འཇམ་དཔལ་གཤིན་རྗེ་ཁ་ཐུན་ནག་པོའི་སྒྲུབ་ཐབས་བཀླག་པས་དོན་གྲུབ། འགྱུར་མེད་རིན་ཆེན་རྣམ་པར་རྒྱལ་བ།

འཇམ་དཔལ་གཤིན་རྗེ་ཁ་ཐུན་ནག་པོའི་སྒྲུབ་ཐབས་བཀླག་པས་དོན་གྲུབ་ཅེས་བྱ་བ་བཞུགས་སོ། །ༀ་སྭ་སྟི། བླ་མ་དང་དཔལ་ལྡན་གཤིན་རྗེའི་གཤེད་ལ་ཕྱག་འཚལ་ལོ། །འགྱུར་མེད་ཆོས་སྐུའི་དབྱིངས་ལས་མ་གཡོས་ཀྱང་། །གཟུགས་སྐུ་འཇམ་དཔལ་རྡོ་རྗེའི་དཀྱིལ་འཁོར་ལྷར། །ཡོངས་ཤར་ཁ་ཐུན་ནག་པོར་ཕྱག་བྱས་ནས། །དེ་སྒྲུབ་ཆོ་ག་འཇུག་བདེའི་ཁྲིགས་སུ་སྡེབས། །ཁ་ཐུན་རྡོ་རྗེའི་དཀྱིལ་འཁོར་དུ་དབང་ཐོབ་པའི་རྣལ་འབྱོར་པས། གཤིན་རྗེ་སྒྲུབ་པ་ལ་དོན་གསུམ་གྱིས་བསྟན་ཏེ། སྔོན་འགྲོ་དངོས་གཞི་རྗེས་དང་གསུམ་ལས། སྔོན་འགྲོ་ལ། ཐོག་མར་བསང་ཆུ་བྱིན་གྱིས་རློབ་པ་ནི། རང་ཡི་དམ་དུ་གསལ་བའི་ཐུགས་ཀ་ནས་ཡི་གེ་རཾ་གཅིག་ཆད་ནས། རཾ་ལས་ཡེ་ཤེས་ཀྱི་མེ་བྱུང་བས་དྲི་ཆབ་ཀྱི་དངོས་པོ་དང་མཚན་མར་འཛིན་པའི་མི་གཙང་བ་ཐམས་ཅད་བསྲེགས་པར་བསམ། ཡཾ་ཞེས་པས་ཐུགས་ཀ་ནས་ཡི་གེ་ཡཾ་གཅིག་ཆད་པས་ཡཾ་དེ་ལས་ཡེ་ཤེས་ཀྱི་རླུང་བྱུང་བས། དྲི་ཆབ་ཀྱི་དངོས་པོ་དང་མཚན་མར་འཛིན་པ་མི་གཙང་བ་ཐམས་ཅད་གཏོར་བར་བསམ། ཁཾ་ཞེས་པས་ཐུགས་ཀ་ནས་ཁཾ་གཅིག་ཆད་པས་ཁཾ་དེ་ལས་ཡེ་ཤེས་ཀྱི་ཆུ་བྱུང་བས། དྲི་ཆབ་ཀྱི་དངོས་པོ་དང་མཚན་མར་འཛིན་པའི་མི་གཙང་བ་ཐམས་ཅད་བཀྲུས་པར་བསམ། ཨ་ཙནྡྲ་མཎྜ་ལ་སྭ་བྷཱ་ཝ་ཞེས་བརྗོད་པས། དྲི་ཆབ་ཀྱི་སྣོད་དེ་ཟླ་བའི་དཀྱིལ་འཁོར་ཁ་ཡར་ལ་བལྟ་བ་གཅིག་ཏུ་གྱུར་པར་བསམ། བཅུད་ཡི་གེ་ཨ་དཀར་པོ་ཞིག་ཏུ་གྱུར་པར་བསམ། དེ་ནས་ༀ་ཨཱཿཧཱུྃ། མ་ཧཱ་ཀྲོ་དྷི་ཤྭ་རཱི་སརྦ་དྲ་བྱཱཾ་ཤྭ་དྷ་ན་ཡ་ཧཱུྃ་ཧྲཱིཿཋཱ། ཞེས་བཟླས་པས་སྔགས་དེ་ལས་འོད་འཕྲོས་པས་ཨ་ལ་ཕོག །དེ་ལས་འོད་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ལ་མཉེས་པའི་མཆོད་པ་ཕུལ། ཐུགས་དམ་གྱི་རྒྱུད་བསྐུལ། སེམས་ཅན་གྱི་ལུས་ངག་ཡིད་གསུམ་གྱི་སྒྲིབ་པ་སྦྱངས། ཚུར་འདུས་ཨ་ལ་ཐིམ། ཨ་འོད་དུ་ཞུ་ནས་རྡོ་རྗེའི་ཆུ་རྡུལ་ཕྲ་རབ་ཙམ་པར་གྱུར་ནས། སྔོ་ལྕིགས་ལྕིགས་འདུག་པས་ཟླ་བའི་དཀྱིལ་འཁོར་ཁེངས་པར་བསམ། རྩྭ་ཀུ་ཤའི་པིར་བཅུག་ལ། རཱ་ས་ཡ་ན་ཏ་ན་གུ་ཧྱ་སིདྡྷི་ས་མ་ཡ་སྭཱ་ཧཱ། ཞེས་བརྒྱ་རྩ་བརྒྱད་བཟླས་ལ། དེ་ནས་དྲི་དེ་བགེགས་དང་ལོག་འདྲེན་ལ་གཏོར་བས་མཚམས་བཅད། མཆོད་རྫས་དང་ཡོ་བྱད་ལ་གཏོར་བས་ཉེས་སྐྱོན་དག །མཆེད་དང་ལྕམ་དྲལ་ལ་གཏོར་བས་ཐུགས་དམ་བསྐང་བར་བསམ་མོ། །སྐྱབས་འགྲོ་ནི། ན་མོ། བརྒྱུད་པའི་རྩ་བ་བླ་མ་རྗེ། །དངོས་གྲུབ་འབྱུང་བའི་ཡི་དམ་ལྷ། །ལེགས་བྱིན་རློབ་པའི་མཁའ་འགྲོ་མ། །རྩ་བ་གསུམ་ལ་སྐྱབས་སུ་མཆི། །སེམས་བསྐྱེད་ནི། ཁམས་གསུམ་འཁོར་བའི་སེམས་ཅན་རྣམས། །སྡུག་བསྔལ་འདམ་ལས་དྲང་བའི་བློས། །བསྐྱེད་དང་རྫོགས་པའི་རིམ་པ་ལ། །བདག་གིས་ཇི་སྲིད་གནས་པར་བགྱི། །དེ་ནས་གཞི་བདག་ལ་གཏོར་མ་བྱིན་ལ། བདེན་པ་བརྡར། དེ་ནས་བགེགས་ལ་བཀའ་བསྒོ་བ་ནི། རང་ཐལ་མལ་པའི་སྙིང་གར་རཾ་ལས་ཉི་མའི་དཀྱིལ་འཁོར། དེ་ཡི་སྟེང་དུ་ཧཱུྃ་མཐིང་ནག །དེ་ལ་དམིགས་ནས། ངག་ཏུ། ༀ་མཉྫུ་ཤྲཱི་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཅེས་པས། བདག་ཉིད་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པ། གཡས་བེ་ཅོན། གཡོན་སྡིགས་མཛུབ་དང་རྒྱུ་ཞགས་ཅན། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། བ་སྤུའི་བུ་ག་ཐམས་ཅད་ཀྱང་ཡེ་ཤེས་ཀྱི་ཁྲོ་ཆུང་ཚོན་གང་བས་གཏམས་པར་བསྒོམ་ལ། བཀའ་བསྒོ་བ་ནི། ཧཱུྃ། གསང་སྔགས་དོན་ལ་མི་མོས་ཤིང་། །ཐེག་པ་མཆོག་ལ་མི་དད་པ། །འདི་ན་འདུག་པའི་གནས་མེད་ཀྱི། །སོ་སོ་རང་རང་གནས་སུ་དེངས། །ཧཱུྃ། ཉི་མའི་དཀྱིལ་འཁོར་ལ་གནས་པའི། །ཁྲོ་བོའི་མིང་ནི་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀུན་གྱི་ལག་ཆ་འཆོར། །ང་ནི་ཁྲོ་བོའི་རྒྱལ་པོ་སྟེ། །ཐུགས་ལས་བྱུང་བའི་ཁྲོ་བོ་ཡིས། །ཕྱོགས་བཅུའི་འཇིག་རྟེན་ཁམས་བཀང་ནས། །བགེགས་རྣམས་མ་ལུས་ཚར་བཅད་དོ། །ༀ་ཤྲཱི་པ་ར་ཡཀྴ་གུ་ཧྱ་བཛྲ་ཊ་ཀི་ནི་ཀཱ་ལ་རཱུ་པ་ནྲྀ་མཱ་ར་ན་ཧཱུྃ་ཕཊ། སྐབས་འདིར་སྤྲོས་པ་ལ་དགའ་ན། ཧཱུྃ། ཉི་མའི་དཀྱིལ་འཁོར་ལ་གནས་པའི། །ཡ་མཱནྟ་ཀའི་དཀྱིལ་འཁོར་འདིར། །འོག་ནས་ཁྲག་གི་རྒྱ་མཚོ་འཁྲུགས། །སྟེང་ནས་རྡོ་རྗེའི་ཐོག་ཆེན་འབེབས། །ཕྱོགས་ནས་བསྐལ་པའི་མེ་དཔུང་འབར། །མཚམས་ནས་རྡོ་རྗེའི་ཚྭ་ཚྭ་འཕྲོ། །ཡ་མཱནྟ་ཀའི་དཀྱིལ་འཁོར་འདིར། །འདི་ན་འདུག་པའི་གནས་མེད་ཀྱི། །འདི་རུ་མ་འདུག་གཞན་དུ་དེངས། །ༀ་ཨ་ཀྲོ་ཏེ་ཀ་ཀཱ་ལ་རཱུ་པ་རུ་ལུ་ཧཱུྃ་ཛཿ ཆྒཻ་མོ་མཱ་ར་ཡ་ནན། ༀ་ཧྲཱིཿཥྚི་བི་ཀྲི་ཏཱ་ན་ན་མཱ་ར་ཡ་ཙཀྲ་ཨ་པ་ན་ཡ་ཧཱུྃ་ཧཱུྃ་ཕཊ་ཕཊ། ཅེས་པས། བདག་གི་བ་སྤུའི་བུ་གའི་ཁྲོ་བོ་དང་། ཤངས་ཀྱི་རླུང་སྒྲོམ་ནས་ཁྲོ་བོའི་སྤྲུལ་པ་སྔ་མ་ལྟ་བུ་གྲངས་མེད་པ་ཕྱོགས་བཅུ་འཕྲོས་པས། དེ་དག་ན་གནས་པའི་བགེགས་ཕྱོགས་བཅུར་བསྐྲད་ཅིང་རྡུལ་དུ་བརླག་པར་བསྒོམ་མོ། །དེ་ནས་གསུམ་པ་རྒྱས་གདབ་པའི་མཚམས་ནི། འོག་མིན་ཆོས་རྒྱལ་ལྷ་ཡི་ཕོ་བྲང་དུ། །ཏིང་འཛིན་མཆོག་ལ་དེང་འདིར་བདག་འཇུག་གིས། །བླ་མེད་མཆོག་གི་གོ་འཕང་མ་ཐོབ་པར། །ལྷ་སྲིན་སྡེ་བརྒྱད་འབྱུང་པོའི་དཔོན་སྣ་རྣམས། །མཚམས་འདི་ཚུན་ཆད་སུ་ཡང་མ་འདའ་ཞིག །བི་ཤྭ་ཀྲོ་དྷ་ཛྭ་ལ་མཎྜ་ལ་ཧཱུྃ། ཞེས་པས། ཕྱི་སྣོད་ཀྱི་འཇིག་རྟེན་གཤིན་རྗེའི་གཞལ་ཡས་ཁང་། ནང་བཅུད་ཀྱི་སེམས་ཅན་གཤིན་རྗེ་གཤེད་ཡབ་ཡུམ་དུ་བསྒོམ་མོ། །བཞི་པ་དེ་ནས་བེ་ཅོན་གྱི་མཚམས་ནི། ངག་ཏུ། ༀ་སུམྦྷ་ནི་སུམྦྷ་ཧཱུྃ། གྷྲྀ་ཧྞ་གྷྲྀ་ཧྞ་ཧཱུྃ། གྷྲྀ་ཧྞ་པ་ཡ་གྷྲྀ་ཧྞ་པ་ཡ་ཧཱུྃ། ཨ་ན་ཡ་ཧོ། བྷ་ག་ཝཱན་བིདྱ་རཱ་ཛ་ཡ་ཧཱུྃ་ཕཊ། ཅེས་པས། རང་གི་བ་སྤུའི་བུ་ག་ནས་ཁྲོ་བོ་སྔ་མ་ལྟ་བུ་གྲངས་མེད་པ་ཕྱོགས་བཅུར་སྤྲོས་པས། ཐུན་མོང་དུ་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སེམས་ཅན་གྱི་རྒྱུད་སྦྱངས། ཁྱད་པར་དུ་གདུག་པ་ཅན་ཚར་བཅད་ནས། སཾ་ཧ་ར་ཎ་ཧཱུྃ། ཞེས་པས། ཁྲོ་བོ་དེ་དག་བདག་གི་བ་སྤུའི་ཁྲོ་བོ་ལ་ཐིམ། མཚོན་ཆ་བེ་ཅོན་རྣམས་བདག་གི་མདུན་ན་འོད་ལྷག་གེ་འདུག་པར་བསྒོམ་ལ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་བེ་ཅོན་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་བེ་ཅོན་བླ་བྲེ་ལ། །འོག་ཀྱང་བེ་ཅོན་ས་གཞིའི་འོག །ཕྱོགས་མཚམས་བེ་ཅོན་འབར་བས་གཏམས། །བེ་ཅོན་མཚམས་ལས་བགེགས་མ་འདའ། །ན་མཿསརྦ་ཏ་ཐཱ་ག་ཏ་ཀྲོ་དྷ་བི་ཛ་ཡ་ཧཱུྃ་ཕཊ། ཅེས་བརྗོད་པས། བེ་ཅོན་རྣམས་ཕྱོགས་བཅུར་འཕྲོས་ཤིང་འཁྲིགས་པས་བེ་ཅོན་གྱི་གུར་དང་བླ་བྲེ་དང་ས་གཞིར་གྱུར་ཏེ་བགེགས་དང་ལོག་འདྲེན་ལྟ་ཅི་སྨོས་ཏེ། སྲིད་པའི་རླུང་གིས་ཀྱང་མི་ཐར་བར་བསྒོམ་མོ། །དེ་ནས་རྒྱས་པར་བྱེད་ན་སྐབས་འདིར་མཚོན་ཆ་རོལ་པའི་མཚམས་ནི། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆ་རྣམ་པ་སྣ་ཚོགས་ཀྱིས། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་རྡོ་རྗེའི་བླ་བྲེ་ལ། །འོག་ཀྱང་རྡོ་རྗེའི་ས་གཞིའི་འོག །ཕྱོགས་མཚམས་རྡོ་རྗེ་འབར་བས་གཏམས། །རྡོ་རྗེའི་མཚམས་ལས་བགེགས་མ་འདའ། །ཧཱུྃ་བཛྲ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་འཁོར་ལོ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་འཁོར་ལོའི་བླ་བྲེ་ལ། །འོག་ཀྱང་འཁོར་ལོའི་ས་གཞིའི་འོག །ཕྱོགས་མཚམས་འཁོར་ལོ་འབར་བས་གཏམས། །འཁོར་ལོའི་མཚམས་ལས་བགེགས་མ་འདའ། །ༀ་ཙཀྲ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་དབྱུག་ཐོ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་དབྱུག་ཐོའི་བླ་བྲེ་ལ། །འོག་ཀྱང་དབྱུག་ཐོོའི་ས་གཞིའི་འོག །ཕྱོགས་མཚམས་དབྱུག་ཐོ་འབར་བས་གཏམས། །དབྱུག་ཐོའི་མཚམས་ལས་བགེགས་མ་འདའ། །ཏྲཱཾ་རཏྣ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་དགྲ་སྟྭ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་དགྲ་སྟྭའི་བླ་བྲེ་ལ། །འོག་ཀྱང་དགྲ་སྟྭའི་ས་གཞིའི་འོག །ཕྱོགས་མཚམས་དགྲ་སྟྭ་འབར་བས་གཏམས། །དགྲ་སྟྭའི་མཚམས་ལས་བགེགས་མ་འདའ། །ཧྲཱིཿཔདྨ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་རལ་གྲི་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་རལ་གྲིའི་བླ་བྲེ་ལ། །འོག་ཀྱང་རལ་གྲིའི་ས་གཞིའི་འོག །ཕྱོགས་མཚམས་རལ་གྲི་འབར་བས་གཏམས། །རལ་གྲིའི་མཚམས་ལས་བགེགས་མ་འདའ། །ཧཱ་ཀརྨ་ཛྭ་ལ་ཨ་ན་ལརྐ་ཧཱུྃ། ཞེས་མཚོན་ཆའི་མཚམས་གསལ་གདབ་ཅིང་བསྒོམ་མོ། །དེ་ནས་མེའི་མཚམས་ནི། མདུན་དུ་མ་ལས་ཉི་མའི་དཀྱིལ་འཁོར་གྱི་སྟེང་དུ་རྃ་གཅིག་བསམ། ངག་ཏུ། ཕཊ་རྃ། ཡྃ་རཾ། ཧེ་རཾ། ཏྲག་རཾ ། ཁྃ་རྃ། ཛྭ་ལ་རྃ ། རྃ་རྃ། ཞེས་པས། མདུན་གྱི་རྃ་ལས་མེ་རི་དང་མེ་དཔུང་འབར་བས་འོག་མེའི་ས་གཞི། ལོགས་མེའི་ར་བ་དང་དྲྭ་བ། སྟེང་མེའི་གུར་དང་བླ་བྲེ། བསྐལ་པའི་མེ་རི་ཆེན་པོ་ཚག་ཚག་ཚོམ་ཚོམ། འུར་འུར་གྱི་སྒྲ་དང་བཅས་པ་བསྒོམ་མོ། །ཚིག་བསྡུས་པ་ལྟར་ན། ཧཱུྃ། ཕྱོགས་མཚམས་ཀུན་ཏུ་རྡོ་རྗེའི་མེ། །རྣམ་པར་འཕྲོ་བ་རྣམས་བསམ་སྟེ། །མ་རུང་པ་དག་ཚིག་བསམ་ན། །བགེགས་རྣམས་མ་ལུས་བརླག་པར་འགྱུར། །བཛྲ་ཛྭ་ལ་རྃ་ཞེས་བརྗོད་པས་ཕྱི་རོལ་རྡོ་རྗེའི་མེའི་འོད་ཀྱིས་འཁྲིགས་པར་བསྒོམ་མོ། །རྒྱས་པ་ལྟར་ན། ཧཱུྃ། རྡོ་རྗེ་རི་རབ་ལྷུན་པོ་འབར་བའི་རྩིབས་བརྒྱད་ན། །འབར་བའི་ལྷ་བརྒྱད་བསྣོལ་བའི་གདན་སྟེང་ན། །ཤིན་ཏུ་མི་བཟད་གཏུམ་ཆེན་ཧ་ལའི་སྐུ། །གཤིན་རྗེ་མ་ཏྲཾ་རོ་ཡི་དབྱུག་པ་འཕྱར། །གང་ལ་ཅིས་འདུལ་ཙིཏྟའི་ཕྲེང་བས་བརྒྱན། །ཕྲ་མེན་དགུ་ཁྲི་མ་ཡི་འཁོར་གྱིས་བསྐོར། །བསྐལ་པའི་མེ་རི་སྨུག་ནག་འབར་བས་རབ་ཏུ་གཏམས། །མེ་ཡི་འཁོར་ལོ་རབ་ཏུ་འབར་བ་ལ། །རྡོ་རྗེ་རྒྱ་གྲམ་འབར་བའི་མེ་གཏོར་བས། །སྟེང་གི་མེ་ལྕེ་འབར་བ་འོག་ཏུ་འཕྲོས། །འོག་གི་མི་ལྕེ་འབར་བ་སྟེང་དུ་འཕྲོས། །མེ་རི་དགོན་པ་དག་ནི་ཕྱོགས་མཚམས་ནས། །དུར་ཁྲོད་མཚན་མའི་མེ་ནི་སྨུག་ཅིང་ནག །ཞེ་སྡང་འཇོམས་པའི་མེ་ནི་མཐིང་ནག་འབར། །གཏི་མུག་འཇོམས་པའི་མེ་ནི་སྨུག་ནག་འབར། །ང་རྒྱལ་འཇོམས་པའི་མེ་ནི་སེར་ནག་འབར། །འདོད་ཆགས་འཇོམས་པའི་མེ་ནི་དམར་ནག་འབར། །ཕྲག་དོག་འཇོམས་པའི་མེ་ནི་ལྗང་ནག་འབར། །དབང་དྲག་གདུག་རྩུབ་མེ་ནི་ཁམ་ནག་འབར། །དུར་ཁྲོད་མེ་ཡི་མཚམས་ལས་གང་འདའ་བ། །རྡུལ་ཆ་ཕྲ་མོ་བཞིན་དུ་བརླག་པར་མཛོད། །ཕཊ་རྃ། ཡྃ་རཾ། ཧེ་རྃ། ཏྲག་རྃ། ཁྃ་རྃ། ཛྭ་ལ་རྃ། རྃ་རྃ། ཞེས་བརྗོད་པས་མེས་འཁྲིགས་པར་བསྒོམས་ཏེ་མཚམས་བཅད་པའོ། །དེ་ནས་ཡེ་ཤེས་ཀྱི་དཀྱིལ་འཁོར་དུ་འཇུག་པ་ལ་དབང་བའི་ཕྱིར། རྒྱུ་བསོད་ནམས་ཀྱི་ཚོགས་བསགས་ཤིང་སྨིན་པའི་དབང་བླང་བ་ནི། བཛྲ་ས་མ་ཡ་ཛཿ ཞེས་ལན་གསུམ་བརྗོད་པས། བཅོམ་ལྡན་འདས་འཇམ་དཔལ་ཞི་ཁྲོའི་ལྷ་ཚོགས་འཁོར་དང་བཅས་པ་ཆོས་སྐུ་མཚན་མ་མེད་པ་ལས་འགྲོ་བའི་དོན་དུ་གཟུགས་ཀྱིི་སྐུར་བཞེངས་ཏེ། རང་ཉིད་ཀྱི་མདུན་གྱི་ནམ་མཁའ་ལ་པདྨ་ཉི་ཟླའི་གདན་ལ་བཞུགས་པར་བསམ་ལ། བརྡོ་སྒོ་དབྱེ་བ་ནི། ཧཱུྃ། ཁམས་གསུམ་འཁོར་བ་རབ་སྟོང་ནས། །ཐམས་ཅད་དུར་ཁྲོད་བདག་ཉིད་དེ། །སྟོང་གསུམ་སྟོང་གི་འཇིག་རྟེན་ན། །ཕྱོགས་བཅུ་སྟོང་གི་འཇིག་རྟེན་ན། །ཡེ་ཤེས་ལྔ་ཡི་རང་བཞིན་ལས། །ཕྱོགས་བཅུ་སྟོང་གི་སྒོ་ཕྱེས་ཤིག །བཛྲ་ཛྙཱ་ན་པྲ་བེ་ཤ་ཡ་ཕཊ། བརྡ་ཕྱག་འཚལ་བ་འདི་སྐད་དོ། །ཧོ། ཐམས་ཅད་ངོ་བོ་མཉམ་ཉིད་སྐུ། །བདེ་ཆེན་གར་དབང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་དང་། །གཤིན་རྗེ་གཤེད་པོའི་ལྷ་ཚོགས་ལ། །བརྡ་དང་གར་གྱིས་མཚོན་ནས་ཀྱང་། །སྒོ་གསུམ་གུས་པས་ཕྱག་འཚལ་ལོ། །གུ་ཧྱ་མཎྜ་ལ་ཨ་ཏི་པུ་ཧོ། པྲ་ཏཱིཙྪ་ཧོཿ བདུན་རྣམ་དག་ནི། ཧཱུྃ། འཇམ་དཔལ་རྡོ་རྗེ་ལ་སོགས་པའི། །ཡབ་ཡུམ་སྲས་དང་བཅས་པ་ལ། །ལུས་ངག་ཡིད་གསུམ་གུས་ལྡན་པས། །ཀུན་ནས་དང་བས་ཕྱག་འཚལ་ལོ། །སངས་རྒྱས་ཞིང་དུ་གང་བསྔགས་པའི། །འཇིག་རྟེན་དག་ན་མཆོག་གྱུར་པའི། །རིན་ཆེན་མེ་ཏོག་བདུག་སྤོས་སོགས། །ཀུན་ནས་སྤྲུལ་ཏེ་མཆོད་པར་བྱ། །བདག་གིས་སྔོན་ཆད་བྱས་པའི་སྡིག །ཀུན་ནས་བསགས་པར་གྱུར་པ་རྣམས། །རང་བཞིན་མེད་ཀྱང་ཡོད་ཚུལ་གྱིས། །རྒྱལ་བ་རྣམས་ཀྱི་སྤྱན་སྔར་བཤགས། །མགོན་པོ་ཀུན་གྱི་བསོད་ནམས་དང་། །དམན་པའི་དགེ་བ་ཐམས་ཅད་ལ། །དེ་བཞིན་མཐུན་པའི་ལྷག་སེམས་ཀྱིས། །དང་བས་རྗེས་སུ་ཡི་རང་ངོ་། །བདེ་གཤེགས་བྱང་ཆུབ་མཆོག་བརྙེས་ནས། །འགྲོ་བ་ཐུགས་རྗེས་འདུལ་སླད་དུ། །ཆོས་ཀྱི་འཁོར་ལོ་བསྐོར་བ་ལ། །ཚངས་པ་བཞིན་དུ་གསོལ་བ་འདེབས། །མྱ་ངན་འདའ་བཞེད་དེ་དག་ལ། །འགྲོ་ཀུན་ཡུན་དུ་བདེ་བའི་ཕྱིར། །ཇི་སྲིད་འཁོར་བ་དེ་སྲིད་བར། །མྱ་ངན་མི་འདའ་བཞུགས་སུ་གསོལ། །ཇི་སྲིད་འཁོར་བ་མ་ཟད་བར། །བདག་གི་དགེ་བའང་དེ་སྲིད་དུ། །ཀུན་ནས་ཟད་པར་མི་འགྱུར་བར། །སེམས་ཅན་ཡོངས་སུ་སྨིན་པར་ཤོག །བདག་ཀྱང་དུས་འདི་ཕན་ཆད་ནས། །བྱང་ཆུབ་སྙིང་པོའི་བར་དུ་ནི། །མགོན་པོའི་འབངས་སུ་འབུལ་ལགས་ཀྱི། །ཐུགས་རྗེས་ཡོངས་སུ་བཟུང་བར་མཛོད། །དུས་འདི་ནས་ནི་བཟུང་ནས་ནི། །མགོན་པོ་ཁྱེད་ཀྱི་བཀའ་བཞིན་དུ། །སེམས་ཅན་དོན་ཀུན་བསྒྲུབ་ལགས་ཀྱི། །བྱིན་གྱིས་བརླབ་པར་མཛད་དུ་གསོལ། །སྡོམ་པ་བཟུང་བ་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱིན་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་སྤྱི་མཐུན་དང་། ཁྱད་པར་དུ། བླ་མས་གསུངས་པའི་སྡོམ་པ་ཀུན། །འཁོར་བར་སྐྱོ་བའི་ཡིད་བཞག་ནས། །ངེས་པར་ལེགས་པའི་དོན་དུའང་། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་ཀུན་ཏུ་བཤགས། །དགེ་བ་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་ལྟར། །སེམས་ཅན་མ་བསྒྲལ་དཔག་མེད་རྣམས། །མྱ་ངན་འདས་ལ་འགོད་པར་བྱ། །ལུས་དང་ངག་དང་ཡིད་ཀྱི་ལས། །ཉེས་པའི་ལས་ཀུན་བསྡམ་པར་བྱ། །བག་མེད་ཆང་ཡང་སྤང་བར་བྱ། །ཐེག་པ་དམན་ལ་ཞུགས་མི་བྱ། །ལྷ་དང་ལྷ་མོ་གསང་བ་སོགས། །བླ་མར་བརྙས་པར་མི་བྱའོ། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོང་བར་མི་བྱའོ། །རིག་པ་འཛིན་པའི་སྡོམ་པ་ཀུན། །ཚུལ་ཆེན་གསང་སྔགས་ལས་གསུངས་པ། །མི་དགེ་བཅུ་སྤོང་ལ་སོགས་པ། །ཀུན་ནས་མ་ལུས་བཟུང་བར་བགྱི། །ལས་དང་བཀའ་སྩལ་མ་ལུས་བགྱི། །ཞེས་སྡོམ་པ་བཟུང་བར་བྱའོ། །དེ་ནས་ཡི་དམ་གྱི་ལྷ་དང་མི་འབྲལ་བར་དམ་བཅའ་བ་ནི། ཧཱུྃ། ནམ་མཁའི་མཐའ་དང་མཉམ་པའི་དཀྱིལ་འཁོར་ནས། །བཅོམ་ལྡན་འཇམ་དཔལ་གཤིན་རྗེ་ཡབ་དང་ཡུམ། །རྒྱལ་བ་སྲས་བཅས་སྲུང་མ་ཐུགས་དམ་ཅན། །ཐུགས་རྗེ་བརྩེ་བས་བདག་ལ་དགོངས་སུ་གསོལ། །བདག་ནི་མཐོ་རིས་ལོངས་སྤྱོད་རྒྱལ་སྲིད་དམ། །འདོད་པའི་ལོངས་སྤྱོད་བསྒྲུབ་པ་མ་ལགས་ཏེ། །འགྲོ་ལ་སྙིང་བརྩེ་ཁོ་ནས་དོན་བརྩོན་པས། །ཡེ་ཤེས་སྒྲིབ་མེད་ཁྱེད་ཀྱིས་གསལ་ལེར་མཁྱེན། །བདག་ལུས་དུམ་བུ་སྟོང་དུ་གཏུབ་གྱུར་ཀྱང་། །ཡི་དམ་ལྷ་ཁྱོད་མི་སྤངས་བསྒྲུབ་པར་བྱ། །བསྐལ་པ་ཐོག་མ་མེད་པའི་སྔོན་རོལ་ནས། །རྩེ་གཅིག་དད་པའི་སེམས་ཀྱིས་བསྒྲུབས་པའི་ལྷ། །འཕགས་པའི་རྒྱལ་པོ་ཁྲོ་རྒྱལ་གཤིན་རྗེའི་གཤེད། །གསང་བའི་ཡུམ་མཆོག་བཛྲ་བེ་ཏ་ལི། །བསྐལ་པ་བསྒྲུབས་ཀྱང་ཁྱོད་ཀྱི་ཞལ་མ་མཐོང་། །ཞལ་བཟང་རྔམ་པ་བདག་ལ་བསྟན་དུ་གསོལ། །བདུད་དང་སྲིན་པོ་དྲེགས་པ་གློ་བུར་ནད། །སྒྱུ་མའི་ལུས་ལ་བར་དུ་གཅོད་གྱུར་ན། །རིག་འཛིན་ཚེ་ཡི་དངོས་གྲུབ་སྩལ་དུ་གསོལ། །རྡོ་རྗེ་གཤིན་རྗེ་བདག་གི་བཟུང་བར་བགྱི། །རཱ་ག་ཡ་ཧོ། རཱ་ག་ཡ་མི། བེ་ཏ་ལི་བཾ། རཀྟ་ཨ་ལ་ཧོ། ས་མ་ཡ་ཧོ། ས་མ་ཡ་སྟྭཾ། བྱིན་དབབ་པ་ནི། ཧཱུྃ། ཡ་མའི་ཚོགས་ཀྱི་དུས་ལ་བབ། །ཁྲོ་བོའི་རྒྱལ་པོའི་དུས་ལ་བབ། །མ་མོ་མཁའ་འགྲོའི་དུས་ལ་བབ། །བྱིན་གྱིས་རློབས་པའི་དུས་ལ་བབ། །དབང་བསྐུར་རྒྱལ་པོའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །དགྲ་བགེགས་འགུགས་པའི་དུས་ལ་བབ། །ཅེས་རྔ་བརྡུང་ཞིང་དྲིལ་བུ་གསིལ། ལུས་ངག་ཡིད་གསུམ་གྱི་སྡིག་སྒྲིབ་དག །ལྷ་ཚོགས་རྣམས་འོད་དུ་ཞུ་ནས་བདག་ལ་ཐིམ། བླ་མས་དབང་བསྐུར། ཡི་དམ་གྱིས་བྱིན་གྱིས་བརླབས། སྲུང་མ་རྣམས་བཀའ་ཉན་ཅིང་གསུང་སྡོད། དེས་བདག་ནུས་པ་དང་ལྡན་ནོ། །བདག་གི་ལུས་ངག་ཡིད་གསུམ་དང་། བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཀྱི་སྐུ་གསུང་ཐུགས་དབྱེར་མེད་དུ་གྱུར་པར་བསམ། ཧཱུྃ། ཡ་མཱནྟ་ཀ་འཇམ་དཔལ་གཤིན་རྗེའི་གཤེད། །ཡབ་ཡུམ་སྲས་བཅས་ཕོ་ཉ་གཡོག་འཁོར་བཅས། །གཡང་གཞི་ཐོད་པས་བརྒྱན་པའི་འཇིགས་ཚོགས་ཅན། །དཀྱིལ་དང་འཁོར་དུ་བཅས་པ་དགོངས་སུ་གསོལ། །སྲིད་གསུམ་དབྱིངས་ནས་བསྐྱོད་པའི་ཡུམ་ཆེན་ནི། །ཕྱི་ཡི་མ་བདུན་ནམ་གྲུ་ཆེན་མོ་དང་། །ཁ་ཁ་རེ་མ་ཏཱི་ཡི་ཚོགས་རྣམས་དང་། །རྦོད་གཏོང་ལེན་པར་བྱེད་པའི་མ་མོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །དམ་རྫས་སྔགས་སོགས་བདུད་རྩིའི་བཅུ་ཕྱུང་སྟེ། །སྲོག་གི་སྙིང་པོས་གནས་འདིར་སྤྱན་འདྲེན་ན། །མངོན་སུམ་འདི་རུ་ལྷ་ཚོགས་བཞུགས་སུ་གསོལ། །བདག་ནི་རྡོ་རྗེ་རང་བྱུང་ཆེན་པོ་སྟེ། །མི་དམིགས་ཚངས་པའི་དངོས་གྲུབ་སྩལ་ལགས་ན། །བཀའ་དང་གཞུང་ལས་འགལ་བ་མཐོལ་ལོ་བཤགས། །མཐོལ་ལོ་བཤགས་སོ་ཡེ་ཤེས་ལྷ་ཡི་ལྷ། །གནོང་ངོ་འགྱོད་དོ་མ་སྲིང་རྒྱ་མཚོའི་ཚོགས། །མཐོལ་བཤགས་ཕུལ་ན་ཚངས་པར་སྩལ་དུ་གསོལ། །ཡི་གེ་བརྒྱ་པ་ལན་གསུམ་བརྗོད། ཕྱི་ནང་གསང་གསུམ་གྱི་མཆོད་པ་བྱིན་གྱིས་བརླབ་པ་ནི། ཧཱུྃ། རྡོ་རྗེ་གཤིན་རྗེའི་ལྷ་ཚོགས་མཆོད་པའི་ཕྱིར། །ཕྱི་ནང་གསང་བའི་མཆོད་པའི་དྲི་མ་རྣམས། །ཡེ་ཤེས་མེ་ཆུ་རླུང་གི་སྦྱོར་བ་ཡིས། །བསྲེགས་དང་བཀྲུ་དང་སྦྱངས་པས་དག་གྱུར་ཅིག །རཾ་ཡཾ་ཁཾ། ཧཱུྃ། པུཥྤེ་དྷཱུ་པེ་ཨཱ་ལོ་ཀེ་དང་ནི། །གནྡྷེ་ལ་སོགས་ཕྱི་ཡི་མཆོད་པ་རྣམས། །ༀ་དང་ཨཱཿདང་ཧཱུཾ་གི་སྦྱོར་བ་ཡིས། །ལྷ་རྣམས་མཉེས་བྱེད་མཆོད་པར་བྱིན་གྱིས་རློབས། ༀ་ཨཱཿཧཱུཾ། ཨརྒྷཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྡ་པཱུ་ཛ་ཨཱཿཧཱུཾ། ཐབས་ཤེས་གཉིས་མེད་ལྷ་ཡི་ཏིང་འཛིན་གྱིས། །གསང་བའི་སྣོད་མཆོག་བྷནྡྷའི་གཞལ་ཡས་སུ། །ཡབ་ཡུམ་མཁའ་གསང་ལས་བྱུང་ཨ་མྲྀ་ཏ། །ཟག་མེད་བདུད་རྩི་ཆེན་པོར་བྱིན་གྱིས་རློབས། །བདུད་རྩི་བསང་། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱི། ཧཱུཾ། རྩ་བའི་ཁྲག་ཆེན་མཱུ་ལ་རཀྟ་དང་། །གསང་བའི་ཁྲག་ཆེན་པདྨ་རཀྟ་དང་། །ཁམས་གསུམ་བསྒྲལ་བའི་མ་ཧཱ་རཀྟ་རྣམས། །རྣལ་འབྱོར་ནང་གི་མཆོད་པར་བྱིན་གྱིས་རློབས། །རཀྟ་བསང་། ༀ་མཱུ་ལ་རཀྟ་ཛྭ་ལ་མཎྜ་ལ་ཧཱུཾ། ༀ་པདྨ་རཀྟ་ཛྭ་ལ་མཎྜ་ལ་ཧཱུཾ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ། ཧཱུཾ། མཁའ་མཉམ་ཐོད་པ་ཤེས་རབ་སྣོད་ནང་དུ། །ཐབས་ཀྱི་རང་བཞིན་ཤ་ལྔ་བདུད་རྩི་ལྔ། །གཉིས་མེད་ཟུང་དུ་འཇུག་པའི་བ་ལིངྟ། །རྣམ་དག་བདུད་རྩི་ཆེན་པོ་བྱིན་གྱིས་རློབས། །ༀ་ཨཱཿཧཱུཾ་མ་ཧཱ་བ་ལིངྟ་བ་ལ་ཏི་གུ་ཧྱ་སིདྡྷི་ས་མ་ཡེ་ཧཱུཾ། ཧཱུཾ། ཤེས་རབ་རང་བཞིན་གསང་བའི་མུ་དྲ་ནི། །བཅུ་དྲུག་ལང་ཚོ་སྒེག་དང་འཛུམ་བཞད་ལྡན། པདྨའི་ཟེའུ་འབྲུས་དགའ་བཞིའི་ཡེ་ཤེས་བསྐྱེད། །བདེ་ཆེན་མཆོད་པ་ཆེན་པོར་བྱིན་གྱིས་རློབས། །ༀ་མ་ཧཱ་མུ་དྲ་པཱུ་ཛ་ཨཱཿཧཱུཾ། ཞེས་བྱིན་གྱིས་བརླབ་བོ། །ཚོགས་རྟེན་བསྡུ་བ་ནི། བཅོམ་ལྡན་འདས་ཡ་མཱནྟ་ཀའི་ལྷ་ཚོགས་ཐམས་ཅད་ཀྱིས། བདག་གི་ལུས་ངག་ཡིད་གསུམ་སྨིན་པར་མཛད་དུ་གསོལ། གྲོལ་བར་མཛད་དུ་གསོལ། བྱིན་གྱིས་བརླབ་པར་མཛད་དུ་གསོལ། ཞེས་བརྗོད་པས་ཡ་མཱནྟ་ཀའི་སྐུ་གསུང་ཐུགས་ལས་ཡི་གེ་ༀ་ཨཱཿཧཱུཾ་གསུམ་བྱུང་སྟེ། བདག་གི་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་ནས། ཡ་མཱནྟ་ཀའི་སྐུ་གསུང་ཐུགས་དང་བདག་གི་ལུས་ངག་ཡིད་གསུམ་དབྱེར་མེད་དུ་གྱུར་ཏེ། ལྷ་ཚོགས་ཐམས་ཅད་བདག་ལ་ཐིམ་པ་བསམ་མོ། །དེ་རྣམས་ནི་སྔོན་འགྲོའི་རིམ་པའོ། །དངོས་གཞི་ཏིང་འཛིན་རྣམ་གསུམ་ལས། དང་པོ་དེ་བཞིན་ཉིད་ཀྱི་ཏིང་འཛིན་ནི། ཧཱུཾ། རྟོག་མེད་སྤྲོས་བྲལ་ཆོས་ཀྱི་དབྱིངས། །དམིགས་མེད་མཁའ་མཉམ་བྱང་ཆུབ་སེམས། །དངོས་པོ་མཚན་མར་མི་དམིགས་པའི། །ཆོས་ཉིད་ངང་དུ་དབྱེར་མེད་མཉམ། །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་ས་མ་ཏི་ཧཱུཾ། ཀུན་སྣང་གི་ཏིང་འཛིན་ནི། ཧཱུཾ། ཆུ་ཟླའི་དཀྱིལ་འཁོར་ཇི་བཞིན་དུ། །སྒྱུ་མའི་སེམས་ཉིད་དེ་དང་འདྲ། །མཁའ་ལ་འཇའ་ཚོན་སྣང་བ་ཡང་། །ནམ་མཁའི་ངང་དུ་རོ་གཅིག་མཉམ། །ༀ་དྷརྨ་དྷཱ་ཏུ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ རྒྱུའི་ཏིང་འཛིན་ནི། ཧཱུཾ། མཁའ་མཉམ་དག་པའི་དབྱིངས་ཉིད་ལས། །ཡེ་ཤེས་ཐུགས་ཀྱི་སྙིང་པོ་ནི། །སེམས་ཉིད་ངེས་པ་ཧཱུཾ་དུ་གྱུར། །ཀུན་འབྱུང་ཡེ་ཤེས་རྒྱུ་ནི་ཧཱུཾ། ༀ་བཛྲ་ཏིསྟ་ཛྙཱ་ན་བཛྲ་ཧཱུཾ། འབྱུང་བ་རིམ་བརྩེགས་ནི། ཧཱུཾ། རྒྱུད་ལྔ་གདོད་ནས་དག་པའི་ཕྱིར། །གཏི་མུག་འབར་བའི་ནམ་མཁའ་ལ། །ཕྲག་དོག་འབར་བའི་རླུང་ནག་འཁྲིགས། །འདོད་ཆགས་འབར་བའི་མེ་ཆུ་ཆགས། །ཞེ་སྡང་འབར་བའི་ས་གཞི་ཆགས། །འདོད་ཆགས་འབར་བའི་རྦ་ཀློང་འཁྱིལ། །ང་རྒྱལ་འབར་བའི་ཀེང་རུས་བརྩིགས། །ཞེ་སྡང་འབར་བའི་མེ་རི་འབར། །ཨེ་ཨགྣེ་མཎྜ་ལ་ཧཱུྃ། ཡཾ་ཀརྨ་རཀྟ་མཎྜ་ལ་ཧཱུཾ། རཾ་ཛྭ་ལ་མཎྜ་ལ་ཧཱུཾ། ཁཾ་མ་ཧཱ་མཎྜ་ལ་ཧཱུཾ། སུཾ་བཛྲ་ཏིཥྛ་ལྷན། ར་རཀྟ་ས་མུན་ཛྭ་ལ་མཎྜ་ལ་ཧཱུཾ། ཀེཾ་ནི་རི་ཏི་ཛྭ་ལ་མཎྜ་ལ་ཧཱུཾ། རཾ་ཛྭ་ལ་མཎྜ་ལ་ཧཱུྃ། ཧཱུྃ་གི་འཕྲོ་འདུ་སྦྱོར་བ་ལས། །འཇིག་རྟེན་ཁམས་ནི་རབ་འབྱམས་ཀུན། །རྃ་ཡྃ་ཁྃ་གིས་བསྲེགས་སྦྱངས་བཀྲུས། །འོད་འདུས་ཐོག་མའི་གཟུགས་ལ་སྡུད། །སྟེང་འོག་པདྨ་འཁོར་ལོ་གནས། །ༀ་སརྦ་ཏ་ཐཱ་ག་ར་བུདྡྷ་ཙཀྲ་གརྦྷེ་ལཾ། ༀ་པདྨ་མཎྜ་ལ་ཨ་བྷི་ཥིཉྩ་ༀ། གཟུགས་ཀྱི་ཡུལ་ལ་ཞེན་པ་ལོངས་སྤྱོད་རྫོགས་པའི་ཞིང་ཁམས་སུ་དག་པར་བྱ་བའི་ཕྱིར་རྟེན་གཞལ་ཡས་ཁང་བསྐྱེད་པ་ནི། ཧཱུཾ། རིན་ཆེན་དུར་ཁྲོད་གཞལ་ཡས་ཁང་། །ཡེ་ཤེས་ཆེན་པོ་གནས་ཆེན་པོ། །ཕྱི་དང་ནང་མེད་ཆོས་ཀྱི་དབྱིངས། །མཐའ་དང་དབུས་མེད་ནམ་མཁའི་དབྱིངས། །གྲུ་གསུམ་མཐིང་ནག་འབར་བ་ལ། །ཟླ་གམ་དམར་པོ་དབང་གི་ཚུལ། །འཁོར་ལོ་ཐོད་པ་བཞི་དང་ལྡན། །ལྕགས་མཁར་གླིང་ཆེན་བཅུ་གསུམ་སྟེ། །འབར་བ་ཁྲག་གི་བར་ཁྱམས་ལ། །གྲུ་བཞི་སྒོ་བཞི་ལོགས་དང་ལྡན། །སྦྲུལ་གྱི་རྒྱ་གྲམ་མཐའ་བསྐོར་ཏེ། །རྡོ་རྗེ་རྒྱ་གྲམ་ཐོད་ཕྲེང་མཛེས། །དཀྱིལ་འཁོར་བསམ་འདས་ལྷུན་གྱིས་གྲུབ། །བྷྲཱུྃ་བི་ཤྭ་བི་ཤུདྡྷེ་བཛྲ་བྷནྡྷ་ཛྙཱ་ན་ཙཀྲ་བྷྲཱུྃ། ཧཱུཾ་སྥ་ར་ཎ་ཕཊ། ཧཱུཾ། བདེ་གཤེགས་ཐུགས་ཀྱི་རང་བཞིན་གྱིས། །ལྷུན་གྲུབ་དཀྱིལ་འཁོར་འབར་བའི་དབུས། །བདུད་དང་མུ་སྟེགས་ཐམས་ཅད་དང་། །གནོད་སྦྱིན་སྲིན་པོ་གདན་དུ་བཏིང་། །གཤིན་རྗེ་ཕོ་མོ་བསྣོལ་བའི་སྟེང་། །མ་ཧེ་གླང་རྒོད་བརྫིས་པའོ། །རུ་དྲ་ཏི་ར་བཾ། ཡ་མ་ཡེ་ཏི་ར་བཾ། མ་ཧེ་མཎྜ་ལ། མ་སཱུ རྻ་མཎྜ་ལ། ཨ་ཙནྡྲ་མཎྜ་ལ། པཾ་པདྨ་མཎྜ་ལ། སླར་ཡང་། སཾ་ཧ་ར་ན་ཧཱུྃ། ནང་འཛིན་བྱེད་ཀྱི་ཤེས་པ་ཚོགས་བརྒྱད་དུ་འཁྲུལ་པ་ཆོས་ཀྱི་སྐུར་དག་པར་བྱ་བའི་ཕྱིར་བརྟེན་པ་ལྷ་བསྐྱེད་པ་ནི། ཧཱུཾ། ཉི་མའི་དཀྱིལ་འཁོར་མ་ལས་བྱུང་། །ཟླ་བའི་གདན་ནི་ཨ་ལས་བྱུང་། །པདྨའི་གདན་ནི་པཾ་ལས་བྱུང་། །གདན་སྟེང་ཧཱུཾ་གི་འཕྲོ་འདུ་ལས། །ཡེ་ཤེས་སེམས་དཔའ་རྡོ་རྗེར་གྱུར། །དེ་ལས་འོད་འཕྲོས་སླར་འདུས་པས། །ཆོས་ཀྱི་སྐུ་མཆོག་གཤིན་རྗེ་གཤེད། །སྐུ་ཆེ་ཡན་ལག་རགས་པ་སྟེ། །དུག་ཆེན་ཧ་ལའི་མདོག་ལྟར་ནག །ཞལ་གསུམ་མཐིང་ལ་ཕྱག་དྲུག་པ། །དབྱུག་ཐོ་དགྲ་སྟྭ་རལ་གྲི་གཡས། །ཞགས་པ་མདུང་ཐུང་བྷན་དམར་གཡོན། །ཞལ་གདངས་མཆེ་གཙིགས་སྤྱན་མིག་འཁྲུགས། །མགོ་ཕྲེང་སྦྲུལ་རིགས་རྣམ་ལྔ་དང་། །གླང་ཆེན་ཞིང་དང་སྟག་ཤམ་གསོལ། །ཐོད་སྐམ་དབུ་རྒྱན་ཉི་ཟླས་མཚན། །ཐལ་ཆེན་རཀྟ་ཞག་ལ་སོགས། །དཔལ་དང་དུར་ཁྲོད་ཆས་ཀྱིས་སྤྲས། །ཞབས་གཞི་བརྐྱང་བསྐུམ་གར་སྟབས་ཀྱིས། །མེ་དཔུང་འབར་བའི་ཀློང་ན་བཞུགས། །ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྩ་ཧཱུཾ་ཕཊ། ཧཱུཾ། གཡོན་ནས་ཁྲོ་མོ་རོ་ལངས་མ། །འབར་བའི་ཁ་ལ་གཟི་མདངས་ཆེ། །ལུས་ནི་མེ་ཆེན་འབར་བ་ལ། །ཞལ་གཅིག་ཕྱག་ནི་གཉིས་པ་སྟེ། །ཡབ་ལ་གཉིས་སུ་མེད་པར་འཁྲིལ། །ཏྲི་ཤུལ་ཐོད་ཁྲག་ཞལ་དུ་སྟོབ། །ༀ་བེ་ཏ་ལི་རཀྴ་ཡཀྴ་ཛཿཛཿ ཨུ་ཙུཥྨ་ཀྲོ་དྷ་བེ་ཏ་ལི་ཧཱུཾ། ཧཱུཾ། གཡས་ནས་བསྐྱེད་པའི་ཡུམ་ཆེན་ནི། །ཨེ་ཀ་ཛཱ་ཊི་རལ་གཅིག་མ། །སྨུག་ནག་སྤྱང་མོ་ཙིཏྟ་བསྣམས། །གཡས་ན་བཀའ་སྡོད་སྒྲོལ་གིང་མོ། །དོན་གྱི་ཁྲོ་མོ་རོ་ལངས་མ། །སྒྲོལ་བྱེད་ཨེ་ཀ་ཛཱ་ཊི་མ། །མ་མ་ཏྲག་རཀྴ་ཨེ་ཀ་ཛྭ་ཊི་ཛཿ ཧཱུྃ། ཡེ་ཤེས་ཐུགས་ཀྱི་ས་བོན་ལས། །འཇིགས་བྱེད་ཆེན་པོ་ཡ་ལས་བྱུང་། །སྨུག་ནག་རལ་གྲི་སྡིགས་མཛུབ་འཕྱར། །མངགས་པ་ལས་ཀྱི་ཕོ་ཉ་སྟེ། །ཡ་མ་རཱ་ཛ་ནི་ཛཿ ཧཱུཾ། ཡབ་ཡུམ་གཉིས་མེད་སྦྱོར་བ་ལས། །ཁྲག་མིག་མ་མོ་མ་ལས་བྱུང་། །ལྕགས་ཀྱུ་ཙིཏྟ་དུང་མཐིང་ག་ཁྲག་བཟུང་། །མངགས་པ་ལས་ཀྱི་ཕོ་ཉ་མོ། །མ་མ་རུ་ལུ་མ་ཧེ་བྷྱོ་ཧཱུཾ་ཕཊ། ཧཱུྃ། ཤ་ཟ་གིང་དང་སྲིན་པོ་དང་། །གིང་ལྕམ་སྲིན་མོ་ཤ་ཟ་མོ། །མ་མོ་ཁྲག་འཐུང་ཡི་དྭགས་ཚོགས། །རོ་ལངས་དུར་ཁྲོད་ཕོ་ཉར་འཁོད། །བཛྲ་ཨཾ་གུ་ཤ་ཛ་ཛཿ སྐུ་གསུང་ཐུགས་བྱིན་གྱིས་རློབ་ཅིང་ཡེ་ཤེས་ལྔའི་དབང་བསྐུར་བ་ནི། ཧཱུཾ། ཁྲོ་བོའི་རྒྱལ་པོ་གཤིན་རྗེའི་གཤེད། །ཡེ་ཤེས་ལྔ་དང་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔས། །དབང་བསྐུར་བྱིན་གྱིས་རློབ་པའོ། །ༀ་ན་མཿསརྦ་ཏ་ཐཱ་ག་ཏ་ཤྲཱི་མཉྫུ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་བུདྡྷ་ཀུན་ལེན་ཧཻ་ཧ། ༀ་བཛྲ་ཀུན་ལེན་ཧཻ་ཧ། ༀ་རཏྣ་ཀུན་ལེན་ཧཻ་ཧ། ༀ་པདྨ་ཀུན་ལེན་ཧཻ་ཧ། ༀ་ཀརྨ་ཀུན་ལེན་ཧཻ་ཧ་ཧཱུཾ་ཕཊ། དེ་ནས་གཏུམ་ཆེན་གྱི་བསྟོད་པ་ནི། ཧཱུཾ། གཏུམ་ཆེན་དྲེགས་པ་ཆེན་པོ་ཐམས་ཅད་འཇོམས་པའི་ལྷ། །དབང་བྱེད་བདུད་འདུལ་དུར་ཁྲོད་ཆས་ཀྱིས་བརྒྱན། །སྒྲོལ་བྱེད་སྐུ་མཆོག་མ་མོ་འབངས་སུ་འཁོལ། །རབ་བརྗིད་གཤིན་རྗེ་འཇོམས་ལ་ཕྱག་འཚལ་བསྟོད། །ཉི་མ་འབུམ་བས་ལྷག་པའི་འོད་སྟོང་ཕྱོགས་བཅུར། འགྱེད། །གདུག་བྱེད་མཚོན་ཆ་མང་པོ་བསྐལ་པའི་མེ་ལྟར་འབར། །ཁྲོ་རྔམས་གདུག་པས་སྲིད་གསུམ་ཐལ་བར་བརླག །འཇིགས་བྱེད་ཡ་མ་རཱ་ཛའི་སྐུ་ལ་ཕྱག་འཚལ་བསྟོད། །རྡོ་རྗེའི་སྐུ་ལ་ཀླུ་དབང་རབ་བརྒྱན་ཅིང་། །གཅན་གཟན་གདུག་པའི་ལྤགས་རློན་ན་བཟར་གསོལ། །ཤ་ཟ་གདུག་པའི་ཚོམ་བུ་དབུ་ཡི་ཐོད་དུ་བཅིང་། །ཁྲོ་བོའི་རྒྱལ་པོ་གདོང་དྲུག་ཕྱག་དྲུག་ཧཱུཾ་སྒྲ་ཞབས་དྲུག་ཅན། །ཕཊ་ཀྱིས་ཁམས་གསུམ་གཏོར་མཛད་ཞལ་ནས་ཧཱུཾ་སྒྲ་འབྱིན། །བརྐྱང་བསྐུམ་བརྗིད་པས་གཤིན་རྗེའི་ཡ་བ་ཏིའི་སྙིང་གར་མནན། །ལྗགས་འདྲིལ་ཚེམས་ཀྱི་བར་ནས་རྡོ་རྗེའི་ཐོག་ཕབ་པས། །འཁོར་གྱི་མ་མོ་རྣམས་ཀྱང་བྲན་དུ་འཁོལ། །ཚམ་རྔམས་ཁྲོ་བོའི་སྐན་སྒྲ་བརྡབས་པ་ཡིས། །འཁོར་གྱི་མ་མོ་རྣམས་ཀྱང་འདར་ལྕུག་ལྕུག །ཚངས་པ་འཁོར་བཅས་རྡུལ་གྱི་ཐིག་འཛག་ཅིང་། །ལྷ་ཆེན་ཁྱབ་འཇུག་མ་ཧཱ་དེ་ཝ་གནོན། །ཕྱག་ན་བྷནྡྷ་རློན་པ་རབ་བསྣམས་ཤིང་། །དངོས་གྲུབ་བསྒྲུབ་ཅིང་ཀླད་ཁྲག་ཞལ་དུ་གསོལ། །ཁྱུང་དང་འུག་པ་ལྟ་བུའི་ཁྲ་རྣམས་ནི། །དམ་ལས་ལོག་པ་རྣམས་ལ་གཏོང་བར་མཛད། །རྣལ་འབྱོར་བདག་ལ་གདུག་ཅིང་འགལ་བྱེད་རྣམས། །རབ་ཏུ་ཆིངས་ཤིག་ཕུང་བར་མཛད་དུ་གསོལ། །གཤིན་རྗེ་ནག་པོ་ཡ་མ་རཱ་ཛ། ཁྲོ་བོ་ཀུན་གྱི་རྗེ། །གཏན་གྱི་ལྷར་ཡང་ཁྱེད་ལ་གསོལ་འདེབས་ན། །དགྲ་བོའི་མགོ་ནས་ཆེམ་ཆེམ་བསྣམས་སུ་གསོལ། །ནད་གཏོང་སྲིན་མོའི་ཚོགས་རྣམས་དབང་སྡུད་ཅིང་། །ཁྱུང་ཆེན་སྔོན་པོ་མཁའ་ལ་ལྡིང་བ་བཞིན། །ཐུགས་ཀྱི་སྤྲུལ་པ་ཁྱེའུ་ཆུང་མང་པོ་ཡིས། །རྣལ་འབྱོར་བདག་ལ་གནོད་པའི་དགྲ་དང་བགེགས། །ཡུད་ཙམ་གྱིས་ནི་ཐལ་བའི་རྡུལ་དུ་རློག །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཨེ་ཀ་ཛ་ཊི་གུ་ཧྱ་རལ་གཅིག་མ། མི་ཕམ་ཁྲོ་གཉེར་གཡུ་ཡི་རལ་གཅིག་མ། །རལ་པ་སྤྲུགས་པའི་སྐྲ་གསེབ་རེ་རེ་ནས། །ཁྲོ་ཆུང་ཞལ་གསུམ་ཕྱག་དྲུག་སྟོང་ཁམས་ཁེངས་པར་འགྱེད། །ཀུན་ཀྱང་མི་བཟད་འཇིགས་བྱེད་ལྕགས་ཀྱུ་ཅན། །ལྕགས་ཀྱུ་བཏབ་པས་དགྲ་བོའི་སྲོག་རྩ་གཅོད། །དམ་ཉམས་དགྲ་བོ་དབང་དུ་སྡུས་ཤིག་ཐལ་བར་རློགས། །ༀ་ཡ་མཱནྟ་ཀ་ཛཿཡ་མ་རཱ་ཛ་ཧཱུཾ། ༀ་གུ་ཧྱ་ཛྙཱ་ན་མཱུཾ་ཧཱུྃ། བྱིན་དུ་ཡ་མ་ཛཿ ཡ་མ་ནན། ༀ་མུ་ཁ་ལེ་ཁ་ཐུན་མུགས་ནན། ༀ་ཡ་མ་ཁ་ཐུན་རཱ་ཛ་ཧཱུཾ། ༀ་ཤྲཱི་ཨ་ཀྲོ་བྱི་རཱ་ཛ་ཧཱུཾ། ཧཾ་ཧེ་རོ་ཏེ་བག་ཛཿ ཛཿཧཱུཾ་བཾ་ཧོཿ ཧཱུཾ་ཛཿ ད་ནི་དབྱིངས་ནས་བཞེངས་སུ་གསོལ་ཏེ། ཧཱུཾ། བཅོམ་ལྡན་ཁྲག་འཐུང་ཁྲོ་རྒྱལ་གཤིན་རྗེ་གཤེད། །བཞེངས་ཤིག་ཆོས་ཀྱི་དབྱིངས་ནས་བཞེངས། །ཡུམ་ཆེན་ཨེ་ཀ་ཛཱ་ཊི་དབྱིངས་ནས་བཞེངས། །ཡུམ་ཆེན་སྲིན་མོ་མགོ་འཕྱང་དབྱིངས་ནས་བཞེངས། །ཐུགས་ཀྱི་སྲས་མཆོག་ཡབ་ཡུམ་དབྱིངས་ནས་བཞེངས། །མཐར་བྱེད་གཤིན་རྗེའི་ཚོགས་རྣམས་དབྱིངས་ནས་བཞེངས། །ཤ་ཟ་སྲིན་མོ་གིང་གི་ཚོགས་རྣམས་དབྱིངས་ནས་བཞེངས། །མ་མོ་ཁྲག་འཐུང་འདུད་ཀྱི་ཚོགས་རྣམས་དབྱིངས་ནས་བཞེངས། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་བཅོལ་བའི་ཕྲིན་ལས་མཛོད། །ཛཿཧཱུཾ་བཾ་ཧོཿ ༀ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་ས་མ་ཡ་སྟྭཾ། འཁོར་གྱི་གིང་ཆེན་བཅོ་བརྒྱད་ས་མ་ཡ་སྟྭཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། སྤྱན་དྲངས་པ་ནི། ཧཱུཾ། དད་པ་དང་ནི་དམ་ཚིག་དབང་གིས་ནི། །ཚུར་གཤེགས་ཚུར་གཤེགས་ཁྲོ་རྒྱལ་གཤིན་རྗེའི་གཤེད། །མཐིང་ནག་གྲུ་གསུམ་འབར་བའི་དཀྱིལ་འཁོར་ནས། །གཤིན་རྗེ་ཕོ་མོ་བསྒྱེལ་བའི་གདན་སྟེངས་སུ། །ཡབ་གཅིག་ཁྲོ་བོའི་རྒྱལ་པོ་གཤིན་རྗེའི་གཤེད། །འཇིགས་བྱེད་ཡ་མ་རཱ་ཛ་ཡབ་ཡུམ་དང་། །ཤ་ཟ་སྲིན་པོ་གིང་གི་ཚོགས་རྣམས་གཤེགས་སུ་གསོལ། །མ་མོ་ཁྲག་འཐུང་བདུད་ཀྱི་ཚོགས་རྣམས་གཤེགས་སུ་གསོལ། །སྐུ་མདོག་མཐིང་ནག་རལ་པ་གྱེན་དུ་འཁྱིལ། །རལ་པ་ཁམ་ནག་གྱེན་དུ་འཁྱིལ་བའི་ལྷས། །སུམ་ཅུ་རྩ་གསུམ་ལྷ་རྣམས་འདར་ལྕུག་ལྕུག །སྤྱན་དགུ་སྡང་མིག་གྱེན་དུ་ལྡོག་པ་ཡིས། །ཕྱོགས་བཅུའི་ཁྲོ་བོ་ཀུན་ཀྱང་གན་བུབ་འདྲེ། །སྨིན་མ་གློག་སྟོང་འོད་དུ་འབར་བ་ཡིས། །སྤྲུལ་པའི་ཕོ་ཉ་མང་པོས་སྲིད་གསུམ་འགེང་། །མཆེ་བ་ཟླ་ཚེས་དཀར་པོ་གཙིགས་པ་ཡིས། །སྡང་བའི་དགྲ་བོའི་སྲོག་རྩ་གཅོད་པར་མཛད། །ཞལ་ནས་ཁྲོ་བོའི་གད་རྒྱངས་སྒྲོགས་པ་ཡིས། །ཁམས་གསུམ་སྲིད་པ་གསུམ་པོ་འགུལ་ཞིང་ལྡེག །ཕྱག་དྲུག་མཚོན་ཆ་འབར་བས་དགྲ་བགེགས་སྒྲོལ། །ཐུགས་དམ་བསྐུལ་གྱི་གནས་འདིར་གཤེགས་སུ་གསོལ། །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཨེ་ཀ་ཛྭ་ཊི་འཇིགས་བྱེད་དཔལ་གྱི་ཡུམ། །དད་པ་དང་ནི་དམ་ཚིག་དབང་གིས་ཚུར་གཤེགས་ཤིག །མ་ཅིག་ལྷ་མོ་རྡོ་རྗེ་དམ་ཚིག་ཅན། །སྐུ་སྟོད་གཡུ་ཡི་དྲིལ་བུ་འབུམ་གྱིས་བརྒྱན། །སྐུ་སྨད་སྟག་ལྤགས་རློན་པ་འབུམ་གྱིས་བརྒྱན། །གཡུ་ཡི་རལ་པས་དུར་ཁྲོད་ཁམས་ཀུན་ཁྱབ། །འཇིགས་བྱེད་ཡ་མ་རཱ་ཛའི་ཐུགས་དམ་བསྐུལ་ཕྱིར་གཤེགས། །དགྲ་བགེགས་རྩ་བ་དྲུང་ནས་འབྱིན་ཕྱིར་གཤེགས། །སྦྱོར་བའི་ཡུམ་མཆོག་བཛྲ་བེ་ཏ་ལི། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཁམ་ནག་གྲུ་གསུམ་འབར་བའི་དཀྱིལ་འཁོར་ནས། །འཇིགས་བྱེད་ཡ་མ་རཱ་ཛ་གཤེགས་སུ་གསོལ། །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཡུམ་གཅིག་མ་མོ་ཁྲག་མིག་གཤེགས་སུ་གསོལ། །ཡབ་ཡུམ་སྲས་བཅས་གནས་འདིར་གཤེགས་སུ་གསོལ། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་བཅོལ་བའི་ཕྲིན་ལས་མཛོད། །ས་མ་ཡ་ཛཿཧཱུཾ་བཾ་ཧོཿ ༀ་ས་མ་ཡ་ཨཱརྻ་མཛྙུ་ཤྲཱི་མུ་དྲ་ཡ་མཱནྟ་ཀ་པཉྩ་ཏེ་རོ་ན་ཧཱུཾ་ཛཿ ཡ་མཱན་ཤ་ཡ་ཧཱུཾ་ཛཿཛཿ གུ་ཧྱ་ཨུ་ཏྲཾ་ཛ་ཛ། འདིར་ཡང་ཤ་ཁྲག་གི་མཆོད་པ་བྱེད་པ་ནི། པྲ་བེ་ཤ་ཡ་ཕཊ། ཨ་བེ་ཤ་ཡ་ཨ་ཨ། ཞེས་གཉིས་སུ་མེད་པར་བསྟིམ་མོ། །ཧཱུཾ། མཐིང་ནག་གྲུ་གསུམ་འབར་བའི་གཞལ་ཡས་འདིར། །རུ་དྲ་གཤིན་རྗེ་བསྣོལ་བའི་གདན་སྟེང་དུ། །མ་ཧེ་ཉི་ཟླ་པདྨའི་གདན་སྟེང་ན། །ཡ་མཱནྟ་ཀ་ཡབ་ཡུམ་འཁོར་དང་བཅས། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །ཟླ་གམ་དམར་པོ་དབང་གི་གཞལ་ཡས་ནས། །གཤིན་རྗེ་བྱོལ་སོང་བསྣོལ་བའི་གདན་སྟེང་དུ། །ཡ་མ་རཱ་ཛ་ཡབ་ཡུམ་འཁོར་དང་བཅས། །དགྱེས་ཤིང་མི་འགྱུར་བརྟན་པར་བཞུགས་སུ་གསོལ། །ༀ་ས་མ་ཡ་ཏིཥྛ་ལྷན། ཡེ་ཤེས་ལྷ་ལ་ཕྱག་འཚལ་བ་ནི། མི་གནས་མི་དམིགས་ཆོས་སྐུ་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྤྲུལ་པ། །ཐུགས་རྗེ་གཟི་ལྡན་གདུག་པ་ཐབས་ཀྱིས་འདུལ། །ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་ལོ། །འཇིགས་བྱེད་སྐུ་ལ་མཉེས་མཆོད་འབུལ་མཛད་མ། །སྒེག་མོ་རལ་གཅིག་ག ཤིན་རྗེ་གཤེད་ཀྱི་ཡུམ། །མ་ཅིག་ཨེ་ཀ་ཛཱ་ཊིའི་སྐུ་ལ་ཕྱག་འཚལ་ལོ། །གཡོན་ནས་ཡུམ་གཅིག་ཁྲོ་མོ་རོ་ལངས་མ། །སྲིན་མོ་མགོ་འཕྱང་སྐུ་ལ་ཕྱག་འཚལ་ལོ། །ཡབ་ཡུམ་གཉིས་མེད་དགྱེས་པའི་སྲས་མཆོག་ནི། །ཡ་མ་རཱ་ཛའི་སྐུ་ལ་ཕྱག་འཚལ་ལོ། །གཤིན་རྗེའི་ཡུམ་ལ་རྣལ་འབྱོར་དགྲ་ལྷ་མོ། །མ་མོ་ཁྲག་མིག་སྐུ་ལ་ཕྱག་འཚལ་ལོ། །ཨ་ཏི་པུ་ཧོཿ པྲ་ཏིཙྪ་ཧོཿ ཕྱིའི་མཆོད་པ་འབུལ་བ་ནི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་ཨརྒྷཾ་འབུལ། །ཨརྒྷཾ་པྲ་ཏིཙྪ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་བདུག་སྤོས་འབུལ། །དྷཱུ་པེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་བའི་མེ་ཏོག་འབུལ། །པུཥྤེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་སྣང་གསལ་འབུལ། །ཨཱ་ལོ་ཀེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་དྲི་ཆབ་འབུལ། །གནྡྷེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་ཞལ་ཟས་འབུལ། །ནཻཝི་དྱ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་སྒྲ་སྙན་འབུལ། །ཤཔྡ་ཁཱ་ཧི། བླ་མེད་དམ་རྫས་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ལོངས་སྤྱོད་ཚོགས་ཀྱིས་རབ་བརྒྱན་པ། །མགོན་པོ་འཁོར་དང་བཅས་པ་བཞེས་སུ་གསོལ། །ས་མ་ཡ་མཉྫུ་ཤྲཱི་ཡ་མཱནྟ་ཀ་ཡ་མ་རཱ་ཛ་ཛཿ མ་མ་ཨེ་ཀ་ཛཱ་ཊི། མ་ཧཱ་བ་ལིཾ་ཏ་ཁཱ་ཧི། ཞེས་གཏོར་མ་འབུལ། དེ་ནས་ཤ་ཁྲག་གི་མཆོད་པ་ནི། ཧཱུཾ། ཤ་ཁྲག་དམར་གྱི་མཆོད་པ་ཆེན་པོ་འདི། །ཡབ་གཅིག་ཡ་མཱནྟ་ཀའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྦྱོར་ཡུམ་བེ་ཏ་ནག་མོའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྒྲོལ་ཡུམ་ཨེ་ཀ་ཛཱ་ཊིའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྲས་མཆོག་ཡ་མ་རཱ་ཛའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །མ་མོ་ཁྲག་མིག་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །འཁོར་གྱི་གིང་ཆེན་རྣམས་ཀྱི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱི་ཡུད་ཙམ་ཕྲིན་ལས་མཛོད། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། སྨན་མཆོད་ནི། ཧཱུཾ། རང་བྱུང་གདོད་ནས་དག་པ་སྟེ། །རྩ་བརྒྱད་སྟོང་ལ་སྦྱར་བའི་སྨན། །རྩ་བ་འབུམ་ཕྲག་ཡངས་པའི་བཅུད། །རཱ་ས་ཡ་ན་ལ་སོགས་རྫས། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་སྒྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་བཅས་ཀྱི། །ཐུགས་དམ་དབྱིངས་མཆོག་བསྐང་བའི་ཕྱིར། །སྐུ་གསུང་ཐུགས་ཀྱི་བདག་ཉིད་འདི། །བདག་གི་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །འཕྲུལ་གྱི་དངོས་གྲུབ་སྩལ་དུ་གསོལ། །ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ། ཧཱུཾ། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ལྷ་མཆོག་ཡ་མཱནྟ་ཀའི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡུམ་ཆེན་ཨེ་ཀ་ཛཱ་ཊིའི་ཞལ་དུ་ཁ་རཾ་ཁཱ་ཧི། །བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡུམ་ཆེན་རོ་ལངས་མ་ཡི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡ་མ་རཱ་ཛའི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །མ་མོ་ཁྲག་མིག་མ་ཡི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྡོམ་ལ་གནས་ཤིང་རིག་འཛིན་བརྒྱུད་པར་བཅས། །ཡང་དག་ལམ་སྟོན་ཐར་ལམ་སྟོན་བྱེད་པའི། །ངེས་པའི་དོན་སྟོན་རྡོ་རྗེ་སློབ་དཔོན་ལ། །རྣམ་དག་བདུད་རྩིའི་དམ་རྫས་མཉེས་མཆོད་འབུལ། །རྒྱལ་ཐེབས་ཅན་དང་ཀརྨ་གིང་ལ་སོགས། །ཤེས་པའི་རིམ་པ་ཁྱབ་པའི་དབང་བསྐུར་བའི། །རྒྱལ་བའི་གདུང་འཚོབ་མཆེད་དང་ལྕམ་དྲལ་ལ། །རྣམ་དག་བདུད་རྩིའི་དམ་རྫས་མཉེས་མཆོད་འབུལ། །ལས་ཀྱི་འཆི་བདག་ཡབ་ཡུམ་གྱི་ཞལ་དུ་ཁ་རཾ་ཁཱ་ཧི། ཞེ་སྡང་ལས་གྲུབ་པའི་གཤེད་པོ་བཞིའི་ཞལ་དུ་ཁ་རཾ་ཁཱ་ཧི། འདོད་ཆགས་ལས་གྲུབ་པའི་གཤེད་མོ་བཞིའི་ཞལ་དུ་ཁ་རཾ་ཁཱ་ཧི། གྲི་ཐོགས་ཀྱི་གིང་ཆེན་བཅོ་བརྒྱད་ཀྱི་ཞལ་དུ་ཁ་རཾ་ཁཱ་ཧི། ཁྲམ་ཐོགས་ཀྱི་བདུད་པོ་བཅུ་གཉིས་ཀྱི་ཞལ་དུ་ཁ་རཾ་ཁཱ་ཧི། མདངས་ལེན་གྱི་མ་མོ་སྟོང་རྩ་བརྒྱད་ཀྱི་ཞལ་དུ་ཁ་རཾ་ཁཱ་ཧི། ཆོས་སྐྱོང་བའི་སྲུང་མ་གཞན་ལའང་འབུལ་ལོ། །དེ་ནས་དངོས་གྲུབ་བླང་བ་ནི། བདུད་རྩིའི་ནང་དུ་ༀ་ཨཱཿཧཱུཾ་གསུམ་བསྒོམ་སྟེ། མཐེབ་སྲིན་གཉིས་ཐབས་ཤེས་ཉི་ཟླའི་དཀྱིལ་འཁོར་དུ་བསྒོམ། ༀ། སྤྱི་བོའི་རྡོ་རྗེ་དམ་ཚིག་ལ། །རྡོ་རྗེ་ཅན་གྱི་ༀ་བསྒོམས་ཏེ། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་རྡོ་རྗེའི་སྐུ་ཐོབ་འགྱུར། །ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊ། ཀ་ཡ་སིདྡྷི་ༀ། ཞེས་པས་ༀ་དེ་ཏོག་གིས་བླངས་ནས་སྤྱི་བོར་བསྒོམ་པས་དེ་ལས་འོད་ཟེར་ཕྱོགས་བཅུར་འཕྲོས། དེ་བཞིན་གཤེགས་པ་ཐམས་ཅད་ཀྱི་སྐུ་ཡི་རང་བཞིན་འུབ་ཀྱིས་བསྡུས་ཏེ་སྤྱི་བོར་ཐིམ་པས་སྐུའི་དངོས་གྲུབ་ཐོབ་པར་བསྒོམ། ཨཱཿ ལྕེ་ཡི་རྡོ་རྗེ་དམ་ཚིག་ལ། །རྡོ་རྗེ་ཅན་གྱི་ཨཱཿབསྒོམས་ཏེ། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་རྡོ་རྗེའི་གསུང་ཐོབ་འགྱུར། །ༀ་ཀཱ་ལ་རཱུ་པ་ཧཱུཾ་ཨཱཿ ཝཱ་ཀ་སིདྡྷི་ཨཱཿ ཞེས་པས་ཨཱཿདེ་བླངས་ནས་ལྕེའི་སྟེང་དུ་བསྒོམས་པ་དེ་ལས་འོད་ཟེར་ཕྱོགས་བཅུར་འཕྲོས། དེ་བཞིན་གཤེགས་པའི་གསུང་གི་བྱིན་རླབས་ཐམས་ཅད་བསྡུས་ནས་ཨཱཿལ་ཐིམ་པས་གསུང་གི་དངོས་གྲུབ་ཐོབ་པར་བསྒོམ། ཧཱུཾ། སྙིང་གི་རྡོ་རྗེ་དམ་ཚིག་ལ། །རྡོ་རྗེ་ཅན་གྱི་ཧཱུཾ་བསྒོམས་ཏེ། །བདུད་རྩི་ལྔ་ཡི་སྦྱོར་བ་ཡི། །ཟོས་ན་རྡོ་རྗེའི་ཐུགས་ཐོབ་འགྱུར། །ༀ་ཧྲཱིཿཥྚི་བི་ཀྲི་ཏཱ་ན་ན་ཧཱུཾ་ཕཊ། ཙིཏྟ་སིདྡྷི་ཧཱུཾ། ཞེས་པས་ཧཱུཾ་དེ་བླངས་ནས་སྙིང་གར་བསྒོམས་པས་དེ་ལས་འོད་ཟེར་ཕྱོགས་བཅུར་འཕྲོས། དེ་བཞིན་གཤེགས་པའི་ཐུགས་ཀྱི་བྱིན་རླབས་ཐམས་ཅད་བསྡུས་ནས་ཧཱུཾ་ལ་ཐིམ་པས་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསྒོམ། དེ་ནས་སྦྱོར་བའི་མཆོད་པ་འབུལ་བ་ནི། ཧཱུཾ། འཁྲིལ་བྱེད་མཆོད་པས་མཉམ་སྦྱོར་བའི། །ལྷ་དང་ལྷ་མོ་ཇི་སྙེད་པ། །དཀྱིལ་འཁོར་ཉིད་ལ་རྫོགས་པ་ཐིམ། །གསང་མཆོད་དམ་པ་བཞེས་སུ་གསོལ། །ཧཱུཾ། འདོད་ཆགས་ཐུགས་རྗེ་ཆེན་པོ་སྟེ། །འཛིན་པ་ཉིད་ཀྱི་མདངས་ལྡན་པས། །ལྷ་ཀླུ་རིག་འཛིན་མི་མོ་ལ། །དགོས་འདོད་ཆགས་པ་བསྟིམ་པར་བྱོས། །འཁྲིལ་ཞིང་མཉམ་སྦྱོར་འཁྱུད་པས་ན། །སྒྱུ་འཕྲུལ་དྲྭ་བའི་ཚུལ་བསྟན་པའི། །ཟླ་གསང་ཐིག་ལེ་གནས་པས་ནི། །བདེ་ཆེན་མཆོད་པས་མཉེས་གྱུར་ཅིག །གང་ཡང་གཟུགས་དང་ལྡན་པ་ཡི། །ཁམས་གསུམ་ཆགས་པའི་བདེ་བ་འདི། །ཟག་མེད་ཡེ་ཤེས་འབྱུང་བའི་གནས། །ཡབ་ཡུམ་དགྱེས་པར་ཚིམ་གྱུར་ཤོག །དེ་ནས་སྒྲོལ་བའི་མཆོད་པ་འབུལ་བ་ནི། ཧཱུཾ། འཇིགས་བྱེད་ཆེན་པོས་ལུང་སྩལ་ལྟར། །ལྔ་བརྒྱ་དུས་ཀྱི་ཐ་མ་ལ། །བསྟན་པ་གཉན་པོ་བདག་རང་འཛིན། །སྒྲོལ་བ་ཁོ་ན་མཆོག་ཡིན་ན། །གང་ཞིག་སངས་རྒྱས་སྐུ་འཇིག་ཅིང་། །ཐེག་མཆོག་ཆོས་ལ་དམོད་པ་དང་། །འཇམ་དཔལ་ལྷ་མཆོག་སྒོམ་ལ་སྡང་། །དེ་ནི་བདག་གིས་བསྒྲལ་བར་འོས། །གཞན་ཡང་བསད་པའི་ཞིང་བསྟན་པ། །གསང་སྔགས་འཛིན་པའི་དགྲར་གྱུར་དང་། །བླ་མ་ལ་གཤེ་སྡིག་ལ་དགའ། །ཞིང་བཅུ་གང་ཡིན་འདིར་བཀུག་ནས། །མངོན་སྤྱོད་ཚུལ་བཞིན་བསྒྲལ་བ་དང་། །རྡུལ་ཆ་ཕྲ་མོར་བཤིགས་པར་མཛོད། །ཧཱུཾ། ཡ་མཱནྟ་ཀའི་ཞལ་དུ་སྟོབ། །གཤིན་རྗེའི་ལྷ་ཚོགས་ཞལ་དུ་སྟོབ། །མ་ཧཱ་མཱཾ་ས་ཁཱ་ཧི། དེ་ནས་རྩ་བའི་ལྷ་ལྔ་ལ་བསྟོད་པ་ནི། ཧཱུཾ། གཏི་མུག་ཚུལ་གྱིས་གཏི་མུག་འཇོམས་མཛད་པ། །གཏི་མུག་ཆེན་པོ་གཤིན་རྗེའི་གཤེད་ཀྱི་སྐུ། །བདེ་གཤེགས་རྒྱལ་བའི་སྐུ་རྣམས་འདུས་པའི་བདག །ལུས་ཀྱི་དབང་པོའི་བག་ཆགས་རྒྱུན་སྦྱོང་ཞིང་། །ཆོས་ཀྱི་དབྱིངས་ཀྱི་ཡེ་ཤེས་སྐུར་སྣང་བ། །ཡ་མཱནྟ་ཀའི་སྐུ་ལ་ཕྱག་འཚལ་བསྟོད། །ཧཱུཾ། ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །ཞེ་སྡང་ཆེན་པོ་ཨེ་ཀ་ཛཱ་ཊིའི་སྐུ། །བདེ་གཤེགས་རྒྱལ་བའི་ཐུགས་རྣམས་འདུས་པའི་བདག །ཡིད་ཀྱི་རྣམ་ཤེས་བག་ཆགས་རྒྱུན་སྦྱོང་ཞིང་། །མེ་ལོང་ལྟ་བུའི་ཡེ་ཤེས་སྐུར་སྣང་བ། །ཨེ་ཀ་ཛཱ་ཊིའི་སྐུ་ལ་ཕྱག་འཚལ་བསྟོད། །ཧཱུཾ། ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ང་རྒྱལ་ཆེན་པོ་ཡ་མ་རཱ་ཛའི་སྐུ། །བདེ་གཤེགས་རྒྱལ་བའི་ཡོན་ཏན་འདུས་པའི་བདག །ཀུན་གཞིའི་རྣམ་ཤེས་བག་ཆགས་རྒྱུན་སྦྱོང་ཞིང་། །མཉམ་པ་ཉིད་ཀྱི་ཡེ་ཤེས་སྐུར་སྣང་བ། །ཡ་མ་རཱ་ཛའི་སྐུ་ལ་ཕྱག་འཚལ་བསྟོད། །ཧཱུཾ། འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །འདོད་ཆགས་ཆེན་པོ་རོ་ལངས་གསང་བའི་སྐུ། །བདེ་གཤེགས་རྒྱལ་བའི་གསུང་རྣམས་འདུས་པའི་བདག །ངག་གི་དབང་པོའི་བག་ཆགས་རྒྱུན་སྦྱོང་ཞིང་། །སོ་སོར་རྟོག་པའི་ཡེ་ཤེས་སྐུར་སྣང་བ། །རོ་ལངས་གསང་བའི་སྐུ་ལ་ཕྱག་འཚལ་བསྟོད། །ཧཱུཾ། ཕྲག་དོག་ཚུལ་གྱིས་ཕྲག་དོག་འཇོམས་པའི་ལྷ། །ཕྲག་དོག་ཆེན་པོ་མ་མོ་ཁྲག་མིག་སྐུ། །བདེ་གཤེགས་རྒྱལ་བའི་ཕྲིན་ལས་འདུས་པའི་བདག །སྒོ་ལྔའི་རྣམ་ཤེས་བག་ཆགས་རྒྱུན་སྦྱོང་ཞིང་། །བྱ་བ་གྲུབ་པའི་ཡེ་ཤེས་སྐུར་སྣང་བ། །མ་མོ་ཁྲག་མིག་སྐུ་ལ་ཕྱག་འཚལ་བསྟོད། །དངོས་གྲུབ་ཀྱི་སྣོད་དུ་རུང་བའི་ཕྱིར་བཤགས་པ་བྱའོ། །ཧཱུཾ། བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་ཇི་བཞིན་མྱུར་དུ་མ་ཕྱིན་ཞིང་། །ལྷ་མཆོག་ཡ་མ་རཱ་ཛའི་ཐུགས་དང་ཅི་འགལ་བ། །ཁྲོ་གཏུམ་ཐུགས་རྗེ་ཅན་གྱི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་ཇི་བཞིན་མྱུར་དུ་མ་ཕྱིན་ཞིང་། །ཡུམ་གཅིག་ཨེ་ཀ་ཛཱ་ཊིའི་ཐུགས་དང་ཅི་འགལ་བ། །དབྱིངས་ལྡན་ཆགས་པ་མེད་པའི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་ཇི་བཞིན་མྱུར་དུ་མ་ཕྱིན་ཞིང་། །ཡུམ་ཆེན་རོ་ལངས་ནག་མོའི་ཐུགས་དང་ཅི་འགལ་བ། །འདོད་ཆགས་དགྱེས་མཛད་མའི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་ཇི་བཞིན་མྱུར་དུ་མ་ཕྱིན་ཞིང་། །སྲས་མཆོག་ཡ་མ་རཱ་ཛའི་ཐུགས་དང་ཅི་འགལ་བ། །སྐུ་ཆེ་ཡན་ལག་རགས་པའི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་ཇི་བཞིན་མྱུར་དུ་མ་ཕྱིན་ཞིང་། །དཔལ་ལྡན་ལྷ་མོ་ནག་མོའི་ཐུགས་དང་ཅི་འགལ་བ། །ཁྲོས་མ་སྲིད་གསུམ་སྒྲོལ་མའི་སྐུ་ལ་བཟོད་པར་གསོལ། །ཡི་གེ་བརྒྱ་པ་ཅི་ནུས་བཟླ། དེ་ནས་སྐུའི་ཆ་ལུགས་ལ་རྒྱས་པར་བསྟོད་པ་ནི། ཡབ་ཅིག་ལྷ་ཡི་རྒྱལ་པོ་གཤེད་མཛད་ལྷ། །ཡབ་ཅིག་སྐུ་ཡི་ཆ་ལུགས་འཇིགས་པར་སྟོན། །གཤིན་རྗེའི་སྐུ་ནི་འབར་བའི་རྒྱལ་པོ་སྟེ། །ཤིན་ཏུ་བརྗིད་ཅིང་གཏུམ་རྔམས་དྲག་ཤུལ་ཆེ། །ཁྱོད་ལ་བདག་གིས་བསྟོད་ཅིང་མཆོད་འབུལ་ན། །བདག་ལ་ཁྱོད་ཀྱིས་ཡུན་དུ་གྲོགས་མཛོད་ཅིག །བདག་ནི་རྟག་ཏུ་ཁྱོད་ལ་མཆོད་འབུལ་ན། །བདག་གི་དགྲ་རྣམས་ཁྱོད་ཀྱིས་ཐལ་བར་རློགས། །ཁྱོད་ཀྱི་ཐུགས་རྗེ་བྲེང་བྲེང་རྩེ་གཅིག་རྒྱུན་མ་ཐུང་། །ཁྱོད་ནི་ཐུགས་རྗེ་དམ་པས་འདིར་གཤེགས་ཤིག །བཅོམ་ལྡན་ཡ་མཱནྟ་ཀའི་སྐུ་ཡི་ཆ་ལུགས་ནི། །ཤིན་ཏུ་ངོ་མཚར་གཤིིན་རྗེ་དཔའ་ལ་བརྗིད། །ཁྲོ་རྒྱལ་དཔའ་བརྗིད་འབར་བས་དགྲ་བགེགས་འདུལ། །ཡབ་གཅིག་ལྷ་ཡི་རྒྱལ་པོ་གཤིན་རྗེ་གཤེད། །མཛད་ལྷ། གཤིན་རྗེ་དཔའ་བརྗིད་དྲེགས་པའི་ཚུལ་གྱིས་མ་མོ་འདུལ། །གཤིན་རྗེའི་གཤེད་ཀྱིས་ཡུན་གྱི་ལྷ་མཛོད་ཅིག །འཇམ་དཔལ་གཤིན་རྗེ་འི་གཤེད་ནི་དྲེགས་པའི་བརྗིད་དང་ལྡན། །མ་མོ་ཀུན་ལ་འཇམ་དཔལ་དབང་བསྒྱུར་ཞིང་། །རྟག་ཏུ་ལྷ་མཆོག་བདག་ལ་གྲོགས་མཛོད་ཅིག །སྲིན་མོ་ཤ་ཟ་སྟོང་ནི་བྲན་དུ་འཁོལ། །གིང་ཆེན་གིང་ལྕམ་རྣམས་ནི་ཕོ་ཉར་འགྱེད། །ཀླུ་རྒྱལ་ཕོ་མོ་རྣམས་ནི་སྐུ་ཡི་རྒྱན་དུ་བྱས། །ཤ་ཟ་གདུག་བྱེད་རྣམས་ནི། ཆས་རྣམས་དག་པར་སྟོན། །འཇམ་དཔལ་གཤིན་རྗེ་གཤེད་ནི་གདུག་པའི་ང་རོ་ཅན། །ཁྲོ་མོ་ཡུན་ཆེན་རྣམས་དང་བཅས་ཏེ་སྐུ་སྟོན་ཅིག །འཇམ་དཔལ་སྐུ་ཡི་ཐུགས་རྗེས་བདག་ལ་དགོངས། །བཅོམ་ལྡན་གཤིན་རྗེའི་རྒྱལ་པོ་སྐུ་བསྐྱོད་ཅིག །འཇམ་དཔལ་སྐུ་བསྐྱོད་བདག་ལ་གྲོགས་མཛོད་ཅིག །གཡས་ནས་ཡུམ་བསྐྱེད་ཨེ་ཀ་ཛཱ་ཊི་མ། །གཡོན་ནས་ཡུམ་བསྐྱེད་བཛྲ་བེ་ཏ་ལི། །གཉིས་ཀའི་སྐུ་ནི་དབུས་ཀྱི་གཙོ་དང་མཐུན། །ཧཱུཾ། ཡབ་གཅིག་འཇམ་དཔལ་དབུ་ཡི་རྒྱན་གྱི་ཆ་ལུགས་ནི། །དབུ་གསུམ་མཐིང་ནག་ཞེ་སྡང་འབར་བའི་དབུ། །དུས་གསུམ་སངས་རྒྱས་ཡེ་ཤེས་ཡིིན་པའི་ཕྱིར། །ཐོད་སྐམ་ཐོད་རློན་ཕྲེང་བ་ཆེན་པོ་ཡིས། །དབུ་རྒྱན་མཛེས་དང་སེ་རལ་ཁ་རུ་བརྒྱན། །ཡབ་གཅིག་འཇམ་དཔལ་དབུ་སྐྲའི་ཆ་ལུགས་ནི། །དབུ་སྐྲ་ཁམ་ནག་རལ་པ་སྲིད་རྩེར་འབར། །ཡབ་གཅིག་འཇམ་དཔལ་སྤྱན་གྱི་ཆ་ལུགས་ནི། །སྤྱན་གསུམ་གཟིག་པས་བསྐལ་པའི་མེ་དཔུང་འབར། །ལས་ཀྱི་ཁྲོ་གཉེར་བསྟན་པས་ཤིན་ཏུ་འབར། །ཡབ་ཅིག་འཇམ་དཔལ་སྙན་གྱི་ཆ་ལུགས་ནི། །སྙན་ནས་བསྐལ་པའི་འབྲུག་སྟོང་ལྡི་རི་རི། །ཡབ་གཅིག་འཇམ་དཔལ་ཤངས་ཀྱི་ཆ་ལུགས་ནི། །བསྐལ་པའི་བག་ཆགས་འཐོར་བྱེད་རླུང་ནག་འཚུབས། །ཡབ་གཅིག་འཇམ་དཔལ་ཞལ་གྱི་ཆ་ལུགས་ནི། །ཉོན་མོངས་བག་ཆགས་འཁྲུ་བྱེད་ཁྲག་གི་རྦ་རླབས་འཁྱིལ། །ཡབ་གཅིག་འཇའ་དཔལ་ཚེམས་ཀྱི་ཆ་ལུགས་ནི། །ཉོན་མོངས་དུག་གསུམ་མ་ལུས་རྩད་ནས་གཅོད། །ཡབ་གཅིག་འཇམ་དཔལ་ཕྱག་མཚན་ཆ་ལུགས་ནི། །གཡས་ཀྱི་དང་པོས་གདུག་པ་འདུལ་བྱེད་ཞིང་དབྱུག་བསྣམས། །བར་མས་གཅོད་ཅིང་གཏུབ་པའི་དགྲ་སྟྭ་བསྣམས། །ཐ་མས་ཉོན་མོངས་སྒྲོལ་བྱེད་རལ་གྲི་བསྣམས། །གཡོན་གྱི་དང་པོས་གདུག་པ་འདུལ་བྱེད་ཁྲོ་མཛུབ་ཞགས་པ་བསྣམས། །བར་མས་ཞེ་སྡང་འབིགས་བྱེད་མདུང་ཐུང་བསྣམས། །ཐ་མས་ཐུགས་རྗེ་ཆགས་པའི་ཐོད་ཁྲག་བསྣམས། །ཡབ་ཅིག་འཇམ་དཔལ་གདུག་པའི་ཞབས་དྲུག་འགྱིང་སྟབས་ནི། །ཞབས་གཉིས་གྱད་ཀྱི་དོར་སྟབས་ཤ་ཟ་སྲིན་མོ་འདུལ། །ཞབས་གཉིས་དོར་སྟབས་མ་མོ་ཁྲག་འཐུང་འདུལ། །ཞབས་གཉིས་བརྐྱང་བསྐུམ་ཚུལ་གྱིས་ཆོས་ཀྱི་དབྱིངས་དང་སྦྱོར། །ཡབ་ཅིག་འཇམ་དཔལ་སྐུ་ཡི་རྒྱན་གྱི་ཆ་ལུགས་ནི། །སྐུ་སྟོད་ཞེ་སྡང་གནག་ཕྱིར་གླང་ཆེན་ཀོ་རློན་དང་། །ཞིང་ལྤགས་སྟོང་གི་གཡང་གཞི་སྐུ་ལ་གསོལ། །སྐུ་སྨད་གདུག་པ་བསྒྲལ་ཕྱིར་སྟག་གི་ཤམ་ཐབས་དང་། །ཐོད་སྐམ་ཉི་ཟླས་མཚན་པའི་དབུ་རྒྱན་དང་། །ཐོད་རློན་ཕྲེང་བས་སེ་རལ་ཁ་རུ་བརྒྱན། །སྦྲུལ་ནག་སྟོང་གི་གདུ་བུ་སྐེད་ཆིངས་དང་། །རིགས་བཞི་ཀླུ་ཡི་གདེངས་ཀས་དབུ་ལ་མཛེས། །བསྐལ་པའི་མེ་ལྟར་འབར་བའི་ཀློང་དཀྱིལ་ན། །མ་ཧེའི་གདན་ལ་བརྐྱང་བསྐུམ་ཚུལ་དུ་བཞུགས། །ཧཱུཾ་དང་ཕཊ་ཀྱི་སྒྲ་ནི་འབྲུག་སྟོང་ལྡིར། །འཇིགས་བྱེད་རྔམས་པས་གདུག་པ་མ་ལུས་འདུལ། །ཁྲོ་རྒྱལ་གཤིན་རྗེ་གཤེད་ལ་ཕྱག་འཚལ་བསྟོད། །སྡང་བའི་དགྲ་བོ་ཐལ་བའི་རྡུལ་དུ་རློག །རྟགས་བསྟོད་ལ་སོགས་པའང་བྱའོ། །བཟླས་པའི་རིམ་པ་ནི། བཤགས་པ་ཕུལ་ལ་འཛབ་ལ་འཇུག་སྟེ། བདག་ཡ་མཱནྟ་ཀ་གསལ་བའི་ཐུགས་ཀར། །ཉི་མའི་དཀྱིལ་འཁོར་མཐེ་བོང་ཙམ་པའི་དབུས་ན་ཡེ་ཤེས་སེམས་དཔའ་ཚོན་གང་བ། དེ་ཡི་ཐུགས་ཀར་རྡོ་རྗེ་ནས་ཙམ་པའི་ལྟེ་བ་ཉི་མའི་དཀྱིལ་འཁོར་སྲན་ཆུང་ཙམ་པ་གཅིག་གི་དབུས་ན་ཧཱུཾ་སྤུས་བྲིས་པ་འདྲ་བ་གཅིག་གི་མཐར། ༀ་ཧྲཱིཿཥྚི་བི་ཀྲི་ཏཱ་ན་ན་ཧཱུཾ་ཕཊ། ཅེས་པའི་སྔགས་ཀྱིས་བསྐོར་བ། བདག་གི་མགྲིན་པ་པདྨ་འདབ་བརྒྱད་ཀྱི་དབུས་ན་རྡོ་རྗེ་རྩེ་ལྔ་པའི་ལྟེ་བར་པདྨ་ལ་ༀ་དམར་པོ་འདབ་མ་བརྒྱད་ལ་ༀ་ཀཱ་ལ་རཱུ་པ་ཨ་ཧཱུཾ་ཕཊ་ཀྱིས་བསྐོར་བ། བདག་ཡ་མཱནྟ་ཀའི་དུང་ཁང་དུ་ཟླ་བའི་དཀྱིལ་འཁོར་མཐེ་བོང་ཙམ་པའི་དབུས་ན་རྡོ་རྗེ་ནས་ཙམ་པའི་ལྟེ་བ་ལ་ཟླ་དཀྱིལ་སྲན་ཆུང་ཙམ་གཅིག་གི་དབུས་སུ་ༀ་གྱི་མཐའ་མ་ལ། ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྩ་ཧཱུཾ་ཕཊ། ཅེས་པའི་སྙིང་པོ་ཡི་གེ་བཅུ་བདུན་པོས་བསྐོར་བའོ། །དེ་ཡང་བཟླས་པའི་དུས་སུ་དང་པོ་སྐུ་གསུང་ཐུགས་ཀྱི་ཡིག་འབྲུ་རྣམས་གསལ་བར་བསྒོམ། བར་དུ་ཡི་གེ་རྣམས་འཁོར་ལོ་གསུམ་གྱི་རྡོ་རྗེའི་རྩེ་གསུམ་ནས་བྱུང་ཞིང་གནས་གསུམ་དུ་འཁོར་ཞིང་ཐིམ། དེ་ནས་འཕྲོ་འདུ་ཇི་ལྟར་འདོད་པ་བཞིན་བྱའོ། །དེ་ནས་ཡི་དམ་ལ་གཏོར་མ་འབུལ་ཞིང་། བསྟོད་པ་བྱ་བ་ནི། ལས་ཀྱི་གཤིན་རྗེའི་གཤེད་པོ་བཞི་དང་ཕྱོགས་སྐྱོང་གི་གཤིན་རྗེ་རྣམས་ཀྱིས། གཤིན་རྗེའི་གཤེད་ལ་བསྐོར་བ་ལན་སྟོང་བྱས་ནས་བསྟོད་པ་ནི། ཧཱུཾ། འཇམ་དབྱངས་ཁྲོ་བོ་དཔལ་ལྡན་གཤིན་རྗེའི་གཤེད། །ཆོས་ཉིད་མི་འགྱུར་སྐུ་མདོག་མཐིང་ནག་འབར། །དཔའ་བར་མཛད་པའི་དུར་ཁྲོད་ཆས་བརྒྱད་གསོལ། །མི་མཐུན་བརྗིད་པས་དབུ་གསུམ་བསྟན་པ་ནི། །ལས་ལ་འཛུད་མཛད་དབང་དྲག་ཞི་བར་མཛོད། །དགྲ་བགེགས་འདུལ་མཛད་མཚོན་ཆ་སྣ་ཚོགས་བསྣམས། །ལྷ་སྲིན་འདུལ་མཛད་ཁྲོ་གཉེར་མཆེ་བ་གཙིགས། །ཆགས་པ་མ་སྤང་སྦྱོར་ཡུམ་སྐུ་ལ་འཁྲིལ། །ཞེ་སྡང་མེ་འབར་སྒྲོལ་ཡུམ་དགྲ་སྙིང་སྟོབ། །དགྲ་བགེགས་འདུལ་མཛད་འཁོར་རྣམས་ཕོ་ཉར་འགྱེད། །ཐམས་ཅད་དབང་དུ་སྡུད་ཅིང་དྲག་སྔགས་བརྗོད། །དཔལ་བརྗིད་གཤིན་རྗེ་གཤེད་ལ་ཕྱག་འཚལ་བསྟོད། །མཆོད་པ་བསྡུས་པ་རེ་བྱ། དེ་དག་ནི་དངོས་གཞིའི་རིམ་པའོ། །རྗེས་ཀྱི་ལས་རིམ་ལས། ཚོགས་ནི་ཅི་འབྱོར་བའི་ཡོ་བྱད་བཤམས། སུམྦྷའི་སྔགས་ཀྱིས་བགེགས་བསྐྲད་དེ། རཾ་ཡཾ་ཁཾ་གིས་སྦྱང་ངོ་། །འདོད་ཡོན་དུ་བྱིན་གྱིས་རློབ་པ་ལ། ༀ་ཨཱཿཧཱུཾ་བ་ལིཾ་ཏ་ཏེ་ཛྭ་ལ་ལིཾ་ཏ་བ་ལ་ཏེ་གུ་ཧྱ་ས་མ་ཡ་སྭཱ་ཧཱ། ཞེས་ལན་བདུན་བརྗོད་པས་བདུད་རྩི་འདོད་ཡོན་ལྔ་དང་ལྡན་པར་བསམ། དེ་ལྟར་ཚོགས་རྣམས་འདོད་ཡོན་ལྔའི་རང་བཞིན་དེ་ལ་དྲུག་སྟེ། ཚོགས་པ་གསུམ་གྱིས་ལྷག་པར་གནས་པར་བྱ་བ་དང་། བསང་བ་གསུམ་གྱིས་དག་པར་བྱ་བ་དང་། སྦྱང་བ་གསུམ་གྱིས་མི་དམིགས་པར་བྱ་བ་དང་། བྱིན་རླབས་གསུམ་གྱིས་ཁྱད་པར་གྱི་རྫས་སུ་བྱ་བ་དང་། བཀྲོལ་ཐབས་གསུམ་གྱིས་དམིགས་པ་སོ་སོར་བྱ་བ་དང་། མཆོད་ཐབས་གསུམ་གྱིས་ལྷའི་རྒྱུད་ཚིམ་པར་བྱ་བའོ། །དེ་ལ་ཚོགས་པ་གསུམ་ནི། འབྱོར་ལྡན་ལོངས་སྤྱོད་ཀྱི་ཚོགས་བཤམས་པའོ། །སྐལ་ལྡན་མི་ཡི་ཚོགས་འདུས་པ་ཕོ་མོ་ལྷར་གསལ་བའོ། །དགྱེས་ལྡན་ལྷ་ཡི་ཚོགས་སྤྱན་དྲང་བའོ། །བསང་བ་གསུམ་ནི། བྱིན་རླབས་དང་ལྡན་པའི་རྫས་ཀྱིས་བསང་བ་བདུད་རྩི་དང་། སྔགས་ཀྱི་བསང་བ་ནི། སརྦ་དྲ་བྱཱཾ་ཤྭ་དྷ་ནི་ཧཱུཾ་ཧྲཱིཿཋཱ། ཞེས་པའོ། །ཏིང་ངེ་འཛིན་གྱིས་བསང་བ་ནི། བགེགས་བསྐྲད་ལ་འདོད་ཡོན་དུ་བྱིན་གྱིས་བརླབས་པའོ། །སྦྱང་བ་གསུམ་ནི། ལྷག་མཐོང་གི་མེས་སྦྱངས། ཡེ་ཤེས་ཀྱི་རླུང་གིས་གཏོར། གཞི་གནས་ཀྱི་ཆུས་སྦྱང་བ་གསུམ་མོ། །བྱིན་རླབས་གསུམ་ནི། ཧཱུཾ་གིས་ཆོས་ཉིད་དུ་སྦྱངས། ཨཱཿཡིས་ཡེ་ཤེས་ཀྱི་བདུད་རྩིར་བསྒྱུར། ༀ་གྱིས་ནམ་མཁའ་གང་བར་སྤེལ་ནས་བྱིན་གྱིས་བརླབས་པའོ། །བཀྲོལ་ཐབས་གསུམ་ནི། ཕུད་དང་། བར་ཕུད། ལྷག་ཕུད་དང་གསུམ་དུ་བཀྲོལ་བའོ། །མཆོད་ཐབས་གསུམ་ནི། གཡས་དཀར་བ་ལ་མཆོད། གཡོན་དམར་བ་ལ་བཤགས། དབུས་མཐིང་བ་ལ་སྟོབ་བོ། །སྤྱན་དྲང་བ་ནི། ཧཱུཾ། བཅོམ་ལྡན་གཤིན་རྗེའི་རྒྱལ་པོ་ཡབ་ཡུམ་དང་། །བྱང་ཆུབ་སེམས་དཔའ་རྡོ་རྗེ་ལྕམ་དྲལ་དང་། །ལས་མཛད་མ་མོ་མཁའ་འགྲོའི་ཚོགས་ཆེན་རྣམས། །རྣལ་འབྱོར་ཡིད་དང་འཐད་པའི་གནས་འདིར་གཤེགས། །ཡ་མ་རཱ་ཛ་མྱོས་བྱེད་འབར་བ་དང་། །ཨཱརྱ་མ་རུ་རལ་པ་ཚར་དགུ་དང་། །སྲོག་བདག་ཡབ་ཡུམ་འཁོར་དང་བཅས་པ་རྣམས། །རྣལ་འབྱོར་ཡིད་དང་འཐད་པའི་གནས་འདིར་གཤེགས། །རྡོ་རྗེ་བདུད་འཇོམས་ཀོང་རྩེ་བྲག་འཇོམས་དང་། །ཨ་བ་གླང་མགོ་དང་ནི་ཡ་བ་ཏི། །གཤིན་རྗེའི་ཕྱྭ་སངས་རྨིགས་པ་ཏེལ་པ་དང་། །ལྷ་མཆོག་དུད་ཁ་ཆོས་རྒྱལ་མིག་དམར་དང་། །ཕྱོགས་སྐྱོང་ཡབ་ཡུམ་འཁོར་དང་བཅས་པ་རྣམས། །རྣལ་འབྱོར་ཡིད་དང་འཐད་པའི་གནས་འདིར་གཤེགས། །བདུད་ཀྱི་བུ་མོ་མཐུ་མོ་ཆེ། །བཙན་གྱི་བུ་མོ་མཐུ་མོ་ཆེ། །གཟའ་ཡི་བུ་མོ་མཐུ་མོ་ཆེ། །ཀླུ་ཡི་བུ་མོ་མཐུ་མོ་ཆེ། །གཤིན་རྗེའི་སྒོ་མ་བཞི་པོ་ཡང་། །རྣལ་འབྱོར་ཡིད་དང་འཐད་པའི་གནས་འདིར་གཤེགས། །ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྩ་ཧཱུཾ་ཕཊ། ས་མ་ཡ་ཛཿཛཿ ཞེས་པས་བྱོན་པར་བསམ། དེ་ནས་སྤྱིར་མཆོད་འབུལ་བ་ནི། ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་པུཥྨེ་ཧཱུཾ། ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་དྷཱུ་པེ་ཧཱུཾ། ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་ཨཱ་ལོ་ཀེ་ཧྲཱིཿ ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་གནྡྷེ་ཧཱུཾ། ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་ནཻ་ཝིདྱ་ཧཱུཾ། ༀ་ཨཱཿཧཱུཾ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །ༀ་བཛྲ་ཤཔྡ་ཧཱུཾ། ཧཱུཾ། སྣ་ཚོགས་དག་ལ་གཟུགས་མཆིས་ཏེ། །གཟུགས་ཀྱི་ལྷ་མོ་མེ་ལོང་མ། །མེ་ལོང་ལས་ཀྱང་གཟུགས་འབྱུང་སྟེ། །མང་པོ་བསམ་གྱིས་མི་ཁྱབ་པ། །ཕྱོགས་བཅུ་འཇིག་རྟེན་ཁམས་བཀང་ནས། །དཀྱིལ་འཁོར་ལྷ་ཡི་སྤྱན་ལ་ཐིམ། །སྤྱན་གྱི་ཐུགས་དམ་བསྐང་གྱུར་ཅིག །ཧཱུཾ། སྣ་ཚོགས་དག་ལ་སྒྲ་མཆིས་ཏེ། །སྒྲ་ཡི་ལྷ་མོ་པི་ཝཾ་མ། །པི་ཝཾ་ལས་ཀྱང་སྒྲ་འབྱུང་སྟེ། །མང་པོ་བསམ་གྱིས་མི་ཁྱབ་པ། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ལྷ་ཡི་སྙན་ལ་ཐིམ། །སྙན་གྱི་ཐུགས་དམ་བསྐང་གྱུར་ཅིག །ཧཱུཾ། སྣ་ཚོགས་དག་ལ་དྲི་མཆིས་ཏེ། །དྲི་ཡི་ལྷ་མོ་སྤོས་ཁང་མ། །སྐུ་མདོག་དམར་མོ་རྒྱན་དང་ལྡན། །ཕྱག་གཉིས་ན་ནི་སྤོས་ཁང་བསྣམས། །མང་པོ་བསམ་གྱིས་མི་ཁྱབ་པ། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ལྷ་ཡི་ཤངས་ལ་ཐིམ། །ཤངས་ཀྱི་ཐུགས་དམ་བསྐང་གྱུར་ཅིག །ཧཱུཾ། སྣ་ཚོགས་དག་ལ་རོ་མཆིས་ཏེ། །རོ་ཡི་ལྷ་མོ་ཞལ་ཟས་མ། །ཞལ་ཟས་ལས་ཀྱང་རོ་འབྱུང་སྟེ། །མང་པོ་བསམ་གྱིས་མི་ཁྱབ་པ། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ལྷ་ཡི་ལྗགས་ལ་ཐིམ། །ལྗགས་ཀྱི་ཐུགས་དམ་བསྐང་གྱུར་ཅིག །ཧཱུཾ། སྣ་ཚོགས་དག་ལ་རེག་མཆིས་ཏེ། །རེག་བྱའི་ལྷ་མོ་ན་བཟའ་འཛིན། །ན་བཟའ་ལས་ནི་རེག་འབྱུང་སྟེ། །མང་པོ་བསམ་གྱིས་མི་ཁྱབ་པ། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ལྷ་ཡི་སྐུ་ལ་ཐིམ། །སྐུ་ཡི་ཐུགས་དམ་བསྐང་གྱུར་ཅིག །ཧཱུཾ། བླ་མེད་མཆོག་གི་མཆོད་པ་དམ་པ་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །དབང་པོ་ལྔ་ཡི་ཡོན་ཏན་མཁོ་དགུར་ལྡན། །ནམ་མཁའི་མཐའ་ཀླས་གཏེར་ཆེན་གྱུར་པ་འདི། །མཆོད་གནས་བླ་མེད་ཁྱེད་ཀྱི་ཕོ་བྲང་དུ། །མཆོད་པའི་སྤྲིན་གྱིས་རྒྱ་ཆེར་འཕེལ་གྱུར་ཅིག །ཨ་ལ་ལ་ཧོ། ཞེས་བརྗོད་དོ། །དེ་ནས་ཚོགས་བསྒྲལ་ཏེ། ཚོགས་ཀྱི་དངོས་པོ་དེ་རང་གི་གཟུང་འཛིན་རྣམ་རྟོག་གི་ཕུང་པོར་བསམ་ལ། ཛཿཧཱུཾ་བཾ་ཧོཿ ཨཾ་ཀུ་ཤ་ཛཿ ཞེས་བརྗོད་པས་སེམས་ཅན་ཐམས་ཅད་ཀྱི་གཟུང་འཛིན་དང་རྣམ་པར་རྟོག་པ་བཀུག་ལ་བསྟིམ། ཀ་ཏ་རི་འཇམ་དཔལ་རྣོན་པོར་བསྐྱེད་ལ་འདི་སྐད་དོ། །ཧཱུཾ། སྲོག་ཅན་རྒྱུ་དང་སྲོག་མེད་རྒྱུ། །འདི་ནི་སྲོག་མེད་རྒྱུ་ཡིན་ཏེ། །སྲོག་མེད་སྒྲོལ་མཛད་ཧེ་རུ་ཀ །སྙིང་རྗེ་མེད་པར་བསྒྲལ་བར་བྱའོ། །ཛ་པྲ་བེ་ཤ་ཡ་ཕཊ། ཅེས་བསྒྲལ་བས་རྣམ་རྟོག་དང་གཟུང་འཛིན་གྱི་ཕུང་པོ་བསྒྲལ་ནས་དེ་ཁོ་ན་ཉིད་ཀྱི་ཡེ་ཤེས་ཐོབ་པར་བྱ། དེ་ནས་ཆ་གསུམ་དུ་བགོས་ཏེ། ཆ་གཅིག་བདེ་བར་གཤེགས་པ་ལ་འབུལ། དེ་ཡང་གསུམ་བྱ་སྟེ། དང་པོ་གཡས་དཀར་བ་ལ་འབུལ་བ་ནི། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་རྔམ་པ་སྟོན་པ་དང་། །སྙིང་རྗེ་ཞི་དང་རྨད་དུ་བྱུང་བ་སྟེ། །སྐུ་ཡི་དངོས་པོ་ཤིན་ཏུ་འགྱུར་བ་ཡི། །གར་བྱོས་སྒྱུ་མའི་རང་བཞིན་རྣལ་འབྱོར་པ། །དཔལ་ཆེན་གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མེ་ཏོག་ལ་སོགས་ཙནྡན་ཕྲེང་། །བཟང་དགུ་འབུལ་ལོ་བཞེས་སུ་གསོལ། །མཛེས་དགུ་འབུལ་ལོ་བཞེས་སུ་གསོལ། །བཏུང་དགུ་འབུལ་ལོ་བཞེས་སུ་གསོལ། །གཡོན་དམར་བ་ལ་བཤགས་པ་ནི། སྐུ་ཡི་དམ་ཚིག་ཉམས་པ་མཐོལ་ལོ་བཤགས། །གསུང་གི་དམ་ཚིག་ཉམས་པ་མཐོལ་ལོ་བཤགས། །ཐུགས་ཀྱི་དམ་ཚིག་ཉམས་པ་མཐོལ་ལོ་བཤགས། །རྩ་བའི་དམ་ཚིག་ཉམས་པ་མཐོལ་ལོ་བཤགས། །ཡན་ལག་དམ་ཚིག་ཉམས་པ་མཐོལ་ལོ་བཤགས། །དམ་ལས་ཉམས་ན་ཐུགས་དམ་ཚོགས་ཀྱིས་བསྐང་། །ཆོ་ག་ཉམས་དང་མ་ཆག་སྟེ། །ཆག་ན་ཐུགས་དམ་ཚོགས་ཀྱིས་བསྐང་། །ཉི་མའི་དུས་ལས་ཡོལ་ཡང་མ་ཡོལ་ཏེ། །ཡོལ་ན་ཐུགས་དམ་ཚོགས་ཀྱིས་བསྐང་། །ཚོགས་ཐ་མ་ལ་དགྲ་བགེགས་ཀྱི་ལིངྒ་བྱས་ནས་མདུན་དུ་བཞག་ལ་ལྕགས་ཀྱུའི་ཕྱག་རྒྱ་བཅས་ཏེ་དགྲ་བགེགས་ཀྱི་རྣམ་ཤེས་བཀུག་ལ། ནྲྀ་ཛཿཏྲི་ཛཿ ཞེས་པས་ལིངྒ་ལ་བསྟིམ་ལ། ཤར་ལྷོ་ནུབ་བྱང་སྒོ་བཞི་ནས། །བདུད་ཀྱི་བུ་མོ་མཐུ་མོ་ཆེ། །བཙན་གྱི་བུ་མོ་མཐུ་མོ་ཆེ། །གཟའ་ཡི་བུ་མོ་མཐུ་མོ་ཆེ། །ཀླུ་ཡི་བུ་མོ་མཐུ་མོ་ཆེ། །གཤིན་རྗེའི་སྒོ་མ་བཞི་རྣམས་ཀྱིས། །དམ་ཉམས་གནས་ནས་དབབ་ཏུ་གསོལ། །རྩ་བའི་སྔགས་ཀྱིས་གཏུབ་ལ་གཏོར་སྣོད་དུ་འབུལ་ལོ། །ཡང་ན། ཨེ་མ་རལླི་ཧོ་ཁ་རཾ་ཁཱ་ཧི། ཞེས་པས་དབུལ་ལོ། །དེ་ནས་སྟོབ་པ་བྱ་སྟེ། དབུས་མཐིང་བ་ལ་སྟོབ་པ་ནི། ཧཱུཾ་ཧཱུཾ་ཧཱུཾ། བཅོམ་ལྡན་ཡ་མཱནྟ་ཀ་ཞལ་ཕྱེས་ཤིག །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱང་བ་འདྲ། །ཞལ་ཁ་ཧོམ་ཁུང་ཚུར་གདོངས་ཤིག །སྡང་དགྲ་གདོན་བགེགས་ཕར་སྟོབ་བོ། །སྟོབ་ཀྱི་སྟོབ་ཀྱིས་ཕར་མ་བཏང་། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། བེ་ཏ་ནག་མོ་ཞལ་ཕྱེས་ཤིག །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱང་བ་འདྲ། །ཞལ་ཁ་ཧོམ་ཁུང་ཚུར་གདོངས་ཤིག །སྡང་དགྲ་གདོན་བགེགས་ཕར་སྟོབ་བོ། །སྟོབ་ཀྱི་སྟོབ་ཀྱིས་ཕར་མ་བཏང་། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། གཤེད་པ་ཡབ་ཡུམ་ཞལ་ཕྱེས་ཤིག །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱང་བ་འདྲ། །ཞལ་ཁ་ཧོམ་ཁུང་ཚུར་གདོངས་ཤིག །སྡང་དགྲ་གདོན་བགེགས་ཕར་སྟོབ་བོ། །སྟོབ་ཀྱི་སྟོབ་ཀྱིས་ཕར་མ་བཏང་། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། ཕྱོགས་སྐྱོང་རྒྱལ་པོ་ཡབ་ཡུམ་ཞལ་ཕྱེས་ཤིག །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱང་བ་འདྲ། །ཞལ་ཁ་ཧོམ་ཁུང་ཚུར་གདོངས་ཤིག །སྡང་དགྲ་གདོན་བགེགས་ཕར་སྟོབ་བོ། །སྟོབ་ཀྱི་སྟོབ་ཀྱིས་ཕར་མ་བཏང་། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། སྒོ་མ་བཞི་རྣམས་ཞལ་ཕྱེས་ཤིག །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱང་བ་འདྲ། །ཞལ་ཁ་ཧོམ་ཁུང་ཚུར་གདོངས་ཤིག །སྡང་དགྲ་གནོད་བགེགས་ཕར་སྟོབ་བོ། །སྟོབ་ཀྱི་སྟོབ་ཀྱིས་ཕར་མ་བཏང་། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། ཞེས་བརྗོད་དོ། །དེ་ནས་ལྷག་མའི་ཆོ་ག་བྱ་སྟེ། ལྷག་མ་བསྡུས། ༀ་ཨཱཿཧཱུཾ་གིས་བྱིན་བརླབས་བྱས་ལ། སྔོན་ཚེ་བདེར་གཤེགས་རྣམས་ཀྱི་བཀའ། །ད་ལྟ་རྣལ་འབྱོར་བདག་གི་ལས། །དང་པོ་ཕུད་ཀྱིས་མི་མཆོད་དུ། །ཡ་མཱནྟ་ཀ་ཕུད་ཀྱི་བདག །དེ་ཕྱིར་དང་པོ་ཕུད་ཀྱིས་མཆོད། །བར་དུ་ཚོགས་ལ་མི་རོལ་དུ། །མཁའ་འགྲོ་དམ་ཚིག་ཚོགས་ལ་དགྱེས། །དེ་ཕྱིར་བར་དུ་ཚོགས་ལ་རོལ། །ཐ་མ་ལྷག་གིས་མི་མཆོད་དུ། །སྤྲུལ་པ་ཡང་སྤྲུལ་ལྷག་ལ་དགྱེས། །དེ་ཕྱིར་ཐ་མ་ལྷག་གིས་མཆོད། །ལྷག་མ་ཁ་ཆུས་མི་བཏབ་ཏུ། །ཁྱེད་དང་ང་གཉིས་ཁྱད་པར་མེད། །དེ་ཕྱིར་ལྷག་མ་ཁ་ཆུས་གདབ། །ཕུད་དང་ལྷག་མར་མི་བསྲེ་རུ། །རྒྱུ་འབྲས་གཅིག་ཅིང་ཁྱད་པར་མེད། །དེ་ཕྱིར་ཕུད་དང་ལྷག་མ་བསྲེ། །རྣམ་གསུམ་གཅིག་ཏུ་མི་བསྲེ་རུ། །ཆོས་ཉིད་ཐམས་ཅད་སྤྲོས་དང་བྲལ། །དེ་ཕྱིར་རྣམ་གསུམ་གཅིག་ཏུ་བསྲེ། །ཕུད་ལ་དགྱེས་པ་ཕུད་ལ་རོལ། །ཁ་རཾ་ཁཱ་ཧི། ཚོགས་ལ་དགྱེས་པ་ཚོགས་ལ་རོལ། །ཁ་རཾ་ཁཱ་ཧི། ལྷག་ལ་དགྱེས་པ་ལྷག་ལ་རོལ། ཁ་རཾ་ཁཱ་ཧི། ཞེས་ཕྱིར་དོར། བསྐུལ་བ་ནི། ཧཱུྃ། བཅོམ་ལྡན་དཔལ་ཆེན་ཁྲོ་རྒྱལ་གཤིིན་རྗེའི་གཤེད། །ཆོས་ཉིད་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་ཁྲོ་རྒྱལ་སྐུར་སྤྲུལ་པ། །དབུ་གསུམ་ཕྱག་དྲུག་ཞབས་བཞི་བགྲད་པ་ནི། །རྣམ་ཐར་གསུམ་ལྡན་ཞལ་གྱིས་སྲིད་པ་སྒྲོལ། །ཡེ་ཤེས་མཆེ་བ་གཙིགས་པས་དགྲ་བགེགས་སྒྲོལ། །སྨ་ར་ཨག་ཚོམ་སེར་ནག་གྱེན་དུ་འཕྱར། །སྙན་ནས་འབྲུག་སྟོང་ཤངས་ནས་འཚུབ་མ་སྡང་། །བདུད་ཀྱི་ཚོགས་རྣམས་དབང་སྡུད་ལས་ལ་འགྱེད། །ཡེ་ཤེས་དགུ་ལྡན་སྤྱན་དགུས་ས་དགུ་མནན། །ཧཱུཾ་ཕཊ་རུ་ལུའི་ངར་སྒྲ་དྲག་པོ་ཡིས། །མ་མོ་མཁའ་འགྲོ་དབང་སྡུད་ལས་ལ་འགྱེད། །ཕ་རོལ་ཕྱིན་དྲུག་རྫོགས་མཛད་ཕྱག་དྲུག་པ། །རྒྱུ་དྲུག་གནས་ཀྱི་དགྲ་བགེགས་ལོག་ལྟ་སྒྲོལ། །ཚད་མེད་བཞི་ལྡན་ཞབས་བཞིས་དྲེགས་པ་གནོན། །སྲིད་པའི་གཤིན་རྗེ་དབང་སྡུད་ལས་ལ་འགྱེད། །སྟག་དང་གླང་ཆེན་ཞེ་སྡང་སྦྲུལ་གྱིས་བརྒྱན། །ཐོད་ཕྲེང་ཐལ་ཆེན་ཁྲག་ཞག་ཚོམ་བུས་བྲིས། །རྣམ་ཐར་བརྒྱད་ལྡན་དཔལ་གྱི་ཆས་བརྒྱད་གསོལ། །སྒྲོལ་གིང་ཕོ་མོ་མང་པོ་ལས་ལ་བསྐུལ། །ཡོན་ཏན་དཔག་མེད་ལྡན་པའི་ལྷ་མཆོག་ཡབ། །འདོད་ཆགས་མངའ་བདག་སྦྱོར་ཡུམ་བེ་ཏ་ལི། །ཞེ་སྡང་བདག་ཉིད་སྒྲོལ་ཡུམ་རལ་གཅིག་མ། །ང་རྒྱལ་སེམས་བདག་ཡབ་ཡུམ་གཉིས་མེད་ཀྱི། །ཐུགས་ཀྱི་སྲས་མཆོག་ཡ་མ་རཱ་ཛ་དང་། །མ་མོ་ཁྲག་མིག་གཞན་ཡང་ལས་ཀྱི་གཤིན། །གྲི་ཐོགས་ཁྲམ་ཐོགས་ཤྭ་ཐོགས་ལ་སོགས་པ། །བཅོམ་ལྡན་འཇམ་དཔལ་གཤིན་རྗེའི་ལྷ་ཚོགས་ཀྱིས། །དྲེགས་པའི་ཚོགས་འདུལ་བསྒྲལ་བའི་ཞིང་བཅུ་ལ། །མངོན་སྤྱོད་དག་གིས་ཕྲིན་ལས་མྱུར་དུ་མཛོད། །ཡེ་ཤེས་ཐུགས་རྗེས་ལས་མཛོད་བསམ་པ་སྒྲུབས། །ཆད་ཐོ་ནི། ཧཱུཾ། འདི་ནི་སངས་རྒྱས་ཐམས་ཅད་ཀྱི། །ཤེས་རབ་ཕ་རོལ་ཕྱིན་པའི་ཚུལ། །དགྲ་རྣམས་ཐམས་ཅད་བསད་བྱས་ནས། །རྟོག་པ་ཐམས་ཅད་ཚར་བཅད་དོ། །ཧཱུཾ། བཅོམ་ལྡན་ཡ་མཱནྟ་ཀ་ལ། །གཤེད་ཆེན་བཞི་ཡིས་བསྐོར་བ་ནི། །ཤར་གྱི་ཕྱོགས་ནས་གཤེགས་སུ་གསོལ། །ཡ་མ་རཱ་ཛ་ཡབ་ཡུམ་ལ། །མ་གཤིན་མཐིང་ནག་འབུམ་གྱིས་བསྐོར། །ཁྱོད་ནི་ཉི་མ་དང་པོའི་གཤིན། །དགྲ་བོ་མགོ་བོ་འཁོར་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ལྷོ་ཡི་ཕྱོགས་ནས་གཤེགས་སུ་གསོལ། །མྱོས་བྱེད་འབར་བ་ཡབ་ཡུམ་ལ། །མ་གཤིན་སེར་ནག་འབུམ་གྱིས་བསྐོར། །ཁྱོད་ནི་ཉི་མ་གཉིས་པའི་གཤིན། །དགྲ་བགེགས་མ་ལུས་བརྒྱལ་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ནུབ་ཀྱི་ཕྱོགས་ནས་གཤེགས་སུ་གསོལ། །ཨཱརྱ་མ་རུ་ཡབ་ཡུམ་ལ། །མ་གཤིན་དམར་ནག་འབུམ་གྱིས་བསྐོར། །ཁྱོད་ནི་ཉི་མ་གསུམ་པའི་གཤིན། །དགྲ་བགེགས་ཁྲག་ཏུ་སྐྱུག་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། བྱང་གི་ཕྱོགས་ནས་གཤེགས་སུ་གསོལ། །རལ་པ་ཚར་དགུ་ཡབ་ཡུམ་ལ། །མ་གཤིན་ལྗང་ནག་འབུམ་གྱིས་བསྐོར། །ཁྱོད་ནི་ཉི་མ་བཞི་པའི་གཤིན། །དགྲ་བགེགས་ལུས་སེམས་ཕྲལ་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཡ་མ་རཱ་ཛའི་ཞལ་དུ་ཁ་རཾ་ཁཱ་ཧི། མྱོས་བྱེད་འབར་བའི་ཞལ་དུ་ཁ་རཾ་ཁཱ་ཧི། ཨཱརྱ་མ་རུའི་ཞལ་དུ་ཁ་རཾ་ཁཱ་ཧི། རལ་པ་ཚར་དགུའི་ཞལ་དུ་ཁ་རཾ་ཁཱ་ཧི། དཔལ་ཆེན་ཡ་མཱནྟ་ཀ་ལ། །ཕྱོགས་སྐྱོང་གཤིན་རྗེས་བསྐོར་བ་ནི། །སྟེང་གི་ཕྱོགས་ནས་གཤེགས་སུ་གསོལ། །གཤིན་རྗེ་ནག་འཇོམས་རྡོ་རྗེ་བདུད་འཇོམས་ཡང་ཟེར། ཡབ་ཡུམ་ལ། །འཁོར་དུ་བདུད་དཀར་འབུམ་གྱིས་བསྐོར། །གཟེར་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ཤར་གྱི་ཕྱོགས་ནས་གཤེགས་སུ་གསོལ། །ཀོང་ཚེ་བྲག་འཇོམས་ཡབ་ཡུམ་ལ། །འཁོར་དུ་སྲོག་བདག་སྟོང་གིས་བསྐོར། །ཁྲག་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ཤར་ལྷོ་མཚམས་ནས་གཤེགས་སུ་གསོལ། །ཨ་བ་གླང་མགོ་ཡབ་ཡུམ་ལ། །འཁོར་དུ་བྲག་སྲིན་འབུམ་གྱིས་བསྐོར། །ཚ་བ་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ལྷོ་ཡི་ཕྱོགས་ནས་གཤེགས་སུ་གསོལ། །ཡ་བ་ཏི་ནི་ཡབ་ཡུམ་ལ། །འཁོར་དུ་ཕུང་སྲི་འབུམ་སྡེས་བསྐོར། །སྐྱ་རྦབ་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ལྷོ་ནུབ་མཚམས་ནས་གཤེགས་སུ་གསོལ། །ཁྲོ་རྒྱལ་ཕྱྭ་སངས་ཡབ་ཡུམ་ལ། །འཁོར་དུ་སྲིན་མོ་འབུམ་སྡེས་བསྐོར། །འབྲུམ་ནག་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ནུབ་ཀྱི་ཕྱོགས་ནས་གཤེགས་སུ་གསོལ། །ཁྲོ་རྒྱལ་རྨིགས་པ་ཡབ་ཡུམ་ལ། །འཁོར་དུ་ཀླུ་བདུད་འབུམ་སྡེས་བསྐོར། །མཛེ་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། ནུབ་བྱང་མཚམས་ནས་གཤེགས་སུ་གསོལ། །ཁྲོ་རྒྱལ་ཏེལ་པ་ཡབ་ཡུམ་ལ། །འཁོར་དུ་ཡ་བདུད་འབུམ་སྡེས་བསྐོར། །ཀ་ཐབས་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། བྱང་གི་ཕྱོགས་ནས་གཤེགས་སུ་གསོལ། །ལྷ་མཆོག་དུད་ཁ་གཤིན་རྗེ་ནག་པོ་ཡང་ཟེར། ཡབ་ཡུམ་ལ། །འཁོར་དུ་དམུ་བདུད་འབུམ་སྡེས་བསྐོར། །རིམས་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། བྱང་ཤར་མཚམས་ནས་གཤེགས་སུ་གསོལ། །ཆོས་ཀྱི་རྒྱལ་པོ་ཡབ་ཡུམ་ལ། །འཁོར་དུ་ཕྱྭ་བདུད་འབུམ་སྡེས་བསྐོར། །འཆི་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། འོག་གི་ཕྱོགས་ནས་གཤེགས་སུ་གསོལ། །གཤིན་རྗེ་མིག་དམར་དམར་པོ་ཡང་ཟེར། ཡབ་ཡུམ་ལ། །འཁོར་དུ་ས་བདག་འབུམ་གྱིས་བསྐོར། །སྐྲང་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །འཁོར་བཅས་འདིར་བྱོན་མཆོད་པ་བཞེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ཧཱུཾ། དཔལ་ཆེན་ཡ་མཱནྟ་ཀ་ལ། །གིང་ཆེན་བཅོ་བརྒྱད་ཡབ་ཡུམ་དང་། །དབང་ཕྱུག་སུམ་ཅུ་རྩ་བརྒྱད་དང་། །མ་བདུན་སྲིང་བཞིས་བསྐོར་བ་ཡང་། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་འགྲུབ་པར་མཛོད། །ༀ་ཁུ་ཁུ་རི་པྲི་ཏོ་ད་ཀ་ཏེ་པྲ་ཏ་མ་ལེ། ལ་ལི་སྭཱ་ཧཱ། མཾ་མཾ། གླེག་ཏ་གླེག་ཏ། སྲི་པྲི་ཏི་ཤི་པ་ཏི། ཏྲིང་ཏྲིང་། དྲང་དྲང་། ཁུ་ཁུ་ནི། གྷྲི་ཧྞ་སྭཱ་ཧཱ། ཞེས་གཏོར་མ་བཏང་། ཟོར་འཕང་བ་ནི། ཧཱུཾ། མ་མོའི་ཚོགས་རྣམས་དགྱེས་མཆོད་དོ། །སྒོ་བས་དེ་ནི་སྒོ་ཕྱེས་ཤིག །འཕྲང་བས་དེ་ནི་འཕྲང་སོལ་ཅིག །གཡས་སུ་དེ་ནི་མ་འདའ་ཞིག །གཡོན་དུ་དེ་ནི་མ་འབུད་ཅིག །ད་ནི་འཐེང་ཞིང་གྲུམ་ཞིང་མཆི། །འཐེང་ཞིང་གྲུམ་ཞིང་མི་མཆི་རྒྱུ། །ཀེང་རུས་གྲམ་པ་རྩང་རེ་ཚ། །ད་ནི་འབུབ་ཅིང་བརྒྱལ་ཞིང་མཆི། །འབུབ་ཅིང་བརྒྱལ་ཞིང་མི་མཆི་རྒྱུ། །རཀྟའི་རྒྱ་མཚོ་གཏིང་རེ་ཟབ། །དམ་ཅན་ཚོགས་ནི་དགྱེས་མཆོད་དོ། །བྷྱོ། བར་ཆད་བྱེད་པའི་འབྱུང་པོ་དང་། །ཟ་བགག་བྱེད་པའི་ཡི་དྭགས་དང་། །སྲོག་ལ་རྨུག་པའི་འདྲེ་སྲིན་དང་། །སྐུ་ལ་བདོ་བའི་དགྲ་བོ་དང་། །བར་ཆད་བྱེད་པའི་བགེགས་ཆེན་རྣམས། །དང་པོ་ཞེ་སྡང་ཕ་ལས་བསྐྱེད། །བར་དུ་འདོད་ཆགས་མ་ལས་སྐྱེས། །དེ་ནས་དྲི་ཟ་ལྟེ་བར་འཁོར། །དེ་ནས་ཉོན་མོངས་ལྔ་ཡི་གཟུགས། །ལྔ་ཕུང་རྩད་ནས་བཅད་པའི་ཕྱིར། །དབང་པོའི་རྟེན་ས་མགོ་ཡིན་པས། །སྤྱི་བོའི་གཙུག་ཏུ་གཏོར་ཟོར་ཡ། །གཟུགས་ལ་ལྟ་བ་མིག་ཡིན་པས། །མིག་འབྲས་གཉིས་ལ་གཏོར་ཟོར་ཡ། །དྲན་པར་བྱེད་པ་སྙིང་ཡིན་པས། །སྲོག་རྩ་དམར་ལ་གཏོར་ཟོར་ཡ། །སྨྲ་བར་བྱེད་པ་ལྕེ་ཡིན་པས། །ལྕེ་རྩ་དག་ལ་གཏོར་ཟོར་ཡ། །ཉན་པར་བྱེད་པ་རྣ་བ་སྟེ། །རྣ་བའི་རྩ་ལ་གཏོར་ཟོར་ཡ། །སྣོམ་པར་བྱེད་པ་སྣ་ཡིན་པས། །སྣ་ཡི་རྩ་ལ་གཏོར་ཟོར་ཡ། །བྱ་བ་བྱེད་པ་ལག་པ་ཡིན། །ལག་པའི་རྩ་ལ་གཏོར་ཟོར་ཡ། །འགྲོ་བར་བྱེད་པ་རྐང་པ་སྟེ། །རྐང་པའི་རྩ་ལ་གཏོར་ཟོར་ཡ། །དབུགས་སུ་རྔུབ་པ་གློ་བ་སྟེ། །གློ་བའི་དཀྱིལ་དུ་གཏོར་ཟོར་ཡ། །གནས་པར་བྱེད་པ་ཡུལ་ཡིན་ཏེ། །གནས་པའི་ཡུལ་ལ་གཏོར་ཟོར་ཡ། །རྟེན་པར་བྱེད་པ་མཁར་ཡིན་ཏེ། །རྟེན་པའི་མཁར་ལ་གཏོར་ཟོར་ཡ། །མཆན་གྱི་བུ་ལ་གཏོར་ཟོར་ཡ། །བྲན་གཡོག་འཁོར་ལ་གཏོར་ཟོར་ཡ། །སྒོ་ཁྱི་རྟ་ལ་གཏོར་ཟོར་ཡ། །བདུན་བརྒྱུད་རྩད་ལ་ཁྲག་ཟོར་ཡ། །སྙིང་ཁྲག་ཆོད་ཅིག་ཙིཏྟ་ནན། །རྣམ་ཤེས་ཕྱོགས་ཤིག་ན་རཾ་རཾ། །གཟུགས་ཕུང་བཤིག་ཅིག་སུ་ན་ཏྲི། །ཡན་ལག་ཆིངས་ཤིག་ཛ་ན་ཧྲཱིཿ དུག་མདའ་རྒྱོབ་ཅིག་ནག་པོའི་ཚོགས། །དགྲ་བགེགས་གཉིས་ཀ་རྡུལ་དུ་རློག །ཅེས་འཕང་ངོ་། །བརྟན་མ་བསྐྱང་བ་ནི། བཤལ་ཆུ་ༀ་ཨཱཿཧཱུཾ་གིས་བྱིན་གྱིས་བརླབས། ཧཱུཾ། བཅོམ་ལྡན་ཡ་མཱནྟ་ཀ་ལ། །བསྟན་སྐྱོང་ཚོགས་ཀྱིས་བསྐོར་བ་ནི། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །དཔལ་ལྡན་ཧ་རི་རྡོ་རྗེ་གཡའ་མ་སྐྱོངས། །གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་། །འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། །བདུད་མོ་བཞི་ཡང་འདིར་གཤེགས་གཏོར་མ་ལོངས། །རྣལ་འབྱོར་བཅོལ་བའི་ཕྲིན་ལས་སྒྲུབ་པར་མཛོད། །ཤ་མེད་གངས་དཀར་རྡོ་རྗེ་གཡུ་སྒྲོན་མ། །ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །གསེར་ཆེན་མཁའ་ལྡིང་རྡོ་རྗེ་ཀླུ་མོ་དང། །རྨ་རི་རབ་འབྱམས་རྡོ་རྗེ་དྲག་མོ་རྩལ། །གནོད་སྦྱིན་བཞི་ཡང་འདིར་གཤེགས་གཏོར་མ་ལོངས། །རྣལ་འབྱོར་བཅོལ་བའི་ཕྲིན་ལས་སྒྲུབ་པར་མཛོད། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོངས། །བཙན་ལ་ལ་རོ་རྡོ་རྗེ་སྨན་གཅིག་མ། །གཡུ་ཡི་དྲིལ་བུ་རྡོ་རྗེ་ཟུ་ལེ་མ། །སྨན་བཙུན་ཁུག་ཆོས་རྡོ་རྗེ་གཡར་མོ་བསིལ། །སྨན་བཙུན་བཞི་ཡང་འདིར་གཤེགས་གཏོར་མ་ལོངས། །རྣལ་འབྱོར་བཅོལ་བའི་ཕྲིན་ལས་སྒྲུབ་པར་མཛོད། །བརྟན་མ་བཅུ་གཉིས་སྨན་ཕྲན་འབུམ་དང་བཅས། །བྲན་གཡོག་འཁོར་བཅས་གཏོར་མ་འདི་ལོངས་ལ། །རྣལ་འབྱོར་བདག་ཅག་འཁོར་དང་བཅས་པ་ཡི། །བར་ཆད་དགྲ་བགེགས་ནད་དང་གནོད་པའི་ཚོགས། །མི་མཐུན་ཕྱོགས་རྣམ་ཞི་དང་ཟློག་པ་དང་། །རྒྱུ་སྦྱོར་རྐྱེན་ངན་བཟློག་པའི་ཕྲིན་ལས་མཛོ། །གཏོར་མ་གཙང་སར་འབུལ་ལོ། །དེ་ནས་གཏོར་གཞོང་ཁ་སྦུབ་ལ། བྲོ་བརྡུང་བ་ནི། ཧཱུྃ། ཁྲོ་བོའི་རྒྱལ་པོ་གཤིན་རྗེའི་གཤེད། །མ་ལུས་ཟིལ་གནོན་བྲོ་ཞིག་བརྡུང་། །བྲོ་བརྡུང་གཟུགས་ཅན་དགྲ་ལ་བརྡུང་། །བྲོ་བརྡུང་གཟུགས་མེད་བགེགས་ལ་བརྡུང། །དགྲ་བགེགས་མགོ་ལ་ཆེམས་སེ་ཆེམ། །ལག་པ་ཐལ་སྦྱོར་གྱེན་ལ་སྦྱོར། །འཕགས་པ་རྣམས་ཀྱི་ཐུགས་དམ་བསྐུལ། །རྐང་པས་བྲོ་བརྡུང་ཐུར་དུ་བརྡུང་། །བདུད་བཞི་མ་ལུས་ཟིལ་གྱིས་གནོན། །བྲོ་བའི་དགྲ་བགེགས་འདུལ་བའི་བྲོ། །གླུ་ནི་ཚངས་པ་དབྱངས་ཀྱི་གླུ། །ཚིག་འདི་དོན་དམ་རྟོགས་པའི་ཚིག །རྐང་པ་གཡས་ཀྱིས་བྲོ་བརྡུངས་པས། །ཕོ་སྲི་ཐམས་ཅད་གཡས་སུ་མནན། །རྐང་པ་གཡོན་གྱིས་བྲོ་བརྡུངས་པས། །མོ་སྲིན་ཐམས་ཅད་གཡོན་དུ་མནན། །གཡས་གཡོན་མེད་པའི་བྲོ་བརྡུངས་པས། །དགྲ་བགེགས་ཐམས་ཅད་ཐལ་བར་བརླག །རྣལ་འབྱོར་ལུས་ངག་ཡིད་གསུམ་ལ། །གནོད་པར་བྱེད་པའི་འབྱུང་པོ་ཀུན། །གཤིན་རྗེ་གཤེད་པོའི་ཏིང་འཛིན་གྱིས། །རི་རབ་ཆེན་པོའི་རྨངས་སུ་མནན། །བྱང་ཆུབ་སེམས་མཆོག་མ་སྐྱེས་བར། །མནན་པ་ཡིན་ནོ་མ་ལྡངས་ཤིག །དགྲ་བགེགས་སྟམྦྷ་རཀྴ་ནན། །སུམ་བྷ་ནི་བརྗོད་པས་གཏོར་གཞོང་རི་རབ་ཀྱི་རྨངས་སུ་དགྲ་བགེགས་མནན་པར་བསམ། དེ་ནས་བླ་མ་ཡི་དམ་ལ་གཏང་རག་གི་མཆོད་བསྟོད་བསྡུས་པ་བྱེད། བཟོད་པར་གསོལ། དངོས་གྲུབ་བླང་། ཡི་གེ་བརྒྱ་པས་ལྷག་ཆད་ཁ་བསྐང་། རྟེན་ཡོད་ན་དེ་ལ་བསྟིམ། མེད་ན། བཛྲ་མུཿས་ཡེ་ཤེས་པ་གཤེགས། དམ་ཚིག་པ་བསྡུ་བ་ནི། ཕྱིའི་གཞལ་ཡས་ཁང་ལྷ་ལ་བསྡུ། ལྷ་ཡ་མ་རཱ་ཛ་ཡབ་ཡུམ་གཉིས་ཟ་བྱེད་བེ་ཏ་ལི་ལ། སྦྱོར་ཡུམ་སྒྲོལ་ཡུམ་གཉིས་ཀྱང་གཙོ་བོ་ལ། གཙོ་བོ་ཉིད་ཀྱང་ཡེ་ཤེས་སེམས་དཔའ་ལ། ཡེ་ཤེས་སེམས་དཔའ་རྡོ་རྗེ་ལ། རྡོ་རྗེ་ཧཱུཾ་ལ་བསྡུས་ཏེ་རིམ་གྱིས་སྟོང་པ་ཉིད་ལ་བློ་བཞག་གོ། །རྗེས་སྐད་ཅིག་གིས་ལྷའི་ང་རྒྱལ་དང་ལྡན་པས་སྤྱོད་ལམ་འཇུག་གོ། །སྨོན་ལམ་ནི། འདི་བསྒྲུབས་པ་ཡི་དགེ་བའི་རྩ་བ་འདིས། །ཕ་མས་གཙོ་བྱས་རིགས་དྲུག་སེམས་ཅན་རྣམས། །བདུད་ཀྱི་གཡུལ་ལས་རྣམ་པར་རྒྱལ་གྱུར་ནས། །རང་རིག་ཡ་མཱནྟ་ཀ་མངོན་གྱུར་ཤོག །བཀྲ་ཤིས་ནི། ཧཱུཾ། བྱང་ཆུབ་སེམས་མཆོག་ཤེས་རབ་ཏིང་འཛིན་གྱིས། །ཉོན་མོངས་ངར་འཛིན་རྣམ་རྟོག་ཀུན་སྤངས་ཏེ། །ཡ་མཱནྟ་ཀའི་དོན་ལ་རབ་བསྒོམས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གཤིན་རྗེའི་གཤེད་པོ་སྐར་ལྟར་འཁྲུགས་པ་ཡིས། །ལས་ཀྱི་གཤིན་རྗེ་ཕོ་མོ་ཀུན་བཏུལ་ནས། །ཕྲིན་ལས་དྲག་པོའི་ལས་ལ་བཀོད་པའི་ཕྱིར། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཞི་རྒྱས་དབང་དྲག་མངོན་སྤྱོད་དྲག་པོ་ཡིས། །གནོད་པའི་དགྲ་བགེགས་མ་ལུས་ཀུན་བསྒྲལ་ནས། །བླ་མེད་བྱང་ཆུབ་ལམ་ལ་འགོད་པའི་ཕྱིར། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རྡོ་རྗེ་གསང་མཆོག་གཤིན་རྗེའི་དཀྱིལ་འཁོར་དུ། །འཇིགས་བྱེད་མི་བཟད་གཤིན་རྗེའི་སྐུར་བཀོད་པའི། །དུས་གསུམ་འགྱུར་མེད་ཁྲོ་རྒྱལ་བགེགས་ཀྱི་གཤེད། ། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཉིན་མཚན་མེད་པར་གཤིན་རྗེའི་གཤེད་བསྒོམས་པས། །གདུག་པའི་དགྲ་བགེགས་རྡུལ་དུ་བརླག་པ་དང་། །བསྐལ་པའི་བར་དུ་དགྲ་བགེགས་མི་ལྡང་བའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གཤིན་རྗེ་སྒྲུབ་པའི་དཀྱིལ་འཁོར་ཆ ེན་པོ་འདིར། །རྡོ་རྗེ་སློབ་དཔོན་མཆེད་དང་ལྕམ་དྲལ་གྱི། །ཐུགས་དམ་ཆེན་པོ་ཡོངས་སུ་བསྐང་བ་ཡིས། །ཡ་མཱནྟ་ཀ་ཤིན་ཏུ་བཀྲ་ཤིས་ལྟར། །སྔགས་འཆང་འཁོར་བཅས་དེ་བཞིན་བཀྲ་ཤིས་ཤོག །ངན་འགྲོ་ལོག་པར་ལྟ་བ་ཀུན་བཅོམ་ནས། །རྣལ་འབྱོར་རིག་འཛིན་ཆོས་རྣམས་དར་ཞིང་འཕེལ། །མཐོང་ཐོས་རེག་པས་བདེ་བ་མཆོག་བརྙེས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དེ་ལྟར་དོན་གཉིས་མངོན་དུ་གྱུར་ནས་ནི། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང་། །བདག་དང་འགྲོ་བ་ཀུན་ལ་བྱིན་ཆེ་བའི། །བསྐལ་པའི་མཐར་ཐུག་བར་དུ་བཀྲ་ཤིས་ཤོག །འཇམ་དཔལ་གཤིན་རྗེ་ཁ་ཐུན་ནག་པོ་ཡི། །ལས་བྱང་དོན་བརྒྱད་མངོན་རྟོགས་པདྨའི་སྤྱན། །མཆོད་རྫས་བྱིན་རླབས་རྣམས་ཏེ་རྩ་བ་ལས། །རང་བཟོས་བསླད་པ་སྤངས་ནས་ཁྲིགས་སུ་བསྡེབས། །འོན་ཀྱང་མཁས་གྲུབ་བློ་གྲོས་ལྡན་རྣམས་ལ། །འདི་འདྲའི་ཆོ་ག་ནག་འགྲོས་བགྱིས་པ་ཡི། །དགོས་པ་མེད་མོད་རང་དང་སྐལ་མཉམ་འགྲོར། །ཕན་ཕྱིར་སྤེལ་འདིས་འཇམ་དཔལ་དང་མཇལ་ཤོག །ཅེས་གཤིན་རྗེ་ཁ་ཐུན་གྱི་སྒྲུབ་ཐབས་ནག་འགྲོས་སུ་བཀོད་པ་འདི་ནི་རིགས་ཀྱི་གཅུང་འགྱུར་མེད་བསྟན་འཛིན་ཆོས་དབང་གིས་རིན་པོ་ཆེ་དང་པོ་ཞོ་འཁོར་དང་ལྷ་རྫས་ཀྱི་རྟེན་བཅས་གསུང་གིས་བསྐུལ་ངོར་འགྱུར་མེད་རིན་ཆེན་རྣམ་པར་རྒྱལ་བས་སྤེལ་བའི་ཡི་གེ་པ་ནི་ནོར་གླིང་པ་འགྱུར་མེད་བསོད་ནམས་རབ་འཕེལ་གྱིས་བགྱིས་པའོ། །མངྒལཾ།། །།