རྡོ་རྗེ་རྣམ་པར་འཇོམས་པ་ཁྲོ་དཀར་གྱི་གཟུངས་ཀྱི་ཆོ་ག་དབང་བསྐུར་དང་བཅས་པ་དག་བྱེད་ཤེལ་གྱི་བུམ་བཟང་། བློ་གྲོས་མཐའ་ཡས།
རྡོ་རྗེ་རྣམ་པར་འཇོམས་པ་ཁྲོ་དཀར་གྱི་གཟུངས་ཀྱི་ཆོ་ག་དབང་བསྐུར་དང་བཅས་པ་དག་བྱེད་ཤེལ་གྱི་བུམ་བཟང་ཞེས་བྱ་བ་བཞུགས་སོ། །ན་མཿཤྲཱི་གུ་རུ་སརྦ་ཏནྟྲ་པ་ཏ་ཡེ། ཟླ་ཤེལ་ལྟར་དཀར་ཉེས་ལྟུང་སྒྲིབ་པའི་དཔུང་། །རྣམ་པར་འཇོམས་མཛད་རྡོ་རྗེ་བདུད་རྩིའི་རྒྱུན། །བསམ་པ་ཡོངས་སུ་རྫོགས་པའི་དཔྱིད་དུ་འབེབས། །འགྲོ་མང་མགོན་དུ་ཤར་བ་དེ་ལ་འདུད། །དེ་ཉིད་སྒྲུབ་པའི་ཐབས་དང་བྱིན་རླབས་སྒོ། །གསར་རྙིང་ཀུན་ལ་རྒྱ་ཆེར་གྲགས་མོད་ཀྱི། །སྔ་འགྱུར་བཀའ་སྲོལ་འདི་ཉིད་རྙེད་དཀའ་བས། །ཡིག་ཆ་རྙིང་པའི་སྙིང་པོ་བསྡུ་བར་བྱ། །གསར་རྙིང་བརྒྱུད་པའི་བཀའ་སྲོལ་གཉིས་ལྡན་གྱི་རྣམ་འཇོམས་ཁྲོ་དཀར་ལྷ་ཉི་ཤུ་པའི་གཟུངས་ཆོག་རྒྱལ་བ་ཀཿཐོག་པའི་ཕྱག་བཞེས་ལྟར་འཆད་པ་ལ་གསུམ། སྔོན་འགྲོ་དཀྱིལ་འཁོར་དང་ཆོ་ག་ལ་འཇུག་པའི་བྱ་བ། དངོས་གཞི་རང་དང་གཞན་གྱི་དོན་ཇི་ལྟར་བསྒྲུབ་པ། རྗེས་དེ་དག་གི་མཇུག་བསྡུ་བའི་ཚུལ་ལོ། །དང་པོ་ལ་གཉིས། སྦྱོར་བའི་སྔོན་འགྲོ་དང་། ཆོ་གའི་སྔོན་འགྲོའོ། །སྦྱོར་བ་ལ་གཉིས། དཀྱིལ་འཁོར་བྲི་བ་དང་། རྫས་བཤམ་པའོ། །དང་པོ་ནི། གཙང་ཞིང་ཡིད་དུ་འོང་བའི་གནས་སུ་དུས་བཟང་པོ་ལ་བརྩམས་པར་བྱ་སྟེ། ཐོག་མར་དཀར་གཏོར་གཙང་མ་ལ་ཆབ་བྲན་ཏེ། ༀ་བཛྲ་ཨ་མྲྀ་ཏེ་ཧཱུྃ་ཕཊ་ཀྱིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་གཏོར་རྫས་རྣམས་འདོད་ཡོན་བདུད་རྩིའི་ཕུང་པོ་ཟད་མི་ཤེས་པར་བསམ་ལ། ཨ་ཀཱ་རོ་བརྗོད་པས་བརླབ། བྷཱུ་མི་པ་ཏ་ས་པ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོ་ནས། ག་ག་ན་ཁཾ་བ་ལིཾ་ཏ་སྭཱ་ཧཱས་ཕུལ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་འདི་ནི། །བདག་ཞུ་ཁྱེད་ཀྱིས་སྩལ་དུ་གསོལ། །ཞེས་གཏོར་མ་ཕུལ་བས་གནང་བ་བྱིན་པར་བསམ། ནག་ཕྱོགས་རྣམས་གོང་གི་ལས་སྔགས་བརྗོད་ཅིང་གུ་གུལ་དུད་པ་སོགས་ཀྱིས་བསྐྲད། ཆོས་ཉིད་རྣམ་དག་སྔགས་བརྗོད་ལ་ས་གཞི་སྟོང་ཉིང་དུ་མོས། གཟུངས་ཐུང་བརྗོད་ཅིང་དྲི་ཆབ་འཐོར་བས་ས་གཞིའི་ཉེས་སྐྱོན་དག་པར་མོས་པ་ནི་ས་ཆོག་མདོར་བསྡུས་པའོ། །དེ་ནས་སྟེགས་བུ་འདོམ་གང་གྲུ་བཞི་སྤོས་ཆབ་ཀྱི་ཆག་ཆག་གདབ་ལ། ཁ་དོག་ལྔ་པའི་སྲད་བུ་ལ་བསངས་གཏོར་བྱས། མདུན་གྱི་ནམ་མཁར་རྒྱལ་བ་སྲས་བཅས་བཞུགས་པ་ལ་ཡིད་ཀྱི་སྤྲུལ་པས་མཆོད་པར་མོས་ཏེ། ལས་སྔགས་བཟླ་བཞིན་དུ་ཐིག་སྐུད་ཡེ་ཤེས་ཀྱི་རང་བཞིན་དུ་མོས་ཏེ་ཞི་དཀྱིལ་སྤྱི་འགྲོའི་ཐིག་གདབ། དཔའ་བོ་འབྲུ་ལྔ་བརྗོད་པས་རིག་ལྔ་འོད་དུ་ཞུ་བའི་ཚོན་རྩིར་མོས་ཏེ། ལས་སྔགས་བཟླ་བཞིན་དུ་ལྟེ་བ་དཀར་པོ། དེ་རྒྱབ་འདབ་བཞི་ཕྱོགས་ཚོན། དེ་རྒྱབ་འཁོར་ལོ་རྩིབས་བཅུ་སེར་པོ། ལྷ་སྣམ་དང་སྒོ་རྣམས་ཕྱོགས་མདོག །རྟ་བབས་རྣམ་བཞི། རྡོ་ར་མེ་རི་སོགས་སྤྱི་ལྟར་བྲི། མི་འགྲུབ་ན་རས་བྲིས་སམ། མཎྜལ་ལ་མེ་ཏོག་གི་ཚོམ་བུ་དབུས་སུ་གཙོ་འཁོར་ལྔ། དེ་རྒྱབ་བཅུ། དེ་རྒྱབ་བཞི་རྣམས་བཀོད། ཕྱི་མ་གཉིས་ལྟར་ན་ཐོག་མའི་ས་ཆོག་མ་བྱས་ཀྱང་རུང་ངོ་། །གཉིས་པ་ནི། རིན་པོ་ཆེའི་བུམ་པ་སྐྱོན་མེད་པ་གཉིས་འདུ་བྱས་ཏེ། སུམྦྷ་ནི་བརྗོད་ལ་ཡུངས་ཀར་གྱིས་བྲབ། ལས་སྔགས་བརྗོད་ལ་གུ་གུལ་བདུག །སྭ་བྷཱ་ཝ་བརྗོད་ཅིང་སྲོག་ཆགས་མེད་པའི་ཆུས་སུམ་གཉིས་ཙམ་བཀང་ལ། དེ་ནས། ༀ་པྲ་མ་ཏི་པཉྩ་སིདྡྷི་ཨཱཿཧཱུྃ། ཞེས་འབྲུ་ལྔ་བླུགས། ༀ་ཨ་མྲྀ་ཏ་པཉྩ་སིདྡྷི་ཨཱཿཧཱུྃ། སྨན་ལྔ། ༀ་ཀརྨ་པཉྩ་སིདྡྷི་ཨཱཿཧཱུྃ། སྙིང་པོ་ལྔ། ༀ་རཏྣ་པཉྩ་སིདྡྷི་ཨཱཿཧཱུྃ། རིན་ཆེན་ལྔ། ༀ་དྷཱུ་པེ་པཉྩ་སདྡྷི་ཨཱཿཧཱུྃ། དྲི་ལྔ་རྣམས་བླུགས། ༀ་ཀཉྩ་ལི་ཀ་ཨ་བྷི་ཥིཉྩ་ཨཱཿཧཱུྃ། ཞེས་པས་མགུལ་ཆིངས་བཅིང་ངོ་། །ༀ་བླག་ཤ་ཀལྤ་ཨ་བྷི་ཥིཉྩ་ཨཱཿཧཱུྃ། ཞེས་པས་ཁ་རྒྱན་གཟུག་གོ། །ༀ་ཛྙཱ་ན་བཛྲ་ཨ་བྷི་ཥིཉྩ་ཨཱཿཧཱུཾ། ཞེས་རྡོ་རྗེ་དང་གཟུངས་ཐག་གདགས་ལ། ཉེ་སྙིང་མཐར། ས་མ་ཡ་ཏིཥྛ་བཛྲ་སྟྭཾ། ཞེས་བརྗོད་བཞིན་པས་རྣམ་རྒྱལ་དཀྱིལ་འཁོར་གྱི་དབུས་སུ་སྟེགས་བུ་ལ་བཀོད། ལྷ་ཙཀ་རྣམས་དེ་མཉམ་དང་། ཕྱག་རྒྱ་ལྔའི་ཙཀླི། ལས་བུམ་བྱང་ཤར། མཐའ་སྐོར་ཤར་དུ་ཡོན་ཆབ། བྱང་ཤར་དུ་དྲི་ཆབ། ཤར་ལྷོ་བདུག་སྤོས། ལྷོར་མཎྜལ། ལྷོ་ནུབ་ཏུ་མེ་ཏོག །ནུབ་ཏུ་ཞལ་ཟས། ནུབ་བྱང་དུ་མར་མེ། བྱང་དུ་རོལ་མོ་རྣམས། མདུན་རྒྱབ་གང་བདེར་གཏོར་དབང་དང་འབུལ་གཏོར་ཕྱོགས་འཐུས་ཟླུམ་གཏོར་བརྗིད་ལྡན་ལ་བཤོས་ཕྲན་བཅུ་བཞིས་བསྐོར་བ་དཀར་པོ་རྒྱན་གྱིས་སྤྲས་པ་དང་། དཀར་གཏོར་ཆ་བཞི་ཡང་དེའི་གཡས་གཡོན་དུ་བཤམ། འབྱོར་ན་སྐུ་གསུང་ཐུགས་ཀྱི་རྟེན་དང་། དཀྱིལ་འཁོར་གྱི་རྒྱན་རྫས་རྣམས་བག་དྲོ་ཞིང་ཡིད་དུ་འོང་བ་བཀོད། གཞན་ཡང་སྔོན་གཏོར། བསང་ཆུ། མིག་དར་མེ་ཏོག་སོགས་ཉེར་བར་མཁོ་བའི་ཡོ་བྱད་རྣམས་ཉེ་བར་བསྡོགས་པར་བྱའོ། །གཉིས་པ་ཆོ་གའི་སྔོན་འགྲོ་ལ་ལྔ། དྲི་མ་བཀྲུ་བ། བསགས་སྦྱང་བྱ་བ། སྔོན་གཏོར་བཏང་བ། མཆོད་རྫས་བརླབ་པ། སྐྱབས་སེམས་བྱ་བའོ། །དང་པོ་ནི། སྒྲུབ་པ་པོ་གོས་གསར་གྱོན། བདེ་བའི་སྟན་ལ་ཁ་ཤར་རམ་བྱང་དུ་བལྟ་བས་འཁོད་དེ། ལག་པ་གཡོན་དུ་ཆུ་གཙང་བླུག་ལ། ༀ་ཤུདྡྷེ་བི་ཤུདྡྷེ་ཨ་ཨ་ཨ་སྭཱ་ཧཱ། ཞེས་གསང་བའི་སྲིན་ལག་གིས་ཆུ་བླངས་ཏེ། ལུས་ཀྱི་གནས་རྣམས་སུ་ཉེ་བར་རེག་པས་ལས་དག་པར་བསམ་མོ། །གཉིས་པ་ནི། མདུན་གྱི་ནམ་མཁར་སངས་རྒྱས་དང་བྱང་ཆུབ་སེམས་དཔའ་རྣམས་མངོན་སུམ་བཞིན་དུ་གསལ་བར་གྱུར། ཇི་སྙེད་སུ་དག་སོགས་བཟང་སྤྱོད་ནས་འབྱུང་བའི་ཡན་ལག་བདུན་པ་ཚང་བར་བྱའོ། །གསུམ་པ་ནི། སྔོན་གཏོར་ལ་ཆབ་བྲན་ཏེ། ༀ་བཛྲ་ཨ་མྲྀ་ཏེ་ཧཱུྃ་གིས་བསང་། སྭ་བྷཱ་ཝ ས་སྦྱང་། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ༀ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པ་ནམ་མཁའ་དང་མཉམ་པར་གྱུར། ༀ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱནྣུཏྤནྣ་ཏྭཱད་ༀ་ཨཱཿཧཱུྃ་ཕཊ་སྭཱ་ཧཱ། ལན་གསུམ་གྱིས་བྱིན་བརླབ། སརྦ་ལོ་ཀ་པཱ་ལ་ཨེ་ཧྱེ་ཧི། པདྨ་ཀ་མ་ལཱ་ཡ་སྟྭཾ། ཞེས་དང་། སརྦ་ལོ་ཀ་པཱ་ལ་ས་པ་རི་ཝཱ་ར་ན་མཿསརྦ་སོགས་ནས། གྲྀ་ཧྞེ་དཾ་བ་ལྱཱ་དི་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བསྔོས་ལ། ཧཱུྃ། ས་ལ་རྒྱུ་བའི་ལྷ་ཀླུ་དང་། །གང་ཡང་ས་ལ་བརྟེན་པ་རྣམས། །སེམས་ཅན་ཀུན་ལ་དགེ་དོན་དུ། །བྱམས་པའི་སེམས་ཀྱིས་གནས་པར་མཛོད། །ལྷ་ཀླུ་འབྱུང་པོ་མཐུ་བོ་ཆེ་དཀར་པོའི་ཕྱོགས་ལ་མངོན་པར་དགའ་བ་རྣམས་ཀྱིས། དཀྱིལ་འཁོར་ཆེན་པོའི་བྱ་བ་མཐར་ཕྱིན་པའི་ཕྲིན་ལས་མཛོད་ཅིག །གང་དག་ནག་པོའི་ཕྱོགས་སུ་གྱུར་པའི་དཀྱིལ་འཁོར་ཆེན་པོ་ལྟ་བར་མི་དབང་བའི་བགེགས་གང་ཡིན་པ་དེ་དག་ཐམས་ཅད་མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདིས་ཚིམས་པར་གྱིས་ལ། བདག་གི་བྱ་བ་མ་འགྲུབ་ཀྱི་བར་དུ་འདིར་མ་གནས་པར་གཞན་དུ་དེངས་ཤིག །ༀ་སུམྦྷ་ནི་སོགས་ཧཱུྃ་བཞིའི་དྲག་སྔགས་བརྗོད་ལ་བསྐྲད་དོ། །བཞི་པ་ནི། བསང་སྦྱང་། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ༀ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པ་ནམ་མཁའ་དང་མཉམ་པར་གྱུར། ༀ་བཛྲ་ཨརྒྷཾ་ཨཱཿཧཱུྃ། པཱདྱཾ་ནས། ཤཔྡའི་བར་དེ་བཞིན་དུ་སྦྱར་བས་བརླབ། ༀ་བཛྲ་དྷརྨ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙཱ་ལི་ནི། པྲཛྙཱ་པ་ར་མི་ཏ་ནཱ་ད་སཾ་བྷ་བེ། བཛྲ་དྷརྨ་ཧྲཱི་ད་ཡ་སན་ཏོ་ཥ་ནི་ཧཱུྃ་ཧཱུྃ་ཧཱུྃ། ཧོཿཧོཿཧོཿ ཨཱཿཁཾ་སྭཱ་ཧཱ། ཞེས་བརྗོད་ལ་རོལ་མོ་བསྒྲག་ཅིང་བྱིན་དབབ་བོ། །ལྔ་པ་ནི། བདག་གཞན་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །རྡོ་རྗེ་རྣམ་པར་འཇོམས་པའི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །དམ་པ་ཆོས་སྐྱོང་བའི་སྲུང་མ་རྣམས་ལ་སྐྱབས་སུ་མཆིའོ། །ཞེས་གྲངས་སུ་བརྗོད་ལ་སྐྱབས་སུ་འགྲོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་བར་ཤོག །ཅེས་ལན་གསུམ་གྱིས་སེམས་བསྐྱེད་དོ། །གཉིས་པ་དངོས་གཞི་ལ་བདུན། བདག་བུམ་མདུན་བསྐྱེད་གཏོར་མ་འབུལ། །བདག་འཇུག་ཁྲུས་གསོལ་གཞན་དོན་ནོ། །ཞེས་པའི་དང་པོ་བདག་བསྐྱེད་ལའང་། དམ་ཚིག་བསྐྱེད། ཡེ་ཤེས་པ་གཞུག །དབང་བསྐུར་རྒྱས་གདབ། མཆོད་པ། བསྟོད་པ། སྔགས་བཟླས། དེའི་རྗེས་རིམ་མོ། །དང་པོ་ནི། ༀ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ། ཨ་ལས་ཟླ་བ། མ་ལས་ཉི་མའི་སྟེང་དུ། ཧཱུྃ་ལས་སྣ་ཚོགས་རྡོ་རྗེའི་ལྟེ་བར་ཧཱུཾ་གིས་མཚན་བ་ལས་འོད་ཟེར་འཕྲོས་པས། སྟེང་འོག་ཕྱོགས་མཚམས་ཐམས་ཅད་རྡོ་རྗེའི་གུར་ཁང་ཡེ་ཤེས་ཀྱི་མེ་རི་འབར་བ་དང་བཅས་པར་གྱུར། དེའི་དབུས་སུ་པཾ་ལས་པདྨ། རཾ་ལས་ཉི་མའི་སྟེང་དུ་རང་གི་སེམས་ཉིད་ཧཱུྃ་དཀར་པོ། དེ་ཡོངས་སུ་གྱུར་པ་ལས་རྡོ་རྗེ་དཀར་པོ་རྩེ་ལྔའི་ལྟེ་བར་ཧཱུྃ་གིས་མཚན་པ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ། ཞལ་གཅིག་ཕྱག་གཉིས་གཡས་རྡོ་རྗེ་དཀར་པོ་རྩེ་ལྔ་པ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། ཞབས་སྐྱིལ་ཀྲུང་གིས་བཞུགས་ཤིང་དར་དང་རིན་པོ་ཆེས་བརྒྱན་པ། དེའི་མདུན་དུ་ཡུམ་རྡོ་རྗེ་ལུ་གུ་རྒྱུད་མ་སྐུ་མདོག་དམར་མོ་གཡས་ལྕགས་སྒྲོག །གཡོན་བུམ་པ་འཛིན་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ཡབ་ཡུམ་གཉིས་ཀའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཧཱུཾ་ལས་འོད་ཟེར་འཕྲོས་པས། རང་འདྲའི་ཡེ་ཤེས་སེམས་དཔའི་ཐུགས་དམ་གྱི་རྒྱུད་བསྐུལ་བར་གྱུར། གཉིས་པ་ནི། རྡོར་དྲིལ་འཛིན་ཅིང་སྤོས་བཏུལ་ལ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་པས་ཡེ་ཤེས་པ་མདུན་གྱི་ནམ་མཁའ་བྱོན། ཛཿཧཱུཾ་བཾ་ཧོཿས་གཉིས་མེད་དུ་ཐིམ་པར་མོས། གསུམ་པ་ནི། ཡང་ཐུགས་ཀའི་ཧཱུྃ་ལས་འོད་ཟེར་འཕྲོས། རིགས་ལྔ་འཁོར་བཅས་སྤྱན་དྲངས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་མཱཾ། ཞེས་གསོལ་བ་བཏབ་པས། རིགས་ལྔས་བུམ་པ་ཐོགས་ནས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ༀ་ན་མཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར། བཞི་པ་ནི། ༀ་བཛྲ་བཱི་དཱ་ར་ཎཱ་ཡ་ཨརྒྷཾ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝིདྱ། ཤཔྡ་པྲ་ཏཱིཙྪ་སྭཱ་ཧཱ། ཞེས་མཆོད། ལྔ་པ་ནི། ཧཱུྃ། བདེ་གཤེགས་དྲི་མེད་ཞི་བའི་སྐུ། །སྐྱོན་གྱིས་མ་གོས་སྐུ་མདོག་དཀར། །རྡོ་རྗེ་དྲིལ་བུ་མི་གཡོ་བརྟེན། །རྣམ་པར་འཇོམས་ལ་ཕྱག་འཚལ་བསྟོད། །སེམས་ཅན་དོན་ལ་རྗེས་ཆགས་མ། །སེམས་ཅན་འདྲེན་མཛད་ལྕགས་སྒྲོག་འཛིན། །སེམས་དཔའ་དགྱེས་མཛད་སེམས་མའི་གཙོ། །ཤེས་རབ་གཙོ་ལ་ཕྱག་འཚལ་བསྟོད། །ཅེས་བསྟོད། དྲུག་པ་གཟུངས་སྔགས་བཟླ་བ་ནི། རང་གི་ཐུགས་ཀར་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུྃ་གིས་མཚན་པ། དེའི་མཐར་སྔགས་ཀྱི་ཡིག་འབྲུ་རྣམས་ཁ་དོག་དཀར་པོ་གཡས་སུ་འཁོར་བ་དེ་ལས་འོད་ཟེར་འཕྲོས་པས་བདག་དང་སེམས་ཅན་ཐམས་ཅད་ཀྱི་དོན་བྱེད་པར་བསམ་ཞིང་། གཟུངས་རིང་བརྒྱ་རྩ་བརྒྱད་དམ། ཉེར་གཅིག་གམ། བདུན་ལ་སོགས་པ་གང་འགྲུབ་བཟླའོ། །བདུན་པ་ནི། ཐུན་འཇོག་པའི་ཚེ་མཆོད་བསྟོད་སྨོས་མ་ཐག་པ་ལྟར་བྱ། གཟུངས་ཆོག་སྐབས་བསྡུ་ལྡང་མི་བྱ་བར་འདི་ནས་བུམ་བསྐྱེད་ལ་འཇུག་གོ། །གལ་ཏེ་བདག་བསྐྱེད་ལ་བརྟེན་ནས་བསྙེན་པ་བྱ་བར་འདོད་ན། ཕྱི་མཆོད་ཙམ་ལས་བཤམ་གྱི་སྤྲོས་པ་གཞན་མི་དགོས་ཤིང་། སྔོན་གཏོར་ཡང་ཉིན་དང་པོ་ལས་རྒྱུན་དུ་བཏང་མི་དགོས་ལ། ཁྲུས་ནས་བཟླས་པའི་བར་ཐུན་རེ་རེ་བཞིན་བསྐྱར། བཟླས་པ་གཟུངས་རིང་ཁོ་ན་མི་ལྕོགས་ན་དེ་ཉིད་ཅི་འགྲུབ་དང་། ཡང་སྙིང་འབུམ་ཕྲག་ལ་སོགས་པ་བཟླ། བཟླས་དམིགས་གཞུང་གསལ་ཐོག་རྒྱལ་བ་སྲས་བཅས་མཆོད་ཅིང་བྱིན་རླབས་འོད་ཟེར་གྱི་རྣམ་པར་བསྡུ་བ་གཙོ་བོར་བྱེད། ཐུན་མཐར་མཆོད་བསྟོད་རྗེས་སུ། ཐུགས་ཀའི་འོད་ཀྱིས་སྣོད་བཅུད་དག་པའི་ཞིང་དུ་གྱུར། དེ་ཐམས་ཅད་འོད་དུ་ཞུ་ནས་རང་ལ་ཐིམ། རང་ཡང་ཐུགས་ཀའི་ཧཱུྃ་ལ་ཐིམ། དེ་ཆོས་ཀྱི་དབྱིངས་འོད་གསལ་སྟོང་པ་ཉིད་ཀྱི་ངང་དུ་ཐིམ་པར་མོས། སླར་བདག་ཉིད་རྡོ་རྗེ་ཁྲོ་བོའི་རང་བཞིན་ཅན་དུ་གྱུར་པའི་གནས་གསུམ་དུ་འབྲུ་གསུམ་གྱིས་མཚན་པར་མོས། འདིར་རྒྱུད་སྡེ་འོག་མའི་ལུགས་ལྟར་ན། ཐུན་མཐར་ཡེ་ཤེས་པ་ལུས་ལས་བྱུང་སྟེ་ནམ་མཁར་བཞུགས་པ་ལ་མཆོད་བསྟོད་བཟོད་གསོལ་བྱས་ནས་གཤེགས། རང་དམ་ཚིག་པའི་ང་རྒྱལ་གྱིས་གནས་བསྲུང་ནས་སྤྱོད་ལམ་ལ་འཇུག་པ་ཡིན་ཀྱང་། སྐབས་འདིར་བླ་མེད་ཀྱི་རྣལ་འབྱོར་པས་ཉམས་སུ་ལེན་པའི་དབང་དུ་བྱས་པ་ཡིན་པས་སྔ་ཕྱི་གང་འདོད་སོ་སོའི་དབང་པོ་དང་བསྟུན་པར་བྱའོ། །གཉིས་པ་བུམ་བསྐྱེད་ནི། བསང་སྦྱང་། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་ཡི་གེ་བྷྲཱུྂ་འོད་དུ་ཞུ་བ་ལས་ཕྱི་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་ནང་ཐར་པ་ཆེན་པོའི་ཞལ་ཡས་ཁང་དུ་གྱུར་པའི་ནང་དུ་འཁོར་ལོ་སེར་པོ་རྩིབས་བཅུ། དེའི་ལྟེ་བར་པདྨ་འདབ་བཞི། དེའི་དབུས་སུ་པདྨ་དང་ཉི་མའི་གདན་ལ། ཧཱུྃ་ལས་རྡོ་རྗེ་དཀར་པོ་རྩེ་ལྔ་པ་ཧཱུྃ་གིས་མཚན་པ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་དཀར་པོ་རྩེ་ལྔ་པ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། ཞབས་སྐྱིལ་ཀྲུང་གིས་བཞུགས་ཤིང་དར་དང་རིན་པོ་ཆེའི་རྒྱན་གྱིས་བརྒྱན་པ། དེའི་མདུན་དུ་ཡུམ་རྡོ་རྗེ་ལུ་གུ་རྒྱུད་མ་སྐུ་མདོག་དམར་མོ་གཡས་ལྕགས་སྒྲོག་གཡོན་བུམ་པ་འཛིན་པ་དར་དང་རིན་པོ་ཆེའི་རྒྱན་གྱིས་བརྒྱན་པ། པད་འདབ་བཞི་ལ་པད་ཟླའི་གདན་རེ་རེའི་སྟེང་དུ། ཤར་དུདྷཱིཿལས་སངས་རྒྱས་སྤྱན་མ་དཀར་མོ་རྡོ་རྗེས་མཚན་པའི་བུམ་པ་འཛིན་པ། ལྷོར་ཏྲཱཾ་ལས་མཱ་མ་ཀཱི་སྔོན་མོ་རིན་པོ་ཆེས་མཚན་པའི་བུམ་པ་འཛིན་པ། ནུབ་ཏུ་ཧྲཱིཿལས་གོས་དཀར་མོ་དམར་མོ་པདྨས་མཚན་པའི་བུམ་པ་འཛིན་པ། བྱང་དུ་ཏྲཱྂ་ལས་དམ་ཚིག་སྒྲོལ་མ་ལྗང་གུ་རྒྱ་གྲམ་གྱི་མཚན་པའི་བུམ་པ་འཛིན་པ། ཡུམ་བཞི་ཀ་བཞེངས་ཏེ་འགྱིང་བག་དང་ལྡན་པ། དར་དང་རིན་པོ་ཆེས་བརྒྱན་པའོ། །འཁོར་ལོ་རྩིབས་བཅུར་པདྨ་དང་ཉི་མའི་གདན་ལ། ཧཱུཾ་དཀར་པོ་བཅུ་ལས་རྡོ་རྗེ་དཀར་པོ་རྩེ་ལྔ་པ་བཅུ་འོད་དུ་ཞུ་བ་ལས། ཤར་སྟོད་དུ་ཧཱུྃ་མཛད། ནུབ་སྟོད་དུ་སྟོབས་པོ་ཆེ། ཤར་དུ་རྣམ་པར་རྒྱལ་བ། ཤར་ལྷོར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། ནུབ་བྱང་དུ་གཞན་གྱི་མི་ཐུབ་པ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། ཐམས་ཅད་ཀྱང་སྐུ་མདོག་དཀར་པོ་གཡས་རྡོ་རྗེ་ནམ་མཁར་འཕྱར་ཞིང་། གཡོན་དྲིལ་བུ་དཀུར་བརྟེན་པ། སྤྱན་གསུམ་མཆེ་བ་བཞི་གཙིགས་ཤིང་དབུ་སྐྲ་ཁམ་སེར་གྱེན་དུ་བརྫེས་པ་ལ་སྦྲུལ་གྱིས་བརྒྱན་པ། སྟག་ལྤགས་ཀྱི་ཤམ་ཐབས་ཅན། ཞབས་གཉིས་འདོར་ཐབས་ཀྱིས་ཡེ་ཤེས་ཀྱི་མེ་འབར་བའི་དབུས་སུ་བཞུགས་པའོ། །སྒོ་བཞིར་པདྨ་དང་ཉི་མའི་སྟེང་དུ་ཤར་དུ་ཛཿལས་ལྕགས་ཀྱུ་མ་དཀར་མོ་གཡས་ལྕགས་ཀྱུ། ལྷོ་སྒོར་ཧཱུྃ་ལས་ཞགས་པ་མ་སེར་མོ་གཡས་ཞགས་པ། ནུབ་སྒོར་བྂ་ལས་ལྕགས་སྒྲོག་མ་དམར་པོ་གཡས་ལྕགས་སྒྲོག །བྱང་སྒོར་ཧོཿལས་དྲིལ་བུ་མ་ལྗང་མོ་གཡས་དྲིལ་བུ། སྒོ་མ་བཞི་ཡང་ཁྲོ་མོའི་གཟུགས་ཅན། གཡོན་ཐམས་ཅད་སྡིགས་མཛུབ་དང་ཞབས་གཉིས་བརྐྱང་བསྐུམ་གྱི་ཚུལ་དུ་བཞུགས་པའོ། །ལྷ་ཚོགས་དེ་དག་ཐམས་ཅད་ཀྱི་སྤྱི་བོར་ༀ་དཀར་པོ་སོགས་གོང་གི་བདག་བསྐྱེད་སྐབས་བཞིན་ལས། ཡུབ་ཡུམ་གཉིས་ལ་མི་བསྐྱོད་པ་དང་། འཁོར་རྣམས་ལ་གཙོ་བོས་དབུ་བརྒྱན་པར་གྱུར། མཆོད་པ་ནི། གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་བདུག་སྤོས་འདི། །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ༀ་བཛྲ་དྷཱུ་པེ་པཱུ་ཛཿམེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། གཙང་ཞིང་གཙང་མར་སྐྱེས་པ་ཡི། །ལྷ་རྫས་བཟང་པོའི་མེ་ཏོག་འདི། །བདག་གིས༴ བཞེས་ནས༴ ༀ་བཛྲ་པུཥྤེ་པཱུ་ཛ༴ སྡུག་བསྔལ་འཇོམས་ཤིང་བཀྲ་ཤིས་ལ། །དགེ་ཞིང་མུན་སེལ་མར་མེ་འདི། །བདག་གིས༴ བཞེས་ནས༴ ༀ་བཛྲ་ཨཱ་ལོ་ཀེ༴ གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་དྲི་ཆབ་འདི། །བདག་གིས༴ བཞེས་ནས༴ ༀ་བཛྲ་གནྡྷེ༴ སྨན་རྣམས་བཅུད་དང་ཡིད་གར་འོང་། །སྔགས་ཀྱི་ཞལ་ཟས་བཤོས་འདི་དག །བདག་གིས༴ བཞེས་ནས༴ ༀ་བཛྲ་ནཻ་ཝི་དྱ༴ སྒྲ་དབྱངས་སྙན་ཞིང་ཡིད་འོང་ལྡན། །ལྷ་རྫས་དམ་པའི་རོལ་མོ་འདི། །བདག་གིས༴ ཐུགས་རྗེེ་དགོངས་ཏེ་བཞེས་སུ་གསོལ། །ༀ་བཛྲ་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བསྟོད་པ་ནི། གོང་གི་ཤློ་ཀ་གཉིས་ཀྱི་མཐར། ཕྱོགས་བཞིའི་པདྨ་འདབ་བཞི་ལ། །སངས་རྒྱས་སྤྱན་དང་མཱ་མ་ཀཱི། །གོས་དཀར་མོ་དང་དམ་ཚིག་སྒྲོལ། །སེམས་མ་བཞི་ལ་ཕྱག་འཚལ་བསྟོད། །འཁོར་ལོ་དང་ནི་ཉི་གདན་ལ། །རྣམ་རྒྱལ་ལ་སོགས་ཁྲོ་བོ་བཅུ། །མདོག་དཀར་རྡོ་རྗེ་དྲིལ་བུ་འཛིན། །བགེགས་འཇོམས་ཁྲོ་བཅུ་ལ་ཕྱག་འཚལ། །ཛཿཧཱུྃ་བྂ་ཧོཿའི་ལས་བྱེད་པའི། །ལྕགས་ཀྱུ་ཞགས་པ་ལྕགས་སྒྲོག་དྲིལ། །ཕྲིན་ལས་བཞི་ལྡན་སྒོ་སྲུང་མ། །སྒོ་མ་བཞི་ལ་ཕྱག་འཚལ་བསྟོད། །དེ་ནས་གཟུངས་སྔགས་བཟླ་བ་ལ་ཐོག་མར་སྔགས་འཁོར་བཀོད་པ་ནི། ལྷ་ཚོགས་ཐམས་ཅད་ཀྱི་ཐུགས་ཀར་ཉི་མའི་དཀྱིལ་འཁོར་རེ་རེ། དེའི་སྟེང་དུ་རང་རང་གི་ཕྱག་མཚན་གྱི་ལྟེ་བར་ས་བོན་ལ་སྔགས་ཀྱི་ཕྲེང་བ་གཡས་བསྐོར་དུ་འཁོད་པ་ནི། གཙོ་བོའི་ཐུགས་ཀར། ༀ་བཛྲ་བི་དཱ་ར་ཎ་བཛྲ་བཛྲ། ཡུམ་གྱི་ཐུགས་ཀར། ༀ་བཛྲ་ནི་ཤྲིཾ་ཁ་ལེ་ཧཱུྃ། ལྷ་མོ་བཞིའི་ཐུགས་དཀར་རིམ་བཞིན། ༀ་སྥོ་ཊ་བཛྲ་བཛྲ་དྷཱི། ༀ་ཀ་ཊ་བཛྲ་བཛྲ་ཏྲཱཾ། ༀ་མ་ཊ་བཛྲ་བཛྲ་རྂ། ༀ་མ་ཐ་བཛྲ་བཛྲ་ཏཱྂ། ཁྲོ་བོ་བཅུ་ལ་རིམ་བཞིན་དུ། ༀ་ཧ་ར་ཧ་ར་བཛྲ་ཧཱུྂ། མ་ཐ་མ་ཐ་བཛྲ་ཧཱུཾ། དྷུ་ན་དྷུ་ན་བཛྲ་ཧཱུཾ། ད་ཧ་ད་ཧ་བཛྲ་ཧཱུཾ། པ་ཙ་པ་ཙ་བཛྲ་ཧཱུཾ། དྷ་ར་དྷ་ར་བཛྲ་ཧཱུཾ། དྷ་ར་ཡ་དྷ་ར་ཡ་བཛྲ་ཧཱུཾ། དཱ་རུ་ཎ་དཱ་རུ་ཎ་བཛྲ་ཧཱུཾ། ཚིནྡྷ་ཚིནྡྷ་བཛྲ་ཧཱུཾ། བྷིནྡྷ་བྷིནྡྷ་བཛྲ་ཧཱུྃ། སྒོ་མ་བཞི་ལ་རིམ་བཞིན་དུ། ༀ་ཧུ་ལུ་ཧུ་ལུ་བཛྲ་ཛཿ ཏིཥྛ་ཏིཥྛ་བཛྲ་ཧཱུྃ། བྷནྡྷ་བྷནྡྷ་བཛྲ་བྂ། ཧ་ན་ཧ་ན་བཛྲ་ཧོཿ ཞེས་པའི་སྔགས་ཕྲེང་འོད་ཟེར་གྱི་འདུ་འཕྲོ་ཅན་དུ་གསལ་བར་གྱུར། ཅེས་གསལ་བཏབ་ལ། བཟླས་པ་དངོས་ནི། གཟུངས་ཐག་བཟུང་སྟེ། རང་གི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས། གཟུངས་ཐག་ལ་འཁྲིལ་ནས་སོང་བས། ལྷའི་སྐུ་གསུང་ཐུགས་ཀྱི་རྒྱུད་བསྐུལ། སྐུའི་ཆ་ཐམས་ཅད་ནས་བདུད་རྩི་བབས་པས་བུམ་པ་གང་། འོད་ཟེར་ཚུར་འདུས་བདག་གི་ཐུགས་ཀར་ཐིམ་པས་མཆོག་ཐུན་མོང་གི་དངོས་གྲུབ་ཐོབ་པར་གྱུར། ཞེས་མོས་ལ། ཐོག་མར་ཉེ་བའི་སྙིང་པོ་ཚར་བདུན་ནམ་ཉེར་གཅིག་ཙམ་བརྗོད། དེ་ནས་གཟུངས་རིང་ཡོངས་སུ་རྫོགས་པ་བརྒྱ་རྩ་བརྒྱད་དམ་གང་འགྲུབ་བཟླའོ། །ཐུན་མཐར་སྔགས་ཙམ་གྱིས་མཆོད་ཅིང་བསྟོད། དབང་བསྐུར་བྱེད་ན་བུམ་ལྷ་དེ་ཀར་བཞག་ལ་རྗེས་ཆོག་སྐབས་མདུན་བུམ་ཆབ་གཅིག་གཤེགས། བྱབ་ཁྲུས་ཁོ་ན་ཡིན་ན་མཆོད་བསྟོད་གྲུབ་པ་དང་། བུམ་པའི་ལྷ་ཡེ་ཤེས་པ་གཤེགས་དམ་ཚིག་པ་འོད་དུ་ཞུ་བ་བུམ་པའི་ཆུ་དང་རོ་གཅིག་ཏུ་གྱུར། ཞེས་གཤེགས་ཞུ་བྱ། ལས་བུམ་བསང་སྦྱང་། སྟོང་པའི་ངང་ལས་པད་ཟླའི་གདན་ལ་བྷྲཱུྂ་ལས་ལས་ཀྱི་བུམ་པ་མཚན་ཉིད་ཡོངས་སུ་རྫོགས་པའི་ནང་དུ། པདྨ་ཉི་མའི་གདན་ལ་ཧཱུཾ་ལྗང་སྔོན་འོད་དུ་ཞུ་བ་ལས། ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་གཡས་བེ་ཅོན་བསྣམས་ཤིང་། གཡོན་སྡིགས་མཛུབ་ཐུགས་ཀར་བསྣོལ་བ། ཁྲོ་བོའི་རྒྱན་གྱིས་བརྒྱན་པའི་གནས་གསུམ་འབྲུ་གསུམ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་སྤྱན་དྲངས། བཛྲ་ས་མཱ་ཛཿ ཛཿཧཱུྃ་བཾ་ཧོཿ སླར་ས་བོན་འོད་ཀྱིས་དབང་ལྷ་སྤྱན་དྲངས་པ་རྣམས་ཀྱིས་དབང་བསྐུར་སྐུ་གང་དྲི་མ་དག །ཆུ་ལྷག་ཡར་ལུད་པ་ལས་དོན་ཡོད་གྲུབ་པས་དབུ་བརྒྱན། ༀ་བཛྲ་ཨརྒྷཾ་ནས། ཤཔྡ་པྲ་ཏཱིཙྪ་སྭཱ་ཧཱ། ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །ཕྲག་དོག་རྣམ་དག་བདག་ཉིད་ཅན། །གནོད་སྦྱིན་འདུལ་མཛད་བེ་ཅོན་བསྣམས། །བདུད་རྩི་འཁྱིལ་ལ་ཕྱག་འཚལ་བསྟོད། །ཐུགས་ཀར་ཉི་སྟེང་ཧཱུྃ་ལས་སྔགས་ཀྱིས་བསྐོར་བ། བཟླས་པས་ཐུགས་རྒྱུད་བསྐུལ་བར་མོས་ལ། ༀ་བཛྲ་ཨ་མྲྀ་ཏ་ཧཱུྃ་ཕཊ། ཞེས་བརྒྱ་རྩ་བརྒྱད་བཟླས། ཁྲོ་བོ་ཆེན་པོ་བགེགས་ཟློག་པའི་ཕྲིན་ལས་མཛོད་ཅིག །ལྷ་འོད་དུ་ཞུ་ནས་དག་བྱེད་རྡོ་རྗེ་བདུད་རྩིའི་རང་བཞིན་དུ་གྱུར། ཞེས་བརྗོད་ལ་དཀྱིལ་འཁོར་བསྐོར་ཞིང་འཐོར་རོ། །གསུམ་པ་མདུན་བསྐྱེད་ནི། དཀྱིལ་འཁོར་བསང་སྦྱང་། སྟོང་པའི་ངང་ལས་ཨེ་ཡཾ་རཾ་བཾ་ལཾ་སུཾ་རྣམས་འོད་དུ་ཞུ་བ་ལས་ནམ་མཁའ་རླུང་མེ་ཆུ་ས་རི་རབ་རྣམས་རིམ་བརྩེགས་ཀྱི་སྟེང་དུ། བྷྲཱུྂ་ལས་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པའི་ཕྱི་རོལ་དུ་འདོད་ཡོན་སྣམ་བུ་ལ་མཆོད་པའི་ལྷ་མོ་རྣམས་འཁོད་ཅིང་རྡོ་ར་མེ་རིའི་ཁོར་ཡུག་དང་བཅས་པའི་ནང་དུ་འཁོར་ལོ་སེར་པོ་རྩིབས་བཅུ། ཞེས་པ་ནས། གཙོ་བོ་ཡབ་ཡུམ་གྱིས་དབུ་བརྒྱན་པར་གྱུར། ཞེས་པའི་བར་བུམ་བསྐྱེད་སྐབས་ལྟར་བྱ། དེ་ནས་མཆོད་པ་ཁ་གསོས་ལ་གོང་ལྟར་བྱིན་བརླབས་ནས། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་སྭཱ་ཧཱ། དེས་འགྲེས་ཏེ། མེ་ཏོག༴ པུཥྤེ༴ བདུག་སྤོས༴ དྷཱུ་པེ༴ སྣང་གསལ༴ ཨཱ་ལོ་ཀེ༴ དྲི་མཆོག༴ གནྡྷེ༴ ཞལ་ཟས༴ ནཻ་ཝི་དྱ༴ རོལ་མོ༴ ཤཔྡའི་བར་དུ་སྦྱར། བསྟོད་པ་དང་། སྔགས་འཁོར་བཀོད་པའང་བུམ་བསྐྱེད་ལྟར། རང་གི་ཐུགས་ཀའི་འོད་ཟེར་གྱིས་མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེ་ལས་འོད་ཟེར་སྤྲོ་བསྡུས་དོན་གཉིས་བྱས། ཁྱད་པར་བདག་དང་སེམས་ཅན་ཐམས་ཅད་ནད་གདོན་སྡིག་སྒྲིབ་སྦྱོང་བ་སོགས་དོན་གཉིས་སྒྲུབ་པར་མོས་ཏེ་བཟླ་ཚུལ་ཡང་སྔར་བཞིན་ལ། མཐུན་མཐར་མཆོད་བསྟོད་མདོར་བསྡུས་བྱའོ། །བཞི་པ་གཏོར་མ་འབུལ་པ་ནི། བྱེ་བྲག་དཀྱིལ་འཁོར་པ་ལ་འབུལ་བ་དང་། མགྲོན་བཞི་ལ་སྤྱིར་བསྔོ་བའོ། །དང་པོ་ནི། རྒྱས་པར་སྤྲོ་ན་གཏོར་རྫས་རྣམས་སྔགས་དྲུག་ཕྱག་དྲུག་གིས་བྱིན་བརླབ། བསྡུ་ན། བསང་སྦྱང་། སྟོང་པའི་ངང་ལས་བྷྲཱུྂ་ལས་གཏོར་གཞོང་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བཅུད་ༀ་ཡིག་ཞུ་བ་ལས་བྱུང་བའི་གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པའི་སྤྲིན་ཕུང་མཐའ་ཡས་པ་སྤྲོ་བར་གྱུར། ༀ་ཨཱཿཧཱུཾ། ལན་བདུན། ལྷ་རྣམས་ཀྱི་ལྗགས་འོད་ཟེར་སྦུ་གུས་ལོངས་སྤྱད་པས་དགྱེས་ཤིང་ཚིམས་པར་མོས་ལ། རྒྱས་པར་སྤྲོ་ན་བཟླས་པའི་སྐབས་སུ་བཤད་པའི་གཙོ་འཁོར་གྱི་སྔགས་རྣམས་ལས་གཏོར་སྔགས་སྦྱར་བས་གཙོ་བོ་ལ་བདུན། འཁོར་རྣམས་ལ་གསུམ་རེས་འབུལ། བསྡུ་ན། ༀ་བཛྲ་བི་དཱ་ར་ཎ་ས་པ་རི་ཝཱ་ར་མ་ཧཱ་བ་ལིཾ་ཏ་ཁཱ་ཧི་ཁཱ་ཧི། ཞེས་ལན་བདུན་གྱིས་ཕུལ། སྔགས་ཙམ་གྱིས་མཆོད། གཙོ་བསྟོད་ཤློ་ཀ་གཅིག་གིས་བསྟོད་པའི་མཐར། ན་མོ་མཆོད་སྦྱིན་གྱི་གཏོར་མ་རྒྱ་ཆེན་པོ་འདོད་པའི་ཡོན་ཏན་ལྔ་དང་ལྡན་པ་འདི་མཆོད་ཅིང་འབུལ་བའི་གནས་ནི། བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ། རིགས་ཀྱི་ཡུམ་ལྔ། ཁྲོ་བོ་བཅུ། སྒོ་མ་བཞི་ལ་སོགས་པ་ལྷ་ཚོགས་འཁོར་དང་བཅས་པ་རྣམས་དང་། གཞན་ཡང་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་ཡི་དམ་རྒྱལ་བའི་དཀྱིལ་འཁོར་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ལ་མཆོད་དོ། །འབུལ་ལོ། །གསོལ་ལོ། །འདོན་ནོ། །དེ་དག་གི་མངའ་རིས་དང་སྤྱན་ལམ་དུ། ཀུན་ཏུ་བཟང་པོའི་མཆོད་སྤྲིན་གྱིས་དགྱེས་ཤིང་ཚིམས་ནས། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་རྐྱེན་ཕྱི་ནང་གི་བར་ཆད་ཐམས་ཅད་ཞི་ནས་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་ཕྲིན་ལས་བཅོལ། གཉིས་པ་ནི་དཀར་གཏོར་ཆ་བཞི་བསང་སྦྱང་བྱིན་རླབས་གོང་ལྟར་བྱས་ལ། ཧཱུྃ། མ་ལུས་ཕྱོགས་ན་བཞུགས་པ་ཡི། །དཀོན་མཆོག་སྲི་ཞུའི་མགྲོན་རྣམས་དང་། །དེ་ཡི་བཀའ་འཁོར་སྐྱོང་མཛད་པའི། །མགོན་པོ་ཡོན་ཏན་མགྲོན་གྱི་རིགས། །ནམ་མཁའི་མཐའ་ཀླས་གྱུར་པ་ཡི། །རིགས་དྲུག་སྙིང་རྗེའི་མགྲོན་རྣམས་དང་། །ཚེ་རབས་ལས་ཀྱིས་མནར་བ་ཡི། །ལན་ཆགས་མགྲོན་གྱི་རིགས་ལ་སོགས། །འཇིག་རྟེན་འདས་དང་མ་འདས་ཀྱི། །མགྲོན་གྱི་རིགས་སུ་གྱུར་པ་རྣམས། །མཆོད་པའི་གནས་འདིར་སྤྱན་འདྲེན་གྱིས། །མ་ཐོགས་མྱུར་དུ་གཤེགས་སུ་གསོལ། །ས་པ་རི་ཝཱ་ར་བཛྲ་ས་མ་ཡ་ཛཿཛཿ ཛཿཧཱུྃ་བྂ་ཧོཿ པདྨ་ཀ་མ་ལཱ་ཡེ་སྟྭཾ། མགྲོན་ཐམས་ཅད་རང་གནས་ནས་འདུས་ཤིང་མདུན་གྱི་ནམ་མཁའ་དང་བར་སྣང་ལ་སྤྲིན་དཔུང་གཏིབས་པ་ལྟར་འཁོད་དེ་ལོངས་སྤྱོད་པས་དགྱེས་ཤིང་ཚིམས་པར་བསམ་ལ། ཧཱུྃ། བདག་དང་འགྲོ་བའི་བསོད་ནམས་སྤེལ་བའི་ཕྱིར། །འདོད་ཡོན་ལོངས་སྤྱོད་གཏོར་མའི་མཆོད་པ་འདི། །དཀོན་མཆོག་སྲི་ཞུ་ཡོན་ཏན་ཚོགས་ལ་འབུལ། །རིགས་དྲུག་བགེགས་དང་ལན་ཆགས་རྣམས་ལ་བསྔོ། །གཏོར་སྣོད་རྒྱ་ཆེན་ཆོས་དབྱིངས་ཁོར་ཡུག་ཏུ། །གཏོར་མ་ཡེ་ཤེས་ཕྱག་རྒྱ་བདུད་རྩིར་གསལ། །འདོད་ཡོན་ལྔ་ཡི་ལོངས་སྤྱོད་རྒྱན་དུ་ཆེ། །རྨད་བྱུང་རྣམ་དག་བདུད་རྩི་གཏོར་མ་འདི། །ཡེ་ཤེས་ལྷ་ལ་འབུལ་གྱི་མཆོད་པ་བཞེས། །དབང་དང་བྱིན་རླབས་དངོས་གྲུབ་སྩལ་དུ་གསོལ། །དམ་ཅན་ཆོས་སྐྱོང་སྲུང་མའི་ཚོགས་ལ་འབུལ། །དགྲ་གདོན་གནོད་བྱེད་བར་ཆད་རྐྱེན་རྣམས་ཟློག །རིགས་དྲུག་སེམས་ཅན་གཏོར་མས་ཚིགས་གྱུར་ནས། །སོ་སོའི་སྡུག་བསྔལ་ཀུན་དང་བྲལ་གྱུར་ཅིག །གནོད་བྱེད་འབྱུང་པོ་གཏོར་མ་འདི་སྣོམས་ལ། །ཚེ་རབས་ལན་ཆགས་བུ་ལོན་འཁོར་བར་གྱིས། །ཁྱེད་རྣམས་ཀུན་ལ་གསོལ་བ་ནི། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་སྩལ་དུ་གསོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་རྣམས་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་རྒྱས་པར་མཛོད། །ལེགས་པ་ཐམས་ཅད་འགྲུབ་པ་དང་། །ཉེས་པ་ཐམས་ཅད་མེད་པར་མཛོད། །ཅེས་ཕྲིན་ལས་བཅོལ་ལ་གཏོར་མ་རྣམས་གཙང་སར་གཤེགས། ན་མོ། བདག་གི་བསམ་པའི་སྟོབས་དག་སོགས་བདེན་པ་བརྗོད་ཅིང་། ཆོས་རྣམས་ཐམས་ཅད་རྒྱུ་ལས་བྱུང་། །སོགས་ཆོས་ཀྱི་སྦྱིན་པ་བྱས་ལ། སརྦ་ཡ་ཧི་གཙྪ། ཞེས་མགྲོན་རྣམས་རང་གནས་སུ་གཤེགས་སོ། །ལྔ་པ་བདག་ཉིད་འཇུག་པ་ནི། བདག་བསྐྱེད་ཀྱི་ཡེ་ཤེས་པ་མདུན་བསྐྱེད་གཙོ་བོའི་ཐུགས་ཀར་བསྟིམ། དེའི་ཐུགས་ཀ་ནས་སྤྲོས་པའི་ལས་ཀྱི་སེམས་དཔས་སློབ་དཔོན་གྱི་བྱ་བ་རྣམས་མཛད་པར་མོས་ལ། འོག་ནས་འབྱུང་བའི་དབང་རྣམས་མཚམས་སྦྱོར་དོར་བ་སོགས་རྒྱས་བསྡུས་སྐབས་ཕྱེད་པར་བྱས་ཏེ་རྫོགས་པར་བླང་ངོ་། །དྲུག་པ་ཁྲུས་གསོལ་བ་ནི། བདག་འཇུག་གྲུབ་མ་ཐག་པར། ནམ་མཁའ་གང་བའི་རྒྱལ་བ་སྲས་བཅས་དང་དཀྱིལ་འཁོར་པ་ལ་དམིགས་ཏེ། ཁྲུས་ཁང་བསྐྱེད་པ་ནས་བརྩམ་སྟེ་སྐུ་ཕྱི་ན་བཟའ་འབུལ་བའི་བར་སྤྱི་ལྟར་བྱས་ཏེ་ཁྲུས་ཆུ་རང་གིས་ལོངས་སྤྱོད། གཞན་དོན་བྱབས་ཁྲུས་སོགས་བྱེད་ན་ལས་བུམ་ནང་དུའང་བླུག་གོ། །བདུན་པ་གཞན་དོན་བྱ་བ་ལ་གཉིས། ནད་པ་སོགས་རྗེས་སུ་འཛིན་པ་བཀྲུ་བྱབས་སྲུང་གསུམ་གྱི་ཆོ་ག །སློབ་མ་རྗེས་སུ་འཛིན་པ་དབང་བསྐུར་བའི་ཆོ་གའོ། །དང་པོ་ལ་བཞི། གླུད་གཏོར་བཏང་བ། བཀྲུ་བ། བྱབས་པ། སྲུང་བའོ། །དང་པོ་ནི། བསྒྲུབ་བྱ་གདན་ནག་པོའི་སྟེང་དུ་འཁོད་པའི་ལག་ཏུ་ཟན་དུམ་གཏད་ལ། འོ། ཁྱེད་རང་རྣམས་ཀྱི་ཚེ་རབས་ཐོག་མ་མེད་པ་ནས་ད་ལྟ་ཡན་ཆད་ཀྱི་སྡིག་པ་དང་སྒྲིབ་པ། ནད་དང་གནོད་པ། རྐྱེན་བགེགས་བར་ཆད་ཐམས་ཅད་ལག་གི་ཟན་སྙི་ལ་ཐིམ་པའི་མོས་པ་གྱིས་ཤིག་བྱས་ལ་མཆིལ་མ་བཏབ་བཅོལ། དེ་ཡིས་ཆངས་བུ་བྱས་པ་སྣོད་དུ་བླུགས་པའི་སྟེང་ཡིག་བརྒྱ་བརྗོད་བཞིན་པས་ལས་བུམ་གྱིས་ཁྲུས་བྱ། དེ་ཉིད་སློབ་མ་རྣམས་ཀྱི་རྒྱབ་ཏུ་བཞག་ལ། བསང་སྦྱང་། སྟོང་པའི་ངང་ལས་ཏྲཱྂ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁཾ་ནག་པོ་འོད་དུ་ཞུ་བ་ལས། ན་བ་གསོ་ཞིང་འཆི་བ་བསླུ་བའི་བདུད་རྩིའི་རྒྱ་མཚོར་གྱུར། ཨཱ་ཀ་རོ་ལན་གསུམ་གྱིས་བྱིན་བརླབ། སཾ་བྷ་ར་བདུན་གྱིས་བསྔོ། ན་མོ། བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །ལན་ཆགས་མགྲོན་ལ་སྦྱིན་པ་དང་། །སེམས་ཅན་ཀུན་ལ་ཕན་གདགས་སླད། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །ཅེས་བདེན་པའི་སྟོབས་བརྗོད་ཅིང་དོར། གུལ་ཡུངས་རོལ་མོའི་སྒྲ་དང་། སུམྦྷ་ནི་དྲག་ཏུ་བརྗོད་ལ་བགེགས་བསྐྲད་དོ། །བྱབས་ཁྲུས་རྐྱང་པའི་སྐབས་སུ་འདིར་མཎྜལ་དང་ཐུན་མོང་གི་སྐྱབས་སེམས་ཙམ་འབོག་པའི་སྲོལ་ཡང་སྣང་ངོ་། །གཉིས་པ་ནི། བྱབས་ཁྲུས་རྐྱང་པའི་སྐབས་རྣམ་བུམ་དང་། དབང་བསྐུར་གྱི་སྔོན་འགྲོ་ལ་རྣམ་བུམ་ནས་བུམ་ཆུ་བསྲེས་པའི་ལས་བུམ་ཐོགས་ལ། ཐོག་མར་དག་བྱེད་ཁྲུས་ཀྱིས་བཀྲུ་བའི་སླད་དུ་དམིགས་པ་འདི་བཞིན་དུ་མཛོད་ཅིག །ཁྱེད་རང་རྣམས་ཀྱི་མདུན་གྱི་ནམ་མཁར་པདྨ་དང་ཉི་མའི་གདན་ལ། བཅོམ་ལྡན་འདས་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་དར་དང་རིན་པོ་ཆེས་བརྒྱན་པའི་ཕྱག་གཡས་ན་རིན་པོ་ཆེའི་བུམ་པ་ཡེ་ཤེས་བདུད་རྩིའི་ཆུ་རྒྱུན་གྱིས་བཀང་བ་བསྣམས་ཏེ། ཁྱེད་རང་རྣམས་ཀྱི་སྤྱི་བོ་ནས་བླུགས་པས། ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་ཐམས་ཅད་ཉི་མས་གྲིབ་སོ་དེད་པ་བཞིན་དུ། ནག་ནུར་གྱིས་བཤང་ལམ་དང་སེན་ཕྲག་རྣམས་སུ་བུད་ནས་འོག་དབང་ཆེན་གསེར་གྱི་ས་གཞིའི་ཞབས་སུ་ཐལ་བས། ལུས་ཕྱི་ནང་མེད་པར་ཤེལ་གོང་གཡའ་དག་པའམ། ཤེལ་དཀར་འོ་མས་གང་བ་ལྟ་བུར་གྱུར། མཐར་ཡེ་ཤེས་ཀྱི་བདུད་རྩིས་ལུས་ཐམས་ཅད་དཀར་ལྟེམས་ཀྱིས་གང་བར་མོས་ཤིག །གཟུངས་རིང་ཚར་གསུམ་དང་། ཉེ་སྙིང་ཚར་གསུམ་གྱི་རྗེས་ལ། སརྦ་པཱ་པཾ་སྡིག་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ། སརྦ་བིགྷྣཱན་བགེགས་ཐམས་ཅད༴ སརྦ་རོ་ག་ནད་ཐམས་ཅད༴ སརྦ་དུཥྚན་གདོན་ཐམས་ཅད༴ སརྦ་ཛྭ་རཾ་རིམས་ནད༴ སརྦ་ཨུ་པ་དྲ་བེ་ཉེ་བར་འཚེ་བ༴ སརྦ་ག་ཧེ་གཟའ་དང་རྒྱུ་སྐར་གྱི་གནོད་པ༴ སརྦ་ཨ་ཀཱ་ལ་མྲི་ཏྱུ་དུས་མ་ཡིན་པའི་འཆི་བ༴ སརྦ་དུར་སྭ་སྣ་རྨི་ལམ་ངན་པ༴ སརྦ་དུར་ནི་མིཏྟེ་ལྟས་ངན༴ སརྦ་ཙིཏྟ་བྱཱ་ཀུ་ལི་སེམས་ཀྱི་གཡེང་བ་ངན་པ་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ། ཞེས་བརྗོད་ལ་བུམ་ཆུས་ཁ་བཤལ་བ་དང་བཀྲུ་བ་དང་བཏུང་བར་བྱའོ། །གསུམ་པ་ནི། རྡོ་རྗེ་དང་བཅས་པའི་ལག་གཡས་ཀྱིས་ཀུ་ཤ་དང་རྨ་བྱ་ཐོགས། གཉིས་པ་བྱབས་པའི་ཆོ་ག་བགྱི་བ་ལ། མདུན་མཁར་བཞུགས་པའི་རྡོ་རྗེ་རྣམ་པར་འཇོམས་པའི་ཕྱག་གཡས་བྱབས་པའི་རྫས་ཀྱིས་ཁྱེད་རང་རྣམས་ལ་བྱབས་པས། བཀྲུས་པའི་ལྷག་མ་སྒོ་གསུམ་ལ་ནད་གདོན་སྡིག་སྒྲིབ་ཅུང་ཟད་ཡོད་པ་ཐམས་ཅད་རྒྱ་མཚོ་ཆེན་པོའི་ནང་དུ་ཕྱགས་ནས་སང་སང་དག་པར་མོས་ཤིག །སྔར་གྱི་ཁྲུས་ཆུ་མདུན་དུ་བཞག་པ་ལ་བྱབས་པའི་ཚུལ་བྱས་ཏེ། གཟུངས་རིང་དང་ཉེ་སྙིང་བརྗོད་ལ་ཚིག་སྔ་མ་རྣམས་ཀྱི་མཇུག །སརྦ་ཤཱིནྟཾ་ཀུ་རུའི་ཚབ་ཏུ། སརྦ་ཨཱ་པ་ན་ཡ་སྭཱ་ཧཱ། ཞེས་སྦྱར་ལ་ཁྲུས་ཆུའང་ཆུ་བོར་འདོར་བཅུག་གོ། །བཞི་པ་ནི། བཀྲུས་ཤིང་བྱབས་པ་དེ་དག་ལས་ཕྱིར་མི་ལྡོག་པའི་སླད་དུ་སྲུང་བའི་གོ་བགོ་བ་ནི། མདུན་མཁར་བཞུགས་པའི་རྡོ་རྗེ་རྣམ་པར་འཇོམས་པའི་ཕྱག་གཡས་པའི་རྡོ་རྗེ་རྩེ་བཅུ་གཅིག་པ་ལས་རྡོ་རྗེ་ཕྲ་མོ་གྲངས་མེད་པ་འཕྲོས་ཏེ། ཁྱེད་རང་རྣམས་ཀྱི་ལུས་མགོ་མཇུག་མེད་པར་རྡོ་རྗེའི་གོ་ཁྲབ་ཀྱིས་ཞུ་ལུབ་ཏུ་གཡོགས་པར་མོས་ཤིག །གཟུངས་རིང་ཉེ་སྙིང་དག་དང་། སྤེལ་ཚིག་སྔ་མ་གཉིས་ཀྱི་ཚབ་ཏུ། རཀྵ་རཀྵ་སྭཱ་ཧཱ། ཞེས་སྦྱར་བ་བརྗོད་ཅིང་གནས་བདུན་དུ་རྡོ་རྗེ་རྒྱ་གྲམ་རེ་བཞག་གོ། །དེ་ནས་གལ་ཆེ་ན་དབང་གི་མཇུག་ཆོག་ལྟར་གཏོར་དབང་བསྐུར་ཞིང་བཟླས་ལུང་སྦྱིན། གོ་བགོ་ཞིང་ཕན་ཡོན་བརྗོད་པའི་མཐར། གདན་དཀར་པོ་བརྗེས་ལ། ད་ནི་འཁོར་བ་མཚོན་པའི་གདན་ནག་པོ་སྤངས་ནས། ཐར་པའི་བདེ་བ་དམ་པ་མཚོན་པའི་གདན་དཀར་པོའི་སྟེང་དུ་ཕྱིན་པ་ལ། བླ་མ་དང་དཀྱིལ་འཁོར་པའི་ལྷ་ཚོགས་རྒྱལ་བ་སྲས་དང་བཅས་པ་རྣམས་ཀྱིས་ཤིས་བརྗོད་ཀྱི་མེ་ཏོག་ཆར་དུ་བསྙིལ་བར་མོས་ཤིག་བྱས་ལ་ཤིས་པ་རྒྱས་པར་བརྗོད། སློབ་མར་དབང་བསྐུར་གྱི་སྐབས་བྱབས་ཁྲུས་མི་དགོས་ལ། ཅི་སྟེ་སྤྱི་འགྲོ་ལྟར་མོས་ཤིང་སྤྲོ་ན། ཐོག་མར་བཀྲུ་བྱབས་སྲུང་གསུམ་བྱས་ནས། འཇུག་པའི་ཆོ་གའི་མཎྜལ་འབུལ་བ་ལ་འཇུག །སྐབས་འདིར་ཐོག་མའི་གླུད་གཏོར་འདོར་ལེན་གང་བདེས་ཆོག་གོ། །གཉིས་པ་སློབ་མ་རྗེས་འཛིན་དབང་གི་ཆོ་ག་ལ་གསུམ། དཀྱིལ་འཁོར་དུ་འཇུག་པའི་ཆོས། དངོས་གཞི་དབང་བསྐུར་བ། རྗེས་མཐའ་རྟེན་གྱི་རིམ་པའོ། །དང་པོ་ལ། སྡོམ་ནི། ཁྲུས་དང་མཎྜལ་གསོལ་དང་གནང་། །ཐུན་མོང་ཐུན་མིན་སྡོམ་པ་བཟུང་། །ཆས་འཇུག་བགེགས་བསྐྲད་བྱིན་གྱིས་བརླབ། །སྲུང་དང་དབབ་དང་མེ་ཏོག་དོར། །སྤྱན་དབྱེ་མཐོང་བསྟན་ལྷ་ངོ་སྤྲད། །ཅེས་ཆོས་བཅོ་ལྔ་ཡོད་པ་ལས། དང་པོ་ནི། ཟུང་དུ་མ་གྱུར་པའི་སློབ་མ་རྣམས་ཕྱི་རོལ་སྒོ་དྲུང་དུ་ལས་བུམ་གྱི་ཆུས་ཁྲུས་བྱ། གཉིས་པ་ལ་ལོ་རྒྱུས་བཤད་པས་མཚམས་སྦྱར་བ་ནི། སེམས་བསྐྱེད་གསལ་བཏབ་ལ། གང་གསན་པར་བྱ་བའི་ཆོས་ནི་རིགས་ཐམས་ཅད་ཀྱི་ཁྱབ་བདག་བཅོམ་ལྡན་འདས་དཔལ་རྡོ་རྗེ་སེམས་དཔའ་ཉིད་མི་བསྐྱོད་པ་སོགས་ཞི་བ་དང་། དཔལ་ཆེན་བཛྲ་ཧེ་རུ་ཀ་སོགས་ཁྲོ་བོའི་དཀྱིལ་འཁོར་གྱི་ཚོམ་བུ་མཐའ་ཡས་པ་སྤྲོ་ཞིང་། གཞན་ཡང་གང་འདུལ་དེར་སྟོན་གྱི་རྣམ་པར་རོལ་བའི་སྤྲིན་རྒྱ་མཚོས་ཆོས་དབྱིངས་རྒྱས་པར་གཏམས་ཏེ་འགྲོ་བའི་དོན་མཛས་པ་ལས། ཕྱོགས་རེའི་སྣང་ཚུལ་དུའང་གསང་སྔགས་ནང་པའི་སྐབས་སུ་རྒྱལ་ཚབ་ཀྱི་སྐྱེས་བུ་རྡོ་རྗེ་ཆོས་རབ་དང་རྡོ་རྗེ་སྙིང་པོ། རིག་འཛིན་གྱི་རྒྱལ་པོ་ཀུཉྫ་ར་སོགས་སུ་གྲགས་ཤིང་། སྔགས་ཕྱི་པའི་སྐབས་སུ་དཔལ་གསང་བའི་དབང་པོ་དང་རྡོ་རྗེ་རྣམ་པར་འཇོམས་པ་ལ་སོགས་པའི་སྐུར་སྣང་བ་དང་། ཡོངས་སུ་གྲགས་པར་ལག་ན་རྡོ་རྗེ་འཛིན་པའི་གཟུགས་ཀྱིས་རྒྱལ་བ་རྣམས་ཀྱི་གསང་བའི་མཛོད་གཉེར་ཞིང་། སངས་རྒྱས་སྲས་དང་སློབ་མར་བཅས་པའི་ཕྱི་ནང་གསང་བའི་བར་ཆད་སྲུང་བར་མཛད་པ་ལས་འདིར་མི་མཐུན་པ་ཞི་བའི་ཕྲིན་ལས་ལ་ཆེད་དུ་བསྔགས་པ་རྡོ་རྗེ་རྣམ་པར་འཇོམས་པའི་དབང་བསྐུར་བ་སྐབས་སུ་བབས་པ་ཡིན། དེའང་། རྒྱུད་དོ་ཅོག་གི་རྩ་བ་སྟེ། ཞེས་གསུངས་པ་ལ་འཕགས་ཡུལ་གྱི་སློབ་དཔོན་ཁ་ཅིག་གིས་བྱ་རྒྱུད་འཇིག་རྟེན་ལས་འདས་པའི་རིགས་གསུམ་གྱི་ཡ་གྱལ་རྡོ་རྗེའི་རིགས་ཀྱི་ཁྲོ་བོ་ལ་རྒྱུད་སྡེ་བརྒྱ་རྩ་བརྒྱད་དུ་བཞུགས་པ་ལས་ཐོག་མ་ཁོ་ནར་འདི་ཉིད་གསུངས་པས་དེ་ཐམས་ཅད་ཀྱི་རྩ་བར་འབྲུ་གཉེར་ཞིང་བྱ་རྒྱུད་ཁོ་ནར་བཞེད་པ་དང་། རྣལ་འབྱོར་གྱི་དབང་ཕྱུག་བི་རཱུ་པ་སོགས་ཀྱིས་བླ་མེད་དུ་བཀྲལ་ཞིང་རྒྱུད་སྡེ་བཞིའི་ལས་སྒྲུབ་པའི་ལྷ་སྔགས་ཐམས་ཅད་ཀྱི་རྩ་བར་བཞེད་པ་ལྟར། པཎ་ཆེན་དྲི་མེད་བཤེས་གཉེན་སོགས་ཀྱང་དོན་གྱིས་དེ་ལྟར་བཞེད་པར་གསལ་ཞིང་། ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་གྱི་སྐུ་རིང་ལ་དམ་པའི་ཆོས་བསྒྱུར་བའི་ཐོར་མར་རྗེ་འབངས་ཡོངས་ཀྱི་ཐུགས་དམ་གྱི་ཆོས་སུ་ཉེ་བར་མཁོ་ཞིང་མེད་དུ་མི་རུང་བ་ལོ་པཎ་ཀུན་བཀའ་བགྲོས་ཏེ་རྒྱལ་པོ་མདོ་ལྔར་གྲགས་པ་བསྒྱུར་བའི་ནང་ཚན། རྡོ་རྗེ་རྣམ་པར་འཇོམས་པ་ཁྲུས་ཀྱི་མདོ། ཞེས་པ་འདི་བྱུང་ཞིང་ཡོངས་སུ་གྲགས་པས། དེའི་རྗེས་འབྲེལ་དུ་སྒྲུབ་ཐབས་ཀྱི་བཀའ་སྲོལ། དབང་དང་རྗེས་གནང་གི་རིགས་མཐའ་ཡས་པ་གསར་རྙིང་ཀུན་ལ་བྱོན་པའི་ནང་ནས། ད་ལམ་གྱི་འཆད་བྱ་འདི་ནི། གཙོ་བོར་པཎ་ཆེན་བི་མ་ལ་མི་ཏྲས་གཉགས་ཛྙཱ་ན། དེས་སོག་པོ་དཔལ་ཡེ། དེས་སྲུ་ལེགས་པའི་སྒྲོན་མ་ལ་གནང་བ་སྔ་འགྱུར་བཀའ་མའི་ཆོས་སྡེར་གཏོགས་པ་ཡིན། དེ་ལས་བརྒྱུད་པའི་རིང་ལུགས་རྒྱས་བསྡུས་མང་དུ་འཕེལ་བ་ལས། འདིར་ནི་བཀའ་སྡེ་ཟུར་པའི་རིག་འཛིན་རྣམས་ལས་རྒྱལ་བ་ཀཿཐོག་པ་ཆེན་པོ་དམ་གཙང་བྱམས་གསུམ་དང་སྤྱན་ལྔ་རྣམ་གཉིས་སོགས་ལ་བརྒྱུད་པ་ཡིན་ཅིང་། ཕྱི་འགྱུར་བ་རི་པའི་ལུགས་ཀྱི་སྒྲུབ་ཐབས་འདོད་པ་ཚིག་དོན་གཅིག་པ་ལོ་ཙཱ་བ་ཆོས་ཀྱི་བཟང་པོ་ནས། སྨར་ཁམས་ཤེས་རབ་བླ་མ་སོགས་ལ་བརྒྱུད་དེ་རྒྱ་སྟོན་ཀུན་དགའ་བརྩོན་འགྲུས་ལས་སྤྱན་སྔ་རིན་པོ་ཆེ་བསོད་ནམས་བུམ་པས་གསན་ཅིང་ཆུ་བོ་གཅིག་འདྲེས་སུ་གྱུར་པ་སྟེ། དེ་ལྟ་བུའི་བཀའ་སྲོལ་རྨད་དུ་བྱུང་བ་རྣམ་འཇོམས་ཁྲོ་དཀར་ལྷ་བཅུ་དགུ་པའི་དཀྱིལ་འཁོར་དུ་དབང་བསྐུར་བའི་ཆོ་ག་བགྱིད་པ་ལ། སློབ་དཔོན་གྱི་བྱ་བ་རྣམས་སྔོན་དུ་སོང་གྲུབ། ཁྱོད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་མཎྜལ་ཞིག་འབུལ་བར་ཞུ། ཞེས་མཚམས་སྦྱར་ལ་མཎྜལ་འབུལ་དུ་གཞུག །གསུམ་པ་ནི། བླ་མ་དཀྱིལ་འཁོར་གྱི་གཙོ་བོ་གཉིས་སུ་མེད་པའི་སྤྱན་སྔར་ཐལ་མོ་མེ་ཏོག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་སྟོན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ལན་གསུམ་གྱི་གསོལ་བ་བཏབ། བཞི་པ་ནི། དེ་ལྟར་གསོལ་བ་བཏབ་པས་སྣོད་རུང་གི་གནང་བ་བྱིན་ཅིང་སྔགས་ཀྱི་ཐེག་པར་བློ་དགུག་པ་ནི་འདི་ལ་གསན་པས་ཁྱབ་པར་གདའ། བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་པས། །གསང་སྔགས་སྤྱོད་པའི་ཆོ་ག་ནི། །ཁྱོད་ལ་ལེགས་པར་བསྟན་པར་བྱ། །རྫོགས་པའི་སངས་རྒྱས་གང་འདས་པ། །གང་དག་དེ་བཞིན་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་པས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྤྱོད་པ་མཉམ་མེད་འདི། །སྐྱོབ་པ་དཔལ་ལྡན་ཧེ་རུ་ཀས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་བྱོས་ཤིག །ཅེས་བརྗོད། ལྔ་པ་ནི། བླ་མ་དཀྱིལ་འཁོར་གྱི་ལྷ་ཚོགས་རྒྱལ་བ་སྲས་དང་བཅས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བ་ཅན་གྱི་བྱང་ཆུབ་མཆོག་ཏུ་སེམས་བསྐྱེད་སྙམ་པས་འདིའི་རྗེས་ཟློས། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་སྐྱབས་སུ་མཆི། །སོགས་སྒྲུབ་ཐབས་ལྟར་ལན་གསུམ་བྱ། དྲུག་པ་ནི། ཐུན་མོང་པ་ཡིན་པ་རིགས་ལྔ་སྤྱི་དང་བྱེ་བྲག་གི་དམ་ཚིག་དང་སྡོམ་པ་རྣམས་ཚུལ་བཞིན་དུ་བཟུང་བར་བགྱིའོ་སྙམ་པའི་འདིའི་རྗེས་ཟློས། སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་བསྐྱེད་པའི། །སྡོམ་པ་དེང་ནས་གཟུང་བར་བགྱི། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ནི་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་བགྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་གྲོལ། །དབུགས་མ་དབྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་བྱའོ། །བདུན་པ་ནི། དཀྱིལ་འཁོར་འདི་ཉིད་སྔོན་ཆད་མ་མཐོང་བའི་བརྡར་གདོང་གཡོགས་འཆིང་བར་ཞུ། ༀ་ཙཀྵུ་བནྡྷ་བ་ར་མ་ཎཱ་ཡེ་སྭཱ་ཧཱ། ཞེས་མིག་དར་དང་། ལྷ་དང་མཇལ་བའི་ཕྱག་རྟེན་དུ་རིན་པོ་ཆེའི་མེ་ཏོག་ཕོན་པོ་ཕྱག་ཏུ་ཐོགས་པར་མོས་ཤིག །ༀ་ཨཱཿཁཾ་བཱི་ར་ཧཱུྃ། ཞེས་ཅོད་པན་གཏད། བརྒྱད་པ་ནི། བླ་མ་དཀྱིལ་འཁོར་པའི་ཐུགས་ཀ་ནས་འོད་ཟེར་དང་ཁྲོ་ཆུང་གི་ཚོགས་ཉི་ཟེར་གྱི་རྡུལ་ལྟར་འཁྲུགས་པས་བར་དུ་གཅོད་པའི་གདོན་བགེགས་ཐམས་ཅད་རྒྱང་རིང་དུ་བསྐྲད་པར་མོས་ཤིག །ༀ་ཨཱཿབིགྷྣཱནྟ་ཀྲྀཏ་ཧཱུྃ་ཕཊ། ཅེས་བརྗོད་ཅིང་ཡུངས་ཐུན་གུ་གུལ་དུད་པ་རོལ་མོའི་སྒྲ་བྱའོ། །དགུ་པ་ནི། ཁྱེད་རང་རྣམས་ཀྱི་གནས་གསུམ་དུ་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པ་རེས་རྒྱས་གདབ་པར་མོས་ཤིག །སློབ་མའི་གནས་གསུམ་དུ་དྲིའི་ཐིག་ལེ་བཀོད་དེ། ༀ་མ་ཏི་སྠི་ར་བཛྲ་ༀ། ཤཱུ་ཏི་སྠི་ར་བཛྲ་ཨཱཿ པྲ་ཏི་སྠི་ར་བཛྲ་ཧཱུྃ། ཞེས་བརྗོད་ལ་རྡོ་རྗེའང་གནས་གསུམ་དུ་གཏུགས། ཁྱེད་རང་རྣམས་ཀྱི་མིག །རྣ་བ། སྣ། ལྕེ། ལུས། སྙིང་ཁ་རྣམས་སུ་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པ་རེ་རེས་རྒྱས་བཏབ་པར་མོས་ཤིག །དྲི་ཐིག་དང་རྡོ་རྗེ་གནས་དྲུག་ཏུ་བཞག་ལ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧྱེ་ཧི་བཛྲ། ཤྲཱིགྷྲཾ་བཛྲ་དྷ་རཱ་ཡ་སྭཱ་ཧཱ། ཞེས་བརྗོད། བཅུ་པ་ནི། ཁྱེད་རང་རྣམས་ཀྱི་ལུས་ལ་རྡོ་རྗེའི་གོ་ཁྲབ་ཞུ་ལུགས་སུ་གཡོགས་པར་མོས་ཤིག །ༀ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལ་མཱ་བརྟྟ་ཡ་སྭཱ་ཧཱ། ཞེས་བརྗོད་ལ་རྡོ་རྗེ་རྒྱ་གྲམ་གྱིས་གནས་རྣམས་སུ་རེག་གོ། །བཅུ་གཅིག་པ་ནི། དབང་གི་གཞི་འགོད་པར་ཡེ་ཤེས་པ་དབབ་པ་ལ་གསོལ་བ་འདེབས་པ་འདིའི་རྗེས་ཟློས། བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་རྡོ་རྗེ་སེམས་དཔའ་དབབ་ཏུ་གསོལ། ལན་གསུམ། ཞེས་གསོལ་བ་བཏབ་པས་བླ་མ་དཀྱིལ་འཁོར་པའི་ཐུགས་ཀ་ནས་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་ཡེ་ཤེས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུྃ་གིས་མཚན་པ་མཚོ་ལ་ཁ་བ་བབས་པ་བཞིན་བྱོན་ནས་ཁྱོད་རང་རྣམས་ཀྱི་ལུས་ལ་ཞུགས་པར་མོས་ཤིག །གུ་གུལ་དུད་པ་བཏང་། རོལ་མོ་བསྒྲག །རྡོ་རྗེ་རྣམ་པར་འཇོམས་པའི་ལྷ་ཚོགས་དང་རྡོ་རྗེའི་ཆར་བབས་ནས་སློབ་མའི་རྒྱུད་བྱིན་གྱིས་རློབ་པར་དམིགས་ལ། གཙོ་བོ་དང་ཁྲོ་བཅུའི་སྔགས་ཤམ་དུ། པྲ་བེ་ཤ་ཡ་ཕཊ། ཅེས་བཏགས་པ་དྲག་ཏུ་བརྗོད་ལ་དབབ། མཐར་རྒྱ་གྲམ་མགོར་བཞག་ལ། ཏིཥྛ་བཛྲ་ཧཱུྃ་གིས་བརྟན་པར་བྱའོ། །བཅུ་གཉིས་པ་ནི། སྔར་བྱིན་པའི་རིན་པོ་ཆེའི་མེ་ཏོག་དེ་ཉིད་རང་གི་རིགས་ཀྱི་ལྷ་གང་ཡིན་པ་ལ་ཕོག་པར་ཤོག་ཅིག་སྙམ་པའི་འདུན་པས་འདིའི་རྗེས་ཟློས་དང་བཅས་དཀྱིལ་འཁོར་དུ་འདོར་བར་ཞུ། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་ཕྱིར་གཙོ་ཆེན་གྱིས། །སྨན་པར་དགོངས་ཏེ་བཞེས་སུ་གསོལ། །པྲ་ཏི་གྲྀཧྞ་བཛྲ་ཧོཿ ཞེས་མེ་ཏོག་དཀྱིལ་འཁོར་དུ་འདོར་དུ་གཞུག །སླར་ཡང་མེ་ཏོག་དེ་ཉིད་རིགས་མཆོག་ལྷའི་དབང་རྟགས་སུ་སྤྱི་བོར་བཅིངས་པར་མོས་ཤིག །ༀ་པྲ་ཏི་གྲིཧྞ་ས་མ་ཡ་མ་ཧཱ་ས་ཏྭ། སེམས་དཔའ་སྟོབས་པོ་ཆེས་འདི་ཟུང་ཞིག །ཅེས་མེ་ཏོག་སློབ་མའི་སྤྱི་བོར་བཞག་གོ། །བཅུ་གསུམ་པ་ནི། ཁྱེད་རང་རྣམས་ཀྱི་མིག་ཏུ་ཡི་གེ་ཨ་དམར་པོ་རེ་རེ་གསལ་བའི་འོད་ཟེར་གྱིས་མ་རིག་པའི་སྒྲིབ་གཡོགས་བསལ་བར་མོས་ཤིག །རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེས་པས་ཐམས་ཅད་མཐོང་གྱུར་ཏེ། །རྡོ་རྗེའི་མིག་ནི་བླ་ན་མེད། །ༀ་བཛྲ་ནེ་ཏྲ་ཨ་པ་ཧ་ར་པ་ཏྲ་ལཾ་ཧྲཱིཿ ཞེས་རྡོ་རྗེ་དང་བཅས་པའི་མིག་ཐུར་གྱིས་གདོང་གཡོགས་བསལ་ལོ། །བཅུ་བཞི་པ་ནི། རྡོ་རྗེའི་ཕྱག་ཤིང་གི་མཚོན་ཏེ། ལྟོས་ཤིག་ལྟོས་ཤིག་སེམས་དཔའ་ཆེ། །མེ་ཏོག་གང་དུ་ཕོག་གྱུར་པའི། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །སྔགས་དང་ཕྱག་རྒྱའི་བྱིན་རླབས་ཀྱིས། །ཁྱོད་ནི་སངས་རྒྱས་རིགས་སུ་སྐྱེས། །ༀ་བཛྲ་པ་ཤྱ་ཧོཿ ཞེས་བལྟ་བར་བསྐུལ། བཅོ་ལྔ་པ་ནི། དེའང་འབྱུང་བཞི་རི་རབ་རིམ་བརྩེགས་ཀྱི་སྟེང་སྲུང་བའི་འཁོར་ལོ་རྡོ་ར་མེ་རི་དང་བཅས་པའི་དབུས་སུ། ཐར་པ་ཆེན་པོའི་གཞལ་ཡས་ཁང་གྲུ་བཞི་རྒྱན་དང་རྟ་བབས་གར་གྱི་སྣམ་བུ་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་གི་ལྟེ་བར་པད་ཉིའི་གདན་ལ། རྡོ་རྗེ་རྣམ་པར་འཇོམས་པ་དཀར་གསལ་རྡོར་དྲིལ་འཛིན་ཅིང་དར་དང་རིན་པོ་ཆེའི་རྒྱན་ཅན་ཡུམ་རྡོ་རྗེ་ལུ་གུ་རྒྱུད་མ་དམར་མོ་ལྕགས་སྒྲོག་བུམ་པ་བསྣམས་པས་འཁྱུད་ཅིང་སེམས་སྐྱིལ་གྱིས་བཞུགས་པ། ཕྱི་རོལ་པདྨ་འདབ་བཞི་ལ། སངས་རྒྱས་སྤྱན་མ། མཱ་མ་ཀཱི། གོས་དཀར་མོ། དམ་ཚིག་སྒྲོལ་མ་སྟེ་རིགས་ཀྱི་ཡུམ་བཞི། དེའི་ཕྱི་རོལ་འཁོར་ལོ་རྩིབས་བཅུ་ལ་ཁྲོ་བོ་ཆེན་པོ་བཅུ། དེ་རྒྱབ་སྒོ་བཞི་ལ་སྒོ་མ་ཆེན་པོ་བཞི་སྟེ། རྣམ་འཇོམས་དཀར་པོ་ལྷ་བཅུ་དགུ་པའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཇལ་བར་མོས་པས་དད་གུས་སྤྲོ་བ་རྒྱ་ཆེན་པོ་སྐྱེད་ཅིག །དེ་དག་ཀྱང་ཁྱོད་རང་རྣམས་ཀྱི་ཡི་དམ་གྱི་ལྷ་ཡིན་པར་ངོ་ཤེས་པར་གྱིས་ཤིག །ཅེས་ངོ་སྤྲད་དོ། །གཉིས་པ་དངོས་གཞི་དབང་བསྐུར་བ་ལ་གསུམ། གསོལ་བ་འདེབས་པ། བུམ་དབང་། ལྷ་དབང་ངོ་། །དང་པོ་ནི། དེ་ལྟར་དཀྱིལ་འཁོར་དུ་འཇུག་པའི་ཆོས་རྣམས་ལེགས་པར་གྲུབ་ནས ། དངོས་གཞིའི་དབང་བསྐུར་ཞུ་བའི་སླད་རུ་ཐོག་མར་མཎྜལ་འབུལ་བར་ཞུ། དེ་ནས་གསོལ་བ་གདབ་པ་འདིའི་རྗེས་ཟློས། །བདེ་གཤེགས་རྣམས་ཀྱི་བདེ་གསོལ་ཕྱིར། །ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་དག་པ་ཡིས། །དེ་བཞིན་དབང་མཆོག་བསྐུར་དུ་གསོལ། །ཞེས་ལན་གསུམ་བརྗོད་དུ་གཞུག །གཉིས་པ་ནི། རྣམ་རྒྱལ་བུམ་པ་བླངས་ལ། བླ་མ་དང་རྡོ་རྗེ་རྣམ་པར་འཇོམས་པ་ཐ་མི་དད་པའི་ཕྱག་ན་རིན་པོ་ཆེའི་བུམ་པ་འཛིན་པས་ཁྱེད་རང་རྣམས་ལ་དབང་བསྐུར་བའི་མོས་པ་མཛོད་ཅིག་བྱས་ལ། བུམ་པ་ཆོས་དབྱིངས་དག་པའི་གཞལ་ཡས་ནས། །བདུད་རྩི་ཡིད་བཞིན་རྒྱ་མཚོ་འཁྱིལ་བ་ཡིས། །དུག་གསུམ་ནད་དང་སྡུག་བསྔལ་ཞི་ནས་ཀྱང་། །དབང་མཆོག་དེས་ཀྱང་ཆོས་ཉིད་རྟོགས་པར་ཤོག །བུདྡྷ་ཀཱ་ལ་ཤ་ཨ་བྷི་ཥིཉྩ་ༀ། བཛྲ་ཀཱ་ལ་ཤ་ཨ་བྷི་ཥིཉྩ་ཧཱུྃ། རཏྣ་ཀཱ་ལ་ཤ་ཨ་བྷི་ཥིཉྩ་ཏྲཱྂ། པདྨ་ཀཱ་ལ་ཤ་ཨ་བྷི་ཥིཉྩ་ཧྲཱིཿ ཀརྨ་ཀཱ་ལ་ཤ་ཨ་བྷི་ཥིཉྩ་ཨཱཿ ཞེས་བུམ་པ་མགོ་བོའི་གནས་ལྔར་བཞག །སྨོན་ལམ་ནི། བུམ་ཆུས་དབང་བསྐུར་བས་ལས་དང་ཉོན་མོངས་པའི་སྡིག་སྒྲིབ་དག་པར་གྱུར་ཅིག །སྨན་ལྔའི་དབང་བསྐུར་བས་དུག་ལྔའི་སྒྲིབ་པ་དག་པར་གྱུར་ཅིག །དྲི་ལྔའི་དབང་བསྐུར་བས་ཕུང་པོ་ལྔའི་སྒྲིབ་པ་དག་པར་གྱུར་ཅིག །སྤོས་ལྔའི་དབང་བསྐུར་བས་དབང་པོ་ལྔའི་སྒྲིབ་པ་དག་པར་གྱུར་ཅིག །འབྲུ་ལྔའི་དབང་བསྐུར་བས་སྟོབས་ལྔ་ཐོབ་པར་གྱུར་ཅིག །རིན་པོ་ཆེ་ལྔའི་དབང་བསྐུར་བས་ཡེ་ཤེས་ལྔ་ཐོབ་པར་གྱུར་ཅིག །སྙིང་པོ་ལྔའི་དབང་བསྐུར་བས་སྐུ་ལྔ་ཐོབ་པར་གྱུར་ཅིག །གཞན་ཡང་བུམ་པའི་ཆས་ཐམས་ཅད་ཀྱི་དབང་བསྐུར་བས་བྱང་ཆུབ་ཀྱི་ཕྱོགས་ཀྱི་ཆོས་མ་ཚང་བ་མེད་པ་ཐོབ་པར་གྱུར་ཅིག །ཅེས་མེ་ཏོག་འཐོར་རོ། །གསུམ་པ་ནི། གཙོ་འཁོར་བཅུ་དགུའི་ལྷ་ཙཀ་རྣམས་རིམ་བཞིན་སྤྱི་བོར་བཞག་ལ། གཞལ་ཡས་ཁང་གི་དབུས་ནས་བཅོམ་ལྡན་འདས་རྡོ་རྗེ་རྣམ་པར་འཇོམས་པ་བྱོན་ཏེ་ཁྱེད་རང་རྣམས་ཀྱི་སྤྱི་བོ་ནས་དབང་བསྐུར་ཞིང་བྱིན་གྱིས་རློབ་པར་མོས་ཤིག །ཧཱུྃ། རྡོ་རྗེ་འཛིན་པའི་སྐུ་འདི་ནི། །དག་ཅིང་གསལ་ལ་བཟུང་དུ་མེད ། །གཟུགས་ཕུང་རྣམ་པར་དག་བྱེད་པ། །སྐལ་ལྡན་བུ་ལ་སྦྱིན་པར་བྱ། །ༀ་བཛྲ་བི་ད་ར་ཎ་ཨ་བྷི་ཥིཉྩ་ཧཱུྃ། བཅོམ་ལྡན་འདས་རྡོ་རྗེ་རྣམ་པར་འཇོམས་པའི་དབང་བསྐུར་བས། ཉོན་མོངས་པ་གཟུགས་ཀྱི་ཕུང་པོ་གནས་སུ་དག་ནས་མེ་ལོང་ལྟ་བུའི་ཡེ་ཤེས་མངོན་དུ་གྱུར་ཅིག །མེ་ཏོག་ཕྲེང་བ་སྤྱི་བོར་བཅིངས་ལ། ཡུམ་རྡོ་རྗེ་ལྕགས་སྒྲོག་མའི་ངོ་བོ་མེ་ཏོག་ཕྲེང་བ་དར་དཔྱངས་དང་བཅས་པ་སྤྱི་བོར་བཅིངས་པར་མོས་ཤིག །རིག་པའི་དོན་ལྡན་མེ་ཏོག་ཕྲེང་། །ཆོས་ཉིད་དར་གྱི་རྒྱན་བཏགས་ཏེ། །ཆེ་བའི་ཡོན་ཏན་རྫོགས་པའི་དབང་། །སྐལ་ལྡན་བུ་ལ་སྦྱིན་པར་བྱ། །ༀ་བཛྲ་ནི་ཤྲི་ཁ་ལེ་ཧཱུྃ། ཨ་བྷི་ཥིཉྩ་ཧཱུྃ། ཡུམ་གྱི་སྒོ་ནས་མེ་ཏོག་གི་ཕྲེང་བས་དབང་བསྐུར་བས་ཆེ་བའི་ཡོན་ཏན་ཐམས་ཅད་རྫོགས་པའི་དབང་ཐོབ་པར་གྱུར་ཅིག །གཙོ་བོའི་ཕྱི་རིམ་པདྨ་འདབ་བཞིའི་སྟེང་ནས་ཡུམ་བཞི་རིམ་པར་བྱོན་ཏེ་མིང་ལ་སོགས་པའི་དབང་བསྐུར་སྩལ་བར་མོས་ཤིག །ང་ནི་སངས་རྒྱས་སྤྱན་མ་སྟེ། །མིང་གི་དབང་མཆོག་ང་ལ་གནས། །གཏི་མུག་རྣམ་པར་དག་བྱེད་པའི། །སྐལ་ལྡན་བུ་ལ་སྦྱིན་པར་བྱ། །ༀ་སྥོ་ཊ་བཛྲ་བཛྲ་དྷཱིཿ ཨ་བྷི་ཥིཉྩ་ཧཱུྃ། སངས་རྒྱས་སྤྱན་མ་མིང་གི་དབང་བསྐུར་བས། ཉོན་མོངས་པ་གཏི་མུག་གནས་སུ་དག་ནས་ཆོས་དབྱིངས་ཡེ་ཤེས་མངོན་དུ་གྱུར་ཅིག །ང་ནི་བཅོམ་ལྡན་མཱ་མ་ཀཱི། །དབུ་རྒྱན་དབང་མཆོག་ང་ལ་གནས། །ང་རྒྱལ་རྣམ་པར་དག་བྱེད་པའི། །སྐལ་ལྡན་བུ་ལ་སྦྱིན་པར་བྱ། །ༀ་ཀ་ཊ་བཛྲ་བཛྲ་ཏྲཱཾ། ཨ་བྷི་ཥིཉྩ་ཧཱུྃ། མཱ་མ་ཀཱི་དབུ་རྒྱན་གྱི་དབང་བསྐུར་བས་ཉོན་མོངས་པ་ང་རྒྱལ་གནས་སུ་དག་ནས་མཉམ་པ་ཉིད་ཀྱི་ཡེ་ཤེས་རྒྱུད་ལ་སྐྱེ་བའི་དབང་དང་ལྡན་པར་གྱུར་ཅིག །ང་ནི་ཤེས་རབ་གོས་དཀར་མོ། །རྡོ་རྗེའི་དབང་མཆོག་ང་ལ་གནས། །འདོད་ཆགས་རྣམ་པར་དག་བྱེད་པའི། །སྐལ་ལྡན་བུ་ལ་སྦྱིན་པར་བྱ། །ༀ་མ་ཊ་བཛྲ་བཛྲ་རྂ། ཨ་བྷི་ཥིཉྩ་ཧཱུྃ། གོས་དཀར་མོ་རྡོ་རྗེའི་དབང་བསྐུར་བས། ཉོན་མོངས་པ་འདོད་ཆགས་གནས་སུ་དག་ནས་སོ་སོར་རྟོག་པའི་ཡེ་ཤེས་རྒྱུད་ལ་སྐྱེ་བའི་དབང་དང་ལྡན་པར་གྱུར་ཅིག །ང་ནི་དམ་ཚིག་སྒྲོལ་མ་སྟེ། །དྲིལ་བུའི་དབང་མཆོག་ང་ལ་གནས། །ཕྲག་དོག་རྣམ་པར་དག་བྱེད་པའི། །སྐལ་ལྡན་བུ་ལ་སྦྱིན་པར་བྱ། །ༀ་མ་ཐ་མ་ཐ་བཛྲ་ཏྲཱྂ། ཨ་བྷི་ཥིཉྩ་ཧཱུྃ། དམ་ཚིག་སྒྲོལ་མ་དྲིལ་བུའི་དབང་བསྐུར་བས། ཉོན་མོངས་པ་ཕྲག་དོག་གནས་སུ་དག་ནས་བྱ་བ་གྲུབ་པའི་ཡེ་ཤེས་རྒྱུད་ལ་སྐྱེ་བའི་དབང་དང་ལྡན་པར་གྱུར་ཅིག །དེ་རྒྱབ་འཁོར་ལོ་རྩིབས་བཅུའི་སྟེང་ནས་ཁྲོ་བོ་ཆེན་པོ་བཅུ་རིམ་པར་བྱོན་ཏེ་སྤྱི་བོ་ནས་དབང་བསྐུར་ཞིང་བྱིན་གྱིས་རློབ་པར་མོས་ཤིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །ཞེ་སྡང་རྣམ་དག་བདག་ཉིད་ཅན། །དྲི་ཟ་འདུལ་མཛད་རྡོ་རྗེ་བསྣམས། །རྣམ་པར་རྒྱལ་པས་དབང་བསྐུར་རོ། །ༀ་དྷུ་ན་དྷུ་ན་བཛྲ་ཧཱུྃ། ཨ་བྷི་ཥིཉྩི་ཧཱུྃ། ཁྲོ་བོ་རྣམ་པར་རྒྱལ་བའི་དབང་བསྐུར་བས། ཤར་ཕྱོགས་དྲི་ཟའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་གཤིན་རྗེ་གཤེད། །ང་རྒྱལ་རྣམ་དག་མཉམ་ཉིད་ཅན། །གཤིན་རྗེ་འཇོམས་མཛད་རྡོ་རྗེ་བསྣམས། །གཤིན་རྗེ་གཤེད་པོས་དབང་བསྐུར་རོ། །ༀ་པ་ཙ་པ་ཙ་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་གཤིན་རྗེ་གཤེད་པོའི་དབང་བསྐུར་བས་ལྷོ་ཕྱོགས་གཤིན་རྗེའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །འདོད་ཆགས་རྣམ་དག་བདག་ཉིད་ཅན། །ཆུ་ལྷ་འདུལ་མཛད་རྡོ་རྗེ་བསྣམས། །རྟ་མཆོག་རྒྱལ་པོས་དབང་བསྐུར་རོ། །ༀ་དྷ་ར་ཡ་དྷ་ར་ཡ་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་རྟ་མགྲིན་རྒྱལ་པོའི་དབང་བསྐུར་བས་ནུབ་ཕྱོགས་ཆུ་ལྷའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །ཕྲག་དོག་རྣམ་དག་བདག་ཉིད་ཅན། །གནོད་སྦྱིན་འདུལ་མཛད་རྡོ་རྗེ་བསྣམས། །བདུད་རྩི་འཁྱིལ་བས་དབང་བསྐུར་རོ། །ༀ་ཚིནྡྷ་ཚིནྡྷ་བཛྲ་ཧཱུཾ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་བདུད་རྩི་འཁྱིལ་བའི་དབང་བསྐུར་བས་བྱང་ཕྱོགས་གནོད་སྦྱིན་གྱི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་དབྱུག་པ་སྔོན་པོ་ནི། །མེ་ལྷའི་གདུག་པ་འདུལ་མཛད་པ། །དབྱུག་སྔོན་རྒྱལ་པོས་དབང་བསྐུར་རོ། །ༀ་ད་ཧ་ད་ཧ་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་དབྱུག་སྔོན་ཅན་གྱི་དབང་བསྐུར་བས། ཤར་ལྷོ་མེ་ལྷའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་མི་གཡོ་མགོན་པོ་སྟེ། །སྲིན་པོའི་གདུག་པ་འདུལ་མཛད་པ། །མི་གཡོ་མགོན་པོས་དབང་བསྐུར་རོ། །ༀ་དྷ་ར་དྷ་ར་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་མི་གཡོ་མགོན་པོའི་དབང་བསྐུར་བས། ལྷོ་ནུབ་སྲིན་པོའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་གཞན་གྱིས་མི་ཐུབ་པ། །རླུང་ལྷའི་གདུག་པ་ཞི་མཛད་པ། །གཞན་གྱིས་མི་ཐུབ་དབང་བསྐུར་རོ། །ༀ་དཱ་རུ་ཎ་དཱ་རུ་ཎ་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་གཞན་གྱིས་མི་ཐུབ་པའི་དབང་བསྐུར་བས། ནུབ་བྱང་རླུང་ལྷའི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་ཁམས་གསུམ་རྣམ་རྒྱལ་ནི། །འབྱུང་པོའི་གདུག་པ་འདུལ་མཛད་པ། །ཁམས་གསུམ་རྣམ་རྒྱལ་དབང་བསྐུར་རོ། །ༀ་བྷིནྡྷ་བྷིནྡྷ་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་ཁམས་གསུམ་རྣམ་པར་རྒྱལ་བའི་དབང་བསྐུར་བས། བྱང་ཤར་དབང་ལྡན་གྱི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་ཧཱུྃ་སྒྲ་སྒྲོགས་པ་སྟེ། །སྟེང་ཕྱོགས་དྲེགས་པ་འདུལ་མཛད་པ། །ཧཱུྃ་སྒྲ་སྒྲོགས་པས་དབང་བསྐུར་རོ། །ༀ་ཧ་ར་ཧ་ར་བཛྲ་ཧཱུྃ། ཨ་བྷི་ཥིཉྩ་ཧཱུྃ། ཁྲོ་བོ་ཆེན་པོ་ཧཱུྃ་ཀ་རའི་དབང་བསྐུར་བས། སྟེང་ཕྱོགས་ཉི་ཟླ་གཟའ་སྐར་གྱི་གདུག་པ་ཞི་བའི་དབང་དང་ལྡན་པར་གྱུར་ཅིག །ཧཱུྃ། ཁྲོ་བོ་ཆེན་པོ་བརྗིད་པའི་སྐུ། །སྟོབས་ཆེན་མནོན་མཛད་རྒྱལ་པོ་སྟེ། །ཀླུ་དང་ས་བདག་འདུལ་མཛད་པ། །སྟོབས་ཆེན་གནོན་པའི་དབང་བསྐུར་རོ། །ༀ་མ་ཐ་མ་ཐ་བཛྲ་ཧཱུྃ། ཨ་བྷི་ཥིཉྩ་ཧཱུཾ། ཁྲོ་བོ་ཆེན་པོ་སྟོབས་པོ་ཆེའི་དབང་བསྐུར་བས། འོག་ཕྱོགས་ཀླུ་དང་ས་བདག་གི་གདུག་པ་ཞི་བའི་དབང་དང་ལྡན་པར་གྱུར་ཅིག །དཀྱིལ་འཁོར་ཆེན་པོའི་སྒོ་མ་བཞི་རིམ་པར་བྱོན་ཏེ་སྤྱི་བོ་ནས་དབང་བསྐུར་ཞིང་བྱིན་གྱིས་རློབ་པར་མོས་ཤིག །ཤར་སྒོ་སྲུང་བའི་སྒོ་མ་ནི། །དཀར་མོ་ལྷ་ཡི་གདོན་སྲུང་མ། །སྐལ་ལྡན་བུ་ལ་དབང་བསྐུར་བས། །ནད་གདོན་སྡིག་སྒྲིབ་ཞི་གྱུར་ཅིག །ༀ་ཧུ་ལུ་ཧུ་ལུ་བཛྲ་ཛཿ ཨ་བྷི་ཥིཉྩ་ཧཱུྃ། སྒོ་མ་ལྕགས་ཀྱུ་མས་དབང་བསྐུར་བས་ནད་གདོན་ཐམས་ཅད་ཞི་བའི་དབང་དང་ལྡན་པར་གྱུར་ཅིག །ལྷོ་སྒོ་སྲུང་བའི་སྒོ་མ་ནི། །སེར་མོ་གཤིན་རྗེའི་གདོན་སྲུང་མ། །སྐལ་ལྡན་བུ་ལ་དབང་བསྐུར་བས། །ཚེ་དབང་ལོངས་སྤྱོད་རྒྱས་པར་ཤོག །ༀ་ཏིཥྛ་ཏིཥྛ་བཛྲ་ཧཱུྃ། ཨ་བྷི་ཥིཉྩ་ཧཱུྃ། སྒོ་མ་ཞགས་པ་མས་དབང་བསྐུར་བས་ཚེ་དབང་ལོངས་སྤྱོད་ཐམས་ཅད་རྒྱས་པའི་དབང་དང་ལྡན་པར་གྱུར་ཅིག །ནུབ་སྒོ་སྲུང་བའི་སྒོ་མ་ནི། །དམར་མོ་ཀླུའི་གདོན་སྲུང་མ། །སྐལ་ལྡན་བུ་ལ་དབང་བསྐུར་བས། །འགྲོ་བ་དབང་དུ་འདུ་བར་ཤོག །ༀ་བྷནྡྷ་བྷ ནྡྷ་བཛྲ་བཾ། ཨ་བྷི་ཥིཉྩ་ཧཱུྃ། སྒོ་མ་ལྕགས་སྒྲོག་མས་དབང་བསྐུར་བས་འགྲོ་བ་ཐམས་ཅད་དབང་དུ་འདུ་བའི་དབང་དང་ལྡན་པར་གྱུར་ཅིག །བྱང་སྒོ་སྲུང་བའི་སྒོ་མ་ནི། །ལྗང་གུ་གནོད་སྦྱིན་གདོན་རྣམས་སྲུང་། །སྐལ་ལྡན་བུ་ལ་དབང་བསྐུར་བས། །དགྲ་བགེགས་འདུལ་བའི་དབང་ཐོབ་ཤོག །ༀ་ཧ་ན་ཧ་ན་བཛྲ་ཧོཿ ཨ་བྷི་ཥིཉྩ་ཧཱུྃ། སྒོ་མ་དྲིལ་བུ་མས་དབང་བསྐུར་བས་དགྲ་བགེགས་ཐམས་ཅད་འདུལ་བའི་དབང་དང་ལྡན་པར་གྱུར་ཅིག །ཅེས་མེ་ཏོག་འཐོར་རོ། །གསུམ་པ་མཐའ་རྟེན་རྗེས་ཀྱི་དབང་ལ་ལྔ། གཏོར་དབང་། སྔགས་དབང་། གོ་བགོ། ཕན་ཡོན། བཀྲ་ཤིས་བརྗོད་པའོ། །དང་པོ་ནི། དེ་ལྟར་དབང་གི་དངོས་གཞི་གྲུབ་ནས་མཐའ་རྟེན་གྱི་ཆོས་རྣམས་རིམ་པར་བསྒྲུབ་པའི་ཐོག་མར་བདག་གཞན་སེམས་ཅན་ཐམས་ཅད་གནས་སྐབས་ཉེ་བར་འཚེ་བའི་བར་ཆད་ཞི་ཞིང་མཐར་ཐུག་མཆོག་གི་གོ་འཕང་ལ་སྦྱོར་བའི་སླད་དུ་བྱིན་རླབས་གཏོར་མའི་དབང་བསྐུར་ཞུ་བར་བགྱི་འོ་སྙམ་པའི་ཐུགས་བསྐྱེེད་གསལ་ཐོབ་ལ་དམིགས་པ་འདི་ལྟར་དུ་མཛོད་ཅིག །གཏོར་ཆེན་ལས་རྡོར་གྱིས་བཏེགས་ལ། གཏོར་སྣོད་འདི་ཉིད་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པ། ཐར་པ་ཆེན་པོའི་གྲོང་ཁྱེར་ཡངས་ཤིང་རྒྱ་ཆེ་ལ་ཉམས་དགའ་བ། མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་དང་ཉི་མའི་སྟེང་དུ་བཅོམ་ལྡན་འདས་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ། དེའི་མདུན་དུ་ཡུམ་རྡོ་རྗེ་ལུ་གུ་རྒྱུད་མ་སྐུ་མདོག་དམར་མོ་གཡས་ལྕགས་སྒྲོག་གཡོན་བུམ་པ་འཛིན་ཅིང་རྒྱན་ཐམས་ཅད་ཀྱིས་བརྒྱན་པ། དེའི་ཕྱི་རོལ་པདྨ་འདབ་བཞི་ལ་སྤྱན་མ་སོགས་ཡུམ་བཞི། དེའི་ཕྱི་རོལ་འཁོར་ལོ་རྩིིབས་བཅུ་ལ་ཧཱུྃ་མཛད་སོགས་ཁྲོ་བོ་བཅུ། སྒོ་བཞིར་སྒོ་མ་བཞི་རྣམས་དང་བཅས་པའི་སྟེང་གི་ཆ་ལ་རྩ་བརྒྱུད་བླ་མ། བར་གྱི་ཆ་ལ་ཕྱོགས་བཅུ་དུས་གསུམ་དུ་བཞུགས་པའི་སངས་རྒྱས་དང་བྱང་ཆུབ་སེམས་དཔའ། རྡོ་རྗེའི་ཁྲོ་བོ་དང་ཁྲོ་མོ། །མཐའ་བསྐོར་དུ་རིག་པའི་ལྷ་མོ་བཀའ་ཉན་མངགས་གཞུག་དང་བཅས་པས་བསྐོར་ཞིང་སྤྲིན་གཏིབས་པ་ལྟར་བཞུགས་པར་གསལ་ཐོབ་ཅིག །དེ་དག་ལ་མོས་གུས་བྱས་པས་ནམ་མཁའི་དབྱིངས་ནས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས། ཁྲོ་བོ་རྣམས་ཀྱིས་བྲོ་བརྡུངས། ཁྲོ་མོ་རྣམས་ཀྱིས་གར་བྱེད། ཧཱུྃ་ཧཱུྃ་དང་ཕཊ་ཕཊ་ཀྱི་དྲག་སྔགས་འབྲུག་ལྟར་སྒྲོགས་པས། ཁྱེད་རང་རྣམས་ཀྱི་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་རྐྱེན་བགེགས་བར་དུ་གཅོད་པ་ཐམས་ཅད་ཐལ་བ་རྡུལ་ཕྲན་བཞིན་དུ་བརླག་པར་སྒོམས་ཤིག །བྱས་ལ་མདོ་གཟུངས་ཀྱི་དབུ་ནས་བརྩམ། ཉེ་སྙིང་གི་བར་ཚར་གཅིག་བརྗོད་གཏོར་མ་མགོར་བཞག །དྲིལ་བུ་གསིལ་ཞིང་ཉེ་སྙིང་གི་སྐབས་འཐོར་ནས་བྲབ། ཡང་ལྷ་ཚོགས་དེ་དག་ཐམས་ཅད་ཀྱི་སྐུ་གསུང་ཐུགས་ཀྱི་གནས་གསུམ་ནས་ཁྲོ་ཆུང་དང་རྡོ་རྗེའི་མཚོན་ཆར་གྲངས་མེད་པ་སི་ལི་སི་ལི་བྱུང་ནས་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་སིབ་སིབ་ཐིམ་པས་ནད་གདོན་རྐྱེན་བགེགས་བར་ཆད་ཐམས་ཅད་སང་སང་དག་པར་སྒོམས་ཤིག །མདོ་གཟུངས་འཐོར་ནས་སོགས་སྔ་མ་ལྟར་འགྲེ། ཡང་ལྷ་ཚོགས་ཐམས་ཅད་ཀྱི་སྐུ་གསུང་ཐུགས་ཀྱི་གནས་གསུམ་ནས་ཡེ་ཤེས་ཀྱི་མེ་ཕུང་རབ་ཏུ་འབར་བ་བྱུང་ནས་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་གནོད་ཅིང་འཚེ་བར་བྱེད་པའི་རྐྱེན་བགེགས་བེ་ཐེལ་རྒྱལ་འགོང་ཀླུ་གཉན་ས་བདག་བྱད་མ་གནོད་བྱེད་ལ་སོགས་པ་ཐམས་ཅད་བྱ་སྒྲོ་མེ་ལ་བསྲེགས་པ་བཞིན་དུ་ནག་ཆོམ་ཆོམ་བསྲེགས་པར་སྒོམས་ཤིག །གཟུངས་སོགས་གོང་ལྟར། ཡང་ལྷ་ཚོགས་དེ་རྣམས་ཀྱི་སྐུའི་ཆ་ཐམས་ཅད་ནས་ཡེ་ཤེས་ཀྱི་བདུད་རྩི་དཀར་སིབ་སིབ་བྱུང་ནས་ཁྱེད་རང་རྣམས་ཀྱི་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་རྐྱེན་བགེགས་བར་ཆད་ཐམས་ཅད་ཉི་མས་གྲིབ་སོ་དེད་པ་བཞིན་དུ་ནག་ནུར་གྱིས་དེད་འོག་སྒོ་དང་སེན་ཕྲག་རྣམས་སུ་བུད་ནས་དབང་ཆེན་གསེར་གྱི་ས་གཞིའི་ཞབས་སུ་སོང་བས། ལུས་ཕྱི་ནང་མེད་པ་ཡེ་ཤེས་ཀྱི་བདུད་རྩིས་དཀར་ལྟེམ་གྱིས་གང་བར་སྒོམས་ཤིག །གཟུངས་སོགས་གོང་མཚུངས་གྲུབ་རྗེས། ཨརྒྷཾ་སོགས་ཀྱིས་མཆོད། བདེ་གཤེགས་དྲི་མེད་ཤློ་ཀ་གཅིག་གིས་བསྟོད། ལྷ་ཚོགས་ཐམས་ཅད་འོད་དུ་ཞུ་ནས་ཡེ་ཤེས་ཀྱི་བདུད་རྩི་དཀར་ལྟེམ་གྱིས་སོང་བ་འདི་ཉིད་ཁྱེད་རང་རྣམས་ལ་བྱིན་པས། ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་ཐམས་ཅད་སངས་ཀྱིས་དག་ནས་ཁྱེད་རང་རྣམས་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་རྡོར་དྲིལ་འཛིན་ཅིང་རྒྱན་ཆ་ལུགས་ཡོངས་སུ་རྫོགས་པར་གྱུར་པའི་བ་སྤུའི་བུ་ག་ཐམས་ཅད་ཁྲོ་ཆུང་ནས་འབྲས་ཙམ་གྱིས་གང་བར་མོས་ཤིག །ཅེས་བྱས་ལ་གཏོར་མ་དྲི་བཟང་གི་ཆུས་བཤལ་བ་སྦྱིན་ནོ། །གཉིས་པ་ནི། དེ་ནས་སྔགས་བཟླས་པའི་ལུང་བླང་བའི་སླད་དུ། བླ་མ་དང་དཔལ་རྡོ་རྗེ་རྣམ་པར་འཇོམས་པ་དབྱེར་མེད་པའི་ཐུགས་ཀ་ནས་གཟུངས་སྔགས་ཀྱི་ཡིག་འབྲུ་ཐམས་ཅད་མར་མེ་གཅིག་ལས་གཉིས་མཆེད་པའི་ཚུལ་དུ་བྱུང་ནས་ཁྱེར་རང་རྣམས་ཀྱི་སྙིང་ཁར་ཐིམ་པའི་མོས་པ་མཛོད་ཅིག །ཅེས་ཕྲེང་བ་འཛིན་དུ་བཅུག་ལ་མདོ་གཟུངས་ཡོངས་རྫོགས་ཉེ་སྙིང་གི་བར་དང་། ཉེ་སྙིང་ཉིད་རྗེས་ཟློས་ལན་གསུམ་བྱར་གཞུག་གོ། །གསུམ་པ་ནི། མདུན་བསྐྱེད་སྐུའི་འོད་ཟེར་ལས་བྱུང་བའི་ཕྱག་རྒྱ་བཞིའི་གོ་ཆས་ཁྱེད་རང་རྣམས་ལ་ཞུ་ལུབས་སུ་གཡོགས་པས་ཕྱིན་ཆད་བགེགས་དང་བར་ཆད་གང་གིས་ཀྱང་མི་ཚུགས་པའི་མོས་པ་མཛོད་ཅིག །ཕྱག་རྒྱ་ལྔའི་ཙཀླིའམ་རྡོ་རྗེ་མགོར་བཞག་ལ། ཧཱུྃ། ཅིས་ཀྱང་མི་ཆོད་མི་ཤིགས་པ། །རྡོ་རྗེའི་གོ་ཆ་བླ་ན་མེད། །རྡོ་རྗེའི་གོ་ཆས་བསྲུང་དུ་གསོལ། །ༀ། ཅིས་ཀྱང་མི༴ འཁོར་ལོའི༴ འཁོར་ལོའི་གོ་ཆས༴ ཏྲཱྂ། ཅིས་ཀྱང༴ རིན་ཆེན་གོ་ཆ༴ རིན་ཆེན་གོ་ཆས༴ ཧྲཱིཿ ཅིས་ཀྱང་༴ པདྨའི་ཆོ་ག༴ པདྨའི་གོ་ཆས༴ ཧཱ། ཅིས་ཀྱང་༴ རྒྱ་གྲམ་གོ་ཆ་བླ་ན་མེད། །རྒྱ་གྲམ་གོ་ཆས་བསྲུང་དུ་གསོལ། །ཞེས་དང་། རྒྱལ་བ་སྲས་བཅས་བདེན་པའི་བྱིན་རླབས་དང་། །རྡོ་རྗེ་རྣམ་པར་འཇོམས་པའི་བྱིན་རླབས་ཀྱིས། །འགྲོ་བ་འདི་ལ་བདག་གིས་བསྲུངས་ཟིན་པས། །ཕྱིན་ཆད་སུས་ཀྱང་གནོད་པ་མ་བྱེད་ཅིག །བཛྲ་རཀྵ་རཀྵ་ཀུ་རུ་སྭཱ་ཧཱ། ཞེས་བརྗོད། བཞི་པ་ནི། དེ་ནས་རྡོ་རྗེ་རྣམ་པར་འཇོམས་པའི་ལྷ་སྔགས་ཀྱི་ཆེ་བའི་ཡོན་ཏན་རྣམས་ཡིད་ལ་དྲན་ཅིང་དད་མོས་དགའ་སྤྲོ་སྐྱེད་བཞིན་པས་འདིའི་ལད་མོ་མཛོད། །སྡིག་པ་ཐམས་ཅད་བྱང་བྱས་ནས། །སོགས་ཕན་ཡོན་ཚང་བར་བརྗོད་པའི་མཇུག །སྡིག་པ་ཀུན་ལས་རྣམ་པར་ཐར། །ཞེས་པའི་ཚིག་རྐང་གཅིག་པུ་ལན་གསུམ་བྱའོ། །ལྔ་པ་ནི། བླ་མ་དཀྱིལ་འཁོར་གྱི་ལྷ་ཚོགས་རྒྱལ་བ་སྲས་བཅས་མཁའ་དབྱིངས་གང་བ་རྣམས་ཀྱིས་བཀྲ་ཤིས་པའི་བདེན་ཚིག་བརྗོད་ཅིང་དགེ་ལེགས་མེ་ཏོག་ཆར་དུ་བསྙིལ་བས། མི་མཐུན་པའི་རྒུད་པ་མཐའ་དག་ཞི་ཞིང་། མཐུན་རྐྱེན་ལེགས་པའི་ཡོན་ཏན་མ་ལུས་པ་འཕེལ་རྒྱས་རྟག་པའི་རང་བཞིན་དུ་བྱིན་གྱིས་བརླབ་པར་མོས་ཤིག །མེ་ཏོག་འཐོར། དྲིལ་བུ་གསིལ་ཞིང་། ༀ། འབྲས་བུའི་རྡོ་རྗེ་སངས་རྒྱས་རྡོ་རྗེ་འཆང་། །ལམ་གྱི་རྡོ་རྗེ་རྡོ་རྗེ་ཐེག་པའི་ཆོས། །རྒྱུ་ཡི་རྡོ་རྗེ་དགེ་འདུན་རྡོ་རྗེའི་རིགས། །མཆོག་གསུམ་རྡོ་རྗེས་སྐྱོབ་པའི་བཀྲ་ཤིས་ཤོག །སངས་རྒྱས་སྟོང་གི་རྡོ་རྗེའི་གསུང་འཛིན་ཅིང་། །རྡོ་རྗེའི་ལུས་ཅན་ལག་ན་རྡོ་རྗེ་འཛིན། །རྡོ་རྗེའི་གསུང་གིས་རྡོ་རྗེའི་ཧཱུྃ་སྒྲ་སྒྲོགས། །རྡོ་རྗེ་རྣམ་པར་འཇོམས་པའི་བཀྲ་ཤིས་ཤོག །གཉེན་པོ་རྡོ་རྗེས་མི་དགེ་བཅུ་པོ་འཇོམས། །སྟོབས་བཅུ་རྡོ་རྗེས་འཇིག་རྟེན་སྐྱོང་བཅུ་གནོན། །ཕ་རོལ་ཕྱིན་བཅུའི་རྡོ་རྗེ་མཐར་ཕྱིན་པ། །རྡོ་རྗེ་ཁྲོ་རྒྱལ་བཅུ་ཡི་བཀྲ་ཤིས་ཤོག །རྡོ་རྗེའི་རིགས་ཅན་ཚངས་དབང་རྒྱལ་ཆེན་དང་། །རྡོ་རྗེའི་བཀའ་ཉན་ཕྱོགས་སྐྱོང་ལྷ་ཀླུ་དང་། །རྡོ་རྗེའི་ཕོ་ཉ་གཟའ་དང་རྒྱུ་སྐར་ཚོགས། །རྡོ་རྗེའི་རིགས་ཀྱི་སྲུང་མའི་བཀྲ་ཤིས་ཤོག །རིན་ཆེན་བུམ་པ་རྡོ་རྗེས་མཚན་པ་ལ། །རྟེན་འབྲེལ་རྫས་དང་རྡོ་རྗེའི་ཆུས་བཀང་སྟེ། །རྡོ་རྗེའི་གཟུངས་ཐག་རྡོ་རྗེའི་ཏིང་འཛིན་སྤྲོས། །རྡོ་རྗེ་དག་བྱེད་ཁྲུས་ཀྱི་བཀྲ་ཤིས་ཤོག །ཉོན་མོངས་བརྒྱད་ཁྲི་བཞི་སྟོང་རྡོ་རྗེས་འཇོམས། །བགེགས་རིགས་སྟོང་ཕྲག་བརྒྱད་ཅུ་རྡོ་རྗེས་འདུལ། །ནད་རིགས་བཞི་བརྒྱ་རྩ་བཞི་རྡོ་རྗེས་ཞི། །རྡོ་རྗེའི་སྨོན་ལམའགྲུབ་པའི་བཀྲ་ཤིས་ཤོག །ༀ་བཛྲ་པཱ་ཎི་ཀཱ་ཡ་ཝཱ་ཀྐཱ་ཙིཏྟ་སིདྡྷི་ཕ་ལ་ཧཱུྃ་ཨཱཿ ཞེས་བརྗོད་དོ། །གསུམ་པ་དེ་དག་གི་མཇུག་བསྡུ་བའི་རིམ་པར་གཉིས། དབང་དང་། དཀྱིལ་འཁོར་གྱི་རྗེས་རིམ་མོ། དང་པོ་ནི། དེ་ལྟར་ན་དེ་དག་གི་སྒོ་ནས་སྔ་འགྱུར་པཎ་ཆེན་དྲི་མེད་བཤེས་གཉེན་དང་། ཕྱི་འགྱུར་གྲུབ་ཐོབ་པ་རི་པའི་བཀའ་སྲོལ་ཆུ་བོ་གཅིག་ཏུ་འདུས་ཤིང་བྱིན་རླབས་དང་ལྡན་པའི་རྡོ་རྗེ་རྣམ་འཇོམས་ཁྲོ་དཀར་ལྷ་བཅུ་དགུ་པའི་དཀྱིལ་འཁོར་དུ་དབང་བསྐུར་ཡོངས་སུ་རྫོགས་པར་གྲུབ་པ་ཡིན་པས། དེ་དག་གི་སྐབས་སུ་ཐོབ་ཅིང་སོགས་སྤྱི་ལྟར་མཚམས་སྦྱར་ལ། དམ་ཚིག་བཟུ ང་བ། གཏང་རག་མཎྜལ། ལུས་ལོངས་སྤྱོད་འབུལ་བ། དགེ་བསྔོ་རྣམས་བྱས་ལ་སློབ་མ་གྱེས་སོ། །གཉིས་པ་ལ་བདུན། མཆོད་བསྟོད་བསྔོ་སྨོན་བཟོད་གསོལ་དང་། །གཤེགས་བསྡུ་བཀྲ་ཤིས་རྒྱས་གདབ་བོ། །ཞེས་པ་ལྟར་ལས། དང་པོ་ནི། མཆོད་པ་གསར་དུ་བཤམས་པའམ་ཁ་གསོས་ལ་བྱིན་གྱིས་བརླབ། མདུན་བུམ་དུ་བཤད་པའི་ཚིགས་བཅད་གང་རུང་གིས་མཆོད་དོ། །གཉིས་པ་ནི། གཙོ་འཁོར་ཡོངས་རྫོགས་ཀྱི་བསྟོད་པ་བུམ་བསྐྱེད་ལྟར་བྱ། གསུམ་པ་ནི། བླ་མ་ཡི་དམ་ལྷ་ཚོགས་དགོངས་སུ་གསོལ། །ལྟ་བུ་ཐེག་པ་ཆེན་པོའི་བསྔོ་སྨོན་གང་འགྲུབ་བྱ། བཞི་པ་ནི། དྲིལ་བུ་གསིལ་ཞིང་ཡིག་བརྒྱ་ལན་གསུམ་བརྗོད་ལ། གང་ཡང་བདག་བློ་རྨོངས་པ་ཡིས། །ལེགས་སྤྱད་འདི་ལ་ཉེས་གྱུར་གང་། །གང་ཕྱིར་ལུས་ཅན་སྐྱབས་ཡིན་ཕྱིར། །དེ་ཀུན་མགོན་པོས་བཟོད་པར་གསོལ། །ཞེས་དང་། མ་རྙེད་ཡོངས་སུ་སོགས་ཤློ་ཀ་བརྗོད་ཅིང་ནོངས་པ་བཤགས། ལྔ་པ་ནི། ༀ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ནས། ༀ་བཛྲ་མུཿས་དཀྱིལ་འཁོར་གྱི་ཡེ་ཤེས་པ་རྣམས་ཆོས་ཀྱི་དབྱིངས་སུ་གཤེགས། ཧཱུྃ་ཞེས་བརྗོད་པས་དམ་ཚིག་པ་རྣམས་བདག་ལ་ཐིམ་པར་མོས་ལ། བདག་བསྐྱེད་བསྡུ་ཞིང་གནས་སྲུང་པའི་ཚུལ་གོང་དུ་བསྙེན་པའི་འཕྲོས་དོན་སྐབས་བཤད་པ་ལྟར་བྱའོ། །དྲུག་པ་ནི། དཀོན་མཆོག་གསུམ་གྱི་ཤིས་བརྗོད་སྤྱི་དང་། བྱེ་བྲག་ཏུ། བཅོམ་ལྡན་གསེར་མདོག་རི་ཡི་རྒྱལ་པོ་འདྲ། །འཇིག་རྟེན་གསུམ་མགོན་འཇམ་དཔལ་དབྱངས་ཀྱི་སྐུ། །བདེ་གཤེགས་སྐུ་ཡི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཅོམ་ལྡན་དངུལ་མདོག་རི་ཡི༴ འཇིག་རྟེན་གསུམ་མགོན་སྤྱན་རས་གཟིགས་ཀྱི་གསུང་། །བདེ་གཤེགས་གསུང་གི༴ བཀྲ་ཤིས༴ བཅོམ་ལྡན་མཐིང་མདོག་རི་ཡི༴ འཇིག་རྟེན་གསུམ་མགོན་ཕྱག་ན་རྡོ་རྗེའི་ཐུགས། །བདེ་གཤེགས་ཐུགས་ཀྱི༴ བཀྲ་ཤིས་དེས༴ ཤར་ལྷོ་ནུབ་བྱང་དཔལ་བེ་འཁོར་ལོ་དང་། །པདྨ་རྒྱལ་མཚན་གདུགས་བུམ་དུང་དང་ཉ། །ལྷ་མོ་བརྒྱད་ཀྱི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་སོགས་ཤིས་པའི་ཚིགས་སུ་བཅད་པ་རྒྱ་ཆེར་བརྗོད་དོ། །བདུན་པ་ནི། རྡུལ་ཚོན་ཡོད་ན་ཨ་ཀཱ་རོས་བསྡུ་ཞིང་འཁོར་གསུམ་མི་དམིགས་པའི་ལྟ་བས་རྒྱས་གདབ། མཆོད་པའི་ཡོ་བྱད་ལོངས་མི་སྤྱད་པར་གཙང་སར་དོར་ཞིང་ལས་ཀྱི་རྗེས་མི་མངོན་པར་བྱའོ། །བརྒྱུད་ལྡན་རིག་འཛིན་མགུལ་གྱི་བུམ་པ་ལས། །དག་བྱེད་བདུད་རྩིའི་ཀླུང་དུ་ཕབ་པ་འདིར། །རང་བློའི་དུག་ཅན་ཆུ་ཡིས་བསླད་མིན་ཀྱང་། །བཀའ་སྲོལ་མི་ནུབ་བཙས་སུ་རྒྱས་པར་སྤེལ། །རྡོ་རྗེའི་ཁྲུས་ཀྱིས་ཕྱི་ནང་ཉེས་ཚོགས་སྤྱངས། །རྡོ་རྗེའི་རིགས་སྔགས་གྲུབ་པས་ཚེ་འདི་ལ། །སྒྲིབ་གཉིས་བག་ཆགས་རྣམ་པར་འཇོམས་བྱེད་པ། །རྡོ་རྗེ་ཁྲོ་བོའི་རྒྱལ་དང་མཚུངས་པར་ཤོག །ཅེས་པ་འདིའང་སྔ་འགྱུར་བསྟན་པའི་རྨང་གཞི་ཀཿཐོག་གྲུབ་པའི་དབང་ཕྱུག་རྣམས་ཀྱི་ཡིག་ཆ་རྙིང་པ་ལ་བརྟེན་ནས་ཁྱེར་བདེ་འདུས་གསལ་གྱི་ཚུལ་དུ། དྭགས་རྙིང་གི་རྗེས་འཇུག་རྟགས་ཙམ་འཛིན་པ་པདྨ་གར་དབང་བློ་གྲོས་མཐའ་ཡས་པའི་སྡེས་གདན་ས་ཆེན་པོ་དཔལ་སྤུང་ཡང་ཁྲོད་དེ་བཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་སྦྱར་བ་དགེ་ལེགས་འཕེལ།། །།