དཔལ་རྡོ་རྗེ་ཕུར་པའི་སྤྱི་ཐབས་བསྡུས་པའི་མན་ངག་དོན་གྱི་སྒྲ་བཞིའི་བཤད་པ།

དཔལ་རྡོ་རྗེ་ཕུར་པའི་སྤྱི་ཐབས་བསྡུས་པའི་མན་ངག་དོན་གྱི་སྒྲ་བཞིའི་བཤད་པ་བཞུགས་སོ། །རྒྱ་གཞུང་ཡིན་ནོ། །ཕུར་བུ་དོན་གྱི་སྤྱི་ཐབས་བསྡུས་པའི་མན་ངག །བཅོམ་ལྡན་འདས་ཤྲཱི་ཧེ་རུ་ཀ་བཛྲ་ཀཱི་ལ་ཡ་བིདྱོཏྟ་མ་ལར་ཕྱག་འཚལ་ལོ། །ཡེ་ཤེས་དབྱིངས་དང་གཉིས་མེད་བྱིན་རླབས་ཀྱིས། །ཕུང་པོ་ཉོན་མོངས་འཆི་བདག་རིག་པ་ཡེ་ཤེས་ཀྱི་ཕུར་པའི་ཡོན་ཏན། ལྷ་བདུད་བཅོམ། །དེ་བཞིན་སྙིང་རྗེ་དགའ་དང་བཏང་སྙོམས་ཀྱི། །ཚད་མེད་སྙིང་རྗེའི་ཕུར་པའི་ཡོན་ཏན། གཙོར་བཟུང་བའི་གཉིས་མེད་འཕྲོ་འདུས་དེ་བཞིན་ནོ། །བྱང་ཆུབ་སེམས་ཀྱི་ཕུར་པ། ཞི་རྒྱས་དབང་དང་དྲག་པོའི་ཀྱང་དེ་བཞིན། །མཚན་མ་རྫས་ཀྱི་ཕུར་པ། ཕུར་བུ་དང་པོ་གཉིས་གསུམ་བཞི་པས་བཅོམ། །དང་པོ་དབྱིངས་དང་ཡེ་ཤེས་གཉིས་མེད་ལྡན། །གཉིས་པ་ཤེས་རབ་སྙིང་རྗེ་ཐབས་དང་ལྡན། །གསུམ་པ་ཐབས་དང་ཤེས་རབ་གཉིས་མེད་ལྡན། །བཞི་པ་བདག་ཉིད་ཁྲོ་བོ་ཕུར་པར་ལྡན། །རྩ་བ་དང་དབང་ཕྱུག་དང་རྫས་ཏེ། ཡང་ན་རེ་རེ་ལ་ཡང་ཡོན་ཏན་དྲུག་ལྡན་ནོ། །དཔལ་དང་གྲགས་དང་སོགས། དབྱིངས་དང་ཡེ་ཤེས་རྟག་ཆད་མཐའ་ལས་འདས། །ལས་དང་ཉོན་མོངས་མཐའ་ལས་སྙིང་རྗེ་འདས། །འཁོར་བ་སྡུག་བསྔལ་མཐའ་ལས་བདེ་ཆེན་འདས། །བར་ཆད་དགྲ་བགེགས་མཐའ་ལས་རྫས་ཕུར་འདས། །ཤྲཱི་ནི་དབྱིངས་དང་ཡེ་ཤེས་གཉིས་མེད་དཔལ། །ཀ་རུ་སྙིང་རྗེ་ཕུར་པའི་བདག་ཉིད་དེ། །རུ་ནི་རཱ་ག་ཆགས་པའི་བྱང་ཆུབ་སེམས། །ཧེ་རུ་རྫས་ཀྱི་ཕུར་བུ་རྒྱུད་དང་བྲལ། །བཛྲ་རིག་པ་རྡོ་རྗེ་འདུ་འབྲལ་མེད། །ཀཱི་ནི་ཀ་རུ་ཐུགས་རྗེས་འགྲོ་བ་འཛིན། །ལཀྵ་བྱང་ཆུབ་བདེ་བའི་རང་བཞིན་ལས། །ཡ་མ་གཤིན་རྗེ་ལ་སོགས་འདུལ་དབང་ངོ་། །བིད་ནི་རིག་པའི་ཕུར་པས་མཐའ་གཉིས་འཇོམས། །སྙིང་རྗེ་རྟོད་དེ་ལས་དང་ཉོན་མོངས་སྒྲོལ། །ཏ་ནི་ཙིཏྟ་ས་སྡུག་བསྔལ་ཕུང་པོ་འཇོམས། །མ་ཧཱ་སྤྲུལ་པ་ཆེན་པོས་གདུལ་བྱ་འདུལ། །མ་ནི་དབྱེར་མེད་སྤྲོས་བྲལ་ཐིག་ལེ་གཅིག་ཏུ་འུབ། །དེ་ཕྱིར་སྤྱི་ཐབས་རྣམ་པ་བཞིར་བསྡུས་པ། །མི་ཕྱེད་དད་པ་བློ་ལྡན་ཚོགས་སྲིད་འདུད། །རྫོད་བྱེད་སྟོན་དང་རྣལ་འབྱོར་འཁོར་དང་བཅས། །བརྗོད་བྱ་ཕུར་བུ་བཞི་དོན་བསྡུས་རྒྱས་ཡིན། །སྒྲ་དང་དོན་སྤྱི་འབྲེལ་བ་བརྗོད་པའོ། །དང་པོ་ལྟ་བའི་གཞུང་དང་རང་བཞིན་འབྲེལ། །གཉིས་པ་སྙིང་རྗེའི་ཚོགས་དང་འགྲོ་བ་འབྲེལ། །གསུམ་པ་ཐབས་དང་ཤེས་རབ་དགོངས་པར་འབྲེལ། །བཞི་པ་ལས་དང་ཐུགས་རྗེས་གདུལ་བྱ་འབྲེལ། །མཐའ་གཉིས་འཇོམས་དང་འཁོར་བ་མི་གཏོང་དང་། །སྡུག་བསྔལ་སེལ་དང་གདུལ་བྱ་འདུལ་བ་སྟེ། །གོ་རིམ་བཞིན་དུ་སྒྲ་བཞི་ཤེས་པའི། དགོས་པ་བསྟན་པ་ཡིན། །ཆོས་སྐུ་ལོངས་སྐུ། བདེ་བ་ཆེན་པོ། བསོད་ནམས་སྤྲུལ་པའི་སྐུ། །ཡང་སྒོས་ཡིན་ཏེ་དགོས་འབྲེལ་སྤྱི་དོན་བཤད། །ཆུ་དང་འོ་མ་ངང་པའི་མཆུས་འབྱེད་ལྟར། །ཤེས་རབ་སྟོབས་ཀྱིས་བཀའ་བརྒྱུད་མཐའ་དག་ལ། །སྒྲ་གཅིག་དོན་མང་ལ་སོགས་བྱེ་བྲག་རྣམས། །མཁས་པ་དགའ་བ་བསྐྱེད་ཕྱིར་བརྩམ་པར་བྱེད། །རྒྱུད་ལུང་མན་ངག་ཀུན་དང་མི་འགལ་ཞིང་། །བཀའ་ལ་སྣང་ཞིང་འཐད་པའི་གཏན་ཚིགས་འདི། །རྣལ་འབྱོར་ཀུན་གྱིས་ཉམས་སུ་བླང་བར་རིགས། ༈ །གླེང་གཞི་དང་ནི་མཚན་ཉིད་རབ་དབྱེ་དང་། །རང་ངོ་བཏབ་ཡུལ་དང་ནི་དགོས་ཆེད་དང་། །བཏབ་ཐབས་ཐེབས་པའི་རྟགས་དང་མ་ཐེབས་སྐྱོན། །ཐབས་ཀྱི་གྲོགས་དང་གནས་དང་དུས་དག་དང་། །རྒྱུ་དང་འབྲས་བུ་ལས་དང་དཀྱིལ་འཁོར་དང་། །དགུག་དང་གཞུག་དང་བཅིང་དང་དབང་བྱ་དང་། །མནན་དང་བཟློག་དང་བསྙེན་དང་སྒྲུབ་པ་དང་། །སྡུད་དང་སྤར་དང་བསྲེག་དང་བསྟབ་པ་དང་། །དཔྲལ་དང་བདུག་དང་གཏོར་མ་དུག་རྫས་དང་། །མཇུག་བསྡུ་བ་སྟེ་བསྡུས་དོན་སུམ་ཅུ་གསུམ། །སྔོན་བྱུང་འདས་པའི་དུས་ན་སངས་རྒྱས་རྣམས། །གདུལ་བྱ་རྣམས་ལ་ཕན་པར་དགོངས་པ་ན། །དང་པོ་ཡེ་ཤེས་ཆེ་ལ་སྙོམས་ཞུགས་ཏེ། །གཉིས་པ་སྙིང་རྗེས་ཀུན་ལ་ཁྱབ་མཛད་ཅིང་། །གསུམ་པ་ཤེས་རབ་ཐབས་ཀྱི་སྦྱོར་བ་མཛད། །བཞི་པ་དཀྱིལ་འཁོར་གསུམ་དུ་རྣམ་སྤྲུལ་ནས། །གདུལ་བྱའི་དབང་དུ་འགྲོ་དོན་རྫོགས་པར་མཛད། །རྒྱུད་ཀུན་ལས་སྣང་སྔོན་གྱི་གླེང་གཞི་ཡིན། །དང་པོའི་མཚན་རིག་པ་ཡེ་ཤེས་ཀྱི་ཕུར་པ། ཉིད་སྟོང་ཞིང་བདག་མེད་པ། །གཉིས་པ་སྙིང་རྗེས་ཚད་མེད་སྙིང་རྗེའི་ཕུར་པ། གདུང་ཞིང་ཕན་འདོགས་པ། །གསུམ་པ་ཆོས་བྱང་ཆུབ་སེམས་ཀྱི་ཕུར་པ། ཀུན་བདེ་བའི་ངང་དུ་གསལ། །བཞི་པ་ལས་མཚན་མ་རྫས་ཀྱི་ཕུར་པ། བཞིས་དོན་སྒྲུབ་མཚན་ཉིད་ཡིན། །རབ་དབྱེ་ཡེ་ཤེས་སྤྲོས་མེད་སྤྲོས་བཅས་གཉིས། །སྤྲོས་མེད་བརྗོད་བྲལ་ཡེ་ནས་གཉིས་སུ་མེད། །ཡེ་ཤེས་ཆེན་པོ་ཀུན་གྱི་ངོ་བོར་གནས། །སྤྲོས་བཅས་ཡེ་ཤེས་ཆེན་པོས་ཀུན་ཁྱབ་དང་། །མ་འགགས་སྣང་བའི་རང་བྱུང་ཡེ་ཤེས་དང་། །དོན་གཅོད་རིག་པའི་ཡེ་ཤེས་གསུམ་དུ་གསུངས། །དེ་ལས་སྤྲོས་པ་ཡེ་ཤེས་བསམ་ཡས་སོ། །སྙིང་རྗེ་སྙིང་རྗེ་ཆེ་དང་མཆོག་དང་གསུམ། །སྙིང་རྗེ་ངན་འགྲོ་སྡུག་བསྔལ་ཅན་ལའོ། །ཆེན་པོ་ཁམས་གསུམ་མཐའ་དག་ཀུན་ལ་འབྱུང་། །མཆོག་ནི་ཉན་ཐོས་ལ་སོགས་འཕགས་ལའོ། །ལྷག་པའི་སེམས་ལ་རྣམ་པ་གསུམ་ཡོད་དེ། །བདེ་བའི་སེམས་དང་བདེ་ཆེན་བདེ་མཆོག་གོ། །ཐ་མ་འབྲིང་དང་རབ་ཏུ་བསྟན་པ་ཡིན། །རྫས་ཀྱི་ཕུར་པ་བསྡུ་ན་རྣམ་པ་བཞི། །ཞི་རྒྱས་དབང་དྲག་སོ་སོའི་མཚན་ཉིད་ཡིན། །གདུལ་བྱ་ཐབས་སུ་བསྟན་པ་བསམ་མི་ཁྱབ། །དོན་བཞི་རང་གི་ངོ་བོར་གསུངས་པ་ནི། །བྱང་ཆུབ་སེམས་ཉིད་ཀུན་གྱི་ངོ་བོ་སྟེ། །དང་པོ་དོན་དམ་གསུམ་ནི་ཀུན་རྫོབ་ཡིན། །སེམས་ཀྱི་རང་བཞིན་སེམས་ཀྱི་རྣམ་པའོ། །ཡུལ་ནི་དབྱིངས་དང་འགྲོ་བ་མཁའ་དང་ནི། །གདུལ་བྱ་གང་ཡིན་དེ་དག་གོ་རིམ་བཞིན། །མཐའ་གཉིས་འཇོམས་དང་ལས་དང་ཉོན་མོངས་སེལ། །སྡུག་བསྔལ་སྟོང་དང་འགྲོ་བའི་དོན་འགྲུབ་པ། །ཕུར་བུ་བཞི་བཏབ་དགོས་ཆེད་ཡིན་ཞེས་གསུངས། །ཐབས་ནི་ལུས་དང་མན་ངག་མཐར་ཕྱིན་དང་། །དོན་དམ་རྟོགས་དང་ཚད་མེད་གྲོགས་ཚང་དང་། །ཤེས་རབ་ཐབས་ཀྱི་ཡན་ལག་ཚང་བ་དང་། །གདུལ་བྱའི་བསམ་པའི་དགོངས་པ་རྫོགས་པ་དང་། །འདི་ནི་ཕུར་བུ་བཏབ་པའི་ཐབས་བཞི་ཡིན། །ཅི་ལའང་མ་ཆགས་མི་གཡོ་གཉིས་འཛིན་བྲལ། །སྙིང་རྗེས་སེམས་ཅན་དོན་ལ་སྐྱོ་བ་མེད། །ཆོ་འཕྲུལ་ཐབས་ཀྱིས་ཕྱག་རྒྱའི་འཕྲོ་འདུ་གསལ། །རྟགས་དང་མཚན་མ་དུས་སུ་ཕྱིན་པ་ནི། །ཕུར་བུ་ཐེབས་པའི་རྟགས་བཞི་གོ་རིམ་བཞིན། །ཡོད་མེད་ལ་སོགས་མཐའ་ལས་འཆལ་བ་དང་། །ཐབས་མེད་ཤེས་རབ་བྲལ་ཞིང་རྨོངས་པ་དང་། །དངོས་རྟོག་སྤྱོད་པ་བརླང་པོར་སྤྱོད་པ་དང་། །རྫས་ལ་འཆའ་ཞིང་དོན་ལ་ཉམས་པ་ནི། །མུ་སྟེགས་ཉན་ཐོས་མངལ་གྱི་སྲིན་བུ་དང་། །ལས་ཀྱི་སྲིན་པོར་སྐྱེས་ཏེ་གོ་རིམ་བཞིན། །དེ་ལས་ལྡོག་པ་ཡོན་ཏན་ཡིན་པར་གསུངས། །དེ་ཡི་གྲོགས་ནི་དད་དང་དམ་ཚིག་དང་། །སྤྱོད་དང་ཏིང་ངེ་དང་བྱིན་རླབས་ལྔའོ། །སེམས་ཀྱིས་མཉམ་པའི་དོན་གཉིས་འདོད་པ་དང་། །སྙིང་རྗེས་འགྲོ་བའི་དོན་ལ་དང་བ་དང་། །སྦྱོར་བའི་སྙོམས་འཇུག་དོན་ལ་མོས་པ་དང་། །མཐུ་ཡིས་གདུལ་བྱའི་དོན་དུ་ཡིད་ཆེས་པ། །རྣལ་འབྱོར་དད་པ་རྣམ་བཞི་གོ་རིམ་བཞིན། །ལྟ་བས་གཉིས་མེད་དོན་ལས་མི་འདའ་ཞིང་། །སྤྱོད་པས་འགྲོ་བའི་དོན་ལ་སྐྱོ་བ་མེད། །དགོངས་པས་བདེ་ཆེན་དོན་ལ་འདུ་འབྲལ་མེད། །ཐབས་ཀྱིས་གདུལ་བྱའི་དོན་ལ་ལེ་ལོ་མེད། །ལྟ་སྤྱོད་མི་སྤང་དང་བླང་དམ་ཚིག་བཞི། །མི་འདའ་དམ་ཚིག་རྣམ་བཞི་གོ་རིམ་བཞིན། །རྣམ་པ་གཅིག་ཏུ་ཇི་ལྟར་གྲགས་པ་ཡི། །གསང་བའི་དམ་ཚིག་རྣམས་ནི་ཅི་རིགས་བསྲུང་། །བླང་དོར་མེད་པ་མཉམ་ཉིད་སྤྱོད་པ་དང་། །བྱམས་སྡང་མེད་པ་སྙིང་རྗེའི་སྤྱོད་པ་དང་། །འདུ་འབྲལ་མེད་པ་གཡེང་བྲལ་སྤྱོད་པ་དང་། །ཅི་འདུལ་ཐབས་དང་མཚན་མའི་སྤྱོད་པ་སྟེ། །རྣལ་འབྱོར་དང་བླང་སྤྱོད་བཞི་གོ་རིམ་བཞིན། །མཉམ་པ་ཆེན་པོ་སྟོང་པའི་ཏིང་འཛིན་དང་། །སྙིང་རྗེ་འགྲོ་བའི་དོན་ལ་རྩེ་གཅིག་དང་། །བདེ་བ་ཆེན་པོའི་ངང་ལ་སྙོམས་འཇུག་དང་། །ཐབས་ཀྱི་ཏིང་འཛིན་ཆོ་འཕྲུལ་སྣ་ཚོགས་སྟོན། །དེ་བཞིན་ཉིད་དང་ཀུན་སྣང་བདེ་རྒྱུ་རིམ་པ་བཞིན། །ལྟ་བས་ཆོས་ཀྱི་སྐུ་རུ་བྱིན་བརླབས་དང་། །སྙིང་རྗེས་འགྲོ་ལ་ཕན་པར་བྱིན་བརླབས་དང་། །བྱང་ཆུབ་སེམས་ཀྱིས་གཟི་བྱིན་བསྐྱེད་པ་དང་། །ཐབས་ཀྱིས་མཐུ་དཔུང་ཆེ་བར་བྱིན་བརླབས་པ། །རྣམ་པ་བཞི་པོ་གོ་རིམ་བཞིན་དུ་སྦྱར། །སངས་རྒྱས་རྣམས་ཀྱི་ཐུགས་དང་ཆོས་ཀྱི་དབྱིངས། །རང་གི་ཡིད་དང་དོན་དམ་བྱང་ཆུབ་དང་། །བདེ་ཆེན་སྐུ་ཡི་ཕོ་བྲང་ཏིང་འཛིན་དང་། །ཕྱི་ནང་གསང་བའི་གནས་ཏེ་རྣམ་བཞི་ནི། །རྣམ་བཞི་སྒྲུབ་པའི་གནས་སུ་རྒྱལ་བས་གསུངས། །ལུང་དང་མན་ངག་ཚད་དུ་ཕྱིན་པ་དང་། །དོན་དམ་བྱང་ཆུབ་སེམས་ལ་ཡིད་ཆེས་དང་། །ཤེས་རབ་ཐབས་ཀྱི་ཏིང་འཛིན་གསལ་བ་དང་། །གདུལ་བྱ་གང་གི་དུས་ལ་བབ་པ་ཡི། །ཕྱི་ནང་དུས་སུ་བསྟན་པ་རྣམ་བཞི་ནི། །ཕུར་བུ་བཞི་ཡི་དུས་ཚོད་གོ་རིམ་བཞིན། །རྒྱུ་རྐྱེན་མེད་པར་རང་སེམས་གནས་འགྱུར་དང་། །རང་གི་སེམས་དང་འགྲོ་བའི་སྡུག་བསྔལ་དང་། །ཐབས་དང་ཤེས་རབ་དགོངས་པ་མཐུན་པ་དང་། །རིན་ཆེན་སྲོག་རྩ་ཕུར་བ་རྫས་ཀྱི་རྒྱུ། །གསང་དང་ཡེ་ཤེས་ས་བོན་ཁྲོ་བོའི་རྒྱུ། །རྒྱུ་བཞི་གོ་རིམ་བཞིན་དུ་བསྟན་པའོ། །རྣམ་སྨིན་འབྲས་བུ་ཆོས་སྐུར་འགྲུབ་པ་དང་། །རྒྱུ་མཐུན་སྙིང་རྗེ་འགྲོ་ལ་འཚམས་པར་སྐྱེ། །སྐྱེས་བུ་བྱེད་པ་དེ་ལ་ཉམས་མྱོང་བྱེད། །འདུལ་བྱེད་དབང་གིས་གདུལ་བྱ་འཚམས་པར་སྦྱོར། །དྲི་མེད་འབྲས་བུ་ཀུན་ལ་ཁྱབ་པར་གནས། །འབྲས་བཞི་དོན་བཞི་འཚམས་པར་མཁས་པས་བཤད། །ཡེ་ཤེས་ཕྲིན་ལས་མཐའ་གཉིས་འཇོམས་ཤིང་སྲེག །ཐུགས་རྗེའི་ཕྲིན་ལས་འགྲོ་བ་གནས་སུ་སྟོབ། །བྱང་ཆུབ་ཕྲིན་ལས་སྡུག་བསྔལ་ཕུང་པོ་སྲེག །སྤྲུལ་པའི་ཕྲིན་ལས་འདུལ་དབང་དོན་མཐར་ཕྱིན། །ལྷུན་གྱིས་གྲུབ་པའི་ཕྲིན་ལས་ཀུན་ལ་ཁྱབ། །སྤྲོས་མེད་སྙིང་པོ་རིག་པས་ལེན་པ་དང་། །ཐུགས་རྗེའི་སྙིང་པོ་མཛད་པས་ལེན་པ་དང་། །བདེ་ཆེན་སྙིང་པོ་སྙོམས་པར་འཇུག་པས་ལེན། །ནན་ཏན་སྙིང་པོས་ཕྲིན་ལས་རྒྱ་མཚོ་ལེན། །སྙིང་པོ་ལེན་ཕྱིར་མཎྜལ་གོ་རིམ་བཞིན། །ཡང་ན་སྤྲོས་མེད་དེ་བཞིན་ཉིད་དང་ནི། །བྱང་ཆུབ་སེམས་ཀྱི་དཀྱིལ་འཁོར་གསུངས་པ་དང་། །ལུས་དང་བྷ་གའི་དཀྱིལ་འཁོར་ཉིད་དང་ཡང་། །མཚན་མ་དབྱིབས་ཀྱི་དཀྱིལ་འཁོར་དེ་རིམ་བཞིན། །དབྱིབས་ནི་ཟུར་གསུམ་ཟླ་གམ་གསུམ་ལ་གྲུ་ཆད་རྒྱན། །སྒོ་དང་སྒོ་ཁྱུད་རྟ་བབས་ར་བས་བརྒྱན། །དབྱིངས་ལས་ཡེ་ཤེས་གསུམ་སྣང་གྲུ་གསུམ་སྟེ། །རྟག་ཆད་དབུ་མར་མངའ་བརྙེས་ཟླ་གམ་ཡིན། །ཡེ་ཤེས་ཀུན་ཏུ་རྒྱས་ཕྱིར་གྲུ་ཆད་བཞི། །སྤྲོས་པ་མེད་པའི་ཚུལ་གྱིས་ཀུན་ནས་ཟླུམ། །རིག་པ་ཤར་སྒོ་ཡོན་ཏན་ལྷོ་ཡི་སྒོ། །མ་རིག་ནུབ་སྒོ་བག་ཆགས་བྱང་ཞེས་བྱ། །ཡོན་ཏན་མི་ཟད་སྒོ་ཁྱུད་རྣམ་ཐར་བརྒྱད། །རྟ་བབས་མི་ཕྱེད་རྡོ་རྗེའི་ཕྲེང་ལས་བརྒྱན། །རིག་པ་རང་གི་བྱེ་བྲག་ལྷ་རྣམས་བཀོད། །དང་པོའི་དོན་ལ་དཀྱིལ་འཁོར་རིམ་པའོ། །བྱང་ཆུབ་སེམས་ཉིད་སྐུ་གསུང་ཐུགས་ཟུར་གསུམ། །ལུས་དང་ངག་ཡིད་དོན་དབང་ཟླ་གམ་ཡིན། །ཚད་མེད་ཀུན་ཏུ་རྒྱས་ཕྱིར་གྲུ་བཞིའོ། །ཐུགས་རྗེ་ཉིད་ཀྱང་སྤྲོས་བྲལ་ཀུན་ནས་ཟླུམ། །སྒོ་བཞི་ཚད་མེད་བཞི་ཡི་རང་བཞིན་ལ། །འདྲེན་ཐབས་བསམ་གྱིས་མི་ཁྱབ་སྒོ་ཁྱུད་ཚུལ། །རྣམ་ཐར་བརྒྱད་ཀྱི་ལམ་སྟེགས་རྟ་བབས་ལ། །སྙིང་རྗེ་འགྲོ་དང་མི་ཕྱེད་རྡོ་རྗེའི་ཕྲེང་། །ལྷ་ཚོགས་ཐབས་ཀྱི་བྱེ་བྲག་བསམ་ཡས་བཀོད། །གཉིས་པའི་དོན་ལ་དཀྱིལ་འཁོར་རིམ་པའོ། །ཐབས་ཀྱི་སྐུ་གསུང་ཐུགས་ནི་ཟུར་གསུམ་སྟེ། །ཤེས་རབ་སྐུ་གསུང་ཐུགས་ནི་ཟླ་གམ་ཡིན། །ཡན་ལག་བཞི་བཞི་རྒྱས་པའི་གྲུ་ཆད་འབར། །ཐབས་ཤེས་ཡན་ལག་དང་པོ་ཀུན་ནས་ཟླུམ། །ལུས་ཀྱི་སྒོ་བཞི་ཡན་ལག་སྒོ་ཁྱུད་ལྡན། །རྣམ་ཤེས་བརྒྱད་ནི་རྟ་བབས་མི་ཕྱེད་རྡོ་རྗེའི་ཕྲེང་། །ཕུང་པོ་ཁམས་དང་སྐྱེ་མཆེད་ལྷ་རྣམས་བཀོད། །གསུམ་པའི་དོན་ལ་དཀྱིལ་འཁོར་རིམ་པའོ། །དྲག་པོ་གྲུ་གསུམ་དབང་ལ་ཟླ་གམ་སྟེ། །རྒྱས་པ་ལྷམ་པ་བཟླུམ་པོ་ཞི་བའི་ཚུལ། །འཇུག་པའི་སྒོ་བཞི་འཚམས་པའི་སྒོ་ཁྱུད་ཅན། །འབབ་སྟེགས་བརྒྱད་དང་རྡོ་རྗེའི་ཕྲེང་བས་བསྐོར། །བདག་ཕུར་ཁྲོ་བོའི་ཚོགས་ཀྱི་ལྷ་རྣམས་བཀོད། །བཞི་བའི་དོན་ལ་དཀྱིལ་འཁོར་རིམ་པའོ། །ཡི་གེ་ཚད་མེད་བདུད་རྩི་རྡུལ་ཚོན་ལྔ། །སོ་སོའི་ཚོན་གྱི་ངོ་བོར་ཤེས་པར་བྱ། །དེར་འཇུག་རིམ་པ་དག་ཀྱང་ཅི་རིགས་སྦྱར། །ཡེ་ཤེས་རྩལ་གྱིས་མཐའ་གཉིས་དབུ་མར་འགུག །ཐུགས་རྗེས་ལས་དང་ཉོན་མོངས་གནས་སུ་འདྲེན། །བྱང་ཆུབ་སེམས་ཀྱིས་སྡུག་བསྔལ་བདེ་བར་འདྲེན། །སྤྲུལ་པའི་ཕོ་ཉས་དགྲ་བགེགས་མྱུར་དུ་འགུག །དགུག་པ་རྣམ་བཞི་གོ་རིམ་བཞིན་དུ་སྦྱར། །ཡེ་ཤེས་ཆེན་པོས་མཐའ་གཉིས་དབུ་མར་གཞུག །ཐུགས་རྗེས་ལས་དང་ཉོན་མོངས་གྲོལ་བར་གཞུག །སྦྱོར་བས་སྡུག་བསྔལ་ཕུང་པོ་བདེ་བར་བསྟིམ། །ཞགས་པས་འགལ་བྱེད་རྣམ་ཤེས་རྟེན་ལ་གཞུག །གཞུག་པའི་དོན་བཞི་གོ་རིམ་ཇི་ལྟ་བའོ། །ཡེ་ཤེས་སྒྲོག་གིས་མཐའ་གཉིས་དབུ་མར་བཅིངས། །ཐུགས་རྗེས་ལས་དང་ཉོན་མོངས་ཐར་པར་བཅིངས། །སྦྱོར་བས་སྡུག་བསྔལ་ཕུང་པོ་བདེ་བར་བཅིངས། །ཕོ་ཉའི་སྒྲོག་གིས་དགྲ་བགེགས་རྟེན་ལ་བཅིངས། །མཐའ་གཉིས་དང་ནི་ལས་དང་ཉོན་མོངས་དང་། །འཁོར་བ་སྡུག་བསྔལ་དམ་འགལ་དགྲ་བགེགས་བཞི། །རིམ་བཞིན་ཕུར་པ་བཞི་ཡིས་དབང་དུ་བྱའོ། །རྟག་ཆད་ལས་དང་ཉོན་མོངས་སྡུག་བསྔལ་དང་། །དགྲ་བགེགས་ཕྱིས་མི་འཕེལ་བར་དོན་བཞིས་མནན། །རིག་པའི་རྩལ་གྱིས་རྟག་ཆད་མཐའ་ལས་ཟློག །ལས་དང་ཉོན་མོངས་ཐུགས་རྗེའི་ཤུགས་ཀྱིས་ཟློག །མཚན་མའི་སྡུག་བསྔལ་བདེ་བའི་དགོངས་པས་ཟློག །བར་གཅོད་དགྲ་བགེགས་སྤྲུལ་པའི་མཚམས་ཀྱིས་ཟློག །ལུང་དང་མན་ངག་ཚད་མས་ཡེ་ཤེས་བསྙེན། །དོན་དམ་རྟོགས་པའི་ཤུགས་ཀྱིས་སྙིང་རྗེ་བསྙེན། །སྦྱོར་བའི་ཡན་ལག་ཐབས་ཀྱིས་བདེ་ཆེན་བསྙེན། །མཚན་མ་དུས་དང་གྲངས་ཀྱིས་གྲུབ་རྟགས་བསྙེན། །སྒྲུབ་ལ་མཆོད་དང་རྫས་དང་ཕྱག་རྒྱ་དང་། །ཏིང་འཛིན་བཟླས་པ་ཉམས་སུ་བླང་བ་ལྔའོ། །ཀུན་བཟང་མཆོད་པས་ཡེ་ཤེས་ལྷ་རྣམས་མཉེས། །ཕྱི་ནང་མཆོད་པས་ཐུགས་རྗེའི་ལྷ་ཚོགས་ཐིམ། །གྷ་ཎ་མཆོད་པས་བདེ་ཆེན་ལྷ་ཚོགས་མཉེས། །དམ་རྫས་མཆོད་པས་སྤྲུལ་པའི་ལྷ་ཚོགས་ཐིམ། །ལུང་དང་མན་ངག་རྫས་བརྟེན་གཉིས་བྲལ་སྒྲུབ། །ཤེས་རབ་སྙིང་རྗེའི་རྫས་བརྟེན་འགྲོ་དོན་སྒྲུབ། །གཙོ་གཟུངས་ཐབས་ལ་བརྟེན་ནས་བདེ་ཆེན་སྒྲུབ། །ཕུར་པ་རྫས་ལ་བརྟེན་ནས་འདོད་པ་སྒྲུབ། །སྐུ་དང་གསུང་ཐུགས་ལས་ཀྱི་ཕྱག་རྒྱ་བཞི། །ཆོས་སྐུ་ལོངས་སྐུ་བདེ་བ་སྤྲུལ་པའི་སྐུ། །ཕུར་བུ་སྐུ་ཡི་ཕྱག་རྒྱ་རྣམ་བཞིར་གསུངས། །དོན་གསུང་སྒྲ་གསུང་སྔགས་གསུང་སྤྲུལ་པའི་གསུང་། །ཕུར་བུ་གསུང་གི་ཕྱག་རྒྱ་རྟགས་བཞིར་གསུངས། །མི་རྟོག་སྙིང་རྗེ་བདེ་ཐུགས་ཀུན་མཁྱེན་ཐུགས། །འབར་བའི་སྲོག་བཞི་ཐུགས་ཀྱི་ཕྱག་རྒྱར་བཤད། །ཞི་རྒྱས་དབང་དྲག་ལས་ཀྱི་ཕྱག་རྒྱ་སྟེ། །ཡེ་ཤེས་ཆེན་པོས་རྟག་ཆད་དངོས་པོ་བཞི། །སྙིང་རྗེ་ཆེན་པོས་ལས་དང་ཉོན་མོངས་ཞི། །བདེ་བ་ཆེན་པོས་མཚན་མའི་སྡུག་བསྔལ་ཞི། །ཞི་བའི་ཕུར་པས་གདུག་རྩུབ་