འཇམ་དཔལ་གྱི་བསྐང་བ་ནོར་བུའི་ཕྲེང་བ། ཟིལ་གནོན་དགྱེས་པ་རྩལ།
འཇམ་དཔལ་གྱི་བསྐང་བ་ནོར་བུའི་ཕྲེང་བ་བཞུགས་སོ། །ཧཱུྃ་ཧྲཱིཿ གང་སྣང་བདེ་སྟོང་ཡེ་ཤེས་རོལ་པ་ལས། །འདོད་དགུ་ཀུན་འབྱུང་རྟག་ཁྱབ་ལྷུན་གྲུབ་ཀྱི། །ཕྱི་ནང་གསང་བ་བསྐང་བའི་དམ་ཚིག་རྫས། །བདེ་ཆེན་ཚོགས་ཀྱི་འཁོར་ལོ་ལ་བརྟེན་ནས། །རྩ་གསུམ་སྲུང་མའི་ཐུགས་དམ་བསྐང་བ་དང་། །དམ་ཚིག་ཉམས་ཆགས་དབྱིངས་སུ་དག་པ་དང་། །མཆོག་ཐུན་དངོས་གྲུབ་ཡིད་བཞིན་འགྲུབ་པའི་ཕྱིར། །བསྐང་ངོ་ཀལྤས་ཐུགས་དམ་གཉན་པོ་བསྐང་། །ཧཱུྃ་ཧྲཱིཿ ཨེ་མ་མཆོད་པ་བླ་ན་མེད། །རང་བྱུང་མཆོད་པ་ཆེན་པོ་པ། །མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱིས་དགྲ་ཆེ་བ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །མཆོད་པ་ཆེན་པོ་ཁྲོ་བ་ཆེ། །ཁྲོ་བ་ཆེན་པོ་དགྲ་ཆེ་བ། །མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །ཡིད་བཞིན་སྤྲིན་གྱི་རོལ་མོ་སྟེ། །བླ་མེད་མཆོག་གི་མཆོད་པ་དམ་པ་འདིས། །བདེ་གཤེགས་སྐུ་ཡི་རིགས་ཀྱི་ཐུགས་དམ་བསྐང་། །པདྨ་གསུང་གི་རིགས་ཀྱི་ཐུགས་དམ་བསྐང་། །ཐུགས་མཆོག་རྡོ་རྗེའི་རིགས་ཀྱི་ཐུགས་དམ་བསྐང་། །ཡོན་ཏན་རིན་ཆེན་རིགས་ཀྱི་ཐུགས་དམ་བསྐང་། །དོན་གྲུབ་ལས་ཀྱི་རིགས་ཀྱི་ཐུགས་དམ་བསྐང་། །རིགས་རྣམས་ཀུན་ཀྱི་ཁྱབ་བདག་རྡོ་རྗེ་འཆང་། །འཇམ་དཔལ་ཡེ་ཤེས་སེམས་དཔའི་ཐུགས་དམ་བསྐང་། །ཐུགས་དམ་བསྐང་ངོ་དབང་དང་དངོས་གྲུབ་སྩོལ། །ཧཱུྃ་ཧྲཱིཿ རང་བྱུང་ལུས་ཀྱི་བདུད་རྩི་རྣམ་དག་པ། །བྱང་ཆུབ་སེམས་ཀྱི་མཆོད་ཡོན་ཞབས་བསིལ་རྒྱུན། །ཁུ་རྡུལ་རྣམ་དག་བྱང་ཆུབ་ཡན་ལག་གི། །ཡིད་འཕྲོག་མེ་ཏོག་སྤྲིན་གྱིས་ཕྱོགས་ཀུན་ཁེབ། །ལས་རླུང་རྣམ་པར་དག་པའི་ཚུལ་ཁྲིམས་བསུང་། །དྲི་ཞིམ་བདུག་པས་ཕྱོགས་རྣམས་ཀུན་ཏུ་ཁྱབ། །དྲོད་ཁམས་རྣམ་དག་ཤེས་རབ་འོད་པོ་ཆེ། །སྣང་གསལ་སྒྲོན་མེས་མཐའ་ཡས་ཞིང་ཀུན་གསལ། །ཆུ་ཁམས་རྣམ་པར་དག་པ་སྙིང་རྗེའི་རླན། །ཚིམ་བྱེད་དྲི་ཆབ་བྱུགས་པས་ཀུན་ནས་འགེངས། །ས་ཁམས་རྣམ་དག་ཏིང་འཛིན་བདུད་རྩིའི་བཅུད། །རོ་མཆོག་ཞལ་ཟས་སྣ་ཚོགས་ཀུན་ཏུ་བཀྲམ། །དམ་ཚིག་བརྗོད་པ་ཡང་དག་ཆོས་ཀྱི་སྒྲ། །སྙན་འཇམ་རོལ་མོའི་དབྱངས་སྙན་མུ་མཐར་ཁྱབ། །ཀུན་ནས་ཀུན་ཏུ་བདེ་བ་མཆོག་གི་དཔྱིད། །བླ་མེད་མཆོག་གི་སོགས། ཧཱུྃ་ཧྲཱིཿ མ་ལུས་གཟུགས་ཀུན་གཟུགས་ཀྱི་རྡོ་རྗེ་མ། །ཡིད་འཕྲོག་གཟུགས་མཛེས་བཀོད་པ་ལམ་སེ་ལམ། །མ་ལུས་སྒྲ་ཀུན་སྒྲ་ཡི་རྡོ་རྗེ་མ། །སྙན་པའི་གླུ་དབྱངས་རོལ་མོ་འུ་རུ་རུ། །མ་ལུས་དྲི་ཀུན་དྲི་ཡི་རྡོ་རྗེ་མ། །ཚིམ་བྱེད་དྲི་ཡི་བསུང་ཞིམ་ཐིབས་སེ་ཐིབ། །མ་ལུས་རོ་ཀུན་རོ་ཡི་རྡོ་རྗེ་མ། །ཞིམ་མངར་བདེ་བའི་བདུད་རྩི་ཆི་ལི་ལི། །མ་ལུས་རེག་ཀུན་རེག་བྱའི་རྡོ་རྗེ་མ། །རེག་འཇམ་བདེ་བའི་ཉམས་འགྱུར་ཡ་ལ་ལ། །མ་ལུས་ཆོས་ཀུན་ཆོས་ཀྱི་རྡོ་རྗེ་མ། །རྨད་བྱུང་དགའ་བའི་ཉམས་མྱོང་བུན་ནེ་བུན། །སྣང་སྲིད་ཀུན་ཀྱང་བདེ་སྟོང་མཆོད་པའི་སྤྲིན། །རབ་འབྱམས་མུ་མཐའ་མེད་པར་བརྡལ་བ་ཡི། །ཡིད་བཞི ན་དགྱེས་རྒུར་འཆར་བའི་ཀུན་བཟང་སྤྲིན། །བླ་མེད་མཆོག་གི་སོགས། ཧཱུྃ་ཧྲཱིཿ བྱང་ཆུབ་ཡན་ལག་བདུན་ལྡན་རྒྱལ་སྲིད་བདུན། །འཕགས་ལམ་ཡན་ལག་བརྒྱད་ལྡན་བཀྲ་ཤིས་རྫས། །རྣམ་ཐར་བརྒྱད་ཀྱི་རང་བཞིན་རྟགས་མཆོག་བརྒྱད། །ཟག་མེད་ཆོས་མཛོད་མཆོད་པར་ལེགས་ཤར་བ། །བུམ་བཟང་དཔག་བསམ་ཤིང་དང་ཡིད་བཞིན་ནོར། །གྲུབ་པའི་དམ་རྫས་བདུད་རྩི་འཛད་མེད་གཏེར། །འདོོད་འཇོའི་བ་མཆོག་མ་རྨོས་ལོ་ཏོག་དང་། །འདོད་འབྱུང་གསེར་གྱི་སྙིང་པོའི་སྤྲིན་ལ་སོགས། །འཇིག་རྟེན་འཇིག་རྟེན་འདས་པའི་དཔལ་ཡོན་ཀུན། །མ་ཚང་མེད་པའི་འབྱོར་པ་དང་བཅས་ཏེ། །བཀྲ་ཤིས་ལྷ་མོ་རྣམས་ཀྱིས་མངའ་གསོལ་བ། །བླ་མེད་མཆོག་གི་སོགས། ཧཱུྃ་ཧྲཱིཿ ཨེ་ཡིག་སྟོང་པའི་དབྱིངས་དང་ཉམས་སྦྱོར་བ། །ཝཾ་ཡིག་བདེ་ཆེན་ཐིག་ལེའི་བཅུ་དྲུག་ཆ། །དགྱེས་བསྐྱེད་འདོད་པའི་ལྷ་མོར་ཤར་བའི་གཟུགས། །མཚུངས་མེད་བདེ་བ་སྟེར་བའི་མཛའ་ན་མོ། །རྡོ་རྗེ་སྒེག་མོ་ཕྲེང་བ་གླུ་གར་མ། །བདུག་སྤོས་མེ་ཏོག་མར་མེ་དྲི་ཆབ་དང་། །པི་ཝཾ་གླིང་བུ་རྡ་ཟླུམ་རྫ་རྔ་ཅན། །གཟུགས་མཛེས་རོ་དང་རེག་བྱ་ཆོས་ཀྱི་དཔྱིད། །རྡོ་རྗེའི་ལྷ་མོ་དགྱེས་པའི་གར་དང་བཅས། །རབ་འབྱམས་ནམ་མཁའི་ཁམས་ཀུན་ཡོངས་བཀངས་ཏེ། །གུས་པས་འདུད་ཅིང་མཆོད་པའི་སྤྲིན་སྤྲོ་བ། །བླ་མེད་མཆོག་གི༴ ཧཱུྃ་ཧྲཱིཿ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ། །སྣང་སྲིད་ཡེ་ཤེས་བདུད་རྩིར་ཞུ་བའི་སྤྲིན། །ཁམས་གསུམ་འཁོར་བ་དབྱིངས་སུ་སྒྲོལ་བ་ཡི། །ཆགས་མེད་ཆགས་པ་ཆེན་པོ་རཀྟའི་མཚོ། །སྣོད་བཅུད་རྣམ་དག་དཔལ་གྱི་བ་ལིངྟ། །འདོད་དགུ་ཀུན་འབྱུང་གཏོར་མ་རི་ལྟར་སྤུངས། །འབྲུ་བཅུད་སྟོང་ལ་སྦྱར་བའི་དཔའ་བོའི་རྫས། །འཐུང་བས་ཚིམ་པའི་ཛ་གད་རྒྱ་མཚོར་བསྐྱིལ། །ཆོས་དབྱིངས་རྣམ་པར་དག་པའི་མཁའ་ཀློང་དུ། །རིགས་པའི་ཡེ་ཤེས་མར་མེ་འོད་དུ་འབར། །ཁམས་དྲུག་ལྡན་པ་རྡོ་རྗེ་ལུས་ཀྱི་ནི། །རིགས་གསུམ་རྩ་ཡི་གྲོང་ཁྱེར་ཆེན་པོ་རུ། །ཁུ་རྡུལ་རླུང་གསུམ་བདེ་ཆེན་བདུད་རྩིའི་དཔྱིད། །རང་བྱུང་གསང་བའི་དམ་ཚིག་རྫས་ཆེན་པོ། །མདོར་ན་རྡོ་རྗེ་ནང་གི་མཆོད་པའི་ཚོགས། །བླ་མེད་མཆོག་གི༴ ཧཱུྃ་ཧྲཱིཿ ཡིད་འོང་ལྟ་ན་སྡུག་པའི་ལང་ཚོ་ཅན། །གང་གི་ལུས་ལས་བཟང་པོའི་དྲི་འབྱུང་བ། །ཨ་ཧཾ་མྱོས་པའི་གླུ་དབྱངས་རབ་སྒྲོགས་ཤིང་། །མ་མཆུའི་སྦྲང་རྩི་ཀུན་ནས་གཞིབ་པ་ཡི། །འཁྱུད་པའི་བདེ་སྟེར་བདེ་ཆེན་རིག་མའི་ཚོགས། །ཐབས་མཆོག་བདེ་ལ་མཆོག་ཏུ་འདུན་པ་ཡིས། །ཡིད་འཕྲོག་འདོད་པའི་སྒྱུ་རྩལ་དང་སྦྱར་ཏེ། །ཟག་མེད་བདེ་བ་ཆེན་པོ་འདྲེན་བྱེད་པའི། །བླ་མེད་མཆོག་གི༴ ཧཱུྃ་ཧྲཱིཿ གཟུང་འཛིན་རྟོག་པ་བཞོན་པར་བཅས་པ་ནི། །དྷུ་ཏིའི་དབྱིངས་སུ་ཐབས་ཀྱིས་བསད་བྱས་ཤིང་། །རྟོག་པའི་རང་མདངས་གདུག་པའི་དགྲ་དང་བགེགས། །ཤེས་རབ་སྙིང་རྗེ་ཆེན་པོའི་རྒྱུ་ཉིད་ལས། །ཡེ་ཤེས་ཁྲོས་པའི་མཚོན་གྱིས་བསྒྲལ་བྱས་པའི། །དུར་ཁྲོད་དྲག་པོའི་རྒྱན་ཆས་ཡོངས་རྫོགས་ཤིང་། །ཁྲག་འཐུང་དགྱེས་པའི་ལོངས་སྤྱོད་ལྷུན་གྱིས་གྲུབ། །བླ་མེད་མཆོག་གི༴ ཧཱུྃ་ཧྲཱིཿ གང་སྣང་སྣང་སྟོང་འཇིགས་བྲལ་རྡོ་རྗེའི་སྐུ། །བསྒུལ་བསྐྱོད་ཐམས་ཅད་བདེ་ཆེན་རྡོ་རྗེའི་གར། །སྒྲ་གྲགས་གྲགས་སྟོང་འགག་མེད་རྡོ་རྗེའི་གསུང་། །བརྗོད་པ་ཀུན་ཀྱང་རྡོ་རྗེ་སྔགས་ཀྱི་གླུ། །ཤེས་རིག་རིག་སྟོང་མི་ཤིགས་རྡོ་རྗེའི་ཐུགས། །དྲན་བསམ་གཡོ་བ་ཟབ་དོན་རྡོ་རྗེའི་རྩལ། །ཀུན་ཀྱང་མི་ཕྱེད་ཡེ་ཤེས་རྡོ་རྗེའི་ངང་། །རོ་མཉམ་བདེ་ཆེན་རྡོ་རྗེའི་བདག་ཉིད་དེ། །ཐམས་བཅད་ལྷ་སྔགས་ཡེ་ཤེས་རོལ་མོ་རུ། །གདོད་ནས་རང་བཞིན་ལྷུན་གྱིས་གྲུབ་པ་ཡི། །སྣང་སྲིད་གཞིར་བཞེངས་མཆོད་པའི་ཕྱག་རྒྱར་འབར། །བླ་མེད་མཆོག་གི༴ ཧཱུྃ་ཧྲཱིཿ ཀ་དག་ལྷུན་གྲུབ་རང་བྱུང་ཡེ་ཤེས་ཀྱི། །ཐིག་ལེ་ཆེན་པོར་འཁོར་འདས་མཉམ་བརྡལ་བའི། །རང་གདངས་མ་འགགས་ཡེ་ཤེས་འོད་ལྔའི་ཀློང་། །རིག་རྩལ་ཐིག་ལེ་སྐུ་དང་ཞིང་ཁམས་སོགས། །རྩོལ་མེད་དག་པའི་དབྱིངས་སུ་རང་ཤར་བའི། །མ་བྱས་ལྷུན་གྲུབ་རྡོ་རྗེ་བཀོད་པའི་སྤྲིན། །རང་བྱུང་འོད་གསལ་ཆེན་པོའི་མཎྜལ། །བླ་མེད་མཆོག་གི༴ ཧཱུྃ་ཧྲཱིཿ འདི་ལྟར་གཞི་ལམ་འབྲས་བུའི་ཆོས་ཀུན་ཀྱང་། །རང་བྱུང་ཡེ་ཤེས་ཆེན་པོར་རོ་གཅིག་པར། །འདུ་འབྲལ་མེད་པའི་གནས་ལུགས་དེ་ཁོ་ན། །འཇམ་དཔལ་རྡོ་རྗེའི་དམ་ཚིག་བླ་ན་མེད། །བསྐང་དང་བཤགས་པར་བྱ་བའི་ཡུལ་ལས་འདས། །ཡེ་སྦྱོར་ཡེ་སྒྲོལ་ཆེན་པོའི་ངང་ཉིད་དུ། །མ་བྱས་ལྷུན་གྱིས་གྲུབ་པར་མཉམ་བཞག་བའི། །བླ་མེད་མཆོག་གི༴ ཧཱུྃ་ཧྲཱིཿ དེ་ལྟར་ཕྱི་ནང་གསང་བ་དེ་ཁོ་ནའི། །བླ་མེད་མཆོག་གི་མཆོད་པ་དམ་པ་འདིས། །རིག་འཛིན་རྩ་བརྒྱུད་བླ་མའི་ཐུགས་དམ་བསྐང་། །ཡི་དམ་ཞི་ཁྲོ་རབ་འབྱམས་ཐུགས་དམ་བསྐང་། །གནས་གསུམ་དཔའ་བོ་མཁའ་འགྲོའི་ཐུགས་དམ་བསྐང་། །རྡོ་རྗེ་ཆོས་སྐྱོང་སྲུང་མའི་ཐུགས་དམ་བསྐང་། །གནོད་སྦྱིན་ནོར་ལྷ་གཏེར་བདག་ཐུགས་དམ་བསྐང་། །མཆོད་པར་འོས་པའི་ཚོགས་ཀྱི་ཐུགས་དམ་བསྐང་། ། རྡོ་རྗེ་མཆེད་དང་ལྕམ་དྲལ་ཐུགས་དམ་བསྐང་། །རིགས་དྲུག་སེམས་ཅན་ཡོངས་ཀྱི་ཐུགས་དམ་བསྐང་། །བདེ་སྟོང་འདུ་འབྲལ་མེད་པའི་དབྱིངས་ཉིད་དུ། །ཐུགས་དམ་གཉན་པོ་ཡོངས་སུ་བསྐང་གྱུར་ནས། །དམ་ཚིག་ཉམས་ཆག་ཐམས་ཅད་དག་པ་དང་། །ལས་བཞིའི་ཕྲིན་ལས་འབད་མེད་ལྷུན་གྱིས་གྲུབ། །མི་མཐུན་རྐྱེན་ངན་བར་ཆད་དབྱིངས་སུ་བཟློག །ཟུང་འཇུག་མཆོག་གི་དངོས་གྲུབ་མྱུར་ཐོབ་མཛོད། །བསྐང་བ་ནོར་བུའི་ཕྲེང་བ་འདི་ནི་ལྕགས་འབྲུག་ཟླ་ལྔ་པའི་ཚེས་ཉེར་གཅིག་ལ་ཟིལ་གནོན་དགྱེས་པ་རྩལ་གྱིས་བྲིས་པ་དགེ་བའི་རྒྱུར་གྱུར་ཅིག། མདྒལཾ། །།