ཤེས་པས་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་ཞེས་བྱ་བའི་གཟུངས།
ཤེས་པས་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་ཞེས་བྱ་བའི་གཟུངས་བཞུགས། རྒྱ་གར་སྐད་དུ། སརྦ་པྲ་ཛྙཱནྟ་པ་ར་མི་ཏ་སིངྔྷི་ཙེཏྱེ་ན་མ་དྷ་ར་ནི། བོད་སྐད་དུ། ཤེས་པས་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ཀྱི་ཚུལ་དང་། འདུལ་བ་དང་། རྣམ་པར་འཕྲུལ་བའི་གཟི་བརྗིད་ཀྱི་རྒྱལ་པོ་ལ་ཕྱག་འཚལ་ལོ། །ཕྱག་འཚལ་དུས་གསུམ་སངས་རྒྱས་ལ། ཕྱག་འཚལ་དཀོན་མཆོག་གསུམ་དགེ་ལ། མི་འཁྲུགས་པ་དང་འོད་དཔག་མེད། སྤྱན་རས་གཟིགས་ལ་བདག་ཕྱག་འཚལ། རིགས་གསུམ་ལ་ཡང་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་འཛིན་པ་ཆེན་པོ་རི་རབ་ཆེན་པོ་སྣ་ལྔ་ལས་གྲུབ་པ། གཞི་ཉིད་མཆོད་རྟེན་གྱི་རང་བཞིན་དུ་གནས་པའི་སྟེང་ན། རིན་པོ་ཆེ་སྣ་ཚོགས་པའི་ཁང་པ་དང་། ཚད་མེད་པའི་མཆོད་རྟེན་བཞི་དང་། རང་བཞིན་གྱི་མཆོད་རྟེན་ཆེན་པའི་གནས་ཡིན་པའི་ཕྱིར་རྩེ་མོའི་དབྱིངས་ཀྱང་མཆོད་རྟེན་དུ་གྱུར་པའི་གནས་ན་ལག་ན་རྡོ་རྗེ་དང་། འཇམ་དཔལ་དང་། སྤྱན་རས་གཟིགས་པ་དང་། བྱམས་པ་ལ་སོགས་པའི་ས་བཅུའི་བྱང་ཆུབ་སེམས་དཔའ་རྣམས་དང་། ཚངས་པ་དང་། བརྒྱ་བྱིན་དང་རྒྱལ་པོ་ཆེན་པོ་བཞི་ལ་སོགས་པ་གཙང་རིས་ཀྱིས་མགོན་པོ་རྣམས་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱི་དབུའི་གཙུག་གཏོར་དང་། ཐུགས་ཀའི་དཔལ་གྱི་བེའུ་ལ་སོགས་པ་རྣམས་ནས་འོད་ཟེར་ཁ་དོག་རྣམ་པ་སྣ་ཚོགས་པ་བྱེ་བ་ཁྲག་ཁྲིག་བརྒྱ་སྟོང་དྲུག་ཅུ་སྙེད་ཅིག་བཀྱེ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲངས་མེད་པ་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་པ་ཐམས་ཅད་འོད་ཟེར་གྱི་སྣང་བ་ཆེན་པོས་ཏིལ་གྱི་གང་བུ་བཞིན་དུ་གང་ཞིང་ཁྱབ་པར་མཛད་པས་མཐའ་ཡས་པའི་སེམས་ཅན་ཐམས་ཅད་ལོང་བ་རྣམས་ཀྱིས་གཟུགས་མཐོང་བ་དང་། འོན་པ་རྣམས་ཀྱིས་སྒྲ་ཐོས་པ་དང་། དིག་པ་རྣམས་ཀྱི་སྨྲ་ཤེས་པ་དང་། ཐེང་བོ་རྣམས་དང་། ཞ་བོ་རྣམས་འགྲོ་ཞིང་ཡན་ལག་རངས་པ་ངང་། ནད་པ་རྣམས་ནད་དང་བྲལ་བ་དང་། །དམྱལ་བ་རྣམས་ཚེ་ཕྲི་ནས་རིམ་གྱིས་སྡུག་བསྔལ་ལས་ཐར་པ་དང་། གཞན་ཡང་འགྲོ་བ་སེམས་ཅན་རྣམས་རིམ་གྱིས་དྲན་པ་རྙེད་པར་བྱས་ནས། ནམ་མཁའི་ཁམས་ཐམས་ཅད་ཡིད་ཀྱི་མཆོད་རྟེན་ཆོས་ཀྱི་སྐུས་གང་ཞིང་རྒྱས་པར་བྱས་ཏེ། འོད་ཟེར་དེ་དག་སླར་བཅོམ་ལྡན་འདས་ཀྱི་དབུའི་གཙུག་ཏུ་འདུས་པ་ལས་ཆོས་ཀྱི་སྐུའི་གཟུགས་བརྙན་དུ་གྱུར་ཏོ། །དེ་ནས་ལག་ན་རྡོ་རྗེ་ལ་སོགས་པའི་འཁོར་རྣམས་ངོ་མཚར་དུ་གྱུར་ནས་བཅོམ་ལྡན་འདས་ལ་བླ་རེ་དང་། རྒྱལ་མཚན་དང་། འཕན་དང་། གདུགས་དང་། རྔ་ཡབ་དང་། དྲིལ་བུ་དང་། དར་དཔྱངས་དང་། སྤོས་དང་། མེ་ཏོག་དང་། ཕྲེང་བ་དང་། བྱུག་པ་དང་། མར་མེ་དང་། བཤོས་དང་། རོལ་མོ་ལ་སོགས་པའི་མཆོད་པ་རྣམས་ཀྱིས་མཆོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འགྲོ་བའི་མགོན་པོ་ཐུགས་རྗེ་ཆེན་པོ་དང་ལྡན་པས་མཆོད་རྟེན་བྱིན་གྱིས་བརླབ་པའི་ཆོ་ག་རིག་པ་ཆེན་མོའི་བི་མ་ལ་ཨུཥྞཱི་ཥའི་གཟུངས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མཆོད་རྟེན་བྱིན་གྱིས་བརླབ་པའི་ཆོ་ག་རིག་པ་ཆེན་མོ་བི་མ་ལ་ཨུཥྞཱི་ཥའི་གཟུངས་འདི་ནི། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་འཛིན་ཏམ། འཆང་ངམ། བྲིས་སམ། ཀློག་གམ། མིང་ཉན་པར་བྱེད