འཇམ་དཔལ་གཤིན་རྗེ་གཤེད་ཁ་ཐུན་གྱི་དབང་བརྒྱུད་བླ་མའི་གསོལ་འདེབས། རྒྱལ་སྲས་གཞན་ཕན་མཐའ་ཡས།
འཇམ་དཔལ་གཤིན་རྗེ་གཤེད་ཁ་ཐུན་གྱི་དབང་བརྒྱུད་བླ་མའི་གསོལ་འདེབས་བཞུགས། ཀུན་བཟང་འཇམ་དཔལ་གསང་བདག་མཉྫུ་ཤྲཱི། །ཤཱིནྟཾ་གརྦྷ་པདྨ་སཾབྷ་ཝ། །ནམ་མཁའི་སྙིང་པོ་གནུབས་ཆེན་ཡབ་སྲས་ཏེ། །བཀའ་བབས་དང་པོའི་བརྒྱུད་པར་གསོལ་བ་འདེབས། །འཇམ་དཔལ་བཤེས་གཉེན་ཧཱུཾ་མཛད་པདྨ་འབྱུང་། །ཁྲག་འཐུང་ནག་པོ་བ་སུ་དྷ་ར་དང་། །སངས་རྒྱས་ཡེ་ཤེས་ཡོན་ཏན་རྒྱ་མཚོ་སྟེ། །བཀའ་བབས་གཉིས་པའི་བརྒྱུད་པར་གསོལ་བ་འདེབས། །མཉྫུ་མི་ཏྲ་རོམ་བུ་གུ་ཧྱ་དང་། །དེ་བ་ཙནྡྲ་དྷ་ན་ཏ་ལའི་ཞབས། །སྨིན་གྲོལ་གདམས་པ་ཀུན་རྫོགས་ཁུ་ལུང་པ། །བཀའ་བབས་གསུམ་པའི་བརྒྱུད་པར་གསོལ་བ་འདེབས། །ཡེ་ཤེས་རྒྱ་མཚོ་མཆོག་གི་སྙིང་པོ་དང་། །ཆོས་ཀྱི་དབོན་རྩ་ཁྲོ་འབར་ཆོས་ཀྱི་རྒྱལ། །ཧཱུྃ་ཆེན་བཀྲ་ཤིས་དར་དང་དར་མ་སེང་། །ལྷ་རྗེ་སེང་དར་རྣམས་ལ་གསོལ་བ་འདེབས། །གནུབས་ནག་ཡེ་རྒྱམ་འཛམ་གླིང་ནག་པོ་དང་། །ཆོས་གྲགས་རྒྱ་མཚོ་རྡོ་རྗེ་དཔལ་འབར་བ། །གྲགས་རྒྱལ་ཐར་པ་རྒྱལ་མཚན་འཇམ་དབྱངས་མཚན། །ནམ་མཁའ་ཐོག་ཐུག་རྣམས་ལ་གསོལ་བ་འདེབས། །རྡོ་རྗེ་སྟོབས་ལྡན་ཁྲོ་རྒྱལ་རྡོ་རྗེ་དང་། །རྣམ་རྒྱལ་རྡོ་རྗེ་ཆོས་དབྱིངས་གཏེར་བདག་གླིང་། །འགྱུར་མེད་རྒྱ་མཚོ་རཏྣ་བི་ཛ་དང་། །པདྨ་བསྟན་འཛིན་རྣམས་ལ་གསོལ་བ་འདེབས། །ཕྲིན་ལས་རྣམ་རྒྱལ་པདྨ་དབང་རྒྱལ་དང་། །ནམ་མཁའི་རྡོ་རྗེ་པདྨ་མངྒ་ལ། །གཞན་ཕན་མཐའ་ཡས་པདྨ་བཛྲ་རྩལ། །བསྟན་པའི་ཉི་མ་རྣམས་ལ་གསོལ་བ་འདེབས། །འཇིགས་མེད་ཀུན་དགའ་བསྟན་འཛིན་ནོར་བུའི་སྡེ། །ཁྱབ་བདག་འགྱུར་མེད་ཕན་བདེའི་འོད་ཟེར་ཞབས། །བརྒྱུད་སྲོལ་ཀུན་འདུས་རྩ་བའི་བླ་མ་དང་། །ཡི་དམ་ལྷ་ཚོགས་རྣམས་ལ་གསོལ་བ་འདེབས། །འདི་ནས་བཟུང་སྟེ་བྱང་ཆུབ་སྙིང་པོའི་བར། །རྗེ་བཙུན་དམ་པ་རྣམས་ཀྱིས་རྗེས་བཟུང་སྟེ། །ངན་སོང་གསུམ་སོགས་མི་ཁོམ་གནས་རིགས་ལས། །ཐར་པའི་དལ་རྟེན་ཐོབ་པར་བྱིན་གྱིས་གྱིས་རློབས། །ཤུགས་དྲག་ངེས་འབྱུང་དད་པས་ཡིད་དྲངས་ནས། །མཚན་ལྡན་དགེ་བའི་བཤེས་གཉེན་ལེགས་བསྟེན་ཏེ། །རང་གཞན་འབྱོར་པའི་རྟེན་འབྲེལ་སྒྲིགས་པ་ལ། །མཐུན་པའི་རྐྱེན་རྣམས་འཛོམས་པར་བྱིན་གྱིས་རློབས། །རང་དོན་ཡིད་བྱེད་དམན་པའི་བློ་སྤངས་ནས། །རྒྱལ་བའི་སྲས་ཀྱི་སྤྱོད་པ་ལྷུར་བླངས་ཏེ། །རྣམ་མཁྱེན་གོ་འཕང་སྒྲུབ་པའི་ཚུལ་རྣམས་ལ། །ནམ་ཡང་རྨོངས་པ་མེད་པར་བྱིན་གྱིས་རློབས། །བསྐལ་པ་དུ་མར་འབད་ཀྱང་མཇལ་དཀའ་བ། །གསང་ཆེན་སྨིན་གྲོལ་ལམ་མཆོག་ལ་བརྟེན་ནས། །ཚེ་འདིར་ཧེ་རུ་ཀ་དཔལ་མངོན་འགྲུབ་སྟེ། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཞེས་རྒྱལ་སྲས་གཞན་ཕན་མཐའ་ཡས་ཀྱིས་མཛད་པའི་བརྒྱུད་འདེབས་ལ་བརྒྱུད་པའི་ཁྱད་པར་གྱིས་གཞན་ཕན་མཐའ་ཡས་ནས་རིགས་བདག་འགྱུར་མེད་ཕན་བདེའི་འོད་ཟེར་བར་ཁ་སྐོང་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།