འཇམ། བོད་དང་བོད་ཆེན་པོའི་རྒྱལ་ཁམས་དར་ཞིང་ལོ་ཆུ་ལེགས། མི་ཕྱུགས་ལ་ནད་མེད་ཅིང་དམ་པའི་ཆོས་དར་ཞིང་རྒྱས། དེའི་དུས་ན་བོད་ཀྱི་བདེ་སྐྱིད་སུམ་ཅུ་རྩ་གསུམ་གྱི་ལྷ་དང་མཉམ་ཟེར། རྒྱལ་པོས་མདོ་དང་ཆོ་ག་ཆ་ལག་དང་བཅས་པ་དངུལ་ཤོག་ལ་ཛམྦུ་ཆུ་བོའི་གསེར་དང་བཻཌཱུརྻ་སྤེལ་མས་བྲིས་ཏེ་དངུལ་གྱི་སྒྲོམ་བུ་ལ་རིན་པོ་ཆེ་དུ་མས་སྤྲས་པའི་ནང་དུ་དར་སྣ་ཚོགས་པའི་ན་བཟའ་མང་དུ་གསོལ་ནས་བཅུགས་ཏེ་མཆོད་པ་རྒྱ་ཆེན་པོ་མ་ཆག་པར་ཕུལ། སྔོན་སངས་རྒྱས་འོད་སྲུངས་ཀྱི་བསྟན་པ་ལ་ཡོན་མཆོད་གཉིས་ཀྱིས་སྨོན་ལམ་གཅིག་ཏུ་བཏབ་པ་རང་ཅག་ཁ་བ་ཅན་པ་རྣམས་ཀྱི་བསོད་ནམས་ཀྱི་དཔལ་དུ་སྨིན་པར་མངོན། ཡབ་རྒྱལ་པོ་ཁྲི་སྲོང་ལྡེའུ་བཙན་གྱིས་རིགས་ཀྱི་སྲས་ཆུང་བ་མུ་ཏིག་བཙན་པོའམ་སད་ན་ལེགས་མཇིང་ཡོན་ལ་གནང་། དེས་ཀྱང་ཡབ་ཀྱི་མཛད་པ་ལྟར་སྨན་བླའི་མཆོད་པ་བཟུང་བས་ནུབ་ཅིག་བཻཌཱུར་སྣང་བའི་ཞིང་ཁམས་མཐོང་ཞེས་ཞུས་པས་ཇི་ལྟར་བྱུང་གསུང་བར་རྒྱུ་མཚན་རྣམས་གསོལ་པ་ན་ཡབ་དགྱེས་ནས་ཤིན་ཏུ་མད་པར་འདུག །སྨན་བླའི་ཞིང་ཁམས་སུ་སྐྱེ་བར་ངེས་པས་ཕྱིན་ཆད་ཀྱང་མཆོད་པ་ལ་བརྩོན་པར་གྱིས་གསུངས། འདིས་སྐར་མའི་ཚད་ལ་བརྟེན་ནས་བརྩིགས་པས་སྐར་ཆུང་རྡོ་རྗེ་དབྱིངས་ཀྱི་ལྷ་ཁང་དུ་གྲགས་པ་བཞེངས། དེས་ཕྱག་ན་རྡོ་རྗེའི་སྤྲུལ་པ་ཁྲི་ལྡེ་གཙུག་བརྟན་ནམ་རལ་པ་ཙན་ལ་གནང་། འུ་ཤང་རྡོའི་ལྷ་ཁང་བཞེངས་ཤིང་མཆོད་གནས་སྡེ་གཉིས་ལ་བསྙེན་བཀུར་དང་ཆོས་རྣམས་སྐད་གསར་བཅད་ཀྱིས་གཏན་ལ་ཕབ་ཅིང་མདོའི་མཆོད་པ་ལ་བརྩོན་པར་མཛད། དེས་ལྷ་ལུང་དཔལ་གྱི་རྡོ་རྗེ་ལ་གནང་། དེ་ཡང་གླང་དར་གྱིས་བསྟན་པ་བསྣུབས་ནས་ནུབ་པར་ཉེ་བའི་ཚེ། སྲས་མངའ་བདག་འོད་སྲུངས་ཆུང་ངུའི་དུས་སུ་ཡབ་མེས་ཀྱི་ཐུགས་དམ་དངུལ་གྱི་གའུའི་ནང་ན་འདུག་པ་གཟིགས་པས་དད་ནས་ཡུམ་ལ་འདི་ཅི་ཡིན་དྲིས་པས་འདི་གོང་མ་རྣམས་ཀྱི་ཐུགས་དམ་ཡིན། རྒྱལ་བུ་རང་གི་ཡབ་ཆོས་ལ་གནག་པས་ཚེ་ཐུང་བདེ་སྐྱིད་མ་བྱུང་ཟེར། ད་འདི་སུས་ཤེས་བྱས་པས་ལྷ་ལུང་དཔལ་གྱི་རྡོ་རྗེས་ཤེས་ཟེར། ཁོང་ལ་ཞུ་དགོས་བྱས་པས། མ་ན་རེ་རིགས་ངན་ཟེར། རྒྱལ་བུའི་ཞལ་ནས་རིགས་མི་གཙོ་ཆོས་གཙོ་གསུངས་ཏེ་སློབ་དཔོན་བདེ་བའི་རྡོ་རྗེ་སྤྱན་འདྲེན་དུ་བཏང་ནས་ཕོ་བྲང་དུ་འདིའི་མཆོད་པ་ཞུས་པས་ནམ་མཁའ་ནས་མེ་ཏོག་གི་ཆར་དང་རོལ་མོའི་སྒྲས་མཆོད་པ་རྒྱལ་བུས་གཟིགས་པས་ངོ་མཚར་སྐྱེས། ད་སྨན་བླའི་ཐུགས་ཀྱིས་འཛིན་པར་འདུག །གང་སྨོས་པའང་འགྲུབ་གསུངས་ནས་ཚེས་བརྒྱད་བྱུང་རེས་ཀྱི་སྨན་བླའི་མཆོད་པ་མ་ཆག་པར་མཛད། མྱ་ངན་ལས་འདས་ནས་དབུ་ཐོད་ལ་སྨན་རྒྱལ་གྱི་སྐུ་གསལ་བར་བྱོན། འདི་ཡན་ལ་བརྒྱུད་པ་སྔ་དར་དང་མན་ལ་ཕྱི་དར་ཞེས་གྲགས། དེས་སྲས་མངའ་བདག་དཔའ་འཁོར་བཙན་ལ་གནང་བར་ཡབ་མེས་ཀྱི་ལུགས་བཞིན་མཆོད་པ་གནང་བས་གྲོངས་པའི་ཚེ་ལྗགས་ལ་སྨན་བླ་གཙོ་འཁོར་གསུམ་དང་རིང་བསྲེལ་མང་དུ་བྱོན། དེས་སྲས་སྐྱིད་ལྡེ་ཉི་མ་མགོན་ལ་གནང་། ཁོང་མངའ་རིས་སྟོད་དུ་སྤྱུགས་པའི་ཚེ་ཡབ་མེས་ཀྱི་ཐུགས་དམ་ཁྱེར་ནས་མཆོད་པར་སྐུ་ཚེ་དང་མངའ་ཐང་འཕེལ། ཡུལ་ཁམས་རྣམས་བདེ་བར་གྱུར། དེས་སྲས་བཀྲ་ཤིས་ལྡེ་ལ་གནང་། དེས་ཚེས་བརྒྱད་ལ་མ་ཆག་པ་དང་ཆོ་འཕྲུལ་ཟླ་བ་ལ་ནར་མར་མཛད་པ་ལན་ཅིག་སྐུ་ཁམས་མ་བདེ་བས་རིམ་གྲོ་ལ་སྨན་བླའི་མཆོད་པ་དང་གཟུངས་བཟླས་པའི་ཆུས་ཁྲུས་བྱས་ནས་གཟིམས་པས་མནལ་ལམ་དུ་མི་དཀར་པོ་ཞིག་གིས་ཁྱོད་ཀྱི་འདི་ལས་ནད་ཡིན་པས། སྨན་གྱི་ཆོད་པ་འདི་བརྒྱ་རྩ་བརྒྱད་དུ་ཡི་དམ་དུ་གྱིས་གསུངས། དེ་ཙམ་འབྱོར་བའི་ཆ་རྐྱེན་མེད་བྱས་པས་ཁྱོད་རང་གི་ཁང་པའི་ཕྱོགས་ནས་འདོམ་གསུམ་ཤར་དུ་གཞལ་བའི་ས་ན་གསེར་ཕྱེ་བྲེ་གསུམ་ཡོད། དེ་ཐོན་ལ་མཆོད་པ་གྱིས་གསུངས་པར་མནལ་སད་པ་དང་ཐུགས་བདེ་བར་བྱུང་། མི་དཀར་པོ་དེ་བྱང་ཆུབ་སེམས་དཔའ་སྐྱབས་གྲོལ་ཡིན་པར་འདུག །གསེར་ཕྱེ་བཏོན་ཏེ་མཆོད་པ་བྱས་པས་སྙུན་བདེ་ཞིང་སྐྱེ་བ་སྔ་ཕྱི་ཤེས་པའི་མངོན་ཤེས་ཤར་རོ། །དེས་སྲས་ཁོ་རེ་ལ་གནང་། དེ་ལ་དེ་ཝ་རཱ་ཛ་དང་། ནཱ་ཱག་རཱ་ཛར་གྲགས་པའི་སྲས་གཉིས་བྱུང་བ་བྱང་སེམས་ཉི་སྣང་དང་ཟླ་སྣང་གི་སྤྲུལ་པར་གྲགས། ཡབ་སྲས་གསུམ་ཀ་རབ་ཏུ་བྱུང་བའི་ཡབ་ཀྱི་མཚན་ལྷ་བླ་མ་ཡེ་ཤེས་འོད་དུ་གྲགས། དགེ་འདུན་མང་པོ་བསྡུས་ཏེ་ཉན་བཤད་སྒོམ་གསུམ་བཙུག །བསྟན་པ་ལ་ཕན་པ་རྒྱ་ཆེན་པོ་མཛད་ཅིང་སྨན་བླའི་མཆོད་པ་མདོ་ནས་བཤད་ཚོད་དང་མཐུན་པར་ཆོ་འཕྲུལ་དང་ཚེས་བརྒྱད་ལ་མ་ཆག་པ་དང་། རྒྱུན་གྱི་ཐུགས་དམ་གྱི་གཙོ་བོར་མཛད། སྐུ་གཤེགས་པའི་དུས་སྤུར་སྦྱངས་པས་ཉིན་ཞགས་བདུན་དུ་འཇའ་འོད་དང་མེ་ཏོག་གི་ཆར་བབས། ཐུགས་ཀྱི་དཀྱིལ་ནས་སྨན་བླ་ཚོན་གང་བ་ཞིག་བྱོན། ནམ་མཁའ་ལ་རོལ་མོའི་སྒྲ་དང་བཅས་ནས་བཻ་ཌཱུརྻའི་ཞིང་ཁམས་བཞུད་པ་མཐོང་བར་གྲགས་ཤིང་ལོ་རྒྱུས་ལ་ལར་ཆོས་ཀྱི་དོན་དུ་གསེར་སློང་བར་བྱོན་པས་གར་ལོག་གིས་བཙོན་དུ་བཟུང་བ་དང་འགའ་ཞིག་གཡུལ་སྤྲད་ནས་ཤོར་བ་སོགས་མི་མཐུན་པ་མང་ཞིང་བཙོན་ནང་དུ་གཤེགས་པར་མཐུན་པས་མྱ་ངན་འདས་ཁའི་ལྟས་སོགས་ཀྱི་ལོ་རྒྱུས་ཆོས་འབྱུང་ཕལ་ཆེར་ན་མི་གསལ་ཡང་གདུང་བདག་མེད་དུ་བསྐྱུར་བར་གཞན་གྱིས་ཞབས་ཏོག་འདྲ་བྱུང་ངམ་སྙམ། དེས་གཅུང་གི་སྲས་མངའ་བདག་ལྷ་ལྡེ་ལ་གནང་། དེས་སྲས་མངའ་བདག་འོད་ལྡེ་ལ་གནང་། དེས་སྲས་རྩེ་ལྡེ་ལ་གནང་། ལྷ་ལུང་དཔལ་རྡོར་མ་གཏོགས་འདི་ཡན་ཆད་བོད་ཆོས་རྒྱལ་གྱི་གདུང་ཤ་སྟག་ཡིན། མངའ་རིས་གནར་པ་དགྲ་བཅོམ་བྱང་ཆུབ་ཚུལ་ཁྲིམས་ཞེས་སྡེ་སྣོད་གསུམ་ལ་བློ་སྦྱངས་པ་དེས་མངའ་བདག་རྩེ་ལྡེ་ལ་སྨན་བླའི་མཆོད་ཆོག་ཞུས་ནས་ཐུགས་དམ་དུ་མཛད། རང་གཞན་ཐམས་ཅད་ལ་ཕན་འདིས་ཐོགས། དུས་ལན་ཅིག་ཙ་ན་ཡོན་བདག་གཅིག་གིས་གདན་དྲངས་ནས་ང་ལ་ཆ་རྐྱེན་ཡོད་པ་ལ་བུ་གཅིག་ཀྱང་མེད། སྨན་བླའི་མཆོད་པ་ཞིག་ཞུ་ཟེར་མཆོད་པ་བྱས་ཏེ་ཁྱོད་ལ་བུ་བདུན་ཡོང་བར་ཡོད་པས་བཞི་ངའི་བཙུན་པ་བྱེད་གསུངས་པ་བཞིན་བྱུང་སྟེ་བུ་བཞི་ཕུལ་བ་རབ་ཏུ་བྱུང་ཞིང་ཕྱིས་དགེ་བའི་བཤེས་གཉེན་བཟང་པོ་རེ་བྱུང་སྐད། མངའ་རིས་དགྲ་བཅོམ་པ་དགུང་ལོ་བརྒྱད་ཅུའི་ཐོག་གྲོངས་པའི་ཚེ་སྨན་བླ་མཆེད་བདུན་དབུ་ཐོད་ལ་བྱོན། འདི་སྤ་གྲོའི་སྤ་གོར་བྲག་ནག་ཏུ་བཞུགས་པས་དགེ་བཤེས་བྲག་ནག་པར་གྲགས། དེ་གཙང་གི་ལྷན་དུང་ལྷར་བྱོན། རུས་པ་ཞུ་ཡིན་པས་ཞུ་ལྷན་པ་ཤེས་རབ་གྲགས་བྱ་བར་གནང་། འདིས་སྨན་བླའི་ཆོ་ག་མཛད་པས་བདེ་གཤེགས་འཁོར་བཅས་མངོན་སུམ་དུ་སྤྱན་འདྲོངས་པ་ཕོ་རོག་པ་མདོ་སྡེ་མགོན་གྱིས་བྲག་སྔོན་ཕུག་པ་ནས་གཟིགས་པར་གྲགས། གསེར་བཟང་དྲི་མེད་ཀྱི་ཞིང་ཁམས་མཇལ། ཚ་བོ་ཞིག་བཙོན་དུ་ཤོར་བ་སྨན་བླར་གསོལ་བ་བཏབ་པས་ཐོན། དེས་ར་ས་ཆུ་ལྷང་པ་དར་མ་རྒྱལ་མཚན་ལ་གནང་། སྐྲན་གྱི་ནད་བདུན་ཞུགས་པ་སྨན་བླར་གསོལ་བ་བཏབ་པས་ཞི། གྲོངས་པའི་ཚེ་དུང་གཡས་འཁྱིལ་དང་རིང་བསྲེལ་མང་དུ་བྱོན། དེས་སྣར་ཐང་གྲོ་མོ་ཚར་མཚན་ཐོགས་པ་མཚན་དངོས་གྲོ་སྟོན་བདུད་རྩི་གྲགས་ལ་གནང་། ཕ་མའི་དོན་དུ་མདོ་ཆོག་མང་དུ་མཛད་པས་སྨན་བླའི་ཞིང་ཁམས་ཡང་ཡང་གཟིགས་ཤིང་ཡབ་ཡུམ་གཉིས་ཞིང་ཁམས་དེར་སྐྱེ་བའི་མཚན་མ་རྙེད། གར་བཞུགས་ཀྱང་སྨན་བླའི་ཞིང་ཁམས་ཡིད་ལ་འོང་གསུང་། ལྷ་སྒོམ་ཞིག་པོ་བྱ་བར་མཛེ་བྱུང་བས་གཡུ་དྲུག་དམར་བརྒྱ་རི་མ་ཞིག་ཕུལ་ནས་ནད་གསོ་བར་ཞུས་པས་སྨན་བླའི་ལྷ་བཤོས་བྱིན། སྨན་གྱི་གཟུངས་ཆུས་བཀྲུས་པས་ལོ་གཅིག་ན་མཛེ་གསོས། དད་པ་ཐུན་མོང་མ་ཡིན་པ་ཐོབ། ཆ་རྐྱེན་ཐམས་ཅད་སྨན་བླའི་ཐེབས་སུ་ཕུལ་ཞིང་ཤི་ཙ་ན་འཇའ་དང་རིང་བསྲེལ་དུ་སོང་། གྲོ་མོ་ཆེ་བས་མཆོག་ཟུང་ལྟ་བུའི་སྲས་གཉིས་སུ་གྲགས་པའི་སངས་རྒྱས་སྒོམ་པ་སེང་གེ་སྐྱབས་ལ་གནང་། མྱ་ངན་ལས་འདའ་དུས་སྨན་བླའི་ཞིང་ཁམས་སུ་འགྲོ་གསུང་། གཤེགས་པའི་ཚེ་ཉིན་ཞག་བདུན་དུ་མེ་ཏོག་གི་ཆར་བབས་ཤིང་དབུ་ཐོད་ལ་སྨན་བླ་བྱོན། དེས་མཆིམས་ནམ་མཁའ་གྲགས་ལ་གནང་། ཐུགས་དམ་གྱི་གཙོ་བོ་སྨན་བླར་མཛད་པས་ཐུགས་ཡིད་ཆེས་པ་ཤ་སྟག་བྱུང་། དེས་བཤེས་གཉེན་ཆེན་པོ་བསོད་ནམས་ཡེ་ཤེས་ལ་གནང་། བླ་མ་འདི་གཉིས་བརྒྱུད་ཡིག་གཞན་ནས་མ་རྙེད་ཀྱང་སྟག་ཚང་བའི་ཉམས་ལེན་བདེ་འཇུག་ནས་བྱུང་། དེས་ཚོགས་ཆོས་ལུང་མཁན་ཆེན་ཞིང་སྟོད་བསོད་ནམས་གྲགས་པ་ལ་གནང་། འདི་ཉིད་ཀྱི་ཐུགས་ལ་བྱང་ཆུབ་ཀྱི་སེམས་རྩོལ་མེད་དུ་འཁྲུངས་པ་སོགས་རྣམ་ཐར་འགངས་ཆེ། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གྱིས་བསྙེན་རྫོགས་ཀྱི་སྡོམ་པའང་འདི་ལ་བཞེས། ཡང་ན་སངས་རྒྱས་སྒོམ་པ་ནས། གཉགས་སྙིང་པོ་རྒྱ་མཚན། དེས་སྤྲུ་ལུང་པ་ཀུན་དགའ་སྨོན་ལམ། དེས་སྤང་ཁང་གྲགས་པ་དཔལ། དེལ་མཁན་ཆེན་བསོད་ནམས་གྲགས་པས་གསན། དེ་ནས་རིམ་པ་བཞིན་མཁན་ཆེན་གྲགས་པ་རྒྱལ་མཚན། མཁན་ཆེན་འཇམ་དབྱངས་རིན་ཆེན་རྒྱལ་མཚན། མཁན་ཆེན་རྒྱལ་བ་ཕྱག་ན། མཁན་ཆེན་ཀུན་དགའ་བློ་གྲོས། མཁན་ཆེན་ཚུལ་ཁྲིམས་དཔའ་འབྱོར། ཆོས་ལུང་ཤར་གླིང་པ་འཁྲུལ་ཞིག་ཀུན་བཟང་མཐུ་སྟོབས་དཔའ་འབར། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །རྡོ་རྗེ་འཆང་དབང་ཕྱུག་རབ་བརྟན། རིགས་ཀུན་བདག་པོ་མགོན་པོ་བསོད་ནམས་མཆོག་ལྡན། ཞ་ལུ་མཁན་ཆེན་རྡོ་རྗེ་འཆང་རིན་ཆེན་བསོད་ནམས་མཆོག་གྲུབ། དེ་ལ་བདག་གིས་མདོ་ཆོག་གི་ལུང་ནོས། ཡང་ན་བཀའ་འགྱུར་བ་མགོན་པོ་བསོད་ནམས་མཆོག་ལྡན་ནས། རབ་འབྱམས་ཆོས་རྗེ་རིན་ཆེན་རྒྱ་མཚོ། མཁས་གྲུབ་ཆེན་པོ་བློ་མཆོག་རྡོ་རྗེ། དེ་ལ་བདག་གིས་ཞུས། གཞན་ཡང་ཞི་བ་འཚོ་ནས། བོ་དྷི་སཏྭ་ཆུང་བ། རྒྱལ་པོ་དགེ་བའི་དཔལ། ཇོ་བོ་ཆེན་པོ་ཨ་ཏི་ཤ །ལྷ་བཙུན་བྱང་ཆུབ་འོད། ཏི་སི་བ་ཆེན་པོ། བྱང་སེམས་ཟླ་བ་རྒྱལ་མཚན། ཀོང་པོ་ལོ་ཙཱ་བ། དགྲ་བཅོམ་པ་རྒྱལ་མཚན། གྱ་བ་དབང་མཛེས། གྱ་བ་དཔལ་མཛེས། ཡོན་ཏན་དབང་ཕྱུག །ཤངས་པ་འདུལ་འཛིན། མཁན་ཆེན་བསོད་ནམས་གྲགས་པའི་བར་དུ་བརྒྱུད་པའང་སྣང་། མངའ་བདག་རྩེ་ལྡེ་ཡན་གྱི་བརྒྱུད་པ་རྣམས་ལ་ཀུན་མཁྱེན་བུ་སྟོན་གྱི་བཞེད་པར་འདི་དང་མི་མཐུན་ཙམ་འདུག་པ་སྙིགས་དུས་ཀྱི་ཐམས་ཅད་མཁྱེན་པ་ལ་འཁྲུལ་པ་ཅི་ལ་མངའ་ནའང་གང་ལ་གོམས་པ་གཙོ་ཆེའམ་སྙམ་སྣར་ཐང་པའི་བཞེད་བཞིན་བཀོད་ལ། གནར་བ་མན་གྱི་བརྒྱུད་པ་ཕྱི་མ་ལ་ཡིག་རྙིང་འདྲ་དང་གསན་ཡིག་ལ་ལར་མཐུན་མི་མཐུན་ཅི་རིགས་སྣང་བ་ཡིག་སྐྱོན་ཤོར་བ་ཡིན་ནམ་ཐེ་ཚོམ་གྱི་གཞིར་འདུག་པས་ཐམས་ཅད་མཁྱེན་པ་སྟག་ཚང་བ་དང་ཀུན་མཁྱེན་མཁྱེན་བརྩེའི་གསན་ཡིག་ལ་ཡིད་བརྟན་དུ་བཟུང་ངོ་། །བྱ་རྒྱུད་དང་འབྲེལ་བའི་སྨན་བླ་སྤྲུལ་སྐུའི་རྗེས་གནང་ནི་རྡོ་རྗེ་འཆང་མགོན་པོ་བསོད་ནམས་མཆོག་ལྡན་ནས། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། དེ་ལ་བདག་གིས་ནོས། སྟག་ཚང་ལོ་ཙཱ་བས་ལོངས་སྐུའི་རྗེས་གནང་དུ་གྲགས་པ་རིག་པའི་དབང་ལྔ་ཙམ་ལ་རིགས་ལྔའི་སྡོམ་བཟུང་བྱེད་པའི་ཕྱག་སྲོལ་ཞིག་འདུག་པ་ནི་མ་དག་པར་ངེས་པས་བདག་གིས་མ་ཞུས་གསུངས་པ་དང་། ངོར་པ་རྡོ་རྗེ་འཆང་གིས་སྨན་བླ་ལོངས་སྐུའི་རྗེས་གནང་ཟེར་ནས་དབང་བཞི་མདོར་བསྡུས་ཤིག་སྦྱོར་བ་བླུན་པོ་རྣམས་ཀྱིས་རང་བཟོས་ཡི ན་ཚུལ་གསུངས་པ་མེད་པར་སྣང་མོད། སྨན་བླ་ལྷ་ང་གཅིག་གི་དཀྱིལ་འཁོར་དུ་བྱ་རྒྱུད་ལུགས་ཀྱི་ཆུ་ཅོད་པན་ལ་བརྟེན་པའི་དབང་རྡོ་རྗེ་འཆང་དཔལ་འབྱོར་ལྷུན་གྲུབ་ནས། ཟུར་ཆེན་ཀུན་མཁྱེན་ཆེན་པོ་ལས་བརྒྱུད་པ་བདག་གིས་ཐོབ་པ་ནི་རྒྱུད་སྡེ་དང་མཐུན་ནམ་སྙམ་མོ། །གཉིས་པ་དད་པ་བསྐྱེད་ཕྱིར་ཕན་ཡོན་ནི། ཇི་སྐད་དུ། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་མོ་ཇི་བཞིན་ནོ། །ཞེས་དང་། དཔལ་མགོན་འཕགས་པ་ཀླུ་སྒྲུབ་ཀྱིས། །འདི་གཉིས་གཙོ་བོ་ཤེས་རབ་སྟེ། །དེ་ཡི་སྔོན་འགྲོ་དད་པ་ཡིན། །ཞེས་གསུངས་པ་ལྟར་དད་པ་ལ་དཀོན་མཆོག་གི་ཡོན་ཏན་ལ་དད་པ། ལས་འབྲས་ལ་ཡིད་ཆེས་པའི་དད་པ། བདེན་བཞིའི་བླང་དོར་ལ་བྱེད་འདོད་པའི་དད་པ་གསུམ་ལས། དང་པོ་ཉིད་ལ་ཡིད་ཆེས་བསྐྱེད་དགོས་པ་ནི། ལུང་ཕྲན་ཚེགས་ལས། ཟླ་བ་སྐར་མའི་ཚོགས་བཅས་ས་ལ་ལྷུང་ཡང་སྲིད། །ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། །ཞེས་ཡང་དག་པར་རྫོགས་པའི་སངས་རྒྱས་ཀྱིས་རྫུན་གསུང་པ་ནི་ནམ་ཡང་མེད་ལ། འཕགས་པ་སངས་རྒྱས་ཀྱི་སྟོབས་བསྐྱེད་པ་ཆོ་འཕྲུལ་རྣམ་པར་འཕྲུལ་པ་བསྟན་པ་ལས་གང་དག་དེ་བཞིན་གཤེགས་པ་ལ་མངོན་སུམ་དུ་མེ་ཏོག་དང་སྤོས་དང་དྲི་དང་འཕྲེང་བ་དང་བྱུག་པ་དང་ན་བཟའ་དང་རྒྱན་རྣམས་ཀྱི་མཆོད་པས་མཆོད་པ་ལྟ་སྨོན་ཀྱང་ཅི་དགོས། ལྷའི་བུ་དག །གང་སེམས་ཅན་ལ་ལས་སངས་རྒྱས་བཅོམ་ལྡན་འདས་མྱ་ངན་ལས་འདས་ནས་ལོ་བརྒྱ་སྟོང་ངམ་བསྐལ་པ་བྱེ་བ་ལོན་ཀྱང་སངས་རྒྱས་ལ་ཕྱག་འཚལ་ལོ་ཞེས་མཚན་ནས་ལན་བདུན་བརྗོད་ནས་ནམ་མཁའ་ལ་མེ་ཏོག་གཏོར་ན་དེ་དག་ཐམས་ཅད་སྡུག་བསྔལ་གྱི་མཐར་བྱེད་པར་འགྱུར་རོ། །མེ་ཏོག་ནམ་མཁའ་ལ་གཏོར་བ་ལྟ་ཞོག་གི། གང་དག་དད་པས་དེ་བཞིན་གཤེགས་པའི་རྗེས་སུ་སློབ་པ་ལ་ལ་ཞིག་གིས་དེ་བཞིན་གཤེགས་པ་ལ་མཆོད་པའི་ཕྱིར་དེ་བཞིན་གཤེགས་པའི་ཆོ་འཕྲུལ་བསླབ་པ་གཅིག་ཙམ་འཛིན་ནམ། ཉིན་གཅིག་གམ་མཚན་གཅིག་གམ། ཡུད་ཙམ་ཞིག་དེ་བཞིན་གཤེགས་པ་ལ་མཆོད་པ་ཡིད་ལ་བྱེད་པར་བརྩོན་ན་དེ་སྡུག་བསྔལ་མཐར་བྱས་ནས་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་དང་། ལུང་གཞི་ལས། མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་ལ་ནི་གོམ་འདོར་ན། །ཛམྦུའི་ཆུ་བོའི་གསེར་གྱི་སྲང་ཚོད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་དང་། སའི་སྙིང་པོ་འཁོར་ལོ་བཅུ་པའི་མདོ་ལས། ཁམས་གསུམ་དག་ན་བདེ་ཞིང་སྐྱིད་པ། །ཐམས་ཅད་དཀོན་ཅོག་མཆོད་ལས་བྱུང་བས། །དེས་ན་བདེ་ཞིང་སྐྱིད་པ་འདོད་པས་དཀོན་ཅོག་གསུམ་པོ་མཆོད་ལ་བརྩོན་བྱ། །ཞེས་དཀོན་མཆོག་གསུམ་པོ་དངོས་དང་དེའི་རྟེན་ལ་མཆོད་པའི་ཕན་ཡོན་མཐའ་ཀླས་པ་དེ་བཞིན་གསུངས་པར་མ་ཟད་རང་རྒྱལ་དགྲ་བཅོམ་པ་བྱེ་བ་ཕྲག་བརྒྱ་ལ་ལོ་མང་དུ་བསྙེན་བཀུར་བྱས་པ་བས། དེ་བཞིན་གཤེགས་པའི་སྐུ་གཟུགས་ལ་དད་པའི་སེམས་ཀྱིས་ཡུད་ཙམ་ཞིག་མིག་གིས་བལྟས་པ་བསོད་ནམས་ཆེ་བར་གསུངས་ཤིང་། བྲམ་ཟེ་ཞིག་གིས་ལམ་ཁར་དེ་བཞིན་གཤེགས་པ་ལ་ཚིགས་བཅད་གཅིག་གིས་བསྟོད་པས་བསྐལ་པ་ཆེན་པོ་ཉི་ཤུའི་བར་དུ་ངན་སོང་གི་སྒོ་ཁེགས་པར་གསུངས། དེ་ཡང་སངས་རྒྱས་བཞུགས་པའི་དུས་ལས་ཀྱང་འདས་རྗེས་རིང་བསྲེལ། གསུང་རབ། དེ་འཛིན་པའི་ཆོས་སྨྲ་བ་ལ་མཆོད་པ་ཕན་ཡོན་ཆེ་ཞིང་ཁྱད་པར་ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །དད་པའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེ་འཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགགས་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་དེ་ནི་དེ་བས་ཁྱད་པར་འཕགས། །ཞེས་དངོས་སུ་བསླབ་པ་ལ་སྦྱར་ནའང་དབྱིབས་མཚུངས་པས་དམ་པའི་ཆོས་འཇིག་པར་ཉེ་བ་ན་ལྷ་བཤོས་སོགས་ཀྱི་མཆོད་པ་ཕུལ་བ་བསོད་ནམས་ཆེ་ཞིང་དེ་ལས་བཀུར་སྟིའི་ཕྱག་འཚལ་དང་བསྟོད་པ། དེ་ལས་རྟེན་གསར་དུ་བཞེངས་ཤིང་རྙིང་པ་གསོ་བ། དེ་བས་ཀྱང་ཐོས་བསམ་སྒོམ་གསུམ་སྒྲུབ་པའི་མཆོད་པ་ལྷག་པའི་རྒྱུ་མཚན་ལ་ངེས་པ་དྲང་དགོས་ཤིང་བྱེ་བྲག་ཆོས་འདི་པའི་ཕན་ཡོན་མཉམ་མེད་ཇོ་བོ་ཆེན་པོ་དཱི་པཾ་ཀཱ་རས་མཐོ་ལྡིང་གསེར་གྱི་ལྷ་ཁང་དུ་ཞིང་ཁམས་རེ་ལ་བསྟོད་པ་རེ་མཛད་སྐབས་བདེ་གཤེགས་གཞན་བདུན་ལ་མཚན་གྱི་མེ་ཏོག་སོགས་དང་སྨན་བླར། མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །ཞེས་སོགས་མཛད་ལ། མདོ་ཆོག་ཆུང་བར་གྲགས་པ་ལ་དྲུང་པ་གྲགས་དོན་པས་མཆན་བུ་ཞིག་བཏབ་པའི་མཇུག་ན་མཚན་གྱི་མེ་ཏོག་མཁན་པོས་མཛད་པའི་ཁ་བྱང་འདུག་པ་ཡི་གེ་མ་དག་པ་ཞིག་ལ་ཡིད་བརྟན་དུ་བཟུང་བ་འདྲ། ཐམས་ཅད་མཁྱེན་པ་སྟག་ཚང་ལོ་ཙཱ་བ་སོགས་མཁས་པའི་གསུང་ལ་ཇོ་བོས་གནང་བར་བཤད་ལ། མཚན་ཙམ་ཐོས་པས་ངན་སོང་གི་འཇིགས་པ་ལས་སྐྱོབ་ཅིང་གལ་ཏེ་ངན་སོང་དུ་སོང་ཡང་དྲན་པ་ཙམ་གྱིས་དེ་ལས་ཐར་བར་འགྱུར་བས་སངས་རྒྱས་ཀྱི་སྤངས་རྟོགས་ལ་ཁྱད་པར་མེད་ནའང་ཐབས་མཁས་པ་དང་སྨོན་ལམ་དང་མཚན་གྱི་ཕན་ཡོན་ལ་བརྟེན་ནས་འགྲོ་བའི་རྒྱུད་ལ་ཐུགས་རྗེ་འཇུག་ཆེ་བའི་དབང་དུ་བྱས་ཏེ་དགེ་བའི་བཤེས་གཉེན་མཆིམས་ཆེན་པོས་བདེ་གཤེགས་གཞན་རྣམས་ལ་ཕྱག་འཚལ་བདུན་བདུན། ཤཱཀྱ་ཐུབ་པ་བཅོ་ལྔ། སྨན་བླར་ཉེར་གཅིག་བྱ་བའི་ཁྱད་པར་མཛད་ཅིང་ཆོས་འདིའི་འགྲོ་དོན་གྱི་དུས་ཀྱང་ལྔ་བརྒྱའི་ཐ་མ་ལ་དམ་པའི་ཆོས་ལྟར་བཅོས་པ་བྱུང་བ་ན་སེམས་ཅན་ལས་ཀྱི་སྒྲིབ་པ་སྣ་ཚོགས་ཀྱིས་བསྒྲིབས་པ། མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ། ཕོངས་པར་གྱུར་པའི་སྐབས་ཡིན་ལ། དེའི་རྒྱུ་མཚན་སྤྱིར་བསྟན་པ་ཉམས་དམའ་བར་སོང་ན་གསུང་རབ་སྤྱི་དང་གཟུངས་སྔགས་སོགས་ཀྱི་མཐུ་ཆུང་ངུ་འགྲོ་བར་གསུང་མོད། མདོ་འདི་ནི་དུས་ངན་སྙིགས་མའི་སེམས་ཅན་གྱི་དོན་དུ་ནན་གྱིས་གསུངས་པས་ནུས་པ་ཆེར་འགྲོ་བ་སྨོན་ལམ་གྱི་སྟོབས་ལས་བྱུང་པ་ཡིན་ལ། དེ་ཡང་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པ་དང་ལས་ཀྱི་སྒྲིབ་པ་ཡོངས་སུ་བྱང་བ་དང་། བདུད་སྡིག་ཅན་གྱིས་མི་བརྗི་བར་བྱ་བ་སོགས་ཕན་ཡོན་སྤྱི་དང་བྱེ་བྲག་ཏུ་སེར་སྣ་དང་ཚུལ་འཆལ་དང་ང་རྒྱལ་དང་ཕྲག་དོག་དང་ཕྲ་མ་དང་ལས་སྦྱོར་ངན་པ་བྱས་པས་རྣམ་སྨིན་ཆེར་མྱོང་བ་རྣམས་ཀྱང་སྔོན་སྨན་བླའི་མཚན་ཐོས་པ་དྲན་ནས་སྡུག་བསྔལ་ལས་ཐར་ཏེ་བདེ་བ་ཕུན་སུམ་ཚོགས་པ་འབྱུང་བ་དང་བསླབ་པ་ཐམས་ཅད་འཆལ་ཀྱང་རྣམ་སྨིན་མི་འབྱུང་ཞིང་འཁོར་ལོས་སྒྱུར་རྒྱལ་སོགས་སུ་སྐྱེ་བ་དང་བུད་མེད་ཀྱི་སྐྱེ་གནས་ལས་ཐར་ཞིང་བུ་ནོར་ཚེ་དང་དབང་ཕྱུག་གང་འདོད་འབྱུང་ལ། བུ་བཙའ་བའི་ཚེ་ནད་མི་འབྱུང་བ་སོགས་དེ་བཞིན་གཤེགས་པའི་ཕན་ཡོན་རྒྱ་ཆེན་གསུང་པར་འཇམ་དཔལ་གྱིས་མཚན་བསྒྲག་པར་དམ་བཅས་ཤིང་མདོ་སྡེ་གནས་སར་སྲུང་མ་སྦྲན་ཞིང་། སྟོན་པས་ཀུན་དགའ་བོ་ལ་ཆོས་དཀོན་ཅོག་གི་སྨོན་ལམ་དེ་བཞིན་གཤེགས་པའི་བཀའ་ཡང་དག་པར་གྱུར་པ་སོགས་ཀྱིས་ཡིད་ཆེས་བསྐྱེད་པར་མཛད། ནད་དྲག་པོས་ཤི་བ་གསོས་ཤིང་རྒྱལ་སྲིད་ལ་ཉེར་འཚེ་མི་འབྱུང་ཞིང་ཞི་བ། ཀུན་དགའ་བོས་སྲོག་དབང་ཆད་པ་སླར་མཚམས་མི་སྦྱོར་བའི་རྩོད་པ་བཀོད་པ་ལ། བྱང་ཆུབ་སེམས་དཔའ་སྐྱབས་གྲོལ་གྱིས་དུས་མིན་གྱི་འཆི་བ་བཅུ་གསོ་བར་ཐེག་ཆེན་གྱི་ལུང་ལས་གསུངས་ཚུལ་གྱིས་ལན་བཏབ་པ། མཚན་ཐོས་པས་གནོད་སྦྱིན་བདུན་འབུམ་ཕྲག་བཅུ་གཉིས་ཀྱིས་བདེན་པ་མཐོང་ནས་མདོ་འདི་བསྲུང་བར་དམ་བཅས་པ་རྣམས་ནི་གདན་མ་འཛོམ་པའི་བར་གྱི་བཀའ་མཆིད་དང་ལྷའི་བུ་ཁ་ཅིག་དོན་དེ་དག་ལ་ཡིད་གཉིས་སྐྱེས་ཏེ་སྟོན་པས་སངས་རྒྱས་ཀྱི་ཞིང་བསྐུལ་བ་ཞེས་བྱ་བའི་ཏིང་ངེ་འཛིན་མངོན་དུ་མཛད་དེ་བདེ་གཤེགས་བདུན་སྤྱན་དྲངས་ནས་གདན་འཛོམ་པ་ལ་བྱང་ཆུབ་སེམས་དཔའ་འཇམ་དཔལ་དབྱངས་ཀྱིས་བཻ་ཌཱུརྻའི་གཟུངས་ཞུས་པར་བརྒྱད་ཀས་མགྲིན་གཅིག་ཏུ་ཕན་ཡོན་རྒྱས་པ་དང་བཅས་པ་གསུངས། གསང་བདག་འཁོར་བཅས་ཀྱིས་བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་བདུན་གྱིས་སྔོན་གྱི་སྨོན་ལམ་གྱི་ཁྱད་པར་རྒྱས་པ་ཡང་ཐོས་ཞེས་སོགས་ཀྱི་བཀའ་མཆིད་ཀྱང་བགྱིས། ཕྱག་རྡོར་གྱིས་གཟུངས་བྱིན་གྱིས་བརླབས་ཤིང་ཚངས་པ་ལ་སོགས་པར་བསྲུང་བར་བཀའ་བསྒོས། ཀུན་དགའ་བོས་ཆོས་ཀྱི་རྣམ་གྲངས་ཀྱིས་ཞུས་པ་རྣམས་གདན་འཛོམ་པའི་བཀའ་མཆིད་དེ། ཕན་ཡོན་དེ་དག་ལ་བརྟེན་ནས་མཉམ་མེད་ཇོ་བོ་ཆེན་པོ་ཡབ་སྲས་ཀྱི་བཀའ་གདམས་གླེགས་བམ་རིན་པོ་ཆེའི་ཞུ་ལན་ནོར་བུའི་འཕྲེང་བར། སྤྲུལ་པའི་ཆོས་རྒྱལ་དཔལ་ལྡན་མར་མེ་མཛད་བཟང་པོ་མ་དག་པའི་གདུལ་བྱ་ལ་དུས་དྲུག་ཏུ་གཟིགས་ཤིང་བཞུགས་པའི་ཚེ་སྙིགས་མའི་མགོན་པོ་རྒྱལ་བ་བདུན་དང་། རང་གི་སྟོན་པ་ཤཱཀྱ་ཐུབ་པ་དང་ཕྱོགས་བཅུའི་སངས་རྒྱས་དང་ཞེས་སོགས་ཀྱིས་ཆེད་དུ་བསྔགས་པ་དང་། ཇོ་བོ་ཡབ་སྲས་ནས་བརྒྱུད་པའི་བཀའ་གདམས་པ་རྣམས་བདེ་གཤེགས་བརྒྱད་དང་གནས་བརྟན་བཅུ་དྲུག་གི་མཆོད་པ་མཛད་པས་ཕྱོགས་དེའི་མོས་པ་དང་ལྡན་པ་རྣམས་ལའང་འབྲེལ་ཆེ་ཞིང་རིས་སུ་མ་ཆད་པའི་ཕན་བདེའི་རྩ་ལག་དམ་པའོ། །གསུམ་པ་མདོ་སྔགས་ཀྱི་ཁྱད་པར་དང་ལོག་རྟོག་གི་བསླད་ཞུགས་པ་རྣམས་ལ་དཔྱད་དེ་འཁྲུལ་པ་བསལ་པ་ནི། སྤྱིར་བདེ་གཤེགས་བདུན་གྱི་ཆོ་ག་འདི་མདོ་སྔགས་གང་དུ་གཏོགས་ཚུལ་ལ་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་ཁྱད་པར་རྒྱས་པ་ཞེས་བྱ་བ་ཐེག་པ་ཆེན་པོའི་མདོ་ཤོ་ལོ་ཀ་བརྒྱད་བརྒྱ་པ་པཎྜི་ཏ་ཇི་ན་མི་ཏྲ། དཱ་ན་ཤཱི་ལ། ཤཱི་ལིནྡྲ་བོ་དྷི། ལོ་ཙཱ་བ་བནྡེ་ཡེ་ཤེས་སྡེ་རྣམས་ཀྱིས་བསྒྱུར་བ་དང་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོའི་སྔོན་གྱི་སྨིན་ལམ་ཁྱད་པར་རྒྱས་པའི་མདོ་པཎྜི་ཏ་སྔོན་མ་གཉིས་དང ། ལོ་ཙཱ་བ་བཤད་མ་ཐག་པས་བསྒྱུར་བའི་སྨན་མདོ་གཉིས་ཀ་སྙིགས་དུས་ཀྱི་ཐམས་ཅད་མཁྱེན་པ་བུ་སྟོན་རིན་པོ་ཆེ་དང་། ཚལ་པ་སི་ཏུ་དགེ་བའི་བློ་གྲོས་གཉིས་ཀྱིས་བསྒྲིགས་པའི་བཀའ་འགྱུར་གྱི་སྒྲིག་རྩོམ་མཐུན་པར་བྱ་རྒྱུད་ཀྱི་དེ་བཞིན་གཤེགས་པའི་རིགས་སུ་མཛད་ཅིང་། ཀུན་མཁྱེན་བུ་དང་ཞ་ལུ་ལོ་ཆེན་གྱི་བསྟན་འགྱུར་གྱི་དཀར་ཆག་གཉིས་སུའང་མཁན་པོས་མཛད་པའི་མདོ་ཆོག་བྱ་རྒྱུད་ཀྱི་དགོངས་འགྲེལ་ཁྲོད་དུ་བཀོད་པ་ཡིན་ལ། རྫེ་ཙོང་ཁ་པ་བློ་བཟང་གྲགས་པ་ཡང་བྱ་རྒྱུད་དུ་བཞེད་པར་བརྟེན་མཁས་གྲུབ་དགེ་ལེགས་དཔའ་བ་དང་། པཎ་ཆེན་བསོད་ནམས་གྲགས་པའི་རྒྱུད་སྡེ་སྤྱི་རྣམ་སོགས་རི་བོ་དགའ་ལྡན་པའི་ཡིག་ཆ་མང་པོར་ཡང་སྔགས་ཕྱོགས་སུ་བཤད་པས། མཁན་པོས་མཛད་པའི་ཆོ་ག་འདི་ཉིད་ཀྱང་སྔགས་ལུགས་སུ་འགྲེལ་པ་དང་། མདོ་ལུགས་སུ་འགྲེལ་བའི་ལུགས་སྲོལ་སྣ་ཚོགས་བྱུང་བ་གཉིས་ཀ་མི་འཐད་པ་མ་ཡིན་ཏེ། བཤད་ཁུངས་ཀྱི་མདོ་འདི་རྒྱུད་དུ་གཏོགས་པས་སྔ་མ་ལྟར་བྱས་པ་འགྲེལ་མི་མཚུངས་པ་མ་ཡིན་ཅིང་མཁན་པོས་མཛད་པ་དངོས་བསྟན་ལྟར་ན་མདོ་ལུགས་གཙོ་བོར་སྟོན་པས་གནས་ལྔ་ཡོངས་སུ་རྫོགས་པའི་དོན་གྱི་པཎ་ཆེན་སྟག་ཚང་ལོ་ཙཱ་བས་མཛད་པའི་ཉམས་ལེན་བདེ་འཇུག་ལས། ཁ་ཅིག་འདི་བྱ་རྒྱུད་དུ་བསྡུས་ནས་རྒྱུད་ཀྱི་ཆོ་གར་བྱེད་པའང་མི་རིགས་ཏེ་མདོའི་ཆོ་ག་གཏན་མེད་དུ་ཐལ་ཚུལ། མདོ་སྡེ་ལས་བྱུང་བའི་ཆོ་ག་ཞེས་སོགས་ཀྱི་ཁུངས་སྨོས་པའི་རང་ཚིག་དང་འགལ་ཚུལ། དེ་ཉིད་བསྡུ་པར་ཐེག་པ་ཆེན་པོའི་མདོ་དང་གསང་འདུས་ཀྱི་རྩ་རྒྱུད་མདོ་དང་བསྲེས་ཞེས་པ་ལྟ་བུར་འཁྲུལ་ནས་རིགས་འགྲེ་བྱས་ཚེ་སཱུ་ཏྲ་དང་སཱུ་ཏྲ་སེ་ནའི་ཁྱད་པར་མ་ཕྱེད་པས་མདོ་སྔགས་མི་འགལ་བར་འགྱུར་བ། རྒྱུད་སྡེ་གོང་མ་གོང་མ་ནས་འོག་མ་འོག་མར་བསྒྲུབ་ཚུལ་ཐུན་མོང་པ་རྣམས་ལེན་དུ་རུང་ཡང་དབང་མ་ཐོབ་པའི་གང་ཟག་གིས་འོག་མ་དང་ཐུན་མོང་དུ་སྤྱད་དུ་མི་རུང་བ་གྱད་ནར་སོན་པ་དང་བྱིས་པ་གཉིས་ཀྱིས་རྡོ་ཐེག་མི་ཐེག་གི་དཔེ་དང་བཅས་དོགས་སེལ་རྒྱས་པར་གསུངས་པ་མཁན་པོ་བྱང་ཆུབ་སེམས་དཔའི་མདོ་དང་ཤིན་ཏུ་འབྱོར་ཞིང་རྣམ་དཔྱོད་མཆོག་ཏུ་ཡངས་པའི་ལེགས་བཤད་ཡིན་མོད། འོན་ཀྱང་ཀུན་མཁྱེན་བུ་སོགས་མཁས་པ་མང་པོས་སྔགས་ཕྱོགས་སུ་བཞེད་པ་མཐའ་གཅིག་ཏུ་མི་འཐད་པར་སྨྲ་བ་ནི་རང་ཉིད་ཆོས་མིག་མ་ཐོབ་པས་དཀའ་ཞིང་རང་གི་བློ་གྲོས་ཆུང་ངུའི་མིག་གིས་ཅུང་ཟད་བརྟགས་ན་སྟག་ཚང་ལོ་ཙཱ་བས། གཞན་ཐམས་ཅད་མདོ་འདིར་ཁྲིགས་ཆགས་སུ་མི་གསལ་ཡང་སློང་དཔོན་བདག་ཉིད་ཆེན་པོ་འདིས་མདོ་གཞན་ནས་འབྱུང་བ་དང་འགའ་ཞིག་བྱ་བ་སྤྱིའི་ཆོ་ག་ནས་ཅུང་ཟད་བླང་དུ་རུང་བ་རྣམས་བསྡུས་པར་གསལ་ལོ། །ཞེས་པ་དང་། པཎ་ཆེན་ཤཱཀ་མཆོག་པས་མཛད་པའི་འཆི་བ་མེད་པའི་མཛོད་ཀྱི་རྔ་སྒྲ་ལས་རྣམ་པར་ཕྱེ་བ་ཞེས་པས་ཐིག་དང་བྱེ་མ་གྲམ་བུར་བརྡལ་བ་ཞེས་པས་ཚོན་འགྱེད་པ་བསྟན་ཚུལ་གྱི་འབྲུ་གཉེར་བའང་དོན་ལ་འབྱོར་ཞིང་ཐིག་ཚོན་རྣམ་བཞག་སྔགས་ལུགས་ཕྱིན་པས་མདོ་རྒྱུད་སོ་སོར་བཀྲལ་ཆོག་པ་ཞིག་ཡོད་པར་མངོན་པས་སྔགས་ལུགས་སུ་བྱེད་ན་རྡོ་རྗེ་འཆང་ཀུན་དགའ་བཟང་པོས་མཛད་པའི་བདེ་གཤེགས་བརྒྱད་ཀྱི་མཆོད་ཆོག་ལྟར་གཞལ་ཡས་ཁང་སྔགས་ལུགས་ཀྱི་མཚན་ཉིད་ཚང་བ་འོད་ཟེར་ལྔས་བསྐོར་བ། ནང་གི་ལྷ་བྲིས་འབུར་གང་རུང་འགོད་ལུགས་དང་འོག་ཏུ་གསལ་འདེབས་ཀྱི་ཆོས་བརྗོད་པ་མཆིམས་དང་རྒྱ་སྟོན་གྱི་ཡི་གེ་སོགས་ལ་བརྟེན་ཅིང་ལྷའི་སྐུ་མདོག་རྣམས་རྒྱལ་སྲས་ཐོགས་མེད་བཟང་པོ་དཔལ་བའི་གསུང་གི་རྗེས་སུ་འབྲང་། གཟུངས་བུམ་ཡང་སྔགས་ལུགས་ལྟར་བསྒྲུབ་ཚུལ་དངོས་གཙང་ཞིང་དེའི་སྡོམ་ཚིག་ཀུན་མཁྱེན་མཁྱེན་བརྩེས་མཛད་པར། རྒྱུད་འདི་བྱ་རྒྱུད་ནམ་ཡང་མ་ཡིན་ཏེ། །ཡིན་ན་མདོ་ཆོག་མཚན་གཞི་བསྟན་དགོས་ཞེས། །ལྷ་སྔགས་དགྲ་བཞིན་སྤོང་བར་བྱེད་པ་སོགས། །ཧ་ཅང་མཁས་པས་དཔྱད་དྲགས་སྐུར་འདེབས་ཀྱིས། །རྣམ་པར་བསླད་ཀྱང་དེ་ལྟར་ཤེས་པ་ཉུང་། །སྒྲོ་སྐུར་བྲལ་བའི་བྱ་རྒྱུ་ཉམས་ལེན་འདི། །ཞེས་གསུངས་ལ། སྔགས་ལུགས་ལྟར་ཉམས་སུ་ལེན་ན་སྒྲུབ་པ་པོ་རྣམས་ཀྱིས་རིགས་གསུམ་སྤྱིའམ་དེ་བཞིན་གཤེགས་པའི་རིགས་ལ་བརྟེན་པའི་བྱ་རྒྱུད་ཀྱི་དབང་མཚན་ཉིད་པ་ཐོབ་དགོས་ཤིང་ལག་ལེན་གྱི་སྐབས་དཀྱིལ་འཁོར་གཞན་ལས་ལྷ་དང་ལྷ་སྟ་གོན་ངེས་པར་དགོས་པ་འདིར་དམིགས་ཀྱིས་བསལ་ཏེ་བཏང་སྙོམས་སུ་འཇོག་ཀྱང་ཐིག་ཚོན་གྱི་ཆོ་ག་གསང་བ་སྤྱི་རྒྱུད་དམ་དེ་ལ་བརྟེན་ནས་རྗེ་དཀོན་མཆོག་ལྷུན་གྲུབ་སོགས་ཚད་ཐུབ་ཀྱི་མཁས་པས་གནང་བའི་ཡི་གེའི་སྟེང་ནས་ངེས་པར་བྱ་དགོས། དེ་ཡང་སྤྱིར་བྱ་རྒྱུད་ལ་ཆོ་གའི་ཆིངས་གོང་མ་ནས་བླངས་ཏེ་མཛད་ཅིང་ལྷ་བསྒོམ་ཚུལ་ལ་ཡང་སློབ་དཔོན་སངས་རྒྱས་གསང་བས། སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ནོ། །ཞེས་ལྷ་དྲུག་གི་རྣམ་བཞག་གསུངས་པ་རྗེ་ཙོང་ཁ་པས་རྡོ་རྗེ་འཆང་གི་ལམ་གྱི་རིམ་པར་རྒྱས་པར་གསུངས་ཤིང་ལ་ལ་དེ་ལྟར་མ་བསྒོམས་ན་བྱ་རྒྱུད་ཚད་ལྡན་མ་ཡིན་པ་ལྟ་བུའི་བློ་ཆུང་བྱེད་ནའང་མཐའ་གཅིག་ཏུ་མ་ངེས་ཏེ། ཐུགས་སྲས་ལོ་ཙཱ་བ་རིན་ཆེན་རྣམ་རྒྱལ་དང་འདུལ་བ་འཛིན་པ་གྲགས་པ་རྒྱལ་མཚན་གྱིས་མཛད་པའི་ཚེ་དཔག་མེད་ལ་ཆོ་ག་གསུམ་བསྐྱེད་ལས་མེད་པ་སོགས་མཐའ་ཀླས་ཤིང་སྐབས་འདིའི་ཉམས་སུ་ལེན་ཚུལ་ནི། ཡེ་ཤེས་རྡོ་རྗེ་ཀུན་ལས་བཏུས་པ་ལས། ཡེ་ཤེས་སེམས་དཔའི་བདེ་བ་དམ་པ་དང་བྲལ་བ་དང་བདག་ཉིད་ལྷར་སྙེམས་པ་དང་བྲལ་བས་བསྒྲུབ་པ་ནི་བྱ་བའི་རྒྱུད་ལ་རབ་ཏུ་གནས་ཞེས་པ་ལྟར་བྱ་རྒྱུད་རང་རྐང་གི་ལུགས་གཅིག་ལ་དེ་ལྟར་བཤད་པས་འདིར་བདག་བསྐྱེད་མེད་པ་ལ་ལྷ་སྤྱན་དྲངས་ནས་མཆོད་ཅིང་འདོད་དོན་ཞུ་བ་རྗེ་འབངས་སུ་བྱ་བའི་ལུགས་སོ། །དེ་ཡང་རྒྱུད་སྡེ་བཞིའི་དཀྱིལ་འཁོར་མཚན་ཉིད་དང་ལྡན་པ་རྣམས་ལ་ཡང་བསྙེན་སྒྲུབ་ལྟ་ཅི་དབང་ཙམ་ཡང་མ་ཐོབ་པར་ལྟོ་རྒྱབ་ཀྱི་ཆེད་དུ་ཆོ་ག་དེ་དག་ལ་ཚམ་ཚོམ་མེད་པར་འཇུག་ཅིང་ཐོབ་ལོམ་འགས་ལག་ལེན་རྣམ་པར་མ་དག་པའི་ཆོ་ག་དྲི་བཅས་དང་རྫུན་ཅན། ལ་ལས་རྒྱུན་མེད་བཞིན་དུ་གཞན་མགོ་བསྐོར་ཏེ་བསྐུར་བ་ལ་ཡིད་བརྟན་དུ་གཟུང་བ་སོགས་བསྟན་པ་རིན་པོ་ཆེ་བཙོག་ཆུས་བསླད་པའི་དུས་ངན་འདིར་གསང་སྔགས་དང་འབྲེལ་བ་སྐད་ཀྱི་སྙན་གྲགས་ལས་རྗེ་སྟག་ཚང་བའི་བཞེད་པ་བཞིན་མདོ་ལུགས་ཁོ་ན་ཉམས་སུ་ལེན་པ་ཇོ་བོ་བཀའ་གདམས་པའི་གསུང་སྒྲོས་སུ། ཁེ་ཆེ་ལ་ཉེན་ཆུང་གསུངས་པ་དང་དོན་མཐུན་པར་མངོན་པས་དངོས་བསྟན་ཉམས་སུ་ལེན་ཚུལ་འོག་ཏུ་སྟོན་ནོ། །པཎ་ཆེན་ཤཱཀ་མཆོག་པས་མདོའི་ཆོ་ག །སྔགས་ཀྱི་ཆོ་ག །ཐུན་མོང་ཇི་ལྟར་བྱ་བ་གསུམ་དུ་གསུངས་ཏེ་ཕྱི་མ་ལ་དཀྱུས་སུ་ཇི་ལྟར་གསལ་བ་བཞིན་བཀླགས་པས་ཆོག་པ་ཡིན་ནོ། །ཞེས་པ་མདོ་ཆོག་ལ་མཆིམས་ཀྱི་ལྷན་ཐབས་མཛད་པར་མི་མཁས་པ་མང་པོས་བླུན་བཅོས་ཀྱི་མདོ་སྔགས་བསྲེས་པའི་ཉག་ཉོག་སྣ་ཚོགས་ཡོད་འདུག་པ་དེ་ལ་ཐུགས་རྩེ་གཏད་འདྲ་བ་མ་དག་པའི་ཡིག་ཧྲུལ་ལ་ཡིད་བརྟན་ཅི་ལ་འོང་ཞིང་མདོ་རྒྱུད་ཀྱི་ཉམས་ལེན་ཅིག་ཆར་དུ་བསྒྲུབ་པ་ལྟ་ཅི་དགོས། མངའ་རིས་སུ་ལོ་ཆེན་རིན་ཆེན་བཟང་པོས་མཐོ་ལྡིང་ལྷ་ཁང་གི་སྟེང་ཐོག་ཏུ་བྱ་སྤྱོད། བར་ཁང་དུ་རྣལ་འབྱོར་རྒྱུད། འོག་ཁང་དུ་བླ་མེད་སོགས་སོ་སོའི་ཉམས་ལེན་མཛད་པ་ནི་མཁས་པ་མགུ་བ་བསྐྱེད་པའི་རྣམ་དཔྱོད་ཀྱི་རྩལ་ཕུལ་དུ་བྱུང་བར་མངོན། ཐུན་མོང་གི་ས་བཅད་འདིས་སེང་གེ་དཀར་མོ་ལ་སྣ་གོང་ཅུང་ཟད་ཉག་པའི་མི་ཁར་སོང་འཚལ་ཞིང་། དྲུང་པ་གྲགས་པ་དོན་གྲུབ་ཀྱིས་ལྷ་ལུང་ཀླུ་སྡིངས་སུ་མཛད་པ་དེ་ལའང་མདོ་སྔགས་གཉིས་མཉམ་པ་བསྲེ་འདུག་པ་འཛམ་གླིང་རྒྱན་གཅིག་གི་བརྟུལ་ཞུགས་ལ་རྒྱུ་མཚན་གླེང་ཡུལ་དུ་མི་སེམས་སོ། །གཉིས་ཀ་འགལ་མེད་དུ་ཉམས་སུ་ལེན་མི་ནུས་ཤིང་མདོ་ལུགས་ལྟར་ཉམས་སུ་ལེན་ན་ཆོ་གའི་འགོ་བོར་སྭ་བྷཱ་ཝ་སོགས་བརྗོད་པ། ཡོ་ག་དང་བླ་མེད་ཀྱི་མཆོད་པ་བྱིན་རླབས། གཏོར་བསྔོས་ཀྱི་སྐབས་བཛྲ་ཡཀྵ་དང་ཕྱག་རྒྱས་སྦྱང་བ། བུམ་སྒྲུབ་ས་བོན་ལས་བསྐྱེད་པ། བསྟོད་པའི་སྐབས་གང་དྲིན་མ་སོགས་སྔགས་དང་འབྲེལ་བའི་ཚིགས་བཅད། ཤར་ཕྱོགས་གཞན་གྱིས་མི་ཐུབ་ཞིང་ཁམས་ནས། །ཞེས་སོགས་སོ་སོའི་གནས་དང་སྦྱར་བའི་ཚིགས་བཅད་བསྐང་གསོལ་དཔེ་བླངས་པ་ལྟ་བུའི་སྤྱན་འདྲེན་གྱི་ཚིག་སྣ་ཚོགས། དཀྱིལ་འཁོར་གཞན་དག་གི་མཆོད་ཕྲེང་མང་པོ་བླངས་ཏེ་གདངས་དང་བཅས་གཞན་སྣང་འདྲིད་པ་ལྷུར་ལེན་ཐབས་སོགས་དགོན་པ་མང་པོའི་བླ་མ་དང་བྱང་འདྲེན་གྱིས་སྣང་བ་ལ་གང་དྲན་བཅུག་པའི་རང་བཟོ་འབའ་ཞིག་ཏུ་ཟད་ཅིང་ལོ་རྒྱུས་འགའ་ཞིག་ཏུ་མཁན་པོས་སྤང་མཆོད་སྤྱན་འདྲེན་རིང་མོ། མདོ་བསྐུལ་རིང་མོ་ལ་སོགས་པ་མཆོད་བརྗོད་ཀྱི་ཆོ་གའི་རིམ་པ་མཐའ་ཡས་པ་མཛད་ཟེར་བ་སྣང་ཡང་། སྡོམ་གསུམ་རབ་དབྱེར། མདོ་བསྐུལ་རིང་མོ་ཞེས་བྱ་བ། །བཀའ་ལ་ནོར་བ་བྱེད་པ་མཐོང་། །མདོ་རྒྱུད་ཀུན་ལས་འདི་མ་གསུངས། །འདི་འདྲའི་རིགས་ཀྱི་ཆོས་འཕེལ་ན། །བསྟན་པའི་རྩ་བ་ནུས་པར་འགྱུར། །སངས་རྒྱས་གསུངས་པའི་ཆོ་ག་ཀུན། །སླ་བར་གྱུར་ཀྱང་མི་བྱེད་ལ། །སངས་རྒྱས་ཀྱིས་ནི་མ་གསུངས་པ། །དཀའ་ཡང་འབད་ནས་བྱེད་པ་མཚར། །ཞེས་གསུངས་པས་འདི་དག་ཁ་གཡར་བ་ལས་ཚད་ལྡན་མིན་ནམ་སྙམ་མོ། །སློབ་དཔོན་ཤཱི་ལ་བྷ་དྲ་དང་གཉགས་དབོན་བསོད་ནམས་བཟང་པོ་སོགས་མཁས་པའི་ཡིག་ཆར་གཤིན་དོན་གྱི་ཆོ་ག་བཤད་པའང་སྟག་ཚང་ལོ་ཙཱ་བས། གཤིན་པོ་ལ་རིགས་དྲུག་རྣམ་དག་ཏུ་གྲགས་པའི་རྙིང་མའི་གཤིན་ཆོག་དང་བསྲེས་པ་ནི་ནམ་ཡང་མི་འཐད་ལ། ཞེས་པ་ནི་མི་བཞེད་པར་མ་ཟད། ངོར་ཆེན་གྱིས་བྱེ་བྲག་ཏུ་གཤིན་པོའི་དོན་དུ་བྱེད་ན་སྤྱན་དྲངས་པའི་རྗེས་མིང་བྱང་ངམ་རྟེན་བཤམས་ནས། དེ་ལ་བགེགས་སྦྱོང་བ་ནས་སྐྱབས་འགྲོའི་བར་བྱེད་ཅིང་། ཁྲུས་ཀྱི་སྐབས་སུ་ཁྲུས་དང་དུག་དབྱུང་སོགས་བྱེད་པ་དང་མཇུག་ཏུ་སྐྱེས་བཅུ་གཉིས་ཀྱི་སྨོན་ལམ་བྱེད་པ་དང་ཞེས་མ་དག་པའི་གྲངས་སུ་མཛད་དེ་སྔགས་ལུགས་ཀྱི་སྐབས་སུ་ཡང་མ་བཞེས་པས་སྔགས་ལུགས་སུ་ཁས་བླངས་ཀྱང་རིགས་འགྲེ་ཧ་ཅང་དཔའ་ཐལ་བའི་དེང་སང་གི་བླ་མ་རྣམས་ཀྱིས་བརྒྱུད་ཁུངས་མེད་པར་ལྷ་དང་བླ་མ་ཡིན་ཚད་ལ་འདས་ཁ་མའི་འཕོ་བའི་ཉམས་ལེན་སྦྱར་བ་དང་འདྲ་བས་རྗེ་མཁྱེན་བརྩེས། ལ་ལ་ཚོམ་བུ་ཙམ་ཡང་མི་འགོད་ལ། །ཆང་འཐུང་ངང་ནས་བློ་ལ་གང་ཡོད་ཀྱི། །ཉག་ཉོག་ཐམས་ཅད་ཆོ་གར་བསྲེ་བ་དང་། །མིང་བྱང་དགུག་གཞུག་ཁྲུས་རྗེས་བསྲེས་པ་སོགས། །ཧ་ཅང་བླུན་པོས་བྱས་པའི་སྒྲོ་བཏགས་དང་། །ཞེས་གསུངས་པ་ཐོག་ཏུ་བབས། ལ་ལ་ཆོས་དཀོན་མཆོག་མཆོད་པའི་དུས་ཕྱོགས་བཅུའི་སངས་རྒྱས་དང་། སྐྱབས་གྲོལ་གྱི་སྐབས་དོན་ཞགས་ལྷ་ལྔའི་ཕྱག་མཆོད་སྦྱོར་བ། ཕྱག་འཚལ་གྱི་ཚེ་བཀའ་གདམས་བརྒྱུད་པའི་ཕྱག་འཚལ་སྦྱོར་བ་སོགས་ཀྱང་འདོན་ཆ་མང་བ་གཙོ་བོར་བཏོན་པའི་སྐྱོན་དང་མདོ་ཆོག་འདི་ཀའི་བཀླགས་ལུང་གི་བླ་བརྒྱུད་ལ། སྐྱི་སྣང་ཚང་བ་དེང་དུ་མེད་པར་དགོན་བླ་རབས་སོགས་མོས་ཚད་བཅུག་པ་སྡེ་དགོན་གོག་པོའི་རྣམ་ཐར་ཁོ་ནར་མངོན། ངོར་ཆེན་གྱི་ཤཱཀ་ཐུབ་ལ་གནས་བརྟན་བཅུ་དྲུག་གི་ཕྱག་མཆོད་སྦྱོར་བ་མི་འཐད་པར་གསུངས་ནའང་སྟག་ཚང་ལོ་ཙཱ་བས་འཐད་པར་གསུངས་པ་སངས་རྒྱས་ཤཱཀྱ་ཐུབ་པའི་འཁོར་གྱི་གཙོ་བོ་ཐེག་དམན་ལྟར་ན་གནས་བརྟན་བཅུ་དྲུག་ཡིན་པས་དོན་གྱིས་ཐོབ་པར་སེམས་མོད། འོན་ཀྱང་ཕྱག་མཆོད་དངོས་སུ་སྦྱོར་ན་ཚིག་ཉོག་གི་རྒྱུ་ཆེ་བས་དེ་ལས་སྔོན་གྱི་ཡིག་རྙིང་ལ་བརྟེན་ནས་གནས་བརྟན་ཕྱག་མཆོད་ལོགས་སུ་བྱས་ན་དངོས་གཙང་ངོ་། །རྨི་རུ་བླ་མ་བྲག་སྒོ་རབ་འབྱམས་པ་ཕུན་ཚོགས་རྒྱལ་མཚན་གྱིས་མཁས་པ་བསྟེན་ནས་སྒྲོ་འདོགས་གཅོད་པ་ལྟ་ཅི་སྨོས་བཀླགས་ལུང་མཚན་ཉིད་ཚང་བ་ཙམ་ཡང་མ་བཙལ་བར་རྟོག་གེ་རྒན་པོའི་ཧམ་པས་གཉགས་དབོན་གྱི་པར་མ་དེ་དང་། གཞན་ཡང་ཡིག་རྙིང་ཐོར་བུ་མཐོང་བར་བརྟེན་ལྷ་ཚོགས་རྣམས་ཀྱི་མངོན་རྟོགས་གསལ་འདེབས་སོགས་ལྷན་ཐབས་མི་ཉུང་བ་ཞིག་བྲིས་ནས། ལེགས་བཤད་དུ་རློམས་ཏེ། པོ་ཏཱ་ལའི་བཀའ་འགྱུར་ཁང་དུ་ཇ་གྲལ་གྱི་སར་སྨན་བླར་རྒྱས་འབྲིང་བསྡུས་གསུམ་ཕྱེད་ཀྱིན་ཡོད་ཅེས་གླེང་པ་རྒྱས་པ་ལ་ལྷན་ཐམས་དེ་སྦྱར་བ་དང་མ་སྦྱར་བའི་དཀྱུས་མ་འབྲིང་པོ་ལྟ་བུའི་རྩིས་ཀྱི་ཞེ་འདོད་སྣང་བ་སྔགས་ཕྱོགས་སུ་སྦྱར་ན་ཐིག་ཚོན་དཀྱིལ་འཁོར་གྱི་རྣམ་བཞག་སོགས་དགོས་པའི་དོགས་པ་ཙམ་ཡང་མ་ཤར་ཞིང་ལྷའི་སྐུ་མདོག་ཕྱག་མཚན་གསལ་པོར་བསྒོམ་པ་སྔགས་ལུགས་ལ་དགོས་ཤིང་མདོ་ལུགས་ལ་བདེན་པའི་སྟོབས་དང་མོས་པའི་མཐུས་མཆོད་གསོལ་བྱེད་པ་མ་གཏོགས་བསྐྱེད་རིམ་ལྟ་བུའི་གསལ་སྣང་མི་དགོས་ལ། བུམ་པ་མདོ་ལུགས་ལྟར་བསྒྲུབ་པ་དང་གསོ་སྦྱོང་ལེན་ཡུལ་བཛྲ་ས་མཱ་ཛཿས་སྤྱན་དྲངས་པ་སོགས་འགལ་འདུ་སྣ་ཚོགས་པའི་སྔགས་ལུགས་སྦྱར་བ་དེ་རྒྱས་པ་དང་། མ་སྦྱར་བ་འབྲིང་པོར་བྱེད་པའི་ལེགས་བཤད་འདི་འདྲ་སྔོན་གྱི་མཁས་པ་རྣམས་ཀྱིས་མ་རྙེད་འདུག་པས་འདི་འདྲའི་རིགས་ལ་ལྷ་བ་ལེགས་བཤད་དུ་མིང་འདོགས་དགོས་པར་སྣང་། ཉིད་ལྷ་བ་སྐུ་སྐྱེའི་རིམ་འདེགས་པར་སོང་བས་གསུང་རབ་བྱིང་དང་མི་མཐུན་པའི་ཆོས་སྐད་འོང་བ་མོད་པར་སྣང་ངོ་། །དེའང་མདུན་གྱི་མཆོད་ཡུལ་དུ་ཆོ་ག་ལས་བྲིས་འབུར་གྱི་རྟེན་འགོད་པར་གསུངས་པ་མདོ་སྔགས་གཉིས་ཀའི་ལུགས་དང་མཐུན་རུང་རྗེ་སྟག་ཚང་པས། པདྨ་འདབ་བརྒྱད་ལ་ཤར་དུ་སྨན་ཐུབ་གཉིས། ལྷོར་མཚན་ཟླ་གཉིས་སོགས་ཀྱིས་བསྐོར་བ། ཤར་སྔོ། ལྷོ་སེར། ནུབ་དམར། བྱང་ལྗང་གུའམ་དམར་སྐྱ་སྟེ། སྨན་བླ་ལ་ནི་བཻ་ཌཱུརྻའི་འོད་ཅེས་གསུངས་ཀྱང་གཞན་རྣམས་ནི་སྐུ་མདོག་ངེས་པར་དཀའ་བས་མཛེས་ཚོན་དུ་གསལ་ལོ། །ཞེས་མདོ་འདི་ཀའི་བཤད་ཁུངས་ཀྱི་སྐུ་མདོག་ཕྱག་མཚན་མ་གསལ་བས་དེང་སང་བྱེད་པ་རྣམས་ནི་རྗེ་སྟག་ཚང་བས། བདེ་གཤེགས་བྱང་སེམས་སོགས་ཀྱི་སྐུ་མདོག་ཕྱག་མཚན་དེང་སང་གི་མཆོད་ཕྲེང་ལ་གྲགས་པ་ཚོར་བཤད་པ་ལའང་མདོའི་ཁུངས་མེད་ཀྱང་རྣལ་འབྱོར་རྒྱུད་ནས་བྱམས་པ་འཇམ་དབྱངས་སོགས་ཀྱི་སྐུ་མདོག་ཕྱག་མཚན་བཤད་པ་སྐབས་སུ་མ་བབས་པ་དང་ཁྱད་པར་གནོད་སྦྱིན་གྱི་ཕྱག་མཚན་ནི་རྒྱུད་ཀྱི་ཁུངས་ཀྱང་མ་མཐོང་བས་དཀའ། ཞེས་གསུངས་པ་མདོར་དངོས་བསྟན་ལ་མེད་པས་ཐུགས་བདེན་མོད། འོན་ཀྱང་མདོ་ལུགས་ལ་བསྐྱེད་རིམ་ལྟར་ལྷའི་གསལ་སྣང་མ་དགོས་རུང་བྲིས་འབུར་ལ་གསལ་ཁ་མེད་ན་འབུར་མ་དང་བྲིས་བྱ་བའི་རྔོ་མ་ཐོགས་པས་སྐུ་མདོག་ཕྱག་མཚན་མེད་ཐབས་མ་བྱུང་བར་དགོངས་ཏེ་རྗེ་སྟག་ཚང་བས། ཆོ་ག་འདི་ལ་རྣལ་འབྱོར་མཛད་པའི་གང་ཟག་མང་པོ་བྱང་ཆུབ་སེམས་དཔའ་དག་པའི་སྣང་བ་ཁྱད་པར་ཅན་མངའ་བ་བྱོན་པ་རྣམས་ཀྱི་གཟིགས་སྣང་སོགས་ཡིན་སྲིད་པས་མཐའ་གཅིག་ཏུ་དགག་པར་མི་ནུས་ཤིང་རི་མོར་འབྲི་བ་སོགས་ལ་སྐུ་མདོག་ཕྱག་མཚན་ངེས་པ་ཅན་བྱེད་ན་སྔ་མའི་ཕྱག་ལེན་ལ་བརྟེན་པ་ལས་མ་འདས་པས་ཕྱག་མཆོད་ཀྱི་སྐྱབས་སུ་འགལ་བ་ཆེར་མེད་པར་མངོན་ནོ། །ཞེས་གསུངས་པ་སྔོན་གྱི་ཡི་གེ་ཁུངས་བཙུན་ལ་བརྟེན་དགོས་པའི་ཤེས་བྱེད་དུ་སོང་ཞིང་སྔ་རབས་ཀྱི་ཡིག་རྙིང་མཐུན་མི་མཐུན་སྣ་ཚོགས་བྱུང་ནའང་རྗེ་ངོར་ཆེན་གྱི་ཡི་གེ་ལྟར་བྱས་ན་དཔྱད་བཟོད་པར་མཐོང་། དེ་ཡང་བཞུགས་ཚུལ་ལ་ཤཱི་ལ་བྷ་དྲ། ངོར་ཆེན། སྟག་ཚང་ལོ་ཙཱ་བ། བྱ་རྒྱུད་ལུགས་ཀྱི་དབང་ཆོག་རྡོ་རྗེ་འཆང་ཕ་བོང་ཁ་པས་མཛད་པ་སོགས་ནས་པདྨ་འདབ་བརྒྱད་ལྟེ་བ་དང་བཅས་པ་བཤད་ཅིང་འགོད་ལུགས་དཀྱིལ་ཆོག་ཏུ་གཙོ་བོ་སྨན་བླ་དང་བྱང་ཤར་དུ་ཡུམ་ཆེན་མོ། ངོར་ལུགས་ལ་ལྟེ་བར་ཡུམ་ཆེན་མོ། གཞན་གཉིས་ལ་ལྟེ་བར་ཆོས་དཀོན་མཆོག །པཎ་ཆེན་ཤཱཀ་མཆོག་གིས་སེང་གེའི་ཁྲི་ཆེན་པོ་བརྒྱད་ཚར་དུ་དངར་བར་བསྒྲིགས་པ། དེ་རེ་རེའི་སྟེང་དུ་དེ་བཞིན་གཤེགས་པ་རེ་རེ་དང་མདོ་འདིའི་པོ་ཏི་ཡང་རེ་རེ་བཞུགས་ཞེས་གྲལ་གཅིག་ལ་སྒྲེང་ཚར་དུ་བསྒྲིགས་པའི་བར་ན་པོ་ཏི་རེ་བཞུགས་པའི་ཁུངས་ཆོ་ག་རྒྱས་པ་ལ་བཅོལ་བ་འདྲ་ཞིང་། མཁན་པོས་མཛད་པའི་མདོ་ཆོག་ཆེ་བར་གྲགས་པར་དེ་པའི་གཡས་གཡོན་གྱི་གྲལ་སྟོད་དུ་འཁོར་བྱང་ཆུབ་སེམས་དཔའ་རྣམས་བཞུགས། གཡས་གཡོན་གྱི་གྲལ་སྨད་དུ་ཚངས་པ་དང་ལྷའི་དབང་པོ་བརྒྱ་བྱིན་དང་རྒྱལ་པོ་ཆེན་པོ་བཞི་དང་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་བཞུགས། གདན་འཛོམ་པའི་དབུས་སུ་པདྨའི་གདན་ལ་བྱང་ཆུབ་སེམས་དཔའ་འཇམ་དཔལ་དང་ཕྱག་ན་རྡོ་རྗེ་དང་སྐྱབས་གྲོལ་གསུམ་གདན་འཛོམ་པ་ལ། ཞེས་བྱུང་བ་ལ་གཞལ་ཡས་ཁང་གི་བཞུགས་ཚུལ་དང་མི་མཐུན་པའི་བོད་ཀྱི་ཚོམས་ཅན་དུ་གྲགས་པ་དང་ཐང་ལ་ཡོལ་བས་བསྐོར་བའི་ནང་དུ་ཆང་ས་ལྟ་བུའི་གྲལ་སྒྲིག་གི་ཉམས་ཤིག་འདུག་པ་བུ་སྟོན་ཐམས་ཅད་མཁྱེན་པས། ཆོས་འབྱུང་དང་དཀར་ཆག་ཏུ་མདོ་ཆོག་རྒྱས་འབྲིང་བསྡུས་གསུམ་ཚད་མར་མཛད་པ་ཟླ་མེད་པའི་མཁས་པ་ཆེན་པོའི་གསུང་ལ་འཁྲུལ་པ་མི་མངའ་ནའང་ཀུན་རིག་རྩ་བའི་དཀྱིལ་འཁོར། གཙུག་དགུ། འཆི་བདག་འཇོམས་པ་མ་གཏོགས་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་ལྷག་མ་རྣམས་དང་མཁའ་འགྲོ་རྒྱ་མཚོའི་དབང་མི་བཞེད་པ་སོགས་སྐབས་འགར་དྲང་དོན་དུ་འགྲེལ་དགོས་ཀྱང་སྣང་ཞིང་། ངེས་པར་ཐམས་ཅད་མཁྱེན་པ་ཞ་ལུ་ལོ་ཆེན་རིན་ཆེན་ཆོས་སྐྱོང་བཟང་པོས་མཛད་པའི་བསྟན་འགྱུར་དཀར་ཆག་ཏུ། བདེ་གཤེགས་བདུན་གྱི་སྨོན་ལམ་ཆོ་ག་དང་ཞེས་པ་ལས་རྒྱས་འབྲིང་བསྡུས་གསུམ་ཡོད་ཚུལ་མ་གསུངས་ཤིང་དེར་མ་ཟད། དེ་ཉིད་ཕྱོགས་གཅིག་སྡུད་པའི་བྱེད་པོ་མཆོག །ཁ་པ་ཅན་གྱི་འདྲེན་པ་གཅིག་པུ་བ། །དྲི་མེད་རྒྱལ་བའི་རིང་ལུགས་གཅེས་འཛིན་པའི། །ཀུན་མཁྱེན་གཉིས་པ་བུ་སྟོན་ཁ་ཆེ་ཡིན། །འདི་ལ་བརྟེན་ནས་ཁ་བ་ཅན་ལྗོངས་འདིའི། །ཕྱོགས་ཕྱོགས་དག་ཏུ་ཐུབ་བསྟན་ལ་བསམས་ནས། །འབྱོར་པས་མངོན་མཐོའི་སྦྱིན་བདག་འགའ་ཞིག་དང་། །བསྟན་འཛིན་རྣམས་ཀྱིས་རྒྱས་པར་བྱས་པ་ཡིན། །སླར་ཡང་ཆོས་ཀྱི་སྤྱན་ལྡན་མཁས་པའི་ཚོགས། །སླད་ནས་འབྱུང་བ་རྣམས་ཀྱིས་འདི་ལ་ཡང་། །མ་ཚང་མ་ཆུད་ནོར་བ་ཆད་པ་དང་། །ཟློས་དང་གོ་རིམ་འཁྲུགས་པ་ལ་སོགས་པ། །བཅོས་པར་བྱ་བ་དུ་མ་ཡོད་པ་རྣམས། །རྐང་གཉིས་མཆོག་གི་བསྟན་ལ་ལེགས་བསམ་ནས། །རྣམ་དག་ལུང་རིགས་གཟུ་བོའི་བློར་ལྡན་པས། །ལེགས་པར་འཆོས་པའི་རྩོལ་བ་མི་འདོར་ཞུ། །ཞེས་གསུངས་པས་དཀར་ཆག་སྔ་མ་རྣམས་ལའང་དག་མ་དག་གི་དཔྱད་པ་དགོས་པར་བསྟན་པའི་ཕྱིར་དད་པའི་རྗེས་འབྲང་ཅི་བྱ་མི་རིགས་བར་སེམས་ལ། ངོར་ཆེན་གྱི་ཆོ་ག་རྒྱས་བསྡུས་གཉིས་བཀའ་གདམས་པ་ཞིག་གིས་བྱས་ཀྱིས་མཁན་ཆེན་ཞི་བ་འཚོས་མཛད་པ་ནི་མ་ཡིན་ནོ་ཞེས་ཐག་བཅད། ཤཱི་ལ་བྷ་དྲ། སྟག་ཚང་པ། ཤཱཀ་མཆོག་པ་གསུམ་གྱི་ཡིག་ཆར་མདོ་རྒྱས་བསྡུས་གཉིས་ཀྱི་འཕྲོས་ཙམ་ཡང་མི་འདུག་ཅིང་བྱམས་དང་སྙིང་རྗེ་སེམས་བསྐྱེད་ཀྱི་སྐོར་རྒྱས་པ་ཕྱོགས་སྐྱོང་འཇིག་རྟེན་སྐྱོང་བ་སོགས་ལྷ་ཀླུ་སྤྱན་འདྲེན་གྱི་ཚིགས་བཅད་སྐོར་དེ་བཞིན་གཤེགས་པ་བདུན་གྱི་སྤྱན་འདྲེན་གོང་དུ་ཡོད་པ། བདེ་བར་གཤེགས་པ་བདུན་གྱི་མཚན་ཡིད་ལ་གཟུང་བར་བྱ་ཞེས་པ་ལས་འཕྲོས་ཏེ། བདེ་གཤེགས་བདུན་སོ་སོ་དང་། བྱེ་བྲག་ཏུ་སྨན་བླའི་ཕན་ཡོན་རྒྱས་བཤད་སོགས་མང་ཙམ་སྣང་ཡང་ཁ་ཐག་རིང་བ་ལས་དགོས་དོན་ལྷག་པོ་ཆེར་མི་འདུག་པས་མཁན་པོ་ཐམས་ཅད་མཁྱེན་པས་མཛད་པའི་མདོ་ཆོག་གཅིག་པུ་འདི་ཀ་ལས་མེད་པར་མངོན་ཞིང་། མདོ་ཆོག་ཆུང་བ་དེ་ལ་སྒོས་ཀྱི་སྨོན་ལམ་བརྒྱད་དོར་ནས་ཐོག་མཐའ་བཟུང་བ་ཙམ་ལས་བརྗོད་བྱ་ཁྱད་ཐོན་མ་བྱུང་མོད། འོན་ཀྱང་ཀར་ལུགས་དྲུང་པ་གྲགས་པ་དོན་གྲུབ་ཀྱིས་མཛད་པའི་སྨོན་ལམ་ཐམས་ཅད་ནས་ཚྭ་རན་བལྟས་པ་ལྟ་བུའི་ཤེར་སྙིང་ཤློ་ཀ་གཅིག་ལ་བསྡུས་ཟེར་བའི་དཔེ་ཟླ་དེ་འདྲ་ལས་ནི་དྲག་ཤས་ཆེ། སློབ་དཔོན་ཚུལ་ཁྲིམས་བཟང་པོས། ཕྱོགས་སྐྱོང་གི་འོག་ཏུ་མཁན་པོ་དང་ཆོས་རྒྱལ་ཡོན་མཆོད་བཞུགས་པར་གསུངས་པ་ནི། ཧ་ཅང་ཐལ་ཆེས་ཏེ། དེ་ལྟར་ན་རྒྱུད་སྡེ་སོ་སོའི་ལྷ་ཚོགས་ཀྱི་ཁྲོད་དུ་ལོ་པཎ་དང་སྦྱིན་བདག་འཇུག་དགོས་པར་འགྱུར་རམ་སྙམ་ཞིང་ཤཱཀ་མཆོག་པས། རྟ་བབས་དྲྭ་བ་ཕྱེད་སོགས་འདུལ་བ་གནས་མལ་གྱི་གཞི་ལས་ཀྱང་བཤད་གསུངས་པ་ལེགས་པའི་ཆར་འགྱུར་ན་ཡང་དེ་འདྲ་བྲིས་ཚེ་བླུན་པོ་རྣམས་ཀྱིས་དཀྱིལ་འཁོར་དུ་འཁྲུལ་གཞི་བྱུང་དོགས་པའི་སྟག་ཚང་པས་ཕ་གུ་ཚུན་བཤད་པ་རྒྱས་བསྡུས་འཚམས་ལ་བྱིན་བརླབ་གསུམ་པ་སྟན་བྱིན་བརླབ་ཀྱི་སྐབས་ལྷ་རྣམས་སྔོ་གྲངས་སུ་བྱས་པར་འགའ་ཞིག་ལ་ལྷ་བསྐྱེད་དམ་སྙམ་པའི་ལོག་རྟོག་འབྱུང་སྲིད་མོད། དེ་ནི་སོ་སོའི་སྟན་བཤམས་པ་ལ་ལྷ་རྣམས་སྤྱན་དྲངས་པའི་ཚེ་དེ་བཞིན་དུ་འགྲུབ་པའི་སྨོན་ལམ་ཡིན་ལ། སྤྱན་འདྲེན་ལུགས་ཀྱང་ཤཱཀ་མཆོག་པས། མ་ག་དྷ་བཟང་མོའི་རྟོག་བརྗོད་དཔེར་མཛད་པ་རྣམ་དཔྱོད་ཀྱི་རྩལ་ཡིན་ཅིང་ཆོས་དཀོན་མཆོག་ལ་ལུང་རྟོགས་གཉིས་ལས་ནི་རྟེན་སངས་རྒྱས་བྱང་ཆུབ་སེམས་དཔའ་རྣམས་སྤྱན་འདྲེན་པ་དེ་ཉིད་ཀྱི་ཆོག་ལ། ཆོས་དབྱིངས་ཤིན་ཏུ་རྣམ་དག་གང་གི་ངོ་བོ་ལ་སྤྱན་འདྲེན་མི་དགོས་པས་སྤྱན་འདྲེན་ལོགས་སུ་མ་བཤད། ཅེས་དང་། དེའི་འཕྲོས་ལས། ཡུམ་ཆེན་མོའི་སྐུ་འབྲི་བར་མི་འཐད་པར་བཤད་པ་མདོ་ལུགས་སོར་བཞག་ན་དེ་ལེགས་པར་མངོན་ཏེ། རྗེ་སྟག་ཚང་པས། ཆོས་དཀོན་ཅོག་གཙོ་བོར་ལུང་ལ་སྦྱར་ནས་གསུངས་པ་ལ་སྤྱིར་ལྷ་སྐུ་དང་སྒོས་ཆོས་སྤྱི་ལ་སྦྱོར་རྒྱུ་ཤེར་ཕྱིན་ཁོ་ན་དང་དེ་ཡང་ཡོ་ག་ནས་བཤད་པའི་དམར་སེར་ཕྱག་གཡས་སོགས་ནི་རང་བཟོ་ཁོ་ན་ཡིན་ནོ། །ཞེས་པས་ཤེས་ནུས། སྔགས་ལུགས་ཀྱི་ཆོ་ག་དང་དབང་གི་རྣམ་བཞག་བྱེད་ན་ལྷ་སྐུ་ཞལ་ཕྱག་གི་རྣམ་པ་ངེས་པར་དགོས་ཤིང་ཆོས་ཐམས་ཅད་ཀྱི་སྙིང་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ལྷག་པ་མེད་པས་སྐྱོན་དུ་མི་འགྱུར་བར་སེམས། ངོར་ཆེན་གྱི་ལྷ་རྣམས་ཞལ་ཕྱིར་བལྟས་ཀྱི་ཙཀ་ལི་ལ་ཕོ་བྲང་དུ་མིང་བཏགས་པ་བོན་པོའི་ལུགས་ཀྱི་རྟེན་བཤམ་པ་དང་། ཞེས་གསུངས་པ་མདོ་ཆོག་གི་ཚིག་དོན་ལ་དཔགས་ཀྱང་ལེགས་པར་མ་མཐོང་ཞིང་བསྟན་པ་སྔ་དར་གྱི་དུས་ཆོས་དང་འཕྲད་གྱི་དོན་ཚུལ་བཞིན་དུ་མ་གོ་བའི་མིའི་རིགས་དང་བོན་ཆོས་ལ་གནག་པ་དག་གི་ཆེད་དུ། སངས་རྒྱས་དང་བྱང་སེམས་ཀྱི་སྐུ་ལ་རྒྱལ་བློན་གྱི་མིང་འདོགས་པ་སོགས་བྱུང་འདུག་པས་དུས་དེར་དགོས་དབང་གིས་བོན་དང་ཕྱོགས་མཐུན་པར་མཛད་པའམ་ཡང་ན་ལས་དང་པོ་པ་འདྲས་ལག་ལེན་ཁོང་དུ་མ་ཆུད་པའི་རྒྱུན་འབྱམས་པའི་ངེས་པ་མི་འདུག །རྗེ་སྟག་ཚང་པས། ཕོ་བྲང་དུ་གྲགས་པ་མང་པོའི་དར་ཤམ་གྱི་ཙཀ་ལི་ལ་དཀྱིལ་འཁོར་ཡོངས་རྫོགས་ཀྱི་སྒོ་དང་སྒོ་ཁྱུད་དྲྭ་ཕྱེད་སོགས་བྱས་པའང་མི་འཐད་དེ་མདོའི་ཁུངས་མེད་ལ། རྒྱུད་ཀྱི་ཁུངས་རྣམས་དང་སྐབས་མ་འབྲེལ་བའི་ཕྱིར་རོ། །ཞེས་པའི་གསུངས་ལ་དཔག་ན་མདོ་ནས་བཤད་པའི་དཀྱིལ་འཁོར་མ་འགྲུབ་པའི་རིགས་ལ་དེ་ཚབ་ཏུ་བྱས་པར་འགལ་བ་མེད་ཅིང་དཀྱིལ་འཁོར་གྱི་སྟེང་དུ་ཕོ་བྲང་བཙུགས་ན་མི་འཐད་པ་ཡིན་ནམ་ཡང་ན་དར་ཤམ་ལ་དཀྱིལ་འཁོར་གྱི་རི་མོ་བྱས་པའང་བྱུང་སྲིད་པ་ལ་དགོངས་སམ་སྙམ། པཎ་ཆེན་ཤཱཀ་མཆོག་པས། གཞན་དང་སྨན་བླའི་ཕོ་བྲང་དུ་གྲགས་པའི་ཆོས་པོ་ཏི་དབུས་སུ་བཞུགས་པ་ལ་ལྷ་རྣམས་ཞལ་ཕྱིར་བསྟན་ནས་བྲིས་པ་འདི་ནི་མདོ་སྔགས་ཀྱི་ལུགས་གང་དང་ཡང་མི་མཐུན་མོད། བསོད་ནམས་གསོག་པའི་ཡན་ལག་ཏུ་འགལ་བ་མེད་དོ། །ཞེས་པར་དཔག་ན་དེང་སང་བྲིས་ཐང་ཙམ་རེ་གཉིས་དགྲམ་པ་ལས་ཚོམ་བུས་མཐའ་རྟེན་པའི་དམིགས་རྟེན་གྱི་རིགས་མ ི་བཤམ་པའི་སླ་ཆོས་གཙོར་བཏོན་འདི་འདྲ་ལས་ཕོ་བྲང་ཡང་སྐྱོན་དུ་མི་འགྱུར་བ་འདྲ་ལ། འོན་ཀྱང་མཁས་པ་ལ་ལས་ལྷ་རྣམས་རྒྱབ་སྤྲོད་མཛད་པར་བརྟེན་བོད་ཀྱི་རྒྱལ་ཁྲིམས་ཞིག་ཅིང་མི་ཤེས་པ་བྱུང་བ་སོགས་གསུང་འདུག་པ་སྔགས་རྙིང་མའི་སྒྲོམ་ཁྲིར་ཙཀ་ལི་མང་པོ་འགོད་པ་ནི་རྒྱན་དགོད་ལས་དངོས་གཞི་མ་ཡིན་ལ། འདིར་ནི་རྟེན་བཤམ་པར་བཤད་པ་དེ་ཀ་དངོས་བསྟན་པ་ཡིན་པས་མི་ཤིས་པའི་དོགས་གནས་ཙམ་འདྲ་ཡང་། ཀཀྞིའི་དཀྱིལ་འཁོར་ཞལ་སྦུབ་པ་སོགས་ལ་དཔག་ན་བློའི་བྱེ་བྲག་ལས་མཐའ་གཅིག་ཏུ་མ་ངེས་ཤིང་། གཙོ་བོ་ནི་གང་ཟག་གི་རྟོགས་པ་མཐོ་དམའ་ལ་རག་པ་འདྲའོ། །གཞན་མ་ཤཱཀ་མཆོག་པའི་དེར་ཚད་མེད་ཀྱི་རྗེས་སུ་སྟོང་ཉིད་དང་སེམས་བསྐྱེད་ཀྱི་གོ་རིམ་གཞན་དང་མི་མཐུན་པས་མི་འཐད་པར་སེམས་ཤིང་། བྷཻ་ཥ་ཛྱེ་མདོ་དང་ཆོ་གར་མེད་གསུངས་པ་བདེན་ཀྱང་ལྷན་ཐབས་སུ་ཅུང་ཟད་དགོས་པ་ཁ་འཕངས་པས་མི་གསལ་བས་གཟུངས་འདི་ཡང་མཁན་པོའི་དགོངས་པར་དོན་གྱིས་འགྲོ་བར་བརྟེན་མཁས་པ་རྣམས་ཀྱིས་སྦྱར་བ་ཡིན་ཅིང་། མ་རིག་མུན་སེལ་མདོ་ཆོག་ན་མེད་གསུང་ནའང་བསྟན་འགྱུར་ཁུངས་བཙུན་པར་ཡོངས་གྲགས་ཀྱི་ཆོ་གར་འདུག་པས་དཔེ་མ་དག་པ་ཞིག་གཟིགས་པ་འདྲ། ཆོ་གར་གདུགས་བཞི་བཅུ་རྩ་དགུ་ལ་དེའི་རྣམ་པར་ཤེས་པ་སླར་ལྡོག་ཅིང་དྲན་པ་རྙེད་ལ། ཞེས་པར་ལ་ལ་དག་མངོན་པ་མཛོད་དུ། མི་ལྡོག་དེ་ནི་དྲི་ཟའོ། །ཞེས་ཕུང་པོ་རྙིང་པ་ལ་འཇུག་པར་མི་སྲིད་པའི་དོགས་གནས་བྱེད་ནའང་ཐེག་པ་ཆེ་ཆུང་གི་བཤད་ཚུལ་ལ་མཐའ་གཅིག་ཏུ་ཚད་བཟུང་དཀའ་བས་དཔེར་ན་དུས་ཀྱི་འཆི་བ་ལ་རིམ་གྲོ་སོགས་ཀྱིས་མི་ལྡོག་ཅིང་དུས་མིན་ལ་ལྡོག་ནུས་པའི་རིགས་པས་ཚེ་ཟད་ནས་ཤི་བའི་རྣམ་ཤེས་ཕུང་པོ་རྙིང་པར་མི་འཇུག་ཀྱང་མ་ཟད་ན་འཇུག་ནུས་པའི་གནད་འགག་གཅིག་ཡོད་འདུག་པས་འཇམ་དཔལ་གྱིས་ཆོ་ག་ཞུས་པའི་དགོངས་པ་དང་གཉིས་ཀྱི། ཕྱི་མའི་སྐབས་ཤཱཀ་མཆོག་པས། མཐར་བྱེད་ཀྱི་གཤིན་རྗེས་ཟིན་པའི་རྣམ་པར་ཤེས་པ་སླར་ལོག་སྟེ་ཚེ་རིང་བར་འགྱུར་བ་ལ་སོགས་ཞེས་གསུངས་པ་དོན་དང་འབྱོར་བར་མཐོང་ཞིང་མདོའི་དངོས་བསྟན་གྱི་ཚིག་དང་མཁན་པོས་ལྷན་ཐབས་སུ་བླན་པའི་ཁྱད་པར་ལ་གཞུང་འདིར་ས་གཞི་བརླབ་པ་ནས་རྫུ་འཕྲུལ་གྱིས་ནམ་མཁའ་ལ་གཤེགས་ཏེ་བཞུགས་པའི་བར་ནི་སྔོན་མདོ་སྡེ་འདི་གསུང་བའི་དུས་སུ་ལྷའི་བུ་ཤེས་རབ་ཆུང་བ་རྣམས་ཀྱི་ཐེ་ཚོམ་བསལ་པའི་སླད་དུ་དེ་བཞིན་གཤེགས་པ་བདུན་ཞིང་འདིར་སྤྱན་དྲངས། ཤཱཀ་ཐུབ་དང་ཐབས་གཅིག་ཏུ་བཞུགས་པ་ལ། འཇམ་དཔལ་དང་ཕྱག་ན་རྡོ་རྗེ་གཉིས་ཞུ་བ་ཞུ་ལན་དངོས་སུ་མཛད་ཅིང་མདོའི་དོན་དང་གཟུངས་སྔགས་བརླབས་པར་མཛད་པ་ལ་བརྟེན་པའོ། །དེ་ལྟ་མོད་ཀྱི་ཤཱཀ་ཐུབ་མན་ཆད་སྤྱན་དྲང་བའི་ཚིག་རྣམས་ནི་མདོ་དང་དངོས་སུ་སྦྱོར་རྒྱུ་མེད་ཀྱང་། བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པ་ཞེས་པ་ནས། ལེགས་པར་བརྒྱན་པའི་ས་གཞི་ལ་ཞེས་པའི་བར་ཕལ་ཆེར་མདོར་དངོས་སུ་སྣང་ལ། གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ་ཞེས་པ་ནས། སྨོན་པ་མེད་པ་ནས་འཇུག་པ་ཞེས་པའི་བར་མདོར་མི་སྣང་ཡང་ཐོགས་མེད་ཀྱི་ཐེག་བསྡུས་ལས་བྱུང་བ་བཞིན་བསྣན། ཞིང་ཁམས་དེ་དང་དེ་དག་གི་དབུས་ན་གཞལ་ཡས་ཁང་མཚམས་ཉིད་ཚང་བ་ཡོད་པ་སྨན་བླའི་ཐད་ཀྱི་མདོར་གསལ། །མཛེས་པ་ཤ་སྟག་འབྱུང་བར་གྱུར་ཅིག་དང་། ལོངས་སྤྱོད་པར་གྱུར་ཅིག་དང་། དེ་བཞིན་དུ་གྱུར་ཅིག །ཞེས་པ་རྣམས་མདོ་དང་སྦྱོར་རྒྱུ་མེད། གཞལ་མེད་ཁང་གི་དབུས་སུ་སེང་གེའི་ཁྲི་ཆེན་པོ་བརྒྱད་ལ་དེ་བཞིན་གཤེགས་པ་བརྒྱད་བཞུགས་པ་དང་བར་གྱི་སྣམ་བུ་ལ་བྱང་ཆུབ་སེམས་དཔའ་གླེང་གཞི་ལས་བྱུང་བ་ཞེས་པ་ནི་མདོ་དང་སྦྱོར་རྒྱུ་ཡོད། ཆོས་པོ་ཏི་བཞུགས་པ་དང་འཇམ་དཔལ་ལ་སོགས་པའི་གདན་ལྷག་མ་བཤམ་པ་ནི་མདོ་དང་སྦྱོར་རྒྱུ་མེད། ཡང་དེ་བཞིན་གཤེགས་པ་བདུན་ལ་ཕྱག་མཆོད་འབུལ་བ་དང་དེ་དག་གི་སྔོན་གྱི་སྨོན་ལམ་དང་མཐུན་པའི་སྨོན་ལམ་འདེབས་པ་ནི་མདོ་དང་སྦྱོར་རྒྱུ་ཡོད། ཤཱཀ་ཐུབ་མན་གྱི་ཕྱག་མཆོད་གཉིས་ལ་མདོ་དང་སྦྱར་རྒྱུ་མེད་ཅིང་ཆོ་གའི་ཚིག་གཞན་རྣམས་ནི་མདོའི་ཚིག་དངོས་བསྟན་ལ་ཡོད་དོ། །རྗེས་ཆོག་གི་ཚིག་རྣམས་ནི་མཁན་པོ་བྱང་ཆུབ་སེམས་དཔའ་ཉིད་ཀྱིས་ཉེ་བར་སྦྱར་བ་ཡིན་ནོ། །ཞེས་གསུངས་པ་ནི་ལེགས་པར་སྣང་། དེ་བཞིན་གཤེགས་པའི་བཀའ་ཡང་དག་པ་ཞེས་སོགས་ནི་སྨོན་ལམ་རྣམས་འགྲུབ་བྱེད་དུ་མདོར་མེད་ཀྱང་མཁན་པོས་མཛད་པ་ཡིན་ནོ། ༈ །བཞི་པ་ཉམས་སུ་བླང་བྱའི་ཆོ་ག་ལ། སྔོན་འགྲོ། དངོས་གཞི། རྗེས་དང་གསུམ་ལས། དང་པོ་མདོ་ཆོ ག་ལས། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་གཟུངས་ཀློག་པའི་ཆོ་ག་མདོ་སྡེ་ལས་བཏུས་པ། དེ་བཞིན་གཤེགས་པ་བདུན་ལ་ཕྱག་འཚལ་ལོ། །ཆོ་ག་བྱེད་པར་འདོད་པས་ལུས་ལེགས་པར་བཀྲུས་ལ་གོས་བཟང་པོ་དྲི་མ་མེད་པ་བགོ་ཞིང་ཁ་ཟས་གཙང་མ་བཟའ་བར་བྱ། སེམས་ཉོན་མོངས་པ་ལ་སོགས་པའི་དྲི་མ་མེད་པར་བྱས་ཏེ། དཀོན་ཅོག་གི་ཡོན་ཏན་དང་མདོ་སྡེའི་ཕན་ཡོན་ལ་ཡིད་ཆེས་ཤིང་དད་པ་དང་གུས་པ་བསྐྱེད། ཚད་མེད་པ་བཞི་བསྒོམ། ཁྱིམ་པ་ཡིན་ན་བསྙེན་གནས་ཀྱི་ཁྲིམས་གཟུང་། དུས་བཟང་པོ་ཚེས་བརྒྱད་ལྟ་བུ་ལ་བརྩམ། གནས་ཡིད་དུ་འོང་བ་གཙང་མར་བྱས་ལ་གདུགས་དང་རྒྱལ་མཚན་མང་པོས་ལེགས་པར་བརྒྱན་པའི་ནང་དུ་སྤོས་ཀྱི་མཎྜལ་ཆེན་པོ་བྱས་ལ་ཚོན་ཕྱེའམ་མེ་ཏོག་གིས་དགྲམ་པར་བྱའོ། །ལུགས་སྐུའམ་རས་བྲིས་སམ། འཇིམ་པ་ལ་བྱས་པ་ཡང་རུང་སྟེ་རིང་བསྲེལ་དང་བཅས་པ་བྱ། འཁོར་འཇིག་རྟེན་དང་འཇིག་རྟེན་ལས་འདས་པའི་གདན་ཡང་བཤམ། མཆོད་པ་ཅི་འབྱོར་པ་ཡང་བཤམས་ཏེ། སྐུ་གཟུགས་རེ་རེའི་སྤྱན་སྔར་མར་མེ་བདུན་བདུན་དང་ཚོན་སྣ་ལྔའི་བ་དན་བདུན་བདུན་བཞག །གཞན་ཡང་སྤོས་དང་། མེ་ཏོག་དང་། དྲི་དང་། ལྷ་བཤོས་དང་། རོལ་མོའི་བྱེ་བྲག་དང་། རིན་པོ་ཆེ་སྣ་བདུན་དང་། བཀྲ་ཤིས་ཀྱི་རྫས་བརྒྱད་དང་། བུམ་པ་ལ་སོགས་པ་སྟ་གོན་བྱའོ། །མདོ་སྡེ་འདི་དང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མདོ་སྡེ་ཟབ་ཅིང་རྒྱ་ཆེ་བ་ཡང་ཅི་ནུས་ཀྱིས་བཀླག །གཟུངས་ཀྱི་ཆོ་ག་འདི། ཞག་བདུན་ནམ་ཞག་ཉི་ཤུ་རྩ་གཅིག་གམ། སུམ་ཅུ་རྩ་ལྔའམ། བཞི་ཅུ་རྩ་དགུ་སྙེད་དུ་བཀླག་པར་བྱའོ། །དེ་ལྟར་མཆོད་པ་བཤམས་པ་དག་དགེ་འདུན་ཚོགས་ནས་བསྟན་བདེ་པ་ལ་འདུག་ནས་སྟོང་པ་ཉིད་ཀྱི་ཏིང་ངེ་འཛིན་ཅི་ནུས་སུ་བསྒོམ། ཞེས་གསུངས་པའི་དོན་བསམ་པ་དང་བསྒོམ་པ་གཉིས་ཡོད་པའི་བཤམས་པ་ལ། གནས་ཁྱད་པར་ཅན་ཡིད་དུ་འོང་བར་ཕྱག་དར་དང་ཆག་ཆག་གདབ་ཅིང་ས་རྒྱན་གནམ་རྒྱན་སོགས་བཀོད་པས་མཛེས་པར་སྟེགས་བུའམ་མ་འགྲུབ་ན་ཞལ་བ་སྤོས་དང་སྨན་གྱི་བྱུག་པས་དྲི་ཞིམ་པར་བྱ། དེར་གཞལ་ཡས་ཁང་བྲི་བ་ལ་སྔགས་ནས་བྱུང་བའི་ཐིག་ཚོན་གྱི་ཆོ་ག་མི་དགོས་ཀྱང་ཚད་མི་འཕྱུག་པའི་ཕྱིར་དུ་ཐིག་ཆེན་བརྒྱད་ནས་སྒོ་ཁྱུད་ཀྱི་བར་གདབ། ཚོན་བཀྱེ་ལུགས་རྟ་བབས་སོགས་སྤངས་པའི་གཞལ་ཡས་ཁང་གྲུ་བཞི་སྒོ་བཞི་པའི་དབུས་སུ་ལྷ་སྣམ་དཀར་པོ་གྲུ་བཞི་པ། དེའི་ཕྱི་རོལ་དུ་ཤར་སྔོ། ལྷོ་སེར། ནུབ་དམར། བྱང་ལྗང་བའི་ལྷ་སྣམ་གྲུ་བཞི་པ་གཉིས་བྱས་ལ། ལྟེ་བར་པདྨ་འདབ་མ་བརྒྱད། བར་མ་ལ་པདྨ་བཅུ་དྲུག་ཕྱི་མ་ལ་ཉེར་བཞི། དབུས་དང་ཕྱོགས་མཚམས་ཀྱི་འདབ་མ་བརྒྱད་ལ་སེང་གེའི་ཁྲི་རེ་རེ། བར་མར་ཟླ་གདན་རེ། ཕྱི་མའི་ཤར་སྒོ་ནས་བརྩམས་ཏེ་གཡས་གྲལ་ལ་ཕྱོགས་སྐྱོང་བཅུ་དང་ཉི་མ་ཟླ་བར་བྲག་རིའི་གདན། གཡོན་གྲལ་ལ་སྡེ་དཔོན་བཅུ་གཉིས་ལ་ཟ་འོག་གི་གདན། སྒོ་བཞིར་རྒྱལ་པོ་ཆེན་པོ་བཞི་ལ་པད་ཟླའི་གདན་རྣམས་རྡུལ་ཚོན་གྱིས་ལེགས་པར་བཞེངས། དེའི་ཕྱི་རོལ་ཏུ་རིན་པོ་ཆེའི་བྱེ་མ་བརྡལ་བ་དང་ཨུཏྤལ་སོགས་ཞིང་གི་ཁྱད་པར་བཤད་པ་རྣམས་བདེ་བ་ཅན་གྱི་ཞིང་བཀོད་ལྟར་ཐོ ན་ན་གང་ལེགས་འབྲི། ཕ་གུའང་སྔགས་ལུགས་ལྟར་རྩིག་པའི་སྟེང་དུ་མ་ཡིན་པར་ཕྱི་རོལ་ནས་མཐའ་བསྐོར་བའི་རྒྱ་ཆེ་བ་སྟེ་དཔེར་ན་སྐྱེད་མོས་ཚལ་ཡངས་པའི་དབུས་སུ་རྒྱ་གར་གྱི་ཁང་བཟང་འདྲ་བ་དང་དེའི་མཐར་ལྕགས་རིས་བསྐོར་བ་ལྟ་བུའི་དོན་སྤྱི་ཤེས་དགོས་ཤིང་རྩིག་པའི་སྟེང་ནས་བྲེ་ཕུལ་གྱིས་བཏེག་པའི་རིན་པོ་ཆེའ ི་རྒྱ་ཕིབ་ཅན་ནོ། །དེར་འགོད་པའི་དམིགས་རྟེན་ནི་དབུས་སུ་མཉྫི་ལྟ་བུའི་ཁར་མདོ་བརྒྱད་བརྒྱ་པའི་གླེགས་བམ་བཞུགས། ཤར་ནས་བརྩམས་ཏེ་ལྷ་རྣམས་འགོད་པ་ལ། བྲིས་འབུར་གང་བྱེད་ཀྱང་མངོན་རྟོག་མེད་ཁ་མེད་དུ་འདུག་པ་བཞེད་ཚུལ་མང་ཡང་རྒྱལ་བའི་སྲས་ཐོགས་མེད་བཟང་པོ་དཔལ་གྱི་ལུགས་བཞིན། ཤར་དུ་ཤཱཀ་ཐུབ་སེར་པོ་གཡས་ས་གནོན་དང་གཡོན་མཉམ་གཞག་ཅན། ལྷོར་སྒྲ་དབྱངས་སེར་པོ་གཡས་མཆོག་སྦྱིན་དང་གཡོན་མཉམ་བཞག་ཅན། ནུབ་ཏུ་མྱ་ངན་མེད་མཆོག་དམར་སྐྱ་ཕྱག་གཉིས་མཉམ་བཞག་ཅན། བྱང་དུ་མཚན་ལེགས་སེར་པོ་གཡས་མི་འཇིགས་པ་དང་གཡོན་མཉམ་གཞག་ཅན། བྱང་ཤར་དུ་སྨན་བླ་སྔོན་པོ་གཡས་མཆོག་སྦྱིན་གྱི་ཕྱག་རྒྱས་ཨ་རུ་ར་དང་གཡོན་མཉམ་བཞག་སྟེང་ན་ལྷུང་བཟེད་ཅན། ཤར་ལྷོར་གསེར་བཟང་སེར་པོ་ཕྱག་གཉིས་ཆོས་འཆད་ཅན། ལྷོ་ནུབ་ཏུ་ཆོས་བསྒྲགས་དཀར་དམར་ཕྱག་གཉིས་ཆོས་འཆད་ཅན། ནུབ་བྱང་དུ་མངོན་མཁྱེན་དམར་པོ་གཡས་མཆོག་སྦྱིན་དང་གཡོན་མཉམ་གཞག་ཅན། ཐམས་ཅད་ཀྱང་ཆོས་གོས་དུར་སྨྲིག་དང་མཚན་བཟང་གིས་སྤྲས་པ་རྡོ་རྗེའི་སྐྱིལ་ཀྲུང་ཅན། བར་གྱི་སྣམ་བུ་དང་པོའི་ཤར་དབུས་སུ་འཇམ་དབྱངས་དམར་སེར་གླེགས་རལ་ཅན། དེའི་གཡས་སུ་སྐྱབས་གྲོལ་དཀར་པོ་ཕྱག་གཉིས་རྡོ་རྗེ་ཁུ་ཚུར་བརླའི་སྟེང་དུ་བཞག་ནས་བསྙེམས་ཚུལ་གྱིས་ཅུང་ཟད་འགྱིང་བ། བྱང་ཤར་གྱི་གྲར་ཉི་མ་ལྟར་སྣང་བྱེད་དམར་སེར་གཡས་ཨུཏྤ་ལའི་སྟེང་ན་ཉི་མས་མཚན་པའི་གླེགས་བམ། གཡོན་རྡོ་རྗེ་ཁུ་ཚུར་དཀུར་བརྟེན་པ། འཇམ་དབྱངས་ཀྱི་གཡོན་དུ་ཕྱག་རྡོར་ལྗང་གུ་གཡས་རྡོ་རྗེ་ཐུགས་ཀ་དང་གཡོན་རིན་པོ་ཆེའི་ཕྲེང་བ་ཅན། ཤར་ལྷོའི་གྲྭར་ཟླ་བ་ལྟར་སྣང་བྱེད་དཀར་པོ་གཡས་ཨུཏྤ་ལའི་སྟེང་ན་གླེགས་བམ་ཟླ་བ་ཚེས་པས་མཚན་པ་གཡོན་རྡོ་རྗེ་ཁུ་ཚུར་དཀུར་བརྟེན་པ། གླིང་གཞི་ནས་བྱུང་བའི་འཛིན་པ་བཅུ་གཅིག་ནི། ལྷོའི་སྣམ་བུ་ལ་སྤྱན་རས་གཟིགས་དཀར་པོ་པདྨ། དེའི་གཡོན་དུ་བློ་གྲོས་ཆེན་པོ་སེར་པོ་མིག་གིས་སྤྲས་པའི་པདྨ། བྱམས་པ་མགོན་པོ་སེར་པོ་ཀླུ་ཤིང་གི་མེ་ཏོག་སྡོང་བུ་དང་བཅས་པ་རིལ་པ་སྤྱི་བླུགས་ཀྱིས་མཚན་པ། ལྷོ་ནུབ་ཀྱི་གྲྭར་སྤོབ་པ་བརྩེགས་དཀར་པོ་རལ་གྲི། ནུབ་ཏུ་རྣམ་གནོན་དོན་ཡོད་དཀར་པོ་རལ་གྲི། ལྟ་ན་སྡུག་དཀར་པོ་པདྨའི་སྡོང་བུའི་སྟེང་ན་གླེགས་བམ་རིན་པོ་ཆེས་སྤྲས་པ། མུན་པ་ངེས་པར་འཇོམས་པའི་བློ་གྲོས་དཀར་པོ་དབྱུག་པ། ནུབ་བྱང་གི་གྲྭར་བསམ་པ་ལེགས་པར་སེམས་དཔའ་དཀར་པོ་བུམ་པ། བྱང་དུ་ལྷུན་པོ་བརྩེགས་དཀར་པོ་ཟླ་ཕྱེད་ཀྱི་མཚན་པའི་པདྨའི་སྡོང་བུ། སང་སང་པོའི་དབྱངས་སྔོ་སྐྱ་ཨུཏྤལ་རིན་པོ་ཆེ་འབར་བ་དང་རྡོ་རྗེས་སྤྲས་པ། ལྷུན་པོ་རྩེ་འཛིན་རྒྱལ་པོ་སེར་པོ་རིན་པོ་ཆེའི་སྙེ་མ། བཅུ་གཅིག་པོ་རྣམ་གཡས་པས་རང་རང་གི་ཕྱག་མཚན་ཐུགས་ཀ་དང་གཡོན་རྡོ་རྗེ་ཁུ་ཚུར་དཀུར་བརྟེན་པ། ཐམས་ཅད་ཀྱང་རིན་པོ་ཆེའི་རྒྱན་དང་དར་སྣ་ཚོགས་གསོལ་ཞིང་ཞི་བའི་ཉམས་ཅན་སེམས་སྐྱིལ་གྱིས་བཞུགས་པ། སྣམ་བུ་ཕྱི་མའི་ཤར་སྒོའི་གཡོན་དུ་གནོད་སྦྱིན་གྱི་སྡེ་དཔོན་མི་འཇིགས་སེར་པོ་རྡོ་རྗེ། དེའི་གཡས་སུ་རྡོ་རྗེ་སྨུག་ནག་རལ་གྲི། རྒྱན་འཛིན་སེར་པོ་དབྱུག་ཏོ། །བྱང་ཤར་གྱི་གྲྭར་གཟའ་འཛིན་སྔོ་སྐྱ་དབྱུག་ཏོ། །བྱང་དུ་རླུང་འཛིན་དམར་པོ་རྩེ་གསུམ། གནས་བཅས་དུད་ཁ་རལ་གྲི། དབང་འཛིན་དམར་པོ་བྱུག་པ། གཏུང་འཛིན་སེར་པོ་དབྱུག་ཏོ། །ནུབ་བྱང་གི་གྲྭར་སྨྲ་འཛིན་སེར་པོ་སྟྭ་རེ། ནུབ་ཏུ་བསམ་འཛིན་སེར་པོ་ཞགས་པ། གཡོ་འཛིན་སྔོན་པོ་དབྱུག་ཏོ། །རྫོགས་བྱེད་དམར་པོ་འཁོར་ལོ། །གཡས་རང་རང་གི་ཕྱག་མཚན་ཐུགས་ཀ་དང་གཡོན་རིན་པོ་ཆེ་སྐྱུག་པ འི་ནེའུ་ལེ་འཛིན་ཅིང་རིན་པོ་ཆེའི་རྒྱན་དང་དར་ལྷབ་ལྷུབ་མནབ་པ། ལྟོ་བ་དང་གསུས་ཁྱིམ་ཆེ་བ། འཇིགས་ཤིང་རྔམས་པའི་ཆ་བྱད་ཅན། རྒྱལ་པོ་རོལ་པའི་ལྟབས་ཀྱིས་བཞུགས་པ། ཤར་སྒོའི་གཡས་སུ་ཤིང་རྟའི་སྟེང་དུ་ཉི་མ་དམར་པོ་ཕྱག་གཉིས་ཉི་མའི་དཀྱིལ་འཁོར། དེའི་གཡོན་དུ་ངང་པའི་སྟེང་དུ་ཟླ་བ་དཀར་པོ་ཕྱག་གཉིས་ཟླ་བ། ངང་པའི་སྟེང་དུ་ཚངས་པ་སེར་པོ་གདོང་བཞི་པ་གཡས་འཁོར་ལོ་དང་གཡོན་བུམ་པ། ཤར་ལྷོའི་གྲྭར་བརྒྱ་བྱིན་དཀར་པོ་གླང་པོ་ཆེ་ལ་གནས་པ་རྗོ་རྗེ། ལྷོར་མེ་ལྷ་དམར་པོ་ར་སྐྱེས་ལ་གནས་པ་མེ་ཐབ། གཤིན་རྗེ་སྔོན་པོ་མ་ཧེ་ལ་གནས་པ་དབྱུག་ཏོ། །སྲིན་པོ་ནག་པོ་རོ་ལངས་ལ་ཞོན་བ་རལ་གྲི། ཆུ་ལྷ་དཀར་པོ་ཆུ་སྲིན་ལ་གནས་པ་སྤྲུལ་ཞགས། ལྷོ་ནུབ་ཀྱི་གྲྭར་རླུང་ལྷ་སྔོ་སྐྱ་ཤ་བ་ལ་གནས་པ་བ་དན། ནུབ་ཏུ་གནོད་སྦྱིན་སེར་པོ་རྟ་ལ་གནས་པ་དབྱུག་ཏོ། །དབང་ལྡན་དཀར་པོ་གླང་ལ་གནས་པ་རྩེ་གསུམ། སའི་ལྷ་མོ་སེར་མོ་ཕག་ལ་གནས་པ་ཕྱག་གཉིས་ཀྱིས་བུམ་པ་འཛིན་པ། ཐམས་ཅད་ཀྱང་རིན་པོ་ཆེའི་ཅོད་པན་དང་དར་གྱིས་མཛེས་པ། ཤར་སྒོར་ཡུལ་འཁོར་བསྲུང་དཀར་པོ་ཕྱག་གཉིས་པི་ཝང་། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི། ནུབ་སྒོར་སྤྱན་མི་བཟང་དམར་པོ་སྦྲུལ་ཞགས། བྱང་སྒོར་རྣམ་ཐོས་སྲས་སེར་པོ་ནེའུ་ལེ་འཛིན་པ། བཞི་ཀའང་རིན་པོ་ཆེའི་ཅོད་པན་དང་དར་སྣ་ཚོགས་ཀྱི་བགླུབས་ཤིང་ཞབས་གཉིས་མཉམ་སྟབས་ཀྱིས་བཞེངས་པ་རྣམས་ཀྱི་སྐུ་རབ་གསེར་དངུལ། འབྲིང་སྨན་འདག །ཐ་མའང་ཙཀ་ལི་བྲིས་པ་གནས་སོ་སོར་དགོད། ཡིག་རྙིང་ཚོར་རས་བྲིས་བྱེད་པའི་གསལ་ཁ་མ་བྱུང་ཡང་ཆུ་ཚོན་གྱི་ཕོ་བྲང་ལ་ལྷ་རྣམས་བྲིས་ན་འཇུག་པ་བདེ་བར་མངོན་ཤིང་དེ་ཙམ་ཡོ་བྱད་དང་གནས་དུས་ཀྱིས་མ་འབྱོར་པ་ལ་མཎྜལ་ལྟ་བུར་འབྲས་དཀར་གྱི་ཚོམ་བུ་གོང་གི་འགོད་ཚུལ་ལྟར་བྱས་ན་དེ་ལ་ལྷ་བསྐྱེད་པ་མིན་ཀྱང་སྤྱན་དྲངས་པའི་ལྷ་ཚོགས་རྣམས་ཀྱི་གདན་ལྟ་བུ་གནས་མི་འཆོལ་བའི་གནད་ཡོད་ཅིང་བདེན་པའི་བྱིན་རླབས་ཀྱིས་གྲུབ་པའི་གདན་ཡངས་ཤིང་རྒྱ་ཆེ་བར་སྤྱན་དྲངས་པའི་ལྷ་རྣམས་བཞུགས་པ་མ་གཏོགས་བཤད་མ་ཐག་པའི་རྟེན་རྣམས་ལ་བསྟིམ་པ་མ་ཡིན་མོད་སྐུ་གཟུགས་བདུན་བྱའོ། །ཞེས་པའི་ཚིག་གི་ནུས་པས་སྐུ་གཟུགས་བདུན་པོ་ངེས་པར་དགོས་ཤིང་འཁོར་རྣམས་ཀྱང་ཤུགས་ལས་འབྱུང་བར་བརྟེན་མཁས་པ་ཚད་ཐུབ་རྣམས་ཀྱིས་མཛད་ཅིང་འོག་ཏུ་མགྲོན་གྱི་ཚོགས་གཤེགས་སུ་གསོལ་བས་རྟེན་གྱི་ཡེ་ཤེས་པ་གཤེགས་པའི་དོགས་པ་ནམ་ཡང་མི་འཚལ་ལོ། །མཆོད་པའི་གཙོ་བོ་བདེ་གཤེགས་རེ་རེ་ལ་མར་མེ་བདུན་བདུན། ཚོན་སྣ་ལྔ་པའི་བ་དན་བདུན་བདུན་དགོས་པ་ནི་སྐྱབས་གྲོལ་གྱི་སྨོན་ལམ་ལས་བྱུང་བ་ལྟར་ཤེས་ནུས་ལ། གཞན་ཡང་སྨན་སྤོས་བཟང་པོ་བཏབ་པའི་མཆོད་ཡོན་དང་བྱུག་པ་མེ་ཏོག་དངོས་སམ་བཅོས་མ་དང་སིལ་མ། ཙན་དན་ཨ་ཀ་རུ་དང་དུ་རུ་ཀ་སོགས་སྲེག་རྫས་དང་ཕྱེ་མ་ཕུལ་བས་མཚོན་དྲི་བཟང་པོའི་བདུག་སྤོས། ཟས་སྣ་ཚོགས་སྦྱར་བའི་ལྷ་གཤོས། སིལ་སྙན་སོགས་རོལ་མོ་སྣ་ཚོགས། གདུགས། རྒྱལ་མཚན། ན་བཟའ། རིན་ཆེན་སྣ་བདུན། བཀྲ་ཤིས་རྫས་བརྒྱད་དང་རྟགས་བརྒྱད་སོགས་དངོས་འབྱོར་གྱི་མཆོད་པ་ཕུན་སུམ་ཚོགས་པར་བཤམ་ཞིང་འགྲུབ་ན་སོ་སོར་བདུན་ཚན་བྱ། གནོད་སྦྱིན་ཕྱོགས་སྐྱོང་གཞི་བདག་སོགས་ལ་གཏོར་མ་མ་ཕུལ་ཀྱང་རུང་མོད། མདོ་དང་འབྲེལ་བའི་སྒོ་ནས་འབུལ་ན་བཤོས་རེ་བཤམས། གཟུངས་བུམ་དྲི་བཟང་གི་ཆུས་བཀང་བ་མགུལ་ཆིངས་དང་འབྲས་བུ་ཅན་གྱིས་ཁ་བརྒྱན་པ་བསྟར། དགེ་སློང་གི་དགེ་འདུན་འཛོམ་པ་ལ་བསྙེན་བཀུར་ཞིང་མདོ་བརྒྱད་བརྒྱ་པ་དང་ཤེར་ཕྱིན་སོགས་མདོ་སྡེ་ཟབ་མོ་མང་དུ་བཀླག་པའི་རྒྱབ་ཆོས་བྱ། དུས་ནི་ནམ་བྱུང་ལའང་བྱར་རུང་ལ། ཁྱད་པར་འོ་སྐོལ་གྱི་སྟོན་པ་འདི་ཉིད་ས་ལུག་དབྱར་འབྲིང་ཆུ་སྟོད་ཀྱི་ཉ་བའི་ཚེས་བཅོ་ལྔ་ལ་ཡུམ་གྱི་ལྷུམས་སུ་ཞུགས། ལྕགས་སྤྲེལ་ས་ག་ཟླ་བའི་ཚེས་བདུན་ལ་སྐུ་བལྟམས། ས་བྱི་དཔྱིད་ཟླ་ཐ་ཆུང་གི་ཚེས་བརྒྱད་ལ་རབ་ཏུ་བྱུང་། ཤིང་རྟ་ས་ག་ཟླ་བའི་ཚེས་བཅོ་ལྔ་ལ་སངས་རྒྱས། ལོ་དེ་ཀའི་ཆུ་སྟོད་ཟླ་བའི་ཚེས་བཞི་ལ་ཝཱ་རཱ་ཎ་སཱིར་བདེན་བཞིའི་ཆོས་འཁོར་བསྐོར། ལྕགས་བྱི་སྟོན་ཟླ་འབྲིང་པོའི་ཉེར་གཉིས་ལ་ལྷ་ལས་བབས། ལྕགས་འབྲུག་ས་ག་ཟླ་བའི་ཚེས་བཅོ་ལྔ་ལ་མྱ་ངན་ལས་འདས་པའི་དུས་སྟོན་རྣམས་འཁྲུལ་མེད་ཕུག་པའི་ལུགས་སྲོལ་བཞིན་བཀོད་ཀྱི། ཆོས་རྗེ་ས་སྐྱ་བ་མེ་ཡོས་དཔྱིད་ཟླ་ཐ་ཆུང་གི་ཚེས་བརྒྱད་ལ་སྐུ་བལྟམས་པ། ཀུན་མཁྱེན་བུ་ཤིང་རྟར་བལྟམས་པ། ཁ་ཆེ་པཎ་ཆེན་དང་ཁྲོ་ཕུ་ལོ་ཙྭ་བ་ཐ་སྐར་ཟླ་བའི་ཉེར་གཉིས་ལ་ལྷ་བབས་སུ་ངོས་འཛིན་པ་སོགས་མཁས་པའི་བཞེད་ཚུལ་ཟབ་ཅིང་བརླིང་བས་དཔྱད་པར་དཀའ་ཡང་ལོ་སྟར་གྱི་ཟླ་བའི་དུས་ཆེན་དེ་དག་འབྱུང་ཞིང་མཉམ་ཡོད་མཆོད་པ་ནི་སངས་རྒྱས་དགུང་ལོ་གང་གི་དུས་བྱུང་བའི་གསལ་ཆ་ཡིད་བརྟན་གྱི་ངེས་རྙེད་མ་བྱུང་རུང་རྟ་ཆེན་གྱི་ཟླ་བ་ཡིན་པར་ཡོངས་སུ་གྲགས་ཤིང་ལ་ལ་དབོ་ཟླར་ཡང་ངོས་འཛིན་མོད་བཤད་མ་ཐག་བའི་དུས་དེ་དག་དང་ཁྱད་པར་ཆོ་འཕྲུལ། བྱང་ཆུབ་བརྙེས་པ། ཆོས་འཁོར་བསྐོར་བ། ལྷ་བབས་རྣམས་དུས་ཆེན་བཞི་ཞེས་དགེ་བ་གང་བྱས་བྱེ་བ་ཕྲག་བརྒྱར་འགྱུར་བར་ལུང་སིལ་བུ་དང་མྱང་འདས་སོགས་ལས་གསུངས་པས་ཕན་ཡོན་ལྷག་པར་ཆེའོ། །ཇོ་བོ་ཆེན་པོའི་བཞེད་པར་གྲགས་པའི་སྟོན་པའི་འཁྲུངས་ལོ་ནི་སྟོད་ལུང་ཇོ་བོ་ཟེར་བ་ཞིག་དང་མཚན་གྱི་འཁྲུལ་གཞི་བྱུང་བ་ལས་དཔལ་དི་པཾ་ཀཱ་རའི་དགོངས་པ་ནི་མིན་ནོ། །གཉིས་པ་བསྒོམ་པ་ནི། ལུས་ལེགས་པར་བཀྲུས་ཤིང་གོས་གཙང་མ་གྱོན་པ་ཕྱིའི་ཁྲུས་དང་ཤ་ཆང་སྒོག་བཙོང་སོགས་མ་དག་པའི་ཟས་སྤངས་ཏེ། དཀར་གསུམ་མངར་གསུམ་གྱིས་མཚོན་པའི་ཟས་གཙང་མར་བརྟེན་ཅིང་སེམས་ཉོན་མོངས་པ་དང་བྲལ་བ་ནང་གི་ཁྲུས་དང་ལྡན་པའི་སྒོ་ནས་ཁྱིམ་པ་ཡིན་ན་གསོ་སྦྱོང་ལ་གནས་པ་དང་། རབ་ཏུ་བྱུང་བ་རྣམས་ཐེག་པ་ཆེན་པོའི་གསོ་སྦྱོང་ལ་གནས་དགོས་པས། དཀོན་ཅོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་བླ་མ་རྒྱལ་བ་སྲས་དང་བཅས་པ་དེང་འདིར་གསོ་སྦྱོང་ལེན་པའི་ཞིང་དུ་འབྱོན་པར་ཅི་གནང་། ཞེས་བདེན་པའི་མཐུས་བྱོན་ཏེ་བཞུགས་པར་མོས་ལ། ཆེར་སྙིགས་འགྲོ་ལ་ཐུགས་རྗེས་ཆེན་པོ་ཡིས། །ཤིན་ཏུ་རྒྱས་པའི་མདོ་སྡེའི་སྙིང་པོའི་དོན། །སྩོལ་མཛད་དངོས་བརྒྱུད་ཡོངས་འཛིན་ལ་སོགས་པའི། །དཔལ་ལྡན་བླ་མ་རྣམས་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་པའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ཕྱོགས་བཅུའི་འགྲོ་ལ་མཁྱེན་བརྩེས་རབ་དགོངས་ནས། །ཕྱོགས་བཅུར་ཆོས་ཀྱི་འཁོར་ལོ་ལེགས་བསྐོར་བས། །ཕྱོགས་བཅུའི་འགྲོ་ཀུན་ཡོངས་སུ་སྐྱོབ་མཛད་པའི། །ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་ལོ། །མཐུན་པའི་སྨོན་ལམ་མཆོག་ཏུ་རྨད་བྱུང་ཞིང་། །སྤྱོད་པ་སྤྱད་ཚེ་ན་ཡང་མཆེད་གྱུར་ལ། །བསྐལ་བཟང་གཅིག་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། །བསྐལ་པ་གྲངས་མེད་འདས་པའི་དུས་ཀྱི་ཚེ། །ཕོངས་གྱུར་འགྲོ་བ་མཐའ་དག་སྐྱོབ་པའི་ཕྱིར། །སྨོན་ལམ་ཁྱད་པར་ཅན་རྣམས་བཏབ་གྱུར་པའི། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །སངས་རྒྱས་རྣམས་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིགས་དང་གསེར་ཐུབ་འོད་སྲུང་དང་། །ཤཱཀྱ་ཐུབ་པ་གའུ་ཏམ་ལྷ་ཡི་ལྷ། །སངས་རྒྱས་དཔའ་བོ་བདུན་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཅན་ཁྱོད་ལ་ཕྱག་འཚལ་ལོ། །ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻ་ཌཱུརྻ་ཡི་འོད་ལ་ཕྱག་འཚལ་ལོ། །ཐབས་མཁས་ཐུགས་རྗེ་སོགས། རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱ་ངན་འདས་ཕྱག་འཚལ། །བདེ་གཤེགས་གང་དུ་བཞུགས་པ་དང་། །འཆག་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོར་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །འཇམ་དཔལ་དབྱངས་དང་སྐྱབས་གྲོལ་གསང་བའི་བདག །སྤྱན་རས་གཟིགས་སོགས་རླབས་ཆེན་སྤྱོད་པ་ཡིས། །འགྲོ་ཀུན་སྲིད་ཞི་ལས་སྒྲོལ་ཁུར་ཁྱེར་བའི། །ཐེག་ཆེན་དགེ་འདུན་རྣམས་ལ་ཕྱག་འཚལ་ལོ། །གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །གང་ལ་གནོད་པ་བྱས་ཀྱང་བདེ་འབྲེལ་བ། །བདེ་བའི་འབྱུང་གནས་དེ་ལ་སྐྱབས་སུ་མཆི། །དགྲ་བཅོམ་བློ་མཆོག་དབང་པོ་ཀུན་དུལ་བ། །བསྟན་པའི་སྲིད་དུ་ལེགས་པར་བརྟན་བཞུགས་ནས། །བསྟན་པ་འཛིན་དང་སྤེལ་དང་བསྲུང་མཛད་པའི། །དགྲ་བཅོམ་གནས་བརྟན་བཅུ་དྲུག་ལ་ཕྱག་འཚལ། །ཟབ་མོ་རྟེན་འབྲེལ་བཅུ་གཉིས་ལེགས་བསྒོམས་པས། །རང་བྱུང་རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པའི་ཚུལ་གྱིས་ཐུགས་ཆུད་པའོ། །འཕགས་པ་རང་རྒྱལ་རྣམས་ལ་ཕྱག་འཚལ་ལོ། །རྫུ་འཕྲུལ་སྟོབས་དང་མངོན་པར་ཤེས་པའི་དཔལ། །ཉེ་བར་ཐོབ་ནས་ཐུབ་པའི་བཀའ་བཞིན་དུ། །བསྟན་པ་རིན་ཆེན་བང་མཛོད་ལེགས་བསྲུང་བའི། །རྡོ་རྗེ་ཆོས་སྐྱོང་རྣམས་ལ་ཕྱག་འཚལ་ལོ། །གང་སྔོན་སྦྱིན་པ་རྒྱ་མཚོའི་དགེ་བསགས་པས། །ཚེ་དང་ནོར་དང་མཐུ་ཡི་དཔལ་བརྙེས་ནས། །སྒྲུབ་པ་པོ་ལ་དབྱིག་གི་ཆར་འབེབས་པ། །ནོར་སྦྱིན་རྣམས་ལ་བསྟོད་ཅིང་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། །བདག་དང་མཁའ་མཉམ་འགྲོ་བ་མ་ལུས་པའི། །ལུས་འདི་ཞིང་རྡུལ་མཉམ་པར་རབ་སྤྲུལ་ནས། །རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །ཇི་སྙེད་སུ་དག་སོགས་ནས། བདེ་བར་གཤེགས་པ་ཐམས་ཅད་བདག་གིས་བསྟོད། །ཅེས་པས་ཕྱག་བྱ། དེ་ནས་རང་གནས་སུ་འཁོད་དེ་རོལ་མོ་ཇི་སྙེད་པ་འབུད་དཀྲོལ་བྱ་ཞིང་། མེ་ཏོག་དམ་པ་སོགས་ནས། རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །ཞེས་བརྗོད། རོལ་མོ་བཞག་སྟེ། འདོད་ཆགས་ཞེ་སྡང་སོགས་ནས། ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་པས་ཡན་ལག་བདུན་པ་བྱས་ལ། པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་དོན་ཡིད་ལ་དྲན་བཞིན་པས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་དེ་རྣམས་ཀྱིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྷག་པར་རྫོགས་པར་བྱ་བའི་ཕྱིར་གསོ་སྦྱོང་ངེས་པར་མཛད་པ་དེ་བཞིན་ཏུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ཏེ་ཇི་སྲིད་སང་ཉི་མ་མ་ཤར་གྱི་བར་དུ་གསོ་སྦྱོང་ངེས་པར་ཡང་དག་པར་བླང་བར་བགྱིའོ། །ཞེས་པ་ལན་གསུམ་གྱི་སྡོམ་པ་བླངས་ལ། དེའི་བསླབ་བྱ་འདི་རྣམས་བསླབ་སྙམ་པས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ནི་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་པ། །དེ་བཞིན་སྲོག་གཅོད་ལ་སོགས་སྤང་། །བླ་མེད་བྱང་ཆུབ་ཐོབ་པར་ཤོག །སྡུག་བསྔལ་མང་འཁྲུག་འཇིག་རྟེན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་ལན་གསུམ་བརྗོད། ༀ་ཨ་མོ་གྷ་ཤྲཱི་ལ། སམྦྷ་ར་སམྦྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ། པདྨ་བི་བྷུ་ཥཱི་ཏ་བྷུ་ཛ། དྷ་ར་དྷ་ར། ས་མནྟ། ཨ་ཝ་ལོ་ཀི་ཏེ་ཧཱུྃ་ཕཊ་སྭཱ་ཧཱ། ཞེས་ཚུལ་ཁྲིམས་རྣམ་དག་གི་གཟུངས་བདུན་ནམ་ཉེར་གཅིག་བཟླ། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །སོགས་ཀྱིས་སྨོན་ལམ་གདབ། ཅེས་ཐེག་པ་ཆེན་པོའི་གསོ་སྦྱོང་བླང་ཞིང་དད་པ་གུས་པ་སོགས་བསམ་པའི་ཁྱད་པར་གྱི་སྤྲོ་བ་བསྐྱེད། སྐྱབས་འགྲོ་ནི། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོར་གྱུར་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་སྨན་གྱི་བླ་བདེ་བར་གཤེགས་པ་མཆེད་བརྒྱད་ཀྱི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆོའོ། །ཞེས་ལན་བདུན་ནམ་གསུམ་སོགས་ཅི་རིགས་པ་བརྗོད། སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་བཅོམ་ལྡན་འདས་བདེ་བར་གཤེགས་པ་བརྒྱད་ཀྱི་ལྷ་ཚོགས་འཁོར་དང་བཅས་པ་རྣམས་ལ་ཕྱག་མཆོད་ཐུགས་དམ་བསྐུལ་བ་ལ་སོགས་པའི་ལམ་གྱི་རིམ་པ་ལ་གནས་པར་བྱའོ། །དེ་ཁོ་ན་ཉིད་ཀྱི་ངང་ནས་ཚད་མེད་བཞི་བསྒོམ་པ་ནི། བདག་དང་སྣང་བ་ཐམས་ཅད་ཆོས་ཀྱི་དབྱིངས་ཀྱི་རང་བཞིན་ཡིན་པ་ལ། དེ་ལྟར་མ་རྟོགས་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་བྱ། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་བྱ། སྡུག་བསྔལ་མེད་པའི་བདེ་བ་དང་མི་འབྲལ་བར་བྱ། བདེ་སྡུག་གི་རྒྱུ་ཆགས་སྡང་ཉེ་རིང་གཉིས་དང་བྲལ་བའི་བཏང་སྙོམས་ལ་གནས་པར་བྱའོ། །རྗེ་སྟག་ཚང་པས། བདག་མེད་ཀྱི་ལྟ་བའི་ཏིང་ངེ་འཛིན་ཅི་ནུས་སུ་བསྒོམ་པ་ལས་ལངས་ནས། དེ་མ་རིག་པའི་སེམས་ཅན་ལ་ཚད་མེད་བཞི་དང་བྱང་ཆུབ་ཀྱི་སེམས་བསྒོམ་ནས། ཞེས་གསུངས་པ་རྒྱུ་འབྲས་སུ་མཛད་པའམ་ཚད་མེད་དེ་ཀས་གོ་བཅད་ནས་གཉིས་པོ་ངོ་བོ་གཅིག་ཏུ་བཞེད་པ་འདྲ་ནའང་སེམས་བསྐྱེད་ལོགས་སུ་བྱེད་པ་གསུང་འདི་ཀའི་འོག་ཏུ་གསལ་བས་ཆོ་ག་མཁན་པོའི་གཞུང་དང་མཐུན་ནོ། །བྱིན་བརླབ་བཞི་སྐོར་ལས་ས་གཞི་བརླབ་པ་ནི། དཀོན་ཅོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལས་བྱུང་བའི་ཆོ་ག་བཞིན། ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་དང་འཕགས་པ་ཆོས་སྐྱོང་བ་ཐམས་ཅད་གདན་འཛོམ་པའི་ཕོ་བྲང་གི་དཀྱིལ་འཁོར་དང་མཆོད་པའི་ཚོགས་སྦྱར་བ་འདི་རྣམས་ཅི་ལྟར་སངས་རྒྱས་དང་བྱང་ཆུབ་སེམས་དཔའ་དེ་དག་གི་སྔོན་གྱི་སྨོན་ལམ་ཁྱད་པར་ཅན་གྱིས་བསྒྲུབ་པའི་སངས་རྒྱས་ཀྱི་ཞིང་ཡོངས་སུ་དག་པ་དང་། བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ། ཐ་གྲུ་ཆེ་བ། ཡངས་པ། རེག་ན་འཇམ་ཞིང་བདེ་བ་དྲི་མ་མེད་ཅིང་འོད་གསལ་བ། ཙན་དན་སྦྲུལ་གྱི་སྙིང་པོའི་དྲི་བསུང་ངད་དང་ལྡན་པའི་ལྷའི་ཏོག་སྣ་ཚོགས་ཀྱི་གཅལ་བཀྲམ་པ། མཐའ་རིན་པོ་ཆེའི་ཕ་གུས་བརྩེགས་པ། གསེར་དང་། དངུལ་དང་། མུ་ཏིག་གི་ཕྱེ་མ་གྲམ་བུར་བརྡལ་བ། ཨུཏྤལ་དང་། ཀུ་མུད་དང། པདྨ་འགྱིང་ཞིང་ལྡེམས་པས་ཁེབས་པར་གྱུར་ཅིང་། ཆུ་བྱ་སྣ་ཚོགས་སྐད་སྙན་པར་སྒྲོགས་པ། དགའ་ཞིང་འཕྱོལ་ལྡིང་བས་བརྒྱན་པའི་ཡན་ལག་བརྒྱད་དང་ལྡན་པའི་མཚོ་དང་རྫིང་དང་ལྟེང་ཀ་དག་གིས་མཛེས་པར་བྱས་པ་རིན་པོ་ཆེའི་དཔག་བསམ་གྱི་ཤིང་ལྗོན་པ་ལྷའི་ནོར་བུ་དང་། མུ་ཏིག་གི་རྒྱན་འཕྲེང་དང་། རིན་པོ་ཆེ་དཔྱངས་པ། མེ་ཏོག་གི་མགོ་ལྕོགས་དང་འབྲས་བུ་མཛེས་པར་ཆགས་པས་གཡུར་ཟ་ཞིང་ལྡེམ་པ། གསེར་གྱི་དྲིལ་བུ་གཡེར་ཁ་འཁྲོལ་བ་ལས་དམ་པའི་ཆོས་ཀྱི་སྒྲ་འབྱུང་བ་དང་ལྡན་པ་ཚར་དུ་བསྒྲེངས་བས་ལེགས་པར་བརྒྱན་པའི་ས་གཞི་ཕུན་སུམ་ཚོགས་པ་འབྱུང་བར་གྱུར་ཅིག །ཁང་བཟང་བརླབ་པ་ནི། དེའི་དབུས་སུ་གཞལ་མེད་ཁང་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ། འཇིག་རྟེན་གྱི་ཁམས་དཔག་ཏུ་མེད་པ་རྒྱས་པར་འགེངས་པའི་འོད་ཟེར་ཆེན་པོ་རབ་ཏུ་འབྱུང་བ། གནས་ཐ་དད་པ་ཤིན་ཏུ་རྣམ་པར་ཕྱེ་བ་མཐའ་ཡས་པ་རྣམ་པར་གནས་པ་རྒྱ་ཡོངས་སུ་མ་ཆད་པ། ཁམས་གསུམ་ལས་ཡང་དག་པར་འདས་པའི་སྤྱོད་ཡུལ་འཇིག་རྟེན་ལས་ཡང་དག་པར་འདས་པ་དེའི་བླ་མའི་དགེ་བའི་རྩ་བ་ལས་བྱུང་བ། ཤིན་ཏུ་རྣམ་པར་དག་ཅིང་དབང་སྒྱུར་བའི་རྣམ་པར་རིག་པའི་མཚན་ཉིད། དེ་བཞིན་གཤེགས་པའི་གནས། བྱང་ཆུབ་སེམས་དཔའི་དགེ་འདུན་དང་ལྡན་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་མཐའ་ཡས་པ་རྣམ་པར་རྒྱུ་བ། ཆོས་ཀྱི་རོའི་དགའ་བ་དང་བདེ་བ་ཆེན་པོས་བརྟན་པ། སེམས་ཅན་ཐམས་ཅད་ཀྱི་དོན་ཐམས་ཅད་ཡང་དག་པར་ཐོབ་པར་བྱེད་པས་ཉེ་བར་གནས་པ། ཉོན་མོངས་པའི་གནོད་པའི་དྲི་མ་ཐམས་ཅད་དང་བྲལ་བ་བདུད་ཐམས་ཅད་ཡོངས་སུ་སྤངས་པ་ཐམས་ཅད་ཀྱི་བཀོད་པ་ལས་ལྷག་པའི་དེ་བཞིན་གཤེགས་པའི་བཀོད་པའི་གནས་དྲན་པ་དང་། བློ་གྲོས་དང་རྟོགས་པ་ཆེན་པོས་ངེས་པར་འབྱུང་བ། ཞི་གནས་དང་ལྷག་མཐོང་གི་བཞོན་པ་ཡིན་པ། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་ཉིད་དང་། སྨོན་པ་མེད་པ་ནས་འཇུག་པ་རིན་པོ་ཆེའི་པདྨའི་རྒྱལ་པོ་ཡོན་ཏན་མཐའ་ཡས་པས་བརྒྱན་པའི་བཀོད་པ་ལ་བརྟེན་པའི་གཞལ་མེད་ཁང་ཆེན་པོ་འབྱུང་བར་གྱུར་ཅིག །གདན་ཁྲི་བརླབ་པ་ནི། དེའི་དབུས་སུ་པདྨའི་གདན་རིན་པོ་ཆེའི་སེང་གེའི་ཁྲི་སྟན་ལ། དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་དང་། དེ་བཞིན་གཤེགས་པ་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་དང་། དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་དང་། དེ་བཞིན་གཤེགས་པ་མྱ་ངན་མེད་མཆོག་དཔལ་དང་། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་དང་། དེ་བཞིན་གཤེགས་པ་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་དང་། དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དང་། བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུའི་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། འཕགས་པ་དམ་པའི་ཆོས་སྐྱོང་བ་ཐམས་ཅད་གདན་འཛོམ་པའི་བཞུགས་གནས་འཕགས་པ་སོ་སོའི་སྨོན་ལམ་ཁྱད་པར་ཅན་དང་མངའ་ཐང་འཚམས་པར་གྲུབ་པར་མཛེས་པ་ཤ་སྟག་འབྱུང་བར་གྱུར་ཅིག །མཆོད་པ་བརླབ་པ་ནི། ཕྱི་ནང་ཀུན་ཏུ་ཡང་ཆོ་རིགས་དང་འཚམས་པར་ཡང་ལྷ་དང་མིའི་ཡོ་བྱད་དམ་པ་ཞལ་ཟས་དང་ན་བཟའ་དང་། རྒྱན་དང་རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱི་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་ཀྱང་གདན་འཛོམ་ནས་དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་བཟླས། ཀུན་ཏུ་བཟང་པོའི་མཆོད་པའི་སྤྲིན་རབ་འབྱམས་སྤྲོ་བར་མཆོད་པའི་སྤྲིན་གྱི་གཟུངས་འདི་ཉིད་ལྷག་པར་ཕན་ཡོན་ཆེ་བ་མདོ་ལས་གསུངས་པས། ༀ་ན་མོ་བྷ་ག་ཝ་ཏེ་བཛྲ་སཱ་ར་པྲ་མ་རྡ་ནི། ཏ་ཐཱ་ག་ཏཱ་ཡ་ཨ་རྷ་ཏེ། ས་མྱ་ཀྶཾ་བུདྡྷ་ཡ། ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛྭ་བཛྲེ། མ་ཧཱ་བི་དྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ་སརྦ་ཀརྨ་ཨཱ་ལྭ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་ལན་གསུམ་མམ་བདུན་ཇི་རིགས་པ་བརྗོད། ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱི་དེ་བཞིན་ཉིད་དུ་གྱུར་ཅིག །ཅེས་ལན་གསུམ་བཟླས། མཆོད་པའི་ཚོགས་བྱིན་གྱིས་བརླབས་པའི་འོག་ཏུ་འཕགས་པ་སྤྱན་དྲང་པ་ནི། པུས་མོ་བཙུགས་ཏེ་མེ་ཏོག་བླང་ཐལ་མོ་སྦྱར་ནས་ཚིག་འདི་སྐད་ཅེས། ཞེས་བྱུང་བའི་སྤྱན་འདྲེན་གྱི་ཚིག་འདི་དག་ངག་ཏུ་བརྗོད་པ་དང་ལྷན་ཅིག་པར་དམིགས་པ་ནི། ཤར་ཕྱོགས་གངྒཱའི་ཀླུང་ཇི་སྙེད་འདས་པ་ན་གཞན་གྱི་མི་ཐུབ་རྣམ་པར་དག་པའི་ཞིང་ནས་མཚན་ལེགས། གདྒཱའི་ཀླུང་བདུན་འདས་པ་ན་རིན་ཆེན་ལྡན་པའི་ཞིང་ན་རིན་ཟླ། གདྒཱའི་ཀླུང་ལྔ་འདས་པ་ན་སྤོས་ཀྱིས་ཡོངས་སུ་གང་བའི་ཞིང་ནས་གསེར་བཟང་། གདྒཱའི་ཀླུང་བདུན་འདས་པ་ན་མྱ་ངན་དང་བྲལ་བའི་ཞིང་ནས་མྱ་ངན་མེད། གདྒཱའི་ཀླུང་བརྒྱད་འདས་པ་ན་ཆོས་ཀྱི་རྒྱལ་མཚན་ཞིང་ནས་ཆོས་བསྒྲགས། གདྒཱའི་ཀླུང་དགུ་འདས་པ་ན་རིན་ཆེན་རྒྱ་མཚོའི་ཞིང ནས་མངོན་མཁྱེན། གདྒཱའི་ཀླུང་བཅུ་འདས་པ་ན་བཻ་ཌཱུརྻ་སྣང་བའི་ཞིང་ནས་སྨན་བླ་རྣམས་འཁོར་གྲངས་མེད་པ་དང་བཅས་པ་ནམ་མཁའ་ལ་ཐོགས་པ་མེད་པའི་རྫུ་འཕྲུལ་གྱིས་གཤེགས་པར་མོས་པ་བརྟན་པོར་བྱེད་པ་ནི་གནད་དུ་ཆེའོ། །བཅོམ་ལྡན་འདས་དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་དང་། དེ་བཞིན་གཤེགས་པ་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་དང་། དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་དང་། དེ་བཞིན་གཤེགས་པ་མྱ་ངན་མེད་མཆོག་དཔལ་དང་། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་དང་། དེ་བཞིན་གཤེགས་པ་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་དང་། དེ་བཞིན་གཤེགས་པ་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོ་དང་། སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་ན་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་ཚོགས་དང་བཅས་པ་ཐམས་ཅད་བདག་ལ་དགོངས་སུ་གསོལ། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་སླད་མའི་དུས་ལྔ་བརྒྱ་ཐ་མ་ལ་དམ་པའི་ཆོས་ལྟར་བཅོས་པ་འབྱུང་བ་ན་སེམས་ཅན་ལས་ཀྱི་སྒྲིབ་པ་སྣ་ཚོགས་ཀྱིས་སྒྲིབས་པ། ནད་སྣ་ཚོགས་ཀྱིས་གཟིར་བ། མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ། ཕོངས་པར་གྱུར་པའི་སེམས་ཅན་ཐམས་ཅད་རྗེས་སུ་བཟུང་ཞིང་ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བའི་སླད་དུ་དེ་བཞིན་གཤེག་པ་རྣམས་ཀྱི་ཐབས་མཁས་པ་མང་པོ་དང་། སྔོན་གྱི་སྨོན་ལམ་གྱི་ཁྱད་པར་རྒྱས་པ་བཟང་ཞིང་རླབས་ཆེ་བ། མཐུ་དང་བྱིན་བརླབས་དཔག་ཏུ་མ་མཆིས་པ་མངའ་བ་ལ་བརྟེན་ཏེ། བླ་དཔོན་སོགས་རང་རང་གི་མིང་འབྱིན་འཇུག་གང་དགོས་སམ། ཡང་ན། བདག་ཅག་ལ་སོགས་པ་འགྲོ་བ་མང་པོ་བསྐྱབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཅིང་མཆིས་ན་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབ་པར་ཅི་གནང་། ད་ལྟར་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་གདུལ་བྱའི་དབང་གིས་འཛམ་བུའི་གླིང་འདིར་མྱ་ངན་ལས་འདས་པའི་ཚུལ་བསྟན་ཀྱང་འཇིག་རྟེན་གྱི་ཁམས་གཞན་དུ་དེ་བཞིན་གཤེགས་པའི་རྣམ་པར་རོལ་པ་སྣ་ཚོགས་ཀྱི་འགྲོ་བའི་དོན་མཛད་ཅིང་བཞུགས་པ་ཡང་དེ་བཞིན་གཤེགས་པའི་ཐུགས་རྗེ་ཆེན་པོ་དང་སྔོན་གྱི་སྨོན་ལམ་ཁྱད་པར་ཅན་ལས་གླེངས་ཏེ། བདག་ཅག་མངའ་རིས་ཀྱི་གདུལ་བྱ་རྣམས་ཕྱག་མཚན་དུ་བཞེས་པའི་ནང་དུ་གཏོགས་ཏེ་བཀའ་དྲིན་ཐོབ་པའི་འཕྲོ་མཆིས་པ་ཙམ་ལ་བརྟེན་ཏེ། བླ་དཔོན་སོགས། བདག་ཅག་ལ་སོགས་པ་འགྲོ་བ་མང་པོ་བསྐྱབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཅིང་མཆིས་ན་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབ་པར་ཅི་གནང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་པ་དང་། རྒྱལ་བའི་སྲས་པོ་སྐྱབས་གྲོལ་དང་། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྔོན་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་བཀའ་སྩལ་པའི་ཚེ་གདན་འཛོམ་པར་འདུས་ཏེ། མདོའི་དོན་བྱིན་གྱིས་བརླབས་ཤིང་དེ་བཞིན་གཤེགས་པའི་བཀའ་བསྒྲུབ་པར་ཐུགས་བསྐྱེད་པ་དེ་དག་ཀྱང་། མིང་གང་དགོས་སམ། བདག་ཅག་ལ་སོགས་པ་འགྲོ་བ་མང་པོ་བསྐྱབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཅིང་མཆིས་ན་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབ་པར་ཅི་གནང་། སྔོན་དེ་བཞིན་གཤེགས་པ་གདན་འཛོམ་པ་ཆེན་པོས་བཀས་གཏད་ཅིང་སོ་སོ་ནས་ཀྱང་ལྷའི་ཚིག་བདེན་པས་མདོང་གསོལ་དུ་ཞལ་གྱི་བཞེས་ཏེ། དམ་པའི་ཆོས་དང་འཁོར་རྣམ་བཞི་སྐྱོང་བར་མཛད་ཅིང་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་སྡེ་འདི་ཡང་ལྷག་པར་ཕྱག་མཚན་དུ་བཞེས་པ། ལྷའི་དབང་པོ་བརྒྱ་བྱིན་དང་། ཚངས་པ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། རྣམ་ཐོས་ཀྱི་བུ་ལ་སོགས་པ་འཕགས་པ་ཆོས་སྐྱོང་བ་ཐམས་ཅད་ཀྱང་མིང་གང་རུང་ངམ། བདག་ཅག་ལ་སོགས་པའི་འགྲོ་བ་མང་པོ་བསྐྱབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཅིང་མཆིས་ན་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབས་པར་ཅི་གནང་། སྔོན་དེ་བཞིན་གཤེགས་པ་གདན་འཛོམ་པའི་སྤྱན་སྔར་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་སྡེ་འཆང་བ་དང་མཆོད་པ་ལ་སོགས་པའི་སེམས་ཅན་དེ་དག་ཕྱག་མཚན་དུ་བཞེས་ཤིང་བསྲུང་བར་ཞལ་གྱིས་བཞེས་པ་གནོད་སྦྱིན་གྱི་སྡེ་དཔོན་ཆེན་པོ་ཇི་འཇིགས་དང་། གནོད་སྦྱིན་གྱི་སྡེ་དཔོན་ཆེན་པོ་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་རྒྱན་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་བཟང་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་རླུང་དང་། གནོད་སྦྱིན་གྱི་སྡེ་དཔོན་ཆེན་པོ་གནས་བཅས་དང་། གནོད་སྦྱིན་གྱི་སྡེ་དཔོན་ཆེན་པོ་དབང་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་བཏུང་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་སྨྲ་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་བསམ་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་གཡོ་བ་འཛིན་དང་། གནོད་སྦྱིན་གྱི་སྡེ་དཔོན་ཆེན་པོ་རྫོགས་བྱེད་དེ། གནོད་སྦྱིན་གྱི་སྡེ་དཔོན་ཆེན་པོ་ཐམས་ཅད་ལ་ཡང་སྔོན་གྱི་ཐུགས་དམ་བཟང་པོ་ལས་གླེངས་ཏེ། མིང་གང་རུང་ངམ། བདག་ཅག་ལ་སོགས་པ་འགྲོ་བ་མང་པོ་བསྐྱབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཅིང་མཆིས་ན་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ་བྱིན་གྱིས་བརླབ་པར་ཅི་གནང་། གཤེགས་བྱོན་སྐྱེ་འབྲི་མེད་པའི་སྐུ། །ཇི་ལྟར་སྨོན་བཞིན་ཡོད་པ་ལྟར། །དཀར་པོ་འཆར་བའི་ཚུལ་བཞིན་དུ། །འཇིག་རྟེན་སྐྱབས་སུ་གཤེགས་སུ་གསོལ། །བདེ་བར་གཤེགས་སོ་བཅོམ་ལྡན་འདས། །བདག་ཅག་བསོད་ནམས་སྐལ་བར་ལྡན། །བདག་གིས་ཕུལ་པའི་མཆོད་ཡོན་འདི། །བཞེས་ནས་བདག་ལ་དགྱེས་པར་མཛོད། །ཁྱོད་ཀྱི་རང་བཞིན་ཡོངས་དག་པས། །སྲེད་སོགས་འཆིང་བ་མི་མངའ་ཡང་། །བདག་ཅག་སྒྲིབ་པ་སྦྱང་སླད་དུ། །གཙང་མ་ཆབ་ཀྱིས་སྐུ་ཁྲུས་གསོལ། །དེ་བཞིན་གཤེགས་དང་དེ་ཡི་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བའི་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །སྲབ་འཇམ་ཡང་པ་ལྷ་ཡི་གོས། །མི་ཕྱེད་རྡོ་རྗེའི་སྐུ་བརྙེས་ལ། །མི་ཕྱེད་མོས་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །འགྲོ་བ་ཉོན་མོངས་སྐོམ་གྱིས་གདུངས་པ་ལ། །ཆོས་ཀྱི་ཆུ་ཡིས་ཚིམ་པར་བྱ་བའི་ཕྱིར། །ཉེས་བྲལ་སྒྲིབ་པའི་དོན་ལ་དམིགས་ནས་ཀྱང་། །བདག་གིས་ཁྱེད་ལ་བུམ་ཆུ་དབུལ་བར་བགྱི། །ཆོས་སྟོན་དག་པའི་དཀྱིལ་འཁོར་འདིར། །དཔལ་ཆེན་དག་པའི་གདན་བཤམས་ཏེ། །ཏིང་འཛིན་མི་གཡོ་མཉམ་བཞག་པས། །དགྱེས་པར་དགོངས་ཏེ་གདན་ལ་བཞུགས། །གཙང་དང་གདན་ཁྲི་ཡངས་པ་ལ། །ཐོགས་དང་དོག་པ་མེད་པའི་སྐུ། །མཉམ་ཉིད་ཚུལ་གྱིས་འདིར་བཞུགས་ལ། །བདེ་བར་སྦྱར་བ་བཞེས་སུ་གསོལ། །སོ་སོའི་ཞིང་ཁམས་ནས་རྫུ་འཕྲུལ་གྱིས་ནམ་མཁའ་ལ་གཤེགས་ཏེ། གཞལ་མེད་ཁང་གི་དབུས་སུ་སེང་གེའི་ཁྲི་ཆེན་པོ་བརྒྱད་ལ། དེ་བཞིན་གཤེགས་པ་བརྒྱད་བཞུགས། ཆོས་པོ་ཏི་ཡང་བཞུགས། བར་གྱི་སྣམ་བུ་ལ་བྱང་ཆུབ་སེམས་དཔའ་གླེང་གཞི་ལས་བྱུང་བའམ་ཡང་ན་བྱང་ཆུབ་སེམས་དཔའི་འཁོར་དཔག་ཏུ་མེད་པ་བཞུགས་པའི་གདན་བཤམ། དེའི་མདུན་དུ་བྱང་ཆུབ་སེམས་དཔའ་འཇམ་དཔལ་དང་། སྐྱབས་གྲོལ་དང་། ཕྱག་ན་རྡོ་རྗེ་གསུམ་གདན་འཛོམ་པ་ལ་སྔོན་གྱི་ཐུགས་དམ་བསྐུལ་ཞིང་ཕྲིན་ལས་མཛད་ཅིང་བཞུགས་པར་བསམ། གསུམ་པ་ལ་གཡོན་གྲལ་དུ་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ཀྱི་གདན་བཤམ། གཡས་གྲལ་དུ་ཚངས་པ་དང་བརྒྱ་བྱིན་གྱི་གདན་བཤམ། སྒོ་བཞི་ལ་རྒྱལ་པོ་ཆེན་པོ་བཞི་རང་རང་གིས་དམ་བཅས་པ་བཞིན་བསྒྲུབ་ཅིང་བཞུགས་པར་བསམ། མཆོད་པ་དང་དཀྱིལ་འཁོར་སྔར་བདེན་པ་བདར་བའི་ཚུལ་དང་འདྲ་བར་མོས་པར་བྱའོ། །གཉིས་པ་དངོས་གཞི་ལ། དེ་ལྟར་བསམས་པའི་རྗེས་ལ་སྤྱི་ཕྱག་འཚལ་ཞིང་མཆོད་དེ། མཆོད་ཡོན་ལ་སོགས་པ་ཅི་འབྱོར་པས་སོ། །ཞེས་གསུངས་པ་ལྟར་མདོར་བསྟན་སྤྱིའི་ཕྱག་མཆོད། རྒྱས་བཤད་སོ་སོའི་ཕྱག་མཆོད་དང་སྨོན་ལམ་གཉིས་སུ་ཡོད་པའི་དང་པོ་ལ། ལྷར་བཅས་སྐྱེ་དགུའི་འདྲེན་པ་ཟས་གཙང་སྲས། །རྒྱལ་བའི་སྲས་མཆོག་མགོན་པོ་འཇམ་དཔལ་དབྱངས། །བསྟན་པའི་རྩ་ལག་མཁན་ཆེན་ཞི་བ་འཚོ། །ཁྲི་སྲོང་ལྡེའུ་བཙན་བཞི་ལ་ཕྱག་འཚལ་ལོ། །ལྷ་ཡི་སྲས་པོ་སད་ན་ལེགས་མཇིང་ཡོན། །གསར་བཅད་སྐད་ཀྱིས་གཏན་འབེབས་ཁྲི་རལ་པ། །ཡིད་སྲུབས་གཤེད་གྱུར་ལྷ་ལུང་དཔལ་རྡོ་རྗེ། །མངའ་བདག་འོད་སྲུངས་བཞི་ལ་ཕྱག་འཚལ་ལོ། །དཀོན་མཆོག་བླ་མར་འཛིན་པ་དཔལ་འཁོར་བཙན། །བསྟན་ལ་ཉེར་གུས་སྐྱིད་ལྡེ་ཉི་མ་མགོན། །མངའ་བདག་ཆོས་ཀྱི་རྒྱལ་པོ་བཀྲ་ཤིས་ལྡེ། །ལྷ་ཡི་བླ་མ་བཞི་ལ་ཕྱག་འཚལ་ལོ། །ནོར་འཛིན་སྐྱོང་བ་མངའ་བདག་ལྷ་ཡི་ལྡེ། །མང་བཀུར་རིགས་ཀྱི་བཙུན་པ་འོད་ལྡེའི་ཞབས། །གངས་ཅན་གཉེན་གྱུར་ལྷ་གཅིག་རྩེ་ལྡེའི་མཚན། །མངའ་རིའི་དགྲ་བཅོམ་བཞི་ལ་ཕྱག་འཚལ་ལོ། །དགེ་བའི་བཤེས་གཉེན་ཞུ་ལྷན་ཤེས་རབ་གྲགས། །ར་ས་ཆུ་ལྷད་དར་མ་རྒྱལ་མཚན་རྗེ། །སྣར་ཐང་བསྟན་ཉི་གྲོ་སྟོན་བདུད་རྩི་གྲགས། །སངས་རྒྱས་སྒོམ་པ་བཞི་ལ་ཕྱག་འཚལ་ལོ། །གཉགས་ཀྱི་རིགས་འཁྲུངས་སྙིང་པོ་རྒྱལ་མཚན་དཔལ། །མཚུངས་མེད་སྤྲུ་ལུང་ཀུན་དགའ་སྨོན་ལམ་ཞབས། །སྤང་སྒང་བླ་མ་གྲགས་པ་རྒྱལ་མཚན་དཔལ། །ཞང་སྟོན་བསོད་གྲགས་བཞི་ལ༴ ཆོས་ལུང་མཁན་ཆེན་གྲགས་པ་རྒྱལ་མཚན་དཔལ། །འཇམ་དཔལ་དབྱངས་དངོས་རིན་ཆེན་རྒྱལ་མཚན་ཞབས། །འདུལ་འཛིན་མཆོག་གྱུར་རྒྱལ་བ་ཕྱག་ནའི་མཚན། །ཀུན་དགའ་བློ་གྲོས་བཞི་ལ༴ སྡོམ་བརྩོན་ཆེན་པོ་ཚུལ་ཁྲིམས་དཔལ་འབྱོར་དང་། །འཁྲུལ་ཞིག་ཀུན་བཟང་མཐུ་སྟོབས་དཔལ་འབར་རྗེ། །ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་ཞབས། །དབང་ཕྱུག་རབ་བརྟན་བཞི་ལ༴ ཐུབ་བསྟན་གསལ་མཛད་བསོད་ནམས་མཆོག་ལྡན་དཔལ། །རིག་འཛིན་ཆེན་པོ་ཆོས་དབྱིངས་རང་གྲོལ་རྩལ། །བརྒྱུད་སྲོལ་ཀུན་འདུས་བློ་བཟང་རྒྱ་མཚོའི་སྡེ། །གཏེར་བདག་གླིང་པ་བཞི་ལ༴ སྨྲ་བའི་དབང་ཕྱུག་ལོ་ཆེན་དྷརྨ་ཤྲཱི། །རྒྱལ་སྲས་དྲིན་ཆེན་རིན་ཆེན་རྣམ་པར་རྒྱལ། །མཁན་ཆེན་ཨོ་རྒྱན་བསྟན་འཛིན་རྡོ་རྗེའི་ཞབས། །ཕྲིན་ལས་རྣམ་རྒྱལ་བཞི་ལ༴ མཚུངས་མེད་རྗེས་བཙུན་ཕྲིན་ལས་ཆོས་ཀྱི་སྒྲོན། །སྨྱོས་སྟོན་འགྱུར་མེད་སངས་རྒྱས་ཀུན་དགའ་དཔལ། །མཁན་ཆེན་མདོ་སྔགས་བསྟན་འཛིན་ནོར་བུའི་སྡེ། །ཕན་བདེའི་འོད་ཟེར་བཞི་ལ༴ ཡང་ན། སྨྲ་བའི་དབང་ཕྱུག་ལོ་ཆེན་དྷརྨ་ཤྲཱི། །རྒྱལ་སྲས་དྲིན་ཆེན་རིན་ཆེན་རྣམ་པར་རྒྱལ། །རབ་འབྱམས་འགྱུར་མེད་བསླབ་གསུམ་རིན་ཆེན་དཔལ། །རིག་འཛིན་བཟང་པོ་བཞི་ལ༴ བྱང་ཆུབ་སེམས་དཔའ་པདྨ་བཀྲ་ཤིས་དཔལ། །རྒྱལ་བའི་སྲས་པོ་གཞན་ཕན་མཐའ་ཡས་སྡེ། །རྣམ་འདྲེན་མཁན་ཆེན་པདྨ་རྡོ་རྗེའི་ཞབས། །ལུང་རྟོགས་བསྟན་ཉི་བཞི་ལ༴ མཁས་བཙུན་ཆེན་པོ་འཇིགས་མེད་ཀུན་དགའ་གྲགས། །མཁན་ཆེན་མདོ་སྔགས་བསྟན་འཛིན་ནོར་བུའི་སྡེ། །རྣམ་འདྲེན་འགྱུར་མེད་ཕན་བདེའི་འོད་ཟེར་སོགས། །བརྒྱུད་པའི་བླ་མ་རྣམས་ལ་ཕྱག་འཚལ་ལོ། །ཞེས་དང་། མཇུག་གི་ཤློ་ཀ་གཉིས་རྗེ་སྟག་ཚང་བའི་གསུང་ལས། གངས་ཅན་ཕན་བདེའི་དཔལ་འབྱོར་འབྱུང་བའི་སྒོ། །དམན་མཆོག་ཀུན་གྱིས་བསྒྲུབ་ཏུ་རུང་བའི་ལམ། །ཆོས་རྒྱལ་ཐུགས་དམ་མདོ་སྡེའི་ཆོ་ག་འདི། །འཛིན་སྐྱོང་སྤེལ་མཛད་རྣམས་ལ་ཕྱག་འཚལ་ལོ། །དོན་གཉིས་མཐར་ཕྱིན་སྟོན་པ་རྫོགས་སངས་རྒྱས། །བདེན་གཉིས་ཟུང་འཇུག་བསྟན་པ་དམ་པའི་ཆོས། །ཚོགས་གཉིས་ཉམས་ལེན་འཕགས་མཆོག་དགེ་འདུན་ཏེ། །སྐྱབས་གནས་དཀོན་མཆོག་གསུམ་ལ་ཕྱག་འཚལ་ལོ། །བརྒྱུད་པ་འདིར་ངེད་ཀྱི་བཀླགས་ལུང་ནོད་པ་སོར་བཞག་བྲིས་པ་ཡིན་གྱི་རང་གིས་བླ་མ་གཞན་ལས་ཐོབ་ན་ཟག་ཟོག་མིན་པའི་བླ་མ་རེ་རེ་བཞིན་ནས་བགྲང་དུ་ཡོད་ཚེ་དེ་དོན་ལྟར་བཅུག་ཆོག་པས་འདི་ཁོ་ན་བྱེད་མི་དགོས་ལ། གྲུབ་མཐའ་སོ་སོའི་ཕྱོགས་ཞེན་གྱིས་རང་གང་མོས་བཅུག་པའི་ངོ་མཚར་བརྒྱུད་པ་ཡིན་པ་སྐད་བྱས་ཚེ་འཇིག་རྟེན་པའི་ཆོས་སྣང་ཆེ་བའི་རིགས་ཁ་ཏོན་བྱེད་སྐབས་རང་གི་ཕ་མ་སོགས་ཀྱང་མི་འཇུག་པའི་ངེས་པ་མི་འདུག་པས་དགོངས་འཚལ་ལོ། །འདིར་རྒྱལ་མཆོག་ལྔ་པ་བློ་བཟང་རྒྱ་མཚོ་ནས་བདག་གི་འདྲེན་མཆོག་འགྱུར་མེད་ཕན་བདེའི་འོད་ཟེར་འབར་གྱི་བརྒྱུད་ལུགས་གཉིས་ཁ་སྐོང་བ་པོ་ནི་ཛྙཱ་ནའོ། །ཕྱོགས་བཅུ་དུས་གསུམ་གྱི་བདེ་བར་གཤེགས་པ་སྲས་དང་བཅས་པ་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ཞམ་འབྲིང་བ་བྱང་ཆུབ་སེམས་དཔའི་འཁོར་དཔག་ཏུ་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་བྱང་ཆུབ་སེམས་དཔའི་ཚོགས་དུ་མས་ཀུན་ནས་བསྐོར་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་བ་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་བྱང་ཆུབ་སེམས་དཔའི་འཁོར་དཔག་ཏུ་མེད་པ་དང་བཅས་པ་ལ༴ མཆོད་དོ༴ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་བརྒྱ་མཚོའི་བྱངས་བྱང་ཆུབ་སེམས་དཔའི་འཁོར་དུ་མས་ཀུན་ནས་བསྐོར་བ་ལ༴ མཆོད་དོ༴ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་བྱང་ཆུབ་སེམས་དཔའ་གྲངས་མེད་པས་བསྐོར་བ་དང་བཅས་པ་ལ༴ མཆོད་དོ༴ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་འཁོར་བྱང་ཆུབ་སེམས་དཔའ་ཉི་མ་ལྟར་རྣམ་པར་སྣང་བྱེད་དང་ཟླ་བ་ལྟར་རྣམ་པར་སྣང་བྱེད་ལ་སོགས་པ་བྱང་ཆུབ་སེམས་དཔའ་དཔག་ཏུ་མེད་པ་བཅས་པ་ལ་ཕྱག་འཚལ་ལོ། །མཆོད་དོ༴ གང་གི་སྐུ་ནི་ཨིནྡྲ་ནཱི་ལའི་མདོག །མཚན་དཔེ་ཉི་མའི་འོད་སྟོང་འབར་བའི་མཁའ། །ཀུན་ལ་ཞི་བདེའི་གོ་སྐབས་འབྱེད་པའི་དབྱིངས། །བཅོམ་ལྡན་སྨན་བླའི་སྐུ་ལ་ཕྱག་འཚལ་ལོ། །གང་གི་གསུང་ནི་དྲི་ཟའི་རྒྱུད་སྟོང་ལྟར། །ཚངས་པའི་དབྱངས་ཀྱིས་སྣ་ཚོགས་གདུལ་བྱའི་ཡིད། །ཀུན་ཏུ་ཚིམ་བྱེད་གསུང་རབ་རྒྱ་མཚོའི་གཏེར། །བཅོམ་ལྡན་སྨན་བླའི་གསུང་ལ་ཕྱག་འཚལ་ལོ། །གང་གི་ཐུགས་ནི་ཡེ་ཤེས་རྒྱ་མཚོའི་ངང་། །དམིགས་མེད་ཐུགས་རྗེའི་རྦ་རླབས་ཆེར་གཡོས་ཤིང་། །སྨོན་ལམ་རྒྱ་མཚོ་མཛད་པ་ལྷུན་གྲུབ་པའི། །བཅོམ་ལྡན་སྨན་བླའི་ཐུགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འཁོར་བྱང་ཆུབ་སེམས་དཔའ་སུམ་ཁྲི་དྲུག་སྟོང་དང་བཅས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །མ་རིག་མུན་སེལ་སྒྲོན་མེའི་མཆོག །སྡུག་བསྔལ་ནད་སེལ་སྨན་གྱི་ཕུལ། །དམ་ཆོས་དཀོན་མཆོག་ཐམས་ཅད་ལ། །ཕྱག་འཚལ་མཆོད་ཅིང་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་བ་དང་སྐྱབས་གྲོལ་དང་ཕྱག་ན་རྡོ་རྗེ་ལ་སོགས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཚངས་པ་དང་བརྒྱ་བྱིན་དང་རྒྱལ་པོ་ཆེན་པོ་བཞི་ལ་སོགས་པ་དམ་པའི་ཆོས་སྐྱོང་བ་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །གནོད་སྦྱིན་གྱི་སྡེ་དཔོན་ཆེན་པོ་ཇི་འཇིགས་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །འཕགས་པའི་ཚོགས་དེ་དག་ཐམས་ཅད་ལ་མཆོད་ཡོན་དང་བྱུག་པ། མེ་ཏོག་དང་བདུག་སྤོས། མར་མེ་དང་ཞལ་ཟས། རོལ་མོ་དང་སིལ་སྙན། གདུགས་དང་བ་དན་ལ་སོགས་པ་དངོས་སུ་ཅི་འབྱོར་བ་འདི་དག་དང་། ཕྱོགས་བཅུ་ན་བདག་པོས་ཡོངས་སུ་མ་བཟུང་བའི་ལྷ་དང་མིའི་རྫས་དམ་པ་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་དང་གཟུངས་དང་རིག་པའི་མཐུ་དང་མོས་པའི་སྟོབས་ཀྱིས་བསྐྱེད་པའི་མཚོན་པའི་སྤྲིན་བཟང་པོ་སྤྱོད་པའི་སྨོན་ལམ་ལས་བྱུང་བ་རྒྱ་མཚོ་ཐམས་ཅད་ཀྱིས་ནམ་མཁའ་ཁམས་ཀྱི་མཐའ་ཀླས་པ་ཐམས་ཅད་རྒྱས་པར་བཀང་སྟེ། འབུལ་ལོ། །མཆོད་དོ། །མིང་ངམ། བདག་ཅག་གི་ཐོག་མ་མ་མཆིས་པ་ནས་འཁོར་བ་ནས་འཁོར་བའི་ཚེ་རབས་ཐམས་ཅད་དུ་སྡིག་པ་མི་དགེ་བའི་ལས་མདོར་ན་མི་བགྱི་བར་རིགས་པའི་ལས་ནི་བགྱིས། བགྱི་བར་འོས་པའི་ལས་མ་བགྱིས་པ་ལ་སོགས་པ་དངོས་སྡིག་ཅི་མཆིས་པ་ཐམས་ཅད་ཡང་དག་པར་འཆགས་སོ། །དུས་གསུམ་གྱི་འཕགས་པ་དང་སོ་སོའི་སྐྱེ་བོའི་དགེ་བའི་རྩ་བ་མཐའ་དག་གི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །ཕྱོགས་བཅུའི་རྒྱལ་བ་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པར་བསྐོར་བར་བསྐུལ་ལོ། །འཇིག་རྟེན་གྱི་སྒྲོན་མེ་གང་དག་མྱ་ངན་ལས་འདས་པའི་ཚུལ་སྟོན་པར་བཞེད་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་འཇིག་རྟེན་གྱི་དོན་མཛད་ཅིང་ཡུན་དུ་བཞུགས་པར་གསོལ་བར་འཚལ་ལོ། །དེ་ལྟར་བགྱི་བའི་བསོད་ནམས་ཀྱི་ཕུང་པོ་ཅི་མཆིས་པ་ཐམས་ཅད་བདག་གཞན་མ་ལུས་པ་བླ་ན་མེད་པའི་བྱང་ཆུབ་མངོན་དུ་བྱེད་པའི་རྒྱུར་བསྔོའོ། །བཅོམ་ལྡན་འདས་གདན་འཛོམ་པ་ཆེན་པོ་དགོངས་སུ་གསོལ། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་སླད་མའི་དུས་ལྔ་བརྒྱ་མཐའ་མ་ལ་དམ་པའི་ཆོས་ལྟར་བཅོས་པ་འབྱུང་བ་ན་སེམས་ཅན་ལས་ཀྱི་སྒྲིབ་པ་སྣ་ཚོགས་ཀྱིས་བསྒྲིབས་པ། ནད་སྣ་ཚོགས་ཀྱིས་གཟིར་བ། མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ་ཕོངས་པར་གྱུར་བའི་སེམས་ཅན་ཐམས་ཅད་རྗེས་སུ་བཟུང་ཞིང་། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་སླད་དུ་སྔོན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུན་གྱི་ཐབས་མཁས་པ་དང་སྔོན་གྱི་སྨོན་ལམ་གྱི་ཁྱད་པར་རྒྱས་པ་རླབས་པོ་ཆེ་ཇི་ལྟར་བཏབ་ཅིང་བྱིན་གྱིས་བརླབས་པ་དང་། དོན་དེ་ཉིད་ད་ལྟར་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་དཔལ་ཤཱཀྱ་ཐུབ་པས་ཇི་ལྟར་བཀའ་སྩལ་ཞིང་བྱིན་གྱིས་བརླབས་པ་དང་། འཕགས་པ་འཇམ་དཔལ་དང་སྐྱབས་གྲོལ་དང་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བཅོམ་ལྡན་འདས་དེ་དག་གི་བཀའ་ལུང་ཡང་དག་པར་བསྒྲུབ་པ་དང་སོ་སོའི་དགོངས་སྤྱོད་རྒྱ་ཆེན་པོ་རྫོགས་པར་བསྐང་བའི་སླད་དུ་མདོ་སྡེའི་དོན་སྒྲུབ་པའི་ཕྲིན་ལས་མཛད་པས་འཕགས་པའི་བཀའ་བརྟགས་པས་ཞལ་གྱིས་བཞེས་ཤིང་ཇི་ལྟར་བྱིན་གྱིས་བརླབས་པ་དང་། ཚངས་པ་དང་ལྷའི་དབང་པོ་བརྒྱ་བྱིན་དང་རྒྱལ་པོ་ཆེན་པོ་བཞི་དང་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ལ་སོགས་ཏེ་དམ་པའི་ཆོས་སྐྱོང་བའི་དགེ་བསྙེན་ཆེན་པོ་ཐམས་ཅད་གདན་འཛོམ་པའི་སྤྱན་སྔར་མདོ་སྡེ་དང་མདོ་སྡེ་འཛིན་པའི་སེམས་ཅན་བསྲུང་བ་དང་བསྐྱབ་པར་ཇི་ལྟར་ཞལ་གྱིས་བཞེས་པ་ལ་སོགས་པ་སྔོན་འཕགས་པ་རྣམས་ཀྱིས་ཇི་ལྟར་བྱིན་གྱིས་བརླབས་ཤིང་བཀའ་སྩལ་བའི་མདོ་སྡེ་ལས་བྱུང་བ་བཞིན་དུ། བཅོམ་ལྡན་འདས་དེ་བཞིན་གཤེགས་པ་སྲས་དང་བཅས་པ་དེ་རྣམས་གདན་འཛོམ་པ་མཛད་པའི་ཕོ་བྲང་གི་དཀྱིལ་འཁོར་བཤམས། འབྱོར་པའི་སྟོབས་ཅི་མཆིས་པས་མཆོད་པའི་ཚོགས་སྦྱར་ནས་གདན་འཛོམ་པའི་སྤྱན་སྔར་མཚན་ནས་བརྗོད་དེ་མཆོད་པ་འབུལ། བཀའ་དྲིན་ནོད་ཅིང་མཆིས་ན་གདན་འཛོམ་པས་སྔོན་ཇི་ལྟར་བྱིན་གྱིས་བརླབས་ཤིང་བཀའ་སྩལ་པ་བཞིན་དུ་མདོ་སྡེའི་ཆོ་ག་ཡོངས་སུ་རྫོགས་པར་མཛད་ཅིང་ཕན་ཡོན་ཇི་སྐད་འབྱུང་བའི་བཀའ་དྲིན་ཐམས་ཅད། མིང་སོ་སོའམ་བདག་ཅག་གིས་འཕྲལ་དུ་ཐོབ་པར་སྩལ་བར་ཅི་གནང་། བཅོམ་ལྡན་འདས་གདན་འཛོམ་པ་ཆེན་པོ་དགོངས་སུ་གསོལ། ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་བ་དང་། བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཁམས་བཟང་ཞིང་སྐུ་ཚེ་རིང་བ། རྣམ་པར་དཀར་བའི་ཕྲིན་ལས་ཕྱོགས་བཅུར་རྒྱས་པ། དགེ་འདུན་རྣམས་ཀྱི་ཆོས་སྤྱོད་བཅུའི་སྒྲུབ་པ་ཐམས་ཅད་གོང་ནས་གོང་དུ་འཕེལ་ཞིང་རྒྱས་པ། དེ་དག་གི་མཐུ་དང་ནུས་པ་ལ་བརྟེན་ནས། སེམས་ཅན་ལ་བདེ་སྐྱིད་འབྱུང་བ། ཁྱད་པར་དུ་ཡང་སྦྱིན་པའི་བདག་པོས་གཙོ་བྱས་སེམས་ཅན་ཐམས་ཅད་སྒྲིབ་གཉིས་བྱང་ཚོགས་གཉིས་རྫོགས་ནས་མྱུར་དུ་མངོན་པར་རྫོགས་པར་འཚང་རྒྱ་བར་བྱིན་གྱིས་བརླབ་ཏུ་གསོལ། དེ་ཡང་མགོན་པོ་ཀླུ་སྒྲུབ་ཀྱིས་དཔག་མེད་བཞི་ལྡན་གྱི་ཕྱག་ཅེས་གསུངས་པ་ལྟར། ཡུལ་སངས་རྒྱས་དཔག་ཏུ་མེད་པ་ལ། རང་གི་ལུས་དཔག་ཏུ་མེད་པར་སྤྲུལ་ནས། སེམས་ཅན་དཔག་ཏུ་མེད་པའི་དོན་གྱི་སླད་དུ། ཕྱག་དཔག་ཏུ་མེད་པ་བཙལ་བས་ཡོན་ཏན་དཔག་ཏུ་མེད་པ་འབྱུང་། ཞེས་ཤཱི་ལ་བྷ་དྲའི་ཁྲིགས་སུ་དཔག་མེད་བཞི་ཞེས་བྱུང་བ་རྒྱུའི་དཔག་མེད་བཞི་ལ་དགོངས་པ་འདྲའོ། །མོས་པའི་ཁྱད་པར་མཆོད་ཡོན་རྣམས་ཡན་ལག་བརྒྱད་དང་ལྡན་པའི་མཚོ་ཆེན་པོ་རླབས་འཕྲེང་དལ་བུར་གཡོ་ཞིང་ལྦུ་བའི་དོ་ཤལ་འཁྲིགས་པ་གྲངས་མེད་པ་དང་། རང་གི་ལུས་ཀྱིས་དེ་བཞིན་དུ་སྤྲུལ་ཏེ་འབུལ་བ་པོའི་ཚུལ་གྱིས་སྐུལ་དབུལ། ཨུ་དུམ་ཝཱ་ར། མནྡཱ་ར་བ། པདྨ། ཨུཏྤལ། བ་ཀུ་ལ་སོགས་ལྷ་མིའི་མེ་ཏོག་སྣ་ཚོགས་པ་ནམ་མཁའི་ཁམས་གང་པ་ཐང་དུ། ཙན་དན་དཀར་དམར་དང་སྦྲུལ་གྱི་སྙིང་པོ། ཨ་ཀ་རུ། དུ་རུ་ཀ །སྨན་སྣ་ཚོགས་བསྲེགས་པའི་དུད་པ་སྤྲིན་ཕུང་འཐིབས་པ་དང་ཕྱེ་མ་ཕུར་མའི་དྲི་ངད་བཟང་པོ་ཤངས་ལ། སྣོད་ཀྱི་འཇིག་རྟེན་ཙམ་གྱི་ཀོང་བུར་འབྲུ་མར་དང་རྩི་བཅུད་ཀྱི་མར་ཁུ་རྒྱ་མཚོ་ལྟ་བུ་གཏམས་པར་སྡོང་བུ་རི་རབ་ཙམ་ལ་སྤར་བའི་མར་མེ་མཐའ་ཡས་པའི་སྣང་བས་ཉི་ཟླ་ཟིལ་གྱིས་ནོན་ནུས་པ་སྤྱན་སྔར། བཟང་དྲུག །ག་བུར། ཙན་དན་སོགས་དྲི་ཞིམ་པོའི་སྨན་གྱི་ཡོངས་སུ་སྤགས་པའི་དྲི་ཆབ་གདྒཱའི་རྒྱུན་ལྟ་བུ་ཐུགས་ཀ །ལྷ་ཀླུ་གནོད་སྦྱིན་མི་ལ་སོགས་པ་རྣམས་ཀྱི་ཟས་གཡོས་སུ་བྱས་པ་དང་། མ་བྱས་པའི་བཅའ་བའི་རིམ་པ་བཟང་དགུ་རོ་བརྒྱ་ཕྲག་བདའ་བའི་ལྷ་བཤོས་ལྗགས། སིལ་སྙན། གླིང་བུ། ཕེག་རྡོབ། རྫ་རྔ། ཟོམ་རྔ་སོགས་འཇིག་རྟེན་གྱི་ཁམས་ཡོངས་སུ་གང་བའི་སྒྲ་སྙན་ལ། གཞན་ཡང་གདུགས་དང་རྒྱལ་མཚན། བ་དན། ལྡ་ལྡི། རིན་ཆེན་སྣ་བདུན། བཀྲ་ཤིས་རྫས་རྟགས་སོགས་མཆོད་པའི་རྫས་དང་ཡོ་བྱད་ཇི་སྙེད་པ་དངོས་དང་གཟུགས་སུ་བྱས་པ་བློས་མང་པོར་སྤྲུལ་པ་ནི་བདག་པོས་ཡོངས་སུ་བཟུང་བའི་མཆོད་པ། རི་རབ། གསེར་རི། རོལ་མཚོ། གླིང་བཞི། ཉི་ཟླ་སོགས་ཡོངས་སུ་མ་བཟུང་བའི་མཆོད་པ། ལུས་ཡིད་བཞིན་གྱི་ནོར་བུའམ། རིན་པོ་ཆེའི་གཞལ་མེད་ཁང་ངམ། ཡང་ན་འབངས་སུ་ཕུལ་ཏེ་བཀའ་བཞིན་དུ་སྒྲུབ་པ་ནི་ལུས་འབུལ་བའི་མཆོད་པ། གོང་དུ་མཆོད་པའི་སྤྲིན་གྱི་གཟུངས་བཀླགས་པའི་མཐུས་ཀུན་ཏུ་བཟང་པོའི་མཆོད་སྤྲིན་དུ་གྱུར་པ་ནི་གཟུངས་ཀྱི་མཆོད་པ། མཆོད་པ་དེ་དག་ཚད་གཟུང་དང་བྲལ་ཏེ་བསམ་གྱིས་མི་ཁྱབ་པ་ནི་མོས་པའི་མཆོད་པ། བདེ་གཤེགས་བརྒྱད་འཁོར་དང་བཅས་པ་སྤྱན་དྲངས་པ་ནི་རྟེན་གྱི་སྟོབས། སྔོན་ཆད་ཀྱི་སྡིག་པ་ལ་དུག་ཁོང་དུ་སོང་བ་ལྟ་བུའི་འགྱོད་སེམས་དྲག་པོ་བསྐྱེད་པ་ནི་རྣམ་པར་སུན་འབྱིན་པའི་སྟོབས། སླན་ཆད་སྲོག་ལ་བབས་ཀྱང་མི་བགྱི་སྙམ་པ་ནི་ཉེས་པ་ལས་སླར་ལྡོག་པའི་སྟོབས། བཤད་མ་ཐག་པའི་ཕྱག་མཆོད་དང་དེ་ཡང་དོན་དམ་པར་རང་བཞིན་མེད་ཀྱང་ཀུན་རྫོབ་ཏུ་རང་བཞིན་གྱི་སྡིག་སྒྲིབ་ཐམས་ཅད་འདག་ཅིག །ཅེས་བརྗོད་པའི་ཚེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་འབྱུང་བའི་འོད་ཟེར་གྱིས་སྨན་པ་མཁས་པས་སྐྱུགས་སྨན་བཏང་བ་བཞིན་ཕྱིར་དྲངས་ཏེ་རང་གི་ལུས་ཤེལ་གོང་ཕྱིས་པ་ལྟར་མོས་པ་ནི་གཉེན་པོ་ཀུན་ཏུ་སྤྱོད་པའི་སྟོབས་ཏེ་བཤགས་པ། རང་གཞན་ཐམས་ཅད་ཀྱི་དུས་གསུམ་གྱི་དགེ་བ་ལ་སེམས་དགའ་བ་སྟེ། སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་པ་ལྟར་གཞན་གྱི་དགེ་བ་ལ་རྗེས་སུ་ཡི་རང་བྱས་ན་བསོད་ནམས་མཉམ་པོར་ཐོབ་པའི་ཕན་ཡོན་ཡོད། རྒྱལ་བུ་དོན་ཐམས་ཅད་གྲུབ་པ་སངས་རྒྱས་ནས་རིང་པོར་མ་ལོན་པའི་ཚེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཚལ་དུ་གནས་པར་བྱ། །ཞེས་ཆོས་མི་གསུང་བའི་ཚུལ་བསྟན་པའི་ཚེ་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས་གསོལ་བ་བཏབ་པ་ལྟར། འདིར་ཡང་རང་གི་ལག་ཏུ་འཁོར་ལོ་ལྟ་བུ་ཐོགས་ཏེ་གདུལ་བྱ་སོ་སོའི་ཁམས་དང་། བསམ་པ་དང་། དབང་པོ་དང་འཚམས་བར་ཆོས་ཀྱི་འཁོར་ལོ་བསྐོར་བར་གསོལ་བ་གདབ། སངས་རྒྱས་དང་བྱང་སེམས་རྣམས་འགྲོ་བའི་དོན་ལ་དུས་དྲུག་ཏུ་མི་གཡེལ་ནའང་སེམས་ཅན་རྣམས་ཉོན་མོངས་པ་ཧྲགས་པས་ཐུགས་འབྱུང་སྟེ་ཞི་བའི་དབྱིངས་སུ་འབྱོན་པར་བཞེད་པ་རྣམས་ལ་བསྐལ་པར་མྱ་ངན་ལས་མི་འདའ་བར་འགྲོ་བའི་དོན་དུ་བཞུགས་པར་གསོལ་བ་གདབ། དགེ་བ་མཐའ་ཀླས་རྫོགས་པའི་བྱང་ཆུབ་ཏུ་བསྔོ་བ་ནི་བློ་གྲོས་མི་ཟད་པས་ཞུས་པའི་མདོར་ཚིག་ལྷུག་པར་ཡོད་པའི་དོན་བཀའ་གདམས་པ་ཞིག་གིས་མཛད་པར། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང་། །རྒྱ་མཚོ་མ་ཟད་བར་དུ་དེ་མི་མཛད། །དེ་བཞིན་དུ་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་དགེ་བ་བྱང་ཆུབ་ཀྱི་རྒྱུ་རུ་བསྔོས་པ་ནི་ནམ་ཡང་མི་འཛད་པའི་ཡན་ལག་ཁྱད་པར་ཅན་ཡིན་ཞིང་། དེ་ལྟར་ཡན་ལག་བདུན་པ་སོ་ནམ་དང་འབྲས་བུ་སྟོན་ཐོག་དང་འདྲ་བ་ནི་ཐུགས་དམ་བསྐུལ་བ་ཡིན་པས། ཡུལ་ཁྱད་པར་ཅན་རྣམས་ལ་གདུང་ཤུགས་རྩེ་གཅིག་པས་སྔོན་གྱི་ཐུགས་དམ་བཅས་པ་རྣམས་ད་ལྟ་བདག་ཅག་ལ་འགྲུབ་པར་མཛད་དུ་གསོལ། ཞེས་སྤྱིའི་ཐུགས་དམ་བསྐུལ་བ་ཞེས་ཀྱང་བྱ། མཆོད་པ་འགྲུབ་པའི་རྒྱུར་གསོལ་བ་གདབ་པ་ཞེས་ཀྱང་བྱ་བའོ། །གཉིས་པ་རྒྱས་བཤད་སོ་སོའི་ཕྱག་མཆོད་སྨོན་ལམ་ལ་བདེ་གཤེགས་བརྒྱད། ཆོས། དགེ་འདུན། ཞར་བྱུང་གཟུངས་བུམ་སྒྲུབ་པ་རྣམས་ཡོད་པ་ལས། བདེ་བར་གཤེགས་པ་བརྒྱད་ཀྱི་དང་པོ་མཚན་ལེགས་ནི། དེའི་འོག་ཏུ་འཕགས་པ་རྣམས་ལ་རེ་རེ་ནས་མཆོད་པ་དབུལ་ཞིང་སྨོན་ལམ་གདབ་པར་བགྱིའོ། །དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོའི་མཚན་ནས་བརྗོད་དེ་མཆོད་ནས་སྨོན་ལམ་དུ་གསོལ་བ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡག་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས་ལ་ཞེས་བྱུང་ཡང་དེང་སང་ལན་བདུན་མི་མཛད་པའི་སླ་ཆོས་མཁན་མང་བ་ཆད་ལྷག་ཏུ་འགྱུར་ཉེན་ཆེ་བས་ངེས་པར་བལྡབས་པ་ལེགས་ཤིང་། སྐབས་འདིར་མཆོད་པ་དབུལ་ཞེས་བྱུང་བ་གོང་གི་འཕགས་པའི་ཚོགས་དེ་དག་ལ་ཞེས་སོགས་ལྷག་མ་དྲུག་པོ་སྦྱོར་བ་འོག་མ་ཀུན་ལ་འགྲེ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོའི་མཚན་ཐོས་ཏེ་ཡིད་ལ་དྲན་ཞིང་ལན་བདུན་བརྗོད་པ་དང་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་ནད་སྣ་ཚོགས་ཀྱི་ལུས་ཡོངས་སུ་གཟིར་ཏེ། རིམས་དང་གཤེད་བྱེད་དང་བྱད་དང་རོ་ལངས་དང་འཇིགས་པ་སྣ་ཚོགས་ཀྱིས་གཙེས་པ་དེ་དག་ཐམས་ཅད་ཀྱི་གནོད་པ་དང་ནད་ཐམས་ཅད་འཕྲལ་དུ་ཞི་བར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་རིམས་དང་སྡིག་པ་ཅན་གྱི་གནོད་དང་ནད་ཐམས་ཅད་མེད་པར་གྱུར་ཅིག །རབ་ཏུ་ཞི་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ལོང་བ་དང་འོན་པ་དང་སྨྱོན་པ་དང་ཤ་བཀྲ་དང་ནད་ཚབས་ཆེན་པོས་བཏབ་པར་གྱུར་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་དབང་པོ་ཐམས་ཅད་ཡོངས་སུ་ཚང་བར་གྱུར་ཅིག །སྡུག་བསྔལ་དང་ནད་ཐམས་ཅད་རྒྱུན་ཆད་པར་གྱུར་ཅིག །བདག་ཅག་ལ་སོགས་པའི་སེམས་ཅན་གང་དག་འདོད་ཆགས་དང་ཞེ་སྡང་དང་གཏི་མུག་གིས་བསྒྲིབས་པ་མཚམས་མེད་པ་ལྔ་བྱེད་པ། བྱ་བ་མ་ཡིན་པའི་སྤྱོད་པ་མང་བ་དམ་པའི་ཆོས་སྤོང་བ་སྡིག་པ་མི་དགེ་བའི་ལས་སྣ་ཚོགས་བྱེད་པ། ངན་སོང་གསུམ་དང་སེམས་ཅན་དམྱལ་བར་འགྲོ་བ་དེ་དག་སེམས་ཅན་དམྱལ་བ་ཆེན་པོར་སྐྱེས་ནས་སྡུག་བསྔལ་གྱི་ཚོར་བ་མྱོང་བ་དེ་དག་ཐམས་ཅད་ཀྱི་མཚམས་མེད་པ་ལྔ་ལ་སོགས་པ་ལས་ཀྱི་སྒྲིབ་པ་ཐམས་ཅད་ཡོངས་སུ་བྱང་ཞིང་ཟད་པར་གྱུར་ཅིག །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པའི་བར་དུ་སུ་ཡང་སེམས་ཅན་དམྱལ་བ་དང་ངན་འགྲོར་འགྲོ་བར་མ་གྱུར་ཅིག །ལྷ་ཡུལ་པའི་ལྷའི་བདེ་བ་དང་མིའི་བདེ་བ་མྱོང་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་དབུལ་པོར་གྱུར་ཏེ་ཟས་དང་སྐོམ་དང་གོས་དང་ནོར་དང་འབྲུ་དང་མལ་ཆ་དང་སྤོས་དང་འཕྲེང་བ་དང་ཡོ་བྱད་མི་བདོག་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་དབྱིག་དང་གོས་དང་ནོར་བུ་འབྲུ་དང་མལ་ཆ་དང་སྤོས་དང་འཕྲེང་བ་དང་ཡོ་བྱད་འཕེལ་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་བཅིང་བ་དང་བརྡེག་པ་དང་གོ་རར་གཞུག་པ་དང་མཚོན་ཆའི་ཚོགས་རྣམས་པ་སྣ་ཚོགས་ཀྱི་ལུས་ཡོངས་སུ་གཟིར་བ་དེ་དག་བྱང་ཆུབ་ཀྱི་མཐར་ཐུག་གི་བར་དུ་བཅིང་བ་དང་བརྡེག་པ་ཐམས་ཅད་ལས་ཡོངས་སུ་ཐར་བར་གྱུར་ཅིག །ལུས་ཀྱི་གདུང་བ་ཐམས་ཅད་རྒྱུན་ཆད་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་མགོན་མེད་པར་གྱུར་པ་ལུས་ལ་གདུང་བའི་མེ་འབར་བ་དང་། སེང་གེ་དང་སྟག་དང་དོམ་དང་དྲེད་དང་སྦྲུལ་གདུག་པའི་ནང་དུ་ཚུད་དེ་སྲོག་ལ་བབས་ཤིང་ཉམ་ཐག་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་ལུས་ལ་གདུང་བའི་མེ་ཐམས་ཅད་རབ་ཏུ་ཞི་བར་གྱུར་ཅིག །སེང་གེ་དང་སྟག་དང་དོམ་དང་དྲེད་དང་སྦྲུལ་གདུག་པ་དེ་དག་ཀྱང་བྱམས་པ་ལ་གནས་པར་གྱུར་ཅིག །འཇིགས་པ་མེད་པ་དང་ཞི་བའི་གནས་ལ་གནས་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ཕན་ཚུན་འཐབ་པ་དང་རྩོད་ཅིང་འགྱེད་པར་གྱུར་ཏེ་འཁྲུགས་ཤིང་འཇིགས་སྐྲག་ནས་དངངས་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་འཐབ་པ་དང་རྩོད་པ་དང་འགྱེད་པ་ཐམས་ཅད་རབ་ཏུ་ཞི་བར་གྱུར་ཅིག །ཕན་ཚུན་བྱམས་པ་ལ་གནས་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ཆུའི་ནང་དུ་སོན་པ་གྲུར་ཞུགས་པ་གླིང་མེད་པར་ཕྱིན་པ་སྲོག་འདོར་བ་ཆུ་ཀླུང་དང་རྒྱ་མཚོའི་ནང་དུ་སོན་ཏེ་སྨྲེ་སྔགས་སྣ་ཚོགས་འདོན་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་ཆུ་ཀླུང་ཆེན་པོ་དེ་ལས་དབུགས་འབྱིན་པ་སྦྱིན་པར་གྱུར་ཅིག །འཇིགས་པ་མེད་པར་རྒལ་བར་གྱུར་ཅིག །འདི་ནས་ཤི་འཕོས་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོའི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ་སྟོན་པ་བླ་ན་མེད་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད་ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་མཚན་ལེགས་ཡོངས་བསྒྲགས་རྒྱལ་པོ་ཡིས། །སྔོན་ཚེ་སྨོན་ལམ་རྣམ་བརྒྱད་བཏབ་པའི་འབྲས། །དཔག་མེད་མཁྱེན་བརྩེ་ནུས་མཐུའི་བྱིན་རླབས་ཀྱིས། །དེང་འདིར་བདག་སོགས་འགྲོ་བས་ལོངས་སྤྱོད་ཤོག །ཐུབ་པའི་བསྟན་དང་སྐྱེ་རྒུ་བདེ་ཞིང་སྐྱིད། །ཁྱད་པར་སྦྱིན་པའི་བདག་པོས་གཙོ་བྱས་པའི། །འགྲོ་རྣམས་སྒྲིབ་གཉིས་བྱང་ཞིང་ཚོགས་གཉིས་པོ། །རབ་རྫོགས་བྱང་ཆེན་མྱུར་དུ་ཐོབ་བྱིན་རློབས། །གཉིས་པ་བདེ་གཤེགས་སྒྲ་དབྱངས་རྒྱལ་པོ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་འབུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོའི་མཚན་ཡིད་ལ་དྲན་ཞིང་ལན་བདུན་བརྗོད་པ་དང་ཕྱག་འཚལ་ཞིང་མཆོད་པ་ལ་སོགས་པའི་མཐུས། བཅོམ་ལྡན་འདས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་རྒྱལ་པོ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་ཞིང་ལས་ཀྱི་མཐའ་དང་ཚོང་ལ་དགའ་སྟེ་གཡེང་བ་སྣ་ཚོགས་མང་བས་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་དང་བྱང་ཆུབ་ཀྱི་སེམས་ཡིད་ལ་བྱེད་པ་ལས་ཡོངས་སུ་ཉམས་ཏེ། འཁོར་བ་ན་འཁྱམས་ཤིང་སོ་སོར་འཁོར་བའི་སྡུག་བསྔལ་སྣ་ཚོགས་མྱོང་བ་དང་། རྒ་བ་དང་ན་བ་དང་རྒུད་པ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་སྣ་ཚོགས་སོ་སོར་མྱོང་བ་དེ་དག་ཐམས་ཅད་བླ་ན་མེད་པའི་བྱང་ཆུབ་ཏུ་སངས་རྒྱས་ཀྱི་བར་དུ་བཟའ་བ་དང་བགོ་བ་དང་བཏུང་བ་དང་ལོངས་སྤྱོད་དང་ཡོངས་སུ་སྤྱད་པ་དང་ནོར་དང་འབྲུ་དང་དབྱིག་དང་གསེར་རྣམས་འབྱུང་ཞིང་འབྱོར་པ་ཕུན་སུམ་ཚོགས་པར་གྱུར་ཅིག །དགེ་བའི་ཆོས་རྣམས་ཀྱིས་རྣམ་པར་འཕེལ་བར་གྱུར་ཅིག །བྱང་ཆུབ་ཀྱི་སེམས་ཡིད་ལ་བྱེད་པ་དང་མི་འབྲལ་བར་གྱུར་ཅིག །ངན་སོང་དང་སེམས་ཅན་དམྱལ་བ་ལ་སོགས་པ་འཁོར་བའི་སྡུག་བསྔལ་ཐམས་ཅད་ལས་ཡོངས་སུ་ཐར་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་གྲང་བ་དང་ཚ་བ་དང་བཀྲེས་པ་དང་སྐོམ་པས་ལུས་ཡོངས་སུ་གདུངས་ཤིང་སྡུག་བསྔལ་གྱི་ཚོར་བས་ཉམ་ཐག་པ་དེ་དག་ཐམས་ཅད་ཀྱི་སྔོན་གྱི་ལས་ཀྱི་སྒྲིབ་པ་དེ་དག་ཐམས་ཅད་ཡོངས་སུ་བྱང་བར་གྱུར་ཅིག །སྐྱེ་བ་དེ་ཡང་མཐའ་མར་གྱུར་ཅིག །བླ་ན་མེད་པའི་བྱང་ཆུབ་ཏུ་སངས་རྒྱས་ཀྱི་བར་དུ་སྐྱེ་བའི་སྡུག་བསྔལ་ཐམས་ཅད་ལས་ཡོངས་སུ་ཐར་བར་གྱུར་ཅིག །ལྷ་དང་མིའི་བདེ་བ་མྱོང་བར་གྱུར་ཅིག །བུད་མེད་གང་དག་ནད་སྣ་ཚོགས་ཀྱི་ལུས་ཡོངས་སུ་གཟིར་ཞིང་བུད་མེད་ཀྱི་སྐྱེ་གནས་ལ་སྨོད་པ་དང་། སེམས་ཅན་གང་དག་བཙའ་བའི་དུས་ཀྱི་སྡུག་བསྔལ་གྱི་ཚོར་བ་མྱོང་བ་དེ་དག་ཐམས་ཅད་ཀྱི་སྡུག་བསྔལ་ཐམས་ཅད་རྒྱུན་ཆད་པར་གྱུར་ཅིག །སྐྱེ་བ་དེ་ཡང་མཐའ་མར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་སྐྱེས་པ་ཉིད་ཐོབ་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་འཆི་བ་དང་དགྲ་དང་དགོན་པའི་གནོད་པས་གཙེས་པ་དང་ཕན་ཚུན་ཕ་མ་དང་སྲིང་མོ་དང་མཛའ་བཤེས་དང་ཉེ་དུའི་མྱ་ངན་མྱོང་ཞིང་སྡུག་བསྔལ་བ་དང་མྱ་ངན་གྱི་ཟུག་རྔུས་ལུས་ལ་ཟུག་པ་དེ་དག་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་འཆི་བ་དང་དགྲ་དང་དགོན་པའི་གནོད་པ་ཐམས་ཅད་རབ་ཏུ་ཞི་བར་གྱུར་ཅིག །མྱ་ངན་དང་སྡུག་བསྔལ་ཐམས་ཅད་དང་བྲལ་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་མཚན་མོ་མུན་པ་མུན་ནག་ན་རྣམ་པར་རྒྱུ་བ་ལས་ཀྱི་མཐའ་རྣམ་པ་སྣ་ཚོགས་ལ་ཞུགས་པ་སྡིག་པ་ཅན་གྱི་གདོན་སྣ་ཚོགས་ཀྱིས་གཙེས་པ། འཇིགས་པ་དང་སྨྲེ་སྔགས་སྣ་ཚོགས་འདོན་པ་དེ་དག་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་མུན་པ་མུན་ནག་ཐམས་ཅད་མེད་པར་གྱུར་ཅིག །སྡིག་པ་ཅན་གྱི་གདོན་ཐམས་ཅད་ལས་ཐར་བར་གྱུར་ཅིག །མཆོད་པ་དང་རིམ་གྲོ་བྱ་བ་སྣ་ཚོགས་ལ་མངོན་པར་བརྩོན་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་དམན་པ་ལ་མོས་ཤིང་ཤེས་རབ་ཆུང་ལ་དྲན་པ་རྨོངས་ཏེ། དགེ་བའི་ཆོས་རྣམས་དང་སྟོབས་དང་བྱང་ཆུབ་ཀྱི་ཡན་ལག་དང་ཏིང་ངེ་འཛིན་དང་གཟུངས་ཀྱི་སྒོ་རྣམས་དང་། སངས་རྒྱས་དང་ཆོས་དང་། དགེ་འདུན་རྗེས་སུ་དྲན་པ་ལས་ཡོངས་སུ་ཉམས་པ་དེ་དག་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་ཏིང་ངེ་འཛིན་དང་དྲན་པ་དང་སྟོབས་དང་གཟུངས་ཀྱི་སྒོ་རྣམས་དང་བྱང་ཆུབ་ཀྱི་ཡན་ལག་རྣམས་མངོན་དུ་གྱུར་ཅིག །ཤེས་རབ་ཆེན་པོ་རྗེས་སུ་རྒྱུ་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་དམན་པ་ལ་མོས་ཤིང་ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པ་ལ་འདོད་པ་བསྐྱེད་དེ། དེ་ལ་གནས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རྒྱབ་ཀྱིས་ཕྱོགས་པར་གྱུར་པ་དེ་དག་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག །ཉན་ཐོས་དང་རང་སངས་རྒྱས་ཀྱི་ས་ལས་ཡང་དག་པར་འདས་པར་གྱུར་ཅིག །བྱང་ཆུབ་ཀྱི་སེམས་ཡིད་ལ་བྱེད་པ་དང་མི་འབྲལ་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་བསྐལ་པ་ཆེན་པོ་ཟད་པའི་ཚེ་འཛམ་བུའི་གླིང་ཀུན་ཏུ་འབར་ཞིང་རབ་ཏུ་འབར་བ་འཁྲུགས་པར་གྱུར་ཏེ། ངུ་ཞིང་མྱ་ངན་བྱེད་ལ་སྔོན་མི་དགེ་བའི་ལས་ཀྱི་རྒྱུས་སྡུག་བསྔལ་འབྱུང་ཞིང་། སྐྱབས་མེད་མགོན་མེད་པ་དེ་དག་ཐམས་ཅད་སྡུག་བསྔལ་དང་མྱ་ངན་དང་བྲལ་བར་གྱུར་ཅིག །བསིལ་བའི་དངོས་པོ་ཐོབ་པར་གྱུར་ཅིག །ཤི་འཕོས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོའི་སངས་རྒྱས་ཀྱི་ཞིང་རྣམ་པར་དག་པ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་བར་གྱུར་ཅིག །སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ། སྟོན་པ་བླ་ན་མེད་པ་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད་ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་གཟི་བརྗིད་སྒྲ་དབྱངས་རྒྱལ་པོ་ཡིས། །སྔོན་ཚེ་སྨོན་ལམ་རྣམ་བརྒྱད་བཏབ་པའི་འབྲས། །མན་གོང་བཞིན་སྦྱོར། གསུམ་པ་བདེ་གཤེགས་གསེར་བཟང་དྲི་མེད་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་ཅི་འབྱོར་པ་ཕུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པའི་མཚན་ཡིད་ལ་དྲན་ཞིང་ལན་བདུན་བརྗོད་པ་དང་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར། བདག་ཅག་ལ་སོགས་པ་སེམས་ཅན་གང་དག་སྲོག་གཅོད་པ་མི་དགེ་བའི་ལས་རྣམ་པ་སྣ་ཚོགས་བྱེད་པ་སྲོག་ཆགས་སྣ་ཚོགས་ཀྱི་སྲོག་གཅོད་པའི་ལས་བྱས་པས་ཚེ་ཐུང་ཞིང་ནད་མང་བ་དང་ཆུ་དང་དུག་དང་མཚོན་དང་མེ་དང་ནད་སྣ་ཚོགས་ཀྱིས་འཆི་བར་འགྱུར་བ་དེ་དག་ཐམས་ཅད་ལས་ཀྱི་སྒྲིབ་པ་དེ་དག་ཐམས་ཅད་ཡོངས་སུ་བྱང་སྟེ་ཚེ་རིང་བར་གྱུར་ཅིག །ནད་མེད་པར་གྱུར་ཅིག །སུ་ཡང་དུས་མ་ཡིན་པར་འཆི་བའི་དུས་བྱེད་པར་མ་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་སྡིག་པ་མི་དགེ་བའི་ལས་སྣ་ཚོགས་བྱས་ཏེ། གཞན་གྱི་རྫས་བརྐུས་འཕྲོག་པས་དབུལ་པོར་སྐྱེས་ཏེ་སྒྲེན་མོ་དང་བཀྲེས་པ་དང་སྐོམ་པས་ལུས་ཡོངས་སུ་གདུངས་ཤིང་སྡུག་བསྔལ་མྱོང་བ་དེ་དག་ཐམས་ཅད་འཕྲལ་དུ་སྡིག་པ་ཐམས་ཅད་བྱངས་སྟེ་བྱང་ཆུབ་ཀྱི་མཐར་ཐུག་གི་བར་དུ་དབང་ཕྱུག་ཕུན་སུམ་ཚོགས་ཤིང་མ་ཚང་བ་མེད་པ་ཐོབ་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་གཅིག་ལ་གཅིག་གནོད་སེམས་དང་ལྡན་ཞིང་ཕན་ཚུན་སྲོག་གཅོད་པར་བྱེད་པ་དང་འཐབ་པར་བྱེད་པ་དེ་དག་ཐམས་ཅད་བླ་ན་མེད་པའི་བྱང་ཆུབ་ཏུ་སངས་རྒྱས་ཀྱི་བར་དུ་ཕན་ཚུན་ཕ་མ་ལྟར་བྱམས་པ་ལ་གནས་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་འདོད་ཆགས་དང་བཞེ་སྡང་དང་གཏི་མུག་གིས་བསྒྲིབས་ཏེ་ཚུལ་ཁྲིམས་འཆལ་བར་གྱུར་ནས་སྡིག་པ་ཀུན་ཏུ་སྤྱོད་ཅིང་བསླབ་པ་བྲལ་ལ་དད་པས་བྱིན་པ་ལོངས་སྤྱོད་པས་ངན་སོང་གསུམ་དུ་ལྷུང་ཞིང་སེམས་ཅན་དམྱལ་བར་འགྲོ་བར་འགྱུར་བ་དེ་དག་ཐམས་ཅད་འཕྲལ་དུ་ལས་ཀྱི་སྒྲིབ་པ་ཐམས་ཅད་ཡོངས་སུ་བྱང་བར་གྱུར་ཅིག །ཉེ་བའི་ཉོན་མོངས་པ་ཐམས་ཅད་དང་བྲལ་བར་གྱུར་ཅིག །བྱང་ཆུབ་ཀྱི་སྙིང་པོ་ལ་ཐུགས་ཀྱི་བར་དུ་ཚུལ་ཁྲིམས་ཡང་དག་པར་འཛིན་ཅིང་ལུས་དང་ངག་དང་ཡིད་སྡོམ་པ་ལ་གནས་པར་གྱུར་ཅིག །བྱང་ཆུབ་ཀྱི་སེམས་ཡིད་ལ་བྱེད་པ་དང་མི་འབྲལ་བར་གྱུར་ཅིག །ཏདྱ་ཐཱ། སིདྡྷེ་སིདྡྷེ། སུ་སིདྡྷེ། མོ་ཙ་ནི་མོཀྵ་ནི། མུ་ཀྟི། བི་མུཀྟི། ཨ་མ་ལེ། བི་མ་ལེ། མདྒ་ལྱ། ཧི་ར་ཎྱ་གརྦྷེ། རཏྣ་གརྦྷེ། སརྦ་ཨརྠ་སཱ་དྷ་ནི། པ་ར་མཱ་རྠ་སཱ་དྷ་ནི། མ་ན་སེ། མ་ཧཱ་མ་ན་སེ། ཨད་བྷུ་ཏྟེ། ཨཏྱད་བྷུ་ཏྟེ། བྷཱི་ཏ་བྷ་ཡེ། སུ་བརྞེ་བྲཧྨ་གྷོ་ཥེ། བྲཧྨ་དྷཱུ་ཥི་ཏེ། སརྦ་ཨརྠེཥུ། ཨཱ་པ་རཱི་ཛི་ཏེ། སརྦ་ཏྲ་ཨ་པྲ་ཏི་ཧ་ཏེ་ཙ་ཏུཥྤ་ཥྛི་བྷུ་ཏ་ཀོ་ཊི། བྷཱ་ཥི་ཏེ། ན་མཿསརྦ་ཏ་ཐཱ་ག་ཏཱ་ནཱཾ་སྭཱ་ཧཱ། བཅོམ་ལྡན་འདས་དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པ་དེས་བྱང་ཆུབ་ཀྱི་ཤིང་དྲུང་དུ་བཞུགས་ཏེ། སེམས་ཅན་འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་པ། ནད་སྣ་ཚོགས་ཀྱིས་གཟིར་བ་དང་འཆི་བ་དང་དགྲ་དང་དགོན་པས་གནོད་པར་གྱུར་པ། ཚེ་བསྐལ་བར་ཐུབ་པའི་སེམས་ཅན་དམྱལ་བར་གཞོལ་བའི་སེམས་ཅན་རྣམས་གཟིགས་ནས་དེ་དག་གི་དོན་དུ་སངས་རྒྱས་ཀྱི་བྱང་ཆུབ་ལ་དགོད་པ་དང་ལས་ཀྱི་སྒྲིབ་པ་ཐམས་ཅད་ཟད་པར་བྱ་བའི་ཕྱིར་གཟུངས་སྔགས་ཀྱི་གཞི་གསུངས་པ་འདི་བཟླས་པའི་བྱིན་གྱིས་བརླབས་ཀྱིས་བདག་ཅག་ལ་སོགས་པ་སེམས་ཅན་ཐམས་ཅད་ཀྱི་མཚམས་མེད་པ་ལྔ་ལ་སོགས་པ་སྡིག་པ་ཐམས་ཅད་བྱང་བར་གྱུར་ཅིག །རེ་བ་ཐམས་ཅད་ཡོངས་སུ་རྫོགས་པར་གྱུར་ཅིག །འཆི་བའི་ཚེ་ཡང་བཅོམ་ལྡན་འདས་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པས་དགོངས་པར་གྱུར་ཅིག །ཤི་འཕོས་ནས་ཀྱང་དེ་བཞིན་གཤེགས་པ་གསེར་བཟང་དྲི་མེད་རིན་ཆེན་སྣང་བ་བརྟུལ་ཞུགས་གྲུབ་པའི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་སྐྱེས་མ་ཐག་ཏུ་གཟུངས་དང་ཏིང་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ། སྟོན་པ་བླ་ན་མེད་པ་གསེར་བཟང་དྲི་མེད་རིན་ཆེན་སྣང་བ་བརྡུལ་ཞུགས་གྲུབ་པ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད་ཅིང་། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་སེར་བཟང་དྲི་མེད་སྣང་བ་ཡིས། །སྔོན་ཚེ་སྨོན་ལམ་རྣམ་བཞི་བཏབ་པའི་འབྲས། མན་སྦྱོར། བཞི་པ་བདེ་གཤེགས་མྱ་ངན་མེད་མཆོག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་ལ་གུས་པས་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་ཅི་འབྱོར་པ་དབུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་མྱ་ངན་མེད་མཆོག་དཔལ་གྱི་མཚན་ཡིད་ལ་དྲན་ཞིང་ལན་བདུན་བརྗོད་པ་དང་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་མྱ་ངན་མེད་མཆོག་དཔལ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་མྱ་ངན་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་མང་བ་དང་སྡུག་བསྔལ་རྣམ་པ་སྣ་ཚོགས་མྱོང་བ་དེ་དག་ཐམས་ཅད་ཀྱི་མྱ་ངན་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་མང་བ་དེ་དག་ཐམས་ཅད་རབ་ཏུ་ཞི་བར་གྱུར་ཅིག །སུ་ཡང་སྡུག་པ་དང་བྲལ་བའི་སྡུག་བསྔལ་མྱོང་བར་མ་གྱུར་ཅིག །ཚེ་རིང་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་སྡིག་པ་མི་དགེ་བ་སྣ་ཚོགས་བྱས་ཏེ་མནར་མེད་པའི་སེམས་ཅན་དམྱལ་བ་ཆེན་པོ་མུན་པ་མུན་ནག་ཆེན་པོ་ཅན་དུ་སྐྱེ་བར་འགྱུར་བའམ་སྐྱེས་པ་དེ་དག་ལ། དེ་བཞིན་གཤེགས་པ་མྱ་ངན་མེད་མཆོག་དཔལ་གྱི་སྐུ་ལས་འོད་ཟེར་གྱི་སྣང་བ་བྱུང་བས་རེག་ཅིང་མཐོང་བར་གྱུར་ཏེ་དེ་མ་ཐག་ཏུ་སྡིག་པ་ཐམས་ཅད་བྱང་ནས་སེམས་ཅན་དམྱལ་བའི་སྡུག་བསྔལ་དེ་དག་ཐམས་ཅད་ལས་ཡོངས་སུ་ཐར་བར་གྱུར་ཅིག །སྡུག་བསྔལ་གྱི་ཚོར་བ་མྱོང་བ་དེ་དག་ཐམས་ཅད་རྒྱུན་ཆད་པར་གྱུར་ཅིག །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ལྷ་དང་མིའི་བདེ་བ་མྱོང་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་སྔོན་སྡིག་པ་མི་དགེ་བ་བགྱིས་ཏེ་གཞན་གྱི་རྫས་འཕྲོག་པས་དབུལ་པོ་དམན་པའི་ཁྱིམ་དུ་སྐྱེས་ནས་གོས་དང་བཟའ་བ་དང་བཏུང་བ་དང་མལ་ཆ་དང་རྒྱན་མི་འདོག་པ་དང་། གྲང་བ་དང་ཚ་བའི་སྡུག་བསྔལ་མྱོང་བ་དང་བཀྲེས་པ་དང་སྐོམ་པས་ལུས་གཟིར་ཞིང་མདོག་ངན་པར་གྱུར་པ་དེ་དག་བྱང་ཆུབ་ཀྱི་མཐར་ཐུག་གི་བར་དུ་བགོ་བ་དང་བཟའ་བ་དང་བཏུང་བ་དང་མལ་ཆ་ཐམས་ཅད་ལ་ལོངས་སྤྱོད་པར་གྱུར་ཅིག །ལུས་ལ་ལྷའི་ལུས་ཀྱི་ཁ་དོག་གིས་བརྒྱན་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་གནོད་སྦྱིན་དང་སྲིན་པོ་དང་འབྱུང་པོ་དང་ཤ་ཟ་རྣམས་ཀྱི་གཙེས་ཤིང་མདངས་ཕྲོགས་ཏེ་ནད་ཀྱི་སྡུག་བསྔལ་སྣ་ཚོགས་མྱོང་བ་དེ་དག་བྱང་ཆུབ་ཀྱི་མཐར་ཐུག་གི་བར་དུ་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་རྣམས་ཀྱི་གཙེས་ཤིང་མདངས་ཕྲོགས་པ་ཐམས་ཅད་རབ་ཏུ་ཞི་ཞིང་བྱམས་པ་ལ་གནས་པར་གྱུར་ཅིག །ནད་ཀྱི་སྡུག་བསྔལ་སྣ་ཚོགས་ལས་ཡོངས་སུ་ཐར་བར་གྱུར་ཅིག །འདི་ནས་ཤི་འཕོས་ནས་ཀྱང་དེ་བཞིན་གཤེགས་པ་མྱ་ངན་མེད་མཆོག་དཔལ་གྱི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་། སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ། སྟོན་པ་བླ་ན་མེད་པ་མྱ་ངན་མེད་མཆོག་དཔལ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་མྱ་ངན་མེད་མཆོག་རྒྱལ་པོ་ཡིས། །སྔོན་ཚེ་སྨོན་ལམ་རྣམ་བཞི་བཏབ་པའི་འབྲས། །མན་སྦྱོར། ལྔ་པ་བདེ་གཤེགས་ཆོས་བསྒྲགས་རྒྱ་མཚོ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་དབུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་ཀྱི་མཚན་ཐོས་ཏེ་ཡིད་ལ་དྲན་ཞིང་ལན་བདུན་བརྗོད་དེ་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་ལོག་པར་ལྟ་བ་ཅན་གྱི་ཁྱིམ་དུ་སྐྱེས་པས། སངས་རྒྱས་དང་ཆོས་དང་དགེ་འདུན་ལ་མ་དད་པ་བྱང་ཆུབ་ཀྱི་སེམས་ཡིད་ལ་བྱེད་པ་ལས་རིང་དུ་གྱུར་པ་དེ་དག་ལས་ཀྱི་སྒྲིབ་པ་དེ་ཟད་པར་གྱུར་ནས་བྱང་ཆུབ་ཀྱི་མཐར་ཐུག་གི་བར་དུ་ཡང་དག་པའི་ལྟ་བ་ཅན་དུ་གྱུར་ཅིག །སངས་རྒྱས་དང་ཆོས་དང་དགེ་འདུན་ལ་དད་པ་མི་ཕྱེད་པ་དང་ལྡན་པར་གྱུར་ཅིག །བྱང་ཆུབ་ཀྱི་སེམས་ཡིད་ལ་བྱེད་པ་ལས་ཕྱིར་མི་ལྡོག་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་གང་ན་སངས་རྒྱས་ཀྱི་སྒྲ་མི་གྲགས་པ། ཆོས་ཀྱི་སྒྲ་མི་གྲགས་པ། དགེ་འདུན་གྱི་སྒྲ་མི་གྲགས་པ་ཡུལ་མཐའ་འཁོབ་ཏུ་སྐྱེས་ཏེ་མི་དགེ་བའི་བཤེས་གཉེན་གྱི་རྒྱུས་སྡིག་པའི་ལས་བྱེད་པ་དེ་དག །དེ་ནས་ཤི་འཕོས་ནས་ངན་སོང་གསུམ་དུ་ལྟུང་ཞིང་དགེ་བའི་ཆོས་རྣམས་ལས་སེམས་པར་འགྱུར་བ་དེ་དག་ལ། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་ཀྱི་མཚན་རྣ་ལམ་དུ་གྲགས་པར་གྱུར་ཏེ་ཆོས་ཀྱི་སྤྲིན་དང་རྒྱ་མཚོའི་སྒྲ་འབྱུང་བར་གྱུར་ཅིག །དེ་དག་གིས་ཆོས་ཀྱི་སྒྲ་དེ་ཐོས་ནས་སྔོན་གྱི་ལས་ཟད་པར་གྱུར་ཏེ་བྱང་ཆུབ་ཀྱི་མཐར་ཐུག་གི་བར་དུ་བྱང་ཆུབ་ཀྱི་སེམས་ཡིད་ལ་བྱེད་པ་དང་མི་འབྲལ་བར་གྱུར་ཅིག །བདག་ཅག་ལ་སོགས་པའི་སེམས་ཅན་གང་དག་གོས་དང་རྒྱན་དང་སྤོས་དང་འཕྲེང་བ་དང་བྱུག་པ་དང་མལ་ཆ་དང་ན་བའི་གསོས་སྨན་དང་བྲལ་ཞིང་མི་ལྡན་པའི་དབང་གིས་སྡུག་བསྔལ་མྱོང་ཞིང་སྡིག་པའི་ལས་བྱེད་པ་དེ་དག་གོས་དང་རྒྱན་དང་སྤོས་དང་ཕྲེང་བ་དང་བྱུག་པ་དང་མལ་ཆ་དང་ན་བའི་གསོས་སྨན་དང་ལོངས་སྤྱོད་རྣམས་བསམ་མ་ཐག་ཏུ་འབྱུང་ཞིང་མི་ལྡན་པ་མེད་པར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་སུ་ཡང་ཅི་དང་ཡང་མི་ལྡན་པ་མེད་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་སྔོན་གྱི་ལས་ཀྱི་རྣམ་པར་སྨིན་པས་ཕན་ཚུན་འཐབ་མོ་འཐབ་པ་དང་རྩོད་པ་དང་འགྱེད་པར་གྱུར་ཏེ་གཅིག་ལ་གཅིག་གནོད་པར་བྱ་བ་དང་གསད་པར་བྱ་བའི་ཕྱིར་རྟུལ་བ་མཚོན་དང་མདའ་དང་དབྱུག་པ་དག་གིས་བསྣུན་ཏེ་སྡུག་བསྔལ་བར་གྱུར་པ་དེ་དག་མདའ་དང་མཚོན་དང་དབྱུག་པ་ལ་སོགས་པ་ལས་སླར་ལྡོག་པར་གྱུར་ཅིག །ཕྱིར་ཕྱོགས་པར་གྱུར་ཅིག །དགྲ་ཐམས་ཅད་ཀྱང་བྱམས་པ་ལ་གནས་པར་གྱུར་ཅིག །སུའི་སྲོག་གི་དབང་པོ་ལ་ཡང་འགག་པར་མ་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་རང་རང་གི་རྫས་དང་ལོངས་སྤྱོད་དང་དབང་ཕྱུག་དག་གིས་ཆོག་ཤེས་པར་གྱུར་ཅིག །འདི་ནས་ཤི་འཕོས་ནས་ཀྱང་དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་ཀྱི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ། སྟོན་པ་བླ་ན་མེད་པ་ཆོས་བསྒྲགས་རྒྱ་མཚོའི་དབྱངས་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་ཆོས་བསྒྲགས་རྒྱ་མཚོ་དབྱངས་མཆོག་གིས། །སྔོན་ཚེ་སྨོན་ལམ་རྣམ་བཞི་བཏབ་པའི་འབྲས། །མན་སྦྱོར། དྲུག་པ་བདེ་གཤེགས་མངོན་མཁྱེན་རྒྱལ་པོ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་དབུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པའི་མཚན་ཐོས་ཏེ་ཡིད་ལ་དྲན་ཞིང་ལན་བདུན་བརྗོད་དེ་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་གང་དག་ཞིང་ལས་དང་ས་བོན་འདེབས་པ་དང་། ཚོང་བྱེད་པ་དང་འཐབ་མོ་དང་རྩོད་པ་ལ་སོགས་པ་སྡིག་པའི་ལས་བྱེད་པ་དེ་དག་ཐམས་ཅད་བསམ་མ་ཐག་ཏུ་འཚོག་ཆས་ཐམས་ཅད་འབྱོར་བར་གྱུར་ཅིག །གནོད་སེམས་མེད་པར་གྱུར་ཅིག །རྟག་ཏུ་དགེ་བའི་ཆོས་བྱེད་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པས་སེམས་ཅན་དམྱལ་བར་འགྲོ་བར་འགྱུར་བ་དེ་དག་ཐམས་ཅད་དགེ་བ་བཅུའི་ལས་ཀྱི་ལམ་དང་ལྡན་པར་གྱུར་ཅིག །སེམས་ཅན་གང་ཡང་དམྱལ་བར་འགྲོ་བར་མ་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་གཞན་གྱི་དབང་དུ་སོང་སྟེ་ཆད་པས་བཅད་པ་དང་། བཅིང་པ་དང་བརྡེག་པ་དང་གོ་རར་གཞུག་པ་དང་གསད་པའི་འོས་སུ་གྱུར་པ་དེ་དག་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་བཅིང་པ་དང་བརྡེག་པ་ལ་སོགས་པ་ལས་ཐར་བར་གྱུར་ཅིག །བླ་ན་མེད་པའི་རང་དབང་ཕུན་སུམ་ཚོགས་པ་དང་ལྡན་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ཚེ་ཐུང་བར་འགྱུར་བའི་སྡིག་པ་མི་དགེ་བ་སྣ་ཚོགས་བྱས་ཏེ་འཆི་བར་འགྱུར་པ་དེ་དག་ཐམས་ཅད་སྡིག་པའི་ལས་ཐམས་ཅད་ཡོངས་སུ་བྱང་སྟེ་ཚེ་རིང་ཞིང་དུས་མ་ཡིན་པར་འཆི་བར་འགྱུར་བས་ནམ་ཡང་འགའ་ཡང་འཆི་བར་མ་གྱུར་ཅིག །འཆི་ཁར་ཡང་དེ་བཞིན་གཤེགས་པ་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པའི་མཚན་རྣ་ལམ་དུ་གྲགས་ཤིང་རྗེས་སུ་དྲན་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་ལྷ་དང་མིའི་བདེ་བ་མྱོང་བར་གྱུར་ཅིག །འདི་ནས་ཤི་འཕོས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པའི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེས་ཤིང་སྐྱེས་མ་ཐག་ཏུ་གཟུགས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ། སྟོན་པ་བླ་ན་མེད་པ་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་ཆོས་ཀྱི་རྒྱ་མཚོ་མངོན་མཁྱེན་གྱིས། །སྔོན་ཚེ་སྨོན་ལམ་རྣམ་བཞི་བཏབ་པའི་འབྲས། །མན་སྦྱོར། བདུན་པ་བདེ་གཤེགས་སྨན་གྱི་བླ་མ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་ལ་གུས་པས་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་ཅི་འབྱོར་པ་ཕུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོའི་མཚན་ཐོས་ཏེ་ཡིད་ལ་དྲན་ཞིང་ལན་བདུན་བརྗོད་དེ་ཕྱག་འཚལ་ཞིང་མཆོད་པ་ལ་སོགས་པའི་མཐུས། དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེའི་སྔོན་གྱི་སྨོན་ལམ་ཁྱད་པར་ཅན་དང་མཐུན་པར་བདག་ཅག་ལ་སོགས་པ་སེམས་ཅན་ཐམས་ཅད་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ལུས་ལེགས་པར་བརྒྱན་པར་གྱུར་ཏེ་བདག་ཅི་འདྲ་བ་དེ་བཞིན་དུ་སེམས་ཅན་ཐམས་ཅད་ཀྱང་དེ་འདྲ་བར་གྱུར་ཅིག །ལུས་ཀྱི་འོད་ཟེར་གྱིས་འཇིག་རྟེན་གྱི་ཁམས་གྲངས་མེད་པ་དཔག་གིས་མི་ལང་བ་དག་ལྷམ་མེ་ལྷན་ནེ་ལྷང་ངེར་གྱུར་ཅིག །ལུས་ནོར་བུ་རིན་པོ་ཆེ་བཻ་ཌཱུརྻ་ཅི་འདྲ་བ་དེ་འདྲ་བར་ཕྱི་ནང་ཤིན་ཏུ་ཡོངས་སུ་དག་པ་དང་དྲི་མ་མེད་ལ་འོད་གསལ་བ་དང་ཁོ་ལག་ཡངས་ཤིང་ཆེ་བ་དང་དཔལ་དང་གཟི་བརྗིད་འབར་བ་དང་ལེགས་པར་གནས་པ་དང་ཉི་མ་དང་ཟླ་བ་ལས་ལྷག་པའི་འོད་ཟེར་གྱི་དྲྭ་བ་རྣམས་ཀྱིས་ལེགས་པར་བརྒྱན་པར་གྱུར་ཅིག །དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་ཅི་འདྲ་བ་དེ་འདྲ་བར་གྱུར་ཏེ་སེམས་ཅན་གང་དག་འཇིག་རྟེན་གྱི་བར་དག་ཏུ་སྐྱེས་པ་དག་དང་། གང་དག་ཡང་མིའི་འཇིག་རྟེན་འདི་ན་མཚན་མོ་མུན་པ་མུན་ནག་གི་ནང་ན་ཕྱོགས་ཐ་དད་པར་འགྲོ་བ་དེ་དག་ཐམས་ཅད་བདག་གི་འོད་ཀྱིས་ཕྱོགས་དགའ་མགུར་འགྲོ་ཞིང་ལས་རྣམས་ཀྱང་བྱེད་པར་གྱུར་ཅིག །དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེའི་ཤེས་རབ་དང་ཐབས་དཔག་ཏུ་མེད་པས་བདག་ཅག་ལ་སོགས་པ་སེམས་ཅན་གྱི་ཁམས་དཔག་གིས་མི་ལང་བ་དག་ལོངས་སྤྱོད་ཟད་མི་ཤེས་པ་དང་ལྡན་པར་གྱུར་ཏེ་སུ་ཡང་ཅིས་ཀྱང་བྲེལ་བ་མེད་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ལམ་ངན་པར་ཞུགས་པ་དང་ཉན་ཐོས་དང་རང་སངས་རྒྱས་ཀྱི་ལམ་དུ་ཞུགས་པ་དེ་དག་ཐམས་ཅད་ཐེག་པ་ཆེན་པོ་བླ་ན་མེད་པའི་ལམ་ལ་འཇུག་པར་གྱུར་ཅིག །བདག་ཅག་ལ་སོགས་པ་སེམས་ཅན་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་སྡོམ་པ་གསུམ་གྱིས་བསྡམ་པ་དང་ཚུལ་ཁྲིམས་ཉམས་པ་མེད་པར་གྱུར་ཅིག །སུ་ཡང་ཚུལ་ཁྲིམས་ལོག་པར་ཞུགས་ཏེ་ངན་འགྲོར་འགྲོ་བར་མ་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་ལུས་ངན་པ་དང་། དབང་པོ་མ་ཚང་བ་དང་མདོག་མི་སྡུག་པ་དང་སྐེམ་པོ་དང་ཡན་ལག་སྐྱོན་ཅན་དང་རྒུར་པོ་དང་ཤ་བཀྲ་ཅན་དང་ཞར་བ་དང་ལོང་བ་དང་འོན་པ་དང་སྨྱོན་པ་དང་ལུས་ལ་ནད་ཀྱིས་བཏབ་པ་དེ་དག་ཐམས་ཅད་ལས་ཀྱི་སྒྲིབ་པ་ཐམས་ཅད་བྱང་ནས་ཐམས་ཅད་དབང་པོ་ཚང་ཞིང་ཡན་ལག་ཡོངས་སུ་རྫོགས་པར་གྱུར་ཅིག །བདག་ཅགས་ལ་སོགས་པ་སེམས་ཅན་གང་དག་ནད་སྣ་ཚོགས་ཀྱིས་གཟིར་བ་སྐྱབས་མེད་པ་མགོན་མེད་པ། འཚོག་ཆས་དང་སྨན་མི་བདོག་པ། དཔུང་གཉེན་མེད་པ། དབུལ་བ་སྡུག་བསྔལ་བ་དེ་དག་གི་ནད་ཐམས་ཅད་རབ་ཏུ་ཞི་བར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་ནད་མེད་ཅིང་གནོད་པ་མེད་པ་དང་ཡོ་བྱད་ཕུན་སུམ་ཚོགས་པ་ལ་གནས་པར་གྱུར་ཅིག །བུད་མེད་གང་དག་བུད་མེད་ཀྱི་སྐྱོན་བརྒྱ་དག་གིས་ཀུན་ནས་ཉོན་མོངས་པར་གྱུར་པ་བུད་མེད་ཀྱི་དངོས་པོ་ལ་མི་དགའ་བ། བུད་མེད་ཀྱི་སྐྱེ་གནས་ལས་ཐར་བར་འདོད་པ་དེ་དག་ཐམས་ཅད་བུད་མེད་ཀྱི་དངོས་པོ་ལས་ལོག་པར་གྱུར་ཅིག །བྱང་ཆུབ་ཀྱི་མཐར་ཐུག་གི་བར་དུ་སྐྱེས་པའི་དབང་པོ་དང་ལྡན་པར་གྱུར་ཅིག །བདག་ཅག་ལ་སོགས་པ་སེམས་ཅན་ཐམས་ཅད་བདུད་ཀྱི་ཞགས་པ་ལས་ཡོངས་སུ་ཐར་བར་གྱུར་ཅིག །ལྟ་བ་ཐ་དད་པ་མི་མཐུན་པ་ཟིང་ཟིང་བས་མི་མཐུན་པ་དག་སྤངས་ཏེ་ཡང་དག་པའི་ལྟ་བ་ལ་གནས་པར་གྱུར་ཅིག །བྱང་ཆུབ་ཀྱི་སྤྱོད་པ་རླབས་པོ་ཆེ་ཡོངས་སུ་རྫོགས་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་སུ་དག་རྒྱལ་པོའི་འཇིགས་པས་སྐྲག་པ་དང་། གང་དག་བཅིང་བ་དང་བརྡེག་པ་དང་གོ་རར་གཞུག་པ་དང་གསད་པར་འོས་པ་རྒྱུ་དུ་མས་ཀུན་ཏུ་གཙེས་པ། ང་རྒྱལ་དང་བྲལ་བ་ལུས་དང་ངག་དང་སེམས་སྡུག་བསྔལ་གྱི་ཉེན་པ་དེ་དག་བདག་གི་བསོད་ནམས་ཀྱི་མཐུས་གནོད་པ་ཐམས་ཅད་ལས་ཡོངས་སུ་ཐར་བར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་བཀྲེས་པ་དང་སྐོམ་པའི་མེ་རབ་ཏུ་འབར་བ། ཁ་ཟས་འཚོལ་བ་ལ་རབ་ཏུ་བརྩོན་པ་སྡིག་པའི་ལས་བྱེད་པ་དེ་དག་བདག་གིས་ཁ་དོག་དང་དྲི་དང་རོར་ལྡན་པའི་བཟའ་བཏུང་གིས་ཚིམ་པར་བྱས་ཏེ། ཕྱིས་ཆོས་ཀྱི་རོས་ཤིན་ཏུ་བདེ་བ་ལ་འགོད་པར་གྱུར་ཅིག །བདག་ཅག་ལ་སོགས་པ་སེམས་ཅན་གང་དག་སྒྲེན་མོ་བགོ་བ་མེད་བ་དབུལ་བ་སྡུག་བསྔལ་བ་གྲང་བ་དང་ཚ་བ་དང་སྦྲང་བུ་དང་ཤ་སྦྲང་དག་གིས་ཉིན་མཚན་དུ་སྡུག་བསྔལ་གྱི་ཚོར་བ་མྱོང་བ་དེ་དག་བདག་གིས་གོས་ཡོངས་སུ་སྤྱད་པར་འོས་པ། ཚོན་སྣ་ཚོགས་སུ་ཁ་བསྒྱུར་བ་དག་དང་རིན་པོ་ཆེའི་རྒྱན་དང་སྤུད་པ་དང་འཕྲེང་བ་དང་བྱུག་པ་དང་རོལ་མོའི་སྒྲ་དང་སིལ་སྙན་དང་། ཕེག་རྡོབ་པ་རྣམས་ཀྱིས་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་གྱུར་ཅིག །འཕགས་པ་དགྱེས་པའི་ཚུལ་ཁྲིམས་ཀྱི་དགའ་བ་དང་ལྡན་པར་གྱུར་ཅིག །ཉོན་མོངས་པའི་གདུང་བས་མི་བརྫི་བར་རྣམ་པར་གྲོལ་བའི་བདེ་བ་ལ་གནས་པར་གྱུར་ཅིག །འདི་ནས་ཤི་འཕོས་ནས་ཀྱང་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོའི་སངས་རྒྱས་ཀྱི་ཞིང་དུ་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་ཞིང་སྐྱེས་མ་ཐག་ཏུ་གཟུངས་དང་ཏིང་ངེ་འཛིན་ལ་སོགས་པ་ཡོན་ཏན་གྱི་ཚོགས་ཐམས་ཅད་མངོན་དུ་གྱུར་ཏེ་སྟོན་པ་བླ་ན་མེད་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་ལ་སོགས་པ་ཕྱོགས་བཅུའི་སངས་རྒྱས་ཐམས་ཅད་ལས་བཀའ་ལུང་ཡང་དག་པར་ནོད། ཐུགས་མཉེས་པར་བྱེད་ཅིང་སྐད་ཅིག་སྐད་ཅིག་ལ་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པར་འཇུག་པར་གྱུར་ཅིག །བཅོམ་ལྡན་སྨན་བླ་བཻ་ཌཱུརྻའི་འོད་ཀྱིས། །སྔོན་ཚེ་སྨོན་ལམ་བཅུ་གཉིས་བཏབ་པའི་འབྲས། །མན་སྦྱོར། བརྒྱད་པ་བདེ་གཤེགས་ཤཱཀྱའི་རྒྱལ་པོ་ནི། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་ཅི་འབྱོར་པ་འབུལ། དེང་རྒྱལ་བ་སྲས་དང་བཅས་པའི་ཚོགས་གདན་འཛོམ་པའི་སྤྱན་སྔར་དེ་བཞིན་གཤེགས་པ་ཤཱཀྱ་ཐུབ་པའི་མཚན་ཡིད་ལ་དྲན་ཞིང་ལན་བདུན་བརྗོད་དེ་ཕྱག་འཚལ་ཞིང་མཆོད་པ་ལ་སོགས་པའི་མཐུས། སྟོན་པ་དེ་བཞིན་གཤེགས་པ་ཤཱཀྱ་ཐུབ་པས་བདག་ཅག་ལ་སོགས་པ་སེམས་ཅན་གང་དག་ལས་ཀྱི་སྒྲིབ་པ་སྣ་ཚོགས་ཀྱི་བསྒྲིབས་པ། ནད་སྣ་ཚོགས་ཀྱིས་གཟིར་བ་མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ་ཕོངས་པར་གྱུར་པ་ཐམས་ཅད་རྗེས་སུ་གཟུང་ཞིང་ལྷ་དང་མིའི་དོན་དང་སྨན་པ་དང་བདེ་བའི་སླད་དུ་དེ་བཞིན་གཤེགས་པ་བདུན་གྱི་ཐབས་མཁས་པ་དང་སྔོན་གྱི་སྨོན་ལམ་གྱི་ཁྱད་པར་རྒྱས་པ་བྱིན་གྱིས་བརླབས་ཤིང་དཔལ་གྱིས་མགུར་ནས་འདི་སྐད་དུ། འཇམ་དཔལ་དེ་ལྟ་བས་ན་ཡོན་ཏན་ཐམས་ཅད་དོན་དུ་གཉེར་བ་རྣམས་ཀྱིས་ཉོན་མོངས་པ་རྣམས་དང་མ་འདྲེས་པར་དེ་བཞིན་གཤེགས་པ་བདུན་གྱི་མཚན་བཟུང་བར་བྱ། ཉིན་ལན་གསུམ་མཚན་ལན་གསུམ་ཡིད་ལ་བྱ། གུས་པས་དང་བར་བྱ། སྐུ་གཟུགས་ཀྱང་བྱ། མེ་ཏོག་དང་བདུག་པ་དང་མར་མེ་དང་བྱུག་པ་དང་ཞལ་ཟས་དང་རོལ་མོའི་སྒྲ་ལ་སོགས་པས་མཆོད་པར་བྱ། ཡན་ལག་བརྒྱད་དང་ལྡན་པའི་བསྙེན་གནས་ལ་ཉེ་བར་གནས་པར་བྱ། ཉིན་བདུན་གཙང་མར་བྱས་ཏེ་ས་ཕྱོགས་གཙང་མར་གནས་ཤིང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་གདབ་པར་བྱ། སེམས་ཅན་ཐམས་ཅད་ལ་བྱམས་པ་དང་སྙིང་རྗེའི་སེམས་སུ་བྱ་ཞེས་བྱ་བ་ལ་སོགས་པ་དང་གཞན་ཡང་། ཏདྱཐཱ། གྷུ་མེ་གྷུ་མེ། ཨི་མེ་ནེ་མི་ཧི། མ་ཏི་མ་ཏི། སཔྟ་ཏ་ཐཱ་ག་ཏ། ས་མཱ་དྷྱཱ་དྷི་ཥྛི་ཏི། ཨ་ཏེ་མ་ཏེ། པཱ་ལེ་པཱ་པཾ་ཤོ་དྷ་ནི། སརྦྦ་པཱ་བཾ་ནཱ་ཤ་ཡ། མ་མ་བུདྡྷེ། བུ དྡྷོཏྟ་མེ། ཨུ་མེ་ཀུ་མེ། བུདྡྷ་ཀྵེ་ཏྲ་པཱ་རི་ཤོ་དྷ་ནི། དྷ་མེ་ནི་དྷ་མེ། མེ་རུ་མེ་རུ། མེ་རུ་ཤི་ཁ་རེ། སརྦྦ་ཨ་ཀཱ་ལ་མྲཱྀ་ཏྱུ། ནཱི་བཱ་ར་ཎི། བུདྡྷེ་སུ་བུདྡྷེ། བུདྡྷ་ཨ་དྷི་ཥྛི་ཏེ་ན། རཀྵ་ནྟུ་མེ། སརྦ་དེ་བཱཿ ས་མེ་ཨ་ས་མེ། ས་མ་ནྭཱ་ཧ་རནྟུ་མེ། སརྦ་བུདྡྷ་བོ་དྷི་ས་ནཱཾ། ཤ་མེ་ཤ་མེ། པྲ་ཤ་མནྟུ་མེ། སརྦ་ཨཱི་ཏྱུ་པ་དྲ་བ་བྱཱ་དྷ་ཡ། པུ་ར་ཎི་པུ་ར་ཎི། པཱུ་ར་ཡ་མེ། སརྦ་ཨཱ་ཤ་ཡ་བཻ་ཌཱུརྻ་པྲ་ཏི་བྷ་སེ། སརྦ་པཱ་པཾ་ཀྵ་ཡཾ་ཀ་རི་སྭཱ་ཧཱ། བཻ་ཌཱུརྻའི་འོད་ཅེས་བྱ་བའི་གཟུངས་འདི་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་འཆང་ངམ་ཀློག་གམ་མཆོད་དམ་ལན་སྟོང་རྩ་བརྒྱད་དུ་བཏོན་ན་དེ་ལ་དེ་བཞིན་གཤེགས་པ་ཐམས་ཅད་ཀྱིས་དགོངས་པར་འགྱུར། བྱང་ཆུབ་སེམས་དཔའ་ཐམས་ཅད་ཀྱིས་སེམས་པར་འགྱུར། རྡོ་རྗེ་འཛིན་པ་ཐམས་ཅད་ཀྱིས་ཡང་དག་པར་བསྲུང་བར་འགྱུར། ལྷ་ཐམས་ཅད་དང་བརྒྱ་བྱིན་དང་ཚངས་པ་དང་རྒྱལ་པོ་ཆེན་པོ་བཞི་དག་གིས་ཀྱང་ཡོངས་སུ་སྐྱོང་བ་འགྱུར། མཚམས་མེད་པ་ལྔ་ལ་སོགས་པ་ལས་ཀྱི་སྒྲིབ་པ་ཐམས་ཅད་ཀྱང་ཡོངས་སུ་བྱང་བར་འགྱུར། ནད་ཐམས་ཅད་ཀྱིས་མི་བཏབ་པར་འགྱུར། རིང་དུ་འཚོ་བར་འགྱུར། དུས་མ་ཡིན་པར་འཆི་བའི་འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར། འཆི་བ་དང་དགྲ་དང་དགོན་པའི་གནོད་པ་དང་། འཐབ་པ་དང་རྩོད་པ་དང་འགྱེད་པ་ཐམས་ཅད་རབ་ཏུ་ཞི་བར་འགྱུར། དགྲ་ཐམས་ཅད་ཀྱི་དབང་དུ་འགྲོ་བར་མི་འགྱུར། ཅི་བསམ་པའི་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །ཞེས་ཇི་སྐད་བཀའ་སྩལ་པ་དེ་དག་ཐམས་ཅད། མིང་ངམ། བདག་ཅག་ལ་སོགས་པའི་དོན་དུ་མདོ་ལས་བྱུང་བའི་ཆོ་ག་བཞིན་དུ་དེ་བཞིན་གཤེགས་པ་བདུན་དང་སྟོན་པ་བདེ་བར་གཤེེགས་པ་རྣམས་གདན་འཛོམ་པའི་སྤྱན་སྔར་མཆོད་ཅིང་སྨོན་ལམ་གསོལ་བ་དང་གཟུངས་སྔགས་བཟླས་པས་ཇི་ལྟར་བྱིན་གྱིས་བརླབས་ཤིང་བཀའ་སྩལ་པ་བཞིན་དུ་བྱིན་གྱིས་བརླབས་ཤིང་ཕན་ཡོན་ཇི་སྐད་བཀའ་སྩལ་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་འཕྲལ་དུ་ཐོབ་པར་མཛད་ཅིང་སྩལ་བར་ཅི་གནང་། བཅོམ་ལྡན་མཉམ་མེད་ཤཱཀྱ་ཐུབ་པ་ཡིས། །བཻ་ཌཱུརྻའི་གཟུངས་ཕན་ཡོན་གསུངས་པའི་འབྲས། །མན་སྦྱོར། གཉིས་པ་དམ་པའི་ཆོས་ནི། མ་རིག་མུན་སེལ་སྒྲོན་མེ་མཆོག །སྡུག་བསྔལ་ནད་སེལ་སྨན་གྱི་ཕུལ། །དམ་ཆོས་དཀོན་མཆོག་ཐམས་ཅད་ལ། །ཕྱག་འཚལ་མཆོད་ཅིང་སྐྱབས་སུ་མཆི། །ལན་བདུན་བཟླས། སྐབས་འདིར་མཆོད་པ་ཅི་འབྱོར་པ་ཕུལ། དེ་བཞིན་གཤེགས་པའི་བཀའ་ཡང་དག་པ་ཚད་མར་གྱུར་པ། འགྱུར་བ་མི་མངའ་བ་དེས་བདག་ཅག་ལ་བདེན་པ་མངོན་སུམ་དུ་བསྟན་པར་ཅི་གནང་། མཚན་ཐོས་ཙམ་གྱིས་སྐྱོན་སེལ་ཡོན་ཏན་འཕེལ། །ཞེས་སོགས་བདེར་གཤེགས་བཀའ་ལུང་འགྱུར་མེད་འབྲས། །མན་སྦྱོར། གསུམ་པ་དགེ་འདུན་ལ་འཇམ་དཔལ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་གཞོན་ནུར་གྱུར་པ་ཐུགས་དྲི་མ་དང་སྐྱོན་ཐམས་ཅད་དང་བྲལ་བ་སྐུ་ཡོན་ཏན་དྲི་མ་མེད་པའི་ཚོགས་ཀྱི་འོད་ཟེར་གྱིས་བརྒྱན་པ། ཞབས་རྟེན་གྱི་པདྨ་ལ་ལྷ་དང་མི་དང་ལྷ་མ་ཡིན་དང་ཀླུ་དང་རིག་སྔགས་འཆང་རྣམས་ཀྱི་ཐོར་ཚུགས་དང་ཅོད་པན་གྱིས་གཏུགས་པ། ངན་སོང་གི་འགྲོ་བ་སྣ་ཚོགས་འཇོམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། སྐབས་འདིར་མཆོད་པ་ཅི་འབྱོར་བ་དབུལ། བཅོམ་ལྡན་འདས་འཕགས་པ་འཇམ་དཔལ་དུས་ངན་པའི་སེམས་ཅན་ལས་ཀྱི་སྒྲིབ་པ་སྣ་ཚོགས་ཀྱིས་བསྒྲིབས་པ། ནད་སྣ་ཚོགས་ཀྱིས་གཟིར་བ། མྱ་ངན་དང་སྡུག་བསྔལ་སྣ་ཚོགས་ཀྱིས་གཙེས་པ། ལྟ་བ་ངན་པ་སྣ་ཚོགས་ཀྱིས་ཡོངས་སུ་བསྒྲིབས་པ། ལམ་དང་ས་དམན་པར་འོག་ནས་འོག་ཏུ་ལྟུང་བར་འགྱུར་བའི་སེམས་ཅན་རྣམས་ལ་ཐུགས་བརྩེ་བར་དགོངས་ཏེ། གང་ཐོས་པ་ཙམ་གྱི་ཅི་ནས་ཀྱང་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང་། སྡིག་པ་དང་ལས་ཀྱི་སྒྲིབ་པ་ཐམས་ཅད་ཡོངས་སུ་བྱང་ཞིང་དག་པར་འགྱུར་བ་དང་། བདུད་སྡིག་ཅན་གྱིས་མི་བརྗི་བར་འགྱུར་བ་དང་གནོད་པ་དང་མི་བདེ་བ་ཐམས་ཅད་རབ་ཏུ་ཞི་བར་འགྱུར་བ་དང་འདོད་དགུའི་རེ་བ་རྫོགས་ཤིང་བསམ་པ་ཐམས་ཅད་ཡིད་བཞིན་དུ་འགྲུབ་བར་འགྱུར་བའི་དེ་བཞིན་གཤེགས་པ་བདུན་གྱི་མཚན་དང་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་སྡེ་སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་དམིགས་ཀྱིས་ཞུ་བ་མཛད་ཅིང་གདན་འཛོམ་པའི་དབུས་སུ་འདི་སྐད་ཅེས། བཅོམ་ལྡན་འདས་སླད་མའི་ཚེ་སླད་མའི་དུས་ན་གང་དག་མདོ་སྡེ་འདི་འཆང་བ་དང་གཞན་དག་ལ་ཡང་རྒྱ་ཆེར་ཡང་དག་པར་སྟོན་པ་དང་ཡི་གེར་འདྲི་བ་དང་ཡི་གེར་འདྲིར་སྩོལ་བ་དང་གླེགས་བམ་དུ་བྲིས་ཏེ། མེ་ཏོག་དང་བདུག་པ་དང་སྤོས་དང་འཕྲེང་བ་དང་བྱུག་པ་གདུགས་དང་རྒྱལ་མཚན་རྣམས་ཀྱིས་བཀུར་སྟིར་བགྱིད་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ལ་བདག་གིས་དེ་བཞིན་གཤེག་པ་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོ་དེའི་མཚན་རྣམ་པ་སྣ་ཚོགས་སུ་བསྒྲག་པར་བྱའོ། །ཐ་ན་རྨི་ལམ་དུ་ཡངས་སངས་རྒྱས་ཀྱི་མཚན་རྣ་ལམ་དུ་ཉེ་བར་བསྒྲག་པར་བགྱིའོ། །ཚོན་སྣ་ལྔ་པའི་རས་ཀྱིས་དཀྲིས་ཏེ་ཕྱོགས་གཙང་མར་བཞག་ན་གང་ན་མདོ་སྡེ་འདི་གནས་པ་དེར་རྒྱལ་པོ་ཆེན་པོ་བཞི་འཁོར་དང་བཅས་པ་དང་ལྷ་བྱེ་བ་ཁྲག་ཁྲིག་བརྒྱ་སྟོང་གཞན་ཡང་མཆིས་པར་འགྱུར། མདོ་སྡེ་འཛིན་པ་དེ་དག་དུས་མ་ལགས་པར་འཆི་བར་མི་འགྱུར། སུས་ཀྱང་མདངས་འཕྲོག་པར་མི་ནུས་ཏེ་ཕྲོགས་ན་ཡང་སླར་འཕྲོག་པར་འགྱུར་རོ་ཞེས་བགྱི་བ་ལ་སོགས་པ་གསུངས་ཤིང་འཕགས་པའི་བཀའ་ཡང་དག་པ་ཚད་མར་གྱུར་པས་ཞལ་གྱིས་བཞེས་པ་བཞིན་དུ་དེང་འདིར་ཡང་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་བཞུགས་ཏེ། མཆོད་པ་བཞེས་ཤིང་དེ་བཞིན་གཤེགས་པ་གདན་འཛོམ་པ་ལ་ཐུགས་དམ་ལས་གླེངས་ཏེ་བསྐུལ་བ་དང་མདོ་སྡེའི་ཆོ་ག་རྫོགས་པར་བསྐང་བའི་ཕྲིན་ལས་མཛད་དེ། མདོ་སྡེའི་ཕན་ཡོན་ཇི་བཀའ་སྩལ་པ་ཐམས་ཅད་བདག་ཅག་ལ་སོག་པ་སེམས་ཅན་ཐམས་ཅད་ཀྱིས་འཕྲལ་དུ་ཐོབ་པར་བྱིན་གྱིས་བརླབ་ཅིང་སྩལ་བར་ཅི་གནང་། འཇམ་དཔལ་གང་གི་ཟབ་རྒྱས་མདོ་སྡེ་འདི། །ནན་གྱིས་ཞུ་བ་མཛད་པའི་ཕན་ཡོན་འབྲས། །མན་སྦྱོར། སྐྱབས་གྲོལ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྐྱབས་གྲོལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་གདུན་བཟླས། སྐབས་འདིར་མཆོད་པ་ཅི་འབྱོར་པ་དབུལ། བཅོམ་ལྡན་འདས་ཕགས་པ་སྐྱབས་གྲོལ་དུས་ངན་པའི་སེམས་ཅན་ཕོངས་ཤིང་སྡུག་བསྔལ་བ་རྣམས་ལ་ཐུགས་བརྩེ་བར་དགོངས་ཏེ། སྟོན་པ་བཅོམ་ལྡན་འདས་གདན་འཛོམ་པའི་སྤྱན་སྔར་འདི་སྐད་དུ། བཙུན་པ་བཅོམ་ལྡན་འདས་སླད་མའི་ཚེ་སླད་མའི་དུས་ན་སེམས་ཅན་བྲོ་ནད་སྣ་ཚོགས་ཀྱི་ལུས་ཡོངས་སུ་གཟིར་ཏེ་ཡུན་རིང་པོར་བྲོ་ནད་ཀྱིས་ལུས་ཀྱི་ཤ་སྲབ་ཅིང་བཀྲེས་པ་དང་སྐོམ་པས་གྲེ་བ་དང་མཆུ་ནི་བསྐམས། འགུམ་པ་ལ་ནི་མངོན་དུ་ཕྱོགས། མཛའ་བཤེས་དང་ཉེ་དུ་དང་སྣག་གི་གཉེན་མཚམས་ངུ་བ་རྣམས་ཀྱིས་ནི་བསྐོར། ཕྱོགས་རྣམས་ནི་མུན་པར་མཐོང་། གཤིན་རྗེའི་མི་རྣམས་ཀྱི་ནི་དྲངས་ཏེ། དེའི་ལུས་འདི་ན་ཉལ་ཡང་རྣམ་པར་ཤེས་པ་ཆོས་ཀྱི་རྒྱལ་པོ་གཤིན་རྗེའི་མདུན་དུ་ཁྲིད་ཅིང་མི་དེ་དང་ལྷན་ཅིག་སྐྱེས་པའི་ལྷ་སླད་བཞིན་འབྲང་བ་གང་ལགས་པ་དེས་དགེ་བའམ་མི་དགེ་བ་བགྱིས་པ་དེ་དག་ཐམས་ཅད་ལེགས་པར་ཡི་གེར་བྲིས་ནས་ཆོས་ཀྱི་རྒྱལ་པོ་གཤིན་རྗེ་ལ་ཕུལ་བ་དང་ཆོས་ཀྱི་རྒྱལ་པོ་གཤིན་རྗེས་དེ་ལ་དྲིས་ཤིང་བརྟགས་ནས་དགེ་བའམ་མི་དགེ་བ་ཇི་ལྟར་བགྱིས་པ་དེ་བཞིན་དུ་བསྒོ་བ་ལ། གང་དག་ནད་པ་དེའི་དོན་དུ་བཅོམ་ལྡན་འདས་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེ་ལ་སྐྱབས་སུ་མཆི་ཞིང་འདི་འདྲ་བའི་སྦྱོར་བས་མཆོད་པར་བགྱིད་ན། དེའི་རྣམ་པར་ཤེས་པ་སླར་ལྡོག་ཅིང་རྨི་ལམ་རྨིས་པ་བཞིན་དུ་བདག་ཉིད་ཀྱི་འཚལ་བའི་གནས་དེར་མཆིས་ཏེ་ཡང་ན་ནི་གདུགས་བདུན། ཡང་ན་ནི་གདུགས་ཉི་ཤུ་རྩ་གཅིག །ཡང་ན་ནི་གདུགས་སུམ་ཅུ་རྩ་ལྔ། ཡང་ན་ནི་གདུགས་བཞི་བཅུ་རྩ་དགུ་ལ་དེའི་རྣམ་པར་ཤེས་པ་སླར་ལྡོག་ཅིང་དྲན་པ་རྙེད་ལ་དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་བདག་ཉིད་ཀྱི་མངོན་སུམ་དུ་གྱུར་ཏེ་སྲོག་གི་སླད་དུ་ཡང་སྡིག་པའི་ལས་མི་བགྱིད་དོ། །མཆོད་པའི་སྦྱོར་བ་ནི་བཙུན་པ་ཀུན་དགའ་བོ་གང་དག་ནད་ཆེན་པོ་ལས་ཡོངས་སུ་ཐར་བར་འདོད་པ་དེ་དག་གིས་ནད་པ་དེའི་དོན་དུ་ཉིན་བདུན་མཚན་བདུན་དུ་ཡན་ལག་བརྒྱད་དང་ལྡན་པའི་གསོ་སྦྱོང་གི་སྡོམ་པ་བླང་བར་བྱ། དགེ་སློང་གི་དགེ་འདུན་ལ་ཟས་དང་སྐོམ་རྣམས་དང་ཡོ་བྱད་ཐམས་ཅད་ཀྱིས་ཅི་ནུས་སུ་མཆོད་པ་དང་རིམ་གྲོར་བྱ། ཉིན་ལན་གསུམ་མཚན་ལན་གསུམ་དུ་བཅོམ་ལྡན་འདས་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེའི་མཚན་ཡིད་ལ་བྱ། མདོ་སྡེ་འདི་ཡང་ལན་བཞི་བཅུ་རྩ་དགུར་གདོན་པར་བྱའོ། །ཞག་བཞི་བཅུ་རྩ་དགུར་མར་མེ་བུད་པར་བྱའོ། །སྐུ་གཟུགས་བདུན་བྱའོ། །སྐུ་གཟུགས་རེ་རེའི་སྤྱན་སྔར་མར་མེ་བདུན་བདུན་བཞག་མར་མེ་རེ་རེའི་ཚད་ཀྱང་ཤིང་རྟའི་འཕང་ལོ་ཙམ་དུ་བྱས་ཏེ་ཅི་ནས་ཀྱང་ཞག་བཞི་བཅུ་རྩ་དགུར་མར་མེ་མི་ཟད་པར་བྱའོ། །ཚོན་སྣ་ལྔ་པའི་བ་དན་བཞི་བཅུ་རྩ་དགུ་ལས་ལྷག་པར་བྱའོ། །བཙུན་པ་ཀུན་དགའ་བོ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ལ་ནད་ཀྱི་གནོད་པ་དང་རང་ངམ་ཕ་རོལ་གྱི་དམག་ཚོགས་ཀྱི་གནོད་པའམ་རྒྱུ་སྐར་རམ་གཟའ་ཟླ་བའམ་གཟའ་ཉི་མའི་གནོད་པའམ་དུས་མ་ཡིན་པའི་རླུང་ངམ་ཆར་རམ་ཐན་པའི་གནོད་པ་ཡང་རུང་གནོད་པ་དང་ནད་འགོ་བའམ་འཁྲུག་པ་ཞིག་ཉེ་བར་གནས་པར་གྱུར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེས་སེམས་ཅན་ཐམས་ཅད་ལ་བྱམས་པའི་སེམས་སུ་བྱ། བཙོན་དུ་བཟུང་བ་རྣམས་གཏང་བར་བྱ་ཞིང་གོང་དུ་སྨོས་པ་བཞིན་དུ་བཅོམ་ལྡན་འདས་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེ་ལ་དེ་ལྟ་བུའི་མཆོད་པ་བྱས་ན། རྒྱལ་པོ་དེའི་དགེ་བའི་རྩ་བ་དང་བཅོམ་ལྡན་འདས་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེའི་སྔོན་གྱི་སྨོན་ལམ་གྱི་ཁྱད་པར་གྱིས་ཡུལ་བདེ་བ་དང་ལོ་ལེགས་པ་དང་ཆར་དང་རླུང་དུས་སུ་ལྡང་ཞིང་ལོ་ཏོག་འགྲུབ་པར་འགྱུར། ཡུལ་དེ་ན་གནས་པའི་སེམས་ཅན་ཐམས་ཅད་ཀྱང་ནད་མེད་པ་དང་བདེ་བ་དང་མཆོག་ཏུ་དགའ་བ་མེད་པར་འགྱུར། ཡུལ་དེར་གནོད་སྦྱིན་དང་སྲིན་པོ་དང་འབྱུང་པོ་དང་ཤ་ཟ་མ་རུངས་པས་སེམས་ཅན་རྣམས་ལ་འཚེ་བར་མི་འགྱུར། ལྟས་ངན་པ་ཐམས་ཅད་མཐོང་བར་མི་འགྱུར། རྒྱལ་པོ་དེའི་ཚེ་དང་མདོག་དང་སྟོབས་དང་ནད་མེད་པ་དང་དབང་ཕྱུག་རྣམས་མངོན་པར་འཕེལ་བར་འགྱུར་རོ། །ཞེས་བགྱི་བ་ལ་སོགས་པ་བཀའ་སྩལ་པ་གསུངས་ཤིང་འཕགས་པའི་བཀའ་ཡང་དག་པ་ཚད་མར་གྱུར་པས་ཞལ་གྱིས་བཞེས་པ་བཞིན་དུ་དེང་འདིར་ཡང་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་བཞུགས་ཏེ་མཆོད་པ་བཞེས་ཤིང་དེ་བཞིན་གཤེགས་པ་གདན་འཛོམ་པའི་ཐུགས་དམ་ལས་གླེངས་ཏེ་བསྐུལ་བ་དང་མདོ་སྡེའི་ཆོ་ག་རྫོགས་པར་བསྐང་བའི་ཕྲིན་ལས་མཛད་དེ། མདོ་སྡེ་འདི་ལས་ཕན་ཡོན་ཇི་སྐད་བཀའ་སྩལ་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་ཐོབ་པར་བྱིན་གྱིས་བརླབ་ཅིང་སྩལ་བར་ཅི་གནང་། སྐྱབས་གྲོལ་མཛད་པས་ནད་འཆི་སྲིད་ཉམས་སོགས། །ཉེས་ཞི་བདེ་སྐྱིད་དར་བའི་སྨོན་ལམ་འབྲས། །མན་སྦྱོར། ཕྱག་ན་རྡོ་རྗེ་སོགས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཚོགས་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་བདུན་བཟླས། ཚངས་པ་དང་ལྷའི་དབང་པོ་བརྒྱ་བྱིན་དང་རྒྱལ་པོ་ཆེན་པོ་ཡུལ་འཁོར་སྲུང་དང་འཕགས་སྐྱེས་པོ་དང་མིག་མི་བཟང་དང་ཀུ་བཻ་ར་ལ་སོགས་པ་དམ་པའི་ཆོས་སྐྱོང་བའི་ལྷའི་དགེ་བསྙེན་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ལན་གསུམ་བཟླས། སྐབས་འདིར་མཆོད་པ་ཅི་འབྱོར་པ་དབུལ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཕྱོགས་སྐྱོང་བ་བཅུ་རྒྱལ་ཆེན་བཞི་འཁོར་དང་བཅས་པ་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་དར་བ་དང་སེམས་ཅན་ལ་བདེ་སྐྱིད་འབྱུང་བའི་ཕྲིན་ལས་མཛོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་སོགས་དང་། ཚངས་པ་དང་ལྷའི་དབང་པོ་བརྒྱ་བྱིན་དང་། རྒྱལ་པོ་ཆེན་པོ་ཡུལ་འཁོར་སྲུང་དང་འཕགས་སྐྱེས་པོ་དང་མིག་མི་བཟང་དང་ཀུ་བཻ་ར་ལ་སོགས་པ་དམ་པའི་ཆོས་སྐྱོང་བའི་ལྷའི་དགེ་བསྙེན་ཆེན་པོ་རྣམས་ཀྱིས་ཇི་ལྟར་སྔོན་གདན་འཛོམ་པ་ཆེན་པོའི་སྤྱན་སྔར་ལྷའི་ཚིག་བདེན་པར་མདོང་གསོལ་དུ་གསུང་གཅིག་ཁོ་ནར་འདི་སྐད་ཅེས། བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པ་ཡང་ཐོས། དེ་བཞིན་གཤེགས་པ་རྣམས་ཀྱང་མངོན་དུ་མཐོང་སྟེ་མཆོད་པ་ཡང་བགྱིས་སོ། །ཡང་བཅོམ་ལྡན་འདས་ས་ཕྱོགས་གང་ན་དེ་བཞིན་གཤེགས་པ་རྣམས་ཀྱི་མཚན་དང་གཟུངས་ཀྱི་ཚིག་འདི་དག་སྤྱོད་པ་དེར་བདག་ཅག་གཡོག་དང་བཅས་ཏེ་མཆིས་པར་བགྱིའོ། །རིགས་ཀྱི་བུའམ་རིགས་ཀྱི་བུ་མོ་གང་ཞིག་འཆང་བ་དང་ཀློག་པ་དང་མཆོད་པར་བགྱིད་པ་དང་ཡི་གེར་འདྲིར་སྩོལ་བ་དེར་བདག་ཅག་མཐུན་པར་ལྷན་ཅིག་ཏུ་མཆིས་ཏེ། རིགས་ཀྱི་བུའམ་རིགས་ཀྱི་བུ་མོའམ་རྒྱལ་པོའམ་རྒྱལ་པོའི་བློན་པོ་མདོ་སྡེའི་དབང་པོ་འཛིན་པ་དང་འདྲི་བ་དེ་ལ་དེ་བཞིན་གཤེགས་པའི་བྱིན་གྱིས་བརླབས་ཀྱིས་བསྲུང་བར་བགྱིའོ། །གྲོང་དང་གྲོང་ཁྱེར་དང་ཕྱོགས་ཀྱང་ཡོངས་སུ་བསྐྱང་བར་བགྱིའོ། །འཆི་བ་དང་དགྲ་དང་དགོན་པའི་གནོད་པ་དང་ནད་ཐམས་ཅད་རབ་ཏུ་ཞི་བར་བགྱིའོ། །བདག་ཅག་ནི་དེ་བཞིན་གཤེགས་པ་དང་སེམས་ཅན་ཐམས་ཅད་ལ་བྱམས་པ། བྱས་པ་གཟོ་བ་ལགས་ཏེ་དུས་མ་ལགས་པར་འགུམ་པ་ཐམས་ཅད་བཟློག་པར་བགྱིའོ། །འཐབ་པ་དང་འཐབ་མོ་དང་རྩོད་པ་དང་འགྱེད་པ་ཐམས་ཅད་རབ་ཏུ་ཞི་བར་བགྱིའོ། །ཇི་ལྟར་བསམ་པ་ཡིད་བཞིན་དུ་འགྲུབ་པ་དང་སེམས་དང་ལུས་བདེ་ཞིང་ལོངས་སྤྱོད་དང་དབང་ཕྱུག་དང་ནོར་དང་འབྲུ་རྣམས་འཕེལ་བར་བགྱིའོ། །ཐམས་ཅད་དུ་བསྲུང་བར་བགྱིའོ། །བཅོམ་ལྡན་འདས་བདག་ཅག་རང་གིས་བྲོ་བོར་བ་དང་དམ་བཅས་པ་འདི་དག་རིགས་ཀྱི་བུའམ་རིགས་ཀྱི་བུ་མོ་དེས་རྗེས་སུ་དྲན་པར་བགྱིའོ། །ཏདྱ་ཐཱ། ཨ་གྷུ། མ་གྷུ། ཏ་ར་གྷུ། མ་མ་གྷུ། གྷུ་རེ། ཧཱ་ཧཱུ་ཧེ། མྲ་མྲ་མྲ་མྲ། ཛུ་ཛུ་རི་ཛུ་རེ་སྭཱ་ཧཱ། གང་ལ་ལ་ཞིག་དེ་བཞིན་གཤེགས་པའི་མཚན་རྣམས་དང་གཟུངས་ཀྱི་ཚིག་འདི་དག་འཆང་བ་དང་ཀློག་པ་དང་ཡི་གེར་འབྲི་བ་དང་ཡི་གེར་འབྲིར་སྩལ་བ་དང་རབ་ཏུ་གུས་པས་མཆོད་པར་བགྱིད་པ་དེ་དག་ངན་སོང་གསུམ་དུ་མི་འཆི་བར་རིག་པར་བགྱིས་ཏེ། དེ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་ལས་སླར་མི་ལྡོག་པར་འགྱུར། ཇི་ལྟར་འཚལ་བའི་སངས་རྒྱས་ཀྱི་ཞིང་དེ་དག་ཏུ་སྐྱེ་བར་འགྱུར། དེ་བཞིན་གཤེགས་པ་མཐོང་བར་འགྱུར། ཚེ་རབས་དྲན་པར་འགྱུར། ཏིང་ངེ་འཛིན་དང་གཟུངས་ཀྱང་ཐོབ་པར་འགྱུར་ཞེས་གསུངས་ཤིང་ཞལ་གྱིས་བཞེས་པ་དང་། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་དེ་བཞིན་གཤེགས་པ་དེ་དག་ལ་འདི་སྐད་ཅེས་གང་མདོ་སྡེའི་དབང་པོ་འཛིན་པ་དེ་དག་གི་དོན་བདག་གིས་གཟུངས་ཀྱི་གསང་སྔགས་ཀྱི་གཞི་རྣམས་སྩལ་བར་བགྱི་ཡི་སངས་རྒྱས་བཅོམ་ལྡན་འདས་རྣམས་བདག་ལ་དགོངས་སུ་གསོལ། ཡང་དག་པར་རྫོགས་པའི་སངས་རྒྱས་བདུན་པོ་དག་ལ་ཕྱག་འཚལ་ལོ། །རྡོ་རྗེ་འཛིན་པ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། བཛྲེ་པ་ཤ་དྷཱ་ར་ཎཱི། ས་མ་ས་མ། ས་མ་ནྟ། ཨ་པྲ་ཏི་ཧ་ཏ་བཛྲེ། ཤ་མ་ཤ་མ། པྲ་ཤ་མ་ནྟུ། སརྦ་བྱཱ་ངྷ་ཡ། ཀུ་རུ་ཀུ་རུ་སརྦ་ཀརྨ་ཎ། ས་མ་ཡ་མ་ནུ་སྨ་ར་བྷ་ག་བཱན། བཛྲ་པ་ཎི། སརྦ་ཨ་ཤ་མ་མེ་པཱ་རི་པཱུ་ར་ཡ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་དེ་བཞིན་གཤེགས་པ་འདི་དག་གི་མཚན་དང་སྔོན་གྱི་སྨོན་ལམ་གྱི་ཁྱད་པར་རྒྱས་པ་དང་ཆོས་ཀྱི་རྣམ་གྲངས་འདི་འཆང་བ་དང་ཀློག་པ་དེའི་རེ་བ་ཐམས་ཅད་བདག་གིས་ཡོངས་སུ་བསྐང་བར་བགྱིའོ། །དོན་ཐམས་ཅད་ཡོངས་སུ་བསྒྲུབ་པར་བགྱིའོ། །གལ་ཏེ་དེས་བདག་མཐོང་བར་འཚལ་ན་ཆོས་ཀྱི་རྣམ་གྲངས་འདི་ཡི་གེར་འབྲིར་སྩལ་བར་བགྱི། དེ་བཞིན་གཤེགས་པ་འདི་དག་གི་སྐུ་གཟུགས་བདུན་ཡང་བགྱི། རྡོ་རྗེ་འཛིན་ཡང་སྐུ་གདུང་དང་བཅས་པར་བགྱི། དེ་བཞིན་གཤེགས་པ་དེ་དག་ལ་ཡང་ཇི་སྐད་གོང་དུ་སྨོས་པ་བཞིན་དུ། སྤོས་དང་བདུག་པ་དང་མར་མེ་དང་འཕྲེང་བ་དང་རྒྱན་དང་རོལ་མོའི་སྒྲ་དང་སིལ་སྙན་དང་ཕེག་རྡོབ་པ་རྣམས་ཀྱིས་མཆོད་དེ་བསྐོར་བར་བགྱི། གཟུངས་ཀྱི་གསང་སྔགས་ཀྱི་གཞི་འདི་དག་ཀྱང་གདོན་པར་བགྱི། སེམས་ཅན་ཐམས་ཅད་ལ་ཡང་ཕན་པའི་སེམས་དང་བྱམས་པའི་སེམས་སུ་བགྱི། འཕགས་པའི་ལམ་ཡན་ལག་བརྒྱད་པའི་བསྙེན་གནས་ལ་གནས་ཏེ་ལན་གསུམ་ཁྲུས་བགྱི་ཞིང་གོས་ལན་གསུམ་བརྗེ་བར་བགྱི། ཚེས་བརྒྱད་ནས་བརྩམས་ཏེ་ཟླ་བ་ཕྱི་མ་བཅོ་ལྔ་ཉའི་བར་དུ་ཉིན་གཅིག་བཞིན་རིག་སྔགས་ལན་བརྒྱ་རྩ་བརྒྱད་བཟླས་ན་དེ་ལ་བདག་གིས་རྨི་ལམ་དུ་མཐོང་བ་སྩལ་བར་བགྱི། འབེལ་བའི་བཀའ་མཆིད་ཀྱང་བགྱི། རེ་བ་ཐམས་ཅད་ཀྱང་ཡོངས་སུ་བསྐང་བར་བགྱིའོ་ཞེས་བྱ་བ་ལ་སོགས་པ་འཕགས་པའི་བཀའ་མི་འགྱུར་བར་ཚད་མར་གྱུར་པ་ཞལ་གྱི་བཞེས་པ་བཞིན་དུ། དེང་འདིར་ཡང་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་བཞུགས་ཏེ་མཆོད་པ་བཞེས་ཤིང་གདན་འཛོམ་པས་མདོ་སྡེའི་ཆོ་ག་ཡོངས་སུ་རྫོགས་པར་བསྐང་བའི་ཕྲིན་ལས་མཛད་དེ་ཕན་ཡོན་ཇི་སྐད་བཀའ་སྩལ་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་ཐོབ་པར་བྱིན་གྱིས་བརླབ་པར་ཅི་གནང་། ལྷག་པར་ཡང་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལ་སོགས་པ་གསུང་རབ་དམ་པའི་ཆོས་ཡུན་རིང་དུ་རྒྱས་པར་བགྱི་བ་དང་། སྒོ་ཐམས་ཅད་ནས་ཆོས་སྤྱོད་པ་རྣམས་ལ་བར་ཆད་དང་བགེགས་སུ་གྱུར་པ་དང་བདུད་ཀྱི་ཕྱོགས་སུ་གྱུར་པ་ཐམས་ཅད་དང་ཡུལ་ཕྱོགས་སུ་མི་ནད་དང་ཕྱུགས་ནད་གཏོང་བ་དང་ཐན་པ་དང་སད་དང་སེར་བ་ལ་སོགས་པས་ལོ་ཏོག་མ་རུངས་པར་བགྱིད་པ་དང་གནོད་པ་དང་མཚན་མ་ངན་པ་དང་བཀྲ་མི་ཤིས་པ་མང་པོ་སྟོན་ཅིང་སེམས་ཅན་ལ་སྡང་བར་སེམས་པའི་གདོན་བགེགས་རིགས་ཐ་དད་པ་མང་པོ་ཡུལ་ཕྱོགས་འདི་ན་རྒྱུ་ཞིང་གནས་པ་ཅི་མཆིས་པ་ཐམས་ཅད་དང་། མིང་གང་རུང་ངམ། བདག་ཅག་ལ་སོགས་པ་ལ་སྔོན་གྱི་ལས་ཀྱི་བདས་པའམ་འཕྲལ་གྱི་རྐྱེན་ལས་བྱུང་བའམ་ཡུལ་ཕྱོགས་དང་ཕ་ཚན་དང་རིགས་བརྒྱུད་ཀྱི་སྲི་ཅན་དུ་གྱུར་པ་ཡང་རུང་སྟེ། མིང་ངམ། བདག་ཅག་ལ་སོགས་པ་རྣམས་ཀྱི་ལུས་དང་སྲོག་དང་ཆབ་སྲིད་དང་དབང་ཕྱུག་དང་འཁོར་དང་ཡོ་བྱད་ལ་སོགས་པ་གང་ཡང་རུང་བ་ལ་ཅི་ཡང་རུང་བའི་སྒོ་ནས་གནོད་པ་བགྱིད་པའི་གདོན་བགེགས་ཅི་མཆིས་པ་ཐམས་ཅད་གང་ལ་འཚམས་པའི་ཐབས་ཀྱིས་འདུལ་ཞིང་། འཁོན་དང་གནོད་པའི་བསམ་པ་འདོར་དུ་སྩལ་ཏེ་ཞི་བ་དང་དགེ་བ་དང་བྱམས་པ འི་བསམ་པ་ཅན་དུ་འགྱུར་ཞིང་སྔོན་ཆད་བཀྲ་མི་ཤིས་པ་དང་གནོད་པའི་སྦྱོར་བ་ངན་པ་བགྱིས་པ་རྣམས་ཀྱང་འཇིག་ཅིང་འདོར་དུ་སྩལ། སླན་ཆད་ཀྱང་གནོད་པའི་བག་ཅི་ཡང་མི་བགྱིད་པར་སོ་སོའི་རིགས་ཀྱི་བྲོ་དམ་པོས་བསྒག་ཅིང་གདན་འཛོམ་པའི་སྤྱན་སྔར་དམ་ཚིག་ཆེན་པོ་སྩལ་བའི་འཕྲིན་ལས་མཛད་པར་ཅི་གནང་། གསང་བདག་ལ་སོགས་རྣམས་ཀྱིས་དམ་བཅས་ཤིང་། །གཟུངས་སྩལ་ཕྱག་རྡོར་སྒྲུབ་ཐབས་བསྟན་པའི་འབྲས། །དཔག་མེད་མཁྱེན་བརྩེ་ནུས་མཐུའི་བྱིན་རླབས་ཀྱིས། །དེང་འདིར་བདག་སོགས་འགྲོ་བས་ལོངས་སྤྱོད་ཤོག །ཐུབ་པའི་བསྟན་དར་སྐྱེ་རྒུ་བདེ་ཞིང་སྐྱིད། །ཁྱད་པར་སྦྱིན་པའི་བདག་པོས་གཙོ་བྱས་པའི། །འགྲོ་བ་རྣམས་ཀྱི་སྒྲིབ་བྱང་ཚོགས་རྫོགས་ཤིང་། །བགེགས་རིགས་བཟློག་ཅིང་མཐུན་རྐྱེན་ཚང་བ་མཛོད། །གནོད་སྦྱིན་གྱི་སྡེ་དཔོན་བཅུ་གཉིས་ནི། མཐུ་དཔལ་དང་ལྡན་པའི་དགེ་བསྙེན་བཅུ་གཉིས་ལ། གནོད་སྦྱིན་གྱི་སྡེ་དཔོན་ཆེན་པོ་ཇི་འཇིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །གནོད་སྦྱིན་གྱི་སྡེ་དཔོན་ཆེན་པོ་རྡོ་རྗེ་ལ་ཕྱག་འཚལ་ལོ། །མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་རྒྱན་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་གཟའ་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་རླུང་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་གནས་བཅས་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་དབང་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་གཏུང་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་སྨྲ་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་བསམ་འཛིན་ལ༴ མཆོད་དོ། །གནོད་སྦྱིན་གྱི་སྡེ་དཔོན་ཆེན་པོ་གཡོ་བ་འཛིན་ལ༴ མཆོད་དོ༴ གནོད་སྦྱིན་གྱི་སྡེ་དཔོན་ཆེན་པོ་རྫོགས་བྱེད་ལ༴ མཆོད་དོ༴ ལན་གསུམ་བཟླས། སྐབས་འདིར་མཆོད་པ་དབུལ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་གནོད་སྦྱིན་གྱི་སྡེ་དཔོན་ཆེན་པོ་འཁོར་དང་བཅས་པ་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་དར་བ་དང་སྦྱིན་བདག་གི་བར་ཆད་ཞི་བའི་ཕྲིན་ལས་མཛོད་ཅིག་མཐུ་དཔལ་དང་ལྡན་པའི་དགེ་བསྙེན་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་པོ་རེ་རེ་ལ་གཡོག་འཁོར་གནོད་སྦྱིན་བདུན་འབུམ་བདུན་འབུམ་དང་བཅས་པ་རྣམས་དགོངས་སུ་གསོལ། ཇི་ལྟར་སྔོན་གདན་འཛོམ་པའི་སྤྱན་སྔར་ལྷའི་ངག་བདེན་པས་གསུང་གཅིག་ཏུ་འདི་སྐད་དུ། སངས་རྒྱས་ཀྱི་མཐུས་བདག་ཅག་གི་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོའི་མཚན་ཐོས་ཏེ་བདག་ཅག་ལ་ཡང་ངན་འགྲོར་འགྲོ་བའི་འཇིགས་པ་འབྱུང་བར་མི་འགྱུར་རོ། །དེས་ན་བདག་ཅག་ལྷན་ཅིག་ཏུ་མཐུན་པར་ཇི་སྲིད་འཚོའི་བར་དུ་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དོན་དང་སྨན་པ་དང་བདེ་བའི་སླད་དུ་སྤྲོ་བར་བགྱིའོ། །བྱེ་བྲག་ཏུ་གྲོང་ངམ་གྲོང་ཁྱེར་རམ་གྲོང་བརྡལ་ལམ་དགོན་པའི་གནས་གང་ན་མདོ་སྡེ་འདི་སྤྱོད་པ་དང་གང་ན་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེའི་མཚན་ཡིད་ལ་འཆང་བ་དང་མཆོད་པ་དང་རིམ་གྲོ་བྱེད་པའི་སེམས་ཅན་དེ་དག་ལ་བདག་ཅག་གི་བསྲུང་བར་བགྱི། ཡོངས་སུ་བསྐྱང་བར་བགྱི། གནོད་པ་ཐམས་ཅད་ལས་ཡོངས་སུ་ཐར་བར་བགྱི། བསམ་པ་ཐམས་ཅད་ཡོངས་སུ་རྫོགས་པར་བགྱིའོ་ཞེས་ཞལ་གྱིས་བཞེས་ཏེ་ཐུགས་དམ་དུ་བཞེས་ཤིང་བཅོམ་ལྡན་འདས་ཀྱིས་ཀྱང་། གང་གི་ཕྱིར་ཁྱེད་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་ཀྱི་རྒྱལ་པོ་དེ་ལ་བྱས་པ་གཟོ་ཞིང་རྗེས་སུ་དྲན་ལ་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ལེགས་སོ་ལེགས་སོ། །ཞེས་རྗེས་སུ་གནང་བ་སྟོན་པ་དེ་བཞིན་དུ་དེང་འདིར་ཡང་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་དུལ་ཞིང་ཞི་བའི་འཁོར་དང་ལྡན་པར་བྱམས་པ་དང་ཐུགས་བརྩེ་བས་མཆོད་པ་བཞེས་ཤིང་མདོ་སྡེའི་ཆོ་ག་ཡོངས་སུ་རྫོགས་པར་བསྐང་བའི་ཕྲིན་ལས་མཛད་དེ་ཕན་ཡོན་ཇི་སྐད་བཀའ་སྩལ་པ་ཐམས་ཅད་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་ཐོབ་པར་བྱིན་གྱིས་བརླབ་པར་ཅི་གནང་། ལྷག་པར་ཡང་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལ་སོགས་པ་གསུང་རབ་དམ་པའི་ཆ ོས་ཡུན་རིང་དུ་རྒྱས་པར་བགྱི་བ་དང་། སྒོ་ཐམས་ཅད་ནས་ཆོས་སྤྱོད་པ་རྣམས་ལ་བར་ཆད་དང་བགེགས་སུ་གྱུར་བ་དང་བདུད་ཀྱི་ཕྱོགས་སུ་གྱུར་པ་ཐམས་ཅད་དང་ཡུལ་ཕྱོགས་སུ་མི་ནད་དང་ཕྱུགས་ནད་གཏོང་བ་དང་། ཐན་པ་དང་སད་དང་སེར་བ་ལ་སོགས་པས་ལོ་ཏོག་མ་རུངས་པར་བགྱིད་པ་དང་། གནོད་པ་དང་མཚན་མ་ངན་པ་དང་། བཀྲ་མི་ཤིས་པ་མང་པོ་སྟོན་ཞིང་སེམས་ཅན་ལ་སྡང་བར་སེམས་པའི་གདོན་བགེགས་ཀྱི་རིགས་ཐ་དད་པ་མང་པོ་ཡུལ་ཁམས་དང་། ཡུལ་ཕྱོགས་འདིར་རྒྱུ་བ་མཆིས་སོ་འཚལ་དང་། མིང་ངམ། བདགཅག་ལ་སོགས་པ་ལ་སྔོན་གྱི་ལས་ཀྱིས་བདས་པའམ་འཕྲལ་གྱི་རྐྱེན་ལས་གྱུར་པའམ་ཡུལ་ཕྱོགས་དང་ཕ་ཚན་དང་རིགས་བརྒྱུད་ཀྱི་སྲི་ཅན་དུ་གྱུར་པ་ཡང་རུང་སྟེ། མིང་ངམ། བདག་ཅག་ལ་སོགས་པ་སེམས་ཅན་རྣམས་ཀྱི་ལུས་དང་སྲོག་དང་ཆབ་སྲིད་དང་། དབང་ཕྱུག་དང་འཁོར་དང་ཡོ་བྱད་ལ་སོགས་པ་གང་ཡང་རུང་བ་ལ་ཅི་ཡང་རུང་བའི་སྒོ་ནས་གནོད་པ་བགྱིད་པའི་གདོན་བགེགས་ཅི་མཆིས་པ་ཐམས་ཅད་གང་ལ་གང་འདུལ་བའི་ཐབས་ཀྱིས་གདུལ་ཞིང་འཁོན་དང་གནོད་པའི་བསམ་པ་འདོར་དུ་སྩལ་ཏེ་ཞི་བ་དང་དགེ་བ་དང་བྱམས་པའི་བསམ་པ་ཅན་དུ་བགྱི་ཞིང་སྔོན་ཆད་བཀྲ་མི་ཤིས་པ་དང་གནོད་པའི་སྦྱོར་བ་ངན་པ་བགྱིས་པ་རྣམས་ཀྱང་འཇིག་ཅིང་འདོར་དུ་སྩལ། སླན་ཆ ད་ཀྱང་གནོད་པའི་བག་ཅི་ཡང་མི་བགྱིད་པར་སོ་སོའི་རིགས་ཀྱི་བྲོ་དམ་པོས་བསྒྲག་ཅིང་གདན་འཛོམ་པའི་སྤྱན་སྔར་དམ་ཚིག་ཆེན་པོ་སྩལ་བའི་ཕྲིན་ལས་མཛད་པར་ཅི་གནང་། གནོད་སྦྱིན་རྣམས་ཀྱིས་བདེན་མཐོང་མདོ་འདི་ཉིད། །བསྲུང་བར་དམ་བཅའ་མཛད་པ་ཇི་བཞིན་འབྲས། །སོགས་ཕྱག་རྡོར་ལྟར་སྦྱོར། གཞི་བདག་ལ་གཏོར་མ་བསྔོ་བ་ནི། མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་ཉིད་སའི་ལྷ་མོ་བརྟན་མས་གཙོ་བྱས་བོད་ཁ་བ་ཅན་པའི་རྒྱལ་ཁམས་བསྲུང་ཞིང་སྐྱོབ་པའི་སྲུང་མ་སྤྱི་དང་བྱེ་བྲག་ཡུལ་ཕྱོགས་འདི་དག་གི་དགོན་གྲོང་གནས་མལ་བསྲུང་བའི་ལྷ་ཀླུ་བརྟན་མ་བཅུ་གཉིས་སོགས་མི་མ་ཡིན་མཐུ་པོ་ཆེ་རྣམས་ལ་འབུལ་ལོ། །མཆོད་སྦྱིན་གྱི་གཏོར་མ་འདི་བཞེས་ལ་བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་ཆོས་བསྒྲུབ་པའི་འགལ་རྐྱེན་ཞི་ཞིང་མཐུན་རྐྱེན་ཡིན་བཞིན་དུ་སྒྲུབ་པར་མཛད་དུ་གསོལ། རེ་རེ་ནས་མཆོད་པ་དབུལ་ཞིང་སྨོན་ལམ་རྫོགས་པའི་སྐབས་འདིར་གཟུངས་སྔགས་བཟླས་ལ་ཁྲུས་བྱ། ཞེས་བྱུང་བ་ལྟར། བཞི་པ་ཞར་བྱུང་གཟུངས་སྒྲུབ་ནི། གཟུངས་ཀྱི་བུམ་པ་ལ་དམིགས་ཏེ་སྐབས་འདིར་བྱ། ཞེས་གསུངས་པས། ཏདྱ་ཐཱ། གྷུ་མེ་སོགས། ཏདྱ་ཐཱ། ༀ་བྷཻ་ཥ་ཛྱེ་བྷཻ་ཥ་ཛྱེ་མ་ཧཱ་བྷཻ་ཥ་ཛྱེ་བྷཻ་ཥ་ཛྱེ། རཱ་ཛ་ས་མུདྒ་ཏེ་སྭཱ་ཧཱ། ཞེས་མང་དུ་བཟླ། སྔགས་བཟླས་པའི་རྐྱེན་གྱིས་བདེ་བར་གཤེགས་པ་བརྒྱད་འཁོར་དང་བཅས་པའི་ཐུགས་དམ་གྱི་རྒྱུད་བསྐུལ་ཏེ་སྐུའི་ཆ་ཐམས་ཅད་ནས་འོད་ཟེར་དཔག་ཏུ་མེད་པ་བྱུང་སྟེ་བུམ་པའི་ཆུ་ལ་ཐིམ་པས་བྱིན་གྱིས་བརླབ་པར་བསམ་པའི་ཆུས་ལྷ་ལའང་ཁྲུས་གསོལ་ཞིང་རང་གཞན་རྣམས་ལ་ཁྲུས་བྱ། གཤིན་པོའི་རུས་པ་སོགས་ལ་གཏོར་ན་ཕན་ཡོན་ཆེ་བ་ལས་མི་འགལ་བར་སེམས་སོ། །གསུམ་པ་མཇུག་ཆོག་གཏང་རག་གི་ཕྱག་འཚལ་ནི། ལྷར་བཅས་སྐྱེ་རྒུའི་འདྲེན་པ་ཟས་གཙང་སྲས། །ཞེས་པ་ནས། བརྒྱུད་པའི་བླ་མ་རྣམས་ལ་ཕྱག་འཚལ་ལོ། །ཞེས་པའི་བར་གོང་ལྟར་ལ། མཚན་གྱི་མེ་ཏོག་རྒྱས་ཤིང་དག་པ་ལ། །དཔེ་བྱད་བཟང་པོའི་འབྲུ་ཆགས་མཛེས་པའི་སྐུ། །གང་གི་མཐོང་ཐོས་དྲན་པའི་དཔལ་གྱུར་པའི། །སྟོན་པ་མཚན་ལེགས་དཔལ་ལ་ཕྱག་འཚལ་ལོ། །རིན་ཆེན་ཟླ་དང་པདྨས་རབ་བརྒྱན་ཅིང་། །ཤེས་བྱ་ཀུན་ལ་མཁས་ཤིང་མཁྱེན་པ་རྒྱས། །རྒྱ་མཚོ་ལྟ་བུར་ཟབ་པའི་གསུང་མངའ་བའི། །སྒྲ་དབྱངས་རྒྱལ་པོ་ཁྱེད་ལ༴ ཛམྦུ་ཆུ་བོའི་གསེར་ལྟར་ལྷང་ངེ་བ། །ཉི་མ་སྟོང་ལས་ལྷག་པའི་གཟི་བརྗིད་འབར། །དྲི་མེད་གསེར་གྱི་མཆོད་སྡོང་ལྟ་བུའི་སྐུ། །གསེར་བཟང་དྲི་མེད་སྣང་ལ་ཕྱག་འཚལ་ལོ། །མྱ་ངན་འདས་ཤིང་བདེ་བའི་མཆོག་བརྙེས་པ། །འགྲོ་བའི་སྡུག་བསྔལ་གདུང་བ་སེལ་མཛད་ཅིང་། །འགྲོ་དྲུག་མགོན་དང་དཔལ་དུ་གྱུར་པ་ཡི། །མྱ་ངན་མེད་མཆོག་དཔལ་ལ༴ ཆོས་སྒྲ་ཆེན་པོས་ཕ་རོལ་རྒོལ་བ་འཇོམས། །རྒྱ་མཚོ་ལྟ་བུར་ཟབ་པའི་གསུང་མངའ་ཞིང་། །འགྲོ་བའི་དུག་གསུམ་མ་ལུས་ཞི་མཛད་པའི། །ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །ཆོས་ཀྱི་བློ་གྲོས་གཏིང་དཔག་དཀའ་བའི་ཚུལ། །རྣམ་དག་ཆོས་ཀྱི་དབྱིངས་ལ་རོལ་མཛད་ཅིང་། །ཤེས་བྱ་མ་ལུས་མངོན་སུམ་གཟིགས་པ་པོ། །མངོན་མཁྱེན་རྒྱལ་པོ་ཁྱོད་ལ་ཕྱག་འཚལ་ལོ། །ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻ་ཌཱུརྻཡི་འོད་ལ་ཕྱག་འཚལ་ལོ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱོད་ལ་ཕྱག་འཚལ་ལོ། །ཞེས་དང་། རྒྱས་པར་སྤྲོ་འདོད་ན་སྟག་ཚང་ལོ་ཙཱ་བས་མཛད་པའི་བསྟོད་པ་འདི་ཉིད་ཚིག་སྦྱོར་ལེགས་པས་ཡང་བསྐྱར་གྱི་ཚུལ་དུ་བྱས་པ་མི་འགལ་ཞིང་མི་བྱེད་ནའང་ཆོས་དཀོན་ཅོག་མན་འདི་ནང་བཞིན་སྦྱོར། ཤར་ཕྱོགས་གདྒཱའི་ཀླུང་གི་བྱེ་སྙེད་ན། །གཞན་གྱི་མི་ཐུབ་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །མཚན་ལེགས་ཡོངས་བསྒྲགས་དཔལ་ལ་ཕྱག་འཚལ་ལོ། །ཤར་ཕྱོགས་གདྒཱའི་ཀླུང་བདུན་བྱེ་སྙེད་ན། །རིན་ཆེན་ལྡན་པ་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །རིན་ཆེན་ཟླ་བའི་ཞབས་ལ་ཕྱག་འཚལ་ལོ། །ཤར་ཕྱོགས་གངྒཱའི་ཀླུང་ལྔའི་བྱེ་སྙེད་ན། །སྤོས་ཀྱི་ཡོངས་གང་རྣམ་དག་ཞིང་གི་དཔལ། །བགྲངས་ཡས་སེམས་དཔས་བསྐོར་བའི་བཅོམ་ལྡན་འདས། །གསེར་བཟང་དྲི་མེད་སྣང་ལ་ཕྱག་འཚལ་ལོ། །ཤར་ཕྱོགས་གངྒཱའི་ཀླུ་བདུན་བྱེ་སྙེད་ན། །མྱ་ངན་བྲལ་བའི་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །མྱ་ངན་མེད་མཆོག་དཔལ་ལ༴ ཤར་ཕྱོགས་གངྒཱའི་ཀླུང་བརྒྱད་བྱེ་སྙེད་ན། །ཆོས་ཀྱི་རྒྱལ་མཚན་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །ཆོས་བསྒྲགས་རྒྱ་མཚོའི་དབྱངས་ལ༴ ཤར་ཕྱོགས་གདྒཱའི་ཀླུང་དགུའི་བྱེ་སྙེད་ན། །རིན་ཆེན་རྒྱ་མཚོའི་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །མངོན་མཁྱེན་རྒྱལ་པོའི་ཞབས་ལ༴ ཤར་ཕྱོགས་གདྒཱའི་ཀླུང་བཅུའི༴ བཻ་ཌཱུརྻ་སྣང་རྣམ་དག་ཞིང་གི་དཔལ། །བགྲང་ཡས་སེམས་དཔས་བསྐོར་བའི་བཅོམ་ལྡན་འདས། །སྨན་གྱི་བླ་མའི་ཞབས་ལ༴ ཐུགས་རྗེ་བརྩོན་འགྲུས་མཆོག་གི་རྩེར་གཤེགས་པས། །སྙིགས་དུས་རྒྱལ་བ་གཞན་གྱིས་མི་འདུལ་བའི། །མི་མཇེད་ཚེ་ལོ་བརྒྱ་པའི་ཞིང་གི་དཔལ། །འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། །ཀུན་འབྱུང་མུན་པའི་ས་བོན་མཐར་མཛད་ཅིང་། །སྡུག་བསྔལ་ཟུག་རྔུའི་རྩ་བ་དྲུང་ནས་འབྱིན། །རྒྱལ་ཡུམ་ཤེས་རབ་ཕ་རོལ་ཕྱིན་ལ་སོགས། །ཐེག་གསུམ་དམ་པའི་ཆོས་ལ༴ ཆོས་ཀྱི་རྒྱལ་བུ་གཞོན་ནུ་མཁྱེན་པའི་གཏེར། །བདག་ཅག་ཉེས་བརྒྱས་གཟིར་བའི་འགྲོ་བ་ལ། །ཟབ་ཡངས་ལམ་འདི་མངོན་དུ་གྱུར་མཛད་པ། །རྗེ་བཙུན་འཇམ་པའི་དབྱངས་ལ༴ ཐབས་མཁས་ཐུགས་རྗེས་ཕུལ་དུ་བྱུང་བའི་མཐུས། །དུས་མིན་འཆི་གསོ་རྒྱལ་སྲིད་སྤེལ་སོགས་སླད། །མཆོད་པའི་སྦྱོར་བ་གསལ་བར་སྟོན་མཛད་པ། །འཕགས་པ་སྐྱབས་གྲོལ་མཛད་ལ་ཕྱག་འཚལ་ལོ། །ཡང་པ་ཅན་དུ་བདེ་གཤེགས་བརྒྱད་འཇོམ་ནས། །སྤྱི་སྒོས་བསྟན་པ་བསྲུང་བར་བཀའ་བསྒོས་ཤིང་། །རང་རང་བདེན་པའི་ངག་གིས་ཞལ་བཞེས་པ། །གསང་བདག་འཁོར་དང་བཅས་ལ༴ ཡངས་པ་ཅན་དུ་སྨན་བླའི་མཚན་ཐོས་པས། །བདེན་མཐོང་མདོ་འདི་བསྲུང་བར་དམ་བཅས་པ། །བདུན་འབུམ་འཁོར་གྱིས་བསྐོར་བའི་བཅུ་གཉིས་པོ། །གནོད་སྦྱིན་སྡེ་དཔོན་རྣམས་ལ༴ མཁའ་ཁྱབ་ཞིང་གི་ཕྱག་འོས་ཐམས་ཅད་ལ། །ཡོན་ཏན་ཞིང་དུ་ལྷག་པར་མོས་པའི་བློས། །འགྲོ་ཀུན་ཞིང་རྡུལ་གྲངས་སྙེད་ལུས་སྤྲུལ་ནས། །སངས་རྒྱས་ཞིང་མཐར་རྟག་ཏུ་གུས་ཕྱག་འཚལ། །ཇི་སྙེད་སུ་དག་ཕྱོགས་བཅུའི་སོགས་ཡན་ལག་བདུན་པ་བྱ། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་སྡེ་ལས་བྱུང་བ་བཞིན་དུ་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུན་དང་སྟོན་པ་བཅོམ་ལྡན་འདས་དམ་པ་བློ་མཐུན་པ་འཁོར་དང་བཅས་པ་སྤྱན་དྲངས་ནས་མཚན་ནས་བརྗོད་དེ་ཕྱག་འཚལ་བ་དང་མཆོད་ཅིང་དེ་དག་གི་སྔོན་གྱི་སྨོན་ལམ་ཁྱད་པར་ཅན་དང་མཐུན་པའི་སྨོན་ལམ་བཏབ་པ་དང་། དེ་དག་གི་སྤྱན་སྔར་སྡིག་པ་བཤགས་པ་དང་དགེ་བ་ལ་རྗེས་སུ་ཡི་རང་བ་དང་། བསྐུལ་ཞིང་གསོལ་བ་བཏབ་པ་ལ་སོགས་པའི་བསོད་ནམས་ཅི་མཆིས་པའི་སྟོབས་དང་། དེ་དག་གི་མཐུ་དཔལ་དང་བྱིན་གྱིས་བརླབས་ཀྱི་སྟོབས་ཀྱིས་བསྟན་འགྲོའི་ཕན་བདེའི་རྩ་ལག་ཏུ་གྱུར་པ་དབང་ཕྱུག་དམ་པ་རྣམས་ཀྱི་ཐོག་མ་མ་མཆིས་པའི་འཁོར་བ་ནས་བསགས་པའི་སྡིག་པ་དང་སྒྲིབ་པ་ཅི་མངའ་བ་ཐམས་ཅད་བྱང་བར་གྱུར་ཅིག །སྐུ་ལ་སྙུན་མི་མངའ་ཞིང་སྐུ་ཚེ་རིང་བ་དང་དབུ་རྨོག་བཙན་པ་དང་ཆབ་སྲིད་འཛོམ་དར་ཆེ་བ་དང་། འཇིག་རྟེན་དང་འཇིག་རྟེན་ལས་འདས་པའི་དཔལ་ཕུན་སུམ་ཚོགས་པ་ལ་མངའ་བརྙེས་པར་གྱུར་ཅིག །མཐར་ཡང་ཚོགས་གཉིས་ཡོངས་སུ་རྫོགས་ནས་གཡུང་དྲུང་གི་སྐུ་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་ཀྱི་གོ་འཕང་བརྙེས་པར་གྱུར་ཅིག །ཆབ་འོག་ཏུ་གཏོགས་པའི་འབངས་ཐམས་ཅད་ཀྱང་ཕྱི་ནང་གི་གནོད་པ་ཐམས་ཅད་རབ་ཏུ་ཞི་ཞིང་བདེ་སྐྱིད་ཕུན་སུམ་ཚོགས་པ་དང་བླ་ན་མེད་པའི་བྱང་ཆུབ་ཆེན་པོ་ཐོབ་པར་གྱུར་ཅིག །ཡུལ་ཁམས་ཐམས་ཅད་དུ་ཡང་མི་ནད་དང་ཕྱུགས་ནད་དང་ལོ་ཉེས་དང་དགྲའི་གནོད་པ་དང་བཀྲ་མི་ཤེས་པའི་བག་ཅི་ཡང་མི་འབྱུང་བ་དང་ཆར་ཆུ་དུས་སུ་བབས་ཏེ་ལོ་ཕྱུགས་འཕེལ་ཞིང་རྒྱས་པ་དང་། བདེ་སྐྱིད་དཔལ་ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱང་བདེ་བ་ཐམས་ཅད་དང་ལྡན་ཞིང་འཇིག་རྟེན་གྱི་ཁམས་དེ་དག་ཏུ་སྐྱེས་ནས་སངས་རྒྱས་བཅོམ་ལྡན་འདས་དེ་རྣམས་ཀྱི་ཞལ་མཐོང་སྟེ། གདམས་ངག་ཐོབ་ནས་ཚོགས་གཉིས་རྫོགས་ནས་སངས་རྒྱས་པར་གྱུར་ཅིག །ཁྱད་པར་དུ་ཡང་དམ་པའི་ཆོས་ཡུན་རིང་དུ་གནས་ཤིང་སྒོ་ཐམས་ཅད་ནས་དར་ཞིང་རྒྱས་པར་གྱུར་ཅིག །དེ་ནས་བཟོད་པར་གསོལ་བ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུན་འཁོར་དང་བཅས་པ་དང་སྟོན་པ་བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་འཁོར་དང་བཅས་པ་གདན་འཛོམ་པའི་སྤྱན་སྔར། མིང་ངམ། བདག་ཅག་ལ་སོགས་པའི་འགྲོ་བ་མང་པོའི་དོན་མཛད་པར་གསོལ་བའི་སྐབས་འདིར་བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པས་མ་འཚལ་བ་དང་བག་མ་མཆིས་པའི་དབང་གིས་ལུས་ངག་ཡིད་གསུམ་གྱི་སྤྱོད་པ་ཉོན་མོངས་པ་དང་འདྲེས་པ་དང་མཆོད་པའི་དངོས་པོ་ཆུང་ཞིང་ངན་པ་དང་། གཙང་སྦྲ་མ་བྱེད་པ་དང་མདོ་ལས་བྱུང་བའི་ཆོ་ག་བཞིན་དུ་མ་ལྕོགས་པ་ལ་སོགས་པ་འཁྲུལ་ཞིང་ནོངས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་རྣམས་ལ་བཟོད་པར་གསོལ་ཞིང་མཆིས་ན། ཐུགས་བརྩེ་བར་དགོངས་ཏེ་བཟོད་པར་བཞེས་ཤིང་འཕྲལ་དང་ཡུན་དུ་བདག་ཅག་གི་སྒྲིབ་པར་མི་འགྱུར་བར་བྱིན་གྱིས་བརླབ་པར་ཅི་གནང་། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་གང་། །དེ་ཡང་བཟོད་པར་མཛད་དུ་གསོལ། །དུས་ངན་སེམས་ཅན་བསོད་ནམས་དམན། །མ་རིག་ཉོན་མོངས་དང་འདྲེས་པས། །འཕགས་པའི་ཐུགས་དགོངས་མ་རྫོགས་པ། །དེ་ཡང་བཟོད་པར༴ སེར་སྣའི་དབང་གྱུར་མི་མཁས་པས། །མཆོད་པ་ངན་ཞིང་བཤམ་ཉེས་པ། །མགོན་པོ་ཐུགས་རྗེ་ཆེ་ལྡན་པས། །དེ་ཡང་བཟོད་པར༴ བག་མེད་སྤྱོད་པ་མ་དག་པས། །མདོ་ལས་བྱུང་བའི་ཆོ་ག་བཞིན། །མ་ལྕོགས་འཁྲུལ་པ་ཅི་མཆིས་པ། །དེ་ཡང་བཟོད་པར༴ ལྷག་པ་དང་ནི་ཆད་པ་དང་། །ཆོ་གའི་ཡན་ལག་ཉམས་པ་དང་། །བདག་གིས་བརྗེད་ངས་ཅི་མཆིས་པ། །དེ་ཡང་བཟོད་པར་མཛད་དུ་གསོལ། །དེ་ནས་གཤེགས་སུ་གསོལ་བ་ནི། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་ཐུགས་རྗེས་འབྱོན་པར་མཛོད། །མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་བདག་ཅག་དང་སེམས་ཅན་ཐམས་ཅད་ཀྱི་དོན་མཛད་པ་ཡིན་ལགས། སོ་སོའི་ཞིང་ཁམས་སུ་རྫུ་འཕྲུལ་གྱིས་འཁོར་དང་བཅས་པ་གཤེགས་སུ་གསོལ། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེ། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །དགེ་བ་འདི་ཡིས་མྱུར་དུ་བདག །སྨན་པའི་རྒྱལ་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འཁོད་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །རྨད་བྱུང་སྲས་བཅས་རྒྱལ་བའི་བྱིན་རླབས་དང་། །རྟེན་འབྲེལ་བསླུ་བ་མེད་པའི་བདེན་པ་དང་། །བདག་གི་ལྷག་བསམ་དག་པའི་མཐུ་སྟོབས་ཀྱིས། །རྣམ་དག་སྨོན་པའི་གནས་ཀུན་འགྲུབ་པར་ཤོག །ཤིས་བརྗོད་ནི། སྙིགས་མའི་འགྲོ་ལ་ཐུགས་རྗེ་ཉི་མའི་འོད། །ཆེས་ཆེར་རབ་འབར་བཅོམ་ལྡན་བདེ་གཤེགས་བདུན། །སྨོན་ལམ་གསུངས་པ་དོན་ཀུན་གྲུབ་པ་སོགས། །རྫོགས་པའི་སངས་རྒྱས་རྣམས་ཀྱི་བཀྲ་ཤིས་ཤོག །ཐོས་པ་ཙམ་གྱིས་སྲིད་ཞིའི་སྡུག་བསྔལ་ལས། །རྣམ་པར་སྒྲོལ་ནུས་ཟབ་དང་རྒྱ་ཆེ་བའི། །སྙིང་པོ་སྨན་གྱི་མདོ་སྡེ་བརྒྱད་བརྒྱ་པ། །གསུང་མཆོག་དམ་པའི་ཆོས་ཀྱི་བཀྲ་ཤིས་ཤོག །ཞུ་གསོལ་བསྲུང་སྐྱོབ་མཛད་པའི་སེམས་དཔའ་ཆེ། །ཉན་ཐོས་ཕྱོགས་སྐྱོང་གནོད་སྦྱིན་སྡེ་དཔོན་སོགས། །ཆོས་འདི་ཡུན་དུ་འཕེལ་ཞིང་གནས་བྱེད་པའི། །དགེ་འདུན་འདུས་པའི་ཚོགས་ཀྱི་བཀྲ་ཤིས་ཤོག །གཞན་ཡང་བཀྲ་ཤིས་ཀྱི་ཚིགས་སུ་བཅད་པ་མདོ་ལས་བྱུང་བ་ཇི་ལྟར་རིགས་པ་བརྗོད་དེ་མེ་ཏོག་སིལ་མ་ཕྱོགས་ཀུན་ཏུ་དགྲམ་པར་བྱའོ། །རྒྱལ་པོའི་ཕྲིན་ལས་འཇུག་པ་ནམ་མཁའི་མཐའ། །ཚད་མའི་སྲང་ལ་ཀུན་མཁྱེན་ཡེ་ཤེས་ཀྱིས། །གཞལ་མིན་སྒྲིབ་པའི་ལུས་ཅན་བློས་རྟོགས་པའི། །སྐལ་བ་རྡུལ་ཕྲན་ཆ་ཡང་སུ་ཡིས་རྙེད། །ཁོལ་བུར་ལུས་མིན་གྱུར་ཏོ་ཅོག་སྐྱོན་དྲི། །ཉེར་བསྒྲུབས་ཡོན་ཏན་མཐའ་དག་ཡོངས་རྫོགས་པར། །གཅིག་ཏུ་མཉམ་པའི་རྒྱལ་རྣམས་སྐལ་དམན་འགྲོར། །ཉེ་རིང་བར་མའི་ཁྱད་པར་ག་ལ་ཞིག །འོན་ཏེ་ཆེར་སྙིགས་བོད་པའི་སྨག་རུམ་འདིར། །ལྷག་པར་ཐུགས་རྗེའི་མཐུ་དཔུང་ཉིན་མོར་བྱེད། །འཆར་ནུབ་སྤངས་པའི་སྣང་བ་དམ་པའི་གཟི། །བདེ་གཤེགས་མཆེད་བདུན་སྨོན་ལམ་རླུང་གིས་དྲངས། །ལྷ་གཅིག་ཁྲི་སྲོང་ལེགས་བྱས་ཛ་མྦུའི་འབྲས། །མདོ་ཆོག་རྒྱ་མཚོར་རོ་གཅིག་འདྲེས་པ་ལས། །ཕན་བདེའི་གསེར་གྱི་སྙེ་མ་གཡུར་ཟ་མཁན། །གང་ཅན་སྐུ་དྲིན་མཚུངས་མེད་ཞི་བ་འཚོ། །རྒྱས་པའི་སྡེ་སྣོད་སྨན་མདོ་བརྒྱད་བརྒྱ་བ། ཚིག་དོན་ཟབ་བརླིང་རིན་ཆེན་འབྱུང་གནས་ཆེར། །གངས་ཅན་བསོད་ནམས་རི་བོ་བསྒྲིལ་བ་ལས། །མདོ་ཆོག་གཉིས་སྐྱེས་རྒྱ་པོའི་དཀྱིལ་འཁོར་ཐོན། །འོན་ཏེ་མཁས་རློམས་དུ་མའི་སྒྲིགས་རྩོམ་གྱིས། །ལོག་རྟོག་ཆུ་འཛིན་བུ་མོའི་ཕང་ཉལ་བ། །དཔྱད་གསུམ་དག་བྱེད་དྲི་བཞོན་གྱིས་བསལ་ཏེ། །གཅིག་ཏུ་དཀར་བའི་ཟེགས་མ་བསིལ་ཟེར་ཐོན། །སྲས་བཅས་རྣམས་མཁྱེན་སྲུང་མར་བཅས་པ་ཡིས། །སྔོན་བཏབ་སྨོན་ལམ་བགྲངས་ཡས་མུཀྟི་ཀཿ རིས་མེད་སྐྱེ་རྒུའི་ཉ་ཕྱིས་ཁོག་ཡངས་པོར། །སྦྲུལ་པའི་སྐལ་བཟང་མངོན་སུམ་མྱོང་བར་ཤོག །ཅེས་བདེ་བར་གཤེགས་པ་བདུན་གྱི་སྨོན་ལམ་གྱི་ཆོ་ག་འདི་ཉིད་གངས་ཅན་ཕན་བདེའི་རྩི་སྨན་གྱི་ལྗོན་པ་ཆེན་པོ་ཡིན་པར་མཆིམས་ནམ་མཁའ་གྲགས་ཀྱི་མཁན་པོའི་གཞུང་ལ་དགོས་ངེས་ཀྱི་ལྷན་ཐབས་མཛད་པའི་ཁུངས་བཙུན་ནའང་བར་སྐབས་སུ་མདོ་ཆོག་རྒྱས་བསྡུས་ཀྱི་དབྱེ་བ་སོགས་མཁན་པོར་ཁ་གཡར་བ་དང་མཆིམས་ཀྱི་ཆོག་བསྒྲིགས་མ་ལ་གཞན་གྱིས་འབྲེལ་མེད་མང་དུ་སྦྱར་བའི་ཉི་མ་འཕུལ་ཐབས་དང་གཞན་མགོ་བསྐོར་བ་ལྷུར་བླངས་ཤིང་། ལ་ལ་ཉུང་བ་ཙམ་གྱིས་ཡ་མཚན་པར་རློམས་ཏེ་ཚིག་སྣ་བསྡུས་པའི་ཤོག་ལྡེབ་གསུམ་བཞི་ལ་ཚང་བའི་ཡི་གེ་མང་པོའི་ལུགས་སྲོལ་འདི་ཉིད་ཚོང་དུས་འོ་མ་ལྟར་བསླད་པ་མཐོང་བས་རྐྱེན་བྱས་མཁའ་མཉམ་ཀྱི་སྐྱེ་དགུ་མཐའ་དག་ལ་ཕན་འདོད་ཀྱི་ལྷག་པའི་བསམ་པས་དྲངས་ཏེ་སྔ་མོ་ནས་རྩོམ་འདུན་ཡོད་པ་དང་། དབུས་གཙང་དུ་ཆོས་སྡེ་གསར་བཙུགས་ཕལ་ཆེར་ལའང་མདོ་ཆོག་ཚུགས་ཡོད་པར་ཕན་རླབས་ཆེ་འདྲ་སྙམ་པའི་སྟེང་། ཐོས་བསམ་དར་རྒྱལ་གླིང་པའི་སློབ་དཔོན་ཕྲིན་ལས་རྒྱ་མཚོ། ཤངས་པ་དགའ་ལྡན་ཆོས་འཁོར་བའི་སློབ་དཔོན་དོན་གྲུབ་རྒྱ་མཚོ། དབུ་མཛད་བློ་བཟང་ཡོན་ཏན། མཆོད་དཔོན་ངག་དབང་ཤེས་རབ། དགེ་སློང་འཇམ་དབྱངས་གྲགས་པ། གསོལ་དཔོན་གེ་ར་བ་བློ་བཟང་མཁྱེན་བརྩེ་རྣམས་ཀྱིས་བསྐུལ་བ་དང་། ཕྱག་མཛོད་ས་སྐྱོང་བློ་བཟང་མཐུ་སྟོབས་ཀྱི་རྨི་རུ་བ་ཚོར་བྲག་སྒོ་རབ་འབྱམས་པས་སྣང་བར་གང་དྲན་གྱི་རྒྱས་འབྲིང་བསྡུས་པ་སོགས་སྣ་ཚོགས་བྱས་ཚུལ་གྱི་སྒྱུར་སྦྱང་ལ་བརྟེན་ཆོག་བསྒྲིགས་ཞིག་དགོས་ཞེས་རྨི་རུ་བླ་མ་རིན་ཆེན་རྒྱ་མཚོས་བསྐུལ་བས་ཀྱང་རྐྱེན་བྱས། ཉེ་ཆར་ཆེན་པོ་ཧོར་གྱི་རྒྱལ་ཁམས་ཀྱི་སའི་ཁལ་ཁ་གཡོན་རུ་ནས་འཇམ་དབྱངས་སྤྲུལ་པའི་སྐུ་བློ་བཟང་བསྟན་པའི་རྒྱལ་མཚན་གྱིས་གསེར་གྱི་མཎྜལ་དང་ཧོར་གོས་མངགས་བཏགས་སོགས་ཀྱི་ཁྱད་ནོར་དང་བཅས་གསུང་གིས་བསྐུལ་བས་མཚམས་སྦྱར་ཏེ། ཡིད་ཆེས་ཤིང་སྤྲོ་བ་བསྐྱེད་པ་མདོ་སྔགས་ཀྱི་ཁྱད་པར་འབྱེད་པའི་དཔྱད་པ་སྔོན་དུ་བཏང་བའི་སྒོ་ནས་ཐམས་ཅད་མཁྱེན་པ་ཞི་བ་འཚོའི་གསུང་དངོས་མར་མེད་དུ་མི་རུང་བའི་མཚམས་སྦྱོར་དང་གསལ་བྱེད་ཀྱིས་བརྒྱན་པའི་བདེ་གཤེགས་བདུན་གྱི་མཆོད་པའི་ཆོག་བསྒྲིགས་ཡིད་བཞིན་དབང་རྒྱལ་ཞེས་པ་འདི་ནི། ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་བཀའ་དྲིན་ལས་ཆོས་འདི་ལ་ལྷག་པར་མོས་པའི་དད་པ་ཐོབ་པ་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལ ང་ཚོའི་སྡེས་བག་ཡོད་ཅེས་པ་ཆུ་གླང་མགོས་ཉ་བའི་ལྷག་པ་ལྷ་མཚམས་ཀྱི་འགྲུབ་སྦྱོར་གྱི་དུས་དགེ་བར། རང་བྱུང་འཕགས་པ་འཇིག་རྟེན་དབང་ཕྱུག་གི་གཙུག་ལག་ཁང་ཕོ་བྲང་དམར་པོ་རིར་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་ལུས་ཅན་མཐའ་དག་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོའི་གོ་འཕང་མངོན་དུ་བྱེད་པའི་རྒྱུར་གྱུར་ཅིག། །།