སྔ་འགྱུར་བཀའ་མའི་ཆོས་སྡེའི་གླེགས་བམ་བཅུ་གསུམ་པ།

གླེགས་བམ། པ༽

དྷརྨཱ་ཤྲཱི། སྨིན་གླིང་ཁྲི་ཆེན་པདྨ་དབང་རྒྱལ། སྨིན་གླིང་གཏེར་ཆེན། འགྱུར་མེད་རྡོ་རྗེ། པདྨ་བཛྲ། འཇིགས་མེད་གླིང་པ། པདྨ་འགྱུར་མེད་རྒྱ་མཚོ། ཀཿཐོག་སི་ཏུ་ཆོས་ཀྱི་རྒྱ་མཚོ། ངག་དབང་དཔལ་བཟང་།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

རྒྱུད་ཐམས་ཅད་ཀྱི་རྒྱལ་པོ་དཔལ་སྒྱུ་འཕྲུལ་རྩ་བའི་རྒྱུད་གསང་བ་སྙིང་པོ།

རྒྱུད་ཐམས་ཅད་ཀྱི་རྒྱལ་པོ་དཔལ་སྒྱུ་འཕྲུལ་རྩ་བའི་རྒྱུད་གསང་བ་སྙིང་པོ་བཞུགས།

བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་ན། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས། ལོངས་སྤྱོད་ཆེན་པོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། མ་ལུས་མི་ལུས་ལུས་པ་མེད་པ་ཐམས་ཅད་དང་། སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། འོག་མིན་གྱི་གནས་མཐའ་དང་དབུས་མེད་པ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ། ཡོན་ཏན་དཔག་ཏུ་མེད་པར་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད། སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཡེ་ཤེས་བསམ་གྱིས་མི་ཁྱབ་པའི་ཡེ་ཤེས་རིན་པོ་ཆེའི་དབྱིབས་དང་། ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། སྤགས་པ། ཚད་དཔག་ཏུ་མེད་པ། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ། མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བཀླུབས་པ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། མི་འཇིགས་པ་སེང་གེའི་ཁྲི་དང་། སྟོབས་གླང་པོ་ཆེའི་ཁྲི་དང་། རྫུ་འཕྲུལ་རྟའི་ཁྲི་དང་། དབང་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རང་བཞིན་གྱིས་འོད་གསལ་བ་ཉི་ཟླའི་དཀྱིལ་འཁོར་དང་། གོས་པ་མེད་པ་པདྨ་རིན་པོ་ཆེའི་གདན་ལ། སྐུ་མདུན་དང་རྒྱབ་མེད་པ། ཐམས་ཅད་དུ་ཞལ་ཐལ་ལེ་བར་གསལ་ཞིང་མཚན་དང་དཔེ་བྱད་དང་ལྡན་པ། བསམ་གྱིས་མི་ཁྱབ་པ་ཐམས་ཅད་དུ། སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་དང་། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ། བཙུན་མོ་དམ་པ་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། བསྐྱོད་པའི་དབྱིངས་ལ་སོགས་པ་བཙུན་མོའི་ཚོགས་དང་གཉིས་སུ་མེད་པར་ཆོས་ཀྱི་དབྱིངས་ཀུན་ཏུ་མཐའ་ཡས་པར་ཁྱབ་པ་ནི། འདི་ལྟ་སྟེ། དཔེར་ན་ཏིལ་གྱི་གོང་བུ་བཞིན་དུ་གང་ནས་ཁྱབ་པར་བཞུགས་སོ། །དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། བྱང་ཆུབ་ཆེན་པོ་རྡོ་རྗེ་ཐོས་པ་དང་། བྱང་ཆུབ་ཆེན་པོ་རྡོ་རྗེ་སྣོམ་པ་དང་། བྱང་ཆུབ་ཆེན་པོ་རྡོ་རྗེ་མྱོང་བ་དང་། བཙུན་མོ་མཐོང་བར་བྱ་བ་དང་། མཉན་པར་བྱ་བ་དང་། བསྣམ་པར་བྱ་བ་དང་། མྱོང་བར་བྱ་བའི་ཚོགས་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། བྱང་ཆུབ་ཆེན་པོ་རྡོ་རྗེ་ཐོས་བྱེད་དང་། བྱང་ཆུབ་ཆེན་པོ་རྡོ་རྗེ་སྣོམ་བྱེད་དང་། བྱང་ཆུབ་ཆེན་པོ་རྡོ་རྗེ་མྱོང་བྱེད་དང་། བཙུན་མོ་འདས་པ་དང་། ད་ལྟར་དང་། འབྱུང་བ་དང་། མ་བྱོན་པའི་ཚོགས་དང་། འཇོམས་པ་ཆེན་པོ་རྡོ་རྗེ་རེག་པ་དང་འཇོམས་པ་ཆེན་པོ་རྡོ་རྗེ་རེག་བྱེད་དང་། འཇོམས་པ་ཆེན་པོ་རྡོ་རྗེ་རེག་བྱ་དང་། འཇོམས་པ་ཆེན་པོ་རྡོ་རྗེ་རེག་ཤེས་དང་། བཙུན་མོ་རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་པ་ལ་སོགས་པ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་གསང་བའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་རྡོ་རྗེ་ལས་ཕྱུང་ངོ་། །ཨེ་ཨེ་མ་ཨེ་མ་ཧོཿ དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དོ། །ཞེས་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གླེང་གཞིའི་ལེའུ་སྟེ་དང་པོའོ།། ༈ །། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེས། བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཞུགས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་མ་ལུས་པ་ཐམས་ཅད་གཅིག་གི་རང་བཞིན་དབྱེར་མེད་པས་དེ་བཞིན་གཤེག་པ་ཉིད། དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཨེ་མ་ཧོཿ རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་བརྗོད་པས། དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོ། བཅོམ་ལྡན་འདས་ཡིད་ཀུན་ཏུ་བཟང་པོ་དང་གཉིས་སུ་མེད་པར་གྱུར་ནས། ཆེད་དུ་བརྗོད་པ་འདི་བརྗོད་དོ། །ཀྱེ་མའོ་ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བས་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་བརྗོད་པས། ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །དེ་ནས་གཉིས་སུ་མེད་པའི་བདག་ཉིད་ཆེན་པོས་ཡེ་ནས་སངས་རྒྱས་པའི་སེམས་ཡེ་ཤེས་སུ་བསྐྱེད་པ་འདི་གསུངས་སོ། །ཨེ་མ་ཧོ་ངོ་མཚར་རྨད་ཀྱི་ཆོས། རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་བརྗོད་པས། དེ་བཞིན་གཤེགས་པ་ཐམས་ཅད་དང་བཙུན་མོའི་ཚོགས་ཐམས་ཅད་ཀྱང་མཉེས་པས་ཁྱབ་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་དང་། བཙུན་མོའི་ཚོགས་ཐམས་ཅད་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་བརྗོད་པས། དེ་བཞིན་གཤེགས་པ་ཐམས་ཅད་དང་། ཆོས་ཐམས་ཅད་ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མེད་ནའང་། འགྲོ་བའི་རྣམ་པར་རྟོག་པ་མ་རིག་པ་ལས། འགྲོ་བ་ལྔའི་རིས་བསམ་གྱིས་མི་ཁྱབ་པར་སྨིན་པ་ལ། ཐུགས་རྗེ་ཆེན་པོ་སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས། ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་གླེང་ངོ་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དོན་དམ་པ་དང་ཀུན་རྫོབ་ཀྱི་བྱང་ཆུབ་སེམས་ཡེ་ཤེས་སུ་བསྐྱེད་པའི་ལེའུ་སྟེ་གཉིས་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་ལས། ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བའི། རིག་པའི་སྐྱེས་བུ་ཐུབ་པ་དྲུག །དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས་འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དེ། བལྟམས་པ་དང་། རབ་ཏུ་བྱུང་བ་དང་། དཀའ་ཐུབ་མཛད་པ་དང་། སངས་རྒྱས་པ་དང་། བདུད་བཏུལ་བ་དང་། ཆོས་ཀྱི་འཁོར་ལོ་བསྐོར་བ་དང་། ཆོ་འཕྲུལ་ཆེན་པོ་བསྟན་པ་དང་། མྱ་ངན་ལས་འདས་པ་ལ་སོགས་པར་སྟོན་པའི་ཐུབ་པས། དུས་གཞི་ཀུན་ཏུ་མཁྱེན་པ་དང་། ཐམས་ཅད་ཀྱི་སེམས་ཀྱི་རྒྱུད་ཀུན་ཏུ་མཁྱེན་པ་དང་། རྫུ་འཕྲུལ་གྱི་སྤྱན་གྱིས་ཐམས་ཅད་ཀུན་ཏུ་གཟིགས་པ་དང་། རྫུ་འཕྲུལ་གྱི་སྙན་གྱིས་ཀུན་ཏུ་གསན་པ་དང་། རྫུ་འཕྲུལ་གྱི་ཆོ་གས་ཀུན་ཏུ་དོན་སྤྱོད་པ་དང་། ཟག་པ་མེད་པ་ཀུན་ཏུ་བཟང་པོའི་སྤྱོད་པ་རྫོགས་པའི་མངོན་པར་ཤེས་པ་ཆེན་པོ་དྲུག་དང་། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཀུན་ཏུ་ཞལ་བསམ་གྱིས་མི་ཁྱབ་པ་དང་། ཀུན་ཏུ་གསུང་བསམ་གྱིས་མི་ཁྱབ་པ་དང་ལྡན་པ། བསམ་གྱིས་མི་ཁྱབ་པ་གྲངས་མེད་པ་ཕྱོགས་བཅུར་སྣང་བར་གྱུར་ཏོ། །ཐམས་ཅད་ཀྱང་འདི་ལྟ་སྟེ། འདུལ་བའི་དབང་གིས་ལྷ་དང་མིའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་བྱང་ཆུབ་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། བླ་ན་མེད་པའི་ཐེག་པ་དང་། མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར། ཆོས་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །དེ་དག་ཐམས་ཅད་ཀྱང་གཟུང་བ་དང་འཛིན་པའི་ཕྱི་ནང་གི་རྟེན་ཅིང་འབྲེལ་བར་འབྱུང་བ་འཛིན་པ་འཁྲུལ་པ་ལས་འདོགས་པ་དང་། ལས་དང་ལས་ཀྱི་འབྲས་བུ་ཆུད་མི་ཟ་བ་དང་། ལས་དང་ལས་ཀྱི་འབྲས་བུས་མི་གོས། གོས་པར་མི་འགྱུར། གོས་སུ་མེད་པར་སྟོན་པའི་མཐར་ཐུག་གོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཇི་སྙེད་འཇིག་རྟེན་འཁྲུལ་པའི་ཆོས། །མ་རིག་རྟོག་པའི་གཟུང་འཛིན་གྱིས། །ཕྱི་ནང་རྟེན་འབྲེལ་གཉིས་སུ་འཁོར། །མི་མཐུན་བདེ་སྡུག་མྱོང་བར་འགྱུར། །རང་བཞིན་ཉིད་ལས་ཉམས་པ་མེད། །ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །རྣམ་དག་དབྱིངས་ཉིད་ཚུལ་གཅིག་གོ། །བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་པས། །གཞན་དུ་གཡོ་བ་ཅི་ཡང་མེད། །ལོག་རྟོག་རྒྱུ་འབྲས་རྒྱུན་ཉིད་ཀྱང་། །གཞི་རྩ་མེད་དབྱིངས་སྐད་ཅིག་མ། །རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཡང་དག་རྟོགས་པས་རབ་བརྟགས་ན། །རང་བཞིན་མེད་ལས་ཅིར་ཡང་འགྲུབ། །སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཆོས་རྣམས་མིང་དུ་བཏགས་པ་ཙམ། །སྟོན་པས་དོན་དང་མཐུན་ཕྱོགས་སུ། །མིང་དང་ཚིག་ཏུ་བཏགས་ནས་བསྟན། །སྟོན་མིང་ཚིག་ལ་དངོས་པོ་མེད། །ཅེས་བརྗོད་དོ། །དེ་ནས་དེ་བཞིན་གཤེགས་པ་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱིས་གསང་བ་འདི་ཉིད། སྐུ་དང་གསུང་དང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿ སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་རྡོ་རྗེ་གསང་བའི་ཚིག་ཏུའོ། །ཞེས་བརྗོད་པས། ཐུབ་པ་དྲུག་གི་སྤྲུལ་པ་གྲངས་མེད་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཡང་དེ་དག་ཏུ་འདུས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཆོས་ཐམས་ཅད་གཏན་ལ་ཕབ་པའི་ལེའུ་སྟེ་གསུམ་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས། མཉམ་པ་ཆེན་པོའི་ཚུལ་རྡོ་རྗེའི་དབྱིངས་སུ། ཆོས་ཐམས་ཅད་ཡེ་ནས་སངས་རྒྱས་པའི་ཏིང་ངེ་འཛིན་ལས་མི་གཡོ་བར། ཆོས་ཐམས་ཅད་མིང་ཙམ་དུ་གནས་པའི་ཡི་གེ་ཕྲེང་བའི་འཁོར་ལོ་ཞེས་བྱ་བ་འདི། སྐུ་དང་གསུང་ཐུགས་རྡོ་རྗེ་ལས་ཕྱུང་ངོ་། །ཨཿ རབ་ཏུ་བརྟན་གྱུར་ཨ་དཀར་ལས། ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་བྱུང་ཡེ་ཤེས་རྒྱུ་ཡིན་ནོ། །ཨཿ ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ཝ་ར་ལ། ཤ་ཥ་ས་ཧ། ཀྵཿ ཨི་ཨཱི། ཨུ་ཨཱུ། ཨེ་ཨཻ། ཨོ་ཨ། འདི་དག་ཕྱུང་བས། འཇིག་རྟེན་དྲུག་གི་ཕྱོགས་བཅུ་མཐའ་ཡས་པ། རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས་ནས། ཆོས་ཐམས་ཅད་མིང་གི་མཚན་ཉིད་ཙམ་དུ་གྱུར་ཏོ། །ཧོཿ དེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེ་ཕྲེང་བ་ཉིད་ལ་གནས། །ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨེ་མ་ཧོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ཀྱི། །རོལ་པ་ཅིར་ཡང་སྤྲུལ་ཅིང་སྟོན། །ཕྱོགས་བཅུ་དུས་བཞིར་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །སེམས་ཀྱི་རང་བཞིན་ཡི་གེ་སྟེ། །ཡི་གེ་དངོས་པོ་ཡོད་མ་ཡིན། །དམིགས་མེད་དེ་ཉིད་སྣ་ཚོགས་པའི། །སྐུ་གསུང་ཐུགས་ཀྱི་འཁོར་ལོ་ཆེ། །སྐུ་གསུང་ཐུགས་ནི་ངོ་མཚར་གྱི། །ཡ་མཚན་འཕྲུལ་ཆེན་རབ་འགུགས་པའོ། །དབྱིངས་ལ་དབྱིངས་ཀྱིས་བྲིས་པ་སྟེ། །ཡི་གེ་ཞེས་ནི་དེ་ཕྱིར་བརྗོད། །མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཨ་ནི་སྐྱེ་མེད་དེ་བཞིན་ཉིད། །ཋ་ནི་སྒྱུ་འཕྲུལ་རྡོ་རྗེ་ཉིད། །ཊ་ནི་སྣང་བའི་སྒྱུ་འཕྲུལ་ཉིད། །ཌ་ནི་སྒྱུ་འཕྲུལ་ཡིད་བཞིན་ཉིད། །ཌྷ་ནི་སྒྱུ་འཕྲུལ་རྣམ་དག་ཉིད། །ཎ་ནི་ཀུན་ཏུ་སྒྱུ་འཕྲུལ་ཉིད། །ཐ་ནི་དྲྭ་བ་མངོན་རྫོགས་ཉིད། །ཏ་ནི་དྲྭ་བས་བརྟན་པ་ཉིད། །ད་ནི་དྲྭ་བས་ལྷམ་མེ་ཉིད། །དྷ་ནི་དྲྭ་བས་འཁྲིལ་བ་ཉིད། །ན་ནི་དྲྭ་བས་ཀུན་ཏུ་འགྱུར། །ཀ་ནི་སྤྱན་གྱི་ཐུགས་ཀྱི་མཆོག །ཁ་ནི་སྙན་གྱི་ཐུགས་ཀྱི་མཆོག །ག་ནི་ཤངས་ཀྱི་ཐུགས་ཀྱི་མཆོག །གྷ་ནི་ལྗགས་ཀྱི་ཐུགས་ཀྱི་མཆོག །ང་ནི་ཐུགས་ཀྱང་འཇིག་བྱེད་པའོ། །ཙ་ནི་སྤྱན་གྱི་སྐུ་ཡི་མཆོག །ཚ་ནི་སྙན་གྱི་སྐུ་ཡི་མཆོག །ཛ་ནི་ཤངས་ཀྱི་སྐུ་ཡི་མཆོག །ཛྷ་ནི་ལྗགས་ཀྱི་སྐུ་ཡི་མཆོག །ཉ་ནི་སྐུ་ཡང་འཇིག་བྱེད་པའོ། །པ་ནི་སྤྱན་གྱི་གསུང་གི་མཆོག །ཕ་ནི་སྙན་གྱི་གསུང་གི་མཆོག །བ་ནི་ཤངས་ཀྱི་གསུང་གི་མཆོག །བྷ་ནི་ལྗགས་ཀྱི་གསུང་གི་མཆོག །མ་ནི་གསུང་ཡང་འཇིག་པར་བྱེད། །ཡ་ནི་སྐྱེ་བ་རྣམ་པར་དག །ཝ་ནི་གནས་པ་དག་པ་ཡིན། །ར་ནི་འཇིག་པ་དག་པ་སྟེ། །ལ་ནི་སྟོང་པ་དག་པའོ། །ཤ་ནི་རྟག་པ་དག་པ་སྟེ། །ཥ་ནི་ཆད་པའང་ཡོད་མ་ཡིན། །ས་ནི་མཐའ་བྲལ་བདག་མེད་པ། །ཧ་ནི་མཚན་མ་མེད་པ་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཨི་ནི་རྡུལ་སྙེད་ལྷ་རྣམས་སུ། །ཨཱི་ནི་རྡུལ་སྙེད་ལྷ་མ་ཡིན། །ཨུ་ནི་རྡུལ་སྙེད་མི་རྣམས་སུ། །ཨཱུ་ནི་རྡུལ་སྙེད་བྱོལ་སོང་རྣམས། །ཨེ་ནི་རྡུལ་སྙེད་ཡི་དྭགས་སུ། །ཨཻ་ནི་རྡུལ་སྙེད་དམྱལ་བ་རྣམས། །ཨོ་ནི་ཐམས་ཅད་འཇིག་པར་བྱེད། །ཨ་ནི་ཐམས་ཅད་ཞིག་པ་ཡིན། །ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་བརྗོད་དོ། །ཨ་ཧོཿ དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད། སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿ ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་འཚོགས་པའི་མཐུ་ཆེན་ཡིན། །ཨ་ཧོཿ རྡོ་རྗེ་གསང་བའི་ཚིག་ཏུའོ། །ཞེས་བརྗོད་པས། དེ་བཞིན་གཤེགས་པ་ཐམས་ཅད་ཡི་གེའི་འཁོར་ལོར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡི་གེ་ཕྲེང་བའི་འཁོར་ལོ་བཀོད་པའི་ལེའུ་སྟེ་བཞི་པའོ།། ༈ །།དེ་ནས་ཡི་གེ་འཁོར་ལོའི་སྤྲིན་བཀོད་པ་ལས་སྒྱུ་འཕྲུལ་རྣམ་པར་འཕྲོ་བ་འདི་ཆེད་དུ་བརྗོད་དོ། །རྩ་བ་མེད་པའི་སེམསས་ཉིད་ནི། །ཆོས་རྣམས་ཀུན་ཀྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཅིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྟུང་བར་འགྱུར། །དགུག་དང་བཏང་དང་བཅིང་དང་དགྲོལ། །གསོ་དང་བསད་དང་འཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །དེ་ཉིད་ཡེ་ཤེས་རང་སྣང་བའི། །མིང་ཚིག་གཟུགས་སོགས་ཡིད་བཞིན་གྱིས། །མུན་ལ་སྣང་བྱུང་ཇི་བཞིན་དུ། །འགྱུར་བ་གསེར་འགྱུར་སྨན་གྱི་ཚུལ། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །དངོས་རྣམས་ཉིད་ན་དངོས་མེད་པར། །རྟོགས་པའི་དབང་སྒྱུར་ཏིང་འཛིན་ཡིན། །གང་གིས་དམིགས་མེད་མི་ཤེས་པ། །དེ་ཡིས་ཆོས་ཀྱི་དབྱིངས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པས་དམིགས་མེད་ཤེས་པར་གྱིས། །གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་བརྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཐབས་ལས་ཐབས་བྱུང་ཐབས་བསམ་ཡས། །ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་བརྗོད་པས་དེ་བཞིན་གཤེགས་པ་ཉིད་གཟིགས་མོས་མཉེས་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་དྲྭ་བ་བསྒྲུབ་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པའི་བདག་ཉིད་ཐམས་ཅད་ཀྱིས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ། ཉིད་ཀྱི་ཆེ་བའི་དཀྱིལ་འཁོར་དབྱུང་བར་བཞེད་ནས། ཆེད་དུ་བརྗོད་པ་འདི་བརྗོད་དོ། །ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་བཅས་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །མཛེས་ཚུལ་མཉེས་པའི་ཡོ་བྱད་འཛིན། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །སྐུ་ཡི་ཕྱག་རྒྱ་ཆེ་མཆོག་ནི། །དེ་བཞིན་དབྱིངས་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །མ་གཡོས་བཞིན་དུ་སྣ་ཚོགས་པའི། །དེའི་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །དཔེར་ན་མེ་ལོང་ཆུ་ཟླ་བཞིན། །དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་སྣང་བར་བསྟན། །ཉན་ཐོས་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུའི་ཚུལ། །གཞན་ཡང་ཐེག་མཆོག་རིམ་པ་བཞིན། །འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱང་། །བླ་མེད་བྱང་ཆུབ་ཡང་དག་ཐོབ། །ཆོས་སྐུ་དཔག་མེད་བརྗོད་དུ་མེད། །ལོངས་སྐུ་ཟད་མེད་ཡིད་བཞིན་གཏེར། །སྤྲུལ་པ་བྱེ་བ་བསམ་མི་ཁྱབ། །མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཐབས་དང་ཤེས་རབ་ས་ཡི་མཆོག །དེ་ལ་སོགས་པ་བསམ་ཡས་མཆོག །སྐྱེ་ཤི་མེད་པའི་གཡུང་དྲུང་སྐུ། །ཉོན་མོངས་ཀུན་གྱི་ཞིང་དུ་གནས། །ཟད་མི་ཤེས་པའི་གཏེར་དུ་འགྱུར། །རྡོ་རྗེ་རིག་པ་འཛིན་པའི་སྐུ། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་སྐུ། །དེ་ཚེ་སྐུ་ལྔ་ཀུན་ཀྱང་རྫོགས། །ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པ་ཐམས་ཅད་དུ་དཀྱིལ་འཁོར་བརྗོད་ཀྱིས་མི་ལང་བ། ཞིང་གི་རྡུལ་སྙེད་དུ་གསལ་བར་གྱུར་ཏོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿ དམིགས་བྱ་དམིགས་བྱེད་མི་དམིགས་དཔག་མེད་བསམ་མི་ཁྱབ། ཡེ་ཤེས་རང་རིག་དཀྱིལ་འཁོར་སྣ་ཚོགས་བརྗོད་མི་ལང་། །མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཡེ་ནས་ཀུན་གསལ་དཀྱིལ་འཁོར་རྣམ་སྤྲོས་སྤྲོས་པ་མེད། །ཧོཿ ཞེས་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་སྤྲོས་པའི་ལེའུ་སྟེ་དྲུག་པའོ།། ༈ །།དེ་ནས་དེ་བཞིན་གཤེགས་པ་བཙུན་མོའི་ཚོགས་དང་བཅས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །བྷྲཱུཾ་བི་ཤྭ་བི་ཤྭ་དྡྷེ། ཧཱུཾ་བཛྲ་དྷྲྀཀ །ༀ་ཛི་ན་ཛིཀ །སྭཱཾ་རཏྣ་དྷྲྀཀ །ཨཱཾ་ཨ་རོ་ལིཀ །ཧཱཾ་པྲ་ཛྙཱ་དྷྲྀཀ །མཱུ་དྷཱ་ཏྭཱི་ཤྭ་རཱི། ལཱཾ་དྭེ་ཥ་ར་ཏི། མཱཾ་མོ་ཧ་ར་ཏི། པྱཱཾ་རཱ་ག་ར་ཏི། ཏཱཾ་བཛྲ་ར་ཏི། ཀྵཱིཾ་ཧི་རཱ་ཛ་ཡཿ ཏྲཾ་ཨཱ་གརྦྷ་ཡཿ ཧྲི་ཧ་ཧཱུཾ་པདྨ་པ་ད་མཿ ཛིཾ་ཀུ་རུ་པཱ་ཎ་ཧྲཱིཿ ཧཱུཾ་ལཱ་སྱེ་ས་མ་ཡ་སྟྭཾཿ ཏྲཱཾ་མཱ་ལྱེ་ས་མ་ཡ་ཧོཿ ཧྲཱི་གཱི་ཏི་རཱ་ཀོ྅་ཧཾ། ཨ་ནྲྀ་ཏི་རཱ་ག་ཡཱ་མི། མཻ་དྷཱ་ར་ཎེ་སྭཱ་ཧཱ། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་ས་རཱ་ཛ་ཡ་སྭ་ཧཱ། མུཾ་ཤྲཱི་ཨཾ་རཱ་གཱ་ཡ་སྭཱ་ཧཱ། ཛཿདྷཱུ་པེ་པྲ་བེ་ཤ །ཧཱུཾ་པུཥྤེ་ཨ་བེ་ཤ །བཾ་དཱི་པ་སུ་ཁི་ནཱི། ཧོཿགནྡྷེ་ཙིཏྟ། ཧཱུཾ་ཡ་༼༡༽མཱནྟ་ཀྲྀཏ་ཕཊ། ཧཱུཾ་བིགྷྣཱནྟ་༼༤༽ཀྲྀཏ་ཕཊ། ཧཱུཾ་པདྨཱནྟ་༼༣༽ཀྲྀཏ་ཕཊ། ཧཱུཾ་པྲཛྙཱནྟ་༼༢༽ ཀྲྀཏ་ཕཊ། ༀ་མ་ཧཱ་བཛྲ་༼༥༽དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུཾ་ཏྲཱུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ན་ཡེ་སྭཱ་ཧཱ། ༀ་ཨེ་ཧྱེ་ཧི་བྷ་ག་ཝཱན། མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿ ས་མ་ཡ་སྟྭཾ། ཛཿཧཱུཾ་བཾ་ཧོཿ ༀ་ཨཱ་ཱཧཱུཾ་སྭཱ་ཧཱ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། ༀ་ཨཱ་ཧཱུཾ་སྭཱ་ཧཱ། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོཿ ཛཿ ཧཱུཾ་བཾ་ཧོཿ ཞེས་བརྗོད་པས། གསུང་གི་དཀྱིལ་འཁོར་འདི་དག་གིས། །འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྲགས་སོ། །རབ་ཏུ་གྲགས་སོ། །ཀུན་ཏུ་གྲགས་སོ། །དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་དང་། བྱ་བ་མོ་རྡོ་རྗེ་གཉིས་སུ་མེད་པའི་དཀྱིལ་འཁོར་ལ་ཐིམ་པར་མཛད་དོ། །དེ་ནས་ཕྱོགས་བཅུ་དུས་བཞིའི་དེ་བཞིན་གཤེགས་པའི་བདག་ཉིད་ཆེན་པོས་བདག་ཉིད་ཆེན་པོའི་ཡེ་ཤེས་དང་བྱིན་བསྡུ་བ་ཞེས་བྱ་བ་འདི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲྭ་བ་ལས་ཕྱུང་ངོ་། །ༀ་མ་ཧཱ་ཤཱུ་ཱུནྱ་ཏཱ་ཛྙཱ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༡༽ཀོ྅་ཧཾ། ༀ་མ་ཧཱ་པྲཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་བ་ཨཱཏྨ་༼༣༽ཀོ྅་ཧཾ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༢༽ཀོ྅་ཧཾ། ༀ་མ་ཧཱ་ཀྲྀ་ཏྱཱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༤༽ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱ ཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་ཝ་བྷཱ་ཝ་ཨཱཏྨ་ཀོ ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་པས། ཐིམ་པར་གྱུར་གསལ་བར་གྱུར་འབར་བར་གྱུར་ཏོ། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསུང་། །སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །གསུང་གཅིག་དཀྱིལ་འཁོར་ཡན་ལག་ནི། །བསམ་གྱིས་མི་ཁྱབ་ཀུན་ཏུ་ཁྱབ། །སྒྲ་དང་མིང་ཚིག་སོ་སོར་གྲགས། །ཐམས་ཅད་གསུང་གི་ཕྱག་རྒྱའི་མཆོག །རྒྱུད་མཆོག་སྒྱུ་འཕྲུལ་དྲྭ་བ་ལས། །བདེ་ལྡན་གསུང་གི་དོན་འབྱུང་བའང་། །ཐམས་ཅད་པདྨའི་ངང་གྱུར་ན། །གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་མཐོ་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད། །བྱང་ཆུབ་རྡོ་རྗེའི་གསུང་དུ་བསྡུས། །བསྡུས་ཉིད་ཕྱོགས་བཅུར་རྣམ་པར་གྲགས། །སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་མཇལ། །དཔེར་ན་དེ་བཞིན་སྦྲིད་སངས་བཞིན། །གསུང་གཅིག་སྒྲ་ཡིས་སོ་སོར་གོ། །དེ་ནི་གསུང་མཆོག་རྒྱལ་པོ་ཡིན། །ཐེག་པ་མཐོ་དམན་བསམ་ཡས་ཀྱང་། །དེ་བཞིན་ཉིད་ལས་མ་གསུངས་ཏེ། །གདུང་བྱའི་ཐབས་སུ་སོ་སོར་ཐོས། །ཇི་ལྟར་གསུང་རབ་ཀུན་བརྗོད་ཀྱང་། །དེ་བཞིན་ཉིད་ཀྱིས་གསུངས་པ་མེད། །ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུང་ཡང་། །ཐུགས་རྗེ་གསུང་གི་བྱིན་རླབས་ཀྱིས། །འགྲོ་དོན་སྣ་ཚོགས་སོ་སོར་གསལ། །གསལ་ཉིད་གསུང་གི་རྡོ་རྗེའི་མཆོག །དེ་བཞིན་གསུང་གི་འགྲོ་དོན་རྣམས། །དེ་བཞིན་ངང་ལས་མ་གཡོས་ཀྱང་། །དཔེར་ན་བྲག་ཅའི་སྒྲ་བཞིན་ནོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་འདུས་པ་དང་གསང་སྔགས་ཀྱི་ལེའུ་སྟེ་བདུན་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་ཀྱི། ཡན་ལག་ཐམས་ཅད་དཀྱིལ་འཁོར་དུ་ལྷུན་གྱིས་གྲུབ་པར་བྱིན་གྱིས་རློབ་པ་ཞེས་བྱ་བ་འདི་ཆེད་དུ་བརྗོད་དོ། །སྒྱུ་འཕྲུལ་དྲྭ་བས་མངོན་རྫོགས་པ། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྤས་ནས་ཐུགས་ཀར་བཀན། །ལཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱཾ་སྒྲེང་རྩེ་མོར་རིན་ཆེན་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཱཾ་སྒྲེང་རྩེ་མོར་པད་མ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །པྱཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱཾ་སྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ཏཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཅེན་སྙེ། །གཟུགས་མཛེས་རིན་ཅེན་ཕྲེང་བ་དང་། །པི་ཝང་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞིའི་ཁྲོ་བོའི་ཕྱག་རྒྱ་ནི། །ནྲྀ་མགོ་གདེངས་དང་རྡོ་རྗེ་གནོན། །ཐོད་སྤྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །དེ་ལ་སོགས་ཏེ་བསམ་མི་ཁྱབ། །ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོའི་ཚོགས་ཆེན་ཐམས་ཅད་ལ། །སོ་སོར་མཐུན་བྱས་ཀུན་ཏུ་སྣང་། །དཔེར་ན་གར་མཁན་ཉིད་འདྲ་བ། །ལུས་ལ་མ་བཀོད་སྣ་ཚོགས་སྟོན། །མདོར་ན་ཕྱག་རྒྱ་ཐམས་ཅད་ནི། །འདི་ཞེས་གཅིག་ཅེས་བརྗོད་དུ་མེད། །གཉིས་དང་གསུམ་དུ་རྣམ་པར་འཕྲོ། །བསྐྱོད་དང་སྤྲོ་བའང་དེ་བཞིན་ཏེ། །མདོར་ན་བསྒུལ་བསྐྱོད་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །གནས་ཉིད་མི་གནས་གནས་པའང་མིན། །དེ་སྐད་དག་མཆོག་ཉིད་ཀྱིས་བཤད། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡན་ལག་ཐམས་ཅད་དཀྱིལ་འཁོར་དུ་བྱིན་གྱིས་བརླབས་ནས་ཕྱག་རྒྱ་སྤྲོས་པའི་ལེའུ་སྟེ་བརྒྱད་པའོ།། ༈ །།དེ་ནས་དེ་བཞིན་གཤེགས་པ་དགྱེས་པ་ཆེན་པོས། རྡོ་རྗེ་གསང་བའི་དམ་ཚིག་བཀོད་པ་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །འབྲུ་ལྔ་སྤོས་ལྔ་རིན་ཅེན་ལྔ། །སྙིང་པོ་ལྔ་དང་སྨན་ལྔ་དང་། །བདུད་རྩི་ལྔ་ཉིད་རབ་མཉམ་ལ། །རིག་པས་ཐིག་ནི་གདབ་པར་བྱ། །ལྟེ་བ་རྩིབས་དང་ལྡན་པ་ཡི། །རྩིབས་བཞི་འཁོར་ལོ་མུ་ཁྱུད་བཅས། །གྲུ་ཅད་བཞི་དང་གྲུ་བཞི་པ། །བར་ཁྱམས་སྒོ་ཁྱུད་ལྡན་པར་བྱ། །སེན་ཟླུམ་ཙམ་གྱི་ཉི་ཟླ་ལ། །ཙ་ནའི་འགྲུབ་ཙམ་པདྨའི་གདན། །ཡུངས་འབྲུ་ཙམ་གྱི་ཡི་གེ་ལས། །ཕྱག་རྒྱ་ཏིལ་འབྲུ་ཙམ་དུ་བྲི། །བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །གླུ་ཚིག་བྲོ་གར་རོལ་མོ་ཡི། །སྤྲིན་ཕུང་ཚོགས་ཀྱིས་རབ་ཏུ་མཆོད། །ཡུམ་དང་འཇོ་མ་སེམས་མ་ཡིས། །ཇི་ལྟར་འདོད་པའི་ལས་བཞིན་མཆོད། །དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཁྲོ་བོའི་དཀྱིལ་འཁོར་དེ་བཞིན་ཏེ། །ཤིན་ཏུ་ཕྲ་ལ་སྦྱངས་པ་ཡིས། །བསམ་ཡས་དག་ལའང་དེ་བཞིན་བྱ། །རིག་པས་དཔག་པ་ཙམ་དུའོ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་བྲེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །གསལ་ལྡན་མའམ་བྱིན་བརླབས་ལ། །སྟོང་གསུམ་ཡུངས་འབྲུར་གཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲངས་མཆོད། །མཉེས་ནས་གྲུབ་པའི་དམ་ཚིག་མཆོག །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །སྒྱུ་འཕྲུལ་དྲྭ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་འགྱུར། །ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཡང་ན་ཐལ་མོ་རབ་བསྣོལ་ནས། །ཕྱག་རྒྱ་ཆེན་པོའི་དབང་དུ་ནི། །དཀྱིལ་འཁོར་མཛུབ་གང་ཚད་དུ་ཡང་། །མཁས་པས་ཆོ་ག་ཇི་བཞིན་བྱ། །ཡང་ན་ས་གཞི་རབ་མཉམ་ལ། །དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཕུར་བུ་སྲད་བུ་ཚོན་ཕྱེ་དང་། །གོས་རྒྱན་མཛེས་པའི་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཡང་ན་ཁྲུ་ནི་བཅུ་དྲུག་དང་། །ཉི་ཤུའམ་ཉི་ཤུ་རྩ་ལྔར་བྱ། །རིགས་ཀྱི་དཀྱིལ་འཁོར་ལྔ་རྣམས་བསྒོམ། །སྐུ་གསུང་ཐུགས་ལྡན་གཟུགས་ཀྱང་དགོད། །ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །མ་མཐོང་རྨོངས་ལ་བསྟན་ཕྱིར་ཚོན། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱི་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཏིང་འཛིན་རོལ་མོ་མཐའ་ཡས་མཆོག །ཡི་གེའམ་གདན་ནམ་སྙིང་པོའམ། །ཕྱག་རྒྱའམ་སྐུ་གསུང་ཐུགས་ལྡན་པར། །བྱིན་རླབས་ཡ་མཚན་རྨད་པོ་ཆེ། །འགྲུབ་འགྱུར་སངས་རྒྱས་ཀུན་གྱི་དམ། །ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིམ་པ་ཐོབ་པར་འགྱུར། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །དཔག་བསམ་ཤིང་དང་ཡིད་བཞིན་གྱི། །རིན་པོ་ཆེ་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་བརྟན་པ་ཡིན། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ན་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོག །རྒྱལ་བ་སྔོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོའི་མཆོག །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་བརྙེས་པ་དང་། །རྒྱ་ཆེན་གསུང་ལ་དོན་བྱུང་བའང་། །མཐུན་པའི་ཡེ་ཤེས་རང་སྣང་བའོ། །གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །བདེ་བ་ཆེན་པོའི་དཀྱིལ་འཁོར་ལ། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་བདེ་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ཞེས་ཆེད་དུ་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་རྡོ་རྗེ་བཀོད་པའི་གསང་བའི་དམ་ཚིག་གི་ལེའུ་སྟེ་དགུ་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོ་རྒྱལ་པོ་སྦྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པདྨོར་འཁྱིལ། །རྩེ་ནས་བསྟིམ་ཞིང་དཀྱིལ་འཁོར་བསྒྱུར། །ཉན་བྱེད་འཁོར་ལོའི་གཞལ་ཡས་སུ། །གསལ་བའི་ཐིག་ལེ་ངོ་བོ་ཉིད། །ཏྲཱཾ་གི་ཕྱག་རྒྱའི་ཚོགས་མཆོག་ལས། །རིན་ཆེན་དཀྱིལ་འཁོར་གསལ་སྤྲོ་ཐིམ། །ཏྲཱཾ། གསང་བ་གསང་ཆེན་གསང་མཆོག་གང་། །གསང་བ་ཀུན་ལའང་མཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །གསལ་བའི་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཡི་གེ་ཕྲེང་བའི་ཚོགས་མཆོག་ལས། །རིགས་ཀྱི་དཀྱིལ་འཁོར་གསལ་འཕྲོ་ཐིམ། །ༀ། དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་གཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །ལག་པའི་འཁོར་ལོའི་གཞན་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱཾ་གི་ཕྱག་རྒྱའི་ཚོགས་མཆོག་ལས། །ལས་ཀྱི་དཀྱིལ་འཁོར་གསལ་འཕྲོ་ཐིམ། །ༀ། ཁྱོད་ནི་རྡོ་རྗེ་ལས་ཡིན་གྱིས། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འདུ་འཕྲོ་ཀུན། །ཁྱོད་ཀྱི་དགོས་པ་བྱེད་པ་ཡིན། །སྨྲ་བྱེད་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧྲཱིཿཡིག་ཕྱག་རྒྱའི་ཚོགས་མཆོག་ལས། །ཆོས་ཀྱི་འཁོར་ལོ་གསལ་སྤྲོ་ཐིམ། ༀ། ཆོོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམས་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲགས་གཞན་དུ་མིན། །བསྐྱོད་ཆེན་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱུྃ་ༀ་སྭཱ་ཨཱཾ་ཧཱ་རྣམས་ལས། དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ༀ། ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡིས་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དབང་སྦྱིན་པའི་ལེའུ་སྟེ་བཅུ་པའོ།། ༈ །།དེ་ནས་དེ་བཞིན་གཤེགས་པ་དགྱེས་པ་ཆེན་པོ་སྒྱུ་འཕྱུལ་དྲྭ་བའི་རྒྱལ་པོ་བསྒྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པར། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཡན་ལག་དབང་པོ་རྣམ་ཤེས་ཀུན། །རྣམ་སྨིན་ༀ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མཱུཾ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །གོས་རྒྱན་བཟའ་བཏུང་གླུ་དང་ཚིག །བྲོ་གར་ཚོགས་ཀྱི་སྤྲིན་ཕུང་ལ། །ཧཱུཾ་དུ་ཤེས་པས་རབ་སྤྱད་ན། །ངོ་མཚར་འབྱུང་བའི་དཀྱིལ་འཁོར་མཉེས། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །བསྒྲུབས་པའི་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུཾ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱ་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །བྱེད་སྤྱོད་ཚོགས་ཆེན་གཉིས་གྱུར་ནས། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོངས་པ་འགྲུབ། །ལྔ་དང་ལྔ་ཡི་སྦྱོར་བ་ཡི། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ཏེ་སྐུ་གསུང་ཐུགས། །ཁྲོ་བོ་ཚོགས་དང་ལྡན་པ་ཡི། །ཚོམ་བུ་གསུམ་གྱི་ལྷ་རྣམས་བསྒོམ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོ་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །ཁྲོ་བོ་ཁྲོ་མོའི་ཚོགས་ཆེན་པ། །ཕོ་ཉ་ཕྱག་བརྙན་བཀའ་ཉན་ཚོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །རྣལ་འབྱོར་སྔགས་འཆང་དངོས་གྲུབ་ནི། །མཉམ་རྫོགས་ལྷུན་གྲུབ་ངང་གནས་ཤིང་། །སྤྱོད་པས་ཅི་ལའང་ཐོགས་མེད་པའི། །ཐམས་ཅད་ཡེ་ནས་དབྱེར་མེད་པའོ། །རྡོ་རྗེའི་རིགས་སུ་ཐམས་ཅད་དཀྱིལ། །འོད་འཕྲོ་འབར་བར་རབ་ཏུ་བསྒོམ། །ཆགས་མེད་ཚུལ་གྱིས་བསྟིམ་པར་བྱ། །གཉིས་མེད་གྱུར་ནས་ཕྱག་རྒྱ་ཆེ། །ཡང་ན་སྐུ་གསུང་ཐུགས་ཉིད་དེ། །ཐམས་ཅད་མ་ལུས་སྐུ་གསུང་ཐུགས། །ཏིང་འཛིན་གསལ་འབར་འོད་ཟེར་འཕྲོ། །གཉིས་མེད་དབྱིངས་ཀྱི་ངང་དུ་ཐིམ། རིག་འཛིན་དངོས་གྲུབ་མཆོག་ཐོབ་འགྱུར། །དཀྱིལ་འཁོར་མ་ལུས་འབར་བ་འགྲུབ། །ཉོན་མོངས་སྡུག་བསྔལ་སེལ་བར་བྱེད། །རྡོ་རྗེའི་རིགས་སུ་སྐྱེ་བའི་གནས། །སྔགས་འཆང་དངོས་གྲུབ་ཡང་དག་ནི། །ཐབས་དང་ཤེས་རབ་ཐམས་ཅད་ཀྱིས། །དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ཆགས་པ་མེད་པའི་ཚུལ་གྱིས་ནི། །འོད་ཟེར་རྣམ་པ་མང་པོ་འཕྲོ། །གཉིས་སུ་མེད་པར་བསྟིམ་པར་བྱ། །དངོས་གྲུབ་མཆོག་གི་སྙིང་པོ་འགྲུབ། །རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམས། །སེམས་དཔའ་སེམས་མ་ཉིད་དུ་བསྒོམ། །སོ་སོའི་སྔགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོར་དམ་ནོས་བཞིན་དུ་བྱ། །ལེ་ལོ་སྒྱིད་སྙོམས་མེད་པ་ཡི། །ཐེ་ཚོམ་མེད་པར་བསྒྲུབས་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་འཐོབ། །སྒྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུ་བཤད། །རྡོ་རྗེ་གསང་བའི་ཚིག་ཏུའོ། །ཞེས་དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་ཆེད་དུ་གླེང་ངོ་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་ཀྱི་དཀྱིལ་འཁོར་གྱི་ལེའུ་སྟེ་བཅུ་གཅིག་པའོ།། ༈ །།དེ་ནས་དེ་བཞིན་གཤེགས་པ་དགྱེས་པ་ཆེན་པོ་རོལ་མོའི་སྤྲིན་རྣམ་པར་སྤྲོས་ཏེ། རྒྱན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཕ་རོལ་ཕྱིན་པ་ཀུན་ཏུ་རྫོགས། །ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པའི། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམ་པར་འགྱུར། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །དཀྱིལ་འཁོར་ཀུན་ཏུ་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཆོ་ག་ལྷག་གམ་མ་ཚང་ན། །སྐྱོན་ཉིད་དག་སྟེ་ཉེས་པ་མེད། །ཅེས་ཆེད་དུ་བརྗོད་པས་རོལ་མོའི་སྤྲིན་གྱིས་མཉེས་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་བསྒྲུབ་པའི་ལེའུ་སྟེ་བཅུ་གཉིས་པའོ།། ༈ །།དེ་ནས་དེ་བཞིན་གཤེགས་པ་ཕྱོགས་བཅུ་དུས་བཞིའི་སྐུ་དང་གསུང་དང་ཐུགས་རྡོ་རྗེའི་དཀྱིལ་འཁོར་ཐམས་ཅད་གཅིག་ཏུ་བསྡུས་ནས་དགྱེས་པ་ཆེན་པོས། ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་དམ་ཚིག་ཤིན་ཏུ་གསང་བའི་སྙིང་པོ་སྤྲིན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བའི། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་བལྟ་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཕྱོགས་བཅུ་དུས་བཞིར་མངོན་རྫོགས་པའི། །སྐུ་གསུང་ཡོན་ཏན་ཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །དབང་སྒྱུར་མཆོག་ཉིད་དམ་པ་ཡིན། །དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྒྱན་དུ་དཀྱིལ་འཁོར་མ་ལུས་ཐོགས། །རྫོགས་པའི་དཀྱིལ་འཁོར་མཉམ་སྦྱོར་བས། །ཐུགས་རྗེའི་དཀྱིལ་འཁོར་ཡོངས་ཀྱིས་འབྱུང་། །ཕྱོགས་དུས་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་སྒྲོལ་བ་ཡིས། །བྱ་བྱེད་མེད་པར་དཀྱིལ་འཁོར་སྤྱོད། །ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་དམ་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱིས། །འདའ་བར་མི་མཛད་དམ་ཚིག་མཆོག །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པ། །བསྙེན་ནས་སྐུ་ལྔ་ལྷུན་གྱིས་རྫོགས། །འབྱུང་དང་མ་འོངས་ཐམས་ཅད་ཀྱང་། །འདི་ཡིས་ལྷུན་གྱིས་གྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེས་སོ། །ཀུན་གྱི་ཕྱག་རྒྱ་ཆེན་པོའི་མཆོག །ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུང་། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་བས་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེག་དང་སྦྲེབས་ལ་ཡུན་རིང་གནས། །ཞེས་དེ་བཞིན་གཤེགས་པ་ཉིད་ཀྱིས་དེ་བཞིན་གཤེགས་པ་ཉིད་ལ་ཆེད་དུ་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཤིན་ཏུ་གསང་བ་མན་ངག་གི་སྙིང་པོའི་ལེའུ་སྟེ་བཅུ་གསུམ་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་ཉིད་ཀྱི་དཀྱིལ་འཁོར་ལ་དགྱེས་པ་ཆེན་པོའི་གླུ་འདི་བླངས་སོ། །ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོཿ ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོཿ ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོཿ ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོཿ ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པའི་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོཿ ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོཿ ཞེས་བསྒྲགས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པའི་མཆོད་པའི་ལེའུ་སྟེ་བཅུ་བཞི་པའོ།། ༈ །།དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱིས་ཁྲོ་བོའི་དཀྱིལ་འཁོར་མངོན་པར་འདུ་མཛད་དེ། དེ་ཅིའི་ཕྱིར་ཞེ་ན། བདག་ཏུ་རྨོངས་པའི་རྟོག་པ་དང་། བརྟགས་པ་ལ་མངོན་པར་ཞེན་པས། ཡང་དག་པའི་ལམ་དང་བྲལ་བ་དག །གབ་པའི་གསང་བ་མ་རྟོགས་པ་སྦས་པའི་གསང་བ་ལ་མངོན་པར་འཆེལ་ནས། རྒྱུ་དང་འབྲས་བུ་ལ་རྨོངས་པས། སྲིད་པའི་ས་བོན་རྩུབ་མོས་འཕངས་ནས། མཚམས་མེད་པའི་རབ་ཏུ་ཚ་བའི་དམྱལ་བར་སྐྱེས་སོ། །དེ་རབ་ཏུ་ཚ་བའི་སྡུག་བསྔལ་དྲག་པོས་གདུངས་པ་དང་། འདི་བས་ཤིན་ཏུ་གྲང་ཡང་ཅི་མ་རུང་སྙམ་པའི་མོད་ལ། རབ་ཏུ་སྦྲེབས་པ་དང་། པདྨ་ལྟར་གས་པའི་སྡུག་བསྔལ་དྲག་པོ་དག་གིས་རབ་ཏུ་གདུངས་པ་དེ་ལྟ་བུའི་སྡུག་བསྔལ་རབ་ཏུ་ཚ་བ་ལ་སོགས་པ་བརྒྱད་དང་། ཤིན་ཏུ་གྲང་བ་ལ་སོགས་པ་བརྒྱད་པོ་དག་ཏུ། འཇིག་རྟེན་གྱི་ཁམས་བརྒྱུད་ཅིང་བསྐལ་པ་ཆེན་པོ་སྟོང་ཕྲག་བཅུ་གཉིས་སུ་མྱོང་ངོ་། །དེ་ནས་རྣམ་པར་སྨིན་པ་དེ་ཟད་པ་དང་། ཡི་དྭགས་ལྟོགས་པ་དང་། སྐོམ་པའི་སྡུག་བསྔལ་གྱིས་རབ་ཏུ་ཉེན་པ་དང་། འདོད་པའི་དངོས་པོ་རྣམས་ཡིད་དུ་མི་འོང་བ་དང་། གདུག་ཅིང་རྩུབ་པའི་དངོས་པོ་སྣ་ཚོགས་སུ་གྱུར་པ་དང་། ཡོད་མེད་པར་ཡང་འགྱུར་ཞིང་། ཤིན་ཏུ་རིད་ཅིང་བསྐམས་པ་དང་། ལུས་དང་ཡན་ལག་དང་དབང་པོ་མི་འཚམས་པར་གྱུར་པར་བསྐལ་པ་ཆེན་པོ་དྲུག་ཏུ་སྐྱེས་སོ། །དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་ཁད་ཀྱིས་བསྲབས་པ་དང་། སྔོན་གྱི་སྲིད་པས་མཚམས་སྦྱར་ནས། ཡི་དྭགས་སྲིན་པོ་ཆེན་པོ་རབ་ཏུ་གདུག་པ་གཏུབ་པོ་ལུས་གཅིག་ལ་མགོ་བོ་བརྒྱ་པ་དང་། མགོ་སྣ་ཚོགས་པ་དང་། ལུས་བརྒྱ་ལ་མགོ་བོ་གཅིག་པ་དང་། ལུས་སྣ་ཚོགས་པ་དང་། ཡན་ལག་མང་པོ་དང་། ཡན་ལག་སྣ་ཚོགས་པ་དང་། གདུག་པའི་ལག་ཆ་སྣ་ཚོགས་པ་ཐོགས་པ། འཁོར་རབ་ཏུ་མང་པོ་དང་། འཇིགས་པའི་གཟུགས་སྣ་ཚོགས་དང་། འཇིགས་པའི་སྒྲ་སྣ་ཚོགས་སྒྲོགས་པ། གཟུགས་དང་ང་རོ་དང་། དྲི་དང་ཁ་རླངས་ཀྱིས་ཐམས་ཅད་སྐྱི་བུང་ཞེས་བྱེད་པ། རབ་ཏུ་འཇིགས་པའི་རླུང་ནག་དང་། གྲང་བ་དང་། ཚ་བའི་དབུགས་ཀྱིས་ཕྱོགས་བ ཅུ་ཀུན་ཏུ་ཁམས་འཁྲུག་པར་བྱེད་པ། ནད་བཞི་བརྒྱ་རྩ་བཞི་འདེབས་པར་བྱེད་པ། མྱོས་ཤིང་ཉམས་པར་བྱེད་པའི་མཐུས། ཀླུའི་རིས་དང་། ལྷ་མ་ཡིན་གྱི་རིས་དང་ལྷའི་རིས་དང་། ཚངས་པའི་རིས་དང་། འོད་གསལ་དང་། དགེ་རྒྱས་དང་། འབྲས་བུ་ཆེ་བ་མན་ཆད་དབང་དུ་བསྡུས་སོ། །དེ་སྔོན་བསྟེན་པའི་སྟོབས་ཀྱིས་ཐམས་ཅད་མཁྱེན་པས་གཟིགས་ནས་ཐུགས་རྗེས་འདུལ་བར་གྱུར་ཏོ། །དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བས། འཇིག་རྟེན་དྲུག་གི་ཕྱོགས་བཅུ་སྲིད་པ་གསུམ་གྱི་བདག་པོ་འདུལ་བའི་ང་རྒྱལ་ཆེན་པོའི་གཟི་བརྗིད་སྟོན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོ། བཅོམ་ལྡན་འདས་དགྱེས་པ་ཆེན་པོས་ཁྲོ་བོའི་རྒྱལ་པོའི་དཀྱིལ་འཁོར་གྱི་སྤྲིན་ཆེན་པོ་རྣམ་པར་འཕྲོ་བའི། སྒྱུ་འཕྲུལ་དྲྭ་བའི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་ཉིད་ཀྱི་དབྱིངས་ཉིད་ནས། ཁྲོ་མོ་དབང་ཕྱུག་ཆེན་མོ་མངོན་དུ་ཕྱུང་སྟེ། ཧི་ཧི་ཞེས་དགྱེས་པའི་གཟི་མདངས་ཀྱིས། རིན་ཅེན་པདྨ་རྒྱས་པར་མཛད་ནས། གཉིས་སུ་མེད་པར་འཁྲིལ་བའི་དགྱེས་པས་ཐིམ་ནས། བྱང་ཆུབ་སེམས་ཀྱི་སྤྲིན་ལས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཁྱབ་པར་ཁྲོ་བོའི་དཀྱིལ་འཁོར་གྱི་ཚོགས་སྟོང་གསུམ་གྱི་འཇིག་རྟེན་ཙམ། ཕྱོགས་བཅུའི་རྡུལ་ཕྲ་མོ་སྙེད་འཐོན་པར་གྱུར་ནས། འཇིག་རྟེན་དྲུག་གི་ཕྱོགས་བཅུ་ཐམས་ཅད་གཡོས། རབ་ཏུ་གཡོས། ཀུན་ཏུ་གཡོས་སོ། །འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །ཤིག་ཤིག །རབ་ཏུ་ཤིག་ཤིག །ཀུན་ཏུ་ཤིག་ཤིག་གོ། །གཏོར་གཏོར། རབ་ཏུ་གཏོར་གཏོར། ཀུན་ཏུ་གཏོར་གཏོར་རོ། །འཇིག་རྟེན་དྲུག་གི་ཕྱོགས་བཅུའི་སྟོང་ཁམས་ཐམས་ཅད་ན་གནས་པའི་དབང་ཆེ་བ་དང་། གཟི་བརྗིད་ཆེ་བ་དང་། མཐུ་ཆེ་བའི་དབང་ཕྱུག་ཆེན་པོ་ལ་སོགས་པ་ཐམས་ཅད་བརྒྱལ། རབ་ཏུ་བརྒྱལ། ཀུན་ཏུ་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཉིད། འཇིགས་བྱེད་ཆེན་པོ་ཤིན་ཏུ་རྔམ་པ་སྐྱི་བུང་ཞེས་བྱེད་པའི་འབར་བ་ཆེན་པོའི་ཁྲག་འཐུང་སྐུ་སྨུག་ནག་ཅིར་ཡང་འགྱུར་བ་དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པ་དེ་དབུ་གསུམ་ཕྱག་དྲུག་ཞབས་བཞིར་གྱུར་ཏེ། དུར་ཁྲོད་ཆེན་པོར་དགྱེས་ནས་ཁྲག་གི་རྒྱ་མཚོའི་དཀྱིལ་ན། ཀེང་རུས་ཆེན་པོའི་རི་རབ་ཀྱི་སྟེང་འབར་བ་ཆེན་པོའི་ཀློང་གི་འཁོར་ལོའི་དཀྱིལ་ན་དབང་ཕྱུག་ཆེན་པོ་དང་། དུར་ཁྲོད་ཀྱི་བདག་པོ་དྲེགས་པ་ཆེན་པོ་ཁྱོ་ཤུག་གི་གདན་ལ་བརྐྱངས་བསྐུམས་སུ་བཞུགས་སོ། །ཁྲོ་བོའི་དཀྱིལ་འཁོར་གྱི་སྤྲིན་ཕུང་དེ་དག་ཀྱང་། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་ཤར་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་རིན་པོ་ཆེར་གྱུར་ཏེ་ལྷོ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་པདྨར་གྱུར་ཏེ་ནུབ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་ཀུན་ཏུ་ལས་སུ་གྱུར་ཏེ་བྱང་ཕྱོགས་སུ་བཞུགས་སོ། །དེ་དག་ཀུན་ཀྱང་འཇིགས་བྱེད་ཆེན་པོའི་ཆ་ལུགས་དང་། རྔམ་པའི་ང་རོ་དང་། འབར་བའི་ཀློང་ན། དབུ་གསུམ་ཕྱག་དྲུག་ཞབས་བཞིས། དྲི་ཟ་དང་། གནོད་སྦྱིན་དང་། སྲིན་པོ་དང་། གཤིན་རྗེ་ལ་སོགས་པ་ཁྱོ་ཤུག་གིས་གདན་བྱས་པ་ལ་བརྐྱངས་བསྐུམས་སུ་བཞུགས་སོ། །བཙུན་མོ་ཁྲག་འཐུང་ཆེན་མོའི་ཚོགས་རྣམས་ཀྱང་སོ་སོའི་སྐུ་ལ་འཁྲིལ་བའི་ཚུལ་གྱིས་བཞུགས་སོ། །རིགས་རིགས་ལྔའི་ཞེས་པ་ནས་ངོ་མཚར་ཏེ་ཞེས་པའི་བར་འདི་རྒྱ་འགྲེལ་སྤར་ཁབ། ལྔའི་ཧེ་རུ་ཀ་གཅིག་ཏུ་བསྟིམས་ཏེ་བསྡུས་ནས། གཅིག་གིས་མང་པོ་འདུལ་བའི་ངོ་མཚར་ཏེ། དེ་ནས་དྲེགས་པ་ཆེན་པོ་ལ་སོགས་པ་གཏུམ་པའི་སེམས་ཀྱིས་གདུག་པའི་རྫུ་འཕྲུལ་རོང་ཟོམ། སྨན་ལུང་པ། གཡུང་སྟོན་པའི་འགྲེལ་པ་བཞིར་མི་གསལ་ཞིང་། རྒྱ་དཔེར་ཡང་མཐོང་བ་མ་བྱུང་མོད། སྒྲོལ་ཊཱིཀ་ཏུ་སྣང་བས་རྒྱ་དཔེ་མི་མཐུན་པ་གཅིག་གཉིས་ཤིག་བྱུང་ངམ་སྙམ། རྒྱ་དཔེ་གཅིག་ན། དེ་ནས་དབང་ཕྱུག་ཆེན་པོ་བརྩེ་བ་ཅན་དྲེགས་པ་ཆེན་པོ་ཞེས་བསྣོན་མ་ཡང་འདུག་གོ། །ཆེན་པོ་སྣ་ཚོགས་བསྟན་ནས། མགྲིན་གཅིག་ཏུ་གདུག་པའི་ང་རོས། བརླང་པོའི་གཏུམ་ཚིག་ཏུ་སྨྲས་པ། ཐོང་ཐོང་སྙིང་རྗེའི་བདག་པོ་ཅི་དེ་ལྟར་བྱེད་དམ་ཞེས་འཛེར་ཞིང་། ཤིན་ཏུ་གདུག་པའི་སེམས་ཀྱིས་ཁྲོས་ནས་རྔམ་མོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དབུ་དགུ་ཕྱག་བཅོ་བརྒྱད་ཞབས་བརྒྱད་དུ་གནས་ནས། རྔམ་པའི་སྐད་ཀྱིས་ཐུགས་རྗེས་འདུལ་བའི་ཐབས་ཀྱིས་ཤིན་ཏུ་ཁྲོས་ནས། ཧཱུཾ་ཧཱུཾ་ཧཱུཾ། ཧ་ཧ་ཧ། ཁཱ་ཧི་ཁཱ་ཧི་ཁཱ་ཧི། ཞེས་བརྗོད་ནས། དབང་ཕྱུག་ཆེན་པོ་ལ་སོགས་པ། གདུག་པ་ཆེན་པོའི་ཚོགས་དེ་དག་གི་སྙིང་དང་དབང་པོ་ཀུན་ཕྱུང་། ནང་ཁྲོལ་ཀུན་དྲངས། ཡན་ལག་ཀུན་བཅད་གཏུབས་ནས་ཤ་ཀུན་ཟོས། ཁྲག་ཀུན་འཐུངས། རུས་པ་ཀུན་འཆོས་སོ། །དེ་ནས་ཧཱུཾ་ཧཱུཾ་ཧཱུཾ་བྷྱོ་ཨེ་ཨ་ར་ལི་ཛཿཛཿ ཞེས་བརྗོད་པས། ཕྱོས་བཅུའི་འཇིག་རྟེན་གྱི་ཁམས་ནམ་མཁའ་དང་བཅས་པ་ཡུངས་འབྲུ་གཅིག་ཙམ་དུ་ཆུད་པར་བསྡུས་སོ། །དེ་ནས་འབྱུང་པོ་མ་ལུས་པའི་རྒྱལ་པོའི་ཡང་རྒྱལ་པོ་དྲེགས་པ་ཆེན་པོ་ལ་སོགས་པའི་ཆུང་མ་འབྱུང་པོ་ཐམས་ཅད་ཀྱི་རྗེ་མོའི་ཡང་རྗེ་མོ། སྲིན་མོ་ཆེན་མོ་མིའི་སྲིན་མོ་དང་། ཚངས་མ་དང་། འཁྲུག་མོ་དང་། །དབང་མོ་དང་། འཇུག་སྲེད་མོ་དང་། གཞོན་ནུ་མོ་དང་། དམར་མོ་དང་། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། སྲིན་མོ་དང་། ཟ་བ་མོ་དང་། དགའ་བ་མོ་དང་། ར་རོ་ཁྲག་འཐུང་མྱོས་མ་དང་། གཅིག་པུ་སྤྱོད་མ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་དང་། གསོད་བྱེད་མོ་དང་། མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆེན་མོ་དང་། ཆུ་ལྷ་མོ་དང་། ནག་མོ་ཆེན་མོ་དང་། ར་མགོ་དམར་སེར་ཆེན་མོ་དང་། བུམ་སྣ་སྔོ་ནག་ཆེན་མོ་དང་། གསུས་འཛིན་སེར་ནག་ཆེན་མོ་ལ་སོགས་པ། བྲན་དང་ཡང་བྲན་དང་། གཡོག་དང་ཡང་གཡོག་འཁོར་ཞིང་གི་རྡུལ་སྙེད་ཀྱང་བསྡུས་སོ། །དེ་ནས་བཅོམ་ལྡ་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོས་འདུལ་བའི་ཐབས་ཀྱིས། ཡང་རིགས་ལྔའི་འཇིགས་བྱེད་ཆེན་པོར་སྣང་བར་བྱས་ནས། དེ་དག་ཀུན་ཀྱང་དགྱེས་པས་རོལ་པའི་དཀྱིལ་འཁོར་གྱི་སྤྲིན་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་དང་གསུང་དང་ཐུགས་རྡོ་རྗེ་ལས་འདི་ཕྱུང་ངོ་། །ༀ་ཨཱཿཧཱུཾ་བཛྲ་པྲ་བེ་ཤ་ཨ་ལ་ལ་ཧོཿ ཞེས་བརྗོད་པས། འབྱུང་མོའི་རྒྱལ་མོ་རྣམས་ཤིན་ཏུ་ཆགས་པའི་ཡིད་གཡོས་ནས། པདྨའི་དཀྱིལ་འཁོར་སྡུད་ཅིང་རྒྱས་པར་གྱུར་ནས། དཔེར་ན་ཁབ་ལེན་ལ་ལྕགས་འདུ་བའི་ཚུལ་དུ། བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་རྡོ་རྗེའི་སྐུ་ལ། སྲིན་མོ་ཆེན་མོ་མིའི་སྲིན་མོ་དང་། དམར་མོ་དང་། དགའ་བ་མོ་དང་། གསོད་བྱེད་མོ་དང་། ནག་མོ་ཆེན་མོ་དང་། དམར་སེར་ཆེན་མོ་དང་། སྔོ་ནག་ཆེན་མོ་དང་། སེར་ནག་ཆེན་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་དེ་བཞིན་གཤེགས་པའི་སྐུ་ལ། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་རིན་པོ་ཆེའི་སྐུ་ལ། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། ཟ་བ་མོ་དང་། སྲིན་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་པདྨའི་སྐུ་ལ། ཁྲག་གིས་མྱོས་མ་དང་། གཅིག་པུར་སྤྱོད་མ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་ཀུན་ཏུ་ལས་ཀྱི་སྐུ་ལ། མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆེན་མོ་དང་། ཆུ་ལྷ་མོ་རྣམས་འཁྲིལ་ལོ། །དེ་ནས་བཅོམ་ལྡན་འདས་དགྱེས་པ་ཆེན་པོའི་ཁྲོ་བོའི་དཀྱིལ་འཁོར་དེ་དག་གིས། ཧཱུཾ་ཞེས་བརྗོད་པས། པདྨའི་དཀྱིལ་འཁོར་གྱི་ཚོགས་བསྡུས་ནས་ཤིན་ཏུ་བཅུམ་པར་གྱུར་ཏོ། །དེ་ནས་དགྱེས་ཏེ་ཧ་ཞེས་བརྗོད་པས། བྱང་ཆུབ་སེམས་ཀྱི་སྤྲིན་ལས། དཀར་མོའི་ཚོགས་དང་། རྐུན་མོའི་ཚོགས་དང་། རྨོངས་མོའི་ཚོགས་དང་། ཐལ་བྱེད་མོའི་ཚོགས་དང་། སྦོས་མོའི་ཚོགས་དང་། གཏུམ་མོའི་ཚོགས་དང་། སྨེ་ཤ་ཅན་གྱི་ཚོགས་དང་། མ་ཚོགས་མའི་ཚོགས་རྣམས་རང་རང་གི་ལག་ཆ་དང་། ངོ་མཚར་དང་བཅས་ནས་འཐོན་ཏོ། །འཐོན་ནས་ཀྱང་འབར་བ་ཆེན་པོ་འཁོར་ལོའི་རྩིབས་མཆན་ཤར་ཕྱོགས་ནས་འཁོར་བར་འཇིགས་པའི་གཟུགས་རང་གི་ལག་ཆ་དང་བཅས་ནས་འཁོད་དོ། །དེ་ནས་ཤིན་ཏུ་དགྱེས་ནས་ཧེ་ཞེས་བརྗོད་པས། སེང་གདོང་ཆེན་མོའི་ཚོགས་དང་། སྟག་གདོང་ཆེན་མོའི་ཚོགས་དང་། ཝ་གདོང་ཆེན་མོའི་ཚོགས་དང་། ཁྱི་གདོང་ཆེན་མོའི་ཚོགས་དང་། བཞད་གདོང་ཆེན་མོའི་ཚོགས་དང་། ཀང་ཀའི་གདོང་ཆེན་མོའི་ཚོགས་དང་། ཁྭ་གདོང་ཆེན་མོའི་ཚོགས་དང་། འུག་པའི་གདོང་ཆེན་མོའི་ཚོགས་དང་བཅས་པ་རྣམས། རང་རང་གི་ལག་ཆ་དང་ངོ་མཚར་དང་བཅས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བ་ཆེན་པོའི་འཁོར་ལོའི་ཕྱི་རོལ་ཤར་ཕྱོགས་ནས་འཁོར་བར་རྔམ་པའི་མདངས་ཀྱི་འཁོད་དོ། །དེ་ནས་ཤིན་ཏུ་དགྱེས་པས་ཕྱོགས་བཅུའི་ཞིང་མ་ལུས་པར་ཁྱབ་ནས་ཕཊ་ཅེས་བརྗོད་པས། རྡོ་རྗེ་སྲིང་འགྲོ་མའི་ཚོགས་དང་། རྡོ་རྗེ་གདོང་མོའི་ཚོགས་དང་། རྡོ་རྗེ་འཇིག་རྟེན་མའི་ཚོགས་དང་། རྡོ་རྗེ་རོ་ལངས་མའི་ཚོགས་རྣམས་རང་རང་གི་ལག་ཆ་དང་། ངོ་མཚར་དུ་མ་བཅས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བའི་དཀྱིལ་འཁོར་གྱི་སྒོར་ཤིན་ཏུ་རྔམ་པའི་གཟུགས་ཀྱིས་གནས་སོ། །དེ་ནས་དགྱེས་པ་ཆེན་པོའི་སྤྲིན་ལས་ཕྱོགས་བཅུ་ནས་ཕཊ་ཅེས་བསྒྲགས་པས། ཐམས་ཅད་ཁྲོས་ནས་མ་མོ་ཐམས་ཅད་ཀྱང་རང་རང་གི་གནས་ག་ལ་བ་དེར་ཡུད་ཙམ་གྱིས་ཕྱིན་པར་བཀྱེའོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་དེ་དག་ཀུན་ཐུགས་རྗེ་ཆེན་པོ་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །ༀ་བཛྲ་མ་ཧཱ་ཨ་མྲྀ་ཏ་མ་ཧཱ་ཀྲོ་དྷ་ཨཾ་ཨཾ་ཨཾ་ཞེས་བརྗོད་པས། དབང་ཕྱུག་ཆེན་པོ་ལ་སོགས་པ་ཐམས་ཅད། བཅོམ་ལྡན་འདས་ཁྲོ་བོ་ཆེན་པོ་དེ་དག་གིས་བསྣམས་ནས་བཏོན་ཏེ། མི་གཙང་བའི་འདམ་གྱི་རྒྱ་མཚོར་ཆུད་པ་ལས་བསྣམས་ནས་ཨུ་ཙུཥྨ་ཀྲོ་དྷ་ཕྱུང་ནས་འདམ་ཀུན་འཐུངས་ཏེ་དྲན་པ་སླར་རྙེད་ནས། ཁྲོ་བོའི་དཀྱིལ་འཁོར་གྱི་ཚོགས་དེ་དག་ཐམས་ཅད་ཀྱང་དབུ་དགུ་བརྒྱ་ཕྱག་སྟོང་བརྒྱད་བརྒྱ། ཞབས་བརྒྱད་བརྒྱ། སྐུ་འབར་བ་ཆེན་པོའི་དཀྱིལ་འཁོར་ན་བཞུགས་པར་མཐོང་ངོ་། །དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་སྲིད་པ་ཀུན་ཏུ་དྲེགས་པའི་དབང་ཕྱུག་ཐམས་ཅད་འདུལ་བའི་ཐབས་སྣ་ཚོགས་བསམ་གྱིས་མི་ཁྱབ་པར་སོ་སོར་སྣང་བས་དུས་གཅིག་ཏུ་བཏུལ་ལོ། །དེ་ནས་དེ་དག་ཤིན་ཏུ་འདར་ཞིང་བྲེད་པ་རབ་ཏུ་ཞུམ་པའི་ང་རོས། འབངས་སུ་མཆི། འབངས་སུ་མཆི། འབངས་སུ་ནན་ཏན་མ་བགྱིས་ན། །མགོ་དང་ལུས་ནི་བརྒྱར་འགས་ཤིང་། །སྙིང་ཡང་འགས་ཤིང་གཏུབ་གྱུར་ཅིག །རུལ་མྱགས་འཚིག་ནས་བརླག་པ་དང་། །དམྱལ་བར་ལྷུང་ནས་འབོད་པར་ཤོག །ཅེས་འབངས་སུ་མཆི་བར་མནའ་བོར་ནས། དཀྱིལ་འཁོར་གྱི་གདན་དུ་བཞག་གོ། །ཐམས་ཅད་ཀྱིས་མགྲིན་གཅིག་ཏུ་ཡང་སྨྲས་པ། བདག་ཅག་རྣམས་ཀྱི་མཆིས་བྲང་དང་། །མ་དང་བུ་མོ་སྲིང་མོ་རྣམས། །དཀྱིལ་འཁོར་ཆེན་པོར་བཞེས་སུ་གསོལ། །དཔའ་བོ་ལྷ་རྗེས་བཞེས་སུ་གསོལ། །བདག་ཅག་སོ་སོ་འཁོར་བཅས་ཀྱི། །ཚོགས་ཀྱི་དཀྱིལ་འཁོར་ཆེན་པོ་འདིའི། །མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འབར་བ་ལྟར། །གཡོ་སྒྱུ་མེད་ཅིང་གུས་ལྡན་པའི། །སེམས་ཀྱིས་བླངས་ནས་སྤྱི་བོ་ཡི། །གཙུག་ཏུ་བཞག་སྟེ་བཀུར་བར་བགྱི། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །གལ་ཏེ་དཔའ་བོའི་སྤྱན་སྔ་འདིར། །སྨྲས་པ་བཞིན་དུ་མ་བསྒྲུབས་ན། །བདག་ཅག་རྣམས་ཀྱི་མགོ་ལུས་སྙིང་། །བཀས་གཏུབས་དུམ་བུར་རུལ་བར་མཆིའོ། །ཞེས་སྨྲས་སོ། །དེ་ནས་དེ་དག་གི་ཆུང་མའི་ཚོགས་དང་། མ་དང་སྲིང་མོ་དང་། བུ་མོའི་ཚོགས་ཐམས་ཅད་དཀྱིལ་འཁོར་དུ་ཡུད་ཙམ་གྱིས་འོངས་ནས། ཐམས་ཅད་ཀྱིས་མགྲིན་གཅིག་ཏུ་སྨྲས་པ། བདག་ཅག་འཁོར་ཚོགས་ཐམས་ཅད་ཀུན། །དཔའ་བོ་ཆེན་པོའི་འབངས་སུ་མཆི། །དཔའ་བོ་ཆེན་པོས་བདག་ཅག་ལ། །ལས་ཀྱི་དངོས་གྲུབ་སྩལ་དུ་གསོལ། །ཞེས་སྨྲས་སོ། །དེ་ནས་བཅོམ་ལྡན་འདས་དགྱེས་པ་ཆེན་པོས་ལག་ཏུ་རྡོ་རྗེ་བྱིན་ནས་མིང་གི་དབང་བསྐུར་ཏེ་དཀྱིལ་འཁོར་གྱི་ཕྱི་རོལ་དུ་བཀོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོ་རང་བཞིན་གྱི་དཀྱིལ་འཁོར་གྱི་སྤྲིན་རྣམ་པར་སྤྲོས་པའི་ལེའུ་སྟེ་བཅོ་ལྔ་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོས་དཀྱིལ་འཁོར་གྱི་ཚོགས་ཆེན་པོ་འདི་དག་དམ་ཚིག་གིས་གྲུབ་པར་བྱ་བའི་ཕྱིར། དེ་བཞིན་གཤེགས་པ་ཁྲོ་བོ་ཁྲག་འཐུང་ཆེན་པོ་བཙུན་མོ་དང་བཅས་པའི་ཚོགས་དེ་དག་གི་སྐུ་དང་གསུང་ཐུགས་རྡོ་རྗེ་ཡེ་ཤེས་རྔམ་པ་ལས་གསུང་གི་དཀྱིལ་འཁོར་འདི་དག་ཕྱུང་ངོ་། །ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ །མ་ཧཱ་ཙཎྜ་སརྦ་དུ ཥྚཱནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ ཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧུཾ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷེ་ཤྭ་རཱི་སརྦ་དུཥྚན་ཧཱུཾ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་སཱུརྱ་རཏྣ་མ་ཧཱ་ཀྲོ་དྷེ་ཤྭ་རཱི་བི་ད་མ་ཧཱུཾ་ཕཊ། ༀ་འདི་སཾ་སྐྲྀ་ཏ་དང་བསྟུན་ན་ཅུང་ཟད་ཐེ་ཚོམ་དུ་སྣང་ཡང་རྒྱུད་ལས་སཾ་སྐྲྀ་ཏ་ཁོ་ནའི་ངེས་པ་མེད་པས་རོང་ཟོམ་གྱི་གསུང་བཞིན་བཅོས་ནས་རྒོད་མར་བསྒྱུར་བའོ། །ཧྲཱི་ཤྲུཏྟ་ས་མནྟ་པདྨ་མ་ཧཱ་ཀྲོ་དྷེ་ཤྭ་རཱི་ཁཱ་ཧི་ཧཱུཾ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རཱི་བི་ཤྭ་ཧཱུཾ་ཕཊ། ༀ་བཛྲ་ཀ་རཱི་ཧ། བཛྲ་ཙ་རཱི་ཧ། བཛྲ་པྲ་མོ་ཧེ་ཧ། བཛྲ་བེཏྟ་ལཱི་ཧ།༼༡༽ བཛྲ་ཙཎྜ་ལཱི་ཧ།༼༤༽ བཛྲ་༼༢༽པུཀྐ་སཱི་ཧ། བཛྲ་གྷསྨ་རཱི་ཧ། བཛྲ་སྨྲ་ཤ་ནཱི་ཧ།༼༣༽ བཛྲ་༼༥༽སིདྷ་མུ་ཁཱི་ཧེ། བཛྲ་བྱཱ་གྷྲྀ་མུ་ཁཱི་ཧེ། བཛྲ་སྲིངྒཱལ་མུ་ཁཱི་ཧེ། བཛྲ་ཤྭ་ན་མུ་ཁཱི་ཧེ། བཛྲ་གྲྀ་ཌྷ་མུ་ཁཱི་ཧེ། བཛྲ་ཀངྐ་མུ་ཁཱི་ཧེ། བཛྲ་ཀཱ་ཀ་མུ་ཁཱི་ཧེ། བཛྲ་ཨཱུ་ལུ་ཀ་མུ་ཁཱི་ཧེ། ༀ་བཛྲ་ཨཱརྱ་ཏེ་ཛ་ཏེ་ང་ཛཿ ༀ་བཛྲ་ཨ་མུ་ཁཱི་ཧཱུཾ། ༀ་བཛྲ་ལོ་ཀ་བཾ། ༀ་བཛྲ་བྷསྨི་པ་ལ་ཡ་བ་ཏུ་ཧོཿ བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོབྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ༀ་རུ་ལུ་རུ་ལུ་ཧཱུཾ། ཨེ་ཧྱེ་ཧི་ཨཱ་ན་ཡ། ཛཿཧཱུཾ་བཾ་ཧོཿ རཾ། ༀ་བཛྲ་ཀྲོ་དྷ་ས་མ་ཡ་ཧཱུཾ། ༀ་ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿ ཨ་ལི་ཨུ་ལི་ཏཱ་ལི་ཏ་པཱ་ལི་དཾཥྚཱ་གོ་ནཱ་ར་དྲི། ཁཾ་རཾ་ཡོ་གི་ནཱི་ཁཱ་ཧི་ཧོཿ གླུ་འདི་ཟུར་ཆག་གི་སྐད་ཡིན་པར་རོང་ཟོམ་ཆོས་བཟང་བཞེད་ཅེས་ལོ་ཆེན་བསོད་ནམས་རྒྱ་མཚོ་གསུང་། ཧཱུཾ་ཧ་ཧེ་ཕཊ། ཅེས་བརྗོད་པས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ཚིག །རབ་ཏུ་ཚིག །ཀུན་ཏུ་ཚིག་གོ། །འབར། རབ་ཏུ་འབར། ཀུན་ཏུ་འབར་རོ། །ཐམས་ཅད་དུ་འབར་བའི་དཀྱིལ་འཁོར་གྱི་ཚོགས་ཀྱིས་གང་། རབ་ཏུ་གང་། ཀུན་ཏུ་གང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་ཚོགས་ཆེན་པོའི་གསུང་གི་དཀྱིལ་འཁོར་སྤྲོས་པའི་ལེའུ་སྟེ་བཅུ་དྲུག་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོས། དེ་དག་གི་དཀྱིལ་འཁོར་བསྟན་པའི་ཕྱིར་ཆེད་དུ་བརྗོད་པ་འདི་བརྗོད་དོ། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྤྲུལ་སྣ་ཚོགས་ཉི་མས་བརྗིད། །འབར་བའི་འཕྲོ་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྦར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞི་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་འབར་བའི་དཀྱིལ་འཁོར་ཀུན་ཏུ་གསལ་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་དཀྱིལ་འཁོར་བསྟན་པའི་ལེའུ་སྟེ་བཅུ་བདུན་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོའི་མཉེས་པའི་མཆོད་པ་ཆེན་པོ་འདི་ཆེད་དུ་བརྗོད་དོ། །དེ་ལ་མཆོད་སྦྱིན་དམ་པ་ནི། །ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱའོ། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་དབུལ། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཕྱོགས་བཅུ་དུས་བཞིར་གཤེགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ནས་ཡོད་འོངས་མ་ཡིན་ཏེ། །ལྷ་སྲིན་ལ་སོགས་སྨོས་ཅི་དགོས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པས་ན། །དཀྱིལ་འཁོར་ཆེན་པོ་འབར་བར་འགྱུར། །ཞེས་བརྗོད་པས། མཉེས་པའི་མཆོད་པ་ཆེན་པོས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཆོད་སྦྱིན་དམ་པ་བསྟན་པའི་ལེའུ་སྟེ་བཅོ་བརྒྱད་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོས་སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་སོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམ་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཡོད་མེད་དབུ་མའང་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་ཀྱང་གཅད་དུ་མེད། །སྲོག་དང་སྐྱེས་བུ་ལོག་རྟོག་ཙམ། །བདེན་པ་གཉིས་ཀ་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླངས་མེད་ཐམས་ཅད་ཉིད་ཀྱི་དབྱིངས། །ཆོས་རྣམས་སྒྱུ་མ་ལྟ་བུ་ལ། །མིང་དང་ཚིག་ཏུ་བཏགས་པ་རྫུན། །རྫུན་ཉིད་ལ་ནི་བརྫུན་སྤྱོད་པ། །རྫུན་ཞེས་བཏགས་ཙམ་ཡོད་མ་ཡིན། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །བླ་མེད་མི་སྤངས་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཡན་ལག་བཅུ་ཡི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། །རྩ་བ་ཉམས་པའི་འཆལ་བ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་མ་བྱེད། །ཉམས་གྱུར་ཉེས་པ་བརྗོད་མི་ལང་། །རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །དམ་ཚིག་འདི་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པ། །རྟོག་འདུལ་དམ་ཚིག་དེ་སྙེད་སྤྲོས། །གཞན་ཡང་རྒྱལ་མཆོག་ཀུན་བཟང་གི། །ཐམས་ཅད་མ་ལུས་ཕྱག་རྒྱ་ཡིས། །སྒྲུབ་མེད་མཆོག་དམ་མ་ལུས་འགྲུབ། །དེ་ལ་སོགས་པ་མཐའ་ཡས་མཆོག །རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིག་མེད་ཀུན་ཏུ་བཟང་པོར་སྦྱོར། །ཇི་བཞིན་ཉིད་དང་འདུལ་བའི་ཐབས། །ཇི་སྙེད་སྡོམ་པ་བསམ་ཡས་འདུས། །མ་ལུས་རྣམ་དག་ལྷུན་གྱིས་གྲུབ། །ཉམས་ན་བསྐངས་པས་རྫོགས་པ་དང་། །དེ་ལ་སོགས་པ་མཐའ་ཡས་མཆོག །ཅེས་བརྗོད་པས། དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་འདུལ་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དམ་ཚིག་གི་ལེའུ་སྟེ་བཅུ་དགུ་པའོ།། ༈ །།དེནས་དེ་བཞིན་གཤེགས་པ་བཅོམ་ལྡན་འདས་དགྱེས་པ་ཆེན་པོ་ལྷུན་གྱིས་གྲུབ་པའི་དམ་ཚིག་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟས་ལྔ་ལ། མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ལ་ཚོགས་ལ་དབུལ། །ཨེ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྤྲེལ་བསྡམས་ནས། །བཅིངས་གྱུར་བསྐྱོད་ནས་ཕྱོགས་བཅུར་གཡོས། །མྱོས་ནས་གས་ཏེ་འཚིག་པར་འགྱུར། །བཾ་གྱི་ཚོགས་ཀྱི་དཀྱིལ་འཁོར་མཆོག །འབར་བ་གཟི་བརྗིད་ལྷུན་ཆེན་ལ། །ཆགས་པའི་ཡིད་ཀྱིས་མཆོད་སྦྱིན་བྱ། །རྡོ་རྗེ་གསུང་ཡང་དབང་དུ་འགྱུར། །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །རྡོ་རྗེ་ཆགས་པའི་ཕུར་པས་གདབ། །ཆགས་པའི་ཚོགས་ལ་ཐིམ་པར་དབུལ། །བཾ་གྱི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །འགུགས་འགྱུར་རྡོ་རྗེའང་ཕྱི་བཞིན་འབྲང་། །ཅི་འདོད་དེ་བཞིན་འོང་བར་འགྱུར། །མ་ཡི་ཚོགས་ཀྱི་དཀྱིལ་འཁོར་མཆོག །འབར་བ་འདུ་འཕྲོ་གཟི་ཆེན་ལ། །དགའ་བའི་ཡིད་ཀྱིས་མཆོད་སྦྱིན་བྱ། །ཡོན་ཏན་ནམ་མཁའི་མཐའ་དང་མཉམ། །བདུད་རྩི་ལྔའམ་ཟས་ལྔ་ལ། །ཡོན་ཏན་ཡིད་བཞིན་གཏེར་དུ་བརྟག །ང་རྒྱལ་དགའ་འཕྲོའི་ཕུར་པས་གདབ། །རྡོ་རྗེེ་གཟི་ཆེན་འཕེལ་བར་དབུལ། །མ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་བསྐྱོད། །གཟི་བརྗིད་འབར་བའི་འཕྲུལ་ཆེན་སྤྲོ། །ཡིད་བཞིན་ནམ་མཁའ་གང་བར་འགྱུར། །ཡ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །དང་བའི་ཡིད་ཀྱིས་མཆོག་སྦྱིན་བྱ། །གཏུམ་ཆེན་རྔམ་པའང་ལྷན་ནེར་འགྱུར། །བདུད་རྩི་ལྔའམ་ཟས་ལྔ་ལ། །གཏུམ་རྔམ་འཁྲུག་པའི་ངོ་བོར་བརྟག །ལྷན་ནེར་གསལ་བའི་ཕུར་བུས་གདབ། །འབར་བ་ལྷན་ནེའི་ཚོགས་ལ་དབུལ། །ཡ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །འབར་བ་ལྷན་ནེའི་བྱིན་གྱིས་ཁྱབ། །ཐམས་ཅད་གཡོ་བ་མེད་པར་བྱེད། །སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་ནས། །གང་འདོད་ལས་དེ་བྱེད་པར་བསྒོ། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་དུ་བསྡུས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་དམ་བཅས་ཁས་བླངས་པའི། །མ་ཐོགས་མྱུར་དུ་མངོན་པར་ཕྱུང་། །དམ་བཅས་བཞིན་དུ་མ་བྱས་ན། །ཇི་ལྟར་དམ་བཅས་མནའ་བོར་བའི། །སྡོམ་བཅས་དེ་ལས་འདའ་བར་འགྱུར། །དམ་ཚིག་དེ་ལས་འདས་གྱུར་ན། །མགོ་ལུས་སྙིང་ཡང་ཚལ་པ་བདུན། །ཡཀྵ་ཁྲོ་བོས་གཏུབས་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་མནའ་བོར་ཁས་བླངས་པའི། །རུལ་མྱགས་འཚིག་ནས་དམྱལ་བར་འགྲོ། །རྣལ་འབྱོར་དམ་ལ་གནས་གྱུར་པའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོང་། །ཕྲ་མེན་མ་ཡང་དངོས་གྲུབ་འཐོབ། །བཅོལ་བའི་ལས་རྣམས་མངོན་དུ་བྱོས། །ཞེས་བསྒོའོ། །ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཁྲག་འཐུང་ཆེན་པོ་ལ་སོགས་པའི། །བྲོ་གར་གླུ་ཚིག་ཆེན་པོས་ནི། །ཐམས་ཅད་ཐམས་ཅད་ཅི་འདོད་པ། །ཐམས་ཅད་ཐམས་ཅད་བྱེད་པ་ཡིན། །མཛོད་ལྡན་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །འདུ་བར་འདོད་ན་འདུ་བར་བྱེད། །འཕེལ་བར་འདོད་ན་འཕེལ་བར་བྱེད། །སྦོས་མོ་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ལྷན་ནེར་འདོད་ན་ལྷན་ནེར་བྱེད། །རྨུགས་པར་འདོད་ན་རྨུགས་པར་བྱེད། །སེང་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཟ་བར་བྱེད། །རྡུལ་ཚ་ཙམ་ཡང་མེད་པར་བྱེད། །བཞད་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་མ་ལུས་འབྱིན་པར་བྱེད། །ཀུན་ལ་རབ་ཏུ་ཉམས་པར་བྱེད། །སླས་དང་བྱི་མོ་བྲན་མོའི་ཚོགས། །བྲོ་གར་གླུ་ཚིག་ཆེན་མོས་ནི། །རྦད་ཅིང་གཏང་བར་བྱ་བ་སྟེ། །ཐམས་ཅད་ཐམས་ཅད་བྱེད་པ་ཡིན། །ལྗོན་པ་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེས་རེག་དྲུང་། །དང་བས་དགའ་བས་ཆགས་པས་དང་། །ཁྲོས་པས་ཀཱ་ལི་རབ་ཏུ་བྱ། །ཞེས་བརྗོད་པས། དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་སྦྱོང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ལྷུན་གྱིས་གྲུབ་པའི་ཕྲིན་ལས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་ནི་ཤུ་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོའི་ཚོགས་ཀྱི་དཀྱིལ་འཁོར་གྱིས་ཤིན་ཏུ་རྔམ་པའི་མདངས་ཀྱིས་གླུ་འདི་བླངས་སོ། །ཧཱུཾ་གཏུམ་ཆེན་དུས་མཐའི་མེ་ཆེན་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ་ཧོཿ ཧཱུཾ་རྔམ་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ་ཧོཿ ཧཱུཾ་ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོཿ ཧཱུཾ་ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོཿ ཧཱུཾ་བདུད་ཀུན་གྱི་ནི་བདག་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོཿ ཧཱུཾ་རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོཿ ཞེས་ཆེད་དུ་གླུ་བླངས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོ་ལ་བསྟོད་པའི་ལེའུ་སྟེ་ཉི་ཤུ་གཅིག་པའོ།། ༈ །།དེ་ནས་བཅོམ་ལྡན་འདས་དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་གསང་སྔགས་ཀྱི་རྒྱལ་པོ་བརྟན་པར་གཟུང་བ་འདི་ཆེད་དུ་བརྗོད་དོ། །ཀྱེ་ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་བརྗོད་པས། དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་དུས་བཞི་མཉམ་པ་ཉིད་ཀྱི་དབྱིངས། སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །འཕགས་པ་རྟོག་པའི་རྒྱལ་པོ་སྒྱུ་འཕྱུལ་དྲྭ་བ་ལེའུ་སྟོང་ཕྲག་བརྒྱ་པ་ལས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་དེ་བཞིན་གཤེགས་པ་ཐམས་ཅད་ཀྱི་གསང་བ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐམས་ཅད་མ་ལུས་པར་འཕྲོས་ཏེ་འཁོར་ལོ་བསྐོར་བ་དེ་དག་གི་འབྲས་བུའི་མཆོག །གཡུང་ཊཱིཀ་ན་རྫོགས་སོ་ཞེས་པ་རེ་ཞིག་རང་རྩོམ་ཟིན་པ་ལ་དགོངས་པ་འདྲའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པ་དང་ཡོངས་སུ་གཟུང་བའི་ལེའུ་སྟེ་ཉི་ཤུ་གཉིས་པའོ།། ༈ །།རྒྱ་གར་གྱི་མཁན་པོ་བི་མ་ལ་མི་ཏྲའི་ཞལ་སྔ་ནས་དང་། བོད་ཀྱི་ལོ་ཙཱ་བ་གཉགས་ཛྙཱ་ན་ཀུ་མཱ་ར་དང་། རྨ་ཨཱ་ཙརྻ་རིན་ཆེན་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སྤྱིར་རྩ་རྒྱུད་འདི་ལ་བོད་དུ་ལོ་པཎ་བསྡེབས་པའི་གཞི་འགྱུར་གསུམ་དང་། པཎྜི་ཏ་མེད་པའི་རྩལ་འགྱུར་གཉིས་ཏེ་འགྱུར་ལྔ་བྱུང་བར་གྲགས་པ་ལས། གཞི་འགྱུར་གསུམ་ནི། སློབ་དཔོན་སངས་རྒྱས་གསང་བ་དང་བཻ་རོ་ཙ་ནའི་སྔ་འགྱུར། སློབ་དཔོན་པདྨ་འབྱུང་གནས་དང་གཉགས་ཛྙཱ་ནའི་བར་འགྱུར། བི་མ་ལ་དང་རྨ་གཉགས་ཐུན་མོང་གི་ཕྱི་འགྱུར་དང་གསུམ་ལས། འདི་ནི་ཕྱི་མ་སྟེ་འཕྱོང་ཅན་ཡིན་ལ། སྔ་མ་གཉིས་ལ་འཕྱོང་མེད་པར་གྲགས་སོ། །རྩལ་འགྱུར་གཉིས་ནི། བསྟན་པ་ཕྱི་དར་གྱི་ཚེ་ཡོངས་རྫོགས་བསྟན་པའི་མངའ་བདག་ཐར་ལོ་ཉི་མ་རྒྱལ་མཚན་གྱི་འགྱུར་དང་། འགོས་ལོ་ཙཱ་བ་གཞོན་ནུ་དཔལ་གྱིས་འགྱུར་བཅོས་མཛད་པ་གཉིས་སུ་གྲགས་སོ། །སརྦ་དཱ་མདྒ་ལཾ།། །།

སྙིང་པོའི་རྒྱུད་བཀླག་ཐབས་ཀྱི་མན་ངག་ཟབ་དོན་སྣང་བ། དྷརྨཱ་ཤྲཱི།

སྙིང་པོའི་རྒྱུད་བཀླག་ཐབས་ཀྱི་མན་ངག་ཟབ་དོན་སྣང་བ་བཞུགས་སོ། །ༀ་སྭ་སྟི། རིགས་བདག་དྲུག་པའི་གནས་ཐོབ་རྒྱུར་གྱུར་པའི། །བླ་མའི་ཞབས་ཀྱི་པདྨོར་ཕྱག་བྱས་ཏེ། །དང་པོའི་ལས་ཅན་རྣམས་ལ་ཉེར་མཁོ་བའི། །ཟབ་མོའི་རྒྱུད་ཀྱི་བཀླག་ཐབས་མན་ངག་བཤད། །དེ་ཡང་ཚེ་འདི་ཁོ་ན་ལ་སངས་རྒྱས་ཐོབ་པར་འདོད་པས། ཟབ་མོའི་རྒྱུད་རྣམས་ལ་རྟོགས་གོམས་ཀྱི་སྦྱོར་བས་འབད་པར་བྱ་ཞིང་། གལ་ཏེ་དེ་ཙམ་མི་ནུས་པའི་བློ་ཆུང་བདག་གིས་ཀྱང་། རྒྱུད་ལ་མོས་པའི་སྒོ་ནས་བལྟ་བ་དང་། འབྲི་བ་དང་། བཀླག་པ་སོགས་ལ་ཅི་ནས་ཀྱང་འབད་པར་བྱ་སྟེ། ཕན་ཡོན་བསམ་གྱིས་མི་ཁྱབ་པར་གསུངས་པའི་ཕྱིར་རོ། །དེ་སྐད་དུའང་རྩ་རྒྱུད་ལས། གང་གིས་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་དང་། བཤད་རྒྱུད་རྒྱ་མཚོ་ལས། བཤད་རྒྱུད་རྒྱ་མཚོའི་རྒྱུད་ཆེན་འདི། །མོས་དང་མཐོང་དང་བྲི་བ་དང་། །བཀླག་པ་ཙམ་གྱིས་འགྲུབ་འགྱུར་ན། །རྟོགས་དང་གོམས་པའི་སྦྱོར་བ་ཡིས། །འབྲས་བུ་ཐོབ་པ་སྨོས་ཅི་དགོས། །ཞེས་གསུངས་སོ། །དེ་དག་ལས་འདིར་རེ་ཞིག་བརྒྱུད་བཀླག་པའི་མན་ངག་གི་རིམ་པ་ནི། ཐོག་མར་མཆོད་གཏོར་སོགས་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས་ལ། སྔོན་འགྲོ་རྒྱུད་སྦྱང་བའི་ཡན་ལག་ནི། བཛྲ་ས་མཱ་ཛཿས། ཚོགས་ཞིང་རྣམས་མཁའ་ཁྱབ་ཀྱི་འཁོར་ལོར་སད་པར་གྱུར་པ་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་བརྗོད་ནས། ཚོགས་ཞིང་རྣམས་རང་ལ་བསྟིམ་མོ། །དེ་ནས་སྲུང་བའི་འཁོར་ལོ་བསྒོམ་པ་ནི། བཛྲ་མ་ཧཱ་ཤྲཱི་ཧེ་རུ་ཀ །རང་ཉིད་སྐད་ཅིག་དྲན་རྫོགས་སུ། །རྡོ་རྗེ་ཁྲག་འཐུང་ཀྲོ་དྷཱིར་བཅས། །ཁྲོ་གཏུམ་མི་བཟད་སྲིད་པོའི་གཟུགས། །བསྐལ་པའི་མེ་དཔུང་ཀློང་ན་གསལ། །ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུཾ། ཁྲག་འཐུང་ཡབ་ཡུམ་སྦྱོར་མཚམས་ནས། །ཁྲོ་ཚོགས་དཔག་མེད་སྤྲོས་པ་ཡིས། །གསང་སྤྱོད་ལྟ་བར་མི་དབང་བའི། །ལོག་འདྲེན་གདོན་བགེགས་མཐར་བསྐྲད་གྱུར། །ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། སླར་འདུས་ཁྲོ་བོའི་རང་བཞིན་གྱི། །རྡོ་རྗེའི་གུར་གྱུར་དེ་ཡི་ཕྱིར། །མེ་རླུང་རྒྱ་མཚོའི་ར་བས་གཏམས། །གཞོམ་མེད་སྲུང་བའི་གུར་དུ་གྱུར། བཛྲ་པཉྩ་ར་རྃ་ཡྃ་ཁྃ། དེ་ནས་སེམས་བསྐྱེད་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཨེ་མའོ་ངོ་མཚར་རྨད་ཀྱི་ཆོས། རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར༴ རྫོགས་པའི་སངས་རྒྱས༴ འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར༴ རྫོགས་པའི་སངས་རྒྱས༴ གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར༴ རྫོགས་པའི་སངས་རྒྱས༴ དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར༴ རྫོགས་པའི་སངས་རྒྱས༴ འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །དེ་ནས་སྣོད་བཅུད་དག་པའི་འཁོར་ལོར་བསྒོམ་པ་ལ། ཐོག་མར་ཏིང་འཛིན་གསུམ་ནི། ཧཱུྃ། མི་དམིགས་ཆོས་ཉིད་དེ་བཞིན་ཉིད། །རང་བཞིན་འོད་གསལ་ཀུན་ཏུ་སྣང་། །ཨ་ཡིག་རྒྱུ་ལས་དཀྱིལ་འཁོར་འབྱུང་། །ཞེས་པའི་དོན་བསྒོམ་མོ། །དེ་ནས་རྟེན་དང་བརྟེན་པའི་དཀྱིལ་འཁོར་བསྐྱེད་པ་ནི། རྒྱུ་ཡི་ཡི་གེ་ཨ་དཀར་ལས། །ཨེ་ཡྃ་བྃ་ལྃ་སུྃ་རྃ་ཆད། །མཁའ་རླུང་ཆུ་ས་རི་རབ་སྟེང་། །མེ་དཀྱིལ་འཁོར་ཡུག་དབུས་སུ་བྷཱུྃ། བྷྲཱུྃ་བི་ཤྭ་བི་ཤུདྡྷེ། ཡོངས་གྱུར་རིན་ཆེན་གཞལ་ཡས་ཁང་། །མཚན་ཉིད་ཀུན་རྫོགས་ལྟེ་བ་རུ། །སེང་གེས་བཏེགས་པའི་རིན་ཆེན་ཁྲི། །དེ་སྟེང་པད་ཉི་ཟླ་བེར་བཅས། །རང་རིག་ཨ་དཀར་གདན་སྟེང་བབས། །དེ་ཉིད་ཧཱུྃ་ལས་རྡོ་རྗེ་གྱུར། །ཧཱུྃ་བཛྲ་དྷྲིཀྲ །འཕྲོ་འདུས་ཡོངས་གྱུར་བཅོམ་ལྡན་འདས། །རྡོར་སེམས་ཨིནྡྲ་ནཱི་ལའི་མདོག །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་དྲིལ་དཀུར་བརྟེན་ཡུམ་ལ་འཁྱུད། །ཞབས་གཉིས་མཉམ་པའི་སྐྱིལ་ཀྲུང་ཅན། །ཐུགས་ལས་མཱུྃ་ཆད་དྲིལ་བུར་གྱུར། །མཱུྃ་དྷཱ་ཏི་ཤྭ་རཱི། ཡོངས་གྱུར་ཕང་གཡོན་དབྱིངས་ཕྱུག་སྔོ། །གཡས་པའི་དྲིལ་བུས་ཡབ་མགུལ་འཁྱུད། །གཡོན་པས་རྡོ་རྗེ་ཐུགས་ཀར་གཏོད། །བརྟུལ་ཞུགས་སྐྱིལ་མོ་ཀྲུང་གིས་འཁྲིལ། །གཉིས་ཀ་རྒྱན་ཆས་བཅུ་གསུམ་གྱིས། །རབ་བརྒྱན་ཞི་བའི་ཚུལ་དགུས་བརྗིད། །བྱེ་བ་དྲུག་ཕྲག་དྲུག་འཕྲོ་བའི། །འོད་ཟེར་ཀློང་བཞུགས་གཉིས་ཀ་ཡི། །སྲོག་གོར་རང་འདྲའི་ཡེ་ཤེས་སེམས། །དེ་ཐུགས་རང་རང་ཕྱག་མཚན་དབུས། །ཐུགས་སྲོག་དྭངས་མའི་ཡི་གེ་གསལ། །དེ་ནས་དབང་བསྐུར་ཞིང་བྱིན་གྱིས་བརླབ་པ་ནི། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཨ་དཪྴ། ས་མ་ཏཱ། པྲ་ཏྱཱ་བེཀྵ་ཎཱ། ཀྲྀ་ཏྱཱ་ནུཥྛཱ་ན་རྣམས་ལ་སྦྱར་བའི་སྔགས་ཚན་ལྔ་དང་། ཡེ་ཤེས་ལྔ་ཡི་བདུད་རྩིའི་ཆུས། །དབང་བསྐུར་རིགས་ལྔས་དབུ་བརྒྱན་གྱུར། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། དེ་བཞིན་དུ། ཝཱ་ཀ་དང་ཙིཏྟ་ལའང་སྦྱར་བས། སྤྱི་མགྲིན་སྙིང་གའི་གནས་གསུམ་དུ། །བྱིན་བརླབས་རྡོ་རྗེ་གསུམ་དུ་གསལ། །དེ་ནས་སྤྱན་དྲངས་ཤིང་བསྟིམ་པ་ནི། རང་གི་ཐུགས་སྲོག་ཧཱུཾ་ཡིག་ལས། །འོད་འཕྲོས་ཡེ་ཤེས་འཁོར་ལོ་དབབ། །ལྕགས་ཀྱུའི་ཕྱག་རྒྱ་དང་བཅས་པས། ༀ་ཨེ་ཧྱེ་ཧི་བྷ་ག་ཝན་མ་ཧཱ་ཀ་རུ་ཎཱི་ཀ་དྲི་ཤྱ་ཧོཿ ས་མ་ཡ་སྟྭཾ། ཞེས་པས་སྙན་གསན་དབབ། རང་གི་ཐུགས་ཀ་ནས་འཕྲོས་པའི། །ཛཿཧཱུྃ་བཾ་ཧོཿས་སྤྱན་དྲངས་ནས། མདུན་མཁར་དམ་ཚིག་འཁོར་ལོ་དང་། །མེ་རི་འདབ་འབྱོར་ཚུལ་གྱིས་བཞུགས། །ཛཿ་ཧཱུྃ་བཾ་ཧོཿ ཞེས་ཕྱག་རྒྱ་དང་བཅས་ཏེ་སྤྱན་དྲང་ངོ་། །ༀ་བཛྲ་ས་མ་ཡ་ༀ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་རིག་པའི་མེ་ཏོག་དོར་ལ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་གཉིས་སུ་མེད་པར་བསམ། དངོས་གྲུབ་བསྐུལ་བ་ནི། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོ་བདག་སྦྱོར་ཅིག །ༀ་བཛྲ་ས་མ་ཡ་ཧཱུྃ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོཿ ཛཿཧཱུྃ་བཾ་ཧོཿ ཞེས་རྒྱ་བཞིས། ཆུ་ལ་ཆུ་བཞག་ཇི་བཞིན་དུ། །དམ་ཚིག་ཡེ་ཤེས་གཉིས་མེད་གྱུར། །སྐབས་འདིར་སྤྲོ་ན་མཆོད་བསྟོད་སོགས་བྱས་པས་ཆོག་ལ། མ་བྱས་ཀྱང་མི་འགལ་ལོ། །དེ་ནས། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་མོས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་བརྗོད་ནས་བཟླས་པ་ལ་འཇུག་སྟེ། བདག་ཉིད་དམ་ཚིག་སེམས་དཔའ་ལས། །ཡེ་ཤེས་འཁོར་ལོ་མདུན་དུ་དབྱེ། །གཉིས་ཀའི་ཐུགས་སྲོག་ཡི་གེའི་མཐར། །སྔགས་ཕྲེང་གཡས་སུ་འཁོར་བ་ལས། །འོད་ཟེར་འགལ་མེའི་འཁོར་ལོ་ལྟར། །ཕར་འཕྲོས་མཆོད་ཅིང་ཚུར་བྱུང་བའི། །ཡེ་ཤེས་འོད་ཟེར་བདག་ལ་ཐིམ། །དེ་ལྟར་དམིགས་ལ་བཟླ་བྱའི་སྔགས་ནི། ཧཱུྃ་བཛྲ་དྷྲིཀ྄། མཱུྃ་དྷཱ་ཏི་ཤྭ་རཱི། ཞེས་ཡབ་ཡུམ་གྱི་སྔགས་དང་། ཞི་བའི་སྤྱི་སྔགས་བོ་དྷི་ཙིཏྟའང་ཅི་རིགས་པ་བཟླས་པའི་མཐར། ཛཿཧཱུྃ་བྃ་ཧོཿ ཞེས་ཕྱག་རྒྱ་དང་བཅས་པས་སླར་ཡང་དམ་ཡེ་དབྱེར་མེད་དུ་བྱའོ། །དེ་ནས་སྐབས་འདིར་རྒྱུན་གཏོར་བསྔོ་བ་ནི། །རྃ་ཡྃ་ཁྃ། རྣམ་དག་ཆོས་དབྱིངས་ངང་ཉིད་ལས། །རང་བྱུང་མཆོད་པའི་ཕུང་པོ་ནི། །ཀུན་བཟང་མཆོད་པའི་སྤྲིན་ལྟ་བུས། །དཔག་ཡས་ནམ་མཁའ་གང་བར་གྱུར། །ན་མསྶ་མནྟ་བུདྡྷ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷུ་པེ་དྷུ། དེ་བཞིན་སྦྱར་བས། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན་དང་། ༀ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ། ༀ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏི་གུ་ཧྱ་ས་མ་ཡེ་སྭཱ་ཧཱ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱ། ཞེས་པས་བྱིན་གྱིས་བརླབ་ནས། མཆོད་ཡུལ་རྣམས། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲི་ཤྱ་ཧོཿ ས་མ་ཡ་སྟྭཾ། ཞེས་པས་སྤྱན་དྲངས་ལ། ན་མ སྶརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་ཀུན་བཟང་། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མསྶ་མནྟ་བུདྡྷ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ཞེས་པས་ཞབས་བསིལ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ༀ་ཤྲཱི་བཛྲ་རཱ་ག་པུཥྤེ་པུ། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ༀ་ཤྲཱི་བཛྲ་རཱ་ག་གནྡྷེ་གན། ཞེས་པས་བཞི་བསྣོལ། ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ༀ་སརྦ་ཏ་ཐཱ་ག་ཏ་མ་ཧཱ་རཀྟ་ཁ་རཾ་ཁཱ་ཧི། ཞེས་པས་སྨན་རཀ་དབུལ་ཞིང་། གཏོར་མ་ནི། ལྷ་རྣམས་ཀྱི་ལྗགས་ཧཱུྃ་ལས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ནས་གསོལ་བར་བསམ་ལ། ༀ་གུ་རུ་མཎྜ་ལ་དེ་ཝ་ག་ཎ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པས་བླ་མ་ཡི་དམ་སྤྱི་དང་། ༀ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿཨི་དཾ་སོགས་དང་། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨི་དཾ་སོགས་ཀྱིས་ཞི་ཁྲོ་ལ་སྒོས་སུ་འབུལ། དེ་ནས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེར་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །ཞེས་པས་བསྟོད། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱིས་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཅེས་འདོད་དོན་གསོལ། དེ་ནས་ཆོས་སྐྱོང་དང་གཞི་བདག་གི་གཏོར་མ་སོགས་སོ་སོའི་གཞུང་བཞིན་དུ་བྱའོ། ༈ །དེ་ནས་རྒྱུད་བཀླག་པའི་མན་ངག་དངོས་ནི། རང་གི་ལྕེ་ཡི་འདོམ་རྩའི་དབུས། །བྷྲཱུྃ་ལས་འཁོར་ལོ་རྩིབས་བཞི་པ། །གྲུ་བཞི་སྒོ་ལྡན་གཞལ་ཡས་ཁང་། །ལྟེ་བ་རྩིབས་སྟེང་པདྨ་དང་། །ཉི་ཟླ་སྒོ་བཞིར་ཉི་མའི་གདན། །དབུས་སུ་ཧྲཱིཿཡིག་ཡོངས་གྱུར་ལས། །སྣང་མཐའ་གོས་དཀར་མ་དང་སྦྱོར། །རྩིབས་བཞིར་ཤར་ནས་རིམ་པ་བཞིན། །ཧྲཱིཿཡིག་ཟུང་རེ་ཞུ་བ་ལས། །རྡོ་རྗེ་ཆོས་དང་པི་ཝང་མ། །རྡོ་རྗེ་རྣོན་པོ་མེ་སྒྲོན་དང་། །རྡོ་རྗེ་འཁོར་ལོ་ལྕགས་སྒྲོག་སྟེ། །རྡོ་རྗེ་སྨྲ་བ་གསལ་བཀྲར་བཅས། །ཀུན་ཀྱང་མཉམ་སྦྱོར་པད་རག་མདོག །སྒོ་བཞིར་རང་རང་ས་བོན་ལས། །གཤིན་རྗེ་གཤེད་དང་སྟོབས་པོ་ཆེ། །རྟ་མགྲིན་བདུད་རྩི་འཁྱིལ་བ་བཞི། །ལྕགས་ཀྱུ་མ་སོགས་ཡུམ་དང་འཁྲིལ། །དེ་ནས། ༀ་མ་ཧཱ་པྲ་ཏྱཱ་བེཀྵ་ཎཱ་དང་པོར་བྱས་པའི། ཨ་དཪྴ༴ ས་མ་ཏཱ༴ ཤུ་ནྱ་ཏཱ༴ ཀྲྀ་ཏྱ་ནུ་ཥྛ་ན་རྣམས་ལ་འགྲེས་སྦྱར་བའི་སྔགས་ཚན་ལྔས་དབང་བསྐུར། ༀ་སརྦ་ཏ་ཐཱ་ག་ཏ་ཀཱ་ཡ་སོགས་གསུམ་གྱིས་བྱིན་གྱིས་བརླབ། བཛྲ་ས་མ་ཛཿ ས་སྙན་གསན་དབབ། ༀ་ཨེ་ཧྱེ་ཧིས་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ་གྱིས་བརྟན་པར་བྱ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། ས་མ་ཡ་ཧོཿ ས་མ་ཡ་སྟྭཾ། ཞེས་བསྐུལ་ཏེ། ལྷ་ཚོགས་ཡབ་ཡུམ་རྣམས་སྙོམས་པར་ཞུགས་པའི་རྗེས་ཆགས་ཀྱི་མེས་འོད་དུ་ཞུ་ནས་རང་ལ་ཐིམ། དེའི་རྐྱེན་གྱིས་རང་ཡང་འོད་དུ་ཞུ་བའི་འོད་ཕུང་དམར་པོ་ལས། བདེ་བར་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་སྣང་བ་མཐའ་ཡས་ཀྱི་སྐུར་གྱུར་པའི་ང་རྒྱལ་དང་བཅས་ཏེ། གང་དག་རབ་འབྱམས་ཕྱོགས་བཅུའི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པས་ཆོས་ཀྱི་ཆར་འབེབས་ཀྱི། །ཉན་པར་འདོད་པ་ཐམས་ཅད་འདིར་གཤེགས་ཤིག །ཅེས་ལྷ་དང་རིག་པ་འཛིན་པ་སོགས་དང་དད་པས་ཆོས་ཀྱི་གཏམ་ཉན་པར་འདོད་པ་རྣམས་བསྡུས་ཏེ། སྒོ་གསུམ་ལྷ་སྔགས་ཡེ་ཤེས་ཀྱི་འཁོར་ལོ་ལས་མི་འདའ་བའི་སྒོ་ནས་རྒྱུད་བཀླག་པར་བྱའོ། །ཚུལ་འདི་ནི་རྒྱུད་ལས། སྨྲ་བྱེད་འཁོར་ལོའི་གཞལ་ཡས་སུ། །ཞེས་སོགས་འཆད་དབང་གི་བསམ་རྒྱུད་དུ་གསུངས་པའི་རིག་པ་སྦྱར་བ་སྟེ། གསང་འདུས་ལས་ཀྱང་། མདོ་དོན་ཆོ་གའི་རིམ་པ་ལ། རྟག་པར་རྡོ་རྗེ་ཆོས་སུ་བྱ། །ཞེས་གསུངས་པ་དང་ཡང་གནད་གཅིག་གོ། །གཞན་དུ་ན་ཐོག་མ་ནས་སྲུང་འཁོར་གྱི་རྗེས་སུ། རྒྱུ་ཏིང་ངེ་འཛིན་གསུམ་ལས་འབྲས་བུ་པདྨ་རིགས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་བསྐྱེད་དེ། ཆོ་གའི་བྱ་བ་གཞན་རྣམས་ཆིངས་སྔར་ལྟར་ལས། གཏོར་འབུལ་ཐོན་ནས་རྒྱུད་ཉན་པར་བསྐུལ་བ་ལ་འཇུག་སྟེ། འདི་ཡང་གོང་མ་དང་གནད་གཅིག་པ་ཡིན་ནོ། །ཡང་རྣམ་པ་གཅིག་ཏུ། སྔོན་བྱུང་ཇི་ལྟ་བ་བཞིན་དུ་བགྱིས་ཀྱང་མི་འགལ་བར་སེམས་ཏེ། དེའི་ཚུལ་ནི། ཐུབ་པ་དྲུག་མ་གཏོགས་པ་རང་སྣང་ཞི་བའི་དཀྱིལ་འཁོར་སུམ་ཅུ་རྩ་དྲུག་གི་རྟེན་དང་བརྟེན་པར་བཅས་པ་དྲྭ་བའི་གཞུང་ལྟར་ལས། གཙོ་བོ་གོ་འཕོ་སྟེ། ཐལ་བ་ལས། འཁོར་ལོའི་ལྟེ་བར་མི་འཇིགས་ཏེ། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་གསུངས་པས། དབུས་ཀྱི་ཁྲིར་ཀུན་བཟང་ཡབ་ཡུམ་བཞུགས་པའི་མདུན་ན་མི་བསྐྱོད་པ་ཡབ་ཡུམ་བཀའ་སྡོད་ཀྱི་ཚུལ་དུ་བཞུགས་པ་དང་། ཐུབ་པ་དྲུག་གི་སྟོན་པའི་ཐུགས་ལས་སྤྲོས་ཏེ་རང་རང་གི་གདུལ་ཞིང་རིགས་དྲུག་གི་གནས་རིགས་སོ་སོར་འགྲོ་བའི་དོན་མཛད་པ་དང་། ཁྲོ་བོའི་དཀྱིལ་འཁོར་ནི། གདུལ་དཀའ་དྲག་པོ་འདུལ་བར་བྱ་བའི་ཕྱིར་ཞི་བ་ཉིད་ཁྲོ་བོར་སྣང་བར་མཛད་པ་སྟེ། དེ་ལྟར་མོས་པའི་སྒོ་ནས་རྒྱུད་བཀླག་པར་བྱ་ཞིང་། མཐར་རྒྱུད་ཀྱི་མཇུག་ཏུ། སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །ཞེས་རྒྱུད་རྫོགས་ནས་མཛད་པ་ཆོས་ཉིད་དུ་བཞུགས་ཚུལ་གྱི་ཚིག་ཕྱིར་སེམས་གཞོལ་ཏེ་མཉམ་པར་འཇོག་པ་ལས། དཀྱིལ་འཁོར་ལ་ཉེར་བསྡུ་སོགས་སྤྲོས་པའི་ཆོ་ག་གཞན་བྱ་མི་དགོས་ལ། འོན་ཀྱང་སྲུང་མའི་གཏོར་འབུལ་དང་། མཐར་ཤིག་བརྗོད་དང་བསྔོ་སྨོན་སོགས་འོག་ནས་འབྱུང་བ་ལྟར་བགྱིས་ཀྱང་མི་འགལ་ལོ། །འདོན་ཐབས་ཀྱི་མན་ངག་སྔ་མ་ཉིད་ཀྱི་དབང་དུ་བྱས་ན། རྒྱུད་རྫོགས་པའི་རྗེས་སུ། སྲུང་མའི་གཏོར་མ་གཤེགས། སླར་ཡང་མཆོད་ཅིང་བསྟོད་ནས། ཡིག་བརྒྱ་དང་། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་ལྷག་ཆད་ཁ་གསོ། ༀ། ཁྱེད་ཀྱི་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿས་ཡེ་ཤེས་ཀྱི་འཁོར་ལོ་དང་། གཏོར་མགྲོན་རྣམས་རང་བཞིན་གྱི་གནས་སུ་གཤེགས་པར་བསམ། སྣོད་བཅུད་འོད་ཞུ་དམ་ཚིག་འཁོར་ལོ་ལ། །རིམ་བཞིན་ཐུགས་སྲོག་ནཱ་དའི་བར་དུ་བསྡུ། །ཧཱུྃ་བཛྲ་དྷྲིཀ྄ །དེ་ལས་སླར་ཡང་སྐད་ཅིག་དྲན་རྫོགས་སུ། །མི་བསྐྱོད་སྣང་སྟོང་སྒྱུ་མའི་སྐུ་རུ་ལྡང་། །དེ་ཡི་གནས་གསུམ་ༀ་དང་ཨཱཿཧཱུྃ་ལས། །སྒོ་གསུམ་རྡོ་རྗེ་གསུམ་གྱི་ངོ་བོར་བཅིངས། །རྒྱ་གྲམ་གྱི་ཕྱག་རྒྱ་སྤྱི་བོར་བཞག་སྟེ། བཛྲ་རཀྵ་ཧཾ། སྤྱི་བོའི་ཧཾ་ཞུ་རྡོ་རྗེའི་འོད་ཟེར་གྱིས། །རང་ལུས་ཀུན་ཁྱབ་རྡོ་རྗེའི་གོ་ཆར་གྱུར། །དེ་ནས་བསྔོ་བ་དང་ཤིས་བརྗོད་ནི། བླ་མ་ཡི་དམ་ལྷ་ཚོགས་དགོངས་སུ་གསོལ། །ཞེས་སོགས་དོང་སྤྲུགས་ལྟར་དང་། ཕུན་སུམ་ཚོགས་པ་ལ་སོགས་པའི་བཀྲ་ཤིས་ཅི་རིགས་ཀྱང་རྒྱ་ཆེར་བརྗོད་པར་བྱའོ། །སྒོ་གསུམ་ལྷ་སྔགས་ཏིང་འཛིན་རོལ་པ་ཡི། །རྣལ་འབྱོར་ངང་ནས་གསང་ཆེན་ཟབ་མོའི་རྒྱུད། །འཆད་དང་ཉན་ནམ་འབྲི་ཀློག་འཆང་རྣམས་ལ། །རྡོ་རྗེ་འཛིན་རྣམས་ལྷག་པར་གཟིགས་པར་འགྱུར། །དེ་སྐད་བཀའ་དྲིན་མཉམ་མེད་ཆོས་ཀྱི་རྗེའི། །བཀའ་ཡི་གནང་བ་ཐོབ་ནས་རྗེ་བཙུན་དེའི། །བཀའ་འབངས་ཆར་གཏོགས་དྷརྨཱས་ཟིན་བྲིས་སུ། །སྤེལ་བའི་དགེ་བའང་འགྲོ་ཕན་རྒྱུ་རུ་བསྔོ། །དགེའོ།། །།

དཔལ་གསང་བ་སྙིང་པོ་སྒྱུ་འཕྲུལ་དྲྭ་བ་རྩ་བའི་རྒྱུད་འཆད་ཐབས་ཀྱི་ཆོ་གའི་རིམ་པ། སྨིན་གླིང་ཁྲི་ཆེན་པདྨ་དབང་རྒྱལ།

དཔལ་གསང་བ་སྙིང་པོ་སྒྱུ་འཕྲུལ་དྲྭ་བ་རྩ་བའི་རྒྱུད་འཆད་ཐབས་ཀྱི་ཆོ་གའི་རིམ་པ་ཨོ་རྒྱན་སྨིན་གྲོལ་གླིང་གི་ཁྲི་ཆེན་པདྨ་དབང་རྒྱལ་གྱིས་མཛད་པ་བཞུགས་སོ། །ན་མོ་གུ་རུ་བྷྱཿ རྒྱུད་ཀྱི་འཆད་ཉན་ཚུགས་པའི་ཉིན་ཐོག་མར་སློབ་དཔོན་གྱིས་ཚིག་བདུན་གསོལ་འདེབས་དང་། རྣམ་ཐར་གསོལ་འདེབས་སྔོན་དུ་འགྲོ་བས་ཚོགས་ཞིང་བཛྲ་ས་མཱ་ཛཿས་སྤྱན་དྲངས་ནས་རྒྱུན་བཤགས་བྱ་བ་ནས་བཟུང་འདས་གཏོར་བསྔོ་བའི་བར་ཟབ་དོན་སྣང་བ་བཞིན་བཏང་། གཏོར་བསྔོས་ལེགས་ལྡན་གཏེར་གཞི་བཤགས་ཕྲིན་རྗེས་གྲོལ། སློབ་མ་རྣམས་འདུས་པ་དང་ཐམས་ཅད་སྡེབ་འདོན་གྱིས་ཚིག་བདུན་གསོལ་འདེབས་དང་། སྤྲོས་བྲལ་ཆོས་དབྱིངས་ལྷུ་གསུམ་གྱི་རྗེས། མཚོ་སྐྱེས་སྤྲུལ་སྐུས་ལུང་བསྟན་རྗེས་བཟུང་ཞིང་། །སོགས་ནས། ཀུན་ཁྱབ་འགྱུར་མེད་སོགས། བསླབ་གསུམ་རྣམ་དག་སོགས། སངས་རྒྱས་གཉིས་པ་སོགས། རྣམ་དག་སྨོན་ལམ་སོགས། རྒྱལ་བ་ཀུན་འདུས་སོགས། རྡོ་རྗེ་སློབ་དཔོན་སོགས་རྒྱུན་བཤགས་ལན་གཅིག་གི་རྗེས་སུ་སློབ་དཔོན་གྱིས། སོ་སོ་རང་རང་གི་དབུ་གཙུག་ཏུ་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་རེ་རེ་འོད་དུ་ཞུ་བ་ལས་བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་གཏོད་ཅིང་འཛིན་པ། གཡོན་དངུལ་དཀར་གྱི་དྲིལ་བུ་དཀུ་ལ་བརྟེན་པ། ཞབས་སེམས་དཔའི་སྐྱིལ་མོ་ཀྲུང་དུ་བཞུགས་པ་དར་དང་རིན་པོ་ཆེའི་རྒྱན་གྱིས་བརྒྱན་པ། ཡུམ་སྙེམས་མ་དཀར་མོ་དང་མཉམ་པར་སྦྱོར་བའི་སྐུར་གྱུར་པའི་ཡབ་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དཀར་པོ་གསལ་ཞིང་འཚེར་བ། དེའི་མཐའ་བསྐོར་དུ་ཡི་གེ་བརྒྱ་པའི་སྔགས་ཕྲེང་དྲི་མ་མེད་པས་གཡས་སུ་བསྐོར་བར་བསམ་ལ། སྤྱི་བོའི་བླ་མ་རྡོ་རྗེ་སེམས་དཔའ་ལ་མོས་གུས་གདུང་ཤུགས་དྲག་པོས་ཡི་གེ་བརྒྱ་པ་གསོལ་འདེབས་ཀྱི་ཚུལ་དུ་བཟླས་པས་ཐུགས་ཀའི་སྔགས་ཕྲེང་དང་སྐུའི་ཆ་ཐམས་ཅད་ལས་བདུད་རྩི་དཀར་པོའི་ཆུ་རྒྱུན་སྐྱ་ཆིལ་ཆིལ་བབས་པ་རང་གི་སྤྱི་བོ་ནས་ཞུགས། ལུས་ནང་གི་ནད་གདོན་སྡིག་སྒྲིབ་ཐམས་ཅད་སངས་ཀྱིས་དག །སྐུ་གསུང་ཐུགས་ཡེ་ཤེས་རྡོ་རྗེའི་དབང་བཞི་རྫོགས་སུ་ཐོབ་སྟེ་ཐུགས་རྒྱུད་བྱིན་གྱིས་བརླབས་པར་གྱུར་སྙམ་པས་ཡི་གེ་བརྒྱ་པ་གསོལ་འདེབས་ཀྱི་ཚུལ་དུ་ལྷན་ཅིག་གནང་བར་ཞུ། ཞེས་ཡིག་བརྒྱ་མང་ཞིག་བཟླ། མགོན་པོ་བདག་ནི་སོགས་ནས་མཛད་དུ་གསོལ། །བར། དེ་ལྟར་གསོལ་བ་བཏབ་པས་སྤྱི་བོའི་བླ་མ་རྡོ་རྗེ་སེམས་དཔའ་འོད་དུ་ཞུ་ནས་སོ་སོ་རང་རང་ལ་ཐིམ་པར་གྱུར། དེ་ནས་སློབ་དཔོན་གྱི་ལྕེའི་དཀྱིལ་འཁོར་གྱི་དབུས་དང་། སོ་སོ་རང་རང་གི་སྙན་གྱི་འདོམས་རྩ་གཉིས་སུ་བྷྲཱུཾ་ཡིག་དམར་སེར་རེ་རེ་འོད་དུ་ཞུ་བ་ལས། འཁོར་ལོ་རྩིབས་བཞི་པའི་གཞལ་ཡས་ཁང་གྲུ་བཞི་སྒོ་བཞི་པ་གདན་དང་བཅས་པ་རེ་རེ་གསལ་བར་གྱུར། དེ་ནས་སློབ་དཔོན་གྱི་ལྕེའི་དཀྱིལ་འཁོར་གྱི་དབུས་སུ་ཧྲཱིཿཟུང་ཞུ་བར་གྱུར་པ་ལས་སྣང་བ་མཐའ་ཡས་དམར་པོ་གཡས་པདྨ་དང་གཡོན་དྲིལ་བུ་འཛིན་པ་ཡུམ་གོས་དཀར་མོ་དང་མཉམ་པར་སྦྱོར་བའི་སྐུར་གྱུར། རྩིབས་བཞིའི་ཤར་ནས་རིམ་པ་བཞིན་ཧྲཱིཿཡིག་ཟུང་རེ་ཞུ་བ་ཡོངས་སུ་གྱུར་པ་ལས། རྡོ་རྗེ་ཆོས་དང་རྡོ་རྗེ་པི་ཝང་མ། རྡོ་རྗེ་རྣོན་པོ་དང་རྡོ་རྗེ་མེ་སྒྲོན་མ། རྡོ་རྗེ་འཁོར་ལོ་དང་རྡོ་རྗེ་ལྕགས་སྒྲོག་མ། རྡོ་རྗེ་སྨྲ་བ་དང་རྡོ་རྗེ་གསལ་བཀྲ་མ་སྟེ། ཐམས་ཅད་ཀྱང་སྐུ་མདོག་དམར་གསལ་ཞལ་གཅིག་ཕྱག་གཉིས་པའི་རྣམ་པ་ཅན་དུ་གྱུར། སོ་སོའི་སྙན་གྱི་དཀྱིལ་འཁོར་ཆ་གཉིས་ཀྱི་དབུས་སུ་ཏྲཱཾ་ཡིག་ཟུང་རེ་ཞུ་བ་ཡོངས་སུ་གྱུར་པ་ལས། རིན་ཆེན་འབྱུང་གནས་སེར་པོ་གཡས་རིན་པོ་ཆེ་དང་གཡོན་དྲིལ་བུ་འཛིན་པ་ཡུམ་མཱ་མ་ཀཱི་དང་མཉམ་པར་སྦྱོར་བའི་སྐུར་གྱུར། རྩིབས་བཞིའི་ཤར་ནས་རིམ་པ་བཞིན་ཏྲཱཾ་ཟུང་རེ་ཞུ་བ་ཡོངས་སུ་གྱུར་པ་ལས། རྡོ་རྗེ་རིན་པོ་ཆེ་དང་རྡོ་རྗེ་མཱ་ལྱེ་མ། རྡོ་རྗེ་ཉི་མ་དང་རྡོ་རྗེ་མེ་ཏོག་མ། རྡོ་རྗེ་རྒྱལ་མཚན་དང་རྡོ་རྗེ་ཞགས་པ་མ། རྡོ་རྗེ་བཞད་པ་དང་རྡོ་རྗེ་བདེ་བ་མ་སྟེ། ཐམས་ཅད་ཀྱང་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པའི་སྐུར་གྱུར། དེ་ལྟར་དཀྱིལ་འཁོར་ཆ་གསུམ་ཀའི་སྒོ་བཞིར་ཧཱུཾ་ཛཿ ཧཱུཾ་ཧཱུཾ། ཧཱུཾ་བཾ། ཧཱུཾ་ཧོཿ ཞེས་པས་ཤར་སྒོར་གཤིན་རྗེ་གཤེད། ལྷོ་སྒོར་སྟོབས་པོ་ཆེ། ནུབ་སྒོར་རྟ་མགྲིན། བྱང་སྒོར་བདུད་རྩི་འཁྱིལ་བ་རྣམས་རང་རང་གི་ཡུམ་ལྕགས་ཀྱུ་མ་ལ་སོགས་པ་དང་མཉམ་པར་སྦྱོར་བའི་སྐུར་གྱུར། དེ་ནས་སློབ་དཔོན་གྱི་ལྕེ་ཡི་དཀྱིལ་འཁོར་ལ་དབང་བསྐུར་བར་གྱུར། ༀ་མ་ཧཱ་པྲ་ཏྱེ་བེཀྵ་ཎ་སོགས་སྔགས་ཚན་ལྔ། སླར་ཡང་སྙན་གྱི་དཀྱིལ་འཁོར་ལ་དབང་བསྐུར་བར་གྱུར། ༀ་མ་ཧཱ་ས་མ་ཏཱ་སོགས་ལྔས་བསྐུར། དཀྱིལ་འཁོར་ཆ་གསུམ་ཀའི་གནས་གསུམ་བྱིན་གྱིས་བརླབས་པར་གྱུར། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་སོགས། བཛྲ་ས་མཱ་ཛཿ ཨེ་ཧྱེ་ཧི་ཛཿཧཱུཾ་བཾ་ཧོཿ ཀཱ་ཡ་ཝཱ་ཀ་ཙིཏྟ་ཏིཥྛ་བཛྲས་བརྟན་པར་བྱས་ནས། ཀུན་བཟང་ཞབས་བསིལ་བཞི་བསྣོལ་གྱིས་མཆོད་ནས། ས་མ་ཡ་ཧོཿ ས་མ་ཡ་སྟྭཾ། ཞེས་བརྗོད་པས་ལྷ་ཚོགས་ཐམས་ཅད་འོད་དུ་ཞུ་བའི་རྐྱེན་གྱིས་སློབ་བུ་ཡང་འོད་དུ་ཞུ་བ་འོད་ཕུང་སེར་པོ་ལས་རིན་ཆེན་འབྱུང་གནས་དང་། སློབ་དཔོན་འོད་དུ་ཞུ་བ་འོད་ཕུང་དམར་པོ་ལས་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་སྣང་བ་མཐའ་ཡས་ཀྱི་སྐུར་གྱུར། གང་དག་རབ་འབྱམས་སོགས། ཞེས་བརྗོད་རྗེས་བདུད་ཚར་གཅོད་ཀྱི་སྔགས་ཚར་གཅིག་འདོན། དེ་ནས་རིམ་པར་ལོ་རྒྱུས་ནས་འཆད་པར་མཛད་ཅིང་། རྒྱུན་དུ་ཐུན་འགོར། ཏ་དྱ་ཐཱ། ཤ་མི་ཤ་མ་ཝ་ཏི། ཤ་མི་ཏ་ཤ་ཏྲུཾ། ཨངྐུ་རེ། མངྐུ་རེ། མཱ་ར་ཛི་ཏེ། ཀ་རོ་ཊེ། ཀེ་ཡཱུ་རེ། ཏེ་ཛོ་ཝ་ཏི། ཨོ་ལོ་ཡ་ནི། བི་ཤུདྡྷེ་ནིརྨ་ལེ་སཱ་ལ་པ་ན་ཡེ། ཁུ་ཁུ་རེ། ཁ་ཁ་གྲ་སེ། གྲ་ས་ནེ། ༀ་མུ་ཁི། པ་རཾ་མ་ཁི། ཨ་མུ་ཁི། ཤ་མི་ཏཱ་ནི། སརྦ་གྲ་ཧ། བནྡྷ་ནཱ་ནི། ནི་གྲྀ་ཧི་ཏྭ། སརྦ་པཱ་ར་པྲ་ཝཱ་དི་ན། བི་མུཀྟ་མཱ་ར་པཱ་ཤ །སྠཱ་བི་ཏྭ། བུདྡྷ་མུ་དྲ། ཨ་ནུཏྒ་ཏི་ཏ། སརྦ་མཱ་རེ། པུ་ཙ་རི་ཏ། པ་རི་ཤུ དྡྷེ། བི་གཙྪནྟུ། སརྦ་མཱ་ར་ཀརྨ་ཎི། ཞེས་ཚར་རེ་དང་། ཕྱི་དྲོའི་ཐུན་གྲོལ་རྗེས། བསོད་ནམས་འདི་ཡིས་སོགས་དགེ་བ་བསྔོ་བར་མཛད། གྲོལ་རྒྱུའི་ཐུན་མཐར། བླ་མ་ཡི་དམ་ལྷ་ཚོགས་དགོངས་སུ་གསོལ། །སོགས་དོང་སྤྲུགས་ནང་ལྟར། ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །ཅེས་བསྔོ་བ་དང་། རྒྱལ་བ་ཀུན་གྱི་གསང་ཆེན་སོགས། ཨོ་རྒྱན་དུས་གསུམ་སོགས། བགེག་རིགས་སྟོང་ཕྲག་སོགས། མི་འགྱུར་ལྷུན་པོ་སོགས་ཀྱིས་ཤིས་བརྗོད་ཅིང་། དེ་ལྟར་འགྲུབ་པར་བྱེད་པ་ཡང་སོགས་བྱ། སློབ་དཔོན་གྱིས་ཆོས་སྐྱོང་གཏོར་འབུལ་སོགས་རྗེས་ཆོག་མཐའ་རྒྱས་སུ་མཛད་པ་ཡིན་ནོ། །ཞེས་པ་འདི་སྨྱོས་རིགས་དགེ་སྦྱོར་ཀུན་བཟང་། སློབ་དཔོན་རྡོར་འཛིན། མཆན། ཆོས་མཛད་ཀུན་ལྡན་ནས་ཆོས་འཆད་སློབ་དཔོན་དུས་ལྷ་རྫས་དང་རིན་གཉིས་ཀྱི་སྐྱེས་བཅས་བསྐུལ་མ་གནང་བ་བཞིན། སྔ་དུས་ཇི་ལྟར་མཛད་པའི་ཆོག་ཁྲིགས་ཁུངས་མ་ཉིད་ལ་བརྟེན་ནས་ཟིན་བྲིས་སུ་བཏབ་པའོ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།

