ཕུར་པའི་སྨད་ལས་ཀྱི་རིམ་པ་རོང་ཟོམ་གྱིས་མཛད་པ།

ཕུར་པའི་སྨད་ལས་ཀྱི་རིམ་པ་རོང་ཟོམ་གྱིས་འདི་གཏེར་ཆེན་གསན་ཡིག་ཏུ་མེད་པ་འདྲ། མཆན། མཛད་པ་བཞུགས་སོ། །སྤྱིར་ཕུར་པ་བཏབ་པའི་དུས་ནི་ལས་ལ་སྦྱོར་ཀའི་ཞག་གྲངས་ཚང་བའི་བསྙེན་སྒྲུབ་ཀྱི་དུས་ཀྱི་ནུབ་ཐ་མ་ཚོགས་བསྟབ་པའི་དུས་སམ། ཡང་ན་གློ་བུར་གྱི་དགྲ་བགེགས་བསྟབ་པ་ཡིན་ཏེ། དེ་ལ་ནུབ་ཐ་མའི་ཚེ་ན་དང་པོར་སྒོམ་པ་དང་མཆོད་པ་དང་བཟླས་པ་རྣམས་རྫོགས་པར་བྱས་ལ། དེ་ནས་གདུག་པ་བསྒྲལ་བའི་ཕྲིན་ལས་བརྩམ་པའི་ཕྱིར། ཡང་དཀྱིལ་འཁོར་རྣམ་པ་གསུམ་བསྐྱེད་དེ། རྡོ་རྗེ་ཁྲོས་པ་ནས། བྱི་བའི་མགོ་ཅན་གྱིས་གཏམས་པའོ་ཞེས་པའི་བར་གྱི་དཀྱིལ་འཁོར་རྣམ་གཉིས་བསྐྱེད་པའི་རྗེས་ལ། དཀྱིལ་འཁོར་གྱི་དབུས་ཨེ་ཡི་གདན་ལ་གནས་པའི་སྒྲུབ་ཕུར་ཉི་ཤུ་རྩ་གཅིག་བླངས་ཏེ། ཕུན་སུམ་ཚོགས་པ་ནས་འབྱུང་བ་བཞིན་དུ་སྐུ་གསུམ་དུ་བྱིན་གྱིས་བརླབ་པ། སྐུ་གསུང་ཐུགས་ཀྱི་བདག་ཉིད་ཆེན་པོ་ཉིད་དུ་བྱིན་གྱིས་བརླབ་ཅིང་དབང་བསྐུར་བའི་བར་ཆོ་ག་བཞིན་བྱས་ལ། ཡུངས་ཀར་རྒྱལ་པོ་དང་གུ་གུལ་སྦྱར་མས་གཏོར་ཞིང་བདུག་སྟེ་ཨེའི་གདན་ལ་བཞག །དེ་ནས་བསྒྲུབ་བྱ་དགུག་པའི་ཕྱིར་ཐུགས་དམ་བསྐུལ་ཞིང་ཕོ་ཉ་བཏང་སྟེ། སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡ་ཡི་དངོས་གྲུབ་སྩོལ། །ཞེས་བརྗོད་ནས། དམ་ཚིག་ཆེན་པོའི་དུས་ལ་བབ། །ཅེས་བརྗོད་པའི་རྗེས་ལ། དཔལ་ལྡན་རྡོ་རྗེ་གཞོན་ནུ་ཉིད་ཀྱི་ཐུགས་དམ་བསྐུལ། དེ་བཞིན་དུ། སྤྲུལ་པ་ཆེན་པོའི་དུས་ལ་བབ། །ཅེས་བརྗོད་ནས་ཁྲོ་བོ་ཕ་བཅུ་མ་བཅུའི་ཐུགས་དམ་བསྐུལ། ཕྱག་བརྙན་ཆེན་པོའི་དུས་ལ་བབ། །ཅེས་ཁྲ་ཐབས་བསྐུལ། ཡང་ན་དེ་གཉིས་དུས་གཅིག་ཏུ་བསྐུལ། ཤྭ་ན་མུ་ཁའི་དུས་ལ་བབ། །ཅེས་ཕྱག་བརྙན་མ་ཟངས་ཀྱི་ཝ་མོ་དག་བསྐུལ། བདག་ཉིད་ཆེན་མོའི་དུས་ལ་བབ། །ཅེས་ཕུར་བུའི་སྲུང་མ་རྡོ་རྗེ་ཀུན་གྲགས་མ་བསྐུལ། ས་བདག་ཆེན་མོའི་དུས་ལ་བབ། །ཅེས་བསྭེའི་ལྷ་མོ་བསྐུལ། ཁྱེད་ཀྱི་ཕྲིན་ལས་དུས་ལ་བབ། །མཐུ་རྩལ་ཅེས་ཀུན་གྱི་མཇུག་ལ་གདགས། དེ་ནས་གཟུགས་ལ་དབབ་ཅིང་དགུག་པའི་ཕྱིར། ཚིག་དང་སྔགས་འདི་དག་བརྗོད་པར་བྱ་སྟེ། བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱ་བའི་གདུང་འཚོབ་པའི། །རིག་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་རྣམས། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་ཁུག་ལ། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིགས་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ༀ་ལཾ་ཧཱུྃ་ལཾ་སྟྭམྦྷ་ཡ་ནན། མོ་ཧ་ག་ཡ། བྷ་ག་བཱན། ཤཱི་ཀྲི་བི་ཀྲི་བཛྲ་ཧཱུྃ་ཀཱ་ར་ཧཱུྃ་ཧཱུྃ་ཕཊ྄་ཕཊ྄་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ སརྦ་བིགྷྣཱན་བཛྲ་ཀཱི་ལ་ཡ་ཧཱུྃ་ཧཱུྃ་ཕཊ྄་ཕཊ྄། བཛྲ་ཧཱུྃ་ཀཱ་ར་ཧཱུྃ་ཨ། ཞེས་བརྗོད་ཅིང་ཤར་སྒོའི་བྱབས་ཕུར་ཡང་སྒྲིལ། ལྕགས་ཀྱུའི་ཕྱག་རྒྱས་དགུག་པ་དང་། དབབ་པའི་ཕྱག་རྒྱས་གཟུགས་ལ་དབབ་པ་དང་། དེ་བཞིན་དུ་ཞུགས་པས་བཅིང་བ་དང་། ལྕགས་སྒྲོག་གིས་བསྡམས་པ་དང་། དྲིལ་བུའི་དབང་དུ་བྱ་བ་རྣམས་ཀྱང་བྱ། ལྷོའི་བསྡིགས་ཕུར་བླང་སྟེ། སྙིང་གར་སྒྲིལ་ལ་བསྡིག །དེ་ནས་ནུབ་ཀྱི་དབང་ཕུར་བླང་སྟེ། དེ་བཞིན་དུ་དབང་བསྡུས། དེ་ནས་བྱང་གི་སྒྲོལ་ཕུར་བླང་སྟེ་སྙིང་གར་བཏབ་པས་ཀུན་གཞི་གཏིང་ནས་བླངས་ནས་འཚོ་བའི་དབང་པོ་དང་ཕྲལ་ཏེ་ལུས་སོལ་དུམ་མམ་སྡོང་གོག་ལྟ་བུར་གྱུར་པར་བསམ་མོ། །འདི་ནི་མན་ངག་གི་སྤྱིར་བསྒྲལ་བ་ཡིན་ཏེ། འོག་ནས་བཏབ་པ་རྣམས་ཀྱང་མནན་པ་ཙམ་དུ་ཟད་དེ། སྒྲུབ་པའི་གྲོགས་མཆོག་ཏུ་ཡོད་པ་རྣམས་ཀྱིས་ནི། ཕུར་བསྐོར་བྱ་ཞིང་། དང་པོ་སྐྱེ་བའི་སྒོ་ལྔ་དགག་པར་བྱས་ཏེ་བསྒྲལ་བ་ནི། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་རྒྱོབ་ཅིག་རྣམ་པར་ཆིངས། །གཏོགས་ཤིག་གྲོགས་དང་བྲལ་བར་གྱིས། །རིངས་པར་ཁུག་ལ་སྨྲ་རུ་ཆུག །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་རྣམས་ཉན་པར་གྱིས། །ཧཱུྃ་པ་ར་བིད་དན་ཚིན྄་དྷ་ཚིན྄་དྷ་ཧཱུྃ་ཕཊ྄། བྷིན྄་དྷ་བྷིན྄་དྷ་ཧཱུྃ་ཕཊ྄། གྲྀཧྞ་གྲྀཧྞ་ཧཱུྃ་ཕཊ྄། ཧ་ན་ཧ་ན་ཧཱུྃ་ཕཊ྄། བན྄་དྷ་བན྄་དྷ་ཧཱུྃ་ཕཊ྄། ཏ་ཐཱ་ཡ་ཏ་ཐཱ་ཡ་ཧཱུྃ་ཕཊ྄། ཧ་ས་ཡ་ར་ན་ཧྲཱི་ཏ་ན་ཧཱུྃ་ཕཊ྄། ཤཱི་ཀྲིང་ཨ་ན་ཡ་ཧཱུྃ་ཕཊ྄། ཛྭ་ལ་པ་ཡ་ཛྭ་ལ་ཡ་ཧཱུྃ་ཕཊ྄། ཨ་བེ་ཤ་ཡ་ཨ་བེ་ཤ་ཡ་ཧཱུྃ་ཕཊ྄། བིན྄་ད་ཡ་བིན྄་ད་ཡ་ཧཱུྃ་ཕཊ྄། ཅེས་བརྗོད་ཅིང་ཕུར་པ་གཅིག་སྙིང་གར་བཏབ་སྟེ་དྲན་པ་སྐྱེ་བའི་སྒོ་བཀག །དེ་བཞིན་དུ་དཔྲལ་བར་བཏབ་སྟེ་སྐྱེ་བའི་སྒོ་བཀག །དེ་བཞིན་དུ་མགུལ་བ་དང་། ལྟེ་བ་དང་། གསང་གནས་སུ་བཏབ་སྟེ། ལུས་དང་ངག་དང་ཡིད་དང་སྲིད་པ་སྐྱེ་བའི་སྒོ་བཀག་པར་དམིགས་སོ། །དེ་ནས་ཕུར་པ་བརྒྱད་ཚན་གཅིག་བླངས་ཏེ་ཕུར་བསྐོར་བྱ་ཞིང་རྣམ་པར་ཤེས་པའི་ཚོགས་བརྒྱད་དག་པར་བྱས་ཏེ་བསྒྲལ་ལ་འདི་སྐད་དུ། བྲན་དང་དཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་ཆད་ཇི་བཞིན་དམ་བཅས་པ། །མངོན་སྤྱོད་ཕྲིན་ལས་མྱུར་དུ་མཛོད། །ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐ་མ་ཐ་བཛྲ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། ཀ་ཏང་ཀ་ཏེ། ཛ་ཡེ་བི་ཛ་ཡེ། ཨ་ཙི་ཏེ་ཨ་པ་ར་ཙི་ཏེ། མ་ར་སེ་ན་པྲ་མརྟ་ནི་ཧཱུྃ་ཕཊ྄། ཅེས་བརྗོད་ཅིང་། མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་གཞི་ལྟེ་བར་བཏབ། ཀུན་གཞི་སྙིང་གི་དཀྱིལ་དུ་བཏབ། ཉོན་མོངས་པའི་ཡིད་ཀྱི་སྙིང་རྩ་གཡོན་དུ་བཏབ། ཡིད་ཀྱི་རྣམ་ཤེས་སྙིང་རྩ་གཡས་སུ་བཏབ། དེ་ནས་ཕུར་པ་བཞི་ཚན་གཅིག་བླངས་ཏེ་ཕུར་བསྐོར་བྱ་ཞིང་། དབང་པོའི་རྟེན་མགོ་དག་པར་བྱ་སྟེ་བསྒྲལ་བའི་ཕྱིར། རྡོ་རྗེ་གསང་བའི་བཀའ་ལས་ནི། །སྡིག་ཆེན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལས་འདའ་མ་བྱེད། མ་མ་པཱ་ཤཾ་ཀུ་རུ་མ་ཏཾ་ཉ་ཀ་ར་ཨི་དན་དྷ་ཏི་མ་མ་ཀརྨ་ཤཱི་ཀྲང་ཀ་ར་ཡེ། ཞེས་བརྗོད་དེ་དཔྲལ་བ་ནས་ལྟག་པར་ཐལ་ཕྱུང་། དེ་བཞིན་དུ་ལྟག་པ་ནས་དཔྲལ་བར། རྣ་ལྟག་གཡས་ནས་གཡོན་དུ། གཡོན་ནས་གཡས་སུ་ཐལ་ཕྱུང་སྟེ་དབང་པོ་ཐམས་ཅད་ཀྱི་རྟེན་མེད་པར་བྱའོ། །དེ་ནས་ཕུར་པ་གསུམ་བླངས་ཏེ་མཐུ་དང་རྫུ་འཕྲུལ་འཕྲོག་ཕྱིར་དུ། གདུག་ཅིང་སྡང་སེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང་། །ང་ལ་བར་ཆོད་བྱེད་པ་རྣམས། །མཐུ་དང་རྫུ་འཕྲུལ་མེད་པར་བྱོས། སརྦ་ཨ་ན་ཡ་ཧཱུྃ་ཕཊ྄། ཅེས་བརྗོད་དེ། སྤྱི་བོ་ནས་གསང་བར་ཐལ་ཕྱུང་། རྐང་མཐིལ་གཉིས་ནས་སྤྱི་བོར་ཐལ་ཕྱུང་སྟེ་ནུས་པ་ཅུང་ཟད་ཀྱང་མེད་པར་བྱས་སོ། །དེ་ནས་ལྷག་མ་མ་ལུས་པར་གཏུན་དུ་བརྡུངས་ཏེ། ཕུར་པ་གཅིག་བླངས་ཏེ་ཁྲོ་བོ་རྣམས་ཀྱི་ཐོ་བར་དམིགས་ལ། ཨེ་ཉིད་ཁྲོ་མོ་རྣམས་ཀྱི་མཁའ་དབྱིངས་སུ་དམིགས་ནས་ལྷག་མ་མ་ལུས་པར་བརྡུང་བར་དམིགས་ཤིང་། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེགས་ནས། །ལུས་ངག་རྡུལ་ཕྲན་བཞིན་དུ་བརྡུང་། །ཁྲོ་མོ་འབར་བའི་གཏུན་ཁུང་དུ། །རྡོ་རྗེའི་ཐོ་བས་བརྡུང་བྱས་ནས། །ལྷ་ཡང་རུང་སྟེ་བསྒྲལ་བར་བྱ། །ཁ་ཐཾ་ཁ་ཐཾ་ཁ་ཐཾ་ཧཱུྃ་ཧཱུྃ་ཧཱུྃ་ཕཊ྄་ཕཊ྄་ཕཊ྄། ཅེས་བརྗོད་དེ་གཅིག་བཏབ་ལ། ཡང་ནས་ཡང་དུ་བཏབ་ཀྱང་རུང་སྟེ། ཁ་ཐཾ་གྱི་ཕྱག་རྒྱས་ཀྱང་མནན་ནོ། །དེ་ནས་རྡོ་རྗེ་གནོད་སྦྱིན་གྱིས་བཟའ་བར་བྱ་སྟེ། དེའི་སྟེང་དུ་མཆེ་བའི་ཕྱག་རྒྱ་བཅས་ལ། བཛྲ་ཡཀྵ་ཀྲོ་དྷ་ཁཱ་ཧི་ཁཱ་ཧི། ཧ་ཧ་ཧ་ཧཱུྃ་ཧཱུྃ་ཧཱུྃ་ཕཊ྄་ཕཊ྄་ཕཊ྄། ཅེས་བརྗོད་དེ། བདག་རྡོ་རྗེ་གཞོན་ནུ་རྡོ་རྗེ་གནོད་སྦྱིན་དུ་སྣང་བ་འཁོར་དང་བཅས་པས་ཕུང་པོ་ཤ་ཁྲག་མ་ལུས་པར་གསོལ་བར་བསམ་མོ། །དེ་ནས་ཆོས་ཉིད་ཀྱི་བདེན་པའོ། །གསང་སྔགས་ཀྱི་བྱིན་གྱིས་བརླབས་སོ། །སངས་རྒྱས་ཀྱི་མཐུའོ། །ཨ་བི་ཙརྱའི་དུས་ལ་བབ་པའོ། །བརྣག་པ་དེ་ཁོ་ན་ལའོ། །ཞེས་བརྗོད་པས། བདེན་པའི་བྱིན་རླབས་འདི་དག་གི་བཀའ་མི་འགྱུར་བར་དམིགས་ལ། བར་འདིར་ཕུན་སུམ་ཚོགས་པ་ནས་འབྱུང་བའི་གཟིར་མནན་དག་ཀྱང་བྱས་ན་བཟང་སྟེ། དེ་ནས་དེ་ཉིད་དུ་མནན་པ་བྱས་ལ་བཞག་གོ། །དེ་ནས་གཏོར་མ་བཏང་། དཀྱིལ་འཁོར་བསྡུས་ལ་ནར་མའམ། གློ་བུར་བ་ལ་བསྟབ་པ་བྱ། ཧོམ་གྱི་སྐབས་སུ་བསྟབ་ལ་སྲེག་ལས་མ་གྲུབ་ཀྱི་བར་དུ་གསོ་བར་མི་བྱའོ། །ཕུར་བུ་གསོ་བའི་དུས་ནི་ཕྲིན་ལས་ཤིན་ཏུ་ནར་མ་དག་རྩོམ་པའི་དུས་སུ་ནམ་ལས་གྲུབ་པ་དང་དེ་ནས་གདོད་གསོ་བར་བྱའོ། །ལས་མ་གྲུབ་པར་གསོ་བ་སྔས་ན་ལས་མྱུར་དུ་མི་གྲུབ་པའི་རྒྱུ་ཡིན་ནོ། །ཞེས་བླ་མའི་མན་ངག་གོ། །ཡི་དམ་ནར་མ་བྱེད་པའི་དུས་སུ་བསྒྲུབ་བྱ་གུད་པ་མེད་ན་ཕུར་བུ་བཏབ་པའི་རྗེས་ཉིད་ལ་གསོ་བར་བྱའོ། །ཕུར་བུ་གསོ་བའི་ཡུལ་ནི་གསུམ་སྟེ། གཟས་པ་པོ་གསོ་བ་དང་། བདག་གསོ་བ་དང་། ཕུར་པ་གསོ་བའོ། །གསོ་བའི་དགོས་ཆེད་ཀྱང་གསུམ་སྟེ། གཟས་པ་པོ་གསོ་བ་ནི། སྙིང་རྗེ་བྱང་ཆུབ་སེམས་དང་འབྲལ་དུ་མི་རུང་བས། དྲག་པོའི་ལས་ཀྱི་བསྒྲལ་བའི་བསྒྲུབ་བྱ་རྣམས་ལ་ཕན་གདགས་ཤིང་སྐྱབས་པའི་ཕྱིར་རོ། །ཕུར་པ་གསོ་བ་ནི། ཕྱག་རྒྱའི་ལྷ་རྣམས་མནན་གཟིར་གྱི་ལས་ཀྱིས་དམེ་བའི་ལས་ལ་སྦྱར་བས། བསོད་ནམས་ཀྱི་དོན་དུ་མི་རུང་བས་བཟོད་པར་གསོལ་བའོ། །བདག་གསོ་བ་ནི། དྲག་པོའི་ལས