སྔ་འགྱུར་བཀའ་མའི་ཆོས་སྡེའི་གླེགས་བམ་བཅུ་བཞི་པ།

གླེགས་བམ། ཕ༽

འགྱུར་མེད་རྡོ་རྗེ། འཇིགས་མེད་གླིང་པ། པདྨ་བཛྲ། དྷརྨ་ཤྲཱི། པདྨ་འགྱུར་མེད་རྒྱ་མཚོ། ངག་དབང་དཔལ་བཟང་། རྒྱལ་སྲས་གཞན་ཕན་མཐའ་ཡས།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

སྒྱུ་འཕྲུལ་ཁྲོ་བོའི་དབང་གི་བརྒྱུད་འདེབས། འགྱུར་མེད་རྡོ་རྗེ།

སྒྱུ་འཕྲུལ་ཁྲོ་བོའི་དབང་གི་བརྒྱུད་འདེབས་ནི། སྟོན་པ་ཀུན་བཟང་རྒྱལ་བ་རིགས་ལྔ་དང་། །རིགས་གསུམ་དྲྭ་མ་ལྔ་དང་རྒྱལ་པོ་ཛཿ ཀུ་ཀུ་རཱ་ཛ་ཨིནྡྲ་བྷཱུ་ཏི་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སིངྷ་ཨུ་པ་རཱ་ཛ་གོ་མ་ས། །སྒེག་རྡོར་སངས་རྒྱས་གསང་བ་བི་མ་ལ། །རྨ་ལོ་རིན་མཆོག་གཙུག་གྱེར་རྣམ་གཉིས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱལ་བའི་ཡོན་ཏན་གནུབས་ཆེན་སངས་རྒྱས་ཞབས། །ཁུ་ལུང་ཡབ་སྲས་ཉང་ཆེན་ཤེར་མཆོག་དང་། །ཡེ་ཤེས་འབྱུང་གནས་ཟུར་ཆེན་ཤཱཀ་འབྱུང་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཟུར་ཆུང་ཀ་ཆེན་རྣམ་བཞི་སྒྲོ་ཕུག་པ། །ཙགས་ཚ་ཤཱཀ་རྡོར་ཤཱཀ་འབྱུང་རྡོ་རྗེ་འོད། །བསོད་ནམས་རྒྱལ་མཚན་ཆོས་སེང་སངས་རྒྱས་དཔལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བསོད་ནམས་མགོན་པོ་སྒྲོལ་ཆེན་ཡབ་སྲས་དང་། །འགོས་ལོ་གཞོན་ནུ་བསོད་ནམས་རྒྱ་མཚོའི་སྡེ། །རིན་ཆེན་རྒྱལ་མཚན་མགོན་པོ་ཟླ་བ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ངག་དབང་རྡོ་རྗེ་དཔལ་ལྡན་བཀྲ་ཤིས་དང་། །ལེགས་གྲུབ་ཚེ་རིང་རྡོ་རྗེ་མི་རྟོག་རྩལ། །པདྨ་ཕྲིན་ལས་འགྱུར་མེད་རྡོ་རྗེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཆོས་དཔལ་རྒྱ་མཚོ་རིན་ཆེན་རྣམ་པར་རྒྱལ། །ཨོ་རྒྱན་བསྟན་འཛིན་ཕྲིན་ལས་རྣམ་རྒྱལ་ཞབས། །ཕྲིན་ལས་ཆོས་སྒྲོན་སངས་རྒྱས་ཀུན་དགའ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མདོ་སྔགས་བསྟན་འཛིན་རིགས་བདག་ཕན་བདེའི་མཚན། །སྨིན་གྲོལ་ཡོངས་རྫོགས་གདམས་པའི་ཆུ་བོ་ཀུན། །འཛིན་མཛད་རྩ་བརྒྱུད་བླ་མའི་ཚོགས་རྣམས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གཞི་རྒྱུད་རང་བཞིན་མ་བཅོས་གནས་ལུགས་ངོར། །ལམ་རྒྱུད་ཐབས་ཀྱིས་མཚོན་བྱས་སྨིན་ཅིང་གྲོལ། །འབྲས་རྒྱུད་ལྷུན་གྲུབ་རིག་འཛིན་སྐུ་ལྔ་ཡི། །གོ་འཕང་དཀའ་བ་མེད་པར་མྱུར་འགྲུབ་ཤོག །ཅེས་སྒྱུ་འཕྲུལ་ཁྲོ་བོའི་དབང་བརྒྱུད་ལུགས་གཅིག་ལ་གསོལ་བ་འདེབས་པ་འདིའང་གཏེར་ཆེན་འགྱུར་མེད་རྡོ་རྗེའི་གསུང་སོར་བཞག་ལ། དེ་མན་གྱི་བརྒྱུད་རིམ་ཁ་སྐོང་བ་པོ་ནི་ཛྙཱ་ནའོ།། །།

སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་བདེ་ཆེན་ཆར་འབེབ། འགྱུར་མེད་རྡོ་རྗེ།

སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་བདེ་ཆེན་ཆར་འབེབས་ཞེས་བྱ་བ་བཞུགས་སོ། །ༀ་སྭ་སྟི། སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་བདེ་ཆེན་ཆར་འབེབས་ཞེས་བྱ་བ། དཔལ་ལྡན་བླ་མ་ཧེ་རུ་ཀ་དང་གཉིས་སུ་མེད་པ་ལ་ཕྱག་འཚལ་ལོ། །དོན་དམ་འགྱུར་མེད་བདེ་ཆེན་ཧེ་རུ་ཀ །སྤྲོས་བྲལ་གདོད་མའི་དབྱིངས་ཕྱུག་མས་འཁྱུད་པ། །རྡོ་རྗེ་ཁྲོ་བོ་ལྔ་བཅུ་རྩ་བརྒྱད་ལྷ། །དཀྱིལ་འཁོར་འཁོར་ལོར་བཅས་ལ་ཕྱག་འཚལ་ལོ། །ཧེ་རུ་ཀ་དཔལ་བདེ་ཆེན་མཆོག་གི་གྲོང་། །སྲིད་ཞིའི་མཐའ་ལས་རྣམ་པར་གྲོལ་བའི་གཞིར། །མྱུར་བདེར་བགྲོད་པའི་ལམ་བཟང་དོ་ཟླ་མེད། །རྡོ་རྗེ་འཛིན་དབང་ཚོགས་ཀྱིས་གཤེགས་པའི་ཤུལ། །ཡི་གེས་མཚོན་མིན་དེ་ལས་གསལ་འཆར་བ། །གདོད་མའི་དཔའ་བོ་སྐུལ་བྱེད་རྡོ་རྗེའི་དབྱངས། །བདེ་ཆེན་ཆར་དུ་འབེབས་པ་སྤྲིན་གྱི་སྒྲར། །ལེན་ནོ་དངོས་གྲུབ་གནས་ལ་དབུགས་འབྱིན་མཛོད། །འདི་ལ་གསུམ་སྟེ། སྒྲུབ་པ་པོ་གང་ཟག །སྒྲུབ་པ་ལམ་རིམ། གྲུབ་པ་འབྲས་བུའོ། །དང་པོ་ནི། སྒྲུབ་པ་པོ་དཀྱིལ་འཁོར་ཆེན་པོ་འདིར་ཞུགས་ཤིང་། ཕྱི་ནང་གི་དབང་ཐོབ་པ། རྩ་བ་དང་ཡན་ལག་གི་དམ་ཚིག་ལ་ཡང་དག་པར་གནས་པའོ། །གཉིས་པ་ལམ་ལ། སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། སྔོན་འགྲོ་ལ་བདུན་གྱི། དང་པོ་བྱ་བའི་སྔོན་འགྲོ་ནི། དུར་ཁྲོད་དང་རི་བོ་དབེན་པ་ལ་སོགས་པ་བསམ་གཏན་དང་རྗེས་སུ་མཐུན་པའི་གནས་ཁང་མཛེས་པར་བརྒྱན། རྟེན་དང་ཕྱི་ནང་གི་མཆོད་གཏོར་སོགས་མཁོ་བའི་ཡོ་བྱད་རྣམས་ཚོགས་པར་བཤམས་ནས། གྲལ་ཕྱག་དང་། ཚུལ་ཕྱག་སྔོན་དུ་འགྲོ་བས་བདེ་བའི་སྟན་ལ་འདུག་སྟེ། རོལ་མོས་བྱིན་དབབ་པ་རྣམས་བྱའོ། །གཉིས་པ་རྒྱུད་སྦྱང་བ་ནི། རང་གི་སྙིང་གའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་དཔལ་ཧེ་རུ་ཀ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དེ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་ལ་སོགས་པས་རྒྱུད་དག་པར་བྱས་ལ། ཚོགས་ཞིང་རྣམས་རང་ལ་བསྡུས་ཏེ། ཆོས་ཐམས་ཅད་ཀྱི་གནས་ལུགས་སྤྲོས་བྲལ་སྟོང་པ་ཉིད་ཀྱི་ངང་ལ་མཉམ་བཞག་བྱའོ། །གསུམ་པ་མཚམས་བཅད་པ་ལ། མཚན་མེད་དང་། མཚན་བཅས་གཉིས་ལས། དང་པོ་ནི། ཧཱུཾ་ཞེས་བརྗོད་པས། འདི་ལྟར་གཟུང་བ་དང་འཛིན་པས་བསྡུས་པ་མཚན་མའི་དམིགས་ཡུལ་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུར་བསྒོམས་པས་ཐ་མལ་གྱི་བདེན་འཛིན་བསལ་ལོ། །གཉིས་པ་ནི། སྟོང་པའི་ངང་ལས་པད་ཉི་ལ་གནས་པའི་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ། དེ་ལས་འོད་ཟེར་འཕྲོས། རྡོ་རྗེའི་ས་གཞི་ར་བ་དྲྭ་བ་གུར་བླ་རེ། ཕྱི་རོལ་བསྐལ་པའི་མེ་དཔུང་རབ་ཏུ་འབར་བས་བསྐོར་བའི་དབུས་སུ། བྷྲཱུྂ་ལས་འཁོར་ལོ་སེར་པོ་རྩིབས་བཅུ་པ་རྩེ་མོ་རྣོ་བའི་དབལ་དང་ལྡན་པ་དྲག་ཏུ་འཁོར་ཞིང་། ཁོག་པ་སྟོང་པ་ཆོས་ཀྱི་དབྱིངས་དང་མཉམ་པའི་དབུས་སུ་པད་ཉི་ལ་གནས་པའི་ཧཱུཾ་ཡིག་སྔོན་པོ་འབར་བར་གྱུར། དེ་ལས་བྱུང་བའི་འོད་ཟེར་གྱིས་སངས་རྒྱས་ཐམས་ཅད་ཀྱི་ཐུགས་དམ་བསྐུལ། གཅིག་ཏུ་འདུས་ནས་ཧཱུཾ་ལ་ཞུགས་པ་ལས། བཛྲ་མ་ཧཱ་ཤྲཱི་ཧེ་རུ་ཀ་བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག །མཐིང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྡོ་རྗེ་འཁོར་ལོ་རིན་པོ་ཆེ། གཡོན་གསུམ་དྲིལ་བུ་པདྨ་རལ་གྲི་འཛིན་པ། ཉི་མ་འབུམ་གྱི་གཟི་བརྗིད་ཅན། གར་དགུའི་ཉམས་ཀྱིས་སྒེག་ཅིང་། དུར་ཁྲོད་རོལ་པའི་ཆས་ཀྱིས་བརྒྱན་པ། ཡུམ་ཀྲོ་དྷཱི་ཤྭ་རཱི་མ་དང་མཉམ་པར་སྦྱོར་བའི་སྐུར་གྱུར། དེའི་ཐུགས་ཀའི་ཧཱུཾ་ལས་མ་བཅུ་འཕྲོས་པ་རྩིབས་ནང་རྣམས་སུ་ཉི་གདན་བཅུར་གྱུར། སླར་ཡང་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་སྤྲོས། ཕྱོགས་བཅུའི་བགེགས་རྣམས་བཀུག་སྟེ་ཉི་གདན་རྣམས་ཀྱི་སྟེང་དུ་མྱོས་ཤིང་འགྱེལ་སྟབས་སུ་འཁོད་པར་བསམ་ལ། ༀ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞ་པཱ་ཡ་གྲྀ་ཧྞ་པཱ་ཡ་ཧཱུཾ། ཨཱ་ན་ཡ་ཧོཿ བྷ་ག་ཝཱན་བིདྱ་རཱ་ཛ་ཧཱུཾ་ཕཊ། ༀ་ཨིནྡྲ་ཡེ། ཨགྣ་ཡེ། ཡ་མ་ཡེ། ནཻ་རི་ཏྱ། ཝ་རུ་ཎཱ་ཡ། ཝ་ཡ་ཡེ། ཀུ་ཝེ་རཱ་ཡ། ཨི་ཤཱ་ན་ཡ། སཱུརྻ་ཙནྡྲ། སུ་རི་ཏཱ། ཨེ་ར་པ་ཏི་ཡེ་ཛཿཧཱུཾ་བཾ་ཧོཿ སླར་ཡང་རང་གི་ཐུགས་ཀ་ནས་ཧཱུཾ་ཡིག་བཅུ་འཕྲོས། སོ་སོའི་གདན་ལ་འཁོད་པ་ལས། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ༀ་བཛྲ་ཀྲོ་དྷ་བི་ཛ་ཡ་ཧཱུཾ་ཧ་ན་ཧ་ན་ཧཱུཾ་ཕཊ། ༀ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ༀ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ་བྷནྡྷ་བྷནྡྷ་ཧཱུཾ་ཕཊ། ༀ་བཛྲ་ཀྲོ་དྷ་ཧ་ཡ་གྲཱི་ཝ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། ༀ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུཾ་ཏིཥྛ་ཏིཥྛ་ཧཱུཾ་ཕཊ། ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ་ཙྪིནྡ་ཙྪིནྡ་ཧཱུཾ་ཕཊ། ༀ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུཾ་བྷིནྡ་བྷིནྡ་ཧཱུཾ་ཕཊ། ༀ་བཛྲ་ཀྲོ་དྷ་མ་ཧཱ་བ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། ཅེས་བརྗོད་པས། ཧཱུཾ་ཡིག་རྣམས་རིམ་པ་བཞིན་ཧཱུཾ་མཛད་ལ་སོགས་པ་ཁྲོ་བོ་བཅུར་གྱུར་ཏེ། ཐམས་ཅད་ཀྱང་སྐུ་མདོག་མཐིང་ནག །ཞལ་གཅིག་ཕྱག་གཉིས་པ་ཐོ་བ་དང་ལྕགས་ཀྱུ་འཛིན་པ། སྨད་ཕུར་བུ་འབར་བའི་རྣམ་པ་ཅན་དུ་གྱུར་པར་བསམ་ཞིང་། དེ་ནས་ཁྲོ་བོ་བདུད་རྩི་འཁྱིལ་བ་ཐོ་བ་ཐོགས་པ་སྤྲུལ་ཏེ། ༀ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ་བཛྲ་དྷ་ར་ཨ་ཛྙཱ་པ་ཡ་ཏི་སརྦ་བིགྷྣཱཾ་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་ལན་གསུམ་བརྗོད་པས། ཁྲོ་བོ་རྣམས་ཕྱོགས་བཅུའི་བགེགས་ལ་ཕུར་བུའི་ཚུལ་དུ་བཏབ་པས། དེ་རྣམས་ཀྱི་ལུས་ཕུག་སྟེ་གཡོ་འགུལ་མེད་པར་བྱས་ནས། སླར་ཡང་དེ་རྣམས་ལས་སྤྲུལ་པ་དང་ཡང་སྤྲུལ་མཚོན་ཆ་སྣ་ཚོགས་དང་བཅས་པའི་འོད་ཟེར་རྣོན་པོ་འཁྲུག་ཅིང་། འབར་བ་སྲུང་བའི་འཁོར་ལོས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་མོ། །འདིར་ཁྲོ་བོ་འཆོལ་བའི་མཚམས་གཅོད་གླེང་གཞི་ལྟར་འབྱོར་བར་སྣང་ཡང་། གོང་མའི་ཕྱག་ལེན་བཞིན་དེ་ལྟར་བྱས་སོ། །བཞི་པ་བཤགས་པ་བྱ་བ་ནི། བཛྲ་ས་མཱ་ཛཿས། བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མེད་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབས་ཀྱང་མི་བགྱིད། སྔར་བྱས་ཀྱི་གཉེན་པོར་རྣལ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། ཧཱུཾ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་ངང་དུ་རོ་གཅིག་པ། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུགས་ཅན་བདག་ཉིད་མ། །མཁའ་དབྱིངས་ཀློང་ཡངས་པདྨོ་འཁྱིལ་བ་ལ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཧཱུཾ། ཐུགས་རྗེ་གདུང་འཚོབ་རིག་འཛིན་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་བགྲོད་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱིར་མནོས་ཤིང་གཉེར་དུ་སྨྲས་སོ་འཚལ། །ཡུན་དུ་མི་གཏོང་འདའ་བར་མི་བགྱིད་ཅིང་། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་འཕྲད་པར་མི་བྱ་ཞེས། །བཀའ་ལས་བྱུང་ཞིང་དེ་ལྟར་མ་ལྕོགས་ཏེ། །གསང་སྒོ་འཆོལ་བས་དབྱེ་བསལ་དཀས་པ་དང་། །མངོན་ཤེས་མེད་པས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐངས་པ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མ་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གི། །ཉམས་སྒྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས། །རང་གནོང་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་བརྩེས་བདག་ལ་དགོངས་ནས་ཀྱང་། །གཉིས་མེད་དབྱིངས་ལས་མི་འགྱུར་བདག་བཀོད་དེ། །དམིགས་མེད་བཏང་སྙོམས་ངང་དུ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་དམིགས་མེད་སྤྲོས་ལས་འདས་པས་ན། །རྣམ་རྟོག་གང་ཡང་དམིགས་པར་མི་འགྱུར་ཞིང་། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པར་མཆིས་ན་རབ་ནོངས་བཟོད་པར་གསོལ། །ཞེས་བརྗོད་པས་སྡིག་སྒྲིབ་ཐམས་ཅད་བྱང་བར་མོས་ནས་མཉམ་པ་ཉིད་ཀྱི་དོན་ལ་བློ་བཞག་གོ། །ལྔ་པ་དམ་བཅའ་བ་ནི། རྡོ་རྗེ་རྩེ་གཅིག་པའི་རྒྱ་བཅིངས་ཏེ། ལྷག་པའི་བསམ་པ་བརྟན་པོས། ༀ། རྣལ་འབྱོར་དབང་པོ་ཡེ་ཤེས་མཐར་ཕྱིན་པ། །འགྲོ་ལ་ཕན་མཛད་ཐུགས་རྗེས་དབང་སྒྱུར་ཞིང་། །སྲིད་པ་གསུམ་གྱི་གཉེན་གྱུར་གཅིག་པུ་པ། །ལྷ་ཡི་ལྷ་ཁྱོད་བདག་ལ་དགོངས་སུ་གསོལ། །བདེ་བར་གཤེགས་པའི་སྤྲུལ་པ་རྒྱ་མཚོ་དང་། །རྣལ་འབྱོར་དབང་ཕྱུག་གྲུབ་པའི་ཚོགས་ཆེན་པོ། །ལྷ་དང་ལྷ་མིན་སྔགས་འཆང་དམ་ཚིག་ཅན། །ཀུན་ནས་འདུས་པ་རྣམས་ཀྱང་དགོངས་སུ་གསོལ། །བདག་ནི་རྒྱལ་སྲིད་མཐོ་རིས་ལོངས་སྤྱོད་དང་། །འདོད་པའི་ཡོན་ཏན་བདག་སྒྲུབ་མ་ལགས་ཏེ། །འགྲོ་ལ་སྙིང་བརྩེ་ཁོ་ནས་དོན་བརྩོན་པ། །འདི་ལ་ཀུན་མཁྱེན་ཁྱོད་ནི་དཔང་དུ་གསོལ། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །འཕགས་མཆོག་སྤྱན་སྔར་ཇི་ལྟར་དམ་བཅས་པ། །སུན་པར་མི་བགྱི་མགོན་ཁྱོད་བསླུ་མ་ལགས། །སྙིང་ནས་བདག་ནི་ཁེ་དང་གྲགས་ལ་སོགས། །གཡོ་དང་ཟང་ཟིང་སེམས་ནི་གཏན་སྤངས་ནས། །གཞན་དོན་སྒྲུབ་པ་གཅིག་པུའི་སེམས་བཞག་སྟེ། །རྣལ་འབྱོར་སྤྱོད་པ་ཆེན་པོ་བདག་གིས་སྤྱད། །ཀུན་ཏུ་བཟང་པོ་བླ་ན་མེད་པ་ཡིས། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །སྲོག་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབ་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱེད་ནི་ཡོངས་མི་སྤོང་། །རྡོ་རྗེ་དམ་ཚིག་ཆེན་པོ་རྣམས་དང་ནི། །རྡོ་རྗེ་སློབ་དཔོན་རྡོ་རྗེ་མཆེད་ལྕམ་དང་། །གཞན་ཡང་ཐེག་པ་མཆོག་ལ་ཞུགས་པ་རྣམས། །སྲོག་གི་ཕྱིར་ཡང་མི་གཏོང་ཅི་ནུས་བསྲུང་། །འཁོར་བ་བདག་མེད་སྒྱུ་མའི་རང་བཞིན་ལ། །བདག་ནི་འཇིགས་པ་ཅི་ཡང་མ་མཆིས་ཏེ། །མ་རིག་སྐྱེ་བོ་རྣམས་ཀྱི་དོན་སླད་དུ། །ཕྱི་མཐར་ཐུག་གི་བར་དུ་གནས་པར་སྤྲོ། །གཞན་དོན་འཁོར་བ་རྣམས་སུ་སྤྱོད་པ་ན། །བྱང་ཆུབ་སྤྱོད་པ་རླབས་ཆེན་བདག་གིས་སྤྱད། །འགྲོ་དྲུག་སེམས་ཅན་རྣམས་ལ་ཕན་གདགས་ཕྱིར། །རང་དབང་དུ་ནི་སྐྱེ་བ་བླང་བར་བགྱི། །བདག་ནི་ཡོངས་སུ་བཟུང་བའི་འཇིག་རྟེན་ནམ། །མྱ་ངན་འདས་ལ་སྤྲོ་བ་མ་མཆིས་ཏེ། །གང་དང་གང་དུ་སྡུག་བསྔལ་གནས་རྣམས་སུ། །བསྐལ་པ་རྒྱ་མཚོར་གནས་ཤིང་ཕན་པར་བགྱི། །སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཇི་སྲིད་ངན་སོང་སྟོངས་པར་མ་གྱུར་པ། །དེ་སྲིད་བདག་གིས་སྐྱོ་བའི་སེམས་མི་བསྐྱེད། །ཤེས་རབ་ཐབས་ཀྱིས་འགྲོ་བའི་དོན་བགྱིད་པ། །སྙིང་རྗེའི་ལོངས་སྤྱོད་དེ་ལས་མ་མཆིས་པས། །སེམས་དམྱལ་ཡི་དྭགས་གཤིན་རྗེའི་འཇིག་རྟེན་ཡང་། །ལྷ་ཡི་དགའ་ཚལ་ལྟ་བུར་བལྟ་བར་བགྱི། །འགྲོ་ལ་ཐུགས་བརྩེས་དཔལ་གྱི་མགུར་ནས་གསུངས། །རྣལ་འབྱོར་དམ་ཆོས་བདུད་རྩི་མཆོག་རྣམས་ནི། །བདག་གིས་འཇིག་རྟེན་ཐུག་པ་མ་མཆིས་བར། །ཇི་ལྟར་འཚམས་པ་བཞིན་དུ་རྒྱས་པར་བགྱི། །སྲིད་པར་ལས་དང་རྐྱེན་གྱིས་དབང་གྱུར་ཏེ། །གང་དང་གང་དུ་དམ་ཆོས་འཇིག་པ་དེར། །མེ་ཚོགས་སྤུ་གྲིའི་སོ་ཡང་བརྒལ་ནས་ནི། །ཕྱི་མཐར་ཐུག་གི་བར་དུ་དམ་ཆོས་བཟུང་། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པ་མཆོག་ལ་ཞུགས་པའི་སྐྱེ་བོ་ལ། །ཚེ་རབས་རྣམས་སུ་མཐུ་རྩལ་ཅི་མཆིས་ཀྱིས། །སྐྱེས་ཆེན་རྣམས་ཀྱི་དགོངས་པ་རྟག་ཏུ་བསྐང་། །དམ་པའི་ཆོས་དང་སྒྲུབ་པའི་གེགས་གྱུར་པ། །མི་དང་མི་མིན་གདུག་པ་གང་ཡང་རུང་། །བདག་གིས་ཞི་དང་ཁྲོ་བོའི་ཕྲིན་ལས་ཀྱིས། །ཡོངས་སུ་ཞི་ཞིང་རྣམ་པར་གཞོམ་པར་བགྱི། །རྣལ་འབྱོར་མཆོག་གི་ཐེག་ཆེན་བླ་མེད་དང་། །རྡོ་རྗེ་རྒྱལ་པོ་ཁྱེད་ལ་བརྟེན་ནས་ནི། །སངས་རྒྱས་ཞིང་སྦྱང་འགྲོ་ལ་སྨན་སླད་དུ། །བྱང་ཆུབ་སྙིང་པོ་བདག་གིས་རྟོགས་པར་བགྱི། །བདག་ནི་འཕགས་མཆོག་ཕྱག་རྒྱ་མངོན་སྤྲུལ་ཏེ། །གལ་ཏེ་སྐབས་མེད་འཆི་བའི་དུས་བྱུང་ཚེ། །གསང་སྔགས་མགོན་པོ་ཡེ་ཤེས་དཀྱིལ་འཁོར་ཅན། །ཁྱེད་ཀྱི་ཞབས་ཀྱི་དྲུང་དུ་མཆི་བར་བགྱི། །སྲིད་གསུམ་སྡུག་བསྔལ་ཅི་འདྲ་ཁྱེད་ཀྱིས་མཁྱེན། །དམྱལ་སོགས་མེ་དཔུང་ཞི་བར་བགྱིད་ལ་སོགས། །སེམས་ཅན་དོན་ལ་མྱུར་དུ་བདག་མཆི་ན། །དམ་པ་རྣམས་ཀྱིས་ནུས་མཐུ་སྩལ་དུ་གསོལ། །དྲུག་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ༀ་ཧཱུཾ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། མཐུ་རྩལ་དབྱུང་བའི༴ བྱིན་གྱིས་རློབ་པའི༴ དབང་མཆོག་བསྐུར་བའི༴ དངོས་གྲུབ་སྩོལ་བའི༴ མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ༴ དངོས་གྲུབ་མཆོག་སྩོལ༴ བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦྱར་ཞིང་། ཧཱུཾ་ཧཱུཾ་ཧཱུཾ་ཧཱུཾ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ་མོ། །བདུན་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ༀ་མ་ཧཱ་ཀྲོ་དྷེ་ཤྭ་རཱི་སརྦ་དྲ་བྱཾ་བི་ཤྭ་དྷ་ནེ་ཧཱུཾ་ཕཊ་ཀྱིས་བསང་། ༀ་མ་ཧཱ་ཤཱུ་ཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་རྡོར་སེམས་སུ་གསལ་བའི་ཐུགས་ཀའི་ཧཱུཾ་ལས། ཨ། དྷཱུ། པུ། ཨཱ། གན་རྣམས་འཕྲོས། སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ཎ་ཧཱུཾ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ་མཆོད་པའི་ལྷ་མོ་ཁྲུས་གཞོང་དང་སྤོས་ཁང་མནྡྷ་རའི་མེ་ཏོག་ལ་སོགས་པ་ཐོགས་པས་ནམ་མཁའ་གང་བ་རྣམས་སུ་གྱུར་པར་བསམ་པས་བྱིན་གྱིས་བརླབས། དེ་ནས་བདུད་རྩི་བསང་། རཾ་ཡཾ་ཁཾ། སྟོང་པའི་ངང་ལས་རང་གི་ཐུགས་ཀ་ནས་བྷྲཱུཾ་ཆད། བྷྲཱུཾ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜ་ལ་བྷྲཱུཾ། བདུད་རྩིའི་སྣོད་གཞལ་ཡས་ཁང་དུ་གསལ་བའི་དབུས་སུ་འཁོར་ལོ་རྩིབས་བཞི་པའི་ལྟེ་བར། མི་ཤ་དང་བྱང་སེམས་དཀར་པོ། ཤར་དུ་བ་ལང་གི་ཤ་དང་དྲི་ཆེན། ལྷོར་ཁྱི་ཤ་དང་ཤ་ཆེན། ནུབ་ཏུ་རྟ་ཤ་དང་རཀྟ། བྱང་དུ་གླང་པོ་ཆེའི་ཤ་དང་དྲི་ཆུ་རྣམས་ཀྱི་སྟེང་དུ། རིམ་པ་བཞིན། ཧཱུཾ་མཱུཾ། ༀ་ལཱཾ། སྭཱ་མཱཾ། ཨཱཾ་པཱཾ། ཧཱ་ཏཱཾ་རྣམས་ཀྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འོད་ཟེར་འཕྲོས་འདུས་ཡོངས་སུ་གྱུར་པ་ལས། རྡོ་རྗེ། འཁོར་ལོ། རིན་པོ་ཆེ། པདྨ། རལ་གྲི་སོ་སོའི་རིགས་ཀྱི་དྲིལ་བུ་རྣམས་སུ་གྱུར། ཧཱུཾ་བཛྲ་དྷྲིཀ྄ །མཱུཾ་དྷཱ་ཏྭི་ཤྭ་རཱི། དབུས་སུ་མི་བསྐྱོད་པ་ཡབ་ཡུམ་མཐིང་ག །ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཤར་དུ་རྣམ་སྣང་ཡབ་ཡུམ་དཀར་པོ། སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ལྷོར་རིན་འབྱུང་ཡབ་ཡུམ་སེར་པོ། ཨཱྂ་ཨཱ་རོ་ལིཀ྄ །པཱཾ་རཱ་ག་ར་ཏི། ནུབ་ཏུ་སྣང་མཐའ་ཡབ་ཡུམ་དམར་པོ། ཧཱཾ་པྲཛྙཱ་དྷྲིཀ྄ །ཏཱཾ་བཛྲ་ར་ཏི། བྱང་དུ་དོན་གྲུབ་ཡབ་ཡུམ་ལྗང་གུ་རྣམས་སུ་གྱུར། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཛཿཧཱུཾ་བཾ་ཧོཿ བོ་དྷི་ཙིཏྟ། སྥ་ར་ཎ་ཕཊ། སཾ་ཧ་ར་ཎ་ཧཱུཾ། རིགས་ལྔ་ཡབ་ཡུམ་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩི་ༀ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བར། ༀ་པདྨཱནྟ་ཀྲྀཏ་བཛྲ་མ་ཧཱ་ཀྲོ་དྷ་ཧ་ཡ་གྲཱི་ཝ་ཧཱུཾ་ཕཊ། རྟ་མགྲིན་དམར་པོ་པདྨ་དང་རྡོ་རྗེ་རྒྱ་གྲམ་འཛིན་པ་ལྟེ་བ་ཡན་ཆད་ཐོན་པ། རྭ་བཞི་ལ། ཤར་དུ་མི་ཕམ་མ་དཀར་མོ་ལྕགས་ཀྱུ་འཛིན་པ། ལྷོར་ཁྲོ་གཉེར་མ་སེར་མོ་ཞགས་པ༴ ནུབ་ཏུ་རོ་ལངས་མ་དམར་མོ་ལྕགས་སྒྲོག༴ བྱང་དུ་རལ་གཅིག་མ་ལྗང་གུ་དྲིལ་བུ་འཛིན་པ། ༀ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་ཐམས་ཅད་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས། ཡེ་ཤེས་ཀྱི་བདུད་རྩི་རྒྱ་མཚོ་ཆེན་པོར་གྱུར་པར་བསམ་ལ། གཡོན་པའི་མཐེབ་སྲིན་གྱི་རྡོ་རྗེས་བདུད་རྩི་ལ་རེག་སྟེ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ། ཞེས་བཟླས་ཤིང་། མཐར་གཡོན་བསྐོར་དུ་དཀྲུགས་ཏེ། ཧཱུཾ་ཧཱུཾ་ཧཱུཾ་ཧཱུཾ་ཞེས་བརྗོད་པས། ཡུམ་བཞི་བདུད་རྩི་ལ་ཐིམ་པར་བསམ་མོ། གཏོར་མ་བྱིན་བརླབ་ནི། བསང་སྦྱངས། སྟོང་པ་ཉིད་ཀྱི་ངང་ལས། བྷྲཱུཾ་པདྨ་བ་ལིཾ་ཏ་བི་ཤྭ་ཙཀྲ་བྷྲཱུཾ། གཏོར་གཞོང་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ༀ་གྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། ༀ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བཱ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར་པར་བསམ། རཀྟ་བསང་སྦྱངས། སྟོང་པའི་ངང་ལས་བྷྲཱུཾ་བྷཉྫ་ཀ་པཱ་ལ་བྷྲཱུཾ། དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋཱ། ཆགས་མེད་རཀྟའི་རྒྱ་མཚོ་རྦ་རླབས་འཁྲུག་པས་ནམ་མཁའ་གང་བར་བསམ་མོ། །གཉིས་པ་དངོས་གཞི་ལ། ཁྱད་པར་གྱི་སྦྱོར་བ་དགོས་ཆེད་ཀྱི་སྒོ་ནས་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་གཉིས། དང་པོ་ནི། དེ་བཞིན་གཤེགས་པ་ཐམས་ཅད་གདུགས་པ་ཅན་གྱི་ཡུལ་ལ་ཐུགས་རྗེ་ཆེན་པོས་ཆེར་ཁྲོས་ནས་འདུལ་བར་མཛད་པ་བཞིན་དུ། ཤིན་ཏུ་གདུག་ཅིང་གཏུམ་པའི་འགྲོ་བ་རྣམས་ལ་རྗེས་སུ་ཆགས་པའི་སྙིང་རྗེ་ཆེན་པོ་རྡོ་རྗེ་ཁྲོ་བོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ་འཁོར་དུ་ལྡང་བར་བགྱིའོ་སྙམ་པས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་དང་། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་པས་དམ་འཆའ་ཞིང་སེམས་བསྐྱེད་དོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །འདི་ལྟར་སྣང་བའི་ཆོས་ཐམས་ཅད་དམིགས་མེད་སྤྲོས་པ་དང་བྲལ་བའི་སྟོང་པ་ཉིད་དུ་བསྒོམ་པའོ། །ཀུན་སྣང་ནི། ཨེ་མའོ་ཀུན་ཏུ་བཟང་པོ་ནི། །བདེ་ཆེན་སྤྲོས་བྲལ་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཀུན་ཏུ་སྣང་བར་བསྒོམ་པའོ། །རྒྱུའི་ཏིང་ངེ་འཛིན་ནི། ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡིས། །འཇིགས་པ་ཡི་ནི་དུས་ལྟར་དྲག །ཅེས་པས། རང་རིག་སྣང་སྟོང་གཉིས་སུ་མེད་པའི་རང་བཞིན་ཧཱུཾ་ཡིག་མཐིང་ག་གསལ་ཞིང་འབར་བར་གྱུར། སྥ་ར་ཎ་ཕཊ། དེ་ལས་འོད་ཟེར་ཧཱུཾ་གི་རྣམ་པ་ནམ་མཁའ་གང་བར་འཕྲོས། དོན་གཉིས་བྱས། སཾ་ཧ་ར་ཎ་ཧཱུཾ། མཁའ་ཁྱབ་ཀྱི་ཧཱུཾ་རྣམས་གཞིའི་ཧཱུཾ་ལ་ཐིམ། དེ་འོད་དུ་ཞུ་བ་ལས། བཛྲ་ཧཱུཾ། ཞེས་བརྗོད་པས། རྡོ་རྗེ་སྔོན་པོ་རྩེ་དགུ་པར་གྱུར། སྥ་ར་ཎ་ཕཊ། དེ་ལས་འོད་ཟེར་འཕྲོས། དོན་གཉིས་བྱས། སཾ་ཧ་ར་ཎ་ཧཱུཾ། ཚུར་འདུས་འོད་དུ་ཞུ་བ་ལས། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ། ཅེས་བརྗོས་པས། རྒྱུའི་ཧེ་རུ་ཀ་སྐུ་མདོག་སྨུག་ནག་ཅིར་ཡང་འགྱུར་བ། རྡོ་རྗེ་དང་དུང་ཁྲག་འཛིན་པ་འབར་བའི་གར་དགུ་དང་ལྡན་པར་བསམ་མོ། །གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་བཞི་དབང་ཆེན་གྱི་དཀྱིལ་འཁོར་བསྒོམ་པ་ནི། རྒྱུའི་ཧེ་རུ་ཀའི་ཐུགས་ཀའི་ཧཱུཾ་ལས། ཨེ་ཡཾ་ར་སུཾ་ཀེཾ་རཾ་རྣམས་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོས་འདུས་འོད་དུ་ཞུ་བ་ལས་རིམ་པ་བཞིན། ཨེ་ཨཱཿཀ་ཤ་མཎྜ་ལ། ཨེ་ལས་ནམ་མཁའ་ཆོས་ཀྱི་འབྱུང་གནས་གྲུ་གསུམ་འབྱམས་ཀླས་པའི་དབྱིངས་སུ། ཡཾ་ཀརྨ་རཀྵ་མཎྜ་ལ། ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ་གཡོ་བའི་བ་དན་གྱིས་མཚན་པ། ར་རཀྟ་ས་མུ་དྲ་མཎྜ་ལ། ར་ལས་རཀྟའི་རྒྱ་མཚོ་དམར་པོ་ཟླུམ་པོ་རྦ་རླབས་འཁྲུག་པ། སུཾ་སུ་མེ་མཎྜ་ལ། སུཾ་ལས་ཞིང་ཆེན་གྱི་ས་གཞི་གྲུ་བཞི་པ། ཀེཾ་ནི་རི་ཏི་མཎྜ་ལ། ཀེཾ་ལས་ཀེང་རུས་ཀྱི་རི་རབ་སྔོ་སྐྱ་གྲུ་བཞི་བང་རིམ་བཞི་དང་ལྡན་པ། རཾ་ཛྭ་ལ་མཎྜ་ལ། རཾ་ལས་མེའི་དཀྱིལ་འཁོར་དམར་ནག་ནམ་མཁའི་མཐའ་ཀླས་པར་འབར་བར་བསམ་ལ། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུག་པའི་དཀྱིལ། །ཀེང་རུས་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཞེས་པས་གསལ་གདབ་ཅིང་། དེ་དག་ཀྱང་ཕྱི་ལྟར་ན་འབྱུང་བ་ལྔ། ནང་ལྟར་ན་ཡེ་ཤེས་ལྔའི་རང་བཞིན། གསང་བ་ལྟར་ན་ཡུམ་ལྔའི་མཁའ་ཀློང་རྣམ་པར་དག་པའོ། །གཉིས་པ་རྟེན་གཞལ་ཡས་ཁང་བསྒོམ་པ་དངོས་ནི། རི་རབ་ཀྱི་སྟེང་དུ་རྒྱུའི་ཧཱུཾ་ལས་བྷྲཱུཾ་སྨུག་ནག་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུཾ། བྷྲཱུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ། ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་བར་ཁྱམས་གཉིས་དང་ལྡན་པའི་ཕྱི་མའི་རྩིག་པ་རིམ་པ་ལྔ་དང་། ནང་རྩིག་རིམ་པ་གསུམ་པ་སྟེ། གཉིས་ཀའང་ཐོད་པ་སྐམ་རྙིང་རློན་གསུམ་ཁྲག་ཞག་གི་འདམ་གྱིས་བརྩིགས་ཤིང་གནམ་ལྕགས་ཨུ རྨོའི་གཟེར་གྱིས་གཏམས་པའི་སྟེང་ན། ཐོད་པ་སྣ་ཚོགས་པས་བཀྲ་བའི་ཕ་གུ་འཕྱར་ཐབས་སུ་བཀོད་པ་ལས་རྒྱུ་མ་དང་དོན་སྙིང་གི་མགུལ་འཁོར་འཕྱང་བ། དེའི་སྟེང་དུ་བྲེ་ཕུལ་གྱི་སྣམ་བུ་ལ་མ་ཀ་རའི་ཁ་ནས་སྦྲུལ་སྦྲམ་དང་ཐོད་སྐམ་གྱི་དྲྭ་བ་དང་དྲྭ་བ་ཕྱེད་པ། དོན་སྙིང་དང་ཡན་ལག་གི་འཕྱང་ཕྲུལ། ཐོད་ཚལ་གྱི་ཟླ་བ། ལྕང་ལོའི་རྔ་ཡབ་དང་དྲིལ་གཡེར་རླུང་གིས་བསྐྱོད་པས་མཛེས་ཤིང་། ཕྱི་ངོས་སུ་བྱ་འདབ་ལས་འཕྱང་བའི་རྐང་ལག་གི་ཤར་བུ། སྟེང་ངོས་སུ་སྒལ་ཚིགས་ཀྱི་མདའ་ཡབ་ཚར་དུ་དངར་བ། དེ་དག་གི་བར་བར་དུ་ཞིང་ཆེན་གྱི་གདུགས། ཉ་ཆེན་གྱི་འཕན་དར། རྒྱུ་རློན་གྱི་ལྡ་ལྡི། ཞིང་ལྤགས་ཀྱི་ལྷབ་ལྷུབ་སོགས་འཇིགས་པའི་རྒྱན་སྣ་ཚོགས་པས་བཀྲ་བ། རིམ་པ་གཉིས་ཀའི་རྩིག་པའི་ཕྱི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་སོགས་ལྷ་མོ་རྣམས་ཀྱིས་དུར་ཁྲོད་རོལ་པའི་མཆོད་སྤྲིན་རབ་འབྱམས་སྤྲོ་བ། སྒོ་དང་སྒོ་འཁྱུད་ཀྱི་མཚམས་དང་ཟུར་བཞིར་ཟླ་ཕྱེད་རྡོ་རྗེས་མཚན་པ། ཕྱི་མའི་སྒོ་ལོགས་ཀྱི་ཕྱི་ཟུར་བཞི་ནས་ཞིང་གི་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བརྒྱད་པ་སོ་དང་ཐོད་པ་དང་དབང་པོ་དང་ཉི་ཟླའི་ཕྲེང་བ་རྣམས་ཀྱིས་སྤྲས་ཤིང་བསིལ་ཁང་དང་ལྡན་པའི་རྩེར་པདྨ་ལ་གནས་པའི་ཆོས་ཀྱི་འཁོར་ལོའི་སྟེང་ནས་ཞིང་གི་གདུགས་ཕུབ་ཅིང་། ཆུ་སྲིན་ཕྲུ་གུ་ཟུང་གིས་བརྟེན་པ། ཕྱི་ནང་གི་སྒོ་ཐམས་ཅད་ལ་རུས་སྦལ་གྱི་མ་ཐེམ། ཆུ་སྲིན་གྱི་ཡ་ཐེམ། སྦྲུལ་ནག་གི་སྐྱེས་བུ། ཞིང་གི་སྒོ་གླེགས་རྣམས་ཀྱིས་སྤྲས་པ། སྒོ་ཕྱི་མའི་གཡས་གཡོན་གྱི་གཞི་ལ་སྐྱེས་བུ་གསལ་ཤིང་གིས་ཕུག་པ་དང་། ཏཱ་ལའི་ལྗོན་པ་རྣམས་ཐོད་ཚལ་རྒྱུ་མ་ལ་བརྒྱུས་པའི་ཕྲེང་བས་བྲེས་ཤིང་། རཀྟའི་རྫིང་བུ་རླབས་ཕྲེང་འཁྲུག་པ་བརྒྱད་ཀྱིས་བསྐོར་བ། དཀྱིལ་འཁོར་དེའི་ནང་གི་ཁྱམས་ཕྱི་མ་ཁྲག་མཚོ་དང་། ནང་མ་གསེར་ཁྱམས་སུ་གནས་པ། ཐོད་སྐམ་གྱིས་བརྩིགས་པའི་གྲུ་ཆད་བཞི་གློ་འབུར་གྱིས་མཛེས་པའི་སྟེང་དུ་འཁོར་ལོ་རྩིབས་བཞི་ལྟེ་བ་དང་བཅས་པ་རྣམས་རིམ་པ་བཞིན་ཁྱད་པར་དུ་གྱུར་པས་སྤགས་པ། ནང་ལྷ་ཆེན་པོ་བརྒྱད་ཀྱི་ཀ་བ་རུས་སྦལ་གྱི་ཀ་གདན་དང་ལྡན་པས་བཏེགས་པའི་སྟེང་ན་ཚངས་པའི་གདུང་བཞི་གདུང་ཟླུམ་དང་བཅས་པ། ཀླུ་བདུད་ཀྱི་ཕྱམ་དང་། རྒྱུ་སྐར་གྱི་དྲལ་གྲབ་ཞིང་ལྤགས་ཀྱི་ཐོག་ཕུབ་ཉི་ཟླའི་མཐོངས་སྐར་དང་བཅས་པའི་དབུས་ཕྱུར་བུ་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་ཏོག་གིས་བརྒྱན་པ། ནང་གི་སྟེང་འོག་རྣམས་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། འབར་བའི་ཕྲེང་བ་འཁྲུག་ཅིང་འབར་བ་ལ་སོགས་ཏེ་དུར་ཁྲོད་རོལ་པའི་གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ། དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པའི་ཕྱི་རོལ་སྲུང་བའི་ཁོར་ཡུག་གི་ནང་དུ་རུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད། དེ་དག་ཏུ་ཤིང་བརྒྱད། དེའི་རྩ་བ་ལ་གནས་པའི་ཕྱོགས་སྐྱོང་བརྒྱད། ཡལ་ག་ལ་བརྟེན་པའི་ཞིང་སྐྱོང་བརྒྱད། ཆུ་བརྒྱད། དེ་ལ་རོལ་པའི་ཀླུ་བརྒྱད། གཞན་ཡང་། མེ་དང་། ཆུ་དང་། སྤྲིན་དང་། རི་དང་། མཆོད་རྟེན་རྣམས་ཀྱང་བརྒྱད་བརྒྱད། ཐམས་ཅད་དུ་གྲུབ་པ་དང་རིག་འཛིན། དཔའ་བོ་དང་རྣལ་འབྱོར་མའི་ཚོགས་དང་། རོ་ལངས་དང་ཤ་ཟ་འབྱུང་པོའི་ཚོགས་རྣམས་ཧ་ཧར་རྒོད་ཅིང་གར་རྩེ་བ། བྱ་དང་གཅན་གཟན་གཏུམ་པོ་མང་པོ་ལང་ལོང་དུ་རྒྱུ་ཞིང་། ཀེང་རུས་དང་། རོ་ལངས་པོ་དང་། དུམ་བུ་དང་། འཚིག་པ་དང་། མ་ཚིག་པ་དང་། འཐོར་བ་ལ་སོགས་པའི་ཤ་རུས་གསར་རྙིང་སྣ་ཚོགས་པ་གཅལ་དུ་བཀྲམ་ཞིང་ཕུང་པོར་སྤུངས་པས་ཡོངས་སུ་གང་བར་བསམ་ཞིང་། ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པའི། །ཕྱི་དང་ནང་མེད་ཀུན་ཏུ་ནང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླས་བརྗིད། །འབར་བའི་འཕྲོ་བ་མང་པོ་འཁྲུག །ཅེས་པས་གསལ་བཏབ། གསུམ་པ་གདན་བསྐྱེད་པ་ནི། གཞལ་ཡས་ཁང་གི་དབུས་ཀྱི་ལྟེ་བ་དང་། འཁོར་ལོའི་རྩིབས་བཞི་ལ། པཾ་པདྨ་མཎྜ་ལ། ཨ་ཙནྡྲ་མཎྜ་ལ། མ་སཱུརྻ་མཎྜ་ལ། སྣ་ཚོགས་པདྨའི་ལྟེ་བར་ཟླ་བ་དང་ཉི་མའི་དཀྱིལ་འཁོར་བརྩེགས་པ་རེ་རེ། དེ་རྣམས་ཀྱི་སྟེང་དུ། མ་ཧཱ་དེ་བ་བཾ། ཨིནྡྲ་ཡ། ཡ་མ་ཡ། རཀྵ་ས། ཀུ་བཻ་ར་ཡ། ཏི་ར་བཾ། དབུས་སུ་ལྷ་ཆེན་པོ་དབང་ཕྱུག་དང་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གནོད་སྦྱིན་རྣམས་རང་རང་གི་ཆུང་མ་དང་བཅས་པའི་ཕོ་རྣམས་ཁ་སྦུབ་དང་། མོ་རྣམས་གན་རྐྱལ་བྱི་ཆིངས་སུ་བསྣོལ་བ། དེ་རྣམས་ཀྱི་སྟེང་དུ། དབུས་སུ་གཏུམ་པ་དོམ། ཤར་དུ་ཁྱུ་མཆོག །ལྷོར་མ་ཧེ། ནུབ་ཏུ་གཟིག །བྱང་དུ་སྟག་རྣམས་ཟུང་རེ་རེས་ཕོ་རྣམས་ཀྱི་སོག་ཕྲག་དང་། མོ་རྣམས་ཀྱི་ནུ་ཕྲག་ནས་ནན་ཏུར་དུ་བརྫིས་པ། འཁོར་ལོའི་གྲྭ་བཞི་དང་། གྲུ་ཆད་བཞི། ཁྱམས་ནང་མའི་ཕྱོགས་མཚམས་བརྒྱད། སྒོ་བཞི་རྣམས་སུ། མ་སཱུརྻ་མཎྜ་ལ། ཏི་ར་བཾ། ཉི་མ་ལ་གནས་པའི་ཞིང་གི་གདན་རེ་རེ། ཁྱམས་ཕྱི་མའི་ཕྱོགས་རེར་དྲུག་དྲུག་དང་། སྒོ་བཞི་རྣམས་སུ། ཏི་ར་བཾ། ཞིང་སྐམ་པོའི་གདན་རྐྱང་པ་རེ་རེ། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྤར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་པས་གསལ་གདབ་བོ། །གཉིས་པ་བརྟེན་པ་ལྷ་བསྐྱེད་པ་ལ་གཉིས་ཏེ། བདག་སྲས་དང་། གཞན་སྲས་ཀྱི་ཆོ་གའོ། །དང་པོ་ལ། ཧེ་རུ་ཀར་བསྐྱེད་ནས་སྙོམས་འཇུག་བྱ་བ་དང་། ངོ་མཚར་སྲས་ཀྱི་དཀྱིལ་འཁོར་སྤྲོ་བའོ། །དང་པོ་ནི། ནམ་མཁར་གནས་པའི་རྒྱུའི་ཧེ་རུ་ཀ་དབུས་ཀྱི་གདན་ལ་བཞུགས་པ་ལས། དེ་ཉིད་དཔལ་ཆེན་པོ་སྐུ་མདོག་སྨུག་ནག་ཅིར་ཡང་འགྱུར་བ། དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པར་གྱུར་ཏེ། དེ་བཞིན་ཉིད་ཀྱི་དབྱིངས་ཉིད་ནས་ཁྲོ་མོ་དབང་ཕྱུག་ཆེན་མོ་མངོན་དུ་ཕྱུངས་ཏེ། ཧི་ཧི་ཞེས་དགྱེས་པའི་མདངས་ཀྱིས་ཡབ་ལ་བཏུད་ཅིང་། པདྨ་རྒྱས་པར་མཛད་ནས། གཉིས་སུ་མེད་པར་འཁྲིལ་བའི་དགྱེས་པས་རོལ་པར་བསམ་ལ། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུངས་ཏེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བས་དགྱེས་པར་ཐིམ། །ཞེས་བརྗོད་པས་གསལ་གདབ། གཉིས་པ་ལ། སྔགས་ཀྱི་སྤྲུལ་པ་སྤྲོ་བ། དེ་རིགས་ལྔར་བསྡུ་བ། སྲས་མོ་ཉི་ཤུ་བསྐྱེད་པའོ། །དང་པོ་ནི། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས། ཡབ་ཡུམ་གཉིས་ཀྱི་སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ལས། འཇིག་རྟེན་དྲུག་གི་ཕྱོགས་བཅུ་མཐའ་ཡས་ཁྱབ་པ། ཁྲོ་བོ་འཆོལ་བ་མཚོན་ཆ་སྣ་ཚོགས་ཀྱི་ཆར་འབེབས་པ་དཔག་ཏུ་མེད་པ་སྤྲོས། ལྟས་ཆེན་པོ་བཅོ་ལྔས་གདུག་པ་ཅན་གྱི་ཚོགས་ཐམས་ཅད་ཚར་བཅད་པར་བསམ་མོ། །གཉིས་པ་ནི། མཁའ་ཁྱབ་ཀྱི་ཁྲོ་བོའི་སྤྲིན་རྣམས་སླར་འདུས་པ་ལས། རྡོ་རྗེ་རིགས་ཀྱི་ཁྲོ་བོ་རྣམས་རང་ལ་ཐིམ་པས་འབྲས་བུའི་ཧེ་རུ་ཀར་གྱུར་པ་ནི། ༀ་བཛྲ་ཤྲཱི་ཧེ་རུ་ཀ་ཧཱུཾ། བཛྲ་ཀྲོ་དྷཱི་ཤྭ་རཱི་སྟྭཾ། བདག་ཉིད་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་། ཉི་མ་བྱེ་བའི་གཟི་བྱིན་འབར་བ། དབུ་གསུམ་གྱི་གཡས་ཞལ་དཀར་ལ་བཞད་པ། གཡོན་ཞལ་དམར་ལ་གཤེ་བ། དབུས་ཞལ་མཐིང་ནག་དྲག་པོར་ཁྲོས་པའི་ཉམས་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། རྣམ་པར་འགྱུར་བའི་ཞལ་གདངས་ཤིང་། མཆེ་བ་གཙིགས་པ། གློག་ལྟར་འཁྱུག་པའི་ལྗགས་འདྲིལ་ཞིང་། རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུཾ་སྒྲ་འབྱིན་པ། རྫི་སྨིན་སྨ་ར་ལས་འབར་བའི་མེ་འཁྱོག་པོར་སྤྲོ་བ། སྐུ་ཆེ་ཞིང་ཡན་ལག་རགས་པ། ལང་ཚོ་རྒྱས་པའི་འགྱུར་བག་ཅན། རྡོ་རྗེའི་བ་སྤུས་གཏམས་པ། སྒེག་པ་དཔའ་བ་མི་སྡུག་པ། རྒོད་དང་གཤེ་དང་འཇིགས་སུ་རུང་། སྙིང་རྗེ་རྔམས་དང་ཞི་བ་སྟེ། གར་གྱི་ཉམས་དགུས་རབ་ཏུ་རྒྱས་པ། ཕྱག་དྲུག་གི་དང་པོ་གཉིས་ཀྱིས། རྡོ་རྗེ་རྩེ་དགུ་དང་དྲིལ་བུ་འཛིན་པས་ཡུམ་ལ་འཁྱུད་པ། གཉིས་པས་རྡོ་རྗེ་རྩེ་ལྔ་དང་། བྷཉྫ་དམར་གྱིས་གང་བ་ཐོགས་པ། གསུམ་པས་ཞིང་གི་དབྱུག་པ་དང་སྟོང་གི་འཇིག་རྟེན་འདེགས་པ། ཞབས་བཞི་གཡས་བརྐྱང་ཞིང་། གཡོན་བསྐུམ་པའི་གྱད་ཆེན་པོའི་སྟབས་ཀྱིས་རང་གི་སྟན་ལ་རོལ་བ། དབུ་རེ་རེ་ལ་ཐོད་པ་སྐམ་པོ་ལྔ་ལྔ་རིགས་ལྔའི་ཅོད་པན་ཅན་གྱིས་དབུ་བརྒྱན་པ། འཛག་པའི་མགོ་བོ་ལྔ་བཅུའི་དོ་ཤལ་དང་། ཐོད་པ་ཚལ་བུའི་དཔུང་རྒྱན་ཅན། ཞིང་ཆེན་གྱི་གཡང་གཞི་དང་། གླང་པོ་ཆེའི་ཀོ་བ་རློན་པས་སྟོད་གཡོགས་ཤིང་། སྟག་གི་ལྤགས་པའི་ཤམ་ཐབས་གྲོལ་བ། ཀླུ་རྒྱལ་རིགས་དཀར་པོས་སྐྲ་ཆིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ། དམངས་རིགས་ལྗང་ཁུས་སྐ་རགས་དང་དོ་ཤལ། གདོལ་པ་ནག་པོས་ཕྱག་ཞབས་ཀྱི་གདུ་བུ་སྟེ། ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཀྱིས་མཚན་པ་སྟེ་དུར་ཁྲོད་རོལ་པའི་ཆས་བརྒྱད་དང་། དཔལ་གྱི་ཆས་བཅུ་སྐུ་ལ་རྫོགས་ཤིང་། སྙན་གོང་ནས་ཉི་ཟླའི་འོད་ཟེར་སྤྲོ་བ། ཡུམ་ཀྲོ་དྷི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ། གཅེར་བུ་སྐྲ་གྲོལ་ཞིང་ལང་ཚོས་སྒེག་པའི་ཉམས་གྱུར་ཅན། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་ཐོད་པ་ཁྲག་གིས་གང་བ་གཙོ་བོའི་ཞལ་དུ་སྟོབ་པ། གཟིག་གི་ལྤགས་པའི་ཤམ་ཐབས་སོགས་དུར་ཁྲོད་རོལ་པའི་ཆས་ཅན། ཞབས་གཡོན་བརྐྱང་ཞིང་། གཡས་བསྐུམ་པས་གཙོ་བོ་དང་དགྱེས་པར་འཁྲིལ་བ། སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན། བསྐལ་པའི་མེའི་ཕུང་པོ་རབ་ཏུ་འབར་བའི་ཀློང་ན་ཁམས་གསུམ་པའི་དབང་ཕྱུག་ཆེན་པོའི་ངོ་བོར་བཞུགས་པའོ། །དེ་ནས། དེ་བཞིན་གཤེགས་པའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་ཀྱི་ཁྲོ་བོའི་ཚོགས་རྣམས་སོ་སོར་འདུས་པ་ལས་རིགས་བཞིའི་ཧེ་རུ་ཀའི་སྐུར་གྱུར་ནས་འཁོར་ལོའི་རྩིབས་བཞིར་རང་རང་གི་གདན་ལ་བཞུགས་པ་ནི། ༀ་བུདྡྷ་ཤྲཱི་ཧེ་རུ་ཀ་ཧཱུཾ། བུདྡྷ་ཀྲོ་དྷཱི་ཤྭ་རཱི་སྟྭཾ། ཤར་གྱི་རྩིབས་ལ་བུདྡྷ་ཧེ་རུ་ཀ་སྐུ་དང་རྩ་ཞལ་སྨུག་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་འཁོར་ལོ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཏྲི་ཤཱུ་ཱུལ་འཛིན་པ། ཡུམ་བུདྡྷ་ཀྲོ་དྷཱི་ཤྭ་རཱི་མ་སྨུག་ནག་དང་མཉམ་པར་སྦྱོར་བ། ༀ་རཏྣ་ཤྲཱི་ཧེ་རུ་ཀ་ཧཱུཾ། རཏྣ་ཀྲོ་དྷཱི་ཤྭ་རཱི་སྟྭཾ། ལྷོའི་རྩིབས་ལ་རཏྣ་ཧེ་རུ་ཀ་སྐུ་དང་རྩ་ཞལ་སེར་ནག །གཡས་སྔོ་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་དགྲ་སྟྭ་འཛིན་པ། ཡུམ་རཏྣ་ཀྲོ་དྷཱི་ཤྭ་རཱི་མ་སེར་མོ་དང་མཉམ་པར་སྦྱོར་བ། ༀ་པདྨ་ཤྲཱི་ཧེ་རུ་ཀ་ཧཱུཾ། པདྨ་ཀྲོ་དྷཱི་ཤྭ་རཱི་སྟྭཾ། ནུབ་ཀྱི་རྩིབས་ལ་པདྨ་ཧེ་རུ་ཀ་སྐུ་དང་རྩ་ཞལ་དམར་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་པདྨ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་རྔེའུ་ཆུང་འཛིན་པ། ཡུམ་པདྨ་ཀྲོ་དྷཱི་ཤྭ་རཱི་མ་དམར་མོ་དང་མཉམ་པར་སྦྱོར་བ། ༀ་ཀརྨ་ཤྲཱི་ཧེ་རུ་ཀ་ཧཱུྃ། ༀ་ཀརྨ་ཀྲོ་དྷཱི་ཤྭ་རཱི་སྟྭཾ། བྱང་གི་རྩིབས་ལ་ཀརྨ་ཧེ་རུ་ཀ་སྐུ་དང་རྩ་ཞལ་ལྗང་ནག །གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རྒྱ་གྲམ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཐོང་གཤོལ་འཛིན་པ། ཡུམ་ཀརྨ་ཀྲོ་དྷཱི་ཤྭ་རཱི་མ་ལྗང་མོ་དང་མཉམ་པར་སྦྱོར་བ། ཁྲག་འཐུང་ཡབ་ཡུམ་ཐམས་ཅད་ཀྱང་གར་དགུའི་རོས་སྒེག་ཅིང་། རྒྱན་དང་ཆ་ལུགས་གཙོ་བོ་དང་མཐུན་པ། རང་རང་གི་གདན་ལ་གཡས་བརྐྱང་པའི་སྟབས་ཀྱིས་བཞུགས་པའོ། །གསུམ་པ་ནི། དེ་ནས་རིགས་ལྔའི་ཁྲག་འཐུང་ཡབ་ཡུམ་རྣམས་རྗེས་སུ་ཆགས་པའི་སྦྱོར་བས་སྙོམས་པར་ཞུགས་ཏེ། དགྱེས་པའི་བཞད་སྒྲ་ཧ་ཞེས་བརྗོད་པས། སྦྱོར་མཚམས་ནས་བྱང་ཆུབ་ཀྱི་སེམས་སྤྲིན་ཁྲོ་མོ་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། འཁོར་ལོའི་གྲྭ་དང་གྲུ་ཆད་བཞིར་རང་རང་གི་གདན་ལ་བཞུགས་པ་ནི། རྩིབས་མཆན་གྱི་ཤར་ལྷོར་ག་རཱི་མ་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ལྷོ་ནུབ་ཏུ་ཙ་རཱི་མ་སེར་མོ་མདའ་གཞུ་འགེངས་པ། ནུབ་བྱང་དུ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་འཕྱར་བ། བྱང་ཤར་དུ་བེ་ཏ་ལི་ནག་མོ་གཡས་རྡོ་རྗེ་འཕྱར་ཞིང་གཡོན་བྱིས་པའི་བམ་ཟ་བ། གྲུ་ཆད་ཀྱི་ཤར་ལྷོར་པུཀྐ་སཱི་དམར་སེར་ཞིང་ཆུང་གི་རྒྱུ་མ་འདྲེན་པ། ལྷོ་ནུབ་ཏུ་གྷསྨ་ལྗང་གུ་གཡས་པའི་རྡོ་རྗེས་གཡོན་གྱི་དུང་དམར་དཀྲུག་ཅིང་གསོལ་བ། ནུབ་བྱང་དུ་སྨ་ཤ་མཐིང་ནག་བྱིས་པའི་རོ་བཟུང་ནས་སྙིང་ཟ་བ། བྱང་ཤར་དུ་ཙཎྜ་སེར་སྐྱ་མཆོག་ལུས་འདྲལ་བ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་པ། སྐྲ་སེར་པོ་གྱེན་དུ་བརྫེས་པ། གཅེར་བུ་དུར་ཁྲོད་རོལ་པའི་ཆས་ཅན། གཡོན་བརྐྱང་བའི་སྟབས་ཀྱིས་གནས་པའོ། །དེ་ནས་སྔར་བཞིན་དགྱེས་པའི་བཞད་སྒྲ་ཧེ་ཞེས་བརྗོད་པས། བྱང་ཆུབ་ཀྱི་སེམས་སྤྲིན་ཕྲ་མེན་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། གསེར་ཁྱམས་ཀྱི་ཕྱོགས་མཚམས་བརྒྱད་དུ་རང་རང་གི་གདན་ལ་བཞུགས་པ་ནི། ཤར་དུ་སེང་གདོང་མ་སེར་མོ་ཕྱག་གཉིས་ཐུགས་ཀར་གྱེན་དུ་བསྣོལ་བས་ཏི་ར་བཟུང་ནས་ཟ་བ། ལྷོར་སྟག་གདོང་མ་དམར་མོ་ཕྱག་གཉིས་མཐུར་དུ་བསྣོལ་ནས་རོ་བཟུང་བ། ནུབ་ཏུ་ཝ་གདོང་མ་ནག་མོ་ཞིང་ཆུང་བཟུང་ནས་ལྕེས་ལྡག་པ། བྱང་དུ་སྤྱང་གདོང་མ་མཐིང་ག་ཞིང་ཆུང་གི་ཁོག་པ་འདྲལ་བ་སྟེ་མཆེ་བ་ཅན་བཞི་དང་། ཤར་ལྷོར་བཞད་གདོང་མ་དམར་སེར་གཡོན་ཞིང་ཆུང་བཟུང་བའི་རྒྱུ་མ་གཡས་པས་དྲངས་ནས་གསོལ་བ། ལྷོ་ནུབ་ཏུ་ཀངྐའི་མགོ་ཅན་དམར་སྐྱ་བམ་རོའི་རྐང་ལག་བཟུང་ནས་ཕྲག་པར་འགེལ་བ། ནུབ་བྱང་དུ་བྱ་རོག་གདོང་ཅན་ནག་མོ་གཡས་རལ་གྲི་གཡོན་བྷན་དམར་འཛིན་པ། བྱང་ཤར་དུ་འུག་གདོང་མ་མཐིང་ག་གཡས་ལྕགས་ཀྱུ་དང་གཡོན་བྷན་དམར་འཛིན་པ་སྟེ་གཤོག་པ་ཅན་བཞི། ཐམས་ཅད་ཀྱང་གཅེར་བུ་རང་རང་ཁྲོས་པའི་ཞལ་ཅན་དྲག་མོའི་རྣམ་འགྱུར་དུར་ཁྲོད་འབར་བའི་ཆས་དང་ལྡན་པའོ། །སླར་ཡང་དགྱེས་པའི་བཞད་སྒྲ་ཕཊ་ཅེས་བརྗོད་པས། བྱང་ཆུབ་ཀྱི་སེམས་སྤྲིན་སྒོ་སྐྱོང་བཞིའི་རྣམ་པར་ཐོན་ནས་རིགས་བསྡུས་ཏེ་སྒོ་བཞིར་རང་རང་གི་གདན་ལ་བཞུགས་པ་ནི། ཤར་སྒོར་རྟ་གདོང་མ་སྔོན་མོ་ལྕགས་ཀྱུ་འཛིན་པ། ལྷོ་སྒོར་ཕག་གདོང་མ་ནག་མོ་མཆེ་ཞགས་འཛིན་པ། ནུབ་སྒོར་སེང་གདོང་མ་དམར་མོ་ལྕགས་སྒྲོག་འཛིན་པ། བྱང་སྒོར་སྤྱང་གདོང་མ་ལྗང་གུའི་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ། ཞལ་ཕྱིར་ཕྱོགས་ནས་འཁོད་པའོ། །དེ་ལྟར་གཙོ་འཁོར་ཐམས་ཅད་སྐུ་མདོག་ཕྱག་མཚན། རྒྱན་དང་ཆ་ལུགས་རྣམས་གསལ་ཞིང་གཟི་བརྗིད་དང་ལྡན་པར་བསམ་མོ། །གཉིས་པ་གཞན་སྲས་ཀྱི་ཆོ་ག་ལ། སྣང་བའི་ཞེན་པ་སྦྱོང་བ་དང་། སྟོང་པའི་འཛིན་པ་སྦྱོང་བ་གཉིས། དང་པོ་སྣང་ཞེན་སྦྱོང་བ་ལའང་། བསྐུལ་ཚིག །ཏིང་ངེ་འཛིན། གསལ་གདབ་པ་དང་གསུམ་གྱི། དང་པོ་ནི། གཙོ་བོའི་ཐུགས་ཀ་ནས་ཀུན་ཏུ་བཟང་པོ་བྱང་ཆུབ་ཀྱི་སེམས་ཀྱི་བདག་ཉིད་རྣམ་སྨིན་གྱི་ལུས་ཀྱི་རྣམ་པས་ཐོན་ཏེ། དཀྱིལ་འཁོར་གྱི་ཤར་སྒོར་འདུད་པའི་རྣམ་པས་འཁོད་པར་བསམ་ཞིང་། ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་གསོལ་བ་གདབ་བོ། །གཉིས་པ་ནི། ལྷ་རྣམས་ཀྱིིས་རྗེས་སུ་གནང་སྟེ། ཐབས་དང་ཤེས་རབ་ཀྱི་འོད་ཟེར་བདག་ལ་འཕྲོས་པས་སེམས་ཀྱི་རྟོག་པ་དང་དེ་ལས་གྱུར་པའི་ལུས་ངག་སྦྱངས་ནས། གཉིས་སུ་མེད་པའི་ཡེ་ཤེས་གཟུང་འཛིན་དང་བྲལ་བའི་རང་བཞིན་གསེར་ཞུན་ལྟ་བུའི་འོད་ཀྱི་གོང་བུར་གྱུར་པ་ལ། ལྷ་རྣམས་ཀྱི་སྐུ་གསུང་ཐུགས་ཀྱི་འོད་ཟེར་འབྲུ་གསུམ་གྱི་རྣམ་པར་འཕྲོས་ཏེ་ཐིམ་པས། དེ་ཉིད་ༀ་ཨཱཿཧཱུཾ་གསུམ་དུ་གྱུར་ནས་རིམ་བཞིན་ཧཱུཾ་ལ་ཞུགས་པ་ཟླ་བ་དང་རླུང་དཀྱིལ་ལ་གནས་པར་གྱུར། དེ་རླུང་གི་བཏེགས་པས་བུང་བ་མེ་ཏོག་ལ་ལྡིང་བ་ལྟར་ལྷ་ཚོགས་ཐམས་ཅད་ལ་གཡས་སུ་ལན་གསུམ་བསྐོར་ནས་གཙོ་བོའི་ཐུགས་ཀར་ཐིམ། ཡབ་ཡུམ་སྙོམས་པར་ཞུགས་པའི་དགའ་བའི་རོལ་མོས་བྱང་ཆུབ་ཀྱི་སེམས་སུ་ཞུ་བ། སྐུའི་དབྱིབས་བརྒྱུད། རྡོ་རྗེའི་ལམ་ནས་ཡུམ་གྱི་པདྨར་སོན་པ་འོད་ཀྱི་གོང་བུར་གནས་པ་ལས། གཙོ་བོ་ཡབ་ཡུམ་ཀྱང་རྗེས་སུ་ཆགས་པའི་སྦྱོར་བས་བདེ་བའི་ངོ་བོར་ཞུ་བར་བསམ་མོ། དེ་ནས། ཧཱུཾ་ཧ་ཧེ་ཕཊ་ཅེས་བརྗོད་པས། རིགས་བཞིའི་ཧེ་རུ་ཀ །ཁྲོ་མོ་བརྒྱད། ཕྲ་མེན་བརྒྱད། སྒོ་མ་བཞི་རྣམས་རིམ་བཞིན་དབུས་ཀྱི་ཐིག་ལེ་ལ་རོ་གཅིག་ཏུ་གྱུར་པ་ལས་གསེར་ཞུན་ལྟ་བུའི་འོད་ཀྱི་གོང་བུ་འབར་བར་བསམ་མོ། །གསུམ་པ་ནི། ཐབས་དང་ཤེས་རབ་གཉིས་མེད་པས། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུང་གི་བྱིན་རླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིབས། །རྡོ་རྗེའི་ལམ་ནས་ཡུམ་གྱི་མཁར། །ཆོས་སྐུ་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོའི་སྒྲ། །ཧཱུཾ་ཧ་ཧེ་ཕཊ་ཅེས་བྱུང་ནས། །བྱང་ཆུབ་སེམས་སུ་གཅིག་པར་ཐིམ། །ཞེས་པས་གསལ་གདབ་བོ། །གཉིས་པ་སྟོང་པའི་འཛིན་ཞེན་སྦྱོང་བ་ལ། ལྷ་བསྐྱེད་པ་དང་། དེ་གསལ་གདབ་པའོ། །དང་པོ་ལ་གསུམ་སྟེ། གཙོ་བོ་ཡབ་ཡུམ་བསྐྱེད་པ། ཡན་ལག་གི་ལྷ་བསྒོམ་པ། འཁོར་སྤྲོ་བའོ། །དང་པོ་ནི། ཧཱུཾ་ཧཱུཾ་ཞེས་བརྗོད་པས། གདན་སྟེང་གི་འོད་ཕུང་དེ་ཉིད་ཧཱུཾ་ཟུང་གཅིག་ཏུ་གྱུར། སྥ་ར་ཎ་ཕཊ། དེ་ལས་འོད་ཟེར་མཁའ་ཁྱབ་ཏུ་འཕྲོས། དོན་གཉིས་བྱས། སཾ་ཧ་ར་ཎ་ཧཱུཾ། སླར་འདུས་ཧཱུཾ་ལ་ཐིམ། འོད་དུ་ཞུ་བ་ལས། ༀ་བཛྲ་གྷཎྜེ། རྡོ་རྗེ་རྩེ་དགུ་དང་དྲིལ་བུ་ཧཱུཾ་ཡིག་གིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སྔར་བཞིན་འཕྲོས་འདུས་འོད་དུ་ཞུ་བ་ལས། ༀ་བཛྲ་ཤྲཱི་ཧེ་རུ་ཀ་ཧཱུཾ། བཛྲ་ཀྲོ་དྷཱི་ཤྭ་རཱི་སྟཱཾ། བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་ཉི་མ་བྱེ་བའི་གཟི་བྱིན་འབར་བ། ཞེས་པ་ནས། ཁམས་གསུམ་པའི་དབང་ཕྱུག་ཆེན་པོའི་ངོ་བོར་བཞུགས་པའོ། །ཞེས་པའི་བར་སྔར་ལྟར་བརྗོད་ཅིང་བསྒོམ་མོ། །གཉིས་པ་ནི། རང་གི་ཐུགས་རིན་པོ་ཆེའི་གུར་ཁྱིམ་ལྟ་བུའི་ནང་དུ་ཉི་མ་ལ་གནས་པའི་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཧཱུཾ་ཡིག་ཕྲ་མོ་འབར་བས་མཚན་པར་བསམ་ལ། དེ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཛཿས་སྤྱན་དྲངས་པར་བསམ་ཞིང་། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བར་བསམ་ཞིང་། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་དབང་སྔགས་རྣམས་བརྗོད་པ་སྟེ། རྡོ་རྗེ་ཕྱིར་བསྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྲིན་ལག་བརྐྱང་བ་རྣ་ལྟག་གཡས་པར། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེ་བོང་བརྐྱང་བ་ལྟག་པར། ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེའུ་ཆུང་བརྐྱང་བ་རྣ་ལྟག་གཡོན་པར། ༀ་མ་ཧཱ་ཀྲྀ་ཏྱཱ་ནུཥྛཱ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་རིམ་པར་དབང་བསྐུར་བས། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པར་བསམ་མོ། །སྤྱི་བོར་ཟླ་བ་ལ་གནས་པའི་ༀ་དཀར་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱའོ། །ༀ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར། ༀ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མགྲིན་པར་པདྨ་ལ་གནས་པའི་ཨཱྃ་དམར་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། གསུང་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཨཱྃ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་གསུང་དང་གཉིས་སུ་མེད་པར་གྱུར། ཨཱྃ་ཡོངས་སུ་གྱུར་པ་ལས་སྣང་མཐའ་དམར་པོ་པདྨ་འཛིན་པས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་མགྲིན་པར། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྙིང་གར་ཉི་མ་ལ་གནས་པའི་ཧཱུཾ་སྔོན་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། ཐུགས་རྗེ་རྗེའི་ལྷ་ཚོགས་ནམ་མཁའ་གང་བར་བྱོན། ཧཱུཾ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་ཐུགས་དང་གཉིས་སུ་མེད་པར་གྱུར། ཧཱུཾ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྙིང་གར། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ཅིང་། སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱའོ། །གསུམ་པ་ལ། སྲས་ཀྱི་དཀྱིལ་འཁོར་སྤྲོ་བ་དང་། དབང་ཕྱུག་མ་བསྐྱེད་པ་གཉིས་ཀྱི། དང་པོ་སྲས་སྤྲོ་བ་ལའང་། མཁའ་གསང་བརླབ་པ་ལ། གསལ་གདབ་པ། སྐུ་བསྐྱེད་པ་དང་གསུམ་ལས། དང་པོ་ནི། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔའི་ལྟེ་བར་བྱང་ཆུབ་སེམས་ༀ་དཀར་པོར་གནས་པའི་བུ་ག་ཕཊ་ཀྱིས་བཀག་པ། ཡུམ་གྱི་མཁའ་པཾ་ལས་པདྨ་འདབ་མ་བརྒྱད་པའི་ལྟེ་བར་ཉི་མ་ལ་རཀྟ་ཨཾ་དམར་པོར་གནས་པའི་གེ་སར་ཨེས་མཚན་པར་མོས་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། ཧཱུཾ་ཧཱུཾ་ཧཱུཾ་ཞེས་གཉིས་སུ་མེད་པར་སྙོམས་པར་ཞུགས་པས་བདེ་ཆེན་པོའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཞལ་དུ་ཞུགས། རྗེས་སུ་ཆགས་པའི་མེས་བྱང་ཆུབ་ཀྱི་སེམས་སུ་ཞུ་བ་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨོར་ལན་གསུམ་དུ་སྤྲོས་པ་ལས། ཐིག་གདབ་པ་དང་། གཞལ་ཡས་ཁང་དུ་བྱིན་གྱིས་བརླབས་ནས། དེར་ལྷ་རྣམས་ཀྱི་ས་བོན་ཡིག་འབྲུའི་དཀྱིལ་འཁོར་བཀྲ་ལམ་གྱིས་གསལ་བར་བསམ་མོ། །གཉིས་པ་ནི། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །ཞེས་གསལ་གདབ་བོ། །གསུམ་པ་ནི། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནི་ཧཱུཾ་ཕཊ། ཅེས་བརྗོད་པས། དབུས་ཀྱི་ཧཱུཾ་གཉིས་བཛྲ་ཧེ་རུ་ཀ་ཡབ་ཡུམ་གྱི་སྐུར་གྱུར། ཕཊ་ཛཿ ཞེས་པས་མཁའ་ལས་སྤྲོས་ནས་མདུན་གྱི་ནམ་མཁར་བཞུགས་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། དེ་ལས་འོད་ཟེར་སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ། བདག་ཉིད་གཙོ་བོ་ཡབ་ཡུམ་ལ་གཉིས་སུ་མེད་པར་གྱུར། དེ་བཞིན་དུ། ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷཱི་ཤྭ་རཱི་སརྦ་དུཥྚན་ཧཱུཾ་ཕཊ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་མ་ཧཱ་སཱུརྻ་རཏྣ་མ་ཧཱ་ཀྲོ་དྷཱི་ཤྭ་རཱི་བི་ད་མ་ཧཱུཾ་ཕཊ། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་ཧྲཱི་ཤྲུ་ཏ་ས་མ་ཏ་པདྨ་མ་ཧཱ་ཀྲོ་དྷཱི་ཤྭ་རཱི་ཁཱ་ཧི་ཧཱུཾ་ཕཊ། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷཱི་ཤྭ་རཱི་བི་ཤྭ་ཧཱུཾ་ཕཊ། ཅེས་བརྗོད་པས། རིགས་བཞིའི་ས་བོན་གྱི་ཡིག་འབྲུ་རྣམས་རིམ་པ་བཞིན་རིགས་བཞིའི་ཧེ་རུ་ཀ་ཡུམ་དང་བཅས་པའི་སྐུར་གྱུར། ཕཊ་ཛཿས་མཁའ་ལས་སྤྲོས་ནས་གཙོ་བོའི་ཕྱོགས་བཞིའི་གདན་གྱི་ནམ་མཁར་བཞུགས་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སྔར་བཞིན། སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ། ཕྱོགས་བཞིར་རང་རང་གི་གདན་ལ་བཞུགས་པ་ནི། ཤར་གྱི་རྩིབས་ལ། བུདྡྷ་ཧེ་རུ་ཀ་སྐུ་དང་རྩ་ཞལ་སྨུག་ནག །གཡས་དཀར་གཡོན་སེར་བའི་ཞལ་གསུམ། ཞེས་པ་ནས། རང་རང་གི་གདན་ལ་གཡས་བརྐྱང་བའི་སྟབས་ཀྱིས་བཞུགས་པའོ། །ཞེས་པའི་བར་སྔར་བཞིན་ལས་བསྐྱེད་སྔགས་རྣམས་དོར་ཏེ་བརྗོད་ཅིང་བསྒོམ་མོ། །དེ་བཞིན་དུ། ༀ་བཛྲ་ག་རཱི་ཧཿ ༀ་བཛྲ་ཙ་རཱི་ཧ༔ ༀ་བཛྲ་པྲ་མོ་ཧེ་ཧཿ ༀ་བཛྲ་བེ་ཏ་ལཱི་ཧཿ ༀ་བཛྲ་པུཀྐ་སཱི་ཧཿ ༀ་བཛྲ་གྷསྨ་རཱི་ཧཿ ༀ་བཛྲ་སྨ་ཤ་ནཱི་ཧཿ ༀ་བཛྲ་ཙཎྜ་ལཱི་ཧཿ ཞེས་བརྗོད་པས། ས་བོན་ཧ་བརྒྱད་པོ་མ་མོ་ཆེན་མོ་བརྒྱད་དུ་གྱུར། ཕཊ་ཛཿ ཞེས་པས་མཁའ་ལས་སྤྲོས་ནས་འཁོར་ལོའི་གྲྭ་དང་གྲུ་ཆད་བཞིར་རང་རང་གི་གནས་ཀྱི་ནམ་མཁར་བཞུགས་པར་གྱུར། སྥ་ར་ཎ་ཕཊ། སཾ་ཧ་ད་ཎ་ཧཱུཾ། སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ་རང་རང་གི་གདན་ལ་བཞུགས་པ་ནི། རྩིབས་མཆན་གྱི་ཤར་ལྷོར་ག་རཱི་མ་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ཞེས་པ་ནས། གཅེར་བུ་དུར་ཁྲོད་རོལ་པའི་ཆས་ཅན། གཡོན་བརྐྱང་བའི་སྟབས་ཀྱིས་གནས་པའོ། །ཞེས་པའི་བར་བརྗོད་ཅིང་བསྒོམ། དེ་བཞིན་དུ། ༀ་བཛྲ་སིདྷ་མུ་ཁཱི་ཧེ། ༀ་བཛྲ་བྱཱ་ཱགྷྲི་མུ་ཁཱི་ཧེ། ༀ་བཛྲ་ཤྲཱི་གཱ་ལ་མུ་ཁཱི་ཧེ། ༀ་བཛྲ་ཤྭ་ན་མུ་ཁཱི་ཧེ། ༀ་བཛྲ་གྲྀ་ཌྷ་མུ་ཁཱི་ཧེ། ༀ་བཛྲ་ཀངྐ་མུ་ཁཱི་ཧེ། ༀ་བཛྲ་ཀཱ་ཀ་མུ་ཁཱི་ཧེ། ༀ་བཛྲ་ཨུ་ལཱུ་ཀཱ་མུ་ཁཱི་ཧེ། ཞེས་བརྗོད་པས། ས་བོན་ཏེ་བརྒྱད་པོ་ཕྲ་མེན་བརྒྱད་དུ་གྱུར། ཕཊ་ཛཿ ཞེས་པས་མཁའ་ལས་སྤྲོས་ནས་གསེར་ཁྱམས་ཀྱི་ཕྱོགས་མཚམས་བརྒྱད་དུ་རང་རང་གི་གནས་ཀྱི་ནམ་མཁར་བཞུགས་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ་རང་རང་གི་གདན་ལ་བཞུགས་པ་ནི། ཤར་དུ་སེང་གདོང་མ་སེར་མོ་ཕྱག་གཉིས་ཐུགས་ཀར་གྱེན་དུ་བསྣོལ་བས་ཏི་ར་བཟུང་ནས་ཟ་བ། ཞེས་པ་ནས། ཐམས་ཅད་ཀྱང་གཅེར་བུ་རང་རང་ཁྲོས་པའི་ཞལ་ཅན་དྲག་མོའི་རྣམ་འགྱུར་དུར་ཁྲོད་འབར་བའི་ཆས་དང་ལྡན་པའོ། །ཞེས་པའི་བར་བརྗོད་ཅིང་བསྒོམ་མོ། །དེ་བཞིན་དུ། ༀ་བཛྲ་ཨཱརྻ་ཏེ་ཛ་ཏེ་ང་ཛཿ ༀ་བཛྲ་ཨ་མུ་ཁེ་ཧཱུཾ། ༀ་བཛྲ་ལོ་ཀ་བཾ། ༀ་བཛྲ་བྷསྨི་པ་ལ་ཡ་བ་ཏུ་ཧོཿ ཞེས་བརྗོད་པས། ས་བོན་ཕཊ་བཞི་པོ་སྒོ་མ་བཞིར་གྱུར། ཕཊ་ཛཿ ཞེས་པས་མཁའ་ལས་སྤྲོས་ནས། སྒོ་བཞིར་རང་རང་གི་གནས་ཀྱི་ནམ་མཁར་བཞུགས་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ་རང་རང་གི་གདན་ལ་བཞུགས་པ་ནི། ཤར་སྒོར་རྟ་གདོང་མ་སྔོན་མོ་ལྕགས་ཀྱུ་འཛིན་པ། ཞེས་པ་ནས། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ་ཞལ་ཕྱིར་ཕྱོགས་ནས་འཁོད་པའོ། །ཞེས་པའི་བར་བརྗོད་ཅིང་བསྒོམ་མོ། །གཉིས་པ་དབང་ཕྱུག་མ་བསྐྱེད་པ་ནི། བདག་ཉིད་བཛྲ་ཧེ་རུ་ཀར་གསལ་བའི་ཐུགས་ཀ་ནས། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ཉི་ཤུ་རྩ་བརྒྱད་འཕྲོས། ཁྱམས་ཕྱི་མའི་ཕྱོགས་བཞིར་དྲུག་དྲུག་དང་། སྒོ་བཞིར་རེ་རེ་སྟེ་རང་རང་གི་སྟན་ལ་འཁོད་པ་ལས། རིམ་པ་བཞིན། མ་ནུ་རཀྵ་སཱི་བྷྱོ། བྲཧྨ་ཎཱི་བྷྱོ། ར་ཏྲི་བྷྱོ། བེཥྞ་བེ་བྷྱོ། ཀུ་མཱ་རཱི་བྷྱོ། ཨིནྡྲ་ཎཱི་བྷྱོ། ཤར་སྟོད་ནས་གཡས་བསྐོར་དུ། རིམ་པ་བཞིན། སྲིན་མོ་སྨུག་ནག་ཐོད་རློན་འཆང་བ། ཚངས་མ་དམར་སེར་པདྨ་བསྣམས་པ། ལྷ་ཆེན་མོ་དཀར་ལྗང་ཏྲི་ཤུལ་འཛིན་པ། རྟོག་འདོད་མ་སྔོན་མོ་འཁོར་ལོ་འཆང་བ། གཞོན་ནུ་མ་དམར་མོ་མདུང་ཐུང་འཕེན་པ། བརྒྱ་བྱིན་མ་དཀར་མོ་ཨིནྡྲ་གདེངས་པའོ། །བཛྲ་པིངྒ་ལ་བྷྱོ། ཨ་མྲྀ་ཏཾ་བྷྱོ། ས་མྱ་བྷྱོ། དཎྜ་དཾ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ལྷོ་སྟོད་ནས་རིམ་པ་བཞིན། རྡོ་རྗེ་མ་སེར་མོ་དུང་ཁྲག་འཐུང་བ། བདུད་རྩི་དམར་མོ་པདྨ་བསྣམས་པ། ཟླ་བ་མ་དཀར་མོ་པུཎྜ་རི་ཀ་འཛིན་པ། བེ་ཅོན་མ་ལྗང་ནག་དབྱུག་ཐོ་འཕྱར་བ། སྲིན་མོ་དམར་མོ་དུང་ཁྲག་འཐུང་བ། ཟ་བ་མ་ལྗང་ནག་རྒྱུ་མ་འདྲེན་པའོ། །ར་ཏི་བཛྲ་བྷྱོ། རུ་དྷི་ར་མཏྟ་བྷྱོ། ཨེ་ཀ་ཙ་རི་ཎཱི་བྷྱོ། མ་ནོ་ཧ་རཾ་བྷྱོ། སིདྡྷི་ཀཾ་བྷྱོ། བཱ་ཡ་བཱི་བྷྱོ། ནུབ་སྟོད་ནས་རིམ་པ་བཞིན་དགའ་བ་དམར་མོ་ཀ་ཏར་འཕྱར་བ། སྟོབས་ཆེན་དཀར་མོ་གཤོལ་མདའ་འཛིན་པ། རྡོ་རྗེ་སེར་མོ་སྤུ་གྲིས་གཅོད་པ། འདོད་པ་དམར་མོ་མདའ་གཞུ་འགེངས་པ། ནོར་སྲུང་མ་དཀར་མོ་བུམ་པ་འཛིན་པ། རླུང་ལྷ་མ་སྔོན་མོ་བ་དན་འཕྱར་བའོ། །མ་ཧཱ་མཱ་ར་ཎ་བཛྲ་བྷྱོ། ཨགྣཱི་བྷྱོ། བཱ་ར་ཧཱི་བྷྱོ། ཙ་མུཎྜཱི་བྷྱོ། སུ་ཏ་ནཾ་བྷྱོ། བ་རུ་ཎཱི་བྷྱོ། བྱང་སྟོད་ནས་རིམ་པ་བཞིན། གསོད་བྱེད་མ་དཀར་མོ་རལ་གྲི་འཛིན་པ། མེ་མོ་དམར་མོ་གསལ་ཤིང་འཕྱར་བ། ཕག་མོ་ནག་མོ་མཆེ་ཞགས་འཛིན་པ། རྒན་བྱེད་མ་དམར་མོ་ཞིང་ཆུང་ཟ་བ། སྣ་ཆེན་མ་དཀར་ལྗང་ཐོད་ཁྲག་འཐུང་བ། ཆུ་ལྷ་སྔོན་མོ་སྦྲུལ་ཞགས་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦོ་ད་ར་བྷྱོ། ཤར་སྒོར་རྡོ་རྗེ་ནག་མོ་ཆེན་མོ་ལྕགས་ཀྱུ་འཛིན་པ། ལྷོ་སྒོར་རྡོ་རྗེ་ར་མོ་སེར་ནག་ཞགས་པ་འཛིན་པ། ནུབ་སྒོར་རྡོ་རྗེ་བུམ་སྣ་མ་དམར་ནག་ལྕགས་སྒྲོག་འཛིན་པ། བྱང་སྒོར་རྡོ་རྗེ་གསུས་འཛིན་མ་ལྗང་ནག་དྲིལ་བུ་འཁྲོལ་བ་སྟེ། ཐམས་ཅད་ཀྱང་གཏུམ་ཞིང་ཁྲོས་པ་དྲག་མོའི་ཉམས་ཅན་དུར་ཁྲོད་རོལ་པའི་ཆས་ཀྱིས་བརྒྱན་ཏེ། འདོད་རྒུར་བསྒྱུར་བའི་རྣམ་རོལ་ཅིར་ཡང་འཆར་བས་མེ་དཔུང་འབར་བའི་དབུས་ན་གནས་པའི་ལྷ་ཐམས་ཅད་ཀྱི་སྲོག་གི་གོར་ཡེ་ཤེས་སེམས་དཔའི་དྭངས་མའི་སྲོག་ཡིག་དང་བཅས་པས་མཚན་པའོ། །གཉིས་པ་གསལ་གདབ་པ་ལ། སྔགས་དང་ཚིག་གིས་གསལ་གདབ་པ་གཉིས་ལས། དང་པོ་ནི། ཧཱུཾ་ཧ་ཧེ་ཕཊ་བྷྱོ་རཾ། ཞེས་པས་དཀྱིལ་འཁོར་གྱི་འཁོར་ལོ་ཐམས་ཅད་གསལ་བརྟན་སྒྲིབ་པ་མེད་པ་འབར་བའི་འོད་ཟེར་མཁའ་ཁྱབ་ཏུ་འཕྲོ་བའི་བདག་ཉིད་དུ་གནས་པར་བསམ་མོ། །གཉིས་པ་ལ། ཆེ་བ་བསྐྱེད་པ་དང་། གསལ་གདབ་དངོས་གཉིས་ལས། དང་པོ་ནི། ས་ལ་སོགས་ལ་ཕྱག་རྒྱར་བྱས། །རྣལ་གྲོལ་རིམ་པར་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཞེས་པའོ། །གཉིས་པ་ནི། སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞིར་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །མཐའ་དབུས་མེད་པར་ཁྱབ་པ་ཡིས། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ཞེས་པས་གསལ་གདབ་བོ། །གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་དྲུག་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་པ་བྱ་བ། དངོས་གྲུབ་གསོལ་བ། དམ་བཅའ་བ། འཛབ་བཟླ་བའོ། །དང་པོ་ལ་བཞི་སྟེ། སྙན་གསན་དབབ་པ། སྤྱན་དྲང་བ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པའོ། །དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུཾ་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་གཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་ལྔ་བཅུ་རྩ་བརྒྱད་སྒྱུ་འཕྲུལ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། ཧཱུཾ། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་རུ་ལུ་རུ་ལུ་ཧཱུཾ། ཞེས་པས་སྙན་གསན་དབབ། གཉིས་པ་ནི། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉ་གནས་བསྐྱོད་ལ། །བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿ དམ་ཚིག་པའི་ཐུགས་ཀ་ནས་འོད་ཟེར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་རྣམ་པ་ཅན་དུ་འཕྲོས་ཡེ་ཤེས་ཀྱི་འཁོར་ལོ་དགུག་བཅིངས་བསྡམས་ལ་དགྱེས་པ་བསྐྱེད་ནས། རཾ་ཞེས་པས་དམ་ཚིག་གི་དཀྱིལ་འཁོར་འཁོར་དང་མེ་རི་འདབ་འབྱོར་དུ་བཞུགས་པར་བསམ་མོ། །གསུམ་པ་ནི། ༀ་བཛྲ་ཀྲོ་དྷ་ས་མ་ཡ་ཧཱུཾ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། །བཞི་པ་ནི། ༀ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿ ཞེས་པས། ཡེ་ཤེས་ཀྱི་འཁོར་ལོ་དམ་ཚིག་པ་ལ་དབྱེར་མེད་དུ་བསྟིམ་ནས། བརྟན་པ་དང་དམ་ཚིག་བསྐུལ་བ་དང་དབང་དུ་བྱས་པས། ལྷ་རྣམས་རྗེས་སུ་ཆགས་པས་དགྱེས་པར་གྱུར་པ་ལས་དྲིན་ལན་གྱི་ཚུལ་དུ། ཨ་ལི་ཨུ་ལི་ཏཱ་ལི་ཏ་པཱ་ལི་དཾཥྚཱ་གོ་ནཱ་ར་ཏྲི་ཁ་རཾ་ཡོ་གི་ནཱི་ཁཱ་ཧི་ཧོཿ ཞེས་པས་མཆོད་དེ། ཧཱུཾ་ཧ་ཧེ་ཕཊ། ཅེས་བརྗོད་པས་གསལ་ཞིང་བརྟན་པར་བྱས་ལ། ཧཱུཾ། སེམས་ཅན་དོན་ཕྱིར་ནན་ཏན་མཆོག་བསྐྱེད་དེ། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །གཉིས་མེད་དོན་གྱི་དངོས་གྲུབ་མཆོག་གི་གནས། །བདག་ལ་གསལ་ཞིང་བརྟན་པར་བཞུགས་སུ་གསོ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ལ། ཕྱག་དང་མཆོད་པ་གཉིས་ལས། དེ་གཉིས་ཀའི་ཚེ་ཡང་། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ། སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་སོགས་ལས་ཀྱི་རིམ་པ་ལ་འཇུག་པར་མོས་པའོ། །དེའི་དང་པོ་ཕྱག་འཚལ་བ་ནི། ཧཱུཾ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་ཉེར་གནས་ཤིང་། །ཐབས་དང་ཤེས་རབ་འབྲེལ་བའི་དཀྱིལ་འཁོར་ནས། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གི་ཁྲོ་ལ་ཕྱག་འཚལ་ལོ། །ཁྲོས་པས་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་ཁྲོ་བོའི་ཚོགས་ལ་ཕྱག་འཚལ་ལོ། །མི་གནས་མི་དམིགས་ཆོས་སྐུ་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྟོན་པ། །ཐུགས་རྗེས་གཟི་ལྡན་གདུག་པ་ཐབས་ཀྱིས་འདུལ། །བཅོམ་ལྡན་ཁྲོ་རྒྱལ་གཙོ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་རྒུར་སྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །ཨ་ཏི་པུ་ཧོཿ པྲ་ཏི་པུ་ཧོཿ ཞེས་པས་ཕྱག་བྱའོ། །གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ཧཱུཾ། རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་མཐིང་ཞལ། །རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །དཔལ་ཆེན་ཡེ་ཤེས་ཐབས་ཀྱི་རྒྱ། །ཤེས་རབ་དབྱིངས་མའི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པས་ཤེས་རབ་ཐབས་ལ་བརྟེན། །གཡོན་པས་དུང་དམར་གཙོ་ལ་སྟོབ། །ཀྲོ་དྷཱི་ཤྭ་རཱི་དབྱིངས་ཀྱི་རྒྱ། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོང་དངོས་གྲུབ་སྩོལ། །རིགས་བཞི་ཁྲོ་བོའི་ཕྱག་རྒྱ་ལས། །བུདྡྷ་ཧེ་རུ་ཀའི་ཕྱག་རྒྱ་ནི། །གཡས་དཀར་གཡོན་སེར་དབུས་མུག་ཞལ། །འཁོར་ལོ་རྡོ་རྗེ་ཏི་ར་གཡས། །དྲིལ་བུ་དུང་དམར་ཏྲི་ཤུལ་གཡོན། །དཔལ་ཆེན་བུདྡྷ་ཐབས་ཀྱི་རྒྱ། །རཏྣ་ཧེ་རུ་ཀའི་ཕྱག་རྒྱ་ནི། །གཡས་སྔོ་གཡོན་དམར་དབུས་སེར་ཞལ། །རིན་ཆེན་རྡོ་རྗེ་ཏི་ར་གཡས། །དྲིལ་བུ་དུང་དམར་དགྲ་སྟ་གཡོན། །དཔལ་ཆེན་རཏྣ་ཐབས་ཀྱི་རྒྱ། །པདྨ་ཧེ་རུ་ཀའི་ཕྱག་རྒྱ་ནི། །གཡས་དཀར་གཡོན་སེར་དབུས་དམར་ཞལ། །པདྨ་རྡོ་རྗེ་ཏི་ར་གཡས། །དྲིལ་བུ་དུང་དམར་རྔེའུ་ཆུང་གཡོན། །དཔལ་ཆེན་པདྨ་ཐབས་ཀྱི་རྒྱ། །ཀརྨ་ཧེ་རུ་ཀའི་ཕྱག་རྒྱ་ནི། །གཡས་དཀར་གཡོན་དམར་དབུས་ལྗང་ཞལ། །རྒྱ་གྲམ་རྡོ་རྗེ་ཏི་ར་གཡས། །དྲིལ་བུ་དུང་དམར་ཐོང་གཤོལ་གཡོན། །དཔལ་ཆེན་ཀརྨ་ཐབས་ཀྱི་རྒྱ། །རིགས་བཞི་ཡུམ་གྱི་ཕྱག་རྒྱ་ནི། །ཞལ་གཅིག་ཕྱག་གཉིས་རིགས་ཀྱི་མདོག །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཀྲོ་དྷཱི་རིགས་བཞི་དབྱིངས་ཀྱི་རྒྱ། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །གནས་མ་བརྒྱད་ཀྱི་ཕྱག་རྒྱ་ནི། །ག་རཱི་བྷན་དམར་ཞིང་དབྱུག་སྔོ། །ཙ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏ་བྱིས་ཟ་རྡོར་འཕྱར་ནག །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་དམར་དཀྲུག་འཐུང་ལྗང་། །སྨ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འདྲལ། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །ཡུལ་མ་བརྒྱད་ཀྱི་ཕྱག་རྒྱ་ནི། །སིདྷ་ཁ་རོ་སྣོལ་སེར་སེང་། །བྱ་གྷྲི་གནས་ལྟག་སྣོལ་དམར་སྟག །སྲྀ་གཱལ་ནག་མོ་བྱིས་ལྡག་ཝ། །ཤྭ་ན་འདྲལ་ལྟ་མཐིང་ག་སྤྱང་། །གྲྀདྡྷ་མགྲིན་དམར་རྒྱུ་འདྲེན་རྒོད། །ཀངྐ་ཞིང་ཕྲག་སྣར་མགོ་རིང་། །ཀཱ་ཀ་ཁ་རོ་བྷན་གྲི་ནག །ཨུ་ལཱུ་ལྕགས་ཀྱུ་མཐིང་ཚོགས་འུག །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །སྒོ་མ་བཞི་ཡི་ཕྱག་རྒྱ་ནི། །རྟ་གདོང་སྔོན་མོ་ལྕགས་ཀྱུ་འཛིན། །ཕག་གདོང་ནག་མོ་མཆེ་ཞགས་ཅན། །སེང་གདོང་དམར་མོ་ལྕགས་སྒྲོག་སྡོམ། །སྤྱང་གདོང་ལྗང་ནག་དྲིལ་འཁྲོལ་དགྱེས། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །འཇིག་རྟེན་འདས་དང་མ་འདས་པའི། །ཡེ་ཤེས་ཐོབ་པར་བྱ་བའི་ཕྱིར། །མ་མོ་རྣམས་ཀྱི་ཕྱག་རྒྱ་ནི། །སྲིན་མོ་སྨུན་ནག་ཐོད་རློན་འཆང་། །ཚངས་མ་དམར་སེར་པདྨ་བསྣམས། །ལྷ་ཆེན་དཀར་ལྗང་ཏྲི་ཤུ་ལ། །རྟོག་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་འཐུང་འཕེན། །བརྒྱ་བྱིན་དཀར་མོ་ཨིནྡྲ་གདེངས། །རྡོ་རྗེ་སེར་མོ་ཙཎྜ་འཐུང་། །བདུད་རྩི་དམར་མོ་པདྨ་བསྣམས། །ཟླ་བ་དཀར་མོ་པུཎྜ་རི། །བེ་ཅོན་ལྗང་ནག་དབྱུག་ཐོ་འཕྱར། །སྲིན་མོ་དམར་མོ་དུང་ཁྲག་འཐུང་། །ཟ་བ་ལྗང་ནག་བ་སུ་འདྲེན། །དགའ་བ་དཀར་མོ་ཀ་ཏར་འཕྱར། །སྟོབས་ཆེན་དཀར་མོ་གཤོལ་མདའ་འཛིན། །རྡོ་རྗེ་སེར་མོ་སྤུ་གྲིས་གཅོད། །འདོད་པ་དམར་མོ་མདའ་གཞུ་འགེངས། །ནོར་བསྲུང་དཀར་མོ་བུམ་པ་འཛིན། །རླུང་ལྷ་སྔོན་མོ་བ་དན་འཕྱར། །གསོད་བྱེད་དཀར་མོ་རལ་གྲི་འཛིན། །མེ་མོ་དམར་མོ་གསལ་ཤིང་འཕྱར། །ཕག་གདོང་ནག་མོ་མཆེ་ཞགས་ཅན། །རྒན་བྱེད་དམར་མོ་ཞིང་ཆུང་ཟ། །སྣ་ཆེན་དཀར་ལྗང་ཐོད་ཁྲག་འཐུང་། །ཆུ་ལྷ་སྔོན་མོ་སྦྲུལ་ཞགས་ཅན། །རྡོ་རྗེ་ནག་མོ་ལྕགས་ཀྱུ་འཛིན། །རྡོ་རྗེ་སེར་མོ་ར་མགོ་ཞགས། །རྡོ་རྗེ་དམར་མོ་ལྕགས་སྒྲོག་སྡོམ། །རྡོ་རྗེ་ལྗང་ནག་དྲིལ་འཁྲོལ་དགྱེས། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །ཞེས་རིམ་པ་བཞིན་ལྷ་སོ་སོའི་ཕྱག་རྒྱ་བཅིངས་ཏེ། དེ་ཡང་ཕྱག་རྒྱ་མདུན་དུ་བསྒྱུར་ནས་ཡབ་གཡོན་དང་ཡུམ་གཡས་སུ་དགྲོལ། དེའི་ཚེ་ལྷ་གང་དང་གང་གི་སྐུ་སྒྱུ་མ་ལྟ་བུར་གསལ་བ་ཕྱག་ཆེན། ས་བོན་དང་བརྗོད་པ་ཆོས་རྒྱ། བཅའ་བ་དམ་རྒྱ། དགྲོལ་བ་ལས་རྒྱ་སྟེ་ཕྱག་རྒྱ་བཞིའོ། །གཉིས་པ་ཀུན་བཟང་ནི། ༀ་ཧཱུཾ། བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས། ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་ནས་ཀྱང་། །འབར་བའི་གདན་ལ་བཞུགས་སུ་གསོལ། །ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མསྶ་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ཞེས་པས་རིམ་པར་ཕྱག་ཞབས་བསིལ་ཞིང་ཞལ་དུ་གསོལ་བར་བསམ་མོ། །བཞི་པ་བཞི་བསྣོལ་ནི། སོ་སོའི་ཕྱག་རྒྱ་སྟོན་ཅིང་། ༀ་ཧཱུཾ། སྤོས་ཀྱི་སྤྲིན་ལྡིང་བདུག་པ་མ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པར་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ཨུཏྤལ་མཐིང་ག་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུཥྤེའི་མཆོད་པར་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷིུ་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་པུཥྤེ་པུ། དབང་གི་ཕྱག་ན་སྒྲོན་མ་བསྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲཱ་ལོ་ཀེའི་མཆོད་པར་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལས། །བཛྲ་གནྡྷེའི་མཆོད་པར་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་པོ་སོ་སོ་ལ་ཐིམ་པར་བསམ་ལ། ༀ་ཨཱཿཧཱུཾ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ཅེས་བརྗོད་པས། སྐྱེས་དང་སྐྱེས་ལན་གྱི་ཚུལ་དུ་ལྷ་རྣམས་མཉེས། ལྷ་མོ་རྣམས་སླར་བྱུང་སྟེ། རང་གི་གནས་བཞིར་ཐིམ་པས་སྐུ་གསུང་ཐུགས་ཕྲིན་ལས་བཞིའི་དངོས་གྲུབ་ཐོབ་པར་བསམ་མོ། །ལྔ་པ་སྨན་མཆོད་ནི། ཧཱུཾ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་བསྒྲལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་གྱིས། །ཐུགས་དམ་དབྱིངས་ནས་བསྐུལ་བའི་ཕྱིར། །འདི་ནི་སྔོན་གྱི་ཐ་ཚིག་སྟེ། །སྐུ་གསུང་ཐུགས་ཀྱི་ངང་ཉིད་དུ། །བདག་ཅག་དད་པས་འབུལ་ལགས་ན། །བླ་མེད་འཕྲུལ་གྱི་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་གཞན་ཡང་། དཀོན་ཅོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོ་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྟོན་པ་ཀུན་བཟང་རྒྱལ་བ་རིགས་ལྔ་དང་། །རིགས་གསུམ་དྲྭ་མ་ལྔ་དང་རྒྱལ་པོ་ཛཿ ཀུ་ཀུ་རཱ་ཛ་ཨིནྡྲ་བྷཱུ་ཏི་ལ། སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སིདྷ་ཨུ་པ་རཱ་ཛ་གོ་མ་ས། །སྒེག་རྡོར་སངས་རྒྱས་གསང་བ་བི་མ་ལ། །རྨ་ལོ་རིན་མཆོག་གཙུག་གྱེར་རྣམ་གཉིས་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྒྱལ་བའི་ཡོན་ཏན་གནུབས་ཆེན་སངས་རྒྱས་ཞབས། །ཁུ་ལུང་ཡབ་སྲས་ཉང་ཆེན་ཤེར་མཆོག་དང་། །ཡེ་ཤེས་འབྱུང་གནས་ཟུར་ཆེན་ཤཱཀ་འབྱུང་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཟུར་ཆུང་ཀ་ཆེན་རྣམ་བཞི་སྒྲོ་ཕུག་པ། །རྩགས་ཚ་ཤཱཀ་རྡོར་ཤཱཀ་འབྱུང་རྡོ་རྗེ་འོད། །བསོད་ནམས་རྒྱལ་མཚན་ཆོས་སེང་སངས་རྒྱས་དཔལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བསོད་ནམས་མགོན་པོ་སྒྲོལ་ཆེན་ཡབ་སྲས་དང་། །འགོས་ལོ་གཞོན་ནུ་བསོད་ནམས་རྒྱ་མཚོའི་སྡེ། །རིན་ཆེན་རྒྱལ་མཚན་མགོན་པོ་ཟླ་བ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ངག་དབང་རྡོ་རྗེ་དཔལ་ལྡན་བཀྲ་ཤིས་དང་། །ལེགས་གྲུབ་ཚེ་རིང་རྡོ་རྗེ་མི་རྟོག་རྩལ། །པདྨ་ཕྲིན་ལས་འགྱུར་མེད་རྡོ་རྗེ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། འགྱུར་མེད་རྒྱ་མཚོ་རིན་ཆེན་རྣམ་པར་རྒྱལ། །ཨོ་རྒྱན་བསྟན་འཛིན་ཕྲིན་ལས་རྣམ་རྒྱལ་ཞབས། །ཕྲིན་ལས་ཆོས་སྒྲོན་སངས་རྒྱས་ཀུན་དགའ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མདོ་སྔགས་བསྟན་འཛིན་རིགས་བདག་ཕན་བདེའི་ཞབས། །སྨིན་གྲོལ་ཡོངས་རྫོགས་གདམས་པའི་ཆུ་བོ་ཀུན། །གཅིག་འདུས་དྲིན་ཅན་རྩ་བའི་བླ་མ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཏེར་ཆེན་མན་གྱི་ཁ་སྐོང་ཛྙཱ་ནས་སོ། །གཞན་ཡང་བརྒྱུད་པའི་རྣམ་གྲངས་དུ་མ་ཡོད་པས་གང་རུང་མོས་པ་བཞིན་སྤྲོ་ན་སྦྱར་རོ། །ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །འབར་བའི་རྒྱལ་པོ་ཁྲོ་རྒྱལ་ཡབ་ཡུམ་བཅུ། །ག་རཱི་ལ་སོགས་མ་མོ་བརྒྱད་རྣམས་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སིདྷ་ལ་སོགས་ཕྲ་མེན་མཆེ་གཤོག་བརྒྱད། །རྡོ་རྗེ་གདོང་མོ་སྒོ་སྐྱོང་རྣམ་པ་བཞི། །མ་ཚོགས་དབང་ཕྱུག་ཉི་ཤུ་རྩ་བརྒྱད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཞན་ཡང་རིག་འཛིན་དཔའ་བོ་མཁའ་འགྲོ་དང་། །དམ་ཅན་ཆོས་སྐྱོང་རིགས་དྲུག་ཕ་མ་སོགས། །སྲིད་གསུམ་ཀ་དག་རྒྱལ་བའི་དཀྱིལ་འཁོར་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་གུ་ཧྱ་ལག་གི་ཕྱག་རྒྱས་གཏོར་བས། ཡེ་ཤེས་ཀྱི་བདུད་རྩིའི་ཟེག་མ་མཁའ་ལ་སྤྲིན་བཞིན་དུ་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་ཐམས་ཅད་མཉེས་ཤིང་ཚིམ་པར་བསམ་ལ། མཐར་དངོས་གྲུབ་བླང་བ་ནི། རང་གི་ལྕེ་ལ་ཧཱུཾ་ཡིག་དང་། སྨན་གྱི་སྟེང་དུ་ༀ་ཨཱཿཧཱུཾ་གསུམ་བསྒོམས་ཏེ། ༀ་ཨཱཿཧཱུཾ། རྡོ་རྗེ་ལྕེ་ཡི་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་བསྒོམ། །བདུད་རྩི་ལྔ་དང་སྦྱར་བའི་སྨན། །མྱང་ན་དངོས་གྲུབ་ཐོབ་པར་འགྱུར། །ༀ་སརྦ་ཏ་ཐཱ་ག་ཏ་ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཾ། ཙིཏྟ་སིདྡྷུཾ་ཧཱུཾ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷཱུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། གཏོར་མ་འདོད་ཡོན་གྱི་ཕུང་པོ་ལས་འདོད་ཡོན་དྲུག་གི་ལྷ་མོ་ནམ་མཁའ་གང་བ་འཕྲོས། དཀྱིལ་འཁོར་པ་རྣམས་ཀྱི་དབང་པོ་དྲུག་གི་གནས་སུ་ཐིམ་པས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་མོ། །བདུན་པ་བདུད་རྩི་གསང་བསྣན་གྱི་མཆོད་པ་ནི། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་བདུད་རྩི་སྦྲེང་ཞིང་། ལྷ་རྣམས་ཀྱི་ཞལ་དུ་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུ་གསོལ་བས་དགྱེས་ཤིང་ཚིམ་པར་བསམ་མོ། །བརྒྱད་པ་རཀྟའི་མཆོད་པ་ལ་གསུམ་ལས། དང་པོ་ནི། ཧཱུཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་བཞེས་ནས་བསྣམས་སུ་གསོལ། །ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨཱ་བེ་ཤ་ཡ། ཨཱ་ཝེ་ཤ་ཡ། པྲ་བེ་ཤ་ཡ། པྲ་བེ་ཤ་ཡ། ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་དང་པོ་སྦྲེངས་པས་རཀྟའི་དྭངས་མ་ཡེ་ཤེས་ཀྱི་བདུད་རྩིའི་ངོ་བོར་སུམ་གཅིག་རོལ་བར་བསམ་མོ། །གཉིས་པ་ནི། ཧཱུཾ། ང་ནི་ཁྲག་འཐུང་ཆེན་པོ་སྟེ། །འཁོར་བའི་དྲྭ་བར་ཆགས་པ་ཡིས། །དམར་ཆེན་བསྐྱིལ་བའི་རྒྱ་མཚོ་ལ། །འཁོར་གྱི་མཁའ་འགྲོ་རྣམས་དང་རོལ། །མ་རུངས་འདོད་ལ་མ་ཆགས་ཤིང་། །དམ་ཚིག་ལ་སྡང་དགྲ་ཆེན་རྣམས། །ཐུགས་རྗེ་བྱང་སེམས་ལྡན་པ་ཡིས། །ངོ་འཐོན་སྟོབས་ཀྱིས་བསྒྲལ་བར་བྱ། །ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། སརྦ་དུཥྚན་ས་མ་ཡ་རཱུ་དྲ་མཱ་ར་ཡ། ཁ་ཁ་ཁཱ་ཧི་ཁཱ་ཧི། ཧྲི་ད་ཡ་པི་པ་ཧཱུཾ་ཕཊ། ཅེས་གཉིས་པ་སྦྲེངས་པས་རཀྟའི་ཁུ་བ་ཞིང་བཅུའི་དགྲ་བགེགས་ཀྱི་ངོ་བོར་གཉིས་སུམ་རོལ་པར་བསམ་མོ། །གསུམ་པ་ནི། ཧཱུཾ། ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་ཟ་བར་བྱའོ། །ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ་ས་མ་ཡ་མ་ཧཱ་མཱཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀེཾ་ནི་རི་ཏི། མ་ཧཱ་པཉྩ་ཨ་མྲྀ་ཏ། མ་ཧཱ་ཨརྒྷཾ་པྲ་ཏཱིཙྪ་ཧོཿ ཁ་ཁ་ཁ། ལེ་ལེ་ལེ། ཧཱུཾ་བྷྱོ། ཧཱུཾ་བྷྱོ། ཧཱུཾ་བྷྱོ། ཞེས་གསུམ་པ་སྦྲེངས་པས་རཀྟའི་སྙིགས་མ་ཞིང་བཅུའི་དུག་གསུམ་ཤ་ཁྲག་རུས་པའི་དངོས་པོར་ལྷག་མེད་དུ་རོལ་པར་བསམ་མོ། །དགུ་པ་བསྒྲལ་མཆོད་ནི། རང་གི་ཐུགས་ཀ་ནས་རཾ་དཔག་ཏུ་མེད་པ་ཆད། རཾ་བཛྲ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་ཞིང་། ཧཱུཾ། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །བཅུ་པ་སྦྱོར་མཆོད་ནི། རང་གི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་གར་ཕཊ་ཀྱིས་བཀག་པ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མ་ལ་རཀྟ་ཨཾ་དམར་པོར་གནས་པའི་གེ་སར་ཨེས་མཚན་པར་མོས་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་ལ། ཧཱུཾ་ཡིག་གླུར་ལེན་བཞིན་དུ་བསྐྱོད་པས་བྱང་ཆུབ་ཀྱི་སེམས་པདྨའི་དབུས་སུ་བབས་པ་དེ་ཉིད། བོ་དྷི་ཙིཏྟ་སྥ་ར་ཎ་ཕཊ་ཀྱིས། བྱང་ཆུབ་སེམས་ཀྱི་རྡུལ་ཕྲ་རབ་མཁའ་ཁྱབ་ཏུ་སྤྲོས་པས་དེ་བཞིན་གཤེགས་པ་ཐམས་ཅད་མཉེས་པར་བྱས་ཤིང་སེམས་ཅན་ཐམས་ཅད་བདེ་བ་ཆེན་པོས་ཚིམ་པར་བསམ། སཾ་ཧ་ར་ཎ་ཧཱུཾ། བྱང་ཆུབ་སེམས་ཀྱི་འོད་ཟེར་བདེ་བ་ཆེན་པོའི་རོ་དང་ལྷན་ཅིག་པར་འདུས་ནས། སེམས་ལྔའི་མཐའི་བདེ་བ་ཆེན་པོའི་ཡེ་ཤེས་མཆོག་ཏུ་རྒྱས་པ་ལ་བློ་བཞག་སྟེ། ༀ་ཧཱུཾ། འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུཾ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྔན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་། དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པ་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ཀོ་ཊ་ཀྵ། ཀོ་ཊ་ག །ཀོ་ཊ་ཀོ་ཊ། ཀོ་ཊ་པཤྩ། ཀོ་ཊཱི་རཱ་ག །ཀོ་ལཀྵ། ཀོ་ལ་བ། ཀོ་ལ་ཀོ་ལ། ཀོ་ལ་པཤྩ། ཀོ་ལ་བྷ་སྟ་ཐཱ། རྣམ་དག་སྒྲིབ་སྤངས་སྲིད་གསུམ་སྐྱོན་བྲལ་ཞིང་། །སྟོན་ཀའི་ཟླ་གསལ་དྲི་མེད་ཞལ་མངའ་བ། །བཅོམ་ལྡན་བདེ་གཤེགས་ཐམས་ཅད་བསྐྱེད་པའི་ཡབ། །ཤེས་རབ་ལྷ་མོ་རིགས་ཀྱི་ཡུམ་རྣམས་དང་། །ཕྱག་བརྙན་ཁྲོ་གཏུམ་རྔམ་པའི་ཚོགས་དང་བཅས། །བསོད་ནམས་ཡེ་ཤེས་ཚོགས་ཀྱི་ཞིང་རབ་རྫོགས། །དགྱེས་པར་རོལ་ཅིག་མཆོད་པ་དམ་པ་འདི། །བཞེས་ཏེ་ཨ་ལ་ལ་ཡིས་དགྱེས་པར་མཛོད། །ཅེས་པས་བདུད་དང་ལོག་འདྲེན་རྣམས་ཚར་གཅོད་པ་དང་། མཁའ་ཁྱབ་ཀྱི་རྒྱལ་བ་དང་དཀྱིལ་འཁོར་གྱི་འཁོར་ལོ་ལ་བསྟོད་ཅིང་བསྐུལ་བ་དང་། ཆོས་ཀྱི་སྒྲ་རྣམ་པ་མཐའ་ཡས་པ་སོ་སོའི་མོས་པ་བཞིན་འཆར་བར་མོས་ལ་རོལ་མོ་སྣ་ཚོགས་པའི་སྒྲ་སྦྱར་རོ། །བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ཧཱུཾ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ། །ཧོཿ ཧཱུཾ། རྔམ་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ། །ཧོཿ ཧཱུཾ། ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ། །ཧོཿ ཧཱུཾ། ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། །ཧོཿ ཧཱུཾ། བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ། །ཧོཿ ཧཱུཾ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་སྟེ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ། །ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་བསྟོད་པར་བྱའོ། །གསུམ་པ་བཤགས་པ་བྱ་བ་ནི། ༀ་བཛྲ་ཨེ་ས་ཧུ། པེ་ས་ཧུ། ས་མ་ཡ་བྷཀྵ་ཧུ། རུ་ལུ་རུ་ལུ་ཧཱུཾ་བྷྱོ་ཧཱུཾ། ཛཿཧཱུཾ་བཾ་ཧོཿ ༀ་པྲ་ཏཱིཙྪ་ཧོཿ ཞེས་མེ་ཏོག་དོར་བ་སྔོན་དུ་འགྲོ་བས། ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པར་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱིི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག་ཐབས་ལ་མཁས་པའི་བདག་ཉིད་སྒྲོལ་བའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས། མི་ལུས། ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་འཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མ་ནོར་བར་མནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་ཆག་དང་འགལ་འཁྲུལ་དུ་གྱུར་པ། ལྷ་ཉེ་བར་མ་བསྒོམ་པ། སྙིང་པོ་དག་པར་མ་བགྲངས་པ། སྦྱོར་བ་མང་པོའི་བར་བསྐུམས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླ་ལས་འདས་པ། དམ་རྫས་ལག་ལེན་རྔོ་མ་ཐོགས་པ། ཛཔ྄་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ། དེ་བཞིན་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། སེམས་ཅན་གྱི་སྤྱོད་པ་རང་ཐད་དུ་གྱུར་པ་དང་། ཁྱད་པར་དུ་སྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་གཉན་པོ་མངོན་པར་མནོས་པ་ལས། ཉམས་ཤིང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས། ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། ཞེས་པ་རྒྱུད་དག་པར་བྱེད་པ་འགྱོད་ཚངས་བཤགས་པའི་རིམ་པའོ། །བཞི་པ་དངོས་གྲུབ་གསོལ་བ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་བ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པ། སྡང་བའི་དགྲ། གནོད་པའི་བགེགས། གདུག་པའི་དབལ། སྦྱོར་བའི་དུག །རྣོ་བའི་མཚོན། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། སོ་སོའི་རྨི་ལམ་ངན་པ་དང་། ལྟས་ངན་པ། མི་ཤིས་པའི་རྐྱེན་དེ་དག་ཐམས་ཅད་ཕྱིར་བཟློག་ཅིང་མིང་ཙམ་ཡང་མི་གྲགས་པར་ཞི་བ་ཆེན་པོ་མཛད་དུ་གསོལ། གལ་ཏེ་ཞི་བས་བསྒྱུར་དུ་མི་གཏུབ་པ་ཞིག་མཆིས་ནའང་། དྲག་པོའི་ཕྲིན་ལས་ཀྱིས་དབང་དུ་བསྡུ་བ་དང་། གཟིར་ཞིང་མནན་པ་དང་། བསྒྲལ་ཞིང་སྤར་བ་ལ་སོགས་ཏེ། ཕྲིན་ལས་དྲག་ཐབས་རྣམ་བཞིས་ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཞེས་འདོད་དོན་གསོལ་ལོ། །ལྔ་པ་དམ་བཅའ་བ་ནི། ལྷག་པའི་བསམ་པ་རྩེ་གཅིག་པས། ༀ་ཧཱུཾ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །དྲུག་པ་ཛཔ྄་ལ། ཛཔ྄་ཁང་དབྱེ་བ། ཛཔ྄་དངོས། སྐབས་ཀྱི་མཇུག་བསྡུ་བ་དང་གསུམ་ལས། དང་པོ་ནི། དབྱེ་གཞིའིི་དཀྱིལ་འཁོར་ལེགས་པར་གསལ་བཏབ་ནས། བྷྲཱུཾ་བི་ཤྭ་བི་ཤུདྡྷེ་ཕཊ་ཛཿ ཧཱུཾ་ཧ་ཧེ་ཕཊ་བྷྱོ་རཾ་ཕཊ་ཛཿ ཞེས་བརྗོད་པས། དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས། མདུན་གྱི་ནམ་མཁར་མེ་རི་འདབ་འབྱར་གྱི་ཚུལ་དུ་བཞུགས་པར་མོས་པའོ། །གཉིས་པ་ནི། བདག་མདུན་གྱི་ལྷ་རྣམས་ཡེ་ཤེས་སེམས་དཔའིི་ཐུགས་ཀར་རྡོ་རྗེའི་ལྟེ་བར་ཉི་མའི་གདན་སྲན་ཟླུམ་ཙམ་གྱི་དབུས་སུ་རིགས་ལྔ་ལ་ཧཱུཾ། ག་རཱི་མ་བརྒྱད་ལ་ཧ། ཕྲ་མེན་བརྒྱད་ལ་ཧེ། སྒོ་སྐྱོང་བཞི་ལ་ཕཊ། དབང་ཕྱུག་མ་རྣམས་ལ་བྷྱོ་རེ་རྣམས་རུ་ལུ་འབྲུ་བརྒྱད་པའི་སྔགས་ཀྱི་ཕྲེང་བ་རེ་རེས་བསྐོར་བར་གསལ་བཏབ་ལ། སྔགས་ཟློས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས། ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་པ་སྟེ། དམ་ཡེ་འཕྲོ་འདུའི་གསལ་བ་གསུམ་དང་ལྡན་པའི་ངང་ནས་སྐྱོན་བཅུ་སྤངས་ཏེ་བཟླ་བར་བྱའོ། །བཟླ་བྱའི་སྔགས་ནི། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ་མ་ཧཱ་ཀྲོ་དྷེ་ཤྭ་རཱི་སྟྭཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་པའོ། །དེས་མཚོན་ནས་རིགས་བཞི་དང་། གནས་ཡུལ་གྱི་མ་མོ་སྒོ་སྐྱོང་དབང་ཕྱུག་མ་རྣམས་སོ་སོའི་བསྐྱེད་སྔགས་ལ་རུ་ལུ་འབྲུ་བརྒྱད་སྦྱར་བས་གཙོ་འཁོར་གྱི་འགྲོས་དང་སྦྱར་ནས་བརྒྱ་དང་ཉེར་གཅིག །བདུན་སོགས་རིམ་པར་བཟླ་ཞིང་། སྤྱི་ཛཔ྄་ནི། རུ་ལུ་ཉིད་ལ་གཙོ་བོར་བྱའོ། །དེ་ཡང་ངེས་རྫོགས་ལས། རྟགས་དུས་གྲངས་ཀྱི་དབྱེ་བས་རབ་འབྲིང་ཐ་མའི་ཚད་རྫོགས་ཀྱི་བར་དུ་བྱ་བར་གསུངས་ཀྱང་། མོས་སྒོམ་ཉི་ཚེ་བ་ལ་ནི། ཅི་ནུས་བཟླ་བ་ཙམ་མོ། །ཕྱི་ནང་གསང་གསུམ་དང་། ཕྲ་མོ་གསུམ་གྱི་བཟླ་ཚུལ་སོགས་ནི་གཞན་དུ་འབྱུང་བ་ལས་ཤེས་པར་བྱའོ། །གསུམ་པ་སྐབས་ཀྱི་མཇུག་བསྡུ་བ་ལ། བསྟོད་པ། བཤགས་པ། ཡེ་ཤེས་པ་བསྡུ་བ་དང་གསུམ་ལས། དང་པོ་ནི། གཞི་བསྟོད་བྱ་བར་གསུངས་པ་ལྟར། ཧཱུཾ། དུས་གསུམ་མི་འགྱུར་རྣམ་ཤེས་རྡོ་རྗེའི་སྐུ། །ཞེ་སྡང་མཐར་ཕྱིན་བཛྲ་ཧེ་རུ་ཀ །དབྱིངས་ནས་རྒྱས་འདེབས་བཛྲ་ཁྲོས་པའི་ཡུམ། །བཛྲ་ཧེ་རུ་ཀ་ལ་ཕྱག་འཚལ་བསྟོད། །མ་འགགས་རང་གསལ་གཟུགས་ཕུང་ཆོས་ཀྱི་སྐུ། །གཏི་མུག་མཐར་ཕྱིན་བུདྡྷ་ཧེ་རུ་ཀ །དབྱིངས་ནས་རྨོངས་སེལ་བུདྡྷ་ཁྲོས་པའི་ཡུམ། །བུདྡྷ་ཧེ་རུ་ཀ་ལ་ཕྱག་འཚལ་བསྟོད། །ཟ་བྱེད་གཏེར་ཚོགས་ཚོར་བ་རིན་འབྱུང་སྐུ། །ང་རྒྱལ་མཐར་ཕྱིན་རཏྣ་ཧེ་རུ་ཀ །དབྱིངས་ནས་ཚེ་འཕེལ་རཏྣ་ཁྲོས་པའི་ཡུམ། །རཏྣ་ཧེ་རུ་ཀ་ལ་ཕྱག་འཚལ་བསྟོད། །ཆགས་མེད་དག་པ་འདུ་ཤེས་པདྨའི་སྐུ། །འདོད་ཆགས་མཐར་ཕྱིན་པདྨ་ཧེ་རུ་ཀ །དབྱིངས་ནས་རྫོགས་བྱེད་པདྨ་ཁྲོས་པའི་ཡུམ། །པདྨ་ཧེ་རུ་ཀ་ལ་ཕྱག་འཚལ་བསྟོད། །དོན་རྣམས་མཐར་ཕྱིན་འདུ་བྱེད་སྤྲུལ་པའི་སྐུ། །ཕྲག་དོག་མཐར་ཕྱིན་ཀརྨ་ཧེ་རུ་ཀ །དབྱིངས་ནས་ཟ་བྱེད་ཀརྨ་ཁྲོས་པའི་ཡུམ། །ཀརྨ་ཧེ་རུ་ཀ་ལ་ཕྱག་འཚལ་བསྟོད། །འཇིག་རྟེན་བཞད་པའི་དུར་ཁྲོད་གནས་བརྒྱད་ནས། །ཐུགས་མཆོག་རྣམ་དག་ཡེ་ཤེས་དཀར་མོའི་ཚོགས། །ཐུགས་རྗེ་ཆེན་པོས་རྣལ་འབྱོར་གྲོགས་མཛད་མ། །གནས་ཀྱི་ག་རཱི་བརྒྱད་ལ་ཕྱག་འཚལ་བསྟོད། །ཡོན་ཏན་རྟགས་ཀྱི་དུར་ཁྲོད་གནས་བརྒྱད་ནས། །འཇིགས་བྱེད་རྩལ་འཕགས་སེང་གདོང་ཕྲ་མེན་ཚོགས། །ཐུགས་རྗེ་ཆེན་པོས་རྣལ་འབྱོར་གྲོགས་མཛད་མ། །ཡུལ་གྱི་ཕྲ་མེན་བརྒྱད་ལ་ཕྱག་འཚལ་བསྟོད། །ཕྱིན་ཅི་ལོག་བཞི་དུར་ཁྲོད་གནས་བཞི་ནས། །ཚད་མེད་བཞི་ཡིས་འགྲོ་བའི་དོན་མཛད་པའི། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །ཡེ་ཤེས་སྒོ་མ་བཞི་ལ་ཕྱག་འཚལ་བསྟོད། །ལྷ་ཆེན་རྣམས་ཀྱི་ཆུང་མ་དབང་མོའི་ཚོགས། །འཁོར་བའི་ཆོས་ལ་མངའ་བརྙེས་སྲིན་མོའི་གཟུགས། །མྱ་ངན་འདས་པའི་སྤྲུལ་སྐུ་མགོ་བརྙན་ཅན། །དབང་ཕྱུག་ཉི་ཤུ་བརྒྱད་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་འབར་བའི་སྐུར་སྟོན་པ། །ཁྲག་འཐུང་རོལ་པའི་ལྷ་ཚོགས་ལྔ་བཅུ་བརྒྱད། །གདོད་ནས་མ་སྐྱེས་རང་བྱུང་གྲུབ་པའི་ལྷ། །ཚེ་རབས་སྔོན་ནས་བསྒྲུབས་པའི་འཕྲོ་མཆིས་ཀྱི། །ད་ལྟ་ཉིད་དུ་བདག་ལ་མངོན་གྱུར་ཅིག །ཅེས་བསྟོད། གཉིས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་མནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱི་དམ་ལས་འགལ་གྱུར་པ། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ། །ཞེས་བཟླས་པའི་ཉེས་བྱས་སུ་གྱུར་པ་ཐམས་ཅད་བཤགས་པར་བྱའོ། །གསུམ་པ་ནི། རང་བཞིན་དང་ཏིང་ངེ་འཛིན་གྱི་དཀྱིལ་འཁོར་དབྱེར་མེད་དུ་རྟོགས་པའི་ཕྱིར། ༀ་བཛྲ་ཀྲོ་དྷ་ས་མ་ཡ་ཧཱུཾ། ཞེས་སོགས་ཀྱིས་རིག་པའི་མེ་ཏོག་དོར་བ་དང་དངོས་གྲུབ་བསྐུལ་བ་སྔར་བཞིན་བྱས་ནས། ཧཱུཾ་ཞེས་པས། མདུན་གྱི་ཡེ་ཤེས་ཀྱི་འཁོར་ལོ་དམ་ཚིག་གི་དཀྱིལ་འཁོར་ལ་གཉིས་སུ་མེད་པར་བསྟིམ་ལ། གསལ་ཞིང་བརྟན་པའི་ཕྱིར་ཡི་གེ་བརྒྱ་པའང་བཟླའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་བསྐྱང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་མཆོད་ལ་ཡང་ལྔ་ལས། དང་པོ་བཤམ་ཞིང་བྱིན་གྱིས་བརླབ་པ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་པ་བཤམས་ནས། བསང་ཆུ་གཏོར་ལ། ༀ་མ་ཧཱ་ཀྲོ་དྷེ་ཤྭ་རཱིས་བསང་། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྟོང་པར་སྦྱངས། མ་སཱུརྻ་མཎྜལ། ཞལ་ཟས་ཀྱི་སྣོད་དུ་ཉི་མ་ལ་ཧཱུཾ་ༀ་སྭཱ་ཨཱཾ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབ། གཉིས་པ་ཚོགས་ཞིང་སྤྱན་འདྲེན་པ་ནི། ཧཱུཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་འདྲེན་གྱི། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་སྟན་དུ་བཏིང་། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ནས་བསྣམས་སུ་གསོལ། །ༀ་རུ་ལུ་རུ་ལུ་ཧཱུཾ། ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿ ཞེས་པས་སྤྱན་དྲངས་ལ་དགུག་གཞུག་བཅིང་མཉེས་བྱ། གསུམ་པ་མཆོད་པ་ལ་གསུམ་ལས། དང་པོ་སྤྱིར་མཆོད་པ་ནི། ཧཱུཾ། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པར་བཞེས་སུ་གསོལ། །ༀ་ཨཱཿཧཱུཾ། སུ་ར་ཏ་ཨུ་པ་བྷྱཿ ཀ་མ་ལ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝཱན། ཛཿཧཱུཾ་བཾ་ཧོཿ ཨ་ལ་ལ་ཧོཿ ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། གཉིས་པ་བྱེ་བྲག་ཏུ་མཆོད་པ་ནི། ༀ་ཧཱུཾ། སྤོས་ཀྱི་སྤྲིན་ལྡིང་བདུག་པ་མ། །སོགས་དང་། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། སོགས་བཞི་བསྣོལ་དང་། ཧཱུཾ། རྡོ་རྗེ་སྒེག་མོ་རྡོ་རྗེ་ཅན། །སེམས་དཔའ་སྔོན་པོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལས། །བཛྲ་ལཱ་སྱེའི་མཆོད་པར་རོལ། །ༀ་ཤྲཱི་བཛྲ་རཱ་ག་ལཱ་སྱེ་ཧཱུཾ། ཡིད་བཞིན་རིན་ཆེན་འོད་འབར་བ། །འཇམ་དཔལ་རྣོན་པོའི་དངོས་གྲུབ་འཛིན། །མཉམ་པ་ཉིད་ཀྱི་ཡེ་ཤེས་ལས། །བཛྲ་མཱ་ལེའི་མཆོད་པར་རོལ། །ༀ་ཤྲཱི་བཛྲ་རཱ་ག་མཱ་ལེ་ཏྲཾ། པདྨ་དབྱངས་མཁན་རྨ་བྱའི་མགྲིན། །སྤྱན་རས་གཟིགས་ཀྱི་དངོས་གྲུབ་འཛིན། །སོ་སོར་རྟོག་པའི་ཡེ་ཤེས་ལས། །བཛྲ་གཱིརྟིའི་མཆོད་པར་རོལ། །ༀ་ཤྲཱི་བཛྲ་རཱ་ག་གཱིརྟཱི་ཧྲཱིཿ གར་མཁན་འགྱིང་བག་གཟི་ལྡན་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན་ཡེ་ཤེས་ལས། །བཛྲ་ནཱིརྟིའི་མཆོད་པར་རོལ། །ༀ་ཤྲཱི་བཛྲ་རཱ་ག་ནྲིརྟི་ཨཱཿ ཞེས་དང་། སྤྲོ་ན། སུ་ར་ཏོ་བཅུ་དྲུག་གིས་ཀྱང་མཆོད་དོ། །གསུམ་པ་ཁྱད་པར་གྱི་མཆོད་པ་ནི། ཚོགས་ཕུད་ཆ་གསུམ་མམ་བཞིར་སྤྲོས་ཏེ། དང་པོ་མཆོད་པ་ནི། ཧཱུཾ། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་འཇིགས་པར་སྟོན་པ་དང་། །སྙིང་རྗེ་རྔམ་དང་ཞི་བ་ལ་སོགས་པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་ཡང་སྒྲུབ་པོ་རྣལ་འབྱོར་ལས། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཱཾ་ས་ལ་སོགས་རོ་མཆོག་གསོལ། །མེ་ཏོག་སོགས་དང་ཙནྡན་དྲི། །བཟང་རྒུ་འབུལ་ལོ་བཞེས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །སྒྲུབ་པའི་རྫས་འདི་ཐམས་ཅད་ལ། །ཧཱུཾ་དང་ཕཊ་ཀྱིས་ལྡན་པར་མཛོད། །ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་པས་ཚོགས་རྫས་འདོད་ཡོན་དྲུག་གི་ལྷ་མོ་མཁའ་ཁྱབ་ཏུ་འཕྲོས་པ་ཚོགས་ཞིང་གི་ལྷ་རྣམས་ཀྱི་གནས་དྲུག་ཏུ་ཐིམ་པས་དགྱེས་པར་བསམ་མོ། །བར་པ་བཤགས་པ་ནི། ཧཱུཾ། ཚེ་རབས་ཐོག་མ་མེད་པ་ཚུན་ཆད་ནས། །ད་ལྟའི་ལུས་འདི་བླངས་པ་ཡན་ཆོད་དུ། །ལུས་ཀྱི་སྡིག་བྱས་སྤྱོད་པ་ངན་དུ་སྤྱད། །ངག་གིས་ཚིག་འཁྱལ་སྨྲ་བ་ངན་དུ་བརྗོད། །སེམས་ཀྱི་བློ་ནོར་ལོག་པར་བསམ་པ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་པ། །བཀྲ་བའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང་། །དེ་ཡི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙམ་ན་བར་ཆད་རྩོམ། །ནོངས་ཤིང་འགལ་འཁྲུལ་ཅི་བགྱིས་མཐོལ་ཞིང་བཤགས། །མཐོལ་བཤགས་བཞེས་ནས་ཚངས་པ་སྩལ་དུ་གསོལ། །ཞེས་དང་། ཡི་གེ་བརྒྱ་པ་ཡང་བརྗོད་ཅིང་། ཚོགས་རྫས་བདུད་རྩི་ལྔའི་རང་བཞིན་དུ་ཕུལ་བས་ཐུགས་དམ་སྐོངས་ཤིང་ཉམས་ཆག་དག་པར་བསམ་མོ། །ཐ་མ་སྟོབ་པ་ལ། རྟེན་བཅའ་བ། དཀྱིལ་འཁོར་བསྐྱེད་པ། ལས་ལ་གཟུད་པ། བདེན་པ་བརྡར་བ། ཕོ་ཉ་འགྱེད་པ། ལས་ལ་སྦྱར་བ། ཞལ་དུ་སྟོབ་པ་དང་བདུན། དང་པོ་ནི། ལིངྒ་ལོགས་སུ་བཅས་པ་མེད་ན། ཚོགས་ཟན་ཆ་གསུམ་པ་དེའི་འདོད་ཡོན་གྱི་ལྷ་མོ་ཧཱུཾ་ཞེས་པས་རང་ལ་བསྡུས་ནས་ཐོད་ཚལ་ལ་སོགས་པའི་སྣོད་དུ་བཞག །གཉིས་པ་ནི། ཨེ་རཾ་ཛྭ་ལ་རཾ། ཞེས་པས། ཕྱི་སྣོད་ཀྱི་འཇིག་རྟེན་ཐམས་ཅད་ཆོས་ཀྱི་འབྱུང་གནས་གྲུ་གསུམ་མཐིང་ནག་འབྱམས་ཀླས་པ་བསྐལ་པའི་མེ་དཔུང་འབར་བར་གྱུར། ཧཱུཾ་ཧ་ཧེ་ཕཊ་བྷྱོ་རཾ། ཞེས་པས། ནང་བཅུད་ཀྱི་སེམས་ཅན་ཐམས་ཅད་ཁྲག་འཐུང་འབར་བའི་དཀྱིལ་འཁོར་དུ་བཞེངས་པར་བསམ། གསུམ་པ་ནི། ༀ་བ་ཧུ་བེ་དྷ། རོ་ཧུ་ཏི། པཉྩ་ཏི། ཨ་ཤེ་ཥ། ནི་ཤེ་ཥ། བཱ་ད་བི་ན་ཡ། བིདྱཱ་ག་ཏེ། ཙ་ལེ། པྲ་ཙ་ལེ། གུཪྦ་གུཪྦ། བི་གུཪྦ། བི་གུཪྦ། བཛྲ་སཾ་བ་ལེ། ཙ་ལེ་ཙ་ལེ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་ལས་ལ་གཟུད་པས། ལྷ་ཚོགས་ཐམས་ཅད་དྲག་པོའི་ལས་ལ་རྔམས་ཤིང་ཁྲོས་པར་བསམ་མོ། །བཞི་པ་ནི། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་ཅོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བཅོམ་ལྡན་འདས་དཔལ་ཆེན་པོ་ཁྲག་འཐུང་རོལ་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་བཀའ་སྡོད་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས་མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ནྲྀ་ཡཾ་ཛཿ ནྲྀ་བཛྲ་ཨངྐུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཞེས་བདེན་པའི་སྟོབས་བརྗོད་དེ་དགུག །ལྔ་པ་ནི། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས། སྤྲུལ་པའི་ཕོ་ཉ་ནམ་མཁའ་གང་བར་སྤྲོས། དེ་རྣམས་ཀྱིས་གཟས་པོ་སྐྱོབ་བྱེད་དང་ཕྲལ་ནས། ཉམ་ཐག་རྣམ་པར་འགྱུར་བའི་ཚུལ་དུ་འདར་ཕྲིལ་གྱིས་བཀུག་སྟེ། པྲ་བེ་ཤ་ཡ་ཕཊ། གཟས་པོའི་སྙིང་གི་སྒོ་ཕྱེ། ཨཱ་བེ་ཤ་ཡ་ཨ། ཞེས་པས་དབྱེར་མེད་དུ་བསྟིམ། ༀ་བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷཎྜེ་ཧོཿ ཞེས་དགུག་བཅིངས་བསྡམས་ནས་མྱོས་པར་བྱའོ། །དྲུག་པ་ནི། བདག་བཛྲ་ཧེ་རུ་ཀར་གསལ་བའི་སོར་མོ་བཅུ་རིགས་ལྔ་ཡབ་ཡུམ་དུ་གྱུར་པའི་སྦྱོར་མཚམས་ནས་ཕུར་བུ་ཧཱུཾ་ལས་བཛྲ་ཀཱི་ལ་ཡར་བསྐྱེད་པ། སངས་རྒྱས་ཐམས་ཅད་ཀྱི་སྐུ་གསུང་ཐུགས་སུ་བྱིན་གྱིས་བརླབ་པ་གདབ་ཅིང་། ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པ་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ནས་ཚོགས་ལ་འབུལ། །ཞེས་དང་། སྡེར་མོའི་སྔགས་མཐར། བོ་དྷི་ཙིཏྟ་སིདྡྷི་ཀུ་རུ་ཧཱུཾ་ཧཱུཾ། ༀ་བཛྲ་ཀྲོ་དྷ་ཕཊ་ཛཿ བཛྲ་སཏྭ་ཧཱུཾ། ཛྙཱ་ན་ས་ཏྭ་ༀ། ཨ་ཡཾ། སྥ་ར་ཎ་ཕཊ། ཅེས་གནས་གསུམ་དུ་བཏབ་པས། བསྒྲལ་བྱའི་ཚེ་དཔལ་གཟི་བྱིན་ཐམས་ཅད་ཧཱུཾ་ཞེས་བདག་ལ་བསྟིམ། གནས་ངན་གྱི་ས་བོན་བག་ཆགས་དང་བཅས་པ་སྦྱངས། མི་ཤིགས་པའི་ཐིག་ལེ་ཧཱུཾ་ཡིག་ཏུ་གྱུར་པ་བདག་གི་ཤངས་བུག་ནས་དྲངས། ཡུམ་གྱི་མཁའ་ལ་སྤྲོས་པ། ཟླ་བ་ལ་གནས་པའི་རྡོ་རྗེ་སེམས་དཔའི་སྐུར་གྱུར། དེ་རླུང་གིས་བཏེགས་ནས་འོག་མིན་དུ་འཕངས་ལ། སྙིགས་མ་མཚོན་ཆས་དུམ་བུར་གཏུབ་ཅིང་། ཧཱུཾ། ཞེ་སྡང་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཐལ་བ་བཞིན་དུ་བརླག་བྱས་ནས། །དྲག་པོའི་ཕྲིན་ལས་གྲུབ་པར་མཛོད། །ༀ་ཧྲཱིཿཥྚི་བི་ཀྲི་ཏཱ་ན་ན་སརྦ་ཤ་ཏྲཱུཾ། ནཱ་ཤ་ཡ། ནཱ་ཤ་ཡ། སྟྭམྦྷ་ཡ། སྟྭམྦྷ་ཡ། ཧཱུཾ་ཕཊ། ཛྭ་ལ་ཙཀྲ། ༀ་བྷྲཱུྃ། ཧཱུཾ་བྷྲཱུྃ། ཏྲཱཾ་བྷྲཱུྃ། ཧྲཱི་བྷྲཱུཾ། ཧཱ་བྷྲུཾ། ཞེས་ཕོའི་རྐང་པ་གཡས་དང་། མོའི་གཡོན་ནས་ཐོག་མར་གཏུབས་ནས་རིམ་གྱིས་བསྒྲལ་ཞིང་མཚོན་ཆ་ལྔའི་ཆར་ཕབ་པར་བསམ་མོ། །བདུན་པ་ནི། ཧཱུཾ། བཻ་ཌཱུར་སྔོན་པོའི་རིན་ཆེན་རི་རབ་ལ། །ཉི་མ་སྟོང་གི་འོད་ཟེར་གདལ་བ་ལྟར། །སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅན། །དཔལ་ལྡན་གཟི་བྱིན་འབར་ལ་ཕྱག་འཚལ་ལོ། །འོད་ཕུང་སྟུག་པོ་སྤྲིན་ལྟར་འཁྲིགས་པ་ཡིས། །འཇིགས་བྱེད་རྔམ་སྟབས་བརྐྱང་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་ལྟར་འབར་བ་སྟེ། །གདུག་པ་ཐམས་ཅད་རྡོ་རྗེའི་ཞལ་དུ་འདྲེན། །མི་བཟད་མཆེ་བ་གཙིགས་པའི་ཞལ་གདངས་ཤིང་། །ཁམས་གསུམ་ཟ་བར་ཆས་པའི་རྐན་སྒྲ་ཅན། །ཉི་ཟླ་རབ་ཏུ་འབར་བའི་སྡང་མིག་གིས། །བདུད་དཔུང་སྲེག་པར་མཛད་ལ་ཕྱག་འཚལ་ལོ། །འབྱུང་པོའི་ཤ་ནི་ཟན་ལས་ཞིམ། །གཏི་མུག་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །སྐུ་ཡི་དངོས་གྲུབ་སྩལ་དུ་གསོལ། །འབྱུང་པོའི་ཁྲག་ནི་ཆང་ལས་ཞིམ། །འདོད་ཆགས་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །གསུང་གི་དངོས་གྲུབ་སྩལ་དུ་གསོལ། །འབྱུང་པོའི་རུས་པ་མར་ལས་ཞིམ། །ཞེ་སྡང་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །ཐུགས་ཀྱི་དངོས་གྲུབ་སྩལ་དུ་གསོལ། །ཞེས་དང་། རྩ་སྔགས་ཀྱི་མཐར་ཁཱ་ཧི་བཏགས་པས་འབུལ་ཞིང་། ཤིན་ཏུ་བསྡུས་པར་ན། ཚོགས་རྫས་དགྲ་བགེགས་སུ་དམིགས་ནས། བཻ་ཌཱུར་སྔོན་པོའི་བསྟོད་ཚིག་གིས་ཕུལ་ཀྱང་རུང་བར་བཤད་དོ། །བཞི་པ་ཚོགས་ལ་རོལ་བ་ནི། ལས་ཀྱི་རྡོ་རྗེས་འཁོར་ལོ་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོགས་མཚན་མའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་འབུལ་ཞིང་། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་ལེན། དེ་ནས་འདུས་པ་གཞན་རྣམས་ལ་ཡང་དྲངས་ཏེ། རྣལ་འབྱོར་པ་རྣམས་ལྷའི་རྣལ་འབྱོར་གསལ་བ་ལས། ཁྱད་པར་དཀྱིལ་འཁོར་པ་རྣམས་རང་གི་ཕུང་ཁམས་སྐྱེ་མཆེད་ཉིད་ལས་མི་གཉིས་པར་ཤེས་པས་ནང་གི་སྲེག་བླུགས་ཀྱི་ཆོ་ག་ཇི་ལྟ་བའི་དམ་ཚིག་གིས་ཚིམ་པར་རོལ་ལོ། །དེའི་མཐར། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་ཛ་གད་དཔའ་བོ་གསོལ་བས་འགྲོ་བ་མ་ལུས་པ་དབང་དུ་འདུ་བར་གྱུར་ཅིག །མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོར་གྱུར་ཅིག །རྡོ་རྗེའི་ཚེ་གསོལ་བས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པར་གྱུར་ཅིག །ཞལ་ཟས་ཀྱི་བྱེ་བྲག་མང་པོ་གསོལ་བས་ཞི་ཁྲོའི་ཕྲིན་ལས་ཀྱི་རྫུ་འཕྲུལ་སྣ་ཚོགས་ལ་དབང་འབྱོར་བར་གྱུར་ཅིག །ཅེས་སྨོན་ལམ་གདབ་བོ། །ལྔ་པ་ལྷག་མའི་ཆོ་ག་ལ། བཤམ་ཞིང་བྱིན་གྱིས་བརླབ་པ། མགྲོན་འགུགས་ཤིང་དབང་དུ་བྱ་བ། མཆོད་པའི་ལས་རིམ་བསྟན་པ། གཤེགས་ཤིང་བསྡུ་བའོ། །དང་པོ་ནི། ལྷག་མ་རྣམས་གསོག་འཇོག་མེད་པར་བསྡུས། སྔར་ཟུར་དུ་བཅད་པའི་ཕུད་དང་། ལྷག་མ། མཆོད་པའི་རས་མ། མར་མེ་དང་བཅས་པ་རྣམས། དཀྱིལ་འཁོར་དང་ཧ་ཅང་མི་རིང་བའི་ཤར་ལྷོར་ཞིང་ལྤགས་ལ་རཀྷས་ཆོས་འབྱུང་ཟླ་གམ་དང་བཅས་པ་བྲིས་པའི་ཁར་བཞག །རྩ་བའི་དཀྱིལ་འཁོར་གསལ་བ་ལས། ཁྱད་པར་ལྷག་མའི་གནས་སུ། ཨེ་བྷྲཱུཾ་ཞེས་པས་ལྷག་མའི་དཀྱིལ་འཁོར་ཕྱི་ཁྱམས་གྲུ་གསུམ་མཐིང་ནག་འབྱམས་ཀླས་པའི་དབུས་སུ་ཁྲག་འཐུང་རོལ་པའི་དཀྱིལ་འཁོར་གདན་དང་བཅས་པ་བསྐྱེད། དེར་ཧཱུཾ་ཧ་ཧེ་ཕཊ། ངོ་མཚར་ཚོགས་ཀྱི་ལྷ་སུམ་ཅུ་སྐད་ཅིག་གིས་གསལ་བར་གྱུར། གཏོར་མ་ཟླ་བ་གནས་པའི་ༀ་ཡིག་འབར་བ། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སྤྲོ་བསྡུས་དམ་ཚིག་གསང་བའི་འདོད་ཡོན་བདུད་རྩིའི་ཕུང་པོ་ཟད་མི་ཤེས་པར་བསམ་ལ། ༀ་ཨཱཿཧཱུཾ་གིས་བྱིན་གྱིས་བརླབ་བོ། །གཉིས་པ་ནི། ཧཱུཾ། ལས་ཀྱི་རྡོ་རྗེ་བྱེད་པར་དབང་བསྐུར་བའི། །མཁའ་འགྲོ་ལྷག་སྡུད་མ་སྲིང་གིང་གི་ཚོགས། །ལྷག་མ་ཁ་ཆུའི་དམ་ལ་གཏོགས་པ་རྣམས། །དམ་ཚིག་བཞིན་དུ་མཆོད་ཀྱིས་གཤེགས་སུ་གསོལ། །ཞེས་དང་། འདོད་རྒྱལ་གྱི་ཕྱག་རྒྱ་བཅིངས་ཏེ། ཨེ་ཨཱ་ར་ལི་ཧྲིཾ་ཧྲིཾ། ༀ་ཊཱ་ཀི་ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བནྡྷ་ཡ། བནྡྷ་ཡ། ཏོ་ཥ་ཡ། ཏོ་ཥ་ཡ། མོ་ཧ་ཡ། མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲི་ད་ཡཾ་ཧཱུཾ་ཛཿ ཛཿཧཱུཾ་བཾ་ཧོཿ ཊཱ་ཀི་ཧཱུཾ་ཛཿ ཞེས་སྤྱུགས་པའི་བརྡ་དང་བཅས་ཏེ་སྤྱན་དྲངས་པས། ལྷག་མའི་མགྲོན་རྣམས་བྱ་ཁྱུང་ཐང་ལ་ལྷགས་པ་བཞིན་སྐད་ཅིག་གིས་བྱོན་པར་བསམ་ཞིང་། ཧེ་རུ་ཀའི་དམ་རྒྱ་བཅིངས་ཏེ། ༀ་ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚཾ་ས་མ་ཡ་མུ་དྲ། པྲ་བྷཉྫ་ཀ་ཧཱུཾ་ཕཊ། ཅེས་པས་ཟིལ་གྱིས་མནན། པདྨའི་ཕྱག་རྒྱ་བཅིངས་ཏེ། ༀ་པདྨ་བ་ཌ་བ་མུ་ཁ། ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བནྡྷ་ཡ། བནྡྷ་ཡ། ཏོ་ཥ་ཡ། ཏོ་ཥ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲྀ་ད་ཡ། ཞེས་པས་ཕྱི་ཁྱམས་གྲུ་གསུམ་པའི་གདན་ལ་བཞུགས་པར་གྱུར། རྟ་གདོང་གི་ཕྱག་རྒྱ་བཅས་ལ། ཧ་ཧ། ཧི་ཧི། ༀ་ཨཱཿཧཱུཾ། ཞེས་དབང་དུ་བསྡུས་པའི་ཅི་བསྒོ་བའི་བཀའ་ནོད་པར་བསམ་མོ། །གསུམ་པ་མཆོད་པ་དངོས་ལ། སྤྱིར་མཆོད་པ་དང་། བྱེ་བྲག་ཏུ་མཆོད་པ་གཉིས་ལས། དང་པོ་ནི། མགྲོན་རྣམས་རིགས་སོ་སོའི་ཚོམ་བུ་ལྔར་བཞུགས་པས་གཏོར་མའི་བདུད་རྩི་བཞེས་པར་བསམ་ཞིང་། ཧེ་རུ་ཀའི་ཐོད་རྒྱ་བཅས་ལ། ༀ་བཛྲ་ཌཱ་ཀི་ནཱི་པྲ་ཏཱིཙྪ་མཾ་བ་ལིཾ་ཏ་ཧཱུཾ་ཕཊ། དེ་བཞིན་དུ། ༀ་བུདྡྷ་ཌཱ་ཀི་ནཱི་སོགས་ནས། ༀ་ཕཊ། ༀ་རཏྣ་ཌཱ་ཀི་ནཱི་ནས་ཏྲཱཾ་ཕཊ། ༀ་པདྨ་ཌཱ་ཀི་ནཱི་ནས་ཧྲཱིཿཕཊ། ༀ་ཀརྨ་ཌཱ་ཀི་ནཱི་ནས་ཨཱཿཕཊ། ཅེས་རིགས་ལྔ་ཕྱེ་ནས་མཆོད་ཅིང་སྨན་རཀ་སྦྲེང་ངོ་། །དེ་ནས་རང་གི་ལྕེ་ལ་རྟ་མགྲིན་ཡུམ་བཞི་དང་རོལ་པ་མཛད་པའི་བྱང་སེམས་ཛ་གད་ཀྱི་ཁ་ཕྲུ་དང་རོ་གཅིག་པས་མཁའ་དབྱིངས་ཀྱི་ཕྱག་རྒྱ་ལས་ལྷག་མ་དམེ་གཏོར་དུ་དབབ་ཅིང་། ༀ་གུ་རུ་ཀྲོ་དྷ་རཏྣ་ས་མ་ཡ་པྲཱི་ཤ་པུརྦ་བུདྡྷ་ཀྵི་ཊ་ཀྵོ་བྷ་ཀ་ར་ཧཱུཾ་ཕཊ། ཅེས་པས་བྱིན་གྱིས་བརླབས་ལ། ཧཱུཾ། དང་པོ་ཕུད་ཀྱིས་མི་མཆོད་དུ། །བཅོམ་ལྡན་དཔལ་ཆེན་ཕུད་ཀྱི་བདག །བར་དུ་ཚོགས་ཀྱིས་མི་མཆོད་དུ། །མ་མོ་མཁའ་འགྲོ་ཚོགས་ཀྱི་བདག །ཐ་མ་ལྷག་མས་མི་མཆོད་དུ། །མ་ཚོགས་དབང་ཕྱུག་ལྷག་མའི་གནས། །ལྷག་མ་ཁ་ཆུས་མི་གདབ་ཏུ། །བྲན་ཕོ་བྲན་མོ་ཁ་ཆུའི་བདག །རྣམ་གསུམ་རིམ་གྱིས་མི་མཆོད་དུ། །བཀའ་དང་གཞུང་ལུགས་རིམ་པར་ཡོད། །རྣམ་གསུམ་གཅིག་ཏུ་མི་བསྲེ་རུ། །ཆོས་ཀྱི་དབྱིངས་སུ་ཐ་མི་དད། །ལས་རྣམས་སོ་སོར་མི་འཆོལ་དུ། །ལས་ཀྱི་འདུ་སྐལ་རིམ་པར་ཡོད། །ཤ་ཁྲག་གཏོར་མ་འདི་ལོངས་ལ། །བཅོལ་བའི་ཕྲིན་ལས་སྒྲུབ་པར་མཛོད། །ཅེས་པས་དམེ་གཏོར་དང་གཙང་གཏོར་བསྲེས། ཚོགས་ཕུད་བར་པ་ལ་བླུགས་ཏེ་མཚམས་སྦྱར་རོ། །གཉིས་པ་བྱེ་བྲག་ཏུ་མཆོད་པ་ནི། ཧཱུཾ། ནམ་མཁའ་སྟོང་ལ་དབང་བསྒྱུར་བའི། །མཁའ་འགྲོ་སུམ་ཅུ་རྩ་གཉིས་ཀྱང་། །ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །སྟོང་ཁམས་ཡོངས་ལ་མངའ་མཛད་པའི། །དབང་ཕྱུག་ཉི་ཤུ་རྩ་བརྒྱད་ཀྱང་། །ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །སྲོག་དབུགས་ཀུན་ལ་མངའ་མཛད་པའི། །སྐྱེས་བུ་གིང་ཆེན་བཅོ་བརྒྱད་ཀྱང་། །ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱེད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །རྡོ་རྗེ་ཕྲ་མེན་རྫུ་འཕྲུལ་ཅན། །སྐྱེས་བུ་ལངྐ་དྲུག་ཅུ་ཡང་། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །ཏ་ཀྲིཏ་ལྕམ་མོར་ཞལ་བཞེས་པའི། །འབར་མ་ཉུལ་ཆེན་བརྒྱད་རྣམས་ཀྱང་། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །ཤ་ཁྲག་ཞལ་དུ་གསོལ་མཛད་པའི། །དུར་ཁྲོད་དྲེགས་པའི་མ་མོ་བདུན། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །རྒྱལ་ཆེན་སྲིང་མོ་ཞལ་བཞེས་པའི། །སྲིང་མོ་ཆེན་མོ་བཞི་རྣམས་ཀྱང་། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །ཕྱོགས་བཅུར་ཁྱབ་པར་ལས་བྱེད་པའི། །ཕོ་ཉ་སུམ་བརྒྱ་དྲུག་ཅུ་ཡང་། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །རི་རབ་རྨང་ནས་འདེགས་མཛད་པའི། །དབང་གི་གྲུ་འདེགས་བཞི་རྣམས་ཀྱང་། ། ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །ཕ་རོལ་དམག་དཔུང་འཇོམས་མཛད་པའི། །དམག་གི་རྒྱལ་མོ་མཆེད་བཞི་ཡང་། །ད་དུང་འཇིག་རྟེན་མ་འདས་པས། །འཇིག་རྟེན་ལས་ཀུན་ཁྱོད་ལ་བཅོལ། །རྣམ་ལྔའི་མཆོད་པ་འདི་བཞེས་ལ། །བཅོལ་བའི་ལས་རྣམས་སྒྲུབ་པར་མཛོད། །ཅེས་དང་། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིཾ་ཁཱ་ཧི། མ་ཧཱ་རཀྟ་ཁཱ་ཧི། ཞེས་འབུལ་ཞིང་སྨན་རཀ་ཀྱང་སྦྲེང་། བཞི་པ་ནི། ༀ་བཛྲ་ཨེ་ས་ཧུ། ཞེས་སོགས་ཀྱིས་མཆོད་བཤགས་བྱས་ལ། ཧོཿ ལྷག་སྡུད་ཀྱི་དམ་ཚིག་ལ་གཏོགས་པའི་མཁའ་འགྲོ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ལྷག་མའི་དམ་ཚིག་འདིས་ཚིམ་ཞིང་དགྱེས་པར་གྱུར་ཏེ། དམ་ཚིག་ཉམས་ཆག་ཐམས་ཅད་སྐོངས་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། ཁྱད་པར་དུ་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་གྲོགས་མཛོད་ཅིག །ཅེས་འདོད་དོན་གསོལ། ཡ་ཧི་གཙྪ་ཞེས་པས་ཕྱི་འཁོར་གྱི་མགྲོན་རྣམས་རང་གནས་སུ་གཤེགས་པར་བསམ་ལ། གཏོར་མ་ཕྱིར་དོར་ནས། ཧཱུཾ་ཞེས་པས་ལྷག་མའི་དཀྱིལ་འཁོར་གྱི་ལྷ་སུམ་ཅུ་རང་གི་སྙིང་གར་བསྡུས་ལ་མཎྜལ་ཡང་བསྡུའོ། །དེ་ཙམ་མི་ནུས་པས་ལྷག་གཏོར་ཤིན་ཏུ་བསྡུས་པ་ལ་དགའ་ན། མགྲོན་བཀུག་ནས་ལྷག་མ་ཁ་ཆུས་བྲན་ཏེ་ཕུད་ལྷག་བསྲེས་ལ། རིགས་ལྔའི་གཏོར་སྔགས་ཀྱིས་མཆོད་པའི་རྗེས་སུ། རྒྱུད་ཀྱི་ལེའུ་ཉི་ཤུ་པར་འབྱུང་བའི་དམ་བསྒྲག་ཅིང་ལས་བཅོལ་བ་ཙམ་བཏགས་ཀྱང་རུང་བར་མངོན་ནོ། །གཉིས་པ་བརྟན་མ་བསྐྱང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ། སྥ་ར་ཎ་ཕཊ། སཾ་ར་ཎ་ཧཱུཾ། ཏྲཾ་རཏྣ་ཏྲཻ་ལོཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབ། ཧཱུཾ། ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་སྤྱོན་དམ་སྐོངས་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་སྤྱོན་དམ་སྐོངས་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་གྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུཾ་བྷྱོ་ཧཱུཾ་ཧཱུཾ། ཞེས་དང་། མ་ཧཱ་པཉྩ་སོགས་ཀྱིས་སྨན་གཏོར་རཀྟས་ཀྱང་མཆོད་ཅིང་སྨན་རཀ་སྦྲེང་། ཕྲིན་ལས་གསོལ་ནས། ཡ་ཧི་གཙྪས་གཤེགས་གསོལ་བྱས་ལ། གཏོར་མ་གཙང་སར་སྐྱེལ་ལོ། །གསུམ་པ་ཉེར་བསྡུ་བྱ་བ་ནི། ཐུན་མཚམས་ལ་འཇུག་པའམ་ཉལ་བ་ན། བྷྲཱུཾ་བི་ཤྭ་བི་ཤུདྡྷེ། ཧཱུཾ་ཧ་ཧེ་ཕཊ་བྷྱོ། ཞེས་པས་དཀྱིལ་འཁོར་གསལ་བཏབ་ལ། སྐབས་འདིར་མཆོད་བསྟོད་དང་བཟོད་གསོལ་ནི་བྱས་ཀྱང་རུང་མ་བྱས་ཀྱང་མི་འགལ་ལོ། །དེ་ནས་རྟག་མཐའ་བསལ་ཕྱིར། ཧཱུཾ། ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ། འཁོར་རྣམས་ཕྱི་ནས་རིམ་བཞིན་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་འཛིན་སེམས་དཔའ་ལ། དེ་ཧཱུཾ་ལ་ཐིམ། ཧཱུཾ་གྱེན་རྫོགས་ནཱ་དའི་བར་དུ་བསྡུས་ནས་མཉམ་པ་ཉིད་ཀྱི་དབྱིངས་སུ་བསྟིམ་མོ། །ཆད་པའི་མཐའ་བསལ་ཕྱིར། ཉལ་བ་ལས་ལངས་པའམ་སྤྱོད་ལམ་ལ་འཇུག་པ་ན། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཞེས་བརྗོད་པས། དཔལ་ཆེན་པོ་ཧེ་རུ་ཀ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། །བཞི་པ་གོ་ཆ་བགོ་ཞིང་ལུས་བསྲུང་བ་ནི། རང་གི་སྤྱི་བོར་ༀ། མགྲིན་པར་ཨཱཾ། སྙིང་གར་ཧཱུཾ་ཡིག་རྣམས་ཀྱིས་མཚན་པར་བསམ་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་པས། ལུས་ཐམས་ཅད་རྡོ་རྗེའི་གོ་ཆས་བཅིངས་ཏེ་ཅིས་ཀྱང་མི་ཤིགས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས་མཛུབ་མོ་གཡས་གཡོན་གཉིས་ༀ་དང་ཏྲུཾ་ལས་རྡོ་རྗེ་གནོད་སྦྱིན་དང་མི་འཆི་ཐབས་སྦྱོར་བསྐྱེད་ལ། ལྟེ་བ་སྙིང་ག་ལྟག་པ་དང་། །དཔྲལ་བ་སྤྱི་བོ་གནས་ལྔ་རུ། །ༀ་ཏྲུཾ། ཞེས་བརྗོད་བཞིན་པར་མཛུབ་མོ་གཉིས་བསྣོལ་ཏེ་རིམ་པར་རེག་པས། ཁྲོ་བོ་གཉིས་དང་རྡོ་རྗེའི་ལུ་གུ་རྒྱུད་ཀྱིས་བསྲུང་ཞིང་བརྟན་པར་བྱའོ། །དེ་ནས་ཐོད་པའི་ཕྱག་རྒྱ་མགོ་བོའི་གནས་ལྔར་བཞག་ལ། ༀ་བཛྲ་ཀ་པཱ་ལ་ཨ་བྷི་ཥིཉྩ་ཏྲཾ་ཏྲཾ། ཞེས་ཐོད་པའི་ཁང་བུ་རིགས་ལྔའི་ཅོད་པན་ཅན་གྱིས་དབང་བསྐུར་བར་མོས། དར་དཔྱངས་ཀྱི་ཕྱག་རྒྱ་བཅས་ལ། ༀ་ཨཱརྱ་ལམྦྷོ་དྷར་ཨ་བྷི་ཥིཉྩ་ཧྲཱིཿཧྲཱིཿ ཞེས་པས་ཅོད་པན་མཐིང་ག་གཡས་སུ་འཕྱང་ཞིང་། དམར་མོ་གཡོན་དུ་འཕུར་བར་བསམ་མོ། །ༀ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་། ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིིས་མཐའ་རྒྱས་པར་བྱའོ། །ལྔ་པ་སྤྱོད་ལམ་རྒྱུན་གྱི་རྣལ་འབྱོར་ནི། དེ་ལྟར་དཀྱིལ་འཁོར་བསྡུས་ནས་ཀྱང་། །རྣལ་འབྱོར་བདག་ཉིད་ཆེན་པོ་ཡིས། །སྤྱོད་ལམ་ཀུན་ཏུ་མི་ཉམས་པར། །ལྷ་ཉིད་དུ་ནི་རྟག་ཏུ་བསྒོམ། །ཞེས་གསུངས་པས་སྣོད་ཐམས་ཅད་གཞལ་ཡས་ཁང་དང་། བཅུད་ཐམས་ཅད་ཧེ་རུ་ཀའི་རང་བཞིན་དུ་ཤེས་པས་སྤྱོད་ལམ་བསྐྱང་ངོ་། །སྒོམ་པས་དུབ་ན། དབུ་མའི་ནང་དུ་མི་རྟོག་པའི་ཐིག་ལེ་མེ་སྟག་ཕུས་བཏབ་པ་ལྟ་བུ་ཡུངས་འབྲུ་ཙམ་ཞིག་ལ་ཤེས་པ་གཏོད་པའམ། སྔར་བཤད་པའི་ཉེར་བསྡུའི་མཐའི་ཧཱུཾ་གི་ནཱ་ད་ཤིན་ཏུ་ཕྲ་བ་ལ་ཤེས་པ་གཏོད་པ་སྟེ། དུབ་ན་ཡེ་ཤེས་ཐིག་ལེ་བལྟ། །ཞེས་གསུངས་པ་བཞིན་ནོ། །ཟས་ཀྱི་རྣལ་འབྱོར་ནི། ནང་གི་སྦྱིན་སྲེག་བླང་བར་བྱ། །ཞེས་པས་བཟའ་བཏུང་ལ་ཐ་མལ་གྱི་གཙང་ཞེན་སྤངས་ནས་སྦྱང་རྟོགས་སྦར་བས་བདུད་རྩིར་བྱས་པ་ལག་པའི་དགང་བླུགས་ཀྱིས་ཁའི་ཐབ་ཁུང་དུ་ཕུལ་བ་གཏུམ་མོའི་མེས་བཞུ་བའི་དྭངས་མས་སྙིང་གའི་ཡེ་ཤེས་སེམས་དཔའ་མཆོད་པར་བསམ་ལ་རོལ་པ་ནི་ནང་གི་སྦྱིན་སྲེག་གོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་བསྒྲུབ་པ་དང་། དེས་གྲུབ་པའི་ཚད་བསྟན་པའོ། །དང་པོ་ནི། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་པས་མཉམ་རྗེས་ཀུན་ཏུ་ལྟ་བ་འཁོར་འདས་མཉམ་ཉིད་དུ་ཤེས་པ་དང་། སྤྱོད་པ་རྩལ་སྣང་དག་པ་རབ་འབྱམས་སུ་རྒྱས་འདེབས་ཀྱི་རྣལ་འབྱོར་དང་མི་འབྲལ་བ་ལ་བསླབ་པའོ། །གཉིས་པ་ནི། དེ་ལྟར་ངེས་རྫོགས་སུ་བསླབས་པས་ཕྱག་རྒྱ་གཅིག་པ་དང་སྤྲོས་བཅས་ལ་ཉམས་ལྔ་མཐར་ཕྱིན་ནས་ཐུན་མོང་གི་དངོས་གྲུབ་དང་། དེ་ནས། ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡིས། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཁྲོ་བོ་ཁྲོ་མོའི་ཚོགས་ཆེན་པོ། །ཕོ་ཉ་ཕྱག་བརྙན་བཀའ་ཉན་སོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །ཅེས་གསུངས་པ་ལྟར་ཚོགས་སྒྲུབ་ཀྱི་ཉེ་རྒྱུ་ལ་བརྟེན་ནས་བསྒྲུབས་པས་དབང་པོ་རྣོ་ན་ཚེ་དབང་རིག་འཛིན་དང་། རྟུལ་ནའང་རྣམ་སྨིན་རིག་འཛིན་ཟླ་བ་དྲུག་ལས་མི་འགྱངས་པར་འཐོབ་ལ། དེ་ནས་ལྷག་བཅས་ལྷག་མེད་གང་རུང་གིས་ཕྱག་ཆེན་དང་ལྷུན་གྲུབ་རིག་འཛིན་གྱི་ས་བགྲོད་ནས་དཔལ་ཧེ་རུ་ཀའི་གོ་འཕང་ལ་གནས་པར་འགྱུར་རོ། །དེ་ལ་ཐུན་མོང་གི་དངོས་གྲུབ་གང་ཞེ་ན། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་གྱུར་བ་འགྲུབ། །ཅེས་པས་ཡོན་ཏན་འབྱུང་བའི་དངོས་གྲུབ་དྲུག་དང་། ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོང་ཞིང་ལྟུང་བར་འགྱུར། །ཞེས་པས་འབྱུང་བའི་དངོས་གྲུབ་ལྔ་དང་། དགུག་དང་བཏང་དང་བཅིང་དང་དགྲོལ། །གསོ་དང་བསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །ཞེས་པས་ལས་ཕྲན་ཚེགས་ཀྱི་དངོས་གྲུབ་བརྒྱད་དེ། བཤད་རྒྱུད་ལས་ནི་གཞན་ཡང་མང་དུ་གསུངས་སོ། །མཆོག་གི་དངོས་གྲུབ་གང་ཞེ་ན། །དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །ཞེས་གསུངས་པ་བཞིན་ནོ། །དཔལ་ལྡན་སངས་རྒྱས་ཀུན་གྱི་གསང་བ་ཆེ། །འགྱུར་མེད་བདེ་ཆེན་སྙིང་པོ་ཡིད་བཞིན་ནོར། །རྒྱུད་དོན་དཔག་དཀའི་རྒྱ་མཚོ་ཆེར་སྦས་པ། །དུས་མཐའི་སྔགས་པས་ཕྱོགས་མཐོང་ཙམ་ཡང་དཀོན། །ལ་ལ་རྙེད་བཀུར་འཆིང་བུ་དོན་གཉེར་བློས། །ཟབ་མོའི་གཏིང་མཐའ་མ་དཔྱད་གྱ་ཚོམས་སུ། །ཞུགས་པས་ཚིག་འཁྲུལ་མུ་ཅོར་སྒྲོག་བཞིན་པས། །དོན་ནོར་རླབས་ཕྲེང་མཇིང་དུ་ལྷུངས་པ་མཐོང་། །དེ་ཕྱིར་ཟབ་རྒྱས་རྒྱ་མཚོར་བདེར་འཇུག་པའི། །སྤོབས་པ་བྲལ་ཡང་དམ་པའི་དེད་དཔོན་དང་། །དྲི་མེད་གཞུང་ལུགས་མཐོང་བརྒྱུད་གྲུ་སྐྱ་ལ། །བརྟེན་ནས་སྙིང་སྟོབས་གཟིངས་ཀྱི་འཕྲུལ་འཁོར་བཤམས། །སྲིད་གསུམ་ཉོན་མོངས་གདུང་སེལ་ཡིད་བཞིན་ནོར། །བདེ་ཆེན་ཆར་དུ་འབེབས་པ་འདོད་འཇོའི་སྤྲིན། །ཕྲིན་ལས་རྒྱལ་མཚན་རྩེ་མོར་མཆོད་རློམ་གྱི། །འདོད་པའི་རེ་སྐོང་མཛོད་ཅིག་ཧེ་རུ་ཀཿ གང་གི་སྒྲུབ་ཐབས་རིམ་པ་དང་པོའི་ཁྲིགས། །བློ་དམན་རྣམས་ཀྱིས་བདེ་བླག་རྟོགས་བྱའི་ཕྱིར། །གསལ་བར་བཀོད་མོད་ནོངས་གང་བླ་མ་ལྷ། །ཆོས་སྤྱན་མངའ་བ་བཅས་ལ་བཟོད་པར་གསོལ། །ཕྱོགས་ལྷུང་དྲི་མར་ཞེན་པ་འཁྱོག་པོའི་བློ། །ལེགས་བཤད་བསྐལ་བརྒྱར་བསྙད་ཀྱང་མི་མགུ་བས། །དེ་དག་འབད་པས་དམོད་ཀྱང་སྐྱོན་ཡོད་མིན། །རྣམ་དཔྱོད་དྲང་པོའི་བློ་ཅན་རྣམས་ལ་གསལ། །འདི་ལས་བསོད་ནམས་ཕུང་པོ་གང་ཐོབ་པའི། །དགེ་ལེགས་བསྟན་འགྲོའི་ཕན་བདེ་རབ་འབྱམས་ཀྱི། །ཉེར་འཚོར་གྱུར་ནས་བདག་ཀྱང་སྲིད་མཐའི་བར། །རྒྱལ་བ་ཀུན་གྱི་གསང་བའི་མཛོད་འཛིན་ཤོག །སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་བདེ་ཆེན་ཆར་འབེབས་ཞེས་བྱ་བ་འདི་ནི་རང་གཞན་མང་པོ་ལ་ཕན་པའི་བསམ་པས། འདི་ཉིད་ཀྱི་རྒྱུད་དང་རྒྱ་གཞུང་རྣམས་དང་། དེ་དག་གི་བཤད་སྲོལ་འཁྲུལ་མེད་བརྒྱུད་པའི་ཕྱག་བཞེས་སུ་ཇི་ལྟར་མཛད་པའི་གཞུང་བཟུང་སྟེ། གསང་བདག་ཆེན་པོ་ཕྲིན་ལས་ལྷུན་གྲུབ་ཀྱི་གསུང་གི་འོད་ཟེར་གྱི་བློའི་པདྨོ་རྣམ་པར་བཞད་པ་ཤཱཀྱའི་དགེ་བསྙེན་རིག་པ་འཛིན་པ་འགྱུར་མེད་རྡོ་རྗེས་ཨིངྒེ་རའི་ལོ་སྣྲོན་གྱི་ཟླ་བ་ཚེས་པ་ལ་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོའི་གཙུག་ལག་ཁང་དུ་སྦྱར་བའི་ཡི་གེ་པ་ནི་རྒྱུད་སྡེ་འདི་ཉིད་ཀྱི་ཚིག་དོན་སྨྲ་བ་ལ་ཐོགས་པ་མེད་པའི་བློ་གྲོས་ཀྱི་མཐུ་གྲུབ་པ་མཁན་ཆེན་ལོ་ཙཱ་བ་དྷརྨ་ཤྲཱིས་བགྱིས་པའོ། །འདིས་ཀྱང་རྒྱལ་བའི་བསྟན་པ་རིན་པོ་ཆེ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་གཞིར་གྱུར་ཅིག །སརྦ་མངྒ་ལཾ།། །།