རྡོར་སེམས་སྒྱུ་དྲྭའི་དབང་གི་བརྒྱུད་འདེབས། སྨིན་གླིང་གཏེར་ཆེན།

རྡོར་སེམས་སྒྱུ་དྲྭའི་དབང་གི་བརྒྱུད་འདེབས་ནི། སྟོན་པ་ཀུན་བཟང་རྒྱལ་ཚབ་རིགས་ལྔ་དང་། །རིགས་གསུམ་དྲྭ་མ་ལྔ་དང་རྒྱལ་པོ་ཛཿ ཀུ་ཀུ་ར་ཛ་ཨིནྡྲ་བྷཱུ་ཏི་དང་། །སེང་ཧ་རཱ་ཛ་རྣམས་ལ་གསོལ་བ་འདེབས། །ཨུ་པ་རཱ་ཛ་གོ་མ་དེ་ཝཱི་དང་། །སྒེག་རྡོར་སངས་རྒྱས་གསང་བ་བི་མ་ལ། །རྨ་ལོ་རིན་མཆོག་གཙུག་གྱེར་རྣམ་པ་གཉིས། །ཞང་སྟོན་རྒྱལ་ཡོན་རྣམས་ལ་གསོལ་བ་འདེབས། །གནུབས་ཆེན་སངས་རྒྱས་ཡོན་ཏན་རྒྱ་མཚོ་དང་། །ཡེ་ཤེས་རྒྱ་མཚོ་ཉང་ཆེན་ཤེས་རབ་མཆོག །ཡེ་ཤེས་འབྱུང་གནས་ཟུར་ཆེན་ཤཱཀྱ་འབྱུང་། །ཟུར་ཆུང་ཤེར་གྲགས་རྣམས་ལ་གསོལ་བ་འདེབས། །ཐུགས་སྲས་ཀ་ཆེན་བཞི་དང་སྒྲོ་ཕུག་པ། །རྩགས་ཚ་ཤཱཀ་རྡོར་ཤཱཀྱ་འབྱུང་གནས་དཔལ། །གླན་སྟོན་རྡོ་རྗེ་འོད་དང་བསོད་ནམས་རྒྱལ། །ཆོས་སེང་སངས་རྒྱས་དཔལ་ལ་གསོལ་བ་འདེབས། །བསོད་ནམས་མགོན་པོ་སྒྲོལ་ཆེན་བསམ་འགྲུབ་མཚན། །སེང་གེ་དཔལ་བཟང་རིགས་རྒྱལ་ལྷུན་གྲུབ་གྲགས། །སངས་རྒྱས་རྡོ་རྗེ་ཚེ་དབང་མགོན་པོ་དང་། །རྡོ་རྗེ་ཚེ་དཔལ་རྣམས་ལ་གསོལ་བ་འདེབས། །ཤཱཀྱ་དཔལ་འབྱོར་སིདྡྷི་ཕ་ལ་དང་། །འཕགས་པ་རིན་ཆེན་ཤཱཀྱ་རཏྣའི་ཞབས། །ཟུར་སྟོན་རྒྱལ་སྲས་པདྨ་བདུད་འདུལ་དང་། །ཆོས་རྒྱལ་རྡོ་རྗེ་རྣམས་ལ་གསོལ་བ་འདེབས། །རྒྱ་སྟོན་འོད་གསལ་རང་གྲོལ་གཏེར་བདག་གླིང་། །ཆོས་དཔལ་རྒྱ་མཚོ་རིན་ཆེན་རྣམ་པར་རྒྱལ། །བསྟན་འཛིན་རྡོ་རྗེ་ཕྲིན་ལས་རྣམ་རྒྱལ་ཞབས། །ཕྲིན་ལས་ཆོས་སྒྲོན་རྣམས་ལ་གསོལ་བ་འདེབས། །སངས་རྒྱས་ཀུན་དགའ་མདོ་སྔགས་བསྟན་འཛིན་དང་། །རིགས་བདག་འགྱུར་མེད་ཕན་བདེའི་འོད་ཟེར་ཞབས། །སྨིན་གྲོལ་ཡོངས་རྫོགས་གདམས་པའི་ཆུ་བོ་ཀུན། །འཛིན་མཛད་རྩ་བརྒྱུད་བླ་མར་གསོལ་བ་འདེབས། །གཞི་རྒྱུད་རང་བཞིན་མ་བཅོས་གནས་ལུགས་དོན། །ལམ་རྒྱུད་ཐབས་ཀྱིས་མཚོན་བྱས་སྨིན་ཅིང་གྲོལ། །འབྲས་རྒྱུད་ལྷུན་གྲུབ་རིག་འཛིན་སྐུ་ལྔ་ཡི། །གོ་འཕང་དཀའ་བ་མེད་པར་མྱུར་འགྲུབ་ཤོག །ཅེས་སྒྱུ་འཕྲུལ་དབང་བརྒྱུད་ལུགས་གཅིག་ལ་གསོལ་བ་འདེབས་པའི་ཚིགས་བཅད་འདི་ཡང་རྗེ་གཏེར་ཆེན་བླ་མའི་གསུང་སོར་བཞག་ལ། དེ་མན་གྱི་བརྒྱུད་རིམ་ཁ་སྐོང་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས། འགྱུར་མེད་རྡོ་རྗེ།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས་ཞེས་བྱ་བ་བཞུགས་སོ། །ༀ་སྭ་སྟི། དཔའ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་བཞི་བཅུ་རྩ་གཉིས་ཀྱི་སྒྲུབ་ཐབས་ཡེ་ཤེས་ཆར་འབེབས་ཞེས་བྱ་བ། དཔལ་ལྡན་བླ་མ་རྡོ་རྗེ་སེམས་དཔའི་ངོ་བོ་ཉིད་ལ་གུས་པས་ཕྱག་འཚལ་ལོ། །མཆོག་ཏུ་མི་འགྱུར་བདེ་ཆེན་རྡོ་རྗེ་སེམས། །ཀུན་ཁྱབ་ཡེ་ཤེས་སྒྱུ་འཕྱུལ་དྲྭ་བའི་གར། །བཞི་བཅུ་རྩ་གཉིས་དཀྱིལ་འཁོར་འཁོར་ལོ་ཆེར། །མངོན་པར་སྣང་མཛད་བླ་མའི་ཞབས་ལ་འདུད། །དཔལ་ལྡན་རྒྱལ་བ་ཀུན་གྱི་དཀྱིལ་འཁོར་གཙོ། །མི་ཕྱེད་རྡོ་རྗེ་བཞི་དངོས་ཕྱག་རྒྱ་ཆེས། །འཁོར་འདས་རྒྱས་འདེབས་རྣམ་དག་རྣལ་འབྱོར་ལམ། །མངོན་པར་གསལ་བར་བྱེད་པ་འདི་ཁོ་ན། །གང་ཞིག་བསྟེན་ན་མཆོག་དང་ཐུན་མོང་གི། །དངོས་གྲུབ་སྐད་ཅིག་ཉིད་ལ་འབད་མེད་དུ། །འགྲུབ་འགྱུར་འདི་ལ་ངོ་མཚར་ཆེར་སྐྱེས་ནས། །བདག་ཀྱང་ཚུལ་འདི་བརྗོད་ལ་སྤྲོ་བར་གྱུར། །འདི་ལ་གསུམ་སྟེ། སྒྱུབ་པ་པོ་གང་ཟག །སྒྲུབ་པ་ལམ་རིམ། གྲུབ་པ་འབྲས་བུའོ། །དང་པོ་ནི། དཀྱིལ་འཁོར་འདིར་དབང་གིས་སྨིན་ཅིང་། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་ལ་གནས་པ། རང་དང་གཞན་གྱི་དོན་རླབས་པོ་ཆེ་སྒྲུབ་པ་ལ་རྩེ་གཅིག་པའི་བསམ་པ་དང་ལྡན་པའོ། །གཉིས་པ་ལམ་ལ། སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། སྔོན་འགྲོ་ལ་བདུན་གྱི། དང་པོ་བྱ་བའི་སྔོན་འགྲོ་ནི། དབེན་ཞིང་བསམ་གཏན་དང་རྗེས་སུ་མཐུན་པའི་གནས་སུ། དམ་ཚིག་གི་ཡོ་བྱད་རྣམས་ཚོགས་པར་བྱས་ལ། གྲལ་ཕྱག་དང་། ཚུལ་ཕྱག་སྔོན་དུ་འགྲོ་བས། འཇམ་པའི་སྟན་ལ་སེམས་དཔའི་སྐྱིལ་ཀྲུང་གིས་འདུག་སྟེ་རོལ་མོ་བྱིན་དབབ་པ་རྣམས་བྱ་བའོ། །གཉིས་པ་རྒྱུད་སྦྱང་བ་ནི། རང་གི་སྙིང་གའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿ ས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དེ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་ལ་སོགས་པར་བརྗོད་ལ། ཚོགས་ཞིང་རྣམས་རང་ལ་བསྡུས་ཏེ། ཀ་དག་གཉིས་སུ་མེད་པའི་ཀློང་དུ་རང་བབས་སུ་མཉམ་པར་བཞག་གོ། །གསུམ་པ་མཚམས་བཅད་པ་ལ། མཚན་མེད་དང་མཚན་བཅས་གཉིས་ལས། དང་པོ་ནི། ཧཱུཾ་ཞེས་བརྗོད་པས་འདི་ལྟར་གཟུང་བ་དང་བསྡུས་པའི་ཆོས་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུའི་ངང་ལ་མཉམ་པར་བཞག །གཉིས་པ་ལ། བདེ་གཤེགས་རིགས་ལྔའི་མཚམས་གཅོད་རེ་རེར་ཡང་ཕྱག་རྒྱ་བཞི་ལས། སྐུ་ཕྱག་ཆེན་ནི། སྟོང་ཉིད་དེའི་ངང་ལས། ཧཱུཾ་བཛྲ་དྷྲིཀ྄ །ཅེས་བརྗོད་པས། རང་ཉིད་སྐད་ཅིག་གིས་རྡོ་རྗེ་སེམས་དཔའ་མཐིང་ག་རྡོ་རྗེ་དང་དྲིལ་བུ་འཛིན་པའི་སྐུར་བསྒོམ་པའོ། །བཅའ་བ་དམ་རྒྱ་ནི། རྡོ་རྗེ་གསོར་བའི་ཕྱག་རྒྱ་བཅའ་བའོ། །བརྗོད་པ་ཆོས་རྒྱ་ནི། ཧཱུཾ། ལུས་ངག་ཡིད་གསུམ་རྡོ་རྗེ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །རྡོ་རྗེ་སེམས་དཔའ་དཔའ་བོ་ཡིན། །རྡོ་རྗེ་སེམས་དཔར་ང་གནས་པས། །ཡེ་ཤེས་རྡོ་རྗེ་གསོར་ཞིང་སྤྲོ། །ཧཱུཾ་བཛྲ་ཛྭ་ལཱ་ན་ལཱརྐ་ཧཱུཾ་ཕཊ། ཅེས་བརྗོད། བསམ་པ་ལས་རྒྱ་ནི། རྡོ་རྗེའི་ཕྱག་རྒྱ་ལས་རྡོ་རྗེ་ཕྲ་མོ་གྲངས་མེད་པ་སྤྲོས་ཏེ། བདུད་བགེགས་ལོག་པར་འདྲེན་པ་ཐམས་ཅད་ཚར་བཅད། ཚུར་འདུས་པ་ལས་ཕྱོགས་མཚམས་ཐམས་ཅད་རྡོ་རྗེའི་གུར་ཁང་མེའི་ར་བ་དང་བཅས་པས་ཡོངས་སུ་བསྐོར་བས་ཅིས་ཀྱང་མི་ཤིགས་པར་བསམ་ཞིང་། ཨེ་མ་འོ་རྡོ་རྗེ་ཆེ་མཆོག་གིས། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཕྱེད་མི་ཤིགས་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པའོ། །ཚུལ་དེ་ལྟ་བུས་རིམ་པ་བཞིན། ༀ་ཛིན་ཛིཀ྄ །རྣམ་པར་སྣང་མཛད་དཀར་པོ་འཁོར་ལོ་དང་དྲིལ་བུ་འཛིན་པའི༴ འཁོར་ལོ་བསྐོར་ཚུལ་བྱ་ཞིང་། ༀ། ལུས་ངག་ཡིད་གསུམ་འཁོར་ལོ་ནི། །སོགས་སྔར་བཞིན་ལས། རྣམ་པར་སྣང་མཛད་དཔའ་བོ་ཡིན། །རྣམ་པར་སྣང་མཛད་ང་གནས་པས། །ཡེ་ཤེས་འཁོར་ལོ་བསྐོར་ཞིང་སྤྲོ། །ༀ་ཙཀྲ་ཛྭ་ལཱ༴ འཁོར་ལོའི་ཕྱག་རྒྱ་ལས་འཁོར་ལོ་ཕྲ་མོ་གྲངས་མེད་པ་སྤྲོ་བསྡུས་འཁོར་ལོའི་གུར་ཁང་གིས་བཅིངས་ལ། ཨེ་མའོ་འཁོར་ལོ་ཆེ་མཆོག་གིས། །ཞེས་སོགས་སོ། །སྭཱཾ་རཏྣ་དྷྲིཀ྄ །རིན་ཆེན་འབྱུང་ལྡན་སེར་པོ་རིན་པོ་ཆེ་དང་དྲིལ་བུ་འཛིན་པའི༴ རིན་ཆེན་འདེབས་ཚུལ་བྱ་ཞིང་། སྭཱཾ། ལུས་ངག་ཡིད་གསུམ་རིན་ཆེན་སོགས། །རིན་ཆེན་འབྱུང་ལྡན་དཔའ་བོ༴ རིན་ཆེན་སེམས་དཔར་ང་༴ ཡེ་ཤེས་རིན་ཆེན་འདེབས༴ སྭཱཾ་རཏྣ་ཛྭ་ལཱ༴ རིན་པོ་ཆེའི་ཕྱག་རྒྱ་ལས་རིན་པོ་ཆེ་སྤྲོ་བསྡུས་རིན་པོ་ཆེའི་གུར་ཁང་གིས་བཅིངས་ལ། ཨེ་མ་འོ་རིན་ཆེན་ཆེ་མཆོག་སོགས། ཨཱཾ་ཨཱ་རོ་ལིཀ྄ །སྣང་བ་མཐའ་ཡས་དམར་པོ་པདྨ་དང་དྲིལ་བུ་འཛིན་པའི༴ པདྨ་འདེབས་ཚུལ་བྱ་ཞིང་། ཨཱཾ། ལུས་ངག་ཡིད་གསུམ་པདྨ་སོགས། སྣང་བ་མཐའ་ཡས་དཔའ་བོ༴ པདྨ་སེམས་དཔར་ང་༴ ཡེ་ཤེས་པདྨ་འདེབས༴ ཨཱཾ་པདྨ་ཛྭ་ལཱ༴ པདྨའི་ཕྱག་རྒྱ་ལས་པདྨ་སྤྲོ་བསྡུས་པདྨའི་གུར་ཁང་གིས་བཅིངས་ལ། ཨེ་མའོ་པདྨ་ཆེ་མཆོག་སོགས། ཧཱཾ་པྲཛྙཱ་དྷྲིཀ྄ །དོན་ཡོད་གྲུབ་པ་ལྗང་གུ་རལ་གྲི་དང་དྲིལ་བུ་འཛིན་པའི༴ རལ་གྲི་འདེབས་ཚུལ་བྱ་ཞིང་། ཧཱཾ། ལུས་ངག་ཡིད་གསུམ་རལ་གྲི་སོགས། ལས་ཀྱི་སེམས་དཔའ་དཔའ༴ ལས་ཀྱི་སེམས་དཔར་ང་༴ ཡེ་ཤེས་རལ་གྲི་འདེབས༴ ཧཱཾ་ཁདྒ་ཛྭ་ལཱ༴ རལ་གྲིའི་ཕྱག་རྒྱ་ལས་རལ་གྲི་སྤྲོ་བསྡུས་རལ་གྲིའི་གུར་ཁང་གི་བཅིངས་ལ། ཨེ་མའོ་རལ་གྲི་ཆེ་མཆོག་གིས་སོགས། དེ་ལྟར་ཕྱག་རྒྱ་རྣམ་པ་ལྔའི་གུར་ཁང་ཡེ་ཤེས་ཀྱི་མེ་ཁ་དོག་ལྔར་འབར་ཞིང་འཕྲོ་བ་དང་བཅས་པས་ཕྱོགས་ཐམས་ཅད་ཡོངས་སུ་ཁྱབ་ཅ ིང་ཅིས་ཀྱང་མི་ཤིགས་པར་བསམ་མོ། །བཞི་པ་བཤགས་པ་བྱ་བ་ནི། བཛྲ་ས་མཱ་ཛཿ ས་བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མེད་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབ་ཀྱང་མི་བགྱིད། སྔར་བྱས་ཀྱི་གཉེན་པོར་རྣམ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། ཧཱུཾ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་བཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུ ན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་ངང་དུ་རོ་གཅིག་པ། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུགས་ཅན་བདག་ཉིད་མ། །མཁའ་དབྱིངས་ཀློང་ཡངས་པདྨོ་འཁྱིལ་བ་ལ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཧཱུཾ། ཐུགས་རྗེ་གདུང་འཚོབ་རིག་འཛིན་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་འགྲོད་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱིར་ནོས་ཤིང་གཉེར་དུ་སྨྲས་སོ་འཚལ། །ཡུན་དུ་མི་གཏོང་འདའ་བར་མི་བགྱིད་ཅིང་། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་འཕྲད་པར་མི་བྱ་ཞེས། །བཀའ་ལས་བྱུང་ཞིང་དེ་ལྟར་མ་ལྕོགས་ཏེ། །གསང་སྒོ་འཆོལ་བས་དབྱེ་བསལ་དཀས་པ་དང་། །མངོན་ཤེས་མེད་པས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མ་འཛེམས་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གི། །ཉམས་གྲིབ་སྐྱོན་གྱིས་སྒོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས། །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་བརྩེས་བདག་ལ་དགོངས་ནས་ཀྱང་། །གཉིས་མེད་དབྱིངས་ལས་མི་འགྱུར་བདག་བཀོད་དེ། །དམིགས་མེད་བཏང་སྙོམས་ངང་ལ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་དམིགས་མེད་སྤྲོས་ལས་འདས་པས་ན། །རྣམ་རྟོག་གང་ཡང་དམིགས་པར་མི་འགྱུར་ཞིང་། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པར་མཆིས་ན་རབ་ནོངས་བཟོད་པར་གསོལ། །ཞེས་བརྗོད་པས་སྡིག་སྒྲིབ་ཐམས་ཅད་བྱང་བར་མོས་ནས་མཉམ་པ་ཉིད་ཀྱི་དོན་ལ་བློ་བཞག་གོ། །ལྔ་པ་དམ་བཅའ་བ་ནི། རྡོ་རྗེ་རྩེ་གཅིག་པའི་རྒྱ་བཅིངས་ཏེ། ལྷག་པའི་བསམ་པ་བརྟན་པོས། ༀ། རྣལ་འབྱོར་དབང་པོ་ཡེ་ཤེས་མཐར་ཕྱིན་པ། །འགྲོ་ལ་ཕན་མཛད་ཐུགས་རྗེས་དབང་བསྒྱུར་ཞིང་། །སྲིད་པ་གསུམ་གྱི་གཉེན་གྱུར་གཅིག་པུ་པ། །ལྷ་ཡི་ལྷ་ཁྱོད་བདག་ལ་དགོངས་སུ་གསོལ། །བདེ་བར་གཤེགས་པའི་སྤྲུལ་པ་རྒྱ་མཚོ་དང་། །རྣལ་འབྱོར་དབང་ཕྱུག་གྲུབ་པའི་ཚོགས་ཆེན་པོ། །ལྷ་དང་ལྷ་མིན་སྔགས་འཆང་དམ་ཚིག་ཅན། །ཀུན་ནས་འདུས་པ་རྣམས་ཀྱང་དགོངས་སུ་གསོལ། །བདག་ནི་རྒྱལ་སྲིད་མཐོ་རིས་ལོངས་སྤྱོད་དང་། །འདོད་པའི་ཡོན་ཏན་བདག་སྒྲུབ་མ་ལགས་ཏེ། །འགྲོ་ལ་སྙིང་བརྩེ་ཁོ་ནས་དོན་བརྩོན་པ། །འདི་ལ་ཀུན་མཁྱེན་ཁྱོད་ནི་དཔང་དུ་གསོལ། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །འཕགས་མཆོག་སྤྱན་སྔར་ཇི་ལྟར་དམ་བཅས་པ། །སུན་པར་མི་བགྱི་མགོན་ཁྱོད་བསླུ་མ་ལགས། །སྙིང་ནས་བདག་ནི་ཁེ་དང་གྲགས་ལ་སོགས། །གཡོ་དང་ཟང་ཟིང་སེམས་ནི་གཏན་སྤངས་ནས། །གཞན་དོན་སྒྲུབ་པ་གཅིག་པུའི་སེམས་བཞག་སྟེ། །རྣལ་འབྱོར་སྤྱོད་པ་ཆེན་པོ་བདག་གིས་སྤྱད། །ཀུན་ཏུ་བཟང་པོ་བླ་ན་མེད་པ་ཡིས། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབས་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱེད་ནི་ཡོངས་མི་སྤོང་། །རྡོ་རྗེའི་དམ་ཚིག་ཆེན་པོ་རྣམས་དང་ནི། །རྡོ་རྗེ་སློབ་དཔོན་རྡོ་རྗེ་མཆེད་ལྕམ་དང་། །གཞན་ཡང་ཐེག་པ་མཆོག་ལ་ཞུགས་པ་རྣམས། །སྲོག་གི་ཕྱིར་ཡང་མི་གཏོང་ཅི་ནུས་བསྲུང་། །འཁོར་བ་བདག་མེད་སྒྱུ་མའི་རང་བཞིན་ལ། །བདག་ནི་འཇིགས་པ་ཅི་ཡང་མ་མཆིས་ཏེ། །མ་རིགས་སྐྱེ་བོ་རྣམས་ཀྱི་དོན་སླད་དུ། །ཕྱི་མཐར་ཐུག་གི་བར་དུ་གནས་པར་སྤྲོ། །གཞན་དོན་འཁོར་བ་རྣམས་སུ་སྤྱོད་པ་ན། །བྱང་ཆུབ་སྤྱོད་པ་རླབས་ཆེན་བདག་གིས་སྤྱད། །འགྲོ་དྲུག་སེམས་ཅན་རྣམས་ལ་ཕན་གདགས་ཕྱིར། །རང་དབང་དུ་ནི་སྐྱེ་བ་བླང་བར་བགྱི། །བདག་ནི་ཡོངས་སུ་བཟུང་བའི་འཇིག་རྟེན་ནམ། །མྱ་ངན་འདས་ལ་སྤྲོ་བ་མ་མཆིས་ཏེ། །གང་དང་གང་དུ་སྡུག་བསྔལ་གནས་རྣམས་སུ། །བསྐལ་པ་རྒྱ་མཚོར་གནས་ཤིང་ཕན་པར་བགྱི། །སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཇི་སྲིད་ངན་སོང་སྟོངས་པར་མ་གྱུར་པ། །དེ་སྲིད་བདག་གིས་སྐྱོ་བའི་སེམས་མི་བསྐྱེད། །ཤེས་རབ་ཐབས་ཀྱིས་འགྲོ་བའི་དོན་བགྱིད་པ། །སྙིང་རྗེའི་ལོངས་སྤྱོད་དེ་ལས་མ་མཆིས་པས། །སེམས་དམྱལ་ཡི་དྭགས་གཤིན་རྗེའི་འཇིག་རྟེན་ཡང་། །ལྷ་ཡི་དགའ་ཚལ་ལྟ་བུར་བལྟ་བར་བགྱི། །འགྲོ་ལ་ཐུགས་བརྩེས་དཔལ་གྱི་མགུལ་ནས་གསུངས། །རྣལ་འབྱོར་དམ་ཆོས་བདུད་རྩི་མཆོག་རྣམས་ནི། །བདག་གིས་འཇིག་རྟེན་ཐུག་པ་མ་མཆིས་བར། །ཇི་ལྟར་འཚམས་པ་བཞིན་དུ་རྒྱས་པར་བགྱི། །སྲིད་པར་ལས་དང་རྐྱེན་གྱིས་དབང་གྱུར་ཏེ། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པ་མཆོག་ལ་ཞུགས་པའི་སྐྱེ་བོ་ལ། །ཚེ་རབས་རྣམས་སུ་མཐུ་རྩལ་ཅི་མཆིས་ཀྱིས། །སྐྱེས་ཆེན་རྣམས་ཀྱི་དགོངས་པ་རྟག་ཏུ་བསྐང་། །དམ་པའི་ཆོས་དང་སྒྲུབ་པའི་གེགས་གྱུར་པ། །མི་དང་མི་མིན་གདུག་པ་གང་ཡང་རུང་། །བདག་གིས་ཞི་དང་ཁྲོ་བོའི་ཕྲིན་ལས་ཀྱིས། །ཡོངས་སུ་ཞི་ཞིང་རྣམ་པར་གཞོམ་པར་བགྱི། །རྣལ་འབྱོར་མཆོག་གི་ཐེག་ཆེན་བླ་མེད་དང་། །རྡོ་རྗེ་རྒྱལ་པོ་ཁྱོད་ལ་བརྟེན་ནས་ནི། །སངས་རྒྱས་ཞིང་སྦྱང་འགྲོ་ལ་སྨན་སླད་དུ། །བྱང་ཆུབ་སྙིང་པོ་བདག་གིས་རྟོགས་པར་བགྱི། །བདག་ནི་འཕགས་མཆོག་ཕྱག་རྒྱ་མངོན་སྤྲུལ་ཏེ། །གལ་ཏེ་སྐབས་མེད་འཆི་བའི་དུས་བྱུང་ཚེ། །གསང་སྔགས་མགོན་པོ་ཡེ་ཤེས་དཀྱིལ་འཁོར་ཅན། །ཁྱེད་ཀྱི་ཞབས་ཀྱི་དྲུང་དུ་མཆི་བར་བགྱི། །སྲིད་གསུམ་སྡུག་བསྔལ་ཅི་འདྲ་ཁྱེད་ཀྱིས་མཁྱེན། །དམྱལ་སོགས་མེ་དཔུང་ཞི་བར་བགྱིད་ལ་སོགས། །སེམས་ཅན་དོན་ལ་མྱུར་དུ་བདག་མཆིས་ན། །དམ་པ་རྣམས་ཀྱིས་ནུས་མཐུ་སྩལ་དུ་གསོལ། །དྲུག་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ༀ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབས། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི༴ བྱིན་གྱིས་རློབ་པའི༴ དབང་མཆོག་བསྐུར་བའི༴ དངོས་གྲུབ་སྩོལ་བའི༴ མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར༴ དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦྱར་ཞིང་། ཧཱུཾ་ཧཱུཾ་ཧཱུཾ་ཧཱུཾ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོར་བྱིན་གྱིས་བརླབས་པར་བསམ་མོ། །བདུན་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ༀ་མ་ཧཱ་ཀྲོ་དྷེ་ཤྭ་རཱི་སརྦ་དྲ་བྱཾ་བི་ཤོ་དྷ་ནི་ཧཱུཾ་ཕཊ་ཀྱི་བསང་། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་རྡོར་སེམས་སུ་གསལ་བའི་ཐུགས་ཀའི་ཧཱུཾ་ལས། ཨ་དྷཱུ་པུ་ཨཱ་གན་རྣམས་འཕྲོས། །སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ཎ་ཧཱུཾ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ནམཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ། མཆོད་པའི་ལྷ་མི་ཁྲུས་གཞོང་དང་སྤོས་ཁང་མནྡཱ་རའི་མེ་ཏོག་ལ་སོགས་པ་ཐོགས་པས་ནམ་མཁའ་གང་བ་རྣམས་སུ་གྱུར་པར་བསམ་པས་བྱིན་གྱིས་བརླབས། དེ་ནས་བདུད་རྩི་བསང་། རཾ་ཡཾ་ཁཾ། སྟོང་པའི་ངང་ལས་རང་གི་ཐུགས་ཀ་ནས་བྷྲཱུཾ་ཆད། བྷྲཱུཾ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་བྷྲཱུཾ། བདུད་རྩིའི་སྣོད་གཞལ་ཡས་ཁང་དུ་གསལ་བའི་དབུས་སུ་འཁོར་ལོ་རྩིབས་བཞི་པའི་ལྟེ་བར། མི་ཤ་དང་བྱང་སེམས་དཀར་པོ། ཤར་དུ་བ་ལང་གི་ཤ་དང་དྲི་ཆེན། ལྷོར་ཁྱི་ཤ་དང་ཤ་ཆེན། ནུབ་ཏུ་རྟ་ཤ་དང་རཀྟ། བྱང་དུ་གླང་པོ་ཆེའི་ཤ་དང་དྲི་ཆུ་རྣམས་ཀྱི་སྟེང་དུ། རིམ་པ་བཞིན། ཧཱུཾ་མཱུཾ་ༀ་ལཱཾ་སྭཱ་མཱཾ་ཨཱཾ་པཱཾ་ཧཱ་ཏཱཾ་རྣམས་ཀྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འོད་ཟེར་འཕྲོས་འདུས་ཡོངས་སུ་གྱུར་པ་ལས། རྡོ་རྗེ་འཁོར་ལོ་རིན་པོ་ཆེ་པདྨ་རལ་གྲི་སོ་སོའི་རིགས་ཀྱི་དྲིལ་བུ་རྣམས་སུ་གྱུར། ཧཱུཾ་བཛྲ་དྷྲིཀ྄ །མཱུཾ་དྷཱ་ཏྭཱི་ཤྭ་རཱི། དབུས་སུ་མི་བསྐྱོད་པ་ཡབ་ཡུམ་མཐིང་ག །ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཤར་དུ་རྣམ་སྣང་ཡབ་ཡུམ་དཀར་པོ། སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ལྷོར་རིན་འབྱུང་ཡབ་ཡུམ་སེར་པོ། །ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི། ནུབ་ཏུ་སྣང་མཐའ་ཡབ་ཡུམ་དམར་པོ། ཧཱཾ་པྲ་ཛྙཱ་དྷྲིཀ྄ །ཏཱཾ་བཛྲ་ར་ཏི། བྱང་དུ་དོན་གྲུབ་ཡབ་ཡུམ་ལྗང་གུ་རྣམས་སུ་གྱུར། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཛཿཧཱུྃ་བྃ་ཧོཿ བོ་དྷི་ཙིཏྟ། སྥ་ར༴ སཾ་ཧ༴ རིགས་ལྔ་ཡབ་ཡུམ་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩི་ༀ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བར། ༀ་པདྨཱནྟ་ཀྲྀ་ཏ་བཛྲ་མ་ཧཱ་ཀྲོ་དྷ་ཧྱ་གྲཱི་ཝ་ཧཱུཾ་ཕཊ། རྟ་མགྲིན་དམར་པོ་པདྨ་དང་རྡོ་རྗེ་རྒྱ་གྲམ་འཛིན་པ་ལྟེ་བ་ཡན་ཆད་ཐོན་པ། རྭ་བཞི་ལ། ཤར་དུ་མི་ཕམ་མ་དཀར་མོ་ལྕགས་ཀྱུ་འཛིན་པ། ལྷོར་ཁྲོ་གཉེར་མ་སེར་མོ་ཞགས་པ༴ ནུབ་ཏུ་རོ་ལངས་མ་དམར་མོ་ལྕགས་སྒྲོག༴ བྱང་དུ་རལ་གཅིག་མ་ལྗང་གུ་དྲིལ་བུ་འཛིན་པ༴ ༀ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་ཐམས་ཅད་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། གཡོན་པའི་མཐེབ་སྲིན་གྱི་རྡོ་རྗེས་བདུད་རྩི་ལ་རེག་སྟེ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཞེས་བཟླས་ཤིང་། མཐར་གཡོན་བསྐོར་དུ་དཀྲུགས་ཏེ། ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད་པས། ཡུམ་བཞི་བདུད་རྩི་ལ་ཐིམ་པར་བསམ་མོ། །གཏོར་མ་བྱིན་བརླབ་ནི། བསང་སྦྱངས། སྟོང་པ་ཉིད་ཀྱི་ངང་ལས། བྷྲཱུཾ་པདྨ་བ་ལིཾ་ཏ་བི་ཤྭ་ཙཀྲ་བྷྲཱུྃ། གཏོར་གཞོང་པད་མའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ཨོཾ་གྱིས་མཚན་པར་གྱུར། སྥ་ར༴ སཾ་ཧ། ༀ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བཱ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར་བར་བསམ། རཀྟ་བསང་སྦྱངས། སྟོང་པའི་ངང་ལས་བྷྲཱུྃ་བྷཉྫ་ཀ་པཱ་ལ་བྷྲཱུྃ། དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། སྥ༴ སཾ༴ ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱཿ ཆགས་མེད་རཀྟའི་རྒྱ་མཚོ་རྦ་རླབས་འཁྲུག་པས་ནམ་མཁའ་གང་བར་བསམ་མོ། །གཉིས་པ་དངོས་གཞི་ལ། ཁྱད་པར་གྱི་སྦྱོར་བ་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་གཉིས། དང་པོ་ལ། ཀུན་རྫོབ་དང་། དོན་དམ་གཉིས་ལས། ཀུན་རྫོོབ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །དོན་དམ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན༴ འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ༴ རྫོགས་པའི༴ གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མ་འོ༴ རྫོགས་པའི༴ དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ༴ རྫོགས་པའི༴ འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་འཛིན་གསུམ་གྱི་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །འདི་ལྟར་སྣང་བའི་ཆོས་ཐམས་ཅད་མི་དམིགས་ཤིང་སྤྲོས་པ་དང་བྲལ་བ་སྟོང་པ་ཉིད་དུ་བསྒོམ་པའོ། །ཀུན་སྣང་ནི། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་ཆེན་པོ་མཁའ་ཁྱབ་ཏུ་བསྒོམ་པའོ། །རྒྱུའི་ཏིང་ངེ་འཛིན་ནི། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །ཞེས་པས་རང་རིག་སྣང་སྟོང་གཉིས་སུ་མེད་པའི་རང་བཞིན་ཨ་དཀར་པོའི་རྣམ་པར་བསྒོམ་པའོ། །དེ་ཉིད་བརྟན་པའི་ཡན་ལག་ཏུ་སྤྲོ་བསྡུ་བྱ་བ་ནི། ཨ་སྥ་ར་ཎ་ཕཊ། ཨ་ཡིག་ལས་ཨ་གྲངས་མེད་པ་ནམ་མཁའ་གང་བར་འཕྲོས། སཾ་ཧ་ར་ཎ་ཧཱུཾ། མཁའ་ཁྱབ་ཀྱི་ཨ་རྣམས་གཞིའི་ཨ་ལ་ཐིམ་པར་གྱུར། ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་པའི་དོན་དྲན་པར་བྱའོ། །གཉིས་པ་ལ་རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། སེམས་ཉིད་ཨ་དཀར་པོ་དྲི་མ་མེད་པར་གསལ་བ་ལས། ཨེ་ཡཾ་ཝཾ་ལཾ་སུཾ་རཾ་རྣམས་ཆད། སྥ༴ སཾ༴ འཕྲོས་འདུས་འོད་དུ་ཞུ་བ་ལས་རིམ་པ་བཞིན། ཨེ་ཨཱ་ཀ་ཤ་མཎྜ་ལ། ཨེ་ལས་ནམ་མཁའ་ཆོས་ཀྱི་འབྱུང་གནས་འབྱམས་ཀླས་པའི་དབྱིངས་སུ། ཡཾ་ཝཱ་ཡུ་མཎྜ་ལ། ཡཾ་ལས་རླུང་གི་དཀྱིལ་འཁོར་ལྗང་གུ་གཡོ་བའི་བ་དན་གྱིས་མཚན་པ། ཝཾ་ས་མུ་དྲ་མཎྜ་ལ། ཝཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། ལཾ་པྲྀ་ཐི་ཝི་མཎྜ་ལ། ལཾ་ལས་སའི་དཀྱིལ་འཁོར་སེར་པོ་གྲུ་བཞི། སུཾ་གརྦྷེ་མཎྜ་ལ། སུཾ་ལས་རིན་པོ་ཆེ་སྣ་བཞིའི་རང་བཞིན་གྱི་རི་རབ་ཟུར་བཞི་པ། རཾ་ཛྭ་ལ་མཎྜ་ལ། རཾ་ལས་མེའི་ཁོར་ཡུག་ནམ་མཁའི་མཐའ་ཀླས་པར་འབར་བའོ། །གཉིས་པ་རྟེན་གཞལ་ཡས་ཁང་བསྐྱེད་པ་ནི། རི་རབ་ཀྱི་སྟེང་དུ་རྒྱུའི་ཨ་ལས་བྷྲཱུྃ་ཆད། སྥ༴ སཾ༴ བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཌྜ་ལ་བྷྲཱུྃ། བྷྲཱུྃ་ཡིག་ཡོངས་སུ་གྱུར་པ་ལས། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པའི་སྟེང་ན། རིན་པོ་ཆེའི་ཕ་གུ་སེར་པོ་རིན་པོ་ཆེ་སྣ་ཚོགས་པས་བཀྲ་བ་འཕྱར་ཐབས་སུ་བཀོད་པའི་མཐར་མུ་ཏིག་གི་མགུལ་འཁོར་འཕྱང་བ། དེའི་སྟེང་ན་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་དྲ་བ་ཕྱེད་པ། དར་དང་རྔ་ཡབ། དྲིལ་བུ་དང་མེ་ལོང་ཟླ་བ་རླུང་གིས་བསྐྱོད་པ་ལ་སོགས་པས་མཛེས་པ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན། དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་། བ་དན་བརྒྱད་བརྒྱད་དང་། ཟུར་བཞིར་རྣམ་པར་བཀྲ་བའི་གདུགས་ཀྱིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོ་བསྐོར་བ་ལ་གཟུགས་རྡོ་རྗེ་མ་སོགས་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་སྤྲོ་བ། སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་བརྒྱན་པ། སྒོ་ལོགས་ཀྱི་ཕྱི་ཟུར་བཞི་ནས་བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས། རྟ་རྐང་ཆུ་སྐྱེས་རིན་ཆེན་སྒྲོམ། །སྣམ་འཕྱོང་གཞི་ལས་ཟ་ར་ཚགས། །རིན་ཆེན་སྒྲིལ་འཕྱང་ཤར་བུ་ཁྱུང་། །ཞེས་པའི་རིམ་པ་ཅན་གྱི་སྣམ་བུ་བརྒྱད་པ་བསིལ་ཁང་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གཡས་གཡོན་དུ་རི་དྭགས་ཕོ་མོ་དང་བཅས་པ། གཞན་ཡང་གདུགས་དང་། རྒྱལ་མཚན་བ་དན་སྣ་ཚོགས་པ་དང་། གསེར་གྱི་དྲིལ་བུ་ལ་སོགས་པས་བརྒྱན་པ། སྒོའི་གཡས་གཡོན་གྱི་གཞི་ལ་ཏཱ་ལའི་ལྗོན་པ་དང་། དཔག་བསམ་གྱི་ཤིང་ལ་བཀྲ་ཤིས་པའི་བྱ་སྙན་པར་སྒྲོག་པ་སྣ་ཚོགས་གནས་པ། ཤིང་དེ་དག་ཀྱང་གསེར་གྱི་ཐ་གུས་བྲེས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་འཁྲོལ་བབས་མཛེས་པ། ཡན་ལག་བརྒྱད་དང་ལྡན་པའི་ཁྲུས་ཀྱི་རྫིང་བུ་ལ་ལྷ་མོ་སྣ་ཚོགས་བདེ་བར་རྩེ་བ། རིན་པོ་ཆེའི་ཕུང་པོ་འོད་འབར་བ་རེ་རེ་སྟེ་བརྒྱད་དང་། གཞན་ཡང་རིན་པོ་ཆེ་སྣ་བདུད་དང་། བཀྲ་ཤིས་པའི་རྫས་བརྒྱད་སོགས་འདོད་པའི་ཡོན་ཏན་ཐམས་ཅད་ཀྱིས་མཛེས་པར་གང་བའོ། །གཞལ་ཡས་ཁང་གི་ནང་བར་ཁྱམས་གྲུ་བཞི་པས་ཀུན་ནས་བསྐོར་ཞིང་། གྲུ་ཆད་བཞི་གློ་འབུར་གྱིས་མཛེས་པའི་ནང་དུ། རྡོ་རྗེའི་ཕྲེང་བས་བསྐོར་བའི་འཁོར་ལོ་རྩིབས་བཞི་པ་ལྟེ་བ་དང་བཅས་པ་རྣམས་རིམ་པ་བཞིན་ཁྱད་པར་དུ་གྱུར་པས་སྤགས་པ། རྡོ་རྗེའི་ཟླུམ་བསྐོར་ལ་བརྟེན་པའི་ཀ་བ་རིགས་ཀྱི་མཚན་མ་ཅན་གཉིས་གཉིས་ཀྱི་ཕྱོགས་རེ་རེ་ནས་བཏེགས་པའི་སྟེང་རྡོ་རྗེའི་གདུང་གིས་མིག་མང་རིས་སུ་བྲེས་ཤིང་མཛེས་པར་ཕུབ་པའི་དབུས་ཕྱུར་བུ་སངས་རྒྱས་ཀྱི་གཙུག་ཏོར་ལྟར་ཀུན་ནས་ཟླུམ་པོར་འཁྱིལ་བའི་རྩེ་མོ་རྡོ་རྗེ་རིན་པོ་ཆེའི་ཏོག་སྟོང་འོད་ཟེར་མཐའ་ཡས་པར་སྤྲོ་བས་མཛེས་པ། ནང་གི་སྟེང་དང་འོག་གི་གཞི་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། ལྷ་དང་མི་ལས་ཁྱད་པར་དུ་གྱུར་པའི་ངོ་མཚར་དུ་མས་འཕགས་པའི་གཞལ་ཡས་ཁང་མཚན་ཉིད་ཐམས་ཅད་རྫོགས་པ་དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ་གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པར་བསམ་ཞིང་། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་གསལ་གདབ་བོ། །གསུམ་པ་གདན་བསྐྱེད་པ་ནི། གཞལ་ཡས་ཁང་གི་དབུས་ཀྱི་ལྟེ་བ་དང་རྩིབས་བཞི་ལ་རིམ་པ་བཞིན། དབུས་སུ་སེང་གེ། ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་མཁའ་ལྡིང་རྣམས་ཀྱིས་བཏེགས་པའི་རིན་པོ་ཆེའི་ཁྲི་བཀོད་པ་ཕུལ་དུ་བྱུང་བའི་སྟེང་དུ། པཾ་པདྨ་མཎྜ་ལ། མ་སཱུ་རྱ་མཎྜ་ལ། ཨ་ཙནྡྲ་མཎྜ་ལ། སྣ་ཚོགས་པདྨའི་ལྟེ་བར་ཉི་མའི་དཀྱིལ་འཁོར་དང་། ཟླ་བ་གང་བ་སྟེ་གདན་ལྔ་བརྩེགས། འཁོར་ལོའི་གོང་རས་དང་། གྲུ་ཆད་ཀྱི་གྲྭ་བཞིར། པཾ་པདྨ་མཎྜ་ལ། མ་སཱུརྻ་མཎྜ་ལ། ཨ་ཙནྡྲ་མཎྜ་ལ། པདྨ་དང་ཉི་ཟླའི་གདན་སུམ་བརྩེགས། ཁྱམས་ཀྱི་ཤར་ནུབ་གཉིས་སུ་རིན་པོ་ཆེའི་ཁྲིར། པཾ་པདྨ་མཎྜ་ལ། མ་སཱུ་རྻམཎྜ་ལ། ཨ་ཙནྡྲ་མཎྜ་ལ། པད་ཉི་ཟླ་བའི་གདན་བཞི་བརྩེགས། ལྷོ་བྱང་དང་མཚམས་བཞིར། པཾ་པདྨ་མཎྜ་ལ། སྣ་ཚོགས་པདྨའི་གདན་རེ་རེ། སྒོ་བཞིར། མ་སཱུརྻ་མཎྜ་ལ། ཉི་མའི་དཀྱིལ་འཁོར་རེ་རེ་རྣམས་གསལ་བར་བསམ་ལ། སེང་གེ་གླང་ཆེན་རྟ་དང་ཁྱུང་། །ནམ་མཁའི་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པ་བཞིན་ནོ། །གཉིས་པ་བརྟེན་པ་ལྷ་བསྐྱེད་པ་ལ་གསུམ་སྟེ། ལྷ་བསྐྱེད་པ་དངོས་དང་། གསལ་གདབ་པ། དབང་བསྐུར་བྱིན་རླབས་བྱ་བའོ། །དང་པོ་ནི། གཞིའི་ཨ་ཡིག་ལས་ཡི་གེ་བཞི་བཅུ་རྩ་གཉིས་ཐོན་ཏེ། སོ་སོའི་གདན་སྟེང་དུ་འཁོད་པ་ནི། དབུས་སུ་ཋ་ཐ། རྩིབས་བཞིའི་ཤར་དུ་ཊ་ཏ། ལྷོར་ཌ་ད། ནུབ་ཏུ་ཌྷ་དྷ། བྱང་དུ་ཎ་ན། རྩིབས་མཆན་གྱི་ཤར་ལྷོའི་གདན་ལ་ཀ་ཙ། ལྷོ་ནུབ་ཏུ་ཁ་ཚ། ནུབ་བྱང་དུ་ག་ཛ། བྱང་ཤར་དུ་གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ་པ་ཡ། ལྷོ་ནུབ་ཏུ་ཕ་ཝ། ནུབ་བྱང་དུ་བ་ར། བྱང་ཤར་དུ་བྷ་ལ། ཁྱམས་ཀྱི་ཤར་དུ་ཀྵ། ནུབ་ཏུ་ཨ། ཤར་ལྷོར་ཨི། བྱང་དུ་ཨཱི། ལྷོར་ཨུ། ནུབ་བྱང་དུ་ཨཱུ། ལྷོ་ནུབ་ཏུ་ཨེ། བྱང་ཤར་དུ་ཨཻ། སྒོ་བཞིའི་ཤར་སྒོར་ང་ཤ །ལྷོ་སྒོར་ཉ་ཥ། ནུབ་སྒོར་མ་ས། བྱང་སྒོར་ཨོ་ཨ་ཧ་རྣམས་རང་རང་གི་ལྷའི་ཁ་དོག་དང་མཐུན་པར་སོ་སོའི་གདན་ལ་འཁོད་པའི་མཐར། ཨ་ཞེས་བརྗོད་པས་གཞིའི་ཨ་དེ་འོད་དུ་ཞུ་ནས་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་བསམ་ལ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨ་སྥ་ར་ཎ་ཕཊ། ཅེས་བརྗོད་པས། ཡིག་འབྲུ་རྣམས་ལས་འོད་ཟེར་འཕྲོས། །སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུཾ། སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས། བཛྲ་ཙཀྲ་རཏྣ་པདྨ་ཁདྒ་གྷཎྜ། ཞེས་བརྗོད་པས། དབུས་སུ་རྡོ་རྗེ་དང་དྲིལ་བུ། རྩིབས་བཞིའི་ཤར་དུ་འཁོར་ལོ་དང་དྲིལ་བུ། །ལྷོར་རིན་པོ་ཆེ་དང་དྲིལ་བུ། །ནུབ་ཏུ་པདྨ་དང་དྲིལ་བུ། །བྱང་དུ་རལ་གྲི་དང་དྲིལ་བུ། །རྩིབས་མཆན་གྱི་ཤར་ལྷོར་རིན་པོ་ཆེའི་མྱུ་གུ་དང་མེ་ལོང་། ལྷོ་ནུབ་ཏུ་རལ་གྲི་དང་ཕྲེང་བ། ནུབ་བྱང་དུ་པདྨ་དང་པི་ཝཾ། བྱང་ཤར་དུ་རྡོ་རྗེ་དང་རྔ་ཡབ། གྲུ་ཆད་བཞིའི་ཤར་ལྷོར་ཀླུ་ཤིང་དང་སྤོས་ཁང་། ལྷོ་ནུབ་ཏུ་པུསྟི་དང་མེ་ཏོག །ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཁྱབས་ཀྱི་ཤར་དུ་རྡོ་རྗེ། ནུབ་ཏུ་དྲིལ་བུ། ཤར་ལྷོར་པི་ཝཾ། བྱང་དུ་གོ་མཚོན། ལྷོར་གསེག་པར། ནུབ་བྱང་དུ་པུ་སྟི། ལྷོ་ནུབ་ཏུ་སྒྲོམ་བུ། བྱང་ཤར་དུ་མེ་ཆུ། ཤར་སྒོར་ནྲྀ་མགོ་གདེངས་པ་དང་ལྕགས་ཀྱུ། ལྷོ་སྒོར་རྡོ་རྗེ་རྩེ་ལྔ་དང་ཞགས་པ། ནུབ་སྒོར་ཐོད་པ་སྤྲུལ་གྱིས་དཀྲིས་པ་དང་ལྕགས་སྒྲོག །བྱང་དུ་རྡོ་རྗེ་རྒྱ་གྲམ་དང་དྲིལ་བུ་སྟེ་ཕྱག་མཚན་བཞི་བཅུ་རྩ་གཉིས་སུ་གྱུར། སྥ༴ དེ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ༴ སླར་འདུས་ནས་ཕྱག་མཚན་རྣམས་ལ་ཐིམ་པ་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ྄ །རང་ཉིད་དཀྱིལ་འཁོར་གྱི་དབུས་སུ། བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག །མཐིང་དཀར་དམར་བའི་ཞལ་གསུམ་ཕྱག་དྲུག་གི། གཡས་དང་པོ་རྡོ་རྗེ་ཐུགས་ཀར་འཛིན་ཅིང་། གཡོན་དང་པོ་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། བར་པ་གཉིས་འཁོར་ལོ་དང་རིན་པོ་ཆེ། ཐ་མ་གཉིས་ཀྱིས་པདྨ་དང་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། ཞབས་གཉིས་རྫོགས་པའི་སྐྱིལ་མོ་ཀྲུང་གིས་བཞུགས་པའོ། །མཱུཾ་དྷཱ་ཏྭེ་ཤྭ་རཱི། དེའི་པང་དུ་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་ཕྱག་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རྡོ་རྗེ་ཐུགས་འཛིན་པ། བརྟུལ་ཞུགས་ཀྱི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུའི་སྨད་དཀྲིས། ཁ་དོག་སྣ་ཚོགས་པའི་ཅོད་པན། ཟི་ལྡིར། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། དོ་ཤལ། སྐ་རགས། ཕྱག་ཞབས་ཀྱི་གདུ་བུ་སྟེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་འཚེར་ལྷུན་སྡུག་གཟི་བྱིན་ལྡན་པ་སྟེ། ཞི་བའི་ཉམས་དགུས་རྒྱས་པ། འོད་ཟེར་ཁ་དོག་དྲུག་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །ༀ་ཛི་ན་ཛིཀ྄ །ཤར་གྱི་རྩིབས་ལ་རྣམ་སྣང་དཀར་པོ། དཀར་མཐིང་དམར་བའི་ཞལ་གསུམ་ཕྱག་དྲུག་གི །དང་པོ་གཉིས་ཀྱིས་འཁོར་ལོ་དང་དྲིལ་བུ་འཛིན་པས་ཡུམ་ལ་འཁྱུད་ཅིང་། བར་པས་རྡོ་རྗེ་དང་རིན་ཆེན། ཐ་མས་པདྨ་དང་རལ་གྲི་འཛིན་པ། ལཱཾ་དྭེ་ཥ་ར་ཏི། ཡུམ་སྤྱན་མ་དཀར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་འཁོར་ལོ་འཛིན་པ། སྭཱཾ་རཏྣ་དྷྲི་ཀ྄ །ལྷོར་རིན་ཆེན་འབྱུང་ལྡན་སེར་པོ། སེར་དཀར་དམར་བའི་ཞལ་གསུམ་ཕྱག་དྲུག་གི། དང་པོ་གཉིས་ཀྱིས་རིན་པོ་ཆེ་དང་དྲིལ་བུ། བར་པས་འཁོར་ལོ་དང་རྡོ་རྗེ། ཐ་མས་པདྨ་དང་རལ་གྲི་འཛིན་པ། མཱཾ་མོ་ཧ་ར་ཏི། མཱ་མ་ཀཱི་སེར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་རིན་པོ་ཆེ་འཛིན་པ། ཨཱཾ་ཨཱ་རོ་ལིཀ྄ །ནུབ་ཏུ་སྣང་བ་མཐའ་ཡས་དམར་པོ། དམར་དཀར་སྔོ་བའི་ཞལ་གསུམ་ཕྱག་དྲུག་གི། དང་པོ་གཉིས་ཀྱིས་པདྨ་དང་དྲིལ་བུ། བར་བས་འཁོར་ལོ་དང་རིན་པོ་ཆེ། ཐ་མས་རྡོ་རྗེ་དང་རལ་གྲི་འཛིན་པ། པཱཾ་རཱ་ག་ར་ཏི། གོས་དཀར་མོ་དམར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་པདྨ་འཛིན་པ། ཧཱཾ་པྲ་ཛྙཱ་དྷྲིཀ྄ །བྱང་དུ་དོན་ཡོད་གྲུབ་པ་ལྗང་གུ། ལྗང་དཀར་དམར་བའི་ཞལ་གསུམ་ཕྱག་དྲུག་གི། དང་པོ་གཉིས་ཀྱིས་རལ་གྲི་དང་དྲིལ་བུ། བར་པས་འཁོར་ལོ་དང་རིན་པོ་ཆེ། ཐ་མས་པདྨ་དང་རྡོ་རྗེ་འཛིན་པ། ཏཱཾ་བཛྲ་ར་ཏི། དམ་ཚིག་སྒྲོལ་མ་ལྗང་གུ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་རལ་གྲི་འཛིན་པ། ཡབ་རྣམས་རྫོགས་པའི་སྐྱིལ་མོ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྱུང་གིས་རོལ་པའོ། །ཀྵཱིཾ་ཧི་རཱ་ཛ་ཡ། རྩིབས་མཆན་བཞིའི། ཤར་ལྷོར་ས་སྙིང་དཀར་པོ་གཡས་རིན་པོ་ཆེའི་མྱུ་གུ་འཛིན་ཅིང་། གཡོན་དྲིལ་བུ་དཀུར་བརྟེན་པ། ཧཱུཾ་ལཱ་སྱ་ས་མ་ཡ་སྟྭཾ། སྒེག་མོ་དཀར་མོ་གཡས་ཡབ་ལ་འཁྱུད་ཅིང་། གཡོན་མེ་ལོང་འཛིན་པ། ཏྲཾ་ཨཱ་གརྦྷ་ཡ། ལྷོ་ནུབ་ཏུ་ནམ་སྙིང་སེར་པོ་གཡས་རལ་གྲི༴ གཡོན་དྲིལ་བུ༴ ཏྲཾ་མཱ་ལེ་ས་མ་ཡ་ཧོཿ ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ། ཧྲཱིཾ་ཧཱ་ཧཱུཾ་པདྨ་པྲ་ད་མ། ནུབ་བྱང་དུ་སྤྱན་རས་གཟིགས་དམར་པོ་གཡས་པདྨ་དཀར་པོ༴ གཡོན་དྲིལ་བུ༴ ཧྲཱིཾ་གཱི་ཏི་རཱ་གོ་ཧཾ། གླུ་མ་དམར་མོ་པི་ཝཾ་འཛིན་པ། ཛྲིཾ་ཀུ་རུ་པཱ་ཎ། བྱང་ཤར་དུ་ཕྱག་རྡོར་མཐིང་ག་གཡས་རྡོ་རྗེ༴ གཡོན་དྲིལ་བུ༴ ཨ་ནིརྟི་རཱ་ག་ཡ་མྱེ། གར་མ་ལྗང་གུ་རྔ་ཡབ་འཛིན་པས་གར་རྒྱ་མཛད་པ། མཻ་དྷཱ་ར་ཎ་སྭཱ་ཧཱ། གྲུ་ཆད་བཞིའི། ཤར་ལྷོར་བྱམས་པ་དཀར་སེར་གཡས་ཀླུ་ཤིང་༴ གཡོན་དྲིལ་བུ༴ ཛཿདྷཱུ་པེ་པྲ་བེ་ཤ །བདུག་སྤོས་མ་དཀར་སེར་སྤོས་ཁང་འཛིན་པ། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ལྷོ་ནུབ་ཏུ་སྒྲིབ་སེལ་དམར་སེར་གཡས་ཆོས་ཀྱི་འཁོར་ལོ༴ གཡོན་དྲིལ་བུ༴ ཧཱུཾ་པུཥྤེ་ཨཱ་བེ་ཤ །མེ་ཏོག་མ་དམར་སེར་མེ་ཏོག་གི་ཕྲེང་བ་འཛིན་པ། ཧཱུྃ་སྭ་རཱ་ཛ་ཡ་སྭཱ་ཧཱ། ནུབ་བྱང་དུ་ཀུན་བཟང་དམར་ལྗང་གཡས་རིན་པོ་ཆེའི་སྙེ་མ༴ གཡོན་དྲིལ་བུ༴ བཾ་དཱི་པ་སུ་གི་རཱི། མར་མེ་མ་དམར་ལྗང་མར་མེ་འཛིན་པ། མཱུཾ་ཤྲཱི་ཨཾ་རཱ་ག་ཡ་སྭཱ་ཧཱ། བྱང་ཤར་དུ་འཇམ་དཔལ་དཀར་ལྗང་གཡས་ཨུཏྤལ༴ གཡོན་དྲིལ་བུ༴ ཧོཿགནྡྷེ་ཙིཏྟ། དྲི་ཆབ་མ་དཀར་ལྗང་དྲིའི་དུང་ཆོས་འཛིན་པ། སེམས་དཔའ་བརྒྱད་པོ་ཐམས་ཅད་ཀྱང་ཞབས་གཡས་ཅུང་ཟད་བརྐྱང་བའི་ཕྱེད་སྐྱིལ་གྱིས་བཞུགས་ཤིང་། སེམས་མ་རྣམས་གཡོན་ཅུང་ཟད་བརྐྱང་བའི་ཕྱེད་སྐྱིལ་གྱིས་ཡབ་ལ་འཁྱུད་པའོ། །ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཁྱམས་ཀྱི་ཤར་དུ་ཀུན་ཏུ་བཟང་པོ་མཐིང་ག་མཉམ་གཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ནུབ་ཏུ་ཀུན་ཏུ་བཟང་མོ་མཐིང་ག་གཡོན་སྟེང་དུ་བཞག་པའི་མཉམ་གཞག་གི་ཕྱག་རྒྱ་ཅན་པདྨའི་སྐྱིལ་ཀྲུང་གིས་བཞུགས་པ། གཤེགས་པ་གཤེགས་མ། སེམས་དཔའ་སེམས་མ། ཀུན་བཟང་ཡབ་ཡུམ་རྣམས་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་། ཚུལ་དགུའི་ཉམས་ཀྱིས་རྒྱས་པའོ། །ༀ་མུ་ནེ་ཀྲེཾ་སྭཱ་ཧཱ། ཁྱམས་ཀྱི་ཤར་ལྷོར་ལྷའི་ཐུབ་པ་དཀར་པོ་པི་ཝཾ་འཛིན་པ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། བྱང་དུ་ལྷ་མིན་གྱི་ཐུབ་པ་མཐིང་ག་གོ་མཚོན་འཛིན་པ། ༀ་མུ་ནེ་སྲུཾ་སྭཱ་ཧཱ། ལྷོར་མིའི་ཐུབ་པ་སེར་པོ་གསེག་པར་འཛིན་པ། ༀ་མུ་ནེ་བྲཾ་སྭཱ་ཧཱ། ནུབ་བྱང་དུ་བྱོལ་སོང་གི་ཐུབ་པ་དམར་ནག་པུསྟི་འཛིན་པ། ༀ་མུ་ནེ་ཀྵཾ་སྭཱ་ཧཱ། ལྷོ་ནུབ་ཏུ་ཡི་དྭགས་ཀྱི་ཐུབ་པ་སེར་ནག་རིན་པོ་ཆེའི་སྒྲོམ་བུ་འཛིན་པ། ༀ་མུ་ནེ་ཡེ་སྭཱ་ཧཱ། བྱང་ཤར་དུ་དམྱལ་བའི་ཐུབ་པ་དུད་ཁ་མེ་ཆུ་འཛིན་པ། དྲུག་ཀའང་གཙུག་ཏོར་དང་ལྡན་ཞིང་ཚངས་པར་སྤྱོད་པའི་ཆ་ལུགས་ཅན། འགྲོ་བའི་དོན་ལ་འགྲེང་སྟབས་སུ་གཤེགས་པའི་ཚུལ་ཅན་ནོ། །ཧཱུཾ་ཡ་མཱནྟ་ཀྲྀཏ་ཕཊ། ཤར་སྒོར་གཤིན་རྗེའི་གཤེད་སྨུག་ནག་ནྲྀ་མགོ་གདེངས་པ་འཛིན་པ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུཾ་ཕཊ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ་དང་མཉམ་པར་སྦྱོར་བ། ཧཱུཾ་པྲ་ཛྙཱནྟ་ཀྲྀ ཏ་ཕཊ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་འཛིན་པ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུཾ་ཕཊ། ཞགས་པ་མ་སེར་ནག་ཞགས་པ་འཛིན་པ་དང་མཉམ་པར་སྦྱོར་བ། ཧཱུཾ་པདྨནྟ་ཀྲྀཏ་ཕཊ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱི་དཀྲིས་པ་འཛིན་པ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དེ་ཤྭ་རཱི་ཛྭ་ལཱི་ནི་ཧཱུཾ་ཕཊ། ལྕགས་སྒྲོག་མ་དམར་ནག་ལྕགས་སྒྲོག་འཛིན་པ་དང་མཉམ་པར་སྦྱོར་བ། ཧཱུཾ་བིགྷྣཱནྟ་ཀྲྀཏ་ཕཊ། བྱང་སྒོར་བདུད་རྩི་འཁྱིལ་བ་ལྗང་ནག་རྡོ་རྗེ་རྒྱ་གྲམ་འཛིན་པ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུཾ་ཕཊ། དྲིལ་བུ་མ་ལྗང་ནག་དྲིལ་བུ་འཛིན་པ་དང་མཉམ་པར་སྦྱོར་བ། ཁྲོ་བོ་བཞི་ཀའང་གཡོན་སྡིགས་མཛུབ་མཛད་ཅིང་། ཡུམ་རྣམས་གཡོན་པས་དུང་ཁྲག་སྟོབ་པའི་ཚུལ་ཅན་ཐམས་ཅད་ཀྱང་ཁྲོ་ཞིང་གཏུམ་ལ་རྣམ་པར་འགྱུར་བའི་ཞལ་ཅན། གར་གྱི་ཉམས་དགུས་སྒེག་ཅིང་། དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཏེ། བསྐལ་པའི་མེ་དཔུང་འབར་བའི་ཀློང་ན་གདུག་པ་ཅན་ཚར་གཅོད་པའི་ཚུལ་གྱིས་བཞུགས་པ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཀྱང་མེ་ལོང་ནང་གི་གཟུགས་བརྙན་ནམ་ཆུ་ནང་གི་ཟླ་བ་ལྟར་སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ཀྱི་འཁོར་ལོར་བཞུགས་པའོ། །གཉིས་པ་གསལ་གདབ་པ་ནི། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུ ཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་ཕྲེང་བ་དང། །པི་ཝང་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འཕྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞི་ཁྲོ་བོའི་ཕྱག་རྒྱ་ནི། །ནྲྀ་མགོ་གདེང་དང་རྡོ་རྗེ་གནོན། །ཐོད་སྤྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝང་དང་། །གོ་ཆ་པུསྟི་རིན་ཆེན་སྒྲོམ། །མེ་དང་ཆུར་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨོའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ཁ་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡིས། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པ་གསལ་གདབ་བོ། །གསུམ་པ་ལ། དབང་བསྐུར་བ་དང་། བྱིན་གྱིས་བརླབ་པ་གཉིས་ལས། དང་པོ་ནི། དེ་ལྟར་གསལ་བའི་ལྷ་ཚོགས་ཐམས་ཅད་ཀྱི་སྲོག་གི་གོར་རང་འདྲའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་སོ་སོའི་ཕྱག་མཚན་གྱི་ལྟེ་བར་ས་བོན་ལ་སྔགས་ཕྲེང་གིས་བསྐོར་བས་མཚན་པར་བསམ་ལ། ས་བོན་རྣམས་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཛཿས་སྤྱན་དྲང་པར་བསམ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱ ཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བས། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུ་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་རང་རིགས་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་པར་མོས་ལ། ཕུང་པོ་ལྔ་དག་པའི་རིགས་ལྔའི་སངས་རྒྱས་སུ་ང་རྒྱལ་བྱ། རིགས་ལྔའི་དབང་རྒྱ་གནས་སོ་སོར་འཇོག་ཅིང་དབང་སྔགས་བརྗོད་པའོ། །དེ་ཡང་རྡོ་རྗེའི་རིགས་མི་བསྐྱོད་པ་ལ་མཚོན་ན། རྡོ་རྗེ་ཕྱི་བསྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྲིད་ལག་བརྐྱང་བ་རྣ་ལྟག་གཡས་པར། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེ་བོང་བརྐྱང་བ་ལྟག་པར། ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེའུ་ཆུང་བརྐྱང་བ་རྣ་ལྟག་གཡོན་པར། ༀ་མ་ཧཱ་ཀྲྀ ཏྱཱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། གཙོ་བོ་ཡབ་ཡུམ། བྱེད་པོ་ཡབ་ཡུམ། ཐུབ་པ་དྲུག་དང་བཅུ་ལ་མི་བསྐྱོད་པ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་གྱུར། དེས་མཚོན་ནས། རིགས་གཞན་བཞི་ལའང་རིགས་གང་ཡིན་དེའི་སྔགས་དང་པོར་བརྗོད་ཅིང་། ཕྱག་རྒྱ་སྤྱི་བོའི་དབུས་སུ་འཇོག་ལ། གང་དབུས་སུ་སོང་བའི་སྔགས་རྒྱ་དང་རིགས་བདག་གི་ཤུལ་དུ་མི་བསྐྱོད་པ་འཇོག་པ་ལས། རྣམ་སྣང་གི་དབང་རྒྱ་དང་ཨཱ་དཪྴ་དང་པོར་བརྗོད་པའི་སྔགས་ཚན་ལྔས། རྣམ་སྣང་། ས་སྙིང་། བྱམས་པ། གཤིན་རྗེ་གཤེད་རྣམས་ཡུམ་དང་བཅས་པ་ལ་རྣམ་སྣང་བདག་པོར་གྱུར་པའི་རིགས་ལྔའི་ཅོད་པན་གྱིས༴ ས་མ་ཏཱ་དང་པོར་བརྗོད་པའི་སྔགས་ཚན་ལྔས། རིན་འབྱུང་། ནམ་སྙིང་། སྒྲིབ་སེལ། སྟོབས་པོ་ཆེ་རྣམས་ཡུམ་དང་བཅས་པ་ལ་རིན་འབྱུང་བདག་པོར་གྱུར་པའི༴ པྲ་ཏྱ་དང་པོར་བརྗོད་པའི་སྔགས་ཚན་ལྔས། སྣང་མཐའ། སྤྱན་རས་གཟིགས། ཀུན་བཟང་། རྟ་མགྲིན་རྣམས་ཡུམ་དང་བཅས་པ་ལ་སྣང་མཐའ་བདག་པོར་གྱུར་པའི༴ ཀྲྀ་ཏྱཱ་དང་པོར་བརྗོད་པའི་སྔགས་ཚན་ལྔས། དོན་གྲུབ། ཕྱག་རྡོར། འཇམ་དཔལ། བདུད་རྩི་འཁྱིལ་བ་རྣམས་ཡུམ་དང་བཅས་པ་ལ་དོན་གྲུབ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་བསམ་མོ། །གཉིས་པ་ནི། ལྷ་ཐམས་ཅད་ཀྱི་སྤྱི་བོར་ཟླ་བ་ལ་གནས་པའི་ༀ་དཀར་པོ། །དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱའོ། །ༀ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར། ༀ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མགྲིན་པར་པདྨ་ལ་གནས་པའི་ཨཱཾ་དམར་པོ། དེའི་འོད་ཟེར་གྱིས༴ གསུང་རྡོ་རྗེའི་ལྷ༴ ཨཱཾ་ལ་ཐིམ། དེ་བཞིན་གཤེག་པ་ཐམས་ཅད་ཀྱི་གསུང་དང་༴ ཨཱཾ་ཡོངས་སུ་གྱུར་པ་ལས་སྣང་མཐའ་དམར་པོ་པདྨ༴ རྡོ་རྗེ་ཕྱག་རྒྱ་མགྲིན་པར། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྙིང་གར་ཉི་མ་ལ་གནས་པའི་ཧཱུཾ་སྔོན་པོ། དེའི་འོད་ཟེར་༴ ཐུགས་རྡོ་རྗེའི༴ ཧཱུཾ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་ཐུགས༴ ཧཱུཾ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ༴ རྡོ་རྗེའི་ཕྱག་རྒྱ་སྙིང་གར། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་དྲུག་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་པ་བྱ་བ། དངོས་གྲུབ་གསོལ་བ། དམ་བཅའ་བ། འཛབ་བཟླ་བའོ། །དང་པོ་ལ་བཞི་སྟེ། སྙན་གསན་དབབ་པ། སྤྱན་དྲང་བ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པའོ། །དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུཾ་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་བཞི་བཅུ་རྩ་གཉིས་སྒྱུ་འཕྲུལ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། མཐེའུ་ཆུང་གཉིས་སྦྲེལ་ཏེ་རྩེ་སྤྲད་པ་ལྕགས་ཀྱུའི་ཕྱག་རྒྱ་དང་བཅས་པས། ཧཱུཾ། སྟོང་པ་ཤིན་ཏུ་ཡོད་མེད་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་མཛད་དགོངས་སུ་གསོལ། །རྡོ་རྗེ་སེམས་དཔའ་ཁྱོད་བདག་སྐལ་བཟང་དཔལ། །ༀ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཞེས་པས་སྙན་གསན་ཕབ་ལ། གཉིས་པ་ནི། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉ་གནས་བསྐྱོད་ལ། །བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །དམ་ཚིག་པའི་ཐུགས་ཀ་ནས་འཕྲོས་པའི་ཛཿཧཱུཾ་བཾ་ཧོཿས་དགུག་བཅིང་བསྡམས་ལ་དགྱེས་པ་བསྐྱེད་ནས། དམ་ཚིག་གི་དཀྱིལ་འཁོར་དང་མེ་རི་འདབ་འབྱར་དུ་བཞུགས་པར་བསམ་མོ། །གསུམ་པ་ནི། ༀ་བཛྲ་ས་མ་ཡ་ༀ། ཨཱཾ་བཛྲ་ས་མ་ཡ་ཨཱཾ། ཧཱུཾ་བཛྲ་ས་མ་ཡ་ཧཱུཾ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱ་བའོ། །བཞི་པ་ནི། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་བརྗོད་པས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པར་གྱུར་པ་དང་། ༀ་བཛྲ་ས་མ་ཡ་ཧཱུྃ། ཡེ་ཤེས་ཀྱི་འཁོར་ལོ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་གྱུར་པར་བསམ། ༀ་བཛྲ་ས་མ་ཡ་སྟྭཾ། ནམ་མཁའ་ལྷའི་དཀྱིལ་འཁོར་ཉིད་དུ་གྲུབ་པར་མ་གྱུར་གྱི་བར་བརྟན་པར་བྱས། ༀ་བཛྲ་ས་མ་ཡ་ཧོཿ དེ་ཡང་ཤིན་ཏུ་དབང་དུ་གྱུར་ཏེ་དགྱེས་པ་ཆེན་པོས་རྗེས་སུ་ཆགས་པར་བྱས། ཛཿཧཱུཾ་བཾ་ཧོཿ ཞེས་བརྗོད་པས་བརྟན་ཅིང་གསལ་བར་བྱས་ནས། རིན་ཆེན་སེང་གེའི་གདན་ལ་ཡང་དག་ངེས་བཞུགས་ཤིང་། །རང་གི་ལྷ་མོ་དག་དང་སྲས་དང་གཡོག་འཁོར་བཅས་པ་རྣམས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་དང་བཅས་པ་རྣམས་ལ་ཕན་ཕྱིར་བཞུགས་སུ་གསོལ། །ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ལ། ཕྱག་དང་། མཆོད་པ་གཉིས་ལས། དེ་གཉིས་ཀའི་ཚེ་ཡང་། རང་ཉིད་དཀྱིལ་འཁོར་གྱི་གཙོ་བོ་ལས། མར་མེ་གཅིག་ལས་གཉིས་ཆད་ཀྱི་ཚུལ་དུ་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ། སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་སོགས་ལས་ཀྱི་རིམ་པ་ལ་འཇུག་པར་མོས་པའོ། །དེའི་དང་པོ་ཕྱག་འཚལ་བ་ནི། མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེའི་བྱེ་བྲག་སྣ་ཚོགས་ཅིང་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་པའི། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ༴ ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ༴ ངོ་མཚར་ཕོ་བྲག་བདེ་བར་གཤེགས་པའི་ཡུམ། །དུས་གསུམ་སྲས་བཅས་ཐམས་ཅད་བསྐྱེད་མཛད་མ། །རིགས་ཀྱི་ཡུམ་གྱུར་རྣམས་ལ༴ རྣམ་ཤེས་དབང་པོ་དག་པས་ཐུགས་དང་གསུང་། །བདེ་བར་གཤེགས་པ་ཀུན་གྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ༴ སྒེག་མོ་ཕྲེང་ཐོགས་རིན་ཆེན་གླུ་གར་ཅན། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས༴ བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ༴ དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་བསྲུང་། །མཐར་བྱེད་སྒོ་བ་བཞི་ལ༴ རྟག་ཆད་ལྟ་འབྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། །ཡེ་ཤེས་སྒོ་མ་བཞི་ལ༴ སྟེང་འོག་ཕྱོགས་བཞི་འཇིག་རྟེན་འདུལ་བའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང་། །བཅོམ་ལྡན་ཐུབ་པ་དྲུག་ལ༴ དམིགས་མེད་ཆོས་ཀྱི་སྐུ་ལ༴ ལོངས་སྤྱོད་རྫོགས་པའི་སྐུ་ལ༴ ཅིར་ཡང་སྤྲུལ་པའི་སྐུ་ལ༴ མི་འགྱུར་རྡོ་རྗེ་སྐུ་ལ༴ མངོན་པར་བྱང་ཆུབ་སྐུ་ལ༴ དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །ཨ་ཏི་པུ་ཧོཿ པྲ་ཏི་པུ་ཧོཿ ཞེས་པས་ཕྱག་རྒྱའོ། །གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ལག་པ་གཡས་ཀྱི་སོར་མོའི་བྲེ་ཁ་ལྔ་ལ། མ་སཱུརྻ་མཎྜ་ལ། ཉི་མའི་དཀྱིལ་འཁོར་ལྔ། གུང་མཛུབ་སྲིན་ལག་མཐེ་བོང་མཐེའུ་ཆུང་རྣམས་ལ། ཧཱུྃ་ༀ་སྭཱ་ཨཱཾ་ཧཱ། གཡོན་གྱི་སོར་མོའི་བྲེ་ཁ་ལྔ་ལ། ཨ་ཙནྡྲ་མཎྜ་ལ། ཟླ་བའི་དཀྱིལ་འཁོར་ལྔ། གུང་མཛུབ་སོགས་ལྔ་ལ། མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པར་བསམ་ལ། ཧཱུཾ། སྒྱུ་འཕྲུལ་དྲྭ་བ་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱུྃ་བཛྲ་དྷྲིཀ྄། འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱུཾ་དྷཱ་ཏྭེ་ཤྭ་རཱི། འབྲུ་བཞི་སྦས༴ ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ༴ འཁྲིལ་བའི༴ ༀ་ཛི་ན་ཛིཀ྄ །འབྲུ་བཞི་སྤས༴ ལཱཾ་སྒྲེང་རྩེ་མོར་དྲིལ༴ ཉི་མ༴ བཏུད་དེ༴ ལཱཾ་དྭེ་ཥ་ར་ཏི། འབྲུ་བཞི༴ སྭཱ་སྒྲེང་རྩེ་མོར་རིན་ཆེན་འབར། །ཟླ་བརྟུལ༴ འཁྲིལ་བའི༴ སྭཱཾ་རཏྣ་དྷྲིཀ྄ །འབྲུ་བཞི༴ མཱཾ་སྒྲེང་རྩེ་མོར་དྲིལ༴ ཉི་མ༴ བཏུད་དེ༴ མཱཾ་མོ་ཧ་ར་ཏི། འབྲུ་བཞི༴ ཨཱཾ་སྒྲེང་རྩེ་མོར་པདྨ་འབར། ཟླ་བརྟུལ་༴ འཁྲིལ་བའི༴ ཨཱཾ་ཨཱ་རོ་ལིཀ྄ །འབྲུ་བཞི༴ པཱཾ་སྒྲེང་རྩེ་མོར་དྲིལ༴ ཉི་མ་༴ བཏུད་དེ༴ པཱཾ་རཱ་ག་ར་ཏི། འབྲུ་བཞི༴ ཧཱ་སྒྲེང་རྩེ་མོར་རལ་གྲི་འབར། །ཟླ་བརྟུལ༴ འཁྲིལ་བའི༴ ཧཱཾ་པྲ་ཛྙཱ་དྷྲིཀ྄ །འབྲུ་བཞི༴ ཏཱཾ་སྒྲེང་རྩེ་མོར་དྲིལ༴ ཉི་མ༴ བཏུད་དེ༴ ཏཱཾ་བཛྲ་རཱ་ཏི། འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིན། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །ཅེས་རིམ་པ་བཞིན་རིགས་ལྔ་སོ་སོའི་ཕྱག་རྒྱ་བཅའ་བ་སྟེ། དེ་ཡང་ཕྱག་རྒྱ་མདུན་དུ་བསྒྱུར་ནས་ཡབ་གཡོན་དང་ཡུམ་གཡས་སུ་དགྲོལ། དེའི་ཚེ་ལྷ་སྐུ་སྒྱུ་མ་ལྟ་བུར་གསལ་བ་ཕྱག་ཆེན། ས་བོན་ཆོས་རྒྱ། བཅའ་དམ་རྒྱ། དགྲོལ་བ་ལས་རྒྱ་སྟེ་རིགས་ལྔ་སྤྱི་དང་སོ་སོའི་ཕྱག་རྒྱ་བཞིའོ། །གཉིས་པ་ཀུན་བཟང་ནི། ༀ་ཧཱུཾ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་ནས་ཀྱང་། །རྡོ་རྗེའི་གདན་ལ་བཞུགས་སུ་གསོལ། །ༀ་ཨཱ་ཧ་ར་ཨཱ་ཧཱ་ར་སརྦ་བིདྱཱ་དྷ་ར་པཱུ་ཛི་ཏེ་ན་མསྶ་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ཞེས་པས་རིམ་པར་ཕྱག་ཞབས་བསིལ་ཞིང་ཞལ་དུ་གསོལ་བར་བསམ་མོ། །བཞི་པ་བཞི་བསྣོལ་ནི། སོ་སོའི་ཕྱག་རྒྱ་སྟོན་ཅིང་། ༀ་ཧཱུྃ། སྤོས་ཀྱི་སྤྲིན་ལྡིང་བདུག་པ་མ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པར་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿ སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷུ་པེ་དྷཱུ། ཨུཏྤ ལ་མཐིང་ག་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས༴ བཛྲ་པུཥྤེའི༴ ༀ་པ་ན་སོགས། པུཥྤེ་པུ། དབང་གི་ཕྱག་ན་སྒྲོན་མ་རྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ༴ བཛྲཱ་ལོ་ཀེའི༴ ༀ་པ་ན་སོགས། ཨཱ་ལོ་ཀེ་ཧྲཱིཿ ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་༴ བཛྲ་གནྡྷེའི༴ ༀ་པ་ན་སོགས། གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས། ཤངས་ལ་སོགས་པའི་དབང་པོ་སོ་སོ་ལ་ཐིམ་པར་བསམ་ལ། ༀ་ཨཱཿཧཱུཾ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ཅེས་བརྗོད་པས། སྐྱེས་དང་སྐྱེས་ལན་གྱི་ཚུལ་དུ་ལྷ་རྣམས་མཉེས། ལྷ་མོ་རྣམས་སླར་བྱུང་སྟེ་རང་གི་གནས་བཞིར་ཐིམ་པས་སྐུ་གསུང་ཐུགས་ཕྲིན་ལས་བཞིའི་དངོས་གྲུབ་ཐོབ་པར་བསམ་མོ། །ལྔ་པ་སྨན་མཆོད་ནི། ༀ་ཧཱུཾ། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་སྒྲོལ་བ། །དུག་ལྔ་སེལ་བའི་བདུད་རྩི་སྨན། །ཐམས་ཅད་བདུད་རྩིའི་རྣལ་འབྱོར་ཆེ། །བྱང་ཆུབ་སེམས་ནི་རྡོ་རྗེ་སྟེ། །ཤ་ཆེན་མཆོད་པ་རིན་པོ་ཆེ། །པདྨ་མེ་ཏོག་ཡང་དག་ལྡན། །རྡོ་རྗེ་ཆུ་སྟེ་ལས་ཀྱི་མཆོག །ཟས་མཆོག་ཚེ་ཡི་དྲི་ཆེན་པོ། །ག་བུར་ཤེལ་གྱི་པོག་ཕོར་དྲི། །རིན་ཆེན་མེ་ལྟར་འབར་བའི་ཚོགས། །མ་ལུས་འདུལ་བའི་ཐིག་ལེ་ཆེ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱར་ནས། །བདུད་རྩི་དམ་པ་རིན་ཆེན་བཅུད། །བདེ་གཤེགས་རྣམས་ཀྱི་ཐུགས་དམ་ཉིད། །རྒྱལ་བ་རྒྱ་མཚོའི་དངོས་གྲུབ་མཆོག །ཐུགས་རྗེ་ཆེན་པོའི་དཀྱིལ་འཁོར་འདིར། །བདག་ཅག་དད་པས་འབུལ་ལགས་ན། །ཐུགས་རྗེས་དགོངས་ཏེ་བཞེས་སུ་གསོལ། །བཞེས་ནས་ཀུན་ཏུ་དགྱེས་མཛོད་ལ། །བླ་མེད་དངོས་གྲུབ་སྩལ་དུ་གསོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་། གཞན་ཡང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོར་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྟོན་པ་ཀུན་བཟང་རྒྱལ་བ་རིགས་ལྔ་དང་། །རིགས་གསུམ་དྲྭ་མ་ལྔ་དང་རྒྱལ་པོ་ཛཿ ཀུ་ཀུ་རཱ་ཛ་ཨིནྡྲ་བྷཱུ་ཏི་ལ། །སྨན་མཆོད་འབུལ་ལོ༴ ༀ་སརྦ་ཏ་ཐཱ་ག་ཏ༴ སིཾ་ཧ་ཨུ་པ་རཱ་ཛ་གོ་མ་ས། །སྒེག་རྡོར་སངས་རྒྱས་གསང་བ་བི་མ་ལ། །རྨ་ལོ་རིན་མཆོག་གཙུག་གྱེར་རྣམ་གཉིས་ལ། །སྨན་མཆོད་འབུལ་ལོ༴ ༀ་སརྦ༴ རྒྱལ་བའི་ཡོན་ཏན་གནུབས་ཆེན་སངས་རྒྱས་ཞབས། །ཁུ་ལུང་ཡབ་སྲས་ཉང་ཆེན་ཤེར་མཆོག་དང་། །ཡེ་ཤེས་འབྱུང་གནས་ཟུར་ཆེན་ཤཱཀ་འབྱུང་ལ། །སྨན་མཆོད༴ ༀ་སརྦ༴ ཟུར་ཆུང་ཀ་ཆེན་རྣམ་བཞི་སྒྲོ་ཕུག་པ། །རྩགས་ཚ་ཤཀ་རྡོར་ཤཱཀ་འབྱུང་རྡོ་རྗེ་འོད། །བསོད་ནམས་རྒྱལ་མཚན་ཆོས་སེང་སངས་རྒྱས་དཔལ། །སྨན་མཆོད༴ ༀ་སརྦ༴ བསོད་ནམས་མགོན་པོ་སྒྲོལ་ཆེན་དགེ་འདུན་འབུམ། །ཤཱཀྱ་བཤེས་གཉེན་བྲ་བོ་ཆོས་འབུམ་དང་། །དཀོན་མཆོག་བཟང་པོ་རྡོ་རྗེ་དཔལ་བཟང་པོར། །སྨན་མཆོད༴ ༀ་སརྦ༴ རྡོ་རྗེ་རྣམ་རྒྱལ་བློ་གྲོས་དཔལ་ལྡན་དང་། །ཀརྨ་གུ་རུ་གྲུབ་ཆེན་ཀུན་བཟང་མཚན། །ཕྲིན་ལས་ལྷུན་གྲུབ་ཆོས་རྒྱལ་བསྟན་འཛིན་ལ། །སྨན་མཆོད་འབུལ་ལོ༴ ༀ་སརྦ༴ འགྱུར་མེད་རྡོ་རྗེེ་ཆོས་དཔལ་རྒྱ་མཚོ་དང་། །རིན་ཆེན་རྣམ་རྒྱལ་ཨོ་རྒྱན་བསྟན་འཛིན་རྗེ། །ཕྲིན་ལས་རྣམ་རྒྱལ་ཕྲིན་ལས་ཆོས་སྒྲོན་ལ། །སྨན་མཆོད་འབུལ་ལོ་མཐུ་དབང་༴ ༀ་སརྦ་ཏ་ཐཱ་ག་ཏ་མ་ཧཱ་པཉྩ༴ སངས་རྒྱས་ཀུན་དགའ་མདོ་སྔགས་བསྟན་འཛིན་དང་། །རིགས་བདག་འགྱུར་མེད་ཕན་བདེའི་འོད་ཟེར་ཞབས། །བརྒྱུད་སྲོལ་ཀུན་འདུས་རྩ་བའི་བླ་མ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཏེར་ཆེན་མན་གྱི་ཁ་སྐོང་ཛྙཱ་ནས་སོ། །མཆན། བརྒྱུད་ཚུལ་ཁྱད་པར་ཅན་དུ་མ་ཡོད་མོད། འདྲེན་པར་འདོད་ན་གཞན་དུ་བལྟའོ། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །འགྲོ་བའི་དོན་མཛད་སྤྲུལ་སྐུ་ཐུབ་དྲུག་ལ། །སྨན་མཆོད༴ ༀ་སརྦ༴ གཞན་ཡང་རྒྱལ་བའི་དཀྱིལ་འཁོར་རབ་འབྱམས་དང་། །དཔའ་བོ་མཁའ་འགྲོ་དམ་ཅན་སྲུང་མའི་ཚོགས། །ཞིང་སྐྱོང་གཞི་བདག་སྲིད་གསུམ་ཀ་དག་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་གུ་ཧྱ་ལག་གི་ཕྱག་རྒྱས་གཏོར་བས། ཡེ་ཤེས་ཀྱི་བདུད་རྩིའི་ཟེག་མ་མཁའ་ལ་སྤྲིན་བཞིན་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་ཐམས་ཅད་མཉེས་ཤིང་ཚིམ་པར་བསམ་ལ། མཐར་དངོས་གྲུབ་བླང་བ་ནི། རང་གི་ལྕེ་ལ་ཧཱུཾ་ཡིག་དང་། སྨན་གྱི་སྟེང་དུ་ༀ་ཨཱཿཧཱུཾ་གསུམ་བསྒོམས་ཏེ། ༀ་ཨཱཿཧཱུཾ། རྡོ་རྗེ་ལྕེ་ཡི་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་བསྒོམ། །བདུད་རྩི་ལྔ་དང་སྦྱར་བའི་སྨན། །མྱང་ན་དངོས་གྲུབ་ཐོབ་པར་འགྱུར། །ༀ་སརྦ་ཏ་ཐཱ་ག་ཏ་ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། འདོད་ཡོན་གྱི་ལྷ་མོ་དཔག་ཏུ་མེད་པས་དཀྱིལ་འཁོར་པ་རྣམས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་ཞིང་། ༀ་ཧཱུྃ། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ༀ་ཨཱཿཧཱུཾ། སུ་ར་ཏ་ཨུ་པ་བྷྱཿཀ་མ་ལ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝཱན་ཛཿཧཱུཾ་བཾ་ཧོཿ ཨ་ལ་ལ་ཧོཿ ཞེས་དང་། ༀ་པ་ན་པེཾ་སོགས་བཞི་བསྣོལ་གྱིས་ཀྱང་མཆོད་དོ། །བདུན་པ་བདུད་རྩི་གསང་བསྣན་གྱི་མཆོད་པ་ནི། བདུད་རྩིའི་རྒྱུན་གཏོར་མར་ལན་གསུམ་དུ་སྦེང་ཞིང་། ༀ་ཨཱཿཧཱུཾ། མི་བསྐྱོད་ཡེ་ཤེས་བདེ་བའི་མཆོག་དང་ལྡན་པའི་རོ་ལ་བསྣམས་སུ་གསོལ། །ཨ་ལ་ལ་ཧོཿ བྱང་ཆུབ་སེམས་དཔའི་བདེ་མཆོག་དེ་ཉིད་འགོག་པ་རྣམས་ལས་བསླང་བའི་ཕྱིར། །ཆགས་པ་མེད་པའི་བདེ་མཆོག་ཀུན་ཏུ་མྱོང་མཛད་བཞེས་ཤིང་བསྣམས་སུ་གསོལ། །ༀ་ཨཱཿཧཱུཾ། མཆོག་ཏུ་གསང་བའི་བདེ་ལ་རོལ་ཞིང་དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་དགའ་བའི་གར་མཛོད་ཅིག །ཨ་ལ་ལ་ཧོཿ ཞེན་ཅིང་ཆགས་པའི་མཐའ་ལ་ཉོན་མོངས་རྣོ་བསྐམས་གཟིར་བ་ཡིས། །མྱོང་བྱེད་བདེ་མཆོག་བརྒྱད་དང་ལྡན་པས་ཐབས་ཀྱི་སྐུ་ལ་སྨྲེ་བར་མཛོད། །འགྲོ་ཀུན་ཚངས་པར་སྦྱོར་བའི་བྱང་ཆུབ་སྒོ་མོར་ལམ་སྟོན་ཅིག །བདེ་མཆོག་བདུད་རྩི་ཁྱད་པར་མེད་པའི་ཚོགས་ལ་བཀའ་སྩོལ་ཅིག །ཨ་ལ་ལ་ཧོཿ ཞེས་པའི་དང་པོས་ལྷ་རྣམས་དགྱེས་པ་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླང་། གསུམ་པས་དེ་བཞིན་གཤེགས་པ་རྣམས་གཞན་དོན་ལ་བསྐུལ་བར་གསལ་གདབ་བོ། །བརྒྱད་པ་ལྷག་པ་ཏིང་ངེ་འཛིན་གྱི་མཆོད་པ་ནི། ༀ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་གཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །དགུ་པ་བསྒྲལ་མཆོད་ནི། རང་གི་ཐུགས་ཀ་ནས་རཾ་ཡིག་དཔག་ཏུ་མེད་པ་ཆད། རཾ་བཛྲ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་ཞིང་། ཧཱུཾ། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །བཅུ་པ་སྦྱོར་མཆོད་ནི། དཀྱིལ་འཁོར་པའི་ལྷ་ཡབ་རྣམས་ཀྱི་རྡོ་རྗེ་ཧཱུཾ་ལས་རྡོ་རྗེ་རྩེ་ལྔ་པ་ལྟེ་བར། ཧཱུཾ་ༀ་སྭཱ་ཨཱཾ་ཧཱས་མཚན་པའི་བུ་ག་ཕཊ་ཀྱིས་བཀག་པ། ཡུམ་རྣམས་ཀྱི་མཁའ་ཨཱཿལས་པདྨ་འདབ་མ་བརྒྱད་པ་ཟེའུ་འབྲུར། མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་ལ། ཧཱུཾ་ཡིག་གླུར་ལེན་བཞིན་དུ་བསྐྱོད་པས་བྱང་ཆུབ་ཀྱི་སེམས་པདྨའི་དབུས་སུ་བབས་པ་དེ་ཉིད། བོ་དྷི་ཙིཏྟ་སྥ་ར་ཎ་ཕཊ་ཀྱིས་བྱང་ཆུབ་སེམས་ཀྱི་རྡུལ་ཕྲ་རབ་མཁའ་ཁྱབ་ཏུ་སྤྲོས་པས་དེ་བཞིན་གཤེགས་པ་ཐམས་ཅད་མཉེས་པར་བྱས་ཤིང་། སེམས་ཅན་ཐམས་ཅད་བདེ་བ་ཆེན་པོས་ཚིམ་པར་བསམ། སཾ་ཧ་ར་ཎ་ཧཱུཾ། བྱང་ཆུབ་སེམས་ཀྱི་འོད་ཟེར་བདེ་བ་ཆེན་པོའི་རོ་དང་ལྷན་ཅིག་པས་འདུས་ནས་སེམས་ལྔའི་མཐའི་བདེ་བ་ཆེན་པོའི་ཡེ་ཤེས་མཆོག་ཏུ་རྒྱས་པ་ལ་བློ་བཞག་སྟེ། ༀ་ཧཱུཾ། འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུཾ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་། དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ༀ། དབང་པོའི་སྤྱོད་ཡུལ་རང་བཞིན་དངོས་པོ་མེད། །རྣམ་དག་བདུད་རྩིའི་རང་བཞིན་དུག་ལྔ་སེལ། །དམ་རྫས་དག་པ་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་རང་བཞིན་དབྱེར་མེད་མཉམ། །དེ་ཕྱིར་དག་པས་དག་པ་ཉིད་མཆོད་ཕྱིར། །ཆོས་ཉིད་ལ་ནི་ཆོས་ཉིད་ཐིམ་པར་དབུལ། །དྲི་མེད་རྣམ་དག་ནམ་མཁའི་རང་བཞིན་ལ། །ལོག་རྟོག་མཚན་མ་མང་པོའི་སྤྲིན་དཔུང་སྟེ། །ཡེ་ཤེས་ཉི་མའི་འོད་ཀྱིས་རབ་བརྒྱན་ནས། །དག་པའི་དོན་ཕྱིར་རྟོགས་ནས་མཆོད་པར་འབུལ། །མཉམ་ཉིད་བླང་དོར་མེད་ལ་སྙོམས་པར་འཇུག་པ་དང་། །བདེ་ཆེན་ལོངས་སྤྱོད་རྫོགས་པ་སྐུ་ཡི་རྒྱན། །འདོད་ཡོན་ལྔ་ཡི་ལྷ་མོར་བྱིན་བརླབས་པ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཞེས་པས་མཆོད་པའི་རོལ་མོ་ཇི་སྙེད་པ་ཐམས་ཅད་ཀྱིས་འཁོར་གསུམ་ཡེ་ཤེས་སུ་དག་པ་མངོན་དུ་བྱས་ནས། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྭ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་མཆོད་པའི་ང་རྒྱལ་བྱ་ཞིང་རོལ་མོ་ཡེ་ཤེས་ཀྱི་སྒྲས་བསྐུལ་ལོ། །བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ༀ། ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། །ཧོཿ ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ། །ཧོཿ ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ། །ཧོཿ ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ། །ཧོཿ ༀ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཧོཿ ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་ཆོས་ཉིད་ཀྱི་རང་སྒྲས་བསྟོད་པར་བྱའོ། །གསུམ་པ་བཤགས་པ་བྱ་བ་ནི། ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རིགས་ལྔའི་བདེ་བར་གཤེག་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག་ཐམས་ལ་མཁས་པའི་བདག་ཉིད། སྒྲོལ་བའི་མཁའ་འགྲོ། རང་བཞིན་གྱི་རྣལ་འབྱོར་ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས། དང་པོར་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མ་ནོར་མནོས་པ་ལས་རྩ་བ་དང་ཡན་ལག་གི་དམ་ཚིག་ཉམས་ཆག་དང་འགལ་འཁྲུལ་དུ་གྱུར་པ། ལྷ་ཉེ་བར་མ་བསྒོམས་པ། སྙིང་པོ་དག་པར་མ་བགྲངས་པ། སྦྱོར་བ་མང་པོའི་བར་བསྐུམས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླ་ལས་འདས་པ། དམ་རྫས་ལག་ལེན་རྔོ་མ་ཐོག་པ། ཛཔ྄་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ། དེ་བཞིན་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། སེམས་ཅན་གྱི་སྤྱོད་པ་རང་ཐད་དུ་གྱུར་པ་དང་། ཁྱད་པར་དུ་སྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་གཉན་པོ་མངོན་པར་མནོས་པ་ལས། ཉམས་ཤིང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས། ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། ཞེས་པས་རྒྱུད་དག་པར་བྱེད་པ་འགྱོད་ཚངས་བཤགས་པའི་རིམ་པའོ། །བཞི་པ་དངོས་གྲུབ་གསོལ་བ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་བ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། རྣམ་འབྱོར་པ་ལ་བར་དུ་གཅོད་པར་བྱེད་པ། སྡང་བའི་དགྲ། གནོད་པའི་བགེགས། གདུག་པའི་དབལ། སྦྱོར་བའི་དུག །རྣོ་བའི་མཚོན། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། སོ་སོའི་རྨི་ལམ་ངན་པ་དང་། ལྟས་ངན་པ། མི་ཤིས་པའི་རྐྱེན་དེ་དག་ཐམས་ཅད་ཕྱིར་བཟློག་ཅིང་མིང་ཙམ་ཡང་མི་གྲགས་པར་ཞི་བ་ཆེན་པོ་མཛད་དུ་གསོལ། གལ་ཏེ་ཞི་བས་བསྒྱུར་དུ་མི་བཏུབ་པ་ཞིག་མཆིས་ནའང་། དྲག་པོའི་ཕྲིན་ལས་ཀྱིས་དབང་དུ་བསྡུ་བ་དང་། གཟིར་ཞིང་མནན་པ་དང་། བསྒྲལ་ཞིང་སྤར་བ་ལ་སོགས་ཏེ། ཕྲིན་ལས་དྲག་ཐབས་རྣམ་པ་བཞིས་ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཞེས་འདོད་པའི་དོན་གསོལ་ལོ། །ལྔ་པ་དམ་བཅའ་བ་ནི། ལྷག་པའི་བསམ་པ་རྩེ་གཅིག་པས། ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །དྲུག་པ་ཛཔ྄ ལ། དེ་ཉིད་བརྗོད་པ། ཛཔ྄་ཁང་དབྱེ་བ། ཛཔ྄་དངོས། སྐབས་ཀྱི་མཇུག་བསྡུ་བ་དང་བཞི་ལས། དང་པོ་ནི། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་ངེས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་དེ་ཁོ་ན་ཉིད་ཀྱི་དོན་དྲན་པས་ངེས་ཤེས་བསྐྱེད་དོ། །གཉིས་པ་ནི། དབྱེ་གཞིའི་དཀྱིལ་འཁོར་ལེགས་པར་གསལ་བཏབ་ནས། བྷྲཱུྃ་བི་ཤྭ་བི་ཤུདྡྷེ་ཕཊ་ཛཿ ཧཱུཾ་ༀ་སྭཱ་ཨཱཾ་ཧཱ་ཕཊ་ཛཿ ཞེས་བརྗོད་པས། དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས། མདུན་གྱི་ནམ་མཁར་མེ་རི་འདབ་འབྱར་གྱི་ཚུལ་དུ་བཞུགས་པར་མོས་པའོ། །གསུམ་པ་ནི། བདག་མདུན་གྱི་ལྷ་རྣམས་ཀྱི་ཡེ་ཤེས་སེམས་དཔའ་སོ་སོའི་ཐུགས་ཀར་རང་རང་གི་ཕྱག་མཚན་གྱི་ལྟེ་བར་དྭངས་མའི་སྲོག་ཧཱུཾ་ཡིག་ལ་སོགས་པའི་མཐར་བཟླ་བྱའི་སྔགས་ཀྱི་ཕྲེང་བས་བསྐོར་བར་གསལ་བཏབ་ལ། སྔགས་ཟློས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་ལ། དམ་ཡེ་འཕྲོ་འདུ་སྟེ་གསལ་བ་གསུམ་དང་ལྡན་པའི་དང་ནས། བཟླ་བྱའི་སྔགས་ནི། ཧཱུྃ་བཛྲ་དྷྲིཀ྄ །མཱུཾ་དྷཱ་ཏྭེ་ཤྭ་རཱི། ༀ་ཛི་ན་ཛིཀ྄ །ལཾ་དེ་ཥ་ར་ཏི། སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི། ཧཱཾ་པྲ་ཛྙཱ་དྷྲིཀ྄ །ཏཱཾ་བ ཛྲ་ར་ཏི། ཀྵཱིཾ་ཧི་རཱ་ཛ་ཡ། ཧཱུཾ་ལ་སྱ་ས་མ་ཡ་སྟྭཾ། ཏྲཾ་ཨཱ་གརྦྷ་ཡ། ཏྲཾ་མཱ་ལེ་ས་མ་ཡ་ཧོཿ ཧྲཱིཾ་ཧཱ་ཧཱུཾ་པདྨ་པྲ་ད་མ། ཧྲཱིཾ་གཱི་ཏི་རཱ་གོ་ཧཾ། ཛྲིཾ་ཀུ་རུ་པཱ་ཎ། ཨ་ནིརྟི་རཱ་ག་ཡ་མྱེ། མཻ་དྷཱ་ར་ཎ་སྭཱ་ཧཱ། ཛཿདྷཱུ་པེ་པྲ་ཝེ་ཤ །ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་པུཥྤེ་ཨཱ་བེ་ཤ །ཧཱུཾ་སྭ་རཱ་ཛ་ཡ་སྭཱ་ཧཱ། བཾ་དཱི་པ་སུ་གི་རཱི། མཱུཾ་ཤྲཱི་ཨཾ་རཱ་ག་ཡ་སྭཱ་ཧཱ། ཧོཿགནྡྷེ་ཙིཏྟ། ཧཱུཾ་ཡ་མཱནྟ་ཀྲྀ ཏ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུཾ་ཕཊ། ཧཱུཾ་པྲ་ཛྙཱནྟ་ཀྲྀཏ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་སོགས། ཧཱུཾ་པདྨནྟ་ཀྲྀ་ཕཊ། ༀ་མ་ཧཱ་པདྨ་དྷ་རོ་མ་ཧཱ་སོགས། ཧཱུཾ་བིགྷྣཱནྟ་ཀྲྀཏ་ཕཊ། ༀ་མ་ཧཱ་ཀ རྨ་དྷ་རོ་མ་ཧཱ་སོགས། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། ཞེས་པ་རྣམས་རིམ་པ་བཞིན་བརྒྱ་དང་ཉེར་གཅིག་སོགས་གཙོ་འཁོར་གྱི་འགྲོས་དང་སྦྱར་ནས་བཟླས་ཞིང་། སྤྲོས་པ་ལ་དགའ་བས། རྣམ་ཤེས་ནམ་མཁའ་མ་སོགས་ཀྱི་ཛཔ྄་བསྐུལ་ཡང་བྱ་བར་བཤད་དོ། །དེ་ཡང་ངེས་རྫོགས་ལས། རྟགས་དང་དུས་དང་གྲངས་ཀྱི་དབྱེ་བས་རབ་འབྲིང་ཐ་མའི་ཚད་རྫོགས་ཀྱི་བར་དུ་བྱ་བར་གསུངས་ཀྱང་། མོས་སྒོམ་ཉིད་ཆོག་སོགས་ལ་ཅི་ནུས་ཙམ་བཟླ་བ་ཡིན་ནོ། །གཞན་དུ་མཁའ་ཁྱབ་ཀྱི་སྤྲོ་བསྡུའི་བཟླས་པ་ཉིད་མཆོག་ཏུ་བཤད་པ་ཡོད་ཀྱང་དོན་གྱི་གནད་གཅིག་གོ། །བཞི་པ་སྐབས་ཀྱི་མཇུག་བསྡུ་བ་ལ། བསྟོད་པ། བཤགས་པ། ཡེ་ཤེས་པ་བསྡུ་བ་དང་གསུམ། དང་པོ་ནི། གཞི་བསྟོད་བྱ་བར་གསུངས་པ་ལྟར། ཧཱུཾ། རྣམ་ཤེས་རྣམ་དག་བཅོམ་ལྡན་རྡོ་རྗེ་སེམས། །ཞེ་སྡང་རྣམ་དག་ཆོས་དབྱིངས་ཡེ་ཤེས་ངང་། །མཐིང་ག་ཕྱག་ན་རྡོ་རྗེ་བར་བ་བསྣམས། །ཐུགས་མཆོག་རྡོ་རྗེ་སེམས་ལ་ཕྱག་འཚལ་བསྟོད། །གཟུགས་ཕུང་རྣམ་དག་བཅོམ་ལྡན་རྣམ་སྣང་མཛད། །གཏི་མུག་རྣམ་དག་མེ་ལོང་ཡེ་ཤེས་ངང་། །དུང་མདོག་ཕྱག་ན་འཁོར་ལོ་འབར་བ་བསྣམས། །སྐུ་མཆོག་རྣམ་སྣང་མཛད་ལ་ཕྱག་འཚལ་བསྟོད། །ཚོར་བ་རྣམ་དག་བཅོམ་ལྡན་རིན་ཆེན་འབྱུང་། །ང་རྒྱལ་རྣམ་དག་མཉམ་ཉིད་ཡེ་ཤེས་ངང་། །གསེར་མདོག་ཕྱག་ན་རིན་ཆེན་འབར་བ་བསྣམས། །ཡོན་ཏན་རིན་ཆེན་འབྱུང་ལ་ཕྱག་འཚལ་བསྟོད། །འདུ་ཤེས་རྣམ་དག་བཅོམ་ལྡན་སྣང་མཐའ་ཡས། །འདོད་ཆགས་རྣམ་དག་ཀུན་རྟོག་ཡེ་ཤེས་ངང་། །ལེ་བརྒན་ཕྱག་ན་པདྨ་འབར་བ་བསྣམས། །གསུང་མཆོག་སྣང་མཐའ་ཡས་ལ་ཕྱག་འཚལ་བསྟོད། །འདུ་བྱེད་རྣམ་དག་བཅོམ་ལྡན་དོན་ཡོད་གྲུབ། །ཕྲག་དོག་རྣམ་དག་བྱ་གྲུབ་ཡེ་ཤེས་ངང་། །ལྗང་གུ་ཕྱག་ན་རལ་གྲི་འབར་བ་བསྣམས། །ཕྲིན་ལས་དོན་ཡོད་གྲུབ་ལ་ཕྱག་འཚལ་བསྟོད། །འབྱུང་བ་རྣམ་དག་རིགས་ཀྱི་ཡུམ་ཆེན་ལྔ། །ཀུན་བཟང་སྤྱན་མ་མཱ་མ་གོས་དཀར་སྒྲོལ། །ཐབས་ཀྱི་སྐུ་ལ་ཤེས་རབ་དགྱེས་འཁྲིལ་མ། །རིགས་ཀྱི་ཡུམ་ཆེན་ལྔ་ལ་ཕྱག་འཚལ་བསྟོད། །བསྐལ་བཟང་བྱང་ཆུབ་སེམས་དཔའ་བརྒྱད་རྣམས་ནི། །བདེ་བར་གཤེགས་པ་ཀུན་གྱི་སྲས་མཆོག་སྟེ། །ཡོན་ཏན་མི་ཟད་སྤྲུལ་པ་བསམ་ཡས་པའི། །སེམས་དཔའ་ཆེན་པོ་བརྒྱད་ལ་ཕྱག་འཚལ་བསྟོད། །སྒེག་མོ་ཕྲེང་ཐོགས་རིན་ཆེན་གླུ་གར་ཅན། །བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་བརྒྱད་ལ་ཕྱག་འཚལ་བསྟོད། །ཡེ་ཤེས་སྒོ་བ་ཆེན་པོ་ཡབ་ཡུམ་བརྒྱད། །གཤིན་རྗེ་སྟོབས་ཆེན་རྟ་མགྲིན་བདུད་རྩི་འཁྱིལ། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །སྒོ་བ་ཡབ་ཡུམ་བརྒྱད་ལ་ཕྱག་འཚལ་བསྟོད། །ཆོས་ཉིད་སྟོང་པའི་ངང་ལས་མ་གཡོས་ཀྱང་། །ཆོས་ཉིད་ཀུན་ཏུ་བཟང་པོ་འདུ་བྲལ་མེད། །ཆོས་ཉིད་ཁྱབ་བརྡལ་ཆེན་པོའི་ཡེ་ཤེས་ཀྱིས། །ཀུན་བཟང་ཡབ་ཡུམ་གཉིས་ལ་ཕྱག་འཚལ་བསྟོད། །ཡེ་ཤེས་བཞི་ལས་རིགས་བཞིའི་ཕྲིན་ལས་ཀྱིས། །འཇིག་རྟེན་དྲུག་གི་བྱེ་བ་ཕྲག་བརྒྱ་རུ། །སྤྲུལ་པ་བྱེ་བ་ཕྲག་བརྒྱས་འགྲོ་དྲུག་གི། །དོན་མཛད་ཐུབ་པ་དྲུག་ལ་ཕྱག་འཚལ་བསྟོད། །རྒྱལ་བ་སངས་རྒྱས་བཞི་བཅུ་རྩ་གཉིས་ཀྱི། །ཆེ་བའི་ཡོན་ཏན་བརྗོད་ཀྱི་མི་ལང་ཡང་། །ཡོན་ཏན་ཆ་ཤས་བརྗོད་པའི་བྱིན་རླབས་ཀྱི། །རིག་འཛིན་སྔགས་འཆང་རྣལ་འབྱོར་བདག་ཅག་གི། །ལས་དང་ཉོན་མོངས་བག་ཆགས་གཏན་སྦྱངས་ནས། །ཚེ་འདི་ཉིད་ལ་རིག་འཛིན་ས་ཐོབ་སྟེ། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །ཅེས་བསྟོད། གཉིས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་མནོས་ཏེ། །བདག་ཅག་མ་རིག་ལུས་དང་ད ག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བཟླས་པའི་ཉེས་བྱས་སུ་གྱུར་པ་ཐམས་ཅད་བཤགས་ཤིང་དག་པར་བྱའོ། །གསུམ་པ་ནི། རང་བཞིན་དང་ཏིང་ངེ་འཛིན་གྱི་དཀྱིལ་འཁོར་གཉིས་རང་བཞིན་དབྱེར་མེད་དུ་རྟོགས་པའི་ཕྱིར། ༀ་བཛྲ་ས་མ་ཡ་ༀ་སོགས་ལྔ་དང་། ༀ། ཡེ་ཤེས་རྒྱལ་པོ་སོགས་ཀྱིས་རིག་པའི་མེ་ཏོག་དོར་ཞིང་དངོས་གྲུབ་བསྐུལ་ནས། ༀ་བཛྲ་ས་མ་ཡ་ཧཱུྃ། ཞེས་བརྗོད་པས། ཡེ་ཤེས་ཀྱི་འཁོར་ལོ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་ཐིམ། ༀ་བཛྲ་ས་མ་ཡ་སྟྭཾ། ཞེས་བརྟན་པར་བྱས། ༀ་བཛྲ་ས་མ་ཡ་ཧོཿ ཞེས་དབང་དུ་གྱུར་ནས་དགྱེས་ཤིང་ཆགས་པར་བྱས། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་བརྟན་ཅིང་གསལ་བར་བྱས་ནས་ཡི་གེ་བརྒྱ་པའང་བཟླའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་མཆོད་ལ་ལྔ་ལས། དང་པོ་བཤམ་ཞིང་བྱིན་གྱིས་བརླབ་པ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་བ་བཤམས་ནས། བསང་ཆུ་གཏོར་ལ། ༀ་མ་ཧཱ་ཀྲོ་དྷེ་ཤྭ་རཱིས་བསང་། རཾ་ཡཾ་ཁཾ་གིས་བསྲེག་གཏོར་བཀྲུས་ཏེ་སྟོང་པར་སྦྱང་། མ་སཱུརྻ་མཎྜལ། ཞལ་ཟས་ཀྱི་སྣོད་དུ་ཉི་མ་ལ་ཧཱུཾ་ༀ་སྭཱ་ཨཱཾ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་པ་ནི། ༀ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །བཅོམ་ལྡན་རྡོ་རྗེ་སེམས་དཔའ་ཉིད། །རིགས་བཞིའི་ལྷ་དང་ལྷ་མོ་དང་། །འཁོར་གྱི་སེམས་དཔའ་སེམས་མ་དང་། །ཀུན་བཟང་སྤྲུལ་པའི་ཚོགས་ཆེན་དང་། །སྒོ་བ་བཞི་སོགས་གཤེགས་སུ་གསོལ། །ༀ་ཨེ་ཧྱེ་ཧི་སོགས་ཀྱིས་ཚོགས་ཞིང་དཔག་ཏུ་མེད་པ་མཁའ་ཁྱབ་ཏུ་སད་པར་བྱས་ལ། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །སོགས་དང་། ༀ་ཤྲཱི་བཛྲ་ཨཾངྐུ་ཤ་ཛཿ དེ་བཞིན་དུ། པཱ་ཤ་ཧཱུཾ། སྥོ་ཊ་བཾ། གྷཎྜེ་ཧོཿས་དགུག་གཞུག་བཅིང་མཉེས་བྱ། གསུམ་པ་མཆོད་པ་ལ་གཉིས་ཀྱི། དང་པོ་ཏིང་ངེ་འཛིན་གྱི་མཆོད་པ་ནི། ༀ་ཧཱུཾ། སྤོས་ཀྱི་སྤྲིན་ལྡིང་བདུག་པ་མོ། །སོགས་དང་། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། སོགས་བཞི་བསྣོལ་དང་། ཧཱུཾ། རྡོ་རྗེ་སྒེག་མོ་རྡོ་རྗེ་ཅན། །སེམས་དཔའ་སྔོན་པོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལས། །བཛྲ་ལཱ་སྱེའི་མཆོད་པ་རོལ། །ༀ་ཤྲཱི་བཛྲ་རཱ་ག་ལཱ་སྱེ་ཧཱུཾ། ཡིད་བཞིན་རིན་ཆེན་འོད་འབར་མ། །འཇམ་དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལས། །བཛྲ་མཱ་ལེའི་མཆོད་པ་རོལ། །མཱ་ལེ་ཏྲཱཾ། པདྨ་དབྱངས་མཁན་རྨ་བྱའི་མགྲིན། །སྤྱན་རས་གཟིགས་ཀྱི་དངོས་གྲུབ་འཛིན། །སོ་སོར་རྟོག་པའི་ཡེ་ཤེས་ལས། །བཛྲ་གཱིརྟཱིའི་མཆོད་པ་རོལ། །གཱི་ཏི་ཧྲཱིཿ གར་མཁན་འགྱིང་བག་གཟི་ལྡན་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན༴ བཛྲ་ནཱིརྟིའི༴ ནཱྀརྟི་ཨ། ཞེས་མཆོད་དོ། །གཉིས་པ་ཚོགས་རྫས་ཀྱི་མཆོད་པ་ནི། ཞལ་ཟས་ཀྱི་ཕུད་རིམ་པར་སྤྲོས་ལ། ཧཱུཾ། ཐབས་དང་ཤེས་རབ་ལྡན་གྱུར་ཅིང་། །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ནས། །ཚོགས་ཆེན་གཉིས་ཀྱང་རྫོགས་པར་རོལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་དང་ལྷ་མོར་བརྟག །སྣ་ཚོགས་གཟུགས་ནི་ཐམས་ཅད་ཀུན། །སྣང་སྟོང་ངོ་བོ་ཉིད་ཀྱི་གཞི། །ཆོས་དབྱིངས་དག་པའི་ཡེ་ཤེས་ཏེ། །རྡོ་རྗེ་ལྷ་མོ་གཟུགས་མཛེས་མ། །འདོད་ཡོན་ཕྱག་ན་བསྣམས་ནས་ནི། །རྐང་པས་སྟབས་བྱེད་ལག་གར་བསྒྱུར། །སྙན་པའི་གླུ་དབྱངས་བླངས་ནས་ནི། །དཀྱིལ་འཁོར་ལྷ་ལ་མཆོད་པར་འབུལ། །ཐམས་ཅད་མ་ལུས་སྒྲ་རྣམས་ནི། །གྲགས་སྟོང་ངོ་བོ་ཉིད་ཀྱི་གཞི། །མེ་ལོང་ལྟ་བུའི་ཡེ་ཤེས་ཏེ། །རྡོ་རྗེ་ལྷ་མོ་འཇམ་པའི་སྒྲ །འདོད་ཡོན་ཕྱག་ན་སོགས། རྐང་པ་བཞི་གོང་བཞིན། བདེ་བ་ཚིམ་བྱེད་བསོད་ནམས་ཏེ། །ཚིམ་སྟོང་ངོ་བོ་ཉིད་ཀྱི་གཞི། །བརྗོད་མེད་མི་གནས་ཡེ་ཤེས་ཏེ། །རྡོ་རྗེ་ཆགས་མེད་པདྨའི་གསུང་། །འདོད་ཡོན་ཕྱག་ན་སོགས། བདེ་གཤེགས་དཀྱིལ་འཁོར་མ་ལུས་པ། །བདེ་བ་རོ་ཡིས་ཚིམ་བྱེད་པ། །རོ་སྟོང་ངོ་བོ་ཉིད་ཀྱི་གཞི། །སོ་སོར་རྟོག་པའི་ཡེ་ཤེས་ཏེ། །ཐམས་ཅད་ཚིམ་བྱེད་རོ་ཡི་ལྷ། །འདོད་ཡོན་སོགས། རྡོ་རྗེ་རེག་བྱ་མྱོང་བྱེད་མ། །དཀྱིལ་འཁོར་བསམ་ཡས་ལྷུན་གྱིས་གྲུབ། །བདེ་མཆོག་དཀྱིལ་འཁོར་ཡངས་བྱེད་མ། །བྱ་བ་གྲུབ་པའི་ཡེ་ཤེས་ཏེ། །རྡོ་རྗེ་རེག་བྱའི་ལྷ་མོ་ནི། །འདོད་ཡོན་སོགས། ཧོཿ བདེ་བར་གཤེགས་པའི་དཀྱིལ་འཁོར་གྱི་ལྷ་ཚོགས་རྣམས་ལ་ཚོགས་ཀྱི་མཆོད་པ་ཆེན་པོ་འབུལ་ཞིང་མཆིས་ན། སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་ནས། །དམ་ཚིག་ཉམས་ཆགས་ཐམས་ཅད་སྐོངས་ཏེ། བླ་ན་མེད་པའི་དངོས་གྲུབ་དམ་པ་ཐོབ་པར་མཛད་དུ་གསོལ། ཞེས་འདོད་ཡོན་ལྔ་དང་། སུ་ར་ཏོ་བཅུ་དྲུག་ལ་སོགས་པའི་གླུ་གར་དང་རོལ་མོ་སྣ་ཚོགས་པས་མཆོད་ནས། བཞི་པ་ཚོགས་ལ་རོལ་བ་ནི། ལས་ཀྱི་རྡོ་རྗེས་འཁོར་ལོ་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་དབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་མའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་སྟོབ། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་བླང་། དེ་ནས་གཞན་རྣམས་ལའང་རིམ་པར་སྟོབ། རྣལ་འབྱོར་པ་རྣམས་ལྷའི་ཏིང་ངེ་འཛིན་གསལ་བ་ལས། ཁྱད་པར་དཀྱིལ་འཁོར་གྱི་ལྷ་རྣམས་ཀྱང་རང་གི་ཕུང་པོ་དང་ཁམས་དང་སྐྱེ་མཆེད་ཉིད་ལས་མི་གཉིས་པར་ཤེས་པས་ནང་གི་སྲེག་བླུགས་ཀྱི་ཆོ་ག་ཇི་ལྟ་བའི་དམ་ཚིག་གིས་ཚིམ་པར་རོལ་ཞིང་ལོངས་སྤྱད་དོ། །དེའི་མཐར། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་ཛ་གད་དཔའ་བོ་གསོལ་བས་འགྲོ་བ་མ་ལུས་པ་དབང་དུ་འདུ་བར་གྱུར་ཅིག །མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོར་གྱུར་ཅིག །རྡོ་རྗེའི་ཚེ་གསོལ་བས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པར་གྱུར་ཅིག །ཞལ་ཟས་ཀྱི་བྱེ་བྲག་མང་པོ་གསོལ་བས་ཞི་ཁྲོའི་ཕྲིན་ལས་ཀྱི་རྫུ་འཕྲུལ་སྣ་ཚོགས་ལ་དབང་འབྱོར་བར་གྱུར་ཅིག །ཅེས་སྨོན་ལམ་གདབ་བོ། །ལྔ་པ་ལྷག་མའི་མཆོད་པ་ནི། ལྷག་མ་རྣམས་གསོག་འཇོག་མེད་པར་བསྡུས། ལྷ་མཆོད་པའི་ལྷག་མས་བསྣན་པ་དཀྱིལ་འཁོར་དང་ཧ་ཅང་མི་ཉེ་བའི་ཤར་ལྷོར་དྲིའི་མཎྜལ་ཟླུམ་པོར་བྱས་པའི་སྟེང་དུ་བཞག །རྩ་བའི་དཀྱིལ་འཁོར་གསལ་བ་ལས་ཁྱད་པར་ལྷག་མའི་གནས་སུ། བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་བྷྲཱུཾ། ལྷག་མའི་དཀྱིལ་འཁོར་མཚན་ཉིད་རྫོགས་པ་གདན་དང་བཅས་པའི་ནང་གི་དབུས་དང་ཕྱོགས་བཞིར། ཧཱུཾ་བཛྲ་དྷྲིཀ྄ །ༀ་ཛི་ན་ཛིཀ྄ །སྭཱཾ་རཏྣ་དྷྲིཀ྄ །ཨཱཾ་ཨཱ་རོ་ལིཀ྄ །ཧཱཾ་པྲ་ཛྙཱ་དྷྲིཀ྄ །རིགས་ཀྱི་ཡབ་ལྔ་སྐད་ཅིག་གིས་གསལ་བར་གྱུར། གཏོར་མ་དམ་ཚིག་གསང་བའི་ལོངས་སྤྱོད་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བསམ་ལ། ༀ་ཨཱཿཧཱུཾ་ལན་གསུམ་དུ་བརྗོད་པས་བྱིན་གྱིས་བརླབས་ཏེ། ཧཱུཾ། ལས་ཀྱི་རྡོ་རྗེ་བྱེད་པར་དབང་བསྐུར་བའི། །མཁའ་འགྲོ་ལྷག་སྡུག་མ་སྲིང་གིང་གི་ཚོགས། །ལྷག་མ་ཁ་ཆུའི་དམ་ལ་གཏོགས་པ་རྣམས། །དམ་ཚིག་བཞིན་དུ་མཆོད་ཀྱིས་གཤེགས་སུ་གསོལ། །ཧོཿ མཁའ་འགྲོ་མ་གསང་བའི་རྒྱུད་དུ་གཏོགས་པའི་མཁའ་འགྲོ་སུམ་ཅུ་རྩ་གཉིས་སྔོན་གྱི་ཐུགས་དམ་དུས་ལས་མི་འདའ་བར་སྒྲུབ་པའི་སྟོང་གྲོགས་ལ་གཤེགས་ཤིག །ཨེ་ཨཱ་ར་ལི་ཧྲཱིཾ་ཧྲཱིཾ་ཛཿཧཱུྃ་བྃ་ཧོཿ ཌཱ་ཀི་ནི་ཧཱུྃ་ཛཿ ཞེས་བརྗོད་ཅིང་ཧེ་རུ་ཀའི་དམ་རྒྱ་དཔྲལ་བར་བཅིངས་ནས་སྤྱུགས་པའི་བརྡ་དང་བཅས་པས་སྤྱན་དྲངས་པས་མཁའ་འགྲོ་མ་སོ་གཉིས་སྤྲིན་གཏིབས་པ་བཞིན་བྱོན་ཏེ། རིགས་ལྔའི་གཙོ་བོ་ལ་གཙོ་མོ་བདུན། དོན་གྲུབ་ལ་དྲུག །གཞན་གསུམ་ལ་ལྔ་ལྔ་འཁྲིལ་ཞིང་སྒོ་མ་བཞི་གཙོ་བའི་གདན་གྱི་ཚུལ་དུ་བཞུགས་པ་ལ། མེ་ཏོག་ལ་སོགས་པས་སྤྱིར་མཆོད་ནས། དམར་གྱི་རཀྟ་གཏོར་མ་ལ་སྦྲེང་ཞིང་། ཧེ་རུ་ཀའི་ཐོད་པའི་ཐལ་མོའི་རྒྱ་དང་བཅས་པས། ༀ་བཛྲ་ཌཱ་ཀི་ནཱི་པྲ་ཏཱིཙྪེ་མཾ་བ་ལིཾ་ཏ་ཧཱུྃ་ཕཊ། དེ་བཞིན་དུ། བུདྡྷ་ཌཱ་ཀི་ནཱི་སོགས་ནས། ༀ་ཕཊ། ༀ་རཏྣ་ཌཱ་ཀི་ནཱི༴ ཏྲཱྃ་ཕཊ། ༀ་པདྨ་ཌཱ་ཀི་ནཱི༴ ཧྲཱིཿ ཕཊ། ༀ་ཀརྨ་ཌཱ་ཀི་ནི༴ ཨཱཿཕཊ། ཅེས་པ་གཏོར་མ་ཕུལ་ལ། ཧཱུཾ། རྣམ་དག་ཆོས་དབྱིངས་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་འབྱུང་། །རང་རང་ལས་ཀྱིས་བསྐུལ་འགྱུར་བས། །སྤྲུལ་པ་བསམ་ཡས་མཁའ་ལ་འགྲོ། །འཇའ་ཚོན་མདོག་འཛིན་རིགས་ལ་སྤྲུལ། །མི་རོ་སྐམ་པོའི་གདན་སྟེང་ན། །ཐུགས་རྗེས་སྤྲུལ་པ་ཅིར་ཡང་སྟོན། །མཐིང་ག་མི་བསྐྱོད་ལ་སོགས་གཟུགས། །སུམ་ཅུ་རྩ་གཉིས་ཀུན་འཛིན་ཅིང་། །མི་ཐོད་ཁྲག་གིས་བཀང་བ་དང་། །ཁ་ཊྭཱཾ་ཏྲི་ཤུལ་གཤོལ་གྲི་བསྣམས། །རང་རང་ལག་ཆ་སྣ་ཚོགས་ལྡན། །དཔའ་བོའི་གཟུགས་ཅན་ཁ་མིག་བགྲད། །ཉི་ཟླའི་ཚུལ་དུ་མཁའ་ལ་འགྲོ། །ཟས་སུ་ཤ་དང་ཁྲག་དང་ནི། །ཁྲག་དང་ཚིལ་བུ་རྒྱུ་མ་ཟ། །ཡང་དག་ཉིད་དེ་འཇིག་རྟེན་ཉིད། །སྤྲུལ་པའི་ཚུལ་གྱིས་གཟུགས་ལས་སྤྲུལ། །མཁའ་འགྲོ་མ་མོ་ཁྱོད་རྣམས་ཀྱང་། །སྔོན་ཚེ་བཅོམ་ལྡན་རིགས་ལྔ་ལ། །ཡེ་ཤེས་དབྱིངས་ལ་ཆགས་ཚུལ་དུ། །འཁྲིལ་ཞིང་རིགས་ལྔའི་སླས་སུ་བྱས། །བསྟན་པ་བསྲུང་བར་མནའ་བོར་བའི། །ཁས་བླངས་འགལ་བར་མི་བྱའི་ཕྱིར། །རྣལ་འབྱོར་བཅོལ་བའི་ཕྲིན་ལས་མཛོད། །ཅེས་དང་། ཧཱུྃ། མཁའ་འགྲོ་གིང་དང་དབང་ཕྱུག་མ། །མ་བདུན་སྲིང་བཞི་འབར་མ་བརྒྱད། །ཕོ་ཉ་ལ་སོགས་ལྷག་སྡུད་ཚོགས། །དཔལ་གྱི་ཕམ་ཕབས་འདི་གསོལ་ལ། །བཅོལ་པའི་ཕྲིན་ལས་གྲུབ་པར་མཛོད། །ཅེས་བརྗོད་ཅིང་སྨན་དང་རཀྟས་ཀྱང་མཆོད་ནས། ཧོཿ ལྷག་སྡུད་ཀྱི་དམ་ཚིག་ལ་གཏོགས་པའི་མཁའ་འགྲོ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ལྷག་མའི་དམ་ཚིག་འདིས་ཚིམ་ཞིང་དགྱེས་པར་གྱུར་ཏེ། དམ་ཚིག་ཉམས་ཆག་ཐམས་ཅད་སྐོངས་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། །སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་གྲོགས་མཛོད་ཅིག །ཅེས་ཕྲིན་ལས་བཅོལ། ཡ་ཧི་གཙྪ་ཞེས་པས། མགྲོན་རྣམས་རང་གནས་སུ་གཤེགས་པར་བསམ་ལ། གཏོར་མ་ཕྱི་རོལ་དུ་བསྐྱལ། ཧཱུྃ་ཞེས་པས་ལྷག་མའི་དཀྱིལ་འཁོར་གྱི་རིགས་ལྔ་རང་ལ་བསྟིམ་ནས། མཎྜལ་ཀྱང་བསྡུའོ། །གཉིས་པ་བརྟན་མ་བསྐྱང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱི་བྲན་ལ། ཏྲཾ་སྥ༴ སཾ༴ ཏྲཾ་རཏྣ་ཏྲེ་ལོ་ཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབས། ཧཱུྃ། ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་སྤྱོན་དམ་སྐོངས་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་སྤྱོན་དམ་སྐོངས་ཕྲིན་ལས་མཛོད། །ཆེ་ཞེ་ཆེན་མོ་ཁྱོད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་སྒྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་པཉྩ་སོགས་ཀྱི་སྨན་རཀ་སྦྲེང་། ཕྲིན་ལས་བཅོལ་ནས། ཡ་ཧི་གཙྪས་གཤེགས་གསོལ་བྱས་ལ། གཏོར་མ་གཙང་སར་བསྐྱལ་ལོ། །གསུམ་པ་ཉེར་བསྡུ་བྱ་བ་ནི། ཐུན་མཚམས་ལ་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ་ཧཱུྃ་ༀ་སྭཱ་ཨཱཾ་ཧཱ། ཞེས་པས་དཀྱིལ་འཁོར་གསལ་བཏབ་ལ། བཛྲ་པདྨ་ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་ག་ཧཾ། ཨ་ནུ་རཱ་ག་ཡ་མྱེ། ཛཿཧཱུཾ་བཾ་ཧོཿ བོ་དྷི་ཙིཏྟ་སྥ་ར་ཎ་ཕཊ། ཞེས་བརྗོད་ཅིང་། ཡབ་ཡུམ་སྙོམས་པར་འཇུག་པའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་གྱི་སྤྲིན་འཕྲོས་པས་སྣོད་བཅུད་ཐམས་ཅད་དག་ཅིང་འོད་གསལ་བར་བྱས། སཾ་ཧ་ར་ཎ་ཧཱུྃ། ཞེས་བརྗོད་པས། དག་པའི་སྣོད་བཅུད་ཐམས་ཅད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ། ལྷ་ཡབ་ཐམས་ཅད་གཙོ་བོ་རྡོ་རྗེ་སེམས་དཔའ་ལ། ཡུམ་ཐམས་ཅད་དབྱིངས་ཕྱུག་མ་ལ། དེ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཧཱུྃ་ལ། ཧཱུྃ་གྱེན་རྫོགས་ནཱ་དའི་བར་དུ་ཐིམ་ནས་རྣམ་པར་རྟོག་མེད་ལྷུན་གྲུབ་ནམ་མཁའ་ལྟ་བུའི་ངང་ལ་མཉམ་པར་བཞག །ཉལ་བ་ལས་ལངས་པའམ་སྤྱོད་ལམ་ལ་འཇུག་པ་ན། ཧཱུྃ་བཛྲ་དྷྲིཀ྄ །ཅེས་བརྗོད་པས། རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། །བཞི་པ་གོ་ཆ་བགོ་ཞིང་ལུས་བསྲུང་བ་ནི། རང་ཉིད་རྡོར་སེམས་སུ་གསལ་བའི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་གྱུར། བཛྲ་ཀཱ་ཝ་ཙི་རཀྵ་ཧཾ། ཞེས་བརྗོད་པས། ལུས་ཐམས་ཅད་རྡོ་རྗེ་རྒྱ་གྲམ་གྱི་གོ་ཆས་ཞུ་ལུགས་སུ་གཡོགས་པས་སྒོ་གསུམ་རྡོ་རྗེ་གསུམ་དང་དབྱེར་མེད་དུ་བཅིངས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས་མཛུབ་མོ་གཡས་སུ་ཏྲཾ་ལས་ཁྲོ་བོ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཆེ་བ་དང་སྡིགས་མཛུབ། གཡོན་དུ་ༀ་ལས་ཁྲོ་བོ་མི་འཆི་ཐབ་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོ་གནས་ལྔ་རུ། ༀ་ཏྲུཾ། ཞེས་བརྗོད་བཞིན་པར་འཛུབ་མོ་གཉིས་བསྣོལ་ནས་རིམ་པར་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ནས་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེའི་ལུ་གུ་རྒྱུད་བྱུང་བས་བསྲུངས་ཤིང་བརྟན་པར་བྱས་ལ། ༀ་རཏྣ་མུ་ཀུ་ཊ་ཨ་བྷི་ཥིཉྩ་ཏྲཾ་ཏྲཾ། ཞེས་རིགས་ལྔའི་དབུ་རྒྱན་གྱིས་དབང་བསྐུར་བར་མོས། ༀ་རཏྣ་མཱ་ལེ་ཨ་བྷི་ཥིཉྩ་ཏྲཾ་ཏྲཾ། རིན་པོ་ཆེའི་ཕྲེང་བ་བཅིངས་པར་བསམ་མོ། །ༀ་ཨཱརྻ་ལམྦྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿ དར་མཐིང་དམར་གྱི་ཅོད་པན་གྱིས་བརྒྱན་པར་བསམ་མོ། །ༀ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་། ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་རྒྱས་པར་བྱའོ། །ལྔ་པ་སྤྱོད་ལམ་རྒྱུན་གྱི་རྣལ་འབྱོར་ནི། སྣོད་ཐམས་ཅད་གཞལ་ཡས་ཁང་དང་། བཅུད་ཐམས་ཅད་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རང་བཞིན་དུ་ཡོངས་སུ་ཤེས་པས་སྤྱོད་ལམ་བསྐྱང་། སྒོམ་པས་དུབ་ན། རང་གི་རྩ་དབུ་མའི་ནང་དུ་ཐིག་ལེ་ཡུངས་འབྲུ་ཙམ་པ་གསལ་ཞིང་འཚེར་བ་མེ་སྟག་ཕུས་བཏབ་པ་ལྟར་འདུག་པར་བསྒོམ། ཡང་ན་སྔར་བཤད་པའི་ཉེར་བསྡུའི་སྙིང་གའི་ཧཱུྃ་ཡིག་ནཱ་དའི་བར་དུ་བསྡུས་པ་དེ་ཉིད་ཐིག་ལེ་ཕྲ་མོ་གསལ་ཞིང་འབར་བར་གྱུར་པ་ལ་གཏད་དེ་བསྒོམ་མོ། །དེས་ནི་མི་རྟོག་པའི་ཡེ་ཤེས་རྒྱུད་ལ་སྐྱེ་བར་འགྱུར་རོ། །ཟས་ཀྱི་རྣལ་འབྱོར་ནི། བཟའ་བཏུང་ལ་ཐ་མལ་པའི་གཙང་ཞེན་སྤངས་ནས་སྦྱངས་རྟོགས་སྤར་བས་བདུད་རྩིར་བྱས་ལ། ལག་པའི་དགང་བླུགས་ཀྱིས། ཞལ་གྱི་ཧོམ་ཁུང་དུ་ཕུལ་བ་གཏུམ་མོའི་མེས་བཞུ་བའི་དྭངས་མའི་བདུད་རྩི་སྙིང་གར་ཡེ་ཤེས་སེམས་དཔའ་སྲེག་ལྷའི་ཚུལ་དུ་བཞུགས་པའི་ཞལ་དུ་དྲངས་པར་བསམ་ལ་རོལ་པ་ནི་ནང་གི་སྦྱིན་སྲེག་དང་། སྲེག་པའི་སྙིགས་མ་ཐལ་བར་གྱུར་པ་ཕྱིར་སྦྱངས་པར་བསམ་ལ་རླུང་རོ་བསལ་བས་ནད་དང་དུག་ལ་སོགས་པས་མི་ཚུགས་པར་བཤད་དོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་བསྒྲུབ་པ་དང་། དེས་གྲུབ་པའི་ཚད་བསྟན་པ་ལས། དང་པོ་ནི། དེ་ལྟར་བཤད་པའི་རིམ་པས་ཐུན་བཞི་ལ་སོགས་པས་ཐུན་གྱི་ངོ་བོ་དང་ཐུན་མཚམས་ཀྱི་རྣལ་འབྱོར་ཐམས་ཅད་ལ་ཆོས་ཐམས་ཅད་རང་བཞིན་མེད་པར་ཤེས་པའི་ལྟ་བ་དང་། རྩལ་སྣང་དག་པ་རབ་འབྱམས་སྒྱུ་མ་ལྟ་བུའི་ལམ་ཁྱེར་དང་མ་བྲལ་བ་ལ་བསླབ་པར་བྱའོ། །གཉིས་པ་ནི། ཚུལ་དེ་ལྟ་བུས་རིམ་པར་བསྒོམས་པས་རྫོགས་རིམ་གྱི་རྟོགས་པ་སྐྱེ་བར་འགྱུར་བའི་རྒྱུད་སྨིན་པར་འགྱུར་བ་དང་། དེ་ལས་རྫོགས་པའི་རིམ་པ་ལ་བྱང་ཆུབ་པར་འགྱུར་ཞིང་། དེ་ཡང་གཡོ་བ་དང་། ཐོབ་པ་དང་། གོམས་པ་དང་། བརྟན་པ་དང་། མཐར་ཕྱིན་པའི་ཉམས་དང་ལྔའི་གནས་སྐབས་རྣམས་སྨིག་སྒྱུ་ལ་སོགས་པའི་དཔེ་ལྔས་མཚོན་པར་གཏན་ལ་ཕེབས་ཤིང་། མཆོག་དང་ཐུན་མོང་གི་དངོས་གྲུབ་རྣམ་པ་གཉིས་པོ་དཀའ་བ་མེད་པར་མྱུར་དུ་འགྲུབ་པར་འགྱུར་བ་སྟེ། དང་པོ་ནི། ཇི་སྐད་དུ། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་དང་། གཉིས་པ་ནི། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྟུང་བར་འགྱུར། །དགུག་དང་བཏང་དང་བཅིང་དང་དགྲོལ། །གསོ་དང་གསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །ཞེས་ཇི་ལྟར་གསུངས་པ་བཞིན་འགྲུབ་པར་འགྱུར་རོ། །ཤིན་ཏུ་རྨད་བྱུང་གསང་བ་མཆོག་གི་གནས། །སྙིང་པོའི་མཐར་ཐུག་རྡོ་རྗེ་སེམས་དཔའ་ཆེ། །སྒྱུ་འཕྲུལ་དྲྭ་བ་ཟབ་དང་རྒྱ་ཆེའི་མཛོད། །རྡོ་རྗེ་འཛིན་དབང་ཀུན་གྱི་འཇུག་ངོགས་ཡིན། །དེ་ཡི་དཀྱིལ་འཁོར་བདེ་ཆེན་མཆོག་གི་གཞིར། །མྱུར་བདེར་བགྲོད་བྱེད་རྣལ་འབྱོར་བསྐྱེད་པའི་རིམ། །རབ་གསལ་སྒྲུབ་པའི་ཐབས་ཚུལ་བླ་ན་མེད། །ཡེ་ཤེས་ཆར་དུ་འབེབས་པའི་དངོས་གྲུབ་དཔྱིད། །འདི་ལས་སྐྱེ་འཆི་བར་དོའི་འཁྲུལ་འཁོར་དུ། །རྟག་ཏུ་མནར་ཞིང་ཐབས་བྲལ་མ་གྱུར་འགྲོ། །ཐབས་མཆོག་སྐུ་གསུམ་ལམ་གྱི་དེ་ཉིད་དོན། །ཇི་བཞིན་འཆར་བར་བྱེད་པའི་རྒྱུར་གྱུར་ཅིག །བདག་བློ་དམན་ཅིང་གཞུང་དོན་རྟོགས་དཀའ་བས། །ནོངས་པར་གྱུར་གང་རྡོ་རྗེ་ཅན་ལ་བཤགས། །དགེ་བ་འདི་དང་དུས་གསུམ་བསགས་ཡོད་ཀུན། །གསང་ཆེན་བསྟན་པ་རྒྱས་པའི་རྒྱུར་གྱུར་ཅིག །དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་བཞི་བཅུ་རྩ་གཉིས་ཀྱི་སྒྲུབ་ཐབས་ཡེ་ཤེས་ཆར་འབེབས་ཞེས་བྱ་བ་འདི་ནི། དོན་གཉེར་ཅན་དུ་མས་ཡང་དང་ཡང་དུ་བསྐུལ་བ་དང་། རང་གཞན་མང་པོ་ལ་ཕན་པའི་ཆེད་དུ་སྒྱུ་འཕྲུལ་རྩ་བཤད་ཀྱི་རྒྱུད་དང་རྒྱ་གཞུང་རྣམས་དང་། དཔལ་ལྡན་ཟུར་པའི་བཤད་སྒྲུབ་ཀྱི་ཕྱག་བཞེས་ཇི་ལྟ་བ་བཞིན་དུ་གསང་བདག་ཆེན་པོ་ཕྲིན་ལས་ལྷུན་གྲུབ་ཀྱི་བཀའ་དྲིན་གྱིས་འཚོ་བའི་རིག་པ་འཛིན་པ་འགྱུར་མེད་རྡོ་རྗེས་རབ་མྱོས་ཀྱི་ལོ་ཁྲུམས་ཀྱི་ཉ་བའི་ཡར་ཚེས་དགེ་བ་ལ་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོའི་བླ་བྲང་ཆོས་འཁོར་ལྷུན་པོར་སྦྱར་བའི་ཡི་གེ་པ་ནི་མཁས་བཙུན་བཟང་པོའི་ཡོན་ཏན་ཐམས་ཅད་ཀྱིས་མངོན་པར་མཐོ་བའི་མཁན་ཆེན་ལོ་ཙཱ་བ་དྷརྨ་ཤྲཱིས་བགྱིས་པའོ། །འདིས་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། །། ༈ སྒྱུ་འཕྲུལ་དྲྭ་བ་ཞི་བའི་སྒྲུབ་པའི་ཐབས། །ངོ་མཚར་ཆ་ཤས་གང་བའི་རི་བོང་ཅན། །གྲངས་མེད་ཆུ་སྣོད་དུ་མར་གསལ་འཆར་བ། སྨིན་གྲོལ་ཀུན་གསལ་སྒེག་མོའི་མཁའ་ལས་སོ། །བཀྲ་ཤིས།།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས་ལས་བསྙེན་པའི་ལས་བྱང་ཉུང་ངུར་དྲིལ་བ། པདྨ་བཛྲ།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས་ལས་བསྙེན་པའི་ལས་བྱང་ཉུང་ངུར་དྲིལ་བ་བཞུགས་སོ། །ༀ་སྭ་སྟི། མཆོག་ཏུ་མི་འགྱུར་བདེ་ཆེན་རྡོ་རྗེའི་བདག །མཁའ་ལྟར་ཀུན་ཁྱབ་དཀྱིལ་འཁོར་རྒྱ་མཚོའི་གཙོ། །རིགས་ཀྱི་བདག་པོ་རིག་པའི་རྡོ་རྗེ་ལ། །རྣམ་ཀུན་འདུ་འབྲལ་མེད་པའི་ཕྱག་གིས་འདུད། །གསང་ཆེན་རྒྱུད་སྡེའི་ཡང་ཞུན་སྙིང་པོའི་བཅུད། །ཚེ་གཅིག་སངས་རྒྱས་སྒྲུབ་པའི་གསང་ལམ་ཆེ། །དཔལ་ལྡན་སྒྱུ་འཕྲུལ་དྲྭ་བའི་བསྙེན་པ་ལ ། །འཇུག་པའི་ལས་བྱང་སྙིང་པོར་དྲིལ་ཏེ་བརྗོད། །དེ་ལ་འདིར་སློབ་དཔོན་གྱིས་སྔོན་དུ་བྱ་བའི་བསྙེན་པ་སོགས་ལ་ཉེ་བར་མཁོ་བའི་ལས་བྱང་གནས་སྐབས་སུ་ཁྱེར་བདེ་བ་ཞིག་འབྲིང་པོ་ལས་ཅུང་ཟད་བསྡུས་ཏེ་གཏེར་ཆེན་ཆོས་ཀྱི་རྒྱལ་པོའི་གསུང་སོར་བཞག་སྟེ་བྲི་བ་ལ། ཐོག་མར་སྒྱུ་འཕྲུལ་དྲྭ་བའི་དཀྱིལ་འཁོར་དུ་དབང་གིས་སྨིན་ཅིང་དམ་ཚིག་དང་སྡོམ་པ་ལ་གནས་པས་རྒྱུད་དག་པའི་གང་ཟག་རང་གཞན་གྱི་དོན་གཉིས་སྒྲུབ་པའི་ཕྱིར་མཆོག་ཐུན་གྱི་དངོས་གྲུབ་དོན་དུ་གཉེར་བ་དག་གི་བསམ་གཏན་དང་རྗེས་སུ་མཐུན་པའི་གནས་སུ་ཡོ་བྱད་རྣམས་ཚོགས་པར་བྱས་ཏེ། རྟེན་མཆོད་ཚུལ་བཞིན་བཤམས་པའི་མདུན་དུ་སྟན་བདེ་བ་ལ་འཁོད་ནས་ཇི་ལྟར་སྒྱུབ་པའི་རིམ་པ་དངོས་ལ་གསུམ་སྟེ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དང་པོ་ལ་དྲུག་ལས། ཐོག་མར་རྒྱུད་སྦྱང་བ་ནི། རང་གི་སྙིང་གའི་ཧཱུྃ་གི་འོད་ཟེར་གྱིས་རང་བཞིན་གྱི་གནས་ནས། བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཞིང་། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་ལ་སོགས་པར་བརྗོད་ལ། ཚོགས་ཞིང་རྣམས་རང་ལ་བསྡུས་ཏེ་ཀ་དག་གཉིས་སུ་མེད་པའི་ཀློང་དུ་རང་བབས་སུ་མཉམ་པར་བཞག་གོ། །གཉིས་པ་མཚམས་བཅད་པ་ནི། ཧཱུྃ་ཞེས་བརྗོད་པས། འདི་ལྟར་གཟུང་བ་དང་འཛིན་པའི་ཆོས་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུའི་ངང་ལ་མཉམ་པར་བཞག །སྟོང་ཉིད་དེའི་ངང་ལས། ཧཱུྃ་བཛྲ་དྷྲིཀ྄་ཞེས་བརྗོད་པས། རང་ཉིད་སྐད་ཅིག་གིས་རྡོ་རྗེ་སེམས་དཔའ་མཐིང་ག་རྡོ་རྗེ་དང་དྲིལ་བུ་འཛིན་པའི་སྐུར་བསྒོམ་མོ། །རྡོ་རྗེ་གསོར་བའི་ཕྱག་རྒྱ་བཅས་ཏེ། ཧཱུྃ། ལུས་ངག་ཡིད་གསུམ་རྡོ་རྗེ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །རྡོ་རྗེ་སེམས་དཔའ་དཔའ་བོ་ཡིན། །རྡོ་རྗེ་སེམས་དཔའ་ང་གནས་པས། །ཡེ་ཤེས་རྡོ་རྗེ་གསོར་ཞིང་སྤྲོ། །ཧཱུྃ་བཛྲ་ཛྭ་ལཱ་ན་ལཱརྐ་ཧཱུྃ་ཕཊ། ཅེས་བརྗོད། དེ་ནས་ཡིད་ཀྱིས་སྐུ་མདོག་དང་ཕྱག་མཚན་རིམ་བཞིན་བསྒྱུར་ཏེ་སོ་སོའི་རྒྱ་དང་བཅས། ༀ་ཙཀྲ་ཛྭ་ལཱ་ན་ལཱརྐ་ཧཱུྃ་ཕཊ། སྭཱཾ་རཏྣ་ཛྭ་ལཱ་ན༴ ཨཱཾ་པདྨ་ཛྭ་ལཱ་ན༴ ཧཱཾ་ཁཏྒ་ཛྭ་ལཱ་ན་ལཱརྐ་ཧཱུྃ་ཕཊ། ཅེས་བརྗོད་པས། རིགས་ལྔའི་ཕྱག་རྒྱ་ལས་ཕྱག་མཚན་ཕྲ་མོ་གྲངས་མེད་པ་སྤྲོས་ཏེ་བདུད་བགེགས་ལོག་པར་འདྲེན་པ་ཐམས་ཅད་ཚར་བཅད། ཚུར་འདུས་པ་ལ་ཕྱོགས་མཚམས་ཐམས་ཅད་ཕྱག་རྒྱ་རྣམ་པ་ལྔའི་གུར་ཁང་ཡེ་ཤེས་ཀྱི་མེ་ཁ་དོག་ལྔར་འབར་ཞིང་འཕྲོ་བ་དང་བཅས་པས་ཕྱོགས་ཐམས་ཅད་ཡོངས་སུ་ཁྱབ་ཅིང་ཅིས་ཀྱང་མི་ཤིགས་པར་བསམ་མོ། །ཨེ་མའོ། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་ཆེ་མཆོག་གིས། །ཉིད་ཀྱིས་མཚན་དུ་གསོལ་བ་ནི། །ཅིས་ཀྱང་མི་ཕྱེད་མི་ཤིགས་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པའོ། །གསུམ་པ་བཤགས་པ་ནི། བཛྲ་ས་མཱ་ཛཿས། བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མ་མེད་པ་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབ་ཀྱང་མི་བགྱིད། སྔར་བྱས་ཀྱི་གཉེན་པོར་རྣལ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། སྤྲོ་ན། ཡེ་ཤེས་སྐུ་མཆོག་མའམ། བསྡུ་ན། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བརྗོད་པས་སྡིག་སྒྲིབ་ཐམས་ཅད་དག་པར་མོས་ནས་མཉམ་ཉིད་ཀྱི་དོན་ལ་བློ་བཞག་གོ། །བཞི་པ་དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་བཅིངས་ཏེ་ལྷག་བསམ་རྩེ་གཅིག་པས། རྒྱས་པར་དམ་བཅའ་ཉི་ཤུ་པའམ། བསྡུ་ན། ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །ཞེས་བྱས་པས་ཀྱང་ཆོག་གོ། །ལྔ་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ༀ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའ ི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦྱར་ཞིང་། ཧཱུྃ་ཧཱུྃ་ཧཱུྃ་ཧཱུྃ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ་མོ། །དྲུག་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་རྡོར་སེམས་སུ་གསལ་བའི་ཐུགས་ཀའི་ཧཱུྃ་ལས་ཨ་དྷཱུ་པུ་ཨཱ་གན་རྣམས་འཕྲོས། སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ན་ཧཱུྃ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ན་མཿ ས་མནྟ་བུདྡྷཱ་ནཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ། མཆོད་པའི་ལྷ་མོ་ཁྲུས་གཞོང་དང་། སྤོས་ཁང་མནྡྷ་རའི་མེ་ཏོག་ལ་སོགས་པ་ཐོགས་པ་ནམ་མཁའ་གང་བ་རྣམས་སུ་གྱུར་པར་བསམ་པས་བྱིན་གྱིས་བརླབ་བོ། །ནང་མཆོད་བདུད་རྩི་བསང་སྦྱང་རྒྱས་པར་གཞུང་བཞིན་དང་། བསྡུ་ན། རཾ་ཡཾ་ཁཾ། སྟོང་པའི་ངང་ལས་བདུད་རྩིའི་སྣོད་དུ་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་གྱི་ས་བོན་གྱིས་མཚན་པ་རྣམས་འོད་དུ་ཞུ་ནས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་གྱི་སྐུར་གྱུར་ཏེ་དེ་རྣམས་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་འཁྱིལ་བ་ལ། ༀ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བ་དང་རྭ་རྣམས་སུ་རྟ་མགྲིན་ཡུམ་བཞི་དང་བཅས་པ་གསལ་བར་གྱུར། ༀ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་ཐམས་ཅད་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་མོ། །གཡོན་པའི་མཐེབ་སྲིན་གྱི་རྡོ་རྗེས་བདུད་རྩི་ལ་རེག་སྟེ། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཞེས་བཟླ་ཞིང་གཡོན་སྐོར་དུ་དཀྲུགས་ཏེ། ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད་པས་ཡུམ་བཞི་བདུད་རྩི་ལ་ཐིམ་པར་བསམ་མོ། །གཏོར་མ་བསང་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ༀ་གྱིས་མཚན་པར་གྱུར། ༀ་བ་ལིདྟ་ཏེ་ཛྭ་བ་ལིདྟ་བ་ལ་བཱ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུད་བརྗོད་པས། གཟུགས་རྡོ་རྗེ་མ་ལ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར་པར་བསམ། རཀྟ་བསང་སྦྱངས། སྟོང་པའི་ངང་ལས་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿ ཋཱཿ ཆགས་མེད་རཀྟའི་རྒྱ་མཚོ་རྦ་རླབས་འཁྲུག་པས་ནམ་མཁའ་གང་བར་བསམ་མོ། །ཤིན་ཏུ་བསྡུ་ན་སྔགས་རྣམས་ལན་གསུམ་གསུམ་བརྗོད་པས་ཀྱང་འགྲུབ་བོ། །གཉིས་པ་དངོས་གཞི་ལ། ཁྱད་པར་སྦྱོར་བ་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་དང་གཉིས་ལས། དང་པོ་ལ་ཀུན་རྫོབ་སེམས་བསྐྱེད་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །དོན་དམ་སེམས་བསྐྱེད་ནི། ཨེ་མ འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་ཙམ་གྱིས་ཀྱང་རུང་ལ་སྤྲོ་ན་ལྔ་ག་རྒྱས་པར་རམ་ཡང་ན། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་འགགས་གནས་དམིགས་འགྲོ་དང་འོང་། །རང་བཞིན་མེད་ལས་དེ་ལྟར་སྣང་། །སྣང་དུས་ཉིད་ནས་དེ་དངོས་མེད། །ཅེས་བརྗོད་དོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །འདི་ལྟར་སྣང་བའི་ཆོས་ཐམས་ཅད་མི་དམིགས་ཤིང་སྤྲོས་པ་དང་བྲལ་བ་སྟོང་པ་ཉིད་དུ་བསྒོམ་པའོ། །ཀུན་སྣང་ནི། དེ་བཞིན་ཉིད་ནི་སྤྲོས་མེད་ཀྱང་། རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེེ་ཆེན་པོ་མཁའ་ཁྱབ་ཏུ་བསྒོམ་པའོ། །རྒྱུའི་ཏིང་ངེ་འཛིན་ནི། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །ཞེས་པས། རང་རིག་སྣང་སྟོང་གཉིས་སུ་མེད་པའི་རང་བཞིན་ཨ་དཀར་པོའི་རྣམ་པར་བསྒོམ་པའོ། །དེ་ཉིད་བརྟན་པའི་ཡན་ལག་ཏུ་སྤྲོ་བསྡུ་བྱ་བ་ནི། ཨ་སྥ་ར་ཎ་ཕཊ། ཨ་ཡིག་ལས་ཨ་གྲངས་མེད་པ་ནམ་མཁའ་གང་བར་འཕྲོས། སཾ་ཧ་ར་ཎ་ཧཱུྃ། མཁའ་ཁྱབ་ཀྱི་ཨ་རྣམས་གཞིའི་ཨ་ལ་ཐིམ་པར་གྱུར། ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བསྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བ་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་པའི་དོན་དྲན་པར་བྱའོ། །གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། སེམས་ཉིད་ཨ་དཀར་པོ་དྲི་མ་མེད་པར་གསལ་བ་ལས། ཨེ་ཡཾ་ཝཾ་ལཾ་སུཾ་རཾ་རྣམས་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་འོད་དུ་ཞུ་བ་ལས་རིམ་པ་བཞིན་ཨེ་ལས་ནམ་མཁའི་ཆོས་ཀྱི་འབྱུང་གནས་འབྱམས་ཀླས་པའི་དབྱིངས་སུ། ཡཾ་ལས་རླུང་གི་དཀྱིལ་འཁོར་ལྗང་ཁུ་གཡོ་བའི་བ་དན་གྱིས་མཚན་པ། ཝཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། །ལཾ་ལས་སའི་དཀྱིལ་འཁོར་སེར་པོ་གྲུ་བཞི། སཾ་ལས་རིན་པོ་ཆེ་སྣ་བཞིའི་རང་བཞིན་གྱི་རི་རབ་ཟུར་བཞི་པ། རཾ་ལས་མེའི་ཁོར་ཡུག་ནམ་མཁའི་མཐའ་ཀླས་པར་འབར་བའོ། །གཉིས་པ་རྟེན་གཞལ་ཡས་ཁང་བསྐྱེད་པ་ནི། རི་རབ་ཀྱི་སྟེང་དུ་རྒྱུ་ཡི་ཨ་ལས་བྷྲཱུྃ་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུཾ། བྷྲཱུྃ་བི་ཤྭ་བི་ཤུ དྡྷེ་བཛྲ་ཛྙཱ་ན་ཙཀྲ་མཎྜལ་བྷྲཱུྃ། བྷཱུྂ་ཡིག་ཡོངས་སུ་གྱུར་པ་ལས། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པ་རིན་པོ་ཆེའི་ཕ་གུ་དྲྭ་བ་དྲྭ་ཕྱེད་ཤར་བུ་མདའ་ཡབ་གདུགས་དང་རྒྱལ་མཚན་བ་དན་རིན་པོ་ཆེའི་ཏོག་སྟོང་འོད་ཟེར་མཐའ་ཡས་པར་སྤྲོ་བ། ཕྱི་ནང་གི་རྒྱན་དང་བཀོད་པ་ངོ་མཚར་དུ་མས་ཁྱད་པར་དུ་འཕགས་པ། གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ་དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པར་བསམ་ཞིང་། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་གསལ་གདབ་བོ། །གསུམ་པ་གདན་བསྐྱེད་པ་ནི། གཞལ་ནས་ཁང་གི་དབུས་ཀྱི་ལྟེ་བ་དང་རྩིབས་བཞི་ལ་རིམ་པ་བཞིན་དབུས་སུ་སེང་གེ །ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་མཁའ་ལྡིང་རྣམས་ཀྱིས་བཏེགས་པའི་རིན་པོ་ཆེའི་ཁྲི་བཀོད་པ་ཕུལ་དུ་བྱུང་བའི་སྟེང་དུ། སྣ་ཚོགས་པདྨའི་ལྟེ་བར་ཉི་མའི་དཀྱིལ་འཁོར་དང་། ཟླ་བ་ཉ་གང་བ་སྟེ་གདན་ལྔ་བརྩེགས། འཁོར་ལོའི་གོང་རས་དང་། གྲུ་ཆད་ཀྱི་གྲྭ་བཞིར་པདྨ་དང་ཉི་ཟླའི་གདན་སུམ་བརྩེགས། ཁྱམས་ཀྱི་ཤར་ནུབ་གཉིས་སུ་རིན་པོ་ཆེའི་ཁྲིར་པད་ཉི་ཟླ་བའི་གདན་བཞི་བརྩེགས། ལྷོ་བྱང་དང་མཚམས་བཞིར་སྣ་ཚོགས་པདྨའི་གདན་རེ་རེ། སྒོ་བཞིར་ཉི་མའི་དཀྱིལ་འཁོར་རེ་རེ་རྣམས་གསལ་བར་བསམ་ལ། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པ་བཞིན་ནོ། །གཉིས་པ་ལྷ་བསྐྱེད་པ་ལ་གསུམ་སྟེ། ལྷ་བསྐྱེད་པ་དངོས་དང་། གསལ་གདབ་པ། དབང་བསྐུར་བྱིན་གྱིས་བརླབ་པའོ། །དང་པོ་ནི། གཞིའི་ཨ་ཉིད་ལས་ཡི་གེ་བཞི་བཅུ་རྩ་གཉིས་ཐོན་ཏེ་སོ་སོའི་གདན་སྟེང་དུ་འཁོད་པ་ནི། དབུས་སུ་ཋ་ཐ། རྩིབས་བཞིའི་ཤར་དུ་ཊ་ཏ། ལྷོར་ཌ་ད། ནུབ་ཏུ་ཌྷ་དྷ། བྱང་དུ་ཎ་ན། རྩིབས་མཆན་གྱི་ཤར་ལྷོའི་གདན་ལ་ཀ་ཙ། ལྷོ་ནུབ་ཏུ་ཁ་ཚ། ནུབ་བྱང་དུ་ག་ཛ། བྱང་ཤར་དུ་གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ་པ་ཡ། ལྷོ་ནུབ་ཏུ་ཕ་ཝ། ནུབ་བྱང་དུ་བ་ར། བྱང་ཤར་དུ་བྷ་ལ། ཁྱམས་ཀྱི་ཤར་དུ་ཀྵ། ནུབ་ཏུ་ཨ། ཤར་ལྷོར་ཨི། བྱང་དུ་ཨཱི། ལྷོར་ཨུ། ནུབ་བྱང་དུ་ཨཱུ། ལྷོ་ནུབ་ཏུ་ཨེ། བྱང་ཤར་དུ་ཨཻ། སྒོ་བཞིའི་ཤར་སྒོར་ང་ཤ །ལྷོ་སྒོར་ཉ་ཥ། ནུབ་སྒོར་མ་ས། བྱང་སྒོར་ཨོ་ཨོ་ཧ། དེ་རྣམས་རང་རང་གི་ལྷའི་ཁ་དོག་དང་མཐུན་པར་སོ་སོའི་གདན་ལ་འཁོད་པའི་མཐར། ཨ་ཞེས་བརྗོད་པས་གཞིའི་ཨ་དེ་འོད་དུ་ཞུ་ནས་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་བསམ་ལ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨ་སྥ་ར་ཎ་ཕཊ། ཅེས་བརྗོད་པས་ཡིག་འབྲུ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུྃ། སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས། བཛྲ་ཙཀྲ་རཏྣ་ཁངྒ་གྷཎྜ། ཞེས་བརྗོད་པས་དབུས་སུ་རྡོ་རྗེ་དང་དྲིལ་བུ། རྩིབས་བཞིའི་ཤར་དུ་འཁོར་ལོ་དང་དྲིལ་བུ། ལྷོར་རིན་པོ་ཆེ་དང་དྲིལ་བུ། །ནུབ་ཏུ་པདྨ་དང་དྲིལ་བུ། །བྱང་དུ་རལ་གྲི་དང་དྲིལ་བུ། །རྩིབས་མཆན་གྱི་ཤར་ལྷོར་རིན་པོ་ཆེའི་མྱུ་གུ་དང་མེ་ལོང་། ལྷོ་ནུབ་ཏུ་རལ་གྲི་དང་ཕྲེང་བ། ནུབ་བྱང་དུ་པདྨ་དང་པི་ཝཾ། བྱང་ཤར་དུ་རྡོ་རྗེ་དང་རྔ་ཡབ། གྲུ་ཆད་བཞིའི་ཤར་ལྷོར་ཀླུ་ཤིང་དང་སྤོས་ཁང་། ལྷོ་ནུབ་ཏུ་པུསྟི་དང་མེ་ཏོག །ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཁྱམས་ཀྱི་ཤར་དུ་རྡོ་རྗེ། ནུབ་ཏུ་དྲིལ་བུ། ཤར་ལྷོར་པི་ཝཾ། བྱང་དུ་གོ་མཚོན། ལྷོར་གསེག་པར། ནུབ་བྱང་དུ་པུསྟི། ལྷོ་ནུབ་ཏུ་སྒྲོམ་བུ། བྱང་ཤར་དུ་མེ་ཆུ། ཤར་སྒོར་ནྲྀ་མགོ་གདེངས་པ་དང་ལྕགས་ཀྱུ། ལྷོ་སྒོར་རྡོ་རྗེ་རྩེ་ལྔ་དང་ཞགས་པ། ནུབ་སྒོར་ཐོད་དབྱུག་སྦྲུལ་གྱིས་དཀྲིས་པ་དང་ལྕགས་སྒྲོག །བྱང་དུ་རྡོ་རྗེ་རྒྱ་གྲམ་དང་དྲིལ་བུ་སྟེ་ཕྱག་མཚན་བཞི་བཅུ་རྩ་གཉིས་སུ་གྱུར། སྥ་ར་ཎ་ཕཊ། དེ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུྃ། སླར་འདུས་ནས་ཕྱག་མཚན་རྣམས་ལ་ཐིམ་པ་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ྄ །རང་ཉིད་དཀྱིལ་འཁོར་གྱི་དབུས་སུ་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་དང་པོ་རྡོ་རྗེ་ཐུགས་ཀར་འཛིན་ཅིང་། གཡོན་དང་པོ་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། བར་པ་གཉིས་འཁོར་ལོ་དང་རིན་པོ་ཆེ། ཐ་མ་གཉིས་ཀྱི་པདྨ་དང་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། ཞབས་གཉིས་རྫོགས་པའི་སྐྱིལ་མོ་ཀྲུང་གིས་བཞུགས་པའོ། །མཱུྃ་དྷཱ་ཏྭེ་ཤྭ་རཱི། དེའི་པང་དུ་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་ཕྱག་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རྡོ་རྗེ་ཐུགས་ཀར་འཛིན་པ། བརྟུལ་ཞུགས་ཀྱི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུས་སྨད་དཀྲིས། ཁ་དོག་སྣ་ཚོགས་པའི་ཅོད་པན། ཟི་ལྡིར། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། དོ་ཤལ། སྐ་རགས། ཕྱག་ཞབས་ཀྱི་གདུ་བུ་སྟེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་འཚེར་ལྷུན་སྟུག་གཟི་བྱིན་ལྡན་པ་སྟེ། ཞི་བའི་ཉམས་དགུ་རྒྱས་པ། འོད་ཟེར་ཁ་དོག་དྲུག་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །ༀ་ཛི་ན་ཛིཀ྄ །ལཱྃ་དྭ་ཥ་ར་ཏི། ཤར་གྱི་རྩིབས་ལ་རྣམ་པར་སྣང་མཛད་དང་སྤྱན་མ་ཡབ་ཡུམ་དཀར་པོ་འཁོར་ལོ་དང་དྲིལ་བུ། སྭཱཾ་རཏྣ་དྷྲིཀ྄ །མཱྃ་མོ་ཧ་ར་ཏི། ལྷོར་རིན་ཆེན་འབྱུང་ལྡན་དང་མཱ་མ་ཀཱི་ཡབ་ཡུམ་སེར་པོ་རིན་པོ་ཆེ་དང་དྲིལ་བུ། ཨཱྃ་ཨཱ་རོ་ལིཀ྄ །པཱྃ་རཱ་ག་ར་ཏི། ནུབ་ཏུ་སྣང་བ་མཐའ་ཡས་དང་གོས་དཀར་མོ་ཡབ་ཡུམ་དམར་པོ་པདྨ་དང་དྲིལ་བུ། ཧཱཾ་པྲཛྙཱ་དྷྲིཀ྄ །ཏཱྃ་བཛྲ་ར་ཏི། བྱང་དུ་དོན་ཡོད་གྲུབ་པ་དང་སྒྲོལ་མ་ཡབ་ཡུམ་ལྗང་གུ་རལ་གྲི་དང་དྲིལ་བུ། ཡབ་རྣམས་གཡས་རང་རྟགས་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པས་ཡུམ་ལ་འཁྱུད་ནས་ཞབས་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་རྣམས་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རང་རྟགས་ཐུགས་ཀར་འཛིན་པ། ཞབས་བརྟུལ་ཞུགས་ཀྱི་སྐྱིལ་མོ་ཀྲུང་གིས་རོལ་པའོ། །ཀྵཱིཾ་ཧི་རཱ་ཛ་ཡ། རྩིབས་མཆན་བཞིའི་ཤར་ལྷོར་ས་སྙིང་དཀར་པོ་རིན་པོ་ཆེའི་མྱུ་གུ། ཧཱུྃ་ལཱ་སྱེ་ས་མ་ཡ་སྟྭཾ། སྒེག་མོ་དཀར་མོ་མེ་ལོང་། ཏྲྃ་ཨ་གརྦྷ་ཡ། ལྷོ་ནུབ་ཏུ་ནམ་སྙིང་སེར་པོ་རལ་གྲི། ཏྲྃ་མཱ་ལྱེ་ས་མ་ཡ་ཧོཿ ཕྲེང་བ་མ་སེར་མོ་རིན་པོ་ཆེའི་ཕྲེང་བ། ཧྲཱིཾ་ཧཱ་ཧཱུྃ་པདྨ་པྲ་ད་མ། ནུབ་བྱང་དུ་སྤྱན་རས་གཟིགས་དམར་པོ་པད་དཀར། ཧྲཱིཾ་གཱི་ཏི་རཱ་ཀོ྅་ཧཾ། གླུ་མ་དམར་མོ་པི་ཝཾ། ཛྲཱིཾ་ཀུ་རུ་པཱ་ཎ། བྱང་ཤར་དུ་ཕྱག་རྡོར་མཐིང་ཁ་རྡོ་རྗེ། ཨ་ནིརྟི་རཱ་ག་ཡ་མྱེ། གར་མ་ལྗང་གུ་རྔ་ཡབ་འཛིན་པས་གར་རྒྱ་མཛད་པ། མཻ་དྷ་ར་ཎེ་སྭཱ་ཧཱ། གྲུ་ཆད་བཞིའི་ཤར་ལྷོར་བྱམས་པ་དཀར་པོ་ཀླུ་ཤིང་། ཛཿདྷཱུ་པེ་པྲ་ཝེ་ཤ །བདུག་སྤོས་མ་དཀར་སེར་སྤོས་ཁང་། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ལྷོ་ནུབ་ཏུ་སྒྲིབ་སེལ་དམར་པོ་ཆོས་ཀྱི་འཁོར་ལོ། །ཧཱུྃ་པུཥྤེ་ཨཱ་ཝེ་ཤ །མེ་ཏོག་མ་དམར་སེར་མེ་ཏོག་གི་ཕྲེང་བ། ཧཱུྃ་ས་རཱ་ཛ་ཡ་སྭཱ་ཧཱ། ནུབ་བྱང་དུ་ཀུན་བཟང་དམར་ལྗང་རིན་པོ་ཆེའི་སྙེ་མ། བཱྃ་དཱི་པ་སུ་གི་རཱི། མར་མེ་མ་དམར་ལྗང་མར་མེ། མཱུྃ་ཤྲཱི་ཨཾ་རཱ་ག་ཡ་སྭཱ་ཧཱ། བྱང་ཤར་དུ་འཇམ་དཔལ་དཀར་ལྗང་ཨུཏྤལ། ཧོཿགནྡྷེ་ཙིཏྟ། དྲི་ཆབ་མ་དཀར་ལྗང་དྲིའི་དུང་ཆོས། སེམས་དཔའ་རྣམས་གཡས་རང་རྟགས་དང་། གཡོན་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། ཞབས་གཡས་ཅུང་ཟད་བརྐྱང་བའི་ཕྱེད་སྐྱིལ་གྱིས་བཞུགས་ཤིང་། སེམས་མ་རྣམས་གཡས་ཡབ་ལ་འཁྱུད་ཅིང་གཡོན་རང་རྟགས་འཛིན་པ། ཞབས་གཡོན་ཅུང་ཟད་བརྐྱང་པའི་ཕྱེད་སྐྱིལ་གྱི་ཡབ་ལ་རོལ་པའོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཁྱམས་ཀྱི་ཤར་དུ་ཀུན་ཏུ་བཟང་པོ་མཐིང་ག་མཉམ་བཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ནུབ་ཏུ་ཀུན་ཏུ་བཟང་མོ་མཐིང་ག་གཡོན་སྟེང་དུ་བཞག་པའི་མཉམ་བཞག་གི་ཕྱག་རྒྱ་ཅན་པདྨའི་སྐྱིལ་ཀྲུང་གིས་བཞུགས་པ། གཤེགས་པ་གཤེགས་མ། སེམས་དཔའ་སེམས་མ། ཀུན་བཟང་ཡབ་ཡུམ་རྣམས་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུའི་ཉམས་ཀྱིས་རྒྱས་པའོ། །ༀ་མུ་ནེ་ཀྲེཾ་སྭཱ་ཧཱ། ཁྱམས་ཀྱི་ཤར་ལྷོར་ལྷའི་ཐུབ་པ་དཀར་པོ་པི་ཝཾ་འཛིན་པ། ༀ་མུ་ནེ་ཧཱུྃ་ཏྲཱུཾ་སྭཱ་ཧཱ། བྱང་དུ་ལྷ་མིན་གྱ ི་ཐུབ་པ་མཐིང་ག་གོ་མཚོནའཛིན་པ། ༀ་མུ་ནེ་སྲུཾ་སྭཱ་ཧཱ། ལྷོར་མི་ཡི་ཐུབ་པ་སེར་པོ་གསེག་པར་འཛིན་པ། ༀ་མུ་ནེ་བྲཾ་སཱ་ཧཱ། ནུབ་བྱང་དུ་བྱོལ་སོང་གི་ཐུབ་པ་དམར་ནག་པུསྟི་འཛིན་པ། ༀ་མུ་ནེ་ཀྵཾ་སྭཱ་ཧཱ། ལྷོ་ནུབ་ཏུ་ཡི་དྭགས་ཀྱི་ཐུབ་པ་སེར་ནག་རིན་པོ་ཆེའི་སྒྲོམ་བུ་འཛིན་པ། ༀ་མུ་ནེ་ཡེ་སྭཱ་ཧཱ། བྱང་ཤར་དུ་དམྱལ་བའི་ཐུབ་པ་དུད་ཁ་མེ་ཆུ་འཛིན་པ། དྲུག་ཀའང་དབུ་གཙུག་ཏོར་དང་ལྡན་ཞིང་ཚངས་པར་སྤྱོད་པའི་ཆ་ལུགས་ཅན། འགྲོ་བའི་དོན་ལ་འགྲེང་སྟབས་སུ་གཤེགས་པའི་ཚུལ་ཅན་ནོ། །ཧཱུྃ་ཡ་མཱནྟ་ཀྲིཏ་ཕཊ། ཤར་སྒོར་གཤིན་རྗེའི་གཤེད་སྨུག་ནག་ནྲྀ་མགོ་གདེངས་པ་འཛིན་པ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ་དང་མཉམ་པར་སྦྱོར་བ། ཧཱུྃ་པྲཛྙཱནྟ་ཀྲི ཏ་ཕཊ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་འཛིན་པ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཞགས་པ་མ་སེར་ནག་ཞགས་པ་འཛིན་པ་དང་མཉམ་པར་སྦྱོར་བ། ཧཱུྃ་པདྨཱནྟ་ཀྲིཏ་ཧཱུྃ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་འཛིན་པ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ལྕགས་སྒྲོག་མ་དམར་ནག་ལྕགས་སྒྲོག་འཛིན་པ་དང་མཉམ་པར་སྦྱོར་བ། ཧཱུྃ་བིགྷྣཱཾ་ཏ་ཀྲིཏ་ཧཱུྃ་ཕཊ། བྱང་སྒོར་བདུད་རྩི་འཁྱིལ་བ་ལྗང་ནག་རྡོ་རྗེ་རྒྱ་གྲམ་འཛིན་པ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། དྲིལ་བུ་མ་ལྗང་ནག་དྲིལ་བུ་འཛིན་པ་དང་མཉམ་པར་སྦྱོར་བ། ཁྲོ་བོ་བཞི་ཀའང་གཡོན་སྡིགས་མཛུབ་མཛད་ཅིང་། །ཡུམ་རྣམས་གཡོན་པ་དུང་ཁྲག་སྟོབ་པའི་ཚུལ་ཅན། ཐམས་ཅད་ཀྱང་ཁྲོ་ཞིང་གཏུམ་པ་རྣམ་པར་འགྱུར་བའི་ཞལ་ཅན། གར་གྱི་ཉམས་དགུས་སྒེག་ཅིང་། དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཏེ། བསྐལ་པའི་མེ་དཔུང་འབར་བའི་ཀློང་ན་གདུག་པ་ཅན་ཚར་གཅོད་པའི་ཚུལ་གྱིས་བཞུགས་པ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཀྱང་མེ་ལོང་གི་གཟུག་བརྙན་ནམ། ཆུ་ནང་གི་ཟླ་བ་ལྟར་སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ཀྱི་འཁོར་ལོར་བཞུགས་པའོ། །གཉིས་པ་གསལ་གདབ་པ་ནི། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་དང་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་དེ། །མེ་ཏོག་ཕྲེང་བ་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འཕྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞིར་ཁྲོ་བོའི་ཕྱག་རྒྱ་ནི། །ནྲྀ་མགོ་གདེངས་དང་རྡོ་རྗེ་གནོན། །ཐོད་སྤྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱི་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝཾ་དང་། །གོ་ཆ་པུ་སྟི་རིན་ཆེན་སྒྲོམ། །མེ་དང་ཆུ་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེ་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པས་གསལ་གདབ་བོ། །གསུམ་པ་དབང་བསྐུར་བ་དང་། བྱིན་གྱིས་བརླབ་པ་གཉིས་ལས། དང་པོ་ནི། དེ་ལྟར་གསལ་བའི་ལྷ་ཚོགས་ཐམས་ཅད་ཀྱི་སྲོག་གི་གོར་རང་འདྲ་བའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་སོ་སོའི་ཕྱག་མཚན་གྱི་ལྟེ་བར་ས་བོན་ལ་སྔགས་ཕྲེང་གིས་བསྐོར་བས་མཚན་པར་བསམ་ལ། ས་བོན་རྣམས་ལས་འོད་ཟེར་འཕྲོས་པར་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཛཿས་སྤྱན་དྲགས་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བས་ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་འགྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་རང་རང་གི་རིགས་བདག་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་པར་མོས་ལ། དེ་ཡང་རྡོ་རྗེ་མི་བསྐྱོད་པ་ལ་མཚོན་ན་རྡོ་རྗེ་བསྡམ་པ་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭཱ་བྷཱ༴ སྲིན་ལན་བརྐྱང་བ་རྣ་ལྟག་གཡས་པར། ༀ་མ་ཧཱ་ས་མ་ཏཱ་ཛྙཱ་ན༴ མཐེ་བོང་བརྐྱང་བ་ལྟག་པར། ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན༴ མཐེ་ཆུང་བརྐྱང་བ་རྣ་ལྟག་གཡོན་པར། ༀ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན༴ ཞེས་པས། གཙོ་བོ་ཡབ་ཡུམ་བྱེད་པོ་ཡབ་ཡུམ་ཐུབ་པ་དྲུག་དང་བཅུ་ལ་མི་བསྐྱོད་པ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་གྱུར། དེས་མཚོན་ནས་རིགས་གཞན་བཞི་ལའང་རིགས་གང་ཡིན་པ་དེའི་སྔགས་དང་པོར་བརྗོད་ཅིང་སྤྱི་བོའི་གནས་སུ་འཇོག་ལ། གང་དབུས་སུ་སོང་བའི་སྔགས་རྒྱ་དང་རིགས་བདག་གི་ཤུལ་དུ་མི་བསྐྱོད་པ་འཇོག་པ་ལས། རྣམ་སྣང་གི་རྒྱ་དང་ཨ་དཪྴ་དང་པོར་བརྗོད་པའི་སྔགས་ཚན་ལྔས། རྣམ་སྣང་ས་སྙིང་བྱམས་པ་གཤིན་རྗེའི་གཤེད་རྣམས་ཡུམ་དང་བཅས་པ་ལ་རྣམ་སྣང་བདག་པོར་གྱུར་པའི་རིགས་ལྔའི༴ ས་མནྟ་དང་པོར་བརྗོད་པའི་སྔགས་ཚན་ལྔས། རིན་འབྱུང་ནམ་སྙིང་སྒྲིབ་སེལ་སྟོབས་པོ་ཆེ་རྣམས་ཡུམ་དང་བཅས་པ་ལ་རིན་འབྱུང་བདག་པོར༴ པྲ་ཏྱ་དང་པོར་བརྗོད་པའི་སྔགས་ཚན་ལྔས། སྣང་མཐའ་སྤྱན་རས་གཟིགས་ཀུན་བཟང་རྟ་མགྲིན་རྣམས་ཡུམ་དང་བཅས་པ་ལ་སྣང་མཐའ་བདག་པོར༴ ཀྲྀ་ཏྱཱ་དང་པོར་བརྗོད་པའི་སྔགས་མཚན་ལྔས། དོན་གྲུབ་ཕྱག་རྡོར་འཇམ་དཔལ་བདུད་རྩི་འཁྱིལ་བ་རྣམས་ཡུམ་དང་བཅས་པ་ལ་དོན་གྲུབ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་བསམ་མོ། །ཕུང་པོ་ལྔ་དག་པ་རིགས་ལྔའི་སངས་རྒྱས་སུ་ང་རྒྱལ་བྱ་ཞིང་། རིགས་ལྔའི་དབང་རྒྱ་གནས་སོ་སོར་འཇོག་ཅིང་དབང་སྔགས་བརྗོད་པའོ། །གཉིས་པ་ནི། ལྷ་ཐམས་ཅད་ཀྱི་སྤྱི་བོར་ཟླ་བ་ལ་ༀ་དཀར་པོ། མགྲིན་པར་པདྨ་ལ་ཨཱྃ་དམར་པོ། སྙིང་ཁར་ཉི་མ་ལ་ཧཱུྃ་སྔོན་པོ། དེ་རྣམས་ཀྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། རྡོ་རྗེ་གསུམ་གྱི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་སུ་མེད་པར་གྱུར། ཡི་གེ་གསུམ་ཡོངས་སུ་གྱུར་པ་ལ་སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། སྙིང་ཁར་མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་གདབ་པར་བསམ་ཞིང་རྡོ་རྗེའི་ཕྱག་རྒྱ་གནས་གསུམ་དུ་བཞག་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ༴ ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ༴ ཞེས་བརྗོད། ཤིན་ཏུ་བསྡུ་ན། གཙོ་བོའི་མངོན་རྟོགས་ཙམ་ཀྱིས་མཐར་བསྐྱེད་སྔགས་རྣམས་ཚང་བར་བརྗོད་ནས། དེ་ལྟར་རྟེན་དང་བརྟེན་པར་སོགས་ཀྱི་མཐར། གདན་ལ་རྫོགས་དང་སེམས་དཔའི་ཚུལ། །སོགས་ཀྱིས་གསལ་གདབ་ལ། དབང་བསྐུར་རྒྱས་གདབ་རྣམས་སྔགས་རྒྱ་ཙམ་གྱིས་ཆོག་གོ། །གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་བཞི་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་སྨོན་དམ་བཅའ། ཛཔ྄་བཟླ་བའོ། །དང་པོ་ལའང་བཞི་སྟེ། སྙན་གསན་དབབ་པ། སྤྱན་དྲང་བ། རིག་པའི་མེ་ཏོག་དོར་བ། དངོས་གྲུབ་བསྐུལ་ནས་བསྟིམ་ཞིང་བརྟན་པར་བྱ་བའོ། །དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུྃ་ཡིག་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་བཞི་བཅུ་རྩགཉིས་སྒྱུ་འཕྲུལ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། ལྕགས་ཀྱུའི་ཕྱག་རྒྱ་དང་བཅས་པས། ༀ་ཨེ་ཧྱེ་ཧི་བྷ་ག་ཝཱ་ན་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཞེས་པས་སྙན་གསན་ཕབ་ལ། གཉིས་པ་ནི། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་ལ། །བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །དམ་ཚིག་པའི་ཐུགས་ཀ་ནས་འཕྲོས་པའི། ཛཿཧཱུྃ་བཾ་ཧོཿས་དགུག་བཅིངས་བསྡམས་ལ་དགྱེས་པ་བསྐྱེད་ནས། དམ་ཚིག་གི་དཀྱིལ་འཁོར་དང་མེ་རི་འདབ་འབྱར་དུ་བཞུགས་པར་བསམ་མོ། །གསུམ་པ་ནི། ༀ་བཛྲ་ས་མ་ཡ་ཨོཾ། ཨཱྃ་བཛྲ་ས་མ་ཡ་ཨཱྃ། ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། །བཞི་པ་ནི། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོ་བདག་སྦྱོར་ཅིག །ཅེས་བརྗོད་པས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པ་དང་། ༀ་བཛྲ་ས་མ་ཡ་ཧཱུྃ། ཡེ་ཤེས་ཀྱི་འཁོར་ལོ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་གྱུར་པར་བསམ། ༀ་བཛྲ་ས་མ་ཡ་སྟྭཾ། ནམ་མཁའ་ལྷའི་དཀྱིལ་འཁོར་ཉིད་གྲུབ་པར་མ་གྱུར་གྱི་བར་བརྟན་པར་བྱས་ལ། ༀ་བཛྲ་ས་མ་ཡ་ཧོཿ དེ་ཡང་ཤིན་ཏུ་དབང་དུ་གྱུར་ཏེ་དགྱེས་པ་ཆེན་པོས་རྗེས་སུ་ཆགས་པར་བྱས། ཛཿཧཱུྃ་བྃ་ཧོཿཞེས་བརྗོད་པས་བརྟན་ཅིང་གསལ་བར་བྱས་ནས། ཀཱ་ཡ་ཝ་ཀཱ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ཕྱག་དང་མཆོད་པ་གཉིས་ལས། དེ་གཉིས་ཀའི་ཚེ། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ་སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་ལ་སོགས་ལས་ཀྱི་རིམ་པ་ལ་འཇུག་པར་མོས་པས། དེའི་དང་པོ་ཕྱག་འཚལ་བ་ནི། མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ༴ ལོངས་སྤྱོད་རྫོགས་པའི་སྐུ་ལ༴ ཅིར་ཡང་སྤྲུལ་པའི་སྐུ་ལ༴ མི་འགྱུར་རྡོ་རྗེའི་སྐུ་ལ༴ མངོན་པར་བྱང་ཆུབ་སྐུ་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །ཨ་ཏི་པཱུ་ཧོཿ པྲ་ཏི་པཱུ་ཧོཿ ཞེས་པས་ཕྱག་བྱའོ། །གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ལག་པ་གཡས་གཡོན་གྱི་སོར་མོའི་བྲེ་ཁ་བཅུ་ལ་ཉི་ཟླའི་དཀྱིལ་འཁོར་གྱི་སྟེང་དུ་རིགས་ལྔ་ཡབ་ཡུམ་གྱི་ས་བོན་རྣམས་ཀྱིས་མཚན་པར་བསམ་ལ། ཧཱུྃ། སྒྱུ་འཕྲུལ་དྲྭ་བས་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡིས། །སྙིང་པོའི་ཕྱག་རྒྱ་འདའ་དཀའ་འོ། །མི་བསྐྱོད་ཉི་མའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །སྦྱར་བའི་ཕྱག་རྒྱ་འབྱུང་བའི་རྒྱུ། །ༀ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱུ། །འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིས། །ཨ་ལ་ལ་སྟེ་མཆོད་པ་འབུལ། །ཨ་ལ་ལ་སྟེ་དགྱེས་པར་མཛོད། །གཉིས་པ་ཀུན་བཟང་ནི། ༀ་ཧཱུྃ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ༴ སོགས་སྭཱ་ཧཱ། ཞེས་པས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ༀ་ཨཱ་ཧ་ར་ཨཱ་ཧ་ར་སརྦ་བི་དྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷ་ནཾ་ག་ག་ཁཾ་ས་མ་ཡེ་སྭཱ་ཧཱ། ཞེས་པས་རིམ་པར་ཕྱག་ཞབས་བསིལ་ཞིང་ཞལ་དུ་གསོལ་བར་བསམ་མོ། །བཞི་པ་བཞི་བསྣོལ་ནི། སོ་སོའི་ཕྱག་རྒྱ་སྟོན་ཅིང་། ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿསརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་བོ་སོ་སོ་ལ་ཐིམ་པར་བསམ་ལ། ༀ་ཨཱཿཧཱུྃ། རབ་ཏུ་དགའ་བས་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ཅེས་བརྗོད་ལ། སྐྱེས་དང་སྐྱེས་ལན་གྱི་ཚུལ་དུ་ལྷ་རྣམས་མཉེས། ལྷ་མོ་རྣམས་སླར་བྱུང་སྟེ་རང་གི་གནས་བཞིར་ཐིམ་པས་སྐུ་གསུང་ཐུགས་ཕྲིན་ལས་བཞིའི་དངོས་གྲུབ་ཐོབ་པར་བསམ་མོ། །ལྔ་པ་སྨན་མཆོད་ནི། ༀ་ཧཱུཾ། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་གྲོལ་བ། །དུག་ལྔ་སེལ་བའི་བདུད་རྩི་སྨན། །ཐུགས་རྗེ་ཆེན་པོའི་དཀྱིལ་འཁོར་འདིར། །བདག་ཅག་དད་པས་འབུལ་ལགས་ན། །ཐུགས་རྗེས་དགོངས་ཏེ་བཞེས་སུ་གསོལ། །བཞེས་ནས་ཀུན་ཏུ་དགྱེས་མཛོད་ལ། །བླ་མེད་དངོས་གྲུབ་སྩལ་དུ་གསོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་། གཞན་ཡང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོ་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ༴ རྒྱལ་བ་ཆོས་ཀྱི་སྐུ་ཡི་དགོངས་པ་ཡི། །བདེ་གཤེགས་རིགས་ལྔ་རིགས་གསུམ་མགོན་པོ་དང་། །སངས་རྒྱས་གསང་བའི་བར་དུ་བྱིན་བརླབས་ཏེ། །འདས་དང་མ་བྱོན་ད་ལྟ་དུས་གསུམ་གྱི། །སྒྱུ་འཕྲུལ་བརྒྱུད་པའི་བླ་མ་ཐམས་ཅད་ལ། །སྨན་མཆོད༴ ༀ་སརྦ་ཏ་ཐཱ༴ བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །འགྲོ་བའི་དོན་མཛད་སྤྲུལ་སྐུ་ཐུབ་དྲུག་ལ། སྨན་མཆོད༴ ༀ་སརྦ༴ གཞན་ཡང་རྒྱལ་བའི་དཀྱིལ་འཁོར་རབ་འབྱམས་དང་། །དཔའ་བོ་མཁའ་འགྲོ་དམ་ཅན་སྲུང་མའི་ཚོགས། །ཞིང་སྐྱོང་གཞི་བདག་སྲིད་གསུམ་ཀ་དག་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡེ་ཤེས་ཀྱི་བདུད་རྩིའི་ཟེག་མ་མཁའ་ལ་སྤྲིན་བཞིན་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་རྣམས་མཉེས་ཤིང་ཚིམ་པར་བསམ་ལ། ༀ་ཨཱཿཧཱུྃ་ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། འདོད་ཡོན་གྱི་ལྷ་མོ་དཔག་ཏུ་མེད་པས་དཀྱིལ་འཁོར་པ་རྣམས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་ཞིང་། ༀ་ཨཱཿཧཱུྃ་སུ་ར་ཨུ་པ་བྷྱཿཀ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝ་ན་ཛཿཧཱུྃ་བྃ་ཧོཿཨ་ལ་ལ་ཧོཿ བདུན་པ་གསང་བསྣན་གྱི་མཆོད་པ་ནི། ༀ་ཨཱཿཧཱུྃ་ཨ་ལ་ལ་ཧོཿ ཞེས་ལན་གསུམ་གྱིས་དང་པོས་ལྷ་རྣམས་དགྱེས་པ་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླང་། གསུམ་པས་དེ་བཞིན་གཤེགས་པ་རྣམས་གཞན་དོན་ལ་བསྐུལ་བར་གསལ་གདབ་བོ། །བརྒྱད་པ་ཏིང་ངེ་འཛིན་གྱི་མཆོད་པ་ནི། ༀ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུའི་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །དགུ་པ་བསྒྲལ་མཆོད་ནི། རྃ་བཛྲ་ཛྭ་ལ་རྃ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་མོ། །བཅུ་པ་སྦྱོར་མཆོད་ནི། མཁའ་གསང་བྱིན་གྱིས་བརླབས། ས་མ་ཡ་སྟྭཾ། ས་མ་ཡ་ཧོཿ ཨ་ནུ་ར་གོ་ཧཾ། ཨ་ནུ་ར་ག་ཡ་མྱེ། ཛཿཧཱུྃ་བྃ་ཧོཿ ཧཱུྃ་ཧཱུྃ་ཧཱུྃ། སྥ་ར་ཎ་ཕཊ། སཾ་ཧ་ར་ཎ་ཧཱུྃ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུྃ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ཞེས་མཆོད་པའི་ང་རྒྱལ་བྱ་ཞིང་རོལ་མོ་ཡེ་ཤེས་ཀྱི་སྒྲས་བསྐུལ་ལོ། །བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ༀ ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། །ཧོཿ ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ། །ཧོཿ ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ། །ཧོཿ ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ། །ཧོཿ ༀ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུལ་ལ་ལྷུན་གྱིས་གྲུབ། །ཧོཿ ༀ། ཐམས་ཅད་མ་ལུས་ལྷུན་གྱིས་གྲུབ། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་ཆོས་ཉིད་ཀྱི་རང་སྒྲས་བསྟོད་པར་བྱའོ། །ཤིན་ཏུ་བསྡུ་ན། ཀུན་བཟང་ཞབས་བསིལ་བཞི་བསྣོལ་སྨན་གཏོར་རྣམས་སྔགས་མཆོད་ཙམ་བྱས་ལ། བསྟོད་པ་ཡང་ཤོ་ལོ་ཀ་ཐ་མ་ཙམ་གྱིས་ཀྱང་དོན་འདུས་སོ། །གསུམ་པ་ནི། ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག །ཐབས་ལ་མཁས་པའི་བདག་ཉིད། སྒྲོལ་པའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མ་ནོར་བར་གནོས་པ་ལས། རྩ་བ་དང་ཡན་ལག་གི་ཉམས་ཆག་དང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གི་སྐུ་བཟོད་པ་ཆེན་པོ་དང་དུ་བཞེས་ནས་ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བླ་མན་ཆད་ནས་དངོས་གྲུབ་ཀྱི་སྐལ་བ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། བདག་ཅག་དམ་ཚིག་འདི་ལ་མངོན་པར་ཞུགས་པ་རྣམས། །བཅད་གཏུབ་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པས་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་བརྗོད་དེ་ཤར་སྒོར་འཁོད་པའི་ལས་ཀྱི་རྡོ་རྗེ་སེམས་དཔའ་དེ་ཉིད་གཙོ་བོའི་ཐུགས་ཀར་ཐིམ་པར་བསམ་མོ། །བཞི་པ་ཛཔ྄་ལ་དེ་ཉིད་བརྗོད་པ་དང་། ཛཔ྄་དགོངས་གཉིས་ལས། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིས། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་ངེས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་དེ་ཁོ་ན་ཉིད་ཀྱི་དོན་དྲན་པས་ངེས་ཤེས་བསྐྱེད་དོ། །གཉིས་པ་ནི། ལྷ་རྣམས་ཀྱི་ཡེ་ཤེས་སེམས་དཔའ་སོ་སོའི་ཐུགས་ཀར་རང་རང་གི་ཕྱག་མཚན་གྱི་ལྟེ་བར་དྭངས་མའི་སྲོག་ཧཱུྃ་ཡིག་ལ་སོགས་པའི་མཐར་བཟླས་བྱའི་སྔགས་ཀྱི་ཕྲེང་བས་བསྐོར་བར་གསལ་བཏབ་ལ། སྔགས་བཟླས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་ལ། དམ་ཡེ་འཕྲོ་འདུ་སྟེ་གསལ་བ་གསུམ་དང་ལྡན་པའི་ངང་ནས་བཟླས་བྱའི་སྔགས་ནི། བསྐྱེད་སྔགས་རྣམས་རིམ་པ་བཞིན་བརྒྱ་དང་ཉེར་གཅིག་སོགས་གཙོ་འཁོར་འགྲོས་སྦྱར་ནས་བཟླ་ཞིང་། རྟགས་དང་དུས་དང་གྲངས་ཀྱི་དབྱེ་བས་རབ་འབྲིང་ཐ་མའི་ཚད་རྫོགས་ཀྱི་བར་དུ་བཟླ་བར་གསུངས་སོ། །བསྙེན་པའི་ཚད་ཀྱང་ལས་རུང་ཙམ་ལ་གཙོ་བོའི་སྔགས་ཆིག་འབུམ། ཞི་བ་རིགས་བཞི་ལ་ཁྲི་རེ། སེམས་དཔའ་མན་ཆད་ལ་ལྔ་སྟོང་རེ་གསུངས་པ་རྣམས་དུས་ཀྱི་དབང་གི་བཞི་འགྱུར་རེ་བཟླ་དགོས་ཤིང་ཁ་སྐོང་དུ་སྤྱི་ཛཔ྄་བོ་དྷི་ཙིཏྟ་འབུམ་ཕྲག་གཅིག་གིས་མཐའ་བརྟེན་ཡན་ཆད་བཟླ་ཞིང་དེ་ཐམས་ཅད་ལ་འབུལ་རྗེས་སུ་ཁྲི་སོགས་བཅུ་ཆའི་གྲངས་ཀྱི་ཁ་སྐོང་དང་། བཅུ་ཆའི་སྦྱིན་སྲེག་དང་བཅས་པ་བྱ་བ་ཡིན་ནོ། །དེ་ནས་གཞི་བསྟོད་རྒྱས་པ་གཞུང་ལྟར་རམ། བསྡུ་ན། མི་རྟོག་རྡོ་རྗེ་སོགས་དང་། བསྟོད་པར་འོས་པས་བསྟོད་མཐར། བཤགས་པ་ནི། ཡེ་གནས་གཉིས་མེད་སོགས་བརྗོད་པས་ཉེས་བྱས་སུ་གྱུར་པ་ཐམས་ཅད་བཤགས་ཤིང་དག་པར་བྱའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་ཀྱི་མཆོད་པ་ལ་ལྔ་ལས། དང་པོ་བཤམས་ཤིང་བྱིན་གྱིས་བརླབ་པ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་པ་བཤམ་ནས། བསང་ཆུ་འཐོར་ལ། ༀ་མ་ཧཱ་ཀྲོ་དྷེ་ཤྭ་རཱི་སརྦ་དྲ་བྱཱཾ་བི་ཤྭ་དྷ་ནི་ཧཱུྃ་ཕཊ་ཀྱིས་བསང་། རྃ་ཡྃ་ཁྃ་གིས་བསྲེག་གཏོར་བཀྲུས་ཏེ་སྟོང་པར་སྦྱངས། མ་སཱུརྻ་མཎྜལ། ཞལ་ཟས་ཀྱི་སྣོད་དུ་ཉི་མ་ལ་ཧཱུྃ་ༀ་སྭཱ་ཨཱྃ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་པ་ནི། ༀ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོད་དཀྱིལ་འཁོར་གཤེགས་སུ་གསོལ། །བཅོམ་ལྡན་རྡོ་རྗེ་སེམས་དཔའ་ནི། །རིགས་བཞི་ལྷ་དང་ལྷ་མོ་དང་། །འཁོར་གྱི་སེམས་དཔའ་སེམས་མ་དང་། །ཀུན་བཟང་སྤྲུལ་པའི་ཚོགས་ཆེན་དང་། །སྒོ་བ་བཞི་སོགས་གཤེགས་སུ་གསོལ། །ༀ་ཨེ་ཧྱེ་ཧི་སོགས་ཀྱིས་ཚོགས་ཞིང་དཔག་ཏུ་མེད་པ་མཁའ་ཁྱབ་ཏུ་སད་པར་བྱས་ལ། ༀ། ཐུགས་རྗེ་ལྕགས་ཀྱུས་ཐུགས་དམ༴ སོགས་དང་། ༀ་ཤྲཱི་བཛྲ་ཨཾ་ཀུ་ཤ་ཛཿ དེ་བཞིན་དུ། པཱ་ཤ་ཧཱུྃ། སྥོ་ཊ་བཾ། གྷནྜེ་ཧོཿས་དགུག་གཞུག་བཅིངས་མཉེས་པར་བྱ། གསུམ་པ་མཆོད་པ་ལ་གཉིས་ཀྱི། དང་པོ་ཏིང་ངེ་འཛིན་གྱི་མཆོད་པ་ནི། རྒྱས་པར་སྤྲོ་ན་ཆོ་ག་རྒྱས་པའི་སྐབས་ལྟར་རམ། བསྡུ་ན། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། སོགས་བཞི་བསྣོལ་དང་། ༀ་ཤྲཱི་བཛྲ་རཱ་ག་ལཱ་སྱེ་ཧཱུྃ། དེ་བཞིན་དུ། མཱ་ལྱེ་ཏྲཱཾ། གཱིརྟི་ཧྲཱིཿ ནཱི་རྟི་ཨ། ཞེས་མཆོད་དོ། །གཉིས་པ་རྫས་ཀྱི་མཆོད་པ་ནི། ཞལ་ཟས་ཀྱི་ཕུད་རིམ་པར་སྤྲོས་ལ། ཧཱུྃ། ཐབས་དང་ཤེས་རབ་ལྡན་གྱུར་ཅིང་། །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ནས། །ཚོགས་ཆེན་གཉིས་ཀྱང་རྫོགས་པར་རོལ། །ཧོཿ བདེ་བར་གཤེགས་པའི་དཀྱིལ་འཁོར་གྱི་ལྷ་ཚོགས་རྣམས་ལ་ཚོགས་ཀྱི་མཆོད་པ་ཆེན་པོ་འབུལ་ཞིང་མཆིས་ན། སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་ནས། དམ་ཚིག་ཉམས་ཆག་ཐམས་ཅད་སྐོངས་ཏེ། བླ་ན་མེད་པའི་དངོས་གྲུབ་ཐོབ་པར་མཛད་དུ་གསོལ། ཞེས་འདོད་ཡོན་ལྔ་དང་སུ་ར་ཏོ་བཅུ་དྲུག་ལ་སོགས་པའི་གླུ་གར་དང་རོལ་མོ་སྣ་ཚོགས་པས་མཆོད། བཞི་པ་ཚོགས་ལ་རོལ་པ་ནི། ལས་ཀྱི་རྡོ་རྗེས་འཁོར་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་པའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་བསྟོད། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་ལེན། དེ་ནས་གཞན་རྣམས་ལ་ཡང་རིམ་པར་སྟོབ། རྣལ་འབྱོར་པ་རྣམས་ལྷའི་ཏིང་ངེ་འཛིན་གསལ་བ་ལ་ཁྱད་པར་དཀྱིལ་འཁོར་གྱི་ལྷ་རྣམས་རང་གི་ཕུང་པོ་ཁམས་དང་སྐྱེ་མཆེད་ཉིད་ལས་མི་གཉིས་པར་ཤེས་པས་ནང་གི་སྲེག་བླུགས་ཀྱི་ཆོ་ག་ཇི་ལྟ་བའི་དམ་ཚིག་གིས་ཚིམ་པར་རོལ་ཞིང་ལོངས་སྤྱད་དེ། དེའི་མཐར། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་ཛ་གད་དཔའ་བོ་གསོལ་བ་འགྲོ་བ་མ་ལུས་པ་དབང་དུ་འདུ་བར་གྱུར་ཅིག །མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོར་གྱུར་ཅིག །རྡོ་རྗེའི་ཚེ་གསོལ་བས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པར་གྱུར་ཅིག །ཞལ་ཟས་ཀྱི་བྱེ་བྲག་མང་པོ་གསོལ་བས་ཞི་ཁྲོའི་ཕྲིན་ལས་ཀྱི་རྫུ་འཕྲུལ་སྣ་ཚོགས་ལ་དབང་འབྱོར་བར་གྱུར་ཅིག །ཅེས་སྨོན་ལམ་བཏབ་བོ། །ལྔ་པ་ལྷག་མའི་མཆོད་པ་ནི། ལྷག་མ་རྣམས་གསོག་འཇོག་མེད་པར་བསྡུས། ལྷ་མཆོད་པའི་ལྷག་མ་བསྣན་པ་དཀྱིལ་འཁོར་དང་ཧ་ཅང་མི་ཉེ་བའི་ཤར་ལྷོར་དྲིའི་མཎྜལ་ཟླུམ་པོར་བྱས་པའི་སྟེང་དུ་བཞག །རྩ་བའི་དཀྱིལ་འཁོར་གསལ་བ་ལས་ཁྱད་པར་ལྷག་མའི་གནས་སུ། བྷྲཱུྃ་བི་ཤྭ་བི་ཤུདྡྷེ་བཛྲ་ཙཀྲ་མཎྜ་ལ་བྷྲཱུྃ། ལྷག་མའི་དཀྱིལ་འཁོར་མཚན་ཉིད་རྫོགས་པ་གདན་དང་བཅས་པའི་ནང་གི་དབུས་དང་ཕྱོགས་བཞིར། ༀ་བཛྲ་དྷྲིཀ྄ ༀ་ཛི་ན་ཛིཀ྄ སྭཱཾ་རཏྣ་དྷྲིཀ྄ །ཨཱྃ་ཨ་རོ་ལིཀ྄ །ཧཱ་པྲ་ཛྙཱ་དྷྲིཀ྄ །རིགས་ཀྱི་ཡབ་ལྔ་སྐད་ཅིག་གིས་གསལ་བར་གྱུར། གཏོར་མའི་དམ་ཚིག་གསང་བའི་ལོངས་སྤྱོད་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བསམ་ལ། ༀ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས། ཧཱུྃ། ལས་ཀྱི་རྡོ་རྗེ་བྱེད་པར་དབང་བསྐུར་བའི། །མཁའ་འགྲོ་ལྷག་སྡུད་མ་སྲིང་གིང་གི་ཚོགས། །ལྷག་མ་ཁ་ཆུའི་དམ་ལ་གཏོགས་པ་རྣམས། །དམ་ཚིག་བཞིན་དུ་མཆོད་ཀྱིས་གཤེགས་སུ་གསོལ། །ཧོཿ མཁའ་འགྲོ་མ་གསང་བའི་རྒྱུད་དུ་གཏོགས་པའི་མཁའ་འགྲོ་སུམ་ཅུ་རྩ་གཉིས་སྔོན་གྱི་ཐུགས་དམ་དུས་ལས་མི་འདའ་བར་སྒྲུབ་པའི་སྡོང་གྲོགས་ལ་གཤེགས་ཤིག །ཨེ་ཨཱ་ར་ལི་ཧྲཱིཾ་ཧྲཱིཾ་ཛཿཧཱུྃ་བཾ་ཧོཿ ཌཱ་ཀི་ནི་ཧཱུྃ་ཛཿ ཞེས་བརྗོད་ཅིང་ཧེ་རུ་ཀའི་དམ་རྒྱ་དཔྲལ་བར་བཅིངས་ནས་སྤྱུགས་པའ་ིབརྡ་དང་བཅས་པས་སྤྱན་དྲངས་པས། མཁའ་འགྲོ་མ་སོ་གཉིས་སྤྲིན་གཏིབས་པ་བཞིན་བྱོན་ཏེ་རིགས་ལྔའི་གཙོ་བོ་ལ་གཙོ་བོ་བདུན། དོན་གྲུབ་ལ་དྲུག །གཞན་གསུམ་ལ་ལྔ་ལྔ་འཁྲིལ་ཞིང་སྒོ་མ་བཞི་གཙོ་བོའི་གདན་གྱི་ཚུལ་དུ་བཞུགས་པ་ལ་མེ་ཏོག་ལ་སོགས་པས་སྤྱིར་མཆོད་ནས། དམར་གྱི་རཀྟ་གཏོར་མར་སྦྲེང་ཞིང་། ཧེ་རུ་ཀའི་ཐོད་པའི་ཐལ་མོ་རྒྱ་དང་བཅས་པས། ༀ་བཛྲ་ཌཱ་ཀི་ནཱི་པྲ་ཏཱིཙྪེ་མཾ་བ་ལིཾ་ཏེ་ཧཱུྃ་ཕཊ། དེ་བཞིན་དུ། ༀ་བུདྡྷ་ཌཱ་ཀི་ནཱི་པྲ༴ སོགས་ནས་ༀ་ཕཊ། ༀ་རཏྣ་ཌཱ་ཀི་ནཱི་སོགས་ཏྲཱྃ་ཕཊ། ༀ་པདྨ་ཌཱ་ཀི་ནཱི་སོགས་ཧྲཱིཿཕཊ། ༀ་ཀརྨ་ཌཱ་ཀི་ནཱི་སོགས་ཨཱཿཕཊ། ཅེས་པས་གཏོར་མ་ཕུལ་ལ། ཧཱུྃ། མཁའ་འགྲོ་གིང་དང་དབང་ཕྱུག་མ། །མ་བདུན་སྲིང་བཞི་འབར་མ་བརྒྱད། །ཕོ་ཉ་ལ་སོགས་ལྷག་སྡུད་ཚོགས། །དབལ་གྱི་ཕམ་ཕབས་འདི་གསོལ་ལ། །བཅོལ་བའི་ཕྲིན་ལས་སྒྲུབ་པར་མཛོད། །ཅེས་བརྗོད་ཅིང་སྨན་དང་རཀྟས་མཆོད་ནས། ཧོཿ ལྷག་སྡུད་ཀྱི་དམ་ཚིག་ལ་གཏོགས་པའི་མཁའ་འགྲོ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ལྷག་མའི་དམ་ཚིག་འདིས་ཚིམས་ཤིང་དགྱེས་པར་གྱུར་ཏེ། དམ་ཚིག་ཉམས་ཆག་ཐམས་ཅད་སྐོང་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། ཁྱད་པར་དུ་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཆོག་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་སྡོང་གྲོགས་མཛོད་ཅིག །ཅེས་ཕྲིན་ལས་བཅོལ། ཡ་ཧི་གཙྪ་ཞེས་པས། མགྲོན་རྣམས་རང་གནས་སུ་གཤེགས་པར་བསམ་ལ་གཏོར་མ་ཕྱི་རོལ་དུ་བསྐྱལ། ཧཱུྃ་ཞེས་པས་ལྷག་མའི་དཀྱིལ་འཁོར་རིགས་ལྔ་རང་ལ་བསྟིམ་ནས་མཎྜལ་ཀྱང་བསྡུའོ། །གཉིས་པ་བརྟན་མ་བསྐྱང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ་རཏྣ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཏྲྃ་རཏྣ་ཏྲཻ་ལོཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབ། ཧཱུྃ། ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་བྱོན་དམ་སྐོང་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་བྱོན་དམ་སྐོང་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་གྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་པཉྩ་སོགས་ཀྱིས་སྨན་རཀ་སྦྲེང་། ཕྲིན་ལས་བཅོལ། ཡ་ཧི་གཙྪས་གཤེགས་གསོལ་བྱས་ལ་གཙང་སར་བསྐྱལ་ལོ། །ཐུན་མཚམས་ལ་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ་ཧཱུྃ་ༀ་སྭཱ་ཨཱྃ་ཧཱ་ཞེས་པས་དཀྱིལ་འཁོར་གསལ་བཏབ་ལ། བཛྲ་པདྨ་ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མི། ཛཿཧཱུྃ་བཾ་ཧོཿ བོ་དྷི་ཙིཏྟ་སྥ་ར་ཎ་ཕཊ། ཅེས་བརྗོད་པས། ཡབ་ཡུམ་སྙོམས་པར་འཇུག་པའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་གྱི་སྤྲིན་འཕྲོས་པས་སྣོད་བཅུད་ཐམས་ཅད་དག་ཅིང་འོད་གསལ་བར་བྱས། སཾ་ཧ་ར་ཎ་ཧཱུྃ། ཞེས་བརྗོད་པས། དག་པའི་སྣོད་བཅུད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ། ལྷ་ཐམས་ཅད་གཙོ་བོ་རྡོ་རྗེ་སེམས་དཔའ་ལ། ཡུམ་ཐམས་ཅད་དབྱིངས་ཕྱུག་མ་ལ། དེ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཧཱུྃ་ལ། ཧཱུྃ་གྱེན་རྫོགས་ནཱ་དའི་བར་ཐིམ་ནས་རྣམ་པར་རྟོག་མེད་ལྷུན་གྲུབ་ནམ་མཁའ་ལྟ་བུའི་ངང་ལ་མཉམ་པར་བཞག །ཉལ་བ་ལས་ལངས་པའམ། སྤྱོད་ལམ་ལ་འཇུག་པ་ན། ཧཱུྃ་བཛྲ་དྷྲིཀ྄ །ཅེས་བརྗོད་པས། རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། །བཞི་པ་གོ་བགོ་ཞིང་ལུས་བསྲུང་བ་ནི། རང་ཉིད་རྡོར་སེམས་སུ་གསལ་བའི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་གྱུར། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས། ལུས་ཐམས་ཅད་རྡོ་རྗེ་རྒྱ་གྲམ་གྱི་གོ་ཆས་ཞུ་ལུགས་སུ་གཡོགས་པས་སྒོ་གསུམ་རྡོ་རྗེ་གསུམ་དང་དབྱེར་མེད་དུ་བཅིངས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས། མཛུབ་མོ་གཡས་སུ་ཏྲཱཾ་ལས་ཁྲོ་བོ་གནོད་སྦྱིན་ནག་པོ་ཕྱག་གཉིས་ཀྱི་མཆེ་བ་དང་སྡིགས་མཛུབ། གཡོན་དུ་ༀ་ལས་ཁྲོ་བོ་མི་འཆི་ཐབས་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོའི་གནས་ལྔ་རུ། ༀ་ཏྲུྃ་ཞེས་བརྗོད་བཞིན་པར་མཛུབ་མོ་གཉིས་བསྣོལ་ནས་རིམ་པར་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ཐབས་སུ་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེ་ལུ་གུ་རྒྱུད་བྱུང་ནས་སྲུངས་ཤིང་བརྟན་པར་བྱས་ལ། ༀ་རཏྣ་མུ་ཀུ་ཊ་ཨ་བྷི་ཥིཉྩ་ཏྲཾ་ཏྲཾ། ཞེས་རིགས་ལྔའི་དབུ་རྒྱན་གྱིས་དབང་བསྐུར་བར་བསམ། ༀ་རཏྣ་མ་ལེ་ཨ་བྷི་ཥིཉྩ་ཏྲཾ་ཏྲཾ། རིན་པོ་ཆེའི་ཕྲེང་བ་བཅིངས་པར་བསམ་མོ། །ༀ་ཨཱརྱ་ལཾ་བྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿདར་མཐིང་དམར་གྱི་ཅོད་པན་གྱིས་དབུ་བརྒྱན་པར་བསམ་མོ། །ༀ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་བརྒྱན་པར་བྱའོ། །ལྔ་པ་སྤྱོད་ལམ་རྒྱུན་གྱི་རྣལ་འབྱོར་ནི། སྣོད་བཅུད་སྣང་གྲགས་ཐམས་ཅད་སྒྱུ་འཕྲུལ་དྲྭ་བའི་རང་བཞིན་དུ་ཤེས་ཤིང་། ཟ་ཉལ་འགྲོ་འཆགས་སོགས་སྤྱོད་ལམ་ཐམས་ཅད་ཐབས་ཤེས་ཁྱད་པར་ཅན་གྱིས་ཟིན་པས་དོན་ཡོད་པར་བྱའོ། །དེ་ལྟར་དཔལ་ལྡན་སྒྱུ་འཕྲུལ་དྲྭ་བ་ཡི། །བསྙེན་སྒྲུབ་ལམ་གྱི་རིམ་པ་ལ་འཇུག་པའི། །ལས་བྱང་སྙིང་པོའི་དོན་དྲིལ་ཉུང་ངུ་འདི། །རང་དང་སྐལ་མཉམ་རྣམས་ལ་ཕན་ཕྱིར་བྲིས། །རང་བཟོའི་ནོངས་པ་མཆིས་ན་མཁས་ལ་བཤགས། །དམ་པའི་རྗེས་འབྲང་ལེགས་པའི་ཆ་མཆིས་ན། །དགེ་དེས་ལམ་བཟང་འདིར་ཞུགས་སྐལ་བཟང་རྣམས། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །ཅེས་རྡོར་སེམས་སྒྱུ་དྲྭའི་བསྙེན་པའི་ལས་བྱང་ཉུང་ངུར་དྲིལ་བ་འདི་ནི་གཏེར་ཆེན་ཆོས་ཀྱི་རྒྱལ་པོའི་གསུང་ལས་ཉེ་བར་བསྡུས་ཏེ་ཤཱཀྱའི་དགེ་སློང་པདྨ་བཛྲས་བྲིས་པ་དགེ་ལེགས་འཕེལ། །དགེའོ། །མདྒ་ལཾ།། །།

སྒྱུ་འཕྱུལ་དྲྭ་བ་ཞི་བའི་དཀྱིལ་འཁོར་གྱི་ཆོ་ག་རིན་ཆེན་ཕྲེང་བ། འགྱུར་མེད་རྡོ་རྗེ།

སྒྱུ་འཕྱུལ་དྲྭ་བ་ཞི་བའི་དཀྱིལ་འཁོར་གྱི་ཆོ་ག་རིན་ཆེན་ཕྲེང་བ་ཞེས་བྱ་བ་བཞུགས་སོ། །དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་དཀྱིལ་འཁོར་གྱི་ཆོ་ག་རིན་ཆེན་ཕྲེང་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་བདེ་ཆེན་སྲིད་ཞི་ཀུན་གྱི་བདག །འགྱུར་མེད་རྡོ་རྗེ་བཞི་དངོས་སེམས་དཔའ་ཆེ། །སྒྱུ་འཕྲུལ་དྲྭ་བའི་དཀྱིལ་འཁོར་འཁོར་ལོའི་སྤྲིན། །མངོན་པར་སྣང་མཛད་བླ་མའི་ཞབས་ལ་འདུད། །གང་གི་དཀྱིལ་འཁོར་སྙིང་པོའི་གྲོང་ཁྱེར་མཆོག །གདོད་མའི་གཞི་དབྱིངས་བླ་ན་མེད་པའི་གནས། །རྟོགས་པའི་རིམ་པས་མངོན་དུ་བྱེད་པའི་ཐབས། །མྱུར་བདེའི་ལམ་མཆོག་སྐལ་བཟང་ཀུན་དགའི་སྐྱེས། །བླ་མེད་དངོས་གྲུབ་མཆོག་གང་དབང་བསྐུར་དང་། །སྒྲུབ་པའི་རྗེས་སུ་འགྲོ་ཞིང་དེ་ཉིད་ཀྱང་། །དཀྱིལ་འཁོར་ལས་ཀྱི་བྱེད་པ་ཅན་གྱི་ཕྱིར། །དེ་ཡི་ཆོ་ག་རིན་ཆེན་ཕྲེང་བར་སྤེལ། །འདི་ལ་གསུམ་སྟེ། གང་སྒྲུབ་པའི་གཞི། གང་གིས་སྒྲུབ་པའི་ཐབས། དེས་གྲུབ་པའི་འབྲས་བུའོ། །དང་པོ་ནི། ཇི་སྐད་དུ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་དང་། སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག །ཅེས་གསུངས་པས་གཞིའི་རྒྱུད་ཅེས་བྱ་བ་གདུལ་བྱའི་རྒྱུད་ཀྱིས་བསྡུས་པ་གཞི་འབྲས་གཉིས་སུ་མེད་པའི་དེ་ཁོ་ན་ཉིད་ཀྱི་རང་བཞིན་ཅན་ནོ། །གཉིས་པ་ནི། རང་བཞིན་གསང་བའི་དོན་རྣམས་ནི། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་དང་། ཐུགས་ཐིག་ལས། བཙོ་དང་ཡན་ལག་རྣམ་བཅུའོ། །ཞེས་པས་ཐབས་ཀྱི་རྒྱུད་ཅེས་བྱ་བ་ལས་ཀྱི་དངོས་པོ་བསྡུས་པའི་ཡན་ལག་ཅན་ཏེ། ཡན་ལག་ནི་དངོས་པོ་བཅུར་གནས་པ་རྣམས་ལས་འདིར། ཤེས་བྱ་དངོས་པོ་དུ་མ་ལས། །གཞི་རྩ་དཀྱིལ་འཁོར་དབང་གི་དོན། །ཞེས་པའི་དང་པོ་ལ་ཡང་། རང་བཞིན་ལ་སོགས་རྣམས་པ་བདུན། །ཞེས་པ་ལས་འདིར་ལྷག་པ་གཟུགས་བརྙན་གྱི་དཀྱིལ་འཁོར་སྟོན་ཏེ། དེ་ལ་ཡང་། ས་གཞི་མཉམ་དང་ཚད་ཐིག་དང་། །ཚོན་དང་བྲི་དང་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ཏན་ནོ། །ཞེས་རྣམ་པ་བཅུར་བཤད་པ་ཉིད་ཀྱང་། སྦྱོར་བ་དང་། དངོས་གཞི་དང་། མཇུག་གི་བྱ་བ་དང་གསུམ་དུ་གནས་པའོ། །སྦྱོར་བ་ལ་ཡང་བཞི་སྟེ། བསྙེན་པའི་ཆོ་ག་དང་། གཞི་བཟུང་བ་དང་། སའི་ཆོ་ག་དང་། སྟ་གོན་གྱི་ཆོ་གའོ། །དང་པོ་ནི། ཤིན་ཏུ་ཕྲ་བའི་དམ་ཚིག་མཆོག །ཅེས་གསུངས་པའི་མཚན་ཉིད་ཅན་གྱི་སྒོ་ནས་བསྙེན་པ་བྱ་བ་སྟེ། སློབ་མར་དབང་བསྐུར་བའི་དོན་དུ་ཡིན་ན། མོས་སློབ་ཀྱི་ཚུལ་གྱིས་མཚན་མ་དང་། དུས་དང་། གྲངས་ཀྱི་བསྙེན་པ་གསུམ་རབ་འབྲིང་ཐ་མའི་སྒོ་ནས་གང་འགྲུབ་ཙམ་ཞིག་སྔོན་དུ་འགྲོ་བ་གཞིར་བྱས་ནས། ཁྱད་པར་གྱི་ཆེད་དུ་བསྙེན་པ་ཁ་གསོ་བ་ལ་འཇུག་ཅིང་། ཚོགས་སྒྲུབ་ཀྱི་ཆེད་ཡིན་ན་ལམ་ངེས་རྫོགས་བསྒོམ་པའི་ཚུལ་གྱིས་ཕྱག་རྒྱ་སྤྲོས་བཅས་མན་ཆད་ལ་བརྟན་པ་ཐོབ་པར་བྱ་དགོས་པ་ཉིད་དོ། །གཉིས་པ་ལས་ཀྱི་གཞི་བཟུང་བ་ནི། སྟོན་པ་མཛོད་ལྡན་ཆུ་བོ་རྫོགས། །ཞེས་སོགས་ཀྱི་མཚན་ཉིད་ཅན་གྱི་རྡོ་རྗེ་སློབ་དཔོ ན་དབང་གིས་ཡོངས་སུ་སྨིན་ཅིང་དམ་ཚིག་དག་པ་གང་དག་ཤེས་པར་བྱ་བའི་གནས་རྣམས་ལ་མཁས་པས། སྟོན་པ་མཆོད་བརྩོན་རྟོགས་པ་གསལ། །ཞེས་སོགས་ཀྱི་མཚན་ཉིད་དང་ལྡན་པའི་སློབ་མའམ་སྒྲུབ་པའི་གྲོགས་དང་བཅས་པ་སྟེ། གནས་དུས་ཡོ་བྱད་སོགས་ཕུན་སུམ་ཚོགས་པའི་ཆ་རྐྱེན་ཐམས་ཅད་བཟང་ཞིང་ཚོགས་པར་བྱ་བའོ། །གསུམ་པ་སའི་ཆོ་ག་ལ། གཞི་དང་རང་མཚན་བླང་དབང་དང་། །སྦྱང་བྱིན་བསྲུང་དང་བཟུང་བ་ནི། །ཞེས་བརྒྱད་དུ་བཤད་པ་ལས་འདིར་བདུན་གྱི། དང་པོ་སའི་གཞི་ལ་བརྟག་པ་ནི་གང་དུ་བྱ་བའི་གཞི་དེའི་ནམ་མཁའི་རིན་པོ་ཆེ་ཟུར་བརྒྱད་ལྟ་བུ་ནས་མང་པོའི་བར་ཅི་རིགས་པར་མཉམ་ཞིང་རན་པར་འཁོར་ལ་དྭངས་ཤིང་གསལ་བར་སྣང་བ་སྟེ། ཟུར་བརྒྱད་ལ་སོགས་རྩེ་མང་ད ང་། །ཞེས་སོགས་གསུངས་པ་བཞིན་ནོ། །བར་གྱི་རི་སྒྲོས་ནི། ཤར་རི་དམའ་ཞིང་གཞོལ་བ། ལྷོ་རི་འཇམ་པ། ནུབ་རི་མཐོ་བ། བྱང་རི་འདུད་ཅིང་སྐྱོབ་པ་སྟེ། ཤར་ལྷོ་གཞོལ་ཞིང་འཇམ་པ་ལ། མཐོ་དང་འདུད་པ་ནུབ་བྱང་ཡིན། །ཞེས་པ་བཞིན་ནོ། །མཚམས་ཀྱི་ཤར་ལྷོ་ན་བྲག་རི་རྣོ་ཟང་ངེ་བ། ལྷོ་ནུབ་ན་བྱེ་མ་ཤལ་ལེ་བ། ནུབ་བྱང་ན་གྲོག་པོའི་སུལ་རི། བྱང་ཤར་ན་མདུང་གི་གྲུད་ཤུལ་ལྟ་བུ་རྣམས་མེད་པ་དང་རི་སྣ་དང་ཆུ་སྣ་མ་ཟུག་པ་སྟེ། ཐོ་སྒྲོ་གྲོག་མདོ་ཆུ་སྣ་སོགས། །དཀྱིལ་འཁོར་དབང་དགྲ་མཚམས་བརྟག་བྱ། །ཞེས་པ་བཞིན་ནོ། །འོག་གཞི་ནི། ལྷུན་སྡུག་ལ་བརྗིད་ཆགས་པ། སྙོམས་ཤིང་འཇམ་ལ་སྣུམ་པ། ཆུ་བོ་ནུབ་ནས་ཤར་དུ་བགྲོད་པ། རླུང་ཆུང་ཞིང་མེ་ཏོག་དང་ནགས་ཚལ་རྒྱས་པ། བྱ་སྐད་སྙན་པར་སྒྲོག་ཅིག་བཀྲ་ཤིས་ལ་བྱིན་ཆགས་པ་སྟེ། ལྷུན་སྡུག་རི་བོ་ནགས་ཚལ་ལྡན། །རབ་ཏུ་སྙོམས་ཤིང་སྣུམ་བག་ཅན། །ཞེས་སོགས་གསུངས་པ་བཞིན་ནོ། །གཉིས་པ་ས་རང་གི་མཚན་ཉིད་བརྟག་པ་ལ། སྤང་བྱ་དང་། བླང་གཉིས་ལས། དང་པོ་ལ། ཕྱིའི་སྤང་བྱས་གཞི་སྟར་སྟར་པོ་དང་། རད་རོད་ཅན་དང་། ཁོལ་བུར་དམའ་བ་དང་། བོ་བ་དང་། ཚ་སྒོ་ཅན་དང་། ཟུག་རྡོ་དང་། རྩི་ཤིང་མི་སྐྱེ་བ་རྣམས་སོ། །ནང་གི་སྤང་བྱ་བརྐོས་པ་ན། གསེག་མ་དང་། ཐལ་བ་དང་། ཤིང་དུམ་དང་། གྱོ་དུམ་དང་། རུས་པ་དང་། གསོང་དང་། སྲོག་ཆགས་ལ་སོགས་པ་མེད་པའོ། །གཉིས་ཀའི་སྤང་བྱ་ནྱཱ་གྲོ་ཏ་ལ་སོགས་པའི་དཔེས་བསྟན་པ་སྟེ། རིམ་པ་བཞིན་ས་གྱོང་པ་དང་། བཤས་པ་དང་། གས་པ་དང་། གྲུམས་པ་དང་། རྩུབ་པ་ལ་སོགས་པ་མེད་པའོ། །གཉིས་པ་ནི། བཀྲ་ཤིས་པའི་རྩ་དང་མེ་ཏོག་ཡོད་པ། ཁ་དོག་བཟང་ཞིང་སྣུམ་བག་ཆེ་བ། རྩིགས་མ་དང་། རུས་པ་སོགས་མེད་ལ། བརྐོས་པའི་ཁུང་བུ་ས་དེ་ཉིད་ཀྱིས་བཀང་བས་ལྷག་པའོ། །གསུམ་པ་ས་བླང་བ་ལ། སྣང་བ་ལས་བླང་བ་དང་། མི་སྣང་བ་ལས་བླང་བའོ། །དང་པོ་ནི། བརྟགས་པས་རུང་བའི་ས་དེ་རྒྱལ་པོ་ལ་སོགས་པ་གཞན་དབང་ན་རིན་དང་ལྡན་པའི་ངག་གིས་གསོལ་ཏེ་རང་དབང་དུ་བླང་བའོ། །གཉིས་པ་ལ། བདེ་བར་གཤེགས་པ་དང་། སའི་ལྷ་མོ་འཁོར་བཅས་ལ་བླང་བའོ། །དང་པོ་ནི། བརྟགས་པའི་གཞི་དེར་བ་བྱུང་དང་། དྲི་བཟང་དང་། བདུད་རྩི་ལྔ་ལ་སོགས་པའི་མཎྜལ་དཀྱིལ་འཁོར་གྱི་ཚད་དང་མཉམ་པར་བྱས་ལ་མཆོད་གཏོར་བཤམས། དེར་དཀྱིལ་འཁོར་གྱི་འཁོར་ལོ་བསྒོམས་ལ། མཆོད་ཅིང་བསྟོད་ནས་འདོད་དོན་གསོལ་ཏེ་ནམ་མཁའ་ལ་འདེགས་པའོ། །གཉིས་པ་ནི། ཕྱོགས་དེར་ས་ལྷའི་མཎྜལ་དྲི་དང་བ་བྱུང་གིས་བྱུགས་པར་ག་བུར་དང་ཙནྡན་གྱི་ཐིག་ལེ་གྲུ་བཞི་མེ་ཏོག་གིས་ཚོམ་བུ་དང་བཅས་པ་དང་། ས་བདག་གི་གཙོ་འཁོར་གྱི་མཆོད་གཏོར་གསེར་སྐྱེམས་དང་བཅས་པ་བཤམས་ཏེ། རྣམ་པར་མི་རྟོག་པའི་ངང་ནས། ཧཱུྃ་བིགྷྣཱན་ཏ་ཀྲྀ་ཏ་ཕཊ། ཅེས་བརྗོད་པས་རང་ཉིད་སྐད་ཅིག་གིས་ཁྲོ་བོ་བདུད་རྩི་འཁྱིལ་བ་ལྗང་སེར་ཞལ་གཅིག་ཕྱག་གཉིས་པ། གཡས་སྣ་ཚོགས་རྡོ་རྗེ་འཕྱར་ཞིང་། གཡོན་དྲིལ་བུ་དཀུར་བརྟེན་པ་ཁྲོ་བོའི་ཆས་ཅན་ཡུམ་དང་བཅས་པའི་སྐུར་གྱུར་པར་བསམ་པ། མཆོད་གཏོར་གསེར་སྐྱེམས་དང་བཅས་པ་རཾ་ཡཾ་ཁཾ་གིས་སྦྱང་ལ། ༀ་ཨཱཿཧཱུཾ་གིས་འདོད་ཡོན་བདུད་རྩིའི་ཕུང་པོར་བྱིན་གྱིས་བརླབ་ལ། རང་གི་ཐུགས་ཀ་ནས་ལཱཾ་ཡིག་སེར་པོ་གཅིག་ཆད་པ་མཎྜལ་གྱི་དབུས་སུ་གནས་པ་ལས་སའི་ལྷ་མོ་གསེར་གྱི་མདོག་ཅན་ཞི་ཞིང་འཛུམ་པ་དར་དང་རིན་པོ་ཆེས་བརྒྱན་པ། གཡས་གསེར་གྱི་བུམ་པ་དང་། གཡོན་མཆོག་སྦྱིན་གྱི་ཕྱག་རྒྱ་མཛད་པ། ཕག་གི་ཁྲི་ལ་བཞུགས་ཤིང་འཇའ་ཚོན་སྣ་ལྔའི་འོད་ཟེར་འཕྲོ་བར་བསམ་ལ། ཡེ་ཤེས་ལྔས་དབང་བསྐུར་ནས་རྣམ་སྣང་བདག་པོར་གྱུར་པའི་རིགས་ལྔས་དབུ་བརྒྱན ། སྐུ་གསུང་ཐུགས་བྱིན་གྱིས་བརླབ། བཛྲ་ས་མ་ཡ་ཧཱུྃ་ཛཿ ཞེས་པས་སྙན་གསན་དབབ། དོན་དམ་གསེར་གྱི་ས་ལ་མངའ་མཛད་པའི། །རིན་ཆེན་མཛེས་པའི་ཕོ་བྲང་ཡིད་འོང་བ ། །ཉི་ཟླ་སྐར་མ་དག་གིས་རབ་བརྒྱན་ཏེ། །ཡིད་དུ་འོང་བའི་ཕོ་བྲང་དབུས་ན་བཞུགས། །མེ་ཏོག་དབུས་ཀྱི་ས་ལ་མངའ་མཛད་དེ། །དབུས་ཀྱི་ས་བདག་ལྷ་མོ་སངས་རྒྱས་སྤྱན། །སྐུ་མདོག་བཙོ་མ་རིན་ཆེན་གསེར་གྱི་མདོག །ཕྱག་གཡས་རིན་ཆེན་གསེར་གྱི་བུམ་པ་བསྣམས། །ཕྱག་གཡོན་མཆོག་སྦྱིན་ཕྱག་རྒྱ་སྟོན་མཛད་པའི། །དབུས་ཀྱི་ལྷ་མོ་འཁོར་དང་བཅས་པ་རྣམས། །བདུད་རྩི་མཆོད་སྦྱིན་མགྲོན་དུ་སྤྱན་འདྲེན་ན། །བྱམས་ཐུགས་བརྩེ་ཕྱིར་གནས་འདིར་གཤེགས་སུ་གསོལ། །ༀ་ཨེ་ཧྱེ་ཧི་བ་སུ་དྷཱ་རི་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཞེས་བརྗོད་ཅིང་ལག་པ་རྒྱབ་སྤྲད་མཐེའུ་ཆུང་སྦྲེལ་བའི་རྒྱས། སྤྱན་དྲངས་ཏེ། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། འབྲུ་གསུམ་གྱིས་ནང་མཆོད་དང་། མིང་སྔགས་ལ་ཨེ་དཾ་བ་ལིཾ་སོགས་བཏགས་པས་གཏོར་མ་ཕུལ་ལ། ལྷ་མོ་ཆེན་མོ་ས་འཛིན་འཇིག་རྟེན་སྐྱོང་། །གསེར་མདོག་ཕྱག་ན་གསེར་གྱི་བུམ་པ་བསྣམས། །འཇའ་ཚོན་འོད་ལྡན་ཕག་གི་ཁྲི་ལ་བཞུགས། །དེ་ལ་ཕྱག་འཚལ་བསྙེན་བཀུར་མཆོད་པ་འབུལ། །ཞེས་བསྟོད་ནས། ༀ་པྲ་ཏི་བྷྱཿསྭཱ་ཧཱ། ཞེས་བརྒྱ་རྩ་བཟླས་པས་འདོད་པའི་ལས་སྩོལ་བ་ལ་དགྱེས་པའི་མདངས་ཕྱུངས་ཏེ་འཁོར་བར་བསམ་མོ། །དེ་ནས་འཁོར་གྱི་ས་བདག་མཆོད་པ་ནི། མཆོད་གཏོར་རྣམས་སྔར་བཞིན་བརླབས་ལ་སྙིང་གའི་འོད་ཟེར་དང་། སྠཱ་ན་པ་ཏི་ཀྵེ་ཏྲ་པཱ་ལ་ས་པ་རི་ཝཱ་ར་ཨེ་ཧྱེ་ཧི་ཞེས་པས་སྤྱན་དྲངས་ཏེ། ཨ་ཀཱ་རོའི་སྔགས་ཀྱི་གཏོར་མ་ཕུལ་ལ། ས་བདག་ལྷ་ཀླུ་འཁོར་དང་བཅས། །གཏོར་མ་དམ་པ་འདི་བཞེས་ལ། །བདག་གི་སྒྲུབ་པ་མ་མཐོན་བར། །ཁྱེད་ལ་གནས་འདི་བདག་གཡར་གྱིས། །ཅི་བདེ་བར་ནི་གཞན་དུ་སོང་། །ཞེས་མཆོད་ཅིང་གསེར་སྐྱེམས་ཀྱང་ཕུལ་ལ། ཡ་ཧི་གཙྪས་རང་གནས་སུ་བཏང་ལ་མཆོད་གཏོར་རྣམས་གཤེགས། དེ་ནས་ལྷ་མོ་དགེ་བའི་དབང་དུ་གསོལ་བ་ནི། ས་ཡི་ཕྱོགས་འདིར་རྡོ་རྗེ་འཛིན་པ་བདག་གིས་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཆེད་དུ་སྒྱུ་འཕྲུལ་དྲྭ་བའི་དཀྱིལ་འཁོར་ཆེན་པོ་བཞེས་སུ་གསོལ་བས་དགེ་བའི་སྟོབས་དང་དཔང་མཛད་དུ་གསོལ་ཞེས་གསོལ་ལ། ལག་གཉིས་ཁུ་ཚུར་གྱེན་དུ་བསྟན་པའི་མཐེའུ་ཆུང་སྤྲེལ། མཛུབ་མོ་རྩེ་སྤྲད་པ་འདེགས་པའི་རྒྱས། བེ་གཱ་ཀྲ་མ་ཡཾ། ཞེས་པས་ལྷ་མོ་ནམ་མཁའ་ལ་དཔང་དུ་བཞུགས་པར་བསམ་མོ། །དེ་ནས་བཛྲ་ས་མ་ཡ་ཧཱུྃ་ཛཿ ཞེས་པས་དཔང་པོའི་ལྷ་ནམ་མཁའ་གང་བར་སྤྱན་དྲངས། ཧཱུྃ་བཞིས་དེ་བཞིན་གཤེགས་པ་རྣམས་ཀྱི་བྱིན་བསྡུས་ནས་བདག་ལ་ཐིམ་པས། བདག་གི་ལུས་འོད་ཀྱི་གོང་བུར་གྱུར་བར་བསམ། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། ཅེས་བརྗོད་པས་རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་རྡོ་རྗེ་དང་གཡོན་དྲིལ་བུ་འཛིན་པ། མི་བཟད་པའི་ཁྲོ་བོ་འབར་བའི་སྡང་མིག་བགེགས་ལ་བལྟ་བའི་རྐང་མཐིལ་དང་སྙིང་གར་ཧཱུཾ་ལས་སྣ་ཚོགས་རྡོ་རྗེ་མེ་རབ་ཏུ་འབར་བར་བསམ་ཞིང་། བདེན་པའི་སྟོབས་བརྗོད་པ་སྔོན་དུ་འགྲོ་བས། ས་ཡི་ཕྱོགས་འདིར་སོགས་ནས་དཀྱིལ་འཁོར་ཆེན་པོ་བཞེངས་སུ་གསོལ་བས། གང་སུ་ཡང་རུང་བའི་འབྱུང་པོ་གདུག་པ་ཅན་གཡོག་དང་འཁོར་དུ་བཅས་པ་ཐམས་ཅད་འདིར་མ་གནས་པར་གཞན་དུ་དེངས་ཤིང་། གལ་ཏེ་མི་འགྲོ་ན་དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་བརྗོད་ཅིང་། རོལ་མོའི་སྒྲ་བྱ། གུ་གུལ་གྱིས་བདུག །ཡུངས་ཐུན་བྲབ་པ་ཁྲོ་བོའི་སྤྲིན་དུ་སྤྲོ་ཞིང་། སུམྦྷ་བཟླ་བས་རྡོ་རྗེ་གསོར་བ་དང་དྲིལ་བུ་འཁྲོལ་བཞིན་པས་རྡོ་རྗེའི་འགྲོས་ཀྱིས་བསྐོར་ཏེ་བགེགས་བསྒྲད་ལ། ཧཱུྃ་རིང་པོར་བརྗོད་པས་ཁྲོ་བོ་རྣམས་སླར་འདུས་ནས་བསྲུང་བའི་གུར་ཁང་སྣ་ཚོགས་རྡོ་རྗེ་མེ་རབ་ཏུ་འབར་བ་དང་བཅས་པས་ཕྱོགས་མཚམས་ཐམས་ཅད་ཁྱབ་པར་བསམ་ལ། སའི་དབུས་སུ་བརྗིད་བག་དང་བཅས་པས་འདུག་སྟེ། ལག་གཡས་པའི་མཐེ་བོས་མཐེའུ་ཆུང་མནན་པ་ཏྲི་ཤུ་ལའི་རྒྱས། ཇི་ལྟར་ཆེ་མཆོག་རྡོ་རྗེ་ཡིས། །དཔུང་བཞི་བདུད་ཀྱི་སྡེ་བཏུལ་ནས། །རྒྱལ་སྲིད་ཆོས་ཀྱི་དཔུང་བཙུགས་པ། །དེ་བཞིན་དུ་ནི་བདག་གིས་ཀྱང་། །ངེས་པར་བྱ་ཕྱིར་དཀྱིལ་འཁོར་བྲི། །ས་ཡི་དངོས་གྲུབ་སྩལ་དུ་གསོལ། །ༀ་རཏྣ་པཱ་ཤཾ་སིདྡྷི་ཀུ་རུ་ས་མ་ཡ་སྟྭཾ། ཞེས་བརྗོད་པས་ལྷ་མོ་འཛུམ་པའི་མདངས་ཀྱིས་འོད་དུ་ཞུ་ནས་ས་གཞི་ལ་ཐིམ་པས་ས་གཞི་རིན་པོ་ཆེའི་རང་བཞིན་ཡེ་ཤེས་ལྔའི་ངོ་བོར་གྱུར་པར་བསམ་མོ། །བཞི་པ་དབང་དུ་བྱ་བ་ནི། ཟངས་སམ་དམར་པོའི་ཤིང་ལས་ཕུར་བུ་རྩེ་མོ་ཟླ་གམ་གཟུགས་སུ་བྱས་པ་ཞིག་སྣོད་འབྲུས་བཀང་བ་ལ་སོགས་པར་བཙུགས་ཏེ་བཞག་ལ། ༀ་པདྨ་ཀཱི་ལི་ཀཱི་ལ་ཡ་ཕཊ་ཛཿ ཞེས་བརྗོད་པས་རང་གི་སྙིང་གའི་ཧཱུཾ་ལས་པདྨ་ཧེ་རུ་ཀ་དམར་པོ་ཞལ་གཅིག་ཕྱག་བཞི་པ་དང་པོ་གཉིས་ཀྱིས་པདྨ་དང་ཞགས་པ། འོག་མ་གཉིས་ཕུར་བུ་སྒྲིལ་བ། སྨད་ཕུར་བུ་ཟླ་གམ་རབ་ཏུ་འབར་བའི་རྩེ་མོ་ཅན་དུ་ཕྱུངས་པ་བཀོད་པའི་ཕུར་བུ་དང་དབྱེར་མེད་དུ་བལྟས་ལ། ཀཱ་ཡ་བཛྲ་སོགས་ཀྱིས་སྐུ་གསུང་ཐུགས་བྱིན་གྱིས་བརླབས་ཏེ་གཟི་བྱིན་དང་ལྡན་པར་བྱས་ལ། ༀ་པདྨ་ཀཱི་ལི་ཀཱི་ལ་ཡ་ཝ་ཤཾ་ས་མ་ཡེ་ཧཱུྃ། ཝ་ཤཾ་ཀུ་རུ་ཝཱ་ཧཱ། ཞེས་བརྗོད་བཞིན་པར་དཀྱིལ་འཁོར་གྱི་གཞི་ལ་བཏབ་པས་བུར་བུ་ལས་བྱུང་བའི་འོད་ཀྱིས་ས་གཞི་ཐམས་ཅད་ཁྱབ་ཅིང་བདག་གི་དབང་དུ་གྱུར་པར་བསམ་མོ། །ལྔ་པ་ལ། སྦྱང་བ་ལས་མེ་སྔགས་ཕྱག་རྒྱ། །ཏིང་ངེ་འཛིན་གྱིས་དག་པར་འགྱུར། །ཞེས་བཞི་ལས། དང་པོ་ལས་དང་བྱ་བས་སྦྱང་བ་ལ། ཐོག་མར་ལྟོ་འཕྱེ་བརྟག་སྟེ། གཟའ་ཉི་མ་རྒྱུ་བའི་སྟོན་ཟླ་ཐ་ཆུང་ལ་སོགས་པའི་ཟླ་བ་གསུམ་གསུམ་ལ་རིམ་པ་བཞིན། ཤར་ལྷོ་ནུབ་བྱང་དུ་མགོ་ལྟ་ཞིང་། ལྷོ་ལ་སོགས་པར་ཕྱོགས་ཏེ་ཉལ་བས་དེའི་ལྟོ་བའི་ཐད་ནས་ས་བརྐོ་བར་བྱའོ། །ཚད་ནི་དཀྱིལ་འཁོར་ཇི་ཙམ་བྱ་བའི་རྒྱའམ། ཁྲུ་གང་གྲུ་བཞི་ཙམ་པ་སའི་སྐྱོན་འབྱིན་ནུས་པར་བརྐོས་ཏེ། གྱོ་མོ་དང་། རུས་པ་དང་། སོལ་བ་ལ་སོགས་པའི་སྐྱོན་རྣམས་བསལ་ནས། སའི་ཕུད་ཀྱིས་དེ་བཞིན་གཤེགས་པ་རྣམས་མཆོད་ལ། ས་དེ་ཉིད་ཀྱིས་བཀང་བས་མཐོ་ན་བཟང་། མཉམ་ན་འབྲིང་། དམའ་ན་ངན་པའོ། །ཡང་དོང་དེ་ཁྲུ་གང་ཙམ་དུ་བྲུས་ནས་འཐས་པར་བཅགས་ལ་ཆུས་བཀང་སྟེ། ཡི་གེ་བརྒྱ་པ་བཟླ་བཞིན་དུ་གོམ་པ་ལྔ་བཅུར་ཕྱིན་ནས་ལོག་སྟེ་བལྟས་པས་གང་ན་རབ། ཕྱེད་ན་འབྲིང་། སྐམས་ན་ངན་ཞིང་། དེ་ཉིད་གཡས་སུ་འཁྱིལ་ནའང་བཟང་། དེ་ལས་ལྡོག་ན་ངན་པའོ། །དེ་དག་ལས་བཟང་པོར་མཐོང་ནས་བརྐོས་པའི་ཁུང་བུ་དེ་ཉིད་དུ་རྫས་སུམ་ཅུས་གང་བའི་བུམ་པ་ཨ་ལས་ལ་བའི་སྟེང་དུ་ཏྲཾ་ལས་རིན་པོ་ཆེའི་མཆོད་སྡོང་དགོས་འདོད་འབྱུང་བའི་གཏེར་དུ་དམིགས་པ་བཅུག་སྟེ། སྔར་གྱི་ས་དང་ཤིས་པའི་ས་བཟང་པོ་གཞན་གྱིས་ཀྱང་བཀང་ལ་སྤོས་ཆུས་བཏབ་ནས་འཐས་པར་བཅགས་པའི་སྟེགས་བུ་དཔངས་སུ་ཁྲུ་གང་དང་། རྒྱར་ཁྲུ་གང་ལ་སོགས་པ་ནས་ཇི་ཙམ་འདོད་པའི་བར་བརྩིགས་ལ་ངོས་མཉམ་པར་བྱས་ལ། རྫས་སུམ་ཅུ། དྲི་བཟང་། བ་བྱུང་ལྔ་དང་བཅས་པའི་གོ་མ་ཡེས་ཁྱབ་པར་བྱའོ། །གཉིས་པ་མེས་སྦྱང་བ་ནི། གོང་གི་མཚན་མ་རྣམས་ཤིན་ཏུ་ངན་པར་མཐོང་ན་གཞན་དུ་སྤོ་བའམ། ཡང་ན་ཞི་བའི་སྦྱིན་སྲེག་ཚུལ་བཞིན་དུ་བྱས་པས་བསལ་བར་བྱའོ། །གསུམ་པ་སྔགས་དང་ཕྱག་རྒྱས་སྦྱང་བ་ནི། མཚན་མ་ངན་པ་འབྲིང་ཙམ་དུ་སྣང་ན། རང་གི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་མཐིང་ག་རེ་རེས་མཚན་པ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་ཧཱུཾ་གིས་མཚན་པར་བསམ་ལ། ༀ་བཛྲ་ཧ་ན་ཧ་ན་ཀྲོ་དྷ་ཧཱུཾ་ཕཊ། ཅེས་བརྗོད་ཅིང་ས་ལ་ལན་གསུམ་བསྣུན་པས་རྡོ་རྗེ་དང་ཧཱུཾ་གི་འོད་ཀྱིས་སའི་ཉེས་སྐྱོན་ཐམས་ཅད་སྦྱངས་ནས་ཡེ་ཤེས་རང་སྣང་གི་གཞིར་གྱུར་པར་བསམ་མོ། །བཞི་པ་ཏིང་ངེ་འཛིན་གྱིས་སྦྱང་བ་ལ། མཚན་མེད་དང་། མཚན་བཅས་གཉིས་ཀྱིས། དང་པོ་ནི། ས་དང་སར་འཛིན་པའི་འཁྲུལ་རྟོག་ཐམས་ཅད་སྟོང་ཉིད་དེ་བཞིན་ཉིད་ཀྱི་དབྱིངས་སུ་རྣམ་པར་དག་པར་བསམ་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་སྦྱང་ངོ་། །གཉིས་པ་ནི། ཧཱུཾ་གི་སྒྲ་རིང་པོར་བརྗོད་པས་རང་ཉིད་སྐད་ཅིག་གིས་ཧཱུཾ་ལས་རྡོ་རྗེ་སྔོན་པོ་ཧཱུཾ་ཡིག་མཐིང་ནག་འབར་བས་མཚན་པར་གྱུར། དེ་ལས་ཨེ་ཡཾ་ཝཾ་ལཾ་རཾ་རྣམས་འོག་ཏུ་ཆད་པ་ལས་འབྱུང་ལྔ་རིམ་བརྩེགས་ཀྱི་སྟེང་དུ་བྷྲཱུཾ་ཡིག་འབར་བར་གྱུར། བྷྲཱུཾ་བི་ཤྭ་བི་ཤུདྡྷེ་ཛྙཱ་ན་བཛྲ་ཙཀྲ །ཞེས་བརྗོད་པས་ཡེ་ཤེས་རིན་པོ་ཆེ་འབར་བའི་དཀྱིལ་འཁོར་ཇི་ལྟར་འབྱུང་བར་འགྱུར་བ་བཞིན་དུ་བཀྲ་ལམ་གྱིས་གསལ་བར་བསམ་མོ། །དྲུག་པ་བྱིན་གྱིས་བརླབ་པ་ནི། གནས་ཁང་ལེགས་པར་བརྒྱན་ལ། སློབ་དཔོན་རྒྱས་པའི་ཆས་སུ་ཞུགས་ནས་རྡོ་རྗེའི་འགྲོས་ཀྱིས་མཐའ་བསྐོར་ཞིང་། ཤར་སྒོ་ནས་ཞུགས་ཏེ། ཤར་དུ་ཕྱོགས་པས་དབུས་སུ་འཁོད་ལ། སྒྲུབ་ཐབས་བཞིན་དུ་བདག་ཉིད་གཙོ་བོ་ཡབ་ཡུམ་དུ་བསྐྱེད་ནས། མཉམ་པར་སྦྱོར་བའི་བྱང་ཆུབ་སེམས་ཀྱི་སྤྲིན་ལས་འཁོར་གྱི་ལྷ་རྣམས་ཡན་ལག་གི་ལྷ་དང་བཅས་པ་གསལ་བཏབ་ལ། བྱང་ཆུབ་སེམས་ཀྱི་འོད་ཟེར་གྱིས་དཀྱིལ་འཁོར་པ་དང་བཅས་པའི་དུས་གསུམ་གྱི་མགོན་པོ་སྲས་དང་བཅས་པ་ཐམས་ཅད་མཁའ་ཁྱབ་ཏུ་སད་པར་བསམ་ཞིང་། བཛྲ་ས་མཱ་ཛཿས་སྙན་གསན། ཨེ་ཧྱེ་ཧིས་སྤྱན་དྲངས། ཀུན་ཟང་། ཞབས་བསིལ། བཞི་བསྣོལ་སོགས་ཕྱི་ནང་གསང་གསུམ་གྱི་མཆོད་པ་རྣམས་ཀྱི་མཆོད་ཅིང་བསྟོད་པར་བྱའོ། །དེ་ནས་ཕྱོགས་བཞིར་གནས་པའི་སློབ་མ། ལཱཾ་དྭེ་ཥ་ར་ཏི་སོགས་ཀྱིས་ཡུམ་བཞིར་བསྐྱེད། བསྐུར། རློབ། དབབ། དྲང་། བསྟིམ། བརྟན་པར་བྱས་ལ། དེ་རྣམས་ཀྱིས་གཙོ་བོ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་པ་སྔོན་དུ་འགྲོ་བས་ཤར་ནས། ཞི་བའི་ཡེ་ཤེས་རང་སྣང་བའི། །རྒྱན་རྣམས་ཀུན་གྱིས་རབ་མཛེས་པ། །སངས་རྒྱས་ཀུན་གྱི་སྐུ་ཡི་མཆོག །དཀྱིལ་འཁོར་ཆེན་པོ་གསུང་དུ་གསོལ། །ལྷོ་ནས། ཡོན་ཏན་རིན་ཆེན་འབྱུང་བའི་གཙོ། །མ་ལུས་ཀུན་གྱི་རེ་སྐོང་བ། །སངས་རྒྱས་ཀུན་གྱི་ཡོན་ཏན་མཆོག །དཀྱིལ་འཁོར་ཆེན་པོ༴ ནུབ་ནས། རང་བཞིན་དག་པས་གོས་པ་མེད། །འདོད་ཆགས་ཕ་རོལ་ཕྱིན་པ་བརྙེས། །སངས་རྒྱས་ཀུན་གྱི་གསུང་གི་མཆོག །དཀྱིལ་འཁོར༴ བྱང་ནས། བསམ་པ་ཐམས་ཅད་ཡོངས་རྫོགས་པས། །ཐམས་ཅད་སྒྲོལ་བའི་དེད་དཔོན་མཆོག །སངས་རྒྱས་ཀུན་གྱི་ཕྲིན་ལས་བདག །དཀྱིལ་འ ཁོར་ཆེན་པོ་གསུང་དུ་གསོལ། །ཐམས་ཅད་ཀྱིས་ཐུན་མོང་དུ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །དཀྱིལ་འཁོར་སྙིང་པོ་བཤད་དུ་གསོལ། །ཞེས་གསོལ་བ་གདབ་ཅིང་། བཞི་མེད་ན་གཅིག་གིས་ཀྱང་ཕྱོགས་དེ་དག་ཏུ་སོང་ནས་བྱ། དེ་ཡང་མེད་ན་བསྒོམས་པས་ཀྱང་རུང་ངོ་། །དེ་ནས་སློབ་དཔོན་གྱི་རྡོར་དྲིལ་འཛིན་ཅིང་འཛུམ་པའི་མདངས་ཀྱིས་བལྟས་ཏེ། ཕྱོགས་བཅུ་མ་ལུས་དུས་གསུམ་གྱིས། །རྒྱལ་བ་སྲས་བཅས་དགོངས་སུ་གསོལ། །ཆེ་གེ་མོ་སོགས་དོན་གྱི་ཕྱིར། །དཀྱིལ་འཁོར་ཆེན་པོ་བདག་བགྱིད་པས། །བདག་ཅག་རྗེས་སུ་བཟུང་བའི་ཕྱིར། །ས་འདི་ཤིས་པར་བྱིན་རླབས་པར། །བདེ་བར་གཤེགས་པས་མཛད་དུ་གསོལ། །ཞེས་ནམ་མཁར་བཞུགས་པའི་དེ་བཞིན་གཤེགས་པ་ཐམས་ཅད་རྗེས་སུ་བསྐུལ་ལ། ཧཱུཾ་བཞིས་བྱིན་བསྡུས་ནས་རང་ལ་བསྟིམ། དེ་ནས་སྙེམས་པ་དང་བཅས་པས་ལངས་ཏེ། འགྲོ་བ་རྣམས་ལ་སྙིང་རྗེར་བལྟས་ནས། སླར་ཡང་རང་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པ་མི་བཟད་པའི་ཁྲོ་བོའི་སྤྲིན་སྤྲོ་བའི་སྐུར་གྱུར་པའི་མིག་གཉིས་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུཾ་ལས་བསྐལ་བའི་མེར་འབར་བས་ཀུན་ཏུ་བལྟ་ཞིང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེར་མི་ཕྱེད་པའི་ང་རྒྱལ་དང་ལྡན་པས། རྡོ་རྗེ་འཛིན་པ་ཉི་མ་དང་། ཆོས་དང་རྟ་མཆོག་སྣང་མཛད་ཀྱང་། །བདག་ཉིད་ཆེན་པོ་ང་ཉིད་ཡིན། །ཐམས་ཅད་བཀའ་ལས་དེང་མ་འདའ། །ཞེས་ང་རྒྱལ་བཟུང་ནས། ཐུགས་ཀའི་ཧཱུཾ་ལས་ཁྲོ་བོའི་སྤྲིན་མི་བཟད་པ་སྤྲོ་ཞིང་རྐང་མཐིལ་གཉིས་སུ་ཧཱུཾ་ལས་འབར་བའི་རྡོ་རྗེ་རེ་རེས་མཚན་པར་བསམ་ལ། རྡོ་རྗེ་གསོར་བ་དང་དྲིལ་བུ་འཁྲོལ་ཞིང་། ཧཱུཾ་བཞི་པའི་སྔགས་དྲག་ཏུ་སྒྲོག་པ་དང་བཅས་པས་དབང་ལྡན་ནས་བརྩམས་ཏེ། རྡོ་རྗེའི་འགྲོས་ཀྱི་གཡས་སུ་བསྐོར་ནས་དཀྱིལ་འཁོར་གྱི་གཞི་ཅིས་ཀྱང་མི་ཤིགས་པ་རྡོ་རྗེའི་རང་བཞིན་དུ་བརྟན་པར་བྱིན་གྱིས་བརླབ་བོ། །བདུན་པ་བསྲུང་བ་ནི། མིག་ལ་སོགས་པའི་ཧཱུཾ་ཡིག་ལས་འོད་ཟེར་འཕྲོས། རྡོ་རྗེའི་ས་གཞི། ར་བ། དྲྭ་བ། གུར་བླ་རེ་ཕྱི་རོལ་བསྐལ་བའི་མེ་དཔུང་རབ་ཏུ་འབར་བའི་དབུས་སུ་བྷྲཱུཾ་ལས་བྱུང་བའི་འཁོར་ལོ་སེར་པོ་རྩིབས་བརྒྱད་ལོགས་དང་། རྩ་རྩེ་སྟེང་འོག་ཏུ་ཕྱོགས་ཤིང་རྣོ་བའི་དབལ་དང་ལྡན་པ། ལྟེ་བ་ཆོས་ཀྱི་དབྱིངས་དང་མ ཉམ་པའི་དབུས་སུ་བདག་ཉིད་ཞེ་སྡང་རྡོ་རྗེར་གནས་པའི་ཐུགས་ཀའི་ཧཱུཾ་ལས་མ་བཅུ་འཕྲོས་པ་རྩིབས་ནང་རྣམས་སུ་ཉི་གདན་བཅུར་གྱུར། སླར་ཡང་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་འཕྲོས། ཕྱོགས་བཅུའི་བགེགས་རྣམས་བཀུག་སྟེ་ཉི་གདན་རྣམས་ཀྱི་སྟེང་དུ་མྱོས་ཤིང་འགྱེལ་སྟབས་སུ་འཁོད་པར་བསམ་ལ། ཧཱུཾ་བཞི་པའི་སྔགས་བརྗོད། སླར་ཡང་ཐུགས་ཀ་ནས་ཁྲོ་བོ་བཅུ་ཕྱུང་སྟེ། མདུན་དུ་བཀོད་པའི་ཕུར་པ་རྣམས་དང་གཉིས་སུ་མེད་པར་གྱུར་པ་ནི་སྟོད་ཁྲོ་བོའི་གཟུགས་ཅན། སྨད་ཕུར་བུ་འབར་བའི་རྣམ་པ་ཅན་དུ་གྱུར་པར་བསམ་ལ། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ཅེས་སོགས་ཁྲོ་བོ་བཅུ་སོ་སོའི་སྔགས་ཀྱི་མཐར། ༀ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ་བཛྲ་དྷ་ར་ཨཱ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཅེས་ཟློས་ཤིང་། ཁྲོ་བོ་རྣམས་ཕྱོགས་བཅུའི་བགེགས་ལ་ཕུར་བུའི་ཚུལ་དུ་བཏབ་པས་དེ་རྣམས་ཀྱི་ལུས་ཕུག་སྟེ་གཡོ་འགུལ་མེད་ཅིང་འོད་གསལ་བར་བསམ་ལ། ཕྱོགས་གཡས་བསྐོར་དང་། མཚམས་གཡོན་བསྐོར། སྟེང་གི་ཕུར་བུ་ཤར་དང་། འོག་གི་ཕུར་བུ་ནུབ་ཏུ་གདབ་པར་བྱའོ། །དེ་ནས་མཚོན་ཆ་ལྔའི་རིམ་པས་བསྲུང་སྟེ། སྒྲུབ་ཐབས་ལས་ཤེས་པར་བྱ་ཞིང་། རྡོ་རྗེའི་གར་དང་སྟངས་སྟབས་ཀྱི་རོལ་པ་ཅི་རིགས་པའང་བྱའོ། །དེ་ལྟར་ཆོས་ཐམས་ཅད་སེམས་ལས་ལོགས་སུ་མེད་ལ། སེམས་ཀྱང་སྟོང་ཉིད་ནམ་མཁའི་རང་བཞིན་དུ་གནས་པས་བར་དུ་གཅད་བྱ་གཅོད་བྱེད་ཐམས་ཅད་དམིགས་སུ་མ་གྲུབ་པ་དེ་ཁོ་ན་ཉིད་ཀྱི་བསྲུང་བའོ། །སྔར་བཤད་པའི་སའི་ཆོ་ག་ཕལ་ཆེར་དཀྱིལ་འཁོར་གྱི་ཁང་པ་ལོགས་སུ་བྱེད་པ་དང་། བརྐོས་ནས་སྟེགས་བུ་བྱ་དགོས་པའི་སར་ཡིན་ལ། གཞན་དུ་ན་མི་སྣང་བ་ལས་བསླང་བ་ཙམ་སྔོན་དུ་འགྲོ་བས་དབང་དུ་བྱ་བ་དང་། སྔགས་རྒྱ་ཏིང་ངེ་འཛིན་གྱིས་སྦྱང་བ་རྣམས་བྱས་ནས། ས་བྱིན་གྱིས་བརླབ་པ་ལ་སོགས་པའི་ལས་ལ་འཇུག་ཅིང་། བརྒྱད་པ་ས་བཟུང་བ་ནི་འོག་ཏུ་མཛད་པ་ཕྱག་ལེན་ཡིན་ནོ། །དེ་དག་ནི་ནུབ་དང་པོའི་བྱ་བའོ། །བཞི་པ་སྟ་གོན་ནམ་ལྷག་པར་གནས་པའི་ཆོ་ག་ལ། དཀྱིལ་འཁོར་གྱི་ཚད་དང་། ཡན་ལག་རབ་གནས་གཉིས་ལས། དང་པོ་ལ། གཟུགས་བརྙན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་གྱི་ཚད་བསྟན་པའོ། །དང་པོ་ལ་གསུམ་ལས། བསྡུས་པའི་ཚད་ནི། ཁྲུ་གང་བ་དང་། བཞི་པའོ། །འབྲིང་པོའི་ནི། ཁྲུ་བཅུ་གཉིས་པ་དང་། བཅུ་དྲུག་པའོ། །རྒྱས་པའི་ནི། ཉི་ཤུ་པ་དང་། ཉི་ཤུ་རྩ་ལྔ་པ་སྟེ། རེ་རེ་ཡང་ཆེ་ཆུང་གཉིས་གཉིས་ཀྱིས་བསྟན་པ་ནི་གནས་ཁང་གི་ཡངས་དོག་དང་། འབྱོར་བའི་ཁྱད་པར་དང་། འདུ་བྱེད་རྐྱེན་གྱི་ཁྱད་པར་ལས་ཇི་ལྟར་རིགས་པར་བྱ་བ་སྟེ། ཚད་ནི་རྐྱེན་གྱིས་མ་ངེས་ཏེ། ཞེས་གསུངས་པ་སྔར་ལས་དང་བྱ་བས་སྦྱང་བའི་སྐབས་སུ་ཤེས་པར་བྱ་བ་ཉིད་དང་། གཉིས་པ་ནི། རྒྱང་གྲགས་དང་དཔག་ཚད་ལ་སོགས་པ་ནས་ཇི་སྲིད། ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་སྒོམ། །ཞེས་བསྟན་པ་བཞིན་ནོ། །རྩ་བའི་གསུམ་པ་ཐིག་དང་། བཞི་པ་ཚོན་གྱི་བྱ་བ་གཉིས་ནི། འཆད་པར་འགྱུར་བའི་ལྷག་གནས་རྣམས་ཀྱི་ཁོངས་སུ་ལག་ལེན་འབྲེལ་སྡེབས་ནས་གསེབ་ཚགས་སུ་ཤེས་པར་བྱའོ། །དེ་ལ་གཉིས་ཏེ། ཡན་ལག་རབ་གནས་དང་། ཡན་ལག་ཅན་གྱི་རབ་གནས་སོ། །དང་པོ་ལ། ཤོམས་དང་། ཆོ་ག་དངོས་གཉིས་ཀྱི་དང་པོ་ནི། རྩ་བའི་དཀྱིལ་འཁོར་གང་དུ་བྱ་བའི་དབང་ལྡན་གྱི་ཕྱོགས་སུ་ཁྲུ་དོ་བའི་མཎྜལ་དྲིས་བྱུག་ལ། སྣ་ཚོགས་པདྨ་འདབ་བརྒྱད་རྡོ་རྗེའི་ར་བ་དང་བཅས་པ་བྲི། དེའི་དབུས་སུ་ལས་བུམ་ཆས་ལྡན་རྡོ་རྗེ་རྒྱ་གྲམ་གྱི་མཚན་མ་ཅན་དགོད། ཤར་དུ་ཡེ་ཤེས་དང་ལས་ཀྱི་ཐིག་སྐུད། ལྷོར་རྡོ་རྗེ། ནུབ་ཏུ་ཐོད་ཆུ་བདུད་རྩི་ལྔ་དང་ལྡན་པ། བྱང་དུ་དྲིལ་བུ། དབུས་དང་མཚམས་ཀྱི་པད་འདབ་བཞི་ལ་རྡུལ་ཚོན་ལྔ་མདོག་རིགས་སྡེབས་པ་དཔའ་བོ་འབྲུ་ལྔ་བཀོད་པ་དང་། དེ་དག་གི་མཐར་མཆོད་གཏོར་སྤྱི་དང་མཐུན་པར་བཤམ་མོ། །གཉིས་པ་ནི། སྔོན་འགྲོ་ནས་བཟུང་བདག་གི་རྣལ་འབྱོར་བཟླས་པའི་མཐར་ཐུག་པ་སྔོན་དུ་འགྲོ་བས་ལས་བུམ་བསང་སྦྱངས། སྟོང་པའི་ངང་ལས་བྷྲཱུྃ་ལས་བྱུང་བའི་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཉི་མའི་གདན་ལ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས། ཧཱུྃ་བིགྷྣཱན་ཏ་ཀྲྀཏ་ཕཊ། ཅེས་བརྗོད་པས་ཁྲོ་བོ་མི་འཆི་ཐབ་སྦྱོར་ལྗང་ནག་རྒྱ་གྲམ་དང་དྲིལ་བུ་འཛིན་པའི་སྐུར་གྱུར་པར་བསམ་ཞིང་། ལས་རིགས་བདག་པོར་བྱས་པའི་ཡེ་ཤེས་ལྔས་དབང་བསྐུར། སྐུ་གསུང་ཐུགས་བྱིན་གྱིས་བརླབ། བཛྲ་ས་མཱ་ཛཿས་སྙན་གསན་དབབ། ཨེ་ཧྱེ་ཧིས་སྤྱན་དྲངས། ཛཿཧཱུཾ་བཾ་ཧོཿས་གཉིས་མེད་དུ་བསྟིམ། ཀཱ་ཡ་ཝཱ་ཀ་ཙིཏྟ་ཏིཥྛ་བཛྲས་བརྟན་པར་བྱས། ཀུན་བཟང་ཞབས་བསིལ་བཞི་བསྣོལ་གྱིས་མཆོད། རྡོ་རྗེ་རྩེ་གཅིག་པའི་རྒྱས་ལས་བུམ་ལ་རེག་སྟེ། ཧཱུྃ་བིགྷྣཱན་ཏ་ཀྲྀ་ཏ་ཕཊ། ཅེས་བརྒྱ་རྩ་བརྒྱད་བཟླས་པའི་མཐར་ལྷ་འོད་དུ་ཞུ་ནས་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བར་བསམ་ཞིང་། བུམ་ཆུ་འཐོར་ཡབ་ཀྱིས་བླངས་ཏེ། ༀ་སྭ་བྷཱ་ཝ་བི་ཤུདྡྷ་དྷརྨ་ཏཱ་བཛྲ་སིདྡྷི་ཧཱུྃ། ཞེས་བརྗོད་ཅིང་། བདག་གནས་ཡོ་བྱད་ཐམས་ཅད་ལ་གཏོར་བས་ཉེས་སྐྱོན་དག་པར་བསམ་མོ། །དེ་ནི་ལྷག་གནས་ཐམས་ཅད་ལ་བསང་གཏོར་བྱ་བའི་དོན་དུའོ། །དེ་ནས་ཐིག་གི་ལྷག་གནས་ནི། རྒྱུ། གྲོགས། ཚད། གྲངས། རབ་གནས། གདབ་ཐབས། སྤྱོད་ལམ་དང་བདུན་ལས། ཡེ་ཐིག་གི་རྒྱུ་པདྨའི་སྣལ་མ་སོགས་དང་། ལས་ཐིག་གི་རྒྱུར་རས་བལ་ལ་སོགས་པ་སྟེ་དཔའ་བོའི་རིན་གྱིས་ཉོས་པའོ། །འཁལ་བའི་གྲོགས་གཞོན་ནུ་མ་མཚན་ལྡན་བཅུ་དྲུག་ལོན་པ་ལ་སོགས་པའོ། །ཚད་སྲིད་དུ་འཛིན་པའི་ཆ་མ་གཏོགས་པ་དཀྱིལ་འཁོར་ལས་ཉིས་འགྱུར་དང་། སྤོམས་སུ་སྒོའི་ཉི་ཤུ་ཆ་སྟེ་ཆ་ཆུང་གི་ལྔ་ཆའོ། །གྲངས་ནི་ཡེ་ཤེས་ཀྱི་ཐིག་སྐུད་ཚོན་སྣ་ལྔས་བསྒྱུར་བ་ལྔ་ཚན་ལྔའམ་ལྔ་ཚན་གཅིག་དང་། དམ་ཚིག་གི་ཐིག་སྐུད་དཀར་དམར་སྔོ་བ་གསུམ་ཚན་གསུམ་མམ་གསུམ་ཚན་གཅིག་གོ། །རབ་གནས་ནི། ཧཱུཾ་བིགྷྣཱན་ཏ་ཀྲྀཏ་ཕཊ། ཅེས་ལས་བུམ་གྱི་ཆུས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཉི་ཟླའི་གདན་ལྔའི་སྟེང་དུ་རང་གི་ཐུགས་ཀ་ནས་ཧཱུཾ་ༀ་སྭཱ་ཨཱཾ་ཧཱཾ་འཕྲོས། ཡེ་ཤེས་ཀྱི་ཐིག་སྐུད་ལ་ཐིམ་པས་དཔའ་བོ་འབྲུ་ལྔར་གྱུར། སླར་ཡང་ཉི་ཟླའི་གདན་གསུམ་གྱི་སྟེང་དུ་ཐུགས་ཀ་ནས་ༀ་ཨཱཿཧཱུཾ་འཕྲོས། དམ་ཚིག་གི་ཐིག་སྐུད་ལ་ཐིམ་པས་ཡི་གེ་གསུམ་དུ་གྱུར་པར་བསམ་ལ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་མདུན་གྱི་ནམ་མཁར་སྤྱན་དྲངས། ཀུན་བཟང་ཞབས་བསིལ་ལ་སོགས་པས་མཆོད་ཅིང་གསོལ་བ་བཏབ་ནས། རང་གི་མིག་གཉིས་ཛཿཡིག་ལས་སྐྱེས་པའི་ཉི་ཟླར་བསམ་ལ། ༀ་དིཔྟ་དྲྀཥྚ་ཨཾ་ཀུ་ཤ་ཛཿ ཞེས་བརྗོད་ཅིང་རྫི་མ་བསྐྱོད་པ་འབར་བའི་ལྟ་སྟངས་ཀྱིས་བསྐུལ་བས་ནམ་མཁའི་དེ་བཞིན་གཤེགས་པ་རྣམས་སྦྱོར་བ་མཛད་པར་མོས་ཏེ། ༀ་མ་ཧཱ་ཤཱུ་ནྱ་ཏཱ་སོགས་ཡེ་ཤེས་ལྔའི་སྔགས་རྣམས་བརྗོད་པས་དེ་རྣམས་ཀྱི་ཐུགས་ཀ་ནས་ཡེ་ཤེས་ལྔའི་རང་བཞིན་གྱི་འོད་ཟེར་ཁ་དོག་ལྔར་བྱུང་། ཡེ་ཤེས་ཀྱི་ཐིག་སྐུད་སོ་སོ་ལ་ཐིམ་པས་དེ་ཉིད་ཡེ་ཤེས་ལྔའི་ངོ་བོར་གྱུར་པར་བསམ་ཞིང་། འབྲུ་ལྔ་བརྗོད་བཞིན་དུ་སློབ་མ་དང་བཅས་པས་དང་པོར་སྲད་བུ་ལྔ་ཚན་རེ་རེ་སོ་སོར་སྒྲིལ། དེ་ནས་ལྔ་པོ་ཡང་གཅིག་ཏུ་སྒྲིལ་བ་བརྡོགས་ནས་གསེར་ལ་སོགས་པའི་སྣོད་དུ་བཞག །དེ་བཞིན་དུ་ཀཱ་ཡ་བཛྲ་སོགས་སྐུ་གསུང་ཐུགས་ཀྱི་སྔགས་གསུམ་བརྗོད་པས་ནམ་མཁའི་དེ་བཞིན་གཤེགས་པ་རྣམས་ཀྱི་གནས་གསུམ་ནས་རྡོ་རྗེ་གསུམ་གྱི་རང་བཞིན་གྱི་འོད་ཟེར་དཀར་དམར་མཐིང་གསུམ་བྱུང་། དམ་ཚིག་གི་ཐིག་སྐུད་སོ་སོ་ལ་ཐིམ་པས་དེ་ཉིད་སྐུ་གསུང་ཐུགས་ཀྱི་ངོ་བོར་གྱུར་པར་བསམ་ཞིང་། འབྲུ་གསུམ་བརྗོད་བཞིན་དུ་གསུམ་ཚན་རེ་རེ་སོ་སོར་སྒྲིལ། དེ་ནས་གསུམ་པོ་ཡང་གཅིག་ཏུ་དྲིལ་ལ་སྔར་བཞིན་བཞག་གོ། །གདབ་ཐབས་དང་སྤྱོད་ལམ་ནི་འོག་ཏུ་བསྟན་ནོ། །དེ་ནས་རྡོ་རྗེ་དང་དྲིལ་བུའི་རབ་གནས་ནི། སྔར་བཞིན་བསར་སྦྱངས་སྟོང་པའི་ངང་ལས་རྡོ་རྗེ་རྩེ་ལྔ་པའི་ལྟེ་བ་ལ་ཀུན་ཏུ་བཟང་པོ། ཡར་གྱི་རྭ་ལྔ་ལ་རིགས་ཀྱི་ཡབ་ལྔ། མར་གྱི་རྭ་ལྔ་ལ་རིགས་ཀྱི་ཡུམ་ལྔ། ཡས་མས་ཀྱི་པདྨའི་འདབ་མ་བརྒྱད་ལ་སེམས་དཔའ་བརྒྱད་དང་སེམས་མ་བརྒྱད། དྲིལ་བུའི་ལྟེ་བ་དང་པད་མའི་འདབ་མ་བརྒྱད་ཀྱི་ཕྱོགས་བཞིར་རིགས་ཀྱི་ཡུམ་ལྔ། མཚམས་བཞིར་གསང་བའི་ཡུམ་བཞི། ཞལ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། རྩེ་མོ་རྡོ་རྗེ་རིགས་ཀྱི་ཡབ་ལྔ་རྣམས་ཀྱི་སྐུར་གསལ་བར བ་སྐྱེད་ལ། བསྐུར། རློབ། དབབ། དྲངས། བསྟིམ། བརྟན། མཆོད་ནས། ཧཱུྃ་ཨཱཿ ཞེས་བརྗོད་པས་ལྷ་རྣམས་འོད་དུ་ཞུ། བཛྲ་གྷཎྜ། ཞེས་བརྗོད་པས་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ་དང་། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ཧཱུྃ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་གཉིས་མེད་པའི། །འཁོར་དང་མྱ་ངན་འདས་པ་ཡིས། །ཆོས་ལ་དེ་བཞིན་དབང་སྒྱུར་ཤོག །ཅེས་བརྗོད་ཅིང་། རྡོ་རྗེ་གསོར། དྲིལ་བུ་དཀྲོལ་བར་བྱའོ། །དེ་ནས་ཐོད་ཆུའི་རབ་གནས་ནི། སྔར་བཞིན་བསང་སྦྱངས། སྟོང་པའི་ངང་ལས་དམ་རྫས་ཀྱི་སྟེང་དུ། ཧཱུྃ་ༀ་སྭཱ་ཨཱྃ་ཧཱྃ་ལས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དེ་བཞིན་གཤེགས་པ་ལྔ་རེ་རེ་ཡང་རིགས་ལྔའི་རང་བཞིན་དུ་འཆར་བར་བསམ་ལ། བསྐུར། རློབ། དབབ། དྲང་། བསྟིམ། བརྟན། མཆོད་ལ་འབྲུ་ལྔ་བརྒྱ་རྩ་སོགས་བཟླས་པའི་མཐར། ཧཱུྃ་ཞེས་བརྗོད་པས་འོད་དུ་ཞུ་བ་ཡེ་ཤེས་ཀྱི་བདུད་རྩིར་འཁྱིལ་བར་བསམ་མོ། །དེ་ནས་ཚོན་ལྷག་གནས་ནི། དགོས་ཆེད། རྒྱུ། གྲངས། རབ་གནས། དགྱེ་ལུགས། ཉེས་སྤོང་དང་དྲུག་ལས། དགོས་ཆེད་ནི། མཚོན་བྱ་ཡེ་ཤེས་ལྔ་མཚོན་བྱེད་རྡུལ་མཚོན་དུ་བསྟན་པའོ། །རྒྱུ་ནི། རབ་ཨིནྡྲ་ནཱི་ལ་ལ་སོགས་པ་རིན་པོ་ཆེ་ལྔའི་ཕྱེ་མ་དང་། འབྲིང་འབྲས་ལ་སོགས་པའི་ཕྱེ་མ་ལ་དེ་དག་བསྲེས་པ་དང་། ཐ་མ་སོ་ཕག་ལ་སོགས་པའི་ཕྱེ་མ་སྟེ་ཚོན་སྣ་ལྔས་ཁ་དོག་བསྒྱུར་བའོ། །གྲངས་ནི། ཚོན་སྣ་ལྔ་སོ་སོ་ལ་ལྔ་ཚན་དུ་ཕྱེ་བའམ། ལྔ་ཚན་གཅིག་གིས་ཀྱང་ངོ་། །རབ་གནས་ནི། བསང་སྦྱངས། སྟོང་པའི་ངང་ལས་ཚོན་སྣ་ལྔའི་སྟེང་དུ། ཧཱུཾ་ༀ་སྭཱ་ཨཱཾ་ཧཱཾ། མཱུཾ་ལཱཾ་མཱཾ་པཱཾ་ཏཱཾ་རྣམས་གནས་པར་གྱུར། སྥ་ར༴ སཾ༴ འཕྲོ་འདུས་སོ་སོའི་ཕྱག་མཚན་ས་བོན་གྱིས་མཚན་པ་རྣམས་སུ་གྱུར་པ་ལས་དེ་བཞིན་གཤེགས་པ་རིགས་ལྔ་ཡུམ་དང་བཅས་པའི་སྐུར་གྱུར་པར་བསམ་ཞིང་། བསྐུར། །རློབ། དབབ། དྲངས། བསྟིམ། བརྟན། མཆོད་པ་རྣམས་བྱས་ལ། ༀ་ཨཱཿསརྦ་པཉྩ་རཏྣ་ས་མ་ཡེ་ཧཱུཾ་ཧཱུཾ། ཞེས་ཅི་ནུས་བཟླས་པའི་མཐར། ཧཱུཾ་ཞེས་བརྗོད་པས་ལྷ་རྣམས་འོད་ཞུ་ནས་རིན་པོ་ཆེའི་རྡུལ་ཕྲ་རབ་ཀྱི་རྡུལ་ཚོན་འབར་བར་བསམ་ཞིང་། བྲིས་པའི་ཡིག་འབྲུ་རྣམས་ཀྱང་མི་མངོན་པར་སྤུངས་ཤིང་བསྣུན་པར་བྱའོ། །དགྱེ་བ་དང་ཉེས་སྤོང་ནི་འོག་ཏུ་བསྟན་ནོ། །གཉིས་པ་ཡན་ལག་ཅན་གྱི་རབ་གནས་ལ། བུམ་པ། སློབ་མ། ལྷ་ལྷག་པར་གནས་པ་དང་གསུམ་ལས། དང་པོ་བུམ་པའི་རབ་གནས་ལ། ཤོམ་དང་། རབ་གནས་དངོས་གཉིས་ལས། དང་པོ་ནི། གསེར་དངུལ་ཟངས་ལ་སོགས་པའི་བུམ་པ་མི་གནག་ཅིང་གསུས་པ་ཆེ་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ཞབས་ཞུམ་པ་ལ་སོགས་པའི་ཚད་དང་མཚན་ཉིད་ཅན་ལྷའི་གྲངས་དང་མཉམ་པའམ། ཡང་ན་རིགས་ཀྱི་དབྱེ་བསྡུས་ལྷའི་བུམ་པ་ལྔ་དང་སྔར་བཤད་པའི་ལས་ཀྱི་བུམ་པ་དང་དྲུག །དེ་ཡང་མེད་ན། རྣམ་པར་རྒྱལ་བ་དང་། ལས་བུམ་སྟེ་གཉིས་སོ། །དེ་དག་ཐོག་མར་གཙང་ཞིང་དག་པར་བྱས་ལ། གུ་གུལ་གྱིས་བདུག །ལས་སྔགས་བཟླ་ཞིང་ཡུངས་ཀར་གྱིས་བྲབ་པས་བགེགས་བསྐྲད་ལ། ཆུ་གཙང་མ་སྲོག་ཆགས་མེད་པ་དྲི་བཟང་དང་སྦྱར་བ་ཀུན་བཟང་ཡབ་ཡུམ་གྱི་སྔགས་བཟླ་བཞིན་དུ་སུམ་གཉིས་ཀྱི་ཚད་དུ་ལོངས་པར་བཀང་བ་ལ། ལན་ཚ། སྦྲང་རྩི། བུ་རམ། ཨ་འབྲས། མར་ཧེ་སྙིང་པོ་ལྔ། ཧ་ས་དེ་བ། གྲྀ་ཧ་ཏི། སྭ་ད། ཀཎྜ་ཀ་རི། ཨ་པ་ར་ཚེ་ཏ་སྟེ་སྨན་ལྔ། གསེར་དངུལ་ལ་མུ་ཏིག་བྱུ་རུ་མུ་མེན་ཏེ་རིན་པོ་ཆེ་ལྔ། ནས་འབྲས་གྲོ་ཏིལ་སྲན་མ་སྟེ་འབྲུ་ལྔ། གུར་གུམ་གླ་རྩི་ཛ་ཏི་ཙནྡན་དཀར་དམར་ཏེ་དྲི་ལྔའོ། །དེ་ལྟར་ལྔ་ཚན་ལྔ་པོ་རྣམས་སྡེ་ཚན་རེ་རེ་རིམ་པ་བཞིན་མི་བསྐྱོད་པ་དང་། རྣམ་སྣང་དང་། རིན་འབྱུང་དང་། མཐའ་ཡས་དང་། དོན་གྲུབ་རྣམས་ཀྱི་སྔགས་ཀྱིས་རིམ་པ་བཞིན་གཞུག་པའམ། རྫས་སྔགས་ཅིག་ཅར་དུ་དྲིལ་བས་ཀྱང་རུང་ཞིང་། རང་མདོག་དང་མཚུངས་པའི་ན་བཟའ་ཟུང་གིས་མགུལ་ཆིངས་སེམས་དཔའི་སྔགས་ཀྱིས་དཀྲི། ཡལ་ག་དང་ལོ་མ་དང་འབྲས་བུར་བཅས་པའི་ཤིང་གིས་ཁ་བརྒྱན་སྒོ་བའི་སྔགས་ཀྱིས་གཞུག །མེ་ཏོག་གི་ཕྲེང་བ་དང་ལྡན་པའི་གཟུགས་ཐག་རྡོ་རྗེ་ཐུབ་པ་དྲུག་གི་སྔགས་ཀྱིས་བཞག །བུམ་པ་ལྷ་གྲངས་དང་མཉམ་པ་ལ་ནི་སོ་སོའི་ཕྱག་རྒྱའི་མཚན་མ་རྣམས་དགོད་ཅིང་། དཀྱིལ་འཁོར་གྱི་ལྷ་གནས་འབྱུང་འགྱུར་སོ་སོར་ཀུ་ཤའི་གདན་ལ་ཕྱོགས་མ་འཆོལ་བར་བཞག །བུམ་པ་ལྔ་པའི་ཚེ་ན་རིགས་ལྔའི་མཚན་མ་སོ་སོར་བཀོད་ལ་དཀྱིལ་འཁོར་གྱི་དབུས་དང་ཕྱོགས་བཞིར་བཞག །བུམ་པ་གཅིག་ལས་མེད་ན་མཚན་མ་རྣམས་དེ་ལ་བཀོད་ནས་དཀྱིལ་འཁོར་གྱི་གཙོ་བོའི་གནས་སུ་བཀོད། མཐའ་མཆོད་པ་རྣམས་ཀྱིས་ཇི་ལྟར་མཛེས་པར་བསྐོར། ལས་བུམ་སྒོའི་ནང་རོལ་གྱི་གཡས་སམ་རང་གི་མདུན་སོགས་གང་བདེར་བསང་གཏོར་གྱི་དོན་དུ་བཞག་གོ། །གཉིས་པ་ནི། བུམ་པ་རྣམས་ལས་ཐམས་ཅད་པས་བསང་། ཤཱུ་ནྱ་ཏས་སྟོང་པར་སྦྱང་། སྟོང་པའི་ངང་ལས་བྷྲཱུྃ་ལས་བྱུང་བའི་རིན་པོ་ཆེའི་བུམ་པ་ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ་ལྷ་རྫས་ཀྱི་གོས་ཀྱི་མགུལ་ཆིངས་དང་། དཔག་བསམ་ཤིང་གིས་ཁ་རྒྱན་དང་ལྡན་པའི་ནང་དུ། ༀ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་བཟླས་པས་ལྷའི་ཆུ་བོ་གདྒཱ་དང་བུམ་ཆུ་དབྱེར་མེད་པར་མོས་ལ། བུམ་པ་ལྷ་གྲངས་དང་མཉམ་པ་ཡོད་ན་སོ་སོའི་གདན་ལ་ལྷ་དེ་དང་དེ་བསྐྱེད་ཅིང་། ལྔ་ཡོད་ན་དབུས་མར་མི་བསྐྱོད་པ་དང་། ཀུན་བཟང་ཡབ་ཡུམ། ཐུབ་པ་དྲུག །ཤར་མར་རྣམ་སྣང་། ས་སྙིང་། བྱམས་པ། གཤིན་རྗེ་གཤེད་རྣམས་ཡུམ་བཅས། ལྷོ་མར་རིན་འབྱུང་། ནམ་སྙིང་། སྒྲིབ་སེལ། སྟོབས་པོ་ཆེ་རྣམས་ཡུམ་བཅས། ནུབ་མར་སྣང་མཐའ། ཀུན་བཟང་། སྤྱན་རས་གཟིགས། རྟ་མགྲིན་རྣམས་ཡུམ་བཅས། བྱང་མར་དོན་གྲུབ། ཕྱག་རྡོར། འཇམ་དཔལ། བདུད་རྩི་འཁྱིལ་བ་རྣམས་ཡུམ་བཅས་བསྐྱེད་ཅིང་། བུམ་པ་གཉིས་པའི་ཚེ་རྣམ་རྒྱལ་བུམ་པའི་ནང་དུ། ལྷ་རང་རང་གི་གདན་གྱི་སྟེང་དུ། ཧཱུཾ་ༀ་སྭཱ་ཨཱཾ་ཧཱ། མཱུཾ་ལཱཾ་མཱཾ་པཱཾ་ཏཱཾ། ཀྵིཾ་ཏྲཾ་ཧྲཱིཾ་ཛིཾ། ཧཱུྃ་ཏྲཾ་ཧྲཱིཾ་ཨཱཾ། མེ་ཐླྷིཾ་ཧཱུྃ་མཱུཾ། ཛ་ཧཱུྃ་བྃ་ཧོཿ ཧཱུྃ་ཧཱུྃ་ཧཱུྃ་ཧཱུྃ། ཛཿཧཱུྃ་བྃ་ཧོཿ ༀ་ཨ། ཀྲཱིཾ་ཏྲུཾ་སྲུཾ་པྲཾ་ཀྵཾ་ཡེ་རྣམས་གནས་པར་གྱུར། སྥ༴ སཾ༴ འཕྲོ་འདུས་ཡོངས་སུ་གྱུར་པ་ལས་སོ་སོའི་ཕྱག་མཚན་ས་བོན་གྱིས་མཚན་པ་རྣམས་སུ་གྱུར། སྥ༴ སཾ༴ སླར་ཡང་འཕྲོ་འདུས་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ྄་སོགས་སོ་སོའི་བསྐྱེད་སྔགས་རྣམས་རིམ་པ་བཞིན་བརྗོད་པས། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་ཏེ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་གྱི་འཁོར་ལོ་ཐམས་ཅད་ཡོངས་སུ་རྫོགས་པར་གསལ་བར་བསམ་ལ། བསྐུར། རློབ། དབབ། དྲངས། བསྟིམ། བརྟན། མཆོད་པ་རྣམས་བྱས་ནས། གཟུངས་ཐག་ལ་འཇུས་ཏེ། བདག་གི་ཞལ་ནས་སྔགས་ཀྱི་ཕྲེང་བ་གཟུངས་ཐག་ལ་འཁྲིལ་ཏེ་སོང་བས་བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། སྙོམས་པར་ཞུགས་པའི་བྱང་སེམས་ཡེ་ཤེས་ཀྱི་བདུད་རྩིར་བབས་པས་བུམ་པ་གང་བར་བསམ་ཞིང་། ལྷ་སོ་སོའི་སྔགས་གཙོ་འཁོར་གྱི་འགྲོས་སྦྱར་བ་ཅི་ནུས་སུ་བཟླས་པའི་མཐར། གཙོ་བོའི་སྔགས་ལན་བདུན་བཟླས་ནས་སྔར་གྱི་ཐོད་ཆུ་བུམ་ནང་དུ་ཕུལ་བས། ལྷ་ཐམས་ཅད་ཆགས་པ་ཆེན་པོས་ཡེ་ཤེས་ཀྱི་བདུད་རྩིར་ཞུ་བ་བུམ་ཆུ་དང་རོ་གཅིག་ཏུ་གྱུར་པར་བསམ་ཞིང་། བདུག་སྤོས་ཀྱི་བདུག་པར་བྱའོ། །གཞན་དུ་འདིར་སྔགས་ཀྱིས་བ ཏབ་པའི་མེ་ཏོག་དཀར་པོ་གཞུག་པར་ཡང་བཤད་དོ། །སློབ་མ་དབང་བསྐུར་དང་། རབ་གནས། བདག་འཇུག་ཙམ་དང་། བསྒྲུབ་པ་དངོས་གྲུབ་ཀྱི་དབང་ལེན་པ་རྣམས་ལ་བུམ་པ་ངེས་པར་འཆའ་དགོས་མོད། སྒྲུབ་མཆོད་ཙམ་ལ་ངེས་པར་དགོས་པ་མ་ཡིན་ཀྱང་འགྲུབ་ན་ནི་ལེགས་སོ། །གཉིས་པ་སློབ་མ་ལྷག་པར་གནས་པའི་ཆོ་ག་ནི་དབང་ཆོག་ཏུ་ཤེས་པར་བྱའོ། །གསུམ་པ་ལྷ་ལྷག་པར་གནས་པའི་ཆོ་ག་ནི། ས་བཟུང་བའི་ས་ཁོངས་སྨོས་པ་ཉིད་དེ། དེ་ལ་ཐིག་གདབ་པ་དང་། ལྷག་གནས་དངོས་ལས། དང་པོ་ནི། ལྷག་གནས་བྱས་པའི་བུམ་པ་རྣམས་དབེན་པར་བཞུགས་སུ་གསོལ་ནས། ཐོག་མར། ༀ་ཨཱཿཧཱུཾ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་ལས་བུམ་གྱི་ཆུས་དཀྱིལ་འཁོར་གྱི་གཞི་ལ་བསང་གཏོར་བྱས་ནས་བདུད་རྩི་དང་བཅས་པའི་དྲིས་བྱུག་ཅིང་འབྲི་བར་འགྱུར་བའི་དཀྱིལ་འཁོར་ནམ་མཁའ་ལ་གསལ་བར་དམིགས་ཏེ། དམ་ཚིག་གི་ཐིག་སྐུད་དྲི་ཞིམ་པོའི་ཐིག་ཆལ་ལས་ཕྱུངས་པ་ཆོ་ག་བཞིན་དུ་གཏོང་ལེན་བྱས་ལ། དང་པོར་ཤར་ནུབ་ཚངས་ཐིག་གདབ། །དབུས་ནས་ཕྱོགས་བཞིར་མཚན་མ་བྱ། །ཤར་ནུབ་ཚད་ནས་གཉིས་པ་དང་། །ཕྱོགས་བཞིའི་ཚད་ནས་ཟུར་ཐིག་བཙལ། །ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་ལས། །རྩ་བའི་བརྒྱད་ཆ་སྒོ་ཡིན་ཏེ། །སྒོ་ཡི་བཞི་ཆ་ཆ་ཕྲན་ནོ། །ཚངས་ཐིག་ནས་བཟུང་དང་པོ་དང་། །དྲུག་པ་ཕྱེད་གདབ་ཕྱི་མ་བསིལ། །གཉིས་བདུན་བརྒྱད་རྣམས་ཆ་བཞི་དང་། །ལྔ་དགུ་དབུས་དོར་མཐའ་གཉིས་གདབ། །གསུམ་པ་མི་གདབ་བཞི་པའི་ནང་། །ཆ་ཕྲན་གཅིག་ཏུ་གདབ་པར་བྱ། །དབུས་ནས་ཟླུམ་བསྐོར་ཆ་ཕྲན་ལྔ། །གཅིག་དང་ལྔ་དང་གཅིག་རྣམས་ནི། །ལྟེ་བ་མུ་ཁྱུད་རྩིབས་རྩིབས་བརྟེན། །གྲུ་ཐིག་ཕྱི་རུ་ཆ་ཕྲན་གཅིག །སྲིད་དུ་སྒོ་ཚད་གློ་འབུར་ཏེ། །དེ་ནས་རིམ་བཞིན་ཁྱམས་རྩིག་ལ། །འདོད་སྣམ་ཕ་གུ་དྲྭ་ཕྱེད་དང་། །ཤར་བུ་མདའ་ཡབ་རྣམས་ཀྱི་ས། །སྒོ་ཁྱུད་ཆ་ཆེན་འགྲམ་དང་ལོགས། །དེ་ཡི་ཕྱེད་ཡིན་མུན་པ་དང་། །ཀ་བ་ཀ་རྒྱན་ཆ་ཕྲན་རེ། །རྟ་བབས་བརྒྱད་པོ་ཆ་མཉམ་ལས། །དང་པོ་ཀ་རྒྱན་མཐའ་དང་མཉམ། །གཉིས་གསུམ་དེ་ལས་གཅིག་ཕྱིར་བཀྱེད། །བཞི་པ་གཉིས་བསྐུམ་ལྔ་པ་གཅིག །ཕྱིར་འཕྱར་དྲུག་པ་གཉིས་སུ་བསྐུམ། །བདུན་བརྒྱད་རིམ་བཞིན་རེ་རེ་འཕྱར། །རིམ་པར་རྟ་རྐང་ཆུ་སྐྱེས་དང་། །སྒྲོམ་དང་ཟ་ར་ཚགས་སྣ་འཕྱོང་། །སྒྲིལ་འཕྱང་ཤར་བུ་ཁྱུང་མགོའོ། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཛོམ་ས་ནས་བཟུང་སྟེ། །ཆ་ཕྲན་གཉིས་ཀྱིས་གླང་རྒྱབ་དབུས། །མུན་པའི་ཕྱི་ཐིག་ཚངས་གནས་ཀྱི། །གཡས་གཡོན་ཆ་ཕྲན་གཉིས་འདས་ནས། །སྔར་བཞིན་བསྐོར་བ་མུན་པའི་མཐོངས། །མུ་རན་ཆ་ཕྲན་གཅིག་གིས་བསྐོར། །འཁོར་ལོ་གཉིས་འགྱུར་པདྨ་དང་། །གདུགས་ནི་ཆ་ཕྲན་རེ་རེའོ། །མདའ་ཐིག་ཟུར་ནས་ཆ་ཕྲན་གཅིག །དོར་མཐར་གཅིག་དང་གཉིས་གཉིས་དང་། །ཆ་ཆེན་གཅིག་ཏུ་བསྐོར་བ་ནི། །རྩིབས་རྟེན་པདྨ་རྡོ་ར་དང་། །མེ་ཡི་ར་བ་རྣམས་ཀྱི་ས། །རྩ་ཐིག་སྒོ་ཁྱུད་འཛོམ་རྩེ་ནས། །རྩིབས་བརྟེན་ཚངས་ཐིག་འཛོམ་པའི་བར། །གཡས་ནས་གཅིག་ཤོས་གཡོན་ནས་གཡས། །བསྐོར་བ་འོག་གཞིའི་འཁོར་ལོའི་རྩིབས། །ཞེས་པ་སྟེ། གདབ་པའི་ཆོ་ག་དང་། སྤྱོད་ལམ་ནི་ཡེ་ཐིག་གི་སྐབས་བཞིན་འདིར་ཡང་ཤེས་པར་བྱ་བ་ཉིད་དོ། །དམ་ཡེའི་ཐིག་འདེབས་ཚུལ་འབྲེལ་བར་འོག་ཏུ་གསུངས་ཀྱང་ལས་ཐིག་མ་བཏབ་པར་སྟ་གོན་གྱི་ལྷ་གནས་ངེས་པ་མི་རྟོགས་པའི་ཕྱིར། འདིར་འདེབས་པ་ལག་ལེན་ནོ། །གཉིས་པ་ནི། ཐིག་གི་མཎྜལ་དེའི་མཐར་ལྷ་གྲངས་སོགས་ཅི་འབྱོར་བའི་མཆོད་པ་བཤམས་ལ། དཀྱིལ་འཁོར་གྱི་གནས་སུ་བདག་གི་ཐུགས་ཀའི་ས་བོན་ལས་སྤྲོས་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པར་བསྐྱེད་ལ། ལྷ་གནས་སོ་སོར་རང་རང་གི་སྔགས་བརྗོད་ཅིང་བྱང་སེམས་དཀར་དམར་ཙནྡན་དང་སྦྱར་བའི་ཐིག་ལེ་གཙོ་བོའི་གནས་སུ་གྲུ་བཞི་དང་། གཞན་རྣམས་སུ་ཟླུམ་པོར་བྱས་ལ། མེ་ཏོག་གི་ཚོམ་བུ་བཀོད་ནས། གདན་བསྐྱེད། བདག་ཉིད་དཀྱིལ་འཁོར་གྱི་དབུས་སུ་ཉི་མ་དང་ཟླ་བའི་གདན་ལ་འདུག་པར་མོས་ལ། གཙོ་བོ་ཡབ་ཡུམ་གྱི་ང་རྒྱལ་དང་ལྡན་པའི་སྒོ་ནས་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨོར་སྤྲོས་པ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་གྱི་འཁོར་ལོར་རྫོགས་པ་རྣམས་རང་རང་གི་གནས་ཇི་ལྟ་བར་བཞུགས་པར་བསམ་ལ། གདན་ལ་རྫོགས་དང་སེམས་དཔའི་ཚུལ། །ཞེས་སོགས་ཀྱིས་གསལ་གདབ། བསྐུར། རློབ། དབབ། དྲངས། བསྟིམ། བརྟན། མཆོད། བསྟོད་རྣམས་བྱས་ལ། སྤོས་དང་བཅས་པའི་རྡོར་དྲིལ་འཛིན་བཞིན་པས། མགོན་པོ་ཀུན་མཁྱེན་བདག་ཉིད་ཅན། །གཅིག་དང་དུ་མ་ཡོངས་གྲོལ་ཕྱིར། །མ་ལུས་བདག་ཉིད་དགོངས་སུ་གསོལ། །ཁྱེད་རྣམས་མོས་ཤིང་མཆོད་པ་དང་། །ཁམས་གསུམ་ཡོངས་སུ་བཟུང་བྱ་ཞིང་། །རང་བཞིན་མཉམ་པར་བྱ་བའི་ཕྱིར། །ཆེ་གེ་མོ་བདག་དཀྱིལ་འཁོར་གྱི། །ལས་རྣམས་ཡོངས་སུ་རྫོགས་པར་བགྱིད། །ཐུགས་རྗེས་ཉེ་བར་དགོངས་མཛད་དེ། །དཀྱིལ་འཁོར་བྱིན་གྱིས་བརླབས་ནས་ནི། །ས་འདི་ཡོངས་སུ་བཟུང་བར་མཛོད། །ༀ་བཛྲ་ས་མ་ཡ་སྟྭཾ། ཞེས་གསོལ་བ་བཏབ་པས་ལྷ་ཐམས་ཅད་དགྱེས་པར་རོལ་པའི་གཟི་བྱིན་མཐའ་ཡས་པས་དེ་ཉིད་དུ་ཐིམ་པས་ཐམས་ཅད་དཀྱིལ་འཁོར་གྱི་རང་བཞིན་དུ་གསལ་བར་བསམ་པ་དེ་དག་ནི་ལྷག་གནས་ཀྱི་ཆོ་ག་སྟེ་ནུབ་གཉིས་པའི་བྱ་བའོ། །གཉིས་པ་དངོས་གཞིའི་ཆོ་ག་ལ། དཀྱིལ་འཁོར་བྲི་བ། རྣམ་པ་དགོད་པ། རབ་གནས། སྦྱིན་སྲེག །སྒྲུབ་ཅིང་མཆོད་པ། དབང་བསྐུར་བའོ། །དང་པོ་ལ། ཐིག་གིས་བྲི་བ་དང་། ཚོན་གྱིས་བྲི་བ་གཉིས་ལས། དང་པོ་ནི། ནངས་པར་བེ་ག་ཀྲ་མ་ཡཾ་ཞེས་འདེགས་པའི་རྒྱས་སྟ་གོན་གྱི་ལྷ་ནམ་མཁར་བཏེགས་ལ། ཚོམ་བུ་རྣམས་གཞན་དུ་བསལ། སྔར་རབ་གནས་བྱས་པའི་ཡེ་ཤེས་ཀྱི་ཐིག་སྐུད་དེ་ཉིད་སློབ་དཔོན་བདག་པོའི་ང་རྒྱལ་གྱིས་ནུབ་ནས་ཤར་དང་། ཐིག་གཡོག་ཡུམ་དུ་མོས་པ་ཤར་ནས་ནུབ་ཏུ་ཕྱོགས་པ་ལ། གཡོན་བའི་ཁུ་ཚུར་གྱི་ལྟེ་བར་བཟུང་ནས། ཛཿཛཿཛཿཞེས་བརྗོད་པས་ཐིག་སྐུད་ཀྱི་རྩེ་མོ་ནས་གཡས་པས་བཟུང་བ་ཐིག་གཡོག་ལ་གཏོད་ཅིང་། དེས་ཀྱང་དེ་སྐད་བརྗོད་ཅིང་དྲངས་ལ་ཤར་ནུབ་ཀྱི་ཚངས་ཐིག་དང་པོ་དང་། ལྷོར་གནས་ཏེ་བྱང་དུ་བལྟ་བས་ཚངས་ཐིག་གཉིས་པ་དང་། མེར་གནས་ཏེ་རླུང་དུ་བལྟ་བས་ཟུར་ཐིག་དང་པོ་དང་། བདེན་བྲལ་ནས་དབང་ལྡན་དུ་བལྟ་བས་ཟུར་ཐིག་གཉིས་པ་དང་། མེར་གནས་ཏེ་བྱང་དུ་བལྟ་བས་ཤར་གྱི་རྩ་ཐིག་དང་། རླུང་ནས་ལྷོར་བལྟ་བས་ནུབ་ཀྱི་དང་། སླར་ཡང་རླུང་ནས་ཤར་དུ་བལྟ་བས་བྱང་གི་དང་། ཡང་མེ་ནས་ནུབ་ཏུ་བལྟ་བས་ལྷོའི་རྩ་ཐིག་སྟེ། ཐིག་ཆེན་བརྒྱད་པོ་ལས་ཐིག་གི་སྟེང་གི་ནམ་མཁའ་ལ་མཐེབ་འཛུབ་གཉིས་ཀྱིས་སེ་གོལ་གྱི་སྒྲ་དང་བཅས་པས་གདབ་ཅིང་། སྔགས་ནི་ཐམས་ཅད་ལ། ༀ་བཛྲ་སཱུ་ཏྲ་ས་མ་ཡ་མ་ཏི་ཀྲ་མ་ཧཱུཾ་ཕཊ། ཅེས་བརྗོད་པས་མཁའ་ཁབ་ཀྱི་རྒྱལ་བ་རྣམས་སད་ཅིང་ཡེ་ཤེས་ཀྱི་ཐིག་དམ་ཚིག་གི་ཐིག་ལ་རོ་མཉམ་དུ་གྱུར་པར་བསམ་མོ། །ཐིག་སྐུད་སྔར་གྱི་སྣོད་དུ་བཞག་པ་ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། དམ་ཚིག་གི་ཕྱག་རྒྱ་བཅས་ལ། བཛྲ་མུཿ ཞེས་པས་ཐིག་སྐུད་ཀྱི་ཡེ་ཤེས་པ་ནམ་མཁའི་ལྷའི་ཐུགས་ཀར་གཤེགས། ཡེ་ཐིག་ཐེབས་ནས་དེ་ལ་འགོ མ་དགོས་པ་བྱུང་ན། ཧྲཱིཿ ཞེས་སྒྲ་རིང་པོ་དང་། འདེགས་པའི་རྒྱས་ནམ་མཁར་བཏེག་པའི་འོག་ནས་འཛུལ་བར་མོས་ཤིང་། སྒོ་ཐད་ཀྱི་རྩ་ཐིག་ཕྱིས་ལ། སླར་ཡང་ཕབ་ལ་བསྟིམ་མོ། །ཐིག་གི་སྤྱོད་ལམ་ནི། སྐུད་པ་ཆད་ན་སློབ་དཔོན་འཆི། །ཐིག་སྣ་ཤོར་ན་སློབ་བུ་འཆི། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུན་ཆད་ལམ་ལ་གནོད་པར་འགྱུར། །དེ་ཕྱིར་མཁས་ལྡན་སྒྲིམས་ཏེ་བྱ། །ཞེས་བཤད་པ་བཞིན་ཤེས་པར་བྱའོ། །གཉིས་པ་ཚོན་གྱིས་བྲི་བ་ནི། དབང་ཕྱུག་རྒྱས་པའི་ཆས་སུ་ཞུགས་ཏེ། དཀྱིལ་འཁོར་གྱི་དབུས་སུ་ཕུར་བུ་དངོས་སུ་བཏབ་པ་ཡིན་ན་ཚོན་སྣ་ལྔ་འབྱུང་རིགས་སྡེབས་པ། མཱུཾ་ཏཱཾ་སོགས་རིམ་པར་བརྗོད་ཅིང་ཁུང་བུ་མཉམ་པར་བཀང་ལ་འབྱུང་བ་རིམ་བརྩེགས་སུ་སྒོམ། སླར་ཡང་གཡས་པའི་མཐེབ་སྲིན་གྱིས་ཚོན་རྩི་ལྔ་ཅུང་ཟད་བླངས་པ་གཡོན་པའི་མཐིལ་དུ་བཞག་ལ། ༀ་སརྦ་པཉྩ་རཏྣ་ས་མ་ཡ་ཧཱུྃ་ཧཱུྃ་ཞེས་བཟླས་ལ་གཡས་པའི་སོར་མོ་ལྔ་ལ་ཉི་མའི་སྟེང་དུ་དཔའ་བོ་འབྲུ་ལྔ་གནས་པར་བསམ་སྟེ་སོར་མོ་ལྔ་ཚོམས་ཀྱིས་གཡོན་པའི་ཚོན་རྩི་ཁུང་བུའི་སྟེང་དུ་བཀོད་ལ། དོན་ཡེ་ཤེས་ལྔ་མཚོན་པའི་རྟགས་རིན་པོ་ཆེ་ལྔ་ལས་གྲུབ་པའི་རི་རབ་ཏུ་གྱུར་པར་བསམ་མོ། །དེ་ནས་དཀྱིལ་འཁོར་གྱི་དབུས་སུ་གནས་པའི་གཡོན་པའི་ཁུ་ཚུར་གྱིས་དབང་ལྡན་ནས་བརྩམས་ཏེ་རྩིག་པ་ལྔ་ཕྱི་ནས་ལྗང་དམར་སེར་དཀར་སྔོ་བ་རྣམས་ཞེང་ཐིག་སྐུད་གང་དང་དཔངས་མཐེའུ་ཆུང་ཕྱེད་ཙམ་པ་མ་འདྲེས་ཤིང་སྙོམས་པ་སྒོ་ཚད་གཅིག་གི་ཚད་ཙམ་དུ་བྲིས་ཏེ་ཀ་པཱ་ལས་བཀབ་ནས་བཞག་གོ། །རྩིག་པ་སྦྲེལ་རན་པ་ན་ཁ་ཕྱེ་ལ་པྲ་བརྟག་སྟེ། ཀུ་ཀུ་རཱ་རྫས་མཉམ་སྦྱོར་དཀྱིལ་ཆོག་ཏུ། རེ་ཁཱ་དམའ་བས་མི་འགྲུབ་ཅིང་། །ཡོན་པོས་གདུང་བ་བསྐྱེད་པར་བྱེད། །ཆད་པས་སློབ་དཔོན་སློབ་མ་དག །འཆིའམ་ན་བར་འགྱུར་བ་ཡིན། །ཆད་ལྷག་ལས་ནི་ནད་བྱུང་ཞིང་། །ཕྱོགས་འཁྲུལ་རྨོངས་པའི་ལས་སུ་འགྱུར། །ཞེས་གསུངས་པ་ལྟར་ཤེས་པར་བྱ་ཞིང་། གལ་ཏེ་མ་འགྲུབ་ན། དེ་ཁོ་ན་ཉིད་ཀྱི་ཏིང་ངེ་འཛིན་གྱིས་སྐྱོན་ཐམས་ཅད་སེལ་བ་ཡིན་ནོ། །སློབ་དཔོན་གྱིས་རྫོགས་པར་བྲི་མི་ནུས་ན། སློབ་མ་རྣམས་ཀྱིས་ཀྱང་ལག་པ་བྱིན་རླབས་སྔར་བཞིན་བྱས་ནས་བྲི་བར་བྱ་སྟེ། དེ་ལ་དབུས་ཀྱི་ལྟེ་བ་མཐིང་ག །མུ་ཁྱུད། འོད་ཕྲེང་། རྩིབས། མཆན། གྲུ་ཆད། གློ་འབུར། བར་ཁྱམས། སྒོ། ཀ་བ་རྣམས་ཕྱོགས་མདོག །རྩིབས་བརྟེན་སྔོན་པོ་ལ་རྡོ་རྗེའི་ཕྲེང་བ། རྩིག་པ་ལྔ་སྦྲགས། འདོད་སྣམ་དམར་པོ། ཕ་གུ་སེར་པོ། དྲྭ་བའི་གཞི་ནག་པོ་ལ་དྲྭ་བ་དཀར་པོ། ཤར་བུ་གཞི་སྔོན་པོ་ལ་ཟ་ར་ཚགས་དཀར་པོ། མདའ་ཡབ་དཀར་པོ་མཆོད་རྟེན་རིས། མུན་པ་དང་གླང་རྒྱབ་ནག་པོ། རྟ་བབས་སྣམ་བུ་བརྒྱད་ཀྱི་རྟ་རྐང་གཞི་སྔོན་པོ་ལ་རྡོ་རྗེ་འགྲེང་བུ། ཆུ་སྐྱེས་དམར་པོ། སྒྲོམ་མཛེས་ཚོན། ཟ་ར་ཚགས་དཀར་པོ་ལ་གཞི་ནག་པོ། སྣ་འཕྱོང་སེར་པོ། སྒྲིལ་འཕྱང་གཞི་ནག་པོ་ལ་དྲ་བ་དཀར་པོ། ཤར་བུ་དཀར་པོ་སྔོན་པོའི་གཞིར་སྒྲིགས་པ། རྒྱ་ཕུབས་ཁྱུང་མགོ་མཐིང་ག །པདྨ་དམར་པོ། འཁོར་ལོ་དང་རི་དྭགས་སེར་པོ། གདུགས་དཀར་པོ། འོག་གཞིའི་འཁོར་ལོ་ཕྱོགས་མདོག །ཕྱི་ཁྱམས་ལྗང་ཁུ། གེ་སར་སེར་པོ། འདབ་མ་སྣ་ཚོགས། རྡོ་ར་གཞི་མཐིང་ག་ལ་རྡོ་རྗེ་དཀར་པོའམ་སེར་པོ། མེ་རི་སྣ་ཚོགས་སྒོ་དང་སྒོ་ཁྱུད་ཀྱི་མཚམས་བཞིར་ཟླ་ཕྱེད་རྡོ་རྗེ། རྟ་བབས་དང་མདའ་ཡབ་ཀྱི་ཁོར་ཡུག་ལ་རྒྱལ་མཚན་དང་བ་དན་ལ་སོགས་པ་དང་། སྒོའི་ཕྱི་རོལ་དུ་ཏཱ་ལའི་ལྗོན་པ། དཔག་བསམ་གྱི་ཤིང་། རིན་པོ་ཆེའི་ཕུང་པོ། ཁྲུས་ཀྱི་རྫིང་བུ་རྣམས་ཕྱོགས་རེར་གཉིས་གཉིས་རྣམས་སྤེལ་མར་བྲིས་ལ། ཚོན་གྱིས་བྲི་བའི་ལས་རྫོགས་པའི་མཐར། ཚོན་ལྷག་ཀུན་བཟང་། ཞབས་བསིལ། བཞི་བསྣོལ་སོགས་ཀྱིས་མཆོད་ནས། བཛྲ་མུཿས་ཡེ་ཤེས་པ་ནམ་མཁའི་ལྷའི་ཐུགས་ཀར་གཤེགས་ནས་དམན་པ་རྣམས་དབེན་པར་བཞག་གོ། །ཉེས་སྤོང་ནི། བག་མེད་གྱུར་པའི་ཉེས་པ་ཡང་། །བཤད་པའི་རྗེས་སུ་ཤེས་པར་བྱ། །ཞེས་པས་ཐིག་གི་སྐབས་སུ་བཤད་པས་མཚོན་ཅིང་། ཇི་བཞིན་པ་མ་འགྲུབ་ན་དེ་སེལ་བའི་གཉེན་པོའང་སྔར་བཤད་པ་བཞིན་ནོ། །གཉིས་པ་རྣམས་པ་དགོད་པ་ནི། རིན་པོ་ཆེའམ་ལྡེ་གུ་སོགས་ལས་བྱས་པའི་ལྷ་སོ་སོའི་སྐུ་བརྙན་ཡོད་ན་དེ་དང་དེའི་གནས་སུ་མ་འཆོལ་བར་དགོད་ཅིང་། མེད་ན་ཚོན་གྱིས་བྲིས་པའི་རྗེས་འབྲེལ་ཉིད་དུ་སྐུ་གཟུགས་སམ། ཡིག་འབྲུའམ། ཕྱག་མཚན་ནམ། རང་མདོག་དང་མཚུངས་པའི་ཐིག་ལེའི་རྣམ་པ་ཅན་གྱི་བར་ཅི་ནུས་སུ་བྲི་ཞིང་། དེ་ཡང་། གཙོ་བོའི་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་རིམ་པ་ཐ་དད་དུ་བྲི་ཚུལ་ཡང་བཤད་དོ། །གསུམ་པ་རབ་གནས་བྱ་བ་ལ་གསུམ་ལས། དང་པོ་བུམ་པའི་རབ་གནས་དང་། གཉིས་པ་སློབ་མ་རབ་གནས་གཉིས་གོང་དུ་སོང་། གསུམ་པ་དཀྱིལ་འཁོར་རབ་གནས་ལ་དཀྱིལ་འཁོར་བརྒྱན་པ་དང་། རབ་གནས་དངོས་ལས། དང་པོ་ནི། སྔར་ལྷག་གནས་བྱས་པའི་བུམ་པ་རྣམས་སྤོས་དང་རོལ་མོས་སྣ་དྲངས་ཏེ་དཀྱིལ་འཁོར་ལ་གཡས་སུ་བསྐོར་ནས་ལྷ་སོ་སོའི་གནས་རྣམས་སུ་མཉྫི་ལ་སོགས་པའི་སྟེགས་ལ་དགོད་ཅིང་། བུམ་པ་ལྔའམ་གཅིག་ཏུ་བསྡུས་པ་ལ་ནི་གཙོ་བོ་ལྔའི་གནས་སམ་དབུས་ཉིད་དུ་བཞུགས་སུ་གསོལ། ལས་བུམ་ནི། སློབ་དཔོན་གྱི་མདུན་དུའོ། །དེ་ནས་དཀྱིལ་འཁོར་གྱི་མཐའ་སྐོར་དྲི་བཟང་གིས་བྱུག་ཅིང་། མེ་ཏོག་གི་སིལ་མ་བཀྲམ། ཕྱོགས་ཀུན་ཏུ་བླ་རེ་དང་ཡོལ་བ་དང་། གདུགས་དང་། རྒྱལ་མཚན་དང་། བ་དན་སྣ་ཚོགས་པ་དང་། གོས་ཟུང་དུ་མས་བཀོད་ལེགས་སུ་བརྒྱན་པར་བྱ་ཞིང་། བདུག་སྤོས་དང་། མེ་ཏོག་དང་། མར་མེ་དང་། དྲི་ཆབ་རྣམས་ལྷ་གྲངས་དང་མཉམ་པ་དང་། གཞན་ཡང་ཞབས་བསིལ་ལ་སོགས་པ་ཕྱིའི་མཆོད་པ་རྣམས་དང་། སྨན་གཏོར་ལ་སོགས་པ་ནང་གི་མཆོད་པ་རྣམས་ཀྱང་ཅི་འབྱོར་བས་ཕྱིའི་ཁོར་ཡུག་རྣམས་མཛེས་པར་བྱ་སྟེ། བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །ཞེས་གསུངས་པ་བཞིན་ནོ། །སྐབས་འདི་དག་ཏུ་བགེགས་བསྐྲད་ཅིང་མཚམས་བཅད་པ། དཀྱིལ་འཁོར་བསྐྱེད་ནས་ལྷ་བསྟིམ་པ། སྒོ་དབྱེ་བ། ཕྱག་འཚལ་བ་རྣམས་ཆོ་ག་རྒྱས་པའི་ཡན་ལག་ཏུ་འབྱུང་ཡང་། རྩ་བའི་རྩིས་འགོས་མ་བསྡུས་པས་ཆད་པའི་དགག་ཆ་ཆུང་ཞིང་། འཇུག་པ་བདེ་བའི་དབང་དུ་བྱས་ནས་འདིར་དེ་ཙམ་མོ། །གསུམ་པ་རབ་གནས་དངོས་དང་། བཞི་པ་སྦྱིན་སྲེག་ནི། འདིར་རྒྱས་པའི་ལས་དང་སྦྲེལ་ཏེ་གཞན་དུ་བཤད་པ་བཞིན་བྱའོ། །ལྔ་པ་དཀྱིལ་འཁོར་སྒྲུབ་པ་ལ། སྔོན་དུ་བྱ་བ་དང་། སྒྲུབ་པ་དངོས་དང་། མཆོད་བསྟོད་སོགས་བྱ་བ་དང་། ཛཔ྄་བཟླ་བ་དང་བཞི་ལས། དང་པོ་ནི། རྣལ་འབྱོར་པ་རྣམས་ཁྲུས་བྱས། ལུས་དྲི་ཞིམ་པོས་བྱུག །སློབ་དཔོན་དཀྱིལ་འཁོར་གྱི་ཤར་ངོས་སུ་ཕྱོགས་པ་དང་། གཞན་རྣམས་ཀྱང་ཇི་ལྟར་འོས་པར་འདུག་ནས། ཐོག་མར་རྒྱུད་སྦྱང་བ་ནས་བཟུང་མཆོད་རྫས་བྱིན་གྱིས་རློབ་པའི་བར་སྔོན་དུ་བྱ་བའོ། །གཉིས་པ་ལ། བདག་མདུན་ཐ་དད་དུ་སྒྲུབ་པ་དང་། ཐ་མི་དད་དུ་སྒྲུབ་པ་གཉིས་ལས། དང་པོ་ནི། བདག་གི་རྣལ་འབྱོར་བཟླས་པའི་བར་བྱས་ནས། དེའི་ཉེར་བསྡུའི་ན་ད་ཤིན་ཏུ་ཕྲ་བའི་དེ་ཁོ་ན་ཉིད་དང་། མདུན་བསྐྱེད་ལ་ལྟོས་པའི་དེ་བཞིན་ཉིད་ཀྱི་ཏིང་ངེ་འཛིན་མཚམས་སྦྱར་ནས་སླར་ཡང་མདུན་བསྐྱེད་སྒྲུབ་པར་མཛད་མོད། འདིའི་གཞུང་དུ་གསལ་བར་མ་བཤད་ཀྱང་། དོན་གྱི་དགོངས་པ་ལུགས་ཕྱི་མ་ལྟར་གནས་པ་ལས་འདིར་དེ་ལྟར་བྱ་སྟེ། དེ་ལ་བསྒྲུབ་གཞི་བདག་དང་། བྲིས་པའི་དཀྱིལ་འཁོར་གཉིས་སྒྲུབ་ཆོས་ཏིང་ངེ་འཛིན་གསུམ་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པའི་བར་གྱི་གདོད་ནས་དག་ཅིང་གྲུབ་པའི་དམ་ཚིག་གི་དཀྱིལ་འཁོར་བདག་མདུན་དབྱེར་མེད་དུ་གསལ་བཏབ་ལ། དབང་བསྐུར་བ་དང་། བྱིན་གྱིས་རློབ་པ། ཡེ་ཤེས་པ་སྤྱན་དྲངས་ཤིང་བསྟིམ་པ་རྣམས་སྒྲུབ་ཐབས་བཞིན་ཤེས་པར་བྱ་བ་ལས། དཀྱིལ་འཁོར་རབ་གནས་སོགས་དང་མ་འབྲེལ་བའི་སྒྲུབ་མཆོད་ཕལ་པ་ཙམ་ལ་སྔར་ནམ་མཁའ་བཞུགས་པའི་སྟ་གོན་གྱི་དཀྱིལ་འཁོར་ཡང་སྤྱན་དྲངས་ནས་སྐབས་འདིར་བསྟིམ་པ་ནི་ཁྱད་པར་རོ། །གསུམ་པ་མཆོད་བསྟོད་སོགས་བྱ་བ་ནི། རང་ཉིད་དཀྱིལ་འཁོར་གྱི་གཙོ་བོ་ལས་གཙོ་བོ་གཉིས་པར་བྱ་བས་ཕྱག་མཆོད་ནས་བཟུང་། དམ་བཅའི་མཐར་ཐུག་གི་བར་སྒྲུབ་ཐབས་བཞིན་བྱས་ལ། བདག་ཉིད་རྡོ་རྗེ་སེམས་དཔའ་མདུན་བསྐྱེད་དང་རོ་གཅིག་ཏུ་གྱུར་པར་བསམ་མོ། །བཞི་པ་ཛཔ྄་བཟླ་བ་ལ། ས་བཅད་ཀྱི་ཆིངས་སྒྲུབ་ཐབས་བཞིན་ལས། ཛཔ྄་ཁང་དབྱེ་བའི་ཚེ། དབྱེ་གཞིའི་དཀྱིལ་འཁོར་གསལ་བ་ལས། བྷྲཱུྃ་བི་ཤྭ་སོགས་ཀྱིས་བདག་དམ་ཚིག་གི་འཁོར་ལོ་ལས་མདུན་བསྐྱེད་ཡེ་ཤེས་ཀྱི་འཁོར་ལོའི་ངོ་བོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབས་འབྱར་གྱི་ཚུལ་དུ་བཞུགས་པར་མོས་པ་ཙམ་སྟེ། དམིགས་པའི་རྣམ་པ་སྒྲུབ་ཐབས་དང་དབྱེ་བ་མེད་ཀྱང་། དོན་གྱི་ངོ་བོ་མི་འདྲ་བའི་གནད་ཤེས་པར་བྱའོ། །ཛཔ྄་བཟླ་བ་ན་དམ་ཡེ་འཕྲོ་འདུ་སྟེ་གསལ་བ་གསུམ་གྱི་ངང་ནས་ལྷ་སོ་སོའི་སྔགས་བཟླ་བའི་ཚེ་རིམ་པ་བཞིན། ཧཱུྃ། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཏིང་འཛིན་ཐུགས་སུ་དབང་བསྒྱུར་བས། །དངོས་གྲུབ་ལས་རྣམས་ཀུན་བྱེད་ཤོག །ཧཱུྃ་ཛྲ་དྷྲིཀ྄ །མཱུཾ་དྷྭ་ཏྭི་ཤྭ་རཱི། དེ་བཞིན་དུ། གཟུགས་ཕུང་ས་ཡི་ངོ་བོ་ཉིད། །སེམས་ཕྱིར་༴ སྣང་མཛད་ཡབ་ཡུམ༴ ཏིང་འཛིན་སྐུ་རུ༴ དངོས་གྲུབ༴ ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཚོར་བ་ཆུ་ཡི༴ སེམས་ཕྱིར༴ འབྱུང་ལྡན༴ ཏིང་འཛིན་ཡོན་ཏན༴ དངོས་གྲུབ༴ སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། འདུ་ཤེས་མེ་ཡི༴ སེམས་ཕྱིར༴ མཐའ་ཡས༴ ཏིང་འཛིན་གསུང་༴ དངོས་གྲུབ༴ ཨཱཾ་ཨཱ་རོ་ལྀཀ྄ པཱཾ་རཱ་ག་ར་ཏི། འདུ་བྱེད་ལུང་གི༴ སེམས་ཕྱིར༴ དོན་གྲུབ༴ ཏིང་འཛིན་ཕྲིན་ལས༴ དངོས་གྲུབ༴ ཧཱཾ་པྲ་ཛྙཱ་དྷྲིཀ྄ །ཏཱཾ་བཛྲ་ར་ཏི། ཞེས་མཚོན་པ་ཙམ་སྟེ། སོ་སོའི་ཛཔ྄་བསྐུལ་དང་སྦྱར་ཏེ་རིམ་པ་བཞིན་གཙོ་འཁོར་གྱི་འགྲོས་སྦྱར་ནས་ཅི་ནུས་སུ་བཟླ་ཞིང་། སྐབས་ཀྱི་མཇུག་བསྡུ་བའི་ལས་རིམ་རྣམ་པ་གསུམ་ཡང་སྒྲུབ་ཐབས་བཞིན་ནོ། །དེ་དག་ནི་སྒྲུབ་ཅིང་མཆོད་པའི་ཆོ་གའོ། །དྲུག་པ་དབང་བསྐུར་བ་ལ། བདག་ཉིད་འཇུག་པ་དང་། སློབ་མ་ལ་དབང་བསྐུར་བའོ། །དང་པོ་ནི། སློབ་མ་འཇུག་པ་ཇི་ལྟ་བ་བཞིན་དཀྱིལ་འཁོར་དུ་ཞུགས་ལ་དབང་བླང་བའམ། རིག་པའི་མེ་ཏོག་དོར་བ་ཉིད་ཀྱིས་ཀྱང་འདིའི་དགོས་པ་འགྲུབ་ཅིང་། གང་གི་ཚེ་ཡང་སློབ་མ་འཇུག་པར་གནང་བ་ནོད་པ་རྣམས་སོ། །གཉིས་པ་སློབ་མ་གཞུག་ཅིང་དབང་བསྐུར་བ་ནི། དབང་གི་ཆོ་ག་ཟུར་དུ་འཆད་པ་ལས་ཤེས་པར་བྱའོ། །གསུམ་པ་རྗེས་ཀྱི་ཆོ་ག་ལ་ལྔ་ལས། དང་པོ་ཚོགས་མཆོད་དང་། གཉིས་པ་བརྟན་སྐྱོང་ནི་སྒྲུབ་ཐབས་ཀྱི་དཀྱུས་བཞིན་དང་། གསུམ་པ་ཉེར་བསྡུའི་ཚེ། གཏང་རག་གི་མཆོད་པ་བཤམས་ལ་བྱིན་གྱིས་བརླབ་སྟེ། ཀུན་བཟང་། ཞབས་བསིལ། བཞི་བསྣོལ་རྣམས་ཀྱི་མཆོད། བསྟོད་པ་རྒྱས་བསྡུས་ཅི་རིགས་པས་བསྟོད། ཡིག་བརྒྱ་དང་བཟོད་གསོལ་རྣམས་སྤྱི་དང་མཐུན་པར་བྱས་ལ། རས་བྲིས་ཡིན་ན་ཡེ་ཤེས་པ་བརྟན་བཞུགས་དང་། བྷྲཱུྃ་བི་ཤྭ་སོགས་ཀྱིས་དམ་ཚིག་གི་དཀྱིལ་འཁོར་གསལ་བཏབ་ལ། བཛྲ་ས་མ་ཡ་སྟྭཾ། ཞེས་སོགས་བརྗོད་ཅིང་དཀྱིལ་འཁོར་གྱི་འཁོར་ལོ་བསྡུས་ལ། གོ་བགོ། ལུས་བསྲུང་སོགས་མཐའ་རྒྱས་རྣམས་སྒྲུབ་ཐབས་ལྟར་བྱ་ཞིང་། རྡུལ་ཚོན་གྱི་ཆོ་ག་ཞག་སྦྲེལ་མར་བྱེད་པའི་ཉི་མ་སྔ་མ་རྣམས་ལའང་དེ་བཞིན་ནོ། །གཟུགས་བརྙན་གྱི་དཀྱིལ་འཁོར་གཤེགས་གསོལ་བྱེད་ན། བེ་གཱ་ཀྲ་མ་ཡཾ། ཞེས་པས་ཡེ་ཤེས་ཀྱི་འཁོར་ལོ་ནམ་མཁར་བཏེག་ནས། གཏང་རག་གི་མཆོདབསྟོད་དང་། བཟོད་གསོལ་སྔར་བཞིན་བྱས་ལ། ༀ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར་ཛྙཱ་ན་མཎྜལ་བཛྲ་མུཿ ཞེས་གཤེགས་སུ་གསོལ་ལ། དམ་ཚིག་གི་འཁོར་ལོ་སྔར་བཞིན་བསྡུས་ནས་གོ་ཆ་བགོ་ཞིང་ལུས་བསྲུང་བ་བྱས་ལ། ཆོས་ཐམས་ཅད་སྟོང་པ་ཉིད་དུ་མོས་ཏེ། རོལ་མོའི་སྒྲ་དང་བཅས་པས་ཨ་ཀཱ་རོ་བཟླ་ཞིང་། རྡོ་རྗེ་དང་བཅས་པའི་ལག་གིས་ཐོག་མར་ལྷ་མཚན་རྣམས་བསྡུས་ལ། ཅུང་ཟད་ཙམ་མགོ་བོར་བཀོད། ལྷག་མ་རྣམས་དབང་ལྡན་ནས་བརྩམ་སྟེ་གཙོ་བོའི་གནས་ཀྱི་བར་དུ་ཕྱགས་ལ་བུམ་པ་ལ་སོགས་པའི་སྣོད་བཟང་པོར་བླུགས་ནས་མཆོད་པ་དང་བཀུར་སྟི་ཆེན་པོས་ཆུ་ཀླུང་དུ་དོར། སླར་ཡང་སྣོད་དེ་ཉིད་ཆུས་བཀང་ནས་ནང་དུ་འོངས་ཏེ་དཀྱིལ་འཁོར་ཁང་པ་རྣམས་བསང་གཏོར་བྱ། དེ་ནས་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་བསྣོལ་བ་སྐམ་པའི་རྒྱས་འོག་གི་ཕུར་བུ་ནས་བཟུང་མས་རིམ་གྱིས་ཕྱུངས་ལ། སྤྱན་མའི་སྔགས་བཟླས་པའི་འོ་མས་ཕུར་རྩེ་བཀྲུ་ཞིང་ཁུང་བུ་རྣམས་ལའང་གཏོར་བས་བགེགས་རྣམས་བདེ་སྟོང་གི་ངོ་བོར་སངས་རྒྱས་པར་བསམ་མོ། །དེ་ནས་དགེ་བ་བསྔོ་ཞིང་སྨོན་ལམ་གདབ་པ་དང་། བཀྲ་ཤིས་བརྗོད་ཅིང་དགའ་སྟོན་བྱ་བ་ལ་སོགས་ཏེ་རྗེས་ཀྱི་བྱ་བ་རྣམས་གསང་བ་སྤྱིའི་འགྲོས་བཞིན་མཐའ་རྒྱས་སུ་བྱའོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་བསྒྲུབས་པ་དང་། དེ་གྲུབ་པའི་ཚད་བསྟན་པ་སྟེ་སྒྲུབ་ཐབས་སུ་བཤད་པ་བཞིན་ཤེས་པར་བྱ་བ་ཡིན་ནོ། །ཁྱབ་བདག་རྡོ་རྗེ་སེམས་དཔའ་མཆོག་གི་ལམ། །སྲས་བཅས་རྒྱལ་བ་ཀུན་གྱིས་བགྲོད་པའི་ཞིང་། །གྲུབ་མཆོག་བྱེ་བའི་འཇུག་ངོགས་བླ་ན་མེད། །སྒྱུ་འཕྲུལ་དྲྭ་བ་གསང་ཆེན་མཆོག་གི་རྩེ། །དེ་ལས་བགྲང་ཡས་དངོས་གྲུབ་ཀུན་གྱི་གཞིར། །དང་པོར་འཇུག་དང་བར་དུ་ཉམས་ལེན་སྲོག །མཐར་ཐུག་འབྲས་བུ་མངོན་དུ་བྱེད་པའི་ཐབས། །ཀུན་ཀྱང་དཀྱིལ་འཁོར་ལས་དང་འབྲེལ་བའི་ཕྱིར། །རྣམ་དག་གཞུང་བཟང་ངེས་པའི་ཟབ་དོན་གནད། །དད་པའི་སྙིང་ལ་ཆ་ཙམ་འཕོས་གྱུར་པས། །ཟབ་ཡངས་རྒྱུད་དོན་ཕ་མཐར་མཚོན་མིན་ཀྱང་། །རྒྱ་མཚོའི་ཆུ་ཐིགས་ཀྱིས་ཀྱང་གདུང་སེལ་བཞིན། །རང་དང་སྐལ་མཉམ་རྗེས་སུ་འབྲང་རྣམས་ལ། །ཕན་ཕྱིར་ཉུང་གསལ་སྙིང་པོར་དྲིལ་བའི་ངག །བརྗོད་འདིས་རྣམ་དག་ངོ་མཚར་རིན་པོ་ཆེའི། །ཕྲེང་བ་ཚར་དུ་དངར་བའི་དགའ་སྟོན་གྲུབ། །འདི་ལས་དཔལ་ལྡན་རྡོ་རྗེ་སེམས་དཔའ་ཆེ། །དབྱིངས་ཕྱུག་རྡོ་རྗེ་བཙུན་མོར་དགྱེས་རོལ་བའི། །དགའ་ཆེན་རོལ་མོ་རྟག་པའི་རྡོ་རྗེ་ཡིས། །མཁའ་མཉམ་འགྲོ་བ་ཡོངས་ལ་ཁྱབ་བྱེད་ཤོག །སྒྱུ་འཕྲུལ་དྲྭ་བ་ཞི་བའི་དཀྱིལ་འཁོར་གྱི་ཆོ་ག་རིན་པོ་ཆེའི་ཕྲེང་བ་ཞེས་བྱ་བ་འདི་ཡང་ཤིང་རྟ་ཆེན་པོ་སངས་རྒྱས་གསང་བའི་གཞུང་ཇི་ལྟ་བ་བཞིན་དུ་རིག་པ་འཛིན་པ་འགྱུར་མེད་རྡོ་རྗེས་རང་ལོ་ཞེ་བརྒྱད་པ་ལ་ཨོ་རྒྱན་སྨིན་གྲོལ་གླིང་གི་ཆོས་གྲྭར་སྦྱར་བའི་ཐོག་མའི་ཡི་གེ་པ་ནི་སྐད་གཉིས་སྨྲ་བའི་བཤེས་གཉེན་དྷརྨ་ཤྲཱིའོ།། །།

སྒྱུ་འཕྲུལ་ཞི་བའི་བསྙེན་པ།

༈ སྒྱུ་འཕྲུལ་ཞི་བའི་བསྙེན་པ་ནི། གཙོ་བོ་ལ། ཧཱུྃ་བཛྲ་དྷྲྀཀ྄ །མཱུྃ་དྷྭ་ཏྭེ་ཤྭ་རཱི། རིགས་བཞི་ཡབ་ཡུམ་ལ། ༀ་ཛི་ན་ཛིཀ྄ །ལྃ་དྭེ་ཥ་ར་ཏི། སྭཱ་རཏྣ་དྷྲྀཀ྄ །མཱྃ་མོ་ཧ་ར་ཏི། ཨཱཾ་ཨཱ་རོ་ལྀཀ྄ །པཱྃ་རཱ་ག་ར་ཏི། ཧཱ་ཱཔྲ་ཛྙཱ་དྷྲྀཀ྄ །ཏཱཾ་བཛྲ་ར་ཏི། བྱང་སེམས་བཅུ་དྲུག་ལ། ཀྵཱིཾ་ཧི་རཱ་ཛ་ཡ། ཧཱུྃ་ལཱ་སྱ་ས་མ་ཡ་སྟྭཾ། ཏྲཱྃ་ཨ་གརྦྷ་ཡ། ཏྲཱྃ་མཱ་ལེ་ས་མ་ཡ་ཧོཿ ཧྲཱིཾ་ཧཱ་ཧཱུྃ་པདྨ་པྲ་ད་མ། ཧྲཱིཾ་གཱིརྟི་ར་ཀོ྅་ཧཾ། ཛིཾ་ཀུ་རུ་པཱ་ཎ། ཨཱྃ་ནིརྟི་རཱ་ག་ཡ་མི། མཻ་དྷཱ་ར་ཎི་སྭཱ་ཧཱ། ཛཿདྷུ་པེ་པྲ་ཝེ་ཤ །ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུྃ་པུཥྤེ་ཨཱ་བེ་ཤ །ཧཱུྃ་ས་རཱ་ཛ་ཡ་སྭཱ་ཧཱ། བྃ་དཱི་པ་སུ་གི་རི། མཱུྃ་ཤྲཱི་ཨཾ་རཱ་གཱ་ཡ་སྭཱ་ཧཱ། ཧོ་གནྡྷེ་ཙིཏྟ། བྱེད་པོ་ཡབ་ཡུམ་དང་ཐུབ་དྲུག་ལ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུྃ་ཏྲུྃ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲེཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། སྒོ་བ་ཡབ་ཡུམ་བརྒྱད་ལ། ཧཱུྃ་ཡ་མཱནྟ་ཀྲྀཏ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུྃ་ཕཊ། ཧཱུྃ་པྲ་ཛྙཱནྟ་ཀྲྀཏ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུྃ་ཕཊ། ཧཱུྃ་པདྨཱནྟ་ཀྲྀཏཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཧཱུྃ་བིགྷྣཱནྟ་ཀྲྀཏ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། སྤྱི་ཛཔ྄་ནི། ༀ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ བཀྲ་ཤིས།། །།

དཔལ་གསང་བའི་སྙིང་པོ་རྡོ་རྗེ་སེམས་དཔའ་སྒྱུ་འཕྲུལ་ཞི་བའི་སྒྲུབ་ཐབས་རྣམ་གྲོལ་ཤིང་རྟ། འཇིགས་མེད་གླིང་པ།

དཔལ་གསང་བའི་སྙིང་པོ་རྡོ་རྗེ་སེམས་དཔའ་སྒྱུ་འཕྲུལ་ཞི་བའི་སྒྲུབ་ཐབས་རྣམ་གྲོལ་ཤིང་རྟ་ཞེས་བྱ་བ་བཞུགས། དཔལ་གསང་བའི་སྙིང་པོ་རྡོ་རྗེ་སེམས་དཔའ་སྒྱུ་འཕྲུལ་ཞི་བའི་སྒྲུབ་ཐབས་རྣམ་གྲོལ་ཤིང་རྟ་ཞེས་བྱ་བ་ལྷག་པ་ཏིང་ངེ་འཛིན་གྱི་དཀྱིལ་འཁོར་ལ་ཕྱག་འཚལ་ལོ། །ཐབས་ལས་ཐབས་གྱུར་བདེ་ཆེན་སྒྱུ་མ་ནི། །རྣམ་ཐར་གསུམ་ལྡན་བཙུན་མོའི་རྫུ་འཕྲུལ་ཅན། །གདན་གསུམ་སྒྱུ་འཕྲུལ་དྲྭ་བའི་མངོན་རྟོགས་ལ། །ཡིད་ཆོས་གཉིས་སུ་མེད་པའི་ཕྱག་གིས་བཏུད། །དེ་ལ་རྒྱུད་ཐམས་ཅད་ཀྱི་སྤྱི། །ལུང་ཐམས་ཅད་ཀྱི་མདུད། མན་ངག་ཐམས་ཅད་ཀྱི་མཛོད་ཁང་། ཏནྟྲ་སྡེ་བཅོ་བརྒྱད་ཀྱི་རྩ་བར་གྱུར་པས་ཨོ་རྒྱན་སངས་རྒྱས་གཉིས་པས་ཀྱང་མན་ངག་ལྟ་བའི་ཕྲེང་བར་ཆེད་དུ་བརྗོད་ཅིང་བསྔགས་ལ། སློབ་དཔོན་བི་མ་ལ་དང་། སངས་རྒྱས་གསང་བ། རྨ་གཉག་ལ་སོགས་པའི་ལོ་པཎ་རྒྱལ་བའི་ཞལ་སྐྱིན་རྣམས་ཀྱིས་བཤད་སྒྲུབ་ཀྱིས་གཏན་ལ་ཕབ་པ་དཔལ་གསང་བའི་སྙིང་པོ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས ། ཞི་བ་རིན་པོ་ཆེའི་སྒྲུབ་ཐབས་རྣམ་གྲོལ་ཤིང་རྟ་བསྟན་པ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལའང་དཀྱིལ་འཁོར་འདུ་བྱ་བ་དང་། ཆོ་གའི་སྦྱོར་བ་གཉིས་ལས། དང་པོ་ནི། དབང་སྒྲུབ་ཆེན་མོའི་རིགས་དང་འབྲེལ་ན་སའི་ཆོ་ག་ནས་བཟུང་རྡུལ་ཚོན་གྱི་དཀྱིལ་འཁོར་སྒྲུབ་པའི་ལས་རིམ་གཞན་དུ་ཤེས་པར་བྱ་ཞིང་། སྒྲུབ་མཆོད་འཇུག་པ་དེ་ཙམ་ལ་ནི་རྡུལ་ཚོན་གྱི་སྒོས་ཆོས་རྣམས་དོར་བའི་རས་བྲིལ་ལའང་བརྟེན་དུ་རུང་ངོ་། །གཉིས་པ་ལ་རྣམ་གྲངས་བདུན་ལས། དང་པོ་རྒྱུད་དག་པར་བྱ་བ་ནི། སྤྱི་ཕྱག་དང་གྲལ་ཕྱག་སྔོན་དུ་འགྲོ་བས། ༀ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། སོགས་ནས། ནོངས་པ་མཆིས་ནའང་རབ་ནོངས་བཟོད་པར་གསོལ། ཞེས་དམིགས་འདོན་ཟུང་དུ་ཆུད་པར་བྱའོ། །གཉིས་པ་ཚོགས་བསགས་པ་ནི། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་དབུལ་ལོ། །ཚེ་རབས་བགྲངས་བའི་དགེ་བ་རྣམས། །བསྡུས་ཏེ་བྱང་ཆུབ་ཆེན་པོར་བསྔོ། །ལན་གསུམ་གྱིས་རྗེས་ཚོགས་ཞིང་རང་ལ་བསྡུའོ། །གསུམ་པ་སྔགས་སྡོམ་བཟུང་ཞིང་དམ་བཅའ་བ་ནི། ཧོཿརྫོགས་སངས་རིན་ཆེན་དག་པའི་སེམས་ཉིད་དང་། །རྟོགས་པའི་དྲི་མ་རབ་བྲལ་དམ་པའི་ཆོས། །བརྟུལ་ཞུགས་བཟང་པོའི་ཚོགས་ལ་སྐྱབས་སུ་མཆི། །སྲིད་དང་བྲལ་བ་རྣམས་ལ་གུས་ཕྱག་འཚལ། །དེང་ནས་བདག་ནི་འགྲོ་ཀུན་ཉེར་འཚོའི་ཕྱིར། །མགོན་རྣམས་འབངས་སུ་བདག་ཉིད་འབུལ་ལགས་ཀྱི། །བརྩེ་བའི་ཐུགས་རྗེས་བཞེས་པར་མཛད་དུ་གསོལ། །བྱམས་པའི་ཞལ་བཟང་དུས་འདིར་གཟིགས་ནས་ཀྱང་། །འགལ་འཁྲུལ་ཉམས་ཆག་ཐམས་ཅད་བསྐང་དུ་གསོལ། །ཇི་ལྟར་སྔོན་གྱི་རྒྱལ་བ་སྲས་བཅས་དང་། །རིག་འཛིན་མཁའ་འགྲོ་རྒྱ་མཚོའི་ཚོགས་རྣམས་ཀྱིས། །ཕྱི་ནང་གསང་བ་མཆོག་གི་དམ་ཚིག་དང་། །སྡོམ་པ་རྒྱ་མཚོ་མཐའ་ཡས་བཟུང་བ་ལྟར། །དེང་ནས་བདག་ཀྱང་ལམ་ཆེན་དེར་ཞུགས་ཏེ། །འགྲོ་ལ་ཕན་ཕྱིར་དེ་དག་གཟུང་བར་བགྱི། །གདོད་ནས་མ་སྐྱེས་མཁའ་ལྟར་རྣམ་དག་ཅིང་། །མི་འགྱུར་ལྷུན་གྲུབ་རང་བྱུང་འོད་གསལ་ལ། །ཇི་བཞིན་མ་བཅོས་ཆོས་ཉིད་དོན་བསྒོམ་སྟེ། །ཆོས་སྐུ་ཡངས་པ་ཆེན་པོའི་མཁའ་དབྱིངས་སུ། །ཀུན་བཟང་དོན་གྱི་དམ་ཚིག་གཟུང་བར་བགྱི། །བདེ་བར་གཤེགས་པ་རིགས་ཀྱི་དམ་ཚིག་ཏུ། །སྡོམ་དང་ཆོས་སྡུད་སེམས་ཅན་དོན་བྱེད་ཅིང་། །བྱང་ཆུབ་སྙིང་པོ་རང་ལ་མཚོན་པའི་ཕྱིར། །ཆོས་ཀྱི་འཁོར་ལོའི་རྫས་ཀྱང་གཟུང་བར་བགྱི། །མི་འགྱུར་རྡོ་རྗེ་རིགས་ཀྱི་དམ་ཚིག་ཏུ། །རང་བཞིན་བསྐྱེད་རྫོགས་དོན་ལས་མི་འདའ་ཞིང་། །རྡོ་རྗེ་སློབ་དཔོན་མཆོག་ཏུ་བཀུར་བ་དང་། །ཐབས་དང་ཤེས་རབ་རང་ལ་མཚོན་པའི་ཕྱིར། །རྡོ་རྗེ་དྲིལ་བུའི་རྫས་ཀྱང་གཟུང་བར་བགྱི། །བསམ་འཕེལ་རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞིས་འགྲོ་ཀུན་བསྐྱང་བ་དང་། །བསོད་ནམས་ཡེ་ཤེས་ཚོགས་ཆེན་རྫོགས་བྱེད་ཅིང་། །ལྷུན་གྲུབ་ཡོན་ཏན་རང་ལ་མཚོན་པའི་ཕྱིར། །ནོར་བུ་རིན་ཆེན་རྫས་ཀྱང་གཟུང་བར་བགྱི། །མ་ཆགས་པདྨ་རིགས་ཀྱི་དམ་ཚིག་ཏུ། །ཕྱི་ནང་གསང་བའི་ཆོས་རྣམས་ཡོངས་གཟུང་ཞིང་། །འགྲོ་ལ་ཚད་མེད་སྙིང་རྗེས་ཆགས་པ་དང་། །སྐྱོན་བྲལ་ཆོས་ཉིད་རང་ལ་མཚོན་པའི་ཕྱིར། །ཡིད་འོང་པདྨ་མཆོག་ཀྱང་གཟུང་བར་བགྱི། །སྣ་ཚོགས་ལས་ཀྱི་རིགས་ཀྱི་དམ་ཚིག་ཏུ། །ཐེག་གསུམ་སྡོམ་པ་མཐའ་དག་བཟུང་བ་དང་། །དོན་གཉིས་ལྷུན་གྲུབ་རང་ལ་མཚོན་པའི་ཕྱིར། །རྒྱ་གྲམ་རལ་གྲི་མཆོག་ཀྱང་གཟུང་བར་བགྱི། །བླ་མེད་རྡོ་རྗེ་ཐེག་པའི་དམ་ཚིག་ཏུ། །ཟུང་འཇུག་ལམ་དུ་ཐམས་ཅད་བསླང་བ་དང་། །སྤང་བླང་མེད་པའི་རོལ་བ་མཚོན་པའི་ཕྱིར། །ཁ་ཊྭཱཾ་ཐོད་པ་ཅང་ཏེའུ་གཟུང་བར་བགྱི། །མདོར་ན་གང་གིས་འཁོར་བ་རྣམ་སྦྱོང་བ། །ཕུང་པོ་སྐྱེ་མཆེད་ཁམས་རྣམས་དག་བྱེད་ཅིང་། །དབང་པོའི་ཡུལ་དང་ཉོན་མོངས་རྣམ་སྦྱོང་བ། །སྐུ་ལྔ་ཡེ་ཤེས་ལྔ་དང་གསུང་ལྔ་དང་། །ཡོན་ཏན་ཕྲིན་ལས་རིགས་ལྔ་སྒྲུབ་པའི་རྫས། །ནང་གི་དགོངས་སྤྱོད་རྒྱ་མཚོ་མཐའ་ཡས་དང་། །ཕྱི་རོལ་དམ་རྫས་འདོད་ཡོན་ཐབས་ཆེན་ལྔ། །ཤ་ལྔ་བདུད་རྩི་ལྔ་ལ་སོགས་པ་དང་། །རྩ་བ་ཡན་ལག་དམ་ཚིག་ལྔ་རྣམ་ལ། །རྡོ་རྗེ་མཆོག་སྒྲུབ་སྐུ་གསུང་ཐུགས་གསུམ་དང་། །ཤེས་དང་མི་སྤང་དང་དུ་བླང་བ་དང་། །བསྒྲུབ་དང་སྤྱད་པར་བྱ་བ་ལྔ་ལྔ་སྟེ། །ཉི་ཤུ་རྩ་བརྒྱད་རྩ་བ་ཡན་ལག་བཅས། །གསང་སྔགས་རྡོ་རྗེ་སྙིང་པོའི་སྡོམ་པ་ཀུན། །དེང་ནས་བརྩམས་ཏེ་བདག་གིས་བསྲུང་བར་བགྱི། །གང་ལ་བརྟེན་ནས་སྲིད་པ་རྣམ་སྦྱོང་ཞིང་། །ཞི་བ་ཐར་པའི་དམ་པ་ཐབས་ཆེན་ཀུན། །འགྲོ་བའི་དོན་དུ་བདག་གིས་ཡོངས་སུ་གཟུང་། །སྲིད་ཞིར་མི་གནས་བྱང་ཆུབ་མཆོག་ཞུགས་ཏེ། །དཀྱིལ་འཁོར་དབང་ཕྱུག་རྡོ་རྗེ་སློབ་དཔོན་དང་། །དཔའ་བོ་རྣལ་འབྱོར་མ་ཀུན་མཆོད་པ་དང་། །ཚོགས་གཉིས་བརྩོན་པ་མཐའ་ཡས་རྒྱ་མཚོ་བསྒྲུབ། །འགྲོ་ལ་སྙིང་བརྩེ་ཕན་པ་མཆོག་ཏུ་བྱ། །གནོད་པར་མི་བྱ་བརྙས་པར་ཡང་མི་བགྱི། །གཅིག་པུ་ཞི་བ་དོན་དུ་མི་གཉེར་ཞིང་། །གཞན་དོན་ཡང་དག་བསྒྲུབ་ལ་བརྩོན་པ་ཡི། །རང་གཞན་ཐར་པའི་སྒོ་ནི་དབྱེ་བར་བགྱི། བཞི་པ་ཕྱི་རོལ་བསྐྲད་པ་ནི། གཞི་བགེགས་སོ་སོར་གཏོར་མ་ཆ་གཉིས་བཤམས་ལ། ཨ་ཀྭ་རོས་བརླབ། ཧཱུྃ་ཡུལ་ཕྱོགས་འདི་དག་ཀུན་ལ་གནས་པ་ཡི། །ལྷ་ཀླུ་གནོད་སྦྱིན་སྲིན་པོ་འབྱུང་པོ་དང་། །ཡི་དྭགས་ཤ་ཟ་བརྗོད་བྱེད་སྨྱོ་བྱེད་དང་། །མཁའ་འགྲོ་མ་མོ་འཁོར་དང་བཅས་པ་རྣམས། །མཆོད་སྦྱིན་གཏོར་མ་བཟང་པོ་འདི་ཉིད་བཞེས། །བར་དུ་གཅོད་པའི་བསམ་སྦྱོར་ཀུན་སྤང་ལ། །ཞི་དང་ཕན་པའི་སེམས་ཀྱིས་གནས་པར་གྱིས། །ཧཱུྃ་ཡེ་ཤེས་རོལ་པ་དཔལ་གྱི་སྐུར་གསལ་ཞིང་། །སྐུ་གསུང་ཐུགས་ལས་སྤྲུལ་པའི་ཁྲོ་ཚོགས་ཀྱིས། །བགེགས་རིགས་མ་ལུས་རྒྱ་མཚོའི་མཐར་བསྐྲད་དོ། །ཧཱུྃ་བཞིའི་སྔགས་ཀྱིས་བསྐྲད། ལྔ་པ་སྲུང་འཁོར་ནི་འོད་རིམ་ལས། ཧཱུྃ་སྟོང་ཆེན་གསལ་བའི་རིག་པ་ཉིད། །སྐད་ཅིག་ས་བོན་རང་གི་ལྷར། །གསལ་བས་ཧཱུྃ་བསྐུལ་འཕྲོ་འདུ་ལས། །ཞེ་སྡང་རྡོ་རྗེར་གསལ་བ་ཡི། །ཐུགས་ཀྱི་ས་བོན་འོད་ཟེར་ལས། །མཚོན་ཆ་རིམ་སྤྲོས་བར་ཆད་བསྐྲད། །སླར་འདུས་རིམ་བཞིན་སྟེང་འོག་གུར། །ཛྭ་ལ་རཾ་གྱིས་མེ་དཔུང་འབར། །རྣམ་རྟོག་འདུ་ཤེས་ཀུན་སྤངས་ན། །བགེགས་ཀྱི་སྦྱོར་བ་ཡོང་མི་འགྱུར། །དེ་བས་རྣམ་རྟོག་གེགས་ཡིན་པས། །ཡང་དག་རིག་པ་ཉིད་ཀྱིས་སྲུང་། །དྲུག་པ་བྱིན་འབེབས་ནི། ཆོས་ཉིད་སྤྲོས་པ་དང་བྲལ་བའི་ཀློང་ནས་ཡེ་ཤེས་ཀྱི་འཁོར་ལོ་སྐུ་ཕྱག་རྒྱ། གསུང་སྒྲ་ཚིག །ཐུགས་ཕྱག་མཚན་གྱི་རྣམ་པར་སད་པ་བདག་གནས་ཡོ་བྱད་རྣམས་ལ་ཐིམ་པར་བསམ་ལ། སྤོས་རོལ་དང་བཅས། ༀ་ཧཱུྃ་ཨ་ལ་ལ་ཧོ། བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབས་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཆོགས་ཀྱི་སྒྲ་སྦྱར་ཞིང་ཧཱུྃ་ཧཱུྃ་ཧཱུྃ་ཧཱུྃ་གིས་བྱིན་བསྡུས། བདུན་པ་མཆོད་རྫས་བརླབ་པ་ནི། ཕྱི་མཆོད་ལ་དམིགས་ནས། བདག་ཉིད་ལྷར་གསལ་ཐུགས་ཀའི་ཧཱུྃ་ཡིག་ལས། །རཾ་ཡཾ་ཁཾ་འཕྲོས་ཡེ་ཤེས་མེ་རླུང་ཆུས། །མཆོད་རྫས་དངོས་འཛིན་སྐྱོན་སྦྱངས་སྟོང་པའི་ངང་། །ཨ་ལས་སྟོང་གསུམ་བྷནྡྷར་རྫོགས་པའི་ནང་། །འཁོར་འདས་བཅུད་དྲངས་ཧཱུྃ་ལས་ཉེར་སྤྱོད་ཀྱི། །དམ་རྫས་འདོད་ཡོན་སྤྲིན་ཕུང་རྒྱ་མཚོར་གྱུར། །ནམ་མཁའ་མཛོད་ཀྱི་སྔགས་རྒྱ་དང་། ༀ་བཛྲ་རཱ་ག །ངྷུ་པེ་དྷུ། དེ་བཞིན་དུ་། པུ་ཥྛེ་པུ། ཨཱ་ལོ་ཀེ་ཧྲཱིཿ གྷནྡྷེ་གྷན། རྡོ་རྗེ་ཞབས་བསིལ་མ་ལ་སོགས་པ་མཆོད་པའི་ལྷ་མོས་ནམ་མཁའ་གང་བར་གྱུར། ནང་མཆོད་བསང་སྦྱང་། སྟོང་པའི་ངང་ལས་ཀཾ་ཡིག་ཡོངས་གྱུར་ལས། །མི་མགོའི་སྒྱེད་སྟེང་ཨ་ལས་བྷནྡྷའི་ནང་། །འཁོར་ལོ་རྩིབས་བཞི་ལྟེ་བར་བཅས་པའི་དབུས། །གོ་ཀུ་ད་ཧ་ན་ལས་ཤ་ལྔ་དང་། །བི་མུ་མ་ར་ཤུ་ལས་བདུད་རྩི་ལྔ། །རང་རང་ས་བོན་གྱིས་མཚན་ཡཾ་རཾ་ལས། །རླུང་གཡོས་མེ་སྦར་དམ་རྫས་ཞུ་བའི་སྟེང་། །ཧཱུྃ་ༀ་སྭཱ་ཨཾ་ཧཱ་ལས་ཕྱག་མཚན་ལྔ། །སོ་སོས་ཡུ་བ་བྱས་པའི་དྲིལ་བུ་རྣམས། །ཡོངས་གྱུར་རིགས་ལྔ་ཡབ་ཡུམ་མཉམ་སྦྱོར་གྱུར། ༀ་ཧཱུྃ་ཏྲཱྃ་ཧྲཱིཿཨཿ མཱུཾ་ལཱཾ་མཱཾ་པཱཾ་ཏཱཾ། ཟླ་བའི་ཁ་གཅོད་སྣ་ཚོགས་རྡོ་རྗེའི་ལྟེར། །རྟ་མགྲིན་དམར་པོ་པདྨ་རྒྱ་གྲམ་འཛིན། །ར་བཞིར་ཡུམ་བཞི་རྡོ་རྗེའི་ཏོག་གི་དབུས། །སྟངས་དཔྱལ་ཀུན་གྱི་བདེ་བའི་འོད་རླངས་སྤྲིན། །དབྱངས་གསལ་ལས་གྱུར་འབྲུ་གསུམ་བརྩེགས་མ་ཡི། །འོད་ཀྱིས་རྒྱལ་བ་མཆོད་ཅིང་གཞན་དོན་བྱས། །ཚུར་འདུས་དམ་ཚིག་རྫས་དང་དབྱེར་མེད་འདྲེས། །ཡེ་ཤེས་བདུད་རྩིའི་རྒྱ་མཚོ་ཆེན་པོར་གྱུར། །མཐེབ་སྲིན་རྟ་མགྲིན་ཡབ་ཡུམ་དུ་གསལ་བས་བདུད་རྩི་དཀྲུག་ཅིང་། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཉེར་གཅིག་དང་། བསངས་འཐོར་ཀྱང་བྱའོ། །གཏོར་མ་ལ་དམིགས་ནས། སྭ་བྷཱ་ཝས་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད། །གཏོར་རྫས་མཆོག་ཆེན་མི་དང་སེང་གེ་གླང་། །བ་ལང་རྟ་ཤ་བདུད་རྩི་ལྔ་ཡི་སྟེང་། །རིགས་ལྔ་ཡབ་ཡུམ་ཕྱག་མཚན་རྣམས་ཀྱིས་མཚན། །འོག་ནས་རླུང་གཡོས་མེ་སྦར་བདུད་རྩི་ཁོལ། །ཟག་མེད་རོ་བརྒྱ་ལྡན་པའི་གཏོར་མ་ནི། །དབང་པོ་དྲུག་ལ་དགྱེས་དགུའི་སྤྲིན་དུ་གྱུར། ༀ་ཨཱཿཧཱུྃ་མ་ཧཱ་བ་ལཱིངྟ་ཏེ་ཛྭ་བ་ལིཾ་ཏ་བ་ལ་བཱ་ཏེ་གུ་ཧྱ་ས་མ་ཡེ་སྭཱ་ཧཱ། ལན་གསུམ། རཀྟ་ལ་དམིགས་ནས། ༀ་སྭ་བྷཱ་ཝས་སྦྱངས། ཨ་ལས་ཡུམ་མཁའ་རྣམས་ཐར་གསུམ་ལྡན་དབྱིངས། །མ་ལས་ཉི་དཀྱིལ་ར་ཡིག་ཡོངས་གྱུར་ལས། །ཆགས་ཆེན་སྲིད་པའི་རཀྟ་འབར་བའི་ཀླ྄ོང་། །ངར་འཛིན་རཱུ་ཏྲའི་རྣམ་ཤེས་ཚོགས་བརྒྱད་རྣམས། །ཐབས་མཆོག་རྡོ་རྗེ་ནོར་བུས་སྦྱངས་པ་ཡིས། །འཁོར་བ་ལུགས་ལྡོག་སྐྱེ་མེད་ཆོས་སྐུར་བསྒྲལ། །ཟེག་མའི་ཚོགས་ལ་ཞིང་གི་ལྷུ་དུམ་དང་། །རྡོ་རྗེ་སྒེག་མོའི་མཆོད་སྤྲིན་སྤྲོ་བར་གྱུར། །ༀ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ལ་ཧཱུྃ་ཧྲཱིཿཋཱཿ ལན་གསུམ། གཉིས་པ་དངོས་གཞི་ལ་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཆེན་པོར་སེམས་བསྐྱེད་པ་དང་། ཕྱིན་དྲུག་གི་ཡན་ལག་བསྐྱེད་རྗོགས་ཀྱི་དངོས་པོར་སྡུད་པའོ། །དང་པོ་ལ་ཀུན་རྫོབ་དང་དོན་དམ་གཉིས་ལས། དང་པོར་ཆོས་དང་སེམས་ཅན་ལ་དམིགས་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །གཉིས་པ་དམིགས་མེད་རྣམ་པར་སྨིན་པ་ནི། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐབས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གཉིས་པ་ལ་ཏིང་འཛིན་གསུམ་གྱིས་བསྐྱེད་གཞི་བསྟེན་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ཕྲིན་ལས་བྱ་བའི་ཡན་ལག་བསྒྲུབ་པའོ། །དང་པོ་ལ་གསུམ་གྱི། དང་པོ་རྡོ་རྗེ་ལྟ་བུ་དེ་བཞིན་ཉིད་ནི། གཞི་རྒྱུད་བདེ་གཤེགས་སྙིང་པོའི་དག་བྱ་ཚོགས་བརྒྱད་གློ་བུར་བའི་སྤྲོས་པ་བསལ་ལ། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་མེད་པའོ། །གཉིས་པ་དཔའ་བར་འགྲོ་བ་ཀུན་སྣང་ནི། ཆོས་ཉིད་དེ་ལྟར་མ་རྟོགས་པའི་སེམས་ཅན་རྣམས་ལ་སྟོང་ཉིད་སྤྲོས་པ་མེད་པའི་གདངས་དམིགས་མེད་ཀྱི་སྙིང་རྗེར་ཤར་བས། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །གསུམ་པ་སྒྱུ་མ་ལྟ་བུ་རྒྱུའི་ཏིང་ངེ་འཛིན་ནི། སྟོང་ཉིད་སྙིང་རྗེ་ཟུང་དུ་འཇུག་པ་དེའི་ངང་ལས་ཡིད་བྱེད་པ་པོ་ཀུན་ཏུ་བཟང་པོའི་བདག་ཉིད་སྐྱེ་མེད་ཀྱི་ཡི་གེར་ལྡང་བསྟེ། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡེ་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །དེ་ལྟར་སྐྱེ་མེད་ཀྱི་ཡི་གེ་ལས་སྤྲོ་བསྡུའི་ཚིག་ཏུ་བསྟན་ཀྱང་འཕེལ་འགྲིབ་ལྟར་སྣང་བ་ནི་མེད་དེ། ཆོས་ཉིད་ཀྱི་དོན་ཡིག་འབྲུས་མཚོན་ནས་བསྐྱེད་རིམ་གྱི་རོལ་རྩལ་མཐའ་དག་ཆོས་བྱ་བ་མོ་ཀུན་ཏུ་བཟང་མོ་ལྷག་མཐོང་གསལ་བའི་བདག་ཉིད་དུ་བརྟན་པར་བྱ་བ་སྟེ། ཨཱཿརབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འགྱུར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །གཉིས་པ་རྟེན་གཞལ་ཡས་ཁང་དང་བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་རྟེན་གཞི་འབྱུང་བའི་དཀྱིལ་འཁོར་སྒོམ་པ་ནི། ཨ་ལས་མཐའ་དབུས་མེད་པ་ཡི། །འོག་མིན་ཆོས་འབྱུང་བསམ་པར་བྱ། །དེ་ནས་ཡཾ་ལས་བྱུང་བ་ཡི། །རླུང་གི་དཀྱིལ་འཁོར་བསམ་པར་བྱ། །དེ་སྟེང་ཡི་གེ་རཾ་ལས་ནི། །མེ་ཡི་དཀྱིལ་འཁོར་བསྐྱེད་པར་བྱ། །དེ་ཡི་སྟེང་དུ་བཾ་བསམས་ཏེ། །དེ་ལས་ཆུ་ཡི་དཀྱིལ་འཁོར་རོ། །ཆུ་ཡི་དཀྱིལ་འཁོར་སྟེང་དུ་ནི། །ལཾ་ལས་ཡེ་ཤེས་ས་གཞིར་བརྟག །གཉིས་པ་རྟེན་གཞལ་ཡས་ཁང་སྒོམ་པ་ནི། རྒྱུད་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་འཁྱུད་བཅས། །གྲུ་ཆད་བཞིས་བརྒྱན་པར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་པས་སྡུག་བསྔལ་བདེན་པའི་རང་གཟུགས་སྣོད་ལྟར་སྣང་བའི་ཀུན་འབྱུང་བ་ཅན་ལས་སྣོད་མ་དག་པ་རྟེན་གཞལ་ཡས་ཁང་གིས་འགོག་པའི་ལམ་གྱི་བདེན་པ་ནི། ལྷུན་པོའི་སྟེང་དུ། བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜལ་བྷྲཱཾ། བྷྲཱུཾ་ཡིག་ཡོངས་སུ་གྱུར་པ་ལས། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ་ནང་ནས་རིམ་པ་བཞིན། མཐིང་། དཀར། སེར། དམར། ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པའི་སྟེང་ན། རིན་པོ་ཆེའི་ཕ་གུ་སེར་པོ་རིན་པོ་ཆེ་སྣ་ཚོགས་པས་བཀྲ་བ་འཕྱར་ཐབས་སུ་བཀོད་པའི་མཐར་མུ་ཏིག་གི་མགུལ་འཁོར་འཕྱང་བ ། དེའི་སྟེང་ན་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་། དྲྭ་བ་ཕྱེད་པ། དར་དང་རྔ་ཡབ། དྲིལ་བུ་དང་མེ་ལོང་། ཟླ་བ་རླུང་གིས་སྐྱོད་པ་ལ་སོགས་པས་མཛེས་པ། དེའི་ཕྱི་ངོས་སུ་བྱ་འདབས་ལ་འཕྱང་བའི་རིན་པོ་ཆེའི་ཤར་བུ། སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན། དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་། བ་དན་བརྒྱད་བརྒྱད་དང་། ཟུར་བཞིར་རྣམ་པར་བཀྲ་བའི་གདུགས་ཀྱིས་མཚན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་ལ་སོགས་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་སྤྲོ་བ། སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་ནོར་བུས་བརྒྱན་པ། སྒོ་ལོགས་ཀྱི་ཟུར་བཞི་ནས་བུམ་པ་ལ་གནས་པའི་ཀ་བ་བཞི་བཞེས་བཏེགས་པའི་རྟ་བབས། རྟ་རྐང་ཆུ་སྐྱེས་རིན་ཆེན་སྒྲོམ། །སྣ་འཕྱང་བཞི་ལས་ཟ་ར་ཚགས། །རིན་ཆེན་སྒྲིལ་འཕྱང་ཤར་བུ་ཁྱུང་། །ཞེས་པས་རིམ་པ་ཅན་གྱི་སྣམ་བུ་བརྒྱད་པ་བསིལ་ཁང་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གཡས་གཡོན་དུ་རི་དྭགས་ཕོ་མོ་དང་བཅས་པ་གཞན་ཡང་གདུགས་དང་རྒྱལ་མཚན་བ་དན་སྣ་ཚོགས་པ་དང་གསེར་གྱི་དྲིལ་བུ་ལ་སོགས་པས་བརྒྱན་པ། སྒོའི་གཡས་གཡོན་གྱི་གཞི་ལ་ཏཱ་ལའི་ལྗོན་པ་དང་། དཔག་བསམ་གྱི་ཤིང་ལ་བཀྲ་ཤིས་པའི་བྱ་སྙན་པར་སྒྲོག་པ་སྣ་ཚོགས་གནས་པ། ཤིང་དེ་དག་ཀྱང་གསེར་གྱི་ཐ་གུས་བྲེས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་འཁྲོལ་བས་མཛེས་པ། ཡན་ལག་བརྒྱད་དང་ལྡན་པའི་ཁྲུས་ཀྱི་རྫིང་བུ་ལ་ལྷ་མོ་སྣ་ཚོགས་བདེ་བར་བརྩེ་བ། རིན་པོ་ཆེའི་ཕུང་པོ་འོད་འབར་བ་རེ་རེ་སྟེ་བརྒྱད་དང་། གཞན་ཡང་རིན་པོ་ཆེ་སྣ་བདུན་དང་། བཀྲ་ཤིས་པའི་རྫས་བརྒྱད་སོགས་འདོད་པའི་ཡོན་ཏན་ཐམས་ཅད་ཀྱིས་མཛེས་པར་གང་བའོ། །གཞལ་ཡས་ཁང་གི་ནང་བར་ཁྱམས་གྲུ་བཞི་པས་ཀུན་ནས་བསྐོར་ཞིང་། གྲུ་ཆད་བཞི་གློ་འབུར་གྱིས་མཛེས་པའི་ནང་དུ། རྡོ་རྗེའི་ཕྲེང་བས་བསྐོར་བའི་འཁོར་ལོ་རྩིབས་བཞི་པ་ལྟེ་བ་དང་བཅས་པ་རྣམས་རིམ་པ་བཞིན་ཁྱད་པར་དུ་གྱུར་པས་འཕགས་པ་རྡོ་རྗེའི་ཟླུམ་བསྐོར་ལ་བརྟེན་པའི་ཀ་བ་རིགས་ཀྱི་མཚན་མ་ཅན་གཉིས་གཉིས་ཀྱིས་ཕྱོགས་རེ་ནས་བཏེག་པའི་སྟེང་། རྡོ་རྗེའི་གདུང་གིས་མིག་མངས་རིས་སུ་བྲིས་ཤིང་མཛེས་པར་ཕུབ་པའི་དབུས་ཕྱུར་བུ་སངས་རྒྱས་ཀྱི་གཙུག་ཏོར་ལྟར་ཀུན་ནས་ཟླུམ་པོར་འཁྱིལ་བའི་རྩེ་མོ་རྡོ་རྗེ་རིན་པོ་ཆེའི་ཏོག་སྟོང་འོད་ཟེར་མཐའ་ཡས་པ་སྤྲོ་བས་མཛེས་པ། ནང་གི་སྟེང་དང་འོག་གི་གཞི་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། ལྷ་དང་མི་ལས་ཁྱད་པར་དུ་གྱུར་པའི་ངོ་མཚར་དུ་མས་འཕགས་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ་དངས་ཤིང་བསྒྲིབ་པ་མེད་པར་ཀུན་ཏུ་གསལ་བ་གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པར་གྱུར། གསུམ་པ་གདན་བསྐྱེད་པ་ནི་རྒྱུད་ལས། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པས། གཞལ་ཡས་ཁང་གི་དབུས་ཀྱི་ལྟེ་བ་དང་རྩིབས་བཞིར་རིམ་པ་བཞིན། དབུས་སུ་སེང་གེ། ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་མཁའ་ལྡིང་རྣམས་ཀྱིས་བཏེག་པའི་རིན་པོ་ཆེའི་ཁྲི་བཀོད་པ་ཕུལ་དུ་བྱུང་བའི་སྟེང་དུ། པཾ་པདྨ་མཎྜ་ལ། མ་སཱུརྻ་མཎྜ་ལ། ཨ་ཙནྡ་མཎྜ་ལ། སྣ་ཚོགས་པདྨའི་ལྟེ་བར་ཉི་མའི་དཀྱིལ་འཁོར་དང་། ཟླ་བ་ཉ་གང་བ་སྟེ་ལྔ་བརྩེགས། འཁོར་ལོའི་གོང་རས་དང་། གྲུ་ཆད་ཀྱི་གྲ་བཞིར། པཾ་པདྨ་མཎྜ་ལ། མ་སཱུརྻ་མཎྜ་ལ། ཨ་ཙནྡྲ་མཎྜ་ལ། པདྨ་དང་ཉི་ཟླའི་གདན་སུམ་བརྩེགས། འཁྱམས་ཀྱི་ཤར་ནུབ་གཉིས་སུ་རིན་པོ་ཆེའི་ཁྲིར། པཾ་པདྨ་མཎྜ་ལ། མ་སཱུརྻ་མཎྜ་ལ། ཨ་ཙནྡྲ་མཎྜ་ལ། པད་ཉི་ཟླ་བའི་གདན་བཞི་བརྩེགས། ལྷོ་བྱང་དང་མཚམས་བཞིར། པཾ་པདྨ་མཎྜ་ལ། སྣ་ཚོགས་པདྨའི་གདན་རེ་རེ་སྒོ་བཞིར། མ་སཱུརྻ་མཎྜ་ལ། ཉི་མའི་དཀྱིལ་འཁོར་རེ་རེ་རྣམས་གསལ་བར་གྱུར། གཉིས་པ་བརྟེན་པ་ལྷ་བསྐྱེད་པ་ལ་གསུམ་ལས། དང་པོ་ནི་རྒྱུད་ལས། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་བཅས་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་དང་། །ཨུཏྤལ་ཀླུ་ཤིང་ལ་སོགས་མཚན། །མཛེས་ཚུལ་མཉེས་པའི་ཡོ་བྱད་འཛིན། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྱིལ་བ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པས་སྦྱང་གཞི་ཕུང་ཁམས་སྐྱེ་མཆེད་ལྷར་ཤར་བའི་བཅུད་མ་དག་པ་དང་ཀུན་བརྟགས་ཀྱི་རྟོག་ཚོགས་ལྷ་སྐུར་བསྒྲུབ་པ་ནི། གཞིའི་ཨ་ཡིག་ལས་ཡི་གེ་བཞི་བཅུ་རྩ་གཉིས་ཐོན་ཏེ་སོ་སོའི་གདན་སྟེང་དུ་འཁོད་པ་ནི་དབུས་སུ། ཋ་ཐ། རྩིབས་བཞིའི་ཤར་དུ། ཊ་ཏ། ལྷོར། ཌ་ད། ནུབ་ཏུ། ཌྷ་ངྷ། བྱང་དུ། ཎ་ན། རྩིབས་མཆན་གྱི་ཤར་ལྷོའི་གདན་ལ། ཀ་ཙ། ལྷོ་ནུབ་དུ། ཁ་ཚ། ནུབ་བྱང་དུ། ག་ཛ། བྱང་ཤར་དུ། གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ། པ་ཡ། ལྷོ་ནུབ་ཏུ། ཕ་ཝ། ནུབ་བྱང་དུ ། བ་ར། བྱང་ཤར་དུ། བྷ་ལ། ཁྱམས་ཀྱི་ཤར་དུ། ཀྵ། ནུབ་ཏུ། ཨཱ། ཤར་ལྷོར། ཨི། བྱང་དུ། ཨཱཾ། ལྷོར། ཨུ། ནུབ་བྱང་དུ། ཨཱུ། ལྷོ་ནུབ་དུ། ཨེ། བྱང་ཤར་དུ། ཨཻ། སྒོ་བཞིའི་ཤར་སྒོར། ང་ཤ །ལྷོ་སྒོར་ཉ་ཥ། ནུབ་སྒོར། མ་ས། བྱང་སྒོར། ཨོ་ཨ་ཧ། རྣམས་རང་རང་གི་ལྷའི་ཁ་དོག་དང་མཐུན་པར་སོ་སོའི་གདན་ལ་འཁོད་པའི་མཐར་ཨ་ཞེས་བརྗོད་པས། གཞིའི་ཨ་དེ་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་བསམ་ལ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོ་དེ་ཉིད་ངེས། །ཨ་སྥ་ར་ཎ་ཕཊ་ཅེས་བརྗོད་པས་ཡིག་འབྲུ་རྣམས་ལས་འོད་ཟེར་འཕྲོས་སངས་རྒྱས་ཀྱི་མཛད་པ་བསྒྲུབ། སཾ་ཧ་ར་ཎ་ཧཱུྃ་སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས། བཛྲ་ཙཀྲ་རཏྣ་པདྨ་ཁངྒ་གྷཎྚ་ཞེས་བརྗོད་པས། དབུས་སུ་རྡོ་རྗེ་དང་དྲིལ་བུ། རྩིབས་བཞིའི་ཤར་དུ་འཁོར་ལོ་དང་དྲིལ་བུ། ལྷོར་རིན་པོ་ཆེ་དང་དྲིལ་བུ། ནུབ་ཏུ་པདྨ་དང་དྲིལ་བུ། བྱང་དུ་རལ་གྲི་དང་དྲིལ་བུ། རྩིབས་མཆན་གྱི་ཤར་ལྷོར་རིན་པོ་ཆེའི་མྱུ་གུ་དང་མེ་ལོང་། ལྷོ་ནུབ་ཏུ་རལ་གྲི་དང་ཕྲེང་བ། ནུབ་བྱང་དུ་པདྨ་དང་པི་ཝང་། བྱང་ཤར་དུ་རྡོ་རྗེ་དང་རྔ་ཡབ། གྲུ་ཆད་བཞིའི་ཤར་ལྷོར་ཀླུ་ཤིང་དང་སྤོས་ཁང་། ལྷོ་ནུབ་ཏུ་པུསྟི་དང་མེ་ཏོག །ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཁྱམས་ཀྱི་ཤར་དུ་རྡོ་རྗེ། ནུབ་ཏུ་དྲིལ་བུ། ཤར་ལྷོར་པི་ཝང་། བྱང་དུ་གོ་མཚོན། ལྷོར་གསེག་པར། ནུབ་བྱང་དུ་པུསྟི། ལྷོ་ནུབ་ཏུ་སྒྲོམ་བུ། བྱང་ཤར་དུ་མེ་ཆུ། ཤར་སྒོར་ནྲི་མགོ་གདེངས་པ་དང་ལྕགས་ཀྱུ། ལྷོ་སྒོར་རྡོ་རྗེ་རྩེ་ལྔ་དང་ཞགས་པ། ནུབ་སྒོར་ཐོད་པ་སྦྲུལ་གྱིས་དཀྲིས་པ་དང་ལྕགས་སྒྲོག །བྱང་དུ་རྡོ་རྗེ་རྒྱ་གྲམ་དང་དྲིལ་བུ་སྟེ་ཕྱག་མཚན་བཞི་བཅུ་རྩ་གཉིས་སུ་གྱུར། སྥ་ར་ཎ་ཕཊ། དེ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབ། སཾ་ཧ་ར་ཎ་ཧཱུྃ་སླར་འདུས་ནས་ཕྱག་མཚན་རྣམས་ལ་ཐིམ་པ་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ །དཀྱིལ་འཁོར་ཆེན་པོའི་དབུས་དག་ཏུ། །བདག་ཉིད་བཅོམ་ལྡན་མི་བསྐྱོད་པ། །ཨིནྡྲ་ནཱི་ལའི་ཁ་དོག་འདྲ། །སྐུ་གསུང་ཐུགས་ཀྱི་དབུ་གསུམ་ནི། །གཡས་དཀར་གཡོན་དམར་དབུས་མཐིང་ཞལ། །ཡེ་ཤེས་དྲུག་གི་ཕྱག་ཉིད་ལ། །རྡོ་རྗེ་པདྨ་རལ་གྲི་ནི། །གཡས་ཀྱི་ཕྱག་ན་བསྣམས་པར་མཛད། །དྲིལ་བུ་འཁོར་ལོ་རིན་ཆེན་འབར། །གཡོན་གྱི་ཡེ་ཤེས་ཕྱག་ན་བསྣམས། །གཡས་པས་རྡོ་རྗེ་ཐུགས་ཀར་བརྟེན། །གཡོན་པ་དྲིལ་བུ་ཡུམ་ལ་འཁྱུད། །ཐབས་དང་ཤེས་རབ་ཞབས་གཉིས་ནི། །མཉམ་པའི་བཏུལ་ཞུགས་སྐྱིལ་མོ་ཀྲུང་། །མདུན་དང་རྒྱབ་མེད་ཀུན་ཏུ་ཞལ། །མཚན་དང་དཔེ་བྱད་ཀུན་གྱིས་སྤྲས། །འོད་ཟེར་འཕྲོ་བའི་ཚོགས་ཆེན་ལས། །ཐུབ་པའི་དཀྱིལ་འཁོར་སྣ་ཚོགས་འཕྲོ། །རྒྱལ་བ་རིགས་ལྔས་དབུ་བརྒྱན་ཅིང་། །སྣ་ཚོགས་རྒྱན་རྣམས་ཀུན་གྱིས་བརྒྱན། །བཙུན་མོ་སྣང་བའི་དབྱིངས་ཕྱུག་མ། །གཞོན་ཚུལ་འཁྲིལ་ལྡེམ་ཤིན་ཏུ་ཆགས། །ཆ་ལུགས་ལ་སོགས་ཡབ་དང་མཐུན། །གཡོན་པ་དྲིལ་བུ་ཐུགས་ཀར་བརྟེན། །གཡས་པ་ཉི་མ་ལས་ལ་འཁྲིལ། །གཉིས་ཀའང་ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་ཚི་གུའི་སྨད་དཀྲིས། ཁ་དོག་སྣ་ཚོགས་པའི་ཅོད་པན་ཟི་ལྡིར། གར་གྱི་ཕུ་རུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། དོ་ཤལ། སྐ་རགས། ཕྱག་ཞབས་ཀྱི་གདུ་བུ་སྟེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་མཚེར་ལྷུན་སྡུག་གཟི་བྱིན་འབར་བ་སྟེ། ཞི་བའི་ཉམས་དགུས་བརྒྱན་པ། འོད་ཟེར་ཁ་དོག་དྲུག་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །ༀ་ཛཱི་ན་ཛཱི་ཀ །ཤར་གྱི་རྩིབས་ལ་རྣམ་སྣང་དཀར་པོ ། དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་འཁོར་ལོ་དང་དྲིལ་བུ་འཛིན་པས་ཡུམ་ལ་འཁྲུད་ཅིང་། བར་པས་རྡོ་རྗེ་དང་རིན་པོ་ཆེ། ཐ་ཆས་པདྨ་དང་རལ་གྲི་འཛིན་པ། ལཱཾ་དེ་ཥ་ར་ཏི། ཡུམ་སྤྱན་མ་དཀར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་འཁོར་ལོ་འཛིན་པ། སྭཱཾ་རཏྣ་དྷྲིག །ལྷོར་རིན་ཆེན་འབྱུང་ལྡན་སེར་པོ། སེར་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་དྲིལ་བུ། བར་པས་འཁོར་ལོ་དང་རྡོ་རྗེ། ཐ་མས་པདྨ་དང་རལ་གྲི་འཛིན་པ། མཱཾ་མོ་ཧ་ཏི། མཱ་མ་ཀཱི་སེར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་རིན་པོ་ཆེ་འཛིན་པ། ཨཱཾ་ཨ་རོ་ལིཀ །ནུབ་ཏུ་སྣང་བ་མཐའ་ཡས་དམར་པོ། དམར་དཀར་སྔོ་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་པདྨ་དང་དྲིལ་བུ། བར་པས་འཁོར་ལོ་དང་རིན་པོ་ཆེ། ཐ་མས་རྡོ་རྗེ་དང་རལ་གྲི་འཛིན་པ། པཱཾ་རཱ་ག་ར་ཏི། གོས་དཀར་མོ་དམར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་པདྨ་འཛིན་པ། ཧཱཾ་པྲཛྙཱ་དྷྲིཀ །བྱང་དུ་དོན་ཡོད་གྲུབ་པ་ལྗང་གུ། ལྗང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རལ་གྲི་དང་དྲིལ་བུ། བར་པས་འཁོར་ལོ་དང་རིན་པོ་ཆེ། ཐ་མས་པདྨ་དང་རྡོ་རྗེ་འཛིན་པ། ཏཱཾ་བཛྲ་ར་ཏི། དམ་ཚིག་སྒྲོལ་མ་ལྗང་གུ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་རལ་གྲི་འཛིན་པ་ཡབ་རྣམས་རྫོགས་པའི་སྐྱིལ་མོ་ཀྲུང་དང་། ཡུལ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་གིས་རོལ་བའོ། །ཀྵིཾ་ཧི་རཱ་ཛ་ཡ། རྩིབས་མཆན་བཞིའི་ཤར་ལྷོར་ས་སྙིང་དཀར་པོ་གཡས་རིན་པོ་ཆེའི་མྱུ་གུ་འཛིན་ཞིང་། གཡོན་དྲིལ་བུ་དཀུར་བརྟེན་པ། ཧཱུྃ་ལཱ་སྱེ་ས་མ་ཡ་སྟྭཾ། སྒེག་མོ་དཀར་མོ་གཡས་ཡབ་ལ་འཁྱུད་ཅིང་། གཡོན་མེ་ལོང་འཛིན་པ། ཏྲཾ་ཨཱ་གྷརྦྷ་ཡ། ལྷོ་ནུབ་ཏུ་ནམ་སྙིང་སེར་པོ་གཡས་རལ་གྲི་འཛིན་ཞིང་། གཡོན་དྲིལ་བུ་དཀུར་བརྟེན་པ། ཏྲཱཾ་མཱ་ལྱེ་ས་མ་ཡ་ཧོཿ ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ། ཧྲཱིཿཧཱ་ཧཱུྃ་པདྨ་པྲ་ད་མ། ནུབ་བྱང་དུ་སྤྱན་རས་གཟིགས་དམར་པོ་གཡས་པདྨ་དཀར་པོ་འཛིན་ཞིང་། གཡོན་དྲིལ་བུ་དཀུར་བརྟེན་པ། ཧྲཱིཾཿགཱི་ཏི་རཱ་གོ་ཧཾཿ གླུ་མ་དམར་མོ་པི་ཝང་འཛིན་པ། ཛིཾ་ཀུ་རུ་པ་ཎ། བྱང་ཤར་དུ་ཕྱག་རྡོར་མཐིང་ག་གཡས་རྡོ་རྗེ་འཛིན་ཞིང་གཡོན་དྲིལ་བུ་དཀུར་བརྟེན་པ། ཨཾ་ནིརྟི་རཱ་ག་ཡ་མྱེ། གར་མ་ལྗང་གུ་གར་རྒྱ་མཛད་པ། མཻ་དྷཱ་ར་ཎེ་སྭཱ་ཧཱ། གྲུ་ཆད་བཞིའི་ཤར་ལྷོར་བྱམས་པ་དཀར་སེར་གཡས་ཀླུ་ཤིང་འཛིན་ཞིང་། གཡོན་དྲིལ་བུ་དཀུར་བརྟེན་པ། ཛཿདྷཱུ་པེ་པྲ་བེ་ཤ །བདུག་སྤོས་མ་དཀར་སེར་སྤོས་ཁང་འཛིན་པ། ཐླྷི་ནིཾསྶ་རཾ་བྷ་ཡ་སྭཱ་ཧཱ། ལྷོ་ནུབ་ཏུ་སྒྲིབ་སེལ་དམར་སེར་གཡས་ཆོས་ཀྱི་འཁོར་ལོ་འཛིན་ཞིང་། གཡོན་དྲིལ་བུ་དཀུར་བརྟེན་པ། ཧཱུྃ་པུཥྤེ་ཨཱ་བེ་ཤ །མེ་ཏོག་མ་དམར་སེར་མེ་ཏོག་གི་ཕྲེང་བ་འཛིན་པ། ཧཱུྃ་སྭ་ར་ཛ་ཡ་སྭཱ་ཧཱ། ནུབ་བྱང་དུ་ཀུན་བཟང་དམར་ལྗང་གཡས་རིན་པོ་ཆེའི་སྙེ་མ་འཛིན་ཞིང་། གཡོན་དྲིལ་བུ་དཀུར་བརྟེན་པ། བཱཾ་དཱི་བ་སུ་གི་རི། མར་མེ་མ་དམར་ལྗང་མར་མེ་འཛིན་པ། མཱུཾ་ཤྲཱི་ཨཾ་རཱ་ག་ཡ་སྭཱ་ཧཱ། བྱང་ཤར་དུ་འཇམ་དཔལ་དཀར་ལྗང་གཡས་ཨུཏྤལ་འཛིན་ཞིང་། གཡོན་དྲིལ་བུ་དཀུར་བརྟེན་ལ། ཧོཿགནྡྷེ་ཙིཏྟ། དྲི་ཆབ་མ་དཀར་ལྗང་དྲིའི་དུང་ཕོར་འཛིན་པ། སེམས་དཔའ་བརྒྱད་པོ་ཐམས་ཅད་ཀྱང་ཞབས་གཡས་ཅུང་ཟད་བརྐྱང་བའི་ཕྱེད་སྐྱིལ་གྱིས་བཞུགས་ཤིང་། སེམས་མ་རྣམས་གཡོན་ཅུང་ཟད་བརྐྱང་བའི་ཕྱེད་སྐྱིལ་གྱིས་ཡབ་ལ་འཁྱུད་པའོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཁྱམས་ཀྱི་ཤར་དུ་ཀུན་ཏུ་བཟང་པོ་མཐིང་ག་མཉམ་བཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ནུབ་ཏུ་ཀུན་ཏུ་བཟང་མོ་མཐིང་ག་གཡོན་སྟེང་དུ་བཞག་པའི་མཉམ་གཞག་གི་ཕྱག་རྒྱ་ཅན་པདྨའི་སྐྱིལ་ཀྲུང་གིས་བཞུགས་པ་གཤེགས་པ་གཤེགས་མ་སེམས་དཔའ་སེམས་མ་ཀུན་བཟང་ཡབ་ཡུམ་རྣམས་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་། ཚུལ་དགུའི་ཉམས་ཀྱིས་རྒྱས་པའོ། །ༀ་མུ་ནེ་ཀྵཾ་སྭཱ་ཧཱ། ཁྱམས་ཀྱི་ཤར་ལྷོར་ལྷའི་ཐུབ་པ་དཀར་པོ་པི་ཝང་འཛིན་པ། ༀ་མུ་ནེ་ཀྲེཾ་སྭཱ་ཧཱ། བྱང་དུ་ལྷ་མིན་གྱི་ཐུབ་པ་མཐིང་ག་གོ་ཆ་འཛིན་པ། ༀ་མུ་ནེ་ཏྲུཾ་སྭཱ་ཧཱ། ལྷོར་མིའི་ཐུབ་པ་སེར་པོ་གསེག་པར་འཛིན་པ། ༀ་མུ་ནེ་སྲུཾ་སྭཱ་ཧཱ། ནུབ་བྱང་དུ་བྱོལ་སོང་གི་ཐུབ་པ་དམར་པོ་པུསྟི་འཛིན་པ། ༀ་མུ་ནི་པྲེ་སྭཱ་ཧཱ། ལྷོ་ནུབ་ཏུ་ཡི་དྭགས་ཀྱི་ཐུབ་པ་སེར་ནག་རིན་པོ་ཆེའི་སྒྲོམ་བུ་འཛིན་པ། ༀ་མུ་ནེ་ཡེ་སྭཱ་ཧཱ། བྱ་ཤར་དུ་དམྱལ་བའི་ཐུབ་པ་དུད་ཁ་མེ་ཆུ་འཛིན་པ། དྲུག་ཀའང་གཙུག་ཏོར་དང་ལྡན་ཞིང་ཚངས་པར་སྤྱོད་པའི་ཆ་ལུགས་ཅན། འགྲོ་བའི་དོན་ལ་འགྲེང་སྟབས་སུ་གཤེགས་པའི་ཚུལ་ཅན་ནོ། །ཧཱུྃ་ཡ་མཱནྟ་ཀྲིཏ་ཕཊ། ཤར་སྒོར་གཤིན་རྗེ་གཤེད་སྨུག་ནག་ནྲྀ་མགོ་གདེངས་པ་འཛིན་པ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ་དང་མཉམ་པར་སྦྱོར་བ། ཧཱུྃ་པྲཛྙཱནྟ་ཀྲི་ཏ་ཕཊ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་འཛིན་པ། ༀ་མ་ཧཱ་ར ཏྣ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ཞགས་པ་མ་སེར་ནག་ཞགས་པ་འཛིན་པ་དང་མཉམ་པར་སྦྱོར་བ། ཧཱུྃ་པདྨནྟ་ཀྲིཏ་ཕཊ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་འཛིན་པ། ༀ་མ་ཧཱ་པདྨ་དྷ་རོ་མ་ཧཱ་ཱཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ལྕགས་སྒྲོག་མ་དམར་ནག་ལྕགས་སྒྲོག་འཛིན་པ་དང་མཉམ་པར་སྦྱོར་བ། ཧཱུྃ་བིགྣན་ཏ་ཀྲི་ཏ་ཕཊ། བྱང་སྒོར་བདུད་རྩི་འཁྱིལ་པ་ལྗང་ནག་རྡོ་རྗེ་རྒྱ་གྲམ་འཛིན་པ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། དྲིལ་བུ་མ་ལྗང་ནག་དྲིལ་བུ་འཛིན་པ་དང་མཉམ་པར་སྦྱོར་བ། ཁྲོ་བོ་བཞི་ཀའང་གཡོན་སྡིགས་མཛུབ་མཛད་ཅིང་། ཡུམ་རྣམས་གཡོན་པས་དུང་ཁྲག་སྟོབས་པའི་ཚུལ་ཅན་ཐམས་ཅད་ཀྱང་ཁྲོ་ཞིང་གཏུམ་ལ་རྣམ་པར་འགྱུར་བའི་ཞལ་ཅན། གར་གྱིས་ཉམས་དགུས་སྒེག་ཅིང་། དུར་ཁྲོད་རོལ་པའི་ཆས་ཀྱིས་བརྒྱན་ཏེ། བསྐལ་པའི་མེ་དཔུང་འབར་བའི་ཀློང་ན་གདུག་པ་ཅན་ཚར་གཅོད་པའི་ཚུར་གྱིས་བཞུགས་པ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཀྱང་མེ་ལོང་ནང་གི་གཟུགས་བརྙན་ནམ་ཆུ་ནང་གི་ཟླ་བ་ལྟར་སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ཀྱི་འཁོར་ལོར་བཞུགས་པའོ། །གཉིས་པ་ནི་དེ་ལ་གཞན་དབང་གིས་རྒྱས་འདེབས་དག་ཆེན་ཡེ་ཤེས་ཀྱི་ཆུས་དབང་བསྐུར་བ་ནི། གདན་གསུམ་རྫོགས་པའི་དཀྱིལ་འཁོར་གྱི་སྲོག་གི་གོར། རང་འདྲའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་རང་རང་གི་ཕྱག་མཚན་ས་བོན་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་དབང་གི་ལྷ་རིགས་ལྔ་སྟངས་དཔྱལ་གྱི་རྣམ་པར་བཛྲ་ས་མཱ་ཛཿ ས་སྤྱན་དྲངས། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ན་བཛྲ་སྭཾ་བྷ་ཝ་ཨཱཏྨ་ཀོ྅་ཧཾཿ ཞེས་བསྐུལ་བས་རྗེས་ཆགས་ཞུ་བདེའི་ཆུ་རྒྱུན་གྱིས་དབང་བསྐུར། ཕུང་པོ་ལྔ་རིགས་ལྔའི་སངས་རྒྱས་དང་། ཉོན་མོངས་པ་ཡེ་ཤེས་ལྔ། ཁམས་ལྔ་ཡུམ་ལྔ། སྐྱེ་མཆེད་སེམས་དཔའ་སེམས་མ། ལས་དབང་ཁྲོ་བོ་ཁྲོ་མོར་གནས་འགྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་རང་རིགས་གཙོ་བོར་གྱུར་པའི་རིགས་ལྔ། སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་པར་གྱུར། ཅེས་བརྗོད་ལ་སོ་སོའི་དབང་རྒྱ་དབང་སྔགས་བསྟུན་ཞིང་། དེ་ཡང་མི་བསྐྱོད་པ་ལ་མཚོན་ན། རྡོ་རྗེ་ཕྱི་སྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤཱུ་ཱུནྱ་ཏཱཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅་ཧཾཿ ཕྱག་རྒྱ་དེ་ལས་མཛུབ་མོ་གཉིས་བརྐྱང་པ་དཔྲལ་བར་བཞག་ལ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ སྲིན་ལག་བརྐྱང་བ་རྣ་ལྟག་གཡས་པར་བཞག་ལ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾཿ མཐེ་བོང་བརྐྱང་བ་ལྟག་པར་བཞག་ལ། ༀ་མ་ཧཱ་པྲཱ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾཿ མཐེའུ་ཆུང་བརྐྱང་བ་རྣ་ལྟག་གཡོན་པར་བཞག་ལ། ༀ་མ་ཧཱ་ཀྲྀ་ཏྱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ དཀྱིལ་འཁོར་བདག་པོ་སྟངས་དཔྱལ་དང་། །བྱ་བྱེད་ཡབ་ཡུམ་ཐུབ་དྲུག་ལ། །མི་བསྐྱོད་དབུས་ན་བཞུགས་པ་ཡི། །རྒྱལ་བ་རིགས་ལྔས་དབུ་བརྒྱན་གྱུར། །དེས་མཚོན་ནས་རིགས་གཞན་བཞི་ལའང་རིགས་གང་ཡིན་དེའི་སྔགས་དང་པོ་དང་ཕྱག་རྒྱ་དབུས་སུ་འཇོག་ལ། གང་དབུས་སུ་སོང་བའི་ཤུལ་དུ་མི་བསྐྱོད་པ་འཇོག་པ་ལ། རྣམ་སྣང་གི་དབང་རྒྱ་མཛུབ་མོ་བརྐྱང་པ་དང་ཨཱ་དཪྴ་དང་པོར་བརྗོད་པའི་ལྔ་ཚན་ལྔའི་སྔགས་རྒྱའི་མཐར། རྣམ་སྣང་ས་སྙིང་བྱམས་པ་དང་། །གཤིན་རྗེ་ཡུམ་དང་བཅས་པ་ལ། །རྣམ་མཛད་དབུས་ན་བཞུགས་པ་ཡི། །རྒྱལ་བ་རིགས་ལྔས་དབུ་བརྒྱན་གྱུར། །རིན་འབྱུང་གི་དབང་རྒྱ་སྲིན་ལག་བརྐྱང་བ་དང་ས་མ་ཏཱ་ཐོག་མར་བརྗོད་པའི་ལྔ་ཚན་ལྔའི་མཐར། རིན་འབྱུང་ནམ་སྙིང་སྒྲིབ་སེལ་དང་། །སྟོབས་ཆེན་ཡུམ་དང་བཅས་པ་ལ། །རིན་འབྱུང་དབུས་ན་བཞུགས་པ་ཡི། །རྒྱལ་བ་རིགས་ལྔས་དབུ་བརྒྱན་གྱུར། །སྣང་མཐའི་དབང་རྒྱ་མཐེ་བོང་བརྐྱང་པ་དང་། པྲཱཏྱ་དང་པོར་བརྗོད་པའི་ལྔ་ཚན་ལྔའི་མཐར། སྣང་བ་མཐའ་ཡས་སྤྱན་རས་གཟིགས། །ཀུན་བཟང་རྟ་མགྲིན་ཡབ་ཡུམ་ལ། །སྣང་མཐའ་དབུས་སུ་བཞུགས་པ་ཡི། །རྒྱལ་བ་རིགས་ལྔས་དབུ་བརྒྱན་གྱུར། །དོན་གྲུབ་ཀྱི་དབང་རྒྱ་མཐེའུ་ཆུང་བརྐྱང་པ་དང་། ཀྲྀ་ཏྱ་དང་པོར་བརྗོད་པའི་ལྔ་ཚན་ལྔའི་མཐར། དོན་ཡོད་གྲུབ་པ་ཕྱག་རྡོར་དང་། །འཇམ་དཔལ་བདུད་རྩི་འཁྱིལ་པ་ལ། །དོན་གྲུབ་བདག་པོར་གྱུར་པ་ཡི། །རྒྱལ་བ་རིགས་ལྔས་དབུ་བརྒྱན་གྱུར། །གསུམ་པ་ཡོངས་གྲུབ་རྡོ་རྗེ་གསུམ་དུ་བྱིན་གྱིས་བརླབ་པ་ནི། ལྷ་ཐམས་ཅད་ཀྱི་སྤྱི་བོར་ཟླ་བ་ལ་གནས་པའི་ༀ་དཀར་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱོན་ནས་ༀ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར། ༀ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་གྱུར། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾཿ མགྲིན་པར་པདྨ་ལ་གནས་པའི་ཨཱཾཿདམར་པོ་དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་བརྒྱུད་བསྐུལ། གསུང་རྡོ་རྗེའི་ལྷ་ཚོགས་ནམ་མཁའ་གང་བར་བྱོན་ནས་ཨཱཾཿལ་ཐིམ། དེ་བཞིན་གཤེགས་པ་ཐམས་ཅད་ཀྱི་གསུང་དང་གཉིས་སུ་མེད་པར་གྱུར། ཨཱཾཿཡོངས་སུ་གྱུར་པ་ལས་སྣང་མཐའ་དམར་པོ་པདྨ་འཛིན་པས་རྒྱས་བཏབ་པར་གྱུར། རྡོ་རྗེའི་ཕྱག་རྒྱ་མགྲིན་པར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ སྙིང་གར་ཉི་མ་ལ་གནས་པའི་ཧཱུྃ་སྔོན་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ་བས། ཐུགས་རྡོ་རྗེའི་ལྷ་ཚོགས་ནམ་མཁའ་གང་བར་བྱོན་ནས་ཧཱུྃ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་ཐུགས་དང་གཉིས་སུ་མེད་པར་གྱུར། ཧཱུྃ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་བཏབ་པར་གྱུར། རྡོ་རྗེའི་ཕྱག་རྒྱ་སྙིང་གར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ གསུམ་པ་ཕྲིན་ལས་བྱ་བའི་ཡན་ལག་ལ་དྲུག་སྟེ། བསམ་གཏན་གྱི་ངང་ནས་ཡེ་ཤེས་པ་སྤྱན་དྲང་བ། སྦྱིན་པའི་རང་བཞིན་མཆོད་པ་འབུལ་བ། བཟོད་པའི་ངོ་བོ་བཤགས་པ་བྱ་བ། བརྩོན་འགྲུས་ཀྱི་བདག་ཉིད་དངོས་གྲུབ་བསྐུལ་བ། ཚུལ་ཁྲིམས་ཀྱི་ངོ་བོ་དམ་བཅའ་བ། ཤེས་རབ་ཀྱི་རང་བཞིན་བཟླས་པ་བྱ་བ་དང་དྲུག་གི། དང་པོ་ལའང་གསུམ་སྟེ། དང་པོ་རྡོ་རྗེའི་གླུས་བསྐུལ་བ་ནི། རྒྱལ་བ་རྣམས་ཀྱི་ཡེ་ཤེས་སྟོང་ཉིད་བཅུ་དྲུག་གི་བདག་ཉིད་རང་བཞིན་དང་ངོ་བོ་ཉིད་མེད་པ་དང་། ཡོད་མེད་ཀྱི་མཐའ་གཞིག་པའི་རྣལ་འབྱོར་གྱི་དོན་དྲན་པར་བྱེད་པ་སྟེ། ཧཱུྃ་སྟོང་པ་ཤིན་ཏུ་ཡོད་མེད་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་མཛད་དགོངས་སུ་གསོལ། །རྡོ་རྗེ་སེམས་དཔའ་ཁྱོོད་བདག་སྐལ་བཟང་དཔལ། གཉིས་པ་ནི། ལྷ་ཚོགས་རྣམས་ཀྱི་ཐུགས་ཀའི་འོད་ཟེར་གྱིས་བསྐུལ་བས། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་སྟེ་རང་བཞིན་གྱི་གནས་ནས་ཕྱོགས་བཅུ་དུས་བཞིའི་རྒྱལ་བ་རབ་འབྱམས་མ་ལུས་ཤིང་ལུས་པ་མེད་པ་སྒྱུ་འཕྲུལ་དྲྭ་བའི་གདན་གསུམ་གྱི་འཁོར་ལོར་སད་པར་བསམས་ལ་སྤོས་རོལ་དང་བཅས། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བ། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་ཨེ་ཧྱེ་ཧེ་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ཛཿཧཱུྃ་བྃ་ཧོཿ ཞེས་དམ་ཡེ་རོ་གཅིག་ཏུ་བསྲེའོ། གསུམ་པ་ནི། རིག་པ་བདེ་གཤེགས་སྙིང་པོའི་མེ་ཏོག་ཕུང་ཁམས་ཚོགས་བརྒྱད་དཀྱིལ་འཁོར་གྱི་འཁོར་ལོར་དག་པའི་དབྱིངས་སུ་དོར་བས་རང་བཞིན་དབྱེར་མེད་དུ་འདྲེས་པར་བསམས་ལ། ༀ་བཛྲ་ས་མ་ཡ་ༀ། ཨཱཾཿབཛྲ་ས་མ་ཡ་ཨཱཾཿ ཧཱུྃ་བཛྲ་ས་མ་ཡ་ཧཱུྃ། སྭ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་པས་རང་བཞིན་གྱི་དཀྱིལ་འཁོར་དང་། ཏིང་འཛིན་སྤྲུལ་པའི་དཀྱིལ་འཁོར་གཉིས་སོ་སོའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་ཀྱི་དམ་ཚིག་གི་ངོ་བོ་གྲུབ་པར་བསམས་ལ། དངོས་གྲུབ་ཀྱི་དོན་དུ་གསོལ་བ་གདབ་པ་ནི། ༀ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོ་བདག་སྦྱོར་ཅིག །ཅེས་པས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པ་དང་། ༀ་བཛྲ་ས་མ་ཡ་ཧཱུྃ་གིས་ཡེ་ཤེས་པ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་ཐིམ། ༀ་བཛྲ་ས་མ་ཡ་སྟཱཾ་གྱིས་རང་ཉིད་ལྷ་ཡི་དཀྱིལ་འཁོར་དུ་འཚང་མ་རྒྱས་ཀྱི་བར་དུ་བརྟེན་པར་བཞུགས་པར་བསམ། ༀ་བཛྲ་ས་མ་ཡ་ཧོ༔ ས་དབང་དུ་གྱུར་ཅིང་དགྱེས་པར་བསམ་ཛཿཧཱུྃ་བཾ་ཧོཿས་བརྟན་ཞིང་གསལ་བར་བྱས་ནས། རིན་ཆེན་སེང་གེའི་གདན་ལ་ཡང་དག་ངེས་བཞུགས་ཤིང་། །རང་གི་ལྷ་མོ་དག་དང་སྲས་དང་གཡོག་འཁོར་བཅས་པ་རྣམས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་དང་བཅས་པ་རྣམས་ལ་ཕན་ཕྱིར་བཞུགས་སུ་གསོལ། །ཀཱ་ཡ་ཝཱཀཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ཕྱག་དང་མཆོད་པ་ནི། པཉྩ་དྲྭ་མ་ལས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་འཚལ། །ཞེས་པ་ལྟར་ཆོས་ཉིད་མངོན་དུ་མཐོང་བ་རྣམས་ལ་བྱ་བྱེད་ཀྱི་གཉིས་རྟོག་མི་དགོས་ཀྱང་། དང་པོའི་བློ་ཅན་རྣམས་ནི་རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ། སེམས་ཅན་ཐམས་ཅད་ད ང་བྱ་བྱེད་ཐུན་མོང་བར་གྱུར་ནས་ཕྱག་དང་མཆོད་པ་ལ་སོགས་པ་ལས་ཀྱི་རིམ་པ་ལ་འཇུག་པར་མོས་པའོ། །དེའི་དང་པོ་ཕྱག་འཚལ་བ་ནི། མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་པའི། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ཀྱི་ཡུམ་གྱུར་རྣམས་ལ་ཕྱག་མཚལ་ལོ། །རྣམ་ཤེས་དབང་པོ་དག་པའི་སྐུ་གསུང་ཐུགས། །བདེ་བར་གཤེགས་པ་རྣམས་ཀྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་མ། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་བསྲུང་། །མཐར་བྱེད་སྒོ་བ་བཞི་ལ་ཕྱག་འཚལ་ལོ། །རྟག་ཆད་ལྟ་འབྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོགས་དྲིལ་འཁྲོལ་མ། །ཡེ་ཤེས་སྒོ་མ་བཞི་ལ་ཕྱག་འཚལ་ལོ། །སྟེང་འོག་ཕྱོགས་བཞིར་འཇིག་རྟེན་གདུལ་བའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱང་། །བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །ཨ་ཏི་པུ་ཧོཿ པྲ་ཏི་པུ་ཧོཿ ཞེས་ཕྱག་བྱའོ། །གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། སྔགས་བླ་མེད་སྤྱིའི་གྲུབ་མཐའི་མངོན་རྟོགས་ཕྱག་རྒྱའི་ཁོང་ནས་འདོན་པ་ལས། འདིར་མཆོད་པ་ལ་མཚོན་ན། ལྷར་སྣང་ཕྱག་ཆེན། ས་བོན་ཆོས་རྒྱ་བཅའ་བ་དམ་རྒྱ། དགྲོལ་བ་ལས་རྒྱའི་དོན་ངེས་པས། ལག་པ་གཡས་ཀྱི་སོར་མོའི་བྲེ་ཁ་ལྔ་ལ། མ་སཱུརྱ་མཎྜལ། ཉི་མའི་དཀྱིལ་འཁོར་ལྔ། གུང་མཛུབ་སྲིན་ལག་མཐེ་བོང་མཐེའུ་ཆུང་རྣམས་ལ། ཧཱུྃ་ༀ་སྭཱ་ཨཱཾཿཧཱ། གཡོན་གྱི་སོར་མོའི་བྲེ་ཁ་ལྔ་ལ། ཨ་ཙནྡྲ་མཎྜལ། ཟླ་བའི་དཀྱིལ་འཁོར་ལྔ། གུང་མཛུབ་སོགས་ལྔ་ལ། མཱུཾ་ལཱཾ་མཱཾ་པཱཾ་ཏཱཾ། རྣམས་ཀྱིས་མཚན་པར་བསམ་ལ། ཧཱུྃ་སྒྱུ་འཕྲུལ་དྲ་བ་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལས། །འདི་ནས་སྤྲད། སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུཾ་གཉིས་རྩེ་སྦྱར་ཏེ། །གཡས་ཀྱི་མཛུབ་མོ་དང་གཡོན་གྱི་གུང་མོ། འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །གཡོན་དུ་དགྲོལ། པད་སྐོར། འབྲུ་བཞི་སྦས་ནས་ཐུགས་ཀར་བཀན། །གཡས་ཀྱི་གུང་མོ། ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟེན། །གཡོན་དུ་དགྲོལ། ཧཱུྃ་བཛྲ་དྷྲིག་པད་སྐོར། འབྲུ་བཞི་སྦས་ནས་ཐུགས་ཀར་བཀན། །གཡོན་གྱི་གུང་མོ། མཱུཾ་སྒྲེང་རྩེ་མོར་དྲིལ་བསིལ་འབར། །དྲིལ་བསིལ། ཉི་མ་འབྲུ་ལྔ་ལས་སུ་འཁྲིལ། །པད་སྐོར། བཏུད་དེ་འཛུམ་པའི་མདངས་ཀྱིས་བལྟ། །མཱུཾ་དྷ་ཏྭེ་ཤྭ་རི། གཡས་སུ་དགྲོལ་བ། འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟེན། །ༀ་ཛི་ན་ཛི་ཀ །འབྲུ་བཞི་སྦས་ནས་ཐུགས་ཀར་བཀན། །ལཱཾ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འབར། །བཏུད་དེ་འཛུམ་པའི་མདངས་ཀྱིས་བལྟ། །ལཱཾ་དྱེ་ཥ་ར་ཏི། འབྲུ་བཞི་སྦས་ནས་ཐུགས་ཀར་བཀན། །སྭཱ་སྒྲེང་རྩེ་མོར་རིན་ཆེན་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟེན། །སྭཱཾ་རཏྣ་དྷྲིཀ །འབྲུ་བཞི་སྦས་ནས་ཐུགས་ཀར་བཀན། །མཱཾ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འབར། །བཏུད་དེ་འཛུམ་པའི་མདངས་ཀྱིས་བལྟ། །མཱཾ་མོ་ཧ་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཨཱཾ་སྒྲེང་རྩེ་མོར་པདྨ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟེན། །ཨཱཾ་ཨ་རོ་ལིཀ །འབྲུ་བཞི་སྦས་ནས་ཐུགས་ཀར་བཀན། །པཱཾ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འབར། །བཏུད་དེ་འཛུམ་པའི་མདངས་ཀྱིས་བལྟ། །པཱཾ་ར་ག་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཧཱ་སྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བསྟེན། །ཧཱཾ་པྲ་ཛྙཱ་དྷྲིཀ །འབྲུ་བཞི་སྦས་ནས་ཐུགས་ཀར་བཀན། །ཏཾ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འབར། །བཏུད་དེ་འཛུམ་པའི་མདངས་ཀྱིས་བལྟ། །ཏྲཱཾ་བཛྲ་ར་ཏི། ༀ་ཧཱུྃ་སོགས་བསྒྲེང་རྒྱ་གཡས་གཡོན་སོ་སོའི་གུང་མཛུབ་ནས་རེ་མོས་ཁོ་ནར་བསྒྲེང་བའོ། །འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིན། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །ཅེས་རིམ་པ་བཞིན་རིགས་ལྔ་སོ་སོའི་ཕྱག་རྒྱ་བཅའ་བ་སྟེ། དེ་ཡང་ཕྱག་རྒྱ་མདུན་དུ་བསྒྱུར་ནས་ཡབ་གཡོན་དང་། ཡུམ་གཡས་སུ་དགྲོལ་བའོ། །གཉིས་པ་ཀུན་བཟང་ནི། ༀ་ཧཱུྃ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མསྶརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་ནས་ཀྱང་། །རྡོ་རྗེའི་གདན་ལ་བཞུགས་སུ་གསོལ། །ༀ་ཨ་ཧ་ར་ཨ་ཧ་ར་སརྦ་བིདྱ་དྷ་ར་པཱུ་ཛི་ཏེ་ན་མསྶ་མནྟ་བུདྡྷ་ནཾ་ག་ག་ན་ཁཾ་ས་མ་ཡེ་སྭཱ་ཧཱ། ཞེས་ཕྱག་ཞབས་ལ་ཉེ་རེག་དང་མཆོད་ཡོན་དུ་དབུལ་ལོ། །བཞི་པ་བཞི་བསྣོལ་ནི། སོ་སོའི་ཕྱག་རྒྱ་དང་བཅས། ༀ་ཧཱུྃ་སྤོས་ཀྱི་སྤྲིན་ལྡིང་བདུག་པ་མ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པར་རོལ། ༀ་པ་ན་པེེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷུ་པེ་དྷུ། ཨུཏྤལ་མཐིང་ག་མེ་ཏོག་འཐོར། སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུ ཥྤེའི་མཆོད་པར་རོལ། ༀ་པ་ན་པེཾ་སོགས་དང་། ༀ་ཤྲི་བཛྲ་རཱ་ག་པུཥྤེ་པུ། དབང་གི་ཕྱག་ན་སྒྲོན་མ་བསྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲ་ལོ་ཀེའི་མཆོད་པར་རོལ། །ༀ་པ་ན་པེཾ་སོགས་དང་། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ཙནྡ་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལས། །བཛྲ་གནྡྷེའི་མཆོད་པར་རོལ། ༀ་པ་ན་པེཾ་སོགས་དང་། ༀ་ཤྲཱི་བཛྲ་རཱ་ག་གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་པོའི་སྒོ་སོ་སོ་ལ་ཐིམ་པར་བསམ། ༀ་ཨཱཿཧཱུྃ་རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ལྔ་པ་སྨན་མཆོད་ནི། ༀ་ཧཱུྃ། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་སྒྲོལ་བ། །དུག་ལྔ་སེལ་བའི་བདུད་རྩི་སྨན། །ཐམས་ཅད་བདུད་རྩིའི་རྣལ་འབྱོར་ཆེ། །བྱང་ཆུབ་སེམས་ནི་རྡོ་རྗེ་སྟེ། །ཤ་ཆེན་མཆོད་པ་རིན་པོ་ཆེ། །པདྨ་མེ་ཏོག་ཡང་དག་ལྡན། །རྡོ་རྗེ་ཆུ་སྟེ་ལས་ཀྱི་མཆོག །ཟས་མཆོག་ཚེ་ཡི་དྲི་ཆེན་པོ། །ག་བུར་ཤེལ་གྱི་པོག་པོར་དྲི། །རིན་ཆེན་མེ་ལྟར་འབར་བའི་ཚོགས། །མ་ལུས་འདུས་པའི་ཐིག་ལེ་ཆེ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱར་ནས། །བདུད་རྩི་དམ་པ་རིན་ཆེན་བཅུད། །བདེ་གཤེགས་རྣམས་ཀྱི་ཐུགས་དམ་ཉིད། །རྒྱལ་བ་རྒྱ་མཚོའི་དངོས་གྲུབ་མཆོག །ཐུགས་རྗེ་ཆེན་པོའི་དཀྱིལ་འཁོར་འདིར། །བདག་ཅག་དད་པས་འབུལ་ལགས་ན། །ཐུགས་རྗེས་དགོངས་ཏེ་བཞེས་སུ་གསོལ། །བཞེས་ནས་ཀུན་ཏུ་དགྱེས་མཛོད་ལ། །བླ་མེད་དངོས་གྲུབ་སྩལ་དུ་གསོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་། བྱེ་བྲག་ཏུ་དཀོན་མཆོག་འགྲེལ་ལས། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོར་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་དང་། ཀུན་བཟང་རིགས་ལྔ་རིགས་གསུམ་དྲ་མ་ལྔ། །ལུང་བསྟན་རྡོ་རྗེ་ཨུ་པ་རཱ་ཛ་དང་། །དྲང་སྲོང་བྷ་ཤི་པྲ་བྷ་ཧ སྟི་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །སརྦ། རྒྱལ་དབང་པདྨ་ཀཱ་ར་གཉགས་ལོ་དང་། །སོག་པོ་ལྷ་དཔལ་གནུབས་ཆེན་སྲས་སློབ་བརྒྱུད། །ཤེས་རབ་མཆོག་དང་ཡེ་ཤེས་འབྱུང་གནས་ལ། །སྨན་མཆོད། སརྦ། གྲུབ་ཐོབ་ཟུར་ཆེན་ཟུར་ཆུང་ཀ་ཆེན་བཞི། །གསང་བདག་སྒྲོ་ཕུག་པཎ་ཆེན་རོང་པའི་ཞབས། །ཤཱཀྱ་འབྱུང་གནས་ཤཱཀ་འབྱུང་རྡོ་རྗེ་འོད། །སྨན་མཆོད། སརྦ། པུརྣཻ་དྷ་ཛ་ཆོས་སེང་བུདྡྷ་ཤྲཱི། བསོད་ནམས་མགོན་པོ་སྒྲོལ་ཆེན་དགེ་རོང་པས་དགུང་ལོ་བརྒྱ་དང་ཉི་ཤུ་སྐོར་བཞུགས་ཤིང་རྣམ་ཐར་ན་མདོ་སྟོན་སེདྒེ་ལས་གསན་ཚུལ་ཡོད་པ་སྒྲོ་ཕུག་པ་ཤཱཀྱ་སེངྒེ་ཡིན། འདུན་འབུམ། །ཤཱཀྱ་བཤེས་གཉེན་བྲ་བོ་ཆོས་འབུམ་ལ། །སྨན་མཆོད། སརྦ། རཏྣ་བྷ་དྲ་རྡོ་རྗེ་དཔལ་བཟང་པོ། །དན་འབག་གཞོན་ནུ་ཀུན་མཁྱེན་དྲི་མེད་འོད། །གཏད་རྒྱ་ལུང་རྫོགས་འཇིགས་མེད་གླིང་པ་ལ། །སྨན། སརྦ། ཕུང་ཁམས་དག་པའི་གཤེགས་པ་གཤེགས་མ་དང་། །དབང་ཡུལ་དག་པའི་བྱང་ཆུབ་ལྕམ་དྲལ་ཚོགས། །ལས་ལ་དབང་བའི་སྒོ་སྐྱོང་ཐུབ་དྲུགས་ལ། །སྨན། སརྦ། མདོར་ན་རབ་འབྱམས་དཀྱིལ་འཁོར་རྒྱ་མཚོའི་སྡེ། །གནས་ཡུལ་ཌཱཀྐི་དམ་ཅན་ཆོས་སྐྱོང་དང་། །ཞིང་སྐྱོང་གཞི་བདག་དཀར་ཕྱོགས་སྐྱོང་བའི་ཚོགས། །དུས་གསུམ་ཕ་མ་འགྲོ་བ་རིགས་དྲུག་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་གུཧྱ་ལག་གི་ཕྱག་རྒྱས་གཏོར་བས། ཡེ་ཤེས་ཀྱི་བདུད་རྩིའི་ཟེགས་མ་མཁའ་ལ་སྤྲིན་བཞིན་དུ་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་ཐམས་ཅད་མཉེས་ཞེང་ཚིམ་པར་བསམ་ལ། མཐར་དོངས་གྲུབ་བླང་བ་ནི། རང་གི་ལྕེ་ལ་ཧཱུྃ་ཡིག་དང་། སྨན་གྱི་སྟེང་དུ་ༀ་ཨཱཿཧཱུྃ་གསུམ་བསྒོམ་སྟེ། ༀ་ཨཱཿཧཱུྃཿ རྡོ་རྗེ་ལྕེ་ཡི་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་སྒོམ། །བདུད་རྩི་ལྔ་དང་སྦྱར་བའི་སྨན། །མྱངས་ན་དངོས་གྲུབ་ཐོབ་པར་འགྱུར། །ༀ་སརྦ་ཏ་ཐཱ་ག་ཏ་ཀཱ་ཡ་སིདྡྷི་ༀ། ཝཱཀ་སིདྡྷི་ཨཿ ཙིཏྟ་སིདྡྷི་ཧཱུྃ། ཞེས་རིམ་པར་བརྫོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། འདོད་ཡོན་གྱི་ལྷ་མོ་དཔག་ཏུ་མེད་པས་དཀྱིལ་འཁོར་བ་རྣམས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་ཞིང་། ༀ་ཧཱུྃཿ བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ༀ་ཨཱཿཧཱུྃ་སུ་ར་ཏོ་ཨུ་པ་བྷྱཿ ཀ་མ་ལ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝཱན་ཛཿཧཱུྃ་བཾ་ཧོཿ ཨ་ལ་ལ་ཧོཿ ཞེས་དང་། ༀ་པ་ན་པེཾ་སོགས་བཞི་བསྣོལ་གྱིས་ཀྱང་མཆོད་དོ། །བདུན་པ་བདུད་རྩི་གསང་ནན་གྱི་མཆོད་པ་ནི། བདུད་རྩི་བཟེད་ཞལ་དུ་ལན་གསུམ་འཕྱར་ཞིང་། ༀ་ཨཱཿཧཱུྃ་མི་བསྐྱོད་ཡེ་ཤེས་བདེ་བའི་མཆོག་དང་ལྡན་པའི་རོ་ལ་བསྣམ་དུ་གསོལ། ཨ་ལ་ལ་ཧོ། བྱང་ཆུབ་སེམས་པའི་བདེ་མཆོག་དེ་ཉིད་འགོག་པ་རྣམས་ལས་བསླང་བའི་ཕྱིར། །ཆགས་པ་མེད་པའི་བདེ་མཆོག་ཀུན་ཏུ་མྱོང་མཛད་བཞེས་ཤིང་བསྣམ་དུ་གསོལ། །ༀ་ཨཱཿཧཱུྃ། མཆོག་ཏུ་གསང་བའི་བདེ་ལ་རོལ་ཞིང་དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་བདེ་བའི་གར་མཛོད་ཅིག །ཨ་ལ་ལ་ཧོ། ཞེན་ཅིང་ཆགས་པའི་མཐའ་ལ་ཉོན་མོངས་རྣོ་བརྐམ་གཟིར་བ་ཡི། །མྱོང་བྱེད་བདེ་མཆོག་བརྒྱད་དང་ལྡན་པས་ཐབས་ཀྱི་སྐུ་ལ་སྨྲེ་བར་མཛོད། །འགྲོ་ཀུན་ཚངས་པར་སྤྱོད་པའི་བྱང་ཆུབ་བསྒོ་མོར་ལམ་སྟོན་ཅིག །བདེ་མཆོག་བདུད་རྩི་ཁྱད་པར་མེད་པའི་ཚོགས་ལ་བཀའ་ལྕོལ་ཅིག ། ཨ་ལ་ལ་ཧོ། ཞེས་དང་པོས་དཀྱིལ་འཁོར་པ་དགྱེས་པ་བསྐྱེད། གཉིས་པས་བྱང་ཆུབ་སེམས་དཔའི་བདེ་མཆོག་མ་རྟོགས་པའི་ཉན་ཐོས་རྣམས་འགོག་པ་ལས་བསླང་། གསུམ་པས་དེ་གཞིན་གཤེགས་པ་རྣམས་གཞན་དོན་ལ་བསྐུལ་ཞིང་གཏོར་མ་ལ་སྦྲན་ནོ། །བརྒྱད་པ་ལྷག་པ་ཏིང་ངེ་འཛིན་གྱི་མཆོད་པ་ནི། ༀ་མཆོད་པའི་ཕྱག་རྒྱ་ཆེན་པོ་ནི། །སེམས་ཀྱིས་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །སྐལ་ལྡན་གསལ་པའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་སྒོམ། །དགུ་པ་བསྒྲལ་མཆོད་ནི། རང་གི་ཐུགས་ཀ་ནས་རཾ་དཔག་ཏུ་མེད་པ་ཆད། རཾ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པར་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་ཞིང་། ཧཱུྃ། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །བཅུ་པ་སྦྱོར་མཆོད་ནི། ཡབ་ཀྱི་ནོར་བུ་ཧཱུྃ་ལས་རྩེ་ལྔ་པའི། །རྡོ་རྗེའི་དབྱིབས་ཅན་ཟླ་བར་ༀ་གྱིས་མཚན། །ཡུམ་གྱི་ཆོས་འབྱུང་མཱཾ་ལས་འདབ་བརྒྱད་ཀྱི། །པདྨའི་ཟེ་འབྲུ་ཉི་མར་མཱུཾ་གྱིས་མཚན། །ཡབ་ཀྱིས་ས་མ་ཧོ་ཡི་བརྡས་བསྐུལ་བས། །ཡུམ་གྱིས་ས་མ་ཡ་སྟྭཾ་ལན་བཏབ་པ། །ཡབ་ཀྱིས་རཱ་ག་ཡ་ཧོའི་བརྡ་སྦྱར་བས ། །ཡུམ་གྱིས་རཱ་ག་ཡ་མིའི་བརྡ་ཡིས་བསྐུལ། །ཛཿཧཱུྃ་བཾ་ཧོཿ བོ་དྷི་ཙིཏྟ་མ་ཧཱ་སུ་ཁ་ཧོ། ཞེས་དགའ་བ་བཞིའི་རོལ་མོ་སོ་སོར་རྟོག་པའིི་ཡེ་ཤེས་སུ་སད་པར་བསམ་ལ། ༀ་ཧཱུྃ། འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུྃ་བཟའ་དང་བཅའ་དང་བཏུང་དང་བགོ། ལོངས་སྤྱོད་ལྔ་ལྡན་ཐམས་ཅད་ནི། དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་། དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ༀ་དབང་པོའི་སྤྱོད་ཡུལ་རང་བཞིན་དངོས་པོ་མེད། །རྣམ་དག་བདུད་རྩིའི་རང་བཞིན་དུག་ལྔ་སེལ། །དམ་རྫས་དག་པ་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་རང་བཞིན་དབྱེར་མེད་མཉམ། །དེ་ཕྱིར་དག་པས་དག་པ་ཉིད་མཆོད་ཕྱིར། །ཆོས་ཉིད་ལ་ནི་ཆོས་ཉིད་ཐིམ་པར་འབུལ། །དྲི་མེད་རྣམ་དག་ནམ་མཁའི་རང་བཞིན་ལ། །ལོག་རྟོག་མཚན་མ་མང་པོའི་སྤྲིན་སྤུངས་ཏེ། །ཡེ་ཤེས་ཉི་མའི་འོད་ཀྱིས་རབ་བརྒྱན་ནས། །དག་པའི་དོན་ཕྱིར་རྟོགས་ནས་མཆོད་པར་འབུལ། །མཉམ་ཉིད་བླང་དོར་མེད་ལ་སྙོམས་པར་འཇུག་པ་དང་། །བདེ་ཆེན་ལོངས་སྤྱོད་རྫོགས་པ་སྐུ་ཡི་རྒྱན། །འདོད་ཡོན་ལྔ་ཡི་ལྷ་མོར་བྱིན་བརླབས་པས། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཞེས་པའི་རོལ་མོ་ཇི་སྙེད་པ་ཐམས་ཅད་ཀྱིས་འཁོར་གསུམ་ཡེ་ཤེས་སུ་དག་པར་མངོན་དུ་བྱས་ནས། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་མཆོད་པའི་ང་རྒྱལ་བྱ་ཞིང་རོལ་མོ་ཡེ་ཤེས་ཀྱི་སྒྲས་བསྐུལ་ལ། བཅུ་གསུམ་པ་གླུ་ཡེ་ཤེས་ཀྱི་མཆོད་པས་བསྟོད་པ་ནི། ༀ་ཕྱོགས་བཅུ་དུས་བཞི་རྫོགས་དྲིལ་སྟབས་དང་བཅས་བསོར་དཀྲོལ། པ་ཡི། །ཡེ་ཤེས་དཀྱིལ་འཁོར་ཐིག་ལེ་པད་སྐོར། ཆེ། །བསོད་ནམས་དཀྱིལ་རང་ཕྱག །འཁོར་སྐུ་ཡི་ཚོགས། །སྣང་སྟོང་ནང་སྐོར་ཐར་སྦྱར། ཐིག་ལེ་ཀུན་ཏུ་རྫོགས་ཧོ། །ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། ། འདུས་པའི་ཚོགས་ཆེན་ཐིག་ལེ་ཆེ་ཧོ། །ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྤྱི་ཕྱག །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །ཞེས་ཡོན་ཏན་རྗེས་སུ་དྲན་པའི་སྒོ་ནས་ཆོས་ཉིད་ཀྱི་རང་སྒྲས་བསྟོད་པར་བྱའོ། །གསུམ་པ་བཤགས་པ་བྱ་བ་ནི། ཧོ། སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་བདེ་བར་གཤེགས་པ། རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག་ཐབས་ལ་མཁས་པའི་བདག་ཉིད། སྒྲོལ་བའི་མཁའ་འགྲོ་རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉེན་པོ་མ་ནོར་བར་མནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་ཆག་འགལ་འཁྲུལ་དུ་གྱུར་པ། ལྷ་ཉེ་བར་མ་བསྒོམ་པ། སྙིིང་པོ་དག་པར་མ་བགྲངས་པ། སྦྱོར་བ་མང་པོས་བར་བསྐུམས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླ་ལས་འདས་པ། དམ་རྫས་ལག་ལེན་རྡོ་མ་ཐོགས་པ། ཛཔ྄་བཟླས་གྲངས་ཉུང་བ། བསྙེན་པ་ཡུན་ཐུང་པ། ཏིང་འཛིན་ཐང་ལྷོད་དུ་གྱུར་པ། དེ་བཞིན་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། སེམས་ཅན་གྱི་སྤྱོད་པ་རང་ཐད་དུ་གྱུར་པ་དང་། ཁྱད་པར་དུ་སྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་གཉེན་པོ་མངོན་པར་ནོས་པ་ལས། ཉམས་ཤིང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས། ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། བཞི་པ་དངོས་གྲུབ་གསོལ་བ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག་རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་བ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་མཛད་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པ་སྡང་བའི་དགྲ། གནོད་པའི་བགེགས། གདུག་པའི་དབལ། སྦྱོར་བའི་དུག །རྣོ་བའི་མཚོན། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། སོ་སོའི་རྨི་ལམ་ངན་པ་དང་ལྟས་ངན་པ། མི་ཤིས་པའི་རྐྱེན་དེ་དག་ཐམས་ཅད་ཕྱིར་བཟློག་ཅིང་མིང་ཡང་མི་གྲགས་པ་ཞི་བ་ཆེན་པོ་མཛད་དུ་གསོལ། གལ་ཏེ་ཞི་བས་བསྒྱུར་དུ་མི་བཏུབ་པ་དག་དྲག་པོའི་ཕྲིན་ལས་ཀྱི་དབང་དུ་བསྡུ་བ་དང་། གཟིར་ཞིང་མནན་པ་དང་། བསྒྲལ་ཞིང་སྦར་བ་ལ་སོགས་ཏེ། ཕྲིན་ལས་དྲག་ཐབས་རྣམ་པ་བཞིས། ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །གཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པ། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདི་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཞེས་འདོད་དོན་གསོལ། ལྔ་པ་དམ་བཅའ་བ་ནི། ལྷག་པའི་བསམ་པ་རྩེ་གཅིག་པས། ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་བརླབ་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབ། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །དྲུག་པ་ཛཔ྄་ལ། དེ་ཉིད་བརྗོད་པ། ཛཔ྄་ཁང་དབྱེ་བ། ཛཔ྄་དངོས། སྐབས་ཀྱི་མཇུག་བསྡུ་བ་དང་བཞི་ལས། དང་པོ་ནི། ཡང་དག་དོན་གྱི་སྙིང་པོ་ནི། །བརྗོད་པ་དུ་མའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་ངེས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། ། དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་དེ་ཁོ་ན་ཉིད་ཀྱི་དོན་དྲན་པར་བྱའོ། །གཉིས་པ་ནི། དབྱེ་གཞིའི་དཀྱིལ་འཁོར་ལེགས་པར་གསལ་བཏབ་ནས། བྷྲཱུྃ་བི་ཤྭ་བི་ཤུདྡྷེ་ཕཊཿཛཿཧཱུྃ་ༀ་སྭཱ་ཨཱཾ་ཧཱ་ཕཊ་ཛཿ ཞེས་བརྗོད་པས་དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁའ་མེ་རི་འདབས་འབྱར་གྱི་ཚུལ་དུ་བཞུགས་པར་མོས་པའོ། །གསུམ་པ་ནི། བདག་མདུན་གྱི་ལྷ་རྣམས་ཀྱི་ཡེ་ཤེས་སེམས་དཔའ་སོ་སོའི་ཐུགས་ཀར་རང་རང་གི་ཕྱག་མཚན་གྱི་ལྟེ་བར་དངས་མའི་ཐུགས་སྲོག་ཧཱུྃ་ཡིག་ལ་སོགས་པའི་མཐར་བཟླ་བྱའི་སྔགས་ཀྱི་ཕྲེང་བས་བསྐོར་བར་གསལ་བཏབ་ལ། སྔགས་ཟློས་བའི་ཚེ་བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་བསམ་ལ། དེ་ཡང་དབང་པོ་མཆོག་ཏུ་གྱུར་པ་རྣམས་ཀྱིས་དམ་ཡེ། འཕྲོ་འདུ་སྟེ་གསལ་བ་གསུམ་དང་ལྡན་པའི་ངང་ནས་བདུད་བཞི་བཅོམ་པའི་མཚན་ཉིད་རིག་པར་བྱ་སྟེ། མན་ངག་ལྟ་བའི་ཕྲེང་བ་ལས། འདི་ལྟར་བསྙེན་པའང་བྱང་ཆུབ་ཀྱི་སེམས་ཤེས་པའི་མཚན་ཉིད། མ་སྐྱེས་པའི་ཏིང་ངེ་འཛིན་གྱིས་འཆི་བདག་གི་བདུད་བཅོམ་མོ། །ཉེ་བའི་བསྙེན་པ་བདག་ཉིད་ལྷར་ཤེས་པའི་མཚན་ཉིད། སྒྱུ་མ་ལྟ་བུའི་ཏིང་ངེ་འཛིན་གྱིས་ཕུང་པོའི་བདུད་བཅོམ་མོ། །སྒྲུབ་པ་ཡུམ་བསྐྱེད་པའི་མཚན་ཉིད། རྡུལ་དང་བྲལ་བའི་ཏིང་ངེ་འཛིན་གྱིས་ཉོན་མོངས་པའི་བདུད་བཅོམ་མོ། །སྒྲུབ་པ་ཆེན་པོ་ཐབས་དང་ཤེས་རབ་ཟུང་དུ་འབྲེལ་བའི་མཚན་ཉིད། མི་དམིགས་མཁའ་དང་མཉམ་པའི་ཏིང་ངེ་འཛིན་གྱིས་ལྷའི་བུའི་བདུད་བར་ཆད་གཡེང་བའི་བདུད་བཅོམ་མོ། །དེ་ལྟར་གང་ལ་བདུད་རྣམ་པ་བཞི་འདུལ་བར་བྱེད་པའི་མཐུ་ཡོད་པའི་ལམ་དེ་ནི་རྣམ་པར་དག་པའི་ལམ་ཡིན་ལ། བཟླ་བྱའི་སྔགས་ནི། ཧཱུྃ་བཛྲ་དྷྲིཀ མཱུཾ་དྷཱ་ཏེ་ཤྭ་རཱི། ༀ་ཛི་ན་ཛིག །ལཱཾ་དེ་ཥ་ར་ཏི། སྭཱཾ་རཏྣ་དྷྲིཀ །མཱཾ་མོ་ཧ་ར་ཏི། ཨཱཾ་ཨ་རོ་ལིཀ །པཱཾ་རཱ་ག་ར་ཏི། ཧཱུྃ་པྲཛྙཱ་དྷྲིཀ །ཏཱཾ་བཛྲ་ར་ཏི། ཀྵིཾ་ཧི་རཱ་ཛ་ཡ། ཧཱུྃ་ལཱ་སྱེ་ས་མ་ཡ་སྟཱཾ། ཏྲཱཾ་ཨ་གརྦྷ་ཡ། ཏྲཱཾ་མ་ལེ་ས་མ་ཡ་ཧོ༔ ཧྲཱིཾ་ཧཱ་ཧཱུྃ་པདྨ་པྲ་ད་མ། ཧྲཱིཾ་གཱི་ཏི་རཱ་ག་ོཧཾ། ཛིཾ་ཀུ་རུ་པཱ་ཎ། ཨཱཾ་ནིརྟི་རཱ་ག་ཡ་མྱེ། མཻ་དྷ་ར་ནཻ་སྭཱ་ཧཱ། ཛཿདྷཱུ་པ་པྲ་བེ་ཤ །ཐླྷིཾ་ནི་ས་རཾ་བྷ་ཡ་སྭཱ་ཧཱ ། ཧཱུྃ་པུཥྤེ་ཨ་བེ་ཤ །ཧཱུྃ་ས་རཱ་ཛ་ཡ་སྭཱ་ཧཱ། བཾ་དཱི་པ་སུ་གི་རཱི། མཱུཾ་ཤྲི་ཨཾ་རཱ་གཱ་ཡ་སྭཱ་ཧཱ། ཧོཿགནྡྷེ་ཙིཏྟ། ཧཱུྃ་ཡ་མཱནྟ་ཀྲིཏ་ཕཊ། ༀ་མཧཱ་བཛྲ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ཧཱུྃ་པྲཛྙཱནྟ་ཀྲིཏ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ཧཱུྃ་པདྨནྟ་ཀྲིཏ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ཧཱུྃ་བིགྷྣནྟ་ཀྲི་ཏ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷི་ཤྭ་རི་ཛྭ་ལ་ནི་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཨ་ཨ་ཨ་བཛྲི་བྷདྲ་ས་མནྟ་ཨ། ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུྃ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ ། ༀ་མུ་ནི་པྲེཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། ཞེས་པ་རྣམས་རིམ་པ་བཞིན་གཙོ་འཁོར་གྱི་འགྲོས་དང་སྦྱར་ནས་བཟླའོ། །བཞི་པ་སྐབས་ཀྱི་མཇུག་བསྡུ་བ་ལ། བསྟོད་པ། བཤགས་པ། ཡེ་ཤེས་པ་བསྡུ་བ་དང་གསུམ། དང་པོ་ནི། དྲིལ་སྟབས་དང་བཅས་རྡོ་རྗེ་གསོལ། ཧཱུྃ་རྣམ་ཤེས་རྣམ་དག་བཅོམ་དྲིལ་སྟབས་དང་བཅས་རྡོ་རྗེ་གསོལ། ལྡན་རྡོ་རྗེེ་སེམས། །ཞེ་སྡང་རྣམ་དག་ཆོས་དབྱིངས་པད་སྐོར། ཡེ་ཤེས་ངང་། །མཐིང་ག་རྡོ་རྗེ་གཏོད་དེ་དྲིལ་བུ་དཀུར་བརྟེན། ནང་སྐོར་ཐར་སྦྱོར། ཕྱག་ན་རྡོ་རྗེ་འབར་བ་བསྣམས། །ཐུགས་མཆོག་རྡོ་རྗེ་སེམས་ལ་ཕྱག་འཚལ་བསྟོད། །གཟུགས་ཕུང་རྣམ་དག་བཅོམ་ལྡན་རྣམ་སྣང་མཛད། །གཏི་མུག་རྣམ་དག་མེ་ལོང་ཡེ་ཤེས་ངང་། །དུང་མདོག་ཕྱག་ན་འཁོར་རང་གི་རྒྱ་སྟབས། ལོ་འབར་བ་བསྣམས། །སྐུ་མཆོག་རྣམ་སྣང་མཛད་ལ་ཕྱག་འཚལ་བསྟོད། །ཚོར་བ་རྣམ་དག་བཅོམ་ལྡན་རིན་ཆེན་འབྱུང་། །ང་རྒྱལ་རྣམ་དག་མཉམ་ཉིད་ཡེ་ཤེས་ངང་། །གསེར་མདོག་ཕྱག་ན་རིན་ཆེན་འབར་བ་བསྣམས། །ཡོན་ཏན་རིན་ཆེན་འབྱུང་ལ་ཕྱག་འཚལ་བསྟོད། །འདུ་ཤེས་རྣམ་དག་བཅོམ་ལྡན་སྣང་མཐའ་ཡས། །འདོད་ཆགས་རྣམ་དག་ཀུན་རྟོག་ཡེ་ཤེས་ངང་། །ལེ་བརྒན་ཕྱག་ན་པདྨ་འབར་བ་བསྣམ། །གསུང་མཆོག་སྣང་མཐའ་ཡས་ལ་ཕྱག་འཚལ་བསྟོད། །འདུ་བྱེད་རྣམ་དག་བཅོམ་ལྡན་དོན་ཡོད་གྲུབ། །ཕྲག་དོག་རྣམ་དག་བྱ་གྲུབ་ཡེ་ཤེས་ངང་། །ལྗང་གུ་ཕྱག་ན་རལ་གྲི་འབར་བ་བསྣམས། །ཕྲིན་ལས་དོན་ཡོད་གྲུབ་ལ་ཕྱག་འཚལ་བསྟོད། །འབྱུང་བ་རྣམ་དག་རིགས་ཀྱི་ཡུམ་ཆེན་ལྔ། །ཀུན་བཟང་སྤྱན་མ་མཱ་མ་གོས་དཀར་སྒྲོལ། །ཐབས་ཀྱི་སྐུ་ལ་ཤེས་རབ་དགྱེས་ཁྱུད་རྒྱ། འཁྲིལ་མ། །རིགས་ཀྱི་ཡུམ་ཆེན་ལྔ་ལ་ཕྱག་འཚལ་བསྟོད། །གསོར་དགྲོལ། བསྐལ་བཟང་བྱང་ཆུབ་སེམས་དཔའ་བརྒྱད་རྣམས་ནི། །བདེ་བར་གཤེགས་པ་ཀུན་གྱི་སྲས་པད་སྐོར། མཆོག་སྟེ། །པད་སྐོར། ཡོན་ཏན་མི་ཟད་སྤྲུལ་པ་བསམ་ཡས་པའི། །ཐར་སྦྱོར། སེམས་དཔའ་ཆེན་པོ་བརྒྱད་ལ་ཕྱག་འཚལ་བསྟོད། །གསོར་དཀྲོལ། སྒེག་མོ་ཕྲེང་ཐོགས་རིན་ཆེན་གླུ་གར་ཅན། །བདུག་པ་མེ་ཏོག་མར་མེ་རང་རང་གི་ཕྱག་རྒྱ། དྲི་ཆབ་མ། །རྒྱལ་བ་རྒྱ་མཚོ་རྣམས་པད་སྐོར། ལ་མཆོད་འབུལ་མ། །མཆོད་པའི་ལྷ་མོ་ཐལ་སྦྱར། བརྒྱད་ལ་ཕྱག་འཚལ་བསྟོད། །ཡེ་ཤེས་སྒོ་བ་ཆེན་པོ་ཡབ་ཡུམ་བརྒྱད། །གཤིན་རྗེ་སྟོབས་ཆེན་རྟ་མགྲིན་བདུད་རྩི་འཁྱིལ། །ལྕགས་ཀྱུ་རང་རང་ཕྱག་རྒྱ། ཞགས་པ་ལྕགས་སྒྲོག་དྲིལ་བུ་མ། །སྒོ་བ་ཡབ་ཡུམ་བརྒྱད་ལ་ཕྱག་འཚལ་བསྟོད། །ཆོས་ཉིད་སྟོང་པའི་ངང་ལས་མ་གཡོས་ཀྱང་། །ཆོས་ཉིད་ཀུན་ཏུ་བཟང་པོ་འདུ་འབྲལ་མེད། །ཆོས་ཉིད་ཁྱབ་གདལ་མཉམ་གཞག་ཆེན་པོའི་ཡེ་ཤེས་ཀྱི། །ཀུན་བཟང་ཡབ་ཡུམ་གཉིས་ལ་ཕྱག་འཚལ་བསྟོད། །ཡེ་ཤེས་བཞིི་ལ་རིགས་བཞིའི་ཕྲིན་ལས་ཀྱིས། །འཇིག་རྟེན་དྲུག་གི་བྱེ་བ་ཕྲག་བརྒྱ་རུ། །སྤྲུལ་པད་སྐོར་རང་། པ་བྱེ་བ་ཕྲག་བརྒྱས་འགྲོ་དྲུག་གི། །དོན་མཛད་ཐུབ་པ་དྲུག་ལ་ཕྱག་འཚལ་བསྟོད། །འདི་ནས་ཐར་སྦྱོར་ལས་མེད། རྒྱལ་བ་སངས་རྒྱས་བཞི་བཅུ་རྩ་གཉིས་ཀྱི། །ཆེ་བའི་ཡོན་ཏན་བརྗོད་ཀྱིས་མི་ལང་ཡང་། །ཡོན་ཏན་ཆ་ཤས་བརྗོད་པའི་བྱིན་རླབས་ཀྱིས། །རིག་འཛིན་སྔགས་འཆང་རྣལ་འབྱོར་བདག་ཅག་གི། །ལས་དང་ཉོན་མོངས་བག་ཆགས་གཏན་སྤྱངས་ནས། །ཚེ་འདི་ཉིད་ལ་རིག་འཛིན་མཆོག་ཐོབ་སྟེ། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །ཅེས་བསྟོད། གཉིས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོ་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པར། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བཟླས་པའི་ཉེས་བྱས་སུ་གྱུར་པ་ཐམས་ཅད་བཤགས་ཤིང་དག་པར་བྱའོ། །གསུམ་པ་ནི། རང་བཞིན་དང་ཏིང་ངེ་འཛིན་གྱི་དཀྱིལ་འཁོར་གཉིས་རང་བཞིན་དབྱེར་མེད་དུ་རྟོགས་པའི་ཕྱིར། ༀ་བཛྲ་ས་མ་ཡ་ༀ་སོགས་ལྔ་དང་། ཡེ་ཤེས་རྒྱལ་པོ་སྐུ་གསུང་ཐུགས་སོགས་ཀྱིས་རིག་པའི་མེ་ཏོག་དོར་ཞིང་དངོས་གྲུབ་བསྐུལ་ནས་ༀ་བཛྲ་ས་མ་ཡ་ཧཱུྃ་ཞེས་བརྗོད་པས་ཡེ་ཤེས་ཀྱི་འཁོར་ལོ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་ཐིམ། ༀ་བཛྲ་ས་མ་ཡ་སྟྭཾ། ཞེས་བརྟན་པར་བྱས། ༀ་བཛྲ་ས་མ་ཡ་ཧོཿ ཞེས་དབང་དུ་སྒྱུར་ནས་དགྱེས་ཤིང་ཆགས་པར་བྱས། ཛཿཧཱུྃ་བཾ་ཧོཿ ཞེས་ཕྱག་རྒྱ་བཞིས་བརྟན་ཅིང་གསལ་བར་བྱས་ནས་ཡི་གེ་བརྒྱ་པ་ཡང་བཟླའོ། ༈ །གསུམ་པ་རྗེས་ཀྱི་ཆོ་ག་ལ་ཚོགས་ཀྱི་མཆོད་པ། བསྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་དང་བཞི་སྟེ། དང་པོ་ཚོགས་མཆོད་ལ་ལྔ་ལས། དང་པོ་བཤམས་ཤིང་བྱིན་གྱིས་བརླབ་པ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་པ་བཤམས་ནས། བསམ་ཆུ་གཏོར་ལ། ༀ་མ་ཧཱ་ཀྲོ་དྷི་ཤྭ་རཱི་སརྦ་དྲ་བྱཾ་ཤོ་དྷ་ནི་ཧཱུྃ་ཕཊ། ཀྱིས་བསངས། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྟོང་པར་སྦྱངས། མ་སཱུརྱ་མཎྜ་ལ། ཞལ་ཟས་ཀྱི་སྣོད་དུ་ཉི་མ་ལ་ཧཱུྃ་ༀ་སྭཱ་ཨཱཾ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ་ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་ནི། ༀ་བསོད་ནམས་ཡེ་ཤེས་ཚོགས་རྫོགས་ཤིང་། །རང་རིགས་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ༀ་ཨེ་ཧྱེ་ཧི་སོགས་ཀྱིས་ཚོགས་ཞིང་མཁའ་ཁྱབ་ཏུ་སད་པར་བྱ། གསུམ་པ་མཆོད་པ་ལ་གཉིས་ཀྱི། དང་པོ་ཏིང་ངེ་འཛིན་གྱི་མཆོད་པ་ནི། ༀ་ཧཱུྃ། སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷུ་པེའི་མཆོད་པར་རོལ། ༀ་ཤྲཱི་བཛྲ་རཱ་ག་དྷུ་པེ་དྷུ། །ཨུཏྤལ་མཐིང་ག་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུཥྤེའི་མཆོད་པར་རོལ། །ༀ་ཤྲཱི་བཛྲ་རཱ་ག་པུཥྤེ་པུ། །དབང་གི་ཕྱག་ན་སྒྲོན་མ་བསྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲ་ལོ་ཀེའི་མཆོད་པར་རོལ། །ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལས། །བཛྲ་གནྡྷེའི་མཆོད་པར་རོལ། ༀ་ཤྲཱི་བཛྲ་རཱ་ག་གནྡྷེ་གན། ཞེས་བཞི་བསྣོལ་དང་། ཧཱུྃ་རྡོ་རྗེ་སྒེག་མོ་རྡོ་རྗེ་ཅན། །སེམས་དཔའ་སྔོན་པོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལས། །བཛྲ་ལཱ་སྱེའི་མཆོད་པར་རོལ། །ༀ་ཤྲཱི་བཛྲ་རཱ་ག་ལཱ་སྱེའི་ཧཱུྃ། །ཡིད་བཞིན་རིན་ཆེན་འོད་འབར་མ། །འཇམ་དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལས། །བཛྲ་མཱ་ལེའི་མཆོད་པར་རོལ། །ༀ་ཤྲཱི་བཛྲ་རཱ་ག་མཱ་ལེ་ཏྲཱཾ། པདྨ་དབྱངས་མཁན་རྨ་བྱའི་མགྲིན། །སྦྱན་རས་གཟིགས་ཀྱི་དངོས་གྲུབ་འཛིན། །སོ་སོར་རྟོགས་པའི་ཡེ་ཤེས་ལས། །བཛྲ་གཱིརྟཱིའི་མཆོད་པར་རོལ། །ༀ་ཤྲཱི་བཛྲ་རཱ་ག་གིརྟི་ཧྲཱིཿ གར་མཁན་འགྱིང་བག་གཟིར་ལྡན་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན་ཡེ་ཤེས་ལས། །བཛྲ་ནིརྟིའི་མཆོད་པར་རོལ། །ༀ་བཛྲ་རཱ་ག་ནིརྟི་ཨཿ གཉིས་པ་ཚོགས་རྫས་ཀྱི་མཆོད་པ་ནི། ཞལ་ཟས་ཀྱི་ཕུད་རིམ་པར་སྤྲོས་ལ། ཧཱུྃ། ཐབས་དང་ཤེས་རབ་ལྡན་གྱུར་ཅིང་། །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ནས། །ཚོགས་ཆེན་གཉིས་ཀྱང་རྫོགས་པར་རོལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་དང་ལྷ་མོར་བརྟག །སྣ་ཚོགས་གཟུགས་ནི་ཐམས་ཅད་ཀུན། །སྣང་སྟོང་ངོ་བོ་ཉིད་ཀྱི་གཞི། །ཆོས་དབྱིངས་དག་པའི་ཡེ་ཤེས་སྟེ། །རྡོ་རྗེ་ལྷ་མོ་གཟུགས་མཛེས་མ། །ཐམས་ཅད་མ་ལུས་སྒྲ་རྣམས་ནི། །གྲག་སྟོང་ངོ་བོ་ཉིད་ཀྱི་གཞི། །མེ་ལོང་ལྟ་བུའི་ཡེ་ཤེས་ཏེ། །རྡོ་རྗེ་ལྷ་མོ་འཇམ་པའི་སྒྲ། །བདེ་བ་ཚིམ་བྱེད་བསོད་ནམས་ཏེ། །ཚིམ་སྟོང་ངོ་བོ་ཉིད་ཀྱི་གཞི། །བརྗོད་མེད་མི་གནས་ཡེ་ཤེས་ཏེ། །རྡོ་རྗེ་ཆགས་མེད་པདྨའི་གསུང་། །བདེ་གཤེགས་དཀྱིལ་འཁོར་མ་ལུས་པ། །བདེ་བ་རོ་ཡིས་ཚིམ་བྱེད་པ། །རོ་སྟོང་ངོ་བོ་ཉིད་ཀྱི་གཞི། །སོ་སོར་རྟོགས་པའི་ཡེ་ཤེས་ཏེ། །ཐམས་ཅད་ཚིམ་བྱེད་རོ་ཡི་ལྷ། །རྡོ་རྗེ་རེག་བྱ་མྱོང་བྱེད་མ། །དཀྱིལ་འཁོར་བསམ་ཡས་ལྷུན་གྱིས་གྲུབ། །བདེ་མཆོག་དཀྱིལ་འཁོར་ཡང་བྱེད་མ། །བྱ་བ་གྲུབ་པའི་ཡེ་ཤེས་ཏེ། །རྡོ་རྗེ་རེག་བྱའི་ལྷ་མོ་རྣམས། །འདོད་ཡོན་ཕྱག་ན་སྣམས་ནས་ནི། །རྐང་པས་སྟབས་བྱེད་ལག་གར་བསྒྱུར། །སྙན་པའི་གླུ་དབྱངས་བླང་ནས་ནི། །དཀྱིལ་འཁོར་ལྷ་ལ་མཆོད་པར་འབུལ། །ཧོ་བདེ་བར་གཤེགས་པའི་དཀྱིལ་འཁོར་ཀྱི་ལྷ་ཚོགས་རྣམས་ལ་ཚོགས་ཀྱི་མཆོད་པ་ཆེན་པོ་འབུལ་ཞིང་མཆིས་ན། སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམས་ནས། དམ་ཚིག་ཉམས་ཆག་ཐམས་ཅད་བསྐངས་ཏེ་བླ་ན་མེད་པའི་དངོས་གྲུབ་ཐོབ་པར་མཛད་དུ་གསོལ། བཞི་པ་ཚོགས་ལ་རོལ་བ་ནི། ལས་ཀྱི་རྡོ་རྗེས་འཁོར་ལོ་འདུས་པའི་གཙོ་བོ་ལ་ཕྱག་བྱས། ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་མའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་སྟོབ་དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོ། ཞེས་བླངས་ནས། ཧོ་བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚང་བའི་ངོ་བོ་སྟེ། །དམ་པ་རིགས་རྒྱའི་དཀྱིལ་འཁོར་ལྷ། །བསྒུལ་བསྐྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ནས། །ཟས་ཀྱིས་སྒྲིབ་པར་མི་འགྱུར་ཞིང་། །གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །ཅེས་རོལ་ནས། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་ཛ་གད་དཔའ་བོ་གསོལ་བས་འགྲོ་བ་མ་ལུས་པ་དབང་དུ་འདུ་བར་གྱུར་ཅིག །མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོར་གྱུར་ཅིག །རྡོ་རྗེའི་ཚེ་གསོལ་བས་རྡོ་རྗེ་སེམས་དཔའི་ཚེ་དང་དཔེ་བྱད་ལ་མངའ་བརྙེས་པར་གྱུར་ཅིག །ཞལ་ཟས་ཀྱི་བྱེ་བྲག་མང་པོ་གསོལ་བས་ཞི་ཁྲོའི་ཕྲིན་ལས་ཀྱི་རྫུ་འཕྲུལ་སྣ་ཚོགས་ལ་དབང་འབྱོར་བར་གྱུར་ཅིག །ཅེས་སྨོན་ལམ་གདབ་བོ། ། ལྔ་པ་ལྷག་མའི་མཆོད་པ་ནི། ལྷག་མ་རྣམས་གསོག་འཇོག་མེད་པར་བསྡུས། ལྷ་མཆོད་པའི་ལྷག་མས་བསྣན་པ་དཀྱིལ་འཁོར་དང་ཧ་ཅང་མི་ཉེ་བའི་ཤར་ལྷོར་དྲིའི་མཎྜལ་ཟླུམ་པོ་བྱས་པའི་སྟེང་དུ་བཞག །རྩ་བའི་དཀྱིལ་འཁོར་གསལ་བ་ལས་ཁྱད་པར་ལྷག་མའི་གནས་སུ། བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་བྷྲཱུཾ་ལྷག་མའི་དཀྱིལ་འཁོར་མཚན་ཉིད་རྫོགས་པར་གདན་དང་བཅས་པའི་ནང་གི་དབུས་དང་ཕྱོགས་བཞིར་ཧཱུྃ་བཛྲ་དྷྲིཀ །ༀ་ཛིན་ཛིཀ །སྭཱ་རཏྣ་དྷྲིཀ །ཨཱཾ་ཨ་ར་ལིཀ །ཧཱཾ་པྲཛྙཱ་དྷྲིཀ །རིགས་ཀྱི་ཡབ་ལྔ་སྐད་ཅིག་གིས་གསལ་བར་གྱུར། གཏོར་མ་དམ་ཚིག་གསང་བའི་ལོངས་སྤྱོད་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བསམ་ལ། ༀ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས་ཏེ། ཧཱུྃ་ལས་ཀྱི་རྡོ་རྗེ་བྱེད་པར་དབང་བསྐུར་བའི། །མཁའ་འགྲོ་ལྷག་སྡུད་མ་སྲིང་གིང་གི་ཚོགས། །ལྷག་མ་ཁ་ཆུའི་དམ་ལ་གཏོགས་པ་རྣམས། །དམ་ཚིག་བཞིན་དུ་མཆོད་ཀྱིས་གཤེགས་སུ་གསོལ། །ཧོ་མཁའ་འགྲོ་གསང་བའི་རྒྱུད་དུ་གཏོགས་པའི་མཁའ་འགྲོ་སུམ་ཅུ་རྩ་གཉིས་སྔོན་གྱི་ཐུགས་དམ་དུས་ལས་མི་འདའ་བར་སྒྲུབ་པའི་སྡོང་གྲོགས་ལ་གཤེགས་ཤིག །ༀ་ཨ་ར་ལི་ཧྲིཾ་ཧྲིཾ་ཛཿཧཱུྃ་བཾ་ཧོཿ ཌཱཀྐི་ནི་ཧཱུྃ་ཛཿ ཞེས་བརྗོད་ཅིང་ཧེ་རུ་ཀའི་དམ་རྒྱ་དཔྲལ་བར་བཅིངས་ནས་སྤྱུག་པའི་བརྡ་དང་བཅས་པས་སྤྱན་དྲངས་བས། མཁའ་འགྲོ་སོ་གཉིས་སྤྲིན་གཏིབས་པ་བཞིན་བྱོན་ཏེ། རིགས་ལྔའི་གཙོ་བོ་ལ་གཙོ་མོ་བདུན། དོན་གྲུབ་ལ་དྲུག །གཞན་གསུམ་ལ་ལྔ་ལྔ་ལ་དྲིལ་ཞིང་། སྒོ་མ་བཞི་གཙོ་བོའི་གདན་གྱི་ཚུལ་དུ་བཞུགས་བ་ལ། མེ་ཏོགས་ལ་སོགས་པས་སྤྱིར་མཆོད་ནས། དམར་གྱི་རཀྟ་གཏོར་མ་ལ་སྦྲེང་ཞིང་ཧེ་རུ་ཀའི་ཐོད་པའི་ཐལ་མོའི་རྒྱ་དང་བཅས་པས། ༀ་བཛྲ་ཌཱཀྐི་ནི་པྲ་ཏཱིཙྪ་མཾ་བ་ལིཾ་ཏ་ཧཱུྃ་ཕཊ། དེ་བཞིན་དུ་བུདྡྷ་ཌཱཀྐི་ནི་སོགས་ནས་ༀ་ཕཊ་ༀ་རཏྣ་ཌཱཀྐི་ནི་སོགས་ཏྲཱཾ་ཕཊ། ༀ་པདྨ་ཌཱཀྐི་ནི་སོགས་ཧྲཱིཿཕཊ། ༀ་ཀརྨ་ཌཱཀྐི་ནི་སོགས་ཨ་ཕཊ། ཅེས་པས་གཏོར་མ་ཕུལ་ལ། ཧཱུྃ་རྣམ་དག་ཆོས་དབྱིངས་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་བྱུང་། །རང་རང་ལས་ཀྱིས་བསྐུལ་གྱུར་པས། །སྤྲུལ་པ་བསམ་ཡས་མཁའ་ལ་འགྲོ། །འཇའ་ཚོན་མདོག་འཛིན་རིགས་ལས་སྤྲུལ། །མི་རོ་སྐམ་པོའི་གདན་སྟེང་ལ། །ཐུགས་རྗེས་སྤྲུལ་པ་ཅིར་ཡང་སྟོན། །མཐིང་ག་མི་བསྐྱོད་ལ་སོགས་གཟུགས། །སུམ་ཅུ་རྩ་གཉིས་ཀུན་འཛིན་ཞིང་། །མི་ཐོད་ཁྲག་གིས་བཀང་བ་དང་། །ཁ་ཊྭཱཾ་ཏྲི་ཤུལ་གཤོལ་གྲི་བསྣམས། །རང་རང་ལག་ཆ་སྣ་ཚོགས་ལྡན། །དཔའ་བོའི་གཟུགས་ཅན་ཁ་མིག་བགྲད། །ཉི་ཟླའི་ཚུལ་དུ་མཁའ་ལ་འགྲོ། །ཟས་སུ་ཤ་དང་ཁྲག་དང་ནི། །རྐང་དང་ཚིལ་བུ་རྒྱུ་མ་ཟ། །ཡང་དག་ཉིད་དེ་འཇིག་རྟེན་ཉིད། །སྤྲུལ་པའི་ཚུལ་གྱིས་གཟུགས་ལས་སྤྲུལ། །མཁའ་འགྲོ་མ་མོ་ཁྱོད་རྣམས་ཀྱང་། །སྔོན་ཚེ་བཅོམ་ལྡན་རིགས་ལྔ་ལ། །ཡེ་ཤེས་དབྱིངས་ལ་ཆགས་ཚུལ་དུ། །འཁྲིལ་ཞིང་རིགས་ལྔའི་སླས་སུ་བྱས། །བསྟན་པ་བསྲུང་བར་མནའ་བོར་བ འི། །ཁས་བླངས་འགལ་བར་མི་བྱའི་ཕྱིར། །རྣལ་འབྱོར་བཅོལ་པའི་ཕྲིན་ལས་མཛོད། །ཅེས་དང་། ཧཱུྃ་མཁའ་འགྲོ་གིང་དང་དབང་ཕྱུག་མ། །མ་བདུན་སྲིང་བཞི་འབར་མ་བརྒྱད། །ཕོ་ཉ་ལ་སོགས་ལྷག་སྡུད་ཚོགས། །དཔལ་གྱི་ཕམ་ཕབས་འདི་གསོལ་ལ། །བཅོལ་པའི་ཕྲིན་ལས་གྲུབ་པར་མཛོད། །ཅེས་བརྗོད་ཅིང་སྨན་དང་རཀྟས་ཀྱང་མཆོད་ནས། ཧོ་ལྷག་སྡུད་ཀྱི་དམ་ཚིག་ལ་གཏོགས་པའི་མཁའ་འགྲོ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ལྷག་མའི་དམ་ཚིག་འདིས་ཚིམ་ཞིང་དགྱེས་པར་གྱུར་ཏེ། དམ་ཚིག་ཉམས་ཆག་ཐམས་ཅད་བསྐངས་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོང་། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་གྲོགས་མཛོད་ཅིག །ཅེས་ཕྲིན་ལས་བཅོལ། ཡ་ཧི་གཙྪ། ཞེས་པས་མགྲོན་རྣམས་རང་གནས་སུ་གཤེགས་པར་བསམ་ལ། གཏོར་མ་ཕྱི་རོལ་དུ་བསྐྱལ། ཧཱུྃ་ཞེས་པས་ལྷག་མའི་དཀྱིལ་འཁོར་རིགས་ལྔ་རང་ལ་བསྟིམ་ནས། མཎྜལ་ཀྱང་བསྡུའོ། །གཉིས་པ་བརྟན་མ་སྐྱོང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཱཾ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཏྲཱཾ་རཏྣ་ཏྲཻ་ལོ་ཀྱ་ཕཊ། གཏོར་མའི་རྡུལ་ཕྲ་རབ་རེ་རེ་བཞིན་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབ། ཧཱུྃ་ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་སྤྱོན་དམ་སྐོང་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །འདིར་སྤྱོན་དམ་སྐོང་ཕྲིན་ལས་མཛོད། །ཆེ་ཞེ་ཆེན་མོ་ཁྱོད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་སྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉེན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་པའི་ཕྲིན་ལས་གྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ་ཁ་ར གྨ། མ་མ་སྲིཾ་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་ཱཔཉྩ་ཨ་མྲྀ་ཏ་རཀྟ་བྷ་ལིཾ་ཏ་ཁཱ་ཧི། ཞེས་སྨན་རཀ་སྤྲེང་། ཕྲིན་ལས་བཅོལ་ནས་ཡ་ཧི་གཙྪས་གཤེགས་གསོལ་བྱས་ལ། གཏོར་མ་གཙང་སར་བསྐྱལ་ལོ། །གསུམ་པ་ཉེར་བསྡུ་བྱ་བ་ནི། ཐུན་མཚམས་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ་ཧཱུྃ་ༀ་སྭཱ་ཨཱཾ་ཧཱ་ཞེས་པས་དཀྱིལ་འཁོར་གསལ་བཏབས་ལ། བཛྲ་པདྨ་ས་མ་ཡ་སྟྭཾ། ས་མ་ཡ་ཧོ། ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཛཿཧཱུྃ་བྃ་ཧོ། བོ་དྷི་ཙིཏྟ་སྥ་ར་ཎ་ཕཊ། ཅེས་བརྗོད་ཅིང་། ཡབ་ཡུམ་སྙོམ་པར་འཇུག་པའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་གྱི་སྤྲིན་འཕྲོས་པས་སྣོད་བཅུད་ཐམས་ཅད་དག་ཅིང་འོད་གསལ་བར་བྱ། སཾ་ཧ་ར་ཎ་ཧཱུྃ་ཞེས་བརྗོད་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ། ལྷ་ཡབ་ཐམས་ཅད་གཙོ་བོ་རྡོ་རྗེ་སེམས་དཔའ་ལ། ཡུམ་ཐམས་ཅད་དབྱིངས་ཕྱུག་མ་ལ། དེ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཧཱུྃ་ལ། ཧཱུྃ་གྱེན་རྫོགས་ན་དའི་བར་དུ་ཐིམ་ནས་རྣམ་པར་རྟོག་མེད་ལྷུན་གྲུབ་ནམ་མཁའ་ལྟ་བུའི་ངང་ལ་མཉམ་པར་བཞག །ཉལ་བ་ལས་ལངས་པའམ་སྤྱོད་ལམ་ལ་འཇུག་པ་ནི། ཧཱུྃ་བཛྲ་དྷྲིཀ །ཅེས་བརྗོད་པས་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲ་བའི་སྐུར་ལྡང་ངོ་། བཞི་པ་གོ་ཆ་བགོ་ཞིང་ལུས་སྲུང་བ་ནི། རང་ཉིད་རྡོར་སེམས་སུ་གསལ་བའི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་གྱུར། བཛྲ་ཀཱ་ཝཱ་ཙི་རཀྵ་ཧཾཿ ཞེས་བརྗོད་པས་ལུས་ཐམས་ཅད་རྡོ་རྗེ་རྒྱ་གྲམ་གྱི་གོ་ཆས་བཞུ་ལུགས་སུ་གཡོགས་པས་སྒོ་གསུམ་རྡོ་རྗེ་གསུམ་དང་དབྱེར་མེད་དུ་བཅིངས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། སྐུ་གསུང་ཐུགས་ཀྱིས་ཀུན་ལ་ཁྱབ། ཅེས་བརྗོད་ཅིང་ང་རྒྱལ་བྱ། དེ་ནས་མཛུབ་མོ་གཡས་སུ་ཏྲཱཾ་ལས་ཁྲོ་བོ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཆེ་བ་དང་སྡིགས་མཛུབ། གཡོན་དུ་ༀ་ལས་ཁྲོ་བོ་མི་འཆི་ཐབས་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོ་གནས་ལྔ་རུ། ༀ་ཏྲུྃ། ཞེས་བརྗོད་བཞིན་པར་མཛུབ་མོ་གཉིས་བསྣོལ་ནས་རིམ་པར་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ནས་ཞལ་ཕྱིར་གཟིགས་ཏེ་སྲུང་བའི་ལས་མཛད་པའི་ཐུགས་ཀ་ནས་རྡོ་རྗེ་ལུ་གུ་རྒྱུད་བྱུང་བས་བསྲུངས་ཤིང་བརྟན་པར་བྱས་ལ། ༀ་རརྣ་མུ་ཀུ་ཊ་ཨ་བྷི་ཥིཉྩ་ཏྲཾ་ཏྲཱཾ་ཞེས་རིགས་ལྔའི་དབུ་རྒྱན་གྱིས་དབང་བསྐུར་བར་མོས། ༀ་རཏྣ་མཱ་ལེ་ཨ་བྷི་ཥིཉྩ་ཏྲཾ་ཏྲཾ། རིན་པོ་ཆེའི་ཕྲེང་བ་བཅིངས་པར་བསམ་མོ། །ༀ་ཨཱ་ཱརྱ་ལཾ་བྷོ་དྷ་ར་ཨ་བྷི་ཥིཉྩ་ཧྲཱིཾ་ཧྲཱིཾཿ དར་མཐིང་དམར་གྱི་ཅོད་པན་གྱིས་བརྒྱན་པར་བསམ་མོ། །ༀ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་བརྒྱན་པར་བྱའོ། །དེ་ལྟར་འགྲུབ་པའི་རྒྱུ་དང་། དེས་གྲུབ་པའི་འབྲས་བུ་ནི། ཆོ་གས་བསྟན་པའི་ཐུན་དང་མཚམས་ཀྱི་ངེས་པ་ཐམས་ཅད་དུ། ཕྱིན་དྲུག་གི་ཡན་ལག་བསྐྱེད་རྫོགས་ཀྱི་དངོས་པོར་སྡུད་པ་ལས་མི་འདའ་ན། བསོད་ནམས་དང་ཡེ་ཤེས་ཀྱི་ཚོགས་མྱུར་དུ་རྫོགས་པར་འགྱུར་ལ། དེ་ཡང་རྡོ་རྗེ་ཐེག་པའི་གྲུབ་མཐའ་ལས་དང་། དམ་ཚིག་དང་། ཆོས་དང་། ཕྱག་ཆེན་ཏེ་ཕྱག་རྒྱ་བཞིའི་སྒོ་ནས་སློང་བ་ལ་མཉམ་རྗེས་ཀུན་ཏུ་བསླབས་པས་རིམ་པ་དང་པོའི་དག་རྫོགས་སྨིན་གསུམ་ལྷོངས་སུ་གྱུར་ནས་སྐྱེ་གནས་བཞིའི་བག་ཆགས་སྦྱོང་ཞིང་། མངོན་པར་བྱང་ཆུབ་པའི་གཟུགས་ཀྱི་སྐུ་མྱུར་དུ་འགྲུབ་ལ། དེ་ཡང་སྔ་འགྱུར་རང་གཞུང་གི་གྲུབ་མཐའ་ལམ་ལྔ་དང་། ས་བཅུའི་སྤངས་རྟོགས་རིག་འཛིན་བཞིའི་གོ་འཕང་ལ་བརྟེན་ནས་རྫོགས་པའི་ཚུལ་པཎྜི་ཏ་རོང་པ་ཆོས་ཀྱི་བཟང་པོ་དང་། རྒྱལ་བ་གཉིས་པ་ཀུན་ཁྱེན་ངག་གི་དབང་པོའི་རྒྱུད་འགྲེལ་ལས་རྟོགས་པར་བྱའོ།། །།

སྒྱུ་འཕྲུལ་དྲྭ་བ་ཞི་བ་འབྲིང་པོའི་དབང་གི་ཆོ་ག་དཀྱིལ་འཁོར་རྒྱ་མཚོར་འཇུག་པའི་གྲུ་ཆེན། པདྨ་འགྱུར་མེད་རྒྱ་མཚོ།