་ཀྱི་རྣམ་པར་སྨིན་པས་བདག་གི་རྒྱུད་ལ་མི་གོས་པའི་ཕྱིར་རོ། །གསོ་བའི་ཐབས་ཀྱང་གསུམ་སྟེ། ལས་དང་བྱ་བས་གསོ་བ་དང་། །ཏིང་ངེ་འཛིན་གྱིས་གསོ་བ་དང་། །མན་ངག་གིས་གསོ་བའོ། །དེ་ལ་ལས་དང་བྱ་བས་གསོ་བ་ནི། ཀཱི་ལ་ཡ་བཅུ་གཉིས་ཀྱི་ཏནྟྲ་ལས་འབྱུང་བའི་ཆོ་ག་ཞིབ་མོ་ལྟ་བུ་ཡིན་ཏེ། དེ་ལྟར་ལས་གྲུབ་པ་དང་ཕུར་པ་བཏབ་པ་རྣམས་སླར་བཏོན་ཏེ། རིགས་ཀྱི་ཡུམ་རྣམས་དང་། འཕགས་པ་ཐབས་སྦྱོར་གྱི་སྔགས་ཀྱིས་བྱིན་གྱིས་བརླབས་པའི་བུམ་པས་ཕུར་བུ་རྣམས་ལ་ཡང་སྐུ་ཁྲུས་གསོལ། མཆོད་པ་དང་བཤགས་པ་དང་བཟོ་གསོལ་བྱ། བསྒྲུབ་བྱའི་གཟུགས་བརྙན་ལ་ཁྲུས་བྱ་སྟེ། བགེགས་ཡིན་ན་དམ་བསྒྲགས་ལ་དེ་ཚུན་ཆད་ཞི་བའི་བཀའ་བསྒོ་བྱའོ། །ཕྱོགས་སྐྱོང་ལ་སོགས་པ་བགེགས་ཆེན་པོ་ཡིན་ན་ཕུར་བུ་དང་འདྲ་བར་བཟོད་པར་གསོལ་བའི་ཆོ་ག་བྱ། དགྲ་ལ་ངན་སོང་སྦྱོང་བའི་སྙིང་པོ་ལྟ་བུས་དེའི་ལས་ཀྱི་སྒྲིབ་པ་རྣམ་པར་སྦྱོང་བའི་ཁྲུས་དང་བཟླས་བརྗོད་དང་། སྦྱིན་སྲེག་དག་གིས་དེ་ལ་ཕན་གདགས་པའི་སྦྱོར་བ་དག་བྱ། བདག་ཉིད་ཀྱང་དྲག་པོའི་ལས་ཀྱི་ཉེས་པས་མི་གོས་པར་བྱ་བའི་ཕྱིར་རྣམ་པར་མི་རྟོག་པ་སྒོམ་པ་དང་། སྲོག་འདོན་བྱ་བ་དང་། གླེགས་བམ་ཀློག་པ་དང་། མཆོད་རྟེན་བཏབ་པ་ལ་སོགས་བྱའོ། །ཏིང་ངེ་འཛིན་གྱི་གསོ་བ་ནི། ཕྲིན་ལས་རྡོ་རྗེ་གཞོན་ནུ་ཉིད་ནས་འབྱུང་བ་ལྟ་བུ་ཡིན་ཏེ། དང་པོ་བསྒྲུབ་བྱའི་སྙིང་གར་ཕུར་པ་སྒྲིལ་ཏེ། ཀཱི་ལི་ཀཱི་ལ་ཡ་ཞེས་ལན་བཅོ་བརྒྱད་བཟླས་པས། ཕུར་བུའི་ཡེ་ཤེས་ཀྱི་འོད་ཟེར་གྱིས་བསྒྲུབ་བྱའི་ལས་དང་ཉོན་མོངས་པའི་དྲི་མ་ཐམས་ཅད་དག་ནས། སེམས་དྲི་མ་མེད་པའི་འོད་ཀྱི་ཚུལ་དུ་ཕུར་པ་ལ་འདུས་པས་གཟས་པ་པོ་ཁམས་གསུམ་དུ་གཏན་མི་འཁོར་བར་བསྒོམ། དེ་ནས་ཕུར་པ་ནམ་མཁའ་ལ་བསྐོར་ཏེ། ཀཱི་ལི་ཀཱི་ལ་ཞེས་ལན་ཉི་ཤུ་རྩ་གཅིག་བཟླས་