དངོས་པོ་ཞི། །དེ་ཕྱིར་ཞི་བ་ལས་ཀྱི་ཕྱག་རྒྱའོ། །གཉིས་མེད་ཡེ་ཤེས་ངང་ལས་ཚོགས་གཉིས་རྒྱས། །བྱང་ཆུབ་སྙིང་རྗེའི་ངང་ལས་ཚད་མེད་རྒྱས། །མཁའ་གསང་སྦྱོར་བའི་ངང་ལས་བདེ་བ་རྒྱས། །འཕྲོ་འདུ་སྤྲུལ་པའི་ངང་ལས་ཆོ་འཕྲུལ་རྒྱས། །དེ་ཕྱིར་རྒྱས་པ་ལས་ཀྱི་ཕྱག་རྒྱའོ། །དབང་བཞི་གོང་དུ་བཤད་པ་དེ་དང་མཚུངས། །ཡེ་ཤེས་དྲག་པོས་རྟག་ཆད་དངོས་པོ་གསོད། །ཐུགས་རྗེ་དྲག་པོས་ལས་དང་ཉོན་མོངས་གསོད། །མཁའ་དབྱིངས་དྲག་པོས་སྡུག་བསྔལ་ཕུང་པོ་གསོད། །དྲག་པོའི་ཕུར་པས་བར་གཅོད་དགྲ་བགེགས་གསོད། །དེ་ཕྱིར་དྲག་པོ་ལས་ཀྱི་ཕྱག་རྒྱའོ། །རྟོགས་པའི་ཡེ་ཤེས་ཏིང་འཛིན་ཀུན་ཁྱབ་གདལ། །ཁྱབ་པ་སྙིང་རྗེའི་ཏིང་འཛིན་རྒྱུན་མི་ཆད། །བདེ་བ་ཆེན་པོའི་ཏིང་འཛིན་རྩེ་གཅིག་གསལ། །སྤྲུལ་པ་ཕྱག་རྒྱའི་ཏིང་འཛིན་ཆར་ལྟར་འབེབས། །ཉམས་སུ་བླང་བའི་ཏིང་འཛིན་རྣམ་བཞིའོ། །རིག་པ་རྩལ་གྱིས་གཉིས་མེད་དོན་ལ་བཟླས། །སྙིང་རྗེ་འཁོར་བ་མ་སྟོངས་བར་དུ་བཟླས། །བདེ་བ་མ་རྙེད་བར་དུ་སྦྱོར་བ་བཟླས། །ལས་རྣམས་མ་གྲུབ་བར་དུ་སྙིང་པོ་བཟླས། །ཉམས་སུ་བླང་བའི་བཟླས་བརྗོད་སྒྲུབ་པའོ། །དང་པོར་ཆོས་ཀུན་མཉམ་ཉིད་ངང་དུ་བསྡུ། །གཉིས་པ་ཐམས་ཅད་སྙིང་རྗེའི་ཞིང་དུ་བསྡུ། །གསུམ་པ་ཡབ་ཡུམ་བདེ་བའི་ངང་དུ་བསྡུ། །བདག་ཕུར་གཟས་གསུམ་གྲུབ་མཐའ་གཅིག་ཏུ་བསྡུ། །རྣམ་པ་བཞི་ཡང་དབྱེར་མེད་ཐིག་ལེར་བསྡུ། །ཆོས་རྣམས་ཐམས་ཅད་མཉམ་པའི་ངང་དུ་སྤར། །སྙིང་རྗེས་ལས་དང་ཉོན་མོངས་གྲོལ་བར་སྤར། །ཡབ་ཡུམ་མཁའ་ལ་འཁོར་བའི་སྡུག་བསྔལ་སྤར། །བསྒྲལ་བའི་རྣམ་ཤེས་འཆི་མེད་གནས་སུ་སྤར། །ཡེ་ཤེས་མེ་ཡིས་རྟག་ཆད་དངོས་པོ་བསྲེག །ལས་དང་ཉོན་མོངས་ཐུགས་རྗེའི་མེ་ཡིས་བསྲེག །བྱང་ཆུབ་ཟེར་གྱིས་བསྡུག་བསྔལ་བུད་ཤིང་བསྲེག །སྤྲུལ་པའི་མེ་ཡིས་འགལ་བྱེད་ཤ་རུས་བསྲེག །བླ་མེད་ནང་གསང་ཕྱི་ཡི་སྦྱིན་སྲེག་ཡིན། །རྟག་ཆད་དངོས་པོ་ཡེ་ཤེས་ཞལ་དུ་བསྟབ། །ལས་དང་ཉོན་མོངས་ཐུགས་རྗེའི་ཞལ་དུ་བསྟབ། །སྡུག་བསྔལ་ཕུང་པོ་ཡབ་ཡུམ་མཁའ་ལ་བསྟབ། །བསྒྲལ་བའི་ཤ་ཁྲག་ཁྲོ་རྒྱལ་ཞལ་དུ་བསྟབ། །ཞེན་པའི་སེམས་དང་རྟག་ཆད་དངོས་པོ་ཕྲལ། །སྙིང་རྗེའི་ཞིང་རྣམས་སྡུག་བསྔལ་ཁུར་དང་ཕྲལ། །བདེ་བ་འདོད་པ་གཡེང་བའི་སྐྱོན་དང་བྲལ། །དམ་ལ་གནོད་པ་འགོ་བའི་ལྷ་དང་བྲལ། །རྟག་ཆད་མཐའ་ལ་དབུ་མའི་དྲི་ཡིས་བདུག །སྙིང་རྗེའི་ཞིང་ལ་འདུལ་ཁྲིམས་དྲི་ཡིས་བདུག །བདེ་བར་མོས་ལ་སྙོམས་འཇུག་དྲི་ཡིས་བདུག །འགལ་བྱེད་མྱོས་ཕྱིར་གུ་གུལ་སོགས་ཀྱིས་བདུག །ཡེ་ཤེས་དབྱིངས་ཀྱི་གཏོར་མས་ཀུན་ལ་ཁྱབ། །ཚད་མེད་སྙིང་རྗེའི་གཏོར་མས་ཀུན་ལ་ཕན། །བཀྲ་གསལ་ཏིང་འཛིན་གཏོར་མ་བདེ་བས་ཁྱབ། །ཁྱད་པར་ཕྲིན་ལས་གཏོར་མས་འདོད་པ་སྒྲུབ། །མཐའ་གཉིས་འཆིང་བྱེད་རྟག་ཆད་ཞེན་པའི་དུག །ལས་དང་ཉོན་མོངས་དུག་གིས་ངན་སོང་གནས་སུ་འཆི། །གཡེང་བ་མང་པོའི་དུག་གིས་སྡུག་བསྔལ་རྒྱ་མཚོར་འཆི། །སྦྱར་སོགས་དུག་གིས་ལུས་དང་སེམས་སུ་འབྲལ། །ལྟ་བ་རྩ་བ་གཡེངས་པ་རྫས་ཀྱི་དུག །མཇུག་བསྡུས་པ་ལ་དངོས་གྲུབ་བླང་བ་དང་། །དབང་བསྐུར་བ་དང་དམ་ཚིག་བླང་བ་དང་། །བཤགས་དང་ལས་ཀྱི་ལྷག་ཆད་བསྐང་བ་དང་། །གོ་ཆ་དང་ནི་འགྲོ་ཉལ་འདུག་སྡོད་དང་། །རྒྱུན་གྱི་ཏིང་ངེ་འཛིན་དང་བཅུ་གཅིག་གོ། །ཁྱད་པར་ཆོས་སྐུའི་དངོས་གྲུབ་དང་པོ་ཡིན། །འགྲོ་དོན་རྫོགས་པའི་དངོས་གྲུབ་གཉིས་པ་ཡིན། །བདེ་ཆེན་འདུ་འབྲལ་མེད་པར་གསུམ་པ་ཡིན། །ཐུན་མོང་ཇི་སྙེད་གྲགས་པ་བཞི་པའོ། །དེ་ཀུན་རང་སེམས་རྣམ་པ་ཡིན་པར་གསུངས། །གྲུབ་པ་གོང་ནས་འབྱིན་པ་ཕྱི་ཡི་ཚུལ། །རང་བྱུང་རྫོགས་ཆེན་བླ་ན་མེད་པའི་ཚུལ། །རྫས་ལ་བརྟེན་ནས་དབང་བསྐུར་བཞི་པ་ཡིན། །གསུམ་པ་ལ་ནི་གཙོ་ཟུངས་གསང་བའི་དབང་། །གཉིས་པ་ལ་ནི་ཤེས་རབ་རིག་པའི་དབང་། །དང་པོ་ལ་ནི་སྤྲོས་བྲལ་ཤིན་ཏུ་གསང་། །བསྐུར་བའི་དབང་ནི་རིམ་པར་བགྲོད་དགོས་ཀྱང་། །རིག་པ་རང་དབང་ཤིན་ཏུ་གཙོ་བར་གསུངས། །དང་པོ་ལ་ནི་མཉམ་པའི་དམ་ཚིག་སྟེ། །དེ་ལས་འདས་ན་མཐའ་གཉིས་མུན་པར་ལྟུང་། །གཉིས་པ་འགྲོ་དོན་རྫོགས་པའི་དམ་ཚིག་སྟེ། །དེ་ལས་འདས་ན་ཉན་ཐོས་ས་རུ་ལྟུང་། །གསུམ་པ་ལ་ནི་སྦྱོར་བའི་དམ་ཚིག་སྟེ། །དེ་ལས་འདས་ན་མངལ་གྱི་སྲིན་བུར་སྐྱེ། །བཞི་པ་ལ་ནི་སྤྱོད་པའི་དམ་ཚིག་སྟེ། །དངོས་པོར་སྤྱོད་ན་ལས་ཀྱི་སྲིན་པོར་སྐྱེ། །རྩ་བ་ཡན་ལག་ཇི་ལྟར་གྲགས་པ་རྣམས། །ལྟ་སྤྱོད་སྒྲུབ་དང་ལས་ཀྱི་བྱེ་བྲག་གིས། །སོ་སོའི་རིམ་པ་བཞིན་དུ་བསྲུང་ཤེས་བྱ། །ལྟ་བ་ཉམས་ན་ཆོས་ཉིད་ངང་དུ་སྒོམ། །སྤྱོད་པ་བདག་གཞན་གཉིས་སུ་མེད་པར་སྒོམ། །སྒྲུབ་པ་ཉམས་ན་བླང་དོར་མེད་པར་སྒོམ། །ཕྲིན་ལས་ཉམས་ན་གྲུབ་མཐའ་གཅིག་ཏུ་སྒོམ། །དོན་དམ་གཉིས་སུ་མེད་པའི་བྱེ་བྲག་བཞིའོ། །ཡང་ན་དོན་དམ་ལ་ནི་དོན་དམ་མོ། །རྣམ་པ་ཀུན་ལ་ཀུན་རྫོབ་སོ་སོར་བཤགས། །མཐའ་གཉིས་ལས་ཀྱི་རྟག་ཆད་དབུ་མར་བཤགས། །ལས་དང་ཉོན་མོངས་ཐུགས་རྗེ་ཆེ་ལ་བཤགས། །སྡུག་བསྔལ་ཕུང་པོ་ཡབ་ཡུམ་ངང་དུ་བཤགས། །ཕྲིན་ལས་རྟག་ཆད་སྤྲུལ་པའི་ལྷ་ལ་བཤགས། །གཉིས་སུ་མེད་པའི་དོན་ལ་བློ་བཞག་ན། །ཆོ་ག་ལྷག་གམ་ཆད་ཀྱང་ཉེས་པ་མེད། །ཡེ་ཤེས་གོ་ཆ་རྟག་ཆད་མཐའ་མི་བཤིག །སྙིང་རྗེའི་གོ་ཆ་ལས་ཀྱི་མཐུས་མི་བཤིག །སྡུག་བསྔལ་དཔུང་གིས་བདེ་བའི་གོ་མི་བཤིག །བར་ཆད་བྱེད་པས་ཕྱག་རྒྱའི་གོ་མི་བཤིག །མདོར་ན་སྟོང་པའི་གོ་ཆ་རབ་ཏུ་སྲ། །དང་པོ་དབུ་མའི་དོན་ལ་མ་ཡེངས་འགྲོ། །འགྲོ་ལ་སྙིང་རྗེའི་སེམས་འགྲོ་གཉིས་པའོ། །ཤེས་རབ་ཐབས་སུ་སྣང་གྲགས་རྟོག་གསུམ་པོ། །ཆོས་ཀུན་བདག་ཕུར་ཁྲོ་བོར་ལྟ་བ་སྟེ། །མདོར་ན་འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད་ཅེས་བྱའོ། །ཉལ་ཚེ་སྟོང་པའི་ངང་ལ་མནལ་བ་དང་། །སྙིང་རྗེ་ཆེན་པོའི་ངང་ལ་བཞག་པ་དང་། །རང་གི་ལྷ་མོ་སེམས་ལ་བསྡུས་ནས་ཀྱང་། །བདེ་བ་ཆེན་པོའི་ངང་ལས་མི་ཉམས་དང་། །དཀྱིལ་འཁོར་ཐམས་ཅད་རང་ལ་བསྡུས་ནས་སུ། །རང་ཉིད་ཡེ་ཤེས་ཐུགས་ལ་བསྡུས་ནས་ནི། །མ་ཡེངས་ལངས་ནས་དཀྱིལ་འཁོར་སླར་བསྐྱེད་བྱ། །འདུག་ཚེ་དེ་ཉིད་རྣམ་བཞི་བསམ་བྱ་སྟེ། །ཡེ་ཤེས་ཐུགས་རྗེ་བདག་དང་སྤྲུལ་པ་ཡིན། །དེ་ཉིད་སེམས་ཤིང་གཡེང་བ་གཞན་མི་བསམ། །སྐད་ཅིག་སྡོད་ཚེའང་རྒྱུན་གྱི་བསམ་མི་དོར། །ལུས་ངག་གཞན་དུ་སྤྱོད་ཀྱང་སེམས་ཉིད་དྲང་པོར་གནས། །རང་གི་ཏིང་འཛིན་ལེ་ལོའི་དབང་མི་བཏང་། །ལྟ་བས་རྒྱུན་དུ་མཉམ་པའི་དོན་མི་བཏང་། །མཛད་པས་རྒྱུན་དུ་འགྲོ་བའི་དོན་མཛད་ཅིང་། །ཐབས་དང་ཤེས་རབ་ལྡན་པས་རྒྱུན་དུ་སྒྲུབ། །སྤྲུལ་པའི་འཕྲོ་འདུ་རྒྱུན་དུ་ནན་ཏན་བྱ། །དེ་ལྟར་བྱས་ན་འབྲས་བུ་ཆུད་མི་ཟ། །ལྔ་ཕུང་མི་སྤང་དགོངས་པ་དཔལ་གྱི་སྐུ། །རྡོ་རྗེ་སེམས་དཔའ་ང་ཉིད་ཡིན་ཞེས་གསུངས། །ཐུབ་པས་བརྒྱད་ཁྲི་བཞི་སྟོང་གསུངས་པ་དང་། །གསང་སྔགས་རྒྱ་མཚོ་རྒྱུད་ལུང་མན་ངག་གི། །སྤྱི་ཡི་སྒྲུབ་པའི་ཐབས་ནི་དོན་བཞི་པོ། །ཕུར་བུ་སྒྲ་ཡི་སྐབས་སུ་བསྡུད་པ་ཡིན། །བཞི་རུ་བསྟན་ཀྱང་དོན་དུ་གཅིག་ལས་མེད། །གཅིག་ཉིད་རྟོགས་པར་བྱ་ཕྱིར་ཐ་དད་བསྟན། །བྱང་ཆུབ་སེམས་ནི་རྡོ་རྗེ་གཅིག་པུ་ཉིད། །གཅིག་པུ་ཉིད་དུ་མ་གྲུབ་ཀུན་གྱི་ངང་། །གཅིག་དང་དུ་མའི་བདག་ཉིད་ཆེན་པོ་ཡིན། །སྣང་དང་མི་སྣང་སྟོང་དང་མི་སྟོང་དང་། །ཡོད་དང་མེད་དང་དོན་དམ་ཀུན་རྫོབ་དང་། །རྟག་དང་ཆད་དང་བདེ་དང་སྡུག་བསྔལ་སོགས། །ཀུན་ཀྱང་བདག་ཉིད་ཆེན་པོའི་ངོ་བོ་ཡིན། །དེ་སྐད་རྒྱལ་བ་ཉིད་ཀྱི་ཞལ་ནས་གསུངས། །མཉམ་ཉིད་ཅན་གྱི་བློ་ལ་དེ་ལྟར་སྣང་། །བློ་ཞན་རྣམས་ལ་བསྟན་ན་ཡིད་ཆེས་མེད། །དེས་ན་སྒྲོ་སྐུར་སྟུང་བའི་སྒོར་འགྱུར་ཏེ། །དེ་བས་ཐུགས་ལ་བརྣག་ལ་ཁར་བྱུང་མིན། །དོན་འདིས་རྨོངས་ན་སྲིད་པའི་འཁོར་ལོར་འཁྱམས། །དགེ་དང་མི་དགེའི་དབང་འགྲོ་ཆུ་བོས་གཡེངས། །འདི་མེད་གཞན་གྱི་འབྲས་བུས་སངས་མི་རྒྱ། །འདི་དོན་རྟོགས་ན་འཁོར་བའི་གསེབ་ལས་ཐར། །དགེ་དང་མི་དགེ་ལས་ཀྱི་དབང་མི་འགྲོ། །མཐོང་བའི་ཆོས་ལ་མངོན་དུ་མ་གྱུར་ཀྱང་། །ཚེ་འདི་འདས་མ་ཐག་ཏུ་མངོན་དུ་འགྱུར། །དོན་གྱི་སྒྲ་བཞིའི་དགོངས་པ་མི་ཤེས་པར། །གསང་སྔགས་ཇི་བཞིན་སྒྲ་ཕྱིར་འབྲངས་པ་རྣམས། །སེང་གེའི་གཟུགས་ཀྱིས་ཝ་སྐད་འབྱིན་པ་དང་། །ཕོ་རོགས་འགྲོས་ཀྱིས་ས་གཞི་ཁོད་སྙོམས་འདྲ། །དེས་ནི་གསང་སྔགས་དགོངས་པ་མི་ཤེས་ཏེ། །དེ་མ་ཤེས་པས་དངོས་གྲུབ་རིང་དུ་སྤང་། །ཐབས་མཆོག་སླ་ཞིང་བདེ་བ་དག་གིས་ནི། །འབྲས་མཆོག་ཁྱད་པར་ཅན་རྙེད་ཕྱིར་མན་ངག །གསང་སྔགས་རྒྱ་མཚོའི་དགོངས་པའི་དོན་མཆོག་འདི། །ལུང་དང་མན་ངག་རིག་པས་ཐག་བཅད་དེ། །གབ་ཅིང་སྦས་པ་ཅུང་ཟད་གསལ་ཕྱེ་བའི། །བསོད་ནམས་གང་ཡིན་འགྲོ་བའི་དོན་དུ་བསྔོ། །རྫོགས་སོ།། །།སློབ་དཔོན་དྷ་ན་སཾསྐྲྀ་ཏའི་དགོངས་པ། བློ་ལྡན་མཆོག་སྲེད་ཀྱིས་བྲིས་ཏེ་མཛད། བོད་ཡུལ་དུ་སློབ་དཔོན་པདྨ་ཐོད་ཕྲེང་གིས་མངའ་བདག་ཁྲི་སྲོང་ལྡེའུ་བཙན་ལ་གནང་། ལྕེ་ཤཱཀྱ་སིདྷ་དང་། བྲང་ཏི་ཛ་ཡ་རཀྵི་ཏས་སྒྲ་བསྒྱུར་བྱས་ཏེ་གབ་ཅིང་གསང་ངོ་། །ཨཐྎ།། །།