སྒྱུ་འཕྲུལ་དྲྭ་བ་ཞི་བ་འབྲིང་པོའི་དབང་གི་ཆོ་ག་དཀྱིལ་འཁོར་རྒྱ་མཚོར་འཇུག་པའི་གྲུ་ཆེན་ཞེས་བྱ་བ་བཞུགས་སོ། །སྒྱུ་འཕྲུལ་དྲ་བ་ཞི་བ་འབྲིང་པོའི་དབང་གི་ཆོ་ག་དཀྱིལ་འཁོར་རྒྱ་མཚོར་འཇུག་པའི་གྲུ་ཆེན་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རང་རིག་ཡེ་ཤེས་གཉིས་འཛིན་འཁྲུལ་རྟོག་གིས། །འཆིང་བ་ཀུན་གྲོལ་མི་འགྱུར་བདེ་ཆེན་ཉིད། །བླ་མེད་སྐུ་བཞིའི་རྡོ་རྗེར་བྱང་ཆུབ་པ། །དྲིན་ཅན་བླ་མའི་ཞབས་ཟུང་གཙུག་གིས་མཆོད། །དུས་གསུམ་རྒྱལ་བ་ཀུན་གྱི་གཤེགས་པའི་ཤུལ། །གསང་ཆེན་སྙིང་པོའི་དེ་ཉིད་ངེས་པའི་དོན། །སྒྱུ་འཕྲུལ་དྲྭ་བ་ཞི་བའི་དཀྱིལ་འཁོར་དུ། །སྐལ་ལྡན་གཞུག་ཐབས་དབང་བསྐུར་ཆོ་ག་བྲི། །དེ་ལ་འདིར་ཧེ་རུ་ཀ་འདུས་པའི་རྒྱུད་ལས། དང་པོ་ས་ཡི་ཆོ་ག་སྟེ། གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་གསུངས་པ་ལྟར་ལས་ནུབ་དང་པོ་སའི་ཆོ་ག་དང་། གཉིས་པ་སྟ་གོན་གྱི་ཆོ་ག་གཞན་རྣམས་རྗེ་བླ་མས་མཛད་པའི་དཀྱིལ་ཆོག་རྡོ་རྗེའི་ཕྲེང་བ་ལྟར་བྱ་ཞིང་། འདིར་སློབ་མ་ལྷག་པར་གནས་པའི་ཆོ་ག་ནི་དཀྱིལ་འཁོར་གྱི་ཤར་ལྷོར་མཎྜལ་ཁྲུ་གང་བ་ལ་འཁོར་ལོ་རྩིབས་བཞི་པ་བྲི། སློབ་དཔོན་གྱི་དྲུང་དུ་སོ་ཤིང་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚང་བར་བྱའོ། །དེ་ནས་སློབ་བུ་རྣམས་ཁྲུས་བྱ། བགེགས་བསྐྲད། སྲུང་འཁོར་བསྒོམ་རྗེས་ཆོས་བཤད་ཐུན་མོང་བ་སྔོན་དུ་འགྲོ་བས། མཚམས་སྦྱོར་གྱི་ཁྱད་པར། འདི་ནི་སྡེ་སྣོད་དང་རྒྱུད་ཐམས་ཅད་ཀྱི་རྩ་བའམ་འཕྲོ་གཞི་ལྟ་བུར་གྱུར་པ་དཔལ་སྒྱུ་འཕྲུལ་དྲྭ་བ་ཆེན་པོའི་ཆོས་ཀྱི་རྣམ་གྲངས་ཏེ། དེ་ལའང་སྨིན་གྲོལ་གྱི་རིམ་པ་གཉིས་སུ་ཡོད་པ་ལས། འདིར་སྨིན་བྱེད་ཀྱི་དབང་ཉིད་བསྐུར་བ་སྐབས་སུ་བབས་པ་ཡིན་ཞིང་། དབང་དེ་ལའང་སྦྱོར་དངོས་རྗེས་གསུམ་ལས། སྐབས་འདིར་སྦྱོར་བ་སྟ་གོན་གྱི་བྱེ་བྲག་སློབ་མ་ལྷག་པར་གནས་པའི་ཆོས་རྣམས་སྒྲུབ་པར་བྱེད་པ་ཡིན་པས། དེའི་སླད་དུ་ཐོག་མར་ཁྱེད་རང་རྣམས་ཀྱི་ལུས་ལོངས་སྤྱོད་དུས་གསུམ་དང་འབྲེལ་བའི་དགེ་ཚོགས་རྒྱ་མཚོ་དང་བཅས་པ་ཐམས་ཅད་གཅིག་ཏུ་བསྡོམས་ནས་འབུལ་བའི་མོས་འདུན་བགྱིས་ཏེ་ཞིང་ཁམས་འབུལ་མཛོད། ཅེས་བརྗོད་དེ་མཎྜལ་འབུལ། དེ་ནས་སློབ་མ་རྣམས་ཀྱིས་སེམས་བསྐྱེད་པར་བྱ་སྟེ། དེ་ལའང་གཉིས་ལས་དང་པོ་ཀུན་རྫོབ་བྱང་ཆུབ་ཀྱི་སེམས་བསྐྱེད་པའི་དོན་དུ་འདིའི་རྗེས་ཟློས་མཛོད། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ལན་གསུམ། གཉིས་པ་དོན་དམ་བྱང་ཆུབ་ཏུ་སེམས་བསྐྱེད་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགགས། །འགགས་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ལན་གསུམ། དེའི་ལན་དུ་སློབ་དཔོན་གྱིས། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིས་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་དོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཁྱོད་ལ་རབ་ཏུ་བསྟན་པར་བྱ། །ཞེས་བརྗོད། སྐབས་འདིར་དཀྱིལ་འཁོར་གྱི་དོན་བཤད་ལ་ངེས་ཤེས་བསྐྱེད་པར་བྱ་སྟེ། རྡོ་རྗེ་ལས་རིམ་ལས། དཀྱིལ་འཁོར་དོན་དང་ཡོན་ཏན་རྣམས། །གསལ་བྱས་རབ་ཏུ་བྲོད་པ་བསྐྱེད། །ཅེས་གསུངས་པས་སོ། །དེ་ལ་འདིར། གསང་བ་སྒྱུ་འཕྲུལ་པའི་ལུགས་ཀྱི་དཀྱིལ་འཁོར་ལ། ངོ་བོ། ངེས་ཚིག །དགོས་ཆེད། དབྱེ་བ་དང་བཞི་ལས། ངོ་བོ་ནི། བཀོད་པ་ལྷའི་འཁོར་ལོར་རྫོགས་པར་སྣང་བའོ། །ངེས་ཚིག་ནི། མཎྜ་ལའི་སྒྲ་ལས་དྲངས་ན་སྙིང་པོ་འཛིན་པའམ་སྙིང་པོ་ལེན་པ་དང་། ཟླུམ་པོའམ་བསྐོར་བའི་དོན་གྱིས་དཀྱིལ་འཁོར་རོ། །དགོས་ཆེད་ནི། ཚོགས་གཉིས་རྫོགས་པར་བྱེད་པའོ། །དབྱེ་བ་ནི། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་པ་ལྟར་བདུན་ལས། འདིར་འཇུག་བྱའི་དཀྱིལ་འཁོར་ནི་ལྷག་པ་གཟུགས་བརྙན་ཏེ། འདི་ལྟ་བུའི་གསང་སྔགས་བླ་ན་མེད་པའི་དཀྱིལ་འཁོར་འདི་འདྲ་མཐོང་བ་ཙམ་གྱིས་ཀྱང་བསྐལ་པ་བྱེ་བ་དུ་མར་བསགས་པའི་སྡིག་སྒྲིབ་འདག་པ་སོགས་ཕན་ཡོན་དང་ལྡན་ན་ཞུགས་ཤིང་དབང་བསྐུར་བས་ནི་ལྟ་ཅི་སྨོས་ཏེ་དེའི་ཕྱིར་དགའ་སྤྲོ་ཡང་དག་པར་བསྐྱེད་མཛོད་ཅིག །ཅེས་བསྐུལ་ལོ། །དེ་ནས་སློབ་མས་གསོལ་བ་གདབ་པ་ནི། རྡོར་སེམས་གཙོ་བོ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དོ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ། དེ་ནས་གནང་བ་སྦྱིན་ཅིང་དྲང་བ་ནི། ལག་གི་རྡོ་རྗེ་ལ་འཇུར་བཅུག་སྟེ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་བཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་ངང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུང་། །སྒྱུ་འཕྲུལ་དྲྭ་བའི་རྫོགས་དབང་བྱིན། །ཞེས་དྲངས་ལ། ཁྱད་པར་ཅན་གྱི་དོན་ལ་གསོལ་བ་གདབ་པ་ནི། བདག་ནི་ལས་མཆོག་སྐལ་བར་ལྡན། །དེང་ནས་ཐེག་པ་ཆེན་པོ་ལ། །བརྟན་པར་བྱ་ཕྱིར་བདག་ལ་ནི། །ཡེ་ཤེས་བསྲུང་བ་མཛད་དུ་གསོལ། །ཞེས་གསོལ། དེ་ནས་བགེགས་བསྐྲད་ཅིང་སྒྲིབ་པ་ཕྲལ་བ་ལ། སྔོན་དུ་འགྲོ་བ་དང་། དངོས་གཉིས། དང་པོ་ནི། ཚེ་མི་ཡར་བར་བྱ་བའི་ཕྱིར། དབང་ཕྱུག་གི་ཐུགས་ཀའི་ས་བོན་ལས་ཡི་གེ་བྷྲཱུྃ་རེ་སློབ་མའི་དཔྲལ་བར་སྤྲོས། བྷྲཱུྃ་བི་ཤྭ་བི་ཤུདྡྷེ། ཞེས་བརྗོད་པས། དུང་ཁང་དུ་ཟླ་གམ་དམར་པོའི་གཞལ་ཡས་ཁང་གནས་སྒོ་གཅིག་པ་སྒོ་ཁྱུད་ཅན་གཅིག་ཏུ་གྱུར། དེའི་ནང་དུ་ཧཱུྃ་ཡིག་གསལ་བ་ལས་ཧཱུྃ་ཞེས་བརྗོད་པས་སློབ་མའི་ཚེའི་དངོས་པོ་ཐམས་ཅད་ཧཱུྃ་ལ་བསྡུ། ༀ་བཛྲ་ཧཱུྃ་ཀཱ་ར་ཧཱུྃ་ཕཊ། ཅེས་བརྗོད་པས། ཧཱུྃ་ཀཱ་ར་སྔོན་པོ་ཚེའི་བུམ་པ་བསྣམས་པ་དང་། ཟླ་གམ་གྱི་གནམ་སྒོ་ལ། ༀ་བཛྲ་ཀྲོ་དྷ་ཨཱརྻ་ཨ་ཙ་ལ་ཧཱུྃ་ཕཊ། ཅེས་བརྗོད་པས། ཁྲོ་བོ་མི་གཡོ་བ་ལྗང་ནག་རལ་གྲི་དང་སྡིགས་མཛུབ་ཅན་གཅིག་གིས་སྒོ་བསྲུང་བར་གྱུར། གཉིས་པ་ལ་བགེགས་བསྐྲད་པ་དང་། སྒྲིབ་པ་ཕྲལ་བ་གཉིས་ཀྱི། དང་པོ་ནི། སློབ་དཔོན་ཞེ་སྡང་རྡོ་རྗེར་གསལ་བས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས། སྤྲུལ་པའི་ཁྲོ་ཚོགས་བསམ་གྱིས་མི་ཁྱབ་པ་སྤྲོས། བདུད་བགེགས་ལོག་པར་འདྲེན་པའི་ཚོགས་ཐམས་ཅད་བསྡིགས་བསྐྲད་བརླག་པར་བསམ་ལ། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་སྒྱུ་འཕྲུལ་ཞི་ཁྲོ་རྣམ་པར་རོལ་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས། ཞེས་བདེན་སྟོབས་བརྗོད་པ་སྔོན་དུ་འགྲོ་བས། འདིར་འདུས་པའི་སློབ་བུ་རྣམས་ལ་གནོད་ཅིང་འཚེ་བའི་འབྱུང་པོ་ཐམས་ཅད་འདིར་མ་གནས་པར་དེངས་ཤིག །ཅེས་དང། ཧཱུྃ་བཞི་པའི་སྔགས་ལན་གསུམ་བརྗོད་ཅིང་གུ་གུལ་གྱིས་བདུག །ཡུངས་ཀར་གྱིས་བྲབ། གཉིས་པ་ནི། སློབ་དཔོན་གྱི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ༀ་ཧཱུྃ་སྭཱ་ཨཱཾ་ཧཱཾ། གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་རྣམས་རིགས་ལྔ་ཡབ་ཡུམ་བཅུར་གྱུར་པར་བསམ་ལ། ༀ་སུ་ར་ཏ་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལི། ཞེས་སོར་མོ་བསྣོལ། བཛྲ་བྷནྡྷ་བཾ། ཞེས་ཕྱག་རྒྱ་བསྡམས་པས་རིགས་ལྔ་ཡབ་ཡུམ་མཉམ་པར་སྦྱོར་བར་བསམ་ལ། གོང་ལྟར་བདེན་སྟོབས་བརྗོད་པ་སྔོན་དུ་འགྲོ་བས། སློབ་བུ་འདི་རྣམས་ཀྱི་རྒྱུད་ལ་ཡོད་པའི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། ཆོས་ཀྱིས་ཕོངས་པའི་སྒྲིབ་པ་དང་། བག་ཆགས་ངན་པའི་སྒྲིབ་པ་ལ་སོགས་ཏེ་སྒྲིབ་པའི་ཕུང་པོ་ཇི་སྙེད་པ་ཐམས་ཅད་ཕྱག་རྒྱའི་འོད་ཟེར་འདིས་བྲལ་བར་གྱུར་ཅིག །བཛྲ་བྷནྡྷ་ཏྲ་ཐ། ཞེས་པའི་སྔགས་མང་དུ་བརྗོད་ཅིང་ཕྱག་རྒྱ་སྤྲུགས་པས། རིགས་ལྔའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་འཕྲོས་པས་སློབ་བུའི་སྒྲིབ་པ་མཐའ་དག་བསྲེགས་ཤིང་སྦྱངས། དུང་ཁང་གི་ཁྲོ་བོ་གཉིས་ཀྱང་ཞུ་ལུགས་སུ་ཐིམ་པའི་རྐྱེན་གྱིས་བུའི་ལུས་ཀྱང་འོད་དུ་ཞུ་བའི་འོད་ཕུང་གསེར་ཞུན་མ་ལྟ་བུར་གནས་པར་བསམ། དེ་ནས་སློབ་བུ་ལྷར་བསྐྱེད་པ་ལ་བསྐུར་བརླབ་གོ་བགོ་ལུས་བསྲུང་བྱ་བ་ནི། ཧཱུྃ་ཞེས་བརྗོད་པས་དེ་ཉིད་ཧཱུྃ་ཡིག་དཀར་པོ་གཅིག་ཏུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་རྡོ་རྗེ་རྩེ་ལྔ་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་རྡོར་དྲིལ་འཛིན་པ་རྒྱན་དང་ཆ་ལུགས་ཐམས་ཅད་རྫོགས་པར་བསམ། སོ་སོའི་ཕྱག་རྒྱ་སློབ་མའི་མགོའི་གནས་ལྔར་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཤཱུ་ནྱ་ཏའི་འཚབ་ཏུ། ཨཱ་དཪྴ། ས་མ་ཏཱ། པྲ་ཏྱ་བེཀྵ་ཎ། ཀྲྀ་ཏྱཱ་ནུཥྛཱ་ཎ་ཞེས་བཅུག་པས་དབང་བསྐུར། ༀ་ཨཱཿཧཱུྃ་ཞེས་བརྗོད་ཅིང་རྡོ་རྗེ་གནས་གསུམ་དུ་གཏུགས་པས་བྱིན་གྱིས་བརླབས། སླར་ཡང་རྡོ་རྗེ་རྩེ་ལྔའི་རྒྱ་བཅིངས་པས་གནས་གསུམ་དུ་བཞག་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱ་ཀ །ཙིཏྟ་ཞེས་བཅུག་པས། བྱིན་གྱིས་བརླབས་པའི་རྟགས་སུ་དཔྲལ་བར་སྐུ་རྡོ་རྗེ་རྣམ་སྣང་དཀར་པོ་འཁོར་ལོ་ༀ་གྱིས་མཚན་པ་འཛིན་པ། མགྲིན་པར་གསུང་རྡོ་རྗེ་སྣང་མཐའ་དམར་པོ་པདྨ་ཨཱཿས་མཚན་པ་འཛིན་པ། སྙིང་གར་ཐུགས་རྡོ་རྗེ་མི་བསྐྱོད་པ་མཐིང་ག་རྡོ་རྗེ་ཧཱུྃ་གིས་མཚན་པ་འཛིན་པ་རྣམས་ཀྱིས་རྒྱས་བཏབ་པར་བསམ། རྡོ་རྗེ་གོ་ཆའི་ཕྱག་རྒྱ་སྤྱི་བོར་བཞག་ལ། བཛྲ་ཀཱ་ཝཱ་ཙི་རཀྵ་ཧཾ། ཞེས་གོ་བགོ། མཛུབ་མོ་གཡས་སུ་ཏྲུཾ་ལས་ཁྲོ་བོ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཆེ་བ་དང་སྡིགས་མཛུབ། གཡོན་དུ་ༀ་ལས་ཁྲོ་བོ་མི་འཆི་ཐབ་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ༀ་ཏྲུཾ། ཞེས་ལྟེ་བ། སྙིང་ག །ལྟག་པ། དཔྲལ་བ། སྤྱི་བོ་རྣམས་སུ་རིམ་པར་མཛུབ་མོ་གཉིས་བསྣོལ་བ་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ནས་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེ་ལུ་གུ་རྒྱུད་བྱུང་བས་བསྲུངས་ཤིང་བརྟན་པར་བསམ་མོ། །དེ་ནས་སོ་ཤིང་དོར་བ་ནི། སོ་ཤིང་སོར་བཅུ་གཉིས་པ་དྲི་བཟང་གིས་བྱུགས་ཤིང་རྩེ་མོར་མེ་ཏོག་གི་ཕྲེང་བ་བཅིངས་པ་སློབ་མ་རྣམས་ཀྱི་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་བསམ་ལ་སྦྱིན་ཞིང་། དེས་ཀྱང་མཁའ་དབྱིངས་ཀྱི་རྒྱས་བཟུང་ལ་སོས་འཆའ་ཞིང་དྲུད་པ་ལྟར་བྱས་པས་སྡིག་སྒྲིབ་ཐམས་ཅད་སྐྱུགས་པར་མོས་ནས། ༀ་ཛིཾ་ཧ་སཾ་ཝརྟི་ཧཱུྃ། ཞེས་མཎྜལ་གྱི་སྟེང་དུ་དོར་བས་ཚུགས་ན་བཟང་། ཕྱོགས་བཞིར་འགྱེལ་ན་ལས་བཞི། མཚམས་བཞིར་དངོས་གྲུབ་དམན་པ་འགྲུབ་པར་བསྟན། དེ་ནས་ཁྱོར་ཆུ་བླུད་པ་ནི། དྲི་བཟང་གི་ཆུ་ལ། ༀ་བཛྲ་ས་ཏྭ་ཨ། ཞེས་བརྗོད་པས། རྡོ་རྗེ་སེམས་དཔའི་རང་བཞིན་གྱི་ཆུའི་རྡུལ་ཕྲ་རབ་ཏུ་ཞུ་བས་རྨི་ལམ་གསལ་བར་བྱེད་པའི་ནུས་པ་དང་ལྡན་པར་བསམ་ཞིང་ཁྱོར་བར་བླུགས་ལ། ༀ་སརྦ་སཾ་ཤོ་དྷ་ན་ཡེ་ཧཱུྃ་ཕཊ། ཅེས་བརྗོད་ཅིང་འཐུང་དུ་བཅུག་ནས་ལྷག་མས་ཁ་ལག་བཀྲུ། དེ་ནས་སྲུང་སྐུད་འཆིང་བ་ནི། སྲུང་སྐུད་དམར་པོ་སུམ་སྒྲིལ་ལ། ༀ་བིགྷྣཱཾ་ཏ་ཀྲྀཏ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཅེས་བརྗོད་ཅིང་མདུད་པ་གསུམ་བཏབ་པས། བར་ཆད་བསྲུང་བའི་ནུས་པ་དང་ལྡན་པར་བསམ་ལ། སྔགས་དེས་ཕོའི་དཔུང་པ་གཡོན་དང་མོའི་གཡས་འཆིང་ཞིང་མདུད་པའི་སྟེང་དུ་སྲིན་ལག་གིས་དྲིའི་ཐིག་ལེ་བྱས་ལ་རྒྱ་གྲམ་དུ་རེག་པས་བསྲུང བར་བསམ་མོ། །དེ་ནས་ཀུ་ཤ་བྱིན་པ་ནི། ཀུ་ཤའི་ཆུན་པོ་ཆེ་ཆུང་གཉིས། རྨི་ལམ་མི་འཁྲུག་པའི་ནུས་པ་དང་ལྡན་པར་བསམ་ལ། ༀ་ཨཱ་དྷཱིཿཧཱུྃ་སྭཱ་ཧཱ། ཞེས་སྔས་དང་སྟན་གྱི་དོན་དུ་བྱིན། དེའི་རྗེས་སུ་དངོས་གྲུབ་ཀྱི་སྣོད་སྐྱོན་ངོ་ཤེས་པའི་ཆེད་དུ་དབང་གི་གེགས་བརྒྱད་བཤད་པར་བྱ་སྟེ། སངས་རྒྱས་ཀུན་གྱི་དངོས་གྲུབ་མཆོག །དབང་དང་བྱིན་རླབས་འབྱུང་བ་ནི། །དཔེར་ན་དྭངས་པའི་རྒྱ་མཚོ་ལ། །ཉི་ཟླའི་གཟུགས་བརྙན་འབྱུང་འགྱུར་གྱི། །རྙོགས་པའི་ཆུ་ལ་འགགས་འགྱུར་བཞིན། །བྱིན་རླབས་དབང་མཆོག་ཐོབ་པའི་གེགས། །རྣམ་པ་བརྒྱད་དུ་རྒྱལ་བས་བཤད། །སྟོན་པ་སྔོན་བྱུང་སློབ་དཔོན་ལ། །བཀའ་གཅོག་བརྙས་པར་བྱེད་པ་ནི། །དབང་དང་དངོས་གྲུབ་དང་པོའི་གེགས། །བླ་མེད་འགྲོ་བའི་རྡོ་རྗེ་སྤུན། །འཁུ་ལྡོག་གདུང་བའི་སེམས་མེད་ན། །དབང་དང་དངོས་གྲུབ་གཉིས་པའི་གེགས། །བྱང་ཆུབ་སེམས་ལ་འདུད་མེད་ཅིང་། །ཐར་ལམ་འདྲེན་པའི་ལྷ་སྤོང་བ། །དབང་དང་བྱིན་རླབས་གསུམ་པའི་གེགས། །སྙིང་རྗེའི་ཡུལ་གྱུར་སེམས་ཅན་ལ། །ཐག་པ་གཅོད་པ་བཞི་པའི་གེགས། །གསང་བས་གསང་བའི་ལྟ་སྤྱོད་རྣམས། །ཡོངས་ལ་འབྱིན་པ་གེགས་ལྔ་ཡིན། །ཐར་ལམ་སྟོན་ལ་འདུད་མེད་ཅིང་། །སེར་སྣས་བཅིངས་པ་དྲུག་པའི་གེགས། །གཟུ་ལུམ་དབང་བྱེད་ལས་ལ་སྤྱོད། །དངོས་གྲུབ་མྱུར་བའི་གེགས་བདུན་པ། །འདོད་པའི་ཁེ་གྲགས་ལྷུར་ལེན་ཞིང་། །གསང་བའི་དམ་ཚིག་སྤོང་བ་སྟེ། །འདི་ནི་བརྒྱད་པའི་གེགས་སུ་བསྟན། །ཉེས་པ་འདི་དག་སྤོང་བ་ནི། །དངོས་གྲུབ་དབང་གི་སྣོད་དུ་འགྱུར། །བུ་ཀྱེ་ནང་པར་འདྲི་བྱེད་པས། །དཀྱིལ་འཁོར་སྟེང་དུ་ལེགས་པར་ཉོལ། །ༀ་བཛྲ་ཡཀྵ་ཀྲོ་དྷ་ས་མ་ཡ་དཎྜ་ཧཱུྃ། ཞེས་ལས་བུམ་གྱི་ཆུས་གཏོར་ནས། དོ་ནུབ་སེང་གེ་ཉལ་ཐབས་ཀྱིས་བདེ་བར་ཉོལ་ལ། མཚན་མོའི་ཐུན་གསུམ་པ་ཐོ་རེངས་ཀྱི་དུས་རྨི་ལམ་བཟང་ངན་གང་རྨིས་པ་དེ་ནང་པར་བདག་ལ་སྨྲོས་ཤིག །ཅེས་བསྒོ། སློབ་བུ་རྨི་ལམ་ངན་ལ་རྨིས་པ་རྣམས་རྡོ་རྗེ་གནོད་སྦྱིན་གྱི་སྔགས། ༀ་བཛྲཀྵ་ཧཱུྃ་ཞེས་པ་དང་མཆེ་བའི་ཕྱག་རྒྱས་བསྲུང་། ཀུན་རྨི་ལམ་ངན་ན་དྲག་པོའི་སྦྱིན་སྲེག་སོགས་ཀྱང་བྱའོ། །དེ་ལ་རྨི་ལམ་བཟང་ངན་གྱི་མཚན་ཉིད་ནི། ཁྲུས་བྱེད་པ་སྐུ་གསུང་ཐུགས་རྟེན་མཐོང་བ་ལ་སོགས་པ་རྨིས་ན་བཟང་། ཐུར་དུ་འབབས་པ་ལ་སོགས་པ་མཐོང་ན་ངན་ནོ། །དེ་དག་ནི་སློབ་མ་ལྷག་པར་གནས་པའི་ཆོ་གའོ། ༈ །དེ་ལྟར་ས་ཆོག་དང་སྟ་གོན་གྱི་རིམ་པ་རྣམས་སོང་ནས། ཐིག་ཚོན་གྱི་བྱ་བ། དཀྱིལ་འཁོར་རྒྱན་བཀོད། རབ་གནས་བྱ་བ། སྒྲུབ་མཆོད་རྣམས་རྗེ་བླ་མས་མཛད་པའི་དཀྱིལ་ཆོག་རིན་ཆེན་ཕྲེང་བ་དང་། སྒྲུབ་ཐབས་ཡེ་ཤེས་ཆར་འབེབས་ལྟར་བྱའོ། །འདིར་དབང་གི་ཆོ་ག་ལ། དཀྱིལ་འཁོར་དུ་འཇུག་པའི་ཆོ་ག་དང་། ཞུགས་པ་ལ་མངོན་པར་དབང་བསྐུར་བའི་ཆོ་ག་གཉིས། དང་པོ་ལ། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་བ། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡིས་ཡན་ལག་རྫོགས་པར་འགྱུར། །ཞེས་ཆོས་བཅོ་བརྒྱད་དུ་ཡོད་པ་ལས། དང་པོ་སློབ་དཔོན་འཇུག་པ་ནི། དཀྱིལ་འཁོར་བཞེངས་སྒྲུབ་ཀྱི་ལས་རིམ་ཀུན་ཚར་བ་དང་། སློབ་དཔོན་རང་ཉིད་སློབ་མ་འཇུག་པ་ལྟར་དཀྱིལ་འཁོར་དུ་ཞུགས་ཏེ། དབང་རྣམས་བདག་འཇུག་གི་ཚུལ་དུ་བླང་བའམ། མི་ནུས་ན་དཀྱིལ་འཁོར་གྱི་ཤར་སྒོར་གུས་པས་འདུག་སྟེ། རིག་པའི་མེ་ཏོག་དོར་ནས་དངོས་གྲུབ་སྐུལ་བ་སྒྲུབ་ཐབས་ལྟར་བྱས་པས་འགྲུབ་བོ། །གཉིས་པ་སློབ་མ་གཞུག་པར་བཟོད་གསོལ་གནང་བ་ཞུ་བ་ནི། ༀ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བྱ། །ཞེས་གསོལ་བས་དེ་བཞིན་གཤེགས་པ་རྣམས་འཛུམ་པའི་མདངས་ཀྱིས་སློབ་བུ་དཀྱིལ་འཁོར་དུ་ཆུག་ལ་དབང་བཅོ་བརྒྱད་སྣོད་དང་འཚམས་པར་བསྐུར་ཅིག །ཅེས་གནང་བ་ཐོབ་པར་བསམ་མོ། །གསུམ་པ་ཁྲུས་བྱ་བ་ནི། སློབ་མ་རྣམས་ལ། ཇི་ལྟར་བལྟམས་པ་སོགས་ཀྱིས་ལས་བུམ་ཆུས་ཁྲུས་བྱས་ནས། མཚམས་གཅོད་སྲུང་འཁོར་སྒོམ་པ་སྔོན་དུ་འགྲོ་བས་ཆོས་བཤད་པར་བྱ་སྟེ། འདི་ལྟར། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་མི་སློབ་པའི་ཟུང་འཇུག་སྐུ་བཞི་ཡེ་ཤེས་ལྔའི་བདག་ཉིད་ཆེན་པོ་གང་གི་གོ་འཕང་ཚེ་འདི་ཉིད་ལ་མངོན་དུ་བསྒྲུབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་དབང་གི་རིམ་པ་རྣམས་ལེགས་པར་ནོད་ནས་ལམ་ཟབ་མོ་བསྐྱེད་རྫོགས་ཀྱི་རིམ་པ་གཉིས་ལ་ཚུལ་བཞིན་དུ་བསླབ་པར་བགྱིའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས། ཆོས་ཉན་པའི་ཀུན་ཏུ་སྤྱོད་པ་རྣམས་ཀྱང་བླང་དོར་མ་འཛོལ་བར་བགྱིས་ཏེ། ལེགས་པར་གསན་འཚལ། དེ་ལ་གང་ཞིག་གསན་པར་བྱ་བའི་ཆོས་ཀྱི་རྣམ་གྲངས་ཀྱང་སྤྱིར་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་གདུལ་བྱའི་སེམས་ཅན་རྣམས་ཀྱི་ཁམས་དང་། དབང་པོ་དང་། བསམ་པའི་རྗེས་སུ་འགྲོ་བའི་ཆོས་ཀྱི་འཁོར་ལོ་དཔག་ཏུ་མེད་པ་ཞིག་བསྐོར་བར་མཛད་པ་ཡང་ཡིན། རེ་ཞིག་སྤང་གཉེན་གྱི་སྒོ་ནས་བསྡུ་ན། གདུལ་བྱའི་རྒྱུད་ཀྱི་ཉོན་མོངས་པའི་བྱེ་བྲག་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་ཕུང་པོའང་དེ་སྙེད་ཅིག་ཏུ་གྲངས་ངེས་པ་ཡིན་ཏེ། དེ་སྐད་དུའང་། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་བ་ཉི་ཁྲི་ཆིག་སྟོང་གསུངས། །མདོར་ན་བརྒྱད་ཁྲི་བཞི་སྟོང་གསུངས་པ་ཀུན། །ཉོན་མོངས་འདུལ་བའི་གཉེན་པོར་གསུངས་པར་ཟད། །ཅེས་གསུངས་པ་ལྟར་རོ། །དེ་ཡང་གཞུང་དང་མན་ངག་ཙམ་གྱི་སྒོ་ནས་བསྡུ་ན། །གཞུང་མཚན་ཉིད་ཕར་ཕྱིན་གྱི་ཐེག་པ་དང་། མན་ངག་གསང་ཆེན་རྡོ་རྗེའི་ཐེག་པ་གཉིས་སུ་འདུ་བ་ཡིན་ཏེ། དེ་ཉིད་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །ཞེས་གསུངས་པ་ལྟར་ལས། འདིར་སྐབས་སུ་བབས་པ་ནི། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་བཤད་པ་ལྟར་ཁྱད་ཆོས་བཞིའི་སྒོ་ནས་ཁྱད་པར་དུ་འཕགས་པ་གསང་སྔགས་རྡོ་རྗེའི་ཐེག་པ་ཉིད་ཡིན་ཞིང་། དེ་ལའང་ཤེས་བྱེད་རྒྱུད་སྡེའི་རྣམ་གྲངས་བསམ་གྱིས་མི་ཁྱབ་པ་ཞིག་ཡོད་ཀྱང་ལྟ་སྤྱོད་ཙམ་གྱི་སྒོ་ནས་བསྡུ་ན། སྤྱོད་པ་གཙོ་བོར་སྟོན་པ་བྱ་བའི་རྒྱུད་དང་། ལྟ་བ་གཙོ་བོར་སྟོན་པ་རྣལ་འབྱོར་གྱི་རྒྱུད་དེ་གཉིས་སུ་གསང་སྔགས་ཀྱི་རྒྱུད་སྡེ་མཐའ་དག་འདུ་བ་ལས། འདིར་ཕྱི་མ་སྟེ། དེར་ཡང་རྣལ་འབྱོར་གྱི་རྒྱུད་ཙམ་དང་། རྣལ་འབྱོར་བླ་ན་མེད་པའི་རྒྱུད་གཉིས་སུ་ཡོད་པ་ལས། འདི་ནི་རྣལ་འབྱོར་བླ་ན་མེད་པ་ལ་ནང་གསེས་བསྐྱེད་རྫོགས་རྫོགས་ཆེན་གསུམ་སྟོན་པའི་གཞུང་རྒྱུད་ལུང་མན་ངག་གསུམ་ཡོད་པའི་དང་པོ་རྒྱུད་མ་ཧཱ་ཡོ་ག །དེ་ལའང་བསྐྱེད་རིམ་ཐབས་ཀྱི་ཆ་དང་རྫོགས་རིམ་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པ་མ་ཧཱའི་མ་ཧཱ་སྟེ་ཕ་རྒྱུད་གསང་བ་འདུས་པ་ལ་སོགས་པ་དང་། བསྐྱེད་རིམ་གྱི་སྤྲོས་པ་ཤས་ཆུང་ཞིང་ཤེས་རབ་བརྫོགས་པའི་རིམ་པ་ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཚུལ་དུ་ཉམས་སུ་ལེན་པ་མ་ཧཱའི་ཨ་ནུ་སྟེ་མ་རྒྱུད་སངས་རྒྱས་མཉམ་སྦྱོར་དང་དཔལ་ཡང་དག་ལ་སོགས་པ་དང་། བསྐྱེད་རྫོགས་ཟུང་དུ་འཇུག་ཅིང་དེའང་རྫོགས་རིམ་རྩ་ཐིག་རླུང་གསུམ་ལས་བསྐྱེད་པའི་བདེ་གསལ་རྣམ་པར་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པ་མ་ཧཱའི་ཨ་ཏི་སྟེ་གཉིས་མེད་ཀྱི་རྒྱུད་སྒྱུ་འཕྲུལ་དྲྭ་བ་ལ་སོགས་པ་ལས། འདིར་སྔ་འགྱུར་བཀའ་མའི་བཀའ་སྲོལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་ཐོག་མར་ངེས་ཤེས་འདྲེན་པ་བླ་མ་བརྒྱུད་པའི་ལོ་རྒྱུས་ཀྱི་དབང་དུ་བྱས་ན། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པ་ལྟར་གསུམ་ལས། དང་པོ་ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་བདག་ཉིད་སྟོན་པ་རིགས་དྲུག་པ་བཅོམ་ལྡན་འདས་དཔལ་ཀུན་ཏུ་བཟང་པོས། འོག་མིན་ཆེན་པོའི་གནས་སུ། འཆད་པའི་སྐྱེས་བུ་དེ་བཞིན་གཤེགས་པ་ལྔ་ཡང་མངོན་པར་སྣང་བར་མཛད་ནས། རྡོ་རྗེ་གསང་བ་ལ་སོགས་པ་རིག་པ་ཁྱད་པར་ཅན་གྱི་འཁོར་རྣམས་ལ་རྒྱུད་ཀྱི་རྒྱལ་པོ་ཉིད་དགོངས་པ་བརྡའི་གསུང་གིས། དུས་རྟག་པ་རྒྱུན་གྱི་འཁོར་ལོར་བསྟན་པ་ནི་རྒྱལ་བ་དགོངས་བརྒྱུད་དོ། །རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་རིགས་གསུམ་མགོན་པོས་ལྷ་ཀླུ་གནོད་སྦྱིན་གྱི་གནས་སུ་བཤད་ནས་དར་བ་དང་། ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན། ལངྐའི་ཡུལ་ཏེ་སིང་ག་ལའི་གླིང་གི་རི་བོ་མ་ལ་ཡའམ་དེང་སང་སུ་མ་ན་ཀཱུ་ཊའི་རི་ཞེས་གྲགས་པའི་རྩེ་མོར་གསང་བདག་གིས་ལྷ་གྲགས་ལྡན་མཆོག་སྐྱོང་། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། ཀླུ་འཇོག་པོ། མི་ལས་སྐལ་ལྡན་ལི་ཙ་བི་དྲི་མེད་གྲགས་པ་སྟེ། དམ་པའི་རིགས་ཅན་དྲྭ་མ་ལྔ་ལ་བཤད་པ་རྣམས་ནི་རིག་འཛིན་བརྡ་བརྒྱུད་དོ། །དེ་ནས་གང་ཟག་སྙན་བརྒྱུད་ནི། གསང་བདག་གིས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ཀྱིས་ཟ་ཧོར་གྱི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་ཤིང་དེའི་རྗེས་ཐོག་ཏུ་ཇི་སྐད་དུ། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་སྣང་བར་འགྱུར། །ཞེས་ལུང་བསྟན་པ་ལྟར་རྒྱལ་པོ་ཉིད་ཀྱི་ཕོ་བྲང་གི་ཁང་ཐོག་ཏུ་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབས་ཤིང་། གསང་བའི་བདག་པོས་དངོས་སུ་བྱིན་གྱིས་བརླབས་ནས་དོན་གྱི་བརྒྱུད་པ་གཏད་དེ། ཚིག་གི་བརྒྱུད་པ་ལི་ཙ་བི་ནས་ལེན་པར་རྗེས་སུ་གནང་བཞིན་སླར་ཡང་དེ་ཉིད་ནས་ལེགས་པར་གསན་པ་སྟེ། དེ་ལྟར་ན། གསང་བའི་བདག་པོ་ནས་ལི་ཙ་བི་དྲི་མེད་གྲགས་པ། རྒྱལ་པོ་ཛཿ ཀུ་ཀུ་རཱ་ཛཿ ཨིནྡྲ་བྷུ་ཏི། ཨུ་པ་རཱ་ཛཿ སྲས་མོ་གོ་མ་དེ་ཝི་རྣམས་ལ་རིམ་པར་བརྒྱུད་དེ། ཐམས་ཅད་ཚོགས་ཀྱི་སྤྱོད་པའི་ཉེ་རྒྱུ་ལ་བརྟེན་ནས་རང་རང་གི་ཚོམ་བུ་དང་བཅས་ཏེ་རྡོ་རྗེ་འཆང་ཆེན་པོའི་ས་ལ་མངོན་དུ་གཤེགས་པ་ཤ་སྟག་གོ། །སྲས་མོས་སྒེག་པ་རྡོ་རྗེ་དང་སློབ་དཔོན་སངས་རྒྱས་གསང་བ། དེ་གཉིས་ཀས་པཎ་ཆེན་བི་མ་ལ་མི་ཏྲ། དེས་བོད་དུ་ལོ་ཙཱ་བ་རྨ་གཉགས་གཉིས། རྨ་རིན་ཆེན་མཆོག་ནས་མཁས་པ་གཙུག་གྱེར་རྣམ་གཉིས། དེ་གཉིས་ལས་ཞང་དང་། གཉགས་ལོ་ཡེ་ཤེས་གཞོན་ནུ་ནས་སོག་པོ་དཔལ་ཡེ་ལ་བརྒྱུད་དེ། ཞང་དང་སོག་པོས་གནུབས་ཆེན་སངས་རྒྱས་ཡེ་ཤེས་ལ་བསྐུར། དེ་ནས་གནུབས་ཡོན་ཏན་རྒྱ་མཚོ་ཡབ་སྲས་དང་། ཆོས་ལུང་གི་ཉང་ཁུ་དབོན་ནས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས། དེའི་སློབ་མ་རྩེ་མོ་བཞི་ལས་ལྟ་སྒོམ་གྱི་རྩེ་མོ་ཟུར་ཆུང་ཤེས་རབ་གྲགས་པ། དེའི་སློབ་མ་ཀ་བ་བཞི་དང་གླན་ཤཱཀ་བྱང་ལས། གསང་བདག་ཆེན་པོ་སྒྲོ་ཕུག་པ་ཤཱཀྱ་སེང་གེ་སོགས་ནས་འོག་མིན་ཨོ་རྒྱན་སྨིན་གྲོལ་གླིང་གི་རྗེ་གཏེར་ཆེན་བླ་མ་ཡབ་སྲས་ནས་རིམ་པར་བརྒྱུད་དེ། ཁོ་བོ་ཅག་གི་བླ་མ་དམ་པ་བཀའ་དྲིན་མཉམ་མེད་དཀྱིལ་འཁོར་རྒྱ་མཚོའི་དབང་ཕྱུག་ཁྱབ་བདག་འཁོར་ལོའི་མགོན་པོ་མཚན་བརྗོད་པར་དཀའ་བ་འདི་ཞེས་པའི་ཞལ་སྔ་ནས་བདག་རྒྱུད་དབང་གི་ཆུ་བོས་སྨིན་པར་མཛད་པ་ཡིན། བརྒྱུད་པ་དེ་ལས་བྱུང་བའི་ཆོས་དེ་ལའང་། ལམ་གྱི་གཞི་སྨིན་བྱེད་དབང་གི་རིམ་པ་དང་། དེའི་ཉམས་ལེན་གྲོལ་བྱེད་བསྐྱེད་རྫོགས་ཀྱི་རིམ་པ་གཉིས་སུ་ཡོད་པ་ལས་འདིར་དབང་བསྐུར་བའི་རིམ་པ་དེ་སྐབས་སུ་བབ་པ་ཡིན། དེ་ལ་དབང་གི་ངོ་བོ་ནི། རྒྱུ་གཉིས་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱིས། རྒྱུད་ཀྱི་དྲི་མ་བྱང་བའམ་ཉམས་སྨད་པར་བྱས་ཤིང་། ཐར་པའི་མྱུ་གུ་མངོན་དུ་སྐྱེས་པའམ། སྐྱེ་ངེས་ཀྱི་ས་བོན་ཁྱད་པར་ཅན་གསོས་ཐེབས་པས་ལམ་བསྒོམ་རུང་དང་འབྲས་བུ་ཐོབ་རུང་གི་ནུས་པ་མཐུ་ཅན་དུ་སྨིན་པར་བྱས་པ་སྟེ། ས་བོན་གསོས་ཐེབས་པའི་ཆ་དེ་སྔགས་ཀྱི་སྡོམ་པའང་ཡིན་ལ། དམ་ཚིག་ཀྱང་ཡིན་ནོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན། མངོན་པར་གཏོར་བས་ན་དབང་སྟེ། སྦྱང་བྱ་སྒོ་གསུམ་གྱི་དྲི་མ་གཏོར་ཞིང་འཁྲུད་པར་བྱེད་པའི་ཕྱིར། ཡང་མངོན་པར་བླུགས་པས་ན་དབང་སྟེ། ལམ་སྒོམ་རུང་དང་འབྲས་བུ་ཐོབ་རུང་གི་ནུས་པ་ཁྱད་པར་ཅན་རྒྱུད་ལ་འཇོག་པའི་ཕྱིར། དེ་ལྟར་ཡང་བརྟག་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས། དབྱེ་ན་དད་པ་ཅན་རྗེས་སུ་འཛིན་པ་ལ་ཕན་པའི་དབང་བཅུ། བརྩོན་འགྲུས་ཅན་རྗེས་སུ་འཛིན་པ་ལ་ནུས་པའི་དབང་ལྔ། བརྟུལ་ཞུགས་ཅན་རྗེས་སུ་འཛིན་པ་ལ་ཟབ་མོའི་དབང་གསུམ་གསུངས་ཏེ། རྩ་རྒྱུད་ཐར་ལོའི་འགྱུར་ལས། དད་དང་བརྩོན་འགྲུས་བརྟུལ་ཞུགས་ལ། །ཕན་དང་ནུས་པའི་དབང་བསྐུར་བྱ། །ཤེས་རབ་དབང་བསྐུར་རིམ་པར་བཅས། །བརྩེ་བས་ཆུད་མི་ཟ་བར་སྦྱིན། །ཞེས་གསུངས། དེ་ཡང་དབང་བསྐུར་བ་ནི་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དེ་ལའང་རྡོ་རྗེ་རྩེ་མོ་ལས། སེམས་ཅན་ཤིན་ཏུ་གདུལ་དཀའ་གང་། །སྡོ མ་པ་འཛིན་པར་མི་བྱེད་ཅིང་། །དད་དང་ལྡན་པ་མེད་པ་ཡང་། །འཇུག་པ་ཉིད་ནི་དགག་མི་བྱ། །ཞེས་པས་རེ་ཞིག་དབང་གི་སྣོད་དུ་མ་གྱུར་པའི་གང་ཟག་ཡིན་ནའང་། དཀྱིལ་འཁོར་དུ་བཅུག་པ་ཙམ་ལ་འགལ་བ་མེད་པར་གསུངས་མོད། དཀྱིལ་འཁོར་དུ་མ་བཅུག་པ་ལ་དབང་བསྐུར་བ་ནི་ནམ་དུའང་མི་རུང་སྟེ། ཇི་སྐད་དུ། དཀྱིལ་འཁོར་མ་མཐོང་བ་རྣམས་ཀྱི་མདུན་དུ་མ་སྨྲ་ཞིག་ཅེས་གསུངས་པའི་ཕྱིར། དེས་ན། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་གསུངས་པ་ལྟར་སྟ་གོན་དུ་གནས་པ་ཡན་ཆད་སོང་ནས། དངོས་གཞི་ལ། རྡོ་རྗེ་སློབ་དཔོན་གྱི་བྱ་བ་དང་། རྡོ་རྗེ་སློབ་མའི་བྱ་བ་གཉིས་ཡོད་པ་ལས། སློབ་དཔོན་གྱི་བགྱི་འོས་དཀྱིལ་འཁོར་བཞེངས་པ། བསྒྲུབ་ཅིང་མཆོད་པ། བདག་ཉིད་དཀྱིལ་འཁོར་དུ་རིག་པས་འཇུག་པ་རྣམས་ཆད་ལྷག་མེད་པར་སྔོན་དུ་གྲུབ། ད་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ལ། ལྷ་དང་སྐལ་བ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོས་དང་། ཞུགས་ནས་དབང་ནོད་པའི་བྱ་བ་གཉིས་ལས། འདིར་འཇུག་པའི་ཡན་ལག་ཁྲུས་དང་བགེགས་བསལ་བ་སྔོན་དུ་སོང་ནས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད་དོ། །བཞི་པ་གདོང་དགབ་པ་ནི། དར་རམ་རས་དམར་པོའི་མིག་དར། ༀ་ཨཱཿཧཱུྃ་གིས་འཆིང་། ཨཱ་ཁཾ་ཝཱི་ར་ཧཱུྃ་གིས་མེ་ཏོག་གཏད་པ་སྙིམ་པར་ཐོགས་པས་ཐལ་མོ་སྦྱར་ལ། རྡོར་སེམས་གཙོ་བོ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ་གྱིས་གསོལ་བ་གདབ། ལྔ་པ་དྲི་བ་ནི། སློབ་དཔོན་གྱིས། བུ་ཁྱོད་ཅི་ལ་དགའ་ཞེས་དྲི། སློབ་བུས། སྐལ་བ་བཟང་ལ་བདག་དགའོ། །ཞེས་ལན་གདབ། དེ་ནས་ལག་གི་རྡོ་རྗེ་ཕྱེད་བྱིན་ལ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུང་། །སྒྱུ་འཕྲུལ་དྲྭ་བའི་རྫོགས་དབང་སྦྱིན། །ཞེས་རང་གི་མདུན་དུ་དྲངས། སྐབས་འདིར་དཀྱིལ་འཁོར་གྱི་ཡོལ་བ་བསལ། དྲུག་པ་ལུས་དབུལ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡེ་ཤེས་ཐོབ་པར་བྱ་བའི་ཕྱིར་འདས་པའི་སངས་རྒྱས་རྟོགས་པ་མངོན་དུ་གྱུར་པ་རྣམས་ལ་ལུས་ཕུལ་བར་བསམ་ལ་ཐལ་མོ་སྤྱི་བོར་སྦྱར་ཏེ། ༀ་སརྦ་བུདྡྷ་པཱུ་ཛོ་བ་སྠཱ་ནཱ་ཡ་ཨཱཏྨ་ནཾ་ནིཪྻཱ་ཏ་ཡཱ་མི། སངས་རྒྱས་ཐམས་ཅད་ཀྱི་ཡེ་ཤེས་ཐོབ་པའི་སྣོད་རུང་དུ་བྱ་བའི་ཕྱིར་ད་ལྟར་གྱི་སངས་རྒྱས་བླ་མ་རྣམས་ལ་ལུས་ཕུལ་བར་བསམ་ལ་ཐལ་མོ་སྨིན་མཚམས་སུ་སྦྱར་ཏེ། ༀ་ཨཱ་ཙརྻ་པཱུ་ཛ་བ་སྠཱ་ནཱ་ཡ་ཨཱཏྨ་ནཾ་ནིཪྻཱ་ཏ་ཡཱ་མི། སེམས་ཅན་ཐམས་ཅད་ཀྱི་དོན་མི་འདོར་ཞིང་མཐར་ཕྱིན་པར་བྱ་བའི་ཕྱིར་མ་འོངས་པའི་སངས་རྒྱས་སེམས་ཅན་ཐམས་ཅད་ལ་ལུས་ཕུལ་བར་བསམ་ཐལ་མོ་སྙིང་གར་སྦྱར་ལ། ༀ་བ་ཀེ་ལ་ས་ཏྭ་པུ་ཙོ་བ་སྠཱ་ནཱ་ཡ་ཨཱཏྨ་ནཾ་ནིཪྻཱ་ཏ་ཡཱ་མི། ཞེས་སློབ་བུས་ལུས་དབུལ། བདུན་པ་བགེགས་བསྐྲད་པ་ལ་སྔོན་དུ་འགྲོ་བ་དང་། དངོས་གཉིས། དང་པོ་ནི། ཚེ་མི་ཡར་བར་བྱ་བའི་ཕྱིར། དབང་ཕྱུག་གི་ཐུགས་ཀའི་ས་བོན་ལས་ཡི་གེ་བྷྲཱུྃ་རེ་སློབ་མའི་དཔྲལ་བར་སྤྲོས། བྷྲཱུྃ་བི་ཤྭ་བི་ཤུདྡྷེ། ཞེས་བརྗོད་པས། དུང་ཁང་དུ་ཟླ་གམ་དམར་པོའི་གཞལ་ཡས་ཁང་གནམ་སྒོ་གཅིག་པ་སྒོ་ཁྱུད་ཅན་གཅིག་ཏུ་གྱུར། དེའི་ནང་དུ་ཧཱུཾ་ཡིག་གསལ་བ་ལས་ཧཱུྃ་ཞེས་བརྗོད་པས་སློབ་མའི་ཚེའི་འདི་དངོས་པོ་ཐམས་ཅད་ཧཱུཾ་ལ་བསྡུ། ༀ་བཛྲ་ཧཱུཾ་ཀཱ་ར་ཧཱུཾ་ཕཊ། ཅེས་བརྗོད་པས། ཧཱུཾ་ཀཱ་ར་སྔོན་པོ་ཚེའི་བུམ་པ་བསྣམས་པ་དང་། ཟླ་གམ་གྱི་གནམ་སྒོ་ལ། ༀ་བཛྲ་ཀྲོ་དྷ་ཨཱརྻ་ཨ་ཙ་ལ་ཧཱུྃ་ཕཊ། ཅེས་བརྗོད་པས། ཁོ་བོ་མི་གཡོ་བ་ལྗང་ནག་རལ་གྲི་དང་སྡིགས་མཛུབ་ཅན་གཅིག་གིས་སྒོ་བསྲུང་བར་གྱུར། གཉིས་པ་ལ། བགེགས་བསྐྲད་པ་དང་། སྒྲིབ་པ་ཕྲལ་བ་གཉིས་ཀྱི། དང་པོ་ནི། སློབ་དཔོན་ཞེ་སྡང་རྡོ་རྗེ་གསལ་བས། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས། སྤྲུལ་པའི་ཁྲོ་ཚོགས་བསམ་གྱིས་མི་ཁྱབ་པ་སྤྲོས། བདུད་བགེགས་ལོག་པར་འདྲེན་པའི་ཚོགས་ཐམས་ཅད་བསྡིགས་བསྐྲད་བརླག་པར་བསམ་ལ། བདེན་སྟོབས་བརྗོད་པ་སྔོན་དུ་འགྲོ་བས། འདིར་འདུས་པའི་སློབ་བུ་རྣམས་ལ་གནོད་ཅིང་འཚེ་བའི་འབྱུང་པོ་ཐམས་ཅད་འདིར་མ་གནས་པར་དེངས་ཤིག །ཅེས་དང། ཧཱུྃ་བཞི་པའི་སྔགས་ལན་གསུམ་བརྗོད་ཅིང་གུ་གུལ་གྱི་བདུག །ཡུངས་ཀར་གྱིས་བྲབ། གཉིས་པ་ནི། སློབ་དཔོན་གྱི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ༀ་ཧཱུྃ་སྭཱ་ཨཱཾ་ཧཱཾ། གཡོན་གྱི་སོར་མོ་ལྔ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་རྣམས་རིགས་ལྔ་ཡབ་ཡུམ་བཅུར་གྱུར་པར་བསམ་ལ། ༀ་སུ་ར་ཏ་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལཱི། ཞེས་སོར་མོ་བསྣོལ། བཛྲ་བྷནྡྷ་བཾ། ཞེས་ཕྱག་རྒྱ་བསྡམས་པས་རིགས་ལྔ་ཡབ་ཡུམ་མཉམ་པར་སྦྱོར་བར་བསམ། བདེན་སྟོབས་བརྗོད་པ་སྔོན་དུ་འགྲོ་བས། སློབ་བུ་འདི་རྣམས་ཀྱི་རྒྱུད་ལ་ཡོད་པའི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། ཆོས་ཀྱིས་ཕོངས་པའི་སྒྲིབ་པ་དང་། བག་ཆགས་ངན་པའི་སྒྲིབ་པ་ལ་སོགས་ཏེ་སྒྲིབ་པའི་ཕུང་པོ་ཇི་སྙེད་པ་ཐམས་ཅད་ཕྱག་རྒྱའི་འོད་ཟེར་འདིས་བྲལ་བར་གྱུར་ཅིག །བཛྲ་བནྡྷ་ཏྲ་ཐ། ཞེས་པའི་སྔགས་མང་དུ་བརྗོད་ཅིང་ཕྱག་རྒྱ་སྤྲུལ་པས། རིགས་ལྔའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་འཕྲོས་པས་སློབ་བུའི་སྒྲིབ་པ་མཐའ་དག་བསྲེགས་ཤིང་སྦྱངས། དུང་ཁང་གི་ཁྲོ་བོ་གཉིས་ཀྱང་ཞུ་ལུགས་སུ་ཐིམ་པའི་རྐྱེན་གྱིས་བུའི་ལུས་ཀྱང་འོད་དུ་ཞུ་བའི་འོད་ཕུང་གསེར་ཞུན་མ་ལྟ་བུར་གནས་པར་བསམ། བརྒྱད་པ་ལྷར་བརླབ་པ་ལ། སློབ་བུ་ལྷར་བསྐྱེད་ནས། བསྐུར་བརླབ་གོ་བགོ་ལུས་བསྲུང་བྱ་བ་ནི། ཧཱུྃ་ཞེས་བརྗོད་པས་དེ་ཉིད་ཧཱུྃ་ཡིག་དཀར་པོ་གཅིག་ཏུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་རྡོ་རྗེ་རྩེ་ལྔ་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་རྡོར་དྲིལ་འཛིན་པ་རྒྱན་དང་ཆ་ལུགས་ཐམས་ཅད་རྫོགས་པར་བསམ་མོ། །སོ་སོའི་ཕྱག་རྒྱ་སློབ་མའི་མགོ་བོའི་གནས་ལྔ་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱ ཏྨ་ཀོ྅་ཧཾ། ཤཱུ་ནྱ་ཏཱའི་ཚབ་ཏུ། ཨཱ་དཪྴ། ས་མ་ཏཱ། པྲ་ཏྱ་བེཀྵ་ཎ། ཀྲྀ་ཏྱཱ་ནུཥྛཱ་ཎ། ཞེས་བཅུག་པས་དབང་བསྐུར། ༀ་ཨཱཿཧཱུྃ་ཞེས་བརྗོད་ཅིང་རྡོ་རྗེ་གནས་གསུམ་དུ་གཏུགས་པས་བྱིན་གྱིས་བརླབས། སླར་ཡང་རྡོ་རྗེ་རྩེ་ལྔའི་རྒྱ་བཅིངས་པ་གནས་གསུམ་དུ་བཞག །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱཀ །ཙིཏྟ་ཞེས་བཅུག་པས། བྱིན་གྱིས་བརླབས་པའི་རྟགས་སུ་དཔྲལ་བར་སྐུ་རྡོ་རྗེ་རྣམ་སྣང་དཀར་པོ་འཁོར་ལོ་ༀ་གྱིས་མཚན་པ་འཛིན་པ། མགྲིན་པར་གསུང་རྡོ་རྗེ་སྣང་མཐའ་དམར་པོ་པདྨ་ཨཱཿས་མཚན་པ་འཛིན་པ། སྙིང་གར་ཐུགས་རྡོ་རྗེ་མི་བསྐྱོད་པ་མཐིང་ག་རྡོ་རྗེ་ཧཱུྃ་གིས་མཚན་པ་འཛིན་པ་རྣམས་ཀྱིས་རྒྱས་བཏབ་པར་བསམ། རྡོ་རྗེ་གོ་ཆའི་ཕྱག་རྒྱ་སྤྱི་བོར་བཞག་ལ། བཛྲ་ཀཱ་ཝཱ་ཙི་རཀྵ་ཧཾ། ཞེས་གོ་བགོ། མཛུབ་མོ་གཡས་སུ་ཏྲུཾ་ལ ས་ཁྲོ་བོ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཆེ་བ་དང་སྡིགས་མཛུབ། གཡོན་དུ་ༀ་ལས་ཁྲོ་བོ་མི་འཆི་ཐབ་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ༀ་ཏྲུཾ། ཞེས་ལྟེ་བ། སྙིང་ག །ལྟག་པ། དཔྲལ་བ། སྤྱི་བོ་རྣམས་སུ་རིམ་པར་མཛུབ་མོ་གཉིས་བསྣོལ་བ་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ནས་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེའི་ལུ་གུ་རྒྱུད་བྱུག་པས་བསྲུངས་ཤིང་བརྟན་པར་བསམ་མོ། །དགུ་པ་དམ་ཚིག་སྦྱིན་པ་ནི། སློབ་མས། ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་མཉེས་པར་མཛོད། །ཨ་ལ་ལ་སྟེ་དམ་ཚིག་སྐོང་། །ཨ་ལ་ལ་སྟེ་དངོས་གྲུབ་སྩོལ། །དཔལ་ལྡན་རྡོ་རྗེ་སྐུ་འཆང་བ། །མི་ཕྱེད་རྡོ་རྗེའི་སྐུ་རང་བཞིན། །དེང་བདག་བྱིན་གྱིས་བརླབས་ནས་ནི། །རྡོ་རྗེའི་སྐུ་རུ་མཛད་དུ་གསོལ། །ཞེས་གསོལ། སློབ་དཔོན་གྱིས་བདུད་རྩི་ལ། ༀ་ཨཱཿཧཱུྃ་ཞེས་བརྗོད་པས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་འབྲུ་གསུམ་གྱི་རྣམ་པར་གསལ་བཏབ་ལ། ༀ་བཛྲ་ཨ་མྲྀ་ཏཾ་ཨ་དྷི་ཏིཥྛ་མཾ་ཧཱུྃ་ཧྲཱིཿཋཱཿ ཞེས་ལན་གསུམ་གྱིས་བྱིན་གྱིས་བརླབས་པ་བླ་མའི་ཕྱག་གཡས་རྡོ་རྗེ་དང་བཅས་པའི་སྲིན་ལག་གིས་བླངས་ནས། ༀ་ཞེས་སློབ་མའི་དཔྲལ་བར་ཐིག་ལེ་བྱས་པས། དཔྲལ་བར་ༀ་དཀར་པོས་མཚན་པར་བསམ། དེ་ལས་འོད་ཟེར་དཀར་པོ་འཕྲོས་དེ་བཞིན་གཤེགས་པ་ཐམས་ཅད་ཀྱི་སྐུའི་བྱིན་རླབས་བསྡུས་ནས་ༀ་ལ་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་སྐུའི་དམ་ཚིག་ཐོབ་པར་བསམ། དེ་བཞིན་དུ། དཔལ་ལྡན་རྡོ་རྗེ་གསུང་འཆང་བ། །མི་ཕྱེད་རྡོ་རྗེ་གསུང་རང་བཞིན། །དེང་བདག་བྱིན་གྱིས་བརླབས་ནས་ནི། །རྡོ་རྗེའི་གསུང་དུ་མཛད་དུ་གསོལ། །ཞེས་གསོལ་བ་གདབ། ཡང་སྔར་བཞིན། ཨཾ་ཞེས་མགྲིན་པར་ཐིག་ལེ་བྱས་པས། ཨཱཾ་དམར་པོར་བསམ། དེ་ལས་འོད་ཟེར་དམར་པོ་འཕྲོས་དེ་བཞིན་གཤེགས་པ་ཐམས་ཅད་ཀྱི་གསུང་གི་བྱིན་རླབས་བསྡུས་ནས་ཨཱཾ་ལ་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་གསུང་གི་དམ་ཚིག་ཐོབ་པར་བསམ། ཡང་། དཔལ་ལྡན་རྡོ་རྗེ་ཐུགས་འཆང་བ། །མི་ཕྱེད་རྡོ་རྗེ་ཐུགས་རང་བཞིན། །དེང་བདག་བྱིན་གྱིས་བརླབས་ནས་ནི། །རྡོ་རྗེའི་ཐུགས་སུ་མཛད་དུ་གསོལ། །ཞེས་གསོལ་བ་གདབ། ཧཱུྃ་ཞེས་སྙིང་གར་ཐིག་ལེ་བྱས་པས་ཧཱུྃ་མཐིང་གར་བསམ། དེ་ལས་འོད་ཟེར་མཐིང་ག་འཕྲོས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་བྱིན་རླབས་བསྡུས་ནས་ཧཱུྃ་ལ་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་ཐུགས་ཀྱི་དམ་ཚིག་ཐོབ་པར་བསམ། བཅུ་པ་དམ་ཚིག་དབབ་པ་ནི། རྡོ་རྗེ་སྙིང་གར་བཞག་ལ། སངས་རྒྱས་ཀུན་གྱི་གསང་བ་འདི། །དམ་ཉམས་མ་འདྲེས་མེད་པ་ལ། །ནམ་ཡང་སྨྲ་བར་མ་བྱེད་ཅིག །ཐེག་པ་ཆེན་པོ་སྟོན་བྱེད་པ། །དེ་ལ་བརྙས་དང་སྨད་མི་རུང་། །སྐུ་གསུང་ཐུགས་ལ་རྟག་གནས་ཤིང་། །མ་ལུས་སེམས་ཅན་དོན་གྱིས་ཤིག །ཅེས་བསྒོ། བཅུ་གཅིག་པ་ཆུ་ནན་བྱ་བ་ནི། དུང་ཞལ་དུ་ཙནྡན་དཀར་དམར་སྦྱར་བའི་ཆུ་ལས་སྔགས་ཀྱི་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཧཱུྃ་ལས་ཁྲོ་བོ་རྡོ་རྗེ་གནོད་སྦྱིན་དུ་གྱུར། ཨེ་ཧྱེ་ཧིས་རང་འདྲའི་ཡེ་ཤེས་པ་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ༀ་བཛྲ་ཡཀྵ་ཧཱུྃ། ཞེས་བཟླས་པས། ལྷ་འོད་དུ་ཞུ་བ་ཆུའི་རྡུལ་ཕྲ་རབ་ཏུ་བསམ་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །རྡོ་རྗེ་ཁྲོ་བོ་ཆེན་པོར་འགྱུར། །རྡོ་རྗེའི་ཆུ་འདི་བཏུང་བར་གྱིས། །ༀ་བཛྲ་ཨཀྵ་ཧཱུྃ་ཕཊ། ཅེས་རྡོ་རྗེས་ལྕེ་ལ་ལན་གསུམ་བཞག་ཅིང་ཉེས་དམིགས་ཀྱི་སྒོ་ནས་ཆུ་ནན་བྱ། དེ་ནས་ཕན་ཡོན་གྱི་སྒོ་ནས་ཆུ་ནན་བྱ་བ་ནི། སླར་ཡང་ཆུ་བསང་སྦྱངས། སྟོང་པའི་ངང་ལས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས་རྡོ་རྗེ་སེམས་དཔའི་སྐུར་བསྐྱེད་ལ་སྔར་ལྟར། ཨེ་ཧྱེ་ཧིས་རང་འདྲཱ་ཡེ་ཤེས་པ་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ༀ་བཛྲ་ས་ཏྭ་ཨ། ཞེས་བཟླས་པས། ལྷ་ཞུ་བ་ལས་བྱུང་བའི་བདུད་རྩིར་བསམ་ལ། དེ་ལྟ་བས་ན་བུ་ཁྱོད་ཀྱིས། །དམ་ཚིག་འདི་དག་བསྲུང་བར་གྱིས། །དམ་ཚིག་བསྲུང་ན་དངོས་གྲུབ་པས། །རྡོ་རྗེའི་བདུད་རྩིའི་ཆུ་འཐུངས་ཤིག །ༀ་བཛྲ་ཨུ་ད་ཀ་ཧཱུྃ་ཕཊ། ཅེས་ལན་གསུམ་བྱིན་རྗེས་འདི་ལྟར་བརྗོད་དེ། དེ་ལྟར་བདུད་རྩིའི་ཆུ་འདི་བཞག་པ་ལྕེ་ལ་བཞག་ཀྱང་བབས་པ་སྙིང་གི་དཀྱིལ་དུ་བབས་ནས། གལ་ཏེ་དམ་ཚིག་མ་བསྲུང་ན། །ཆུ་དེ་རྡོ་རྗེ་གནོད་སྦྱིན་ཞེས་བྱ་བ་ལྕགས་ཀྱི་སྡིག་པ་མགོ་དགུ་པར་གྱུར་ནས་སྙིང་ཁྲག་ཞོ་བཞིན་འཇིབ་པས་ཚེ་ཐུང་ཞིང་ནད་མང་བ་དང་། ཚེ་ཕྱི་མར་དམྱལ་བའི་སྡུག་བསྔལ་གྱིས་ཉམ་ཐག་པར་འགྱུར་རོ། །དམ་ཚིག་བསྲུངས་ན་ཆུ་དེ་རྡོ་རྗེ་སེམས་དཔར་གྱུར་ནས་དེ་རྟག་ཏུ་བྱིན་གྱིས་བརླབ་ཅིང་། ཚེ་འདིར་ཡང་དགེ་དགུ་དང་། སྨོན་བརྒྱད་དུ་གྱུར་ནས་ནད་བཞི་བརྒྱ་རྩ་བཞི་གདོན་སྟོང་ཕྲག་བརྒྱད་ཅུས་མི་ཚུགས་པ་དང་། ཕྱི་མར་བླ་ན་མེད་པའི་བྱང་ཆུབ་ཐོབ་ནས་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་གནས་སུ་འདྲེན་པའི་དེད་དཔོན་བྱེད་པར་འགྱུར་རོ། །ཞེས་བརྗོད་དོ། །བཅུ་གཉིས་པ་དམ་ཚིག་བསྒྲག་པ་ནི། བླ་མའི་ཕྱག་གཡས་རྡོ་རྗེ་དང་བཅས་པ་སྤྱི་བོར་བཞག་ལ། ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་དོགས་པ་མེད་གྱིས་ལ། །འདོད་པ་ལྔ་ཡི་ཡོན་ཏན་སྤྱོད། །གཞན་ཡང་སྟོང་ཁམས་ཐམས་ཅད་ན། །ཤེས་རབ་དབྱིངས་དང་འདོད་ཡོན་གཞན། །རབ་འབྲིང་ཐ་མ་ཐམས་ཅད་སྤྱོད། །གཞན་ཡང་དམ་ཚིག་ཉམས་པ་དང་། །སྐྱེ་བོ་གང་ཞིག་དམ་ལ་གནོད། །བརྟུལ་ཞུགས་ཅན་གྱིས་དེ་དྲོངས་ལ། །ཁྲག་ཆེན་སྙིང་ལས་བཏུང་བར་གྱིས། །འདི་ལ་མི་བྱ་ཅུང་ཟད་མེད། །སེམས་ཉིད་ཐེག་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱད་ཀྱང་། །པདྨ་ལ་ནི་འདམ་བཞིན་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བྱ་དང་མི་བྱ་ཅུང་ཟད་མེད། །ཅེས་བསྒོ། བཅུ་གསུམ་པ་རིན་ཆེན་དོར་བ་ནི། སྔར་གཏད་པའི་མེ་ཏོག་ཐལ་སྦྱར་གྱིས་བཟུང་བ་སློབ་དཔོན་གྱི་ལུས་གདོད་ནས་རིགས་ལྔའི་དཀྱིལ་འཁོར་དུ་བཞུགས་པ་ལ་འདོར་བར་གསུངས་ཀྱང་འཇུག་པ་བདེ་ཕྱིར་མཎྜལ་གྱི་ར་བ་འདི་ཉིད་རིགས་ལྔའི་ལྷར་བཞུགས་པ་ལ་དམིགས་ཏེ། མེ་ཏོག་ལ་སོགས་རིན་ཆེན་ཕྲེང་། །སྔོན་ཚེ་ཡེ་ཤེས་བསྙེན་པའི་ལྷ། །ཐུགས་རྗེས་བཟུང་བར་དགོངས་ནས་ཀྱང་། །གང་ཡིན་དེ་ལ་འབབ་གྱུར་ཅིག །ༀ་པྲ་ཏཱིཙྪ་བཛྲ་ཧོཿ ཞེས་འདོར་དུ་བཅུག་པས། དབུས་སུ་བབས་ན་རྡོ་རྗེའི་རིགས། ཤར་དུ་དེ་བཞིན། ལྷོར་རིན་ཆེན། ནུབ་ཏུ་པདྨ། བྱང་དུ་ལས་རིགས་ཏེ། དེ་ལྟར་རིགས་གང་ཡིན་ངོས་ཟུངས་ཤིག །ཅེས་བརྗོད་ལ། ༀ་པྲ་ཏཱི་གྲྀཧྞ་ཏྭཾ་ཨི་མཾ་ས་ཏྭ་མ་ཧཱ་བ་ལ་ཏིཥྛ། ཞེས་སྤྱི་བོར་འཆིང་། བཅུ་བཞི་པ་ལྷ་དབབ་པ་ནི། སློབ་བུ་རྣམས་ལུས་གནད་དྲང་པོར་བསྲངས་ཏེ་རླུང་རང་བབས་སུ་བཞག་ལ། སྙིང་ནང་དུ་ཆུ་ནན་གྱི་ཡེ་ཤེས་པ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་ཕྱག་ཕྱག་མཚན་ཡོངས་སུ་རྫོགས་པར་གསལ་བ་ལ་ཤེས་པ་སྐད་ཅིག་ཀྱང་མ་ཡེངས་པར་གྱིས་ཤིག །ཅེས་བསྒོས་ཏེ། རྡོ་རྗེ་རྩེ་གཅིག་པའི་རྒྱ་བཅས་ལ། ཧཱུྃ་བཛྲ་དྷྲིཀ྄ །ས་མ་ཡ་སྟྭཾ། ཞེས་ལན་གསུམ་བརྗོད་པས། རྡོ་རྗེ་སེམས་དཔའ་ཆོས་སྐུ་ལས་གཟུགས་སྐུར་བཞེངས་པར་བསམ་ལ། དབང་ཕྱུག་གིས་ལྕགས་ཀྱུའི་ཕྱག་རྒྱ་དང་བཅས། ༀ་བཛྲ་ས་ཏྭ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཛཿཧཱུྃ་བྃ་ཧོཿ ཞེས་བརྗོད་པས་འོག་མིན་ནས་ཡེ་ཤེས་སེམས་དཔའི་རང་བཞིན་རྡོ་རྗེ་སེམས་དཔའི་སྐུ་ཆེ་ཆུང་བསམ་གྱིས་མི་ཁྱབ་པ་བྱོན་ནས་སློབ་མའི་སྤྱི་བོའི་སྟེང་གི་ནམ་མཁར་བཞུགས་པར་བསམ་ལ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབས། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཧཱུཾ་ཧཱུཾ་ཧཱུཾ་ཧཱུཾ། ཞེས་བརྗོད་ཅིང་སྤོས་རོལ་བྱ། དེ་ནས་བླ་མའི་ཕྱག་གཡས་རྡོ་རྗེ་དང་བཅས་པ་སློབ་མའི་སྙིང་གར་བཞག་ལ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། བདེན་པ་ཆེན་པོས་བྱིན་གྱི་རླབས་ཀྱིས་བྱིན་ཕབ་པའི་ཡེ་ཤེས་པ་དེ་ཉིད་ཙིཏྟའི་དཀྱིལ་དུ་ཡེ་ཤེས་སེམས་དཔའི་རང་བཞིན་དུ་བཞུགས་ནས་འཇིག་རྟེན་འདིའི་དགེ་དགུ་དང་སྨོན་བརྒྱད་དུ་གྱུར་ཏེ། ཕྱི་མ་བླ་ན་མེད་པའི་བྱང་ཆུབ་ཀྱི་རྒྱུར་གྱུར་ཅིག །གལ་ཏེ་དམ་ཚིག་ཉམས་ན་རྡོ་རྗེ་གནོད་སྦྱིན་དུ་གྱུར་ནས་སྲོག་རྩའི་ཁྲག་འཇིབ་པར་གྱུར་ཅིག །ཅེས་དམོད་བོར་ནས། པྲ་ཝེ་ཤ་ཡ་ཕཊ། ཅེས་པས་སྙིང་གི་སྒོ་ཕྱེ་ལ་ནམ་མཁའ་གང་བའི་ལྷ་ཚོགས་རྣམས་སློབ་མའི་སྦྱི་བོ་ནས་ཞུགས་པ་སྙིང་གའི་རྡོ་རྗེ་སེམས་དཔའ་ལ་སིབ་སིབ་ཐིམ་པར་བསམ་ཞིང་སྤོས་རོལ་དང་བཅས་ཏེ། ཨ་ཝེ་ཤ་ཡ་ཨ། ཞེས་ཆུ་ནན་གྱི་ལྷ་དང་གཉིས་མེད་དུ་གྱུར་པར་བསམ་མོ། །བཅོ་ལྔ་པ་ལྷ་སྒོམ་པར་ནན་ཏན་བྱ་བ་ནི་འོག་ཏུ་དཀྱིལ་འཁོར་གྱི་ལྷ་ངོ་བསྟན་པ་དང་སྦྲེལ་ནས་མཛད་པ་ཕྱག་ལེན་ནོ། །བཅུ་དྲུག་པ་མིག་དབྱེ་བ་ནི། དབང་ཕྱུག་གི་ཐུགས་ཀ་ནས་འོད་ཟེར་ཐུར་མ་འདྲ་བ་བྱུང་སྟེ། སློབ་བུའི་མ་རིག་པའི་ལིང་ཐོག་བསལ་བས་དག་པ་ཡེ་ཤེས་ཀྱི་སྤྱན་དང་ལྡན་པར་མོས་ལ། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དམ་པ་བལྟ་བར་བྱ། །སངས་རྒྱས་གང་གི་རིགས་སུ་འཁྲུངས། །དངོས་གྲུབ་མཆོག་ཏུ་འགྱུར་བར་བྱ། །བཛྲ་ཙཀྵུ་པྲ་ཝེ་ཤ་ཡ་ཕཊ། ཅེས་མིག་དབྱེ་ཞིང་གདོང་གཡོགས་དགྲོལ། བཅུ་བདུན་པ་དཀྱིལ་འཁོར་བསྟན་པ་ནི། དབང་ཕྱུག་གིས་ཕྱག་ཤིང་ཐོགས་ཏེ། ཧེ་མཎྜ་ལ་པཱ་ཤྱ། ཞེས་པ་ཙམ་མམ། སྤྲོ་ན་འགྲེལ་པ་ཉི་སེང་མར་གསུངས་པ་ལྟར། དཀྱིལ་འཁོར་ཆེན་པོ་འདི་ལ་ལྟོས། །ད་ནི་དད་པ་རབ་སྐྱེད་ཅིག །སངས་རྒྱས་གདུང་གི་རིགས་སུ་འཁྲུངས། །དམ་ཚིག་མཆོག་ཏུ་འགྱུར་བ་ཡི། །རྡོ་རྗེ་པདྨོ་རོལ་མོའི་མཆོག །སྔགས་དང་ཕྱག་རྒྱས་བྱིན་གྱིས་བརླབ། །དངོས་གྲུབ་ཐམས་ཅད་ཕུན་སུམ་ཚོགས། །གསང་སྔགས་རྣམས་ནི་སྒྲུབ་པར་གྱིས། །ཞེས་བལྟ་བར་བསྐུལ་ནས། དེ་ཡང་བསྲུང་བའི་འཁོར་ལོས་མི་ཕྱེད་པར་བཅིངས་པའི་ནང་དུ་སྣ་ཚོགས་པདྨའི་ལྟེ་བ་ལ་རྫོགས་པའི་གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ། ཡོན་ཏན་དཔག་ཏུ་མེད་པ་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་དང་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཡེ་ཤེས་བསམ་གྱིས་མི་ཁྱབ་པ་ཡེ་ཤེས་རིན་པོ་ཆེའི་དབྱིབས་དང་ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། སྤགས་པ། ཚད་དཔག་ཏུ་མེད་པ། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ་མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་ཀླུབས་པ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། གདན་གྱི་རིམ་པ་ནི། རིགས་ལྔའི་གནས་སུ་མི་འཇིགས་པ་སེང་གེའི་ཁྲི་དང་། སྟོབས་གླང་པོ་ཆེའི་ཁྲི་དང་། རྫུ་འཕྲུལ་རྟའི་ཁྲི་དང་། དབང་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རིགས་ལྔ་དང་བྱ་བྱེད་ཀྱི་གནས་སུ་རེ་བ་ཡིད་བཞིན་དུ་སྐོང་བ་རིན་པོ་ཆེའི་གདན། རིགས་ལྔ་བྱ་བྱེད་སེམས་དཔའ་རྣམས་ཀྱི་གནས་སུ་གོས་པ་མེད་པ་པདྨའི་གདན་ལ་རང་བཞིན་གྱི་འོད་གསལ་བ་ཉི་ཟླའི་དཀྱིལ་འཁོར། ཐུབ་པ་དྲུག་ལ་པད་རྐྱང་དང་། མཐར་བྱེད་ཀྱི་གནས་སུ་ཉི་མའི་གདན་རེ་རེ་སྟེ། དེ་རྣམས་ནི་རྟེན་གྱི་དཀྱིལ་འཁོར་རོ། །བརྟེན་པ་ལྷའི་དཀྱིལ་འཁོར་ནི། དཀྱིལ་འཁོར་གྱི་དབུས་ཀྱི་གདན་ལ་རྣམ་པར་ཤེས་པ་གནས་སུ་དག་པ་ཐུགས་རྡོ་རྗེའི་བདག་ཉིད་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་དང་པོ་རྡོ་རྗེ་ཐུགས་ཀར་འཛིན་ཅིང་། གཡོན་དང་པོ་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། བར་པ་གཉིས་འཁོར་ལོ་དང་རིན་པོ་ཆེ། ཐ་མ་གཉིས་ཀྱིས་པདྨ་དང་རལ་གྲི་འཛིན་པ་དབུ་སྐྲ་རལ་པའི་ཐོར་ཚུགས་ཅན། ཞབས་གཉིས་རྫོགས་པའི་སྐྱིལ་མོ་ཀྲུང་གིས་བཞུགས་པའི་པང་དུ་འབྱུང་བ་ནམ་མཁའི་ཁམས་གནས་སུ་དག་པ་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་ཕྱག་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རྡོ་རྗེ་ཐུགས་ཀར་འཛིན་པ་བརྟུལ་ཞུགས་ཀྱི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་བརྒྱན་པ་ཞི་བའི་ཚུལ་དགུས་བརྗིད་ཅིང་འོད་ཟེར་ཁ་དོག་དྲུག་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །རྩིབས་བཞིའི་ཤར་གྱི་རྩིབས་ལ་གཟུགས་ཕུང་དང་འབྱུང་བ་སའི་ཁམས་གནས་སུ་དག་པ་སྐུ་རྡོ་རྗེའི་བདག་ཉིད་བཅོམ་ལྡན་འདས་རྣམ་པར་སྣང་མཛད་དང་ཡུམ་སངས་རྒྱས་སྤྱན་མ། ལྷོའི་རྩིབས་ལ་ཚོར་ཕུང་དང་འབྱུང་བ་ཆུའི་ཁམས་གནས་སུ་དག་པ་ཡོན་ཏན་རྡོ་རྗེའི་བདག་ཉིད་བཅོམ་ལྡན་འདས་རིན་ཆེན་འབྱུང་ལྡན་དང་ཡུམ་མཱ་མ་ཀཱི །ནུབ་ཀྱི་རྩིབས་ལ་འདུ་ཤེས་དང་འབྱུང་བ་མེའི་ཁམས་གནས་སུ་དག་པ་གསུང་རྡོ་རྗེའི་བདག་ཉིད་བཅོམ་ལྡན་འདས་སྣང་བ་མཐའ་ཡས་དང་ཡུམ་གོས་དཀར་མོ། བྱང་གི་རྩིབས་ལ་འདུ་བྱེད་དང་འབྱུང་བ་རླུང་གི་ཁམས་གནས་སུ་དག་པ་ཕྲིན་ལས་རྡོ་རྗེའི་བདག་ཉིད་བཅོམ་ལྡན་འདས་དོན་ཡོད་གྲུབ་པ་དང་ཡུམ་དམ་ཚིག་སྒྲོལ་མ། རྩིབས་མཆན་བཞིའི་ཤར་ལྷོར་མིག་ཤེས་དང་ཡུལ་གཟུགས་རྣམ་པར་དག་པ་ས་སྙིང་ཡབ་ཡུམ། ལྷོ་ནུབ་ཏུ་སྣའི་རྣམ་ཤེས་དང་ཡུལ་དྲི་གནས་སུ་དག་པ་ནམ་སྙིང་ཡབ་ཡུམ། ནུབ་བྱང་དུ་ལྕེའི་རྣམ་ཤེས་དང་ཡུལ་སྒྲ་གནས་སུ་དག་པ་སྤྱན་རས་གཟིགས་ཡབ་ཡུམ། བྱང་ཤར་དུ་རྣ་བའི་རྣམ་ཤེས་དང་ཡུལ་རོ་གནས་སུ་དག་པ་ཕྱག་རྡོར་ཡབ་ཡུམ། གྲུ་ཆད་བཞིའི་ཤར་ལྷོར་མིག་དབང་དང་འདས་པའི་དུས་གནས་སུ་དག་པ་བྱམས་པ་ཡབ་ཡུམ། ལྷོ་ནུབ་ཏུ་རྣ་བའི་དབང་པོ་དང་ད་ལྟར་གྱི་དུས་གནས་སུ་དག་པ་སྒྲིབ་སེལ་ཡབ་ཡུམ། ནུབ་བྱང་དུ་སྣ་དབང་དང་མ་འོངས་པའི་དུས་གནས་སུ་དག་པ་ཀུན་བཟང་ཡབ་ཡུམ། བྱང་ཤར་དུ་ལྕེ་དབང་དང་མ་ངེས་པའི་དུས་གནས་སུ་དག་པ་འཇམ་དཔལ་ཡབ་ཡུམ། ཁྱམས་ཀྱི་ཤར་ནུབ་གཉིས་སུ་ཡིད་ཆོས་གནས་སུ་དག་པ་བྱ་བྱེད་ཡབ་ཡུམ། ཁྱམས་ཀྱི་ཤར་ལྷོར་ང་རྒྱལ་གནས་སུ་དག་པ་ལྷའི་ཐུབ་པ། བྱང་དུ་ཕྲག་དོག་གནས་སུ་དག་པ་ལྷ་མིན་གྱི་ཐུབ་པ། ལྷོར་འདོད་ཆགས་གནས་སུ་དག་པ་མིའི་ཐུབ་པ། ནུབ་བྱང་དུ་གཏི་མུག་གནས་སུ་དག་པ་བྱོལ་སོང་གི་ཐུབ་པ། ལྷོ་ནུབ་ཏུ་སེར་སྣ་གནས་སུ་དག་པ་ཡི་དྭགས་ཀྱི་ཐུབ་པ། བྱང་ཤར་དུ་ཞེ་སྡང་གནས་སུ་དག་པ་དམྱལ་བའི་ཐུབ་པ། ཤར་སྒོར་རེག་པ་དང་རྟག་པར་ལྟ་བ་གནས་སུ་དག་པ་གཤིན་རྗེ་གཤེད་ཡབ་ཡུམ། ལྷོ་སྒོར་རེག་བྱ་དང་ཆད་པར་ལྟ་བ་གནས་སུ་དག་པ་སྟོབས་ཆེན་ཡབ་ཡུམ། ནུབ་སྒོར་རེག་བྱེད་དང་བདག་ཏུ་ལྟ་བ་གནས་སུ་དག་པ་རྟ་མགྲིན་ཡབ་ཡུམ། བྱང་སྒོར་རེག་ཤེས་དང་མཚན་མར་ལྟ་བ་གནས་སུ་དག་པ་བདུད་རྩི་འཁྱིལ་བ་ཡབ་ཡུམ་སྟེ་དེ་ལྟར་ན་སྒྱུ་འཕྲུལ་དྲྭ་བ་ཞི་བ་བཞི་བཅུ་རྩ་གཉིས་ཀྱི་དཀྱིལ་འཁོར་ཆེན་པོ། རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཇལ་བར་གྱུར་སྙམ་དུ་དགའ་བ་དང་སྤྲོ་བ་ཡང་དག་པ་བསྐྱེད་མཛོད། དེའི་ནང་ནས་ཀྱང་ཁྱོད་ཀྱི་ཡི་དམ་གྱི་ལྷ་ནི་འདི་ཡིན་ཏེ། དེ་ཡང་སྔོན་མེ་ཏོག་དབུས་སུ་བབས་པ་རྣམས་ཀྱི་ཡི་དམ་གྱི་ལྷ་ནི་མི་བསྐྱོད་པ་དང་དེའི་སྙིང་པོ་སྔགས་ནི། ཧཱུྃ་བཛྲ་དྷྲིཀ྄ །ཅེས་པའོ། །དེ་བཞིན་དུ་ཤར་དུ་བབས་པ་རྣམས་ཀྱི་ཡི་དམ་གྱི་ལྷ་ནི་རྣམ་པར་སྣང་མཛད་དང་། སྙིང་པོ་སྔགས་ནི། ༀ་ཛི་ན་ཛིཀ྄ །ཅེས་པའོ། །ལྷོ་རུ་བབས་པ་རྣམས་ཀྱི་ཡི་དམ་གྱི་ལྷ་ནི་རིན་ཆེན་འབྱུང་ལྡན་དང་། སྙིང་པོ་སྔགས་ནི། སྭཱ་རཏྣ་དྷྲིཀ྄ །ཅེས་པའོ། །ནུབ་ཏུ་བབས་པ་རྣམས་ཀྱི་ཡི་དམ་གྱི་ལྷ་ནི་སྣང་བ་མཐའ་ཡས་དང་། སྙིང་པོ་སྔགས་ནི། ཨཱཾ་ཨཱ་རོ་ལིཀ྄ །ཅེས་པའོ། །བྱང་དུ་བབས་པ་རྣམས་ཀྱི་ཡི་དམ་གྱི་ལྷ་ནི་དོན་ཡོད་གྲུབ་པ་དང་། སྙིང་པོ་སྔགས་ནི། ཧཱ་པྲ་ཛྙཱ་དྷྲིཀ྄ །ཅེས་པ་ནི། དེ་ལྟར་ན་དུས་རྟག་ཏུ་ལྷ་དེ་དང་དེའི་མངོན་རྟོགས་སྒོམ་པ་དང་སྔགས་བཟླ་བ་ལ་བརྩོན་པར་གྱིས་ཤིག །ཅེས་བསྒོ། དེ་ནས་སྐབས་འདིར་རིགས་གང་ལ་བབས་པའི་གསང་མཚན་གདགས་པར་བྱ་སྟེ། དབུས་སུ་བབས་ན། རྡོ་རྗེ་སྙིང་པོ་རྩལ། རྡོ་རྗེ་ཡང་དག་རྩལ། རྡོ་རྗེ་ཐུགས་མཆོག་རྩལ། རྡོ་རྗེ་འགྱུར་མེད་རྩལ། རྡོ་རྗེ་དྲག་པོ་རྩལ། ཞེས་སོགས་དང་། མོ་རྣམས་ལ། རྡོ་རྗེ་དབྱིངས་ཕྱུག་རྩལ། ཞེས་པ་ལྟ་བུ། ཤར་དུ་བབས་ན། རྡོ་རྗེ་སྐུ་མཆོག་རྩལ། རྡོ་རྗེ་བདེ་གཤེགས་རྩལ། རྡོ་རྗེ་ལྷུན་གྲུབ་རྩལ། རྡོ་རྗེ་བཻ་རོ་ཙ་ན་རྩལ། ཞེས་སོགས་དང་། མོ་རྣམས་ལ། དེ་བཞིན་དབྱིངས་ཕྱུག་རྩལ། ཞེས་པ་ལྟ་བུ། ལྷོར་བབས་ན། རྡོ་རྗེ་ཡོན་ཏན་གཏེར་འབྱུང་རྩལ། རྡོ་རྗེ་དཔལ་མཆོག་རྩལ། རྡོ་རྗེ་རིན་ཆེན་སྙིང་པོ་རྩལ། ཞེས་སོགས་དང་། མོ་རྣམས་ལ། རིན་ཆེན་དབྱིངས་ཕྱུག་རྩལ། ཞེས་པ་ལྟ་བུ། ནུབ་ཏུ་བབས་ན། རྡོ་རྗེ་གསུང་མཆོག་རྩལ། རྡོ་རྗེ་མྱུ་གུ་རྩལ། རྡོ་རྗེ་དབང་ཕྱུག་རྩལ། རྡོ་རྗེ་མ་ཆགས་པདྨ་རྩལ། རྡོ་རྗེ་དྲི་མེད་རྩལ། ཞེས་སོགས་དང་། མོ་རྣམས་ལ། པདྨ་དབྱིངས་ཕྱུག་རྩལ། ཞེས་པ་ལྟ་བུ། བྱང་དུ་བབས་ན། རྡོ་རྗེ་ལས་རབ་རྩལ། རྡོ་རྗེ་ཁྱུང་གཤོག་རྩལ། རྡོ་རྗེ་ཐོགས་མེད་རྩལ། རྡོ་རྗེ་བདུད་འཇོམས་རྩལ། ཞེས་སོགས་དང་། མོ་རྣམས་ལ། ལས་ཀྱི་དབྱིངས་ཕྱུག་རྩལ། ཞེས་པ་ལྟ་བུ། རིགས་དང་མཐུན་པའི་མིང་གདགས་ཏེ། དེ་ལྟ་བུའི་མིང་དེ་ཉིད་མ་བརྗེད་པར་གྱིས་ཤིག །མ་འོངས་པའི་དུས་སུ་རིགས་དེ་དང་དེར་མངོན་པར་རྫོགས་པར་སངས་རྒྱས་པའི་ཚེ། ས་བླ། ས་འོག །ས་སྟེང་གསུམ་དུ་གྲགས་པར་འགྱུར་ཞིང་སེམས་ཅན་གྱི་དོན་བྱེད་པ་དང་། ཁྱད་པར་དུ་ཞེ་སྡང་ཅན་ལ་སོགས་པའི་གདུལ་བྱ་འདུལ་བར་འགྱུར་རོ། །ཞེས་བརྗོད་དོ། །དེ་ནས་ཁེ་ཉེན་བཤད་པའི་སྒོ་ནས་ལྷ་སྒོམ་པར་གདམས་པ་ནི། སྐལ་བ་མཉན་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ལྷ་སྤངས་དགེ་སྤྱད་དོན་མེད་པས། །གང་གིས་ཕྱག་རྒྱ་འདི་སྤངས་ན། །ཉོན་མོངས་ངན་སོང་གནས་སུ་སྐྱེ། །བྱང་ཆུབ་འབྲས་བུ་འཐོབ་མི་འགྱུར། །བླ་མེད་འགྲོ་བའི་རྒྱུན་ཡང་ཆད། །རིགས་ཆད་ཉིད་དུ་ལྟུང་བར་འགྱུར། །བདག་ཉིད་ལྷ་དང་མཉམ་སྦྱོར་བས། །ཡོན་ཏན་ཆུང་ཡང་འགྲུབ་པར་འགྱུར། །གཅིག་དང་དུ་མ་ཡོངས་བྲལ་བས། །དཀྱིལ་འཁོར་ཐམས་ཅད་འགྲུབ་པར་གསུངས། །ཞེས་བརྗོད། བཅོ་བརྒྱད་པ་ཡོན་འབུལ་བ་ནི། རྩ་རྒྱུད་ལས། དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་འབུལ། །ཞེས་གསུངས་པས་ལུས་དང་ལོངས་སྤྱོད་ཐམས་ཅད་ལྟོས་མེད་དུ་ཕུལ་བའི་མོས་པས་དེ་མཚོན་བྱེད་དུ་མཎྜལ་འབུལ། དེ་ལྟར་དཀྱིལ་འཁོར་དུ་ཞུགས་པའི་ཡོན་ཏན་ལ་བཞི་ལས། དང་པོ་དཀྱིལ་འཁོར་འདིར་ཞུགས་པས་དཀྱིལ་འཁོར་ཐམས་ཅད་དུ་ཞུགས་པར་འགྱུར་པའི་ཡོན་ཏན་ནི། རྡོ་རྗེ་ལས་རིམ་ལས། སྒྱུ་འཕྲུལ་དྲྭ་བར་ལེགས་ཞུགས་པས། །ཕྱོགས་བཅུ་དུས་བཞིར་གཤེགས་པ་ཡི། །དཀྱིལ་འཁོར་ཀུན་ཏུ་ཞུགས་པ་ཡིན། །ཞེས་གསུངས། གཉིས་པ་མཚན་མའི་དཀྱིལ་འཁོར་དུ་ཞུགས་པས་རང་བཞིན་འབྲས་བུའི་དཀྱིལ་འཁོར་དུ་ཞུགས་པ་དང་སྐལ་བ་མཉམ་པར་འགྱུར་པའི་ཡོན་ཏན་ནི། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་མངོན་དུ་མཐོང་བ་ཡི། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་གསུངས། གསུམ་པ་མོས་པ་སྐྱེས་པ་ཙམ་གྱིས་རྒྱལ་བའི་སྲས་སུ་དགོངས་པར་འགྱུར་བའི་ཡོན་ཏན་ནི། རྩ་རྒྱུད་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡིས། །ཉེ་བའི་སྲས་སུ་དགོངས་པར་འགྱུར། །ཞེས་གསུངས། བཞི་པ་དཀྱིལ་འཁོར་དུ་ཞུགས་ནས་དམ་ཚིག་མ་ཉམས་ན་མཆོག་ཐུན་གྱི་དངོས་གྲུབ་ཐོབ་པར་འགྱུར་བའི་ཡོན་ཏན་ནི། རྡོ་རྗེ་ལས་རིམ་ལས། རྡོ་རྗེ་འཛིན་པའི་རིགས་ངེས་ཤིང་། །གདོན་རྣམས་བཟློག་ཅིང་ངན་སོང་སྤོང་། །ལོངས་སྤྱོད་འདུ་བ་རྣམ་གཉིས་དང་། །ཡེ་ཤེས་སྤྱན་གྱི་གཞི་རུ་ངེས། །དེ་ལ་སོགས་པ་བསམ་ཡས་མཆོག །ཅེས་གསུངས། དེ་དག་ནི་དཀྱིལ་འཁོར་དུ་འཇུག་པའི་ཆོ་གའོ། །གཉིས་པ་ཞུགས་པ་ལ་མངོན་པར་དབང་བསྐུར་བའི་ཆོ་ག་ནི། རྩ་རྒྱུད་ལས། དད་བརྩོན་བརྟུལ་ཞུགས་རབ་རྟོགས་པས། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་གསུངས་པ་ལྟར། སློབ་མ་དད་པ་ཅན་ལ་ཕྱི་ཕན་པའི་དབང་བཅུ། རང་གཞན་གྱི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་བསྐུར་བའི་རིམ་པ་དང་གསུམ། དང་པོ་ཕན་དབང་བསྐུར་བ་ལ། སྔོན་དུ་འགྲོ་བ་དང་། དངོས་གཉིས། དང་པོ་ནི། སློབ་མ་རྣམས་ཀྱིས་བླ་མ་དང་དཀྱིལ་འཁོར་གྱི་ལྷ་ལ་ཕྱག་སྔོན་དུ་འགྲོ་བས། དཔལ་ལྡན་སངས་རྒྱས་ཀུན་བདག་ཉིད། །བརྩེ་བར་དགོངས་ཏེ་བདག་ལ་ཡང་། །དབང་བསྐུར་བདུད་རྩི་ཆེན་པོ་ཉིད། །དེ་རིང་རབ་ཏུ་གསལ་བར་མཛོད། །ཅེས་ལན་གསུམ་གྱིས་གསོལ་བ་གདབ། དེ་ནས་འགྲེལ་པ་ཉི་སེང་མར་གསུངས་པ་ལྟར། སློབ་མ་དཀྱིལ་འཁོར་གྱི་ཤར་སྒོའི་ནང་རོལ་དུ་དབང་སྟེགས་པདྨ་འདབ་མ་བརྒྱད་པའི་སྟེང་དུ་རྡོ་རྗེ་མི་བསྐྱོད་པ་ཞལ་གཅིག་ཕྱག་གཉིས་པའི་རྣམ་པས་འཁོད་པ་ལ་རུས། སངས་རྒྱས་དག་ནི་ཐམས་ཅད་ཀྱི། །གསང་བ་རྡོ་རྗེ་གསུམ་ལས་བྱུང་། །ཁམས་གསུམ་ཀུན་གྱིས་ཕྱག་བྱས་པ། །དབང་བསྐུར་གནང་བ་ཆེན་པོ་སྦྱིན། །ཞེས་གནང་བ་བྱིན་ནས། སྤོས་དང་རོལ་མོར་བཅས་པས་དཀྱིལ་འཁོར་ལ་བསྐོར་ཞིང་དབང་ཕྱུག་གིས་དཀྱིལ་འཁོར་གྱིས་ལྷ་ལ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །ཅེས་བསྟོད་རྗེས། བཛྲ་ས་མཱ་ཛཿ ཞེས་རྡོ་རྗེ་བསྡུ་བའི་ཕྱག་རྒྱས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་དུ་སད་ནས་བཞུགས་པར་མོས་ལ་མེ་ཏོག་དང་བཅས་ཐལ་མོ་སྦྱར་ཏེ། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བདག་ལ་དགོངས་སུ་གསོལ། བདག་རྡོ་རྗེ་སློབ་དཔོན་འདི་ཞེས་བྱ་བས་སློབ་བུ་འདི་རྣམས་ལ་སྒྱུ་འཕྲུལ་དྲྭ་བའི་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱི་བདག་ལ་མཐུ་བསྟན་དུ་གསོལ། དབང་བསྐུར་དུ་གསོལ། བྱིན་གྱིས་རློབ་ཏུ་གསོལ། དེ་བཞིན་གཤེགས་པ་ཐམས་ཅད་ཀྱིས། །སྒྱུ་འཕྲུལ་དྲྭ་བའི་དཀྱིལ་འཁོར་དུ། །རྡོ་རྗེ་ཤུགས་ཀྱིས་བསྒྲལ་ནས་ཀྱང་། །བྱིན་རླབས་དམ་པ་ནོད་པར་བྱའོ། །ཞེས་བརྗོད་ཅིང་དཀྱིལ་འཁོར་གྱི་དབུས་སུ་འདུག་པར་མོས་ལ་རང་ཉིད་དབང་ཁྲི་ལ་འདུག་པར་བྱའོ། །གཉིས་པ་ནི། རྡོ་རྗེ་ལས་རིམ་ལས། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་པ་ལྟར་དབང་ཐམས་ཅད་ལ་དོན་བརྒྱད་བརྒྱད་དུ་བསྡུས་ནས་གསུངས་པ་ལས། དབང་རེ་རེ་ལ་ཡང་དྲུག་པ་ཡན་ཆད་གསེབ་ཚགས་སུ་འབྱུང་བར་ཤེས་པར་བྱ་ལ། དེ་ལ། སྙིང་པོ་ལྔ་དང་དབུ་རྒྱན་དང་། བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །ཞེས་པའི་སྡོམས་ལྟར་ཕན་དབང་བཅུའི་དང་པོ་སྙིང་པོ་ལྔའི་དབང་བསྐུར་བ་ནི། དབང་རྫས་རིགས་ལྔའི་ཕྱག་མཚན་མདུན་དུ་བཤམས་ལ། ཧཱུྃ་བིགྷྣཱན་ཏ་ཀྲྀཏ་ཕཊ། ཅེས་ལས་སྔགས་ཀྱིས་བསང་། སྭ་བྷཱ་ཝས་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ༀ་ཨཱཿཧཱུྃ་སྭཱ་ཧཱ་ལས་སོ་སོའི་ཕྱག་མཚན་ས་བོན་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པ། སྣང་མཐའ་དམར་པོ་པདྨ་འཛིན་པ། མི་བསྐྱོད་པ་མཐིང་ག་རྡོ་རྗེ་འཛིན་པ། རིན་འབྱུང་སེར་པོ་རིན་ཆེན་འཛིན་པ། དོན་གྲུབ་ལྗང་གུ་རལ་གྲི་འཛིན་པ། ལྔ་ཀའང་གཡོན་དྲིལ་བུ་འཛིན་ཅིང་རྫོགས་པའི་སྐྱིལ་མོ་ཀྲུང་གིས་བཞུགས་པ་རང་རང་གི་ཡུམ་དང་འཁྲིལ་བའི་སྐུར་བསྐྱེད་ལ། ཨཱ་དཪྴ་སོགས་རང་རིགས་བདག་པོར་བྱས་པའི་སྔགས་ལྔ་ཚན་ལྔས་དབང་བསྐུར། ཀཱ་ཡ་བཛྲ་སོགས་ཀྱིས་བྱིན་གྱིས་བརླབས། བཛྲ་ས་མཱ་ཛཿས་དབབ། ཨེ་ཧྱེ་ཧིས་དྲངས། ཛཿཧཱུྃ་བྃ་ཧོཿས་བསྟིམ། ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ་གྱིས་བརྟན་པར་བྱ། ཀུན་བཟང་ཞབས་བསིལ་བཞི་བསྣོལ་གྱི་མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་རིགས་ལྔའི་ཕྱག་མཚན་ས་བོན་གྱིས་མཚན་པར་གྱུར། དེ་ནས་དབང་ཕྱུག་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པ་སློབ་མའི་དཔྲལ་བར་ཕོག་པའི་རྐྱེན་གྱིས་ཟླ་བའི་གདན་ལ་ༀ་ཡིག་དཀར་པོས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་འཁོར་ལོ་ༀ་གྱིས་མཚན་པར་གྱུར། སླར་ཡང་འཕྲོ་འདུས་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་གྱུར། དེ་ནས་དབང་རྫས་འཁོར་ལོ་དཔྲལ་བར་བཞག་པ་བདུད་རྩི་དྲི་ཆེན་གྱི་ཁམས་ལ་ཐིམ་པས་སྐུ་རྡོ་རྗེའི་དབང་ཐོབ་པར་མོས་ལ། ༀ། བདེ་གཤེགས་སྐུ་ཡི་ངོ་བོ་ལས། །མི་ཤིགས་རྡོ་རྗེ་རྒྱལ་བའི་གཙོ། །སྔགས་དང་ཕྱག་རྒྱ་ལྡན་པ་ཡིས། །རྡོ་རྗེ་སྐུ་ཡི་ངོ་བོར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་དབང་ཕྱུག་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པ་སློབ་མའི་མགྲིན་པར་ཕོག་པའི་རྐྱེན་གྱིས་པདྨའི་གདན་ལ་ཨཱཾ་ཡིག་དམར་པོས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་པདྨ་ཨཱཾ་གིས་མཚན་པར་གྱུར། སླར་ཡང་འཕྲོ་འདུས་ཡོངས་སུ་གྱུར་པ་ལས་སྣང་མཐའ་དམར་པོ་པདྨ་འཛིན་པས་རྒྱས་བཏབ་པར་གྱུར། དེ་ནས་དབང་རྫས་པདྨ་མགྲིན་པར་བཞག་པ་དམར་ཆའི་ཁམས་ལ་ཐིམ་པས་གསུང་རྡོ་རྗེའི་དབང་ཐོབ་པར་མོས་ལ། ཨཱཾ། བདེ་གཤེགས་གསུང་གི་ངོ་བོ་ལས། །མི་ཤིགས་རྡོ་རྗེ་ཆོས་ཀྱི་དབྱིངས། །སྔགས་དང་ཕྱག་རྒྱ་ལྡན་པ་ཡིས། །རྡོ་རྗེ་གསུང་གི་ངོ་བོར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་དབང་ཕྱུག་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པ་སློབ་མའི་སྙིང་གར་ཕོག་པའི་རྐྱེན་གྱིས་ཉི་མའི་གདན་ལ་ཧཱུཾ་ཡིག་མཐིང་གས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་རྡོ་རྗེ་ཧཱུཾ་གིས་མཚན་པར་གྱུར། སླར་ཡང་འཕྲོ་འདུས་ཡོངས་སུ་གྱུར་པ་ལས་མི་བསྐྱོད་པ་མཐིང་ག་རྡོ་རྗེ་འཛིན་པས་རྒྱས་བཏབ་པར་གྱུར། དེ་ནས་དབང་རྫས་རྡོ་རྗེ་སྙིང་གར་བཞག་པ་དཀར་ཆའི་ཁམས་ལ་ཐིམ་པས་ཐུགས་རྡོ་རྗེའི་དབང་ཐོབ་པར་མོས་ལ། ཧཱུྃ། བདེ་གཤེགས་ཐུགས་ཀྱི་ངོ་བོ་ལས། །མི་ཤེགས་རྡོ་རྗེ་ཐུགས་ཀྱི་ཐུགས། །སྔགས་དང་ཕྱག་རྒྱ་ལྡན་པ་ཡིན། །རྡོ་རྗེ་ཐུགས་ཀྱི་ངོ་བོར་ཤོག །ༀ་སརྦ་ཏ་ཐཱ་ག་མ་ཧཱ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཡང་དབང་ཕྱུག་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པ་སློབ་མའི་ལྟེ་བའི་གཡས་སུ་ཕོག་པའི་རྐྱེན་གྱིས་ཟླ་བའི་གདན་ལ་སྭཱ་ཡིག་སེར་པོས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོས་འདུས་རིན་པོ་ཆེ་སྭཱས་མཚན་པར་གྱུར། སླར་ཡང་འཕྲོ་འདུས་ཡོངས་སུ་གྱུར་པ་ལས་རིན་འབྱུང་སེར་པོ་རིན་ཆེན་འཛིན་པས་རྒྱས་བཏབ་པར་གྱུར། དེ་ནས་དབང་རྫས་རིན་པོ་ཆེ་ལྟེ་བའི་གཡས་སུ་བཞག་པ་ཤ་ཆེན་གྱི་ཁམས་ལ་ཐིམ་པས་ཡོན་ཏན་རྡོ་རྗེའི་དབང་ཐོབ་པར་མོས་ལ། སྭཱ། མི་འགྱུར་བ་ཡི་ཞིང་ཁམས་ལས། །མ་སྐྱེས་པ་ཡི་འབྲས་བུར་ལྡན། །མ་བསགས་པ་ཡི་ལོངས་སྤྱོད་འབྱུང་། །ཅིར་ཡང་འགྱུར་བའི་ཡེ་ཤེས་ཀྱིས། །རང་དབང་ཐབས་ཀྱིས་བསྒྱུར་བར་ཤོག །ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་དབང་ཕྱུག་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པ་སློབ་མའི་ལྟེ་བའི་གཡོན་དུ་ཕོག་པའི་རྐྱེན་གྱིས་ཟླ་བའི་གདན་ལ་ཧཱ་ཡིག་ལྗང་གུས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་རལ་གྲི་ཧཱས་མཚན་པར་གྱུར། སླར་ཡང་འཕྲོ་འདུས་ཡོངས་སུ་གྱུར་པ་ལས་དོན་གྲུབ་ལྗང་གུ་རལ་གྲི་འཛིན་པས་རྒྱས་བཏབ་པར་གྱུར། དེ་ནས་དབང་རྫས་རལ་གྲི་ལྟེ་བའི་གཡོན་དུ་བཞག་པ་དྲི་ཆུའི་ཁམས་ལ་ཐིམ་པས་ཕྲིན་ལས་རྡོ་རྗེའི་དབང་ཐོབ་པར་མོས་ལ། ཧཱ། ཐབས་དང་ཤེས་གཉིས་མེད་པའི། །འདོད་ཆགས་ཆེན་པོའི་ཏིང་འཛིན་ལས། །ལས་དང་དངོས་གྲུབ་ཀུན་སྣང་བས། །མ་ལུས་མཉམ་པར་སྦྱོར་བར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱ ཏྨ་ཀོ྅་ཧཾ། དེ་ལྟར་སྙིང་པོ་ལྔའི་དབང་བསྐུར་བས་ཁམས་ལྔའི་དྲི་མ་དག་ནས་འབྲས་བུ་ལྔ་མངོན་དུ་བྱེད་པའི་ནུས་པ་ཐོབ་པར་བསམ་ལ། དེ་དང་རྗེས་མཐུན་སྨོན་ལས་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས་སྐལ་ལྡན་རིག་པ་འཛིན་པ་ཁྱོད་ལ་སྙིང་པོ་ལྔའི་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དབང་དམ་པ་ཐོབ་པར་གྱུར་ཅིག །གཉིས་པ་དབུ་རྒྱན་གྱི་དབང་ནི། དབུ་རྒྱན་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་སྭཱ་ལས་རིན་པོ་ཆེ་སྭཱས་མཚན་པ་འཕྲོ་འདུས་ཡོངས་སུ་གྱུར་པ་ལས་རིན་འབྱུང་སེར་པོ་གཡས་རིན་པོ་ཆེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ་དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ་ཡུམ་མཱ་མ་ཀཱི་དང་འཁྲིལ་བའི་སྐུར་བསྐྱེད་ལ། ས་མ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་དབུ་རྒྱན་དུ་གྱུར། དེ་ལྟ་བུའི་རབ་གནས་ཅན་གྱི་དབུ་རྒྱན་མགོ་ལ་བཀོན་ཏེ་དབང་བསྐུར་བས་རིན་པོ་ཆེའི་ཁང་བུ་ལྔ་ལྡན་དུ་མོས་ལ། སངས་རྒྱས་ཀུན་གྱི་རཏྣ་ཆེ། །དཔག་ཏུ་མེད་པའི་འོད་དང་ལྡན། །རིགས་མཆོག་ཕྱག་རྒྱ་ལྔར་ལྡན་པས། །ཁམས་གསུམ་བདག་པོར་དབང་བསྐུར་རོ། །ༀ་རཏྣ་མ་ཀུ་ཊ་ཨ་བྷི་ཥིཉྩ་ཏྲཾ་ཏྲཾ་ཏྲཾ་ཏྲཾ་ཏྲཾ། དེ་ནས་དབང་ཕྱུག་གི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་ཨཱོཾ་སྭཱ་ཨཱཾ་ཧཱ། གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་རྣམས་རིགས་ལྔ་ཡབ་ཡུམ་བཅུར་གྱུར། དེ་ནས་རྡོ་རྗེ་བསྡམས་པ་ལས་གུང་མོ་གཉིས་སྒྲེང་བ་གཤིབས་ཏེ་སྦྱར་བས། མི་བསྐྱོད་པ་ཡབ་ཡུམ་སྦྱོར་བ་མཛད། ཧཱུྃ་བཛྲ་དྷྲིཀ྄ །མཱུཾ་དྷཱ་ཏྭེ་ཤྭ་རཱི། ཨ་བྷི་ཥིཉྩ་ཧཱུྃ། ཞེས་བརྗོད་པས་སྦྱོར་མཚམས་ནས་བྱང་སེམས་ཀྱི་རྒྱུན་མཐིང་ག་བབས་པ་སློབ་མའི་སྤྱི་བོར་ཐིམ་པས་ཀུན་གཞི་སྟོང་པ་ཉིད་ཀྱི་ཡེ་ཤེས་སུ་དག་པར་མོས་ལ། ཧཱུྃ། ཆོས་དབྱིངས་མཉམ་པ་ཆེན་པོ་ལས། །ཡེ་ཤེས་གསལ་བ་རྣམ་པར་དག །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །སྐྱེ་མེད་ཆོས་ལ་དབང་ཐོབ་ཤོག །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་མཛུབ་མོ་གཉིས་སྒྲེང་བ་གཤིབས་ཏེ་སྦྱར་བས། རྣམ་སྣང་ཡབ་ཡུམ་སྦྱོར་བ་མཛད། ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཨ་བྷི་ཥིཉྩ་ཧཱུྃ། ཞེས་བརྗོད་པས་སྦྱོར་མཚམས་ནས་བྱང་སེམས་ཀྱི་རྒྱུན་དཀར་པོ་བབས་པ་སློབ་མའི་དཔྲལ་བར་ཐིམ་པས་ཀུན་གཞིའི་རྣམ་ཤེས་མེ་ལོང་ཡེ་ཤེས་སུ་དག་པར་མོས་ལ། ༀ། དག་ཅིང་གསལ་བའི་རང་བཞིན་ཏེ། །སྐྱོན་མེད་སེམས་ཉིད་རིན་པོ་ཆེ། །མེ་ལོང་ལྟ་བུའི་ཡེ་ཤེས་ཀྱིས། །སྲིད་པ་གསུམ་ལ་དབང་བསྒྱུར་ཤོག །ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་སྲིན་ལག་གཉིས་སྒྲེང་བ་གཤིབས་ཏེ་སྦྱར་བས། རིན་འབྱུང་ཡབ་ཡུམ་སྦྱོར་བ་མཛད། སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ཨ་བྷི་ཥིཉྩ་ཧཱུྃ། ཞེས་བརྗོད་པས་སྦྱོར་མཚམས་ནས་བྱང་སེམས་ཀྱི་རྒྱུན་སེར་པོ་བབས་པ་སློབ་མའི་རྣ་ལྟག་གཡས་སུ་ཐིམ་པས་ཉོན་ཡིད་མཉམ་ཉིད་ཡེ་ཤེས་སུ་དག་པར་མོས་ལ། སྭཱཾ། ཁམས་གསུམ་རེ་སྐོང་རྒྱལ་པོ་སྟེ། །ཡིད་བཞིན་རིན་ཆེན་གཏེར་གྱི་མཆོག །མཉམ་པ་ཉིད་ཀྱི་ཡེ་ཤེས་ཀྱིས། །འགྲོ་བའི་རེ་སྐོང་རྒྱལ་པོར་ཤོག །ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅་ཧཾ། ཡང་མཐེ་བོང་གཉིས་སྒྲེང་བ་གཤིབས་ཏེ་སྦྱར་བས། སྣང་མཐའ་ཡབ་ཡུམ་སྦྱོར་བ་མཛད། ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི། ཨ་བྷི་ཥིཉྩ་ཧཱུྃ། ཞེས་བརྗོད་པས་སྦྱོར་མཚམས་ནས་བྱང་སེམས་ཀྱི་རྒྱུན་དམར་པོ་བབས་པ་སློབ་མའི་ལྟག་པར་ཐིམ་པས་ཡིད་སོ་སོར་རྟོག་པའི་ཡེ་ཤེས་སུ་དག་པར་མོས་ལ། ཨཱཾ། ཉེས་པའི་སྐྱོན་བྲལ་དྲི་མ་མེད། །སྐྱེ་འགག་མེད་པའི་དངོས་གྲུབ་སྟེ། །སོ་སོར་རྟོག་པའི་ཡེ་ཤེས་ཀྱིས། །སྲིད་གསུམ་ཉེས་དམིགས་སེལ་བར་ཤོག །ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡང་མཐེའུ་ཆུང་གཉིས་སྒྲེང་བ་གཤིབས་ཏེ་སྦྱར་བས། དོན་གྲུབ་ཡབ་ཡུམ་སྦྱོར་བ་མཛད། ཧཱཾ་པྲ་ཛྙཱ་དྷྲིཀ྄ །ཏཱཾ་བཛྲ་ར་ཏི། ཨ་བྷི་ཥིཉྩ་ཧཱུྃ། ཞེས་བརྗོད་པས་སྦྱོར་མཚམས་ནས་བྱང་སེམས་ཀྱི་རྒྱུན་ལྗང་གུ་བབས་པ་སློབ་མའི་རྣ་ལྟག་གཡོན་དུ་ཐིམ་པས་སྒོ་ལྔ་བྱ་བ་གྲུབ་པའི་ཡེ་ཤེས་སུ་དག་པར་མོས་ལ། ཧཱཾ། དབྱིངས་ཀྱི་དཀྱིལ་འཁོར་མཐར་ཕྱིན་ཅིང་། །གྲུབ་པ་ལས་ཀྱི་བྱེ་བྲག་ལས། །བྱ་བ་ནན་ཏན་ཡེ་ཤེས་ཀྱིས། །སྐྱེ་འགྲོ་དབྱིངས་སུ་སྒྲོལ་བར་ཤོག །ༀ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ལྟར་དབུ་རྒྱན་གྱི་དབང་བསྐུར་བས་རྣམ་ཤེས་ཚོགས་བརྒྱད་ཀྱི་སྒྲིབ་པ་དག་ནས་དེ་ཉིད་མ་སྤངས་ཡེ་ཤེས་ལྔར་གསལ་བའི་ནུས་པ་དངོས་སུ་ཐོབ་པའི་རྟགས་སུ་རིགས་ལྔ་སྤྲུལ་སྐུའི་ཆ་བྱད་ཅན་དབུ་རྒྱན་རིན་པོ་ཆེའི་ཁང་བུའི་སྙིང་པོ་ལ་བཞུགས་པས་དབུ་བརྒྱན་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་དབུ་རྒྱན་གྱི་དབང་བསྐུར་བས་རྣམ་པར་ཤེས་པའི་ཚོགས་བརྒྱད་མ་སྤངས་གནས་སུ་དག་ནས་ཡེ་ཤེས་ལྔའི་དབང་དམ་པ་ཐོབ་པར་གྱུར་ཅིག །གསུམ་པ་བུམ་པའི་དབང་ནི། བུམ་པ་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱུྃ་ༀ་སྭཱ་ཨཱཾ་ཧཱ་ལས་སོ་སོའི་ས་བོན་ཕྱག་མཚན་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས་མི་བསྐྱོད་པ་མཐིང་ག་རྡོ་རྗེ་འཛིན་པ། རྣམ་སྣང་དཀར་པོ་འཁོར་ལོ་འཛིན་པ། རིན་འབྱུང་སེར་པོ་རིན་ཆེན་འཛིན་པ། སྣང་མཐའ་དམར་པོ་པདྨ་འཛིན་ལ། དོན་གྲུབ་ལྗང་གུ་རལ་གྲི་འཛིན་པ། ལྔ་ཀའང་གཡོན་དྲིལ་བུ་འཛིན་ཅིང་རྫོགས་པའི་སྐྱིལ་མོ་ཀྲུང་གིས་བཞུགས་པ། རང་རང་གི་ཡུམ་དང་འཁྲིལ་བའི་སྐུར་བསྐྱེད་ལ། ལྔ་ཚན་ལྔས་དབང་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱི་ཞུ་བ་ལས་བྱུང་བའི་དབང་རྫས་བུམ་པར་གྱུར། དེ་ལྟ་བུའི་བུམ་པ་སྤྱི་བོར་བཞག་ཅིང་བུམ་ཆུ་མགོ་བོའི་གནས་ལྔར་གཏིགས་པ་རྩ་གནས་ཐིག་ལེས་གང་བ་ལ་ཐིམ་པར་མོས་ལ། བུམ་པ་ཟླུམ་པོའི་ཕོ་བྲང་། །སྣོད་བཅུད་མ་ལུས་ཀུན་བསྡུས་ནས། །ཐིག་ལེ་ཆེན་པོར་རྒྱས་བཏབ་པས། །སེམས་ཅན་ཐམས་ཅད་སངས་རྒྱས་ཡིན། །ༀ་བཛྲ་ཀཱ་ལ་ཤ་ཡ་བྷི་ཥིཉྩ་ཧཱུཾ། ༀ་བུདྡྷ་ཀཱ་ལ་ཤ་ཨ་བྷི་ཥིཉྩ་ༀ། ༀ་རཏྣ་ཀཱ་ལ་ཤ་ཨ་བྷི་ཥིཉྩ་ཏྲཱཾ། ༀ་པདྨ་ཀཱ་ལ་ཤ་ཨ་བྷི་ཥིཉྩ་ཧྲཱིཿ ༀ་ཀརྨ་ཀཱ་ལ་ཤ་ཨ་བྷི་ཥིཉྩ་ཨཿ དེ་ལྟར་བུམ་པའི་དབང་བསྐུར་བས་ཉོན་མོངས་པ་ལྔའི་དྲི་མ་དག་ནས་ཡེ་ཤེས་ལྔའི་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་བུམ་པ་བྱང་ཆུབ་སེམས་ཀྱི་ཆུ་རྒྱུན་གྱི་དབང་བསྐུར་བས་ཕྱི་ནང་གི་དྲི་མ་ཡོངས་སུ་དག་ནས་བྱང་ཆུབ་ཀྱི་སེམས་ཡེ་ཤེས་ལྔ་དང་ལྡན་པའི་དབང་དམ་པ་ཐོབ་པར་གྱུར་ཅིག །བཞི་པ་ཅོད་པན་གྱི་དབང་ནི། དར་མཐིང་དམར་གྱི་ཅོད་པན་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱུྃ་དང་ཨཱཾ་ལས་རྡོ་རྗེ་ཧཱུྃ་གིས་མཚན་པ་དང་པདྨ་ཨཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་རྡོར་སེམས་མཐིང་ག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། སྣང་མཐའ་དམར་པོ་གཡས་པདྨ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། གཉིས་ཀའང་དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་གཞུགས་པ་རང་རང་གི་ཡུམ་དང་འཁྲིལ་བའི་སྐུར་བསྐྱེད་ལ། ཤཱུ་ནྱ་ཏཱ་དང་། པྲ་ཏྱ་བེཀྵ་ཎ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་ཅོད་པན་དུ་གྱུར། དེ་ལྟ་བུའི་དར་དམར་མཐིང་གི་ཅོད་པན་མགོ་བོའི་གཡས་གཡོན་དུ་འཕུར་ཞིང་དཔྱངས་པ་རྩ་རོ་རྐྱང་གཉིས་ལ་ཐིམ་པར་མོས་ལ། ཅོད་པན་མི་འགྱུར་མངའ་བརྙེས་པས། །ཆོས་ཀྱི་རྒྱལ་སྲིད་ཆེན་པོའི་དབང་། །ཁམས་གསུམ་ཀུན་གྱི་དབང་ཕྱུག་ཆེ། །ཆོས་ཀྱི་རྒྱལ་པོར་དབང་བསྐུར་རོ། །ༀ་བཛྲ་ཨཱརྱ་ལམྦྷོ་དྷ་ར་ཨ་བྷི་ཥིཉྩ་ཧྲཱིཿ ཧྲཱིཿ དེ་ལྟར་དར་མཐིང་དམར་གྱི་ཅོད་པན་གྱི་དབང་བསྐུར་བས་གདུག་པ་ཅན་ཟིལ་གྱིས་གནོན་ཅིང་ཆོས་ཀྱི་རྒྱལ་སྲིད་ལ་མངའ་བརྙེས་པའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན༴ སྐལ་ལྡན་རིག་པ་འཛིན་པ་ཁྱོད་ལ་ཅོད་པན་གྱི་དབང་བསྐུར་བས། དམར་པོ་གཡོན་ནས་གྱེན་དུ་འཕུར་བས་སྲིད་གསུམ་ཆོས་ཀྱི་རྒྱལ་སྲིད་ཆེན་པོ་ལ་དབང་བྱེད་པ་དང་། མཐིང་ག་གཡས་ནས་མཐུར་དུ་འཕྱང་བས་ཁམས་གསུམ་གྱི་གདུག་པ་ཅན་ཐམས་ཅད་ཟིལ་གྱིས་གནོན་པའི་དབང་དམ་པ་ཐོབ་པར་གྱུར་ཅིག །ལྔ་པ་ཕྲེང་བའི་དབང་ནི། ཕྲེང་བ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་སྭཱ་ལས་རིན་པོ་ཆེ་སྭཱས་མཚན་པ་འཕྲོ་འདུས་ཡོངས་སུ་གྱུར་པ་ལས་རིན་འབྱུང་སེར་པོ་གཡས་རིན་པོ་ཆེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་མཱ་མ་ཀཱི་དང་འཁྲིལ་བའི་སྐུ་བསྐྱེད་ལ། ས་མ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་ཕྲེང་བར་གྱུར། དེ་ལྟ་བུའི་ཕྲེང་བ་དྲྭ་མིག་ཅན་མགོར་བཅིངས་པ་ཐིག་ལེ་སོ་གཉིས་ལ་ཐིམ་པར་མོས་ལ། ཏྲཱཾ། གཟུངས་དང་ཏིང་འཛིན་རྒྱུ་འབྲས་ཆོས། །བྱང་ཆུབ་ཕྱོགས་རྣམས་ཤེས་རབ་རྒྱན། །མི་འཇིགས་སྟོབས་དང་དཔེ་བྱད་མཚན། །འབྲས་བུ་རྫོགས་པར་དབང་བསྐུར་རོ། །ༀ་རཏྣ་མཱ་ལ་ཨ་བྷི་ཥིཉྩ་ཏྲཱཾ་ཏྲཱཾ། དེ་ལྟར་ཕྲེང་བའི་དབང་བསྐུར་བས་གཟུངས་དང་ཏིང་ངེ་འཛིན་སོགས་འབྲས་བུའི་ཆོས་ལ་མངའ་བརྙེས་པའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་ཕྲེང་བའི་དབང་བསྐུར་བས། གཟུངས་ཀྱི་སྒོ་ལྔ་བརྒྱ་དང་། ཏིང་ངེ་འཛིན་གྱི་སྒོ་འབུམ་ཕྲག་ལ་སོགས་པ་འབྲས་བུའི་ཆོས་ཐམས་ཅད་ལ་དབང་སྒྱུར་བའི་དབང་དམ་པ་ཐོབ་པར་གྱུར་ཅིག །དྲུག་པ་གོ་ཆའི་དབང་ནི། གོ་ཆ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱཾ་ལས་རལ་གྲི་ཧཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་དོན་གྲུབ་ལྗང་གུ་གཡས་རལ་གྲི་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་དམ་ཚིག་སྒྲོལ་མ་དང་འཁྲིལ་བའི་སྐུར་བསྐྱེད་ལ། ཀྲྀཏྱཱ་ནུཥྛཱ་ན་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་གོ་ཆར་གྱུར། དེ་ལྟ་བུའི་གོ་ཆ་ལུས་ལ་བཀོན་པས་ལུས་རྩའི་དྲྭ་བས་ཁེབས་པ་ལ་ཐིམ་པར་མོས་ལ། ཧཱུྃ། མི་ཤིགས་ཡེ་ཤེས་རྡོ་རྗེ་ནི། །སངས་རྒྱས་ཀུན་གྱི་ཡ་ལད་དེ། །ཁྱབ་པའི་ཚུལ་གྱིས་དྲྭ་བ་ཡིན། །དབང་མཆོག་དམ་པ་སྦྱིན་པར་བྱ། །ༀ་བཛྲ་རཀྵ་ཨ་བྷི་ཥིཉྩ་ཧཱུྃ། དེ་ལྟར་གོ་ཆའི་དབང་བསྐུར་བས་རྒོལ་བ་གང་གིས་ཀྱང་མི་ཚུགས་པའི་ནུས་པ་དངོས་སུ་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་གོ་ཆའི་དབང་བསྐུར་བས་བདུད་བཞིའི་དཔུང་ཚོགས་ལ་སོགས་པ་ཕས་ཀྱི་རྒོལ་བ་ཐམས་ཅད་ཀྱིས་མི་ཚུགས་པའི་དབང་དམ་པ་ཐོབ་པར་གྱུར་ཅིག །བདུན་པ་རྒྱལ་མཚན་གྱི་དབང་ནི། རྒྱལ་མཚན་བསང་སྦྱང་། དབང་རྫས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་རྡོར་སེམས་མཐིང་ག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་དབྱིངས་ཕྱུག་མ་དང་འཁྲིལ་བའི་སྐུར་བསྐྱེད་ལ། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་རྒྱལ་མཚན་དུ་གྱུར། དེ་ལྟ་བུའི་རྒྱལ་མཚན་ལག་ཏུ་གཏད་པ་གསང་བའི་དབང་པོ་ལ་ཐིམ་པར་མོས་ལ། ཧཱུྃ། སྐུ་གསུང་ཐུགས་ཀྱི་བདག་ཉིད་ཆེ། །ལོག་པར་ལྟ་བ་ཟིལ་གནོན་མཚན། །ཐམས་ཅད་ཚར་གཅོད་ཡེ་ཤེས་རྒྱ། །ཡོན་ཏན་མངོན་འབྱུང་དབང་བསྐུར་རོ། །ༀ་བཛྲ་ཀེ་ཏུ་ཨ་བྷི་ཥིཉྩ་ཧཱུྃ། དེ་ལྟར་རྒྱལ་མཚན་གྱི་དབང་བསྐུར་བས་ལོག་ལྟ་ཅན་ཟིལ་གྱིས་གནོན་པའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་རྒྱལ་མཚན་གྱི་དབང་བསྐུར་བས་བདུད་བཞི་དང་མཐའ་གཉིས་ལས་རྒྱལ་བའི་དབང་དམ་པ་ཐོབ་པར་གྱུར་ཅིག །བརྒྱད་པ་གདུགས་ཀྱི་དབང་ནི། གདུགས་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་མི་བསྐྱོད་པ་མཐིང་ག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་བསྐུར་བརྟེན་པ། དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་དབྱིངས་ཕྱུག་མ་དང་འཁྲིལ་བའི་སྐུར་བསྐྱེད་ལ། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་གདུགས་སུ་གྱུར། དེ་ལྟ་བུའི་གདུགས་སྤྱི་བོར་ཕུབ་པས་ཀླད་པ་བདེ་ཆེན་གྱི་འཁོར་ལོ་ལ་ཐིམ་པར་མོས་ལ། ཧཱུྃ། གཉིས་མེད་ཡེ་ཤེས་རྟོག་བྲལ་བ། །རྨོངས་སོགས་སེམས་ཕྱིར་རང་བཞིན་སྟོང་། །ལོག་འབྱུང་རྒྱུ་འབྲས་མི་གདུང་བ། །ཐུགས་རྗེས་སྐྱོབ་པར་དབང་བསྐུར་རོ། །ༀ་བཛྲ་རཏྣ་ཚཱ་ཏྲཾ་ཨ་བྷི་ཥིཉྩ་ཧཱུྃ། དེ་ལྟར་གདུགས་ཀྱི་དབང་བསྐུར་བས་ཉོན་མོངས་པས་གདུང་བ་ལས་སྐྱོབ་པའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་གདུགས་ཀྱི་དབང་བསྐུར་བས། བདག་དང་གཞན་གྱི་ཤེས་པའི་རྒྱུད་ལ་ཡོད་པའི་ཉོན་མོངས་པ་ཐམས་ཅད་ཀྱི་གདུང་བ་བསིལ་བར་བྱེད་པའི་དབང་དམ་པ་ཐོབ་པར་གྱུར་ཅིག །དགུ་པ་ཕྱག་རྒྱའི་དབང་ནི། རབ་གནས་སྔོན་དུ་དཀྱིལ་འཁོར་སྒྲུབ་མཆོད་བྱས་པ་ཉིད་ཀྱིས་ཁྱབ་ཅིང་། སྐབས་འདིར་དབང་བསྐུར་བ་སྟེ། དེ་ཡང་དཀྱིལ་འཁོར་གྱི་ལྷ་ཚོགས་རྣམས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རིམ་བཞིན་བྱོན་ཏེ། སྤྱི་བོ་ནས་སོ་སོའི་རྟོག་ཚོགས་ལ་ཐིམ་པར་མོས་ལ། ཧཱུྃ། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཏིང་འཛིན་ཐུགས་སུ་དབང་བསྐུར་བས། །དངོས་གྲུབ་ལས་རྣམས་མངོན་བྱེད་ཤོག །ཧཱུྃ་བཛྲ་དྷྲིཀ྄ །མཱུྃ་དྷཱ་ཏྭེ་ཤྭ་རཱི། ཨ་བྷི་ཥིཉྩ་ཧཱུྃ། གཟུགས་ཕུང་ས་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །སྣང་མཛད་ཡབ་ཡུམ་རང་བཞིན་ལས། །ཏིང་འཛིན་སྐུ་རུ་དབང་བསྐུར་བས། །དངོས་གྲུབ་ལས་རྣམས་མངོན་བྱེད་ཤོག །ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཨ་བྷི་ཥིཉྩ་ཧཱུྃ། ཚོར་བ་ཆུ་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །འབྱུང་ལྡན་ཡབ་ཡུམ་རང་བཞིན་ལས། །ཏིང་འཛིན་ཡོན་ཏན་དབང་བསྐུར་བས། །དངོས་གྲུབ་ལས་རྣམས་མངོན་བྱེད་ཤོག །སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ཨ་བྷི་ཥིཉྩ་ཧཱུྃ། འདུ་ཤེས་མེ་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མཐའ་ཡས་ཡབ་ཡུམ་རང་བཞིན་ལས། །ཏིང་འཛིན་གསུམ་དུ་དབང་བསྐུར་བས། །དངོས་གྲུབ་ལས་རྣམས་མངོན་བྱེད་ཤོག །ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི་ཨ་བྷི་ཥིཉྩ་ཧཱུྃ། འདུ་བྱེད་རླུང་གི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །དོན་གྲུབ་ཡབ་ཡུམ་རང་བཞིན་ལས། །ཏིང་འཛིན་ཕྲིན་ལས་དབང་བསྐུར་བས། །དངོས་གྲུབ་ལས་རྣམས་མངོན་བྱེད་ཤོག །ཧཱྃ་པྲ་ཛྙཱ་དྷྲིཀ྄ །ཏཱཾ་བཛྲ་ར་ཏི། ཨ་བྷི་ཥིཉྩ་ཧཱུྃ། མིག་གཟུགས་སེམས་ཕྱིར་མ་སྐྱེས་པ། །ས་སྙིང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཀྵཱིཾ་ཧི་རཱ་ཛ་ཡ། ཧཱུྃ་ལཱ་སྱ་ས་མ་ཡ་སྟྭཾ། ཨ་བྷི་ཥིཉྩ་ཧཱུྃ། སྣ་དྲི་སེམས་ཕྱིར་མ་སྐྱེས་པ། །ནམ་སྙིང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཏྲཾ་ཨཱ་གརྦྷ་ཡ། ཏྲཾ་མཱ་ལེ་ས་མ་ཡ་ཧོཿ ཨ་བྷི་ཥིཉྩ་ཧཱུྃ། ལྕེ་སྒྲ་སེམས་ཕྱིར་མ་སྐྱེས་པ། །སྤྱན་རས་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཧྲཱིཾ་ཧཱ་ཧཱུྃ་པདྨ་པྲ་ད་མ། ཧྲཱིཾ་གཱི་ཏི་རཱ་གོ་ཧཾ། ཨ་བྷི་ཥིཉྩ་ཧཱུྃ། རྣ་རོ་སེམས་ཕྱིར་མ་སྐྱེས་པ། །ཕྱག་རྡོར་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཛྲིཾ་ཀུ་རུ་པཱ་ཎ། ཨཾ་ནིརྟི་ར་ག་ཡ་མྱེ། ཨ་བྷི་ཥིཉྩ་ཧཱུྃ། མིག་དབང་འདས་དུས་མ་སྐྱེས་པ། །བྱམས་པ་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །མཻ་དྷཱ་ར་ཎི་སྭཱ་ཧཱ། ཛཿདྷུ་པེ་པྲ་ཝེ་ཤ །ཨ་བྷི་ཥིཉྩ་ཧཱུྃ། རྣ་དབང་ད་ལྟ་མ་སྐྱེས་པ། །སྒྲིབ་སེལ་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུྃ་པུཥྤེ་ཨ་ཝེ་ཤ །ཨ་བྷི་ཥིཉྩ་ཧཱུྃ། སྣ་དབང་མ་འོངས་མ་སྐྱེས་པ། །ཀུན་བཟང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཧཱུྃ་སྭ་རཱ་ཛ་ཡ་སྭཱ་ཧཱ། བཾ་དཱི་པ་སུ་གི་རཱི། ཨ་བྷི་ཥིཉྩ་ཧཱུྃ། ལྕེ་དབང་མ་ངེས་པ་སྐྱེས་པ། །འཇམ་དཔལ་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྐུར་བས། །སྤྱོད་ཡུལ་ཡོངས་སུ་དག་བྱེད་ཤོག །མུཾ་ཤྲཱི་ཨཾ་རཱ་གཱ་ཡ་སྭཱ་ཧཱ། ཧོཿ གནྡྷེ་ཙིཏྟ་ཨ་བྷི་ཥིཉྩ་ཧཱུྃ། རེག་པ་རྟག་པ་མ་སྐྱེས་སེམས། །གཤིན་རྗེ་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་བསྐུར་བས། །གདུལ་བྱ་མ་ལུས་མཐར་བྱེད་ཤོག །ཧཱུྃ་ཡ་མཱནྟ་ཀྲི་ཏ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཨ་བྷི་ཥིཉྩ་ཧཱུྃ། རེག་དབང་ཆད་པ་མ་སྐྱེས་སེམས། །སྟོབས་ཆེན་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་བསྐུར་བས། །གདུལ་བྱ་མ་ལུས་མཐར་བྱེད་ཤོག །ཧཱུྃ་པྲཛྙཱནྟ་ཀྲྀཏ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཨ་བྷི་ཥིཉྩ་ཧཱུྃ། རེག་ཡུལ་བདག་འཛིན་མ་སྐྱེས་སེམས། །རྟ་མགྲིན་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་བསྐུར་བས། །གདུལ་བྱ་མ་ལུས་མཐར་བྱེད་ཤོག །ཧཱུྃ་པདྨཱནྟ་ཀྲྀཏ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རི་ཛྭ་ལཱི་ནི་ཧཱུྃ་ཕཊ། ཨ་བྷི་ཥིཉྩ་ཧཱུྃ། རེག་ཤེས་མཚན་འཛིན་མ་སྐྱེས་སེམས། །བདུད་རྩི་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་བསྐུར་བས། །གདུལ་བྱ་མ་ལུས་མཐར་བྱེད་ཤོག །ཧཱུྃ་བིགྷྣནྟ་ཀྲྀཏ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཨ་བྷི་ཥིཉྩ་ཧཱུྃ། ཡིད་ནི་རང་རིག་མ་སྐྱེས་སེམས། །ཀུན་ཏུ་བཟང་པོའི་རང་བཞིན་ལས། །ཏིང་འཛིན་བྱེད་པར་དབང་བསྐུར་བས། །མ་ལུས་ཀུན་གྱི་བྱེད་པར་ཤོག །ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཨ་བྷི་ཥིཉྩ་ཧཱུྃ། ཆོས་ནི་དེ་བཞིན་མ་སྐྱེས་པ། །ཀུན་ཏུ་བཟང་མོའི་རང་བྱིན་ལས། །ཏིང་འཛིན་བྱ་བར་དབང་བསྐུར་བས། །མ་ལུས་ཀུན་གྱི་བྱ་བར་ཤོག །ཨ་ཨ་ཨ་བཛྲཱི་བྷ་དྲ་ས་མནྟ་ཨ། ཨ་བྷི་ཥིཉྩ་ཧཱུྃ། ང་རྒྱལ་སེམས་ཕྱིར་མ་སྐྱེས་པ། །བརྒྱ་བྱིན་དབང་པོའི་རང་བཞིན་ལས། །ཏིང་འཛིན་ཐུབ་པར་དབང་བསྐུར་བས། །འགྲོ་བ་ལྷ་རྣམས་འདུལ་བྱེད་ཤོག །ༀ་མུ་ནེ་ཀྲེཾ་སྭཱ་ཧཱ། ཨ་བྷི་ཥིཉྩ་ཧཱུྃ། ཁོང་ཁྲོ་སེམས་ཕྱིར་མ་སྐྱེས་པ། །ཐག་བཟང་རིས་ཀྱི་རང་བཞིན་ལས། །ཏིང་འཛིན་ཐུབ་པར་དབང་བསྐུར་བའང་། །འགྲོ་བ་ལྷ་མིན་འདུལ་བྱེད་ཤོག །ༀ་མུ་ནེ་ཧཱུྃ་ཏྲུཾ་ཏྲཾ་སྭཱ་ཧཱ། ཨི་བྷི་ཥིཉྩ་ཧཱུྃ། འདོད་ཆགས་སེམས་ཕྱིར་མ་སྐྱེས་པ། །ཤཱཀྱ་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་བསྐུར་བས། །འགྲོ་བ་མི་རྣམས་འདུལ་བྱེད་ཤོག །ༀ་མུ་ནེ་སྲུཾ་སྭཱ་ཧཱ། ཨ་བྷི་ཥིཉྩ་ཧཱུྃ། གཏི་མུག་སེམས་ཕྱིར་མ་སྐྱེས་པ། །སེང་གེ་རབ་བརྟན་རང་བཞིན་ལས། །ཏིང་འཛིན་ཐུབ་པར་དབང་བསྐུར་བས། །འགྲོ་བ་བྱོལ་སོང་འདུལ་བྱེད་ཤོག །ༀ་མུ་ནེ་བྲཾ་སྭཱ་ཧཱ། ཨ་བྷི་ཥིཉྩ་ཧཱུྃ། སེར་སྣ་སེམས་ཕྱིར་མ་སྐྱེས་པ། །ཁ་འབར་དེ་བའི་རང་བཞིན་ལས། །ཏིང་འཛིན་ཐུབ་པར་དབང་བསྐུར་བས། །འགྲོ་བ་ཡི་དྭགས་འདུལ་བྱེད་ཤོག །ༀ་མུ་ནེ་ཀྵཾ་སྭཱ་ཧཱ། ཨ་བྷི་ཥིཉྩ་ཧཱུྃ། ཞེ་སྡང་སེམས་ཕྱིར་མ་སྐྱེས་པ། །གཤིན་བུ་རྗེ་ཡི་རང་བཞིན་ལས། །ཏིང་འཛིན་ཐུབ་པར་དབང་བསྐུར་བས། །འགྲོ་བ་དམྱལ་བ་འདུལ་བྱེད་ཤོག །ༀ་མུ་ནེ་ཡེ་སྭཱ་ཧཱ། ཨ་བྷི་ཥིཉྩ་ཧཱུྃ། དེ་ལྟར་ལྷའི་དབང་བསྐུར་བས་རྟོག་ཚོགས་བཞི་བཅུ་རྩ་གཉིས་རང་ཁ་མའི་དྲི་མ་དག་ནས། སྐུ་དང་ཡེ་ཤེས་བཞི་བཅུ་རྩ་གཉིས་སུ་རང་སྣང་བའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་ཕྱག་རྒྱའི་དབང་བསྐུར་བས། རྟོག་པ་བཞི་བཅུ་རྩ་གཉིས་མ་སྤངས་གནས་སུ་དག་ནས། སངས་རྒྱས་བཞི་བཅུ་རྩ་གཉིས་ཀྱི་ངོ་བོ་ཉིད་མངོན་དུ་གྱུར་ཏེ། སྣང་བ་རྣམ་པར་འབྱེད་པའི་ཏིང་ངེ་འཛིན་སྒོམ་པའི་དབང་དམ་པ་ཐོབ་པར་གྱུར་ཅིག །བཅུ་པ་བཟའ་བཏུང་གི་དབང་ནི། བཟའ་བཏུང་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ༀ་ལས་འཁོར་ལོ་ༀ་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས་རྣམ་སྣང་དཀར་པོ་གཡས་འཁོར་ལོ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེའི་རྒྱན་ཅན་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་སངས་རྒྱས་སྤྱན་མ་དང་འཁྲིལ་བའི་སྐུར་བསྐྱེད་ལ། ཨཱ་དཪྴ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ཞུ་བ་ལས་བྱུང་བའི་དབང་རྫས་བཟའ་བཏུང་དུ་གྱུར། དེ་ལྟ་བུའི་བཟའ་བཏུང་ཁར་སྦྱིན་པ་ལྕེ་ལ་གནས་པའི་རོ་འབབ་མ་ལ་ཐིམ་པར་མོས་ལ། ༀ། བཟའ་དང་བཅའ་དང་བཏུང་ལ་སོགས། །རང་སེམས་རྣམ་དག་རྒྱན་གྱི་ཕྱིར། །གཉིས་མེད་རོལ་པས་དབང་བསྐུར་བས། །བདུད་རྩི་ཡིད་བཞིན་སྐུ་ཐོབ་ཤོག །ༀ་བཛྲ་ཨ་མྲྀ་ཏ་ཧཱུྃ། ཨ་བྷི་ཥིཉྩ་ཧཱུྃ། དེ་ལྟར་བཟང་བཏུང་གི་དབང་བསྐུར་བས་ཡེ་ཤེས་ཀྱི་སྣང་བ་འདོད་ཡོན་གྱི་རོལ་མོར་མ་འགགས་པར་སྤྱོད་པའི་ནུས་པ་དངོས་སུ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་ཁྱོད་ལ་བཟའ་བཏུང་གི་དབང་བསྐུར་བས། འདོད་ཡོན་རྣམ་པ་ལྔ་ཆོས་ཉིད་ཀྱི་རྒྱན་དུ་རིག་ནས་མ་སྤངས་པར་རོལ་པའི་དབང་དམ་པ་ཐོབ་པར་གྱུར་ཅིག །དེ་ལྟར་ཕྱི་ལྷག་པ་གཟུགས་བརྙན་གྱི་དཀྱིལ་འཁོར་དུ་ཕན་པའི་དབང་བཅུ་བསྐུར་བས་འདི་ཕྱིར་ཕན་པའི་ས་བོན་ཙམ་འཇོག་ཅིང་། ཕྱི་དཀྱིལ་དྲང་དོན་གྱི་བསྐྱེད་རིམ་རྣམས་མཉན་དུ་རུང་བའི་སྐལ་བ་ཅན་དུ་བྱས་པ་ཡིན་ནོ། ༈ །གཉིས་པ་རང་གཞིན་གྱི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ་བསྐུར་བ་ལ། བདག་དོན་ནུས་པའི་བརྩོན་འགྲུས་ཅན་ལ་ཉན་སྒོམ། གཞན་དོན་ནུས་པའི་བརྩོན་འགྲུས་ཅན་ལ་ཕྲིན་ལས་དང་འཆད་དབང་། གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བའོ། །དང་པོ་གཉིས་ལས། དང་པོ་ཉན་དབང་ནི། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུྃ་ཡིག་དམར་སེར་གཉིས་ཆད་སློབ་བུའི་རྣ་བའི་འདོམ་རྩ་གཉིས་སུ་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཉི་ཟླ་བ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་སྒྲ་གསལ་བའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཏྲཾ་ཡིག་ཟུང་ལྔ་དང་། སྒོ་བཞིར་ཧཱུྃ་ཛཿ ཧཱུྃ་ཧཱུྃ། ཧཱུྃ་བྃ། ཧཱུྃ་ཧོཿརྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལ་དབུས་ཀྱི་གདན་ལ་བཅོམ་ལྡན་འདས་རིན་ཆེན་འབྱུང་ལྡན་གཡས་རིན་པོ་ཆེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་མཱ་མ་ཀཱི་གཡས་དྲིལ་བུ་དང་གཡོན་རིན་པོ་ཆེ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་རིན་ཆེན་རིན་པོ་ཆེའི་མྱུ་གུ་དང་། ཕྲེང་བ་མ་ཕྲེང་བ་འཛིན་པ། ལྷོར་རྡོ་རྗེ་གཟི་བརྗིད་ཉི་མ་དང་། མེ་ཏོག་མ་མེ་ཏོག་འཛིན་པ། ནུབ་ཏུ་རྡོ་རྗེ་རྒྱལ་མཚན་རྒྱལ་མཚན་དང་། ཞགས་པ་མ་ཞགས་པ་འཛིན་པ། བྱང་དུ་རྡོ་རྗེ་བཞད་པ་ཚེམས་ཀྱི་ཕྲེང་བ་སྟོན་པ་དང་། བསིལ་ཡབ་མ་བསིལ་ཡབ་འཛིན་པ། ཐམས་ཅད་ཀྱང་སྐུ་མདོག་སེར་པོ་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུས་བརྗིད་པ། ཤར་སྒོར་གཤིན་རྗེ་གཤེད་སྨུག་ནག་ནྲྀ་མགོ་གདེངས་པ་དང་། ལྕགས་ཀྱུ་མ་སྔོན་མོ་ལྕགས་ཀྱུ་འཛིན་པ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་དང་། ཞགས་པ་མ་སེར་མོ་ཞགས་པ་འཛིན་པ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་དང་། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་བདུད་རྩི་འཁྱིལ་བ་ལྗང་ནག་སྣ་ཚོགས་རྡོ་རྗེ་དང་། དྲིལ་བུ་མ་ལྗང་གུ་དྲིལ་བུ་འཛིན་པ། ཡབ་ཡུམ་བརྒྱད་པོ་ཐམས་ཅད་ཀྱང་ཁྲོ་བོའི་ཆས་ཀྱིས་བརྒྱན་པ་མེ་དཔུང་འབར་བའི་དབུས་ན་བཞུགས་པའོ། །དབང་རྫས་གླེགས་བམ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཏྲཱཾ་ལས་རིན་པོ་ཆེ་ཏྲཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་རིན་ཆེན་འབྱུང་ལྡན་ཡབ་ཡུམ་དུ་གྱུར། རྣ་བའི་དཀྱིལ་འཁོར་ཆ་གཉིས་དང་དབང་རྫས་ཀྱི་ལྷ་ལ། ས་མ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་རྣ་བའི་དཀྱིལ་འཁོར་ཆ་གཉིས་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་སེར་པོ་ལས་རིན་ཆེན་འབྱུང་ལྡན་དང་། དབང་རྫས་ཀྱི་ལྷ་འོད་དུ་ཞུ་བ་ལས་གླེགས་བམ་དུ་གྱུར། དེ་ལྟ་བུའི་གླེགས་བམ་ལག་ཏུ་གཏད་པ་རྣ་བའི་ཐིག་ལེ་ལ་ཐིམ་པར་མོས་ལ། ཏྲཱཾ། གསང་བ་གསང་ཆེན་གསང་མཆོག་གང་། །གསང་བ་ཀུན་ལ་མཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །དེ་ལྟར་ཉན་པའི་དབང་བསྐུར་བས་དེང་ཕྱིན་ཆད་བཀའ་ཕྱི་ནང་ཐམས་ཅད་ཉན་པའི་དབང་དམ་པ་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་ཉན་པའི་དབང་བསྐུར་བས་དེ་བཞིན་གཤེགས་པའི་བཀའ་ཕྱི་ནང་ཐམས་ཅད་ལ་ཐོགས་པ་མེད་པར་ཉན་པའི་དབང་དམ་པ་ཐོབ་པར་གྱུར་ཅིག །གཉིས་པ་སྒོམ་དབང་ནི། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུྃ་ཡིག་དམར་སེར་གཅིག་ཆད་སློབ་བུའི་སྙིང་གི་འདོམ་རྩར་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཉི་ཟླ་བ་དང་སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་དྲན་པ་གསལ་བའི་ཐིག་ལེའི་ངོ་བོ་ཉིད་དབུས་དང་། རྩིབས་བཞིར་ཧཱུྃ་ཡིག་ཟུང་ལྔ་དང་། སྒོ་བཞིར་ཧཱུྃ་ཛཿ ཧཱུྃ་ཧཱུྃ། ཧཱུྃ་བཾ། ཧཱུྃ་ཧོཿརྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་རྡོ་རྗེ་མི་བསྐྱོད་པ་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་རྡོ་རྗེ་དབྱིངས་ཕྱུག་མ་གཡས་དྲིལ་བུ་དང་གཡོན་རྡོ་རྗེ་འཛིན་པས་འཁྱུད་པ། རྩིབས་བཞིའི་ཤར་དུ་སེམས་དཔའ་རྡོ་རྗེ་འཁོར་ལོ་དང་། བརྟན་མ་རྡོ་རྗེ་དྲིལ་བུ་འཛིན་པ། ལྷོར་རིན་ཆེན་རྡོ་རྗེ་རིན་པོ་ཆེ་དང་། འབར་མ་རྡོ་རྗེ་དྲིལ་བུ་འཛིན་པ། ནུབ་ཏུ་ཆོས་རྡོ་རྗེ་པདྨ་དང་། སྡུད་མ་རྡོ་རྗེ་དྲིལ་བུ་འཛིན་པ། བྱང་དུ་ལས་ཀྱི་རྡོ་རྗེ་རལ་གྲི་དང་། བསྐྱོད་མ་རྡོ་རྗེ་དྲིལ་བུ་འཛིན་པ། ཐམས་ཅད་ཀྱང་སྐུ་མདོག་མཐིང་ག་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུས་བརྗིད་པ། ཤར་སྒོར་གཤིན་རྗེ་གཤེད་སྨུག་ནག་ནྲྀ་མགོ་གདེངས་པ་དང་། ལྕགས་ཀྱུ་མ་སྔོན་མོ་ལྕགས་ཀྱུ་འཛིན་པ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་དང་། ཞགས་པ་མ་སེར་མོ་ཞགས་པ་འཛིན་པ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་དང་། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་བདུད་རྩི་འཁྱིལ་བ་ལྗང་ནག་སྣ་ཚོགས་རྡོ་རྗེ་དང་། དྲིལ་བུ་མ་ལྗང་གུ་དྲིལ་བུ་འཛིན་པ། ཡབ་ཡུམ་བརྒྱད་པོ་ཐམས་ཅད་ཀྱང་ཁྲོ་བོའི་ཆས་ཀྱིས་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །དབང་རྫས་ཕྲེང་བ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་རྡོ་རྗེ་མི་བསྐྱོད་པ་ཡབ་ཡུམ་དུ་གྱུར། སྙིང་གི་དཀྱིལ་འཁོར་དང་དབང་རྫས་ཀྱི་ལྷ་ལ། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་སྙིང་གི་དཀྱིལ་འཁོར་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་མཐིང་ག་ལས་རྡོ་རྗེ་མི་བསྐྱོད་པ་དང་། དབང་རྫས་ཀྱི་ལྷ་འོད་དུ་ཞུ་བ་ལས་ཕྲེང་བར་གྱུར། དེ་ལྟ་བུའི་ཕྲེང་བ་ལག་ཏུ་གཏད་པ་སྙིང་གི་ཐིག་ལེར་ཐིམ་པར་མོས་ལ། ༀ། དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་བཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །དེ་ལྟར་སྒོམ་པའི་དབང་བསྐུར་བས་དེང་ཕྱིན་ཆད་ལྷ་རྟོག་དབྱེར་མེད་དུ་སྒོམ་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་སྒོམ་པའི་དབང་བསྐུར་བས། རྣམ་པར་གྲོལ་བའི་ལམ་མཐའ་དག་ཐོགས་པ་མེད་པར་སྒོམ་པའི་དབང་དམ་པ་ཐོབ་པར་གྱུར་ཅིག །འདིར་རང་རང་གི་ཡི་དམ་གྱི་ལྷ་གང་ཡིན་སྒོམ་པར་གསུངས་པས་མེ་ཏོག་གང་ལ་ཕོག་པའི་ལྷ་དེ་སྒོམ་པར་བཤད་ཀྱང་། དེང་སང་བསྙེན་སྒྲུབ་ལ་གཙོ་བོ་གོ་འཕོ་བའི་ཕྱག་ལེན་མི་མཛད་པ་ཤས་ཆེ་བས་དཀྱིལ་འཁོར་གྱི་གཙོ་བོ་རྡོ་རྗེ་རིགས་ཀྱི་ལྷར་སྦྱར་བ་སྟེ། འདི་ལ་སྔ་རབས་པ་རྣམས། ལྷག་པའི་ལྷ། བབ་པའི་ལྷ། མོས་པའི་ལྷ་ཞེས་གང་རུང་འབོགས་པར་གསུངས་པས་དང་པོའི་ལུགས་སོ། །གཉིས་པ་གཞན་དོན་ནུས་པའི་བརྩོན་འགྲུས་ཅན་ལ་ཕྲིན་ལས་དང་འཆད་དབང་བསྐུར་བ་གཉིས་ཀྱི། དང་པོ་ཕྲིན་ལས་ཀྱི་དབང་ནི། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུྃ་ཡིག་དམར་སེར་གཉིས་ཆད། སློབ་བུའི་ལག་པའི་འདོམ་རྩ་གཉིས་སུ་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཉི་ཟླ་བ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་བྱ་བྱེད་གསལ་བའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཧཱྃ་ཡིག་ཟུང་ལྔ་དང་། སྒོ་བཞིར་ཧཱུྃ་ཛཿ ཧཱུྃ་ཧཱུྃ། ཧཱུྃ་བྃ། ཧཱུྃ་ཧོཿརྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་དོན་ཡོད་གྲུབ་པ་གཡས་རྒྱ་གྲམ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་དམ་ཚིག་སྒྲོལ་མ་གཡས་དྲིལ་བུ་དང་གཡོན་རྒྱ་གྲམ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་ལས་རལ་གྲི་དང་། རྡོ་རྗེ་གར་མ་གར་བསྒྱུར་བ། ལྷོར་རྡོ་རྗེ་བསྲུང་བ་གོ་ཆ་དང་། རྡོ་རྗེ་བྱུགས་པ་མ་དྲིའི་དུང་ཆོས་འཛིན་པ། ནུབ་ཏུ་རྡོ་རྗེ་གནོད་སྦྱིན་ཕག་རྒོད་ཀྱི་མཆེ་བ་དང་། རྡོ་རྗེ་དྲིལ་བུ་མ་དྲིལ་བུ་འཛིན་པ། བྱང་དུ་རྡོ་རྗེ་ཁུ་ཚུར་ཁུ་ཚུར་བཅངས་པ་དང་། རྡོ་རྗེ་གནོད་སྦྱིན་མ་རྨ་བྱའི་སྒྲོ་འཛིན་པ། ཐམས་ཅད་ཀྱང་སྐུ་མདོག་ལྗང་གུ་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུས་བརྗིད་པ། ཤར་སྒོར་གཤིན་རྗེ་གཤེད་སྨུག་ནག་ནྲྀ་མགོ་གདེངས་པ་དང་། ལྕགས་ཀྱུ་མ་སྔོན་མོ་ལྕགས་ཀྱུ་འཛིན་པ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་དང་། ཞགས་པ་མ་སེར་མོ་ཞགས་པ་འཛིན་པ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་དང་། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་བདུད་རྩི་འཁྱིལ་བ་ལྗང་ནག་སྣ་ཚོགས་རྡོ་རྗེ་དང་། དྲིལ་བུ་མ་ལྗང་གུ་དྲིལ་བུ་འཛིན་པ། ཡབ་ཡུམ་བརྒྱད་པོ་ཐམས་ཅད་ཀྱང་ཁྲོ་བོའི་ཆས་ཀྱིས་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །དབང་རྫས་རྒྱ་གྲམ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧཱཾ་ལས་རྒྱ་གྲམ་ཧཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་དོན་ཡོད་གྲུབ་པ་ཡབ་ཡུམ་དུ་གྱུར། ལག་པའི་དཀྱིལ་འཁོར་ཆ་གཉིས་དང་དབང་རྫས་ཀྱི་ལྷ་ལ། ཀྲྀ་ཏྱཱ་ནུཥྛཱ་ན་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལག་པའི་དཀྱིལ་འཁོར་ཆ་གཉིས་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་ལྗང་གུ་ལས་དོན་ཡོད་གྲུབ་པ་དང་། དབང་རྫས་ཀྱི་ལྷ་འོད་དུ་ཞུ་བ་ལས་རྒྱ་གྲམ་དུ་གྱུར། དེ་ལྟ་བུའི་རྒྱ་གྲམ་ལག་ཏུ་གཏད་པ་ལག་པའི་ཐིག་ལེར་ཐིམ་པར་མོས་ལ། ༀ། ཁྱོད་ནི་རྡོ་རྗེ་ལས་ཡིན་གྱིས། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འདུ་འཕྲོ་ཀུན། །ཁྱོད་ཀྱི་དགོས་པ་བྱེད་པ་ཡིན། །དེ་ལྟར་ཕྲིན་ལས་ཀྱི་དབང་བསྐུར་བས་ཕྲིན་ལས་རྣམ་པ་བཞིས་འགྲོ་བ་འདུལ་བའི་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ་ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་ཕྲིན་ལས་བཞིའི་དབང་བསྐུར་བས། ཕྲིན་ལས་རྣམ་པ་བཞི་ཐོགས་པ་མེད་པར་སྤྱོད་ཅིང་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །གཉིས་པ་འཆད་དབང་ནི། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུྃ་ཡིག་དམར་སེར་གཅིག་ཆད་སློབ་བུའི་ལྕེ་སྟེང་དུ་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཉི་ཟླ་བ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་སྒྲ་གསལ་བར་བྱེད་པའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཧྲཱིཿ ཡིག་ཟུང་ལྔ་དང་སྒོ་བཞིར་ཧཱུྃ་ཛཿ ཧཱུྃ་ཧཱུྃ། ཧཱུྃ་བྃ། ཧཱུྃ་ཧོཿ རྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་སྣང་བ་མཐའ་ཡས་གཡས་པདྨ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་གོས་དཀར་མོ་གཡས་དྲིལ་བུ་དང་གཡོན་པདྨ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་ཆོས་པད་མ་ཁ་འབྱེད་པ་དང་། རྡོ་རྗེ་གླུ་ལེན་མ་པི་ཝཾ་འཛིན་པ། ལྷོར་རྡོ་རྗེ་རྣོན་པོ་རལ་གྲི་དང་། རྡོ་རྗེ་མར་མེ་མ་མར་མེ་འཛིན་པ། ནུབ་ཏུ་རྡོ་རྗེ་རྒྱུ་འཁོར་ལོ་དང་། རྡོ་རྗེ་ལྕགས་སྒྲོག་མ་ལྕགས་སྒྲོག་འཛིན་པ། བྱང་དུ་རྡོ་རྗེ་སྨྲ་བ་རྡོ་རྗེའི་ལྕེ་དང་། རྡོ་རྗེ་གསལ་བཀྲ་མ་མར་མེ་འཛིན་པ། ཐམས་ཅད་ཀྱང་སྐུ་མདོག་དམར་པོ་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་། ཚུལ་དགུས་བརྗིད་པ། ཤར་སྒོར་གཤིན་རྗེ་གཤེད་སྨུག་ནག་ནྲྀ་མགོ་གདེངས་པ་དང་། ལྕགས་ཀྱུ་མ་སྔོན་མོ་ལྕགས་ཀྱུ་འཛིན་པ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་དང་། ཞགས་པ་མ་སེར་མོ་ཞགས་པ་འཛིན་པ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་དང་། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་བདུན་རྩི་འཁྱིལ་བ་ལྗང་ནག་སྣ་ཚོགས་རྡོ་རྗེ་དང་། དྲིལ་བུ་མ་ལྗང་གུ་དྲིལ་བུ་འཛིན་པ། ཡབ་ཡུམ་བརྒྱད་པོ་ཐམས་ཅད་ཀྱང་ཁྲོ་བོའི་ཆས་ཀྱིས་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །དབང་རྫས་འཁོར་ལོ་དུང་དང་ཕྱག་ཤིང་རྣམས་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླ་བའི་གདན་ལ་ཧྲཱིཿལས་པདྨ་ཧྲཱིཿ ས་མཚན་པ་འཕྲོ་འདུས་ཡོངས་སུ་གྱུར་པ་ལས་སྣང་པ་མཐའ་ཡས་ཡབ་ཡུམ་དུ་གྱུར། ལྕེའི་དཀྱིལ་འཁོར་དང་དབང་རྫས་ཀྱི་ལྷ་ལ། པྲ་ཏྱ་བེཀྵ་ན་སྔོན་འགྲོས་བསྐུར། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལྕེའི་དཀྱིལ་འཁོར་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་དམར་པོ་ལས་སྣང་བ་མཐའ་ཡས་དང་། དབང་རྫས་ཀྱི་ལྷ་འོད་དུ་ཞུ་བ་ལས་འཁོར་ལོ་དུང་དང་ཕྱག་ཤིང་རྣམས་སུ་གྱུར། དེ་ལྟ་བུའི་དབང་རྫས་རྣམས་ལག་ཏུ་གཏད་པ་ལྕེའི་ཐིག་ལེར་ཐིམ་པར་མོས་ལ། ༀ། ཆོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམ་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །དེ་ལྟ་འཆད་པའི་དབང་བསྐུར་བས་དེང་ཕྱིན་ཆད་བསྟན་པ་ཕྱི་ནང་ཐམས་ཅད་འཆད་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་འཆད་པའི་དབང་བསྐུར་བས། སེམས་ཅན་ཐམས་ཅད་ཀྱི་ཤེས་པའི་རྒྱུད་ལ་ཐེག་པ་མཐའ་དག་གི་ཆོས་ཀྱི་འཁོར་ལོ་བསྐོར་བའི་དབང་དམ་པ་ཐོབ་པར་གྱུར་ཅིག །གསུམ་པ་གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བ་ནི། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུྃ་ཡིག་དམར་སེར་ལྔ་ཆད། སློབ་བུའི་མགོ་དང་ལག་མཐིལ་གཉིས་དང་རྐང་མཐིལ་གཉིས་རྣམས་སུ་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞིའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཉི་ཟླ་བ་དང་། ཁྲོ་བཅུའི་གནས་སུ་ཉི་མའི་གདན་རེ་རེ་གསལ་བར་གྱུར་པའི་ལག་པ་གཡས་ཀྱི་འཁོར་ལོའི་དབུས་དང་། རྩིབས་བཞིར་ཧཱུཾ་ཡིག་ཟུང་ལྔ། མགོ་བོའི་དབུས་དང་རྩིབས་བཞིར་ༀ་ཡིག་ཟུང་ལྔ། ལག་པ་གཡོན་གྱི་དབུས་དང་རྩིབས་བཞིར་སྭཱཾ་ཡིག་ཟུང་ལྔ། རྐང་པ་གཡོན་གྱི་དབུས་དང་རྩིབས་བཞིར་ཨཾ་ཡིག་ཟུང་ལྔ། རྐང་པ་གཡས་ཀྱི་དབུས་དང་རྩིབས་བཞིར་ཧཱཾ་ཡིག་ཟུང་ལྔ། སྤྱི་གཙུག །སྙིང་ག །ནུ་མ་གཡས་གཡོན། དཔུང་པ་གཡས་གཡོན། སོག་པ་གཡས་གཡོན། སོག་དབྲག །གཤང་ལམ་རྣམས་སུ་ཧཱུཾ་ཡིག་ཟུང་རེ་གསལ་བ་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་ལག་པ་གཡས་ཀྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་རྡོ་རྗེ་མི་བསྐྱོད་པ་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་འཛིན་པ་འཁྱུད་པ། རྩིབས་བཞིའི་ཤར་དུ་སེམས་དཔའ་རྡོ་རྗེ་རྡོ་རྗེ་དང་། བརྟན་མ་རྡོ་རྗེ་ཁུ་ཚུར་དཀུར་བརྟེན་པ། ལྷོར་རིན་ཆེན་རྡོ་རྗེ་རིན་པོ་ཆེ་དང་། འབར་མ་རྡོ་རྗེ་མེ་འོད་འཛིན་པ། ནུབ་ཏུ་ཆོས་ཀྱི་རྡོ་རྗེ་པདྨ་དང་། སྡུད་མ་རྡོ་རྗེ་པུསྟི་འཛིན་པ། བྱང་དུ་རྡོ་རྗེ་ཕྲིན་ལས་ཤང་ལང་དང་། བསྐྱོད་མ་རྡོ་རྗེ་བ་དན་འཛིན་པ། མགོ་བོའི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་རྣམ་པར་སྣང་མཛད་གཡས་འཁོར་ལོ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་སངས་རྒྱས་སྤྱན་མ་གཡས་དྲིལ་བུ་དང་གཡོན་འཁོར་ལོ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་སེམས་དཔའ་རྡོ་རྗེ་དང་། ལཱ་སྱ་མ་མེ་ལོང་འཛིན་པ། ལྷོར་རྡོ་རྗེ་རྒྱལ་པོ་ལྕགས་ཀྱུ་དང་། དྷཱུ་པེ་མ་སྤོས་ཁང་འཛིན་པ། ནུབ་ཏུ་རྡོ་རྗེ་ཆགས་པ་མདའ་གཞུ་འགེངས་པ་དང་། རྡོ་རྗེ་ལྕགས་ཀྱུ་མ་ལྕགས་ཀྱུ་འཛིན་པ། བྱང་དུ་རྡོ་རྗེ་ལེགས་པ་སེ་གོལ་རྡེབ་པ་དང་། རྡོ་རྗེ་སྒྲོལ་མ་རྡོར་ཕྲེང་འཛིན་པ། ལག་པ་གཡོན་གྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་རིན་ཆེན་འབྱུང་ལྡན་གཡས་རིན་པོ་ཆེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་མཱ་མ་ཀཱི་གཡས་དྲིལ་བུ་དང་གཡོན་རིན་པོ་ཆེ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་རིན་ཆེན་རིན་པོ་ཆེའི་མྱུ་གུ་དང་། ཕྲེང་བ་མ་ཕྲེང་འཛིན་པ། ལྷོར་རྡོ་རྗེ་གཟི་བརྗིད་ཉི་མ་དང་། མེ་ཏོག་མ་མེ་ཏོག་འཛིན་པ། ནུབ་ཏུ་རྡོ་རྗེ་རྒྱལ་མཚན་རྒྱལ་མཚན་དང་། ཞགས་པ་མ་ཞགས་པ་འཛིན་པ། བྱང་དུ་རྡོ་རྗེ་བཞད་པ་ཚེམས་ཀྱི་ཕྲེང་བ་སྟོན་པ་དང་། བསིལ་ཡབ་མ་བསིལ་ཡབ་འཛིན་པ། རྐང་པ་གཡོན་གྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་སྣང་བ་མཐའ་ཡས་པདྨ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་གོས་དཀར་མོ་གཡས་དྲིལ་བུ་དང་གཡོན་པདྨ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་ཆོས་པདྨ་ཁ་འབྱེད་པ་དང་། རྡོ་རྗེ་གླུ་ལེན་མ་པི་ཝཾ་འཛིན་པ། ལྷོར་རྡོ་རྗེ་རྣོན་པོ་རལ་གྲི་དང་། རྡོ་རྗེ་མར་མེ་མ་མར་མེ་འཛིན་པ། ནུབ་ཏུ་རྡོ་རྗེ་རྒྱུ་འཁོར་ལོ་དང་། རྡོ་རྗེ་ལྕགས་སྒྲོག་མ་ལྕགས་སྒྲོག་འཛིན་པ། བྱང་དུ་རྡོ་རྗེ་སྨྲ་བ་རྡོ་རྗེའི་ལྕེ་དང་། རྡོ་རྗེ་གསལ་བཀྲ་མ་མར་མེ་འཛིན་པ། རྐང་པ་གཡས་ཀྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དོན་ཡོད་གྲུབ་པ་གཡས་རྒྱ་གྲམ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ཡུམ་དམ་ཚིག་སྒྲོལ་མ་གཡས་དྲིལ་བུ་དང་གཡོན་རྒྱ་གྲམ་འཛིན་པས་འཁྱུད་པ། རྩིབས་བཞིའི་ཤར་དུ་རྡོ་རྗེ་ལས་སྣ་ཚོགས་རྡོ་རྗེ་དང་། རྡོ་རྗེ་གར་མ་གར་བསྒྱུར་བ། ལྷོར་རྡོ་རྗེ་བསྲུང་བ་གོ་ཆ་དང་། རྡོ་རྗེ་དྲི་མ་བྱུགས་པ་འཛིན་པ། ནུབ་ཏུ་རྡོ་རྗེ་གནོད་སྦྱིན་ཕག་རྒོད་ཀྱི་མཆེ་བ་དང་། རྡོ་རྗེ་དྲིལ་བུ་མ་དྲིལ་བུ་འཛིན་པ། བྱང་དུ་རྡོ་རྗེ་ཁུ་ཚུར་ཁུ་ཚུར་དཀུར་བརྟེན་པ་དང་། རྡོ་རྗེ་གར་མ་ལྷའི་ན་བཟའ་པཉྩ་ལི་ཀ་འཛིན་པ། དེ་ལྟར་དཀྱིལ་འཁོར་ཆ་ལྔའི་ལྷ་ཚོགས་ཐམས་ཅད་ཀྱང་སྐུ་མདོག་རིགས་ཀྱི་ཁ་དོག་ཅན་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུས་བརྗིད་པ། ལུས་ཀྱི་གནས་བཅུ་ལས། སྤྱི་གཙུག་ཏུ་ཧཱུྃ་མཛད་སྔོ་སྐྱ་རང་རྟགས་མདའ་གཞུ། སྙིང་གར་རྣམ་རྒྱལ་དཀར་པོ་ཁ་ཊྭཱཾ་ག་དང་ཏྲི་ཤུལ། ནུ་མ་གཡས་སུ་དབྱུག་པ་སྔོན་པོ་དབྱུག་པ་དང་མེ་དཔུང་། དཔུང་མགོ་གཡས་པར་གཤིན་རྗེ་གཤེད་མཐིང་ག་བེ་ཅོན་དང་དགྲ་སྟྭ། སོག་སྟེང་གཡས་པར་མི་གཡོ་བ་ལྗང་དམར་སྤུ་གྲི་དང་ཞགས་པ། སོག་དབྲག་ཏུ་རྟ་མགྲིན་དམར་པོ་རལ་གྲི་དང་སྦྲུལ་ཞགས། སོག་སྟེང་གཡོན་པར་གཞན་གྱིས་མི་ཐུབ་པ་སྔོན་པོ་བྷཉྫ་དང་རྔ་ཡབ། དཔུང་མགོ་གཡོན་པར་བདུད་རྩི་འཁྱིལ་བ་ལྗང་གུ་རྒྱ་གྲམ་དང་དྲིལ་བུ། ནུ་མ་གཡོན་དུ་ཁམས་གསུམ་རྣམ་རྒྱལ་སེར་པོ་འཁོར་ལོ་དང་མཆེ་བ། གཤང་ཁར་སྟོབས་པོ་ཆེ་དུད་ཁ་ཐོ་བ་དང་གཏུན་ཤིང་། ཐམས་ཅད་ཀྱང་ཞལ་གསུམ་ཕྱག་དྲུག་གི་དང་པོ་གཉིས་རྡོ་རྗེ་དང་དུང་དམར། བར་པ་གཉིས་རང་རྟགས། ཐ་མ་གཉིས་ཕུར་བུ་འདྲིལ་བ་ཞབས་བཞི་དོར་སྟབས་བགྲད་པ། གར་དགུའི་ཉམས་ཀྱིས་སྒེག་ཅིང་དུར་ཁྲོད་རོལ་པའི་ཆས་ཅན་རང་འོད་ཀྱི་ཡུམ་ཡབ་ཀྱི་མདོག་ཅན་གཡས་འཁྱུད་སྟབས་དང་གཡོན་དུང་དམར་ཡབ་ལ་སྟོབས་པ་ཁྲོ་མོའི་ཆས་ཅན་དང་འཁྲིལ་བ། མེ་དཔུང་འབར་བའི་དབུས་ན་བཞུགས་པའོ། །དབང་རྫས་རྡོར་དྲིལ་བསང་སྦྱང་། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་བའི་ངང་ལས་པད་ཉི་ཟླ་བའི་གདན་ལ་ༀ་དང་ཨ་ལས་རྡོར་དྲིལ་ས་བོན་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས་བྱེད་པ་པོ་ཀུན་ཏུ་བཟང་པོ་མཐིང་ག་མཉམ་གཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། བྱ་བ་མོ་ཀུན་ཏུ་བཟང་མོ་མཐིང་ག་ཕྱག་གཡོན་སྟེང་དུ་བཞག་པའི་མཉམ་གཞག་གི་ཕྱག་རྒྱ་ཅན་པདྨའི་སྐྱིལ་མོ་ཀྲུང་གིས་བཞུགས་པ། གཉིས་ཀའང་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུས་བརྗིད་པའོ། །དཀྱིལ་འཁོར་ཆ་ལྔ་ཁྲོ་བཅུ་དང་བཅས་པ་དང་དབང་རྫས་ཀྱི་ལྷ་ལ་ལྔ་ཚན་ལྔས་དབང་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལུས་དཀྱིལ་གྱི་ལྷ་ཚོགས་རྟེན་དང་བརྟེན་པར་བཅས་པ་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་མཐིང་ག་ལས་ཀུན་ཏུ་བཟང་པོ་དང་། དབང་རྫས་ཀྱི་ལྷ་འོད་དུ་ཞུ་བ་ལས་རྡོ་རྗེ་དང་དྲིལ་བུར་གྱུར། དེ་ལྟ་བུའི་རྡོར་དྲིལ་ལག་ཏུ་གཏད་དེ་སྙིང་གར་བསྣོལ་དུ་བཅུག་པ་ཡན་ལག་ལྔའི་རེག་ཤེས་ཀྱི་ཐིག་ལེ་ལ་ཐིམ་པར་མོས་ལ། ༀ། ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །དེ་ལྟར་རྡོ་རྗེ་རྒྱལ་པོའི་དབང་བསྐུར་བས་དེང་ཕྱིན་ཆད་བདག་གཞན་གྱི་དོན་ཐམས་ཅད་སྒྲུབ་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བས་རྡོ་རྗེ་རྒྱལ་པོའི་ས་འཛིན་ཅིང་། དཀྱིལ་འཁོར་ཐམས་ཅད་ཀྱི་བྱེད་པོའི་དབང་དམ་པ་ཐོབ་པར་གྱུར་ཅིག །དེ་ལྟར་ནང་ལུས་ཀྱི་དཀྱིལ་འཁོར་དུ་ནུས་པའི་དབང་ལྔ་བསྐུར་བས་རང་གཞན་གྱི་དོན་དངོས་སུ་བྱེད་པ་ལ་དབང་ཞིང་། ཁྱད་པར་གྱི་བསྐྱེད་རིམ་དང་རྫོགས་རིམ་རྗེས་མཐུན་པ་རྣམས་ཉན་སྒོམ་འཆད་པར་ནུས་པའི་སྐལ་བ་ཅན་དུ་བྱས་པ་ཡིན་ནོ། །གསུམ་པ་སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་བསྐུར་བ་ལ་གསུམ་ལས། དང་པོ་གསང་དབང་ལ། དཀྱིལ་འཁོར་བཅའ་བ་དང་། དངོས་གཉིས། དང་པོ་ནི། གོ་མ་ཡེས་ཁྱེམ་མེད་པར་བྱུགས་པའི་སྟེགས་བུ་ཚད་ལྡན་ལ་ཡུམ་གྱི་མཁའ་དཀྱིལ་མཚོན་བྱེད་པདྨ་དམར་པོར་འདབ་མ་བཞི་པ་སོར་བཞི་པའི་ཚད་ཅན་དང་། ཐབས་ཀྱི་གསང་བའི་ནོར་བུ་མཚོན་བྱེད་རྡོ་རྗེ་སྔོན་པོ་རྩེ་ལྔ་པ་མཛུབ་གང་བའི་ཚད་ཅན་སོ་སོའི་མཚན་མ་དང་བཅས་པ་དག་བྱའོ། །གཉིས་པ་ནི། མཎྜལ་འབུལ་བ་སྔོན་དུ་འགྲོ་བས། རྡོར་སེམས་གཙོ་བོ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ་གྱིས་གསོལ་བ་གདབ། དེ་ལ་བླ་མས། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུངས། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་བྱིན། དེ་ནས་སློབ་དཔོན་དཀྱིལ་འཁོར་གྱི་གཙོ་བོ་བཅོམ་ལྡན་འདས་རྡོ་རྗེ་སེམས་དཔར་གསལ་བའི་གནས་ལྔར་རྒྱལ་བ་རིགས་ལྔ་དང་། ལག་པ་གཡས་གཡོན་ཁ་དང་གསང་བའི་ཕྱི་རྣམས་སུ་ཁྲོ་བོ་བཞི་ཕྱག་རྒྱ་ལོ་ཉི་ཤུ་མ་ཡུམ་རྡོ་རྗེ་དབྱིངས་ཀྱི་དབང་ཕྱུག་མར་གསལ་བའི་གནས་ལྔར་རིགས་ཀྱི་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ཱུནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་ག་ཕཊ་ཀྱིས་བཀག་ཅིང་། རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཾ་དམར་པོར་གནས་པའི་གེ་སར་ལ་ཨ། དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་པས་བྱང་ཆུབ་ཀྱི་སེམས་འཁོར་ལོ་བཞིར་དགའ་བཞིའི་འགྲོས་ཀྱིས་ཕྱིན་པ་ཡབ་ཀྱི་གསང་བ་རྡོ་རྗེའི་ལམ་ནས་ཡུམ་གྱི་པདྨའི་སྣ་རྩེ་ལ་སངས་རྒྱས་བཞི་བཅུ་རྩ་གཉིས་ཀྱི་དཀྱིལ་འཁོར་གསལ་བ་ལ་མཆོད་པ་ཕུལ་ཏེ། ཡུམ་མཁར་བསྐྱིལ་བའི་ཡབ་ཡུམ་གྱི་ཉི་ཟླ་བྱང་ཆུབ་ཀྱི་སེམས་གཉིས་འདྲེས་དེ་ཉིད་སློབ་བུའི་ལྕེ་ཐོག་ཏུ་བཞག་པར་མོས་ལ། ༀ། མི་བསྐྱོད་ཡབ་ཡུམ་རོལ་པ་ཡིས། །བདེ་བ་གསལ་ཞིང་མི་དམིགས་པ། །ཤེས་རབ་ཐབས་ཀྱི་ཕྱག་རྒྱའོ། །རྡོ་རྗེ་ཡེ་ཤེས་ཧཱུྃ་ཚོགས་ཀྱིས། །པདྨོའི་ཡེ་ཤེས་བསྡུས་འཁྱིལ་བའི། །ཡུངས་ཀར་ཚད་ཙམ་རྡོ་རྗེ་སེམས། །རྩེ་ནས་རྩེ་རུ་བསྟིམ་པ་ཡིས། །རང་བཞིན་ཆོས་ཁམས་དཀྱིལ་འཁོར་གྱི། །ས་བོན་ཟུང་གསུམ་གཉིས་དང་བཅས། །གནས་ངན་ལེན་པ་གསུམ་སྦྱངས་ཏེ། །དམིགས་མེད་སེམས་ཀྱི་ཡེ་ཤེས་ལྔ། །གསལ་བས་ས་བོན་འཚིག་པ་བཞིན། །མི་སྐྱེ་ཐབས་ཀྱི་དབུགས་དབྱུང་ངོ་། །ཤྲཱི་མ་ཧཱ་སུ་ཁ་བཛྲ་བོ་དྷི་ཧཱུཾ་ཧོ་ༀ། ཞེས་བདུད་རྩི་སྦྱིན། དེ་ལྟར་དབང་བསྐུར་བས་ལྕེ་ཐོག་ཏུ་བཞག་པའི་བྱང་སེམས་ཧཱུཾ་གི་རྣམ་པར་གསལ་བ་དེ་ཉིད་ཡུངས་འབྲུ་ཙམ་གྱི་རྡོ་རྗེ་སེམས་དཔའ་ཤ་སྟག་ཏུ་གྱུར་པ་སྙིང་གར་ཐིམ་པས་ཆོས་ཀྱི་འཁོར་ལོའི་རྩ་ཆེན་བཞི་ལ་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་སྦྱངས་ནས་སེམས་ཉིད་རྣམ་པར་མི་རྟོག་པའི་རང་བཞིན་དོན་དམ་སྤྲོས་མེད་བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་གསང་བ་བྱང་ཆུབ་སེམས་ཀྱི་དབང་བསྐུར་བས་གནས་ངན་ལེན་གྱི་ས་བོན་བག་ཆགས་དང་བཅས་པ་དག་ནས་གནས་ལུགས་དོན་དམ་སྐྱེ་མེད་ཀྱི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ནས་སླར་ཡང་བདེན་པ་བརྗོད་པ་ནི། རྡོར་དྲིལ་སློབ་བུའི་སྙིང་གར་བཟུང་ལ། ༀ། མི་འགྱུར་བ་ཡི་ཡེ་ཤེས་གནས། །མ་བཙལ་ཕྱིན་པས་བདེ་བའི་མཆོག །མ་བལྟས་གསལ་བའི་ཡེ་ཤེས་སྤྱན། །གོང་ན་མེད་པས་ཀུན་གྱི་རྗེ། །ཡེ་ཤེས་རང་གནས་བརྡལ་བ་ལ། །མི་འགྱུར་གཡུང་དྲུང་ས་ཐོབ་ཤོག །ༀ་མ་ཧཱ་གུ་ཧྱ་བྷྲཱུཾ་ཛྙཱ་ན་མཎྜ་ལ་ཛྙཱ་ན་གུ་ཧྱ་སིདྡྷི་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བདེན་པ་བརྗོད། དེ་ཉིད་ནུས་པ་ཅན་དུ་བྱ་བའི་ཕྱིར་དབུ་རྒྱན་དང་ཅོད་པན་མཐིང་དམར་གྱིས་དབང་བསྐུར་ཏེ། དེ་ཡང་དབུ་རྒྱན་བསྐོན་ལ། ཧཱུྃ། ཐབས་མཁས་ཐུགས་རྗེའི་བྱིན་རླབས་ཀྱིས། །རིགས་ཀྱི་བུ་མཆོག་དབང་བསྐུར་ཕྱིར། །གསང་བའི་དབུ་རྒྱན་འདི་བཅིངས་པས། །རིགས་ཀྱི་བུ་མཆོག་དེང་ཕན་ཆད། །འཇིག་རྟེན་ཆེ་བ་ཀུན་གྱི་བླ། །ཆེ་བས་ཆེ་བ་ཟིལ་གྱིས་གནོན། །སངས་རྒྱས་ཆེ་བ་མཆོག་གནས་ནི། །རྣལ་འབྱོར་ཆེན་པོ་ཁྱོད་ཉིད་ཡིན། །ༀ་ཏ་ཐཱ་ག་ཏོ་གུ་ཧྱ་བཛྲ་རཏྣ་མུ་ཀུ་ཊ་ཏྲཾ་ཏྲཾ། བཛྲ་གུ་ཧྱ་སིདྡྷི་ཧཱུྃ། ཅོད་པན་བཅིངས་ལ། ཧ། ཁྱུང་གི་གཤོག་པ་གཡས་གཡོན་གདེངས་པ་ཡིས། །ཀླུ་རྣམས་ཟིལ་གྱིས་གནོན་པར་བྱེད་པ་ལྟར། །སྲིད་གསུམ་ཡོན་ཏན་མཆོག་ཏུ་རྫོགས་པ་ཡི། །སངས་རྒྱས་ཀུན་ལ་མཛེས་པའི་ཅོད་པན་མཆོག །མཆོག་ཏུ་ཆེ་བས་བདུད་བཞི་ཟིལ་གྱིས་གནོན། །ༀ་ཏ་ཐཱ་ག་ཏོ་མ་ཧཱ་གུ་ཧྱ་མཱ་ལ་ཨ་བྷི་ཥིཉྩ་ཧོཿ དེ་ནས་དབུགས་དབྱུང་བ་ནི། བུ་ཁྱོད་མཚན་མའི་རྟོག་བྲལ་ཞིང་། །ཚེ་རིང་བདེ་བ་ཕུན་སུམ་ཚོགས། །ཀུན་ལ་སྤྱོད་པའི་དབང་ཐོབ་ནས། །སློབ་མ་བདེ་ལ་འགོད་བྱེད་པའི། །དབང་ཕྱུག་ཆེན་པོར་དེང་གྱུར་ཏོ། །ཞེས་བརྗོད། གསང་བ་གཉེར་གཏད་པ་ནི། གསང་བའི་དོན་མཆོག་འདི་དག་ནི། །ལྟ་བ་དམན་ལ་བསྟན་བྱས་ན། །དུས་མིན་པར་ནི་སྲོག་ཟད་ནས། །མགོ་འགས་སྙིང་ཡང་འཚིག་པར་འགྱུར། །ཁབ་ལེན་གྱིས་ནི་ལྕགས་སྡུད་ལྟར། །མི་འདོད་བཞིན་དུ་དབང་མེད་པར། །བསྐལ་པར་ངན་སོང་མྱོང་བར་འགྱུར། །དེ་བས་ཤིན་ཏུ་གསང་བར་བྱ། །ཞེས་བསྒོ། གཉིས་པ་ཡེ་ཤེས་རང་གནས་སམ་ཤེས་རབ་ཡེ་ཤེས་ཀྱི་དབང་ནི། མཎྜལ་སྔོན་དུ་འགྲོ་བས་བླ་མ་ལ་ཕྱག་རྒྱ་མཚན་ལྡན་ལོ་བཅུ་དྲུག་མ་རྒྱུད་དག་པར་བྱས་པ་ཡང་ཕུལ་ཏེ། རྡོར་སེམས་གཙོ་བོ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་གསོལ་བ་གདབ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུང་། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་བྱིན། དེ་ནས་སློབ་བུའི་གུང་མོ་གཡས་དང་ཕྱག་རྒྱའི་གུང་མོ་གཡོན་ལྟོ་སྦྱར་ཏེ། རཏྣའི་ཕྲེང་བས་བཅིངས་པའི་རྩེ་ནས་དབང་ཕྱུག་གི་མཐེབ་སྲིན་གྱིས་བཟུང་སྟེ་སློབ་མ་ལ་གཏད་པར་མོས་ལ། བདེ་བ་ཆེན་པོ་ཆོས་ཀྱི་སྐུ། །ཤེས་རབ་ཐབས་ཀྱིས་རྫོགས་པར་འགྱུར། །འདི་དང་སྐྱེ་བ་ཐམས་ཅད་དུ། །དངོས་གྲུབ་བདེ་འདི་མ་སྤོང་ཞིག །རྒྱལ་བ་སངས་རྒྱས་ཐམས་ཅད་ཀྱི། །རྫོགས་པའི་ཕྱག་རྒྱ་ཁྱོད་ལས་བྱུང་། །སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེ་བསྐལ་པ་མཐའ་ཀླས་པར། །ཆོས་སྐུ་འཐོབ་པར་མི་འགྱུར་རོ། །ཞེས་གཏད། དེ་ནས་སློབ་མ་དང་གཏད་པའི་ཕྱག་རྒྱ་གཉིས་ཕན་ཚུན་འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱས་རྗེས། སློབ་མ་དཀྱིལ་འཁོར་གྱི་གཙོ་བོ་བཅོམ་ལྡན་འདས་རྡོ་རྗེ་སེམས་དཔར་གསལ་བའི་གནས་ལྔར་རྒྱལ་བ་རིགས་ལྔ་དང་། ལག་པ་གཡས་གཡོན། ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་ཡུམ་རྡོ་རྗེ་དབྱིངས་ཀྱི་དབང་ཕྱུག་མར་གསལ་བའི་གནས་ལྔར་རིགས་ཀྱི་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུྃ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་ག་ཕཊ་ཀྱིས་བཀག་ཅིང་། རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཾ་དམར་པོར་གནས་པའི་གེ་སར་ལ་ཨེ་དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུྃ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་པས། རྗེས་ཆགས་ཀྱི་རླུང་བསྐྱོད་པས་གཏུམ་མོ་འབར་བའི་རྐྱེན་གྱིས་བྱང་ཆུབ་ཀྱི་སེམས་ཞུ་བ་ལ་བརྟེན་ནས་རྩ་གནས་ཐམས་ཅད་ནས་ཐིག་ལེ་གཡོས་པས་བདེ་བ་འགོ་ལྡང་བའི་ཚུལ་དུ་སྐྱེས་པ་གཡོ་ལྡང་བྱང་ཆུབ་ཀྱི་སེམས་དང་། བདེ་བ་ཕྱི་མ་ལ་འཇུག་པའི་ཚེ་སྔ་མ་འཇིག་ཅིང་མཐར་ཐམས་ཅད་འགགས་པ་འཇིག་འཇུག་བྱང་ཆུབ་ཀྱི་སེམས་དང་། རྟེན་ཅན་གྱི་བདེ་བ་རང་ས་ན་གནས་པ་མེད་པའི་ཚུལ་གྱིས་ཐམས་ཅད་གནས་པ་གནས་པ་བྱང་ཆུབ་ཀྱི་སེམས་དང་། སྔ་མའི་བདེ་བས་མཚོན་ནས་ཕྱི་མའི་བདེ་བ་ཐམས་ཅད་ལ་དམིགས་ཤིང་འདུན་པ་སྨོན་པ་བྱང་ཆུབ་ཀྱི་སེམས་དང་། དེ་ལྟར་གནས་བཞིར་དགའ་བཞིའི་འགྲོས་ཀྱིས་སོང་བའི་ཡབ་ཡུམ་གྱི་རྩ་ཐམས་ཅད་ཀྱི་བཅུད་འདུས་པའི་སྙིང་པོ་ཉི་ཟླའི་དྭངས་མ་མཁའ་གསང་རྡོ་རྗེ་དང་པདྨའི་རྩེར་འཕྲད་དེ་ཞལ་མཇལ་བ་ལས་ཐབས་ཉིད་ཤེས་རབ་ཏུ་སྦྱོར་བ། ཤེས་རབ་ཐབས་སུ་སྦྱོར་བ། ཐབས་ཤེས་གཉིས་མེད་དུ་སྦྱོར་བ་ཏེ་སྦྱོར་བ་གསུམ་གྱི་སྒོ་ནས་དངོས་པོ་ལྷན་ཅིག་སྐྱེས་པའི་དགའ་བ་ཉམས་སུ་མྱོང་བ་མཐར་ཕྱིན་པ་བྱང་ཆུབ་ཀྱི་སེམས་ཏེ། དེ་ལྟར་སེམས་ལྔའི་རིམ་པས་ཡས་བབས་བདེ་བ་ཆེན་པོའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་མོས་ལ། ཧཱུཾ། རྗེས་སུ་འཇུག་པའི་ཕྱག་རྒྱ་ཉིད། །ཟིལ་པའི་ཐིག་ལེ་སྔོན་ལས་བཞིན། །བཅུ་དྲུག་ཕྱེད་ཕྱེད་ཐིག་ལེ་གཅིག །ཕན་ཚུན་དགོད་པའི་སྟོབས་ཀྱིས་བསྟིམ། །བདེ་བ་གཉིས་པའི་ངོ་བོ་ཉིད། །གསུམ་པའི་ཡེ་ཤེས་དཀྱིལ་འཁོར་དུ། །གསལ་བར་ཤར་བས་གྱུར་པའི་སྒྲ། །རང་བཞིན་འོད་གསལ་དཀྱིལ་འཁོར་རོ། །ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ་ཧཱུཾ། ཨ་བྷི་ཥིཉྩ་ཧཱུཾ། དེ་ལྟར་བསྐུར་ཚིག་གིས་ཉམས་སུ་མྱོང་བའི་དོན་ངོ་སྤྲོད་པས་སེམས་ཉིད་དོན་དམ་འོད་གསལ་དུ་དྭངས་པའི་རྟགས་སྣང་ལྷག་པ་ཀུན་རྫོབ་ཀྱི་ཡེ་ཤེས་སུ་ཤར་བས་ལྷན་སྐྱེས་བདེ་བ་ཆེན་པོ་རྒྱུད་ལ་སྐྱེས་ཏེ་ཤེས་རབ་ཡེ་ཤེས་ཀྱི་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་ཡེ་ཤེས་རང་གནས་ཀྱི་དབང་བསྐུར་བས་ཤེས་བྱའི་དྲི་མ་དག་ནས་དོན་དམ་པ་འགག་མེད་ཀྱི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ནས་རྡོར་དྲིལ་སློབ་བུའི་སྙིང་གར་བཟུང་ལ། ༀ། མི་འགྱུར་བ་ཡི་ཡེ་ཤེས་གནས། །མ་བཙལ་ཕྱིན་པས་བདེ་བའི་མཆོག །མ་བལྟས་གསལ་བའི་ཡེ་ཤེས་སྤྱན། །གོང་ན་མེད་པས་ཀུན་གྱི་རྗེ། །ཡེ་ཤེས་རང་གནས་བརྡལ་བ་ལ། །མི་འགྱུར་གཡུང་དྲུང་ས་ཐོབ་ཤོག །ༀ་མ་ཧཱ་གུ་ཧྱ་བྷྲཱུྃ་ཛྙཱ་ན་མཎྜ་ལ་གུ་ཧྱ་སིདྡྷི་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བདེན་པ་བརྗོད། དེ་ནས་དབུགས་དབྱུང་བ་ནི། དེ་རིང་ཕན་ཆད་བུ་ཁྱོད་ནི། །རང་རིག་བདེ་ལ་གནས་པས་ན། །རྡོ་རྗེ་སེམས་དཔའ་ཞེས་བྱ་སྟེ། །ཡུམ་དང་འཇོ་མ་ཐམས་ཅད་ལ། །འདོད་བཞིན་སྤྱོད་པའི་དབང་ཕྱུག་འགྱུར། །རིགས་སུ་གྱུར་རྣམས་ཐབས་འདི་བཟུང་། །མཐུན་འཇུག་མཚམས་ལས་འགྲོ་འདུལ་བའི། །དབང་ཕྱུག་རྒྱལ་པོ་ཉིད་དུ་ངེས། །ཞེས་བརྗོད། གསུམ་པ་དབྱེར་མེད་བདེ་བ་ཆེན་པོའི་དབང་ནི། མཎྜལ་སྔོན་དུ་འགྲོ་བས་བླ་མ་ལ་ཕྱག་རྒྱ་མཚན་ལྡན་ལོ་བཅུ་གཉིས་མ་རྒྱུད་དག་པར་བྱས་པ་ཡང་ཕུལ་ཏེ། རྡོར་སེམས་གཙོ་བོ་ཁྱོད་ལ་འདུད། །ཐར་ལམ་ཆེད་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་གསོལ་གདབ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུང་། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་སྦྱིན། དེ་ནས་སློབ་བུའི་གུང་མོ་གཡས་དང་ཕྱག་རྒྱའི་གུང་མོ་གཡོན་ལྟོ་སྦྱར་ཏེ། རཏྣའི་ཕྲེང་བས་བཅིངས་པའི་རྩེེ་ནས་དབང་ཕྱུག་གི་མཐེབ་སྲིན་གྱི་བཟུང་སྟེ་སློབ་མ་ལ་གཏད་པར་མོས་ལ། བདེ་བ་ཆེན་པོ་ཆོས་ཀྱི་སྐུ། །ཤེས་རབ་ཐབས་ཀྱིས་རྫོགས་པར་འགྱུར། །འདི་དང་སྐྱེ་བ་ཐམས་ཅད་དུ། །དངོས་གྲུབ་བདེ་འདི་མ་སྤོང་ཞིག །རྒྱལ་བ་སངས་རྒྱས་ཐམས་ཅད་ཀྱི། །རྫོགས་པའི་ཕྱག་རྒྱ་ཁྱོད་ལས་བྱུང་། །སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེ་བསྐལ་པ་མཐའ་ཀླས་པར། །ཆོས་སྐུ་ཐོབ་པར་མི་འགྱུར་རོ། །ཞེས་གཏད། དེ་ནས་སློབ་མ་དང་གཏད་པའི་ཕྱག་རྒྱ་གཉིས་ཕན་ཚུན་འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱས་རྗེས། སློབ་མ་དཀྱིལ་འཁོར་གྱི་གཙོ་བོ་བཅོམ་ལྡན་འདས་རྡོ་རྗེ་སེམས་དཔར་གསལ་བའི་གནས་ལྔར་རྒྱལ་བ་རིགས་ལྔ་དང་། ལག་པ་གཡས་གཡོན། ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་ཡུམ་རྡོ་རྗེ་དབྱིངས་ཀྱི་དབང་ཕྱུག་མར་གསལ་བའི་གནས་ལྔར་རིགས་ཀྱི་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱ་ཏཱ་སྔོན་འགྲོས། བསྐུར། བརླབ། དབབ། དྲངས་བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་ག་ཕཊ་ཀྱིས་བཀག་ཅིང་། རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་བཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཾ་དམར་པོར་གནས་པའི་གེ་སར་ལ་ཨ། དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། སྙོམས་པར་ཞུགས་པས་བྱང་ཆུབ་ཀྱི་སེམས་འཁོར་ལོ་བཞིར་ཡས་བབས་ཀྱི་རིམ་པར་དགའ་བ་བཅུ་དྲུག་གི་འགྲོས་ཀྱིས་ཕྱིན་པ་ལས་ཉི་ཟླ་ཟུང་འབྲེལ་གྱིས་མཚན་སོ་གཉིས་དང་། ཟླ་བའི་ཐིག་ལེ་རེ་རེ་བཞིན་ཡེ་ཤེས་ལྔའི་ཉམས་དང་ལྡན་པས་དཔེ་བྱད་བརྒྱད་ཅུ་རྫོགས་ཤིང་མངོན་ཤེས་དྲུག་ཀྱང་ཤར་ནས་ཡུམ་གྱི་རྩ་ཁ་ཁ་མུ་ཁའི་རྩེར་ཉི་ཟླ་གཉིས་འདྲེས་འཁྱིལ་བ་དེ་ཉིད་རྡོ་རྗེ་ནོར་བུར་བསྟིམ་པ་ཧཱུྃ་ཞེས་གྱེན་དུ་ལྡོག་པའི་སྦྱོར་བས་མས་བརྟན་གྱི་དགའ་བཞིའི་ཡེ་ཤེས་ཉམས་སུ་མྱོང་བར་བྱས་པའི་དགའ་བཞིའི་ཡེ་ཤེས་རེ་རེ་ལའང་དགའ་བ་བཞི་བཞི་སྟེ་བཅུ་དྲུག་གི་དང་པོ་བཞིས་ཚོགས་ལམ་དང་། དེ་ནས་རེ་རེས་སྦྱོར་མཐོང་། དེ་ནས་དགུས་སྒོམ་ལམ་ས་དགུ་རྫོགས་ཏེ། དགའ་བ་བཅུ་དྲུག་གི་མཐའ་མ་རང་བཞིན་ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་དེའི་ཚེ་ན་སྣང་སྟོང་གི་མཐའ་མ་བསྒྲིབས་པར་གསལ་བས་ཀུན་ཏུ་འོད་དང་། མི་ཤིགས་པའི་དྭངས་མས་ལུས་ཐམས་ཅད་ལ་ཁྱབ་ཅིང་བརྟན་པས་འཁོར་བའི་སྐྱོན་གྱིས་མ་གོས་པས་པདྨ་ཅན། རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་རང་སྣང་བས་ཡི་གེའི་འཁོར་ལོའི་ས་རྫོགས་ཏེ། མདོར་ན་ཐུན་མོང་དང་ཁྱད་པར་གྱི་ས་ལམ་ཐམས་ཅད་རྫོགས་པར་མོས་ལ། ཧཱུྃ། རྡོ་རྗེ་ཉི་མ་ཐབས་ཀྱི་རྒྱ། །ཕུང་སོགས་ཕྱག་རྒྱའི་ཚོགས་དང་ལྡན། །དེ་ཟླ་བསིལ་བྱེད་ཤེས་རབ་དངོས། །དུས་གཅིག་རོ་མཉམ་ཐིག་ལེ་ཆེ། །སུམ་ཅུ་རྩ་གཉིས་མཚན་རྫོགས་ཤིང་། །ཟླ་བའི་ཡེ་ཤེས་ལྔ་བཅུ་དྲུག །དཔེ་བྱད་ལ་སོགས་དཔག་ཏུ་མེད། །སེམས་ཤེས་མངོན་པར་ཤེས་དང་ལྡན། །སེམས་མཐའ་འགྲོ་འོང་རྫུ་འཕྲུལ་ཤེས། །གནས་ནས་ལོག་པ་ཐིམ་པའི་སྒྲ། །མཐའ་གཉིས་མ་གོས་པདྨ་ཅན། །སྤྲུལ་པའི་གནས་ནས་བཀྱེ་བ་ཡིས། །བཞི་བཅུ་ལྔ་སོགས་མཐའ་ཡས་ཀུན། །རང་བཞིན་ཉིད་ལས་རང་གསལ་བ། །བཅུ་གསུམ་ཡི་གེ་འཁོར་ལོར་བརྗོད། །ༀ་དྷརྨ་ཀཱ་ཡ་ཨ་བྷི་ཥིཉྩ་ཧཱུྃ། དེ་ལྟར་བསྐུར་ཚིག་གིས་ཉམས་སུ་མྱོང་བའི་དོན་ངོ་སྤྲད་པས་འཁོར་འདས་མཉམ་ཉིད་བདེ་བ་ཆེན་པོའི་དཀྱིལ་འཁོར་དུ་དབང་བསྒྱུར་ཏེ་མཆོག་ཏུ་མི་འགྱུར་བ་དེ་ཁོ་ན་ཉིད་ཀྱི་དོན་མངོན་དུ་བྱས་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུའི་དུས་བཞིའི༴ སྐལ་ལྡན་རིག་པ་འཛིན་པ་ཁྱོད་ལ་བདེ་བ་ཆེན་པོའི་དབང་བསྐུར་བས་སྒྲིབ་གཉིས་བག་ཆགས་དང་བཅས་པ་དག་ནས་སྐྱེ་འགག་གཉིས་སུ་མེད་པ་ཟུང་འཇུག་དོན་དམ་པའི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ལྟར་གསང་བ་བྷ་གའི་དཀྱིལ་འཁོར་དང་དེ་ཁོ་ན་ཉིད་སེམས་ཀྱི་དཀྱིལ་འཁོར་དུ་ཟབ་མོའི་དབང་གསུམ་བསྐུར་བས་ཐུན་མོང་མ་ཡིན་པའི་རྫོགས་རིམ་རྣམས་ཉན་སྒོམ་ནུས་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་དབང་མ་ཐོབ་པའི་སྐྱོན་དང་། ཐོབ་པའི་ཡོན་ཏན་ནི། རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་དབང་མ་ཐོབ་པའི་སྐྱོན་དང་། དུས་འདི་ཕྱིན་ཅད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དབང་ཐོབ་པའི་ཕན་ཡོན་གསུངས་ཏེ། དེ་བས་ན་བསྐྱེད་རྫོགས་ཀྱི་ལམ་ཟབ་མོ་ཉམས་སུ་ལེན་པ་ལ་དང་པོར་དབང་ནོད་པ་ཤིན་ཏུ་ནས་གཅེས་པ་ཡིན་ནོ། །དེས་དབང་བསྐུར་བའི་རིམ་པ་དངོས་སོང་ནས། རྗེས་ཀྱི་རིམ་པ་ལ་བཞི་ཡོད་པའི། དང་པོ་དབང་རྟགས་སྦྱིན་ཅིང་བཀའ་བསྒོ་བ་ནི། སློབ་མའི་ལག་ཏུ་རྡོ་རྗེ་གཏད་དེ་གསོར་དུ་བཅུག་ལ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །དྲིལ་བུ་གཏད་དེ་དཀྲོལ་དུ་བཅུག་ལ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་དབང་ཆེན་ཏེ། །མྱ་ངན་འདས་དང་འཁོར་བ་ཡི། །ཆོས་ལ་འདོད་བཞིན་དབང་བསྐུར་རོ། །དེ་ནས་སླར་ཡང་རྡོར་དྲིལ་བསྣོལ་ནས་སློབ་བུའི་ལག་པ་གཡས་གཡོན་དུ་གཏད་དེ་རྡོ་རྗེ་གསོར་ཞིང་དྲིལ་བུ་དཀྲོལ་དུ་བཅུག་ལ། བཛྲ་གཎྜེ་ཨ་བྷི་ཥིཉྩ་ཧཱུཾ། ཞེས་བརྗོད། སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན༴ སྐལ་ལྡན་རིག་པ་འཛིན་པ་ཁྱོད་ལ་དབང་རྟགས་རྡོ་རྗེ་དང་དྲིལ་བུ་གཏད་དེ་དབང་བསྐུར་བས་ཐབས་དང་ཤེས་རབ་གཉིས་སུ་མེད་པས་འགྲོ་བ་སེམས་ཅན་གྱི་དོན་རྒྱུན་མི་ཆད་པར་བྱེད་པའི་དབང་དམ་པ་ཐོབ་པར་གྱུར་ཅིག །དེ་ནས་དབང་ཕྱུག་དབང་ཁྲི་ལ་འདུག་པའི་ཞབས་གཡས་པ་ལ་མགོ་བོ་གཏུག་ཏུ་བཅུག་སྟེ། དེ་རིང་ཕན་ཆད་བུ་ཁྱོད་ཀྱི། །རྡོ་རྗེ་སེམས་དཔའ་ང་ཡིན་པས། །ང་ཡི་ཇི་སྐད་བསྒོ་བ་བཞིན། །བུ་ཁྱོད་ཀྱིས་ནི་བྱ་དགོས་སོ། །ཞེས་བཀའ་བསྒོ། གཉིས་པ་བུམ་ཆུ་བླུད་ཅིང་སྨོན་ལམ་གདབ་པ་ནི། དབང་ཕྱུག་བཞེངས་ཏེ་དབུས་ཀྱི་བུམ་པ་བཏེགས་ལ། དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་བས། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་བུམ་ཆུ་བླུད། ཏིཥྚ་བཛྲ། ཞེས་དབང་རྣམས་བརྟན་པར་བྱ། གོང་ལྟར་བདེན་སྟོབས་བརྗོད་པ་སྔོན་དུ་འགྲོ་བས། བདག་རྡོ་རྗེ་སློབ་དཔོན་ཆེ་གེ་མོས་ཆེ་གེ་མོ་ལ་སོགས་པའི་སློབ་བུ་རྣམས་ལ་སྒྱུ་འཕྲུལ་དྲྭ་བའི་དབང་བསྐུར་བས། དུས་འདི་ཕྱིན་ཆད་ངན་སོང་གསུམ་ལ་སོགས་པའི་སྡུག་བསྔལ་ཐམས་ཅད་དང་བྲལ་ནས་མཐོ་རིས་ཀྱི་བདེ་བ་ཕུན་སུམ་ཚོགས་པ་དང་ལྡན་ཏེ། དེ་ལས་ཀྱང་རྒྱལ་བའི་སྲས་རིགས་ཕུན་སུམ་ཚོགས་པའི་སྲས་སུ་ངེས་པར་དབང་གི་འབྲས་བུ་མ་ལུས་པ་ལ་དབང་ཐོབ་ནས་སྲིད་པའི་སེམས་ཅན་མཐའ་དག་གི་དོན་ཡོངས་སུ་རྫོགས་པར་བྱེད་པར་གྱུར་ཅིག །ཡུལ་ཕྱོགས་འདི་ལ་སོགས་ཏེ་རྒྱལ་ཁམས་ཐམས་ཅད་དུ་དུས་ཀྱི་འཁྲུག་པ་ཞི་བར་གྱུར་ཅིག །མཚོན་གྱི་བསྐལ་པ་ཉམས་པར་གྱུར་ཅིག །མི་ནད་ཕྱུགས་ནད་ཐམས་ཅད་རྒྱུན་ཆད་པར་གྱུར་ཅིག །ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས་ཏེ་སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །གསུམ་པ་དབང་ཕྱུག་གི་དབང་བསབ་ཅིང་སློབ་བུའི་ལུས་བསླུ་བ་ནི། དབང་ཕྱུག་ཀུན་ཏུ་བཟང་པོར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་རྫས་ཀྱི་རབ་གནས་ཀྱི་ལྷ་རྣམས་གསལ་བཏབ་པ་ལས། སླར་ཡང་ཧཱུཾ་ཞེས་བརྗོད་ཅིང་བསྐུར་གནས་རྣམས་སུ་དབང་རྫས་རྣམས་གཏུགས་པས་ལྷ་རྣམས་འོད་དུ་ཞུ་བ་སོ་སོའི་མཚུངས་ལྡན་གྱི་རྒྱུ་ལ་ཐིམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་མདུན་གྱི་ནམ་མཁར་དཔང་པོའི་ཚུལ་དུ་བཞུགས་པའི་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་འོད་དུ་ཞུ་ནས་དབང་ཕྱུག་ལ་ཐིམ་པས་སྔར་བས་ཀྱང་ནུས་པ་ཆེར་སྐྱེས་ཤིང་གཟི་འོད་འབར་བར་བསམ་མོ། །དེ་ནས་སློབ་བུ་རྣམས་ཀྱིས་ཕྱག་སྔོན་དུ་འགྲོ་བས་ཅི་འབྱོར་བའི་དངོས་པོས་ལུས་བསླུ་བར་བྱ་སྟེ། ཐལ་མོ་སྦྱར་ལ། གཉིས་མེད་རྒྱལ་བའི་མཆོག་ལ་རབ་གནས་ཤིང་། །སྐུ་གསུང་ཐུགས་ཀྱི་རོལ་པ་ཅིར་སྟོན་པའི། །བླ་མེད་སྨན་པའི་རྒྱལ་པོ་བཞུགས་སུ་གསོལ། །ཟང་ཟིང་རྫས་ཀྱི་དགོས་པས་མ་བྲེལ་ཀྱང་། །བདག་འཛིན་སྡུག་བསྔལ་རྟོག་པས་བཅིངས་པ་ཡི། །འཁོར་བའི་འདམ་རྫབ་ཀློང་ནས་དྲངས་བའི་ཕྱིར། །འབྱོར་པས་དམིགས་པའི་མཆོད་པ་བཞེས་སུ་གསོལ། །ཞེས་ལུས་བསླུ། བཞི་པ་གཏང་རག་གིས་མཆོད་ཅིང་ཡོན་དབུལ་བ་ནི། སློབ་བུའི་གཙོ་བོས་ཀ་པཱ་ལ་མཚན་ལྡན་བདུད་རྩིས་བཀང་བ་མར་ཆོལ་དང་བཅས་པ་བཏེགས་ལ། ཁྱོད་ནི་ཡེ་ནས་སྐུ་གསུང་ཐུགས་ཀྱི་དཔལ། །དཔལ་གྱི་ཕྱག་རྒྱ་མང་པོ་ཐོབ་པའི་ཕྱིར། །དུས་གསུམ་ཀུན་ཏུ་སངས་རྒྱས་ཡིན་པའི་རྟགས། །རྡོ་རྗེ་ཆེ་མཆོག་ཁྱོད་ལ་ཕྱག་འཚལ་བསྟོད། །ཅེས་དབང་ཕྱུག་གི་ཞལ་དུ་དྲང་ཞིང་ཅི་འབྱོར་བའི་ཡོན་དབུལ། རྗེས་དམ་ཚིག་ཁས་བླང་བ་དང་། མཎྜལ་འབུལ། དགེ་བ་བསྔོ་ཞིང་ཤིས་པ་བརྗོད་པས་ཀྱང་མཐའ་བརྒྱན་པར་བྱའོ། །རྗེས་ཀྱི་ཆོ་ག་རྣམས་ཀྱང་སྒྲུབ་དཀྱིལ་བཞིན་ཤེས་པར་བྱའོ། །མཆོག་ཏུ་གསང་བ་གདོད་མའི་གནས་ལུགས་གང་། །འཁྲུལ་མེད་མངོན་སུམ་གསལ་བ་སྙིང་པོའི་བཅུད། །རྒྱལ་ཀུན་དགོངས་པའི་ཞེ་ཕུགས་དེ་ཁོ་ན། །ཇི་བཞིན་ཉིད་དུ་སྟོན་བྱེད་ངེས་པའི་ལམ། །ཞི་བ་བཞི་བཅུ་རྩ་གཉིས་དཀྱིལ་འཁོར་དུ། །སྐལ་ལྡན་སྨིན་པར་བྱེད་པའི་ཐབས་ཀྱི་སྒོ། །ཕན་ནུས་ཟབ་མོའི་དབང་གི་ཆོ་ག་འདི། །བློ་གསལ་སྙིང་གི་གདུང་བ་སེལ་ཕྱིར་སྤེལ། །ཡིག་རྙིང་རྣམས་ལ་རྐང་པས་འཇུག་འདོད་ཀྱང་། །འདབ་ཆགས་རིངས་པའི་བགྲོད་པ་ནམ་མཁའ་ལ། །བྱེད་པ་ཆོས་ཉིད་ཡིན་ཕྱིར་མདོ་སྒྱུ་གཉིས། །མ་འདྲེས་འབྱེད་པ་ཕྱོགས་འདིའི་ཁྱད་ཆོས་ཡིན། །གལ་ཏེ་ཉེས་བཤད་ནོངས་པའི་ཆ་མཆིས་ན། །འཕགས་དང་དམ་པའི་ཚོགས་ཀྱིས་བཟོད་མཛད་རིགས། །འདིར་འབད་དགེ་བས་ལུས་ཅན་འགྲོ་བ་ཀུན། །རྣམ་གྲོལ་བྱང་ཆུབ་ཐོབ་པའི་རྒྱུར་གྱུར་ཅིག །སྒྱུ་འཕྲུལ་དྲྭ་བ་ཞི་བ་འབྲིང་པོའི་དབང་གི་ཆོ་ག་དཀྱིལ་འཁོར་རྒྱ་མཚོར་འཇུག་པའི་གྲུ་ཆེན་ཞེས་བྱ་བ་འདི་ནི་རང་གཞན་མང་པོ་ལ་ཕན་འདོད་དང་། རིགས་ཀྱི་གཅུང་འགྱུར་མེད་ཡིད་བཞིན་ལེགས་པར་གྲུབ་པའི་གསུང་གིས་ཀྱང་བསྐུལ་མ་བཏབ་པར་བརྟེན་དུས་གསུམ་རྒྱལ་བའི་སྤྱི་གཟུགས་སྐྱབས་མགོན་བླ་མ་གཏེར་ཆེན་ཆོས་ཀྱི་རྒྱལ་པོ་མཆེད་ཀྱི་ཞབས་རྡུལ་སྤྱི་བོས་ལེན་པ་སྨྱོས་བན་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེས་རང་ལོ་ཉེར་གཅིག་པ་མི་ཟད་པའི་ལོ་ཁྲུམས་ཟླའི་དམར་ཕྱོགས་ཀྱི་ཚེས་དགེ་བར་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོར་རྫོགས་པར་སྦྱར་བ་དགེ་ལེགས་སུ་གྱུར་ཅིག། །།

སྒྱུ་འཕྲུལ་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཟླ་བའི་འོད་ཟེར། པདྨ་བཛྲ།

སྒྱུ་འཕྲུལ་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཟླ་བའི་འོད་ཟེར་ཞེས་བྱ་བ་བཞུགས་སོ། །ༀ་སྭ་སྟི་སིདྡྷཾ། ནམ་ཡང་མི་འགྱུར་ལྷུན་གྲུབ་ཕྲིན་ལས་བཞི། །ཀུན་ཁྱབ་རིས་མེད་འགྲོ་བ་འདུལ་མཛད་པ། །བླ་མ་རྡོ་རྗེ་སེམས་དཔའི་ངོ་བོ་ལ། །ཕྱག་བྱས་རྒྱུད་ལུང་ཞི་བའི་སྦྱིན་སྲེག་བྲི། །འདིར་ས་ག་ཟླ་བའི་སྦྱིན་སྲེག་བཀླག་ཆོག་མར་བཀོད་པ། ལོ་ཆེན་རིན་པོ་ཆེའི་གསུང་གཞིར་བཞག་ནས། བསྙེན་པའི་ཁ་སྐོང་སོགས་མདུན་བསྐྱེད་ཀྱི་དཀྱིལ་འཁོར་དང་མ་འབྲེལ་བའི་ཚེ། ཇི་ལྟར་བྱ་བའི་རིམ་པ་ཅུང་ཟད་བསྒྱུར་ཏེ་བྲི་བ་ལ། སྒྱུ་འཕྲུལ་དྲྭ་བ་ཞི་བ་འབྲིང་པོའི་དཀྱིལ་འཁོར་དང་སྦྱར་ནས་སྟོན་ཏེ། དེ་ལ་ཐོག་མར་བཅས་གཤོམས་ནི། ཐབ་སྟེགས་གྲུ་བཞི་པ་རྒྱར་ཁྲུ་དོ་དང་དཔངས་སུ་ཁྲུ་ཕྱེད་པའི་ཁར་དྲི་དཀར་པོ་དང་བ་བྱུང་གིས་ཆག་ཆག་བཏབ། དེའི་སྟེང་ངོས་ཀྱི་མཐའ་ནས་ཟླུམ་སྐོར་གྱི་མུ་ཁྱུད་ནག་པོ་ལ་ༀ་ཡིག་དང་སེང་མགོ་སྤེལ་བའི་ནང་དུ་འཁོར་ལོ་རྩིབས་བཞི་པ་བྲི། དེའི་ལྟེ་བར་ཐབ་ཁུང་རྩིགས་ན་རྒྱར་ཁྲུ་གང་དང་དཔངས་སུ་ཁྲུ་ཕྱེད་ཟླུམ་པོར་བསླང་བའི་ཕྱིར་བཀྱེད་པའི་སོར་བཞིའི་ཚད་ཅན་གྱི་ཁ་ཁྱེར་བང་རིམ་གསུམ་ལ། ནང་ནས་རིམ་པར་འཁོར་ལོ་ལྕགས་ཀྱུ་འོད་ཕྲེང་གིས་བསྐོར་བའི་དབུས་སུ་སྲབ་མཐུག་སོར་གང་ཙམ་པའི་ཐབ་མཚན་འཁོར་ལོ་ༀ་གྱིས་མཚན་པ་སྟེ། ཐམས་ཅད་ཀྱང་ཚོན་དཀར་པོས་ཁ་བསྒྱུར་རོ། །བྲི་ཐབ་བྱེད་ན། ཐབ་སྟེགས་བྲི་རྩིགས་གང་བྱེད་ཀྱང་རུང་ཞིང་། གཞིའི་འཁོར་ལོ་ༀ་སེང་སྤེལ་བའི་མུ་ཁྱུད་དང་བཅས་པ་བྲི་དུས་ཁ་ཁྱེར་གྱི་འོག་ཏུ་ཚུད་པས་བྲི་མི་དགོས་ལ། གཞན་ཐམས་ཅད་སྔར་དང་འདྲ་བར་རྡུལ་ཚོན་དཀར་པོས་བྲི་བར་བྱའོ། །གང་ལྟར་ཡང་འོ་མ་ཅན་གྱི་ཤིང་རྩེ་མོའི་ཆ་ལས་བྱུང་བའམ་དགོན་པའི་བ་གཅི་སྐམ་གཙང་སྲོག་ཆགས་མེད་པ་ཐབ་ནང་དུ་ཐབ་ལས་ཅུང་ཟད་དམའ་བ་ཟླུམ་པོར་བརྩིགས་པའི་ཤར་ལྷོར་མེ་ཚང་བཅའ། སྟེགས་བུའི་གྲྭར་མདའ་བཞི་བཙུགས་པ་སྲད་བུ་དཀར་པོས་བསྣོལ་མར་བྲན་ཅིང་སྟེང་ནས་མེ་དར་དཀར་པོ་དགབ། སྟེགས་བུའི་ཤར་ལྷོའི་ཟུར་དུ་མདའ་དར་དམར་པོ་གཟུག །ཐབ་ཀྱི་མདུན་དུ་སྟན་དཀར་ཞིང་འཇམ་པ་དང་། དེའི་གཡས་གཡོན་དུ་ཁྲུ་གང་བའི་ཚད་ཀྱི་རྫས་སྟེགས་དང་མཆོད་སྟེགས་དཀར་པོ་སྟེ་གསུམ་ག་ལ་སྣ་ཚོགས་པདྨ་འདབ་མ་བརྒྱད་པ་རེ་བྲི། སྟན་གྱི་མདུན་དུ་ཞེང་མཐོ་གང་དཔངས་སློབ་དཔོན་གྱི་སྐེད་པ་ཙམ་སླེབ་པའི་མེ་ཡོལ་གངས་རི་བྲིས་པ་བཞག །གཡས་ཕྱོགས་རྫས་སྟེགས་ཀྱི་པདྨའི་ལྟེ་བར་བ་ལས་བྱུང་བའི་མར་ཁུ་དགང་བླུགས་ཀྱི་གཟར་བུ་ཁ་སྦྱར་བ་དང་བཅས་པ། མདུན་གྱི་འདབ་མར་འོ་མ་ཅན་གྱི་རྩེ་མོའི་ཆ་ལས་བྱུང་བའི་ཡམ་ཤིང་མཐོ་གང་བ་རྩེ་གཉིས་མར་ཁུས་ཉུག་པ། པད་འདབ་ལྷག་མ་བདུན་ལ་ཏིལ་དཀར། མངར་གསུམ། ནས་དཀར་དང་འབྲས་དཀར་གྱི་ཆན་སོགས་ཁ་ཟས་དཀར་པོ་དང་། ཙནྡན་དཀར་པོ་སོགས་དྲི་དཀར་པོའི་རིགས་དང་། ཙམ་པ་ཀ་སོགས་མེ་ཏོག་དཀར་པོའི་རིགས་ཏེ་ཐམས་ཅད་རང་བཞིན་ནམ་བཅོས་པས་དཀར་བ་འདས་མ་འདས་ཀྱི་ཁྱད་པར་གྱིས་ཕྱི་ནང་ཉིས་རིམ་དང་ཐུགས་དམ་བསྐུལ་བའི་རྫས་ཡུངས་ཀར་རྣམས་རིན་པོ་ཆེ་དཀར་པོའི་སྣོད་དུ་བཤམ། གཡོན་ཕྱོགས་མཆོད་སྟེགས་ཀྱི་པདྨའི་ལྟེ་བར། འོ་མ་འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་དང་བསྲེས་པའི་མར་དཀར་གྱི་འདས་གཏོར་ཟླུམ་པོ་རིལ་བུ་དྲུག་གིས་བསྐོར་བ་མཉྫིའི་སྟེང་བཀོད་པའི་མདུན་དུ་རྒྱུ་དེ་ལས་འཇིག་རྟེན་ལས་འདས་པའི་གཏོར་མ་དཀར་ཟླུམ། མདུན་གྱི་པད་འདབ་ལ་རྡོར་དྲིལ། དེའི་གཡས་གཡོན་གྱི་འདབ་མར་སྨན་རཀ །པད་འདབ་ལྷག་མ་ལྔ་ལ་ཞབས་བསིལ་དང་བཞི་བསྣོལ་གྱི་མཆོད་རྫས་རང་བཞིན་ནམ་བཅོས་པས་དཀར་བ་གཡས་བསྐོར་དུ་བཤམ་ཞིང་ལས་བུམ་ཀྱང་ཅི་བདེར་བཞག་གོ། །དེ་ལྟར་བཤམས་ཟིན་ནས་ཆོ་ག་ནི། སློབ་དཔོན་ཆས་གོས་དང་རིན་པོ་ཆེའི་རྒྱན་དཀར་པོས་བརྒྱན་ལ་རྡོ་རྗེའི་སྐྱིལ་ཀྲུང་གིས་ཤིས་པའི་ཕྱོགས་སུ་ཁ་བལྟས་པས་འདུག་ནས། དོན་གྱི་སེམས་ཆོས་ཐམས་ཅད་ཀྱི་གཤིས་ལུགས་ལྷག་པ་བདེན་པ་དབྱེར་མེད་ཀྱི་ལྟ་བ་རྟོགས་ཤིང་བྱང་ཆུབ་ཀྱི་སེམས་དང་ལྡན་པས། ཀུན་སློང་སྟོངས་ཀྱི་སེམས་རང་གཞན་གྱི་གནོད་སྡིག་སེལ་བར་འདོད་པའི་སེམས་ཞི་ཞིང་དང་བའི་སྒོ་ནས། ངག་སྔགས་རྣམས་ཕྲ་ཞིང་ཞི་བ་རྒྱུན་མི་ཆད་པར་བཟླ་བའི་ཚུལ་གྱིས་ཆོ་གའི་ལས་ལ་འཇུག་སྟེ། ༀ་ཛི་ན་ཛིཀ྄་ཅེས་པས། རང་ཉིད་རྣམ་པར་སྣང་མཛད་དཀར་པོ་ཞལ་གཅིག་ཕྱག་གཉིས་པའི་རྣམ་པས་དཀྱིལ་འཁོར་གྱི་ཤར་སྒོའི་ཐད་དུ་འཁོད་དེ་སྦྱིན་སྲེག་གི་ལས་རིམ་ལ་འཇུག་པར་མོས་པས། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔ་ཡི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ༀ་མ་ཧཱ་བཛྲ། ཞེས་རྡོ་རྗེ་གསོར་ཞིང་ཐུགས་ཀར་འཛིན། ༀ་བཛྲ་གྷཎྜེ་ཨཱཿ དྲིལ་བུ་དཀྲོལ་ཞིང་དཀུར་བརྟེན། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་འཁྱུད་རྒྱ་བྱས་ཏེ་དམ་ཚིག་གསུམ་དྲན་པར་བྱའོ། །དེ་ནས་ཕྱི་མཆོད་རྣམས་སྒྲུབ་ཐབས་ལྟར་བརླབ་ཅིང་། སྨན་རཀ་གཉིས་སྔགས་ཙམ་གྱིས་བྱིན་རླབས་གསོ། ལས་གཏོར་དང་སྲེག་རྫས་རྣམས་ལ་ལས་བུམ་གྱི་ཆུ་འཐོར་ཞིང་། ཧཱུཾ་བིགྷྣཱནྟ་ཀྲྀཏ་ཕཊ་དང་། སྭ་བྷཱ་ཝས་བསང་སྦྱང་། སྟོང་པའི་ངང་ལས་མ་དང་ཨ་ལས་ཉི་ཟླའི་གའུའི་སྣོད་དུ་རང་གི་ཐུགས་ཀ་ནས་གཏོར་མའི་གནས་སུ་འབྲུ་གསུམ་དང་སྲེག་རྫས་ཀྱི་གནས་སུ་འབྲུ་ལྔ་སྤྲོས་ཏེ་འཕྲོ་འདུས་ཡོངས་སུ་གྱུར་པ་ལས་ཞི་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དཀར་པོ་འཕྲོ་བ་དང་སྲེག་རྫས་རྣམས་རོ་བརྒྱ་ལྡན་པའི་ཟག་མེད་ཡེ་ཤེས་ཀྱི་བདུད་རྩི་ནམ་མཁའ་གང་བས་ཞི་བའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བསམ་ལ། ༀ་ཨཱཿ ཧཱུཾ། ༀ་ཧཱུཾ་སྭཱ་ཨཱཾ་ཧཱ་ཞེས་བཟླས་པས་བྱིན་གྱིས་བརླབ། དེ་ནས་ཐབ་བསང་སྦྱང་། སྟོང་པའི་ངང་ལས་མདུན་དུ་བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་གསུམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དཀར་པོ་འབར་བར་བསམ་ལ། ༀ་ཨགྣེ་ཡེ་ཛྭ་ལ་ཛྭ་ལ་ཧུཾ་ཕཊ། ཅེས་རྒྱུན་བཞག་གམ་གཙུབ་ཤིང་ལས་བྱུང་བའི་མེ་དུ་བ་མེད་པས་སྤར་ལ། ཐབ་ཀྱི་མེའི་དབུས་སུ་མ་དང་དཱིཿལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ༀ་ཡིག་དཀར་པོའི་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་བ་རི་ཥི་ཧཱུཾ་ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆ་བྱད་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། ཨ་དཪྴ་སོགས་ཀྱིས་བསྐུར་བརླབ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣེ་དེ་བ་ས་མ་ཡ་ཧཱུཾ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོས་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨགྣེ་དེ་བ་རི་ཥི་ཛཿཛཿས་སྤྱན་དྲང་། ཛཿ ཧཱུྃ་བཾ་ཧོཿས་བསྟིམ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། མེ་ལྷ་ཞལ་ཅུང་ཟད་གདངས་པ་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་དུ་བྱས་པས་དགང་བླུགས་བཟུང་ནས། ༀ་ཨགྣེ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་སྟེ་རྗེས་གཟར་བུ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་བསྐོར་གྱིས། ༀ་ཨགྣེ་དེ་བ་རི་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་ལན་གསུམ་གྱིས་དགང་བླུགས་ཕུལ། དེ་རྗེས་སྔགས་དེ་ཁོ་ནས་ཡམ་ཤིང་མར་ཁུ་བསྲེག་རྫས་རྣམས་རེ་རེ་ནས་ལྔའམ་བདུན་སོགས་ཇི་ལྟར་རིགས་པ་ཕུལ་ནས། ཧཱུཾ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱབས་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་སྤྲུལ་པ་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་ཆིབས། །བགྲང་ཕྲེང་འཛིན་ཅིང་རིག་སྔགས་གསུང་། །བདུད་རྩིའི་བཅུད་ལྡན་གུནྡྷེ་བསྣམས། །ཆོས་ཀྱི་བདུད་རྩིས་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཡུངས་ཀར་ཐབ་ཏུ་གཏོར་ཞིང་། ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། ཞེས་འདོད་དོན་གསོལ། དེ་དག་སྦྱིན་ལྷ་སྟེ་འཇིག་རྟེན་པའི་མེ་ལྷ་མཆོད་པའི་ཆོ་གའོ། །དེ་ནས་སྲེག་ལྷ་ཞེས་པ་འདས་པའི་མེ་ལྷ་མཆོད་པ་ནི། མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་དབུས་སུ་བྷྲཱུཾ་ཡིག་འཕྲོ་འདུས་ཡོངས་སུ་གྱུ་པ་ལས། བྷྲཱུཾ་བི་ཤྭ་བི་ཤུདྡྷེ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གདན་དང་བཅས་པ་གསལ་བར་བསམ་ལ། ཡེ་ཤེས་ཕྱོགས་བཞི་དབུས་བརྟགས་ཏེ། ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་པའི་བར་གྱིས་གསལ་བཏབ་ལ། རང་གི་ཐུགས་ཀ་ནས་ཡི་གེ་བཞི་བཅུ་རྩ་གཉིས་འཐོན་ཏེ་སོ་སོའི་གདན་སྟེང་དུ་འཁོད་པ་ནི་དབུས་སུ་ཊ་ཏ། རྩིབས་བཞིའི་ཤར་དུ་ཋ་ཐ། ལྷོར་ཊ་ད། ནུབ་ཏུ་ཌྷ་དྷ། བྱང་དུ་ཎ་ན། རྩིབས་མཆན་གྱི་ཤར་ལྷོའི་གདན་ལ་ཀ་ཙ། ལྷོ་ནུབ་ཏུ་ཁ་ཚ། ནུབ་བྱང་དུ་ག་ཛ། བྱང་ཤར་དུ་གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ་པ་ཡ། ལྷོ་ནུབ་ཏུ་ཕ་ཝ། ནུབ་བྱང་དུ་བ་ར། བྱང་ཤར་དུ་བྷ་ལ། ཁྱམས་ཀྱི་ཤར་དུ་ཀྵ། ནུབ་ཏུ་ཨ། ཤར་ལྷོར་ཨི། བྱང་དུ་ཨཱི། ལྷོར་ཨུ། ནུབ་བྱང་དུ་ཨཱུ། ལྷོ་ནུབ་ཏུ་ཨེ། བྱང་ཤར་དུ་ཨཻ། སྒོ་བཞིའི་ཤར་སྒོར་ང་ཤ །ལྷོ་སྒོར་ཉ་ཥ །ནུབ་སྒོར་མ་ས། བྱང་སྒོར་ཨོ་ཨ། དེ་རྣམས་ཁ་དོག་དཀར་པོ་སོ་སོའི་གདན་ལ་འཁོད་པར་གྱུར། སྥ་ར་ཎ་ཕཊ། ཅེས་བརྗོད་པས་ཡིག་འབྲུ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུཾ། སླར་འདུས་ནས་ཡིག་འབྲུ་རྣམས་ལ་ཐི མ་པས་ཡོངས་སུ་གྱུར་པ་ལས། ༀ་ཛི་ན་ཛིཀ྄ །ལཾ་དྭེ་ཥ་ར་ཏི། ཧཱུཾ་བཛྲ་དྷྲིཀ྄ །མུཾ་དྷཱ་ཏྭེ་ཤྭ་རཱི། སྭཱ་རཏྣ་དྷྲིཀ྄ །མཱཾ་མོ་ཧ་ར་ཏི། ཨཱཾ་ཨཱ་རོ་ལིཀ྄ །པཱཾ་ར་ག་ར་ཏི། ཧཱཾ་པྲ་ཛྙཱ་དྷྲིཀ྄ །ཏཱཾ་བཛྲ་ར་ཏི། ཀྵཱིཾ་ཧི་རཱ་ཛ་ཡ། ཧཱུྃ་ལཱ་སྱེ་ས་མ་ཡ་སྟྭཾ། ཏྲཾ་ཨ་གརྦྷ་ཡ། ཏྲཱྃ་མཱ་ལེ་ས་མ་ཡ་ཧོཿ ཧྲཱིཾ་ཧ་ཧཱུཾ་པདྨ་པྲ་ད་མ། ཧྲཱིཾ་གཱི་ཏི་ར་གོ་ཡ་ཧཾ། ཛྲིཾ་ཀུ་རུ་པ་ཎ། ཨཾ་ནིརྟི་རཱ་ག་ཡ་མེ། མཻ་ཏྲི་དྷ་ར་ཎི་སྭཱ་ཧཱ། ཛཿདྡྷཱུ་པེ་པྲ་ཝེ་ཤ་ཡ། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུྃ་པུཥྤེ་ཨཱ་བེ་ཤ །ཧཱུྃ་སྭ་རཱ་ཛ་ཡེ་སྭཱ་ཧཱ། བཾ་དཱི་པ་སུ་གི་རཱི། མུཾ་ཤྲཱི་ཨཱཾ་རཱ་ག་ཡ་སྭཱ་ཧཱ། ཧོཿ གནྡྷེ་ཙིཏྟ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུྃ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་པྲེཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ནེ་ཡེ་སྭཱ་ཧཱ། ཧཱུྃ་ཡ་མཱནྟ་ཀྲྀཏ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཧཱུྃ་པྲ་ཛྙཱནྟཀྲྀ་ཏ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ༀ་པདྨཱནྟ་ཀྲྀཏ་ཧཱུྃ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཧཱུྃ་བིགྷྣཱནྟ་ཀྲྀཏ་ཧཱུྃ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཅེས་སོ་སོའི་སྔགས་བརྗོད་པས། བཅོམ་ལྡན་འདས་དཔལ་རྣམ་པར་སྣང་མཛད་ལ་སོགས་ཏེ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དཀར་པོ་གཡས་འཁོར་ལོ་དང་གཡོན་རང་རྟགས་འཆང་བ་སོ་སོའི་གདན་ལ་བཞུགས་པའི་སྐུ་ལས་འོད་ཟེར་དཀར་པོའི་ཕྲེང་བ་མཁའ་ཁྱབ་ཏུ་སྤྲོ་པས་ཞི་བའི་ཕྲིན་ལས་མཛད་པར་བསམ་ལ། གདན་ལ་རྫོགས་དང་སེམས་དཔའི་ཚུལ། ཞེས་པ་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཞེས་པའི་བར་སྐུ་མདོག་སྟོན་པའི་རྐང་པ་གཉིས་དོར་བས་གསལ་ལ་གདབ། རིགས་ལྔའི་ཕྱག་རྒྱ་གནས་ལྔར་གཏུགས་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཨཱ་དཪྴ༴ ས་མ་ཏཱ༴ པྲ་ཏྱ་བེ་ཀྵ་ཎ༴ ཀྲྀ་ཏྱཱ་ནུཥྛ་ན༴ ཞེས་པས་དབང་བསྐུར། རྡོ་རྗེའི་ཕྱག་རྒྱ་གནས་གསུམ་དུ་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱ་ཀ༴ ཙིཏྟ༴ ཞེས་རྒྱས་གདབ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་ཀྱི་འཁོར་ལོ་སྤྱན་དྲངས་པར་བསམ་ལ། ༀ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ༀ་ཨེ་ཧྱེ་ཧི་ཨཱ་ན་ཡ་ཛཿཧཱུྃ་བྃ་ཧོཿ ཞེས་པས་དམ་ཚིག་པ་དང་གཉིས་སུ་མེད་པར་གྱུར་པར་བསམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ༀ་ཛིན་ཛིཀ྄ །ཅེས་ལན་གསུམ་གྱིས་བཀང་བའི་དགང་བླུགས་ཁ་སྦྱར་བ། ལུང་ལས་བཤད་པའི་ཞི་བ་ཞེ་གཉིས་ཀྱི་སྤྱི་སྔགས། ༀ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཞེས་པའི་མཐར་སྤེལ་ཚིག་སྔར་ལྟར་བཏགས་པས་ལན་གསུམ་ཕུལ། དེ་ནས་ཡམ་ཤིང་མར་ཁུ་སོགས་སྲེག་རྫས་གཞན་རྣམས་ལྷ་རང་རང་གི་སྔགས་ཀྱིས་སོ་སོར་གཙོ་འཁོར་གྱི་འགྲོས་སྦྱར་ཏེ་འབུལ་བའམ་མི་ནུས་ན། བོ་དྷི་ཙིཏྟ་སྤྱིར་བརྒྱའམ་ཉེར་གཅིག་ཙམ་བཅུ་ཚན་རེ་རེའི་མཐར་སྤེལ་ཚིག་སྔར་ལྟར་སྦྱར་ནས་འབུལ་ལོ། །ཞེས་གསུངས་པས། བསྙེན་པའི་ཁ་སྐོང་གི་དབང་དུ་བྱས་ན། རྣལ་འབྱོར་པ་བདག་གི་ལྷ་ཉེ་བར་མ་བསྒོམ་པ། སྙིང་པོ་དག་པར་མ་བགྲངས་པ། ཛཔ྄་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ་ལ་སོགས་པའི་དམ་ཚིག་ཉམས་ཆག་ཞིག་རལ་དུ་གྱུར་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་སྦྱར་རོ། །དེ་རྗེས། ༀ་ཛི་ན་ཛིཀ྄་ས་པ་རི་ཝཱ་ར་མ་ཧཱ་བ་ལིདྟ་ཁཱ་ཧིས་ལས་གཏོར་དང་། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་རཀ་ཕུལ་ནས། ༀ། ཕྱོགས་བཅུ་དུས་བཞི་རྫོགས་པ་ཡི། །ཞེས་སོགས་ཀྱིས་བསྟོད་ལ་ཐབ་ཁུང་དུ་ཡུངས་ཀར་འཐོར་ཞིང་། ༀ། ཡེ་ཤེས་ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འབར་བའི་སྦྱིན་སྲེག་འབུལ། །བདག་གིས་ཞི་བའི་ཕྲིན་ལས་མཐར་ཕྱིན་ནས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་མཛོད། །ཅེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས། བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ་མོ། །དེ་ནས་གཏང་རག་གི་མཆོད་བསྟོད་དང་བཟོད་གསོལ་བྱས་ལ། མེ་ལྷའི་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་གཞལ་ཡས་ཁང་གདན་དང་བཅས་པ་རང་ལ་ཐིམ་པར་བསམ་མོ། །སླར་ཡང་། ༀ་ཨགྷེ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་བླུགས་གཟར་བདུན་གྱི་མར་ཁུས་མེ་གསོས་ཏེ་འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། ༀ་ཨགྣེ་དེ་བ་རྀ་ཥི་ཧ་བྱ་སོགས་ཀྱིས་བསྲེག་རྫས་ལྷག་རྣམས་ཕུལ། ཀུན་བཟང་སོགས་ཀྱིས་མཆོད། ༀ་ཨགྣེ་དེ་བ་རྀ་ཥི་མ་ཧཱ་བ་ལིདྟ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་ལས་གཏོར་དང་སྨན་རཀ་ཕུལ། མེ་སྟེ་བསྲེག་བྱས་བསྟོད། ཡིག་བརྒྱས་ནོངས་པ་བཤགས། བཛྲ་མུཿས། མེ་ལྷ་ཡེ་ཤེས་པ་རང་གནས་སུ་གཤེགས། །དམ་ཚིག་པ་འབར་བའི་རྣམ་པར་གྱུར་པར་བསམ་ལ་ལས་ཀྱི་རྗེས་བསྡུ་ཞིང་བསྔོ་སྨོན་ཤིན་བརྗོད་ཀྱིས་མཐའ་བརྒྱན་པར་བྱའོ། །ཞེས་པ་འདི་ཡང་རང་དང་སྐལ་མཉམ་འགའ་ལ་ཉེར་མཁོའི་ཆེད་དུ་པདྨ་བཛྲ་གྱིས་བྲིས་པ་དགེའོ།། །།

དཔལ་གསང་བ་སྙིང་པོའི་བརྒྱུད་པ་རིན་པོ་ཆེར་གསོལ་སྨོན་ཀུ་མུད་ཕྲེང་བ། ཀཿཐོག་སི་ཏུ་ཆོས་ཀྱི་རྒྱ་མཚོ།

དཔལ་གསང་བ་སྙིང་པོའི་བརྒྱུད་པ་རིན་པོ་ཆེར་གསོལ་སྨོན་ཀུ་མུད་ཕྲེང་བ་བཞུགས་སོ། །ཨེ་ཝཾ་རང་བཞིན་རྡོ་རྗེ་དྲིལ་བུ་འཆང་། །སྒྱུ་མའི་རང་བཞིན་རོལ་པའི་གར་གྱིས་སྒེགས། །བདེ་སྟོང་རང་བཞིན་ཁ་སྦྱོར་བདུན་གྱིས་བདག །ལྷན་སྐྱེས་རང་བཞིན་རྡོ་རྗེ་སེམས་དཔའ་རྒྱལ། །གསང་བའི་བདག་པོ་རིགས་ཅན་དྲྭ་མ་ལྔ། །ལུང་བསྟན་རྡོ་རྗེ་ཀུ་ཀུ་རཱ་ཛའི་ཞབས། །ཤཱཀྱ་སུ་ཏྲི་ས་བརྒྱད་སེམས་མ་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །རྡོ་རྗེ་ཡོན་ཏན་གཟུངས་དང་ཧཱུཾ་ཀ་ར། །པྲ་བྷ་ཧ་སྟི་སངས་རྒྱས་གསང་བའི་ཞབས། །སློབ་དཔོན་པདྨ་པཎ་ཆེན་བི་མ་ལར། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །རིན་ཆེན་མཆོག་དང་གྱེ་རེ་མཆོག་སྐྱོང་བ། །རྒྱལ་བ་ཡོན་ཏན་གནུབས་ཆེན་རིན་པོ་ཆེ། །ཡོན་ཏན་རྒྱ་མཚོ་ཡེ་ཤེས་རྒྱ་མཚོ་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །བློ་གྲོས་བྱང་ཆུབ་བདེ་གཤེགས་ཟུར་པོ་ཆེ། །ཤེས་རབ་གྲགས་པ་གསང་བདག་སྒྲོ་ཕུག་པ། །རྫོགས་ཆེན་པར་གྲགས་བླ་མ་རིན་པོ་ཆེ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། ༈ །སྐུ་གསུམ་མངོན་དུ་གྱུར་པའི་ཀཿཐོག་པ། །དེ་སྲས་ས་བཅུའི་དབང་ཕྱུག་གཙང་སྟོན་ཞབས། །ཐུགས་རྗེ་མཚུངས་མེད་བྱམས་པ་འབུམ་པ་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །ནམ་མཁའ་རྡོ་རྗེ་ཐུགས་རྗེ་ཡེ་ཤེས་དང་། །སྟོན་པ་དབང་འབྱོར་རྗེ་བཙུན་དཔལ་འབར་བ། །མགོན་པོ་རྒྱལ་མཚན་ཚུལ་ཁྲིམས་རྒྱལ་མཚན་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །དྷརྨ་ཀླ་ཀྵ་ཡེ་ཤེས་རྒྱལ་མཚན་རྗེ། །ནམ་མཁའ་རྒྱལ་མཚན་མཚུངས་མེད་ནམ་མཁའ་དཔལ། ནམ་མཁའ་རྒྱ་མཚོ་ཆོས་ཀྱི་དབང་པོ་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །བསོད་ནམས་རྡོ་རྗེ་ཧེ་པ་ཆོས་འབྱུང་དང་། །ཤཱཀྱ་བཀྲ་ཤིས་རིན་ཆེན་རྡོ་རྗེའི་ཞབས། །སངས་རྒྱས་བཀྲ་ཤིས་ཤཱཀྱ་ཚེ་རིང་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །ཨུ་རྒྱན་ཕུན་ཚོགས་ཐུགས་ཀྱི་རྡོ་རྗེ་བ། །བློ་གྲོས་ཆེན་པོ་རྗེ་བཙུན་བླ་མའི་ཞབས། །དཔལ་ལྡན་རྡོར་སེམས་དཀྱིལ་འཁོར་དབང་ཕྱུག་དངོས། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ། །དམ་པོའི་མཛོད་འཆང་ཀུན་བཟང་དགོངས་པའི་རྩལ། །མངོན་རྫོགས་དུས་གསུམ་སྒྱུ་འཕྲུལ་བླ་མ་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །ལྷུན་སྡུག་ཞི་ཚུལ་སྒྱུ་འཕྲུལ་དྲྭ་བ་དང་། །རབ་འབར་དཔལ་ཆེན་ཁྲག་འཐུང་འཁོར་ལོའི་ལྷ། །གནས་ཡུལ་ཌཱཀྐི་མ་མགོན་བསྟན་སྲུང་ལ། །གསོལ་འདེབས་ཕྱག་འཚལ་བྱིན་རླབས་དངོས་གྲུབ་སྩོལ། །བཀའ་རྒྱུད་རྣམས་ལ་གསོལ་བ་བཏབ་པ་ཡིས། །བདག་ཅག་སློབ་འབངས་འཁོར་བཅས་མ་ལུས་ཀུན། །ཕྱི་ཡིས་གཡེང་བས་བར་དུ་མི་ཆོད་ཅིང་། །ལྟ་སྤྱོད་ཏིང་འཛིན་སྒོམ་པ་རོ་མཉམ་ཤོག །འདི་ལས་ཕྱི་མ་རང་ལས་གཞན་གྱི་དོན། །གཙོ་ཆེར་ཤེས་ནས་རྨད་བྱུང་བྱང་ཆུབ་ཀྱི། །སྤྱོད་པ་སློབ་ཅིང་དཔལ་ལྡན་བླ་མ་ལས། །རྣམ་དག་དབང་བཞིས་བདག་རྒྱུད་སྨིན་པར་ཤོག །རྟོགས་བྱ་གཞི་རྒྱུད་དཔལ་ལྡན་གསང་བ་སྙིང་། །འཆིང་གྲལ་མེད་པའི་གནས་ལུགས་གདོད་མའི་གཤིས། །བདེན་པ་དབྱེར་མེད་རྟོགས་བྱེད་ཐབས་མཆོག་ལམ། །ལུང་གི་སྤྱི་རྒྱུད་ཆེན་པོ་གཏན་འབེབས་ཤོག །ཤེས་རབ་གསུམ་གྱིས་སེམས་ལ་ལེགས་བསྐྱེད་དེ། །ཐབས་ཀྱིས་ངེས་དང་ཤེས་རབ་རྣམ་གྲོལ་ལམ། །ཤེས་འཇུག་རིམ་དང་ཅིག་ཆར་དབང་པོ་བཞིན། །རྟོགས་གོམས་ལམ་གྱུར་རིག་འཛིན་བཞི་འགྲུབ་ཤོག །ལམ་གྱི་ཆ་རྐྱེན་ལྟ་སྤྱོད་དཀྱིལ་འཁོར་དབང་། །དམ་ཚིག་ཕྲིན་སྒྲུབ་ཏིང་འཛིན་མཆོད་སྔགས་རྒྱ། །རྒྱུད་ཀྱི་དངོས་པོ་བཅུ་ལ་ལེགས་མཁས་ཤིང་། །བསྐྱེད་རྫོགས་རིམ་གཉིས་མཐའ་རུ་ཕྱིན་པར་ཤོག །གྲུབ་པ་མཐར་ཕྱིན་འབྲས་ཆོས་ཉེར་ལྔའི་བདག །དང་པོའི་སངས་རྒྱས་ཐུགས་ཀྱི་ཐིག་ལེ་ལས། །བགྲང་ཡས་འགྲོ་ལ་མཁའ་ཁྱབ་སྤྲུལ་པའི་ཉི། །ཕུན་ཚོགས་ཕན་བདེའི་འོད་སྟོང་རྒྱས་པར་ཤོག །ཅེས་པའང་ཆོས་ཀྱི་རྒྱ་མཚོས་འཇུག་པ་བདེ་བའི་ཕྱིར་བཀོད་པའོ། །དགེ་ལེགས་འཕེལ།།

དཔལ་གསང་བ་སྙིང་པོའི་བརྒྱུད་པ་རིན་པོ་ཆེ་ལ་གསོལ་བ་འདེབས་པ་དང་ལམ་རིམ་སྨོན་ལམ་ཕུན་ཚོགས་དཔག་བསམ་སྤྲིན་གྱི་མེ་ཏོག ཀཿཐོག་སི་ཏུ་ཆོས་ཀྱི་རྒྱ་མཚོ།

ཤྲཱི གུ ཧྱ ག རྦྷ སྱ པ ར སྤ རཿ ར ཏྣ ན པྲཱ ཪྠ ན ཙ། མཱ རྒ ཀྲ མ པྲ ཎི དྷཱ ན ཌྒུ ཏི སུ མེ གྷེ ན པཱུ ཥྤཾ ནཱ མ བྷི ཧ ར ཏི སྨ།
དཔལ་གསང་བ་སྙིང་པོའི་བརྒྱུད་པ་རིན་པོ་ཆེ་ལ་གསོལ་བ་འདེབས་པ་དང་། ལམ་རིམ་སྨོན་ལམ་ཕུན་ཚོགས་དཔག་བསམ་སྤྲིན་གྱི་མེ་ཏོག་ཅེས་བྱ་བ་བཞུགས་སོ། །
ཀ་དག་ཀུན་བཟང་གདོད་ནས་ཡེ་སངས་རྒྱས། །འཁོར་འདས་མཉམ་ཉིད་གཉིས་མེད་ཀློང་དུ་གྱུར། །དང་པོའི་སངས་རྒྱས་དཔལ་ལྡན་རྡོ་རྗེ་འཆང་། །གསང་བདག་ཆེན་པོ་ཁྱེད་ལ་མི་ཕྱེད་འདུད། །རྒྱལ་སྲས་དབང་ཕྱུག་མཐུ་སྟོབས་ནུས་པའི་གཏེར། །སངས་རྒྱས་སྟོང་གི་བསྟན་པ་འཛིན་བྱེད་ཅིང་། །གདུལ་དཀའ་འདུལ་མཛད་ཕྱག་ན་རྡོ་རྗེ་བསྣམས། །གསང་བདག་གཉིས་པའི་ཞབས་ལ་གསོལ་བ་འདེབས། །ཐུབ་པས་ལུང་བསྟན་ཨོ་རྒྱན་ཌཱཀྐིའི་གཙོ། །གསང་སྔགས་རྒྱུད་སྡེ་ཟབ་མོའི་མཛོད་འཆང་བ། །རིན་ཆེན་མང་གི་རྣམ་འཕྲུལ་ཐམས་ཅད་མཁྱེན། །ཀུ་ཀུ་རཱ་ཛའི་ཞབས་ལ༴ རྒྱལ་བའི་དངོས་སློབ་མ་འོངས་ལུང་བསྟན་པ། །ཆོས་ཀྱི་རྒྱལ་པོ་ངེས་དོན་རྒྱ་མཚོའི་བདག །ཚེ་གཅིག་སངས་རྒྱས་ས་ལ་གཤེགས་མཛད་པ། །ཨིནྟྲ་བྷུ་ཏིའི་ཞབས་ལ༴ གསུང་རབ་རྒྱུད་སྡེ་རྒྱ་མཚོའི་ཕ་རོལ་ཕྱིན། །དོན་བཅུད་གསང་སྔགས་ཟབ་མོའི་གནས་ལུགས་རྟོགས། །འདོད་ཡོན་སྤང་མེད་རྣམ་དག་ལམ་དུ་ཁྱེར། །ཤཱཀྱ་སུ་ཏྲིའི་ཞབས༴ གསུང་རབ་རྒྱ་མཚོའི་གཞུང་དོན་ཁོང་དུ་ཆུད། །ཀ་དག་གནས་ལུགས་རང་བྱུང་འགྱུར་མེད་རྟོགས། །ཕུང་ཁམས་ལྷར་སྨིན་སྟོབས་ཀྱིས་ཕ་རོལ་སོན། །ས་བརྒྱད་སེམས་མའི་ཞབས་ལ༴ ཐེག་ཆེན་རྣལ་འབྱོར་གསང་སྔགས་ཟབ་མོའི་བདག །བླ་མེད་རྡོ་རྗེ་ཐེག་པའི་དོན་རྟོགས་ནས། །ཚེ་གཅིག་ཚེ་འདིར་རིག་འཛིན་མཆོག་ཐོབ་པ། །རྡོ་རྗེ་ཡོན་ཏན་གཟུངས་ལ་གསོལ༴ ཡང་དག་ཐུགས་ཀྱི་སྒོར་ཞུགས་དངོས་གྲུབ་བརྙེས། །མི་འགྱུར་བདེ་སྟོང་དབྱེར་མེད་རྡོ་རྗེ་འཛིན། །ཟབ་ལམ་བསྟན་པའི་མངའ་བདག་ཆོས་ཀྱི་རྗེ། །གྲུབ་ཆེན་ཧཱུྃ་ཀ་ར་ལ༴ གསང་སྔགས་ཕྱི་ནང་ཆོས་ལ་མངའ་བརྙེས་ཤིང་། །རྒྱལ་བའི་དཀྱིལ་འཁོར་ཚོགས་རྣམས་ཞལ་གཟིགས་ནས། །སྣ་ཚོགས་ཐབས་ཀྱིས་འགྲོ་བའི་དོན་མཛད་པ། །ཕྲ་ཆེན་ཧ་སྟིའི་ཞབས་ལ་གསོལ༴ འཇམ་དཔལ་དབྱངས་ཀྱིས་ཐུགས་རྗེས་རྗེས་བཟུང་ནས། །ཕྱི་ནང་ཐེག་པའི་ཆོས་རྣམས་ཐུགས་ལ་རྫོགས། །ངོ་མཚར་གཞུང་དང་གདམས་པ་དུ་མའི་གཏེར། །སངས་རྒྱས་གསང་བའི་ཞབས༴ འོད་དཔག་མེད་ཀྱི་རྣམ་འཕྲུལ་འཆི་མེད་སྐུ། །དྷ་ན་ཀོ་ཥའི་མཚོ་གླིང་པདྨར་སྐྱེས། །སངས་རྒྱས་གཉིས་པ་ཟབ་རྒྱས་ཆོས་གཏེར་བདག །ཨུ་རྒྱན་པདྨའི་ཞབས་ལ༴ པཎ་ཆེན་དུ་མ་ཚོགས་པའི་དབུས་ན་མཛེས། །རིག་པའི་གནས་ལྔ་མ་ལུས་ཐུགས་ལ་རྫོགས། །རྒྱ་གར་མཁས་པའི་མཆོག་གྱུར་བཀའ་དྲིན་བདག །དྲི་མེད་བཤེས་གཉེན་ཞབས༴ ལུང་རིགས་གསུང་གི་དབང་ཕྱུག་མངའ་བརྙེས་ཤིང་། །ཕ་རོལ་སྨྲ་བའི་ལོག་རྟོག་ཚར་གཅོད་ཅིང་། །ཟབ་རྒྱས་ཆོས་ཀྱི་རྒྱ་མཚོ་བསྒྱུར་མཛད་པ། །ལོ་ཙ་རིན་ཆེན་མཆོག་ལ༴ ཐུབ་དབང་བསྟན་པའི་རྒྱུ་འབྲས་ཐེག་པ་ལ། །ཇི་བཞིན་མ་ནོར་མངོན་སུམ་རྟོགས་གྱུར་ནས། །ཟག་མེད་དགོངས་པ་མཆོག་ལ་མངའ་བརྙེས་པ། །ཀྱེ་རུ་མཆོག་སྐྱོང་ཞབས༴ རྣམ་དག་ཐོས་པའི་ལུང་ཆོས་ཐུགས་ལ་རྫོགས། །གསང་སྔགས་ཟབ་མོའི་བསྒྲུབ་རྒྱུད་བསྟན་པ་འཛིན། །ཟག་མེད་ཟུང་འཇུག་མངོན་སུམ་རྟོགས་པ་ཡི། །རྒྱལ་བ་ཡོན་ཏན་ཞབས་ལ༴ ཐུབ་དབང་བསྟན་པའི་དཔལ་ལ་མངའ་བརྙེས་ཤིང་། །མི་འགྱུར་ཡེ་ཤེས་གོ་འཕང་མཆོག་ཐོབ་ནས། །ལུས་ཅན་ཐེག་མཆོག་ལམ་ལ་བཀོད་མཛད་པ། །ཡེ་ཤེས་རིན་ཆེན་ཞབས༴ མཁྱེན་རབ་སྟོང་ཉིད་རྒྱ་མཚོ་ཆེན་པོ་ལས། །ཞིང་མཆན། འགགས་མེད་སྙིང་རྗེའི་རླབས་ཆེན་ཀུན་ནས་གཡོས། །གསང་སྔགས་ཟབ་དོན་རིན་ཆེན་འབྱུང་བའི་གནས། །སྲས་ཀྱི་དམ་པ་ཁུ་ལུང་བ། ཡོན་ཏན་རྒྱ་མཚོའི་ཞབས་ལ༴ དེ་གནུབ་ཉིད་སྐུ་ཡི་སྲས་གྱུར་གསང་སྔགས་འཛིན། །རབ་འབྱམས་བསྟན་པའི་སྲོག་ཤིང་མཛོད་གསུམ་བདག །ཚད་མེད་ཐུགས་རྗེས་བསླབ་བྱ་གཏིང་ནས་རྫོགས། །ཡེ་ཤེས་རྒྱ་མཚོའི་ཞབས་ལ༴ གསང་སྔགས་ཟབ་མོའི་གནས་ལུགས་ཁོང་དུ་ཆུད། །ཡང་ཕུར་སྨན་གསུམ་རྒྱུད་ལུང་མན་ངག་བཅས། །མཁས་གྲུབ་གཉིས་ཀྱི་རྒྱལ་རྒྱུད་འཛིན་མཛད་པ། །བློ་གྲོས་བྱང་ཆུབ་ཞབས་ལ༴ སྒྱུ་འཕྲུལ་ཐེག་པའི་ཆོས་ལ་དབང་ཐོབ་ནས། །ཉོན་མོངས་ཡེ་ཤེས་ཆེན་པོར་ལམ་དུ་ཁྱེར། །གསང་སྔགས་མངའ་བརྙེས་བསྟན་འཛིན་ཆོས་ཀྱི་རྗེ། །བདེ་གཤེགས་ཟུར་ཆེན། ཤཱཀྱ་འབྱུང་གནས་ཞབས་ལ༴ བསྐལ་མང་སྔོན་ནས་སྦྱངས་པ་ཞིབ་པའི་མཐུས། །ཐེག་མཆོག་བསྐྱེད་རྫོགས་གསུམ་གྱིས་དོན་རྟོགས་ནས། །བདག་གཞན་མཆོག་གི་དོན་ལ་སྦྱར་མཛད་པ། །ཟུར་ཆུང་ཤེས་རབ་གྲགས་པ་ལ༴ གནས་ཀྱི་ཁྱད་འཕགས་རྐེ་ལུང་ཞེས་བྱ་དེར། །མདོ་བཞི་སྔོ་ལྔ་ལ་སོགས་གསང་སྔགས་ཆོས། །མ་ལུས་ཐུགས་སུ་ཆུད་ནས་བསྒྲུབ་པ་མཛད། །ཡང་ཁྱེད་བླ་མའི་ཞབས་ལ༴ གཞུང་ལུགས་རབ་འབྱམས་དོན་ལ་མངའ་བརྙེས་ཤིང་། །གདུལ་བྱ་མཐའ་དག་ཐེག་པའི་ལམ་ལ་གཟུད། །སངས་རྒྱས་བསྟན་པ་རྒྱ་ཆེར་སྤེལ་མཛད་པ། །རྗེ་སྒྲོ་ཕུག་པ། ཤཱཀྱ་སེང་གེའི་ཞབས༴ ཐེག་པ་མཐའ་དག་ཁོང་ཆུད་རྫོགས་ཆེན་དོན། །ཇི་བཞིན་རྟོགས་ནས་གཟུང་འཛིན་རང་སར་གྲོལ། །བདག་གཞན་དོན་གཉིས་ཕུན་སུམ་ཚོགས་པའི་དཔལ། །འཇམ། རྫོགས་ཆེན་པ་ཞེས་གྲགས་ལ༴ རྒྱ་གར་ཡུལ་དུ་བྱང་ཆུབ་སེམས་སྦྱངས་ནས། །གངས་ཅན་ཁྲོད་འདིར་གསང་སྔགས་བསྟན་པ་སྐྱོངས། །བདེ་བ་ཅན་དུ་རྒྱལ་སྲས་བྱང་ཆུབ་སེམས། །ས་བཅུའི་དབང་ཕྱུག་དམ་པ་དེ་ལ་འདུད། །ལུང་རིགས་མན་ངག་ཀུན་ལ་མཁས་གྱུར་ནས། །མདོ་རྒྱུད་དགོངས་པའི་ཐུགས་ལ་ཉི་མ་ཤར། །བསྐྱེད་རྫོགས་གཉིས་ཀྱིས་བདག་གཞན་རྒྱུད་སྦྱངས་པ། །ཆོས་རྗེས་གཙང་སྟོན་ཞབས་ལ༴ ཆོས་ཉིད་རྣམ་དག་བྱམས་པའི་རི་བོ་ལ། །སྙིང་རྗེའི་འབྲས་ལྡན་དཔག་བསམ་འབུམ་གྱིས་བརྒྱན། །མཚན་མཆོག་དོན་ལྡན་འགྲོ་མགོན་ཆོས་ཀྱི་རྗེ། །བྱམས་པ་ཆེན་པོའི་ཞབས་ལ༴ སྣང་སྟོང་གཉིས་མེད་ཆོས་དབྱིངས་ནམ་མཁའ་ལ། །གནས་ལུགས་འགྱུར་མེད་རང་བྱུང་རྡོ་རྗེའི་སྐུ། །ལུང་བསྟན་མཆོད་ཐོབ་ཙ་སྡེ་སྤྱན་སྔ་བ། །ནམ་མཁའ་རྡོ་རྗེའི་ཞབས་ལ༴ རྒྱུད་སྡེ་བསྲུང་ཞིང་གསང་སྔགས་རྡོ་རྗེ་འཛིན། །ཐོས་བསམ་སྒོམ་པའི་བྱ་བ་མཐར་ཕྱིན་ནས། །འཆད་རྩོད་རྩོམ་པའི་དོན་ལ་མ་རྨོངས་པ། །ཐུགས་རྗེ་ཡེ་ཤེས་ཞབས་ལ༴ ལྡེམ་དགོངས་བརྒྱད་དང་མཐའ་དྲུག་ཚུལ་བཞི་དང་། །རྟོན་པ་བཞི་དང་གཞུང་གི་འབོད་ལེན་གྱིས། །གསང་སྔགས་ཟབ་མོའི་རྒྱུད་གཞུང་གཏན་ལ་དབབ། །སྟོན་པ་དབང་འབྱོར་ཞབས་ལ༴ དམ་རྫས་བདུད་རྩིའི་རྒྱ་མཚོ་ཆེན་པོར་བསྐྱིལ། །ལུང་རིགས་དྲི་མེད་པདྨོའི་ཁ་ཕྱེ་ནས། །བློ་གསལ་རྐང་དྲུག་ལྡན་ལ་དགའ་སྟོན་འགྱེད། །རྗེ་བཙུན་དཔལ་འབར་ཞབས་ལ༴ ཀུན་མཁྱེན་ཟག་སྤངས་བསྟན་པའི་མཛོད་འཛིན་པ། །སྡོམ་གསུམ་རྣམ་དག་ཉེས་ལྟུང་དྲི་མས་དབེན། །མཚུངས་མེད་ཆོས་རྗེ་གདུལ་བྱའི་མགོན་གྱུར་པ། །སྟོན་པ་མགོན་རྒྱལ་ཞབས་ལ༴ དྲི་མེད་ཚུལ་ཁྲིམས་རྣམ་དག་རྒྱལ་བའི་མཚན། །ཐེག་མཆོག་ཟབ་དོན་མ་ལུས་ཐུགས་སུ་ཆུད། །མཁྱེན་རབ་འཇམ་དཔལ་དབྱངས་དང་གཉིས་མེད་པ། །ཡང་ཁྲོད་པ ། ཚུལ་ཁྲིམས་རྒྱལ་མཚན་ཞབས་ལ༴ མཁས་པ་རྒྱ་མཚོ་ཚོགས་པའི་དབུས་ན་མཛེས། །སྣ་ཚོགས་ཐེག་པའི་གཞུང་ལུགས་བཤད་རྩལ་ཆེ། །རང་འདོད་མེད་ཅིང་གཞན་ཕན་ཁོ་ནར་སེམས། །བྲའོ། དྷཱརྨ་ཀླ་ཀྵའི་ཞབས་ལ༴ མདོ་སྔགས་རྒྱ་མཚོའི་དབུས་སུ་ལེགས་འཁྲུངས་ཤིང་། །གསུང་རབ་པདྨོའི་མངའ་བདག་ཆོས་ཀྱི་རྗེ། །དོན་བཅུ་སྦྲང་རྩི་ལྟ་བུའི་མངའ་བདག་ཅན། །བུ་འབོར་བ། ཡེ་ཤེས་རྒྱལ་མཚན་ཞབས་ལ༴ མང་ཐོས་གསུང་རབ་ཀུན་གྱི་མཐར་སོན་ཅིང་། །རྒྱལ་བའི་དབང་པོ་ཇི་བཞིན་མཁྱེན་གྱུར་ནས། །མཁས་མཆོག་རྣམས་ཀྱི་གཙུག་གི་རྒྱན་གྱུར་པ། །དཔལ་འབར་དྲུང་བ་ནམ་མཁའ་རྒྱལ་མཚན་ཞབས་ལ༴ གཞུང་ལུགས་རྒྱ་མཚོའི་གླིང་ན་ཡོན་ཏན་གྱི། །གདེངས་ཀ་རབ་འབར་སྟོང་ཉིད་ཕུགས་སྒྲ་སྒྲོགས། །བློ་གྲོས་ཀླུ་དབང་ཚུལ་ཁྲིམས་ནོར་བུའི་གཏེར། །སྒྲོ་འདོགས་པ། ནམ་མཁའ་དཔལ་བའི༴ རབ་དཀར་མཁྱེན་པའི་ས་གཞི་ཡངས་པ་ལ། །ཐུགས་རྗེས་དཔག་བསམ་འདོད་འབྱུང་ཁོ་ལགས་ཡངས། །ནུས་པ་མི་ཟད་གཏེར་མངའ་འགྲོ་བའི་མགོན། །ནམ་མཁའ་རྒྱ་མཚོའི་ཞབས་ལ༴ གཏིང་མཐའ་བྲལ་བ་ཆོས་ཉིད་བདེན་དོན་གཟིགས། །ལུང་རྟོགས་ཡོན་ཏན་ནོར་བུའི་མཛོད་འཆང་བ། །སྒྲུབ་པའི་རྒྱལ་མཚན་འཛིན་པའི་བླ་མ་བརྙེས། །ཧོར་པོ། ཆོས་ཀྱི་དབང་པའི་ཞབས་ལ༴ ཤཱཀྱའི་བསྟན་པ་ཆུ་གཏོར་ཁ་བ་དཀར་པོ་བསྲུབས་པ་ལས། །དོན་གཉིས་བསིལ་ཟེར་སྟོང་འཕྲོ་སྙིགས་དུས་སྐྱབས། །མཐའ་ཀླས་རྒྱུད་པའི་མུན་སེལ་རི་བོང་འཛིན། །པུ་ནྱ་བཛྲའི་ཞབས་ལ༴ སྐྱོན་བྲལ་བསླབ་པ་གསུམ་གྱིས་རྒྱུད་ཕྱུག་ཅིང་། །དྲི་བྲལ་བསྐྱེད་རྫོགས་གསུམ་གྱི་དོན་གཟིགས་ནས། །སྒྲིབ་བྲལ་སྐུ་གསུམ་དགོངས་པ་མངོན་གྱུར་པ། །ཧེ་པ། ཆོས་ཀྱི་འབྱུང་གནས་ཞབས་ལ༴ པདྨའི་གསང་བསྟན་ཕྱོགས་བརྒྱར་སྤེལ་བ་ལ། །ཚད་མེད་ཐུགས་རྗེས་དགོངས་པའི་དཔལ་ཐོབ་ཅིང་། །གསང་སྔགས་སྔ་འགྱུར་ཆོས་ལ་མངའ་བརྙེས་པ། །སྟག་བུ་ཤཀྱ་བཀྲ་ཤིས་ཞབས༴ བཀའ་གཏེར་གཞུང་ལ་མཁྱེན་པའི་སྤྱན་རས་ཡངས། །དོན་བརྒྱུད་ཡིད་བཞིན་ནོར་བུ་བདག་གིར་ཐོབ། །ལྟ་དགོངས་རྣམ་དག་ཐུགས་རྗེ་མཚུངས་པ་མེད། །རོང་སྟོན་སོག་མོ་བ། རིན་ཆེན་རྡོ་རྗེའི་ཞབས༴ ཆོས་ཀུན་མཐར་ཐུག་ཟབ་ལམ་རྫོགས་པ་ཆེའི། །རྟོགས་པས་རྒྱུད་ཕྱུག་རིམ་གཉིས་གདེངས་དང་ལྡན། །པདྨས་རྗེས་བཟུང་ཡེ་ཤེས་ཆེན་པོ་བརྙེས། །དགོན་ཉིན་པ། བུདྷ་མངྒའི་ཞབས་ལ༴ རིན་ཆེན་བྱང་ཆུབ་སེམས་ལ་བརྟན་པ་ཐོབ། །དབང་གདམས་མན་ངག་མང་པོས་ཐུགས་རྒྱུད་ཁེངས། །བསྐྱེད་རྫོགས་བསྙེན་བསྒྲུབ་མང་པོའི་ཕ་རོལ་སོན། །ལྕག་མདུད། ཤཱཀྱ་ཚེ་རིང་ཞབས་ལ༴ ནང་དུ་རིམ་གཉིས་རྟོགས་པ་བརྟན་གྱུར་ཀྱང་། །སྦས་པའི་ཚུལ་གྱིས་སྒྲུབ་པ་མཐའ་རུ་བསྐྱོལ། །ཟབ་ཆོས་འདི་ལས་རྟོགས་པ་མཆོག་བརྙེས་པ། །སྡེར་ནང་། ཨུ་རྒྱན་ཕུན་ཚོགས་ཞབས༴ མདོ་སྔགས་གྲུབ་མཐའ་རྒྱ་མཚོའི་ཕ་རོལ་སོན། །རྒྱ་ཆེན་རྒྱུད་སྡེའི་དགོངས་པ་མངོན་དུ་གྱུར། །བདེ་སྟོང་ཉམས་ཀྱིས་སྒེགས་པའི་ཧེ་རུ་ཀ །ཐུགས་ཀྱི་རྡོ་རྗེའི་ཞབས༴ ངེས་འབྱུང་ཆེན་པོས་ཆོས་བརྒྱད་མགོ་སྙོམས་ཤིང་། །སྙིང་རྗེ་ཆེན་པོས་བྱང་ཆུབ་ཐུགས་འབྱོངས་ཏེ། །ཡེ་ཤེས་ཆེན་པོས་སྣང་སྲིད་སྒྱུ་མར་གཟིགས། །བློ་གྲོས་ཆེན་པོའི་ཞབས༴ རྨད་བྱུང་ལེགས་བཤད་གསུང་གི་ཉི་འོད་ཀྱིས། །རྨོངས་པའི་རབ་རིབ་ཀུན་ནས་འཕྲོག་བྱེད་ཅིང་། །སྐལ་བཟང་ཐར་པའི་པད་ཚལ་རྒྱས་བྱེད་པ། །དཔལ་ལྡན་བླ་མའི་ཞབས༴ འབར་དེས་རྒྱལ་བའི་དཀྱིལ་འཁོར་ལྷ་ཚོགས་དང་། །གནས་ཡུལ་ཞིང་སྔགས་ལྷན་སྐྱེས་ཌཱཀྐིའི་ཚོགས། །བསྟན་སྲུང་མ་མགོན་གནོད་སྦྱིན་ལྕམ་དྲལ་ལ། །མོས་གུས་གདུང་བས་གསོལ་འདེབས་ཕྱག་འཚལ་ལོ། །འདི་ལྟར་སྣང་གྲགས་ལྷ་ཡི་ངོ་བོ་ཉིད། །གཞི་ཡི་སངས་རྒྱས་སེམས་ཅན་ཐམས་ཅད་དང་། །གསང་སྔགས་སྒོར་ཞུགས་གསང་བའི་དམ་ཚིག་ཅན། །རྡོ་རྗེའི་མཆེད་བཅས་རྒྱལ་བའི་དཀྱིལ་འཁོར་ལོར། །རྡོ་རྗེ་མཆོག་གསུམ་འདུ་འབྲལ་མེད་པའི་གཤིས། །བྱ་རྩོལ་བྲལ་བ་བདེ་ཆེན་སྙིང་པོ་ལ། །རང་བབ་བཞག་པ་བཅོས་སླད་ཀུན་བྲལ་བར། །རང་ངོ་ཤེས་པའི་ངང་ནས་གསོལ་བ་འདེབས། །དེ་ལྟར་དཔལ་ལྡན་བརྒྱུད་གསུམ་བླ་མ་ལྟར། །བྱང་ཆུབ་བར་དུ་སྐྱབས་མཆི་གསོལ་འདེབས་ན། །ལམ་བཟང་བསྒྲུབ་པའི་འགལ་རྐྱེན་ཀུན་ཞི་ཞིང་། །མཐུན་རྐྱེན་སྨོན་པའི་དོན་ཀུན་འགྲུབ་པར་མཛོད། ༈ །ཤིན་ཏུ་རྙེད་དཀའི་དལ་རྟེན་ཡིད་བཞིན་ནོར། །ཐོབ་དཀའ་འཇིགས་སླ་ཆུ་ཡི་ལྦུ་བ་ལྟར། །ཡིད་བརྟན་མི་རུང་སྲིད་པའི་བདེ་བ་ལ། །ཞེན་པ་སྙིང་ནས་ལྡོག་པར་བྱིན་གྱིས་རློབས། །འཇིགས་རུང་འཁོར་བའི་མེ་འོབས་ཉམས་ང་བར། །གངྒཱའི་ཆུ་ལྟར་བསིལ་བའི་ལོག་ཤེས་ཀྱིས། །ཐར་མེད་དུས་རིང་ལས་ཀྱིས་མནར་བའི་འགྲོར། །ཤིན་ཏུ་སྙིང་རྗེ་ཆེན་པོས་ཡིད་དྲངས་ཏེ། །སྐྱབས་གནས་རིན་ཆེན་གསུམ་གྱི་གདུགས་དཀར་དབུབས། །ཕན་བདེའི་འདོད་པ་འཇོ་བའི་ངལ་འཚོ་ཐོབ། །རླབས་ཆེན་བྱང་ཆུབ་སེམས་དང་རྒྱལ་སྲས་ཀྱི། །སྤྱོད་པ་རྒྱ་མཚོ་འབྱོངས་པར་བྱིན་གྱིས་རློབས། །གསང་ཆེན་གཉིས་མེད་མཐར་ཐུག་ལུང་གི་སྤྱི། །རྒྱུད་ཆེན་དཔལ་ལྡན་སྒྱུ་འཕྲུལ་གསང་སྙིང་སྒོར། །དོན་ཆེན་ཚེ་འདིར་འགྲུབ་པའི་ཐབས་གཅིག་པུ། །བརྩེ་ཆེན་མཚན་ཉིད་བརྒྱད་ལྡན་བླ་མ་ལས། །སངས་རྒྱས་ལས་ཀྱང་དཀོན་པའི་རྡོ་རྗེའི་ཐེག །ཕན་ནུས་ཟབ་མོའི་དབང་གི་ཆུ་བོ་ཡིས། །བདག་རྒྱུད་སྒྲིབ་པའི་དྲི་མ་ལེགས་འཁྲུད་ཅིང་། །རྡོ་རྗེ་གསུམ་ཞལ་སྙིང་དབུས་འཛུམ་པར་ཤོག །དབང་དུས་གདན་གསུམ་དཀྱིལ་འཁོར་བླ་མར་བཅས། །དཔང་དུ་བཙུགས་ནས་སྲུང་བར་ཁས་བླངས་པའི། །རྩ་བ་ཡན་ལག་སྡོམས་པའི་དམ་ཚིག་ཚོགས། །སྙིང་དང་མིག་ལས་གཅེས་པར་སྲུང་བར་ཤོག །རྨད་བྱུང་རྒྱུད་སྡེའི་རྒྱ་མཚོ་ཐོས་བསམ་གྲུ། །བརྩོན་འགྲུས་ཤེས་རབ་བ་དན་དཀར་པོ་ཡིས། །ལེགས་པར་བརྒལ་ཏེ་ཟབ་རྒྱས་རིན་ཆེན་གླིང་། །སྒོམ་པའི་ནོར་བཟང་བདེ་བླག་རྙེད་པར་ཤོག །རང་སེམས་སྣང་བ་འཁྲུལ་པའི་གཉིས་ཆོས་ཀུན། །སྣང་དུས་ཉིད་ནས་དོན་དམ་མཉམས་པ་ཉིད། །དག་པ་རབ་འབྱམས་ཀུན་རྫོབ་རྒྱལ་བའི་དངོས། །རྒྱུད་དོན་ཆ་རྐྱེན་འབྲས་བུ་གདོད་མ་ནས། །རང་གནས་རྡོ་རྗེའི་ལུས་ཀྱི་འཁོར་ལོ་དྲུག །སྲོག་ཤིང་གསུམ་དབུས་ཨེ་ཝམ་མ་ཡའི་གཟུགས། །རྩ་དབྱིབས་འོད་འབྱུང་གཞི་ཡི་གསང་བ་སྙིང་། །རྟོགས་པའི་གེགས་གྱུར་གློ་བུར་སྒྲིབ་བསལ་ནས། །བདེན་གཉིས་དབྱེར་མེད་གཞི་རྩ་བྲལ་བའི་ཡུལ། །དངོས་ཚུལ་གཏན་ཚིགས་ཤེས་རབ་མིག་གིས་གཞལ། །རྟག་ཆད་གཟུང་འཛིན་རང་རིག་དོན་དམ་བདེན། །བདེན་གཉིས་རིས་ཕྱེའི་དྲི་བྲལ་དེ་ཉིད་རིག །བཟང་ངན་ཕྱོགས་རིས་བློ་འདས་གཉུག་མའི་གཤིས། །ལམ་དང་རྒྱུད་ཀྱི་རྒྱུ་ཤེས་ལྟ་བ་ནི། །ཚངས་ལ་མ་ནོར་ངོ་སྤྲོད་དོན་མཐོང་ཤོག །བསམ་གཏན་འགལ་རྐྱེན་ཚོགས་སྤངས་དབེན་པའི་གནས། །ཡིད་འོང་སྒྲ་མེད་ཞི་བའི་ནགས་ཚལ་དུ། །འཆི་བ་ཆོས་སྐུ་སྟོང་པ་ཆེན་པོ་ཡི། །དེ་ཏིང་རྣལ་འབྱོར་ཟབ་མོས་སྦྱོང་བར་ཤོག །ལོག་རྟོག་མཁའ་དབྱིངས་ཆུ་སྐྱེས་སྲིད་པའི་ཚལ། །སྡུག་བསྔལ་མྱོས་པའི་སེམས་ཅན་ཡུལ་མེད་ལ། །སྙིང་རྗེ་ཀུན་སྣང་སྒྱུ་མའི་རྣལ་འབྱོར་གྱིས། །བར་དོ་ལོངས་སྤྱོད་རྫོགས་སྐུར་སྦྱོང་བར་ཤོག །རྣམ་རྟོག་རླུང་གིས་མ་བསྐྱོད་ཏིང་ངེ་འཛིན། །སྒྲོན་མེ་རབ་གསལ་ཕྲ་རགས་ཆོ་ག་གསུམ། །རིམ་གྱིས་བསྐྱེད་པས་སྐྱེ་སྲིད་སྦྱོང་བྱེད་པ། །ཕྱག་རྒྱ་གཅིག་པའི་ལྷར་སྣང་བརྟན་པར་ཤོག །ལམ་གྱི་གསང་སྙིང་རྒྱུད་དོན་ཉམས་བླངས་ཚེ། །རྒྱལ་ཆེན་བཞི་དང་དཔལ་ལྡན་ཁྲོ་བོ་བཅུའི། །འཁོར་གྱིས་བསྐོར་བའི་ཞེ་སྡང་རྡོ་རྗེ་ཡིས། །བགེགས་འཇོམས་ཕྱོགས་བཅིངས་ཕྱི་ནང་གསང་བའི་མཚམས། །བདག་གི་རྣམ་རྟོག་སེམས་ལ་ལེགས་བཅད་དེ། །སྣོད་ཀྱི་སྣང་བ་འོག་མིན་གཞལ་མེད་ཁང་། །བཅུད་ཀྱི་སེམས་ཅན་བཅོམ་ལྡན་འཁོར་ལོའི་ཚོགས། །གྲགས་པ་གསུང་དང་རྟོགས་པ་བློ་འདས་ཐུགས། །ཡིད་འོང་ལྷ་སྐུ་ཕྱི་ཡི་རྡོ་རྗེ་སེམས། མི་ཤིག་ཐིག་ལེ་ནང་གི་སྒྱུ་འཕྲུལ་ཏེ། །རྟོག་ཚོགས་རང་གྲོལ་གསང་བའི་གསང་བ་སྙིང་། །རང་ཞལ་མཐོང་བའི་ཟུང་འཇུག་ཏིང་འཛིན་འཕྲུལ། །དཀྱིལ་འཁོར་ཚོམ་བུ་ཕྱག་རྒྱ་སྤྲོས་བཅས་ལ། །རིགས་གཅིག་རིགས་གསུམ་རིགས་ལྔ་སངས་རྒྱས་སྟོང་། །ཉི་ཁྲི་བཞི་སྟོང་བདུན་ཁྲི་དྲུག་སྟོང་སོགས། །རྣམ་པ་གསལ་ཞིང་དག་དྲན་ང་རྒྱལ་བརྟན། །ཚུལ་དགུས་རབ་མཛེས་སངས་རྒྱས་ཞི་བའི་ལྷ། །གར་དགུས་བརྗིད་ལྡན་འབར་བ་ཁྲག་འཐུང་གི། །ལྷ་རུ་གསལ་བ་བསྐྱེད་པའི་རིམ་པ་དང་། །བདེ་ཆེན་ཡེ་ཤེས་རྫོགས་པར་མཉམ་སྦྱོར་བས། །འདོད་ཡོན་ཐམས་ཅད་རྒྱལ་བའི་དཀྱིལ་འཁོར་ལ། །བདེ་བར་རོལ་མཐུས་ཚོགས་ཆེན་གཉིས་རྫོགས་ཏེ། །ཐལ་མལ་སྣང་ཞེན་སྒྲིབ་འདི་སྒྱུ་མའི་སྐུ། །ཡེ་ཤེས་ཁ་སྦྱོར་གཟུགས་སུ་སྦྱོང་བར་ཤོག །གནས་དུས་སྟོན་འཁོར་སྒྲུབ་རྫས་ཕུན་ཚོགས་ལྔ། །མ་ཉམས་ཆོ་ག་ལྔ་རྫོགས་ཡོ་བྱད་ལྡན། །ཡན་ལག་ལྔ་ཚངས་བསྙེན་དང་ཉེ་བར་བསྙེན། །སྒྲུབ་པ་སྒྲུབ་ཆེན་ཨཱ་ལི་ཀཱ་ལི་ཡིས། །ཚོམ་བུ་ཚོགས་ཀྱི་བསྒྲུབ་པ་ཡོངས་སུ་རྫོགས། །ཐུན་མོང་གཏེར་སོགས་ལུ་གུ་རྒྱུད་ཀྱི་ལས། །རིམ་པ་དང་པོའི་དངོས་གྲུབ་བརྒྱད་བསྒྲུབ་པས། །ཟག་མེད་ལམ་སྦྱོང་སྤྱོད་པ་མཐར་ཕྱིན་ཤོག ༈ །མཁའ་དཀྱིལ་དྭངས་པའི་དབྱིངས་ན་ཉི་ཟླ་ལ། །ཡེ་ཤེས་རྒྱལ་པོ་སྟངས་དཔྱལ་ཡེ་སངས་རྒྱས། །བསྒོམས་མཐུས་སྐྱེ་གནས་བཞི་སྦྱོངས་གང་སྣང་ཀུན། །བསམ་མི་ཁྱབ་པའི་འོད་གསལ་འཆར་བར་ཤོག །ཚངས་པའི་གནས་སུ་པད་དཀར་ཨཿཧཾ་ལྟོར། །སངས་རྒྱས་ཀུན་འདུས་བླ་མ་རིན་པོ་ཆེ། །གཉིས་མེད་སྦྱོར་བའི་བདུད་རྩིས་ལུས་ཀུན་ཁྱབ། །བྱིན་རླབ་དངོས་གྲུབ་གནད་ཀྱིས་དབང་ཐོབ་ཤོག །ཁམས་དྲུག་ལྡན་པ་རྡོ་རྗེའི་ལུས་འདི་ནི། །གནད་དུ་བསྣན་ན་སངས་རྒྱས་ཚེ་འདི་ལ། །ཐོབ་ཕྱིར་ལུས་ཀྱི་གནས་ལུགས་ལ་མཁས་ནས། །སྟོང་རའི་གནད་ཀྱིས་དབུ་མར་རླུང་ཟིན་ཤོག །ལ་ལ་རཱ་སའི་ལྕགས་ཀྱུས་བརྟན་གཡོའི་དཔལ། །དྷུ་ཏིའི་ཕོ་བྲང་ནང་དུ་བསྡུ་བ་ལ། །ངག་གི་རྒྱལ་པོ་འབྲུ་གསུམ་རྡོར་བཟླས་ཀྱིས། །སྲོག་གི་གནད་མཁས་རང་སྣང་དབང་འདུས་ཤོག །སྤྲུལ་འཁོར་གཏུམ་མོའི་ཐབ་ཁུང་ཀུན་རྟོག་གི། །བུད་ཤིང་བསྲེགས་པས་སྦར་བའི་ཡེ་ཤེས་མེས། །བདེ་ཆེན་འཁོར་ལོའི་ཧཾ་དཀར་བཞུ་བླུགས་རྒྱུན། །རྩོལ་བའི་གནད་ཀྱིས་ཆོས་འཁོར་བདེ་འབར་ཤོག །དབུ་མའི་ཡར་སྣར་དྭངས་མ་ཉུང་འབྲུ་ཙམ། །དབྱེར་མེད་འདྲེས་པ་ལོངས་སྤྱོད་འཁོར་ལོའི་བཅུད། །དྲོད་ཀྱིས་རེག་པས་རྩ་གང་ཚད་མེད་བདེ། །བདེ་སྟོང་ཡིད་ཕྲོག་མཚན་དཔེའི་སྐུ་འགྲུབ་ཤོག །སྙིང་གའི་དྭངས་མའི་འོད་འབར་མགྲིན་རྟེན་ཞུ། །སྙིང་གར་ཞུགས་པས་རྒྱུ་དང་མི་རྒྱུ་བ། །ཀུན་བྱེད་ལས་རླུང་ཉེར་ཞི་ཟག་མེད་བདེ། །བདེ་སྟོངས་ཚངས་དབྱངས་རྡོ་རྗེའི་གསུང་ཐོབ་ཤོག །ལྟེ་བས་སྙིང་གའི་ཁམས་བསྐུལ་དེ་དང་དེར། །ཡོངས་ཁྱབ་དྲན་རྟོག་ཞི་བའི་ཏི་ལ་ཀ །སྨྲ་བསམ་བརྗོད་དུ་མེད་པ་མཆོག་བདེ་འཆར། ། བདེ་སྟོང་མཁྱེན་གཉིས་གཟིགས་པའི་ཐུགས་བརྙེས་ཤོག །དེ་ལྟར་འཁོར་ལོ་བཞི་དབུས་མཁའ་སེམས་དང་། །ས་ཆུ་མེ་རླུང་གཅིག་འདྲེས་དྭངས་མའི་རྒྱུན། །ཕྲ་བས་ཀུན་ཁྱབ་ཉེར་ཞིའི་བདེ་བ་རྫོགས། །ཡས་བབ་སྐུ་བཞིའི་ལང་ཚོ་ངོམ་པར་ཤོག །སྙིང་གའི་ཟེར་གྱིས་ལྟེ་བའི་ཐིག་ལེ་བསྡུས། །མགྲིན་དང་གཙུག་ཏོར་ཀུན་ཀྱང་ཀུན་གཞིར་ཐིམ། །འདོད་ལྔ་དབུས་ཀྱི་ནམ་མཁའི་ངང་ཉིད་དུ། །མས་བརྟན་དགའ་བཞིའི་སྤྲོས་པ་ཀུན་བསྡུས་ནས། །དོན་གྱི་འོད་གསལ་སྟོང་པ་ཆེན་པོའི་སྦུབས། །དཔེ་ཡི་ཡེ་ཤེས་རྫོགས་པའི་རིམ་པས་སྦྱོར། །གྱ་ནོམ་ལྷར་ཞེན་རྟོག་པའི་འགྲོས་བཅོམ་ནས། །ཟག་མེད་སྒྲིབ་བྲལ་འཆར་བར་བྱིན་གྱིས་རློབས། །དེ་ལྟར་མེ་རླུང་འགྲོ་བས་ནམ་མཁའི་བ། །སྟོང་ཕྲག་དོན་གཉིས་རྩ་རུ་བཞོས་པའི་བཅུད། །སྙིང་ལ་བསྟར་བས་བདེ་སྟོང་མཛའ་ན་མོ། །ཐར་པའི་དཔྱིད་དུ་འབྲལ་བ་མེད་གྱུར་ཅིག །སྐྱེ་འགགས་གནས་དམིགས་བྲལ་བ་གདོད་མའི་གཤིས། །འགྲོ་འོང་སྤྲོས་པས་མ་གོས་གཉུག་མའི་སེམས། །ཀུན་བཟང་བསམ་མི་ཁྱབ་པའི་མན་ངག་གིས། །ཇི་བཞིན་རྫོགས་པ་ཆེན་པོར་རྫོགས་གྱུར་ཅིག །ཡིད་ཀྱིས་ལྷ་སྐུ་སྟོབས་རྫོགས་རྣམ་པར་སྨིན། །ལུས་སེམས་རྡོ་རྗེའི་གནས་གྲུབ་ཚེ་ལ་དབང་། །འཇའ་ལུས་གཡོ་བ་མེད་པ་ཕྱག་རྒྱ་ཆེ། །རྩོལ་མེད་ལྷུན་གྲུབ་རིག་འཛིན་བཞི་བགྲོད་ནས། །དཔལ་ལྡན་བླ་མ་རྣམས་ཀྱི་བྱིན་རླབས་དང་། །གསང་ཆེན་སྒྱུ་དྲྭའི་ཟབ་ལམ་མྱུར་ཁྱད་དང་། །རྩེ་གཅིག་སྒོམ་པ་རྣམ་པར་དག་པའི་སྟོབས། །མཐོང་བའི་ཆོས་ལ་དཔལ་ལྡན་རྡོ་རྗེའི་སེམས། །དོན་གྱི་གསང་སྙིང་མཐར་འབྲས་མངོན་དུ་བྱས། །རྡོ་རྗེའི་ཏིང་འཛིན་འཁྲུལ་པའི་ཚོགས་ཀུན་འཇོམས། །ཉི་ཤུ་རྩ་ལྔ་མི་ཟད་གཏེར་ཆེན་བརྡོལ། །ཧེ་རུ་ཀཿདཔལ་མྱུར་དུ་བརྙེས་གྱུར་ཅིག །གོ་འཕང་མཆོག་དེ་ཚེ་འདིར་མ་ཐོབ་ཀྱང་། །འཆི་ཚེ་བླ་མ་ཀུན་བཟང་འཁོར་བཅས་ཀྱིས། །ཡིད་འོང་མཆོད་སྤྲིན་སྙན་པའི་རོལ་མོའི་སྒྲ། །ངོ་མཚར་ལྟས་བཟང་མང་པོས་བསུ་བར་ཤོག །དེ་ཚེ་འཆི་བ་ཆོས་སྐུའི་འོད་གསལ་ལས། །བར་དོ་ལོངས་སྤྱོད་རྫོགས་པས་སྐྱེ་གནས་ཀུན། །སྤྲུལ་སྐུ་ངོ་མཚར་སྒྱུ་མའི་སྤྲིན་དཀར་པོ། །སེམས་ཉིད་བདེ་ཆེན་མཁའ་ལས་ལྡང་བར་ཤོག །རྒྱལ་བ་ཀུན་གྱི་ཐུགས་ཀྱི་བཅུད་ཕྱུང་ཞིང་། །རྒྱལ་སྲས་ཀུན་གྱི་གུས་པས་ཕྱག་བྱས་པ། །རབ་འབྱམས་ཞིང་ན་གསུང་གི་གསང་བ་ཀུན། །སྤྲོ་བའི་གཞིར་གྱུར་རྒྱུད་རྒྱལ་འདིས་མཚོན་ཏེ། །གསང་ཆེན་རྒྱུད་སྡེའི་བསྟན་པ་རིན་པོ་ཆེ། །འཇིག་རྟེན་ཁམས་སུ་ཡུན་རིང་གནས་པ་དང་། །དེར་འཛིན་རྣམས་ཀྱི་བཞེང་དོན་སྐྱོངས་བ་ལ། །གནས་ཡུལ་མཁའ་འགྲོ་ཀུན་གྱིས་གྲོགས་མཛད་ཅིང་། །བརྒྱུད་གསུམ་རིག་འཛིན་བླ་མའི་ཐུགས་ཀྱིས་དགོངས། །སྣང་སྲིད་དམ་ཅན་དྲེགས་པས་བཀའ་ལ་ཉན། །རང་རྒྱུད་སྨིན་ཅིང་གཞན་རྒྱུད་གྲོལ་བ་ཡི། །བཀྲ་ཤིས་གྲགས་པའི་བ་དན་ཀུན་ཁྱབ་ཤོག །ཅེས་པ་འདིའང་མཁས་གྲུབ་ཆེན་པོའི་ལམ་རིམ་འགྲེལ་ཆེན་དབུར་བཞུགས་བརྒྱུད་འདེབས་ལ་ཁ་སྐོང་གི་ཤོ་ལོ་ཀ་བཅུ་དྲུག་དང་། ལམ་རྣམ་བཀོད་དང་། ལམ་ཆེ་ཆུང་། རིམ་གསུམ་ལ་སོགས་པ་ལས་འབྱུང་བའི་དཔལ་སྒྱུ་འཕྲུལ་དྲ་བའི་ལམ་ཚང་ལ་མ་ནོར་བ་སྨོན་ལམ་དུ་བསྡེབས་ཏེ་སྦྱོར་བ་པོ་ནི། རྒྱུད་ཀྱི་རྒྱལ་པོ་ལ་ཤེས་ནས་དད་པ་ཐོབ་པའི་རིག་འཛིན་གྱི་བཙུན་པ་ཆོས་ཀྱི་རྒྱ་མཚོ་བསྟན་པའི་ཉི་མ་དཔལ་བཟང་པོ་སྟེ། འདིས་ཀྱང་རང་གཞན་སེམས་ཅན་ཐམས་ཅད་ཟབ་མོའི་ལམ་འདི་ལ་བརྟེན་ནས་ཁྱབ་བདག་རྡོ་རྗེ་སེམས་དཔའི་གོ་འཕང་དམ་པ་མངོན་དུ་བྱེད་པའི་རྒྱུར་གྱུར་ཅིག། །།

བཅོམ་ལྡན་འདས་གསང་བ་སྙིང་པོ་ཞི་བ་འབྲིང་པོའི་སྒྲུབ་ཐབས་བྱིན་རླབས་ཀྱི་སྙེ་མ། ཀཿཐོག་སི་ཏུ་ཆོས་ཀྱི་རྒྱ་མཚོ།

