འཆི་བདག་གི་བསྐུལ་བ།

འཆི་བདག་གི་བསྐུལ་བ་བཞུགས་སོ། །ཧཱུྃ། རིམ་པ་བདུན་གྱི་ས་འོག་ནས། །ཡ་ལས་བྱུང་བའི་འཆི་བདག་ནི། །མུན་པའི་མདོག་ཅན་འཇིགས་པའི་གཟུགས། །སྲིད་གསུམ་ཟ་བྱེད་ཁྱོད་ལ་བསྟོད། །ལས་ཀྱི་གཤིན་རྗེ་མཐུ་བོ་ཆེ། །གཅེར་བུ་མ་ཧེའི་ཁྲི་སྟེང་དུ། །ཐོད་པས་མཚན་པའི་དབྱུག་པ་བསྣམས། །སྲོག་དབུག་བདག་པོ་ཁྱོད་ལ་བསྟོད། །ནག་པོ་སེང་གདོང་རལ་པ་ཅན། །གློག་ལྟར་མྱུར་བའི་སྟོབས་དང་ལྡན། །དགེ་སྡིག་གཉིས་ཀྱི་བྱ་ར་བྱེད། །ཁྲིམས་ཀྱི་བདག་པོ་ཁྱོད་ལ་བསྟོད། །འཆི་བདག་ནག་པོའི་ཡུམ་ཆེན་ནི། །སྲིན་མོ་དུག་ཧྲུལ་གོས་གྱོན་མ། །དུས་མཚན་ནག་མོ་སྐྱེ་འགྲོའི་གཤེད། །གདུག་བྱེད་མ་མོ་ཁྱོད་ལ་བསྟོད། །ཡ་མཱནྟ་ཀའི་སྒྲུབ་མཆོག་སྐྱོང་བ་དང་། །དགྲ་བགེགས་སྒྲོལ་ཞིང་བསྟན་པ་བསྲུང་བར་མཛོད། །ཧཱུྃ། ཡ་མ་རཱ་ཙ་སྲིན་མོ་ཤ་ཟ་ཡུམ། །བདུད་འཇོམས་དམར་པོ་ཀོང་རྩེ་དང་པོའི་གཤིན། །སྲིན་པོ་ནག་མོ་ལག་བརྒྱ་མགོ་འཕྱང་ཡུམ། །ས་ཡི་རང་བཞིན་ལྷ་བདུད་འཁོར་བཅས་ལ། །བསྟོད་དང་གཏོར་མ་རཀྟས་མཆ ོད་པར་བགྱི། །ཡ་མཱནྟ་ཀའི་སྒྲུབ་མཆོག་སྐྱོང་བ་དང་། །དགྲ་བགེགས་སྒྲོལ་ཞིང་བསྟན་པ་བསྲུང་བར་མཛོད། །མྱོས་བྱེད་འབར་བ་སྲིན་མོ་སྟོབས་ཆ ེན་ཡུམ། །མིག་དམར་གཅོག་པ་ལྷ་མཆོག་གཉིས་པའི་གཤིན། །ཞགས་པ་མོ་དང་སེར་མོ་མིག་བརྒྱ་ཡུམ། །རླུང་གི་རང་བཞིན་ཕུང་པོའི་བདུད་ཚོགས་ལ། །བསྟོད་དང་གཏོར་མ་རཀྟས་མཆོད་པར་བགྱི། །ཡ་མཱནྟ་ཀའི་སྒྲུབ་མཆོག་སྐྱོང་བ་དང་། །དགྲ་བགེགས་སྒྲོལ་ཞིང་བསྟན་པ་བསྲུང་བར་མཛོད། །ཨཱརྻ་མ་རུ་སྲིན་མོ་སེང་གེ་ཡུམ། །གླང་མགོ་ཡ་བ་ཏི་དང་ཏེལ་པ་གསུམ་པའི་གཤིན། །དམར་པོ་དབུགས་འཕྲོགས་སྲིན་མོ་འབྲུག་སྒྲོགས་ཡུམ། །ཆུ་ཡི་རང་བཞིན་ཉོན་མོངས་བདུད་ཚོགས་ལ། །བསྟོད་དང་གཏོར་མ་རཀྟས་མཆོད་པར་བགྱི། །ཡ་མཱནྟ་ཀའི་སྒྲུབ་མཆོག་སྐྱོང་བ་དང་། །དགྲ་བགེགས་སྒྲོལ་ཞིང་བསྟན་པ་བསྲུང་བར་མཛོད། །རལ་པ་ཚར་དགུ་སྲིན་མོ་འབར་མ་ཡུམ། །སྟག་མགོ་ཕྱྭ་སངས་ཆོས་རྒྱལ་བཞི་པའི་གཤིན། །ནད་གཏོང་ཁྲག་གཏོང་སྲིན་མོ་སྦྱིན་སྲེག་ཡུམ། །མེ་ཡི་རང་བཞིན་འཆི་བདག་བདུད་ཚོགས་ལ། །བསྟོད་དང་གཏོར་མ་རཀྟས་མཆོད་པར་བགྱི། །ཡ་མཱནྟ་ཀའི་སྒྲུབ་མཆོག་སྐྱོང་བ་དང་། །དགྲ་བགེགས་སྒྲོལ་ཞིང་བསྟན་པ་བསྲུང་བར་མཛོད། །ཤ་ཁྲག་དམར་གྱི་གཏོར་མ་རྒྱ་ཆེན་པོ་འདི་འབུལ་ཞིང་བསྔོ་བའི་གནས་སུ་གྱུར་པ་ནི། འཆི་བདག་ལས་ཀྱི་གཤིན་རྗེ་བྱེ་བ་གུང་རིང་། ཡུམ་སྲིན་མོ་དུག་ཧྲུལ་གོས་གྱོན་མ་འཁོར་དང་བཅས་པ་ཐམས་ཅད་ལ་འབུལ་ལོ། །གཞན་ཡང་ཡ་མ་རཱ་ཛ་ཡབ་ཡུམ། མྱོས་བྱེད་འབར་བ་ཡབ་ཡུམ། ཨཱརྻ་མ་རུ་ཡབ་ཡུམ། རལ་པ་ཚར་དགུ་ཡབ་ཡུམ། ཕྱོགས་སྐྱོང་བའི་གཤིན་རྗེ་འཁོར་དང་བཅས་པ་ཐམས་ཅད་ལ་འབུལ་ལོ། །ཕོ་གཤེད་སུམ་བརྒྱ་དྲུག་ཅུ། མོ་གཤེད་སུམ་བརྒྱ་དྲུག་ཅུ་སྟེ་གཤིན་རྗེ་བདུན་བརྒྱ་ཉི་ཤུ། གྲི་ཐོགས་གིང་གི་ཚོགས། ཁྲམ་ཐོགས་བདུད་ཀྱི་ཚོགས། ཤོ་ཐོགས་རྩིས་ཀྱི་ཚོགས། སྲོག་གཅོད་བཤན་པའི་ཚོགས། མདངས་ལེན་གྱི་མ་མོ་སྟོང་རྩ་གཉིས། འཁོར་ཡི་དྭགས་འབུམ་སྡེའི་ཚོགས་དང་བཅས་པ་ཐམས་ཅད་ལ་འབུལ་ལོ། །བཞེས་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། བསྟན་པའི་རུ་ཏྲ་སྒྲོལ། ཕྲིན་ལས་ལྷུན་གྱིས་གྲུབ་པར་མཛོད།། །། ཁ་ཐུན་དྲག་པོའི་སྦྱིན་སྲེག་བཞུགས་སོ། །དྲང་སྲོང་མེ་ལྷར་མཆོད་པ་འབུལ། །ཞེས་འབྱུང་བའི་དོན་ལ་གསུམ་སྟེ། གཞི་དལ་བཅའ་བ། ཐབ་ལྷར་བསྐྱེད་ཅིང་མཆོད་པ། འབྲས་བུ་ཕྲིན་ལས་བཅོལ་ཞིང་གཤེགས་སུ་གསོལ་བའོ། །མཐིང་ནག་གྲུ་བཞི་ཐབ་ཁུང་ཟུར་གསུམ་དུ། །ཚེར་མ་ཅན་གྱི་ཤིང་བརྩིགས་ལ། །དུག་སྣ་ཚོགས་དང་ཁྲག་སྣ་ཚོགས། །ལྕགས་ཕྱེ་ཟངས་ཕྱེ་རྡོ་ཕྱེ་དང་། །ཡུངས་ཀར་ཡུངས་ནག་མར་ནག་དང་། །ཡམ་ཤིང་དུག་ཤིང་ཚེར་མ་ཅན། །རྩ་བ་ལས་བྱུང་སོར་བརྒྱད་ཚད། །ལིངྒ་ཕུར་པ་མདའ་དང་གྲི། །དྲག་པོའི་མེ་བླངས་ཡུག་སས་སྦར། །ཏིང་འཛིན་རྃ་ལས་མེ་ལྷ་ཉིད། །དུད་ཁ་ར་སྐྱེས་ཁམ་པ་ཞོན། །ཞལ་གཅིག་ཕྱག་གཉིས་ཕྲེང་བ་མེ། །ལྟོ་བར་དོན་གྱི་ལྷ་ལྔ་བསམ། །ཡེ་ཤེས་སེམས་དཔའ་སྤྱན་དྲངས་བསྟིམ། །ཏིལ་ཆེན་མར་ཁུས་མེ་དཔལ་བསྐྱེད། །ཚིལ་ཆེན་བཅས་པའི་ཡམ་ཤིང་འབུལ། །ལིངྒ་དབྱེ་དགུགས་ཕུར་པས་གདབ། །མདས་བརྡེག་ཐུན་ཕབ་གྲིས་གཏུབ་ལ། །མེ་ལྷའི་ཞལ་བརྒྱུད་ལྷ་ཚོགས་མཆོད། །སྐྱེ་བརྒྱུད་བཅད་ཕྱིར་ཤ་རུས་འབུལ། །གྲི་རུ་གསོད་ཕྱིར་ལྕགས་ཕྱེ་དང་། །ཟངས་ཕྱེ་རྡོ་ཕྱེ་ཡུངས་ཀར་འབུལ། །རིམས་ནད་དབབ་ཕྱིར་ཡུངས་ནག་འབུལ། །སྣ་ཚོགས་ནད་གཏོང་དམེ་ཁྲག་འབུལ། །སྦོས་ནད་བརྒྱལ་ནད་གཏོང་བའི་ཕྱིར། །གདུག་པ་དུག་གི་ཚོགས་རྣམས་འབུལ། །ཨཱོྂ་ཧྲཱིཿཥྚི་ཝིཥྚི་ཏཱ་ན་ན་ཧཱུྃ་ཕཊ། ཡ་མ་མེ་ཏ་ཀྵེ་ར་ཙ་ས་ཏོ་རུ་ན་ཡོ་ནི་ར་ཡ་ཙ་ནི་ཤ་ཏྲཱུྃ་མཱ་ར་ཡ་ཨགྣེ་ཡེ་ཁ་རཾ་ཁཱ་ཧི་སྭཱ་ཧཱ། ཞེས་རིམ་གྱིས་བརྒྱ་རྩ་བརྒྱད་དམ། ང་གཅིག་གམ་ནི་ཉེར་གཅིག་འབུལ། །གཞན་ཡང་ཉིན་བཞིའི་ལྷ་སྔགས་ཀུན། །ཧྲཱིཿཥྚིས་བསྡུས་ལ་རིམ་བཞིན་འབུལ། །ཉིན་བཞི་ཐམས་ཅད་ཀྱི་མགོར་ཧྲཱིཿཥྚིསབརྒྱན་ནས་འབུལ་ལོ། །ཡ་མ་ར་ཛ་ས་ཏྭ་མེ་ཡ་ཨ་མུ་ཀཾ། ཤ་ཏྲཱུཾ་མཱ་ར་ཡ་ཨགྣེ་ཁ་རཾ་ཁཱ་ཧི་སྭཱ་ཧཱ། ཉིན་བཞི་མགོ་འཇུག་དེ་ཡིས་འགྲེ། །ཞི་རྒྱས་དབང་དྲག་ཕྲིན་ལས་ཀྱི། །འབྲས་བུ་སྦྱིན་སྲེག་དག་གིས་འབྱིན། །ཡི་དམ་ནར་མ་རྒྱུན་དུ་ནི། །ཨཱོྂ་ས་མ་ཡ་མཉྫུ་ཤྲཱི་ཡ་མཱནྟ་ཀ་ཡ་མ་རཱ་ཙ་མ་མ་ཨེ་ཀ་ཛཱ་ཊི་ཨགྣེ་ཡེ་ཁ་རཾ་ཁཱ་ཧི་སྭཱ་ཧཱ། ཞེས་པའི་སྔགས་འདིས་འབུལ་བར་བྱ། །བདག་དང་གཞན་གྱི་ཕྲིན་ལས་བཅོལ། །སྨོན་ལམ་བཏབ་ལ་གཤེགས་སུ་གསོལ། །དམ་ཚིག་དཀྱིལ་འཁོར་རང་ལ་བསྡུ། །དྲི་ཆུས་བསང་ལ་ཐ་མལ་བསམ། །ཐལ་བ་ཆུ་བོ་ཆེན་པོར་དོར། །གཤིན་རྗེ་ནག་པོའི་སྦྱིན་སྲེག་ནི། །རྒྱ་གར་བྲམ་ཟེའི་རིགས་ལས་བྱུང་། །དྷ་ན་ད་ལ་དག་ལས་བརྒྱུད། །རྒྱ་རྒྱ་རྒྱ། རྫོགས་སོ།། །།