་ན། དེ་མཚམས་མེད་ལྔ་དང་། མི་དགེ་བཅུ་དང་། སྡིག་པའི་ལས་ཅི་བྱས་པ་ཐམས་ཅད་མ་ལུས་པར་བྱང་བར་འགྱུར་རོ། །བི་མ་ལ་ཨུཥྞཱི་ཥའི་རིག་པ་ཆེན་མོའི་མཆོད་རྟེན་བྱིན་གྱིས་བརླབ་པའི་ཆོ་ག་འདིའོ། །ༀ་ཏྲཻ་ཡ་དྷི་སརྦ་ཏ་ཐཱ་ག་ཏ་ཧྲི་ད་ཡ་གརྦྷེ། ཛྭ་ལ་དྷརྨ་དྷ་ཏུ་གརྦྷེ། སཾ་ཧ་ར་ཎ་ཨཱ་ཡུཿསྂ་ཤོ་དྷ་ཡ། པ་པྂ་སརྦ་ཏ་ཐཱ་ག་ཏ་ས་མནྟ་ཨུཥྞི་ཥ་བི་མ་ལེ་བི་ཤུདྡྷ་སྭཱ་ཧཱ། རིག་པ་ཆེན་མོ་འདི་གསུངས་མ་ཐག་ཏུ་འཇིག་རྟེན་གྱི་ཁམས་ཐམས་ཅད་མཆོད་རྟེན་གྱི་རང་བཞིན་དུ་གྱུར་ཏོ། །རིག་པ་ཆེན་མོ་འདི་གྲོ་གའམ་རས་སམ་ཤིང་ཤུན་ལ་བྲིས་ཏེ་རྒྱལ་མཚན་གྱི་རྩེ་མོ་ལ་བཏགས་ན། ལྷ་དང་མི་ལ་སོགས་པ་ཐམས་ཅད་ཀྱིས་མཆོད་ཅིང་ཕྱག་བྱ་བ་དང་། བཀུར་སྟི་བྱ་བའི་འོས་སུ་གྱུར་པ་དང་། རིག་པ་ཆེན་མོ་འདི་ལུས་སམ་མགུལ་དུ་ཐོགས་ན། དེ་ལྷ་དང་། མི་དང་། ལྷ་མ་ཡིན་པ་ལ་སོགས་རྣམས་ཀྱིས་སངས་རྒྱས་ཉིད་དུ་བལྟ་བར་འགྱུར་རོ། །བདག་ཉིད་རི་བྲག་གམ། ཚལ་ལམ། དགོན་པའམ། ས་ཕྱོགས་གང་དུ་འགྲོ་བའི་ཚེ་རིག་པ་ཆེན་མོ་འདི་བརྗོད་ན་རི་དང་ས་ཕྱོགས་ཐམས་ཅད་མཆོད་རྟེན་དུ་འདྲ་བར་འགྱུར་རོ། །ༀ་ཏྲེ་ཡ་དྷྭེ་སརྦ་ཏ་ཐཱ་ག་ཏ་ཧྲི་ད་ཡ་གརྦྷེ། ཛྭ་ལ་དྷརྨ་དྷཱ་ཏུ་གརྦྷེ། སཾ་ཧ་ར་ཎ་ཨཱ་ཡུཿསཾ་ཤོ་དྷ་ཡ། པཱ་པཾ་སརྦ་ཏ་ཐ་ག་ཏ་ས་མནྟ་ཨུཥྞཱི་ཥ་བི་མ་ལེ་བི་ཤུདྡྷེ་མ་ཧཱ་བི་ར་ཛེ་ར་གམྦྷཱི་ར་སི། དྷརྨ་དྷཱ་ཏུ་གརྦྷེ། བི་བི་སཱ་ར་ཨ་ཨ་ལཾ་སྭཱ་ཧཱ། ཞེས་བརྗོད་ན། ས་གཞི་ཐམས་ཅད་ཀྱང་མཆོད་རྟེན་གྱི་རང་བཞིན་དུ་འགྱུར་རོ། །བདག་ཉིད་ཆུའམ། ཆུ་བོའམ། མཚོའམ། རྒྱ་མཚོ་ལ་སོགས་པ་གང་ལ་རྒལ་བ་ན་ཡང་རིག་པ་ཆེན་མོའི་རིགས་སྔགས་འདིས་བཏབ་ན་ཆུ་དེ་ཐམས་ཅད་ཀྱང་མཆོད་རྟེན་གྱི་རང་བཞིན་དུ་འགྱུར་རོ། །ༀ་ཏྲཻ་ཡ་དྷཱེ་སརྦ་ཏ་ཐཱ་ག་ཏ་ཧྲི་ད་ཡ་གརྦྷེ། ཛྭ་ལ་དྷརྨ་དྷ་ཏུ་གརྦྷེ། སཾ་ཧ་ར་ཎ་ཨཱ་ཡུཿསྂ་ཤོ་དྷ་ཡ། པཱ་པཾ་སརྦ་ཏ་ཐཱ་ག་ཏ་ས་མནྟ། བི་མ་ལ་ཨུཥྞཱི་ཥ་བི་ཤུདྷེ། མ་ཧཱ་བི་ར་ཛེ་ར་གམྦྷི་ར་སི། དྷརྨ་དྷཱ་ཏུ་བི་བི་སཱ་ར་ཨ་མ་མ་ཀི་སྭཱ་ཧཱ། ཞེས་བརྗོད་ན། ཆུ་ཐམས་ཅད་ཀྱང་མཆོད་རྟེན་གྱི་རང་བཞིན་དུ་འགྱུར་རོ། །གཞན་ཡང་བདག་ཉིད་ཀྱིས་ནམ་མཁའ་གང་ནས་གང་ཁྱབ་པར་རིག་པ་ཆེན་མོའི་སྔགས་འདི་བཏབ་ན། ནམ་མཁའ་ཐམས་ཅད་ཀྱང་མཆོད་རྟེན་གྱི་རང་བཞིན་དུ་འགྱུར་རོ། །ༀ་ཏྲཻ་ཡ་དྷཱི་སརྦ་ཏ་ཐཱ་ག་ཏ་ཧྲི་ད་ཡ་གརྦྷེ། ཛྭ་ལ་དྷརྨ་དྷཱ་ཏུ་གརྦྷེ། སྂ་ཧ་ར་ཎ། ཨཱ་ཡུཿསྂ་ཤོ་དྷ་ཡ། པཱ་པཾ་སརྦ་ཏ་ཐཱ་ག་ཏ་ས་མནྟ། བི་མ་ལ་ཨུཥྞཱི་ཥ་བི་ཤུདྷེ། མ་ཧཱ་བི་ར་ཛེ ར་གམྦྷི་ར་སི། དྷརྨ་དྷཱ་ཏུ་བི་བི་སཱ་ར་ཨ་ཨ་ཨེ་ཁྂ་ལ་སྭཱ་ཧཱ། ཞེས་བརྗོད་ན། ནམ་མཁའི་ཁམས་ཐམས་ཅད་མཆོད་རྟེན་གྱི་རང་བཞིན་དུ་འགྱུར་ཏེ། ཕྱག་བྱ་བ་དང་། བསྐོར་བ་བྱ་བ་དང་། མཆོད་པ་བྱ་བའི་འོས་སུ་འགྱུར་རོ། །བི་མ་ལ་ཨུཥྞཱི་ཥའི་གཟུངས་འདི་བཟླས་ཏེ། འབྱུང་བ་ཆེན་པོ་ལྔ་པོ་གང་ལ་ཡང་མཆོད་རྟེན་བཏབ་ན་ཉོན་མོངས་པ་དང་། སྒྲིབ་པ་ཐམས་ཅད་དག་པར་འགྱུར་རོ། །གཞན་ཡང་ས་དང་། ཤིང་དང་། རྡོ་དང་། འཇིམ་པ་དང་། འབི་འབི་གང་ཡང་རུང་བ་ལ་རིག་པའི་སྔགས་འདིས་བཏབ་སྟེ། མཆོད་རྟེན་བཏབ་ན་རིན་པོ་ཆེ་སྣ་ཚོགས་ཀྱི་མཆོད་རྟེན་གྱི་རྒྱུར་འགྱུར་ཏེ། ༀ་རཏྣ་ཙཻཏྱེ་པཉྩ་ཡེ་བི་བི་སཱ་ར་སྭཱ་ཧཱ། ཞེས་བརྗོད་ནས་པའི་ལྕི་བ་ལ་སོགས་པས་བྱུག་ན་ཐམས་ཅད་རིན་པོ་ཆེའི་མཆོད་རྟེན་གྱི་རྒྱུར་འགྱུར་རོ། །རིག་པ་ཆེན་པོའི་སྔགས་འདི་མ་བཏབ་ན། གང་ཞིག་གསེར་དང་། དངུལ་དང་། བཻ་ཌཱུརྻ་ལ་སོགས་པ་རིན་པོ་ཆེ་སྣ་བདུན་ལས་མཆོད་རྟེན་བཞེངས་སུ་གསོལ་ཡང་རྡོ་དང་། ཤིང་དང་ཁམས་ས་དང་འདྲ་བར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་འདི་ཉིད་རྫས་ཀྱི་རང་བཞིན་ལས་སྙིང་པོ་དང་གསང་སྔགས་བྱིན་གྱིས་བརླབས་པ་མ་བཞུགས་པའི་ཕྱིར་རོ། །རིག་པ་ཆེན་མོ་འདིས་བྱིན་གྱིས་བརླབས་ཏེ་བཏབ་ན། འབྱུང་བ་ཆེན་པོ་གང་ལ་མཆོད་རྟེན་བཏབ་ཀྱང་བསྐལ་པ་དཔག་ཏུ་མེད་པ་ཐམས་ཅད་ཀྱི་སྒྲིབ་པའི་དྲི་མ་དག་ནས། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ནས་ཕྱིར་མི་ལྡོག་པའི་ས་ཐོབ་པར་འགྱུར་རོ། །རིག་པ་ཆེན་པོ་འདིས་བྱིན་གྱིས་བརླབས་ཏེ་རྡོ་དང་ཤིང་ལེབ་ལ་སོགས་ལ་མཆོད་རྟེན་བཏབ་ན། དེ་གདོན་མི་ཟ་བར་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ནས་ས་བཅུ་རིམ་གྱིས་བགྲོད་དེ། བཅུ་གཅིག་ཀུན་ཏུ་འོད་ཀྱི་ས་ཐོབ་པར་འགྱུར་རོ། །རིག་པ་ཆེན་མོ་འདིས་བྱིན་གྱིས་བརླབས་ཏེ། གསེར་དང་། དངུལ་དང་། བཻ་ཌཱུརྻ་ལ་སོགས་པ་ལ་མཆོད་རྟེན་བཏབ་ན། དེ་གདོན་མི་ཟ་བར་རྒྱལ་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ནས་རྡོ་རྗེ་འཛིན་པའི་ས་ཐོབ་པར་འགྱུར་རོ། །གཞན་ཡང་རིག་པ་ཆེན་མོའི་སྔགས་འདིས་བཏན་ན་མཆོད་རྟེན་གཅིག་བཏབ་ན་ཡང་བྱེ་བ་བཏབ་པར་འགྱུར་རོ། །རིག་པ་ཆེན་མོ་འདིས་མ་བཏབ་ན་བྱེ་བ་བཏབ་ཀྱང་གཅིག་དང་འདྲ་བར་འགྱུར་རོ། །དེའི་ཅིའི་ཕྱིར་ཞེ་ན། གོང་མ་བཞིན་ནོ། །རིག་པ་ཆེན་པོ་དེའི་སྔགས་ནི་འདི་ཡིན་ཏེ། ཏདྱ་ཐཱ། སཱུ་ཀྵྨེ། སཱུ་ཀྵྨེ། ཤུནྟེ། ཤཱཏྣེ། ནི་རཱ་ཀུ་ལེ། ཡ་ཤོ་ཏེ་ཛོ། སརྦ་བུདྡྷེ། ཨདྷིཥྛ་ན། ཨ་དྷིཥྛི་ཏེ། ཨ་ནུ་མི་དེ་སྭཱ་ཧཱ། འདིའི་ཆོ་ག་ནི་འདི་ཡིན་ཏེ། འཇིམ་པའི་གང་བུ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། མཆོད་རྟེན་གཅིག་བཏབ་ན་བྱེ་བ་བཏབ་པར་འགྱུར་རོ། །བརྒྱ་བཏབ་པའི་གྲངས་དང་ཕན་ཡོན་ནི་འཕགས་པ་ཉན་ཐོས་ཀྱི་དགྲ་བཅོམ་པ་རྣམས་ཀྱིས་ཀྱང་བརྗོད་པར་མི་ནུས་སོ། །སྟོང་བཏབ་པའི་གྲངས་དང་ཕན་ཡོན་ནི་བྱང་ཆུབ་སེམས་དཔའ་རྣམས་ཀྱིས་ཀྱང་བརྗོད་པར་མི་ནུས་སོ། །ཁྲི་བཏབ་པའི་གྲངས་དང་ཕན་ཡོན་ནི་དེ་བཞིན་གཤེགས་པ་རྣམས་ཀྱིས་ཀྱང་བརྗོད་པར་མི་ནུས་སོ། །འབུམ་བཏབ་པའི་གྲངས་དང་ཕན་ཡོན་ནི་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་རྣམས་ཀྱིས་ཀྱང་བརྗོད་པར་མི་ནུས་སོ། །དེ་བས་ན་མཆོད་པའི་རྟེན་ལྔ་མན་ཆད་གདབ་པའི་མཆོད་པའི་ཆོ་ག་བྱ་བའི་ཐོག་མར་མཆོད་རྟེན་བརྩིགས་པའི་གནས་སམ། མཆོད་རྟེན་གྱི་འཇིམ་པའི་གནས་སམ། མཆོད་རྟེན་གྱི་འཇིམ་པ་གནས་གང་ནས་བླང་གི་གནས་དེར་ས་བདག་བྱིན་གྱིས་རླབས་ཅིང་ས་ལ་གནས་པའི་གདོན་བགེགས་བསམ་སྦྱོར་ངན་པ་མཆོད་རྟེན་དང་། དགེ་བ་ལ་བར་ཆད་བྱེད་པ་རྣམས་མཚམས་གཅད་པར་བྱ་སྟེ། ཐིག་སྐུད་ལ་རིག་པ་ཆེན་མོའི་སྔགས་འདིས་གདབ་སྟེ། ༀ་བཛྲ་སཱུ་ཏྲ་ཧཱུྃ་ཕཊ། ཅེས་བརྗོད་ནས་ཐིག་སྐུད་དེ་ཉིད་རྡོ་རྗེའི་སྐུད་པར་དམིགས་ནས་མཆོད་རྟེན་གྱིས་ཁྱོན་ཇི་ཙམ་རན་པ་དང་འཇིམ་བའི་ས་ཁྱོན། ཇི་ཙམ་རན་པ་ཐིག་གིས་ས་བཅད། དེ་བཞིན་དུ་ས་བཅད་ནས་གཞི་དེ་ཉིད་མཆོད་རྟེན་གྱི་རྒྱུ་རིན་པོ་ཆེ་རྣམ་པ་སྣ་ཚོགས་པ་དང་འདྲ་བར་འགྱུར་རོ། །དེ་ནས་ས་དེ་ཉིད་ལ་སེང་ལྡེང་གི་ཕུར་བུ་སོར་བརྒྱད་པ་ལ་རིག་པ་ཆེན་མོའི་སྔགས་འདི་གདབ་པར་བྱ་སྟེ། ༀ་བཛྲ་ཀཱི་ལི་ཀཱི་ཁི་ཀཱི་ལ་ཡ་སརྦ་དུཥྚ་ན་ཧཱུྃ་ཕཊ། ཅེས་བྱ་བ་འདི་ལན་བདུན་བཟླས་ཏེ། རྡོ་རྗེ་ཕུར་བུར་དམིགས་ཏེ་དབུས་དང་གྲྭ་བཞིར་གདབ་བོ། །དེ་བཞིན་དུ་བཏབ་ན་མི་དང་མི་མ་ཡིན་པ་ལས་བསྲུང་བར་འགྱུར་རོ། །སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །སེང་ལྡེང་གི་ཕུར་བུ་ནི་མཆོད་རྟེན་གྱི་འཇིམ་པའི་ས་ཇི་ཙམ་དགོས་པ་མ་བླངས་ཀྱིས་བར་དུ་མི་དབྱུང་བར་བཞག་གོ། །དེ་ནས་ཏིལ་དང་ཡུངས་ཀར་ལ་རིག་པ་ཆེན་མོའི་སྔགས་འདི་བརྗོད་པར་བྱ་སྟེ། ༀ་ཨ་མྲྀ་ཏེ་ཧ་ན་ཧ་ན་ཧཱུྃ་ཕཊ། ཅེས་ལན་བདུན་བཟླས་ཏེ། སའི་ཕྱོགས་སུ་གཏོར་བས། སའི་ཕྱོགས་དེ་ཉིད་ཀྱང་དེ་བཞིན་གཤེགས་པའི་བཞུགས་གནས་དཔག་ཏུ་མེད་པར་འགྱུར། དེ་ལྟར་ས་གཞི་དེ་བཞིན་གཤེགས་པའི་བཞུགས་གནས་སུ་བྱིན་གྱིས་བརླབས་ཏེ། བགེགས་ཀྱི་བསམ་སྦྱོར་ངན་པ་ལས་མཚམས་བཅད་དེ། སྤོས་དང་། མེ་ཏོག་དང་། གཏོར་མ་ལ་སོགས་པ་རྣམས་ཀྱིས་ཀྱང་ས་ཕྱོགས་དེ་ན་གནས་པའི་ལྷ་དང་། ཀླུ་དང་། ལྷ་མ་ཡིན་ལ་སོགས་པ་རྣམས་ལ་མཆོད་ཅིང་བསྔོས་ཏེ། བི་མ་ལ་ཨཥྞི་ཥའི་གཟུངས་འདི་བཀླགས་ན། ས་ཕྱོགས་དེ་ཡང་ཤིན་ཏུ་བཀྲ་ཤིས་ཤིང་བྱིན་ཆགས་པར་འགྱུར་རོ། །དེ་ནས་མཆོད་རྟེན་གྱི་འཇིམ་པའི་ས་བརྐོ་བའི་ཚེ་རིག་པ་ཆེན་མོའི་སྔགས་འདི་བཟླས་ཏེ་བརྐོ་བར་བྱའོ། །ༀ་བཛྲ་ཁ་ན་ཁ་ན་ཧཱུྃ་ཕཊ། ཅེས་བཟླས་ཤིང་ས་གཞི་དེ་ཉིད་རིན་པོ་ཆེ་སྣ་ལྔར་གྱུར་པར་དམིགས་ཏེ་བརྐོས་ན་དེ་བཞིན་གཤེགས་པའི་སྐུ་རྣམ་པར་དག་པའི་རྒྱུར་འགྱུར་རོ། །དེ་ནས་ས་གཙང་མ་བླངས་པ་དེ་དག་གནས་གཙང་མ་གཅིག་ཏུ་བཞག་ནས་ས་བརྡུང་བའི་ཆོ་ག་ནི་ཐོ་བ་ལ་བདུད་རྩི་འཁྱིལ་བའི་ཕྱག་རྒྱ་རྡོ་རྗེ་རྩེ་གསུམ་པས་མནན་ཏེ། རིག་པ་ཆེན་མོའི་སྔགས་འདིས་བཏབ་སྟེ་བརྡུང་ངོ་། །བཛྲ་མུདྒ་ར་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུྃ་ཕཊ། ཅེས་ལན་བདུན་བཟླས་ཏེ། རྡོ་རྗེའི་ཐོ་བར་དམིགས་ཤིང་བརྡུངས་ན་ཉོན་མོངས་པ་དང་། བག་ཆགས་ཐམས་ཅད་མ་ལུས་པར་བྱང་ཞིང་བཅོམ་པར་འགྱུར་རོ། །དེ་ནས་འཇིམ་པ་བརྫི་བའི་སྤོས་ཆབ་ལ་བདུད་རྩི་འཁྱིལ་བའི་ཕྱག་རྒྱས་གཏུགས་ཏེ། སྤོས་ཆུ་དེའི་ནང་དུ་ཡང་ཆོས་ཉིད་ཀྱི་ཡི་གེ་ཨ་ཞེས་བྱ་བ་དཀར་པོ་ལས་ཟླ་བའི་དཀྱིལ་འཁོར་འོད་དང་བཅས་པར་དམིགས་ཏེ་ཟླ་བའི་དཀྱིལ་འཁོར་གྱི་འོད་ཟེར་ཆེན་པོ་དེས་སྤོས་ཆུ་དེ་ཁྱབ་པར་གྱུར་ནས། སྤོས་ཆུ་ཉིད་བདུད་རྩིའི་རང་བཞིན་དུ་གྱུར་པར་དམིགས་ནས་རིག་པ་ཆེན་མོའི་སྔགས་འདི་བརྗོད་པར་བྱའོ། །ༀ་ཨ་མྲྀ་ཏེ་ཧཱུྃ་ཕཊ། ཅེས་བྱ་བ་བདུན་བཟླས་ཏེ་བྱིན་གྱིས་བརླབས་ལས། དེ་ཉིད་ཀྱང་བདུད་རྩི་ཆེན་པོའི་ཆུ་རྒྱུན་དང་འདྲ་བར་འགྱུར་རོ། །དེ་ནས་འཇིམ་པ་བརྗི་བའི་སྔགས་ཆེན་མོ་འདི་བརྗོད་པར་བྱའོ། །ༀ་བཛྲ་པྲ་མ་དྷ་ན་ཡ ཧཱུྃ་ཕཊ། ཅེས་ལན་བདུན་བརྗོད་དེ། འཇིམ་པ་དེ་ཉིད་དེ་བཞིན་གཤེགས་པའི་སྐུར་འགྱུར་རོ། །དེ་ནས་འཇིམ་པ་དེ་ཉིད་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པར་བྱིན་གྱིས་བརླབ་པ་ནི་འཇིམ་པ་དེ་ཉིད་ལ་བདུད་རྩི་འཁྱིལ་པའི་ཕྱག་རྒྱ་བཅིངས་ཏེ། རིག་པ་ཆེན་མོའི་གཟུངས་འདི་བརྗོད་པར་བྱའོ། །ན་མོ་རཏྣ་ཏྲ་ཡཱ་ཡ། ཏདྱ་ཐཱ། སཱུཀྵྨེ་སཱུཀྵྨེ། ཤཱནྟེ་ཤཱཏྣེ། དཱནྟེ་དཱནྟེ། ནི་རཱ་ཀུ་ལེ། ཡ་ཤོ་ཡ་ཤོ །པ་ཏི་ཏེ་ཛོ་ཤུདྡྷེ་བི་ཤུདྡྷེ། སརྦ་ཏ་ཐཱ་ག་ཏ་ཨ་དྷིཥྛ་ན། ཨདྷི་ཥྛི་ཏེ། ཨ་ན་མཿཏི་ཧེ་ཏེ་སྭཱ་ཧཱ། ཞེས་བདག་ཉིད་ཀྱིས་རིག་པ་ཆེན་མོ་འདི་ལན་བདུན་གསུམ་ཉི་ཤུ་རྩ་གཅིག་བཟླས་ཏེ། རིག་པ་ཆེན་མོའི་སྔགས་འདིས་བྱིན་གྱིས་བརླབས་ནས་འཇིམ་པ་ཉིད་ལས་ཡེ་ཤེས་ཀྱི་འོད་ཟེར་སྣ་ལྔ་ཕྱོགས་བཅུར་འཕྲོས་པར་འགྱུར་རོ། །ཕྱོགས་བཅུར་འཕྲོས་ནས་ཀྱང་སེམས་ཅན་ཐམས་ཅད་ཀྱི་དོན་ཇི་ལྟར་འདུལ་བར་བྱས་པར་འགྱུར་རོ། །འོད་ཟེར་དེ་དག་སླར་འདུས་པས་ཀྱང་འཇིམ་པ་ཉིད་རིན་པོ་ཆེ་སྣ་ལྔའི་རང་བཞིན་དུ་གྱུར་ནས། དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པའི་རྒྱུ་རྐྱེན་དང་ལྡན་པར་འགྱུར་རོ། །དེ་ལྟར་ཡིད་ཀྱིས་ཀྱང་དམིགས་སོ། །དེ་ནས་འབི་འབི་བྱེད་པའི་ཚེ་རིག་པ་ཆེན་མོ་འདི་བརྗོད་པར་བྱ་སྟེ་བཛྲ་ཨཱ་ཡུ་ཥེ་སྭཱ་ཧཱ། ཞེས་ལན་བདུན་བཟླས་ཏེ་བྱིན་གྱིས་བརླབས་ན། འབི་འབི་ཉིད་ལས་ཡེ་ཤེས་ཀྱི་འོད་ཟེར་གྱི་སྤྲིན་གྱིས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པར་འཕྲོས་ཤིང་ཁྱབ་སྟེ། འགྲོ་བ་མང་པོའི་དོན་བྱེད་པར་འགྱུར་རོ། །འོད་ཟེར་གྱི་སྤྲིན་ཕུང་དེ་དག་སླར་འབི་འབིའི་ནང་དུ་འདུས་པས་ཀྱང་དེ་ཉིད་ཡེ་ཤེས་རིན་པོ་ཆེའི་རང་བཞིན་ཤེལ་སྒོང་ལྟར་ཡོངས་སུ་དག་པར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་འབི་འབིའི་ནང་དུ་བི་མ་ལ་ཨུཥྞི་ཥའི་སྙིང་པོ་མུ་དྲའི་ཕྱག་རྒྱར་བྱས་པའམ། གྲོ་གའམ། རས་སམ། ཤོག་ཤོག་གམ། ཤིང་ཤུན་ལ་སྔགས་བྲིས་པ་དང་། དེའི་ནང་དུ་རིགས་ལྔ་སོ་སོའི་སྙིང་པོ། ༀ་ཧཱུྃ་ཏྲཱཾ་ཧྲཱི་ཨཱ༔ དེ་རྣམས་ཕྲུགས་སུ་སྦྱར་ཏེ། འབི་འབིའི་ཕྱག་རྒྱར་བྱེད་པའམ། ཡི་གེར་ཐིམ་པའམ་གང་ཡང་རུང་སྟེ་ནང་དུ་སྩལ་ན། དེ་བཞིན་གཤེགས་པའི་ཐུགས་ཡེ་ཤེས་དང་ལྡན་པར་འགྱུར་རོ། །ནང་དུ་སྩོལ་བའི་སྔགས་འདི་བརྗོད་པར་བྱའོ། །ༀ་བཛྲ་གརྦྷེ་སྭཱ་ཧཱ། ཞེས་བྱ་བ་བཟླས་ན་དེ་བཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་དེའི་ནང་དུ་འདུས་ཤིང་ཞུགས་པར་འགྱུར་རོ། །ཡིད་ཀྱིས་ཀྱང་དམིགས་སོ། །དེ་ནས་ཙཻ་ཏྱའི་ཕོར་བུའི་ནང་དུ་ཡུངས་ཀར་རམ། ཏིལ་མར་གྱིས་བསྐུ་བའི་སྔགས་རིག་པ་ཆེན་མོ་འདིར་བརྗོད་པར་བྱའོ། །ༀ་ཨ་ར་ཛེ་བི་ར་ཛེ་སཱ་ཧཱ། ཞེས་ལན་གསུམ་བཟླས་ཤིང་བྱིན་གྱིས་བརླབས་ན་དེ་ཉིད་ཐབས་དང་ཤེས་རབ་འབྲེལ་པ་ལས་ཆོས་ཀྱི་དབྱིངས་ཉིད་ཀྱི་མཆོད་རྟེན་དུ་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་མཆོད་རྟེན་འདེབས་པའི་ཚེ་རིག་པ་ཆེན་མོ་འདི་བརྗོད་པར་བྱའོ། །ༀ་བཛྲ་མུདྒ་ར་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུྃ་ཕཊ། ཅེས་བཟླས་ཤིང་མཆོད་རྟེན་བཏབ་ན་དབྱིངས་དང་ཡེ་ཤེས་གཉིས་སུ་མེད་པར་འབྲེལ་བ་ལས་ཆོས་ཀྱི་སྐུའི་མཆོད་རྟེན་དུ་འགྱུར་རོ། །དེ་ནས་བི་མ་ལ་ཨུཥྞཱི་ཥའི་སྙིང་པོ་གང་ནས་བྱུང་བས་ཀྱང་མཆོད་རྟེན་བཏབ་ན་དབྱིངས་དང་ཡེ་ཤེས་གཉིས་སུ་མེད་པར་འབྲེལ་པ་ལས་ཆོས་ཀྱི་སྐུའི་མཆོད་རྟེན་འབྱམས་ཀླས་པར་འགྱུར་རོ། །དེ་ནས་མཆོད་རྟེན་ཕོར་བུའི་ནང་ནས་འབྱུང་བའི་རིག་པ་ཆེན་མོའི་སྔགས་འདི་བརྗོད་ལ་དབྱུང་ངོ་། །ༀ་དྷརྨ་དྷ་ཏུ་ཡེ་སྭཱ་ཧཱ། དྷརྨ་དྷ་ཏུ་གརྦྷེ་སྭཱ་ཧཱ། ཞེས་ལན་བདུན་བཟླས་མཆོད་རྟེན་ཕྱུང་ན་ཐབས་དང་ཤེས་རབ་གཉིས་སུ་མེད་པར་འབྲེལ་བ་ལས་མཆོད་རྟེན་ཆོས་ཀྱི་སྐུ་འབྱམས་ཀླས་པ་འབྱུང་སྟེ། འགྲོ་བ་སེམས་ཅན་ཐམས་ཅད་ཀྱི་དོན་འཁོར་བ་མ་སྟོངས་ཀྱི་བར་དུ་ཕུན་སུམ་ཚོགས་པ་མཛད་པར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་མཆོད་རྟེན་སྣོད་ནས་ཕྱུང་བ་ལ་འཁོར་ལོ་གཟུགས་པའི་རིག་པ་ཆེན་མོའི་སྔགས་འདི་བརྗོད་པར་བྱའོ། །ༀ་པྲ་མ་ན་ཡེ་སྭཱ་ཧཱ། ཞེས་བཟླས་ནས་འཁོར་ལོ་བཙུགས་ན་རིན་པོ་ཆེའི་གདུགས་དང་རིན་པོ་ཆེའི་ཏོག་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