བྷ ག ཝཱཾ གུ ཧྱ ག རྦྷ ཤཱ ནྟ མ དྷྱཾ སྱ ས དྷ ནཱ དྷི ཥྛ ནཱཾ གུ ནྡཱི ནཱ མ བི ཧ ར ཏི སྨ།
བཅོམ་ལྡན་འདས་གསང་བ་སྙིང་པོ་ཞི་བ་འབྲིང་པོའི་སྒྲུབ་ཐབས་བྱིན་རླབས་ཀྱི་སྙེ་མ་ཞེས་བྱ་བ་བཞུགས་སོ། །
བཅོམ་ལྡན་འདས་གསང་བ་སྙིང་པོ་ཞི་བ་འབྲིང་པོའི་སྒྲུབ་ཐབས་བྱིན་རླབས་ཀྱི་སྙེ་མ་ཞེས་བྱ་བ། ཐུགས་རྗེའི་མངའ་བདག་རྗེ་བཙུན་བླ་མ་དཀྱིལ་འཁོར་གྱི་དབང་ཕྱུག་ལ་གུས་པ་ཆེན་པོས་ཕྱག་འཚལ་ལོ། །རྒྱལ་བ་ཀུན་གྱི་རྡོ་རྗེ་གསུམ་བསྡུས་ཡེ་ཤེས་སྒྱུ་འཕྲུལ་དྲྭ་བའི་དངོས། །དབྱིངས་ཕྱུག་དགའ་མར་རྣམ་རོལ་མཆོག་བདེའི་སྤྲིན་ཕུང་ཆོས་དབྱིངས་ཀུན་ཁྱབ་ལས། །མཐའ་དག་བཞི་བཅུ་རྩ་གཉིས་ལྷ་ཡི་གར་སྤྲོ་ཨིནྡྲ་ནཱི་ལའི་རི། །རབ་སྒེག་ལྟར་མཛེས་བླ་མ་མི་བསྐྱོད་རྡོ་རྗེས་སྙིང་ལ་བདེ་ཆེན་བྱིན། །གང་དེའི་དངོས་གྱུར་པདྨ་གཉག་གནུབས་ཟུར་པའི་སྲོལ། །ཆོས་ཀྱི་སྤྱན་མངའ་དམ་པ་ཡབ་སྲས་ཀྱིས་བཀྲལ་བ། །དུས་མཐར་སྤྱོད་པའི་སྐལ་མཉམ་དོན་དུ་འདིར་བསྡེབས་ཏེ། །རྙོག་མེད་བཀོད་ལ་དཔའ་བོ་མཁའ་འགྲོས་བརྩེ་བར་མཛོད། །ཡེ་ཤེས་འཇའ་ལུས་སྒྱུ་མའི་སྐུ་ཅན་རྣམས། །གཤེགས་ཤུལ་ཟབ་དོན་རྒྱུད་སྡེའི་གྲོང་ཁྱེར་དུ། །རིམ་གཉིས་སྒོ་ཆེན་འབྱེད་ལ་བརྩོན་པ་རྣམས། །སྐལ་བཟང་འདོད་པ་སྦྱིན་པའི་ལྡེའུ་མིག་ལོངས། །དེ་ལ་འདིར་ཆོས་ཐམས་ཅད་ཀྱི་བརྗོད་བྱ་བདེན་གཉིས་དབྱེར་མེད་འཁོར་འདས་མཉམ་པ་ཉིད་བློ་ཡི་སྤྱོད་ཡུལ་འདས་པ་ཉིད། རྗོད་བྱེད་སྟོང་ཕྲག་བརྒྱ་པ་སྒྱུ་འཕྲུལ་དྲྭ་བ་ལས་ཕྱུངས་ཤིང་། གཉིས་སུ་མེད་པའི་རྒྱུད་ཐམས་ཅད་ཀྱི་རྒྱལ་པོ་ཐེག་པ་ཐམས་ཅད་ཀྱི་གཞི་དང་རྩ་བར་ངེས་པ་དཔལ་གསང་བ་སྙིང་པོའི་དོན་ཐམས་ཅད་དྲིལ་ན་ཆོས་བརྗེ་ཀཿཐོག་པའི་བཞེད་ཀྱིས་ལྔར་མཛད་དེ། ཤེས་བྱ་གཞི་སྐུ་གསུམ་གྱི་དཀྱིལ་འཁོར་དུ་གནས་ཚུལ། དེ་མ་རྟོགས་པས་གཞི་སེམས་ཅན། ལམ་རྣལ་འབྱོར། འབྲས་བུ་སངས་རྒྱས་ཀྱི་སྣང་བ་སོ་སོར་འཆར་བའི་འཁྲུལ་འཁོར་སྣང་ཚུལ། དེ་ཡང་དག་པ་འདུལ་བྱེད་སངས་རྒྱས་རྣམས་ཀྱི་ཐུགས་རྗེས་མཁྱེན་ཅིང་གཟིགས་པ་དང་། གཟིགས་ནས་རྟོག་པ་མེད་པའི་ཐུགས་རྗེ་ཉི་མའི་འོད་དང་། ཆུ་བོའི་རྒྱུན་ལྟར་རྟག་ཁྱབ་ལྷུན་གྲུབ་ཏུ་འཆར་ཞིང་། ཁྱད་པར་འཁྲུལ་པ་སྦྱོང་བྱེད་ཐབས་ལམ་རྐྱེན་ཡི་གེའི་རྒྱུད་ཀྱིས་དོན་མཛད་ཚུལ་རྣམས་སུ་བསྡུ་བར་མཛད་ལ། དེ་ལས་ལམ་རྒྱུད་ཀྱི་རིམ་པ། སྲིད་པ་སྡུག་བསྔལ་དུ་མ་མཐོང་བའི་བློས། །སྲིད་ལས་ཐར་འདོད་དང་། རང་གཅིག་པུ་མ་ཡིན་པར་མཁའ་ཁྱབ་ཀྱི་སེམས་ཅན་ཐམས་ཅད་སྒྲོལ་འདོད་ཀྱི་བྱང་ཆུབ་ལ་འཇུག་པ་བརྟན་པོས། རྡོ་རྗེའི་སློབ་དཔོན་དངོས་གྲུབ་ཐམས་ཅད་ཀྱི་རྩ་བ་མཉེས་པར་བྱས་ཏེ། རྡོ་རྗེ་ཐེག་པའི་ལམ་གྱི་གཞི་སྨིན་བྱེད་ཀྱི་དབང་ཐམས་ཅད་བསྐུར་བ་ཐོབ་པས། རྒྱུད་སྨིན་པའི་རྒྱལ་སར་ཆུད་པ་དང་། རྩ་བ་ཡན་ལག་གི་དམ་ཚིག་མཐའ་དག་མིག་འབྲས་ལྟར་མ་ཉམས་ལ་ཡོངས་སུ་རྫོགས་པར་སྲུང་བའི་རྟེན་གྱི་གང་ཟག་ཤེས་རབ་མཆོག་དང་། བརྩོན་འགྲུས་ཀྱི་གོ་ཆ་བགོས་པ་ཞིག་གིས་སྐུ་གསུམ་ལྷུན་གྱིས་གྲུབ་པའི་དཀྱིལ་འཁོར་ལམ་རིམ་པ་གཉིས་ལ་སློབ་པའོ། །དེའང་ཨིནྟྲ་བྷུ་ཏིས་མཛད་པའི་རིམ་གཉིས་ལས། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པའོ། །ཞེས་དང་། ཏིང་འཛིན་དེ་ལ་ལེགས་གནས་ནས། །རྫོགས་པའི་རིམ་པ་འདོད་པ་ཡིས། །སྐད་གཅིག་ཉིད་ལ་ལྷ་རྣམས་གསལ། །རྫོགས་པའི་རིམ་པའི་བསྐྱེད་རིམ་སྟེ། །བསྐྱེད་པའི་རིམ་པའི་རྫོགས་པའོ། །ཞེས་སོགས་གསུངས་པ་ལྟར་རྫོགས་རིམ་གྱི་རྟོགས་པས་སྐྱེ་བའི་ནུས་པ་སྨིན། །ལུས་ངག་ཡིད་གསུམ་ཐ་མལ་དུ་འཛིན་པ་བཟློག་ཅིང་། རྒྱུད་སྦྱོང་བའི་ཕྱིར་ལམ་ལྔའི་རྣལ་འབྱོར་རྒྱུད་དོན་སློབ་དཔོན་ཆེན་པོ་སངས་རྒྱས་གསང་བས་ལམ་གྱི་རིམ་པར་བཀྲལ་པ་ལས་ཇི་སྐད་འབྱུང་བ་ལྟར་སྟོང་ཆེན་དང་སྙིང་རྗེ་སྒྱུ་མའི་རྣལ་འབྱོར་ལ་གོམས་པས་ཕྱག་རྒྱ་གཅིག་པའི་ཕྲ་བ་ཡི་གེའི་སྤྲོ་བསྡུ་དང་། རགས་པ་ཞལ་གཅིག་ཕྱག་གཉིས་དང་། གོམས་ནས་ཞལ་གསུམ་ཕྱག་དྲུག་གི་རྗེས་སྤྲོས་པའི་རྣལ་འབྱོར་བསྐྱེད་པའི་རིམ་པ་ལ་ནན་ཏན་དུ་བྱ་བ་ལས། ལེའུ་བཅོ་ལྔ་པ་ཡན་གྱི་རྩ་རྒྱུད་ཀྱི་མ་བསྒྱུར་རྣལ་མ་ཞི་བ་ལའང་ལྷ་དང་ཚོམ་བུ་སྤྲོ་བསྡུ་མཐའ་ཡས་པས་འདིར་ནི་གླེང་གཞི་ལས་གསུངས་པ་ལྷ་སོ་དྲུག་དང་། གསུམ་པ་ལས་ཐུབ་དྲུག་བཅས་དངོས་བསྟན་ཞེ་གཉིས་ཞི་བ་འབྲིང་པོའི་ཕྱག་རྒྱ་སྤྲོ་བ་དང་ཚོགས་བསྒྲུབ་ཀྱི་མོས་བསྒོམ་མཐའ་དག་ལ་སྦྱར་དུ་རུང་བའི་མངོན་རྟོགས་ཡན་ལག་མཐའ་དག་ཚང་བར་འཆད་དོ། །དེ་ལ་གཉིས། སྒྲུབ་བྱེད་ཆོ་གའི་རིམ་པ་གྲུབ་པའི་འབྲས་བུའོ། །དང་པོ་ལ་གསུམ་སྦྱོར་དངོས་རྗེས་སོ། །དང་པོ་ལ་སྔོན་འགྲོའི་སྦྱོར་བ་དང་། ཆོ་གའི་སྦྱོར་བའོ། །དང་པོ། སྒྲུབ་པོ་གང་ཟག །སྒྲུབ་པའི་ཀུན་སློང་། སྒྲུབ་པའི་རྐྱེན་ནོ། །དང་པོ་འོད་རིམ་ལས། སྒྱུ་འཕྲུལ་རི་མོའི་དཀྱིལ་འཁོར་དུ། །དབང་རྣམས་ཐོབ་པར་བྱས་པ་དང་། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་པའི་མཚན་ཉིད་མངའ་བས། །གཉིས་པ་ཡང་དེ་ཉིད་ལས། །ཁེ་གྲགས་འདོད་གཡེངས་ཀུན་སྤངས་ཏེ། །ཞེསདང་། ཚད་མེད་ཐུགས་རྗེས་འགྲོ་སྒྲོལ་ཞེས། །དམ་བཅའ་བརྟན་ཏེ་མི་ལྡོག་པར། །ཞེས་པ་ལྟར་སྐུ་གསུམ་ལྷུན་གྱིས་གྲུབ་པའི་འདོད་བྱ་ལ་དྲན་པ་ཉེ་བར་བཞག་པས། གསུམ་པ་ལ་གནས་དང་། སྒྲུབ་རྫས་སོ། །དང་པོ་ཡང་དེ་ལས། རི་བོ་དབེན་པའི་གནས་མཆོག་ནི། །མེ་ཏོག་ཤིང་དང་བཀྲ་ཤིས་བྱ། །སྙན་པའི་སྒྲ་ལྡན་བར་ཆད་མེད། །ཅེས་སོགས་འབྱུང་བ་བཞིན་བདག་དབང་བར་ཆད་མེད་པའི་གནས་བསམ་གཏན་དང་མཐུན་པར། གཉིས་པ་རྩ་རྒྱུད་ལས། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་པ་དམ་ཚིག་གི་བྲིས་སྐུ་དང་། རྟེན་གསུམ་ལ་མཆོད་པའི་བྱེ་བྲག་ཕྱི་ནང་དང་། སྟེགས་དམའ་བར་སྔོན་གཏོར་ཆུ་དང་ཉེར་སྤྱོད། སྒྲུབ་པོའི་མདུན་དུ་རྡོར་དྲིལ་དང་ནང་མཆོད་སོགས་མཁོ་བའི་ཡོ་བྱད་རྣམས་ཚོགས་པར་བྱའོ། །གནིས་པ་ལ་སྡོམས་ནི། ཕྱག་དང་གསོལ་གདབ་རྒྱུན་བཤགས་དང་། །སྒྲིབ་སྦྱོང་ཚོགས་བསགས་བསང་ཆུ་བརླབ། །བགེགས་བསལ་མཚམས་བཅད་བཤགས་སྡོམས་བཟུང་། །བྱིན་རླབས་སྔོན་འགྲོའི་རིམ་པ་བཅུ། །དང་པོ། བླ་མ་དཀྱིལ་འཁོར་སྲུང་མ་ལ་ཕྱག་དགུ་སྤྲུགས་སུ་འཚལ་བ་ཚུལ་ཕྱག་དང་། སློབ་དཔོན་ལ་སློབ་མ་རྣམས་ནས་ཕྱག་དང་། ཕན་ཚུན་ཐམས་ཅད་ནས་ཕྱག་བསྣོལ་བའི་གྲལ་ཕྲག་གིས་བདེ་བའི་སྟན་ལ་འཁོད་པའོ། །གཉིས་པ་འདུས་པ་ཚོམ་བུའི་སྒྲུབ་པའི་སྐབས། ལས་ཀྱི་རྡོ་རྗེས་ཕྱག་གསུམ་འཚལ་ནས། བླ་མ་རྡོ་རྗེ་འཛིན་པ་ཆེན་པོས་དབུ་མཛད། གསང་བའི་དཀྱིལ་འཁོར་འདིར་འདུས་པ་ཐམས་ཅད་ཐུགས་དམ་ལ་མཉམ་པར་བཞག་པར་ཞུ། ཞེས་གསོལ་བ་གདབ། ཐམས་ཅད་ཀྱི་གནས་གསུམ་དུ་བདུད་རྩིའི་ཐིག་ལེ་རེ་བྱས་ལ་སྐུ་གསུང་ཐུགས་སུ་བྱིན་གྱིས་རླབས་རྡོ་རྗེ་སློབ་དཔོན་ནས་བཟུང་སྟེ་ཐམས་ཅད་ཀྱི་དབུ་ལ་མེ་ཏོག་གི་ཕྲེང་བ་གདགས་སོ། །གསུམ་པ་ལ་གཉིས་ཡན་ལག་བདུན་པ་དང་སྐྱབས་སེམས་སོ། །དང་པོ་ནི། རང་ཉིད་དཔལ་རྡོ་རྗེ་སེམས་དཔར་གསལ་བའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་དབུས་ཧཱུྃ་གི་འོད་ཟེར་སྲོག་དག་པའི་ལམ་ནས་ཞུགས། ཕྱོགས་བཅུའི་སངས་རྒྱས་ཐམས་ཅད་ཆོས་ཀྱི་སྐུ་ལས་གཟུགས་ཀྱི་སྐུར་བཞེངས་པ་བཅོམ་ལྡན་འདས་ཐུགས་སྒྱུ་འཕྲུལ་དྲྭ་བའི་ལྷ་ཚོགས་རྡོ་རྗེ་སློབ་དཔོན་ལ་བརྒྱུད་པའི་བླ་མས་བསྐོར་བ་དང་བཅས་པ་མདུན་གྱི་ནམ་མཁར་ༀ་བཛྲ་ས་མཱ་ཛཿ ཞེས་སེ་གོལ་དཔུང་མགོར་བསྣོལ་མར་གཏོགས། ཡིད་ལས་སྤྲུལ་པའི་ལྷ་མོ་རྣམས་ཀྱིས་མཆོད་པར་བསམ་སྟེ། ༀ་བཛྲ་ས་ཏྭ་ས་པ་རི་ཝ་ར་བཛྲ་ཨརྒྷཾ་པ་ཏིཙྪ་ཧཱུྃ། ནས་ཤབྟའི་བར་གྱི་མཆོད། ཐལ་མོ་སྙིང་གར་བཀོད་དེ། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །ཡིད་བཞིན་རིན་ཆེན་ལྟ་བུའི་སྐུ། །བླ་མ་རྣམས་ལ་ཕྱག་འཚལ་ལོ། །བླ་མ་བཤེས་གཉེན་དམ་པ་ཁྱོད། །བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །བདག་ཅག་རྣམས་ཀྱི་མགོན་ལགས་སོ། །བདག་ཅག་རྣམས་ཀྱི་སྟོན་པ་ལགས། །བདག་ཅག་རྣམས་ཀྱི་འདྲེན་པ་ལགས། །མུན་པ་སེལ་བའི་སྒྲོན་མ་ལགས། །དུག་གསུམ་ནད་སེལ་སྨན་པ་ལགས། །འགྲོ་བ་སྒྲོལ་བའི་གྲུ་ལགས་སོ། །ཉི་མའི་ཞལ་ལ་ཕྱག་འཚལ་འདུད། །ཟླ་བའི་སྐུ་ལ་ཕྱག་འཚལ་འདུད། །པདྨའི་གསུང་ལ་ཕྱག་འཚལ་འདུད། །ནམ་མཁའི་ཐུགས་ལ་ཕྱག་འཚལ་འདུད། །ཡོན་ཏན་རེ་སྐོང་ཕྱག་འཚལ་འདུད། །ཕྲིན་ལས་ཀུན་སྒྲོལ་ཕྱག་འཚལ་འདུད། །དེས་བསྐྱེད་དུས་གསུམ་སངས་རྒྱས་དང་། །དམ་ཆོས་རྒྱུ་འབྲས་མ་ལུས་དང་། །རིག་འཛིན་བྱང་ཆུབ་སེམས་དཔའ་དང་། །དགེ་འདུན་རྣམས་ལ་ཕྱག་འཚལ་འདུད། །དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །ནོར་བུ་རིན་ཆེན་ཡོན་ཏན་མཛོད། །རྡོ་རྗེ་ཡིད་ལ་ཕྱག་འཚལ་ལོ། །མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱའི་རང་བཞིན་གཉིས་མེད་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཀུན་བཟང་ལྷ་ཡི་ལྷ་ལ་ཕྱག་འཚལ་ལོ། །དཔལ་ལྡན་གཉིས་མེད་སྒྲིབ་པ་སྤངས་པ་ཡི། །ཡེ་ཤེས་རང་རིག་གསལ་བའི་མཁའ་དཀྱིལ་ནས། །དཀྱིལ་འཁོར་སྤྲོ་བ་འགྲོ་དོན་སྤྲུལ་པ་ཡི། །མ་ལུས་ཐུགས་སུ་ཆུད་ལ་ཕྱག་འཚལ་ལོ། །ཀུན་བཟང་འཁོར་ལོ་བཞི་དབུས་དགའ་བཞིའི་གཟུགས། །བདེ་ཆེན་སྤྲིན་དཔུང་རྡོ་རྗེའི་ལྷ་མོ་རྣམས། །ཚད་མེད་བཞི་དང་འདོད་ལྔའི་དཔལ་ཐོགས་པས། །ཡེ་ཤེས་ལྔ་དང་རྡོ་རྗེ་བཞི་རུ་མཆོད། ༈ །བདག་གིས་ཚེ་རབས་ཐོག་མ་མེད་པ་ནས། །ད་ལྟ་ཡན་ཆོད་མི་དགེ་སྡིག་སྤྱོད་དང་། །འདུལ་སྡོམ་བཤིག་དང་ཕྱི་ནང་དམ་ཉམས་དང་། །ཁྱད་པར་ཉོན་མོངས་བག་མེད་ལེ་ལོ་ཡིས། །རྩ་བ་ཡན་ལག་ལ་སོགས་བསྲུང་བྱ་རྣམས། །ཞིག་རལ་ཉམས་དང་ཁྱད་བསད་ཡལ་བར་དོར། །གཞུང་དུ་མ་བསྙག་གཞུང་འགལ་ཆེ་ཆུང་རྣམས། །ཉམས་དང་ཚོར་དང་མ་ཚོར་ཉམས་སོ་འཚལ། །རྩ་བ་ཡན་ལག་ཟླ་ཞར་ཀུན་ཏུ་ཉམས། །ཤིན་ཏུ་འགྱོད་ཅིང་གདུང་བས་བཤགས་པར་བྱ། །གནོང་ངོ་འགྱོད་དོ་ཚངས་པར་སྩལ་དུ་གསོལ། ༈ །རྫོགས་སངས་རྒྱས་དང་བྱང་ཆུབ་སེམས་དཔའ་དང་། །འཕགས་པ་རྣམས་དང་སོ་སོའི་སྐྱེ་བོ་ཡིས། །དགེ་བའི་རྩ་བ་བསགས་པ་མ་ལུས་ལ། །རྟག་ཏུ་བདག་ནི་རྗེས་སུ་ཡི་རང་ངོ་། ༈ །འབྲས་བུ་མངོན་གྱུར་རིང་པོ་མ་ལེན་པར། །ཕྱོགས་བཅུའི་འཇིག་རྟེན་ཁམས་ན་བཞུགས་སོ་འཚལ། །འགྲོ་རྣམས་མྱུར་དུ་སངས་རྒྱས་ཐོབ་སླད་དུ། །བླ་མེད་ཆོས་ཀྱི་འཁོར་ལོ་བསྐོར་བར་བསྐུལ། ༈ །གདུལ་བྱའི་བྱ་བ་ཚར་བའི་ཐུབ་པ་རྣམས། །ཆོས་ཀྱི་དབྱིངས་སུ་འདར་བར་བཞེད་པ་ལ། །ཇི་སྲིད་འཁོར་བ་སྟོང་པར་མ་གྱུར་བར། །བཞུགས་ནས་མྱ་ངན་མི་འདའ་གསོལ་བ་འདེབས། ༈ །བདག་གིས་ཚེ་རབས་ཐོག་མ་མེད་པ་ནས། །ད་ལྟ་ཡན་ཆོད་དགེ་བ་ཅི་སྤྱད་དང་། །ཁྱད་པར་དེང་འདིར་དགེ་བ་ཅི་བསགས་པ། །བདག་གཞན་དོན་ཕྱིར་བྱང་ཆུབ་ཆེན་པོར་བསྔོ། །གཉིས་པ་སྒྲུབ་ཐབས་མེ་ལོང་ལྟ་བུ་ལས། བྱམས་དང་སྙིང་རྗེ་དགའ་བ་དང་། །བཏང་སྙོམས་པ་ཡང་ཡོངས་བསྒོམས་ནས། །ཞེས་པ་ལྟར་སྐྱེས་བུ་མཆོག་གི་བསམ་པས་དྲངས་པའི་བློས། ༈ བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད། ཇི་སྲིད་བྱང་ཆུབ་བར་དུ། ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་ངོ་བོ་དམ་པའི་ཆོས་ཐེག་པ་རིམ་པ་དགུའི་འབྱུང་གནས། དགེ་འདུན་འཕགས་པ་རྣམས་ཀྱི་མངའ་བདག་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ལེགས་པར་གསུངས་པའི་ཆོས་ལ་སྐྱབས་སུ་མཆིའོ། །ཚོགས་ཀྱི་མཆོག་དགེ་འདུན། བཅོམ་ལྡན་འདས་རྒྱལ་བ་བཞི་བཅུ་རྩ་གཉིས་ལ་སོགས་པ་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ ཤྲཱི་མ་ཧཱ་ཀ་ལ། དཔལ་ལྷ་མོ་ནག་མོ་ལ་སོགས་ཏེ་ཆོས་སྐྱོངས་པའི་སྲུང་མ་ཡེ་ཤེས་ཀྱི་སྤྱན་དང་རྫུ་འཕྲུལ་གྱི་ཞབས་དང་ལྡན་པ་རྣམས་ལ༴ ལན་གསུམ། སེམས་ཅན་ཐམས་ཅད་དཔལ་རྡོ་རྗེ་སེམས་དཔའི་གོ་འཕང་ལ་འགོད་པར་བྱ། དེ་ཡི་ཆེད་དུ་སྐུ་གསུང་ཐུགས་ཀྱི་རྣལ་འབྱོར་ལ་འཇུག་པར་བྱའོ། །སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། བཞི་པ་ཞི་ཁྲོ་བཤགས་ཆུང་གི་དོན་བསྡུ་ན་ཐུན་མོང་མིན་པའི་རྡོར་སེམས་བསྒོམ་བཟླས་ཏེ། རང་གི་སྤྱི་གཙུག་ཏུ་སྣ་ཚོགས་པདྨ་འདབ་བརྒྱད་ཀྱི་ལྟེ་བར་ཆེ་མཆོག་ཡོན་ཏན་ལ་སྙིང་གར་ཞི་བ་དང་སྤྱི་བོར་ཁྲོ་བོའི་ལུས་དཀྱིལ་རྫོགས་པའི་དབུ་ཐོག་ཏུ་པདྨ་དང་ཟླ་བའི་གདན་ལ། ཧཱུྃ་ལས་བྱུང་བའི་བཅོམ་ལྡན་འདས་དཔལ་རྡོ་རྗེ་སེམས་དཔའ་བླ་མ་དང་གཉིས་སུ་མེད་པ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་བས་ཡུམ་སྙེམས་མ་དཀར་མོ་གཡོན་དྲིལ་བུ་ཐོགས་པ་ལ་འཁྱུད་པ། ཞབས་ཕྱེད་སྐྱིལ་མཐེ་བོང་གཡས་རང་གི་སྤྱི་གཙུག་ཏུ་རེག་པ། ལོངས་སྤྱོད་རྫོགས་པའི་རྒྱན་ཅན། སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་དང་རྡོ་རྗེ་ཟླ་བ་སྔགས་ཕྲེང་གཡས་འཁོར་དང་བཅས་པའོ། །དེ་ལས་འོད་ཟེར་འཕྲོས་སྒྲུབ་སྡེ་བརྒྱད་ཀྱི་ལྷ་ལུས་དཀྱིལ་དང་བཅས་པ་དཔལ་རྡོ་རྗེ་སེམས་དཔའི་དཀྱིལ་འཁོར་གྱི་རྣམ་པར་ༀ་བཛྲ་ས་མཱ་ཛས་སྤྱན་དྲངས་ཏེ། བཅོམ་ལྡན་འདས་ཞི་ཁྲོ་རབ་འབྱམས་ཀྱི་ཚོགས་ལ་ཕྱག་འཚལ་ལོ། །ཨེ་མ་ཧོ། ཕྱོགས་བཅུ་དུས་བཞི་ཀུན་གྱི་བདག་ཉིད་ཆེ། །བླ་མ་རྒྱལ་བ་ཞི་ཁྲོ་ཡོངས་རྫོགས་དགོངས། །འདིར་གཤེགས་ཉི་ཟླ་པདྨའི་གདན་ལ་བཞུགས། །ཉམས་ཆག་ན་རག་སྦྱོང་ཕྱིར་ཕྱག་མཆོད་བཞེས། །ཡོན་ཏན་ཕུན་ཚོགས་བླ་མ་རྣམས་ལ་ཕྱག་འཚལ་ལོ། །དམིགས་མེད་སྤྲོས་བྲལ་ཆོས་ཀྱི་སྐུ་ལ་ཕྱག་འཚལ་ལོ། །བདེ་ཆེན་ལོངས་སྤྱོད་རྫོགས་པའི་སྐུ་ལ་འགྲོ་མགོན་ཅིར་ཡང་སྤྲུལ་པའི་སྐུ་ལ༴ གནས་ལུགས་མི་འགྱུར་རྡོ་རྗེའི་སྐུ༴ ཡང་དག་མངོན་པར་བྱང་ཆུབ་སྐུ་ལ༴ ཉོན་མོངས་ཞི་མཛད་ཞི་བའི་ལྷ་ལ༴ ལོག་ལྟ་ཚར་གཅོད་ཁྲོ་བོའི་སྐུ་ལ༴ ཐབས་མགོན་ཚེ་བདག་འཇམ་དཔལ༴ སྐྱོན་བྲལ་སྒྲ་སྒྲོག་པདྨའི་གསུང་ལ། །ཡང་དག་དོན་ལྡན་བཛྲ་ཐུགས་ལ༴ དུག་ལྔ་ནད་སེལ་བདུད་རྩི་སྨན་ལ༴ དྲེགས་པ་འཇམ་མཛད་ཕུར་པའི་ལྷ༴ འབྱུང་བའི་མངའ་བདག་མ་མོའི་ཚོགས་ལ༴ ས་དང་ལམ་རྫོགས་རིག་འཛིན་རྣམས་ལ༴ བསྟན་པ་བསྲུང་མཛད་དམ་ཅན་རྣམས༴ དགྲ་བགེགས་འདུལ་མཛད་སྔགས་བདག་རྣམས་ལ་ཕྱག་འཚལ་ལོ། ༈ །གང་གི་རྒྱལ་བ་ཞི་ཁྲོ་ཡི། །དཀྱིལ་འཁོར་མཚན་ཐོས་ཕྱག་འཚལ་ནས། །ཉམས་ཆག་མ་ལུས་ཀུན་བྱང་ནས། །མཚམས་མེད་ལྔ་ལ་སྨོས་ཅི་དགོས། །ན་རག་གནས་ཀྱང་དོང་དཀྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །རྡོ་རྗེ་སེམས་དཔའི་གསང་སྔགས་དངོས། །ལས་སྒྲིབ་ཉམས་སྒྲིབ་དག་བྱེད་པའི། །འཁོར་བ་དོང་དཀྲུགས་ཡོང་སྙིང་བཟླས། །བཅོམ་ལྡན་འདས་བདག་གི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས་གནས་གསུམ་འབྲུ་གསུམ་ལས་འོད་ཀྱི་ལུས་ངག་ཡིད་གསུམ་ལ་ཕོག །ཆག་ཉམས་ཐམས་ཅད་དག །སླར་ཡང་སྦྱོར་བ་མཛད་པའི་བྱང་སེམས་ཡེ་ཤེས་བདུད་རྩིས་ལུས་ཐམས་ཅད་གང་། དམ་ཚིག་ཉམས་ཆག་ཐམས་ཅད་བྱང་ཞིང་དག་པར་གྱུར་པར་མོས་ལ། ༀ་བཛྲ་ས་ཏྭ་ས་མ་ཡཱ། སོགས་ཡི་གེ་བརྒྱ་པ་ལན་ཉེར་གཅིག་བཟླས་མཐར། ཧོཿ བདེ་གཤེགས་ཡོངས་རྫོགས་དགོངས་སུ་གསོལ། །རྒྱལ་བའི་བཀའ་དང་བླ་མའི་ལུང་། །ཇི་བཞིན་མ་སྤྱད་སློབ་དཔོན་སྨད། །རྡོ་རྗེ་མཆེད་དང་ལྕམ་དྲལ་ལ། །ལྟ་ལོག་ངན་སེམས་ངག་ཏུ་སྨྲས། །བརྡེག་བཙོག་གནོད་པ་དངོས་སུ་སྤྱད། །ལྷ་དང་དཀྱིལ་འཁོར་ཉམས་མ་གསལ། །ཛབ་བཟླས་མ་དག་ཟུར་ཆག་ཉམས། །གསང་བར་འོས་དང་གཉེར་གཏད་སྨྲས། །གསང་བཅུ་བསྒྲག་ཅིང་བླ་མ་བསླུས། །རྩ་བའི་དམ་ཉམས་མཐོལ་ཞིང་བཤགས། །སྤྱད་པར་བྱ་བའི་དམ་ཚིག་ལྔ། །ཤེས་བྱ་ལྔ་དང་བསྒྲུབ་བྱ་ལྔ། །མི་སྤང་ལྔ་དང་དང་ལེན་ལྔ། །ཡན་ལག་དམ་ཉམས་མཐོལ་ཞིང་བཤགས། །བསྙེན་བསྒྲུབ་ཏིང་འཛིན་མི་གསལ་ཞིང་། །ཉ་སྟོང་དུས་དྲུག་མཆོད་པ་ཆག །ལེ་ལོ་བསོག་འཇོག་ཚོགས་སྤྱང་གིས། །ཕུད་ལྷག་ཉམས་ཤིང་ཁ་ཚར་ཤོར། །ཚོར་དང་མ་ཚོར་རྐྱེན་དབང་གིས། །སྒོ་གསུམ་བག་མེད་དམ་ཉམས་བཤགས། །བླ་མ་རྡོ་རྗེ་སེམས་དཔས་རིགས་ཀྱི་བུ་ཁྱོད་ཀྱི་སྡིག་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་པར་བསམ་ནས། ཆོས་ཐམས་ཅད་ཡེ་ནས་གནས་པའི་གནས་ལུགས་ཡིད་ལ་བྱས་ཏེ། ཡིད་ཀྱི་དམ་ཉམས་ལྟ་བས་བཤགས། །དེ་ཡང་ཀུན་གཞི་བྱང་ཆུབ་སེམས། །ཡིན་པ་མེད་པའི་ལྟ་བ་རྟོགས། །མིན་པ་མེད་པའི་སྤྱད་པ་རྟོགས། །ཡིན་པ་མེད་པའི་དགོངས་ཉམས་ལོན། །ཡིན་མིན་མེད་པའི་སྤྱོད་པ་རྟོགས། །རེ་དོགས་མེད་པའི་བྱང་ཆུབ་སེམས། །རྩ་བ་ཡན་ལག་ཐམས་ཅད་ཀྱི། །ཆག་ཉམས་མ་བྱུང་མ་སྐྱེས་པས། །བཤགས་བྱ་བཤགས་བྱེད་གཉིས་མེད་གྲོལ། །ལྔ་པ་ནི། སྐུ་གསུམ་གྱི་མཎྜལ་འབུལ་བ་ལས་ལོངས་སྐུ་དག་པ་ཞིང་གི་མཎྜལ་ནི། ཚོམ་བུ་ལྔ་བཀོད་ཅིང་། ཧཱུྃ་ཨཱོཾ་སྭཱ་ཨཱཾ་ཧཱཿ སྣང་སྲིད་ཕྱོགས་བཅུ་རྣམ་དག་ཞིང་ཁམས་བདེ་ཆེན་འོག་མིན་སྟུག་པོ་བཀོད་པའི་བླ་བྲེ་ཅན། འདོད་ལྔའི་སྤྲིན་གྱི་ཆར་ཆེན་རྩི་ཤིང་སྐར་མ་ལྟར་བཀྲམ་འདོད་དགུའི་དཀྱིལ་འཁོར་ཀུན་འབྱུང་བས། ཀུན་ཁྱབ་ཆོས་དབྱིངས་རྡུལ་སྙེད་མཆོད་པས་ཀུན་ཏུ་འགེངས་པའི་ཀུན་བཟང་ནམ་མཁའི་མཛོད་ཆེན་འདི། དཔལ་ལྡན་རྡོར་སེམས་རྒྱལ་བ་རྒྱལ་སྲས་རྒྱ་མཚོ་མཉེས་པའི་དཔལ་སྟུག་རྒྱ་མཚོས་མཛེས་གྱུར་ཅིག །ཕྱོགས་བཅུའི་བརྟན་གཡོ་རྡུལ་སྙེད་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །བླ་མ་རྣམས་དང་དཀོན་མཆོག་གསུམ། །དཀྱིལ་འཁོར་ཀུན་ལ་རྒྱས་པ་འབུལ། །སྤྲུལ་སྐུ་སྣང་སྲིད་རྣམ་དག་གི་མཎྜལ་ལ། ཚོམ་བུ་བདུན་བཀོད་དེ། ཏྲཾ། གླིང་བཞིའི་དཀྱིལ་འཁོར་རིན་ཆེན་ལྡན། །དཔག་བསམ་ཤིང་དང་རྫིང་བུ་མཛེས། །ལས་བཞིའི་བྱིན་བརླབ་ཁྱད་པར་ལས། །ལྷ་དང་ལྷ་མོ་ལོངས་སྤྱོད་ལྡན། །ལྷག་པའི་ཏིང་འཛིན་མཆོད་པར་བཞེས། །ཆོས་རྣམས་ཐམས་ཅད་འབྲས་བུ་ཡོངས་རྫོགས་ཤིང་། །སངས་རྒྱས་རྣམས་ལ་མཎྜལ་འདི་འབུལ་བས། །འབྲས་བུ་འཕགས་པའི་ནོར་བདུན་ལྷུན་གྲུབ་སྟེ། །ཏིང་འཛིན་འབུམ་ཕྲག་རྣམས་ལ་དབང་བསྒྱུར་ཤོག །མོས་གུས་གསོལ་བ་གདབ་པ་ཆོས་སྐུའི་མཎྜལ་ནི། ན་མོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་དང་། ཞིང་ཁམས་ཟག་པ་མེད་པ། ཟད་མི་ཤེས་པ་རྒྱན་གྱི་འཁོར་ལོའི་བདེན་པ་དང་། རྒྱལ་བ་རྒྱ་མཚོ། གསང་བ་རྒྱ་མཚོ། སྨིན་པ་རྒྱ་མཚོ། བརྒྱུད་པའི་བླ་མ་རྗེ་བཙུན་རིན་པོ་ཆེ་རྣམས་ཀྱི་བྱིན་རླབས་ཀྱིས། །བདག་རིག་པ་འཛིན་པ་རྡོ་རྗེ་ཞེས་བགྱི་བ་ལ། སེམས་ཅན་ཐམས་ཅད་ཀྱི་དོན་དུ་རྫོགས་པ་ཆེན་པོ་ཤིན་ཏུ་རྣལ་འབྱོར། དོན་རང་བྱུང་གི་ཡེ་ཤེས་དེ་ཁོ་ན་ཉིད་དོན་གྱིས་གང་བ་དང་། ཤིན་ཏུ་གང་བ་དང་། རྒྱས་པ་དང་། ཤིན་ཏུ་རྒྱས་པ་དང་། སྨིན་པ་དང་། ཤིན་ཏུ་སྨིན་པ་དང་། གྲོལ་བ་དང་། ཤིན་ཏུ་གྲོལ་བ་རྒྱ་ཆེན་པོ་མཛད་དུ་གསོལ། བདག་གིས་དགེ་བའི་ལས་འདི་བགྱིས་པ་ཡིས། །འཇིག་རྟེན་རིང་པོར་མི་ཐོག་སངས་རྒྱས་ནས། དེ་ཀུན་འགྲོ་ལ་ཕན་ཕྱིར་དམ་ཆོས་ཀྱིས། །སྡུག་བསྔལ་མང་གདུང་སེམས་ཅན་སྒྲོལ་གྱུར་ཅིག །ཅེས་བརྗོད་པས་ལྷན་སྐྱེས་ཀྱི་ཡེ་ཤེས་འཆར་བར་འགྱུར་རོ། །ཛ་ཧཱུྃ་བྃ་ཧོ། ཚོགས་ཞིང་རྣམས་རང་ལ་ཐིམ་པར་གྱུར་པའི་ངང་ལ་བཞག་གོ། །དྲུག་པ་ལ་རང་ང་རྒྱལ་བཟུང་བ་དང་། ལས་དངོས་སོ། །དང་པོ། ཧཱུྃ་བཛྲ་དྷྲཱིཀ །སྐད་ཅིག་གིས་སྟོང་པའི་ངང་ལས། རང་ཉིད་དཔལ་རྡོ་རྗེ་སེམས་དཔའི་སྐུ་མདོག་སྔོ་ནག་གཡས་རྡོ་རྗེ། གཡོན་དྲིལ་བུ་འཛིན་པ། ཞལ་འཛུམ་ཡང་མཆེ་བ་ཡུད་ཙམ་གཙིགས་པ། སྤྱན་གསུམ་ཞི་བ་ཡིན་ཀྱང་ཡུད་ཙམ་སྡང་མིག་ཏུ་གཟིགས་པ། སྐུ་འོད་དཔུང་གི་ནང་ན་བཞུགས་ཀྱང་འོད་ཀྱི་རྩེ་མོ་ལ་མེ་རི་འཕྲོ་བ། ཉི་མའི་དཀྱིལ་འཁོར་ལ་ཡུམ་དབྱིངས་ཕྱུག་མ་དང་སྙོམས་པར་འཇུག་པ། གཡས་པས་ཡབ་ལ་འཁྱུད་ཅིང་། གཡོན་པས་དྲིལ་བུ་ཡབ་ཀྱི་སྙན་རྩར་འཁྲོལ་པ། དེ་ཡི་ཐུགས་ཀར་ཟླ་བའི་གདན་ལ་རང་འདྲའི་ཡེ་ཤེས་སེམས་དཔའ། དེ་ཡི་ཐུགས་ཀར་རྡོ་རྗེའི་ལྟེ་བར་ཧཱུྃ་ལ། ཧཱུྃ་བཛྲ་དྷྲིཀ་གིས་བསྐོར་བ། ཡུམ་གྱི་ཐུགས་ཀར་དྲིལ་བུ་ལ། མུྃ་དྷཱ་དུ་ཤྭ་རིས་བསྐོར་བའི་བདག་ཉིད་ཅན་དུ་གྱུར། དེ་དང་དུས་མཉམ་དུ་ཕྱོགས་བཅུའི་འགྲོ་བ་ཐམས་ཅད་ཀྱང་རྡོ་རྗེ་སེམས་དཔའི་སྐུར་གྱུར་ཏེ། སྤྱི་མགྲིན་སྙིང་ག་ནས་འོད་ཟེར་དཀར་དམར་སྔོན་པོ་བྱུང་ནས་རང་ལ་ཐིམས་པར་གྱུར། གཉིས་པ་ནི། བྷནྡྷའི་ནང་དུ་ཨ་མྲྀ་ཏ་བཏབ་པ་བཀོད། སྟོང་པའི་ངང་ལས། བྷྲཱུྃ་ལས་བྷནྡྷའི་ནང་དུ་ཨ་ལས་ཟླ་བའི་སྟེང་དུ། མཱུྃ་ལས་ཡུམ་ཀྲོ་དྷི་ཤྭ་རི་མ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་བསྣམས་པ། དཔལ་གྱི་ཆས་བརྒྱད་ཀྱིས་བརྒྱན་པའི་ཐུགས་ཀར་ཟླ་བའི་སྟེང་དུ། བྷནྡྷ་མཱུྃ་གྱིས་མཚན་པར་གསལ་བར་གྱུར། ༀ་བཛྲ་དྷཱ་དུ་ཀྲོ་ཏི་ཤྭ་རི་དེ་བི་ཤྭ་དྷ་ན་ཏ་ན་ཛྙཱ་ན་ཧཱུྃ་ཧཱུྃ་ཧཱུྃ། ལན་ཉེར་གཅིག །དབྱིངས་ཕྱུག་ཁྲོ་མོ་འོད་དུ་ཞུ་བའི་ཆུ་ཡི་རྡུལ་ཕྲ་རབ་ཏུ་བསམ་ནས་བདག་གནས་ཡོ་བྱད་རྣམས་ལ་གཏོར་ཞིང་། ༀ་ཀྲོ་དྷི་ཤྭ་རི་ཧཱུྃ་ཕཊ། བདུན་པ་ལ། དཀར་ཕྱོགས་དྲོད་ཉུལ་གྱི་བགེགས་བསལ་བ་དང་། ནག་ཕྱོགས་གླག་ལྟའི་བགེགས་བསལ་བའོ། །དང་པོ་ནི། རྃ་ཡྃ་ཁྃ་གིས་བསངས། ༀ་སྭ་བྷཱ་ཝས་སྦྱངས། སྟོང་པའི་ངང་ལས་བྷྲུྃ་ལས་བྱུང་བའི་སྣོད་ཡངས་ཤིང་རྒྱ་ཆེ་བར་ཏྲྃ་ལས་བདུད་རྩིའི་རྒྱ་མཚོ་ཟད་མི་ཤེས་པའི་གཏོར་མ་འདོད་པའི་ཡོན་ཏན་ཕུན་སུམ་ཚོགས་པར་གྱུར། ༀ་ཨཱཿཧཱུྃ་ཧོ་ས་སྤེལ། རང་གི་སྙིང་གའི་ཧཱུྃ་གི་འོད་ཟེར་གྱིས་དཀྱིལ་འཁོར་གྱི་འཁོར་ཡུག་ཏུ་གནས་པ་མཁའ་འགྲོའི་ཚོགས་དང་། ཕྱོགས་སྐྱོང་ཞིང་སྐྱོང་སྲིད་གསུམ་འབྱུང་པོའི་ཚོགས་ཐམས་ཅད་ཨ་ཀཪྵ་ཡ་ཛཿ ས་སྤྱན་དྲངས་ལ་སྤྲོ་ན་སྔགས་དྲུག་ཕྱག་སྤེལ། ༀ་ཌཱཀྐི་ནི་ལོ་ཀ་པཱ་ལ་ཀྵེ་ཏྲ་པཱ་ལ་ས་པཱ་རི་ཝ་ར་ཨི་དཾ་བཱ་ལིནྟ་ཁ་ཁ་ཁ་ཧི་གསུམ་དབུལ་ལ། ཏིང་འཛིན་མཐུ་ལྡན་རྣམ་རོལ་གཟི་བྱིན་ཅན། །ཤེས་རིག་གྲགས་པའི་ཚུལ་ཁྲིམས་འཁོར་གྱིས་བསྐོར། །མྱ་ངན་འདས་པ་བདུད་རྩིའི་རོ་ཡི་བཅུད། །མཁའ་འགྲོ་ཞིང་སྐྱོང་མཉམ་ཉིད་ངང་དུ་བསྔོ། །ཕྱོགས་སྐྱོང་རྒྱལ་ཆེན་སོ་སོའི་འཁོར་བཟློག་ཅིང་། །ཕྱོགས་དང་ཕྱོགས་མཚམས་ཐམས་ཅད་བསྲུང་བ་དང་། །དམ་བཅས་ཞལ་བཞེས་ཁས་བླངས་ལྷ་དག་བཞིན། །བསྟན་པ་བརྗོད་ལ་ཚུལ་བཞིན་སྲུང་དུ་གསོལ། །ཞེས་རོལ་མོའི་སྒྲ་བཅས་དཀར་གཏོར་སྒྲུབ་ཁང་གི་ངོས་སུ་དོར། གཉིས་པ་ནི། ༀ་སརྦ་བིགྷྣན་བ་ལིནྟ་གྷྲྀ་ཧྣ་ཁ་ཧི། ཧཱུྃ། རྣལ་འབྱོར་ཆེན་པོའི་དཀྱིལ་འཁོར་འདིར། །གསང་བའི་དམ་ཅན་སོ་སོ་ནས། །འདུ་བ་ལ་ནི་མ་གཏོགས་ཤིང་། །ཉན་པ་ལ་ནི་མི་དབང་བ། །ཀུན་ཀྱང་རེ་བ་བསྐང་ལགས་ཀྱིས། །ད་ལྟ་ཉིད་དུ་སོ་སོར་དེངས། །ཧཱུྃ། ཅི་སྟེ་བཀའ་ལས་འདས་གྱུར་ན། །རྡོ་རྗེ་འཛིན་རྒྱལ་ཁྲོས་ནས་ནི། །རྡོ་རྗེ་མཚོན་ཆེན་འབར་བ་ཡིས། །ཐལ་བ་བཞིན་དུ་བརླག་པར་བྱེད། །ཅེས་བགེགས་གཏོར་དོར། འདྲེ་འཇིག་བདུག །ཧཱུྃ་བཞི་བའི་སྔགས་རོལ་མོའི་སྒྲ་དྲག་པོ་དང་བཅས་པའི་ཚམ་རྔམས་བྱ། བརྒྱད་པ་ཀུན་རྫོབ་ཀྱི་མཚམས་དང་། དོན་དམ་གྱི་མཚམས་སོ། །དང་པོ། རང་གི་མིག་གཡས་མ་ལས་ཉི་མ། གཡོན་པ་ཨ་ལས་ཟླ་བ། གཡས་ཀྱིས་མེས་བགེགས་དང་ལོག་འདྲེན་ཐམས་ཅད་བསྲེག །ཧཱུྃ་ཧཱུྃ་ཧཱུྃ། ༀ་ཛྭ་ལ་བཛྲ་ཧཱུྃ། མནྟྲ་སུ་མ་བྷཱ་ནི་ཧཱུྃ། ཧཱུྃ་བྷྲུྃ། ༀ་བྷྲུྃ། ཏྲཱྃ་བྷྲུྃ། ཧྲཱིཿབྷྲུྃ། ཧཱ་བྷྲུྃ། ཞེས་གསུངས་པ་ཙམ་གྱིས་ལྷ་ཚོགས་རྣམས་ཀྱི་ཐུགས་ཀ་ནས་རྡོ་རྗེའི་ཆར། སྤྱི་བོ་ནས་འཁོར་ལོ། མགྲིན་པ་ནས་ཐོ་བ། ལྟེ་བ་རལ་གྲི། གསང་གནས་ནས་རྒྱ་གྲམ། སྐུ་ཐམས་ཅད་ལས་བྲག་རིའི་ཆར་བྱུང་བས་བགེགས་རྣམས་བརྒྱལ་ཞིང་གཏོར། གཡོན་གྱི་ཟླ་བ་བདུད་རྩིས་ཆུས་ཐལ་བ་ཡང་མ་ལུས་པར་བཀྲུས། ཧཱུྃ་ཧཱུྃ་ཧཱུྃ། ཕྱི་རོལ་དུ་མཚོན་ཆ་རྣམས་རིམ་པ་དྲུག་གི་གུར་ཁང་དུ་གྱུར་པའི་ཕྱི་རྡོ་རྗེ་རྒྱ་གྲམ་སྣ་ཚོགས་པའི་རྭ་ཅན་དུ་བརྟན། སླར་ཡང་སྤྱན་དབུས་མའི་བྱང་ཆུབ་སེམས་ཀྱི་འོད་ཀྱིས་བགེགས་བརྒྱལ་བ་རྣམས་སླར་བསླང་སྟེ་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་བྱས་ཤིང་འཇིག་རྟེན་གྱི་ཁམས་གཞན་དུ་སྐྱེས་པར་གྱུར། ཧཱུྃ་ཧཱུྃ་ཧཱུྃ། ༀ་བཛྲ་ས་ཏྭ་ར་ཛཱ་ཛ༔ ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བ། །མཚོན་ཆ་རྣམ་པ་སྣ་ཚོགས་ཀྱིས། །དཀྱིལ་འཁོར་རིམ་པ་ཚུལ་བཞིན་སྲུངས། །ཧཱུྃ། སྟེང་ཡང་རྡོ་རྗེའི་བླ་བྲེ་ལ། །རྡོ་རྗེའི་ཐོ་ཐོག་སེར་ཆེན་འབེབས། །འོག་ཀྱང་རྡོ་རྗེའི་ས་གཞི་ལ། །རྡོ་རྗེའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་རྡོ་རྗེ་འབར་བས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་ཛྭ་ལཱ་ཱན་ལངྐ་ཀྲོ་དྷ་ཧཱུྃ་ཕཊ། ཧཱུྃ། སྟེང་ཡང་འཁོར་ལོའི༴ འཁོར་ལོའི༴ འོག་ཀྱང་༴ འཁོར་ལོའི༴ ཕྱོགས་མཚམས་འཁོར་ལོ༴ རླུང་ཡང་༴ བགེགས་ཀྱི་ཚོགས་ལྟ༴ ༀ་ཙཱཀྲ་ཛྭ་ལཱ༴ ཧཱུྃ། སྟེང་ཡང་རལ་གྲིའི༴ རལ་གྲིའི༴ འོག་ཀྱང༴ རལ་གྲིའི་ཚ༴ ཕྱོགས་མཚམས༴ རླུང་ཡང་༴ བགེགས་ཀྱི༴ ༀ་པྲཱ་ཛྙཱ་ཛྭ་ལཱ༴ ཧཱུྃ། སྟེང་ཡང་ཐོ་བའི༴ ཐོ་བའི་ཐོ་ཐོག༴ འོག་ཀྱང་༴ ཐོ་བའི༴ ཕྱོགས་མཚམས་རླུང་ཡང་འགྱུ༴ བགེགས་ཀྱི༴ ༀ་མུ་སྟི་ཛྭ་ལ༴ ཧཱུྃ། སྟེང་ཡང་རྒྱ་གྲམ༴ རྒྱ་གྲམ་ཐོ་ཐོག༴ འོག་ཀྱང་༴ རྒྱ་གྲམ་ཚྭ༴ ཕྱོགས་མཚམས༴ རླུང་ཡང་༴ བགེགས་ཀྱི་ཚོགས༴ ༀ་ཀརྨ་ཛྭ་ལ༴ ཧཱུྃ། སྟེང་ཡང་བྲག་རིའི༴ བྲག་རིའི་ཐོ་ཐོག་སེར་ཆེན་འབེབས། །འོག་ཀྱང་བྲག་རིའི་ས་གཞི་ལ། །བྲག་རིའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་བྲག་རི་འབར་བས་གཏམས། །རླུང་ཡང་འཇུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། ༀ་བཛྲ་པ་ཏ་ལ་པཉྩ་ཧཱུྃ་ཕཊ། གཉིས་པ་ནི། རྣམ་པར་རྟོག་པ་བགེགས་ཡིན་ཏེ། །བགེགས་ནི་རང་གི་སེམས་ལས་བྱུང་། །རང་བཞིན་ཡེ་ནས་དག་ཞེས་ན། །བགེགས་ཞེས་བྱ་བའི་མིང་ཡང་མེད། །སྤྱི་བོ་སྣ་ཚོགས་རྡོ་རྗེའི་རྭ་བ་ལས། །རྐང་མཐིལ་རྡོ་རྗེ་ཆེན་པོའི་ས་གཞི་དང་། །རྩིབ་མ་རྡོ་རྗེའི་རྭ་བར་གནས་པ་དང་། །ལྟག་པ་རྡོ་རྗེ་གུར་དུ་ཕུབ་ནས་ནི། །བ་སྤུ་མདའ་ཡི་དྲྭ་བ་ཆེན་པོ་སྟེ། །སེན་མོ་མེ་རི་རབ་ཏུ་འབར་བའོ། །དགུ་པ་ལ་དམ་ཚིག་ཉམས་པའི་བཤགས་པ་ཁྱད་པར་བ་དང་། སྡོམ་པ་བཟུང་བའོ། །དང་པོ། ༀ་བཛྲ་ས་མཱ་ཛས། བཤགས་ཡུལ་བླ་མ་རྒྱལ་བ་རྒྱ་མཚོ་ནམ་མཁའ་ཏིལ་གྱི་གང་བུ་བཞིན་དུ་ཁྱབ་པ་གསལ་བར་གྱུར། ཚེ་རབས་འཁོར་བ་ཐོག་མེད་ནས་བསགས་པའི་སྡིག་ལྟུང་ཐམས་ཅད་ལ་གནོང་ཞིང་འགྱོད་པས་བླ་མ་དང་། ཁྱད་པར་དུ་གསང་སྔགས་ཀྱི་སྐོར་ཞུགས་ནས་དམ་ཚིག་ཉམས་པས། འགྱོད་སྡོམས་ཀྱི་བསམ་པ་བརྟན་པོས་ཕྱག་སྲིན་ལག་རྩེ་སྤྲད་དེ། ཧཱུྃ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་མཛད་པ། །འདིར་གཤེགས་པ་དག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེར་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པ། །གཉིས་མེད་བྱང་ཆུབ་སེམས་ཀྱིས་མཉེས་རྒྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུགས་ཅན་བདག་ཉིད་མ། །མཁའ་དབྱིངས་ཀློང་ཡོངས་པདྨོ་འཁྱིལ་པ་ལ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཧཱུྃ། ཐུགས་རྗེ་གདུང་འཚོབ་རིག་འཛིན་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་བགྲོད་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདས་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱིར་ནོས་ཤིང་གཉེར་དུ་སྨྲས་སོ་འཚལ། །ཡུན་དུ་མ་གཏོང་འདའ་བར་མི་བགྱིད་ཅིང་། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོངས་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་གཅིག་ཙམ་ཡང་ཕྲད་སྨྲ་མི་བྱ་ཞིང་། །ལུང་པ་གཅིག་གི་ཆུ་ལ་མི་འཐུང་ཞེས། །བཀའ་ལས་བྱུང་བ་དེ་ལྟར་མ་ལྕོགས་ཏེ། གསང་སྒོ་འཆོལ་བས་དབྱེ་བསལ་དཀའ་བ་དང་། མངོན་ཤེས་ཆུང་བས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དེ། །ཉམས་ལ་མི་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གིས། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་པ་རྣམས། །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་བརྩེས་བདག་ལ་དགོངས་ནས་ཀྱང་། །གཉིས་མེད་མི་འགྱུར་དབྱིངས་ལ་བདག་བཀོད་དེ། །མི་དམིགས་བཏང་སྙོམས་ངང་དུ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་གཉིས་མེད་སྤྲོས་ལས་འདས་པ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པ་མཆིས་ན་རབ་གནོང་བཟོད་པར་གསོལ། །མཐོལ་ལོ་བཤགས་སོ་དམ་ཅན་གཉན་གྱི་ཚོགས། །གནོང་ངོ་འགྱོད་དོ། །སྦྱང་ངོ་བསལ་ལོ། །ནོངས་པ་མཆིས་ན་མི་འཆབ་བཟོད་པར་གསོལ། །བཟོད་པར་བཞེས་ཏེ་ཚངས་པ་སྩལ་དུ་གསོལ། །ཡི་གེ་བརྒྱ་པ་བརྗོད་དེ་ཆག་ཉམས་རང་བཞིན་མེད་པར་དག་པར་བསམ། གཉིས་པ་ནི། རྡོ་རྗེ་རྩེ་གཅིག་པའི་རྒྱ་བཅས་པ་ཐུགས་ཀར་འཆང་བཞིན་དུ། བླ་མ་དཀྱིལ་འཁོར་གྱི་ལྷ་ཚོགས་བདག་ལ་དགོངས་སུ་གསོལ། །བླ་མེད་མི་སྤངས་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །གཏི་མུག་ཆགས་དང་ཞེ་སྡང་ཆེ། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་འདོར་རོ། །ༀ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་པའི་དོན་དུ་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་ཤིག །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་མཛད། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་ལན་གསུམ། བཅུ་པ་ལ་རང་གི་རྒྱུད་བྱིན་རླབས་པ་དང་། །མཆོད་རྫས་བྱིན་བརླབ་པའོ། །དང་པོ་ནི་ཡེ་ཤེས་འབེབ་པ་སྟེ། ཧཱུྃ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་སྟོན་པའི༴ བྱིན་ཆེན་དབབ་པའི༴ དབང་ཆེན་བསྐུར༴ ༀ། མཐུ་ཆེན་མཐུ་སྩོལ་བཅོམ་ལྡན་འདས། །དབང་ཆེན་དབང་བསྐུར༴ དངོས་གྲུབ་མཆོག་སྩོལ༴ གསང་བ་མཆོག་གི་དཀྱིལ་འཁོར་འདིར། །ལས་ཀྱི་འབྲས་བུ་མཆིས་པར་མཛོད། །ༀ་ཨཱཿཧཱུྃ་ས་མ་ཡཿསྟྭམ། ས་མ་ཡ་ཧོ། ཞེས་སྤོས་དང་བྱིན་ཆགས་པའི་རོལ་མོའི་བསྐུལ། ཧཱུྃ་ཧཱུྃ་ཧཱུྃ། རྩ་བརྒྱུད་ཀྱི་བླ་མ། དཀྱིལ་འཁོར་གྱི་ལྷ་ཚོགས་སྐུ་གསུང་ཐུགས་ཀྱི་ཕྱག་རྒྱ་འོག་མིན་ནས་ཁ་ཆར་བབ་པ་ལྟར་བྱོན་ནས་སྙིང་གའི་སྒོ་ཕྱེས་ཏེ་སིབ་ཀྱིས་ཐིམ་པར་གྱུར་པའི་ངང་ལ་གསལ་སྟོང་འཛིན་མེད་དུ་ཅི་ནུས་སུ་བཞག་གོ། །གཉིས་པ་ལ། ཐུན་མོང་བ་དང་། ཐུན་མིན་གཉིས། དང་པོ་བསངས། རང་གི་ཐུགས་ཀ་ནས་ཡི་གེ་གསུམ་སྤྲོས། མཆོད་རྫས་ལ་ཕོག །རྃ་ཛྭ་ལ་རྃ། ཡྃ་སྥ་ར་ཎ་ཕཊ། ཁྃ་བི་ཤུདྡྷེ་ཧཱུྃ། མ་དག་པ་ཐམས་ཅད་བསྲེག་གཏོར་བཀྲུས། །སྃ་ཧ་ན་ཎ་ཧཱུྃ། ཐུགས་ཀར་ཐིམ་སྟེ་སྟོང་པར་གྱུར། སྟོང་པའི་ངང་ལས་རྡོ་རྗེ་བདེ་མཆོག་སྒྱུ་འཕྲུལ་དྲྭ་བའི་ཡེ་ཤེས་ལྔ་ཡི་རང་གཟུགས་དཀར་མཐིང་སྔོ་སེར་དམར་ལྗང་གཟུགས་ཀྱིས་མཛེས་པའི། རིག་མ་དམ་པ་མཆོད་ཡོན་མ་སོགས། བདུད་རྩིའི་སྣོད་དང་། ཁྲུས་ཁང་། བདུག་སྤྲིན། དཔག་བསམ་གྱི་མེ་ཏོག་སོགས་ཐོགས་ཤིང་། བརྟན་གཡོའི་བཅུད་ཀུན་བསྡུ་བ། ཏིང་ངེ་འཛིན་གྱི་འགྱུར་བ་མཐའ་ཡས་པའི་དཔལ་ཅན། སྤྱོད་ཡུལ་ཀུན་བཟང་ནམ་མཁའི་མཛོད་ཀྱི་སྤྲིན་དཔུང་ཆེན་པོ། བླ་མ་དང་བཅོམ་ལྡན་འདས་རྣམ་པར་ཤེས་པའི་རྒྱལ་པོ་ལ་སོགས་པ་དཀྱིལ་འཁོར་གྱི་འཁོར་ལོར་མཉེས་པ་རྒྱ་མཚོ་འབྱུང་བར་གྱུར་ཅིག །སོ་སོའི་ཕྱག་རྒྱ་བཅས། ༀ་བཛྲ་ཨརྒྷཱཾ་ཨཱཿཧཱུྃ་དེ་བཞིན། པཏྱཾ༴ པུཥྤེ་ནས་གནྡྷེའི་བར་སྦྱར། ལྷག་མ་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབ་བོ། །གཉིས་པ་ཐུན་མིན་སྨན་རག་གཏོར་མ་བརླབ། དང་པོ་ནི། རྃ་ཡྃ་ཁྃ། སྟོང་པའི་ངང་ལས་རང་གི་ཐུགས་ཀ་ནས་བྷཱུྃ་ཆད། མུ་ཏིག་དྲི་མ་མེད་པ་དཀར་པོ་ལྟ་བུའི། ནང་ཀ་པཱ་ལ་ཡངས་ཤིང་རྒྱ་ཆེ་བའི་ཕྱི་རིན་པོ་ཆེ་སྣ་ལྔ་ལས་གྲུབ་པའི་གཞལ་མེད་ཁང་གྲུ་བཞི་སྒོ་བཞི་རྟ་བབས་དང་བཅས་པ། ཐིག་བཞི་བཏབ་པས་རིལ་ཆ་དགུ་དང་ལྡན་པའི་དབུས་ཉི་མའི་སྟེང་བྱང་སེམས་དཀར་པོ་ལ་ཧཱུྃ་མཱུྃ། ཤར་དུ་ཟླ་བའི་སྟེང་དྲི་ཆེན་སེར་པོ་ལ་ཨཱོཾ་ལཱྃ། ལྷོར་རིན་ཆེན་ཟུར་བརྒྱད་སྟེང་ཤ་ཆེན་སྔོན་པོ་ལ་སྭཱ་མཱྃ། ནུབ་ཏུ་པདྨ་འདབ་བརྒྱད་སྟེང་རཀྟ་དམར་པོ་ལ་ཨཱྃ་བཱྃ། བྱང་དུ་ཨེ་གྲུ་གསུམ་སྟེང་དྲི་ཆུ་ལྡང་གུ་ལ་ཧཱ་ཏཱཾ། དེ་རྣམས་ལས་འོད་འཕྲོས་འཁོར་འདས་ཀྱི་བཅུད་བསྡུས་ཏེ་བསྟིམ། རྡོ་རྗེ་འཁོར་ལོ་རིན་པོ་ཆེ། །པདྨ་རྒྱ་གྲམ་འབར་བ་དང་། །སོ་སོའི་རིགས་ཀྱི་དྲིལ་བུར་གྱུར། །སྤྲོ་བསྡུས་རྡོ་རྗེ་གསུམ་དུ་བྱས། །དབུས་སུ་རྡོར་སེམས་ཡབ་ཡུམ་དཀར། །ཤར་དུ་རྣམ་སྣང་ཡབ་ཡུམ་སེར། །ལྷོ་རུ་རིན་འབྱུང་ཡབ་ཡུམ་སྔོ། །ནུབ་ཏུ་སྣང་མཐའ་ཡབ་ཡུམ་དམར། །བྱང་དུ་དོན་གྲུབ་ཡབ་ཡུམ་ལྗང་། །རང་རྟགས་ཐུགས་བསྣོལ་ཡུམ་ལ་འཁྱུད། །རང་གི་ཕྱག་གཡོན་པའི་མཐེབ་སྲིན་ལ་མ་ཨ་ཡོངས་སུ་གྱུར་པའི་ཉི་ཟླའི་དབུས་ཧྲཱིཿལས་རྟ་མགྲིན་དམར་པོ་ལྕགས་ཀྱུ་ཐོགས་ཤིང་སྡིགས་མཛུབ་མཛད་པ། མི་ཕམ་མ་དཀར་མོ་ལྕགས་ཀྱུ། ཁྲོ་གཉེར་མ་སེར་མོ་ཞགས་པ། རོ་ལང་མ་དམར་མོ་ལྕགས་སྒྲོག །རལ་གཅིག་མ་ལྗང་ཁུ་དྲིལ་བུ་འཛིན་པ་བཞིས་མདུན་གཡས་རྒྱབ་གཡོན་ནས་འཁྲིལ་བ། རང་དང་རྟ་མགྲིན་རིགས་ལྔར་བཅས་པའི་ཡབ་ཀྱི་རྡོ་རྗེ་ལ་ༀ་ཕཊ། ཡུམ་གྱི་པདྨ་ལ་ཡང་ༀ་ཕཊ་ཀྱིས་མཚན་པ། ས་མ་ཡ་སྟྭཾ། ས་མ་ཡ་ཧོ། ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱ། ཛ་ཧཱུྃ་བཾ་ཧོཾཿབོ་དྷི་ཙིཏྟ། སྥ་ར་ཎ་ཕཊཿ སཾ་ཧ་ར་ན་ཧཱུྃཿ ཞེས་རང་ཡི་དམ་ཡབ་ཡུམ་སྦྱོར་བ་མཛད་པའི་བྱང་ཆུབ་སེམས་ཀྱི་འོད་ཟེར་རྟ་མགྲིན་ཡབ་ཡུམ་ལ་ཕོག །དེ་རོལ་པ་མཛད་པའི་བྱང་ཆུབ་སེམས་སྤྲིན་རིགས་ལྔ་ཡབ་ཡུམ་བཅུ་ལ་ཕོག་སྟེ། དེ་དག་རོལ་པར་མཛད་པའི་བྱང་ཆུབ་སེམས་ཀྱི་འོད་ཟེར་གྱིས་སངས་རྒྱས་ཐམས་ཅད་ཀྱི་ཐུགས་ཡང་དག་པའི་ཡེ་ཤེས་ཀྱི་བདུད་རྩི་བཀུག་སྟེ་དམ་ཚིག་གི་བདུད་རྩི་དང་རོ་གཅིག་ཏུ་གྱུར། ཧཱུྃ་བཛྲ་དྷྲིཀ །མཱུྃ་རྡ་དུ་ཤྭ་རི། ༀ་ཛི་ན་ཛིཀ྄ །ལྃ་དེ་ཤྭ་ར་ཏི། སྭཱ་རཏྣ་བྷྲཱིཀ །མཱྃ་མོ་ཧ་ར་ཏི། ཨཱོཾ་ཨ་རོ་ལིཀ །བཱྃ་ར་ག་ར་ཏི། ཧཱ་པྲཱཛྙཱ་དྷྲཱིཀ །ཏཱྃ་བཛྲ་ར་ཏི། ༀ་ཨཱ༔ཧཱུྃ་སརྦ་པཉྩ་ཨ་མྲི་ཏ་ཧཱུྃ་ཧྲཱིཿཋཱཿ རྡོ་རྗེས་དཀྲུག་སྟེ་ལན་ཉེར་གཅིག་གམ་བདུན་བརྗོད་ནས། ཐེབ་སྲིན་ཉི་ཟླའི་སྐྱོགས་ཀྱིས། ༀ་ཨཱཿཧཱུྃ། བླ་མ་ཡི་དམ་མཁའ་འགྲོ་ཆོས་སྐྱོངས་མཆོད། །ཡང་གཏོར་ནས། ༀ་ཨཱཿཧཱུྃ། རྣལ་འབྱོར་མཆེད་རྣམས་སྡིག་སྒྲིབ་དག་པར་གྱུར་ཡང་གཏོར། ༀ་ཨཱ་ཧཱུྃ་མཆོད་རྫས་དང་གནས་ཁང་གི་ཉེས་སྐྱོན་དག་པར་གྱུར། རྡོ་རྗེའི་རྩེས་འཐོར་ཞིང་རྡོ་རྗེ་གསོར་ལ། ༀ་ཨཱཿཧཱུྃ་གང་ཞིག་བཀའ་རྐུ་བ་དང་། གསུང་གཅོད་པ་དང་། ལྟ་བ་དང་། ཉམ་པ་ལ་མི་དབང་བ་སྣོད་མ་ཡིན་པའི་བགེགས་རིགས་སྟོང་ཕྲག་བརྒྱད་ཅུ་པོ་དག་ལ། ང་ཡི་ཡེ་ཤེས་ཀྱི་བདུད་རྩིས་ཆུ་རྒྱུན་འདི་ཕོག་པ་ཙམ་གྱིས་ལུས་སྲོག་སྒྱུ་མ་རྡུལ་དུ་བརླག་ནས་ཐམས་ཅད་མེད་པར་བྱོས་ཤིག །གང་ཞིག་དམ་ཚིག་དང་ལྡན་པ་རྣམས་ཀྱི་ཐུགས་དམ་བསྐངས་བར་མཛོད་ཅིག །རིག་ཅན་རྣམས་ཀྱི་དམ་ཚིག་ནི། །རིག་མེད་རྣམས་ལ་དབབ་མི་འགྱུར། །རིག་ཅན་རང་གི་དམ་ཚིག་ལས། །སངས་རྒྱས་ཀུན་ཀྱང་འདའ་བ་མིན། །གནས་གསུམ་དུ་ཐིགས་གཏོར། ༀ་ཨཱཿཧཱུྃ། འཁྱོར་བའི་བདུད་རྩི་བཏུངས། ༀ་ཨཱཿཧཱུྃ་ལུས་ཀྱི་ལྷ་མཉེས་ཏེ། ཁ་ཆོད་ཟླ་བ་རྡོ་རྗེ་ལམ་ཐེབ་སྲིན་གྱི་རྟ་མགྲིན་བཞུགས་པར་གྱུར། གཉིས་པ་ནི། རྃ་ཡྃ་ཁྃ། སྟོང་པའི་ངང་ལས་བྷྲཱུྃ་ལས་ལྕང་ལོར་བཅས་པའི་དུང་ཆེན་དུ་ར་ལས་ངོ་བོ་ཡེ་ཤེས་ལ་རྣམ་པ་འཇིག་རྟེན་རྩི་བཅུད་སྲོག་གི་རྟེན་འབྱུང་རཀྟའི་རྒྱ་མཚོ། དམར་གྱི་སྦུ་ཕྲེང་ལྷ་མོའི་སྤྲིན་དང་། ཞིང་གི་སྙས་འཕྱོག །འཁོར་ལོའི་འོད་ཟེར་འཁྲུགས་པར་གྱུར། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧཱུྃ་ཧཱུྃ་ཕཊ། ལན་གསུམ། རྡོ་རྗེས་དཀྲུག་སྟེ་གཏོར་ཞིང་། ཧཱུྃ་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་རྒྱུད་ཚིམས། ཧཱུྃ་ཆོས་སྐྱོངས་རྣམས་ཀྱི་ཐུགས་དམ་བསྐངས། ཧཱུྃ་བགེགས་རིག་སྟོང་ཕྲག་བརྒྱད་ཅུ་རྡུལ་དུ་བརླག་པར་གྱུར། རང་གི་ལྕེ་ལ་ལན་གསུམ་བླང་སྟེ། སྙིང་གར་ཟླ་གམ་གྱི་མཚན་མ་བཏབ་བོ། །གསུམ་པ་ནི། རྃ་ཡྃ་ཁྃ། སྟོང་པའི་ངང་ལས་བྷནྡ་རིན་པོ་ཆེའི་གཞལ་མེད་ཁང་ཡོངས་སུ་རྫོགས་པ་རིལ་ཆ་དགུ་ལྡན་ལ། དབུས་བྱང་སེམས་དཀར་པོར་ཧཱུྃ། །དེའི་མདུན་མི་རོ་དམར་སྐྱ་ལ་མཱུྃ། །ཤར་དྲི་ཆེན་སེར་པོ་ལ་ཨཱོཾ། །ལྷོར་ཤ་ཆེན་སྔོན་པོ་ལ་སྭཱྃ། །ནུབ་ཏུ་པདྨ་རཀྟ་དམར་པོ་ལ་ཨཱྃ། །བྱང་དུ་དྲི་ཆུ་ལྗང་གུ་ལ་ཧཱ། །ཤར་ལྷོར་གླང་པོ་ཆེའི་རོ་དཀར་པོ་ལ་ལཱྃ། ལྷོ་ནུབ་ཏུ་རྟ་རོ་སྔོན་པོ་ལ་མཱྃ། ནུབ་བྱང་རྨ་བྱའི་རོ་ལྗང་ཀུ་ལ་བཱྃ། བྱང་ཤར་ཁྱི་རོ་དཀར་པོ་ལ་ཏཱྃ། མ་སུརྻ་མཎྜ་ལ་ཧཱུྃ། རང་གི་ཐུགས་ཀ་ནས་ཉི་དཀྱིལ་ཧཱུྃ་གིས་མཚན་པ་སྤྲོས། མ་དག་པ་ཐམས་ཅད་བསྲེགས། པྃ་པདྨ་མཎྜ་ལ་ཧཱུྃ། པདྨ་ཨཱྃ་གྱིས་མཚན་པས་ཡིག་འབྲུ་བཅུ་པོ་བདུད་རྩིར་གྱུར། ཨཱ་ཙནྟྲ་མཎྜ་ལ་ༀ། ཟླ་དཀྱིལ་ༀ་གྱི་མཚན་པ་བདུད་རྩིས་སྟེང་དུ་ཁ་ཆོད་གནས་པའི་དབུས་ཨཱོཾ་ལས་གཟུགས་རྡོ་རྗེ་མ་མེ་ལོང་བསྣམས་པ་དཀར། སྒྲ་རྡོ་རྗེ་པི་ཝཾ་སྒྲེང་བ་སྔོ། །དྲི་རྡོ་རྗེ་སྤོས་ཁང་ཐོགས་པ་སེར། །རོ་རྡོ་རྗེ་རོ་བརྒྱ་བའི་ཞལ་ཟས་ཐོགས་པ་དམར། །རེག་རྡོ་རྗེ་ན་བཟའི་གོང་བ་རྡོ་རྗེས་མཚན་པ་བྲེས་པ་ལྗང་། །ཆོས་རྡོ་རྗེ་ཨེ་གྲུབ་གསུམ་འཛིན་པ་མཐིང་མདོག་སྟེ། འདོད་པའི་ཡོན་ཏན་ཁམས་དྲུག་གིས་མཆོད་པ་དཔག་ཏུ་མེད་པས་རྒྱལ་བ་མཆོད་ཅིང་ཏིང་ངེ་འཛིན་གྱི་མཛེས་སྡུག་སྒྱུ་མའི་འགྱིང་བས་རོལ་པ་ཅན། གཏོར་མ་ཀུན་བཟང་ནམ་མཁའི་གཏེར་དུ་གྱུར། ༀ་བ་ལིཾ་ཏ་ཏེ་ཛྭ་ལ་ལིཾ་ཏ། བཱ་ལ་བྷ་ཏེ། གུ་ཧྱ་ས་མ་ཡེ་སྭཱ་ཧཱ། ལན་གསུམ། རྒྱུད་ཀྱི་རྒྱལ་པོ་ལས་ཕྲེང་ལས་འབྱུང་བའི་མཆོད་སྤྲིན་བྱིན་རླབ་དང་རོལ་མོའི་བྱིན་རླབས་ལྷག་ཆད་ཁ་བསྐོང་ཡིག་བརྒྱ་དང་བཅས་རོལ་མོ་བསྐུལ་ནས་སྣང་སྤྱོད་དག་པ་བདེ་ཆེན་དུ་ཤེས་པར་བྱའོ། །གཉིས་པ་དངོས་གཞི་ལ་ཡང་གཉིས། སེམས་བསྐྱེད་པ་དང་རྣལ་འབྱོར་དངོས་ལ་འཇུག་པའོ། །དང་པོ་ལའང་ཀུན་རྫོབ་དང་། དོན་དམ་གསལ་གདབ་པའོ། །དང་པོ། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །གཉིས་པ་ནི། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས༴ འགག་པ་མེད་ལས༴ འགག་པ་ཉིད་ན༴ ཨེ་མ་ཧོ༴ རྫོགས་པའི༴ གནས་པ་མེད་ལས༴ གནས་པ་ཉིད་ན༴ ཨེ་མ་ཧོ༴ རྫོགས་པའི༴ དམིགས་པ་མེད༴ དམིགས་པ་ཉིད༴ ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་ཐམས་ཅད་སྐྱེས། །འགྲོ་འོང་ཉིད་ན་འགྲོ་འོང་མེད། །གཉིས་པ་རྣལ་འབྱོར་ལའང་། ཏིང་ངེ་འཛིན་གསུམ་གྱིས་ཁོག་དབུབ་པ། རྒྱུ་ཡི་རྣལ་འབྱོར། ཆོ་འཕྲུལ་བཞིས་གཞུང་བསྲང་ནས་ཚོགས་པ་སྐུ་ཡི་རྣལ་འབྱོར། ཐུགས་དམ་བསྐུལ་ཞིང་བཟླས་པ་གསུང་གི་རྣལ་འབྱོར། མཉམ་པར་བཞག་པའི་ཏིང་འཛིན་ཕྲ་མོའི་མཇུག་ལྡང་ཐུགས་ཀྱི་རྣལ་འབྱོར་ཏེ་བཞི་ལས། དང་པོ་ལ་གསུམ་གྱི། དང་པོ་དེ་བཞིན་ཉིད་ཀྱི་ཏིང་འཛིན་ནི། དངོས་རྣམས་ཉིད་ན་དངོས་མེད་པར། རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །ཨཱོཾ་མ་ཧཱ་ཤུ་མྱ་ཏཱ་ཛྙཱ་ན་བཛྲ་སྭ་བྷཱ་ཝཱཏྨ་ཀོ྅་ཧཾ། ཕྱི་ནང་གི་ཆོས་འདི་ལྟར་སྣང་བ་ཐམས་ཅད་ཡེ་གདོད་མ་ཉིད་ནས་རང་བཞིན་མེད་པའི་དེ་ཁོ་ན་ཉིད་སྤྲོས་པ་ཀུན་དང་བྲལ་བ་སེམས་ཀྱི་གཤིས་མ་བཅོས་པའོ། །གཉིས་པ་ནི། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །ལུས་དང་ངག་སེམས་ཆོས་ཐམས་ཅད། །གང་ནའང་ནི་མི་དམིགས་པ། མིག་ཡོར་ཚུལ་དུ་སྦྱར་བ་ཡིས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །སྟོང་པ་ཉིད་དང་དབྱེར་མེད་པའི། །འགགས་མེད་སྙིང་རྗེ་སྒྱུ་མ་ཀུན་ཁྱབ་འཛིན་མེད་ནི། །མ་རྟོགས་སེམས་ཅན་གྱི་ཡུལ་ནམ་མཁའི་མཐའ་ཁྱབ་པ་དེ་སྙེད་དུ་གསལ་བར་གྱུར། །གསུམ་པ་ནི། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །ཨཿ རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོར་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །སྣང་སྟོང་གཉིས་སུ་མེད་པའི་སྙིང་རྗེ་ལས་ཡི་གེ་ཨ་ཡིག་དཀར་པོ་གཞི་རྩར་བཞུགས་པ་གསལ་ཞིང་བརྟན་པ་གཅིག་བྱུང་། ཨ་སྥ་ར་ཎ་ཕཊ། དེ་ལས་ནམ་མཁའི་མཐའ་ཀླས་པར་སྤྲོས། སྃ་ཧ་ར་ཎ་ཧཱུྃ། དེ་ཐམས་ཅད་ཀྱང་གཞི་པོའི་ཨ་ལ་ཐིམ་སྟེ་འཕེལ་འགྲིབ་མེད་པའི་བྱང་ཆུབ་སེམས་ཀྱི་མཚན་ཉིད་བརྟན་པར་གྱུར། གཉིས་པ་ལ། བསྐྱེད་པའི་ཆོ་འཕྲུལ། དབང་བསྐུར་བའི་ཆོ་འཕྲུལ། བྱིན་གྱིས་རླབ་པའི་ཆོ་འཕྲུལ། མཆོད་པའི་ཆོ་འཕྲུལ་ལོ། །དང་པོ་ལ། རྟེན་གཞལ་ཡས་ཁང་དང་། རྟེན་པ་ལྷ་གསལ་བའོ། །དང་པོ་ནི། གཉིས་སུ་མེད་པའི་ཡེ་ཤེས་ཀྱི་ངོ་བོ་ཨ་དཀར་པོ་ལས། ཨེ་ཡྃ་བྃ་ལྃ་སུྃ་རྃ་རྣམས་ཆད། འོད་ཟེར་སྤྲོ་བ་དང་བསྡུ་བས་འབྱུང་ལྔའི་རྟོག་པ་བསལ་ཏེ་ཡུམ་ལྔའི་མཁའ་ཀློང་དུ་དག་པར་བྱས། ཨེ་ལས་ཆོས་ཀྱི་འབྱུང་གནས་ཟུར་གསུམ་མཐིང་ཀ་རྒྱ་ཁྱོན་ནམ་མཁའ་ལྟར་འབྱམས་ཀླས་པའི་དབུས་སུ། ཡྃ་ལས་རླུང་གི་དཀྱིལ་འཁོར་སྲ་ཞིང་མཁྲེགས་པ། ཁ་དོག་དུད་ཀ་དབྱིབ་ཟླ་གམ་ཟུར་ལ་བ་དན་གཡོ་བས་མཚན་པའི་སྟེང་། བྃ་ལས་ཆུ་ཡི་དཀྱིལ་འཁོར་དཀར་ཟླུམ་བུམ་པས་བརྒྱན་པ། དེ་ཡི་སྟེང་ལྃ་ལས་གསེར་གྱིས་དཀྱིལ་གྲུ་བཞི་སེར་པོ། རྡོ་རྗེ་དང་བུམ་པས་མཛེས་པའི་སྟེང་། སུྃ་ལས་རི་ཡི་རྒྱལ་པོ་རི་རབ་རིན་པོ་ཆེ་སྣ་ཚོགས་པ་བཀྲ་ཞིང་དབྱིབས་གྲུ་བཞི་ཁ་ཁྱེར་དང་རྒྱ་མཉམ་པའི་ཐོག །རྃ་ལས་ཕྱི་རོལ་ཀུན་ཏུ་ཡེ་ཤེས་ཀྱི་མེ་སྣ་ལྔ་པ་འབར་བའི་དབུས། ཧཱུྃ་མཐིང་ནག་དང་སྣ་ཚོགས་རྡོ་རྗེ་ལས་སྐྱེས་པའི་སྲ་བརྟན་རྡོ་རྗེའི་གུར་ཁང་སྲུང་བའི་འཁོར་ལོ་རྡོ་རྗེའི་ས་གཞི་ར་བ་འབར་བ་དང་བཅས་པ་གསལ་བར་གྱུར། ༀ་བཛྲ་རཀྵ་རཀྵ་ཧཱུྃ་བྷྲཱུྃ། དེ་ཡི་ནང་དུ་རྒྱུ་ཡི་ཨ་ལས་བྷྲཱུྃ་ཆད། འོད་ཟེར་སྤྲོ་བསྡུས་ཐ་མལ་པའི་གནས་ཀྱི་འཛིན་པ་བསལ་ཏེ་དག་པའི་ཞིང་དུ་བྱས། བྷྲཱུྃ་བི་ཤྭ་བི་ཤུདྷེ། བྷྲཱུྃ་ཡོངས་སུ་གྱུར་པ་ལས་ཆོས་ཀྱི་དབྱིངས་རང་བཞིན་ཡེ་ཤེས་རིན་པོ་ཆེ་སྣ་ཚོགས་འབར་བ་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི། རྒྱ་ཁྱོན་ཚད་བཟུང་དུ་མེད་པའི་ནང་ནས་མཐིང་དཀར་སེར་དམར་ལྗང་བའི་རྩིག་པ་རིམ་པ་ལྔ་ལྡན་གྱི་ནང་། ཤར་གྱི་ལོགས་དཀར་པོ་འཁོར་ལོ། །ལྷོ་སེར་པོ་རིན་པོ་ཆེ། ནུབ་དམར་པོ་པདྨ། བྱང་ལྗང་གུ་རལ་གྲི། སྟེང་མཐིང་ནག་རྡོ་རྗེས་བརྒྱན་པ་སྟེ། རིགས་དྲུག་པའི་ཐུགས་ཡེ་ཤེས་ཀྱི་འོད་ཟེར་མཐའ་ཡས་པས་ཁྱབ་པ། དེ་ཡི་སྟེང་གསེར་གྱི་ཕ་གུ་འཕྱང་བའི་ངོས་ཆུ་ན་འཕྱང་ཕྲེང་བ་གཅུས་པའི་སྟེང་། རིན་པོ་ཆེའི་ཕྲ་ཚོམ་ཅན་གྱི་མཛེས་གདུང་གིས་མནན་པའི་ཀ་ཐུང་ཉེར་བརྒྱད་བར་སེང་མགོ་ལས་འཕྱང་འཕྲུལ་མུ་ཏིག་གི་དྲྭ་བ་དང་། དྲྭ་ཕྱེད། དྲིལ་བུ་དང་། དྲིལ་བུ་ཆེན་པོ་འཁྲོལ་ཞིང་། །དེ་ལས་ཟླ་བ་དང་རྔ་ཡབ་ཆེན་པོའི་བསིལ་ཡབ་བསྐྱོད་པའི་ཐོག །བྱ་འདབ་ལས་རིན་པོ་ཆེ་དཀར་པོའི་ཤར་བུ། སྟེང་ན་མདའ་ཡབ་ཤེལ་གྱི་མཆོད་རྟེན་དབྱིབས་ཅན་གྱིས་ཡོངས་སུ་བསྐོར་བའི་པདྨའི་གདན་ལ་ཟུར་བཞིར་གདུགས་དང་། བ་དན་དང་རྒྱལ་མཚན་བརྒྱད་བརྒྱད་དང་། རྡོ་རྗེའི་འཕན་ལྷ་རྫས་ཀྱིས་གོས་རྣམ་པར་བཀྲ་བ་ལྷབ་ལྷུབ་ཏུ་གཡོ་བས་བརྒྱན་པ། ཉི་མ་དང་ཟླ་བ་ཕྱེད་པ་དང་རང་པའི་སྐར་ཁུང་ལྡིང་བའི་ཕྱོགས་ཏ་ར་ཎ་ཡིས་བཟུང་བ། རྩིག་པའི་ཕྱི་འགྲམ་འདོད་ཡོན་གྱི་སྣམ་བུ་དམར་པོ་གྲུ་བཞི་ཀུན་དུ་འཁོར་བའི་བར་སྣང་དྲྭ་བའི་གསེབ་དང་ཁ་ཁྱེར་ལ་གཟུགས་ཀྱི་རྡོ་རྗེ་སོགས་གཟུངས་མ་ཁ་དོག་སྣ་ཚོགས་པས་མཆོད་རྫས་སྣ་ཚོགས་པ་ཐོགས་ཏེ་བཅོམ་ལྡན་འདས་ལ་མཆོད་པ་དང་རོལ་མོ་སྣ་ཚོགས་སྤྲིན་ལྟར་གཏིབ་པ། སྒོ་བཞིའི་མདུན་སྟེགས་བུ་གྲུ་བཞི་པའི་སྟེང་བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས་གསལ་བའི་མཐོང་ཁོང་རྡོ་རྗེའི་འགྲེང་རྭ་དང་བཅས་པ་ལ། རྟ་རྐང་ཆུ་སྐྱེས་རིན་ཆེན་སྒྲོམ། མ་སྐྱེས་ཐབས་ཀྱིས་ཟར་ཚགས། སྣམ་འཕྱང་ཆུན་འབྱང་ཤར་བུ་དང་། སྣ་ཚོགས་ཁྱུང་མགོ་རིམས་པར་འཁྲིགས། ཞེས་པའི་སྣམ་བུ་རིམ་པ་བརྒྱད་ལྡན། རྒྱལ་མཚན། བ་དན། འཕུར་མ། རྔ་ཡབ་དྲིལ་བུ་གཡོ་ཞིང་མཛེས་པའི་རྩེ་མོར་གདུགས་དང་པདྨའི་བར་ན་ཆོས་འཁོར་གཡས་གཡོན་རི་དྭགས་ཕོ་མོ་དང་བཅས་པ། གླང་སེང་ངང་པ་རི་དྭགས་དང་། ཁྱེའུ་ཆུང་ཀླུ་ཕྲུག་ཆུ་སྲིན་ཁྱུང་། སྒོ་ཁང་གི་རྒྱན་དགུ་དང་། འཛེགས་པའི་ཐེམ་སྐས་བརྒྱད་ལྡན། གཡས་གཡོན་གྱི་གཞི་ལ་མཁའ་འགྲོ་སོ་གཉིས་ཀྱི་གནས་ཏ་ལའི་ལྗོན་ཤིང་སོ་གཉིས་ཏེ་ཕྱོགས་རེར་བརྒྱད་རེ་ལ་གསེར་གྱི་དྲྭ་བ་སྦྲེལ་ཞིང་། གསེར་གྱི་ཙོང་ཙོང་བྲེས་བ། དེ་དང་གྲངས་མཚུངས་དཔག་བསམ་གྱི་ཤིང་མནྡྷཱར་བའི་མེ་ཏོག་བཀྲ་ཤིས་ཞིང་ཆོས་སྒྲ་སྒྲོགས་པའི་སྤྲུལ་པའི་བྱ་སྐད་སྙན་པར་སྒྲོགས་པ་གནས་པ། གསེར་གྱི་གཡེར་ཁ་འཁྲོལ་ཞིང་། བར་ན་རིན་པོ་ཆེ་སྣ་བདུན་པའི་རི་དང་། སྤྲིན་གསེབ་ན་མཆོད་པའི་ལྷ་མོ་གར་རྩེ་བ། ཡན་ལག་བརྒྱད་དང་ལྡན་པའི་བདུད་རྩི་ཁྲུས་རྫིང་དང་། ནེའུ་སེང་སྔོན་པོའི་ཚལ། མེ་ཏོག་དཀར་པོའི་གླིང་རྣམས་ན་དད་པ་ཅན་ཆོས་ཉན་པའི་གནས་རིན་པོ་ཆེ་སྣ་བདུན་དང་། བཀྲ་ཤིས་པའི་རྫས་སོགས་འདོད་ཡོན་གྱི་སྤྲིན་གཏིབ་པའི་ཕོ་བྲང་གི་ཟུར་བཞི་དང་། སྒོ་དང་སྒོ་ཁྱུད་ཕྱི་མཚམས་ལ་ཟླ་ཕྱེད་རྡོ་རྗེ་ནོར་བུ་འབར་བ་གནས་པའོ། ༈ །གཞལ་མེད་ཁང་ཀུན་དུ་ཡང་ནང་དུ་གྱུར་པའི་བར་ཁྱམས་གྲུ་བཞི་ཀུན་ནས་བསྐོར་བའི་གྲུ་ཆད་བཞི་ལ་གློ་བུར་མཁར་ཐབས་བཞི་ཡིས་བརྒྱན་པའི་དབུས་རྡོ་རྗེའི་ཕྲེང་བའི་ནང་འཁོར་ལོ་རྩིབས་བཞི་པ་སེར་པོ་རྩིབས་མཆན་སྔོན་པོའི་ལྟེ་བ་ཟླུམ་པོ་མཐིང་ཀ་དང་བཅས་པ། བླ་ན་མེད་པའི་རྟགས་རིམ་པ་བཞིན་རྡོ་རྗེའི་འགྲེང་བུ་རེས་སྦགས་ཤིང་། རྡོ་རྗེ་རྩེ་གསུམ་པའི་ཟླུམ་བསྐོར་ལ་བརྟེན་པ། ཤར་འཁོར་ལོ། ལྷོ་རིན་པོ་ཆེ། ནུབ་པདྨ། བྱང་རལ་གྲིའི་བརྒྱན་པའི་ཀ་བ་གཉིས་གཉིས་བརྒྱད་ཀྱིས་བཏེགས་པའི་རྡོ་རྗེའི་གདུང་བཞིས་མིག་མང་རིས་སུ་བྲེས་ཤིང་མཛེས་པར་ཕུབ་པའི་ཀ་རྒྱན་དང་ཀ་ཞུ་ཐམས་ཅད་རིན་པོ་ཆེ་འབར་བ་ལས་བྱས་པ། ཕྱམ་ཙ་རིན་པོ་ཆེའི་གདུང་ཕྲན་ཉེར་བརྒྱད་ཕྱོགས་བཞིར་བཞི་བཞི། ཟུར་བཞིར་གསུམ་གསུམ། ཕྱམ་རྩེ་གདུང་ཐུང་ཉེར་བརྒྱད་མཐུད་པ། དེ་ཡང་བྱ་སྐྱིབས་ལྔ་ལྡན་གཞལ་མེད་ཁང་གི་ཐོག་སངས་རྒྱས་ཀྱི་གཙུག་ཏོར་ལྟར་ཟླུམ་པོར་འཁྱིལ་བའི་ཆོས་ཀྱི་སྐུ་ཡི་ཕོ་བྲང་མཆོད་རྟེན་བུམ་དབྱིབས་བྲེ་དང་ཆོས་འཁོར་འཕན་དང་ཟར་ཚགས་ཉི་ཟླ་རྡོ་རྗེ་རིན་པོ་ཆེའི་ཏོག་གིས་མཛེས་པའི། འོག་མིན་གྱི་ཞིང་རང་སྣང་རྣམ་དག་སྟུག་པོ་བཀོད་པ། སྣང་ལ་རང་བཞིན་མ་གྲུབ་ཅིང་། བདེ་ལ་སྒྲིབ་པ་མེད་པར་གསལ་བ། གཞི་ཚད་མེད་པའི་ཡེ་ཤེས་ཆོས་ཀྱི་འཁོར་ལོའི་གདན་གྱི་ལྟེ་བ་ལ་ཕོ་བྲང་རྫོགས་པའི་སངས་རྒྱས་ཀྱི་བཀོད་པ་ཁྱད་པར་འཕགས་པའོ། །གཞལ་ཡས་དབུས་ཀྱི་ལྟེ་བ་ལ་སྨོན་ལམ་གྲུབ་པའི་གདན་མི་འཇིགས་བཞིའི་རྟགས་སེང་གེ། རྩིབས་བཞིའི་ཤར་དུ་སྟོབས་བཅུ་ལྡན་ཕྱིར་གླང་པོ། ལྷོར་རྫུ་འཕྲུལ་རྐང་བཞི། ནུབ་ཏུ་དབང་བཅུ་རྨ་བྱ། བྱང་འཕྲིན་ལས་བཞི་མཁའ་ལྡིང་རྣམས་བརྒྱད་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཛོད་མིག་བདུན་བདུན་དང་ལྡན་པ་རིན་པོ་ཆེ་འོད་འབར་བའི་ཀ་བ་ཅན། མུ་ཏིག་གི་དྲྭ་བས་ངོས་གཡོགས་ཤིང་མཛེས་པ་ཕུལ་དུ་བྱུང་བའི་སྟེང་ཡོན་ཏན་གྱིས་ཉེས་ཚོགས་བཅོམ་པའི་གདན་སྣ་ཚོགས་པདྨ་འདབ་མ་སྟོང་དང་ལྡན་པའི་དབུས་ན་ཉི་མ་དང་ཟླ་བའི་དཀྱིལ་འཁོར་རེ་རེ་སྟེ་ལྔ་བརྩེགས། གློ་འབུར་བཞི་གྲུ་ཆད་བཞི་སྟེ་བརྒྱད་དུ་རིན་པོ་ཆེའི་ཁྲི་ཆུང་དང་པད་ཉི་ཟླ་བ་བཞི་བརྩེགས། ལྷ་སྣམ་ཤར་ནུབ་དྲང་པོ་གཉིས་སུ་པདྨ་ཉི་ཟླ་གསུམ་བརྩེགས། །མཚམས་བཞི་ལྷོ་ནུབ་གཉིས་དང་དྲུག་ཏུ་པད་ཀྱང་རེ་རེ། སྒོ་བཞིར་ཉི་མ་ལ་བདུད་བཞི་དཀར་སེར་དམར་ལྗང་དང་བཅས་པ་གསལ་བར་གྱུར། སླར་ཡང་གསལ་གདབ་ཅིང་དག་པ་དྲན་པའི་ཕྱིར། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྫོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འོག་མིན་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡང་མ་ཆད་པའི། །ཡོན་ཏན་ཁྱད་པར་འཕགས་པ་ནི། །གསང་བ་ཡུམ་གྱི་བ་ག་ལ། །བཅུ་གསུམ་དབང་ཕྱུག་ལྡན་པ་ཡི། །རྡོ་རྗེ་འཆང་ཆེན་དཔག་མེད་དང་། །ཏིལ་འབྲུའི་ཚུལ་དུ་རབ་ཏུ་གནས། །ཆོས་རྣམས་ཀུན་གྱི་དེ་བཞིན་ཉིད། །ཐོག་མ་ཐ་མ་དབུས་མེད་པའི། །རང་བཞིན་དོན་གྱི་འོག་མིན་ནི། །རྒྱལ་བ་ཀུན་གྱི་ཕོ་བྲང་ཕྱིར། །འདས་དང་ད་ལྟར་མ་བྱོན་པ། །རྒྱལ་བ་ཀུན་གྱི་རྟེན་པའི་གནས། ༈ །ཆོས་རྣམས་སྣ་ཚོགས་ཇི་སྙེད་པ། །དངོས་པོ་མཐའ་དག་མེད་ཕྱིར་ཟླུམ། །ཁྱབ་དང་དཔག་དང་ཚད་མེད་དང་། །ཡེ་ཤེས་བཞི་ཕྱིར་འཁོར་ལོ་བསྟན། །ཆོས་དབྱིངས་འདུ་འབྲལ་མེད་པའི་ཕྱིར། །མུ་ཁྱུད་ཟླུམ་པོས་ཀུན་ནས་བསྐོར། །སྐུ་གསུང་ཐུགས་དང་བྱིན་རླབས་དང་། །ཐུགས་རྗེ་མ་ཁྱབ་མེད་པའི་ཕྱིར། །ཡོངས་སངས་རྒྱས་པའི་དབྱིངས་སུ་བསྟན། །རང་བྱུང་ཡེ་ཤེས་མཐའ་བྲལ་བས། །ཕྱོགས་བཅུར་འགྲོ་འོང་མི་གནས་པའི། །ཚད་དང་བྲལ་བའི་སེམས་ཀྱི་ཕྱིར། གཞི་རྩ་ཚད་མེད་འཁོར་ལོར་བསྟན། །གདོད་ནས་བྱིན་རླབས་ངོ་བོའི་ཕྱིར། །མ་བསགས་ལྷུན་རྫོགས་མཛད་ཉིད་དེ། །འགྲོ་བ་རེ་འདོད་སྐོང་བའི་ཕྱིར། །རིན་ཆེན་འབར་བའི་གཞལ་ཡས་ཁང་། །སྣ་ཚོགས་དངོས་དང་དངོས་མེད་པའི། །ཆོས་ཀུན་ངོ་བོར་རང་གནས་ཏེ། །བདག་གཞན་གཟུང་འཛིན་བྲལ་བའི་ཕྱིར། །ཕྱི་དང་ནང་བྲལ་སྒྲིབ་པ་མེད། །ཐུན་མོང་ལ་བརྟེན་ཐབས་ཀྱི་འབྲས། །ཡེ་ཤེས་ཐབས་ཀྱིས་འཕགས་པ་ཉིད། །གདུལ་བྱའི་བློ་ལ་མངོན་སྣང་བ། །གློ་འབུར་བཞི་ནི་ལྷག་པར་མཛེས། །ཐུན་མོང་ཐུན་མོང་མ་ཡིན་པའི། །གདུལ་བྱའི་རིམ་པ་མཐོ་དམན་ཀུན། །སྟོང་སྨོན་ཚད་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་བཤད། །ཐབས་མང་བསམ་གྱིས་མི་ཁྱབ་པས། །ལམ་བརྒྱད་རིམ་པར་བགྲོད་པ་ཡི། །འབྲས་བུས་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཞེན་དང་སྦང་བའི་ལམ་བྲལ་བ། །འདོད་ཡོན་ཡེ་ཤེས་ལྔར་རོལ་ཏེ། །བདག་མཆོད་ཀུན་མཉེས་ལས་འབྱུང་བས། འདོད་ཡོན་ལྷ་མོ་འཁྲིག་པར་བསྟན། །ཐབས་དང་ཤེས་རབ་ལྡན་པ་ཡི། །མ་ཆགས་ཐབས་དང་ལྡན་པ་དང་། །ཆེ་བའི་ཡོན་ཏན་ལྷུན་རྫོགས་པས། །ཉི་ཟླ་པདྨ་རིན་པོ་ཆེ། །ལས་དང་ཐུགས་རྗེ་སྨོན་ལམ་གྱི། །བྱང་ཆུབ་སེམས་དཔའ་མཐུ་བོ་ཆེ། །སྨོན་ལམ་དབང་གིས་དེ་དག་ཏུ། །ཐོས་པ་རྒྱ་མཚོ་བསགས་ཕྱིར་གནས། ༈ །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའི་ལྡིང་གི་ཁྲི་ཆེན་ཏེ། ༈ །རང་བྱུང་དཀྱིལ་འཁོར་ལྷུན་གྱིས་གྲུབ། །ཐམས་ཅད་ངོ་བོ་གཅིག་པའི་ཕྱིར། །རྩེ་མོ་ཀུན་ཏུ་ཟླུམ་པོར་འཁྱིལ། ༈ །ཚད་མེད་བཞི་ཡི་དོན་བརྩོན་ནས། །དགོས་འདོད་རེ་སྐོང་དོན་གྲུབ་ཕྱིར། ༈ །སྒོ་བཞི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཙོང་ཙོང་འཕེལ། །དྲིལ་བུ་གཡེར་ག་ཐེག་སྒྲོགས་པ། །བཀྲ་ཤིས་བྱ་སྙན་སྒྲ་སྒྲོགས་ལྡན། །ཡིད་བཞིན་རིན་ཆེན་བརྒྱད་བསྐོར་བས། །རིན་ཆེན་ཕུང་པོ་བཞི་གཉིས་ལྡན། །ཐམས་ཅད་ལ་ནི་དབང་སྒྱུར་ཕྱིར། །ལྷ་ཆེན་ཕྱོགས་སྐྱོང་བརྒྱད་ཀྱིས་བསྐོར། ༈ །གཉིས་པ་ལྷ་གསལ་བ་ལ་གསུམ། གསུང་ཡིག་འབྲུ། ཐུགས་ཕྱག་མཚན། སྐུ་ཕྱག་རྒྱའི་ཆོ་འཕྲུལ་ལོ། །དང་པོ་ནི། གཞི་ཡི་ཨ་དཀར་པོ་ལས་ཀྵཿསྔོན་པོ་བྱུང་། ཨ་དང་ཀྵའི་ཁྱད་པར་ལས་ཡི་གེ་བཞི་བཅུ་གཉིས་སུ་བྱུང་སྟེ། སོ་སོའི་གདན་ལ་འཁོད་དེ་ཐབས་ཤེས་མཚོན་པའི་ལོག་དྲང་གིས་བཞུགས་པ། དབུས་སུ་ཋ་ཐ་སྔོ། རྩིབས་བཞིའི་ཤར་དུ་ཊ་ཏ་དཀར། ལྷོར་ཌ་ད་སེར། ནུབ་ཏུ་ཌྷ་དྷ་དམར། བྱང་དུ་ཎ་ན་ལྗང་། གློ་འབུར་ཤར་ཀ་ཙ་དཀར། ལྷོར་ཁ་ཚ་སེར། ནུབ་ཏུ་ག་ཛ་དམར། བྱང་དུ་གྷ་ཛྷ་ལྗང་། གྲུ་ཆད་ཤར་ལྷོར་པ་ཡ་དཀར། ལྷོ་ནུབ་ཏུ་ཕ་ཝ་སེར། ནུབ་བྱང་དུ་བར་དམར། བྱང་ཤར་དུ་བྷ་ལ་ལྗང་། ཁྱམས་ཀྱི་ཤར་ལྷོ་ཨི་དཀར། བྱང་དུ་ཨཱི་སེར། ལྷོར་ཨུ་སེར། ནུབ་བྱང་དུ་ཨཱུ་ལྗང་སེར། ལྷོ་ནུབ་ཏུ་ཨེ་སེར། བྱང་ཤར་དུ་ཨཻ་ནག །ཤར་སྒོར་ང་ཤ་མཐིང་། ལྷོ་སྒོར་ཉ་ཥ་སེར། ནུབ་སྒོར་མ་ས་དམར། བྱང་སྒོར་ཨོ་ཨ་ཏ་ལྗང་། སླར་ཡང་ཀྵ་ཉི་ཁྱམས་ཀྱི་ཤར་དྲང་པོར་བཞུགས། ཨ་ལས་ཨ་ཞིག་བྱུང་ནུབ་དྲང་པོ་བཞུགས་གཞི་བོའི་ཨ་དེ་ཡིག་འབྲུ་ཐམས་ཅད་ལ་ཐིམ་པས་གསལ་ཞིང་འབར་ཏེ་སླར་ཡང་འོད་ཟེར་གྲངས་མེད་པ་འཕྲོས། མཁའ་ཁྱབ་འདི་གཉིས་གཅིག་ཏུ་བསྡུའང་གསུམ། མཆན། ཀྱི་འཕགས་པའི་གསུང་གི་རྒྱུད་བསྐུལ། བྱིན་བསྡུས། འགྲོ་བ་སེམས་ཅན་གྱི་ཐ་མལ་བའི་ངག་གི་སྒྲིབ་པ་སྦྱངས། སླར་འདུས་ཡིག་འབྲུར་ཐིམ་སྟེ་ཡོངས་སུ་གྱུར་པ་ལས། གཉིས་པས་ནི། དབུས་སུ་རྡོ་རྗེ་དང་དྲིལ་བུ། རྩིབས་ཀྱི་ཤར་འཁོར་ལོ་དང་དྲིལ་བུ། ལྷོར་རིན་པོ་ཆེ་དང་དྲིལ་བུ། ནུབ་ཏུ་པདྨ་དང་དྲིལ་བུ། བྱང་དུ་རལ་གྲི་དང་དྲིལ་བུ། གློ་འབུར་ཤར་རིན་པོ་ཆེའི་མྱུ་གུ་དང་མེ་ལོང་། ལྷོ་རུ་རལ་གྲི་དང་རིན་པོ་ཆེའི་ཕྲེང་བ། ནུབ་ཏུ་པདྨ་དཀར་པོ་དང་པི་ཝཾ། བྱང་དུ་རྡོ་རྗེ་དང་གར་གྱི་ལག་པ། གྲུ་ཆད་བཞིའི་ཤར་ལྷོར་ཀླུ་ཤིང་དང་། སྤོས་ཁང་། ལྷོ་ནུབ་ཏུ་ཆོས་ཀྱི་འཁོར་ལོ་དང་མེ་ཏོག་གི་ཕྲེང་བ། ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཁྱམས་ཀྱི་ཤར་དུ་རྡོ་རྗེ་དཀར་པོ་རྩེ་ལྔ། ནུབ་ཏུ་ཆོས་འབྱུང་མཐིང་ཀ །ཤར་ལྷོར་པི་ཝཾ། བྱང་དུ་གོ་མཚོན། ལྷོར་མཁར་བསིལ་དང་ལྷུང་བཟེད། ནུབ་བྱང་དུ་ཆོས་ཀྱི་གླེགས་བམ། ལྷོ་ནུབ་ཏུ་རིན་པོ་ཆེའི་སྒྲོམ་བུ། བྱང་ཤར་དུ་མེ་ཆུ། ཤར་སྒོར་ཐོད་དབྱུག་དང་ལྕགས་ཀྱུ། ལྷོ་སྒོར་རྡོ་རྗེའི་དབྱུག་པ་དང་ཞགས་པ། ནུབ་སྒོར་པད་མའི་དབྱུག་པ་དང་ལྕགས་སྒྲོག །བྱང་སྒོར་རྒྱ་གྲམ་གྱི་དབྱུག་པ་དང་དྲིལ་བུ་རྣམས་ལས་འོད་ཟེར་གྲངས་མེད་པ་འཕྲོས། མཁའ་ཁྱབ་བདེ་བར་གཤེགས་པའི་ཐུགས་ཀྱི་རྒྱུད་བསྐུལ། བྱིན་བསྡུས། འགྲོ་བ་སེམས་ཅན་གྱི་ཐ་མལ་པའི་ཡིད་ཀྱི་སྒྲིབ་པ་སྦྱངས། སླར་ཕྱག་མཚན་ལ་ཐིམ་སྟེ་ཡོངས་སུ་གྱུར་པ་ལས། གསུམ་པ་ནི། རིགས་ལྔ་བྱ་བྱེད་སངས་རྒྱས་གདན། །ཐུབ་དྲུག་སེམས་དཔའ་སེམས་མའི་གདན། །ཁྲོ་རྒྱལ་སྒོ་བ་སྒོ་མའི་གདན། །ཅེས་པ་ལྟར་རིམ་པ་བཞིན་དུ་བསྐྱེད་དེ། ཧཱུྃ་བཛྲ་དྷྲིཀ །མཱུྃ་དྷ་ཏྭི་ཤྭ་རི་ཏི། སེམས་ཉིད་རྡོ་རྗེ་དྲིལ་བུ་ལ་སོགས་པ་སྐུ་ཕྲ་མོར་གནས་འགྱུར་བཞིན་འོད་ཟེར་གྲངས་མེད་པ་འཕྲོས། མཁའ་ཁྱབ་བདེ་བར་གཤེགས་པའི་སྐུ་ཡི་རྒྱུད་བསྐུལ། བྱིན་བསྡུས། འགྲོ་བ་སེམས་ཅན་གྱི་ཐ་མལ་པའི་ལུས་ཀྱི་སྒྲིབ་པ་སྦྱངས། སྐུ་ཕྲ་མོ་གྲངས་མེད་པ་སྤྲོ་བ་དང་བསྡུ་བ་མཛད་དེ། དབུས་ཀྱི་གདན་ལ་རང་ཉིད་བཅོམ་ལྡན་འདས་དཔལ་ཐུགས་སྒྱུ་འཕྲུལ་དྲྭ་བ་རྡོ་རྗེ་སེམས་དཔའ་བདེ་བ་ཆེན་པོ་མི་བསྐྱོད་པའི་སྐུར་གྱུར་པ་ནི། རྣམ་ཤེས་ཀྱི་ཕུང་པོ་དང་ཞེ་སྡང་མ་སྤང་གནས་སུ་དག་པ་ཆོས་ཀྱི་དབྱིངས་ཀྱི་ཡེ་ཤེས་ལས་བྱུང་བའི་རྟགས་སུ་སྐུ་མདོག་མཐིང་ཀ་ཨིནྟྲ་ནི་ལ་དང་ནམ་མཁའ་འདྲེས་པའི་ལྟ་བུར་འཆོར་བ། ཞལ་གསུམ་ཕྱག་དྲུག །ཞལ་གཡས་དཀར་གཡོན་དམར་དབུས་སྐུ་དང་མཐུན་པ་དབུ་ར ལ་པའི་ཐོར་ཚུགས་ནག་པོ་འགྱིང་བ་རིན་པོ་ཆེའི་རྩེ་བྲན་ཅན། ཕྱག་དྲུག་གི་དང་པོ་གཉིས་རྡོ་རྗེ་དང་དྲིལ་བུ་བསྣོལ་བས་ཡུམ་ལ་འཁྱུད་པ། གཡས་བར་མ་འཁོར་ལོ། ཐ་མ་ན་རིན་པོ་ཆེ། གཡོན་བར་མ་ན་པད་མ། ཐ་མ་ན་རལ་གྲི་འཛིན་པའི་ཕྱག་རྒྱ་དེ་དག་ལ་ཡེ་ཤེས་ཀྱི་མེ་འབར་བ། ཕྱི་ནང་ནི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། ཞབས་མཉམ་པའི་སྐྱིལ་མོ་ཀྲུང་གིས་བཞུགས་པའི་བར་དུ་ཡུམ་སྣང་བ་ནམ་མཁའ་རྣམ་པར་དག་པ་རྡོ་རྗེ་དབྱིངས་ཕྱུག་མ་མཐིང་ཀ །ཞལ་གཅིག་ཕྱག་གཉིས་གཡས་ཡབ་ལ་འཁྱུད་ཅིང་། གཡོན་པས་རྡོ་རྗེའི་དྲིལ་བུ་བསྣམས་པ། བརྟུལ་ཞུགས་སྐྱིལ་མོ་ཀྲུང་གིས་འཁྲིལ་བའོ། །ཨཱོཾ་ཛི་ན་ཛིཀ །ལཱྃ་དཱཻ་ཥ་ར་ཏི། འཁོར་ལོའི་རྩིབས་ཀྱི་ཤར་དུ། གཟུགས་ཕུང་དང་གཏི་མུག་བཅོས་སླད་མེད་པར་དག་པ་མེ་ལོང་ལྟ་བུའི་ཡེ་ཤེས་ལས་བྱུང་བའི་རྟགས་སུ། དེ་བཞིན་གཤེགས་པ་རྣམ་པར་སྣང་མཛད་སྐུ་མདོག་ཟླ་བ་ལྟར་དཀར་བ། དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་འཁོར་ལོ་དང་དྲིལ་བུས་ཡུམ་ལ་འཁྱུད་པ། གཡས་རྡོ་རྗེ་རིན་པོ་ཆེ། གཡོན་པདྨ་རལ་གྲི་འཛིན་པ། ཡུམ་སྲ་བ་ས་དག་པ་སྤྱན་མ་དཀར་མོ་གཡས་ཡབ་ལ་འཁྱུད་ཅིང་གཡོན་འཁོར་ལོའི་དྲིལ་བུ་འཛིན་པ། སྭཱ་རཏྣ་དྷྲིཀ྄ །མཱྃ་མོ་ཧ་ར་ཏི། ལྷོར་ཚོར་ཕུད་དང་ང་རྒྱལ་གསལ་སྟོང་དུ་དག་པ་མཉམ་པ་ཉིད་ཀྱི་ཡེ་ཤེས་ལས་བྱུང་བའི་རྟགས་སུ། དེ་བཞིན་གཤེགས་པ་རིན་ཆེན་འབྱུང་ལྡན་གསེར་བཙོ་མའི་ཁ་དོག་ཅན། སེར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རིན་པོ་ཆེ་དང་དྲིལ་བུས་ཡུམ་ལ་འཁྱུད་པ། གཡས་རྡོ་རྗེ་འཁོར་ལོ། གཡོན་པད་མ་རལ་གྲི་འཛིན་པ། ཡུམ་མཉེན་པ་ཆུ་ཁམས་དག་པ་མཱ་མ་ཀཱི་སེར་མོ་གཡས་ཡབ་ལ་འཁྱུད་ཅིང་གཡོན་རིན་པོ་ཆེའི་དྲིལ་བུ་འཛིན་པ། ཨཱོཾ་ཨཱ་རོ་ལིཀ྄ །པྱཱཾ་རཱ་ག་ར་ཏི། ནུབ་ཏུ་འདུ་ཤེས་ཀྱི་ཕུང་པོ་དང་འདོད་ཆགས་བདེ་སྟོང་དུ་དག་པ་སོ་སོར་རྟོག་པའི་ཡེ་ཤེས་ཀྱི་རྟགས་སུ། དེ་བཞིན་གཤེགས་པ་སྣང་བ་མཐའ་ཡས་པདྨ་རཱ་ག་ལྟར་དམར་བ། དམར་དཀར་སྔོ་བའི་ཞལ་གསུམ་ཕྱག་དྲུག་གི་ཕྱག་དང་པོ་གཉིས་པདྨ་དང་དྲིལ་བུས་ཡུམ་ལ་འཁྱུད་པ། གཡས་རྡོ་རྗེ་འཁོར་ལོ། གཡོན་རིན་ཆེན་རལ་གྲི་འཛིན་པ། ཡུམ་དྲོ་བ་མེ་ཁམས་དག་པ་གོས་དཀར་མོ་དམར་མོ་གཡས་ཡབ་ལ་འཁྱུད་ཅིང་གཡོན་པདྨའི་དྲིལ་བུ་འཛིན་པ། ཧཱ་པྲཛྙཱ་དྷྲིཀ྄ །ཏྃ་བཛྲ་ར་ཏི་བྱང་དུ། འདུ་བྱེད་ཀྱི་ཕུང་པོ་དང་ཕྲག་དོག་རང་གྲོལ་དུ་དག་པ་བྱ་བ་གྲུབ་པའི་ཡེ་ཤེས་ལས་བྱུང་བའི་རྟགས་སུ། དེ་བཞིན་གཤེགས་པ་དོན་ཡོད་གྲུབ་པ་མརྒད་ལྟར་ལྗང་བ། ལྗང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རལ་གྲི་དང་དྲིལ་བུས་ཡུམ་ལ་འཁྱུད་པ། གཡས་རྡོ་རྗེ་འཁོར་ལོ། གཡོན་རིན་ཆེན་པདྨ་འཛིན་པ། ཡུམ་བསྐྱོད་པ་རླུང་དག་པ་དམ་ཚིག་སྒྲོལ་མ་ལྗང་གུ་གཡས་ཡབ་ལ་འཁྱུད་ཅིང་། གཡོན་རལ་གྲིའི་དྲིལ་བུ་འཛིན་པ། བདེ་བར་གཤེགས་པ་བཙུན་མོའི་ཚོགས་དང་བཅས་པ་དེ་དག་ཐམས་ཅད་ཀྱང་། གནག་སྣུམ་རལ་པའི་ཐོར་ཚུགས་འགྱིང་བ་རིན་པོ་ཆེའི་རྩེ་བྲན་གྱིས་མཛེས་པ། ཁ་སྦྱོར་སྒྱུ་མའི་བདེ་བའི་ལང་ཚོ་དར་ལ་བབ་ཅིང་། མཛེས་པ་ཐམས་ཅད་ཀྱི་ཕུལ་དུ་གྱུར་པ། ཕྱི་ནང་གི་མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུ་ཆགས་པ། སྙན་གོང་གཡས་གཡོན་ཨུཏྤལ་མཛེས་ཤིང་། རིན་པོ་ཆེའི་དབུ་རྒྱན། སྙན་ཆ་ཕྱག་ཞབས་དཔུང་པའི་གདུ་བུ། མགུལ་རྒྱན། སེ་མོ་དོ། དོ་ཤལ་ཏེ་རིན་པོ་ཆེའི་རྒྱན་བརྒྱད་དང་། ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚི་གུའི་སྨད་དཀྲིས། ཁ་དོག་སྣ་ཚོགས་པའི་ཅོད་པཎ། ཟི་ལྡིར་གར་གྱི་ཕུ་རུང་སྟེ་དར་གྱི་ཆས་གོས་ལྔ་ཡིས་ཀླུབས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་འཚེར་ལྷུན་སྟུག་གཟི་བྱིན་ལྡན་པ་སྟེ་ཞི་བའི་ཉམས་དགུས་རྒྱས་པ། ཡབ་ཡུམ་དེ་རྣམས་ནི་ལོངས་སྤྱོད་རྫོགས་པའི་སྐུ་སྟེ་ཁ་དོག་དྲུག་ལྡན་འོད་ཟེར་བྱེ་བ་ཕྲག་དྲུག་རེ་འབར་བའི་ཀློང་ན་བདེ་སྟོང་གཉིས་མེད་ཀྱི་ཡེ་ཤེས་ལ་ཡབ་རྣམས་མཉམ་པ་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་གིས་རོལ་པ། དབྱིངས་དང་ཡེ་ཤེས་དབྱེར་མེད་པའི་རྟགས་ཡབ་ཡུམ་ཞལ་སྦྱོར་དང་། འབྱུང་ལྔ་ཆོས་དབྱིངས་སུ་གཟིགས་པས་ཡབ་རྣམས་ཡུམ་ལ་གཟིགས་པ་དང་། ཕུང་ལྔ་ཡེ་ཤེས་སུ་ཤར་བས་ཡུམ་རྣམས་ཡབ་ལ་གཟིགས་པའོ། ༈ །གློ་འབུར་ལ་ནང་སེམས་བཞི་ནི། འདི་བི་མ་ལས་རྩིབས་མཆན་ལ་མཛད་ཀྱང་སློབ་དཔོན་པདྨས་གློ་འབུར་ལ་འགོད་པའི་རྗེས་སུ་དམ་པ་བདེ་བར་གཤེགས་པ་བཟང་། མཆན། ཀྵིཾ་ཧི་རཱ་ཛཱ་ཡ། ཧཱུྃ་ལཱ་སྱེ་ས་མ་སྟྭྃ། ཤར་དུ་མཐོང་བ་མིག་ཤེས་རྣམས་པར་དག་པ་བྱང་ཆུབ་ཆེན་པོ་ས་ཡི་སྙིང་པོ་དང་། ཡུལ་གཟུགས་དག་པ་ཡུམ་ལྷ་མོ་སྒེགས་མོ་མ་གཉིས་སྐུ་མདོག་དཀར་པོ་ཡབ་ཀྱི་ཕྱག་གཡས་ན་རིན་པོ་ཆེའི་མྱུ་གུ་དང་། གཡོན་དྲིལ་བུ་དཀུར་བསྟན་པ། ཡང་ན་སྐྱབ་སྦྱིན་མཛད་གསུངས། མཆན། ཡུམ་གྱིས་ཕྱག་གཡོན་ན་མེ་ལོང་འཛིན་པ། གཡས་པས་ཡབ་ལ་འཁྱུད་པ། དེ་གཉིས་ནི་རྣམ་པར་སྣང་མཛད་ཀྱི་སྐུ་དང་ཐུགས་ལས་བྱུང་བ། ཏྲཱྃ་ཨ་གརྦྷ་ཡ། ཏྲཱྃ་མཱ་ལྱེ་ས་མ་ཡ་ཧོ། ལྷོར་སྣོམ་པ་སྣ་ཤེས་རྣམ་པར་དག་པ་བྱང་ཆུབ་ཆེན་པོ་ནམ་མཁའི་སྙིང་པོ་དང་། ཡུལ་དྲི་དག་པ་ཡུམ་རིན་པོ་ཆེའི་ཕྲེང་བ་མ་གཉིས་སྐུ་མདོག་སེར་པོ། ཡབ་ཀྱི་ཕྱག་གཡས་ན་རལ་གྲི། གཡོན་དྲིལ་བུ། ཡུམ་གྱིས་ཕྱག་གཉིས་ན་རིན་པོ་ཆེའི་ཕྲེང་བ་ཐོགས་པས་ཡབ་ཀྱི་དབུ་ལ་ཐོད་བཅིང་བ། དེ་གཉིས་ནི་རིན་འབྱུང་གི་སྐུ་དང་ཐུགས་ལས་སྐྱེས་པ། ཧྲཱིཾ་ཧ་ཧཱུྃ་པདྨ་བ་ད་མ། ཧྲིཾ་གཱིརྟི་རཱ་གོ་ཧཾ། ནུབ་ཏུ་མྱོང་བ་ལྕེ་ཤེས་རྣམ་པར་དག་པ་བྱང་ཆུབ་ཆེན་པོ་སྤྱན་རས་གཟིགས་དང་། ཡུལ་རོ་དག་པ་ཡུམ་ལྷ་མོ་དབྱངས་མཁན་མ་གཉིས་སྐུ་མདོག་དམར་བ། ཡབ་ཀྱི་ཕྱག་གཡས་ན་པདྨ་དཀར་པོ་དང་། གཡོན་དྲིལ་བུ། ཡུམ་གྱི་ཕྱག་གཉིས་པི་ཝཾ་འཛིན་པ། དེ་གཉིས་ནི་སྣང་མཐའི་ཐུགས་ལས་སྐྱེས་པ། ཛྲིཾ་ཀུ་རུ་པཱ་ན་ཧྲཱིཿ ཨ་ནིརྟི་རཱ་ག་ཡཱ་མི། བྱང་དུ་ཐོས་པ་རྣ་ཤེས་རྣམ་པར་དག་པ་བྱང་ཆུབ་ཆེན་པོ་ཕྱག་ན་རྡོ་རྗེ་དང་། ཡུལ་སྒྲ་དག་པ་ཡུམ་ལྷ་མོ་གར་མཁན་མ་གཉིས་སྐུ་མདོག་ལྗང་ཀུ། ཡབ་ཀྱི་ཕྱག་གཡས་ན་རྡོ་རྗེ་དཀར་པོ་རྩེ་ལྔ་པ། གཡོན་དྲིལ་བུ། ཡུམ་གྱི་ཕྱག་གཉིས་གར་གྱི་ལག་པ་བསྒྱུར་ནས། ཞལ་ཟས་རོ་མཆོག་བརྒྱ་དང་ལྡན་པ་ཡབ་ཀྱི་ཞལ་དུ་སྟོབས་པ། དེ་གཉིས་ནི་དོན་ཡོད་གྲུབ་པའི་ཐུགས་དང་སྐུ་ལས་སྐྱེས་པ། ༈ གྲུ་ཆད་ཀྱི་ཟུར་བཞིར་ཕྱི་སེམས་བཞི་ནི། ཟུར་ལུགས་པ་བཤད་རྒྱུད་བཞེད་ལྟར་དཀར་སེར་སོགས་ཁྲ་བོར་མཛད་ཀྱང་། སློབ་དཔོན་པདྨའི་མན་ངག་ལ་དཀར་འབྱམས་སོགས་མཛད་པ་ཀཿཐོག་པའི་བཞེད། མཆན། མཻཾ་དྷ་ར་ཎ་སྭཱ་ཧཱ། ཛཿདྷཱུ་ཥྤ་པྲ་ཝེ་ཤ་ཡ། ཤར་ལྷོར་མཐོང་བྱེད་མིག་དབང་དག་པ་བྱང་ཆུབ་ཆེན་པོ་བྱམས་པ་མགོན་པོ་དང་། ཡུལ་འདས་པ་དཔྱིད་ཀྱི་དུས་དག་པ་ཡུམ་ལྷ་མོ་བདུག་སྤོས་མ་གཉིས་སྐུ་མདོག་དཀར་པོ། ཡབ་ཀྱི་ཕྱག་གཡས་ན་མེ་ཏོག་གི་ཕང་ཕུང་གཡོ་བའི་ཀླུ་ཤིང་དང་། གཡོན་ན་གུནྡྷེ་སྟེ་རིལ་བ་སྤྱི་བླུགས། ཡུམ་གྱི་ཕྱག་གཉིས་བདུག་སྤྲིན་འཐུལ་བའི་སྤོས་ཁང་འཛིན་པ། ཐླྷིཾ་ནིསྶ་རཾ་བྷཱ་ཡ་སྭཱ་ཧཱ། ཧཱུྃ་པུཥྤེ་ཨཱ་བེ་ཤ་ཡ། ལྷོ་ནུབ་ཏུ་ཐོས་བྱེད་རྣ་བའི་དབང་པོ་རྣམ་པར་དག་པ་བྱང་ཆུབ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང་། ཡུལ་ད་ལྟ་དབྱར་གྱི་དུས་དག་པ་ཡུམ་ལྷ་མོ་མེ་ཏོག་མ་གཉིས་སྐུ་མདོག་སེར་པོ་ཡབ་ཀྱི་ཕྱག་གཡས་ན་ཆོས་ཀྱི་འཁོར་ལོ་དང་། གཡོན་དྲིལ་བུ། ཡུམ་གྱི་ཕྱག་གཉིས་མེ་ཏོག་གི་ཕྲེང་བ་བསྣམས་པ། ཧཱུྃ་སྭཱ་རཱ་ཛཱ་ཡ་སྭཱ་ཧཱ། བཾ་དཱི་བ་སུ་གི་ཁི་ནཱི་རི། ནུབ་བྱང་དུ་སྣོམ་བྱེད་སྣ་དབང་རྣམ་པར་དག་པ་བྱང་ཆུབ་ཆེན་པོ་ཀུན་ཏུ་བཟང་པོ་དང་། ཡུལ་མ་འོངས་པ་སྟོན་གྱི་དུས་དག་པ་ཡུམ་མར་མེ་གཉིས་སྐུ་མདོག་དམར་པོ། ཡབ་ཀྱི་ཕྱག་གཡས་ན་རིན་པོ་ཆེའི་སྙེ་མ་དང་། གཡོན་དྲིལ་བུ། ཡུམ་གྱི་ཕྱག་གཡོན་མར་མེ། གཡས་ཡབ་ལ་འཁྱུད་པའོ། །མཱུཾ་ཤྲཱི་ཨ་རཱ་གཱ་ཡ་སྭཱ་ཧཱ། ཧོཿགནྡྷེ་ཙིཏྟ། བྱང་ཤར་དུ་མྱོང་བྱེད་ལྕེ་དབང་རྣམ་པར་དག་པ་བྱང་ཆུབ་ཆེན་པོ་འཇམ་དཔལ་གཞོན་ནུ་དང་། ཡུལ་ཕྱིས་འབྱུང་བ། མ་ངེས་པའི་དགུན་དུས་དག་པ་ཡུམ་ལྷ་མོ་དྲི་ཆབ་མ་གཉིས་སྐུ་མདོག་ལྗང་གུ་ཡབ་ཀྱི་ཕྱག་གཡས་ཨུཏྤལ་དང་། གཡོན་དྲིལ་བུ། ཡུམ་གྱི་ཕྱག་གཉིས་ཀྱིས་དྲི་ཆབ་དུང་ཕོར་བསྣམས་པ། དེ་བཞི་ནི་སྣ་ཚོགས་པའི་རིགས་སམ་རྡོ་རྗེ་མི་བསྐྱོད་པའི་སྐུ་དང་ཐུགས་ལས་སྐྱེས་པའོ། །སེམས་དཔའ་སེམས་མ་དེ་ཐམས་ཅད་ཀྱང་ཞལ་གཅིག་ཕྱག་གཉིས། མཚན་དང་དཔེ་བྱད་འབར་བ། ཞི་བའི་ཚུལ་ལྡན་ཅིང་རིན་པོ་ཆེ་དང་དར་གྱི་རྒྱན་ཐམས་ཅད་བརྒྱན་པ། འོད་ཟེར་གྲངས་མེད་པའི་ཀློང་ན། དབུ་རལ་པའི་ཐོར་ཚུགས་དང་བཅས། ཡབ་ཐམས་ཅད་ཞབས་གཡས་དང་། ཡུམ་ཞབས་གཡོན་ཅུང་ཟད་བརྐྱང་པའི་ཕྱེད་དཀྱིལ་གྱིས་ཡབ་ཡུམ་ཞལ་སྦྱོར་དུ་གནས་ཏེ་ཐུགས་རྗེས་སེམས་ཅན་ཐམས་ཅད་ལ་བུ་གཅིག་པུ་ལ་མས་བྱམས་པ་བཞིན་དགོངས་ཏེ་ཡེ་ཤེས་བདེ་ཆེན་སྒྱུ་མའི་རོས་སྒེགས་པ། ཡབ་ཡུམ་དེ་རྣམས་མངོན་པར་བྱང་ཆུབ་པའི་སྐུའོ། ༈ །ཁྱམས་ལ་བྱ་བྱེད་གཉིས་ནི། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨ། ཨ་ཨ་ཨ་བཛྲི་བྷ་དྲ་ས་མནྟ་ཨ། ཤར་དྲང་པོ་རྟོག་ཚོགས་རྒྱལ་བའི་དཀྱིལ་འཁོར་དུ་ཤར་བས་རྒྱུད་ཐམས་ཅད་ཀྱི་བྱེད་པོ་ཡིད་རྣམ་པར་དག་པ་བཅོམ་ལྡན་འདས་ཡབ་རྡོ་རྗེ་ཀུན་ཏུ་བཟང་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་མཉམ་པའི་ཕྱག་རྒྱའི་དཀྱིལ་ན་རྡོ་རྗེ་དཀར་པོ་རྩེ་ལྔ་པ་ལས་ཡེ་ཤེས་ཀྱི་འོད་ཟེར་འཕྲོ་བ། མཁྱེན་པའི་ཡེ་ཤེས་ཤེས་བྱའི་དངོས་པོ་ཐམས་ཅད་དབྱིངས་སུ་གཟིགས་པའི་རྟགས་ཞལ་ནུབ་ཏུ་གཟིགས་པ། ནུབ་དྲང་བོར་ཆོས་འདུས་བྱས་དང་འདུས་མ་བྱས་ཐམས་ཅད་གནས་སུ་དག་པ་བྱེད་པ་བཅོམ་ལྡན་འདས་མ་ཡུམ་ཀུན་ཏུ་བཟང་མོ་སྐུ་མདོག་དཀར་མོ་ཕྱག་གཉིས་ཆོས་འབྱུང་གི་ཕྱག་རྒྱ་བཅས་ཏེ། དབྱིངས་མཁྱེན་པ་དང་ལྡན་པའི་རྟགས་ཞལ་ཤར་དུ་གཟིགས་པ། གཉིས་ཀ་ཡང་མཉམ་པའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་ཅན། ཡབ་ཡུམ་དེ་གཉིས་ནི་ཆོས་ཀྱི་སྐུའོ། ༈ །ཁྱམས་ལ་ཐུབ་པ་དྲུག་ནི། ༀ་མུ་ནེ་ཀྲིཾ་སྭཱ་ཧཱ། ཤར་ལྷོ་རང་རྒྱལ་དག་པ་ལྷ་ཡི་ཐུབ་པ་བརྒྱ་སྦྱིན་དཀར་པོ་ཕྱག་ན་པི་ཝཾ་འཛིན་པ། ༀ་མུ་ནེ་ཧཱུྃ་ཏྲཱུྃ་སྭཱ་ཧཱ། བྱང་དུ་ཕྲག་དོག་དག་པ་ལྷ་མིན་གྱི་ཐུབ་པ་ཐག་བཟང་མཐིང་ག་གོ་ཆ་དང་མཚོན་མདུང་ཐུང་འཛིན་པ། ༀ་མུ་ནེ་སྲུྃ་སྭཱ་ཧཱ། ལྷོར་འདོད་ཆགས་དག་པ་མི་ཡི་ཐུབ་པ་ཤཱཀྱ་སེང་གེ་གསེར་བཙོ་མའི་ཁ་དོག་ཅན། བསྲེག་ཤང་དང་པར་བུ་འཛིན་པ། ༀ་མུ་ནེ་བྲེཾ་སྭཱ་ཧཱ། ནུབ་བྱང་དུ་གཏི་མུག་དག་པ་བྱོལ་སོང་གི་ཐུབ་པ་སེང་གེ་དམ་བརྟེན་སེར་ནག་ཆོས་ཀྱི་གླེགས་བམ་འཛིན་པ། ༀ་མུ་ནེ་ཀྵྃ་སྭཱ་ཧཱ། ལྷོ་ནུབ་ཏུ་སེར་སྣ་དག་པ་ཡི་དྭགས་ཀྱི་ཐུབ་པ་ཁ་འབར་མ་སྔོན་པོ་རིན་པོ་ཆེའི་སྒྲོམ་བུ་དགོས་འདོད་འབྱུང་བ་འཛིན་པ། ༀ་མུ་ནེ་ཡེ་སྭཱ་ཧཱ། བྱང་ཤར་དུ་ཞེ་སྡང་དག་པ་དམྱལ་བའི་ཐུབ་པ་ཆོས་ཀྱི་རྒྱལ་པོ་སྔོན་པོ་ཕྱག་གཡས་མེ་བསྣམས་ནས་གྲང་བའི་སྡུག་བསྔལ་བསིལ་བ། གཡོན་ཆུ་ཐོགས་ནས་ཚ་བའི་སྡུག་བསྔལ་བསིལ་བར་མཛད་པ། སྐུ་མདོག་སོགས་འདི་དག་སྒྱུ་འཕྲུལ་བླ་མ་སྟེ་བཤད་རྒྱུད་ཀྱིས་རྩ་རྒྱུད་འབྲེལ་བའི་ལུགས་ཡིན། མཆན། ཀུན་ཀྱང་དབུ་གཙུག་ཏོར་དང་ལྡན་ཅིང་ཚངས་པར་སྤྱོད་པའི་ཆ་ལུགས་ཅན། འགྲོ་བའི་དོན་ལ་བསྙེལ་བ་མི་མངའ་བར་གཞན་བདེ་བའི་དོན་མཛད་པའི་རྟགས་སུ། གདན་ལ་བཞེངས་སྟབས་ཀྱིས་རྒྱུད་དྲུག་གིས་འགྲོ་བ་སྒྲོལ་བ། ཐུབ་པ་དེ་དག་ནི་སྤྲུལ་པའི་སྐུའོ། །སྒོ་བ་བཞི་ནི། ཧཱུྃ་ཡ་མཱནྟ་ཀྲྀ་ཏྲ་ཕཊ། ༀ་མ་ཧཱ་བཛྲ་དྷ་རོ། མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུྃ་ཕཊ། ཤར་སྒོར་རེག་པ་ལུས་ཤེས་དག་པ་འཇོམས་པ་ཆེན་པོ་གཤིན་རྗེའི་གཤེད་དང་། རྟག་པར་མ་ཡིན་པའི་ཡུམ་མི་ཕམ་མ་གཉིས་སྐུ་མདོག་མཐིང་ནག །ཡབ་ཀྱི་ཕྱག་གཡས་ན་ཐོད་དབྱུག །ཡུམ་གྱི་གཡས་ན་ལྕགས་ཀྱུ་བསྣམས་པ། ཕུང་པོའི་བདུད་ཀྱི་གདན་ལ་རོལ་བའོ། །ཧཱུྃ་པྲཱཛྙཱནྟ་ཀྲྀ་ཏཱ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རི་ཛྭ་ལི་ནི་ཧཱུྃ་ཕཊ། ལྷོ་སྒོར་རེག་བྱེད་ལུས་དབང་དག་པ་འཇོམས་པ་ཆེན་པོ་སྟོབས་པོ་ཆེ་དང་། ཆད་པར་མ་ཡིན་པའི་ཡུམ་ཁྲོ་གཉེར་མ་གཉིས་སྐུ་མདོག་སེར་ནག་ཡབ་ཀྱི་ཕྱག་གཡས་ན་རྡོ་རྗེའི་དབྱུག་པ། ཡུམ་གྱི་གཡས་ན་ཞགས་པ་བསྣམས་པ། འཆི་བདག་གི་བདུད་ཀྱི་གདན་ལ་རོལ་པའོ། །ཧཱུྃ་པདྨནྟ་ཀྲྀ་ཏྲ་ཕཊ། ༀ་མ་ཧཱ་པདྨ་དྷ་རོ། །མ་ཧཱ་ཀྲོ་དྷི་ཤྭ་རཱི་ཛྭ་ལི་ནི་ཧཱུྃ་ཕཊ། ནུབ་སྒོར་རེག་བྱ་དབང་ཡུལ་དག་པ་འཇོམས་པ་ཆེན་པོ་རྟ་མགྲིན་དང་། བདག་ཏུ་མ་ཡིན་པའི་ཡུམ་རོ་ལང་མ་གཉིས་སྐུ་མདོག་དམར་ནག །ཡབ་ཀྱི་ཕྱག་གཡས་ན་པདྨའི་དབྱུག་པ་སྦྲུལ་གྱིས་དཀྲིས་པ་དང་། ཡུམ་གྱི་ཕྱག་གཡས་ལྕགས་སྒྲོག་བསྣམས་པ། ཉོན་མོངས་པའི་བདུད་ཀྱི་གདན་ལ་རོལ་པའོ། །ཧཱུྃ་བིགྷྣནྟ་ཀྲྀ་ཏ་ཕཊ། ༀ་མ་ཧཱ་ཀརྨ་དྷ་རོ། མ་ཧཱ་ཀྲོ་དྷེ་ཤྭ་རི་ཛཱ་ལི་ནི་ཧཱུྃ་ཕཊ། བྱང་སྒོར་རེག་ཤེས་འདུས་བྱུང་དག་པ་འཇོམས་པ་ཆེན་པོ་བདུད་རྩི་འཁྱིལ་པ་དང་། མཚན་མར་མ་ཡིན་པའི་ཡུམ་རལ་གཅིག་མ་གཉིས་སྐུ་མདོག་ལྗང་ནག །ཡབ་ཀྱི་ཕྱག་གཡས་ན་རྡོ་རྗེ་རྒྱ་གྲམ་གྱི་དབྱུག་པ། ཡུམ་གྱི་གཡས་གསེར་གྱི་དྲིལ་ཆེན་འཁྲོལ་བ། ལྷ་ཡི་བུའི་བདུད་ཀྱི་གདན་ལ་རོལ་པའོ། །ཀུན་ཀྱང་ཞལ་གཅིག་ཕྱག་གཉིས་སྤྱན་གསུམ་བགྲད་ཅིང་མཆེ་བ་བཞི་གཙིགས་པ། ཞལ་ཕྱིར་ལྟ་བ། རྣམ་པར་འགྱུར་བའི་ཁྲོ་གཉེར་ཆུ་རླབས་ལྟར་འཁྲུགས་པ། ཞལ་གདངས་ཤིང་ལྗགས་འདྲིལ་བ། རལ་པ་གྱེན་དུ་བརྫེས་ཤིང་། ཞིང་གླང་སྟག་གི་གོས་གསུམ། སྦྲུལ་དང་ཐོད་རྒྱན་གཉིས། ཁྲག་ཞག་སྒྱུ་འཕྲུལ་ཐལ་བའི་ལུགས། ཐལ་བའི་བྱུག་པ་གསུམ་སྟེ་དུར་ཁྲོད་ཀྱི་ཆས་བརྒྱད། ཆུ་སྲིན་ཉི་ཟླ་མཆེ་བ་གཤོག་པ། རྡོ་རྗེའི་ཁྲབ་སླག་ལྕགས་མེད་པ་ལ་ཆས་བརྒྱད་དེ་བཅུ་དྲུག་གིས་བརྒྱན་པ། ཡུམ་གྱི་གཡོན་ཐམས་ཅད་ཐོད་པ་ཁྲག་གིས་བཀང་བ་ཐོགས་ཤིང་། གཞལ་ཡས་གྱི་སྒོ་ཁང་ཐམས་ཅད་ཁྲོ་བོའི་སྐུ་ལས་འཕྲོས་པའི་མེ་རི་རྡོ་རྗེ་རྩེ་ལྔའི་གཟུགས་འབར་བའི་ཀློང་ན་རྔམས་པ་ཆེན་པོས་གར་དགུས་གཏུམ་ཞིང་བདུད་བགེགས་ཀྱི་ཚོགས་རྣམ་པར་འཇོམས་ཀྱང་། ཐུགས་ཆོས་ཉིད་ལས་མ་གཡོས་པས། ཡབ་ཡུམ་དེ་རྣམས་ནི་རྡོ་རྗེ་མི་འགྱུར་བའི་སྐུའོ། །གཞལ་ཡས་ཕོ་བྲང་གི་ཕྱི་རོལ་ལ་ཏཱ་ལའི་ཚལ་དུ་མཁའ་འགྲོ་སོ་གཉིས་ལྷ་ཆེན་པོ་དཔལ་མགོན་བདུན་ཅུ་སོགས་དང་རྟ་བབས་ཀྱི་ནམ་མཁའ་རྒྱུད་སྡེ་དྲུག་གི་རྩ་གསུམ་ལྷ་དང་དབུས་མཆོད་རྟེན་གྱི་ཆོས་འཁོར་ལ་རིག་འཛིན་བླ་མ་སྤྲིན་ལྟར་འཁྲིགས་པའོ། །དེ་ལྟར་བདག་གི་དཀྱིལ་འཁོར་འདི་ན་བཞུགས་པ་བཞིན་དུ། འཇིག་རྟེན་དྲུག་གི་ཕྱོགས་བཅུ་ཆོས་ཀྱི་དབྱིངས་ཀྱིས་གར་ཁྱམ་པ་ཐམས་ཅད་རྒྱལ་བའི་དཀྱིལ་འཁོར་དང་། ཆོས་ཀྱི་དབྱིངས་སེམས་ཉིད་སྒྱུ་འཕྲུལ་དྲྭ་བས་ཁྱབ་པའི་རྟེན་བརྟེན་པ་མ་ལུས་པ་སྣང་སྣོང་ཟུང་དུ་འཇུག་པར་གསལ་བར་གྱུར། སླར་ཡང་གསལ་གདབ་ཅིང་དག་པ་དྲན་པའི་ཕྱིར། གང་ཕྱིར་རྡོ་རྗེ་ཐུགས་ཆུད་པའི། །ལས་དང་སྤྱོད་པ་དཀའ་ཐུབ་དང་། །སྲིད་པའི་རི་བོས་མི་བསྐྱེད་པ། །དེ་ནི་མི་བསྐྱོད་མཆོག་ཏུ་གསུངས། །ཐབས་དང་ཤེས་རབ་འབྲེལ་བ་ཡི། །ཇི་སྙེད་སྐུ་གསུང་ཐུགས་སྣང་བ། །མེས་དང་ཐབས་ཀྱིས་ཁྱད་པར་གྱིས། །རྣམ་པར་སྣང་ཕྱིར་སྣང་མཛད་མཆོག །རྒྱལ་བ་ཀུན་གྱི་ཡོན་ཏན་ནི། །ཚོགས་རྣམས་འདུས་པའི་ངོ་བོ་ཉིད། །ཡོན་ཏན་རིན་ཆེན་ལྟར་འབྱུང་བས། །རིན་ཆེན་འབྱུང་བར་གསུངས་པ་ཡིན། །དཔག་ཏུ་མེད་པ་གསུང་གི་སྒོ། །དབང་པོ་ཐབས་ཀྱི་བྱེ་བྲག་གིས། །དོན་རྟགས་གསུང་དང་ཡི་གེའི་སྒོ། །མཐའ་ཡས་སྣང་ཕྱིར་མཐའ་ཡས་མཆོག །དཔག་མེད་ཐུགས་རྗེའི་མཛད་པ་ཡི། །འགྲོ་འོང་མེད་པའི་ཐུགས་རྗེ་ཡིས། །འགྲོ་བ་སྐྱོབས་པའི་དོན་མཛད་པ། །དོན་གྲུབ་ཅེས་ནི་རྣམ་པར་བསྟན། །རིག་པའི་རྒྱལ་པོ་འདི་དག་ཀྱང་། །ཐ་མལ་ལྔ་ཉིད་གནས་དག་ཅིང་། །དེ་ལས་ཐབས་དེས་མངོན་བྱས་པས། །དེར་དབང་བསྐུར་ཏེ་ཉིད་སྣང་བ། །རྒྱལ་པོ་ཉིད་དུ་བརྗོད་པ་ཡིན། །སྟེང་འོག་གཉིས་ལ་མངོན་གྲུབ་པའི། །སྦྱོར་དང་འཇུ་འདུལ་རླུང་གི་རིམ། །གང་དེ་ཐབས་ལས་མངོན་གྱུར་པའི། །བདེ་བའི་གཟུགས་དང་ཚོར་བ་དང་། །འདུ་ཤེས་དང་ནི་འདུ་བྱེད་དང་། །རྣམ་དག་བདག་མེད་བདེ་བའི་རོས། །དབང་བསྐུར་ཡེ་ཤེས་རྒྱལ་པོ་བཤང་། །གང་ཕྱིར་སྣང་དང་སྒོམ་དང་བྲིས། །ཕྱག་རྒྱ་རྩ་བཅུད་ཐིག་ལེའི་མདོག །དཀར་དང་དམར་དང་སེར་བ་དང་། །སྔོ་དང་ལྗང་དང་རིམ་ལྡན་པའོ། །རྒྱལ་བ་ཀུན་གྱི་བདེ་བསྐྱེད་ཅིང་། །སྤྱོད་དང་དེ་ལས་འབྱུང་བའི་ཡུམ། །ཐམས་ཅད་དེ་ལས་འབྱུང་བ་ལྔ། །ཐ་མལ་ཞེན་པ་དག་པ་དང་། །དབང་བསྒྱུར་རྒྱལ་པོ་ལྔ་རང་བཞིན། །སྲ་དང་གཤེར་དང་དྲོད་དང་བསྐྱོད། །ནམ་མཁའི་ཁམས་ཀྱི་གང་ཆེ་བ། །སྟེང་འོག་ཐབས་ལས་མངོན་གྱུར་པ། །ཡུལ་དང་ཤེས་པ་དབྱེར་མེད་ཅིང་། །ཐུགས་རྗེ་ཤེས་རབ་འབྲེལ་པ་ཡི། །འཁོར་བ་དང་ནི་མྱ་ངན་འདས། །གཉིས་མེད་གཟིགས་པ་སྤྱན་གྱི་མཆོག །ཟག་མེད་སྟོང་པའི་བློ་ཆེན་གྱིས། །སྐྱེས་དང་བསྡུ་དང་གནས་པའི་ཕྱིར། །མཐའ་དབུས་བྲལ་བའི་དེ་བཞིན་ཉིད། །ནམ་མཁའི་དབྱིངས་ཤེས་གང་བརྗོད་པ། །ཐུན་མོང་ཐུན་མོང་མ་ཡིན་པའི། །ལས་དང་ལྟ་བ་ཉོན་མོངས་པ་དང་། །ཤེས་བྱའི་དྲི་མ་མཐའ་ཡས་པ། །རྟོག་པས་སྦྱོར་ཞིང་བསྲེག་པས་ན། །གོས་དཀར་མ་རུ་བརྗོད་པ་ཡིན། །གང་ཕྱིར་ལས་དང་ཏིང་འཛིན་དང་། །ཡེ་ཤེས་ཐུགས་རྗེ་བར་མེད་ཆུས། །གང་དང་འཁྲུ་དང་ཚིམ་བྱེད་པས། །ཆུ་ནི་མ་མཱ་ཀི་རུ་བཤད། །གང་ཕྱིར་རྟོག་དང་ཐབས་དག་དང་། །ཏིང་འཛིན་ཐབས་ཀྱིས་རླུང་དག་གིས། །བགྲོད་པ་མེད་པའི་ཞིང་ཁམས་སུ། །སྒྲོལ་བ་སྒྲོལ་མ་ཉིད་དུ་བཤད། །སྙིང་པོ་ཡེ་ཤེས་རང་བྱུང་ཉིད། །ཀུན་རྟེན་གནས་དང་ཁྱབ་པའི་ཕྱིར། །བྱང་ཆུབ་སེམས་ཀྱི་རང་བཞིན་ལ། །ས་ཡི་སྙིང་པོར་བརྗོད་པ་ཡིན། །རང་བྱུང་སྙིང་པོ་བྱང་ཆུབ་སེམས། །ནམ་མཁའ་ལྟ་བུར་བསམ་བརྗོད་བྲལ། །མཐའ་དབུས་སྒྲོ་བཀུར་གང་འདས་པ། །དེ་ནི་ནམ་མཁའི་སྙིང་པོ་ཉིད། །གང་ཕྱིར་ཐུགས་རྗེ་དཔག་མེད་པས། །འགྲོ་བ་ཆུ་བོ་བརྒལ་བའི་བར། །སྐྱེ་བ་མེད་ཅིང་གཟིགས་པས་ན། །སྤྱན་རས་གཟིགས་དབང་པདྨའི་གཙོ། །རྟོག་དང་དབྱེར་མེད་རྡོ་རྗེ་ཡིས། །མཐའ་ཡི་བདག་རྟོག་མཚན་མ་དག །འཇོམས་པ་ཕྱག་ན་རྡོ་རྗེ་སྟེ། །ཐུན་མོང་ཉིད་དང་ཁྱད་པར་གྱི། །གསང་བའི་རྣམ་པར་ཤེས་པ་བཞི། །ཐུན་མོང་ཡུལ་དང་ཁྱད་པར་གྱིས། །ཐབས་དང་ཤེས་རབ་འབྲེལ་བ་ལས། །མཚོན་དང་རྟོག་དང་སྒོམ་པ་ཡི། །ལྷ་མོ་བཞིར་ནི་མངོན་སྣང་བ། །བྱང་ཆུབ་སེམས་དང་བདེ་བ་དང་། །ཐབས་ཀྱི་བདེ་བས་སྒེག་པ་དང་། །ལྷ་མོ་འདི་ནི་སྒེག་མོར་བཤད། །གྲོལ་དང་མ་གྲོལ་འཁོར་བ་ཡི། །ཕྱི་ནང་སྒྲ་ཡི་བྱེ་བྲག་ཀུན། །བྲག་ཆ་ལྟ་བུར་བརྗོད་མཛད་པ། །བར་ཆད་མེད་པས་ཕྲེང་བ་དང་། །ཚིམས་པའི་ངོ་བོ་གང་བསྟན་དང་། །དྲི་དང་ལྡན་པའི་ཁྱད་པར་གྱིས། །དབྱངས་ཉིད་ཚིམས་ཤིང་ཡིད་བདེ་བས། །དེ་ཉིད་རྡོ་རྗེ་གིརྟི་མ། །རོ་ཡིས་ཁྱབ་ཅིང་གར་བསྒྱུར་ལྡན། །བདེ་བ་ཆེན་པོ་བཞི་ཡི་གར། །ཁྱབ་དང་མཛེས་དང་ཚིམས་པ་ལྟར། །མི་གནས་བཀྲོལ་བར་གར་མཁན་མ། །རྒྱན་དང་ཆགས་པའི་སྒྲ་དག་དང་། །ཡིད་ཀྱི་ཕྲེང་བ་བདེ་བའི་གར། །ལྷ་མོ་བཞི་ཡི་རང་བཞིན་ནོ། །མ་རྟོགས་འགྲོ་བ་མཐའ་ཡས་པ། །རང་བཞིན་ཐུགས་རྗེ་མཛད་པ་ཡི། །ཡོངས་ལ་ཕན་ཐོག་སྐྱོབ་པ་ནི། །འདི་ནི་བྱམས་པ་ཞེས་བྱའོ། །རྟོགས་གོམས་མཐར་ཕྱིན་ཁྱད་པར་གྱི། །ལས་དང་ཉོན་མོངས་ལྟ་བའི་རིམ། །སེལ་བ་འདི་ནི་སྒྲིབ་སེལ་ལོ། །ཐབས་དང་ཤེས་རབ་གནས་རྟོག་ན། །གང་ཕྱིར་སྒོང་ལེན་མི་གནས་པ། །ཕྱི་ནང་སྣོད་བཅུད་མ་ལུས་པ། །དབྱེ་བ་མེད་པས་ཀུན་ཏུ་བཟང་། །བདག་དང་གཞན་དུ་འཛིན་པ་ཀུན། །ཟག་པ་མེད་པའི་ཤེས་རབ་ཡིན། །ལྟ་བའི་དྲྭ་བ་སྤྱོད་པས་ན། །ཟག་མེད་ཤེས་རབ་འཇམ་དཔལ་སྐུ། །དབང་པོ་ཡི་གེ་ཐིག་ལེར་བཅས། །གནས་དང་རྟོག་དང་སྒོམ་པ་ཡི། །མངོན་དུ་སྣང་ཕྱིར་བརྗོད་པ་ཡིན། །དུས་བཞི་རིམ་པ་གཉིས་བརྒྱད་དེ། །དེ་གཉིས་བྲོད་དང་སྤྲོ་བསྐྱེད་དང་། །སྤྱོད་ཡུལ་ཕྱིར་དག་བརྗོད་པ་ནི། །དྲི་དང་ཕྲེང་བས་གང་ཚིམས་ཤིང་། །ཡིད་རྟོག་མེད་པས་རྡོ་རྗེ་དྲི། །ཕྱི་ནང་ཁྱབ་པའི་དཀྱིལ་འཁོར་ལ། །མེ་ཏོག་ཐིག་ལེ་བདེར་བཀོད་པས། །རྡོ་རྗེ་མེ་ཏོག་བླ་ན་མེད། །ཕྱི་ནང་སེམས་ལ་གནས་བཅས་པའི། །མུན་པ་བསལ་ཕྱིར་ཤེས་རབ་དང་། །ཡེ་ཤེས་སྣང་བ་བླ་ན་མེད། །རྡོ་རྗེ་གསལ་བའི་མར་མེ་མ། །ཕྱི་ནང་དཀྱིལ་འཁོར་མ་ལུས་ལ། །རང་བྱུང་ཏིང་འཛིན་བདེ་བ་ཡིས། །ཐམས་ཅད་ཁྱབ་པར་གནས་པའི་ཕྱིར། །ཁྱབ་བྱེད་རྡོ་རྗེ་དྲི་ཆབ་མ། །དེ་བཞིན་ཉིད་ལ་དགོངས་པ་ཡིན། །འཁོར་བའི་ཆོས་རྣམས་མ་ལུས་པ། །བྱང་ཆུབ་སྙིང་པོ་ཚར་བཅད་པས། །རྣམ་པར་རྒྱལ་བ་ཞེས་སུ་བརྗོད། །གཟུང་འཛིན་བྲལ་བའི་ཡེ་ཤེས་ནི། །གཉིས་མེད་རྟོག་པའི་གཉེན་པོ་སྟེ། །རྟོག་གོམས་དེ་ནི་འཇོགས་པས་ན། །ཡ་མནྟ་ཀྲྀཏྲ་གཤིན་རྗེ་སྟེ། །གང་ཕྱིར་འཁོར་བའི་རྒྱ་མཚོ་ལས། །ཐབས་དང་བཅས་པའི་རྫུ་འཕྲུལ་ལས། །འཇོམས་དང་སྒྲོལ་བར་མཛད་པས་ན། །རྟ་མགྲིན་རྒྱལ་པོར་དེ་བཤད་དེ། །འཁོར་བའི་བདུད་ཀྱི་དུག་ལྔ་ལས། །ཡེ་ཤེས་ལྔ་རུ་གསལ་གོམས་པས། །གཉིས་མེད་རྩི་རུ་གང་འཁྱིལ་བ། །སྒྲིབ་ཟད་བདུད་རྩི་འཁྱིལ་པར་བཤད། །གང་དུ་ལུས་དང་བཅས་པ་ཡིན། །དབང་པོ་ཡུལ་དང་རྣམ་ཤེས་རེག །རང་རྒྱུད་བཅས་པའི་ཡེ་ཤེས་ཉིད། །སྒོ་བ་རྣམ་པ་བཞི་རུ་གསུངས། །རང་རྒྱུད་རྟག་ཆད་བཟློག་པ་དང་། །གཟུང་དང་ལྷ་དང་བདེ་བ་དང་། །ཐིག་ལེ་རིག་པར་བཅས་པ་ཉིད། །གང་ཕྱིར་གནས་དག་དགུག་པ་དང་། །གང་དུ་འགྲོ་བར་མི་ནུས་དང་། །དེ་ལས་འདའ་བར་དཀའ་བ་དང་། །བསྟིམ་ནས་བདེ་བ་དྲིལ་བུ་མས། །གཟུང་དང་འཁྱུད་དང་སྡོམ་པ་དང་། །གཉིས་སུ་མེད་པས་བདེ་ཆེན་པ། །རང་ལུས་སྣང་སྲིད་བརྟན་གཡོ་ལ། །རྟོག་དང་གོམས་པའི་ཚུལ་གྱིས་སྦྱར། །དེ་དག་མ་ལུས་འདྲེན་བྱེད་པ། །རིག་པའི་རྒྱལ་པོ་ཀུན་དབྱེར་མེད། །ཀུན་གཞི་རྡོ་རྗེ་མི་ཕྱེད་པས། །ཀུན་ཏུ་བཟང་པོར་དེ་བཤད་དོ། །མ་ལུས་འདུསབྱས་མ་བྱས་ཆོས། །མ་ལུས་ཟག་མེད་ཁྱབ་པའི་དབྱིངས། །རྟོག་དང་ཤེས་དང་གང་གྱུར་པ། །ཀུན་ཏུ་བཟང་མོར་དེ་བཤད་དོ། ༈ །དམྱལ་བ་ཡི་དྭགས་བྱོལ་སོང་དང་། མི་དང་ལྷ་དང་ལྷ་མིན་ཏེ། །སོ་སོའི་གནས་དེ་གང་ཡིན་པ། །འགྲོ་བ་འདུལ་བ་སྟོན་པའི་གནས། ༈ །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྟུག་གཟི་བྱིན་འབར། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བ་འཁྲིགས་པའི་འོད། །མཐའ་དབུས་མེད་པར་ཁྱབ་པ་ཡིས། །དཀྱིལ་འཁོར་བསམ་ཡས་ལྷུན་གྱིས་གྲུབ། ༈ །མ་སྐྱེས་རིག་པ་བྱང་ཆུབ་སེམས། །དངོས་མེད་དངོས་པོའི་རང་བཞིན་དུ། །རྡོ་རྗེ་སེམས་དཔའི་ངོ་བོ་ཉིད། །གཡོ་དང་མ་གཡོར་བཅས་པ་ཡི། །ཕྱི་ནང་སྣོད་བཅུད་མ་ལུས་པ། །རང་བྱུང་སེམས་ཀྱི་དཀྱིལ་འཁོར་ཉིད། །རང་བཞིན་གནས་དང་རྟོགས་པ་དང་། །བསམ་དང་དམིགས་དང་གོམས་པ་ཡི། །སྐུ་གསུང་ཐུགས་དང་མཚན་མ་དང་། །ལྷ་དང་ལྷ་མིན་གསང་བ་དང་། །ཤ་ཟ་འབྱུང་པོ་མིའམ་ཅི། །གྲུལ་བུམ་ཡི་དྭགས་ཀླུ་རྣམས་དང་། །རྒྱུ་བ་སྲོག་ཆགས་མ་ལུས་དང་། །རྩི་ཤིང་གེལ་བ་འབྲས་བུ་དང་། །ཕུན་སུམ་ཚོགས་པ་མ་ལུས་དང་། །མ་བཅོས་དོན་གྱི་ལྷ་ཉིད་དེ། །བྱང་ཆུབ་སེམས་སུ་ཁྱད་པར་མེད། ༈ །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །འཇིག་རྟེན་འདས་པ་དཀྱིལ་ཡིན་ཏེ། །འཇིག་རྟེན་སྣ་ཚོགས་འཁོར་དུ་བཤད། །རིག་པའི་དོན་ཉིད་དཀྱིལ་ཉིད་དེ། །ཆོ་འཕྲུལ་རང་བྱུང་འཁོར་དུ་གསུངས། ༈ གཉིས་པ་དབང་བསྐུར་བའི་ཕྱིར་ཐུགས་སྲོག་བཀོད་པ་དང་། དེ་ལ་དབང་བསྐུར་བའོ། །དང་པོ་ནི། དེ་ལྟར་གསལ་བའི་ལྷ་ཚོགས་ཐམས་ཅད་ཀྱི་ཐུགས་ཀའི་དབུས་རང་འདྲའི་ཡེ་ཤེས་སེམས་དཔའ་རྒྱན་སྤངས་པ་རེའི་ཐུགས་ཀར་རང་རང་གི་ཕྱག་མཚན་ལྟེ་བར་ཡབ་ཐམས་ཅད་ལ་ཉི་མ་དང་། ཡུམ་ཐམས་ཅད་ལ་ཟླ་བའི་སྟེང་རིགས་ལྔ་སེམས་དཔའ་ཡབ་ཡུམ་ཀུན་བཟང་བཅས་ལ། ཧཱུྃ་མཱུྃ། ཨཱོཾ་ལཱྃ། སྭཱ་མཾ། ཨཱོཾ་པཱྃ། ཧཱ་ཏཱྃ། ཀྵཱྃ་ཧཱུྃ། ཏྲཱྃ་ཏྲཱྃ། ཧྲཱིཾ་ཧྲཱིཾ། ཛྲིཾ་ཨ། མཻཾ་ཛཿ ཐླྷིཾ་ཧཱུྃ། ཧཱུྃ་བྃ། མཱུྃ་ཧཱོ། ཧཱུྃ་ཨཿ རྣམས་དང་། ཐུབ་དྲུག་ཀྲེཾ་ཏྲུྃ་སྲུྃ་པྲེཾ་ཀྵཾ་ཡེ་དང་། སྒོ་བ་ཡབ་བཞིར་ཧཱུྃ་ཧཱུྃ་ཧཱུྃ་ཧཱུྃ། ཡུམ་ལ་ཛཿཧཱུྃ་བྃ་ཧྃཿརྣམས་ཀྱི་མཐར་རང་རང་གི་བཟླས་བྱའི་སྔགས་ཀྱིས་མཚན་པ་གསལ་བར་གྱུར། གཉིས་པ་ནི། ཐུགས་ཀ་ནས་འཕྲོས་པའི་འོད་ཀྱིས་དབང་གི་ལྷ་རིགས་ལྔ་འཁོར་བཅས་ༀ་བཛྲ་ས་མཱ་ཛཿ དེ་དག་ཀུན་ཀྱང་ཐབས་དང་ཤེས་རབ་དབྱེར་མེད་པས་བྱང་ཆུབ་སེམས་ཀྱི་འོད་ཟེར་གྱིས་བདག་ལ་དབང་བསྐུར། དྲི་མ་ཐམས་ཅད་དག །ཕུང་པོ་ལྔ་རིགས་ལྔ་དང་། ཉོན་མོངས་པ་ལྔ་ཡེ་ཤེས་ལྔར་གནས་འགྱུར། གཙོ་བོ་བྱ་བྱེད་ཡབ་ཡུམ། ཐུབ་དྲུག་བཅས་ལ་མི་བསྐྱོད་པ་རྣམ་སྣང་། ས་སྙིང་བྱམས་པ། གཤིན་རྗེ་གཤེད་ཡབ་ཡུམ་རྣམས་ལ་རྣམ་སྣང་། རིན་འབྱུང་། ནམ་སྙིང་། སྒྲིབ་སེལ། སྟོབས་པོ་ཆེ་ཡབ་ཡུམ་རྣམས་ལ་རིན་འབྱུང་། སྣང་མཐའ། སྤྱན་གཟིགས། ཀུན་བཟང་། རྟ་མགྲིན་ཡབ་ཡུམ་རྣམས་ལ་སྣང་མཐའ། དོན་གྲུབ། ཕྱག་རྡོར། འཇམ་དཔལ། བདུད་རྩི་འཁྱིལ་བ་ཡབ་ཡུམ་རྣམས་ལ་དོན་གྲུབ་རྣམས་ཞལ་གཅིག་ཕྱག་གཉིས་རང་རྟགས་དང་དེའི་ཡུ་བ་བྱས་པའི་དྲིལ་བུ་ཐུགས་ཀར་བསྣོལ་བ་ལོངས་སྐུའི་ཆ་བྱད་ཅན་རེས་བདག་པོར་བྱས་པའི་རིགས་ལྔ་ལྔས་དབུ་བརྒྱན་པར་གྱུར། ཕྱག་རྒྱ་མཛུབ་སྲིན་ཐེབ་ཆེ་ཆུང་བཅས་སོ་སོར་བརྐྱང་པ་སྤྱི་བོ། དཔྲལ་བ། རྣ་ལྟག་གཡས། རྒྱབ་གཡོན་རྣམས་སུ་བཞག་སྟེ། ༀ་མ་ཧཱ་ཤྲུ་ནྱ་ད་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ས་མ་ཏྭ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ནི་མི་བསྐྱོད་པ་གཙོ་བོའོ། །ༀ་མ་ཧཱ་ཨཱ་དཪྴ། ཤྲཱུ་ནྱ་ཏ། ས་མ་ཧཱ། པྲ་དྱ༴ ཀྲི་ཏྱཱ༴ རྣམས་རྣམ་སྣང་གཙོ་བོ། ༀ་མ་ཧཱ་ས་མ་ཏཱ། ཨཱ་དཪྴ༴ ཤྲཱུ་ནྱ་ཏ༴ པྲ་ཏྱ༴ ཀྲྀ་ཏྱཱ༴ རྣམས་རིན་འབྱུང་གཙོ་བོ། ༀ་མ་ཧཱ་པྲ་ཏྱཱ༴ ཨཱ་དཪྴ༴ ས་མ་ཏཱ༴ ཤྲཱུ་ནྱ་ཏྱ༴ ཀྲྀ་ཏྱཱ༴ རྣམས་སྣང་མཐའ་བདག་པོ་དང་། ༀ་མ་ཧཱ་ཀྲྀ་ཏྱཱ༴ ཨཱ་དཪྴ༴ ས་མ་ཏཱ༴ པྲ་ཏྱ༴ ཤྲཱུ་ནྱ་ཏ༴ རྣམས་དོན་གྲུབ་གཙོ་བོར་བྱས་པ་སྟེ་ལྔ་ཚན་ལྔའོ། །རྟགས་དེ་དག་གིས་དོན་རྒྱལ་བའི་དཀྱིལ་འཁོར་ཐམས་ཅད་ཆོས་ཉིད་ལས་མ་གཡོས་པ་དང་། འགག་པ་མེད་པར་རང་སྣང་བ་དང་། ཡེ་ནས་དབྱེར་མེད་པ་དང་། གདུལ་བྱའི་མོས་པ་དང་མཐུན་པར་འཇུག་པ་དང་། དོན་གཉིས་ཕུན་སུམ་ཚོགས་པ་རྣམས་མཚན་པའོ། །གསུམ་པ་ཡིན་གྱི་བརླབ་པའི་ཆོ་འཕྲུལ་བའི་རྡོ་རྗེ་ལྔར་བྱེད་པ་དང་། དམ་ཡེ་དབྱེར་མེད་དུ་བྱེད་པའོ། །དང་པོ་ནི། རྡོ་རྗེ་རྩེ་ལྔ་པའི་རྒྱ་གནས་ལྔར་གཏུགས་ཏེ། ༀ་སརྦ་ཏ་ཐཱ་ག་ཏཱ་མ་ཧཱ་ཱཀཱ་ཡ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཝཱ་ཀ྄་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏཱ་མ་ཧཱ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐ་ག་ཏཱ་མ་ཧཱ་པུ་ཙ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ལྷ་ཚོགས་ཐམས་ཅད་ཀྱི་དུང་ཁང་གི་ནང་དུ་ཟླ་བ་ལ་གནས་པའི་ཨཱོཾ་དཀར་པོ། མགྲིན་པར་ལྗགས་པདྨ་ལ་གནས་པའི་ཨཱཿདམར་པོ། ཐུགས་ཀར་གཡས་ཉི་མའི་དཀྱིལ་འཁོར་ལ་གནས་པའི་ཧཱུྃ་མཐིང་སྔོན། ལྟེ་བར་རིན་པོ་ཆེ་ཟུར་བརྒྱད་ལ་གནས་པ་སྭཱ་སེར་པོ། གསང་བར་ཆོས་འབྱུང་གྲུ་གསུམ་ལ་གནས་པའི་ཧཱ་ལྗང་གུ་རྣམས་ལས་འཕྲོས་པའི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་བསྐུལ། རྡོ་རྗེ་ལྔའི་ལྷ་ཚོགས་མི་ཟད་རྒྱན་གྱི་འཁོར་ལོ་ནམ་མཁའ་གང་བར་བྱོན། ཡི་གེ་རྣམས་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་གོ་འཕང་གི་ཆོས་ལྔ་དང་ཐ་མི་དད་པར་གྱུར། ཡི་གེ་རྣམས་འོད་དུ་ཞུ་བ་ལས། སྐུ་རྡོ་རྗེ་དཀར་པོའི་འཁོར་ལོ་དང་དྲིལ་བུ་ཅན། ཐུགས་ཀར་འཁོར་ལོ་ཨཱོཾ་གྱིས་མཚན་པ། གསུང་རྡོ་རྗེ་དམར་པོ་པདྨ་དང་དྲིལ་བུ་ཅན། །ཐུགས་ཀར་པདྨ་ཨས་མཚན་པ། ཐུགས་རྡོ་རྗེ་མཐིང་ནག་རྡོ་རྗེ་དང་དྲིལ་བུ་ཅན། ཐུགས་ཀར་རྡོ་རྗེ་ཧཱུྃ་གིས་མཚན་པ། ཆགས་པའི་རྡོ་རྗེ་སེར་པོ་རིན་པོ་ཆེ་དང་དྲིལ་བུ་ཅན། ཐུགས་ཀར་རིན་པོ་ཆེ་སྦཱས་མཚན་པ། མཆོད་པའི་རྡོ་རྗེ་ལྗང་ཀུ། རལ་གྲི་དང་དྲིལ་བུ་ཅན། ཐུགས་ཀར་རལ་གྲི་ཧས་མཚན་པ་རྣམས་ཀྱི་གནས་ལྔར་རྒྱས་བཏབ་པར་གྱུར། སླར་ཡང་ང་རྒྱལ་བཟུང་བའི་ཕྱིར། དེ་ལྟར་རྟོགས་པའི་རྣལ་འབྱོར་བས། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྟོགས་པས་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །དཀྱིལ་འཁོར་ཀུན་དུ་རབ་སྦྱར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། ༈ །གཉིས་པ་ལ་སྙན་གསན་དབབ་པ་དང་། སྤྱན་དྲང་བ་དངོས། རིག་པའི་མེ་ཏོག་གི་འཇུག་པ། དངོས་གྲུབ་བསྐུལ་ཏེ་བསྟིམ་པའོ། །དང་པོ། ཐུགས་ཀའི་འོད་ཟེར་གྱིས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད། དགོངས་པ་ཆོས་སྐུ་ལས་མེ་ལོང་ལ་གཟུགས་བརྙན་ཤར་བ་ལྟར། གཟུགས་སྐུ་བཞི་བཅུ་རྩ་གཉིས་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་མངོན་སུམ་བཞུགས་པར་གྱུར། ཧཱུྃ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེས་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །རྡོ་རྗེ་གནོད་སྦྱིན་ཕྱག་རྒྱ་བཅས། ༀ་བཛྲ་ས་མ་ཛ་ཧཱུྃ་ཛ། གཉིས་པའི་ལྕགས་ཀྱུའི་རྒྱ་བཅས། ཧོཿ ཡོད་མེད་སྟོང་པ་ཤིན་ཏུ་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གཤེགས། །ཡེ་ཤེས་རྒྱ་མཚོ་རྣམ་པར་རོལ་པའི་ཀློང་། །མི་གནས་མི་དམིགས་ནམ་མཁའི་དབྱིངས་ནས་བཞེངས། །ཚོགས་ཆེན་གཉིས་རྫོགས་ཐུགས་དམ་དབྱིངས་ཀྱི་ལྷ། །ལོངས་སྤྱད་རྫོགས་མཛད་རོལ་པ་ཆེན་པོའི་སྐུ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཐབས་ཀྱིས་མ་རྨོངས་བདེ་ཆེན་དབྱིངས་ནས་བཞེངས། །ཡེ་ཤེས་སྒྱུ་མ་རྣམ་པར་རོལ་པའི་སྐུ། །འཕགས་རྗེ་སྤྲུལ་པ་མང་པོ་འབྱུང་བའི་གནས། །ཐབས་དང་ཤེས་རབ་མཆོག་ལ་མངའ་བརྙེས་པས། །བདེར་གཤེགས་བདེ་བར་གཤེགས་པ་བཞེངས་སུ་གསོལ། །ༀ་ཨེ་ཧྱ་ཧཱི་བྷ་ག་ཝཱན། མ་ཧཱ་ཀ་རུ་ཎི་ཀ་དྲི་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཛཿཧཱུྃ་བྃ་ཧོཿ ཞེས་སྤོས་དང་རོལ་མོ་ཕུལ། ༀ་ཐུགས་རྗེས་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉ་གནས་བསྐྱོད་ལ། །བདེ་གཤེགས་བཞུགས་ཤིང་རྣལ་གྲོལ་དགྱེས་པ་བསྐྱེད། །ཅེས་བསྐུལ་བས་ངོ་བོ་ལ་བྱོན་བཞུད་མེད་ཀྱང་གདུལ་བྱའི་དོན་དུ་གཤེགས་པའི་ཡེ་ཤེས་པ་དམ་ཚིག་གི་དཀྱིལ་འཁོར་དང་མེ་རི་འདབ་འབྲེལ་དུ་བཞུགས་པ་ལ། གསུམ་པ་ལ། ༀ་བཛྲ་ས་མ་ཨཱོཾ། ཨྃ་བཛྲ་ས་མ་ཨྃ། ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་གསོལ་བཏབ་པས་རང་བཞིན་དང་ཏིང་ངེ་འཛིན་གྱི་དཀྱིལ་འཁོར་སྐུ་གསུང་ཐུགས་ཡོན་ཏན་ཕྲིན་ལས་དབྱེར་མེད་དུ་བྱས། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུྃ། ༀ་བཛྲ་ས་མ་ཡ་སྟཾ། ༀ་བཛྲ་ས་མ་ཡ་ཧོཿ ཞེས་དབྱེར་མེད་དུ་བྱས་པ་དེ་ཡང་བརྟན་པར་བྱས། རིན་ཆེན་སེང་གེའི་ཁྲི་ལ་ཡང་དག་ངེས་བཞུགས་ཤིང་། རང་གི་ལྷ་མོ་དག་དང་སྲས་དང་གཡོག་འཁོར་བཅས་པ་རྣམས། ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། འཇིག་རྟེན་ལྷ་དང་བཅས་པ་རྣམས་ལ་ཕན་ཕྱིར་བཞུགས་སུ་གསོལ། སྟོབས་ཀྱི་གླང་པོའི་ཁྲི་ལ་ཡང་། རང་གི་ལྷ་མོ་ཀུན་ཏུ་བཟང་། འཇིག་རྟེན༴ རྫུ་འཕྲུལ་རྟ་ཡི་ཁྲི་ལ༴ རང་གི་ལྷ་མོ༴ ཀུན་ཏུ་བཟང་པོའི༴ འཇིག་རྟེན༴ དབང་བཅུ་རྨ་བྱའི་ཁྲི༴ རང་གི་ལྷ་མོ༴ ཀུན་ཏུ་བཟང་པོའི༴ འཇིག་རྟེན༴ ཐོག་མེད་མཁའ་ལྡིང་ཁྲི་ལ༴ རང་གི༴ ཀུན་ཏུ་བཟང་༴ འཇིག་རྟེན༴ ཀཱ་ཡ་ཝཱཀ་ཙིཏྟ་ཏིཥྛ་བཛྲ། བཞི་པ་མཆོད་པའི་ཆོ་འཕྲུལ་གྱི་སྡོམས་ནི། ཕྱག་དང་ཀུན་བཟང་ཕྱི་ལ་གསུམ། ཕྱག་རྒྱ་གར་མཆོད་ཕུལ། ཚོགས་མཆོད། སྦྱོར་སྒྲོལ་སྨན་གཏོར་དེ་ཁོ་ན། །ཡོན་ཏན་བསྟོད་པ་བཤགས་དམ་བླང་། །ཞེས་པ་ལྟར་བཅུ་གསུམ་ལས། དང་པོ། རང་གི་ཐུགས་ཀ་ནས་ཕྱུང་བའི་སྤྱན་མ་ལ་སོགས་པའི་ལྷ་མོ་སྒོ་བཞིར་འཁོད་ནས་ཕྱག་དང་མཆོད་པའི་ལས་རིམ་ལ་འཇུག་པར་གྱུར། འོག་མིན་ཞིང་གཤེགས་ཡང་དག་ཆོས་སྐུའི་དོན། །ཇི་བཞིན་གཟིགས་ཀྱང་གདུལ་བྱ་མི་འདོར་བའི། །ཐུགས་རྗེ་ཐབས་ཀྱི་བྱེ་བྲག་རྣམ་པར་སྤྲོ། །རབ་འབྱམས་བླ་མ་རྣམས་ལ་ཕྱག་འཚལ་ལོ། །མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེས་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ༴ ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོར་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ༴ མཛེས་པའི་སྐུ་མཆོག་སེམས་ཅན་སྒྲོལ་ལ་མཁས། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །ཤེས་རབ་ཐབས་ཀྱིས་གཙོ་ལ་མཉེས་མཛད་མ། །རིགས་ཀྱི་ཡུམ་རྣམས་ལ་ཡང་༴ ཐབས་མཁས་ཐུགས་རྗེས་ཡེ་ཤེས་སྤྲུལ་པའི་སྐུ། །རིགས་ལྔ་རྣལ་འབྱོར་གྲུབ་པའི་ས་བརྙེས་པ། ཐུགས་རྗེ་ཆེན་པོས་འགྲོ་བའི་དོན་མཛད་པ། །སེམས་དཔའ་སེམས་མ་རྣམས་ལ༴ བྱམས་དང་སྙིང་རྗེ་དགའ་བ་བཏང་སྙོམས་ཀྱིས། །ཉོན་མོངས་ལོག་པར་ལྟ་བའི་དགྲ་རྣམས་འཇོམས། །གཤིན་རྗེ་གཤེད་པོ་ལ་སོགས་ཁྲོ་བོ་བཞི། །སྒོ་བ་ཡབ་ཡུམ་རྣམས་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས༴ སྟེང་འོག་ཕྱོགས་བཞི་འཇིག་རྟེན་འདུལ་བའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱང་། །བཅོམ་ལྡན་ཐུབ་པ་དྲུག་ལ༴ དམིགས་མེད་ཆོས་ཀྱི་སྐུ་ལ༴ ལོངས་སྤྱོད་རྫོགས་པའི་སྐུ༴ ཅིར་ཡང་སྤྲུལ་པའི་སྐུ༴ མི་འགྱུར་རྡོ་རྗེའི་སྐུ༴ མངོན་པར་བྱང་ཆུབ་སྐུ༴ ཁམས་གསུམ་ཞིང་དུ་སྦྱོར༴ ཨ་ཏི་པུ་ཧོཿ པྲ་ཏི་པུ་ཧོཿ གཉིས་པ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱལ་མཚོ་ཡེ་ཤེས་ཀྱི། །སྲིད་པ་རྒྱ་མཚོ་མཐའ་ཡས་ཀྱི། །སྤྱོད་པ་རྒྱ་མཚོ་རྨད་བྱུང་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མ་སྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱེཿ སརྦ་ཏྤ་ཏྤཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། འབྱུང་བ་ཀུན་ལས་ནམ་མཁའ་ནི། །འབྱུང་བ་ཆེན་པོ་ལྔ་པ་སྟེ། །ནམ་མཁའ་ལས་ནི་འདོད་པ་འབྱུང་། །འདོད་པའི་མཆོད་པ་གྲུབ་གྱུར་ཅིག །ༀ་པ་ན་པེ་པེ་ནུ་སུ་ར་ཏོ། །ཏི་པུ་པ་ར་མུ། སརྦ་ཏཱ་ཐ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་སརྦ་ཏཱ་ཐཱ་ག་ཏ་ག་ག་ན་པུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། གསུམ་པ་ལ་དངོས་འབྱོར་འདོད་ཡོན་དང་། ཡིད་སྤྲུལ་འདོད་ཡོན། དེ་བཞིན་ཉིད་ཀྱི་འདོད་ཡོན་ནོ། །དང་པོ་སྤྱིར་འབུལ་བ་དང་། བྱེ་བྲག་གོ། །དང་པོ། ཐོས་བསམ་མཆོད་ཡོན་ཞབས་བསིལ་སྒོམ་རླབས་གཡོ། །ཏིང་འཛིན་བདུག་པ་རྣམ་གྲོལ་མེ་ཏོག་འཕྲོ། །ཤེས་རབ་མར་མེ་དྲི་ཆུ་ཚུལ་ཁྲིམས་མཚོ། །བདུད་རྩི་མྱ་ངན་འདས་མཆོད་རོལ་མོའི་བཅུད། །བླ་མ་མཆོག་དང་མི་བསྐྱོད་རྡོ་རྗེ་གཙོ། །དཔལ་ལྡན་སྒྱུ་འཕྲུལ་བདེ་བའི་དཀྱིལ་འཁོར་ལ། །གུས་པས་འབུལ་ན་བདག་གཞན་སེམས་ཅན་ཀུན། །རྣམ་པར་ཐར་པ་བརྒྱད་ལ་མངའ་བརྙེས་ཤོག །ༀ་ན་མཿསརྦ་ཏ་ཐཱ་ག་ཏ་དེ་ཝསྱ་མཎྜལ་ས་པཱ་རི་ཝ་ར་བཛྲ་ཨརྒྷཾ་ནས། ཤབྟ་པྲ་ཏིཙྪ་སྭཱ་ཧཱ། སོ་སོའི་ཕྱག་རྒྱ་བཅས། གཉིས་པ་ལ་རྣམ་བདུན་དང་། འདོད་ཡོན་དངོས་སོ། དང་པོ། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་སླད་དུ། ། རྡོ་རྗེའི་གདན་ལ་བཞུགས་སུ་གསོལ། །ༀ་ཨ་ཧ་ར་ཨ་ཧ་ར་སརྦ་བིརྻ་དྷཱ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ༀ་ཧཱུྃ། སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་གདུགས་ཀྱིས་འགེབ། །བྱམས་པ་ཐབས་དང་ཤེས་རབ་ལས། །བཛྲ་དྷཱུཥྤེའི་མཆོད་པར་རོལ། །ༀ་ཤྲཱི་བཛྲ་ར་ག་དྷཱུ་ཥྤེ་ཧཱུྃ། ཨུཏྤལ་མཐིང་ཀ་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུཥྤེའི་མཆོད་པར་རོལ། ༀ་ཤྲཱི་བཛྲ་ར་ག་པུཥྤེ་པུ། དབང་གི་ཕྱག་ནི་སྒྲོན་མ་བསྣམས། །ཆོས་ཀྱི་རྒྱལ་མཚན་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲ་ལོ་ཀའི་མཆོད་པ་རོལ། །ༀ་ཤྲཱི་བཛྲ་རཱ་གཱ་ལོ་ཀེ་དྷྲཱིཿ ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལ། །བཛྲ་གནྡྷེའི་མཆོད་པར་རོལ། །ༀ་ཤྲཱི་བཛྲ་ར་ག་གནྡྷེ་གན། །མྱ་ངན་འདས་མཆོག་རང་བཞིན་བས། །བཅུད་ལེན་བྲོ་མཆོག་ཞལ་ཟས་འདི། །བདག་གི་དད་པས་འབུལ་ལགས་ཀྱི། །བཞེས་ཏེ་གྲུབ་མཆོག་སྩལ་དུ་གསོལ། །ༀ་བཛྲ་ནཻ་ཝི་ཏྱ་ཨཱ་ཧཱུྃ། དེ་ནས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སེལ་བྱེད་པ། །སྤྲིན་རྣམས་སོ་སོར་གནས་གྱུར་ཅིག །ན་མོ་རཏྣ་ཏྲཱ་ཡ་ཡ། ན་མོ་བྷ་ག་ཝ་ཏེ་བཛྲ་ས་ར་སོགས་དང་། ༀ་བཛྲ་གཎྜེ་དྷརྨ་ར་ཎི་ཏ། སོགས་ཀྱིས་རོལ་མོ་དབུལ། གཉིས་པ་ནི། དུང་མདོག་སྒེགས་མོ་རྡོ་རྗེའི་སྤྱན། །སེམས་དཔའ་སྔོན་མོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལ། །བཛྲ་སྱའི་མཆོད་པར་རོལ། །ༀ་བཛྲ་ལ་སྱ་ཧཱུྃ། ཡིད་བཞིན་རིན་ཆེན་གཙུག་ཁྲོ་མ། །འཇམ་དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལས། །བཛྲ་མཱ་ལྱེ་མཆོད་པར་རོལ། །ༀ་བཛྲ་མ་ལཱེ་ཏྲཾ། པདྨ་དབྱངས་མཁན་རྨ་བྱའི་མགྲིན། །སྤྱན་རས་གཟིགས་དབང་དངོས་གྲུབ་འཛིན། །སོ་སོར་རྟོག་པའི་ཡེ་ཤེས་ལས། །བཛྲ་གིརྟིའི་མཆོད་པར་རོལ། །ༀ་བཛྲ་གིརྟི་ཧྲཱིཿ གར་མཁན་འགྱིང་བག་གཟི་ལྡན་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན་ཡེ་ཤེས་ལས། །བཛྲ་ནིརྟིའི་མཆོད་པར་རོལ། །ༀ་བཛྲ་ནིརྟི་ཨཱཿགཉིས་པ་ནི། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དམ་ཚིག་ཆེན་པོ་དམ་པ་གྲུབ་པར་མཛོད། །ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་གྲུབ་པར་མཛོད། །ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་དགའ་བ་དག་པར་མཛོད། །ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་བཏང་སྙོམས་གྲུབ་པར་མཛོད། ༈ །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཤིང་། །མཉེན་འཇམ་རེག་ན་བདེ་བ་ཡིས། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །ཏྲཾ། དབྱིབས་ལེགས་རྫིང་བུ་བྲོ་མཆོག་བསིལ། །བྷྲཱུྃ། རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །ཧྲཱིཿ གླུ་དབྱངས་ཚིགས་སུ་བཅད་པའི་སྒྲ། །ཏྲཱི། བླ་བྲེ་རྒྱལ་མཚན་ན་བཟའ་བདུགས། །དོ་ཤལ་དཔུང་རྒྱན་སེ་མོ་དོ། །ཨཱཿ བཟའ་དང་བཏུང་བའི་མཆོག་རྣམས་ཀྱི། །རང་ལ་མཛེས་པར་རྒྱན་པ་ཡི། །ལྷ་དང་ལྷ་མོའི་རྡུལ་སྙེད་ཀྱིས། །བྲོ་གར་གླུ་ཚིག་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བསྐངས་ནས། །དཀྱིལ་འཁོར་ཀུན་ལ་རྒྱས་པར་འབུལ། །གསུམ་པ་ནི། སྤྲུལ་པའི་འཁོར་ལོར་རྣམ་རྟོག་སྤོས་རིང་ནི། །གཏུམ་མོས་བསྲེགས་པའི་དགའ་བ་རྡོ་རྗེ་མ། །ཨིནྡྲ་ནཱི་ལ་ལྟར་སྔོ་བདེ་བའི་དྲོད། །རབ་འབར་སྤྲིན་དུ་འཐུལ་བས་བླ་མ་མཆོད། །ༀ་བཛྲ་དྷཱུཥྤེ་གྲྀཧྞ་ཧཱུྃ། ༈ ཚངས་པའི་འཁོར་ལོར་ཀུནྡའི་པད་དཀར་ནི། །རྣམ་པར་འཐོར་བ་མཆོག་དགའ་རྡོ་རྗེ་མ། །གསེར་སྦྱང་ལྟར་མཛེས་ཧྃ་ཟེའུ་འབྲུ། །ཡས་འབབ་སྒྱུ་མའི་སྒེགས་པས་བླ་མ་མཆོད། །ༀ་བཛྲ་པུཥྤེ་གྲྀ་ཧྞ་ཧཱུྃ། ༈ ཆོས་ཀྱི་འཁོར་ལོར་གཟུང་འཛིན་མུན་པའི་གཤེད། །ཟག་མེད་སྣང་གསལ་དགའ་བྲལ་རྡོ་རྗེ་མ། །བྱེ་རུའི་མདངས་འཛིན་མི་ཤིག་ཐིག་ལེའི་འོད། །ལྔ་འདྲིས་སྐུ་གསུམ་རང་གསལ་བླ་མར་མཆོད། །ༀ་བཛྲ་ཨ་ལོ་ཀེ་གྲྀ་ཧྞ་ཧཱུྃ། ༈ །བདེ་སྐྱོང་འཁོར་ལོར་བདེ་ཆེན་དྲི་བཟང་པོ། །བརྗོད་བྲལ་ལས་ཤར་ལྷན་སྐྱེས་རྡོ་རྗེ་མ། །མ་རྒད་ལྟར་ལྗང་མས་བརྟན་བྱུགས་པའི་ཆབ། །བདེ་སྟོང་ལང་ཚོའི་འགྱུར་བས་བླ་མ་མཆོད། །ༀ་བཛྲ་གནྡྷེ་གྲྀ་ཧྞ་ཧཱུྃ། ལོངས་སྤྱོད་འཁོར་ལོར་རླུང་སྔགས་ནཱ་དའི་སྒྲ། །སྟོང་ཉིད་ངང་ན་སྒྲོགས་པའི་རོལ་མོའི་སྤྲིན། །རྡོ་རྗེའི་ལུས་ཀྱི་ཞིང་ཁམས་རྒྱ་མཚོ་ན། །སངས་རྒྱས་རྒྱལ་མཚོ་རྟག་ཏུ་མཉེས་ཕྱིར་འབུལ། ༈ །དྷུ་ཏིའི་དབུས་སུ་གཉིས་འཛིན་རྟོག་པའི་རོ། །གཉིས་མེད་མྱང་བ་བསམ་མི་ཁྱབ་བདེ་ཡིས། །ཀུན་བཟང་ངང་ཚིམས་ཞལ་ཟས་བཀོད་པ་བཅས། །བླ་མ་མི་བསྐྱོད་རྡོ་རྗེ་མཉེས་ཕྱིར་འབུལ། ༈ །བཞི་པ་ཕྱག་རྒྱ་ལ་རྟོགས་པ་ལྟ་བ་དང་། མ་འགག་བརྟགས་ཀྱི་ཕྱག་རྒྱའོ། །དང་པོ་ནི། ཧཱུྃ། སྒྱུ་འཕྲུལ་དྲྭ་བ་མངོན་རྫོགས་པའི། །དབང་པོའི་ཡུལ་དུ་གང་གྱུར་པ། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བྱང་ཆུབ་མཆོག་གི་རྒྱ། །གཉིས་པ་ནི། བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམ་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །འདི་ནི་སྤྱི་རྒྱ་ཆེན་པོ་སྟེ། །བླ་མེད་ཆེན་པོས་འདི་སྐད་གསུངས། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའ་འོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་འཕྲོས་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། ༈ །ༀ་དང་མུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །བདེ་བ་ཆེན་པོ་སྦྱིན་པའི་རྒྱ། །ཕྱག་རྒྱའི་བཅའ་ཚུལ་དང་། ཕྱག་རྒྱ་བཞིའི་དོན་ཤེས་པས། འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱུྃ་བཛྲ་དྷྲིཀ །འབྲུ་བཞི་སྦས་ནས་ཐུགས་ཀར་བཀན། །མཱུྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱུྃ་དྷཱ་ཏྭཱ་ཤྭ་རི། འབྲུ་བཞི༴ ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ༴ འཁྲིལ་བའི༴ ཨཱོཾ་ཛི་ན་ཛིཀ །འབྲུ་བཞི༴ ལཱྃ་སྒྲེང་རྩེ་མོར་དྲིལ་བསིལ་འབར། །ཉི་མ༴ བཏུད་དེ་འཛུམ༴ ལཱྃ་དྭཻ་ཥ་ར་ཏི། འབྲུ་བཞི༴ སྭཱ་སྒྲེང་རྩེ་མོར་རིན་ཆེན་འབར། ཟླ་བརྟུལ༴ འཁྲིལ་བའི༴ སྭཱ་རཏྣ་དྷྲཱིཀ྄ །འབྲུ་བཞི༴ མཱྃ་སྒྲེང་རྩེ༴ ཉི་མ་འབྲུ་ལྔ༴ བཏུད་དེ༴ མཱྃ་མོ་ཧ་ར་ཏི། འབྲུ་བཞི༴ ༀ་སྒྲེང་རྩེ་མོར་པདྨ་འབར། །ཟླ་བརྟུལ༴ འཁྲིལ་བའི༴ ཨཱོཾ་ཨ་རོ་ལྀཀ྄ །འབྲུ་བཞི༴ པྱྃ་སྒྲེང་༴ ཉི་མ༴ བཏུད་དེ༴ པྱྃ་རཱ་ག་ར་ཏི། འབྲུ་བཞི་༴ ཧ་སྒྲེང་རྩེ་མོར་རལ་གྲི་འབར། །ཟླ་བརྟུལ༴ འཁྲིལ་བའི༴ ཧཱ་པྲཛྙཱ་དྷྲིཀ྄ །འབྲུ་བཞི༴ ཏཱྃ་སྒྲེང་རྩེ༴ ཉི་མ༴ བཏུད་དེ༴ ཏཱྃ་བཛྲ་ར་ཏི། ༈ །རྡོ་རྗེ་རིན་ཆེན་ཐུགས་ཀར་འཛིན། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །ས་ཡི་སྙིང་པོའི་ཕྱག་རྒྱ་ཡིན། །ཀྵིཾ་ཧཾ་རཱ་ཛཱ་ཡ། རྡོ་རྗེ་རིན་ཆེན་ཁུ་ཚུར་བཅས། །སྐུ་ཡི་ཐད་ཀར་བཟུང་བ་དང་། འཛུམ་པའི༴ སྒེ་མོའི་ཕྱག་རྒྱ་ཡིན་པར་བཤད། །ཧཱུྃ་ལཱ་སྱེ་ས་མ་ཡ་སྟཾ། །རྡོ་རྗེ་རལ་གྲིའི་ཐུགས་ཀ་ནས། །རིན་ཆེན་དྲིལ༴ འཛུམ་པའི༴ ནམ་མཁའི་སྙིང་པོའི༴ ཏྲཱྃ་ཨ་གརྦྟ་ཡ། རྡོ་རྗེ་རིན་ཆེན་རྣ་ལྟག་བཞག །རིན་ཆེན་ཕྲེང་བ་བཟུང་བ་རུ། །འཛུམ་པའི་མདངས༴ ཕྲེང་བའི་ཕྱག༴ ཏྲྃ་མ་ལྱེ་ས་མ་ཡ་ཧོ། །རྡོ་རྗེ་པདྨའི་ཐུགས་ཀ་ནས། །རིན་ཆེན་དྲིལ༴ འཛུམ་པའི༴ སྤྱན་རས་གཟིགས་ཀྱི་ཕྱག་རྒྱ་ཡིན། །ཧྲཱིཾ་ཧ་ཧཱུྃ་པདྨ་བ་ད་མ། རིན་ཆེན་པི་ཝཾ་འཛིན་པར་བྱ། །རྡོ་རྗེ་ལེན་པར་བྱས་ནས་ནི། །འཛུམ་པའི་མདངས་ཀྱིས་བལྟའ་བ་ནི། །དབྱངས་ཀྱི་ཕྱག་རྒྱ་ཡིན་པར་བཤད། །ཧྲི་གིརྟི་རཱ་ག་ཡ་ཧོ། །རྡོ་རྗེ་རྡོ་རྗེའི༴ རིན་ཆེན་དྲིལ་བསིལ༴ འཛུམ་པའི་མདངས༴ ཕྱག་ན་རྡོ་རྗེའི༴ ཛྲིཾ་ཀུ་རུ་པ་ཎ་ཧྲཱིཿ རིན་ཆེན་གར་ཐབས་བསྐོར་ནས་ནི། །རྡོ་རྗེ་ཐལ་མོ་ལས་ལ་འཁྲིལ། །འཛུམ་པའི༴ གར་གྱི་ཕྱག་རྒྱར་དཔའ་བོས་བཤད། །ཨ་ནིརྟི་ར་ག་ཡ་མི། །རྡོ་རྗེ་ཀླུ་ཤིང་ཐུགས་ཀ་ནས། །རིན་ཆེན་དྲིལ་བསིལ༴ འཛུམ་པའི༴ བྱམས་པ་མཻ་ཏྲིའི༴ མཻ་དྷ་ར་ཎི་སྭཱ་ཧཱ། རིན་ཆེན་བདུག་སྤོས་ཐུགས་ཀར་འཛིན། །རྡོ་རྗེ་ལས་ལ་རབ་ཏུ་འཁྲིལ། །འཛུམ་པའི༴ བདུག་པའི་ཕྱག་རྒྱ་ཡིན་པར་བཤད། །ཛཿདྷཱུ་ཥྤེ་པྲ་ཝེ་ཤ་ཡ། རྡོ་རྗེ་པོ་ཏིའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི༴ སྒྲིབ་པ་རྣམས་སེལ་ཕྱག་རྒྱ་ཡིན། ཐླྷིཾ་ནི་སྶ་རི་པ་ཡེ་སྭཱ་ཧཱ། རྡོ་རྗེ་རིན་ཆེན་རྣ་ལྟག་ཏུ། །མེ་ཏོག་སྣོད་བཅས་འཛིན་པ་ལ། །འཛུམ་པའི༴ མེ་ཏོག་ཕྱག་རྒྱ་ཡིན་པར་བཤད། །ཧཱུྃ་པུཥྤེ་ཨ་ཝེ་ཤ་ཡ། རྡོ་རྗེ་སྙེམས་མའི་ཐུགས་ཀ་ནས། །རིན་ཆེན་དྲིལ༴ འཛུམ་པའི༴ ཀུན་ཏུ་བཟང་པོའི༴ ཧཱུྃ་སྭ་རྭཱ་ཛཱ་ཡ་སྭཱ་ཧཱ། རིན་ཆེན་མར་མེའི་ཐུགས་ཀ་ནས། །རྡོ་རྗེ་སེམས་དཔའ་ཆེ་ལ་འཁྲིལ། །འཛུམ་པའི༴ མར་མེའི་ཕྱག་རྒྱར་དཔའ་བོས་བཤད། །བྃ་དཱི་བ་སུ་ཁི་ནི། རྡོ་རྗེ་ཨུཏྤལ་ཐུགས་ཀ་ནས། །རིན་ཆེན་དྲིལ༴ འཛུམ་པའི་མདངས༴ འཇམ་དཔལ་གྱིས་ནི་ཕྱག་རྒྱ་ཡིན། །མཱུྃ་ཤྲཱི་ཨཾ་རཱ་ག་ཡ་སྭཱ་ཧཱ། རིན་ཆེན་དབྱུག་པའི་ཐུགས་ཀ་ནས། །རྡོ་རྗེས་ཉུག་པར་བྱེད་པ་དང་། །འཛུམ་པའི༴ དྲི་ཡི་ཕྱག་རྒྱ་ཡིན་པར་བཤད། །ཧོཿགནྡྷེ་ཙིཏྟ། ༈ ཪྣྲྀ་མགོ་གདེངས་པ་གཤེད་པོ་སྟེ། །ཧཱུྃ་ཡ་མནྟ་ཀྲྀ་ཏྲ་ཕཊ། མཛུབ་གཉིས་བཀུག་པ་ལྕགས་ཀྱུའི་རྒྱ། །ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤོ་རཱི་ཛྭ་ལི་ནཱི་ཧཱུྃ་ཕཊ། རྡོ་རྗེ་རྣོན་པོ་སྟོབས་ཆེན་རྒྱ། །ཧཱུྃ་པྲ་ཛྙཱནྟ་ཀྲྀ་ཏྲ་ཧཱུྃ་ཕཊ། མཛུབ་གཉིས་རྩེ་སྤྲད་ཞགས་པའི་རྒྱ། ། ཨ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནི་ཧཱུྃ་ཕཊ། ཐོད་སྦྲུལ་གནོན་པ་རྟ་མགྲིན་རྒྱ། །ཧཱུྃ་པདྨནྟ་ཀྲྀ་ཏ་ཕཊ། མཛུབ་གཉིས་འཁྱུད་པ་ལུ་གུ་རྒྱུད། །ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱ་ཛྭ་ལི་ནི་ཧཱུྃ་ཕཊ། རྒྱ་གྲམ་གནོན་པ་འཁྱིལ་པའི་རྒྱ། །ཧཱུྃ་བིགྷྣནྟ་ཀྲྀ་ཏྲ་ཕཊ། བསྐྱོད་པར་གྱུར་ན་འབེབས་པའོ། །ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རི་ཛྭ་ལི་ནི་ཧཱུྃ་ཕཊ། པི་ཝཾ་ལེན་པ་ལྷ་ཡི་རྒྱ། ༀ་མུ་ནེ་ཀྲེཾ་སྭཱ་ཧཱ། མི་ནི་གསེག་པར་འཛིན་པ་སྟེ། ༀ་མུ་ན་ཧཱུཾ་ཏྲུྃ་སྭཱ་ཧཱ། ལྷ་མི་ཕྱག་རྒྱ་གོ་ཆ་ཡིན། །ༀ་མུ་ན་སྲུཾ་སྭཱ་ཧཱ། ཆོས་ཀྱི་འཁོར་ལོ་བྱོལ་སོང་རྒྱ། །ༀ་མུ་ནེ་པྲཾ་སྭཱ་ཧཱ། ཟ་མ་ཏོག་ནི་ཡི་དྭགས་རྒྱ། །ༀ་མུ་ནེ་ཀྵྃ་སྭ་ཧཱ། མེ་ཆུ་གཉིས་ནི་དམྱལ་བའི་རྒྱ། ༀ་མུ་ནེ་ཡེ་སྭཱ་ཧཱ། ཡབ་ཀྱི་སྤྱི་རྒྱ་ཀུན་བཟང་གིས། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུྃ། ཡུམ་གྱི་སྤྱི་རྒྱ་བཟང་མོར་བཤད། ཨ་ཨ་ཨ་བཛྲི་བྷ་དྲ་ས་མནྟ་ཨཿ ཡང་ན་ཀུན་བཟང་ཡབ་ཡུམ་ནི། །རྡོ་རྗེ་ཐལ་མོ་ཉིད་དུ་བཤད། །ཕྱག་རྒྱའི་མཆོད་པ་སྣ་ཚོགས་ཀྱིས། །དཀྱིལ་འཁོར་ཐུགས་དམ་བསྐང་གྱུར་ཅིག །རྒྱལ་སྲས་མཆོད་པས་མཉེས་གྱུར་ནས། །མཐར་ཕྱིན་དངོས་གྲུབ་སྩལ་དུ་གསོལ། །ལྔ་པ་ནི། བཀྲ་ཤིས་རྫས་རྟགས་སྣ་བདུན་གོས། དང་པོ་ནི། ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་ཀུན་དངོས་སྒྱུ་འཕྲུལ་དྲྭ་བ་ལ། །བཀྲ་ཤིས་རྫས་བརྒྱད་དག་གིས་མཆོད་པར་བྱ། །ༀ་ཨཥྚ་མངྒ་ལ་པུ་ཛ་ཧོ། གཉིས་པ། བཀྲ་ཤིས་གང་ཞིག་མཆོད་པའི་ལྷ་རྣམས་ཀྱི། །ཕྱག་ན་གདུགས་དུང་པདྨ་གསེར་གྱི་ཉ། །དཔལ་བེའུ་བཀྲ་ཤིས་རྒྱལ་མཚན་འཁོར་ལོ་ནི། །ལེགས་པར་ཐོགས་ནས་དཀྱིལ་འཁོར་ལྷ་ཚོགས་མཆོད། །ༀ་མངྒ་ལ་རཏྣ་པཱུ་ཛི་ཏེ་ཨཿཧཱུྃ། གསུམ་པ་ལ། སོ་སོའི་ཕྱག་རྒྱ་བཅས། ཞིང་འདི་འཁོར་ལོ་རིན་པོ་ཆེས། །མཁས་པ་རྣམས་ཀྱིས་ཡོངས་བསྐང་སྟེ། །དངོས་གྲུབ་འབྲས་བུ་སྒྲུབ་པའི་ཕྱིར། །ཉིན་རེ་ཤེས་རབ་ཅན་གྱིས་དབུལ། །ༀ་ཙཀྲ་རཏྣ་པུ་ཛི་ཏེ་ཨ་ཧཱུྃ། དེ་བཞིན་སྦྱར་ཏེ། ནོར་བུ༴ བཙུན་མོ༴ བློན་པོ༴ གླང་པོ༴ རྟ་མཆོག༴ དམག་དཔོན༴ རྣམས་དང་། མ་ཎི་རཏྣ༴ སྟྲཱི་རཏྣ༴ པུ་རུ་ཥ༴ ཧ་སྟི༴ ཏུ་ར་སྒ་ཨ་ཤྭ༴ ཁརྒ་རྣམས་ཀྱིས་འབུལ། བཞི་པ། སྲབ་འཇམ་ཡངས་པ་ལྷ་ཡི་གོས། །མི་ཕྱེད་རྡོ་རྗེའི་སྐུ་ལ་གསོལ། །མི་ཤིག་རྡོ་རྗེའི་སྐུ་ལ་འབུལ། །བདག་ཅག་རྡོ་རྗེའི་སྐུ་ཐོབ་ཤོག །ༀ་བཛྲ་ཝས་སེ་པྲ་ཏིཙྪ་ཡེསྭཱ་ཧཱ། དེ་ལྟར་མཆོད་པ་ཕུལ་བས་ལྷ་རྣམས་མཉེས་ཏེ་ལྷ་མོ་རྣམས་རང་ལ་ཐིམ་པར་གྱུར། དྲུག་པ་ནི། དཀྱིལ་འཁོར་པའི་ལྷ་ཡབ་རྣམས་ཀྱི་རྡོ་རྗེ་ཧཱུྃ་ལས་རྩེ་ལྔ་པའི་ལྟེ་བར་ས་བོན་དང་། ཡུམ་མཁའ་པདྨ་འདབ་བརྒྱད་ལ་ས་བོན་དང་། བུ་ག་ཕཊ་ཀྱིས་མཚན་པ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་ར་ག་ཡ་མྱེ། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། །ཛཿཧཱུྃ་བྃ་ཧོཿ ཞེས་སྙོམས་པར་ཞུགས་ཤིང་རྒྱལ་བ་ཐམས་ཅད་བདེ་བ་ཆེན་པོའི་ཡེ་ཤེས་སེམས་ལྔའི་མཐའ་ལ་དགྱེས། །འགྲོ་བ་ཐམས་ཅད་བདེ་ཆེན་གྱིས་ཚིམ་པར་གྱུར། རིན་ཆེན་པདྨའི་དཀྱིལ་འཇམ་འདི། །འཛུམ་པའི་མདངས་ཀྱིས་འབུལ་ལགས་ན། །དགྱེས་པའི་རྡོ་རྗེ་གསོར་མཛད་ནས། །བྱང་ཆུབ་སེམས་སྤྲིན་དབབ་ཏུ་གསོལ། །རྡོ་རྗེ་གསོར་བའི་དགའ་མཆོག་འདི། །འཛུམ་ཞིང་འཁྱིལ་པའི་གནས་སུ་གསོར། །མི་དམིགས་བདེ་བའི་འཕྲོ་འདུ་ནི། །རྡོ་རྗེ་འཛིན་མར་ལྡན་ལས་བྱུང་། །ཤེས་རབ་དབྱིངས་མ་ཡུམ་གྱི་གཞལ་ཡས་སུ། །རྒྱལ་བའི་དཀྱིལ་འཁོར་མ་ལུས་རབ་བཀོད་དེ། །ཐབས་དང་ཤེས་རབ་འབྲེལ་པའི་སྦྱོར་མཆོད་འདི། །རྒྱལ་བའི་དཀྱིལ་འཁོར་ཚོགས་ལ་མཆོད་པར་འབུལ། །ༀ་སརྦ་ཏ་ཐཱ་ག་ཏཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་བཛྲ་པྲ་ཝེ་ཤ་ཡ་ཨ་ལ་ལ་ཧོ། བདུན་པ་ནི། ཐུགས་ཀ་ནས་རྃ་གྱིས་སྣོད་འཇིག་རྟེན་དང་། །བཅུད་སེམས་ཐམས་ཅད་བསྲེག །ཡྃ་གིས་ཐལ་བར་གཏོར། ཁྃ་གི་ཆུས་བཀྲུས་ཏེ། རྣམ་ཤེས་ཧཱུྃ་དུ་གྱུར་པ་རང་གི་ཞལ་ནས་གྱི་མཁའ་ལ་བབ། རྡོ་རྗེ་སེམས་དཔར་གྱུར་པའི་གཙུག་ཏུ་ཀུན་བཟང་གིས་མཚན་པ་ཉི་ཟླའི་བར་དུ་བཞག་ནས་རླུང་དཀྱིལ་གྱིས་བཏེག་སྟེ། སྥ་ར་ཎ་ཕཊ་ཀྱིས་འོག་མིན་དུ་རྣམ་སྣང་གི་མཛོད་སྤུར་ཐིམ་པར་གྱུར། དེ་ལས་མཆོད་སྦྱིན་དམ་པ་ནི། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་དཀྱིལ་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུྃ་དུ་གྱུར་ནས་རྣམ་པར་དག །དབྱིངས་སུ་ཐིམ་ནས་ཕྱག་རྒྱ་འབར། །སྐུ་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་སྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྦྱོར་སྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །བརྒྱད་པ་ནི། ཧོཿ རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིག་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་བ། །སྡུག་བསྔལ་སེལ་བའི་བདུད་རྩི་སྟེ། །ཐམས་ཅད་བདུད་རྩིའི་རྣལ་འབྱོར་ཆེ། །བྱང་ཆུབ་སེམས་ནི་རྡོ་རྗེ་ཆེ། །པདྨ་མེ་ཏོག་ཡང་དག་ལྡན། །ག་བུར་ཤེལ་གྱི་པོག་ཕོར་དྲི། །གཙང་དམེ་མེད་པ་དྲི་མེད་ཆུ། །རིན་ཆེན་མེ་ལྟར་འབར་བའི་ཚོགས། །མ་འདུས་བསྡུས་པའི་ཐིག་ལེ་སྟེ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱར་བ། །འཆི་མེད་བདུད་རྩི་ར་སཱ་ཡན། །རྒྱལ་བ་རྒྱ་མཚོ་ཀུན་གྱི་གསོས། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྷ་མིན་གསང་བ་ཡི། །ཐུགས་དམ་དབྱིངས་ཉིད་བསྐུལ་བའི་མཆོག །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ཞེས་ཐིགས་འབུལ་བཞིན། རྒྱལ་བ་ཐམས་ཅད་དང་དབྱེར་མེད་པའི་དཔལ་མགོན་བླ་མ་རིན་པོ་ཆེའི་ཞལ་དུ་ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རྃ་ཁ་ཧི། ཀུན་བཟང་རིགས་ལྔ་རིགས་གསུམ་དྲཱ་མ་ལྔ། །ཆོས་རྒྱལ་ཡབ་སྲས་ས་བརྒྱད་སེམས་མ་དང་། །རྡོ་རྗེ་ཡོན་ཏན་ཧཱུྃ་མཛད་ཕྲ་ཆེན་ཞབས། །སངས་རྒྱས་གསང་བ་རྣམས་ལ་བདུད་རྩིས་མཆོད། །ༀ་ཨཱཿཧཱུྃ་སརྦ༴ ཨུ་རྒྱན་ཆེན་པོ་པཎ་ཆེན་བི་མ་ལ། །རྨ་ལོ་ཀྱི་རེ་ཞང་བན་གནུབས་ཡབ་སྲས། །ཡེ་ཤེས་རྒྱ་མཚོ་བློ་གྲོས་བྱང་ཆུབ་དང་། །ཟུར་བ་མེས་དབོན༴ ༀ་ཨཱཿཧཱུྃ་སརྦ༴ རྫོགས་ཆེན་པ་དང་འཇམ་དབྱངས་ཀཿཐོག་པ། །ཆོས་རྗེ་ཡབ་སྲས་ནམ་མཁའ་རྡོ་རྗེའི་ཞབས། །ཐུགས་རྗེ་དབང་འབྱོར་དཔལ་འབར་རྒྱལ་མཚན་གཉིས། དྷཱརྨ་ལཀྵ་རྣམས་ལ༴ ༀ་ཨཱཿཧཱུྃ་སརྦ༴ ཡེ་ཤེས་རྒྱལ་མཚན་ནམ་མཁའ་རྣམ་གསུམ་དང་། །ཆོས་དབང་བསོད་ནམས་ཆོས་འབྱུང་ཤཱཀྱའི་མཚན། །རིན་ཆེན་སངས་རྒྱས་ཤཱཀྱ་ཨུ་རྒྱན་མཚན། །ཐུགས་ཀྱི་རྡོ་རྗེ་རྣམས་ལ༴ ༀ་ཨཱཿཧཱུྃ་སརྦ༴ རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་གསུམ་སྡུག་བསྔལ་སེལ་མཛད་པ། །བདེ་གཤེགས་ཀུན་བཟང་ཡབ་ཡུམ་ལ། །དམ་ཚིག་མཆོག་གི་མཆོད་པ་འབུལ། །ༀ་ཨཱཿཧཱུྃ་སརྦ༴ ཕུང་པོ་ལྔ་དང་འབྱུང་བ་ལྔ། ཡེ་ཤེས་དབྱིངས་སུ་རྣམས་དག་པ། །རིགས་ལྔ་བདེར་གཤེགས་ཡབ་ཡུམ་ལ། །དམ་རྫས༴ ༀ༴ རྣམ་ཤེས་ཚོགས་དང་སྤྱོད་ཡུལ་རྣམས། །བྱང་ཆུབ་སེམས་སུ་རྣམ་དག་པ། །སེམས་དཔའ་ལྕམ་དྲལ་ཚོགས་རྣམས་ལ། །དམ་ཚིག༴ ༀ༴ ཐུགས་རྗེ་ཆེན་པོའི་བྱིན་རླབས་ཀྱིས། །འགྲོ་དྲུག་དབྱིངས་སུ་སྦྱོར་མཛད་པ། །སྤྲུལ་སྐུ་ཐུབ་པ་དྲུག་རྣམས་ལ། །དམ་ཚིག༴ ༀ༴ ཕྱི་ནང་བདུད་ཚོགས་ཐམས་ཅད་འདུལ་མཛད་པ། །གནས་ཡུལ་རོ་ལང་རྡོ་རྗེ་བཅིང་སྡོམས་འབབ། །སྤྲུལ་པའི་སྒོ་སྐྱོང་ཁྲོ་རྒྱལ་ཡབ་ཡུམ་ལ། །རྣམ་དག་དམ་ཚིག༴ ༀ༴ དུས་རྣམས་ཀུན་ཏུ་འགྲོ་ལ་བརྩེར་དགོངས་ཤིང་། །དུག་གསུམ་དུག་ལྔ་མ་སྤངས་གནས་དག་པ། །དུས་གསུམ་བཞུགས་པའི་རྡོ་རྗེ་སློབ་དཔོན་ལ། །རྣམ་དག༴ ༀ༴ ཚེ་རབས་སྔོན་ནས་ལས་ཀྱི་འཕྲོ་མཐུད་པའི། །མཆེད་དང་ལྕམ་དྲལ་ཀརྨ་གིང་ལ་སོགས། །རྡོ་རྗེ་ལྕམ་དྲལ་མ་ལུས་འཁོར་བཅས་ལ། །རྣམ་དག༴ ༀ་ཨཱཿཧཱུྃ་སརྦ་པཉྩ་ཨ་མྲི་ཏ་ཁ་རཾ་ཁ་ཧཱི། མཐར་རང་གི་གནས་གསུམ་དུ་བདུད་རྩིའི་ཐིག་ལེ་ཅིག་བཀོད་དེ། ༀ་ཨཱཿཧཱུྃ། རྡོ་རྗེ་ལྕེ་ཡིས་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་བསྒོམ། །བདུད་རྩི་ལྔ་དང་སྦྱར་བའི་སྨན། །མྱ་ངན་དངོས་གྲུབ་ཐོབ་པར་འགྱུར། །ༀ་སརྦ་ཏ་ཐ་ག་ཏ་ཀ་ཡ་སིདྡྷི་ༀ། ཝཱཀ྄་སིདྡྷི་ཨ། ཙིཏྟ་སིདྡྷི་ཧཱུྃ། དགུ་པ་ནི། ༀ་ཧཱུྃ། བཀའ་གསང་རྨད་དུ་བྱུང་བའི་དཀྱིལ་འཁོར་དུ། །ཁམས་དྲུག་ལྡན་པ་རྡོ་རྗེའི་ལྷ་མོར་བཅས། །བཟའ་བཅའ་བཏུང་བའི་མཆོད་པ་དམ་པ་རྣམས། རྨད་བྱུང་གཏོར་མ་ཆེན་པོར་སྤུངས་ཏེ་འབུལ། །བཟའ་དང་བཅའ་དང་བཏུང་དང་བསྒོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །ཧཱུྃ། གཟུགས་ནི་ལག་གཉིས་མེ་ལོང་འཛིན། །གཟུགས་མཛེས་སྤྱོད་པས་ཕྱོགས་བཅུར་གཡོ། །ཤིན་ཏུ་སྒེགས་པའི་གཟི་བྱིན་འབར། །གཟུགས་ཀྱི་ལྷ་མོ་སྤྱན་ལ་ཐིམ། །ༀ་བཛྲ་རཱུ་པ་ཧཱུྃ། སྒྲ་ནི་ལག་གཉིས་པི་ཝཾ་བརྡེག །བདེ་བའི་སྒྲ་སྙན་ཕྱོགས་བཅུར་སྒྲོགས། །དབྱངས་སྙན་ཡིད་འཕྲོག་གཟི་ལྡན་འབར། །སྒྲ་ཡི་ལྷ་མོ་སྙན་ལ་ཐིམ། །ༀ་བཛྲ་ཛཾ་ཀ་ར་ཧཱུྃ། དྲི་ནི་ལག་གཉིས་སྤོས་བསྣམས་ཏེ། །སྤོས་ཀྱི་སྤྲིན་ལྡིང་བདུག་པ་མོ། །ཀུན་ཏུ་ཚིམ་བྱེད་དྲི་བསྲུང་ལྡན། །དྲི་ཡི་ལྷ་མོ་ཤངས་ལ་ཐིམ། །ༀ་བཛྲ་དྷུ་ཥྤེ་ཧཱུྃ། རོ་ནི་ལག་གཉིས་སྣོད་བསྣམ་སྟེ། །བཅུད་ལྡན་རོ་མཆོག་ལྔ་བརྒྱར་འཕྲོ། །ཤིན་ཏུ་སྒེགས་པའི་གཟི་བརྗིད་འབར། །རོ་ཡི་ལྷ་མོ་ལྗགས་ལ་ཐིམ། །ༀ་བཛྲ་ནེ་བི་ཏུ་ཧཱུྃ། རེག་ནི་རྡོ་རྗེ་ཡང་འཁྱུད་མ། །མཉེན་འཇམ་རེག་ན་བདེ་བ་ཡི། །གཟུགས་མཛེས་སྒོད་པ་ཕྱོགས་བཅུར་གཡོ། །ཤིན་ཏུ་སྒེགས་པའི་གཟི་བརྗིད་འབར། །རེག་གི་ལྷ་མོ་སྐུ་ལ་འཁྲིལ། །ༀ་བཛྲ་གནྡྷེ་ཧཱུྃ། ཆོས་ནི་འདུས་བྱས་འདུས་མ་བྱས། །སྣང་སྟོང་རྡོ་རྗེ་ནམ་མཁའི་སྐུ། །ཤིན་ཏུ་སྒེགས་པའི་གཟི་བརྗིད་འབར། །ཆོས་ཀྱི་ལྷ་མོ་ཐུགས་ཀར་ཐིམ། །ༀ་དྷརྨ་ཏྟུ་སྭཱ་བྷཱ་ཝཱ་ཱཨཏྨ་ཀོ྅་ཧཾ། གཏོར་མའི་སྟེང་ལས་འདོད་ཡོན་གྱི་ལྷ་མོ་དུ་མ་སྤྲོས། རྒྱལ་བ་རྣམས་ཀྱི་སྤྱན་ཤང་ཐུགས་ཀ་སྐུ་ལུས་ལ་ཐིམ། གཏོར་མའི་བར་བདུད་རྩིའི་རྒྱ་མཚོ་ལྷ་རྣམས་ཀྱི་ལྗགས་རྡོ་རྗེ་སྦུ་གུར་གྱུར་པས་གསོལ། འོག་དུག་གསུམ་ཤ་ཁྲག་རུས་པའི་རྒྱ་མཚོ་སྒོབ་ཆོས་སྐྱོང་གི་ཚོགས་ཀྱིས་ལྗགས་གྲི་གུག་ཏུ་གྱུར་པས་གསོལ་ནས་མཉེས་པར་གྱུར། ༀ་བྷོ་དྷི་ཙིཏྟ་མ་ཧཱ་སུ་ཁུ་ཛྙཱ་ན་དྷརྟུ་ཨཱཿ ས་པཱ་རི་ཝ་ར་ཨི་དཾ་མ་མ་ཧཱ་བ་ལིནྟ་ཁ་ཁ་ཧི་ཁ་ཧི། བཅུ་པ་ལ། སྐུ་གསུང་ཐུགས་ཡོན་ཏན་ཕྲིན་ལས་དང་། ཉོན་མོངས་ལྔ་ཡི་དེ་ཁོ་ན། དོན་གྱི་མཆོད་པ་དེ་ཁོ་ན། ཡེ་ཤེས་རོལ་མོའི་དེ་ཁོ་ན། དེ་ལྡན་མཆོད་པའི་ཡོན་ཏན་ལྔ། དང་པོ། སྲིད་གསུམ་སེམས་ཅན་ཐམས་ཅད་ཀྱིས། །དགེ་དང་སྡིག་པའི་ལས་བྱས་པ། །ཐམས་ཅད་སངས་རྒྱས་མཛད་སྤྱོད་དེ། །ལས་ཀྱི་མཆོད་པ་བཞེས་སུ་གསོལ། །ༀ་སརྦ་ཏ་ཐཱ་ག་ཏཱ་ཀརྨ་པཱུ་ཛ་ཧཱུྃ། སྲིད་གསུམ་སེམས་ཅན་ཐམས་ཅད་ཀྱིས། །གཟུགས་ལ་སོགས་པ་འདོད་རྣམས་དང་། །ཆགས་ལས་གྱུར་པའི་བདེ་བ་སྟེ། །སངས་རྒྱས་རྣམས་ལ་ཕུལ་གྱུར་ནས། །རྡོ་རྗེ་རིན་ཆེན་འདྲ་བར་གྱུར། །ༀ་སརྦ་ཏ་ཐཱ་ག་ཏ་ཨ་ནུ་རཱ་ག་པཱུ་ཛ་ཧཱུྃ། ནམ་མཁའི་མཐའ་ཀླས་འཇིག་རྟེན་ན། །སྣང་ཞིང་སྲིད་པའི་གཟུགས་རྣམས་ཀུན། །ཕྱག་རྒྱ་སྣ་ཚོགས་དཀྱིལ་འཁོར་ལ། །སྐུ་མཆོག་ཕྱག་རྒྱའི་མཆོད་པར་བཞེས། །ༀ་སརྦ་ཏ་ཐཱ་ག་ཏཱ་ཀཱ་ཡ་པཱུ་ཛ་ཧཱུྃ། ནམ་མཁའི་མཐའ་ཀླས་འཇིག་རྟེན་ན། །སྒྲར་གྲགས་པ་ནི་བྱེ་སྙེད་རྣམས། །ཐམས་ཅད་མ་ལུས་སྔགས་ཀྱི་ཚིག །གསུང་མཆོག་ཆོས་ཀྱི་མཆོད་པ་བཞེས། །ༀ་སརྦ་ཏ་ཐ་ག་ཏཱ་ཝཀྐ་པུ་ཛ་ཧཱུྃ། ནམ་མཁའི་མཐའ་ཀླས་འཇིག་རྟེན་ན། །སེམས་ཅན་རྣམས་ཀྱི་སེམས་རྟོགས་རྣམས། །ཏིང་འཛིན་འབུམ་ཕྲག་སྣ་ཚོགས་ལ། །དམིགས་པའི་དམ་ཚིག་མཆོད་པར་བཞེས། །ༀ་སརྦ་ཏ་ཐཱ་ག་ཏ་ས་མ་ཡ་ཏི་པཱུ་ཛ་ཧཱུྃ། གཉིས་པ་ནི། སྲིད་གསུམ་སེམས་ཅན་ཐམས་ཅད་ཀྱིས། །ཞེ་སྡང་སྤྱོད་པའི་ལས་རྣམས་ཀུན། །རྡོ་རྗེ་རིགས་ཀྱི་མཛད་སྤྱོད་དེ། །སྒྲོལ་བའི་མཆོད་པ་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །གཏི་མུག་སྤྱོད་པའི་ལས་རྣམས་ཀུན། །བདེར་གཤེགས་རིགས་ཀྱི་མཛད་སྤྱོད་དེ། །རྟོག་མེད་མཆོད་པ་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱིས། །ང་རྒྱལ་སྤྱོད་པའི་ལས་རྣམས་ཀུན། །རིན་ཆེན་རིགས་ཀྱི་མཛད་སྤྱོད་དེ། །ཏིང་འཛིན་མཆོད་པ་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །འདོད་ཆགས་སྤྱོད་པའི༴ པདྨའི་རིགས༴ སྦྱོར་བའི་སྲིད་གསུམ་སེམས་ཅན་ཐམས་ཅད་ཀྱི། །ཕྲག་དོག་སྤྱོད་པའི་ལས་རྣམས་ཀུན། །ལས་ཀྱི་རིགས་ཀྱི་མཛད་སྤྱོད་དེ། །དམ་ཚིག་མཆོད་པ་བཞེས་སུ་གསོལ། །གསུམ་པ་ནི། རང་ལུས་རྣམ་པར་མི་རྟོག་པར། །བཤིག་ནས་སྟོང་པ་ཉིད་དུ་བསྒོམ། །དེ་ལྟ་བུ་ཡི་ཆོས་ཉིད་ཀྱིས། །མཆོད་པ་འཕགས་པ་རྣམས་ལ་འབུལ། །རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་ཐམས་ཅད་ཀུན། །བདག་ཉིད་ཆེན་པོ་རྟོགས་པ་ཡིས། །དབྱིངས་སུ་ཡང་ནི་སྤ་བར་བྱའོ། །བཞི་པ་ནི། ༀ། དབང་པོའི་སྤྱོད་ཡུལ་རང་བཞིན་དངོས་པོ་མེད། །རྣམ་དག་བདུད་རྩིའི་རང་བཞིན་སྡུག་བསྔལ་སེལ། །དམ་རྫས་དག་པ་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་རང་བཞིན་དབྱེར་མེད་བསམས། །དེ་ཕྱིར་དག་པས་དག་པ་ཉིད་མཆོད་ཕྱིར། །ཆོས་ཉིད་ལ་ཡང་ཆོས་ཉིད་ཐིམ་པར་འབུལ། །དྲི་མེད་རྣམ་དག་ནམ་མཁའི་རང་བཞིན་ལ། །ལོག་རྟོག་མཚན་མ་མེད་པའི་སྤྲིན་དཔུངས་ཏེ། །ཡེ་ཤེས་ཉི་མའི་འོད་ཀྱིས་རབ་བརྒྱན་ནས། །དག་པའི་དོན་ཕྱིར་རྟོགས་ནས་མཆོད་པར་འབུལ། །མཉམ་ཉིད་བླང་དོར་མེད་ལ་སྙོམས་པར་བཞེངས། །བདེ་ཆེན་ལོངས་སྤྱོད་རྫོགས་པ་སྐུ་ཡི་རྒྱན། །འདོད་ཡོན་ལྔ་ཡི་ལྷ་མོར་བྱིན་རླབས་པ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ལྔ་པ། སྒྱུ་འཕྲུལ་དྲྭ་བ་མངོན་རྫོགས་པའི། །དཀྱིལ་འཁོར་བརྟེན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་མ། །འཛུལ་ལམ་ནམ་མཁར་འགྲོ་བར་འགྱུར། །གླུ་ཚིགས་སྒྲ་ཡི་ཕྱག་རྒྱའམ། །ཆོས་ཀྱི་དངོས་གྲུབ་ཐོར་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཟག་མེད་འགྱུར། །བཟའ་དང་བཏུང་བར་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨ་ལི་ཀ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །བཅུ་གཅིག་པ་ནི། ཞི་གསང་ཐབས་ཞགས་ཀྱི་གླུ་རྣམས་ཏེ། ༀ། ཕྱོགས་བཅུ་དུས་བཞི་རྫོགས་པ་ཡིས། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། །ཧོཿ ༀ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ། །ཧོཿ ༀ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ། །ཧོཿ ༀ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ། །ཧོཿ ༀ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་གཅིག་ཡུད་ལ་ལྷུན་གྱིས་གྲུབ། །ཧོཿ ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ ༀ། ཕྱོགས་བཅུའི་འཇིག་རྟེན་རབ་འབྱམས་ནས། །རྒྱལ་བ་གང་བཞུགས་འཁོར་དང་བཅས། །བླ་མེད་ལྷ་དང་ལྷ་མོ་ཡི། །གྲུབ་པའི་བྱིན་བརླབ་བསམ་མི་ཁྱབ། །ༀ། སེམས་དཔའ་བཅུ་དྲུག་རིགས་ཀྱི་གཙོ། །སེམས་མ་བཅུ་དྲུག་རིགས་ཀྱི་ཡུམ། །མཐུ་ཆེན་ཁྲོ་བོ་ཁྲོ་མོ་དང་། །ཕོ་ཉ་འཇིག་རྟེན་སྐྱོངས་བར་ལྡན། །ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་ཐམས་ཅད་མ་ལུས་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ༀ་དཔའ་བོ་ཆེན་པོ་མཐུ་ལྡན་རྣམས། །ཐུགས་རྗེ་ཆེན་པོའི་བྱིན་རླབས་ཀྱིས། །བདག་གིས་ལྷག་པའི་བསམ་པ་རྣམས། །གྲུབ་པར་བྱིན་གྱིས་བརླབ་ཏུ་གསོལ། །ༀ། ཁམས་གསུམ་ཞིང་དུ་སྦྱོར་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ༴ ལོངས་སྤྱོད་རྫོགས་པའི་སྐུ་ལ༴ ཅིར་ཡང་སྤྲུལ་པའི་སྐུ༴ བཅུ་གཉིས་པ་བཤགས་སྨོན་ནི། ཧོཿ ཡེ་ནས་སྤྲོས་པ་མེད་པའི་དབྱིངས། །རང་བཞིན་རྣམ་པར་དག་པ་ན། །དུས་གསུམ་གཤེགས་ཤིང་བཞུགས་པ་ཡིས། །རྫོགས་པའི་སངས་རྒྱས་བཅོམ་ལྡན་འདས། །རྣམ་པ་ཐམས་ཅད་ཀུན་མཁྱེན་པའི། །ཡེ་ཤེས་བྱེ་བྲག་ཀུན་ལྡན་པ། །འགྲོ་བ་མ་ལུས་འདུལ་ཐབས་སུ། །བཅོམ་ལྡན་རྡོ་རྗེ་སེམས་སོགས་ཏེ། །རིགས་ལྔ་བདེ་བར་གཤེགས་པ་དང་། །རིགས་མཆོག་གཟུངས་ཀྱི་ཡུམ་དང་བཅས། །རྒྱལ་སྲས་འཁོར་དུ་སེམས་དཔའི་ཚོགས། །སེམས་མའི་དཀྱིལ་འཁོར་ལ་སོགས་པ། །ཡེ་ཤེས་ཆེན་པོའི་དབང་ཕྱུག་ཆེ། །ཐབས་ལ་མཁས་པའི་བདག་ཉིད་ཅན། །མཁའ་འགྲོའི་རང་བཞིན་རྣལ་འབྱོར་ལྡན། །ངོ་བོ་ཉིད་སྐུ་མ་ལུས་ཤིང་། ༈ །རྒྱལ་བ་རྒྱ་མཚོ་འཁོར་བཅས་པ། །ཁྱེད་རྣམས་གསན་ཅིང་དགོངས་སུ་གསོལ། ༈ །བདག་ཅག་ཚོགས་ཀྱི་དཀྱིལ་འཁོར་འདིར། །འདུས་ཤིང་ཚོགས་པའི་དཀྱིལ་འཁོར་རྣམས། །དང་པོ་གསང་སྒོར་ཁས་འཆེས་ཏེ། །དམ་ཚིག་གཉེན་པོ་མངོན་པར་མནོས། །ཆག་ཉམས་ཞིག་རལ་གྱུར་པ་དང་། །རྩ་བ་ཡན་ལག་དམ་མནོས་ནས། །བཀའ་བཞིན་བསྲུང་བར་རྔོ་མ་ཐོགས། །བསྲུང་བའི་དམ་ཚིག་མནོས་པ་ལས། །གཏི་མུག་མ་ཚོར་དབང་གིས་ནི། །བདེ་དང་སྡུག་བསྔལ་རྐྱེན་མ་བཟོད། །སྒོ་གསུམ་ཉེས་སྐྱོན་མེ་ཤོར་བས། །བདག་དང་གཞན་གྱི་རྒྱུད་བསྲེགས་པས། །སྐྱོན་བྲལ་མཚན་མར་མ་ཕྱིན་ཏེ། །བསྲུང་བའི་དམ་ཚིག་ཉམས་པ་བཤགས། །ༀ་བཛྲ་སཏྭ་སོགས། ཚོར་བ་དང་ནི་མ་ཚོར་བའི། །ཉམས་པ་ཐམས་ཅད་བྱང་གྱུར་ཅིག །ཚོར་དང་མ་ཚོར་ཉམས་པ་རྣམས། །ཕྱིན་ཆད་མི་བྱེད་པར་གྱུར་ཅིག །གནས་ཐོགས་པ་དང་རྒྱུད་བྱང་ལས། །སླན་ཆད་ཕྱིར་ལ་མི་ལྡོགས་པའི། །སེམས་དང་འབྲལ་བར་མ་གྱུར་ཅིག །ཤེས་རབ་རྣོ་ཞིང་དབང་པོ་གསལ། །ཡེ་ཤེས་ཅན་གྱུར་སེམས་ཅན་དོན། །མ་ལུས་བྱེད་པའི་མཐུ་ཐོབ་ནས། །སྐྱེས་པའི་ཚེ་རབས་ཐམས་ཅད་དུ། །སློབ་དཔོན་བཀའ་དྲིན་ལན་སྡོན་ཅིང་། །ཕ་མའི་དྲིན་ལན་རྗེས་སུ་སྒྲུབ། །མན་ངག་སྣོད་དང་ལྡན་གྱུར་ཅིག །ཚེ་འདི་དང་ནི་ཚེ་རབས་གཞན། །སྐྱོན་བརྗོད་ཐམས་ཅད་དང་བྲལ་ནས། །དགེ་བའི་རྩ་བ་ཐམས་ཅད་དུ། །ཡོན་ཏན་ཚད་བཞིན་ཐོབ་གྱུར་ཅིག ༈ །བདག་ཅག་སྒྲུབ་པོ་འདིར་འདུས་རྣམས། །དགེ་བའི་རྩ་བ་བསྒྲུབ་པ་ལ། །བར་ཆད་བྱེད་པའི་སྡང་དགྲ་དང་། །སྦྱོར་བ་རྐུ་དང་གནོད་བགེགས་གསུམ། །ཞི་དང་དབང་དང་མངོན་སྤྱོད་ཀྱིས། །མནན་དང་བཟློག་དང་སྤོར་ཞིང་སྤར། །འདུལ་སྐལ་ཕྲིན་ལས་མཚམས་པ་བཞིན། །ཚར་བཅད་གྲུབ་པར་མཛད་དུ་གསོལ། ༈ །བཅུ་གསུམ་པ། རྡོ་རྗེ་རྩེ་གཅིག་པའི་ཕྱག་རྒྱ་སྙིང་གར་བཀོད་དེ། དམ་བཅའ་ཉེར་གཅིག་པའམ། ༀ། སེམས་ཅན་དོན་ཕྱིར་ནན་ཏན་མཆོག་བསྐྱེད་དེ། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །གཉིས་མེད་དོན་གྱི་དངོས་གྲུབ་མཆོག་གི་གནས། །བདག་ལ་སྩལ་ཞིང་བརྟན་པར་བཞུགས་སུ་གསོལ། །ཀཱ་ཡ་ཝཱ་ཀཱ་ཙིཏྟ་བྷོ་དྷི་ཙིཏྟ་ས་མ་ཡཱ་ཧཱུྃ། ༀ་ཨཱཿཧཱུྃ། ༈ གསུམ་པ་གསུངས་བཟླས་པའི་རྣལ་འབྱོར་ལ་གཉིས། བསྙེན་པ་དང་། མཇུག་བསྡུ་བའོ། །དང་པོ་ལ། ལྷ་རྟོག་གི་བསྙེན་པ་དང་། མཉམ་རྫོགས་ཀྱི་བསྙེན་པའོ། །དང་པོ་ལ་གཙོ་བརྒྱུད་འཁོར་བརྒྱུད་གཉིས་ཀྱི། །དང་པོ་གཙོ་འཁོར་གྱི་སྐུ་ལུས་གོ་འཕོ་བ་དང་། ཕྱི་མ་ཤེས་པ་གོ་འཕོ་ཞིང་བསྒོམས་པ་སྟེ། གང་ལྟར་ཡང་། རྟོག་ཚོགས་དེ་དག་ལྷ་དེ་དང་དེར་གྱུར་ནས་དབུའི་གཙུག་ཏོར་དང་གདན་ཁྲི་ནས་ལུས་སྐུ་ཡོངས་རྫོགས་གསལ་གདབས་དང་། སྔགས་འཁོར་སྤྲོ་བསྡུ་བཅས་པས། ཧཱུྃ། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལ། །ཏིང་འཛིན་ཐུགས་སུ་དབང་བསྐུར་ནས། །དངོས་གྲུབ་ལས་རྣམས་འགྲུབ་བྱེད་ཤོག །ཧཱུྃ་བཛྲ་དྷྲིཀ྄ །མཱུྃ་དྷཱ་ཏྭཱི་ཤྭ་རི། ཞེས་བཟླ། དེ་ནས་རང་ཀུན་བཟང་དུ་གསལ་བ་རིགས་འགྲེས་ལ། ཡིད་ནི་རང་རིག་མ་སྐྱེས་པ། །ཀུན་ཏུ་བཟང་མོའི་རང་བཞིན་ལས། །ཏིང་འཛིན་བྱེད་པར་དབང་བསྒྱུར་ནས། །མ་ལུས་ཀུན་གྱི་བྱེད་པོར་ཤོག །ཆོས་ནི་དེ་བཞིན་མ་སྐྱེས་པ། །ཀུན་ཏུ་བཟང་པོའི་རང་བཞིན་ལས། །ཏིང་འཛིན་བྱ་བར་དབང་བསྒྱུར་ནས། །མ་ལུས་ཀུན་གྱི་བྱ་བར་ཤོག །ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུྃ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ གཟུགས་ཕུང་ས་ཡི་ངོ་བོ་ཉིད། །སེམས་ཕྱིར་སྣང་མཛད་ཡབ་ཡུམ༴ ཏིང་འཛིན་སྐུ་རུ༴ དངོས་གྲུབ་ལས་རྣམས་གྲུབ་བྱེད་ཤོག །ཨཱོཾ་ཛི་ན་ཛིཀ྄ །ལཱྃ་དྭེ་ཥ་ར་ཏི། ཚོར་བ་ཆུ་ཡི་རང་བཞིན་ལས། །སེམས་ཕྱིར༴ འབྱུང་ལྡན༴ ཏིང་འཛིན་ཡོན་ཏན༴ དངོས་གྲུབ༴ སྭཱ་རཏྣ་དྷྲིཀ྄ །མཱྃ་མོ་ཧ་ར་ཏི། འདུ་ཤེས་མེ་ཡི༴ སེམས༴ མཐའ་ཡས༴ ཏིང་འཛིན་གསུངས་གི༴ དངོས་གྲུབ༴ ༀ་ཨ་རོ་ལིཀ྄༴ པྱཾ་ར་ག་ར་ཏི། འདུ་བྱེད་རླུང་གི༴ སེམས༴ དོན་གྲུབ༴ ཏིང་འཛིན་ཕྲིན་ལས༴ དངོས་གྲུབ༴ ཧཱ་པྲཱཛྙཱ་དྷྲིཀ྄ །ཏྃ་བཛྲ་ར་ཏི། ༈ མིག་གཟུགས་སེམས་ཕྱིར་མ་སྐྱེས་པ། །ས་སྙིང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་བསྒྱུར་བས། །སྤྱོད་ཡུལ་ཡོངས་སུ་དག་བྱེད་ཤོག །ཀྵིཾ་ཧི་རཱ་ཛཱ་ཡ། ཧཱུྃ་ལཱ་སྱེ་ས་མ་སྟཾ། སྣ་དྲི་སེམས༴ ནམ་སྙིང་༴ ཏིང་འཛིན༴ སྤྱོད་ཡུལ༴ ཏྲྃ་ཨ་གརྦྷ་ཡ། ཏྲཱཾ་མ་ལྱེ་ས་མ་ཡ་ཧོ། ལྕེ་རོ༴ སྤྱན་གཟིགས༴ ཏིང་འཛིན༴ སྤྱོད་ཡུལ༴ ཧྲཱི་ཧ་ཧཱུྃ་པདྨ་བ་ད་མ། ཧྲི་གིརྟི་རཱ་ག་ཡ་ཧོ། རྣ་སྒྲ༴ ཕྱག་རྡོར༴ ཏིང་འཛིན༴ སྤྱོད་ཡུལ༴ ཛྲིཾ་ཀུ་རུ་པ་ཎ་ཧྲཱིཿ ཨ་ནིརྟི་རཱ་ག་ཡ་མི། མིག་དབང་འདས་དུས་མ་སྐྱེས་པ། བྱམས་པ་ཡབ་ཡུམ༴ ཏིང་འཛིན༴ སྤྱོད་ཡུལ༴ མེ་དྷ་ར་ནི་སྭཱ་ཧཱ། ཛ་དྷཱུ་ཥྤེ་པྲ་ཝེ་ཤ་ཡ། རྣ་དབང་ད་ལྟར༴ སྒྲིབ་སེལ༴ ཏིང་འཛིན༴ སྤྱོད་ཡུལ༴ ཐླྷིཾ་ནི་སྶ་རཾ་པ་ཡ། ཧཱུྃ་པུཥྤེ་ཨ་ཝ་ཤ་ཡ། སྣ་དབང་མ་འོངས༴ ཀུན་བཟང་༴ ཏིང་འཛིན༴ སྤྱོད་ཡུལ༴ ཧཱུྃ་སྭཱ་རཱ་ཛཱ་ཡ། པཱྃ་དི་པ་སུ་ཁི་ནཱི། ལྕེ་དབང་མ་ངེས་མ་སྐྱེས་སེམས། །འཇམ་དཔལ༴ ཏིང་འཛིན༴ སྤྱོད་ཡུལ༴ མཱུྃ་ཤྲཱི་ཨཾ་རཱ་གཱ་ཡ་སྭཱ་ཧཱ། ཧོཿགནྦྷེ་ཙིཏྟ། རེག་ཤེས་རྟག་པ༴ གཤིན་རྗེ༴ ཏིང་འཛིན་འཇོམས་པར་དབང༴ གདུལ་བྱ་མ་ལུས་མཐར་བྱེད་ཤོག །ཧཱུྃ་ཡ་མཱནྟ་ཀྲྀཏྲ་ཕཊ། ༀ་མ་ཧཱ་བཛྲ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལི་ནཱ་ཧཱུྃ་ཕཊ། རེག་ཡུལ་ཆད་པ༴ སྟོབས་ཆེན། ཏིང་འཛིན༴ གདུལ་བྱ༴ ཧཱུྃ་པྲ་ཛྙཱནྟ་ཀྲྀ་ཏྲ་ཧཱུྃ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལི་ནཱ་ཧཱུྃ་ཕཊ། རེག་དབང་བདག་འཛིན༴ རྟ་མགྲིན་ཡབ་ཡུམ༴ ཏིང་འཛིན༴ གདུལ་བྱ༴ ཧཱུྃ་པདྨཱནྟ་ཀྲྀ་ཏྲ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷི་ཤྭ་རཱི་ཛྭ་ལི་ནཱ་ཧཱུྃ་ཕཊ། རེག་པ་མཚན་འཛིན་མ་སྐྱེས་པའི། །བདུད་རྩི༴ ཏིང་འཛིན༴ གདུལ་བྱ་མ་ལུས༴ ཧཱུྃ་བིགྷྣནྟ་ཀྲྀ་ཏྲ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུྃ་ཕཊ། ང་རྒྱལ་སེམས་ཕྱིར་མ་སྐྱེས་པ། །བརྒྱ་བྱིན་དབང་པོའི་རང་བཞིན་ལས། །ཏིང་འཛིན་ཐུབ་པར་དབང་བསྒྱུར་ནས། །འགྲོ་བ་ལྷ་རྣམས་འདུལ་བར་ཤོག །ༀ་མུ་ནེ་ཀྲེཾ་སྭཱ་ཧཱ། ཕྲག་དོག༴ ཐག་བཟང་རིས་ཀྱི༴ ཏིང་འཛིན༴ འགྲོ་བ་ལྷ་མིན༴ ༀ་མུ་ནེ་སྲུྃ་སྭཱ་ཧཱ། འདོད་ཆགས༴ ཤཱཀྱ༴ ཏིང་འཛིན༴ འགྲོ་བ་མི་རྣམས༴ ༀ་མུ་ནེ་ཧཱུྃ་ཏྲུྃ་སྭཱ་ཧཱ། གཏི་མུག༴ སེང་གེ་དམ་བརྟེན༴ ཏིང་འཛིན༴ འགྲོ་བ་བྱོལ་སོང་༴ ༀ་མུ་ནེ་བྲཾ་སྭཱ་ཧཱ། སེར་སྣ༴ ཁ་འབར་ཐུབ་པའི༴ ཏིང་འཛིན༴ འགྲོ་བ་ཡི་དྭགས༴ ༀ་མུ་ནེ་ཀྵཾ་སྭཱ་ཧཱ། ཞེ་སྡང་༴ གཤིན་བུ་རྗེ་ཡི༴ ཏིང་འཛིན༴ འགྲོ་བ་དམྱལ་བ༴ ༀ་མུ་ནེ་ཡེ་སྭཱ་ཧཱ། ཞེས་པའི་བསྙེན་པ་ནི། ཐུན་རེ་རེ་རིགས་ལྔ་ཀུན་བཟང་དང་བཅས་ལ་བརྒྱ་རྩ་རེས་མཚོན་ན། སེམས་དཔའ་ལ་དེའི་ཕྱེད་ཐུབ་པ་སྒོ་བ་ཉེར་གཅིག་རེ་བཟླ་བར་གསུངས་སོ། །གཉིས་པ་མཉམ་རྫོགས་ལའང་མཉམ་རྫོགས་ཙམ་དང་། མཉམ་རྫོགས་ཆེན་པོའོ། །དང་པོ་ནི། བྷྲཱུྃ་བི་ཤྭ་བི་ཤུདྡྷེ་ཕཊ་ཛྭཿཧཱུྃ་ཨཱོཾ་སྭཱ་ཨཱཾ་ཧཱ་ཕཊ་ཛཿ དམ་ཚིག་གིས་དཀྱིལ་འཁོར་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེས་ནས། མདུན་གྱི་ནམ་མཁའ་ལ་མེ་རི་འདབ་འབྱར་གྱི་ཚུལ་དུ་བཞུགས་པར་གྱུར། རང་རྡོ་རྗེ་སེམས་དཔའ་ཡབ་ཡུམ་གྱི་སེམས་དཔའ་སུམ་བརྩེགས་སྔགས་ཕྲེང་དང་བཅས་པའི་སྔགས་འཁོར་ཤང་བུག་གཡས་ནས་ཡུམ་གྱི་གཡོན་དུ་ཐུགས་ཀར་འཁོར། ཡང་ཡུམ་གྱི་གཡས་ནས་རང་གི་གཡོན་བརྒྱུད་འཁོར། དམ་ཚིག་པའི་ལྷ་འཁོར་རྣམས་དང་། ཡེ་ཤེས་པ་གཙོ་འཁོར་བཅས་པའི་ཐུགས་ཀའི་སྔགས་ཕྲེང་ཤང་བུག་བརྒྱུད། རང་གི་ཐུགས་ཀར་འཁོར་བས་བྱིན་བསྡུས། རང་གི་ཐུགས་ཀའི་སྔགས་ཕྲེང་ཤང་བུག་ནས་ཐོན། མཆོད་པའི་ཚུལ་དུ་ལྷ་དེ་དག་གི་ཐུགས་ཀར་འཁོར་བས་དགྱེས་པ་བསྐྱེད། འོད་ཟེར་གྱིས་སེམས་ཅན་ཐམས་ཅད་ཀྱི་སྒྲིབ་པ་བསལ་ནས། །གསུང་རྡོ་རྗེའི་གོ་འཕང་ལ་བཀོད། སླར་འདུས་ཏེ་རང་གི་ཐུགས་ཀར་ཐིམ་པར་གྱུར། གཙོ་འཁོར་སྔགས་ཚང་མ་གོང་བཞིན་ནམ། ༀ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་རྟུ་ཨཿ ཞེས་སྤྱི་དྲིལ་བསྙེན། གཉིས་པ་མཉམ་རྫོགས་ཆེན་པ། དམ་ཚིག་གི་དཀྱིལ་འཁོར་ལྷ་ཡབ་རྣམས་བདག་མི་བསྐྱོད་པ་ལ་ཐིམ། ཡུམ་རྣམས་གཙོ་མོ་ལ་ཐིམ་སྟེ་འོད་གསལ་དུ་ཞུགས། རང་གི་ཐུགས་ཀའི་སྔགས་ཕྲེང་གི་འོད་ཟེར་སྔགས་ཀྱི་རྣམ་པ་ཤང་གཡས་ནས་ཐོན། མདུན་གྱི་ཡེ་ཤེས་སེམས་དཔའ་ལ་མཆོད་པའི་ཚུལ་ཤངས་བུག་གཡོན་ནས་བརྒྱུད། ཐུགས་ཀར་འཁོར་ནས་གཡས་ནས་ཕྱིར་ཐོན། རང་གི་གཡོན་ནས་ཐུགས་ཀར་ཐིམ། འོད་གསལ་དུ་ཞུགས་པའི་ལྷ་རྣམས་སྐུ་ལུས་ལས་ཕྱིར་ཐོན། རང་རང་གི་གདན་སྟེང་དུ་འཁོད་པར་གྱུར། སྔགས་ཐམས་ཅད་སྦྲེལ་བའམ། ཡབ་ཡུམ་གཙོ་བསྙེན་ཁོ་ན་བཟླས་པས་ཀྱང་རུང་ངོ་། །མཐར་བཟླས་པའི་ལྟ་བ་གསལ་གདབ་པའི་ཕྱིར། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། གང་ནས་བརྩལ་ཀྱང་མི་རྙེད་པས། །རང་རིག་དྲི་མེད་དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ན། །སེམས་ཉིད་ཐེག་པར་རབ་ངེས་ཏེ། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་ངེས་ཤེས་བསྐྱེད་དེ། དེ་གང་དུའང་། དམ་ཡེ་འཕྲོ་འདུ་སྟེགས་ལ་གསུམ་གསལ་ཐེབ་པར་དགོས་སོ། །བསྙེན་ཚུལ་འདི་དག་གང་ཡང་རུང་བ་རེའམ། མཐར་ཆགས་སུ་བགྱིས་ཀྱང་ཆོག་ཅིག །ཅི་ནུས་བཟླ་བ་མོས་སྒོམ་གྱི་དབང་དང་། ལམ་ངེས་རྫོགས་ལ་རྟགས་དང་དུས་དང་། གྲངས་ཀྱི་དབྱེ་བ་རྒྱ་ཆེར་གསུངས་པ་རྒྱུད་དང་མན་ངག་ལས་ཤེས་པར་བྱའོ། །གཉིས་པ་མཇུག་ཏུ་དངོས་གྲུབ་གསོལ་བ་ལའང་མཆོད་བསྟོད་དང་། བསྙེན་བཤགས་དང་། དངོས་གྲུབ་ཞུ་བའོ། །དང་པོ། མདུན་གྱི་ཡེ་ཤེས་པ་ལ་ཀུན་བཟང་ལ་ཞབས་བསིལ། སྒེག་མོ་བརྒྱད་མཆོད་དང་། རོལ་མོ་རྣམས་སྔགས་ཙམ་གྱིས་མཆོད། ནངས་མཆོད་འབུལ་ནས། བདེ་བ་ལས་འཁྲུངས་རྡོ་རྗེ་འཆང་བའོ། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །གང་དུ་དང་པོར་མི་བསྐྱོད་རྡོ་རྗེ་ནི། །དྲི་མེད་བློ་ཡིས་ཡི་གེ་ཧཱུྃ་དུ་སྤྲུལ། །གཟུགས་མེད་ཚུལ་གྱིས་ཕྲེང་བས་བསྐོར་བ་ནི། །སྒྱུ་འཕྲུལ་དྲྭ་བ་ཁྱོད་ལ་ཕྱག་འཚལ་ལོ། །གསུང་སྙན་ཡི་གེས་ཀུན་ལ་ཁྱབ་པ་ཡི། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མི་གསུང་ལྷ་མོ་དམ་བཅས་འདུལ་མཛད་པ། །སྒྱུ་འཕྲུལ་ཚུལ་མང་ལྡན་པ་འགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པའི། །ན་ཆུང་དག་དང་ལྷན་ཅིག་བཞད་མཛད་དེ། །གཡས་ཀྱི་ཕྱག་གིས་རྡོ་རྗེ་བསོད་ནས་ཀྱང་། །གཡོན་པ་ཡིས་ནི་དྲིལ་བུའི་སྒྲ་སྙན་འཁྲོལ། །ལྷ་མོ་མཐའ་དག་བཙུན་མོར་གྱུར་པ་ཡིས། །དམ་ཚིག་རྣམས་ཀྱི་བྱ་བ་བྱེད་པར་འགྱུར། ༈ །མཉམ་ཉིད་མི་གཡོ་མཉམ་ཉིད་མཆོག་གི་རང་བཞིན་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྨིན་པར་མཛད། །དྲི་མེད་མི་གཡོ་མཉམ་ཉིད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལ་ཚད་མེད་དེ། །དཔེ་ནི་ནམ་མཁའ་དང་ཡང་དཀྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པའི་ཐུགས་རྗེ་ཤུགས་ལས་བྱུང་། །སྨོན་ལམ་འགྲུབ་པ་འགགས་པ་མེད་པའི་ཆོས་ཉིད་ཅན། །འགྲོ་བའི་དོན་གྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡིས། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་པ། །ཁམས་གསུམ་ཀུན་ལ་དངོས་གྲུབ་མཆོག་སྩོལ་མཛད་པ་ཡིས། །ཐུགས་རྗེའི་སྤྱོད་པ་མི་གཡོ་འགག་པར་ཡོངས་མི་འགྱུར། །ཨེ་མ་ཧོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛོད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། ༈ །གཉིས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་བསྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིན་རྒྱལ་བའི་དམ་མནོས་ཏེ། །བདག་ཅག་མ་རིག་ལུས་དང་དག་སེམས་ཀྱི། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། ༈ དབྱངས་གསལ་རྟེན་སྙིང་ཡི་གེ་བརྒྱ་པས་ལྷག་ཆད་ཁ་བསྐང་བར་བྱའོ། །གསུམ་པ། རྡོ་རྗེ་རྩེ་གཅིག་པའི་རྒྱ་བཅས། གོང་སྡོམ་བཟུང་གི་སྐབས། ༀ། བདེ་བར་གཤེགས་པ་ཁྱེད་ཅི་འདྲ། །སོགས་ཀྱི་མཐར་གནས་གསུམ་དུ་རྒྱ་གཏུགས་ལ། བྷོ་དྷི་ཙིཏྟ་ཀཱ་ཡ་ས་མ་ཡ་ༀ། བྷི་དྷི་ཙིཏྟ་ཝཱ་ཀ་ས་མ་ཡ་ཨཱཿ བྷི་དྷི་ཙིཏྟ་ས་མ་ཡ་ཧཱུྃ། ཞེས་བརྗོད་པས་མདུན་གྱི་ཡེ་ཤེས་པའི་དཔྲལ་མགྲིན་སྙིང་ག་ནས་སྐུ་གསུང་ཐུགས་རྡོ་རྗེའི་ལྷ་ཚོགས་བྱུང་། རང་གི་གནས་གསུམ་དུ་ཐིམ། དབང་ཐམས་ཅད་ཐོབ། དྲི་མ་ཐམས་ཅད་དག །རྡོ་རྗེ་གསུམ་མངོན་དུ་བྱས། སླར་ཡང་བདག་དང་ཡེ་ཤེས་པ་དབྱེར་མེད་དུ་བརྟན་པའི་ཕྱིར། ༀ་བཛྲ་ས་མ་ཡ་ཨཱོཾ་སོགས་ནས། དེ་ཡང་བརྟན་པར་བྱས། ཞེས་པའི་བར་གོང་བཞིན་དུ་བརྗོད་པས། ཛཿཧཱུྃ་བཾ་ཧོཿ དང་། སླར་ཡི་གེ་བརྒྱ་པའི་སྔགས་ཀྱིས་བརྟེན་པ་མངོན་དུ་གྱུར་པ་ཆུ་ལ་ཆུ་བཞག་ལྟར་བསམ་མོ། ༈ །བཞི་པ་ཏིང་འཛིན་ཕྲ་མོའི་འཇུག་ལྡང་ཐུགས་ཀྱི་རྣལ་འབྱོར་ནི། མ་ཧཱའི་ཨ་ནུ་དང་རྗེས་སུ་འབྲེལ་བ་སྟེ། ལུས་དཀྱིལ་གསལ་དང་ལུས་དག་དྲན། ཕྲ་མོའི་རྣལ་འབྱོར་བསྒོམ་པའོ། །དང་པོ་ནི། སྤྱི་གཙུག་བདེ་ཆེན་དཀྱིལ་འཁོར་ནས། །རྣམ་པར་སྣང་མཛད་ཡབ་ཡུམ་ལ། །སྒོ་བ་ཡབ་ཡུམ་བརྒྱད་ཀྱིས་བསྐོར། །འདི་ནི་སྐུ་ཡི་དཀྱིལ་འཁོར་ཏེ། །རྩ་དང་ཐིག་ལེ་སྔགས་དང་རླུང་། །དབུ་ཡི་གཙུག་ཏོར་རྩེ་མོ་ནི། །རིགས་བདག་ཀུན་བཟང་ཡབ་ཡུམ་ལ། །ཐུབ་དྲུག་སྤྲུལ་པའི་འཁོར་གྱིས་བསྐོར། །འདི་ནི་སྐུ་ཡི་དཀྱིལ་འཁོར་ཡིན། ༈ །མགྲིན་པ་ལོངས་སྤྱོད་དཀྱིལ་འཁོར་ལ། །སྣང་བ་མཐའ་ཡས་ཡབ་ཡུམ་ནི། །སྤྱན་རས་གཟིགས་དང་གླུ་མ་དང་། །ཀུན་བཟང་མར་མེ་མ་ཡིས་བསྐོར། །འདི་ནི་གསུང་གི་དཀྱིལ་འཁོར་ཉིད། །གནས་རྟེན་གྲུབ་པས་གཡོ་བར་གྲུབ། ༈ །སྙིང་ཁ་ཆོས་ཀྱི་འཁོར་ལོ་ལ། །མི་བསྐྱོད་ཡབ་དང་ཡུམ་དུ་བཅས། །ས་ཡི་སྙིང་པོ་སྒེག་མོ་དང་། །བྱམས་པ་བདུག་སྤོས་མ་ཡིས་བསྐོར། །འཁོར་ལོ་ཐིག་ལེ་སྔགས་དང་རླུང་། །འདི་ནི་ཐུགས་ཀྱི་དཀྱིལ་འཁོར་ཉིད། །ལྟེ་བ་སྤྲུལ་པའི་དཀྱིལ་འཁོར་ནས། །དཀོན་མཆོག་དཔལ་ནི་ཡབ་ཡུམ་ལ། །ནམ་མཁའི་སྙིང་པོ་ཕྲེང་བ་མ། །སྒྲིབ་སེལ་མེ་ཏོག་མ་དང་བཅས། །འདི་ནི་ཡོན་ཏན་འཁོར་ལོ་ཏེ། །འཁོར་ལོ་ཁམས་བཅུད་སྔགས་དང་རླུང་། ༈ །གསང་བ་མེ་རླུང་དཀྱིལ་འཁོར་ལ། །གྲུབ་པ་གདོན་མི་ཟ་བ་ནི། །ཕྱག་ན་རྡོ་རྗེ་གར་མ་དང་། །འཇམ་དཔལ་དྲི་ཆབ་མ་ཡི་བསྐོར། །འཁོར་ལོ་བདུད་རྩི་ཡི་གེ་གཡོས། །འདི་ནི་ཕྲིན་ལས་འཁོར་ལོ་ཡིན། ༈ །གཉིས་པ་ལུས་ངག་དྲན་པའི་ཕྱིར། རང་གི་ལུས་ཉིད་འདོམ་གང་ལ། །ཐམས་ཅད་ཚང་བས་གནས་པ་ནི། །ཀུན་གཞི་དེ་སྟེང་ཉོན་ཡིད་མེད། །ཡབ་ནི་རྒྱུ་ཉིད་ཨར་གནས་སོ། །རྐང་མཐིལ་རླུང་ལ་སུམ་མདོ་མེ། །ལྟེ་བ་ཆུ་ལ་སྙིང་ག་ས། །སྒལ་ཚིག་རི་རབ་སྐྲ་ནི་མེ། །མི་མཉམ་མེད་པའི་གྲུ་བཞི་ལུས། །སྙིང་གའི་རྩ་ཡི་སྒོ་བཞི་ལ། །རྐང་བརྒྱད་ཀ་བ་རྣམ་པ་བརྒྱད། །མིག་གཉིས་པཉྩ་ར་ག་ལ། །སྣ་ནི་རིན་ཆེན་ཕ་གུ་ཉིད། །སོ་ནི་དྲྭ་བ་དྲྭ་ཕྱེད་ལ། །ལྕེ་ཆུ་འདོད་ཡོན་ལྷ་མོ་འབྱུང་། །རྣ་བ་རྟ་བ་ཉིད་དུ་གནས། །སྙིང་ནི་མ་འཇིག་སེང་གེའི་གདན། །མཁལ་མ་སྟོབས་བཅུ་གླང་པོ་ཆེ། །མཚེར་བ་རྫུ་འཕྲུལ་རྟ་ཡི་ཁྲི། །མཆིན་པ་དབང་བཅུ་རྨ་བྱ་ཉིད། །གློ་བ་ཐོགས་མེད་ནམ་མཁའ་ལྡིང་། །ཕོ་བ་རིན་ཆེན་ཁྲི་རྐང་ལ། །མཆིན་ཁྲི་དཀར་ནག་ཉི་ཟླའི་གདན། །རྒྱུ་ལོང་ཆགས་མེད་པདྨ་ཡིན། །ཁྱབ་བྱེད་གཟུགས་ཕུང་རྣམ་སྣང་མཛད། །སྲོག་འཛིན་རྣམ་ཤེས་མི་བསྐྱོད་པ། །མི་མཉམ་ཚོར་བ་རིན་ཆེན་འབྱུང་། །གྱེན་རྒྱུ་འདུ་ཤེས་སྣང་མཐའ་ཡས། །ཐུར་སེལ་འདུ་བྱེད་དོན་ཡོད་གྲུབ། །སྲ་བ་ས་ནི་སངས་རྒྱས་སྤྱན། །ནམ་མཁའ་དབྱིངས་ཕྱུག་མ་ཉིད་ལ། །གཉེན་པའི་ཆུ་དབྱིངས་མ་མཱ་ཀི། །དྲོ་བ་མེད་དབྱིངས་གོས་དཀར་མོ། །བསྐྱོད་པ་རླུང་ནི་དམ་ཚིག་སྒྲོལ། །བཅུད་ནི་ཡབ་ལ་སྣོད་ནི་ཡུམ། །སྤྱད་བྱར་གྱུར་པའི་བཙུན་མོ་ནི། །རྒྱུ་བས་སྙིང་མེ་རླུང་མིག །གཟུགས་ནི་སྒེག་མོར་གནས་པའོ། །ཤིན་ཏུ་རྒྱུ་བ་ནམ་མཁའ་ཉིད། །ནམ་སྙིང་སྣ་ལ་གནས་པ་དང་། །དྲི་ནི་ལྷ་མོ་ཕྲེང་བ་མོ། །མངོན་པར་རྒྱུ་བ་སྤྱན་རས་གཟིགས། །རྡོ་རྗེ་མྱོང་མར་བྱེད་པ་སྟེ། །རོ་ནི་ལྷ་མོ་གླུ་ལེན་མ། །རབ་ཏུ་རྒྱུ་བ་ཕྱག་རྡོར་ཉིད། །རྣ་བ་ལ་གནས་ཐོས་པ་ལ། །སྒྲ་ནི་ལས་ཀྱི་གར་བྱེད་མ། །རྣམ་ཤེས་དབང་པོ་བྱང་ཆུབ་སེམས། །ཡུལ་ལ་སྣང་བ་མཆེད་པ་དང་། །ཐོབ་པར་བྱེད་པ་སྣང་བ་གསུམ། །བྱམས་པ་མེ་ཡི་རླུང་དུ་བཤད། །དཔྱིད་ནི་འདས་དུས་སྤོས་མེ་མ། །སྒྲིབ་སེལ་སྣ་ཡི་རླུང་ཡིན་ཏེ། །ད་ལྟར་དབྱར་ནི་མེ་ཏོག་ལ། །ཀུན་བཟང་མ་ནི་མངོན་པར་རྒྱུ། །འབྱུང་དུས་སྟོན་ཏེ་མར་མེ་མ། །འཇམ་དཔལ་རླུང་ཉིད་གནས་པ་ཡང་། །མ་ངེས་དགུན་དེ་དྲི་ཆབ་མ། །དབང་པོར་སྣང་བའི་ལྷ་ཉིད་ཀུན། །རང་ལ་ཡེ་ནས་དུས་སྤྱོད་ཡུལ། །འདི་ནི་སྙིང་རྗེ་ཐབས་མཆོག་ཡབ། །ཆོས་ནི་སྟོང་པ་ཤེས་རབ་ཡུམ། །ཞེ་སྡང་དམྱལ་བར་སྣང་བ་ཡང་། །ཐུབ་པས་ཞེ་སྡང་མེ་ཡང་གསོད། །སེར་སྣས་ཡི་དྭགས་སྣང་བ་ཡང་། །ང་རྒྱལ་རི་བསྙིལ་ཐུབ་པ་ཡིན། །གཏི་མུག་བྱོལ་སོང་སྐྱེས་པ་ལ། །ཐུབ་པས་གཏི་མུག་མུན་པ་སེལ། །འདོད་ཆགས་མི་ཡི་སྐྱེ་གནས་ཉིད། །འདོད་ཆགས་དུག་འཇོམས་ཤཱཀྱ་ཐུབ། །ཁོང་ཁྲོས་ལྷ་མ་ཡིན་དུ་སྐྱེ། །བདག་གཞན་དྲན་པས་ལྷ་མིན་ཐུབ། །ཕྲག་དོག་ལྷ་ཡི་གནས་སྣང་བས། །ཕྲག་དོག་ལྕགས་འགྲོལ་ལྷ་ཡི་ཐུབ། །ལུས་ཀྱི་འདུས་ཏེ་རེག་པ་ནི། །རྡོ་རྗེ་རེག་པ་གཤིན་རྗེའི་གཤེད། །རེག་པ་སྲ་བ་ས་ཡིན་ཏེ། །རྟག་པར་མ་ཡིན་ལྕགས་ཀྱུ་མ། །ལུས་ཀྱི་དབང་པོ་རེག་བྱེད་ཉིད། །ཡབ་ཀྱི་རྡོ་རྗེ་སྟོབས་པོ་ཆེ། །གཤེར་བ་འབྱུང་བ་ཆུ་ཉིད་དེ། །ཆད་པར་མ་ཡིན་ཞགས་པ་མ། །ལུས་ཀྱི་ཡུལ་ནི་རེག་བྱ་ཉིད། །ཡུམ་གྱི་པདྨ་རྟ་མགྲིན་དཔལ། །ཚ་ཞིང་དྲོ་བ་མེ་ཡིན་ཏེ། །བདག་ཏུ་མ་ཡིན་ལྕགས་སྒྲོག་མ། །ལུས་ཀྱི་རྣམ་པར་ཤེས་པ་ནི། །དམ་རྫས་དཀར་དམར་བདུད་རྩི་འཁྱིལ། །གཡོ་རླུང་སྟོང་བདེའི་ནམ་མཁའ་ནི། །མཚན་མར་མ་ཡིན་དྲིལ་བུ་མ། །སྲིད་གསུམ་ཁམས་གསུམ་སེམས་ཅན་ལ། །ཡེ་ནས་རང་ལ་ལྷུན་གྱིས་གྲུབ། །རང་གནས་ཆེན་པོ་རྟོགས་གྱུར་ནས། །རང་བཞིན་དཀྱིལ་འཁོར་བསྐྱེད་པར་བྱ། །གསུམ་པ་ནི། ལྷ་དེ་དག་གི་ཐུགས་ཀར་མི་ཤིགས་པའི་ཐིག་ལེ་དྭངས་མ་ལྔ་འདུས། འོད་ལྔའི་རང་བཞིན་འཚེར་བ་རེ་རེ་བསྒོམས་ཏེ། དེ་ཡི་དབུས་སུ་དཀྱིལ་འཁོར་ཡོངས་རྫོགས་རེ་གསལ་བཏབ་པ་ལ་སེམས་བཟུང་ཞིང་། རྡོ་རྗེའི་བཟླས་པ་འབྲུ་གསུམ་སྤྲོ་བསྡུ་དང་སྦྱར་བའི་འོད་གསལ་གྱི་རྣལ་འབྱོར་ཟབ་མོས་ཕྱི་སྣོད་ནང་བཅུད་ཐམས་ཅད་སྟོང་པའི་ངང་ལ་མཉམ་པར་འཇོག་པ་དང་། དེ་གསལ་གདབ་པའི་ཕྱིར། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམས། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོའི་རིགས་ཀྱི་དེ་བཞིན་ཉིད། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྟག་པ་ཡི། །ཐུགས་ཀྱི་ཡེ་ཤེས་ལྔས་བལྟར་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པར་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། ༈ །ཅེས་ངེས་པའི་ཤེས་པ་བསྐྱེད་དོ། །གསུམ་པ་རྗེས་ཀྱི་རིམ་པ་ལ། ཆོ་གའི་རྗེས་དང་། ལས་ཀྱི་རྗེས་སོ། །དང་པོ་ལ་ཚོགས་ཀྱི་མཆོད་པ། ལྷག་མ་བྱ་བ། གཏོར་མ་སྐྱོང་བ། ཉེར་བསྡུའི་རྣལ་འབྱོར་རོ། །དང་པ་ལ་སྡོམས་ནི། སྔོན་དུ་བྱ་དང་གསོལ་བ་གདབ། མཚམས་བཅད་བྱིན་རླབས་བྱིན་དབབ་དང་། མཆོད་ཅིང་ཚིམས་པར་བྱ་བའོ། །དང་པོ། ཚོགས་ཀྱི་མཎྜལ་ཛ་གད་པཉྩ་དང་སྦྱར་བ་ནུབ། ཤར་ལྷོ། ཤིང་ཐོག །ཞོ་ཕྲུམ་སོགས་ཤར། ཚོགས་བཤོས་ཟླ་གམ་བྱང་། ཚོགས་དངོས་དང་། བུར་བ་དབུས། དར་དམར་མཐིང་གི་ཞལ་ཁེབ་དང་། ཕྱི་ནང་གི་མཆོད་པ་སྦྱར། འབྱུང་པོ་ཕྱོགས་སྐྱོང་ལ་གཏོར་མ་བསྔོ། གཉིས་པ་ལས་རྡོར་གྱིས་འཁོར་ལོའི་གཙོ་བོ་ལ་ཕྱག་གསུམ་འཚལ་ནས། ཀྱེ། རྡོ་རྗེ་སློབ་དཔོན་དཔལ་དང་ལྡན། །སྲིད་པའི་སྡུག་བསྔལ་བཅད་པ་དང་། །བྱིས་པའི་ལམ་ནས་བརྒལ་བའི་ཕྱིར། །སྤྱོད་པའི་ཁྱད་པར་མཛད་དུ་གསོལ། ༈ །ཕྱོགས་བཅུ་དུས་བཞི་བསམ་ཡས་ཀྱིས། །བདེ་བར་གཤེགས་པ་ཐམས་ཅད་དང་། །སྲས་ཀྱི་ཚོགས་འདུས་ཇི་སྙེད་པ། །སྤྱོད་པའི་ཁྱད་པར་འདི་ལས་བྱུང་། །བདེ་བས་བདེ་བ་ཆེན་པོ་ཡི། །ངོ་མཚར་ཡང་དག་བསྟན་དུ་གསོལ། །བྱང་ཆུབ་སྙིང་པོ་མཆོག་གི་བར། །བདེ་མཆོག་སྤྱོད་པ་ཡང་དག་བླང་། །ཞེས་ལན་གསུམ་གསོལ་བ་གདབ་བོ། །གསུམ་པ་ནི། ༀ་སུམྦྷ་ནི་སོགས་བརྗོད་ཅིང་བགེགས་གཏོར་དོར། དྲིལ་བུ་དཀྲོལ། ས་ཡི་ཕྱོགས་འདིར་གསང་སྤྱོད་ལྟ་བ་ལ་མི་དབང་བ་ཐམས་ཅད་རྒྱང་རིང་དུ་བྱེར་ཅིག །སརྦ་བིགྷྣན་གཙྪནྟུ། ཡིད་ཀྱིས་སྲུང་འཁོར་ཕུབ། བཞི་པ་སྤོས་ཆེན་བཏུལ། ཆུ་ཆང་ནང་གསུམ་འཐོར། རླུང་གཡབ་ཀྱིས་སྦྱང་། རང་གི་ཐུགས་ཀ་ནས་རྃ་ཡྃ་ཁྃ་གསུམ་སྤྲོས། ཚོགས་ཀྱི་ཞལ་ཟས་ཐམས་ཅད་བསྲེག་གཏོར་སྦྱང་སྟེ་སྟོང་པར་གྱུར། ༀ་ཀྲོ་དྷི་ཤྭ་རཱི་ཧཱུྃ་ཕཊ། ༀ་སྭཱ་བྷ་ཝ་སོགས་དང་། སྟོང་པ་ཉིད་ཀྱི་ངང་ལས་ཚོགས་གཞོང་བྷནྡྷ་རིན་པོ་ཆེའི་གཞལ་མེད་ཁང་ཡོངས་སུ་རྫོགས་པ། སོགས་ནས། གཏོར་མ་བྱིན་བརླབས་ལྟར། འགྱིངས་བས་རོལ་པ་ཅན། སྟེང་འདོད་ཡོན་གྱི་ལྷ་མོ། བར་བདུད་རྩིའི་རྒྱ་མཚོ། འོག་དུས་གསུམ་ཤ་ཁྲག་རུས་པའི་མཆོད་པ་ཚོགས་རྫས་ཀུན་བཟང་ནམ་མཁའི་མཛོད་དུ་གྱུར། ༀ་ཨཱཿཧཱུྃ་ཧ་ཧོ་ཧྲཱིཿས་བྱིན་རླབས། རྃ་ཡྃ་ཁྃ། སྟོང་པའི་ངང་ལས་རང་གི་ཐུགས་ཀ་ནས་བྷྲཱུྃ་ཆད། མུ་ཏིག་དྲི་མ་མེད་པ་དཀར་པོ་ལྟ་བུའི་སོགས་སྨན་བྱིན་རླབས་ཡོངས་རྫོགས་ནས། ཧཱུྃ་ཧྲཱི་ཋཱཿ ལྔ་པ་སྤྱན་འདྲེན་དང་། གཟི་བྱིན་བསྐྱེད་པའོ། །དང་པོ་ནི། ༀ་བཛྲ་ས་མ་ཡ་ཧཱུྃ་ཛཿ རྡོ་རྗེ་སེམས་དཔའ་སངས་རྒྱས་ཀུན་གྱི་དངོས། །དུས་གསུམ་བདེ་བར་གཤེགས་པའི་བཤེས་གཉེན་ཏེ། །སྤྲུལ་པ་ཞི་ཁྲོ་མང་པོའི་འབྱུང་གནས་གཙོ། །འགྲོ་བའི་དོན་ཕྱིར་མཆོད་ཅིང་གཤེགས་སུ་གསོལ། །ཐུགས་རྗེ་ཆེན་པོ་ཡེ་ཤེས་སྒྲོལ་འབར་བ། །ཉི་ཟླ་ལྟ་བུར་སྒྲིབ་པ་སེལ་མཛད་ཅིང་། །ཡོན་ཏན་མཆོག་གིས་བརྒྱན་ཅིང་བསྒྲུབ་པའི་མགོན། །མཆོད་གནས་དཔལ་ཞིང་དམ་པར་གཤེགས་སུ་གསོལ། །རིན་ཆེན་དབྱིག་ལྟར་ཤིན་ཏུ་མཛེས་པའི་སྐུ། །མཉམ་ཉིད་ཡེ་ཤེས་ནམ་མཁའི་དབྱིངས་ལྟར་དག །འགྲོ་བ་མ་ལུས་བསྒྲལ་བར་དམ་བཅས་ལ། །བཀའ་དྲིན་དྲན་ཕྱིར་མཆོད་ཀྱིས་གཤེགས་སུ་གསོལ། །ཆགས་རབ་དོན་ཕྱིར་མ་ལུས་དབང་དུ་བསྡུད། །རྟོག་པའི་ཡེ་ཤེས་ཐར་ལམ་འདྲེན་པའི་དཔལ། །ཆུ་སྐྱེས་ཁ་འབུས་འགྲོ་བའི་ཡིད་བསྒྱུར་བ། །དག་པའི་དོན་ཕྱིར་མཆོད་ཀྱིས་གཤེགས་སུ་གསོལ། །ཡེ་ཤེས་མཚོན་ཆེན་དུག་གསུམ་རྩད་ནས་གཅོད། །ནན་ཏན་ཡེ་ཤེས་སྤྲུལ་པ་ཕྱོགས་བཅུར་འགྱེད། །ཕྲིན་ལས་རྣམ་བཞི་འགྲོ་དྲུག་བསྒྲལ་བའི་ཕྱིར། །མཉམ་པའི་དོན་ཕྱིར་མཆོད་ཀྱིས་གཤེགས་སུ་གསོལ། །ཤེས་རབ་དབྱིངས་མའི་རིགས་ཀྱི་ཡུམ་ལྔའི་ངང་། །ཆོས་དབྱིངས་ཡེ་ཤེས་ནམ་མཁར་གསལ་བ་དང་། །གསང་ཆེན་བདེ་བའི་ལོངས་སྤྱོད་རྫོགས་པའི་ངང་། །ཐབས་ཀྱི་ཕྱག་རྒྱར་རོལ་ཅིང་གཤེགས་སུ་གསོལ། །རྟོགས་པའི་ཡེ་ཤེས་རིགས་ཀྱི་ཕྱག་རྒྱར་སྣང་། །ཐབས་ཀྱི་མ་རྨོངས་ཕྲིན་ལས་མཛད་པའི་རྟགས། །ཐུགས་རྗེའི་སྤྱོད་པས་ཡོན་ཏན་མཐར་ཕྱིན་པ། །སེམས་དཔའ་ཆེན་པོ་མཆོད་ཀྱིས་གཤེགས་སུ་གསོལ། །ཕྱི་ནང་གཉིས་ཀྱི་ལྷ་མོ་དམ་ཚིག་མ། །ཕྱག་རྒྱ་བཞི་ཡི་ཡེ་ཤེས་གསལ་བ་ལས། །གར་དང་ཕྱག་རྒྱས་རོལ་ཅིང་དགྱེས་མཛད་དེ། །གཙོ་མཆོག་ཐུགས་དམ་བསྐངས་ཕྱིར་གཤེགས་སུ་གསོལ། །ཏྀཀྲ་ཏ་ཁྲོ་བོ་གདུག་པ་འདུལ་བའི་ཕྱིར། །ཐུགས་རྗེ་ཐབས་ཀྱིས་ཕྱོགས་སྐྱོང་ཞབས་ཀྱིས་གནོན། །ཧཱུྃ་དང་ཕཊ་ཀྱི་འབྲུག་སྒྲ་ལྡིར་བ་ལས། །བརྗིད་པའི་ཐབས་ཀྱིས་འགྱིང་ཞིང་གཤེགས་སུ་གསོལ། །གཞལ་ཡས་ཕྱོགས་བཞིའི་ཡེ་ཤེས་བཞི་ཡི་ངང་། །བྱམས་དང་སྙིང་རྗེ་དགའ་བ་བཏང་སྙོམས་ཚུལ། །ཐར་པའི་ལམ་སྟོན་ཡང་དག་དབྱིངས་ལ་བཀོད། །སྒོ་སྐྱོངས་སྤྱན་འདྲེན་མཆོད་ཀྱི་གཤེགས་སུ་གསོལ། །སྐུ་གསུང་ཐུགས་ལས་སྤྲུལ་པའི་ཕོ་ཉ་མོ། །ཕྲིན་ལས་རྣམ་བཞི་རྫོགས་པར་མཛད་འཚལ་གྱིས། །ཡེ་ཤེས་སྐར་ལྟར་འཁྲུགས་པའི་དཀྱིལ་འཁོར་འདིར། །དམ་ཚིག་རྗེས་དགོངས་མཆོད་ཅིང་གཤེགས་སུ་གསོལ། །ༀ་ཨེ་ཧྱ་ཧི་སོགས་ཀྱིས་སྤྱན་དྲངས་རྒྱ་བཅས། ༀ་ཤྲཱི་བཛྲ་ཨངྐུ་ཤ་ཛཿ ༀ་ཤྲཱི་བཛྲ་པཱ་ཤ་ཧཱུྃ། ༀ་ཤྲཱི་བཛྲ་སྥོ་ཊ་བཾ། ༀ་ཤྲཱི་བཛྲ་གྷཎྜེ་ཧོཿ གཉིས་པ་ནི། འབྱུང་བ་ཆེན་པོ་ནམ་མཁའ་ནི། སོགས་སྔགས་དང་བཅས་པ་དང་། བདེ་བར་གཤེགས་སོ་བཅོམ་ལྡན་འདས། སོགས་གོང་ཀུན་བཟང་མཆོད་པའི་སྐབས་འབྱུང་བ་སྔགས་དང་བཅས་པས་མཆོད། ཀུན་བཟང་ཕྱི་ནང་གསང་བ་དེ་ཁོ་ན་ཉིད་ཚིགས་བཅད་དུ་བསྡེབ་པ། ཏིང་ངེ་འཛིན་གྱི་སྦིར་གྱིས་ལེགས་བྲིས་པ། །འཇིག་རྟེན་སྣང་བ་རྒྱལ་བའི་དཀྱིལ་འཁོར་ན། །རྒྱ་མཚོའི་ཡོན་ཆབ་ལྷོ་སྤྲིན་བདུག་སྤོས་འཐུལ། །རྩི་ཤིང་མེ་ཏོག་ཉི་ཟླའི་མར་མེ་གསལ། །ཆུ་བོའི་བྱུག་པ་རི་བོ་ཞལ་ཟས་དང་། །སྒྲར་གྲགས་ཐམས་ཅད་རོལ་མོ་སྣང་གྲགས་ཕྱི། །གང་ཤར་ཚོགས་དྲུག་སྟོང་ཉིད་སྤྲུལ་པའི་གཤིས། །བདེན་མེད་སྤྲོས་བྲལ་སྒྱུ་མའི་བཀོད་པ་ནང་། །སྣང་བ་སྐུ་དང་སྒྲར་གྲགས་གསུང་རྡོ་རྗེ། །དྲན་རྟོག་མི་ཤིག་བློ་འདས་གསང་བའི་དབྱིངས། །སྐྱེ་མེད་ངང་ནས་གནས་ལུགས་འགག་མེད་གདངས། །སྣ་ཚོགས་ཤར་བ་དེ་ཉིད་ངང་ནས་མཆོད། །དྲུག་པ་ལ་ཚོགས་མཆོད་དང་། ཚོགས་བཤགས་ཀྱིས་ལྷ་ཚིམ་པར་བྱ་བ། དམ་ཚིག་གི་རྫས་ཀྱིས་རྣལ་འབྱོར་པ་ཚིམ་པར་བྱ་བ། ལྷག་མའི་ཟས་ཀྱིས་ལྷག་སྡུད་ཚིམ་པར་བྱ་བ། དེ་དག་གི་སྨོན་ལམ་མོ། །དང་པོ་ལ། མཆོད་བཤགས་གཉིས་ཀྱི། དང་པོ། གཏོར་མའི་སྟེང་གི་འདོད་ཡོན་ལྷ་མོས་ཚོགས་ཞིང་རྣམས་དགྱེས་པར་བསྐྱེད། བར་བདུད་རྩིའི་རྒྱ་མཚོ་ལས། ལྗགས་རྡོ་རྗེ་སྦུ་གུས་བཅུད་དྲང་སྟེ་གསོལ། འོག་ཤ་ཁྲག་རུས་པ་ཁྲོ་རྒྱལ་སྒོ་བ་ཆོས་སྐྱོངས་རྣམས་ཀྱིས་གསོལ་བས་མཉེས་པར་གྱུར། ཧཱུྃ། གཟུགས་ནི་ལག་གཉིས་མེ་ལོང་འཛིན། །སོགས་ནས་གོང་གཏོར་མཆོད་སྐབས་ལྟར་ཁམས་དྲུག་གི་ལྷ་མོ་རྫོགས་པ། སྭཱ་བྷཱ་ཝཱཏྨ་ཀོ྅་ཧཾ། བར་དང་། སྤྲོ་ན་སྒེགས་མོ་བརྒྱད་མཆོད་མཐར། ཧཱུྃ་བཛྲ་དྷྲིཀ །མཱུྃ་དྷཱ་ཏེ་ཤྭ་རཱི། ག་ན་ཙཀྲ་པཱུ་ཛ་བ་ཁ་ཁ་ཁ་ཧཱི་སོགས་ཞི་བ་ཞེ་གཉིས་སྔགས་ཚང་མའི་མཐར་བཏགས་ལ་གསུམ་གསུམ་འབུལ། གཉིས་པ་ནི། ཡང་དག་པའི་དགོངས་པ་མངོན་དུ་གྱུར་པ་དཔལ་ཀུན་ཏུ་བཟང་པོ་ནས་དྲིན་ཆེན་བླ་མ་དམ་པའི་བར་དུ་བྱོན་པ་རྩ་བརྒྱུད་ཀྱི་བླ་མ། ཡི་དམ་ཞི་ཁྲོ་ཕུར་གསུམ་ལ་སོགས་ཏེ་རྒྱུད་སྡེ་ཆེན་པོ་དྲུག་གི་ལྷ། ཡུལ་ཉེར་གཞི། ཧེ་རུ་ཀ་ཡི་གནས་བཅུ། དུར་ཁྲོད་ཆེན་པོ་བརྒྱད་ལ་སོགས་པ་ན་གནས་པའི་དཔའ་བོ་མཁའ་འགྲོ། ཆོས་སྐྱོངས་བའི་སྲུང་མ་ནག་པོ་གནོད་སྦྱིན་ལྕམ་གསུམ་ལ་སོགས་པའི་ཞལ་དུ་ཚོགས་ཀྱི་མཆོད་པ་ཆེན་པོ་འབུལ་ལོ། །རྣལ་འབྱོར་པ་བདག་ཅག་གི་རྩ་བ་ཡན་ལག་ཆག་ཉམས་འགལ་འཁྲུལ་དུ་གྱུར་པ་ཐམས་ཅད་མཐོལ་ལོ་བཤགས་སོ། །བྱང་ཞིང་དག་པར་མཛད་དུ་གསོལ། ཧཱུྃ་ལྟ་བ་འཕང་དམས་ཆོས་ཉིད་དོན་མ་རྟོགས། །སྒོམ་པ་ཡུན་ཐུང་ཡི་དམ་ལྷ་མ་གསལ། །སྤྱོད་པ་རླབ་ཆུང་ཡི་དམ་ལྷ་མ་མཉེས། །བརྩེ་གདུང་ཆུང་བས་སློབ་དཔོན་སྐུ་མ་མཉེས། །བཀྲ་བའི་ལྷ་ཚོགས་རྣམས་ལ་བཤགས་པར་བགྱི། །ཡི་གེ་བརྒྱ་པ་བརྗོད་ལ་ཆག་ཉམས་རང་བཞིན་མེད་པར་ཤེས་པ་རྟོག་པ་ལྟ་བས་བསྐངས་བར་བྱའོ། །གཉིས་པ་ཞུ་བ་དང་ལན་གྱིས་ཚོགས་ཀྱི་དོན་ངོ་སྤྲད་པ་དང་། བདུད་རྩིའི་མཆོད་པས་ཚོགས་ཀྱི་རྣམ་རྟོག་སེལ་བ་དང་། ཚོགས་ལ་རོལ་བ་དངོས་སོ། །དང་པོ་ལ་གསུམ་གྱི། དང་པོ་ཞུ་བའི་ཕྱིར་ལས་རྡོར་གྱིས་དབང་ཕྱུག་ལ་ཕྱག་གསུམ་འཚལ་ཏེ། ཛ་གད་ཀྱི་ཞལ་བུ་ཐོགས་ལ། གར་བསྐོར་བཅས། ཀྱེ། གཟིགས་ཤིག་མཛེས་ལྡན་དམ་པའི་ཆོས། །འདི་ལ་རྣམ་རྟོག་བྱར་མི་རུང་། །ཁྱི་དང་བྲམ་ཟེ་གདོལ་པ་གསུམ། །རང་བཞིན་གཅིག་པ་ཉིད་དུ་རོལ། །ཞེས་དང་། ༀ། རྡོ་རྗེ་འཛིན་སོགས་དགོངས་སུ་གསོལ། །བདག་གི་ཚོགས་ཀྱི་མཆོད་པ་འདི། །མཉེས་པའི་དོན་དུ་བསྟབ་ལགས་ན། །ཅི་བདེ་བར་ནི་བཞེས་སུ་གསོལ། །གཉིས་པ་ནི། སློབ་དཔོན་གྱིས་ཡེ་ཤེས་ཆེན་པོ་ལས་བྱུང་བའི། ཚོགས་ཆེན་འབར་བས་ཉོན་མོངས་བསྲེགས། །འདི་འདྲའི་བདེ་བ་ཐོབ་ནས་ཀྱང་། །ཀུན་གྱིས་ཨ་ཧོ་སུ་ཁ་བརྗོད། །ཐམས་ཅད་ཀྱིས། ཨ་ཧོ་མ་ཧ་སུ་ཁ་ཧོ། ཨ་ལ་ལ་ཧོ། གསུམ་པ་ཆེ་བ་ལ་ཚོགས་ཀྱི་རང་བཞིན་ངོ་སྤྲད་པ་དང་། དེ་ཡི་རྒྱུ་ཡོ་བྱད་ལམ་དུ་བྱ་བའོ། །དང་པོ་སྐུ་གསུམ་དང་། བྱང་ཆུབ་སེམས་སུ་ངོ་སྤྲོད་པ་སྟེ། སྟོང་ལ་འབྱོར་བའི་རྟགས་སུ་དམ་པ་འབྱུང་། །བདེ་མཆོག་བདེ་མཛད་བདེ་བར་མཛད་པ་སྟེ། །རིག་པའི་སྐྱེས་བུ་རྡོ་རྗེ་སེམས་དཔའ་ཡིན། །དེ་ནི་བྱང་ཆུབ་སེམས་སུ་རིག་པས་རིག །བྱང་ཆུབ་སེམས་ནི་དངོས་གྲུབ་མཆོག །དེ་རིག་ཡང་དག་ཉིད་ཅེས་བྱ། །འོད་དང་མངོན་ཤེས་ལྔ་ལ་སོགས། །ལྡན་ཡང་གནོད་སྦྱིན་མོས་མི་ཤེས། །གཉིས་པ་ལ། འགོ་བ་ཟས། གླུ་ཚིག་སྒྲ། བྲོ་གར་འདུ་འཕྲོའི་ཡོ་བྱད་གསུམ། དང་པོ་ཐམས་ཅད་ནས། རྣལ་འབྱོར་རིག་འཛིན་དམ་ལྡན་པས། །ན་བཟའ་དང་ནི་ཞལ་ཟས་རྣམས། །གྲུབ་པའི་རྫས་སུ་དབང་བསྐུར་ཏེ། །གསོལ་ནས་དངོས་གྲུབ་མཆོག་ཐོབ་འགྱུར། །གཉིས་པ། རྣལ་འབྱོར་རིག་འཛིན་དམ་ལྡན་པས། །གླུ་དང་ཚིག་གི་སྒྲ་རྣམས་ནི། །གསུང་གི་ངོ་བོར་བྱིན་རླབས་ནས། །བསྒྲགས་ནས་དངོས་གྲུབ་མཆོག་ཐོབ་འགྱུར། །གསུམ་པ། རྣལ་འབྱོར་རིག་འཛིན་དམ་ལྡན་པས། །བྲོ་དང་གར་གྱིས་མཆོད་བྱས་ཏེ། །འོད་ཀྱིས་འདུ་འཕྲོར་བྱིན་རླབས་ནས། །དངོས་གྲུབ་མཆོག་ཀྱང་ཐོབ་པར་འགྱུར། །ལས་ཀྱི་རྡོ་རྗེས་འདུས་པ་ཐམས་ཅད་ལ་གནས་གསུམ་དུ་དྲི་ཡི་ཐིག་ལེ་འབུལ། གཉིས་པ་བདུད་རྩིའི་མཆོད་པ་ལ། ཞུ་བ་དང་། འབུལ་བའོ། །དང་པོ་ནི། ལས་ཀྱི་རྡོ་རྗེ་ཕྱག་གསུམ་བཙལ་ནས། ཧཱུྃ་མཛད་ཧཱུྃ་གིས་ཐུགས་དམ་བསྐང་བ་ནི། །ལྕང་ལོར་བཅས་པའི་པདྨ་བྷཉྩ་རུ། །ཚེ་འཛིན་མཆོག་གི་དམར་ཆེན་དམ་པས་བཀང། །པདྨ་ཟིལ་ཏིག་དྲི་དང་རཀྟ་ཁཱ། །རྡོ་རྗེ་ལས་ཀྱི་ཆུ་དང་བདུད་རྩི་ལྔ། །ཤ་ཆེན་མཁའ་ལྡིང་ཤེལ་སྒོང་གཟུགས་ཚོགས་སོགས། །སྨན་ཆེན་ལྔ་དང་ཆོ་དང་བྱི་ལ་སེ། །སྦྱོར་དང་སྒྲོལ་བའི་བདུད་རྩི་མཆོག་ཉིད་ཀྱིས། །ཧཱུྃ་མཛད་ཧཱུྃ་གིས་ཐུགས་དམ་བསྐོང་བར་མཛོད། །ཅེས་གསོལ། གཉིས་པ་ནི། ཧོཾ། རང་བྱུང་གདོད་ནས་དག་པ་ཡི། །སོགས་ནས། ཙིཏྟ་སིདྡྷི་ཧཱུྃ། ཞེས་དངོས་གྲུབ་བླངས་བ་རྫོགས་པར་བརྗོད་ནས། མཐེབ་སྲིན་ཉི་ཟླའི་སྐྱོགས་ཀྱིས་འབུལ། སློབ་དཔོན་གྱི་མདུན་དུ་ཕྱི་མཆོད་བཀོད་པ་ལས་རྡོར་གྱིས་ཚོགས་ལ་འགྲིམ་པའམ་བཏེགས་ཏེ་སླར་ཡང་ཕྱི་མཆོད་རྒྱས་པ་བྱ། གསུམ་པ་ལ་ཕྱག་ཚང་བས་ཚོགས་འགྱེད་ཕུལ་ནས། རྣལ་འབྱོར་པ་ཀུན་ལ། ཚོགས་ཀྱི་མཆོད་པ་རྒྱན་དུ་རོལ། །ཞེས་ཞུ། ལེན་པ་པོས་ཀྱང་། ཨ་ལ་ལ་ཧོ། ཞེས་ལན་བཏབ། བྷྲཱུྃ་ཧ་ཧོ་ཕཊ། རང་ཉིད་བཅོམ་ལྡན་མི་བསྐྱོད་རྡོ་རྗེ་ཡི། །སྙིང་གར་ཟབ་ཡངས་རྒྱུད་སྡེའི་དཀྱིལ་འཁོར་ལྷ། །སྤྱི་བོར་བླ་མ་མགྲིན་པར་མཁའ་འགྲོ་དང་། །ལྟེ་བར་ཆོས་སྐྱོངས་རྩ་ཁམས་དཔའ་བོ་དང་། །རྣལ་འབྱོར་མ་ལུས་རྡོ་རྗེ་རྩེ་གསུམ་ལྗགས། །བཟའ་དང་བཏུང་བ་ཁམས་དྲུག་འདོད་ཡོན་གྱི། །སྤྲུལ་པའི་རིག་མ་རང་བྱུང་རྩིའི་བཅུད། །རང་བཞིན་རྣམ་པར་དག་པའི་ངང་དུ་མཆོད། །ཞེས་བཟའ་བཏུང་ལོངས་སྤྱོད་བཞིན། རིགས་ཀྱི་རྟོགས་པ་དང་། ངོ་ཚ་དང་འཇིག་པ། མི་གཙང་བའི་རྟོག་པ་སྟེ་མི་བྱ་བ་གསུམ། རྡོ་རྗེ་འཛིན་པ་ལས་རྡོར། རྡོ་རྗེའི་སྤུན་ལ་ཐ་མལ་བླ་དྭགས་ཀྱི་མིང་དང་། དམ་རྫས་ལ་ཐ་མལ་གྱི་མིང་ནས་མི་འབོད་པ་གསུམ། ལུས་ལྷ། ངང་སྔགས། སེམས་ཆོས་ཉིད་དེ་མི་འདྲལ་བ་གསུམ། བྱ་བའི་དུས། བྱས་གྲགས། ཇི་ལྟར་བྱ་ཚུལ་གསང་བ་སྟེ་གསང་བ་གསུམ། ཚོགས་གྲལ་དུ་མ་བསྡད་པ་ལ་མི་སྦྱིན། རང་གིས་བྱིན་རླབ་རྫས་གཞན་ལ་མི་སྦྱིན། ལྷག་མ་ཁྱི་བྱ་ལ་སོགས་པའི་དོན་དུ་མི་སྦྱིན་པ་གསུམ། ཚོགས་གྲལ་དུ་ཀུ་ཅོ་རྩོད་པ་བག་མེད་པ་རྣམས་སྤངས་བའི་ཚུལ་ལ་འབད་དོ། །གསུམ་པ་ཟོས་ལྷག་ཕྱོགས་གཅིག་བསྡུས་པ། ཚོགས་ཀྱི་དཀྱིལ་འཁོར་ཤར་ལྷོ་དྲི་ཡི་མཎྜལ་དང་ཞིང་ལྤགས་སྟེང་། གཏོར་སྟེགས་ལ་བསོག་འཇོག་མེད་པར་སྣོད་དུ་བཀོད། དེའི་སྟེང་ངོས་གཏོར་ཁྲིར་ཚོགས་མཆོད་ཀྱི་ལྷག་མར་དཔལ་འབར་བཙུགས་ཏེ་སྨན་རཀ་སྦྲེང་། ལས་རྡོར་གྱིས་ཕྱག་བྱས་ཏེ། ལྷག་མ་ལ་བྱིན་རླབས་ཞུ་འཚལ། ༀ་ཨ་ཧཱུྃ། ལྷག་མའི་དམ་རྫས་སྟེང་འདོད་ཡོན་གྱི་ལྷ་མོ། བར་བདུད་རྩིའི་རྒྱ་མཚོ། འོག་དུག་གསུམ་ཤ་ཁྲག་རུས་པའི་ཚོགས་སུ་གྱུར། ལུས་ཀྱིས་མཛེས་པའི་ཕྱག་རྒྱ་དང་། ངག་གིས། ༀ་ཨེ་ཨཱ་ར་ལི་ཧོཿ ཛཿཧཱུྃ་བྃ་ཧོཾཿ བཛྲ་ས་མ་ཡ་ཕེཾ་ཕེཾ། ཐུགས་ཀར་ལྕགས་ཀྱུའི་ཕྱག་རྒྱ་བཅས། སྒུགས་པའི་བརྡས་བསྐུལ་ཏེ། ཌཱཀྐིར་ཛཿཧཱུྃ། ཌཱཀྐི་རཱ་ཛཱ་ཛ། ཨཱ་གཙྪ་ཡ། ཨཱ་གཙྪ་ཡ། པྲ་ཝེ་ཤ་ཡ། པྲ་ཝེ་ཤ་ཡ། ཨཱ་བེ་ཤ་ཡ། ཨཱ་བེ་ཤ་ཡ། ཏིསྟ་ཡ། ཏིསྟ་ཡ། བྷནྡྷ་ཡ། བྷནྡྷ་ཡ། ཏོ་ཥ་ཡ། ཏོ་ཥ་ཡ། མོ་ཧ་ཡ། མོ་ཧ་ཡ། སརྦ་བཛྲ་ནན། ཌཀྐི་ནི་ཧྲི་ད་ཡ་ཧཱུྃ་ཕཊ། ཅེས་བརྗོད་པས་རང་གི་ཐུགས་ཀ་ནས་འདོད་པའི་རྒྱལ་པོ་བྱུང་ནས། ལྷག་མགྲོན་ཐམས་ཅད་ཀྱི་ཐུགས་ཀ་ནས་བཟུང་སྟེ་དཀྱིལ་འཁོར་གྱི་མུ་རན་ལ་བཀུག་པར་གྱུར། ལྷག་མ་གཉིས་ཀྱི་གཙང་ལྷག་དང་དམེ་ལྷག་སོ་སོར་སྨན་རཀ་སྦྲེང་། ༀ་སརྦ་བུདྡྷ་བཛྲ་རཏྣ་པད་མ་ཀརྨ་ཌཱཀྐི་ནི་ཨེ་མྃ་བ་ལིནྟ་ཧཱུྃ་ༀ་ཏྲཱྃ་ཧྲཱིཿཧཱ་ཕཊ། གསུམ་གྱིས་འབུལ། དམེ་ལྷག་དང་གཅིག་ཏུ་བསྲེས། མཁའ་འགྲོ་མ་སུམ་ཅུ་རྩ་གཉིས། དབང་མོ་ཉི་ཤུ་རྩ་བརྒྱད། དམ་ཅན་བཅུ་གཉིས་དྲེགས་པའི་ཚོགས་དང་བཅས་པ། ལངྒ་བཅུ་དྲུག །འབར་མ་བརྒྱད། མ་བདུན་སྲིང་བཞི། གིང་ཕོ་མོ་བཅོ་བརྒྱད། རྡོ་རྗེ་ཕོ་ཉ་མོ་དྲུག་ཅུ་རྩ་བཞི་ལ་སོགས་པ། དཔལ་ཆེན་པོའི་སྤྱན་སྔར་ཁས་བླངས་ཤིང་དམ་བཅས་པ་ལ་སངས་རྒྱས་ཀྱི་བསྟན་པ་རིན་པོ་ཆེ་སྲུང་བར་ཞལ་གྱིས་བཞེས་པ། ལྷག་མགྲོན་དུ་གྱུར་པ། ཚོགས་ལྷག་ལ་དབང་བ་རྣམས་ཀྱི་ཞལ་དུ་ཁ་ཁ་ཁ་ཧི། སྡང་བྱེད་ཀྱི་དགྲ་སོད། གནོད་བྱེད་ཀྱི་བགེགས་ཐུལ། ཆོས་སྦྱོང་ཟབ་མོ་ལ་བར་དུ་གཅོད་པའི་རྐྱེན་བཟློག་ཅིག །ཅེས་བརྗོད་ལ་ལྷག་མ་སྐྱོང་ངོ་། །ཡ་ཧི་གཙྪ། ལྷག་མགྲོན་རྣམས་རང་གནས་སུ་གཤེགས་པར་གྱུར། བཞི་པ་ནི། ཟག་མེད་བདེ་བའི་དཔལ་ལས་ལེགས་སྤྲུལ་པ། །གདན་གསུམ་ཚང་བའི་དཀྱིལ་འཁོར་རྒྱ་མཚོ་ལ། །དགྱེས་ལྡན་ལྷ་ཡི་མཆོད་པའི་སྤྲིན་དཔུང་ཚོགས། །ལེགས་པར་ཕུལ་བས་ཚོགས་གཉིས་རྫོགས་པར་ཤོག །རྡོ་རྗེའི་ལུས་ཀྱིས་སྒྱུ་མའི་ཐབ་ཁུང་དུ། །རང་རིག་གདོད་ནས་གྲུབ་པའི་རྩ་གསུམ་ལ། །ཀུན་རྟོག་བཟའ་བའི་བསྲེག་བླུགས་ཕུལ་བའི་མཐུས། །འཁོར་འདས་དག་མཉམ་ཆེན་པོར་རྒྱས་ཐེབ་ཤོག །རྡོ་རྗེ་ཐེག་པའི་གསང་བ་འདིར་འདུས་པ། །སྐལ་ལྡན་མི་ཡིས་འབྱོར་ལྡན་ཡོ་བྱད་ཚོགས། །དམ་ཚིག་རྫས་ལ་ལེགས་པ་སྤྱོད་པའི་མཐུས། །ཉམས་རྟོག་གོང་ནས་གོང་དུ་འཕེལ་བར་ཤོག །སྔོན་ཚེ་དཔལ་ཆེན་སྤྱན་སྔར་དམ་མནོས་པ། །ལྷག་སྡུད་རྣམས་ཀྱིས་རྣམ་མང་འདོད་ཡོན་ལ། །བདེ་བར་རོལ་པས་བདེ་ཆེན་རྡོ་རྗེ་སེམས། །བསྒྲུབ་ལ་རྟག་ཏུ་བར་ཆད་སྲུང་བར་ཤོག །དངོས་ཀུན་ཡེ་ཤེས་སྒྱུ་འཕྲུལ་དྲྭ་བ་ཡིས། །ཆོས་ཉིད་རྫོགས་པ་ཆེན་པོར་ཚིམ་བྱེད་པ། །ལྷན་སྐྱེས་གཉུག་མའི་ཚོགས་ཀྱི་འཁོར་ལོ་ནི། །སྙིང་དབུས་པདྨར་རྟག་ཏུ་སིམ་གྱུར་ཅིག ༈ །བླ་མ་ཡི་དམ་མཁའ་འགྲོའི་དཀྱིལ་འཁོར་ལ། །བསྒོམ་བཟླས་མཆོད་བསྟོད་ཚོགས་འཁོར་ཕུལ་བ་ཡིས། །དགེ་བ་འདི་ཡིས་བདག་གཞན་སེམས་ཅན་རྣམས། །སྐྱོན་བྲལ་ཡོན་ཏན་མ་ལུས་རབ་རྫོགས་ཏེ། །མཐར་ཐུག་སངས་རྒྱས་སྐུ་ལྔ་ཐོབ་པར་ཤོག ༈ །གཉིས་པ་ལྷག་ཆེན་གྱིས་ཆོ་ག་ནི། སྲུང་མའི་གཏོར་ཆོག་སྟེ་ཚོགས་མཆོད་མེད་ཀྱང་བསྙེན་པའི་མཇུག་ཏུ་བྱ་བར་གསུངས་པས། མདུན་སྟེགས་ལ་ཐོད་སྣོད་དུ་གཏོར་མ་སྙིང་གི་དབྱིབས་ཅན་སོ་དྲུག་གམ། ལྔ་དམ་རྫས་ཀྱིས་བརྒྱན་པ་བཀོད། གཏོར་གཞོང་གི་མདུན་དུ་ཕྱི་མཆོད་བཤམས། ༀ་ཨཱཿཧཱུྃ། གཏོར་མའི་སྟེང་འདོད་ཡོན་གྱི་ལྷ་མོ་སོགས་ཚོགས་ལྷག་བྱིན་རླབས་ལྟར་དང་། བདག་གི་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་དམར་པོ་ལྕགས་ཀྱུ་དང་ཞགས་པ་ཐོགས་པ་སྤྲོས། མཁའ་འགྲོ་མ་སོ་གཉིས་དང་། དཔའ་བོ་བཞི་རང་དབང་མེད་པར་སྤྱན་དྲངས་ཏེ། བཅོམ་ལྡན་འདས་རིགས་ལྔའི་འཁོར་གྱི་ཕྱིར་གཞལ་མེད་ཁང་གི་ཕྱི་རོལ་ཏ་ལའི་ཚལ་དུ་ཕྱོགས་རེར་བརྒྱད་བརྒྱད་དང་། ཟུར་བཞིར་བཞི་གནས་པའོ། །ༀ་ཌཱཀྐི་རཱ་ཛཱ་ཧཱུྃ། སོགས་གོང་ལྟར་དང་སྤྱུག་གླུས་བསྐུལ། དེ་ཐམས་ཅད་ཀྱང་ཞིང་ཚལ་བའི་གདན་ལ་གར་གྱིས་འགྱིང་བ། གཅེར་བུ་ལག་ན་གྲི་གུག་དང་། ཐོད་ཁྲག་ཐོགས་པ། རུས་པའི་རྒྱན་དང་གཡེར་ཁའི་ཕྲེང་བས་ཀླུབ་པ། ཤར་བརྒྱད་དཀར། ལྷོ་བརྒྱད་སེར། ནུབ་བརྒྱད་དམར། བྱང་བརྒྱད་ལྗང་། མཚམས་རྣམས་གཉིས་འདྲེས་ཅན་ནོ། །སློབ་དཔོན་གྱིས་གཏོར་མ་ལ་ཁ་ཕྲུ་བཏབ་ལ། བཅོམ་ལྡན་འདས་དཔལ་རྡོ་རྗེ་སེམས་དཔའི་ལྗགས་ཀྱི་རྩེ་མོ་ལས། བདུད་རྩིའི་ཆར་འཕྲོས། མཁའ་འགྲོ་མ་རྣམས་ཀྱིས་ཞལ་དུ་ཐིམ། དེ་ནི་ཁ་ཆུའི་དགོངས་པའོ། །གཏོར་མ་བདུད་རྩིའི་རྒྱ་མཚོ། མཁའ་འགྲོ་རྣམས་ཀྱིས་གསོལ། དེ་ནི་བདུད་རྩིའི་དགོངས་པའོ། །དུག་གསུམ་ཤ་ཁྲག་རུས་པར་གྱུར་ཡང་མཁའ་འགྲོ་མ་རྣམས་ཀྱིས་གསོལ་བར་གྱུར། དེ་ནི་དུག་གསུམ་གྱི་དགོངས་པའོ། །དེ་ནས་མཆོད་དེ། ཧཱུྃ་བཛྲ་དྷཱ་ཀ་ཌཱཀྐི་ནི། པྲ་ཏིཙྪ་ཨེ་མྃ་བ་ལིཾ་ཏ་ཧཱུྃ་ཕཊ་ཁ་ཧི། ༀ་སརྦ་བུདྡྷ་དྷཱ་ཀ་ཌཱཀྐི་ནི། པྲ་ཏིཙྪ་ཨི་མྃ་བ་ལིཾ་ཏ་ཨཱོཾ་ཕཊ་ཁ་ཧི། དེ་ཤར་གྱི་དགུ། ཏྲཱྃ་སརྦ་རཏྣ་དྷཱ་ཀ་དྷཱ་ཀི་ནི། པྲ་ཏིཙྪ་ཨི་མྃ་བ་ལིཾ་ཏ་ཏྲཱྃ་ཕཊ་ཁ་ཧི། ལྷོ་ཡི་དགུའོ། །ཧྲཱིཿསརྦ་པདྨ་ཌཱ་ཀ་ཌཱཀྐི་ནི། པྲ་ཏིཙྪ་ཨི་མྃ་བ་ལིཾ་ཏ། ཧྲཱིཿཕཊ་ཁ་ཧི། ནུབ་ཀྱི་དགུ། ཧཱཿསརྦ་ཀརྨ་ཌཱ་ཀ་ཌཱཀྐི་ནི། པྲ་ཏིཙྪ་ཨི་མྃ་བ་ལིཾ་ཏ་ཧཱ་ཕཊ་ཁ་ཧི། བྱང་གི་དགུའོ། །འདི་རྣམས་སོ་སོའི་གྲངས་ཚད་དམ་གསུམ་རེ་བཟླའོ། །དེ་ནས་མཁའ་འགྲོ་མ་རྣམས་ཀྱིས་རྣ་བ་ཅག་གེར་ཉན་པར་གྱུར་པ་ལ། རྡོ་རྗེ་དྲིལ་བུའི་འགྱུར་བ་བཅས། ཧཱུྃ། བཅོམ་ལྡན་རྡོ་རྗེ་སེམས་དཔའ་ལ། །མཁའ་འགྲོའི་ཚོགས་ཀྱིས་བསྐོར་བ་ནི། །མངོན་པར་དགའ་བའི་འཇིག་རྟེན་ནས། །རྡོ་རྗེ་ནམ་མཁར་འགྲོ་མ་རྣམས། །ཡི་དྭགས་སྟན་ལ་ཡང་དག་བཞུགས། །དཔའ་བོ་འཇིགས་པའི་གཟུགས་འཛིན་ཏེ། །སྐལ་དང་རང་གི་ལག་ཆར་ལྡན། །གདུག་པའི་སེམས་ཀྱིས་བསྡིག་བྱེད་ཅིང་། །ཤ་ཁྲག་དང་ནི་རྒྱུ་མ་དང་། །རྐང་དང་ཚིལ་བུ་ཟ་སྤྱོད་རྣམས། །ཟ་བར་བྱེད་ཅིང་འདྲེན་པར་བྱེད། །གསོད་པར་བྱེད་ཅིང་ཕྲོག་པར་བྱེད། །ཀུན་ཀྱང་རང་གི་དམ་ཚིག་ལྡན། །ཤར་གྱི་ཕྱོགས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའ་ཡི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་སྒྲུབས། །ལས་བཅོལ་ཕྲིན་ལས་མཛད་དུ་གསོལ། །དཔལ་དང་ལྡན་པའི་འཇིག་རྟེན་ནས། །རྡོ་རྗེ་ནམ་མཁར༴ གཟི་བྱེད་ཆེ་དང་འབར་བྱེད་མེ། །འཇོམས་བྱེད་མ་དང་བོང་བུའི་མགོ། །ཀུན་ཀྱང་རང་གི་དམ་ཚིག་ལྡན། །ལྷོ་ཡི་ཕྱོགས༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ བདེ་བ་ཅན་གྱི་འཇིག་རྟེན་ནས། །རྡོ་རྗེ་ནམ༴ ཆགས་ཆེན་མ་དང་ཆགས་བྲལ་མ། །འཁོར་ལོ་མ་དང་རྒྱས་འདེབ་མ། །ཀུན་ཀྱང་རང་གི་ལག་ཆར་ལྡན། །ནུབ་ཀྱི༴ འདི་གཤེགས༴ བཀའ་ཡི༴ བདག་གི༴ ལས་བཅོལ༴ རྣམ་པར་དག་པའི་འཇིག་རྟེན་ནས། །རྡོ་རྗེ་ནམ༴ སྣ་ཚོགས་ལུས་དང་སྲུང་བ་མོ། །གནོད་སྦྱིན་མ་དང་ཡང་དག་འཕྲོག །ཀུན་ཀྱང་༴ བྱང་གི་ཕྱོགས༴ འདིར་གཤེགས༴ བཀའ་ཡི༴ བདག་གི༴ ཤ་ཆེན་སྤུངས་པའི་འཇིག་རྟེན་ནས། །བྱ་རོག་གདོང་ནི་མིག་འཕྲུལ་ཅན། །འཇིགས་པའི་མིག་དང་འཇིགས་པའི་གདོང་། །ཤར་ལྷོའི༴ ལག་པར་གྲི་དང་ཁྲག་གཞུང་ཐོགས། །མཆོག་ཏུ་ཤ་དང་ཁྲག་ལ་དགྱེས། །ཀུན་ཀྱང་༴ ཤར་ལྷོ་མཚམས༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ ཀེང་རུས་སྤུངས་པའི་འཇིག་རྟེན་ནས། །བཞད་དང་འུག་པའི་གདོང་རིང་མ། །ཁྲོས་པ་ཁྱི་དང་ཕག་གི་གདོང་། །ལྷོ་ནུབ་ནམ༴ ལྟོ་འཕྱང་པོ་ལ་བུམ་པ་འཛིན། །ཀུན་ཀྱང་༴ ལྷོ་ནུབ་མཚམས༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ རཀྟ་ཁྲག་གི་རྦ་ཀློང་ནས། །རྔ་མོང་བུའི་གདོང་འཛིན་ཏེ། །ཁྲོས་པ་ར་དང་བྱི་ལའི་གདོང་། །ནུབ་བྱང་ནམ་མཁར་འགྲོ༴ རྒྱུ་མའི་མགོ་ནས་ཟ་བར་བྱེད། །ཀུན་ཀྱང་༴ ནུབ་བྱང་མཚམས༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ ཐལ་ཆེན་སྤུངས་པའི་འཇིག་རྟེན་ནས། །ཀེང་རུས་དཀར་པོ་འཛིན་པ་སྟེ། །ཁྲོས་པས་རུས་པའི་ཕྲེང་བ་ཀླུབ། །བྱང་ཤར་ནམ༴ ཕན་ཚུན་འཐབ་ཅིང་རྩོད་པར་བྱེད། །འཇིགས་བྱེད་དྲག་པོའི་མཆེ་བ་ཅན། །ལྕེ་སྤྱང་གི་ནི་འཁོར་གྱིས་བསྐོར། །ཀུན་ཀྱང་འདིར་གཤེགས༴ བཀའ་ཡི༴ བདག་གི༴ ལས་བཅོལ༴ དཔལ་ལྡན་རྡོ་རྗེ་སེམས་དཔའ་ཡི། །དཀྱིལ་འཁོར་དེ་ཡི་གྲ་བཞི་ནས། །འཇིགས་བྱེད་མཁའ་འགྲོ་བཞི་འབྱུང་བ། །ཤར་གྱི་ཕྱོགས་ནས་བྱུང་བ་ནི། །རྡོ་རྗེ་མཁའ་འགྲོ་ཆེན་མོ་སྟེ། །སྲིན་མོ་བུམ་སྣ་གཤེགས་སུ་གསོལ། །འཇིགས་བྱེད་འབུམ་ཕྲག་དགུ་དང་བཅས། །ཀུན་ཀྱང་༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ ༈ ལྷོ་ཡི་ཕྱོགས༴ རིན་ཆེན་མཁའ་འགྲོ༴ རྡོ་རྗེ་དུས་མཚན༴ འཇིགས་བྱེད་འབུམ་ཕྲག་ལྔ་དང་བཅས། །ཀུན་ཀྱང་༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ ནུབ་ཀྱི་ཕྱོགས་ནས༴ པདྨ་མཁའ་འགྲོ༴ རྡོ་རྗེ་དུས་ཀྱི་འཁོར་ལོ་ཡང་། །འཇིགས་བྱེད་འབུམ་ཕྲག་གསུམ་དང་བཅས། །ཀུན་ཀྱང་༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ བྱང་གི་ཕྱོགས༴ རྡོ་རྗེ་ལངྐ་མགྲིན་བཅུ་ཡང་། །གནོད་སྦྱིན་བྱེ་བ་འབུམ་དང་བཅས། །ཀུན་ཀྱང་༴ འདིར་གཤེགས༴ བཀའ་ཡི༴ བདག་གི༴ ལས་བཅོལ༴ མཁའ་འགྲོ་ཕོ་མོ་ཁྱེད་རྣམས་ཀྱང་། །སྔོན་ཚེ་བཅོམ་ལྡན་རིགས་ལྔ་ཡིས། །ཕོ་རྣམས་བཏུལ་ཏེ་གདན་དུ་བཏིང་། །མོ་རྣམས་བཏུལ་ཏེ་མཛའ་མོར་བྱས། །སོ་སོའི་དམ་ཚིག་བགོས་པ་བཞིན། །བདག་ཀྱང་རྒྱལ་བའི་བསྟན་སྲུང་ན། །ལས་བཅོལ་ཕྲིན་ལས་མཛད་དུ་གསོལ། །བར་དུ་གཅོད་པའི་དགྲ་བགེགས་རྣམས། །མྱུར་དུ་སྒྲོལ་ལ་མེད་པར་མཛད། །བདུད་འདུལ་མཐུ་དང་སྐལ་ལྡན་ཚེ། །མཛོད་ལྡན་ནོར་དང་འཁོར་རྣམས་ཀྱིས། །དངོས་གྲུབ་དམ་པ་སྩལ་དུ་གསོལ། །སྨན་རཀ་བསྒྲེང་། མ་ཧཱ་པཉྩ་ཨ་མྲྀ་ཏ་ཁ་ཧི། མ་ཧཱ་རཀྟ་ཁ་ཧི། མཆོད་པའི་ཚོགས་གཏོར་གཞོང་དུ་གཤེགས་ལ། ཨི་དཾ་པུཥྤེ། དྷཱུཥྤེ། ཨ་ལོ་ཀེ །གནྡྷེ། ནཻ་ཝིཏྱེ། ཤ་པྟ་པཱུ་ཛ་ཧོ། ཞེས་ཡི་གེ་བརྒྱ་པ་བཟླ་བཞིན་རོལ་མོའི་སྒྲ་བཅས་གཏོར་མ་གཤེགས། མཁའ་འགྲོ་མ་རྣམས། ཡ་ཏི་གཙྪ། དམ་ཚིག་འཁོར་ལོའི་གནས་སུ་གཤེགས། །གསུམ་པ་ལ། བརྟན་མ་དང་། གཏོར་སྐྱོང་དངོས་སོ། །དང་པོ་གཏོར་མ་ནམ་མཁའ་མཐོང་སར་ཁྱེར་སྨན་རག་བྲན། ༀ་ཨཱཿཧཱུྃ། རྒྱ་གར་ཡུལ་གྱི་ཚུ་རོལ་དུ། །བལ་པོའི་ཡུལ་གྱི་ཕ་རོལ་ན། །ཨ་སུ་ར་ཡི་བྲག་ཕུག་ཏུ། །པདྨ་དབང་གིས་དམ་སྩལ་བ། །མི་སྡུག་ནག་མོའི་བུ་མོ་བདུད་མོ་བཞི། །དམར་མོ་ཁྲོ་གཉེར་བུ་མོ་གནོད་སྦྱིན་བཞི། །དཀར་ཤམ་བཞིན་བཟང་བུ་མོ་སྨན་བཙུན་བཞི། །འདིར་གཤེགས་དམ་དགོངས་མཆོད་སྦྱིན་བསྣམ་དུ་གསོལ། །མཆོད་པ་གཤེགས་ལ། ༀ་ལ་ལ། ལེ་ལེ། ཏཾ་ཏཾ། ཁ་རགྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ། ཨི་དཾ་པུཥྤེ་ནས། པུ་ཛ་ཧོ། སྨན་རག་སྔགས་དང་། ཡིག་བརྒྱ་བརྗོད། ཡ་ཧི་གཙྪ་ས་རང་གནས་སུ་གཤེགས། གཉིས་པ། གཏོར་མ་རྩ་བ་གཅིག་པ་རྩེ་མོ་གསུམ་པ་ལ། སྨན་བྲན། གཏོར་མ་ཏྲཱྃ་ལས་རིན་ཆེན་མཆོད་སྡོང་ནི། རྩེ་གསུམ་འབྲུ་གསུམ་རྩ་བ་ཏྲཱྃ་མཚན་པ། །བདེ་བར་གཤེགས་པ་དམ་ཅན་སྲུང་མ་དང་། །འགྲོ་དྲུག་སེམས་ཅན་ཀུན་ལ་མཆོད་སྦྱིན་འབུལ། །ལྷ་ཚོགས་ཐམས་ཅད་ཞལ་ཕྱིར་གཟིགས་པར་བསྒོམས་ལ་རོལ་མོ་དང་། བཟློག་སྔགས་དང་། བྱེ་བྲག་སྲུང་འཁོར་གྱི་སྐབས་ཀྱི་ཛྭ་ལི་བཛྲའི་སྔགས་བརྗོད། རང་གི་གནས་ལྔ་ནས་མཚོན་ཆ་སྣ་ལྔ་སྤྲོས། །རྡོ་རྗེའི་རྭ་གུར་ལ་ཕོག །དེ་ལས་མཚོན་ཆ་སྤྲོས་བདུད་བགེགས་ཐམས་ཅད་བསྐྲད། ཚུར་འདུས་སྲུང་བའི་གུར་ཁང་བརྟན་པར་གྱུར། བཛྲ་བྷྲཱུྃ་རཀྵ་རཀྵཿ རྟེན་སྙིང་དང་། རྫོགས་པའི་བྱང་ཆུབ་སྒྲུབ་པ་ལ། །སོགས་སྨན་ལམ་བྱས་ཏེ་ལྷ་ཚོགས་ཞལ་ནང་དུ་གཟིགས་པར་བསམ། བཞི་པ་ཉེར་བསྡུ་ལ། གཏོང་རག་གི་མཆོད་བཤགས་དང་། ཉེར་བསྡུ་དངོས། དང་པོ། མཆོད་པ་བྱིན་རླབས་མཐར། རྣམ་བདུན་འདོད་ཡོན་སྨན་རག་གཏོར་མ་སྔགས་ཙམ་གྱིས་མཆོད་དེ། ཤ་དང་རུས་པ་ཁྲག་ཀྱང་མེད། །ནམ་མཁའ་ལ་ནི་འཇའ་ཚོན་ལྟར། །ཁྱོད་ཀྱི་སྐུ་ནི་སྟོན་པར་མཛད། །ཁོང་སྟོང་ཁྱོད་ཀྱི་སྐུ་ལ་བསྟོད། །ཁྱོད་ནི་གླང་པོའི་རྣ་བ་ཅན། །ཁྱོད་ནི་སེང་གེའི་སྟང་སྟབས་ཅན། །ཁྱོད་ནི་ཕ་ལྟར་སྐྱོབས་པའོ། །ཁྱོད་ནི་མ་ལྟར་བྱམས་པའོ། །ཁྱོད་ནི་ས་ལྟར་འདེགས་པ་སྟེ། །ཁྱོད་ནི་ཆུ་ལྟར་སྡུད་པའོ། །ཁྱོད་ནི་གཟུགས་སྡུག་ཡིད་ཀྱིས་བརྒྱན། །ཁྱོད་ནི་རླུང་ལྟར་གཏོར་བའོ། །ཁྱོད་ནི་སྤྲིན་ལྟར་ལྡིང་བའོ། །ཁྱོད་ནི་ཆར་ལྟར་འབེབ་པའོ། །དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱུ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །རྡོ་རྗེ་ཡིད་ལ་ཕྱག་འཚལ་ལོ། །རང་ཉིད་གཙོ་བོ་ཕྱག་གཉིས་པའི་རྣམ་པས་ཤར་སྒོར་འཁོད་པར་གྱུར། །ན་མོ་བུདྷཱ་ཡ། ན་མོ་དྷཱརྨ་ཡ། ན་མོ་སངྒྷ་ཡ། བདག་ནི་རང་རིག་ཡེ་ཤེས་བློ་དང་མི་ལྡན་པས། བག་མེད་ཚུལ་གྱིས་དམ་ལས་འགལ་གྱུར་ཏེ། །བཀའ་རྒྱུད་བླ་མའི་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །བདག་ནི༴ བག་མེད༴ རྡོ་རྗེ་སེམས་སོགས་ཐུགས༴ ཐུགས་རྗེ་ཆེ་མངའ༴ བདག་ནི༴ བག་མེད༴ མ་མོ་མཁའ་འགྲོའི༴ ཐུགས་རྗེ༴ ཡིག་བརྒྱ་ལན་གསུམ་དང་དབྱངས་གསལ་རྟེན་སྙིང་གིས་ཁ་བསྐང་། གཉིས་པ་ལ་དཀྱིལ་འཁོར་བསྡུ་ཞིང་ལྷ་རུ་སྡང་། གོ་བགོ་ལུས་བསྲུང་སྨོན་བཀྲ་ཤིས། ཞེས་དྲུག་གི །དང་པོ། ཧཱུྃ་ཧཱུྃ། ཞེས་བརྗོད་པས་རང་གི་སྙིང་གའི་འོད་ཀྱིས་ཕོག་པས་ཁམས་གསུམ་བརྟན་གཡོ་རྣམ་པར་དག་པ་འོད་དུ་ཞུ་བ་སྲུང་འཁོར་ལ་ཐིམ། དེ་གཞལ་ཡས་ཁང་། དེའི་རྒྱུན་རྣམས་ཡབ། དངོས་པོ་རྣམས་ཡུམ་ལ་ཐིམ། སྐུའི་རིགས་རྣམས་སྣང་། གསུང་སྣང་མཐའ། ཐུགས་གཙོ་བོ། ཡོན་ཏན་རིན་འབྱུང་། ཕྲིན་ལས་དོན་གྲུབ། ཐུབ་དྲུག་བྱ་བྱེད་ལ་ཐིམ། དེ་ཐམས་ཅད་ཀྱང་ཉི་མ་དང་ཟེར་བཞིན་ཡབ་རྣམས་རྡོ་རྗེ་སེམས་དཔའ། ཡུམ་རྣམས་དབྱིངས་ཕྱུག་མ་ལ་ཐིམ། དེ་ཡབ་ལ། དེ་ཡེ་ཤེས་སེམས་དཔའ། དེ་ཏིང་འཛིན་སེམས་དཔའ་ལ། དེ་ཧཱུྃ་ལ། དེ་གྱེན་རྫོགས་ན་དའི་བར་དུ་ཐིམ་ནས། སྤྲོས་བྲལ་རྣམ་པར་དག་པ་རང་བྱུང་གི་ཡེ་ཤེས་ནམ་མཁའ་ལྟ་བུ་མངོན་སུམ་དུ་གྱུར། སྟོང་ཉིད་ལ་ཅི་གནས་སུ་མཉམ་པར་འཇོག །གཉིས་པ་ནི། དེའི་ངང་ལས་སྡང་བ་ནི། ཧཱུྃ་བཛྲ་དྷྲིཀ྄ །རང་ཉིད་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པའི་སྐུ་རྒྱུར། མཚམས་ལྷ་ལྟར་ཡིན་གསུངས། མཆན། གསུམ་པ་ནི། སྤྱི་བོ་དང་ལུས་ཀྱི་གནས་ལྔ་ལྔར་རིགས་ལྔ་དང་རྡོ་རྗེ་ལྔས་མཚན་པར་གྱུར། རྡོ་རྗེའི་ཕྱག་རྒྱ་གཏུག་སྟེ། ཧཱུྃ་ཨཱོཾ་སྭཱ་ཨཱྃཿཧཱཿ ཨཱོཾ་ཨཱྃ་ཧཱུྃ་སྭཱ་ཧཱཿ སེམས་དཔའ་སུམ་བརྩེགས་གསལ། བཛྲ་ཀཱ་ཝཱ་ཙི་རཀྵ་ཧྃ། ལུས་རྡོ་རྗེའི་གོ་ཁྲབ་ཀྱིས་ཞུ་ལུགས་སུ་གཡོགས། ཧཱུྃ་ཧཱུྃ་ཞེས་པའང་རྐང་པའི་མཐེ་བོང་ནས་རྡོ་རྗེའི་རྒྱུན་ཐག་ཟུང་རེ་བྱུང་། རྐང་ཚིག་རྒྱབ། པུས་མོའི་འོག །དཔྱི་མིག་གནས་མདུན་རྒྱབ་ཏུ། ལྟེ་བ། སོག་ཕྲག །སྙིང་ཁ། ལྟག་རུས། དཔྲལ་བའི་སྐྲ་མཚམས་དྲུག་ཏུ་རྡོ་རྗེ་རྒྱ་གྲམ་གྱི་མདུད་པ་རེ་བཅིངས་བར་གྱུར། བཞི་པ་ནི། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །མཛུབ་མོ་གཡས་ན་ཧཱུྃ་ནག་པོ། །གཡོན་ཨ་དམར་པོ་གཉིས་ཁྲོ་བོ་རྡོ་རྗེ་གནོད་སྦྱིན་ནག་པོ་རྡོ་རྗེ་དང་། ཕག་རྒོད་ཀྱི་མཆེ་བ་འཛིན་པ། བདུད་རྩི་ཐབ་སྦྱོར་དམར་པོ་རལ་གྲི་དང་ཞགས་པ་ཐོགས་པས་མདོ་དྲུག་ཏུ་ཞབས་བསྣོལ་ཏེ་སྲུང་བར་གྱུར། ཧཱུྃ་ཨ་ཞེས་གནས་དྲུག་ཏུ་བསྒོམ་ༀ་ཨཱརྻ་ལམྦོ་དྷ་ར་ཨ་བྷི་ཥཉྩ་ཧྲཱིཿཧྲཱིཿ རྒྱུན་ཐག་རྩེ་སྨིན་མཚམས་ན་ཡོད་པ་ལས་དར་མཐིང་དམར་གྱི་ཅོད་པཎ་འཕྱང་བར་གྱུར། ༀ་བཛྲ་རཏྣ་པདྨ་མཱ་ལྱེ་ཨ་བྷི་ཥཉྩ་ཏྲཱྃ་ཏྲཱྃ། ཞེས་རིན་པོ་ཆེ་དང་མེ་ཏོག་གི་ཕྲེང་བ་བཅིངས། ཡི་གེ་བརྒྱ་པ་བཟླ་བས་གསལ་ཞིང་བརྟན་པར་བྱའོ། །ལྔ་པ་ནི། སངས་རྒྱས་འབྱུང་དང་སྐལ་མཉམ་ཞིང་། །ཐེག་པ་དམན་པར་ཡང་མི་སྐྱེ། །ངན་སོང་དག་ཏུ་མི་ལྟུང་བར། །ཚེ་རིང་བདེ་བ་ཕུན་སུམ་ཚོགས། །ལུས་བྱད་བཟང་ཞིང་ཡན་ལག་རྫོགས། ༈ །སྙིང་རྗེ་ཆེ་ཞིང་ཤེས་རབ་ལྡན། ༈ །བདག་དང་གཞན་དོན་རྫོགས་སྤྱོད་ཤོག །བླ་མེད་བྱང་ཆུབ་ཐོར་ཚུགས་ཅན། །ཤིན་ཏུ་བརྟན་པའི་རི་བོར་གནས། །མུ་སྟེགས་རླུང་གིས་ཚུགས་མི་འགྱུར། །ཐེག་མཆོག་རྡོ་རྗེ་དེ་ལྟ་བུ། །དཀྱིལ་འཁོར་མི་ཟད་འབྱུང་བའི་གཏེར། །རྡོ་རྗེ་ནོར་བུ་རིན་པོ་ཆེ། །བྱི་དོར་བྱས་ཤིང་ཤིན་ཏུ་གསལ། །བསྐལ་པ་གྲངས་མེད་གནས་གྱུར་ཀྱང་། །སྐུ་ནི་ཤིན་ཏུ་གཞོན་པའི་ཚུལ། །སྐྱེ་ཤི་མེད་པའི་རྡོ་རྗེ་ཡིས། །ཐམས་ཅད་འབྱུང་བའི་གཏེར་ཡིན་ཏེ། །ཡོན་ཏན་ཕུན་སུམ་ཚོགས་དང་ལྡན། །བླ་མེད་བྱང་ཆུབ་གྲུབ་གྱུར་ནས། །ཡེ་ཤེས་རྡོ་རྗེ་གྲུབ་པར་ཤོག །ཚོགས་ཆེན་གཉིས་ཀྱང་རྫོགས་རྒྱུར་ཅིག །ཐམས་ཅད་ཀུན་གྱིས་སྟོན་པ་པོ། །ཐམས་ཅད་མཁྱེན་པའི་གོ་འཕང་བརྙེས། །སངས་རྒྱས་ཉིད་ལ་དབང་བྱེད་ཤོག །དེ་རྟོགས་ཀུན་ཀྱང་རྡོ་རྗེའི་རིགས། །སྐུ་གསུང་ཐུགས་སུ་འགྲུབ་པར་ཤོག །སེམས་ཅན་འདམ་གྱིས་མི་གོས་ཤིང་། །བླ་ན་མེད་པའི་བྱང་ཆུབ་ལམ། །སྣ་ཚོགས་སྡུག་བསྔལ་ཞི་མཛད་ཅིང་། །སེམས་ཅན་སྐོམ་པ་ངོམ་མཛད་ཤོག ༈ །ཐུགས་དམ་ཉམས་པ་ཀུན་བསྐང་སྟེ། །ཡེ་ཤེས་བླ་མའི་ས་གནོན་ནས། །སྐུ་གསུང་ཐུགས་ནི་མི་ཟད་པ། །རྒྱན་གྱི་འཁོར་ལོ་ཐོབ་པར་ཤོག །འདི་ལས་བདག་གི་དགེ་བ་གང་ཐོབ་པ། །འགྲོ་བ་བློ་ཞན་རྣམས་ཀྱིས་ཆོས་ཀུན་ནི། །སྟོང་ཉིད་སྒྱུ་མ་ལྟ་བུར་རབ་རྟོགས་ནས། །ཡེ་ཤེས་གཉིས་མེད་སྐུ་གསུམ་ཐོབ་པར་ཤོག །དེ་ལྟའི་དགེ་རྩས་ལམ་གནས་རྣལ་འབྱོར་ཀུན། །བསྐྱེད་རིམས་མཐར་ཕྱིན་ཡང་དག་ཞེན་གྲོལ་ནས། །ཀུན་གྱི་མཐར་ལམ་མངོན་གྱུར་དོན་རྫོགས་ཏེ། །མཐའ་ཡས་འགྲོ་དོན་ཚུལ་བཞིན་བྱེད་པར་ཤོག །དྲུག་པ་ནི། ཞལ་ནས་གསུངས་པའི་བཀྲ་ཤིས་དང་། བཀྲ་ཤིས་གང་ཞིག་ཀ་དག་ངང་ལས་མ་གཡོས་ཀྱང་། །ལྷུན་གྲུབ་འོད་གསལ་རྟག་པ་དམ་པའི་རོལ་མོ་ཅན། །ཐུགས་རྗེ་ཀུན་ཁྱབ་ཀུན་བཟང་བརྒྱུད་གསུམ་བླ་མ་ཡིས། །བདེན་པ་དེས་ཀྱང་དག་མཉམ་ལ་གནས་བཀྲ་ཤིས་ཤོག །བཀྲ་ཤིས་གང་ཞིག་ཤིན་ཏུ་ཞི་བའི་ཆོས་དབྱིངས་ལས། །མི་བསྐྱོད་རྡོ་རྗེ་ཁ་སྦྱོར་རྒྱལ་པོ་མཛེས་པའི་སྐུ། །ཟུང་འཇུག་ཡེ་ཤེས་སྒྱུ་འཕྲུལ་དྲྭ་བའི་འཁོར་ལོའི་བདག །བདེན་པ༴ བྱེ་བྲག་ཟེར་ཀློང་ཨིནྟྲ་ནཱི་ལའི་ལྷུན་པོ་ལ། །མཁའ་དབྱིངས་དབང་པོའི་གཞུ་ཡིས་འཁྱུད་འདྲ་ཞལ་གསུམ་མངའ། །དྲུག་ལྡན་ཕྱག་ན་སྣ་ཚོགས་རང་རྟགས་ལེགས་འཛིན་པ། །བདེན་པ༴ མེ་ལོང་ལ་སོགས་ཡེ་ཤེས་བཞི་ལས་གྲུབ་པའི་སྐུ། །རྣམ་སྣང་ལ་སོགས་རྩིབས་བཞིའི་འཁོར་ལོ་ལ་གནས་པ། །སྤྱན་མ་ལ་སོགས་མཉམ་སྦྱོར་ལོངས་སྤྱོད་རྫོགས་པའི་སྐུ། །བདེན་པ༴ མིག་སོགས་དབང་ཤེས་ཡུལ་བཅས་དག་པ་རྒྱལ་བའི་སྲས། །ས་སྙིང་ལ་སོགས་གློ་འབུར་གྲུ་ཆད་ལ་གནས་པ། །སྒེག་མོ་ལ་སོགས་བཅུ་དྲུག་མཉམ་སྦྱོར་མངོན་བྱང་སྐུ། །བདེན་པ༴ ཕུང་སོགས་འབྱུང་བའི་འཁོར་འདས་བདེན་གཉིས་རྣམ་དག་པ། །དེ་བཞིན་གཤེགས་སོགས་དཀྱིལ་འཁོར་འཁོར་ལོའི་སྤྲོ་བའི་གཞི། །རིགས་སོགས་ཀུན་བདག་ཁྱམས་ལ་བྱ་བྱེད་ཆོས་ཀྱི་སྐུ། །བདེན་པ༴ སེར་སྣ་ལ་སོགས་རྟོག་པ་དྲུག་དག་ཐུབ་པ་ནི། །ལྷ་ལ་སོགས་པའི་འགྲོ་བ་དྲུག་པོ་འདྲེན་མཛད་ཅིང་། །སྦྱིན་སོགས་ཕར་ཕྱིན་དྲུག་བདག་འཁྱམས་གནས་སྤྲུལ་པའི་སྐུ། །བདེན་པ༴ བྱམས་པ་ལ་སོགས་ཚད་མེད་བཞི་དངོས་རེག་སོགས་དག །གཤིན་རྗེ་ལ་སོགས་མཐར་བྱེད་ཡབ་ཡུམ་རྡོ་རྗེའི་སྐུ། །ཕུང་པོ་ལ་སོགས་བདུད་བཞིའི་རོ་ལ་དཔའ་ཞིང་བརྗིད། །བདེན་པ༴ བཀྲ་ཤིས་གང་ཞིག་འོག་མིན་སྟུག་པོ་བཀོད་པའི་ཞིང་། །ཐར་པ་ཆེན་པོའི་གཞལ་མེད་འོད་ལྔའི་སྤྲིན་ཕུང་འཕྲོ། །ཟླ་བ་རླུང་བསྐྱོད་གསེར་དང་དྲིལ་བུའི་དྲྭ་བས་བརྒྱན། །བདེན་པ༴ བྱང་ཕྱོགས་སོ་བདུན་བཀོད་པ་ངོ་མཚར་སྒྱུ་མའི་ཕུལ། །ཡིད་ཕྲོག་ཏཱ་ལ་དཔག་བསམ་ཤིང་ཚལ་རྟ་བབས་བརྒྱན། །པདྨ་རི་དྭགས་གདུགས་དང་ཆོས་འཁོར་རྒྱལ་མཚན་འཕྱང་། །བདེན་པ་སྣ་ཚོགས་རྡོ་རྗེའི་སྲུང་བའི་སྐུར་ཁང་བདུད་ལས་རྒྱལ། །ལོག་འདྲེན་བགེགས་འཇོམས་སྣ་ལྔ་འབར་བའི་མེ་རི་འཁྱིལ། །སྐྱོན་བྲལ་པདྨ་ནམ་མཁའི་མཐའ་མཉམ་ཕོ་བྲང་གི་བདེན་པ་དེས་ཀྱང་དག་མཉམ་ལ་གནས་བཀྲ་ཤིས་ཤོག ༈ །བཀྲ་ཤིས་གང་ཞིག་རྡོ་རྗེ་འཆང་གིས་གསུངས་པའི་རྒྱུད། །བྱེ་བ་དུང་ཕྱུར་དཔག་མེད་ཀུན་གྱི་རྩེ་མོ་མཆོག །གསང་བ་སྙིང་པོ་ཕྱོགས་བཅུའི་རྒྱལ་བའི་ཐུགས་ཀྱི་མཛོད། །བདེན་པ་དེས་ཀྱང་དག་མཉམ་ལ་གནས་བཀྲ་ཤིས་ཤོག །ཅེས་ཤིས་པར་བརྗོད་པས་དགེ་ལེགས་སུ་བྱའོ། །གཉིས་པ་ལས་ཀྱི་རྗེས་ལ། སྤྱོད་ལམ་རྒྱུན་གྱི་རྣལ་འབྱོར་སྟོན་ཏེ། ཐ་མལ་པའི་མཚན་མར་འཛིན་པ་དང་། འདུ་ཤེས་ཐམས་ཅད་དོར་ནས། གནས་ཁང་དག་པའི་ཞིང་དང་གཞལ་མེད་ཁང་། གྲོགས་སུ་དང་འགྲོགས་ཀྱང་ཡི་དམ་གྱི་ལྷ་དཔལ་རྡོ་རྗེ་སེམས་དཔའི་ང་རྒྱལ་གྱིས། བྱེད་སྤྱོད་ཐམས་ཅད་རང་བཞིན་གཉིས་སུ་མེད་པའི་ཡེ་ཤེས་དང་། བཟའ་བ་ཚོགས་དང་། བགོ་བརྒྱན་སོགས་ཡོ་བྱད་ཀྱི་རྣལ་འབྱོར་ཟབ་མོས་དགེ་སྡིག་བཏང་སྙོམས་ཐ་མལ་བ་མ་ཡིན་པར་རྡོ་རྗེ་ཐེག་པའི་ཐབས་མཁས་ཀྱིས་ཟག་མེད་ཚོགས་གཉིས་རྫོགས་པའི་དགེ་བར་བསྒྱུར་བ་ལ་མཁས་པར་བྱའོ། །དེ་ལྟར་རྗེས་ལ་ཐོབ་པའི་དུས་ཀུན་དུ་ཐ་མལ་དུ་མིག་ཡེང་བ་གལ་ཆེ་ཞིང་། རྣལ་འབྱོར་གྱིས་སྐྱོན་སེམས་ཅན་འདི་དག་ཐམས་ཅད་བདག་གིས་སངས་རྒྱས་སུ་བྱའོ་སྙམ་པའི་སེམས་བསྐྱེད་རིན་པོ་ཆེའི་རྩི་དང་མ་བྲལ་བ་དགོས་ཏེ། མེ་ལོང་ལྟ་བུའི་སྒྲུབ་ཐབས་ལས། ཡང་ན་རྒྱལ་བའི་དཀྱིལ་འཁོར་གྱི། །བྱིན་རླབས་ཀྱིས་ནི་རྣམ་པར་སྦྱངས། །སེམས་ཅན་ཐམས་ཅད་མཐོང་བ་ན། །སྙིང་རྗེ་བྱམས་པའི་སེམས་བསྐྱེད་དེ། །སངས་རྒྱས་ཉིད་དུ་བྱའོ་ཞེས། །སྨོན་པའི་སེམས་ནི་ཁྱད་པར་ཅན། །བློ་ཅན་གྱིས་ནི་རྟག་ཏུ་བྱ། །དེ་ལྟར་དུས་བཞིའི་ཉིན་མཚན་དུ། །རྣལ་འབྱོར་ཚུལ་ལ་གནས་པ་ཡིན། །ཞེས་གསུངས་པ་དང་གཞན་ཡང་གཉིད་འོད་གསལ་དུ་སྦ་བ་སོགས་ཆུ་བོ་རྒྱུན་གྱི་རྣལ་འབྱོར་འཁོར་ཡུག་ཏུ་བྱས་ཏེ་གཉིས་འཛིན་གྱི་འཆིང་བ་གྲོལ་ནས་ཏིང་ངེ་འཛིན་ལ་བློ་བརྟན་པ་ནི་དངོས་གྲུབ་ཀྱི་རྒྱུའོ། །དེ་སྐད་དུའང་རྒྱུད་ལས། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་ནི། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་གསུངས་སོ། །གཉིས་པ་གྲུབ་པ་འབྲས་བུ་ལ་གནས་སྐབས་དང་། མཐར་ཐུག་གོ། །དང་པོ་ལའང་ཞར་ལས་བྱུང་བ་དང་། དངོས་སོ། དང་པོ་ཇི་སྐད་བཤད་པའི་བསྐྱེད་རིམ་བྱིན་གྱིས་བརླབས་པ་དང་། ཡོངས་སུ་བརྟགས་པ་དང་། རྟོགས་པའི་རྣལ་འབྱོར་གསུམ་དང་ལྡན་པས་ལྕགས་ལ་གསེར་འགྱུར་གྱི་རྩི་བཞིན་ཐ་མལ་ཕྱི་སྣང་ཞེན་སྦྱོང་སྟེ། རྒྱས་ཐེབས་པར་བྱས་ནས། རྡོ་རྗེ་གསུམ་གྱི་རྣལ་འབྱོར་གོམས་པས། རོ་ལང་གསེར་དུ་བསྒྱུར་བ་དང་། བུམ་པ་བཟང་པོའི་གཏེར་སོགས་དངོས་གྲུབ་བརྒྱད་དང་། ནམ་མཁའ་རྡོ་རྗེ་སྲ་འབྱུང་། ནད་སེལ་བདུད་རྩི། གདོན་བགེགས་གཏོར་མ་སོགས་དང་། ཆུ་མེར་བསྒྱུར་བ་སོགས་རྫུ་འཕྲུལ་རབ་འབྱམས་ལ་མངའ་དབང་འབྱོར་ན་ཞི་རྒྱས་དབང་དྲུག་གི་ལས་ཕྲན་ཚེགས་སྨོས་ཅི་དགོས་ཏེ་འཇིག་རྟེན་པའི་འོག་མིན་གྱི་བར་གྱི་མཐུན་པའི་ལས་དང་དངོས་གྲུབ་ཐམས་ཅད་འགྲུབ་པའི་ཐབས་ལྟ་བ། རྫོགས་རིམ་གྱིས་རྒྱས་ཐེབས་པའི་བསྐྱེད་རིམ་གྱི་རྣལ་འབྱོར་གོམས་པ་མངོན་གྱུར་པ་གཙོ་ཆེ་ཞིང་། དེའང་བསྙེན་པ་དང་། ཕྲ་མོའི་རྣལ་འབྱོར་གྱི་མཐར་སོན་པས་ཡིད་ཏིང་ངེ་འཛིན་བརྟན་པ་དང་། དེའི་རྒྱུ་རྫོགས་པ་ཞིག་དགོས་སོ། །གཉིས་པ་ནི། དེ་ལྟར་བསྐྱེད་རིམ་གྱིས་གཞི་བཟུང་སྟེ། གང་ལ་གནད་དུ་བསྣུན་པ་རྡོ་རྗེའི་ལུས་དང་། དེ་ལ་ཇི་ལྟར་བསྣུན་པའི་ཚུལ་མཁས་པས་མཚན་བཅས་ཀྱི་རྫོགས་རིམ། རྩ་གསུམ་འཁོར་ལོ་དྲུག་ལྡན་གྱི་ལུས་ལ། སྟེང་སྒོ་དང་འོག་སྒོ་འཇུ་འདུལ་རང་ལུས་དང་། ཕྱག་རྒྱ་གང་ཡང་རུང་བ་ལ་བརྟེན་པའི་ཡས་འབབ་དང་། མས་བརྟན་གྱི་དགའ་བཞིའི་ཡེ་ཤེས་ངོས་བཟུང་ཞིང་། དེ་ལ་བརྟེན་ནས་བདེ་ཆེན་འདྲེན་པའི་གོམས་པ་མཐར་སོན་པས། རིལ་པོ་དང་རྗེས་གཞིག་གིས་མཚན་མ་མེད་པའི་རྫོགས་རིམ་ལ་འཇུག་པ་ནི་རླུང་དབུ་མ་སྐུར་ཞུགས་པའི་རྟགས་ཀྱིས་དྲངས་པའི་འོད་གསལ་འཆར་བ་དེ་ཏིང་སྟོང་པ་ཆེན་པོའི་རྣལ་འབྱོར་དང་། དེ་ཡི་ངང་ལས་སྒྱུ་འཕྲུལ་དྲྭ་བའི་ལྷ་སྐུ་གྲིབ་མ་ལྟ་བུར་ལྡང་བ་ཀུན་སྣང་སྙིང་རྗེ་སྒྱུ་མའི་རྣལ་འབྱོར་དང་། དེ་ཡང་བདེ་སྟོང་ཟུང་འཇུག་གི་རྣམ་རོལ་ཆུ་ལ་གཟུགས་བརྙན་ཕོས་པ་ལྟ་བུའི་གསང་ཆེན་རིགས་གཅིག་ཕྱག་རྒྱ་གཅིག་པའི་རྣལ་འབྱོར་དང་། དེའང་གང་སྣང་ཐམས་ཅད་ཞུ་བདེའམ་ལྷན་སྐྱེས་ཀྱི་ལྷ་སྐུར་རྩལ་སྦྱོང་བ་ཕྱག་རྒྱ་སྤྲོས་བཅས་ཏེ་སྐྱེ་ཤི་བར་དོ་གསུམ་དང་ཆོས་མཐུན་དེ་སྦྱོང་བྱེད། འབྲས་དུས་སྐུ་གསུམ་དང་མཐུན་པའི་རྣམ་པ་ལམ་བྱེད་ཡིན་ཅིང་། དེ་ལྟར་རྫོགས་རིམ་ལ་གོམས་པའི་གང་ཟག་གིས། །རྟོགས་པ་དེ་བརྟན་པའི་སླད་དུ་བརྟུལ་ཞུགས་ཀྱི་སྤྱོད་པ་ཚོམ་བུ་ཚོགས་སྒྲུབ་ལ་འཇུག་པར་འགྱུར་ཞིང་། དེའི་འབྲས་བུ་མཐོང་ལམ་ལ་སྦྱོར་བས། དབང་པོ་རྣོ་ན་འོད་གསལ་ལས་ཟུང་འཇུག་གི་ལྷ་སྐུར་དངོས་ལ་ལྡང་ནུས་པ་ཚེ་དབང་དང་། མི་ནུས་ཀྱང་དོན་གྱི་འོད་གསལ་གྲུབ་པ་རྣམ་སྨིན་རིག་འཛིན་གང་རུང་གི་མཐར། ཡེ་ཤེས་སྒྱུ་མའི་སྐུ་ཅན་སྒོམ་ལམ་ཕྱག་ཆེན་རིག་འཛིན་དང་། དེ་ནས་ཁ་སྦྱོར་ཡན་ལག་བདུན་ལྡན་གྱི་གོ་འཕང་འགྲུབ་མ་རག་པའི་མཐར་ལམ་ལྷུན་གྲུབ་རིག་འཛིན་གྱི་བར་ལ། བརྩོན་པ་དང་ལྡན་ན་བར་མ་ཆད་པར་ཉི་ཟླའི་བགྲོད་པ་ལས་ཀྱང་མྱུར་བར་འགྲོ་བ་ཡིན་ནོ། །ཇི་སྐད་དུ། གང་ཞིག་འདི་ལ་མོས་གྱུར་པ། །རྒྱལ་བའི་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །ཞེས་དང་། བདེ་གཤེགས་ཉིད་ཀྱི་ཡུལ་བཞུགས་པ། །འཇིགས་མེད་ཀུན་ཏུ་བཟང་པོར་སྦྱར། །ཞེས་གསུངས་སོ། །གཉིས་པ་ནི། དེ་ལྟར་རྡོ་རྗེ་ཐེག་པ་སྒྱུ་འཕྲུལ་དྲྭ་བའི་སྒོར་ཞུགས་ནས་དད་བརྩོན་དམ་ཚིག་མ་ཉམས་པའི་གང་ཟག་གིས་ལམ་ཚུལ་བཞིན་བསྒོམ་ན། སྔགས་བླ་མེད་ཀྱི་འཕགས་པའི་འབྲས་བུ་མཐོང་བའི་ཆོས་ལ་མངོན་དུ་འགྱུར་ནུས་ཞིང་། དེ་ནུས་ན་སངས་རྒྱས་ཀྱི་གོ་འཕང་ལ་དཀའ་བ་མེད་པར་མྱུར་དུ་བགྲོད་པ་ཡིན་ཏེ། སྦྱང་གཞི་རྒྱུ་རྒྱུད་ལ་བརྟེན་པའི་སྦྱང་བྱ་གློ་བུར་གྱི་དྲི་མ་དག་པ་རབ་ཀྱི་མཐར་ཐུག་པ་ནི་ཕྱོགས་བཅུ་དུས་བཞིའི་ལོངས་སྤྱོད་ཆེན་པོའི་དབྱིངས། རང་སྣང་རྣམ་དག་སྟུག་པོ་བཀོད་པ་ནང་གཡོ་བ་མེད་པར་བཞུགས་པའི་ཆོས་སྐུའི་རང་མདངས། དཔལ་སྒྱུ་འཕྲུལ་དྲྭ་བའི་སྤྲིན་ཆེན་པོ་བསྐོད་དེ། སྤྲུལ་སྐུ་ནམ་མཁའ་དང་མཉམ་པར་སྤྲོ་བས་འཁོར་བ་མ་སྟོང་གི་བར་ལ་གདུལ་བྱའི་དོན་ལྷུན་གྲུབ་ཏུ་སྣང་ཡང་། ངོ་བོ་ལ་འགྱུར་བ་མེད་པ་རྡོ་རྗེའི་སྐུར་བཞུགས་པ་ནི། རྒྱུད་ཀྱི་རྒྱལ་པོ་ལ་བརྩོན་པས་ཐོབ་པའི་འབྲས་བུ་ལགས་ན། སྐལ་བ་དང་ལྡན་པ་དག་གིས་གཡར་དམ་མི་ལྷོད་པར་བྱའོ། །དེ་ལྟར་དཔལ་ལྡན་སྒྱུ་འཕྲུལ་དྲྭ་བའི་སྒྲུབ་ཐབས་འདིའང་། རྩ་བ་དང་བཤད་པའི་རྒྱུད་སྡེ་རྣམས་དང་། རྒྱ་བོད་ཀྱི་མན་ངག་ཚད་མའི་འགྲེལ་བ་རྣམས་དང་། དྲྭ་ཆེན་དྲྭ་ཆུང་མེ་ལོང་ལྟ་བུ་ལ་སོགས་པའི་སྒྲུབ་ཐབས་རྣམས་དང་། རིག་འཛིན་དམ་པ་གཞན་གྱིའང་ཡིག་ཆ་རྣམས་དང་། ཁྱད་པར་སློབ་དཔོན་པདྨ་ལས་སྙན་དུ་བརྒྱུད་པའི་མན་ངག་ཁྱད་པར་དུ་འཕགས་པའི་བདག་པོ། ལམ་འདི་ལས་ཟུང་འཇུག་ལ་གཤེགས་པ་མང་པོའི་འབྱུང་གནས་ཆོས་རྗེ་ཀཿཐོག་པའི་སྙན་བརྒྱུད་དྲི་མ་མེད་པ་རྣམས་ལ་ཡང་ཡང་དཔྱད་དེ་ལེགས་པར་བཀོད་པ་ཡིན་ནོ། །སངས་རྒྱས་གསང་དང་པདྨ་བི་མ་ལའི། ཞལ་ལུང་སོམ་ཉིའི་གནས་མིན་བརྒྱུད་པ་ནི། རྨད་བྱུང་རིན་ཆེན་གསེར་ཕྲེང་ལས་འོངས་པ། །གསང་ཆེན་འདི་འདྲ་འཇིག་རྟེན་གསུམ་ན་དཀོན། །མཁས་འདོད་དུག་ཆུས་མ་སྤགས་ལྷག་བསམ་གྱིས། །ཤིན་ཏུ་གསང་བ་རྨད་བྱུང་སྙིང་པོའི་རྒྱུད། །དཔང་པོར་བཀོད་ནས་གྲུབ་ཐོབ་འབུམ་ཕྲག་ལམ། །ཉམས་མེད་བདུད་རྩིའི་ཟིལ་མངར་བདག་གིས་འཐོར། །ཟབ་ཡང་རྒྱུད་སྡེའི་རྒྱ་མཚོ་གཏིང་མཐའ་བྲལ། །རྡོ་རྗེ་འཛིན་པའི་གསང་བའི་ཡུལ་ཡིན་ན། །བློ་ཆུང་བདག་འདྲས་དཔྱད་པའི་ཉེས་མཆིས་ན། །བླ་མ་རྣམས་དང་གསང་བའི་བདག་ལ་འཆགས། །བསོད་ནམས་གཟི་བརྗིད་རབ་འབར་འགྲོ་བ་མཐའ་ཡས་ཀྱིས། །སྙིང་གི་མུན་སེལ་བདེ་ཆེན་ལྷན་གཅིག་སྐྱེས་པ་ནི། །ཉི་མ་ལྟར་གསལ་རྡོ་རྗེ་སེམས་དཔའི་སྒྱུ་འཕྲུལ་བདེ། །མཁའ་མཐའ་ཟད་པ་དེ་སྲིད་རྟག་ཏུ་སྣང་གྱུར་ཅིག །ཅེས་པའང་རིང་མོ་ནས་བྱ་བར་འདོད་པ་ལ། ཉེ་ཆར་དོན་གཉེར་ཅན་རྣམས་ཀྱིས་བསྐུལ་བ་བཞིན། བླ་མ་དམ་པ་རྣམས་ཀྱི་བཀའ་དྲིན་གྱིས་འཚོ་བའི་གསང་བ་སྒྱུ་འཕྲུལ་པ་ཤཱཀྱའི་དགེ་སློང་རྡོ་རྗེ་འཛིན་པ་ཆོས་ཀྱི་རྒྱ་མཚོས་གངས་ཅན་གྱི་ཁྲོད་ན་མངོན་པར་མཐོ་བའི་སྒྲུབ་གནས་ཆེན་པོ་ཤར་ཀཿཐོག་རྡོ་རྗེའི་གདན་དུ། སྣ་ཚོགས་དབྱིག་གི་ལོ། འབུམ་འགྱུར་ཟླ་བའི་ཚེས་དང་པོ་ནས་བརྩམས་ཏེ། དམར་ཕྱོགས་ཀྱི་ཚེས་བཅུ་ལ་རྫོགས་པར་གྱུར་པའི་དགེ་བས་ལུས་ཅན་ཀུན་གྱིས་དཔལ་རྡོ་རྗེ་སེམས་དཔའི་གོ་འཕང་མངོན་དུ་བྱེད་པར་གྱུར་ཅིག །དགེའོ། །དགེའོ། །དགེའོ།། །།

དཔལ་གསང་བ་སྙིང་པོ་ཞི་བའི་དཀྱིལ་འཁོར་ཆོ་ག་རྣམ་དག་གསེར་ཕྲེང་། ཀཿཐོག་སི་ཏུ་ཆོས་ཀྱི་རྒྱ་མཚོ།

མ ཎྜ ལ བི དྷཱི བཱི ཤུ དྡྷ རཱ ཿ མཱ ལེ ཤྲཱི གུ ཧྱ ག རྦྷ ཤཱ ནྟ སྱ བི ཛ ཧ ར།
དཔལ་གསང་བ་སྙིང་པོ་ཞི་བའི་དཀྱིལ་འཁོར་ཆོ་ག་རྣམ་དག་གསེར་ཕྲེང་བཞུགས་སོ། །
དཔལ་གསང་བ་སྙིང་པོ་ཞི་བའི་དཀྱིལ་འཁོར་ཆོ་ག་རྣམ་དག་གསེར་ཕྲེང་ཞེས་བྱ་བ། དཔལ་ལྡན་བླ་མ་རྡོ་རྗེ་སེམས་དཔའ་ལ་ཕྱག་འཚལ་ཞིང་སྐྱབས་སུ་མཆིའོ། །གཟུང་འཛིན་དགྲ་བཅོམ་སྣང་བ་སྟོང་པ་ཟུང་འཇུག་ཆེན་པོའི་རྒྱལ་སྲིད་སྐྱོང་། །དཔལ་ལྡན་བདེ་སྟོང་ཉིན་བྱེད་ཟེར་གྱིས་གོ་འཕང་པད་དཀར་རབ་ཏུ་བཞད། །དྲི་མེད་མཁའ་ལྟར་དྭངས་པའི་ལུས་ཅན་ཤེས་རབ་སྙིང་རྗེའི་མཚར་སྡུག་མངའ། །རྨད་བྱུང་བླ་མ་གསང་བའི་བདག་པོ་སྙིང་དབུས་ཆུ་སྐྱེས་མཆོག་ཏུ་རོལ། །ཟབ་ཡངས་མདོ་སྒྱུ་སེམས་ཀྱི་བང་མཛོད་ལ། །དབང་སྒྱུར་གྲུབ་པའི་དབང་ཕྱུག་ཀུན་གྱི་རྗེ། །མ་ནོར་རྒྱལ་བའི་ལམ་བཟང་མཚོན་པའི་མིག །སྦྱིན་མཛད་ཀཿཐོག་པ་དེར་བདག་ཕྱག་འཚལ། གསང་ཆེན་བླ་མེད་རྒྱ་མཚོ་ཆེན་པ་ལས། །སྒྱུ་འཕྲུལ་སྙིང་པོ་དགོས་འབྱུང་ནོར་བུའི་དབྱིག །བརྟེན་པ་ཙམ་གྱིས་མཆོག་ཐུན་ཆར་འབེབས་པ། །དཀྱིལ་འཁོར་ཆེན་པོའི་ཆོ་ག་རྣམ་པར་དབྱེ། །དེའང་བཅོམ་ལྡན་སྒྱུ་འཕྲུལ་དྲྭ་བའི་ལམ་མཐའ་དག་རིམ་པ་དབང་གིས་བགྲོད་ཅིང་། དེ་ནི་དཀྱིལ་འཁོར་གྱི་ཆོ་ག་ལ་ལྟོས་པས། །དེའི་ཐོག་མར་ཤེས་པར་བྱ་བ་བསྡུས་པའི་དོན་ལ། །སློབ་དཔོན་དམ་པ་རིན་པོ་ཆེས། །གནས་པ་གཞི་ཡི་དཀྱིལ་འཁོར་དང་། །རྟོགས་པ་མངོན་གྱུར་དེ་བཞིན་ཉིད། །འབྲེལ་པ་ཐུགས་རྗེའི་དཀྱིལ་འཁོར་དང་། །མཛད་པས་འདུལ་བའི་དཀྱིལ་འཁོར་གསུམ། །དེ་བཞིན་ཉིད་ཀྱི་ཏིང་འཛིན་དང་། །རགས་པ་རྟགས་ཀྱིས་ལྷག་པའོ། །སྣང་ཚུལ་གཉིས་ནི་གཟུགས་བརྙན་ཏེ། །མཚན་མར་བྱས་པ་རྟགས་ཀྱི་ལྷག །རང་བྱུང་བྱང་སེམས་ངོ་ཤེས་དང་། །རྩ་སོགས་མཚན་མའི་ལུས་ཀྱིས་ལྷག །ཚོགས་པས་སྒྲུབ་པའི་དཀྱིལ་འཁོར་དང་། །མཛད་པ་མཐར་ཕྱིན་ལྷུན་གྲུབ་བོ། །ཞེས་དང་། དེའང་། མདོར་སྡུས་གཞི་ལམ་འབྲས་བུ་གསུམ། །རང་བཞིན་གནས་པའི་དཀྱིལ་འཁོར་དང་། །དབྱིངས་ཀྱི་གཟུགས་བརྙན་དཀྱིལ་འཁོར་ནི། །མ་བཅོས་སྣང་བས་བཞུ་རུ་བསྡུས། །སོགས་གསུངས་པ་ལྟར་བསྡུ་ན་གསུམ། །ཤེས་པར་བྱ་བ་གཞིའི་དཀྱིལ་འཁོར། །ཤེས་བྱེད་ལམ། ཤེས་པ་མཐར་ཕྱིན་པ་འབྲས་བུའོ། །དང་པོ་ལ་ནང་གསེས་སུ། འཁོར་འདས་ཐམས་ཅད་སྣང་དུས་ཉིད་ནས་ངོ་བོ་དབྱེར་མེད། རྣམ་པ་འགགས་མེད། མཚན་ཉིད་མ་འདྲེས་པར་མཉམ་པ་ཉིད་དུ་རྫོགས་པས། སེམས་ཀྱི་ཆོས་ཉིད་བདེ་གཤེགས་སྙིང་པོ་དཀྱིལ་དང་། བརྟག་པ་གཉིས་ཆོས་འཁོར་དུ་གནས་པ་རང་བཞིན་གཞི་ཡི་དཀྱིལ་འཁོར་དང་། སེམས་ཕུང་ཁམས་སྐྱེ་མཆེད་བགས་ཆག་ཀྱིས་བགོས་པ་གློ་བུར་དྲི་མས་མ་རྟོགས་འཁྲུལ་དུས་ཀྱང་། དོན་ཆོས་དབྱིངས་ལས་མ་གཡོས་པ་མ་རྟོགས་དབྱིངས་གཟུགས་བརྙན་གྱི་དཀྱིལ་འཁོར་ཏེ། གཞི་ལ་རང་བཞིན་ཡེ་གནས་དང་། གློ་བུར་བ་གཉིས་སོ། །གཉིས་པ་ལ་ཕྱི་ནང་གསང་བ་གཉིས་གཉིས་ཏེ། དོན་དམ་ཆོས་ཉིད་གཞི་ལ་བཞུགས་པ། རིག་པ་དགག་བསྒྲུབ་ལས་འདས་པའི་རྩལ་གྱིས་རང་རྙེད་དེ་གོམས་པས་ཡེ་ཤེས་ལྔ་རྫོགས་པ་ཆེན་པོ་ཀུན་བཟང་ཁྱབ་བདལ་གྱི་དོན་མངོན་དུ་བྱེད་པ་ཏིང་ངེ་འཛིན་གྱི་དཀྱིལ་འཁོར་དང་། དབྱིངས་ལས་རགས་སྣང་རྟགས་ཀྱི་ཕྱག་རྒྱར་བཞེངས་པ་ཀུན་རྫོབ་ཆོས་ཅན་ཞི་ཁྲོའི་དཀྱིལ་འཁོར་བསྒོམས་པས་རིག་པ་ལྟར་སྨིན་པ་ལྷག་པ་ཏིང་ངེ་འཛིན་གྱི་དཀྱིལ་འཁོར་ཏེ་དེ་གཉིས་གསང་བ་དང་། རྟོག་ཚོགས་ཞེ་གཉིས་བསྡུ་ན་ཕུང་པོ་ལྔར་འདུས་ཤིང་། དེའང་རྣམ་ཤེས་ཕུང་པོ་ལ་འདུས་པས། ཚོགས་དགུ་ཡེ་ཤེས་ཆེན་པོར་བླ་མའི་མན་ངག་གིས་ངོ་སྤྲད་པ་ལྟར་མཐོང་བ་དང་། ལྷ་རྟོག་དབྱེར་མེད་དུ་ཤེས་པས་མ་དག་པ་ཉིད་དག་པ་དང་མཉམ་པའི་དོན་གོ་བ་མངོན་དུ་གྱུར་པ་ལྟ་གདེས་བྱང་ཆུབ་སེམས་ཀྱི་དཀྱིལ་འཁོར་དང་། འཁོར་ལོ་དྲུག་སྲོག་ཤིང་གསུམ་རྩ་མདུད་ཡི་གེའི་ཚོགས་བཅས་ལྡན་པའི་རྡོ་རྗེའི་ལུས་ལ་རྩ་ལུང་ཁམས་ཡེ་ཤེས་བཞི་ངོ་བོ་ཉིད་ཀྱིས་གྲུབ་པ་གནད་དུ་བསྣུན་པས་བདེ་ཆེན་འདྲེན་པ་ལྷག་པ་བྱང་ཆུབ་སེམས་ཀྱི་དཀྱིལ་འཁོར་ཏེ་དེ་ཉིད་ནང་གི་དཀྱིལ་འཁོར་དང་། དེ་ལྟར་སྣང་བ་ཐམས་ཅད་རྡོ་རྗེ་གསུམ་དུ་གནས་པ་དེ་མཚོན་བྱེད་བརྡ་བྲིས་འབུར་སོགས་བཅོས་མ་ཕྱི་རྡུལ་དུ་ཆུ་ཚོན་སོགས་ཀྱི་ལྷག་པ་གཟུགས་བརྙན་གྱི་དཀྱིལ་འཁོར་དང་། ཆོ་ག་ལྔ་དང་། ཡོ་བྱད་ལྔ། སྔགས་ཀྱི་ཡན་ལག་ལྔ་སོགས་ཚངས་བས། བྲིས་པ་གཟུགས་བརྙན་དང་། སྒོམ་པ་ཏིང་ངེ་འཛིན་དང་། གནས་པ་ལུས་དཀྱིལ་དང་། འདུས་པ་རྡོ་རྗེ་ཚོམ་བུའི་དཀྱིལ་འཁོར་ཐམས་ཅད་ཕྱི་ནང་སྤྲད་དེ། མཆོག་གི་ཚོགས་བསྒྲུབ་པ་ཚོགས་ཀྱི་དཀྱིལ་འཁོར་ཏེ། དེ་ནི་དེ་ཁོ་ནའམ་ཐུན་མོང་གི་དཀྱིལ་འཁོར་ཏེ་ལམ་བགྲོད་པ་ཕྱི་དཀྱིལ་ལས་དང་པོ་པ་དང་། ཡེ་ཤེས་ལ་ཅུང་ཟད་དབང་བས་ནང་དཀྱིལ་དང་དེ་ཁོ་ན་ཉིད་དཀྱིལ་སྦྱོར་ལམ་པའི་དང་། གསང་དཀྱིལ་མཐོང་ལམ་ཡན་ཆད་ཀྱི་སྤྱོད་ཡུལ་ཡིན་པས་དེ་ལྟར་ལམ་ལ་དྲུག་དང་། གསུམ་པ་མཐར་ཕྱིན་འབྲས་དུས་སུ། གཞི་གནས་ལུགས་མ་མཐོང་བ་འཁོར་བ། ཕྱོགས་རེར་མཐོང་བ་ལམ་པ། གསང་སྔགས་སྦྱང་བའི་སྟོབས་ཀྱི་མཐོང་གོམས་མངོན་དུ་གྱུར་པ་རང་དོན་དུ་སྤངས་རྟོགས་མཐར་ཕྱིན་དེ་བཞིན་ཉིད་ཀྱི་དཀྱིལ་འཁོར་དང་། དབྱིངས་ཡེ་གཉིས་སུ་མེད་པའི་མཁྱེན་པས་ཡུལ་བྲལ་སེམས་ཅན་གྱི་ཁམས་ལ་རྟག་པ་རྒྱུན་དུ་དམིགས་པ་མེད་པའི་ཐུགས་རྗེ་ཆེན་པོས་གཟིགས་པ་ཐུགས་རྗེའི་དཀྱིལ་འཁོར་དང་། དེ་མཚོན་བྱེད་ཕྱིར་གསལ་བཞིན་ལག་གི་རྣམ་པ་ཅན་གྱི་ལྷ་སྐུར་སྟོན་པ་ནི། རྟོགས་པ་ཡེ་ཤེས་གཟུགས་བརྙན་གྱི་དཀྱིལ་འཁོར་དང་། དག་མ་དག་གི་གདུལ་བྱ་ལ་ལུགས་འབྱུང་ལྡོག་ཞི་ཁྲོ་རབ་འབྱམས་སྐུ་གསུམ་དང་། ཐེག་རིམ་དགུའི་གསུང་དང་། མཁྱེན་གཉིས་ཡེ་ཤེས་ཀྱི་ཐུགས་ཏེ་འདུལ་བ་གསུམ་གྱིས་གཞན་དོན་མཛད་པ། འདུལ་བའི་དཀྱིལ་འཁོར་ཏེ། འབྲས་བུ་ལ་བཞི་དང་བཅུ་གཉིས་སུ་གནས་པ་གསུམ་དུ་འདུས་སོ། །དེའང་། རང་བཞིན་དང་། ཀུན་རྫོབ་གཉིས་སུ་བསྡུ་བ་དང་། བདུན་དུ་དབྱེ་བ་དང་། དེའང་དུས་བཞི་མཉམ་པ་ཉིད་ལ་མ་འདྲེས་ཡོངས་སུ་རྫོགས་པ་ལྷུན་གྱིས་གྲུབ་པའི་དཀྱིལ་འཁོར་གཅིག་པུ་སྟེ། དབྱེ་བསྡུ་མང་དུ་སྣང་བའང་། རྒྱུད་དོན་མཐའ་དག་དཀྱིལ་འཁོར་དུ་གནས་པས་དཀྱིལ་འཁོར་རྒྱ་ཆེ་བ་ཡིན་ཅིང་། འདིར་དེ་དག་ལས་ལྷག་པ་གཟུགས་དཀྱིལ་ལམ་ཕྱི་དཀྱིལ་དྲང་དོན་ནི། ཚོགས་སྒྲུབ་དང་ནང་ལུས། གསང་བ་བྷ་ག། ཡང་གསལ་དེ་ཁོ་ན་ཉིད་ཀྱི་དཀྱིལ་འཁོར་མཐའ་དག་གི་གཞི་དང་མཚོན་བྱེད། འབྲས་དཀྱིལ་གྱི་རྒྱུ་ཡིན་པས། རིམ་པ་དབང་གི་ལམ་གྱིས་བགྲོད་པ་ལ། ལོ་ཏོག་འདོད་པས་ས་བོན་ལྟར་མེད་ཀ་མེད་དུ་འོང་བའི་ཕྱིར་དེ་ཆད་པ་ལ། རྡོ་རྗེ་ལས་རིམ་ལས། ས་གཞི་མཉམ་དང་ཚངས་ཐིག་དང་། །ཚོན་དང་འབྲི་དང་རྣམ་པ་དང་། །རབ་གནས་སྦྱིན་བསྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ཏན་ནོ། །ཞེས་དོན་བཅུར་གསུང་བའི་དང་པོ་ལའང་། ལས་ཀྱི་ཉེར་བསྡོགས་བྱ་བ། ལས་ཀྱི་གཞི་བཟུང་བ། ལས་དངོས་སོ། །དང་པོ་དཀྱིལ་འཁོར་གྱི་སློབ་དཔོན་སློབ་མའི་མཚན་ཉིད། དེས་ཇི་ལྟར་བྱ་བའོ། །དང་པོ། བཤད་རྒྱུད་རོལ་པ་ལས། ཐོག་མར་རྡོ་རྗེ་སློབ་དཔོན་བཟང་། །སྐུ་གསུང་ཐུགས་ཀྱི་གསང་བའི་བདག །སངས་རྒྱས་ཐེག་པ་ཀུན་ལྡན་པས། །སྙིང་རྗེ་ཆེར་ལྡན་འགྲོ་དྲུག་བཟུང་། །མངོན་པར་སྒྲོལ་བའི་ལམ་ཀུན་གྱིས། །རྒྱ་བ་ཆེན་པོ་གཞན་དོན་སྤྱད། །ཐབས་ཀྱི་ཐེག་པ་ཀུན་ལྡན་ཞིང་། །ཤེས་རབ་ཆེན་པོའི་བདག་ཉིད་ཅན། །བློ་གྲོས་དྲི་མ་མེད་པ་ཡིས། །མྱ་ངན་འདས་ལམ་མངོན་པར་སྦྱོར། །གསང་བའི་རྒྱུད་རྣམས་ཚུལ་ཤེས་ཤིང་། །དེ་དག་དོན་རྣམས་བསྒྲུབ་ནས་སྤྱོད། །དཀྱིལ་འཁོར་ཆེན་པོའི་ལམ་ལ་མཁས། །དེ་དག་སྔགས་པའི་གདམས་ངག་དང་། །དེ་ཉིད་རྡོ་རྗེ་སློབ་དཔོན་མཆོག །རབ་ཏུ་བཟུང་བར་འདོད་པ་ཡི། །ཞེས་སོགས་གསུངས་པའི་དོན་ལམ་རིམ་ལྟར། གསང་ཆེན་བླ་ན་མེད་པའི་ལྟ་སྒོམ་སྤྱོད་པའི་མཛོད་གསུམ་ལྡན་པ། ཕྱི་ནང་གསང་བ་དེ་ཁོ་ན་ཉིད་ཀྱི་དབང་གི་ཆུ་བོ་བཞི་རྫོགས་པ། སྙིང་རྗེས་སློབ་མ་མི་གཏོང་བའི་གཉེར་དང་ལྡན་པ། རྒྱུད་སྡེ་ལ་མཁས་ཤིང་དོན་ཁྲོལ་བ། ཕྲིན་ལས་ཀྱི་ཆོག་འགྲིག་ལ་མཁས་པ། བླ་མ་བརྒྱུད་པའི་མན་ངག་ཉམས་མྱོང་གི་དྲོད་འཆང་བ་སྟེ་མཚན་ཉིད་བརྒྱད་ལྡན་གྱི་སློབ་དཔོན་དེས། སྟོན་པ་སློབ་དཔོན་མཆོད་ཅིང་། དབང་ཐོབ་བརྩོན་འགྲུས་དང་དམ་ཚིག་གིས་ལྟ་བ་རྟོག་པའི་ཤེས་རབ་དང་། དེ་བཞིན་ཉིད་སོགས་ཏིང་ངེ་འཛིན་གསལ་བ། རྩ་བ་ཡན་ལག་གི་དམ་ཚིག་མ་ཉམས་པ། སྔགས་དང་ཕྱག་རྒྱ་ཤེས་ཤིང་། ཡོ་བྱད་དང་ལྡན་པ་སྟེ་གསང་སྔགས་ཀྱི་སྔགས་ཆངས་བའི་མཚན་ཉིད་བརྒྱད་ལྡན་གྱི་སློབ་མ་བརྟགས་ནས། སྣོད་དང་ལྡན་པ་རིན་པོ་ཆེ་ལྟ་བའི་གང་ཟག་ལ་བརྩེ་བས་རྗེས་སུ་འཛིན་པ་བྱ་ཞིང་། སློབ་མ་དེས་ཀྱང་དགེ་སློང་རྡོ་རྗེ་འཛིན་པའི་བླ་མ་གོང་གི་མཚན་ཉིད་དང་ལྡན་པ་བརྟེན་པར་བྱ་བ་མཆོག་ཏུ་གསུངས་སོ། །གཉིས་པ་མོས་སློབ་ཙམ་དུ་སློབ་མ་ལ་དབང་བསྐུར་བ་དང་། ཚོགས་སྒྲུབ་ཀྱིས་ལམ་ངེས་རྫོགས་ཀྱི་ཚུལ་གཉིས་ཀྱི་ཕྱི་མ་ལོགས་སུ་ཤེས་པར་བྱ་ཞིང་། འདིར་སྔ་མའི་དབང་དུ་ནི་དང་པོར་སློབ་དཔོན་གྱིས་བསྙེན་སོགས་དག་པར་བྱ་བར་གསུངས་པས། ཕྱི་ནང་གསང་གསུམ་གྱི་བཟླས་པ་རབ་རྟགས་མ་བྱུང་གི་བར་དང་། འབྲིང་ཟླ་བ་དྲུག་ལ་སོགས་པ་དུས་དང་། ཐ་མ་འབྲུ་འབུམ་མམ། ཇི་སྐད་དུ། དཀྱིལ་འཁོར་གཙོ་བོའི་བཟླས་པ་འབུམ། དེ་ལས་གཞན་པ་ཁྲི་རུ་བཟླ། ཞེས་གསུངས་པ་ལྟར་སྔོན་དུ་འགྲོ་བ་གཞིར་བྱས་ནས་ཁྱད་པར་བསྙེན་པ་ཁ་གསོ་བ་ལ་འཇུག་པའོ། །གསུམ་པ་ལམ་རིམ་ལས། སྡེ་དཔུང་ཆེན་པོས་མི་ཚུགས་ཤིང་། །ས་གཞི་བར་སྣང་ཤིས་པ་དང་། །ལོ་རྒྱུས་རྣམ་པ་གཉིས་ཀ་ལྡན། །ཡིད་འོང་ས་བཙལ་རྒྱས་པར་བྱ། །ཞེས་པའི་ས་ཆོག་ལ་ལས་རིམ་ལས། གཞི་དང་རང་མཚན་སློང་དབང་དང་། །སྦྱངས་བྱིན་བསྲུང་དང་བཟུང་བ་ནི། །དང་པོའི་ཉིང་ལ་གཉིད་དུ་བཤད། །ཅེས་པས་དོན་བརྒྱད་ཀྱི། དང་པོ་ལ། གནམ་ས་བར་སྣང་བརྟག་པ་གསུམ་གསུངས་པས་གནམ་འཁོར་ལོ་རྩིབས་བརྒྱད་འདྲ་བ། ས་པདྨ་འདབ་བརྒྱད་འདྲ་བ། ལོགས་བཀྲ་ཤིས་རྟགས་བརྒྱད་ཚངས་པ། བར་སྣང་འོ་ཁའི་ཆུ་ལྟར་དྭངས་བ། ཤར་གཞོལ། ལྷོ་འཇམ། ནུབ་མཐོ། བྱང་འདུད་པ། ཤར་ལྷོར་སློབ་དཔོན་ཚེ་ལ་གནོད་པའི་བྲག་རི་རྡོ་ཟང་ངེ་བ་གཤིན་རྗེ་གདུག་པའི་མདུང་རྩེ་དང་། ལྷོ་ནུབ་མཚམས་བྱེ་མ་ཤལ་ལེ་བ་སྲིན་མོ་ངུས་པའི་མཆི་རྗེས་འཁོར་མི་དགེ་བར་འབྱུང་བ་དང་། ནུབ་བྱང་ན་གྲོག་པོའི་ཡུལ་རིས་གནོད་སྦྱིན་གྱི་སྦར་རྗེས་ལྟ་བུ་ནོར་ལ་གནོད་པ་དང་། བྱང་ཤར་མདུད་དྲུང་ཤུལ་ལྟ་བུ་ནི་མར་མོའི་སྤར་རྗེས་ཏེ་སློབ་མ་ལ་གནོད་པའི་ས་དགྲ་དེ་རྣམས་དང་བྲལ་བ། ཤར་སྟག་སྐྱ་བོ་ཛ་ལམ་དང་། ལྷོར་གཡུ་འབྲུག་སྟེ་ཆུ་རྒྱུན། ནུབ་ན་བྱ་དམར་པོ་སྟེ་བྲག་མཐོ་བ། བྱང་ན་རུས་སྦལ་ནག་པོ་སྟེ་ཤིང་སྐམ་མཆུ་མིག་ཡོད་པ། འོག་གཞི་ལྷུན་སྡུག་བརྗིད་ཆགས། སྙོམས་ཤིང་འཇམ་ལ་སྣུམ་པ། ཆུ་བོ་དབང་ཕྱོགས་ནས་འབབ་པ། རླུང་ཉུང་། བྱ་སྐད་སྙན་པ་སོགས་ཏེ། དེའང་ལས་རིམ་ལས། ཟུར་བརྒྱད་ལ་སོགས་རྩེ་མང་དང་། །ཆུ་བོ་བཞིན་དུ་མ་བོ་ཞིང་། །མཉམ་ཞིང་འོ་ཁའི་ཆུ་ལྟར་དང་། །ཉི་མ་ཤིན་ཏུ་གནས་པ་ནི། །ནམ་མཁའི་མཚན་ཉིད་ཤེས་པར་བྱ། །མཐོ་དང་འདུད་པ་ནུབ་བྱང་ཡིན། །ཤར་ལྷོར་གཞོལ་ཞིང་འཇམ་པ་ལ། །ཐོ་སྒྲོ་གྲོག་ཐོ་ཆུ་སྣ་ཚོགས། །དཀྱིལ་འཁོར་དབང་སྒྲ་མཚམས་རྟགས་བྱ། །ལྷུན་སྡུག་རི་བོ་ནགས་ཚལ་ལྡན། །རབ་ཏུ་མཉམ་ཞིང་སྣུམ་བག་ལྡན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཙམ་གྱིས་རླུང་ཉུང་ཞིང་། །མེ་ཏོག་ཤིང་ཚལ་བྱ་སྐད་བརྟགས། །ལོ་རྒྱས་ཤིས་པའང་མཆོག་ཏུ་གསུངས། །ཞེས་དང་། བཤད་རྒྱུད་རོལ་པ་ལས། ས་གཞི་ཕྱོགས་མཚམས་སྟེང་འོག་དག །བརྡལ་ཞིང་སྤུངས་དང་བསྐོར་བ་དང་། །རབ་ཏུ་བརྩེགས་པའི་ལྗོངས་དང་བཅས། །གཡས་སུ་འཁྱིལ་ཞིང་བགྱེད་པ་ཡི། །པདྨ་བརྩེགས་དང་འཁོར་ལོའི་དབྱིབས། །བར་ཆད་གནོད་བྱེད་མི་གནས་པའི། །སྔོན་བྱུང་གྲུབ་པའི་བཀྲ་ཤིས་མཆོག །ཡང་དག་རྟོག་སྟེ་ཤིས་པའི་གར། །ཞེས་བརྟག་པར་བྱ་བ་དང་། སྤྱིར་ནི་རྒྱུད་དེ་ལས། གྲོང་ཁྱེར་ཡུལ་འཁོར་བཟང་པོ་དང་། །སྐྱེད་ཚལ་བ་གླང་སླས་དང་དང་། །རི་བོ་ནགས་ཚལ་སྤང་གཤོང་ཉིད། །རྒྱ་མཚོའི་ངོས་དང་ལུང་པའི་ཕུག །སྦྱོར་བའི་བཀོད་པའི་གནས་རྣམས་སུ། །དཀྱིལ་འཁོར་བཟང་པོ་བརྩམས་པའི་ཕྱིར། །ཕུན་སུམ་ཚོགས་པའི་གནས་འཇུག་བྱ། །གསུངས་པས་བཀྲ་ཤིས་པ་དང་ལྡན་པ་བཙལ་བར་བྱའོ། །གཉིས་པས་རང་གི་མཚན་ཉིད་ལ། དེ་ལས། ཐང་ཀ་སོག་ལེ་ལྟ་བུ་དང་། །རྨ་དང་ཕོ་བའི་མཚན་ཉིད་དང་། །ཚྭ་རྐོ་ཟུག་སྔོ་རུས་སྦལ་དང་། །རམ་པ་ཐལ་བ་ཤིང་སོལ་དང་། །གྱོ་མོག་རུས་པ་གསོང་ལ་སོགས། །ནྱ་གྲོ་དྷ་དང་པཱ་ལ་ཤ །ཨུ་དུམྺ་ར་ཨ་ཤྭཏྠ། །ཨརྫུ་ན་ལ་སོགས་པའི་ཚུལ། །འདོད་པ་མ་ཡི་སྤྱད་སྤོང་བྱ། །བཀྲ་ཤིས་གཙང་མ་མེ་ཏོག་ཤིང་། །གཞན་དང་ཁ་དོག་ལྡན་པ་དང་། །རྩིབ་མ་རྒྱུས་པ་རབ་ཉུང་ཞིང་། །ལྷག་པར་གྱུར་པ་མཆོག་ཏུ་བཤད། །ཅེས་པའི་སྤང་བླང་མ་ནོར་བ་བྱ་སྟེ། མཐོ་དམན་ཅན་དང་། རྩུབ་པོ་དང་། རྩི་ཤིང་མི་སྐྱེ་བ་དང་། ཚ་སྒོ་ཅན་དང་། ཧ་ཅང་གཤེར་བ་དང་། བརྐོས་པ་ནི། གསེག་ཐལ་ཤིང་དང་། གྱོ་དུམ། རུས་པ་སྲོག་ཆགས་མེད་པ། གྱོང་བ་གས་གྲུམ་མ་སོང་བའི་གཞི་ལེགས་པར་བཀྲ་ཤིས་པའི་རྩ་དང་མེ་ཏོག་ཡོད་པ། ཁ་དོག་བཟང་ཞིང་སྣུམ་བག་ཆེ་བ། བརྐོས་པའི་ཁུང་བུས་དེས་བཀང་བ་ནི་ལྷག་པར་འགྱུར་བའོ། ༈ །གསུམ་པས་བསླང་བ་ལ་སྣང་བ་ལ་བསླང་བ་དང་མི་སྣང་བ་ལས་སོ། །དང་པ་ོརང་ལ་དབང་བ་བཙལ་མི་དགོས་ཤིང་། གཞན་རྒྱལ་པོའམ་བློན་པོའམ། དགེ་འདུན་སྡེ་བོ་ཆེའི་མངའ་རིས་ཡིན་ན། དང་པོ་ཚིག་དང་། རྟེན་དང་། རིན་མཇལ་བ་གང་རུང་གིས་བདག་དབང་བར་ཆད་མེད་པར་བྱའོ། །གཉིས་པ་ལས་ལྷ་ལས་སློང་བ་དང་། ཞིང་སྐྱོང་ལས་སློང་བ་དང་། བདེ་བར་གཤེགས་པ་ལ་སློང་བའོ། །དང་པོ། ས་ལྷའི་མཎྜལ་བ་བྱུང་བྱུགས། །བཟང་པོའི་དྲིས་བརླན་ག་བུར་དང་། །ཙནྡན་ཐིག་ལེར་ཚོམ་བུ་བཀོད། །སྟེང་དུ་མཉྫའི་ལ་གནས་པ། །ས་བདག་གཙོ་འཁོར་དཀར་ཟླུམ་ནི། །པད་འདབ་བཞི་པ་མཛེས་པར་བཀོད། །ཤར་དུ་ཞབས་བསིལ་མཆོད་ཡོན་སྣོད། །ཤར་ལྷོར་མཚམས་འཛིན་ལྷོ་ནུབ་སྤོས། །ནུབ་ཏུ་མར་མེ་ནུབ་བྱང་དྲི། །བྱང་དུ་ཞལ་ཟས་བྱང་ཤར་ནི། །མེ་ཏོག་དག་གི་ཕུང་པོའོ། །རིན་ཆེན་གསེར་སྐྱེམས་ཟུང་བཤམས་ནས། །འདུས་པ་ཡོད་ན་གསོལ་གདབ་དང་། །བདག་གི་རྣལ་འབྱོར་བཟླས་པ་དང་། །འོད་གསལ་ངང་དུ་བསྡུས་ནས་སླར། །ཧཱུྃ། བཛྲ་དྷྲིཀ྄ །རང་ཉིད་དཔལ་རྡོ་རྗེ་སེམས་དཔའི་སྐུར་གྱུར། ལས་རིམ་ལས་མི་འཆི་ཐ་བར་སྦྱོར་བསྐྱེད་པར་གསུངས་ཀྱང་། སློབ་དཔོན་པདྨའི་མན་ངག་ལ་རྡོར་སེམས་ཀྱིས་མཛད་གསུངས། རྃ་ཡྃ་ཁྃ། ༀ་ཨཱཿཧཱུྃ། ཟག་པ་མེད་པའི་འདོད་ཡོན་གྱི་མཆོད་སྤྲིན་ནམ་མཁའ་གང་བར་གྱུར། ཚོམ་བུ་བསང་སྦྱངས། སྟོང་པའི་ངང་ལས་པད་ཟླ་ལ་ལཱཾ་སེར་པོ་ལས་བྱུང་བའི་ས་ཡི་ལྷ་མོ་གསེར་མདོག་ཅན་ཞི་འཛུམ་ཞལ་གཅིག་ཕྱག་གཉིས། དར་དང་རིན་པོ་ཆེས་བརྒྱན་ཅིང་། གཡས་གསེར་གྱི་བུམ་པ་རིན་པོ་ཆེས་གང་བ་དང་། གཡོན་མཆོག་སྦྱིན་གྱི་རྒྱས་དཔང་པོར་ཁས་ལེན་པའི་ཕྱག་རྒྱ་ཅན། ལྷ་མོ་སངས་རྒྱས་སྤྱན་མའི་རང་བཞིན་ཕག་གི་ཁྲི་ལ་རོལ་ཅིང་འཇམ་ཚོན་སྣ་ལྔའི་འོད་ཟེར་འཕྲོ་བར་གྱུར། ༀ་མ་ཧཱ་ཤཱུ་ནྱཱ་ཏ་སོགས་རྣམ་སྣང་བདག་པོའི་རིགས་ལྔའི་དབུ་བརྒྱན་དང་། ༀ་སརྦ་ཏ་ཐཱ་ག་ཏ་ཀཱ་ཡ་སོགས་ལྔས་བྱིན་རླབས། ཧཱུྃ་གི་འོད་ཀྱིས་བསྐུལ་བས་ས་འོག་ནས་ས་ཡི་ལྷ་མོ་འཁོར་བཅས་སྤྱན་དྲངས། བཛྲ་ས་མ་ཡ་ཧཱུྃ་ཛ༔ ཞེས་སྙན་བསྣན་ལ། དོན་དམ་གསེར་གྱི་ས་ལ་མངའ་མཛད་པའི། །རིན་ཆེན་མཛེས་པའི་ཕོ་བྲང་ཡིད་འོང་གདལ། །ཉི་ཟླ་སྐར་མ་དག་གིས་རབ་བརྒྱན་ཏེ། །ཡིད་དུ་འོང་བའི་ཕོ་བྲང་དབུས་ན་བཞུགས། །མེ་ཏོག་དབུས་ཀྱི་ས་ལ་མངའ་མཛད་དེ། །དབུས་ཀྱི་ས་བདག་ལྷ་མོ་སངས་རྒྱས་སྤྱན། །སྐུ་མདོག་གཙོ་མ་རིན་ཆེན་གསེར་གྱི་མདོག །ཕྱག་གཡས་རིན་ཆེན་གསེར་གྱི་བུམ་པ་བསྣམས། །ཕྱག་གཡོན་མཆོད་སྦྱིན་ཕྱག་རྒྱ་སྟོན་མཛད་པའི། །དབུས་ཀྱི་ལྷ་མོ་འཁོར་དང་བཅས་པ་རྣམས། །བདུད་རྩི་མཆོད་སྦྱིན་མགྲོན་དུ་སྤྱན་འདྲེན་ན། །བྱམས་ཐུགས་བརྩེ་ཕྱིར་གནས་འདིར་གཤེགས་སུ་གསོལ། །ༀ་ཨེ་ཧྱ་ཧི་བ་སུདྷ་རཱི་མ་ཧཱ་ཀ་རུ་ཎི་ཀ་དྲི་ཤྱ་ཧོཿ ས་མ་ཡ་ཧོཿ ས་མ་སྟྭཾ། ཛཿཧཱུྃ་བཾ་ཧོཿ གཉིས་སུ་མེད་པར་ཐིམ། ༀ་པྲི་ཐི་ཝི་དེ་ཝཱི་ས་པ་རི་ཝཱ་རེ་བྷྱཿ ཨརྒཾ། པཱ་དྱཾ་ནས། བཛྲ་པུཥྤེ་པྲ་ཏིཙྪ་སྭཱ་ཧཱ། ནས་ཤབྟའི་བར་གྱིས་མཆོད། འབྲུ་གསུམ་གྱིས་ནང་མཆོད་འབུལ། སྔགས་གོང་གི་མཐར། ༀ་ཨཱ་ཀ་རོ་སོགས་བཏགས་པ་ལན་གསུམ་གྱིས་གཏོར་མ་འབུལ། ལྷ་མོ་ཆེན་མོ་ས་འཛིན་འཇིག་རྟེན་སྐྱོང་། །གསེར་མདོག་ཕྱག་ན་གསེར་གྱི་བུམ་པ་བསྣམས། །འཇའ་ཚོན་འོད་ལྡན་ཕག་གི་ཁྲི་ལ་བཞུགས། །དེ་ལ་ཕྱག་འཚལ་བསྙེན་བཀུར་མཆོད་པ་འབུལ། །རྒྱལ་བ་རྣམས་ཀྱི་སྤྱན་སྔར་དམ་བཅས་ནས། །རྒྱལ་བའི་བསྟན་བསྲུང་རྒྱལ་བ་བྱང་ཆུབ་ཀྱི། །ཤིང་གི་དྲུང་བཞུགས་བདུད་སྡེ་ལས་རྒྱལ་བའི། །དབང་པོར་མཛད་པའི་ལྷ་མོ་ཁྱེད་ལ་བསྟོད། །ཧཱུྃ། མ་ལུས་ས་འདིར་དབང་བྱེད་པའི། །བདག་པོ་ཁྱེད་ཀྱིས་དཔང་མཛོད་ཅིག །མ་ལུས་མཆོད་དང་གཏོར་མའི་རྫས། །བདག་གིས་ཕུལ་བ་འདི་བཞེས་ལ། །སྔོན་གྱི་བདེ་གཤེགས་བཀའ་བཞིན་དུ། །ད་ལྟ་བྱིན་རླབས་ལྷག་པའི་གནས། །དུས་གསུམ་ཀུན་ཏུ་བསྟེན་པ་ཡི། །ས་གཞི་བཟང་པོ་ཤེས་པ་དང་། །དངོས་གྲུབ་ཐམས་ཅད་ཉེ་བར་མཛོད། །ལྷ་མོ་ཁྱོད་ནི་བློ་དང་ལྡན། །གསེར་མདོག་བུམ་པའི་མཚན་མས་མཛེས། །འོག་གི་བགེགས་ཚོགས་མངའ་མཛད་ཅིང་། །གནས་རྣམས་བསྐྱོད་པའི་བློ་ལྡན་ཡང་། །དུས་ཚོད་འདི་ནས་དཔང་པོར་མཛོད། །ༀ་པྲ་ཏི་བྷྱཿསྭཱ་ཧཱ། བརྒྱ་རྩ་བཟླས། འདོད་པའི་ལས་རྩོལ་བ་ལ་དགྱེས་པའི་མདངས་ཕྱུང་སྟེ་འཁོད་པར་གྱུར། གཉིས་པ་ནི། སྒྲུབ་ཐབས་ལས་འབྱུང་བའི་དཀར་གཏོར་བསང་སྦྱང་ནས། མཉམ་ཉིད་ངང་དུ་བསྔོ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདིར། །བདག་ཞུགས་ཁྱེད་ཀྱིས་སྩལ་དུ་གསོལ། །ཅེས་དང་གསེར་སྐྱེམས་ཀྱང་ཕུལ་ལ། ཡ་ཏི་གཙྪ་ས་རང་གནས་སུ་བཏང་སྟེ་མཆོད་གཏོར་གཤེགས། ལག་གཡས་མཆོག་སྦྱིན་གྱི་རྒྱ་བསྟན་ཏེ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ས་ཡི་ཕྱོགས་འདིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་དཀྱིལ་འཁོར་བཞེངས་པ་ལ་དབང་པོར་མཛད་དུ་གསོལ། ལག་ཁུ་ཚུར་གྱེན་བསྟན་མཐེའུ་ཆུང་སྤྲེལ། མཛུབ་མོ་རྩེ་སྤྲད་འདེགས་རྒྱས། བིགཱ་ཀྲ་མ་ཡཾ། ལྷ་མོ་ནམ་མཁའ་ལ་བཞུགས་པར་གྱུར། དེ་ནས་སློབ་དཔོན་གྱིས། རང་གི་ཐུགས་ཀ་ནས་འོད་ཟེར་འཕྲོས་པས་བདེ་བར་གཤེགས་པ་ནམ་མཁའ་གང་བར་སྤྱན་དྲངས། ༀ་བཛྲ་ས་མ་ཡ་ཧཱུྃ་ཛཿ ཧཱུྃ་ཧཱུཾ་ཧཱུཾ་ཧཱུཾ། བདེ་བར་གཤེགས་པ་ཐམས་ཅད་བདག་གི་ལུས་ལ་ཐིམ་སྟེ་ལུས་འོད་ཀྱི་གོར་བུར་གྱུར། ཧཱུྃ་བཛྲ་དྷྲིཀ྄ །སྐད་ཅིག་གིས་སྟོང་པའི་ངང་ལས། རང་ཉིད་དཔལ་རྡོ་རྗེ་སེམས་དཔའ་ཞེ་སྡང་རྡོ་རྗེ་སྐུ་མདོག་སྔོ་ནག་གཡས་རྡོ་རྗེ་གཡོན་དྲིལ་བུ་འཛིན་པ་སོགས་ནས། བདག་ཉིད་ཅན་དུ་གྱུར། ཞེས་པའི་བར་སྒྲུབ་ཐབས་ནས་འབྱུང་བ་ལྟར་བརྗོད། དེ་ཡི་སྤྱན་ཉི་ཟླ་དང་། ཐུགས་ཀར་ཧཱུྃ། རྐང་མཐིལ་ལ་རྡོ་རྗེའི་རང་བཞིན་གྱི་འབར་བའི་ཧཱུྃ་རེས་མཚན་པར་གྱུར། ཧཱུྃ། སྟོབས་ཆེན་ལྷ་དང་ཀླུར་བཅས་པ། །གནོད་སྦྱིན་སྲིན་པོ་བགེགས་ཀྱི་ཚོགས། །ཤ་ཟ་འབྱུང་པོ་མཁའ་འགྲོའི་གདོན། །ལྷ་སྲིན་ལྟོ་འཕྱེ་ནམ་མཁའ་ལྡིང་། །དྲི་ཟ་གྲུ་བུམ་གསང་བ་པོ། །མ་ལུས་བགེགས་ཀྱི་ཚོགས་བཅས་རྣམས། །རྡོ་རྗེ་འཆོལ་བའི་མཚོན་ཆ་ཡིས། །བཤིག་ཅིང་དཔྲལ་གཏུབ་བརླག་བྱེད་པས། །གནས་འདིར་ཕྱོགས་སུ་གནས་མ་བྱེད། །ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། །རྗེ་བཙུན་རྩ་བརྒྱུད་ཀྱི་བླ་མ་དམ་པ་རྣམས་ཀྱི་བདེན་པ་དང་། དོན་དམ་རྣམ་པར་དག་པའི༴ ཀུན་རྫོབ་བསླུ་བ་མེད་པའི༴ བདེན་པ་ཆེན་པོའི་ནུས་མཐུས། ས་ཡི་ཕྱོགས་འདིར། སེམས་ཅན་ཐམས་ཅད་རྡོ་རྗེ་འཆང་ཆེན་པོ་ཐོབ་པའི་ཆེད་དུ། བཅོམ་ལྡན་འདས་དཔལ་རྡོ་རྗེ་སེམས་དཔའ་གསང་བ་སྒྱུ་འཕྲུལ་དྲ་བའི་དཀྱིལ་འཁོར་ཆེན་པོ་བཞེངས་སུ་གསོལ་གྱི་གང་སུ་དག །ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། བརྗེད་བྱེད་དང་། མཁའ་འགྲོ་དང་། འབྱུང་པོ་དང་། གྲིབ་གནོན་དང་། རྒན་ཕོ་མོ་དང་། ནམ་མཁའ་ལྡིང་དང་། མིའམ་ཅི་དང་། རིགས་སྔགས་གྲུབ་པ། གཡོགས་དང་འཁོར་དུ་བཅས་པ་ཐམས་ཅད། རྡོ་རྗེ་འཛིན་པའི་བཀའ་བཞིན་གཞན་དུ་དེངས་ཤིག །བཀའ་ལས་འདའ་བར་བྱེད་པ་ཐམས་ཅད་གཉིས་སུ་མེད་པའི་ཡེ་ཤེས་ཀྱི་རང་བཞིན་ཞེ་སྡང་རྡོ་རྗེའི་ཕྱག་ན་བསྣམས་པའི་རྡོ་རྗེ་མེ་རབ་ཏུ་འབར་བ་འདིའི་སྤྲུལ་པའི་སྤྲིན་གྱིས་མགོ་བོ་ཚལ་པ་བརྒྱར་འགེམ་པར་འགྱུར་ཏེ། ཡུངས་དཀར་ཧཱུྃ་དང་ཁྲོ་བོ་དང་། རྡོ་རྗེ་བསམ་སྟེ་དོར། གུ་གུལ་དང་། རོལ་མོའི་ཚོམ་རྔམ་བྱ། དྲིལ་བུ་དྲག་ཏུ་འཁྲོལ་ཞིང་ཧཱུྃ་གི་གླུ་དང་། རྡོ་རྗེ་སྙམས་པས་གསོར་བའི་འགྱིང་བག་དང་བཅས་དཀྱིལ་འཁོར་གྱི་མཐའ་ནས་རྡོ་རྗེའི་འགྲོས་ཀྱིས་གཡས་བསྐོར་དུ་བགེགས་གསལ། ཧཱུཾ་ཧཱུཾ་ཧཱུཾ། ༀ་ཛྭ་ལ་བཛྲ་ཧཱུཾ་སོགས་ནས། བགེགས་རྣམས་བརྒྱལ་ཞིང་གཏོར། བར་སྒྲུབ་ཐབས་བཞིན་བརྗོད། ཁྲོ་བོ་ཐམས་ཅད་སླར་འདུས་ནས་སྲུང་བའི་གུར་ཁང་སྣ་ཚོགས་རྡོ་རྗེ་རབ་ཏུ་འབར་བས་ཕྱོགས་ཀུན་གཏམ་པར་གྱུར། རང་གནས་སུ་འདུས་ཏེ། ལག་པ་གཡས་པའི་མཐེའུ་ཆུང་མནན་པ་ཏྲི་ཤུ་ལའི་རྒྱས། ཇི་ལྟར་ཆེ་མཆོག་རྡོ་རྗེ་ཡིས། །དཔུང་བཞི་བདུད་ཀྱི་སྡེ་བདུལ་ནས། །རྒྱལ་སྲིད་ཆོས་ཀྱིས་དཔང་བཙུགས་པས། །དེ་བཞིན་དུ་ནི་བདག་གིས་ཀྱང་། །ངེས་པར་བྱ་ཕྱིར་དཀྱིལ་འཁོར་བྲི། །ས་ཡ་དངོས་གྲུབ་སྩལ་དུ་གསོལ། །ༀ་རཏྣ་པཱ་ཤཾ་སིདྡྷི་ཀུ་རུ་ས་མ་ཡ་སྟཾ། བར་འདིར་ཧཱུྃ་བཞི་བརྗོད། ལྷ་མོ་རང་བཞིན་གཉིས་མེད་ཕྱིར། །འཛུམ་པའི་མདངས་ཀྱིས་འོད་ཁྱབ་པའི། །ཐམས་ཅད་རིན་ཆེན་ངོ་བོ་སྟེ། །ཡེ་ཤེས་ལྔ་ཡི་རང་བཞིན་དུ། །བརྟན་བྱས་དངོས་གྲུབ་མཆོག་ཏུ་གྱུར། །རིག་པ་འཛིན་པ་ཁྱེད་དཀྱིལ་འཁོར་ལས་ཅི་བདེ་བར་བྱོས་ཤིག །ཅེས་གནང་བ་སྩལ་ནས། ལྷ་མོ་ས་ལ་ཐིམ། རོལ་མོ་དང་བཅས་མཆོད་པ་གཤེགས། གསུམ་པ། དབུས་དེར་སྔར་བཞིན་མཆོད་པ་དང་། གཏོར་མ་རྒྱན་ལྡན་ལེགས་པར་བཤམས། ས་སློང་འདི་དབུས་ལུགས་པ་གོང་དུ་མཛད་ཀྱང་། བཤད་རྒྱུད་དང་ཁམས་ལུགས་པའི་མན་ངག་གི་ལུགས་ལ་ལ་འདིར་མཛད་གསུངས། ནམ་མཁའ་གང་བའི་བདེ་བར་གཤེགས་པ་དང་། མདུན་གྱིས་གཞིར་དཀྱིལ་འཁོར་གྱི་འཁོར་ལོར་རྟེན་དང་བརྟེན་པར་བཅས་པ་གསལ་བར་གྱུར། ཐོས་བསམ་མཆོད་ཡོན་སོགས་དང་། ༀ་ན་མ་སརྦ་སོགས་ཨརྒཾ་ནས་ཤཔྟའི་བར་དང་། ཀུན་བཟང་། མཆོད་ཡོན། ཞབས་བསིལ། སྒེགས་མོ་བརྒྱད། མཐར། ཞལ་ཟས་དང་། རོལ་མོ་བཅས་སྒྲུབ་ཐབས་ནས་འབྱུང་བས་མཆོད། ༀ་ཨཱཿཧཱུྃ་སརྦ་བནྫ་ས་ནང་མཆོད་ཕུལ། མཉམ་ཉིད་མི་གཡོས་བསྟོད། རྡོ་རྗེ་གསོར་དྲིལ་བུ་འཁྲོལ་བ་དང་བཅས། གཏོར་མའི་རྩེར་སྤོས་ཕུལ་ལ། ལྕེ་ཧཱུྃ་ལས་སྐྱེས་པའི་རྡོ་རྗེར་གྱུར། །ཕྱོགས་རྣམས་ཀུན་བཞུགས་སངས་རྒྱས་དང་། སྲས་དང་དཀྱིལ་འཁོར་དགོངས་སུ་གསོལ། །འདིར་ནི་དཀྱིལ་འཁོར་བྲི་འཚལ་བས། ། དངོས་གྲུབ་དམ་པའི་དཀྱིལ་འཁོར་གཞི། །ས་འདི་བདག་ལ་སྩལ་དུ་གསོལ། །ཐུགས་རྗེ་ཉི་མས་ཁྱད་མཛད་པའི། །རྒྱལ་བ་རྣམས་ནི་མངོན་བཞུགས་ཏེ། །མ་ལུས་འགྲོ་རྣམས་ཐམས་ཅད་དང་། །ཁྱད་པར་བདག་གིས་སློབ་མ་ལ། །བྱིན་རླབས་ལྷག་པར་གནས་པའི་ཕྱིར། །གནས་འདི་བརྩེ་བར་འདོད་པ་ལགས། །ཐམས་ཅད་མཁྱེན་པ་ལྷ་ཡི་མཆོག །ཡང་དག་བསྟོད་ཅིང་འདུད་པའི་གནས། །དཀྱིལ་འཁོར་བཟང་པོའི་གནས་རྫོགས་པར། །བྱིན་རླབས་དབང་བསྐུར་ཀུན་སྩོལ་ཅིག །ཡང་དག་རྫོགས་པའི་བྱང་ཆུབ་ཏུ། །བདག་ཅག་བསམ་པ་བརྟན་བསྐྱེད་པས། །ཕྱོགས་རྣམས་ཀུན་ནས་དགོངས་མཛད་དེ། །ལམ་མཆོག་དཔལ་ལྡན་བླ་ན་མེད། །དུས་གསུམ་ཀུན་ཏུ་བསྔགས་པ་ཡི། །བྱ་བ་ཆེན་པོ་ཡོངས་རྫོགས་མཛོད། །ལན་གསུམ་གྱིས་གསོལ་བ་བཏབ་པས། བདེ་བར་གཤེགས་པ་རྣམས་ཀྱི་ཐུགས་ཀ་དང་། དཀྱིལ་འཁོར་གྱི་ཐུགས་ཀ་ནས་འོད་ཀྱིས་ས་ལ་ཕོག་པས་ས་དེ་བཀྲ་ཤིས་པར་བསམ་ལ། ༀ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །སོགས་ཤོ་ལོ་ཀ་གསུམ་དང་རྟེན་སྙིང་བརྗོད། མེ་ཏོག་གི་ཆར་བསྙིལ། རྡོ་རྗེ་འདེགས་རྒྱས། ཧཱུྃ་བེ་གཱ་ཀྲ་མ་ཡཾ། དཀྱིལ་འཁོར་གྱི་འཁོར་ལོ་ནམ་མཁའ་ལ་གཤེགས་པར་གྱུར། མཆོད་པ་རྣམས་བསྡུའོ། །བཞི་པ་དབང་དུ་བྱ་བ་ནི། ཟངས་སམ་ཙནྡན་སོགས་དམར་པོའི་ཤིང་ཕུར་བུ་རྩེ་ཟླ་གམ་བྱས་པ་གདན་བཅས་མདུན་དུ་བཀོད་དེ། བསང་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་དབང་མཆོག་ཁྲོ་བོ་པདྨ་རཱ་གའི་མདོག་དང་འདྲ་བ་ཞལ་གཅིག་ཕྱག་བཞི་པ། དང་པོ་གཉིས་པདྨ་དང་ཞགས་པ། འོག་མ་གཉིས་ཕུར་བུ་སྒྲིལ་བ། སྨད་ཕུར་བུ་ཟླ་གམ་འབར་བར་གྱུར། བཛྲ་ས་མ་ཛཿས་བསྟིམ། ཛ་ཧཱུཾ་བཾ་ཧོ། དབྱེར་མེད་དུ་བྱས། ཀཱ་ཡ་བཛྲ་སོགས་སྐུ་གསུང་ཐུགས་བྱིན་རླབས། ༀ་པདྨ་ཀཱི་ལི་ཀཱི་ལ་ཡ་ཝ་ཤཾ་ས་མ་ཡེ་ཧཱུཾ། ཝ་ཤཾ་ཀུ་རུ་སྭཱ་ཧཱ། ཞེས་དཀྱིལ་འཁོར་གྱི་དབུས་སུ་བཏབས་པ། ཕུར་བུ་ལས་བྱུང་བའི་འོད་ཀྱིས་དཀྱིལ་འཁོར་གྱིས་ཐམས་ཅད་བདག་གི་དབང་དུ་གྱུར། ལྔ་པ་ལ། ལས་རིམ་དུ། སྦྱང་བ་ལས་མེ་སྔགས་ཕྱག་རྒྱ། ཏིང་ངེ་འཛིན་གྱིས་དག་པར་གྱུར། ཞེས་པས་བཞི་ཡིས་དང་པོ་ལས་དང་། བྱ་བ་བས་སྦྱངས་པ་ནི། དྲང་སྲོང་གནས་དང་བ་གླང་ལྷས། །ཕུག་དང་རི་ཡི་རྩེ་མོ་དང་། །ས་གཞི་གང་ན་འཐས་པ་དང་། །ཁང་སྟོང་དང་ནི་རྡོ་ལེབ་དང་། །མཆོད་རྟེན་དྲུང་དང་འབབ་ཆུའི་གླིང་། །མཚོ་འགྲམ་མ་གཏོགས་གཞན་དག་ཏུ། །འཇིག་རྟེན་ས་ལ་དབང་བྱེད་པ། །ས་བདག་ལྟོ་འཕྱེ་བརྟག་པར་བྱ། །མ་ནོར་མཚམས་སུ་ཟུར་བསྟན་པའི། །གྲུ་བཞིར་བཅད་ལ་ཕྱོགས་བཞི་གང་། །ཆ་བཅུ་རེ་དབྱེ་ཆ་ཆེན་ཡིན། །རེ་རེ་ཆ་ཕྲན་དགུ་རེར་དབྱེ། །ཕྱོགས་རེར་དགུ་བཅུ་དགུ་བཅུར་འགྱུར། །ཁྱིམ་ཟླ་གསུམ་རེའི་ཞག་དང་མཉམ། །མཐའ་བསྐོར་རེའུ་མིག་བསྡོམས་པ་ནི། །ཁྱིམ་ཞག་གསུམ་བརྒྱ་དྲུག་ཅུར་མཚུངས། །ཁྲུམ་ཉ་སྟོན་རར་བརྩིས་པ་ཡིས། །བུ་མོའི་ཁྱིམ་ཟླ་ནས་བརྩམས་ཏེ། །སྟོན་གསུམ་མགོ་ཤར་དགུ་གསུམ་ལྷོ། །དཔྱིད་གསུམ་ནུབ་ལ་དབྱར་གསུམ་བྱང་། །གཞོག་གཡོན་འོག་བཅུག་གཡས་བསྐོར་གྱིས། །ཞག་རེར་རེའུ་མིག་རེ་རེ་འཕོ། །ལྟོ་བའི་ཐད་ནས་བརྐོ་བར་བཤད། །དེ་ཕྱིར་བརྐོ་ས་གློ་བུར་དུ། །བརྟག་པའི་ཐབས་ནི་ཚངས་ཟུར་བཏབ། །དེ་སྟེང་མགོ་བོ་གང་གནས་པའི། །ཟླ་ཞག་བཙལ་ལ་དེའི་ཐད་དྲང་། །ཕྱོགས་གཞན་ཐིག་བཏབ་ཚངས་ཐིག་སྟེ། །དེ་དཀྱིལ་གྱིས་ནི་གདེངས་ཀའི་བར། །ཆ་མཉམ་ལྔ་རུ་བགོ་བྱས་ལ། །དེ་ཡི་ཆ་གཅིག་གིས་ཚད་པས། །གདེངས་ཀའི་རྩེ་ནས་མར་གསུམ་དང་། །ཚངས་ཐིག་མདུན་དུ་ཕྱེད་དང་གཉིས། །དོར་བའི་ཡས་མར་ཆ་གཅིག་དང་། །ཕྲད་ལ་ཆོ་ཕྱེད་གནས་པ་དེ། །ལྟོ་བའི་ཐད་ཡིན་བརྐོ་བའི་སའོ། ༈ །ཁྱིམ་གྱི་ཟླ་ཞག་ཚོལ་ལུགས་ཀྱང་། །གང་བརྩིའི་ཉི་སྐར་མཁའ་རོས་བསྒྱུར། །ཆུ་ཚོད་བཅུག་ལ་མདའ་ཡོན་ཟླས། །ཐོབ་པ་ལུག་ཁྱིམ་ནས་བརྩམས་ཏེ། །ཁྱིམ་ཟླ་འདས་པའི་གྲངས་ཡིན་ལ། །ལྷག་མ་མཁའ་མེས་བསྒྱུར་བ་ལ། །ཆུ་སྲང་མིག་གིས་བགོས་ཐོབ་གཞུག །མདའ་ཡོན་ཟླས་ཕོག་བརྩི་བཞིན་པའི། །ཞག་འདི་དང་བཅས་ད་ལྟར་བའི། །ཁྱིམ་གྱི་འདས་ཞག་རྟོགས་པར་འགྱུར། །ལུག་གླང་འཁྲིག་ཀར་སེང་བུ་མོ། །སྲང་སྡིག་གཞུ་ཆུ་བུམ་ཉ་རྣམས། །དཔྱིད་འབྲིང་ནག་ཟླ་ནས་བཟུང་སྟེ། །ལྟོ་འབྱོར་ཁྱིམ་ཟླ་བཅུ་གཉིས་མིང་། ༈ །དེ་ལ་ལྟོ་འཕྱེ་རོ་སྟོང་མི། །གདེངས་ཀ་དང་ལྡན་རོ་སྨད་སྦྲུལ། །ལག་གཡོན་རྣ་བ་གཡོན་ལ་བཀབ། །གཡས་པ་རིན་ཆེན་ཐོགས་ནས་སུ། །དཀུར་བསྟན་རོ་སྨད་ལྟོ་ཕྱེའི་གཟུགས། །དེ་ཡང་ངོ་བོ་མཐའ་ཡས་དཀར། །མཇུག་རྩེར་རིགས་ལྡན་སྔོན་པོ་དང་། །གསང་བར་སྟོབས་རྒྱུ་དུ་བའི་མདོག །ལྟེ་བར་དུང་སྐྱོང་དཀར་པོ་དང་། །དཔུང་པ་པད་ཆེན་གསེར་གྱི་མདོག །ནོར་རྒྱས་སྙིང་གར་ལྗང་ཁུ་དང་། །འཇོག་པོ་དམར་པོ་མགྲིན་པ་ལ། །རྣ་བར་པདྨ་དཀར་པོ་མཛེས། །སྤྱི་རུ་མཐའ་ཡས་སྔོན་པོ་གནས། །བགེགས་མཐར་བྱེད་པ་མིག་ཏུ་བསྒོམ། །ས་མཁན་སྔགས་པ་རང་ཉིད་ཀྱང་། །བགེགས་མཐར་བྱེད་དང་ཏོག་ཙེ་ནི། །གསེར་རྡོར་རྩེ་ལྔ་ལག་གཡས་སྟེང་། །གཡོན་འོག་གིས་བཟུང་ཤར་ལྟས་ནས། །དབུས་ཤར་ལྷོ་ནུབ་བྱང་རྣམས་ནས། །ཁམ་ལྔ་བརྐོས་པ་དངོས་གྲུབ་ས། །སྣོད་བཙལ་ས་གཞན་བསྲེ་བྱས་ལ། །རྣམ་འཇོམས་གཟུང་ཆུ་བསིལ་གཏོར་ཆུས། །ས་ཀུན་ཁྱབ་པར་བཞི་སྡེ་ཡི། །དགེ་འདུན་གྱིས་གཏོར་ཏེ་བཞི་འཕེལ། །བརྐོས་པའི་མཚན་ལ་བརྟག་པ་ལ་སས་བརྟག་པ་ནི། ཁྲུ་གང་ངམ་པུས་ནུབ་ཙམ་བརྐོས་པས་ས་ཡི་རོ་ལྔ་བསལ་ཏེ། སེམས་ཅན་གྱི་རོ་རུས་པ། རྡོའི་རོ་མཁར་གོང་། ཤིང་གི་རོ་སོལ་བ། རྫས་ཀྱི་རོ་གྱོ་མོ། འབྲུ་ཡི་ཕུལ་མ་རྣམས་བསལ། སའི་ཕུད་ཀྱིས་བདེ་བར་གཤེགས་པ་མཆོད། ས་དེ་ཉིད་ཀྱིས་བཀང་བས་མཐོ་ན་བཟང་། མཉམ་ན་འབྲིང་། དམའ་ན་ངན་པའོ། །ཆུས་བརྟག་པ་ནི། དོང་དེ་ཁྲུ་གང་ཙམ་བྲུས་པ་འཐས་པར་བཅག་ལ་ཆུས་བཀང་སྟེ། ཡི་གེ་བརྒྱ་པ་བཟླ་བཞིན་ཤར་ཕྱོགས་སུ་གོམས་པ་དྲང་པོ་ལྔ་བཅུ་རྩ་བཞིར་ཕྱིན། ཚུར་འོང་། ཆུ་འགྲམ་དུ་ཕྱིན་ཙ་ན་གང་ན་རབ། ཕྱེད་འབྲིང་། སྐམ་འཐས་ངན། གཡས་སུ་འཁྱིལ་པ་བཟང་། ལྡོག་ན་ངན་པས་སྦྱང་བ་དགོས་སོ། །དེར་བུམ་པའི་ནང་དུ་རྟེན་སྙིང་དང་། སྲོག་ཤིང་ལ་ཏྲཾ་ཡིག་དང་འབྲུ་གསུམ་བྲིས་པ་འོག་ནས་འབྱུང་བའི་རྫས་སུམ་ཅུ་དང་། འབྲུ་སྣ་ཚོགས་པས་གང་བ་བསངས་སྦྱངས། སྟོང་པའི་ངང་ལས་ཨ་ལས་ཟླ་བའི་སྟེང་དུ་ཏྲཾ་ལས་བུམ་པ་རིན་པོ་ཆེའི་མཆོད་སྡོང་དགོས་འདོད་ཐམས་ཅད་ལྷུན་གྱིས་གྲུབ་པར་འབྱུང་བའི་གཏེར་ཆེན་པོར་གྱུར། དེ་ཉིད་ནང་དུ་སྦས་ནས་བཀྲ་ཤིས་པ་གྲུབ་པའི་གནས་ཆེན་གྱིས་སྣ་བཟང་པོ་ལ་སྤོས་ཆུས་བཏབ་པ་འཐས་པ་བཅགས་པའི་སྟེགས་བུ་དཔངས་སུ་ཁྲུ་གང་དང་། རྒྱར་ཁྲུ་གང་སོགས་ཅི་འདོད་བརྩིགས་པའི་ངོས་དང་། རྫས་སུམ་ཅུ། དྲི་བཟང་། བ་བྱུང་ལྔ་དང་བཅས་པའི་གོམ་ཡེ་སྟེ་སྐྱང་ནུལ་གྱིས་ཁྱབ་པར་བྱུགས་ཤིང་མཉམ་པར་བྱའོ། །དེ་ལ་བ་བྱུང་ལྔ་ནི། དམར་ཐལ་བ་ཡི་མགྲིན་པ་ན། །དག་བྱེད་རྫས་ཡོད་ནུས་པ་དེས། །གཙང་བའི་ལས་ཀུན་མཆོག་ཏུ་གསུངས། །ས་གཙང་རྩ་ཟོས་བ་མཆོག་གི། །གཅི་བ་ས་ལ་མ་ལྷུང་དང་། །གཅིན་ཉིད་ས་ལ་མ་ལྷུང་བ། །མར་དང་འོ་མ་ཞོ་ལྔའོ། །དང་པོར་མར་ནི་ཅི་ཙམ་པ། །སྲང་དུ་བྱས་པའི་ལྕི་བ་གཅིན། །ཉི་ཤུའི་འགྱུར་རེ་འོ་ཞོ་གཉིས། །མར་གྱི་སུམ་འགྱུར་ལྡན་བྱས་ལ། །དང་པོ་ལྕི་བ་ཆུ་གཉིས་བསྲེ། །ཚགས་བཙགས་དེ་ལ་འོ་ཞོ་མར། །བསྲེས་ཏེ་གཙང་མའི་སྣོད་དུ་བཀོལ། །ཁ་ཡི་ཆུ་དང་འོག་གི་ཚིགས། །དོར་ཏེ་བར་གྱིས་ལྡེ་གུ་དེས། །མཎྜལ་བྱུགས་པའི་རྫས་སུ་བཤད། །ཉི་མ་བདུན་དུ་ལག་སྣུམ་བྱུག །དེ་ནི་མི་བརྟན་པར་ཡང་བཤད། །ཟུར་ནི་ལེགས་བྱུགས་མཉམ་པོ་ཡི། །མཎྜལ་དག་ལ་པགྫ་ར། །མར་གྱི་ལྡེ་གུས་བཀུས་པ་ན། །མེ་ལོང་དང་ནི་ཆུ་ཤེལ་བཞིན། །འདི་ལ་དགོས་པ་རྣམ་ལྔ་ཡོད། །གདོན་བགེགས་ཐུབ་ཅིང་འདུ་ནད་སེལ། །དྲི་ཞིམ་འགྲོ་བ་དབང་དུ་སྡུད། །ཤིན་ཏུ་གཙང་མའི་ཡོན་ཏན་ལྔ། །གཉིས་པ་མེས་སྦྱང་བ་ནི། །མཚན་མ་ངན་པ་ཐམས་ཅད་ཞི་བའི་སྦྱིན་བསྲེག་གིས་སྦྱང་སྟེ། །ལམ་རིམ་ལས། ཀུན་ནས་མཚན་མ་ངན་གྱུར་ན། །གཞན་དུ་བགྲོད་དམ་ཞི་བ་ཡི། །མེ་ཡིས་རབ་ཏུ་དག་པར་འགྱུར། །ཞེས་གསུངས་སོ། །གསུམ་པ་སྔགས་དང་ཕྱག་རྒྱས་སྦྱང་བ་ནི། མཚན་མ་འབྲིང་ལ། རང་གི་ཕྱག་གཡས་མཐིལ་སོར་མོ་ལྔ་ཡི་སྟེང་ཉི་མའི་དཀྱིལ་འཁོར་ལྔ་ལ་ཧཱུྃ་མཐིང་ག་རེ་རེ་ཡོངས་སུ་གྱུར་པ་རྡོ་རྗེ་རྩེ་ལྔ་ཧཱུྃ་གིས་མཚན་པར་གྱུར། ༀ་བཛྲ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཅེས་ཆོས་ཉིད་དག་པའི་རྒྱས་ལན་གསུམ་བསྣུན། གཙོ་སྔགས་ལན་བདུན་བཟླ། རྡོ་རྗེ་ཧཱུཾ་གི་འོད་ཀྱིས་ས་ཡི་ཉེས་སྐྱོན་ཐམས་ཅད་དག་པ་ཡེ་ཤེས་རང་སྣང་གི་གཞིར་གྱུར། བཞི་པ་ཏིང་ངེ་འཛིན་གྱིས་སྦྱང་བ་ལ། མཚན་མེད་ཀྱིས་སྦྱང་བ་དང་། མཚན་བཅས་སྦྱང་བ་གཉིས་ཀྱི། དང་པོ། ཐམས་ཅད་རང་སེམས་རྣམ་པའི་ཕྱིར། །མཚན་ཉིད་མེད་པའི་ཕྱག་རྒྱ་ནི། །ནམ་མཁའ་ལྟ་བུར་རང་བཞིན་ནས། །འཁྲུལ་སྣང་ས་དང་ས་འཛིན་པ། །འཁྲུལ་བཅོས་ཆོས་ཅན་ལ་གནས་ཕྱིར། །དག་པར་བལྟས་ན་མཚན་ཉིད་མེད། །རང་རིག་སྟོང་པའི་ཡེ་ཤེས་ལ། །གཟུང་དང་འཛིན་པ་གཉིས་མེད་ཕྱིར། །སྤྱོད་ཡུལ་ཡོངས་སུ་དག་པར་བྱ། །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྟོང་ཉིད་དུ་བསྒོམ་པའི་བློས་ས་སྦྱང་བའི་ཕུལ་དུ་གྱུར་པའོ། །གཉིས་པ་སྣོད་གཞལ་ཡས་ཁང་གིས་སྦྱང་བ། རང་རིག་ཡེ་ཤེས་ཀྱི་རྡོ་རྗེ་སྔོན་པོ་མཐིང་ནག་ཧཱུྃ་ཡིག་འབར་བས་མཚན་པར་གྱུར། དེ་ལས་ཨཻ་ཡཾ་བཾ་ལཾ་སུཾ་རཾ་རྣམས་ཆད། ནས་སྒྲུབ་ཐབས་སུ། ཧཱུཾ་བྷྲཱུཾ། དེ་ཡི་སྟེང་དུ་བྷྲཱུཾ་ཁ་དོག་སྣ་ཚོགས་པ་གསལ། འོད་ཟེར་སྤྲོ་བསྡུས་ཐ་མལ་པའི་སོགས་ནས། ཡེ་ཤེས་ཀྱི་འོད་ཟེར་མཐའ་ཡས་པར་སྤྲོ་བའི་རྒྱན་དང་བཀོད་པ་བསམ་གྱིས་མི་ཁྱབ་པར་གསལ་བར་གྱུར། གསལ་བཏབ་པ། རང་བཞིན་རྣམ་པར་དག་པའི་དབྱིངས། །སྟོང་པ་ཉིད་ཀྱི་ཏིང་འཛིན་ལས། །ཧཱུྃ་གྱུར་ནམ་མཁའ་ཨེ་གཟུགས་ཅན། །ཐམས་ཅད་ཀུན་གྱི་གཞིར་གནས་པའོ། །དྲན་སྤྱོད་རླུང་ནི་ཡཾ་སྔོན་པོ། །ས་བོན་ཆུ་སྟེ་བཾ་དཀར་བཤད། །མ་ལུས་གཞི་སྟེ་གསེར་མདོག་ལ། །སྐད་ཅིག་སྒྲ་མེད་དམར་སེར་རཾ། །མ་ངེས་ཀུན་གཞི་སྣ་ཚོགས་བྷྲཱུཾ། །འབྱུང་བ་རིམ་བརྩེགས་རྟེན་དང་བཅས། །རྡོ་རྗེ་རྒྱ་གྲམ་ས་གཞི་དག །སྔགས་དང་ཕྱག་རྒྱས་བརྟན་པར་གྱུར། །བྷྲཱུཾ་ལས་རིན་ཆེན་ཁང་བཟང་ནི། །གདན་གྱི་དཀྱིལ་འཁོར་ཆ་རྫོགས་པའོ། །དྲུག་པ་བྱིན་གྱིས་བརླབ་པར་བྱ་བ་ནི། དཀྱིལ་འཁོར་གྱི་འཁོར་ལོས་བཟུང་བའང་སྟེ། རྡོ་རྗེ་སློབ་དཔོན་འཁོར་ལོས་བསྒྱུར་བའི་ཆ་ལུགས། རྒྱས་པའི་གོས་བཅས་དཀྱིལ་འཁོར་མཐའ་བསྐོར་གྱིས་ཤར་ནས་ཞུགས་ཏེ་དབུས་སུ་བཞུགས། ཞལ་ཤར་བསྟན་མདུན་སྟེགས་ལ་རྣམ་བདུན་ཕྲེང་ཚར་དང་། ནང་མཆོད་བཀོད། ཕྱོགས་བཞིར་སྟེགས་བུ་བཞི་ལ་མཆོད་པ་ལན་བཞིར་བཀོད། དེའང་སློབ་དཔོན་མཆོད་པ་ནི། གཡས་ནས་མགོ་བརྩམས་མཆོད་ཡོན་དང་། ཞབས་བསིལ་བདུག་སྤོས་མེ་ཏོག་སྒྲོན། དྲི་དང་ཞལ་ཟས་སྨན་གཏོར་རཀ །དེ་ལྟར་བསྐོར་ཕྱོགས་མ་འཁྲུལ་པ། འོག་ནས་འབྱུང་བའི་རྫས་ཀྱིས་བརྒྱན། སློབ་དཔོན་གྱིས། རང་རིག་རྡོ་རྗེ་ཧཱུྃ་མཚན་པ་ལས་འོད་འཕྲོས་འཕགས་པ་མཆོད། གསང་བ་གསུམ་གྱི་བྱིན་བསྡུས། སེམས་ཅན་གྱི་སྒྲིབ་པ་སྦྱངས། རྡོ་རྗེ་གསུམ་ལ་བཀོད། ཚུར་འདུས་སེང་ཁྲི་རིན་པོ་ཆེ་པདྨ་ཉི་ཟླའི་གདན་གྱི་ལྟེ་བ་ལ་ཡོངས་སུ་གྱུར་པས། ཧཱུཾ་བཛྲ་དྷྲཱིཀ །མཱུྃ་དྷཱ་ཏྭཱི་ཤྭ་རི། རང་ཉིད་བཅོམ་ལྡན་འདས་སྒྱུ་འཕྲུལ་དྲྭ་བ་ནས་སྒྲུབ་ཐབས་སུ། འཁྲིག་པའོ། །ཞེས་པའི་བར་གསལ་བཏབ་ཅིང་བརྗོད། ཡབ་ཀྱི་གསང་བའི་རྡོ་རྗེ་རྩེ་ལྔ་པ་ཧཱུཾ་དང་། ཡུམ་གྱི་གསང་བའི་པད་མ་འདབ་བཞི་ལ་མཱུཾ་གྱིས་མཚན་ཅིང་། བུ་ག་ཕཊ་ཀྱིས་བཀག་པ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ྅་ཧཾ། ཨ་ནུ་རཱ་ག་ཡ་མྱེ། སྦྱོར་བའི་བརྡའ་བཞིས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་སྙོམས་པར་ཞུགས་པས་བྱང་ཆུབ་སེམས་ལྔའི་སྤྲིན་གྱི་འོད་ཟེར་གྱིས་སེམས་ཅན་ཐམས་ཅད་བཀུག་དཀྱིལ་འཁོར་གྱི་ཕྱི་རོལ་དུ་བཀོད། བདག་ཅག་དཀྱིལ་འཁོར་དུ་སྦྱོར་ཅིག །ཅེས་གསོལ་བ་བཏབ་པ་གསན་ནས་མཁའ་གསང་དུ་བཅུག་སྟེ་ཕྱིར་བཏོན། དེ་ཐམས་ཅད་ཀྱིས་ཡབ་ཀྱི་བྱིན་གྱིས་རླབས་ཀྱིས་རང་གི་ལུས་ལྷར་ཤིས་པས་དཀྱིལ་འཁོར་གྱི་ཕྱི་རོལ་གནས་ཏེ་ཆེད་དུ་བརྗོད་པ། ཨེ་མ་ཧོ། རྡོ་རྗེ་ཕུང་པའི་ཡན་ལག་ཀུན། རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མཱ་ཀི །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །བཙལ་ཀྱང་རྒྱལ་བས་མ་རྙེས་སོ། །ཡང་ཡུམ་གྱིས་བྱིན་གྱིས་རླབས་ཀྱིས་ཆོས་ཐམས་ཅད་སྟོང་ཉིད་དུ་རྟོགས་ནས་ཆེད་དུ་བརྗོད་པ། ཨེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་མངོན་སངས་རྒྱས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བས་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་མཉེས་སོ། །དེ་ཐམས་ཅད་སངས་རྒྱས་ཉིད་དུ་གྱུར་ནས་སོ་སོའི་ཞིང་དུ་འཁོད། སླར་ཡང་གདོད་ནས་གྲུབ་པའི་དེ་བཞིན་གཤེགས་པ་ཐམས་ཅད་བཀུག །ཐུགས་སྲོག་གི་ཡི་གེ་བཞི་བཅུ་གཉིས་སུ་གྱུར། མཁའ་གསང་ནས་ཕྱིར་ཐོན་སྐུ་རྫོགས་པར་གདན་ལ་འཁོད་པར་གྱུར་པ་ནི། ཨཱོཾ་ཛི་ན་ཛིཀ྄ །ལཾ་དེ་ཥ་ར་ཏི། སྭཱ་རཏྣ་དྷྲིཀ྄ །མཱྃ་མོ་ཧ་ར་ཏི། ༀ་ཨཱ་རོ་ལིཀ྄ །པྱཱྃ་རཱ་ག་ཏི། ཧཱ་པྲ་ཛྙཱ་དྷྲིཀ྄ །ཏྃ་བཛྲ་ར་ཏི། ཀྵཱིཾ་ཧི་རཱ་ཛ་ཡ། ཧཱུྃ་ལ་སྱེ་ས་མ་ཡ་སྟྭཾ། ཏྲཱྃ་ཨ་གརྦྷ་ཡ། ཏྲཱྃ་མ་ལྱེ་ས་མ་ཡ་ཧོ། ཧྲཱིཾ་ཧ་ཧཱུཾ་པདྨ་བ་ད་མ། ཧྲཱི་གཱིརྟཱི་རཱ་གོ྅་ཧཾ། ཛྲིཾ་ཀུ་རུ་པ་ཎ་ཧྲཱི། ཨ་ནིརྟི་རཱ་ག་ཡཱ་མི། མཻཾ་དྷ་ར་ཎི་སྭཱ་ཧཱ། ཛཿདྷཱུ པྤེ་པྲ་ཝེ་ཤ་ཡ། ཐླྷིཾ་ནི་སྶ་རཾ་པ་ཡ་སྭཱ་ཧཱ། ཧཱུྃ་པུཥྤེ་ཨ་ཝེ་ཤ་ཡ། ཧཱུཾ་སྥ་ར་ཛ་ཡ་སྭཱ་ཧ། བཱཾ་དཱི་པ་སུ་གཱི་ནི། མཱུྃ་ཤྲཱི་ཨཾ་རཱ་གཱ་ཡ་སྭཱ་ཧཱ། ཧོཿགནྡྷེ་ཙིཏྟ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨ། ཨ་ཨ་ཨ་བཛྲ་བྷ་དྲ་ས་མ་ཉ་ཨ། ༀ་མུ་ནི་ཀྲིཾ་སྭཱ་ཧཱ། ༀ་མུ་ནི་ཧཱུཾ་ཏྲཱུཾ་སྭཱ་ཧཱ། ༀ་མུ་ནི་སྲུཾ་སྭཱ་ཧཱ། ༀ་མུ་ནི་པྲཾ་སྭཱ་ཧཱ། ༀ་མུ་ནི་ཀྵཾ་སྭཱ་ཧཱ། ༀ་མུ་ནི་ཡེ་སྭཱ་ཧཱ། ཧཱུྃ་ཡ་མཱནྟ་ཀྲྀཏ་ཕཊ། ༀ་མ་ཧཱ་བཛྲ་དྷ་རོ། མ་ཧཱ་ཀྲོ་དྷི་ཤྭ་རཱི་ཛྭ་ལི་ནི་ཧཱུྃ་ཕཊ། ཧཱུྃ་པྲ་ཛྙཱནྟ་ཀྲྀཏ་ཕཊ། ༀ་མ་ཧཱ་རཏྣ་དྷ་རོ། མ་ཧཱ་ཀྲོ་དྷེ་ཤྭ་རི་ཛྭ་ལཱི་ནི་ཧཱུཾ་ཕཊ། ཧཱུྃ་པདྨནྟ་ཀྲྀ་ཏྲ་ཕཊ། ༀ་མ་ཧཱ་པདྨ་དྷ་རོ། མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནཱི་ཧཱུཾ་ཕཊ། ཧཱུཾ་བིགྷྣཱ་ཀྲྀ་ཏྲ་ཕཊ། ༀ་མ་ཧཱ་ཀརྨ་དྷ་རོ། ༀ་མ་ཧཱ་ཀྲོ་དྷི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཅེས་བརྗོད་པས་ཞི་བ་བཞི་བཅུ་རྩ་གཉིས་ཐུགས་སྲོག་དང་། དབུ་རྒྱན་དང་། བྱིན་རླབས་ཀྱིས་ལྷ་དང་བཅས་པ་གསལ་བར་གྱུར། འཁོར་ལ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་མྱོང་བྱེད་སྣོམ་བྱེད་རྣམས། །བཙུན་མོ་ཡི་ནི་ཚོགས་དང་བཅས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །འཇིག་རྟེན་དྲུག་གི་ཕྱོགས་བཅུར་ནི། །འདུས་པ་བཞི་ཡིས་འགྲོ་དོན་མཛད། །ༀ་སངས་རྒྱས་ཀུན་གྱི་སྐུ་གསུང་ཐུགས། །རྣམ་དག་རྫོགས་པའི་དཀྱིལ་འཁོར་ཉིད། །མི་ཤིག་དྲི་མ་ཀུན་དང་བྲལ། །ཐུགས་རྗེ་འོད་ཟེར་ཉི་དཀྱིལ་བཞིན། །ས་གནས་ལམ་ཀུན་རྫོགས་མཛད་པ། །རབ་ཏུ་སྦྱངས་བའི་སྟོབས་རྫོགས་ཤིང་། །ཐ་སྙད་མིག་གཉིས་ཡུལ་དང་བྲལ། །བྱང་ཆུབ་སེམས་མཆོག་སྒྲིབ་པ་མེད། །འགྲོ་གནས་ཐུགས་རྗེའི་རྒྱུན་བཅས་པས། །རང་གི་ཡེ་ཤེས་འདུས་མ་བྱས། །ཐེག་པ་མཆོག་ལྡན་སྔགས་ཀྱི་རྒྱན། །ཕྱག་རྒྱའི་དཀྱིལ་འཁོར་གསང་མཛད་ཅིང་། །རང་བཞིན་ཕྱག་རྒྱའི་གནས་སུ་འཇུག །ༀ་མ་ཧཱ་ཤཱུ་ནྱ་ཏཱ་སོགས་དབང་བསྐུར། ཀ་ཡ་སོགས་བྱིན་རླབས། ཐུགས་ཀའི་འོད་ཟེར་གྱིས་དཀྱིལ་འཁོར་གྱི་འཁོར་ལོ་དུས་གསུམ་རྒྱལ་བ་སྲས་བཅས་མདུན་མཁར་སྤྱན་དྲངས། ༀ་བཛྲ་ས་མཱ་ཛཿ ས་བསྙན་བརྣན། ༀ་ཧྱེ་ཧི། ཞེས་སྤྱན་དྲང་། ཛ་ཧཱུྃ་བཾ་ཧོཿ ཞེས་བསྟིམ། ༀ་ན་མ་སརྦ་ཏ་ཐཱ་ག་ཏ་བྷྱོ་བི་ཤྭ་སོགས་ཀུན་བཟང་། ༀ་ན་མ་སརྦ་ཏ་ཐཱ་ག་ཏེ་དེ་ཝ་སྱ་མཎྜ་ལས་བཱ་རི་ཝ་ར་བཛྲ་ཨརྒཾ་པྲ་ཏིཙྪ་སྭཱ་ཧཱ། ཞེས་མཆོད་ཡོན། ༀ་ཨ་ཧ་ར་ཨ་ཧ་ར་སོགས་ཞབས་བསིལ། ༀ་ཤྲཱི་བཛྲ་རཱ་ག་དྷཱུ་ཥྤེ་དྷུ། སོགས་བཞི་བསྣོལ། ༀ་བཛྲ་ནཻ་ཝི་དྱ་ཨཱཿཧཱུྃ། ཞེས་ཞལ་ཟས་དང་། ༀ་བཛྲ་གཎྜེ་དྷུརྨ་ར་ཎི་ཏ། སོགས་རོལ་མོར་བཅས། ༀ་བཛྲ་ལཱ་སྱེ་ཧཱུཾ། ༀ་བཛྲ་མཱ་ལེ་ཏྲཱཾ། ༀ་བཛྲ་གིརྟི་ཧྲཱིཿ ༀ་བཛྲ་ནིརྟི་ཨཿ དེ་དག་ཕྱི་མཆོད་དང་། ༀ་སརྦ་ཏ་ཐཱ་ག་ཏཱ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རཾ་ཡཾ་ཁཾ་ཧཱུཾ་སྥ་ར་ཎ་ཕཊ། ༀ་ཨཱཿཧཱུྃ་སརྦ་པཉྩ་ཨ་མྲི་ཏ་ཁ་རཾ་ཁ་ཧི། ༀ་མ་ཧཱ་བ་ལིནྟ་ཁ་ཧི། དེ་དག་ནི་ན ང་གི་མཆོད་པ་དང་། ༀ་སྭ་བྷཱ་ཝ་ཤཱུདྷ་སརྦ་དྷཱརྨ་སྭ་བྷཱ་ཝ་ཤཱུདྡྷོ་ཧཾ། ཞེས་དེ་ཁོ་ན་ཉིད་དྲན་པ་གསང་བའི་མཆོད་པའོ། །དེ་བཞིན་གཤེགས་པ་ཀུན་གྱི་ཐུགས། །ཡེ་ཤེས་རྒྱ་མཚོ་རབ་ཏུ་ཟབ། །དཀྱིལ་འཁོར་ཡིད་བཞིན་འབྱུང་བའི་གཏེར། །རྡོ་རྗེ་ཡིད་ལའང་ཕྱག་འཚལ་ལོ། །ཞེས་བསྟོད་དེ་ཏིང་ངེ་འཛིན་དེ་ཉིད་ཀྱི་ང་རྒྱལ་བཟུང་སྟེ་གནས་པར་བྱའོ། ༈ །དེ་ནས་ཕྱོགས་བཞིར་གནས་པའི་སློབ་མ་བཞིས་ཐུན་མོང་དུ་སྒྲུབས་ཐབས་ནས་འབྱུང་བའི་མཆོད་པ་བྱིན་རླབས་སྔགས་དང་རོལ་མོར་བཅས་པའི་མཐར། ཀུན་བཟང་ཆུ་གཉིས། བཞི་བསྣོལ། ཞལ་ཟས་རོལ་མོ། ལྷ་མོ་བཞི། སྦྱོར་སྒྲོལ། སྨན་གཏོར། དེ་ཁོ་ནར་བཅས་པའི་མཆོད་པ་དང་། དྲིལ་སྟབ་བཅས། ཨེ་མ་ཧོ། ལུས་ངག་ཡིད་གསུམ་ནམ་མཁའ་ལྟར། །རང་བཞིན་འོད་གསལ་དྭངས་པ་ལས། །སྒྱུ་འཕྲུལ་དྲྭ་བའི་སློབ་དཔོན་བཞིན། །དེ་དང་བརྟག་པར་བདག་ཕྱག་འཚལ། ༈ །ཤར་ཕྱོགས་པ་ཐུན་མོང་དུ། ལཱྃ་དཱེ་ཥ་ར་ཏི། རང་ཉིད་སངས་རྒྱས་སྤྱན་མ་དཀར་མོ་འཁོར་ལོའི་དྲིལ་བུ་འཛིན་པར་གྱུར། གཡོན་རང་རྟགས་དྲིལ་བུ་ལས། གཡས་ཐམས་ཅད་ཐུགས་ཀར་ཐལ་མོ་བཀོད་པ་ཅན་དུ་བསྐྱེད་གསུངས། མཆན། སྙན་པ་རྣན། སྤྱན་དྲངས། བསྟིམ། ༀ་མ་ཧཱ་ཨ་དཱཪྴས་བདག་པོར་བྱས་པའི་རིགས་ལྔས་དབུ་བརྒྱན། ཀཱ་ཡ་ཝཱཀ྄་སོགས་གནས་ལྔ་བྱིན་རླབས་ཟིན་ནས་མཎྜལ། མ་ཚང་བ་མེད་པ་འདི་ཉིད་དཀྱིལ་འཁོར་ཆེན་པོར་བྱིན་གྱིས་རླབས་པ་ཞུ་བའི་དོན་དུ་འབུལ་བར་བགྱིའོ། །ཞེས་སྤྱར། དྲིལ་སྟབས་བཅས། ཞི་བའི་ཡེ་ཤེས་རང་སྣང་བའི། །རྒྱན་རྣམས་ཀུན་གྱིས་རབ་མཛེས་པ། །སངས་རྒྱས་ཀུན་གྱི་སྐུ་ཡི་མཆོག །དཀྱིལ་འཁོར་ཆེན་པོ་གསུང་དུ་གསོལ། །ལྷོ་ནས། མཱྃ་མོ་ཧ་ར་ཏི། རང་ཉིད་མཱ་མཱ་ཀཱི་སེར་མོ་རིན་པོ་ཆེའི་དྲིལ་བུ་འཛིན་པར་གྱུར། བརྣན། དྲངས། བསྟིམ། དབང་། བརླབ། མཎྜལ་བཅས། ཡོན་ཏན་རིན་ཆེན་འབྱུང་བའི་གཙོ། །མ་ལུས་ཀུན་གྱི་རེ་སྐོང་བ། །སངས་རྒྱས་ཀུན་གྱི་ཡོན་ཏན་མཆོག །དཀྱིལ་འཁོར་ཆེན་པོ་གསུང་དུ་གསོལ། ནུབ་ནས། པྱཱྃ་རཱ་ག་ར་ཏི། རང་ཉིད་གོས་དཀར་མོ་དམར་མོ་པདྨ་དྲིལ་བུ་འཛིན་པའི་སྐུར་གྱུར། གཞན་གོང་བཞིན། རང་བཞིན་དག་པས་གོས་པ་མེད། །འདོད་ཆགས་ཕ་རོལ་ཕྱིན་པ་བརྙེས། །སངས་རྒྱས་ཀུན་གྱི་གསུང་གི་མཆོག །དཀྱིལ་འཁོར་ཆེན་པོ་གསུང་དུ་གསོལ། །བྱང་ནས། ཏཱྃ་བཛྲ་ར་ཏི། རང་ཉིད་དམ་ཚིག་སྒྲོལ་མ་ལྗང་གུ་རལ་གྲི་དྲིལ་བུ་འཛིན་པའི་སྐུར་གྱུར། གོང་བཞིན། བསམ་པ་ཐམས་ཅད་ཡོངས་རྫོགས་པས། །ཐམས་ཅད་སྒྲོལ་བའི་དེད་དཔོན་མཆོག །སངས་རྒྱས་ཀུན་གྱི་ཕྲིན་ལས་བདག །དཀྱིལ་འཁོར་ཆེན་པོ་བཤད་དུ་གསོལ། །ཐམས་ཅད་ཀྱིས་ཐུན་མོང་དུ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །དཀྱིལ་འཁོར་སྙིང་པོ་བཤད་དུ་གསོལ། །ཞེས་གསོལ་གདབ་བོ། །བཞི་མེད་ན་གཅིག་གིས་དེ་དག་ཏུ་སོང་ནས་བྱ་བར་གསུངས། སློབ་དཔོན་གྱིས་རྡོར་དྲིལ་འཛིན་ཅིང་འཛུམ་པའི་མདངས་ཀྱིས་བལྟ་བ་བཅས། ཕྱོགས་བཅུ་མ་ལུས་དུས་གསུམ་གྱི། །རྒྱལ་བ་སྲས་བཅས་དགོངས་སུ་གསོལ། །ཆེ་གེ་མོ་སོགས་དོན་གྱི་ཕྱིར། །དཀྱིལ་འཁོར་ཆེན་པོ་བདག་བགྱིད་པས། །བདག་ཅག་རྗེས་སུ་བཟུང་བའི་སླད། །ས་འདི་ཤིས་པར་བྱིན་རླབས་པས། །བདེ་བར་གཤེགས་པས་མཛད་དུ་གསོལ། །ནམ་མཁའ་གང་བའི་བདེ་བར་གཤེགས་པ་ཐམས་ཅད་རང་ལ་ཐིམ་པར་གྱུར། ཧཱུྃ་ཧཱུྃ་ཧཱུྃ་ཧཱུྃ། འགྲོ་བ་ལ་སྙིང་རྗེ་བས། སླར་ཡང་རང་ཉིད་ཞེ་སྡང་རྡོ་རྗེའི་མིག་གཉིས་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུྃ་གི་ཡི་གེར་གྱུར། །རྡོ་རྗེ་འཛིན་པ་ཉི་མ་དང་། །ཆོས་དང་རྟ་མཆོག་སྣང་མཛད་དང་། །བདག་ཉིད་ཆེན་པོ་ང་ཉིད་ཡིན། །ཐམས་ཅད་བཀའ་ལས་དེང་མ་འདའ། །ཐུགས་ཀ་ནས་ཁྲོ་བོའི་སྤྲུལ་པའི་སྤྲིན་ཕུང་མཐའ་ཡས་པར་སྤྲོ་བའི་རྐང་མཐིལ་གཉིས་སུ་འབར་བའི་རྡོ་རྗེས་མཚན་པས། དཀྱིལ་འཁོར་གྱི་ས་གཞི་ཅིས་ཀྱང་མི་ཤིགས་པ་རྡོ་རྗེའི་རང་བཞིན་དུ་བརྟན། ཞེས་རྡོ་རྗེའི་འགྲོས་ཀྱིས་བཅིང་། བདུན་པ་སྲུང་བའི་ཕྱིར། རང་གི་མིག་གཡས་ཀྱི་མེས་བགེགས་དང་ལོག་འདྲེན་ཐམས་ཅད་སྲེག །ཧཱུྃ་ཧཱུྃ་ཧཱུྃ། ༀ་ཛྭ་ལ་བཛྲ་ཧཱུྃ་སོགས་སྒྲུབ་ཐབས་ནས། རཱ་ཛ་ཛཿ ཞེས་བགེགས་བརྒྱལ་བར་སླར་བསླང་། སླར་ཡང་དེ་ཡི་དབུས་སུ་བྷྲཱུཾ་ལས་བྱུང་བའི་འཁོར་ལོ་སེར་པོ་རྩིབས་བརྒྱད་ལ་སོགས་དང་། རྩ་རྩེ་སྟེང་འོག་ཏུ་ཕྱོགས་ཤིང་རྣོ་བའི་དབལ་དང་ལྡན་པ། སྦུབ་སྟོང་རབ་ཏུ་ཡངས་ཤིང་། ལྟེ་བ་ཆོས་ཀྱི་དབྱིངས་དང་མཉམ་པའི་དབུས་སུ་བདག་ཉིད་ཞེ་སྡང་རྡོ་རྗེའི་ཐུགས་ཀའི་ཧཱུཾ་ཡིག་ལས་མ་བཅུ་འཕྲོས། རྩིབས་ནང་རྣམས་སུ་ཉི་གདན་བཅུར་གྱུར། ཡང་རང་གི་ཐུགས་ལས་ཁྲོ་བོ་ཌཱཀྐི་རཱ་ཛ་སྔོ་སྐྱ་ལྕགས་ཀྱུ་དང་ཐོ་བ་ཐོགས་པ་སྤྲོས། ཕྱོགས་བཅུའི་བགེགས་རྣམས་བགེགས་ཀྱི་གཙོ་བོ་ཕྱོགས་སྐྱོང་བཅུ་ལ་བསྟིམ། དེ་དག་རྣམས་ལྕགས་ཀྱུས་སྙིང་ནས་དྲངས་ཏེ་བཀུག་པས་མྱོས་ཤིང་དྲན་པ་ཉམས་ནས་ཉི་གདན་རྣམས་ཀྱི་སྟེང་དུ་འགྱེལ་ཐབས་སུ་འཁོད་པར་གྱུར། ཧཱུྃ་བཞི་པའི་སྔགས་བརྗོད། ༀ་ཨིནྟྲ་ཡ། ཨགྣེ་ཡེ། ཡ་མ་ཡ། ནི་རི་དྱ། ཝ་རུ་ཎ་ཡ། ཝ་ཡེ་ཝེ། ཀུ་བེ་རཱ་ཡ། ཨི་ཤཱ་ན་ཡ། སུརྻ་ཙནྟ། སུ་རི་ཏཱ། ཨི་ར་པ་ཏ་ཡེ། ཛཿཧཱུཾ་བཾ་ཧོཿ ཡངས་སྦྱོར་མཚམས་ནས་ཁྲོ་བོ་བཅུ་ཕྱུང་སྟེ། མདུན་གྱི་ཕུར་བུ་རྣམས་ལ་ཐིམ་སྟེ་སྟོང་པ་ཉིད་དུ་ཞུགས། སྟོང་པའི་ངང་ལས་ཧཱུཾ་ལས་བྱུང་བའི་རྡོ་རྗེའི་ཁྲོ་རྒྱལ་བཅུ་པོ་ཕྱོགས་རྣམས་ཕྱོགས་མདོག །མཚམས་རྣམས་འདྲེས་མ། སྟེང་འོག་གཉིས་མཐིང་ཀ་ཀུན་ཀྱང་ཞལ་གཅིག །ཕྱག་གཉིས་ཐོ་བ་དང་ཕུར་བུ་འཛིན་པ། སྨད་ཕུར་བུ་འབར་བའི་རྣམས་པ་ཅན་དུ་གྱུར། སྟེང་ཕུར་ཤར་སྟོད་དུ་བཀོད་པས། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ཤར་ཕུར་ཤར་སྨད་དུ་བཏབ། ༀ་བཛྲ་ཀྲོ་དྷ་བི་ཛ་ཡ་ཧཱུྃ་ཧ་ན་ཧ་ན་ཧཱུྃ་ཕཊ། ལྷོ་ཕུར་ལྷོ་བཏབ། ༀ་བཛྲ་ཀྲོདྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ནུབ་ཕུར་ནུབ་སྨད་བཏབ། ༀ་བཛྲ་ཀྲོ་དྷ་ཧྱ་གྷྲྀ་ཝ་ཧཱུཾ་ཧུ་ལུ་ཧུ་ལུ་ཧཱུྃ་ཕཊ། བྱང་ཕུར་བྱང་དུ་བཏབ། ༀ་བཛྲ་ཀྲོ་དྷ་ཨ་མྲྀ་ཏ་ཀུནྜ་ལི་ཧཱུཾ་ཚིནྡྷ་ཚིནྡྷ་ཧཱུཾ་ཕཊ། ཕྱོགས་གཡས་བསྐོར་རོ། །བྱང་ཤར་གྱི་ཕུར་པ་དེར་བཏབ། ༀ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ་ཕཊ། བྷན་དྷ་བྷན་དྷ་ཧཱུཾ་ཕཊ། ནུབ་བྱང་ཕུར་པ་དེར་བཏབ། ༀ་བཛྲ་ཀྲོ་དྷ་ཨ་པཱ་ར་ཛི་ཏ་ཧཱུཾ་ཏིཥྛ་ཏིཥྛ་ཧཱུཾ་ཕཊ། ལྷོ་ནུབ་ཕུར་པ་དེར་བཏབ། ༀ་བཛྲ་ཀྲོ་དྷ་ཨཱརྻ་ཨ་ཙ་ལ་ཧཱུཾ་བྷནྡྷ་བྷནྡྷ་ཧཱུཾ་ཕཊ། ཤར་ལྷོའི་ཕུར་བ་དེར་བཏབ། ༀ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། མཚམས་གཡོན་བསྐོར་རོ། །འོག་ཕུར་ནུབ་སྟོད་དུ་བཀོད། ༀ་བཛྲ་ཀྲོ་དྷ་མཱ་ཧཱ་བ་ལ་ཧཱུཾ་སྥོ་ཊ་ཧཱུཾ་ཕཊ༔ དེ་དག་སོ་སོའི་སྔགས་མཐར། ༀ་གྷ་གྷ་གྷ་ཏ་ཡ་གྷཱ་ཏ་ཡ་སརྦ་དུཥྚན་ཧཱུཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ། བཛྲ་ཀཱི་ལ་ཡ་བཛྲ་དྷ་ར་ཨ་ཛྙཱ་པ་ཡ་ཏི་སརྦ་བིགྷྣཾ་ཀཱ་ཝཱཀ྄་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཞེས་སྦྱར་ཞིང་སྟང་སྟབས་བྱ། སྟེང་དུ་ཧཱུཾ་མཛད། ཤར་དུ་རྣམ་རྒྱལ། ལྷོར་གཤིན་རྗེ་གཤེད། ནུབ་ཏུ་རྟ་མགྲིན། བྱང་དུ་བདུད་རྩི་འཁྱིལ་པ། བྱང་ཤར་དུ་ཁམས་གསུམ་རྣམ་རྒྱལ། ནུབ་བྱང་དུ་འདོད་པའི་རྒྱལ་པོ། ལྷོ་ནུབ་ཏུ་མི་གཡོ་བ། ཤར་ལྷོར་དབྱུག་པ་སྔོན་པོ། འོག་ཏུ་བགེགས་འཇོམས་སྟོབས་པོ་ཆེ་རྣམས་ཌཱཀྐི་རཱ་ཛས་བགེགས་རྣམས་ལ་བཏབ་པས་ལུས་ཐལ་གྱིས་ཕུག་སྟེ་གཡོ་འགུལ་མེད་ཅིང་གནས་པར་གྱུར། སླར་ཡང་ཞེ་སྡང་རྡོ་རྗེའི་རྔམས་པའི་གར་གྱི་ཐུགས་ཀྱི་ཧཱུཾ་གི་འོད་ཟེར་མཐའ་ཡས་པས་དཀྱིལ་ཁོར་གྱིས་བརྟན་ཅིང་དག་པར་བགེགས་ཀྱིས་མི་ཚུགས་པར་གྱུར། ཧཱུཾ་གིས་གླུ་ལེན་ཅིང་ཕཊ་ཀྱིས་སྒྲ་དྲག་པོས་རྡོ་རྗེ་གསོར་ཞིང་བསྡིགས་ནས་པད་དཀོར་དང་བསྒྲགས་གཡས་བརྐྱང་དང་སྡིགས་མཛུབ་གཡས་སུ་བསྒྱུར་ཞིང་རྡོ་རྗེ་ཐུགས་ཀ་དང་དྲིལ་བུ་དཀུར་བརྟེན་པའི་རྡོ་རྗེ་གཡས་བསྐོར་གྱིས་འགྲོས་ཀྱིས་ས་ལན་གསུམ་འཐས་པར་གཅག་པ་རྡོ་རྗེ་སེམས་དཔའི་དགྱེས་གར་རོ། །ཡུམ་གྱི་ཆགས་པའི་གར་གྱིས་ཐུགས་ཀྱི་མཱུྃ་ཡིག་གི་འོད་ཟེར་མཐའ་ཡས་པས་བགེགས་དང་། དེས་བར་དུ་གཅོད་པ་ལ་སོགས་པའི་འཁོར་གསུམ་སྟོང་ཉིད་དུ་སྦྱངས་པར་གྱུར། མཱུྃ་གྱི་གླུ་དང་ཧཱི་ཞེས་དྲིལ་བུ་དྲག་ཏུ་འཁྲོལ་བས་གར་བསྐོར་དང་གཡོན་བརྐྱང་གི་སྡིགས་མཛུབ་གཡོན་བསྒྱུར་མཐར་ཐུགས་ཀར་འཁྱུད་རྒྱ་བྱ་བ། རྡོ་རྗེ་གཡོན་འགྲོས་ཀྱིས་ས་ལན་གསུམ་དུ་བཅག་པ། དབྱིངས་ཕྱུག་ཡུམ་གྱིས་བདེ་གར་རོ། །སྤྲོ་ན་ཞི་བའི་ཚོགས་གར་ཆེན་མོ་བྱའོ། །དེ་ནས། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །སོགས་ནས། པ་ཏ་ལ་པཉྩ་ཧཱུྃ་ཕཊ། བར་སྒྲུབ་ཐབས་ལྟར་བརྗོད། མཐར་ཆོས་ཐམས་ཅད་སེམས་ཀྱི་སྣང་བ་ལ། དེའང་སྟོང་ཉིད་དུ་གནས་པས་འཁོར་གསུམ་རྣམ་པར་མི་རྟོག་པའི་དེ་ཁོ་ན་ཉིད་དུ་ཤེས་པས། རྣམ་པར་རྟོགས་པ་བགེགས་ཡིན་ཏེ། །སོགས་ནས། མིང་ཡང་མེད། ཅེས་བརྗོད་པར་བྱའོ། །བརྒྱད་པས་བཟུང་ན་ཕྱག་ལེན་གྱི་དབང་གིས་འོག་ཏུ་འབྱུང་ངོ་། །ས་ཆོག་དེ་དག་ཀྱང་དཀྱིལ་འཁོར་གྱི་ཁང་པ་གསར་པ་དང་། མ་དུལ་བའི་ས་ཕྱོགས་སུ་ས་ཆོག་གསར་དུ་བྱ་དགོས་པ་སོགས་ཀྱི་དབང་ལས། རྡུལ་ཚོན་གྱི་སྒྲུབ་མཆོད་དཀྱུས་ཙམ་དཀྱིལ་འཁོར་ཁང་པ་རྙིང་པ་ལས་བརྟག་པ། སྣང་བ་ལས་སློང་བ། བརྐོ་བ། གཏེར་སྦ་བ་སོགས་དོར་ཞིང་། རས་བྲིས་ཀྱི་ས་ཆོག་ཞག་ཆོད་ལ་ནི་མི་སྣང་བ་ལས་སློང་བ་དང་། དབང་དུ་བྱ་བ། སྔགས་རྒྱ་ཏིང་ངེ་འཛིན་གྱིས་སྦྱང་བ། བྱིན་གྱིས་རླབས་པ་ཙམ་དང་། སྟ་གོན་དང་སྦྲེལ་བའི་དབང་དུ་ན། ས་སློང་། དབང་སྦྱང་། དམིགས་པ་ཙམ་དང་། བྱིན་རླབས་ཙམ་མོ། །དེ་དག་ཀྱང་རྒྱས་བསྡུས་འབྱིན་འཇུག་མ་འཁྲུལ་པར་བྱའོ། །དེ་ཡན་ཆད་ནུབ་དང་པོར་བྱ་བ་ས་ཆོག་གི་རིམ་པའོ། ༈ །འདི་མན་ཆད་སྟ་གོན་གྱི་ཁོངས་སུ་ས་བཅད་ལྔ་གསུངས་པའི་གཉིས་པ་མཉམ་པར་བྱ་བའང་། དེ་ཡི་གཞི་དཀྱིལ་འཁོར་གྱི་ཚད་བསྟན་པ་དང་། དེ་ལ་ཇི་ལྟར་བྱ་བའོ། །དང་པོ་ལའང་། དྲང་དོན་ཕྱི་དཀྱིལ་ལྷག་པ་གཟུགས་བརྙན་གྱི་ཚད་དང་། ངེས་དོན་ནང་དཀྱིལ་ལྷག་པ་ཏིང་འཛིན་ནམ་མཆོག་དཀྱིལ་གྱི་ཚད་བསྟན་པའོ། །དང་པོ་ཆུང་བ་ལ་རྩ་བརྒྱུད་ལས། དེ་ལ་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་བྱ། །ཞེས་ལོག་རེ་ལ་ཁྲུ་གང་རེས་ཁྲུ་བཞི་པ་དང་། ལུས་གང་རེས་ལུས་བཞི་པ་གཉིས་སྒྱུ་འཕྲུལ་གྱི་དཀྱིལ་འཁོར་བསྡུས་པ་ལྷ་བཅོ་བརྒྱད་པའི་བྲི་གཞི་དང་། ཡང་ན་ལུས་ནི་བཅུ་གཉིས་སམ། ཡང་ན་ཁྲུ་ནི་བཅུ་དྲུག་པ། ཞེས་པས་ངོས་རེ་ལ་འདོམ་གསུམ་གསུམ་བཅུ་གཉིས་པའམ། ངོས་རེ་ལ་ཁྲུ་གསུམ་གསུམ་བསྡུས་པའོ། །ངོས་རེ་ལ་ཁྲུ་བཞི་བཞི་པའམ། འདོམ་བཞི་བཞི་པ་སྟེ་བཅུ་དྲུག་པ་རྒྱས་བསྡུས་བཞི་ནི་ལྷ་བཞི་བཅུ་ཞེ་གཉིས་པའི་འབྲི་གཞིའོ། །ཉི་ཤུའམ་ཉི་ཤུ་རྩ་ལྔར་བྱ། ཞེས་པས་ཁྲུ་ཉི་ཤུ་ནི་ངོས་རེ་ལ་འདོམ་ལྔ་པ། ཉི་ཤུ་རྩ་ལྔ་ནི་ངོས་རེ་ལ་འདོམ་དྲུག་དང་ཁྲུ་གང་རེ་ཡོད་པ། དེ་གཉིས་སྒྱུ་འཕྲུལ་རྒྱས་པའི་བྲི་གཞི་སྟེ། དེ་དག་ཀྱང་ཚད་ནི་རྐྱེན་གྱིས་མ་ངེས་ཏེ། ཞེས་གསུངས་པས་གནས་ཁང་གི་ཡང་དོགས་དང་། སློབ་མའི་འདུ་བྱེད་ཆ་རྐྱེན་འབྱོར་པ་ཆེ་ཆུང་དང་། རྡོ་རྗེ་སློབ་དཔོན་ཕྱག་གཟོ་བ་མི་གཟོ་བ་ལ་ལྟོས་ནས་གསུངས་སོ། །གཉིས་པ་ནི་རྣལ་འབྱོར་པ་ཏིང་འཛིན་རྩལ་ཆུང་ན། གཞུ་འདོམ་ལྔ་བརྒྱ་སྟེ་རྒྱང་གྲགས་ཀྱི་ཚད་དང་། འབྲིང་ནི་དཔག་ཚད་ཀྱི་བར་དུ་ལྷས་གང་བར་བསྒོམ་པ་ནི་ཆོས་མཆོག་མན་དང་། དེ་ནས་སངས་རྒྱས་སྟོང་དང་། མཐོང་ལམ་པ་ཡན་གྱིས་ཉི་ཁྲི་བཞི་སྟོང་དང་། མཐར་ལམ་པའི་སློབ་དཔོན་གྱིས་བསམ་ཡས་ལྷུན་གྱིས་གྲུབ་པའི་དཀྱིལ་འཁོར་ཆོས་ཀྱི་དབྱིངས་ནམ་མཁའ་ཁྱབ་པར་མཐའ་ཀླས་པ་སྲིད་དུ་བསྒོམ་པ་སྟེ། སློབ་དཔོན་དགོངས་པ་ཟབ་མི་ཟབ་དང་། སློབ་བུ་ལས་ཚབ་ཆེ་ཆུང་གི་དབྱེ་བས་ཕྱེ་ཞིང་སློབ་དཔོན་འཕགས་པས། དྲོད་ཐོབ་པའི་སློབ་མ་ལ་བསྐུར་བའི་དཀྱིལ་འཁོར་དུ་ཚད་རྒྱ་ཆེ་བ་ནི། སློབ་དཔོན་པདྨ་ཇོ་མོ་མཁར་ཆེན་བཟའ་ལ་རྡོ་རྗེ་ཕུར་པའི་དབང་བསྐུར་བ་དང་། སློབ་དཔོན་སངས་རྒྱས་གསང་བས་ཏི་སེར་མཚོ་མ་ཕམ་ལ་ཐིག་དོར་ནས་དཀྱིལ་འཁོར་རྒྱང་གྲགས་སུ་སྤྲུལ་ཏེ་སྒྱུ་འཕྲུལ་དུ་དབང་བསྐུར་བའི་ལོ་རྒྱུས་ལྟ་བུའོ། །དེ་ཡང་ལས་རིམ་ལས། སློབ་དཔོན་མཐར་ཉེའི་ལམ་གནས་པས། །བཞི་བཅུ་རྩ་གཉིས་གསུམ་འཕྲོ་ཞིང་། །སངས་རྒྱས་སྟོང་གི་དཀྱིལ་འཁོར་སོགས། །རྡོ་རྗེའི་ཐིག་ཚད་དོར་ཙམ་གྱིས། །རྒྱང་གྲངས་ལ་སོགས་མཚན་མ་ཡི། །དཀྱིལ་འཁོར་ཕྱག་རྒྱར་གསལ་ལྡན་པ། །ཏིང་འཛིན་ལྷག་པའི་གཟུགས་བརྙན་ཡིན། །ཞེས་གསུངས་སོ། །གཉིས་པ་ཇི་ལྟར་བྱ་བ་ནི། རྫས་དང་ཡོ་བྱད་ལ་གནམ་རྒྱན། བར་ལོགས་ཡོལ་བ་སོགས་ཆ་རྐྱེན་རྣམས་འདི་ནས་བསོགས། ཞག་གིས་བར་ཆོད་པ་ལ་བདག་གི་རྣལ་འབྱོར་བསྡུ་ལྡང་བཅས་ཟིན་ནས་གོ་མ་ཡེས་ཆགས་ཆགས་གདབ་པའི་སྔོན་དུ་རྡོར་དྲིལ་བྱིན་རླབས་བྱ་བར་གསུངས་པས། རྡོར་དྲིལ་མདུན་དུ་བཞག་སྟེ། བསང་ཆུས་འཐོར། སྭཱ་བྷཱ་ཝས་སྦྱངས། སྟོང་པའི་ངང་ལས་རྡོ་རྗེ་རྩེ་ལྔ་པའི་ལྟེ་བ་ལ་ཀུན་ཏུ་བཟང་པོ། ཡར་རྭ་ལྔ་རྒྱལ་བ་རིགས་ལྔ། མར་གྱི་རཱ་ལྔ་རིགས་ཀྱི་ཡུམ་ལྔ། ཡས་མས་ཀྱི་པད་འདབ་སེམས་དཔའ་ཡབ་ཡུམ་བཅུ་དྲུག །དྲིལ་བུའི་ལྟེ་བ་དང་། པདྨའི་འདབ་མ་བརྒྱད་ཀྱི་ཕྱོགས་བཞིར་རིགས་ཀྱི་ཡུམ་ལྔ། མཚམས་བཞིར་གསང་བའི་ཡུམ་བཞི། ཞལ་ཤེས་རབ་ཀྱི་ཕ་རོལ་དུ་ཕྱིན་མ། རྩེ་མོའི་རྡོ་རྗེ་རིགས་ལྔ་ཡབ་ལྔའི་སྐུར་གྱུར། རྡོ་རྗེའི་རིགས་བདག་པོར་བྱས་པའི་ཤཱུ་ཱུནྱ་ཏཱ་ས་དབང་བསྐུར། གནས་ལྔ་བརློབ། བརྣན། དྭངས། བསྟིམ། བརྟན། ལས་ཀྱི་རྡོ་རྗེས་མཆོད་པའི་རྭ་བར་མཆོད་པ་བཀོད་པ་བཏེགས་ནས་ཕྱི་ནང་གིས་མཆོད། ཧཱུཾ་ཨཱ་ཞེས་བརྗོད་པས་ལྷ་རྣམས་འོད་དུ་ཞུ། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔ་ཡི་ངོ་བོ། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་བྱང་ཆུབ་སེམས་ཀྱི་རང་བཞིན་ནོ། །ཞེས་ངེས་ཤེས་བསྐྱེད། ལན་གསུམ་གསོར་ནས། ཐུགས་ཀར་རྡོ་རྗེ་བཟུང་བ་སྐུ་ཡི་དམ་ཚིག་ལ་དྲན་པ་བཞག་པས། ༀ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་གཙོ། །ༀ་བཛྲ་གཎྜེ། དྲིལ་བུ་འཁྲོལ་བ་གསུང་གི་དམ་ཚིག་གི། སྲིད་པ་ངོ་བོ་ཉིད་ཀྱི་བདག །རང་བཞིན་དུ་ནི་དངོས་མེད་བྱས། །རང་བཞིན་དག་པའི་སེམས་དཔའ་རྣམས། །དམ་པའི་སྲིད་པ་ཐོབ་པར་ཤོག །ཐུགས་ཀར་འཁྱུད་རྒྱ་བྱ་བ་ཐུགས་ཀྱི་དམ་ཚིག་གིས། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་གཉིས་མེད་པ། །འཁོར་དང་མྱ་ངན་འདས་པ་ཡིས། །ཆོས་ལ་དེ་བཞིན་དབང་སྒྱུར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭཱ་བྷཱ་ཝཱཏྨ་ཀོ྅་ཧཾ། སྟེགས་བུ་ལ་ཐོད་པའི་ནང་དུ་རྫས་སུམ་ཅུ་པའི་གོ་མ་ཡོ་བྱ་སྟེ། ཕུང་ལྔ་དག་ཅིང་སྐུ་ལྔ་ཐོབ་པའི་ཕྱིར། འབྲས། མོན་སྲནསྡེེའུ་གྲོ་ནས། ཏིལ་དཀར་ཏེ་འབྲུ་ལྔ། དབང་པོ་ལྔ་དག་ཅིང་ཕྲིན་ལས་ལྔ་ཐོབ་པའི་ཕྱིར། ཙནྡ་དཀར་དམར་གཉིས། གུར་གུམ། གླ་རྩི། ཛ་ཏི་སྟེ་སྤོས་ལྔ། ཡུལ་ལྔ་དག་ཅིང་ཡོན་ཏན་ལྔ་ཐོབ་པའི་ཕྱིར། བྱེ་རུ། མུ་ཏིག །གསེར། དངུལ། ནོར་བུ་གསུངས་པས་དེའི་རྒྱུ་རིང་བསྲེལ་ལམ་ཡང་ན་ཨིནྜ་ནཱི་ལ་ལྟ་བུའི་རིན་པོ་ཆེ་དངོས་ཏེ་ལྔ། གཞན་སེལ་རྣམ་ཤེས་ལྔ་དག་ཅིང་། དོན་གཉེར་ཡེ་ཤེས་ལྔ་ཐོབ་པར་བྱ་བའི་ཡིར་ཆུའི་སྙིང་པོ་ལན་ཚྭ། མེ་ཏོག་གི་སྙིང་པོ་སྦྲང་རྩི། ཤིང་ཏོག་གི་སྙིང་པོ་བུ་རམ། རྩི་ཐོག་སྙིང་པོ་མར། འབྲུའི་སྙིང་པོ་ཨ་འབྲས་ཏེ་ལྔ། འདོད་ཡོན་ལྔ་དག་ཅིང་གསུང་ལྔ་ཐོབ་པར་བྱ་བའི་ཕྱིར། བྱ་ཀྲྀ་ཏེ་སྟ་ག་ཚེ་ར། སེང་ཀྲི་སྟེ་སེང་ཚོར། ཏ་པ་དེ་ཝ་སྟེ་ཆུ་དག་གྷྲི་ཏ་རི་དབང་ལག །ཀནྡ་ཀ་རི་སྟེ་སླེ་ཏྲེས་རྣམས་སམ། སྟག་ཚེར། སེང་ཚེར། པ་ར་སྟེ་ཤཱུ་དག །ཀནྟ་ཀ་རི་སྟེ་ཤུ་ཟུར། ཨ་པཱ་ར་ཛི་ཏ་སྟེ་སྙིང་ཞོ་ཤ་རྣམས་དང་། ཁམས་ལྔ་དག་པས་རིགས་ལྔ་ཐོབ་པར་བྱ་བའི་ཕྱིར། བྱང་སེམས་དཀར་དམར། དྲི་ཆུ་དྲི་ཆེན། ཤ་ཆེན་དང་བདུད་རྩི་ལྔ་དེ་དག་ཀྱང་སུམ་ཅུ་རབ་བསྙམས་བསྐམ་པར་བྱ། ཞེས་པ་ལྟར་སྦྱར་བའི་འདེ་གུས་འཐུག་སྲབ་གླང་ཀོ་ཙམ་དུ་བྱུགས་པར་བྱ་བ་གསུངས་པ་རྒྱ་གར་བས་དེ་ལྟར་མཛད་པའི་རྐྱང་ནུལ་གྱི་དོད་དེ་ངས་བོད་ཀྱི་ལག་ལེན་ལ་འཐོར་ཞིང་འདེབ་པ་ཙམ་མཛད་པས། དེ་ཡང་དང་པོར་རབ་གནས་བྱ་བ་ནི། བསངས་སྦྱངས། སྟོང་པའི་ངང་ལས་དམ་རྫས་ཀྱི་སྟེང་དུ། ཧཱུྃ་ཨཱོྂ་སྭཱྃ་ཨཱྃ་ཧཱ་ལས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དེ་བཞིན་གཤེགས་པ་ལྔ་རེ་ཡང་རིགས་ལྔའི་རང་བཞིན་དུ་འཆར་བར་གྱུར། ཤུ་ནྱཱ་ཏ་ས་བདག་པོར་བྱས་པའི་བསྐུར། རློབ། བརྣན། དྲངས། བསྟིམ། བརྟན། མཆོད་འབྲུ་ལྔ་བརྒྱ་རྩ་བཟླ། ཧཱུྃ་ཞེས་བརྗོད་པས་འོད་དུ་ཞུ་བ་ཡེ་ཤེས་ཀྱི་བདུད་རྩིར་འཁྱིལ་པར་གྱུར། དེས་དཀྱིལ་འཁོར་གྱི་གཞིར་ཆག་ཆག་འདེབས་ཏེ། ༀ་ཨཱཿཧཱུཾ་སརྦ་སཾ་ཤོ་དྷ་ནི་ཧཱུྃ་ཕཊ། ཅེས་གཡོན་བསྐོར་དུ་བྱའོ། ༈ །གསུམ་པ་ཚངས་ཐིག་ལའང་། ཡན་ལག་ཅན་ཐིག་གི་བྱ་བ་དང་། ཡན་ལག་དངོས་ལྷ་དང་བུམ་པ་སློབ་མ་ལྷག་པར་གནས་པའོ། །དང་པོ་ལ། རྒྱུ་གྲོགས་ཚད་གྲངས་རབ་གནས་དང་། གདབ་ཐབས་སྤྱོད་ལམ་བདུན་དུ་བཤད། དང་པོ་ལ་རྒྱུད་ལས། ཕུར་བུ་སྲད་བུ་ཚོན་ཕྱེ་དང་། ཞེས་པས། ཐིག་གི་དོན་མི་འགྱུར་བར་ཕྱེད་པ་ལ་བཤད་ཕྱིར་དེ་ཡི་རྒྱུ་འགྱིང་ཕུར་བསྐོར་ཕུར་གཉིས་དང་། སྲད་བུ་ཞེས་པས་ཡེ་ཐིག་གི་རྒྱུ་མེ་ཏོག་པད་མའི་རྩ་བ་ལས་བྱས་པའི་རྒྱུས་པའི་སྐུད་པ། དམ་ཚིག་གི་ཐིག་སྐུད་རས་བལ་དཀྲིས་པ་ལས་བྱས་པ་སྟེ། སྔ་མ་ལ་དཀར་སེར་དམར་ལྗང་མཐིང་སྟེ་ཁ་དོག་ལྔ་དང་། ཕྱི་མ་ལ་དཀར་དམར་མཐིང་གསུམ་དཔའ་བོའི་རིན་གྱིས་ཉོས་པའོ། །གཉིས་པ་ནི། རྒྱལ་རིགས་ཀྱི་བུ་མོ་ལོ་བཅུ་དྲུག་མ་ཡུམ་དུ་བྱིན་རླབས་པའམ། སློབ་མ་ལས་ཀྱི་རྡོ་རྗེ་ཡུམ་ཀུན་ཏུ་བཟང་མོར་མོས་པ་ལ། གསུམ་པ། རིང་ཐུང་འཛིན་པ་དེ་ཉིད་མ་གཏོགས་པ་དཀྱིལ་འཁོར་གྱི་ཉིས་འགྱུར་དང་། སྦོམས་སུ་སྒོ་ཡི་ཉི་ཤུའི་ཆའོ། །བཞི་པ་གོང་དུ་སོང་། ལྔ་པ་བསང་ཆུས་འཐོར། སྭ་བྷཱ་ཝས་སྦྱང་། སྟོང་པའི་ངང་ལས་ཉི་ཟླའི་གདན་ལྔའི་སྟེང་དུ། རང་གི་ཐུགས་ཀ་ནས་ཧཱུཾ་ༀ་སྭཱ་ཨྃ་ཧཱ་རྣམས་འཕོས། ཡེ་ཤེས་ཀྱི་ཐིག་སྐུད་ལ་ཐིམ། དཔའ་བོ་འབྲུ་ལྔར་གྱུར། སླར་ཡང་ཉི་ཟླའི་གདན་གསུམ་གྱི་སྟེང་དུ་ཐུགས་ཀ་ནས་ༀ་ཨཱཿཧཱུྃ་འཕྲོས། དམ་ཚིག་གི་ཐིག་སྐུད་ལ་ཐིམ་ཡི་གེ་གསུམ་དུ་གྱུར། འོག་མིན་ནས་ས་བོན་གྱི་ཚོགས་བཀུག །སླར་ཡང་ཐུགས་ཀའི་འོད་ཀྱིས་དེ་བཞིན་གཤེགས་པ་སྲས་དང་བཅས་པ་མདུན་མཁར་ༀ་བཛྲ་ས་མཱ་ཛཿ ཕྱི་ནང་གསང་བས་མཆོད། ཐིག་གི་སྲད་བུ་འདི་ལ་བྱིན་གྱིས་བརླབ་ཏུ་གསོལ། འབར་བའི་ལྟ་སྟངས་ནི་རྫིམ་བསྐྱོད་བཞིན་པར། རང་གི་མིག་གཉིས་ཛཿཡིག་ལས་སྐྱེས་པའི་ཉི་ཟླར་གྱུར། ༀ་དིཔྟ་དྲྀཥྛ་ཨངྐུ་ཤ་ཛཿ ནམ་མཁའི་དེ་བཞིན་གཤེགས་པ་ཐམས་ཅད་སྦྱོར་བར་མཛད་པར་གྱུར། ༀ་མ་ཧཱ་ཤཱུ་ནྱ་ཏཱ་སོགས་ཡེ་ཤེས་ལྔའི་སྔགས་བརྗོད་དེ་རྣམས་ཀྱི་སྦྱོར་མཚམས་ནས་ཡེ་ཤེས་ལྔའི་རང་བཞིན་གྱི་འོད་ཟེར་ཁ་དོག་ལྔ་འབར་བ། ཡི་གེ་འབྲུ་ལྔ་ལ་ཐིམ། དེ་ཡོངས་སུ་གྱུར་པ་ལས་རིགས་ལྔ་ཡབ་ཡུམ་བཅུར་གྱུར། སླར་ཡང་འོད་ཀྱིས་དེ་འདྲ་བ་སྤྱན་དྲངས། ༀ་བཛྲ་ས་མཱ་ཛ། བསྟན། དྲངས། བསྟིམ། ཕྱི་ནང་གསང་བས་མཆོད། གླུ་དྲུག་གིས་བསྟོད། ཡབ་ཡུམ་སྦྲེལ་བའི་སྔགས་ལན་བདུན་བདུན་གྱིས་བསྙེན། དེ་དག་ཞུ་བ་ལས། ཡེ་ཤེས་ལྔ་ཡི་འོད་ཀྱི་སྲད་བུར་གྱུར། སློབ་དཔོན་ཡབ་ཏུ་གསལ་བས་དཀྱིལ་འཁོར་གྱི་ཤར་དུ་ཞལ་གཟིགས། སློབ་མ་ཡུམ་དུ་གསལ་བས་ནུབ་བལྟས་སུ་བཞུགས། སློབ་དཔོན་ལ་སློབ་མས་ཐིག་སྐུད་ཕུལ། སློབ་དཔོན་གྱིས་རེ་རེ་ནས་ཡབ་ཀྱི་འབྲུ་ལྔ་བརྗོད་བཞིན་གཡས་སོར་གྱིས་སློབ་མ་ལ་གཏོད་པ། སློབ་མས་རེ་རེ་ནས་གཡོན་སོར་ལ་ཡར་བསྒྲིལ་ཏེ། ཧཱུྃ། མཐིང་ཀ། གུང་མོ། ཨཱོཾ། དཀར་པོ། མཛུབ་མོ། སྭཱ། སེར་པོ། སྲིན་ལག །ཨཱཾ། དམར་པོ། མཐེ་བོང་། ཧཱ། ལྗང་གུ། མཐེའུ་ཆུང་ལའོ། །ཡང་ཡུམ་གྱི་འབྲུ་ལྔ་བརྗོད་གྱིན་མར་འཁལ་སྟེ། མཱུྃ་ལཱྃ་མཱྃ་པཱྃ་ཏཱྃ། ཡབ་ཡུམ་གཉིས་ཀའི་འབྲུ་བཅུ་བརྗོད་བཞིན་ཐམས་ཅད་གཅིག་ཏུ་འཁལ་ཏེ་གསེར་རམ་དངུལ་སྣོད་དུ་བཞག་གོ། །ཀཱ་ཡ་བཛྲ་སོགས་རྡོ་རྗེ་གསུམ་སྔགས་བརྗོད་པས། ནམ་མཁའི་དེ་བཞིན་གཤེགས་པ་རྣམས་ཀྱི་གནས་གསུམ་ནས་རྡོ་རྗེ་གསུམ་གྱི་རང་བཞིན་འོད་ཟེར་དཀར་དམར་མཐིང་གསུམ་བྱུང་། དམ་ཚིག་གི་ཐིག་སྐུད་སོ་སོ་ལ་ཐིམ། དེ་ཉིད་སྐུ་གསུང་ཐུགས་རྡོ་རྗེར་གྱུར། བསྣན། དྲངས། བསྟིམ། བརྟན། མཆོད། བདེ་གཤེགས་སྐུ་གསུང་ཐུགས་རྡོ་རྗེ་མི་ཤིགས་རྒྱལ་བའི་རྡོ་རྗེ་གསུམ། སྔགས་དང་ཕྱག་རྒྱར་ལྡན་པ་ཡི། རྡོ་རྗེ་མཆོག་གསུམ་ལ་ཕྱག་འཚལ་ལོ། །ཀཱ་ཡ་བཛྲ་སོགས་བསྙེན། ལྷ་དེ་དག་ཞུ་བ་ལས། སྐུ་གསུང་ཐུགས་ཀྱི་སྲད་བུར་གྱུར། སྔར་བཞིན་གནས་པས་འབྲུ་གསུམ་སློབ་མ་ལ་གཏད་དེ། ཨཱོཾ་དཀར་པོ། མཛུབ་མོ། ཨཱཿདམར་པོ། མཐེ་བོང་། ཧཱུྃ་མཐིང་ཀ །གུང་མོ་ལ་ཡར་འཁེལ། ཡང་ལན་གཅིག་གིས་མར་འཁེལ། ཡང་ལན་གཅིག་གིས་ཐམས་ཅད་འཁལ་བས་སྣོད་དུ་བཞག་གོ། །དྲུག་པ་ནི་སྐུད་པ་ཆད་ན་སློབ་དཔོན་འཆི། ཐིག་སྣ་ཤོར་ན་སློབ་བུ་འཆི། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུན་ཆད་ལས་ལ་གནོད་པར་འགྱུར། །དེ་ཕྱིར་མཁས་ལྡན་སྒྲིམས་ཏེ་བྱ། །ཞེས་བཤད་པ་བཞིན་ཤེས་པས་ཡེ་ཐིག་གིས་གནས་ཐིག་འདེབས་པ་དང་། ལས་ཐིག་གིས་ས་ཐིག་འདེབ་པའོ། །དང་པོ་ནི། སློབ་དཔོན་ནུབ་ནས་ཤར་གཟིགས་དང་། སློབ་མ་ཞལ་ཤར་ནས་ནུབ་གཟིགས་ཀྱིས་ལྷ་ཡབ་ཡུམ་གྱི་ང་རྒྱལ་བྱ། ཛཿཛཿཛཿ ཞེས་ཡེ་ཤེས་ཐིག་སྐུད་སྨིན་མཚམས་སུ་བཟུང་ནས། ༀ། ཕྱོགས་བཅུ་མ་ལུས་དུས་གསུམ་གྱི། །རྒྱལ་བ་སྲས་བཅས་མ་ལུས་ཀུན། །ཐིག་གི་སྒྲ་འདིས་བསྐུལ་ནས་ཀྱང་། །བྱིན་གྱིས་བརླབས་པར་མཛད་དུ་གསོལ། །ༀ་བཛྲ་ས་མ་ཡ་མུ་ཏྲ་གྴ་མ་ཧཱུཾ་ཞེས་སམ་ༀ་བཛྲ་སཱུ་ཏྲས་མ་མ་ཏི་ཀྲ་མ་ཧཱུྃ་ཕཊ། ཅེས་སེ་གོལ་ནམ་མཁའ་ལ་གཏོགས་པ་བཅས་ཤར་ནུབ་ཚངས་ཐིག་དང་། སློབ་དཔོན་ལྷོར་གནས་ཏེ་བྱང་དུ་བལྟ་བས་སློབ་མས་རྒྱབ་འགྲོས་བྱ་བ་བཅས་ཚངས་ཐིག་གཉིས་པ་དང་། མེར་གནས་ཏེ་རླུང་དུ་བལྟ་བས་ཟུར་ཐིག་དང་པོ་དང་། བདེན་བྲལ་ནས་དབང་ལྡན་དུ་བལྟའ་བས་ཟུར་ཐིག་གཉིས་པ་དང་། མེར་གནས་ཏེ་བྱང་དུ་བལྟའ་བས་རྒྱབ་འགྲོས་བཅས་ཤར་གྱི་རྩ་ཐིག་དང་། རླུང་ནས་ལྷོར་བལྟའ་བས་རྒྱབ་འགྲོས་བཅས་ནུབ་ཀྱི་རྩ་ཐིག་དང་། སླར་ཡང་རླུང་ནས་ཤར་དུ་བལྟའ་བ་རྒྱབ་འགྲོས་བཅས་པས་བྱང་གི་རྩ་ཐིག་དང་། མེ་ནས་ནུབ་ཏུ་བལྟའ་བ་རྒྱབ་འགྲོས་བཅས་པས་ལྷོ་ཡི་རྩ་ཐིག་སྟེ་ཐིག་ཆེན་བརྒྱད་པོ་ནམ་མཁའ་གདབ་བོ་དེ་ཡི་ཚེ། ཐིག་སྐུད་ཀྱི་སྒྲས་འཇིག་རྟེན་ཁམས་ཀྱི་བདེ་བར་གཤེགས་པ་ཐམས་ཅད་ལ། ཁྱེད་ཀྱིས་སེམས་ཅན་གྱི་དོན་མཛད་པའི་དུས་ཡིན་ནོ་ཞེས་བསྐུལ་བས་ནམ་མཁས་ཁྱབ་ཚད་ཞི་ཁྲོ་རབ་འབྱམས་ཀྱི་དཀྱིལ་འཁོར་ལྷ་ཚོགས་ལྷུན་གྱིས་གྲུབ་པས་གང་བར་གྱུར། ཐིག་སྣོད་དུ་བཞག་གོ། །ཕྱོགས་མཚམས་འདི་དག་ཀྱང་ཕྱོགས་དཀྱིལ་འཁོར་དང་བསྟུན་ཏེ། རྣལ་འབྱོར་པའི་ཕྱོགས་དང་། འཇིག་རྟེན་པའི་ཕྱོགས་མ་ནོར་བ་དགོས་སོ། །གཉིས་པ་ནི། དམ་ཚིག་གི་ཐིག་དྲི་ཞིམ་པོའི་སྤོས་ཆལ་གྱིས་བྱུག་པས་ས་ལ་ཐིག་ཆེན་བརྒྱད་བཏབ་ནས། འགྱིང་ཕུར་ལྟེ་བར་བཙུག་ས་ལ་ཟླུམ་བསྐོར་སྐོར་བ་ནས་ཐིག་གི་ལས་ནི། ༀ་སྭཱ་སྟི། བླ་མ་རྡོ་རྗེ་སེམས་ལ་འདུད། །སྒྱུ་འཕྲུལ་ཞི་བ་འབྲིང་པོ་ཡི། །ཐིག་གི་རིམ་པ་བཤད་པར་བྱ། །སྟེགས་བུ་ཇི་ལྟར་མཚམས་པ་ཡི། །དབུས་མཐོ་མཐའ་གཞོལ་འཇོམས་ཞིང་སྙོམས། །ཤར་ལྷོ་ཤིན་ཏུ་གཞོལ་མི་བྱ། །ཚེ་དང་ནོར་ལ་གནོད་པ་ཡིན། །དེས་ན་ཀུན་ནས་གྲུ་བཞིར་བྱ། །སློབ་དཔོན་སློབ་མ་ནུབ་ཤར་དུ། །སྔར་བཞིན་གནས་ནས་སྟེགས་དེ་ལ། །དང་པོ་ཤར་ནུབ་ཚངས་ཐིག་གདབ། །དེ་ཡི་དབུས་སུ་མཚན་མ་བྱ། །དེ་ནི་དཀྱིལ་འཁོར་དབུས་ཡིན་ནོ། །དབུས་ནས་ཤར་ནུབ་ཚད་མཉམ་པའི། །མཚན་མ་བྱས་པ་བརྐྱང་བ་ཡི། །ལྷོ་བྱང་གཉིས་སུ་བྱ་རྗེས་བྱ། །དེ་སྟེང་ཚངས་ཐིག་གཉིས་པ་གདབ། །དེ་བཞིན་ལྷོ་བྱང་ཚངས་ཐིག་ལའང་། །ཤར་ནུབ་ལྟ་བུའི་མཚན་མ་བྱ། །ཕྱོགས་བཞིར་མཚན་མའི་སྟེང་བཟུང་བས། །ཟུར་བཞིར་བྱ་རྗེས་མཚན་མ་བྱ། །དེ་སྟེང་ཟུར་ཐིག་གཉིས་པོ་གདབ། ༈ །ཀུན་ནས་གྲུ་བཞིར་གྱུར་དེ་ལ། །ཇི་ལྟར་ཤོང་བའི་ཟླུམ་བསྐོར་བྱ། །དེ་ནི་མེ་རིའི་ཕྱི་ཡིན་ནོ། །ལྟེ་བ་ནས་བཟུང་དེ་ཡི་བར། །ཟུར་ཐིག་སྟེང་ནས་ཨངྐུ་བཅས། །ཆ་ནི་བཅུ་དྲུག་དག་ཏུ་བགོ། །དེ་ཡི་བཅོ་ལྔ་མེ་རིའི་ནང་། །དེ་ཡི་ཆ་ཕྲན་གཅིག་དང་གཉིས། །སླར་ཡང་ཆ་ཕྲན་གཅིག་བཅས་པ། །རྡོ་རྭ་པདྨས་རྩིབས་རྟེན་བྲི། །བཅུ་གསུམ་ངོས་ན་མདའ་ཡབ་ཀྱི། །ལོགས་ཐིག་བཞི་པོས་གྲུ་བཞིར་བཅད། །མདའ་ཐིག་ནས་ནི་ལྟེ་བའི་བར། །ཆ་བཞིར་བགེགས་ལ་གསུམ་པོ་ནི། །ནང་གི་ལྷ་གནས་ཉིད་ཡིན་ནོ། །བཞི་པ་རྩ་ཐིག་ཉིད་ཤེས་བྱ། །མདའ་ཐིག་དང་ནི་རྩ་ཐིག་བར། །ཕྱེད་བགོས་ཆ་ཆེན་གཉིས་འབྱུང་ངོ་། །ནང་མ་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །ཆ་ཆེན་ཕྱི་མ་ཕྱེད་དུ་བགོ། །ཕྱི་མ་དེ་ཡང་ཕྱེད་དུ་བཅད། །དྲྭ་ཕྱེད་ཤར་བུ་མདའ་ཡབ་འབྱུང་། ༈ །སྒོ་ཐིག་ཕྱིར་དུ་རྩ་ཐིག་ནས། །རྟ་བབ་ཕྱི་ཐིག་བར་དུ་ནི། །ཚངས་ཐིག་གཡས་གཡོན་ཆ་ཆེན་ནི། །གཉིས་གཉིས་ནང་མ་ཕྱེད་གདབ་ཅིང་། །ཕྱི་མ་ཕྱེད་གདབ་ཕྱི་མ་ནི། །ཆ་བཞིར་དགོས་པས་སྒོ་འཁྱུད་དང་། །སྒོ་འགྲམ་སྒོ་ལོག་མུན་པ་དང་། །ཀ་བ་ཀ་བའི་རྒྱན་རྣམས་འབྱུང་། །ཀ་བརྒྱན་མཐའ་རུ་ཆ་ཕྲན་བསྣན། ༈ །མདའ་ཡབ་ཕྱི་རོལ་རྟ་བབ་ལ། །སྣམ་བུ་བརྒྱད་མ་ཆ་ཆེན་གསུམ། །ནང་མ་གཉིས་པོ་བཞི་བཞིར་བགོ། །རྟ་བབ་སྣམ་བུ་བརྒྱད་ཡིན་ནོ། ། ཕྱི་མ་དབུས་དོར་མཐའ་གཉིས་གདབ། །པདྨ་ཆོས་འཁོར་གདུགས་ཀྱི་ས། །རྟ་རྐང་ཀ་རྒྱན་མཐའ་དང་མཉམ། །ཆུ་སྐྱེས་དང་ནི་སྒྲོམ་བུ་གཉིས། །དེ་ལས་ཆ་ཕྲན་གཅིག་གི་རིང་། །ཟར་ཚགས་དེ་ལས་གཉིས་ཀྱི་ཐུང་། །སྣ་འཕྱོང་དེ་ལས་གཅིག་གི་རིང་། །ཆུན་འཕྱང་དེ་ལས་གཉིས་ཀྱིས་ཐུང་། །ཤར་བུ་དེ་ལས་གཅིག་གི་རིང་། །དེ་ལས་ཁྱུང་མགོ་གཅིག་ཕྱར་རོ། །པདྨ་འཁོར་ལོ་གདུགས་གསུམ་པོ། །རྒྱ་ཚད་ཆ་ཕྲན་གཉིས་རེ་སྟེ། །པདྨའི་གཡས་གཡོན་ཆ་ཕྲན་ཕྱེད། །དོར་སར་རི་དྭགས་རེ་རེ་བྲི། ༈ །བསིལ་ཁང་འཁྱོག་དགུ་བྱ་བའི་ཕྱིར། །སྣམ་བུ་དང་པོ་ཕྱེད་དང་བཞི། །གཉིས་པ་གསུམ་པ་དྲུག་དྲུག་གོ། །བཞི་པ་ལ་ནི་བཞི་ཉིད་དོ། །སྣམ་བུ་ལྔ་པ་ཆ་ཕྲན་གསུམ། །དྲུག་པ་དེ་ནི་ཚངས་རྩེར་སླེབ། །དེ་རྣམས་ཕྱི་རུ་ཕྱེད་རེ་བཅད། ༈ །གླང་རྒྱབ་མིག་གསུམ་བྱ་འདོད་ན། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཛོམ་པ་ནས་བཟུང་སྟེ། །ཆ་ཕྲན་གཉིས་ཀྱི་དབུས་མ་བསྐོར། །མུན་པ་པ་ཏིའི་ཕྱི་ཐིག་དང་། །ཚངས་ཐིག་འཇོམ་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཉིས་ཀྱི་གཡས་གཡོན་བསྐོར། །དེ་རྣམས་ཕྱི་རུ་ཆ་རེ་བསྐོར། ༈ །འོག་བཞིའི་འཁོར་ལོ་བསྐོར་ཚུལ་ནི། །མདའ་ཐིག་ཟུར་ནས་ཆ་ཆེན་ཕྱེད། །དོར་བའི་ཟླུམ་བསྐོར་ནང་དུའང་། །ཆ་ཕྲན་བསྐོར་བ་རྩིབས་རྟེན་ཡིན། །རྩ་ཐིག་དང་ནི་སྒོ་ཁྱུད་ཐིག །འཛོམས་པ་ནས་བཟུང་རྩིབས་རྟེན་ལ། །རྩེ་རེག་གཡས་ནས་གཡོན་པ་བསྐོར། །གཡོན་ནས་གཡས་པ་བསྐོར་བར་བྱ། །འདི་ནི་རྡོར་སེམས་སྒྱུ་དྲྭའི་ལུགས། ༈ །ནང་གི་ལྟེ་བའི་ལྷ་གནས་ལ། །ཁྱམས་ཀྱི་ལྷ་སྣམ་ཆ་ཆེན་གཅིག །གློ་འབུར་ལ་ནི་ཆ་ཕྲན་ནོ། །དེ་ནང་གྲུ་ཆད་ཡང་པོ་འབྱུང་། །ཟུར་ཐིག་སྟེང་གི་ཨངྐུ་ལས། །ལྔ་སྟེང་རྡོ་རྗེའི་གདུང་ཟླུམ་བསྐོར། །གསུམ་སྟེང་ལྟེ་བའི་མུ་ཁྱུད་དེ། །གཉིས་ཀར་ཆ་ཕྲན་ནང་ཟླུམ་བསྐོར། །དེ་བར་ཐིག་རྩེ་འཛོམ་པ་ཡིས། །འཁོར་ལོ་རྩིབས་བཞིའི་རི་མོ་དབྱེ། །སྒོ་དང་རྟ་བབ་ལ་སོགས་པའི། །རི་མོ་རྣམ་པར་དབྱེ་བ་ཡིས། །དཔལ་ལྡན་སྒྱུ་འཕྲུལ་དཀྱིལ་འཁོར་འགྲུབ། །མཁས་པས་མ་ནོར་ཞིབ་མོའི་མིག །མཐོང་བ་བརྒྱུད་པ་གོམས་པ་གཅེས། །དགེ་འདིས་ལུས་ཅན་མཐའ་ཀླས་པ། །སྟུག་པོ་བཀོད་པ་ཉིད་འགྲུབ་ཤོག །དེ་ཡི་ཚེའང་ཐིག་སྐུད་མི་འགོང་བར་གལ་ཆེ་ཞིང་། འགོང་དགོས་པ་བྱུང་ཚེ་ཧྲཱིཿཞེས་སྒྲ་རིང་པོ་དང་། འདེགས་པའི་རྒྱས་ནམ་མཁར་བཏེགས་པའི་འོག་ཏུ་འཛུལ་བར་མོས་ཏེ། རབ་གནས་ལྡན་པའི་ཐིག་འགོང་ན། བདེ་གཤེགས་བསྐུར་བ་བཏབ་དང་མཚུངས། །ཧྲཱིཿསྒྲའི་ཕྱག་རྒྱས་འཛུལ་བར་བྱ། ཞེས་གསུངས་སོ། །སློབ་དཔོན་རྡོར་དྲིལ་ཐོགས་ཤིང་པད་ཀོར་དང་བཅས་ཏེ་ལྷ་ཡི་ང་རྒྱལ་གྱིས་གཡས་རྡོ་རྗེ་ཐུགས་ཀ་དང་གཡོན་དྲིལ་བུ་དཀུར་བརྟེན་པས་ཧྲཱིཿཧྲཱིཿཞེས་བརྗོད་ལ་སྒོ་རྣམས་བྱེ་བར་བསམ་ལ། ཐར་པ་དང་ཐམས་ཅད་མཁྱེན་པའི་གེགས་སུ་གྱུར་པ་ཐམས་ཅད་དབྱེའོ། །ཞེས་དྲི་བཟང་གི་ཆུས་སྒོ་ཁང་ཀྱི་རྩ་ཐིག་ཕྱིས་ལ། སླར་ཡང་ཐིག་སྐུད་ལ་མཆོད་ནས། བཛྲ་མུཿ ཞེས་ཐིག་སྐུད་ཀྱི་ཡེ་ཤེས་པ་ནམ་མཁར་གཤེགས། གཉིས་པ་ལ་གསུམ་ལྷ་དང་། བུམ་པའི་སྟ་གོན། སློབ་མ་ལྷག་གནས་སོ། །དང་པོ། གོང་གིས་བཟུང་བའང་འདི་ཉིད་དེ་དྲི་བཟང་གི་ཆུས་གཙོ་བོའི་གནས་སུ་གྲུ་བཞི། འཁོར་གནས་སུ་ཟླུམ་པོ་བྱས་ཏེ་འབྲས་སམ་ནས་མར་ལས་བཅོས་པའི་ཚོམ་བུ་བཀོད་དེ། ཧཱུྃ་བཛྲ་དྷྲཱིཀ྄ །མཱུྃ་དྷྭ་ཏྭེ་ཤྭ་རི། པཱྃ་པདྨ་མཎྜལ། ཨ་ཙནྜ་མཎྜལ། མ་སུརྻ་མཎྜལ་ཧཱུྃ། ཀ་ཡ་ཝཀ྄་ཙིཏྟ་ཏིཥྛ་བཛྲ་ས་མ་ཡ་སྟྭཾ། འཁོར་སྔགས་ཚང་མ་ལའང་ཀཱ་ཡ་སོགས་ཀྱི་སྔགས་དེ་བཏགས་པས་བཀོད། ལྷ་གྲངས་དང་མཉམ་པའམ་ཕྱོགས་བཞིར་མཆོད་པ་ཆ་བཞི། རྩ་མཆོད་དང་ལྔའམ། རྩ་མཆོད་ལྟར་མཆོད་པ་ཆ་ལྔ་ལྔར་འགོད། དེ་དག་ཀྱང་གནས་སོ་སོ་ནས་མ་འཁྲུལ་པར་བྱ་ཞིང་མཐར་གོང་གི་གསལ་གདབ་པའི་ཚིག །ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། སོགས་ནས། བཙལ་ཀྱང་རྒྱལ་བས་མི་མཉེས་སོ། །ཞེས་དང་། ཨེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སོགས་ནས། བཙལ་ཀྱང་རྒྱལ་བས་མི་མཉེས་སོ། །ཞེས་དང་། འཁོར་ལོ་རྒྱལ་པོ་རྒྱལ་མོ་དང་། །སོགས་ནས། འདུལ་བ་བཞི་ཡིས་འགྲོ་དོན་མཛད། །ཅེས་བརྗོད་དེ་རང་གི་རྡོ་རྗེའི་ལུས་དང་། དེའི་རྩ་ཐིག་རླུང་གསུམ་གྱི་ཆོ་འཕྲུལ་དུ་ཤར་བའི་ཕྱི་ནང་སྣོད་བཅུད་འཁོར་འདས་དག་མ་དག་ཐམས་ཅད་རང་བྱུང་ཡེ་ཤེས་ཀྱི་རོལ་རྩལ། ཆོས་ཉིད་དོན་གྱི་ལྷར་གནས་པའི་བྱིན་རླབས་ཆོས་ཅན་ལྷ་ཡི་དཀྱིལ་འཁོར་དུ་ཡེ་གདོད་མ་ནས་གནས་པའི་ལྷ་དོན་དྲན་པས་ངེས་ཤེས་བསྐྱེད། སླར་ཡང་ནམ་མཁར་བཏེགས་པའི་ལྷ་རྣམས་དེ་ལ་ཐིམ། ཛ་ཧཱུྃ་བཾ་ཧོ། ཕྱི་ནང་གི་མཆོད་པ་དང་། གླུ་དྲུག་གིས་བསྟོད་ནས། མཆོད་པ་རྙིང་པ་དག་བརྗེ། གཉིས་པ་ནི། ཤོམ ས་དང་། རབ་གནས་སོ། །དང་པོ་བཤད་རྒྱུད་རོལ་པ་ལས། རིན་ཆེན་སྣ་ཚོགས་རྒྱུ་ལས་བྱུང་། །ཁ་དོག་དབྱིབས་དང་རྒྱན་ལྡན་པའི། །དཀྱིལ་འཁོར་ཕོ་བྲང་བཟང་པ་ཉིད། །འབྲུ་ལྔ་སྤོས་ལྔ་སྙིང་པོ་ལྔ། །རིན་ཆེན་སྣ་ལྔ་སྨན་ལྔ་དག །ཉེ་བར་སྦྱར་བས་སྔགས་ཀྱི་མཆོད། །ཁ་རྒྱན་འགུལ་ཆིངས་བཟུངས་ཐག་བཅས། །ལྔའམ་བཅུ་གཉིས་ཉི་ཤུ་གཅིག །རིགས་ཀྱི་མཚན་མ་གྲངས་བཞིན་བྱ། །ཞེས་གསུངས་པས་གསེར་དངུལ་ཟངས་གསུམ་གང་རུང་ལས་གྲུབ་པའི་བུམ་པ་མི་གནག་ཅིང་། གསུས་པ་ཆེ་བ་ལྷུང་བཟེད་ཀྱི་དབྱིབས་ལྟ་བུ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ཞབས་ཞུམ་པ་ཚད་དང་མཚན་ཉིད་རྫོགས་པ་ལྷ་ཡི་གྲངས་དང་མཉམ་པ་སྟེ་ཡབ་ཡུམ་དབྱེར་མེད་དམ་རེ་རེར་བཅས་པས། ཉེར་ལྔའམ། ཉེར་གཅིག །བཅུ་གཉིས། དེ་དག་ཀྱང་བསྡུས་ན། རྡོ་རྗེ། དེ་བཞིན་གཤེགས་པ་རིན་པོ་ཆེ། པདྨ། ལས་ཏེ་རིགས་ལྔའི་བུམ་པ་ལྔ། དབུས་སུ་བུམ་གདན་དང་དྲུག །ལས་ཐམས་ཅད་པའི་བུམ་པ་སྟེ་བདུན་ནམ། བུམ་གདན་ཕྲི་བའི་བུམ་པ་དྲུག་ཤིན་ཏུ་མ་འཛོམ་ན་རྣམ་པར་རྒྱལ་བ་དང་ལས་བུམ་གཉིས་ཏེ་གང་ཡང་གཙང་ཞིང་དག་པར་བྱས་ལ། སུམྦྷ་ནིས་ཡུངས་དཀར་བྲབ་སྟེ་བགེགས་བསྐྲད། ཧཱུྃ་གི་གླུ་ལེན་པ་བཅས་གུ་གུལ་གྱིས་བདུག་སྟེ་སྐྱོན་མེད་པར་བྱ། བསངས་ཆུའི་སྔགས་བཟླ་ཞིང་དྲི་བཟང་དང་བསང་ཆུ་སྦྱར་བས་བྱུགས། ཀུན་བཟང་ཡབ་ཡུམ་གྱི་སྔགས་བཟླ་བཞིན་དུ་ཆུ་གཙང་སྲོག་ཆགས་མེད་པས་སུམ་གཉིས་པར། བཀང་བའི་ནང་དུ་རྫས་སུམ་ཅུ་སོ་སོར་རམ་ཅིག་ཆར་དུ་འདེབས་ཏེ་རིགས་ལྔ་ཡབ་ཡུམ་གྱི་སྔགས་བརྗོད། ཕྱོགས་མདོག་ནི་ན་བཟའ་དང་མགུལ་ཆིངས་སེམས་དཔའ་ཡབ་ཡུམ་སྔགས་ཀྱིས་དཀྲི། ཡལ་ག་ལོ་མ་འབྲས་བུར་བཅས་པའི་ཤིང་གིས་སམ། གཙང་མའི་རྩྭ་ཀུ་ཤས་ཁ་རྒྱན་སྒོ་བ་ཡབ་ཡུམ་སྔགས་ཀྱིས་འཛུགས། རྡོ་རྗེ་རྩེ་དགུ་ལ་མེ་ཏོག་གི་ཕྲེང་བ་སྐུད་པ་ཁ་དོག་ལྔ་ལྡན་གྱིས་བསྒྲིལ་བའི་གཟུངས་པ་ཐག་ཐུབ་དྲུག་གི་སྔགས་ཀྱིས་བཞག །ཡི་གེ་བརྒྱ་པའི་སྔགས་བཟླ་ཞིང་མཚན་མ་འདོགས་ཏེ། ལྷ་གྲངས་དང་མཉམ་པའི་བུམ་པ་ལ་ནི་སྒྲུབ་ཐབས་ཀྱི་ཐུགས་ཕྱག་མཚན་བསྐྱེད་པ་ནས་འབྱུང་བའི་ཕྱག་མཚན་སོ་སོ་མ་ནོར་བར་འདོགས། དཀྱིལ་འཁོར་གྱི་ཚོམ་བུའི་ལྷ་གསན་ལྟར་བཀོད། ཉེར་གཅིག་པ་ལ་ལས་བུམ་མ་གཏོགས་པའི་ཕྱོགས་བཞིར་བཞི་པ་ཞི། དབུས་སུ་བཞི་སྟེ་རང་མཚན་དང་། བཅུ་གཉིས་པ་ལས་བུམ་ཟུར་དུ་ཕྱི་བའི་ཕྱོགས་རེར་གཉིས་གཉིས་དང་། ལྔ་པ་ལ་ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རྒྱ་གྲམ་མ་མ་རལ་གྲི། དབུས་སུ་རྡོ་རྗེ་རྣམས་དང་། བུམ་པ་གཅིག་ཡིན་ན་དེ་ཐམས་ཅད་ཀྱི་མཚན་མ། ལས་ཐམས་ཅད་ཀྱི་བུམ་པར་སྣ་ཚོགས་རྡོ་རྗེ་རྣམས་བཀོད་ལ་དེ་དག་དཀྱིལ་འཁོར་གྱི་དབུས་དང་ཕྱོགས་བཞིར་ཀུ་ཤའི་གདན་ལ་གནས་མ་འཆོལ་བར་བཞག །མཆོད་པ་ལྷ་གྲངས་མཉམ་པའམ། ཤར་དུ་ཆུ་བརྒྱད་ལྷོ་ཡི་ཆར། །མེ་ཏོག་བཞི་དང་ལྷོ་ནུབ་ཏུ། །སྤོས་བཞི་ནུབ་ཏུ་མར་མེ་བཞི། །ནུབ་བྱང་ངོས་སུ་དྲི་ཆབ་བཞི། །བྱང་དུ་ཞལ་ཟས་རྣམ་པ་བཞི། །བྱང་ཤར་མཚམས་འཛིན་མེ་ཏོག་བཞི། །དེ་དག་ཤར་དུ་གཏོར་མ་དང་། །སློབ་དཔོན་མདུན་དུ་སྨན་རྣམས་བཀོད། །མདུན་དུ་ཐོད་པའི་ནང་དག་ཏུ། །སྔར་གྱི་ཆག་ཆག་བཏབ་པའི་ལྷག །དྲི་བཟང་སུམ་ཅུའི་རྫས་ལྡན་བླུགས། །དེ་ནི་འོད་ཞུ་འབུལ་བའི་ཆབ། །སྒྲུབ་ཐབས་ནས་འབྱུང་བའི་མཆོད་པ་བྱིན་རླབས་བྱ། གཉིས་པ་ནི་བུམ་པ་རྒྱས་འབྲིང་ལ་རིམ་གྱིས་བསྐྱེད་པ་དང་། བུམ་པ་བསྡུས་པ་ལ་ཅིག་ཆར་དུ་བསྐྱེད་པའོ། །དང་པོ་ནི། འོག་ཏུ་འབྱུང་བའི་བུམ་པ་བསྐྱེད་པ་ཟིན་ནས། དེ་འདྲའི་བུམ་པ་ཉེར་ལྔ་པའི། །དང་པོའི་ནང་དུ་པད་ཟླ་ཉི་མ་རིན་པོ་ཆེ་སེང་གེས་བཏེགས་པའི་ཁྲིལ། ཧཱུྃ་བཛྲ་དྷྲཱིཀ྄ །མཱུྃ་དྷཱ་ཏེ་ཤྭ་རི། བཅོམ་ལྡན་འདས་དཔལ་ཐུགས་སྒྱུ་འཕྲུལ་དྲྭ་བ་སོགས་ནས། སྐྱིལ་ཀྲུང་གིས་འཁྲིལ་བའོ། །བུམ་པ་གཉིས་པའི་ནང་ནས་ལྔ་པའི་བར་དུ། གླང་རྟ་རྨ་བྱ་མཁའ་ལྡིང་གིས་བཏེགས་པའི་ཁྲི་པད་ཉི་ཟླ་བ་ལྔ་བརྩེགས་ཀྱི་ཤར་བུམ་དུ། ༀ་ཛི་ན་ཛིཀ྄ །ལྃ་དྭཻ་ཥ་ར་ཏི། གཟུགས་ཕུང་དང་གཏི་མུག་ནས་འཛིན་པ། སྭཱ་རཏྣ་དྷྲཱིཀ྄ །མྃ་མོ་ཧ་ར་ཏི། ལྷོ་བུམ་དུ། ཚོར་ཕུང་དང་། སོགས་རཱ་ག་ར་ཏི། ནུབ་བུམ་དུ། འདུ་ཤེས་ཀྱི། སོགས། བཛྲ་ར་ཏི། བྱང་བུམ་དུ། འདུ་བྱེད་ཀྱི་ཕུང་པོ་དང་སོགས་ནས། ཡབ་ལ་གཟིགས་པའོ། །བུམ་པ་དྲུག་པ་ནས་བཅུ་གསུམ་པའི་བར་གྱི་ནང་དུ་ཁྲི་ཆུང་པད་ཉི་ཟླ་བ་བཞི་བརྩེགས་རེ་ལ། ཕྱོགས་བཞིར་ནང་སེམས་བཞི་ནི་ནས། དོན་ཡོད་གྲུབ་པའི་ཐུགས་དང་སྐུ་ལས་སྐྱེས་པ། མཚམས་བཞིར་ཕྱི་སེམས་བཞི་ནི་ནས། མངོན་པར་བྱང་ཆུབ་པའི་སྐུའོ། །བུམ་པ་བཅུ་བཞི་པ་དང་། བཅོ་ལྔ་པ་ཤར་ནུབ་ཏུ་གནས་པའི་ནང་པད་ཉི་ཟླ་བ་སུམ་བརྩེགས་ཀྱི་གདན་ལ། རྟོག་ཚོགས་རྒྱལ་བའི་དཀྱིལ་འཁོར་དུ་ཤར་བས་སོགས། ནུབ་ཏུ་གཟིགས་པ། ཆོས་འདུས་བྱས་དང་། སོགས་ནས། ཆོས་ཀྱི་སྐུའོ། །བུམ་པ་བཅུ་དྲུག་པ་ནས་ཉེར་གཅིག་པའི་བར་གྱི་ནང་དུ་པད་རྐྱང་རེ་ལ་ཐུབ་དྲུག་ནི། ༀ་མུ་ནི་ཀྲིཾ་སྭཱ་ཧཱ། སོགས་ནས། སྤྲུལ་པའི་སྐུའོ། །བུམ་པ་ཉེར་གཉིས་ནས་ཉེར་ལྔ་པའི་བར་གྱི་ནང་དུ་ཉི་རྐྱང་རེ་ལ་སྒོ་བ་བཞི་ནི། ཧཱུྃ་ཡ་མཱནྟ་ཀྲྀཊ་ཕཊ། སོགས་ནས། ཤར་སྒོ་སོགས་ལ། ཤར་བུམ་ཐ་མར། ཞེས་སོགས་བསྒྱུར་བས། རོལ་པ་ཁྲོ་བོའི་ཆས་ཐམས་ཅད་ཀྱིས་བརྒྱན་པ། དེ་ཐམས་ཅད་རྡོ་རྗེའི་སྐུའོ། །ལས་ཐམས་ཅད་པའི་བུམ་པར། ཞེས་སྒྲེལ། ཉེར་གཅིག་པ་དང་བཅུ་གཉིས་པ་ནི། ལྔ་པ་དང་ཕལ་ཆེར་མཚུངས་ཏེ་ལག་ལེན་མཛད་པ་ཉུང་བས་མ་བཀོད་དེ། འབྲིང་པོ་ལྔ་པའི་ལུགས་ལ་རྟེན་བུམ་པ་བསྐྱེད་པ་དང་། བསྟེན་པ་ལྷ་བསྐྱེད་པའོ། །དང་པོ་ནི། ༀ་ཀྲོ་དྷི་ཤྭ་རི་ཧཱུྃ་ཕཊ། ཅེས་བསངས། ༀ་སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་གདན་གྱི་སྟེང་དུ་བྷྲཱུཾ་ལས་བྱུང་བའི་རིན་པོ་ཆེའི་བུམ་པ་ལྟོ་བ་ལྡིར་བ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ཞབས་ཞུམ་པ། ལྷ་རྫས་ཀྱི་གོས་ཀྱིས་མགུལ་ཆིངས་དང་། དཔག་བསམ་ཤིང་གིས་ཁ་བརྒྱན་པའི་ནང་སྙིང་པོ་ཐམས་ཅད་ཀྱིས་ཡོངས་སུ་གདབ། ༀ་ཏ་པྟེ་ཏ་པྟེ་མ་ཧཱ་ཏ་སྟེ་སྭཱ་ཧཱ། ལ་ཡི་ཆུ་བོ་གངྒཱ་དལ་གྱིས་འབབ་པས་ཡོངས་སུ་གང་བར་གྱུར། གཉིས་པ་ནི། དེ་འདྲའི་བུམ་པ་ལྔ་ཡི་དབུས་མའི་ནང་དུ་སེང་ཁྲི་པད་ཉི་ཟླ་བ་ལྔ་བརྩེགས་དང་། པད་ཉི་ཟླ་བ་སུམ་བརྩེགས་གཉིས་དང་། པད་རྐྱང་དྲུག་ལ་རིམ་པ་བཞིན། ཧཱུྃ་བཛྲ་དྷྲཱིཀ྄ །མཱུྃ་དྷཱ་ཏི་ཤཱ་རི། ཀུན་བཟང་ཡབ་ཡུམ་དང་། ཐུབ་དྲུག་གི་སྔགས་བརྗོད་ལ། དབུས་སུ་མི་བསྐྱོད་རྡོ་རྗེ་མཐིང་། །དབུ་གསུམ་མཐིང་དཀར་དམར་བའི་ཞལ། །ཕྱག་དྲུག་གཡས་གསུམ་རྡོ་རྗེ་དང་། །འཁོར་ལོ་རིན་ཆེན་འབར་བ་བསྣམས། །དྲིལ་བུ་པདྨ་རལ་གྲི་གཡོན། རྡོ་རྗེ་དབྱིངས་ཕྱུག་ཡུམ་དང་སྦྱོར། །དེ་ཡི་ནུབ་དང་ཤར་དག་ཏུ། །ཀུན་བཟང་མཐིང་ཀ་རྡོ་རྗེ་འཛིན། །བཟང་མོ་དཀར་མོ་ཆོས་འབྱུང་ཕྱག །ཤར་ལྷོ་བྱང་ལྷོ་ནུབ་བྱང་དང་། །ལྷོ་ནུབ་བྱང་ཤར་ཕྱོགས་རྣམས་སུ། །བརྒྱ་ཕྱིན་དཀར་པོ་པི་ཝང་འཛིན། །ཤཱཀ་ཐུབ་སེར་པོ་སྤར་བསྲེག་བསྣམས། །དམ་བརྟེན་དམར་པོ་གླེགས་བམ་འཛིན། །ཁ་འབར་ལྗང་གུ་ཞལ་ཟས་བསྣམས། །ཐག་བཟང་སྔོན་པོ་གོ་ཆ་འཛིན། །ཆོས་རྒྱལ་ནག་པོ་མེ་ཆུ་བསྣམས། །དེ་རྣམས་མི་བསྐྱོད་ཅོད་པན་ཅན། །ཤར་བུམ་དུ་གླང་པོ་ཆེའི་ཁྲི་པད་ཉི་ཟླ་བ་ལྔ་བརྩེགས་དང་། ཁྲི་ཆུང་པད་ཉི་ཟླ་བ་སུམ་བརྩེགས་གཉིས། ཉི་རྐྱང་བཅས་པའི་གདན་ལ། ༀ་ཛི་ན་ཛིཀ྄ །ལྃ་དྭཻ་ཥ་རཱི་ཏི། ས་སྙིང་ཡབ་ཡུམ་དང་བྱམས་པའི་སྔགས་ཡབ་ཡུམ། གཤིན་རྗེ་གཤེད་ཡབ་ཡུམ་བཅས་པའི་སྔགས་བརྗོད། དེ་དབུས་རྣམ་པར་སྣང་མཛད་དཀར། །དབུ་གསུམ་དཀར་མཐིང་དམར་བའི་ཞལ། །ཕྱག་དྲུག་གཡས་གསུམ་འཁོར་ལོ་དང་། །རྡོ་རྗེ་རིན་ཆེན་འབར་བ་བསྣམས། །དྲིལ་བུ་པདྨ་རལ་གྲི་གཡོན། །སངས་རྒྱས་སྤྱན་དང་གཉིས་མེད་འཁྲིལ། །ས་སྙིང་དཀར་མོ་ལ་སེ་ཡུམ། །མྱུ་གུ་དྲིལ་འཛིན་རྡོ་རྗེ་བསྣམས། །བྱམས་པ་དཀར་མོ་དྷཱུ་པེ་ཡུམ། །ཀླུ་ཤིང་དྲིལ་འཛིན་བདུག་སྤོས་བསྣམས། །གཤིན་རྗེ་མཐིང་ནག་འཛིན་གྱེད་ཡུམ། །ཐོད་དབྱུག་དུག་ཁྲག་ལྕགས་ཀྱུ་བསྣམས། །དེ་རྣམས་རྣམ་སྣང་ཅོད་པན་ཅན། ༈ །ལྷོ་བུམ་དུ་རྟ་མཆོག་ཁྲི་པད་ཉི་ཟླ་བ་ལྔ་བརྩེགས་དང་། ཁྲི་ཆུང་པད་ཉི་ཟླ་བ་སུམ་བརྩེགས་གཉིས། ཉི་རྐྱང་བཅས་པའི་གདན་ལ། སྭཱ་རཏྣ་དྷྲིཀ྄ །མཱྃ་མོ་ཧ་ར་ཏི། ནམ་སྙིང་ཡབ་ཡུམ། སྒྲིབ་སེལ་ཡབ་ཡུམ། སྟོབས་པོ་ཆེ་ཡབ་ཡུམ་རྣམས་སྔགས་བརྗོད། དེ་དབུས་རིན་ཆེན་འབྱུང་ལྡན་སེར། །དབུ་གསུམ་སེར་དཀར་དམར་བའི་ཞལ། །ཕྱག་དྲུག་གཡས་གསུམ་རིན་ཆེན་དང་། །རྡོ་རྗེ་རྩེ་ལྔ་འཁོར་ལོ་བསྣམས། །དྲིལ་བུ་པདྨ་རལ་གྲི་གཡོན། །མཱ་མཱ་ཀི་དང་གཉིས་མེད་འཁྲིལ། །ནམ་སྙིང་སེར་པོ་མཱ་ལྱཻ་ཡུམ། །རལ་གྲི་དྲིལ་འཛིན་ཕྲེང་བ་བསྣམས། །སྒྲིབ་སེལ་སེར་པོ་པུཥྤེ་ཡུམ། །འཁོར་ལོ་དྲིལ་འཛིན་མེ་ཏོག་བསྣམས། །སྟོབས་ཆེན་སེར་ནག་འདྲེན་བྱེད་ཡུམ། །རྡོར་དབྱུག་ཐོད་ཁྲད་ཞགས་པ་འཛིན། །དེ་རྣམས་རིན་འབྱུང་ཅོད་པཎ་ཅན། ༈ །ནུབ་བུམ་དུ་རྨ་བྱའི་ཁྲི་པད་ཉི་ཟླ་བ་ལྔ་བརྩེགས་དང་། ཁྲི་ཆུང་པད་ཉི་ཟླ་བ་སུམ་བརྩེགས་དང་ཉི་རྐྱང་བཅས་པའི་གདན་ལ། ཨཱོཾ་ཨ་རོ་ལིཀ྄ །པྃ་ར་ག་ར་ཏི། ཀུན་བཟང་ཡབ་ཡུམ་སྤྱན་གཟིགས་ཡབ་ཡུམ་རྟ་མགྲིན་ཡབ་ཡུམ་བཅས་པའི་སྔགས་བརྗོད། དེ་དབུས་སྣང་བ་མཐའ་ཡས་དམར། །དབུ་གསུམ་དམར་དཀར་མཐིང་ནག་ཞལ། །ཕྱག་དྲུག་གཡས་གསུམ་པདྨ་དང་། །རྡོ་རྗེ་རྩེ་ལྔ་འཁོར་ལོ་འཛིན། །དྲིལ་བུ་རིན་ཆེན་རལ་གྲི་གཡོན། །གོས་དཀར་མོ་དང་གཉིས་མེད་འཁྲིལ། །ཀུན་བཟང་དམར་མོ་དཱི་པཱྃ་ཡུམ། །སྙེ་མ་དྲིལ་འཛིན་མར་མེ་བསྣམས། །སྤྱན་གཟིགས་དམར་མོ་གིརྟི་ཡུམ། །པདྨ་དྲིལ་འཛིན་པི་ཝཾ་བསྣམས། །རྟ་མགྲིན་དམར་ནག་འཆིང་བྱེད་ཡུམ། །བེ་ཅོན་དུང་ཁྲག་ལྕགས་སྒྲོག་བསྣམས། །དེ་རྣམས་སྣང་མཐའི་ཅོད་པཎ་ཅན། ༈ །བྱང་བུམ་དུ་ནམ་མཁའ་ལྡིང་གི་ཁྲི་པད་ཉི་ཟླ་བ་ལྔ་བརྩེགས་དང་། ཁྲི་ཆུང་པད་ཉི་ཟླ་བ་སུམ་བརྩེགས་དང་། ཉི་རྐྱང་བཅས་པའི་གདན་ལ། ཧཱ་པྲ་ཛྙཱ་དྷྲིཀ྄ །ཏཱྃ་བཛྲ་ར་ཏི། ཕྱག་རྡོར་ཡབ་ཡུམ། འཇལ་དཔལ་ཡབ་ཡུམ། བདུད་རྩི་འཁྱིལ་པ་ཡབ་ཡུམ་རྣམས་ཀྱི་སྔགས་བརྗོད་ལ། དེ་དབུས་དོན་ཡོད་གྲུབ་པ་ལྗང་། །དབུ་གསུམ་ལྗང་དཀར་དམར་བའི་ཞལ། །ཕྱག་དྲུག་གཡས་གསུམ་རལ་གྲི་དང་། །རྡོ་རྗེ་རྩེ་ལྔ་འཁོར་ལོ་འཛིན། །དྲིལ་བུ་རིན་ཆེན་པདྨ་གཡོན། །དམ་ཚིག་སྒྲོལ་མ་གཉིས་མེད་འཁྲིལ། །ཕྱག་རྡོར་ལྗང་ཀུ་ནིརྟི་ཡུམ། །རྡོ་རྗེ་དྲིལ་འཛིན་ཞལ་ཟས་བསྣམས། །འཇམ་དཔལ་ལྗང་ཀུ་གནྡྷེ་ཡུམ། །ཨུཏྤལ་དྲི་འཛིན་དྲི་ཆབ་བསྣམས། །བདུད་རྩི་ལྗང་ནག་བརླག་བྱེད་ཡུམ། །རྒྱ་གྲམ་ཐོད་ཁྲག་དྲིལ་བུ་འཛིན། །དེ་རྣམས་དོན་གྲུབ་ཅོད་པཎ་ཅན། ༈ །ལས་ཐམས་ཅད་པའི་བུམ་པ་སྣ་ཚོགས་རྡོ་རྗེས་མཚན་པའི་ནང་དུ་ཉི་གདན་ལ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས། ཧཱུྃ་བིགྷྣཱནྲ་ཏ་ཀྲྀཏྲ་ཕཊ། ཁྲོ་བོ་མི་འཆི་ཐབ་སྦྱོར་ལྗང་ནག་ལ། རྒྱ་གྲམ་དྲིལ་བུ་འཛིན་ཅིང་ཁྲོ་ཆས་རྫོགས། །དབུ་སྐྲ་དམར་སེར་རབ་འབར་གྱད་འདོར་སྟབས། །ཉི་མའི་གདན་ལ་འགྱིང་ཞིང་རོལ་པའོ། །རྣམ་བུམ་རྣམས་ལ་ལྔ་ཚན་ལྔས་བསྐུར། ལས་བུམ་ལས་རིགས་བདག་པོར་བྱས་པའི་རིགས་ལྔས་དབང་བསྐུར། གནས་ལྔ་བྱིན་གྱིས་བརླབ་བོ། །སྙན་བསྣན། དྲངས། བསྟིམ། བརྟན། ཕྱི་ནང་གསང་གསུམ་གྱིས་མཆོད། ཞི་བའི་གླུ་དྲུག་གིས་བསྟོད། ཧཱུྃ། འཇིགས་པའི་ཧཱུཾ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་སླད། །བགེགས་ཀྱི་དགྲ་ལ་ཕྱག་འཚལ་བསྟོད། །བསྙེན་པ་འོག་ནས་འབྱུང་བས་འབུལ། གཉིས་པ་བསྡུས་པ་ནི། བསྐྱེད་ཆོག་གོང་ལྟར་ལ། ཡོངས་སུ་གང་བར་གྱུར། དེ་དབུས་སེང་གླང་རྟ་རྨ་བྱ། །མཁའ་ལྡིང་ཁྲི་པད་ཉི་ཟླ་ལྔ། །རིན་ཆེན་ཁྲི་པད་ཉི་ཟླ་བརྒྱད། །པད་ཉི་ཟླ་བ་སུམ་བརྩེགས་གཉིས། །པད་རྐྱང་དྲུག་དང་ཉི་རྐྱང་བཞི། །རང་རང་ལྷ་ཡི་གདན་གྱི་སྟེང་། །ཧཱུྃ་ཨཱོཾ་སྭཱ་ཨཱྃ་ཧཱ། མཱུྃ་ལཱྃ་མཱྃ་པཱྃ་ཏཱྃ། ཀྴིཾ་དྲྃ་ཧྲཱིཾ་ཛིཾ། མེཾ་ཐླྷིཾ་ཧཱུྃ་མཱུྃ། ཛཿཧཱུྃ་བྃ་ཧོ། ཧཱུྃ་ཧཱུྃ་ཧཱུྃ་ཧཱུྃ། ཛཿཧཱུྃ་བྃ་ཧོཿ ༀ་ཨ། ཀྵིཾ་ཏྲུཾ་སྲུཾ་པྲཾ་ཀྵཾ་ཡེ། སྥ་ར་ཎ་ཕཊ྄། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་སོ་སོའི་ཕྱག་མཚན་ས་བོན་གྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ྄ །མཱུྃ་དྷཱ་ཏྭེ་ཤྭ་རི། སོགས་ཞི་བ་བཞི་བཅུ་ཞེ་གཉིས་ཀྱི་སྔགས་བརྗོད་ལ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་ཏེ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་གྱི་འཁོར་ལོ་ཐམས་ཅད་ཡོངས་སུ་རྫོགས་པར་གྱུར། འཁོར་ལ་རྒྱལ་པོ་རྒྱལ་མོ་དང་། སོགས་ནས། འདུལ་བ་ཞི་ཡིས་འགྲོ་དོན་མཛད། གོང་གིས། ལས་ཐམས་ཅད་པའི་བུམ་པ་ནས་འགྱིང་ཞིང་རོལ་པའོ། །བསྐུར། རློབ། བརྟན། དྲངས། བསྟིམ། མཆོད། བསྟོད། བདག་གི་ཐུགས་ཀའི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་གཙོ་བོའི་ཐུགས་དམ་རྒྱུད་བསྐུལ། དེའི་འོད་ཟེར་འཁོར་རྣམས་ལ་ཕོག་པས། ཡབ་ཡུམ་ཐམས་ཅད་ཀྱི་ཐབས་ཤེས་བདེ་ཆེན་བྱང་ཆུབ་སེམས་ཀྱི་འོད་ཀྱིས་ཀུན་ལ་ཁྱབ། དེ་དག་གི་བྱིན་རླབས་ཀྱང་གཙོ་བོ་ཡབ་ཡུམ་གྱི་ཐུགས་ཀར་འདུས། དེ་དག་གི་སྐུ་ལས་བདེ་ཆེན་ཡེ་ཤེས་ཀྱི་བདུད་རྩིར་བབ་པས་བུམ་པ་གང་བར་གྱུར། པད་བསྐོར་དང་གར་བསྐོར་བསྒྲགས་གཟུངས་ཐག་སློབ་དཔོན་གྱི་ཐུགས་ཀར་འཛིན། གཙོ་བོ་ཡབ་ཡུམ་ལྔ། ཀུན་བཟང་ཡབ་ཡུམ་བཅས་བརྒྱ་རྩ་རེ། འཁོར་ལ་མར་ཕྱེད་རེས་ཉུང་བར་བྱ་སྟེ་ལྔ་བཅུ་རེ་བཟླ། མཐར་གཙོ་སྔགས་ལན་བདུན་བཟླས་ནས་ཐོད་ཆུ་བུམ་ནང་དུ་ཕུལ་ནས། འཇོག་དུས་སུ། ལྷ་ཐམས་ཅད་ཀྱང་ཆགས་པ་ཆེན་པོའི་ཡེ་ཤེས་ཀྱི་བདུད་རྩིར་ཞུ་བ་བུམ་ཆུ་དང་རོ་གཅིག་ཏུ་གྱུར། སློབ་དཔོན་གྱིས་པད་བསྐོར་བཅས་མེ་ཏོག་དཀར་པོ་བུམ་པའི་ནང་དུ་འབུལ། ལས་རྡོར་གྱིས་བདུག་སྤོས་བདུག་སྟེ། སློབ་དཔོན་གྱི་ལོགས་སུ་སྟེགས་ལ་གྲལ་ཐབས་སུ་བཀོད་པར་གསུངས་སོ། །ཡང་བུམ་པ་ལྔ་པ་ལའང་འདི་ལྟར་བྱས་ན་འཐུས་པ་ནི། མན་ངག་གསུང་སྒྲོས་ལས། ཐམས་ཅད་རང་རིག་ཡེ་ཤེས་ཕྱིར། གཙོ་བོ་འཕོ་ཡང་མི་དགོས་སོ། །ཞེས་ཀྱང་ཡིག་རྙིང་ལས་གསུངས་སོ། །འདིར་ཨོ་རྒྱན་གཏེར་བདག་གླིང་པས། དབང་དང་རབ་གནས་དང་། བདག་འཇུག་ཙམ། བསྒྲུབ་པ་དངོས་གྲུབ་ཀྱི་དབང་ལེན་རྣམས་ལ་བུམ་པ་ངེས་པར་དགོས་མེད། སྒྲུབ་མཆོད་ཙམ་ལ་ངེས་པར་མི་དགོས་ཀྱང་འགྲུབ་ན་ལེགས་སོ། །གསུངས། མཆོད་རྫས་རྙིང་པ་རྣམས་དོར། ཆོམ་བུ་ལ། སླར་ཡང་མཆོད་པ་བཤམས་ཏེ། དཀྱིལ་འཁོར་ཡོལ་བས་བཅད། སློབ་མ་སྟ་གོན་གྱི་ཆས་རྣམས་སྟེགས་ལ་འདུ་བྱའོ། །གསུམ་པ་སློབ་མ་ལྷག་པར་གནས་པ་སྟ་གོན་གྱི་ཆོ་ག་ལ། གསང་བ་སྤྱི་རྒྱུད་ལས་གསུངས་པ་ལྟར་སྣོད་དང་ལྡན་པའི་སློབ་མ་འདུ་བྱས་ལ། དབང་གི་ཆོ་ག་ལས་འབྱུང་བ་ལྟར་རྗེས་འཛིན་བྱའོ། །སློབ་མ་སྟ་གོན་ཟིན་ཕྲལ། ལྷ་ལྟ་གོན་གྱི་འཇུག་བསྡུ་བའི་ཕྱིར། སྒྲུབ་ཐབས་ནས་བྱུང་བའི་མཆོད་པ་བྱིན་རླབས་ཕྱི་ནང་གསང་བ་སྔགས་ཙམ་གྱི་མཆོད། གླུ་དྲུག་གིས་བསྟོད་ལ། སློབ་དཔོན་གཙོ་བོ་གཉིས་པའི་ཚུལ་གྱིས་ཤར་སྒོར་བཞེང་སྟེ། གཡས་སྤོས། གཡོན་དྲིལ་བུ་ཐོགས་ལ། གྲོགས་དང་བཅས་པས་སྟ་གོན་གྱི་དཀྱིལ་འཁོར་བཏེགས་པའི་གསོལ་བཏབ་དབྱངས་དང་ལྡན་པ་འདི་སྐད་དོ། །མགོན་པོ་ཀུན་མཁྱེན་བདག་ཉིད་ཅན། །གཅིག་དང་དུ་མ་སྤྲོས་བྲལ་ཅིང་། །མ་ལུས་བདག་ཉིད་དགོངས་སུ་གསོལ། །ཁྱེད་རྣམས་མོས་ཤིང་མཆོད་པ་དང་། །ཁམས་གསུམ་ཡོངས་སུ་གཟུང་བྱ་ཞིང་། །རང་བཞིན་མཉམ་པར་བྱ་བའི་ཕྱིར། །ཆེ་གེ་མོ་བདག་དཀྱིལ་འཁོར་གྱི། །ལས་རྣམས་ཡོངས་སུ་རྫོགས་པར་བགྱི། །ཐུགས་རྗེས་ངེས་པར་དགོངས་ནས་ཀྱང་། །དཀྱིལ་འཁོར་བྱིན་གྱིས་རླབས་ནས་ནི། །ས་གཞི་ཡོངས་སུ་བཟུངས་བར་མཛོད། །ༀ་བཛྲ་ས་མ་ཡ་སྟཾ། ཞེས་ལན་གསུམ་གྱིས་མཐར། བེ་གཱ་ཀྲ་མ་ཡཾ། ཞེས་འདེགས་པའི་རྒྱ་བཅས། སྟ་གོན་གྱི་ལྷ་ནམ་མཁར་གཤེགས་པར་གྱུར། ཚོམ་བུ་རྣམས་བསྡུའོ། །བཞི་པ་ཚོན་གྱི་བྱ་བ་དང་། ལྔ་པ་བྲི་བ་ལ་ཐུན་མོང་དུ། དགོས་ཆེད་རྒྱུ་གྲངས་རབ་གནས་དང་། དབྱེ་ལུགས་ཉེས་པོ་སྤོང་བ་དྲུག །དང་པོ་ནི། མ་མཐོང་རྨོངས་ལ་བསྟན་ཕྱིར་ཚོན། །ཞེས་གསུངས་པས། གཞི་སེམས་ཉིད་ཡེ་ནས་ཡེ་ཤེས་ལྔ་དང་། འབྲས་བུ་རང་བཞིན་ལྷུན་གྲུབ་འོག་མིན་ན་བཞུགས་པ་མཐར་ཕྱིན་སྐུ་དང་ཡེ་ཤེས་མ་མཐོང་རྨོངས་པའི་གདུལ་བྱ་ལ་བསྟན་པའི་ཕྱིར་རོ། །གཉིས་པ། རབ་ནི་ལས་རིམ་ལས། ཨིནྟྲ་ནཱི་ལ་ཟླ་འོད་དང་། །པུ་ཤ་རཱ་ག་བྱུ་རུ་བཟང་། །མ་རྒ་ཏ་ལས་བྱས་པ་དབྱེ། །ཞེས་པ་ལྟར་རིན་ཆེན་ལྔའི་ཕྱེ་མ་དང་། འབྲིང་སྨན་ཁ་དོག་བསྒྱུར་བའམ། འབྲས་སཱ་ལུའམ་ནས་སོགས་འབྲུ་ཚོན་སྣ་ལྔས་ཁ་དོག་བསྒྱུར་བ་སྟེ། མེ་ལོང་ལས། འབྲས་དང་སཱ་ལུ་ལ་སོགས་པ། ཁ་དོག་བསྒྱུར་བ་དེ་བཞིན་ནོ། །གསུངས། ཐ་མ་བཀྲ་ཤིས་པའི་ཡུལ་ཕྱོགས་ནས་བྱུང་བས་ཚོན་ཁ་དོག་སྣ་ལྔ་པའམ། ཅོང་ཞི་དང་། རྡོ་དཀར་ཕྱེ་མར་བྱས་པ་ཁ་དོག་ལྔ་པ་སོགས་སོ། །གསུམ་པ་སྒྱུ་འཕྲུལ་ཞི་བ་རྒྱས་པ་ལ། ཚོན་སྣ་ཉི་ཤུ་རྩ་ལྔ་སྟེ། མཐིང་དཀར་སེར་དམར་ལྗང་བའི་ཁ་དོག་ལྔ་རེ་རེ་ལའང་། མཐིང་ནག །མཐིང་སྐྱ། མཐིང་སེར། མཐིང་དམར། མཐིང་ལྗང་སོགས་ཕྱེ་ཞིང་། འདིར་ཞི་བ་འབྲིང་པོའི་ལུགས་ཀྱི་རྡུལ་ཚོན་ཁ་དོག་ལྔ་པ་སྟེ། དེ་ལ་ཇི་ལྟར་བྱ་བ། རྡོ་ཕྱེ་བཏག་བརྡུང་ཆུར་བསིངས་བཏུལ། །དར་གྱི་ཚགས་མས་བཙག་པར་བྱ། །དམར་རྩི་འབྲི་མོག་ཡང་ན་སྐག །འོ་ཤང་གིས་བརླན་བྱུགས་པ་དེ། །ཉི་འོད་ལ་བསྲེགས་མ་སྐམ་ཙམ། །ས་བསྲེས་རང་མདོག་མ་ལོན་པར། །ལེགས་པར་མཉེས་པས་དམར་ལེགས་འབྱུང་། །དེ་བླ ན་མ་བྲལ་ཁ་ཁུག་བྱེད། །རྡོ་ཞོ་དང་སྦྱར་བྱ་རྡོ་མེར། །བསྲེགས་པ་གྲང་དུས་བརྡུང་ཕྱེ་འཕུལ། །མཐིང་གི་མདང་འོད་ཟིལ་གྱིས་གནོན། །རམ་བཏུལ་དེ་དང་ས་སྦྱར་ནས། །མཉེ་ན་ལྕགས་ཁ་འབྱུང་བར་འགྱུར། །བ་མོས་མ་རེག་སྟོན་དུས་ཀྱི། །སྤང་རྒྱན་མཉེད་བཏུབ་བྱས་པ་ཡི། །རྩེ་མོའི་ཆ་རྣམས་ཞིབ་མོར་བརྡུང་། །དེ་དང་ས་བསྲེས་སླར་བརྡུངས་ནས། །ཉི་མའི་འོད་དུ་མཉེ་ཞིང་བསྲེགས། །ལག་གཉིས་ལན་གསུམ་བསྐྱུར་བ་ན། །ཁ་དོག་སྔོན་པོ་ཕྱི་བཞིན་ལེགས། །དེ་ལ་རྡོ་ཞོ་བཏུལ་པོ་ནི། །ཞིབ་བཏགས་ཅུང་ཟད་བཏབ་བྱས་ནས། །བཏུད་ཅིང་མཉེ་ནས་ཉི་འོད་ལ། །བསྲེག་པས་ཁ་དོག་ལྗང་ཀུ་འབྱུང་། །གྲོ་ལྗང་གཞོན་ནུ་ཧཱ་ལའི་འདབ། །སྲན་མ་ཞོན་ནུ་སོགས་བརྡུང་ནས། །ས་བསྲེས་མཉེ་ཞིང་ཉི་མར་སྐམ། །འདིས་ཀྱང་ཁ་དོག་ལྗང་ལེགས་འོང་། །ཡུང་བ་ཞིབ་བཏགས་ཞོ་སྦྱར་ནས། །ས་དཀར་བསྲེས་པས་གྲིབ་སྐམ་བྱ། །གཙོ་མ་གསེར་གྱི་ཁ་དོག་འཛིན། །ཡང་ནི་རྡོ་ཞོའམ་བུལ་ཏོག་དང་། །སྦྱར་བས་ངུར་སྨྲིག་བཟང་པོ་འབྱུང་། །གྲོ་ཕྱེ་སྣུམ་སྦྱར་མེར་བསྲེགས་ན། །མིག་སྨན་མདོག་དང་རྣམ་པར་མཚུངས། །བཞི་པ་ནི། སྟེགས་བུ་ལ། དབུས་སུ་མཚོན་མཐིང་། ཧཱུྃ་ཤར་དུ་དཀར་པོ་ལ། ཨཱོཾ་ལྷོར་སེར་པོ་ལ། སྭཱ་ནུབ་དམར་པོ་ལ། ཨཱྃ་བྱང་དུ་ལྗང་གུ་ལ། ཧཱ་ཡང་དབུས་སུ། མཱུྃ་ཤར་དུ། ལཱྃ་ལྷོར། མཱྃ་ནུབ་ཏུ། པཱྃ་བྱང་དུ། ཏཱྃ་རྣམས་བྲི། མཐར་ཕྱི་ནང་གི་མཆོད་པས་བསྐོར། མདུན་སྟེགས་ལ་སྨན་གཏོར་བཀོད། བསངས་སྦྱངས། སྟོང་པའི་ངང་ལས་ཉི་ཟླའི་གདན་ལྔའི་སྟེང་དུ། སོགས་ནས། ཐིགས་སྐུད་ཅེས་པའི་ཚབ་ཏུ་རྡུལ་ཚོན་ལ་ཐིམ་དཔའ་བོ་འབྲུ་ལྔར་གྱུར། སླར་ཡང་ཉི་ཟླའི་གདན་ལྔའི་སྟེང་རང་གི་ཐུགས་ཀ་ནས། མཱུྃ་ལཱྃ་མཱྃ་པཱྃ་ཏཱྃ། རྣམ་འཕྲོས། རྡུལ་ཚོན་ལ་ཐིམ། དཔའ་མོ་འབྲུ་ལྔར་གྱུར། འོག་མིན་ནས་ས་བོན་གྱི་ཚོགས་བཀྲག །སོགས་གོང་ཐིག་ཆོག་ནས། ༀ་བཛྲ་ས་མཱ་ཡ་ཛཿ ཚོན་ལ་བྱིན་གྱིས་བརླབ་ཏུ་གསོལ། འབར་བའི་ལྟ་སྟངས་ཀྱི་རྫི་མ་བསྐྱོད་བཞིན་པར། རང་གི་མིག་གཉིས་སོགས་ནས། ༀ་བཛྲ་ས་མཱ་ཛཿ བརྣན། དྲངས། བསྟིམ། ཕྱི་ནང་གསང་བས་མཆོད། གླུ་དྲུག་གིས་བསྟོད། ཡབ་ཡུམ་སྦྲེལ་བའི་སྔགས་བདུན་བདུན་བདུན་བསྙེན། དེའི་མཐར། ༀ་ཨཱཿསརྦ་པཉྩ་རཏྣ་ས་མ་ཡེ་ཧཱུཾ་ཧཱུཾ། ཞེས་བརྒྱ་རྩ་བརྒྱད་ཟླ། ཧཱུཾ་ཞེས་པས། ལྷ་རྣམས་འོད་དུ་ཞུ་བས་རིན་པོ་ཆེའི་རྡུལ་ཕྲ་རབ་ཀྱི་རྡུལ་ཚོན་འབར་བར་གྱུར། བདེན་པ་དྲི་མ་མེད་གང་གི། །སངས་རྒྱས་བཅོམ་ལྡན་འདས་རྣམས་ཀྱིས། །སེམས་ཅན་ལ་བརྩེའི་བདེན་པ་དེས། །ཕྲ་མོའི་རྡུལ་ཚོན་འབར་གྱུར་ཅིག །ཅེས་ལན་གསུམ་གྱིས། གཡོན་བསྐོར་གྱིས་རྡོ་རྗེས་རྡུལ་ཚོན་དབྱི་བར་བྱའོ། །དབང་ཕྱུག་རྒྱས་པའི་ཆས་སུ་ཞུགས་ཏེ། དཀྱིལ་འཁོར་གྱི་ལྟེ་ཁུང་དུ་ཚོན་སྣ་ལྔ་རིགས་བསྡེབ་པ། མཐིང་། ལྗང་། དམར། དཀར། སེར་བའི་རིམ་པོ་ལྔ་འབྱུང་བ་རིམ་བརྩེགས་སུ་སྒོམ་ལ། མཱུྃ་ཏཱྃ་པཱྃ་ལཱྃ་མཱྃ། སླར་ཡང་གཡས་པའི་ཐེབ་སྲིན་གྱི་ཚོན་རྩི་ལྔ་ཅུང་ཟད་བླངས་པ་གཡོན་མཐིལ་དུ་བཞག་ལ། ཚོན་བྱིན་རླབས་ཀྱི་སྔགས་བཟླས་ལ། དོན་ཡེ་ཤེས་ལྔ་མཚོན་པའི་རྟགས་རིན་པོ་ཆེ་སྣ་ལྔ་ལས་གྲུབ་པའི་རི་རབ་ཏུ་གྱུར། ཆོས་རྣམས་བདག་སེམས་རྟོག་བྱས་ནས། །བྱང་ཆུབ་སེམས་ཉིད་དག་པའི་ཕྱིར། །ཤིན་ཏུ་དཀར་བའི་མདོག་ཏུ་བསྟན། །དེ་རྟོགས་བྱ་ཕྱིར་དག་པའི་མདོག །ཆོས་རྣམས་སེམས་སུ་མངོན་ཆགས་པ། །པདྨ་རཱ་ག་ཞེས་བརྗོད་དེ། །ཆགས་དང་ཆགས་པར་བྱ་བ་མེད། །ཆགས་མེད་ཕྱིར་ན་དམར་པོའོ། །ཡོན་ཏན་གཏེར་ལྡན་ཟད་མི་ཤེས། །ཐམས་ཅད་འབྱུང་བའི་གནས་ཡིན་ཏེ། །དབྱིངས་ཉིད་མི་ཟད་གཏེར་ཡིན་པས། །ཁ་དོག་གསེར་གྱི་མདོག་ཏུ་བསྟན། །འཁྲུལ་སྣང་ཕྱིན་ཅི་ལོག་རྣམས་ལ། །ཐུགས་རྗེ་ཆེན་པོའི་བྱིན་རླབས་ཀྱིས། །དབྱིངས་བསྡུད་ལས་རྣམས་རྫོགས་མཛད་པས། །ཀུན་ཏུ་ལས་ཀུན་ལྗང་གུའི་མདོག །དེ་བཞིན་ཉིད་ཀྱི་དབྱིངས་ཉིད་ལ། །ཅིས་ཀྱང་མི་ཚུགས་བཅོས་སུ་མེད། །ཁ་དོག་ནག་པོའི་དངོས་དང་བཞིན། །དེ་ཉིད་མཚོན་ཕྱིར་མཐིང་གར་བསྟན། །ཞེས་ཚོན་གྱིས་དག་དྲན་བྱའོ། །སླར་དཀྱིལ་འཁོར་གྱི་དབང་ལྡན་ནས་བརྩམས་ཏེ། བརྩིག་པ་ཕྱི་ནས་ལྗང་དམར་སེར་དཀར་མཐིང་ཆ་ཕྲན་ལྔ་ཡི་ཚད་དུ་སྙམས་པ་སྒོ་ཚད་གཅིག་གི་ཚད་ཙམ་དུ་བྲིས་ཏེ་ཀཱ་པཱ་ལས་བཀབ་ནས་བཞག །འདི་ནི་དབང་ལྡན་ནས་བགེགས་མི་འཇུག་པ་དང་། དངོས་གྲུབ་ཀྱི་འབྲས་བུ་ཐོབ་པ་ལ་བར་ཆད་ཡོད་མེད་བརྟགས་པ་སྟེ། དེ་ཡན་ཆོད་ནུབ་གཉིས་པའོ། །ནང་པར་རྩིག་པ་སྤྲེལ་རན་པ་ནམ་ཁ་ཕྱེ་ལ་པྲ་བརྟག་སྟེ། ཀུ་ཀུ་རཱ་ཛས། རེ་ཁ་དམའ་བས་མི་འགྲུབ་ཅིང་། །ཡོན་པོས་གདུང་བ་བསྐྱེད་པར་བྱེད། །ཆད་པས་སློབ་དཔོན་སློབ་མ་དག །འཆི་འམ་ན་བར་འགྱུར་བ་ཡིན། །ཆད་ལྷག་ལས་ནི་ནང་འབྱུང་ཞིང་། །ཕྱོགས་འཕྲུལ་རྨོངས་པའི་ལས་སུ་འགྱུར། །ཞེས་གསུངས་པ་ལྟར་ཤེས་པར་བྱ་ཞིང་། སྐྱོན་ཐམས་ཅད་ཀྱང་སྟོང་པ་ཉིད་ཀྱི་ཏིང་འཛིན་གྱིས་སེལ་བ་ཡིན་ནོ། །ལྔ་པ་ནང་པར་སློབ་དཔོན་སློབ་མ་དང་བཅས་པས་བདག་གི་རྣལ་འབྱོར་བསྡུས་པ་བསྡུ་ལྡང་བཅས་གྲུབ་ཕྲལ་སློབ་དཔོན་གྱི་ཕྱག་བྱིན་གྱིས་བརླབ་སྟེ་ལག་སོར་རིགས་ལྔ་ཡབ་ཡུམ་བཅུར་པར་བསམ། སློབ་མས་ཀྱང་ལག་པ་བྱིན་རླབས་ནས་ཚོན་གྱི་བྲི་ཚུལ། དབུས་ཀྱི་ལྟེ་བ་མཐིང་ཀ་ལ། །དེ་ཡི་མུ་ཁྱུད་སྣ་ལྔའི་ཕྲེང་། །མཐིང་སྐྱ་དཀར་སེར་དམར་ལྗང་ངོ་། །རྩིབས་མཆན་གྲུ་ཆད་གློ་བུར་དང་། །བར་ཁྱམས་སྒོ་དང་ཀ་བར་བཅས། །ཕྱོགས་མདོག་རྩིབས་བརྟེན་མུ་ཁྱུད་ནི། །རྡོ་རྗེ་སྔོན་པོའི་ཕྲེང་བ་ལ། །ཕྱོགས་རེར་གཉིས་གཉིས་ཀ་བ་བརྒྱད། །འཁོར་ལོ་རིན་ཆེན་པདྨ་དང་། །རལ་གྲི་རྣམས་ཀྱི་མཚན་མ་བྲི། །རྩིག་པ་རིམ་པ་ལྔ་སྦྲག་སྟེ། །འདོད་སྣམ་དམར་བའི་གཞི་དག་གི། །སྒོ་དང་སྒོ་ཁྱུད་གྲྭ་བཞི་མཚམས། །ཟླ་ཕྱེད་ལ་གནས་རིན་པོ་ཆེ། །དམར་པོ་ལ་ནི་རྡོ་རྗེས་མཚན། །ཕྱོགས་རེར་མེ་ལོང་དཀར་པོ་དང་། །པི་ཝཾ་སྔོན་པོ་སྤོས་ཁང་སེར། །ཞལ་ཟས་དམར་པོ་སྣོད་སེར་བ། །རེག་བྱ་ལྗང་གུ་ལྷབ་ལྷུབ་འཕུར། །ཆ་རེས་མཛེས་པར་བརྒྱན་པར་བྱ། །ཕ་གུ་སེར་པོ་དྲྭ་བའི་གཞི། །ནག་པོ་ལ་གནས་དྲྭ་བ་སེར། །དྲྭ་ཕྱེད་དྲིལ་བུ་ཟླ་བ་དང་། །རྔ་ཡབ་རླུང་གིས་བསྐྱོད་པས་བརྒྱན། །དྲྭ་ཕྱེད་མགོ་དེ་སེར་མགོ་བྱ། །མཛེས་གདུང་རིན་ཆེན་ཕྲ་ཚོམ་ཅན། །མནན་པའི་ཀ་ཐུང་ཉེར་བརྒྱད་པ། །གཞི་སྔོ་དག་ལ་ཤར་བུ་དཀར། །མདའ་ཡབ་དཀར་པོ་མཆོད་རྟེན་རིས། །པདྨའི་གདན་ལ་ཟུར་བཞི་རུ། །གདུགས་དང་རྒྱལ་མཚན་བ་དན་དང་། །རྡོ་རྗེའི་འཕན་བཅས་ཕྱོགས་རེ་རུ། །བརྒྱད་བརྒྱད་སྣ་ཚོགས་མདོག་ཏུ་བྱ། །རྒྱལ་མཚན་བ་དན་གནས་པའི་གཞི། །བུམ་པ་དག་ནས་སེར་པོ་བྱ། །འཁྱོག་དགུའི་གླང་རྒྱབ་མུན་པར་བཅས། །ནག་པོ་བྱ་ཞིང་གླང་རྒྱབ་གཞུང་། །སེང་མགོ་དྲྭ་བ་དཀར་པོས་བརྒྱན། ༈ །རྟ་བབས་དག་ལ་སྣམ་བུ་བརྒྱད། །རྟ་རྐང་སྔོ་སྐྱར་རྡོ་རྗེ་ཡི། །འགྲེང་བུ་སྔོ་ཞིང་ཆུ་སྐྱེས་དམར། །སྒྲོམ་ནི་མཛེས་ཚོན་ཟར་ཚགས་དཀར། །གཞི་ནག་སྣ་འཕྱོང་ཕྲ་ཅན་སེར། །སྒྲིལ་འཕྱང་གཞི་ནག་དྲྭ་བ་སེར། །ཤར་བུ་དཀར་པོ་སྔོན་པོའི་གཞི། །རྒྱ་ཕུབ་ཁྱུང་མགོ་མཐིང་ཀ་ལ། །མདའ་ཡབ་རིས་ཏེ་པདྨ་དམར། །འཁོར་ལོ་སེར་པོ་རི་དྭགས་ནི། །སེར་སྐྱ་སྟེང་གི་གདུངས་དཀར་པོ། །འོག་གཞིའི་འཁོར་ལོ་ཕྱོགས་ཀྱི་མདོག །གཞི་ཡི་ཕྱི་ཁྱམས་ལྗང་གུ་ལ། །སྣ་ཚོགས་པ་ཏྲ་རིས་སུ་བྱ། །རྩིབས་རྟེན་སེར་པོའི་ཕྱི་རོལ་དུ། །མེ་ཏོག་འདབ་མ་སྣ་ཚོགས་བྱ། །རྡོ་རྭ་གཞི་མཐིང་རྡོ་རྗེ་སེར། །མེ་རི་སྣ་ཚོགས་མདོག་ཅན་གྱི། །པ་ཏྲའི་སེར་ཁོང་ནག་པོས་ལེན། །དཀར་པོའི་རི་མོས་བཅད་པར་བྱ། །སྒོ་ཡི་ཕྱི་རོལ་གཡས་གཡོན་དུ། །བཞི་བཞི་ཕྱོགས་རེར་བརྒྱད་རེ་བཅས། །ཏཱ་ལ་ལོ་འདབ་ཐུར་འཕྱང་བ། །སོ་གཉིས་ཚང་བར་བྱ་དགོས་གསུངས། །དེ་ཕར་ལ་འདབ་གྱིན་བསྟན་ཅིང་། །མེ་ཏོག་འབྲས་བུ་མངོན་བརྒྱན་པའི། །དཔག་བསམ་ཤིང་ནི་དེ་ཡི་གྲངས། །ཏཱ་ལ་ལྗང་སེར་དཔག་བསམ་སྔོ། །རྩ་བ་དམར་སྐྱ་མུ་ཏིག་དང་། །གསེར་གྱི་དྲྭ་བ་དྲིལ་བུས་སྦྲེལ། །རྩ་བར རིན་ཆེན་ཕུང་པོ་དང་། །ཁྲུས་རྫིང་དེ་ཡི་གྲངས་སམ་བཞི། །ཕྱོགས་རེར་བྲི་བར་བྱ་བར་གསུངས། །དྲུག་པ་ཉེས་སྤང་ནི། རེ་ཁ་དམའ་བས་མི་འགྲུབ་ཅིང་། །ཡོན་པོས་གདུང་བ་བསྐྱེད་པར་བྱེད། །ཆད་ན་ཐིག་དང་མཚུངས་པ་སྟེ། །ཕྱོགས་འཁྲུལ་བས་ནི་གཉིས་ཀ་ཉམས། །ཚོན་རྩི་སྲབ་ན་དབུལ་པོར་འགྱུར། །འཐུག་ལ་མ་སྙོམས་མཛེ་འབྱུང་ཞིང་། །ཚོན་ཐལ་ཤོར་ན་ནད་རིམ་འབྱུང་། །དེ་ཕྱིར་སྐྱོན་རྣམས་སྤོང་སྟེ་བྱ། །དྲུག་པ་རྣམ་པ་འགོད་པ་ནི། རྒྱུད་ལས། ས་ལ་སོགས་ལ་ཕྱག་རྒྱ་བྱས། །རྣམ་གྲོལ་རིམ་པར་ཐོབ་གྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཞེས་གསུངས་པས་རིན་པོ་ཆེའམ་ས་སོགས་ལས་བྱས་པའི་སྐུ་རྟེན་དང་། རི་མོར་བྲིས་པའི་ཙཀ་ལི་སོགས་ལྷ་གནས་སུ་མ་འཆོལ་བར་དགོད། མེད་ན་ཚོན་གྱིས་དལ་བྱས་པར་རབ་སྐུ་ཡོངས་རྫོགས། དལ་འབྲིང་པོར་འབྲིང་ཕྱག་མཚན། དལ་བསྡུས་བར་ཐ་མ་ཡིག་འབྲུ། ཡང་ཐ་ལྷ་རང་མདོག་དང་མཚུངས་པའི་ཐིག་ལེའི་ཚོན་སྤུངས་བྱ་བའམ། གཙོ་བོ་གཟུགས། རིགས་ལྔ་ཕྱག་མཚན། ཕལ་པ་ལ་ཡིག་འབྲུ་བཀོད་པ་ཡང་ཡོད་དེ་འདིར་སློབ་དཔོན་པདྨའི་ལུགས་ཀྱིས། རིགས་ལྔ་ལ་སྐུ་གསུང་ཐུགས་གསུམ་འགོད་སེམས་དཔའ་རྣམས་ལ་ཐུགས་དང་གསུང་དགོད། ཐུབ་པ་ཁྲོ་བོ་ལ་གསུང་ངམ་ཐུགས་སམ་རེ་རེ་དགོད་གསུངས་པས་དེ་ཡི་དབང་དུ་ན། ༈ དབུས་སུ་སེང་ཁྲི་པད་ཉི་ཟླ། །མི་བསྐྱོད་མཐིང་དཀར་དམར་བའི་ཞལ། །ཕྱག་དྲུག་དང་གཉིས་རྡོ་རྗེ་དང་། །དྲིལ་བུ་ཐུགས་ཀར་བསྣོལ་གཡས་ལྷག །འཁོར་ལོ་རིན་ཆེན་གཡོན་ལྷག་ན། །པདྨ་རལ་གྲི་འཛིན་པང་ན། །དབྱིངས་ཕྱུག་མཐིང་ཀ་དྲིལ་བསྣམས་འཁྱུད། །ཧཱུྃ་མཱུྃ་ཡི་གེས་རབ་ཏུ་མཚན། །དེས་མཚོན་ཏེ་སྒྲུབ་ཐབས་སུ་ཤེས་པར་བྱའོ། །ཚོན་ལྷག་ལ་ཕྱི་ནང་གསང་བས་མཆོད། གླུ་དྲུག་གིས་བསྟོད། བཛྲ་མུཿ ས་ཡེ་ཤེས་པ་རྣམས་ནམ་མཁའི་ལྷ་ཡི་ཐུགས་ཀར་གཤེགས། དེ་ཉིད་དབེན་པར་བསྐྱལ་ལོ། །བདུན་པ་དཀྱིལ་འཁོར་རབ་གནས་ལ། དཀྱིལ་འཁོར་བརྒྱན་པ་དང་། རབ་གནས་དངོས་སོ། །དང་པོ་ནི་སློབ་དཔོན་གྱིས་རྣམ་རྒྱལ་བུམ་པ། མཆོད་གཡོགས་པས་ལས་བུམ། སྒྲུབ་གྲོགས་གཞན་གྱི་བུམ་པ་མང་པོ་ཡོད་ན་ཐོགས་ཏེ་དཀྱིལ་འཁོར་ཤར་སྒོ་ནས་རྟེན་སྙིང་དང་། ཆེ་བའི་ཆེ་མཆོག་སོགས་དཀོན་མཆོག་གསུམ་གྱིས་བཀྲ་ཤིས་ཀྱི་ཚིགས་སུ་བཅད་པ་དང་བཅས་ཏེ་བྷོ་དྷི་ཙིཏྟ་དང་། གཙོ་བོ་ཡབ་ཡུམ་གྱི་སྔགས་སྦྲེལ་མར་བཟླ་ཞིང་རོལ་མོ་དང་བཅས་ལན་གསུམ་བསྐོར་ཤར་དུ་གནས་པས། བུམ་པ་སོ་སོ་ནས་ལྷ་རྣམས་ལ་འབུལ་བའི་སྟང་ཀ་བྱས་ལ་རང་གི་སྤྱི་བོར་གཏུགས་ཙམ་རེ་བྱ། བཅོམ་ལྡན་འདས་དཔལ་སྒྱུ་འཕྲུལ་དྲ་བས་བདག་ལ་མངོན་པར་དབང་བསྐུར་དུ་གསོལ། བུམ་པ་མ་ལགས་རྒྱལ་པོ་ལགས། །རྒྱལ་པོ་སྔགས་ཀྱིས་བཏབ་ནས་ཀྱང་། །རྒྱལ་པོ་ཆེན་པོར་མངའ་གསོལ་གྱིས། །རྒྱལ་པོའི་ཚུལ་དུ་བཞུགས་སུ་གསོལ། །ཞེས་བརྗོད་པས། དཀྱིལ་འཁོར་གྱི་ལྷ་གནས་མ་འཆོལ་བར་སོ་སོ་མཉྫི་ལ་འགོད་པའམ་སྟེ་གཟུར་པ་ལ་དབུས་དང་ཕྱོགས་བཞིར་བཀོད་པའམ་བུམ་པ་མང་པོ་ཡིན་ཚེ་རྒྱབ་ཕྱོགས་སུ་གྲལ་ཐབས་ཀྱི་བཀོད་པས་བཤམས་ཀྱང་ཆོག་པར་བླ་མཿཀཿཐོག་པ་ཡབ་སྲས་ཀྱི་འགྲེལ་པ་ལས་གསུངས། བུམ་གདན་ནི། རྣམ་བུམ་ལ་རིགས་སོ་སོར་ཕྱེ་ཚེ་ཕྱག་མཚན་ལྔ་སོ་སོའམ། ཡང་ན་པད་མ་འདབ་བརྒྱད་ཡིན། མཆོད་གཡོགས་པས་ལས་བུམ་ཐོགས་ཏེ་སློབ་དཔོན། མདུན་སྟེགས་ཀྱི་བུམ་ལྡན་སྣ་ཚོགས་རྡོ་རྗེའི་རེ་ཁཱ་ཅན་ལ་བཞུགས་སུ་གསོལ་ནས། ཁྲོ་བོ་ཆེན་པོས་དཀྱིལ་འཁོར་གྱི་བར་ཆད་ཐམས་ཅད་སྲུང་དུ་གསོལ། ཞེས་བརྗོད། དཀྱིལ་འཁོར་གྱི་མཐའ་དྲི་བཟང་གི་ཆུ་དང་། སྣུམ་གྱིས་ཕྱུགས། མེ་ཏོག་དཀར་པོའི་སིལ་མ་ལེགས་པར་བཀྲམ། ཟུར་བཞིར་རྒྱལ་མཚན་བཞི། ཕྱོགས་བཞིར་འཕན་བཞི། མཐའ་ཀུན་ཏུ་རས་བཟང་པོའི་ཡོལ་བས་དཀྲི། བ་དན་བཀོད་ལེགས་པ་བརྒྱད་ཕྱོགས་རེར་གཉིས་གཉིས་དང་། ལས་བཞིའི་དངོས་གྲུབ་སྒྲུབ་པའི་རྟེན་འབྲེལ་དུ། དཀྱིལ་འཁོར་གྱི་གྲ་བཞིར་བུམ་པ་མགུལ་ཆིངས་དང་བཅས་པ་བཞིའི་སྟེང་ཉ་ཕྱིས་ཀྱི་ནང་དུ་བདུད་རྩི་བླུགས་པ་བཤམས། མེད་ན་ཚོན་གྱིས་བྲི། ཤར་དུ་ནང་མཆོད་སྨན་དང་། ཞི་གཏོར་པད་ཟླུམ་གྱི་དཀྱིལ་དབྱིབས་ཅན། ཁམས་དྲུག་ལྷ་མོ་ཅན་དང་། རཀྟ་བྱང་དུ་བཀའ་སྲུང་གི་གཏོར་མ་ལྷོར་མཁའ་འགྲོ་སོ་གཉིས་ཀྱི་གཏོར་མ། བྱང་ཤར་དུ་མཚམས་འཛིན་མེ་ཏོག་གི་བུམ་པ་ཆེ་ལེགས། ཤར་དུ་ཏིང་ཕོར་ལེགས་པ་བཞི་བཅུ་ཞེ་གཉིས་ཀྱི་ནང་དུ་ལུང་པ་དགུ་འདུས་ཀྱི་ཆུ་དྭངས་བསིལ་རྙོག་པ་མེད་པ་ལ་འབྲས་ཡོས། དྲི་བཟང་། སྤོས་ཆབ་ཡིད་དུ་འོང་བ། བ་དམར་ཟལ་འོ་མ་བཅས་མཆོད་ཡོན། དེའི་ཕྱིན་ཏིང་ཕོར་ཞེ་གཉིས་ལ་དག་བྱེད་ཀྱི་སུར་པ་དང་བུལ་ཏོག་ཤིང་ཤུན་སོགས་སྦྱར་བའི་ཆུ་གཙང་། ཞབས་བསིལ། ཤར་ལྷོར་ཤིང་ཚྭ་ཆུ་ཡི་ཚུལ། སྤོས་དཀར་ཐལ་གྱི་ཚུལ། ལི་ཤི་རྡོར་གྱི་ཚུལ། སྤང་སྤོས་ཚ་ཡི་ཚུལ་རྣམས་ལ། ནཱ་གི་དང་། ཁྱད་པར་དུ་ཛ་ཏི། ཙནྡན་དཀར་དམར་རྣམས་སྔ་མ་ལས་ཕྱི་མས་མང་རིམ་དུ་བཏབ། སྦྲང་བུར་གྱི་ཁ་ཚར་དང་། ཆང་གི་ཁུ་བ། སུག་སྨེལ་གྱི་ཕབ་བཏབ་པ་སྦྱར་བའི་སྤོས་ཀྱི་རིང་བུ་ཆེན་པོའི་ཀོང་བམ་དང་། དེ་ནས་ལྷན་སྐྱེས་དང་སྦྱར་སྤོས་སྣ་ཚོགས་པའི་སྤོས་སྣོད་ཞེ་གཉིས་ལྷོ་སྟོད་དུ་བཤམས། ལྷོ་སྨད་ནས་དབྱར་ཡིན་ན་དུག་རིགས་མ་ཡིན་པ་ཆུ་དང་ཐང་ལས་སྐྱེས་པའི་མེ་ཏོག །དགུན་ཡིན་ན་སྨན་དང་འབྲུ་ལ་ཚོན་གྱིས་ཁ་དོག་བསྒྱུར་བ་དང་། དར་ཟབ་བཙོས་པའི་མེ་ཏོག་ཞེ་གཉིས། ལྷོ་ནུབ་ནས་ནུབ་གཞུང་བར་མར་མེ་ཞེ་གཉིས། དེ་ནས་ནུབ་བྱང་གི་བར་ཏ་ཕྱིས་དུང་ཆོས་གང་རུང་དུ་ག་བུར། ཙནྡན། གུར་གུམ། ཛ་ཏི། སིརྻ་རྣམས་སྦྱར་བའི་དྲི་ཆབ་ཞེ་གཉིས། དེ་ནས་བྱང་སྟོད་དང་བྱང་སྟོད་ནས་བྱང་སྨད་བར། ཀ་ར། བུ་རམ། རྒུན་འབྲུམ། ཕྱེ་སོགས་ལས་བཙོས་པའི་ཞལ་ཟས་བཟའ་བཅའ་བཏུང་བ་སྟེ། འབྲས་ཆང་། རྒུན་ཆང་། བུ་རམ་ཆང་སོགས་ཞེ་གཉིས་དང་། ཤ་མཐུད་མར་ཁུར་སོགས་སམ་དེ་དག་གིས་རྒྱུ་ལས་བྱས་པའི་གཡོས་ཀྱི་བྱེ་བྲག་ཞེ་གཉིས། མ་འབྱོར་ན་རེ་རེ་འཕན་རྒྱད་བརྒྱད་དང་། ཤིན་ཏུ་མ་འབྱོར་ན་རེ་རེས་མཛད་དོ། །གཞན་དུ། གལ་ཏེ་དངོས་གྲུབ་མཆོག་འདོད་ན། །དྲི་དང་མེ་ཏོག་བདུག་སྤོས་དང་། །མར་མེ་བརྒྱ་ནི་དབུལ་བྱ་ཞིང་། །རྒྱལ་མཚན་ལྷ་བཤོས་བརྒྱ་བརྒྱ་འབུལ། །ཞེས་པས་བརྒྱ་སྟོང་ཁྲི་སོགས་འབྱོར་བ་བཞིན་གཙང་ཞིང་། བསམ་སྦྱོར་དག་པ་གསུམ་ལྡན་དུ་བྱའོ། །དེ་རྣམས་ཀྱང་རྒྱུད་ལས། བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །ཞེས་པ་ལྟར་ཏེ་ཕྱོགས་སུ་མདའ་བརྒྱད་ལ་ཚོན་སྐུད་ཀྱི་དྲྭ་བས་མཛེས་པར་བྲིས། སློབ་དཔོན་ལ་སོགས་པར་རྡོ་རྗེ་དྲིལ་བུ། རོལ་མོའི་ཁྱད་པར་སོགས་དང་། ཉེ་བར་མཁོ་བ་ཐམས་ཅད་འདུ་བྱེའོ། །གཉིས་པ་ལ་རྒྱས་འབྲིང་བསྡུས་པའི་དབྱེ་བ་མང་མོད། འདིར་འབྲིང་པོ་ཙམ་དགོད་པ་ནི། དཀྱིལ་འཁོར་ལ་སོགས་གང་བྱས་པ། །རབ་གནས་ཡེ་ཤེས་མི་ལྡན་རྣམས། །སོགས་དང་བྲི་བའི་ནུས་པ་མེད། །དེ་ཕྱིར་མཁས་དེས་རབ་ཏུ་བསྒྲིམས། །ཞེས་གསུངས་པས་འདི་ལ་དོན་གསུམ། སྦྱོར་དངོས་རྗེས་སོ། །དང་པོ་ལ་བཤམས་བཀོད་དང་ཆོ་གའོ། །དང་པོ། དཀྱིལ་འཁོར་མདུན་དུ་ཁྲུས་སྟེགས་པདྨ་འདབ་བརྒྱད་ལ་རིན་པོ་ཆེའི་ཁྲུས་གཞོང་དུ་མེ་ལོང་། དེའི་ནུབ་སྟེགས་ལ་དབང་བུམ་སོ་ལྔའི་བཅུད་ལྡན་ནི་སྔར་སྟ་གོན་གྱི་རྣམ་བུམ་མོ། །ཤར་དུ་སྨན་དང་བ་བྱུང་སྦྱར་བའི་ཁྲུས་བུམ། སུར་པའི་ཆུ། རས་ཁ་ཚར་མ་ཉམས་པ་དཀར་པོ་དྲི་མ་མེད་པ་ལ་དྲི་ཡི་ཐིག་ལེ་ལྔ་ལ་ཨཱོཾ་ཧཱུྃ་ཏྲཱཾ་ཧྲཱི་ཨཱ་རྣམས་བྲིས་པ། གཡས་སུ་དྲི་ཞིམ་པོས་བགོས་པའི་འབྲུ་མར་ཕྱི་སྣོད། དྲི་དང་བ་བྱུང་སྦྱར་སྣོད། གཡོན་དུ་ཙནྡ་དཀར་དམར། ཨུ་དུམ་བར། ནྱ་གྲོ་དྷ། པཪྤ་ཏ་ཏེ་དེ་ལྔའམ་ཚབ་ཏུ་བ་ལུའི་མེ་ཏོག་ལྕུག་མ་ལེགས་པ། གསོལ་པ། རྒྱ་ལྕང་། ཤུག་ཤུན་སྟེ་ཤིང་ལྔའི་ཤུན་པ། དུར་བའི་པིར་རྣམས་བཀོད། ཁུ་སྟེགས་གཡོན་དུ་སྟེགས་ལ། ཁྲི་ལྔའི་རི་མོ། རིན་པོ་ཆེའི་རྒྱན་བརྒྱད། མིག་ཐུར། སྐན་འབྲུ། རྨང་ཚེར། ལྗགས་གཞར། ཚིམ་ཤིང་། དུང་གི་སོ་མང་གསེར་གྱི་སྤུ་གྲི་རྣམས་དང་། མེ་ཏོག །གདུགས། མར་མེ། ཕྱི་ནང་གི་མཆོད་པ། བླ་བྲེ་དང་ཡོལ་བ། ན་བཟའ་རྣམས་དང་། མཎྜལ་གྱི་བཀོད་པ་བཅས་ཚོགས་པར་བྱའོ། །གཉིས་པ་ལ། བུམ་པ་བྱིན་རླབས་བགེགས་སྦྱང་བཀྲུ། གསོལ་བཏགས་བཅས་པའི་ས་བཅད་བཞི། དང་པོ་ནི། སྒྲུབ་ཐབས་ལས་འབྱུང་བའི་གསོལ་གདབ་དང་། རྡོ་རྗེ་སློབ་དཔོན་སངས་རྒྱས་དཔལ། །སོགས་ལན་གསུམ། མཆོད་པ་བྱིན་རླབས། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །སོགས་ཀུན་རྫོབ་དང་། ཨེ་མ་ཧོ་ངོ་མཚར་རྨད་ཀྱི་ཆོས། སོགས་དོན་དམ་སེམས་བསྐྱེད་དང་ཏིང་འཛིན་གསུམ་གྱི་ཚིགས་བཅད་རྗེས། གོང་གིས་བྱིན་རླབས་དང་སྦྱང་བའི་སྐབས། ཧཱུཾ་གྱུར་ནམ་མཁའ་ཨེ་གཟུགས་ཅན། ཅེས་པ་ནས། ཆ་རྫོགས་པའོ། །ཞེས་པའི་བར་དང་། རང་རིག་རྡོ་རྗེ་ཧཱུཾ་མཚན་ལས་འོད་འཕྲོས། སོགས་ནས་བརྣན། དྲངས། བསྟིམ། མཆོད། བསྟོད་པ་བཅས་པས། རྡོ་རྗེ་ཡིད་ལའང་ཕྱག་འཚལ་ལོ། །ཞེས་པའི་བར་བརྗོད། སྒྲུབ་ཐབས་ལས། མཉམ་རྫོགས་ཀྱི་བསྙེན་པ། བྷྲཱུཾ་བི་ཤྭ་བི་ཤུདྡྷེ་ཕཊ྄་ཛཿ སོགས་ནས། ཛྙཱ་ན་དྷ་རྟུ་ཨཿ བར་བརྗོད། སྤྱི་དྲིལ་བསྙེན། བཟླས་པའི་ལྟ་བ་གསལ་གདབ་ནས། བསྡུ་ལྡང་གོ་བགོ་ལུས་བསྲུང་བཅས་ཟིན་པར་བྱ། དབང་བུམ་བསང་སྦྱངས་ལས་བུམ་ཆུས་དག་པར་བྱས་ཏེ། སྟོང་པའི་ངང་ལས་བྷྲཱུཾ་ཞེས་བརྗོད་པས་རིན་པོ་ཆེའི་བུམ་པ་མཚན་ཉིད་ཡོངས་སུ་རྫོགས་པའི་ནང་དུ་ཧཱུཾ་ཨཱོཾ་སྭཱ་ཨཱཾ་ཧཱ་རྣམས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་གྱི་སྐུར་བཀྲ་ལམ་གྱིས་གསལ་བར་གྱུར། བསྐུར། རློབ། བརྣན། དྲངས། བསྟིམ། མཆོད་བསྟོད། ཧཱུཾ་བཛྲ་དྷྲིཀ྄ །མཱུྃ་དྷཱ་ཏེ་ཤྭ་རི། སོགས་རིགས་ལྔ་ཡབ་ཡུམ་སྔགས་ལ། ༀ་ཡེ་དྷཱརྨ་སོགས་རྟེན་འབྲེལ་སྙིང་པོ་ཅི་ནུས་བཏགས་པ་བཟླས། ཡིག་བརྒྱས་བཟོད་པར་གསོལ་ཏེ་ལྷ་མི་ཞུ་བར་བཞག །ༀ་སྭ་བྷཱ་ཝ་སོགས་ཆོས་ཉིད་རྣམ་དག་གི་སྔགས་རྒྱས་ཁྲུས་བུམ་རྫས་དང་བཅས་པའི་དྲི་མ་སྦྱང་། ༀ་ན་མཿསརྦ་ཏ་ཐཱ་ག་ཏེ་བྷྱོ་སོགས་ནམ་མཁའ་མཛོད་ཀྱི་སྔགས་རྒྱས་སྤེལ། ༀ་བཛྲ་ཨ་མྲྀ་ཏ་སོགས་བདུད་རྩི་ཐབ་སྦྱོར་སྔགས་ཀྱིས་དྲི་མ་སྦྱོང་བ་ལ་ཐོགས་པ་མེད་པར་བྱས། ༀ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲི་ཡེ་ཧཱུཾ། ཞེས་པ་དང་། ཧཱུྃ་བིགྷྣ་ནྲ་ཏ་ཀྲྀ་ཏྲ་ཕཊ། ཅེས་སྔགས་དང་། སྟོང་པའི་ངང་ལས་བྷྲཱུཾ་ལས་ཟླ་བ་ལ་གནས་པའི་བུམ་པར་རྟེན་འབྲེལ་སྙིང་པོའི་འོད་ཟེར་འབར་བས་འཁོར་འདས་ཀྱི་བདུད་རྩི་ཐམས་ཅད་བསྡུས་པར་གྱུར། རྟེན་སྙིང་བརྒྱ་རྩ་བཟླས་ཡེ་ཤེས་ཀྱི་བདུད་རྩིས་བུམ་པ་གང་བར་བསམ་མོ། །གཉིས་པ་ནི། སྒྲུབ་ཐབས་ལས། ཧཱུཾ་བཛྲ་དྷྲཱིཀ྄ །སྐད་ཅིག་གིས་སྟོང་པའི་ངང་ལས། རང་ཉིད་ཞེ་སྡང་རྡོ་རྗེ་དཔལ་རྡོ་རྗེ་སེམས་དཔའ་སོགས་ནས། བདག་ཉིད་ཅན་དུ་གྱུར། ཧཱུཾ་རྣལ་འབྱོར་ཆེན་པོའི་དཀྱིལ་འཁོར་འདིར། སོགས་ནས། ཐལ་བ་བཞིན་དུ་བརླག་པར་བྱེད། །ཅེས་པའི་བར་དང་། ས་ཡི་ཕྱོགས་འདིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་དཀྱིལ་འཁོར་ཆེན་པོ་རབ་ཏུ་གནས་པར་བགྱི་ཡི། གང་སུ་ཡང་རུང་བའི་འབྱུང་པོ་གདུག་པ་ཅན་འཁོར་དང་བཅས་པ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བས་བརླག་ཏ་རེ། ཧཱུྃ་བཞི་པའི་སྔགས་དང་། རང་གི་མིག་གཡས་མ་ལས་ཉི་མ། གཡོན་པ་ཨ་ལས་ཟླ་བ། སོགས་ནས། པ་ཏ་ལ་པཉྩ་ཧཱུྃ་ཕཊ། ཅེས་པའི་བར་བརྗོད་པར་བྱའོ། །གསུམ་པ་ནི། རྟེན་གྱི་གཟུགས་བརྙན་མེ་ལོང་དུ་འཆར་བས་ལས་རྡོར་གྱིས་མེ་ལོང་དང་། ལས་གཡོགས་པས་ཁྲུས་གཞོང་བཏེགས། ཐོག་མར། ༀ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ནི་སྭཱ་ཧཱ། ཞེས་བ་བྱུང་དང་དྲི་བཟང་གི་ཆུ་སྦྱར་བ་བྱུག །དུར་བའི་ཕྱིར་གྱིས་བཀྲུ། ༀ་ཨཱཿཧཱུྃ་ཧྲཱི་ཋཿ ཏིལ་ལམ་འབྲུ་མར་དྲི་ཞིམ་པོར་བྱས་པ་དུར་བའི་སྤིར་གྱིས་བྱུག །སྣུམ་བསལ་བའི་ཕྱིར། ༀ་སརྦ་ཏ་ཐཱ་ག་ཏ་ཀཱ་ཡ་བོ་ཤོ་དྷ་ནི་སྭཱ་ཧཱ། ཞེས་ཤིང་ཤུན་ལྔ་ཡི་ཕྱེ་མས་ཕྱིས། ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱི་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གི་ཁྲུས་བགྱིའོ། །ༀ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲཱི་ཧཱུྃ། ཤེས་རོལ་མོར་བཅས་བྲི་སྨན་བ་བྱུང་སྦྱར་བའི་བུམ་ཆུས་བཀྲུ། ༀ་རཏྣ་པྲ་བྷཉྩ་ར་ཧ་སྭཱ་ཧཱ། ཞེས་ཁ་ཚར་མ་ཉམས་པའི་རས་ཀྱིས་བུ། དྲིའི་དུང་ཞལ་ཐོགས་ལ། ༀ་བཛྲ་གནྡྷེ་སྭཱ་ཧཱ། ཞེས་དྲི་ལྔའི་ཆུ་ཐུགས་ཀར་བྱུག་གོ། །བཞི་པ་ལག་གཡས་རྡོ་རྗེ་དང་བཅས་པས་སྤོས་སྣོད་ཐོགས་ལ་གཡོན་དྲིལ་བུ་བསིལ་བས། རང་གི་ལྕེ་ཧཱུྃ་ལས་བྱུང་བའི་རྡོ་རྗེར་གྱུར། ཇི་ལྟར་སངས་རྒྱས་རྣམས་ནི་དགའ་ལྡན་ནས། །སྤྲུལ་པ་དམ་པ་ཏོག་དཀར་ལྷ་ཡི་བུས། །མི་ཕམ་མགོན་ལ་རྒྱབ་ཚབ་དབང་བསྐུར་ནས། །གཟིགས་པ་རྣམ་ལྔས་འཛམ་གླིང་ཀུན་གཟིགས་ཤིང་། །གླང་ཆེན་ཐལ་དཀར་སྟབས་གཤེགས་ལྷུམ་ཞུགས་ལྟར། །རྡོ་རྗེ་རིན་ཆེན་པདྨའི་རིགས་མཆོག་དང་། །ལས་ཀྱི་རིགས་དང་དེ་བཞིན་གཤེགས་པའི་རིགས། །ཕྱོགས་བཅུའི་རྒྱལ་བ་སྲས་དང་བཅས་པ་རྣམས། །དུས་འདིར་བདག་གིས་དད་པས་སྤྱན་འདྲེན་ན། །རྟེན་མཆོག་འདི་ལ་འབྱོན་པར་མཛད་དུ་གསོལ། །དེང་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་བྱ་བའི་སླད་དུ། དཔལ་སྒྱུ་འཕྲུལ་དྲྭ་བའི་དཀྱིལ་འཁོར་རབ་ཏུ་གནས་པར་བགྱི་ཡིས། རྒྱལ་བ་རྒྱ་མཚོ་ཐམས་ཅད་ཀྱིས་བདག་ལ་མཐུ་བསྟན་གསོལ། བྱིན་གྱིས་བརླབ་ཏུ་གསོལ། དབང་བསྐུར་དུ་གསོལ། ཡེ་ཤེས་ཀྱི་སྣང་བ་ཐོབ་པས་རབ་ཏུ་གནས་པར་མཛད་དུ་གསོལ། ༀ་པྲ་ཏཱིཙྪ་ཧོཿ ཞེས་མེ་ཏོག་དོར། ༀ་རཏྣ་མ་ལེ་ཨ་བྷི་ཥིཉྩ་ཧཱུཾ། ཞེས་དེ་ཉིད་ལྷག་པའི་ལྷས་རང་གིས་སྤྱི་བོར་བཀོད་པར་བསམ། གཉིས་པ་དངོས་གཞི་ལ། དམ་ཚིག་བསྐྱེད་དང་སྤྱན་དྲངས་བསྟིམ། དབང་པོ་སྐྱོན་བསལ་མངའ་གསོལ་འབུལ། དབང་བསྐུར་མཆོད་བསྟོད་བཞུགས་སུ་གསོལ། ཞེས་ས་བཅད་བདུན་གྱི་དང་པོ་ནི། ཧཱུཾ་བིགྷྣཱནྟ་ཀྲྀཏྲ་ཕཊ། ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་སྙིང་རྗེ་ཆེན་པོའི་ཡེ་ཤེས་ཀྱི་རང་མདངས་སེམས་ཉིད་རྡོ་རྗེ་མཐིང་ཀ་ཧཱུཾ་ཡིག་མཐིང་ཀས་མཚན་པར་གསལ་བར་གྱུར། དེ་ལས་ཨེ་ཡཾ་བཾ་ལཾ་སུཾ་རཾ་རྣམས་ཆད། ཡོངས་སུ་གྱུར་པ་ལས་འབྱུང་ལྔ་རིམ་བརྩེགས་རི་རབ་དང་བཅས་པའི་སྟེང་དུ་མེ་རི་སྣ་ཚོགས་པདྨའི་ལྟེ་བ་ལ་རྫོགས་པའི་འཁོར་ལོ་རྩིབས་བཞི་ལ། གནས་པ་མདུན་གྱི་དཀྱིལ་འཁོར་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི་རྟ་བབ་རྒྱན་དང་གདུགས་ཆོས་འཁོར་རི་དྭགས་སོགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ་ལྟེ་བ་འཁོར་ལོ་རྩིབ་བཞི་བར་ཁྱམས་གློ་བུར་དང་བཅས་པར་གསལ་བར་གྱུར། དེ་དབུས་རང་རིག་རྡོ་རྗེ་ཧཱུྃ་མཚན་ལས་འོད་འཕྲོས་འཕགས་པ་མཆོད། སོགས་ནས་གོང་ལྟར། རང་བཞིན་ཕྱག་རྒྱའི་གནས་སུ་འཇུག །ཅེས་པའི་བར་བརྗོད། བསྐུར། རློབ་ནས། གཉིས་པ། ཐུགས་ཀའི་འོད་ཟེར་གྱིས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་སོགས་སྒྲུབ་ཐབས་ནས། བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །ནམ་མཁར་བཞུགས་པའི་ཡེ་ཤེས་པ་རྣམས་དམ་ཚིག་པ་ལ་ཐིམ། སེང་གླང་རྟ་རྨ་བྱ་མཁའ་ལྡིང་སྟེ་ལྔ་པོའི་ཁྲི་འབུལ་བས་སྒྲུབ་ཐབས་ནས། རིན་ཆེན་སེང་གེའི་ཁྲི་ལ་སོགས་ནས། ཀཱ་ཡ་ཝཱཀ྄་ཙིཏྟ་ཏིཥྛ་བཛྲ། གཉིས་པ། མིག་སྨན་བྱུགས་པའི་གསེར་ཐུར་ཐོགས་པས། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །དེ་བཞིན་རྒྱལ་བ་རྣམས་ཀྱིས་སྤྱན། །སེམས་ཅན་དོན་དུ་དབྱེ་བར་བྱ། །ༀ་བཛྲ་ཙཀྵུ་ས་མནྟ་བི་ཤྭ་དྷ་ནེ་སྭཱ་ཧཱ། གསེར་གྱི་སྙན་འབྲུས་ལ་སྙན་སྤ་བ་བསལ་བ་ལྟར་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡིས་སྙན་འབྲུ་ཡིས། །སྙན་གྱི་དབང་པོའི་སྐྱོན་བསལ་བས། །སྙན་ལྔ་ཡོངས་སུ་རྫོགས་པར་ཤོག །ༀ་སྲོཀྵུ་པྲ་ཝེ་ཤ་ཡ་སྭཱ་ཧཱ། གསེར་གྱི་རྨང་ཚེར་གྱིས་ཤངས་བསལ་ཚུལ་བྱ། ཁྱད་པར་རྒྱུ་ལས་བྱུང་བ་ནི། །རིན་པོ་ཆེ་ཡི་རྨང་གཟེར་གྱིས། །ཤངས་ཀྱི་དབང་པོའི་སྐྱོན་བསལ་བས། །སེམས་ཀྱི་རྣམ་གྲངས་ཤེས་པར་ཤོག །ༀ་པྲི་ཡཾ་སྲུཾ་སྭཱ་ཧཱ། གསེར་གྱི་ལྗགས་བཞར་གྱིས་ལྗགས་ཀྱི་དྲི་མ་བསལ་བར་ལྟར་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་ལྗགས་གཞར་གྱིས། །ལྗགས་ཀྱི་དབང་པོའི་སྐྱོན་བསལ་ནས། །གསུང་རབ་མ་ལུས་འཆད་པར་ཤོག །ༀ་དི་བྱ་མུ་ཁཱ་ཡ་སྭཱ་ཧཱ། གསེར་གྱི་ཐུར་མས་ཚེམ་འབྲུ་བལྟར་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་ཚེམས་ཤིང་གིས། །ཚེམས་ཀྱི་དྲི་མ་བསལ་བ་ཡིས། །མཉམ་པར་བཞག་པ་ཐོབ་པར་ཤོག །ༀ་བཛྲ་དནྟ་སྭཱ་ཧཱ། དུང་གི་སོ་མང་གིས་རྒྱན་ཅན་རྣམས་ཀྱིས་དབུ་སྐྲ་ཤད་པར་བྱས་ཏེ། ཁྱད་པར་རྒྱུ་ལས་བྱུང་བ་ཡི། །རིན་ཆེན་དུང་གི་སོ་མང་གིས། །དབུ་སྐྲ་ལྕང་ལོའི་སྐྱོན་བསལ་བས། །མཚན་ཉིད་མ་འདྲེས་མཁྱེན་པར་ཤོག །ༀ་མ་ནུ་པཾ་སོ་སྭཱ་ཧཱ། གསེར་གྱི་སྤུ་གྲིས་ཐུབ་དྲུག་སོགས་ཀྱི་དབུ་སྐྲ་དང་ཞལ་སྤུ་འབྲེག་ཚུལ་གྱིས། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་སྤུ་གྲི་ཡིས། །དབུ་དང་ཞལ་གྱི་སྤུ་འབྲེག་པས། །ཉོན་མོངས་རྩད་ནས་གཅོད་པར་ཤོག །ༀ་ནིརྨཱ་ཀཱ་ཡ་སྭཱ་ཧཱ། བཞི་པ་མངའ་གསོལ་ལ། རྒྱན་དང་ཅོད་པཎ་ཁྲུས་ཕྱི་དང་། མེ་ཏོག་གདུགས་དང་མར་མེ་དང་། །དྲི་ཆབ་དམ་རྫས་གཏོར་མ་མཆོད། །སྦྱོར་དང་འདོད་ཡོན་ལྷབ་ལྷུབ་དང་། །ན་བཟའ་མཎྜལ་བཅུ་དྲུག་གོ། །དང་པོ། རིན་ཆེན་ཕྲེང་བ་དབུ་བརྒྱན་དང་། །གདུ་བུ་དོ་ཤལ་སྐུ་རགས་དག །འབྱོར་པའི་དད་པས་བདག་འབུལ་ན། །གཉིས་མེད་རྒྱན་དུ་བཞེས་སུ་གསོལ། །གཉིས་པ། སྣ་ཚོགས་དར་གྱི་འཕུར་ལྕེ་ཅན། །ཅོད་པཎ་ཐབས་དང་ཤེས་རབ་ཀྱིས། །གཉིས་ཀྱིས་མཐའ་ལ་མི་གནས་པའི། །གཉིས་མེད་སྐུ་མཆོག་བརྒྱན་པར་བྱ། །གསུམ་པ། རྒྱལ་བའི་སྐུ་ལ་དྲི་མ་མི་མངའ་ཡང་། །སྤོས་དྲི་སྨན་ཆབ་ཁྲུས་མཆོག་འདི་གསོལ་བས། །འགྲོ་བ་ཀུན་གྱི་ལས་དང་ཉོན་མོངས་པའི། །དྲི་མ་བག་ཆགས་བཅས་ཏེ་དག་པར་ཤོག །བཞི་པ་ནི། ཐུགས་རྗེ་ལྷུན་རྫོགས་སངས་རྒྱས་གཟུགས་སྐུ་ལ། །སྲི་ཞུ་གུས་ཕྱིར་རས་ཀྱི་སྐུ་ཕྱིས་པས། །ལས་དང་ཉོན་མོངས་བག་ཆགས་ཀུན་བསལ་ནས། །སྤྱོད་ལམ་རྣམ་པར་དག་པའི་སྒོ་ཐོབ་ཤོག །ལྔ་པ་ནི། ཡོན་ཏན་ལྷུན་རྫོགས་སངས་རྒྱས་སྐུ་གཟུགས་ལ། །རིན་ཆེན་མཛེས་པའི་མེ་ཏོག་དོར་བྱས་པས། །ལོག་ལྟའི་ཉོན་མོངས་ཐ་བ་ཀུན་བྲལ་ཏེ། །ལྟ་བས་མི་ངོམས་མཛེས་པ་སྐུ་ཐོབ་ཤོག །དྲུག་པ་ནི། མཆོག་ཏུ་རྣམ་པར་དག་པའི་སྐུ་མངའ་བའི། །སངས་རྒྱས་སྐུ་ལ་གདུགས་མཆོག་འདི་ཕུལ་བས། །དམ་ཚིག་སྡོམ་པའི་ཉེས་སྐྱོན་ཀུན་བྲལ་ནས། །ཡེ་ཤེས་ཐུགས་རྗེས་མ་ལུས་སྐྱོབ་པར་ཤོག །བདུན་པ་ནི། རང་རིག་ཐམས་ཅད་མཁྱེན་པའི་ཡེ་ཤེས་ལ། །མུན་པ་སྣང་བྱེད་མར་མེ་འདི་བལྟམས་པས། །མ་རིག་འཐིབ་པོའི་མུན་པ་ཀུན་བསལ་ནས། །སངས་རྒྱས་ལ་སོགས་སྤྱན་ལྔ་ཐོབ་པར་ཤོག །བརྒྱད་པ། སྙིགས་མ་ལྔ་ཉིད་འབྲས་བུས་ཡོངས་རྫོགས་པའི། །རྒྱལ་བའི་སྐུ་ལ་དྲི་ཆབ་འདི་ཕུལ་བས། །གདུང་བ་ཟུག་རྔུ་མྱ་ངན་ཀུན་བྲལ་ནས། །འོད་ཟེར་མཐའ་ཡས་འགྱེད་པའི་སྐུ་ཐོབ་ཤོག །དགུ་པ། དུག་ལྔ་མ་སྤངས་སྐུ་ལྔར་རྣམ་དག་པའི། །བདེ་ཆེན་སྐུ་ལ་དམ་རྫས་འདི་ཕུལ་བས། །ཀུན་ཏུ་བཟང་པོའི་སྤྱོད་ལམ་ཡོངས་རྫོགས་པའི། །ཀུན་ནས་ཡོངས་སུ་སྨིན་པའི་སྐུ་ཐོབ་ཤོག །བཅུ་པ་ནི། ཆོས་རྣམས་ལོངས་སྤྱོད་ཡོངས་སུ་རྫོགས་པ་ཡི། །རྒྱལ་བའི་སྐུ་ལ་གཏོར་མ་འདི་ཕུལ་བས། །རྫས་སུ་སྤྱོད་པའི་གདུང་བ་ཀུན་བྲལ་ནས། །གསང་བའི་ལོངས་སྤྱོད་ཡོངས་སུ་རྫོགས་པར་ཤོག །བཅུ་གཅིག་པ་སྒྲུབ་ཐབས་ནས་འབྱུང་བའི་མཆོད་པ་བྱིན་རླབས་དང་སྒེག་མོ་བརྒྱད་མཆོད་མཐར། རོལ་མོ་འབུལ། ཡེ་ཤེས་སྤྱོད་ཡུལ་ཡོངས་སུ་དག་པ་ཡི། །རྒྱལ་བའི་སྐུ་ལ་མཆོད་པ་འདི་ཕུལ་བས། །ཁམས་གསུམ་དུག་གསུམ་རྩད་ནས་དག་འགྱུར་ཏེ། །སྐུ་གསུམ་ལྷུན་གྲུབ་ཞིང་ཁམས་དག་པར་ཤོག །བཅུ་གཉིས་པ། ཐབས་དང་ཤེས་རབ་འདུ་འབྲལ་མེད་པ་ཡི། །བདེ་ཆེན་སྐུ་ལ་ག་ཎ་འདི་ཕུལ་བས། །སྤྱོད་ཡུལ་བྱང་ཆུབ་སེམས་སུ་རྣམ་དག་ནས། །མཐའ་ཡས་སྙོམས་པར་འཇུག་པ་ཐོབ་པར་ཤོག །བཅུ་གསུམ་པ། མཐའ་ཡས་བདེ་དང་བྲལ་བ་མེད་པའི་ཕྱིར། །གཉིས་མེད་སྐུ་ལ་འདོད་ཡོན་ལྔ་ཕུལ་བས། །མཐའ་ལ་ཞེན་པའི་གདུང་བ་ཀུན་བྲལ་ནས། །བདེ་བ་ཆེན་པོའི་ཐབས་རྣམས་རྫོགས་པར་ཤོག །བཅུ་བཞི་པ། གཟི་བརྗིད་ཁྱད་པར་འཕགས་པའི་དཀྱིལ་འཁོར་ལ། །བླ་རེ་ལྷབ་ལྷུབ་ལ་སོགས་ཕུལ་བྱས་པས། །ལོག་པར་ལྟ་བ་རྣམས་དང་ཡོངས་བྲལ་ནས། །འབར་བའི་རྒྱལ་པོ་ཐུབ་མེད་འགྲུབ་པ་ཤོག །བཅོ་ལྔ་པ། བྱམས་མགོན་སྐུ་ལ་སྙོམས་པའི་དཀྱིལ་འཁོར་ལ། །རིན་ཆེན་ལྡན་པའི་ན་བཟའ་འདི་ཕུལ་བས། །ཐ་བས་རྒྱགས་པའི་སྤྱོད་ལམ་ཀུན་བྲལ་ཏེ། །གཟི་བརྗིད་ཁྱད་པར་འཕགས་པའི་སྐུ་ཐོབ་ཤོག །བཅུ་དྲུག་པ་ནི། མཎྜྃལ་སོ་བདུན་པའི་མཐར། མ་ཚང་བ་མེད་པ་འདི་ཉིད་བླ་མ་དང་དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་གུས་པས་འབུལ་བར་བགྱིའོ། །སྒྲུབ་ཐབས་ནས་སྐུ་གསུམ་མཎྜལ་འབུལ་བར་རྫོགས་པར་བྱ། ལྔ་པ་ནི་དབང་བསྐུར་བ་སྟེ། ཐུགས་ཀ་ནས་འཕྲོས་པའི་འོད་ཟེར་གྱིས་དབང་གི་ལྷ་ནམ་མཁའ་གང་བར་ༀ་བཛྲ་ས་མཱ་ཛཿཕྱི་ནང་གསང་བས་མཆོད། དེ་རྣམས་ཀྱིས་དགེ་མཚན་དུ་མ་དང་ལྡན་པའི་བུམ་པ་རིན་པོ་ཆེས་དབང་བསྐུར་བར་གྱུར། སློབ་དཔོན་ནས་བུམ་པའི་ཁ་རྒྱན་གྱིས་ཆུ་འཐོར་བཞིན། ཇི་ལྟར་བལྟམས་པ་སོགས་དང་། ༀ་མ་ཧཱ་ཤཱུ་ནྱཱ་ཏ་སོགས་ལྔ་ཚན་ལྔའི་སྔགས་བརྗོད། ༀ་སརྦ་ཏ་ཐཱ་ག་ཏཱ་མ་ཧཱ་ཀཱ་ཡ་སོགས་དང་། ལྷ་ཚོགས་ཐམས་ཅད་ཀྱི་དུང་ཁང་སོགས་ནས། གནས་ལྔར་རྒྱས་བཏབ་པར་གྱུར། ཞེས་པའི་བར་སྒྲུབ་ཐབས་ལྟར་བརྗོད། དྲུག་པ་ནི། སླར་ཡང་མཆོད་པ་བྱིན་རླབས་དང་། འོག་མིན་ཞིང་གཤེགས་སོགས་ཕྱག་ནས། ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །ཞེས་པའི་བར་སྒྲུབ་ཐབས་ནས་འབྱུང་བ་ལྟར་མཆོད་པ་དང་། བསྟོད་པ་བྱ། བདུན་པ་ནི། རྟེན་འབྲེལ་སྙིང་པོ་བརྒྱ་རྩ་བཟླ་ཞིང་། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། །ཆོས་ཉིད་རྣམ་པར་དག་པའི་བདེན་པ་དང་། །ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བཅོམ་ལྡན་འདས་དཔལ་གསང་བ་སྒྱུ་འཕྲུལ་དྲྭ་བ་རྡོ་རྗེ་སེམས་དཔའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པའི་བདེན་པ་དང་། ཁྱད་པར་རྒྱལ་བས་གསུངས་པའི་ཆོ་གའི་ལས་རིམ་རྣམ་པར་དག་པ་སྒྲུབ་པའི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས། དཔལ་སྒྱུ་འཕྲུལ་དྲྭ་བའི་དཀྱིལ་འཁོར་གྱི་ལྷ་ཚོགས་ཐམས་ཅད། དུས་འདི་ནས་བཟུང་སྟེ་ཇི་སྲིད། རས་བྲིས་ཡིན་ན། འབྱུང་བ་བཞིའི་གནོད་པས་མ་ཞིག་གི་བར་དུ། ཞེས་དང་། རྡུལ་ཚོན་ཡིན་ན། ཇི་སྲིད་གཤེགས་གསོལ་གྱི་ཆོ་ག་མ་བྱས་ཀྱི་བར་དུ། ཞེས་བསྒྱུར། བདག་དང་སེམས་ཅན་ཐམས་ཅད་ཀྱི་དོན་དུ་བརྟན་པར་བཞུགས་ནས། དངོས་གྲུབ་སྩལ་ཞིང་སེམས་ཅན་གྱི་དོན་མཛད་དུ་གསོལ། རྟེན་སྙིང་གི་མེ་ཏོག་གཏོར་ཞིང་། ༀ་སརྦ་ཏ་ཐཱ་ག་ཏ་ཀཱ་ཡ་ཝཱཀྩིཏྟ་ཏིཥྛ་བཛྲ། ཞེས་ལན་གསུམ་བཟླའོ། །གསུམ་བརྗེས་ལ། གཏོར་ཆོག་བྱ་ཞིང་སྨོན་ལམ་གདབ། ཅེས་གཉིས་ལས། དང་པོ། མཁའ་འགྲོ་སོ་གཉིས་ཀྱི་ལྷག་ཆེན་དང་། བསྟན་མ་ལ་གཏོར་མ་བསྐྱལ། ཆོས་སྐྱོང་བའི་སྲུང་མ་མཆོད། མཐར་ལྷ་ཡི་ང་རྒྱལ་བརྟན་པོས་རྡོ་རྗེ་སྤྱི་བོར་བཀོད་ལ། ༀ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ། ཆོས་སྐྱོང་བའི་སྲུང་མའི་དབང་པོ་རྣམས་ཀྱིས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པ་དང་། ཁྱད་པར་དུའང་རྒྱུད་སྡེ་ཆེན་པོ་འདི་ཉིད་ཀྱི་བཤད་དང་སྒྲུབ་པའི་བསྟན་པ་ཕྱོགས་བརྒྱར་འཕེལ་བར་མཛད་དུ་གསོལ། ཅེས་བརྗོད། ཕྱི་རོལ་དུ་འབྱུང་པོ་ལ་གཏོར་མ་ཆ་གསུམ་བཏང་བར་བྱའོ། །གཉིས་པ་ནི། རྣམ་དག་རིན་ཆེན་དྲི་མ་མེད་པའི་གནས། །བླ་མ་མཆོག་དང་དཔལ་ལྡན་མི་བསྐྱོད་པའི། །སྒྱུ་འཕྲུལ་དྲྭ་བའི་དཀྱིལ་འཁོར་མ་ལུས་པ། །མཁྱེན་བརྩེའི་ངོ་མཚར་གྲངས་མེད་བདེན་པའི་མཐུས། །སྣ་ཚོགས་ཁམས་ལས་གྲུབ་པའི་གཟུགས་བརྙན་ཡི། །དཀྱིལ་འཁོར་ཆེན་པོ་རབ་ཏུ་གནས་པའི་མཐུས། །ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །འཛིན་མའི་འཁོར་ལོར་རྟག་ཏུ་ཁྱབ་ཅིང་གནས། དེ་འཛིན་བཤད་དང་སྒྲུབ་པའི་དཔལ་ཡོན་ཅན། ས་གསུམ་སྐྱེ་བོ་ཀུན་གྱི་གཉེན་གཅིག་པུར། །སྐུ་ཚེའི་རྒྱལ་མཚན་ཡུན་དུ་བརྟན་པ་དང་། །བཞེད་དོན་ལྷུན་གྱིས་གྲུབ་པའི་རྒྱུར་གྱུར་ཅིག །འཇིག་རྟེན་ཀུན་དུ་སྲིད་འགྲོར་ཉམས་ང་བའི། །ནད་མུག་འཁྲུགས་རྩོད་མི་མཐུན་ཕྱོགས་རྣམས་ཀུན། །ངང་གིས་ཞི་ནས་འོ་རྣམས་བདེ་བའི་རྒྱུ། །ཡང་དག་ལྟ་བ་མཆོག་དང་ལྡན་གྱུར་ཅིག །མཁའ་ལ་ཕུན་ཚོགས་བདུད་རྩིའི་བྲིལ་ཕྲེང་གིས། །ས་ལ་འབྲས་སྨིན་ཆད་མེད་རྟག་འཕེལ་བས། །མི་ལ་དུས་ཀུན་འཚོ་བ་བཟང་པོ་རྒྱས། །འགྲོ་ལ་ཚེ་རིང་ནད་མེད་དགེ་གྱུར་ཅིག །ངུར་སྨྲིག་རྒྱལ་མཚན་མཛེས་པའི་བརྟུལ་ཞུགས་ཀྱིས། །དྲང་སྲོང་ཆེན་པོའི་རིང་ལུགས་གསལ་མཛད་རྣམས། །གཡེང་བ་མེད་པར་འཆད་རྩོད་རྩོམ་པ་ཡིས། །ཉིན་མཚན་ཀུན་ཏུ་ཆོས་ཀྱིས་འདའ་བར་ཤོག །ནགས་དང་རི་སུལ་ཚང་ཚིང་ཞི་བ་ན། །བསམ་བསྟན་སྒོམ་པའི་སྒྲུབ་པ་པོ་རྣམས་ཀྱང་། །ལོག་འཚོ་སྤངས་པའི་འཚོ་བས་ལུས་སྟོབས་རྒྱས། །རྟག་ཏུ་རིམ་པ་གཉིས་ལས་མི་གཡེལ་ཤོག །ཆོས་ལྡན་ཡུལ་སྲུང་རྒྱལ་པོའི་ཚོགས་རྣམས་ཀྱང་། །འཐབ་རྩོད་མེད་པར་འཚེ་བ་ཀུན་དང་བྲལ། །དཔལ་འབྱོར་རྒྱས་ཤིང་དཀོན་མཆོག་གསུམ་ལ་གུས། །འདི་ཕྱི་ཀུན་ཏུ་བདེ་ཞིང་སྐྱིད་པར་ཤོག །བདག་སོགས་གང་དུ་སྐྱེ་བ་དེ་དང་དེར། །རྡོ་རྗེ་བླ་མའི་ཞབས་པད་ལ་འདུད་ཅིང་། །དམ་ཚིག་མཐའ་དག་གཏན་དུ་མི་ཉམས་པར། །རྡོ་རྗེ་ཐེག་པའི་དངོས་གྲུབ་འགྲུབ་གྱུར་ཅིག །ཅེས་བརྗོད་ལ་སྟོན་པ་སངས་རྒྱས་ཀྱིས་གསུངས་པའི་བཀྲ་ཤིས་དང་། རོལ་མོར་བཅས་པས་དཀྱིལ་འཁོར་ལན་གསུམ་བསྐོར་ནས་ཤིས་པར་བྱའོ། །བརྒྱད་པ་སྦྱིན་བསྲེག་ནི། རྒྱས་པའི་སྦྱིན་བསྲེག་བྱ་བ་སྟེ། དེ་ཉིད་ཀྱི་ཡིག་ཆ་ལས་གསལ་བར་འགྱུར་རོ། །དེ་ཡན་ཆོད་ནུབ་གསུམ་པའི་བྱའོ། །དགུ་པ་དཀྱིལ་འཁོར་དུ་སློབ་དཔོན་འཇུག་པ་དང་། སློབ་མ་འཇུག་པ་གཉིས་ཀྱི་ཕྱི་མ་དབང་གི་ཆོ་ག་ལས་ཤེས་ཤིང་། སྔ་མ་ལའང་དཀྱིལ་འཁོར་སྒྲུབ་མཆོད་དང་། འཇུག་པ་དངོས་སོ། །དང་པོ་ནི་འཁོར་ལོའི་དབང་ཕྱུག་གིས་གཙོས་སྒྲུབ་པོ་རྣམས་རང་གི་ལུས་ལྷར་ཤེས་པས་ཡི་གེ་བརྒྱ་པའི་ཁྲུས་བྱས། ལུས་དྲི་ཞིམ་པོས་བྱུགས། ཚུལ་ཕྱག་དང་གྲལ་ཕྱག་གིས། སློབ་དཔོན་དཀྱིལ་འཁོར་ཤར་དང་། གཞན་རྣམས་ཇི་ལྟར་འོས་པར་སྟན་ལ་འཁོད་ནས། རབ་གནས་སོགས་དང་མ་འབྲེལ་བའི་སྒྲུབ་མཆོད་རྐྱང་པ་ཙམ་ལ་ནམ་མཁའི་སྟ་གོན་གྱི་ལྷ་སྤྱན་འདྲེན་དུས་བསྟིམ་པ་ལས་གཞན་སྒྲུབ་ཐབས་བཞིན་དུ་ཚོགས་གཉིས་བསོགས་པའི་ཆོ་ག་སྡུ་ལྡང་གི་བར་བྱས་ལ་ཐུན་སྐབས་སུ་རྡོ་རྗེ་གསུམ་གྱི་རྣལ་འབྱོར་གྱིས་སྒོ་གསུམ་འཁྲུལ་པ་ཡེ་ཤེས་སུ་སྡོམས་པའི་རྣལ་འབྱོར་ལ་དྲན་པ་ཉེ་བར་བཞག་སྟེ། བདག་མདུན་དབྱེར་མེད་བསྐྱེད་ནས་ཞེས་པ་བདག་དང་མདུན་བསྐྱེད་རྫས་སོ་སོ་ཐ་དད་པ་དམིགས་པ་གཅིག་གིས་ཁྱབ་པའམ། བདག་མདུན་སོ་སོ་བ་གཉིས་གཅིག་ཏུ་བྱས་ཏེ་སྒོམ་པའམ། བདག་གཅིག་སོ་སོར་གཉིས་སམ་གསུམ་དུ་འཆར་བ་ལྟ་བུ་ཐ་མལ་སྣང་ཞེན་སྦྱོང་བྱེད་ཀྱི། ཐ་མ་ལ་སྣང་ཞེན་གཉིས་འཛིན་དུ་མ་སོང་བར། རང་རིག་པ་ཡེ་ཤེས་ཉིད་དཀྱིལ་འཁོར་མཐའ་དང་མུ་མེད་པ་ཆོས་ཀྱི་དབྱིངས་ཁྱབ་པ་དེ་སྲིད་དུ་ཁྱབ་ཅིང་དེ་ཡི་ངང་ལ་སྣང་སྲིད་དཀྱིལ་འཁོར་དུ་མ་གྱུར་པ་མེད་པས་སློབ་དཔོན་ཀཿཐོག་པ་ཆེན་པོས། དེ་ཉིད་དཀྱིལ་འཁོར་རྣམ་བཞི་སྟེ། །ཐམས་ཅད་འགག་པ་མེད་པ་ནི། །དེ་ཉིད་ཡི་ཡི་དཀྱིལ་འཁོར་ཡིན། །མ་འགག་པ་ཉིད་མ་སྐྱེས་པ། །དེ་ཉིད་ནང་གིས་ད་ལ་ཡིན། །མ་སྐྱེས་མི་འགག་དབྱེར་མེད་པ། །གསང་བའི་དཀྱིལ་འཁོར་ཡིན་པར་བཤད། །བླ་དྭགས་སྒྲོ་འདོགས་ཀུན་བྲལ་བ། །དེ་ཉིད་དཀྱིལ་འཁོར་བཞི་པ་ཡིན། །ཞེས་གསུངས་ལྟ་བུའི་སྒྱུ་འཕྲུལ་རང་ལུགས་ཀྱི་བཀོད་པ་དཀྱིིལ་འཁོར་གྱི་ལྟ་དོན་རྟོགས་ཤིང་སྣང་བ་ལྟར་ཤེས་པའི་གདེང་གིས་ཟིན་པས་བདག་དང་མདུན་ཞེས་སོ་སོར་ཕྱེ་བའི་འཛིན་པས་མ་སླད་པར། སྣང་གྲགས་རིགས་པ་ཐམས་ཅད་ཡེ་ཤེས་ཀྱི་འཁོར་ལོ་འཆང་བའི་ཆོ་འཕྲུལ་ཏིང་ངེ་འཛིན་གྱི་རྩལ་ལས་གཅིག་དང་དུ་མའི་དཀྱིལ་འཁོར་གྱི་སྤྲོ་བསྡུ་ཅིར་ཡང་གོམས་པར་བྱ་བ་སྟེ། རྨད་དུ་བྱུང་བའི་རྒྱུད་རྒྱལ་འདི་ཉིད་ཀྱི་དགོངས་དོན་ཡིན་པས་དེ་ལྟར་ཤེས་པར་བྱ་ཡི། ཆོས་ཐམས་ཅད་དག་མཉམ་ཡུལ་དང་ཡུལ་ཅན་བདེན་པ་དབྱེར་མེད་དེ་མཚོན་བྱེད་བརྡའ་ལ་སོ་སོར་འཆར་བས། བདག་གི་ལུས་དང་། རིག་པ་རང་བྱུང་གི་དཀྱིལ་འཁོར་གཞི་འབྲས་དབྱེར་མེད་དོན་དང་། དེ་མཚོན་བྱེད་རྟགས་ཀྱི་ཕྱག་རྒྱ་བྲིས་པ་གཟུགས་བརྙན་གཉིས་སྣང་ཚུལ་སོ་སོར་སྣང་བ་ལྟར། གནས་ཚུལ་ལ་འགལ་བར་འཛིན་པའི་བློས་སོ་སོར་ཞེན་པས་བདག་མདུན་དབྱེར་མེད་ཅེས་པའི་རྒྱུད་སྡེའི་གསང་གནད་ཟབ་མོ་རྣ་བར་མ་སོང་བ་ནི། རྡོ་རྗེ་ཐེག་པའི་རྒྱུད་དོན་མཐར་ཐུག་པ་ཤེས་པའི་སྐལ་བས་རེ་ཞིག་སྤངས་པའོ། །དེས་ན་ལམ་འདིའི་ལུགས་རིག་འཛིན་དམ་པ་གོང་མའི་མན་ངག་ལྟར་སྒྲུབ་གཞི་བདག་དང་། བྲིས་པ་དཀྱིལ་འཁོར། སྒྲུབ་ཆོས་ཏིང་འཛིན་གསུམ་རྩལ་སོ་སོར་འཆར་ཡང་ཡེ་ཤེས་རིག་པ་གཅིག་གི་རོལ་གར་ལ། གཅིག་ཐ་དད་ཀྱི་སྤྲོས་པ་བྲལ་བའི་གདེང་གོ་བས་གདོད་ནས་དག་ཅིང་གྲུབ་པའི་གསལ་གདབ་ཅིང་མཆོད་པར་བྱ་བ་དང་། ཐུན་མཚམས་སུ་འོག་མིན་དུ་སྟོན་འཁོར་ཚོགས་པ་བཞིན། ཡུལ་སྣང་ཕུན་ཚོགས་ཡེ་གནས་དང་། རྒྱུད་དོན་གང་སར་གྱི་ཆོས་ལ་ཚང་པའི་དགོངས་པ་དང་བཅས་ཏེ་རྒྱུད་བཀླག་ཅིང་རང་སེམས་དོན་གྱི་བླ་མ་རང་བྱུང་དཀྱིལ་འཁོར་གྱི་བདག་པོ་རང་ངོ་མཇལ་བ་ལས་ལོགས་སུ་དབང་དོན་ཟུར་བ་མེད་མོད། རྣལ་འབྱོར་པ་དེ་ལྟ་བུའི་རྟོགས་གོམས་ཀྱི་གདེངས་མེད་པ་དག་དེ་གསལ་འདེབས་པའི་ཕྱིར། རྒྱུད་སྨིན་བྱེད་ཀྱིས་བདག་ཉིད་འཇུག་པས་སྔགས་སྡོམ་གསོ་སྦྱོང་དང་། ཡེ་ཤེས་གོང་ནས་གོང་དུ་འཕེལ་བ་དང་། དེ་ཉིད་བརྟན་པར་བྱ་བའི་ཐབས་ཚུལ་ལ་བརྩོན་པར་བྱའོ། །གཉིས་པ་ནི། རྩ་རྒྱུད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་འཇུག་པར་བྱ། །ཞེས་པས་རྣལ་འབྱོར་པ་དག་མཉམ་དབྱེར་མེད་ཀྱི་ངེས་ཤེས་གོ་བ་གོམས་པ་མངོན་དུ་གྱུར་པའི་སློབ་དཔོན་གྱིས་རིག་པའི་མེ་ཏོག་དོར་བས་ཅིག་ཆར་དུ་བདག་ཉིད་དཀྱིལ་འཁོར་དུ་འཇུག་པའི་ཚུལ་དང་། དེ་ལྟར་མ་གོ་བས་རིམ་གྱིས་པའི་དབང་ལ་བརྟེན་ནས་བདག་ཉིད་དཀྱིལ་འཁོར་དུ་འཇུག་པའི་ཚུལ་ཏེ་གཉིས་སོ། །དེ་ལྟར་རིམ་ཅིག་ཆར་གང་གི་སྐབས་སུའང་། སྒྲུབ་གཞི་རང་ལ་གནས་པའི་སྐུ་དང་ཡེ་ཤེས་དེ། སྒྲུབ་བྱེད་དཀྱིལ་འཁོར་གྱི་འཁོར་ལོར་བདག་དང་མི་གཉིས་པའི་དབང་ལྷ་དེ་དག་གི་སྐུ་གསུང་ཐུགས་དང་དབྱེར་མེད་པར་མཉམ་པར་སྦྱོར་བས། སྒྲུབ་འབྲས་དག་པ་མངོན་གྱུར་གྱི་གོ་འཕང་གི་ཆོས་རྒྱུད་ལ་འཇོགས་པའམ། མངོན་དུ་བྱེད་པར་ངེས་པས། དབང་ཡེ་བསྐུར་ཆེན་པོའི་ལྟ་བས་ཟིན་པ་ཞིག་དགོས་སོ། །དེ་ཡི་ཕྱིར་ལྟ་བ་རྣལ་མ་དེ་ངེས་པའིགང་ཟག་གིས། གསལ་གདབ་པ་ལ། བདག་དང་དཀྱིལ་འཁོར་སྐུ་གསུང་ཐུགས་ཡེ་ནས་དབྱེར་མེད་ལ་འཁྲུལ་བས་སྒྲིབ་པ་དེ་བསལ་བའི་ཕྱིར་དབང་པོ་རབ་ཤེས་རབ་ཆེན་པོའི་བློ་སྟོབས་ཅན་དག་གིས་ཐེ་ཚོམ་ཆོད་དེ་སྤྲོས་པ་མང་པོའི་གནས་ལ་མི་ལྟོས་པ་སླར་སྔགས་ཙམ་གྱིས་དབྱེར་མེད་དུ་བྱེད་པའི་བརྡའ་ཐབས་ཀྱིས། ཡེ་ནས་དབྱེར་མེད་ཡིན་པ་ལ་ཤེས་པའི་རྒྱུད་སྨིན་བྱེད་ཆེས་ཁྱད་པར་བའི་ཐབས་སྦྱང་ཞིང་མཁས་པ་བླ་མེད་ཀྱི་ཟབ་པ་སྙིང་པོའི་རྒྱུད་སྡེ་མཐར་ཐུག་པ་འདི་རང་གི་དགོངས་པར་སྒོ་བསྟུན་པ་དང་། བདག་དང་དཀྱིལ་འཁོར་བའི་སྐུ་གསུང་ཐུགས་ཡེ་ནས་དབྱེར་མེད་ཡིན་པར་གོ་མོད། དབང་དམན་དེ་ཙམ་གྱིས་ཡིན་པ་ལ་ཡིན་པར་ངེས་པ་སྐྱེ་མི་ནུས་པའི་བློ་སྟོབས་དམན་པས་དབང་ལྷ་སྤྱན་དྲངས་བ་སོགས་ཀྱིས། དབང་གི་ཡུལ་ལས་དབང་བླང་བའི་ཆོ་ག་ཐབས་མང་པོས་རིམ་གྱིས་བདག་དང་དཀྱིལ་འཁོར་དབྱེར་མེད་དུ་བྱ་བའི་ཚུལ་བླ་མེད་ཀྱི་རྒྱུད་སྡེ་འོག་མ་སྤྱི་ཙམ་གྱི་སྒོ་བ སྟུན་དང་གཉིས་སུ་གནས་པ་ནི། བསྐྱེད་རིམ་ལ་སྔགས་ཙམ་བརྗོད་པའམ་སྐད་ཅིག་གིས་བསྐྱེད་པ་དང་། མངོན་བྱང་ལྔ་སོགས་ཀྱིས་རིམ་པར་བསྐྱེད་པ་གཉིས་སུ་གནས་པ་བཞིན་ནོ། དང་པོ་ནི། སློབ་དཔོན་ཤར་སྒོར་བཞེངས་ནས་མེ་ཏོག་དོར་བཞིན། རང་གཙོ་བོ་གཉིས་པའི་རྣམས་པས་མར་མེ་ལས་མར་མེ་འཕྲོས་པ་ལྟར་ཤར་སོགས་སྒོ་བཞིར་གནས་པར་གྱུར། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཧཱུཾ་བཛྲ་ས་མ་ཡ་ཧཱུཾ། མདུན་གྱི་ལྷ་ཚོགས་ཨིནྟྲ་ནཱི་ལའི་རི་ལ་ཉི་མ་ཤར་བ་ལྟ་བུའི་ཐུགས་ཀ་ནས་འོད་ཟེར་བསྐལ་པའི་མེ་དཔུང་ལྟ་བུ་བྱུང་བས། ལུས་ངག་གི་རྟོག་སྒྲིབ་སྦྱངས་ནས་རིག་པ་ཧཱུཾ་དུ་གྱུར། གཙོ་བོའི་ཐུགས་ཀར་ཐིམ། ཉོན་མོངས་ཞེ་སྡང་དང་རྣམ་པར་ཤེས་པའི་མེ་ལོང་ཡེ་ཤེས་དང་རྡོ་རྗེ་སེམས་དཔར་གནས་གྱུར། ཡང་། ༀ། ཡེ་ཤེས་རྒྱལ་པོ་སོགས་སྦྱོར་ཅིག །ༀ་བཛྲ་ས་མ་ཡ་ༀ། མདུན་གྱི་ལྷ་ཚོགས་ག ངས་རི་ལ་ཉི་མ་ཤར་བ་ལྟ་བུའི་ཐུགས་ཀ་ནས་འོད་ཟེར་བསྐལ་པའི་མེ་དཔུང་ལྟ་བུ་བྱུང་བས། ལུས་ངག་གི་རྟོག་སྒྲིབ་སྦྱངས་ནས་རིག་པ་ༀ་དུ་གྱུར། གཙོ་བོའི་ཐུགས་ཀར་ཐིམ། ཉོན་མོངས་པ་གཏི་མུག་དང་གཟུགས་ཀྱི་ཕུང་པོ་ཆོས་དབྱིངས་ཡེ་ཤེས་དང་རྣམ་པར་སྣང་མཛད་དུ་གནས་གྱུར། ཡང་ལྷོ་སྒོར་ཕྱིར། ༀ། ཡེ་ཤེས་རྒྱལ་པོ་སོགས་ནས། བདག་སྦྱོར་ཅིག །སྭཱ་བཛྲ་ས་མ་ཡ་སྭཱ། མདུན་གྱི་ལྷ་ཚོགས་གསེར་རི་ལ་ཉི་མ་ཤར་བ་ལྟ་བུའི་ཐུགས་ཀ་ནས་འོད་ཟེར་བསྐལ་པའི་མེ་དཔུང་ལྟ་བུ་བྱུང་བས། ལུས་ངག་གི་རྟོག་སྒྲིབ་སྦྱངས་ནས་རིག་པ་སྭཱར་གྱུར། གཙོ་བོའི་ཐུགས་ཀར་ཐིམ། ཉོན་མོངས་པ་ང་རྒྱལ་དང་ཚོར་བའི་ཕུང་པོ་མཉམ་ཉིད་ཡེ་ཤེས་དང་རིན་ཆེན་འབྱུང་ལྡན་དུ་གནས་གྱུར། ཡང་ནུབ་སྒོར་ཕྱིན། ༀ། ཡེ་ཤེས་རྒྱལ་པོ་སོགས་ནས། བདག་སྦྱོར་ཅིག །ༀ་བཛྲ་ས་མ་ཡ་ཨཾ། མདུན་གྱི་ལྷ་ཚོགས་རྣམས་པདྨ་རཱ་གའི་རི་བོ་ལ་ཉི་མ་ཤར་བ་ལྟ་བུའི་ཐུགས་ཀ་ནས་འོད་ཟེར་བསྐལ་པའི་མེ་དཔུང་ལྟ་བུ་བྱུང་བས། ལུས་ངག་གི་རྟོག་སྒྲིབ་སྦྱངས་ནས་རིག་པ་ཨྃ་དུ་གྱུར། གཙོ་བོའི་ཐུགས་ཀར་ཐིམ། ཉོན་མོངས་པ་འདོད་ཆགས། འདུ་ཤེས་ཀྱི་ཕུང་པོ། སོར་རྟོག་ཡེ་ཤེས་དང་། སྣང་བ་མཐའ་ཡས་སུ་གྱུར། ཡང་བྱང་སྒོར་ཕྱིན། ༀ། ཡེ་ཤེས་རྒྱལ་པོ་སོགས་ནས། བདག་སྦྱོར་ཅིག །ཧཱ་བཛྲ་ས་མ་ཡ་ཧཱ། མདུན་གྱི་ལྷ་ཚོགས་ཐམས་ཅད་མ་རྒད་ཀྱི་རི་བོ་ལ་ཉི་མ་ཤར་བ་ལྟ་བུའི་ཐུགས་ཀ་ནས་འོད་ཟེར་བསྐལ་པའི་མེ་དཔུང་ལྟ་བུ་བྱུང་བས། ལུས་ངག་གི་རྟོག་སྒྲིབ་སྦྱངས་ནས་རིག་པ་ཧཱར་གྱུར། གཙོ་བོའི་ཐུགས་ཀར་ཐིམ། ཉོན་མོངས་པ་ཕྲག་དོག་དང་འདུ་བྱེད་ཀྱི་ཕུང་པོ་བྱ་གྲུབ་ཡེ་ཤེས་དང་དོན་ཡོད་གྲུབ་པར་གནས་གྱུར། སླར་ཡང་ཤར་སྒོར་ཕྱིན་ནས། ༀ་བཛྲ་ས་མ་ཡ་ཧཱུཾ། ༀ་ས་མ་ཡ་སྟཾ། བདག་དམ་ཚིག་དང་རང་བཞིན་ཡེ་ཤེས་ཀྱི་དཀྱིལ་འཁོར་གཉིས་གདོད་ནས་དབྱེ་བ་མེད་པའོ། །དེ་ནས་སློབ་མ་ལ་འཇུག་པར་གནང་བ་ཞུ་བ་ནི། ༀ། རྡོ་རྗེ་ཡེ་ཤེས་ཐོབ་བྱེད་པ། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བགྱི། །བཟོད་པར་མཛད་དེ་དགོངས་སུ་གསོལ། །ལན་གསུམ་གྱིས་གསོལ་བ་བཏབ་པས། ༀ་བཛྲ་ས་མ་ཡ་ཧོཿ དེ་བཞིན་གཤེགས་པ་རྣམས་ཐུགས་རྗེས་ཞལ་འཛུམ་དབང་རྣམས་སྣོད་དང་མཚམས་པར་བསྐུར་ཅིག་ཅེས་གནང་བ་ཐོབ་ནས་གཙོ་བོའི་ཐུགས་ཀར་ཐིམ་པས་དབྱེར་མེད་པར་གྱུར། རང་གནས་སུ་འཁོད་དོ། །གཉིས་པ་ལ། བཤམས་བཀོད་དང་། དངོས་སོ། །དང་པོ། བགེགས་གཏོར་ལན་ཆགས་ནག་པོ་དང་། །རང་མདུན་མིག་དར་མེ་ཏོག་དང་། །རྡོ་རྗེ་གནོད་སྦྱིན་ཏིལ་དང་བཅས། །མཎྜལ་ནང་མཆོད་དུང་ཆོས་དང་། །རིགས་ལྔའི་ཕྱག་མཚན་དབུ་རྒྱན་དང་། །ཅོད་པན་མཐིང་དམར་ཕྲེང་བ་དང་། །གོ་ཆ་རྒྱལ་མཚན་གདུགས་ཕྱག་རྒྱ། །ལྷ་ཚོགས་ཚང་མོའམ་གཙོ་བོ་དང་། །བཟའ་བཏུང་རྣམས་དང་གླེགས་བམ་ཕྲེང་། རྒྱ་གྲམ་འཁོར་ལོ་དུང་ཕྱག་ཤིང་། །རིག་མའམ་ཡང་ན་དྲིལ་བུས་རུང་། །དབང་ལྷར་མཆོད་པ་འབུལ་རྒྱུ་ནི། །རྭ་བར་ཆུ་གཉིས་བཞི་བསྣོལ་དང་། །ཞལ་ཟས་བཅས་དང་གུ་གུལ་དང་། །ཁྱད་པར་སྤོས་སྦྱོར་དང་བཅས་བཀོད། །གཉིས་པ་ལ་དཀྱིལ་འཁོར་དུ་འཇུག་པའི་ཆོས་དང་། ཞུགས་པ་ལ་དབང་བསྐུར་བའོ། །དང་པོ་ནི། དབང་ཕྱུག་འཇུག་དང་བཟོད་གསོལ་དང་། ། ཁྲུས་དགབ་དྲི་དང་ལུས་འབུལ་དང་། །བགེགས་བསྐྲད་ལྷར་བརླབ་དམ་ཚིག་སྦྱིན། །དེ་ཉིད་དཔོག་དང་ཆུ་ནན་དང་། །བསྒྲག་དང་མེ་ཏོག་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་ཏན་རྣམ་བཅོ་བརྒྱད། །ཅེས་ལས་རིམ་ལས་གསུངས་པ་ལྟར་གྱི་འཇུག་པ་བཟོད་གསོལ་གཉིས་མི་བརྩི་བའི་འདིར་ཆོས་བཅུ་དྲུག་གི། དང་པོ། ཇི་ལྟར་བལྟམ་པ་སོགས་ནས། ཁྲུས་བགྱིའོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱཾ། ཞེས་ལས་བུམ་གྱིས་ཆུ་འཐོར། སྦྱང་གཞི་གདོད་ནས་དག་པའི་རང་རིག་གཉུག་མ་བླ་མ་དང་དབྱེར་མེད་པའི་ལྷར་ཤར་བ་ཉིད་དབང་ལེན་པའི་ཡུལ་དུ་བྱས་ནས། སྦྱང་བྱ་ཕུང་ཁམས་སྐྱེ་མཆེད་གློ་བུར་བ་དེ་ཉིད་རྣམ་པར་དག་པ་མར་མེ་ལས་མར་མེ་ཆད་པ་བཞིན་དུ་གཙོ་བོ་ཕྱག་གཉིས་པའི་རྣམ་པར་ཤར་སྒོར་དབང་སྟེགས་པདྨ་འདབ་བརྒྱད་ལ་འཁོད་པ་ཉིད་དབང་ལེན་པ་པོར་བྱས་ཏེ། ལུས་ལོངས་སྤྱོད་དུས་གསུམ་དགེ་བའི་དངོས་པོ་ཐམས་ཅད་མཎྜལ་དུ་འབུལ་བར་མོས་པས། མཎྜལ་སོ་བདུན་མའི་མཐར། མ་ཚང་བ་མེད་པ་འདི་ཉིད་བླ་མ་དང་དབང་ཕྱུག་རྡོ་རྗེ་སེམས་དཔའ་ལ་དཀྱིལ་འཁོར་དུ་འཇུག་པའི་ཡོན་དུ་འབུལ་བར་བགྱིའོ། །སྒྲུབ་ཐབ་ལས། སྣང་སྲིད་ཕྱོགས་བཅུའི་ཞིང་ཁམས་སོགས་དང་། ཏྲཾ་གླིང་བཞིའི་དཀྱིལ་འཁོར་རིན་ཆེན་ལྡན། སོགས་ནས། དབང་བསྒྱུར་ཤོག །ཅེས་བརྗོད། གཉིས་པ་ནི། ཧཱུཾ་བིགྷྣནྟ་ཀྲྀཏྟ་ཕཊ། ཅེས་ལས་བུམ་གྱིས་བསངས། ༀ་བཛྲ་ཡཀྵ་ཧཱུཾ། ཞེས་རྡོ་རྗེ་གནོད་སྦྱིན་གྱིས་བགེགས་བསྐྲད། ༀ་བཛྲ་རཀྵ་ཧཱུཾ། ཧཱུཾ་དཀར་པོའི་ཚོགས་ཀྱི་དྲྭ་བར་གྱུར། ཞེས་བརླབས་པའི་མིག་དར། ༀ་ཙཀྵུ་བནྡྷ་ཝ་ར་མཱ་ཱནཱ་ཡ་ཧཱུཾ། ཞེས་འཆིང་། ཨ་ཁཾ་ཝཱི་ར་ཧཱུཾ། ཞེས་མེ་ཏོག་འཛིན། ཐལ་མོ་སྦྱར་ནས། རྡོར་སེམས་གཙོ་བོ་ཁྱོད་ལ་འདུད། །ཐལ་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པར་དང་། །མཁྱེན་རབ་ཡེ་ཤེས་བདག་ལ་སྩོལ། །ལན་གསུམ་དུ་གསོལ་བ་གདབ། གསུམ་པ་ནི། ཁྱོད་ནི་དགའ་བ་ཅི་ལ་དགའ། །ཁྱོད་ནི་དད་པ་ཅི་ལ་དད། །ཁྱོད་ནི་མོས་པ་ཅི་ལ་མོས། །ཁྱོད་ཀྱི་འདོད་པ་ཇི་ལྟ་བར། །ད་ལྟ་ཉིད་དུ་སྨྲ་བར་གྱིས། །ཞེས་དྲིས་པས། བདག་ཅག་སྐལ་ལྡན་རིགས་ཀྱི་བུ། །རབ་དགྱེས་སེམས་ལ་བདག་ཅག་དགའ། །མཆོད་དོན་ཉིད་ལ་བདག་ཅག་དང་། །སྐལ་བ་བཟང་ལ་བདག་དགའ་འོ། །དེ་ལ་ལན། བུ་འདིར་ཤོག་གཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོར་ཞིང་རང་སེམས་བརྟན་པོར་ཟུང་། །སྒྱུ་འཕྲུལ་དྲྭ་བའི་རྫོགས་དབང་སྦྱིན། །བཞི་པ་ནི། རྡོ་རྗེ་སློབ་དཔོན་སངས་རྒྱས་དཔལ། །སོགས་ལན་གསུམ་དང་། ཁྱད་པར་དུ། ཕྱོགས་བཅུའི་རྒྱལ་བ་སྲས་བཅས་དང་། །དབང་ཕྱུག་ད་ལྟར་སངས་རྒྱས་དང་། །མ་འོངས་རང་བཞིན་སེམས་ཅན་ལ། །དགོས་པ་གཅིག་ཕྱིར་ལུས་འབྲུལ་བྱ། །ཐལ་མོ་སྤྱི་བོར་བཀོད། ༀ་སརྦ་བུདྡྷ་པཱུ་ཛོ་ས་སྠཱ་ན་ཡ་ཨཱཏྨཱ་ནཾ་ནིཪྻཱ་ཏ་ཡཱ་མི། སྨིན་མཚམས་སུ་བཀོད། ༀ་ཨཱ་ཙཪྻཱ་པཱུ་ཙོ་བ་སྠ་ནཱ་ཡ་ཨརྨཱ་ནཾ་ནིཪྻཱ་ཏ་ཡཱ་མི། ཐལ་མོ་སྙིང་གར་བཀོད། ༀ་བ་ཤ་ལ་ས་ཏྭ་པཱུ་ཙོ་བ་སྠ་ནཱ་ཡ་ཨཱརྨཱ་ན་ནིཪྻཱ་ཏ་ཡཱ་མི། ལྔ་པ་ནི་ཕྱི་བགེགས་དང་། ནང་བགེགས་བསལ་བའོ། །དང་པོ། བྷྲཱུཾ་སློབ་བུའི་དུང་ཁང་གཞལ་ཡས་ཁང་། །གནམ་སྒོ་གཅིག་པ་ཟླ་གམ་ནང་། །ཧཱུཾ་ལས་ཧཱུཾ་མཛད་བུམ་འཛིན་སྔོ། །ཧོ་ལ་གཏུམ་ཆེན་མི་གཡོ་ལྗང་། །རལ་གྲི་སྡིགས་མཛུབ་ཨཾ་གཙིག་བསྡམ། །འཇིགས་པར་གཟིགས་པས་སྒོ་སྲུང་གྱུར། །ༀ་བཛྲ་ཧཱུྃ་ཀཱ་ར་ཧཱུྃ་ཕཊ྄། ༀ་བཛྲ་ཀྲོ་དྷ་ཨཪྻཱ་ཨ་ཙ་ལ་ཧཱུྃ་ཕཊ། ༀ་ཨཱ་ཀོ་རོས་ལན་ཆགས་ནག་པོ་རྣམས་བགེགས་ལ་བསྔོ། ཧཱུཾ་བཞི་པ་དང་ཛྭ་ལ་བཛྲའི་སྔགས་བརྗོད། བདེན་སྟོབས་བརྗོད། ས་ཡི་ཕྱོགས་འདིར་རྡོ་རྗེ་འཛིན་པ་བདག་ཉིད་འདུག་ཅིང་དབང་བླང་བ་ལ་བར་དུ་གཅོད་པ་ཐམས་ཅད་རྒྱང་རིང་དུ་སོང་ཞིག །རོལ་མོར་བཅས་བགེགས་བསལ། གོང་གི་ཁྲོ་བོ་བཅུའི་སྔགས་བརྗོད། ཐུགས་ཀ་ནས་སྤྲུལ་པའི་ཁྲོ་བོ་བསམ་གྱིས་མི་ཁྱབ་པས། མཉམ་པོར་འོང་བའི་བདུད་ལ་སོགས་པ་རྒྱང་རིང་དུ་བཀྲད་པར་གྱུར། གཉིས་པ་ལ་སྔགས་དང་ཕྱག་རྒྱས་བསལ་བ་དང་། རྫས་ཀྱིས་བསལ་བའོ། །གཙོ་བོའི་ཕྱག་སོར་ཉི་ཟླ་བཅུར། །ཨཱོཾ་ཧཱུཾ་སྭཱ་ཨཱཾ་ཧཱ་རྣམས་དང་། མཱུྃ་ལཱྃ་མཱྃ་པཱྃ་ཏཱྃ་མཚན་པ། རིགས་ལྔ་ཡབ་ཡུམ་བཅུ་རུ་གྱུར། ༀ་སུ་ར་ཏ་སྟྭཾ། ཐལ་མོ་སྦྱར། བཛྲ་ཨཉྫ་ལི། སོར་མ་བསྣོལ། བཛྲ་བྷནྡྷ་བ། ཞེས་ཕྱག་རྒྱ་བསྡམས། རིགས་ལྔ་ཡབ་ཡུམ་མཉམ་སྦྱོར་བའི། །སྦྱོར་མཚམས་བྱང་སེམས་འོད་ཟེར་གྱིས། །འཁོར་བ་ཐོག་མེད་སྡིག་སྒྲིབ་ཀུན། །བྱ་སྒྲོ་མེ་ལ་བསྲེག་བཞིན་སྦྱངས། །བདེན་སྟོབས་སྔོན་དུ་འགྲོ་བས། རིགས་ཀྱི་བུ་རྣམས་ཀྱི་རྒྱུད་ལ་ཡོད་པའི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། ཆོས་ཀྱིས་འཕོངས་པའི་སྒྲིབ་པ་དང་། བག་ཆགས་ངན་པའི་སྒྲིབ་པ་ལ་སོགས་ཏེ་སྒྲིབ་པའི་ཕུང་པོ་ཇི་སྙེད་ཅིག་མཆིས་པ་ཐམས་ཅད་དྲལ་བར་གྱུར་ཅིག །བཛྲ་བྷནྡྷ་ཏྲ་ཐ། ཞེས་བརྗོད་དེ་ཕྱག་རྒྱ་སྤྲུགས། གཉིས་པ། རྡོ་རྗེ་གནོད་སྦྱིན་སྲེག་ཁང་ནི། །རྫ་ལས་བྱས་པའི་གནོད་སྦྱིན་སྐུ། །གཡས་གཡོན་ཕག་རྒོད་མཆེ་བ་འཛིན། །གདན་ནི་སྤོས་ཕོར་དབྱིབས་སུ་སྟེ། །པདྨ་ཟླའི་སྟེང་ཉིད་ན། །ཁྲོ་བོའི་རོལ་པས་འགྱིང་བཞིན་བཞུགས། །ཞལ་གདངས་ལྟོ་བའི་ནང་དག་ཏུ། །མེ་སྦར་དེ་ལ་ཏིལ་ཕུལ་ལམ། །ཡང་ན་མར་མེ་བཟང་པོར་བྱ། །རང་གི་སྙིང་གར་པདྨ་ནག །འདབ་བརྒྱད་ལྟེ་བར་སྡིག་སྒྲིབ་པཾ། །ལྟེ་བར་མེ་དཀྱིལ་གྲུ་གསུམ་སྟེང་། །ཡི་གེ་ཧཱུཾ་གཟུགས་མཐིང་ནག་གསལ། །གསང་གནས་རླུང་ལྗང་གཞུ་དབྱིབས་རྒྱས། །བླ་མ་ལྷ་ཡི་ཐུགས་ཀ་ནས། །འོད་ཟེར་ཕྲ་ལ་མྱུར་བ་བྱུང་། །གསང་གནས་རླུང་གཡོས་མེ་སྦར་ནས། །དེ་ཉིད་དབུ་རྐྱང་རོ་མར་བཞུགས། །སྡིག་སྒྲིབ་ཐམས་ཅད་པཾ་ལ་བསྟིམ། །ལུས་རྩ་ཐམས་ཅད་གསལ་ཞིང་སྟོང་། །དག་པ་ཡེ་ཤེས་བདུད་རྩིས་གང་། །པད་མ་དེ་ཡི་པཾ་ལ་ཐིམ། །དེ་མལ་ཡེ་ཤེས་མེ་ཡིས་གང་། །པཾ་གྱུར་སྡིག་པ་རིད་སྐམ་གསལ། །ལྟེ་བའི་ཧཱུྃ་དེ་གྱེན་འཕགས་པས། །ཁྲོ་བོ་རྡོ་རྗེ་གནོད་སྦྱིན་ནི། །ཞལ་གཅིག་འཇིགས་ལྟ་མཆེ་བ་གཙིགས། །ཕྱག་གཉིས་ཕག་རྒོད་མཆེ་བ་འཛིན། །ཤིན་ཏུ་འཇིགས་རུང་ཆ་བྱད་ཅན། །ནག་ལ་གསུས་ཆེ་སྐྲ་སེར་བརྫེས། །སྙིང་གར་ཡར་ལ་བྱོན་ཙ་ན། །སྡིག་པ་དེ་ཉིད་མགྲིན་པར་བྲོས། །ཁྲོ་དེ་མགྲིན་པར་བྱོན་ཙ་ན། །སྡིག་པ་སྣ་སྒོ་གཡས་སུ་བུད། །དེ་རྗེས་ཁྲོ་བོ་ཆེར་རྔམས་པས། །བྱོན་ནས་སྡིག་པ་དེ་ཉིད་ཟོས། །སྟོང་ཉིད་ངང་དུ་རང་བཞིན་མེད། །དེས་ན་ཁྲོ་བོ་སྣ་གཡོན་ནས། །ཚུར་ཞུགས་ལུས་ནང་ཁྲོ་བོ་གང་། །ༀ་བཛྲ་ཡཀྵ་ཧཱུྃ། སརྦ་པཱ་པཾ་ད་ཧ་ན་བྷ་སྨིཾ་ཀུ་རུ་སྭཱ་ཧཱ། ལན་གསུམ་མམ་བདུན་བརྗོད། དྲུག་པ་ནི། བདག་དང་མཐའ་ཡས་སོགས་ཀུན་རྫོབ་སེམས་བསྐྱེད་དང་། ཨེ་མ་ཧོ། ངོ་མཚར་རྨད་ཀྱི་ཆོས་སོགས་དོན་དམ་སེམས་བསྐྱེད་གཉིས་སྒྲུབ་ཐབས་བཞིན་བརྗོད། ལས་ཀྱིས་བསངས། སྭ་བྷ་ཝས་སྦྱངས། སྟོང་པའི་ཉིད་དང་སྙིང་རྗེ་སྒྱུ་མའི་རང་མདངས་སེམས་ཉིད་ཧཱུྃ་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་རྡོ་རྗེ་རྩེ་ལྔ་སྔོན་པོ་ཧཱུྃ་གིས་མཚན་པར་གྱུར། སྥ་ར་ཎ་ཕཊ། ས་ཧ་ན་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས་པད་ཉི་ཟླ་བ་ལ་བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུ་མདོག་སྔོན་པོ། རྡོ་རྗེ་དང་དྲིལ་བུ་བསྣོལ་ཐབས་སུ་འཛིན་པ་ལོངས་སྤྱོད་རྫོགས་སྐུའི་རྒྱན་ཐམས་ཅད་རྫོགས་ཤིང་སྐྱིལ་མོ་ཀྲུང་གིས་རོལ་པའོ། །སོ་སོའི་ཕྱག་རྒྱ་མགོ་བོའི་གནས་བཞག་སྟེ། ༀ་མ་ཧཱ་ཤཱུ་ནྱ་ཏ་སོགས་རིགས་ལྔའི་སྔགས་བརྗོད། སྤྱི་བོའི་གནས་ལྔར་རིགས་ལྔ་ཡབ་ཡུམ་གྱིས་མཚན་པར་གྱུར། གནད་ལྔར་རྩེ་ལྔའི་རྒྱ་གཏུགས་ཏེ་ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་ནས། པཱུ་ཛ་བཛྲའི་བར་བརྗོད། སྤྱི་བོར་ཟླ་བ་གནས་པའི་ༀ་དཀར་པོ་སོགས་ནས་མཚན་པ་རྣམས་ཀྱིས་རྒྱལ་བཏགས་པར་གྱུར། ༀ། དཔལ་ལྡན་སངས་རྒྱས་ལྔ་འཆང་བ། །རྡོ་རྗེ་མི་ཕྱེད་ལྔའི་རང་བཞིན། །དེང་འདིར་བྱིན་གྱིས་བརླབ་ནས་ནི། །རྡོ་རྗེ་ལྔ་རུ་མཛད་དུ་གསོལ། །ཞེས་བརྗོད། བཛྲ་ཀཱ་ཝཱ་ཙི་རཀྵཿ མཛུབ་མོ་གཡས་ན་ཧཱུཾ་ནག་པོ། སོགས་ནས། ཧཱུཾ་ཨ་ཞེས་གནས་དྲུག་ཏུ་བསྣོལ། བདུན་པ་དམ་ཚིག་སྦྱིན་པའི་ཕྱིར་གསོལ་བ་འདེབས་པ། ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་མཉེས་པར་མཛོད། །ཨ་ལ་ལ་སྟེ་དམ་ཚིག་སྐོར། །ཨ་ལ་ལ་སྟེ་དངོས་གྲུབ་སྩོལ། །རྫས་སུམ་ཅུ་པ་སྦྱར་བའི་དམ་རྫས་ལྕེ་ལ་སློབ་དཔོན་གྱིས་རྩལ་བར་མོས་ཏེ། རྡོ་རྗེ་རྩེས་ནང་མཆོད་ནས་བླངས་པ་ལྕེ་ལ་མྱང་བཞིན། ཨཱོཾ་ཨཱ་ཧཱུྃ་སྭཱ་ཧཱ། སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཋཱཿ རྡོ་རྗེ་ལྔ་ཡི་དམ་ཚིག་ཐོབ་པར་གྱུར། །བརྒྱད་པ་དབབ་པ། རྡོ་རྗེ་སྙིང་གར་བཟུང་ལ། དེ་རིང་ཕྱིན་ཆད་བུ་ཁྱོད་ཀྱི། །རྡོ་རྗེ་འཆང་ཆེན་ང་ཡིན་པས། །ང་ཡིས་ཇི་ལྟར་བསྒོ་བ་བཞིན། །ཁྱེད་ཀྱིས་ཀྱང་ནི་བྱ་དགོས་སོ། །ང་ལ་བརྙས་པར་མ་བྱེད་ཅིག །སྡུག་བསྔལ་ཀུན་དང་མ་བྲལ་བར། །ཚེ་ཡི་འདུ་བྱེད་བྱས་ནས་ནི། །སེམས་ཅན་དམྱལ་བར་ཆེན་པོར་ལྟུང་། །སངས་རྒྱས་ཀུན་གྱི་གསང་བ་འདི། །དམ་ཉམས་མ་འདྲེས་མེད་པ་ལ། །ནམ་ཡང་སྨྲ་བར་མ་བྱེད་ཅིག །ཐེག་པ་ཆེན་པོ་སྟོན་བྱེད་པ། །ང་ལ་བརྙས་དང་སྨད་མི་རུང་། །སྐུ་གསུང་ཐུགས་ལ་རྟག་གནས་ཤིང་། །མ་ལུས་སེམས་ཅན་དོན་གྱིས་ཤིག །དེང་ཁྱོད་དེ་རིང་གཤེགས་ཀུན་གྱི། །རིགས་སུ་ཞུགས་ཀྱི་དཀྱིལ་འཁོར་ཆེ། །མ་མཐོང་བ་ལ་མ་སྨྲ་ཞིག །གསང་བའི་དངོས་སྒྲུབ་གསང་སྟེ་སྒྲུབས། །ༀ་སརྦ་ཏ་ཐཱ་ག་ཏཱ་མ་ཧཱ་བཛྲ་ས་ཏྭ་ས་མ་ཡ་ཧཱུཾ། དགུ་པ་ཆུ་ནན་ལ་ཉེས་དམིགས་དང་། ཕན་ཡོན་གྱི་སྒོ་གཉིས། དང་པོ། ཙནྡན་དཀར་དམར། གུར་གུམ། གླ་རྩི། ཛ་ཏི་ཏེ་དྲི་ལྔ་རྣམས་སྦྱར་བའི་དུང་ཞལ་གྱི་ཆུ་ལ། ལས་སྔགས་ཀྱིས་བསངས། སྭཱ་བྷཱ་ཝས་སྦྱངས། མི་དམིགས་པ་སྟོང་ཉིད་ཀྱི་ངང་ལ་ཧཱུཾ་ལས་ཁྲོ་བོ་རྡོ་རྗེ་གནོད་སྦྱིན་དུ་གྱུར། ཨེ་ཧྱ་ཧིས་དྲངས། ཛཿཧཱུཾ་བཾ་ཧོ་ས་བསྟིམ། ༀ་བཛྲ་ཡཀྵ་ཧཱུཾ། ལྷ་འོད་དུ་ཞུ་བ་ཆུ་ཡི་རྡུལ་ཕྲ་རབ་ཏུ་གྱུར། འདི་ནི་ཁྱོད་ཀྱི་དམྱལ་བའི་ཆུ་དམ་ཚིག་འདས་ན་བསྲེག་པར་བྱེད། རྡོ་རྗེ་ཁྲོ་བོ་ཆེན་པོར་གྱུར། །རྡོ་རྗེའི་ཆུ་འདི་བཏུང་བར་གྱིས། །ༀ་བཛྲ་ཡཀྵ་ཧཱུཾ་ཕཊ྄། གཉིས་པ་སླར་ཡང་ཆུ་དེ་བསང་སྦྱངས། སྟོང་པའི་ངང་ལས་ཧཱུྃ་ལས་རྡོ་རྗེ་ཧཱུྃ་མཚན་ཡོངས་སུ་གྱུར་པ་ལས་དཔལ་རྡོ་རྗེ་མི་བསྐྱོད་པར་གྱུར། ཨེ་ཧྱ་ཧིས་དྲངས། ཛ་ཧཱུྃ་བཾ་ཧོས་བསྟིམ། ༀ་བཛྲ་ས་ཏྭ་ཨཿ ལྷ་འོད་དུ་ཞུ་བ་ལས་བདུད་རྩིར་གྱུར། དེ་ལྟ་བས་ན་བུ་ཁྱོད་ཀྱིས། །དམ་ཚིག་འདི་དག་སྲུང་བར་གྱིས། །དེ་བཞིན་བྱས་ན་དངོས་གྲུབ་འབྱུང་། །རྡོ་རྗེ་བདུད་རྩིའི་ཆུ་འདི་འཐུང་། །ༀ་བཛྲ་ཨུད་ཀ་ཧཱུཾ་ཕཊ། བཅུ་པ་དམ་བསྒྲག་པ། ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་དགོས་པ་མེད་གྱིས་ལ། །འདོད་པ་ལྔ་ཡི་ཡོན་ཏན་སྤྱོད། །གཞན་ཡང་སྟོང་ཁམས་ཐམས་ཅད་ན། །ཤེས་རབ་དབྱིངས་དང་འདོད་ཡོན་གཞན། །རབ་འབྲིང་ཐ་མ་ཐམས་ཅད་སྤྱོད། །གཞན་ཡང་དམ་ཚིག་ཉམས་པ་དང་། །སྐྱེ་བོ་གང་ཞིག་དམ་ལ་གནོད། །བརྟུལ་ཞུགས་ཅན་གྱིས་དེ་དྲོངས་ལ། །ཁྲག་ཆེན་སྙིང་ལས་བཏུང་བར་གྱིས། །འདི་ལ་མི་བྱ་ཅུང་ཟད་མེད། །སེམས་ཉིད་ཐེགས་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱད་ཀྱང་། །པདྨ་ལ་ནི་འདམ་བཞིན་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བྱ་དང་མི་བྱ་ཅུང་ཟད་མེད། །བྱས་ལ་མི་སོགས་ཚོགས་ཆེན་རྫོགས། །བླ་མེད་བྱང་སེམས་མི་སྤང་ཞིང་། །བླ་མ་སྙིང་ལྟར་བསྟེན་ཅིང་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་སྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་ཆེ། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་འདོར་རོ། །དམ་ཚིག་མ་ལུས་བཟུང་བར་གྱིས། །ཞར་བྱུང་དམ་བཟུང་བ་ནི། བླ་མ་དཀྱིལ་འཁོར་གྱི་ལྷ་ཚོགས་བདག་ལ་དགོངས་སུ་གསོལ། །བླ་མེད་མི་སྤང་ནས་བསམ་པ་འགྲུབ་གྱུར་ཅིག །ཅེས་པའི་བར་སྒྲུབ་ཐབས་ལས་འབྱུང་བ་ལྟར་ལན་གསུམ་བརྗོད། ༈ མན་ངག་གིས་དེ་ཡན་ཕྱིར་འཇུག་ཏུ་མཛད་ནས། ནང་འཇུག་གི་དང་པོ་སྒོ་དབྱེ་བར་གསོལ་བ་གདབ་སྟེ། བདེ་ཆེན་ལྷུན་གྲུབ་གཞལ་ཡས་འདིར། །རྣམ་པར་ཐར་པའི་སྒོ་བཞི་ནས། །ཚ ད་མེད་ཐུགས་རྗེས་སྒོ་ཕྱེས་ཏེ། །བྱམས་པའི་ཞལ་རྣམས་བསྟན་དུ་གསོལ། །སློབ་དཔོན་གྱིས་གནང་བ་སྦྱིན་པ། ཨེ་མ་སྐལ་ལྡན་འདུས་པའི་ཚོགས། །འཁོར་བའི་ལམ་སྒོ་ཀུན་བཅད་དེ། །བྱང་ཆུབ་ལམ་དུ་གཟུད་པའི་ཕྱིར། །རྡོ་རྗེའི་གསང་སྒོ་དབྱེ་བར་བྱ། །ཞེས་གསུངས་པར་མོས། ཡང་གསོལ་བ་བཏབ་ནས་འཇུག་པ་ནི། ཤར་སྒོ་ནས། ཧཱུཾ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་འབྱམ་ཀླས་མ་ལུས་ཀུན། །མཆོག་ཆེན་མཉམ་པར་སྦྱར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ༀ་སརྦ་ཏཱ་ཐཱ་ག་ཏཱ་ན་མོ་ཧཱུཾ། ༀ་ན་མ་ཏེ། ཧཱུཾ། ༀ་ན་མ་མེ་ཧཱུཾ། ༀ་ན་མོ་ན་མ་ཧཱུཾ། ཞེས་ཐལ་མོ་སྤྱི་མགྲིན་སྙིང་ག་གསུམ་དུ་བཀོད། ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་པ་ལ་གནོང་འགྱོད་ཀྱི་བློས། ༀ་བཛྲ་ས་ཏྭ་ས་མ་ཡ༴ སོགས་ཡི་གེ་བརྒྱ་པ་བརྗོད། དཀྱིལ་འཁོར་གྱི་ལྷ་ཚོགས་ཐམས་ཅད་གངས་རི་ལ་ཉི་མ་ཤར་བ་ལྟ་བུ་ཐུགས་ཀྱིས་དགོངས་ཞལ་གྱིས་ཕྱོགས་སྤྱན་གྱིས་གཟིགས་པ་དང་ཞལ་མཇལ་བར་གྱུར། དེ་དག་གི་ཐུགས་ཀ་ནས་འོད་ཟེར་དཀར་པོ་དང་། མཐིང་ཀ་བསྐལ་པའི་མེ་དཔུང་ལྟ་བུས་ལུས་ངག་ཡིད་གསུམ་གྱི་རྟོག་སྒྲིབ་ཐམས་ཅད་སྤྱངས་ནས་རིག་པའི་ངོ་བོ་ཧཱུཾ་དཀར་པོ་གཙོ་བོའི་ཐུགས་ཀར་ཐིམ། ཡང་ལྷོ་སྒོ་ནས་སྔར་བཞིན་གསོལ་འདེབས་ཕྱག་ཡིག་བརྒྱ་བརྗོད། ལྷ་ཚོགས་ཐམས་ཅད་གསེར་རི་ལ་ཉི་མ་སོགས་དང་། འོད་ཟེར་སེར་པོ་བསྐལ་པའི་སོགས་དང་། རིག་པའི་ངོ་བོ་སྭཱ་སེར་པོ་སོགས་བསྒྱུར། ཡང་ནུབ་སྒོ་ནས་གསོལ་འདེབས་ཕྱག་ཡིག་བརྒྱ་དང་། ལྷ་ཚོགས་ཐམས་ཅད་པད་མ་ར་གའི་རི་བོ་ལ་ཉི་མ་སོགས་དང་། འོད་ཟེར་དམར་པོ་སོགས་དང་། རིག་པའི་ངོ་བོ་ཨཱཾ་དམར་པོ་སོགས་འདོན་པ་སྤོ། ཡང་བྱང་སྒོ་ནས་གསོལ་འདེབས་ཕྱག །ན་མོ་ཀརྨ་ཀུ་རུ་ཧཱུཾ། ཞེས་འདོགས། ཡིག་བརྒྱ་དང་། དཀྱིལ་འཁོར་ལྷ་ཚོགས་མརྒད་ཀྱི་རི་བོ་ལ་སོགས་དང་། འོད་ཟེར་ལྗང་ཀུ་བསྐལ་པའི་སོགས་དང་། རིག་པའི་ངོ་བོ་ཧཱ་ལྗང་གུ་སོགས་བརྗེ་ཞིང་། དཀྱིལ་འཁོར་ལ་དངོས་སུ་སྐོར་དེ་ལྟར་བྱ་བའམ། དེ་ལྟར་མོས་པས་ལས་ཀྱི་རྡོ་རྗེས་དེ་དང་དེར་ཕྱིན་ནས་ཕྱག་དང་བཅས་ཏེ་མཐའ་དཀྲིས་བསལ། སློབ་དཔོན་གྱིས། བྷྲཱུཾ་པྲ་ཝེ་ཤ་ཡ་ཕཊ། ཅེས་པས་དཀྱིལ་འཁོར་གྱི་སྒོ་ཕྱེ་སྟེ་གཞི་དུས་སུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འོད་གསལ་བ་སྟེ་རྣམ་པར་ཐར་བ་བཞི་དང་། ལམ་དུས་སུ་ཐབས་སྦྱིན་པ་དང་། སྙན་པར་སྨྲ་བ། དོན་མཐུན་པ་དང་། དོན་སྤྱོད་པ་སྟེ་བསྡུ་དངོས་བཞི་དང་། ཤེས་རབ་བྱམས་པ་དང་། སྙིང་རྗེ། དགའ་བ། བཏང་སྙོམས་ཏེ་དམིགས་པ་མེད་པའི་ཚད་མེད་བཞི་ཡིས་དོན་རྫོགས་པའི་ཕྱིར་དུ། སྐྱབས་སུ་འགྲོ་བ་དང་། སེམས་བསྐྱེད་པ་དང་། སྡིག་པ་བཤགས་པ་དང་། རྗེས་སུ་ཡི་རང་བ་བཞིའི་ཕྱག་གིས། འབྲས་དུས་སུ་ཞི་རྒྱས་དབང་དྲག་གི་དངོས་གྲུབ་བཞི་འགྲུབ་པའི་རྟེན་འབྲེལ་བསྒྲིགས་པ་ཡིན་ནོ། །ཞེས་ངེས་པ་བསྐྱེད། མཐར་སློབ་དཔོན་གཙོ་བོ་གཉིས་པའི་ཚུལ་གྱིས་ཤར་སྒོ་ནས་སློབ་མ་འཇུག་པའི་གསོལ་བ་བཏབ་པར་མོས་པས། དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། བདག་གིས་སྐལ་ལྡན་བཞུགས་པར་བགྱི། །འདིར་ནི་དངོས་གྲུབ་ཅི་ཡོད་དང་། །རིགས་ནི་གང་གི་སྣོད་དུ་འགྱུར། །འདི་ན་བསགས་པ་ཅི་ཡོད་དང་། །དཀྱིལ་འཁོར་འདི་ནི་དེ་བཞིན་ཤོག །ལན་གསུམ། བཅུ་གཅིག་པ་རིན་པོ་ཆེ་དོར་བ་ནི། ཚེ་རབས་སྔོན་ནས་འབྲེལ་པ་གང་ཡིན་པ་དེ་ལ་བབ་པར་ཤོག་སྙམས་པས་དངོས་སུ་དཀྱིལ་འཁོར་རམ། དོ་རྭའི་དབུས་སུ་རྒྱལ་བ་བཞི་བཅུ་རྩ་གཉིས་ལམ་མེར་བཞུགས་པར་བསམས་པས། མེ་ཏོག་ལ་སོགས་རིན་ཆེན་ཕྲེང་། །སྔོན་ཚེ་ཡེ་ཤེས་བསྙེན་པའི་ལྷ། །ཐུགས་རྗེས་བཟུང་བར་དགོངས་ནས་ཀྱང་། །གང་ཡིན་དེ་ལ་འབབ་གྱུར་ཅིག །ༀ་བཛྲ་ས་མ་ཡ་པྲ་ཏིཙྪ་ཧོཿ ཞེས་འདོར་བས་དབུས་སུ་རྡོ་རྗེ། ཤར་དུ་དེ་བཞིན། ལྷོར་རིན་ཆེན། ནུབ་ཏུ་པདྨ། བྱང་དུ་ལས་རིགས་རྣམས་ངོས་ཟིན་པར་བྱ། གང་ལ་བབ་པའི་ལྷ་དེས་སྤྱི་བོར་མེ་ཏོག་བཀོད་པར་བསམ། ༀ་པྲ་ཏི་གྲིཧྣ་ཨི་མཾ་ས་ཏྭ་མ་ཧཱ་བ་ལ་ཏིཥྛ། ཞེས་སྤྱི་བོར་འཆིང་། ཡང་སློབ་མས་རྡོ་རྗེ་རྩེ་གཅིག་པའི་རྒྱ་སྙིང་གར་བཀོད་དེ། ལྷ་མི་སྤང་བར་དམ་བཅའ་བའི་ཕྱིར། སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབ་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱོད་ནི་ཡོངས་མི་སྤོང་། །དེ་ཡི་མཐའ། གང་ལ་བབ་པའི་ལྷའི་སྙིང་པོ་ལས། གཙོ་སྔགས་ཤམ་དུ། བཛྲ་ས་མ་ཡ་ཧཱུཾ། ཞེས་ལན་གསུམ་དུ་བརྗོད། བཅུ་གཉིས་པ་ལྷ་དབབ་ལ་ནི། སངས་རྒྱས་ཐམས་ཅད་གཅིག་བསྡུས་པ། །རྡོ་རྗེ་སེམས་དཔའ་བདེ་ཆེན་པོ། །དེ་ཉིད་གསང་བ་དམ་པ་ཡི། །རྡོ་རྗེའི་ཡེ་ཤེས་དབབ་ཏུ་གསོལ། །ལན་གསུམ་གསོལ་བ་གདབ། སློབ་བུས་ལུས་གནད་དྲངས་པོར་བསྲངས། ངག་རླུང་རྒྱུ་རང་སོར་བཞག །སྙིང་གི་དབུས་སུ་ཆུ་ནན་གྱི་ཡེ་ཤེས་པ་དཔལ་རྡོ་རྗེ་སེམས་དཔའ་རྒྱན་དང་ཕྱག་མཚན་ཐམས་ཅད་ཡོངས་སུ་རྫོགས་པ་ཆོས་སྐུ་ལས་གཟུགས་སྐུར་བཞེངས། འོག་མིན་ནས་རྡོ་རྗེ་སེམས་དཔའི་སྐུ་ཆེ་ཆུང་བསམ་གྱིས་མི་ཁྱབ་པ་བྱོན་ནས་བཞུགས། སློབ་དཔོན་དཀྱིལ་འཁོར་གྱི་དབང་ཕྱུག་གི་ཐུགས་ཀ་ནས་ལྷ་མོ་ལྕགས་ཀྱུ་མ་གྲངས་མེད་པ་འཕྲོས། ཡེ་ཤེས་པའི་ལྷ་ཚོགས་བཀུག་སྟེ་སྟེང་ཐམས་ཅད་ཡམ་ཡམ་ཤིག་ཤིག་གནས་པར་གྱུར། སློབ་དཔོན་གྱི་ལྕགས་ཀྱུའི་རྒྱ་བཅའ་བར་མོས་པས་ལྕགས་ཀྱུའི་རྒྱ་དང་བཅས། ༀ་བཛྲ་སཏྭ་ཨེ་ཧྱ་ཧི་བྷ་ག་ཝཱན྄་མ་ཧཱ་ཀ་རུ་ཎི་ཀ་དྲི་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཛཿཧཱུཾ་བཾ་ཧོཿ འཕགས་མཆོག་ཐུགས་རྗེས་སོགས་མཆ ིས་པར་མཛོད། ཧཱུྃ་ཧཱུཾ་ཧཱུཾ་ཧཱུཾ་བར་སྒྲུབས་ཐབས་འབྱུང་བར་ལྟར་བརྗོད། སྤོས་སྦྱོར་དང་། རོལ་མོས་བསྐུལ། རྐང་མཐིལ་དུ་ཡ་ལས་རླུང་གཡོས། ལྟེ་བའི་མེ་སྤར། སྙིང་གའི་ས་བསྲེགས། རྡོ་རྗེ་སེམས་དཔའི་སྐུ་ལས་བདུད་རྩི་བབ་པས་བདེ་བ་བཟོད་མེད་དུ་འབར། བར་སྣང་ལ་ཡམ་ཡམ་བསྐྱོད་པ་ལ་སློབ་དཔོན་གཙོ་བོས་ཕྱག་སྤྱི་བོར་བཀོད་བདེན་སྟོབས་བརྗོད་པར་གྱུར། ན་མོ་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། རྒྱལ་བ་རྒྱ་མཚོ། གསང་བ་རྒྱ་མཚོ། སྨིན་པ་རྒྱ་མཚོའི་བཀའ་བ་རྒྱུད་ཀྱི་བླ་མ་རིན་པོ་ཆེ་རྣམས་ཀྱི་བདེན་པ་དང་། ཆོས་ཉིད་ཆོས་ཅན་གདོད་ནས་དག་ཅིང་བསླུ་བ་མེད་པའི་བདེན་པ་དང་། བཅོམ་ལྡན་འདས་ཐུགས་སྒྱུ་འཕྲུལ་དྲྭ་བ་རྡོ་རྗེ་སེམས་དཔའ་ཞི་བ་རྣམ་པར་རོལ་པའི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས། རིགས་ཀྱི་བུ་འདི་རྣམས་ཀྱི་སྙིང་ལ་དཔལ་རྡོ་རྗེ་སེམས་དཔའ་གནས་པར་གྱུར་ཅིག །རྡོ་རྗེ་སེམས་དཔའི་སྐུ་གསུང་ཐུགས། །དམ་ཚིག་རྣམས་ལས་མི་འདའ་ན། །འདིར་ཡང་དགེ་འདུན་སྨོན་བརྒྱ་དང་། །ཕྱི་མ་རྡོ་རྗེ་འཆང་ཐོབ་ཤོག །སངས་རྒྱས་ཀུན་གྱི་གསང་བ་འདི། །སྤོང་བར་བྱེད་ན་ཡེ་ཤེས་སེམས། །རྡོ་རྗེ་གནོད་སྦྱིན་ཉིད་གྱུར་ནས། །སྲོག་རྩའི་ཁྲག་ཆེན་འཇིག་གྱུར་ཅིག །བྷྲཱུཾ་པྲ་ཝེ་ཤ་ཡ་ཕཊ། ཅེས་སྙིང་གའི་སྒོ་ཕྱེས་པའི་ནང་དུ་ནམ་མཁའ་ཁྱབ་པའི་ལྷ་ཚོགས་ཐམས་ཅད་སིབ་སིབ་ཐིམ་ནས་བརྟན་པར་གྱུར། གཙོ་སྔགས་མཐར། སྤོས་རོལ་བཅས། ཨ་ཝེ་ཤ་ཡ་ཨ་ཨ་ཨཿ ར་ར་ར་ཙ་ལ་ཡ། ཙ་ལ་ཡ་ཧཱུཾ་ཨ་སྟཾ་བྷ་ཡ་ཧ་ཛྷཻཾ། མང་དུ་བཟླ་ཏིཥྛ་བཛྲ་ས་བརྟན་པར་བྱའོ། །བཅུ་གསུམ་པ་ནན་ཏན་ནི། ༀ་རྡོ་རྗེ་སེམས་དཔའ་རིགས་ཀྱི་ལྷ། །སྐལ་པ་མཉམ་པའི་ཡེ་ཤེས་ཏེ། །གཉེར་ན་ཉེ་བར་འབྱུང་བ་ཡིས། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ལྷ་སྤང་དགེ་སྤྱད་དོན་མེད་དེ། །གང་ཞིག་ཕྱག་རྒྱ་འདི་སྤང་ན། །ཉོན་མོངས་ངན་སོང་གནས་སུ་སྐྱེ། །བྱང་ཆུབ་འབྲས་བུ་ཐོབ་མི་འགྱུར། །བླ་མེད་འགྲོ་བའི་རྒྱུན་ཡང་ཆད། །རིགས་ཆད་ཉིད་དུ་གནས་པར་འགྱུར། །དེ་ནི་ལྷ་སྤང་བའི་ཉེས་ད མིག་གི་སྒོ་ནས་ནན་ཏན་བརྗོད་པའོ། །ཡང་། བདག་ཉིད་ལྷ་དང་མཉམ་སྦྱོར་ནས། །ཡོན་ཏན་ཆུང་ཡང་འགྲུབ་པར་འགྱུར། །གཅིག་དང་དུ་མར་ཡོངས་བྲལ་བའི། །དཀྱིལ་འཁོར་ཐམས་ཅད་འགྲུབ་པར་འགྱུར། །དེ་ནི་འགྲོལ་བའི་སྒོ་ནས་ཡོན་ཏན་དང་། གང་ལ་ཐར་པའི་ལྷ་མི་སྤོང་བར་ནན་ཏན་བརྗོད་པའོ། །བཅུ་བཞི་པ་མིག་དབྱེ་བ་ནི། གསེར་ཐུར་སོར་བརྒྱད་པ་ལ། ༀ་དཀར་པོས་མཚན་པ། དབང་ཕྱུག་གི་ཐུགས་ཀ་ནས་འོད་ཟེར་བྱུང་། མ་རིག་བའི་ལིང་ཐོག་བསལ་ནས་དག་པ་ཡེ་ཤེས་ཀྱི་སྤྱན་དང་ལྡན་པར་བསམ། རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེ་མིག་ནི་བླ་ན་མེད། །ༀ་བཛྲ་ཙཀྵུ་པྲ་ཝེ་ཤ་ཡ་ཕཊ྄། ཞེས་གདོང་གཡོགས་འགྲོལ། བཅོ་ལྔ་པ་མཐོང་བ་བསྟན་པའི་ཕྱིར། སློབ་དཔོན་གྱིས་ཕྱག་ཤིང་གིས་བསྟན་པར་ཐོས་པས། ཧེ་མཎྜལ་པཱ་ཤྱ། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དམ་པ་བལྟ་བར་བྱ། །སངས་རྒྱས་གང་གི་རིགས་སུ་འཁྲུང་། །དངོས་གྲུབ་མཆོག་ཏུ་འགྱུར་བར་བྱ། ༈ །དཀྱིལ་འཁོར་ཆེན་པོ་འདི་ལ་ལྟོས། །ད་ནི་དད་པ་རབ་སྐྱེད་ཅིག །སངས་རྒྱས་གདུང་གི་རིགས་སུ་འཁྲུངས། །དམ་ཚིག་མཆོག་ཏུ་འགྱུར་བ་ཡིས། །རྡོ་རྗེ་པདྨོ་རོལ་མོའི་མཆོག །སྔགས་དང་ཕྱག་རྒྱས་བྱིན་གྱིས་བརླབ། །དངོས་གྲུབ་ཐམས་ཅད་ཕུན་སུམ་ཚོགས། །གསང་སྔགས་རྣམས་ནི་གྲུབ་པར་གྱིས། །སྨྱུག་འདེབས་ཀྱིས་འཛུགས་ལ། ཆོས་རྣམས་ཐམས་ཅད་དམིགས་མེད་པའི། །དབྱིངས་སུ་ཐིམ་ནས་འོད་ཟེར་གསལ། །གཅིག་དང་བྲལ་བ་ཐམས་ཅད་མེད། །དཀྱིལ་འཁོར་སྤྲོས་མེད་ཟླུམ་པའི་ཚུལ། །རང་རིག་ཡེ་ནས་མྱ་ངན་འདས། །ཡེ་ཤེས་རྒྱུ་དང་འབྲས་བུའི་ཚུལ། །ཆོས་ཀྱི་འཁོར་ལོར་ཡོངས་ཀྱིས་བསྐོར། །ཐུགས་རྗེའི་བྱིན་རླབས་སྤྲོས་པ་ཡིས། །ཡེ་ཤེས་བཞི་ཡི་དཀྱིལ་འཁོར་སྤྲོ། །སྐུ་གསུང་ཐུགས་དང་ཡེ་ཤེས་ལྔ། །བྱིན་རླབས་ཡ་མཚན་བསམ་མི་ཁྱབ། །རང་གསལ་སྣང་བའི་ཐབས་ལས་བྱུང་། །བསོད་ནམས་ཡེ་ཤེས་ཚོགས་རྫོགས་ཕྱིར། །མཐའ་དབུས་མེད་པར་རྒྱས་པར་གནས། །སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། །ས་རྣམས་ཁྱད་པར་བཀོད་པས་ན། །དེར་འགྲོ་ལམ་སྟེགས་བརྒྱད་དང་ལྡན། །རང་བཞིན་ཡེ་ནས་འོད་གསལ་ཕྱིར། །ཉི་ཟླ་བརྩེགས་པའི་གདན་འབར་ཞིང་། །ཡེ་ནས་རྣམ་པར་དག་པའི་ཕྱིར། །མ་ཆགས་པདྨ་འབར་བའི་གདན། །ཟག་མེད་ཡེ་ཤེས་གཏེར་གྱུར་པ། །ཡིད་བཞིན་རིན་ཆེན་འབར་བའི་གདན། །འབྲས་བུའི་ཆོས་རྣམས་ཡོངས་རྫོགས་ཕྱིར། །སེང་གེ་ལ་སོགས་བཏེགས་པ་ཡིན། །ཡེ་ནས་མཉམ་ཉིད་མི་འདའི་ཕྱིར། །ཏཱ་ལའི་ལྗོན་ཤིང་རང་བཞིན་གནས། །རེ་བ་ཡིད་བཞིན་སྐོང་བའི་ཕྱིར། །དཔག་བསམ་ཤིང་དང་རིན་ཆེན་འབར། །ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཐམས་ཅད་རང་བཞིན་དག་པའི་ཕྱིར། །སྒྱུ་འཕྲུལ་བཞི་བཅུ་རྩ་གཉིས་ཀྱིས། །ཐམས་ཅད་ལྷ་ནི་རྟག་ཏུ་སྦྱོར། །ཐམས་ཅད་མ་ལུས་དཀྱིལ་འཁོར་མཆོག །ཅེས་པའམ། སྒྲུབ་ཐབས་ནས། ཡེ་ཤེས་ཕྱོགས་བཞི་དབུས་བརྟགས་ཏེ། སོགས་ནས། ལྷ་ཆེན་ཕྱོགས་སྐྱོང་བརྒྱད་ཀྱིས་བསྐོར། ཞེས་པའི་བར་དང་། ང་ཕྱིར་རྡོ་རྗེ་ཐུགས་ཆུད་པའི། །སོགས་ནས། ཆོ་འཕྲུལ་རང་བྱུང་འཁོར་དུ་གསུངས། །ཞེས་པའི་བར་རམ། ཡང་ན་སྔ་མའི་རྗེས་སུ། དེ་དབུས་བཞུགས་པའི་ལྷ་ཚོགས་ནི། །འཁོར་ལོ་རྒྱལ་པོ་རྒྱལ་མོ་དང་། །སོགས་པ་བྱིན་རླབས་སྐབས་སུ། འདུལ་བ་བཞི་ཡིས་འགྲོ་དོན་མཛད། །བར་དུ་བརྗོད། དེ་དང་རྗེས་འབྲེལ་རྟེན་བརྟེན་པའི་དེ་ཁོ་ན་ཉིད་ནི། ཐར་པ་ཆེན་པོའི་ཕོ་བྲང་དུ། བསྡུ་བའི་དངོས་པོ་སྒོ་བཞི་སྟེ། །ཚད་མེད་བཞི་ཡི་གྲྭ་བཞིའོ། །འཕགས་པའི་བདེན་པ་རྣམ་བཞི་ངོས། །ཡེ་ཤེས་ལྔ་ཡི་ཁ་དོག་ལྔའི། །རྩིག་པ་རིམ་པ་ལྔ་པའོ། །དད་སོགས་དབང་ལྔའི་འདོད་ཡོན་འཁྲིགས། །རྣམ་ཐར་བརྒྱད་པོ་རྟ་བབས་སོ། །རྫུ་འཕྲུལ་རྐང་པ་སྒོ་འཁྱུད་བཞི། །འཕགས་ལམ་ཡན་ལག་ཀ་བ་བརྒྱད། །རྣམ་པར་ཐར་པའི་སྒོ་ལོགས་བཞི། །ཡེ་ཤེས་ལྔ་ཡི་མེ་འོད་འབར། །རྣམ་ཤེས་ཆོས་དབྱིངས་མི་བསྐྱོད་པ། །གཟུགས་ཕུང་མེ་ལོང་རྣམ་སྣང་མཛད། །ཚོར་བ་མཉམ་ཉིད་རིན་ཆེན་འབྱུང་། །འདུ་ཤེས་སོར་རྟོག་འོད་དཔག་མེད། །འདུ་བྱེད་བྱ་གྲུབ་དོན་ཡོན་གྲུབ། །ས་ཆུ་མེ་རླུང་མཁའ་ཡུམ་ལྔ། །མིག་སྣ་ལྕེ་རྣ་ཤེས་དབང་བརྒྱད། །གཟུགས་སྒྲ་དྲི་རོ་འདས་མ་འོངས། །ད་ལྟ་མ་ངེས་དུས་བརྒྱད་བཅས། །སེམས་དཔའ་ཡབ་ཡུམ་བཅུ་དྲུག་ཚོགས། །ཡིད་ཆོས་བྱ་བ་བྱེད་པ་པོ། །ང་རྒྱལ་ཕྲག་དོག་འདོད་ཆགས་ནི། །བརྒྱ་བྱིན་ཐག་བཟང་ཤཱཀྱ་ཐུབ། །གཏི་མུག་སེར་སྣ་ཞེ་སྡང་རྣམས། །སེང་གེ་ཁ་འབར་ཆོས་རྒྱལ་ཏེ། །ཤེས་དབང་རེག་བྱ་ལུས་བྱུང་བཅས། །རྟག་ཆད་བདག་མཚོན་སྒོ་བ་བཞི། །ཡུམ་བཅས་དག་པ་ཤར་བའོ། །བཅུ་དྲུག་པ། ཚོགས་ཀྱིས་མཆོད་པ་བཏེགས་ནས་སྔགས་འབུལ་ཙམ་དང་ཡིག་བརྒྱ་བཟླ། དཀྱིལ་འཁོར་དུ་ཞུགས་པ་ཙམ་གྱི་ཡོན་ཏན་ནི། སྒྱུ་འཕྲུལ་དྲྭ་བར་ལེགས་ཞུགས་པས། །ཕྱོགས་བཅུ་དུས་བཞིར་གཤེགས་པ་ཡི། །དཀྱིལ་འཁོར་ཀུན་ཏུ་ཞུགས་པ་ཡིན། །དེ་ནི་དཀྱིལ་འཁོར་འདིར་ཞུགས་པ་ཐམས་ཅད་དུ་ཞུགས་པའི་ཡོན་ཏན་ནོ། །རྡོ་རྗེ་སེམས་དཔའ་ལ་སོགས་པའི། །འཁོར་ལོར་སྔོན་དུ་མཐོང་བ་ཡི། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །དེ་མཚན་མའི་དཀྱིལ་འཁོར་དུ་ཞུགས་པས་རང་གི་འབྲས་བུའི་དཀྱིལ་འཁོར་དུ་ཞུགས་པ་དང་སྐལ་བ་མཉམ་པའི་ཡོན་ཏན་ནོ། །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་ཀྱི། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡིས། །ཉེ་བའི་སྲས་སུ་དགོངས་པར་འགྱུར། །དེ་ནི་མོས་པའི་ཡོན་ཏན་ནོ། །རྡོ་རྗེ་འཛིན་པའི་རིགས་ངེས་ཤིང་། །གདོན་རྣམས་བཟློག་ཅིང་ངན་སོང་སྤོང་། །ལོངས་སྤྱོད་འདུ་བ་རྣམ་གཉིས་དང་། །ཡེ་ཤེས་སྤྱན་གྱི་གཞི་རུ་ངེས། །དེ་ལ་སོགས་པ་བསམ་ཡས་མཆོག །ཅེས་དམ་ཚིག་མ་ཉམས་ན་དངོས་གྲུབ་རབ་འབྱམས་འགྲུབ་པའི་ཡོན་ཏན་ནོ། །དེ་དག་དཀྱིལ་འཁོར་དུ་འཇུག་པའི་ཆོ་གའོ། ༈ །གཉིས་པ་ཞུགས་པ་ལ་དབང་བསྐུར་བའི་ཆོ་ག་ལ་གསུམ་དང་པོ་ཕྱི་ཕན་དབང་བཅུ་ལ་སྔོན་འགྲོ་དང་། དངོས་སོ། །དང་པོ། ཏྲཾ། གླིང་བཞིའི་དཀྱིལ་འཁོར་རིན་ཆེན་ལྡན། །སོགས། ཏིང་འཛིན་མཆོད་པ་བཞེས། མཎྜལ་བཀོད་པ་ཕུལ་བྱུང་འདི་ཉིད་བླ་མ་དང་འཁོར་ལོའི་བདག་པོ་ལ་སློབ་མ་ལ་ཕན་པའི་དབང་ཞུ་བའི་དོན་དབུལ་བར་བགྱིའོ། །ཡོན་འབུལ་བའི་དོད། བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་བསྒྲུབ་ཕྱིར། །ཕོངས་པ་མེད་པར་འབུལ་བར་བྱ། །གསོལ་བ་གདབ་པ་ནི། དཔལ་ལྡན་སངས་རྒྱས་ཀུན་བདག་ཉིད། །བརྩེ་བར་དགོངས་ཏེ་བདག་ལ་ཡང་། །དབང་བསྐུར་བདུད་རྩི་ཆེན་པོ་ཉིད། །དེ་རིང་རབ་ཏུ་གསལ་བར་མཛོད། །ལན་གསུམ། སློབ་མ་དཀྱིལ་འཁོར་ཤར་སྒོའི་ནང་རོལ་དབང་སྟེགས་ལ་རྡོ་རྗེ་སེམས་དཔའི་རྣམ་པར་འཁོད་པར་གྱུར། སློབ་དཔོན་གྱིས་ལན། སངས་རྒྱས་དག་ནི་ཐམས་ཅད་ཀྱི། །གསང་བ་རྡོ་རྗེ་གསུམ་ལས་བྱུང་། །ཁམས་གསུམ་ཀུན་གྱིས་ཕྱག་བྱས་པ། །དབང་བསྐུར་གནང་བ་ཆེན་པོ་སྦྱིན། །སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་ཕྱོགས་བཅུ་དུས་བཞིའི་བསམ་ཡས་ལྷུན་གྲུབ་ཀྱི་དཀྱིལ་འཁོར་ཐམས་ཅད་རྒྱལ་བ་བཞི་བཅུ་རྩ་གཉིས་ཀྱི་རྣམ་པ་གདན་གསུམ་ཚང་བའི་དབང་ལྷ་ནམ་མཁའ་གང་བ་བཛྲ་ས་མཱ་ཛཿ ཞེས་རྡོ་རྗེ་བསྡུ་རྒྱ་བཅས་སྙན་བརྣན། ཨེ་ཧྱ་ཧིས་དྲངས། བསྟིམ། བརྟན། ཕྱི་ནང་གསང་བས་མཆོད། གླུ་དྲུག་གིས་སམ། མཉམ་ཉིད་མི་གཡོས་བསྟོད། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །འདི་ཡང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེས་དབང་བསྐུར་སྩོལ། །སྒྱུ་འཕྲུལ་དྲྭ་བའི་དཀྱིལ་འཁོར་དུ། །སློབ་དཔོན་བདག་གིས་བརྩེ་བ་ལ། །མཐུ་སྩོལ་དབང་བསྐུར་བྱིན་གྱིས་རློབས། །དེ་བཞིན་གཤེགས་པ་ཐམས་ཅད་ཀྱི། །སྒྱུ་འཕྲུལ་དྲྭ་བའི་དཀྱིལ་འཁོར་དུ། །རྡོ་རྗེ་ཤུགས་ཀྱིས་བསྒྲལ་ནས་ཀྱང་། །བྱིན་བརླབ་དམ་པ་ནོད་པར་བྱའོ། །ཞེས་ལྷ་ལ་གསོལ་བ་བཏབ་པས་ལྷས་དབུགས་དབྱུགས་ཞིང་སློབ་དཔོན་གྱིས་དམ་བཅའ་བརྟན་པར་གྱུར། །གཉིས་པ་ལ་དང་པོ་བུམ་དབང་དང་། དང་པོ་རྒྱུད་དང་ལས་རིམ་ལས་སྙིང་པོ་ལྔ་སྔོན་དུ་གསུངས་མོད། མན་ངག་གིས་བུམ་པ་སྔོན་དུ་མཛད་པས། རབ་གནས་ལ། བསང་སྦྱངས། དབང་རྫས་བུམ་པ་སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་གདན་ལྔ་ལ་ཧཱུྃ་ཨཱོཾ་སྭཱ་ཨཱཾ་ཧཱ་རྣམས་ལས་སོ་སོའི་ཕྱག་མཚན་ཡི་གེ་དེ་དག་གིས་མཚན་པ། འཕྲོ་འདུས་དེ་ཡོངས་སུ་གྱུར་པ་ལས། མི་བསྐྱོད་པ་མཐིང་ཀ་དབྱིངས་ཕྱུག་མར་བཅས་རྡོ་རྗེ། རྣམ་སྣང་དཀར་པོ་སངས་རྒྱས་སྤྱན་བཅས་འཁོར་ལོ། །རིན་འབྱུང་སེར་པོ་མཱ་མ་ཀི་བཅས་རིན་པོ་ཆེ། སྣང་མཐའ་དམར་པོ་གོས་དཀར་བཅས་པདྨ། དོན་གྲུབ་ལྗང་གུ་སྒྲོལ་མ་བཅས་རལ་གྲི་རྣམས་གཡས་དང་། གཡོན་དྲིལ་བུ་བསྣོལ་ཐབས་སུ་འཛིན་པ། ཡུམ་རྣམས་གཡས་ཡབ་ལ་འཁྱུད་ཅིང་། གཡོན་དྲིལ་བུ་འཛིན་པས་ཡབ་ལ་འཁྲིལ་བ། ཡབ་རྣམས་རྫོགས་སྐྱིལ་དུ་བཞུགས་ཤིང་ལོངས་སྐུའི་རྒྱན་ཅན་ནོ། །ལྔ་ཚན་ལྔས་བསྐུར། རློབ། བརྣན། དྲངས། བསྟིམ། བརྟན། མཆོད། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱི་ཞུ་བ་ལས་བྱུང་བའི་དབང་རྫས་བུམ་པར་གྱུར། དེ་ཡང་རིགས་ལྔ་བདེ་བར་གཤེགས་པ་རྣམས། དབང་བསྐུར་བའི་དགོངས་པ་མཛད། རིགས་ཀྱི་ཡུམ་བཞིས་བུམ་ཆུ་མགོ་བོའི་གནས་ལྔར་གཏིགས་ཤིང་རྩ་གནས་ཐིག་ལེས་གང་བ་ལ་དབང་བསྐུར་བཞིན་ཁྲུས་གསོལ། སེམས་དཔའ་རྣམས་ཀྱིས་བཀྲ་ཤིས་བརྗོད། རྡོ་རྗེའི་ལྷ་མོ་རིག་མ་རྣམས་ཀྱིས་མཆོད་པ་འབུལ། ཁྲོ་བོ་རྣམས་ཀྱིས་བགེགས་བསྐྲད་དེ་དབང་གི་བྱ་བ་ལ་བརྩོན་པར་གྱུར། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱིས་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །བཀྲ་ཤིས་དེས་ནི་དེ་རིང་དབང་མཆོག་དམ་པ་བསྐུར། །བུམ་པ་མང་པོ་ཡོད་ན་གཙོ་བོའི་ནང་དུ་བསྡུ། ལས་རྡོར་གྱིས་ཕྱག་བཅས་ཕྲག་འགེབ་ཀྱིས་བུམ་པ་ཐོགས་ཏེ། ཏིལ་གྱི་གང་བུ་ལྟར་གང་བའི། །རྒྱལ་བ་བུམ་པ་འཛིན་པ་ཡིས། །དེ་རིང་ཁྱོད་ལ་དབང་བསྐུར་བ། །དེ་ལྟར་ཤེས་ནས་ཡིད་བདེར་བྱོས། །ཞེས་སྤྲོ་བ་སྐྱེད། ཁ་བརྒྱན་གྱི་ཆུ་གཏོར་ཞིང་། བུམ་པ་ཟླུམ་པོ་ཕོ་བྲང་དུ། །སྣོད་བཅུད་མ་ལུས་ཀུན་བསྡུས་ནས། །ཐིག་ལེ་ཆེན་པོར་རྒྱས་བཏབ་པས། །སེམས་ཅན་ཐམས་ཅད་སངས་རྒྱས་ཡིན། །ཧཱུཾ་བཛྲ་ཀཱ་ལ་ཤ་ཨ་བྷི་ཥིཉྩ་ཧཱུཾ། མགོ་བོའི་དབུས་སུ་གཏུགས། རིགས་འགྲེས་ཏེ། ༀ་བུདྡྷ་མགོའི་ཤར། སྭཱ་རཏྣི་མགོའི་ལྷོ། ཨཱཾ་པདྨ་མགོའི་ནུབ། ཧཱ་ཀརྨ་མགོའི་བྱང་དུ་གཏུགས་ཏེ་སླར་ཁྲུས་དང་བཏུང་བར་བཅས། ཇི་ལྟར་བལྟམས་པ་སོགས་ནས། བདག་གིས་དབང་བསྐུར་རོ། །ཕྱོགས་བཅུ་ཐམས་ཅད་སངས་རྒྱས་ཀྱིས། །ཡང་དག་དཀྱིལ་འཁོར་བསྟན་པའི་བདག །ཉོན་མོངས་དྲི་མ་ཀུན་སེལ་བའི། །བུམ་པའི་ཆུ་ཡིས་དག་པར་འགྱུར། །ༀ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲཱི་ཡེ་ཧཱུཾ། ༀ་སྭཱ་བྷཱ་ཝ་བི་ཤཱུདྡྷེ་སརྦ་དྷཱརྨཱ་བྷཱ་ཝ་ཤཱུདྡྷོ྅་ཧཾ། བུམ་པ་སླར་བཞག །དེ་ལྟར་བུམ་པས་དབང་བསྐུར་སྐུ་གང་དྲི་མ་དག་ཆུ་ཡི་ལྷག་མ་གྱེན་དུ་ལུད་མི་བསྐྱོད་པས་དབུ་བརྒྱན། དེ་ལ་སྒེག་མོ་བརྒྱད་ཀྱིས་མཆོད། དག་པ་སྨོན་ལམ་བཅས་བདེན་སྟོབས་འདི་མན་འགྲེལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་དང་བརྒྱུད་གསུམ་བླ་མ་དམ་པ་རྣམས་ཀྱིས་བདེན་པ་དང་། ཕྱོགས་བཅུ་དུས་བཞིའི་བདེ་བར་གཤེགས་པ་མི་ཟད་རྒྱན་གྱི་འཁོར་ལོར་འདུས་པ་དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་བདེན་པ་ཆེན་པོས་སྨོན་པའི་དོན་འདི་ཡིད་བཞིན་དུ་འགྲུབ་པར་གྱུར་ཅིག །བཀྲ་ཤིས་རིན་ཆེན་མཛེས་པའི་བུམ་པ་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་བས། །ཉོན་མོངས་ལྔ་ཡི་དྲི་མ་ཀུན་དག་ནས། །ཡེ་ཤེས་ལྔ་དང་ལྡན་པའི་དབང་ཐོབ་ཤོག །གཉིས་པ་ལ་བཅུ་ཡི་དང་པོ་རབ་གནས། བསང་སྦྱངས། དབང་རྫས་རྣམས་སྟོང་པ་ཉིད་དུ་གྱུར། སྟོང་པའི་ངང་ལས་དེ་བཞིན་གཤེགས་པ་རིགས་ལྔའི་ཕྱག་མཚན་སྙིང་པོ་ལྔ་དང་། དབུ་བརྒྱན་རིན་ཆེན་འབྱུང་ལྡན་ཞུ་བའི་རིན་པོ་ཆེའི་ཁང་བུ་ལྔ་པའི་ནང་དུ་རེ་རེ་ནས་པད་ཉི་ཟླ་གདན་ལྔ་ལྔ་ལ་ཧཱུཾ་ཨཱོཾ་སྭཱ་ཨཱཾ་ཧཱ་རྣམས་ལས་སོགས་ནས། ལོངས་སྐུའི་རྒྱན་ནོ། །བར་གོང་བཞིན་དང་། དར་མཐིང་དམར་ཅོད་པཎ་ཧཱུཾ་ཨཱཾ་ལས་རྡོ་རྗེ་དང་པདྨ་ཡོངས་སུ་གྱུར་པ་ལས་མི་བསྐྱོད་པ་དང་སྣང་མཐའ་ཡབ་ཡུམ། རིན་པོ་ཆེའི་ཕྲེང་བ་སྭཱ་དང་རིན་པོ་ཆེ་ལས་རིན་ཆེན་འབྱུང་ལྡན་ཡབ་ཡུམ། གོ་ཆ་ཧཱ་དང་རལ་གྲི་ལས་དོན་གྲུབ་ཡབ་ཡུམ། རྒྱལ་མཚན་དང་གདུགས་རེ་རེ་ནས་ཧཱུཾ་དང་རྡོ་རྗེ་ལས་མི་བསྐྱོད་ཡབ་ཡུམ། བཟའ་བཏུང་ༀ་དང་འཁོར་ལོ་ལས་རྣམ་སྣང་ཡབ་ཡུམ་རྣམས་སུ་གྱུར། ཐུན་མོང་དུ་ལྔ་ཚན་ལྔས་བསྐུར་བརླབ། བརྣན། དྲངས། བསྟིམ། བརྟན། མཆོད། ལྷ་ཐམས་ཅད་འོད་དུ་ཞུ་བས་དབང་རྫས་སོ་སོར་གྱུར། གཉིས་པ་སྙིང་པོ་ལྔ་ཡི་དབང་ནི། གཞི་ལུས། རྡོ་རྗེ་སེམས་དཔའ་ཡན་ལག་གི་ལྷ་བཅུ་བཅས་བཅུ་གཅིག་གི་དབང་སྟེ། གུང་། མཛུབ། སྲིན་ལག །མཐེ་བོང་། མཐེའུ་ཆུང་རྣམས་སྦྱར་བ་མགོ་བོའི་དབུས། མདུན། གཡས་རྒྱབ་གཡོན་རྣམས་སུ་བཀོད་བཞིན། ཧཱུཾ། ཆོས་དབྱིངས་མཉམ་པ་ཆེན་པོ་ལས། །ཡེ་ཤེས་གསལ་བས་རྣམ་པར་དག །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །སྐྱེ་མེད་ཆོས་ལ་དབང་ཐོབ་ཤོག །མི་བསྐྱོད་ཡབ་ཡུམ་སྔགས་དང་། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ༀ། དག་ཅིང་གསལ་བའི་རང་བཞིན་ལས། །སྐྱོན་མེད་སེམས་ཉིད་རིན་པོ་ཆེ། །མེ་ལོང་ལྟ་བུའི་ཡེ་ཤེས་ཀྱིས། །སྲིད་པ་གསུམ་ལ་དབང་བསྒྱུར་ཤོག །རྣམ་སྣང་ཡབ་ཡུམ་སྔགས་དང་། ༀ་མ་ཧཱ་ཨ་དཪྴ་ཛྙཱ་ན། སྭཱ། ཁམས་གསུམ་རེ་སྐོང་རྒྱལ་པོ་སྟེ། །ཡིད་བཞིན་རིན་ཆེན་གཏེར་གྱི་མཆོག །མཉམ་པ་ཉིད་ཀྱི་ཡེ་ཤེས་ཀྱིས། །འགྲོ་བའི་རེ་སྐོང་རྒྱལ་པོར་ཤོག །རིན་འབྱུང་ཡབ་ཡུམ་སྔགས། ༀ་མ་ཧཱ་ས་མ་ཏཱ་ཛྙཱ་ན་བཛྲ༴ ཨཱཾ། ཉེས་པའི་སྐྱོན་བྲལ་དྲི་མ་མེད། །སྐྱེ་འགག་མེད་པའི་དངོས་གྲུབ་སྟེ། །སོ་སོར་རྟོག་པའི་ཡེ་ཤེས་ཀྱིས། །སྲིད་གསུམ་ཉེས་དམིགས་སེལ་བར་ཤོག །སྣང་མཐའ་ཡབ་ཡུམ་སྔགས། ༀ་མ་ཧཱ་པྲ་ཧྱ་བེ་ཀྵ་ན་ཛྙཱ་ན་སོགས་ཧཱ། དབྱིངས་ཀྱི་དཀྱིལ་འཁོར་མཐར་ཕྱིན་ཅིང་། །གྲུབ་པ་ལས་ཀྱི་བྱེ་བྲག་ལས། །བྱ་བ་ལས་ཀྱི་ཡེ་ཤེས་ཀྱིས། །སྐྱེ་འགྲོ་དབྱིངས་སུ་སྒྲོལ་བར་ཤོག །དོན་གྲུབ་ཡབ་ཡུམ་སྔགས་དང་། ༀ་མ་ཧཱ་ཀྲྀ་ཏྷཱ་ནུཥྛ་ན་ཛྙཱ་ན་སོགས། དེ་ལྟར་དེ་བཞིན་གཤེགས་པ་ལྔ་ཡབ་ཡུམ་སྦྱོར་བ་མཛད་པའི་བྱང་ཆུབ་སེམས་ཀྱིས་འོད་ལྔས་དབང་བསྐུར། རྣམ་པར་ཤེས་པ་ཚོགས་བརྒྱད་ཡེ་ཤེས་ལྔར་གནས་གྱུར། སྐུ་ལྔ་གྲུབ། ཕུང་པོ་ལྔ་གནས་གྱུར། སྐྱེ་འགག་གནས་དམིགས་འགྲོ་འོང་བྲལ་བའི་དོན་རྟོག་པ་མངོན་དུ་བྱས། ཞེས་ངེས་པ་བསྐྱེད་བདེན་སྟོབས་སྤྲོ་ན་བརྗོད། རིགས་ལྔ་ཡེ་ཤེས་ལྔ་ཡི་དབང་མཆོག་འདིས། །སྐལ་ལྡན༴ ཟབ་ཅིང་རྒྱ་ཆེ་མི་ཟད་རྒྱན་འཁོར་ལོ། །རྒྱལ་བ་རིགས་ལྔའི་གོ་འཕང་ཐོབ་པར་ཤོག །ཡང་ཕྱག་མཚན་ལྔ་དཔྲལ་མགྲིན་སྙིང་ལྟེ་གསང་བར་གཏུགས་ལ། ཨཱོཾ། བདེ་གཤེགས་སྐུ་ཡི་ངོ་བོ་ལས། །མི་ཤིགས་རྡོ་རྗེ་རྒྱལ་བའི་གཙོ། །སྔགས་དང་ཕྱག་རྒྱ་ལྡན་པ་ཡིས། །རྡོ་རྗེ་སྐུ་ཡི་ངོ་བོར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཨཱཾ། བདེ་གཤེགས་གསུང་གི་ངོ་བོ་ལ། །མི་ཤིགས་རྡོ་རྗེ་ཆོས་ཀྱི་དབྱིངས། །སྔགས་དང་ཕྱག་རྒྱ་ལྡན་པ་ཡིས། །རྡོ་རྗེ་གསུང་གི་ངོ་བོར་ཤོག །ཝཱཀ྄་བཛྲ་བསྒྱུར། ཧཱུཾ་བདེ་གཤེགས་ཐུགས་ཀྱི༴ མི་ཤིགས་རྡོ་རྗེ་རྒྱལ་བའི་ཐུགས། །སྔགས་དང་༴ རྡོ་རྗེ་ཐུགས་ཀྱི། ཙིཏྟ༴ བསྒྱུར། སྭཱ་མི་འགྱུར་བ་ཡི་ཞིང་ཁམས་ནས། །མ་བསྐྱེད་པ་ཡི་འབྲས་བུ་ལ། །མ་བསགས་པ་ཡི་ཡོངས་སྤྱོད་འབྱུང་། །ཅིར་ཡང་འགྱུར་བའི་ཡེ་ཤེས་ཀྱིས། །རང་དབང་ཐབས་ཀྱིས་བསྒྱུར་བར་ཤོག །ཨ་ནུ་རཱ་ག་ཎ་བཛྲ་བསྒྱུར། ཧཱ། ཐབས་དང་ཤེས་རབ་གཉིས་མེད་པའི། །འདོད་ཆགས་ཆེན་པོའི་ཏིང་འཛིན་ལས། །ལས་དང་དངོས་གྲུབ་དབང་དུ་གྱུར། །མ་ལུས་ཉམ་པའི་རྒྱལ་པོར་ཤོག །པཱུ་ཛ་བཛྲ་ཞེས་བསྒྱུར། དེ་ལྟར་དབང་བསྐུར་བས་གནས་ལྔ་བྱིན་གྱིས་བརླབས། དུང་ཁང་གི་ནང་དུ་ཟླ་བ་ལ་གནས་པའི་སོགས་ནས། གནས་ལྔར་རྒྱས་བཏབ་པར་གྱུར། ཞེས་པའི་བར་སྒྲུབ་ཐབས་བཞིན་དང་། སྐུ་ཡི་རྡོ་རྗེ་འཁོར་ལོ་དཀར་པོ་ཡིས། །སྐལ་ལྡན་སེམས་ཅན་ལུས་དང་དྲི་ཆེན་ཁམས་དག་ནས། །མཚན་དཔེས་སྤྲས་པ་རྡོ་རྗེའི་སྐུ་ཐོབ་ཤོག །གསུང་གི་རྡོ་རྗེ་པདྨ་དམར་པོ་ཡིས། །སྐལ་ལྡན༴ སེམས་ཅན་ངག་དང་དམར་ཆའི་ཁམས་དག་ནས། །ཡན་ལག་དྲུག་ཅུ་རྡོ་རྗེའི་གསུང་ཐོབ་ཤོག །ཐུགས་ཀྱི་རྡོ་རྗེ་མཐིང་ཀ་ཡིས། །སྐལ་ལྡན༴ སེམས་ཅན་ཡིན་དང་ཀུནྡའི་ཁམས་དག་ནས། །འབུམ་ཕྲག་དྲུག་ཅུ་རྡོ་རྗེའི་ཐུགས་ཐོབ་ཤོག །ཚོགས་པའི་ལྷ་མོ་རིན་ཆེན་སེར་པོ་ཡིས། །སྐལ་ལྡན༴ སེམས་ཅན་ལས་དང་ཤ་ཆེན་ཁམས་དག་པ། །བརྒྱ་དང་བཞི་བཅུ་ཡོན་ཏན་མཆོག་ཐོབ་ཤོག །མཆོད་པའི་རྡོ་རྗེ་རལ་གྲི་ལྗང་གུ་ཡིས། །སྐལ་ལྡན༴ སེམས་ཅན་སྤྱོད་དང་དྲི་ཆུའི་ཁམས་དག་པ། །ལས་བཞི་ཕྲིན་ལས་རྡོ་རྗེར་ལྷུན་གྲུབ་ཤོག །ཉོན་མོངས་མཚན་མ་ཀུན་འཇོམས་ཤིང་། །རིག་མཆོག་དངོས་གྲུབ་བརྟེན་བྱེད་པ། །རྡོ་རྗེ་འཁོར་ལོ་རལ་གྲི་དང་། །པདྨ་རིན་ཆེན་བླ་ན་མེད། །གསུམ་པ་དབུ་རྒྱན་རྣམས་བཅིངས་བཞིན་དུ། དེ་བཞིན་གཤེགས་པ་ཀུན་གྱི་རྒྱན། །སངས་རྒྱས་ཀུན་གྱིས་བསྔགས་པ་ཡིས། །རིན་པོ་ཆེ་ཡི་དབུ་བརྒྱན་གྱིས། །ཁམས་གསུམ་བདག་པོར་དབང་བསྐུར་རོ། །ༀ་རིགས་ཀྱི་དབུ་བརྒྱན་བླ་ན་མེད། །ཉོན་མོངས་གནས་ཀུན་རྣམ་པར་སྦྱོང་། །ཡེ་ཤེས་བྱིན་རླབས་སྟོབས་རྫོགས་པའི། །མཚན་མ་བཟང་པོ་ཁྱོད་ཀྱི་བརྒྱན། །ༀ་རཏྣ་མུ་ཀུ་ཊ་ཨ་བྷི་ཥཉྩ་ཏྲཾ་ཏྲཾ་ཏྲཾ་ཏྲཾ་ཏྲཾ། དེ་བཞིན་གཤེགས་པའི་དབུ་བརྒྱན་ཁང་བུ་འདིས། སྐལ་ལྡན༴ གློ་བུར་འཁྲུལ་པའི་དྲི་མ་ཀུན་དག་ནས། །ཁམས་གསུམ་ཆོས་ཀྱི་རྒྱལ་པོ་མངའ་བརྙེས་ཤོག །བཞི་པ་ཅོད་པཎ་ནི། ཧ། ཁྱུང་གི་གཤོག་པ་གཡས་གཡོན་རབ་བརྡེབས་པས། །ཀླུ་རྣམས་མ་ལུས་ཟིལ་གྱིས་ནོན་པ་ལྟར། །སྲིད་གསུམ་ཡོན་ཏན་རྫོགས་མཛེས་ཅོད་པཎ་མཆོག །ཆེ་མཆོག་བདུད་བཞི་ཟིལ་གནོན་དབང་ཐོབ་ཤོག །ༀ་བཛྲ་བཛྲ་ཨརྻ་ལམྦྷོ་དྷ་ར་ཨ་བྷི་ཥིཉྩ་ཧྲཱི་ཧྲཱིཿ དེ་ལྟ་བུས་ཅོད་པཎ་རྩ་རོ་རྐྱང་གཉིས་ལ་ཐིམ། མཛེས་ཤིང་ཡིད་འོང་མཐིང་དམར་ཅོད་པཎ་འདིས། །སྐལ་ལྡན༴ ལོག་ལྟ་གདུག་པ་ཅན་ཀུན་ཟིལ་གནོན་ནས། །ཐབས་དང་ཤེས་རབ་ཆོས་ལ་མངའ་འབྱོར་ཤོག །ལྔ་པ་ཕྲེང་བ་ནི་མགོ་བོར་བཅིངས་ལ། ཏྲཾ། གཟུངས་དང་ཏིང་འཛིན་རྒྱུ་འབྲས་ཆོས། །བྱང་ཆུབ་ཕྱོགས་རྣམས་ཤེས་རབ་རྒྱན། །མི་འཇིགས་སྟོབས་དང་དཔེ་བྱད་མཚན། །འབྲས་བུ་རྫོགས་པར་དབང་བསྐུར་རོ། །ༀ་རཏྣ་མཱ་ལྱཻ་ཨ་བྷི་ཥིཉྩ་ཏྲཾ་ཏྲཾ། དེ་ལྟ་བུའི་ཕྲེང་བ་མགོ་ཡི་ཐིག་ལེ་སོ་གཉིས་ལ་ཐིམ། སྣ་ཚོགས་རིན་པོ་ཆེ་ཡིས་ཕྲེང་བ་འདིས། །སྐལ་ལྡན༴ གཟུངས་ཀྱི་སྒོ་མཆོག་ལྔ་བརྒྱ་ཏིང་ངེ་འཛིན། །འབུམ་ཕྲག་ལ་སོགས་འབྲས་ཆོས་མཆོག་བརྙེས་ཤོག །དྲུག་པ་གོ་ཆ་ནི། ཧཱུཾ། མི་ཤིགས་ཡེ་ཤེས་རྡོ་རྗེ་ནི། །སངས་རྒྱས་ཀུན་གྱི་ཡ་ལད་དེ། །ཁྱབ་པའི་ཚུལ་གྱིས་དྲྭ་བ་ཡིན། །དབང་མཆོག་དམ་པ་སྦྱིན་པར་བྱ། །གོ་ཆ་བཟང་པོ་བརྟན་བྱས་པས། །མི་མཐུན་རྟོགས་པའི་ཚོགས་ལས་རྒྱལ། །རང་གི་ཕྱག་རྒྱ་རྫོགས་པ་ཡི། །དུས་རྣམས་ཀུན་ཏུ་སྲུང་བའི་མཆོག །ༀ་བཛྲ་རཀྵ་ཨ་བྷི་ཥིཉྩ་ཧཱུཾ། དེ་ལྟ་བུའི་གོ་ཆ་ལུས་རྩ་ཡི་དྲྭ་བས་ཁེབས་པ་ལ་ཐིམ། སྲ་བརྟན་རྡོ་རྗེའི་གོ་ཆ་བཟང་པོ་འདིས། །སྐལ་ལྡན་རིགས་ཀྱི༴ བདུད་བཞི་ཕས་རྒོལ་དཔུང་གིས་མི་ཚུགས་པ། །ཕྱོགས་ལས་རྣམ་པར་རྒྱལ་བའི་དབང་ཐོབ་ཤོག །བདུན་པ་རྒྱལ་མཚན་ནི། ཧཱུཾ། སྐུ་གསུང་ཐུགས་ཀྱི་བདག་ཉིད་ཆེ། །ལོག་པར་ལྟ་བ་ཟིལ་གནོན་མཚན། །ཐམས་ཅད་ཚར་གཅོད་ཡེ་ཤེས་རྒྱ། །ཡོན་ཏན་མངོན་འབྱུང་དབང་བསྐུར་རོ། །ༀ་བཛྲ་ཀེ་ཏུ་ཨ་བྷི་ཥཉྩ་ཧཱུཾ། དེ་ལྟར་རྒྱལ་མཚན་ལག་ཏུ་གཏད་པ་གསང་བའི་དབང་པོ་ལ་ཐིམ། མི་ནུབ་རྣམ་པར་རྒྱལ་བའི་རྒྱལ་མཚན་འདིས། །སྐལ་ལྡན༴ བདུད་བཞི་མཐའ་གཉིས་ཕྱོགས་ལས་རྣམ་རྒྱལ་བ། །དཔལ་ལྡན་འཇིགས་པ་མེད་པའི་གནས་ཐོབ་ཤོག །བརྒྱད་པ་གདུགས་ཀྱི་དབང་། ཧཱུཾ། གཉིས་མེད་ཡེ་ཤེས་རྟོག་བྲལ་བ། །རྨོངས་སོགས་སེམས་ཕྱིར་རང་བཞིན་སྟོང་། །ལོག་འབྱུང་རྒྱུ་འབྲས་མི་གདུང་བ། །ཐུགས་རྗེས་སྐྱོབ་པར་དབང་བསྐུར་རོ། །བྱིན་རླབས་ངོ་མཚར་ཡུལ་རྫོགས་པས། །དབྱིངས་དང་ཡེ་ཤེས་མཉམ་པ་ཉིད། །ཁམས་གསུམ་ཆོས་ཀྱི་རྒྱལ་མཚན་གྱིས། །ཤེས་བྱའི་གནས་ཀུན་གསལ་བར་མཛད། །ༀ་བཛྲ་རཏྣ་ཚཱ་ཏྲཾ་ཨ་བྷི་ཥིཉྩ་ཧཱུཾ། དེ་ལྟར་གདུགས་ཀླད་པ་བདེ་ཆེན་གྱི་འཁོར་ལོ་ལ་ཐིམ། རིན་ཆེན་གདུགས་མཛེས་གསེར་གྱི་ཡུ་བ་ཅན། །སྐལ་ལྡན༴ བདག་གཞན་རྒྱུད་ཀྱི་ལས་དང་ཉོན་མོངས་པའི། །གདུང་བ་མ་ལུས་བསིལ་བར་བྱེད་གྱུར་ཅིག །དགུ་པ་ཕྱག་རྒྱའི་དབང་ནི། གཙོ་འཁོར་གྱི་སྐུ་སྤྱི་བོ་སོགས་སམ། རྡོ་རྗེ་སེམས་དཔའི་སྐུ་སྤྱི་བོར་བཞག་ལ། སྤྲོ་ན་སྒྲུབ་ཐབས་ཀྱི་བསྙེན་པའི་སྐབས། ཧཱུཾ། རྣམ་ཤེས་ནམ་མཁའི་ངོ་བོ་ཉིད། །སོགས་ནས། འགྲོ་བ་དམྱལ་བ་འདུལ་བྱེད་ཤོག །བར་བརྗོད། སོ་སོའི་སྔགས་མཐར། ཨ་བྷི་ཥིཉྩ་ཧཱུཾ། ཞེས་བཏགས། བསྡུས་ན། མི་རྟོགས་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེས་ཐབས་དང་བྱེ་བྲག་ཅིར་ཡང་སྟོན། །རྡོ་རྗེ་སེམས་དཔའ་ཆེ་དེས་དབང་བསྐུར་རོ། །ལྷ་ཐམས་ཅད་རང་ལ་ཐིམ་པས་ལུས་དཀྱིལ་འཁོར་དུ་གྱུར་པ་ནི། སྒྲུབ་ཐབས་ནས། སྤྱི་གཙུག་བདེ་ཆེན་དཀྱིལ་འཁོར་ན། །སོགས་ནས། རང་བཞིན་དཀྱིལ་འཁོར་བསྐྱེད་པར་བྱོས། ཞེས་ངོ་སྤྲད་པར་འདོན། དེ་ལ་ལྷ་རྣམས་ཀྱིས་གསང་མཚན་གདགས་པར་མོས་པས། བཛྲ་ས་ཏྭ་ནཱ་མ་ཨ་བྷི་ཥིཉྩ་ཧཱུཾ། སངས་རྒྱས་བཞི་བཅུ་རྩ་གཉིས་ཕྱག་རྒྱ་འདིས། སྐལ་ལྡན༴ རྟོགས་ཚོགས་ཞེ་གཉིས་ལྷ་རུ་དག་གྱུར་ཏེ། སྣང་བ་རྣམ་འབྱེད་ཏིང་འཛིན་ཐོབ་གྱུར་ཤིག །བཅུ་པ་བཟའ་བཏུང་གི་དབང་ནི། ཚོགས་རྫས་རོལ་ལ། ༀ། བཟའ་དང་བཅའ་དང་བཏུང་དང་བགོ། །རང་སེམས་རྣམ་དག་བརྒྱན་པའི་ཕྱིར། །གཉིས་མེད་རོལ་པའི་དབང་བསྐུར་བས། །བདུད་རྩི་ཡིད་བཞིན་སྐུ་ཐོབ་ཤོག །ཀུན་ཏུ་བྲོ་མཆོག་ཚིམ་བྱེད་རྫས། །འདོད་པའི་ཡོན་ཏན་མ་འགགས་དབྱིངས། །ཆོས་དབྱིངས་བདུད་རྩི་བླ་ན་མེད། །རྣམ་གྲོལ་ཟག་པ་མེད་པའི་རྫས། །ཁམས་གསུམ་འདོད་ཡོན་རྣམས་རྫོགས་པས། །དེང་འདིར་ཁྱེད་ལ་དབང་བསྐུར་རོ། །ༀ་བཛྲ་ཨ་མྲྀ་ཏ་ཨ་བྷི་ཥཉྩ་ཧཱུཾ། བཟང་བཏུང་ལྕེ་ཡི་རྩ་རོ་འབབ་མ་ལ་ཐིམ། བཟའ་བཅའ་བཏུང་བ་དྲི་མེད་ཞལ་ཟས་འདིས། །སྐལ་ལྡན༴ འདོད་ཡོན་མ་སྤང་ཆོས་ཉིད་རྒྱན་དུ་ཤར། བྱེད་སྤྱོད་ཚོགས་ཆེན་རྫོགས་པའི་དབང་ཐོབ་ཤོག །དེ་ལྟར་དབང་ཐོབ་པ་དེ་མཆོད་པའི་ཡུལ་དུ་གྱུར་པས་སྒེག་མོ་བརྒྱད་མཆོད་བྱ། རྣམ་པར་སྣང་མཛད་ཡེ་ཤེས་སོགས་རིགས་ལྔའི་བཀྲ་ཤིས་བརྗོད། དེ་ལྟར་ན་སྐལ་ལྡན་རིག་པ་འཛིན་པ་ཁྱེད་ཀྱིས། རྒྱལ་བ་རིགས་ལྔ་ལ་བརྟེན་ནས་ཕན་པའི་དབང་བཅུ་བསྐུར་བ་ཐོབ། འདི་ཕྱིར་ཕན་པའི་ས་བོན་འཇོག །ཚེ་རབས་ཐམས་ཅད་དུ་སྒྱུ་འཕྲུལ་གྱི་སྒོར་འཇུག་པའི་བག་ཆགས་བཞག །རྡོ་རྗེ་འཆང་ཆེན་པོར་རིགས་ངེས། ཕྱི་དཀྱིལ་མཉན་པ་ལ་སོགས་པའི་སྐལ་པ་ཅན་དུ་བྱས་སོ། །ཞེས་གསུངས་པར་བསམ་ལ་ངེས་ཤེས་བསྐྱེད་དོ། །གཉིས་པ་ནུས་དབང་ལ་སྔོན་འགྲོ་དང་དངོས་སོ། །དང་པོ། ཏྲཾ། གླིང་བཞི་སོགས་མཆོད་པ་བཞེས། མཎྜལ་བཀོད་པ་ཕུལ་བྱུང་འདི་ཉིད་བླ་མ་དང་འཁོར་ལོའི་བདག་པོ་ལ་སློབ་དཔོན་ནུས་པའི་དབང་ཞུ་བའི་དོན། སོགས་གོང་བཞིན་ཡོན་འབུལ་བཅས་གསོལ་བ་གདབ། འཁོར་ལོའི་དབང་ཕྱུག་དགོངས་སུ་གསོལ། །སེམས་ཅན་ཀུན་ལ་ཕན་གདགས་ཕྱིར། །རྟག་ཏུ་བདག་ནི་སློབ་དཔོན་བགྱིད། །ནུས་པའི་དབང་མཆོག་བསྐུར་དུ་གསོལ། །ལན་གསུམ། གཉིས་པ་ལ་ལྔ་སྟེ། དང་པོ་གཞན་དོན་རྒྱུ་རང་དོན་ནུས་པ་ལ་ཉན་སྒོམ་དེའི་འབྲས་བུ་གཞན་དོན་ནུས་པ་ལ་འཆད་ཕྲིན། དེ་གཉིས་ཀ་ནུས་པ་ལ་གཉིས་ཀ་བརྟན་པའི་རྒྱུ་སློབ་དཔོན་གྱི་དབང་རབ་འབྱམས་མའོ། །དང་པོ་ནི། སློབ་དཔོན་དྲུག་པའི་སྦྱོར་མཚམས་ནས། །བྷྲུཾ་གཅིག་རྣ་བའི་འདོམ་རྩར་ཞུགས། །གཞལ་མེད་རྩིབ་བཞི་ལྟེ་བ་ལ། །པད་ཉི་ཟླ་བ་ཆ་ལྔ་དང་། །སྒོ་བཞིར་ཉི་རྐྱང་རེ་རེ་ལ། །ཏྲཱཾ་ཟུང་ལྔ་དང་ཧཱུཾ་ཛཿདང་། །ཧཱུྃ་ཧཱུྃ་ཧཱུྃ་བྃ་ཧཱུྃ་ཧོ་རྣམས། །འཕྲོ་འདུས་ཡོངས་གྱུར་དེ་ཡི་དབུས། །རིན་འབྱུང་མཱ་ཀི་ཡབ་ཡུམ་འཁྲིལ། །རྡོ་རྗེ་རིན་ཆེན་ཕྲེང་བ་མ། །རྡོ་རྗེ་གཟི་བརྗིད་མེ་ཏོག་མ། །རྡོ་རྗེ་རྒྱལ་མཚན་ཞགས་པ་མ། །རྡོ་རྗེ་བཞད་པ་བསིལ་ཡབ་མ། །ཕྱོགས་བཞིར་བཞུགས་ཞི་སྐུ་མདོག་སེར། །ཤར་སྒོ་གཤིན་རྗེ་ལྕགས་ཀྱུ་སྨུག །ལྷོ་སྒོར་སྟོབས་ཆེན་ཞགས་པ་སེར། །ནུབ་སྒོར་རྟ་མགྲིན་ལྕགས་སྒྲོག་དམར། །བྱང་སྒོར་འཁྱིལ་པ་དྲིལ་བུ་ལྗང་། །ཁྲོ་ཆས་མེ་དཔུང་དབུས་ན་བཞུགས། །རྒྱུད་ཀྱི་གླེགས་བམ་བསང་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་པད་ཉི་ཟླར། །ཏྲཱཾ་ལས་གླེགས་བམ་རིན་འབྱུང་གསལ། །ས་མཱ་ཏ ས་གཙོ་བྱས་བསྐུར་བརླབ། བརྣན། དྲངས། ཛཿཧཱུཾ་བཾ་ཧོཿ ཆ་གཅིག་བསྐུར་ཡུལ་ལ་ཐིམ། ཛཿཧཱུཾ་བཾ་ཧོཿ ཆ་གཅིག་དབང་རྫས་ཐིམ། བརྟེན། མཆོད་ནས། དཀྱིལ་འཁོར་འོད་ཞུ་སློབ་མར་ཐིམ། །སློབ་མ་རིན་ཆེན་འབྱུང་ལྡན་གྱུར། །དབང་རྫས་ལྷ་འོད་ཞུ་བ་ལས། །གླེགས་བམ་རྣ་བའི་ཐིག་ལེར་ཐིམ། །ཉན་བྱེད་འཁོར་ལོའི་གཞལ་ཡས་སུ། །གསང་བའི་ཐིག་ལེའི་ངོ་བོ་ཉིད། །ཏྲཱཾ་གི་ཕྱག་རྒྱའི་ཚོགས་མཆོག་ལས། །རིན་ཆེན་དཀྱིལ་འཁོར་གསལ་སྤྲོ་ཐིམ། །ཏྲཱཾ། གསང་བ་གསང་ཆེན་གསང་མཆོག་དང་། །གསང་བ་ཀུན་ལ་ཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །ༀ་སརྦ་ཏ་ཐཱ་ག་ཏ་དྷ་ར་ཛྙཱ་ན་ཨ་བྷི་ཥིཉྩ་ༀ། དེས་རིགས་འགྲེས་ཏེ། ཧཱུཾ་ཏྲཱཾ་ཧྲཱིཿཨཱཿརྣམས་སྦྱར། དབང་མཆོག་འདིས་ནི་དབང་བསྐུར་བས། །གསུང་རབ་རྒྱ་མཚོ་ཐོས་པ་དང་། །གསང་སྔགས་ཀུན་ལ་ཉན་པ་རྣམས། །ཕྱིན་ཅི་མ་ལོག་རྟོག་པར་ཤོག །རྒྱུད་ཀྱི་རྒྱལ་པོ་ལག་ཏུ་བྱིན་ནས་ནི། །སྐལ་ལྡན་ཁྱོད་ལ་ཉན་པའི་དབང་བསྐུར་བས། །དེ་བཞིན་གཤེགས་པས་ལེགས་པར་གསུངས་པའི་ཆོས། །ཐེག་པ་དགུ་རྣམས་མ་ལུས་ཐོབ་གྱུར་ཅིག །གཉིས་པ་སྒོམ་དབང་གི་དོན། སློབ་དཔོན༴ བྷྲཱུཾ་གཅིག་སྙིང་གི་འདོམ་རྩར་ཞུགས། །གཞལ༴ པད་ཉི༴ སྒོ་བཞི༴ ཧཱུྃ་ཟུར་ལྔ༴ ཧཱུཾ་ཧཱུཾ༴ འཕྲོ༴ མི་བསྐྱོད་དབྱིངས་ཕྱུག་ཡབ་ཡུམ་འཁྲིལ། །རྡོ་རྗེ་སེམས་དཔའ་སྒེག་མོ་བཅས། །རྡོ་རྗེ་རྒྱལ་པོ་བདུག་པ་མ། །རྡོ་རྗེ་ཞགས་པ་ལྕགས་ཀྱུ་མ། །རྡོ་རྗེ་ལེགས་པ་སྒྲོལ་མ་རྣམས། །ཕྱོགས་བཞིར་བཞུགས་ཞི་སྐུ་མདོག་མཐིང་། །ཤར༴ ལྷོ༴ ནུབ༴ བྱང༴ ཁྲོ༴ ཕྲེང་བ་བསང་སྦྱངས། སྟོང་༴ སྟོང་༴ ཧཱུྃ་ལས་ཕྲེང་བ་མི་བསྐྱོད་གསལ༴ ཤུ་ནྱ་ཏས་བསྐུར། བརླབ། བརྣན། དྲངས། བསྟིམ། མཆོད། དཀྱིལ་འཁོར༴ སློབ་མ་མི་བསྐྱོད་རྡོ་རྗེར་གྱུར། །དབང་རྫས༴ ཕྲེང་བ་སྙིང་གའི་ཐིག་ལེར་ཐིམ། །གསང་བའི་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཡི་གེ་ཕྲེང་བའི་ཚོགས་མཆོག་ལས། །རིགས་ཀྱི་འཁོར་ལོ་གསལ་སྤྲོ་ཐིམ། །ༀ་དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་བཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །ༀ་སརྦ་ཏ་ཐཱ་ག་ཏ་གུ་ཧྱ་ཨ་བྷི་ཥིཉྩ་ༀ། དེས་རིགས་འགྲེས། ཧཱུྃ་ཏྲཱཾ་ཧྲཱི་ཨཱ་རྣམས་མཇུག་ཏུ་གདགས། དབང་མཆོག་འདིས་ནི་དབང་བསྐུར་བས། །དོན་དམ་ཀུན་རྫོབ་དབྱེར་མེད་དང་། །སྐུ་གསུང་ཐུགས་ཀྱི་རང་བཞིན་དུ། །རྟག་ཏུ་བསྒོམ་ཞིང་བསྒྲུབ་པར་ཤོག །སྐབས་འདིར་ཡི་དམ་གྱི་སྔགས་ཚང་མ་བཟླ། བསྙེན་པའི་ཕྲེང་བ་ལག་ཏུ་གཏད་ནས་ནི། །སྐལ་ལྡན་ཁྱོད་ལ་སྒོམ་པའི་དབང་བསྐུར་བས། །དཔལ་ལྡན་རྡོ་རྗེ་སེམས་དཔའི་དཀྱིལ་འཁོར་དུ། །རྣམ་གྲོལ་ལམ་ཀུན་ཐོགས་མེད་སྒོམ་ནུས་ཤོག །གསུམ་པ་ཕྲིན་ལས་ཀྱི་དབང་། སློབ༴ བྷྲཱུཾ་གཉིས་ལག་གཉིས་འདོམ་རྩར་ཞུགས། །གཞལ༴ པད་ཉི༴ སྒོ་བཞིར༴ ཧཱ༴ ཟུང་ལྔ༴ ཧཱུྃ་ཧཱུྃ༴ འཕྲོ༴ དོན་གྲུབ་དམ་ཚིག་སྒྲོལ་མ་འཁྲིལ། །རྡོ་རྗེ་ལས་དང་གར་མཁན་མ། །རྡོ་རྗེ་གོ་ཆ་དྲི་ཆབ་མ། །རྡོ་རྗེ་གནོད་སྦྱིན་དྲིལ་བུ་དང་། །རྡོ་རྗེ་ཁུ་ཚུར་འབེབས་མ་རྣམས། །ཕྱོགས་བཞིར་བཞུགས་ཞི་སྐུ་མདོག་ལྗང་། །ཤར༴ ལྷོ༴ ནུབ༴ བྱང་༴ བྲོ༴ སྣ་ཚོགས་རྡོ་རྗེ་བསང་སྦྱངས། སྟོང་༴ སྟོང་༴ ཧ་ལས་རྒྱ་གྲམ་དོན་གྲུབ་གསལ། ཀྲྀཏྱཱ་ནུ་ཥྛཱ་ནས་དབང་བསྐུར། བརླབ། བརྣན། དྲངས། བསྟིམ། བརྟན། མཆོད། དཀྱིལ་འཁོར་འོད༴ སློབ་མ་དོན་ཡོད་གྲུབ་པར་གྱུར། དབང་རྫས༴ རྒྱ་གྲམ་ལག་པའི་ཐིག་ལེར་ཐིམ། །ལག་པའི་འཁོར་ལོའི་གཞལ་ཡས་སུ། །གསང་བའི༴ ཧཱ་ཡི་ཕྱག་རྒྱའི་ཚོགས་མཆོག་ལས། །ལས་ཀྱི་དཀྱིལ་འཁོར་གསལ་སྤྲོ་ཐིམ། །ༀ། ཁྱོད་ནི་རྡོ་རྗེ་ལས་ཡིན་གྱིས། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འདུ་འཕྲོ་ལས། །ཁྱོད་ཀྱི་དགོས་པ་བྱེད་པ་ཡིན། །ༀ་ཀརྨ་བཛྲ་ཨ་བྷི་ཥཉྩ་ཧཱུཾ། ༀ་ཏྲཱཾ་ཧྲཱི་ཨཱ། དབང་མཆོག་འདིས་ནི་དབང་བསྐུར་བས། །ཕྲིན་ལས་རྣམ་བཞི་ལྷུན་གྲུབ་ཅིང་། །རྒྱལ་བ་རྒྱ་མཚོ་མཆོད་པ་དང་། །རྟག་ཏུ་འགྲོ་དོན་བྱེད་པར་ཤོག །དགུག་དང་བཏང་དང་བཅིང་དང་དགྲོལ། །གསོ་དང་གསོད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་གྱིས། །རྡོ་རྗེ་རྒྱ་གྲམ་ལག༴ སྐལ་ལྡན་ཁྱོད་ལ་ཕྲིན་ལས་དབང་བསྐུར་བས། །ཕྲིན་ལས་རྣམ་བཞི་གང་ལ་གང་འདུལ་གྱིས། །གཞན་དོན་ལྷུན་གྱིས་གྲུབ་པའི་དབང་ཐོབ་ཤོག །བཞི་པ་འཆད་པའི་དབང་ལ་ཀྱེ་རེ་མཆོག་སྐྱོང་སོགས་ཁམས་ལུགས་པ་ལྟར། ཐུན་མོང་ཡོ་ག་དང་མཐུན་པ་དང་། འདི་ཉིད་ཐུན་མིན་ནོ། །དང་པོ་ནི། འཆད་པའི་རྗེས་གནས་བྱ་བ་དང་། འགྲོ་དོན་སྒྱུ་མ་ལྟར་ངོ་སྤྲད། ཐུར་མའི་བརྡའ་ལས་གདམས་པའོ། །དང་པོ། ཕྱག་རྒྱལ་པོ་དང་བཅས། རིགས་ལྔའི་སྐུར་གནས་གྱུར་པས་ཆོས་འཆད་པར་གྱུར། འཇིག་རྟེན་ཁམས་ནི་ཐམས་ཅད་དུ། །ཇི་ལྟར་ཇི་ལྟར་འདུལ་བ་ལྟར། །སེམས་ཅན་ཀུན་གྱི་དོན་གྱི་ཕྱིར། ༈ །དེ་ལྟར་རྡོ་རྗེའི་འཁོར་ལོ་བསྐོར། །ཚིག་གོང་མ་གསུམ་འགྲེས་ལ། དེ་ལྟར་རིན་ཆེན་འཁོར་ལོ་བསྐོར། ༈དེ་ལྟར་པདྨའི༴ ༈ །དེ་ལྟར་རལ་གྲིའི༴ ༈ དེ་ལྟར་འཁོར་ལོའི་འཁོར་ལོ། སློབ་མས་དམ་འཆའ་བ། སྲིད་པར་ལས་དང་རྐྱེན་གྱིས་དབང་གྱུར་ཏེ། །གང་དང་གང་དུ་དམ་ཆོས་འཇིགས་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་ཟུང་། །གཉིས་པ་བསང་སྦྱངས། སྟོང་པའི་ངང་ལས་མེ་ལོང་ཧཱུཾ་ལས་རྡོ་རྗེ་སེམས་དཔའ་དང་། མིག་ཐུར་ཤེས་རབ་ཀྱི་ཕ་རོལ་དུ་ཕྱིན་པ་གཉིས་དཀར་པོ་རྡོ་རྗེ་དྲིལ་བུ་འཛིན་པ། དེ་ཞུ་བས་དབང་རྫས་སོ་སོར་གྱུར། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོགས་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་བྱུང་། །དེ་ཁོ་ན་ཉིད་ལས་བྱུང་བ། དེ་ལྟར་དོན་དེ་ཤེས་ནས་སུ། །གཟུགས་བརྙན་གསལ་བར་སེམས་ཅན་གྱིས། །དྲི་མེད་ཐམས་ཅད་མཐོང་བར་གྱིས། །བརྗོད་དང་གཟུང་འཛིན་རྣམ་པར་སྤངས། །དག་ཅིང་གསལ་ལ་དྲི་མ་མེད། །མེ་ལོང་ནང་གི་གཟུགས་བརྙན་བཞིན། །རབ་ལྷའི་གཟུགས་ནི་ཤེས་པར་བྱ། །གསུམ་པ། ཇི་ལྟར་མིག་མཁན་རྒྱལ་པོ་ཡིས། །ལིང་ཏོག་ནད་རྣམས་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཞེས་སོ། །གཉིས་པ་ནི། སློབ་དཔོན་དྲུག་བྷྲཱུཾ་གཅིག་ལྕེ་ཡི་འདོམ་རྩར་འཕྲོས། གཞལ་པད་ཉི༴ སྒོ༴ ཧྲཱིཿཟུང་ལྔ༴ ཧཱུཾ་ཧཱུཾ༴ འཕྲོ་འདུས༴ སྣང་མཐའ་གོས་དཀར་ཡབ་ཡུམ་འཁྲིལ། །རྡོ་རྗེ་ཆོས་དང་དཔྱངས་མཁན་མ། །རྡོ་རྗེ་རྣོན་པོ་མར་མེ་མ། །རྡོརྗེ་འཁོར་ལོ་ལྕགས་སྒྲོག་མ། །རྡོ་རྗེ་སྨྲ་བ་གསལ་བཀྲ་མ། །ཕྱོགས་བཞིར་བཞུགས་ཞི་སྐུ་མདོག་དམར། །ཤར༴ ལྷོ༴ ནུབ༴ བྱང་༴ ཁྲོ༴ འཁོར་ལོ་དུང་ཕྱག་ཤིང་རྣམས་བསང་སྦྱངས། སྟོང་༴ སྟོང་༴ ཧྲཱིཿལས་རྫས་རྣམས་སྣང་མཐར་གསལ། པྲྀ་ཏྱ་བེཀྵ་ནས་དབང་བསྐུར། བརླབ། བརྣན། དྲངས། བསྟིམ། བརྟན། མཆོད། དཀྱིལ་འཁོར༴ སློབ་མ་སྣང་བ་མཐའ་ཡས་གྱུར། དབང་རྫས་ལྷ་འོད་ཞུ་བ་ལས། སོ་སོར་གྱུར་པ་ལྕེ་ལ་ཐིམ། །སྨྲ་བྱེད་འཁོར་ལོའི་གཞལ་ཡས་སུ། །གསལ༴ ཧྲཱི་ཡི་ཕྱག་རྒྱའི༴ ཆོས་ཀྱི་འཁོར་ལོ་གསལ་སྤྲོ་ཐིམ། འཁོར་ལོ་དང་ཕྱག་ཤིང་བྱིན། ༀ་ཆོས་ཀྱི་སྐུ་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམས་པར་གྱིས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲགས་གཞན་དུ་མིན། །ༀ་བཛྲ་པ་ཤ་དྷཱརྨ་ཙཱཀ྄་ཨ་བྷི་ཥིཉྩ་ཨཱ། ཧཱུཾ། ཏྲཱྃ། ཧྲཱི། ཨཱོཾ། དུང་གཏད་ལ། འཇིག་རྟེན་ཁམས་ནི་ཐམས་ཅད་དུ། །ཇི་ལྟ་ཇི་ལྟར་འདུལ་གྱུར་པ། །སེམས་ཅན་ཀུན་གྱི་དོན་གྱི་ཕྱིར། །ཁྱོད་ཀྱིས་ཆོས་ཀྱི་དུང་འདི་བུས། །དབང་མཆོག༴ ཆོས་རྣམས་མ་ལུས་སྒྲོགས་པ་དང་། །སྣོད་ལྡན་ངང་ཚུལ་བཟང་བ་ལ། །མཐུན་པར་གསང་རྒྱུད་སྟོན་པར་ཤོག །འཁོར་ལོ་དུང་དང་ཕྱག་ཤིང་ལག་གཏད་ནས། །སྐལ་ལྡན་ཁྱོད་ལ་འཆད་པའི་དབང་བསྐུར་བས། །སེམས་ཅན་རྒྱུད་ལ་ཐེག་པ་མཐའ་དག་གི། །ཆོས་ཀྱི་འཁོར་ལོ་ཕྱོགས་མེད་བསྐོར་ནུས་ཤོག ། ༈ ལྔ་པ་རྡོ་རྗེ་རྒྱལ་པོ་བཀའ་རབ་འབྱམས་ལ། དངོས་གཞི་དང་། རྗེས་སོ། །དང་པོ་ནི། སློབ་མ་སེང་གེའི་ཁྲི་ལ་མཆོད་པའི་བཀོད་པ་དུ་མ་བཅས་འཁོད་པར་གྱུར། སློབ་དཔོན༴ བྷྲཱུཾ་ལྔ་མགོ་ལག་རྐང་ལྔར་ཆད། གཞལ་མེད༴ པད་ཉི༴ སྒོ་བཞིར་ཉི་རྐྱང་ལྡན་པ་ལྔ། །ལུས་གནས་བཅུ་ལ་ཉི་གདན་རེ། །ལག་གཡས་ཧཱུཾ་དང་མགོ་དབུས་ༀ། །ལག་གཡོན་སྭཱ་དང་རྐང་གཡོན་ཨཱཾ། །རྐང་གཡས་ཧཱ་བཅས་ཟུང་རེ་ལྔ། །ལུས་ཀྱི་གནས་ལ་ཧཱུཾ་བཅུ་གསལ། །ལག་པ་གཡས་ཀྱི་དབུས་རྩིབས་བཞིར། །མི་བསྐྱོད། སོགས་ནས་གོང་གི་སྒོམ་པའི་དབང་ལྟར། སྐུ་མདོག་མཐིང་། མགོ་བའི་དབུས་ཀྱི་དབུས་རྩིབ་བཞིར། །རྣམ་སྣང་སངས་རྒྱས་སྤྱན་མ་འཁྲིལ། །སེམས་དཔའ་རྡོ་རྗེ་བརྟན་རྡོ་རྗེ། །རིན་ཆེན་འབར་བའི་རྡོ་རྗེ་དང་། །ཆོས་ཀྱི་རྡོ་རྗེ་སྡུད་མ་ཡུམ། །ལས་ཀྱི་རྡོ་རྗེ་བསྐྱོད་མ་རྣམས། །ཞི་རྒྱན་མཛེས་ཤིང་སྐུ་མདོག་དཀར། །ལག་པ་གཡོན་གྱི་དབུས་རྩིབ་བཞིར། །རིན་འབྱུང་སོགས་ནས་ཉན་དབང་ལྟར། །སྐུ་མདོག་སེར། རྐང་པ་གཡོན་གྱི༴ སྣང་མཐའ༴ སོགས་ནས་འཆད་དབང་ལྟར། སྐུ་མདོག་དམར་རྐང་པ་གཡས་ཀྱི། དོན་གྲུབ་སོགས་ནས། གོང་གི་ཕྲིན་ལས་དབང་ལྟར། སྐུ་མདོག་ལྗང་། སྤྱི་གཙུག་ཧཱུཾ་མཛད་མདའ་གཞུ་སྔོ། །སྙིང་གར་རྣམ་རྒྱལ་ཏྲི་ཤུལ་དཀར། །ནུ་གཡས་དབྱུག་སྔོན་དབྱུག་མེ་དཔུང་། །དཔུང་གཡས་གཤེད་མཐིང་བེ་ཅོན་སྟྭ། །སོག་གཡས་མི་གཡོ་གྲི་ཞགས་ལྗང་། །སོག་དབྲག་རྟ་དམར་གྲི་སྦྲུལ་ཞགས། །སོག་གཡོན་གཞན་གྱིས་མི་ཐུབ་སྔོ། །བྷཉྫ་རྔ་ཡབ་ཐོག་པ་བརྗིད། །དཔུང་གཡོན་འཁྱིལ་ལྗང་རྒྱ་གྲམ་དྲིལ། །ནུ་གཡོན་རྣམ་རྒྱལ་འཁོར་ལོ་དང་། །མཆེ་བ་ཐོགས་པ་སེར་ཞིང་རྔམ། །བཤང་ཁར་སྟོབས་པོ་ཆེ་དུད་ཁ། །ཐོ་བ་དང་ནི་གཏུན་ཤིང་འཛིན། །ཞལ་གསུམ་ཕྱག་དྲུག་དང་པོ་གཉིས། །རྡོ་རྗེ་དུང་དམར་བར་རང་རྟགས། །ཐ་གཉིས་ཕུར་འདྲིལ་ཞབས་བཞི་པོ། །དོར་སྟབས་བགྲད་པ་གར་དགུས་སྒེག །དུར་ཁྲོད་ཆས་བརྒྱད་ཡུམ་དང་སྦྱོར། །དུང་དམར་ཡབ་སྟོབས་མེ་དབུས་བཞུགས། །རྡོར་དྲིལ་བསང་སྦྱངས། སྟོང་༴ སྟོང་༴ ༀ་ཨ་ཀུན་བཟང་ཡབ་ཡུམ་མཐིང་། །གཉིས་ཀ་ཞི་རྒྱན་མཛེས་ཤིང་བརྗིད། །ལྔ་ཚན་ལྔ་བསྐུར། བརླབ། དྲངས། བསྟིམ། བརྟན། མཆོད། དཀྱིལ་འཁོར༴ སློབ་མ་ཀུན་ཏུ་བཟང་པོ་གྱུར། དབང་རྫས༴ རྡོར་དྲིལ་ཡན་ལག་ལྔ་ལ་ཐིམ། རྡོ་རྗེ་ཐུགས་ཀར་བརྟེན་པ་སྐུའི་དམ་ཚིག་གིས། ༀ་ཐོག་མཐའ་མེད་སོགས་གོང་སྟ་གོན་གྱི་སྐབས་ལྟར། བདག་པོའི་གཙོ། འདི་དེ་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་བསྣམས། །ཧེ་རུ་ཀཿདཔལ་བརྟུལ་ཞུགས་བརྟན། །ༀ་བཛྲ་ས་ཏྭ་ཧཱུཾ། ཨ་བྷི་ཥཉྩ་ཧཱུཾ། དྲིལ་བུ་དཀུར་བསྟན་པ་གསུང་གི་དམ་ཚིག་གིས། སྲིད་པ་ངོ་བོ་ཉིད། སོགས་ནས། སྲིད་པ་ཐོབ་པར་ཤོག །འདི་དེ་རྣལ་འབྱོར་མ་རྣམས་ཀྱིས། །ཤེས་རབ་དབྱངས་ཀྱིས་རྗེས་འགྲོར་བརྗོད། །ཁྱོད་ཀྱིས་ཀྱང་ནི་རྟག་ཏུ་ཆོང་། །བྱང་ཆུབ་མཆོག་ཏུ་རྒྱལ་བས་བཞེས། །ༀ་གཎྜེ་ཨ་ཧཱུཾ། ཨ་བྷི་ཥཉྩ་ཧཱུཾ། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱའི་ཚིག་གིས་རྗེས་སུ་གྲགས། །ཉིད་ཀྱི་འདུས་ནི་བརྟེན་ཕྱིར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་སོགས་ལག་ཐུགས་ཀར་བསྣོལ་བས་འཁྱུད་རྒྱ་བྱ་བ་བརྟུལ་ཞུགས་དབང་ངོ་། །སླར་རྡོ་རྗེ་གསོར། དྲིལ་བུ་དཀྲོལ་འཇུག་སྟེ། ༀ། ཕྱོགས་བཅུ་དུས་བཞི་ཐམས་ཅད་ཀྱིས། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །ཅེས་བསྐུར་སྔགས། ༀ་སརྦ་ཏ་ཐཱ་ག་ཏ་བཛྲ་ར་ཛྲ་དྷཱརྨ་ཙཱཀ྄་ༀ་ༀ་ༀ། ༀ་སརྦ་ཧཱུྃ་ཧཱུྃ་ཧཱུྃ། ༀ་སརྦ་ཧྲཱི་ཧྲཱི་ཧྲཱིཿ ཏྲཾ་ཏྲཾ་ཏྲཾ། ༀ་སརྦ་ཨ་ཨ་ཨ། དབང་མཆོག་འདིས་ནི་དབང་བསྐུར་བས། །ཆོས་རྣམས་ཐམས་ཅད་ལྷུན་གྲུབ་ཅིང་། །མ་ལུས་ཀུན་ལ་དབང་བསྒྱུར་པས། །ཆོས་ཀྱི་རྒྱལ་པོ་ཆེན་པོར་ཤོག །རྡོ་རྗེ་དྲིལ་བུ་ལག་ཏུ༴ སྐལ་ལྡན་བུ་ལ་སློབ་དཔོན་དབང་བསྐུར་བས། །དཀྱིལ་འཁོར་ཀུན་གྱི་བྱེད་པོ་བཀའ་རབ་འབྱམས། །རྡོ་རྗེ་རྒྱལ་པོའི་ས་མཆོག་ཐོབ་པར་ཤོག །གཉིས་པ་ལ་ལུང་བསྟན་ཅིང་སེམས་ཅན་གྱི་དོན་བྱེད་པའི་རྗེས་སུ་གནང་བ་དང་། གཟེངས་བསྟོད་པ་དང་། མཆོད་པའི་རྗེས་སུ་གནང་བའོ། །འདི་དག་ཀྱང་ཁམས་ལུགས་ཏེ་ཡོ་ག་དང་འབྲེལ་བའོ། །དང་པོ། སློབ་དཔོན་སྤྲུལ་པའི་སྐུ་ཤཱཀྱ་སེང་གེའི་ཆ་བྱད་ཀྱིས་ལུང་བསྟན་པར་གྱུར། གཡས་སྐྱབས་སྦྱིན། གཡོན་སྣམ་སྦྱར་གྲཱ་ནས་བཟུང་སྟེ། རྡོ་རྗེ་སེམས་དཔའ་དེ་བཞིན་གཤེགས། །བདག་གིས་ཁྱོད་ནི་ལུང་བསྟན་ཏོ། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མ་ཡིན། །དེ་རིང་བདུད་ལས་རྣམ་རྒྱལ་བའི། །གྲོང་ཁྱེར་མཆོག་ཏུ་ཞུགས་པ་ཡིན། །ད་ནི་ཁྱོད་ཉིད་རྡོ་རྗེ་འཆང་། །ཐོབ་འགྱུར་འདི་ལ་ཐེ་ཚོམ་མེད། །འོག་མིན་སྟུག་པོ་བཀོད་པར་མི་བསྐྱོད་རྡོ་རྗེ་ཞེས་སུ་སངས་རྒྱ་བར་ངེས་པའོ། །སློབ་མ་དམ་པ་ཁྱོད་ཀྱིས་ཀྱང་། །སློབ་དཔོན་ལས་རྣམས་ཅི་རིགས་པར། །དེ་རིང་ཕྱིན་ཆད་མ་ལུས་པ། །སངས་རྒྱས་མཛད་པ་བཞིན་དུ་གྱིས། །གཉིས་པ། ཆོས་ཀྱི་དབྱིངས་ཀྱི་བྱིན་རླབས་དང་། །དམ་ཚིག་དག་ནི་མ་ཉམས་ཤིང་། །ཁྱོད་རྟག་བླ་མ་ལ་གུས་ན། །དངོས་གྲུབ་ཐམས་ཅད་འགྲུབ་པར་འགྱུར། །གསུམ་པ་ནི། རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་དྲག་པོས་ལེགས་ཚིམ་ཞིང་། །ལུས་ཅན་བདེ་གཤེགས་ཆ་ལུགས་སུ། །བྱང་ཆུབ་ཀྱིས་ནི་ཚིམ་པར་བྱོས། །ༀ་ཤྲཱི་བཛྲ་རཱ་ག་དྷཱུ་ཥྤེ་དྷཱུ། ཏྲཾ། རྒྱལ་བ་རྣམས་ལ་མེ་ཏོག་འཐོར། །བྱང་ཆུབ་ཡན་ལག་ཚིམ་གྱུར་ནས། །མཚན་དང་དཔེ་བྱད་ལྡན་པ་ཡི། །སངས་རྒྱས་སྐུ་ནི་ཐོབ་པར་བྱོས། ༀ་ཤྲཱི་བཛྲ་རཱ་ག་པུཥྤེ་པུ། །ཆོས་ཀྱི་མར་མེ་ལེགས་སྦར་བས། །པདྨ་གར་དབང་མཚན་ཉིད་ནི། །སེམས་ཅན་མ་རིག་མདོངས་པ་ལས། །ཡེ་ཤེས་སྒྲོན་མས་གསལ་བར་བྱོས། །ༀ་ཤྲཱི་བཛྲ་ར་ག་ཨ་ལོ་ཀེ་ཧྲཱིཿ ཚུལ་ཁྲིམས་ཏིང་འཛིན་ཤེས་རབ་དང་། །རྣམ་གྲོལ་ཡེ་ཤེས་འཐོར་བ་ཡི། །དྲི་མེད་རྒྱལ་བ་རྣམས་ཀྱི་དྲི། །ལུས་ཅན་ཀུན་ལ་ཁྱབ་གྱུར་ཅིག །ༀ་ཤྲཱི་བཛྲ་ར་ག་གནྡྷེ་གན། །དེང་ནས་བརྩམ་སྟེ་རྫོགས་སངས་རྒྱས། །རྡོ་རྗེ་སྒེག་མོ་རྡོ་རྗེ་སྤྱན། །ཤིན་ཏུ་སྒེགས་པའི་གཟི་བརྗིད་འབར། །རྡོ་རྗེ་ལཱ་སྱེའི་མཆོད་པས་མཆོད། །ༀ་བཛྲ་ལ་སྱེ་ཧཱུཾ། དེང་༴ རྡོ་རྗེ་ཕྲེང་བ་རྡོ་རྗེའི་རྒྱན། །ཤིན་ཏུ༴ རྡོ་རྗེ་མཱ་ལྱེའི་མཆོད༴ ༀ་བཛྲ་མ་ལྱེ་ཏྲཾ། དེང་ནས༴ རྡོ་རྗེ་དབྱངས་མཁན་རྡོ་རྗེའི་མགྲིན། །ཤིན་ཏུ་༴ རྡོ་རྗེ་གརྟིའི༴ ༀ་བཛྲ་གརྟི་ཧྲཱིཿ དེང་ནས༴ རྡོ་རྗེ་གར་མ་རྡོ་རྗེ་འགྱིང་། །ཤིན་ཏུ༴ རྡོ་རྗེ་ནིརྟིའི༴ ༀ་བཛྲ་ནིརྟི་ཨཱཿ དེ་ལྟར་སྐལ་ལྡན་རིག་པ་འཛིན་པ་ཁྱོད་ཀྱིས་བདག་གཞན་དོན་གཉིས་ལ་བརྟེན་ནས་ནུས་པའི་དབང་ལྔ་བསྐུར་བ་ཐོབ། དོན་གཉིས་ནུས་པའི་ས་བོན་འཇོག །གསང་སྔགས་ཀྱི་བྱ་བ་ཐམས་ཅད་ལ་དབང་། དྲུག་པ་ཀུན་ཏུ་བཟང་པོའི་ཕྲིན་ལས་བསྒྲུབ་རུང་བྱས། ནང་གི་རྫོགས་རིམ་སོགས་མཉན་པའི་སྐལ་བ་ཅན་དུ་བྱས་སོ། ༈ །དག་པ་དྲན་པ། དེ་ལྟར་དེ་དག་གིས་དོན་ནང་ལུས་དཀྱིལ་དང་། རྟགས་ཕྱི་མཚན་མ་གཟུགས་བརྙན་གྱི་དཀྱིལ་འཁོར་དུ་བུམ་དབང་འཁོར་བཅས་ཐོབ། ལུས་ཀྱི་སྒྲིབ་པ་སྦྱངས། ལུས་རྩ་ཡེ་ཤེས་དྲྭ་བ་བརྟེན་ནས་སྒྱུ་མ་ཆུ་ཟླ་ལྟ་བུ་བསྐྱེད་རིམ་སྒོམ་པ་ལ་དབང་། རྣམ་སྨིན་རིག་འཛིན་དང་། སྐུ་རྡོ་རྗེ་སྤྲུལ་པའི་སྐུའི་གནས་སྐབས་དང་། མཐར་འབྲས་ཐོབ་པའི་རྟེན་འབྲེལ་བསྒྲིགས། གསུམ་པ་ཟབ་པའི་དབང་གོང་མ་ལ་གསུམ། དང་པོ་གསང་དབང་ནི། མཎྜལ་གོང་བཞིན། འཁོར་ལོའི་བདག་པོ་ལ་གསང་བའི་དབང་བསྐུར་ཞུ་བའི་སོགས། གསོལ་འདེབས། རྡོར་སེམས་གཙོ་བོ་སོགས་ལན་གསུམ། ༀ་ཨཱཿཧཱུྃ། སློབ་དཔོན་གཙོ་བོ་བཅོམ་ལྡན་འདས་དཔལ་ལྡན་རྡོ་རྗེ་སེམས་དཔའི་གནས་ལྔར་རྒྱལ་བ་རིགས་ལྔ་དང་། ལག་གཡས་གཡོན་ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་རྡོ་རྗེ་དབྱིངས་ཕྱུག་མ་གནས་ལྔར་རིགས་ཀྱི་ཡུམ་ལྔ། ཡན་ལག་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱཱ་ཏཱས་བསྐུར། བརླབ། བརྣན། དྲངས། བསྟིམ། བརྟན། མཆོད། ཡབ་ཀྱི་གསང་གནས་ཧཱུཾ་ལས་རྡོ་རྗེ་རྩེ་ལྔ་ལ་དཀར་ཆག་ༀ་དང་ཕཊ་ཀྱིས་བཀག་པ། རྭ་ལྔ་ལ་ཧཱུྃ་ༀ་སྭཱ་ཨྃ་ཧཱ་རྣམས་དང་། ཡུམ་མཁའ་པཾ་ལས་པདྨ་དམར་པོ་འདབ་བཞི་ལྟེ་བར་རཀྟ་ཨཾ་ཉིད་ཨེས་བཀག་པ། མཱུྃ་ལཱྃ་མཱྃ་པཱྃ་ཏཱྃ་རྣམས་ཀྱིས་མཚན་པར་གྱུར་ས་མ་ཡ་སྟཾ། ས་མ་ཡ་ཧོ། ཨ་ནུ་རཱ་གོ྅་ཧཾ། ཨ་ནུ་རཱ་ག་མྱེ། ཛཿཧཱུཾ་བཾ་ཧཱོཿ ཞེས་སྙོམས་པར་ཞུགས་པའི་བདེ་ཆེན་བྱང་ཆུབ་སེམས་གཉིས་རོ་གཅིག་འདྲེས་པ་ལྕེ་ལ་སྩལ་བར་གྱུར། ༀ། མི་བསྐྱོད་ཡབ་ཡུམ་རོལ་པ་ཡིས། །བདེ་བ་གསལ་ཞིང་མི་དམིགས་པ། །ཤེས་རབ་ཐབས་ཀྱི་ཕྱག་རྒྱའོ། །རྡོ་རྗེ་ཡེ་ཤེས་ཧཱུྃ་ཚོགས་ཀྱིས། །པདྨོའི་ཡེ་ཤེས་བསྡུས་ཤིང་འཁྱིལ། །ཡུངས་དཀར་ཚད་ཙམ་རྡོ་རྗེ་སེམས། །རྩེ་ནས་རྩེ་རུ་བསྟིམ་པ་ཡིས། །རང་བཞིན་ཆོས་ཁམས་དཀྱིལ་འཁོར་གྱི། །ས་བོན་ཟུང་གསུམ་གཉིད་དང་བཅས། །གནས་ངན་ལེན་པ་གསུམ་སྦྱངས་ཏེ། །དམིགས་མེད་སེམས་ཀྱི་ཡེ་ཤེས་ལྔ། །གསལ་བས་ས་བོན་ཚིག་པ་བཞིན། །མི་སྐྱེ་ཐབས་ཀྱི་དབུག་དབྱུང་ངོ་། །ཤྲཱི་མ་ཧཱ་སུ་ཁ་བཛྲ་བྷོ་དྷི་ཧཱུཾ་ཧོ་ཨཾ། ཡང་སྔགས་དེ་བརྗོད་ལ་ནང་མཆོད་མྱང་། དེ་ཡུང་འབྲུ་ཙམ་གྱི་རྡོ་རྗེ་སེམས་དཔའ་ཤ་སྟག་ཏུ་གྱུར། གཉིད་སྲབ་མོ་རྨི་ལམ་དང་། སྙིང་ག་ལ་གནས་པའི་རིགས་དྲུག་གི་ས་བོན་སྦྱངས། གསལ་སྟོང་ཟུང་འཇུག་གི་ཡེ་ཤེས་སྐྱེས། །ཀུནྡཱ་ལྟ་བུའི་བདེ་ཆེན་བྱང་སེམས་ཀྱིས། །སྐལ་ལྡན་བུ་ལ་གསང་བའི་དབང་བསྐུར་བས། །གནས་ངན་ལེན་པའི་བག་ཆགས་ཀུན་དག་པ། །གཏུམ་མོ་གསལ་སྟོང་ཡེ་ཤེས་སྐྱེ་གྱུར་ཅིག །འབྲུ་གསུམ་གྱིས་གདོང་གཡོགས་བསལ། བདེན་སྟོབས་ནི། ༀ། མི་འགྱུར་བ་ཡི་ཡེ་ཤེས་གནས། །མ་བཙལ་ཕྱིན་པའི་བདེ་བའི་མཆོག །མ་བལྟས་གསལ་བའི་ཡེ་ཤེས་སྤྱན། །གོང་ན་མེད་པ་ཀུན་གྱི་རྗེ། །ཡེ་ཤེས་རང་གནས་བརྡལ་བ་ལ། །མི་འགྱུར་གཡུང་དྲུང་ས་ཐོབ་ཤོག །ༀ་མ་ཧཱ་གུ་ཧྱ་བྷྲཱུཾ་ཛྙཱ་ན་མཎྜལ་ཛྙཱ་ན་གུ་ཧྱ་སིདྡྷི་སྭཱ་བྷཱ་ཝ་ཨཱཏྨ་ཀོ྅་ཧཾ། ཤཱུ་ནྱཱ་ཏ་བདག་པོར་བྱས་པའི་དབུ་རྒྱན། ༀ་ཏ་ཐཱ་ག་ཏོ་མ་ཧཱ་གུ་ཧྱ་མཱ་ལ་ཨ་བྷི་ཥིཉྩ་ཧོཿ ཞེས་ཅོད་པཎ་དང་། འཕྱར་ཚུལ་དབུགས་དབྱུང་བ་ནི། བུ་ཁྱོད་མཚན་མའི་རྟོགས་བྲལ་ཞིང་། །ཚེ་རིང་བདེ་བ་ཕུན་སུམ་ཚོགས། །ཀུན་ལ་སྤྱོད་པའི་དབང་ཐོབ་ནས། །སློབ་མ་བདེ་ལ་འགོད་བྱེད་པའི། །དབང་ཕྱུག་ཆེན་པོ་ཁྱོད་གྱུར་ཏོ། །གསང་བར་གཉེར་གཏད་པ། གསང་བའི་དོན་མཆོག་འདི་དག་ནི། །ལྟ་བ་དམན་ལ་བསྟན་བྱས་ན། །དུས་མིན་པར་ནི་སྲོག་ཟད་ནས། །མགོ་འགས་སྙིང་ཡང་འཚིག་པར་འགྱུར། །ཁབ་ལེན་གྱིས་ནི་ལྕགས་སྡུད་ལྟར། །མི་འདོད་བཞིན་དུ་དབང་མེད་པར། །བསྐལ་བར་ངན་སོང་མྱོང་བར་འགྱུར། །དེ་བས་ཤིན་ཏུ་གསང་བར་བྱ། །དག་དྲན། དེ་ལྟར་ན་སྐལ་ལྡན་རིག་པ་འཛིན་པ་ཁྱོད་ཀྱིས་བྷ་གའི་དཀྱིལ་འཁོར་དུ་གསང་དབང་ཐོབ། ངག་སྒྲིབ་སྦྱངས། རླུང་རིན་ཆེན་འོད་འཕྲོ་ལ་བརྟེན་ནས། ཨ་ཤད་སྟེང་སྒོ་བསྒོམ་པ་ལ་དབང་ཚེ་དབང་རིག་འཛིན་དང་གསུང་རྡོ་རྗེ་ལོངས་སྤྱོད་རྫོགས་པའི་སྐུའི་གནས་སྐབས་དང་མཐར་འབྲས་ཐོབ་པའི་རྟེན་འབྲེལ་བསྒྲིགས། གཉིས་པ་ཤེས་རབ་ཡེ་ཤེས་ཀྱི་དབང་ནི། ཕྱག་རྒྱ་བཅུ་དྲུག་མ་དང་བཅས་པའི། མཎྜལ་གོང་བཞིན། འཁོར་ལོའི་བདག་པོ་ལ་ཤེས་རབ་ཡེ་ཤེས་ཀྱི་སོགས། གསོལ་འདེབས་ནི། རྡོར་སེམས་ཡེ་ཤེས་གཙོ་བོ་སོགས་ལན་གསུམ། འབྲུ་གསུམ་གྱིས་མིག་དར་འགེབ། དཀྱིལ་འཁོར་བའི་ཐུགས་ཀ་ནས་གཟུགས་དང་ལང་ཚོས་བརྒྱན་པའི་རིག་མ་སྤྲོས་ཏེ་དབང་ཕྱུག་གིས་རཏྣའི་ཕྲེང་བས་བཅིངས་ཏེ་གཏད། བདེ་བ་ཆེན་པོ་ཆོས་ཀྱི་སྐུ། །ཤེས་རབ་ཐབས་ཀྱིས་རྫོགས་པར་འགྱུར། །འདི་དང་སྐྱེ་བ་ཐམས་ཅད་དུ། །དངོས་གྲུབ་བདེ་འདི་མ་སྤོང་ཞིག །རྒྱལ་བ་སངས་རྒྱས་ཐམས་ཅད་ཀྱི། །རྫོགས་པའི་ཕྱག་རྒྱ་ཁྱོད་ལས་བྱུང་། །སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེའི་བསྐལ་པ་མཐའ་ཀླས་པར། །ཆོས་སྐུ་ཐོབ་པར་མི་འགྱུར་རོ། །ཞེས་གདམས། སློབ་མ་གཙོ་བོ་བཅོམ་ལྡན་འདས། །སོགས་གོང་ལྟར། ཛཿཧཱུཾ་བཾ་ཧོཿ ཞེས་པའི་བར་དང་། དེ་ལྟར་སྙོམས་པར་ཞུགས་ནས། རྗེས་སུ་ཆགས་པའི་རླུང་བསྐྱོད། གཏུམ་མོ་འབར་བས་བྱང་ཆུབ་སེམས་ཀྱི་ཟླ་བ་ཞུ། རྩ་གནས་ཐམས་ཅད་དུ་ཐིག་ལེ་མགོ་ལྡང་བ་གཡོ་ལྡང་བྱང་ཆུབ་སེམས། བདེ་བ་ཕྱི་མ་ལ་འཇུག །སྔ་མ་འགག་པ་འཇིག་འཇུག་བྱང་ཆུབ་སེམས། རྟེན་ཅན་བདེ་བ་རང་ས་ན་གནས་པ་ལ་དེར་འཛིན་བྲལ་བ་གནས་པ་བྱང་ཆུབ་སེམས། སྔ་མའི་བདེ་བས་མཚོན་ནས་ཕྱི་མ་ལ་འདུན་པ་སྨོན་པ་བྱང་སེམས་དང་། དེའང་སྤྱི་བོ་ནས་མགྲིན་པར་བཟོད་མེད་ཀྱི་བདེ་བ་ལས་ལུས་སྟན་ལ་མི་ཚུགས་པ་ལྟ་བུ་དགའ་བ། དེའང་ཤིན་ཏུ་བདེ་བས་བརྒྱལ་ཐབས་ལྟ་བུར་མགྲིན་པ་ནས་སྙིང་གར་མཆོག་དགའ། ཟག་བཅས་ཀྱི་ཞེན་པ་རགས་པ་དང་བྲལ་བའི་བདེ་བ་སྙིང་ག་ནས་ལྟེ་བར་སོན་པས་དགའ་བྲལ། ཟག་ཞེན་ཐམས་ཅད་བྲལ་བ འི་སྨྲ་བརྗོད་མི་བཏུབ་པའི་བདེ་ཉམས་ཁྱད་འཕགས་ལྷན་སྐྱེས་ཀྱི་དགའ་བ་དང་ཟུང་འབྲེལ་ལྟེ་བ་ནས་གསང་བ་དང་། དེ་ནས་རྡོ་རྗེ་པདྨའི་རྩེར་ཉི་ཟླ་ཞལ་མཇལ། ཐབས་ཤེས་རབ་ཏུ་སྦྱོར་བ། ཤེས་རབ་ཐབས་སུ་སྦྱོར་བ་སྦྱོར་བ་གསུམ་གྱིས་ཡས་འབབ། མཐར་ཕྱིན་པ་མཐར་ཕྱིན་བྱང་ཆུབ་སེམས། དཔེ་ཡི་ཡེ་ཤེས་ལ་ཅུང་ཟད་མཉམ་པར་བཞག །སླར་ཡང་ཧཱུཾ་ཞེས་དྲངས་པས་མས་བརྟན་དགའ་བ་བཞིའི་ཡེ་ཤེས་རྒྱུད་ལ་སྐྱེས། དེ་འདྲའི་དགའ་བ་རེ་རེ་ལའང་ཐབས་དང་། ཤེས་རབ་ཀྱི་ཆ་གཉིས་གཉིས་བཅུ་དྲུག་གིས། དང་པོ་བཞིས་ཚོགས་ལམ། དེ་ནས་ག ཉིས་སྦྱོར་མཐོང་། དེ་ནས་དགུས་སྒོམ་ལམ་ས་དགུ། དགའ་བ་བཅུ་དྲུག་གི་མཐའ་མ་དཔེའི་འོད་གསལ་ལྷན་སྐྱེས་བདེ་ལ་འཛིན་མེད་ཤར་བའི་དུས། པདྨ་ཅན་ཀུན་ཏུ་འོད། ཡི་གེ་འཁོར་ལོ་རྣམས་ཀྱང་རྫོགས་པར་གྱུར། ཧཱུཾཿ རྗེས་སུ་འཇུག་པའི་ཕྱག་རྒྱ་ཉིད། །ཟིལ་བའི་ཐིག་ལེ་སྨོན་ལམ་བཞིན། །བཅུ་དྲུག་ཕྱེད་ཕྱེ་ཐིག་ལེ་གཅིག །ཕན་ཚུན་འགོད་པའི་སྟོབས་ཀྱིས་བསྟིམ། །བདེ་བ་གཉིས་པའི་ངོ་བོ་ཉིད། །གསུམ་པའི་ཡེ་ཤེས་དཀྱིལ་འཁོར་དུ། །གསལ་བར་ཤར་བས་གྱུར་པའི་སྒྲ། །རང་བཞིན་འོད་གསལ་དཀྱིལ་འཁོར་ཆེ། །རྡོ་རྗེ་ཉི་མ་ཐབས་ཀྱི་རྒྱ། །ཕུང་སོགས་ཕྱག་རྒྱའི་ཚོགས་དང་ལྡན། །དོ་ཟླ་བསིལ་བྱེད་ཤེས་རབ་དངོས། །དུས་གཅིག་རོ་མཉམ་ཐིག་ལེ་ཆེ། །སུམ་ཅུ་རྩ་གཉིས་མཚན་རྫོགས་ཤིང་། །ཟླ་བའི་ཡེ་ཤེས་ལྔ་བཅུ་དྲུག །དཔེ་བྱད་ལ་སོགས་དཔག་ཏུ་མེད། །སེམས་ཤེས་མངོན་པར་ཤེས་དང་ལྡན། །སེམས་མཐའ་འགྲོ་འོང་རྫུ་འཕྲུལ་ཤེས། །གནས་ནས་ལོག་པ་ཐིམ་པའི་སྤྲས། །མཐའ་གཉིས་མ་གོས་པདྨ་ཅན། །སྤྲུལ་པའི་གནས་ནས་བཀྱེ་བ་ཡིས། །བཞི་བཅུ་ལྔ་སོགས་མཐའ་ཡས་ཀུན། །རང་བཞིན་ཉིད་ལས་རང་གསལ་བ། །བཅུ་གསུམ་ཡི་གེ་འཁོར་ལོ་བརྗོད། །ༀ་དྷརྨ་ཀཱ་ཡ་ཨ་བྷི་ཥིཉྩ་ཧཱུཾ། འབྲུ་གསུམ་གྱིས་མིག་དར་བསལ། མཚན་ཉིད་ལྡན་པའི་ཕྱག་རྒྱ་རིག་མ་འདིས། །སྐལ་ལྡན་བུ་ལ་ཤེས་རབ་དབང་བསྐུར་བས། །ཡེ་ཤེས་རང་གནས་བདེ་ཆེན་དོན་རྟོགས་ཏེ། །བདེ་སྟོང་ཐིག་ལེ་འགག་མེད་ཐོབ་པར་ཤོག །བདེན་སྟོབས། ༀ་མི་འགྱུར་པ་ཡི་སོགས། གོང་བཞིན། ཨཱཏྨ་ཀོ྅་ཧཾ་བར་དབུགས་དབྱུང་བ། དེ་རིང་ཕན་ཁྱོད་བུ་ཁྱོད་ནི། །རང་རིག་བདེ་ལ་གནས་པས་ན། །རྡོ་རྗེ་སེམས་དཔའ་ཞེས་བྱ་སྟེ། །ཡུམ་དང་འཇོ་མ་ཐམས་ཅད་ལ། །འདོད་བཞིན་སྤྱོད་པའི་དབང་ཕྱུག་འགྱུར། །རིགས་སུ་གྱུར་རྣམས་ཐབས་འདི་རུ། །མཐུན་འཇུག་མཚམས་ལས་འགྲོ་འདུལ་བའི། །དབང་ཕྱུག་རྒྱལ་པོ་ཉིད་དུ་ངེས། །དག་དྲན། དེ་ལྟར་ན་སྐལ་ལྡན་རིག་པ་འཛིན་པ་ཁྱོད་ཀྱིས་མཁའ་གསང་གི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ་ཡིད་སྒྲིབ་སྦྱངས། ཁམས་བདེ་ཆེན་རྒྱལ་པོ་ལ་བརྟེན་ནས་བདེ་སྟོང་སྒོ་ཐིག་ལེ་སྒོམ་པ་ལ་དབང་། ཕྱག་ཆེན་རིག་འཛིན་དང་། ཐུགས་རྡོ་རྗེ་ཆོས་སྐུའི་གནས་སྐབས་དང་མཐར་འབྲས་ཐོབ་པའི་རྟེན་འབྲེལ་བསྒྲིགས། ཞེས་ངེས་པ་བསྐྱེད། གསུམ་པ་ཚིག་དབང་རིན་པོ་ཆེ་ནི། མཎྜལ་མཐར། འཁོར་ལོའི་བདག་པོ་ལ་ཚིག་གི་དབང་བསྐུར་ཞུ། སོགས་གསོལ་གདབ་ནི། སྒྲུབ་ཐབས་ལས་འབྱུང་བའི་ཆོས་སྐུའི་མཎྜལ་ཏེ། ན་མོ། དེ་བཞིན་གཤེགས་པ་ཐམས་ཅད་ཀྱི་སྐུ་དང་། སོགས་ནས། ཤིན་ཏུ་གྲོལ་བ་རྒྱ་ཆེན་པོ་མཛད་དུ་གསོལ། བར་བརྗོད་པ་ལན་གསུམ། ཆོས་རྣམས་ཐམས་ཅད་ནམ་མཁའི་ཁམས། །དངོས་པོ་མཚན་མ་ཀུན་ལས་འདས། །དེ་ལ་མཁས་པས་བཅོས་སུ་མེད། །དེ་བཞིན་སེམས་ཀྱི་རྣམ་པ་ཀུན། །དེ་བཞིན་ཉིད་དེ་བཅོས་ལས་འདས། །འདི་ལྟར་ཡེ་ནས་ཡིན་ཤེས་ན། །དབང་རྣམས་བསྐུར་ཡང་ག་ལ་དགོས། །ཨེ་མ་ཧོ། ངོ་མཚར་རྨད་ཀྱི་ཆོས་སོགས་སྒྲུབ་ཐབས་ནས་འབྱུང་བ་ལྟར། འགྲོ་འོང་ཉིད་ནའང་འགྲོ་འོང་མེད། ཅེས་སྔར་གྱི་དབང་གསུམ་པས་མཚོན་ཏེ་དཔེ་དང་། ཚིགས་གིས་མི་མཚོན་ཀྱང་། ཚིག་གི་རྟོགས་པར་བྱ་བ། བློ་དང་སྤྲོས་པ་ལས་འདས་པ། སེམས་ཉིད་རྫོགས་པ་ཆེན་པོ་རང་བྱུང་གི་རིག་པ་དགག་སྒྲུབ་དང་བྲལ་བ། གང་ཤར་རང་གྲོལ་གྱི་ངང་ལ་དུས་གསུམ་གྱི་ཡིད་བྱེད་ཐམས་ཅད་རང་སར་ཞི་བའི་ཚུལ་དུ་མཉམ་པར་བཞག །ལུས་ཕྱི་སྡོམ། ཁོང་སློང་། མ་ཡེང་ཙམ་དུ་རྣམ་པར་མི་རྟོག་པའི་རིག་སྟོང་གི་ཉམས་བསྐྱང་། སྨྲ་བསམ་བརྗོད་འདས་གསང་བ་སྙིང་པོའི་དོན། །སྐལ་ལྡན་ཁྱོད་ལ་ཚིག་གིས་དབང་བསྐུར་བས། །ཆོས་ཉིད་བསལ་བཞག་མེད་པའི་དོན་རྟོགས་ནས། །རྫོགས་པ་ཆེན་པོ་མངོན་དུ་འགྱུར་བར་ཤོག །དག་དྲག་དེ་ལྟར་ན་སྐལ་ལྡན་རིག་པ་འཛིན་པ་ཁྱོད་ཀྱིས་དེ་ཁོ་ན་ཉིད་སེམས་ཀྱི་དཀྱིལ་འཁོར་དུ་ཚིག་དབང་ཐོབ། སྒོ་གསུམ་ཆ་མཉམ་གྱི་དྲི་མ་སྦྱངས། བརྗོད་བྲལ་གཉུག་མའི་རིག་པ་ལ་བརྟེན་ནས་རྫོགས་པ་ཆེན་པོ་སྒོམ་པ་ལ་དབང་། ལྷུན་གྲུབ་རིག་འཛིན་དང་། ཡེ་ཤེས་རྡོ་རྗེ་ངོ་བོ་ཉིད་སྐུའི་གནས་སྐབས་དང་མཐར་འབྲས་ཐོབ་པའི་རྟེན་འབྲེལ་བསྒྲིགས། གཉིས་པ་དཀྱིལ་འཁོར་དུ་ཞུགས་ཤིང་དབང་བསྐུར་ཐོབ་པའི་ཡོན་ཏན་དང་། མ་ཐོབ་པའི་ཉེས་དམིགས་བཅས། དབུ་བརྒྱན་ཅོད་པཎ་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུག་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་བས། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་ནད་མེད་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། ༈ །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་རྩམ་པ་རྣམས། །འབྲས་བུ་མེད་ཅིང་བརླག་པར་འགྱུར། །རྗེས་སུ་སློབ་དཔོན་གྱི་ཞབས་སྤྱི་བོར་བླང་། སྙིང་གར་གཏུགས་པར་མོས་པས། སློབ་དཔོན་གྱི་དམ་ཚིག་དང་བཀའ་སྤྱི་བོར་གནས་པར་གྱུར་ཅིག །དབང་གི་རྒྱལ་རྟགས་དང་མ་འབྲལ་བར་གྱུར་ཅིག །ཅེས་སྨོན་པ་དང་། གཙོ་བོས་ཇི་ལྟར་སོགས་ལན་གསུམ་མཎྜལ་སོ་བདུན་མ་ལོངས་སྤྲུལ་མཎྜལ་བཅས། མ་ཚང་བ་མེད་པ་འདི་ཉིད་འཇུག་པ་ལེགས་པར་ཐོབ་པའི་བཏང་རག་གི་ཡོན་དུ། ཞེས་བསྒྱུར། དེང་ནས་བརྩམས་ཏེ། སོགས་ལན་གསུམ། མཐར་མཇུག་གི་བཀྲ་ཤིས་ནི་ཀཿཐོག་པ་ཆེན་པོ་རྩ་སྡེ་བའི་གསུངས་འདི་ཉིད་གཙིགས་ཆེ་བར་གནས་པས། བཀྲ་ཤིས་གང་ཞིག་བདེ་ཆེན་འཆང་བྱེད་ཅིང་། །མཆོག་གསུམ་འཕགས་པའི་བཀྲ་ཤིས་ཀུན་གྱི་གཞི། །བཀྲ་ཤིས་དོན་གྲུབ་ཡིད་བཞིན་འབྱུང་བའི་གཏེར། །རྗེ་བཙུན་མཚུངས་མེད་བླ་མའི་བཀྲ་ཤིས་ཤོག །བཀྲ་ཤིས་གང་ཞིག་ལྷ་དང་མཉམ་སྦྱོར་བས། །ལྷ་ཡི་བཀྲ་ཤིས་མངོན་པར་ཉེར་ཐོབ་ཅིང་། །བཀྲ་ཤིས་དོན་གཉིས་ལེགས་པར་འགྲུབ་བྱེད་པ། །ཡི་དམ་ལྷ་རྣམས་ཀུན་གྱི། །བཀྲ་ཤིས་དཔལ་ལྡན་སྐུ་གསུམ་རབ་བརྙེས་ཤིང་། །ཡེ་ཤེས་རྒྱ་མཚོ་བཀྲ་ཤིས་མཐའ་ཡས་པ། །བཀྲ་ཤིས་དབྱིངས་སུ་འགྲོ་རྣམས་འདྲེན་མཛད་པ། །ཡང་དག་རྫོགས་སངས་རྒྱས་ཀྱིས་བཀྲ་ཤིས་ཤོག །བཀྲ་ཤིས་གསུང་རབ་དྲི་མེད་རྟོགས་པ་ཡི། །དོན་ལྡན་ཆགས་བྲལ་བཀྲ་ཤིས་དོན་དམ་ཆོས། །བཀྲ་ཤིས་མཆོག་གིས་སེམས་ཅན་སྐྱབས་གྱུར་པ། །དམ་ཆོས་རྒྱ་མཚོའི་ཚོགས་ཀྱི༴ བཀྲ་ཤིས་སྡོམ་གསུམ་རྣམ་དག་རྒྱན་གྱིས་མཛེས། །ཐོས་བཙུན་ཏིང་འཛིན་བཀྲ་ཤིས་དབང་འབྱོར་བས། །བཀྲ་ཤིས་ཡིད་སྐྱེད་དགུའི་དཔལ་གྱུར་པ། །དགེ་འདུན་དམ་པ་རྣམས་ཀྱི༴ བཀྲ་ཤིས་མཐར་ཕྱིན་དཔལ་ཆེན་སྤྱན་སྔ་རུ། །བསྟན་པ་སྲུང་བར་ཁས་བླང་བཀྲ་ཤིས་གང་། །བཀྲ་ཤིས་མཐུ་ཡིས་ལོག་འདྲེན་ཚར་གཅོད་པའི། །ཆོས་སྐྱོང་སྲུང་མ་རྣམས་ཀྱི་བཀྲ་ཤིས་ཤོག །བཀྲ་ཤིས་དོན་གྱིས་ཉོན་མོངས་རྣམ་དག་ཅིང་། །ནད་རྣམས་བཀྲ་ཤིས་སྟོབས་ཀྱིས་ཞི་གྱུར་ནས། །བཀྲ་ཤིས་བདེན་པས་བགེགས་དཔུང་འཇོམས་བྱེད་དེ། །རྣམ་པ་ཀུན་ཏུ་ལེགས་པའི་བཀྲ་ཤིས་ཤོག །བཀྲ་ཤིས་སྙན་པའི་བ་དན་ཀུན་ཁྱབ་ཅིང་། །བསོད་ནམས་ཆེན་པོའི་བཀྲ་ཤིས་རྒྱུན་ཆགས་ནས། །བཀྲ་ཤིས་ཚེ་དབང་མི་འགྱུར་རྡོ་རྗེ་འཛིན། །དཔལ་འབྱོར་ཕུན་སུམ་ཚོགས་པའི་བཀྲ་ཤིས་ཤོག །བཀྲ་ཤིས་མངོན་གྱུར་རྒྱལ་བའི་བཀྲ་ཤིས་ཀྱིས། །བཀྲ་ཤིས་མཆོག་ཏུ་སྔགས་པའི་བཀྲ་ཤིས་གང་། །བཀྲ་ཤིས་རྒྱ་མཚོའི་ཚོགས་ཀྱིས་བཀྲ་ཤིས་ཤིང་། །བཀྲ་ཤིས་ལྷུན་གྱིས་གྲུབ་པའི་བཀྲ་ཤིས་ཤོག །འདི་དག་གི་མཇུག་ཏུ་སློབ་མ་འཇུག་པར་གནང་བ་ནོད་པ་ནི་གོང་བཞིན་ནོ། །བཅུ་པ་ཞུགས་པའི་ཡོན་ཏན་ནི་གོང་གསུང་པ་སོགས་སོ། །རྗེས་ཀྱི་ཚེ་རས་བྲིས་ཀྱི་དཀྱིལ་འཁོར་ལ་ནི་སྒྲུབ་མཆོད་ཀྱི་ཚེ འང་ཐིག་ཚོན་ལྷག་གནས་སོགས་དོར་ཞིང་ཟོར་ཡང་དུ་བྱ་བའི་གནད་ཤེས་པས། ཇི་སྲིད་འབྱུང་བཞིའི་གནོད་པས་མ་ཞིག་གི་བར་དུ། ཞེས་བརྟན་བཞུགས་བྱ་ཞིང་། རྡུལ་ཚོན་གྱི་ཕྱོགས་ཉིན་བདུན་ལྟ་བུ་ལ་གྲོལ་ཉིན་བར་དུ། ཇི་སྲིད་འདོད་དོན་མ་རྫོགས་པ་དེ་སྲིད་དུ། ཞེས་བརྟན་བཞུགས་བྱ། ཚར་ཉིན་བེགཱ་ཀྲ་མ་ཡཾ། ཞེས་པས་མཁའ་ལ་བཏེགས་སླར་ཡང་བཏང་རག་གི་མཆོད་བསྟོད། བཟོད་གསོལ་རྣམས་ཀྱིས་མཐར། ༀ་ཁྱེད་ཀྱི་སེམས་ཅན་དོན་ཀུན་མཛད། །སོགས་མཐར། ཛྙཱ་ན་མཎྜལ་བཛྲ་མུཿ ཞེས་གཤེགས་གསོལ་དང་། དམ་ཚིག་གི་འཁོར་ལོ་བསྡུ་ལྡང་གོ་བགོ་ལུས་སྲུང་གི་རྗེས། ཆོས་ཐམས་ཅད་སྟོང་ཉིད་དུ་མོས་ཏེ་རོལ་མོའི་སྒྲ་བཅས། ༀ་ཨཀཱ་རོ། བཟླ་བཞིན་དུ། རྡོ་རྗེར་བཅས་པའི་ལག་པས་ལྷ་མཚན་བསྡུས་ལ། ཅུང་ཟད་མགོ་བོར་བཀོད། དབང་ལྡན་ནས་གཙོ་བོའི་བར་དུ་བསྡུས་ཏེ་གསེར་དངུལ་གྱི་བུམ་པར་བླུགས་པ་བཀུར་བསྟི་ཆེན་པོས་རྒྱུན་འབབས་ཀྱི་ཆུ་ཀླུང་དུ་བསྐྱལ། སླར་ཡང་སྣོད་དེ་ཆུས་བཀང་ནས་ནང་དུ་འོང་སྟེ་དཀྱིལ་འཁོར་གྱི་ཁང་པ་བསངས་གཏོར་བྱེད། ཧཱུཾ་མཛད་ཕྱག་རྒྱས་མཛུབ་མོ་བསྣོལ་བ་ཀམ་པའི་རྒྱས་འོག་ནས་ཡར་ཕུར་བུ་རྣམས་ཕྱུང་། ༀ་བཛྲ་ཀཱི་ལ་ཡ་ཨུཏྐི་ལ་ཡ་སརྦ་བིགྷྣན་བཛྲ་དྷ་ར་ཨཱ་ཛྙཱ་པ་ཡ་ཧཱུཾ་ཧཱུཾ་ཧཱུཾ་ཕཊ་ཧོཿ སྣོད་དུ་བཞག་པའི་རྩེ་མོར་འོ་ཆབ་གཏོར། ༀ་རུ་རུ་སྤུ་རུ་ཛྭ་ལ་ཏིཥྛ་སིདྡྷི་ལོ་ཙ་སརྦ་ཨཪྠ་སིདྡྷི་སོ་སྭཱ་ཧཱ། ཞེས་སྤྱན་མའི་སྔགས་བཟླས། འོ་ཆབ་ཕུར་ཁུང་དུའང་གཏོར་བས། བགེགས་རྣམས་ལ་སྨས་པ་བོས་ཏེ། བདེ་སྟོང་གི་ཡེ་ཤེས་སུ་སངས་རྒྱས། ཕུར་བུའི་ཡེ་ཤེས་པ་རྣམས་ལག་གི་རྡོ་རྗེ་ལ་ཐིམ། ཆད་ལྷག་ཡི་གེ་བརྒྱ་བའི་ཁ་སྟོང་བཟླ། ཕྱོགས་སྐྱོང་འབྱུང་པོ་ལ་གཏོར་མ་བསྔོ། དགེ་བ་བསྔོ་ཞིང་སྨོན་ལམ་དང་། བཀྲ་ཤིས་ཀྱི་མཐར་རྒྱས་སུ་བྱའོ། །མོས་སློབ་སྒྲུབ་མཆོད་སྐྱང་པ་བའི་ལུགས་ཙམ་ལས། གཞན་ཚོགས་སྒྲུབ་དང་འབྲེལ་བ་ནི་སྒྲུབ་ཆེན་གྱི་ཡི་གེ་ལས་ངེས་པར་བྱའོ། །དགེའོ།། །།

