རོང་ཕུར་བླ་མ་བརྒྱུད་པའི་གསོལ་འདེབས། རྒྱལ་སྲས་གཞན་ཕན་མཐའ་ཡས།
༈ རོང་ཕུར་བླ་མ་བརྒྱུད་པའི་གསོལ་འདེབས་བཞུགས། སྟོན་པ་ཀུན་བཟང་རྡོ་རྗེ་གཞོན་ནུ་དང་། །བྲམ་ཟེ་ཆེན་པོ་མི་ཡི་ཐོད་པ་ཅན། །མཁའ་འགྲོའི་གཙོ་མོ་ལས་ཀྱི་དབང་མོ་ཆེ། །པྲ་བྷ་ཧསྟི་རྣམས་ལ་གསོལ་བ་འདེབས། །ཨུ་པ་དཱ་ན་ཨོ་རྒྱན་པདྨ་འབྱུང་། །རྡོ་རྗེ་བདུད་འཇོམས་དཔལ་གྱི་དབང་ཕྱུག་དང་། །དཔལ་གྱི་མེ་ཏོག་གཙུག་ཏོར་གཞོན་ནུའི་ཞབས། །ཡོན་ཏན་གྲགས་པ་རྣམས་ལ་གསོལ་བ་འདེབས། །གུ་ཎ་རཏྣ་དཔལ་གྱི་རིན་ཆེན་དང་། །རིན་ཆེན་ཚུལ་ཁྲིམས་རོང་ཟོམ་ཆོས་བཟང་ཞབས། །གཟི་འབར་སྟོན་དར་སྟོན་སེང་ཇོ་སྲས་དང་། །ར་སྤེ་འབུམ་དཔལ་རྣམས་ལ་གསོལ་བ་འདེབས། །ཀུན་དགའ་མེ་དཔུང་ཆོས་བཞད་གསེར་འོད་དང་། །འོད་ཟེར་འབུམ་དང་འབུམ་རྒོད་དར་མ་བརྟན། །སྲ་བརྟན་རྡོ་རྗེ་བསོད་ཤེ་སེདྒེ་དཔལ། །དགེ་འདུན་རིན་ཆེན་རྣམས་ལ་གསོལ་བ་འདེབས། །དགེ་རྒྱལ་རྡོ་རྗེ་སེངྒེ་བློ་གྲོས་བཟང་། །པ་ར་ཧི་ཏ་བཛྲ་ཤཱི་ལ་དང་། །ཕྲིན་ལས་ལྷུན་གྲུབ་འགྱུར་མེད་རྡོ་རྗེའི་ཞབས། །འགྱུར་མེད་རྒྱ་མཚོ་རྣམས་ལ་གསོལ་བ་འདེབས། །རིན་ཆེན་རྣམ་རྒྱལ་པདྨ་བསྟན་འཛིན་དང་། །ཨོ་རྒྱན་བསྟན་འཛིན་ཕྲིན་ལས་རྣམ་པར་རྒྱལ། །དཔལ་འབྱོར་རྒྱ་མཚོ་རིག་འཛིན་བཟང་པོ་དང་། །པདྨ་མངྒ་རྣམས་ལ་གསོལ་བ་འདེབས། །གཞན་ཕན་མཐའ་ཡས་པདྨ་རྡོ་རྗེ་དང་། །བསྟན་པའི་ཉི་མ་འཇིགས་མེད་ཀུན་དགའ་དཔལ། །མདོ་སྔགས་བསྟན་འཛིན་རིགས་བདག་འཁོར་ལོའི་མགོན། །ཕན་བདེའི་འོད་ཟེར་ཞབས་ལ༴ བརྒྱུད་སྲོལ་ཀུན་འདུས་རྩ་བའི་བླ་མ་དང་། །མཐའ་ཡས་དངོས་གྲུབ་མཆོག་སྩོལ་ཡི་དམ་ལྷ། །བར་ཆད་ཀུན་སེལ་དཔའ་བོ་མཁའ་འགྲོའི་ཚོགས། །ཆོས་སྐྱོང་སྲུང་མར་བཅས་ལ༴ ཐུགས་རྗེའི་བདག་ཉིད་མགོན་པོ་མཆོག་རྣམས་ཀྱིས། །བདག་རྒྱུད་སྨིན་ཅིང་གྲོལ་བར་མཛད་པ་དང་། །ཟབ་མོའི་ལམ་གྱི་འགལ་རྐྱེན་ཀུན་ཞི་ཞིང་། །མཐུན་རྐྱེན་ཡིད་བཞིན་འགྲུབ་པར་བྱིན་གྱིས་རློབས། །ལམ་བཟང་ཚེ་འདིར་སྒྲུབ་ལ་བརྩོན་པའི་མཐུས། །ཐུན་མོང་ལམ་ལྔ་ཐུན་མིན་རིག་འཛིན་བཞིས། །བགྲོད་ནས་ཧེ་རུ་ཀ་དཔལ་མངོན་བྱས་ཏེ། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་རྒྱལ་སྲས་གཞན་ཕན་མཐའ་ཡས་ཀྱིས་མཛད་པའི་བརྒྱུད་འདེབས་ལ་བརྒྱུད་པའི་ཁྱད་པར་གྱིས་གཞན་ཕན་མཐའ་ཡས་ནས་རིགས་བདག་འགྱུར་མེད་ཕན་བདེའི་འོད་ཟེར་བར་ཁ་སྐོང་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།