རིག་འཛིན་བསྐུལ་རྒྱས་པ།
རིག་འཛིན་བསྐུལ་རྒྱས་པ་བཞུགས་སོ། །ཧཱུྃ། བྱང་ཆུབ་མཆོག་ཏུ་ཐུགས་བསྐྱེད་ཅིང་། །དུས་གསུམ་རྒྱལ་བའི་གདུང་འཚོ བ་པ། །རིག་འཛིན་རྣམས་ཀྱི་དུས་ལ་བབ། །ཕུར་པ་སྒྲུབ་པའི་གྲོགས་མཛོད་ཅིག །ཧཱུྃ། སློབ་དཔོན་ཆེན་པོ་པདྨ་འབྱུང་གནས་ཀྱིས། །ཙནྡན་ནགས་མེ་མཆེད་ཚེ་བསྙེན་ཕུར་བསྒྲིལ། །ཚ་བའི་མེ་ཤི་ནགས་ཚལ་སྔོན་བས་བཟང་། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །སློབ་དཔོན་ཆེན་པོ་བི་མ་ལ་མི་ཏྲ་ཡིས། །གདྒཱའི་ཆུ་ལ་བཏབ་ནས་དུམ་བུར་བཅད། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །བལ་པོའི་སློབ་དཔོན་ཤཱི་ལ་མཉྫུ་ཡིས། །མཎྜལ་བྲག་ལ་བཏབ་ནས་ཕྱེ་མར་བསྙིལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །མ་ཅིག་ཇོ་མོ་མཁར་ཆེན་མཚོ་རྒྱལ་གྱིས། །འོ་ཡུག་མཁར་བ་སྣ་ཡི་དབེན་རྩ་རུ། །སྤྱང་ཀིའི་རྗེས་ཀྱི་ས་ལ་ཕུར་པ་བཏབ། །སྲོག་བདག་སྤྲུལ་པ་སྤྱང་ཀི་བཅུ་གསུམ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་བསྒྲུབ་པའི་གྲོགས་མཛོད་ཅིག །མཆིམས་སྟོན་ལོ་ཙཱ་ཤཱཀྱ་པྲ་བྷ་ཡིས། །ཡར་ཀླུངས་ཕུག་ནས་གཙང་པོ་གྱེན་དུ་སློག །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ཤུད་པུ་ལོ་ཙཱ་དཔལ་གྱི་སེང་གེ་ཡིས། །འུ་ཤང་རྡོ་ཡི་བྲག་ལ་ཐོགས་མེད་འཛུལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །སྣ་ནམ་ལོ་ཙཱ་རྡོ་རྗེ་བདུད་འཇོམས་ཀྱིས། །ཧས་པོ་རི་རུ་ནམ་མཁར་རྔ་ཆེན་བརྡུངས། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །མིང་པོ་མཁར་ཆེན་དཔལ་གྱི་དབང་ཕྱུག་གིས། །རྩིབས་ཀྱི་སྤྱང་ཀི་སྔོན་པོ་གཉའ་ནས་བཟུང་། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་བསྒྲུབ་པའི་གྲོགས་མཛོད་ཅིག །འདིར་ལ་བྱིད་ཡེ་ཤེས་བརྩེགས་ཆད་འདྲ། མཆན། གར་ཤ་མཁའ་འགྲོའི་གླིང་གི་དབེ ན་ས་རུ། །སློབ་དཔོན་མི་ནུབ་རྒྱལ་བའི་སྙིང་པོ་ཡི། །བདུད་ཀྱི་སྤྲུལ་པ་བྱ་རོག་ཐང་ལ་ལྷུང་། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ལོ་པཎ་དཔལ་བློས་སྤ་གྲོ་སྟག་ཚང་དུ། །མོན་གྱི་དམག་ཚོགས་ཐམས་ཅད་ཁ་ཕུང་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ཉང་སྟོད་སྲིན་མོ་རི་ཡི་ཅོ་ཏོ་རུ། །སློབ་དཔོན་ངམ་འབྲེ་ཀླུ་ཡི་རྒྱལ་མཚན་གྱིས། །དགྲ་ལ་བཏབ་པས་བགེགས་ཀྱང་ཞར་ལ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་བ་སྒྲུབ་པའི་གྲོགས་མཛོད་ཅིག །ངམ་འབྲེ་ས་ལེ་ཤེས་རབ་དབང་ཕྱུག་གིས། །འོད་ལ་བཏབ་པས་དཀོར་བདག་རྒྱལ་པོ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །གྲུབ་ཆེན་ལང་ལབ་བྱང་ཆུབ་རྡོ་རྗེ་ཡིས། །རྐུན་མའི་རྗེས་ལ་བཏབ་ནས་ནོར་རྣམས་ཁུག །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོདཅིག །སྣ་ནམ་ཤེས་རབ་ཚུལ་ཁྲིམས་ཡབ་སྲས་ཀྱིས། །གནུབས་བན་མཐུ་ཆེན་སྟག་རམ་མི་དགུ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །སྐྱི་ནག་བན་དེ་བྱང་ཆུབ་རིན་ཆེན་གྱིས། །དགྲ་ལ་ཐེབས་ཏེ་ཁང་པའི་གྱང་ཡང་འགྱེལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །འོ་ཡུག་རོལ་པོ་རྨོག་སྒར་དབེན་པ་རུ། །ཉང་ནག་བནྡྷེ་དབང་གི་ཤེས་རབ་ཀྱིས། །ཕུར་པ་གྲུབ་ནས་དགྲ་བགེགས་ཐམས་ཅད་བཏུལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །དེ་ནས་ཤཱཀྱ་རྒྱལ་མཚན་སྐུ་མཆེད་ཀྱིས། །འདར་ནག་རྟ་པ་བཅུ་དགུ་ཕུར་པས་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །གཡས་རུ་ལྷན་གྱི་སྟག་ལུང་གྲོག་པོ་རུ། །སློབ་དཔོན་དྲག་པོས་སྒྲུབ་པ་མཐར་ཕྱིན་ནས། །ནོར་རྫས་ཕྲོགས་པའི་བནྡྷེ་བཅུ་གསུམ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །རྒྱན་མཁར་ངོ་དམར་ཕུག་གི་དབེན་རྩ་རུ། །སོ་སྟོན་ཁྲི་རྒྱལ་རྡོ་རྗེ་གཏེར་སྒྲུབ་ཀྱིས། །ཕུར་བུ་བསྒྲིལ་ཏེ་དགྲ་བགེགས་དུས་གཅིག་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །དེ་ཡི་སློབ་མ་ལྷ་རྗེ་ཕུར་སྟོན་གྱིས། །ལ་སྟོད་ཁྲ་རི་རྡོ་རྗེ་གནམ་རྫོང་དུ། །རྟགས་ཚད་ཕེབས་ནས་དགྲ་བགེགས་གཉིས་ཀ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །བནྡྷེ་རྒྱ་སྟོན་ནམ་མཁའ་རྒྱལ་པོ་ཡིས། །དབང་སྟེང་དགོན་པར་དགྲ་བགེགས་གཉིས་ལ་ཐེབས། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །སྲས་ཀྱི་ཐུ་བོ་ཉི་མ་རྒྱལ་མཚན་གྱིས། །ཕུར་པ་གྲུབ་པས་དགྲ་བགེགས་ཕྱེ་མར་བྱས། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ཉང་བན་ཆེན་པོས་ཤུ་མངས་ལུང་པ་ཡིས། །གནས་དབེན་ས་རོང་རྒྱན་མཁར་གྱི་ཐོག་ཕུག །མཆན། གདུག་པའི་དགྲ་བགེགས་ཕུར་པའི་སྒོ་ནས་བཏུལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །སྔགས་འཆང་ནག་པོ་འཛམ་གླིང་པཎྜི་ཏས། །སྨུ་ལུང་བསམ་གཏན་གླིང་གི་སྒྲུབ་ཁང་དུ། །ཕུར་པ་གྲུབ་ནས་དགྲ་བགེགས་ཞིང་བཅུ་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །བྲེས་ཕུ་བསམ་གཏན་རྡོ་རྗེའི་ཁང་བུ་རུ། །སློབ་དཔོན་ཆེན་མོ་ཆུ་བར་ཉི་ཕུག་པས། །བསྙེན་སྒྲུབ་ཚད་ཕྱིན་དགྲ་བགེགས་ཆམ་ལ་ཕབ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །བན་གྲོང་སྟོན་པ་གསང་སྔགས་རྡོ་རྗེ་ཡིས། །མངའ་རིས་རྫོང་ཁ་རྒྱལ་པོའི་ཕོ་བྲང་དུ། །ཐུན་གཏོར་མེ་དཔུང་གྱུར་ཏེ་དགྲ་བགེགས་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ལྷོ་བྲག་མཁར་ཆུ་དཔལ་གྱི་གནས་མཆོག་ཏུ། །ཨོ་རྒྱན་སྤྲུལ་པ་རྡོ་རྗེ་སེང་གེ་ཡིས། །ཕུར་པ་འཕར་ཞིང་བཞད་པའི་བར་དུ་བསྒྲུབས། །བསྟན་པ་བཤིག་པའི་དགྲ་བགེགས་ཐམས་ཅད་བསྒྲལ། །སྔོན་ཚེ་ཇི་ལྟར་རྟགས་བསྟན་མ་བསྙེལ་བར། །དེ་རིང་ཕུར་པ་སྒྲུབ་པའི་གྲོགས་མཛོད་ཅིག །ཁྱེད་ཀྱི་ཐུགས་རྗེ་ཕྲིན་ལས་དུས་ལ་བབ། །རྟགས་དང་མཚན་མ་སྟོན་པའི་དུས་ལ་བབ། །མཐུ་རྩལ་མངོན་དུ་ཕྱུང་བའི་དུས་ལ་བབ། །ཀཱི་ལ་ཡ་ཡི་དངོས་གྲུབ་སྩལ་དུ་གསོལ། །ཞེས་བསྐུལ་ལོ། ༈ །རྡོ་རྗེ་ཕུར་པའི་གཞི་བསྟོད་གུད་དུ་ཕྱུང་བ་བཞུགས་སོ། །ཧཱུྃ། ཤིན་ཏུ་མི་བཟད་དཔལ་ཆེན་རྡོ་རྗེའི་སྐུ། །ཞེ་སྡང་ཐུགས་མཆོག་རཀྴ་ཧེ་རུ་ཀ །ཡཀྴ་ཡང་སྣང་། ཆོས་སྐུ་ཡེ་ཤེས་ལྔ་བརྙེས་གཞོན་ནུའི་ཚུལ། །རྡོ་རྗེ་གཞོན་ནུའི་སྐུ་ལ་ཕྱག་འཚལ་བསྟོད། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །བདེ་ཆེན་དབྱིངས་ནས་སྤྲུལ་པ་འབྱུང་བའི་གནས། །རཀྴ་ཧེ་རུའི་སྐུ་ལ་དགྱེས་བར་འཁྲིལ། །ཆོས་དབྱིངས་འཁོར་ལོ་རྒྱས་འདེབས་མ་ལ་ཕྱག་འཚལ་བསྟོད། ༈ །རོལ་པའི་སྟོབས་ཀྱིས་ཉི་ཟླ་ཚར་གཅོད་ཅིང་། །འདོད་ཆགས་སྐྱོན་སྤངས་སྐུ་ཡི་དབང་ཕྱུག་ཆེ། །ཡེ་ཤེས་མཐར་ཕྱིན་ཉི་ཟླའི་འོད་བཞིན་གསལ། །སྐྱེ་བཞི་མོས་ལ་དབང་མཛད་ཧཱུྃ་ཀཱ་ར། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །ཟློག་པའི་སྟོབས་ཀྱིས་ཐབས་ཡང་སྣང་། ལྷ་རྣམས་ཚར་གཅོད་ཅིང་། །མ་བྱིན་ལེན་པ་སྤངས་པའི་བདག་ཉིད་ཆེ། །རབ་ཏུ་ཤེས་པས་ཤེས་རབ་མཐར་ཕྱིན་པ། །ཡོ་བྱད་དབང་མཛད་གཞན་གྱིས་མི་ཐུབ་རྒྱལ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །འཇིགས་པའི་སྟོབས་ཀྱིས་དྲང་སྲོང་ཚར་གཅོད་ཅིང་། །ལོག་པའི་སྐྱོན་སྤངས་ཡང་དག་ཉིད་དང་ལྡན། །ཚུལ་ཁྲིམས་མཐར་ཕྱིན་དྲང་སྲོང་སྤྱོད་པ་ཆེ། །ཡེ་ཤེས་དབང་མཛད་ཁྲོ་ཆེན་དབྱུག་སྔོན་ཅན། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །འཇིགས་བྱེད་སྟོབས་ཀྱིས་འཆི་བདག་ཚར་གཅོད་ཅིང་། །སྲོག་གཅོད་སྐྱོན་སྤངས་སྐུ་ཡི་དབང་ཕྱུག་ཆེ། །གཟུང་འཛིན་གཉིས་སྤངས་བསམ་གཏན་དག་ལ་གནས། །ཚེ་ལ་དབང་མཛད་ཁྲོ་ཆེན་གཤིན་རྗེ་གཤེད། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །བརྡེག་པའི་སྟོབས་ཀྱིས་སྲིན་པོ་ཚར་གཅོད་ཅིང་། །རྫུན་གྱི་སྐྱོན་སྤངས་ངག་གི་དབང་ཕྱུག་ཆེ། །དབུ་མའི་སྟོབས་ཀྱིས་མཚན་མ་འདུལ་མཛད་པ། །སྐྱེ་ལ་དབང་མཛད་དྲན་ཚུལ་མི་གཡོ་མགོན། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །བརྗིད་པའི་སྟོབས་ཀྱིས་ཀླུ་རྣམས་ཚར་གཅོད་ཅིང་། །ཕྲ་མའི་སྐྱོན་སྤངས་དག་པའི་དབང་ཕྱུག་ཆེ། །འབད་པ་མེད་པའི་བརྩོན་འགྲུས་ཤུགས་དང་ལྡན། །ཆོས་ལ་དབང་མཛད་ཁྲོ་ཆེན་རྟ་མཆོག་དཔལ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །ཤུགས་འཆང་སྟོབས་ཀྱིས་རླུང་ལྷ་ཚར་གཅོད་ཅིང་། །ངག་འཁྱལ་སྐྱོན་སྤངས་ངག་གི་དབང་ཕྱུག་ཆེ། །འདོད་པ་ཀུན་སྦྱིན་མཛད་པ་རྒྱལ་པོའི་ཚུལ། །སེམས་ལ་དབང་མཛད་ཁྲོ་ཆེན་འདོད་པའི་རྒྱལ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །སྔགས་འཁོར་སྟོབས་ཀྱིས་གནོད་སྦྱིན་ཞབས་ཀྱིས་གནོན། །ངག་རྩུབ་སྐྱོན་སྤངས་ངག་གི་དབང་ཕྱུག་ཆེ། །སྨོན་ལམ་རྣམ་པར་དག་པས་བདུད་རྩི་འཁྱིལ། །ལས་ལ་དབང་མཛད་ཁྲོ་ཆེན་བདུད་རྩི་འཁྱིལ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །གནོན་པའི་སྟོབས་ཀྱིས་འབྱུང་པོ་ཚར་གཅོད་ཅིང་། །གནོད་སེམས་སྐྱོན་སྤངས་ཐུགས་ཀྱི་དབང་ཕྱུག་ཆེ། །གཉེན་པོའི་སྟོབས་ཀྱིས་ཐམས་ཅད་ཟིལ་གྱིས་གནོན། །རྫུ་འཕྲུལ་དབང་མཛད་ཁྲོ་ཆེན་ཁམས་གསུམ་རྒྱལ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། །གཟི་བརྗིད་སྟོབས་ཀྱིས་ཐམས་ཅད་ཟིལ་གྱིས་གནོན། །བརྣབ་སེམས་སྐྱོན་སྤངས་ཐུགས་རྗེའི་དབང་ཕྱུག་ཆེ། །དྲག་རྩལ་ཤུགས་ཀྱིས་གདུག་པ་འདུལ་མཛད་པ། །སྨོན་ལམ་དབང་མཛད་ཁྲོ་ཆེན་སྟོབས་པོ་ཆེ། །ཁྲོ་བོ་ཆེན་པོ་ཁྱོད་ལ་ཕྱག་འཚལ་བསྟོད། ༈ །བསྐྱོད་པའི་ཡེ་ཤེས་ས་རྣམས་དུས་གཅིག་སྤྱོད། །ཐུགས་རྗེ་ཆེན་པོས་འཁོར་བ་གནས་སུ་འདྲེན། །ཐབས་དང་ཤེས་རབ་སྤྱོད་པས་མཐའ་གཉིས་སྤངས། །ཁམས་གསུམ་ཧཱུྃ་མཛད་མཉེས་མཛད་སྒྲ་འབྱིན་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །ཡེ་ཤེས་ཐུགས་རྗེས་ཟིན་པས་མཐར་མི་ལྟུང་། །ཐུགས་རྗེས་ཡེ་ཤེས་ཟིན་པས་སྲིད་པ་གྲོལ། །གཉིས་ལ་མི་གནས་མཐའ་གཉིས་དབུ་མར་སྡིགས། །རྣམ་པར་རྒྱལ་བ་མཉེས་མཛད་སྙེམས་མའི་སྐུ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །རིག་པ་ཡེ་ཤེས་ཆོས་ཀྱི་སྐུ་ཉིད་འཛིན། །ཐབས་དང་ཤེས་རབ་ལྡན་པས་འགྲོ་དོན་མཛད། །དབྱུག་པ་སྔོན་པོ་མཉེས་མཛད་རྡོ་རྗེ་སྡེར། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །ཡེ་ཤེས་མཚན་བསྡུད་ཐུགས་རྗེས་དུར་ཁྲོད་འབྱུང་། །ཐུགས་རྗེའི་སྤྲུལ་པ་སྐུ་དང་ཡེ་ཤེས་འཕྲོ། །ཤེས་པ་སྙིགས་མ་དབུ་མ་རིག་པར་བསྐྱེལ། །གཤེད་པོ་མཉེས་མཛད་རྡོ་རྗེ་དུར་ཁྲོད་བདག །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །ཤེས་རབ་ཐོ་བས་མཚན་མ་དབྱིངས་སུ་བརྡུང་། །ཆོས་དབྱིངས་གཏུན་དུ་ཤེས་བྱའི་བག་ཆགས་འཇོམས། །མི་དམིགས་གཏུན་དུ་མཚན་མའི་བག་ཆགས་བརྡུང་། །མི་གཡོ་མགོན་པོ་མཉེས་མཛད་གཏུན་ཁུང་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །རྡོ་རྗེ་གཏུམ་མོས་མཚན་མའི་བག་ཆགས་འཇོམས། །ཐུགས་རྗེས་རྔམས་ཚུལ་གནོད་པ་ཐལ་བར་རློག །གཉིས་ལས་མི་གནས་མཐའ་བྲལ་དབུ་མར་སྡིགས། །རྟ་མཆོག་རྒྱལ་པོ་མཉེས་མཛད་རལ་གཅིག་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །ཕྲ་མོ་འབིགས་ཤིང་ཡེ་ཤེས་དབྱིངས་སུ་སྡུད། །ཕྲ་མོའི་འདའ་ནི་ཡེ་ཤེས་དབྱིངས་སུ་འཕེན། །དབུ་མའི་མདའ་ནི་གཉིས་སུ་མེད་པར་མགྱོགས། །གཞན་གྱིས་མི་ཐུབ་མཉེས་མཛད་མདའ་སྙེམས་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །མཚན་མ་མེད་པའི་དབྱིངས་རིག་ཐོས་པའི་སྒྲ། །དབྱིངས་ཉིད་རིག་པར་ཤེས་པ་སྙན་པའི་སྒྲ། །རིག་པ་ཡེ་ཤེས་ཆོས་ཀྱི་དབྱིངས་སུ་འབྱིན། །བདུད་རྩི་འཁྱིལ་བ་མཉེས་མཛད་རླུང་འབྱིན་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །བདག་རྟོག་ལོག་པའི་མཚན་མ་ཀུན་བཅོམ་ནས། །ཟ་བྱེད་མཆེ་བས་སྐྱེ་ཤི་རྩད་ནས་གཅོད། །སྐུ་དང་ཡེ་ཤེས་མ་སྐྱེས་མི་དམིགས་པས། །ཁམས་གསུམ་རྣམ་རྒྱལ་མཉེས་བྱེད་གསོད་བྱེད་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་ལོ། །ཐུགས་དམ་རྣམ་དག་དབང་གིས་དབྱིངས་ནས་བསྐུལ། །ཐུགས་རྗེའི་ཤུགས་ཀྱིས་འགྲོ་བ་གནས་ནས་འདྲེན། །གཉིས་མེད་མཆོད་བསྐུལ་དབུ་མར་དགྱེས་པ་བསྐྱེད། །མ་ཧཱ་བ་ལ་མཉེས་བྱེད་བསྐུལ་བྱེད་མ། །ཁྲོ་མོ་ཡུམ་མཆོག་ཁྱོད་ལ་ཕྱག་འཚལ་བསྟོད། ༈ །ལྷག་མཐོང་ཆོས་ཉིད་ཞི་གནས་ལམ་ལས་རྒྱལ། །སྨོན་ལམ་ཐུགས་རྗེས་འཁོར་བའི་སྟོབས་ལས་རྒྱལ། །འགྲོ་བའི་དོན་མཛད་སྨོན་ལམ་ཤུགས་དང་ལྡན། །དེ་ཕྱིར་ཕྲ་མེན་མྱོས་བྱེད་ཕག་མགོ་ཅན་ལ་ཕྱག་འཚལ་བསྟོད། །ཐུགས་རྗེ་ཕྲིན་ལས་མི་བཟད་སྡུག་བསྔལ་བ། །ཡལ་བར་མ་འདོར་གཏུམ་ཆེན་བརྩོན་འགྲུས་ཤུགས། །འཁོར་བ་མཐའ་གཏུག་གདོད་ནས་དག་པར་སྒྲོལ། །དེ་ཕྱིར་དཔལ་གཏུམ་སྟག་མགོ་ཅན་ལ་ཕྱག་འཚལ་བསྟོད། །ཐུགས་རྗེའི་སྡང་མིག་འཁོར་བ་ཞེ་ལ་གནོན། །མཐུ་རྩལ་ཆེན་པོའི་ཉོན་མོངས་འཇོམས་པར་བྱེད། །འཆམས་པའི་རལ་པ་གསིག་ཅིང་འཇིག་རྟེན་འགེངས། །དེ་ཕྱིར་མི་འགྱུར་གཡག་མགོ་ཅན་ལ་ཕྱག་འཚལ་བསྟོད། །རྟོག་པའི་དགྲ་སྤངས་དྲན་པའི་དགོན་པར་འཇུག །འཁྲུལ་སྐྱོན་དྲི་མ་ཤེས་བྱའི་རྫི་ཚོགས་སྤོང་། །འགྲོ་དོན་དུས་ལ་བབ་ན་ཐུགས་རྗེ་འཇུག །དེ་ཕྱིར་འཇུག་བྱེད་ཤ་བའི་མགོ་ཅན་ལ་ཕྱག་འཚལ་བསྟོད། །ཆོས་དབྱིངས་སྣང་ལམ་རྟོག་པའི་སྐྱོན་སེལ་ཅིང་། །ཐུགས་རྗེའི་སྤྲུལ་པ་བསམ་གྱིས་མི་ཁྱབ་པས། །དུག་གསུམ་མི་སྤོང་ཤ་ཁྲག་ལུས་ལ་རོལ། །དེ་ཕྱིར་སེལ་བྱེད་གཟིག་མགོ་ཅན་ལ་ཕྱག་འཚལ་བསྟོད། །ཡ་ང་བག་ཟོན་འགྲོ་དོན་ཐབས་དང་ལྡན། །གདུལ་བྱ་དུས་ལ་བབས་ཚེ་ཐུགས་རྗེས་འཇུག །མི་འདུལ་ཟིན་གཏུབས་བཏང་སྙོམས་ཆེན་པོར་བཞུགས། །དེ་ཕྱིར་མཁས་བརྩོན་བྱི་ལའི་དབུ་ལ་ཕྱག་འཚལ་བསྟོད། །ཡེ་ཤེས་དབྱིངས་ལ་འཇུག་པས་ཤེས་བྱ་ཟ། །དབྱིངས་ལ་ཡེ་ཤེས་འཇུག་པས་ཉོན་མོངས་ཟ། །དབྱིངས་དང་ཡེ་ཤེས་གཉིས་མེད་འཁོར་བ་ཟ། །དེ་ཕྱིར་ཟ་བྱེད་སྤྱང་ཀིའི་དབུ་ལ་ཕྱག་འཚལ་བསྟོད། །རིས་བཙུན་གཉེན་པོར་གྱུར་པས་ཐམས་ཅད་འདུལ། །ཕྲིན་ལས་སྟོབས་ཀྱིས་བདུད་དཔུང་མ་ལུས་འདུལ། །སྟོང་ཉིད་སྒྲ་སྒྲོག་མུ་སྟེགས་ཝ་ཚོགས་འཇོམས། །དེ་ཕྱིར་རྩལ་ལྡན་སེང་གེའི་དབུ་ལ་ཕྱག་འཚལ་བསྟོད། །ཡེ་ཤེས་ཐུགས་རྗེའི་སྟོབས་ཀྱིས་མཐའ་གཉིས་འདུལ། །འཆམས་སྟབས་རལ་པ་གསིག་པས་བདུད་དཔུང་འཇོམས། །ལས་སུ་ཅི་མཛད་བརྩོན་འགྲུས་སྟོབས་དང་ལྡན། །དེ་ཕྱིར་མགྱོགས་འགྲོས་དྲེད་ཀྱི་དབུ་ལ་ཕྱག་འཚལ་བསྟོད། །དབྱིངས་ལས་ཡེ་ཤེས་ཉལ་བས་ཐུགས་རྗེ་རྨི། །མཐིང་ནག་གཅེར་བུ་དྲག་པོའི་སྐུར་སྟོན་པ། །ཐུགས་མཆོག་རྣམ་དག་ཡེ་ཤེས་དབྱིངས་སུ་མཁྱེན། །དེ་ཕྱིར་སྨྱོ་བྱེད་དོམ་གྱི་དབུ་ལ་ཕྱག་འཚལ་བསྟོད། ༈ །འཇུག་པ་རང་དབང་མེད་པར་བསྐྱོད་གྱུར་པས། །འཁོར་བའི་ཉོན་མོངས་ཐམས་ཅད་མྱོས་པར་བྱེད། །སྙན་པའི་ཆོས་རྟོགས་ལོག་ལྟ་མྱོས་བྱེད་པ། །དེ་ཕྱིར་མྱོས་བྱེད་རྨིག་བུའི་མགོ་ལ་ཕྱག་འཚལ་བསྟོད། །ཡིད་གཡོ་ལས་ཅན་སེམས་པར་གྱུར་ནས་ནི། །ཡེ་ཤེས་དབང་གི་ཐུགས་རྗེས་འགྲོ་བ་གཡོ། །དོན་མཛད་འོད་འཕྲོ་ཡེ་ཤེས་དབྱིངས་ནས་མཁྱེན། །དེ་ཕྱིར་ཚུལ་ཁྲིམས་བྱ་རྒོད་མགོ་ལ་ཕྱག་འཚལ་བསྟོད། །བསམ་པའི་དངོས་པོ་འདོད་པས་འདུན་པ་འབྱུང་། །དབྱིངས་དང་ཡེ་ཤེས་མཁྱེན་པས་ཤེས་བྱ་ཟ། །ཐུགས་རྗེའི་འདུན་པས་བག་ཆགས་མཚན་མ་ཟ། །དེ་ཕྱིར་ཟ་བྱེད་བྱ་རོག་དབུ་ལ་ཕྱག་འཚལ་བསྟོད། །དམིགས་པའི་སེམས་འཛིན་ཡིད་ལ་བྱེད་པར་བསྒྱུར། །ཡེ་ཤེས་དབྱིངས་སུ་རྟོགས་པས་ཉིན་མོ་ཉལ། །ཐུགས་རྗེས་འགྲོ་དོན་དགོངས་པས་མཚན་མོར་བལྟ། །དེ་ཕྱིར་དྲང་མཁན་འུག་པའི་དབུ་ལ་ཕྱག་འཚལ་བསྟོད། །བརྟགས་པའི་དངོས་པོ་རྩེ་གཅིག་ཏིང་འཛིན་བསྒྱུར། །མཉམ་ཉིད་མཐའ་བྲལ་དབྱིངས་ལས་མི་གཡོ་བར། །རྟོག་པ་སྤྱོད་པ་བྱིས་པས་མི་མཐོང་སྦེད། །དེ་ཕྱིར་སྦེད་བྱེད་ཁྭ་ཏའི་དབུ་ལ་ཕྱག་འཚལ་བསྟོད། །མཉམ་ཉིད་དབྱིངས་ལས་ཡེ་ཤེས་ཤུགས་ཀྱིས་མགྱོགས། །ཞི་གནས་སྤྱན་ཟླུམ་འགྲོ་བའི་དོན་ཚོགས་འབྱུང་། །ལས་འབྲས་བདེན་པས་ཡིད་ཆེས་དད་པར་བསྒྱུར། །དེ་ཕྱིར་མགྱོགས་བྱེད་པུ་ཤུད་དབུ་ལ་ཕྱག་འཚལ་བསྟོད། །ངེས་པའི་དངོས་པོ་འཛིན་པ་མེད་པར་བསྒྱུར། །ལྷག་མཐོང་ཡེ་ཤེས་དབྱིངས་ལ་མཉམ་པར་གནས། །ཞི་གནས་རྟེང་པོའི་འཛིན་པས་མི་འཕྲོག་པ། །དེ་ཕྱིར་ཕྲ་མེན་ཁྲ་ཡི་དབུ་ལ་ཕྱག་འཚལ་བསྟོད། །འདྲེས་པའི་དངོས་པོ་མ་འདྲེས་དྲན་པར་བསྒྱུར། །འབུམ་ཕྲག་ཏིང་འཛིན་ལྷག་མཐོང་སོ་སོར་གསལ། །ཡེ་ཤེས་དབྱིས་ལས་སྤྲུལ་པ་བསམ་མི་ཁྱབ། །དེ་ཕྱིར་སྒྲོན་མེ་ཕ་ཝང་དབུ་ལ་ཕྱག་འཚལ་བསྟོད། །ཆོས་རྣམས་འབྱེད་པ་མེད་པར་གནས་བསྒྱུར་ལ། །མཉམ་པ་ཉིད་ཀྱི་ངང་དུ་ལོག་ལྟ་སེལ། །རིག་པ་སྐྱེན་པས་སེམས་ཉིད་རྩེ་མོ་གཅོད། །དེ་ཕྱིར་གཅོད་བྱེད་སྲེ་མོང་མགོ་ལ་ཕྱག་འཚལ་བསྟོད། །ས་འོག་སྤྱོད་པས་རིག་པ་གནས་བསྒྱུར་བ། །ཕྲིན་ལས་བྱེ་བྲག་མང་པོ་ཅི་མཛད་ཀྱང་། །ཕྱག་རྒྱ་བཞི་ལས་མི་བསྐྱོད་དུར་ཁྲོད་ཉུལ། །དེ་ཕྱིར་མགྱོགས་བྱེད་བྱི་བའི་དབུ་ལ་ཕྱག་འཚལ་བསྟོད། །འཁོར་བ་རྡོ་རྗེར་བརྗོད་པས་མྱ་ངན་འདས། །ཆོས་སྐུ་རྡོ་རྗེར་བརྗོད་པས་མཐའ་གཉིས་སྤངས། །བརྗོད་མེད་སྤྲོས་བྲལ་དོན་དམ་ཚིག་ལས་འདས། །དེ་ཕྱིར་བརྗོད་མེད་ལྕགས་ཀྱུ་མ་ལ་ཕྱག་འཚལ་བསྟོད། །ཆོས་ཉིད་རྡོ་རྗེ་དངོས་པོ་མཚན་མ་འཇོམས། །ཡེ་ཤེས་རྡོ་རྗེས་གཟུང་འཛིན་ལོག་རྟོག་བསྲེག །ཕྱག་མཚན་རྡོ་རྗེ་དྲེགས་པ་ལྷ་བདུད་འཇོམས། །དེ་ཕྱིར་འཇོམས་བྱེད་ཞགས་པ་མ་ལ་ཕྱག་འཚལ་བསྟོད། །འཆི་མེད་རྡོ་རྗེ་ཡུལ་སེམས་འགག་པ་མེད། །གྲུབ་པའི་རྡོ་རྗེས་བསམ་པའི་འབྲས་བུ་ཐོབ། །ཐུགས་རྗེའི་རྡོ་རྗེས་འཁོར་བའི་རྩ་བ་གཅོད། །དེ་ཕྱིར་གཙོ་མཆོག་ལྕགས་སྒྲོག་མ་ལ་ཕྱག་འཚལ་བསྟོད། །ཡེ་ཤེས་འཁྲོལ་བྱེད་ཡོན་ཏན་རྒྱ་མཚོ་འགྲུབ། །ཐུགས་རྗེ་འཁྲོལ་བྱེད་འཇིག་རྟེན་དབང་དུ་སྡུད། །ཡེ་ཤེས་རྡོ་རྗེས་གཉིས་མེད་དབྱིངས་སུ་སྡུད། །དེ་ཕྱིར་དྲིལ་འཁྲོལ་ཁྲ་མགོ་མ་ལ་ཕྱག་འཚལ་བསྟོད། །དཔལ་རྡོ་རྗེ་ཕུར་པའི་དཀྱིལ་འཁོར་གྱི་ལྷ་རྣམས་ཀྱི་གཞི་བསྟོད་རྫོགས་སོ།། །།