སྒྱུ་འཕྲུལ་དྲྭ་བ་ཆེན་པོ་ལས་ཞི་བའི་ལས་བྱང་འབྲིང་པོ་དང་འབྲེལ་བའི་རིམ་གཉིས་ཀྱི་རྣལ་འབྱོར་གསལ་བའི་བསྙེན་ཡིག་དངོས་གྲུབ་རིན་པོ་ཆེའི་ཟ་མ་ཏོག ངག་དབང་དཔལ་བཟང་།

སྒྱུ་འཕྲུལ་དྲྭ་བ་ཆེན་པོ་ལས་ཞི་བའི་ལས་བྱང་འབྲིང་པོ་དང་འབྲེལ་བའི་རིམ་གཉིས་ཀྱི་རྣལ་འབྱོར་གསལ་བའི་བསྙེན་ཡིག་དངོས་གྲུབ་རིན་པོ་ཆེའི་ཟ་མ་ཏོག་ཅེས་བྱ་བ་བཞུགས་སོ། །རིགས་དང་དཀྱིལ་འཁོར་ཀུན་གྱི་ཁྱབ་བདག་བཅོམ་ལྡན་འདས་དཔལ་རྡོ་རྗེ་སེམས་དཔའི་ཞབས་ཀྱི་པདྨོར་རྣམ་པ་ཀུན་ཏུ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་རླབས་པར་མཛད་དུ་གསོལ། དེ་ཡང་ཇི་སྐད་དུ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་ཐུན་མོང་གི་དངོས་གྲུབ་དངོས་སུ་འགྲུབ་ཅིང་། མཆོག་གི་དངོས་གྲུབ་སྒྲུབ་པའི་གཞིར་མེད་དུ་མི་རུང་བ། རྣལ་འབྱོར་ཆེན་པོའི་ལམ་བསྐྱེད་པའི་རིམ་པ་ལ་བསླབ་པར་འདོད་པ་དག་གིས། དང་པོ་སྔགས་ཀྱི་འཇུག་སྒོ་སྨིན་བྱེད་དབང་གི་རིམ་པ་ཕྱི་ཕན་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་དང་བཅས་པ་ནོས། དབང་སྲོག་རྒྱུད་ལ་འཛིན་པ་དམ་ཚིག་རྣམ་པར་དག་པ་ཉིད་མེད་ན་བསྐྱེད་རྫོགས་གང་ལ་འཇུག་ཀྱང་འབྲས་བུ་མེད་པར་མ་ཟད་ངན་སོང་ལས་འགྲོ་ས་མེད་པས། དམ་ཚིག་གི་གནས་འདི་ཤིན་ཏུ་གལ་ཆེ་བ་ཞིག་ལགས་པས། དེ་ཅུང་ཟད་བཤད་ན། གསང་བ་སྙིང་པོ་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་དག་སྟེ། །ཞེས་རྩ་བ་ལྔ་དང་། ཡན་ལག་གི་དམ་ཚིག་བཅུར་གསུངས་པས། རྩ་བ་ལྔ་པོ་འདི་མི་སྲུང་བར་སྔགས་ལ་ཞུགས་པ་རང་གཞན་ཕུང་ལ་སྦྱོར་བ་ལས་མེད་པས། དེ་ཡིད་ལ་འཇགས་པ་ཅུང་ཟད་འགོད་པ་ལ། དང་པོ་བླ་མེད་མི་སྤང་བ་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པ་དོན་དམ་བདེན་པ་དང་ལྷག་པ་ཀུན་རྫོབ་ཀྱི་བདེན་པ་གཉིས་པོ་ལ་ཡིད་ཆེས་ཀྱི་ངེས་པར་ལྟ་བསྒོམ་སྤྱོད་པ་གསུམ་གྱིས་ཉམས་སུ་ལེན་པར་བྱ་བ་ལས་ལོག་ལྟས་མི་སྤང་ངོ་། །གཉིས་པ་བླ་མ་བཀུར་བ་ནི། ཡུལ་དབང་བསྐུར་རྒྱུད་འཆད་མན་ངག་སྟོན་པའི་བླ་མ་གསུམ་སྒོ་གསུམ་གཡོ་སྒྱུ་དང་ཟོལ་ཟོག་མེད་པར་ཅི་མཉེས་ལས་ཐུགས་དང་འགལ་བའི་བྱ་བ་སྣེ་གཅིག་ཙམ་ཡང་སྤང་བའོ། །གསུམ་པ་སྔགས་དང་ཕྱག་རྒྱ་རྒྱུན་མི་བཅད་པ་ནི། ཡུལ་རྒྱུ་མ་ནོར་བ་རྩ་བའི་སྔགས། བསྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་གསུམ་དང་། ཕྱག་རྒྱ་ལ་བཅའ་བ་དམ་ཚིག་གི་ཕྱག་རྒྱ་དང་། བཀྲོལ་བ་ལས་ཀྱི་ཕྱག་རྒྱ་དང་། བསམ་པ་ཆོས་ཀྱི་ཕྱག་རྒྱ་དང་། ལྷ་སྐུ་ཕྱག་རྒྱ་ཆེན་པོ་དང་བཞི་པོ་རྣམས་བརྩོན་པས་མི་འདོར་བར་ལོ་ཟླས་བར་མི་ཆོད་པར་བརྩོན་པར་བྱའོ། །བཞི་པ་མཆེད་ལ་བྱམས་པར་བྱེད་པ་ནི། སྤྱི་ཡུལ་དྲུག་གསུངས་ཀྱང་། ཕྱི་མ་བཞི་འདི་ཡུལ་ཤིན་ཏུ་གཉན་པས་ཉེ་བའི་མཆེད་དེ་སྔགས་ཀྱི་ཐེག་པར་ཞུགས་པ་དང་། འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དཀྱིལ་འཁོར་གཅིག་གིས་བསྡུས་པ་མ་གཅིག་པའི་སྤུན་ལྟ་བུ་ཡིན་པས་དེ་གསུམ་ནི་ཡང་དག་པའི་ལམ་དུ་ཞུགས་པའི་མཆེད་དང་། དེའི་ནང་ནས་ཀྱང་འདྲེས་པའི་མཆེད་ནི་ལྷག་པར་བྱམས་པར་བྱ་བའི་ཡུལ་ཡིན། བྱམས་ལུགས་ནི་རྟག་ཏུ་མི་འབྲལ་ཞིང་ཕན་འདོགས་པའི་ལྷག་བསམ་གྱིས་བརྩེ་གདུང་རྒྱུན་མི་བཅད་པར་བྱའོ། །ལྔ་པ་གསང་བའི་དོན་མི་སྨྲ་བ་ནི། གསང་བའི་ཡུལ་ནི། སྔགས་ཀྱི་དམ་ཚིག་ཉམས་པ་དང་། དམ་ལས་ལོག་པ་དང་། དམ་ཚིག་མེད་པ་དཀྱིལ་འཁོར་མ་མཐོང་བ་དང་། ནང་འདྲེས་མ་འདྲེས་ཐམས་ཅད་ལ་གསང་དགོས། གསང་ཚུལ་ནི། སྤྱིར་སྔགས་ཀྱི་ཚིག་དང་དོན་གྱི་གནས་རྣམས་སྣོད་མ་ཡིན་པ་ལ་གསང་བར་བྱ་བ་ཡིན་མོད། ཁྱད་པར་དུ་གསང་དོན་བཅུ་ནི། གསལ་བཀྲ་ལས། ལྟ་ཟབ་སྤྱོད་པ་བརླང་པོ་དང་། །ལྷའི་མིང་གཟུངས་དང་གྲུབ་རྟགས་གསང་། །ཞེས་སྤྱིར་དུས་ནམ་ཡང་གསང་དགོས་པ་སྤྱི་གསང་བཞི་ནི། སྔགས་ཀྱི་ལྟ་བ་ཟབ་མོ་མཉམ་པའི་བདེན་གཉིས་དབྱེར་མེད་ཀྱི་དོན་བློ་འཕང་དམའ་བ་རྣམས་ལ་གསང་། སྦྱོར་སྒྲོལ་གྱི་སྤྱོད་པ་བརླང་པོ་ནི་ཐམས་ཅད་ལ་གསང་། ཡི་དམ་གྱི་ལྷའི་མིང་དང་སྔགས་དང་གྲུབ་པའི་རྟགས་རྣམས་ནི་ནང་མ་འདྲེས་པའི་མཆེད་ལ་བསྟན་ན་དམ་ཚིག་ཉམས་པར་འགྱུར་ཞིང་མ་འདྲེས་པ་ལ་བསྟན་ན་རང་གི་དངོས་གྲུབ་འགྲུབ་པ་ལ་ཤིན་ཏུ་གེགས་ཆེན་པོ་སྐྱེད་པས་རྣམ་པ་ཀུན་ཏུ་གསང་བར་བྱའོ། །བར་གསང་བཞི་ནི། རང་གི་སྒྲུབ་པའི་གནས་དང་། སྒྲུབ་པའི་དུས་ཚོད་དང་། སྒྲུབ་པའི་གྲོགས་མཆེད་དང་གཟུངས་མ་དང་། སྒྲུབ་པའི་རྫས་ཡོ་བྱད་དང་བཅས་པ་བཞི་པོ་སྒྲུབ་པ་མཐར་མ་ཕྱིན་བར་དུ་གསང་བར་བྱའོ། །གསང་འོས་དང་གཉེར་གཏད་གཉིས་ཀྱི། དང་པོ་ནི། གསང་བར་འོས་པ་རྫས་དང་སྤྱོད་པ་གཞན་ཕལ་པས་མཐོང་ཐོས་སུ་མི་རུང་བ་རྣམས་གསང་བའོ། །གསང་བར་གཉེན་གཏད་ནི། སློབ་དཔོན་དང་མཆེད་ལྕམ་གྱིས་གསང་བར་གདམས་པ་རྣམས་ནི་དུས་ནམ་དུ་ཡང་གསང་བར་བྱ་དགོས་སོ། །དེ་ལྟར་རྩ་བ་ལྔ་པོ་འདི་ནི། ཤིང་ལྗོན་པའི་རྩ་བ་ལྟར་ཡོན་ཏན་ཐམས་ཅད་ཀྱི་གཞི་རྟེན་ཡིན་པས་རྩ་བ་ལྔ་ཞེས་གསུངས་སོ། །དེའང་བྱང་སེམས་དང་སྔགས་རྒྱ་གཉིས་བསྒྲུབ་པའི་དམ་ཚིག་དང་། གཞན་གསུམ་སྲུང་བའི་དམ་ཚིག་གི་མཆོག་སྟེ་རྩ་བ་ལྔ་པོ་སྲུང་ན་དངོས་གྲུབ་ཐམས་ཅད་ཀྱི་འབྱུང་གནས་སུ་འགྱུར་ལ། མ་སྲུང་ཞིང་ཉམས་པར་གྱུར་ན་བྱང་ཆུབ་ཀྱི་མྱུ་གུ་སྔོ་སྐམས་སུ་འགྱུར་བས་འདི་ལྔ་སྲུང་བ་ཅི་ནས་གལ་ཆེ། ཡན་ལག་གི་དམ་ཚིག་མི་སྤང་བ་ལྔའམ་མི་འདོར་བ་ལྔ་ནི། རྩ་བའི་དམ་ཚིག་གི་གྲོགས་སུ་དགོས་པ་འོབ་མཚམས་ཀྱི་ར་བ་ལྟ་བུ་ཡིན་ཀྱང་དེ་བསྡུ་ན་གོང་མ་ཁྱད་པ་ཅན་གྱིས་སྒྲུབ་པའི་ཆོས་སྨན་ལ་ལོངས་སྤྱོད་པ་དང་། ཆོས་ཐམས་ཅད་བདེན་གཉིས་རིས་མེད་དུ་མཉམ་པ་ལ་ཤེས་འཇུག་གི་དགོངས་པ་ཟབ་མོས་དེ་ལས་མི་འདའ་བར་མཉམ་པའི་དམ་ཚིག་ལ་གནས་པས་འཐུས། དེ་ལྟར་དབང་ཐོབ་དམ་ཚིག་ལ་གནས་པའི་གང་ཟག་གིས་བསྙེན་སྒྲུབ་ལ་འཇུག་པར་བྱ་དགོས་པ་གཞིར་བཞག་ནས། དེ་ནས་སྒྱུ་འཕྲུལ་དྲྭ་བ་ཆེན་པོའི་བསྙེན་པ་བཏང་བའི་ཚུལ། བླ་མ་གོང་མའི་ཞལ་རྒྱུན་བཞིན་འཆད་པ་ལ། གཞི་ཤེས་པའི་ལྟ་བས་ཆོས་ཐམས་ཅད་ཀྱི་གནས་ལུགས་གཏན་ལ་དབབ་པ། རྐྱེན་འཇུག་པའི་མཚན་ཉིད་བསྒོམ་པས་ཉམས་སུ་བླངས་པ། ལམ་གྱུར་གྱི་འབྲས་བུ་རིག་འཛིན་གྱི་གོ་འཕང་ལ་སྦྱོར་བའི་ཚུལ་གསུམ་དུ་བསྡུས་ནས་འཆད་པའི་དང་པོ་ལ་སྤྱིར་མ་ཧཱའི་རྒྱུད་ཀྱི་དངོས་པོ་བཅུ་ངེས་པ་ཞིག་ཅི་ནས་དགོས་ཀྱང་སྐབས་འདིར་ལྟ་བའི་གནད་དེ་འཆད་པར་བྱ་སྟེ་དེ་ཡང་གཞི་དང་ལམ་དང་འབྲས་བུ་གསུམ་གྱི་སྒོ་ནས་ཤེས་པར་བྱ་བ་ལ། དང་པོ་གཞི་ལ་གཉིས་ཏེ། ཧེ་རུ་ཀ་གལ་པོ་ལས། གནས་ལུགས་ངོ་བོ་ཉིད་ཀྱི་གཞི། །ལྷག་པའི་ཆོས་སྐུ་བཅིང་གྲོལ་མེད། །ཅེས་དང་། རྩ་རྒྱུད་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱི་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིས་སོ་སོར་འཛིན། །ཅེས་གནས་ལུགས་ངོ་བོ་ཉིད་ཀྱི་གཞི་ནི་སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ་དབྱིངས་སྟོང་པའི་ཆ་ནས་དབྱིངས་དོན་དམ་དང་། རང་བཞིན་འོད་གསལ་བའི་ཆ་ནས་ཡེ་ཤེས་དོན་དམ། དེ་གཉིས་དབྱེར་མི་ཕྱེད་པ་ཟུང་འཇུག་དོན་དམ། ཕྱི་མ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཡི་ལྡོག་པ་ལྔར་ཕྱེ་བས་ལྷག་པའི་དཀོར་བདུན་ངོ་བོ་ཉིད་བདེན་པ་དབྱེར་མེད་ལྷུན་གྱིས་གྲུབ་པའི་དཀྱིལ་འཁོར་ཉིད་ཡུལ་ཅན་སེམས་ཀྱི་གནས་ལུགས་སུ་བཞུགས་པ་དེ་སེམས་ཅན་ཐམས་ཅད་རིགས་གཅིག་གི་ཚུལ་དུ་བཞུགས་པས་བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ་པར་གསུངས་པ་དེ་ཡིན་ལ། རྫས་གཅིག་གི་ཁྱབ་པར་བསྟན་པ་གཏན་མིན་པས། དེ་ལྟ་བུའི་གནས་ལུགས་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་དེ་ཐོས་བསམ་གྱི་ཤེས་རབ་ཀྱིས་ཚོགས་ལམ་པས་དོན་སྤྱིའི་ཚུལ་གྱིས་རྟོགས། སྦྱོར་ལམ་པས་དེ་ལ་མྱོང་བ་ཐོན། མཐོང་ལམ་པས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་མངོན་སུམ་ཡུལ་རང་གསལ་དུ་རྟོགས་དགོས་པའི་གོ་བ་སྤྱིར་བཏང་ནས་ལས་དང་པོ་པའི་སྐབས་སུ་གཏན་ཚིགས་ཆེན་པོ་བཞིས་གཏན་ལ་ཕབ་ནས་ངེས་པའི་བློ་ཁྱད་པར་ཅན་བསྐྱེད་པ་ལ་ལྟ་བ་ཞེས་བྱའོ། །དེ་ཡང་ལྟ་བའི་ངེས་པ་བསྐྱེད་པ་ལ། གཉིས་པ་འཁྲུལ་པ་བཏགས་པའི་གཞི་འདི་ཉིད་ཆོས་ཅན་དུ་མ་བཟུང་ན་དེའི་ཆོས་ཉིད་དེ་ལོགས་སུ་གཞལ་མི་ཤེས་པས། དེ་ངོས་བཟུང་བའི་ཕྱིར། རང་གི་རྣམ་རྟོག་ལས་ཀྱིས་སྤྲུལ། །ཞེས་གསུངས་པས། སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ་བདེ་བར་གཤེགས་པའི་སྙིང་པོ་བདེན་པ་དབྱེར་མེད་དེ་ལྟར་ཡིན་པ་ལ། རྟེན་འབྲེལ་བཅུ་གཉིས་ཀྱི་ཐོག་མའི་མ་རིག་པས་རང་ངོ་མ་ཤེས། གཞིའི་གནས་ཚུལ་དེ་ལ་སྣང་ཚུལ་གཟུང་འཛིན་བདེན་པར་ཞེན་པའི་དབང་གིས་ཡུལ་མེད་ཡུལ་དུ་བཟུང་བ། སེམས་མེད་སེམས་སུ་བཟུང་བའི་ལོག་རྟོག་སྟེ། དེ་སྟོན་པར་བཞེད་ནས། རྩ་རྒྱུད་ལས། བདག་དང་བདག་གི་གཞན་རྣམས་ནི། །ལོག་པ་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་པས། །གཞན་དུ་གཡོ་བ་ཅི་ཡང་མེད། །ཅེས་གཞན་རང་རྒྱུད་པས་འཁོར་རྩ་བདག་འཛིན། ཐལ་འགྱུར་པས་བདེན་འཛིན་ལ་བཞེད་ཀྱང་། འདིར་ནི་མ་རིག་པ་ལོག་པར་རྟོག་པའི་ཤེས་པ་ཉིད་ལ། རྩ་རྒྱུད་ལས། ཨ་ཧོཿ སྲིད་རྩིའི་ཉེས་དམིགས་བདག་ཏུ་རྟོག་ལས་འཕྲོས། །རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །ཅེས་པས། དེས་བཟུང་ཚུལ་ལ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བློས་ཕར་བཏགས་པ་ཙམ་ལས་ཡུལ་གྱི་སྟེང་ན་རང་རྒྱུད་པ་ལྟར་རང་གི་མཚན་ཉིད་ཀྱིས་གྲུབ་པར་མི་བཞེད་པས། ལོག་རྟོག་ཉིད་ལ་ཉིད་སྤྱོད་པས། །ལོག་རྟོག་སྒྱུ་མ་ཉིད་ཀྱང་ངོ་། །ཞེས་གསུངས། འཁྲུལ་པའི་ཆོས་ཐམས་ཅད་མ་རིག་པའི་རོལ་པས་ལོག་པར་རྟོག་པའི་ཆོ་འཕྲུལ་འབའ་ཞིག་པ་འདི་ལྟར་སྣང་བ་ནི། ལོག་རྟོག་གི་རྒྱུན་སྔ་མ་ཉིད་ལ་ཕྱི་མ་ཉིད་སྤྱོད་པ་རྨི་ལམ་གྱི་སྣང་བ་ལྟར་ལོག་པར་རྟོག་པའི་འཕྲུལ་སྣང་ཙམ་ཉིད་ལས་གཞན་དུ་འཁྲུལ་པའི་རྒྱུ་ཕྲ་ཞིང་ཟབ་པ་ཅི་ཡང་ཡོད་པ་མ་ཡིན་ཏེ། དེའི་རྒྱུ་མ་རིག་པས་བདག་དང་། ཕུང་པོ་ལྔ་དང་། ཞེན་པའི་རྒྱུན་རྣམས་སུ་སྣང་བ་ཉིད་ཀྱི་ཕྱིར། དཔེར་ན་རྨི་ལམ་གྱི་སྣང་བ་བཞིན་ནོ། །དེ་ལྟར་ན་མ་ཧཱ་ཡོ་ག་རང་ལུགས་ཀྱི་བདེན་པ་གཉིས་ཀྱི་རྣམ་བཞག །རྩ་རྒྱུད་ལས། ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །རྣམ་དག་དབྱིངས་ཉིད་ཚུལ་གཅིག་གོ། །ཞེས་གསུངས། དེ་ཡང་ཐ་སྙད་པའི་ཤེས་ངོར་སྣང་ཡང་རྣམ་པར་དཔྱད་ན་ལོག་རྟོག་ཙམ་ཡང་ཡོད་པ་མ་ཡིན་པས་འཁོར་བ་སྣང་ཙམ་ཉིད་ནས། ཡང་དག་པར་མ་གྲུབ་པ་ལྷག་པའི་བདེན་པ་དབྱེར་མེད་དབྱིངས་དང་ཡེ་ཤེས་གཉིས་སུ་མེད་པ་དེ་དོན་དམ་བདེན་པ་དང་། སྒྱུ་མ་ལྟ་བུར་རང་སྣང་མ་འགགས་པར་ལྷ་རྟོག་དབྱེར་མེད་དུ་བཞུགས་པས་དེ་ངེས་པ། སྔགས་རང་ལུགས་ཀྱི་བདེན་པ་གཉིས་སུ་འཇོག་པས་རྒྱུའི་ཐེག་པ་དང་བསྲེ་བར་མི་བྱའོ། །དེས་ན་རིག་པའི་དགག་བྱ་ལོག་རྟོག་བདེན་པར་ཞེན་པ་དེ་ཡིན་ལ། ལམ་གྱི་དགག་བྱ་འཁྲུལ་པའི་ཤེས་པ་ལ་མ་དག་པར་སྣང་བ་དེ་ཉིད་འོག་ཏུ་འཆད་པའི་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་གསུམ་གྱིས་བསྐྱེད་རིམ་སྒོམ་པ་དེས་དགག་དགོས་པ་ཡིན་ལ། བསྐྱེད་རིམ་གྱི་སྒོམ་པ་དེ་ལྟ་བ་ཡིན་པར་ཁས་ལེན་ནུས་པའོ། །དེས་ན་ཐ་མལ་གྱི་སྣང་ཞེན་འགོགས་པ་ལ་བསྐྱེད་རིམ་གྱི་ཡུལ་གསུམ་གྱད་དུ་མ་གྱུར་གྱི་བར་གོམས་པས་དཔེར་ན་མི་སྡུག་པ་གོམས་པས་ས་གཞི་ཀེང་རུས་ཀྱི་སྣང་བར་འཆར་བ་བཞིན་དུ་གོམས་པས་ཐ་མལ་མ་དག་པའི་སྣང་བ་ལྡོག་ནུས་ཀྱང་ད་དུང་དེ་ལ་གྱ་ནོམ་ལྷར་ཞེན་གྱི་སྣང་བ་ཡོད་པ་དེས་འཆིང་བས་དེ་འགོགས་པ་ལ་རྫོགས་རིམ་གྱི་ལམ་གྱིས་རླུང་སེམས་ཀྱི་འཛིན་པ་དབུ་མའི་དབྱིངས་སུ་བཅིང་ནས་དཔེ་དང་དོན་གྱི་འོད་གསལ་རིམ་གྱིས་རང་རྒྱུད་ལ་འདྲེན་པའི་སྟོབས་ཀྱིས་རྗེས་ཐོབ་ན་ལྷར་ཞེན་གྱི་འཛིན་པ་དེ་ཡང་སྒྱུ་མ་ལྟར་འཆར་དགོས་པའི་གནད་རྣམས་ཟིན་པར་བྱས་ནས། ལོག་རྟོག་བདེན་པར་ཞེན་པ་དེ་དགག་པ་ལ། རྟོགས་པ་བཞིའི་གཏན་ཚིག་གིས་གྲུབ་མཐའ་མཉམ་རྫོགས་ཆེན་པོའི་རང་བཞིན་དུ་གཏན་འབེབ་ཅིང་ངེས་པར་བྱ་བའི་ཕྱིར། རྩ་རྒྱུད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་རླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས། དང་པོ་ནི། འདི་ལྟར་ལོག་པའི་རྟོག་པ་དང་དེའི་སྣང་བ་ཉིད་ཀྱང་འབྱུང་བཞིའི་འཕོ་འགྱུར་ནམ་མཁའི་ངང་ལས་མ་གཡོས་བཞིན་དུ་དོན་ལ་ཆོས་ཉིད་བརྟེན་པའི་གཞི་དང་བསྐྱེད་པའི་རྩ་བ་མེད་པ་ལས་གཞན་དུ་གཡོ་བ་ཅི་ཡང་མེད་པ་ནི། རྒྱུ་གཅིག་པའི་རྟགས་ཀྱིས་སྒྲུབ་པ་སྟེ། དེ་ཆོས་ཅན་དུ་བཀོད་ན། འདི་ལྟར་སྣང་བའི་འཁོར་འདས་ཀྱི་སྣང་བ་ཆོས་ཅན། རྒྱུ་སྐྱེ་བ་མེད་པ་སྟོང་པ་ཉིད་དུ་རོ་གཅིག་སྟེ། བདེན་པའི་གཅིག་དང་དུ་མ་བྲལ་བའི་ཕྱིར། དཔེར་ན་འཇིམ་པའི་བུམ་པ་བཞིན། ཞེས་སོ། །དེས་མཚོན་ཆོས་ཐམས་ཅད་བློས་བརྟགས་པ་ཙམ་ལས་བདེན་པའི་གཅིག་དང་དུ་མ་བྲལ་བའི་ཕྱིར་རོ། །གཉིས་པ་ཡིག་འབྲུའི་ཚུལ་གྱི་གཏན་ཚིགས་ནི། ཇི་ལྟར་ལོག་རྟོག་གི་རྒྱུན་རྣམ་པར་དག་པས་ཆོས་ཐམས་ཅད་སྟོང་ཉིད་ཀྱི་དབྱིངས་སུ་རྒྱུ་གཅིག་ན་སྣ་ཚོགས་སུ་སྣང་བ་མི་རིགས་སོ། །ཞེས། སྟོང་པ་ཉིད་རྟེན་འབྲེལ་རང་བཞིན་མེད་པའི་འཆར་ཚུལ་དུ་གོ་བ་རྙེད་པའི་ངོར། སྟོང་པ་ཉིད་དབྱིངས་ཡེ་ཤེས་གཉིས་སུ་མེད་པ་དེ། རྟེན་འབྲེལ་འགགས་པ་མེད་པའི་འཆར་ཚུལ་ལྷ་རྟོག་དབྱེར་མེད་པ་ལ་ངེས་པ་སྐྱེ་བའི་ཕྱིར། དེ་ཡང་སྐྱེ་མེད་མཚོན་པ་ཨའི་ཚུལ་ཏེ། གསུང་གི་རང་བཞིན་དེ་ཉིད་ལ་ཅིར་ཡང་མི་འགགས་པས་དབང་བསྒྱུར་བ་མཚོན་པ་ཨུའི་ཚུལ་ཏེ་སྐུའི་རང་བཞིན། དེ་གཉིས་མཚམས་སྦྱར་བ་གཉིས་མེད་དུ་རྟོག་པ་རིག་པ་ཡེ་ཤེས་ལྔར་གསལ་བ་མཚོན་བྱེད་ༀ་གྱི་ཚུལ་དུ་རྟོགས་པ་ཐུགས་ཀྱི་རང་བཞིན་ཏེ། དེ་དག་མཚོན་པ་ལ། ཆོས་ཅན་དུ་འགོད་ན། འདི་ལྟར་མ་དག་པའི་སྣང་བ་འདི་ཆོས་ཅན། ལྷ་རྟོག་དབྱེར་མེད་དུ་འཆར་དུ་རུང་སྟེ། ཡི་གེ་ཨ་ཨུ་ༀ་གསུམ་གྱིས་མཚོན་པ་རྟེན་འབྲེལ་རང་བཞིན་མེད་པ་སྐུ་གསུང་ཐུགས་སུ་འཆར་བའི་ཕྱིར། དཔེར་ན་སྐྱུ་རུ་རང་བཞིན་ས་བོན་འོ་མས་བྲན་པ་བཞིན་ནོ། །ཞེས་སོ། །སྔ་མ་དེ་གཉིས་ཀྱིས་ལམ་གྱི་གནད་ལྟ་བ་བདེན་པ་གཉིས་ལ་སྒྲོ་འདོགས་བཅད་ནས། གསུམ་པ་འདི་བདེན་གཉིས་དབྱེར་མེད་དུ་རྟོགས་པ་དེ་གོམ་ན་དེ་བཞིན་རྟོགས་ནས་གོམ་ན་མངོན་དུ་གྱུར་ནུས་སམ། ནུས་ན་ཕྱིར་མི་ལྡོག་གམ་སྙམ་ན། འདི་ལ་སྤྱིར་བློས་རྟོགས་ཚད་མངོན་དུ་གྱུར་དགོས་པ་མིན་ཀྱང་། འདིར་ནི་བདེན་པ་དབྱེར་མེད་སྐུ་ཐུགས་ཟུང་དུ་འཇུག་པ་ཉིད་རྟོགས་ནས་གོམ་ན་མངོན་དུ་འགྱུར་བར་མ་ཟད་སླར་མི་ལྡོག་པར་ངེས་པ་བསྐྱེད་པའི་སླད་དུ་ཆོས་ཅན་འགོད་ན། ཡེ་ཤེས་ཀྱི་རོལ་པ་ཆོས་ཅན། ཁྱོད་ཇི་ལྟར་རྟོགས་ནས་གོམས་ན་ཁྱོད་ཇི་ལྟ་བ་བཞིན་མངོན་དུ་འགྱུར་ནུས་པའི་ཕྱིར། དཔེར་ན་ཆབ་རོམ་ཆུར་ཞུ་བའི་ནུས་པའམ་བྱིན་བརླབས་ཡོད་པ་བཞིན། ཞེས་སོ། །བཞི་པ་གཏན་ཚིགས་དེ་རྣམས་ཚད་མ་གང་གིས་རྟོགས་ནུས་སྙམ་ན། མངོན་སུམ་བཞི་ལས་འཕགས་པའི་མངོན་སུམ་འདི་ཡུལ་གྱི་གནས་ཚུལ་ལ་ཞུགས་པའི་བློ་ཡིན་པའི་ཕྱིར་དང་། དེ་ལྟར་དམིགས་པའི་བློ་དེ་དྲི་མ་ཟད་བྱེད་ཡིན་པའི་ཕྱིར་དང་། དེ་དང་ལྡན་པའི་གང་ཟག་དེ་ཉེས་ཟད་ཡིན་པའི་ཕྱིར་ན་རྗེས་དཔག་ལོང་བ་བརྒྱུད་པ་ལྟ་བུར་མ་ཡིན་པར་གཞན་འཕགས་པའི་མངོན་སུམ་ལ་ཐུག་དགོས་པའི་ཕྱིར། ཡེ་ཤེས་ཀྱི་རོལ་པ་ཁྱོད་ཆོས་ཅན། དེ་ལྟར་རང་རིག་མངོན་སུམ་གྱི་ཡུལ་མེད་རང་གསལ་དུ་རྟོགས་ནུས་ཏེ། འཕགས་པའི་མངོན་སུམ་ཡིན་པའི་ཕྱིར། དཔེར་ན་ཆོས་དབྱིངས་མངོན་སུམ་མཐོང་བ་བཞིན་ཞེས། གཞན་གྱི་མངོན་སུམ་རྗེས་དཔག་གི་རྟགས་སུ་འགོད་པ་ཚད་མའི་སྤྱི་སྐད་ཡིན་ཏེ་ཡུལ་མེ་ཏོག་ལྡན་གྱི་བྲག་རྫོང་ན་ཆོས་ཅན་ཆུ་མེད་དེ། ལྷས་སྦྱིན་གྱིས་མ་མཐོང་བའི་ཕྱིར། ཞེས་པ་བཞིན་མངོན་སུམ་པའི་རྟགས་ཀྱིས་མངོན་སུམ་རྟོགས་པ་ཡོད་ཅེས་བཀོད་ན་ཆོག་གོ། །འདི་ལྟར་གཏན་ཚིགས་སྔགས་ཀྱི་བདེན་པ་གཉིས་ལ་ངེས་པ་ཐུན་མིན་དུ་འགྲོ་བར་བྱ་དགོས། སྒྱུ་འཕྲུལ་གྱི་མན་ངག་པདྨའི་མན་ངག་ལྟ་བའི་ཕྲེང་བ་ན་འདི་དག་ལས། གོང་མའི་མན་ངག་གི་ངོ་སྤྲོད་ཞིག་གསུང་མ་གནང་བས་འདི་མ་ཧཱ་ཡོ་གའི་ལྟ་བའི་གནད་ཤིན་ཏུ་གལ་ཆེ་བར་སྣང་བས་དེ་བཞིན་ངེས་དགོས་པ་རྣམས་ཀྱིས་གཞི་ཤེས་པའི་མཚན་ཉིད་ལྟ་བ་བསྟན་ནས། གཉིས་པ་ལམ་གྱི་རྣམ་པར་བཞག་པ་ལ་སྤྱི་དང་བྱེ་བྲག་གཉིས་ཀྱི། དང་པོ་རྒྱུད་ཀྱི་དངོས་པོ་བཅུ་ལས་དང་པོ་ལྟ་བ་ནི་གཞི་ཤེས་པར་བྱ་བ་དང་མར་འབྲེལ། འབྲས་བུ་ཐོབ་པར་བྱ་བ་དང་ཡར་འབྲེལ་བས། གཞིའི་གནས་ལུགས་རྟོགས་ཚུལ་དང་འབྲེལ་བས་གཞི་དང་མཉམ་དུ་བསྟན་ནས། ལམ་རྒྱུད་ཕྱི་མ་སྤྱོད་པ་དང་། དབང་དང་། དམ་ཚིག་དང་། མཆོད་པ་དང་། སྔགས་དང་། ཏིང་ངེ་འཛིན་དང་། སྒྲུབ་པ་དང་དགུའོ། །དེ་དག་ངེས་པར་བྱ་བ་ལ་རྒྱུད་ཀྱི་བཤད་པ་ཐོས་བསམ་གྱི་ཤེས་རབ་ཀྱིས་ངེས་པ་སྤྱིར་བཏང་ནས། འདིར་ནི་བྱེ་བྲག་ཏུ་གྱུར་པ་ཏིང་ངེ་འཛིན་ནམ་རྐྱེན་འཇུག་པའི་མཚན་ཉིད་བསྒོམ་པ་ལ་བསྐྱེད་རིམ་དང་རྫོགས་པའི་རིམ་པ་གཉིས་བསྒོམ་པ་རྒྱུད་འདིའི་ལམ་གྱི་གཞུང་ཤིང་ལྟ་བུ་ཡིན་པས། དང་པོ་ཐ་མལ་མ་དག་པའི་སྣང་ཞེན་གྱི་གཉེན་པོ་ཐབས་བསྐྱེད་པའི་རིམ་པ་རྒྱ་ཆེ་བའི་ཕྱོགས་ཇི་ལྟར་གོམ་པ་ནི་གཙོ་བོར་སྦྱོར་ལམ་དྲོད་ཐོབ་པ་ཚོགས་སྒྲུབ་དང་འབྲེལ་ནས་བཤད་པ་རྒྱུད་ཀྱི་དངོས་བསྟན་ཡིན་པའི་ཤུགས་ཀྱིས་འཕང་བ་གཙོ་བོ་ལས་དང་པོ་པའི་སྐབས་ནས་ཐབས་བསྐྱེད་པའི་རིམ་པ་ལ་ཇི་ལྟར་གོམ་པ་ལ་གསུམ། སྔོན་འགྲོ་དང་། དངོས་གཞི། རྗེས་ཀྱི་བྱ་བ་དང་གསུམ་ལས། དང་པོ་གང་དུ་སྒྲུབ་པའི་གནས་རྒྱུད་ལས་བཤད་པ་བཞིན་མཚན་ཉིད་ཚང་བ། གོང་མས་ཞབས་ཀྱིས་བཅག་པ། བཀྲ་ཤིས་ཤིང་བྱིན་རླབས་དང་ལྡན་པ་གཞི་བདག་དཀར་པོའི་ཕྱོགས་ལ་དགའ་བ། སྐྱེ་བོའི་འདུ་འཛིས་དབེན་པ་ཞིག་ནི་ངེས་པར་དགོས་པ་སྤྱིར་བཏང་ལ། བྱེ་བྲག་ཏུ་དུས་འཁོར་རྩ་རྒྱུད་ལས། གང་དུ་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་རྒུ་རྣམས། །བདེ་གནས་ས་འཛིན་རྩོད་པ་མེད། །དེར་ནི་རྣལ་འབྱོར་ཡོ་ག་བརྩམ། །ཞེས་དང་། སྒོས་ནི། བསྡུས་རྒྱུད་ལས། གང་དུ་སེམས་ནི་རབ་ཏུ་ཚིམ་པར་གྱུར་པ་དེར་ནི་སྒྲུབ་པ་བྱའོ་མི་ཡི་བདག་པོ་ཀྱེ། །ངེས་པར་འཇམ་པའི་མལ་ཆ་དག་དང་རྟེན་ལ་ཉེ་བར་འདུག་ལ་སྔར་བརྗོད་སྲུང་བ་བྱས་ནས་ནི། ཞེས་དང་། དགོངས་འདུས་ལས། ཡིད་མཐུན་བྱུང་ན་གྲོང་ཁྱེར་ཡིན་ཡང་རུང་། །ཞེས་རྒྱུན་གྱི་ཉམས་ལེན་གྱི་གནས་ལ་ངེས་པ་མེད་པར་ཡང་གསུངས་ལ། མདོར་ན་རང་གང་དུ་ཡིད་དགའ་ཞིང་ཉེར་འཚེ་མེད་པ་དེར་བསྒོམ་པར་གསུངས་ལ། དུས་ཚོད་ཡང་རྒྱུད་ལས། ཤིན་ཏུ་སྐར་མ་རྒྱལ་ལ་གཏད། །ཚེས་གྲངས་ཡར་གྱི་ངོ་ལ་བྱ། །གསུངས་པས་ལས་དང་པོ་པས་ཟླ་བ་ལྔ་པའི་ཚེས་བཞི་ནི་གུ་རུ་རིན་པོ་ཆེས་དགོངས་འདུས་ལས་གསུངས་པའི་གཟའ་ཕུར་བུ་སྐར་མ་རྒྱལ་འཛོམ་པའི་བཀྲ་ཤིས་པའི་དུས་ཡིན་པས། དེར་སྒྲུབ་པའི་དབུ་འཛུག་པ་ལ། གནས་ཁང་ཕྱག་དར་དང་ཞི་ཁྲོའི་གཏོར་མ་དཀར་དམར་གཉིས་དང་སྨན་རཀ་ཉེར་སྤྱོད་བཅས་དང་། འཛོམ་ན་རྒྱུད་མགོན་ལེགས་ལྡན་གྱི་གཏོར་མ། བརྟན་མ་རྒྱུན་བཞག་བཅས་དང་། སྒོ་དྲུང་དུ་ཐོ་དཀར་པོ་བརྩིགས། ཐོ་བྱང་ལ་ཕྱག་ན་རྡོ་རྗེའི་སྐུའམ་སྔགས་བྱང་། རྒྱལ་ཆེན་བཞིའི་སྔགས་བྱང་གཤམ་རྫོགས་པའི་བྱང་ཆུབ་སྒྲུབ་པ་ལ། སོགས་བྲིས་ཏེ་པྲ་རྩིས་མནན་པ་དང་། རང་གི་གདན་འོག་ཏུ་ས་དཀར་གྱི་གཡུང་དྲུང་གཡས་འཁྱིལ་དང་། ཀུ་ཤ་རྩེ་མོ་ནང་བསྟན་གྱིས་རྒྱ་གྲམ་གྱི་རྣམ་པར་བཀོད་པའི་སྟེང་། བསམ་གཏན་གྱི་འབོལ་ཆུང་མདུན་དམའ་བ་ཕྱི་ནས་ཅུང་ཟད་མཐོ་བར་བཏིང་ནས་ཕྱི་དྲོ་དབང་གི་དུས་སུ་སྒྲུབ་པའི་དབུ་འཛུག་དགོས་ལ། དེ་ཡང་རྒྱུན་བཤགས་སྔོན་དུ་སོང་ནས་སྒོ་དྲུང་དུ་ཕྱིན་ནས། རྒྱལ་ཆེན་གྱི་གཏོར་མ་བཞིའམ་གཅིག་གིས་འཐུས་པས། དེ་དང་ཉེར་སྤྱོད་བཅས་བཤམས་པ་བྱིན་གྱིས་བརླབས་ནས། གང་དག་འདིར་གནས་སོགས་དང་། དེའི་མཐར་རྒྱལ་ཆེན་བཞིའི་སྔགས་ལ་ཉེར་སྤྱོད་དང་གཏོར་མའི་སྔགས་བཏགས་པས་ཐོ་འཛུག །དེ་ཡང་རྒྱལ་ཆེན་ཡུལ་འཁོར་སྲུང་དྲི་ཟའི་དཔུང་དང་བཅས་པས་ཤར་ནས་ལྷོའི་བར་དུ་ཕྲེང་བས་སྦྲེལ་བ་ཞིག་སོགས་བཤད་རྒྱུ་ཡོད་ཀྱང་། ཞལ་རྒྱུན་ལ། རྒྱལ་པོ་ཆེན་པོ་རྣམས་སྔོན་གྱི་དམ་ཚིག་གི་དབང་གིས་སྒྲུབ་པ་པོ་སྲུང་བ་ཆོས་ཉིད་ཡིན་པས། ཕྱོགས་སོ་སོ་ན་རྒྱལ་ཆེན་བཞི་རང་རང་གི་དཔུང་དང་བཅས་པ་དམག་གི་ཕྲུ་མ་བཞིན་བཞུགས་པར་བསམ་པས་ཆོག་ཅེས་གསུངས། དེ་ནས་བགེགས་གཏོར་བཏང་བ་ལ་དཀྱིལ་ཆོག་གི་ནང་ལྟར་རང་ཉིད་ཞེ་སྡང་རྡོ་རྗེའི་ང་རྒྱལ་ལ་གནས་པས་གཏོར་མ་བྱིན་གྱིས་བརླབས་ཏེ། རང་གི་ཚེ་རབས་ཀྱི་ལན་ཆགས་པའི་བགེགས་ཀྱི་བདག་པོ་དང་བདག་མོ་རྣམས་ལ་འདོད་ཡོན་བསམ་གྱིས་མི་ཁྱབ་པའི་དངོས་པོར་ནམ་མཁའ་མཛོད་ཀྱི་སྔགས་དང་ཕྱག་རྒྱས་བསྔོས་ཏེ། བདག་གི་བྱང་ཆུབ་སྒྲུབ་པའི་གེགས་དང་བར་ཆད་མ་བཏང་བར་བདེན་པའི་ཚིག་གིས་དཀྲོལ། གལ་ཏེ་མི་ཉན་ཅིང་གདུག་པའི་སེམས་ཀྱིས་འདུག་ན་ཁྲོ་བོ་འཆོལ་བའི་ཚོགས་སྤྲོས་ཏེ་ཧཱུྃ་ཧཱུྃ་ཧཱུྃ་བི་ཤྭ་བཛྲ་སོགས་དང་ཧཱུྃ་བཞིའི་སྔགས་ཐུན་གྱིས་གཟིར་ཞིང་སྒྲུབ་པའི་གནས་ཀྱི་ཕ་མཐར་བསྐྲད། ཧཱུྃ་ཞེས་བརྗོད་པས་སོགས་ནས་མཚོན་ཆ་ལྔའི་སྲུང་བའི་འཁོར་ལོ་ཕྱི་ནང་རིམ་པ་ལྔ་པ་བྱ་སྒོང་ལྟར་སྲུབ་མེད་པ་ཕྱི་རོལ་ནས་ཡེ་ཤེས་ཀྱི་མེ་དང་མེ་དཔུང་གི་རང་བཞིན་ཁྲོ་ཆུང་གི་ཚྭ་ཚྭ་འཕྲོ་བ་རང་གི་གནས་ཀྱི་གནམ་ས་འབྱར་བར་སྣང་བའི་ནང་ཚུན་ཆད་དུ་བསྒོམ། ནམ་མཁའི་མཐའ་ཚུན་ཆད་ཟེར་བ་དེ་མ་བརྟགས་པའི་གཏམ་ཡིན། དེ་ལ་དགོས་པ་ལྷག་པོ་མེད། འདི་དང་རྒྱལ་ཆེན་ཐོ་འཛུག་གཉིས་ཀྱི་སྐབས་དམིགས་གསལ་ཡོད་ན་དམིགས་རྡིལ་བཞག །འོན་ཀྱང་མཚམས་མ་གྲོལ་བར་དུ་སུ་འཇུག་མ་དགོས་ན་ཤིན་ཏུ་ལེགས། སྲུང་འཁོར་འདི་མཚམས་མ་གྲོལ་བར་བསྡུ་རིམ་གྱི་དུས་སུ་མི་བསྡུ་བར་ཐུན་རེ་རེ་བཞིན་གསལ་འདེབས་པ་དང་། དགོང་མོ་ཉལ་ཁའི་དུས་སུ་ཆེར་གསལ་བཏབ་སྟེ་ཉལ་བར་བྱ་དགོས་པ་དཔལ་སྤྲུལ་རིན་པོ་ཆེའི་གསུང་རྒྱུན་ཡིན། དེ་ནས་བཤགས་པ་ནས་བསྙེན་པའི་བར་ནར་འདེད་ཀྱིས་བསྙེན་པ་སྟོང་རྩ་ཙམ་སོང་བ་དང་། སྲོད་ཀྱི་སྐབས་དེ་ཉིད་ལ་ཚོགས་མཆོད་རྒྱས་པ་ཞིག་བྱས་ཏེ་འཇུག་ཆོག་རྣམས་རྫོགས་པར་བྱས་ཏེ་ཉལ། ཕྱི་ཉིན་ཐོ་རེང་གི་དུས་སུ་མལ་ནས་ལྡང་སྟེ་གོས་ཚགས་ལེགས་པར་བསྒོས་ཏེ་སྟན་ལ་འདུག་ནས། རང་རང་གི་ལུགས་ཀྱི་སྔོན་འགྲོ་ཐུན་མོང་དང་ཐུན་མོང་མ་ཡིན་པས་རྒྱུད་ལེགས་པར་སྦྱང་། འབུམ་ལྔ་ཙམ་ཚང་བར་བྱེད་ན་འདིར་སྦྱང་། མིན་ཀྱང་སྔོན་འགྲོ་བློ་ལྡོག་བཞིས་རྒྱུད་འཁུལ་ནུས་པ་ཞིག་ཁག་ཆེ་བས། དེ་ཉིན་བདུན་ནམ། བདུན་ཕྲག་གསུམ་ལ་ལེགས་པར་བློ་སྦྱང་། དེ་བར་ལས་བྱང་བཏང་མི་དགོས། སྲུང་བའི་འཁོར་ལོ་དེ་ཡིད་ཀྱིས་གསལ་གདབ། ཁྱད་པར་དངོས་གྲུབ་ཀྱི་གེགས་སྦྱང་ནས་རྒྱུད་སྣོད་རུང་དུ་བྱ་བ་ལ། ཡེ་ཤེས་སྐུ་མཆོག་གི་བཤགས་པ་དང་འབྲེལ་བའི་ཕྱག་དང་བཤགས་པ་ཅི་ནུས་སུ་བསགས། དེ་ལྟར་སྔོན་དུ་འགྲོ་བའི་རིམ་པས་སྤྱིར་རྒྱུད་སྦྱང་པས། ཕན་ཡོན་བགེགས་དང་བར་ཆད་ཞི་བ་དང་། ལྷ་མཉེས་པས་རྒྱུད་བྱིན་གྱིས་བརླབ་པར་མྱུར་བ་དང་། དངོས་གཞིའི་ཏིང་ངེ་འཛིན་ལ་བློ་གོམས་སླ་བ་དང་། ཚོགས་གཉིས་དང་ཁྱད་པར་བསོད་ནམས་ཀྱི་ཚོགས་རྒྱ་ཆེན་པོ་གསོག་པ་དང་། གཞི་ལམ་འབྲས་གསུམ་གྱི་རྟེན་འབྲེལ་ཁྱད་པར་ཅན་འགྲིམས་ཤིང་རྒྱུད་སྨིན་པ་དང་། ཚེ་རབས་ཐམས་ཅད་ལྷག་པའི་ལྷས་རྗེས་སུ་འཛིན། གནས་སྐབས་སུ་ལས་དང་དངོས་གྲུབ་ཀྱི་ཁྱད་པར་རབ་འབྱམས་ལ་དབང་བ་སོགས་དགོས་པ་དཔག་ཏུ་མེད་པ་ཡོད་པས་སྔོན་དུ་བྱ་བ་རྣམས་གལ་ཆུང་དང་དོན་མེད་མི་བསམ་པར་གནད་དུ་སྨིན་པར་བྱ་དགོས་པ་ཡིན་ནོ། །གཉིས་པ་དངོས་གཞི་སྒྲུབ་པ་ལ་དངོས་སུ་འཇུག་པ་ལ་བསྐྱེད་རྫོགས་གཉིས་ཀྱི་དང་པོ་ལ། ཐུན་རྣམས་ཀྱི་སྔ་དྲོའི་ཐུན་ལ་ལས་བྱང་རྒྱས་པ་ཞིག་བཏང་། ཕྱི་མ་རྣམས་ལ་ཚོགས་བསགས་དང་མཚོན་ཆ་ལྔའི་སྲུང་འཁོར་སྔགས་ཙམ་དང་། ཉེར་སྤྱོད་སྨན་རག་གཏོར་མ་བཅས་སྔགས་ཙམ་དང་། དངོས་གཞི་དེ་བཞིན་ཉིད་ཀྱི་ཏིང་འཛིན་ནས་ལྷ་བསྐྱེད་ཡོངས་སུ་རྫོགས་པའི་བར་རྣམས་ནར་འདེད་ཀྱིས་བཏང་། དབང་བསྐུར་བྱིན་རླབས་གཉིས་སྔགས་ཙམ་གྱིས་འཐུས་ལ། སྤྱན་འདྲེན་བཞུགས་གསོལ་གཉིས་གཞུང་གི་ཚིག་སྔགས་བཅས་པ། ཀུན་བཟང་བཞི་བསྣོལ་སྨན་རག་གཏོར་མ་རྣམས་སྔགས་ཙམ་དང་། བསྟོད་པ་རྣམ་དག་དྲན་པ་ཡིན་པས་ག ཞུང་བཞིན་དུ་བཏང་ནས། གཟོད་དེ་བཞིན་ཉིད་ཀྱི་ཏིང་ངེ་འཛིན་ནས་རིམ་པར་སེམས་དམིགས་པ་ལ་བསླབ་ནས་ཐུན་གྱི་སུམ་ཆ་གཉིས་དང་། ཆ་ཕྱི་མ་ལ་བསྙེན་པ་བཟླ་བར་བྱའོ། །དགོང་ཐུན་གྱི་མཇུག་ཏུ་ལེགས་ལྡན་གྱི་གཏོར་བསྔོ་ཡང་བྱའོ། །འདི་ནི་ལམ་ངེས་རྫོགས་ཀྱི་དབང་དུ་བྱ་བ་ཡིན་པས་བཀའ་གཏེར་གཉིས་ཀར་ཆོ་གའི་འགྲོས་འདི་སྦྱར་ཆོག་པས། དང་པོ་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་ནི། གཞུང་གི། དངོས་རྣམས་ཉིད་ན་དངོས་མེད་པ། །སོགས་ཚིགས་བཅད་གཅིག་བརྗོད་ནས། འདི་བསྒོམ་ཚུལ་ལ་གཉིས། རིག་པ་སྤྱི་བླུགས་སུ་འཇོག་པ་དང་། དཔྱད་པའི་རྗེས་ལ་འཇོག་པ་གཉིས་ཞེས་ཞལ་རྒྱུན་དུ་འབྱུང་བ་བཞིན། དང་པོ་ནི། འདི་ལྟར་སྣང་བའི་ཆོས་ཐམས་ཅད་མི་དམིགས་ཤིང་སྤྲོས་པ་དང་བྲལ་བའི་སྟོང་པ་ཉིད་དུ་སྔར་གྱི་གཏན་ཚིགས་ཀྱིས་ངེས་པས། ཡུལ་སྐྱེ་མེད་ཀྱི་རྣམ་པ་ལ་བློས་རྩིས་མེད་དུ་འཇོག་པའོ། །གཉིས་པ་ནི། རྒྱུད་ལས་གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་རྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །ཞེས་པས། རང་གི་སེམས་ལ་ཡོད་པའི་རྒྱུ་མཚན་ལ་ཡང་དཔྱད་ན་གང་ཡང་མི་རྙེད་པས་དབྱིབས་དང་ཁ་དོག་ཕོ་མོ་མ་ནིང་མཚན་མེད་དང་། རྒྱལ་རིགས་སོགས་རིགས་བརྒྱུད། སྐྱེ་འགགས་གནས་གསུམ་དུ་བརྟགས་ཀྱང་གང་ཡང་གྲུབ་པ་མེད་པར། རྒྱུད་ལས། ཆོས་རྣམས་མིང་དུ་བཏགས་པ་ཙམ། །ཞེས་གསུངས་པས། མིང་དང་བརྡས་ཕར་བཏགས་པ་ཙམ་མ་གཏོགས། རང་བཞིན་གྱིས་བདེན་པར་གྲུབ་པ་མེད་ངེས་སྙམ་པའི་ངེས་པ་རྙེད་ངེས་སུ་དཔྱད་ནས། དེ་ནས་སྟོང་ཉིད་ཀྱི་དོན་སྤྱི་ལ་སེམས་གྲིམ་ལྷོད་སྙོམས་པར་རྩེ་གཅིག་ཏུ་བཞག །ཤེས་པ་ཁོང་ལྷོད་ལ་བཞག །འཛིན་སྟོང་གི་ངར་ཆ་མ་ལྷོད་པར་བཞག །ངར་ཆ་ཤོར་ན་ཡང་སེམས་གྲིམ་དུ་བཏང་། ཡང་རྣམ་རྟོག་འཚུབས་ནས་དམིགས་པ་མི་གསལ་ན་ཅུང་ཟད་ལྷོད་ལ་ཁོང་སྒྲིམ། རྟོག་པ་ཆེར་འཕྲོས་ན་སྒོམ་འཕྲོ་བཅད་ལ་དེ་མ་ཐག་དམིགས་པ་གསལ་བཏབ་པ་དེ་ལ་སེམས་གཅིག་ཏུ་གཏད། ཡང་དམིགས་པ་ཡིད་ཡུལ་ནས་བརྗེད་ནས་སྒོམ་རྒྱུ་བློ་ཡུལ་ན་མེད་པར་རྣམ་རྟོག་ཕྲ་མོ་ཤར་ནས་འདུག་ན་འོག་འགྱུ་བྱ་བ་ཡིན་པས་དེའི་འཕྲོ་རྦད་ཀྱིས་བཅད། རྣམ་རྟོག་རྒྱ་འབྱམས་སུ་སོང་ན་སྐྱོན་ཆེ་བས་སླར་དེ་འདྲ་མི་འབྱུང་བར་བྱེད་སྙམ་པའི་ཞེ་བཅད་དྲག་པོ་བྱ། ཁམས་ཉོག་པ་དང་གཉིད་བྲོ་བ་སོགས་བྱུང་ན། གདོང་ལ་ཆུ་ལྕག་བྲབ་པ་དང་ཁྲུས་བྱ། གོས་སྲབ་ཏུ་གཏོང་། མཐོ་ཞིང་བསིལ་སར་སྡོད། ཤེས་པ་ཡེར་ན་ཟས་བཅུད་ཅན་བརྟེན། གོས་དྲོ་བར་བྱ། གནས་མུན་པ་ཅན་དང་དམའ་སར་སྡོད། དེ་དག་གིས་མ་སེལ་ན་རེ་ཞིག་བསྒོམ་འཕྲོ་བཅད་ལ་ངལ་གསོ། བསྒོམ་མི་ནུས་པའི་ལེ་ལོ་སྐྱེ་ན། མ་བརྩོན་པའི་ཉེས་དམིགས་དང་། བརྩོན་འགྲུས་ཀྱི་ཕན་ཡོན་དམ་པ་གོང་མའི་རྣམ་ཐར་རྣམས་དྲན། འདོད་ཡོན་གྱིས་སེམས་གཡེང་ན། འདོད་ཡོན་ལ་ཆགས་པ་དང་། འབྲས་བུ་འཁོར་བའི་ཉེས་དམིགས་དྲན་ནས་ཞེན་འཁྲིས་རྦད་ཀྱིས་བཅད། དམིགས་པའི་གསལ་སྣང་ཁྱད་པར་ཅན་སྐྱེ་ན་ཅུང་བཟད་ངལ་གསོ། ཡང་འཕྲོ་འཐུད་དེ་བསྒོམ། སྐབས་རེར་གསལ་མི་ཐེབས་པའི་ཨུ་ཐུག་བྱུང་ན། ད་དུང་ནན་ཏན་མི་བྱེད་པར་སྒོམ་འཕྲོ་བཅད་ལ་རེ་ཞིག་ངལ་གསོ། ཡང་བསྒོམ་ན་སྒོམས་ལ་མྱོང་བའི་སྣེ་ཟིན་ནས་འོང་། ཏིང་ངེ་འཛིན་བསྒོམ་དུས་དང་། ལྷ་བསྒོམ་པའི་སྐབས་གང་ལ་སྔ་མ་ལ་བརྟན་པ་མ་ཐོབ་པར་དམིགས་པ་གཞན་དང་གཞན་ལ་སྤོ་ནས་བསྒོམ་པ་ནི་ཏིང་ངེ་འཛིན་གྱི་སྐྱོན་ཤིན་ཏུ་ཆེ་བ་ཡིན་པས། བློ་གཞན་དུ་མི་འགྲོ་བར་དམིགས་པ་དེ་ཁོ་ན་ལ་བསྒྲིམ་པ་དེ་བསྒོམ་དགོས། འདི་ནི་ཐོག་མཐའ་བར་གསུམ་གྱི་སེམས་འཛིན་ཐམས་ཅད་ལ་ཤིན་ཏུ་གལ་ཆེ་བས། སྒོམ་ཚུལ་དེ་ཡན་ལ་བཤད་ཚུལ་ཆོས་རྗེ་མི་ཕམ་གྱིས་སྤྱི་དོན་འོད་གསལ་སྙིང་པོ་ལས་ཉེས་པ་ལྔ་སྤང་། འདུ་བྱེད་བརྒྱད་བརྟེན། སེམས་གནས་པའི་ཐབས་དགུའི་སྒོ་ནས་བསྒོམ་དགོས་གསུངས་པ་ཤིན་ཏུ་ཟབ་པའི་མན་ངག་ཏུ་སྣང་བས། དེ་ལྟར་གོམ་ན་རིམ་གྱིས་སེམས་ཇེ་གནས་སུ་འོང་བའི་སྟེང་ནས་ཉམས་ལྔ་རིམ་པར་འབྱུང་བས་དེའི་ཚུལ་ནི། དེ་ལ་བསམ་གཏན་མི་འགྲུབ་པའི་ཉེས་པ་ལྔ་ནི། ལེ་ལོ་དང་། གདམས་ངག་བརྗེད་པ་དང་། བྱིང་རྒོད་དང་། གཉེན་པོ་འདུ་མི་བྱེད་པ་དང་། བྱིང་རྒོད་ཞི་ན་ཡང་ཧ་ཅང་རྩོལ་བས་འདུ་བྱེད་པའོ། །དེ་ལ་དང་པོ་གཉིས་ཀྱིས་ཏིང་ངེ་འཛིན་ལ་འཇུག་པའི་སྦྱོར་བ་ལ་གེགས་བྱེད། གསུམ་པས་དངོས་གཞི་དང་། ཐ་མ་གཉིས་ཀྱིས་ཏིང་ངེ་འཛིན་གོང་འཕེལ་དུ་འགྱུར་བ་ལ་གེགས་བྱེད་པས་དེ་དག་སྤོང་བའི་གཉེན་པོ་བརྒྱད་ནི། དད་པ། འདུན་པ། རྩོལ་པ། ཤིན་སྦྱང་། དྲན་པ། ཤེས་བཞིན། སེམས་པ། སེམས་འདུ་བྱེད་བཏང་སྙོམས་ཏེ། དང་པོ་བཞིས་ལེ་ལོ་སྤོང་སྟེ། ཏིང་ངེ་འཛིན་ཐོབ་པ་ལ་དད་པས་འདུན་ཅིང་། དོན་དུ་གཉེར་ནས་རྩོལ་བ་བསྐྱེད་པས་ཤིན་ཏུ་སྦྱང་བ་ཐོབ་སྟེ། ལེ་ལོ་སྤངས། གདམས་ངག་མི་བརྗེད་པའི་དྲན་པ་དང་། བྱིང་རྒོད་བྱུང་ན་རྟོག་པ་སྤོང་བའི་གཉེན་པོ་འདུ་བྱེད་སེམས་པ་དང་། བྱིང་རྒོད་ཞི་ཚེ་རྣམ་རྟོག་འདུ་མི་བྱེད་པའི་བཏང་སྙོམས་སུ་གནས་པ་རྣམས་ནི་གདམས་ངག་བརྗེད་པ་ལ་སོགས་པའི་གཉེན་པོ་རིམ་པ་བཞིན་ནོ། །ཚུལ་དེ་ལྟ་བུས་ཏིང་ངེ་འཛིན་སྒྲུབ་པ་སྟོབས་དྲུག་དང་ལྡན་དགོས་ལ། དེ་ཡང་ཐོས་པ། བསམ་པ། དྲན་པ། ཤེས་བཞིན། བརྩོན་འགྲུས། ཡོངས་སུ་འདྲེས་པའི་སྟོབས་སོ། །ཡིད་ལ་བྱེད་པ་བཞིའི་གནས་སྐབས་ཅན་གྱི་སེམས་གནས་པའི་ཐབས་དགུ་རིམ་པར་སྒྲུབ་དགོས་པས། ཡིད་བྱེད་བཞི་ནི། བསྒྲུབ་སྟེ་འཇུག་པའི་ཡིད་བྱེད། ཆད་ཅིང་འཇུག་པའི་ཡིད་བྱེད། ཆད་པ་མེད་པར་འཇུག་པའི་ཡིད་བྱེད། རྩོལ་བ་མེད་པར་འཇུག་པའི་ཡིད་བྱེད་བཞིའོ། །དེ་ལྟར་སེམས་གནས་པའི་ཐབས་དགུའི་སྒོ་ནས་འཇོག་པ་ལ། མདོ་ལས། འཇོག་པར་བྱེད། བསྡུས་ཏེ་འཇོག་པར་བྱེད། བརླན་ཏེ་འཇོག་པར་བྱེད། ཉེ་བར་འཇོག་པར་བྱེད། དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད། ཏིང་ངེ་འཛིན་དུ་བྱེད། ཅེས་གསུངས་པས། དེ་ཡང་ཐོས་པས་འཇོག །བསམ་པས་རྒྱུད་དུ་འཇོག །དྲན་པས་དམིགས་པ་ལ་སླར་བརླན་ཏེ་འཇོག་པ་དང་ཉེ་བར་འཇོག །ཤེས་བཞིན་གྱིས་དུལ་བ་དང་། ཞི་བར་བྱེད་དེ་འཇོག །བརྩོན་འགྲུས་ཀྱི་རྣམ་པར་ཞི་བས་རྩེ་གཅིག་ཏུ་ཡོངས་སུ་འདྲིས་པས་སེམས་བྱིང་རྒོད་དང་བྲལ་བའི་མཉམ་པར་འཇོག་པ་དང་འགྲུབ་པས་དེ་ཡང་ཡིད་ལ་བྱེད་པ་བཞིའི་སྒོ་ནས། སེམས་དང་པོ་གཉིས་ཀྱི་སྐབས་ཡིད་བྱེད་དང་པོ་བསྒྲིམ་སྟེ་འཇུག་པའི་ཡིད་བྱེད་གཙོ་བོར་དགོས་ལ། གསུམ་པ་ནས་བདུན་པའི་བར་དུ་ཆད་ཅིང་འཇུག་པའི་ཡིད་བྱེད་དགོས་ལ། བརྒྱད་པའི་དུས་ན་ཆད་པ་མེད་པར་འཇུག་པའི་ཡིད་བྱེད་དགོས། དགུ་པའི་དུས་ན་རྩོལ་བ་མེད་པར་འཇུག་པའི་ཡིད་ལ་བྱེད་པ་དགོས་སོ། །དེ་ལྟར་གནས་སྐབས་དགུ་པོ་དེ་དག་ཀྱང་གཡོ་བའི་ཉམས་རི་གཟར་གྱི་འབབ་ཆུ་ལྟ་བུ་དང་། ཐོབ་པའི་ཉམས་རོང་ཁུང་དོག་མོའི་ཆུ་ལྟ་བུ་དང་། གོམས་པའི་ཉམས་ཆུ་ཀླུང་ལྟ་བུ་དང་། བརྟན་པའི་ཉམས་རྒྱ་མཚོ་རླབས་དང་བྲལ་བ་ལྟ་བུ་དང་། མཐར་ཕྱིན་པའི་ཉམས་རི་བོ་ལྟ་བུའི་ཉམ་ལྔ་རིམ་པར་སྐྱེ་བས། ད་ནི་ཚུལ་དེ་དག་གནད་མཐུན་པར་ཉམས་སུ་ལེན་པའི་མན་ངག་ཏུ་བསྟན་ན། ཏིང་ངེ་འཛིན་མ་ཐོབ་པའི་སྐྱོན་དང་། ཐོབ་པའི་ཡོན་ཏན་དང་། སེམས་བཞག་ཐབས་ཀྱི་གདམས་ངག་ཐོབ་པའི་སྟོབས་ཀྱིས་ཏིང་ངེ་འཛིན་སྒོམ་པ་ལ་དད་འདུན་བསྐྱེད་ལ་ཤིན་ཏུ་བསྒྲིམ་པའི་རྩོལ་བས་ལེ་ལོ་སོགས་སྤང་སྟེ་དམིགས་པའི་ཡུལ། གང་དམིགས་སུ་བསལ་བ་དེའི་དོན་ལ་བཞག་པར་བྱ་བ་ནི་ཐབས་དང་པོའོ། །དེའི་ཚེ་ན་སྐད་ཅིག་ཀྱང་མི་སྡོད་པར་རྣམ་རྟོག་གློག་བཞིན་གཡོ་ན་ཡང་། རྩོལ་བ་བསྐྱེད་དེ་ཡང་ཡང་སྦྱང་། རྣམ་རྟོག་མང་དུ་སོང་བ་འདྲ་ན་སྐྱོན་མིན་ཏེ། སྔར་སེམས་ལ་བལྟ་མ་མྱོང་བས། ད་རྣམ་རྟོག་ངོས་ཟིན་པ་ཡིན་གོང་མ་དག་གིས་ཞལ་ནས། རྣམ་རྟོག་མང་དུ་སོང་བ་འདྲ་ན་སེམས་སྤྲོ་ཤི་ནས་ང་ལ་སྒོམ་མི་སྐྱེ་སྙམ་པ་བྱུང་ན། དེ་དུས་སེམས་སྤྲོ་བ་བསྐྱེད་དགོས་ཏེ། སྒོམ་སྐྱེ་བའི་སྔ་རྟགས་ཡིན་གསུངས་པ་བཞིན་ཤེས་དགོས་སོ། །ཏིང་འཛིན་གྱི་གདམས་ངག་ཐོས་པའི་དོན་བསམ་པའི་སྟོབས་ཀྱིས་དམིགས་པ་སྔ་མ་ལ་གནས་པའི་རྒྱུན་མཐུད་ཅི་ནུས་སུ་བྱ་བ་ཐབས་གཉིས་པའོ། །ཐབས་དང་པོ་འདི་གཉིས་ཀྱི་དུས་ན་གནས་པའི་རྒྱུན་འབྱུང་དཀའ་ཡང་། བསྒྲིམ་ཞིང་བསྒྲིམ་པའི་ཡིད་བྱེད་ཀྱི་རྒྱུན་དེ་ལ་བཞག་པར་བྱའོ། །སེམས་སྐར་མདའ་བཞིན་དུ་གཡོ་བ་དེ་དམིགས་པ་སྔ་མའི་རྒྱུན་ལས་གཞན་དུ་གཡེང་བའི་ཚེ། ཆུ་དྲག་པོ་ལམ་སྲོལ་དུ་འཇུག་པ་ལྟར། དྲན་པས་སླར་ཡང་རང་ཤུལ་དུ་བླན་ཏེ་བཞག་པ་ནི་ཐབས་གསུམ་པའོ། །བཞག་ཐབས་དང་པོ་འདི་གསུམ་གྱི་དུས་ན་ཤོག་སྐྱ་རླུང་གིས་ཁྱེར་བའམ། རི་གཟར་གྱི་ཆུ་བཞིན་དུ་གཡོ་བའི་ཉམས་ཀྱི་སྐབས་ཡིན་པས། རྣམ་རྟོག་ཤུགས་དྲག་དེ་གནས་པའི་གོ་སྐབས་རྙེད་དཀའ་བས། དཔེར་ན་ཆུ་དྲག་པོ་ལ་ཆུ་ལོན་བརྩིགས་པ་ལྟར་སེམས་མི་ཞུམ་པར་འབད་པར་བྱའོ། །ཤིན་ཏུ་གདུལ་བར་དཀའ་བ་སེམས་ཀྱི་རྟ་རྒོད་དེ། དྲན་པའི་ཐག་པས་དམ་དུ་བཅིང་ཞིང་། ལྷོད་པའི་འདུ་བྱེད་བཏང་སྙོམས་ཀྱི་ར་བར་བཅུག་ལ། རྩོལ་བའི་སྲས་ཀྱིས་ཁ་ལོ་དྲང་བ་བཞིན་གཅེས་སོ། །ཡང་སྔ་མ་ལས་དྲན་པ་ཅུང་ཟད་སྟོབས་སུ་གྱུར་པའི་ཚེ་ན་དམིགས་ཡུལ་དེ་ཉིད་ལ་སེམས་ཅུང་ཟད་གནས་པར་རྩོམ་ན། རྩེ་གཅིག་པའི་ཚུལ་གྱིས་སེམས་ནང་དུ་བསྡུས་ནས་དམིགས་པ་ཁོ་ན་ལ་ཉེ་བར་འཇོག་པ་ནི་བཞི་པའོ། །དཔེར་ན་བྱ་རྒོད་གཟན་ལ་འཁོར་བ་བཞིན། བློ་དམིགས་པ་ལ་ཅུང་ཟད་འཁོར་བ་ཡིན་པས་དྲན་པའི་རྒྱུན་བརྟན་པར་བྱ་བ་གལ་ཆེའོ། །དེ་ནས་ཏིང་ངེ་འཛིན་ལ་ངང་གིས་སྤྲོ་བ་ཅུང་ཟད་སྐྱེ་ནས། བུང་བ་གནས་གཅིག་ཏུ་ཡུན་རིང་མི་སྡོད་པར་མྱུར་དུ་གཡོ་བཞིན་པར་རྩི་བཅུད་འཐུང་བ་ལྟར་བཞག་པ་ལ་མོས་པ་སྐྱེ་བའི་ཚེ་ན་སྔ་མ་ལྟ་བུའི་རྣམ་རྟོག་གི་གཡོ་བ་མི་བཟད་པ་རྣམས་ཅུང་ཟད་དུ་དུལ་བ་ཐོབ་པ་ནི་ལྔ་པའོ། །ཉེར་འཇོག་དང་དུལ་བ་འདི་གཉིས་གནས་སྐབས་དང་པོ་རྣམས་ལས་ཅུང་ཟད་བཞག་པ་དེ་ཡིན་པས་ཐོབ་པའི་ཉམས་ཞེས་བྱ་སྟེ། ཏིང་ངེ་འཛིན་སྐྱེ་བའི་མགོ་དང་པོར་རྩོམ་པའམ་དྲོད་ཅུང་ཟད་ཐོབ་པ་ཡིན་ནའང་། དཔེ་རོང་ཁུང་གི་ཆུ་ལྟར་རྣམ་རྟོག་ཕྲ་བ་མང་པོ་བྲེལ་བཞིན་འཚུབ་པའི་རྒྱུན་འགྲིགས་པ་ཡོད་དོ། །དེ་ལྟར་ནའང་རི་གཟར་གྱི་ཆུ་ལས་རོང་ཁུང་ཆུ་ཅུང་ཟད་དལ་བ་ལ་དཔེར་བྱས་པའོ། །དུལ་བ་འདིའི་སྐབས་ན། བུམ་པར་ཆུད་པའི་བུང་བ་མ་བཏང་བར་གཞན་དུ་འགྲོ་དབང་མེད་པ་བཞིན། དམིགས་པ་ལ་སེམས་གཏད་པའི་ཚེ། དམིགས་པ་ཡིད་ཡུལ་ནས་མི་འབོར་ཀྱང་། རྟོག་པ་གཡོ་བ་རྒྱུན་མི་ཆད་པ་ཡིན་ལ། དེའི་དུས་ན་དམིགས་པ་དེ་ཡི་ངང་དུ་མི་བསྒུལ་བར་ཤེས་བཞིན་གནས་པ་གཅེས་སོ། །དེ་ལྟར་ཤེས་བཞིན་དུ་དེར་གནས་ཚེ་བྱིང་རྒོད་བྱུང་ན་དེ་བསལ་ཕྱིར་སེམས་པས་སོ་སོའི་གཉེན་པོ་ཚུལ་བཞིན་འདུ་བྱེད་པའི་སྒོ་ནས་གེགས་སུ་གྱུར་པའི་རྣམ་རྟོག་སྣ་ཚོགས་རང་བཞིན་དུ་འདུ་བ་དེ་ཞི་བར་བྱ་བ་ནི་དྲུག་པའོ། །དེ་ལྟར་ཞི་བར་གྱུར་ན་བྱིང་རྒོད་ཀྱི་སྐྱོན་མེད་པའི་ཆུ་རྙོགས་མ་དྭངས་པ་ལྟར། དེ་མི་བསྒུལ་བར་བཞག་སྟེ། སྐྱེས་བུ་ངལ་གསོ་བ་ལྟར་བཏང་སྙོམས་ཀྱི་ངང་ལ་ཤེས་བཞིན་དུ་གནས་པར་བྱའོ། །རྣམ་རྟོག་ཅུང་ཟད་ཞི་བའི་ཚུལ་དེ་གོང་འཕེལ་དུ་གྱུར་པ་ལས། རྣམ་རྟོག་རྣམས་རྒྱས་བྱེད་ཀྱི་གནས་སུ་གྱུར་པ་ཉེ་བའི་ཉོན་མོངས་པ་རྣམས་ཀྱང་། ཆུ་རྙོགས་རིམ་གྱིས་དྭངས་པ་བཞིན་ཉེ་བར་ཞི་བའི་ཚུལ་གྱིས་གཡེང་བ་སྤོང་བ་ནི་བདུན་པའོ། །གཡེང་བའི་སྐྱོན་རྣམས་ཐག་བསྲིང་བར་གྱུར་པ་ཞི་བ་དང་ཉེར་ཞི་གཉིས་པོ་འདིའི་ཚེ་ན་གོམས་པའི་ཉམས་ཆུ་ཀླུང་ལྟ་བུ་ཞེས་བྱ་སྟེ། ཆུ་ཀླུང་དལ་བ་རྒྱང་ནས་གཡོ་བ་མེད་པ་ལྟར་སྣང་ཡང་དྲུང་ནས་བལྟས་ན་བར་མ་ཆད་པར་འགྲོ་བ་བཞིན་དུ། སེམས་གནས་པ་ལྟར་སྣང་ཡང་། ཞིབ་ཏུ་བརྟགས་ན་གཡོ་བ་ཕྲ་མོ་མང་བ་ཡིན་ནོ། །དེ་ཡི་དུས་ན་བརྩོན་པས་གོང་ནས་གོང་དུ་སྤེལ་བར་བྱ་བ་གལ་ཆེའོ། །བླན་འཇོག་ནས་བརྩམ་སྟེ་འདིའི་བར་དུ་བྱིང་རྒོད་ཀྱིས་བར་བཅད་ནས་སླར་དམིགས་པ་ལ་འཇུག་པའི་ཡིད་བྱེད་ཀྱི་སྐབས་ཡིན་པས་ཤེས་བཞིན་དང་སེམས་པ་དང་བཏང་སྙོམས་གསུམ་གྱིས་ཅི་རིགས་པར་འདུལ་བ་གལ་ཆེ། བརྩོན་པ་བསྐྱེད་པའི་སྟོབས་ཀྱིས་སྔ་མ་ལས་ཁྱད་པར་གྱི་རྩོལ་བ་མ་བཏང་ན་རྟོག་པས་བར་བཅད་མི་ནུས་པར་དམིགས་པ་ལ་རྩེ་གཅིག་གནས་པ་ནི་འདུ་བྱེད་དང་བཅས་པའམ། རྩེ་གཅིག་པ་ཞེས་བྱ་བ་བརྒྱད་པའོ། །འདི་ལ་བརྟན་པའི་ཉམས་རྒྱ་མཚོ་རླབས་དང་བྲལ་བ་ལྟ་བུ་ཟེར་ཏེ་དམིགས་པ་གནས་ཤིང་རྩོལ་བ་དང་བཅས་ན་རྒྱུན་ཆད་པ་མེད་པར་འཇུག་པའི་ཡིད་བྱེད་ཀྱི་སྐབས་ཡིན་ལ། འདི་དུས་དམིགས་པ་ལ་བཏང་སྙོམས་སུ་འཇོག་པ་གལ་ཆེའོ། །འདུ་བྱེད་དང་བཅས་པའི་སྐབས་དེ་གོང་ནས་གོང་དུ་འཕེལ་བ་ལས་རྩོལ་བ་མི་དགོས་པར་ངང་གིས་འཇུག་པའི་མཉམ་བཞག་ཐོབ་པ་སེམས་གནས་དགུའི་ཐ་མ་སྟེ། འདོད་སེམས་རྩེ་གཅིག་པ་ཞེས་ཀྱང་བྱ་ལ། སྔ་མ་རྣམས་གོམས་ཤིང་ཡོངས་སུ་འདྲིས་པའི་སྟོབས་ཀྱིས་ཐོབ་པ་ཡིན་ནོ། །མཐར་ཕྱིན་པའི་ཉམས་རི་བོ་ལྟ་བུ་གཡོ་འགུལ་མེད་པ་འདི་ནས་མགོ་བརྩམ་སྟེ་འབྱུང་བའོ། །འདོད་སེམས་རྩེ་གཅིག་པ་དེ་གྲུབ་ན། སེམས་གཏད་པའི་དམིགས་པ་ལ་རྩོལ་བ་མེད་པར་གནས་ལ། སྤྱོད་ལམ་ཀུན་ཏུ་ངང་གིས་གནས་ཤིང་། རང་གར་ཅི་ཡང་མི་བསམ་པར་བཞག་ན་སྣང་བ་འགགས་ཤིང་སེམས་ནམ་མཁའ་དང་འདྲེས་པ་ལྟ་བུའི་ཉམས་འཆར་ལ། དེ་ལས་ལང་བ་ན། ལུས་གློ་བུར་དུ་བྱུང་བ་སྙམ་པ་དང་། ཆགས་སྡང་གི་རྟོག་པ་ཤུས་ཇེ་ཆུང་ལ་སོང་། གསལ་ཉམས་ཆེ་དུས་དངོས་པོའི་རྡུལ་ཕྲན་བསྒྲང་ཐུབ་པ་ལྟ་བུའི་བདེ་གསལ་མི་རྟོག་གསུམ་གྱི་ཉམས་ཅི་རིགས་པ་སྐྱེའོ། །གཉིད་ཀྱང་ཏིང་ངེ་འཛིན་དང་འདྲེས་པ་ལྟ་བུ་དང་། རྨི་ལམ་ཕལ་ཆེར་དག་པར་འབྱུང་ཡང་། ད་དུང་ལུས་སེམས་ཤིན་སྦྱང་གི་བདེ་བ་འདྲེན་མི་ཐུབ་ན་ཞི་གནས་མཚན་ཉིད་པ་མིན་ན་ལྷག་མཐོང་ག་ལ་ཡིན། སེམས་གནས་པའི་ཉམས་ཐན་ཐུན་ལ་ས་ལམ་མཐོན་པོར་རློམ་པར་མི་བྱ་བར་ལམ་གྱི་གནད་ལ་མཁས་པར་བྱ་དགོས་པས། དེ་འདྲའི་འདོད་སེམས་རྩེ་གཅིག་པ་དེའི་ངང་དུ་གོམས་པར་བྱས་པས་ལུས་དང་སེམས་ལས་སུ་རུང་བར་གྱུར་པ་ནི་ཤིན་སྦྱང་ཞེས་བྱ་སྟེ། སེམས་དེ་རྟ་ཤིན་ཏུ་དུལ་བ་རང་དབང་དུ་གྱུར་པ་བཞིན་དུ་བསྐྱེད་རྫོགས་ཀྱི་དམིགས་པ་ལ་ཇི་འདོད་འདོད་དུ་བཀོལ་དུ་བཏུབ་ཅིང་། སེམས་ལ་འཚེར་བག་སོགས་མི་བདེ་བ་ལྟ་བུའི་གནས་ངན་ལེན་དང་ཡོངས་སུ་བྲལ་བའི་བདེ་བ་དང་། དེའི་སྟོབས་ཀྱིས་ལས་སུ་རུང་བའི་རླུང་ལུས་ལ་རྒྱུ་བས་ལུས་ལྡང་བ་སོགས་བཀོལ་དུ་མི་བཏུབ་བའི་གནས་ངན་ལེན་དང་བྲལ་ནས། ལུས་ཤིང་བལ་གྱི་འདབ་མ་ལྟར་ཡང་བ་དང་། འོ་མའི་ཆུ་རྒྱུན་དྲོན་མོས་བཀྲུས་པ་ལྟར་བདེ་བའི་རྣམ་པ་དང་། དེ་འདྲའི་ཤིན་ཏུ་སྦྱང་བ་དེ་དང་པོར་རགས་པ་དེ་ནས་ཕྲ་བ་རིམ་བཞིན་སྐྱེ་ལ། རགས་པའང་དང་པོ་ཕྲ་མོ་ནས་བརྩམ་མཐར་ཡོངས་སུ་རྫོགས་པ་གསལ་པོར་འབྱུང་ཞིང་། རགས་པ་དེས་སེམས་གཡོ་བས་ན་རིམ་བཞིན་དེའི་ཤུགས་ཟད་ནས་གྲིབ་མ་ལྟར་སྲབ་པའི་ཤིན་སྦྱང་ཕྲ་མོ་མི་གཡོ་བ་ཏིང་ངེ་འཛིན་དང་མཐུན་པ་འབྱུང་ངོ་། །དེ་ལ་ཞི་གནས་ཞེས་བྱ་ལ། ཚུལ་དེས་བསྐྱེད་རྫོགས་གང་བསྒོམས་ཀྱང་ཚད་དང་ལྡན་པ་འབྱུང་བ་ཡིན་པས་འདི་ལྟར་ཉམས་ལྔ་མཐར་ཕྱིན་པར་བསྒོམ་པ་ནི་གལ་ཆེ་བས། དང་པོ་སྟོང་པ་ཆེན་པོའི་ཏིང་ངེ་འཛིན་སྒོམ་ཚུལ་ལ་སྦྱར་ནས་ཞི་གནས་སྒྲུབ་ཚུལ་རྒྱས་པར་བཤད་པའོ། །སྟོང་པ་ཆེན་པོའི་ཏིང་ངེ་འཛིན་བསྒོམ་པའི་དགོས་པ་ཆོས་ཀྱི་སྐུ་ལ་གཟུགས་སྐུ་འཆར་བའི་རྟེན་འབྲེལ་མངོན་དུ་བྱ་བ་དང་། འདི་མན་ཆད་ཀྱི་བསྐྱེད་པ་ཐམས་ཅད་ཡེ་སྟོང་རྫོགས་པ་ཆེན་པོས་ཟིན་པས་དངོས་པོ་དང་མཚན་མར་ཞེན་པའི་མདུད་པ་ལས་གྲོལ་བའི་དགོས་པ་ཡོད་དོ། །དེ་ཡང་ལམ་བསྒྲོད་ཚུལ་གྱི་དབང་དུ་བྱས་ན། སྟོང་པ་ཆེན་པོའི་ཏིང་ངེ་འཛིན་གྱིས་ཚོགས་ལམ་ཆུང་ངུ་། སྙིང་རྗེ་སྒྱུ་མའི་ཏིང་ངེ་འཛིན་གྱིས་འབྲིང་པོ། རྒྱུའི་ཏིང་ངེ་འཛིན་ལས་ཕྱག་རྒྱའི་ལྷར་གསལ་བ་ཕྱག་རྒྱ་གཅིག་པའི་ཏིང་ངེ་འཛིན་གྱིས་ཚོགས་ལམ་ཆེན་པོ་བསྒྲོད་དགོས་པས་མདོ་སྔགས་གཉིས་ཀའི་ལུགས་ལྷག་མཐོང་གི་གོ་བ་ཙམ་གྱི་སྟེང་ནས་ཞི་གནས་མཚན་ཉིད་པ་ཞིག་སྒྲུབ་པས་ཚོགས་ལམ་བསྒྲོད་དགོས་པ་ལ་ཁྱད་པར་མེད། སྦྱོར་ལམ་ལ་སྐབས་འདིར་ཕྱག་རྒྱ་སྤྲོས་བཅས་ཀྱི་འཕོ་བར་གསུངས་པ་ལ། དེ་ལ་གཟོད་རྫོགས་རིམ་གྱི་མན་ངག་མ་བསྣན་ན་མི་བསྒྲོད་པས་རྫོོགས་རིམ་གྱིས་རླུང་སེམས་དབུ་མར་ཐིམ་པའི་སྟོབས་ཀྱིས་དྲངས་པའི་ལྷག་མཐོང་དཔེའི་ཡེ་ཤེས་ལ་མྱོང་བ་ཐོན་པ་ཞིག་གིས་བསྒྲོད་དགོས་ལ། མཐོང་ལམ་དུ་ཞི་གནས་དང་ལྷག་མཐོང་ཟུང་དུ་འཇུག་པ་དོན་གྱི་འོད་གསལ་སྐྱེས་ནས་དེའི་རྗེས་སུ་བསམ་ཡས་ལྷུན་གྲུབ་ཀྱི་དཀྱིལ་འཁོར་དུ་ལྡང་བར་གསུངས་པ་བཞིན་ངེས་པར་བྱས་ནས། དང་པོ་དེ་བཞིན་ཉིད་ཀྱི་ཏིང་ངེ་འཛིན་ལ་ཉམས་ལྔ་མཐར་ཕྱིན་པར་བྱས་ནས། སེམས་རང་བཞིན་ངང་གིས་ཏིང་ངེ་འཛིན་ལ་འཇུག་པ་ཞིག་གི་བར་སྒོམ་ནུས་ན་ཕྱི་མ་འདི་རྣམས་ལ་དཀའ་བ་ཆེར་མེད་པར་དམིགས་རྣམས་སྤོས་ནས་སྒོམ་ན་ཡུན་མི་རིང་བར་ཏིང་ངེ་འཛིན་ཁྱད་པར་ཅན་འགྲུབ་པའོ། །གཉིས་པ་ཀུན་ཏུ་སྣང་བའི་ཏིང་ངེ་འཛིན། དེ་བཞིན་ཉིད་ནི་སྤྲོས་མེད་ཀྱང་བརྗོད་ནས། དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་ཆེན་པོ་མཁའ་ཁྱབ་ཏུ་སྒོམ་ནས། སྙིང་རྗེ་དེ་ལ་སེམས་རྩེ་གཅིག་པས་བརྟན་པ་མ་ཐོབ་པར་བསྒོམ་པའོ། །དེའི་དགོས་པ་སྟོང་པ་མཐའ་གཅིག་ཏུ་ཞེན་པ་གྲོལ་ནས་ཆོས་ཐམས་ཅད་སྣང་ལ་རང་བཞིན་མེད་པ་སྒྱུ་མ་ལྟ་བུའི་ངང་ནས་རང་རིག་པ་རང་བྱུང་གི་ཡེ་ཤེས་གསལ་ལ་འཛིན་པ་མེད་པ་སྦྱོར་ལམ་དུ་འཆར་བ་ནི་དེ་ཡི་དགོས་པའོ། །གསུམ་པ་ཕྱག་རྒྱ་གཅིག་པའི་ཏིང་ངེ་འཛིན་གྱི་སྔ་རོལ་དུ། རྒྱུའི་ཏིང་ངེ་འཛིན་བསྒོམ་པ་ལ། དངོས་པོ་མེད་ལས་སོགས་བརྗོད་ནས། དེ་ཡང་ངོ་བོ་སྟོང་པ་ཉིད། གདངས་སྙིང་རྗེ་ཆེན་པོ། རང་རིག་སྣང་སྟོང་གཉིས་སུ་མེད་པའི་རང་བཞིན་རྣམ་པ་ཡི་གེ་ཨ་དཀར་པོར་བསྒོམ་པར་བྱ་སྟེ། རྒྱུད་ལས། ཨ། རབ་ཏུ་བརྟན་གྱུར་ཨ་དཀར་ལས། །སོགས་གསུངས་པས། ཨ་དེ་ལ་སེམས་ཤིན་ཏུ་བརྟན་པ་བསམ་གཏན་གྱི་དངོས་གཞི་མ་འགྲུབ་པར་བསྒོམ། དེ་བརྟན་པ་ན། དེ་ལས་ཨ་དཀར་པོ་གྲངས་མེད་པ་འཇིག་རྟེན་དུ་སྤྲོ་བའོ། །འདི་ལ་ཏིང་ངེ་འཛིན་གྱི་བརྟན་པ་ཁྱད་པར་ཅན་ཐོབ་ན་འོག་གི་ལྷ་བསྐྱེད་པ་དང་སྔགས་བཟླ་བ་སོགས་ལ་མི་ལྟོས་པར་ཞི་རྒྱས་དབང་དྲག་གི་ལས་བསམ་གྱིས་མི་ཁྱབ་པ་རྣམས་སྒྲུབ་པ་རང་དབང་འབྱོར་བ་ཡིན་ཏེ། འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་སོ། །དེ་ནས་ལྷ་བསྒོམ་པ་ལ། རྟེན་གཞལ་ཡས་ཁང་དང་བརྟེན་པ་ལྷ་བསྒོམ་པ་གཉིས་ཀྱི་དང་པོ་ལ། འོད་གསལ་བའི་སེམས་ཉིད་ལ་གཞལ་ཡས་ཁང་གི་བཀོད་པ་ཅི་ཡོད་པ་དེ་ཉིད་ཀུན་བཟང་ཞི་བ་བཞུགས་པའི་གནས་ཡིན་པས་འདིར་དེ་བསྐྱེད་པ་ནི། གཞི་དབང་ཆེན་གྱི་དཀྱིལ་འཁོར་གསལ་བ། སེམས་ཉིད་ཨ་དཀར་པོ་སོགས་ནས་འབར་བའོ། །སོགས་བརྗོད་ནས་གསལ་བར་བསྐྱེད། གཉིས་པ་རྟེན་གཞལ་ཡས་ཁང་བསྐྱེད་པ་ནི། རི་རབ་སོགས་ནས། རོལ་མོ་སྣ་ཚོགས་སྤྲིན་ཕུང་བཞིན་བར་བརྗོད་ནས་གསལ་བར་བསྐྱེད། གསུམ་པ་གདན་ནས་ལྷ་བསྐྱེད་པ་ཡོངས་སུ་རྫོགས་པའི་བར་ལན་གཅིག་གསལ་བཏབ་ནས། གཟོད་གཙོ་བོ་ཕྱག་རྒྱ་གཅིག་པའི་ལྷར་སྣང་ལ་གསལ་འདེབས་པ་ལ་གསུམ། ལྷ་སྣང་ལ་བསླབ་པ། ང་རྒྱལ་ལ་བསླབ་པ། དག་དྲན་ལ་བསླབ་པའོ། །དང་པོ་ལ་གཉིས་ཏེ། ལྷའི་རྣམ་པ་སྤྱི་ལ་སེམས་འཛིན་པ་དང་། བྱེ་བྲག་ལ་སེམས་འཛིན་པའོ། །དང་པོ་ནི། དེ་ཡང་ཐོག་མ་ནས་དཀྱིལ་འཁོར་ཡོངས་རྫོགས་བསྒོམས་ཀྱང་གསལ་སྣང་འགྲུབ་དཀའ་བས་གཙོ་རྐྱང་ཞིག་བསྒོམ་སྟེ་དེ་ལ་གསལ་སྣང་ཐོབ་ནས་རིམ་གྱིས་དཀྱིལ་འཁོར་སོགས་བསྒོམ་པ་ལ་བསླབ་དགོས་པས། རང་གི་མདུན་དུ་དཀར་ཆ་ཡོད་སར་ཞལ་བསྟན་པའི་ཡི་དམ་གྱི་སྐུ་ཐང་མཚན་ཉིད་ཚང་ཞིང་ཆེ་བ་དྭངས་པ་ཞལ་སྤྱན་ཡོ་བ་སོགས་སྐྱོན་མེད་པ་མཛེས་པ་ཞིག་བཀྲམ། དེ་ཡང་གཏེར་ཆེན་ཡབ་སྲས་ཀྱི་ཕྱག་བཞེས་སྨིན་གླིང་གི་ཕྱག་རྒྱུན་ལ་ཁྲིད་ཐང་ཞེས་ཡུལ་བཀོད་དང་ལྷ་མགྲོན་མང་པོ་མེད་པའི་སྐུ་ངོ་ཐོག་གཙོར་འདོན་བྱས་པ་ཞིག་མཛད་སྲོལ་ལྟར་ཡོད་ན་ལེགས། དེའི་མདུན་དུ་མཆོད་པ་མཚོན་བྱེད་ཙམ་བཤམས། ཐག་ཉེ་བར་རང་གི་སྟན་བཏིང་། ལུས་གནད་དང་ལྡན་པས་ཐོག་མར་མདུན་གྱི་ཐང་ཀ་ལ་མིག་ཅེར་གྱིས་བལྟས་ཏེ་སྐུའི་རྣམ་པ་ངེས་པར་བྱས་ལ་རིག་པ་བསྒྲིམ་ལ་ཅུང་ཞིག་བཞག །ཡང་མིག་བཙུམ་ལ། དེའི་ཐང་ཀའི་དེ་དང་འདྲ་བ་ཞིག་ཨེ་གསལ་བལྟ། མི་གསལ་ན་ཡང་མིག་ཕྱེ་ལ་སྔར་བཞིན་རྒྱུན་ཅི་རིགས་པར་སེམས་མ་ཡེངས་པར་བལྟ། ཡང་མིག་བཙུམ་ལ་སྔར་བཞིན་བསྒོམ། དེ་སྔར་རེས་མོས་ཀྱིས་བསྒོམ་ནས་མཐར་མིག་བཙུམ་དུས་མདུན་གྱི་ཐང་ཀའི་སྐུ་དེ་འདྲ་བ་ལམ་ལམ་གསལ་ན། དེ་རང་གི་ལུས་ལ་ཚུར་སྤོ་སྟེ་བསྒོམ། དེ་ཡང་ཐོག་མར་རང་གི་ལུས་ལ་སྐུའི་རྣམ་པ་སྐུ་མདོག་ཕྱག་མཚན་རྒྱན་ཆ་ལུགས་གདན་དང་བཅས་ཝལ་གྱིས་གསལ་གདབ། དེ་ཡང་ཡོངས་སུ་རྫོགས་པར་གསལ་གསལ་ན་དེ་དག་ལ་སེམས་བཟུང་བས་ཆོག །དེ་ཙམ་མི་གསལ་ན་ཐོག་མར་ཡོངས་རྫོགས་གསལ་འདེབས་ཐེང་གཅིག་བྱས་ནས། དེ་ནས་སྐུ་མདོག་དཀར་དམར་ལ་སོགས་པའི་བྱེ་བྲག་དང་། ཞལ་ཕྱག །ཕྱག་མཚན། ཞི་ཁྲོ་སོ་སོའི་རྒྱན་ཆ་དང་རྣམ་འགྱུར་བཞུགས་སྟངས། གདན་ཁྲི། འོད་ཟེར་གྱི་ཕུང་པོ་བྱེ་བ་ཕྲག་དྲུག་དྲུག་འཕྲོ་བ། ཁྲོ་བོ་ཡིན་ན་ཡེ་ཤེས་ཀྱི་མེ་འབར་བའི་དབུས་ན་བཞུགས་པ་ལམ་གྱིས་གསལ་བཏབ། དེ་དག་ལ་ཡུད་ཙམ་ཞིག་བསྒོམ་སྟེ་འཕྲོ་བཅད། ཡང་ཞིབ་མོ་གསལ་འདེབས་ཐེང་གཅིག་བྱས་ཏེ་སྔར་བཞིན་སེམས་བཟུངས། མི་གསལ་ན་སྔར་བཞིན་བྲིས་སྐུ་ལ་བལྟ། དེ་ལྟར་ཡང་ཡང་བྱ་ཞིང་ཉིན་མོའི་ཐུན་གཉིས་ལ་བྲིས་སྐུ་ལ་བལྟ་བ་དང་རང་ལྷ་བསྒོམ་པ་སྤེལ་མ་བྱ། ཐུན་རེ་ལ་འདི་ཙམ་གྱི་ངེས་པ་མེད། ཡང་མཚན་ཐུན་གཞན་གཉིས་ལ་ལྷ་སྐུའི་རྣམ་པ་གསལ་རུང་མི་གསལ་རུང་རེས་བསྒྲིམ་སྟེ་གསལ་འདེབས་དང་འཕྲོ་བཅད་གྱིན་བསྒོམ་རེས་རང་ལྷ་ཡིན་སྙམ་པའི་ང་རྒྱལ་བྱ། རེས་ལྷའི་རྣམ་པ་ཡོད་ཚུལ་ཙམ་ལ་ཤེས་པ་ངལ་གསོ་ཕྱིར་ཀློད་གྱིན་བསྒོམ། སྐབས་འགར་དེའི་བོགས་འདོན་དུ་བྲིས་སྐུ་ལ་ཤེལ་སྒོའམ། མེ་ལོང་གི་འོད་གང་རུང་འཆར་དུ་བཅུག་སྟེ་གཞན་ལ་མ་ཡེངས་པར་དེ་ཁོ་ན་ལ་ཡུན་རིང་དུ་བལྟ། ཡང་མིག་བཙུམ་ནས་རང་ཉིད་ཀྱང་དེ་དང་འདྲ་བར་ཡུད་ཙམ་རེ་བསྒོམ། ཉིན་པར་གྱི་ཐུན་ཐམས་ཅད་དུ་དེ་གས་དུས་འདའ་བར་བྱ། ཐུན་མཚམས་མཚན་མོའི་གུང་དུ་གང་ཡང་ཡིད་ལ་མི་བྱེད་པར་རང་བབ་ཏུ་ལྷོད། ཡང་ན་གཉིད་ཚིམ་པར་ལོག །དེ་ལྟར་སྒོམ་གྱི་སྣ་མ་སུན་པར་རྩེ་གཅིག་ཏུ་གཞུར་བས་ཟླ་བ་དྲུག་ལ་སོགས་པར་དུས་ཐུང་ངུས་གསལ་སྣང་ཁྱད་པར་ཅན་རྫོགས་པར་འགྱུར་ལ། འདི་དག་གི་ཐུན་མཚམས་ཐམས་ཅད་དུ་ལུས་ངག་གི་བྲེལ་བ་ཐམས་ཅད་སྤངས། སེམས་རྣམ་རྟོག་རྒྱ་འབྱམས་སུ་མ་སོང་བ་ལྷའི་གསལ་སྣང་དང་མ་བྲལ་བར་བྱའོ། །གཉིས་པ་བྱེ་བྲག་ལ་སེམས་འཛིན་པ་ལ་གཉིས་ཏེ། རྒྱན་མེད་པ་དང་། རྒྱན་ཅན་ལ་སེམས་འཛིན་པའོ། །དང་པོ་ནི། དེ་ལྟ་བུའི་ལྷ་སྐུའི་གསལ་སྣང་སྤྱི་ཙམ་པའི་འཛིན་སྟངས་མ་ཤོར་བའི་ངང་ནས། བྱེ་བྲག་ཏུ་ཞི་བའི་རིགས་ལ་གཙུག་ཏོར་རམ་སྨིན་མཚམས་དང་། ལྷ་སྐུ་ཁྲོ་ཆགས་དང་ཁྲོ་བོ་ཡིན་ན་སྤྱན་དབུས་ནས་ཐོག་མར་སེམས་བཟུང་། དེ་ཡང་སྤྱན་དབུས་མར་དཔེར་མཚོན་ན། དབུས་གནག་པ་མཐའ་སྐྱ་བ། སྤྱན་རྩ་དམར་ཤིག་གེ་བ། སྤྱན་གཡོན་པ་གྱེན་ལ་བསླང་བ་ལྟ་བུ་སྨིན་མ་དང་བཅས་པ་ཞིག་ཡིད་ཀྱིས་ཡང་ནས་ཡང་དུ་སྒོམ་ལ། གསལ་ཐེབས་པ་ན་དེ་སེམས་མདུང་ཚུགས་སུ་གཏོད་པ་ནི། རབ་བསྒོམ་པས་གསལ་འདེབས་པ་ཞེས་བྱའོ། །དེ་གསལ་མ་ཐེབས་ན་འབྲིང་ངག་ཏུ་བརྗོད་ཅིང་གསལ་འདེབས་ཏེ་དབུས་གནག་པ་སོགས་བརྗོད་པས་དེ་བཞིན་གསལ་འདེབས། དེས་ཀྱང་མི་གསལ་ན་ཐ་མ་བྲིས་པས་གསལ་འདེབས་པ་ཞེས་སྤྱན་དབུས་མ་རི་མོ་མཚན་རྫོགས་ལེགས་པར་བྲིས་པ་ཉེ་རིང་འཚམས་པར་བཞག །མིག་ཕྱེད་བཙུམ་རན་པར་བལྟས་ལ། གསལ་སྣང་ཤར་བ་ན་མིག་བཙུམ་སྟེ། དེ་ལྟ་བུ་ཞིག་རང་གི་སྨིན་མཚམས་སུ་ཡོད་པར་བསྒོམ་ལ་གསལ་འདེབས། གང་ལྟར་ཡང་སེམས་གྲིམ་ལྷོད་རན་པར་རྩེ་གཅིག་ཏུ་བཞག་གོ། །འདི་དག་གི་སྐབས་ན་ཏིང་ངེ་འཛིན་གྱི་གེགས་བྱིང་རྒོད་ཀྱི་སྐྱོན་སེལ་ཚུལ། ཏིང་འཛིན་དང་པོའི་སྐབས་ན་བཤད་ཟིན་ཀྱང་། ལས་དང་པོ་པས་མན་ངག་གི་ཁོག་འཁྲོལ་བ་དཀའ་བས་འདིར་ཡང་འཆད་དགོས་པས་དེ་ལྟ་ན། ཏིང་འཛིན་སྒོམ་པའི་དུས་སུ། ཤེས་པ་ཁོང་ལྷོད། འཛིན་སྟངས་ཀྱི་ངར་ཆ་མ་ཤོར་བར་གྲིམས་སུ་བཏང་། རྣམ་རྟོག་འཚུབས་ནས་མི་གསལ་ན་ཅུང་ཟད་ཀློད་ལ་ཁོང་བསྒྲིམ། རྟོག་པ་ཆེར་འཕྲོ་ན་འཕྲོ་རྦད་ཀྱིས་བཅད། དེ་མ་ཐག་དམིགས་རྟེན་ལ་གཏོད། ཡང་དམིགས་རྟེན་དེ་བློ་ཡུལ་ན་མི་གསལ་བར་ཡོད་ལ་འཛིན་སྟངས་ཀྱི་ངར་ཆ་ཤོར་ན་བྱིང་བ་རག་པ་ཡིན་ལ། དམིགས་རྟེན་དེ་བློ་ཡུལ་ནས་བསྐྱུད་ནས་སེམས་འདི་དྲན་མེད་པར་འདུག་ན་བྱིང་བ་ཕྲ་མོ་ཡིན་པས། འདི་གཉིས་ཏིང་ངེ་འཛིན་གྱི་གེགས་ཤིན་ཏུ་ཆེ་ཤོས་ཡིན་པས། སེམས་བསྒྲིམ་སྟེ་དམིགས་པའི་འཛིན་སྟངས་ཀྱི་ངར་དང་གསལ་ཆ་མ་ཤོར་བར་བྱ་བ་གནད་དུ་ཆེ། དམིགས་རྟེན་བརྗིད་ནས་འོག་འགྱུ་དང་རྣམ་རྟོག་རགས་པ་རྒྱ་འབྱམས་སུ་སོང་ན། སླར་དེ་འདྲ་མི་འབྱུང་བར་བྱེད་སྙམ་པའི་ཞེ་བཅད་དྲག་པོ་བྱ། ཁམས་ཉོག་པ་དང་གཉིད་བྲོ་བ་སོགས་བྱུང་ན། གདོང་ལ་ཆུ་ལྕག་འདེབས། ཁྲུས་བྱ་གོས་སྲབ་ཏུ་བཏང་། མཐོ་ཞིང་བསིལ་སར་བསྡོད། ཡང་ཤེས་པ་ཡེར་ཡེར་པ་བྱུང་ན། ཟས་བཅུད་ཅན་བརྟེན། གོས་དྲོ་བར་བྱ། གནས་མུན་པ་ཅན་དང་དམའ་སར་བསྡོད། དེ་དག་གིས་མ་སེལ་ན་ཅུང་ཟད་ངལ་གསོ། སོས་པ་དང་ཡང་བསྒོམ། བསྒོམ་ལ་མི་སྤྲོ་བའི་ལེ་ལོ་སྐྱེ་ན་མི་བརྩོན་པའི་ཉེས་དམིགས་དང་། བརྩོན་པའི་ཕན་ཡོན་བསམ་ལ་སྤྲོ་ཤུགས་བསྐྱེད། དམ་པ་གོང་མའི་དཀའ་སྤྱད་ཀྱི་རྣམ་ཐར་དྲན། འདོད་ཡོན་གྱི་སེམས་གཡེང་ན། རྒྱུ་འདོད་ཡོན་ལ་ཆགས་པའི་ཉེས་དམིགས་དང་། འབྲས་བུ་འཁོར་བའི་ཉེས་དམིགས་དྲན་པས་ངེས་འབྱུང་གི་ཤུགས་དྲག་ཏུ་བསྐྱེད་ལ་ཞེན་འཁྲིས་རྦད་ཀྱིས་བཅད། གསལ་སྣང་ཁྱད་པར་ཅན་བསྐྱེད་པ་ན་ཅུང་ཟད་ངལ་གསོ། ཡང་འཕྲོ་མཐུད་དེ་བསྒོམ་སྐབས་འགར་གསལ་མི་ཐེབས་པའི་ཧུ་ཐུག་བྱུང་ན། འོང་དུ་རེ་བའི་ནན་ཏན་བསྐྱེད་ན་བསྒོམ་གྱིས་སྣ་སུན་ཁུར་ནས་ཕྱིས་སྒོམ་སྙིང་མི་འདོད་པ་འབྱུང་བས། ནན་ཏན་མི་བྱེད་པར་རེ་ཞིག་ངལ་གསོ། ངལ་སོས་ནས་བསྒོམ་པས་མྱོང་བས་སྣེ་ཟིན་འོང་། ལྷ་གཅིག་བསྒོམ་དུས། དེ་མི་གསལ་བར་ལྷ་གཞན་གསལ་བ་དང་། ཏིང་ངེ་འཛིན་གཞན་ལ་སེམས་ཟིན་པ་སོགས་རྣམ་རྟོག་གི་དུག་ཡིན་པས། དེ་ལ་སེམས་མི་འཕྲོ་བར་རྩ་བའི་དམིགས་པ་ཁོ་ན་ལ་གཏད་དགོས་ཏེ། ཀུན་མཁྱེན་ཆེན་པོས། རེས་དེར་གཏད། རེས་གཞན་དུ་གཏད་ན་དམིགས་པའི་ས་ཟིན་མེད་པས་ཤིན་ཏུ་སྐྱོན་ཆེ་གསུངས་པས། སེམས་འཛིན་ཉི་ཚེ་ཙམ་ལ་རྫོགས་པ་ཆེན་པོའི་མཐོ་སྒྲོས་ཞིག་བཏགས་ནས་མི་ཚེ་དོན་མེད་དུ་བྱེད་པ་ལ་འཕང་ནས། འདིར་ཏིང་ངེ་འཛིན་སྐྱོན་མེད་པར་སྒྲུབ་པའི་གནད་བསླང་སྟེ་བཤད་པ་ཡིན་པས་ཡིད་ཆེས་པའི་གནས་སོ། །རྩ་རྒྱུད་ལས། གང་གི་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སོགས་གསུངས་པའི་དོན་དེ་བཞིན་དུ་ངེས་དགོས་སོ། །དེ་ལྟར་སྤྱན་དབུས་མ་ལ་གསལ་སྣང་ལེགས་པར་ཐེབས་པའི་ཉམས་བརྟན་པོ་བྱུང་བ་ན། རིམ་གྱི་སྤྱན་གཡས་གཡོན། ཤངས། ཞལ། ཚེམས། ལྗགས། སྙན། མགུལ། སྐུ་སྐེད། སྐུ་སྨད། ཕྱག་ཞབས། གདན་ཁྲི། ཞི་བའི་འོད་ཟེར་དང་། ཁྲོ་བོ་ཡིན་ན་མེ་རིའི་བར་དུ་སྐུ་ཆ་ཤས་ནས་སེམས་བཟུང་ལ། དངོས་སུ་ལག་པས་རེག་པའམ། མིག་ཤེས་ཀྱི་མཐོང་རྒྱུ་ཡོད་པ། ཡུལ་གསུམ་གྱད་དུ་གྱུར་པའི་མཚན་མ་བརྟན་པོ་མ་བྱུང་གི་བར་དུ་བསྒོམ་པར་བྱའོ། །གཉིས་པ་ནི་དེ་ལྟར་སྐུ་གཅེར་བུ་རྒྱན་མེད་ལ་སེམས་འཛིན་པ་རྫོགས་ནས། དེ་ཉིད་ལ་འཛིན་པ་མ་ཤོར་བའི་ངང་ནས། རྒྱན་གྱི་བྱེ་བྲག་རེ་རེ་བཞིན་དུ་སེམས་བཟུང་བར་བྱ་སྟེ། རིན་པོ་ཆེའི་རྒྱན་ཅན་རྣམས་ཀྱི་དབུའི་ཐོར་ཚུག་གི་རྩེ་རྒྱན་ནོར་བུའི་ཏོག་ནས། རུས་པའི་རྒྱན་ཆ་རྣམས་ཀྱི་སྤྱི་བོ་རུས་པའི་འཁོར་ལོ་ལེབ་མོའི་དབུས་ཀྱི་ཁོང་སེང་ནས་ཐོན་པའི་ཐོར་ཚུག་གི་ཏོག་ཟླུམ་པོའི་རྣམ་པ་སོགས་ནས་བཟུང་། དབུ་རྒྱན། སྙན་རྒྱན། མགུལ་རྒྱན། ཕྱག་གདུབ། དཔུང་གདུབ། ཞབས་གདུབ། སྐ་རགས། དོ་ཤལ། སེ་མོ་དོའམ། དོ་ཤལ་ཐུང་བ། སྟོད་གཡོགས་དང་སྨད་གཡོགས་སོགས་དར་གྱི་ཆས་གོས་དང་། གཞན་ཡང་རིན་པོ་ཆེ་དང་རུས་པའི་རྒྱན་གྱི་རིགས་དང་། ཁྲོ་བོ་ལ། གླང་ཀོ །ཞིང་ལྤགས། སྟག་ཤམ་སོགས་ཁྲོ་ཆས། ཞི་ཁྲོ་སོ་སོའི་ཕྱག་མཚན་གྱི་ཁྱད་པར་གྱིས་མཚོན་ཏེ། རྒྱན་གྱི་བྱེ་བྲག་རེ་རེ་ནས་སེམས་བཟུང་ཞིང་གསལ་སྣང་བརྟན་པོ་མ་བྱུང་བར་དུ་བསྒོམ། དེ་དག་ལ་རབ་བསྒོམ་པ། འབྲིང་བརྗོད་པ། ཐ་མ་བྲིས་པས་གསལ་འདེབས་དགོས་པ་གསར་རྙིང་གི་མཁས་གྲུབ་ཆེན་པོ་རྣམས་ཞལ་མཐུན་པས། རྙིང་མ་བ་ཡིན་ན་གྱེར་བསྒོམ་ཁོ་ན་ཡིན་ཅེས་པའི་གཏམ་སྙིང་པོ་མེད་པར་མཐོང་ངོ་། །བྱིང་རྒོད་ཀྱི་སྐྱོན་བཅོས་པ་སོགས་ཇི་སྐད་བཤད་པ་བཞིན་གང་དགོས་པའི་དུས་སུ་ཉམས་སུ་བླང་ངོ་། །ཅུང་ཟད་བརྟན་པ་ཐོབ་པ་ན་རེས་རིམ་གྱིས་གསལ་གདབ། རེས་ངེས་མེད་དུ་གསལ་གདབ། རེས་ཅིག་ཆར་དུ་གསལ་གདབ་པ་སོགས་ཀྱིས་ཏིང་ངེ་འཛིན་ལ་རྩལ་སྦྱང་། སྣང་བའི་ང་རྒྱལ་སྲ་སྲ་འཐས་འཐས་སུ་རྡོ་རྗེའི་ཆོས་མདུན་དང་ལྡན་པར་གསལ་འདེབས་དགོས་པ་གུ་རུ་རིན་པོ་ཆེས་ཕུར་ཊིཀ་འབུམ་ནག་ལས་གསུངས། སྟོང་པའི་ང་རྒྱལ་ལ་ལྷ་དེ་ཡང་དཔྱད་ན་གཅིག་དང་དུ་མའི་བདེན་པ་དང་བྲལ་བ། དྭངས་གསལ་རྙོགས་པ་མེད་པ་ནམ་མཁའ་འཇའ་ཚོན་དང་། ཆུ་ཟླ་ལྟ་བུ་ལ་རྩེ་གཅིག་ཏུ་གཏད་པས་མཚོན་རྟེན་འབྲེལ་རང་བཞིན་མེད་པ་ལ་འགལ་འདུས་སྐྱོན་མེད་པར་བསླབ་པར་བྱའོ། །དེ་ལྟར་ཕྱག་རྒྱ་གཅིག་པའི་ཏིང་ངེ་འཛིན་བརྟན་པ་ཡན་ཆད་ཀྱིས་ཚོགས་ལམ་ཆེན་པོ་བསྒྲོད་ནས། འདི་ནས་གཟོད་རྫོགས་རིམ་གྱི་མན་ངག་གི་སྣོན་མ་བཏབ་ནས། ཐུན་གྱི་སྟོད་ཆ་ལ་བསྐྱེད་རིམ་དང་སྨད་ཆ་ལ་རྫོགས་རིམ་བསྒོམ་པའམ། ཡང་ན་ཉིན་མོ་བསྐྱེད་རིམ་དང་མཚན་མོ་རྫོགས་པའི་རིམ་པ་འོག་ནས་འབྱུང་བ་བསྒོམ་པ་སྟེ། རྩ་རྒྱུད་ལས། དཀྱིལ་འཁོར་ལྡན་པའི་དཀྱིལ་འཁོར་ལས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་སོ། །དེ་ལྟར་གཙོ་རྐྱང་ལ་གོམས་ནས། འཁོར་གྱི་དཀྱིལ་འཁོར་གཟོད་སྤྲོ་བར་བྱ་དགོས་པས། གོ་རིམ་ལ་བསླབ་པ་ཞེས་རང་གི་མདུན་ནས་བརྩམ་སྟེ་རྣམ་པར་སྣང་མཛད་སོགས་འཁོར་སོ་སོའི་སྐུ་མདོག་དང་། ཕྱག་མཚན། རྒྱན་ཆ་ལུགས། རྟེན་གཞལ་ཡས་ཁང་། དུར་ཁྲོད། སྲུང་འཁོར། འོག་གཞིའི་བར་མངོན་རྟོགས་ནས་ཇི་ལྟར་འབྱུང་བ་བཞིན་མ་འདྲེས་པར་རེ་རེ་ནས་ཡོངས་སུ་རྫོགས་པར་གསལ་གདབ། དེ་ལ་གོམས་ནས་གཟོད་དཀྱིལ་འཁོར་སྤྲོ་བར་བྱ་བ་སྟེ། རྩ་རྒྱུད་ལས། ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་ཡུམ་འཕྲོར་འགྱུར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་བར། །ཞེས་པ་བཞིན། གཙོ་བོ་གཅིག་ལ་སངས་རྒྱས་སྟོང་གི་དཀྱིལ་འཁོར་སྤྲོས་ནས་དཀྱིལ་འཁོར་ཡོངས་སུ་རྫོགས་པ་དེ་ལྟར་སྤྲོ་བ་ལ་སེམས་སྦྱང་། སྒྱུ་འཕྲུལ་ལས་གཞན་གྱི་དཀྱིལ་འཁོར་ཞིག་ཡིན་ན། ལྷ་གྲངས་གཞལ་ཡས་ཁང་སོགས་ཉིས་ལྡེབ་དང་སུམ་ལྡེབ་ལ་སོགས་པ་དང་མཐར་རྟེན་བརྟེན་པ་དང་བཅས་པ་ཅིག་ཆར་དུ་གསལ་བའི་བར་དུ་སྦྱང་། དེ་ནས་མ་ངེས་པ་ལ་བསླབ་པ་ནི། དཀྱིལ་འཁོར་ལ་རྒྱ་ཆེ་ཆུང་། ལྷ་གྲངས་མང་ཉུང་། སྐུ་མདོག །ཞལ་ཕྱག་ཚད། ཕྱག་མཚན་བཞུགས་སྟངས། རྒྱན་ཆས། ཉམས་འགྱུར་སོགས་མ་ངེས་པ་དང་། མང་པོ་ཉུང་ངུར་བསྡུ། ཉུང་ངུ་མང་པོར་སྤེལ། རྟེན་ཆེ་བ་ལ་བརྟེན་པ་ཆུང་བ་སོགས་ཏིང་ངེ་འཛིན་ལ་ཅི་འདོད་འདོད་དུ་རྩལ་སྦྱང་ཁྱད་པར་ཅན་སྒྲུབ་ནས་ལས་རུང་ཁྱད་པར་ཅན་ཐོན་ནས། སོ་སོའི་ཐད་ཀར་གསལ་སྣང་ཐོན་པ་ན་གོ་རིམ་ལ་ལོབ་པའི་ཚད་ཡིན་ཀྱང་། ད་དུང་བརྟན་པ་ཐོབ་པའི་ཕྱིར་ཡུན་བསྲིང་བར་བྱའོ། །དེ་ཡང་བསྙེན་བསྒྲུབ་རྣམ་པ་བཞིས་རྣམ་པར་བཞག་པས་ས་ལམ་ཆོད་ཚུལ་གསང་བ་སྒྱུ་འཕྲུལ་པའི་ཆོས་སྐད་ཐུན་མོང་མ་ཡིན་པ་ལགས་པས། དེ་ལྟར་ན་ཏིང་ངེ་འཛིན་དང་པོ་གསུམ་གྱིས་ཚོགས་ལམ་བསྒྲོད་པ་བསྙེན་པ་དང་། ཕྱག་རྒྱ་སྤྲོས་བཅས་ཀྱི་ཏིང་ངེ་འཛིན་ལ་དབང་ཐོབ་པ་ཉེ་བའི་བསྙེན་པ་སྦྱོར་ལམ་དང་པོ། དེ་ནས་ཡོ་བྱད་ལྔ་དང་ལྡན་པས་ཚོམ་བུ་ཚོགས་ཀྱི་སྒྲུབ་པ་ཟླ་བ་དྲུག་གམ་སྤོགས་ཆོག་དང་བཅས་པའི་དུས་སུ། རྟ་བབས་ཀྱི་སྟེང་དུ་རིགས་བཞི་ཚོམ་བུའི་དཀྱིལ་འཁོར་བསྒོམས་པས་སྦྱོར་ལམ་བཞི་བསྒྲོད་པ་སྒྲུབ་པ། དེ་ནས་སྲོད་ལ་དགྲ་ལས་དངོས་གྲུབ། གུང་ལ་ལྷ་ལས་དངོས་གྲུབ། ཐོ་རངས་ཡུམ་ལས་དངོས་གྲུབ་བླངས་ཏེ། ཐིག་ལེ་ཡས་བབས་ཀྱི་མཐའ་ན་དངོས་པོ་ལྷན་ཅིག་སྐྱེས་པའི་ཡེ་ཤེས་དང་། མས་བརྟན་གྱི་མཐའ་ན་རང་བཞིན་ལྷན་ཅིག་སྐྱེས་པའི་དོན་གྱི་འོད་གསལ་རྒྱུད་ལ་སྐྱེས་ནས། རྗེས་ཐོབ་ན་བསམ་ཡས་ལྷུན་གྲུབ་ཀྱི་དཀྱིལ་འཁོར་དུ་ལྡང་བ་ནི་སྒྲུབ་པ་ཆེན་པོ་མཐོང་ལམ་གྱི་ཡེ་ཤེས་ཡིན་པས། རྩ་རྒྱུད་ལས། དེ་ལ་སོགས་ཏེ་བསམ་མི་ཁྱབ། །ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཞེས་པ་བཞིན་ནོ། །ཉན་ཐོས་ཀྱི་ལུགས་ཀྱི་ཆོས་མཆོག་དེ་མ་ཐག་པའི་ཡེ་ཤེས་ཞེས་དུས་ཐུང་ངུ་ཞིག་ལས་མེད་ལ། འདིར་ནི་ཐེག་པ་ཆེན་པོའི་སྦྱོར་ལམ་ལ་ནང་གསེས་བཅུ་གཉིས་སུ་དབྱེ་བ་ཡོད་པ་བཞིན་ཤེས་དགོས་སོ། །ད་ཐུན་མཚམས་སུ་བསླབས་པ་ནི། ཐུན་མཚམས་སུ་ཡང་སྔ་མ་དེ་བཞིན་བསླབས་པས། ཞག་མང་པོར་སོང་ཡང་ཡུན་མི་ཚོར། ཚ་གྲང་བཀྲེས་སྐོམ་སོགས་ཀྱི་གཡེང་རྐྱེན་གྱིས་མི་གནོད་པ་བྱུང་ན་ཐུན་མཚམས་ལ་ལོབ་པ་ཞེས་བྱའོ། །དེ་ལྟར་བསྒོམ་པས་ལོབ་ཚད་ཁྱད་པར་བ་ནི། བྲིས་སྐུ་ལ་ཉི་འོད་ཕོག་པ་སོགས་བཀྲག་ཆེ་བ་ལ་བལྟ་དུས། རང་གིས་བསྒོམ་པའི་ཡིད་ངོར་གསལ་བའི་ལྷ་སྐུའི་བཀྲག་མདངས་དེ་ཟིལ་གྱིས་གནོན་ནས་རང་གི་བསྐྱེད་རིམ་ནག་ནོག་ཏུ་གྱུར་ན་མི་མཉམ་པར་ལོབ་པ་ཞེས་བྱ་ལ། དེ་གཉིས་བཀྲག་ཆེ་ཆུང་མེད་ན་མཉམ་པར་ལོབ་པ་ཞེས་བྱའོ། །མིག་བཙུམ་ནས་ལྟ་སྐུའི་གསལ་སྣང་ལ་རྩེ་གཅིག་ཏུ་གནས་འཕྲོར་མིག་ཕྱེས་ཏེ་ལྟ་སྐུ་ལ་བལྟས་ཚེ་ལྷའི་བཀྲག་མདངས་དེ་དག་ཕར་ཟིལ་གྱིས་གནོན་ནས་ནག་ཆེམ་པའམ། ཐལ་བ་ཕྱུར་གྱིས་འགྲོ་ན་ལྷག་པོར་ལོབ་པ་ཞེས་ཁ་དོག་ལ་ལོབ་པའི་ཚད་ཡིན། དམིགས་པ་རྒྱ་ཆེ་ཆུང་སོགས་གང་འདོད་དུ་འཕྲལ་འཕྲལ་བསྒྱུར་ལ་རང་དབང་འབྱོར་བ་གོ་རིམ་ལ་ལོབ་པའི་ཚད། དུས་འདི་ཙམ་ཏིང་ངེ་འཛིན་ལ་གནས་པར་བྱའོ་སྙམ་པའི་འཕེན་པ་གང་བཏང་བ་དེ་ཙམ་དུ་གནས་ཐུབ་ན་ཐུན་མཚམས་ལ་ལོབ་པའི་ཚད་ཡིན། བརྟན་པའི་ཚད་ནི། དེ་རྣམས་ལ་རྐྱེན་གྱིས་མི་གནོད་ཅིང་། ནམ་འདོད་དུ་ཐོགས་པ་མེད་པ་དེ་ཡི་ཚེ་བརྟན་པ་ཐོབ་པ་ཡིན་ནོ། །དེ་ལྟར་རང་ལྷར་བསྒོམ་པ་ལ་འབྱོར་ན་ཐོག་མར། མདུན་དུ་མིག་གིས་མཐོང་བའི་དངོས་པོ་གང་རུང་བསྒོམ་པ་བདེ་བ་ཞིག་ལྷར་བསྒོམ། དེ་གསལ་ན་རིམ་པས་རྒྱ་བསྐྱེད་དེ་མཐར་སྣོད་བཅུད་རྟེན་དང་བརྟེན་པར་བཅས་པ་སྒྱུ་འཕྲུལ་དྲྭ་བ་ཆེན་པོའི་རྟེན་དང་བརྟེན་པའི་དཀྱིལ་འཁོར་དུ་བསྒོམ་པ་ལ་བསླབ་པར་བྱའོ། །ད་ནི་གཉིས་པ་ང་རྒྱལ་ལ་བསླབ་པ་ནི། རང་ཉིད་མི་ཐ་མལ་པ་ཡིན་ནོ་སྙམ་པའི་འདུ་ཤེས་དེ་ཆེད་ཀྱིས་སྤངས་ནས། སྐྱོན་ཀུན་ཟད། ཡོན་ཏན་ཀུན་རྫོགས། སངས་རྒྱས་ཀུན་གྱི་ངོ་བོ་ལྷག་པའི་ལྷ་གང་གསལ་བཏབ་པ་དེ་ཉིད་དངོས་ཡིན་སྙམ་པའི་ང་རྒྱལ་བྱེད་པ་དང་། དེ་ནས་རང་ཉིད་ལྷ་སྐུར་གསལ་བའི་སྤྱན་ནི་ལྷག་པའི་ལྷ་དེ་དངོས་ཀྱི་སྤྱན་ཡིན། ཞལ་ནས་སྐུ་ལུས་ཕྱག་ཞབས་ལ་སོགས་པ་རེ་རེ་ནས། ལྷ་དངོས་ཀྱི་དེ་དང་དེ་ཡིན་སྙམ་པ་དང་། ངག་ཀྱང་ལྷ་དངོས་ཀྱི་གསུང་། ཡིད་ཀྱང་ལྷ་དངོས་ཀྱི་ཐུགས་ཡིན་སྙམ་དུ་བསྒོམ་པ་དང་། དེ་ནས་རང་ལྷག་པའི་ལྷར་གསལ་བ་དེ་ཉིད་ཀྱི་སྐུ་གསུང་ཐུགས་ཀྱི་སྣང་ཆ་ལས་ནམ་མཁའི་ཁམས་ཐམས་ཅད་དུ། སེམས་ཅན་སོ་སོའི་སྣང་ངོར། སྐུ་གང་ལ་གང་འདུལ་གྱི་བཀོད་པས་འགྲོ་དོན་མཛད་པ་དང་། གསུང་སྒྲ་དབྱངས་རྣམ་པ་ཐམས་ཅད་པས་སེམས་ཅན་གྱི་བསམ་པ་དང་མཐུན་པར་ཆོས་སྟོན་པ་དང་། ཐུགས་དོན་དམ་དང་ཀུན་རྫོབ་ཀྱི་ཤེས་བྱ་ཐམས་ཅད་སྐྱུ་རུ་ར་ལག་མཐིལ་དུ་བཞག་པ་ལྟར་མངོན་སུམ་དུ་མཁྱེན་པ་ལ་སོགས་པའི་ཡི་དམ་གྱི་ལྷའི་སྐུ་གསུང་ཐུགས་ཀྱི་ཡོན་ཏན་ཐམས་ཅད་རེ་རེ་ནས་ང་ལ་ཡོད། དེའི་ཕྱིར་ང་ལྷག་པའི་ལྷ་དངོས་ཡིན་སྙམ་དུ་བསྒོམ་པ་ལ་བསླབས། དེ་ལྟ་བའི་ལྷའི་ང་རྒྱལ་གྱི་རྣམ་པ་ཡིད་ལ་ལམ་གྱི་ཤར་བྱུང་བ་ན། དེའི་ངང་ལ་འཛིན་སྟངས་གསལ་བར་བྱས་ལ་རྩེ་གཅིག་ཏུ་སེམས་བཟུང་ཚུལ་གོང་ལྟར་བྱས་ལ། མཐར་རང་ལྷ་དེ་དངོས་སུ་སོང་བ་ལྟ་བུར་དངོས་ཀྱི་འདུ་ཤེས། བཅོས་མིན་གྱི་འདུ་ཤེས་བཅོས་མིན་དུ་རྒྱུན་པར་འཆར་བའམ། རེ་ཞིག་གམ། ནམ་བསྒོམ་པའི་ཚེ་ཡོང་བ་དང་། དུས་ནམ་གྱི་བར་དུ་བཞག་ཀྱང་འཁྱོང་བ་བྱུང་ན་ལོབ་པའི་ཚད་ཡིན་ནོ། །གསུམ་པ་དག་པ་དྲན་པ་ལ་བསླབས་པ་ནི། དག་པ་དྲན་པ་འདི་དག་རྒྱུན་དུ་མངོན་རྟོགས་ནམ་སྒོམ་པའི་ཚེ་དྲན་པར་བྱ་དགོས་མོད། འདིར་ནི་ཐོག་མར་བསྒོམ་པར་བྱ་བའི་ཕྱིར་དེ་དང་དེ་ལ་མོས་པ་ཤུགས་དྲག་ཏུ་བསྐྱེད་ནས་བསླབ་པ་ཡིན་ཏེ་རྒྱས་པར་སོ་སོའི་སྒྲུབ་ཐབས་དང་རྒྱུད་ཀྱི་རྣམ་བཤད་རྣམས་སུ་རྒྱ་ཆེར་གསུངས་པ་ལྟར་ཤེས་དགོས་ལ། འདིར་མདོར་བསྡུས་སུ་བརྗོད་ན། དེ་ཡང་ལྷ་སྐུའི་རྣམ་པ་འདི་དག་ལས་ཉོན་གྱིས་དབང་མེད་དུ་སྐྱེ་བ་བཟུང་བའི་འབྱུང་ལུས་རགས་པར་གྲུབ་པ་ལྟ་བུ་མ་ཡིན་པར་འབྲས་བུ་མཐར་ཕྱིན་པའི་ལྷ་རྡོ་རྗེ་མི་བསྐྱོོད་པ་སོགས་ལྷ་སོ་སོའི་གསང་བ་གསུམ་གྱི་ཡོན་ཏན་དེ་དང་དེ་གདུལ་བྱའི་ངོར་མཚོན་པར་བྱ་བའི་ལྷ་རྟགས་སུ་སྣང་བའི་ཕྱིར་གསང་ཆེན་སྔ་འགྱུར་པའི་སྒྲུབ་ཐབས་རྣམས་སུ་ལྷའི་སྐུ་མདོག་ཕྱག་མཚན་རེ་རེ་ནས་ཆེ་བའི་ཡོན་ཏན་གྱི་རྟགས་བསྟོད་དང་། ཆོས་ཉིད་དོན་གྱི་སྟོད་པ་འབྱུང་བ་རྣམས་ཀྱི་དོན་བཞིན། འདིར་ནི་ཆོས་ཉིད་དོན་གྱི་བསྟོད་པ་གཞུང་བཞིན་དུ་ངེས་པར་བྱས་ནས་མདོར་བསྡུས་དག་པ་དྲན་པའི་དོན་ལ་བསླབས་པ་ནི། དེ་ལྟར་སྣང་སྲིད་ལྷའི་འཁོར་ལོ་སོ་སོར་དག་པ་དྲན་པ་ནི། ཆོས་ཅན་ལྷ་དང་ལྷ་མོའི་དག་པ་ཞེས་བྱ་ལ། གཞི་གནས་ལུགས་ཡེ་ནས་རང་རིག་ཡེ་ཤེས་མཉམ་རྫོགས་ཆེན་པོར་གནས་པ་གསལ་འདེབས་ཕྱིར་སྒྲུབ་ཐབས་སོ་སོའི་སྦྱོར་མཆོད་སོགས་ཀྱི་སྐབས་སུ་འབྱུང་བ་ལྟར་ལྷ་ཡབ་ཡུམ་མཉམ་སྦྱོར་གྱི་དམིགས་པ་གསལ་བཏབ་པའམ། བསྐྱེད་རྫོགས་ཟུང་འབྲེལ་དུ་བསྒོམ་ཚེ་རྫོགས་རིམ་གྱི་ལུས་ལ་གནད་དུ་བསྣུན་པས་བདེ་ཆེན་ཆ་མཐུན་ཙམ་ཤར་བས་ཀྱང་བསྐྱེད་རིམ་ལ་རྒྱས་འདེབས་པ་སྟེ། གང་ལྟར་ཀྱང་རྗེས་ཆགས་བདེ་བ་ཆེན་པོའི་རྩིས་ཟིན་པར་བྱེད་པ་ནི་རང་རིག་བདེ་ཆེན་གྱི་དག་པ་དང་། དེ་ཡང་སྣང་ཆ་སྒྱུ་མ་ལྟ་བུ་ལ་ངོ་བོ་བྱུང་གནས་འགྲོ་གསུམ་སྐྱེ་འགགས་གནས་གསུམ་གྱི་ངོས་བཟུང་ཐམས་ཅད་བྲལ་བའི་ལྟ་བས་རྒྱས་བཏབ་སྟེ། སྣང་སྟོང་ཟུང་འཇུག་ཏུ་བསྒོམ་པ་ནི། ཆོས་ཉིད་དེ་བཞིན་ཉིད་ཀྱི་དག་པ་སྟེ། དག་དྲན་རེ་རེ་ལ་ལྟ་བས་དུག་དབྱུང་བ་གལ་ཆེ། དེ་ལྟར་ཐོག་མར་ངེས་ཤེས་ཤུགས་དྲག་བསྐྱེད་དེ་བསྒོམ་པ་ལོབ་ན། ལྷ་ཡི་རྣམ་པ་དེ་ཤར་ཙམ་ན། དག་པ་དེ་དང་དེའི་ངོ་བོར་འདུ་ཤེས་པ་བཅོས་མིན་དུ་འབྱུང་ཞིང་། དེའི་ཚེ་དག་པ་དྲན་པ་གོམས་ཤིང་ལོབ་པའི་ཚད་ཡིན། ཏིང་ངེ་འཛིན་རྣམ་པ་གསུམ་བསྒོམ་པ་ཟླ་བ་རེ་རེ་བྱས་ནས། ཕྱག་རྒྱ་གཅིག་པའི་ཏིང་འཛིན་མན་ཆད་ཟླ་བ་དགུ་སྟེ་ཁྱོན་བསྡོམ་ལོ་གཅིག་གི་བར་དུ་བསྙེན་པ་བཏང་ལ་གཙོ་བོ་རྣམ་པ་གསལ་བ་ང་རྒྱལ་བརྟན་པ་རྣམ་དག་དྲན་པ་གསུམ་མཐུན་གྱི་ཆ་གཉིས་ལ་བསྒོམ་རྒྱུ་དང་། སུམ་ཆ་གཅིག་ལ་བསྙེན་པ་བཏང་ན། གཙོ་བོར་བྱེ་ཆུང་གཅིག །འཁོར་རིགས་བཞི་ལ་འབུམ་ཕྲག་བཞི། སེམས་དཔའ་ཡབ་ཡུམ་ལ་ཁྲི། ཀུན་བཟང་ཡབ་ཡུམ་ལ་འབུམ་འཕྲག་གཅིག །ཐུབ་པ་དྲུག་སྒོ་བ་བཞི་ལ་ཁྲི་རེ་དགོས། བསྡུས་པའི་དབང་དུ་ན། གཙོ་བོ་མི་བསྐྱོད་པ་འབུམ་ཕྲག་བཞི། འཁོར་རིགས་བཞི་ལ་འབུམ་ཕྲག་རེ་དང་། དེ་ཕྱིན་ཆད་ལ་ཁྲི་རེ་བཟླས་ན་བསྙེན་པ་ལས་རུང་ཙམ་ཡིན། གཉིས་པ་རྫོགས་པའི་རིམ་པ་བསྒོམ་པ་ལ། ཕྱག་རྒྱ་གཅིག་པ་ཡན་ཆད་ཀྱི་ཏིང་ངེ་འཛིན་ཉམས་ལྔ་མཐར་ཕྱིན་པ་ན། གཟོད་རྫོགས་པའི་རིམ་པ་ལ་འཇུག་པ་ལས། དང་པོ་ནས་རྫོགས་པའི་རིམ་པ་བསྒོམ་པ་ནི་སྔ་འགྱུར་བའི་ལམ་གྱི་གནད་ཁྲིད་ཚུལ་མ་ཤེས་པས་ནོངས་སོ། །དེས་ན་བསྐྱེད་རིམ་ལ་བརྟན་པ་མཐར་ཕྱིན་པའམ་བརྟན་པ་ཅུང་ཟད་ཙམ་ཐོབ་པ་ན། དེ་ནས་རྫོགས་པའི་རིམ་པ་བསྒོམ་པ་ནི། སྔོན་འགྲོ་ལམ་གྱི་གནད་ལ་གསུམ། རྩ་སྦྱང་བ་སྟོང་རའི་གནད་ནི། རང་ཉིད་གཙོ་རྐྱང་དུ་བསྒོམ་པའི་འཁོར་ལོ་བཞིའི་དབུས་ན་རོ་རྐྱང་ཀུན་འདར་མ་གསུམ་ཀ་བའི་ཚུལ་དུ་ཡོད་པའི་ནང་སྦུག་སྟོང་སང་ངེ་བ་ལ་དམིགས་པ་བཟུང་བས། གཙོ་བོར་དབུ་མའི་ནང་ཕྲུ་མ་ཕུས་གདབ་པ་ལྟ་བུ། དང་པོ་མདའ་སྨུག་ཙམ། དེ་ནས་སྤོས་དོང་ཙམ། དེ་ནས་ཞོ་ཟོ་ཙམ། དེ་ནས་ལུས་ཐམས་ཅད་དབུ་མའི་ནང་ཙམ་བསྒོམ། འདིས་ནི་རླུང་སེམས་ཐམས་ཅད་དབུ་མར་ཚུད་པའི་གནད་ཡོད་དོ། །དེ་ནས་ལུང་སྦྱང་བ་སྲོག་གི་གནད་ནི། དེ་ལྟར་དབུ་མ་དང་འཁོར་ལོ་བཞི་སྟོང་པར་གསལ་བའི་གཡས་གཡོན་རོ་རྐྱང་གི་ཡར་སྣ་གཉིས་ནས་སྨིན་མཚམས་ནས་སྣ་བུག་གི་ནང་གཉིས་ལ་ཟུག་ཅིང་། མར་སྣ་གཉིས་ལྟེ་བའི་འོག་སོར་བཞིའི་ཆ་སྤུན་གུའི་ཐད་ནས་དབུ་མར་བུག་པའི་ཚུལ་དུ་དབུ་མར་ཚུད་པར་བསམ་ལ། རླུང་རོ་བུས་ནས་རླུང་ཕྱིར་འཕང་དུས་ནད་དང་སྡིག་སྒྲིབ་ཕྱིར་སངས་སངས་སོང་བར་བསམ། དེ་ནས་ནང་དུ་འདྲེན་དུས་སྣོད་བཅུད་བརྟན་གཡོའི་བདེན་འཛིན་དང་། སངས་རྒྱས་དང་བྱང་ཆུབ་སེམས་དཔའི་ཡོན་ཏན་དང་བཅས་པ་རླུང་གི་རྣམ་པས་སྣ་བུག་ནས་རོ་རྐྱང་གི་ནང་ནས་བྱུང་བ་དབུ་མའི་མར་སྣ་ནས་ནང་དུ་ཚུད་པར་བསམ་ལ། སྟེང་རླུང་ལྟེ་བར་མནན། འོག་རླུང་ཅུང་ཟད་བསྐུམ་ལ། འཇམ་རླུང་བུམ་པ་ཅན་དལ་བུས་འཛིན་ཅིང་། མི་ཐུབ་པ་ན་དལ་གྱིས་ཕྱིར་བཏང་། རང་བབ་ཀྱིས་འབྱུང་རྔུབས་ལས། ཆ་བབས་སུ་འཛིན་པ་ནི་གནད་ཡང་དག་པའོ། །དེ་ལྟར་བྱས་པས་རླུང་སྐྱོན་མེད་པ་ངང་གིས་ཟིན་ཞིང་འབྱོང་ངོ་། །དེ་ནས་ཐིག་ལེ་སྦྱོང་བའི་གནད་ནི། གཏུམ་མོའི་རྣལ་འབྱོར་བསྒོམ་པ་ལ། ལྟེ་བའི་ཐད་སྤྲུལ་པའི་འཁོར་ལོའི་དབུས་སུ་དབུ་མའི་ནང་ན། མེའི་དྭངས་མ་རྒྱ་ཁབ་ཀྱི་རྩེའམ། ཡུངས་དཀར་གྱི་འབྲུ་ཙམ་གསལ་ལ། དེ་ཡང་ཨ་ཤད་ཀྱི་རྣམ་པ་ཅན་རེག་བྱ་ཤིན་ཏུ་ཚ་བ་གཅིག་བསྒོམ་ལ་རོ་རྐྱང་གི་རླུང་དབུ་མའི་མར་སྣར་ཞུགས་པའི་མེ་སྦར་བས། དེ་ཡང་མེ་རྟ་རྔའི་ཉག་མ་ཙམ་དུ་འབར་བར་བསམ་ལ་རླུང་དང་དམིགས་པ་སྦྱང་། དེ་ལྟར་གོམས་པས་དབུ་མའི་མར་སྣའི་ནང་རླུང་གིས་གང་བས་ཡེ་ཤེས་ཀྱི་རླུང་དུམ་གཅིག་གསར་དུ་སྐྱེས། དེའི་སྟོབས་ཀྱིས་མེ་ཡང་ཆེར་འབར། ལྟེ་བའི་ངོས་དང་རྐེད་པ་དྲོད་ཀྱིས་འཁོར་བ་བྱུང་ན་གཟོད་གཏུམ་མོ་སྦར་ནས་སྔ་མའི་མེ་དེ་ལས་ཆེར་འབར་རིམ་བཞིན་སྤྱི་བོའི་ཧཾ་ལས་ཐིག་པ་ཆེར་བབས་པས་དབུ་མའི་ནང་ཁེངས། དྭངས་མས་འཁོར་ལོ་བཞིའི་རྩ་འདབ་སྟོང་པ་རྣམས་གང་བ་ལ་སེམས་མ་ཡེངས་པར་བསྒོམ་པས། བདུད་རྩི་དབུ་མའི་ནང་ནས་བབས་པའི་རེག་པ་ལུས་སེམས་ཀྱིས་མྱོང་ནས་སེམས་བདེ་སྟོང་ཆེན་པོར་ངང་གིས་འཆར་རོ། །དེ་ནས་དངོས་གཞི་ཁྱད་པར་ཅན་གྱི་གནད་ཡས་བབས་ཀྱི་ཡེ་ཤེས་དང་། མས་བརྟན་གྱི་ཡེ་ཤེས་དང་། ཀུན་ཏུ་བཟང་པོ་བསམ་གྱིས་མི་ཁྱབ་པའི་ཡེ་ཤེས་དང་གསུམ་ལས་དང་པོ་ལ་བཞི། ཀུན་ཏུ་བཟང་པོའི་མན་ངག །ཀུན་ཏུ་བཟང་མོའི་མན་ངག །སྦྱོར་བ་དག་པའི་མན་ངག །ཁྱབ་བདལ་ཆེན་པོའི་མན་ངག་རྣམས་རྒྱུད་ཀྱི་ལེའུ་བཅུ་གསུམ་པ་མན་ངག་གི་ལེའུ་ལས་བསྟན་པ་ལྟར་བསྒོམ་པ་ལ། དང་པོ་བདེ་ཆེན་འཁོར་ལོའི་མན་ངག་ནི། འཁོར་ལོ་བཞིའི་དབུས་ན་དབུ་མ་ཡེ་ཤེས་ཀྱི་རྩ་ལ་དྭངས་མ་དཀར་དམར་འདྲེས་པ་ཉུང་འབྲུ་ཙམ་གྱི་རྟེན་ལ་འོད་ལྔའི་གོང་བུ་སྲན་མའི་རྡོག་པོ་ཙམ་རེ་བསམ་པའི་དང་པོ་སྤྱི་གཙུག་གི་དྭངས་མ་ཉུང་འབྲུ་ཙམ་ལ་མགྲིན་པའི་དྭངས་མ་འོད་དང་བཅས་པའི་དྲོད་ཀྱིས་ཞུ། བྱང་ཆུབ་སེམས་ཀྱི་ཐིག་པ་སྐྲའི་ཉག་མ་ཙམ་བབས་པས་སྤྱི་བོའི་རྩ་འདབ་དང་། མགྲིན་པའི་རྟེན་གྱི་དྭངས་མ་ལ་ཞུགས། ཚད་མེད་པའི་བདེ་བས་ཁྱབ་པར་བསམ་ལ་འཇམ་རླུང་གྲངས་མང་བར་བཟུང་། གཉིས་པ་སྙིང་གའི་འོད་དང་། དྭངས་མའི་དྲོད་ཀྱིས་མགྲིན་པའི་དྭངས་མ་བཞུས། ལོངས་སྤྱོད་ཀྱི་འཁོར་ལོའི་རྩ་འདབ་དང་། སྙིང་གའི་རྟེན་ལ་ཞུགས། ཟག་པ་མེད་པའི་བདེ་བ་སྐྱེ་བར་བསམ་ལ་རླུང་བཟུང་། གསུམ་པ་དེ་ནས་ལྟེ་བའི་འོད་དང་ཐིག་ལེའི་དྲོད་ཀྱིས་སྙིང་གའི་རྟེན་གྱི་དྭངས་མ་ཞུ་བས་ཆོས་ཀྱི་འཁོར་ལོའི་རྩ་འདབ་དང་། ལྟེ་བའི་རྟེན་གྱི་ཐིག་ལེ་ལ་ཞུགས། མཆོག་ཏུ་བདེ་བའི་ཡེ་ཤེས་སྐྱེ་བར་བསམ་ལ་རླུང་བཟུང་། བཞི་པ་དེ་ནས་སྙིང་གི་འོད་རྟེན་གྱི་དྭངས་མའི་དྲོད་མར་སོང་། ལྟེ་བའི་རྟེན་གྱི་དྭངས་མ་ཞུ་བའི་དྭངས་མ་རླངས་པའི་ཚུལ་གྱིས་རགས་པ་མ་ཡིན་པར་ཕྲ་ལ་དྭངས་པས་སྤྲུལ་པའི་འཁོར་ལོའི་རྩ་འདབ་དང་རོ་རྐྱང་དང་དབུ་མའི་ནང་ཀུན་ཁྱབ་པར་ཞུགས་པའི་ཉེ་བར་ཞི་བའི་བདེ་བས་ཁྱབ། དགའ་བ་བཞིའི་ཡེ་ཤེས་སྐྱེ་བར་བསམ་ལ་འཇམ་རླུང་བཟུང་། འདི་དག་གི་ཚེ་ན་དགའ་བ་རེ་ཞིག་དངོས་གནས་པ་སྐྱེ་བ་མིན་ཀྱང་སེམས་མི་རྟོག་པར་བཞག་ནས་དེ་ཡེ་ཤེས་ཡིན་པར་བློ་བཞག་ནས་གོམས་ན་གོམས་པའི་སྟོབས་ཀྱིས་ཁམས་ཞུ་ནུས་པས་དགའ་བ་དངོས་གནས་པ་དང་། དེས་དྲངས་པའི་ཡེ་ཤེས་ཁྱད་པར་ཅན་སྐྱེ་བ་ནི་གཏུམ་མོ་བསྒོམ་པའི་ལག་རྗེས་ཡིན་པས་ཐེ་ཚོམ་མི་དགོས་པའི་མན་ངག་ཁྱད་པར་ཅན་ཡིན་ནོ། །དེ་ནས་གཉིས་པ་མས་བརྟན་གྱི་ཡེ་ཤེས་ལ་བཞི་ལས། དང་པོ་ནི་སྙིང་གའི་འོད་ལས་ཟེར་འཕྲོས་ཏེ་ལྟེ་བར་སོང་བ་ཐིག་ལེ་རྟེན་དང་བཅས་ཇེ་ཕྲ་ཇེ་ཆུང་ལ་ཡར་འདུས་སྙིང་གའི་འོད་དང་ཐིག་ལེ་ལ་ཐིམ་པའི་ངང་དུ་སེམས་མི་རྟོག་པར་བཞག་གོ། །ཡང་འོད་ཟེར་མགྲིན་པར་འཕྲོས་ཇེ་ཕྲ་ལ་སྙིང་གར་འདུས་པའི་ངང་ལ་བཞག །ཡང་འོད་ཟེར་སྤྱི་བོའི་ཐིག་ལེ་རྟེན་དང་བཅས་པ་ལ་ཕོག་པས་ཇེ་ཕྲ་ཇེ་ཆུང་ལས་སྙིང་གར་འདུས་པའི་ངང་ལ་བཞག་གོ། །ཡང་སྙིང་གའི་རྩ་འདབ་ཀྱི་དྭངས་མ་ཡང་རྟེན་གྱི་དྭངས་མ་འདུས། དེ་ཡང་བརྟེན་པ་ཐིག་ལེ་སྲན་མ་ཙམ་ལ་འདུས། འོད་ལྔ་པོ་ཡང་དབུས་ཀྱི་མཐིང་ག་ནམ་མཁའ་ལྟ་བུའི་ངང་ལ་འདུས། དེ་ཡང་མདངས་ཇེ་ཕྲ་ལས་མཐར་ཡིད་ལ་མི་ཕྱེད་པར་ཀུན་ཏུ་བཟང་མོ་ཆོས་ཉིད་སྟོང་པ་ཆེན་པོའི་དབྱིངས་སུ་དག་པའི་ངང་ལ་མཉམ་པར་བཞག་གོ། །དེ་ལྟར་ཡང་དང་ཡང་དུ་གོམས་པས་རླུང་དང་ཕྲ་ཐིག་ལ་སེམས་ཟིན་པས། རླུང་སེམས་གནད་གཅིག་པས་སེམས་གང་དུ་ཟིན་པ་དེས་རླུང་རྣམས་ཐིམ་ནས་སྟོང་པ་བཞིའམ་དགའ་བ་བཞིའི་ཡེ་ཤེས་ཁྱད་པར་ཅན་སྐྱེ་ནས་རླུང་སེམས་ཀྱིས་བསླད་པ་དང་བྲལ་བའི་དཔེ་དོན་གྱི་འོད་གསལ་གང་ཡང་རུང་བ་ཤར་ནས་དེའི་རྗེས་སུ་རླུང་ལྡང་བར་རྩོམ་ནས་སྣང་བཞི་ལུགས་ལྡོག་གི་ཚུལ་གྱིས་ཐོབ་པའི་མཇུག་ཏུ། སྣང་བ་གསུམ་གྱི་འོད་གསལ་གྱིས་རྒྱུ་བྱས། འོད་ཀྱི་ཐིག་ལེ་བསྒོམ་རྒྱུ་རླུང་འོད་ཟེར་ལྔ་པས་རྐྱེན་བྱས་ནས་སྒྱུ་འཕྲུལ་དྲྭ་བ་ཆེན་པོ་རྟེན་དང་བརྟེན་པའི་རྣམ་པར་རྩོལ་མེད་དུ་ལྡང་བ་ཡིན་ནོ། །མཆེད་པའི་ཐོག་ཏུ་ཐོན་པ་ན་ལུས་རིག་པ་འཛིན་པ་ལས་ལྷ་སྐུར་ལྡང་བ་དཀའ་བས། ཐོབ་པ་དང་མཉམ་དུ་ལྷ་སྐུར་ལྡང་བ་ནི། རྩ་རྒྱུད་ལེའུ་འདི་ཉིད་ལས། སྙིང་པོ་ཐིག་ལེ་མཉམ་སྦྱོར་ནས། །བདེ་ཆེན་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མ་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསུངས་པ་འདི་བཞིན་ངེས་པ་ལས། དུས་འཁོར་བ་ཡི་སྟོང་གཟུགས་དང་། རྫོགས་ཆེན་པའི་སྣང་བའི་འཆར་ཚུལ་དང་ནམ་ཡང་བསྲེ་བར་མི་བྱའོ། །འོ་ན་དཔེ་དོན་གྱི་འོད་གསལ་གྱི་རྗེས་སུ་ལྷ་སྐུར་ཇི་ལྟར་ལྡང་སྙམ་ན་བསྐྱེད་པའི་རིམ་པ་ལ་གོམས་གོམས་པའི་ནུས་པ་རླུང་སེམས་གཉིས་ལ་ཆེས་ཐེང་བས། བསྐྱེད་རིམ་གྱི་རྣམ་དག་དྲན་པའི་སྐབས་ཐུན་མཚམས་ལ་ལོབ་པ་ཞེས་བྱ་བ་དེའི་དགོས་པ་ཡིན་པས་སོ། །དེ་ལྟར་བསྐྱེད་པའི་རིམ་པ་དང་རྫོགས་པའི་རིམ་པ་མདོར་བསྡུས་སུ་བསྟན་ནས། ད་ནི་རྩ་བའི་གསུམ་པ་འབྲས་བུ་ལ་གཉིས། གནས་སྐབས་དང་། མཐར་ཐུག་གི་འབྲས་བུའོ། །དང་པོ་དེ་ལྟར་གོམས་པས་དབང་པོའི་རྣམ་ཤེས་རྣམས་ཡུལ་ལ་འཕྲོ་བའི་རྒྱུན་ཁེག་པས་དབང་ཤེས་ཀྱི་བཞོན་པའི་རླུང་རྣམས་ནང་དུ་ལྡོག །ཉེ་བའི་རྟགས་སུ་མིག་སྔར་ཁང་པ་དུ་བས་ཁེངས་པ་ལྟ་བུ་སོགས་སྔོ་ལོང་ལོང་པོ་དང་། བྱེ་ཐང་ལ་ཉི་འོད་ཕོག་པ་རྒྱང་ནས་བལྟས་ཚེ་ཆུ་རྒྱུག་པ་ལྟ་བུ་སོགས་ཤིག་ཤིག་བར་སྣང་སྨིན་རྒྱུ་ལྟ་བུར་མཐོང་བ་དང་། སྲིན་བུ་མེ་ཁྱེར་ལྟ་བུའི་སྣང་བ་མེ་འབར་བ་ལྟར་དམར་ཙག་ཙག་གི་འོད་འཕྲོ་བ་སོང་བ་དང་། མར་མེ་འབར་བ་ལྟ་བུའི་ལྷབ་ལྷབ་འབར་བར་སྣང་བ་དང་། སྤྲིན་མེད་པའི་ནམ་མཁའ་དྭངས་པ་ལྟར་གསལ་སྟོང་མཐའ་དབུས་མེད་པར་གནས་པའི་སྣང་བ་འཆར་བ་སྟེ། མཚན་ལྟས་ལྔ་ཉམས་ཀྱི་ཚུལ་དུ་འཆར་བ་དང་། རྨི་ལམ་གྱི་ལྟས་སུ་སངས་རྒྱས་དང་བྱང་ཆུབ་སེམས་དཔའི་སྐུ་སོ་སོར་བཞུགས་པ་མཐོང་བ་དང་། སངས་རྒྱས་དང་བདག་མཚུངས་པར་བདག་ལྷར་གསལ་བའི་སྐུ་མདུན་རྒྱབ་ཏུ་ཕྱི་ནང་མེད་པར་ཕྱོགས་ཐམས་ཅད་དུ་ཞལ་ཐ་ལེར་མཐོང་བ་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བདག་ལྷར་གྱུར་པ་ལ་ཕྱག་མཆོད་མཛད་པར་མཐོང་བ་དང་། སངས་རྒྱས་ཐམས་ཅད་ཀྱིས་ཆོས་ཟབ་མོ་སྟེར་བ་དང་བཤད་པར་རྨི་བ་སྟེ་རྟགས་ཀྱི་མཆོག་ལྔ་དང་། གཞན་ཡི་དམ་སྐུ་གཟུགས་ཞལ་འཛུམ་པ་དང་། འོད་བྱུང་བ་དང་། སྐུ་མ་མཐོང་ཡང་གསུང་ཐོས་པ་དང་། ལྷ་མོའི་གླུ་དབྱངས་ཐོས་པ་དང་། གཞལ་ཡས་ཁང་ལས་སྒྲ་བྱུང་བ་ཐོས་པ་དང་། གྲོགས་པོ་དམ་པ་ཞེས་བྱང་སེམས་རྣམས་ཀྱི་འབོད་པ་དངོས་སམ་རྨི་ལམ་དུ་འབྱུང་ངོ་། །དེ་དག་ཀྱང་གོང་དུ་བཤད་པའི་རྟོགས་པ་དང་རྒྱུད་ཚོད་དེ་དག་སླེབས་པ་རྣམས་ལ་བྱུང་ན་ཡང་དག་པའི་ལྟས་སུ་གོ་ལ། དེང་སང་རང་རེ་ཐ་མལ་པ་ལ་རང་གར་ལྟས་དེ་རིགས་འོང་དོན་མེད་པར་འོང་ན་གདོན་གྱི་ཆོ་འཕྲུལ་ལམ་བར་ཆད་ཀྱི་ལྟས་སམ་རླུང་ལ་སོགས་པ་ནད་ཀྱིས་འཕྲུལ་ལམ་བག་ཆགས་ཀྱི་སེམས་རྨིས་ཙམ་དུ་ཟད་ཀྱི་དོན་མེད་པར་ཤེས་པར་བྱ་སྟེ། སེམས་རྒྱུད་ལ་ཉམས་དང་རྟོགས་པའི་དྲི་ཙམ་མི་བྲོ་བཞིན་དུ་དེ་དག་ཡིན་དུ་རེ་བའི་ཨོ་ཟོབ་བྱེད་པའི་རང་གི་དེ་ཉིད་གསལ་བར་བྱེད་པ་ཁོ་ནའོ། །གཞན་ཡང་བཤད་དགོས་པ་མང་ཡང་ཚོགས་ཆེན་འདུས་པའི་སྐབས་ན་འཆད་པར་སྤྲོའོ། །གཉིས་པ་ནི། རྩ་རྒྱུད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་རྒྱུ་ཤེས་པའི་མཚན་ཉིད་ལྟ་བ་རྟོགས་ཤིང་། རྐྱེན་འཇུག་པའི་མཚན་ཉིད་བསྐྱེད་རྫོགས་ཀྱི་ཏིང་ངེ་འཛིན་གོམས་པས་ལྟ་སྤྱོད་ཟུང་འབྲེལ་དུ་འབྱོར་བའི་སྒྲུབ་བྱེད་ཐབས་ཀྱི་ངེས་པ་མི་གཏོང་བའི་གཟུངས་ཀྱང་ཡིན་ལ། དེ་དག་ས་བོན་དང་ཆུ་ལུད་ལྟར་འབྲས་བུར་སྨིན་བྱེད་ཀྱི་རྒྱུ་དང་རྐྱེན་ཡང་ཡིན་ཏེ། ལྟ་བ་རྟོགས་ནས་སྟོང་ཆེན་དང་ཀུན་ཏིང་ལ་གནས་པ་བསྙེན་པ་དང་། ཕྱག་རྒྱ་གཅིག་སྤྲོས་ནི་ཉེར་བསྙེན་དང་། ཚོགས་སྒྲུབ་ནི་སྒྲུབ་པ། དེ་འབྲས་མཐོང་ལམ་ཐོབ་མ་རག་པའམ་ཐོབ་པ་ནི་སྒྲུབ་པ་ཆེན་པོ་སྟེ། དེ་དག་གང་གི་དུས་སུ་ཡང་རྟོགས་གོམས་གཉིས་ཀྱི་འབྲས་བུས་འབྱིན་ནུས་ཀྱི་མཐུ་ཅན་དུ་གང་གིས་སྐུ་གྱུར་པའི་ཚེ་ཟག་མེད་སློབ་པའི་ལམ་རིག་འཛིན་བཞི་དང་། མི་སློབ་རྒྱལ་བ་སྐུ་ལྔའི་གོ་འཕང་ཐོབ་ནས་སངས་རྒྱས་ཀྱི་ཞིང་ཀུན་ཏུ་གྲགས་པར་འགྱུར་བས། ཚོམ་བུ་ཚོགས་སུ་སྒྲུབ་པའི་མཐའ་ན་སྲོད་ལྷ་དང་། གུང་ལ་དགྲ་དང་། ཐོ་རངས་ཡུམ་ལས་དངོས་གྲུབ་བླངས་པས། ཐིག་ལེ་ཡས་བབས་ཀྱི་མཐའ་ན་དངོས་པོ་ལྷན་ཅིག་སྐྱེས་པའི་ཡེ་ཤེས་དང་། མས་བརྟན་གྱི་མཐའ་ན་རང་བཞིན་ལྷན་ཅིག་སྐྱེས་པའི་ཡེ་ཤེས་མཐོང་ལམ་དོན་གྱི་འོད་གསལ་རྒྱུད་ལ་སྐྱེས་ནས། དེའི་རྗེས་ཐོབ་ཏུ་བསམ་ཡས་སྒྱུ་འཕྲུལ་དྲྭ་བའི་དཀྱིལ་འཁོར་དུ་ལྡང་བ་ལ་ཁྱད་པར་མེད་ཀྱང་། འདི་ལ་བརྩོན་པ་དང་། ཏིང་ངེ་འཛིན་དང་། ཤེས་རབ་ཀྱི་སྟོབས་ཆེ་བ་རྣམས་ཀྱིས་ཟག་བཅས་ཀྱི་ཕུང་པོ་དྭངས་མའི་ལུས་སུ་གྱུར་ནས་འཆི་བ་མེད་པ་ཚེ་ལ་དབང་བའི་རིག་འཛིན་ཐོབ་པས་རྣམ་སྨིན་རིག་འཛིན་ལས་ཡོན་ཏན་ལྷག་པར་བཅས་པའི་ཕྱིར་ལྷག་བཅས་ཀྱི་རིག་འཛིན་ནམ་ཚེ་དབང་རིག་འཛིན། ལམ་ཡོངས་སུ་མ་རྫོགས་བར་དུ་ཚེ་ལ་དབང་བའོ། །དེ་ལྟར་བརྩོན་ཏིང་ཤེས་རབ་ཀྱི་སྟོབས་ཅུང་ཟད་ཞེན་པ་དག་གིས་དེ་ལྟར་དྭངས་མའི་ལུས་སུ་གྱུར་མ་ནུས་པ་རྣམ་སྨིན་རིག་འཛིན་ནམ་ལྷག་མེད་མྱང་འདས་ཞེས་ལམ་རིམ་ལས་གསུངས་སོ། །ལམ་རིམ་ལས། ནུས་པ་ཐོབ་དང་མ་ཐོབ་པས། །མཐོང་ལམ་གཉིས་སུ་ཕྱེ་བ་ཡིན། །ཞེས་རྣམ་སྨིན་བར་ཚེའི་བར་ཆད་པ་བར་དོར་ས་གཉིས་པར་སྤང་རྟོགས་ན་འཕར་ནས་ས་དགུ་པའི་བར་ཕྱག་ཆེན་རིག་འཛིན་དང་། བཅུ་ནས་རྒྱུན་མཐའི་བར་ལྷུན་གྲུབ་རིག་འཛིན་ལ་བཞེད་པ་འདི་ཟུར་གྱི་རིག་འཛིན་ཆེན་པོ་རྣམས་ཀྱིས་བཞེད་པ་བླ་ན་མེད་པ་ཡིན་པས་གཞན་དུ་དྲང་བར་མི་བྱའོ། །རིག་འཛིན་བཞི་པོ་དེ་དག་གིས་འཕགས་པ་སློབ་པའི་ས་བཅུ་ཆོད་ཚུལ་ལས་དགོངས་སྤྱོད་རྒྱ་མཚོ་དག་མཉམ་བདེན་པ་དབྱེར་མེད་ལ་གོམས་པ་ཆེས་ཆེ་བས། རྣམ་སྨིན་དང་ས་བརྒྱད་པ། ཚེ་དབང་དང་དགུ་པ། ཕྱག་ཆེན་དང་ས་བཅུ་པ། ལྷུན་གྲུབ་རིག་འཛིན་དང་བཅུ་གཅིག་ཀུན་ཏུ་འོད་དང་དགོངས་སྤྱོད་མཉམ་པ་ཡིན་ལ། རྗེས་ཀྱི་ཡོན་ཏན་གྱི་ཐོབ་ཚུལ་མཚན་ཉིད་ཐེག་པ་དང་མི་འདྲ་བ་ལམ་རིམ་ལས། མཉམ་པར་བཞག་ལས་མ་གཡོས་ཤིང་། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། ཞིང་ཁམས་གྲངས་མེད་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། རྔོན་དང་སྨད་ཚོངས་ལ་སོགས་པ། སྤྲུལ་པའི་ལུས་ཀྱི་འདུལ་བར་བྱེད། །ཅེས་པས། དགོངས་པ་དག་མཉམ་བདེན་པ་དབྱེར་མེད་ལ་མཉམ་པར་བཞག་བཞིན་པ་ལས་མ་གཡོས་པར། དུས་སྐད་ཅིག་རེ་རེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་བརྒྱ་ཡི་ཞིང་གི་རྡུལ་སྙེད་ཀྱི་གྲངས་ཀྱི་སངས་རྒྱས་ཀྱི་ཞལ་མཐོང་བ་དང་། རང་གི་ལུས་དེ་སྙེད་སྟོན་པ་དང་། འཁོར་དེ་སྙེད་དང་། སེམས་ཅན་དེ་སྙེད་འདུལ་བ་དང་། ཏིང་ངེ་འཛིན་གྱི་སྒོ་དེ་ཉིད་ལ་འཇུག་པ་དང་། ཆོས་ཀྱི་སྒོ་དེ་སྙེད་སྟོན་པ་དང་། ཞིང་དེ་སྙེད་གཡོ་བ་དང་། འོད་ཟེར་དེ་སྙེད་འགྱེད་པ་རྣམ་སྨིན་རིག་འཛིན་གྱི་ཡོན་ཏན་དང་། ཚེ་དབང་རིག་འཛིན་སྟོང་གསུམ་འཇིག་རྟེན་བརྒྱ་རྩི་གཞིར་བྱས་པའི་སྟོང་ཕྲག་གི་འཇིག་རྟེན་གྱི་རྡུལ་སྙེད་དང་མཉམ་པའི་སངས་རྒྱས་ཀྱི་ཞལ་མཐོང་བ་སོགས་དང་། ཕྱག་ཆེན་རིག་འཛིན་དུས་སྐད་ཅིག་ལ་སྔ་མ་དེ་རྩི་གཞིར་བྱས་པའི་འཇིག་རྟེན་གྱི་ཁམས་བརྒྱ་སྟོང་ཕྲག་བཅུ་ཡི་རྡུལ་སྙེད་ཀྱི་གྲངས་དང་། ལྷུན་གྲུབ་རིག་འཛིན་དུས་སྐད་ཅིག་ལ། སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུའི་རྡུལ་སྙེད་དང་མཉམ་པའི་སངས་རྒྱས་མཐོང་བ་སོགས་མཚན་ཉིད་ཐེག་པ་ལས་ཆེས་ཁྱད་པར་ཡོད་པ་རྣམས་ཤེས་པར་བྱའོ། །ད་ནི་རྩ་བའི་གསུམ་པ་སྒྲུབ་པ་རྗེས་ཀྱི་བྱ་བ་ནི། བར་ཆད་མེད་པའི་ལམ་ལ་ཚོགས་སྒྲུབ་པའི་དབང་དུ་བྱས་ཏེ། སྔོན་འགྲོ་ཤོམ་བྱེད་ཅིང་ནུབ་དང་པོ་འགོ་འཛིན་གྱི་བསྙེན་པ་ལ་འཇུག་པ་དང་བཅས་པ་ནི་བསྙེན་པ། ཅི་ཙམ་སྒྲུབ་པའི་ཞག་གྲངས་ཕྱེད་ཚུན་ཆད་ནི་ཉེ་བའི་བསྙེན་པ་སྟེ། དེ་གཉིས་ལས་འོད་ཟེར་དཀར་པོ་སྤྲོས་པས་དངོས་གྲུབ་ཀྱི་སྣོད་རུང་དུ་བྱེད་ནས། ནུབ་ཐ་མ་མ་གཏོགས་པའི་ཕྱེད་ཡན་ཆད་འོད་ཟེར་དམར་པོའི་འཕྲོ་འདུ་བསྣོལ་མས་དངོས་གྲུབ་བསྐུལ་ཞིང་བསྡུ་བས་བཅུད་དག་པར་བྱེད་པ་ནི་སྒྲུབ་པ་དང་། རྟགས་མཐོང་ནས་ནུབ་ཐ་མར་འོད་ཟེར་མཐིང་གའི་ཚུར་བསྡུ་བས་རྒྱུད་དག་པར་བྱེད་པ་ནི་སྒྲུབ་པ་ཆེན་པོ་སྟེ། དེ་དག་ནི་བསྙེན་པའི་ལུགས་ཀྱི་བསྙེན་སྒྲུབ་ཡན་ལག་བཞི་ཞེས་བྱ་བ་སྟེ། དེ་ཡང་ཟླ་བ་གཅིག་ལ་དཔེར་མཚོན་ན། ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་དང་། །ལྷ་གསལ་འཕྲོ་འདུ་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་སྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བླང་བ་སྒྲུབ་ཆེན་པོ། །ཞེས་པས། དེ་ཡང་ལོ་གཅིག་གི་དབང་དུ་བྱས་ན། བསྙེན་པའི་སྟ་གོན་གྱི་བྱ་བ་ནས་ནུབ་དང་པོ་བསྙེན་པའི་མགོ་འཛུག་པ་ཡན་ཆད་བསྙེན་པའི་ཡན་ལག་དང་། དེ་ནས་ཟླ་བ་དྲུག་གི་བར་དུ་ཏིང་ངེ་འཛིན་གཙོ་བོར་བསྒོམ་ཞིང་བསྙེན་པ་ཟླ་བ་ནི་ཉེ་བསྙེན་དང་། དེ་ནས་ན་ཟླ་བ་དྲུག་གི་བར་དུ་སྒྲུབ་པ་ལ་གཙོ་བོར་འཛབ་ཁང་དབྱེ་ཞིང་། དཀྱིལ་ཆོག་གི་རྣམ་ཤེས་ནམ་མཁའ་སོགས་འཛབ་བསྐུལ་བྱས་ཏེ། མདུན་བསྐྱེད་གསལ་བཏབ་སྟེ་སྒྲུབ་པའོ། །དང་པོ་བསྐྱེད་རིམ་ལ་བསླབ་པའི་དུས་ན་མདུན་གྱི་ཐང་སྐུ་ལ་དམིགས་ཏེ་བསྒོམ་པ་ནི། གང་ཟག་དབང་པོ་འབྲིང་དང་ཐ་མའི་དབང་གིས་བསྐྱེད་རིམ་ལ་གསལ་སྣང་ཐོན་སླ་བའི་ཆེད་ཀྱིས་དང་པོ་དེ་ལྟར་གོམས་ནས། གསལ་སྣང་ཐོན་པ་ན། དེ་རང་གི་ལུས་ལ་སྤོས་ཏེ་བསྒོམ་པས། གཙོ་བོ་བདག་བསྐྱེད་ཁོ་ན་ཡིན་ལ། སྒྲུབ་པའི་སྐབས་འདིར་ནི་བདག་མདུན་གཉིས་ཀ་ལ་གསལ་སྣང་ཐོན་དགོས་པའི་ཁྱད་པར་ཡོད་པ་བཞིན་དུ་ཤེས་དགོས་སོ། །དེ་ནས་ཐ་མའི་ཞག་བདུན་གྱི་སྔོན་རོལ་དུ་མཆོད་པ་གསར་དུ་བཤམས། དངོས་གྲུབ་ཀྱི་རྫས་འགོད་ནས། བཟླས་པའི་ཚེ་དངོས་གྲུབ་བསྐུལ་བའི་སྔགས་རྩ་སྔགས་ལ་ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཞེས་གཤམ་གདགས་ནས་བཟླ། ནུབ་ཐ་མའི་ཐོ་རངས་ཀྱི་དུས་སུ་དངོས་གྲུབ་ཞུ་དགོས་པ་དུས་ཀྱི་གནད་ཁྱད་པར་ཡིན་ཏེ། དེ་ཡང་ནམ་ལངས་ཉིན་གུང་བར་སྣང་བའི་དུས། ཉིན་གུང་ནས་སྲོད་ཀྱི་བར་མཆེད་པའི་དུས། སྲོད་ནས་མཚན་གུང་བར་ཐོབ་པའི་དུས། དེ་ནས་ཐོ་རངས་ཀྱི་བར་རྣམས་ཉེར་ཐོབ་བམ་འོད་གསལ་གྱི་དུས་ཡིན་པས། རྒྱལ་བུ་དོན་གྲུབ་ཀྱིས་ཐོ་རངས་རྒྱལ་རྔ་བརྡུང་དུ་ཉེ་བ་ན་ཟད་དང་མི་སྐྱེ་ཤེས་པའི་ཡེ་ཤེས་མངོན་དུ་མཛད་པ་དང་། རྙིང་མའི་སྔགས་གཞུང་ཚད་མ་རྣམས་ནས། དེང་སང་སྐྱ་རེང་དང་པོ་ཤར། །རྡོ་རྗེ་སེམས་དཔའི་ནམ་ཡང་ལངས། །ཞེས་དང་། རྡོ་རྗེ་སྲིན་པོའི་ནམ་ཡང་ལངས། །ཞེས་པ་རྣམས་དུས་གནད་ཁྱད་པར་ཅན་འདི་ལ་དགོངས་པས། དེའི་ཚུལ་ནི། ནུབ་ཐ་མའི་མཚན་ཕྱེད་ཙམ་ནས་ཡར་ལངས་ཏེ། ལས་བྱང་རྒྱས་པ་ཚར་གཅིག་བསྙེན་པ་དང་བཅས་པ་མཆོད་བསྟོད་བཅས་གྲུབ་པར་བྱས། མདུན་བསྐྱེད་མི་བསྡུ་བར་བཞག་ནས། ཚོགས་ཀྱི་འཁོར་ལོ་རྒྱས་པར་བསྐོར་ནས། ལྷག་མ་དང་བརྟན་མ་ཡན་ཆད་གྲུབ་པ་དང་། དེ་ནས་དངོས་གྲུབ་ཀྱི་གེགས་སྡིག་པ་དང་ཉམས་ཆག་བཤགས་པ་ཡེ་ཤེས་སྐུ་མཆོག་ཚར་གསུམ་དང་། དངོས་གྲུབ་ཀྱི་བར་ཆད་བགེགས་བསལ་བ་ལ། ཧཱུྃ་ཧཱུྃ་ཧཱུྃ་བི་ཤྭ་བཛྲ་དང་། ཧཱུྃ་བཞིས་བགེགས་བསྐྲད། སྲུང་བའི་འཁོར་ལོ་བརྟན་པར་བསྒོམ། དངོས་གྲུབ་ཀྱི་རྫས་ལ། མཁའ་ཁྱབ་ཀྱི་རྒྱལ་བ་སྲས་བཅས་ཀྱི་བྱིན་རླབས་བསྡུ་བ། འཕགས་མཆོག་ཐུགས་རྗེ་སོགས་བབ་དྲུག་འདས་བཞིས་བྱིན་དབབ། དེ་ནས་རྩ་སྔགས་ལ་དངོས་གྲུབ་བསྐུལ་བའི་གཤམ་བཏགས་ནས་བརྒྱ་རྩ་བཟླས། སྨན་ཐོད་ཆང་གིས་བཀང་བ་ཐོགས་ཏེ། གཞུང་གི་སྨན་མཆོད་ༀ་ཧཱུྃ་སངས་རྒྱས་ཀུན་དང་སོགས་ནས་བླ་མ་བརྒྱུད་པ་དཀྱིལ་འཁོར་གྱི་ལྷ་ཚོགས་བཅས་པར་ཕུལ་ནས། བདུད་རྩི་གུ་ཡའི་ལག་གི་ཕྱག་རྒྱས་གཏོར་བས་ཡེ་ཤེས་ཀྱི་བདུད་རྩིའི་ཟེག་མ་ནམ་མཁའ་ལ་སྤྲིན་བཞིན་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ། ལྷ་ཚོགས་ཐམས་ཅད་མཉེས་ཤིང་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསམ། དེ་ནས་གཏོར་མ་དང་དངོས་གྲུབ་ཀྱི་རྫས་བཟའ་བཏུང་ཅི་རིགས་པ་རྣམས་ལ་ལོངས་སྤྱད་ནས། དམིགས་པ་རྫས་དེ་དག་ལྷའི་ངོ་བོར་ཤེས་པས་གནས་གསུམ་གྱི་འོད་ཟེར་བདག་ལ་ཐིམ། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དངོས་གྲུབ་ཐོབ་པར་བསམ་ལ། ༀ་བཛྲ་ས་མ་སོགས་དང་། ༀ། ཡེ་ཤེས་རྒྱལ་པོ་སོགས་བརྗོད་ནས། མདུན་བསྐྱེད་ཀྱི་དཀྱིལ་འཁོར་རྣམས་བདག་ཉིད་ལ་ཐིམ་ནས་གཉིས་སུ་མེད་པའི་དངོས་གྲུབ་ཐོབ་པར་བསམ་ལ་མཉམ་པར་བཞག་གོ། །དེ་ནས་མཆོད་བསྟོད་དང་། ཉེར་བསྡུ། གོ་བགོ། ལུས་བསྲུང་བཅས་རྗེས་རྒྱས་པར་བྱས་ནས། དེ་ཉིན་ནས་ཞག་ཤས་བར་དུ་གནས་བཟུང་ཞིང་ཡི་དམ་ལ་གཏང་རག་གི་ཚོགས་ཅི་འབྱོར་པར་ཕུལ། ཁ་སྐོང་གི་ཞི་བའི་སྦྱིན་སྲེག་ཅི་རིགས་པར་བྱ། དེ་ནས་རྒྱལ་ཆེན་མཆོད་གཏོར་དང་། རྒྱལ་ཐོ་བཀྲོལ་ནས་ཞག་ཁ་ཤས་སུ་འདུག །དེ་ནས་རིམ་གྱིས་རྡོ་རྗེ་མཆེད་ལྕམ་དམ་ཚིག་གཙང་བ་རྣམས་དང་རིམ་གྱིས་འཕྲད་པར་བྱ་བ་ལས། ཐོ་བཀྲོལ་བ་དང་། མི་མང་པོ་དང་འཕྲད་པ་སོགས་བྱས་ན་གྲིབ་གནོན་ལྟ་བུས་ཧར་གྱིས་འཆི་བ་ཡང་ཐོས་པས་ཚོད་ཟིན་པར་བྱའོ། །དེ་དག་གིས་ལམ་ངེས་རྫོགས་ཀྱི་རིམ་པའི་དབང་དུ་བྱས་པ་ཡིན་ལ། ལས་དང་པོ་པས་བསྙེན་འབྲེལ་ཙམ་བྱ་བ་ལ། ཉིན་ཐུན་གཉིས་དང་མཚན་ཐུན་གཉིས་བཅས་བཞིས་འཇུག་བདེ་བས་ཉིན་མོའི་ཐུན་སྔ་དྲོ་ལ་ལས་བྱང་རྒྱས་པར་བཏང་། འཛབ་ཁང་དབྱེ་བ་དང་། དཀྱིལ་ཆོག་གི་འཛབ་བསྐུལ་བཅས་བསྙེན་པ་ཅི་ནུས་དང་། མཐར་མཇུག་བསྡུ་བ་ལ། བསྟོད་པ། བཤགས་པ། ཡེ་ཤེས་པ་བསྡུ་བ་གསུམ་གྱི་དང་པོ་བཞི་བསྟོད་བྱ་བར་གསུངས་པ་ལྟར་ན། ཧཱུྃ། རྣམ་ཤེས་རྣམ་དག་བཅོམ་ལྡན་སོགས་ཀྱིས་བསྟོད། གཉིས་པ། ཡེ་ནས་གཉིས་མེད་སོགས་ཀྱིས་ནོངས་པ་བཤགས། གསུམ་པ་ནི། རང་བཞིན་དང་ཏིང་ངེ་འཛིན་གྱི་དཀྱིལ་འཁོར་གཉིས། རང་བཞིན་དབྱེར་མེད་དུ་རྟོགས་པའི་ཕྱིར། ༀ་བཛྲ་ས་མ་ཡ་ༀ་སོགས། ༀ། ཡེ་ཤེས་རྒྱལ་པོ་སོགས་ཀྱིས་རིག་པའི་མེ་ཏོག་དོར་ཞིང་། དངོས་གྲུབ་བསྐུལ་ནས། ༀ་བཛྲ་ས་མ་ཡ་ཧཱུྃ། ཞེས་བརྗོད་པས། ཡེ་ཤེས་ཀྱི་འཁོར་ལོ་དམ་ཚིག་པ་ཆུ་ལ་ཆུ་བཞག་པ་བཞིན་དབྱེར་མེད་དུ་ཐིམ། ༀ་བཛྲ་ས་མ་ཡ་ཧོཿ ཞེས་དབང་དུ་གྱུར་ནས་དགྱེས་ཤིང་ཆགས་པར་བྱས། ཛཿཧཱུྃ་བྃ་ཧོཿ ཞེས་ཕྱག་རྒྱ་བཞིས་བརྟན་ཅིང་གསལ་བར་བྱས་ནས་ཡི་གེ་བརྒྱ་པ་བཟླའོ། །དེ་ནས་ཉེར་བསྡུ་གོ་བགོ་ལུས་སྲུང་བར་བྱའོ། །དེ་བཞིན་ཐུན་ཐམས་ཅད་དུ་ངེས་པའོ། །དེ་ནས་ཐུན་ཕྱི་མ་གསུམ་ལ། ལས་བྱང་དང་ལྷ་བསྐྱེད་པའི་གཞུང་ཚིག་རྣམས་རྒྱས་པར་མི་ལྕོགས་ན་ཀུན་མཁྱེན་ཆེན་པོའི་ངལ་གསོལ་དོན་ཁྲིད་ཀྱི་དགོངས་པ་འདི་བཞིན་བཏང་བས་འཐུས་ཏེ། བདག་དང་མཐའ་ཡས་སེམས་ཅན་རྣམས་སོགས། ཨེ་མ་ཧོཿངོ་མཚར་རྨད་ཀྱི་ཆོས། །སོགས་ཀུན་རྫོབ་དང་དོན་དམ་པའི་སེམས་བསྐྱེད་ནས། ཏིང་ངེ་འཛིན་རྣམ་གསུམ། དངོས་རྣམས་ཉིད་ནས་སོགས་ཚིགས་བཅད་རྣམས་བརྗོད། བར་གྱི་ཚིག་ལྷུག་རྣམས་དོར་ནས། ཡི་གེ་མཆོག་ནི་བསྒོམ་པར་བྱ། །ཞེས་དང་། ཨ། རབ་ཏུ་བརྟན་གྱུར་ནས། བརྟན་བྱུང་ཡེ་ཤེས་རྒྱུ་ཡིན་ནོ། །ཞེས་དང་། དེ་ནས་སེམས་ཉིད་ཨ་དཀར་པོ་དྲི་མ་མེད་པ་ནས། ནམ་མཁའི་མཐའ་ཀླས་པར་འབར་བའོ། །ཞེས་པའི་བར་དང་། རི་རབ་ཀྱི་སྟེང་དུ་རྒྱུའི་ཨ་ལས་བྷྲཱུྃ་ཆད། སྥ་ར་ཎ་ཕཊཿ སཾ་ཧ་ར་ཎ་ཧཱུྃ། བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་བྷྲཱུྃ། ཞེས་བརྗོད་ནས། ཡེ་ཤེས་ཕྱོགས་བཞི་དབུས་བརྟགས་ཏེ། །སོགས་ནས། རོལ་མོ་སྤྲིན་ཕུང་བཞིན། །ཞེས་པའི་བར་བཏང་ནས། སེངྒེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་དང་། ཨ་ཉིད་སྣ་ཚོགས་པར་སྣང་བའི། །སོགས་ནས། མངོན་རྫོགས་རྒྱལ་པོ་དེ་ཉིད་ངེས། །ཨ་སྥ་ར་ཎ་ཕཊཿ ཅེས་དང་། གདན་ལ་རྫོགས་དང་སེམས་དཔའི་ཚུལ། །སོགས་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཞེས་པས་གསལ་གདབ་ནས། བསྐུར། རློབ། དབབ། དྲང་། བསྟིམ། བརྟན། མཆོད་པ་རྣམས་སྔགས་ཀྱིས་བྱས་ནས། གཞུང་གི་བསྟོད་པ། ཕྱོགས་བཅུ་དུས་བཞི་རྫོགས་པ་ཡི། །སོགས་ནས། སྐུ་གསུང་ཐུགས་ཀྱི་ཐིག་ལེ་ཆེ་ཧོཿའི་བར་བརྗོད། དེ་ནས། ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །ནས། བདག་ཅག་བསམ་པ་འགྲུབ་གྱུར་ཅིག །ཅེས་བཏང་ནས། ཡང་དག་དོན་གྱི་སྙིང་པོ་སོགས་ནས། འཛབ་ཅི་ནུས་སུ་བཟླའོ། །དེ་ནས་འཛབ་ཀྱི་རྗེས་བསྟོད་བཤགས། ཡེ་ཤེས་པ་བསྡུ་བ་བཅས་གྲུབ་ནས། ཉེར་བསྡུ་གོ་བགོ་ལུས་སྲུང་བར་བྱས་པས་འཐུས་པ་ཡིན་ནོ། །དཔལ་ལྡན་རྡོ་རྗེ་སེམས་དཔའ་རིག་རྣམས་ཀུན་གྱི་བདག་པོ་མཆོག་གི་ལམ། །སྲས་བཅས་རྒྱལ་བ་མ་ལུས་མི་ལུས་ལུས་པ་མེད་ཀུན་གྱིས། །ཀུན་ནས་བསྒྲོད་པ་གཅིག་པའི་ལམ་གྱི་མཐར་ཐུག་གྲུབ་པའི་སྐྱེ་བོ་འཇུག་པའི་གནས། །སྒྱུ་འཕྲུལ་དྲྭ་བ་ཆེན་པོ་བཤད་དང་རྩ་བའི་རྒྱུད་ཀྱི་གསང་ཆེན་ཐེག་པ་མཆོག་གི་རྩེ། །ལས་དང་ཡེ་ཤེས་དངོས་གྲུབ་འདོད་རྒུ་མ་ལུས་བསླུ་བ་མེད་པར་འབྱུང་བའི་གཞིར། །དང་པོའི་ལས་ཅན་འཇུག་དང་བར་དུ་ཉམས་ལེན་ངེས་པའི་གནད། །གནས་སྐབས་རིག་འཛིན་བཞི་དང་མཐར་ཐུག་འབྲས་བུས་མངོན་དུ་བྱེད་པའི་ཐབས། །ཤེས་འཇུག་འབྱོར་པའི་གཟུངས་ཀྱི་ཆིངས་ཀྱིས་བཅིངས་པའི་བསྙེན་བསྒྲུབ་ཡན་ལག་རྣམ་བཞིའི་འགྲོས། །རྣམ་དག་གཞུང་ལ་ཐོས་བསམ་བྱས་དང་མན་ངག་ཟབ་མོ་གོམས་པའི་མཐུས། །འདི་ན་སྐལ་བཟང་སྐྱེ་བོའི་འཇུག་ངོགས་གྲུབ་བརྙེས་བྱེ་བའི་ཐུགས་ཀྱི་གསང་མཛོད་མ་ལུས་པ། །ཐང་མར་བརྡལ་ནས་ཉུང་ངུའི་ངག་གིས་གདམས་འདི་རང་དང་སྐལ་མཉམ་རྗེས་འབྲངས་རྣམས། །བརྩེ་བའི་ཤུགས་ཀྱིས་སྙིང་པོར་དྲིལ་ནས་བརྗོད་པའི་གཏམ་འདི་ངོ་མཚར་དུས་ཀྱི་དགའ་སྟོན་ཡིན། །འདིས་ཐོབ་དགེ་བས་དཔལ་ལྡན་རྡོ་རྗེ་སེམས་དཔའ་དབྱིངས་ཕྱུག་རྡོ་རྗེ་བཙུན་མོར་དགྱེས་རོལ་པའི། །དགའ་ཆེན་རྟག་པའི་ཡེ་ཤེས་སྒྱུ་འཕྲུལ་དྲྭ་བ་ཁ་སྦྱོར་བདུན་དང་ལྡན་པ་ཡིད་ཅན་འགྲོ་བས་ཐོབ་པར་ཤོག །ཅེས་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ལ་བརྟེན་ནས་ལམ་ངེས་རྫོགས་དང་མོས་བསྒོམ་གྱི་ལམ་གྱིས་འཇུག་པ་འདི་ནི་བཀའ་དྲིན་མཚུངས་པ་མེད་པ་བསྟན་པའི་ཉི་མ་ཉིད། ཡིད་ལྷུང་བླ་མ་སྒྱུ་འཕྲུལ་བའམ། དགའ་རབ་མདུན་ནས་རྒྱུད་འདིའི་མན་ངག་གནད་རྣམས་གསན་ནས་ཐུགས་ཉམས་སུ་བཞེས་ཚུལ་གྱི་གསུང་རྒྱུན་དང་། ཨ་བུ་དཔལ་སྤྲུལ་རིན་པོ་ཆེས་ན་རག་དོང་སྤྲུག་གི་བསྙེན་པ་བཏང་ཚུལ་ཞལ་ནས་སྙན་དུ་བརྒྱུད་པ་བཀའ་དྲིན་ཅན་གྱི་དོང་སྤྲུག་གི་བསྙེན་ཡིག་གནང་བ་རྣམས་རྩ་བར་བཟུང་ནས། གོ་འཇོ་རག་དགོན་མཆོག་སྤྲུལ་བཤད་སྒྲུབ་རྒྱ་མཚོས་མདོ་སྒྱུ་གཉིས་ཀྱི་མཚམས་གྲྭ་གསར་འཛུག་གི་ཐུགས་བཞེད་ཀྱིས་སྔ་ཕྱིར་བསྐུལ་བ་དོན་ཡོད་པའི་ཕྱིར། གསང་བ་སྒྱུ་འཕྲུལ་གྱི་གནས་ལ་མོས་པ་ལམ་དུ་བྱེད་པ་པདྨ་ལས་འབྲེལ་རྩལ་གྱིས་སྤེལ་བ་ཕྱོགས་དུས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག། །།