བཅོམ་ལྡན་འདས་སྨན་གྱི་བླ་མའི་རྗེས་གནང་གི་བརྒྱུད་འདེབས་ཨུཏྤལ་ཕྲེང་མཛེས། མཁྱེན་བརྩེའི་དབང་པོ།

༈ བཅོམ་ལྡན་འདས་སྨན་གྱི་བླ་མའི་རྗེས་གནང་གི་བརྒྱུད་འདེབས་ཨུཏྤལ་ཕྲེང་མཛེས་ཞེས་བྱ་བ་བཞུགས་སོ། །སངས་རྒྱས་སྨན་པའི་རྒྱལ་པོ་ཤཱཀྱའི་ཏོག །འཇམ་དབྱངས་ཞི་འཚོ་ཁྲི་སྲོང་སད་ན་ལེགས། །ཁྲི་རལ་དཔལ་རྡོར་འོད་སྲུང་དཔལ་འཁོར་བཙན། །སྐྱིད་ལྡེ་ཉི་མ་མགོན་ལ་གསོལ་བ་འདེབས། །བཀྲ་ཤིས་ལྡེ་དང་ལྷ་བཙུན་ཡེ་ཤེས་འོད། །ལྷ་ལྡེ་འོད་ལྡེ་རྩེ་ལྡེ་དགྲ་བཅོམ་པ། །ཤེས་རབ་གྲགས་པ་དར་མ་རྒྱལ་མཚན་དང་། །དཔལ་ལྡན་གྲོ་བ་རྣམས་ལ་གསོལ་བ་འདེབས། །སངས་རྒྱས་སྒོམ་པ་སྙིང་པོ་རྒྱལ་མཚན་ཞབས། །སྤྲུ་ལུང་པ་དང་གྲགས་དཔལ་བསོད་ནམས་གྲགས། །རྒྱལ་སྲས་ཐོགས་མེད་འཁུས་ལོ་དཔལ་ཡེའི་མཚན། །སེང་གེ་རྒྱལ་མཚན་རྣམས་ལ་གསོལ་བ་འདེབས། །དཀོན་མཆོག་རྒྱལ་མཚན་གྲགས་སེང་བློ་བཟང་བ། །མཁྱེན་རབ་ཆོས་རྗེ་སྤྱན་སྔ་ངག་གི་དབང་། །ཀུན་དགའ་ཆོས་གྲགས་མཆོག་ལེགས་བསྟན་འཛིན་བཟང་། །ངག་དབང་ལྷུན་གྲུབ་རྣམས་ལ་གསོལ་བ་འདེབས། །རྨོར་ཆེན་རྗེ་དང་འཇམ་མགོན་གནས་གསར་བ། །ཀུན་དགའ་བློ་གྲོས་ནམ་མཁའ་འཆི་མེད་དང་། །ཀུན་དགའ་བསྟན་འཛིན་འཇམ་དབྱངས་མཁྱེན་བརྩེའི་དབང་། །བློ་གྲོས་མཐའ་ཡས་བསྟན་པའི་རྒྱལ་མཚན་རྗེ། །རྡོ་རྗེ་འཛིན་པ་འགྱུར་མེད་ངེས་དོན་དབང་། །རྩ་བའི་བླ་མ་རྣམས་ལ་གསོལ་བ་འདེབས། །དཔལ་ལྡན་རྩ་བརྒྱུད་བླ་མའི་ཚོགས་རྣམས་ལ། །གུས་པས་ཕྱག་འཚལ་མཆོད་སྤྲིན་རྒྱ་མཚོས་མཆོད། །སྡིག་ལྟུང་ཀུན་བཤགས་དགེ་ལ་རྗེས་ཡི་རང་། །བསྐལ་བརྒྱར་ཞབས་བརྟན་ཆོས་འཁོར་བསྐོར་བར་བསྐུལ། །དེ་ལྟར་བསགས་ལས་བྱུང་བའི་དགེ་ཚོགས་ཀུན། །བྱང་ཆུབ་སྙིང་པོར་ཡོངས་སུ་བསྔོས་པའི་མཐུས། །བདག་གཞན་འགྲོ་ཀུན་སྐྱེ་བ་ཐམས་ཅད་དུ། །ཐེག་མཆོག་བཤེས་ཀྱིས་རྗེས་སུ་བཟུང་གྱུར་ཅིག །སྲིད་ལས་ངེས་འབྱུང་ཚུལ་ཁྲིམས་རྣམ་པར་དག །རྒྱལ་སྲས་སྤྱོད་པ་རྒྱ་མཚོས་རྒྱུད་སྦྱངས་ཤིང་། །བདག་དང་ཕུང་པོ་རྣམ་རིག་ལས་འདས་པའི། །དོན་དམ་བྱང་ཆུབ་སེམས་མཆོག་རྟོགས་པར་ཤོག །ཁྱད་པར་བདེ་གཤེགས་སྨན་པའི་རྒྱལ་པོ་ཡི། །ཡིད་འོང་མཚན་དཔེའི་སྣང་བརྙན་ལེགས་བསྒོམས་ཤིང་། །གཟུངས་སྔགས་ཟབ་མོའི་བཟླས་བརྗོད་བརྩོན་པའི་མཐུས། །སྒྲིབ་གཉིས་རྒྱུར་བཅས་ལྷག་མེད་འཇིལ་གྱུར་ཅིག །གཞན་ཡང་ནད་གདོན་ཉེར་འཚེ་ཀུན་ཞི་ཞིང་། །ཚེ་དཔལ་འབྱོར་པའི་སྐལ་བཟང་རབ་རྒྱས་ནས། །གནས་སྐབས་མཐར་ཐུག་ཕན་དང་བདེ་བ་ཡི། །ཆོས་མཐུན་བསམ་སྦྱོར་ཡིད་བཞིན་འགྲུབ་པར་ཤོག །ཚེ་ཡི་མཐར་ཡང་བདེ་གཤེགས་སྲས་བཅས་ཀྱིས། །མངོན་སུམ་རྗེས་བཟུང་གསུང་གིས་དབུགས་འབྱུང་ཞིང་། །དག་པའི་ཞིང་དུ་བརྫུས་ཏེ་སྐྱེས་ནས་ཀྱང་། །དོན་གཉིས་མྱུར་དུ་འགྲུབ་པར་བྱིན་གྱིས་རློབས། །ཞེས་པའང་དགེ་སློང་གུ་ཎ་ལ་ཀྵྨཱིའི་བཞེད་སྐོང་དུ་ཆོས་སྨྲ་བའི་གཟུགས་བརྙན་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷི་རསྟུ། གོང་གི་མཁྱེན་བརྩེ་ནས་བརྒྱུད་རིམ་ཁ་སྐོང་ཚིགས་གཉིས་པོ་ཛྙཱ་ནས་སོ།། །།