དཔལ་གསང་བའི་སྙིང་པོ་སྒྱུ་འཕྲུལ་ཁྲོ་བོའི་སྒྲུབ་ཐབས་ཁྲག་འཐུང་མངོན་རྫོགས། འཇིགས་མེད་གླིང་པ།

དཔལ་གསང་བའི་སྙིང་པོ་སྒྱུ་འཕྲུལ་ཁྲོ་བོའི་སྒྲུབ་ཐབས་ཁྲག་འཐུང་མངོན་རྫོགས་བཞུགས། དཔལ་གསང་བའི་སྙིང་པོ་སྒྱུ་འཕྲུལ་ཁྲོ་བོའི་སྒྲུབ་ཐབས་ཁྲག་འཐུང་མངོན་རྫོགས་ཞེས་བྱ་བ་སྤྱི་དཔལ་ཆེན་པོ་ལ་ཕྱག་འཚལ་ལོ། །ཤིན་ཏུ་ཞི་བ་དམ་པ་ཆོས་ཀྱི་དབྱིངས། །གདུག་ཅན་གཤེད་དུ་གར་དགུས་དཔའ་བའི་ཉམས། །རྡོ་རྗེ་མངོན་སྤྱོད་རོལ་པའི་ཕྲིན་ལས་ཅན། །ཁྲག་འཐུང་འདུས་པའི་བདག་ཉིད་ལ་ཕྱག་འཚལ། །འདི་ལ་གསུམ་སྔོན་འགྲོ། དངོས་གཞི། རྗེས་སོ། །དང་པོ་ལང་གཉིས། སྦྱོར་བ་སྔོན་འགྲོ། དབང་སྒྲུབ་ཆེན་མོ་དང་འབྲེལ་ན་སའི་ཆོ་ག་ནས་བཟུང་རྡུལ་ཚོན་གྱི་དཀྱིལ་འཁོར་འདུ་བྱ་བའི་ལས་རིམ་དཀྱིལ་ཆོག་ལྟར་ཤེས་པར་བྱས་ནས། གཉིས་པ་ཆོ་གའི་སྔོན་འགྲོ་ལ་རྣམ་གྲངས་བརྒྱད་ལས། དང་པོ་སྐྱབས་སུ་འགྲོ་བ་ནི། ཧཱུྃ། བདེ་གཤེགས་ཡོངས་རྫོགས་དཀོན་མཆོག་གསུམ་གྱི་ངང་། །དཔལ་ཆེན་འདུས་པའི་ངོ་བོར་ཡོངས་ཤར་བ། །སྤྲོ་བསྡུའི་བྱེད་པོ་བྱང་ཆུབ་སེམས་ཀྱི་ལྷར། །རང་ངོ་ཤེས་པའི་ངང་ནས་སྐྱབས་སུ་མཆི། །ལན་གསུམ། གཉིས་པ་སེམས་བསྐྱེད་ནི། ཧཱུྃ། ཆོས་ཀྱི་དབྱིངས་ལ་ཕྱོགས་རིས་མཉམ་བརྡལ་ཡང་། །མ་རྟོགས་འཁྲུལ་པར་འཁྱམས་པའི་བདག་འཛིན་བདུད། །འོད་གསལ་ཆོས་སྐུའི་ཀློང་དུ་བསྒྲལ་བའི་ཕྱིར། །དཔལ་ཆེན་ལྷ་ཚོགས་བསྒྲུབ་པར་སེམས་བསྐྱེད་དོ། །ལན་གསུམ། གསུམ་པ་ཚོགས་གསོག་ནི། ཧོ། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་གྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་བགྲངས་བའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །བཞི་པ་བགེགས་གཏོར་གཏོང་བ་ནི། ཧཱུྃ། ང་ནི་སྤྱི་དཔལ་ཆེན་པོ་སྟེ། །བྱང་ཆུབ་བསྒྲུབ་ལ་བར་གཅོད་པའི། །གནོད་བྱེད་ལོག་འདྲེན་འབྱུང་པོ་རྣམས། །གཏོར་མ་ལོངས་ལ་ཕྱིར་དེངས་ཤིག །གལ་ཏེ་བཀའ་ལས་འདའ་བྱེད་ན། །མགོ་བོ་ཚལ་པ་བརྒྱར་ཁོས་ཤིང་། །ལུས་ནི་རྡུལ་ཕྲན་བཞིན་དུ་བཤིག །ཧཱུྃ་བཞིའི་དྲག་སྔགས་དང་ཐུན་བརྡེག །ལྔ་པ་མཚམས་གཅོད་སྲུང་འཁོར་ནི། ཧཱུྃ། བདག་ཉིད་ཞེ་སྡང་རྡོ་རྗེ་ཡི། །སྤྱན་མིག་ཉི་ཟླས་གཟིར་ཞིང་བསྲེག །ཐུགས་ལས་ཁྲོ་བོའི་ཚྭ་ཚྭ་འཕྲོ། །སྟོང་གསུམ་སྤྲུལ་པའི་མེ་ཡིས་འགེངས། །ཕྱོགས་མཚམས་མཚོན་ཆ་འཆོལ་བས་གཏམ ས། །བདག་མེད་སྟོང་པར་མཚམས་གཅད་དོ། །ༀ་སཱུརྱ་ཙནྡྲ་བཛྲ་ཀྲོ་ཏ་ཛྭ་ལ་རཾ་རཾ་ཙཀྲ་ཝརྟི་མ་ཧཱ་ཀྲོ་ཏ་སརྦ་དུཥྚཾ་ཨེ་ཧཱུྃ་ཕཊ། དྲུག་པ་བརྡ་སྒོ་དབྱེ་ཞིང་བརྡ་ཕྱག་འཚལ་བ་དང་། ནོངས་བཤགས་དམ་བཅའ་གཟུང་བ་ནི། ཧཱུྃ། མ་རིག་ལིང་ཏོག་ཡེ་ཤེས་ཐུར་མས་དབྱེ། །སེམས་ཉིད་ལྷ་སྐུར་རྟོགས་པའི་བརྡའ་ཕྱག་འཚལ། །འགལ་འཁྲུལ་ནོངས་པ་ཆོས་སྐུའི་ཀློང་དུ་བཤགས། །དཔལ་ཆེན་སྲོག་གི་ཕྱིར་ཡང་མི་གཏོང་ངོ་། །ཨ་ལ་ལ་ཧོ། དགུ་པ་སྣོད་བཅུད་བྱིན་འབེབས་ནི། ཧཱུྃ། དཔལ་ཆེན་འདུས་པའི་ལྷ་ཚོགས་རྣམས། ། ཆོས་སྐུའི་ཀློང་ནས་ཐུགས་རྗེ་བསྐྱེད། །ལོངས་སྐུའི་རྣམ་རོལ་ཅིར་ཡང་བསྒྱུར། །སྤྲུལ་སྐུའི་དཀྱིལ་འཁོར་བརྟེན་པར་བཅས། །དབང་བསྐུར་བྱིན་ཕོབ་རྟགས་མཚན་སྟོན། །ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། སརྦ་ས་མ་ཡ་ཨ་བེ་ཤ་ཡ་ཕཻཾ་ཕཻཾ། བརྒྱད་པ་མཆོད་པ་བྱིན་གྱིས་བརླབ་པ་ནི། ཕྱི་མཆོད་ལ་དམིགས་ནས། བདག་ཉིད་ལྷར་གསལ་ཐུགས་ཀའི་ཧཱུྃ་ཡིག་ལས། །རཾ་ཡཾ་ཁཾ་འཕྲོས་ཡེ་ཤེས་མེ་རླུང་ཆུས། །མཆོད་རྫས་དངོས་འཛིན་སྐྱོན་སྦྱངས་སྟོང་པའི་ངང་། །ཨཱཿལས་སྟོང་གསུམ་བྷནྡྷར་རྫོགས་པའི་ནང་། །འཁོར་འདས་བཅུད་དྲངས་ཧཱུྃ་ལས་ཉེར་སྤྱོད་ཀྱི། །དམ་རྫས་འདོད་ཡོན་སྤྲིན་ཕུང་རྒྱ་མཚོར་གྱུར། །ནམ་མཁའ་མཛོད་ཀྱི་སྔགས་རྒྱ་དང་། ༀ་བཛྲ་རཱ་ག་དྷཱུ་པེ་དྷུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གྷནྡྷེ་གྷན། རྡོ་རྗེ་ཞབས་བསིལ་མ་ལ་སོགས་པ་མཆོད་པའི་ལྷ་མོས་ནམ་མཁའ་གང་བར་གྱུར། ནང་མཆོད་བསང་སྦྱངས་ནས། སྟོང་པའི་ངང་ལས་ཀཾ་ཡིག་ཡོངས་གྱུར་ལས། །མི་མགོའི་སྒྱེད་སྟེང་ཨ་ལས་བྷནྡྷའི་ནང་། །འཁོར་ལོ་རྩིབས་བཞི་ལྟེ་བར་བཅས་པའི་དབུས། །གོ་ཀུ་ད་ཧ་ན་ལས་ཤ་ལྔ་དང་། །བི་མུ་མ་ར་ཤཱུ་ལས་བདུད་རྩི་ལྔ། །རང་རང་ས་བོན་གྱིས་མཚན་ཡཾ་རཾ་ལས། །རླུང་གཡོས་མེ་སྦར་དམ་རྫས་ཞུ་བའི་སྟེང་། །ཧཱུྃ་ཨཱོཾ་སྭཱ་ཨཾ་ཧཱ་ལས་ཕྱག་མཚན་ལྔ། །སོ་སོས་ཡུ་བ་བྱས་པའི་དྲིལ་བུ་རྣམས། །ཡོངས་གྱུར་རིགས་ལྔ་ཡབ་ཡུམ་མཉམ་སྦྱོར་གྱུར། །ༀ་ཧཱུྃ་ཏྲཱཾ་ཧྲཱི་ཨཿ མཱུཾ་ལཱཾ་མཱཾ་པཱཾ་ཏཱཾ། ཟླ་བའི་ཁ་གཅོད་སྣ་ཚོགས་རྡོ་རྗེའི་ལྟེར། །རྟ་མགྲིན་དམར་པོ་པདྨ་རྒྱ་གྲམ་འཛིན། །གྲྭ་བཞིར་ཡུམ་བཞི་རྡོ་རྗེའི་ཏོག་གི་དབུས། །སྟངས་དཔྱལ་ཀུན་གྱི་བདེ་བའི་འོད་རླངས་སྤྲིན། །དབྱངས་གསལ་ལས་གྱུར་འབྲུ་གསུམ་བརྩེགས་མ་ཡི། །འོད་ཀྱིས་རྒྱལ་བ་མཆོད་ཅིང་གཞན་དོན་བྱས། །ཚུར་འདུས་དམ་ཚིག་རྫས་དང་དབྱེར་མེད་འདྲིས། །ཡེ་ཤེས་བདུད་བརྩིའི་རྒྱ་མཚོ་ཆེན་པོར་གྱུར། །མཐེབ་སྲིན་རྟ་མགྲིན་ཡབ་ཡུམ་དུ་གསལ་བས་བདུད་རྩི་དཀྲུགས་ཤིང་། ༀ་ཨཱཿ ཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཐཱཿ ཉེར་གཅིག་དང་། བསངས་འཐོར་ཡང་བྱའོ། །གཏོར་མ་ལ་དམིགས་ཏེ། སྭ་བྷཱ་ཝས་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད། །གཏོར་རྫས་མཆོག་ཆེན་མི་དང་སེངྒེ་གླང་། །བ་ལང་རྟ་ཤ་བདུད་རྩི་ལྔ་ཡི་སྟེང་། །རིགས་ལྔ་ཡབ་ཡུམ་ཕྱག་མཚན་རྣམས་ཀྱིས་མཚན། །འོག་ནས་རླུང་གཡོས་མེ་སྦར་བདུད་རྩི་ཁོལ། །ཟག་མེད་རོ་བརྒྱ་ལྡན་པའི་གཏོར་མ་ནི། །དབང་པོ་དྲུག་ལ་དགྱེས་དགུའི་སྤྲིན་དུ་གྱུར། །ༀ་ཨཱཿཧཱུྃ་མ་ཧཱ་བྷ་ལིངྟ་ཏེ་ཛྭ་བ་ལིང་ཏ་བ་ལ་བཱ་ཏེ་གུ་ཧྱ་ས་མ་ཡེ་སྭཱ་ཧཱ། རཀྟ་ལ་དམིགས་ནས། ༀ་སྭ་བྷཱ་ཝས་སྦྱངས། ཨཱཿལས་ཡུམ་མཁའ་རྣམ་ཐར་སུམ་ལྡན་དབྱིངས། །མ་ལས་ཉི་དཀྱིལ་ར་ཡིག་ཡོངས་གྱུར་ལས། །ཆགས་ཆེན་སྲིད་པའི་རཀྟ་འབར་བའི་ཀློང་། །ངར་འཛིན་རཱུ་ཏྲའི་རྣམ་ཤེས་ཚོགས་བརྒྱད་རྣམས། །ཐབས་མཆོག་རྡོ་རྗེ་ནོར་བུས་སྦྱངས་པ་ཡིས། །འཁོར་བ་ལུགས་ལྡོག་སྐྱེ་མེད་ཆོས་སྐུར་བསྒྲལ། །ཟེགས་མའི་ཚོགས་ལ་ཞིང་གི་ལྷུ་དམ་དང་། །རྡོ་རྗེ་སྒེག་མོའི་མཆོད་སྤྲིན་སྤྲོ་བར་གྱུར། །ༀ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱི་ཋཱཿ ལན་གསུམ། གཉིས་པ་དངོས་གཞི་ལ་གཉིས། རྟེན་དང་བརྟེན་པའི་དཀྱིལ་འཁོར་བསྐྱེད་པ་དང་། བསྙེན་ཅིང་བསྒྲུབ་པའི་ལས་ཀྱི་རིམ་པའོ། །དང་པོ་ལའང་གཉིས། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷའི་དཀྱིལ་འཁོར་བསྒོམ་པ་གཉིས་ཀྱི་དང་པོ་ལའང་ནང་གསེས་རྣམ་གྲངས་བརྒྱད་ལས། དང་པོ་དེ་བཞིན་ཉིད་གྱི་ཏེང་ངེ་འཛིན་ནི། དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་མེད་པའོ། །ལུས་དང་ངག་སེམས་ཆོས་ཐམས་ཅད། །གང་ནའང་མ་གནས་མི་དམིགས་པའི། །རང་བཞིན་མཉམ་པའི་དཀྱིལ་འཁོར་ལ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི། ཕྱོགས་བཅུ་མ་ལུས་ཐམས་ཅད་ལ། །སྙིང་རྗེ་ཆེན་པོས་ཀུན་ཏུ་ཁྱབ། །རང་བྱུང་དེ་ཉིད་དངོས་མེད་པར། །ཀུན་གྱི་ཕྱག་རྒྱའི་རྒྱུ་ཡིན་ནོ། །གསུམ་པ་རྒྱུའི་ཏིང་ངེ་འཛིན་ནི། སྔོན་པོ་ཧཱུྃ་ཉིད་ཧེ་རུའི་དངོས། །ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡི། །འཇིགས་པ་ཡི་ནི་དུས་ལྟར་གྲག །བཞི་པ་རྟེན་གཞལ་ཡས་ཁང་བསྒོམ་པ་ནི། རྒྱུའི་ཧེ་རུ་ཀ་སྐུ་མདོག་སྨུག་ནག་རྡོ་རྗེ་དང་དུང་ཁྲག་འཛིན་པའི་ཐུགས་ཀ་ནས་ཨེ་ཡཾ་རཾ་སུཾ་ཀེཾ་རཾ་རྣམས་ཆད། ཨེ་ལས་ནམ་མཁའ་མཐིང་ནག །ཡཾ་ལས་རླུང་གི་དཀྱིལ་འཁོར། རཾ་ལས་རཀྟའི་རྒྱ་མཚོ། སུམ་ལས་ཞིང་ཆེན་གྱི་ས་གཞི། ཀེཾ་ལས་རུས་པའི་རི་རབ། རཾ་ལས་མེའི་དཀྱིལ་འཁོར་གྱི་སྟེང་དུ། རྒྱུའི་ཧེ་རུ་ཀའི་ཐུགས་ཀ་ནས་བྷྲཱུྃ་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ་ཞེས་བརྗོད་པས། ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡང་མ་ཆད་པ། །ཕྱི་དང་ནང་མེད་ཀུན་ཏུ་སྣང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་འཕྲོ་བ་མང་པོ་འཕྲོ། །ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་རྣམ་ཐར་བཞི་དང་ལྡན་པའི་རྟགས། གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་ཁྱམས་གཉིས་དང་ལྡན་པའི་ཕྱི་མའི་རྩིག་པ་རིམ་པ་ལྔ་དང་། ནང་རྩིག་རིམ་པ་གསུམ་པ། གཉིས་ཀའང་ཐོད་པ་སྐམ་རྙིད་རློན་གསུམ་ཁྲག་ཞག་གི་འདམ་གྱིས་བརྩིགས་ཤིང་གནམ་ལྕགས་ཨུར་མོའི་གཟེར་གྱིས་བལྟམས་པའི་སྟེང་ན་ཐོད་པ་སྣ་ཚོགས་པས་བཀྲ་བའི་ཕ་གུ་འཕྱར་ཐབས་སུ་བཀོད་པ་ལས་རྒྱུ་མ་དང་དོན་སྙིང་གི་མགུལ་འཁོར་འཕྱང་བ། དེའི་སྟེང་དུ་བྲེ་ཕུལ་གྱི་སྣམ་བུ་ལ་མ་ཀ་རའི་ཁ་ནས་སྦྲུལ་སྒྲམ་དང་ཐོད་སྐམ་གྱི་དྲྭ་བ་དང་དྲ་བ་ཕྱེད་པ། དོན་སྙིང་དང་ཡན་ལག་གི་འཕྱང་འཕྲུལ། ཐོད་ཚལ་གྱི་ཟླ་བ། ལྕང་ལོའི་རྡ་ཡབ་དང་དྲིལ་གཡེར་རླུང་གིས་སྐྱོད་པས་མཛེས་ཤིང་། ཕྱི་ངོས་སུ་བྱ་འདབས་ལས་འཕྱང་བའི་རྐང་ལག་གི་ཤར་བུ། སྟེང་ངོས་སུ་སྒལ་ཚིགས་ཀྱི་མདའ་ཡབ་ཚར་དུ་དང ར་བ། དེ་དག་གི་བར་བར་དུ་ཞིང་ཆེན་གྱི་གདུགས། ཉ་ཆེན་གྱི་འཕན་དང་། རྒྱུ་རློན་གྱི་ལྡ་ལྡི། ཞིང་ལྤགས་ཀྱི་ལྷབ་ལྷུབ་སོགས་འཇིགས་པའི་རྒྱན་སྣ་ཚོགས་པས་བཀྲ་བ། རིམ་པ་གཉིས་ཀའི་རྩིག་པའི་ཕྱི་འགྲམ་ནས། འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུགས་རྡོ་རྗེ་མ་ལ་སོགས་ལྷ་མོ་རྣམས་ཀྱིས་དུར་ཁྲོད་རོལ་པའི་མཆོད་སྤྲིན་རབ་འབྱམས་སྤྲོ་བ། བདེན་པ་གཉིས་ལྡན་གྱི་སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་ཕྱེད་རྡོ་རྗེས་མཚན་པ། ཕྱི་མའི་སྒོ་ལོགས་ཀྱི་ཕྱི་ཟུར་བཞི་ནས་ཞིང་གི་ཀ་བ་བཞི་བཞིས་བཏེག་པའི་རྟ་བབས་སྣམ་བུ་བརྒྱད་པ་སོ་དང་། ཐོད་པ་དང་། དབང་པོ་དང་། ཉི་ཟླའི་ཕྲེང་བ་རྣམས་ཀྱིས་སྤྲས་ཤིང་བསིལ་ཁང་དང་ལྡན་པའི་རྩེར་པདྨ་ལ་གནས་པའི་ཆོས་ཀྱི་འཁོར་ལོའི་སྟེང་ནས་ཞིང་གི་གདུགས་ཕུབ་ཅིང་། ཆུ་སྲིན་གྱི་ཕྲུག་གུ་ཟུང་གིས་བརྟེན་པ། ཕྱི་ནང་གི་སྒོ་ཐམས་ཅད་ལ་རུས་སྦལ་གྱི་མ་ཐེམ། ཆུ་སྲིན་གྱི་ཡ་ཐེམ ། སྦྲུལ་ནག་གི་སྐྱེས་བུ། ཞིང་གི་སྒོ་གླེགས་རྣམས་ཀྱིས་སྤྲས་པ། སྒོ་ཕྱི་མའི་གཡས་གཡོན་གྱི་གཞི་ལ། སྐྱེས་བུ་གསལ་ཤིང་གིས་ཕུག་པ་དང་། ཏཱ་ལའི་ལྗོན་པ་རྣམས་ཐོད་ཚལ་རྒྱུ་མ་ལ་བརྒྱུས་པའི་ཕྲེང་བས་བྲེས་ཤིང་། རཀྟའི་རྫིང་བུ་རླབས་ཕྲེང་འཁྲུག་པ་བརྒྱད་ཀྱིས་བསྐོར་བ། དཀྱིལ་འཁོར་དེའི་ནང་གི་ཁྱམས་ཕྱི་མ་ཁྲག་མཚོ་དང་། ནང་མ་གསེར་ཁྱམས་སུ་གནས་པ ། ཐོད་སྐམ་གྱི་བརྩིགས་པ་ཆེ་བའི་ཡོན་ཏན་རྒྱས་པའི་རྟགས། གྲུ་ཆད་བཞི་གློ་འབུར་གྱིས་མཛེས་པའི་སྟེང་དུ། བདེ ན་པ་བཞི་དང་ལྡན་པའི་རྟགས། འཁོར་ལོ་རྩིབས་བཞི་པ་ལྟེ་བ་དང་བཅས་པ་རྣམས་རིམ་པ་བཞིན་ཁྱད་པར་དུ་གྱུར་པས་སྦགས་པ། ནང་ལྷ་ཆེན་པོ་བརྒྱད་ཀྱི་ཀ་བ་རུས་སྦལ་གྱི་ཀ་གདན་དང་ལྡན་པས་བཏེགས་པའི་སྟེང་ན་ཚངས་པའི་གདུང་བཞི་གདུང་ཟླུམ་དང་བཅས་པ། ཀླུ་བདུད་ཀྱི་ཕྱམ་དང་། རྒྱུ་སྐར་གྱི་དྲལ་གྲལ། ཞིང་ལྤགས་ཀྱི་ཐོག་ཕུབ། ཉི་ཟླའི་མཐོངས་དཀར་དང་བཅས་པའི་དབུས་ཕྱུར་བུར་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་ཏོག་གིས་བརྒྱན་པ། ནང་གི་སྟེང་འོག་རྣམས་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ། འབར་བའི་ཕྲེང་བ་འཁྲུག་ཅིང་འབར་བ་ལ་སོགས་ཏེ་དུར་ཁྲོད་རོལ་པའི་གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ། དངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པའི་ཕྱི་རོལ་སྲུང་བའི་ཁོར་ཡུག་གི་ནང་དུ་རཱུ་ཏྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད། དེ་དག་ཏུ་ཤིང་བརྒྱད། དེའི་རྩ་བ་ལ་གནས་པའི་ཕྱོགས་སྐྱོང་བརྒྱད། ཡལ་ག་ལ་བརྟེན་པའི་ཞིང་སྐྱོང་བརྒྱད། ཆུ་བརྒྱད། དེ་ལ་རོལ་པའི་ཀླུ་བརྒྱད། གཞན་ཡང་། མེ་དང་། ཆུ་དང་། སྤྲིན་དང་། རི་དང་། མཆོད་རྟེན་རྣམས་ཀྱང་བརྒྱད་བརྒྱད། ཐམས་ཅད་དུ་གྲུབ་པ་དང་རིག་འཛིན། དཔའ་བོ་དང་རྣལ་འབྱོར་མའི་ཚོགས་དང་། རོ་ལངས་དང་། ཤ་ཟ་འབྱུང་པོའི་ཚོགས་རྣམས་ཧ་ཧར་རྒོད་ཅིང་གར་རྩེ་བ། བྱ་དང་གཅན་གཟན་གཏུམ་མོ་མང་པོ་ལང་ལོང་དུ་རྒྱུ་ཞིང་། ཀེང་རུས་དང་། རོ་ལངས་པོ་དང་། དུམ་བུ་དང་། འཚིག་པ་དང་། མ་ཚིག་པ་དང་། འཐོར་བ་ལ་སོགས་པའི་ཤ་རུས་གསར་རྙིང་སྣ་ཚོགས་པ་གཅལ་དུ་བཀྲམ་ཞིང་སྤུངས་པས་ཡོངས་སུ་གང་བར་བསམ་མོ། །ལྔ་པ་གདན་བསྐྱེད་པ་ནི། པཾ་པདྨ་མཎྜ་ལ། ཨ་ཙནྡྲ་མཎྜ་ལ། མ་སཱུརྱ་མཎྜ་ལ། འཁོར་ལོའི་དབུས་དང་རྩིབས་བཞིར། ཡོན་ཏན་གྱི་ཆེ་བ་དང་ལྡན་པའི་རྟགས། སྣ་ཚོགས་པདྨ་དང་ཟླ་ཉི་བརྩེགས་པའི་དཀྱིལ་འཁོར་རེ་རེ། དེ་རྣམས་ཀྱི་སྟེང་དུ་མ་ཧཱ་དེ་ཝ་བཾ། ཨིནྡྲ་ཡ། ཡ་མ་ཡ། རཀྵ་ས། ཀུ་བེ་ར་ཡ། ཏི་ར་པཾ། གདུག་ཅན་ཟིལ་གྱིས་གནོན་པའི་རྟགས་སུ། དབུས་སུ་དབང་ཕྱུག་དང་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གནོད་སྦྱིན་རྣམས་རང་རང་གི་ཆུང་མ་དང་བཅས་པ་ཁྱོ་ཤུག་བསྣོལ་བ་རེ་རེའི་སྟེང་དུ། དུག་ལྔ་གནས་སུ་དག་པའི་བརྡ། །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྤར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་བྱོལ་སོང་གཙོ་བོ་བརྒྱད་པོ་རེ་རེས་དྲེགས་པ་ཕོ་མོ་བརྫིས་པ། འཁོར་ལོའི་གྲྭ་དང་གྲུ་ཆད་བཞི་གསེར་ཁྱམས་ཀྱི་ཕྱོགས་མཚམས་བརྒྱད་པོར། མ་སཱུརྱ་མཎྜ་ལ། ཏི་ར་བཾ་ལས་ཉི་མ་དང་ཞིང་གི་གདན་རེ་རེ། ཁྲག་ཁྱམས་ཀྱི་ཕྱོགས་མཚམས་དྲུག་དྲུག་དང་སྒོ་བཞིའི་ནང་དུ་ཞིང་གི་གདན་རེ་རེ་གསལ་བར་བསམ་མོ། །གཉིས་པ་བརྟེན་པ་ལྷ་བསྐྱེད་པ་ལ་གཉིས། བདག་ཉིད་ཀྱི་སྲས་སུ་དེ་བཞིན་གཤེགས་པ་བྱ་བ་དང་། དེ་བཞིན་གཤེགས་པའི་སྲས་སུ་བདག་བྱའོ། །དང་པོ་ནི། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུང་སྟེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བས་དགྱེས་པར་ཐིམ། །ནམ་མཁར་གནས་པའི་རྒྱུའི་ཧེ་རུ་ཀ་དབུས་ཀྱི་གདན་ལ་བཞུགས་པ་དེ་ཉིད་དཔལ་ཆེན་པོ་སྐུ་སྨུག་ནག་ཅིར་ཡང་འགྱུར་བ། དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པར་གྱུར་ཏེ། དེ་བཞིན་ཉིད་ཀྱི་དབྱིངས་ནས་ཁྲོ་མོ་དབང་ཕྱུག་ཆེན་མོ་མངོན་དུ་ཕྱུང་སྟེ། ཧེ་ཧེ་ཞེས་དགྱེས་པའི་མདངས་ཀྱིས་ཡབ་ལ་བཏུད་ཅིང་། པདྨ་རྒྱས་པར་མཛད་ནས་གཉིས་སུ་མེད་པར་འཁྲིལ་བའི་དགྱེས་པས་རོལ་བར་བསམ་མོ། །ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་ཏ་ཛྭ་ལ་མཎྜ་ལ་ཕཊ་ཕཊ་ཧ་ལ་ཧ་ལ་ཧཱུྃ། ཞེས་བརྗོད་པས་ཡབ་ཡུམ་གཉིས་ཀྱི་སྦྱོར་མཚམས་ནས་བྱང་ཆུབ་ཀྱིི་སེམས་སྤྲིན་ལས། འཇིག་རྟེན་དྲུག་གི་ཕྱོགས་བཅུ་མཐའ་ཡས་ཁྱབ་པར། ཁྲོ་བོ་འཆོལ་བ་མཚོན་ཆ་སྣ་ཚོགས་ཀྱི་ཆར་འབེབས་པ་དཔག་ཏུ་མེད་པ་སྤྲོས། ལྟས་ཆེན་པོ་བཅོ་ལྔས་གདུག་པ་ཅན་ཀྱི་ཚོགས་ཐམས་ཅད་ཚར་གཅད་པར་བསམ་མོ། །མཁའ་ཁྱབ་ཀྱི་ཁྲོ་བོའི་སྤྲིན་རྣམས་སླར་འདུས་པ་ལས། རྡོ་རྗེ་རིགས་ཀྱི་ཁྲོ་བོ་རྣམས་རང་ལ་ཐིམ་པས་འབྲས་བུའི་ཧེ་རུ་ཀར་གྱུར་པ་ནི། ༀ་བཛྲ་ཤྲཱི་ཧེ་རུ་ཀ་ཧཱུྃ། བཛྲ་ཀྲོ་དྷི་ཤྭ་རཱི་སྟྭཾ། བདག་ཉིད་བཅོམ་ལྡན་འདས་དཔལ་ཆེན་པོ། །དགྱེས་མཛད་བཛྲ་ཧེ་རུ་ཀ །མཐིང་ནག་ཆར་སྤྲིན་ལྟ་བུར་གནག །ཉི་མ་བྱེ་བའི་གཟི་བྱིན་ཅན། །དབུ་གསུམ་གཡས་དཀར་གཡོན་དམར་མཐིང་། །ཁྲོས་པའི་ཉམས་ཅན་དམར་ཟླུམ་སྤྱན། གསུམ་གསུམ་རྣམ་པར་འགྱུར་བའི་ཞལ། །མཆེ་གཙིགས་ལྗགས་ནི་གློག་ལྟར་འཁྱུག །རྡོ་རྗེའི་གད་མོས་སྲིད་གསུམ་གཡོ། །ཤངས་ནས་མི་བཟད་ཧཱུྃ་སྒྲ་འབྱིན། །རྫི་སྨིན་སྨ་ར་མེ་ལྟར་འབར། །གཏུམ་རྔམས་ཞལ་ནི་ཁྲོ་གཉེར་བསྡུས། །སྐུ་ཆེ་ཡན་ལག་རགས་པ་ལ། །རྡོ་རྗེའི་བ་སྤུས་ཀུན་ནས་བལྟམས། །སྒེག་པ་དཔའ་བ་མི་སྡུག་པ། །དགོད་དང་གཤེ་དང་འཇིགས་སུ་རུང་། །གར་གྱི་ཉམས་དགུས་རབ་ཏུ་རྒྱས། །ཕྱག་དྲུག་གཡས་གཡོན་དང་པོ་གཉིས། །རྡོར་དྲིལ་འཛིན་པས་ཡུམ་ལ་འཁྱུད། །གཉིས་པ་རྩེ་ལྔ་བྷནྡྷ་དམར། །གསུམ་པས་ཞིང་དབྱུག་སྟོང་ཁམས་འདེགས། །ཞབས་བཞི་གཡས་བརྐྱང་གཡོན་པ་བསྐུམ། །གྱད་ཀྱི་དོར་སྟབས་ཆེན་པོས་རོལ། །ཐོད་སྐམ་རིགས་ལྔའི་དབུ་རྒྱན་སོགས། །དུར་ཁྲོད་དཔལ་གྱི་ཆས་རྣམས་རྫོགས། །སྙན་གོང་ཉི་ཟླའི་འོད་ཟེར་སྤྲོ། །ཡུམ་ཆེན་ཀྲོ་དྷི་ཤྭ་རཱི་མ། །སྔོ་སྐྱ་ཞལ་གཅིག་ཕྱག་གཉིས་པ། །སྤྱན་གསུམ་ལང་ཚོས་སྒེག་པའི་ཉམས། །ཕྱག་གཡས་དྲིལ་བུས་ཡབ་ལ་འཁྱུད། །གཡོན་པ་དུང་ཁྲག་གཙོ་ལ་སྟོབ། །གཟིག་གི་པགས་པའི་ཤམ་ཐབས་སོགས། །དུར་ཁྲོད་རོལ་པའི་ཆས་ཀྱིས་བརྒྱན། །གཡོན་བརྐྱང་གཡས་བསྐུམ་གཙོ་དང་འཁྲིལ། །བསྐལ་པའི་མེ་དཔུང་ཀློང་ན་བཞུགས། །དེ་བཞིན་གཤེགས་དང་རིན་པོ་ཆེ། །པདྨ་ལས་ཀྱི་རིགས་ལ་སོགས། །ཐམས་ཅད་འདུས་པའི་བདག་ཉིད་ཅན། །རིགས་བཞིའི་ཧེ་རུ་ཀར་གྱུར་ནས། །འཁོར་ལོ་རྩིབས་བཞིའི་གདན་ལ་བཞུགས། །ༀ་བུདྡྷ་ཤྲཱི་ཧེ་རུ་ཀ་ཧཱུྃ། བུདྡྷ་ཀྲོ་དྷི་ཤྭ་རཱི་སྟྭཾ། ༀ་རཏྣ་ཤྲཱི་ཧེ་རུ་ཀ་ཧཱུྃ། རཏྣ་ཀྲོ་དྷི་ཤྭ་རཱི་སྟྭཾ། ༀ་པདྨ་ཤྲཱི་ཧེ་རུ་ཀ་ཧཱུྃ། པདྨ་ཀྲི་དྷི་ཤྭ་རཱི་སྟྭཾ། ༀ་ཀརྨ་ཤྲཱི་ཧེ་རུ་ཀ་ཧཱུྃ། ཀརྨ་ཀྲོ་དྷི་ཤྭ་རཱི་སྟྭཾ། སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞིར་བགྲད། །ཀོ་རློན་གོས་ནི་སྣ་ཚོགས་གྱོན། །རྔམས་པའི་སྒྲ་ཆེན་འཇིགས་པར་སྒྲོག །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་འཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །རྗེས་སུ་ཆགས་པས་སྙོམས་པར་ཞུགས། །ཧེ་ཞེས་དགྱེས་པའི་བཞད་སྒྲ་ལས། །སྦྱོར་མཚམས་བྱང་ཆུབ་སེམས་ཀྱི་སྤྲིན། །ཁྲོ་མོ་བརྒྱད་ཀྱི་རྣམ་པར་ཐོན། །ག་རཱི་མ་དང་ཙ་རཱི་མ། །པྲ་མོ་ཧ་དང་བེ་ཏ་ལཱི། །པུཀྐ་སི་དང་གྷསྨ་རི། །སྨ་ཤ་ནི་དང་ཙཎྜ་ལི། །རྩིབས་མཆན་དང་ནི་གྲྭ་བཞིར་འཁོད། །ཧེ་ཞེས་དགྱེས་པའི་བཞད་སྒྲ་ལས། །ཕྲ་མེན་ཆེན་མོ་བརྒྱད་ཐོན་ཏེ། །སེང་གེ་སྟག་དང་ཝ་སྤྱང་གདོང་། །བཞད་གདོང་ཀངྐ་བྱ་རོག་གདོང་། །འུག་གདོང་བརྒྱད་པོ་གསེར་ཁྱམས་ཀྱི། །ཕྱོགས་མཚམས་ལ་ནི་རིམ་བཞིན་འཁོད། །སླར་ཡང་དགྱེས་པའི་བཞད་སྒྲ་ནི། །ཧེ་ཞེས་བརྗོད་པས་བྱང་ཆུབ་སེམས། །སྒོ་སྐྱོང་བཞི་ཡི་རྣམ་པར་ཐོན། །ཤར་ལྷོ་ནུབ་བྱང་སྒོ་བཞི་རུ། །རྟ་གདོང་མ་དང་ཕག་གདོང་མ། །སེང་གདོང་མ་དང་སྤྱང་གདོང་མ། །ཀུན་ཀྱང་ཤིན་ཏུ་ཁྲོས་པའི་ཉམས། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །མཐའ་དབུས་མེད་པར་ཁྱབ་པ་ཡི། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །གཉིས་པ་དེ་བཞིན་གཤེགས་པའི་སྲས་སུ་བདག་བྱ་བ་ལ་གཉིས། རྟག་མཐའ་གཞིག་པ་དང་། ཆད་མཐའ་བསལ་བའོ། །དང་པོ་ནི། ཐབས་དང་ཤེས་རབ་གཉིས་མེད་པའི། །ཡེ་ཤེས་ཟེར་གྱིས་ལུས་རྟོག་སྦྱངས། །གསེར་ཞུན་ལྟ་བུའི་སེམས་དག་ལས། །གསུང་གི་བྱིན་རླབས་འོད་ཀྱི་འབྲུ། །ཐུགས་ཀར་ཐིིམ་ནས་སྐུ་ཡི་དབྱིབས། །རྡོ་རྗེའི་ལམ་ནས་ཡུམ་གྱི་མཁར། །ཆོས་སྐུ་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོའི་སྒྲ། །ཧཱུྃ་ཧ་ཧ་ཕཊ་ཅེས་བྱུང་ནས། །བྱང་ཆུབ་སེམས་སུ་གཅིག་པར་ཐིམ། །གཙོ་བོའི་ཐུགས་ཀ་ནས་ཀུན་ཏུ་བཟང་པོ་བྱང་ཆུབ་སེམས་ཀྱི་བདག་ཉིད་རྣམ་སྨིན་གྱི་ལུས་ཀྱི་རྣམ་པས་འཐོན་ཏེ། དཀྱིལ་འཁོར་གྱི་ཤར་སྒོར་འདུད་པའི་རྣམ་པས་འཁོར་པར་བསམ་ཞིང་། ཧོཿ སེམས་ཉིད་ཐེག་པར་རབ་ངེས་པའི། །དཀྱིལ་འཁོར་བཞི་བཅུ་རྩ་གཉིས་རྫོགས། །སངས་རྒྱས་རྡོ་རྗེ་ཧེ་རུ་ཀའི། །ཚོམ་བུའི་དཀྱིལ་འཁོར་བསམ་ཡས་ཀྱིས། །སྐུ་གསུང་ཐུགས་སུ་བདག་སྦྱོར་ཅིག །ༀ་བཛྲ་ཀྲོ་དྷ་ས་མ་ཡ་ཧོ། ༀ་བཛྲ་ཀྲོ་དྷ་ས་མ་ཡ་སྟྭཾ། ཞེས་བསྐུལ་བས་ལྷ་རྣམས་ཀྱིས་རྗེས་སུ་གནང་སྟེ། ཐབས་དང་ཤེས་རབ་ཀྱི་འོད་ཟེར་བདག་ལ་འཕྲོས་པས་སེམས་ཀྱི་རྟོག་པ་དང་དེ་ལས་གྱུར་པའི་ལུས་ངག་སྦྱངས་ནས་གཉིས་སུ་མེད་པའ་ིཡེ་ཤེས་གཟུང་འཛིན་དང་བྲལ་བའི་རང་བཞིན་གསེར་ཞུན་ལྟ་བུའི་འོད་ཀྱི་གོང་བུར་གྱུར་པ་ལ། ལྷ་རྣམས་ཀྱི་སྐུ་གསུང་ཐུགས་ཀྱི་འོད་ཟེར་འབྲུ་གསུམ་གྱི་རྣམ་པར་འཕྲོས་ཏེ་ཐིམ་པས། དེ་ཉིད་ༀ་ཨཱཿཧཱུྃ་གསུམ་དུ་གྱུར་ནས་རིམ་བཞིན་ཧཱུྃ་ལ་ཞུགས་པ་ཟླ་བ་དང་རླུང་དཀྱིལ་ལ་གནས་པར་གྱུར། དེ་རླུང་གིས་བཏེག་པས་བུང་བ་མེ་ཏོག་ལ་ལྡིང་བ་ལྟར་ལྷ་ཚོགས་རྣམས་ལ་ལན་གསུམ་བསྐོར་ནས་གཙོ་བོའི་ཐུགས་ཀར་ཐིམ། ཡབ་ཡུམ་སྙོམས་པར་ཞུགས་པའི་དགའ་བའི་རོལ་མོས་བྱང་ཆུབ་ཀྱི་སེམས་སུ་ཞུ་བ་སྐུའི་དབྱིབས་བརྒྱུད། རྡོ་རྗེའི་ལམ་ནས་ཡུམ་གྱི་པདྨར་སོན་པ་འོད་ཀྱི་གོང་བུར་གནས་པ་ལས། གཙོ་བོ་ཡབ་ཡུམ་ཀྱང་རྗེས་སུ་ཆགས་པའི་སྦྱོར་བས་བདེ་བའི་ངོ་བོར་ཞུ་བར་བསམ་མོ། །དེ་ནས་ཧཱུྃ་ཧ་ཧེ་ཕཊ་ཅེས་བརྗོད་པས། རིགས་བཞིའི་ཧེ་རུ་ཀ །ཁྲོ་མོ་བརྒྱད། སྒོ་མ་བཞི་རྣམས་རིམ་བཞིན་དབུས་ཀྱི་ཐིག་ལེ་ལ་རོ་གཅིག་ཏུ་གྱུར་པ་ལས་གསེར་ཞུན་ལྟ་བུའི་འོད་ཀྱི་གོང་བུར་འབར་བར་གྱུར། གཉིས་པ་ཆད་མཐའ་བསལ་བ་ལ་གསུམ། གཙོ་བོ་ཡབ་ཡུམ་བསྐྱེད་པ་དང་། དེ་ལ་དབང་བསྐུར་བ་དང་། སྲས་ཀྱི་དཀྱིལ་འཁོར་བསྐྱེད་པའོ། །དང་པོ་གཙོ་བོ་བསྐྱེད་པ་ནི། ཧཱུྃ་ཧཱུྃ་ཞེས་བརྗོད་པས། གདན་སྟེང་གི་འོད་ཕུང་དེ་ཉིད་ཧཱུྃ་ཟུང་གཅིག་ཏུ་གྱུར། སྥ་ར་ཎ་ཕཊ། དེ་ལས་འོད་ཟེར་མཁའ་ཁྱབ་ཏུ་འཕྲོས། དོན་གཉིས་བྱས། སཾ་ཧ་ར་ཎ་ཧཱུྃ། སླར་འདུས་ཧཱུྃ་ལ་ཐིམ། འོད་དུ་ཞུ་བ་ལས། ༀ་བཛྲ་གྷཎྜེ། རྡོ་རྗེ་རྩེ་དགུ་དང་དྲིལ་བུ་ཧཱུྃ་ཡིག་གིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུྃ། སྔར་བཞིན་འཕྲོས་འདུས་འོད་དུ་ཞུ་བ་ལས། ༀ་བཛྲཱ་ཤྲཱི་ཧེ་རུ་ཀ་ཧཱུྃ། བཛྲ་ཀྲོ་དྷི་ཤྭ་རཱི་སྟྭཾ། བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་ཉི་མ་བྱེ་བའི་གཟི་བྱིན་འབར་བ། རྣམ་ཐར་གསུམ་དང་ལྡན་པའི་རྟགས། དབུ་གསུམ་གྱི་གཡས་ཞལ་དཀར་ལ་བཞད་པ། གཡོན་ཞལ་དམར་ལ་གཤེ་བ། དབུས་ཞལ་མཐིང་ནག་དྲག་པོར་ཁྲོས་པའི་ཉམས་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ་རྣམ་པར་འགྱུར་བའི་ཞལ་གདངས་ཤིང་། མཆེ་བ་གཙིགས་པ། གློག་ལྟར་འཁྱུག་པའི་ལྗགས་འདྲིལ་ཞིང་། རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུྃ་སྒྲ་འབྱིན་པ། རྫི་སྨིན་སྨ་ར་ལས་འབར་བའི་མེ་འཁྱོག་པོར་སྤྲོ་བ། སྐུ་ཆེ་ཞིང་ཡན་ལག་རགས་པ། ལང་ཚོ་རྒྱས་པའི་འགྱུར་བག་ཅན། རྡོ་རྗེའི་བ་སྤུས་གཏམས་པ། སྒེག་པ་དཔའ་བ་མི་སྡུག་པ། རྒོད་དང་གཤེ་དང་འཇིགས་སུ་རུང་། སྙིང་རྗེ་རྔམས་དང་ཞི་བ་སྟེ། གར་གྱི་ཉམས་དགུས་རབ་ཏུ་རྒྱས་པ། ཡེ་ཤེས་དྲུག་དང་ལྡན་པའི་རྟགས། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་དྲིལ་བུ་འཛིན་པས་ཡུམ་ལ་འཁྱུད་པ། གཉིས་པས་རྡོ་རྗེ་རྩེ་ལྔ་དང་། བྷཉྫ་དམར་གྱིས་གང་བ་ཐོགས་པ། གསུམ་པས་ཞིང་གི་དབྱུག་པ་དང་སྟོང་གི་འཇིག་རྟེན་འདེགས་པ། རྫུ་འཕྲུལ་གྱི་རྐང་པ་བཞི་དང་ལྡན་པའི་རྟགས། ཞབས་བཞི་གཡས་བརྐྱངས་ཤིང་། གཡོན་བསྐུམས་པའི་གྱད་ཆེན་པོའི་སྟབས་ཀྱིས་སྟན་ལ་རོལ་བ། དབུ་རེ་རེ་ལ་ཐོད་པ་སྐམ་པོ་ལྔ་ལྔ་རིགས་ལྔའི་ཅོད་པན་གྱིས་དབུ་བརྒྱན་པ། འཛག་པའི་མགོ་བོ་ལྔ་བཅུའི་དོ་ཤལ་དང་། ཐོད་པ་ཚལ་བུའི་དཔུང་རྒྱན་ཅན། ཞིང་ཆེན་གྱི་གཡང་གཞི་དང་། གླང་པོ་ཆེའི་ཀོ་བ་རློན་པས་སྟོད་གཡོགས་ཤིང་། སྟག་གི་པགས་པའི་ཤམ་ཐབས་གྲོལ་བ། ཀླུ་རྒྱལ་རིགས་དཀར་པོས་སྐྲ་ཆིངས། རྗེའུ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་ཕྱག་ཞབས་ཀྱི་གདུ་བུ་སྟེ། ཐམས་ཅད་ཀྱང་གདུག་པའི་སྦྲུལ་གྱི་རྣམ་པ་ཅན། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཀྱིས་མཚན་པ་སྟེ་དུར་ཁྲོད་རོལ་པའི་ཆས་བརྒྱད་དང་། དཔལ་གྱི་ཆས་བཅུ་སྐུ་ལ་རྫོགས་ཤིང་། སྙན་གོང་ནས་ཉི་མའི་འོད་ཟེར་སྤྲོ་པ། ཡུམ་ཀྲོ་དྷི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ། གཅེར་བུ་སྐྲ་གྲོལ་ཞིང་ལང་ཚོས་སྒེག་པའི་ཉམས་འགྱུར་ཅན། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་ཐོད་པ་ཁྲག་གིས་བཀང་བ་གཙོ་བོའི་ཞལ་དུ་སྟོབ་པ། གཟིག་གི་པགས་པའི་ཤམ་ཐབས་སོགས་དུར་ཁྲོད་རོལ་པའི་ཆས་ཅན་ཞབས་གཡོན་བརྐྱངས་ཤིང་། གཡས་བསྐུམས་པས་གཙོ་བོ་དང་དགྱེས་པར་འཁྲིལ་བ། སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན། བསྐལ་པའི་མེའི་ཕུང་པོ་རབ་ཏུ་འབར་བའི་ཀློང་ན་ཁམས་གསུམ་པའི་དབང་ཕྱུག་ཆེན་པོའི་ངོ་བོར་བཞུགས་པའོ། །གཉིས་ལ་དབང་བསྐུར་བ་ནི། རང་གི་ཐུགས་རིན་པོ་ཆེའི་གུར་ཁྱིམ་ལྟ་བུའི་ནང་དུ་ཉི་མ་ལ་གནས་པའི་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཧཱུྃ་ཡིག་ཕྲ་མོ་འབར་བས་མཚན་པར་བསམས་ལ། དེ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཱཛཿས་སྤྱན་དྲངས་པར་བསམ་ཞིང་། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བར་བསམ་ཞིང་། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་དབང་སྔགས་རྣམས་བརྗོད་པ་སྟེ། རྡོ་རྗེ་ཕྱི་བསྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཕྱག་རྒྱ་དེ་ཉིད་ལས་མཛུབ་མོ་གཉིས་བརྐྱང་པ་དཔྲལ་བར་འཇོག་ཅིང་། ༀ་མ་ཧཱ་ཨ་དཪྴ་ཛྙཱ་ན། སྲིན་ལག་གཉིས་བརྐྱང་བ་རྣ་ལྟག་གཡས་པར་འཇོག་ཅིང་། ༀ་མ་ཧཱ་ཱས་མ་ཏ་ཛྙཱ་ན། མཐེ་བོང་གཉིས་བརྐྱང་པ་ལྟག་པར་འཇོག་ཅིང་། ༀ་མ་ཧཱ་པྲ་ཏྱ་བེཀྵ་ན་ཛྙཱ་ན། མཐེའུ་ཆུང་གཉིས་བརྐྱང་བ་རྣ་ལྟག་གཡོན་པར་འཇོག་ཅིང་། ༀ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན། ཞེས་རིམ་པར་དབང་བསྐུར་བས། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར་བས་ཀུན་བརྟགས་ལ་གཞན་དབང་གིས་རྒྱས་བཏབ། ཆུ་ལྷག་མ་སྤྱི་བོར་བརྟན་པ་ལས་གཞན་དབང་ལ་ཡོངས་གྲུབ་ཀྱི་རྒྱས་བཏབ་པས་ཡེ་ཤེས་འགྱུར་བ་མེད་པའི་བརྡར་དབུ་གཙུག་ན་རྡོ་རྗེ་ཕྱེད་པ་དང་། རིགས་བདག་རྡོ་རྗེ་མི་བསྐྱོད་པས་དབུ་བརྒྱན་པར་གྱུར། སྤྱི་བོར་ཟླ་བ་ལ་གནས་པའི་ༀ་དཀར་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ༀ་ལ་ཐིམ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར། ༀ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་གྱུར་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། མགྲིན་པར་པདྨ་ལ་གནས་པའི་ཨཱཾ་དམར་པོ་དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། གསུང་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཨཱཾ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་གསུང་དང་གཉིས་སུ་མེད་པར་གྱུར། ཨཱཾ་ཡོངས་སུ་གྱུར་པ་ལས་སྣང་མཐའ་དམར་པོ་པདྨ་འཛིན་པས་རྒྱས་བཏབ་པར་གྱུར། རྡོ་རྗེའི་ཕྱག་རྒྱ་མགྲིན་པར་བཞག །ༀ་སརྦ་ཏ་ཐཱ་ག་ཏ་མ་ཧཱ་ཝཱཀྐ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། ཐུགས་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཧཱུྃ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་ཐུགས་ད ང་གཉིས་སུ་མེད་པར་གྱུར། ཧཱུྃ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་བཏབ་པར་གྱུར། རྡོ་རྗེའི་ཕྱག་རྒྱ་སྙིང་གར་བཞག །ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཱཾ། ཞེས་བརྗོད་ཅིང་། སྐུ་གསུང་ཐུགས་རྡོ་རྗེ་གསུམ་དུ་གསལ་ལོ། །གསུམ་པ་སྲས་ཀྱི་དཀྱིལ་འཁོར་བསྐྱེད་པ་ལ། རིགས་བཞིའི་ཧེ་རུ་ཀ་བསྐྱེད་པ་དང་། འཁོར་གྱི་དཀྱིལ་འཁོར་བསྐྱེད་པའོ། །དང་པོ་ལ་གཉིས། མཁའ་གསང་བརླབ་པ་དང་། ལྷ་ཚོགས་སྤྲོ་བ་གཉིས་ལས་དང་པོ་ནི། ཡབ་ཀྱི་གསང་གནས་ཧཱུྃ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་ག་ཕཊ་ཀྱིས་བཀག་པ། ཡུམ་གྱི་མཁའ་པཾ་ལས་པདྨ་འདབ་མ་བརྒྱད་པའི་ལྟེ་བར་ཉི་མ་ལ་རཀྟ་ཨཱཾ་དམར་པོར་གནས་པའི་གེ་སར་ཨེས་མཚན་པར་མོས་ལ། ས་མ་ཡ་སྟྭཾ། ས་མ་ཡ་ཧོ། ཨ་ནུ་རཱ་གེ་ཧ། ཨ་ནུ་རཱ་ག་ཡ་མྱེ། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུྃ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། ཧཱུྃ་ཧཱུྃ་ཧཱུྃ་ཞེས་གཉིས་སུ་མེད་པར་སྙོམས་པར་ཞུགས་པས་བདེ་བ་ཆེན་པོའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཞལ་དུ་ཞུགས། རྗེས་སུ་ཆགས་པའི་མེས་བྱང་ཆུབ་ཀྱི་སེམས་སུ་ཞུ་བ། སྐུའི་དབྱིབས་བརྒྱུད། རྡོ་རྗེའི་ལམ་ནས་ཡུམ་གྱི་པདྨོར་ལན་གསུམ་དུ་སྤྲོས་པ་ལས་ལྷ་རྣམས་ཀྱི་ས་བོན་ཡིག་འབྲུའི་དཀྱིལ་འཁོར་བཀྲ་ལམ་གྱིས་གསལ་བར་གྱུར་བར་བསམ་མོ། །གཉིས་པ་ལྷ་ཚོགས་སྤྲོ་བ་ནི། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ་ཥྚཎྜ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷི་ཤྭ་རི་ཛྭ་ལ་ནི་ཧཱུྃ་ཕཊ། ཅེས་བརྗོད་པས། དབུས་ཀྱི་ཧཱུྃ་གཉིས་བཛྲ་ཧེ་རུ་ཀ་ཡབ་ཡུམ་གྱི་སྐུར་གྱུར། ཕཊ་ཛཿ ཞེས་པས་མཁའ་ལས་སྤྲོས་ནས་མདུན་གྱི་ནམ་མཁར་བཞུགས་པར་གྱུར་སྥ་ར་ཎ་ཕཊ། སཾ་ཧ་ར་ཎ་ཧཱུྃ། དེ་ལས་འོད་ཟེར་སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ། བདག་ཉིད་གཙོ་བོ་ཡབ་ཡུམ་ལ་གཉིས་སུ་མེད་པར་གྱུར། དེ་བཞིན་དུ་ས་བོན་ཡིག་འབྲུའི་དཀྱིལ་འཁོར་གཞན་རྣམས་ཀྱང་ལྷ་སྐུར་རྫོགས་པ། ཕཊ་ཛཿ ཞེས་མཁའ་ལས་སྤྲོས་ཏེ་རང་རང་གི་གདན་ལ་བཞུགས་པ་ནི། ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཱཙཎྜ་སརྦ་དུ་ཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷི་ཤྭ་རཱི་སརྦ་དུཥྚཾ་ཧཱུྃ་ཕཊ། ཤར་གྱི་རྩིབས་ལ་བུདྡྷ་ཧེ་རུ་ཀ་སྐུ་དང་རྩ་ཞལ་སྨུག་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་འཁོར་ལོ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཏྲི་ཤུལ་འཛིན་པ་ཡུམ་བུདྡྷ་ཀྲོ་དྷི་ཤྭ་རཱི་མ་སྨུག་ནག་དང་མཉམ་པར་སྦྱོར་བ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ་ཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་མ་ཧཱ་སཱུརྱ་རཏྣ་མ་ཧཱ་ཀྲོ་དྷི་ཤྭ་རཱི་བི་དམ་ཧཱུྃ་ཕཊ། ལྷོའི་རྩིབས་ལ་རཏྣ་ཧེ་རུ་ཀ་སྐུ་དང་རྩ་ཞལ་སེར་ནག །གཡས་སྡོ་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་དགྲ་སྟྭ་འཛིན་པ། ཡུམ་རཏྣ་ཀྲོ་དྷི་ཤྭ་རཱི་མ་སེར་མོ་དང་མཉམ་པར་སྦྱོར་བ། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ་ཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་ཧྲཱི་ཤཱུ་ཏ་ས་མ་ཏ་པདྨ་མ་ཧཱ་ཀྲོ་དྷི་ཤྭ་རི་ཁཱ་ཧི་ཧཱུྃ་ཕཊ། ནུབ་ཀྱི་རྩིབས་ལ་པདྨ་ཧེ་རུ་ལ་སྐུ་དང་རྩ་ཞལ་དམར་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་པདྨ་དང་དྲིལ་བུ་འཛིན་པ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་རྔེའུ་ཆུང་འཛིན་པ། ཡུམ་པདྨ་ཀྲོ་དྷི་ཤྭ་རཱི་མ་དམར་མོ་དང་མཉམ་པར་སྦྱོར་བ། ༀ་ཀརྨ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུ་ཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷི་ཤྭ་རཱི་བི་ཤྭ་ཧཱུྃ་ཕཊ། བྱང་གི་རྩིབས་ལ་ཀརྨ་ཧེ་རུ་ཀ་སྐུ་དང་རྩ་ཞལ་ལྗང་ནག །གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རྒྱ་གྲམ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཐོང་གཤོལ་འཛིན་པ། ཡུམ་ཀརྨ་ཀྲོ་དྷི་ཤྭ་རཱི་མ་ལྗང་མོ་དང་མཉམ་པར་སྦྱོར་བ། ཁྲག་འཐུང་ཡབ་ཡུམ་ཐམས་ཅད་ཀྱང་གར་དགུའི་རོས་སྒེག་ཅིང་། རྒྱན་དང་ཆ་ལུགས་གཙོ་བོ་དང་མཐུན་པ། རང་རང་གི་གདན་ལ་གཡས་བརྐྱང་པའི་སྟབས་ཀྱིས་བཞུགས་པའོ། །ཕཊ་ཛཿ ཞེས་བརྗོད་པས་འཁོར་ལོའི་གྲྭ་དང་གྲུ་ཆད་བཞི་ལ། ༀ་བཛྲ་ག་རཱི་ཧ། རྩིབས་མཆན་གྱི་ཤར་ལྷོར་ག་རཱི་མ་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ༀ་བཛྲ་ཙ་རཱི་ཧ། ལྷོ་ནུབ་ཏུ་ཙ་རི་མ་སེར་མོ་མདའ་གཞུ་འགེངས་པ། ༀ་བཛྲ་པྲ་མོ་ཧེ་ཧ། ནུབ་བྱང་དུ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་འཕྱར་བ། ༀ་བཛྲ་བེ་ཏ་ལཱི་ཧ། བྱང་ཤར་དུ་བེ་ཏ་ལཱི་ནག་མོ་གཡས་རྡོ་རྗེ་འཕྱར་ཞིང་གཡོན་བྱིས་པའི་བམ་ཟ་བ། ༀ་བཛྲ་པུཀྐ་སི་ཧ། གྲུ་ཆད་ཀྱི་ཤར་ལྷོར་པུཀྐ་སྭི་དམར་སེར་ཞིང་ཆུང་གི་རྒྱུ་མ་འདྲེན་པ། ༀ་བཛྲ་གྷསྨ་རཱི་ཧ། ལྷོ་ནུབ་ཏུ་གྷསྨ་ལྗང་གུ་གཡས་པའི་རྡོ་རྗེས་གཡོན་གྱི་དུང་དམར་དཀྲུག་ཅིང་གསོལ་བ། ༀ་བཛྲ་སྨ་ཤ་ནཱི་ཧ། ནུབ་བྱང་དུ་སྨ་ཤ་མཐིང་ནག་བྱིས་པའི་རོ་བཟུང་ནས་སྙིང་ཟ་བ། ༀ་བཛྲ་ཙཎྜ་ལཱི་ཧ། བྱང་ཤར་དུ་ཙཎྜ་ལི་སེར་སྐྱ་མཆོག་ལུས་འབྲལ་བ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་པ། སྐྲ་སེར་པོ་གྱེན་དུ་བརྫེས་པ། གཅེར་བུ་དུར་ཁྲོད་རོལ་པའི་ཆས་ཅན་གཡོན་བརྐྱང་པའི་སྟབས་ཀྱིས་གནས་པའོ། །ཕཊ་ཛཿ ཞེས་སྤྲོས་པས་གསེར་ཁྱམས་ཀྱི་ཕྱོགས་མཚམས་བརྒྱད་དུ། ༀ་བཛྲ་སིངྷ་མུ་ཁ་ཧེ། ཤར་དུ་སེང་གདོང་སེར་མོ་ཕྱག་གཉིས་ཐུགས་ཀར་གྱེན་དུ་བསྣོལ་བས་ཏི་ར་བཟུང་ནས་ཟ་བ། ༀ་བཛྲ་བྱཱ་གྷྲི་མུ་ཁ་ཧེ། ལྷོར་སྟག་གདོང་མ་དམར་མོ་ཕྱག་གཉིས་མཐུར་དུ་བསྣོལ་ནས་རོ་བཟུང་བ། ༀ་བཛྲ་ཤྲི་གཱ་ལ་མུ་ཁ་ཧེ། ནུབ་ཏུ་ཝ་གདོང་མ་ནག་མོ་ཞིང་ཆུང་བཟུང་ནས་ལྕེས་བལྡག་པ། ༀ་བཛྲ་ཤྭ་ནཱ་མུ་ཁ་ཧེ། བྱང་དུ་སྤྱང་གདོང་མ་མཐིང་ག་ཞིང་ཆུང་གི་ཁོག་པ་འབྲལ་བ་སྟེ་མཆེ་བ་ཅན་བཞི་དང་། ༀ་བཛྲ་གྲྀདྡྷ་མུ་ཁ་ཧེ། ཤར་ལྷོར་བཞད་གདོང་མ་དམར་སེར་གཡོན་ཞིང་ཆུང་བཟུང་བའི་རྒྱུ་མ་གཡས་པས་དྲངས་ནས་གསོལ་བ། ༀ་བཛྲ་ཀངྐ་མུ་ཁ་ཧེ། ལྷོ་ནུབ་ཏུ་ཀངྐའི་མགོ་ཅན་དམར་སྐྱ་བམ་རོའི་རྐང་ལག་བཟུང་ནས་ཕྲག་པར་འགེལ་པ། ༀ་བཛྲ་ཀཱ་ཀ་མུ་ཁ་ཧེ། ནུབ་བྱང་དུ་བྱ་རོག་གདོང་མ་ནག་མོ་གཡས་རལ་གྲི་གཡོན་བྷན་དམར་འཛིན་པ། ༀ་བཛྲ་ཨུ་ལུ་ཀ་མུ་ཁ་ཧེ། བྱང་ཤར་དུ་འུག་གདོང་མ་མཐིང་ག་གཡས་ལྕགས་ཀྱུ་དང་གཡོན་བྷན་དམར་འཛིན་པ་སྟེ། གཤོག་པ་ཅན་བཞི། ཐམས་ཅད་གཅེར་བུ་རང་རང་ཁྲོས་པའི་ཞལ་ཅན་དྲག་མོའི་རྣམ་འགྱུར་དུར་ཁྲོད་འབར་བའི་ཆས་དང་ལྡན་པའོ། །ཕཊ་ཛཿ ཞེས་སྤྲོས་པས་སྒོ་བཞིའི་ནང་དུ། ༀ་བཛྲ་ཨཱརྱ་ཏེ་ཛ་ཏེ་ང་ཛ། ཤར་སྒོར་རྟ་གདོང་མ་སྔོན་པོ་ལྕགས་ཀྱུ་འཛིན་པ། ༀ་བཛྲ་ཨ་མུ་ཁེ་ཧཱུཾ། ལྷོ་སྒོར་ཕག་གདོང་མ་ནག་མོ་མཆེ་ཞག་འཛིན་པ། ༀ་བཛྲ་ལོ་ཀ་བཾ། ནུབ་སྒོར་སེང་གདོང་མ་དམར་མོ་ལྕགས་སྒྲོག་འཛིན་པ། ༀ་བཛྲ་བྷསྨི་པ་ལ་ཡ་བ་ཏུ་ཧོ། བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ་ཞལ་ཕྱིར་ཕྱོགས་ནས་འཁོད་པའོ། །གཉིས་པ་འཁོར་ཁྱམས་དབང་ཕྱུག་མ་བསྐྱེད་པ་ནི། བདག་ཉིད་བཛྲ་ཧེ་རུ་ཀར་གསལ་བའི་ཐུགས་ཀ་ནས། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ཉི་ཤུ་རྩ་བརྒྱད་འཕྲོས། ཁྱམས་ཕྱི་མའི་ཕྱོགས་བཞིར་དྲུག་དྲུག་དང་། སྒོ་བཞིར་རེ་རེ་སྟེ་རང་རང་གི་སྟན་ལ་འཁོད་པ་ལས། རིམ་པ་བཞིན། མ་ནུ་རཀྴ་སཱི་བྷྱོ། བྲཧྨ་ཎི་བྷྱོ། ར་ཏྲཱི་བྷྱོ། བེཥྞ་བེ་བྷྱོ། ཀུ་མ་རཱི་བྷྱོ། ཨིནྡྲ་ཎི་བྷྱོ། ཤར་སྟོད་ནས་གཡས་སྐོར་དུ་རིམ་པ་བཞིན། སྲིན་མོ་སྨུག་ནག་ཐོད་རློན་འཆང་བ། ཚངས་མ་དམར་སེར་པདྨ་བསྣམས་པ། ལྷ་ཆེན་མོ་དཀར་ལྗང་ཏྲི་ཤུལ་འཛིན་པ། རྟོགས་འདོད་མ་སྔོན་མོ་འཁོར་ལོ་འཆང་བ། གཞོན་ནུ་མ་དམར་མོ་མདུང་ཐུང་འཕེན་པ། བརྒྱ་བྱིན་དཀར་མོ་ཨིནྡྲ་གདེངས་པའོ། །བཛྲ་པིང་ག་ལཾ་བྷྱོ། ཨ་མྲྀ་ཏཾ་བྷྱོ། ས་མྱ་བྷྱོ། དནྜ་དཾ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ལྷོ་སྟོད་ནས་རིམ་པ་བཞིན། རྡོ་རྗེ་མ་སེར་མོ་དུང་ཁྲག་འཐུང་བ། བདུད་རྩི་མ་དམར་མོ་པདྨ་བསྣམས་པ། ཟླ་བ་མ་དཀར་མོ་པུཎྜ་རི་ཀ་འཛིན་པ། བེ་ཅོན་མ་ལྗང་ནག་དབྱུག་ཐོ་འཕྱར་བ། སྲིན་མོ་དམར་མོ་དུང་ཁྲག་འཐུང་བ། ཟ་བ་མ་ལྗང་ནག་རྒྱུ་མ་འདྲེན་པའོ། །རཱ་ཏི་བཛྲ་བྷྱོ། རུ་ཏི་ར་མ་ཏྱ་བྷྱོ། ཨེ་ཀ་ཙ་རི་ཎི་བྷྱོ། མ་ནོ་ཧ་རཾ་བྷྱོ། སིདྡྷི་ཀཾ་བྷྱོ། བཱ་ཡ་བཱི་བྷྱོ། ནུབ་སྟོད་ནས་རིམ་པ་བཞིན། དགའ་བ་དམར་མོ་ཀ་ཏར་འཕྱར་བ། སྟོབས་ཆེན་མོ་གཤོལ་མདའ་འཛིན་པ། རྡོ་རྗེ་སེར་མོ་སྤུ་གྲིས་གཅོད་པ། འདོད་པ་དམར་མོ་མདའ་གཞུ་འགེངས་པ། ནོར་སྲུང་མ་དཀར་མོ་བུམ་པ་འཛིན་པ། རླུང་ལྷ་མ་སྔོན་མོ་བ་དན་འཕྱར་བའོ། །མ་ཧཱ་མཱ་ར་ཎ་བཛྲ་བྷྱོ། ཨགྣཱི་མ་བྷྱོ། བཱ་ར་ཧཱི་བྷྱོ། ཙ་མུ་ཎྜི་བྷྱོ། སུ་ཏ་ནི་བྷྱོ། བ་རུ་ཎི་བྷྱོ། བྱང་སྟོད་ནས་རིམ་པ་བཞིན། གསོད་བྱེད་མ་དཀར་མོ་རལ་གྲི་འཛིན་པ། མི་མོ་དམར་མོ་གསལ་ཤིང་འཕྱར་བ། ཕག་མོ་ནག་མོ་མཆེ་ཞགས་འཛིན་པ། རྒན་བྱེད་མ་དམར་མོ་ཞིང་ཆུང་ཟ་བ། སྣ་ཆེན་མ་དཀར་ལྗང་ཐོད་ཁྲག་འཐུང་བ། ཆུ་ལྷ་སྔོན་མོ་སྦྲུལ་ཞགས་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙ་ཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦྷོ་དྷ་ར་བྷྱོ། ཤར་སྒོར་རྡོ་རྗེ་ནག་མོ་ཆེན་མོ་ལྕགས་ཀྱུ་འཛིན་པ། ལྷོ་སྒོར་རྡོ་རྗེར་མོ་སེར་ནག་ཞགས་པ་འཛིན་པ། ནུབ་སྒོར་རྡོ་རྗེ་བུམ་སྣ་མ་དམར་ནག་ལྕགས་སྒྲོག་འཛིན་པ། བྱང་སྒོར་རྡོ་རྗེ་གསུས་འཛིན་མ་ལྗང་ནག་དྲིལ་བུ་འཁྲོལ་བ་སྟེ། ཐམས་ཅད་ཀྱང་གཏུམ་ཞིང་འཁྲོས་པ་དྲག་མོའི་ཉམས་ཅན་དུར་ཁྲོད་རོལ་པའི་ཆས་ཀྱིས་བརྒྱན་ཏེ། འདོད་དགུར་བསྒྱུར་བའི་རྣམ་རོལ་ཅིར་ཡང་འཆར་བ་མེ་དཔུང་འབར་བའི་དབུས་ན་གནས་པའི་ལྷ་ཐམས་ཅད་ཀྱི་སྲོག་གི་གོ ར་ཡེ་ཤེས་སེམས་དཔའ་དངས་མའི་སྲོག་ཡིག་དང་བཅས་པས་མཚན་པའོ། །ཧཱུྃ་ཧ་ཧེ་ཕཊ་བྷྱོ་རཾ་ཞེས་བརྗོད་པས་དཀྱིལ་འཁོར་གྱི་འཁོར་ལོ་ཐམས་ཅད་གསལ་བརྟན་སྒྲིབ་པ་མེད་པ་འབར་བའི་འོད་ཟེར་མཁའ་ཁྱབ་ཏུ་འཕྲོ་བའི་བདག་ཉིད་དུ་གནས་པར་བསམ་མོ། །གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་དྲུག་སྟེ། སྤྱན་དྲང་བ། མཆོད་པ་དབུལ་བ། བཤགས་པ་བྱ་བ། དངོས་གྲུབ་གསོལ་བ། དམ་བཅའ་བ། ཛཔ྄་བཟླ་བའོ། །དང་པོ་ལའང་ནང་གསེས་བཞིའི་དང་པོ་སྙམ་གསན་དབབ་པ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དངས་མིའི་ཐུགས་སྲོག་ཧཱུྃ་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་ལྔ་བཅུ་རྩ་བརྒྱད་སྒྱུ་འཕྲུལ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམས་ལ། ཧཱུྃ། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡིས། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག་ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་སྙན་གསན་ལ། གཉིས་པ་སྤྱན་དྲང་བ་དངོས་ནི། ཧཱུྃ། རྡོ་རྗེ་སྙིང་པོ་སྲིད་གསུམ་མགོན། །ཚོགས་རྗེ་ཚོགས་བདག་དཔལ་དང་ལྡན། །འཇིགས་བྱེད་འདུལ་བ་འཇིགས་པའི་གཙོ། །རྡོ་རྗེ་ཁྲག་འཐུང་གཤེགས་སུ་གསོལ། །ཐོད་རུས་འབར་བའི་དཀྱིལ་འཁོར་ནས། །མཁའ་འགྲོའི་ཚོགས་དང་ལོངས་སྤྱོད་ཅིང་། །གདུག་པ་མ་ལུས་འདུལ་མཛད་པ། །ཚོགས་ཀྱི་སློབ་དཔོན་གཤེགས་སུ་གསོལ། །ཐུགས་རྗེ་ཆེན་པོ་ཐབས་མཁས་པ། །གདུག་པ་འདུལ་ཕྱིར་གཤེགས་སུ་གསོལ། །ཡེ་ཤེས་རྟོག་པའི་ཁྱད་པར་ལས། །སྤྲུལ་པ་མང་པོའི་ཚོགས་དང་གཤེགས། །ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨེ་ཧྱེ་ཧི་ཨ་ན་ཡ་ཛཿཧཱུྃ་བྃ་ཧོཿ དམ་ཚིག་པའི་ཐུགས་ཀ་ནས་འོད་ཟེར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་རྣམ་པ་ཅན་དུ་འཕྲོས། ཡེ་ཤེས་ཀྱི་འཁོར་ལོ་བཀུག་བཅིངས་བསྡམས་ལ་དགྱེས་པ་བསྐྱེད་ནས། རཾ་ཞེས་པས་དམ་ཚིག་གི་དཀྱིལ་འཁོར་དང་མེ་རི་འདབས་འབྱར་དུ་བཞུགས་པར་བསམ་མོ། །གསུམ་པ་རིག་པའི་མེ་ཏོག་དོར་བ་ནི། ༀ་བཛྲ་ཀྲོ་དྷ་ས་མ་ཡ་ༀ། ཨཱཿབཛྲ་ཀྲོ་དྷ་ས་མ་ཡ་ཨཱཿ ཧཱུྃ་བཛྲ་ཀྲོ་དྷ་ས་མ་ཡ་ཧཱུྃ། སྭཱ་བཛྲ་ཀྲོ་དྷ་ས་མ་ཡ་སྭཱ། ཧཱ་བཛྲ་ཀྲོ་དྷ་ས་མ་ཡ་ཧཱ། ཞེས་བརྗོད་པས་རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། །བཞི་པ་དངོས་གྲུབ་བསྐུལ་བ་ནི། ༀ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོ། ཞེས་པས་ཡེ་ཤེས་ཀྱི་འཁོར་ལོ་དམ་ཚིག་གི་དཀྱིལ་འཁོར་ལ་དབྱེར་མེད་དུ་བསྟིམ་ནས། དམ་ཚིག་བསྐུལ་ཞིང་རང་དབང་དུ་བྱས་པ། ལྷ་རྣམས་རྗེས་ཆགས་ཀྱི་དགྱེས་པ་བསྐྱེད་ནས་དྲིན་ལན་གྱི་ཚུལ་དུ། ཨ་ལི་ཨུ་ལི་ཏཱ་ལི་ཏཱ་པ་ཨི་དཾ་ཥྚ་གོ་ནཱ་ར་ཏྲི་ཁ་རཾ་ཡོ་གི་ནཱི་ཁཱ་ཧི་ཧེ། ཞེས་མཆོད་ལ་ཧཱུྃ་ཧ་ཧེ་ཕཊ། ཅེས་བརྗོད་པས་གསལ་ཞིང་བརྟན་པར་བྱས་ལ། བཞུགས་སུ་གསོལ་བ་ནི། ཧཱུྃ། སེམས་ཅན་དོན་ཕྱིར་ནན་ཏན་མཆོག་བསྐྱེད་དེ། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །གཉིས་མེད་དོན་གྱི་དངོས་གྲུབ་མཆོག་གི་གནས། །བདག་ལ་གསལ་ཞིང་བརྟན་པར་བཞུགས་སུ་གསོལ། །ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཀཱ་ཡ་ཝཱཀྐ་ཙིཏྟ་ཏིཥྛ་བཛྲ། གཉིས་པ་མཆོད་པ་ལ་ཕྱག་དང་མཆོད་པ་གཉིས་ལས། དེ་གཉིས་གང་གི་ཚེ་ཡང་། རང་ཉིད་དཀྱིལ་འཁོར་གྱི་གཙོ་བོ་ལས་སྤྲུལ་པའི་ཧེ་རུ་ཀ་ཞལ་གཅིག་ཕྱག་གཉིས་པ་དཀྱིལ་འཁོར་གྱི་ཤར་སྒོར་འཁོད་པས་སེམས་ཅན་ཐམས་ཅད་དང་བྱ་བྱེད་ཐུན་མོང་དུ་གྱུར་པས་དེ་དང་དེའི་བྱ་བ་ལ་འཇུག་པར་མོས་ནས། དང་པོ་ཕྱག་འཚལ་བ་ནི། ཧཱུྃ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེར་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་ཉེར་གནས་ཤིང་། །ཐབས་དང་ཤེས་རབ་འབྲེལ་བའི་དཀྱིལ་འཁོར་ནས། །མཁའ་འགྲོ་མི་བཟད་འབར་བའི་སྤྲིན་སྤྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །ཨ་ཏི་པུ་ཧོ། པྲ་ཏི་ཙ་ཧོ། གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ཧཱུྃ། རྣམ་པར་པད་སྐོར། གྲོལ་བ་མཚོན་པའི་ཕྱིར། །དབུས་ཀྱི་པད་སྐོར། ཁྲོ་བོའི་ཕྱག་རྒྱ་ནི། །གཡས་དཀར་མཛུབ་བརྡ། གཡོན་དམར་དབུས་མཐིང་ཞལ། །སོ་སོའི་རྒྱ་སྟབས། རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །ཕྱི་སྐོར། དཔལ་ཆེན་ཡེ་ཤེས་ཐབས་གཡོན་དཀྲོལ། ཀྱི་རྒྱ། །ཤེས་པད་སྐོར། རབ་དབྱིངས་མའི་ཕྱག་རྒྱ་ནི། །ཞལ་གཅིག་པད་སྐོར། ཕྱག་གཉིས་སྐུ་མདོག་མཐིང་། །གཡས་པ་ཤེས་རབ་རང་ཕྱག་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཀྲོ་དྷི་ཤྭ་རཱི་དབྱིངས་ཀྱི་རྒྱ། །འབར་བའི་གདན་ལ་བཞེངས་ནས་ཀྱང་། །པད་སྐོར། མཆོད་བཞེས་དམ་བསྐང་དངོས་གྲུབ་སྩོལ། །རིགས་བཞི་ཁྲོ་བོའི་ཕྱག་རྒྱ་ལས། །བུདྡྷ་ཧེ་རུའི་ཕྱག་རྒྱ་ནི། །པད་སྐོར། གཡས་དཀར་གཡོན་སེར་དབུས་སྨུག་ཞལ། །འཁོར་ལོ་རྡོ་རྗེ་ཏི་ར་གཡས། །དྲིལ་བུ་དུང་དམར་ཏྲི་ཤཱུལ་གཡོན། །དཔལ་ཆེན་བུདྡྷ་ཐབས་ཀྱི་རྒྱ། །རཏྣ་ཧེ་རུའི་ཕྱག་རྒྱ་ནི། །གཡས་སྔོན་གཡོན་དམར་དབུས་སེར་ཞལ། །རིན་ཆེན་རྡོ་རྗེ་ཏི་ར་གཡས། །དྲིལ་བུ་དུང་དམར་དགྲ་སྟྭ་གཡོན། །དཔལ་ཆེན་རཏྣ་ཐབས་ཀྱི་རྒྱ། །པདྨ་ཧེ་རུའི་ཕྱག་རྒྱ་ནི། །གཡས་དཀར་གཡོན་སེར་དབུས་དམར་ཞལ། །པདྨ་རྡོ་རྗེ་ཏི་ར་གཡས། ། དྲིལ་བུ་དུང་དམར་རྔེའུ་ཆུང་གཡོན། །དཔལ་ཆེན་པདྨ་ཐབས་ཀྱི་རྒྱ། །ཀརྨ་ཧེ་རུ་ཕྱག་རྒྱ་ནི། །གཡས་དཀར་གཡོན་དམར་དབུས་ལྗང་ཞལ། །རྒྱ་གྲམ་རྡོ་རྗེ་ཏི་ར་གཡས། །དྲིལ་བུ་དུང་དམར་ཐོང་གཤོལ་གཡོན། །དཔལ་ཆེན་ཀརྨ་ཐབས་ཀྱི་རྒྱ། །རིགས་བཞིའི་ཡུམ་གྱི་ཕྱག་རྒྱ་ནི། །ཞལ་གཅིག་ཕྱག་གཉིས་རིགས་ཀྱི་མདོག །གཡས་པས་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཀྲོ་དྷི་རིགས་བཞི་དབྱིངས་ཀྱི་རྒྱ། །འབར་བའི་གདན་ལ་བཞེང ས་ནས་ཀྱང་། །མཆོད་བཞེས་དམ་བསྐང་དངོས་གྲུབ་སྩོལ། །གནས་མ་བརྒྱད་ཀྱི་ཕྱག་རྒྱ་ནི། །ག་རཱི་བྷན་དམར་ཞིང་དབྱུག་སྔོ། །ཙ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏ་བྱིས་ཟ་རྡོར་འཕྱར་ནག །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་དམར་དཀྲུག་འཐུང་ལྗང་། །སྨ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འདྲལ། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་སྡུབ་བཀན་སྦྱར། དམ་བསྐང་དངོས་གྲུབ་སྩོལ། །ཡུལ་མ་པད་སྐོར། བརྒྱད་ཀྱི་ཕྱག་རྒྱ་ནི། །སེངྷ་ཁ་རོ་བསྣོལ་སེང་སེར། །བྱཱ་གྷྲཱི་གནས་ལྷག་བསྣོལ་ཕྱིར། དམར་སྟག །སྲི་ལ་ནག་མོ་བྱིས་བལྡག་ཝ། །ཤྭ་ན་འདྲལ་ལྟ་མཐིང་ག་སྤྱང་། །གྲི་དྷ་མགྲིན་དམར་རྒྱུ་འདྲེན་རྒོད། །ཀངྐ་ཞིང་ཕྲག་སྣར་མགོ་རིང་། །ཀཱ་ཀ་ཁ་རོ་བྷན་གྲི་ནག །ཨུ་ལུ་ལྕགས་ཀྱུ་གཡས་མཛུབ་བཀུག ། མཐིང་ཚོགས་འུག །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་བསྐང་དངོས་གྲུབ་སྩོལ། །སྒོ་མ་བཞི་ཡི་ཕྱག་རྒྱ་ནི། །རྟ་གདོང་སྔོན་མོ་ལྕགས་ཀྱུ་རང་ཕྱག་འཛིན། །ཕག་གདོང་ནག་མོ་མཆེ་ཞགས་ཅན། །སེང་གདོང་དམར་མོ་ལྕགས་སྒྲོག་སྡོམ། །སྤྱང་གདོང་ལྗང་ནག་དྲིལ་འཁྲོལ་དགྱེས། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་བསྐང་དངོས་གྲུབ་སྩོལ། །འཇིག་རྟེན་འདས་པད་སྐོར། དང་མ་འདས་པའི། །ཡེ་ཤེས་ཐོབ་པད་སྐོར། པར་བྱ་བའི་ཕྱིར། །མ་མོ་རྣམས་པད་སྐོར། ཀྱི་ཕྱག་རྒྱ་ནི། །སྲིན་མོ་སྨུག་ནག་ཐོད་སྲིན་ལག་མིག་འབྲས་བྱ། རློན་འཆང་། །ཚངས་མ་དམར་སེར་པདྨ་བསྣམས། །ལྷ་ཆེན་དཀར་ལྗང་ཏྲི་ཤཱུ་ལ། །རྟོགས་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་ཐུང་འཕེན། །བརྒྱ་རྒྱུ་འདྲེན། བྱིན་དཀར་མོ་ཨིནྡྲ་གདེངས། །རྡོ་རྗེ་སེར་མོ་ཙན་དན་འཐུང་། །བདུད་རྩི་དམར་མོ་པདྨ་བསྣམས། །ཟླ་བ་དཀར་མོ་པུཎྜ་རི། །བཻ་ཅོན་ལྗང་ནག་དབྱུག་ཐོ་འཕྱར། །སྲིན་མོ་དམར་མོ་དུང་ཁྲག་འཐུང་། །ཟ་བ་ལྗང་ནག་བ་སུ་འདྲེན། །དགའ་བ་གཡས་གདེངས། དམར་མོ་ཀ་ཏར་འཕྱར། །སྟོབས་ཆེན་དཀར་མོ་གཤོལ་གཡོན་སྡིགས་མཛུབ་དང་གཡས་རྡོ་རྗེ་ཁུ་ཚུར། མདའ་འཛིན། །རྡོ་རྗེ་སེར་མོ་སྤུ་གྲིས་གཅོད། །འདོད་པ་དམར་མོ་མདའ་གཞུ་འགེངས། །ནོར་སྲུང་དཀར་མོ་བུམ་པ་འཛིན ། །རླུང་ལྷ་སྔོན་མོ་བ་དན་འཕྱར། །གསོད་བྱེད་དཀར་མོ་རལ་གྲི་འཛིན། །མི་མོ་དམར་མོ་གསལ་ཤིང་འཕྱར། །ཕག་གདོང་ནག་མོ་མཆེ་ཞགས་ཅན། །རྒན་བྱེད་དམར་མོ་ཞིང་ཆུང་ཟ། །སྣ་ཆེན་དཀར་ལྗང་ཐོད་ཁྲག་འཐུང་། །ཆུ་ལྷ་སྔོན་མོ་སྦྲུལ་ཞགས་ཅན། །རྡོ་རྗེ་ནག་མོ་ལྕགས་སྒོ་མ་བཞིའི་རང་ཕྱག །ཀྱུ་འཛིན། །རྡོ་རྗེ་སེར་མོ་ར་མགོ་ཞགས། །རྡོ་རྗེ་དམར་མོ་ལྕགས་སྒྲོག་སྡོམས། །རྡོ་རྗེ་ལྗང་ནག་དྲིལ་འཁྲོལ་དགྱེས། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་བསྐང་དངོས་གྲུབ་རྩོལ། །ཞེས་རིམ་པ་བཞིན་ལྷ་སོ་སོའི་ཕྱག་རྒྱ་མདུན་དུ་བཅའ་ཞིང་བསྒྱུར་བའི་མཐར། ཁུ་ཚུར་ཁ་སྦྱར་བརླ་གཡོན་སྟེང་དུ་འཇོག །ཡུམ་རྒྱ་གཡས་དང་ཡབ་རྒྱ་གཡོན་དུ་འགྲོལ་ལོ། །ཕྱག་རྒྱ་བཞིའི་མཚན་ཉིད་ནི་ཞི་བར་བཤད་པ་བཞིན་འདིར་ཡང་ངེས་པར་བྱའོ། །གཉིས་པ་ཀུན་བཟང་ནི། ༀ་ཧཱུྃ། བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེབྷྱཿ སརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་ནས་ཀྱང་། །འབར་བའི་གདན་ལ་བཞུགས་སུ་གསོལ། །ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷ་ནི་ག་ག་ན་ཁཾ་ས་མ་ཡེ་སྭཱ་ཧཱ། ཞེས་རིམ་པར་ཕྱག་ཞབས་བསིལ་ཞིང་ཞལ་དུ་གསོལ་བར་བསམ་མོ། །བཞི་པ་བཞི་བསྣོལ་ནི། སོ་སོའི་ཕྱག་རྒྱ་དང་བཅས། ༀ་ཧཱུྃ། སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་གདུགས་ཀྱིས་འགེངས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པ་རོལ། །ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཏུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ཨུཏྤལ་མཐིང་ག་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་ཤེས་རབ་ལས། །བཛྲ་པུཥྤེའི་མཆོད་པར་རོལ། །ༀ་པ་ན་པེཾ་པེ་ནུ་སོགས་ཀྱི་མཐར། ༀ་ཤྲཱི་བཛྲ་རཱ་ག་པུཥྤེ་པུ། །དབང་གི་ཕྱག་ན་སྒྲོན་མ་བསྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ་ཐབས་དང་ཤེས་རབ་ལས། །བཛྲ་ལོ་ཀེའི་མཆོད་པར་རོལ། །ༀ་པ་ན་པེཾ་སོགས། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱི། །ཙན་དན་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་ཤེས་རབ་ལས། །བཛྲ་གནྡྷེའི་མཆོད་པར་རོལ། །ༀ་པ་ན་པེཾ་སོགས་དང་། ༀ་ཤྲཱི་བཛྲ་རཱ་ག་གྷནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་པོ་སོ་སོ་ལ་ཐིམ་པར་བསམ་མོ། །ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ཅེས་བརྗོད་པས། སྐྱེས་དང་སྐྱེས་ལན་གྱི་ཚུལ་དུ་ལྷ་རྣམས་མཉེས། ལྷ་མོ་རྣམས་སླར་བྱུང་སྟེ་རང་གི་གནས་བཞིར་ཐིམ་པས་སྐུ་གསུང་ཐུགས་ཕྲིན་ལས་བཞིའི་དངོས་གྲུབ་ཐོབ་པར་བསམ་མོ། །ལྔ་པ་སྨན་མཆོད་ནི། ཧཱུྃ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་བསྒྲལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་གྱིས། །ཐུགས་དམ་དབྱིངས་ནས་བསྐང་བའི་ཕྱིར། །འདི་ནི་སྔོན་གྱི་ཐ་ཚིག་སྟེ། །སྐུ་གསུང་ཐུགས་ཀྱི་ངང་ཉིད་དུ། །བདག་ཅག་དད་པས་འབུལ་ལགས་ན། །བླ་མེད་འཕྲུལ་གྱི་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨྀ་མྲ་ཏ་ཁ་རཾ་ཁཱ་ཧི། ཞེས་སྤྱིར་དབུལ་ཞིང་བྱེ་བྲག་ཏུ་དཀོན་མཆོག་འགྲེལ་ལས། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོར་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཱཧི། ཞེས་དང་། ཀུན་བཟང་རིགས་ལྔ་རིགས་གསུམ་དྲ་མ་ལྔ། །ལུང་བསྟན་རྡོ་རྗེ་ཨུ་པ་རཱ་ཛ་དང་། །དྲང་སྲོང་བྷ་ཤི་པྲ་བྷ་ཧསྟི་ལ། །སྨན་མཆོད༴ སརྦ༴ རྒྱལ་དབང་པདྨ་ཀཱ་ར་གཉགས་ལོ་དང་། །སོག་པོ་ལྷ་དཔལ་གནུབས་ཆེན་སྲས་སློབ་བརྒྱུད། །ཤེས་རབ་མཆོག་དང་ཡེ་ཤེས་འབྱུང་གནས་ལ། །སྨན༴ སརྦ༴ གྲུབ་ཐོབ་ཟུར་ཆེན་ཟུར་ཆུང་ཀ་ཆེན་བཞི། །གསང་བདག་སྒྲོ་ཕུག་པཎ་ཆེན་རོང་པའི་ཞབས། །ཤཱཀྱ་འབྱུང་གནས་ཤཱཀ་འབྱུང་རྡོ་རྗེ་འོད། །སྨན་མཆོད༴ སརྦ༴ པུརྞྱཻ་དྷཱ་ཛ་ཆོས་སེང་བུདྡྷ་ཤྲཱི། །བསོད་ནམས་མགོན་པོ་སྒྲོལ་ཆེན་དགེ་འདུན་འབུམ། །ཤཱཀྱ་བཤེས་གཉེན་བྲ་བོ་ཆོས་འབུམ་ལ། །སྨན་མཆོད༴ སརྦ༴ རཏྣ་བྷ་དྲ་རྡོ་རྗེ་དཔལ་བཟང་པོ། །དན་འབག་གཞོན་ནུ་ཀུན་མཁྱེན་དྲི་མེད་འོད། །གཏད་རྒྱ་ལུང་རྫོགས་འཇིགས་མེད་གླིང་པ་ལ། །སྨན་མཆོད༴ སརྦ༴ མངོན་རྫོགས་རྒྱལ་པོ་ཁྲག་འཐུང་ཡབ་ཡུམ་བཅུ། །ག་རཱི་ཕྲ་མེན་གདོང་མོ་དབང་ཕྱུག་སོགས། །ལྔ་བཅུ་རྩ་བརྒྱད་འབར་བའི་དཀྱིལ་འཁོར་ལ། །སྨན་མཆོད༴ སརྦ༴ མདོར་ན་རབ་འབྱམས་དཀྱིལ་འཁོར་རྒྱ་མཚོའི་སྡེ། །གནས་ཡུལ་ཌཱཀྐི་དམ་ཅན་ཆོས་སྐྱོང་དང་། །ཞིང་སྐྱོང་གཞི་བདག་དཀར་ཕྱོགས་སྐྱོང་བའི་ཚོགས། །དུས་གསུམ་ཕ་མ་འགྲོ་བ་རིགས་དྲུག་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་གུ་ཧྱ་ལག་གི་ཕྱག་རྒྱས་གཏོར་བས་ཡེ་ཤེས་ཀྱི་བདུད་རྩིའི་ཟེགས་མ་མཁའ་ལ་སྤྲིན་བཞིན་དུ་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་ཐམས་ཅད་མཉེས་ཤིང་ཚིམས་པར་བསམས་ལ་མཐར་དངོས་གྲུབ་བླང་བ་ནི་རང་གི་ལྕེ་ལ་ཧཱུྃ་ཡིག་དང་། སྨན་གྱི་སྟེང་དུ་ༀ་ཨཱཿཧཱུྃ་གསུམ་བསྒོམས་ཏེ། ༀ་ཨཱཿཧཱུྃ་རྡོ་རྗེ་ལྕེ་ཡི་དམ་ཚིག་ལ། །རྡོ་རྗེ་ཅན་གྱི་འབྲུ་གསུམ་སྒོམ། །བདུན་རྩི་ལྔ་དང་སྦྱར་བའི་སྨན། མྱངས་ན་དངོས་གྲུབ་ཐོབ་པར་འགྱུར། །ༀ་སརྦ་ཏ་ཐཱ་ག་ཏ་ཀྭ་ཡ་སིདྡྷི་ༀ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། ༀ་ཧཱུྃ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཛཿཧཱུྃ་བཾ་ཧོཿ ཤྲི་ཧེ་རུ་ཀ་མ་ཧཱ་བཛྲ། ཨི་དཾ། དྷཱུ་པེ། པུཥྤེ། དཱི་པཾ། གནྡྷི། བ་ལིཾ་ཏ། པྲ་ཏཱིཙྪ་ཧོཿ ཤྲཱི་མཱ་ན་ཁ་ཁ་ཁཱ་ཧི་ཁཱ་ཧི། གཏོར་མ་འདོད་ཡོན་གྱི་ཕུང་པོ་ལས་འདོད་ཡོན་དྲུག་གི་ལྷ་མོ་དཔག་ཏུ་མེད་པ་བྱུང་ནས་ལྷ་རྣམས་དགྱེས་པ་བསྐྱེད་ཏེ་རང་ལ་ཐིམ་པར་བསམ་མོ། །བདུན་པ་བདུད་རྩི་གསང་ནན་གྱི་མཆོད་པ་ནི། བདུད་རྩི་བཟེད་ཞལ་དུ་ལན་གསུམ་འཕྱར་ཞིང་། ༀ་ཨཱཿཧཱུྃ། མི་བསྐྱོད་ཡེ་ཤེས་བདེ་བའི་མཆོག་དང་ལྡན་པའི་རོ་ལ་བསྣམ་དུ་གསོལ། །ཨ་ལ་ལ་ཧོ། བྱང་ཆུབ་སེམས་དཔའི་བདེ་མཆོག་དེ་ཉིད་འགོག་པ་རྣམས་ལས་བསླང་བའི་ཕྱིར། །ཆགས་པ་མེད་པའི་བདེ་མཆོག་ཀུན་ཏུ་མྱོང་མཛད་བཞེས་ཤིང་བསྣམ་དུ་གསོལ། །ༀ་ཨཱཿཧཱུྃ། མཆོག་ཏུ་གསང་བའི་བདེ་ལ་རོལ་ཞིང་དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་བདེ་བའི་གར་མཛོད་ཅིག །ཨ་ལ་ལ་ཧོ། ཞེན་ཅིང་ཆགས་པའི་མཐའ་ལ་ཉོན་མོངས་རྣོ་བརྐམ་གཟིར་བ་ཡི། །མྱོང་བྱེད་བདེ་མཆོག་བརྒྱད་དང་ལྡན་པས་ཐབས་ཀྱི་སྐུ་ལ་སྨྲེ་བར་མཛོད། །འགྲོ་ཀུན་ཚངས་པར་སྤྱོད་པའི་བྱང་ཆུབ་སྒོ་མོར་ལམ་སྟོན་ཅིག །བདེ་མཆོག་བདུད་རྩི་ཁྱད་པར་མེད་པའི་ཚོགས་ལ་བཀའ་སྩོལ་ཅིག །ཨ་ལ་ལ་ཧོ། ཞེས་དང་པོས་དཀྱིལ་འཁོར་པ་དགྱེས་པ་བསྐྱེད། གཉིས་པས་བྱང་ཆུབ་སེམས་དཔའི་བདེ་མཆོག་མ་རྟོགས་པའི་ཉན་ཐོས་རྣམས་འགོག་པ་ལས་བསླང་། གསུམ་པས་དེ་བཞིན་གཤེགས་པ་རྣམས་གཞན་དོན་ལ་བསྐུལ་ཞིང་གཏོར་མ་ལའང་སྤྲན་ནོ། །བརྒྱད་པ་རཀྟའི་མཆོད་པ་ཚར་གསུམ་ལས། དང་པོ་ནི། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་བཞེས་ནས་བསྣམ་དུ་གསོལ། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨཱ་བེ་ཤ་ཡ། ཨཱ་བེ་ཤ་ཡ། པྲ་བེ་ཤ་ཡ། པྲ་བེ་ཤ་ཡ། ཤྲཱི་བ་ན་ཁ་ཁ་ཁཱ་ཧི་ཁཱ་ཧི། ཞེས་དང་པོ་སྦྲེངས་པས་རཀྟའི་དངས་མ་ཡེ་ཤེས་ཀྱི་བདུད་རྩིའི་ངོ་བོར་སུམ་གཅིག་རོལ་བར་བསམ་མོ། །གཉིས་པ་ནི། ཧཱུྃ། ང་ནི་ཁྲག་འཐུང་ཆེན་པོ་སྟེ། །འཁོར་བའི་དྲྭ་བར་ཆགས་པ་ཡི། །དམར་ཆེན་བསྐྱིལ་བའི་རྒྱ་མཚོ་ལ། །འཁོར་ཀྱི་མཁའ་འགྲོ་རྣམས་དང་རོལ། །མ་རུངས་འདོད་ལ་མ་ཆགས་ཤིང་། །དམ་ཚིག་ལ་སྡང་དགྲ་ཆེན་རྣམས། །ཐུགས་རྗེ་བྱང་སེམས་ལྡན་པ་ཡིས། །ངོ་མཐོན་སྟོབས་ཀྱིས་བསྒྲལ་བར་བྱ། །ཛཿཧཱུྃ་བྃ་ཧོ ཿ ཤྲཱི་ཧེ་རུ་ཀ་མ་ཧཱ་བཛྲ། སརྦ་དུཥྚཾ་ས་མ་ཡ་མུ་དྲ་མཱ་ར། ཁ་ཁ། ཁཱ་ཧི། ཁཱ་ཧི། ཧྲི་ད་ཡ་པི་པ་ཧཱུྃ་ཕཊ། ཞེས་གཉིས་པ་སྦྲེངས་པས་རཀྟའི་ཁུ་བ་ཞིང་བཅུའི་དགྲ་བགེགས་ཀྱི་ངོ་བོར་སུམ་གཉིས་རོལ་པར་བསམ་མོ། །གསུམ་པ་ནི། ཧཱུྃ། ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་ཟ་བར་བྱའོ། །ཛཿཧཱུྃ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ་ས་མ་ཡ། མ་ཧཱ་མཱཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀེེཾ་ནི་རི་ཏི། མ་ཧཱ་པཉྩ་ཨ་མྲྀ་ཏ། མ་ཧཱ་ཨརྒྷཾ་པྲ་ཏཱིཙྪ་ཧོ། ཁ་ཁ་ཁ། ལེ་ལེ་ལེ། ཧཱུྃ་བྷྱོ། ཧཱུྃ་བྷྱོ། ཧཱུྃ་བྷྱོ། ཞེས་གསུམ་སྦྲེངས་པས་རཀྟའི་རྩིགས་མ་ཞིང་བཅུའི་དུག་གསུམ་ཤ་ཁྲག་རུས་པའི་དངོས་པོར་ལྷག་མེད་དུ་རོལ་བར་བསམ་མོ། །དགུ་པ་བསྒྲལ་མཆོད་ནི། རང་གི་ཐུགས་ཀ་ནས་རཾ་དཔག་ཏུ་མེད་པ་ཆད། རཾ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་ཞིང་། ཧཱུྃ། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །བཅུ་པ་སྦྱོར་མཆོད་ནི། ཡབ་ཀྱི་ནོར་བུ་ཧཱུྃ་ལས་རྩེ་ལྔ་པའི། །རྡོ་རྗེའི་དབྱིབས་ཅན་ཟླ་བར་ༀ་གྱིས་མཚན། །ཡུམ་གྱི་ཆོས་འབྱུང་མཾ་ལས་འདབ་བརྒྱད་ཀྱི། །པདྨའི་ཟེའུ་འབྲུ་ཉི་མར་མུཾ་གྱིས་མཚན། །ཡབ་ཀྱི་ས་མ་ཧོ་ཡིས་བརྡས་བསྐུལ་བས། །ཡུམ་གྱི་ས་མ་ཡ་སྟྭཾ་ལན་བཏབ་པ། །ཡབ་ཀྱིས་རཱ་ག་ཡ་ཧོའི་བརྡ་སྦྱར་བས། །ཡུམ་གྱིས་རཱ་ག་ཡ་མི་བརྡ་ཡིས་བསྐུལ། །ཛཿཧཱུྃ་བཾ་ཧོཿ བྷོ་དྷི་ཙིཏྟ་མ་ཧཱ་སུ་ཁ་ཧོ། ཞེས་དགའ་བ་བཞིའི་རོལ་མོས་སོ་སོར་རྟོག་པའི་ཡེ་ཤེས་སུ་སད་པར་བསམ་ཞིང་། ༀ། འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝཱ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུྃ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་། དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམས་པ་ནི་བླ་ན་མེད་པ་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ཀོ་ཊ་ཀྵ། ཀོ་ཊ་ག །ཀོ་ཊ་ཀོ་ཊ། ཀོ་ཊ་པཤྩ། ཀོ་ཊི་རཾ་ག །ཀོ་ལ་ཀྵ། ཀོ་ལ་པ། ཀོ་ལ་ཀོ་ལ། ཀོ་ལ་པཤྩ། ཀོ་ལ་བྷསྟ་ཐཱ། རྣམ་དག་སྒྲིབ་སྤངས་སྲིད་གསུམ་སྐྱོན་བྲལ་ཞིང་། །སྟོན་ཀའི་ཟླ་གསུམ་དྲི་མེད་ཞལ་མངའ་བ། །བཅོམ་ལྡན་བདེ་གཤེགས་ཐམས་ཅད་བསྐྱེད་པའི་ཡབ། །ཤེས་རབ་ལྷ་མོ་རིགས་ཀྱི་ཡུམ་རྣམས་དང་། །ཕྱག་བརྙན་ཁྲོ་གཏུམ་རྔམས་པའི་ཚོགས་དང་བཅས། །བསོད་ནམས་ཡེ་ཤེས་ཚོགས་ཀྱི་ཞིང་རབ་རྫོགས། །དགྱེས་པར་རོལ་ཅིག་མཆོད་པ་དམ་པ་འདི། །བཞེས་ཏེ་ཨ་ལ་ལ་ཡིས་དགྱེས་པར་མཛོད། །ཅེས་པས་བདུད་དང་ལོག་འདྲེན་རྣམས་ཚར་གཅོད་པ་དང་། མཁའ་ཁྱབ་ཀྱི་རྒྱལ་བ་དང་དཀྱིལ་འཁོར་གྱི་འཁོར་ལོ་ལ་བསྟོད་ཅིང་བསྐུལ་བ་དང་། ཆོས་ཀྱི་སྒྲ་རྣམས་མཐའ་ཡས་པ་སོ་སོའི་མོས་པ་བཞིན་འཆར་བར་མོས་ལ་རོལ་མོ་སྣ་ཚོགས་པའི་སྒྲ་སྦྱར་རོ། །བཅུ་གསུམ་པ་ཡེ་ཤེས་གླུའི་མཆོད་པ་གསང་བ་གསུམ་གྱི་ཡོན་ཏན་དྲན་པས་བསྟོད་པ་ནི། ཧཱུྃ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟང་ཡག་ཟ་བྱེད་ཆེ། །ཧོ། ཧཱུྃ། རྔམས་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་མཐོར་རླུང་གཡེང་བ་ཆེ། །ཧོ། ཧཱུྃ ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ། །ཧོ། ཧཱུྃ། ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། །ཧོ། ཧཱུྃ། བདུད་ཀུན་གྱི་ནི་བདག་ཆེན་པོ། །བདུད་ཀྱི་བདུད་བྱེད་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ། ཧོ། ཧཱུྃ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་སྟེ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། །ཞེས་བསྟོད་པར་བྱའོ། །གསུམ་པ་བཤགས་པ་བྱ་བ་ནི། ༀ་བཛྲ་ཨེ་ས་ཧུ། པེ་ས་ཧུ། ས་མ་ཡ་བྷཀྵ་ཧུ། རུ་ལུ་རུ་ལུ་ཧཱུྃ་བྷྱོ་ཧཱུྃ། ཛཿཧཱུྃ་བཾ་ཧོཿ ༀ་པྲ་ཏཱིཙྪ་ཧོ། ཞེས་མེ་ཏོག་དོར་བ་སྔོན་དུ་འགྲོ་བས། ཧོ། སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག །ཐབས་ལ་མཁས་པའི་བདག་ཉིད། སྒྲོལ་བའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉེན་པོ་མ་ནོར་བར་མནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་ཆག་དང་འགལ་འཁྲུལ་དུ་གྱུར་པ། ལྷ་ཉེ་བར་མ་བསྒོམས་པ། སྙིང་པོ་དག་པར་མ་བགྲངས་པ། སྦྱོར་བ་མང་པོས་བར་བསྐུམས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླར་འདས་པ། དམ་རྫས་ལག་ལེན་རྡོ་མ་ཐོགས་པ། ཛབ་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ། དེ་བཞིན་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། སེམས་ཅན་གྱི་སྤྱོད་པ་རང་ཐད་དུ་གྱུར་པ་དང་། ཁྱད་པར་དུ་སྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་གཉེན་པོ་མངོན་པར་མནོས་པ་ལས། ཉམས་ཤིང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས། ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། །བཞི་པ་དངོས་གྲུབ་གསོལ་བ་ནི། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་པ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡང་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པ། སྡང་བའི་དགྲ། གནོད་པའི་བགེགས། གདུག་པའི་དབལ། སྦྱོར་བའི་དུག །རྣོ་བའི་མཚོན། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་བཅུ། སོ་སོའི་རྨི་ལམ་ངན་པ་དང་། ལྟས་ངན་པ་མི་ཤིས་པའི་རྐྱེན་དེ་དག་ཐམས་ཅད་ཕྱིར་བཟློག་ཅིང་མིང་ཙམ་ཡང་མི་གྲགས་པར་ཞི་བ་ཆེན་པོ་མཛད་དུ་གསོལ། གལ་ཏེ་ཞི་བས་བསྒྱུར་དུ་མི་བཏུབ་པ་དག་དྲག་པོའི་ཕྲིན་ལས་ཀྱིས་དབང་དུ་བསྡུ་བ་དང་། གཟིར་ཞིང་གནན་པ་དང་། བསྒྲལ་ཞིང་སྤར་བ་ལ་སོགས་ཏེ། ཕྲིན་ལས་དྲག་ཐབས་རྣམ་པ་བཞིས་ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་བཞུགས་པ་རྣམས། །གཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མ དངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཞེས་འདོད་དོན་གསོལ། ལྔ་པ་དམ་བཅའ་ནི། ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏང་ན། །རྡོ་རྗེ་རྒྱལ་པོས་བྱིན་བརླབ་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབ། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །དྲུག་པ་ཛཔ྄་ལ་གསུམ་གྱི་དང་པོ་ཛཔ྄་ཁང་དབྱེ་བ་ནི། དབྱེ་གཞིའི་དཀྱིལ་འཁོར་ལེགས་པར་གསལ་བཏབ་ནས། བྷྲཱུྃ་བི་ཤྭ་བི་ཤུདྡྷེ་ཕཊ་ཛཿཧཱུྃ་ཧ་ཧེ་ཕཊ་བྷྱོ་རཾ་ཕཊ་ཛཿ ཞེས་བརྗོད་པས་དམ་ཚིག་གི་དཀྱིལ་འཁོར་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས། མདུན་གྱི་ནམ་མཁར་མེ་རི་འདབས་འབྱར་གྱི་ཚུལ་དུ་བཞུགས་པར་མོས་པའོ། །གཉིས་པ་ཛཔ྄་དངོས་བཟླ་བ་ནི། བདག་བདུན་གྱི་ལྷ་རྣམས་ཀྱི་ཡེ་ཤེས་སེམས་དཔའི་ཐུགས་ཀར་རྡོ་རྗེའི་ལྟེ་བར་ཉི་མའི་གདན་སྲན་ཟླུམ་ཙམ་གྱི་དབུས་སུ་རིགས་ལྔ་ལ་ཧཱུྃ། ག་རཱི་མ་བརྒྱད་ལ་ཧ། ཕྲ་མེན་བརྒྱད་ལ་ཧེ། སྒོ་སྐྱོང་བཞི་ལ་ཕཊ། དབང་ཕྱུག་མ་རྣམས་ལ་བྷྱོ། དེ་རྣམས་རུ་ལུ་འབྲུ་བརྒྱད་པའི་སྔགས་ཀྱི་ཕྲེང་བ་རེ་རེས་བསྐོར་བར་གསལ་བཏབ་ལ། སྔགས་ཟློས་པའི་ཚེ་བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་པ་སྟེ། བསྐྱེད་རིམ་ཆོས་ཀྱི་ཕྱག་རྒྱའི་དག་རྫོགས་སྨིན་གསུམ་ལ་ངེས་པ་རྙེད་པ། འཕྲོ་འདུ་ལས་ཀྱི་ཕྱག་རྒྱའི་སྦྱང་གཞི་སྦྱོང་བྱེད་ཀྱི་རྣམ་དག་དྲན་པ། འདའ་དཀའ་དམ་ཚིག་གི་ཕྱག་རྒྱའི་ངང་མཉམས་པ་ལྷར་སྣང་ཕྱག་རྒྱ་ཆེན་པོ་ལ་གསལ་བརྟེན་གྱི་ཚད་བརྒྱད་ཐོབ་པར་སློབ་བཞིན་པས། བཟླས་པའི་སྐྱོན་བཅུ་སྤངས་ཏེ། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ། མ་ཧཱ་ཀྲོ་དྷི་ཤྭ་རཱི་སྟྭཾ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་པས་མཚོན་ནས་རིགས་བཞི་དང་། གནས་ཡུལ་གྱི་མ་མོ་སྒོ་སྐྱོང་དབང་ཕྱུག་མ་རྣམས་སོ་སོའི་བསྐྱེད་སྔགས་ལ་རུ་ལུ་འབྲུ་བརྒྱད་སྦྱར་བ་གཙོ་འཁོར་གྱིས་འགྲོས་དང་སྦྱར་བས། བརྒྱ་དང་ཉེར་གཅིག་བདུན་སོགས་རིམ་པར་བཟླ་ཞིང་། སྤྱི་ཛཔ྄་ནི་རུ་ལུ་ཉིད་ལ་གཙོ་བོར་བྱའོ། །དེང་སང་རྒྱུད་སྡེ་ཆེན་པོའི་རིང་ལུགས་ལ་འཇུག་པ་ཉུང་ཡང་གལ་ཏེ་སྨིན་པར་སློབ་པ་བྱུང་སྲིད་ན་གྲངས་དུས་མཚན་མའི་བསྙེན་པ་སྤྱི་དང་མཐུན་པ་ངེས་རྫོགས་ལས་ཀྱང་བཤད་དོ། །གསུམ་པ་སྐབས་ཀྱི་མཇུག་བསྡུ་བ་ལ་གསུམ་ལས། དང་པོ་གཞི་བསྟོད་བྱ་བ་ནི། ཧཱུྃ་དུས་གསུམ་མི་འགྱུར་རྣམ་ཤེས་རྡོ་རྗེའི་སྐུ། །ཞེ་སྡང་མཐར་ཕྱིན་བཛྲ་ཧེ་རུ་ཀ །དབྱིངས་ནས་རྒྱས་འདེབས་བཛྲ་ཁྲོས་མའི་ཡུམ། །བཛྲ་ཧེ་རུ་ཀ་ལ་ཕྱག་འཚལ་བསྟོད། །མ་འགགས་རང་གསལ་གཟུགས་ཕུང་ཆོས་ཀྱི་སྐུ། །གཏི་མུག་མཐར་ཕྱིན་བུདྡྷ་ཧེ་རུ་ཀ །དབྱིངས་ནས་རྨོངས་སེལ་བུདྡྷ་ཁྲོས་པའི་ཡུམ། །བུདྡྷ་ཧེ་རུ་ཀ་ལ་ཕྱག་འཚལ་བསྟོད། །ཟ་བྱེད་གཏེར་ཚོགས་ཚོར་བ་རིན་འབྱུང་སྐུ། །ང་རྒྱལ་མཐའ་ཕྱིན་རཏྣ་ཧེ་རུ་ཀ །དབྱིངས་ནས་ཚེ་འཕེལ་རཏྣ་ཁྲོས་པའི་ཡུམ། །རཏྣ་ཧེ་རུ་ཀ་ལ་ཕྱག་འཚལ་བསྟོད། །ཆགས་མེད་དག་པ་འདུ་ཤེས་པདྨའི་སྐུ། །འདོད་ཆགས་མཐར་ཕྱིན་པདྨ་ཧེ་རུ་ཀ །དབྱིངས་ནས་རྫོགས་བྱེད་པདྨ་ཁྲོས་པའི་ཡུམ། །པདྨ་ཧེ་རུ་ཀ་ལ་ཕྱག་འཚལ་བསྟོད། །དོན་རྣམས་མཐར་ཕྱིན་འདུ་བྱེད་སྤྲུལ་པའི་སྐུ། །ཕྲག་དོག་མཐར་ཕྱིན་ཀརྨ་ཧེ་རུ་ཀ །དབྱིངས་ནས་ཟ་བྱེད་ཀརྨ་ཁྲོས་པའི་ཡུམ། །ཀརྨ་ཧེ་རུ་ཀ་ལ་ཕྱག་འཚལ་བསྟོད། །འཇིག་རྟེན་བཞད་པའི་དུར་ཁྲོད་གནས་བརྒྱད་ནས། །ཐུགས་མཆོག་རྣམ་དག་ཡེ་ཤེས་དཀར་མོའི་ཚོགས། །ཐུགས་རྗེ་ཆེན་པོའི་རྣལ་འབྱོར་གྲོགས་མཛད་མ། །གནས་ཀྱི་ག་རཱི་བརྒྱད་ལ་ཕྱག་འཚལ་བསྟོད། །ཡོན་ཏན་རྟགས་ཀྱི་དུར་ཁྲོད་གནས་བརྒྱད་ནས། །འཇིགས་བྱེད་རྩལ་འཕགས་སེང་གདོང་ཕྲ་མེན་ཚོགས། །ཐུགས་རྗེ་ཆེན་པོའི་རྣལ་འབྱོར་གྲོགས་འཛད་མ། །ཡུལ་གྱི་ཕྲ་མེན་བརྒྱད་ལ་ཕྱག་འཚལ་བསྟོད། །ཕྱིན་ཅི་ལོག་བཞི་དུར་ཁྲོད་གནས་བཞི་ནས། །ཚད་མེད་བཞི་ཡི་འགྲོ་བའི་དོན་མཛད་པའི། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །ཡེ་ཤེས་སྒོ་མ་བཞི་ལ་ཕྱག་འཚལ་བསྟོད། །ལྷ་ཆེན་རྣམས་ཀྱི་ཆུང་མ་དབང་མོའི་ཚོགས། །འཁོར་བའི་ཆོས་ལ་མངའ་བརྙེས་སྲིན་མོའི་གཟུགས། །མྱ་ངན་འདས་པའི་སྤྲུལ་སྐུ་མགོ་བརྙན་ཅན། །དབང་ཕྱུག་ཉི་ཤུ་བརྒྱད་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་འབར་བའི་སྐུར་སྟོན་པ། །ཁྲག་འཐུང་རོལ་པའི་ལྷ་ཚོགས་ལྔ་བཅུ་བརྒྱད། །གདོད་ནས་མ་སྐྱེས་རང་བྱུང་གྲུབ་པའི་ལྷ། །ཚེ་རབས་སྔོན་ནས་བསྒྲུབས་པའི་འཕྲོ་མཆིས་ཀྱི། །ད་ལྟ་ཉིད་དུ་བདག་ལ་མངོན་གྱུར་ཅིག །ཅེས་བསྟོད་ལ། གཉིས་པ་བཤགས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་མནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བཟླས་པས་ཉེས་བྱས་རྣམས་བཤགས། གསུམ་པ་ཛཔ྄་ཁང་བསྡུ་བ་ནི། རང་བཞིན་དང་ཏིང་ངེ་འཛིན་དབྱེར་མེད་དུ་རྟོགས་པའི་ཕྱིར། ༀ་བཛྲ་ཀྲོ་དྷ་ས་མ་ཡ་ཧཱུྃ། ༀབཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿ ཞེས་རིག་པའི་མེ་ཏོག་དོར་བ་དང་དངོས་གྲུབ་བསྐུལ་བ། ༀ་ཁྲོ་ལ་ཁྲོས་པས་སོགས་སྔར་བཞིན་བྱས་ནས། ཧཱུྃ། ཞེས་པས་ཡེ་ཤེས་ཀྱི་འཁོར་ལོ་དམ་ཚིག་གི་དཀྱིལ་འཁོར་ལ་གཉིས་མེད་དུ་བསྟིམ་ལ། གསལ་ཞིང་བརྟན་པའི་ཕྱིར་ཡི་གེ་བརྒྱ་པའང་བཟླའོ། །སྤྱི་དོན་གསུམ་པ་རྗེས་ཀྱི་རིམ་པ་ལ། ཚོགས་མཆོད། ཐུགས་དམ་བསྐུལ་བ། ཆད་བསྟན་སྐྱོང་བ། དངོས་གྲུབ་བླང་བ། ནོངས་བཤགས། ཉེར་བསྡུ། གོ་བསྒོ། ལུས་བསྲུང་། དགེ་བ་བསྔོ་བ་ཤིས་བརྗོད་དང་དགུའི་དང་པོ་ཚོགས་མཆོད་ལའང་དྲུག་གི། དང་པོ་བསང་སྦྱངས་བྱིན་བརླབ་ནི། ཧཱུྃ། དཔལ་ཆེན་ཐུགས་ལས་རཾ་ཡཾ་ཁཾ། །འཕྲོས་པས་ཚོགས་ཀྱི་དངོས་འཛིན་སྦྱངས། །སྣང་སྲིད་བདེ་ཆེན་ཀ་པཱ་ལར། །བཅུད་རྣམས་རིགས་ལྔའི་དམ་རྫས་གྱུར། །ༀ་ཨཱཿཧཱུྃ་ཧ་ཧོ་ཧྲཱིཿ གཉིས་པ་སྤྱན་འདྲེན་ནི། ཧཱུྃ། འོག་མིན་ཆོས་དབྱིངས་ཕོ་བྲང་དང་། །ཡན་ལག་བདུན་ལྡན་ལོངས་སྤྱོད་རྫོགས། །རང་བཞིན་སྤྲུལ་སྐུའི་ཞིང་ཁམས་ནས། །དཔལ་ཆེན་དཀྱིལ་འཁོར་ལྷ་ཚོགས་དང་། །གནས་དང་ཉེ་གནས་རྣམ་པར་གཉིས། །ཡུལ་ནི་རོལ་པ་ཉེ་ཡུལ་རོལ། །ཞིང་དང་ཉེ་བའི་ཞིང་དང་ནི། །འདུ་དང་ཉེ་བའི་འདུ་བ་དང་། །ཚནྡྷོ་ཉེ་བའི་ཚནྡྷོ་སྟེ། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོ་བསིལ་བའི་ཚལ། །ཨ་ཌི་ཡ་ནར་པདྨ་བརྩེགས། །ཟ་ཧོར་ཡུལ་ན་ཁུ་བྱུག་ཀློང་། །སེང་ངེའི་ཡུལ་ན་སྐུ་ལ་རྫོགས། །ཁ་ཆེའི་ཡུལ་ན་ཧེ་ཆེན་རོལ། །བལ་པོའི་ཡུལ་ན་ཡ་མ་ཁ། །ཐོ་གར་ཡུལ་ན་གསང་ཆེན་རོལ། །ལི་ཡུལ་འཇིག་རྟེན་མངོན་རྫོགས་ཏེ། །དུར་ཁྲོད་ཆེན་པོ་བརྒྱད་རྣམས་ན། །བཞུགས་པའི་དཔའ་བོ་མཁའ་འགྲོ་དང་། །ཤུགས་འགྲོ་རྣལ་འབྱོར་ཞིང་སྐྱོང་རྣམས། །ཚོགས་ལ་སྤྱན་འདྲེན་གཤེགས་སུ་གསོལ། །ཚོགས་ཁང་འདི་ནི་སྤྲུལ་པའི་ཞིང་། །ཚོགས་རྫས་འདོད་ཡོན་རོལ་བའི་རྒྱན། །ཐབས་དང་ཤེས་རབ་ལྕམ་དྲལ་ལྡན། །རྡོ་རྗེའི་གླུ་གར་བྱིན་རེ་ཆགས། །ཅང་ཏེའུ་དྲིལ་བུ་བསྙན་ཅིང་འཁྲོལ། །འདི་ནི་དམ་ཚིག་མཆོག་གི་གནས། །ཤགས་དང་རྩོད་པ་ཀུ་ཅོ་མེད། །རིག་པ་བརྟུལ་ཞུགས་ཉམས་དང་ལྡན། །དམ་ཚིག་འདི་ནི་དང་དུ་བཞེས། །མཆོག་དང་ཐུན་མོང་དངོས་གྲུབ་སྩོལ། །གུ་རུ་དྷེ་ཝ་ཌཱ ཀྐ་ཌཱ ཀྐི་ནི་དྷརྨ་པཱ་ལ་བཛྲ་ས་མ་ཡ་ཛཿ གསུམ་པ་ཚོགས་ཕུད་འབུལ་བ་ནི། ཧཱུྃ། སངས་རྒྱས་དམ་ཚིག་བླ་ན་མེད། །ཤ་ལྔ་བདུད་རྩི་རྣམ་པ་ལྔ། །བཟའ་བཅའ་བཏུང་བ་ཕྱི་ཡི་ཚོགས། །འདོད་ཡོན་ལྷ་མོ་རྣམ་པ་ལྔ། །དབང་པོའི་ལོངས་སྤྱོད་ནང་གི་ཚོགས། །བདེ་སྟོང་ཡེ་ཤེས་བླ་ན་མེད། །དགའ་བཞི་རྣམ་རོལ་གསང་བའི་ཚོགས། །དཀྱིལ་འཁོར་ལྷ་ལ་མཆོད་པ་འབུལ། །བཞེས་ནས་དབང་དང་དངོས་གྲུབ་སྩོལ། །ག་ཎ་ཙཀྲ་པཱུ་ཛ་ཧོ། བཞི་པ་བཤགས་པ་ནི། ཧཱུྃ། གང་ཞིག་འཁྲུལ་པར་གྱུར་པ་དེ་ནས་བཟུང་། །རྣམ་སྨིན་ལུས་ལ་རྟེན་པ་དེ་སྲིད་དུ། །མི་དགེ་བཅུ་དང་མཚམས་མེད་ཉེ་བ་ལྔ། །ལྕི་བ་བཅུ་དྲུག་ལོག་པ་བརྒྱད་ལ་སོགས། །ཐེག་པ་གསུམ་དང་རིག་པ་འཛིན་པ་ཡི། །སྡོམ་གསུམ་དམ་ཚིག་ཉམས་པ་མཐའ་དག་ཀུན། །ག་ན་ཚོགས་ཀྱི་འཁོར་ལོ་ལ་བརྟེན་ནས། །འཆབ་པ་མེད་པའི་སེམས་ཀྱིས་མཐོལ་ལོ་བཤགས། །དག་ཚངས་ཆེན་པོའི་དངོས་གྲུབ་སྩལ་དུ་གསོལ། །ཧེ་རུ་ཀའི་ཡིག་བརྒྱ་བཟླའོ། །ལྔ་པ་བསྒྲལ་བསྟབ་ནི། ཨེ་ལས་ཐར་མེད་སྲིད་པའི་འབྲུབ་ཁུང་ནང་། །མ་རིག་འཁྲུལ་པས་བཅིངས་པ་བདག་ལྟའི་དགྲ། །ཡེ་ཤེས་དབྱིངས་ལ་བསྒྲིབ་པའི་གཟུང་འཛིན་བགེགས། །དག་ཆེན་ཡེ་ཤེས་རིག་པའི་ལྕགས་ཀྱུས་ཟུང་། །མཉམ་པར་མ་བཞག་མེད་པའི་ཞགས་པས་ཆིངས། །ལྷག་མཐོང་ལུ་གུ་རྒྱུད་ཀྱི་དྲྭ་བས་སྡོམས། །རྗེས་ཐོབ་འཁྲུལ་པ་མེད་པའི་དྲིལ་བུས་མྱོས། །ཕུང་པོ་ལྔ་ཡི་ཉེ་བར་ལེན་པ་ཀུན། །བདག་མེད་རྟོགས་པའི་མཚོན་གྱིས་རྣམ་པར་གཏུབས། །སྐྱེ་མེད་ཁྲོས་པའི་ལྷ་ཚོགས་ཞལ་དུ་སྟོབ། །མཱཾ་ས། རཀྟ། ཙིཏྟ། གོ་རོ་ཙ་ན། བ་སུ་ཏ། ཀེེཾ་ནརྟི་ཏ་ན་ཙཀྲ་པཱུ་ཙ་ཁ་ཁ་ཁཱ་ཧི་ཁཱ་ཧི། དྲུག་པ་ལྷག་མ་ནི། ཞིང་ལྤགས་ཀྱི་སྟེང་དུ་བཞག་ལ། ཧེ་རུ་ཀའི་དམ་རྒྱས་ཁ་ཕྲུ་གདབ། ཨ་ཀཱ་རོས་བརླབ་ཅིང་། སྤྱུགས་གླུ་དང་བཅས། ཀྱེ། དང་པོ་ཕུད་ཀྱི་མི་མཆོད་རྒྱུ། །དཔལ་ཆེན་དཀྱིལ་འཁོར་ཚོགས་ཀྱི་བདག །བར་དུ་བཤགས་པ་མི་བགྱི་རྒྱུ། །རྣལ་འབྱོར་ལྡན་ལ་དམ་ཚིག་གཉན། །ཐ་མ་བསྒྲལ་བསྟབ་མི་བགྱི་རྒྱུ། །རྟོགས་པས་བདག་རྒྱུད་སྔོན་བསྒྲལ་ཕྱིར། །ད་ལྟ་ལྷག་མས་མི་མཆོད་རྒྱུ། །མ་ཚོགས་དབང་ཕྱུག་གིང་ལངྐ་། །ཕོ་ཉ་སུམ་བརྒྱ་དྲུག་ཅུ་སོགས། །ཀུན་ཀྱང་དཔལ་ཆེན་སྤྲུལ་པ་ཡིན། །ལྷག་མ་ཁ་ཆུས་མི་བྲན་རྒྱུ། །དམ་ཚིག་གཅིག་ཏུ་བསྲེ་བའི་ཕྱིར། །འབངས་ཐོག་རྗེ་ཡིས་མི་གནན་རྒྱུ། །ཅི་བཅོལ་ལས་ལ་བསྐུལ་བའི་ཕྱིར། །རྗེ་ལ་འབངས་ཀྱིས་མི་རྒོལ་རྒྱུ། །དྲག་ཤུལ་ལས་ཐབས་མྱུར་བའི་ཕྱིར། །ཧཱུྃ། རྣམ་དག་རང་བཞིན་ཞི་བ་ལས། །བཅོམ་ལྡན་དཔལ་ཆེན་སྤྲུལ་པ་ནི། །ཐབས་ཤེས་ཟླ་གསང་རོལ་བ་ལས། །དཀྱིལ་འཁོར་མུ་རན་སྐྱོང་བ་སྟེ། །ཁྱེད་ཅག་སྔོན་གྱི་ཡལ་གམ་ཅན། །ལག་ན་གློ་སྙིང་ནང་ཁྲོལ་ཐོགས། །ལེགས་ཉེས་སྟོང་འཛིན་ཚོགས་ཁང་ཉུལ། །མཐུ་དང་རྫུ་འཕྲུལ་དཔག་ཏུ་མེད། །སྔོན་ཚེ་དཔལ་ཆེན་ཧེ་རུ་ཀས། །དུག་གསུམ་རཱུ་ཏྲ་བསྒྲལ་བའི་ཚེ། །ཁས་བླངས་དམ་བཅས་དྲན་གྱིས་ལ། །སྲིན་མོའི་ཟ་ལམ་ཆེན་པོ་རུ། །ཕམ་ཕབས་ལོང་ལ་བསྟན་པ་སྲུངས། །བཅོལ་པའི་ཕྲིན་ལས་འགྲུབ་པར་མཛོད། །གཉིས་པ་ཐུགས་དམ་བསྐུལ་བ་ནི། ཧཱུྃ། མི་གནས་ཡེ་ཤེས་ཆོས་སྐུའི་ཕོ་བྲང་ནས། །ལོངས་སྤྱོད་རྫོགས་པ་ཞི་དང་ཁྲོ་བའི་ལྷ། །ཐུགས་དམ་བསྐུལ་ལོ་འགྲོ་བའི་དོན་ལ་དགོངས། །རིག་པའི་རང་བཞིན་བདེ་གཤེགས་སྙིང་པོ་ཡང་། །མ་རིག་འཛིན་པའི་ཀུན་གཞི་ལུང་མ་བསྟན། །སྒོ་ལྔའི་ཡུལ་དང་རྟེན་ཅིང་འབྲེལ་བ་ལས། །རིགས་དྲུག་རྒྱུད་ལྔའི་གནས་སུ་འཁྱམས་པ་རྣམས། །ལས་དང་ཉོན་མོངས་མཐུ་ཡིས་གཟིར་བའི་མཐུ། །ཕྱི་རོལ་ཡུལ་ལ་སྨིན་པའི་སྡུག་བསྔལ་དང་། །ནད་མཚོན་མུ་གེ་དགྲ་བགེགས་འབྱུང་པོའི་གདོན། །འཇིགས་པ་ཆེན་པོ་བརྒྱད་དང་བཅུ་དྲུག་ཀུན། །མངོན་སྤྱོད་དྲག་པོའི་རོལ་པས་ཚར་བཅད་ནས། །ལོག་རྟོག་དངོས་པོར་ཞེན་པའི་སེམས་ཅན་རྣམས། །རྒྱུ་འབྲས་ཐེག་པ་གཞན་གྱིས་འདུལ་དཀའ་བས། །རང་བྱུང་ཡེ་ཤེས་རྟོགས་པའི་ཕྲིན་ལས་མཛོད། །གསུམ་པ་ཆད་ཐོ་བསྒྲག་པ་ནི། ཧཱུྃ། དུས་གསུམ་རྣམ་དག་ཀུན་ཏུ་བཟང་པོའི་དུས། །མངོན་རྫོགས་ཡེ་ཤེས་དམ་པའི་འོག་མིན་དུ། །ཀུན་གཞི་ཡིད་ཆོས་དག་པའི་སྟོན་པ་ཡིས། །རང་སྣང་རང་བཞིན་མེད་པའི་འཁོར་ཚོགས་ལ། །རྒྱལ་བ་དགོངས་བརྒྱུད་རྫོགས་པའི་ཡོ་ག་གསུམ། །བརྡ་ཚིག་བརྗོད་པ་བྲལ་བར་བསྟན་པའི་ཚེ། །གྲགས་ཆེན་གསལ་བའི་སྟོན་པ་བཅུ་གཉིས་དང་། །དགའ་རབ་དཔའ་བོ་གསང་འཛིན་རྡོ་རྗེ་ཆོས། །བརྡ་རྒྱུད་རིག་འཛིན་གྲུབ་པ་མཆོག་རྣམས་ཀྱིས། །སྟོན་འཁོར་དགོངས་པ་གཅིག་པའི་དབང་ཐོབ་བཞིན། །ཚོགས་བརྒྱད་རང་འགྲོལ་གཏོར་མ་འདི་བཞེས་ལ། །འཁྲུལ་པ་གཞི་ལ་དག་པའི་ཕྲིན་ལས་མཛོད། །དེ་རྗེས་གསང་སྔགས་བསྟན་པ་བྱུང་བའི་ཚེ། །འོག་མིན་དགའ་ལྡན་རི་རབ་ལྷུན་པོའི་རྩེ། །ལྷ་གནས་གསུམ་དུ་གྲགས་པའི་གནས་མཆོག་དང་། །ཤམྦྷ་ལ་དང་ཨོ་རྒྱན་ཟ་ཧོར་ཡུལ། །སིངྒ་ལ་དང་གནམ་ལྕགས་འབར་བའི་རྩེ། །མཆོད་རྟེན་ཆེན་པོ་བདེ་བྱེད་བརྩེགས་པ་རུ། །རིག་འཛིན་སྡེ་སྣོད་མཐའ་དག་བབས་པའི་ཚེ། །འཇིག་རྟེན་འཇིག་རྟེན་འདས་པའི་མཁའ་འགྲོ་དང་། །དཀྱིལ་འཁོར་མུ་རན་སྐྱོང་བ་ཐམས་ཅད་ཀྱིས། །གཏོར་མ་ལེན་ཞིང་ལེགས་ཉེས་སྟངས་འཛིན་པའི། །ཁས་བླངས་དམ་བཅའ་བཞིན་དུ་ཕྲིན་ལས་མཛོད། །ཅེས་བཤལ་ཆུས་གཏོར་མར་བྲན་ཏེ་བསྟན་མ་སྐྱོང་བ་ནི། བྷྱོ། ཚོགས་དང་བཀའ་ཡི་བདག་ཉིད་ནི། །ཁྲག་འཐུང་རྡོ་རྗེ་ནམ་མཁའི་ཡུམ། །གངས་རི་ཅན་གྱི་ཡུལ་ལྷ་ནི། །བདུད་དང་གནོད་སྦྱིན་སྨན་མོ་བཞི། །ཚུར་སྤྱོན་ཚུར་སྤྱོན་གཏོར་མ་ལོང་། །རྟེན་འབྲེལ་ཡན་ལག་བཅུ་གཉིས་དང་། །དུས་སྦྱོར་བཅུ་གཉིས་གནས་དག་པས། །བལ་བོད་མཚམས་ན་ཚེ་རིང་མ། །ལ་སྟོད་རྡོ་རྗེ་གཡའ་མ་སྐྱོང་། །གནོད་སྦྱིན་གངས་ལ་ཀུན་བཟང་མོ། །འབྲོག་ཆེན་འཁོར་འདུལ་བགེགས་ཀྱི་གཙོ། །ཇོ་མོ་གངས་རར་སྤྱན་གཅིག་མ། །བྱང་ན་མཁའ་ལྡིང་ཀླུ་མོ་རྒྱལ། །ཁ་རག་རྡ་ོརྗེ་ཁྱུང་བཙུན་མ། །རྨ་ཆེན་སྤོམ་རར་དྲག་མོ་རྒྱལ། །ཀོང་བཙུན་དེ་མོ་བོད་ཁམས་སྐྱོང་། །འབྲོག་བཙན་རྡོ་རྗེ་སྨན་གཅིག་མ། །ཇོ་མོ་ནགས་རྒྱལ་གཡར་མོ་བསིལ། །དབུས་ན་རྡོ་རྗེ་ཐུ་ལེ་སྨན། །ཀུན་ཀྱང་པདྨའི་བཀའ་ཉན་ཏེ། །དམ་ལ་གནས་ཤིང་རིགས་ལ་འགོ། །ཐ་ཚིག་བཞིན་དུ་གཏོར་མ་ལོངས། །མཐའ་ཡི་དམག་དང་རྒྱ་འདྲེའི་འཚུབ། །མུ་སྟེགས་འགྱུ་བའི་སྒོ་འཕྲང་དང་། །འགོང་པོ་སྤུན་དགུའི་ནད་དལ་སྲུངས། །རྟག་ཆད་ཐར་པར་འཁྲུལ་པ་ཡི། །འཇིག་ཚོགས་ལྟ་བ་དབུ་མར་བཟློག །བདེན་དོན་རྣམ་པ་བཅུ་གཉིས་ཀྱི། །བསྟན་པ་རྒྱས་པའི་ཕྲིན་ལས་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རག་མ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། གཏོར་གཞོང་རི་རབ་ཏུ་བསམ་པ་ཁ་སྦུབ་ལ། ཧཱུྃ། དམ་སྲི་བྱ་བའི་སྡིག་ཅན་ཁྱོད། །འགྲོ་བ་ཡོངས་ཀྱི་རྒྱུད་ལ་རྒོལ། །བྱང་ཆུབ་སེམས་ཀྱི་བརྟུལ་ཞུགས་བྲོས། །མནན་ནོ་སྟོང་ཆེན་འོག་ཏུ་མནན། །གཏད་དོ་ཆུ་སྲིན་གྲེ་བར་གཏད། །བསྒྱུར་རོ་གཤིན་རྗེའི་ཁ་རུ་བསྒྱུར། །བསྲེག་གོ་ཡེ་ཤེས་མེ་ཡིས་བསྲེག །བདག་ཏུ་བལྟ་བ་མ་ཞིག་བར། །བསྐལ་པ་ཞིག་ཀྱང་མི་གཏོང་ངོ་། །ༀ་ཨཱཿཧཱུྃ་སྟམྦྷ་ཡ་ལཾ་ནན། བཞི་པ་དངོས་གྲུབ་བླང་བ་ནི། མཆོད་ཅིང་བསྟོད་ལ། བྱིན་རླབས་ཀུན་གྱི་རྩ་བ་བླ་མ་ནི། །དངོས་གྲུབ་སྩོལ་ཕྱིར་དཔལ་ཆེན་རོལ་པའི་ལྷ། །རྣམ་ཐར་སྒོ་གསུམ་ཐུགས་ཀྱི་དཀྱིལ་འཁོར་ནས། །རང་བཞིན་ཡོངས་གྲུབ་བྱང་ཆུབ་སེམས་ཀྱི་དངོས། །ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ། །ས་བཅུ་ལམ་ལྔ་དབང་བཅུ་ཕྱི་ནང་གཉིས། །རིག་འཛིན་བཞི་དང་སྐུ་ལྔ་ཡེ་ཤེས་ལྔ། །གྲུབ་ཆེན་བརྒྱད་དང་ཕྲིན་ལས་རྣམ་པ་བཞི། །འཁོར་བའི་རང་བཞིན་གློ་བུར་སྒྲིབ་པ་གཉིས། །ཀུན་གཞིའི་ཁམས་ལ་བག་ལ་ཉལ་གྱི་ཚུལ། །ཤིན་ཏུ་རྣམ་དག་རྣམ་ཀུན་མཆོག་ལྡན་གྱི། །དངོས་གྲུབ་དམ་པ་དེང་འདིར་སྩལ་དུ་གསོལ། །རྩ་སྔགས་མཐར། དྷརྨ་ཀཱ་ཡ། སམྦྷོ་ཀཱ་ཡ། ནིརྨ་ཀཱ་ཡ་ཙིཏྟ་སིདྡྷི་ཕ་ལ་ཧཱུྃ། ཞེས་སྒྲུབ་རྫས་རྣམས་གནས་གསུམ་དུ་གཏུག་ཅིང་མྱོང་། སླར་ཡང་གཏང་རག་གི་མཆོད་བསྟོད་བྱས་ལ། ལྔ་པ་ནོངས་བཤགས་ནི། ཧོ། སྔགས་ཀྱི་དངོས་གྲུབ་མ་ལུས་པ། །དམ་ཚིག་ཉིད་ལ་བརྟེན་གྱུར་ཀྱང་། །རྨོངས་དང་མ་རིག་ཉོན་མོངས་པས། །ཟིལ་གྱིས་ནོན་པ་བདག་ཅག་ནི། །ཉེས་པ་དུ་མའི་སྣོད་ལགས་ཏེ། །མགོན་པོ་ཐུགས་རྗེ་ཆེ་རྣམས་ཀྱི། །ཐུགས་ལ་ཁྲོ་བ་མི་མངས་ཡང་། །ལེགས་ཉེས་སྟངས་འཛིན་བདག་པོ་རྣམས། །སྐྱོན་མཐོང་ཙམ་ན་ཆད་པ་གཅོད། །འགལ་ཞིང་ནོངས་པ་ཅི་མཆིས་པ། །མཐོལ་ལོ་བཤགས་སོ་ཚངས་པར་སྩོལ། །ཡི་གེ་བརྒྱ་པ་ལན་གསུམ་གྱི་སྙིང་ནས་བཤགས་པར་བྱའོ། །དྲུག་པ་ཉེར་བསྡུ་ནི། ཧཱུྃ། སྣོད་བཅུད་ལྷ་དང་གཞལ་ཡས་སུ། །ཤར་བ་དག་པའི་སྣོད་བཅུད་ཀྱང་། །རྟེན་ཉིད་བརྟེན་པ་ལྷ་རྣམས་ཀྱང་། །གཙོ་བོ་ལ་ཐིམ་དེ་ཡང་ཧཱུྃ། །ཞབས་ཀྱུ་ནས་བཟུང་ནཱ་དའི་བར། །རིམ་ཡལ་གདོད་མའི་གཤིས་སུ་ཨཱཿ ཞེས་མཉམ་པར་བཞག །བདུན་པ་སྤྱོད་ལམ་གྱི་རྣལ་འབྱོར་ནི། སླར་ཡང་རིག་པ་བྱང་ཆུབ་སེམས། །རྗེས་ཐོབ་གཉུག་མའི་ཧེ་རུ་ཀཿ ཕྱག་རྒྱ་གཅིག་པའི་གནས་གསུམ་དུ། །ཡི་གེས་མཚན་པས་རྣམ་རྟོག་སྲུངས། །བཛྲ་རཀྵ་ཧཾ། ཞེས་གོ་བགོ། ཡི་གེ་བརྒྱ་པས་བརྟན་པར་བྱ། བརྒྱད་པ་སྨོན་ལམ་ནི། ཧཱུྃ། སྣང་གྲགས་རིག་པ་དཀྱིལ་འཁོར་གསུམ་གྱི་ངང་། །བསོད་ནམས་ཡེ་ཤེས་རིམ་གཉིས་རྣལ་འབྱོར་ཚོགས། །མི་གནས་ཡེ་ཤེས་མྱ་ངན་འདས་པར་བསྔོ། །ཀུན་ཀྱང་དཔལ་ཆེན་གོ་འཕར་ཐོབ་པར་ཤོག །ལན་གསུམ། དགུ་པ་ཤིས་བརྗོད་ནི། ཧཱུྃ། གདོད་མའི་མགོན་པོ་རིགས་ལྔ་གངས་ཆེན་མཚོ། །སྐུ་སྔ་ལྷུན་རྫོགས་སྤྲུལ་པའི་ཞིང་ཁམས་ལ། །བསྐལ་བཟང་སངས་རྒྱས་སྟོང་རྩ་བྱོན་པ་ཡི། །སྒྲོན་མའི་བསྐལ་པ་བཟང་པོའི་བཀྲ་ཤིས་ཤོག །སྟོང་གསུམ་མི་མཇེད་རྡོ་རྗེ་ཐེགས་པའི་ཞིང་། །འཕུར་འགྲོའི་བསྟན་པ་འབྱུང་གནས་ཨོ་རྒྱན་ཡུལ། །གངས་རིའི་ཁྲོད་དུ་འབོད་པ་ཁྲི་སྲོང་རྗེའི། །ཐུགས་བསྐྱེད་བསྟན་པ་མཐའ་རྒྱས་བཀྲ་ཤིས་ཤོག །འཛམ་གླིང་ས་ཡི་ལྟེ་བ་རྡོ་རྗེའི་གདན། །པཎ་གྲུབ་ཆོས་རྒྱལ་འཛོམ་པ་ཆོས་འཁོར་གསུམ། །མདོ་སྔགས་བསྟན་པ་དར་བ་གངས་ཅན་ལྗོངས། །རྒྱལ་བསྟན་ཡུན་དུ་གནས་པའི་བཀྲ་ཤིས་ཤོག །ཅེས་དང་། བསྔོ་སྨོན་གྱིས་མཐའ་རྒྱས་པར་བྱའོ། །རྒྱུད་ཆེན་སྒྱུ་འཕྲུལ་དྲྭ་བ་བསྒྲུབ་པའི་ཐབས། །རྒྱ་གཞུང་རྣམས་ནི་བརྗོད་བྱེད་ཉུང་ལ་དམ། །དཔལ་ལྡན་ཟུར་པའི་གཞུང་ལུགས་ཆུ་ལྷར་ཕྱོགས། །དོན་ལ་གཡེལ་དང་བྱིན་རླབས་ཞུད་པའི་ཚེ། །འབབ་ཆུའི་རྒྱུན་ལྟར་བཀླགས་པས་དོན་གྲུབ་བསྡེབས། །རྒྱལ་བའི་ཆོས་འཁོར་གསུམ་གྱི་འབྲས་བུའི་དོན། །འོག་མིན་ཆེན་པོ་ཐོག་མཐའ་མེད་དུས་ནས། །རྒྱལ་བའི་དགོངས་པ་རིག་འཛིན་བརྡས་བརྒྱུད་པ། །ལུང་བསྟན་རྡོ་རྗེའི་ཆོས་ཆར་ཆེན་པོ་ཉིད། །རྒྱུད་ཀྱི་དངོས་པོ་བཅུ་དང་ཕྱག་རྒྱ་བཞིའི། །ཆིངས་ཀྱིས་སྐྱེ་གནས་བཞི་ཡི་གནས་སྦྱོར་ཞིང་། །རིག་འཛིན་རྣམ་བཞིའི་གོ་འཕང་ལ་སྦྱོར་བ། །རྡོ་རྗེའི་སྡེ་སྣོད་ལས་གཞན་ལྟར་སྣང་ཆེས། །ཉང་སྨད་ས་ཡི་ཐིག་ལེ་རྒྱལ་བྱེད་ཚལ། །ཐེག་པ་མཆོག་གི་གླིང་དེ་སྒྲ་དང་དོན། །མཚུངས་པར་བསྔགས་པའི་བྱེད་པོ་འདི་ཉིད་ཕྱིར། །སྔ་འགྱུར་བསྟན་པའི་ཉིན་བྱེད་འབར་གྱུར་ཅིག །རིག་འཛིན་འདུས་པའི་ཚོགས་རྗེས་བསྐུལ་ངོར་རྫོགས་ཆེན་པ་རང་བྱུང་རྡོ་རྗེས་སོ།། །།