པས་ཕུར་པའི་གཟི་བྱིན་བསྐྱེད་དེ་ཁམས་གསུམ་གང་བར་དམིགས་ནས། ཡེ་ཤེས་ཀྱི་འོད་འབར་བར་བསྒོམས་པས་ཕྱག་རྒྱའི་ལྷ་རྣམས་ལ་ཉེས་པས་མ་གོས་པས་གཟི་བྱིན་ཆེན་པོ་དང་ལྡན་པར་བསྒོམ་མོ། །དེ་ནས་ཕུར་པ་བདག་གི་ཐུགས་ཀར་བཟུང་ལ་ཀཱི་ལི་ཀཱི་ལ་ཡ་ཞེས་བརྒྱ་རྩ་བརྒྱད་བཟླས་པས་ཕུར་པ་ཡེ་ཤེས་ཀྱི་འོད་ཟེར་དུ་གྱུར་ཏེ་བདག་གི་ཐུགས་ཀར་ཐིམ་པས། བདག་གི་ལུས་ངག་ཡིད་གསུམ་གྱིས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །མན་ངག་གིས་གསོ་བ་ནི། བྱི་ཏོ་ལས་གསུངས་པ་ལྟ་བུ་ཡིན་ཏེ། དང་པོ་ཕུར་བུ་བཏབ་ཅིང་གཏུན་གྱིས་བརྡུངས་པའི་ཤ་ཁྲག་ཁམས་གསུམ་གང་བར་དམིགས། དེའི་སྟེང་དུ་ཡི་གེ་ཧཱུྃ་ནམ་མཁའ་གང་བར་བཀོད་ནས་ཕཊ་ཅེས་དྲག་ཏུ་བརྗོད་པས། ལས་དང་ཉོན་མོངས་པའི་ཤ་ཁྲག་དེ་དག་ཧཱུྃ་གིས་བསྡུས་ཤིང་ཕཊ་ཀྱིས་གཏོར་བས་སྒྲིབ་པའི་དྲི་མ་ཡོངས་སུ་དག་སྟེ་གཟས་པོའི་བྱང་ཆུབ་སེམས་ཀྱི་རང་བཞིན་འོད་ལྗང་གུ་ཚོན་གང་བས་ནམ་མཁའི་ཁམས་གང་བར་བསྒོམ་མོ། །དེ་གསལ་བར་གྱུར་པ་དང་། དེའི་དཀྱིལ་དུ་ཕུར་པའི་བྱང་ཆུབ་སེམས་ཀྱི་རང་བཞིན་འོད་ལེ་བརྒན་ཚོན་གང་བ་གཅིག་དམིགས་ལ། འོད་ལྗང་གུ་དེ་དག་ལེ་བརྒན་ལ་ཐིམ་པར་བསྒོམ། འོད་ལེ་བརྒན་དེས་ཀྱང་ནམ་མཁའི་ཁམས་གང་བར་བསྒོམ། དེ་གསལ་བར་གྱུར་པ་དང་། དེའི་དཀྱིལ་དུ་བདག་གི་བྱང་ཆུབ་སེམས་ཀྱི་རང་བཞིན་འོད་མཐིང་ག་ཚོན་གང་བ་གཅིག་བསྒོམ་སྟེ། དེ་དག་ལ་འདུས་ནས་འོད་དེས་ཀྱང་ནམ་མཁའི་ཁམས་གང་བར་བསྒོམ་མོ། །དེ་ལྟར་བྱང་ཆུབ་ཀྱི་སེམས་རྣམ་པ་གསུམ་དབྱེར་མེད་པའི་རྟགས་སུ་འོད་རྣམ་པ་གསུམ་དབྱེར་མེད་པས། དེ་ཡང་འོད་ཀྱི་ཐིག་ལེ་གཅིག་ཏུ་འདུས་ཏེ། དེ་ཡང་མི་དམིགས་པར་གྱུར་ནས་བྱང་ཆུབ་ཀྱི་སེམས་བདེ་བ་ཆེན་པོ་ལ་རང་བཞིན་གྱིས་གནས་པར་བསྒོམ། འདི་དག་ནི་གསོ་བའི་ཆོ་གའོ།། །།