དཔལ་རྡོ་རྗེ་ཕུར་པའི་སྒྲུབ་སྐོར་ལས་རོང་ཟོམ་ལུགས་ཀྱི་ཕུར་པའི་གཞུང་པོད་བསྟན་པ་རྒྱ་མཚོའི་སྙིང་བཅུད།
དཔལ་རྡོ་རྗེ་ཕུར་པའི་སྒྲུབ་སྐོར་ལས། རོང་ཟོམ་ལུགས་ཀྱི་ཕུར་པའི་གཞུང་པོད་བསྟན་པ་རྒྱ་མཚོའི་སྙིང་བཅུད་ཅེས་བྱ་བ་བཞུགས་སོ། །
ན་མོ་གུ་རུ་བཛྲ་ཀུ་མཱ་ར་ཡ། དེ་ལ་འདིར་ཕྱོགས་དུས་ཀྱི་རྒྱལ་བ་ཡོངས་ཀྱི་ཕྲིན་ལས་ཀྱི་རང་གཟུགས་དཔལ་རྡོ་རྗེ་གཞོན་ནུ་ཡིན་ལ། དེ་ཉིད་སྒྲུབ་པའི་ཆོས་སྐོར་ལས་བཀའ་བརྒྱད་བདེ་གཤེགས་འདུས་པའི་དཀར་ཆག་ལས། རྡོ་རྗེ་གཞོན་ནུ་ཕྲིན་ལས་ཀྱི་རྒྱུད་ལ་བིདྱོཏྟ་མ་ལ་འབུམ་སྡེ་ཕུར་པ་ཕ་ཡི་རྒྱུད། རྣལ་འབྱོར་དམ་པ་གསང་ཆེན་མ་ཡི་རྒྱུད། ཀཱི་ལ་ཡི་བཅུ་གཉིས་ཕུར་པ་གཉིས་ཀའི་རྒྱུད། ཅེས་གསུངས་པ་ལྟར་བིདྱོཏྟ་མ་ལ་ཞེས་པ་བོད་སྐད་དུ་རིག་པ་མཆོག་གི་རྒྱུད་འབུམ་པར་གྲགས་ཤིང་རྩ་དུམ་སོགས་ཕ་རྒྱུད། ཕུར་པ་གསང་བའི་རྒྱུད་ཆེན་པོ་སོགས་མ་རྒྱུད། ཀཱི་ལ་ཡ་བཅུ་གཉིས་སོགས་གཉིས་ཀའི་རྒྱུད་དུ་མཛད་པའི་ཕྲིན་ལས་ཕུར་པ་རོལ་པའི་རྒྱུད་སྡེ་རྒྱ་མཚོའི་དགོངས་བཅུད་མན་ངག་གི་ཕྱེ་བའི་བཀའ་སྲོལ་མི་འདྲ་བ་དུ་མ་ཡོད་པ་ལས་ཁྱད་པར་དུ་གྱུར་པ་རོང་ཟོམ་ཆོས་ཀྱི་བཟང་པོའི་བཀའ་སྲོལ་ལས་བྱུང་བའི་རོང་ཕུར་ཞེས་ཡོངས་སུ་གྲགས་པ་འདི་ནི་བརྒྱུད་གསུམ་རིག་འཛིན་རྒྱ་མཚོའི་མངའ་བདག་དཔལ་ཨོ་རྒྱན་གྱི་སློབ་དཔོན་པདྨ་འབྱུང་གནས་ནས་རིང་བརྒྱུད་བར་མ་ཆད་པ་དང་། ཉེ་བརྒྱུད་ཁྱད་པར་བའི་དབང་དུ་བྱས་ན། རོང་བན་ཡོན་ཏན་རིན་ཆེན་གྱིས་སློབ་དཔོན་ཆེན་པོ་དངོས་ལ་ཐུག །མི་ཡུལ་དུ་ལོ་སུམ་བརྒྱར་བཞུགས་ཏེ་མཐར་སྐུ་ལུས་མ་སྤངས་པར་མཁའ་སྤྱོད་དུ་གཤེགས། དེའི་སྲས་རོང་བན་རིན་ཆེན་ཚུལ་ཁྲིམས་དགུང་ལོ་ཕྱེད་དང་ཉིས་བརྒྱར་བཞུགས། དེའི་སྲས་རོང་ཟོམ་པཎྜི་ཏ་ཆེན་པོ་ཆོས་ཀྱི་བཟང་པོ་ཡིན་ཏེ་དགུང་ལོ་བརྒྱ་དང་བཅུ་དགུ་བཞུགས་ཤིང་སྐུ་ལ་བསྒྲེས་རྒུད་མི་མངའ་ཞིང་འཛམ་བུའི་གླིང་ན་ཡོངས་སུ་གྲགས་པའི་མཁས་གྲུབ་གཉིས་ལྡན་དུ་གྱུར་པ་ཡིན་པས་དེ་རྣམས་ལས་གྲུབ་ཐོབ་ཀྱི་བརྒྱུད་པ་བར་མ་ཆད་པར་བྱོན་པས་བྱིན་རླབས་ཀྱི་ཚན་ཀ་གཞན་ལས་འཕགས་པའི་སྒྲུབ་སྐོར་གྱི་རིམ་པ་འདི་ལ་ནང་གསེས་སུ། རོང་ཟོམ་གྱི་ལུགས་དང་། ཇོ་མོའི་ལུགས་ཀྱི་ཡིག་ཆ་གཉིས་སུ་བཞུགས་པས། དང་པོ་རོང་ཟོམ་གྱི་ལུགས་ཀྱི་ཡིག་ཆ་ལ།