་ཤར་བུ་དང་། དར་གྱི་ལྷབ་ལྷུབ་ལ་སོགས་པ་རྣམས་ཀྱིས་བརྒྱན་ཏེ། མྱ་ངན་འདས་པའི་ཡོན་ཏན་སྣ་ཚོགས་ཀྱིས་བརྒྱན་ཏེ། འགྲོ་བའི་དོན་ཡིད་བཞིན་དུ་མཛད་པར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་མཆོད་རྟེན་ལ་ན་བཟའ་གསོལ་བའི་ཚེ་རིག་པ་ཆེན་མོ་འདི་བཟླས་ལ་གསོལ་ཏོ། །ༀ་དྷརྨ་དྷ་ཏུ་སྭ་བྷཱ་བ་བི་ཤུདྡྷེ་དྷརྨ་ཏེ་སྭཱ་ཧཱ། ཞེས་ལན་མང་དུ་བཟླས་ཏེ་བཏབ་ན་ཆོས་ཀྱི་དབྱིངས་རྣམ་པར་དག་པའི་དོན་དང་ལྡན་པར་འགྱུར་རོ། །དེ་ནས་མཆོད་རྟེན་བཏབ་པའི་དཀྱིལ་འཁོར་མཆོད་རྟེན་ལྔར་བཏབ་ན་དཀྱིལ་འཁོར་ཡང་ཕྱོགས་བཞི་དབུས་དང་ལྔར་བྲི་བར་བྱའོ། །དེ་བཞིན་དུ་མཆོད་རྟེན་གྱི་གྲངས་བརྒྱའམ། སྟོང་ངམ་གར་བཏབ་པ་དེའི་གྲངས་དང་མཆོད་རྟེན་གྱི་ཤོང་ཚད་ཀྱི་དཀྱིལ་འཁོར་གྱི་རེའུ་མིག་རྡོའི་སྟེགས་བུ་བརྩིགས་པ་ནི་སའམ་རྡོ་ལེབ་བམ། ཤིང་ལ་སོགས་པ་ལ་དཀྱིལ་འཁོར་གྲུ་བཞིར་བགྱིས་ཏེ། འོག་གི་ཁྲི་ཡང་སེང་གེའི་ཁྲིའམ། རིན་པོ་ཆེའི་ཁྲིའམ། པདྨའི་ཁྲི་སྟེགས་སུ་བྱས་ལ་དེའི་སྟེང་དུ་གོ་མ་ཡེ་དང་སྤོས་ཆུས་ཆག་ཆག་བཏབ་སྟེ། དབུས་དང་ཕྱོགས་བཞིར་མཆོད་རྟེན་བཞུགས་པའི་ས་ཀུན་ཏུ་གུར་གུམ་དང་། ཙནྡན་གྱི་ཆུས་ཟླུམ་པོར་བསྐུས་ལ་སྲད་བུས་ཐིག་བཏབ་ལ་དཀྱིལ་འཁོར་བྲི་བར་བྱ་སྟེ། དཀྱིལ་འཁོར་བྲི་བ་ཡང་མཆོད་རྟེན་ལྔར་བཏབ་ན་དཀྱིལ་གྱི་ཕྱོགས་བཞི་དབུས་དང་ལྔར་བྲི་བར་བྱའོ། །དེ་བཞིན་མཆོད་རྟེན་གྱི་གྲངས་བརྒྱའམ། སྟོང་གང་བཏབ་པ་དེའི་གྲངས་ཀྱི་མཆོད་རྟེན་གྱི་ཤོང་ཚད་ཀྱི་དཀྱིལ་འཁོར་རེའུ་མིག་རྡོ་རྗེ་དྲྭ་བའི་ཐིག་གིས་ས་བཅད་པར་བྱའོ། །མཆོད་རྟེན་བཞག་པའི་ས་གཞི་ཐམས་ཅད་པདྨ་འདབ་མ་བརྒྱད་པར་འབྲི་བར་བྱའོ། །དེ་ནས་མཆོད་རྟེན་དཀྱིལ་འཁོར་དུ་བཞུགས་པའི་ཚེ་རིག་པ་ཆེན་མོའི་སྔགས་འདི་བརྗོད་ལ་བཞུགས་སུ་གསོལ་ལོ། །ༀ་སུ་པྲ་ཏིཥྛ་སྟུ་པེ་སྭཱ་ཧཱ། ཞེས་ལན་གསུམ་བཟླས་ཏེ་མཆོད་རྟེན་བཞག་ན་བདག་དང་གཞན་གྱི་དོན་ཕུན་སུམ་ཚོགས་པར་སྦྱོང་བར་འགྱུར་རོ། །དེ་ནས་མཆོད་རྟེན་དགོད་པའི་རིམ་པ་ནི་དང་པོ་དབུས་སུ་དགོད། དེ་ནས་ཤར་དུ་དགོད། དེ་ནས་ལྷོ་རུ་དགོད། དེ་ནས་ནུབ་ཏུ་དགོད། དེ་ནས་བྱང་གི་བར་དུ་རིམ་པ་བཞིན་དུ་དགོད་པར་བྱའོ། །དགོད་པའི་ཚེ་རིག་པ་ཆེན་མོའི་སྔགས་འདི་བརྗོད་པར་བྱའོ། །ༀ་བཛྲ་པདྨ་ས་མ་ཡེ་སྭཱ་ཧཱ། ཞེས་ལན་གསུམ་དུ་བཟླས་ལ་རྡོ་རྗེ་དང་པདྨའི་གདན་ལ་བཞུགས་སུ་གསོལ། ཞེས་བྱས་ལ་ས་གཞི་དང་། ནམ་མཁའི་ཁམས་དང་། རྒྱ་མཚོའི་མཇིངས་ཐམས་ཅད་མཆོད་རྟེན་གྱིས་གང་བར་ཡིད་ཀྱིས་ཀྱང་དམིགས་སོ། །གཞན་ཡང་མཆོད་རྟེན་རེ་རེ་བཏབ་ནས་ཐལ་བྱུང་དཀྱིལ་འཁོར་སྟེང་དུ་བཞུགས་ལ། སྤོས་དང་། མེ་ཏོག་ལ་སོགས་པ་མཆོད་པ་རྣམ་པ་ལྔས་མཆོད་ཅིང་བཞུགས་སུ་གསོལ། མཆོད་རྟེན་གྱི་ཁ་དོག་ལ་སོགས་པ་བཀུ་བ་ནི་ཞི་བའི་དཀར་པོ། རྒྱས་པའི་སེར་པོ། དབང་གི་དམར་པོ། བསྲུང་བའི་ལྗང་གུར་དམིགས་ཏེ། ན་བཟའ་ཡང་དེ་དེ་བཞིན་དུ་གསོལ་ལ་ཡིད་ཀྱིས་ཀྱང་དེ་བཞིན་དུ་དམིགས་སོ། །དེ་ནས་མཆོད་རྟེན་གྱི་དཀྱིལ་འཁོར་བྱིན་གྱིས་བརླབ་པར་བྱ་སྟེ། དཀྱིལ་འཁོར་གྱི་སྟེང་དུ་ཡི་གེ་རཾ་དམར་པོ་གནས་པ་ལས་རིག་པ་ཆེན་མོའི་སྔགས་འདི་བརྗོད་པར་བྱའོ། །ཧཱུྃ་རཾ་སྭཱ་ཧཱ། ཞེས་ལན་གསུམ་བཟླས་པས་དེ་ཉིད་ཡེ་ཤེས་ཀྱི་མེ་དཔུང་ཆེན་པོར་རབ་ཏུ་འབར་ནས་གནས་དེ་དག་གི་རྟོག་པ་རྣམ་པར་སྦྱངས་ཏེ། དཀྱིལ་འཁོར་གྱི་གཞི་དེ་ཉིད་རིན་པོ་ཆེ་སྣ་ལྔ་ལས་གྲུབ་པའི་དཀྱིལ་འཁོར་དུ་འགྱུར་རོ། །དེ་བཞིན་ཡིད་ཀྱིས་ཀྱང་དམིགས་སོ། །དེ་ནས་དཀྱིལ་འཁོར་ལེའུ་ཚེ་ལྔའམ། བརྒྱའམ། སྟོང་ངམ། གང་བྲིས་པའི་དབུས་རྣམས་སུ་ཡི་གེ་ཨ་དཀར་པོ་གནས་པ་ལས་རིག་པ་ཆེན་མོའི་སྔགས་འདི་བརྗོད་པར་བྱ་སྟེ། ༀ་ཨ་ཡ་ཙནྡྲ་མཎྜལ་ཧཱུྃ་ཕཊ། ཅེས་གྲངས་ཇི་ཙམ་རན་པར་བཟླས་ན་མཆོད་རྟེན་གྱི་གདན་ཟླ་བའི་དཀྱིལ་འཁོར་རེ་རེར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་མཆོད་རྟེན་གྱི་ཆོ་ག་མཛད་པའི་ཚེ་ཁ་ཤར་ནུབ་གང་བ་དེར་བལྟས་ལ། བདག་ཉིད་རྡོ་རྗེ་འཛིན་པའི་སྐུ་ཕྱག་རྒྱ་ཆེན་པོར་ཏིང་ངེ་འཛིན་གྱིས་བསྒྱུར་ཏེ། སྙིང་གར་ཟླ་བའི་དཀྱིལ་འཁོར་གྱི་སྟེང་རྡོ་རྗེ་རྩེ་ལྔ་པ་ཡེ་ཤེས་ཀྱི་འོད་དཔུང་འཕྲོ་བ་གནས་པར་བྱས་ལ། སྐུ་དང་བ་སྤུའི་གསེབ་ཐམས་ཅད་ནས་ཀྱང་ཡེ་ཤེས་ཀྱི་འོད་ཟེར་དང་། སངས་རྒྱས་ཀྱི་དཀྱིལ་འཁོར་དང་བཅས་པའི་སྤྲིན་ཕུང་བཞིན་དུ་མཐའ་འབྱམ་ཀླས་པར་འཕྲོས་ཤིང་སེམས་ཅན་གྱི་ཁམས་ཐམས་ཅད་དུ་བྱིན་གྱིས་བརླབས་ཤིང་དོན་མཛད་ནས་སླར་སྐུའི་ནང་དུ་ཐིམ་པར་འགྱུར་ཏེ། དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ནས་མཆོད་རྟེན་གྱི་གཞལ་ཡས་ཁང་བསྐྱེད་པ་ནི་མཆོད་རྟེན་དཀྱིལ་འཁོར་དུ་བཞག་པ་ལ་རྡོ་རྗེ་དབྱིངས་མའི་ཕྱག་རྒྱ་བཅིང་ནས་མཆོད་རྟེན་གྱི་སྟེང་དུ་རེག་པར་བྱས་ལ། རིག་པ་ཆེན་མོའི་སྔགས་འདི་བརྗོད་པར་བྱའོ། །ༀ་བཛྲ་དྷ་ཏུ་ཨ་དྷི་ཏིཥྛ་ཧཱུྃ། ཞེས་བཟླས་ཏེ་བྱིན་གྱིས་བརླབས་པས་རིན་པོ་ཆེ་སྣ་ཚོགས་ཀྱི་གཞལ་མེད་ཁང་གི་ནང་ན་རིན་པོ་ཆེའི་ས་གཞི་དང་། ཆོས་ཀྱི་དབྱིངས་ཀྱི་དཀྱིལ་འཁོར་གྱི་སྟེང་ན་ཟླ་བའི་གདན་གྱི་དབུས་ན་མཆོད་རྟེན་བཞུགས་པར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །དེ་ལྟར་དུ་མཆོད་རྟེན་རེ་རེ་བཏབ་སྟེ། བཞག་ནས། དེ་ལ་མཆོད་པའི་རྣམ་པས་མཆོད་ནས་ནི་སེང་གེའི་རྒྱལ་མཚན་དང་། འབྲས་ཆན་དང་། སྤྱན་གཟིགས་སྣ་ཚོགས་དང་འདྲ་ཞིང་དགོད་པ་དང་། བླ་རེ་དང་། འཕན་དང་། གདུགས་དང་། ཕྲེང་བ་དང་། བདུག་པ་དང་། མར་མེ་དང་། སྤོས་དང་། མཆོད་པའི་རྣམ་པ་རྣམ་པར་དག་པར་སྦྱང་པའི་རིག་པ་ཆེན་མོ་འདི་བརྗོད་པར་བྱའོ། །ༀ་སརྦ་པཱུ་ཛ་པུཥྤེ་སྭཱ་ཧཱ། ཞེས་བཟླས་ཏེ་བྱིན་གྱིས་བརླབས་པས་ཀུན་ཏུ་བཟང་པོའི་མཆོད་པའི་སྤྲིན་ཕུང་ཕུན་སུམ་ཚོགས་པས་རྣམ་པས་འཁྲིགས་ཤིང་ཆར་གྱི་རྒྱུན་བཞིན་དུ་འབབས་པར་འགྱུར་རོ། །དེ་བཞིན་དུ་ཡིད་ཀྱིས་ཀྱང་དམིགས་སོ། །མཆོད་རྟེན་མཆོད་པ་རྣམ་པ་ལྔ་པོ་ཆ་རེ་རེས་མཆོད་ཅིང་། ཡོན་དུ་དར་བུ་ཆུང་དང་། འཕན་ལ་སོགས་པའི་བླ་རེ་དང་། གདུགས་བུ་ཆུང་ཡང་རུང་སྟེ་རེ་རེ་དབུལ་ལོ། །དེ་ལྟར་ཆོ་ག་བཞིན་དུ་བཏབ་པ་ལགས་ན་དགོངས་པ་རྒྱུད་ཀྱི་ཏིང་ངེ་འཛིན་གསལ་བར་བྱ་བ་ནི། མཆོད་རྟེན་གྱི་ཕྱོགས་བཞི་དབུས་དང་ལྔར་རིགས་ལྔའི་སངས་རྒྱས་སྐུ་མདོག་དང་། རྒྱན་དང་། ཆ་ལུགས་དང་། འཁོར་ཕུན་སུམ་ཚོགས་པ་ཚུལ་བཞིན་དུ་དགོངས་ཏེ་དམིགས་པར་བྱའོ། །ཡེ་ཤེས་ལྔ་ལས་གྲུབ་པའི་མཆོད་རྟེན་དེ་ཡང་རང་བཞིན་གྱིས་རྣམ་པར་དག་ཅིང་གསལ་བ་དེ་དག་གི་བུམ་པའི་དབུས་སུ་བི་མ་ལ་ཨུཥྞཱི་ཥའི་གཟུངས་ཀྱི་སྙིང་པོ་དང་། རིགས་ལྔ་སོ་སོའི་སྙིང་པོ་འབྲུ་རེ་རེ་ཁ་དོག་གསེར་བཙོ་མ་བཞིན་དུ་དྭངས་ཤིང་འཚེར་བ་གཅིག་ཏུ་དམིགས་ལ། དེ་དག་ལས་ཡེ་ཤེས་ཀྱི་འོད་ཟེར་སྣ་ཚོགས་འབྱམས་ཀླས་པ་རིགས་ལྔ་ཕྱོགས་བཅུར་འཕྲོས་པ་ལས་དེ་བཞིན་གཤེགས་པའི་སྐུའི་སྤྲིན་གྱིས་ནམ་མཁའི་མཐའ་ཀླས་ཤིང་ཆོས་ཀྱི་དབྱིངས་ཀྱི་མུར་ཐུགས་པར་བརྒྱན་ཅིང་ཐུབ་པར་གྱུར་ནས་འཇིག་རྟེན་གྱི་ཁམས་ཐམས་ཅད་བྱིན་གྱིས་བརླབས་ཏེ། འགྲོ་བ་ཐམས་ཅད་ཀྱི་དོན་འདི་མཛད་ཅིང་རེ་བ་བསྐང་ནས་སླར་འདུས་ཏེ། དེ་ཉིད་ཀྱི་དབུའི་གཙུག་དང་། ཐུགས་ཀར་ཕོག །ཕྲིན་ལས་ཀྱི་སྒྲིབ་པ་ལ་སོགས་པ་རྣམ་པར་དག་སྟེ། སྐུ་དང་། གསུང་དང་། ཐུགས་རྡོ་རྗེ་ཉིད་དུ་གྱུར་པར་དམིགས་ལ། དུང་ཕོར་གྱི་ནང་དུ་སྤོས་ཆབ་དང་། དྲི་སྣ་ཚོགས་སྦྱར་བའི་ཨརྒྷས་གསོལ་ཏོ། །ཨརྒྷའི་ཕྱག་རྒྱ་བཅིངས་བ་དེའི་སྟེང་དུ་དུང་ཕོར་བཞག་ལ་སྤོས་ཆུའི་ནང་དུ་ཨ་དཀར་པོ་ལས་ཟླ་བའི་དཀྱིལ་འཁོར་དུ་གྱུར་པའི་འོད་ཟེར་གྱིས་སྤོས་ཆུ་ཉིད་ཡེ་ཤེས་ཀྱི་བདུད་རྩིའི་རང་བཞིན་དུ་གྱུར་པར་དགོངས་ཤིང་དམིགས་ཏེ། མཆོད་པ་འབུལ་བའི་རིག་པ་ཆེན་མོ་འདི་བརྗོད་པར་བྱའོ། །ༀ་ཨ་མྲྀ་ཏེ་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་བཟླས་ནས་དབུའི་སྤྱི་བོར་ལན་གསུམ་དུ་བདུགས་ཤིང་སྦྲིངས་ཏེ་ཕུལ་བས་འཕགས་པ་ཐམས་ཅད་མཉེས་པར་འགྱུར་རོ། །ཚིགས་སུ་ཡང་འཕགས་པ་ཐམས་ཅད་མཉེས་པར་གྱུར་ཅིག་ཅེས་ཀྱང་བརྗོད་དོ། །དེ་ནས་ཕྱག་རྒྱའི་རྒྱ་མཚོའི་སྤྲིན་གྱིས་དབུའི་གཙུག་ཏུ་བཀྲམ་སྟེ་ཡེ་ཤེས་ཀྱི་སྐུའི་ནང་དུ་འདུས་ཤིང་ཕུན་སུམ་ཚོགས་པའི་དབང་ཐམས་ཅད་བསྐུར་བར་དམིགས་སོ། །དེ་ནས་བི་མ་ལ་ཨུཥྞི་ཥའི་གཟུངས་འདི་བཀླག་ཅིང་ལན་ཅི་མང་དུ་བརྗོད་པར་བྱས་ནས་བསྔོ་བ་དང་སྨོན་ལམ་རྒྱས་གདབ་པར་བྱའོ། །ཆོ་ག་འདི་བཞིན་དུ་རྫོགས་པར་བྱ་བ་མི་བདེ་ན་རང་གི་ལྷ་ཉིད་ཀྱི་ཏིང་ངེ་འཛིན་གྱིས་སྐུར་སྒྱུར་བ་ལས་དགོངས་པ་མཉམས་པར་བྱ་སྟེ། མཆོད་རྟེན་དང་། མཆོད་པའི་ཡོ་བྱད་ལ་སོགས་པ་ཐམས་ཅད་རང་བཞིན་གྱིས་ཆོས་ཀྱི་དབྱིངས་རྣམ་པར་དག་པར་དགོངས་ཏེ། མཆོད་རྟེན་བཏབ་ན་ཡང་ཆོ་ག་རྒྱས་པར་བྱ་བ་དང་འདྲ་སྟེ་འགལ་བ་མེད་དོ། །དེ་བཞིན་དུ་མ་གྱུར་ན་ཡང་བི་མ་ལ་ཨུཥྞཱི་ཥའི་གཟུངས་འདི་ཀློག་པ་དང་། འཛིན་པ་དང་། ཡི་གེར་འདྲི་ཞིང་འཆང་བས་མཆོད་རྟེན་བཏབ་ན་ཆོ་ག་རྒྱས་པར་མཛད་པ་ཉིད་འདི་ཡིན་ཏེ། མཆོད་རྟེན་དེ་དེ་བཞིན་གཤེགས་པའི་སྐུར་བསྒྱུར་ནས་བདག་གཞན་གྱི་དོན་ཕུན་སུམ་ཚོགས་པ ར་བྱེད་པར་འགྱུར་རོ། །བི་མ་ལ་ཨུཥྞི་ཥའི་གཟུངས་འདི་མ་བརྗོད་ན་མཆོད་རྟེན་ལ་མཆོད་པ་ཕུལ་ཞིང་མངའ་གསོལ་ཡང་མངའ་ཕུལ་བར་མི་འགྱུར་རོ། །གཞུང་ལས་ཀྱང་འདི་སྐད་ཅེས་འབྱུང་ངོ་། །རིག་སྔགས་གསང་སྔགས་ཐམས་ཅད་ཀྱི། །སྔགས་ཀྱི་རང་བཞིན་མི་གསལ་ཞིང་། །དགོངས་པའི་ཏིང་འཛིན་མི་གསལ་བས། །མཆོད་རྟེན་ལ་སོགས་སྐུ་གཟུགས་རྣམས། །བཏབ་ཀྱང་རྫོགས་པར་ཡོང་མི་འགྱུར། །ཞེས་འབྱུང་ངོ་། །གང་ཞིག་གསང་སྔགས་དང་དགོངས་པར་ལྡན་པས་མཆོད་རྟེན་དང་སྐུ་གཟུགས་བཏབ་པའི་ཡོན་ཏན་འདི་ཇི་སྐད་དུ། མཆོད་རྟེན་ཆོ་ག་དམ་པ་འདི། །བསོད་ནམས་བགྱིས་པའི་ཁྱད་པར་ནི། །གཟུངས་འདི་བཟླས་པའི་མཆོད་རྟེན་གྱིས། །གཅིག་བཏབ་བྱེ་བ་བཏབ་དང་འདྲ། །ཡུན་རིང་དུས་ནས་འཁོར་བ་ཡི། །མཚམས་མེད་ལྔ་དང་སྡིག་དཔུང་རྣམས། །ཇི་སྙེད་ཡོད་པ་མ་ལུས་འབྱུང་། །ཚེ་རིང་ཕུན་སུམ་ཚོགས་པར་འགྱུར། །ཚེ་རབས་གཞན་དུ་སྐྱེ་བ་ན། །རིགས་མཆོག་དམ་པར་སྐྱེས་ནས་ཀྱང་། །ལོངས་སྤྱོད་མཆོག་དང་རབ་ལྡན་ཞིང་། །འཁོར་ལོས་སྒྱུར་བའི་རྒྱལ་པོར་སྐྱེ། །ཚེ་རབས་སྔ་ཕྱི་དྲན་པར་འགྱུར། །དུས་གསུམ་འཇིག་རྟེན་ཐམས་ཅད་དུ། །དཀོན་མཆོག་གསུམ་དང་མི་འབྲལ་ཅིང་། །བགེགས་དང་གནོད་པས་དེ་མི་སྐྱོད། །བསམ་པ་ཡོངས་སུ་འགྲུབ་པར་འགྱུར། །མཐར་ནི་མངོན་པར་འཚང་རྒྱའོ། །བི་མ་ལ་ཨུཥྞཱི་ཥའི་གཟུངས་རྫོགས་སོ།། །།