སྒྱུ་འཕྲུལ་དྲྭ་བ་ཁྲོ་བོའི་སྒྲུབ་ཐབས་བདེ་ཆེན་ཆར་འབེབས་ཀྱི་སྙིང་པོའི་དོན་བསྡུས། པདྨ་བཛྲ།

སྒྱུ་འཕྲུལ་དྲྭ་བ་ཁྲོ་བོའི་སྒྲུབ་ཐབས་བདེ་ཆེན་ཆར་འབེབས་ཀྱི་སྙིང་པོའི་དོན་བསྡུས་བཞུགས་སོ། །བླ་མ་དང་གཉིས་སུ་མེད་པ་དཔལ་ཧེ་རུ་ཀ་ལ་ཕྱག་འཚལ་ལོ། །སྲིད་ཞིར་མི་གནས་ཤེས་རབ་ཆེན་པོའི་གདངས། །གདུལ་དཀའི་འགྲོ་ལ་ཐུགས་རྗེ་རབ་ཁྲོས་པ། །འཇིགས་རུང་ཉམས་བརྒྱའི་གར་གྱིས་སྲིད་པ་གསུམ། །འཇིགས་བྱེད་བླ་མ་ཧེ་རུ་ཀ་དེས་སྐྱོངས། །མཁའ་སྤྱོད་མེ་རི་འབར་བའི་ཕོ་བྲང་དུ། །ཁྲག་འཐུང་མངོན་རྫོགས་རྒྱལ་པོའི་ཞལ་བལྟ་ཕྱིར། །སྔོན་བྱོན་རིག་འཛིན་བྱེ་བའི་གཤེགས་ཤུལ་ལ། །འཇུག་འདོད་སྐལ་བཟང་རྣམས་ཀྱི་དོན་ཆེད་དུ། །མཁའ་འགྲོ་མི་བཟད་འབར་བའི་སྤྲིན་འཕྲོ་བའི། །ཚོགས་ཀྱི་དཀྱིལ་འཁོར་ཆེན་པོའི་ཏིང་འཛིན་གྱི། །གསང་ལམ་རྡོ་རྗེའི་ཐེམ་སྐས་འདི་སྦྱིན་གྱིས། །གཡེལ་མེད་བརྩོན་པས་འདི་ལ་འབད་པར་འོས། །དེ་ལ་འདིར་སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་སྙིང་པོར་དྲིལ་ཏེ་བསྙེན་པའི་ལས་བྱང་ཉུང་གསལ་གཏེར་ཆེན་ཆོས་ཀྱི་རྒྱལ་པོའི་གསུང་ལས་ཉེ་བར་བསྡུས་ཏེ་བཀོད་པ་ལ། སྒྲུབ་པ་པོ་འདི་ཉིད་དཀྱིལ་འཁོར་དུ་ཞུགས་ཤིང་ཕྱི་ནང་གསང་བའི་དབང་ཐོབ་པ། རྩ་བ་དང་ཡན་ལག་གི་དམ་ཚིག་ལ་ཡང་དག་པར་གནས་པ། སྒྲུབ་འབྲས་གནས་སྐབས་སུ་རིག་འཛིན་བཞི་དང་། མཐར་ཐུག་མི་སློབ་པའི་ཟུང་འཇུག་ཧེ་རུ་ཀའི་གོ་འཕང་དོན་དུ་གཉེར་བ་རྣམས་ཀྱིས་སྒྲུབ་པའི་ཐབས་འདི་ལ། སྔོན་འགྲོ་དང་། དངོས་གཞི། རྗེས་དང་གསུམ་མོ། །དང་པོ་ལ་བདུན་གྱི། དང་པོ་བྱ་བའི་སྔོན་འགྲོ་ནི། དུར་ཁྲོད་དང་རི་བོ་དབེན་པ་ལ་སོགས་པ་བསམ་གཏན་དང་རྗེས་སུ་མཐུན་པའི་གནས་ཁང་མཛེས་པར་བརྒྱན། རྟེན་དང་ཕྱི་ནང་གི་མཆོད་གཏོར་ལ་སོགས་མཁོ་བའི་ཡོ་བྱད་རྣམས་ཚོགས་པར་བཤམས་ནས། བདེ་བའི་སྟན་ལ་འདུག་གོ། །གཉིས་པ་རྒྱུད་སྦྱང་བ་ནི། རང་གི་སྙིང་གའི་ཧཱུྃ་གི་འོད་ཟེར་གྱིས་རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་དཔལ་ཧེ་རུ་ཀ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །ཞེས་ལན་གསུམ་ལ་སོགས་པས་རྒྱུད་དག་པར་བྱས་ལ། ཚོགས་ཞིང་རྣམས་རང་ལ་བསྡུས་ཏེ་གནས་ལུགས་སྤྲོས་བྲལ་སྟོང་པ་ཉིད་ཀྱི་ངང་ལ་མཉམ་པར་བཞག་པར་བྱའོ། །གསུམ་པ་མཚམས་བཅད་པ་ལ། མཚན་མེད་དང་། མཚན་བཅས་གཉིས་ལས། དང་པོ་ནི། ཧཱུྃ་ཞེས་བརྗོད་པས། འདི་ལྟར་གཟུང་བ་དང་འཛིན་པས་བསྡུས་པ་མཚན་མའི་དམིགས་ཡུལ་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུར་བསྒོམས་པས་ཐ་མལ་གྱི་བདེན་འཛིན་བསལ་ལོ། །གཉིས་པ་ནི། འདིར་ཁྲོ་བོ་འཆོལ་བའི་མཚམས་གཅོད་གླེང་གཞི་ལྟར་འབྱོར་བར་སྣང་གསུངས་པ་བཞིན་འཇུག་བདེ་བས། སྟོང་པའི་ངང་ལས་བཛྲ་མ་ཧཱ་ཤྲཱི་ཧེ་རུ་ཀ་ཞེས་བརྗོད་པས་བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་བརྗོད་པས་ཐུགས་ཀའི་ཧཱུྃ་ལས་ཁྲོ་བོའི་སྤྲིན་སྤྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་པ་ལས་སྟེང་འོག་ཕྱོགས་མཚམས་བཅུར་ཉི་མ་ལ་གནས་པའི་ཕྱོགས་སྐྱོང་བཅུའི་སྙིང་གར། ༀ་བཛྲ་ཀྲོ་དྷ་ཀཱི་ལ་ཡ་ཕཊ་ཛཿ ཞེས་ཕུར་བུའི་ཚུལ་དུ་བཏབ་པ་རྣམས་ཁྲོ་བོ་བཅུར་གྱུར་པ་ནི། ༀ་ཧཱུྃ་ཀཱ་ར་བཛྲ་མ་ཧཱ་ཀྲོ་དྷ་ཧཱུྃ་ཧཱུྃ་ཕཊ། དེ་བཞིན་དུ། ཧཱུྃ་ཀཱ་རའི་ཚབ་ཏུ། བི་ཛ་ཡ། ནཱི་ལ་དཎྜ། ཡ་མཱནྟ་ཀ །ཨཱརྻ་ཨ་ཙ་ལ། ཧྱ་གྲཱི་ཝ། ཨ་པ་རཱ་ཛི་ཏ། ཨ་མྲྀ་ཏ་ཀུནྜ་ལཱ། ཏྲཻ་ལོཀྱ་བི་ཛ་ཡ། མ་ཧཱ་བ་ལ་རྣམས་བཅུག་སྟེ། ཞེས་བརྗོད་པའི་རྐྱེན་གྱིས་རིམ་པ་བཞིན། སྟེང་དུ་ཧཱུཾ་མཛད། ཤར་དུ་རྣམ་རྒྱལ། མེར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། རླུང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ལ་སྨད་ཕུར་བུ་འབར་བས་བགེགས་ལ་གཟིར་བ། དེ་རྣམས་ལས་སྤྲུལ་པ་ཡང་སྤྲུལ་མཚོན་ཆ་སྣ་ཚོགས་དང་བཅས་པའི་འོད་ཟེར་རྣོན་པོ་འཁྲུག་ཅིང་འབར་བ་སྲུང་བའི་འཁོར་ལོས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་མོ། །བཞི་པ་བཤགས་པ་ནི། བཛྲ་ས་མཱ་ཛཿ བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མེད་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབས་ཀྱང་མི་བགྱིད། སྔར་བྱས་ཀྱི་གཉེན་པོ་རྣལ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། ཧཱུྃ། ཡེ་ཤེས་སྐུ་མཆོག་གམ། བསྡུ་ན། ཡེ་ནས་མཉམ་ཉིད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ། །ཞེས་བརྗོད་པས་སྡིག་སྒྲིབ་དག་པར་བསམ། ལྔ་པ་དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་དང་ལྷག་བསམ་བརྟན་པོས། སྤྲོ་ན། རྣལ་འབྱོར་དབང་པོ་དང་། བསྡུ་ན། ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །ཀུན་རྫོབ་དང་ནི་དོན་དམ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །ཞེས་བརྗོད། དྲུག་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ༀ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་པའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦིར་ཞིང་། ཧཱུྃ་ཧཱུྃ་ཧཱུྃ་ཧཱུྃ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ། བདུན་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ༀ་མ་ཧཱ་ཀྲོ་དྷཱི་ཤྭ་རཱི་སརྦ་དྲ་བྱཾ་བི་ཤྭ་དྷ་ནི་ཧཱུྃ་ཕཊ་ཀྱིས་བསང་། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་ཧེ་རུ་ཀར་གསལ་བའི་ཐུགས་ཀའི་ཧཱུྃ་ལས། ཨ། དྷཱུ། པུ། ཨཱ། གན་རྣམས་འཕྲོས། སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ཎ་ཧཱུྃ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ་མཆོད་པའི་ལྷ་མོ་ཁྲུས་གཞོང་དང་སྤོས་ཁང་མནྡྷ་རའི་མེ་ཏོག་ལ་སོགས་པ་ཐོགས་པས་ནམ་མཁའ་གང་བ་རྣམས་སུ་གྱུར་པར་བསམ་ལ་བྱིན་གྱིས་བརླབ། དེ་ནས་བདུད་རྩི་བསང་། རཾ་ཡཾ་ཁཾ། སྟོང་པའི་ངང་ལས་བདུད་རྩིའི་སྣོད་དུ་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་གྱི་ས་བོན་གྱིས་མཚན་པ་རྣམས་འོད་དུ་ཞུ་ནས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་གྱི་སྐུར་གྱུར་ཏེ་དེ་རྣམས་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བ་ལ། ༀ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བ་དང་རྭ་རྣམས་སུ་རྟ་མགྲིན་ཡུམ་བཞི་དང་བཅས་པ་གསལ་བར་གྱུར། ༀ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་མོ། །གཡོན་པའི་མཐེབ་སྲིན་གྱི་རྡོ་རྗེས་བདུད་རྩིར་རེག་ལ། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཞེས་བཟླས་ཤིང་གཡོན་སྐོར་དུ་དཀྲུགས་ཏེ། ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད་པས། ཡུམ་བཞི་བདུད་རྩི་ལ་ཐིམ་པར་བསམ་མོ། །གཏོར་མ་བསང་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ༀ་གྱིས་མཚན་པར་གྱུར། ༀ་བ་ལིངྟ་ཏེ་ཛྭ་བ་ལིངྟ་བ་ལ་བ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར། རཀྟ་བསང་སྦྱངས། སྟོང་པའི་ངང་ལས་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱཿ ཆགས་མེད་རཀྟའི་རྒྱ་མཚོ་རྦ་རླབས་འཁྲུགས་པས་ནམ་མཁའ་གང་བར་བསམ་མོ། ཤིན་ཏུ་བསྡུ་ན་སྔགས་རྣམས་ལན་གསུམ་གསུམ་བརྗོད་པས་ཀྱང་འགྲུབ་བོ། །གཉིས་པ་དངོས་གཞི་ལ། ཁྱར་པར་གྱི་སྦྱོར་བ་དགོས་ཆེད་ཀྱི་སྒོ་ནས་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་གཉིས། དང་པོ་ནི། དེ་བཞིན་གཤེགས་པ་ཐམས་ཅད་གདུག་པ་ཅན་གྱི་ཡུལ་ལ་ཐུགས་རྗེ་ཆེན་པོས་ཆེར་ཁྲོས་ནས་འདུལ་བར་མཛད་པ་བཞིན་དུ། ཤིན་ཏུ་གདུག་ཅིང་གཏུམ་པའི་འགྲོ་བ་རྣམས་ལ་རྗེས་སུ་ཆགས་པའི་སྙིང་རྗེ་ཆེན་པོ་རྡོ་རྗེ་ཁྲོ་བོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ་འཁོར་དུ་ལྡང་བར་བགྱིའོ་སྙམ་པས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་དང་། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་པས་དམ་བཅའ་ཞིང་སེམས་བསྐྱེད་དོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །འདི་ལྟར་སྣང་བའི་ཆོས་ཐམས་ཅད་དམིགས་མེད་སྤྲོས་པ་དང་བྲལ་བའི་སྟོང་པ་ཉིད་དུ་བསྒོམ་པའོ། །ཀུན་སྣང་ནི། ཨེ་མའོ་ཀུན་ཏུ་བཟང་པོ་ནི། །བདེ་ཆེན་སྤྲོས་བྲལ་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེས་མཁའ་ཁྱབ་ཀུན་ཏུ་སྣང་བར་བསྒོམ་པའོ། །རྒྱུའི་ཏིང་ངེ་འཛིན་ནི། ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡི། །འཇིགས་པ་ཡི་ནི་དུས་ལྟར་དྲག །ཅེས་པས། རང་རིག་སྣང་སྟོང་གཉིས་སུ་མེད་པའི་རང་བཞིན་ཧཱུྃ་ཡིག་མཐིང་ག་གསལ་ཞིང་འབར་བར་གྱུར། སྥ་ར་ཎ་ཕཊ། དེ་ལས་འོད་ཟེར་ཧཱུྃ་གི་རྣམ་པ་ནམ་མཁའ་གང་བར་འཕྲོས། དོན་གཉིས་བྱས། སཾ་ཧ་ར་ཎ་ཧཱུྃ། མཁའ་ཁྱབ་ཀྱི་ཧཱུྃ་རྣམས་གཞིའི་ཧཱུྃ་ལ་ཐིམ། དེ་འོད་དུ་ཞུ་བ་ལས་བཛྲ་ཧཱུྃ་ཞེས་བརྗོད་པས། རྡོ་རྗེ་སྔོན་པོ་རྩེ་དགུ་པར་གྱུར། སྥ་ར་ཎ་ཕཊ། དེ་ལས་འོད་ཟེར་འཕྲོས། དོན་གཉིས་བྱས། སཾ་ཧ་ར་ཎ་ཧཱུྃ། ཚུར་འདུས་འོད་དུ་ཞུ་བ་ལས། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། ཅེས་བརྗོད་པས། རྒྱུའི་ཧེ་རུ་ཀ་སྐུ་མདོག་སྨུག་ནག་ཅིར་ཡང་འགྱུར་བ། རྡོ་རྗེ་དང་དུང་ཁྲག་འཛིན་པ་འབར་བའི་གར་དགུ་དང་ལྡན་པར་བསམ་མོ། །གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། རྒྱུའི་ཧེ་རུ་ཀའི་ཧཱུྃ་ལས། ཨེ་ཡཾ་ར་སུཾ་ཀེཾ་རཾ་རྣམས་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོས་འདུས་འོད་དུ་ཞུ་བ་ལས་རིམ་པ་བཞིན། ཨེ་ལས་ནམ་མཁའ་ཆོས་ཀྱི་འབྱུང་གནས་གྲུ་གསུམ་འབྱམས་ཀླས་པའི་དབྱིངས་སུ། ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ་གཡོ་བའི་བ་དན་གྱིས་མཚན་པ། ར་ལས་རཀྟའི་རྒྱ་མཚོ་དམར་པོ་ཟླུམ་པོ་རྦ་རླབས་འཁྲུགས་པ། སུཾ་ལས་ཞིང་ཆེན་གྱི་ས་གཞི་སྨུག་ནག་གྲུ་བཞི་པ། ཀེཾ་ལས་ཀེང་རུས་ཀྱི་རི་རབ་སྔོ་སྐྱ་གྲུ་བཞི་བང་རིམ་བཞི་དང་ལྡན་པ། རཾ་ལས་མེའི་དཀྱིལ་འཁོར་དམར་ནག་ནམ་མཁའི་མཐའ་ཀླས་པར་འབར་བར་བསམ་ལ། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུག་པའི་དཀྱིལ། །ཀེང་རུས་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཞེས་པས་གསལ་གདབ་ཅིང་། དེ་དག་ཀྱང་ཕྱི་ལྟར་ན་འབྱུང་བ་ལྔ། ནང་ལྟར་ན་ཡེ་ཤེས་ལྔའི་རང་བཞིན། གསང་བ་ལྟར་ན་ཡུམ་ལྔའི་མཁའ་རྣམ་པར་དག་པའོ། །གཉིས་པ་རྟེན་གཞལ་ཡས་ཁང་བསྒོམ་པ་དངོས་ནི། རི་རབ་ཀྱི་སྟེང་དུ་རྒྱུའི་ཧཱུྃ་ལས་བྷྲཱུྃ་སྨུག་ནག་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ། ཡེ་ཤེས་རིན་པོ་ཆེའི་བྷཉྫ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་བར་ཁྱམས་གཉིས་དང་ལྡན་པའི་ཕྱི་མའི་རྩིག་པ་རིམ་པ་ལྔ་དང་ནང་རྩིག་པ་རིམ་པ་གསུམ་པ་སྟེ། གཉིས་ཀའང་ཐོད་པ་སྐམ་རྙིང་རློན་གསུམ་ཁྲག་ཞག་གི་འདམ་གྱིས་བརྩིགས་ཤིང་གནམ་ལྕགས་ཨུརྨོའི་གཟེར་གྱིས་གཏམས་པ་སོགས་དུར་ཁྲོད་རོལ་པའི་གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ་དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པའི་ཕྱི་རོལ་སྲུང་བའི་ཁོར་ཡུག་གི་ནང་དུ་རུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད་ཀྱི་བཀོད་པ་འཇིགས་སུ་རུང་བས་ཕྱོགས་ཐམས་ཅད་ཡོངས་སུ་གང་བར་བསམ་ལ། ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པའི། །ཕྱི་དང་ནང་མེད་ཀུན་ཏུ་ནང་། །འཁོར་བའི་འཁོར་ལོའི་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླས་བརྗིད། །འབར་བའི་འཕྲོ་བ་མང་པོ་འཁྲུག །ཅེས་གསལ་གདབ། གསུམ་པ་གདན་བསྐྱེད་པ་ནི། གཞལ་ཡས་ཁང་གི་དབུས་ཀྱི་ལྟེ་བ་དང་འཁོར་ལོ་རྩིབས་བཞི་ལ། སྣ་ཚོགས་པདྨའི་ལྟེ་བར་ཟླ་བ་དང་ཉི་མའི་དཀྱིལ་འཁོར་བརྩེགས་པ་རེ་རེ། དེ་རྣམས་ཀྱི་སྟེང་དུ། དབུས་སུ་ལྷ་ཆེན་པོ་དབང་ཕྱུག་དང་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གདོན་སྦྱིན་རྣམས་རང་རང་གི་ཆུང་མ་དང་བཅས་པའི་ཕོ་རྣམས་ཁ་སྦུབ་དང་མོ་རྣམས་གན་རྐྱལ་བྱི་ཆིངས་སུ་བསྣོལ་བ། དེ་རྣམས་ཀྱི་སྟེང་དུ། དབུས་སུ་གཏུམ་པ་དོམ། ཤར་དུ་ཁྱུ་མཆོག །ལྷོར་མ་ཧེ། ནུབ་ཏུ་གཟིག །བྱང་དུ་སྟག་རྣམས་ཟུང་རེ་རེས་ཕོ་རྣམས་ཀྱི་སོག་ཕྲག་དང་། མོ་རྣམས་ཀྱི་ནུ་ཕྲག་ནས་ནན་ཏུར་དུ་བརྫིས་པ། འཁོར་ལོའི་གྲྭ་བཞི་དང་། གྲུ་ཆད་བཞི། ཁྱམས་ནང་མའི་ཕྱོགས་མཚམས་བརྒྱད། སྒོ་བཞི་རྣམས་སུ་ཉི་མ་ལ་གནས་པའི་ཞིང་གི་གདན་རེ་རེ། ཁྱམས་ཕྱི་མའི་ཕྱོགས་རེར་དྲུག་དྲུག་དང་། སྒོ་བཞི་རྣམས་སུ་ཞིང་སྐམ་པོའི་གདན་རྐྱང་པ་རེ་རེ། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱིས་སྤར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་གསལ་གདབ་བོ། །གཉིས་པ་བརྟེན་པ་ལྷ་བསྐྱེད་པ་ལ་གཉིས་ཏེ། ཧེ་རུ་ཀར་བསྐྱེད་ནས་སྙོམས་འཇུག་བྱ་བ་དང་། ངོ་མཚར་སྲས་ཀྱི་དཀྱིལ་འཁོར་སྤྲོ་བའོ། །དང་པོ་ནི། ནམ་མཁར་གནས་པའི་རྒྱུའི་ཧེ་རུ་ཀ་དབུས་ཀྱི་གདན་ལ་བཞུགས་པ་ལས། དེ་ཉིད་དཔལ་ཆེན་པོ་སྐུ་མདོག་སྨུག་ནག་ཅིར་ཡང་འགྱུར་བ། དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པར་གྱུར་ཏེ། དེ་བཞིན་ཉིད་ཀྱི་དབྱིངས་ཉིད་ནས་ཁྲོ་མོ་དབང་ཕྱུག་ཆེན་མོ་མངོན་དུ་ཕྱུངས་ཏེ། ཧི་ཧི་ཞེས་དགྱེས་པའི་མདངས་ཀྱིས་ཡབ་ལ་བཏུད་ཅིང་། པདྨ་རྒྱས་པར་མཛད་ནས་གཉིས་སུ་མེད་པར་འཁྲིལ་བའི་དགྱེས་པས་རོལ་པར་བསམ། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུངས་ཏེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བས་དགྱེས་པར་ཐིམ། །ཞེས་བརྗོད་པས་གསལ་གདབ། གཉིས་པ་ལ། སྔགས་ཀྱི་སྤྲུལ་པ་སྤྲོ་བ། དེ་རིགས་ལྔར་བསྡུ་བ། འཁོར་གྱི་དཀྱིལ་འཁོར་བསྐྱེད་པའོ། །དང་པོ་ནི། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས་ཡབ་ཡུམ་གཉིས་ཀྱི་སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ལས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཁྱབ་པར། ཁྲོ་བོ་འཆོལ་བ་མཚོན་ཆ་སྣ་ཚོགས་ཀྱི་ཆར་འབེབས་པ་དཔག་ཏུ་མེད་པ་སྤྲོས། ལྟས་ཆེན་པོ་བཅོ་ལྔས་གདུག་པ་ཅན་གྱི་ཚོགས་ཐམས་ཅད་ཚར་བཅད་པར་བསམ་མོ། །གཉིས་པ་དངོས་དང་། ཡན་ལག་གི་ལྷ་བསྒོམ་པའོ། །དང་པོ་ནི། མཁའ་ཁྱབ་ཀྱི་ཁྲོ་བོའི་སྤྲིན་རྣམས་སླར་འདུས་པ་ལས། རྡོ་རྗེའི་རིགས་ཀྱི་ཁྲོ་བོ་རྣམས་རང་ལ་ཐིམ་པས་འབྲས་བུའི་ཧེ་རུ་ཀར་གྱུར་པ་ནི། ༀ་བཛྲ་ཤྲཱི་ཧེ་རུ་ཀ་ཧཱུྃ། བཛྲ་ཀྲོ་དྷཱི་ཤྭ་རཱི་སྟྭཾ། བདག་ཉིད་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་། ཉི་མ་བྱེ་བའི་གཟི་བྱིན་འབར་བ། དབུ་གསུམ་གྱི་གཡས་ཞལ་དཀར་ལ་བཞད་པ། གཡོ་ཞལ་དམར་ལ་གཤེ་བ། དབུས་ཞལ་མཐིང་ནག་དྲག་པོར་ཁྲོས་པའི་ཉམས་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། རྣམ་པར་འགྱུར་བའི་ཞལ་གདངས་ཤིང་མཆེ་བ་གཙིགས་པ། གློག་ལྟར་འཁྱུག་པའི་ལྗགས་འདྲིལ་ཞིང་རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུྃ་སྒྲ་འབྱིན་པ། རྫི་སྨིན་སྨ་ར་ལས་འབར་བའི་མེ་འཁྱོག་པོར་སྤྲོ་བ། སྐུ་ཆེ་ཞིང་ཡན་ལག་རགས་པ། ལང་ཚོ་རྒྱས་པའི་འགྱུར་བག་ཅན། རྡོ་རྗེའི་བ་སྤུས་གཏམས་པ། སྒེག་པ་དཔའ་བ་མི་སྡུག་པ། རྒོད་དང་གཤེ་དང་འཇིགས་སུ་རུང་། སྙིང་རྗེ་རྔམས་དང་ཞི་བ་སྟེ། གར་གྱི་ཉམས་དགུས་རབ་ཏུ་རྒྱས་པ། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་དྲིལ་བུ་འཛིན་པས་ཡུམ་ལ་འཁྱུད་པ། གཉིས་པས་རྡོ་རྗེ་རྩེ་ལྔ་དང་། བྷཉྫ་དམར་གྱིས་གང་བ་ཐོགས་པ། གསུམ་པས་ཞིང་གི་དབྱུག་པ་དང་སྟོང་གི་འཇིག་རྟེན་འདེགས་པ། ཞབས་བཞི་བརྐྱང་ཞིང་། གཡོན་བསྐུམ་པའི་གྱད་ཆེན་པོའི་སྟབས་ཀྱིས་རང་གི་སྟན་ལ་རོལ་པ། དབུ་རེ་རེ་ལ་ཐོད་པ་སྐམ་པོ་ལྔ་ལྔ་རིགས་ལྔའི་ཅོད་པན་ཅན་གྱིས་དབུ་བརྒྱན་པ། ཁྲག་འཛག་པའི་མགོ་བོ་ལྔ་བཅུའི་དོ་ཤལ་དང་། ཐོད་པ་ཚལ་བུའི་དཔུང་རྒྱན་ཅན། ཞིང་ཆེན་གྱི་གཡང་གཞི་དང་། གླང་པོ་ཆེའི་ཀོ་བ་རློན་པས་སྟོད་གཡོགས་ཤིང་། སྟག་གི་ལྤགས་པའི་ཤམ་ཐབས་གྲོལ་བ། ཀླུ་རྒྱལ་རིགས་དཀར་པོས་སྐྲ་ཆིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུལ་ཆུ། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་ཕྱག་ཞབས་ཀྱི་གདུ་བུ་སྟེ། ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཀྱིས་མཚན་པ་སྟེ་དུར་ཁྲོད་རོལ་པའི་ཆས་བརྒྱད་དང་། དཔལ་གྱི་ཆས་བཅུ་སྐུ་ལ་རྫོགས་ཤིང་། སྙན་གོང་ནས་ཉི་ཟླའི་འོད་ཟེར་སྤྲོ་བ། ཡུམ་ཀྲོ་དྷཱི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ། གཅེར་བུ་སྐྲ་གྲོལ་ཞིང་ལང་ཚོས་སྒེག་པའི་ཉམས་འགྱུར་ཅན། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་ཐོད་པ་ཁྲག་གིས་གང་བ་གཙོ་བོའི་ཞལ་དུ་སྟོབ་པ། གཟིག་གི་ལྤགས་པའི་ཤམ་ཐབས་སོགས་དུར་ཁྲོད་རོལ་པའི་ཆས་ཅན། ཞབས་གཡོན་བརྐྱང་ཞིང་། གཡས་བསྐུམ་པས་གཙོ་བོ་དང་དགྱེས་པར་འཁྲིལ་བ། སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན། བསྐལ་པའི་མེའི་ཕུང་པོ་རབ་ཏུ་འབར་བའི་ཀློང་ན་ཁམས་གསུམ་པའི་དབང་ཕྱུག་ཆེན་པོའི་ངོ་བོར་བཞུགས་པའོ། །དེ་ནས། དེ་བཞིན་གཤེགས་པའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་ཀྱི་ཁྲོ་བོའི་ཚོགས་རྣམས་སོ་སོར་འདུས་པ་ལས་རིགས་བཞིའི་ཧེ་རུ་ཀར་གྱུར་ནས་འཁོར་ལོའི་རྩིབས་བཞིར་རང་རང་གི་གདན་ལ་བཞུགས་པ་ནི། ༀ་བུདྡྷ་ཤྲཱི་ཧེ་རུ་ཀ་ཧཱུྃ། བུདྡྷ་ཀྲོ་དྷཱི་ཤྭ་རཱི་སྟྭཾ། ཤར་གྱིི་རྩིབས་ལ། བུདྡྷ་ཧེ་རུ་ཀ་སྐུ་དང་རྩ་ཞལ་སྨུག་ནག །གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་འཁོར་ལོ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཏྲི་ཤཱུལ་འཛིན་པ། ཡུམ་བུདྡྷ་ཀྲོ་དྷཱི་ཤྭ་རཱི་མ་སྨུག་ནག་དང་མཉམ་པར་སྦྱོར་བ། ༀ་རཏྣ་ཤྲཱི་ཧེ་རུ་ཀ་ཧཱུྃ། རཏྣ་ཀྲོ་དྷཱི་ཤྭ་རཱི་སྟྭཾ། ལྷོའི་རྩིབས་ལ་རཏྣ་ཧེ་རུ་ཀ་སྐུ་དང་རྩ་ཞལ་སེར་ནག །གཡས་སྔོ་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་དགྲ་སྟྭ་འཛིན་པ། ཡུམ་རཏྣ་ཀྲོ་དྷཱི་ཤྭ་རཱི་མ་སེར་མོ་དང་མཉམ་པར་སྦྱོར་བ། ༀ་པདྨ་ཤྲཱི་ཧེ་རུ་ཀ་ཧཱུྃ། པདྨ་ཀྲོ་དྷཱི་ཤྭ་རཱི་སྟྭཾ། ནུབ་ཀྱི་རྩིབས་ལ་པདྨ་ཧེ་རུ་ཀ་སྐུ་དང་རྩ་ཞལ་དམར་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་པདྨ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་རྔེའུ་ཆུང་འཛིན་པ། ཡུམ་པདྨ་ཀྲོ་དྷཱི་ཤྭ་རཱི་མ་དམར་མོ་དང་མཉམ་པར་སྦྱོར་བ། ༀ་ཀརྨ་ཤྲཱི་ཧེ་རུ་ཀ་ཧཱུྃ། ཀརྨ་ཀྲོ་དྷཱི་ཤྭ་རཱི་སྟྭཾ། བྱང་གི་རྩིབས་ལ་ཀརྨ་ཧེ་རུ་ཀ་སྐུ་དང་རྩ་ཞལ་ལྗང་ནག །གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རྒྱ་གྲམ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག །ཐ་མས་ཞིང་དབྱུག་དང་ཐོང་གཤོལ་འཛིན་པ། ཡུམ་ཀརྨ་ཀྲོ་དྷཱི་ཤྭ་རཱི་མ་ལྗང་མོ་དང་མཉམ་པར་སྦྱོར་བ། ཁྲག་འཐུང་ཡབ་ཡུམ་ཐམས་ཅད་ཀྱང་གར་དགུའི་རོས་སྒེག་ཅིང་། རྒྱན་དང་ཆ་ལུགས་གཙོ་བོ་དང་མཐུན་པ་རང་རང་གི་གདན་ལ་གཡས་བརྐྱང་པའི་སྟབས་ཀྱིས་བཞུགས་པའོ། །གཉིས་པ་ནི། རང་རང་གི་ཐུགས་རིན་པོ་ཆེའི་གུར་ཁྱིམ་ལྟ་བུའི་ནང་དུ་ཉི་མ་ལ་གནས་པའི་རང་འདྲ་བའི་ཡེ་ཤེས་སེམས་དཔའ་རེ་རེ། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཧཱུྃ་ཡིག་ཕྲ་མོ་འབར་བ་རེས་མཚན་པར་བསམ་ལ། དེ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱིི་རྣམ་པར་བཛྲ་ས་མཱ་ཛཿས་སྤྱན་དྲངས་པར་བསམ་ཞིང་། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བར་བསམ་ཞིང་། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་དབང་སྔགས་རྣམས་བརྗོད་པ་སྟེ་རྡོ་རྗེ་ཕྱིར་བསྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན༴ ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ༀ་མ་ཧཱ་ཨཱ་དཪྴ༴ སྲིན་ལག་བརྐྱང་བ་རྣ་ལྟག་གཡས་པར། ༀ་མ་ཧཱ་ས་མ་ཏཱ༴ མཐེ་བོང་བརྐྱང་བ་ལྟག་པར། ༀ་མ་ཧཱ་པྲ་ཏྱ་བེཀྵ་ན༴ མཐེའུ་ཆུང་བརྐྱང་བ་རྣ་ལྟག་གཡོན་པར། ༀ་མ་ཧཱ་ཀྲྀཾ་ཏྱཱ་ནུཥྵཱ་ན༴ ཞེས་རིམ་པར་དབང་བསྐུར་བས། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པར་བསམ་མོ། །སྤྱི་བོར་ཟླ་བ་ལ་གནས་པའི་ༀ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ། དེ་རྣམས་ཀྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་གསུང་ཐུགས་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་སུ་མེད་པར་གྱུར། ཡི་གེ་གསུམ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པ། སྣང་མཐའ་དམར་པོ་པདྨ་འཛིན་པ། མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ༴ རྡོ་རྗེའི་ཕྱག་རྒྱ་མགྲིན་པར། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ༴ རྡོ་རྗེའི་ཕྱག་རྒྱ་སྙིང་གར། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ༴ ཞེས་བརྗོད་ཅིང་སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱའོ། །གསུམ་པ་ལ་སྲས་ཀྱི་དཀྱིལ་འཁོར་སྤྲོ་བ་དང་། དབང་ཕྱུག་མ་བསྐྱེད་པ་གཉིས་ལས། དང་པོ་ནི། ཡབ་ཀྱི་གསང་གནས་ཧཱུྃ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་གར་ཕཊ་ཀྱིས་བཀག་པ། ཡུམ་གྱི་མཁའ་པཾ་ལས་པདྨ་འདབ་མ་བརྒྱད་པའི་ལྟེ་བར་ཉི་མ་ལ་རཀྟ་ཨཾ་དམར་པོ་གནས་པའི་གེ་སར་ཨས་མཚན་པར་མོས་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མི། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུྃ་བྃ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། ཧཱུྃ་ཧཱུྃ་ཧཱུྃ་ཞེས་རིགས་ལྔའི་ཁྲག་འཐུང་ཡབ་ཡུམ་རྣམས་རྗེས་སུ་ཆགས་པའི་སྦྱོར་བས་སྙོམས་པར་ཞུགས་ཏེ། དགྱེས་པའི་བཞད་སྒྲ་ཧ་ཞེས་བརྗོད་པས་སྦྱོར་མཚམས་ནས་བྱང་ཆུབ་ཀྱི་སེམས་སྤྲིན་ཁྲོ་མོ་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། འཁོར་ལོའི་གྲྭ་དང་གྲུ་ཆད་བཞིར་རང་རང་གི་གདན་ལ་བཞུགས་པ་ནི། ༀ་བཛྲ་ག་རཱི་ཧ། རྩིབས་མཆན་གྱི་ཤར་ལྷོར་ཀ་རཱི་མ་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ༀ་བཛྲ་ཙ་རཱི་ཧ། ལྷོ་ནུབ་ཏུ་ཙ་རཱི་མ་སེར་མོ་མདའ་གཞུ་འགེངས་པ། ༀ་བཛྲ་པྲ་མོ་ཧཱི་ཧ། ནུབ་བྱང་དུ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་འཕྱར་བ། ༀ་བཛྲ་བེ་ཏ་ལཱི་ཧ། བྱང་ཤར་དུ་བཻ་ཏ་ལཱི་ནག་མོ་གཡས་རྡོ་རྗེ་འཕྱར་ཞིང་གཡོན་བྱིས་པའི་བམ་ཟ་བ། ༀ་བཛྲ་པུཀྐ་སཱི་ཧ། གྲུ་ཆད་ཀྱི་ཤར་ལྷོར་པུཀྐ་སཱི་དམར་སེར་ཞིང་ཆུང་གི་རྒྱུ་མ་འདྲེན་པ། ༀ་བཛྲ་གྷསྨ་རཱི་ཧ། ལྷོ་ནུབ་ཏུ་གྷསྨ་རི་ལྗང་གུ་གཡས་པའི་རྡོ་རྗེས་གཡོན་གྱི་དུང་དམར་དཀྲུག་ཅིང་གསོལ་བ། ༀ་བཛྲ་སྨ་ཤ་ནཱི་ཧ། ནུབ་བྱང་དུ་སྨ་ཤ་ནཱི་མཐིང་ནག་བྱིས་པའི་རོ་བཟུང་ནས་སྙིང་ཟ་བ། ༀ་བཛྲ་ཙཎྜ་ལཱི་ཧ། བྱང་ཤར་དུ་ཙཎྜ་ལཱྀ་སེར་སྐྱ་མགོ་ལུས་འདྲལ་བ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་པ། སྐྲ་སེར་པོ་གྱེན་དུ་བརྫེས་པ་གཅེར་བུ་དུར་ཁྲོད་རོལ་པའི་ཆས་ཅན། གཡོན་བརྐྱང་པའི་སྟབས་ཀྱིས་གནས་པའོ། །དེ་ནས་སྔར་བཞིན་དགྱེས་པའི་བཞད་སྒྲ་ཧེ་ཞེས་བརྗོད་པས། བྱང་ཆུབ་ཀྱི་སེམས་ཀྱི་སྤྲིན་ཕྲ་མེན་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། གསེར་ཁྱམས་ཀྱི་ཕྱོགས་མཚམས་བརྒྱད་དུ་རང་རང་གི་གདན་ལ་བཞུགས་པ་ནི། ༀ་བཛྲ་སིདྷ་མུ་ཁཱི་ཧེ། ཤར་དུ་སེང་གདོང་མ་སེར་མོ་ཕྱག་གཉིས་ཐུགས་ཀར་གྱེན་དུ་བསྣོལ་བས་ཏི་ར་བཟུང་ནས་ཟ་བ། ༀ་བཛྲ་བྱཱ་གྲྀ་མུ་ཁཱི་ཧེ། ལྷོར་སྟག་གདོང་མ་དམར་མོ་ཕྱག་གཉིས་མཐུར་དུ་བསྣོལ་ནས་རོ་བཟུང་བ། ༀ་བཛྲ་ཤྲཱི་གཱ་ལ་མུ་ཁཱི་ཧེ། ནུབ་ཏུ་ཝ་གདོང་མ་ནག་མོ་ཞིང་ཆུང་བཟུང་ནས་ལྕེས་ལྡག་པ། ༀ་བཛྲ་ཤྭ་ན་མུ་ཁཱི་ཧེ། བྱང་དུ་སྤྱང་གདོང་མ་མཐིང་ནག་ཞིང་ཆུང་གི་ཁོག་པ་འདྲལ་བ་སྟེ་མཆེ་བ་ཅན་བཞིའོ། །ༀ་བཛྲ་གྲྀདྡྷ་མུ་ཁཱི་ཧེ། ཤར་ལྷོར་བཞད་གདོང་མ་དམར་སེར་གཡོན་ཞིང་ཆུང་བཟུང་བའི་རྒྱུ་མ་གཡས་པས་དྲངས་ནས་གསོལ་བ། ༀ་བཛྲ་ཀངྐ་མུ་ཁཱི་ཧེ། ལྷོ་ནུབ་ཏུ་ཀངྐའི་མགོ་ཅན་དམར་སྐྱ་བམ་རོའི་རྐང་ལག་བཟུང་ནས་ཕྲག་པར་འགེལ་བ། ༀ་བཛྲ་ཀཱ་ཀ་མུ་ཁཱི་ཧེ། ནུབ་བྱང་དུ་བྱ་རོག་གདོང་ཅན་ནག་མོ་གཡས་རལ་གྲི་དང་གཡོན་བྷན་དམར་འཛིན་པ། ༀ་བཛྲ་ཨུ་ལཱུ་ཀཱ་མུ་ཁཱི་ཧེ། བྱང་ཤར་དུ་འུག་གདོང་མ་མཐིང་ནག་གཡས་ལྕགས་ཀྱུ་དང་གཡོན་བྷན་དམར་འཛིན་པ་སྟེ་གཤོག་པ་ཅན་བཞི། ཐམས་ཅད་ཀྱང་གཅེར་བུ་རང་རང་ཁྲོས་པའི་ཞལ་ཅན་དྲག་མོའི་རྣམ་འགྱུར་དུར་ཁྲོད་འབར་བའི་ཆས་དང་ལྡན་པའོ། །སླར་ཡང་དགྱེས་པའི་བཞད་སྒྲ་ཕཊ་ཅེས་བརྗོད་པས་བྱང་ཆུབ་ཀྱི་སེམས་སྤྲིན་སྒོ་སྐྱོང་བཞིའི་རྣམ་པར་ཐོན་ནས་རིགས་བསྡུས་ཏེ་སྒོ་བཞིར་རང་རང་གི་གདན་ལ་བཞུགས་པ་ནི། ༀ་བཛྲ་ཨཱརྻ་ཏེ་ཛ་ཏེ་ང་ཛཿ ཤར་སྒོ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ༀ་བཛྲ་ཨ་མུ་ཁེ་ཧཱུྃ། ལྷོ་སྒོར་ཕག་གདོང་མ་ནག་མོ་མཆེ་ཞགས་འཛིན་པ། ༀ་བཛྲ་ལོ་ཀ་བཾ། ནུབ་སྒོར་སེང་གདོང་མ་དམར་མོ་ལྕགས་སྒྲོག་འཛིན་པ། ༀ་བཛྲ་བྷསྨི་པ་ལ་ཡ་བ་ཏུ་ཧོཿ བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ། ཞལ་ཕྱིར་ཕྱོགས་ནས་འཁོད་པའོ། །གཉིས་པ་ནི། བདག་ཉིད་བཛྲ་ཧེ་རུ་ཀར་གསལ་བའི་ཐུགས་ཀ་ནས། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ཉི་ཤུ་རྩ་བརྒྱད་འཕྲོས། ཁྱམས་ཕྱི་མའི་ཕྱོགས་བཞིར་དྲུག་དྲུག་དང་། སྒོ་བཞིར་རེ་རེ་སྟེ་རང་རང་གི་སྟན་ལ་འཁོད་པ་ལས་རིམ་པ་བཞིན། མ་ནུ་རཀྵ་སཱི་བྷྱོ། བྲ་ཧྨ་ཎི་བྷྱོ། ར་ཏྲི་བྷྱོ། བིཥྞ་བཻ་བྷྱོ། ཀུ་མཱ་རཱི་བྷྱོ། ཨིནྡྲ་ནཱི་བྷྱོ། ཤར་སྟོད་ནས་གཡས་བསྐོར་དུ་རིམ་པ་བཞིན། སྲིན་མོ་སྨུག་ནག་ཐོད་རློན་འཆང་བ། ཚངས་མ་དམར་སེར་པདྨ་བསྣམས་པ། ལྷ་ཆེན་མོ་དཀར་ལྗང་ཏྲི་ཤུལ་འཛིན་པ། རྟོག་འདོད་མ་སྔོན་མོ་འཁོར་ལོ་འཆང་བ། གཞོན་ནུ་མ་དམར་མོ་མདུང་ཐུང་འཕེན་པ། བརྒྱ་བྱིན་མ་དཀར་མོ་ཨིནྡྲ་གདེངས་པའོ། །བཛྲ་པིངྒ་ལཾ་བྷྱོ། ཨ་མྲྀ་ཏ་བྷྱོ། ས་མྱ་བྷྱོ། དཎྜ་དཾ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ལྷོ་སྟོད་ནས་རིམ་པ་བཞིན། རྡོ་རྗེ་མ་སེར་མོ་དུང་ཁྲག་འཐུང་བ། བདུད་རྩི་མ་དམར་མོ་པདྨ་བསྣམས་པ། ཟླ་བ་མ་དཀར་མོ་པུཎྜ་རཱི་ཀ་འཛིན་པ། བེ་ཅོན་མ་ལྗང་ནག་དབྱུག་ཏོ་འཕྱར་བ། སྲིན་མོ་དམར་མོ་དུང་ཁྲག་འཐུང་བ། ཟ་བ་མ་ལྗང་ནག་རྒྱུ་མ་འདྲེན་པའོ། །ར་ཏི་བཛྲ་བྷྱོ། རུ་དྷི་ར་མ་ཏྟཱ་བྷྱོ། ཨེ་ཀ་ཙ་རི་ཎཱི་བྷྱོ། མ་ནོ་ཧ་རཾ་བྷྱོ། སིདྡྷི་ཀཾ་བྷྱོ། ཝ་ཡ་ཝི་བྷྱོ། ནུབ་སྟོད་ནས་རིམ་པ་བཞིན་དགའ་བ་དམར་མོ་ཀ་ཏར་འཕྱར་བ། སྟོབས་ཆེན་དཀར་མོ་གཤོལ་མདའ་འཛིན་པ། རྡོ་རྗེ་སེར་མོ་སྤུ་གྲིས་གཅོད་པ། འདོད་པ་དམར་མོ་མདའ་གཞུ་འགེངས་པ། ནོར་སྲུང་མ་དཀར་མོ་བུམ་པ་འཛིན་པ། རླུང་ལྷ་མ་སྔོན་མོ་བ་དན་འཕྱར་བའོ། །མ་ཧཱ་མཱ་ར་ཎ་བཛྲ་བྷྱོ། ཨགྣེ་བྷྱོ། ཝཱ་ར་ཧཱི་བྷྱོ། ཙ་མུཎྜཱི་བྷྱོ། སུ་ཏ་ནཾ་བྷྱོ། ཝཱ་རུ་ཎཱི་བྷྱོ། བྱང་སྟོད་ནས་རིམ་པ་བཞིན། གསོད་བྱེད་མ་དཀར་མོ་རལ་གྲི་འཛིན་པ། མེ་མོ་དམར་མོ་གསལ་ཤིང་འཕྱར་བ། ཕག་མོ་ནག་མོ་མཆེ་ཞགས་འཛིན་པ། རྒན་བྱེད་མ་དམར་མོ་ཞིང་ཆུང་ཟ་བ། སྣ་ཆེན་མ་དཀར་ལྗང་ཐོད་ཁྲག་འཐུང་བ། ཆུ་ལྷ་སྔོན་མོ་སྦྲུལ་ཞགས་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙ་ཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦོ་ད་ར་བྷྱོ། ཤར་སྒོར་རྡོ་རྗེ་ནག་མོ་ཆེན་མོ་ལྕགས་ཀྱུ་འཛིན་པ། ལྷོ་སྒོར་རྡོ་རྗེ་མོ་སེར་ནག་ཞགས་པ་འཛིན་པ། ནུབ་སྒོར་རྡོ་རྗེ་བུམ་སྣ་མ་དམར་ནག་ལྕགས་སྒྲོག་འཛིན་པ། བྱང་སྒོར་རྡོ་རྗེ་གསུས་འཛིན་མ་ལྗང་ནག་དྲིལ་བུ་འཁྲོལ་བ་སྟེ་ཐམས་ཅད་ཀྱང་གཏུམ་ཞིང་ཁྲོས་པ་དྲག་མོའི་ཉམས་ཅན་དུར་ཁྲོད་རོལ་པའི་ཆས་ཀྱིས་བརྒྱན་ཏེ། འདོད་རྒུར་བསྒྱུར་བའི་རྣམ་རོལ་ཅིར་ཡང་འཆར་བས་མེ་དཔུང་འབར་བའི་དབུས་ན་གནས་པའི་ལྷ་ཐམས་ཅད་ཀྱི་སྲོག་གི་གོར་ཡེ་ཤེས་སེམས་དཔའ་དྭངས་མའི་སྲོག་ཡིག་དང་བཅས་པས་མཚན་པའོ། །སྔགས་ཚིག་གིས་གསལ་གདབ་པ་ནི། ཧཱུྃ་ཧ་ཧེ་ཕཊ་བྷྱོ་རཾ། ཞེས་པས་དཀྱིལ་འཁོར་གྱི་འཁོར་ལོ་ཐམས་ཅད་གསལ་བརྟན་སྒྲིབ་པ་མེད་པ་འབར་བའི་འོད་ཟེར་མཁའ་ཁྱབ་ཏུ་འཕྲོ་བའི་བདག་ཉིད་དུ་གནས་པར་བསམ་མོ། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞིར་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །མཐའ་དབུས་མེད་པར་ཁྱབ་པ་ཡིས། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ཞེས་གསལ་གདབ་བོ། །ཏིང་འཛིན་གསུམ་དང་ལྷའི་མངོན་རྟོགས་རྣམས་བསྙེན་པའི་དོན་པོ་ཆེ་ཡིན་པས་དང་པོ་པ་རྣམས་ཧ་ཅང་བསྡུས་ན་མི་དགའ་བས་དེ་ཙམ་བྱས་ལ། མངོན་རྟོགས་མ་འདྲེས་ཤིང་གོམས་པར་གྱུར་པ་ན་གཙོ་བོའི་མངོན་རྟོགས་ཙམ་གྱི་མཐར་བསྐྱེད་སྔགས་རྣམས་ཚང་བར་བརྗོད་མཐར། ཧཱུྃ་ཧ་ཧེ་ཕཊ་བྷྱོ་རཾ་སོགས་ཀྱིས་གསལ་གདབ་པ་དང་དབང་བསྐུར་རྒྱས་གདབ་རྣམས་སྔགས་རྒྱ་ཙམ་གྱིས་ཀྱང་རུང་ངོ་། །གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་ལྔ་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་ཤིང་དངོས་གྲུབ་གསོལ་བ། དམ་བཅའ་བ། འཛབ་བཟླ་བའོ། །དང་པོ་ལ་བཞི་སྟེ། སྙན་གསན་དབབ་པ། སྤྱན་དྲངས་པ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པའོ། །དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུྃ་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་ལྔ་བཅུ་རྩ་བརྒྱད་སྒྱུ་འཕྲུལ་ཡེཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། ཧཱུྃ། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱིི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ༀ་རུ་ལུ་རུ་ལུ་ཧཱུྃ། ཞེས་སྙན་གསན་དབབ། གཉིས་པ་ནི། ཨེ་ཧྱེ་ཧི་ཨཱ་ན་ཡ་ཛཿཧཱུྃ་བྃ་ཧོཿ རཾ་ཞེས་པས་དམ་ཚིག་གི་དཀྱིལ་འཁོར་དང་མེ་རི་འདབ་འབྱར་དུ་བཞུགས་པར་བསམ་མོ། །གསུམ་པ་ནི། ༀ་བཛྲ་ཀྲོ་དྷ་ས་མ་ཡ་ཧཱུྃ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། །བཞི་པ་ནི། ༀ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿ ཞེས་པས་ཡེ་ཤེས་ཀྱི་འཁོར་ལོ་དམ་ཚིག་པ་ལ་དབྱེར་མེད་དུ་བསྟིམས་ནས། ཧཱུཾ་ཧ་ཧེ་ཕཊ། ཅེས་བརྗོད་པས་བརྟན་པར་བྱས་ལ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ལ་ཕྱག་དང་མཆོད་པ་གཉིས་ལས། དེ་གཉིས་ཀའི་ཚེ་ཡང་། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ། སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་སོགས་ལས་ཀྱི་རིམ་པ་ལ་འཇུག་པར་མོས་པའོ། །དེའི་དང་པོ་ཕྱག་འཚལ་བ་ནི། ཧཱུཾ། སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོས་པའི་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་ཁྲོ་བོའི་ཚོགས་ལ་ཕྱག་འཚལ་ལོ། །ཨ་ཏི་པཱུ་ཧོཿ པྲ་ཏིཙྪ་ཧོཿ ཞེས་པས་ཕྱག་བྱའོ། །གཉིས་པ་མཆོད་པ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ཧཱུྃ། རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་མཐིང་ཞལ། །རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །དཔལ་ཆེན་ཡེ་ཤེས་ཐབས་ཀྱི་རྒྱ། །ཤེས་རབ་དབྱིངས་མའི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པས་ཤེས་རབ་ཐབས་ལ་བརྟེན། །གཡོན་པས་དུང་དམར་གཙོ་ལ་སྟོབ། །ཀྲོ་དྷི་ཤྭ་རཱི་དབྱིངས་ཀྱི་རྒྱ། །འབར་བའི་གདན་ལ་བཞུགས་ནས་ཀྱང་། །མཆོད་བཞེས་དམ་སྐོང་དངོས་གྲུབ་སྩོལ། །ཞེས་པ་ཙམ་མོ། །གཉིས་པ་ཀུན་བཟང་ནི། ༀ་ཧཱུྃ། བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། །གསུམ་པ་ཞབས་བསིལ་ནི། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། བཞི་པ་བཞི་བསྣོལ་ནི། ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་པོ་སོ་སོ་ལ་ཐིམ་པར་བསམ་མོ། །ལྔ་པ་སྨན་མཆོད་ནི། ཧཱུྃ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཅན་ཀུན་བསྒྲལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་གྱི། །ཐུགས་དམ་དབྱིངས་ནས་བསྐུལ་བའི་ཕྱིར། །འདི་ནི་སྔོན་གྱི་ཐ་ཚིག་སྟེ། །སྐུ་གསུང་ཐུགས་ཀྱི་ངང་ཉིད་དུ། །བདག་ཅག་དད་པས་འབུལ་ལགས་ན། །བླ་མེད་འཕྲུལ་གྱི་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་གཞན་ཡང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོ་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྒྱལ་བ་ཆོས་ཀྱི་སྐུ་ཡི་དགོངས་པ་ཡིས། །བདེ་གཤེགས་རིགས་ལྔ་རིགས་གསུམ་མགོན་པོ་དང་། །སངས་རྒྱས་གསང་བའི་བར་དུ་བྱིན་རླབས་ཏེ། །འདས་དང་མ་བྱོན་ད་ལྟ་དུས་གསུམ་གྱི། །སྒྱུ་འཕྲུལ་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཞན་ཡང་དབང་བསྐུར་རྒྱུད་བཤད་མན་ངག་གི། །བརྒྱུད་པའི་བཀའ་བབ་དུ་མའི་ཆུ་བོ་ཀུན། །གཅིག་འདུས་དྲིན་ཅན་རྩ་བའི་བླ་མ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །འབར་བའི་རྒྱལ་པོ་ཁྲོ་རྒྱལ་ཡབ་ཡུམ་བཅུ། །ཀ་རཱི་ལ་སོགས་མ་མོ་བརྒྱད་རྣམས་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སིདྷ་ལ་སོགས་ཕྲ་མེན་མཆེ་གཤོག་བརྒྱད། །རྡོ་རྗེ་གདོང་མོ་སྒོ་སྐྱོང་རྣམ་པ་བཞི། །མ་ཚོགས་དབང་ཕྱུག་ཉི་ཤུ་རྩ་བརྒྱད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཞན་ཡང་རིག་འཛིན་དཔའ་བོ་མཁའ་འགྲོ་དང་། །དམ་ཅན་ཆོས་སྐྱོང་རིགས་དྲུག་ཕ་མ་སོགས། །སྲིད་གསུམ་ཀ་དག་རྒྱལ་བའི་དཀྱིལ་འཁོར་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་མཐར་དངོས་གྲུབ་བླང་བ་ནི། རང་གི་ལྕེ་ཧཱུྃ་ཡིག་དང་། སྨན་གྱི་སྟེང་དུ་ༀ་ཨཱཿཧཱུྃ་གསུམ་བསྒོམས་ཏེ། ༀ་སརྦ་ཏ་ཐཱ་ག་ཏ་ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་གཏོར་མ་འདོད་ཡོན་གྱི་ཕུང་པོ་ལས་འདོད་ཡོན་དྲུག་གི་ལྷ་མོ་ནམ་མཁའ་གང་བར་འཕྲོས། དཀྱིལ་འཁོར་པ་རྣམས་ཀྱི་དབང་པོ་དྲུག་གི་གནས་སུ་ཐིམ་པས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་མོ། །བདུན་པ་བདུད་རྩི་གསང་བསྣན་གྱི་མཆོད་པ་ནི། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་ལྷ་རྣམས་ཀྱི་ཞལ་དུ་མུ་ཏིག་དཀར་པོ་དྲི་མ་མེད་པ་ལྟ་བུ་གསོལ་བས་དགྱེས་ཤིང་ཚིམ་པར་བསམ་མོ། །བརྒྱད་པ་རཀྟའི་མཆོད་པ་འབུལ་བ་ལ་གསུམ་ལས། དང་པོ་ནི། ཧཱུཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆ ེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་བའི་ཆོགས་བཅས་ཀྱིས། །མ་ལུས་བཞེས་ནས་བསྣམས་སུ་གསོལ། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨཱ་ཝེ་ཤ་ཡ། ཨཱ་ཝེ་ཤ་ཡ། པྲ་ཝེ་ཤ་ཡ། པྲ་ཝེ་ཤ་ཡ། ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་རཀྟའི་དྭངས་མ་ཡེ་ཤེས་ཀྱི་བདུད་རྩིའི་ངོ་བོར་སུམ་གཅིག་རོལ་པར་བསམ་མོ། །གཉིས་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། སརྦ་དུཥྚན་ས་མ་ཡ་རུ་དྲ་མཱ་ར་ཡ་ཁ་ཁ་ཁཱ་ཧི་ཁཱ་ཧི། ཧྲྀཿད་ཡ་པི་པ་ཧཱུྃ་ཕཊ། ཅེས་རཀྟའི་ཁུ་བ་ཞིང་བཅུའི་དགྲ་བགེགས་ཀྱི་ངོ་བོར་སུམ་གཉིས་རོལ་པར་བསམ་མོ། །གསུམ་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ས་མ་ཡ་མ་ཧཱ་མཱཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀེཾ་ནི་རི་ཏི། མ་ཧཱ་པཉྩ་ཨ་མྲྀ་ཏ། མ་ཧཱ་ཨརྒྷཾ་པྲ་ཏཱིཙྪ་ཧོཿ ཁ་ཁ་ཁ། ལེ་ལེ་ལེ། ཧཱུྃ་བྷྱོ། ཧཱུྃ་བྷྱོ། ཧཱུྃ་བྷྱོ། ཞེས་རཀྟའི་རྩིག་མ་ཞིང་བཅུའི་དུག་གསུམ་ཤ་ཁྲག་རུས་པའི་དངོས་པོར་ལྷག་མེད་དུ་རོལ་པར་བསམ་མོ། །དགུ་པ་བསྒྲལ་མཆོད་ནི། རཾ་བཛྲ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་མོ། །བཅུ་པ་སྦྱོར་མཆོད་ནི། ༀ་ཕཊ། ཨེ་ཨེ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾཿ ཨ་ནུ་རཱ་ག་ཡ་མྱེ། ཛཿཧཱུྃ་བྃ་ཧོཿ ཧཱུྃ་ཧཱུྃ་ཧཱུྃ། བོ་དྷི་ཙིཏྟ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། །བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ༀ་ཧཱུྃ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །ཞེས་འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། །བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ཀོ་ཊ་ཀྵ། ཀོ་ཊ་པ། ཀོ་ཊ་ཀོ་ཊ། ཀོ་ཊ་པཤྩ། ཀོ་ཊཱི་རཱ་ག །ཀོ་ལཀྵ། ཀོ་ལ་བ། ཀོ་ལ་ཀོ་ལ། ཀོ་ལ་པཤྩ། ཀོ་ལ་བྷསྟ་ཐཱ། ཞེས་བརྗོད་ལ་རོལ་མོ་སྣ་ཚོགས་པའི་སྒྲ་སྦིར་རོ། །བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ཧཱུྃ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ། །ཧོཿ ཧཱུྃ། རྔམ་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའིི་འཐོར་རླུང་གཡེང་བ་ཆེ། །ཧོཿ ཧཱུྃ། ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ། །ཧོཿ ཧཱུྃ། ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། །ཧོཿ ཧཱུྃ། བདུད་ཀུན་གྱི་ནི་བདུད་པོ་ཆེ། །བདུད་ཀྱི་བདུད་དེ་བདུད་འཇོམས་པ། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ། །ཧོཿ ཧཱུྃ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་སྟེ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ། །ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་བསྟོད་པ་བྱའོ། །ཤིན་ཏུ་བསྡུ་ན་དབབ་དྲངས་བསྟིམ་བརྟན་མཆོད་པ་རྣམས་སྔགས་ཙམ་དང་བསྟོད་པའང་ཤྭ་ལོ་ཀ་མཐའ་མ་ཁོ་ནས་ཆོག་གོ། །གསུམ་པ་ནི། ༀ་བཛྲ་ཨེ་ས་ཧུ། བེ་ས་ཧུ། ས་མ་ཡ་བྷཀྵ་ཧུ། རུ་ལུ་རུ་ལུ་ཧཱུྃ་བྷྱོ་ཧཱུྃ། ཛཿཧཱུྃ་བྃ་ཧོཿ ༀ་པྲ་ཏཱིཙྪ་ཧོཿ ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག་ཐབས་ལ་མཁས་པའི་བདག་ཉིད། སྒྲོལ་བའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་འཚོགས་པ་རྣམས་ཀྱིས་དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་མོ་མ་ནོར་བར་མནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་ཆག་དང་། འགལ་འཁྲུལ་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས་ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་བ་དང་རིགས་རྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པའི་ཕྱི་ནང་གི་མི་ཤིས་པའི་རྐྱེན་ཐམས་ཅད་ཕྲིན་ལས་རྣམ་པ་བཞིས་ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབ་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །བཞི་པ་ནི། ༀ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་བརྗོད་དེ་ཤར་སྒོར་འཁོད་པའི་ལས་ཀྱི་ཧེ་རུ་ཀ་གཙོ་བོའི་ཐུགས་ཀར་ཐིམ་པར་བསམ། ལྔ་པ་ནི། ལྷ་རྣམས་ཀྱི་ཡེ་ཤེས་སེམས་དཔའི་ཐུགས་ཀར་རྡོ་རྗེའི་ལྟེ་བར་ཉི་མའི་གདན་སྲན་ཟླུམ་ཙམ་གྱི་དབུས་སུ་རིགས་ལྔ་ལ་ཧཱུཾ། ཀ་རཱི་མ་བརྒྱད་ལ་ཧ། ཕྲ་མེན་བརྒྱད་ལ་ཧེ། སྒོ་སྐྱོང་བཞི་ལ་ཕཊ། དབང་ཕྱུག་མ་རྣམས་ལ་བྷྱོ་རེ་རྣམས་རུ་ལུ་འབྲུ་བརྒྱད་པའི་སྔགས་ཀྱི་ཕྲེང་བ་རེ་རེས་བསྐོར་བར་གསལ་བཏབ་ལ། སྔགས་བཟླས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཤིང་ཐིམ་པར་དམིགས་པ་སྟེ། དམ་ཡེ་འཕྲོ་འདུའི་གསལ་བ་གསུམ་དང་ལྡན་པའི་ངང་ནས་སྐྱོན་བཅུ་སྤངས་ཏེ་བཟླ་བར་བྱའོ། །བཟླ་བྱའི་སྔགས་ནི། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་མ་ཧཱ་ཀྲོ་དྷཱི་ཤྭ་རཱི་སྟྭཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུྃ། ཞེས་པའོ། །དེས་མཚོན་ནས་རིགས་བཞི་དང་། གནས་ཡུལ་གྱི་མ་མོ་སྒོ་སྐྱོང་དབང་ཕྱུག་མ་རྣམས་སོ་སོའི་བསྐྱེད་སྔགས་ལ་རུ་ལུ་འབྲུ་བརྒྱད་སྦྱར་བ་གཙོ་འཁོར་གྱི་འགྲོས་དང་སྦྱར་ནས་བརྒྱ་དང་ཉེར་གཅིག་བདུན་སོགས་རིམ་པར་བཟླ་ཞིང་། སྤྱི་ཛཔ྄་ནི། རུ་ལུ་ཉིད་ལ་གཙོ་བོར་བྱའོ། །དེ་ཡང་ངེས་རྫོགས་ལས། རྟགས་དུས་གྲངས་ཀྱི་ཕྱེ་བར་རབ་འབྲིང་ཐ་མའི་ཚད་རྫོགས་ཀྱི་བར་དུ་བྱ་བར་གསུངས་ཀྱང་། མོས་སྒོམ་ཉི་ཚེ་བ་ལས་རུང་ཙམ་གྱི་བསྙེན་ཚད་ནི། གཙོ་བོ་བཛྲ་ཧེ་རུ་ཀ་ལ་ཆིག་འབུམ། རིགས་བཞིའི་ཧེ་རུ་ཀ་ལ་ཆིག་ཁྲི་རེ། ཀ་སེང་སྒོ་མ་དབང་མོ་བཅས་ལ་ལྔ་སྟོང་རེ་གསུངས་པ་རྣམས་དུས་ཀྱི་དབང་གིས་བཞི་འགྱུར་དང་། སྤྱི་འཛབ་ཁོ་ན་འབུམ་ཕྲག་བཞིས་མཐའ་བརྟེན་པ་བཟླ་ཞིང་། དེ་ཐམས་ཅད་ལ་འབུམ་རྗེས་སུ་ཁྲི་སོགས་བཅུ་ཆའི་གྲངས་ཀྱི་ཁ་སྐོང་དང་། བཅུ་ཆའི་སྦྱིན་སྲེག་དང་བཅས་པ་བྱ་བ་ཡིན་ནོ། །བསྙེན་པའི་མཇུག་ཏུ། སྤྲོ་ན་གཞི་བསྟོད་རྒྱས་པ་གཞུང་ལྟར་རམ། ཡང་ན། ཧཱུྃ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །མ་སྲིང་མཁའ་འགྲོའི་ཚོགས་ལ་ཕྱག་འཚལ་ལོ། །ཞེས་བརྗོད། ཡེ་ནས་གཉིས་མེད་སོགས་ཀྱིས་བཟླས་པའི་ཉེས་བྱས་སུ་གྱུར་པ་ཐམས་ཅད་བཤགས་པར་བྱའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་མཆོད་ལའང་ལྔ་ལས། དང་པོ་བཤམས་ཤིང་བྱིན་གྱིས་བརླབ་པ་ནི། ཛ་གད་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་བཤམས་ནས་བསང་ཆུ་གཏོར་ལ། ༀ་མ་ཧཱ་ཀྲོ་དྷཱི་ཤྭ་རཱིས་བསང་། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྟོང་པར་སྦྱངས། མ་སཱུརྱ་མཎྜ་ལ། ཞལ་ཟས་ཀྱི་སྣོད་དུ་ཉི་མ་ལ་ཧཱུྃ་ༀ་སྭཱ་ཨཱཾ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་པ་ནི། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་འདྲེན་གྱི། །དུར་ཁྲོད་མཆོད་པའི་གནས་འདི་རུ། །ཞིང་ཆེན་གསར་རྙིང་སྟན་དུ་བཏིང་། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ནས་བསྣམས་སུ་གསོལ། །ༀ་རུ་ལུ་རུ་ལུ་ཧཱུྃ། ཨེ་ཧྱེ་ཧི་ཨ་ན་ཡ་ཛཿཧཱུྃ་བྃ་ཧོཿ ཞེས་པས་སྤྱན་དྲངས་ལ་དགུག་གཞུག་བཅིང་མཉེས་བྱ། གསུམ་པ་མཆོད་པ་གསུམ་ལས། དང་པོ་སྤྱིར་མཆོད་པ་ནི། ཧཱུྃ། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པ་བཞེས་སུ་གསོལ། །ༀ་ཨཱཿཧཱུྃ་སུ་ར་ཏ་ཨུ་པ་བྷྱཿ ཀ་མ་ལ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝཱན། ཛཿཧཱུྃ་བྃ་ཧོཿ ཨ་ལ་ལ་ཧོཿ ༀ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿ སརྦ་མ་ཧཱ་སུ་ཁ་སིདྡྷི་ཧུ། གཉིས་པ་བྱེ་བྲག་ཏུ་མཆོད་པ་ནི། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ༀ་ཤྲཱི་བཛྲ་རཱ་ག་ལཱ་སྱེ་ཧཱུྃ། མཱ་ལྱེ་ཏྲཾ། གཱི་ཏི་ཧྲཱིཿ ནཱིརྟི་ཨཿ གསུམ་པ་ཁྱད་པར་གྱི་མཆོད་པ་ནི། ཚོགས་ཕུད་ཆ་གསུམ་མམ་བཞིར་སྤྲོས་ཏེ། དང་པོ་མཆོད་པ་ནི། ཧཱུྃ། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་འཇིགས་པར་སྟོན་པ་དང་། །སྙིང་རྗེ་རྔམས་དང་ཞི་བ་ལ་སོགས་པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་ཡང་སྒྲུབ་པོ་རྣལ་འབྱོར་ལས། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཱཾ་ས་ལ་སོགས་རོ་མཆོག་གསོལ། །མེ་ཏོག་སོགས་དང་ཙནྡན་དྲི། །བཟང་དགུ་འབུལ་ལོ་བཞེས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །སྒྲུབ་པའི་རྫས་འདི་ཐམས་ཅད་ལ། །ཧཱུྃ་དང་ཕཊ་ཀྱིས་ལྡན་པར་མཛོད། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་པས་ཚོགས་རྫས་འདོད་ཡོན་དྲུག་གི་ལྷ་མོ་མཁའ་ཁྱབ་ཏུ་སྤྲོས་པས་ཚོགས་ཞིང་རྣམས་ཀྱི་གནས་དྲུག་ཏུ་ཐིམ་པས་དགྱེས་པར་བསམ་མོ། །བར་པ་བཤགས་པ་ནི། ཧཱུྃ། ཚེ་རབས་ཐོག་མ་མེད་པ་ཚུན་ཆད་ནས། །ད་ལྷའི་ལུས་འདི་བླངས་པ་ཡན་ཆད་དུ། །ལུས་ཀྱི་སྡིག་བྱས་སྤྱོད་པ་ངན་དུ་སྤྱད། །ངག་གི་ཚིག་འཁྱལ་སྨྲ་བ་ངན་དུ་བརྗོད། །སེམས་ཀྱི་བློ་ནོར་ལོག་པར་བསམ་པ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་པ། །བཀྲ་བའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང་། །དེ་ཡི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙམ་ན་བར་ཆད་རྩོམ། །ནོངས་ཤིང་འགལ་འཁྲུལ་ཅི་མཆིས་མཐོལ་ཞིང་བཤགས། །མཐོལ་བཤགས་བཞེས་ནས་ཚངས་པ་སྩལ་དུ་གསོལ། །ཞེས་དང་ཡི་གེ་བརྒྱ་པ་ཡང་བརྗོད་ཅིང་། ཚོགས་རྫས་བདུད་རྩི་ལྔའི་རང་བཞིན་དུ་ཕུལ་བས་ཐུགས་དམ་བསྐང་ཞིང་ཉམས་ཆག་དག་པར་བསམ་མོ། །ཐ་མ་བསྒྲལ་སྟོབ་ནི། ཚོགས་ཆ་གསུམ་པའི་འདོད་ཡོན་གྱི་ལྷ་མོ་ཧཱུྃ་ཞེས་པས་རང་ལ་བསྡུས་ནས། ཨེ་རཾ་ཛྭ་ལ་རཾ། ཧཱུྃ་ཧ་ཧེ་ཕཊ་བྷྱོ་རཾ། སྣོད་བཅུད་ཐམས་ཅད་ཁྲག་འཐུང་འབར་བའི་དཀྱིལ་འཁོར་དུ་བཞེངས་པར་བསམ་ལ། ནྲྀ་ཡཾ་ཛཿ ནྲྀ་བཛྲ་ཨངྐུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུྃ་བྃ་ཧོཿ སྡེར་མོའི་སྔགས་མཐར། བོ་དྷི་ཙིཏྟ་སིདྡྷི་ཀུ་རུ་ཧཱུྃ་ཧཱུྃ། ༀ་བཛྲ་ཀྲོ་དྷ་ཕཊ་ཛཿ བཛྲ་སཏྭ་ཧཱུྃ། ཛྙཱ་ན་ས་ཏྭ་ༀ། ཨ་ཡཾ། སྥ་ར་ཎ་ཕཊ། ཅེས་ཚེ་ལུང་གི་དགོངས་པས་བསྒྲལ། ༀ་བྷྲཱུྃ། ཧཱུྃ་བྷྲཱུྃ། ཏྲཱྃ་བྷྲཱུྃ། ཧྲཱིཿབྷྲཱུྃ། ཧཱ་བྷྲཱུྃ། ཞེས་གཏུབ་ནས། ཧཱུྃ། བཻ་ཌཱུར་སྔོན་པོའི་རིན་ཆེན་རི་རབ་ལ། །ཉི་མ་སྟོང་གི་འོད་ཟེར་གདལ་བ་ལྟར། །སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅན། །དཔལ་ལྡན་གཟི་བྱིན་འབར་བ་ལ་ཕྱག་འཚལ་ལོ། །འོད་ཕུང་སྟུག་པོ་སྤྲིན་ལྟར་འཁྲིགས་པ་ཡི། །འཇིགས་བྱེད་རྔམས་སྟབས་བརྐྱང་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་ལྟར་འབར་བ་སྟེ། །གདུག་པ་ཐམས་ཅད་རྡོ་རྗེའི་ཞལ་དུ་འདྲེན། །མི་བཟད་མཆེ་བ་གཙིགས་པའི་ཞལ་གདངས་ཤིང་། །ཁམས་གསུམ་ཟ་བར་ཆས་པའི་རྐན་སྒྲ་ཅན། །ཉི་ཟླ་རབ་ཏུ་འབར་བའི་སྡང་མིག་གིས། །བདུད་དཔུང་སྲེག་པར་མཛད་ལ་ཕྱག་འཚལ་བསྟོད། །འབྱུང་པོའི་ཤ་ནི་ཟན་ལས་ཞིམ། །གཏི་མུག་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །སྐུ་ཡི་དངོས་གྲུབ་སྩལ་དུ་གསོལ། །འབྱུང་པོའི་ཁྲག་ནི་ཆང་ལས་ཞིམ། །འདོད་ཆགས་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །གསུང་གི་དངོས་གྲུབ་སྩལ་དུ་གསོལ། །འབྱུང་པོའི་རུས་པ་མར་ལས་ཞིམ། །ཞེ་སྡང་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །ཐུགས་ཀྱི་དངོས་གྲུབ་སྩལ་དུ་གསོལ། །ཞེས་དང་རྩ་སྔགས་ཀྱི་མཐར་ཁཱ་ཧི་བཏགས་པས་འབུལ་ཞིང་སྟོབ་བོ། །བཞི་པ་ཚོགས་ལ་རོལ་པ་ནི། ལས་ཀྱི་རྡོ་རྗེས་འཁོར་ལོ་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་མའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་འབུལ་ཞིང་། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་ལེན་ཅིང་རྣལ་འབྱོར་པ་རྣམས་ལྷར་སྣང་གི་ངང་ནས་ནང་གི་སྲེག་བླུགས་ཀྱི་ཚུལ་དུ་ཚིམ་པར་རོལ་ཞིང་། དེའི་མཐར་སྨོན་ལམ་ཡང་གདབ་བོ། །ལྔ་པ་ལྷག་མའི་ཆོ་ག་ལ་སྔར་ཟུར་དུ་བཅད་པའི་ཕུད་དང་མེ་གཏོར་བཅས་བཤམས་ལ། ལྷག་མའི་དམ་ཚིག་གསང་བའི་འདོད་ཡོན་བདུད་རྩིའི་ཕུང་པོ་ཟད་མི་ཤེས་པར་བསམ་ལ། ༀ་ཨཱཿཧཱུྃ་གིས་བྱིན་གྱིས་བརླབས་ནས། འདོད་རྒྱལ་གྱི་ཕྱག་རྒྱ་བཅིངས་ཏེ། ཨེ་ཨཱ་ར་ལི་ཧྲཱིཾ་ཧྲཱིཾ། ༀ་ཌཱ་ཀི་ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཥ་ཡ་ཏོ་ཥ་ཡ། མོ་ཧ་ཡ། མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲི་ད་ཡཾ་ཧཱུྃ་ཛཿ ཛཿཧཱུྃ་བྃ་ཧོཿ ཌཱ་ཀི་ཧཱུྃ་ཛཿ ཞེས་སྤྱུགས་པའི་བརྡ་དང་བཅས་ཏེ་སྤྱན་དྲངས་པས། ལྷག་མའི་མགྲོན་རྣམས་བྱ་ཁྱུང་ཐང་ལ་ལྷགས་པ་བཞིན་སྐད་ཅིག་གིས་བྱོན་པར་བསམ་ཞིང་། ཛ་གད་ཀྱི་ཁ་ཕྲུ་མཁའ་དབྱིངས་ཀྱི་རྒྱས་དམེ་གཏོར་དུ་དབབ་ཅིང་། ༀ་གུ་རུ་ཀྲོ་དྷ་རཏྣ་ས་མ་ཡ་པྲཱི་ཤ་པུརྦ་བུདྡྷ་ཀྵེ་ཊ་ཀྵོ་བྷ་ཀ་ར་ཧཱུྃ་ཕཊ། ཅེས་པས་བྱིན་གྱིས་བརླབས་ནས་ཕུད་ལྷག་བསྲེས་ལ། ཧེ་རུ་ཀ་ཡི་ཐོད་རྒྱ་བཅས་ཏེ། ༀ་བཛྲ་ཌཱ་ཀི་ནཱི་པྲ་ཏཱིཙྪ་མཾ་བ་ལིཾ་ཏེ་ཧཱུྃ་ཕཊ། དེ་བཞིན་དུ། ༀ་བུདྡྷ་ཌཱ་ཀི་ནཱི་ནས་ༀ་ཕཊ། ༀ་རཏྣ་ཌཱ་ཀི་ནཱི་ནས་ཏྲཱཾ་ཕཊ། ༀ་པདྨ་ཌཱ་ཀི་ནཱི་ནས་ཧྲཱིཿཕཊ། ༀ་ཀརྨ་ཌཱ་ཀི་ནས་ཨཱཿཕཊ། ཅེས་མཆོད་ཅིང་སྨན་རཀ་སྦྲེང་སྟེ། སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་པས། །གང་འདོད་ལས་དེ་བྱེད་པར་བསྒོ། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་དུ་བསྡུས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་དམ་བཅས་ཁས་བླངས་པའི། །མ་ཐོགས་མྱུར་དུ་མངོན་པར་ཕྱུང་། །དམ་བཅས་བཞིན་དུ་མ་བྱས་ནས། །ཇི་ལྟར་དམ་བཅས་མནའ་བོར་བའི། །སྡོམ་བཅས་དེ་ལས་འདའ་བར་འགྱུར། །དམ་ཚིག་དེ་ལས་འདས་གྱུར་ན། །མགོ་ལུས་སྙིང་ཡང་ཚལ་པ་བདུན། །ཡཀྵ་ཁྲོ་བོས་གཏུབ་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་མནའ་བོར་ཁས་བླངས་པས། །རུལ་མྱག་ཚིག་ནས་དམྱལ་བར་འགྲོ། །རྣལ་འབྱོར་དམ་ལ་གནས་གྱུར་པའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོང་། །ཕྲ་མེན་མ་ཡང་དངོས་གྲུབ་ཐོབ། །བཅོལ་བའི་ལས་རྣམས་མངོན་དུ་བྱོས། །ཞེས་བརྗོད་ཅིང་ལྷག་གཏོར་ཕྱིར་དོར་ནས། ཡ་ཧི་གཙྪཿ ཞེས་པས་ཕྱི་རོལ་འཁོར་གྱི་མགྲོན་རྣམས་རང་གནས་སུ་གཤེགས་པར་བསམ་མོ། །གཉིས་པ་བརྟན་མ་སྐྱོང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཏྲཾ་རཏྣ་ཏྲཻ་ལོཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབས། ཧཱུྃ། ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་བྱོན་དམ་སྐོངས་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་བྱོན་དམ་སྐོངས་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་འགྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་པཉྩ་སོགས་ཀྱིས་སྨན་གཏོར་རཀྟས་ཀྱང་མཆོད་ཅིང་སྨན་རཀ་སྦྲེང་། ཕྲིན་ལས་གསོལ་ནས། ཡ་ཧི་གཙྪས་གཤེགས་གསོལ་བྱས་ལ། གཏོར་མ་གཙང་སར་བསྐྱལ་ལོ། །གསུམ་པ་ཉེར་བསྡུ་བྱ་བ་ནི། ཐུན་མཚམས་ལ་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ། ཧཱུྃ་ཧ་ཧེ་ཕཊ་བྷྱོ། ཞེས་པས་དཀྱིལ་འཁོར་གསལ་བཏབ་ལ། སྐབས་འདིར་མཆོད་བསྟོད་དང་བཟོད་གསོལ་ནི་བྱས་ཀྱང་ཆོག་ལ་མ་བྱས་ཀྱང་མི་འགལ་ལོ། །དེ་ནས་རྟག་མཐའ་བསལ་ཕྱིར། ཧཱུྃ་ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ་ཐིམ། འཁོར་རྣམས་ཕྱི་ནས་རིམ་བཞིན་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཧཱུྃ་ལ་ཐིམ། ཧཱུྃ་གྱེན་རྫོགས་ནཱ་དའི་བར་དུ་བསྡུས་ནས་མཉམ་པ་ཉིད་ཀྱི་དབྱིངས་སུ་བསྟིམ་མོ། །ཆད་པའི་མཐའ་བསལ་བའི་ཕྱིར། ཉལ་བ་ལས་ལངས་པའམ་སྤྱོད་ལམ་ལ་འཇུག་པ་ན། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ། ཞེས་བརྗོད་པས། དཔལ་ཆེན་པོ་ཧེ་རུ་ཀ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། །བཞི་པ་གོ་ཆ་བགོ་ཞིང་ལུས་བསྲུང་བ་ནི། རང་གི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་བསམ་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས་ལུས་ཐམས་ཅད་རྡོ་རྗེའི་གོ་ཆས་བཅིངས་ཏེ་ཅིས་ཀྱང་མི་ཤིགས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས་མཛུབ་མོ་གཡས་གཡོན་གཉིས་སུ་ༀ་དང་ཏྲཱུཾ་ལས་རྡོ་རྗེ་གནོད་སྦྱིན་དང་མི་འཆི་ཐབས་སྦྱོར་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོ་གནས་ལྔ་དུག །ༀ་ཏྲུཾ། ཞེས་བརྗོད་བཞིན་པར་མཛུབ་མོ་གཉིས་བསྣོལ་ཏེ་རིམ་པར་རེག་པས། ཁྲོ་བོ་གཉིས་དང་རྡོ་རྗེའི་ལུ་གུ་རྒྱུད་ཀྱིས་བསྲུང་ཞིང་བརྟན་པར་བྱའོ། །དེ་ནས་ཐོད་པའི་ཕྱག་རྒྱ་མགོ་བོའི་གནས་ལྔར་བཞག་ལ། ༀ་བཛྲ་ཀ་པཱ་ལ་ཨ་བྷི་ཥིཉྩ་ཏྲཾ་ཏྲཾ། ཞེས་ཐོད་པའི་ཁང་བུ་རིགས་ལྔའི་ཅོད་པན་གྱིས་དབང་བསྐུར་བར་མོས། དར་དཔྱངས་ཀྱི་ཕྱག་རྒྱ་བཅས་ལ། ཨཱོཾ་ཨཱརྻ་ལམྦྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿ ཞེས་པས་ཅོད་པན་མཐིང་ག་གཡས་སུ་འཕྱང་ཞིང་དམར་པོ་གཡོན་དུ་འཕུར་བར་བསམ་མོ། །ༀ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་། ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་རྒྱས་པར་བྱའོ། །ལྔ་པ་སྤྱོད་ལམ་གྱི་རྣལ་འབྱོར་ནི། སྣང་སྤྱོད་ཐམས་ཅད་རང་བཞིན་སྒྱུ་འཕྲུལ་དྲྭ་བའི་དཀྱིལ་འཁོར་དུ་ཤེས་ཤིང་ཟ་ཉལ་འགྲོ་འཆགས་ཀྱི་སྤྱོད་ལམ་ཐམས་ཅད་ཐབས་ཤེས་ཀྱི་རྣལ་འབྱོར་ཁྱད་པར་ཅན་གྱིས་ཟིན་པའི་སྒོ་ནས་དོན་ཡོད་པ་ལ་བསླབ་པར་བྱའོ། །དེ་ལྟར་ཧེ་རུ་ཀ་དཔལ་སྒྲུབ་པའི་ཐབས། །གཏེར་ཆེན་བླ་མའི་གསུང་གི་བདུད་རྩིའི་བཅུད། །བསྙེན་པའི་ལས་བྱང་ཉུང་ངུར་དྲིལ་བ་འདི། །དང་པོའི་ལས་ཅན་རྣམས་ལ་ཕན་ཕྱིར་བྲིས། །གཟུ་ལུམ་རས་ཆོད་ཉེས་པ་མཆིས་ན་བཤགས། །ལེགས་པར་བཤད་པའི་ཆ་ཤས་གང་ཡོད་པའི། །དགེ་དེས་ལན་འདིར་སློབ་པའི་གང་ཟག་རྣམས། །ཟུང་འཇུག་ཆེན་པོའི་གོ་འཕང་མངོན་བྱེད་ཤོག །ཅེས་སྒྱུ་འཕྲུལ་དྲྭ་བ་ཧེ་རུ་ཀའི་སྒྲུབ་ཐབས་གཏེར་ཆེན་ཆོས་ཀྱི་རྒྱལ་པོའི་གསུང་ལས་བསྙེན་པའི་ལས་བྱང་ཉུང་ངུར་བསྡུས་ཏེ། རང་དང་སྐལ་མཉམ་རྣམས་ལ་ཕན་པའི་བློས་རིག་འཛིན་གྱི་བཙུན་པ་པདྨ་བཛྲས་གཡི་སྟོད་དབེན་པའི་ནགས་ཚལ་དྲྭ་བ་ཅན་དུ་བྲིས་པ་གསང་ཆེན་སྙིང་པོའི་བསྟན་པ་ཕྱོགས་དུས་ཀུན་ཏུ་རྒྱས་པའི་རྒྱུར་གྱུར་ཅིག། །།

སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་གྱི་ཆོ་ག་རྡོ་རྗེའི་ཕྲེང་བ། དྷརྨ་ཤྲཱི།

སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་གྱི་ཆོ་ག་རྡོ་རྗེའི་ཕྲེང་བ་ཞེས་བྱ་བ་བཞུགས་སོ། །སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་གྱི་ཆོ་ག་རྡོ་རྗེའི་ཕྲེང་བ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། །ཁྱབ་བདག་སྟོན་པ་རྡོ་རྗེ་སེམས་དཔའ་ཉིད། །གདུལ་དཀའ་འདུལ་ཕྱིར་ཧེ་རུ་ཀ་དཔལ་གྱི། །རྣམ་རོལ་ལྔ་བཅུ་རྩ་བརྒྱད་དཀྱིལ་འཁོར་ལྷའི། །འཁོར་ལོར་སྣང་མཛད་དཔལ་ལྡན་བླ་མར་འདུད། །གང་གི་གོ་འཕང་འཁོར་ལོ་ཚོགས་ཆེན་སར། །སྐལ་ལྡན་མྱུར་བདེར་བགྲོད་བྱེད་ལམ་གྱི་མཆོག །རྡོ་རྗེ་འཛིན་དབང་ཚོགས་ཀྱི་གཤེགས་ཤུལ་ཉིད། །དམ་པའི་གསུང་གི་རྗེས་འབྲངས་འདིར་གསལ་ཏེ། །གྲུབ་པའི་འབྲས་བུ་ཅི་དགར་འབྱུང་བའི་སྒོ། །དབང་དང་སྒྲུབ་པའི་ཕྲིན་ལས་ལ་བརྟེན་ཅིང་། །དེ་ཡང་དཀྱིལ་འཁོར་ལས་དང་འབྲེལ་བའི་ཕྱིར། །ཟབ་དོན་རྡོ་རྗེའི་ཕྲེང་བ་རྣམ་པར་སྤེལ། །འདི་ལ་གསུམ་སྟེ། གང་བསྒྲུབ་པའི་གཞི། གང་གིས་སྒྲུབ་པའི་ཐབས། དེས་གྲུབ་པའི་འབྲས་བུའོ། །དང་པོ་ནི། ཇི་སྐད་དུ། སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག །ཅེས་དང་། བཤད་རྒྱུད་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་གསུངས་པ་ལྟར་རྟོགས་མ་རྟོགས་ཀྱི་བྱེད་པས་འཁོར་འདས་ཐམས་ཅད་ཀྱིི་འབྱུང་གནས་སུ་གྱུར་པ་གཞིའི་རྒྱུད་ཅེས་བྱ་བ་སྟེ། གདུལ་བྱའི་རྒྱུད་ཀྱིས་བསྡུས་པ་ཆོས་ཉིད་བྱང་ཆུབ་སེམས་ཀྱི་རང་བཞིན་ཅན་ནོ། །གཉིས་པ་ནི། གཞིའི་རྒྱུད་དེ་གློ་བུར་གྱི་དྲི་མ་ལས་བྲལ་བར་བྱེད་པ་ཐབས་ཀྱི་རྒྱུད་ཅེས་བྱ་བ་ལམ་གྱི་དངོས་པོས་བསྡུས་པའི་ཡན་ལག་ཅན་ཏེ། ཡན་ལག་གི་དངོས་པོ་བཅུར་གནས་པ་ཉིད་ལས་འདིར། གསང་བའི་སྙིང་པོའི་རྒྱུད་ཀྱི་དོན། །ཇི་སྙེད་བཅུ་ཡི་གཞི་ཉིད་ལས། །སྐབས་ཀྱི་དགོས་པ་དཀྱིལ་འཁོར་དབང་། །ཞེས་པའི་དང་པོ་དཀྱིལ་འཁོར་ལའང་། སྐབས་དགོས་ཐོག་མ་མཎྜལ་ལ། །རྒྱུད་ལས་གཞི་གཉིས་གཅིག་གསུངས་པ། །ཞེས་དཀྱིལ་འཁོར་བདུན་ལས་འདིར་ལྷག་པ་གཟུགས་བརྙན་གྱི་དཀྱིལ་འཁོར་སྟོན་ཏེ། དེ་ལའང་། སྡོམ་ཚིག་ས་ཐིག་སྟ་གོན་དང་། །ཚོན་གྱིས་བྲི་དང་དབྱེ་བསྙེན་པ། །རབ་ཏུ་གནས་ཤིང་རྒྱས་པས་བསྲེག །འཇུག་པ་གཉིས་དང་ཡོན་ཏན་བཤད། །ཅེས་གསུངས་པ་ཉིད་ཀྱང་། སྦྱོར་བ་དང་། དངོས་གཞི་དང་། མཇུག་གི་བྱ་བ་དང་གསུམ་དུ་གནས་པའོ། །སྦྱོར་བ་ལའང་བཞི་སྟེ། བསྙེན་པའི་ཆོ་ག་དང་། གཞི་གཟུང་བ་དང་། སའི་ཆོ་ག་དང་། སྟ་གོན་གྱི་ཆོ་གའོ། །དང་པོ་ནི། སློབ་མ་ལའང་དབང་བསྐུར་བ་ཙམ་གྱི་ཆེད་དུ་ཡིན་ན་མོས་སློབ་ཀྱི་ཚུལ་གྱིས། མཚན་མ་དང་། དུས་དང་། གྲངས་ཀྱི་བསྙེན་པ་གསུམ་རབ་འབྲིང་ཐ་མའི་སྒོ་ནས་གང་འགྲུབ་ཙམ་ཞིག་སྔོན་དུ་འགྲོ་བ་གཞིར་བྱས་ནས། ཁྱད་པར་གྱི་ཆེད་དུ་བསྙེན་པ་ཁ་གསོ་བ་ལ་འཇུག་ཅིང་། ཚོགས་སྒྲུབ་ཀྱི་ཆེད་ཡིན་ན་ནི་ལམ་ངེས་རྫོགས་ཀྱི་ཚུལ་གྱིས་ཕྱག་རྒྱ་སྤྲོས་བཅས་མན་ཆད་ལ་བརྟན་པ་ཐོབ་པར་བྱ་དགོས་པ་ཉིད་དོ། །གཉིས་པ་ལས་ཀྱི་གཞི་བཟུང་བ་ནི། ཆུ་བོ་འདུས་པའི་དེད་དཔོན་ལ། །ཞེས་པའི་མཚན་ཉིད་ཅན་གྱི་བླ་མས། སྲོག་ལུས་ལོངས་སྤྱོད་རྣམ་གསུམ་གྱིས། །གསང་བའི་རྒྱུད་ལས་གསུངས་པ་བཞིན། །མཉེས་བྱེད་གཞི་ཡངས་སློབ་བུའི་མཆོག །ཅེས་པའི་མཚན་ཉིད་ཅན་གྱི་སློབ་བུའམ་སྒྲུབ་གྲོགས་དང་བཅས་པ་སྟེ། གནས་དུས་ཡོ་བྱད་སོགས་ཕུན་སུམ་ཚོགས་པའི་ཆ་རྐྱེན་ཐམས་ཅད་བཟང་ཞིང་ཚོགས་པར་བྱ་བའོ། །གསུམ་པ་སའི་ཆོ་ག་ལ། བརྟག་བསླང་ཚད་དབང་སྦྱང་བསྲུང་སློབ། །ཡོངས་སུ་བཟུང་བས་རྫོགས་པ་ཡིན། །ཞེས་བརྒྱད་དུ་བཤད་པ་ལས་འདིར་བདུན་གྱི། དང་པོ་ས་བརྟག་པ་ལ། བརྟག་པ་དངོས་དང་། ངན་ན་སྦྱང་སྤོ་བྱ་བའོ། །དང་པོ་ལའང་། གཞི་དང་། ས་རང་གི་མཚན་ཉིད་ལ་བརྟག་པ་གཉིས་ལས། དང་པོ་ནི། གང་དུ་བྱ་བའི་གཞི་དེའི་ནམ་མཁའ་ཕྱག་རྒྱ་ལྔ་ཡི་དབྱིབས་ལྟ་བུ་དང་། བར་སྣང་གི་ཁ་དོག་དྭངས་ཤིང་གསལ་ལ་འཁོར་ལོ་ལ་སོགས་པའི་དབྱིབས་འདྲ་བ་ལ། ས་གཞི་ཤིས་པའི་ལོ་རྒྱུས་དང་ལྡན་ཅིང་། ཁ་དོག་མ་འདྲེས་ལ་སྣུམ་མདངས་ཆགས་པ། ཤར་རི་གཞོལ་བ། ཕྱོགས་ཀྱི་རི་སྒྲོས་བཟང་ཞིང་། ཤར་ལྷོར་གཤིན་རྗེ་གདུག་པའི་མདུང་རྩེ་ལྟ་བུ་མེད་པ་སོགས་མཚམས་ཀྱི་དགྲ་བཞི་མེད་པ་སྟེ། དང་པོ་ནམ་མཁའ་བར་སྣང་ས། །ནམ་མཁའ་ཕྱག་རྒྱ་ལྔ་དབྱིབས་ལ། །བར་སྣང་མདོག་དང་དབྱིབས་སུ་ཤེས། །ས་གཞི་ལོ་རྒྱུས་རྣམ་གཉིས་ཀྱིས། །བཀྲ་ཤིས་རྣམ་གཉིས་ལྡན་མི་ལྡན། །དབྱིབས་མདོག་ཕྱོགས་མཚམས་བརྒྱད་བརྟག་བྱ། །ཞེས་གསུངས་པ་བཞིན་ནོ། །གཉིས་པ་ནི། ཕྱིའི་སྐྱོན་ཐད་ཀ་སོག་ལེ་ལྟ་བུ་ལ་སོགས་པ་མེད་པ། ནང་གི་སྐྱོན། འོག་གཞི་གཏེར་དུ་བརྐོས་བརྟགས་ཏེ། །ཞེས་པ་ལྟར་བརྐོས་པ་ན་གསེག་མ་དང་། ཐལ་བ་དང་། ཤིང་དུམ་དང་། གྱོ་དུམ་དང་། རུས་པ་དང་། གསོང་དང་། སྲོག་ཆགས་ལ་སོགས་པ་མེད་པ། ཕྱི་ནང་གཉིས་ཀའི་སྐྱོན་ནྱ་གྲོ་དྷ་ལྟ་བུ་ལ་སོགས་པ་མེད་ཅིང་། བཀྲ་ཤིས་པའི་རྩྭ་དང་མེ་ཏོག་ཡོད་པ་དང་། ཁ་དོག་བཟང་ཞིང་སྣུམ་བག་ཆེ་བ། རྩིགས་མ་དང་རྒྱུས་པ་སོགས་ཉུང་ཞིང་། བརྐོས་པའི་ཁུང་བུས་དེ་ཉིད་ཀྱིས་བཀང་བ་ན་ལྷག་པར་གྱུར་པའོ། །གཉིས་པ་ངན་ན་སྦྱང་སྤོ་བྱ་བ་ནི། དེ་ལྟར་བརྟགས་པས་ངན་ན་ས་གཞན་དུ་སྤོ་བའམ། སྐྱོན་སྦྱངས་ཏེ་དག་པར་བྱས་པའི་གནས་སུ་བརྩམ་ཞིང་། ཁྱད་པར་ཁྲོ་བོ་ལ་མ་མོ་འདུ་བའི་དུར་ཁྲོད་ཤིས་པ་ཡིན་ཏེ། ཤིས་པ་མིན་ན་སྤོ་བའམ་སྦྱང་། །སྐྱོན་དག་སྤངས་ཏེ་དུར་ཁྲོད་དུ། །དངོས་གྲུབ་ཁྲོ་བོ་བསྒྲུབ་པར་བྱ། །ཞེས་སོ། །གཉིས་པ་ས་བསླང་བ་ལ། སྣང་བ་ལས་བསླང་བ་དང་། མི་སྣང་བ་ལས་བསླང་བའོ། །དང་པོ་ནི། བརྟགས་པས་རུང་བའི་ས་དེ་རྒྱལ་པོ་སོགས་གཞན་དབང་བ་ཞིག་ན་རིན་གཞལ་བ་སོགས་ཀྱི་སྒོ་ནས་བསླངས་ལ་བདག་དབང་བར་བྱའོ། །གཉིས་པ་ལ། བདེ་བར་གཤེགས་པ་དང་། སའི་ལྷ་མོ་འཁོར་བཅས་ལ་བསླང་བའོ། །དང་པོ་ནི། བརྟགས་པའི་གཞི་དེར་བ་བྱུང་དང་། དྲི་བཟང་དང་། བདུད་རྩི་ལྔ་ལ་སོགས་པའི་མཎྜལ་ཇི་ཙམ་བཞེངས་པར་འདོད་པའི་དཀྱིལ་འཁོར་ཚད་དང་མཉམ་པར་བྱས་ལ། མཆོད་གཏོར་བཤམས་ཏེ། དཀྱིལ་འཁོར་གྱི་འཁོར་ལོ་བསྒོམས་ལ་མཆོད་ཅིང་བསྟོད་ནས་འདོད་དོན་གསོལ་ཏེ་ནམ་མཁའ་ལ་འདེགས་པའོ། །གཉིས་པ་ནི། ས་ལྷའི་མཎྜལ་དྲི་དང་བ་བྱུང་གིས་བྱུག་པར་ག་བུར་དང་ཙནྡན་གྱི་ཐིག་ལེ་གྲུ་བཞི་པ་མེ་ཏོག་གི་ཚོམ་བུ་བཅས་པ་དང་། ས་བདག་གཙོ་འཁོར་གྱི་མཆོད་གཏོར་གསེར་སྐྱེམས་དང་བཅས་པ་བཤམས་ཏེ། རྣམ་པར་མི་རྟོག་པའི་ངང་ལས། ཧཱུཾ་བིགྷྣཱནྟ་ཀྲྀ་ཏ་ཕཊ། ཅེས་བརྗོད་པས། རང་ཉིད་སྐད་ཅིག་གིས་ཁྲོ་བོ་བདུད་རྩི་འཁྱིལ་བ་ལྗང་སེར་ཞལ་གཅིག་ཕྱག་གཉིས་པ་གཡས་སྣ་ཚོགས་རྡོ་རྗེ་འཕྱར་ཞིང་། གཡོན་དྲིལ་བུ་དཀུར་བརྟེན་པ། ཁྲོ་བོའི་ཆས་ཅན་ཡུམ་དང་བཅས་པའི་སྐུར་གྱུར་པར་བསམ་ལ། མཆོད་གཏོར་གསེར་སྐྱེམས་དང་བཅས་པ་རཾ་ཡཾ་ཁཾ་གིས་སྦྱང་། ༀ་ཨཱཿཧཱུཾ་གིས་འདོད་ཡོན་བདུད་རྩིའི་ཕུང་པོར་བྱིན་གྱིས་རློབ་ལ། རང་གི་ཐུགས་ཀ་ནས་ལཱཾ་ཡིག་སེར་པོ་གཅིག་ཆད་པ་མཎྜལ་གྱི་དབུས་སུ་གནས་པ་ལས་སའི་ལྷ་མོ་གསེར་གྱི་མདོག་ཅན་ཞི་ཞིང་འཛུམ་པ་དར་དང་རིན་པོ་ཆེས་བརྒྱན་པ། གཡས་གསེར་གྱི་བུམ་པ་དང་། གཡོན་མཆོག་སྦྱིན་གྱི་ཕྱག་རྒྱ་མཛད་པ། ཕག་གི་ཁྲི་ལ་བཞུགས་ཤིང་འཇའ་ཚོན་སྣ་ལྔའི་འོད་ཟེར་འཕྲོ་བར་བསམ་ལ། ཡེ་ཤེས་ལྔས་དབང་བསྐུར་ནས། རྣམ་སྣང་བདག་པོར་གྱུར་པའི་རིགས་ལྔས་དབུ་བརྒྱན། སྐུ་གསུང་ཐུགས་བྱིན་གྱིས་རློབ། བཛྲ་ས་མ་ཡ་ཧཱུཾ་ཛཿ ཞེས་པས་སྙན་བསྣན་ལ། མཆོད་ཡོན་སྦྲེང་བཞིན་དུ། དད་པ་དང་ནི་དམ་ཚིག་གིས། །ཚུར་གཤེགས་ལྷ་མོ་བརྟན་མ་ཆེ། །མཆོད་ཡོན་བཞེས་ནས་འདི་ཉིད་དུ། །མཆོད་པས་བདག་ལ་དགྱེས་པར་མཛོད། །ༀ་ཨེ་ཧྱེ་ཧི་བ་སུ་དྷཱ་རཱི་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཞེས་སྤྱན་དྲངས་ཏེ། ཛཿཧཱུྃ་བྃ་ཧོཿས་གཉིས་སུ་མེད་པར་བསྟིམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། འབྲུ་གསུམ་གྱིས་ནང་མཆོད་དང་། མིང་སྔགས་ལ་ཨི་དཾ་བ་ལིཾ་སོགས་བཏགས་པས་གཏོར་མ་ཕུལ་ལ། ས་ཡི་ལྷ་མོ་བརྟན་མ་འོག་ཕྱོགས་སྐྱོང་། །སྐུ་གསེར་ཕྱག་ན་གསེར་གྱི་བུམ་པ་བསྣམས། །འཇའ་ཚོན་འོད་ལྡན་ཕག་ཆེན་ཁྲི་ལ་བཞུགས། །དེ་ལ་ཕྱག་འཚལ་བསྙེན་བཀུར་མཆོད་པར་འབུལ། །ཞེས་བསྟོད་ནས། ༀ་པྲ་ཏི་བྷྱཿསྭཱ་ཧཱ། ཞེས་བརྒྱ་རྩ་བརྒྱད་བཟླས་པས་འདོད་པའི་ལས་སྩོལ་བ་ལ་དགྱེས་པའི་མདངས་ཕྱུངས་ཏེ་འཁོད་པར་བསམ་མོ། །དེ་ནས་འཁོར་གྱི་ས་བདག་མཆོད་པ་ནི། མཆོད་གཏོར་རྣམས་སྔར་བཞིན་བྱིན་གྱིས་བརླབས་ནས། སྙིང་གའི་འོད་ཟེར་དང་། སྠཱ་ན་པ་ཏི་ཀྵེ་ཏྲ་པཱ་ལ་ས་པ་རི་ཝཱ་ར་ཨེ་ཧྱེ་ཧི། ཞེས་པས་སྤྱན་དྲངས་ཏེ། ཨ་ཀཱ་རོའི་སྔགས་ཀྱིས་གཏོར་མ་ཕུལ་ལ། ཧཱུཾ། རི་རབ་ཆེན་པོའི་གནས་དང་གླིང་བཞི་དང་། །རྒྱ་མཚོའི་འཇིང་གནས་གཙུག་ན་ནོར་བུ་འབར། །ཀུན་དགའི་བདག་པོ་དབང་བྱེད་ཆེན་པོ་དང་། །ཀུན་ཏུ་ས་ཡི་ལྷ་མོ་བརྟན་འབར་མ། །ས་བདག་མཐུ་ཆེན་འཁོར་གྱི་གནས་རྣམས་སུ། །མཆོད་སྦྱིན་གཏོར་མ་དམ་པ་འདི་བསྔོས་པས། །སོ་སོ་འཁོར་བཅས་རེ་བ་སྐོང་གྱུར་ནས། །བདག་གི་ལས་འདིའི་འབྲས་བུ་མཆིས་པར་མཛོད། །ཅེས་མཆོད་ཅིང་། གསེར་སྐྱེམས་ཀྱང་ཕུལ། ཡ་ཧི་གཙྪས་རང་གནས་སུ་བཏང་ལ་མཆོད་གཏོར་རྣམས་གཤེགས། དེ་ནས་ལྷ་མོ་དགེ་བའི་དཔང་དུ་གསོལ་བ་ནི། ལག་གཡས་པའི་མཐེ་བོས་མཐེའུ་ཆུང་བསྣན་པ་ཏྲི་ཤཱུ་ལའི་རྒྱས་ས་ལ་ལན་གསུམ་གཏུག་ཅིང་། ཧཱུཾ། སྐྱོབ་པ་སངས་རྒྱས་ཐམས་ཅད་ཀྱིས། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ཀྱིས་དཔང་མཛོད་ཅིག །ༀ་པྲ་ཏི་བྷྱཿསྭཱ་ཧཱ། ཞེས་གསོལ་ལ། ལག་གཉིས་ཁུ་ཚུར་གྱེན་བསྟན་གྱི་མཐེ་ཆུང་སྦྲེལ། མཛུབ་མོ་རྩེ་སྤྲད་པ་འདེགས་པའི་རྒྱས། བེ་གཱ་ཀྲ་མ་ཡཾ། ཞེས་པས་ལྷ་མོ་ནམ་མཁའ་ལ་དཔང་དུ་བཞུགས་པར་བསམ་མོ། །དེ་ནས་བཛྲ་ས་མ་ཡ་ཧཱུཾ་ཛཿས་དཔང་པོའི་ལྷ་རྣམས་ནམ་མཁའ་གང་བར་སྤྱན་དྲངས། ཧཱུཾ་བཞིས་དེ་བཞིན་གཤེགས་པ་རྣམས་ཀྱི་བྱིན་བསྡུས་ནས་བདག་ལ་ཐིམ་པས་བདག་གི་ལུས་འོད་ཀྱི་གོང་བུར་གྱུར་པར་བསམ་ལ། ༀ་བཛྲ་མ་ཧཱ་ཤྲི་ཧེ་རུ་ཀ་ཧཱུྃ། ཞེས་བརྗོད་པས་རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་གཡས་རྡོ་རྗེ་དང་གཡོན་དྲིལ་བུ་འཛིན་པ། མི་བཟད་པའི་ཁྲོ་བོ་འབར་བའི་སྡང་མིག་བགེགས་ལ་བལྟ་བའི་རྐང་མཐིལ་དང་སྙིང་གར་ཧཱུཾ་ལས་སྣ་ཚོགས་རྡོ་རྗེ་མེ་རབ་ཏུ་འབར་བར་བསམ་ཞིང་བདེན་སྟོབས་བརྗོད་པ་སྔོན་དུ་འགྲོ་བས། ས་ཡི་ཕྱོགས་འདིར་རྡོ་རྗེ་འཛིན་པ་བདག་གིས་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཆེད་དུ་སྒྱུ་འཕྲུལ་དྲྭ་བ་ཁྲོ་བོའི་ལྷག་པ་གཟུགས་བརྙན་གྱི་དཀྱིལ་འཁོར་ཆེན་པོ་བཞེངས་སུ་གསོལ་བས། གང་སུ་ཡང་རུང་བའི་འབྱུང་པོ་གདུག་པ་ཅན་གཡོག་དང་འཁོར་དུ་བཅས་པ་ཐམས་ཅད་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་དེ་བཞིན་གཤེགས་པ་ཐམས་ཅད་ཀྱིས་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་བརྗོད་ཅིང་། རོལ་མོའི་སྒྲ་སྦྱར། གུ་གུལ་གྱིས་བདུག །ཡུངས་ཐུན་གྱིས་བྲབ་པ་ཁྲོ་བོའི་སྤྲིན་དུ་སྤྲོ་ཞིང་། སུམྦྷ་བཟླ་བས་རྡོ་རྗེ་གསོར་བ་དང་དྲིལ་བུ་འཁྲོལ་བཞིན་པས་རྡོ་རྗེའི་འགྲོས་ཀྱིས་བསྐོར་ཏེ་བགེགས་བསྐྲད་ལ། ཧཱུཾ་རིང་པོར་བརྗོད་པས། ཁྲོ་བོ་རྣམས་སླར་འདུས་ནས་སྲུང་བའི་གུར་ཁང་སྣ་ཚོགས་རྡོ་རྗེ་མེ་རབ་ཏུ་འབར་བ་དང་བཅས་པས་ཕྱོགས་མཚམས་ཐམས་ཅད་ཁྱབ་པར་བསམ་ལ། སའི་དབུས་སུ་བརྗིད་བག་དང་བཅས་པས་འདུག་སྟེ། སྔར་བཞིན་བཅས་པའི་ལག་གཡས་ཏྲི་ཤཱུ་ལའི་རྒྱས། ཇི་ལྟར་ཆེ་མཆོག་ཧེ་རུ་ཀས། །རུ་དྲ་བདུད་ཀྱི་སྡེ་བཏུལ་ནས། །ཆོས་ཀྱི་རྒྱལ་སྲིད་དཔུང་གཙུགས་པ། །དེ་བཞིན་དུ་ནི་བདག་གིས་ཀྱང་། །རྒྱལ་བར་བྱས་ཏེ་དཀྱིལ་འཁོར་བྲི། །ས་ཡི་དངོས་གྲུབ་སྩལ་དུ་གསོལ། །ༀ་རཏྣ་པཱ་ཤཾ་སིདྡྷི་ཀུ་རུ་ས་མ་ཡ་སྟྭཾ། ཞེས་བརྗོད་པས་ལྷ་མོ་འཛུམ་པའི་དམངས་ཀྱིས་འོད་དུ་ཞུ་ནས་ས་གཞི་ལ་ཐིམ་པས། ས་གཞི་རིན་པོ་ཆེའི་རང་བཞིན་ཡེ་ཤེས་ལྔའི་ངོ་བོར་གྱུར་པར་བསམ་མོ། །གསུམ་པ་དཀྱིལ་འཁོར་གྱི་ཚད་ལ། གཟུགས་བརྙན་གྱི་དང་། ཏིང་ངེ་འཛིན་གྱི་དཀྱིལ་འཁོར་གྱི་ཚད་བསྟན་པའོ། །དང་པོ་ལ་གསུམ་ལས། བསྡུས་པའི་ཚད་ནི། ཁྲུ་གང་པ་དང་། ཁྲུ་བཞི་པ་པའོ། །འབྲིང་ཚད་ནི། ཁྲུ་བཅུ་གཉིས་པ་དང་། བཅུ་དྲུག་པའོ། །རྒྱས་པའི་ཚད་ནི། ཁྲུ་ཉི་ཤུ་པ་དང་། ཉི་ཤུ་རྩ་ལྔ་པ་སྟེ། རེ་རེ་ལ་ཡང་ནང་གསེས་སུ་གཉིས་གཉིས་ཀྱིས་སྟོན་པ་ནི་གནས་ཁང་ཡངས་དོག་དང་། འབྱོར་བའི་ཁྱད་པར་དང་། གང་ལ་མོས་པའི་དབང་གིས་འདམ་ཁ་ཅན་དུ་གསུངས་པ་སྟེ། སློབ་བུའི་མོས་པ་དང་སྦྱར་ནས། །ལེགས་རྩིགས་ངོས་འཇམ་སྙོམས་པར་བྱ། །ཞེས་གསུངས་པ་ལྟར་འོག་ཏུ་ལས་དང་བྱ་བས་སྦྱང་བའི་སྐབས་སུ་དྲན་པར་བྱའོ། །གཉིས་པ་ནི། དཔག་ཚད་རྒྱང་གྲགས་རིམ་པ་བཞིན། །ཞེས་པས་རྒྱང་གྲགས་དང་དཔག་ཚད་སོགས་ནས་ཇི་སྲིད་མཁའ་ཁྱབ་ཀྱི་བར་དུ་རྣལ་འབྱོར་པའི་བློ་ཁྱད་དང་སྦྱར་ཏེ་གསུངས་སོ། །བཞི་པ་ས་དབང་དུ་བྱ་བ་ནི། ཟངས་སམ་དམར་པོའི་ཤིང་ལས་ཕུར་བུ་རྩེ་མོ་ཟླ་གམ་གྱི་གཟུགས་སུ་བྱས་པ་ཞིག་སྣོད་འབྲུས་བཀབ་ལ་སོགས་པར་བཙུགས་ཏེ་བཞག་ལ། ༀ་པདྨ་ཀཱི་ལི་ཀཱི་ལ་ཡ་ཕཊ་ཛཿ ཞེས་བརྗོད་པས། རང་གི་སྙིང་གའི་ཧཱུཾ་ལས་པདྨ་ཧེ་རུ་ཀ་དམར་པོ་ཞལ་གཅིག་ཕྱག་བཞི་པ། དང་པོ་གཉིས་ཀྱིས་པདྨ་དང་ཞགས་པ། འོག་མ་གཉིས་ཕུར་བུ་འདྲིལ་བ། སྨད་ཕུར་བུ་ཟླ་གམ་རབ་ཏུ་འབར་བའི་རྩེ་མོ་ཅན་དུ་ཕྱུངས་པ་བཀོད་པའི་ཕུར་བུ་དང་དབྱེར་མེད་དུ་བལྟས་ལ། ཀཱ་ཡ་བཛྲ་སོགས་ཀྱིས་སྐུ་གསུང་ཐུགས་བྱིན་གྱིས་བརླབས་ཏེ་གཟི་བྱིན་དང་ལྡན་པར་བྱས་ལ། ཧཱུཾ། པདྨ་དབང་གི་ཁྲོ་མཆོག་ཆགས་པའི་སྐུ། །མ་ལུས་དབང་དུ་སྡུད་པའི་ལས་མཛད་པ། །འཛམ་གླིང་ཡེ་ཤེས་རིན་ཆེན་ས་འདི་དག །བདག་གི་བྱང་ཆུབ་གྲོགས་སུ་འགྱུར་བར་མཛོད། །ༀ་པདྨ་ཀཱི་ལི་ཀཱི་ལ་ཡ་ཝ་ཤཾ་མ་ན་ཡེ་ཧཱུཾ། ཝ་ཤཾ་ཀུ་རུ་སྭཱ་ཧཱ། ཞེས་བརྗོད་བཞིན་པར་དཀྱིལ་འཁོར་གྱི་གཞི་ལ་བཏབ་པས། ཕུར་བུ་ལས་བྱུང་བའི་འོད་ཀྱིས་ས་གཞི་ཐམས་ཅད་ཁྱབ་ཅིང་བདག་གི་དབང་དུ་གྱུར་པར་བསམ་མོ། །ལྔ་པ་ལ། སྡོམ་ནི་ལས་དང་སྦྱིན་སྲེག་དང་། །སྔགས་དང་ཕྱག་རྒྱ་ཏིང་ངེ་འཛིན། །ཞེས་པ་ལྟར་བཞི་ལས། དང་པོ་ལས་དང་བྱ་བས་སྦྱང་བ་ལ། ཐོག་མར་ལྟོ་འཕྱེ་བརྟག་སྟེ། གཟའ་ཉི་མ་རྒྱུ་བའི་སྟོན་ཟླ་ཐ་ཆུང་ལ་སོགས་པའི་ཟླ་བ་གསུམ་གསུམ་ལ་རིམ་པ་བཞིན། ཤར་ལྷོ་ནུབ་བྱང་དུ་མགོ་བལྟ་ཞིང་། ལྷོ་ལ་སོགས་པར་ཕྱོགས་ཏེ་ཉལ་བས། དེའི་ལྟོ་བའི་ཐད་ནས་ས་བརྐོ་བར་བྱའོ། །ཚད་ནི་དཀྱིལ་འཁོར་ཇི་ཙམ་བྱ་བའི་རྒྱའམ་ཁྲུ་གང་གྲུ་བཞི་ཙམ་པ་སའི་སྐྱོན་འབྱིན་ནུས་པར་བརྐོས་ཏེ། གྱོ་མོ་དང་། རུས་པ་དང་། སོལ་བ་ལ་སོགས་པའི་སྐྱོན་རྣམས་བསལ་ནས། སའི་ཕུད་ཀྱིས་དེ་བཞིན་གཤེགས་པ་རྣམས་མཆོད་ལ། ས་དེ་ཉིད་ཀྱིས་བཀང་བས་མཐོ་ན་བཟང་། མཉམ་ན་འབྲིང་། དམའ་ན་ངན་པའོ། །ཡང་དོང་དེ་ཁྲུ་གང་ཙམ་དུ་བྲུས་ནས་འཐས་པར་བཅགས་ལ་ཆུས་བཀང་སྟེ། ཡི་གེ་བརྒྱ་པ་བཟླ་བཞིན་དུ་གོམ་པ་ལྔ་བཅུར་ཕྱིན་ནས་ལྡོག་སྟེ་བལྟས་པས་གང་ན་རབ། ཕྱེད་ན་འབྲིང་། བསྐམས་ན་ངན་ཞིང་། དེ་ཉིད་གཡས་སུ་འཁྱིལ་ནའང་བཟང་། དེ་ལས་ལྡོག་ན་ངན་པའོ། །དེ་དག་ལས་བཟང་པོར་མཐོང་ནས་བརྐོས་པའི་ཁུང་བུ་དེ་ཉིད་དུ་རྫས་སུམ་ཅུས་གང་བའི་བུམ་པ་ཨ་ལས་ཟླ་བའི་སྟེང་དུ་ཏྲཾ་ལས་རིན་པོ་ཆེའི་མཆོད་སྡོང་དགོས་འདོད་འབྱུང་བའི་གཏེར་དུ་དམིགས་པ་བཅུག་སྟེ། སྔར་གྱི་ས་དང་ཤིས་པའི་ས་བཟང་པོ་གཞན་གྱིས་ཀྱང་བཀང་ལ། སྤོས་ཆུས་བཏབ་ནས་འཐས་པར་བཅགས་པའི་སྟེགས་བུ་དཔངས་སུ་ཁྲུ་གང་དང་། རྒྱར་ཁྲུ་གང་ལ་སོགས་པ་ནས་ཇི་ཙམ་འདོད་པའི་བར་བརྩིགས་ལ་ངོས་མཉམ་པར་བྱ་སྟེ། རྫས་སུམ་ཅུ། དྲི་བཟང། བ་བྱུང་ལྔ་དང་བཅས་པའི་གོ་མ་ཡེས་ཁྱབ་པར་བྱའོ། །གཉིས་པ་མེས་སྦྱང་བ་ནི། གོང་གི་མཚན་མ་རྣམས་ཤིན་ཏུ་ངན་པར་མཐོང་ན་གཞན་དུ་སྤོ་བའམ། ཞི་བའི་སྦྱིན་སྲེག་ཚུལ་བཞིན་དུ་བྱས་པས་བསལ་བར་བྱའོ། །གསུམ་པ་སྔགས་དང་ཕྱག་རྒྱས་སྦྱང་བ་ནི། མཚན་མ་ངན་པ་འབྲིང་ཙམ་དུ་སྣང་ན། རང་གི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་མཐིང་ག་རེ་རེས་མཚན་པ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ཧཱུཾ་གིས་མཚན་པར་བསམ་ལ། ༀ་བཛྲ་ཧ་ན་ཧ་ན་ཀྲོ་དྷ་ཧཱུཾ་ཕཊ། ཅེས་བརྗོད་ཅིང་ས་ལ་ལན་གསུམ་བསྣུན་པས། རྡོ་རྗེ་དང་ཧཱུཾ་གི་འོད་ཀྱིས་སའི་ཉེས་སྐྱོན་ཐམས་ཅད་སྦྱངས་ནས་ཡེ་ཤེས་རང་སྣང་གི་གཞིར་གྱུར་པར་བསམ་མོ། །བཞི་པ་ཏིང་ངེ་འཛིན་གྱིས་སྦྱང་བ་ལ། མཚན་མེད་དང་། མཚན་བཅས་གཉིས་ཀྱི། དང་པོ་ནི། ས་དང་སར་འཛིན་པའི་འཁྲུལ་རྟོག་ཐམས་ཅད་སྟོང་ཉིད་དེ་བཞིན་ཉིད་ཀྱི་དབྱིངས་སུ་རྣམ་པར་དག་པར་བསམ་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ཞེས་སྦྱང་ངོ་། །གཉིས་པ་ནི། ཧཱུཾ་གི་སྒྲ་རིང་པོར་བརྗོད་པས། རང་རིག་སྐད་ཅིག་གིས་ཧཱུཾ་ལས་རྡོ་རྗེ་སྔོན་པོ་ཧཱུཾ་ཡིག་མཐིང་ནག་འབར་བས་མཚན་པར་གྱུར། དེ་ལས་ཨེ་ཡཾ་ར་སུཾ་ཀེཾ་རཾ་བྷྲཱུཾ་རྣམས་འོག་ཏུ་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོས་འདུས་ཡོངས་སུ་གྱུར་པ་ལས་འབྱུང་ལྔ་རིམ་བརྩེགས་ཀྱི་སྟེང་དུ། བྷྲཱུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ། ཞེས་བརྗོད་པས། ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་དཀྱིལ་འཁོར་ཇི་ལྟར་འབྱུང་བར་འགྱུར་བ་བཞིན་དུ་བཀྲ་ལམ་གྱིས་གསལ་བར་བསམ་མོ། །དྲུག་པ་བྱིན་གྱིས་བརླབ་པ་ནི། གནས་ཁང་ལེགས་པར་བརྒྱན་ལ། སློབ་དཔོན་རྒྱས་པའི་ཆས་སུ་ཞུགས་ནས། རྡོ་རྗེའི་འགྲོས་ཀྱིས་མཐའ་བསྐོར་ཞིང་ཤར་སྒོ་ནས་ཞུགས་ཏེ་དབུས་ཀྱི་གདན་ལ་ཤར་དུ་ཕྱོགས་པས་འཁོད་ལ། བསྐྱེད་སྔགས་ཀྱིས་རང་ཉིད་སྐད་ཅིག་གི་གཙོ་བོ་ཡབ་ཡུམ་དུ་བསྐྱེད་ནས་དབང་བསྐུར་བྱིན་གྱིས་རློབ། མཁའ་གསང་བརླབས་ནས་མཉམ་པར་སྦྱོར་བའི་བྱ་བས་སྲས་ཀྱི་ལྷ་ཚོགས་སུམ་ཅུ་སྤྲོ་བ་དང་། དབང་མོ་བསྐྱེད་པ་རྣམས་སྒྲུབ་ཐབས་ལྟར་གཞན་སྲས་ཀྱི་ཆོ་གས་གསལ་བཏབ་ལ། བྱང་ཆུབ་སེམས་ཀྱི་འོད་ཟེར་གྱིིས་དཀྱིལ་འཁོར་པ་དང་བཅས་པའི་དུས་གསུམ་གྱི་མགོན་པོ་སྲས་དང་བཅས་པ་ཐམས་ཅད་མཁའ་ཁྱབ་ཏུ་སད་པར་བསམ་ཞིང་། ༀ་རུ་ལུ་རུ་ལུ་ཧཱུཾ་གིས་སྙན་བསྣན། ཨེ་ཧྱེ་ཧིས་སྤྱན་དྲངས། ཀུན་བཟང་ཞབས་བསིལ་བཞི་བསྣོལ་སོགས་ཕྱི་ནང་གསང་བའི་མཆོད་པ་རྣམས་ཀྱིས་མཆོད་ཅིང་བསྟོད་པར་བྱའོ། །དེ་ནས་ཕྱོགས་བཞིར་གནས་པའི་སློབ་མ་བཞི། རྡོ་རྗེ། རིན་ཆེན། པདྨ། ཀརྨ་ཁྲོས་པའི་རྒྱལ་མོ་བཞིར་བསྐྱེད། བསྐུར། རློབ། དབབ། དྲང་། བསྟིམ། བརྟན་པར་བྱས་ལ། ལས་མཁན་ནམ་དེ་རྣམས་རང་རང་གིས་གཙོ་བོ་ལ་ཀུན་བཟང་ཞབས་བསིལ་བཞི་བསྣོལ་གྱིས་མཆོད་པ་སྔོན་དུ་འགྲོ་བས། ཤར་ནས། ཞི་བའི་ཡེ་ཤེས་རང་སྣང་བའི། །རྒྱན་རྣམས་ཀུན་གྱིས་རབ་མཛེས་པ། །སངས་རྒྱས་ཀུན་གྱི་སྐུ་ཡི་མཆོག །དཀྱིལ་འཁོར་ཆེན་པོ་གསུང་དུ་གསོལ། །ལྷོ་ནས། ཡོན་ཏན་རིན་ཆེན་འབྱུང་བའི་གཙོ། །མ་ལུས་ཀུན་གྱི་རེ་སྐོང་བ། །སངས་རྒྱས་ཀུན་གྱི་ཡོན་ཏན་མཆོག །དཀྱིལ་འཁོར་ཆེན་པོ་གསུང་དུ་གསོལ། །ནུབ་ནས། རང་བཞིན་དག་པས་གོས་པ་མེད། །འདོད་ཆགས་ཕ་རོལ་ཕྱིན་པ་བརྙེས། །སངས་རྒྱས་ཀུན་གྱི་གསུང་གི་མཆོག །དཀྱིལ་འཁོར་ཆེན་པོ་གསུང་དུ་གསོལ། །བྱང་ནས། བསམ་པ་ཐམས་ཅད་ཡོངས་རྫོགས་པས། །ཐམས་ཅད་སྒྲོལ་བའི་དེད་དཔོན་མཆོག །སངས་རྒྱས་ཀུན་གྱི་ཕྲིན་ལས་བདག །དཀྱིལ་འཁོར་ཆེན་པོ་གསུང་དུ་གསོལ། །ཐམས་ཅད་ཀྱིས་ཐུན་མོང་དུ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །དཀྱིལ་འཁོར་སྙིང་པོ་བཤད་དུ་གསོལ། །ཞེས་གསོལ་བ་གདབ་ཅིང་། བཞི་མེད་ན་གཅིག་གིས་ཀྱང་ཕྱོགས་དེ་དག་ཏུ་སོང་ནས་བྱ། དེ་ཡང་མེད་ན་བསྒོམས་པས་ཀྱང་རུང་ངོ་། །དེ་ནས་སློབ་དཔོན་གྱིས་རྡོར་དྲིལ་འཛིན་ཅིང་འཛུམ་པའི་མདངས་ཀྱིས་བལྟས་ཏེ། ཕྱོགས་བཅུ་མ་ལུས་དུས་གསུམ་གྱི། །རྒྱལ་བ་སྲས་བཅས་དགོངས་སུ་གསོལ། །ཆེ་གེ་མོ་སོགས་དོན་གྱི་ཕྱིར། །དཀྱིལ་འཁོར་ཆེན་པོ་བདག་བགྱིད་པས། །བདག་ཅག་རྗེས་སུ་བཟུང་བའི་ཕྱིར། །ས་འདི་ཤིས་པར་བྱིན་རླབས་པར། །བདེ་བར་གཤེགས་པས་མཛད་དུ་གསོལ། །ཞེས་ནམ་མཁར་བཞུགས་པའི་དེ་བཞིན་གཤེགས་པ་ཐམས་ཅད་རྗེས་སུ་བསྐུལ་ལ། ཧཱུཾ་བཞིས་བྱིན་བསྡུས་ནས་རང་ལ་བསྟིམ། དེ་ནས་སྙེམས་པ་དང་བཅས་པས་ལངས་ཏེ། འགྲོ་བ་རྣམས་ལ་སྙིང་རྗེས་བལྟས་ནས། སླར་ཡང་རང་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པ་མི་བཟད་པའི་ཁྲོ་བོའི་སྤྲིན་སྤྲོ་བའི་སྐུར་གྱུར་པའི་མིག་གཉིས་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུཾ་ལས་བསྐལ་པའི་མེར་འབར་བས་ཀུན་ཏུ་བལྟ་ཞིང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེར་མི་ཕྱེད་པའི་ང་རྒྱལ་དང་ལྡན་པས། ཧཱུཾ། ང་ནི་སངས་རྒྱས་ཀུན་གྱི་བདག །གསང་བའི་དཀྱིལ་འཁོར་ཆེན་པོ་འདིར། །དབང་མཆོག་སྒྲུབ་པའི་ལས་བྱེད་ཀྱིས། །བགེགས་རྣམས་ཐམས་ཅད་གཞན་དུ་དེངས། །ཞེས་བརྗོད་པས། ཐུགས་ཀའི་ཧཱུཾ་ལས་ཁྲོ་བོའི་སྤྲིན་མི་བཟད་པར་སྤྲོ་ཞིང་། རྐང་མཐིལ་གཉིས་སུ་ཧཱུཾ་ལས་འབར་བའི་རྡོ་རྗེ་རེ་རེས་མཚན་པར་བསམ་ལ། རྡོ་རྗེ་གསོར་བ་དང་། དྲིལ་བུ་འཁྲོལ་ཞིང་། ཧཱུཾ་བཞི་པའི་དྲག་སྔགས་སྒྲོག་པ་དང་བཅས་པས་དབང་ལྡན་ནས་བརྩམས་ཏེ། རྡོ་རྗེའི་འགྲོས་ཀྱིས་གཡས་སུ་བསྐོར་ནས་དཀྱིལ་འཁོར་གྱི་གཞི་ཅིས་ཀྱང་མི་ཤིགས་པ་རྡོ་རྗེའི་རང་བཞིན་དུ་བརྟན་པར་བྱིན་གྱིས་རློབ་བོ། །བདུན་པ་བསྲུང་བ་ནི། སྟོང་པའི་ངང་ལས་པད་ཉི་ལ་གནས་པའི་ཧཱུཾ་ལས་སྣ་ཚོགས་རྡོ་རྗེ། ཞེས་པ་ནས། ཨེ་ར་པ་ཏི་ཡེ་ཛཿཧཱུཾ་བཾ་ཧོཿ ཞེས་པའི་བར་སྒྲུབ་ཐབས་ལྟར་གྱི་རྗེས་སུ། སླར་ཡང་རང་གི་ཐུགས་ཀ་ནས་ཁྲོ་བོ་བཅུ་ཕྱུང་སྟེ། མདུན་དུ་བཀོད་པའི་ཕུར་བུ་རྣམས་དང་གཉིས་སུ་མེད་པར་གྱུར་པ་ནི། ༀ་བཛྲ་ཀྲོ་དྷ་ཧཱུཾ་ཀ་ར་ཧཱུཾ། གརྫ་གརྫ་ཧཱུཾ་ཕཊ། སོགས་དང་། ཞེས་བརྗོད་པས་ཁྲོ་བོ་བཅུར་གྱུར་ཏེ་ནས། དེ་ནས་ཁྲོ་བོ་བདུད་རྩི་འཁྱིལ་བ་ཐོ་བ་ཐོགས་པ་སྤྲུལ་ཏེ། ཞེས་པའི་བར་དང་། ཁྲོ་བཅུ་སོ་སོའི་སྔགས་ཀྱི་མཐར། ༀ་གྷ་གྷ་གྷཱ་ཏ་ཡ་ནས་འབར་བ་སྲུང་བའི་འཁོར་ལོས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་མོ། །ཞེས་པའི་བར་སྒྲུབ་ཐབས་ལྟར་བྱས་ལ། ཕྱོགས་གཡས་བསྐོར་དང་། མཚམས་གཡོན་བསྐོར། སྟེང་གི་ཕུར་བུ་ཤར་དང་། འོག་གི་ཕུར་བུ་ནུབ་ཏུ་གདབ་ཅིང་རྡོ་རྗེའི་གར་དང་སྟངས་སྟབས་ཀྱི་རོལ་པ་ཅི་རིགས་པའང་བྱའོ། །དེ་ལྟར་ཆོས་ཐམས་ཅད་སེམས་ལས་ལོགས་སུ་མེད་ལ། སེམས་ཀྱང་སྟོང་ཉིད་ནམ་མཁའི་རང་བཞིན་དུ་གནས་པས་བར་དུ་བཅད་བྱ་གཅོད་བྱེད་ཐམས་ཅད་དམིགས་སུ་མ་གྲུབ་པ་དེ་ཁོ་ན་ཉིད་ཀྱི་བསྲུང་བའོ། །སྔར་བཤད་པའི་སའི་ཆོ་ག་ཕལ་ཆེར་དཀྱིལ་འཁོར་གྱི་ཁང་པ་ལོགས་སུ་བྱེད་པ་དང་། བརྐོས་ནས་སྟེགས་བུ་བྱ་དགོས་པའི་སར་ཡིན་ལ། གཞན་དུ་ན་མི་སྣང་བ་ལ་བསླང་བ་ཙམ་སྔོན་དུ་འགྲོ་བས་དབང་དུ་བྱ་བ་དང་། སྔགས་རྒྱ་ཏིང་ངེ་འཛིན་གྱིས་སྦྱང་བ་རྣམས་བྱས་ནས། ས་བྱིན་གྱིས་རློབ་པའི་ལས་ལ་འཇུག་ཅིང་། སྔར་དྲངས་པའི་ལས་རིམ་གྱི་སྡོམ་ཚིག་ཏུ་བསྲུང་བ། བྱིན་གྱིས་རློབ་པ། བཟུང་བ་ཞེས་པའི་རིམ་པས་གསུངས་ཀྱང་། འོག་ཏུ་དོན་འཆད་པའི་ཚེ་བསྲུང་རློབ་གཉིས་གོ་ལྡོག་ཅིང་། བཟུང་བ་སྟ་གོན་གྱི་དཀྱུས་སུ་བཤད་པ་ལྟར་བདེ་བས་འདིར་ཡང་དེ་བཞིན་བྱས་སོ། །དེ་དག་གི་ནུབ་དང་པོའི་བྱ་བའོ། །བཞི་པ་སྟ་གོན་ནམ་ལྷག་པར་གནས་པའི་ཆོ་ག་ལ། དེ་ཡང་ལས་རིམ་གྱི་རྩ་བའི་ས་བཅད་གཉིས་པ་ཐིག་ལ་གཉིས་ཀྱི་ཡེ་ཐིག་དང་། བཞི་པ་ཚོན་གྱིས་བྲི་བ་དང་། ལྔ་པ་རྣམ་པ་དགོད་པའི་དབྱེ་བ་རྣམས་ནི་ལག་ལེན་བདེ་ཕྱིར་འོག་ཏུ་དངོས་གཞིའི་སྐབས་སུ་འཆད་ཅིང་། དྲུག་པ་རྣམ་རྒྱལ་དང་ལས་བུམ་བསྙེན་པ། གཉིས་པའི་ནང་ཚན་ལས་ཐིག་གདབ་པ། བདུན་པ་རབ་གནས་ལ་གསུམ་ལས། ཡན་ལག་དང་སློབ་བུར་རབ་གནས་རྣམས་ས་བཅད་གསུམ་པ་སྟ་གོན་གྱི་ཁོངས་འདིར་བླངས་ཏེ་ལག་ལེན་འབྲེལ་བསྡེབས་ནས་གསེབ་ཚགས་སུ་འཆད་པར་བྱའོ། །དེ་ལ་གཉིས་ཏེ། ཡན་ལག་རབ་གནས་དང་། ཡན་ལག་ཅན་གྱི་རབ་གནས་སོ། །དང་པོ་ལ། ཤོམས་དང་། ཆོ་ག་དངོས་གཉིས་ཀྱི། དང་པོ་ནི། རྩ་བའི་དཀྱིལ་འཁོར་གང་དུ་བྱུང་བའི་དབང་ལྡན་གྱི་ཕྱོགས་སུ་ཁྲུ་དོ་པའི་མཎྜལ་དྲིས་བྱུག་ལ། སྣ་ཚོགས་པདྨ་འདབ་བརྒྱད་རྡོ་རྗེའི་ར་བ་དང་བཅས་པ་བྲི། དེའི་དབུས་སུ་ལས་བུམ་ཆས་ལྡན་རྡོ་རྗེ་རྒྱ་གྲམ་གྱི་མཚན་མ་ཅན་དགོད། ཤར་དུ་ཡེ་ཤེས་དང་ལས་ཀྱི་ཐིག་སྐུད། ལྷོར་རྡོ་རྗེ། ནུབ་ཏུ་ཐོད་ཆུ་བདུད་རྩི་ལྔ་ལྡན། བྱང་དུ་དྲིལ་བུ། དབུས་དང་མཚམས་ཀྱི་པད་འདབ་བཞི་ལ་རྡུལ་ཚོན་ལྔ་མདོག་རིགས་སྡེབས་པ་དཔའ་བོ་འབྲུ་ལྔ་བཀོད་པ་དང་། དེ་དག་གི་མཐར་མཆོད་གཏོར་སྤྱི་དང་མཐུན་པར་བཤམ་མོ། །གཉིས་པ་ནི། སྔོན་འགྲོ་ནས་བཟུང་བདག་གི་རྣལ་འབྱོར་བཟླས་པའི་མཐར་ཐུག་པ་སྔོན་དུ་འགྲོ་བས་ལས་བུམ་བསང་སྦྱང་། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཉི་མའི་གདན་ལ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། ཧཱུཾ་བིགྷྣཱཾ་ཏ་ཀྲྀ་ཏ་ཕཊ། ཅེས་བརྗོད་པས། ཁྲོ་བོའི་མི་འཆི་ཐབས་སྦྱོར་ལྗང་ནག་རྒྱ་གྲམ་དང་དྲིལ་བུ་འཛིན་པའི་སྐུར་གྱུར་པར་བསམ་ཞིང་། ལས་རིགས་བདག་པོར་བྱས་པའི་ཡེ་ཤེས་ལྔས་དབང་བསྐུར། སྐུ་གསུང་ཐུགས་བྱིན་གྱིས་རློབ། བཛྲ་ས་མཱ་ཛཿས་སྙན་གསན་དབབ། ཨེ་ཧྱེ་ཧིས་སྤྱན་དྲང་། ཛཿཧཱུཾ་བྃ་ཧོཿས་གཉིས་མེད་དུ་བསྟིམ། ཀཱ་ཡ་ཝཱ་ཀ་ཙིཏྟ་བཛྲས་བརྟན་པར་བྱས། ཀུན་བཟང་། ཞབས་བསིལ། བཞི་བསྣོལ་གྱི་མཆོད། རྡོ་རྗེ་རྩེ་གཅིག་པའི་རྒྱས་ལས་བུམ་ལ་རེག་སྟེ། ཧཱུཾ་བིགྷྣཱནྟ་ཀྲྀ་ཏ་ཕཊ། ཅེས་བརྒྱ་རྩ་བརྒྱད་བཟླས་པའི་མཐར། ལྷ་འོད་དུ་ཞུ་ནས་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བར་བསམ་ཞིང་། བུམ་ཆུ་འཐོར་ཡབ་ཀྱིས་བླངས་ཏེ། ༀ་སྭ་བྷཱ་ཝ་བི་ཤུདྡྷེ་དྷརྨ་ཏཱ་བཛྲ་སིདྡྷི་ཧཱུཾ། ཞེས་བརྗོད་ཅིང་། བདག་གནས་ཡོ་བྱད་ཐམས་ཅད་ལ་གཏོར་བས་ཉེས་སྐྱོན་དག་པར་བསམ་མོ། །དེ་ནི་ལྷག་གནས་ཐམས་ཅད་ལ་བསང་གཏོར་བྱ་བའི་དོན་དུའོ། །དེ་ནས་ཐིག་གི་ལྷག་གནས་ནི། རྒྱུ། གྲོགས། ཚད། གྲངས། རབ་གནས། གདབ་ཐབས། སྤྱོད་ལམ་དང་བདུན་ལས། ཡེ་ཐིག་དང་ལས་ཐིག་གཉིས་ཀའི་སྐུད་རྒྱུ་ཞིང་གི་བ་སུ་ཏའམ། རྒྱུས་ཆེན་ལ་བྱ་བར་གསུངས་ནའང་། ཡེ་ཐིག་གི་རྒྱུར་བྱ་བའམ། ཡང་ན་དམ་ཡེ་ཐུན་མོང་དུ་རས་བལ་ལ་སོགས་པ་དཔའ་བོའི་རིན་གྱིས་ཉོས་པ་ལ་ཁྱད་པར་གྱི་རྒྱུ་ཅུང་ཟད་རེ་བསྲེས་པའོ། །འཁལ་བའི་གྲོགས་ནི་གཞོན་ནུ་མ་མཚན་ལྡན་ལོ་བཅུ་དྲུག་ལོན་པ་ལ་སོགས་པའོ། །ཚད་སྲིད་དུ་འཛིན་པའི་ཆ་མ་གཏོགས་པ་དཀྱིལ་འཁོར་ལས་ཉིས་འགྱུར་དང་། སྦོམ་ཕྲ་སྒོའི་ཉི་ཤུ་ཆ་སྟེ་ཆ་ཆུང་གི་ལྔ་ཆའོ། །གྲངས་ནི་ཡེ་ཤེས་ཀྱི་ཐིག་སྐུད་ཚོན་སྣ་ལྔས་བསྒྱུར་བ་ལྔ་ཚན་ལྔའམ་ལྔ་ཚན་གཅིག་དང་། དམ་ཚིག་གི་ཐིག་སྐུད་དཀར་དམར་སྔོ་སྟེ་སུམ་ཚན་གསུམ་མམ་གསུམ་ཚན་གཅིག་གོ། །རབ་གནས། གདབ་ཐབས། སྤྱོད་ལམ་གསུམ་ནི་འོག་ཏུ་སྟོན་ནོ། །དེ་ནས་རྡོ་རྗེ་དང་དྲིལ་བུའི་རབ་གནས་ནི། ཧཱུཾ་བིགྷྣཱནྟཱ་ཀྲྀ་ཕཊ། ཅེས་ལས་བུམ་གྱི་ཆུས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་རྡོ་རྗེ་རྩེ་ལྔ་པའི་ལྟེ་བ་ལ་དཔལ་ཆེན་པོ། ཡར་གྱི་རྭ་ལྔ་ལ་ཁྲག་འཐུང་རིགས་ལྔ། མར་གྱི་རྭ་ལྔ་ལ་རིགས་ཀྱི་ཡུམ་ལྔ། ཡས་མས་ཀྱི་པདྨའི་འདབ་མ་བརྒྱད་ལ་གནས་མ་བརྒྱད་དང་ཡུལ་མ་བརྒྱད། དྲིལ་བུའི་ལྟེ་བ་དང་པདྨའི་འདབ་མ་བརྒྱད་ཀྱི་ཕྱོགས་བཞིར་རིགས་ཀྱི་ཡུམ་ལྔ། མཚམས་བཞིར་གསང་བའི་ཡུམ་བཞི། ཞལ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། རྩེ་མོའི་རྡོ་རྗེ་ཁྲག་འཐུང་རིགས་ལྔ་རྣམས་ཀྱི་སྐུར་གསལ་བར་བསྐྱེད་ལ། བསྐུར། རློབ། དབབ། དྲང་། བསྟིམ། བརྟན། མཆོད་ནས། ཧཱུཾ་ཨ། ཞེས་བརྗོད་པས་ལྷ་རྣམས་འོད་དུ་ཞུ། བཛྲ། གྷཎྜེ། ཞེས་བརྗོད་པས། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ་དང་། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ཧཱུཾ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་གཉིས་མེད་པའི། །འཁོར་དང་མྱ་ངན་འདས་པ་ཡིས། །ཆོས་ལ་དེ་བཞིན་དབང་སྒྱུར་ཤོག །ཅེས་བརྗོད་ཅིང་། རྡོ་རྗེ་གསོར། དྲིལ་བུ་དཀྲོལ་བར་བྱའོ། །དེ་ནས་ཐོད་ཆུའི་རབ་གནས་ནི། སྔར་བཞིན་བསང་སྦྱངས། སྟོང་པའི་ངང་ལས་དམ་རྫས་ཀྱི་སྟེང་དུ་ཧཱུཾ་ཧ་ཧེ་ཕཊ་བྷྱོ་ལས་ཁྲག་འཐུང་རོལ་པའི་དཀྱིལ་འཁོར་གྱི་འཁོར་ལོ་ཐམས་ཅད་གསལ་བར་བསྐྱེད། བསྐུར། རློབ། དབབ། དྲང་། བསྟིམ། བརྟན། མཆོད་ལ། རུ་ལུ་ཅུང་ཟད་བཟླས་ལ། ཧཱུཾ་ཞེས་བརྗོད་པས་འོད་དུ་ཞུ་བ་ཡེ་ཤེས་ཀྱི་བདུད་རྩིར་འཁྱིལ་བར་བསམ་མོ། །དེ་ནས་ཚོན་གྱི་ལྷག་གནས་ནི། དགོས་ཆེད། རྒྱུ། གྲངས། རབ་གནས། དགྱེ་ལུགས། ཉེས་སྤོང་དང་དྲུག་ལས། དགོས་ཆེད་ནི། མཚོན་བྱ་ཡེ་ཤེས་ལྔ་མཚོན་བྱེད་རྡུལ་ཚོན་དུ་བསྟན་པའོ། །རྒྱུ་ནི། རབ་རིན་པོ་ཆེ་ལྔའི་ཕྱེ་མ་དང་། འབྲིང་འབྲུའི་ཕྱེ་མ་ཁ་བསྒྱུར་བ་དང་། ཐ་མ་སོ་ཕག་ལ་སོགས་པའི་ཕྱེ་མ་ཚོན་སྣ་ལྔས་ཁ་དོག་བསྒྱུར་བ་སྟེ། གང་ལྟར་ཡང་ཐལ་ཆེན་ཅུང་ཟད་བསྲེས་པའོ། །གྲངས་ནི། ཚོན་སྣ་ལྔ་སོ་སོ་ལ། ལྔ་ཚན་དུ་ཕྱེ་བའམ། ལྔ་ཚན་གཅིག་གིས་ཀྱང་ངོ་། །རབ་གནས་ནི། སྐབས་འདིར་ཐིག་ཚོན་ཐུན་མོང་དུ་བྱ་སྟེ། བསང་སྦྱང་། སྟོང་པའི་ངང་ལས་ཡེ་ཤེས་ཀྱི་ཐིག་སྐུད་དང་ཚོན་སྣ་ལྔ་སོ་སོའི་སྟེང་དུ་ཉི་ཟླ་ལ་གནས་པའི་ཧཱུཾ་ཟུང་ལྔ་དང་། དམ་ཚིག་གི་ཐིག་སྐུད་ཀྱི་སྟེང་དུ་ཉི་ཟླ་ལ་གནས་པའི་ཧཱུཾ་ཟུང་གསུམ་གསལ་བར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོས་འདུས་སོ་སོའི་ཕྱག་མཚན་ས་བོན་གྱིས་མཚན་པ་རྣམས་ཡོངས་སུ་གྱུར་པ་ལས། ཁྲག་འཐུང་རིགས་ལྔ་དང་རིགས་གསུམ་རང་རང་གི་ཡུམ་དང་བཅས་པའི་སྐུར་གྱུར། བསྐུར། རློབ། དབབ། དྲང་། བསྟིམ། བརྟན། མཆོད་དེ། ཧཱུཾ། ཞེས་བརྗོད་པས་ལྷ་རྣམས་འོད་དུ་ཞུ་ནས་ཐིག་ཚོན་སོ་སོ་ལ་ཐིམ་པར་བསམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་མདུན་གྱི་ནམ་མཁར་སྤྱན་དྲངས་ལ། རྡོ་རྗེ་གསོར་བཞིན་དུ། ཧོཿ མི་གནས་ཡེ་ཤེས་ཆེན་པོའི་བདག །ཕྱོགས་བཅུ་དུས་བཞིའི་དེ་བཞིན་གཤེགས། །ཐམས་ཅད་གསན་ཅིང་དགོངས་སུ་གསོལ། །རྡོ་རྗེ་འཛིན་པ་བདག་གིས་ནི། །འཇིགས་བྱེད་ཆེན་པོ་ཧེ་རུ་ཀའི། །དཀྱིལ་འཁོར་བཞེངས་པར་འཚལ་ལགས་ན། །དེ་བཞིན་གཤེགས་པ་ཐམས་ཅད་ཀྱིས། །བདག་ལ་མཐུ་དང་བྱིན་རླབས་སྩོལ། །བདག་ལ་རྡོ་རྗེ་ཡེ་ཤེས་ཀྱིས། །ཐིག་ཚོན་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས། རང་གི་མིག་གཉིས་ཛཿཡིག་ལས་སྐྱེས་པའི་ཉི་ཟླར་བསམ་ལ། ༀ་དིཔྟ་དྲྀཥྚ་གུ་ཧྱ་ཛྙཱ་ན་ཛཿཛཿ ཞེས་བརྗོད་ཅིང་རྫི་མ་བསྐྱོད་པ་འབར་བའི་ལྟ་སྟངས་ཀྱིས་བསྐུལ་བས་ནམ་མཁའི་དེ་བཞིན་གཤེགས་པ་རྣམས་སྦྱོར་བ་མཛད་པར་མོས་ཏེ། ༀ་མ་ཧཱ་ཤཱུ་ནྱ་ཏཱ་སོགས་ཡེ་ཤེས་ལྔའི་སྔགས་རྣམས་བརྗོད་པས་དེ་རྣམས་བརྗོད་པས་དེ་རྣམས་ཀྱི་ཐུགས་ཀ་ནས་ཡེ་ཤེས་ལྔའི་རང་བཞིན་གྱི་འོད་ཟེར་ཁ་དོག་ལྔར་བྱུང་། ཡེ་ཤེས་ཀྱི་ཐིག་སྐུད་དང་ཚོན་སོ་སོ་ལ་ཐིམ་པས་དེ་ཉིད་ཡེ་ཤེས་ལྔའི་ངོ་བོར་གྱུར་པར་བསམ་ཞིང་། འབྲུ་ལྔ་བརྗོད་བཞིན་པར་སློབ་མ་དང་བཅས་པས་དང་པོར་སྲད་བུ་ལྔ་ཚན་རེ་རེ་སོ་སོར་སྒྲིལ། དེ་ནས་ལྔ་པོ་ཡང་གཅིག་ཏུ་བསྒྲིལ་ལ་བརྡོགས་ནས་གསེར་ལ་སོགས་པའི་སྣོད་དུ་བཞག །དེ་བཞིན་དུ་ཀཱ་ཡ་བཛྲ་སོགས་སྐུ་གསུང་ཐུགས་ཀྱི་སྔགས་གསུམ་བརྗོད་པས་ནམ་མཁའི་དེ་བཞིན་གཤེགས་པ་རྣམས་ཀྱི་གནས་གསུམ་ནས་རྡོ་རྗེ་གསུམ་གྱི་རང་བཞིན་གྱི་འོད་ཟེར་དཀར་དམར་མཐིང་གསུམ་བྱུང་། དམ་ཚིག་གི་ཐིག་སྐུད་སོ་སོ་ལ་ཐིམ་པས་དེ་ཉིད་སྐུ་གསུང་ཐུགས་ཀྱི་ངོ་བོར་གྱུར་པར་བསམ་ཞིང་། འབྲུ་གསུམ་བརྗོད་བཞིན་དུ་གསུམ་ཚན་རེ་རེ་སོ་སོར་སྒྲིལ། དེ་ནས་གསུམ་པོའང་གཅིག་ཏུ་སྒྲིལ་ནས་སྔར་བཞིན་བཞག །ཚོན་ལ། ༀ་ཨཱཿསརྦ་པཉྩ་རཏྣ་ས་མ་ཡེ་ཧཱུཾ་ཧཱུཾ་ཧཱུཾ། ཞེས་བཟླས་པས་རིན་པོ་ཆེའི་རྡུལ་ཕྲ་རབ་ཀྱི་རྡུལ་ཚོན་འབར་བར་བསམ་ཞིང་། བྲིས་པའི་ཡིག་འབྲུ་རྣམས་ཀྱང་མི་མངོན་པར་སྤུངས་ཤིང་བསྣུན་པར་བྱའོ། །ཚོན་དགྱེ་བ་དང་། ཉེས་སྤོང་ནི་འོག་ཏུ་སྟོན་ནོ། །གཉིས་པ་ཡན་ལག་ཅན་གྱི་རབ་གནས་ལ། བུམ་པ། སློབ་མ། ལྷ་ལྷག་པར་གནས་པ་དང་གསུམ་ལས། དང་པོ་བུམ་པ་རབ་གནས་ལ། ཤོམས་དང་། རབ་གནས་དངོས་གཉིས་ལས། དང་པོ་ནི། རྒྱས་པར་ན་མཚན་ཉིད་དང་ལྡན་པའི་བུམ་པ་ལྷ་གྲངས་དང་མཉམ་པའམ། བསྡུ་ན་རིགས་ལྔར་བསྡུས་ཏེ་ལྷ་བུམ་ལྔ། ཤིན་ཏུ་བསྡུ་ན་རྣམ་རྒྱལ་དང་། ལས་བུམ་གཉིས་ལས། རྣམ་རྒྱལ་ནི་དབུས་ཀྱི་ཁྲོ་བོ་གསང་བུམ་ཁོ་ནར་བསྡུས་ཀྱང་རུང་ངོ་། །དེའི་ཚུལ་ནི། ཕོ་མོའི་ཐོད་པ་མཚན་ལྡན་གྱི་ནང་དུ་ཆང་དང་རྫས་སུམ་ཅུའི་བཅུད་ཀྱིས་བཀང་བ་དར་མཐིང་དམར་གྱིས་བཅིངས་ཤིང་ལྕང་ལོས་བརྒྱན་པ་སྟེ། རྫས་སུམ་ཅུ་ནི། ལན་ཚྭ། སྦྲང་རྩི། བུ་རམ། ཨ་འབྲས། མར་ཏེ་སྙིང་པོ་ལྔ། ཧ་ས་དེ་བ། བྲྀ་ཧ་ཏི། སྭ་ད། ཀཎྜ་ཀ་རི། ཨ་པ་ར་ཙི་སྟེ་སྨན་ལྔ། གསེར་དངུལ་མུ་ཏིག་བྱུ་རུ་མུ་མེན་ཏེ་རིན་པོ་ཆེ་ལྔ། ནས་འབྲས་གྲོ་ཏིལ་སྲན་མ་སྟེ་འབྲུ་ལྔ། གུར་གུམ་གླ་རྩི་ཛ་ཏི་ཙནྡན་དཀར་དམར་ཏེ་དྲི་ལྔ། དེ་ལྟར་ལྔ་ཚན་ལྔ་པོའི་སྟེང་དུ་བདུད་རྩི་ལྔ་བསྣན་པས་སུམ་ཅུའོ། །དེ་ཡང་བུམ་པ་ལྷ་གྲངས་དང་མཉམ་པ་ལ་ནི་གང་དུ་བཞག་པའི་གནས་དཀྱིལ་འཁོར་གྱི་ལྷ་གནས་འབྱུང་འགྱུར་སོ་སོའི་གནས་དང་། བུམ་པ་ལྔ་པའི་ཚེ་ན་དཀྱིལ་འཁོར་གྱི་དབུས་ཀྱི་ལྟེ་བ་དང་ཕྱོགས་བཞི་སྟེ་གཙོ་བོ་རིགས་ལྔའི་གནས་སུ་མ་འཆོལ་བར་བཞག །བུམ་པ་གཅིག་ལས་མེད་ན་གཙོ་བོའི་གནས་སུ་དགོད། མཐའ་མཆོད་པ་རྣམས་ཀྱི་ཇི་ལྟར་མཛེས་པར་བསྐོར། ལས་བུམ་སྒོའི་ནང་རོལ་གྱི་གཡས་སམ་རང་གི་མདུན་སོགས་གང་བདེར་བསང་གཏོར་གྱི་དོན་དུ་བཞག །གཉིས་པ་ནི། བུམ་པ་རྣམས་ལས་ཐམས་ཅད་པས་བསང་། ཤཱུ་ནྱ་ཏཱས་སྟོང་པར་སྦྱང་། སྟོང་པའི་ངང་ལས་བྷྲཱུཾ་ལས་བྱུང་བའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གདན་དང་བཅས་པ་གསལ་བར་བསམ་ལ། བུམ་པ་ལྷ་གྲངས་དང་མཉམ་པ་ཡོད་ན་སོ་སོའི་གདན་ལ་ལྷ་དེ་དང་དེ་བསྐྱེད་ཅིང་། བུམ་པ་ལྔ་པའི་ཚེ་བླ་མ་གོང་མ་དག་གིས། དབུས་སུ་དཀྱིལ་འཁོར་གྱི་འཁོར་ལོ་ཚང་བ་དང་། ཤར་དུ་བུདྡྷ་ཁྲག་འཐུང་ལ། ཤར་དང་ཤར་ལྷོའི་གནས་མ་དང་ཡུལ་མ། སྒོ་མ་རྟ་གདོང་མ། ཤར་གྱི་དབང་མོ་བདུན་རྣམས་བསྡུས་པ་སོགས་རིགས་སོ་སོར་ཕྱེ་མོད་ཀྱང་། ཁྱབ་བྱ་དཀྱིལ་འཁོར་ཚང་བ་ཁྱབ་བྱེད་རྡོ་རྗེའི་རིགས་གཅིག་ཏུ་བསྡུས་རྗེས། སླར་ཡང་ཁྱབ་བྱེད་དང་ཁྱབ་བྱ་གཞན་བཞི་པོ་སོ་སོར་ཕྱེ་བ་ལ་དགོས་པ་ལྷག་པོ་མ་མཐོང་བས། འདིར་རྒྱུད་ཀྱི་གླེང་གཞི་དང་བསྟུན་ཏེ། དབུས་སུ་བཛྲ་ཧེ་རུ་ཀ་ལ་དབང་ཕྱུག་མའི་གཙོ་མོ་བཞི་དང་སྒོ་མ་བཞི། རིགས་གཞན་བཞི་ལ་རང་རང་གི་ཕྱོགས་དང་མཚམས་ཀྱི་གནས་ཡུལ་དང་། ཕྱོགས་ཀྱི་སྒོ་སྐྱོང་བཞི། དབང་མོ་ལྔ་ལྔ་རེ་བསྡུས་པ་སྐྱོན་གྱི་དགག་ཆ་ཆུང་བར་མངོན་ནོ། །བུམ་པ་གཉིས་པའི་ཚེ་རྣམ་རྒྱལ་བུམ་པའི་ནང་དུ་རང་རང་གི་གདན་ལ་ཧཱུཾ་ཟུང་ལྔ་དང་། ཧ་བརྒྱད་དང་། ཧེ་བརྒྱད་དང་། ཕཊ་བཞི། བྷྱོ་ཉི་ཤུ་རྩ་བརྒྱད་རྣམས་གནས་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་སོ་སོའི་ཕྱག་མཚན་ས་བོན་གྱིས་མཚན་པ་རྣམས་སུ་གྱུར། སྥ་ར་ཎ ཕཊ། སཾ་ཧ་ར་ཎ་ཧཱུཾ། སླར་ཡང་འཕྲོ་འདུས་ཡོངས་སུ་གྱུར་པ་ལས། ༀ་བཛྲ་མ་ཧཱ་ཤྲི་ཧེ་རུ་ཀ་ཞེས་སོགས་སོ་སོའི་བསྐྱེད་སྔགས་རྣམས་རིམ་བཞིན་བརྗོད་པས། བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་ལ་སོགས་ཏེ་ལྔ་བཅུ་རྩ་བརྒྱད་ཁྲག་འཐུང་རོལ་པའི་དཀྱིལ་འཁོར་གྱི་འཁོར་ལོ་ཐམས་ཅད་ཡོངས་སུ་རྫོགས་པར་གསལ་བར་བསམ་ལ། བསྐུར། རློབ། དབབ། དྲང་། བསྟིམ། བརྟན། མཆོད་པ་རྣམས་བྱས་ནས། གཟུངས་ཐག་ལ་འཇུས་ཏེ། བདག་གི་ཞལ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་སོང་བས་བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། སྙོམས་པར་ཞུགས་པའི་བྱང་སེམས་ཡེ་ཤེས་ཀྱི་བདུད་རྩིར་བབས་པས་བུམ་པ་གང་བར་བསམ་ཞིང་། ལྷ་སོ་སོའི་རྩ་སྔགས་གཙོ་འཁོར་གྱི་འགྲོས་སྦྱར་བ་ཅི་ནུས་སུ་བཟླས་པའི་མཐར། ༀ་ཏཔྡེ་ཏཔྡེ་མ་ཧཱ་ཏཔྡེ་སྭཱ་ཧཱ། ཞེས་ཐོད་ཆུ་བུམ་ནང་དུ་ཕུལ་བས། ལྷ་ཐམས་ཅད་ཆགས་པ་ཆེན་པོས་ཡེ་ཤེས་ཀྱི་བདུད་རྩིར་ཞུ་བ་བུམ་ཆུ་དང་རོ་གཅིག་ཏུ་གྱུར་པར་བསམ་ཞིང་། བདུག་སྤོས་ཀྱིས་བདུག་པར་བྱའོ། །སློབ་མར་དབང་བསྐུར་བ་དང་། རབ་གནས། བདག་འཇུག་ཙམ་དང་། སྒྲུབ་པ་དངོས་གྲུབ་ཀྱི་དབང་ལེན་པ་རྣམས་ལ་བུམ་པ་ངེས་པར་འཆའ་དགོས་མོད། སྒྲུབ་མཆོད་ཙམ་ལ་ངེས་པར་དགོས་པ་མ་ཡིན་ཀྱང་འགྲུབ་ན་ནི་ལེགས་སོ། །གཉིས་པ་སློབ་མ་ལྷག་པར་གནས་པའི་ཆོ་ག་ནི། དབང་ཆོག་ཏུ་ཤེས་པར་བྱའོ། །གསུམ་པ་ལྷ་ལྷག་པར་གནས་པའི་ཆོ་ག་ནི། ས་བཟུང་བའི་ས་ཁོངས་སྨོས་པ་ཉིད་དེ། དེ་ལ་ཐིག་གདབ་པ་དང་། ལྷག་གནས་དངོས་ལས། དང་པོ་ནི། ལྷག་གནས་བྱས་པའི་བུམ་པ་རྣམས་དབེན་པར་བཞུགས་སུ་གསོལ་ནས། ཐོག་མར། ༀ་ཨཱཿསརྦ་ཤོ་དྷ་ནེ་ཧཱུཾ་ཕཊ། ཅེས་ལས་བུམ་གྱི་ཆུས་དཀྱིལ་འཁོར་གྱི་གཞི་ལ་བསང་གཏོར་བྱས་ནས་བདུད་རྩི་དང་བཅས་པའི་དྲིས་བྱུག་ཅིང་འབྲི་བར་འགྱུར་བའི་དཀྱིལ་འཁོར་ནམ་མཁའ་ལ་གསལ་བར་དམིགས་ཏེ་དམ་ཚིག་གི་ཐིག་སྐུད་དྲི་ཞིམ་པོའི་ཐིག་ཆལ་ལས་ཕྱུངས་པ་ཆོ་ག་བཞིན་དུ་གཏོང་ལེན་བྱས་ལ། དང་པོ་ཤར་ནུབ་ཚངས་ཐིག་གདབ། །དབུས་ནས་ཕྱོགས་བཞིར་མཚན་མ་བྱ། །ཤར་ནུབ་ཚད་ནས་གཉིས་པ་དང་། །ཕྱོགས་བཞིའི་ཚད་ནས་ཟུར་ཐིག་བཙལ། །ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་གདབ། །དེ་ནས་ཆ་ཆེན་ནང་མ་གསུམ། །ཕྱེད་དུ་གཏུབས་ཏེ་དྲུག་ཏུ་བྱས། །དང་པོ་ཕྱེད་གདབ་ཕྱི་མ་ཕྱེད། །གཉིས་པ་དང་ནི་བཞི་པའི་ནང་། །བཞི་ཆ་གཅིག་རེ་གདབ་པར་བྱ། །ལྔ་པ་དབུས་དོར་མཐའ་གཉིས་བསིལ། །དྲུག་པ་ཕྱེད་གདབ་ཕྱི་མ་གདབ། །དེ་ནི་ནང་གི་སྒོ་ཡིན་ནོ། །ཆ་ཆེན་བཞི་པ་ཕྱི་ཡི་ཁྱམས། །ལྔ་དགུ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་བརྒྱད་པ་ཆ་བཞིར་བགོ། །ཕྱི་སྒོ་ཚངས་ཐིག་གཡས་གཡོན་དུ། །ཆ་ཆེན་གཉིས་གཉིས་བཏབ་པ་ལས། །དང་པོ་ཕྱེད་གདབ་ཕྱི་མ་བཅད། །གཉིས་པ་ཆ་ཕྲན་བཞི་རུ་བསིལ། །དབུས་ནས་ཟླུམ་བསྐོར་ཆ་ཕྲན་ལྔ། །གཅིག་དང་ལྔ་དང་གཅིག་རྣམས་ནི། །ལྟེ་བ་མུ་ཁྱུད་རྩིབས་རྩིབས་བརྟེན། །དེ་ནས་ནང་གི་གློ་འབུར་གྱི། །དཀྱུས་སུ་སྒོ་ཚད་ཞེང་ཆ་ཕྲན། །ཁྱམས་རྩིག་འདོད་སྣམ་ཕ་གུ་དང་། །དྲྭ་ཕྱེད་ཤར་བུ་མདའ་ཡབ་སྟེ། །སྒོ་ཁྱུད་སྒོ་ཚད་འགྲམ་ལོགས་གཉིས། །དེ་ཡི་ཕྱེད་ཡིན་ནང་སྒོའོ། །ཕྱི་མ་རིམ་བཞིན་ཕྱི་ཁྱམས་རྩིག །འདོད་སྣམ་ཕ་གུ་དྲྭ་ཕྱེད་དང་། །ཤར་བུ་མདའ་ཡབ་རྣམས་ཀྱི་ས། །སྒོ་འཁྱུད་ཆ་ཆེན་འགྲམ་དང་ལོགས། །དེ་ཡི་ཕྱེད་ཡིན་མུན་པ་དང་། །ཀ་བ་ཀ་རྒྱན་ཆ་ཕྲན་རེ། །རྟ་བབས་བརྒྱད་པོ་ཆ་མཉམ་ལས། །དང་པོ་ཀ་རྒྱན་མཐའ་དང་མཉམ། །གཉིས་གསུམ་དེ་ནས་གཅིག་ཕྱིར་བསྐྱེད། །བཞི་པ་གཉིས་བསྐུམ་ལྔ་པ་གཅིག །ཕྱིར་འཕྱར་དྲུག་པ་གཉིས་སུ་བསྐུམ། །བདུན་བརྒྱད་རིམ་བཞིན་རེ་རེ་འཕྱར། །རིམ་པར་རྟ་རྐང་ཆུ་སྐྱེས་དང་། །སྒྲོམ་དང་ཟ་ར་ཚགས་སྣ་འཕྱོང་། །སྒྲིལ་འཕྱང་ཤར་བུ་ཁྱུང་མགོའོ། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཛོམ་ས་ནས་བཟུང་སྟེ། །ཆ་ཕྲན་གཉིས་ཀྱིས་གླང་རྒྱབ་དབུས། །མུན་པའི་ཕྱི་ཐིག་ཚངས་གནས་ཀྱི། །གཡས་གཡོན་ཆ་ཕྲན་གཉིས་འདས་ནས། །སྔར་བཞིན་བསྐོར་བ་མུན་པའི་མཐོངས། །མུ་རན་ཆ་ཕྲན་གཅིག་གིས་བསྐོར། །འཁོར་ལོ་ཉིས་འགྱུར་པདྨ་དང་། །གདུགས་ནི་ཆ་ཕྲན་རེ་རེའོ། །མདའ་ཐིག་ཟུར་ནས་ཆ་ཕྲན་གཅིག །དོར་མཐར་ཆ་ཕྲན་གཅིག་དང་གཉིས། །ཆ་ཆེན་གཅིག་དང་དེ་ཕྱེད་དང་། །ཆ་ཆེན་གཅིག་ཏུ་བསྐོར་བ་ནི། །རྩིབས་རྟེན་པདྨ་དུར་ཁྲོད་དང་། །རྡོ་ར་མེ་རི་རྣམས་ཀྱི་ས། །རྩ་ཐིག་སྒོ་ཁྱུད་འཛོམ་རྩེ་ནས། །རྩིབས་རྟེན་ཚངས་ཐིག་འཛོམ་པའི་བར། །གཡས་ནས་གཅིག་ཤོས་གཡོན་ནས་གཡས། །བསྐོར་བ་འོག་གཞི་འཁོར་ལོའི་རྩིབས། །ཞེས་པ་སྟེ། གདབ་པའི་ཆོ་ག་དང་། སྤྱོད་ལམ་ནི་ཡེ་ཐིག་གི་སྐབས་བཞིན་འདིར་ཡང་ཤེས་པར་བྱ་བ་ཉིད་དོ། །སྐབས་འདིར་སྐྱ་ཐིག་ཙམ་བཏབ་ནས། དམ་ཡེའི་ཐིག་འདེབས་ཚུལ་སྦྲེལ་ནས་འོག་ཏུ་གསུངས་པའང་དོན་ལ་གནས་པ་ཡིན་མོད་ཀྱི། འོན་ཀྱང་བྱ་སླ་བའི་ཆེད་དུ་ལས་ཐིག་འདིར་བཏབ་ནས་སྐྱ་ཐིག་མི་དགོས་པར་བྱས་པ་ཡིན་ནོ། །གཞན་དུ་ཁ་ཅིག་ལས་ཐིག་མ་བཏབ་པར་སྟ་གོན་གྱི་ལྷ་གནས་ངེས་པ་མི་རྟོགས་པའི་ཕྱིར་འདིར་ངེས་པར་འདེབས་དགོས་ཞེས་སྨྲ་ནའང་མཐའ་གཅིག་ཏུ་ངེས་པར་མ་མཐོང་ངོ་། །གཉིས་པ་ནི། ཐིག་གི་མཎྜལ་དེའི་མཐར་ལྷ་གྲངས་སོགས་ཅི་འབྱོར་བའི་མཆོད་པ་བཤམས་ལ། དཀྱིལ་འཁོར་གྱི་གནས་སུ་རང་ཉིད་གཙོ་བོ་ཡབ་ཡུམ་མཉམ་པར་སྦྱོར་བའི་སེམས་སྤྲིན་ལས་བྷྲཱུཾ་འཕྲོས་ཏེ་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པར་བསྐྱེད་ལ། ལྷ་གནས་སོ་སོར་རང་རང་གི་རྩ་སྔགས་ལ་མ་ཎི་པདྨ་ཡེ་སྭཱ་ཧཱ་བཏགས་པའི་སྔགས་བརྗོད་ཅིང་བྱང་སེམས་དཀར་དམར་ཙནྡན་དང་སྦྱར་བའི་ཐིག་ལེ་གཙོ་བོའི་གནས་སུ་གྲུ་བཞི་པ་དང་། གཞན་རྣམས་སུ་ཟླུམ་པོར་བྱས་ལ། མེ་ཏོག་གི་ཚོམ་བུ་བཀོད་ནས། གདན་བསྐྱེད། བདག་ཉིད་དཀྱིལ་འཁོར་གྱི་དབུས་སུ་ཉི་ཟླའི་གདན་ལ་འདུག་པར་མོས་ལ། གཙོ་བོ་ཡབ་ཡུམ་གྱི་སྐུར་གསལ་བཏབ་པ་ལ་དབང་བསྐུར་བྱིན་གྱིས་རློབ། མཁའ་གསང་བྱིན་བརླབས་དང་ལྡན་པའི་སྒོ་ནས་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨོར་སྤྲོས་པ་ལྔ་བཅུ་རྩ་བརྒྱད་ཁྲག་འཐུང་རོལ་པའི་དཀྱིལ་འཁོར་གྱི་འཁོར་ལོར་རྫོགས་པ་རྣམས་རང་རང་གི་གནས་ཇི་ལྟ་བར་བཞུགས་པར་བསམ་ལ། སྨུག་ནག་སྔོ་ནག་སེར་ནག་དང་། །ཞེས་སོགས་ཀྱིས་གསལ་གདབ། དབབ། དྲང་། བསྟིམ། བརྟན། མཆོད་བསྟོད་རྣམས་བྱས་ལ། སྤོས་དང་བཅས་པའི་རྡོར་དྲིལ་འཛིན་བཞིན་པས། ༀ། ཕྱོགས་བཅུའི་འཇིག་རྟེན་རབ་འབྱམས་ན། །རྒྱལ་བ་གང་བཞུགས་འཁོར་དང་བཅས། །མགོན་པོ་དམ་ཅན་ཇི་སྙེད་པ། །ཐམས་ཅད་ཀུན་ནས་དགོངས་སུ་གསོལ། །སྲས་བཅས་ཐབས་ཅིག་གཤེགས་ནས་ཀྱང་། །ས་གཞི་ཡོངས་སུ་བཟུང་བར་མཛོད། །ༀ་བཛྲ་ཀྲོ་དྷ་ས་མ་ཡ་སྟྭཾ། ཞེས་གསོལ་བ་བཏབ་པས་ལྷ་ཐམས་ཅད་དགྱེས་པར་རོལ་པའི་གཟི་བྱིན་མཐའ་ཡས་པས་དེ་ཉིད་དུ་ཐིམ་པས་ཐམས་ཅད་དཀྱིལ་འཁོར་གྱི་རང་བཞིན་དུ་གསལ་བར་བསམ་པ་དེ་དག་ནི་ལྷག་གནས་ཀྱི་ཆོ་ག་སྟེ་ནུབ་གཉིས་པའི་བྱ་བའོ། །གཉིས་པ་དངོས་གཞིའི་ཆོ་ག་ལ། དཀྱིལ་འཁོར་བྲི་བ། རྣམ་པར་དགོད་པ། རབ་གནས། སྦྱིན་སྲེག །སྒྲུབ་ཅིང་མཆོད་པ། དབང་བསྐུར་བའོ། །དང་པོ་ལ། ཐིག་གིས་བྲི་བ་དང་། ཚོན་གྱིས་བྲི་བ་གཉིས་ལས། དང་པོ་ནི། ནངས་པར་བེ་གཱ་ཀྲ་མ་ཡཾ། ཞེས་འདེགས་པའི་རྒྱས་སྟ་གོན་གྱི་ལྷ་ནམ་མཁར་བཏེགས་ལ། ཚོམ་བུ་རྣམས་གཞན་དུ་བསལ། སྔར་རབ་གནས་བྱས་པའི་ཡེ་ཤེས་ཀྱི་ཐིག་སྐུད་དེ་ཉིད་སློབ་དཔོན་བདག་པོའི་ང་རྒྱལ་གྱིས་ནུབ་ནས་ཤར་དང་། ཐིག་གཡོག་ཡུམ་དུ་མོས་པ་ཤར་ནས་ནུབ་ཏུ་ཕྱོགས་པ་ལ་གཡོན་པའི་ཁུ་ཚུར་གྱིས་ལྟེ་བར་བཟུང་ནས། ཛཿཛཿཛཿ ཞེས་བརྗོད་པས་ཐིག་སྐུད་ཀྱི་རྩེ་མོ་ནས་གཡས་པས་བཟུང་བ་ཐིག་གཡོག་ལ་གཏོད་ཅིང་། དེས་ཀྱང་དེ་སྐད་བརྗོད་ཅིང་དྲངས་ལ་ཤར་ནུབ་ཀྱི་ཚངས་ཐིག་དང་པོ་དང་། ལྷོར་གནས་ཏེ་བྱང་དུ་བལྟ་བས་ཚངས་ཐིག་གཉིས་པ་དང་། མེར་གནས་ཏེ་རླུང་དུ་བལྟ་བས་ཟུར་ཐིག་དང་པོ་དང་། བདེན་བྲལ་ནས་དབང་ལྡན་དུ་བལྟ་བས་ཟུར་ཐིག་གཉིས་པ་དང་། མེར་གནས་ཏེ་བྱང་དུ་བལྟ་བས་ཤར་གྱི་རྩ་ཐིག་དང་། རླུང་ནས་ལྷོར་བལྟ་བས་ནུབ་ཀྱི་དང་། སླར་ཡང་རླུང་ནས་ཤར་དུ་བལྟ་བས་བྱང་གི་དང་། ཡང་མེ་ནས་ནུབ་ཏུ་བལྟ་བས་ལྷོའི་རྩ་ཐིག་སྟེ། ཐིག་ཆེན་བརྒྱད་པོ་ལས་ཐིག་གི་སྟེང་གི་ནམ་མཁའ་ལ་མཐེབ་མཛུབ་གཉིས་ཀྱིས་སེ་གོལ་གྱི་སྒྲ་དང་བཅས་པས་གདབ་ཅིང་། སྔགས་ནི་ཐམས་ཅད་ལ། ༀ་བཛྲ་སཱུ་ཏྲ་ས་མ་ཡ་མ་ཏི་ཀྲ་མ་ཧཱུཾ་ཕཊ། ཅེས་བརྗོད་པས་མཁའ་ཁྱབ་ཀྱི་རྒྱལ་བ་རྣམས་སད་ཅིང་ཡེ་ཤེས་ཀྱི་ཐིག་དམ་ཚིག་གི་ཐིག་ལ་རོ་མཉམ་དུ་གྱུར་པར་བསམ་མོ། །ཐིག་སྐུད་སྔར་གྱི་སྣོད་དུ་བཞག་པ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། དམ་ཚིག་གི་ཕྱག་རྒྱ་བཅས་ལ། བཛྲ་མུཿ ཞེས་པས་ཐིག་སྐུད་ཀྱི་ཡེ་ཤེས་པ་ནམ་མཁའི་ལྷའི་ཐུགས་ཀར་གཤེགས། ཡེ་ཐིག་ཐེབས་ནས་དེ་ལ་འགོམ་དགོས་པ་བྱུང་ན་ཧྲཱིཿཞེས་སྒྲ་རིང་པོ་དང་། འདེགས་པའི་རྒྱས་ནམ་མཁར་བཏེགས་པའི་འོག་ནས་འཛུལ་བར་མོས་ཤིང་། སྒོ་ཐད་ཀྱི་རྩ་ཐིག་ཕྱིས་ལ། སླར་ཡང་ཕབ་ལ་བསྟིམ་མོ། །ཐིག་གི་སྤྱོད་ལམ་ནི། སྐུད་པ་ཆད་ན་སློབ་དཔོན་འཆི། །ཐིག་སྣ་ཤོར་ན་སློབ་བུ་འཆི། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུན་ཆད་ལམ་ལ་གནོད་པར་འགྱུར། །དེ་ཕྱིར་མཁས་ལྡན་སྒྲིམས་ཏེ་བྱ། །ཞེས་བཤད་པ་བཞིན་ཤེས་པར་བྱའོ། །གཉིས་པ་ཚོན་གྱིས་བྲི་བ་ནི། དབང་ཕྱུག་རྒྱས་པའི་ཆས་སུ་ཞུགས་ཏེ། དཀྱིལ་འཁོར་གྱི་དབུས་སུ་ཕུར་པ་དངོས་སུ་བཏབ་པ་ཡིན་ན། ཚོན་སྣ་ལྔ་འབྱུང་རིགས་བསྡེབས་པས་མཱུཾ་ཏཱཾ་སོགས་རིམ་པར་བརྗོད་ཅིང་ཁུང་བུ་མཉམ་པར་བཀང་ལ་འབྱུང་བ་རིམ་བརྩེགས་སུ་བསྒོམ། སླར་ཡང་གཡས་པའི་མཐེབ་སྲིན་གྱིས་ཚོན་རྩི་ལྔ་ཅུང་ཟད་བླངས་པ་གཡོན་པའི་མཐིལ་དུ་བཞག་ལ། ༀ་ཨཱཿསརྦ་པཉྩ་རཏྣ་ས་མ་ཡེ་ཧཱུཾ་ཧཱུཾ་ཧཱུཾ། ཞེས་བཟླས་ལ། གཡས་པའི་སོར་མོ་ལྔ་ལ་ཉི་མའི་སྟེང་དུ་ཡབ་ཀྱི་འབྲུ་ལྔ། གཡོན་པའི་སོར་མོ་ལྔ་ལ་ཟླ་བའི་སྟེང་དུ་ཡུམ་གྱི་འབྲུ་ལྔ་གནས་པར་བསམ་སྟེ། གཡས་པའི་སོར་མོ་ལྔ་ཚོམས་ཀྱིས་གཡོན་པའི་ཚོན་རྩི་ཁུང་བུའི་སྟེང་དུ་བཀོད་ལ། དོན་ཡེ་ཤེས་རིན་པོ་ཆེའི་རང་བཞིན་རྟགས་ཀེང་རུས་ཆེན་པོའི་རི་རབ་ཏུ་གྱུར་པར་བསམ་མོ། །དེ་ནས་དཀྱིལ་འཁོར་གྱི་དབུས་སུ་གནས་པས་གཡོན་པའི་ཁུ་ཚུར་གྱིས་དབང་ལྡན་ནས་བརྩམས་ཏེ་རྩིག་པ་ལྔ་ཕྱི་ནས་ལྗང་དམར་སེར་དཀར་སྔོ་བ་རྣམས་ཞེང་ཐིག་སྐུད་གང་དང་དཔངས་མཐེའུ་ཆུང་ཕྱེད་ཙམ་པ་མ་འདྲེས་ཤིང་སྙོམས་པ་སྒོ་ཚད་གཅིག་གི་ཚད་ཙམ་དུ་བྲིས་ཏེ་ཀ་པཱ་ལས་བཀབ་ནས་བཞག་གོ། །རྩིག་པ་སྦྲེལ་རན་པ་ན་ཁ་ཕྱེ་ལ་པྲ་བརྟག་སྟེ། ཀུ་ཀུ་རཱ་ཛས་མཉམ་སྦྱོར་དཀྱིལ་ཆོག་ཏུ། རེ་ཁཱ་དམའ་བས་མི་འགྲུབ་ཅིང་། །གཡོན་པོས་གདུང་བ་བསྐྱེད་པར་བྱེད། །ཆད་པས་སློབ་དཔོན་སློབ་མ་དག །འཆིའམ་ན་བར་འགྱུར་བ་ཡིན། །ཆད་ལྷག་ལས་ནི་ནད་འབྱུང་ཞིང་། །ཕྱོགས་འཁྲུལ་རྨོངས་པའི་ལས་སུ་འགྱུར། །ཞེས་གསུངས་པ་ལྟར་ཤེས་པར་བྱ་ཞིང་། གལ་ཏེ་མ་འགྲུབ་ན། དེ་ཁོ་ན་ཉིད་ཀྱི་ཏིང་ངེ་འཛིན་གྱིས་སྐྱོན་ཐམས་ཅད་སེལ་བ་ཡིན་ནོ། །སློབ་དཔོན་གྱིས་རྫོགས་པར་བྲི་མི་ནུས་ན། སློབ་མ་རྣམས་ཀྱིས་ཀྱང་ལག་པ་བྱིན་བརླབས་སྔར་བཞིན་བྱས་ནས་བྲི་བར་བྱ་སྟེ། དེ་ལ་དབུས་ཀྱི་ལྟེ་བ་མཐིང་ག །མུ་ཆད་དང་གྲུ་ཆད་ལྗང་གུ། རྩིབས་བཞི་སེར་པོ། རྩིབས་མཆན་དམར། རྩིབས་རྟེན་སྔོན་པོ་ལ་རྡོ་རྗེའི་ཕྲེང་བ། གློ་འབུར་དང་། སྒོ་རྣམས་ཕྱོགས་མདོག །ཁྱམས་ནང་མ་སེར་པོ་དང་ཕྱི་མ་ཁྲག་ཁྱམས། རྩིག་པ་ནང་མ་ནང་ནས་སྔོ་དམར་དཀར་པོ་དང་། ཕྱི་མ་ནང་ནས་མཐིང་དཀར་སེར་དམར་ལྗང་བ། འདོད་སྣམ་དམར་པོ། ཕ་གུ་སེར་པོ་ཐོད་པས་དཀྲིགས་པ། དྲྭ་བའི་གཞི་ནག་པོ་ལ་སྦྲུལ་དང་ཐོད་ཕྲེང་གི་དྲྭ་བ་དང་དྲྭ་བ་ཕྱེད་པ། གཞི་སྔོན་པོ་ལ་རྐང་ལག་གི་ཤར་བུ། མདའ་ཡབ་དཀར་པོ་མཆོད་རྟེན་རིས། མུན་པ་དང་གླང་རྒྱབ་ནག་པོ། ཞིང་སྨུག་གི་ཀ་བ། རྟ་བབས་སྣམ་བུ་བརྒྱད་ནི། རྟ་རྐང་གཞི་སྔོན་པོ་ལ་རྡོ་རྗེ་འགྲེང་བུ་སེར་པོ། ཆུ་སྐྱེས་དམར་པོ་སྒྲོམ་མཛེས་ཚོན། ཟར་ཚགས་དཀར་པོ་ལ་གཞི་ནག་པོ། སྣ་འཕྱོང་སེར་པོ། སྒྲིལ་འཕྱང་གཞི་ནག་པོ་ལ་དྲྭ་བ་དཀར་པོ། ཤར་བུ་དཀར་པོ་གཞི་སྔོན་པོ་ལ་སྒྲིགས་པ། རྒྱ་ཕུབས་ཁྱུང་མགོ་མཐིང་ག །པདྨ་དམར་པོ། འཁོར་ལོ་དང་རི་དྭགས་སེར་པོ། ཞིང་གི་གདུགས། འོག་གཞིའི་འཁོར་ལོ་ཕྱོགས་མདོག །ཕྱི་ཁྱམས་ལྗང་གུ། གེ་སར་སེར་པོ། འདབ་མ་སྣ་ཚོགས། དུར་ཁྲོད་ཀྱི་གཞི་ནག་པོ་ལ་ཆོས་རྣམས་ཀྱིས་འཇིགས་པར་བརྒྱན་པ། རྡོ་ར་གཞི་མཐིང་ག་ལ་རྡོ་རྗེ་དཀར་པོའམ་སེར་པོ། མེ་རི་སྣ་ཚོགས་སམ་དམར་སེར། རྟ་བབས་དང་མདའ་ཡབ་ཀྱི་ཁོར་ཡུག་ལ་ཞིང་གི་རྒྱལ་མཚན་དང་། བདན་ལ་སོགས་པ་དང་། སྒོའི་ཕྱི་རོལ་དུ་སྐྱེས་བུ་གསལ་ཤིང་གི་ཕུག་པ་དང་། ལྗོན་ཤིང་། རཀྟའི་རྫིང་བུ་རྣམས་ཕྱོགས་རེར་གཉིས་གཉིས་སྤེལ་མར་བྲིས་ལ། ཚོན་གྱིས་བྲི་བའི་ལས་རྣམས་རྫོགས་པའི་མཐར། ཚོན་ལྷག །ཀུན་བཟང་། ཞབས་བསིལ། བཞི་བསྣོལ་སོགས་ཀྱིས་མཆོད་ནས། བཛྲ་མུཿས་ཡེ་ཤེས་པ་ནམ་མཁའི་ལྷའི་ཐུགས་ཀར་གཤེགས་ནས་དམན་པ་རྣམས་དབེན་པར་བཞག་གོ། །ཉེས་སྤོང་ནི། བག་མེད་གྱུར་པའི་ཉེས་པ་ཡང་། །བཤད་པའི་རྗེས་སུ་ཤེས་པར་བྱ། །ཞེས་པས་ཐིག་གི་སྐབས་སུ་བཤད་པས་མཚོན་ཅིང་། ཇི་བཞིིན་པ་མ་འགྲུབ་ན། དེ་སེལ་བའི་གཉེན་པོ་ཡང་སྔར་བཤད་པ་བཞིན་ནོ། །གཉིས་པ་རྣམ་པ་དགོད་པ་ནི། རིན་པོ་ཆེའམ་ལྡེ་གུ་སོགས་ལས་བྱས་པའི་ལྷ་སོ་སོའི་སྐུ་བརྙན་ཡོད་ན་དེ་དང་དེའི་གནས་སུ་མ་འཆོལ་བར་དགོད་ཅིང་། མེད་ན་ཚོན་གྱིས་བྲི་བའི་རྗེས་འབྲེལ་ཉིད་དུ་སྐུ་གཟུགས་སམ། ཡིག་འབྲུའམ། ཕྱག་མཚན་ནམ། རང་མདོག་དང་མཚུངས་པའི་ཐིག་ལེའི་རྣམ་པ་ཅན་གྱི་བར་ཅི་ནུས་སུ་བྲི་ཞིང་། དེ་ཡང་གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་རིམ་པ་ཐ་དད་དུ་བྲི་ཚུལ་ཡང་བཤད་དོ། །གསུམ་པ་རབ་གནས་བྱ་བ་ལ་གསུམ་ལས། དང་པོ་བུམ་པའི་རབ་གནས་དང་། གཉིས་པ་སློབ་མ་རབ་གནས་གཉིས་གོང་དུ་སོང་། །གསུམ་པ་དཀྱིལ་འཁོར་རབ་གནས་ལ། དཀྱིལ་འཁོར་བརྒྱན་པ་དང་། རབ་གནས་དངོས་ལས། དང་པོ་ནི། སྔར་ལྷག་གནས་བྱས་པའི་བུམ་པ་རྣམས་སྤོས་དང་རོལ་མོས་སྣ་དྲངས་ཏེ་དཀྱིལ་འཁོར་ལ་གཡས་སུ་བསྐོར་ནས་ལྷ་སོ་སོའི་གནས་རྣམས་སུ་མཉྫི་ལ་སོགས་པའི་སྟེགས་ལ་དགོད་ཅིང་། བུམ་པ་ལྔའམ་གཅིག་ཏུ་བསྡུས་པ་ལ་ནི་གཙོ་བོ་ལྔའི་གནས་སམ་དབུས་ཉིད་དུ་བཞུགས་སུ་གསོལ། ལས་བུམ་ནི་སློབ་དཔོན་གྱི་མདུན་དུའོ། །དེ་ནས་དཀྱིལ་འཁོར་གྱི་མཐའ་བསྐོར་དྲི་བཟང་གིས་བྱུག་ཅིང་། མེ་ཏོག་གི་སིལ་མ་བཀྲམ། ཕྱོགས་ཀུན་ཏུ་བླ་རེ་དང་། ཡོལ་བ་དང་། གདུགས་དང་། རྒྱལ་མཚན་དང་། བ་དན་སྣ་ཚོགས་པ་དང་། གོས་ཟུང་དུ་མས་བཀོད་ལེགས་སུ་བརྒྱན་པར་བྱ་ཞིང་། བདུག་སྤོས་དང་། མེ་ཏོག་དང་། མར་མེ་དང་། དྲི་ཆབ་རྣམས་ལྷ་གྲངས་དང་མཉམ་པ་དང་། གཞན་ཡང་ཞབས་བསིལ་ལ་སོགས་པ་ཕྱིའི་མཆོད་པ་རྣམས་དང་། སྨན་གཏོར་རཀྟ་ལ་སོགས་པ་ནང་གི་མཆོད་པ་རྣམས་ཀྱང་ཅི་འབྱོར་བས་ཕྱིའི་ཁོར་ཡུག་རྣམས་མཛེས་པར་བྱ་སྟེ། བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །ཞེས་གསུངས་པ་བཞིན་ནོ། །སྐབས་འདི་དག་ཏུ་བགེགས་བསྐྲད་ཅིང་མཚམས་བཅད་པ་དང་། དཀྱིལ་འཁོར་བསྐྱེད་ནས་ལྷ་བསྟིམ་པ། སྒོ་དབྱེ་བ། ཕྱག་འཚལ་བ་རྣམས་དང་། ཕྱག་ལེན་འགར་དཀྱིལ་འཁོར་བྱིན་འབེབས་ཀྱང་མཛད་པ་ཆོ་ག་རྒྱས་པའི་ཡན་ལག་ཏུ་འབྱུང་ནའང་། རྩ་བའི་རྩིས་འགོས་མ་བསྡུས་པས་ཆད་པའི་དགག་ཆ་ཆུང་ཞིང་འཇུག་པ་བདེ་བའི་དབང་དུ་བྱས་ནས་འདིར་དེ་ཙམ་མོ། །གཉིས་པ་རབ་གནས་དངོས་དང་། བཞི་པ་སྦྱིན་སྲེག་ནི། འདིར་རྒྱས་པའི་ལས་དང་སྦྲེལ་ཏེ་གཞན་དུ་བཤད་པ་བཞིན་བྱའོ། །ལྔ་པ་དཀྱིལ་འཁོར་སྒྲུབ་པ་ལ། སྔོན་དུ་བྱ་བ་དང་། སྒྲུབ་པ་དངོས་དང་། མཆོད་བསྟོད་སོགས་བྱ་བ་དང་། འཛབ་བཟླ་བ་དང་བཞི་ལས། དང་པོ་ནི། རྣལ་འབྱོར་པ་རྣམས་ཁྲུས་བྱས། ལུས་དྲི་ཞིམ་པོས་བྱུག །སློབ་དཔོན་དཀྱིལ་འཁོར་གྱི་ཤར་ངོས་སུ་ཕྱོགས་པ་དང་། གཞན་རྣམས་ཀྱང་ཇི་ལྟར་འོས་པར་འདུག་ནས། ཐོག་མར་རྒྱུད་སྦྱང་བ་ནས་བཟུང་མཆོད་རྫས་བྱིན་གྱིས་རློབ་པའི་བར་སྔོན་དུ་བྱ་བའོ། །གཉིས་པ་ལ། བདག་མདུན་ཐ་དད་དུ་སྒྲུབ་པ་དང་། ཐ་མི་དད་དུ་སྒྲུབ་པ་གཉིས་ལས། དང་པོ་ནི། བདག་གི་རྣལ་འབྱོར་བཟླས་པའི་བར་བྱས་ནས། དེའི་ཉེར་བསྡུའི་ནཱ་ད་ཤིན་ཏུ་ཕྲ་བའི་དེ་ཁོ་ན་ཉིད་དང་། མདུན་བསྐྱེད་ལ་ལྟོས་པའི་དེ་བཞིན་ཉིད་ཀྱི་ཏིང་ངེ་འཛིན་མཚམས་སྦྱར་ནས། སླར་ཡང་མདུན་བསྐྱེད་བསྒྲུབ་པར་མཛད་མོད། འདིའི་གཞུང་དུ་གསལ་བར་མ་བཤད་ཀྱང་། དོན་གྱི་དགོངས་པ་ལུགས་ཕྱི་མ་ལྟར་གནས་པས་འདིར་དེ་ལྟར་བྱ་སྟེ། དེ་ལས་བསྒྲུབ་གཞི་བདག་དང་། བྲིས་པའི་དཀྱིལ་འཁོར་གཉིས་སྒྲུབ་ཆོས་ཏིང་ངེ་འཛིན་གསུམ་ནས། འབར་བའི་དཀྱིལ་འཁོར་གསལ་བར་སྣང་། །ཞེས་པའི་བར་གྱིས་གདོད་ནས་དག་ཅིང་གྲུབ་པའི་དམ་ཚིག་གི་དཀྱིལ་འཁོར་བདག་མདུན་དབྱེར་མེད་དུ་གསལ་བཏབ་ལ། སྙན་གསན་དབབ་པ། སྤྱན་དྲང་བ། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པ་རྣམས་སྒྲུབ་ཐབས་བཞིན་ཤེས་པར་བྱ་བ་ལས། དཀྱིལ་འཁོར་རབ་གནས་སོགས་དང་མ་འབྲེལ་བའི་སྒྲུབ་མཆོད་ཕལ་པ་ཙམ་ལ་སྔར་ནམ་མཁར་བཞུགས་པའི་སྟ་གོན་གྱི་དཀྱིལ་འཁོར་ཀྱང་སྤྱན་དྲངས་ནས་སྐབས་འདིར་བསྟིམ་པ་ནི་ཁྱད་པར་རོ། །གསུམ་པ་མཆོད་བསྟོད་སོགས་བྱ་བ་ནི། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་ཆད་ལྟར་གྱེས་པས་ཕྱག་མཆོད་ནས་བཟུང་། དམ་བཅའི་མཐར་ཐུག་གི་བར་སྒྲུབ་ཐབས་བཞིན་བྱས་ལ། བདག་ཉིད་མདུན་བསྐྱེད་དང་རོ་གཅིག་ཏུ་གྱུར་པར་བསམ་མོ། །བཞི་པ་ཛཔ྄་བཟླ་བ་ལ། ས་བཅད་ཀྱི་ཚངས་སྒྲུབ་ཐབས་བཞིན་ལས། ཛཔ྄་ཁང་དབྱེ་བའི་ཚེ། དབྱེ་གཞིའི་དཀྱིལ་འཁོར་གསལ་བ་ལས། བྷྲཱུཾ་བི་ཤྭ་སོགས་ཀྱིས་བདག་དམ་ཚིག་གི་འཁོར་ལོ་ལས་མདུན་བསྐྱེད་ཡེ་ཤེས་ཀྱི་འཁོར་ལོའི་ངོ་བོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས། མདུན་གྱི་ནམ་མཁར་མེ་རི་འདབས་འབྱར་གྱི་ཚུལ་དུ་བཞུགས་པར་མོས་པ་ཙམ་སྟེ། དམིགས་པའི་རྣམ་པ་སྒྲུབ་ཐབས་དང་དབྱེ་བ་མེད་ཀྱང་། དོན་གྱི་ངོ་བོ་མི་འདྲ་བའི་གནད་ཤེས་པར་བྱའོ། །ཛཔ྄་བཟླ་བ་ན་དམ་ཡེ་འཕྲོ་འདུ་སྟེ་གསལ་བ་གསུམ་གྱི་ངང་ནས་ལྷ་སོ་སོའི་སྒོས་འཛབ་དང་གཙོ་བོར་སྤྱིར་འཛབ་ལ་སྒྲིལ་ནས་བཟླ་ཞིང་། སོ་སོའི་སྒོས་འཛབ་བཟླ་བའི་ཚེ་སྤྲོ་ན་རང་རང་གི་འཛབ་བསྐུལ་ཀྱང་སྦྱོར་ཏེ་གཞན་ལས་ཤེས་པར་འགྱུར་ལ། གང་ལྟར་ཡང་རིམ་བཞིན་གཙོ་འཁོར་གྱི་འགྲོས་སྦྱར་ནས་ཅི་ནུས་སུ་བཟླ་ཞིང་། སྐབས་ཀྱི་མཇུག་བསྡུ་བའི་ལས་རིམ་རྣམ་པ་གསུམ་ཡང་སྒྲུབ་ཐབས་བཞིན་ནོ། །དེ་དག་གི་སྒྲུབ་ཅིང་མཆོད་པའི་ཆོ་གའོ། །དྲུག་པ་དབང་བསྐུར་བ་ལ། བདག་ཉིད་འཇུག་པ་དང་། སློབ་མ་ལ་དབང་བསྐུར་བའོ། །དང་པོ་ནི། སློབ་མ་འཇུག་པ་ཇི་ལྟ་བ་བཞིན་དུ་དཀྱིལ་འཁོར་དུ་ཞུགས་ནས་དབང་བླང་བའམ། རིག་པའི་མེ་ཏོག་དོར་བ་ཉིད་ཀྱིས་ཀྱང་འདིའི་དགོས་པ་འགྲུབ་ཅིང་། གང་གི་ཚེ་ཡང་སློབ་མ་འཇུག་པར་གནང་བ་ནོད་པ་རྣམས་སོ། །གཉིས་པ་སློབ་མ་གཞུག་ཅིང་དབང་བསྐུར་བ་ནི། དབང་གི་ཆོ་ག་ཟུར་དུ་འཆད་པ་ལས་ཤེས་པར་བྱའོ། །གསུམ་པ་རྗེས་ཀྱི་ཆོ་ག་ལ་ལྔ་ལས། དང་པོ་ཚོགས་མཆོད་དང་། གཉིས་པ་བརྟན་སྐྱོང་ནི་སྒྲུབ་ཐབས་ཀྱི་དཀྱུས་བཞིན་དང་། གསུམ་པ་ཉེར་བསྡུའི་ཚེ ། གཏང་རག་གི་མཆོད་པ་བཤམས་ལ་བྱིན་གྱིས་བརླབས་ཏེ། ཀུན་བཟང་། ཞབས་བསིལ། བཞི་བསྣོལ། སྨན་གཏོར། རཀྟ་རྣམས་ཀྱིས་མཆོད། བསྟོད་པ་རྒྱས་བསྡུས་ཅི་རིགས་པས་བསྟོད། ཡིག་བརྒྱ་དང་། བཟོད་གསོལ་རྣམས་སྤྱིི་དང་མཐུན་པར་བྱས་ལ། རས་བྲིས་ཡིན་ན་ཡེ་ཤེས་པ་བརྟན་བཞུགས་དང་། བྷྲཱུཾ་བི་ཤྭ་སོགས་ཀྱིས་དམ་ཚིག་གི་དཀྱིལ་འཁོར་གསལ་བཏབ་ལ། ཧཱུཾ་ཞེས་བརྗོད་པས་རང་གི་སྙིང་གའི་འོད་ཀྱི་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་ལ་ཐིམ། ཞེས་སོགས་བརྗོད་ཅིང་དཀྱིལ་འཁོར་གྱི་འཁོར་ལོ་བསྡུས་ལ། གོ་བགོ། ལུས་བསྲུང་སོགས་མཐའ་རྒྱས་རྣམས་སྒྲུབ་ཐབས་ལྟར་བྱ་ཞིང་། རྡུལ་ཚོན་གྱི་ཆོ་ག་ཞག་སྦྲེལ་མར་བྱེད་པའི་ཉི་མ་སྔ་མ་རྣམས་ལའང་དེ་བཞིན་ནོ། །གཟུགས་བརྙན་གྱི་དཀྱིལ་འཁོར་གཤེགས་གསོལ་བྱེད་ན། བེ་གཱ་ཀྲ་མ་ཡཾ། ཞེས་པས་ཡེ་ཤེས་ཀྱི་འཁོར་ལོ་ནམ་མཁར་བཏེགས་ནས། གཏང་རག་གི་མཆོད་བསྟོད་དང་། བཟོད་གསོལ་སྔར་བཞིན་བྱས་ལ། ༀ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར་ཛྙཱ་ན་མཎྜ་ལ་བཛྲ་མུཿཞེས་གཤེགས་སུ་གསོལ་ལ། དམ་ཚིག་གི་འཁོར་ལོ་སྔར་བཞིན་བསྡུས་ནས། གོ་ཆ་བགོ་ཞིང་ལུས་བསྲུང་བ་བྱས་ལ། ཆོས་ཐམས་ཅད་སྟོང་པ་ཉིད་དུ་མོས་ཏེ། རོལ་མོའི་སྒྲ་དང་བཅས་པས་ཨ་ཀཱ་རོ་བཟླ་ཞིང་། རྡོ་རྗེ་དང་བཅས་པའི་ལག་གིས་ཐོག་མར་ལྷ་མཚན་རྣམས་བསྡུས་ལ། ཅུང་ཟད་ཙམ་མགོ་བོར་བཀོད། ལྷག་མ་རྣམས་དབང་ལྡན་ནས་བརྩམས་ཏེ་གཙོ་བོའི་གནས་ཀྱི་བར་དུ་ཕྱགས་ལ་བུམ་པ་ལ་སོགས་པའི་སྣོད་བཟང་པོར་བླུགས་ནས་མཆོད་པ་དང་བཀུར་སྟི་ཆེན་པོས་ཆུ་ཀླུང་དུ་དོར། སླར་ཡང་སྣོད་དེ་ཉིད་ཆུས་བཀང་ནས་ནང་དུ་འོངས་ཏེ་དཀྱིལ་འཁོར་ཁང་པ་རྣམས་བསང་གཏོར་བྱས། དེ་ནས་ཧཱུཾ་མཛད་ཀྱི་ཕྱག་རྒྱ་ལས་མཛུབ་མོ་གཉིས་བསྣོལ་བ་སྐམ་པའི་རྒྱས་འོག་གི་ཕུར་བུ་ནས་བཟུང་མས་རིམ་གྱིས་ཕྱུངས་ལ། སྤྱན་མའི་སྔགས་བཟླས་པའི་འོ་མས་ཕུར་རྩེ་བཀྲུ་ཞིང་། ཁུང་བུ་རྣམས་ལའང་གཏོར་བས་བགེགས་རྣམས་བདེ་སྟོང་གི་ངོ་བོར་སངས་རྒྱས་པར་བསམ་མོ། །དེ་ནས་དགེ་བ་བསྔོ་ཞིང་སྨོན་ལམ་གདབ་པ་དང་། བཀྲ་ཤིས་བརྗོད་ཅིང་དགའ་སྟོན་བྱ་བ་ལ་སོགས་ཏེ་རྗེས་ཀྱི་བྱ་བ་རྣམས་གསང་བ་སྤྱིའི་འགྲོས་བཞིན་མཐའ་རྒྱས་སུ་བྱའོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་སྒྲུབ་པ་དང་། དེས་གྲུབ་པའི་ཚད་བསྟན་པ་སྟེ། སྒྲུབ་ཐབས་སུ་བཤད་པ་བཞིན་དང་། རྒྱས་པར་གཞན་དུའང་འཆད་པར་འདོད་དོ། །དཔལ་ལྡན་སྒྱུ་འཕྲུལ་དྲྭ་བ་ཁྲག་འཐུང་གི། །སྙིང་པོའི་དཀྱིལ་འཁོར་ཐར་པའི་གྲོང་ཁྱེར་དུ། །མྱུར་བདེར་འཇུག་པའི་ཐབས་ཚུལ་བླ་ན་མེད། །དཀྱིལ་འཁོར་ཆོ་གའི་ལས་ཀྱི་རིམ་པ་ཉིད། །དེའི་ཕྱིར་རྒྱུད་གཞུང་ཟབ་དོན་དགོངས་པའི་གནད། །གྲུབ་པ་མཆོག་གི་ཕྱག་བཞེས་ཇི་ལྟ་བར། །མ་འདྲེས་གསལ་བར་འཆར་བའི་ངོ་མཚར་ནི། །རྡོ་རྗེའི་ཕྲེང་བ་མཆོག་གིས་མཚོན་པར་བྱས། །འདི་ལས་བསོད་ནམས་ཚོགས་སུ་གང་གྱུར་དེ། །མཁའ་མཉམ་འགྲོ་ཀུན་ལྔ་བཅུ་རྩ་བརྒྱད་ལྷའི། །བདག་པོ་ཐུགས་ཀྱི་རྡོ་རྗེ་དཔལ་ཆེན་པོའི། །གོ་འཕང་བདེ་ཆེན་མཆོག་ལ་སྤྱོད་གྱུར་ཅིག །སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་གྱི་ཆོ་ག་རྡོ་རྗེའི་ཕྲེང་བ་ཞེས་བྱ་བ་འདི་ཡང་རིག་པ་འཛིན་པ་འགྱུར་མེད་རྡོ་རྗེས་སྔར་བཀོད་པའི་ཞི་བའི་དཀྱིལ་ཆོག་ཉིད་གཞིར་བྱས། དེ་ལས་ཆོ་གའི་ཁྱད་པར་བྱེ་བྲག་པ་རྣམས་ཚང་ཞིང་གསལ་ལ་འཇུག་པ་བདེ་བར་བྱས་པ་ལས། ཐོག་མའི་ཡི་གེར་སྤེལ་བ་པོ་ནི། གཞུང་ལུགས་རབ་འབྱམས་ལ་མཆོག་ཏུ་ཟབ་པའི་བློ་མཐུན་ཅན་མཁན་ཆེན་ལོ་ཙཱ་བ་དྷརྨ་ཤྲཱིའོ།། ༈ །། ལྔ་བཅུ་རྩ་བརྒྱད་ཁྲག་འཐུང་དཀྱིལ་འཁོར་གྱི། །ཆོ་གའི་ས་བོན་གཅིག་ལས་གྲངས་མེད་དུ། །འཕེལ་བའི་སྤར་གྱི་ལྗོན་ཤིང་སྨིན་གྲོལ་གླིང་། །ཆོས་ཀྱི་དགའ་བའི་ཚལ་ལས་འཁྲུངས་པའོ།། །།

སྒྱུ་འཕྲུལ་དྲྭ་བ་ཁྲོ་བོའི་དབང་གི་ཆོ་ག་ཁྲག་འཐུང་རྡོ་རྗེའི་གད་རྒྱངས། པདྨ་འགྱུར་མེད་རྒྱ་མཚོ།

སྒྱུ་འཕྲུལ་དྲྭ་བ་ཁྲོ་བོའི་དབང་གི་ཆོ་ག་ཁྲག་འཐུང་རྡོ་རྗེའི་གད་རྒྱངས་ཞེས་བྱ་བ་བཞུགས་སོ། །སྒྱུ་འཕྲུལ་དྲྭ་བ་ཁྲོ་བོ་བསྡུས་པའི་དབང་གི་ཆོ་ག་ཁྲག་འཐུང་རྡོ་རྗེའི་གད་རྒྱངས་ཞེས་བྱ་བ། བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་ལ་ཕྱག་འཚལ་ལོ། །ཚད་མེད་ཐུགས་རྗེའི་གཏེར་མངའ་གཏན་གྱི་སྐྱབས། །རིགས་དང་དཀྱིལ་འཁོར་ཀུན་གྱི་ཁྱབ་བདག་མཆོག །འཛམ་གླིང་འགྲོ་བའི་འདྲེན་པ་རྡོ་རྗེ་འཆང་། །དཔལ་ལྡན་བླ་མའི་ཞབས་ཟུང་གཙུག་གིས་མཆོད། །ངེས་གསང་ཐེག་པའི་ཡང་རྩེ་སྙིང་པོའི་བཅུད། །གནས་ལུགས་དེ་བཞིན་ཉིད་སྟོན་ངེས་པའི་ལམ། །ཁྲག་འཐུང་ལྔ་བཅུ་རྩ་བརྒྱད་དཀྱིལ་འཁོར་དུ། །གཞུག་ཐབས་རྡོ་རྗེའི་གད་རྒྱངས་དབྱངས་སུ་ལེན། །དེ་ལ་འདིར་ཧེ་རུ་ཀ་འདུས་པའི་རྒྱུད་ལས། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་གསུངས་པ་ལྟར་ལས། ནུབ་དང་པོ་སའི་ཆོ་ག་དང་། གཉིས་པ་སྟ་གོན་གྱི་ཆོ་ག་གཞན་རྣམས་རྗེ་བླ་མས་མཛད་པའི་དཀྱིལ་ཆོག་རྡོ་རྗེའི་ཕྲེང་བ་ལྟར་བྱ་ཞིང་། འདིར་སློབ་མ་ལྷག་པར་གནས་པའི་ཆོ་ག་ནི་དཀྱིལ་འཁོར་གྱི་ཤར་ལྷོར་མཎྜལ་ཁྲུ་གང་པ་ལ་འཁོར་ལོ་རྩིབས་བཞི་པ་བྲི། སློབ་དཔོན་གྱི་དྲུང་དུ་སོ་ཤིང་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚང་བར་བྱའོ། །དེ་ནས་སློབ་བུ་རྣམས་ཁྲུས་བྱ། བགེགས་བསྐྲད། སྲུང་འཁོར་བསྒོམ་རྗེས་ཆོས་བཤད་ཐུན་མོང་པ་སྔོན་དུ་འགྲོ་བས། མཚམས་སྦྱོར་གྱི་ཁྱད་པར། འདི་ནི་སྡེ་སྣོད་དང་རྒྱུད་ཐམས་ཅད་ཀྱི་རྩ་བའམ་འཕྲོ་གཞི་ལྟ་བུར་གྱུར་པ་དཔལ་སྒྱུ་འཕྲུལ་དྲྭ་བ་ཆེན་པོའི་ཆོས་ཀྱི་རྣམ་གྲངས་ཏེ། དེ་ལའང་སྨིན་གྲོལ་གྱི་རིམ་པ་གཉིས་སུ་ཡོད་པ་ལས། འདིར་སྨིན་བྱེད་ཀྱི་དབང་ཉིད་བསྐུར་བ་སྐབས་སུ་བབས་པ་ཡིན་ཞིང་། དབང་དེ་ལའང་སྦྱོར་དངོས་རྗེས་གསུམ་ལས། སྐབས་འདིར་སྦྱོར་བ་སྟ་གོན་གྱི་བྱེ་བྲག་སློབ་མ་ལྷག་པར་གནས་པའི་ཆོས་རྣམས་སྒྲུབ་པར་བྱེད་པ་ཡིན་པས། དེའི་སླད་དུ་ཐོག་མར་ཁྱེད་རང་རྣམས་ཀྱི་ལུས་ལོངས་སྤྱོད་དུས་གསུམ་དང་འབྲེལ་བའི་དགེ་ཚོགས་རྒྱ་མཚོ་དང་བཅས་པ་ཐམས་ཅད་གཅིག་ཏུ་བསྡོམས་ནས་འབུལ་བའི་མོས་འདུན་བགྱིས་ཏེ་ཞིང་ཁམས་འབུལ་མཛོད། ཅེས་བརྗོད་དེ་མཎྜལ་འབུལ། དེ་ནས་སློབ་མ་རྣམས་ཀྱིས་སེམས་བསྐྱེད་པར་བྱ་སྟེ། དེ་ལའང་གཉིས་ལས། དང་པོ་ཀུན་རྫོབ་བྱང་ཆུབ་ཀྱི་སེམས་བསྐྱེད་པའི་དོན་དུ་འདིའི་རྗེས་ཟློས་མཛོད། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ལན་གསུམ། གཉིས་པ་དོན་དམ་བྱང་ཆུབ་ཏུ་སེམས་བསྐྱེད་པ་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགགས། །འགགས་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ལན་གསུམ། དེའི་ལན་དུ་སློབ་དཔོན་གྱིས། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་དོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཁྱོད་ལ་རབ་ཏུ་བསྟན་པར་བྱ། །ཞེས་བརྗོད། སྐབས་འདིར་དཀྱིལ་འཁོར་གྱི་དོན་བཤད་པ་ལ་ངེས་ཤེས་བསྐྱེད་པར་བྱ་སྟེ། དེ་ལ་ངོ་བོ། ངེས་ཚིག །དབྱེ་བ་དང་གསུམ་ལས། ངོ་བོ་ནི། ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་པས་བཀོད་པ་ལྷའི་འཁོར་ལོར་རྫོགས་པར་སྣང་བའོ། །ངེས་ཚིག་ནི། མཎྜ་ལའི་སྒྲ་ལས་སྙིང་པོ་འཛིན་པའམ་སྙིང་པོ་ལེན་པའི་དོན་དང་། ཡང་ན་ཟླུམ་པོའམ་བསྐོར་བའི་དོན་གྱིས་དཀྱིལ་འཁོར་རོ། །དབྱེ་བ་ནི། ཆོས་དོན་ལས་གསུམ་དང་། འགྲེལ་ཆུང་ལས་བཅུ་གཉིས་སུ་ཕྱེ་ཡང་། སྐབས་འདིར་བདུན་དུ་དབྱེ་བའི་དབང་དུ་བྱས་ན། རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་པ་ལྟར་ལས། འདིར་འཇུག་བྱའི་དཀྱིལ་འཁོར་ནི་ལྷག་པ་གཟུགས་བརྙན་ཏེ། འདི་ལྟ་བུའི་གསང་སྔགས་བླ་ན་མེད་པའི་དཀྱིལ་འཁོར་འདི་འདྲ་མཐོང་བ་ཙམ་གྱིས་ཀྱང་བསྐལ་པ་བྱེ་བ་དུ་མར་བསགས་པའི་སྡིག་སྒྲིབ་འདག་པ་སོགས་ཀྱི་ཕན་ཡོན་དང་ལྡན་ན་ཞུགས་ཤིང་དབང་བསྐུར་བས་ནི་ལྟ་ཅི་སྨོས་ཏེ། དེའི་ཕྱིར་དགའ་སྤྲོ་ཡང་དག་པར་བསྐྱེད་མཛོད། །ཅེས་བསྐུལ་ལོ། །དེ་ནས་སློབ་མས་གསོལ་བ་གདབ་པ་ནི། ཧེ་རུ་ཀ་དཔལ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ། དེ་ནས་གནང་བ་སྦྱིན་ཅིང་དྲང་བ་ནི། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་ཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དྭངས་ཡིད་ཀྱིས། །གཏོང་ཞིང་རང་སེམས་བརྟན་པོར་བཟུང་། །སྒྱུ་འཕྲུལ་དྲྭ་བའི་རྫོགས་དབང་སྦྱིན། །ཞེས་གནང་བ་སྦྱིན་ཞིང་ལག་གི་རྡོ་རྗེས་དྲངས་ལ། ཁྱད་པར་ཅན་གྱི་དོན་ལ་གསོལ་བ་གདབ་པ་ནི། བདག་ནི་ལས་མཆོག་སྐལ་བར་ལྡན། །དེང་ནས་ཐེག་པ་ཆེན་པོ་ལ། །བརྟན་པར་བྱ་ཕྱིར་བདག་ལ་ནི། །ཡེ་ཤེས་བསྲུང་བ་མཛད་དུ་གསོལ། །ཞེས་གསོལ། དེ་ནས་བགེགས་བསྐྲད་ཅིང་སྒྲིབ་པ་ཕྲལ་བ་ལ། སྔོན་དུ་འགྲོ་བ་དང་། དངོས་གཉིས། དང་པོ་ནི། ཚེ་མི་ཡར་བར་བྱ་བའི་ཕྱིར་དབང་ཕྱུག་གི་ཐུགས་ཀའི་ས་བོན་ལས་ཡི་གེ་བྷྲཱུཾ་རེ་སློབ་མའི་དཔྲལ་བར་སྤྲོས། བྷྲཱུཾ་བི་ཤྭ་བི་ཤུདྡྷེ། ཞེས་བརྗོད་པས་དུང་ཁང་ཟླ་གམ་དམར་པོའི་གཞལ་ཡས་ཁང་གནམ་སྒོ་གཅིག་པ་སྒོ་ཁྱུད་ཅན་གཅིག་ཏུ་གྱུར། དེའི་ནང་དུ་ཧཱུཾ་ཡིག་མཐིང་སྐྱ་དང་། སྒོར་ཧཱུཾ་ཡིག་ལྗང་ནག་གཅིག་གསལ་བ་ལས་འོད་འཕྲོས་ལུས་ཀྱི་ནང་གང་། ཨཱ་ཡུ་ཧཱུཾ་ཛཿ འོད་ཟེར་ཚུར་འདུས་ཚེ་བཅུད་ཐམས་ཅད་དབུས་ཀྱི་ཧཱུཾ་ལ་ཐིམ་པ་ལས། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་ཕཊ། ཅེས་བརྗོད་པས་ཧཱུཾ་ཀཱ་ར་མཐིང་སྐྱ་རྡོ་རྗེ་དང་དྲིལ་བུ་བསྣམས་པ་གཅིག་ཏུ་གྱུར། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ་ཕཊ། ཅེས་པས་སྒོའི་ཧཱུཾ་ཡིག་དེ་མི་གཡོ་བ་ལྗང་ནག་རལ་གྲི་དང་སྡིགས་མཛུབ་ཅན་གཅིག་ཏུ་གྱུར་ཏེ་སྲུང་བའི་ལས་མཛད་པར་བསམ་མོ། །གཉིས་པ་ལ། བགེགས་བསྐྲད་པ་དང་། སྒྲིབ་པ་ཕྲལ་བ་གཉིས་ཀྱི། དང་པོ་ནི་། སློབ་དཔོན་ཞེ་སྡང་རྡོ་རྗེའི་སྙེམས་པས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས་སྤྲུལ་པའི་ཁྲོ་ཚོགས་བསམ་གྱིས་མི་ཁྱབ་པ་སྤྲོས། འཇིག་རྟེན་གྱི་ཁམས་ཐམས་ཅད་གང་། ལྟས་ཆེན་པོ་བཅོ་ལྔ་དང་། ཆོས་སྣང་བའི་ཆོ་འཕྲུལ་ཆེན་པོས་བདུད་བགེགས་ལོག་པར་འདྲེན་པའི་ཚོགས་ཐམས་ཅད་བསྡིགས་བསྐྲད་བརླག་པར་བསམ་ལ། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་སྒྱུ་འཕྲུལ་རྣམ་པར་རོལ་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། ཞེས་བདེན་སྟོབས་བརྗོད་པ་སྔོན་དུ་འགྲོ་བས། འདིར་འདུས་པའི་སློབ་བུ་རྣམས་ལ་གདོན་ཅིང་འཚེ་བའི་འབྱུང་པོ་ཐམས་ཅད་འདིར་མ་གནས་པར་དེངས་ཤིག །ཅེས་དང་། ཧཱུཾ་བཞི་པའི་སྔགས་ལན་གསུམ་སོགས་བརྗོད་ཅིང་གུ་གུལ་གྱིས་བདུག །ཡུངས་ཀར་གྱིས་བྲབ། སླར་ཡང་ཁྲོ་བོ་རྣམས་ཚུར་འདུས་ཕྱོགས་མཚམས་ཐམས་ཅད་ཁྲོ་བོ་དང་རྡོ་རྗེའི་གུར་ཁང་མཚོན་ཆའི་ཆར་འབབ་ཅིང་། འབར་བ་མེའི་ཕྲེང་བ་ཕྱོགས་ཀུན་ཏུ་འཕྲོ་བས་བཅིངས་ཏེ་ཅིས་ཀྱང་མི་ཤིགས་པར་བསམ། གཉིས་པ་ནི། སློབ་དཔོན་གྱི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་ཨཱོཾ་སྭཱཾ་ཨཱཾ་ཧཱཾ། གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་རིགས་ལྔ་ཡབ་ཡུམ་བཅུར་གྱུར་བར་བསམ། ༀ་སུ་ར་ཏ་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལི། ཞེས་སོར་མོ་བསྣོལ། བཛྲ་བྷནྡྷ་བཾ། ཞེས་ཕྱག་རྒྱ་བསྡམས་པས། རིགས་ལྔ་ཡབ་ཡུམ་མཉམ་པར་སྦྱོར་བར་བསམ། གོང་ལྟར་བདེན་སྟོབས་བརྗོད་པ་སྔོན་དུ་འགྲོ་བས། སློབ་བུ་འདི་རྣམས་ཀྱི་རྒྱུད་ལ་ཡོད་པའི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། ཆོས་ཀྱིས་ཕོངས་པའི་སྒྲིབ་པ་དང་། བག་ཆགས་ངན་པའི་སྒྲིབ་པ་ལ་སོགས་ཏེ་སྒྲིབ་པའི་ཕུང་པོ་ཇི་སྙེད་པ་ཐམས་ཅད་ཕྱག་རྒྱའི་འོད་ཟེར་འདིས་བྲལ་བར་གྱུར་ཅིག །བཛྲ་བྷནྡྷ་ཏྲ་ཐ། ཞེས་མང་དུ་བརྗོད་ཅིང་ཕྱག་རྒྱ་སྤྲུགས་པས། རིགས་ལྔའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་འཕྲོས་པས་སློབ་བུའི་སྒྲིབ་པ་མཐའ་དག་བསྲེགས་ཤིང་སྦྱངས། དུང་ཁང་གི་ཁྲོ་བོ་གཉིས་ཀྱང་ཞུ་ལུགས་སུ་ཐིམ་པའི་རྐྱེན་གྱིས་བུའི་ལུས་ཀྱང་འོད་དུ་ཞུ་བའི་འོད་ཕུང་གསེར་ཞུན་མ་ལྟ་བུར་གནས་པར་བསམ། དེ་ནས་སློབ་བུ་ལྷར་བསྐྱེད་པ་ལ་བསྐུར་བརླབ་གོ་བགོ་ལུས་བསྲུང་བྱ་བ་ནི། སློབ་དཔོན་གྱི་ཧཱུཾ་ཞེས་བརྗོད་པས་འོད་ཕུང་དེ་ཉིད་ཧཱུཾ་ཡིག་མཐིང་ནག་ཏུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་རྡོ་རྗེ་རྩེ་དགུ་བར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སླར་ཡང་འཕྲོ་འདུས་ཡོངས་སུ་གྱུར་པ་ལས་ཧེ་རུ་ཀ་མཐིང་ནག་རྡོ་རྗེ་དང་དུང་ཁྲག་ཅན་དུ་གྱུར། སོ་སོའི་ཕྱག་རྒྱ་སློབ་མའི་མགོ་བོའི་གནས་ལྔར་བཞག་ལ། ༀ་མ་ཧཱ་ཤཱུ་ནྱ་ཏཱ་ཱཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཤཱུ་ནྱ་ཏཱའི་ཚབ་ཏུ། ཨཱ་དཪྴ། ས་མ་ཏཱ། པྲ་ཏྱ་བེཀྵ་ཎ། ཀྲྀ་ཏྱཱ་ནུཥྛཱ་ན། ཞེས་བཅུག་པས་དབང་བསྐུར། ༀ་ཨཱཿཧཱུཾ། ཞེས་བརྗོད་ཅིང་རྡོ་རྗེ་གནས་གསུམ་དུ་གཏུགས་པས་བྱིན་གྱིས་བརླབ། སླར་ཡང་རྡོ་རྗེ་རྩེ་ལྔའི་རྒྱས་བཅིངས་པ་གནས་གསུམ་དུ་བཞག་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱཀ །ཙིཏྟ་ཞེས་བཅུག་པས། བྱིན་གྱིས་བརླབས་པའི་རྟགས་སུ་གནས་གསུམ་དུ་སྐུ་གསུང་ཐུགས་རྡོ་རྗེའི་ལྷ་རང་རྟགས་ས་བོན་གྱིས་མཚན་པ་འཛིན་པས་རྒྱས་བཏབ་པར་བསམ། སྤྱི་བོར་ཧཾ་བཀོད་པ་ཞུ་བ་ལས་ལུས་ཐམས་ཅད་རྡོ་རྗེའི་གོ་ཆས་བཅིངས་པར་བལྟས་ལ། རྡོ་རྗེ་གོ་ཆའི་ཕྱག་རྒྱ་སྤྱི་བོར་འཆིང་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས་གོ་བགོ། མཛུབ་མོ་གཡས་གཡོན་གཉིས་སུ་ༀ་དང་ཏྲུཾ་ལས་རྡོ་རྗེ་གནོད་སྦྱིན་དང་མི་འཆི་ཐབས་སྦྱོར་བསྐྱེད་ལ། ༀ་ཏྲུཾ། ཞེས་ལྟེ་བ། སྙིང་ག །ལྟག་པ། དཔྲལ་བ། སྤྱི་བོ་རྣམས་སུ་རིམ་པར་མཛུབ་མོ་གཉིས་བསྣོལ་བ་རེག་པས། གནས་དེ་དང་དེར་ཁྲོ་བོ་གཉིས་པོ་ཞབས་བསྣོལ་ནས་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེའི་ལུ་གུ་རྒྱུད་བྱུང་བས་བསྲུངས་ཤིང་བརྟན་པར་བསམ། དེ་ནས་སོ་ཤིང་སྦྱིན་པ་ནི། སོ་ཤིང་སོར་བཅུ་གཉིས་པ་དྲི་བཟང་གིས་བྱུགས་ཤིང་རྩེ་མོར་མེ་ཏོག་གི་ཕྲེང་བ་བཅིངས་པ་སློབ་མ་རྣམས་ཀྱི་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་བསམ་ལ་སྦྱིན་ཞིང་། དེས་ཀྱང་མཁའ་དབྱིངས་ཀྱི་རྒྱས་བཟུང་ལ་སོས་འཆའ་ཞིང་དྲུད་པ་ལྟར་བྱས་པས་སྡིག་སྒྲིབ་ཐམས་ཅད་སྐྱུགས་པར་མོས་ནས། ༀ་ཛི་ཧ་སཾ་ཝརྟི་ཧཱུཾ། ཞེས་མཎྜལ་གྱི་སྟེང་དུ་དོར་བས། ཚུགས་ན་བཟང་། ཕྱོགས་བཞིར་འགྱེལ་ན་ལས་བཞི། མཚམས་བཞིར་དངོས་གྲུབ་དམན་པ་འགྲུབ་པར་བསྟན། དེ་ནས་འཁྱོར་ཆུ་བླུད་པ་ནི། དྲི་བཟང་གི་ཆུ་ལ། ༀ་བིགྷྣཱཾ་ཏ་ཀྲྀཏ་ཧཱུཾ་ཕཊ། ཞེས་བཟླས་པ་ཁྱོར་བར་བླུགས་ལ། ༀ་སརྦ་སཾ་ཤོ་དྷ་ན་ཡེ་ཧཱུཾ་ཕཊ། ཅེས་བརྗོད་ཅིང་འཐུང་དུ་བཅུག་ནས་ལྷག་མས་ཁ་ལག་བཀྲུ། དེ་ནས་སྲུང་སྐུད་འཆིང་བ་ནི། སྲུང་སྐུད་དམར་པོ་སུམ་སྒྲིལ་ལ། ༀ་བཾགྷྣཱཾ་ཏ་ཀྲྀཏ་ཨ་མྲྀ་ཏ་ཀུཎྜ་ལཱི་ཚིནྡྷ་ཚིནྡྷ་ཧཱུཾ་ཕཊ། ཅེས་བརྗོད་ཅིང་མདུད་པ་གསུམ་བཏབ་པས་བྱིན་གྱིས་བརླབས་ལ་ཕོའི་དཔུང་པ་གཡོན་དང་། མོའི་གཡས་ལ་འཆིང་། ༀ་བཛྲ་རཀྵ་རཀྵ་ཧཱུཾ་ཕཊ། ཅེས་མདུད་པའི་སྟེང་དུ་སྲིན་ལག་གིས་དྲིའི་ཐིག་ལེ་བྱས་པས་རྡོ་རྗེའི་གོ་ཁྲབ་ཀྱིས་གཡོགས་ཏེ་རྡོ་རྗེ་རྒྱ་གྲམ་གྱི་མདུད་པ་སྤྱི་མགྲིན་སྙིང་ཁ་ལྟེ་བ་གསང་གནས་རྐང་མཐིལ་དང་དྲུག་ཏུ་བྱས་ཏེ་བར་ཆད་ཀྱི་བགེགས་ཀྱིས་མི་ཚུགས་པར་བསམ། དེ་ནས་ཀུ་ཤ་སྦྱིན་པ་ནི། ཀུ་ཤའི་ཆུན་པོ་ཆེ་ཆུང་གཉིས་རྨི་ལམ་མི་འཁྲུགས་པའི་ནུས་ལྡན་དུ་བསམ་ལ། ༀ་ཨཱ་དྷཱིཿཧཱུཾ་སྭཱ་ཧཱ། ཞེས་སྔས་དང་སྟན་གྱི་དོན་དུ་སློབ་དཔོན་གྱིས་ཕྱག་གཡས་གཡོན་བསྣོལ་ཏེ་བྱིན་པ་སློབ་མས་ཀྱང་དེ་བཞིན་དུ་བླང་། དེའི་རྗེས་སུ་དངོས་གྲུབ་ཀྱི་སྣོད་སྐྱོན་ངོ་ཤེས་པའི་ཕྱིར་དུ་དབང་གི་གེགས་བརྒྱད་བཤད་པར་བྱ་སྟེ། སངས་རྒྱས་ཀུན་གྱི་དངོས་གྲུབ་མཆོག །དབང་དང་བྱིན་རླབས་འབྱུང་བ་ནི། །དཔེར་ན་དྭངས་པའི་རྒྱ་མཚོ་ལ། །ཉི་ཟླའི་གཟུགས་བརྙན་འབྱུང་འགྱུར་གྱི། །རྙོགས་པའི་ཆུ་ལ་འགགས་འགྱུར་བཞིན། །བྱིན་རླབས་དབང་མཆོག་ཐོབ་པའི་གེགས། །རྣམ་པ་བརྒྱད་དུ་རྒྱལ་བས་བཤད། །སྟོན་པ་སྔོན་བྱོན་སློབ་དཔོན་ལ། །བཀའ་གཅོག་བརྙས་པར་བྱེད་པ་ནི། །དབང་དང་དངོས་གྲུབ་དང་པོའི་གེགས། །བླ་མེད་འགྲོ་བའི་རྡོ་རྗེ་སྤུན། །འཁུ་ལྡོག་གདུང་བའི་སེམས་མེད་ན། །དབང་དང་དངོས་གྲུབ་གཉིས་པའི་གེགས། །བྱང་ཆུབ་སེམས་ལ་འདུད་མེད་ཅིང་། །ཐར་ལམ་འདྲེན་པའི་ལྷ་སྤོང་བ། །དབང་དང་བྱིན་རླབས་གསུམ་པའི་གེགས། །སྙིང་རྗེའི་ཡུལ་གྱུར་སེམས་ཅན་ལ། །ཐག་པ་གཅོད་པ་བཞི་པའི་གེགས། །གསང་བས་གསང་བའི་ལྟ་སྤྱོད་རྣམས། །ཡོངས་ལ་འབྱིན་པ་གེགས་ལྔ་ཡིན། །ཐར་ལམ་སྟོན་ལ་འདུད་མེད་ཅིང་། །སེར་སྣས་བཅིངས་པ་དྲུག་པའི་གེགས། །གཟུ་ལུམ་དབང་བྱེད་ལས་ལ་སྤྱོད། །དངོས་གྲུབ་མྱུར་བའི་གེགས་བདུན་པ། །འདོད་པས་ཁེ་གྲགས་ལྷུར་ལེན་ཅིང་། །གསང་བའི་དམ་ཚིག་སྤོང་བ་སྟེ། །འདི་ནི་བརྒྱད་པའི་གེགས་སུ་བསྟན། །ཉེས་པ་འདི་དག་སྤོང་བ་ནི། །དངོས་གྲུབ་དབང་གི་སྣོད་དུ་འགྱུར། །བུ་ཀྱེ་ནངས་པར་འདྲི་བྱེད་པས། །དཀྱིལ་འཁོར་སྟེང་དུ་ལེགས་པར་ཉོལ། །ༀ་བཛྲ་ཡཀྵ་ཀྲོ་དྷ་ས་མ་ཡ་དཾཥྚ་ཧཱུཾ། ཞེས་ལས་བུམ་གྱི་ཆུས་གཏོར་ནས། དོ་ནུབ་སེང་གེའི་ཉལ་ཐབས་ཀྱིས་བདེ་བར་ཉོལ་ལ་མཚན་མོའི་ཐུན་གསུམ་པ་ཐོ་རེངས་ཀྱི་དུས་སུ་རྨི་ལམ་བཟང་ངན་གང་རྨིས་པ་དེ་ནངས་པར་བདག་ལ་སྨྲོས་ཤིག །ཅེས་བསྒོ། སློབ་བུ་རྨི་ལམ་ངན་པ་རྨིས་པ་རྣམས་རྡོ་རྗེ་གནོད་སྦྱིན་གྱི་སྔགས། ༀ་བཛྲ་ཡཀྵ་ཧཱུཾ། ཞེས་པ་དང་མཆེ་བའི་ཕྱག་རྒྱས་བསྲུང་། ཀུན་རྨི་ལམ་ངན་ན་དྲག་པོའི་སྦྱིན་སྲེག་སོགས་ཀྱང་བྱའོ། །དེ་ལ་རྨི་ལམ་བཟང་ངན་ནི། ཁྲུས་བྱེད་པ། ཉི་ཟླ་ཤར་བ། སེང་གེའི་ཁྲི་ལ་འདུག་པ། སྐུ་གསུང་ཐུགས་ཀྱི་རྟེན་མཐོང་བ་ལ་སོགས་པ་རྨིས་ན་བཟང་། མཐུར་དུ་འབབ་པ་དང་། གཡང་ས་དང་རི་དང་ལྗོན་ཤིང་ལས་ལྷུང་བ། ཆུས་ཁྱེར་བ། བོང་བུ་དང་སྤྲེའུ་སོགས་ཞོན་ནས་ལྷོར་འགྲོ་བ་སོགས་མཐོང་ན་ངན་ནོ། །དེ་དག་ནི་སློབ་མ་ལྷགས་པར་གནས་པའི་ཆོ་གའོ། ༈ །དེ་ལྟར་ས་ཆོག་དང་སྟ་གོན་གྱི་རིམ་པ་རྣམས་སོང་ནས། ཐིག་ཚོན་གྱི་བྱ་བ། དཀྱིལ་འཁོར་རྒྱན་བཀོད། རབ་གནས་བྱ་བ། སྒྲུབ་མཆོད་རྣམས་རྗེ་བླ་མས་མཛད་པའི་དཀྱིལ་ཆོག་རྡོ་རྗེའི་ཕྲེང་བ་དང་། སྒྲུབ་ཐབས་བདེ་ཆེན་ཆར་འབེབས་ལྟར་བྱའོ། །འདིར་དབང་གི་ཆོ་ག་ལ། ཐོག་མར་ཕན་དབང་གི་དབང་རྫས་རྣམས་ཆབ་གཅིག་རབ་གནས་བྱས་ན་འཇུག་པ་བདེ་བས། དབང་རྫས་རྣམས་བསགས་པ། ཧཱུཾ་བིགྷྣཱཾ་ཏ་ཀྲྀ་ཏ་ཕཊ། ཅེས་ལས་སྔགས་ཀྱིས་བསང་། སྭ་བྷཱ་ཝས་སྦྱང་། དབང་རྫས་རྣམས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཧཱུཾ་ཡིག་ཟུང་ལྔ་འཕྲོ་འདུས་ཡོངས་སུ་གྱུར་པ་ལས་སོ་སོའི་ཕྱག་མཚན་ས་བོན་གྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སླར་ཡང་འཕྲོ་འདུས་ཡོངས་སུ་གྱུར་པས་བཛྲ་ཧེ་རུ་ཀ་མཐིང་ནག་རྡོ་རྗེ་དང་དུང་ཁྲག་འཛིན་པ། བུདྡྷ་ཧེ་རུ་ཀ་སྨུག་ནག་འཁོར་ལོ་དང་དུང་ཁྲག་འཛིན་པ། རཏྣ་ཧེ་རུ་ཀ་སེར་ནག་རིན་ཆེན་དང་དུང་ཁྲག་འཛིན་པ། པདྨ་ཧེ་རུ་ཀ་དམར་ནག་པདྨ་དང་དུང་ཁྲག་འཛིན་པ། ཀརྨ་ཧེ་རུ་ཀ་ལྗང་ནག་རྒྱ་གྲམ་དང་དུང་ཁྲག་འཛིན་པ། ཐམས་ཅད་ཀྱང་ཞལ་གཅིག་ཕྱག་གཉིས་པ་རང་རིགས་ཀྱི་ཡུམ་དང་མཉམ་པར་སྦྱོར་ཞིང་ཞབས་གཉིས་གཡས་བརྐྱང་བའི་དོར་སྟབས་ཀྱིས་བཞུགས་པ་གར་དགུའི་རོས་སྒེག་ཅིང་དུར་ཁྲོད་རོལ་པའི་ཆས་ཀྱིས་བརྒྱན་པ། ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །ཤཱུ་ནྱ་ཏཱ་སོགས་རང་རིགས་བདག་པོར་བྱས་པའི་སྔགས་ལྔ་ཚན་ལྔས་བསྐུར། ཀཱ་ཡ་བཛྲ་སོགས་ཀྱིས་བྱིན་གྱིས་བརླབ། བཛྲ་ས་མཱ་ཛཿས་དབབ། ཨེ་ཧྱེ་ཧིས་དྲངས། ཛཿཧཱུཾ་བྃ་ཧོཿས་བསྟིམ། ཀཱ་ཡ་ཝཱ་ཀ་ཙིཏྟ་བཛྲ་གྱིས་བརྟན་པར་བྱ། ཀུན་བཟང་ཞབས་བསིལ་བཞི་བསྣོལ་གྱིས་མཆོད་ནས། ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་བཛྲ་ཧེ་རུ་ཀ་ཡབ་ཡུམ་ཞུ་བ་ལས་བྱུང་བའི་དབང་རྫས་གདུགས་དང་རྒྱལ་མཚན་དང་གཡས་པའི་ཅོད་པན། བུདྡྷ་ཧེ་རུ་ཀ་ཡབ་ཡུམ་ཞུ་བ་ལས་བྱུང་བའི་དབང་རྫས་བཟའ་བཏུང་། རཏྣ་ཧེ་རུ་ཀ་ཡབ་ཡུམ་ཞུ་བ་ལས་བྱུང་བའི་དབང་རྫས་དབུ་རྒྱན་དང་ཕྲེང་བ། པདྨ་ཧེ་རུ་ཀ་ཡབ་ཡུམ་ཞུ་བ་ལས་བྱུང་བའི་དབང་རྫས་གཡོན་པའི་ཅོད་པན། ཀརྨ་ཧེ་རུ་ཀ་ཡབ་ཡུམ་ཞུ་བ་ལས་བྱུང་བའི་དབང་རྫས་གོ་ཆ། རིགས་ལྔ་ཀ་ཞུ་བ་ལས་བྱུང་བའི་དབང་རྫས་སྙིང་པོ་ལྔ་དང་བུམ་པ་རྣམས་སུ་གྱུར། ཕྱག་རྒྱ་ལྷའི་དབང་ལས་འཕྲོས་པའི་ཆས་དབང་དང་སྒྲུབ་དབང་གི་རྫས་ལྷག་མ་རྣམས་བསང་སྦྱངས། སྟོང་པའི་ངང་ལས་ཧཱུཾ་ཡིག་རེ་རེ་ཡོངས་སུ་གྱུར་པ་ལས། སེམས་ཉིད་ཡེ་ཤེས་ཀྱི་རོལ་པ་མ་འགགས་པའི་ཆོ་འཕྲུལ་དུ་རང་སྣང་བ་ཁྲག་འཐུང་འབར་བའི་གདན་དང་ཕྱག་མཚན་རྒྱན་ཆས་སྒྲུབ་རྫས་རྣམས་རང་རང་གི་རྣམ་པ་གསལ་ལ་མ་འདྲེས་པས་ལས་དང་དངོས་གྲུབ་ཀྱི་མཐུ་བྱིན་སྩོལ་བ་ལ་ཐོགས་པ་མེད་པའི་ནུས་ལྡན་དུ་བསམ་པའོ། །དེ་ནས་ཆོ་ག་དངོས་ལ། དཀྱིལ་འཁོར་དུ་འཇུག་པའི་ཆོ་ག་དང་། ཞུགས་པ་ལ་མངོན་པར་དབང་བསྐུར་བའི་ཆོ་ག་གཉིས། དང་པོ་ནི། རྩ་རྒྱུད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་གསུངས་པས། སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དགུ་སྟེ་དོན་ཉེར་གཅིག་ཡོད་པ་ལས། དང་པོ་སློབ་དཔོན་འཇུག་པ་ནི། དཀྱིལ་འཁོར་བཞེངས་སྒྲུབ་ཀྱི་ལས་རིམ་ཀུན་ཚར་བ་དང་། སློབ་དཔོན་རང་ཉིད་སློབ་མ་འཇུག་པ་ལྟར་དཀྱིལ་འཁོར་དུ་ཞུགས་ཏེ། དབང་རྣམས་བདག་འཇུག་གི་ཚུལ་དུ་བླང་བའམ། མི་ནུས་ན་དཀྱིལ་འཁོར་གྱི་ཤར་སྒོར་གུས་པས་འདུག་སྟེ། རིག་པའི་མེ་ཏོག་དོར་ནས་དངོས་གྲུབ་བསྐུལ་བ་སྒྲུབ་ཐབས་ལྟར་བྱས་པས་འགྲུབ་བོ། །གཉིས་པ་སློབ་མ་གཞུག་པར་བཟོད་གསོལ་གནང་བ་ཞི་བ་ནི། ༀ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བྱ། །ཞེས་གསོལ་བས། དེ་བཞིན་གཤེགས་པ་རྣམས་འཛུམ་པའི་མདངས་ཀྱིས་སློབ་བུ་དལ་དུ་ཆུག་ལ། ཕན་ནུས་ཟབ་མོའི་དབང་གསུམ་སྣོད་དང་འཚམས་པར་སྐུར་ཅིག །ཅེས་གནང་བ་ཐོབ་པར་བསམ་མོ། །གསུམ་པ་ཁྲུས་བྱ་བ་ནི། སློབ་མ་རྣམས་ལ། ཇི་ལྟར་བལྟམས་པ་སོགས་ཀྱིས་ལས་བུམ་གྱི་ཆུས་ཁྲུས་བྱས་ནས། མཚམས་གཅོད་སྲུང་འཁོར་སྒོམ་པ་སྔོན་དུ་འགྲོ་བས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་མི་སློབ་པའི་ཟུང་འཇུག་སྐུ་བཞི་ཡེ་ཤེས་ལྔའི་བདག་ཉིད་ཆེན་པོ་གང་གི་གོ་འཕང་ཚེ་འདི་ཉིད་ལ་མངོན་དུ་བསྒྲུབ་པར་བྱ། དེའི་ཆེད་དུ་གསང་སྔགས་རྡོ་རྗེའི་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་དབང་གི་རིམ་པ་རྣམས་ལེགས་པར་ནོད་ནས་ལམ་ཟབ་མོ་བསྐྱེད་རྫོགས་ཀྱི་རིམ་པ་གཉིས་ལ་ཚུལ་བཞིན་དུ་བསླབ་པར་བགྱིའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས། ཆོས་ཉན་པའི་ཀུན་ཏུ་སྤྱོད་པ་རྣམས་ཀྱང་བླང་དོར་མ་འཛོལ་བར་བགྱིས་ཏེ། ལེགས་པར་གསན་འཚལ། དེ་ལ་གང་ཞིག་གསན་པར་བྱ་བའི་ཆོས་ཀྱི་རྣམ་གྲངས་ཀྱང་སྤྱིར་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་གདུལ་བྱའི་སེམས་ཅན་རྣམས་ཀྱི་ཁམས་དང་། དབང་པོ་དང་། བསམ་པའི་རྗེས་སུ་འགྲོ་བའི་ཆོས་ཀྱི་འཁོར་ལོ་དཔག་ཏུ་མེད་པ་ཞིག་བསྐོར་བར་མཛད་པ་ཡིན་ཡང་། རེ་ཞིག་སྤང་གཉེན་གྱི་སྒོ་ནས་བསྡུ་ན། གདུལ་བྱའི་རྒྱུད་ཀྱི་ཉོན་མོངས་པའི་བྱེ་བྲག་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་ཕུང་པོའང་དེ་སྙེད་ཅིག་ཏུ་གྲངས་ངེས་པ་ཡིན་ཏེ། དེ་སྐད་དུའང། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །མདོར་ན་བརྒྱད་ཁྲི་བཞི་སྟོང་གསུངས་པ་ཀུན། །ཉོན་མོངས་འདུལ་བའི་གཉེན་པོར་གསུངས་པར་ཟད། །ཅེས་གསུངས་པ་ལྟར་རོ། །དེ་ཡང་གཞུང་དང་མན་ངག་ཙམ་གྱི་སྒོ་ནས་བསྡུ་ན། གཞུང་མཚན་ཉིད་ཕར་ཕྱིན་གྱི་ཐེག་པ་དང་། མན་ངག་གསང་ཆེན་རྡོ་རྗེའི་ཐེག་པ་གཉིས་སུ་འདུ་བ་ཡིན་ཏེ། དེ་ཉིད་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །ཞེས་གསུངས་པ་ལྟར་ལས། འདིར་སྐབས་སུ་བབས་པ་ནི། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་བཤད་པ་ལྟར་ཁྱད་ཆོས་བཞིའི་སྒོ་ནས་ཁྱད་པར་དུ་འཕགས་པ་གསང་སྔགས་རྡོ་རྗེའི་ཐེག་པ་ཉིད་ཡིན་ཞིང་། དེ་ལའང་ཤེས་བྱེད་རྒྱུད་སྡེའི་རྣམ་གྲངས་བསམ་གྱིས་མི་ཁྱབ་པ་ཞིག་ཡོད་ཀྱང་ལྟ་སྤྱོད་ཙམ་གྱི་སྒོ་ནས་བསྡུ་ན། སྤྱོད་པ་གཙོ་བོར་སྟོན་པ་བྱ་བའི་རྒྱུད་དང་། ལྟ་བ་གཙོ་བོར་སྟོན་པ་རྣལ་འབྱོར་གྱི་རྒྱུད་དེ་གཉིས་སུ་གསང་སྔགས་ཀྱི་རྒྱུད་སྡེ་མཐའ་དག་འདུ་བ་ལས། འདིར་ཕྱི་མ་སྟེ། དེར་ཡང་རྣལ་འབྱོར་གྱི་རྒྱུད་ཙམ་དང་། རྣལ་འབྱོར་བླ་ན་མེད་པའི་རྒྱུད་གཉིས་སུ་ཡོད་པ་ལས། འདི་ནི་རྣལ་འབྱོར་བླ་ན་མེད་པ་ལ་ནང་གསེས་བསྐྱེད་རྫོགས་རྫོགས་ཆེན་གསུམ་སྟོན་པའི་གཞུང་རྒྱུད་ལུང་མན་ངག་གསུམ་ཡོད་པའི་དང་པོ་རྒྱུད་མ་ཧཱ་ཡོ་ག །དེ་ལའང་བསྐྱེད་རིམ་ཐབས་ཀྱི་ཆ་དང་རྫོགས་རིམ་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པ་མ་ཧཱའི་མ་ཧཱ་སྟེ་ཕ་རྒྱུད་གསང་བ་འདུས་པ་ལ་སོགས་པ་དང་། བསྐྱེད་རིམ་གྱི་སྤྲོས་པ་ཤས་ཆུང་ཞིང་ཤེས་རབ་རྫོགས་པའི་རིམ་པ་ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཚུལ་དུ་ཉམས་སུ་ལེན་པ་མ་ཧཱའི་ཨ་ནུ་སྟེ་མ་རྒྱུད་སངས་རྒྱས་མཉམ་སྦྱོར་དང་དཔལ་ཡང་དག་ལ་སོགས་པ་དང་། བསྐྱེད་རྫོགས་ཟུང་དུ་འཇུག་ཅིང་དེའང་རྫོགས་རིམ་རྩ་ཐིག་རླུང་གསུམ་ལས་བསྐྱེད་པའི་བདེ་གསལ་རྣམ་པར་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པ་མ་ཧཱའི་ཨ་ཏི་སྟེ་གཉིས་མེད་ཀྱི་རྒྱུད་སྒྱུ་འཕྲུལ་དྲྭ་བ་ལ་སོགས་པ་ལས། འདིར་སྔ་འགྱུར་བཀའ་མའི་བཀའ་སྲོལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་ཐོག་མར་ངེས་ཤེས་འདྲེན་པ་བླ་མ་བརྒྱུད་པའི་ལོ་རྒྱུས་ཀྱི་དབང་དུ་བྱས་ན། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པ་ལྟར་གསུམ་ལས། དང་པོ་ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་བདག་ཉིད་སྟོན་པ་རིགས་དྲུག་པ་བཅོམ་ལྡན་འདས་དཔལ་ཀུན་ཏུ་བཟང་པོས། འོག་མིན་ཆེན་པོའི་གནས་སུ། འཆད་པའི་སྐྱེས་བུ་དེ་བཞིན་གཤེགས་པ་ལྔ་ཡང་མངོན་པར་སྣང་བར་མཛད་ནས། རྡོ་རྗེ་གསང་བ་ལ་སོགས་པ་རིག་པ་ཁྱད་པར་ཅན་གྱི་འཁོར་རྣམས་ལ་རྒྱུད་ཀྱི་རྒྱལ་པོ་ཉིད་དགོངས་པ་བརྡའི་གསུང་གིས། དུས་རྟག་པ་རྒྱུན་གྱི་འཁོར་ལོར་སྟོན་པ་ནི་རྒྱལ་བ་དགོངས་བརྒྱུད་དོ། །རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་རིགས་གསུམ་མགོན་པོས་ལྷ་ཀླུ་གནོད་སྦྱིན་གྱི་གནས་སུ་བཤད་ནས་དར་བ་དང་། ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན། ལངྐའི་ཡུལ་ཏེ་སིང་ག་ལའི་གླིང་གི་རི་བོ་མ་ལ་ཡའམ་དེང་སང་སུ་མ་ན་ཀུ་ཊའི་རི་ཞེས་གྲགས་པའི་རྩེ་མོར་གསང་བདག་གིས་ལྷ་གྲགས་ལྡན་ཕྱོགས་སྐྱོང་། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། ཀླུ་རྒྱལ་འཇོག་པོ། མི་ལས་སྐལ་ལྡན་ལི་ཙ་བི་དྲི་མེད་གྲགས་པ་སྟེ། དམ་པའི་རིགས་ཅན་དྲྭ་མ་ལྔ་ལ་བཤད་པ་རྣམས་ནི་རིག་འཛིན་བརྡ་བརྒྱུད་དོ། །དེ་ནས་གང་ཟག་སྙན་བརྒྱུད་ནི། གསང་བདག་གིས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ཀྱིས་ཟ་ཧོར་གྱི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་ཤིང་དེའི་རྗེས་ཐོགས་སུ་ཇི་སྐད་དུ། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་སྣང་བར་འགྱུར། །ཞེས་ལུང་བསྟན་པ་ལྟར་རྒྱལ་པོ་ཉིད་ཀྱི་ཕོ་བྲང་གི་ཁང་ཐོག་ཏུ་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབས་ཤིང་། གསང་བའི་བདག་པོས་དངོས་སུ་བྱིན་གྱིས་བརླབས་ནས་དོན་གྱི་བརྒྱུད་པ་གཏད་དེ། ཚིག་གི་བརྒྱུད་པ་ལི་ཙ་བི་ནས་ལེན་པར་རྗེས་སུ་གནང་བའི་སླར་ཡང་དེ་ཉིད་ནས་ལེགས་པར་གསན་པ་སྟེ། དེ་ལྟར་ན་གསང་བའི་བདག་པོ་ནས་ལི་ཙ་བི་དྲི་མེད་གྲགས་པ། རྒྱལ་པོ་ཛཿ ཀུ་ཀུ་རཱ་ཛཿ ཨིནྡྲ་བྷུ་ཏི། ཨུ་པ་རཱ་ཛཿ སྲས་མོ་གོ་མ་དེ་ཝི་རྣམས་ལ་རིམ་པར་བརྒྱུད་དེ། ཐམས་ཅད་ཚོགས་ཀྱི་སྤྱོད་པའི་ཉེ་རྒྱུ་ལ་བརྟེན་ནས་རང་རང་གི་ཚོམ་བུ་དང་བཅས་ཏེ་རྡོ་རྗེ་འཆང་ཆེན་པོའི་ས་ལ་མངོན་དུ་གཤེགས་པ་ཤ་སྟག་གོ། །སྲས་མོས་སྒེག་པ་རྡོ་རྗེ་དང་སློབ་དཔོན་སངས་རྒྱས་གསང་བ། དེ་གཉིས་ཀས་པཎ་ཆེན་བི་མ་ལ་མི་ཏྲ། དེས་བོད་དུ་ལོ་ཙཱ་བ་རྨ་གཉགས་གཉིས། རྨ་རིན་ཆེན་མཆོག་ནས་མཁས་པ་གཙུག་གྱེར་རྣམ་གཉིས། དེ་གཉིས་ལས་ཞང་དང་། གཉགས་ལོ་ཡེ་ཤེས་གཞོན་ནུ་ནས་སོག་པོ་དཔལ་ཡེ་ལ་བརྒྱུད་དེ། ཞང་དང་སོག་པོས་གནུབས་ཆེན་སངས་རྒྱས་ཡེ་ཤེས་ལ་གནང་། དེ་ནས་གནུབས་ཡོན་ཏན་རྒྱ་མཚོ་ཡབ་སྲས་དང་། ཆོས་ལུང་གི་ཉང་ཁུ་དབོན་ནས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས། དེའིི་སློབ་མ་རྩེ་མོ་བཞི་ལས་ལྟ་སྒོམ་གྱི་རྩེ་མོ་ཟུར་ཆུང་ཤེས་རབ་གྲགས་པ། དེའི་སློབ་མ་ཀ་བ་བཞི་དང་གླན་ཤཱཀ་བྱང་ལས། གསང་བདག་ཆེན་པོ་སྒྲོ་ཕུག་པ་ཤཱཀྱ་སེང་གེ་ནས་རིམ་པར་བརྒྱུད་དེ། ཁོ་བོ་ཅག་གི་བླ་མ་དམ་པ་བཀའ་དྲིན་མཉམ་མེད་འདིར་རྩ་བའི་བླ་མའི་མཚན་སྨོས་ཏེ། འདི་ཞེས་བྱ་བས། བདག་རྒྱུད་དབང་གི་ཆུ་བོས་སྨིན་པར་མཛད་པ་ཡིན། བརྒྱུད་པ་དེ་ལས་བྱུང་བའི་ཆོས་དེ་ལའང་། ལམ་གྱི་གཞི་སྨིན་བྱེད་དབང་གི་རིམ་པ་དང་། དེའི་ཉམས་ལེན་གྲོལ་བྱེད་བསྐྱེད་རྫོགས་ཀྱི་རིམ་པ་གཉིས་སུ་ཡོད་པ་ལས་འདིར་དབང་བསྐུར་བའི་རིམ་པ་དེ་སྐབས་སུ་བབ་པ་ཡིན། དེ་ལ་དབང་གི་ངོ་བོ་ནི། རྒྱུ་གཉིས་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱིས། རྒྱུད་ཀྱི་དྲི་མ་བྱང་བའམ་ཉམས་སྨད་པར་བྱས་ཤིང་། ཐར་པའི་མྱུ་གུ་མངོན་དུ་སྐྱེས་པའམ། སྐྱེ་ངེས་ཀྱི་ས་བོན་ཁྱད་པར་ཅན་གསོས་ཐེབས་པས་ལམ་བསྒོམ་རུང་དང་འབྲས་བུ་ཐོབ་རུང་གི་ནུས་པ་མཐུ་ཅན་དུ་སྨིན་པར་བྱས་པ་སྟེ། ས་བོན་གསོས་ཐེབས་པའི་ཆ་དེ་སྔགས་ཀྱི་སྡོམ་པའང་ཡིན་ལ། དམ་ཚིག་ཀྱང་ཡིན་ནོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན། མངོན་པར་གཏོར་བས་ན་དབང་སྟེ། སྦྱང་བྱ་སྒོ་གསུམ་གྱི་དྲི་མ་གཏོར་ཞིང་འཁྲུད་པར་བྱེད་པའི་ཕྱིར། ཡང་མངོན་པར་བླུགས་པས་ན་དབང་སྟེ། ལམ་སྒོམ་རུང་དང་འབྲས་བུ་ཐོབ་རུང་གི་ནུས་པ་ཁྱད་པར་ཅན་རྒྱུད་ལ་འཇོག་པའི་ཕྱིར། དེ་ལྟར་ཡང་བརྟག་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས། དབྱེ་ན། དད་པ་ཅན་རྗེས་སུ་འཛིན་པ་ཕན་པའི་དབང་ཉེར་བརྒྱད། བརྩོན་འགྲུས་ཅན་རྗེས་སུ་འཛིན་པ་ལ་ནུས་པའི་དབང་ལྔ། བརྟུལ་ཞུགས་ཅན་རྗེས་སུ་འཛིན་པ་ལ་ཟབ་མོའི་དབང་གསུམ་གསུངས་ཏེ། རྩ་རྒྱུད་ཐར་ལོའི་འགྱུར་ལས། དད་དང་བརྩོན་འགྲུས་བརྟུལ་ཞུགས་ལ། །ཕན་དང་ནུས་པའི་དབང་བསྐུར་བྱ། །ཤེས་རབ་དབང་བསྐུར་རིམ་པར་བཅས། །བརྩེ་བས་ཆུད་མི་ཟ་བར་སྦྱིན། །ཞེས་གསུངས། དེ་ཡང་དབང་བསྐུར་བ་ནི་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དེ་ལའང་རྡོ་རྗེ་རྩེ་མོ་ལས། སེམས་ཅན་ཤིན་ཏུ་གདུལ་དཀའ་གང་། །སྡོམ་པ་འཛིན་པར་མི་བྱེད་ཅིང་། །དད་དང་ལྡན་པ་མེད་པ་ཡང་། །འཇུག་པ་ཉིད་ནི་དགག་མི་བྱ། །ཞེས་པས་རེ་ཞིག་དབང་གི་སྣོད་དུ་མ་གྱུར་པའི་གང་ཟག་ཡིན་ནའང་། དཀྱིལ་འཁོར་དུ་བཅུག་པ་ཙམ་ལ་འགལ་བ་མེད་པར་གསུངས་མོད། དཀྱིལ་འཁོར་དུ་མ་བཅུག་པ་ལ་དབང་བསྐུར་བ་ནི་ནམ་དུའང་མི་རུང་སྟེ། ཇི་སྐད་དུ། དཀྱིལ་འཁོར་མ་མཐོང་བ་རྣམས་ཀྱི་མདུན་དུ་མ་སྨྲ་ཞིག་ཅེས་གསུངས་པའི་ཕྱིར། དེས་ན། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་གསུངས་པ་ལྟར་སྟ་གོན་དུ་གནས་པ་ཡན་ཆད་སོང་ནས། དངོས་གཞི་ལ། རྡོ་རྗེ་སློབ་དཔོན་གྱི་བྱ་བ་དང་། རྡོ་རྗེ་སློབ་མའི་བྱ་བ་གཉིས་ཡོད་པ་ལས། སློབ་དཔོན་གྱི་བགྱི་འོས་དཀྱིལ་འཁོར་བཞེངས་པ། བསྒྲུབ་ཅིང་མཆོད་པ། བདག་ཉིད་དཀྱིལ་འཁོར་དུ་རིག་པས་འཇུག་པ་རྣམས་ཆད་ལྷག་མེད་པར་སྔོན་དུ་གྲུབ། ད་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ལ། ལྷ་དང་སྐལ་བ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོས་དང་། ཞུགས་ནས་དབང་ནོད་པའི་བྱ་བ་གཉིས་ལས། འདིར་འཇུག་པའི་ཡན་ལག་ཁྲུས་དང་བགེགས་བསལ་བ་སྔོན་དུ་སོང་ནས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད་དོ། །བཞི་པ་གདོང་དགབ་པ་ནི། དར་རམ་རས་དམར་པོའི་མིག་དར། ༀ་ཨཱཿཧཱུཾ་གིས་བཅིང་། ཨ་ཁཾ་ཝཱི་ར་ཧཱུཾ་གིས་མེ་ཏོག་གཏད། ཧེ་རུ་ཀ་དཔལ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ལན་གསུམ་གྱིས་གསོལ་བ་གདབ། ལྔ་པ་དྲི་བ་ནི། སློབ་དཔོན་གྱིས། ཁྱོད་ཀྱི་འདོད་པ་ཇི་ལྟ་བུ། །ཞེས་ལན་གསུམ་དུ་དྲི། དྲུག་པ་ལན་གདབ་པ་ནི། སློབ་མས། སྐལ་བ་བཟང་པོ་ཐོབ་པར་འཚལ། །ཞེས་ལན་གདབ། བདུན་པ་དྲངས་ནས་གྲལ་དུ་དགོད་པ་ནི། ལག་གི་རྡོ་རྗེ་ལ་འཇུར་བཅུག་སྟེ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །བྱང་ཆུབ་རྡོ་རྗེའི་ལམ་ནས་དྲངས་ནས་ནི། །སྐུ་གསུང་ཐུགས་ཀྱི་དབང་དང་དངོས་གྲུབ་རྣམས། །དྭངས་པའི་ཡིད་ཀྱིས་རབ་ཏུ་བླང་བར་གྱིས། །ཞེས་རིམ་པར་དྲངས་ཏེ་དབང་སྟེགས་པདྨ་འདབ་མ་བརྒྱད་པ་རེ་བྲིས་པའམ་བསྒོམ་པའི་སྟེང་དུ་གྲལ་ལ་བཞག །སྐབས་འདིར་དཀྱིལ་འཁོར་གྱི་ཡོལ་བ་བསལ། བརྒྱད་པ་ཚེ་སྦ་བ་ནི། ཚེ་མི་ཡར་བར་བྱ་བའི་ཕྱིར་དབང་ཕྱུག་གི་ཐུགས་ཀའི་ས་བོན་ལས་ཡི་གེ་བྷཱུཾ་རེ་སློབ་མའི་དཔྲལ་བར་སྤྲོས། བྷཱུཾ་བི་ཤྭ་བི་ཤུདྡྷེ་ཞེས་བརྗོད་པས་དུང་ཁང་ཟླ་གམ་དམར་པོའི་གཞལ་ཡས་ཁང་གནམ་སྒོ་གཅིག་པ་སྒོ་ཁྱུད་ཅན་གཅིག་ཏུ་གྱུར། དེའི་ནང་དུ་ཧཱུཾ་ཡིག་མཐིང་སྐྱ་དང་། སྒོར་ཧཱུཾ་ཡིག་ལྗང་ནག་གཅིག་གསལ་བ་ལས་འོད་འཕྲོས་ལུས་ཀྱི་ནང་གང་། ཨཱ་ཡུ་ཧཱུཾ་ཛཿ འོད་ཟེར་ཚུར་འདུས་ཚེ་བཅུད་ཐམས་ཅད་དབུས་ཀྱི་ཧཱུཾ་ལ་ཐིམ་པ་ལས། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་ཕཊ། ཅེས་བརྗོད་པས་ཧཱུཾ་ཀཱ་ར་མཐིང་སྐྱ་རྡོ་རྗེ་དང་དྲིལ་བུ་བསྣམས་པ་གཅིག་ཏུ་གྱུར། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ་ཕཊ། ཅེས་པས་སྒོའི་ཧཱུཾ་ཡིག་དེ་མི་གཡོ་བ་ལྗང་ནག་རལ་གྲི་དང་སྡིགས་མཛུབ་ཅན་གཅིག་ཏུ་གྱུར་ཏེ། སྲུང་བའི་ལས་མཛད་པར་བསམ་མོ། །དགུ་པ་བགེགས་བསྐྲད་པ་ནི། སློབ་དཔོན་ཞེ་སྡང་རྡོ་རྗེའི་སྙེམས་པས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས་སྤྲུལ་པའི་ཁྲོ་ཚོགས་བསམ་གྱིས་མི་ཁྱབ་པ་སྤྲོས། འཇིག་རྟེན་གྱི་ཁམས་ཐམས་ཅད་གང་། ལྟས་ཆེན་པོ་བཅོ་ལྔ་དང་། ཆོས་སྣང་བའི་ཆོ་འཕྲུལ་ཆེན་པོས་བདུད་བགེགས་ལོག་པར་འདྲེན་པའི་ཚོགས་ཐམས་ཅད་བསྡིགས་བསྐྲད་བརླག་པར་བསམ་ལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་སྒྱུ་འཕྲུལ་རྣམ་པར་རོལ་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། ཞེས་བདེན་སྟོབས་བརྗོད་པ་སྔོན་དུ་འགྲོ་བས། འདིར་འདུས་པའི་སློབ་བུ་རྣམས་ལ་གནོད་ཅིང་འཚེ་བའི་འབྱུང་པོ་ཐམས་ཅད་འདིར་མ་གནས་པར་དེངས་ཤིག །ཅེས་དང་། ཧཱུཾ་བཞི་པའི་སྔགས་ལན་གསུམ་བརྗོད་ཅིང་གུ་གུལ་གྱིས་བདུག །ཡུངས་ཀར་གྱིས་བྲབ། སླར་ཡང་ཁྲོ་བོ་རྣམས་ཚུར་འདུས་ཕྱོགས་མཚམས་ཐམས་ཅད་ཁྲོ་བོ་དང་རྡོ་རྗེའི་གུར་ཁང་མཚོན་ཆའི་ཆར་འབབ་ཅིང་། འབར་བ་མེའི་ཕྲེང་བ་ཕྱོགས་ཀུན་ཏུ་འཕྲོ་བས་བཅིངས་ཏེ་ཅིས་ཀྱང་མི་ཤིགས་པར་བསམ། བཅུ་པ་སྒྲིབ་པ་ཕྲལ་བ་ནི། སློབ་དཔོན་གྱི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་ༀ་སྭཱཾ་ཨཱཾ་ཧཱཾ། གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་རེ་རེའི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པར་རིགས་ལྔ་ཡབ་ཡུམ་བཅུར་གྱུར་པར་བསམ། ༀ་སུ་ར་ཏ་སྟྭཾ། ཞེས་ཐལ་མོ་སྦྱར། བཛྲ་ཨཉྫ་ལི། ཞེས་སོར་མོ་བསྣོལ། བཛྲ་བྷནྡྷ་བཾ། ཞེས་ཕྱག་རྒྱ་བསྡམས་པས། རིགས་ལྔ་ཡབ་ཡུམ་མཉམ་པར་སྦྱོར་བར་བསམ། གོང་ལྟར་བདེན་སྟོབས་བརྗོད་པ་སྔོན་དུ་འགྲོ་བས། སློབ་བུ་འདི་རྣམས་ཀྱི་རྒྱུད་ལ་ཡོད་པའི་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། ཆོས་ཀྱི་ཕོངས་པའི་སྒྲིབ་པ་དང་། བག་ཆགས་ངན་པའི་སྒྲིབ་པ་ལ་སོགས་ཏེ་སྒྲིབ་པའི་ཕུང་པོ་ཇི་སྙེད་པ་ཐམས་ཅད་ཕྱག་རྒྱའི་འོད་ཟེར་འདིས་བྲལ་བར་གྱུར་ཅིག །བཛྲ་བནྡྷ་ཏྲ་ཐ། ཞེས་མང་དུ་བརྗོད་ཅིང་ཕྱག་རྒྱ་སྤྲུགས་པས། རིགས་ལྔའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་འཕྲོས་པས་སློབ་བུའི་སྒྲིབ་པ་མཐའ་དག་བསྲེགས་ཤིང་སྦྱངས། དུང་ཁང་གི་ཁྲོ་བོ་གཉིས་ཀྱང་ཞུ་ལུགས་སུ་ཐིམ་པའི་རྐྱེན་གྱིས་བུའི་ལུས་ཀྱང་འོད་དུ་ཞུ་བའི་འོད་ཕུང་གསེར་ཞུན་མ་ལྟ་བུར་གནས་པར་བསམ། བཅུ་གཅིག་པ་ལྷར་བསྐྱེད་པ་ནི། སློབ་དཔོན་གྱི་ཧཱུཾ་ཞེས་བརྗོད་པས་འོད་ཕུང་དེ་ཉིད་ཧཱུཾ་ཡིག་མཐིང་ནག་ཏུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་རྡོ་རྗེ་རྩེ་དགུ་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སླར་ཡང་འཕྲོ་འདུས་ཡོངས་སུ་གྱུར་པ་ལས་ཧེ་རུ་ཀ་མཐིང་ནག་རྡོ་རྗེ་དང་དུང་ཁྲག་ཅན་དུ་གྱུར། བཅུ་གཉིས་པ་བྱིན་གྱིས་བརླབ་པ་ནི། སོ་སོའི་ཕྱག་རྒྱ་སློབ་མའི་མགོ་བོའི་གནས་ལྔར་བཞག་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སོགས། ཤཱུ་ནྱ་ཏཱའི་ཚབ་ཏུ། ཨཱ་དཪྴ། ས་མ་ཏཱ། པྲ་ཏྱ་བེཀྵ་ཎ། ཀྲྀཏྱཱ་ནུཥྛཱ་ན། ཞེས་བཅུག་པས་དབང་བསྐུར། ༀ་ཨཱཿཧཱུཾ། ཞེས་བརྗོད་ཅིང་རྡོ་རྗེ་གནས་གསུམ་དུ་གཏུགས་པས་བྱིན་གྱིས་བརླབ། སླར་ཡང་རྡོ་རྗེ་རྩེ་ལྔའི་རྒྱ་བཅིངས་པ་གནས་གསུམ་དུ་བཞག་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་སརྦ་ཏ་ཐཱ་ག་ར་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པའི་རྟགས་སུ་གནས་གསུམ་དུ་སྐུ་གསུང་ཐུགས་རྡོ་རྗེའི་ལྷ་རང་རྟགས་ས་བོན་གྱིས་མཚན་པ་འཛིན་པས་རྒྱས་བཏབ་པར་བསམ། བཅུ་གསུམ་པ་གོ་བགོ་བ་ནི། སྤྱི་བོར་ཧཾ་བཀོད་པ་ཞུ་བ་ལུས་ཐམས་ཅད་རྡོ་རྗེའི་གོ་ཆས་བཅིངས་པར་བལྟས་ལ། རྡོ་རྗེ་གོ་ཆའི་ཕྱག་རྒྱ་སྤྱི་བོར་འཆིང་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས་གོ་བགོ། བཅུ་བཞི་པ་ལུས་བསྲུང་བ་ནི། མཛུབ་མོ་གཡས་གཡོན་གཉིས་སུ་ༀ་དང་ཏྲུཾ་ལས་རྡོ་རྗེ་གནོད་སྦྱིན་དང་མི་འཆི་ཐབས་སྦྱོར་བསྐྱེད་ལ། ༀ་ཏྲཱུཾ། ཞེས་ལྟེ་བ་སྙིང་ག་ལྟག་པ་དཔྲལ་བ་སྤྱི་བོ་རྣམས་སུ་རིམ་པར་མཛུབ་མོ་གཉིས་བསྣོལ་བ་རེག་པས། གནས་དེ་དང་དེར་ཁྲོ་བོ་གཉིས་པོ་ཞབས་བསྣོལ་ནས་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེ་ལུ་གུ་རྒྱུད་བྱུང་བས་བསྲུངས་ཤིང་བརྟན་པར་བསམ། བཅོ་ལྔ་པ་དམ་ཚིག་དཔོག་པ་ནི། ཐོད་པའི་བདུད་རྩི་ལ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་ༀ་ཨཱཿཧཱུཾ་གི་རྣམ་པར་གསལ་བར་བསམ་ལ། སློབ་བུས། དཔལ་ལྡན་རྡོ་རྗེ་སྐུ་འཆང་བ། །མི་ཕྱེད་རྡོ་རྗེ་གསུམ་དང་ལྡན། །དེང་བདག་སངས་རྒྱས་སྐུ་འཛིན་པ། །བྱིན་གྱིས་བརླབ་པའི་ལས་མཛོད་ཅིག །ཅེས་གསོལ། སློབ་དཔོན་གྱིས་བདུད་རྩི་ལས་ༀ་ཡིག་དཀར་པོ་བླངས་པར་མོས་ལ། རྡོ་རྗེས་བདུད་རྩི་བླངས་ཏེ་ༀ་ཞེས་ཚིག་དེ་ཉིད་བརྗོད་བཞིན་དུ་སློབ་བུའི་ལྕེ་ཐོག་ཏུ་སྦྱིན། དེ་ལས་འོད་ཟེར་དཀར་པོ་འཕྲོས་དེ་བཞིན་གཤེགས་པ་ཐམས་ཅད་ཀྱི་སྐུའི་བྱིན་རླབས་བསྡུས་ནས་སློབ་མའི་དཔྲལ་བར་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་སྐུའི་དམ་ཚིག་ཐོབ་པར་བསམ། དེ་བཞིན་དུ། དཔལ་ལྡན་རྡོ་རྗེའི་གསུང་འཆང་བ། །མི་ཕྱེད་རྡོ་རྗེ་གསུམ་དང་ལྡན། །དེང་བདག་སངས་རྒྱས་གསུང་འཛིན་པ། །བྱིན་གྱིས་བརླབ་པའི་གནས་མཛོད་ཅིག །ཅེས་གསོལ། སློབ་དཔོན་གྱིས་བདུད་རྩི་ལས་ཨཱཿཡིག་དམར་པོ་བླངས་པར་མོས་ཏེ། བདུད་རྩི་སྦྱིན། དེ་ལས་འོད་ཟེར་དམར་པོ་འཕྲོས་དེ་བཞིན་གཤེགས་པ་ཐམས་ཅད་ཀྱི་གསུང་གི་བྱིན་རླབས་བསྡུས་ནས་སློབ་མའི་མགྲིན་པར་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་གསུང་གི་དམ་ཚིག་ཐོབ་པར་བསམ། ཡང་། དཔལ་ལྡན་རྡོ་རྗེ་ཐུགས་འཆང་བ། །མི་ཕྱེད་རྡོ་རྗེ་གསུམ་དང་ལྡན། །དེང་བདག་སངས་རྒྱས་ཐུགས་འཛིན་པ། །བྱིན་གྱིས་བརླབ་པའི་གནས་མཛོད་ཅིག །ཅེས་གསོལ། སློབ་དཔོན་གྱིས་བདུད་རྩི་ལས་ཧཱུཾ་ཡིག་སྔོན་པོ་བླངས་པར་མོས་ཏེ། བདུད་རྩི་སྦྱིན། དེ་ལས་འོད་ཟེར་མཐིང་ག་འཕྲོས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་བྱིན་རླབས་ཐམས་ཅད་བསྡུས་ནས་སློབ་མའི་སྙིང་ཁར་ཐིམ་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱིན་གྱིས་བརླབས་པས་ཐུགས་ཀྱི་དམ་ཚིག་ཐོབ་པར་བསམ། དེ་ཉིད་ཚིག་གིས་དཔོག་པ་ནི། མི་ལྡོག་རིགས་ངེས་བརྟན་བྱའི་ཕྱིར། །ཐར་ལམ་འདྲེན་པའི་བླ་མ་དང་། །བྱང་ཆུབ་འགྲོ་བའི་སྤུན་རྣམས་ལ། །སྒོ་གསུམ་ཟོལ་མེད་བཀུར་བ་དང་། །གསང་བའི་ཡིད་ཀྱིས་བསྲུང་བྱ་ཞིང་། །ཧེ་རུ་དཔལ་ལ་རྟག་གནས་ནས། །མཐའ་ཡས་སེམས་ཅན་བུ་བཞིན་སྐྱོངས། །ཞེས་བརྗོད། བཅུ་དྲུག་པ་ཆུ་ནན་བྱ་བ་ལ། ཉེས་དམིགས་ཀྱི་སྒོ་ནས་ཆུ་ནན་བྱ་བ་དང་། ཕན་ཡོན་གྱི་སྒོ་ནས་ཆུ་ནན་བྱ་བ་གཉིས། དང་པོ་ནི། ཙན་དན་དཀར་དམར་སྦྱར་བའི་ཆུ་བསང་སྦྱངས། སྟོང་པའི་ངང་ལས་ཧཱུཾ་ལས་ཁྲོ་བོ་རྡོ་རྗེ་གནོད་སྦྱིན་དུ་གྱུར། ༀ་བཛྲ་ཡཀྵ་ཧཱུཾ། ཞེས་བཟླས་པས་ལྷ་འོད་དུ་ཞུ་བ་ཆུའི་རྡུལ་ཕྲ་རབ་ཏུ་བསམ་ལ། སངས་རྒྱས་ཀུན་དང་མཉམ་སྦྱོར་བའི། །སྡོམ་པ་ལས་ནི་གང་འདས་པ། །ལྷ་རྣམས་དང་ནི་མི་རྣམས་དང་། །སྒྲུབ་པ་པོ་དང་རྣལ་འབྱོར་རྣམས། །དེ་ཀུན་ཁྲོས་ནས་ཁྲག་ཆེན་པོ། །ཉམས་པའི་སྙིང་ནས་དྲངས་ཏེ་འཐུང་། །ཨི་དཾ་ཏེ་ན་ར་ཀན་ཧཱུཾ། ཞེས་རྡོ་རྗེས་ལྕེ་ལ་ལན་གསུམ་བཞག །གཉིས་པ་ནི། སླར་ཡང་ཆུ་དེ་ཉིད་བསང་སྦྱངས། སྟོང་པའི་ངང་ལས་ཧཱུཾ་ལས་རྡོ་རྗེ་ཧེ་རུ་ཀའི་སྐུར་གྱུར། ༀ་བཛྲ་ཨ་མྲྀ་ཏཾ་ཨ་དྷི་ཏིཥྛ་མཾ་ཧཱུྃ་ཧྲཱིཿཋཱཿ ཞེས་བཟླས་པས། ལྷ་ཞུ་བ་ལས་བྱུང་བའི་བདུད་རྩིར་བསམ་ལ། དེ་ལྟ་བས་ན་བུ་ཁྱོད་ཀྱིས། །དམ་ཚིག་འདི་དག་བསྲུང་བར་གྱིས། །དམ་ཚིག་བསྲུང་ན་དངོས་གྲུབ་པས། །རྡོ་རྗེ་བདུད་རྩིའི་ཆུ་འཐུང་ཞིག །ༀ་བཛྲ་ཨུ་ད་ཀ་ཧཱུཾ་ཕཊ། ཅེས་སྔར་ལྟར་བྱིན་རྗེས་འདི་ལྟར་བརྗོད་དེ། དེ་ལྟར་བདུད་རྩིའི་ཆུ་དེ་བཞག་པ་ལྕེ་ལ་བཞག་ཀྱང་། བབ་པ་སྙིང་གི་དཀྱིལ་དུ་བབས་ནས་གལ་ཏེ་དམ་ཚིག་མ་བསྲུང་ན། ཆུ་དེ་རྡོ་རྗེ་གནོད་སྦྱིན་ཞེས་བྱ་བ་ལྕགས་ཀྱི་སྡིག་པ་མགོ་བོ་དགུ་པར་གྱུར་ནས་སྙིང་ཁྲག་ཞོ་བཞིན་འཇིབ་པས་ཚེ་ཐུང་ཞིང་ནད་མང་བ་དང་། ཚེ་ཕྱི་མར་དམྱལ་བའི་སྡུག་བསྔལ་གྱིས་ཉམ་ཐག་པར་འགྱུར་རོ། །དམ་ཚིག་བསྲུང་ན་ཆུ་དེ་རྡོ་རྗེ་སེམས་དཔར་གྱུར་ནས་དེས་རྟག་ཏུ་བྱིན་གྱིས་རློབ་ཅིང་། ཚེ་འདིར་ཡང་དགེ་དགུ་དང་། སྨོན་བརྒྱད་དུ་གྱུར་ནས་ནད་བཞི་བརྒྱ་རྩ་བཞི་གདོན་སྟོང་ཕྲག་བརྒྱད་ཅུས་མི་ཚུགས་པ་དང་། ཕྱི་མར་བླ་ན་མེད་པའི་བྱང་ཆུབ་ཐོབ་ནས་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་གནས་སུ་འདྲེན་པའི་དེད་དཔོན་བྱེད་པར་འགྱུར་རོ། །ཞེས་བརྗོད་དོ། །བཅུ་བདུན་པ་དམ་ཚིག་བསྒྲག་པ་ནི། བླ་མའི་ཕྱག་གཡས་རྡོ་རྗེ་དང་བཅས་སྤྱི་བོར་བཞག་ལ། རྒྱལ་བས་གསུངས་པའི་ཡེ་ཤེས་གང་། །དེང་འདིར་དངོས་གྲུབ་མཆོག་ཏུ་གསུངས། །དམ་ཚིག་ཆེ་བའི་ཆེན་པོ་མཆོག །བྱེ་བྲག་མེད་པར་དེང་ནས་སྤྱོད། །དགེ་དང་མི་དགེའི་ཆོས་རྣམས་ལ། །ལྷག་པར་བརྟན་པར་མི་བྱ་སྟེ། །མཉམ་ཉིད་རིག་པའི་ཀློང་ཞུགས་ནས། །ཅི་ལའང་ཐོགས་པ་མེད་པར་སྤྱོད། །ཅེས་བསྒོ། བཅོ་བརྒྱད་པ་རིན་ཆེན་དོར་བ་ནི། སྔར་གཏད་པའི་མེ་ཏོག་ཐལ་སྦྱར་གྱིས་བཟུང་ལ། ཧཱུཾ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །དུར་ཁྲོད་རྫས་ཀྱི་མེ་ཏོག་དོར་ནས་ཀྱང་། །བླ་མེད་སྐུ་གསུང་ཐུགས་ཀྱི་དངོས་གྲུབ་རྣམས། །སྐལ་ལྡན་བདག་ཅག་རྣམས་ལ་སྩལ་དུ་གསོལ། །ༀ་པྲ་ཏཱིཙྪ་བཛྲ་ཧོཿ ཞེས་མཎྜལ་ར་བར་ལྟོས་མེད་དུ་དོར། དབུས་སུ་བབས་ན་རྡོ་རྗེའི་རིགས། ཤར་དུ་དེ་བཞིན། ལྷོར་རིན་ཆེན། ནུབ་ཏུ་པདྨ། བྱང་དུ་ལས་རིགས་ཏེ་དེ་ལྟར་རིགས་གང་ཡིན་ངོས་བཟུངས་ཤིག །ཅེས་བརྗོད་ལ། ༀ་པྲ་ཏཱི་གྲི་ཧྞ་ཏྭཾ་ཨི་མཾ་སཏྭ་མ་ཧཱ་བ་ལ་ཏིཥྛ། ཞེས་སྤྱི་བོར་འཆིང་། བཅུ་དགུ་པ་ལྷ་དབབ་པ་ནི། སློབ་བུ་རྣམས་ལུས་བདེ་ལུགས་སུ་བསྲངས་ཏེ་རླུང་རང་བབས་སུ་བཞག་ལ། སྙིང་ནང་དུ་ཆུ་ནན་གྱི་ཡེ་ཤེས་པ་ཧེ་རུ་ཀ་མཐིང་ནག་ཞལ་ཕྱག་ཕྱག་མཚན་ཡོངས་སུ་རྫོགས་པར་གསལ་བ་ལ་ཤེས་པ་སྐད་ཅིག་ཀྱང་མ་ཡེངས་པར་གྱིས་ཤིག །ཅེས་བསྒོས་ཏེ། རྡོ་རྗེ་རྩེ་གཅིག་པའི་རྒྱ་བཅས་ལ། ༀ་བཛྲ་མ་ཧཱ་ཀྲོདྷ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ས་མ་ཡ་སྟྭཾ། ཞེས་ལན་གསུམ་བརྗོད་པས། རྡོ་རྗེ་སེམས་དཔའ་ཆོས་སྐུ་ལས་གཟུགས་སྐུར་བཞེངས་པར་བསམ་ལ། དབང་ཕྱུག་གིས་ལྕགས་ཀྱུའི་ཕྱག་རྒྱ་དང་བཅས། ༀ་བཛྲ་མ་ཧཱ་ཀྲོ་དྷ་ཤྲཱི་ཧེ་རུ་ཀ །བཛྲ་ཀྲོ་དྷཱི་ཤྭ་རཱི་ས་མ་ཡ་སྟཱཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿ ཞེས་བརྗོད་པས་འོག་མིན་ནས་ཡེ་ཤེས་སེམས་དཔའི་རང་བཞིན་ཧེ་རུ་ཀའི་སྐུ་ཆེ་ཆུང་བསམ་གྱིས་མི་ཁྱབ་པ་བྱོན་ནས་སློབ་མའི་སྤྱི་བོའི་སྟེང་གི་ནམ་མཁར་བཞུགས་པར་བསམ་ལ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་སྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཧཱུཾ་ཧཱུཾ་ཧཱུཾ་ཧཱུཾ། ཞེས་བརྗོད་ཅིང་སྤོས་རོལ་བྱ། དེ་ནས་བླ་མའི་ཕྱག་གཡས་རྡོ་རྗེ་དང་བཅས་པ་སློབ་མའི་སྙིང་གར་བཞག་ལ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་བྱིན་ཕབ་པའི་ཡེ་ཤེས་པ་དེ་ཉིད་ཙིཏྟའི་དཀྱིལ་དུ་ཡེ་ཤེས་སེམས་དཔའི་རང་བཞིན་དུ་བཞུགས་ནས་འཇིག་རྟེན་འདི་ཡི་དགེ་དགུ་དང་སྨོན་བརྒྱད་དུ་གྱུར་ཏེ། ཕྱི་མ་བླ་ན་མེད་པའི་བྱང་ཆུབ་ཀྱི་རྒྱུར་གྱུར་ཅིག །གལ་ཏེ་དམ་ཚིག་ཉམས་ན་རྡོ་རྗེ་གནོད་སྦྱིན་དུ་གྱུར་ཏེ་སྲོག་རྩའི་ཁྲག་འཇིབ་པར་གྱུར་ཅིག །ཅེས་དམོད་པ་བོར། པྲ་བེ་ཤ་ཡ་ཕཊ། ཅེས་པས་སྙིང་གི་སྒོ་ཕྱེ་ལ་ནམ་མཁའ་གང་བའི་ལྷ་ཚོགས་རྣམས་སློབ་མའི་སྤྱི་བོ་ནས་ཞུགས་པ་སྙིང་གའི་ཧེ་རུ་ཀ་ལ་སིབ་སིབ་ཐིམ་པར་བསམ་ཞིང་སྤོས་རོལ་དང་བཅས་ཏེ། ཨ་བེ་ཤ་ཡ་ཨ། ཞེས་ཆུ་ནན་གྱི་ལྷ་དང་གཉིས་མེད་དུ་གྱུར་པར་བསམ་མོ། །སྐབས་འདིར་ལྷ་སྒོམ་པའི་ཐབས་སྟོན་པར་གསུངས་ཀྱང་། འོག་ཏུ་དལ་གྱི་ལྷ་ངོ་བསྟན་པ་དང་སྦྲེལ་ནས་མཛད་པ་ཕྱག་ལེན་ནོ། །ཉི་ཤུ་པ་མིག་དབྱེ་བ་ནི། དབང་ཕྱུག་གི་ཐུགས་ཀ་ནས་འོད་ཟེར་ཐུར་མ་འདྲ་བ་བྱུང་སྟེ་སློབ་བུའི་མ་རིག་པའི་ལིང་ཐོག་བསལ་བས་དག་པ་ཡེ་ཤེས་ཀྱི་སྤྱན་དང་ལྡན་པར་མོས་ལ། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་འདི་ལ་བལྟ་བར་གྱིས། །སྔགས་དང་ཕྱག་རྒྱའི་རིགས་སུ་འཁྲུངས། །ཁྱོད་ནི་དམ་ཚིག་འདི་ལྟ་བུ། །གསང་བ་བསྟན་པའི་སྣོད་དུ་རུང་། །དམ་ཚིག་མཆོག་ཏུ་འགྱུར་བར་བྱེད། །དངོས་གྲུབ་ཐམས་ཅད་ཕུན་སུམ་ཚོགས། །བཛྲ་ཙཀྵུ་པྲ་བེ་ཤ་ཡ་ཕཊ། ཅེས་མིག་དབྱེ་ཞིང་གདོང་གཡོགས་དཀྲོལ། ཉེར་གཅིག་པ་དཀྱིལ་འཁོར་བསྟན་པ་ནི། དབང་ཕྱུག་གིས་ཕྱག་ཤིང་ཐོགས་ཏེ། ཧེ་མཎྜ་ལ་པཱ་ཤྱ། དེ་ཡང་སྲུང་བའི་འཁོར་ལོས་མི་ཕྱེད་པར་བཅིངས་པའི་ནང་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ་སྣ་ཚོགས་པདྨའི་ལྟེ་བ་ལ་རྫོགས་པའི་གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གི་དབུས་ཡེ་ཤེས་ལྔའི་བརྡར་འཁོར་ལོ་རྩིབས་བཞི་ལྟེ་བ་དང་བཅས་པ་དེའི་ཕྱིར་བདེན་པ་བཞི་མཚོན་པའི་གྲུ་ཆད་བཞིས་རྣམ་པར་བརྒྱན་ཅིང་། ཆེ་བའི་ཡོན་ཏན་རྒྱས་པས་དབྱིབས་གྲུ་བཞི་པ། རྣམ་ཐར་བཞིའི་སྒོ་ནས་འཇུག་པའི་སྒོ་ཁྱུད་ཅན། བདེན་གཉིས་མཚོན་པའི་བར་ཁྱམས་རིམ་པ་གཉིས་ཀྱི་ནང་མ་གསེར་ཁྱམས་དང་། ཕྱི་མ་ཁྲག་ཁྱམས་སུ་གནས་པ། ཐོད་པ་སྐམ་རློན་རྙིད་གསུམ་གྱི་རྩིག་པ་ཕྱི་མ་ཡེ་ཤེས་ལྔ་མཚོན་པའི་རིམ་པ་ལྔ་དང་། ནང་མ་རྡོ་རྗེ་གསུམ་མཚོན་པའི་རིམ་པ་གསུམ་པ། ཐམས་ཅད་ཀྱང་རཀྟས་སྤྱིན་ཐབས་སུ་སྦྱར་ཞིང་གནམ་ལྕགས་ཀྱི་གཟེར་བུས་བཏབ་པ། རྩིག་སྟེང་ཐོད་པ་སྣ་ཚོགས་ཀྱི་ཕ་གུ་འཕྱར་བ་ལས་རྒྱུ་མ་དང་སྙིང་གི་མགུལ་འཁོར། བྲེ་ཕུལ་གྱི་སྣམ་བུར་སྦྲུལ་སྦྲམ་དང་ཐོད་ཕྲེང་གི་དྲྭ་བ་དང་དྲྭ་བ་ཕྱེད་པ། རྐང་ལག་གི་ཤར་བུ། སྒལ་ཚིགས་ཀྱི་མདའ་ཡབ། རིམ་པ་གཉིས་ཀའི་རྩིག་པའི་འགྲམ་དུ་འདོད་པའི་སྣམ་བུ་དང་། སྒོ་ཕྱི་མ་ལ་རྒྱུ་འབྲས་ཀྱི་རྟ་བབ་སོགས་འཇིགས་པའི་རྒྱན་སྣ་ཚོགས་ཀྱིས་བཀྲ་བ། སྟེང་ཞིང་ལྤགས་ཀྱིས་ཐོག་ཕུབ་ཉི་ཟླའི་མཐོངས་སྐར་དང་བཅས་པའི་དབུས་ཕྱུར་བུ་ལྷ་ཆེན་པོའི་ཐོད་པས་ཟླུམ་པོར་ཕུབ་པའི་རྩེ་མོར་ཙིཏྟའི་ཏོག་གིས་མཚན་པ། དེ་ལྟ་བུའི་གཞལ་མེད་ཁང་གི་ནང་ན་གདན་གྱི་རིམ་པ་ནི། ཁྲག་འཐུང་རིགས་ལྔའི་གནས་སུ་པད་ཟླ་ཉི་མ་བརྩེགས་པའི་སྟེང་དུ་དུག་ལྔ་གནས་སུ་དག་པའི་བརྡར་དབུས་སུ་གཏུམ་པ་དོམ། ཤར་དུ། ཁྱུ་མཆོག །ལྷོར་མ་ཧེ། ནུབ་ཏུ་གཟིག །བྱང་དུ་སྟག་རྣམས་ཟུང་ཟུང་གིས་སྦར་བས། དབུས་སུ་དབང་ཕྱུག་དང་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གནོད་སྦྱིན་རྣམས་ཕོ་མོ་ཁ་སྦུབ་གན་རྐྱལ་དུ་བསྣོལ་བའི་སོག་དབྲག་དང་ནུ་དབྲག་ནས་ལས་ལ་ནན་ཏུར་དུ་འཛུད་པའི་ཕྱིར་བཟུང་བ། གནས་ཡུལ་སྒོ་སྐྱོང་རྣམས་ལ་ཉི་མ་དང་ཞིང་གི་གདན། དབང་མོ་རྣམས་ཀྱི་གནས་སུ་ཞིང་སྐམ་པོའི་གདན་རེ་རེ་སྟེ། དེ་རྣམས་ནི་རྟེན་གྱི་དཀྱིལ་འཁོར་རོ། །བརྟེན་པ་ལྷའི་དཀྱིལ་འཁོར་ནི། དཀྱིལ་འཁོར་གྱི་དབུས་ཀྱི་གདན་ལ་ཞེ་སྡང་དག་པ་ཐུགས་རྡོ་རྗེའི་བདག་ཉིད་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་ཞབས་བཞི་པ། ཞལ་གདངས་ཤིང་མཆེ་བ་གཙིགས་པ། ལྗགས་བསྒྲིལ་ཞིང་རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུཾ་སྒྲ་འབྱིན་ཅིང་རྫི་སྨིན་སྨ་ར་ལས་མེ་འབར་བ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། སྐུ་ཆེ་ཞིང་ཡན་ལག་རགས་པ། ལང་ཚོ་རྒྱས་པའི་འགྱུར་བག་ཅན་རྡོ་རྗེའི་བ་སྤུས་གཏམས་པ། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་དྲིལ་བུ་འཛིན་པས་ཡུམ་ལ་འཁྱུད་པ། བར་པ་གཉིས་ཀྱིས་རྡོ་རྗེ་རྩེ་ལྔ་དང་དུང་དམར། ཐ་མ་གཉིས་ཀྱིས་ཞིང་དབྱུག་དང་སྟོང་གི་འཇིག་རྟེན་འདེགས་པ། ཞབས་བཞི་གཡས་བརྐྱང་ཞིང་གཡོན་བསྐུམ་པའི་གྱད་ཆེན་པོའི་སྟབས་ཀྱིས་རོལ་བ། གར་དགུའི་ཉམས་ཀྱིས་སྒེག་ཅིང་དུར་ཁྲོད་རོལ་པའི་ཆས་བརྒྱད་དང་དཔལ་གྱི་ཆས་བཅུ་སྐུ་ལ་རྫོགས་པ། ཡུམ་ཀྲོ་དྷི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ་པ། དྲིལ་བུ་དང་དུང་དམར་འཛིན་ཅིང་ཁྲོ་མོའི་ཆ་ལུགས་རྫོགས་པས་གཙོ་བོ་དང་དགྱེས་པར་འཁྲིལ་བ་སྟོང་ཉིད་སྙིང་རྗེ་ཟུང་དུ་འཇུག་པའི་བདག་ཉིད་ཅན་མེ་དཔུང་འབར་བའི་དབུས་ན་བཞུགས་པའོ། །རྩིབས་བཞིའི་ཤར་དུ་གཏི་མུག་དག་པ་སྐུ་རྡོ་རྗེའི་བདག་ཉིད་བུདྡྷ་ཧེ་རུ་ཀ་ཡབ་ཡུམ། ལྷོར་ང་རྒྱལ་དག་པ་ཡོན་ཏན་རྡོ་རྗེའི་བདག་ཉིད་རཏྣ་ཧེ་རུ་ཀ་ཡབ་ཡུམ། ནུབ་ཏུ་འདོད་ཆགས་དག་པ་གསུང་རྡོ་རྗེའི་བདག་ཉིད་པདྨ་ཧེ་རུ་ཀ་ཡབ་ཡུམ། བྱང་དུ་ཕྲག་དོག་དག་པ་ཕྲིན་ལས་རྡོ་རྗེའི་བདག་ཉིད་ཀརྨ་ཧེ་རུ་ཀ་ཡབ་ཡུམ། དེའི་ཕྱི་རོལ་གྱི་རྩིབས་མཆན་དང་གྲུ་ཆད་བཞི་ལ་རྣམ་ཤེས་ཚོགས་བརྒྱད་གནས་སུ་དག་པའི་རྟགས་སུ། ག་རཱི་མ། ཙ་རཱི་མ། པྲ་མོ་ཧ། བེ་ཏ་ལཱི། པུཀྐ་སཱི། གྷསྨ་རཱི། སྨ་ཤ་ནཱི། ཙཎྜ་ལཱི་སྟེ་གནས་ཀྱི་མ་མོ་བརྒྱད། གསེར་ཁྱམས་ཀྱི་ཕྱོགས་བཞི་དང་མཚམས་བཞིར་ཡུལ་བརྒྱད་གནས་སུ་དག་པའི་རྟགས་སུ། སེང་གདོང་མ། སྟག་གདོང་མ། ཝ་གདོང་མ། སྤྱང་གདོང་མ་སྟེ་མཆེ་བ་ཅན་བཞི་དང་། བཞད་གདོང་མ། ཀངྐའི་གདོང་མ། བྱ་རོག་གདོང་མ། འུག་གདོང་མ་སྟེ་གཤོག་པ་ཅན་བཞི་སྟེ་ཡུལ་གྱི་ཕྲ་མེན་བརྒྱད། དཀྱིལ་འཁོར་ནང་མའི་སྒོ་བཞིར་ཕྱིན་ཅི་ལོག་བཞི་གནས་སུ་དག་པའི་རྟགས་སུ། རྟ་གདོང་མ། ཕག་གདོང་མ། སེང་གདོང་མ། སྤྱང་གདོང་མ་སྟེ་སྒོ་མ་བཞི། དཀྱིལ་འཁོར་ཕྱི་མའི་ཁྱམས་དང་སྒོ་བཞིར་སྒལ་ཚིགས་ཉེར་བརྒྱད་གནས་སུ་དག་པའི་རྟགས་སུ། སྲིན་མོ་ཆེན་མོ་མིའི་སྲིན་མོ་དང་། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་དང་། དམར་མོ་དང་། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། སྲིན་མོ་དང་། ཟ་བ་མོ་དང་། དགའ་བ་མོ་དང་། ར་རོ་ཁྲག་འཐུང་མྱོས་མ་དང་། གཅིག་པུར་སྤྱོད་མ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་དང་། གསོད་བྱེད་མོ་དང་། མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆེན་མོ་དང་། ཆུ་ལྷ་མོ་དང་། ནག་མོ་ཆེན་མོ་དང་། ར་མགོ་དམར་སེར་ཆེན་མོ་དང་། བུམ་སྣ་སྔོ་ནག་ཆེན་མོ་དང་། གསུས་འཛིན་སེར་ནག་ཆེན་མོ་སྟེ་དབང་ཕྱུག་མ་ཉི་ཤུ་རྩ་བརྒྱད། གཞན་ཡང་། ཕྱི་རོལ་སྲུང་བའི་འཁོར་ལོ་ལ་ཁྲོ་བོ་ཆེན་པོ་ཡབ་ཡུམ་ཟུང་བཅུ་ལ་སོགས་ཏེ་སྤྲུལ་པ་དང་ཡང་སྤྲུལ་འཁོར་ཚོགས་བསམ་གྱིས་མི་ཁྱབ་པས་ཡོངས་སུ་བསྐོར་བ་སྟེ། དེ་ལྟར་ན་སྒྱུ་འཕྲུལ་དྲྭ་བ་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཆེན་པོ་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཇལ་བར་གྱུར་སྙམ་དུ་དགའ་བ་དང་སྤྲོ་བ་ཡང་དག་པ་བསྐྱེད་མཛོད། དེའི་ནང་ནས་ཀྱང་ཁྱོད་ཀྱི་ཡི་དམ་གྱི་ལྷ་ནི་འདི་ཡིན་ཏེ། དེ་ཡང་སྔོན་མེ་ཏོག་དབུས་སུ་བབས་པ་རྣམས་ཀྱི་ཡི་དམ་གྱི་ལྷ་བཛྲ་ཧེ་རུ་ཀ་ཡིིན་པ་དང་། སྙིང་པོ་སྔགས་ནི། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པའོ། །དེ་བཞིན་ཤར་དུ་བབས་པ་རྣམས་ཀྱི་ཡི་དམ་གྱི་ལྷ་ནི་བུདྡྷ་ཧེ་རུ་ཀ་དང་། སྙིང་པོ་སྔགས་ནི། ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པའོ། །ལྷོ་རུ་བབས་པ་རྣམས་ཀྱི་ཡི་དམ་གྱི་ལྷ་ནི་རཏྣ་ཧེ་རུ་ཀ་དང་། སྙིང་པོ་སྔགས་ནི། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པའོ། ། ནུབ་ཏུ་བབས་པ་རྣམས་ཀྱི་ཡི་དམ་གྱི་ལྷ་ནི་པདྨ་ཧེ་རུ་ཀ་དང་། སྙིང་པོ་སྔགས་ནི། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པའོ། །བྱང་དུ་བབས་པ་རྣམས་ཀྱི་ཡི་དམ་གྱི་ལྷ་ནི་ཀརྨ་ཧེ་རུ་ཀ་དང་། སྙིང་པོ་སྔགས་ནི། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཅེས་པ་སྟེ། དེ་ལྟར་ན་དུས་རྟག་ཏུ་ལྷ་དེ་དང་དེའི་མངོན་རྟོགས་སྒོམ་པ་དང་སྔགས་བཟླ་བ་ལ་བརྩོན་པར་གྱིས་ཤིག །ཅེས་བསྒོ། དེ་ནས་སྐབས་འདིར་རིགས་གང་ལ་བབས་པའི་གསང་མཚན་གདགས་པར་བྱ་སྟེ། དབུས་སུ་བབས་ན། རྡོ་རྗེ་སྙིང་པོ་རྩལ། རྡོ་རྗེ་ཡང་དག་རྩལ། རྡོ་རྗེ་ཐུགས་མཆོག་རྩལ། རྡོ་རྗེ་འགྱུར་མེད་རྩལ། རྡོ་རྗེ་དྲག་པོ་རྩལ། ཞེས་སོགས་དང་། མོ་རྣམས་ལ། རྡོ་རྗེ་དབྱིངས་ཕྱུག་རྩལ། ཞེས་པ་ལྟ་བུ། ཤར་དུ་བབས་ན། རྡོ་རྗེ་སྐུ་མཆོག་རྩལ། རྡོ་རྗེ་བདེ་གཤེགས་རྩལ། རྡོ་རྗེ་ལྷུན་གྲུབ་རྩལ། རྡོ་རྗེ་བཻ་རོ་ཙ་ན་རྩལ། ཞེས་སོགས་དང་། མོ་རྣམས་ལ། དེ་བཞིན་དབྱིངས་ཕྱུག་རྩལ། ཞེས་པ་ལྟ་བུ། ལྷོར་བབས་ན། རྡོ་རྗེ་ཡོན་ཏན་གཏེར་འབྱུང་རྩལ། རྡོ་རྗེ་དཔལ་མཆོག་རྩལ། རྡོ་རྗེ་རིན་ཆེན་སྙིང་པོ་རྩལ། ཞེས་སོགས་དང་། མོ་རྣམས་ལ། རིན་ཆེན་དབྱིངས་ཕྱུག་རྩལ། ཞེས་པ་ལྟ་བུ། ནུབ་ཏུ་བབས་ན། རྡོ་རྗེ་གསུང་མཆོག་རྩལ། རྡོ་རྗེ་མྱུ་གུ་རྩལ། རྡོ་རྗེ་དབང་ཕྱུག་རྩལ། རྡོ་རྗེ་མ་ཆགས་པདྨ་རྩལ། རྡོ་རྗེ་དྲི་མེད་རྩལ། ཞེས་སོགས་དང་། མོ་རྣམས་ལ། པདྨ་དབྱིངས་ཕྱུག་རྩལ། ཞེས་པ་ལྟ་བུ། བྱང་དུ་བབས་ན། རྡོ་རྗེ་ལས་རབ་རྩལ། རྡོ་རྗེ་ཁྱུང་གཤོག་རྩལ། རྡོ་རྗེ་ཐོགས་མེད་རྩལ། རྡོ་རྗེ་བདུད་འཇོམས་རྩལ། ཞེས་སོགས་དང་། མོ་རྣམས་ལ། ལས་ཀྱི་དབྱིངས་ཕྱུག་རྩལ། ཞེས་པ་ལྟ་བུ་རིགས་དང་མཐུན་པའི་མིང་གདགས་ཏེ། དེ་ལྟ་བུའི་མིང་དེ་ཉིད་མ་བརྗེད་པར་གྱིས་ཤིག །མ་འོངས་པའི་དུས་སུ་རིགས་དེ་དང་དེར་མངོན་པར་རྫོགས་པར་སངས་རྒྱས་པའི་ཚེ། ས་བླ། ས་འོག །ས་སྟེང་གསུམ་དུ་གྲགས་པར་འགྱུར་ཞིང་སེམས་ཅན་གྱི་དོན་བྱེད་པ་དང་། ཁྱད་པར་དུ་ཞེ་སྡང་ཅན་ལ་སོགས་པའི་གདུལ་བྱ་འདུལ་བར་འགྱུར་རོ། །ཞེས་བརྗོད་དོ། །དེ་ནས་ཁེ་ཉེན་བཤད་པའི་སྒོ་ནས་ལྷ་སྒོམ་པར་གདམས་པ་ནི། སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ལྷ་སྤངས་དགེ་སྤྱད་དོན་མེད་པས། །གང་གིས་ཕྱག་རྒྱ་འདི་སྤངས་ན། །ཉོན་མོངས་ངན་སོང་གནས་སུ་སྐྱེ། །བྱང་ཆུབ་འབྲས་བུ་ཐོབ་མི་འགྱུར། །བླ་མེད་འབྲས་བུ་རྒྱུན་ཡང་ཆད། །རིགས་ཆད་ཉིད་དུ་ལྟུང་བར་འགྱུར། །བདག་ཉིད་ལྷ་དང་མཉམ་སྦྱོར་བས། །ཡོན་ཏན་ཆུང་ཡང་འགྲུབ་པར་འགྱུར། །གཅིག་དང་དུ་མ་ཡོངས་བྲལ་བས། །དཀྱིལ་འཁོར་ཐམས་ཅད་འགྲུབ་པར་གསུངས། །ཞེས་བརྗོད། དེ་ལྟར་དཀྱིལ་འཁོར་དུ་ཞུགས་པ་ལ་ཡོན་ཏན་དང་མ་ཞུགས་པ་ལ་སྐྱོན་ཅི་ཡོད་ཅེ་ན། རྡོ་རྗེ་ལས་རིམ་ལས། འཇིགས་བྱེད་སྟངས་དཔྱལ་གཉིས་སམ་ལྔ། །བྱས་ཏེ་དད་ལྡན་རབ་ཞུགས་ན། །འོག་མིན་ཆེན་པོར་ཉིད་ཞུགས་དང་། །འདོད་པ་ཡིད་འོང་མཉམ་པར་འགྱུར། །གང་དག་དད་མེད་མི་འཇུག་པ། །བྱང་ཆུབ་ཆེན་པོར་དབུལ་བར་འགྱུར། །ཞེས་གསུངས། དེ་དག་ནི་དཀྱིལ་འཁོར་དུ་འཇུག་པའི་ཆོ་གའོ། །གཉིས་པ་ཞུགས་པ་ལ་མངོན་པར་དབང་བསྐུར་བའི་ཆོ་ག་ནི། ལས་རིམ་ལས། དེ་ནས་ཟབ་མོའི་དབང་བསྐུར་བའི། །སྡོམ་ནི་རྒྱུ་རྐྱེན་དགོས་ཆེད་དང་། །གེགས་དང་ངོ་བོ་རྣམ་གྲངས་དང་། །བསྐུར་ཐབས་སྐྱོན་དང་ཡོན་ཏན་འབྲས། །ཞེས་གསུངས་པ་ལྟར་དོན་ཚན་བཅུས་སྟོན་ཅིང་། ཁྱད་པར་དབང་བསྐུར་ཐབས་ལ། སྡོམ་ནི་ཡོན་དང་ཁྲི་རྩིག་གསོལ། །དགོངས་གསོལ་དབང་རྣམས་སྦྱིན་པའོ། །ཞེས་གསུངས་པ་ལས། ཐོག་མར་ཡོན་འབུལ་བ་ནི། རྩ་རྒྱུད་ལས། དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །ཞེས་གསུངས་པ་ལྟར། ལུས་དང་ལོངས་སྤྱོད་ཐམས་ཅད་ལྟོས་མེད་དུ་ཕུལ་བར་མོས་ཏེ་མཎྜལ་སྔོན་དུ་འགྲོ་བས་ཐལ་མོ་སྦྱར་ལ། རང་རྒྱུད་གདོས་པས་བཅིངས་པའི་ཕུང་པོ་འདི། །བདག་མེད་རྒྱལ་བའི་ཞིང་དུ་སྦྱར་བའི་ཕྱིར། །ལུས་སྲོག་རྫས་ཀྱི་མཆོད་པ་དམ་པ་འདི། །བླ་མེད་སྨན་པའི་མཆོག་ལ་འབུལ་ལགས་ན། །གཉིས་སུ་མེད་པའི་ཚུལ་དུ་དགོངས་ནས་སུ། །བླང་དོར་མེད་པའི་ཚུལ་གྱིས་བཞེས་སུ་གསོལ། །ཨ་ལ་ལ་ཧོཿ ཞེས་ལུས་དབུལ། དེ་ནས་བླ་མ་དང་དཀྱིལ་འཁོར་གྱི་ལྷ་ལ་ཕྱག་བཙལ་ཏེ་གསོལ་བ་གདབ་པ་ནི། དཔལ་ལྡན་སངས་རྒྱས་ཀུན་བདག་ཉིད། །བརྩེ་བར་དགོངས་ཏེ་བདག་ལ་ཡང་། །དབང་བསྐུར་བདུད་རྩི་ཆེན་པོ་ཉིད། །དེ་རིང་རབ་ཏུ་གསལ་བར་མཛོད། །ཅེས་ལན་གསུམ། དེ་ལ་རུས། སངས་རྒྱས་དག་ནི་ཐམས་ཅད་ཀྱི། །གསང་བ་རྡོ་རྗེ་གསུམ་ལས་བྱུང་། །ཁམས་གསུམ་ཀུན་གྱིས་ཕྱག་བྱས་པ། །དབང་བསྐུར་གནང་བ་ཆེན་པོ་སྦྱིན། །ཞེས་གནང་བ་བྱིན་ནས། སྤོས་དང་རོལ་མོར་བཅས་པས་རུ་ལུ་བཟླ་བཞིན་དུ་དཀྱིལ་འཁོར་ལ་བསྐོར་བ་བྱ་ཞིང་དབང་ཕྱུག་གིས་དཀྱིལ་འཁོར་གྱི་ལྷ་ལ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །ཅེས་བསྟོད་རྗེས། གསང་བ་མཆོག་གི་དཀྱིལ་འཁོར་དུ། །སློབ་བུའི་རེ་བ་བསྐང་བ་དང་། །སེམས་ཅན་དོན་ཕྱིར་བདག་རྩོམ་ན། །བཟོད་པར་མཛོད་དེ་དགོངས་སུ་གསོལ། །ཞེས་དབང་ཕྱུག་གིས་ལྷ་ལ་བཟོད་པར་གསོལ་ལ། བཛྲ་ས་མཱ་ཛཿ ཞེས་རྡོ་རྗེ་བསྡུ་བའི་སྔགས་རྒྱས། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་མདུན་གྱི་ནམ་མཁར་སྤྲིན་ཕུང་གཏིབས་པ་བཞིན་དུ་སད་ནས་བཞུགས་པར་མོས་ལ་མེ་ཏོག་དང་བཅས་པའི་ཐལ་མོ་སྦྱར་ཏེ། དགོངས་སུ་གསོལ་བ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བདག་ལ་དགོངས་སུ་གསོལ། བདག་རྡོ་རྗེ་སློབ་དཔོན་འདི་ཞེས་བྱ་བས་སློབ་བུ་འདི་རྣམས་ལ་སྒྱུ་འཕྲུལ་དྲྭ་བའི་དབང་བསྐུར་བས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མཐུ་བསྟན་དུ་གསོལ། དབང་བསྐུར་དུ་གསོལ། བྱིན་གྱིས་རློབ་ཏུ་གསོལ། དེ་བཞིན་གཤེགས་པ་ཐམས་ཅད་ཀྱིས། །སྒྱུ་འཕྲུལ་དྲྭ་བའི་དཀྱིལ་འཁོར་དུ། །རྡོ་རྗེ་ཤུགས་ཀྱིས་བསྒྲལ་ནས་ཀྱང་། །བྱིན་རླབས་དམ་པ་ནོད་པར་བྱའོ། །ཞེས་བརྗོད་ཅིང་དཀྱིལ་འཁོར་གྱི་དབུས་སུ་འདུག་པར་མོས་ལ་རང་ཉིད་དབང་ཁྲི་ལ་འདུག་པར་བྱའོ། །དེ་ནས་དབང་བསྐུར་བའི་ལས་རིམ་དངོས་ནི། རྩ་རྒྱུད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་གསུངས་པ་ལྟར། སློབ་མ་དད་པ་ཅན་ལ་ཕྱི་ཕན་པའི་དབང་ཉེར་བརྒྱད། རང་གཞན་གྱི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་བསྐུར་བའི་རིམ་པ་དང་གསུམ། དང་པོ་ཕན་དབང་བསྐུར་བ་ལ། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔ་སྟེ། །ཕྱི་དབང་ཉེར་བརྒྱད་ཕན་པའི་དབང་། །ཞེས་པ་ལྟར་ལྔ་ལས། དང་པོ་དྲེགས་པ་གདན་གྱི་དབང་ནི། སློབ་མ་དཀྱིལ་འཁོར་གྱི་ཤར་སྒོའི་ནང་རོལ་དུ་བཛྲ་ཧེ་རུ་ཀའི་རྣམ་པས་འཁོད་པའི་རྐང་འོག་ཏུ་དབང་སྟེགས་ཟིལ་གནོན་དྲེགས་པའི་གདན་བཏིང་བར་མོས་ལ། ཧཱུཾ། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་དང་ཉི་ཟླའི་གདན། །ཞབས་བཞིས་བདུད་བཞི་འདུལ་བའི་རྟགས། །དྲེགས་པའི་གདན་གྱི་དབང་བསྐུར་རོ། །རཀྴ་ཡཀྴ་སཱུརྱ་ཙནྡྲ་མཎྜ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དྲེགས་པའི་གདན་གྱི་དབང་བསྐུར་བས། ཁམས་གསུམ་གྱི་དྲེགས་པ་ཅན་ཐམས་ཅད་འདུལ་ཞིང་ཚར་བཅད་དེ་ཆགས་སྡང་དང་རྣམ་རྟོག་ཐམས་ཅད་ཟིལ་གྱིས་གནོན་པའི་དབང་དམ་པ་ཐོབ་པར་གྱུར་ཅིག །གཉིས་པ་ཕྱག་རྒྱ་ལྷའི་དབང་ནི། དཀྱིལ་འཁོར་གྱི་ལྷ་ཚོགས་རྣམས་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན་ཏེ་སློབ་བུ་ལ་ཐིམ་པས་ལྷ་རང་རང་གི་སྐུར་གྱུར་པར་བསམ་ལ། ཨེ་མ་ང་ནི་རང་བྱུང་བའི། །དཔལ་ཆེན་ཁྲོ་རྒྱལ་ཉིད་ཀྱི་སྐུ། །ཡེ་ཤེས་འབར་བའི་རྡོ་རྗེ་འདི། །ང་ཡིས་ཁྱོད་ཀྱི་ལག་ཏུ་སྦྱིན། །རྡོ་རྗེ་འདི་ནི་ཁྱོད་ཀྱིས་ལོངས། །ཡུམ་ཆེན་བཛྲ་ཁྲོ་མོའི་རྒྱལ། །བརྩོན་འགྲུས་ཕ་རོལ་ཕྱིན་མའི་དབང་། །དེ་རིང་ཁྱོད་ལ་བསྐུར་བར་བྱ། །གཟུགས་ཀྱི་མཆོད་པས་མཉེས་བྱའི་ཕྱིར། །ནམ་མཁའི་རྒྱལ་མོ་ཁྱོད་ལ་སྦྱིན། །ༀ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ །བཛྲ་ཀྲོ་དྷེ་ཤྭ་རཱི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དཔལ་ཆེན་པོ་བཛྲ་ཧེ་རུ་ཀ་ཡབ་ཡུམ་གྱི་དབང་བསྐུར་བས། ཉོན་མོངས་པ་ཞེ་སྡང་དང་འབྱུང་བ་ནམ་མཁར་འཛིན་པའི་རྟོག་པ་གནས་སུ་དག་ནས། སྟོང་པ་ཉིད་ཀྱི་ཡེ་ཤེས་སུ་ལྷུན་གྱིས་གྲུབ་སྟེ། ཉོན་མོངས་པ་ཞེ་སྡང་གི་མཐའ་ལ་གནས་པ་རྣམས་དུས་གཅིག་ལ་སྒྲོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །དཔལ་ཆེན་ཁྲོ་རྒྱལ་ཉིད་ཀྱི་སྐུ། །ཡེ་ཤེས་འབར་བའི་འཁོར་ལོ་འདི། །ང་ཡིས་ཁྱོད་ཀྱི་ལག་ཏུ་སྦྱིན། །འཁོར་ལོ་འདི་ནི་ཁྱོད་ཀྱིས་ལོངས། །ཡུམ་ཆེན་བུདྡྷ་ཁྲོ་མོའི་རྒྱལ། །ཤེས་རབ་ཕ་རོལ་ཕྱིན་མའི་དབང་། །དེ་རིང་ཁྱོད་ལ་བསྐུར་བར་བྱ། །རོལ་པའི་མཆོད་པས་མཉེས་བྱའི་ཕྱིར། །སྲ་བརྟན་རྒྱལ་མོ་ཁྱོད་ལ་སྦྱིན། །ༀ་བུདྡྷ་ཀྲོ་དྷ་མ་ཧཱ་ཤྲཱི་ཧེ་རུ་ཀ །བུདྡྷ་ཀྲོ་དྷཱི་ཤྭ་རཱི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དཔལ་ཆེན་པོ་བུདྡྷ་ཧེ་རུ་ཀ་ཡབ་ཡུམ་གྱི་དབང་བསྐུར་བས། ཉོན་མོངས་པ་གཏི་མུག་དང་འབྱུང་བ་སར་འཛིན་པའི་རྟོག་པ་གནས་སུ་དག་ནས། མེ་ལོང་ལྟ་བུའི་ཡེ་ཤེས་སུ་ལྷུན་གྱིས་གྲུབ་སྟེ། ཉོན་མོངས་པ་གཏི་མུག་གི་མཐའ་ལ་གནས་པ་རྣམས་དུས་གཅིག་ལ་སྒྲོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །དཔལ་ཆེན་ཁྲོ་རྒྱལ་ཉིད་ཀྱི་སྐུ། །ཡེ་ཤེས་འབར་བའི་རིན་ཆེན་འདི། །ང་ཡིས་ཁྱོད་ཀྱི་ལག་ཏུ་སྦྱིན། །རིན་ཆེན་འདི་ནི་ཁྱོད་ཀྱིས་ལོངས། །ཡུམ་ཆེན་རཏྣ་ཁྲོ་མོའི་རྒྱལ། །སྦྱིན་པའི་ཕ་རོལ་ཕྱིན་མའི་དབང་། །དེ་རིང་ཁྱོད་ལ་བསྐུར་བར་བྱ། །ལྷག་མཐོང་ཡེ་ཤེས་ཐོབ་བྱའི་ཕྱིར། །རྩེ་གཅིག་རྒྱལ་མོ་ཁྱོད་ལ་སྦྱིན། །ༀ་རཏྣ་ཀྲོ་དྷ་མ་ཧཱ་ཤྲཱི་ཧེ་རུ་ཀ །རཏྣ་ཀྲོ་དྷེ་ཤྭ་རཱི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དཔལ་ཆེན་པོ་རཏྣ་ཧེ་རུ་ཡབ་ཡུམ་གྱི་དབང་བསྐུར་བས། ཉོན་མོངས་པ་ང་རྒྱལ་དང་འབྱུང་བ་ཆུར་འཛིན་པའི་རྟོག་པ་གནས་སུ་དག་ནས། མཉམ་པ་ཉིད་ཀྱི་ཡེ་ཤེས་སུ་ལྷུན་གྱིས་གྲུབ་སྟེ། ཉོན་མོངས་པ་ང་རྒྱལ་གྱི་མཐའ་ལ་གནས་པ་རྣམས་དུས་གཅིག་ལ་སྒྲོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །དཔལ་ཆེན་ཁྲོ་རྒྱལ་ཉིད་ཀྱི་སྐུ། །པདྨ་བླ་ན་མེད་པ་འདི། །ང་ཡིས་ཁྱོད་ཀྱི་ལག་ཏུ་སྦྱིན། །པདྨ་འདི་ནི་ཁྱོད་ཀྱིས་ལོངས། །ཡུམ་ཆེན་པདྨ་ཁྲོ་མོའི་རྒྱལ། །ཚུལ་ཁྲིམས་ཕ་རོལ་ཕྱིན་མའི་དབང་། །དེ་རིང་ཁྱོད་ལ་བསྐུར་བར་བྱ། །སྒྲ་ཡི་མཆོད་པས་མཉེས་བྱའི་ཕྱིར། །ཞི་གནས་རྒྱལ་མོ་ཁྱོད་ལ་སྦྱིན། །ༀ་པདྨ་ཀྲོ་དྷ་མ་ཧཱ་ཤྲཱི་ཧེ་རུ་ཀ །པདྨ་ཀྲོ་དྷེ་ཤྭ་རཱི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དཔལ་ཆེན་པོ་པདྨ་ཧེ་རུ་ཡབ་ཡུམ་གྱི་དབང་བསྐུར་བས། ཉོན་མོངས་པ་འདོད་ཆགས་དང་འབྱུང་བ་མེར་འཛིན་པའི་རྟོག་པ་གནས་སུ་དག་ནས་སོ་སོར་རྟོག་པའི་ཡེ་ཤེས་སུ་ལྷུན་གྱིས་གྲུབ་སྟེ། ཉོན་མོངས་པ་འདོད་ཆགས་ཀྱི་མཐའ་ལ་གནས་པ་རྣམས་དུས་གཅིག་ལ་སྒྲོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །དཔལ་ཆེན་ཁྲོ་རྒྱལ་ཉིད་ཀྱི་སྐུ། །ཡེ་ཤེས་འབར་བའི་རལ་གྲི་འདི། །ང་ཡིས་ཁྱོད་ཀྱི་ལག་ཏུ་སྦྱིན། །རལ་གྲི་འདི་ནི་ཁྱོད་ཀྱིས་ལོངས། །ཡུམ་ཆེན་ཀརྨ་ཁྲོ་མོའི་རྒྱལ། །བཟོད་པའི་ཕ་རོལ་ཕྱིན་མའི་དབང་། །དེ་རིང་ཁྱོད་ལ་བསྐུར་བར་བྱ། །དྲི་ཡི་མཆོད་པས་མཉེས་བྱའི་ཕྱིར། །བསྐྱོད་བྱེད་རྒྱལ་མོ་ཁྱོད་ལ་སྦྱིན། །ༀ་ཀརྨ་ཀྲོ་དྷ་མ་ཧཱ་ཤྲཱི་ཧེ་རུ་ཀ །ཀརྨ་ཀྲོ་དྷེ་ཤྭ་རཱི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དཔལ་ཆེན་པོ་ཀརྨ་ཧེ་རུ་ཡབ་ཡུམ་གྱི་དབང་བསྐུར་བས། ཉོན་མོངས་པ་ཕྲག་དོག་དང་འབྱུང་བ་རླུང་དུ་འཛིན་པའི་རྟོག་པ་གནས་སུ་དག་ནས། བྱ་བ་ནན་ཏན་གྱི་ཡེ་ཤེས་སུ་ལྷུན་གྱིས་གྲུབ་སྟེ། ཉོན་མོངས་པ་ཕྲག་དོག་གི་མཐའ་ལ་གནས་པ་རྣམས་དུས་གཅིག་ལ་སྒྲོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ཞིང་དབྱུག་དབང་། །དེ་རིང་ཁྱོད་ལ་སྦྱིན་པར་བྱ། །སྲིད་གསུམ་མ་ལུས་འཇོམས་པའི་ཕྱིར། །རྡོ་རྗེ་ཞིང་དབྱུག་ཁྱོད་ཀྱིས་ལོངས། །ༀ་བཛྲ་ག་རཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ག་རཱི་མའི་དབང་བསྐུར་བས། ཡེ་ཤེས་ཀྱི་དབྱུག་ཐོས་སྲིད་པ་གསུམ་གྱི་སྡུག་བསྔལ་གཏན་ནས་འཇོམས་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་མདའ་གཞུའི་དབང་། །དེ་རིང་ཁྱོད་ལ་སྦྱིན་པར་བྱ། །ཆགས་མེད་ཐུགས་རྗེས་དོན་མཛད་ཕྱིར། །རྡོ་རྗེ་མདའ་གཞུ་ཁྱོད་ཀྱིས་ལོངས། །ༀ་བཛྲ་ཙ་རཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཙ་རཱི་མ་ཡི་དབང་བསྐུར་བས། ཐབས་དང་ཤེས་རབ་ཀྱི་མདའ་གཞུས་ཆགས་པ་ཆེན་པོའི་ཐུགས་རྗེས་འགྲོ་བའི་དོན་མཛད་པའི་དབང་དམ་པར་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་རྒྱལ་མཚན་དབང་། །དེ་རིང་ཁྱོད་ལ་སྦྱིན་པར་བྱ། །ཁམས་གསུམ་ཀུན་ལས་རྒྱལ་བའི་ཕྱིར། །རྡོ་རྗེ་རྒྱལ་མཚན་ཁྱོད་ཀྱིས་ལོངས། །ༀ་བཛྲ་པྲ་མོ་ཧེ་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་པྲ་མོ་ཧའི་དབང་བསྐུར་བས། ཆུ་སྲིན་རྒྱལ་མཚན་གྱིས་ཁམས་གསུམ་གྱི་བདུད་ལས་རྒྱལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་སྦྱིན་པར་བྱ། །རྣམ་རྟོག་རྡུལ་དུ་བརླག་པའི་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ༀ་བཛྲ་བེ་ཏ་ལཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བེ་ཏ་ལཱིའི་དབང་བསྐུར་བས། ཡེ་ཤེས་ཀྱི་རྡོ་རྗེས་རྣམ་པར་རྟོག་པ་རྡུལ་དུ་རློག་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་རྒྱུ་ཞགས་དབང་། །དེ་རིང་ཁྱོད་ལ་སྦྱིན་པར་བྱ། །བདེ་ཆེན་དབྱིངས་སུ་དྲངས་པའི་ཕྱིར། །རྡོ་རྗེ་རྒྱུ་ཞགས་ཁྱོད་ཀྱིས་ལོངས། །ༀ་བཛྲ་པུཀྐ་སཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་པུཀྐ་སཱིའི་དབང་བསྐུར་བས། འདྲེན་བྱེད་ཀྱི་རྒྱུ་ཞགས་ཀྱིས་ལོག་རྟོག་བདེ་ཆེན་གྱི་གནས་སུ་འདྲེན་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་དུང་ཁྲག་དབང་། །དེ་རིང་ཁྱོད་ལ་སྦྱིན་པར་བྱ། །སྣོད་བཅུད་མ་ལུས་གསོལ་མཛད་ཕྱིར། །རྡོ་རྗེ་དུང་ཁྲག་ཁྱོད་ཀྱིས་ལོངས། །ༀ་བཛྲ་གྷསྨ་རཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་གྷསྨ་རཱིའི་དབང་བསྐུར་བས་ཆགས་པའི་དུང་ཁྲག་གིས་སྣོད་བཅུད་མ་ལུས་པ་གསོལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་སྙིང་ཟན་དབང་། །དེ་རིང་ཁྱོད་ལ་སྦྱིན་པར་བྱ། །འགྲོ་བ་མ་ལུས་བསྒྲལ་བའི་ཕྱིར། །རྡོ་རྗེ་བྱིས་སྙིང་ཁྱོད་ཀྱིས་ལོངས། །ༀ་བཛྲ་སྨ་ཤ་ནཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྨ་ཤ་ནཱིའི་དབང་བསྐུར་བས། ཟ་བྱེད་ཀྱི་སྙིང་ཟན་གྱིས་འགྲོ་བ་མ་ལུས་པ་སྡུག་བསྔལ་ལས་སྒྲོལ་བའིི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་མགོ་ལུས་དབང་། །དེ་རིང་ཁྱོད་ལ་སྦྱིན་པར་བྱ། །སེམས་ཅན་ལྔ་ཕུང་གཞོམ་པའི་ཕྱིར། །རྡོ་རྗེ་མགོ་ལུས་ཁྱོད་ཀྱིས་ལོངས། །ༀ་བཛྲ་ཙཎྜ་ལཱི་ཧ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཙཎྜ་ལཱིའི་དབང་བསྐུར་བས། ཐབས་ཤེས་ཀྱི་མགོ་ལུས་ཀྱི་ལས་དང་ཉོན་མོངས་པ་ཐམས་ཅད་གཞོམ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་སེང་གདོང་དབང་། །དེ་རིང་ཁྱོད་ལ་སྦྱིན་པར་བྱ། །རྩལ་གྱིས་ཐམས་ཅད་མནན་པའི་ཕྱིར། །རྡོ་རྗེ་སེང་གདོང་ཁྱོད་ཀྱིས་ལོངས། །ༀ་བཛྲ་སིདྷ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སེང་གདོང་གི་དབང་བསྐུར་བས། མི་འཇིགས་པའི་རྩལ་གྱིས་ལོག་ལྟ་ཐམས་ཅད་ཟིལ་གྱིས་གནོན་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་སྟག་གདོང་དབང་། །དེ་རིང་ཁྱོད་ལ་སྦྱིན་པར་བྱ། །དཔའ་བརྟུལ་དབྱིངས་སུ་ཟ་བའི་ཕྱིར། །རྡོ་རྗེ་སྟག་གདོང་ཁྱོད་ཀྱིས་ལོངས། །ༀ་བཛྲ་བྱཱ་གྷྲི་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྟག་གདོང་གི་དབང་བསྐུར་བས། ཟ་བྱེད་དཔལ་རྟུལ་གྱིས་རྣམ་རྟོག་དབྱིངས་སུ་ཟ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ཝ་གདོང་དབང་། །དེ་རིང་ཁྱོད་ལ་སྦྱིན་པར་བྱ། །སྒྲིབ་བྱེད་ཐམས་ཅད་མཐོང་བའི་ཕྱིར། །རྡོ་རྗེ་ཝ་གདོང་ཁྱོད་ཀྱིས་ལོངས། །ༀ་བཛྲ་ཤྲཱི་གཱ་ལ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཝ་གདོང་གི་དབང་བསྐུར་བས། སྒྲིབ་བྱེད་ཐམས་ཅད་ཤེས་རབ་ཀྱི་སྤྱན་གྱིས་མཐོང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་སྤྱན་གདོང་དབང་། །དེ་རིང་ཁྱོད་ལ་སྦྱིན་པར་བྱ། །ཐམས་ཅད་མ་ལུས་ཟ་བའི་ཕྱིར། །རྡོ་རྗེ་སྤྱང་གདོང་ཁྱོད་ཀྱིས་ལོངས། །ༀ་བཛྲ་ཤྭ་ན་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྤྱང་གདོང་གི་དབང་བསྐུར་བས། ཟ་བྱེད་ཀྱི་ཐུགས་རྗེས་ལས་དང་ཉོན་མོངས་པ་ཐམས་ཅད་ཟ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་བྱ་རྒོད་དབང་། །དེ་རིང་ཁྱོད་ལ་སྦྱིན་པར་བྱ། །མགྱོགས་པ་ཐམས་ཅད་སྙེག་པའི་ཕྱིར། །རྡོ་རྗེ་བྱ་རྒོད་ཁྱོད་ཀྱིས་ལོངས། །ༀ་བཛྲ་གྷྲྀདྡྷ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བྱ་རྒོད་གདོང་གི་དབང་བསྐུར་བས། མགྱོགས་པ་ཐམས་ཅད་སྙེག་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ཀངྐའི་དབང་། །དེ་རིང་ཁྱོད་ལ་སྦྱིན་པར་བྱ། །སྲིད་གསུམ་མ་ལུས་བསྡུ་བའི་ཕྱིར། །རྡོ་རྗེ་ཀངྐ་ཁྱོད་ཀྱིས་ལོངས། །ༀ་བཛྲ་ཀངྐ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཀངྐའི་གདོང་གི་དབང་བསྐུར་བས། སྲིད་གསུམ་དབང་དུ་སྡུད་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ཀཱ་ཀའི་དབང་། །དེ་རིང་ཁྱོད་ལ་སྦྱིན་པར་བྱ། །རྣམ་རྟོག་རྡུལ་དུ་རློག་པའི་ཕྱིར། །རྡོ་རྗེ་བྱ་རོག་ཁྱོད་ཀྱིས་ལོངས། །ༀ་བཛྲ་ཀཱ་ཀ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བྱ་རོག་གདོང་གི་དབང་བསྐུར་བས་རྣམ་པར་རྟོག་པ་རྡུལ་དུ་རློག་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ཨུ་ལཱུའི་དབང་། །དེ་རིང་ཁྱོད་ལ་སྦྱིན་པར་བྱ། །ཡེ་ཤེས་སྒྲོན་མ་གསལ་བའི་ཕྱིར། །རྡོ་རྗེ་འུག་གདོང་ཁྱོད་ཀྱིས་ལོངས། །ༀ་བཛྲ་ཨུ་ལཱུ་ཀ་མུ་ཁཱི་ཧེ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་འུག་པའི་གདོང་གི་དབང་བསྐུར་བས། ཡེ་ཤེས་ཀྱི་སྒྲོན་མེས་མ་རིག་པའི་མུན་པ་སེལ་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ལྕགས་ཀྱུའི་དབང་། །དེ་རིང་ཁྱོད་ལ་སྦྱིན་པར་བྱ། །ཐུགས་རྗེས་ཐམས་ཅད་དྲང་བའི་ཕྱིར། །རྡོ་རྗེ་ལྕགས་ཀྱུ་ཁྱོད་ཀྱིས་ལོངས། །ༀ་བཛྲ་ཨཱརྱ་ཏེ་ཛ་ཏེ་ང་ཛཿ ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྟ་གདོང་ལྕགས་ཀྱུ་མའི་དབང་བསྐུར་བས། བྱམས་པའི་ཐུགས་རྗེས་བདེ་ཆེན་དབྱིངས་སུ་འདྲེན་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་མཆེ་ཞགས་དབང་། །དེ་རིང་ཁྱོད་ལ་སྦྱིན་པར་བྱ། །ཐུགས་རྗེས་ཐམས་ཅད་འཆིང་བའི་ཕྱིར། །རྡོ་རྗེ་མཆེ་ཞགས་ཁྱོད་ཀྱིས་ལོངས། །ༀ་བཛྲ་ཨ་མུ་ཁེ་ཧཱུཾ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཕག་གདོང་ཞགས་པ་མའི་དབང་བསྐུར་བས། སྙིང་རྗེའི་ལས་ཀྱིས་རྣམ་རྟོག་གི་མཚན་མ་འཆིང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་ལྕགས་སྒྲོག་དབང་། །དེ་རིང་ཁྱོད་ལ་སྦྱིན་པར་བྱ། །ཐུགས་རྗེས་ཐམས་ཅད་བསྡོམ་པའི་ཕྱིར། །རྡོ་རྗེ་ལྕགས་སྒྲོག་ཁྱོད་ཀྱིས་ལོངས། །ༀ་བཛྲ་ལོ་ཀ་བཾ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སེང་གདོང་ལྕགས་སྒྲོག་མའི་དབང་བསྐུར་བས། དགའ་བའི་ཐུགས་རྗེས་ལོག་ལྟ་ཐམས་ཅད་ཆོས་ཉིད་དུ་སྡོམ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །ཁྲག་འཐུང་ཀུན་གྱི་དྲིལ་བུའི་དབང་། །དེ་རིང་ཁྱོད་ལ་སྦྱིན་པར་བྱ། །ཐུགས་རྗེས་རྡུལ་དུ་རློག་པའི་ཕྱིར། །རྡོ་རྗེ་དྲིལ་བུ་ཁྱོད་ཀྱིས་ལོངས། །ༀ་བཛྲ་བྷ་སྨི་པ་ལ་ཡ་བ་ཏུ་ཧོཿ ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྤྱང་གདོང་དྲིལ་བུ་མའི་དབང་བསྐུར་བས། བཏང་སྙོམས་ཀྱི་ཐུགས་རྗེས་ལོག་ལྟ་རྡུལ་དུ་རློག་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བའི། །སླས་དང་བྱི་མོ་བྲན་མོའི་ཚོགས། །དབང་ཕྱུག་ཉི་ཤུ་བརྒྱད་ཀྱི་དབང་། །དེ་རིང་ཁྱོད་ལ་སྦྱིན་བྱ་སྟེེ། །ཤར་གྱི་མ་དྲུག་དབང་ཕྱུག་རྣམས། །དགྲ་བགེགས་ཐམས་ཅད་ཞི་བྱའི་ཕྱིར། །དེ་རིང་ཁྱོད་ལ་སྦྱིན་པར་བྱ། །ལས་ཀྱི་སྲིན་པོའི་ཆུང་མ་སྟེ། །མི་ཡི་སྲིན་མོ་དབང་ཕྱུག་འབར། །ཕྱག་མཚན་ཐོད་ཁྲག་འབར་བའི་དབང་། དབང་མཆོག་དེས་ནི་དབང་བསྐུར་རོ། །མ་ནུ་རཀྵ་སཱི་བྷྱོ། ཨ་བྷི་ཥིཉྩ་ཧཱུཾ། ལྷ་ཆེན་བིཥྞའི་ཆུང་མ་སྟེ། །ཚངས་མ་དམར་སེར་གདོང་བཞི་འབྱིན། །ཕྱག་མཚན་པདྨ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བྲཧྨ་ཎཱི་བྷྱོ། ཨ་བྷི་ཥིཉྩ་ཧཱུཾ། མ་ཧཱ་དེ་བའི་ཆུང་མ་སྟེ། །ལྷ་ཆེན་དཀར་ལྗང་དབང་ཕྱུག་འབར། །ཕྱག་མཚན་ཏྲི་ཤཱུལ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །ར་ཏྲི་བྷྱོ། ཨ་བྷི་ཥིཉྩ་ཧཱུཾ། ལྷ་ཆེན་ཁྱབ་འཇུག་ཆུང་མ་སྟེ། །འཇུག་སྲེད་འདོད་པའི་དབང་ཕྱུག་འབར། །ཕྱག་མཚན་འཁོར་ལོ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བེཥྞ་བཻ་བྷྱོ། ཨ་བྷི་ཥིཉྩ་ཧཱུཾ། གཞོན་ནུ་སྨིན་དྲུག་ཆུང་མ་སྟེ། །གཞོན་ནུ་དམར་མོ་དབང་ཕྱུག་འབར། །ཕྱག་མཚན་མདུང་ཐུང་འཕེན་པའི་དབང་། །དབང་མཆོག་དེས་ནི་དབང་བསྐུར་རོ། །ཀུ་མཱ་རཱི་བྷྱོ། ཨ་བྷི་ཥིཉྩ་ཧཱུཾ། ལྷ་ཆེན་བརྒྱ་བྱིན་ཆུང་མ་སྟེ། །བརྒྱ་བྱིན་དཀར་མོ་དབང་ཕྱུག་འབར། །ཕྱག་མཚན་ཨིནྡྲ་གདེངས་པའི་དབང་། །དབང་མཆོག་དེས་ནི་དབང་བསྐུར་རོ། །ཨིནྡྲ་ཎཱི་བྷྱོ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཤར་གྱི་མ་དྲུག་གི་དབང་བསྐུར་བས། བསམ་པ་ཙམ་གྱིས་ཞི་བའི་ཕྲིན་ལས་ཐམས་ཅད་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །སླས་དང་བྱི་མོ་བྲན་མོའི་ཚོགས། །ལྷོ་ཡི་མ་དྲུག་དབང་མཆོག་རྣམས། །ཚེ་དང་བསོད་ནམས་རྒྱས་པའི་ཕྱིར། །དེ་རིང་ཁྱོད་ལ་སྦྱིན་པར་བྱ། །ཏྲི་ཤ་ག་ཡི་ཆུང་མ་སྟེ། །རྡོ་རྗེ་སེར་མོ་དབང་ཕྱུག་འབར། །ཕྱག་མཚན་ཙནྡན་འཐུང་བའི་དབང་། །དབང་མཆོག་དེས་ནི་དབང་བསྐུར་རོ། །བཛྲ་པིངྒ་ལཾ་བྷྱོ། ཨ་བྷི་ཥིཉྩ་ཧཱུཾ། གཟའ་ཆེན་ཉི་མའི་ཆུང་མ་སྟེ། །བདུད་རྩི་དམར་མོ་དབང་ཕྱུག་འབར། །ཕྱག་མཚན་པདྨ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །ཨ་མྲྀ་ཏཾ་བྷྱོ། ཨ་བྷི་ཥིཉྩ་ཧཱུཾ། གཟའ་ཆེན་ཟླ་བའི་ཆུང་མ་སྟེ། །ཟླ་བ་དཀར་མོ་དབང་ཕྱུག་འབར། །ཕྱག་མཚན་པུཎྜ་རི་ཀའི་དབང་། །དབང་མཆོག་དེས་ནི་དབང་བསྐུར་རོ། །ས་མྱ་བྷྱོ། ཨ་བྷི་ཥིཉྩ་ཧཱུཾ། གཤིན་རྗེ་བེ་ཅོན་ཆུང་མ་སྟེ། །བེ་ཅོན་ལྗང་ནག་དབང་ཕྱུག་འབར། །ཕྱག་མཚན་བེ་ཅོན་འབར་བའི་དབང་། །དབང་མཆོག་དེས་ནི་དབང་བསྐུར་རོ། །དཎྜ་དཾ་བྷྱོ། ཨ་བྷི་ཥིཉྩ་ཧཱུཾ། ཟ་བྱེད་སྲིན་པོའི་ཆུང་མ་སྟེ། །སྲིན་མོ་དམར་མོ་དབང་ཕྱུག་འབར། །ཕྱག་མཚན་ཐོད་ཁྲག་འབར་བའི་དབང་། །དབང་མཆོག་དེས་ནི་དབང་བསྐུར་རོ། །རཀྵ་སཱི་བྷྱོ། ཨ་བྷི་ཥིཉྩ་ཧཱུཾ། མ་ཧཱ་ཀཱ་ལའི་ཆུང་མ་སྟེ། །ཟ་བ་ལྗང་ནག་དབང་ཕྱུག་འབར། །བ་སུ་ཞགས་པ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བྷཀྵ་སཱི་བྷྱོ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ལྷོའི་མ་དྲུག་གི་དབང་བསྐུར་བས། བསམ་པ་ཙམ་གྱིས་རྒྱས་པའི་ཕྲིན་ལས་ཐམས་ཅད་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །སླས་དང་བྱི་མོ་བྲན་མོའི་ཚོགས། །ནུབ་ཀྱི་མ་དྲུག་དབང་མཆོག་རྣམས། །ཐམས་ཅད་དབང་དུ་བསྡུ་བའི་ཕྱིར། །དེ་རིང་ཁྱོད་ལ་སྦྱིན་པར་བྱ། །བྷྲྀཾ་གི་རི་ཏིའི་ཆུང་མ་སྟེ། །དགའ་བ་དམར་མོ་དབང་ཕྱུག་འབར། །ཕྱག་མཚན་ཀ་ཏར་འཕྱར་བའི་དབང་། །དབང་མཆོག་དེས་ནི་དབང་བསྐུར་རོ། །ར་ཏི་བཛྲ་བྷྱོ། ཨ་བྷི་ཥིཉྩ་ཧཱུཾ། གནོད་སྦྱིན་སྟོབས་བཟང་ཆུང་མ་སྟེ། །སྟོབས་ཆེན་དཀར་མོ་དབང་ཕྱུག་འབར། །ཕྱག་མཚན་གཤོལ་མདའ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །རུ་དྷི་ར་མཏྟཱ་བྷྱོ། ཨ་བྷི་ཥིཉྩ་ཧཱུཾ། དགའ་བྱེད་དབང་ཕྱུག་ཆུང་མ་སྟེ། །རྡོ་རྗེ་སེར་མོ་དབང་ཕྱུག་འབར། །ཕྱག་མཚན་སྤུ་གྲི་འབར་བའི་དབང་། །དབང་མཆོག་དེས་ནི་དབང་བསྐུར་རོ། །ཨེ་ཀ་ཙ་རི་ཎཱི་བྷྱོ། ཨ་བྷི་ཥིཉྩ་ཧཱུཾ། ཀརྨ་འདོད་ལྷའི་ཆུང་མ་སྟེ། །འདོད་པ་དམར་མོ་དབང་ཕྱུག་འབར། །ཕྱག་མཚན་མདའ་གཞུ་འཛིན་པའི་དབང་། །དབང་མཆོག་དེས་ནི་དབང་བསྐུར་རོ། །མ་ནོ་ཧ་རཾ་བྷྱོ། ཨ་བྷི་ཥིཉྩ་ཧཱུཾ། ནོར་སྲུང་ཛམ་ལྷའི་ཆུང་མ་སྟེ། །ནོར་སྲུང་དཀར་མོ་དབང་ཕྱུག་འབར། །ཕྱག་མཚན་གཏེར་གྱི་བུམ་པའི་དབང་། །དབང་མཆོག་དེས་ནི་དབང་བསྐུར་རོ། །སིདྡྷི་ཀཾ་བྷྱོ། ཨ་བྷི་ཥིཉྩ་ཧཱུཾ། རླུང་ལྷ་ཆེན་པོའི་ཆུང་མ་སྟེ། །རླུང་ལྷ་སྔོན་མོ་དབང་ཕྱུག་འབར། །ཕྱག་མཚན་བ་དན་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཱ་ཡ་བཱི་བྷྱོ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ནུབ་ཀྱི་མ་དྲུག་གི་དབང་བསྐུར་བས། བསམ་པ་ཙམ་གྱིས་དབང་གི་ཕྲིན་ལས་ཐམས་ཅད་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །སླས་དང་བྱི་མོ་བྲན་མོའི་ཚོགས། །བྱང་གི་མ་དྲུག་དབང་མཆོག་རྣམས། །དགྲ་བགེགས་རྡུལ་དུ་རློག་པའི་ཕྱིར། །དེ་རིང་ཁྱོད་ལ་སྦྱིན་པར་བྱ། །སྲིན་པོ་གསོད་བྱེད་ཆུང་མ་སྟེ། །གསོད་བྱེད་ལྗང་ནག་དབང་ཕྱུག་འབར། །ཕྱག་མཚན་རལ་གྲི་འབར་བའི་དབང་། །དབང་མཆོག་དེས་ནི་དབང་བསྐུར་རོ། །མ་ཧཱ་མཱ་ར་ཎ་བཛྲ་བྷྱོ། ཨ་བྷི་ཥིཉྩ་ཧཱུཾ། མེ་ལྷ་དྲང་སྲོང་ཆུང་མ་སྟེ། །མེ་མོ་དམར་མོ་དབང་ཕྱུག་འབར། །ཕྱག་མཚན་མེ་ཡི་གསལ་ཤིང་འཛིན། །དབང་མཆོག་དེས་ནི་དབང་བསྐུར་རོ། །ཨགྣཱི་བྷྱོ། ཨ་བྷི་ཥིཉྩ་ཧཱུཾ། ས་བདག་ཕག་ཆེན་ཆུང་མ་སྟེ། །ཕག་མོ་ནག་མོ་དབང་ཕྱུག་འབར། །ཕྱག་མཚན་ཞགས་པ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཱ་ར་ཧཱི་བྷྱོ། ཨ་བྷི་ཥིཉྩ་ཧཱུཾ། གཤིན་རྗེ་རྒན་བྱེད་ཆུང་མ་སྟེ། །རྒན་བྱེད་དམར་མོ་དབང་ཕྱུག་འབར། །ཕྱག་མཚན་ཞིང་ཆུང་ཟ་བའི་དབང་། །དབང་མཆོག་དེས་ནི་དབང་བསྐུར་རོ། །ཙ་མུཎྜི་བྷྱོ། ཨ་བྷི་ཥིཉྩ་ཧཱུཾ། བི་ན་ཡ་གའི་ཆུང་མ་སྟེ། །སྣ་ཆེན་དཀར་མོ་དབང་ཕྱུག་འབར། །ཕྱག་མཚན་ཐོད་ཁྲག་འཐུང་བའི་དབང་། །དབང་མཆོག་དེས་ནི་དབང་བསྐུར་རོ། །སུ་ཏ་ནཾ་བྷྱོ། ཨ་བྷི་ཥིཉྩ་ཧཱུཾ། བ་རུ་ཎ་ཡི་ཆུང་མ་སྟེ། །ཆུ་ལྷ་སྔོན་མོ་དབང་ཕྱུག་འབར། །ཕྱག་མཚན་སྦྲུལ་ཞགས་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བ་རུ་ཎཱི་བྷྱོ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བྱང་གི་མ་དྲུག་གི་དབང་བསྐུར་བས། བསམ་པ་ཙམ་གྱིས་དྲག་པོའི་ཕྲིན་ལས་ཐམས་ཅད་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །སླས་དང་བྱི་མོ་བྲན་མོའི་ཚོགས། །སྒོ་མ་བཞི་ཡི་དབང་མཆོག་རྣམས། །ལས་བཞི་ཐམས་ཅད་སྒྲུབ་པའི་ཕྱིར། །དེ་རིང་ཁྱོད་ལ་སྦྱིན་པར་བྱ། །ནག་པོ་ཆེན་པོའི་ཆུང་མ་སྟེ། །མ་ཧཱ་ཀཱ་ལི་དབང་ཕྱུག་འབར། །ཕྱག་མཚན་ལྕགས་ཀྱུ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཛྲ་མ་ཧཱ་ཀཱ་ལི་བྷྱོ། ཨ་བྷི་ཥིཉྩ་ཧཱུཾ། ཤན་པ་ར་མགོའི་ཆུང་མ་སྟེ། །ཙ་ཀཱ་སེར་མོ་དབང་ཕྱུག་འབར། །ཕྱག་མཚན་ཞགས་པ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཛྲ་ཙ་ཀཱ་ལ་བྷྱོ། ཨ་བྷི་ཥིཉྩ་ཧཱུཾ། བུམ་སྣ་ཆེན་པོའི་ཆུང་མ་སྟེ། །ཀུམྦྷ་ཀཪྞ་དབང་ཕྱུག་འབར། །ཕྱག་མཚན་ལྕགས་སྒྲོག་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཛྲ་ཀུམྦྷ་ཀཪྞ་བྷྱོ། ཨ་བྷི་ཥིཉྩ་ཧཱུཾ། ནག་པོ་གསུས་འཛིན་ཆུང་མ་སྟེ། །ལམྦྷོ་དྷ་ར་དབང་ཕྱུག་འབར། །ཕྱག་མཚན་དྲིལ་བུ་འབར་བའི་དབང་། །དབང་མཆོག་དེས་ནི་དབང་བསྐུར་རོ། །བཛྲ་ལམྦྷོ་དྷ་ར་བྷྱོ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྒོ་མ་བཞིའི་དབང་བསྐུར་བས། བསམ་པ་ཙམ་གྱིས་ཕྲིན་ལས་མཐའ་དག་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །དེས་རྩ་བའི་ལྷ་ཁྲག་འཐུང་ལྔ་བཅུ་རྩ་བརྒྱད་ཀྱི་དབང་བསྐུར་བ་སོང་ནས། དེ་ནས་དཀྱིལ་འཁོར་གྱི་ཕྱི་རོལ་སྲུང་བའི་འཁོར་ལོ་ལ་བཞུགས་པའི་ཁྲོ་བཅུ་རྣམས་ཀྱི་དབང་བསྐུར་བར་མོས་ལ། ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །སྟེང་གི་ཕྱོགས་ནས་བགེགས་བྱུང་བ། །ཉི་ཟླའི་གདོན་ཚོགས་ཐམས་ཅད་ཀུན། །ཧཱུཾ་ཆེན་ཀཱ་ར་ཉིད་ཀྱིས་ཟློག །ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་ཧཱུཾ་ཀཱ་རའི་དབང་བསྐུར་བས། ཉི་ཟླ་ཚངས་པའི་གདོན་འདུལ་ཞིང་འདོད་པ་ལོག་པའི་སྐྱོན་སྤངས་ཏེ་སྐྱེ་བ་ལ་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །ཤར་གྱི་ཕྱོགས་ནས་གེགས་བྱུང་བ། །དྲི་ཟའི་གདོན་ཚོགས་ཐམས་ཅད་ཀུན། །རྣམ་པར་རྒྱལ་བ་ཉིད་ཀྱིས་ཟློག །ༀ་བཛྲ་ཀྲོ་དྷ་བི་ཛ་ཡ་ཧཱུཾ་ཧ་ན་ཧ་ན་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་རྣམ་པར་རྒྱལ་བའི་དབང་བསྐུར་བས། དྲི་ཟའི་གདོན་ཚོགས་འདུལ་ཞིང་མ་བྱིན་པར་ལེན་པའི་སྐྱོན་སྤངས་ཏེ་ཡོ་བྱད་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །ཤར་ལྷོ་མཚམས་ནས་གེགས་བྱུང་བ། །དྲང་སྲོང་གདོན་ཚོགས་ཐམས་ཅད་ཀུན། །དབྱུག་པ་སྔོན་པོ་ཉིད་ཀྱིས་ཟློག །ༀ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་དབྱུག་པ་སྔོན་པོའི་དབང་བསྐུར་བས། དྲང་སྲོང་གི་གདོན་ཚོགས་འདུལ་ཞིང་ལོག་པར་ལྟ་བའི་སྐྱོན་སྤངས་ཏེ་ཡེ་ཤེས་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །ལྷོ་ཡི་ཕྱོགས་ནས་བགེགས་བྱུང་བ། །གྲུལ་བུམ་གདོན་ཚོགས་ཐམས་ཅད་ཀུན། །གཤིན་རྗེ་གཤེད་པོ་ཉིད་ཀྱིས་ཟློག །ༀ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་གཤིན་རྗེ་གཤེད་ཀྱི་དབང་བསྐུར་བས། གྲུལ་བུམ་གྱི་གདོན་ཚོགས་འདུལ་ཞིང་སྲོག་གཅོད་པའི་སྐྱོན་སྤངས་ཏེ་ཚེ་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །ལྷོ་ནུབ་ཕྱོགས་ནས་གེགས་བྱུང་བ། །སྲིན་པོའི་གདོན་ཚོགས་ཐམས་ཅད་ཀུན། །མི་གཡོ་མགོན་པོ་ཉིད་ཀྱིས་ཟློག །ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུཾ་བྷནྡྷ་བྷནྡྷ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་མི་གཡོ་མགོན་པོའི་དབང་བསྐུར་བས། སྲིན་པོའི་གདོན་འདུལ་ཞིང་རྫུན་གྱི་སྐྱོན་སྤངས་ཏེ་མོས་པ་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། ། ནུབ་ཀྱི་ཕྱོགས་ནས་བགེགས་བྱུང་བ། །ཀླུ་ཡི་གདོན་ཚོགས་ཐམས་ཅད་ཀུན། །རྟ་མགྲིན་རྒྱལ་པོ་ཉིད་ཀྱིས་ཟློག །ༀ་བཛྲ་ཀྲོ་དྷ་ཧ་ཡ་གྲཱི་ཝ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་རྟ་མགྲིན་གྱི་དབང་བསྐུར་བས། ཀླུ་དབང་གི་གདོན་འདུལ་ཞིང་ཕྲ་མའི་སྐྱོན་སྤངས་ཏེ་ཆོས་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། ། ནུབ་བྱང་མཚམས་ནས་བགེགས་བྱུང་བ། །རླུང་ལྷའི་གདོན་ཚོགས་ཐམས་ཅད་ཀུན། །གཞན་གྱིས་མི་ཐུབ་ཉིད་ཀྱིས་ཟློག །ༀ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུཾ་ཏིཥྛ་ཏིཥྛ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་གཞན་གྱིས་མི་ཐུབ་པའི་དབང་བསྐུར་བས། རླུང་ལྷའི་གདོན་འདུལ་ཞིང་ངག་འཁྱལ་པའི་སྐྱོན་སྤངས་ཏེ་སེམས་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །བྱང་གི་ཕྱོགས་ནས་བགེགས་བྱུང་བ། །གནོད་སྦྱིན་གདོན་ཚོགས་ཐམས་ཅད་ཀུན། །བདུད་རྩི་འཁྱིལ་བ་ཉིད་ཀྱིས་ཟློག །ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ་ཙྪིནྡྷ་ཙྪིནྡྷ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་བདུད་རྩི་འཁྱིལ་བའི་དབང་བསྐུར་བས། གནོད་སྦྱིན་གྱི་གདོན་འདུལ་ཞིང་ཚིག་རྩུབ་ཀྱི་སྐྱོན་སྤངས་ཏེ་ལས་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །བྱང་ཤར་མཚམས་ནས་བགེགས་བྱུང་བ། །དབང་ལྡན་གདོན་ཚོགས་ཐམས་ཅད་ཀུན། །ཁམས་གསུམ་རྣམ་རྒྱལ་ཉིད་ཀྱིས་ཟློག །ༀ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུཾ་བིནྡྷ་བིནྡྷ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་ཁམས་གསུམ་རྣམ་རྒྱལ་གྱི་དབང་བསྐུར་བས། དབང་ལྡན་གྱི་གདོན་འདུལ་ཞིང་གནོད་སེམས་ཀྱི་སྐྱོན་སྤངས་ཏེ་རྫུ་འཕྲུལ་ལ་དབང་བའི་དབང་དམ་པ་ཐོབ་པར་གྱུར་ཅིག །ཨེ་མ་ང་ནི་རང་བྱུང་བ། །ཁྲོ་རྒྱལ་ཁྲག་འཐུང་འབར་བའི་སྐུ། །འོག་གི་ཕྱོགས་ནས་བགེགས་བྱུང་བ། །ས་བདག་གདོན་ཚོགས་ཐམས་ཅད་ཀུན། །སྟོབས་ཆེན་རྒྱལ་པོ་ཉིད་ཀྱིས་ཟློག །ༀ་བཛྲ་ཀྲོ་དྷ་མ་ཧཱ་བ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁྲོ་བོ་སྟོབས་པོ་ཆེའི་དབང་བསྐུར་བས། ས་བདག་གི་གདོན་འདུལ་ཞིང་བརྣབ་སེམས་ཀྱི་སྐྱོན་སྤངས་ཏེ་སྨོན་ལམ་ལ་དབང་བའི་དབང་དམ་པ་ཐོབ་པར་གྱུར་ཅིག །གསུམ་པ་བསྣམས་པ་ཕྱག་མཚན་གྱི་དབང་ནི། ཕྱག་མཚན་རྣམས་གཏད་ལ། རྡོ་རྗེ་དུང་ཆེན་གང་བ་དང་། །ཁོར་ཡུག་རལ་གྲི་དགྲ་སྟྭ་གཤོལ། །ཐུགས་མཚན་རང་རྟགས་འབར་བ་ཡི། །ཕྱག་རྒྱ་དྲུག་གི་དབང་བསྐུར་རོ། །ༀ་བཛྲ་ལོ་ཀ་པཱ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཕྱག་མཚན་དྲུག་གི་དབང་བསྐུར་བས། ཁམས་གསུམ་གྱི་གདུག་པ་འདུལ་བའི་དབང་དམ་པ་ཐོབ་པར་གྱུར་ཅིག །བཞི་པ་རྒྱན་ཆས་རྟགས་ཀྱི་དབང་ལ་བཅུ་ལས། དང་པོ་དབུ་རྒྱན་གྱི་དབང་ནི། ཐོད་པའི་དབུ་རྒྱན་བསྐོན་ལ། དབུ་རྒྱན་ཐོད་པའི་ཕྲེང་བས་བརྒྱན། །དབུ་སྐྲ་ཁམ་ནག་རལ་པ་ཅན། །སྲིད་རྩེ་འདས་པའི་འཇིག་རྟེན་ཁམས། །སྟོང་ཆེན་མི་མཇེད་དབང་དུ་སྡུད། །དུས་གསུམ་སངས་རྒྱས་དབུ་རྒྱན་འདིས། །རྣལ་འབྱོར་དབང་ཕྱུག་དབང་བསྐུར་རོ། །ཀ་པཱ་ལ་མཱ་ལ་མུ་ཀུ་ཊ་ཨ་བྷི་ཥིཉྩ་ཧཱུཾ་ཏྲཾ་ཧྲཱིཿཨ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཐོད་པའི་དབུ་རྒྱན་གྱི་དབང་བསྐུར་བས། ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་མནན་ཏེ་འཁོར་བ་ཕྱགས་མས་འདེབས་པའི་དབང་དམ་པ་ཐོབ་པར་གྱུར་ཅིག །གཉིས་པ་བུམ་པའི་དབང་ནི། བུམ་པ་ལྷ་གྲངས་སམ་ལྔ་པའི་ཚེ་བུམ་ཆུ་དབུས་ཀྱི་བུམ་པར་བསྡུས་པ་བཏེགས་ནས་སྤྱི་བོར་བཞག་ཅིང་བུམ་ཆུ་མགོ་བོའི་གནས་ལྔར་གཏུགས་ལ། བདུད་རྩི་བུམ་ཆུ་རབ་གནས་ལྡན། །སྒྲིབ་ཚོགས་དག་པར་དབང་བསྐུར་བ། །ཆུ་རྒྱུན་ཕབ་པས་རིག་ལྔར་གསལ། །སྐལ་ལྡན་བུ་ལ་བསྐུར་ཐོབ་ཤོག །ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ཀ་ལ་ཤ་ཨ་བྷི་ཥིཉྩ་ཧཱུཾ། ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཀ་ལ་ཤ་ཨ་བྷི་ཥིཉྩ་ཧཱུཾ། ༀ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་ཀ་ལ་ཤ་ཨ་བྷི་ཥིཉྩ་ཧཱུཾ། ༀ་པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རཱི་ཀ་ལ་ཤ་ཨ་བྷི་ཥིཉྩ་ཧཱུཾ། ༀ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷེ་ཤྭ་རཱི་ཀ་ལ་ཤ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བུམ་པ་བྱང་སེམས་བདུད་རྩིའི་ཆུ་རྒྱུན་གྱི་དབང་བསྐུར་བས། ལས་དང་ཉོན་མོངས་པའི་དྲི་མ་ཐམས་ཅད་དག་ནས། ཕུང་པོ་ཁམས་དང་སྐྱེ་མཆེད་ཐམས་ཅད་ཁྲག་འཐུང་རིགས་ལྔའི་ལྷ་ཚོགས་སུ་གསལ་བའི་དབང་དམ་པ་ཐོབ་པར་གྱུར་ཅིག །གསུམ་པ་སྙིང་པོ་ལྔའི་དབང་ནི། སློབ་མའི་སྤྱི་མགྲིན་སྙིང་གར་ཟླ་བ་པདྨ་ཉི་མ་དང་ལྟེ་བའི་གཡས་གཡོན་དུ་ཟླ་བའི་གདན་རེ་རེའི་སྟེང་དུ་ཧཱུཾ་ཡིག་འབར་བ་རེ་རེ་གནས་པ་འཕྲོ་འདུས་ཡོངས་སུ་གྱུར་པ་ལས་སོ་སོའི་ཕྱག་མཚན་ས་བོན་གྱིས་མཚན་པར་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། སླར་ཡང་འཕྲོ་འདུས་ཡོངས་སུ་གྱུར་པ་ལས་ཁྲག་འཐུང་རིགས་ལྔའི་སྐུར་བསྐྱེད་ལ། སྙིང་པོ་ལྔ་གནས་ལྔར་གཏུགས་ཏེ། ཧཱུཾ། ཁྲག་འཐུང་སྐུ་གསུང་ཐུགས་དང་ནི། །ཡོན་ཏན་ཕྲིན་ལས་ངོ་བོ་ལས། །སྔགས་དང་ཕྱག་རྒྱ་ལྡན་པ་ནི། །དཔལ་ཆེན་རིགས་ལྔའི་ངོ་བོར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཀཱ་ཡའི་ཚབ་ཏུ། ཝཱཀ །ཙིཏྟ། ཨ་ནུ་རཱ་ག་ཎ། པཱུ་ཛ་ཞེས་བཅུག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྙིང་པོ་ལྔའི་དབང་བསྐུར་བས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་དབྱེར་མེད་དུ་གྱུར་ཏེ་འགྲོ་བའི་དོན་བྱེད་པའི་དབང་དམ་པ་ཐོབ་པར་གྱུར་ཅིག །བཞི་པ་ཅོད་པན་གྱི་དབང་ནི། ཤུན་གྱི་ཅོད་པན་མགོ་བོར་བཅིངས་ལ། ཤུན་གྱི་ཅོད་པན་རབ་གནས་ལྡན། །ཤེས་བྱ་ཐོགས་མེད་མཁྱེན་པ་དང་། །རྟག་ཆད་ཟིལ་གྱིས་གནོན་པའི་ཕྱིར། །བུ་མཆོག་འདི་ལ་སྦྱིན་པར་བྱ། །ༀ་ཨཱརྻ་ལམྦྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿ ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཤུན་གྱི་ཅོད་པན་གྱི་དབང་བསྐུར་བས། ཤེས་བྱ་ཐམས་ཅད་ཐོགས་མེད་དུ་མཁྱེན་ཅིང་རྟག་ཆད་ཟིལ་གྱིས་གནོན་པའི་དབང་དམ་པ་ཐོབ་པར་གྱུར་ཅིག །ལྔ་པ་གོ་ཆའི་དབང་ནི། གོ་ཆ་བསྐོན་ལ། ཧཱུཾ། མི་ཤིགས་རྡོ་རྗེ་ཡེ་ཤེས་ནི། །སངས་རྒྱས་ཀུན་གྱི་ཡ་ལད་དེ། །ཁྱབ་པའི་ཚུལ་དུ་དྲྭ་བ་ཡིས། །ཅིས་ཀྱང་མི་ཚུགས་གོ་ཆའི་དབང་། །དེ་རིང་ཁྱོད་ལ་བསྐུར་བར་བྱ། །ༀ་བཛྲ་ཀཱ་ཝཱ་ཙི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེའི་གོ་ཁྲབ་ཀྱི་དབང་བསྐུར་བས། བདུད་དང་མུ་སྟེགས་ལ་སོགས་པ་ཕས་ཀྱི་རྒོལ་བས་མི་ཚུགས་པའི་དབང་དམ་པ་ཐོབ་པར་གྱུར་ཅིག །དྲུག་པ་ཕྲེང་བའི་དབང་ནི། རུས་པའི་ཕྲེང་བ་མགོར་བཅིངས་ལ། གཟུངས་དང་ཏིང་འཛིན་སྟོབས་དང་མི་འཇིགས་པ། །ཆེ་བའི་ཡོན་ཏན་འཕེལ་བར་གྱུར་པ་འདི། །སྔགས་འཆང་གང་ལ་དབང་འདི་བསྐུར་བ་ཡིས། །རིག་འཛིན་གནས་སུ་འདུ་འབྲལ་མེད་པར་ཤོག །ༀ་ཀ་པཱ་ལ་མཱ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རུས་པའི་ཕྲེང་བའི་དབང་བསྐུར་བས། གཟུངས་དང་ཏིང་ངེ་འཛིན་དང་མི་འཇིགས་པ་ལ་སོགས་པ་ཆེ་བའི་ཡོན་ཏན་ཐམས་ཅད་ཐོབ་ནས་རིག་འཛིན་གནས་སུ་འདུ་འབྲལ་མེད་པའི་དབང་དམ་པ་ཐོབ་པར་གྱུར་ཅིག །བདུན་པ་རྒྱན་ཆ་བཞིའི་དབང་ནི། རྒྱན་ཆས་རྣམས་བསྐོན་ལ། གླང་ཆེན་ཀོ་རློན་ཐེག་མཆོག་དང་། །སྡུད་བྱེད་ཞིང་གི་གཡང་གཞི་དང་། །མཉེན་ལྕུགས་འཁྲིལ་བའི་སྦྲུལ་ཆུན་དང་། །དཔའ་བརྟུལ་སྟག་གི་ཤམ་ཐབས་དང་། །རྒྱན་ཆ་བཞི་ཡི་དབང་བསྐུར་རོ། །ག་ཛ་ཙཪྨ་ན་ར་ཙཪྨ། བྱཱ་གྷྲཱི་ཙཪྨ་ནཱ་ག་སརྦ་ཙཪྨ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་གླང་ཆེན་ཀོ་རློན་གྱི་དབང་བསྐུར་བས། ཐེག་པ་རིམ་དགུ་ལ་མངའ་བརྙེས་པའི་དབང་དམ་པ་ཐོབ་པར་གྱུར་ཅིག །ཞིང་ཆེན་གཡང་གཞིའི་དབང་བསྐུར་བས། ཚད་མེད་བཞིས་འགྲོ་དོན་བྱེད་པའི་དབང་དམ་པ་ཐོབ་པར་གྱུར་ཅིག །སྦྲུལ་ཆུན་གྱི་དབང་བསྐུར་བས། འགྲོ་བ་ཐམས་ཅད་འཁོར་བ་ནས་འདྲེན་པའི་དབང་དམ་པ་ཐོབ་པར་གྱུར་ཅིག །སྟག་གི་ཤམ་ཐབས་ཀྱི་དབང་བསྐུར་བས། འཁོར་བའི་གཡུལ་ལས་རྒྱལ་བའི་དབང་དམ་པ་ཐོབ་པར་གྱུར་ཅིག །བརྒྱད་པ་ཐོད་རློན་ཕྲེང་བའི་དབང་ནི། མི་མགོའི་དོ་ཤལ་བསྐོན་ལ། དོན་དམ་སྤྲོས་མེད་སྒྱུ་མའི་ཁོང་སེང་ཅན། །དབང་པོ་སྣ་ལྔ་ཡེ་ཤེས་ལྔ་དང་ལྡན། །ཤ་ཁྲག་རློན་པ་ཐུགས་རྗེ་ཆེན་པོའི་ངང་། །ལྕང་ལོ་མང་པོ་འགྲོ་དོན་མཛད་པའི་རྟགས། །ང་རྒྱལ་མ་སྤངས་ཐོད་པའི་ཕྲེང་བ་འདི། །དབང་ཕྱུག་ཆེན་པོའི་སྐུ་ཡི་རྒྱན་དུ་བཞེས། །ཀ་པཱ་ལ་མཱ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཐོད་རློན་ཕྲེང་བའི་དབང་བསྐུར་བས། སྤྲོས་མེད་ཡེ་ཤེས་ལྔའི་ཐུགས་རྗེས་འགྲོ་དོན་མཛད་པའི་དབང་དམ་པ་ཐོབ་པར་གྱུར་ཅིག །དགུ་པ་བྱུགས་པའི་རྟགས་གསུམ་གྱི་དབང་ནི། སྨིན་མཚམས་སུ་རཀྟའི་ཐིག་ལེ་སོགས་རྟགས་གསུམ་བཏབ་ལ། ཐུགས་རྗེ་ཆེན་པོ་ཆགས་པའི་རཀྟ་དང་། །དོན་དམ་བཅུད་ཀྱི་ཞག་གི་ཟོ་རིས་དང་། །གདུལ་བྱ་ཐལ་བར་རློག་པའི་ཐིག་ལེ་དང་། །ལྷག་པའི་རྟགས་ཆེན་གསུམ་གྱི་དབང་བསྐུར་རོ། །སརྦ་ཏ་ཐཱ་ག་ཏ་རཀྟ་མེ་ད་བྷསྨི་ཧོཿ ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རཀྟའི་ཐིག་ལེའི་དབང་བསྐུར་བས། མ་མོ་མཁའ་འགྲོ་དབང་དུ་སྡུད་པའི་དབང་དམ་ཐོབ་པར་གྱུར་ཅིག །ཞག་གི་ཟོ་རིས་ཀྱི་དབང་བསྐུར་བས། སངས་རྒྱས་ཀུན་དང་ཐུགས་རྗེ་གཅིག་པའི་དབང་དམ་པ་ཐོབ་པར་གྱུར་ཅིག །ཐལ་ཆེན་གྱི་ཚོམ་བུའི་དབང་བསྐུར་བས། གིང་ཆེན་བྲན་བཞིན་དུ་སྡུད་པའི་དབང་དམ་ཐོབ་པར་གྱུར་ཅིག །བཅུ་པ་མེ་དཔུང་གི་དབང་ནི། མེ་དཔུང་གཏད་ལ། རང་རྟགས་འབར་བ་ཡེ་ཤེས་མེ། །ཁམས་གསུམ་ཉོན་མོངས་སྲེག་བྱེད་པའི། །བསྐལ་པ་མེ་ཡི་ཆས་མཆོག་སྟེ། །དབང་མཆོག་འདིས་ཀྱང་དབང་བསྐུར་རོ། །ཛྙཱ་ན་ཛྭ་ལ་རཾ། ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྲེག་བྱེད་མེ་དཔུང་གི་དབང་བསྐུར་བས། དཔལ་ཆེན་པོའི་ཐུགས་ལ་ཡེ་ཤེས་རྣམ་ལྔའི་མེ་བྱུང་བས་ཁམས་གསུམ་གྱི་ཉོན་མོངས་པ་དུག་ལྔ་སྲེག་པར་བྱེད་པའི་དབང་དམ་པ་ཐོབ་པར་གྱུར་ཅིག །ལྔ་པ་སྒྲུབ་རྫས་ཀྱི་དབང་ལ་བཅོ་ལྔ་ལས། དང་པོ་དམ་རྫས་བདུད་རྩི་ལྔའི་དབང་ནི། བདུད་རྩི་ལྔ་རིམ་པར་གཏད་ལ། གཙང་རྨེ་མེད་པའི་ཟས་མཆོག་དྲི་ཆེན་འདིས། །སྐལ་ལྡན་རྣལ་འབྱོར་འདི་ལ་དབང་བསྐུར་བས། །མེ་ལོང་ལྟ་བུའི་ཡེ་ཤེས་མངོན་གྱུར་ནས། །དེ་བཞིན་རིགས་ཀྱི་དངོས་གྲུབ་ཐོབ་པར་ཤོག །ༀ་ཨཱ་ཡུརྫྙཱ་ན་སིདྡྷི་ཀུ་རུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དྲི་ཆེན་གྱི་དབང་བསྐུར་བས། མེ་ལོང་ལྟ་བུའི་ཡེ་ཤེས་ཀྱི་དོན་རྟོགས་ནས་དེ་བཞིན་གཤེགས་པའི་རིགས་ཀྱི་དངོས་གྲུབ་ཐོབ་པའི་དབང་དམ་པ་ཐོབ་པར་གྱུར་ཅིག །སྐྱེ་མེད་བྱང་ཆུབ་སེམས་ཀྱི་རྫས་མཆོག་འདིས། །སྐལ་ལྡན་རྣལ་འབྱོར་འདི་ལ་དབང་བསྐུར་བས། །སྟོང་པ་ཉིད་ཀྱི་ཡེ་ཤེས་མངོན་གྱུར་ནས། །རྡོ་རྗེ་རིགས་ཀྱི་དངོས་གྲུབ་ཐོབ་པར་ཤོག །ༀ་མ་ཧཱ་བོ་དྷི་ཙིཏྟ་སིདྡྷི་ཀུ་རུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བྱང་སེམས་ཀྱི་དབང་བསྐུར་བས། སྟོང་པ་ཉིད་ཀྱི་ཡེ་ཤེས་ཀྱི་དོན་རྟོགས་ནས་རྡོ་རྗེ་རིགས་ཀྱི་དངོས་གྲུབ་ཐོབ་པའི་དབང་དམ་པ་ཐོབ་པར་གྱུར་ཅིག །ཁམས་གསུམ་བསྒྲལ་བའི་ཤ་ཆེན་རྫས་མཆོག་འདིས། །སྐལ་ལྡན་རྣལ་འབྱོར་འདི་ལ་དབང་བསྐུར་བས། །མཉམ་པ་ཉིད་ཀྱི་ཡེ་ཤེས་མངོན་གྱུར་ནས། །རིན་ཆེན་རིགས་ཀྱི་དངོས་གྲུབ་ཐོབ་པར་ཤོག །ༀ་མ་ཧཱ་མཱཾ་ས་སིདྡྷི་ཀུ་རུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཤ་ཆེན་གྱི་དབང་བསྐུར་བས། མཉམ་པ་ཉིད་ཀྱི་ཡེ་ཤེས་ཀྱི་དོན་རྟོགས་ནས་རིན་ཆེན་རིགས་ཀྱི་དངོས་གྲུབ་ཐོབ་པའི་དབང་དམ་པ་ཐོབ་པར་གྱུར་ཅིག །ཐུགས་རྗེ་ཆགས་པར་རཀྟའི་རྫས་མཆོག་འདིས། །སྐལ་ལྡན་རྣལ་འབྱོར་འདི་ལ་དབང་བསྐུར་བས། །སོ་སོར་རྟོག་པའི་ཡེ་ཤེས་མངོན་གྱུར་ནས། །པདྨ་རིགས་ཀྱི་དངོས་གྲུབ་ཐོབ་པར་ཤོག །ༀ་མ་ཧཱ་རཀྟ་སིདྡྷི་ཀུ་རུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རཀྟའི་དབང་བསྐུར་བས། སོ་སོར་རྟོག་པའི་ཡེ་ཤེས་ཀྱི་དོན་རྟོགས་ནས་པདྨ་རིགས་ཀྱི་དངོས་གྲུབ་ཐོབ་པའི་དབང་དམ་པ་ཐོབ་པར་གྱུར་ཅིག །ལས་རྣམས་འགྲུབ་པའི་རྫས་མཆོག་དྲི་ཆུ་འདིས། །སྐལ་ལྡན་རྣལ་འབྱོར་འདི་ལ་དབང་བསྐུར་བས། །བྱ་བ་གྲུབ་པའི་ཡེ་ཤེས་མངོན་གྱུར་ནས། །ལས་ཀྱི་རིགས་ཀྱི་དངོས་གྲུབ་ཐོབ་པར་ཤོག །ༀ་མ་ཧཱ་ཀུ་ཀུ་ཏ་སིདྡྷི་ཀུ་རུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དྲི་ཆུའི་དབང་བསྐུར་བས། བྱ་བ་གྲུབ་པའི་ཡེ་ཤེས་ཀྱི་དོན་རྟོགས་ནས་ལས་ཀྱི་རིགས་ཀྱི་དངོས་གྲུབ་ཐོབ་པའི་དབང་དམ་པ་ཐོབ་པར་གྱུར་ཅིག །གཉིས་པ་ཤ་ལྔའི་དབང་ནི། ཤ་ལྔ་གཏད་ལ། ཤ་ཆེན་མཆོག་གི་དམ་ཚིག་གིས། །རིག་པ་འཛིན་པའི་གཙོ་བོར་གྱུར། །གླང་པོའི་ཤ་ཡི་དམ་ཚིག་གིས། །མངོན་ཤེས་ལྔ་དག་ཐོབ་པར་འགྱུར། །བ་གླང་ཤ་ཡི་དམ་ཚིག་གིས། །རྡོ་རྗེ་འགུགས་པའི་མཆོག་ཏུ་འགྱུར། །རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཁྱི་ཤའི་དམ་ཚིག་མཆོག་གིས་ནི། །མངོན་ཤེས་ལྔ་དང་ལྡན་པར་འགྱུར། །མ་ཧཱ་མཱཾ་ས་ཨ་བྷི་ཥིཉྩ་ཧཱུཾ། ག་ཛ་མཱཾ་ས༴ ག་མཱཾ་ས༴ ཏུ་ར་ག་མཱཾ་ས༴ ཀུ་ཀུ་ར་མཱཾ་ས་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཤ་ལྔའི་དབང་བསྐུར་བས། རིག་འཛིན་གྱི་གཙོ་བོའི་སྐུ་གྲུབ་སྟེ་མངོན་པར་ཤེས་པ་ལྔ་དང་། དགུག་པ་དགུ་དང་། ལུས་གཞན་ལ་མི་སྣང་བའི་དབང་དམ་པ་ཐོབ་པར་གྱུར་ཅིག །གསུམ་པ་རཀྟའི་དབང་ནི། བྷནྡྷ་རཀྟས་བཀང་བ་གཏད་ལ། བྷནྡྷ་སྣོད་ཡངས་བཅུད་ཀྱི་ཁྲག་མཚོ་གསོལ། །རྔམ་པའི་ཞལ་དུ་དུག་གསུམ་ཟ་བར་མཛད། །སྔགས་འཆང་གང་ལ་དབང་འདི་བསྐུར་བ་ཡིས། །རིག་འཛིན་རྒྱལ་བའི་གོ་འཕང་ཐོབ་གྱུར་ཅིག །ༀ་ཀ་པཱ་ལ་མ་ཧཱ་རཀྟ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བྷནྡྷ་རཀྟའི་དབང་བསྐུར་བས། དུག་གསུམ་ཞལ་དུ་གསོལ་བས་རིག་འཛིན་རྒྱལ་བའི་གོ་འཕང་བརྙེས་པའི་དབང་དམ་པ་ཐོབ་པར་གྱུར་ཅིག །བཞི་པ་རྒྱལ་མཚན་གྱི་དབང་ནི། ཞིང་གི་རྒྱལ་མཚན་གཏད་ལ། ཚུལ་ཁྲིམས་གོས་ཆེན་ཞིང་ཀླུབས་རྒྱལ་མཚན་ནི། །ཡེ་ཤེས་ལྔ་དང་ལྡན་པ་བརྗིད་པའི་ཏོག །ཚར་གསུམ་སྒེག་པ་སྤྲུལ་པའི་ལྕང་ལོས་རྒྱན། །ཡན་ལག་ལྕུག་ཕྲན་ཤེས་བྱའི་ཅོད་པན་དང་། །སོར་ཕྲེང་རིན་ཆེན་སྦྱིན་པའི་རྣ་ཆར་ལྡན། །དབྱིག་མདོག་རྡོ་རྗེ་གཤམ་གྱི་བརྗིད་བག་ཅན། །སྐལ་ལྡན་རིགས་ཀྱི་བུ་ལ་སྦྱིན་པར་བྱ། །ༀ་བཛྲ་ཀེ་ཏུ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཞིང་གི་རྒྱལ་མཚན་གྱི་དབང་བསྐུར་བས། བདུད་བཞི་དང་མཐའ་གཉིས་ལས་རྒྱལ་བའི་དབང་དམ་པ་ཐོབ་པར་གྱུར་ཅིག །ལྔ་པ་གདུགས་ཀྱི་དབང་ནི། ཞིང་གི་གདུགས་ཕུབ་ལ། གཉིས་མེད་ཡེ་ཤེས་རྟོག་བྲལ་བ། །རྨོངས་སོགས་སེམས་ཕྱིར་རང་བཞིན་སྟོང་། །ལོག་འབྱུང་རྒྱུ་འབྲས་གདུངས་པ་ལས། །ཐུགས་རྗེས་སྐྱོབ་པའི་དབང་བསྐུར་རོ། །ༀ་བཛྲ་ཚཱ་ཏཱ་ཏི་ར་བཾ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཞིང་ལྤགས་ཀྱི་གདུགས་ཀྱི་དབང་བསྐུར་བས། ལོག་པའི་རྒྱུ་འབྲས་ཐམས་ཅད་གཉིས་མེད་རྟོག་བྲལ་ཡེ་ཤེས་ཀྱི་ཐུགས་རྗེས་སྐྱོབ་པའི་དབང་དམ་པ་ཐོབ་པར་གྱུར་ཅིག །དྲུག་པ་ཁ་ཊྭཱཾ་ག་དྲིལ་བུ་དཔྱངས་པའི་དབང་ནི། ཁ་ཊྭཱཾ་ག་དྲིལ་བུའི་སྒྲ་འཁྲོལ་བ་གཏད་དེ། རྡོ་རྗེ་ཁ་ཊྭཱཾ་དྲིལ་བུའི་སྒྲས། །ཐམས་ཅད་ཕབ་ནས་སླར་ཡང་ནི། །ཁམས་གསུམ་དག་ཀྱང་འཚོ་བར་བྱེད། །སྐལ་ལྡན་ཁམས་གསུམ་སྨིན་བྱེད་ཤོག །ༀ་བཛྲ་ཁ་ཊྭཱཾ་ག་གཎྜེ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཁ་ཊྭཱཾ་ཀ་དྲིལ་བུའི་དབང་བསྐུར་བས། ཁ་ཊྭཱཾ་གྱིས་ཁམས་གསུམ་གྱི་གདུག་པ་ཅན་ཐམས་ཅད་བསྒྲལ་ཏེ་སངས་རྒྱས་ཀྱི་ས་ལ་སྦྱོར་ཞིང་དྲིལ་བུས་དེ་བཞིན་གཤེགས་པ་ཐམས་ཅད་ལ་སྙན་གསན་འབེབས་པའི་དབང་དམ་པ་ཐོབ་པར་གྱུར་ཅིག །བདུན་པ་ཕུར་བུའི་དབང་ནི། ཕུར་བུ་གཏད་ལ། སྒྲུབ་པའི་རྫས་མཆོག་བཛྲ་ཀཱི་ལ་ཡ། །དཔལ་ལྡན་རྡོ་རྗེ་འཆང་གིས་བྱིན་བརླབས་ཀྱིས། །སྔགས་འཆང་གང་ལ་དབང་འདི་བསྐུར་བ་ཡིས། །ཕྱི་ནང་བར་གཅོད་བགེགས་རྣམས་ཚར་གཅོད་ཤོག །ༀ་བཛྲ་ཀཱི་ལ་ཡ་ཨ་བྷི་ཥིཉྩ་ༀ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེ་ཕུར་བུའི་དབང་བསྐུར་བས། ཕྱི་ནང་གི་བར་དུ་གཅོད་པའི་དགྲ་བགེགས་ཚར་གཅོད་པའི་དབང་དམ་པ་ཐོབ་པར་གྱུར་ཅིག །བརྒྱད་པ་རྡོ་རྗེ་དང་དྲིལ་བུའི་དབང་ནི། རྡོར་དྲིལ་གཏད་ལ། ཐབས་དང་ཤེས་རབ་དབང་ཆེན་ཏེ། །རྡོ་རྗེ་དྲིལ་བུ་རིག་པ་འཛིན། །མྱ་ངན་འདས་དང་འཁོར་བ་ཡི། །ཆོས་ལ་འདོད་བཞིན་དབང་བསྒྱུར་ཅིག །ༀ་པྲ་ཛྙཱ་ས་མ་ཡོ་གི་ཨ་བྷི་ཥིཉྩ་ༀ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེ་དྲིལ་བུའི་དབང་བསྐུར་བས། ཐབས་དང་ཤེས་རབ་ཟུང་དུ་འབྲེལ་ནས་འཁོར་འདས་ཀྱི་ཆོས་ཐམས་ཅད་ལ་ཇི་ལྟར་འདོད་པ་བཞིན་ལོངས་སྤྱོད་པའི་དབང་དམ་པ་ཐོབ་པར་གྱུར་ཅིག །དགུ་པ་རྔེའུ་ཆུང་གི་དབང་ནི། ཐོད་རྔ་གཏད་ལ། གསང་བའི་རྔེའུ་ཆུང་ཆེན་པོ་འདིས། །ཁམས་གསུམ་ཆོས་རྔ་ཆེན་པོ་བསྒྲགས། །ང་རྒྱལ་དྲག་ཤུལ་བདུད་འཇོམས་པའི། །ཕྱག་མཚན་འདིས་ཀྱང་དབང་བསྐུར་རོ། །ༀ་བཛྲ་ཌཱ་མ་རུ་ཀ་པཱ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྔེའུ་ཆུང་གི་དབང་བསྐུར་བས། ཆོས་ཉིད་སྐྱེ་བ་མེད་པའི་སྒྲ་བསྒྲགས་ཏེ་བདུད་དང་སྲིན་པོ་ཟིལ་གྱིས་མནན་ནས་མ་མོ་མཁའ་འགྲོ་དབང་དུ་སྡུད་པའི་དབང་དམ་པ་ཐོབ་པར་གྱུར་ཅིག །བཅུ་པ་ཡུངས་ཀར་གྱི་དབང་ནི། ཡུངས་ཀར་གཏད་ལ། དཔལ་ཆེན་ཡབ་ཡུམ་གསང་བའི་ཐུགས་ཀ་ནས། །མཐར་བྱེད་ཚར་ཤ་པ་ནི་མཚོན་ཆར་ལྡན། །ཡུངས་ཀར་རྒྱལ་པོར་བྱིན་རླབས་ཤ་རི་རམ། །བར་ཆད་བགེགས་ཀྱི་ཚོགས་འཇོམས་རྫས་མཆོག་འདིས། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ༀ་བཛྲ་ཤ་རི་རཾ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཡུངས་ཀར་གྱི་དབང་བསྐུར་བས། འགྲོ་བའི་དོན་དུ་སྤྲུལ་པ་འགྱེད་ཅིང་ཁམས་གསུམ་གྱི་གདུག་པ་ཅན་འདུལ་བའི་དབང་དམ་པ་ཐོབ་པར་གྱུར་ཅིག །བཅུ་གཅིག་པ་ཤེས་རབ་གཟུངས་མའི་དབང་ནི། གཟུངས་མ་གཏད་ལ། དོན་དམ་རང་བཞིན་སྤྲོས་དང་བྲལ། །དྲི་མེད་རྣམ་དག་བྱང་ཆུབ་སེམས། །གཞི་བྱེད་གཟུངས་མ་རྒྱལ་མོའི་དབང་། །སྐལ་ལྡན་རྣལ་འབྱོར་ཁྱོད་ལ་སྦྱིན། །པྲཛྙཱ་དྷ་རི་ཛ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཤེས་རབ་གཟུངས་མའི་དབང་བསྐུར་བས། ཁམས་གསུམ་རྣམ་པར་དག་པའི་བྱང་ཆུབ་ཀྱི་སེམས་ལ་དབང་བསྒྱུར་བའི་དབང་དམ་པ་ཐོབ་པར་གྱུར་ཅིག །བཅུ་གཉིས་པ་ཕྲེང་བའི་དབང་ནི། བགྲང་ཕྲེང་གཏད་ལ། གཟུངས་དང་ཏིང་འཛིན་རྒྱུ་འབྲས་ཆོས། །བྱང་ཆུབ་ཆོས་རྣམས་རྟོགས་པའི་རྒྱན། །མི་འཇིགས་ཆོས་དང་དཔེ་བྱད་མཚན། །འབྲས་བུའི་ཆོས་ལ་དབང་བསྐུར་རོ། །ༀ་བཛྲ་མཱ་ལ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཕྲེང་བའི་དབང་བསྐུར་བས། དཔལ་ཆེན་པོ་དང་མ་མོ་མཁའ་འགྲོ་རྣམས་ཉེ་བར་བསྙེན་ནས་དངོས་གྲུབ་ལེན་པའི་དབང་དམ་པ་ཐོབ་པར་གྱུར་ཅིག །བཅུ་གསུམ་པ་རྡོ་རྗེ་ཚེའི་དབང་ནི། ཚེ་འབྲང་གཏད་ལ། སྐྱེ་ཤི་མེད་པ་རྡོ་རྗེ་དབང་གི་ཚེ། །རང་རིག་བྱང་སེམས་གདོད་ནས་སྐྱེ་ཤི་མེད། །གཞན་གྱིས་མི་འཕྲོག་བདུད་ལས་ཡེ་ནས་རྒྱལ། །འཆི་མེད་རྡོ་རྗེ་ཚེ་ཡི་དབང་བསྐུར་རོ། །ༀ་བཛྲ་ཨཱ་ཡུ་ཥེ་ཛྙཱ་ན་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་འཆི་མེད་ཚེའི་དབང་བསྐུར་བས། བར་ཆད་ཀྱི་བདུད་ལས་རྒྱལ་ཏེ་དཔལ་ཆེན་པོའི་ཐུགས་སྐྱེ་འཆི་མེད་པའི་དོན་རྟོགས་པའི་དབང་དམ་པ་ཐོབ་པར་གྱུར་ཅིག །བཅུ་བཞི་པ་བཟའ་བཏུང་གི་དབང་ནི། བཟའ་བཏུང་གཏད་ལ། བཟའ་དང་བཅའ་དང་བཏུང་དང་བགོ། །རང་རིག་གསང་བའི་ལོངས་སྤྱོད་རྒྱན། །གཉིས་མེད་རོལ་པར་དབང་བསྐུར་བས། །ལོངས་སྤྱོད་ཆེན་པོའི་དབང་ཐོབ་ཤོག །ཨ་ལི་ཨུ་ལི་ཏ་ལི་ཏ་པ་ལི་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བཟའ་བཏུང་གི་དབང་བསྐུར་བས། འདོད་ཡོན་ཐམས་ཅད་ཆོས་ཉིད་ལ་ཆོས་ཉིད་རོལ་ཏེ་འཛིན་མེད་དུ་ལོངས་སྤྱོད་པའི་དབང་དམ་པ་ཐོབ་པར་གྱུར་ཅིག །བཅོ་ལྔ་པ་མིང་གི་དབང་ནི། རྡོར་དྲིལ་ལྷན་ཅིག་བཟུང་བ་མགོ་ཐོག་ཏུ་དཀྲོལ་ལ། ཡང་དག་བླ་མེད་དཀྱིལ་འཁོར་དུ། །མཚན་ཡང་རྡོ་རྗེའི་མིང་བཏགས་པས། །སྔགས་འཆང་མིང་དབང་བསྐུར་བ་ཡིས། །རིག་འཛིན་རྒྱལ་ཞིང་གྲགས་གྱུར་ཅིག །གུ་ཧྱ་རཏྣ་ན་མ་ཨ་བྷི་ཥིཉྩ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེ་མིང་གིས་དབང་བསྐུར་བས། རྡོ་རྗེ་ཆེ་གེ་མོ་ཞེས་བྱ་བར་རིག་འཛིན་དང་སངས་རྒྱས་ཀྱི་ཞིང་ཐམས་ཅད་དུ་མཚན་ངེས་པ་ཅན་དུ་གྲགས་པའི་དབང་དམ་པ་ཐོབ་པར་གྱུར་ཅིག །དེ་ལྟར་ཕྱི་ལྷག་པ་གཟུགས་བརྙན་གྱི་དཀྱིལ་འཁོར་དུ་ཕན་དབང་ཉེར་བརྒྱད་བསྐུར་བས། འདི་ཕྱིར་ཕན་པའི་ས་བོན་ཙམ་འཇོག་ཅིང་ཕྱི་དཀྱིལ་དྲང་དོན་གྱི་བསྐྱེད་རིམ་རྣམས་མཉན་དུ་རུང་བའི་སྐལ་པ་ཅན་དུ་བྱས་པ་ཡིན་ནོ། །གཉིས་པ་རང་བཞིན་གྱི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ་བསྐུར་བ་ལ། བདག་དོན་ནུས་པའི་བརྩོན་འགྲུས་ཅན་ལ་ཉན་སྒོམ། གཞན་དོན་ནུས་པའི་བརྩོན་འགྲུས་ཅན་ལ་ཕྲིན་ལས་དང་འཆད་དབང་། གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བའོ། །དང་པོ་ལ་གཉིས་ཀྱི། དང་པོ་ཉན་དབང་ནི། སློབ་དཔོན་བཅོམ་ལྡན་འདས་དགྱེས་པ་ཆེན་པོ་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུཾ་ཡིག་དམར་སེར་གཉིས་ཆད། སློབ་བུའི་རྣ་བའི་འདོམ་རྩ་གཉིས་སུ་འཕྲོས་པ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཟླ་ཉི་མ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་སྒྲ་གསལ་བའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཏྲཾ་ཡིག་ཟུང་ལྔ་དང་། སྒོ་བཞིར་ཕཊ་བཞི་རྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་རཏྣ་ཧེ་རུ་ཀ་ཡབ་ཡུམ། རྩིབས་བཞིར་རིན་ཆེན་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ཐམས་ཅད་ཀྱང་སྐུ་མདོག་སེར་ནག་ཞལ་གཅིག་ཕྱག་གཉིས་པ་རིན་ཆེན་དང་དུང་ཁྲག་འཛིན་པ་དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཅིང་དཔལ་གྱི་ཆས་བཅུ་རྫོགས་པ། སྒེག་པ་ལ་སོགས་པ་གར་དགུའི་ཉམས་ཅན་ཞབས་གཡས་བརྐྱང་པའི་དོར་སྟབས་ཀྱིས་རང་འདྲའི་ཡུམ་དང་མཉམ་པར་སྦྱོར་བ། སྒོ་བཞིའི་ཤར་དུ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ལྷོར་ཕག་གདོང་མ་ནག་མོ་མཆེ་ཞགས་འཛིན་པ། ནུབ་ཏུ་སེང་གདོང་མ་དམར་མོ་ལྕགས་སྒྲོག་འཛིན་པ། བྱང་དུ་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ་ཞལ་ཕྱིར་ཕྱོགས་ནས་འཁོད་པ། གཙོ་འཁོར་ཐམས་ཅད་ཀྱང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དབང་རྫས་གླེགས་བམ་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཏྲཱཾ་ལས་རིན་པོ་ཆེ་ཏྲཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་རཏྣ་ཧེ་རུ་ཀ་ཡབ་ཡུམ་དུ་གྱུར། རྣ་བའི་དཀྱིལ་འཁོར་ཆ་གཉིས་དང་དབང་རྫས་ཀྱི་ལྷ་ལ། ས་མ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་རྣ་བའི་དཀྱིལ་འཁོར་ཆ་གཉིས་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་སེར་པོ་ལས་རཏྣ་ཧེ་རུ་ཀ་དང་། དབང་རྫས་ཀྱི་ལྷ་འོད་དུ་ཞུ་བ་ལས་གླེགས་བམ་དུ་གྱུར། དེ་ལྟ་བུའི་གླེགས་བམ་ལག་ཏུ་གཏད་པ་རྣ་བའི་ཐིག་ལེ་ལ་ཐིམ་པར་མོས་ལ། ཏྲཱཾ། གསང་བ་གསང་ཆེན་གསང་མཆོག་གང་། །གསང་བ་ཀུན་ལའང་གཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །དེ་ལྟར་ཉན་པའི་དབང་བསྐུར་བས་དེང་ཕྱིན་ཆད་བཀའ་ཕྱི་ནང་ཐམས་ཅད་ཉན་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཉན་པའི་དབང་བསྐུར་བས། དེ་བཞིན་གཤེགས་པའི་བཀའ་ཕྱི་ནང་ཐམས་ཅད་ཐོགས་པ་མེད་པར་ཉན་པའི་དབང་དམ་པ་ཐོབ་པར་གྱུར་ཅིག །གཉིས་པ་སྒོམ་དབང་ནི། སློབ་དཔོན་བཅོམ་ལྡན་འདས་དགྱེས་པ་ཆེན་པོ་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གསལ་བའི་སྦྱོར་མཚམས་ནས་བྷཱུཾ་ཡིག་དམར་སེར་གཅིག་ཆད་སློབ་བུའི་སྙིང་གི་འདོམ་རྩར་འཕྲོས་པ་ཡོངས་སུ་གྱུར་པ་ལས། འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཟླ་ཉི་མ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་དྲན་པ་གསལ་བའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཧཱུཾ་ཡིག་ཟུང་ལྔ་དང་། སྒོ་བཞིར་ཕཊ་བཞི་རྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་བཛྲ་ཧེ་རུ་ཀ་ཡབ་ཡུམ། རྩིབས་བཞིར་རྡོ་རྗེ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ཐམས་ཅད་ཀྱང་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཅིང་དཔལ་གྱི་ཆས་བཅུ་རྫོགས་པ། སྒེག་པ་ལ་སོགས་པ་གར་དགུའི་ཉམས་ཅན་ཞབས་གཡས་བརྐྱང་བའི་དོར་སྟབས་ཀྱིས་རང་འདྲའི་ཡུམ་དང་མཉམ་པར་སྦྱོར་བ། སྒོ་བཞིའི་ཤར་དུ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ལྷོར་ཕག་གདོང་ནག་མོ་མཆེ་ཞགས་འཛིན་པ། ནུབ་ཏུ་སེང་གདོང་དམར་མོ་ལྕགས་སྒྲོག་འཛིན་པ། བྱང་དུ་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་ཞལ་ཕྱིར་ཕྱོགས་ནས་འཁོད་པ། གཅོ་འཁོར་ཐམས་ཅད་ཀྱང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དབང་རྫས་ཕྲེང་བ་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་བཛྲ་ཧེ་རུ་ཀ་ཡབ་ཡུམ་དུ་གྱུར། སྙིང་གི་དཀྱིལ་འཁོར་དང་དབང་རྫས་ཀྱི་ལྷ་ལ། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་སྙིང་གི་དཀྱིལ་འཁོར་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་མཐིང་ག་ལས་བཛྲ་ཧེ་རུ་ཀ་དང་། དབང་རྫས་ཀྱི་ལྷ་འོད་དུ་ཞུ་བ་ལས་ཕྲེང་བར་གྱུར། དེ་ལྟ་བུའི་ཕྲེང་བ་ལག་ཏུ་གཏད་པ་སྙིང་གི་ཐིག་ལེར་ཐིམ་པར་མོས་ལ། ༀ། དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་བཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །དེ་ལྟར་སྒོམ་པའི་དབང་བསྐུར་བས་དེང་ཕྱིན་ཆད་ལྷ་རྟོག་དབྱེར་མེད་དུ་སྒོམ་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་སྒོམ་པའི་དབང་བསྐུར་བས། རྣམ་པར་གྲོལ་བའི་ལམ་མཐའ་དག་ཐོགས་པ་མེད་པར་སྒོམ་པའི་དབང་དམ་པ་ཐོབ་པར་གྱུར་ཅིག །འདིར་རང་རང་གི་ཡི་དམ་གྱི་ལྷ་གང་ཡིན་སྒོམ་པར་གསུངས་པས། མེ་ཏོག་གང་ལ་ཕོག་པའི་ལྷ་དེ་སྒོམ་པར་བཤད་ཀྱང་དེང་སང་བསྙེན་སྒྲུབ་ལ་གཙོ་བོ་གོ་འཕོའི་ཕྱག་ལེན་མི་མཛད་པ་ཤས་ཆེ་བས་དཀྱིལ་འཁོར་གྱི་གཙོ་བོ་རྡོ་རྗེའི་རིགས་ཀྱི་ལྷར་སྦྱར་བ་སྟེ། འདི་ལ་སྔ་རབས་པ་རྣམས། ལྷག་པའི་ལྷ། བབས་པའི་ལྷ། མོས་པའི་ལྷ་ཞེས་གང་རུང་འབོགས་པར་གསུངས་པའི་དང་པོའི་ལུགས་སོ། ༈ །གཉིས་པ་གཞན་དོན་ནུས་པའི་བརྩོན་འགྲུས་ཅན་ལ་ཕྲིན་ལས་དང་འཆད་དབང་བསྐུར་བ་གཉིས་ཀྱི། དང་པོ་ཕྲིན་ལས་ཀྱི་དབང་ནི། སློབ་དཔོན་བཅོམ་ལྡན་འདས་དགྱེས་པ་ཆེན་པོ་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གསལ་བའི་སྦྱོར་མཚམས་ནས་བྷཱུཾ་ཡིག་དམར་སེར་གཉིས་ཆད། སློབ་བུའི་ལག་པའི་འདོམ་རྩ་གཉིས་སུ་འཕྲོས་པ་ཡོངས་སུ་གྱུར་པ་ལས། འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཟླ་ཉི་མ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་བྱ་བྱེད་གསལ་བའི་ཐིག་ལེའི་ངོ་བོ་ཉིད་དབུས་དང་རྩིབས་བཞིར་ཧཱཾ་ཡིག་ཟུང་ལྔ་དང་། སྒོ་བཞིར་ཕཊ་བཞི་རྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་ཀརྨ་ཧེ་རུ་ཀ་ཡབ་ཡུམ། རྩིབས་བཞིར་ལས་ཀྱི་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ཐམས་ཅད་ཀྱང་སྐུ་མདོག་ལྗང་ནག་ཞལ་གཅིག་ཕྱག་གཉིས་པ་རྒྱ་གྲམ་དང་དུང་ཁྲག་འཛིན་པ་དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཅིང་དཔལ་གྱི་ཆས་བཅུ་རྫོགས་པ། སྒེག་པ་ལ་སོགས་པ་གར་དགུའི་ཉམས་ཅན་ཞབས་གཡས་བརྐྱང་བའི་དོར་སྟབས་ཀྱིས་རང་འདྲའི་ཡུམ་དང་མཉམ་པར་སྦྱོར་བ། སྒོ་བཞིའི་ཤར་དུ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ལྷོར་ཕག་གདོང་ནག་མོ་མཆེ་ཞགས་འཛིན་པ། ནུབ་ཏུ་སེང་གདོང་མ་དམར་མོ་ལྕགས་སྒྲོག་འཛིན་པ། བྱང་དུ་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་ཞལ་ཕྱིར་ཕྱོགས་ནས་འཁོད་པ། གཙོ་འཁོར་ཐམས་ཀྱང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དབང་རྫས་རྒྱ་གྲམ་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཧཱཾ་ལས་རྒྱ་གྲམ་ཧཱཾ་གིས་མཚན་པ་འཕྲོ་འདུས་ཡོངས་སུ་གྱུར་པ་ལས་ཀརྨ་ཧེ་རུ་ཀ་ཡབ་ཡུམ་དུ་གྱུར། ལག་པའི་དཀྱིལ་འཁོར་ཆ་གཉིས་དང་དབང་རྫས་ཀྱི་ལྷ་ལ། ཀྲྀཏྱཱ་ནུཥྛཱ་ན་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལག་པའི་དཀྱིལ་འཁོར་ཆ་གཉིས་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་ལྗང་གུ་ལས་ཀརྨ་ཧེ་རུ་ཀ་དང་། དབང་རྫས་ཀྱི་ལྷ་འོད་དུ་ཞུ་བ་ལས་རྒྱ་གྲམ་དུ་གྱུར། དེ་ལྟ་བུའི་རྒྱ་གྲམ་ལག་ཏུ་གཏད་པ་ལག་པའི་ཐིག་ལེར་ཐིམ་པར་མོས་ལ། ༀ། ཁྱོད་ནི་རྡོ་རྗེ་ལས་ཡིན་གྱི། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འདུ་འཕྲོ་ཀུན། །ཁྱོད་ཀྱི་དགོས་པ་བྱེད་པ་ཡིན། །དེ་ལྟར་ཕྲིན་ལས་ཀྱི་དབང་བསྐུར་བས་ཕྲིན་ལས་རྣམ་པ་བཞིས་འགྲོ་བ་འདུལ་བ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཕྲིན་ལས་བཞིས་དབང་བསྐུར་བས་ཕྲིན་ལས་རྣམ་པ་བཞི་ལ་ཐོགས་པ་མེད་པར་སྤྱོད་ཅིང་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །གཉིས་པ་འཆད་དབང་ནི། སློབ་དཔོན་བཅོམ་ལྡན་འདས་དགྱེས་པ་ཆེན་པོ་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གསལ་བའི་སྦྱོར་མཚམས་ནས་བྷཱུཾ་ཡིག་དམར་སེར་གཅིག་ཆད་སློབ་བུའི་ལྕེ་སྟེང་དུ་འཕྲོས་པ་ཡོངས་སུ་གྱུར་པ་ལས། འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཟླ་ཉི་མ་དང་། སྒོ་བཞིར་ཉི་མའི་གདན་རེ་རེ་གསལ་བའི་སྟེང་དུ་སྒྲ་གསལ་བར་བྱེད་པའི་ངོ་བོ་ཉིད་དབུས་དང་རྩིབས་བཞིར་ཧྲཱིཿ ཡིག་ཟུང་ལྔ་དང་། སྒོ་བཞིར་ཕཊ་བཞི་རྣམས་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་པདྨ་ཧེ་རུ་ཀ་ཡབ་ཡུམ། རྩིབས་བཞིར་པདྨ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ཐམས་ཅད་ཀྱང་སྐུ་མདོག་དམར་ནག་ཞལ་གཅིག་ཕྱག་གཉིས་པ་པདྨ་དང་དུང་ཁྲག་འཛིན་པ་དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཅིང་དཔལ་གྱི་ཆས་བཅུ་རྫོགས་པ། སྒེག་པ་ལ་སོགས་པ་གར་དགུའི་ཉམས་ཅན་ཞབས་གཡས་བརྐྱང་བའི་དོར་སྟབས་ཀྱིས་རང་འདྲའི་ཡུམ་དང་མཉམ་པར་སྦྱོར་བ། སྒོ་བཞིའི་ཤར་དུ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ལྷོར་ཕག་གདོང་མ་ནག་མོ་མཆེ་ཞགས་འཛིན་པ། ནུབ་ཏུ་སེང་གདོང་དམར་མོ་ལྕགས་སྒྲོག་འཛིན་པ། བྱང་དུ་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ་ཞལ་ཕྱིར་ཕྱོགས་ནས་འཁོད་པ། གཙོ་འཁོར་ཐམས་ཀྱང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དབང་རྫས་འཁོར་ལོ་དུང་དང་ཕྱག་ཤིང་རྣམས་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཧྲཱིཿ ལས་པདྨ་ཧྲཱིཿས་མཚན་པ་འཕྲོ་འདུས་ཡོངས་སུ་གྱུར་པ་ལས་པདྨ་ཧེ་རུ་ཀ་ཡབ་ཡུམ་དུ་གྱུར། ལྕེའི་དཀྱིལ་འཁོར་དང་དབང་རྫས་ཀྱི་ལྷ་ལ། པྲ་ཏྱཱ་བེཀྵ་ཎ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལྕེའི་དཀྱིལ་འཁོར་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་དམར་པོ་ལས་པདྨ་ཧེ་རུ་ཀ་དང་། དབང་རྫས་ཀྱི་ལྷ་འོད་དུ་ཞུ་བ་ལས་འཁོར་ལོ་དུང་དང་ཕྱག་ཤིང་རྣམས་སུ་གྱུར། དེ་ལྟ་བུའི་དབང་རྫས་རྣམས་ལག་ཏུ་གཏད་པ་ལྕེའི་ཐིག་ལེར་ཐིམ་པར་མོས་ལ། ༀ། ཆོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམས་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །དེ་ལྟར་འཆད་པའི་དབང་བསྐུར་བས་དེང་ཕྱིན་ཆད་བསྟན་པ་ཕྱི་ནང་ཐམས་ཅད་འཆད་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་འཆད་པའི་དབང་བསྐུར་བས་སེམས་ཅན་ཐམས་ཅད་ཀྱི་ཤེས་རྒྱུད་ལ་ཐེག་པ་མཐའ་དག་གི་ཆོས་ཀྱི་འཁོར་ལོ་བསྐོར་བའི་དབང་དམ་པ་ཐོབ་པར་གྱུར་ཅིག །གསུམ་པ་གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བ་ནི། སློབ་དཔོན་བཅོམ་ལྡན་འདས་དགྱེས་པ་ཆེན་པོ་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གསལ་བའི་སྦྱོར་མཚམས་ནས་བྷཱུཾ་ཡིག་དམར་སེར་ལྔ་ཆད། སློབ་བུའི་མགོ་དང་ལག་མཐིལ་གཉིས་དང་རྐང་མཐིལ་གཉིས་རྣམས་སུ་འཕྲོས་པ་ཡོངས་སུ་གྱུར་པ་ལས། འཁོར་ལོ་རྩིབས་བཞི་པ་གྲུ་བཞི་སྒོ་བཞི་པའི་གཞལ་ཡས་ཁང་དུ་གྱུར་པའི་ལྟེ་བ་དང་རྩིབས་བཞིར་པད་ཟླ་ཉི་མ་དང་། ཁྲོ་བཅུའི་གནས་སུ་ཉི་མའི་གདན་རེ་རེ་གསལ་བར་གྱུར་པའི་ལག་པ་གཡས་ཀྱི་འཁོར་ལོའི་དབུས་དང་རྩིབས་བཞིར་ཧཱུཾ་ཡིག་ཟུང་ལྔ་དང་། མགོ་བོའི་དབུས་དང་རྩིབས་བཞིར་ༀ་ཡིག་ཟུང་ལྔ། ལག་པ་གཡོན་གྱི་དབུས་དང་རྩིབས་བཞིར་སྭཱཾ་ཡིག་ཟུང་ལྔ། རྐང་པ་གཡོན་གྱི་དབུས་དང་རྩིབས་བཞིར་ཨཱཾ་ཡིག་ཟུང་ལྔ། རྐང་པ་གཡས་ཀྱི་དབུས་དང་རྩིབས་བཞིར་ཧཱཾ་ཡིག་ཟུང་ལྔ། སྤྱི་གཙུག །སྙིང་ག །ནུ་མ་གཡས་གཡོན། དཔུང་པ་གཡས་གཡོན། སོག་པ་གཡས་གཡོན། སོག་དབྲག །གཤང་ལམ་རྣམས་སུ་ཧཱུཾ་ཡིག་ཟུང་རེ་གསལ་བ་ལས་སོ་སོའི་ཕྱག་མཚན་དུ་གྱུར། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འཕྲོ་འདུས་ཡོངས་སུ་གྱུར་པ་ལས་ལག་པ་གཡས་ཀྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་བཛྲ་ཧེ་རུ་ཀ་ཡབ་ཡུམ། རྩིབས་བཞིར་རྡོ་རྗེའི་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། མགོ་བོའི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་བུདྡྷ་ཧེ་རུ་ཡབ་ཡུམ། རྩིབས་བཞིར་སངས་རྒྱས་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ལག་པ་གཡོན་གྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་རཏྣ་ཧེ་རུ་ཀ་ཡབ་ཡུམ། རྩིབས་བཞིར་རིན་ཆེན་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། རྐང་པ་གཡོན་གྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་པདྨ་ཧེ་རུ་ཀ་ཡབ་ཡུམ། རྩིབས་བཞིར་པདྨ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། རྐང་པ་གཡས་ཀྱི་འཁོར་ལོའི་དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་ཀརྨ་ཧེ་རུ་ཀ་ཡབ་ཡུམ། བརྩིབས་བཞིར་ལས་ཀྱི་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བ། ཐམས་ཅད་ཀྱང་སྐུ་མདོག་རིགས་ཀྱི་ཁ་དོག་ཅན་ཞལ་གཅིག་ཕྱག་གཉིས་པ་རང་རྟགས་དང་དུང་ཁྲག་འཛིན་པ་དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཅིང་དཔལ་གྱི་ཆས་བཅུ་རྫོགས་པ་སྒེག་པ་ལ་སོགས་པ་གར་དགུའི་ཉམས་ཅན་ཞབས་གཡས་བརྐྱང་བའི་དོར་སྟབས་ཀྱིས་རང་འདྲའི་ཡུམ་དང་མཉམ་པར་སྦྱོར་བ། ལུས་ཀྱི་གནས་བཅུ་ལ། སྤྱི་གཙུག་ཏུ་ཧཱུཾ་མཛད་སྔོ་སྐྱ་རང་རྟགས་མདའ་གཞུ། སྙིང་གར་རྣམ་རྒྱལ་དཀར་པོ་ཁ་ཊྭཱཾ་ཀ་དང་ཏྲི་ཤུལ། ནུ་མ་གཡས་སུ་དབྱུག་པ་སྔོན་པོ་དབྱུག་པ་དང་མེ་དཔུང་། དཔུང་མགོ་གཡས་པར་གཤིན་རྗེ་གཤེད་མཐིང་ག་བེ་ཅོན་དང་དགྲ་སྟྭ། སོག་སྟེང་གཡས་པར་མི་གཡོ་བ་ལྗང་དམར་སྤུ་གྲི་དང་ཞགས་པ། སོག་དབྲག་ཏུ་རྟ་མགྲིན་དམར་པོ་རལ་གྲི་དང་སྦྲུལ་ཞགས། སོག་སྟེང་གཡོན་པར་གཞན་གྱིས་མི་ཐུབ་པ་སྔོན་པོ་བྷཉྫ་དང་རྔ་ཡབ། དཔུང་མགོ་གཡོན་པར་བདུད་རྩི་འཁྱིལ་བ་ལྗང་གུ་རྒྱ་གྲམ་དང་དྲིལ་བུ། ནུ་མ་གཡོན་དུ་ཁམས་གསུམ་རྣམ་རྒྱལ་སེར་པོ་འཁོར་ལོ་དང་མཆེ་བ། གཤང་ཁར་སྟོབས་པོ་ཆེ་དུད་ཁ་ཐོ་བ་དང་གཏུན་ཤིང་། ཐམས་ཅད་ཀྱང་ཞལ་གསུམ་ཕྱག་དྲུག་གི་དང་པོ་གཉིས་རྡོ་རྗེ་དུང་དམར། བར་པ་གཉིས་རང་རྟགས། ཐ་མ་གཉིས་ཕུར་བུ་འདྲིལ་བ། །ཞབས་བཞི་དོར་སྟབས་བགྲད་པ། གར་དགུའི་ཉམས་ཀྱིས་སྒེག་ཅིང་དུར་ཁྲོད་རོལ་པའི་ཆས་ཅན། རང་འོད་ཀྱི་ཡུམ་ཡབ་ཀྱི་མདོག་ཅན་གཡས་འཁྱུད་སྟབས་དང་གཡོན་དུང་དམར་ཡབ་ལ་སྟོབ་པ་ཁྲོ་མོའི་ཆས་ཅན་དང་འཁྲིལ་བ། གཙོ་འཁོར་ཐམས་ཅད་ཀྱང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའོ། །དབང་རྫས་རྡོར་དྲིལ་བསང་སྦྱངས། དབང་རྫས་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླ་ཉི་མའི་གདན་ལ་ཧཱུཾ་ཟུང་ལས་རྡོར་དྲིལ་ས་བོན་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས་རིགས་འདུས་བཛྲ་ཧེ་རུ་ཀ་ཡབ་ཡུམ་དུ་གྱུར། དཀྱིལ་འཁོར་ཆ་ལྔ་ཁྲོ་བཅུ་དང་བཅས་པ་དང་དབང་རྫས་ཀྱི་ལྷ་ལ་ལྔ་ཚན་ལྔས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད ཡབ་ཡུམ་མཉམ་པར་སྦྱོར་བའི་རྗེས་ཆགས་ཀྱིས་ལུས་དཀྱིལ་གྱི་ལྷ་ཚོགས་རྟེན་དང་བརྟེན་པར་བཅས་པ་འོད་དུ་ཞུ་བ་སློབ་བུར་ཐིམ་པའི་རྐྱེན་གྱིས་སློབ་མ་ཡང་འོད་དུ་ཞུ་བའི་འོད་ཕུང་མཐིང་ག་ལས་རིགས་འདུས་བཛྲ་ཧེ་རུ་ཀ་དང་། དབང་རྫས་ཀྱི་ལྷ་འོད་དུ་ཞུ་བ་ལས་རྡོ་རྗེ་དང་དྲིལ་བུར་གྱུར། དེ་ལྟ་བུའི་རྡོ་དྲིལ་ལག་ཏུ་གཏད་དེ་སྙིང་གར་བསྣོལ་དུ་བཅུག་པ་ཡན་ལག་ལྔའི་རེག་ཤེས་ཀྱིི་ཐིག་ལེ་ལ་ཐིམ་པར་མོས་ལ། ༀ། ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིིན་པ་སྤྱོད། །དེ་ལྟར་རྡོ་རྗེ་རྒྱལ་པོའི་དབང་བསྐུར་བས་དེང་ཕྱིན་ཆད་བདག་གཞན་གྱི་དོན་ཐམས་ཅད་སྒྲུབ་པ་ལ་དབང་ཐོབ་པར་བསམ་མོ། །སྨོན་ལམ་གདབ་པ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བས་རྡོ་རྗེ་རྒྱལ་པོའི་ས་འཛིན་ཅིང་། དཀྱིལ་འཁོར་ཐམས་ཅད་ཀྱི་བྱེད་པ་པོའི་དབང་དམ་པ་ཐོབ་པར་གྱུར་ཅིག །དེ་ལྟར་ནང་ལུས་ཀྱི་དཀྱིལ་འཁོར་དུ་ནུས་པའི་དབང་ལྔ་བསྐུར་བས་རང་གཞན་གྱི་དོན་དངོས་སུ་བྱེད་པ་ལ་དབང་ཞིང་། ཁྱད་པར་གྱི་བསྐྱེད་རིམ་དང་རྫོགས་རིམ་རྗེས་མཐུན་པ་རྣམས་ཉན་སྒོམ་འཆད་པར་ནུས་པའི་སྐལ་བ་ཅན་དུ་བྱས་པ་ཡིན་ནོ། ༈ །གསུམ་པ་སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་བསྐུར་བ་ལ་གསུམ་ལས། དང་པོ་གསང་དབང་ལ། དཀྱིལ་འཁོར་བཅའ་བ་དང་། དངོས་གཉིས། དང་པོ་ནི། གོ་མ་ཡེས་ཁྱེམ་མེད་པར་བྱུགས་པའི་སྟེགས་བུ་ཚད་ལྡན་ལ་ཡུམ་གྱི་མཁའ་དཀྱིལ་མཚོན་བྱེད་པདྨ་དམར་པོ་འདབ་མ་བཞི་པ་སོར་བཞི་པའི་ཚད་ཅན་དང་། ཐབས་ཀྱི་གསང་བའི་ནོར་བུ་མཚོན་བྱེད་རྡོ་རྗེ་སྔོན་པོ་རྩེ་ལྔ་མཛུབ་གང་བའི་ཚད་ཅན་སོ་སོའི་མཚན་མ་དང་བཅས་པ་དག་བྱའོ། །གཉིས་པ་ནི། མཎྜལ་འབུལ་བ་སྔོན་དུ་འགྲོ་བས། ཧེ་རུ་ཀ་དཔལ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ་གྱིས་གསོལ་བ་གདབ། དེ་ལ་བླ་མས། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་བཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་བཟུང་། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་བྱིན། དེ་ནས་སློབ་དཔོན་དཀྱིལ་འཁོར་གྱི་གཙོ་བོ་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀར་གསལ་བའི་གནས་ལྔར་ཁྲག་འཐུང་རིགས་ལྔ་དང་། ལག་པ་གཡས་གཡོན་ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་ལོ་ཉི་ཤུ་མ་ཡུམ་བཛྲ་ཀྲོ་དྷེ་ཤྭ་རཱི་མར་གསལ་བའི་གནས་ལྔར་རིགས་ཀྱི་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་གར་ཕཊ་ཀྱིས་བཀག་ཅིང་རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཱཾ་དམར་པོར་གནས་པའི་གེ་སར་ལ་ཨ། དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུར་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་པས་བྱང་ཆུབ་ཀྱི་སེམས་འཁོར་ལོ་བཞིར་དགའ་བཞིའི་འགྲོས་ཀྱིས་ཕྱིན་པ་ཡབ་ཀྱི་གསང་བ་རྡོ་རྗེའི་ལམ་ནས་ཡུམ་གྱི་པདྨའི་སྣ་རྩེ་ལ་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་གསལ་བ་ལ་མཆོད་པར་ཕུལ་ཏེ། ཡུམ་མཁར་བསྐྱིལ་བའི་ཡབ་ཡུམ་གྱི་ཉི་ཟླ་བྱང་ཆུབ་ཀྱི་སེམས་གཉིས་འདྲེས། དེ་ཉིད་སློབ་བུའི་ལྕེ་ཐོག་ཏུ་བཞག་པར་མོས་ལ། ཧཱུཾ། ང་ནི་རྒྱལ་བ་ཀུན་གྱི་བླ། །ཐིག་ལེ་བྱང་ཆུབ་སེམས་ཆེན་པོ། །ང་ནི་ཁྲོ་རྒྱལ་ཀུན་གྱི་རྗེ། །ཡེ་ཤེས་རོལ་པའི་འབྱུང་གནས་གཏེར། །ང་ནི་སྤྱི་དཔལ་བླ་ན་མེད། །སྐྱོན་བྲལ་ཐབས་ཀྱི་རྒྱལ་པོ་ཡིན། །སེམས་ཀྱི་དཀྱིལ་ནས་དྲངས་པའི་ཆུ། །ཁྱོད་ཀྱི་ལྕེ་ལ་ཕབ་པ་འདི། །སྙིང་གི་དཀྱིལ་དུ་བཟུང་བར་བྱོས། །རིགས་ཀྱི་བུ་མཆོག་དེང་ཕན་ཆད། །རྡོ་རྗེ་སེམས་དཔའི་ཐུགས་མཆོག་བཟུང་། །སངས་རྒྱས་ཀུན་གྱི་གཙོ་བོ་ཡིན། །བྱང་ཆུབ་སེམས་དང་མཉམ་པའི་ཕྱིར། །སེམས་དཔའ་ཀུན་གྱི་མཆོག་གནས་ཡིན། །རིགས་ཀྱི་བུ་མཆོག་དེང་ཕན་ཆད། །ཕྱི་དང་ནང་དང་གསང་བ་ཡི། །བསྟན་པ་ཕྱི་དང་ཟབ་མོ་ཀུན། །སེམས་ཀྱི་དཀྱིལ་དུ་བསྡུས་ནས་ཀྱང་། །རྡོ་རྗེ་ལྕེ་ཡི་སྒོ་ཕྱེ་སྟེ། །བདུད་རྩི་སྨན་མཆོག་དམ་པ་འདིས། །དད་ལྡན་སྐྱེས་བུ་ངོམས་པར་བྱོས། །སེམས་ཀྱི་ཐིག་ལེའི་དཀྱིལ་འཁོར་དུ། །ཞི་ཁྲོ་འབར་བའི་སྐུ་སྒོམ་ལ། །སྲིད་པ་གསུམ་ལ་དབང་སྒྱུར་ཅིག །དབང་ཅན་ཐམས་ཅད་བཀོལ་བར་བྱོས། །སྐྱེ་འགྲོ་ཀུན་ལ་སྙིང་བརྩེ་ཡིས། །གདུལ་བའི་ཕྱག་རྒྱ་འདི་ཡང་སྤྱོད། །དུག་གསུམ་རྩ་བ་གཅོད་པར་བྱེད། །ཕྱི་ནང་སྣོད་བཅུད་རྣམ་པར་དག །རྣམ་དག་ཆེན་པོ་ཉིད་ཀྱི་ལམ། །བྱེད་སྤྱོད་ཐམས་ཅད་ཚོགས་གཉིས་རྫོགས། །འགྲོ་དོན་བདེ་ཆེན་པདྨའི་དབྱིངས། །སེམས་ཀྱི་ཆུ་འདི་བཏུང་བར་བྱོས། །རྣལ་འབྱོར་ཆེན་པོའི་དམ་དུ་བཟུང་། །ཡུངས་ཀར་ཚད་ཙམ་རྡོ་རྗེ་སེམས། །གནས་ངན་ལེན་པ་གསུམ་སྦྱངས་ཏེ། །ཧཱུཾ་ཉིད་རིང་པོས་མཚམས་སྦྱར་ཏེ། །ཧཱུཾ། ཐམས་ཅད་བདེ་བ་ཆེན་པོའི་དབྱིངས། །དགེ་སྡིག་ལས་ཀྱིས་མ་བཅོས་ཤིང་། །བསྒོམས་ཤིང་བསྒྲུབས་པས་མི་འབྱུང་བའི། །རྣམ་དག་སེམས་ཀྱི་རིན་ཆེན་གཏེར། །རྡོ་རྗེ་སྙིང་པོ་ཡེ་ཤེས་ཀྱིས། །ཁྲོ་རྒྱལ་ཀུན་གྱི་གཙོར་གྱུར་ཅིག །ཤྲཱི་མ་ཧཱ་སུ་ཁ་བཛྲ་བོ་དྷི་ཧཱུཾ་ཧོ་ༀ། ཞེས་བདུད་རྩི་བྱིན། དེ་ལྟར་དབང་བསྐུར་བས། ལྕེ་ཐོག་ཏུ་བཞག་པའི་བྱང་སེམས་ཧཱུཾ་གི་རྣམ་པར་གསལ་བ་དེ་ཉིད་ཡུངས་འབྲུ་ཙམ་གྱི་རྡོ་རྗེ་སེམས་དཔའ་ཤ་སྟག་ཏུ་གྱུར་པ་སྙིང་གར་ཐིམ་པས་ཆོས་ཀྱི་འཁོར་ལོའི་རྩ་ཆེན་བཞི་ལ་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་སྦྱངས་ནས་སེམས་ཉིད་རྣམ་པར་མི་རྟོག་པའི་རང་བཞིན་དོན་སྤྲོས་མེད་བདེ་བ་ཆེན་པོའི་ཡེ་ཤེས་རྒྱུད་ལ་སྐྱེས་པར་བསམ་མོ། །སྨོན་ལམ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་གསང་བ་བྱང་ཆུབ་སེམས་ཀྱིི་ད བང་བསྐུར་བས་གནས་ངན་ལེན་པའི་ས་བོན་བག་ཆགས་དང་བཅས་པ་དག་ནས་གནས་ལུགས་དོན་དམ་སྐྱེ་མེད་ཀྱི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ནས་སླར་ཡང་སློབ་མའི་ཤེས་པ་ཧཱུཾ་ཡིག་ཤེལ་ལྟར་དྭངས་པ་ཡོངས་སུ་གྱུར་པ་ལས། སྐད་ཅིག་གིས་ཆེ་མཆོག་ཧེ་རུ་ཀ་མཐིང་ནག་རྡོ་རྗེ་དང་ཐོད་ཁྲག་བསྣམས་པ། དེའི་ཐུགས་ཀར་གུ་ཧྱ་ཧེ་རུ་ཀ་སྔོན་པོ་རྡོར་དྲིལ། དེའི་ཐུགས་ཀར་ས་ནུ་ཧེ་རུ་ཀ་དཀར་པོ་ཕྱག་གཉིས་རྡོ་རྗེ་རྩེ་གཅིག་པའི་ཕྱག་རྒྱ་ཅན་གསལ་བཏབ་སྟེ་རྡོ་རྗེ་དང་དྲིལ་བུ་ལྷན་ཅིག་སྙིང་གར་བཟུང་ལ་བདེན་པ་བརྗོད་པ་ནི། ༀ། མི་འགྱུར་བ་ཡི་ཡེ་ཤེས་གནས། །མ་བཙལ་ཕྱིན་པས་བདེ་བའི་མཆོག །མ་བལྟས་གསལ་བའི་ཡེ་ཤེས་སྤྱན། །གོང་ན་མེད་པས་ཀུན་གྱི་རྗེ། །ཡེ་ཤེས་རང་གནས་བརྡལ་བ་ལ། །མི་འགྱུར་གཡུང་དྲུང་ས་ཐོབ་ཤོག །ༀ་མ་ཧཱ་གུ་ཧྱ་བྷྲཱུཾ་ཛྙཱ་ན་མཎྜལ་ཛྙཱ་ན་གུ་ཧྱ་སིདྡྷི་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བདེན་པ་བརྗོད། དེ་ཉིད་ནུས་པ་ཅན་དུ་བྱ་བའི་ཕྱིར་ཀ་པཱ་ལའི་དབུ་རྒྱན་དང་ཞིང་གི་ཅོད་པན་མཐིང་དམར་གྱིས་དབང་བསྐུར་ཏེ། དེ་ཡང་དབུ་རྒྱན་བསྐོན་ལ། ཧཱུཾ། ཐབས་མཁས་ཐུགས་རྗེ་བྱིན་རླབས་ཀྱིས། །རིགས་ཀྱི་བུ་མཆོག་དབང་བསྐུར་ཕྱིར། །གསང་བའི་དབུ་རྒྱན་འདི་བཅིངས་པས། །རིགས་ཀྱི་བུ་མཆོག་དེང་ཕན་ཆད། །འཇིག་རྟེན་ཆེ་བ་ཀུན་གྱི་བླ། །ཆེ་བས་ཆེ་བ་ཟིལ་གྱིས་གནོན། །སངས་རྒྱས་ཆེ་བ་མཆོད་ནས་ནི། །རྣལ་འབྱོར་ཆེན་པོ་ཁྱོད་ཉིད་ཡིན། །ༀ་ཏ་ཐཱ་ག་ཏོ་གུ་ཧྱ་བཛྲ་རཏྣ་མུ་ཀུ་ཊ་ཏྲཾ་ཏྲཾ། བཛྲ་གུ་ཧྱ་སིདྡྷི་ཧཱུཾ། ཅོད་པན་བཅིངས། ཧ། ཁྱུང་གི་གཤོག་པ་གཡས་གཡོན་གདེངས་པ་ཡིས། །ཀླུ་རྣམས་ཟིལ་གྱིས་གནོན་པར་བྱེད་པ་ལྟར། །སྲིད་གསུམ་ཡོན་ཏན་མཆོག་ཏུ་རྫོགས་པ་ཡི། །སངས་རྒྱས་ཀུན་ལ་མཛེས་པའི་ཅོད་པན་མཆོག །མཆོག་ཏུ་ཆེ་བས་བདུད་བཞི་ཟིལ་གྱིས་གནོན། །ༀ་ཏ་ཐཱ་ག་ཏོ་མ་ཧཱ་གུ་ཧྱ་བཛྲ་མཱ་ལ་ཨ་བྷི་ཥིཉྩ་ཧོཿ དེ་ནས་དབུགས་དབྱུང་བ་ནི། བུ་ཁྱོད་མཚན་མའི་རྟོག་བྲལ་ཞིང་། །ཚེ་རིང་བདེ་བ་ཕུན་སུམ་ཚོགས། །ཀུན་ལ་སྤྱོད་པའི་དབང་ཐོབ་ནས། །སློབ་མ་བདེ་ལ་འགོད་བྱེད་པའི། །དབང་ཕྱུག་ཆེན་པོར་དེང་གྱུར་ཏོ། །ཞེས་བརྗོད། གསང་བ་གཉེར་གཏད་པ་ནི། གསང་བའི་དོན་མཆོག་འདི་དག་ནི། །ལྟ་བ་དམན་ལ་བསྟན་བྱས་ན། །དུས་མིན་པར་ནི་སྲོག་ཟད་ནས། །མགོ་འགས་སྙིང་ཡང་འཚིག་པར་འགྱུར། །ཁབ་ལེན་གྱིས་ནི་ལྕགས་སྡུད་ལྟར། །མི་འདོད་བཞིན་དུ་དབང་མེད་པར། །བསྐལ་པར་ངན་སོང་མྱོང་བར་འགྱུར། །དེ་བས་ཤིན་ཏུ་གསང་བར་བྱ། །ཞེས་བསྒོ། གཉིས་པ་ཡེ་ཤེས་རང་གནས་སམ་ཤེས་རབ་ཡེ་ཤེས་ཀྱི་དབང་ནི། མཎྜལ་སྔོན་དུ་འགྲོ་བས་བླ་མ་ལ་ཕྱག་རྒྱ་མཚན་ལྡན་ལོ་བཅུ་དྲུག་མ་རྒྱུད་དག་པར་བྱས་པ་ཡང་ཕུལ་ཏེ། ཧེ་རུ་ཀ་དཔལ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་གསོལ་གདབ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་བཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་རུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་ཟུང་། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་བྱིན། དེ་ནས་སློབ་བུའི་གུང་མོ་གཡས་དང་ཕྱག་རྒྱའི་གུང་མོ་གཡོན་པ་ལྟོ་སྦྱར་ཏེ་རཏྣའི་ཕྲེང་བས་བཅིངས་པའི་རྩེ་ནས་དབང་ཕྱུག་གི་མཐེབ་སྲིན་གྱིིས་བཟུང་སྟེ་སློབ་མ་ལ་གཏད་པར་མོས་ལ། བདེ་བ་ཆེན་པོ་ཆོས་ཀྱི་སྐུ། །ཤེས་རབ་ཐབས་ཀྱིས་རྫོགས་པར་འགྱུར། །འདི་དང་སྐྱེ་བ་ཐམས་ཅད་དུ། །དངོས་གྲུབ་བདེ་འདི་མ་སྤོངས་ཤིག །རྒྱལ་བ་སངས་རྒྱས་ཐམས་ཅད་ཀྱི། །རྫོགས་པའི་ཕྱག་རྒྱ་ཁྱོད་ལས་བྱུང་། །སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེ་བསྐལ་པ་མཐའ་ཀླས་པར། །ཆོས་སྐུ་ཐོབ་པར་མི་འགྱུར་རོ། །ཞེས་གཏད། དེ་ནས་སློབ་མ་དང་གཏད་པའི་ཕྱག་རྒྱ་གཉིས་ཕན་ཚུན་འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱས་རྗེས། སློབ་མ་དཀྱིལ་འཁོར་གྱི་གཙོ་བོ་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀར་གསལ་བའི་གནས་ལྔར་ཁྲག་འཐུང་རིགས་ལྔ་དང་། ལག་པ་གཡས་གཡོན་ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་ཡུམ་བཛྲ་ཀྲོ་དྷེ་ཤྭ་རཱི་མར་གསལ་བའི་གནས་ལྔར་རིགས་ཀྱི་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་བའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་གས་ཕཊ་ཀྱིས་བཀག་ཅིང་རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཱཾ་དམར་པོར་གནས་པའི་གེ་སར་ལ་ཨེ། དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས་སྙོམས་པར་ཞུགས་པས་རྗེས་ཆགས་ཀྱི་རླུང་བསྐྱོད་པས་གཏུམ་མོ་འབར་བའི་རྐྱེན་གྱིས་བྱང་ཆུབ་ཀྱི་སེམས་ཞུ་བ་ལ་བརྟེན་ནས་རྩ་གནས་ཐམས་ཅད་ནས་ཐིག་ལེ་གཡོས་པས་བདེ་བ་འགོ་ལྡང་བའི་ཚུལ་དུ་སྐྱེས་པ་གཡོ་ལྡང་བྱང་ཆུབ་ཀྱི་སེམས་དང་། བདེ་བ་ཕྱི་མ་འཇུག་པའི་ཚེ་སྔ་མ་འཇིག་ཅིང་མཐར་ཐམས་ཅད་འགག་པ་འཇིག་འཇུག་བྱང་ཆུབ་ཀྱི་སེམས་དང་། རྟེན་ཅན་གྱི་བདེ་བ་རང་ས་ན་གནས་པ་མེད་པའི་ཚུལ་གྱིས་ཐམས་ཅད་གནས་པ་གནས་པ་བྱང་ཆུབ་ཀྱི་སེམས་དང་། སྔ་མའི་བདེ་བས་མཚོན་ནས་ཕྱི་མའི་བདེ་བ་ཐམས་ཅད་ལ་དམིགས་ཤིང་འདུན་པ་སྨོན་པ་བྱང་ཆུབ་ཀྱི་སེམས་དང་། དེ་ལྟར་གནས་བཞིར་དགའ་བཞིའི་འགྲོས་ཀྱིས་སོང་བའི་ཡབ་ཡུམ་གྱི་རྩ་ཐམས་ཅད་ཀྱི་བཅུད་འདུས་པའི་སྙིང་པོ་ཉི་ཟླའི་དྭངས་མ་མཁའ་གསང་རྡོ་རྗེ་དང་པདྨའི་རྩེར་འཕྲད་དེ་ཞལ་མཇལ་བ་ལས་ཐབས་ཉིད་ཤེས་རབ་ཏུ་སྦྱོར་བ། ཤེས་རབ་ཐབས་སུ་སྦྱོར་བ། ཐབས་ཤེས་གཉིས་མེད་དུ་སྦྱོར་བ་སྟེ། སྦྱོར་བ་གསུམ་གྱི་སྒོ་ནས་དངོས་པོ་ལྷན་ཅིག་སྐྱེས་པའི་དགའ་བ་ཉམས་སུ་མྱོང་བ་མཐར་ཕྱིན་པ་བྱང་ཆུབ་ཀྱི་སེམས་ཏེ། དེ་ལྟར་སེམས་ལྔའི་རིམ་པས་ཡས་བབས་བདེ་བ་ཆེན་པོའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་མོས་ལ། ཧཱུཾ། རྗེས་སུ་འཇུག་པའི་ཕྱག་རྒྱ་ཉིད། །ཟིལ་པའི་ཐིག་ལེ་སྔོན་ལམ་བཞིན། །བཅུ་དྲུག་ཕྱེད་ཕྱེད་ཐིག་ལེ་གཅིག །ཕན་ཚུན་དགོད་པའི་སྟབས་ཀྱིས་བསྟིམ། །བདེ་བ་གཉིས་པའི་ངོ་བོ་ཉིད། །གསུམ་པའི་ཡེ་ཤེས་དཀྱིལ་འཁོར་དུ། །གསལ་བར་ཤར་བས་གྱུར་པའི་སྒྲ། །རང་བཞིན་འོད་གསལ་དཀྱིལ་འཁོར་རོ། །ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ་ཧཱུཾ། ཨ་བྷི་ཥིཉྩ་ཧཱུཾ། དེ་ལྟར་བསྐུལ་ཚིག་གིས་ཉམས་སུ་མྱོང་བའི་དོན་ངོ་སྤྲད་པས་སེམས་ཉིད་དོན་དམ་འོད་གསལ་དུ་དྭངས་པའི་རྟགས་སྣང་ལྷག་པ་ཀུན་རྫོབ་ཀྱི་ཡེ་ཤེས་སུ་ཤར་བས་ལྷན་སྐྱེས་བདེ་བ་ཆེན་པོ་རྒྱུད་ལ་སྐྱེས་ཏེ་ཤེས་རབ་ཡེ་ཤེས་ཀྱི་དབང་ཐོབ་པར་བསམ་མོ། །སྨོན་ལམ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་ཡེ་ཤེས་རང་གནས་ཀྱི་དབང་བསྐུར་བས་ཤེས་བྱའི་དྲི་མ་དག་ནས་དོན་དམ་པ་འགག་མེད་ཀྱི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ནས་རྡོར་དྲིལ་སློབ་བུའི་སྙིང་གར་བཟུང་ལ། ༀ། མི་འགྱུར་བ་ཡི་ཡེ་ཤེས་གནས། །མ་བཙལ་ཕྱིན་པས་བདེ་བའི་མཆོག །མ་བལྟས་གསལ་བའི་ཡེ་ཤེས་སྤྱན། །གོང་ན་མེད་པས་ཀུན་གྱི་རྗེ། །ཡེ་ཤེས་རང་གནས་བརྡལ་བ་ལ། །མི་འགྱུར་གཡུང་དྲུང་ས་ཐོབ་ཤོག །ༀ་མ་ཧཱ་གུ་ཧྱ་བྷྲཱུཾ་ཛྙཱ་ན་མཎྜ་ལ་ཛྙཱ་ན་གུ་ཧྱ་སིདྡྷི་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བདེན་པ་བརྗོད། དེ་ནས་དབུགས་དབྱུང་བ་ནི། དེ་རིང་ཕན་ཆད་བུ་ཁྱོད་ནི། །རང་རིག་བདེ་ལ་གནས་པས་ན། །རྡོ་རྗེ་སེམས་དཔའ་ཞེས་བྱ་སྟེ། །ཡུམ་དང་འཇོ་མ་ཐམས་ཅད་ལ། །འདོད་བཞིན་སྤྱོད་པའི་དབང་ཕྱུག་འགྱུར། །རིགས་སུ་གྱུར་རྣམས་ཐབས་འདི་བཟུང་། །མཐུན་འཇུག་མཚམས་ལས་འགྲོ་འདུལ་བའི། །དབང་ཕྱུག་རྒྱལ་པོ་ཉིད་དུ་ངེས། །ཞེས་བརྗོད། གསུམ་པ་དབྱེར་མེད་བདེ་བ་ཆེན་པོའི་དབང་ནི། མཎྜལ་སྔོན་དུ་འགྲོ་བས་བླ་མ་ལ་ཕྱག་རྒྱ་མཚན་ལྡན་ལོ་བཅུ་གཉིས་མ་རྒྱུད་དག་པར་བྱས་པ་ཡང་ཕུལ་ཏེ། ཧེ་རུ་ཀ་དཔལ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་སྟེ། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་གསོལ་བ་གདབ། བུ་འདིར་ཤོག་ཅིག་ཅི་བདེ་བར། །ལས་སྤྱོད་རིམ་པར་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་བཟུང་། །རྫོགས་པའི་ཡེ་ཤེས་བདེ་ཆེན་ལ། །དམིགས་པ་མེད་པར་གནས་ཕྱིར་དུ། །སེར་སྣ་སྤངས་པའི་དང་ཡིད་ཀྱིས། །གཏོང་ཞིང་རང་སེམས་བརྟན་པོར་བཟུང་། །ཡེ་ཤེས་རང་གནས་རྫོགས་དབང་སྦྱིན། །ཞེས་གནང་བ་བྱིན། དེ་ནས་སློབ་བུའི་གུང་མོ་གཡས་དང་ཕྱག་རྒྱའི་གུང་མོ་གཡོན་པ་ལྟོ་སྦྱར་ཏེ་རཏྣའི་ཕྲེང་བས་བཅིངས་པའི་རྩེ་ནས་དབང་ཕྱུག་གི་མཐེབ་སྲིན་གྱིས་བཟུང་སྟེ་སློབ་མ་ལ་གཏད་པར་མོས་ལ། བདེ་བ་ཆེན་པོ་ཆོས་ཀྱི་སྐུ། །ཤེས་རབ་ཐབས་ཀྱིས་རྫོགས་པར་འགྱུར། །འདི་དང་སྐྱེ་བ་ཐམས་ཅད་དུ། །དངོས་གྲུབ་བདེ་འདི་མ་སྤོངས་ཤིག །རྒྱལ་བ་སངས་རྒྱས་ཐམས་ཅད་ཀྱི། །རྫོགས་པའི་ཕྱག་རྒྱ་ཁྱོད་ལས་བྱུང་། །སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེ་བསྐལ་པ་མཐའ་ཀླས་པར། །ཆོས་སྐུ་ཐོབ་པར་མི་འགྱུར་རོ། །ཞེས་གཏད། དེ་ནས་སློབ་མ་དང་གཏད་པའི་ཕྱག་རྒྱ་གཉིས་ཕན་ཚུན་འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱས་རྗེས། སློབ་མ་དཀྱིལ་འཁོར་གྱི་གཙོ་བོ་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀར་གསལ་བའི་གནས་ལྔར་ཁྲག་འཐུང་རིགས་ལྔ་དང་ལག་པ་གཡས་གཡོན་ཁ་དང་གསང་བའི་ཕྱི་རྣམས་སུ་ཁྲོ་བོ་བཞི། ཕྱག་རྒྱ་ལོ་བཅུ་གཉིས་མ་ཡུམ་བཛྲ་ཀྲོ་དྷེ་ཤྭ་རཱི་མར་གསལ་བའི་གནས་ལྔར་ཡུམ་ལྔ་དང་། ཡན་ལག་བཞི་ལ་ཁྲོ་མོ་བཞི་རྣམས་གསལ་བར་གྱུར། ཤཱུ་ནྱ་ཏཱ་སྔོན་འགྲོས་བསྐུར། བརླབ། དབབ། དྲངས། བསྟིམ། བརྟན། མཆོད་ནས། ཡབ་ཀྱི་གསང་གནས་ཧཱུཾ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ༀ་དཀར་པོར་གནས་པའི་བུ་གར་ཕཊ་ཀྱིས་བཀག་ཅིང་རྭ་ལྔ་ལ་ཉི་མ་ལ་གནས་པའི་དཔའ་བོ་འབྲུ་ལྔ། ཡུམ་གྱི་མཁའ་པཾ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མ་ལ་རཀྟ་ཨཱཾ་དམར་པོར་གནས་པའི་གེ་སར་ལ་ཨེ། དབུས་དང་འདབ་བཞིར་ཟླ་བ་ལ་གནས་པའི་དཔའ་མོ་འབྲུ་ལྔས་མཚན་པར་བསམ་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མྱེ། ཞེས་སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། སྙོམས་པར་ཞུགས་པའི་བྱང་ཆུབ་ཀྱི་སེམས་འཁོར་ལོ་བཞིར་ཡས་བབས་ཀྱི་རིམ་པས་དགའ་བ་བཅུ་དྲུག་གི་འགྲོས་ཀྱིས་ཕྱིན་པ་ལས་ཉི་ཟླ་ཟུང་འབྲེལ་གྱིས་མཚན་སོ་གཉིས་དང་། ཟླ་བའི་ཐིག་ལེ་རེ་རེ་བཞི་ཡེ་ཤེས་ལྔའི་ཉམས་དང་ལྡན་པས་དཔེ་བྱད་བརྒྱད་ཅུ་རྫོགས་ཤིང་མངོན་ཤེས་དྲུག་ཀྱང་ཤར་ནས་ཡུམ་གྱི་རྩ་ཁ་ཁ་མུ་ཁའི་རྩེར་ཉི་ཟླ་གཉིས་འདྲེས་འཁྱིལ་བ་དེ་ཉིད་རྡོ་རྗེ་ནོར་བུར་བསྟིམ་པ་ཧཱུཾ་ཞེས་གྱེན་དུ་ལྡོག་པའི་སྦྱོར་བས་མས་བརྟན་གྱི་དགའ་བཞིའི་ཡེ་ཤེས་ཉམས་སུ་མྱོང་བར་བྱས་པའི་དགའ་བཞིའི་ཡེ་ཤེས་རེ་རེ་ལ་ཡང་དགའ་བ་བཞི་བཞི་སྟེ་བཅུ་དྲུག་གི་དང་པོ་བཞིས་ཚོགས་ལམ་དང་། དེ་ནས་རེ་རེས་སྦྱོར་མཐོང་། དེ་ནས་དགུས་སྒོམ་ལམ་ས་དགུ་རྫོགས་ཏེ། དགའ་བ་བཅུ་དྲུག་གི་མཐའ་མ་རང་བཞིན་ལྷན་ཅིག་སྐྱེས་པ་བདེ་བ་ཆེན་པོའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་དེའི་ཚེ་ན་སྣང་སྟོང་གི་མཐས་མ་སྒྲིབས་པར་གསལ་བས་ཀུན་ཏུ་འོད་དང་། མི་ཤིགས་པའི་དྭངས་མས་ལུས་ཐམས་ཅད་ལ་ཁྱབ་ཅིང་བརྟན་པས་འཁོར་བའི་སྐྱོན་གྱིས་མ་གོས་པས་པདྨ་ཅན་དང་། རྟོགས་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་རང་སྣང་བས་ཡི་གེ་འཁོར་ལོའི་ས་རྫོགས་ཏེ། མདོར་ན་ཐུན་མོང་དང་ཁྱད་པར་གྱི་ས་ལམ་ཐམས་ཅད་རྫོགས་པར་བྱས་པར་མོས་ལ། ཧཱུཾ། རྡོ་རྗེ་ཉི་མ་ཐབས་ཀྱི་རྒྱ། ཕུང་སོགས་ཕྱག་རྒྱའི་ཚོགས་དང་ལྡན། །དེ་ཟླ་བསིལ་བྱེད་ཤེས་རབ་དངོས། །དུས་གཅིག་རོ་མཉམ་ཐིག་ལེ་ཆེ། །སུམ་ཅུ་རྩ་གཉིས་མཚན་རྫོགས་ཤིང་། །ཟླ་བའི་ཡེ་ཤེས་ལྔ་བཅུ་དྲུག །དཔེ་བྱད་ལ་སོགས་དཔག་ཏུ་མེད། །སེམས་ཤེས་མངོན་པར་ཤེས་དང་ལྡན། །སེམས་མཐའ་འགྲོ་འོང་རྫུ་འཕྲུལ་ཤེས། །གནས་ནས་ལོག་པ་ཐིམ་པའི་སྒྲ། །མཐའ་གཉིས་མ་གོས་པདྨ་ཅན། །སྤྲུལ་པའི་གནས་ནས་བཀྱེ་བ་ཡིས། །བཞི་བཅུ་ལྔ་སོགས་མཐའ་ཡས་ཀུན། །རང་བཞིན་ཉིད་ལས་རང་གསལ་བ། །བཅུ་གསུམ་ཡི་གེ་འཁོར་ལོ་བརྗོད། །ༀ་དྷརྨ་ཀཱ་ཡ་ཨ་བྷི་ཥིཉྩ་ཧཱུཾ། དེ་ལྟར་བསྐུལ་ཚིག་གིས་ཉམས་སུ་མྱོང་བའི་དོན་ངོ་སྤྲད་པས་འཁོར་འདས་མཉམ་ཉིད་བདེ་བ་ཆེན་པོའི་དཀྱིལ་འཁོར་དུ་དབང་བསྒྱུར་ཏེ། མཆོག་ཏུ་མི་འགྱུར་བ་དེ་ཁོ་ན་ཉིད་ཀྱི་དོན་མངོན་དུ་བྱས་པར་བསམ་མོ། །སྨོན་ལམ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་བདེ་བ་ཆེན་པོའི་དབང་བསྐུར་བས་སྒྲིབ་གཉིས་བག་ཆགས་དང་བཅས་པ་དག་ནས་སྐྱེ་འགག་གཉིས་སུ་མེད་པ་ཟུང་འཇུག་དོན་དམ་པའི་ཡེ་ཤེས་མངོན་དུ་རྟོགས་པའི་དབང་དམ་པ་ཐོབ་པར་གྱུར་ཅིག །དེ་ལྟར་གསང་བ་བྷ་གའི་དཀྱིལ་འཁོར་དང་། དེ་ཁོ་ན་ཉིད་སེམས་ཀྱི་དཀྱིལ་འཁོར་དུ་ཟབ་མོའི་དབང་གསུམ་བསྐུར་བས་ཐུན་མོང་མ་ཡིན་པའི་རྫོགས་རིམ་རྣམས་ཉན་སྒོམ་ནུས་པའི་སྐལ་བ་ཅན་དུ་བྱས་པ་ཡིན་ནོ། ༈ །དེ་ནས་དབང་མ་ཐོབ་པ་དང་ཐོབ་པའི་སྐྱོན་ཡོན་བཤད་པ་ནི། རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་དབང་མ་ཐོབ་པའི་སྐྱོན་དང་། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དབང་ཐོབ་པའི་ཕན་ཡོན་གསུངས་ཏེ། དེ་བས་ན་བསྐྱེད་རྫོགས་ཀྱི་ལམ་ཟབ་མོ་ཉམས་སུ་ལེན་པ་ལ། དང་པོར་དབང་ནོད་པ་ཤིན་ཏུ་ནས་གཅེས་པ་ཡིན་ནོ། །དེས་དབང་བསྐུར་བའི་རིམ་པ་དངོས་སོང་ནས་རྗེས་ཀྱི་རིམ་པ་ལ་བཞི་ཡོད་པའི་དང་པོ་དབང་རྟགས་སྦྱིན་ཞིང་བཀའ་བསྒོ་བ་ནི། སློབ་མའི་ལག་ཏུ་རྡོ་རྗེ་གཏད་དེ་གསོར་དུ་བཅུག་ལ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །དྲིལ་བུ་གཏད་དེ་དཀྲོལ་དུ་བཅུག་ལ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་དབང་ཆེན་ཏེ། །མྱ་ངན་འདས་དང་འཁོར་བ་ཡི། །ཆོས་ལ་འདོད་བཞིན་དབང་བསྐུར་རོ། །དེ་ནས་སླར་ཡང་རྡོར་དྲིལ་བསྣོལ་ནས་སློབ་བུའི་ལག་པ་གཡས་གཡོན་དུ་གཏད་དེ། རྡོ་རྗེ་གསོར་ཞིང་དྲིལ་བུ་དཀྲོལ་དུ་བཅུག་ལ། བཛྲ་གྷཎྜེ་ཨ་བྷི་ཥིཉྩ་ཧཱུཾ། ཞེས་བརྗོད། སྨོན་ལམ་ནི། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་ལ་དབང་རྟགས་རྡོ་རྗེ་དང་དྲིལ་བུ་གཏད་དེ་དབང་བསྐུར་བས་ཐབས་དང་ཤེས་རབ་གཉིས་སུ་མེད་པས་འགྲོ་བ་སེམས་ཅན་གྱི་དོན་རྒྱུན་མི་ཆད་པར་བྱེད་པའི་དབང་དམ་པ་ཐོབ་པར་གྱུར་ཅིག །དེ་ནས་དབང་ཕྱུག་དབང་ཁྲི་ལ་འདུག་པའི་ཞབས་གཡས་པ་ལ་མགོ་བོས་གཏུག་ཏུ་བཅུག་སྟེ། དེ་རིང་ཕན་ཆད་བུ་ཁྱོད་ཀྱི། །ཧེ་རུ་ཀ་དཔལ་ང་ཡིན་པས། །ང་ཡིས་ཇི་སྐད་བསྒོ་བ་བཞིན། །བུ་ཁྱོད་ཀྱིས་ནི་བྱ་དགོས་སོ། །ཞེས་བཀའ་བསྒོ། གཉིས་པ་བུམ་ཆུ་བླུད་ཅིང་སྨོན་ལམ་གདབ་པ་ནི། དབང་ཕྱུག་བཞེངས་ཏེ་དབུས་ཀྱི་བུམ་པ་བཏེགས་ལ། དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་བུམ་ཆུ་བླུད། ཏིཥྛ་བཛྲ་ཞེས་དབང་རྣམས་བརྟན་པར་བྱ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི༴ བདེན་པ་ཆེན་པོའི་བྱིན་གྱི་རླབས་ཀྱིས། ཞེས་བདེན་སྟོབས་བརྗོད་པ་སྔོན་དུ་འགྲོ་བས། བདག་རྡོ་རྗེ་སློབ་དཔོན་ཆེ་གེ་མོས་ཆེ་གེ་མོ་ལ་སོགས་པའི་སློབ་བུ་རྣམས་ལ་སྒྱུ་འཕྲུལ་དྲྭ་བའི་དབང་བསྐུར་བས། དུས་འདི་ཕྱིན་ཆད་ངན་སོང་གསུམ་ལ་སོགས་པའི་སྡུག་བསྔལ་ཐམས་ཅད་དང་བྲལ་ནས་མཐོ་རིས་ཀྱི་བདེ་བ་ཕན་སུམ་ཚོགས་པ་དང་ལྡན་ཏེ། དེ་ལས་ཀྱང་རྒྱལ་བའི་སྲས་རིགས་ཕུན་སུམ་ཚོགས་པའི་སྲས་སུ་ངེས་པར་དབང་གི་འབྲས་བུ་མ་ལུས་པ་ལ་དབང་ཐོབ་ནས། སྲིད་པའི་སེམས་ཅན་མཐའ་དག་གི་དོན་ཡོངས་སུ་རྫོགས་པར་བྱེད་པར་གྱུར་ཅིག །ཡུལ་ཕྱོགས་འདི་ལ་སོགས་ཏེ་རྒྱལ་ཁམས་ཐམས་ཅད་དུ་དུས་ཀྱི་འཁྲུག་པ་ཞི་བར་གྱུར་ཅིག །མཚོན་གྱི་བསྐལ་པ་ཉམས་པར་གྱུར་ཅིག །མི་ནད་དང་ཕྱུགས་ནད་ཐམས་ཅད་རྒྱུན་ཆད་པར་གྱུར་ཅིག །ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས་ཏེ་སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །གསུམ་པ་དབང་ཕྱུག་གི་དབང་བསབ་ཅིང་སློབ་བུའི་ལུས་བསླུ་བ་ནི། དབང་ཕྱུག་བཅོམ་ལྡན་འདས་དགྱེས་པ་ཆེན་པོ་དཔལ་ཧེ་རུ་ཀར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་རྫས་ཀྱི་རབ་གནས་ཀྱི་ལྷ་རྣམས་གསལ་གཏབ་པ་ལས། སླར་ཡང་ཧཱུཾ་ཞེས་བརྗོད་ཅིང་བསྐུར་གནས་རྣམས་སུ་དབང་རྫས་རྣམས་གཏུགས་པས། ལྷ་རྣམས་འོད་དུ་ཞུ་བ་སོ་སོའི་མཚུངས་ལྡན་གྱི་རྒྱུ་ལ་ཐིམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་མདུན་གྱི་ནམ་མཁར་དཔང་པོའི་ཚུལ་དུ་བཞུགས་པའི་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་འོད་དུ་ཞུ་ནས་དབང་ཕྱུག་ལ་ཐིམ་པས་སྔར་བས་ཀྱང་ནུས་པ་ཆེར་སྐྱེས་ཤིང་གཟི་འོད་འབར་བར་བསམ་མོ། །དེ་ནས་སློབ་བུ་རྣམས་ཀྱིས་ཕྱག་སྔོན་དུ་འགྲོ་བས་ཅི་འབྱོར་བའི་དངོས་པོས་ལུས་བསླུ་བར་བྱ་སྟེ། ཐལ་མོ་སྦྱར་ལ། གཉིས་མེད་རྒྱལ་བའི་མཆོག་ལ་རབ་གནས་ཤིང་། །སྐུ་གསུང་ཐུགས་ཀྱི་རོལ་བ་ཅིར་སྟོན་པའི། །བླ་མེད་སྨན་པའི་རྒྱལ་པོ་དགོངས་སུ་གསོལ། །ཟང་ཟིང་རྫས་ཀྱི་དགོས་པས་མ་བྲེལ་ཀྱང་། །བདག་འཛིན་སྡུག་བསྔལ་རྟོག་པས་བཅིངས་པ་ཡི། །འཁོར་བའི་འདམ་རྫབ་ཀློང་ནས་དྲང་བའི་ཕྱིར། །འབྱོར་པས་དམིགས་པའི་མཆོད་པ་བཞེས་སུ་གསོལ། །ཞེས་ལུས་བསླུ། བཞི་པ་གཏང་རག་གིས་མཆོད་ཅིང་ཡོན་དབུལ་བ་ནི། སློབ་བུའི་གཙོ་བོས་ཀ་པཱ་ལ་མཚན་ལྡན་བདུད་རྩིས་བཀང་བ་མར་ཆོལ་དང་བཅས་པ་བཏེགས་ལ། ཁྱོད་ནི་ཡེ་ནས་སྐུ་གསུང་ཐུགས་ཀྱི་དཔལ། །དཔལ་གྱི་ཕྱག་རྒྱ་མང་པོ་ཐོབ་པའི་ཕྱིར། །དུས་གསུམ་ཀུན་ཏུ་སངས་རྒྱས་ཡིན་པའི་རྟགས། །རྡོ་རྗེ་ཆེ་མཆོག་ཁྱོད་ལ་ཕྱག་འཚལ་བསྟོད། །ཅེས་དབང་ཕྱུག་གི་ཞལ་དུ་དྲང་ཞིང་ཅི་འབྱོར་བའི་ཡོན་དབུལ། རྗེས་དམ་ཚིག་ཁས་བླང་བ། མཎྜལ་འབུལ། དགེ་བ་བསྔོ་ཞིང་ཤིས་པ་བརྗོད་པས་ཀྱང་མཐའ་བརྒྱན་པར་བྱའོ། །རྗེས་ཀྱི་ཆོ་ག་རྣམས་ཀྱང་སྒྲུབ་དཀྱིལ་བཞིན་ཤེས་པར་བྱའོ། །ཤིན་ཏུ་གསང་བ་ལྷན་སྐྱེས་བདེ་བའི་དངོས། །རྣམ་པ་ཀུན་ལྡན་ཆོས་ཀུན་སྙིང་པོའི་བཅུད། །དུས་གསུམ་རྒྱལ་བའི་དགོངས་དོན་དེ་ཁོ་ན། །འཁྲུལ་མེད་ཇི་བཞིན་ཉིད་སྟོན་ངེས་པའི་ལམ། །རང་སྣང་ཁྲག་འཐུང་ལྔ་བཅུ་རྩ་བརྒྱད་ལྷའི། །ཡེ་ཤེས་རྡོ་རྗེའི་རོལ་མོར་ལོངས་སྤྱོད་ཕྱིར། །རིམ་གཉིས་རིན་ཆེན་ཁང་པར་འཇུག་པའི་སྒོ། །སྟོན་བྱེད་ཚངས་པའི་གད་རྒྱངས་དབྱངས་སུ་བླངས། །གཏིང་དཔག་དཀའ་བ་རྒྱུད་དོན་རྒྱ་མཚོའི་མཐའ། །བྱིས་པའིི་ངང་ཚུལ་བདག་ལྟས་ཅི་སྟེ་མཚོན། །འོན་ཀྱང་སྔོན་བྱོན་མཁས་པའི་བསྟན་བཅོས་དང་། །དམ་པའི་གསུང་རྒྱུན་ཇི་བཞིན་ཡི་གེར་སྤེལ། །འདིར་འབད་དགེ་བ་ཉིན་མོར་བྱེད་པའི་གཟིས། །བློ་གསལ་སྙིང་གི་པདྨོ་ཆེར་བཞད་པས། །སྐལ་ལྡན་རྐང་དྲུག་ཚོགས་རྣམས་ཡིད་འཕྲོག་སྟེ། །ལེགས་བྱས་སྦྲང་རྩིའི་དཔལ་ལ་སྤྱོད་གྱུར་ཅིག །སྒྱུ་འཕྲུལ་དྲྭ་བ་ཁྲོ་བོ་བསྡུས་པའི་དབང་གི་ཆོ་ག་ཁྲག་འཐུང་རྡོ་རྗེའི་གད་རྒྱངས་ཞེས་བྱ་བ་འདི་ཡང་རང་གཞན་མང་པོར་ཕན་འདོད་དང་། ཉེ་ཆར་རིགས་ཀྱི་གཅུང་འགྱུར་མེད་ཡིད་བཞིན་ལེགས་པར་གྲུབ་པའི་གསུང་གིས་ཀྱང་བསྐུལ་མ་བཏབ་པར་བརྟེན་དྲིན་ཅན་བླ་མ་གཏེར་བདག་གླིང་པ་མཆེད་ཀྱི་ཞབས་རྡུལ་སྤྱི་བོས་ལེན་པ་སྨྱོས་བན་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེས་རང་ལོ་ཉེར་གཅིག་པ་མི་ཟད་པའི་ལོ་སྨིན་དྲུག་ཟླ་བའི་དཀར་ཕྱོགས་ཀྱི་གྲལ་ཚེས་དགེ་བར་ཞི་ཁྲོའི་ཆོ་ག་ཐུན་མོང་བ་རྣམས་འཇུག་པ་བདེ་བའི་ཕྱིར་ཞི་བའི་དབང་ཆོག་ཉིད་གཞིར་བྱས་ཏེ་འོག་མིན་ཨོ་རྒྱན་སྨིན་གྲོལ་གླིང་གི་བླ་བྲང་ཆོས་འཁོར་ལྷུན་པོར་སུག་བྲིས་སུ་སྦྱར་བ་དགེ་ལེགས་སུ་གྱུར་ཅིག། །།

སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་ལ་བརྟེན་པའི་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཉི་མའི་འོད་ཟེར། པདྨ་བཛྲ།

སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་ལ་བརྟེན་པའི་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཉི་མའི་འོད་ཟེར་ཞེས་བྱ་བ་བཞུགས་སོ། །ཧེ་རུ་ཀ་ལ་ཕྱག་འཚལ་ལོ། །འདིར་སྒྱུ་འཕྲུལ་ཁྲོ་བོའི་སྦྱིན་སྲེག་གི་ཆོ་ག་བཀླག་ཆོག་མར་བཀོད་པ། ལོ་ཆེན་རིན་པོ་ཆེའི་གསུང་སོར་བཞག་ལས། མདུན་དཀྱིལ་དང་མ་འབྲེལ་བ་བསྙེན་པའི་ཁ་སྐོང་སོགས་ཀྱི་ཆེད་དུ་ཞི་བའི་སྲེགས་བླུགས་ཀྱི་ཁ་བསྒྱུར་ཅུང་ཟད་བགྱིས་ཏེ་བྲིའོ། །དེ་ལ་ཐོག་མར་བཅས་བཤོམས་ནི། ཐབ་སྟེགས་གྲུ་བཞིར་རྒྱར་ཁྲུ་དོ་དང་དཔངས་ཁྲུ་ཕྱེད་པའི་ཁར་དྲི་དཀར་པོ་དང་བ་བྱུང་གི་ཆག་ཆག་བཏབ། དེའི་ངོས་ཀྱི་མཐའ་ནས་ཟླུམ་སྐོར་གྱི་མུ་ཁྱུད་ནག་པོ་ལ་ཧཱུྃ་ཡིག་དང་སེང་མགོ་སྤེལ་བའི་ནང་དུ་འཁོར་ལོ་དཀར་པོ་རྩིབས་བཞི་པ་བྲི། དེའི་ལྟེ་བར་ཐབ་ཁུང་བརྩིག་ན་རྒྱར་ཁྲུ་གང་དང་དཔངས་སུ་ཁྲུ་ཕྱེད་ཟླུམ་པོར་བསླང་བའི་སྟེང་ནས་ཕྱིར་འགྱེད་པའི་སོར་བཞིའི་ཚད་ཅན་གྱི་ཁ་ཁྱེར་བང་རིམ་གསུམ་པ་ནང་ནས་རིམ་པར་འཁོར་ལོ་ལྕགས་ཀྱུ་འོད་ཕྲེང་གིས་བསྐོར་བའི་དབུས་སུ་སྲབ་འཐུག་སོར་གང་ཙམ་པའི་ཐབ་མཚན་འཁོར་ལོ་ཧཱུྃ་ཡིག་གིས་མཚན་པ་སྟེ། ཐམས་ཅད་ཀྱང་ཚོན་དཀར་པོས་བྲི་བར་བྱའོ། །གང་ལྟར་ཡང་འོ་མ་ཅན་གྱི་ཤིང་རྩེ་མོའི་ཆ་ལས་བྱུང་བའམ། དགོན་པའི་བ་ལྕི་སྐམ་པོ་སྲོག་ཆགས་མེད་པས་ཐབ་ནང་དུ་ཐབ་ལས་ཅུང་ཟད་དམའ་བའི་ཟླུམ་པོར་བརྩིགས་པའི་ཤར་ལྷོར་མེ་ཚང་བཅའ། སྟེགས་བུའི་གྲར་མདའ་བཞི་བཙུགས་པ་སྲད་བུ་དཀར་པོ་བསྣོལ་མར་བྲན་ཅིང་སྟེང་ནས་མེ་དར་དཀར་པོ་དགབ། སྟེགས་བུའི་ཤར་ལྷོའི་ཟུར་དུ་མདའ་དར་དམར་པོ་གཟུག །ཐབ་ཀྱི་མདུན་དུ་སྟན་དཀར་ཞིང་འཇམ་པ་དང་། དེའི་གཡས་གཡོན་དུ་ཁྲུ་གང་བའི་ཚད་ཀྱིས་རྫས་སྟེགས་དང་མཆོད་སྟེགས་དཀར་པོ་སྟེ་གསུམ་ཀ་ལ་སྣ་ཚོགས་པདྨ་འདབ་མ་བརྒྱད་པ་རེ་བྲི། སྟན་གྱི་མདུན་དུ་ཞེང་མཐོ་གང་དང་དཔངས་སློབ་དཔོན་གྱི་སྐེད་པ་ཙམ་སླེབ་པའི་མེ་ཡོལ་གངས་རི་བྲིས་པ་བཞག །གཡས་ཕྱོགས་རྫས་སྟེགས་ཀྱི་པདྨའི་ལྟེ་བར་བ་ལས་བྱུང་བའི་མར་ཁུ་དགང་བླུགས་ཀྱི་གཟར་བུ་ཁ་སྦྱར་བ་དང་བཅས་པ། མདུན་གྱི་འདབ་མར་འོ་མ་ཅན་གྱི་རྩེ་མོའི་ཆ་ལས་བྱུང་བའི་ཡམ་ཤིང་མཐོ་གང་བརྩེ་གཉིས་མར་ཁུས་ཉུག་པ། པད་འདབ་ལྷག་མ་བདུན་ལ། ཏིལ་དཀར། མངར་གསུམ། ནས་དཀར། འབྲས་དཀར་གྱི་ཆན་སོགས་ཁ་ཟས་དཀར་པོ་དང་། ཙནྡན་དཀར་པོ་སོགས་དྲི་དཀར་པོའི་རིགས་དང་། ཙམ་པ་ཀ་སོགས་མེ་ཏོག་དཀར་པོའི་རིགས་ཏེ་ཐམས་ཅད་རང་བཞིན་ནམ་བཅོས་པས་དཀར་བ་འདས་མ་འདས་ཀྱི་ཁྱད་པར་གྱི་ཕྱི་ནང་ཉིས་རིམ་དང་ཐུགས་དམ་བསྐུལ་བའི་རྫས་ཡུངས་ཀར་རྣམས་རིན་པོ་ཆེ་དཀར་པོའི་སྣོད་དུ་བཤམ། གཡོན་ཕྱོགས་མཆོད་སྟེགས་ཀྱི་པདྨའི་ལྟེ་བར། འོ་མ། འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་བསྲེས་པའི་མར་དཀར་གྱི་འདས་གཏོར་ཟླུམ་པོ་རིལ་བུ་དྲུག་གིས་བསྐོར་བ་མཉྫིའི་སྟེང་བཀོད་པའི་མདུན་དུ་རྒྱུ་དེ་ལས་འཇིག་རྟེན་པའི་གཏོར་མ་དཀར་ཟླུམ། བདུན་གྱི་པད་འདབ་ལ་རྡོར་དྲིལ། དེ་ཡི་གཡས་གཡོན་གྱི་འདབ་མར་སྨན་རཀ །པད་འདབ་ལྷག་མ་ལྔ་ལ་ཞབས་བསིལ་དང་བཞི་བསྣོལ་གྱི་མཆོད་རྫས་རང་བཞིན་ནམ་བཅོས་པས་དཀར་བ་གཡས་བསྐོར་དུ་བཤམས་ཤིང་ལས་བུམ་ཀྱང་ཅི་བདེར་བཞག་གོ། །དེ་ལྟར་ཤོམས་ཟིན་ནས་ཆོ་ག་ནི། སློབ་དཔོན་ཆས་གོས་དང་རིན་པོ་ཆེའི་རྒྱན་དཀར་པོས་བརྒྱན་ལ་རྡོ་རྗེའི་སྐྱིལ་ཀྲུང་གིས་ཤིས་པའི་ཕྱོགས་སུ་ཁ་བལྟས་པས་འདུག་ནས། དོན་གྱི་སེམས་ཆོས་ཐམས་ཅད་ཀྱི་གཤིས་ལུགས་ལྷག་པ་བདེན་པ་དབྱེར་མེད་ཀྱི་ལྟ་བ་རྟོགས་ཤིང་བྱང་ཆུབ་ཀྱི་སེམས་དང་ལྡན་པས། ཀུན་སློང་སྟོངས་ཀྱི་སེམས་རང་གཞན་གྱི་གནོད་སྡིག་སེལ་བར་འདོད་པའི་སེམས་ཞི་ཞིང་དང་བའི་སྒོ་ནས། ངག་སྔགས་རྣམས་ཕྲ་ཞིང་ཞིབ་ལ་རྒྱུན་མི་ཆད་པར་བཟླ་བའི་ཚུལ་གྱིས་ཆོ་གའི་ལས་ལ་འཇུག་སྟེ། ༀ་བུདྡྷ་ཤྲཱི་ཧེ་རུ་ཀ་ཧཱུྃ། ཞེས་པས་རང་ཉིད་བུདྡྷ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་དཀྱིལ་འཁོར་གྱི་ཤར་སྒོའི་ཐད་དུ་འཁོད་དེ་སྦྱིན་སྲེག་གི་ལས་རིིམ་ལ་འཇུག་པར་མོས་པས། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ༀ་མ་ཧཱ་བཛྲ་ཧཱུྃ། ཞེས་པས་རྡོ་རྗེ་གསོར་ཞིང་ཐུགས་ཀར་འཛིན། ༀ་བཛྲ་གྷཎྜེ་ཨ། དྲིལ་བུ་དཀྲོལ་ཞིང་དཀུར་བརྟེན། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་འཁྱུད་རྒྱ་བྱས་ཏེ་དམ་ཚིག་གསུམ་དྲན་པར་བྱའོ། །དེ་ནས་ཕྱི་མཆོད་རྣམས་སྒྲུབ་ཐབས་ལྟར་བརླབ་ཅིང་། སྨན་རཀ་གཉིས་སྔགས་ཙམ་གྱིས་བྱིན་གྱིས་བརླབ་བོ། །ལས་གཏོར་དང་སྲེག་རྫས་རྣམས་ལ་ལས་བུམ་གྱི་ཆུ་འཐོར་ཞིང་། ཧཱུྃ་བིགྷྣཱནྟ་ཀྲྀཏ་ཕཊ་དང་། སྭ་བྷཱ་ཝས་བསང་སྦྱང་། སྟོང་པའི་ངང་ལས་མ་དང་ཨ་ལས་ཉི་ཟླའི་གྭའུའི་སྣོད་དུ་རང་གི་ཐུགས་ཀ་ནས་གཏོར་མའི་གནས་སུ་འབྲུ་གསུམ་དང་སྲེག་རྫས་ཀྱི་གནས་སུ་ཧཱུྃ་ལྔ་སྤྲོས་ཏེ་འཕྲོ་འདུས་ཡོངས་སུ་གྱུར་པ་ལས་ཞི་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དཀར་པོ་འཕྲོ་བ་དང་། སྲེག་རྫས་རྣམས་རོ་བརྒྱ་ལྡན་པའི་ཟག་མེད་ཡེ་ཤེས་ཀྱི་བདུད་རྩི་ནམ་མཁའ་གང་བས་ཞི་བའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བསམ་ལ། ༀ་ཨཱཿཧཱུྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཞེས་བཟླས་པས་བྱིན་གྱིས་བརླབ། དེ་ནས་ཐབ་བསང་སྦྱངས། སྟོང་པའི་ངང་ལས་མདུན་དུ་བྷྲཱུྃ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་གསུམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པའི་ཡེ་ཤེས་ཀྱི་མེ་འོད་དཀར་པོ་འབར་བར་བསམ་ལ། ༀ་ཨགྣེ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་རྒྱུན་བཞག་གམ་གཙུབ་ཤིང་ལས་བྱུང་བའི་མེ་དུ་བ་མེད་པ་སྦར་ལ། ཐབ་ཀྱི་མེའི་དབུས་སུ་མ་དང་དཱིཿལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ༀ་ཡིག་དཀར་པོ་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་ཝ་རྀ་ཥི་ཧཱུྃ་ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆ་བྱད་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། ཨ་དཪྴ་སོགས་ཀྱིས་བསྐུར་བརླབ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣེ་དེ་ཝ་ས་མ་ཡ་ཧཱུྃ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོས་གཡབ་ཅིང་། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་ཕྱག་རྒྱ་དང་བཅས། ཨགྣེ་དེ་ཝ་རི་ཥི་ཛཿཛཿས་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། མེ་ལྷའི་ཞལ་ཅུང་ཟད་གདངས་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་དུ་བྱས་པས་དགང་བླུགས་བཟུང་ནས། ༀ་ཨགྣེ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་སྟེ་རྗེས་གཟར་བུ་ཁ་སྦྱར་ནས་པུས་མོའི་ནང་ལས་མི་འདའ་བས་གཡས་བསྐོར་གྱིས། ༀ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ། ཞེས་ལན་གསུམ་གྱིས་དགང་བླུགས་ཕུལ། དེ་རྗེས་སྔགས་ཁོ་ནས་ཡམ་ཤིང་། མར་ཁུ་སྲེག་རྫས་རྣམས་རེ་རེ་ནས་ལྔའམ་བདུན་སོགས་གྲངས་ཇི་ལྟར་རིག་པ་ཕུལ་ལ། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པ་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་ཆིབས། །བགྲང་ཕྲེང་འཛིན་ཅིང་རིག་སྔགས་གསུང་། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཡུངས་ཀར་ཐབ་ཏུ་འཐོར་ཞིང་། ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། །ཞེས་འདོད་གསོལ། དེ་ནས་འདས་པའི་སྲེག་ལྷ་མཆོད་པ་ནི། མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་དབུས་སུ་བྷྲཱུྃ་ཡིག་འཕྲོ་འདུས་ཡོངས་སུ་གྱུར་པ་ལས། བྷྲཱུྃ་བི་ཤྭ་བི་ཤུདྡྷེ་ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་བར་ཁྱམས་གཉིས་དང་ལྡན་པའི་ལྷ་གནས་རྣམས་སོ་སོའི་གདན་དང་བཅས་པ་གསལ་བར་གྱུར། འབར་བའི་འཁོར་ལོ་རྩིབས་བཞི་པ། །ཞེས་པ་ནས། དབང་ཕྱུག་ལྷ་ཆེན་ལ་སོགས་བཟུང་། །ཞེས་པའི་བར་གྱིས་གསལ་བཏབ་ལ། བདག་གི་ཐུགས་ཀ་ནས་རིགས་ལྔའི་ཧེ་རུ་ཀའི་གནས་སུ་ཧཱུྃ་ཡིག་ཟུང་ལྔ། ཁྲོ་མོ་བརྒྱད་ཀྱི་གནས་སུ་ཧ་བརྒྱད། ཕྲ་མེན་བརྒྱད་ཀྱི་གནས་སུ་ཧེ་བརྒྱད། སྒོ་མ་བཞིའི་གནས་སུ་ཕཊ་བཞི། དབང་མོ་རྣམས་ཀྱི་གནས་སུ་བྷྱོ་ཉི་ཤུ་རྩ་བརྒྱད་རྣམས་སྤྲོས་ཏེ་སོ་སོའི་གདན་ལ་འཁོད་པར་བསམ། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འོད་ཟེར་སྤྲོ་བསྡུས་ཡོངས་སུ་གྱུར་པ་ལས། ༀ་བུདྡྷ་ཤྲཱི་ཧེ་རུ་ཀ་ཧཱུྃ། ཞེས་པ་ནས། བཛྲ་ལམྦྷོ་དྷ་ར་བྷྱོ། ཞེས་པའི་བར་བརྗོད་པས། བཅོམ་ལྡན་འདས་དགྱེས་པ་ཆེན་པོ་བུདྡྷ་ཧེ་རུ་ཀ་ལ་སོགས་ཏེ་ལྔ་བཅུ་རྩ་བརྒྱད་ཁྲག་འཐུང་རོལ་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དཀར་པོ་གཡས་འཁོར་ལོ་དང་གཡོན་རང་རྟགས་འཆང་བ་སོ་སོའི་གདན་ལ་བཞུགས་པའི་སྐུ་ལས་འོད་ཟེར་དཀར་པོའི་ཕྲེང་བ་མཁའ་ཁྱབ་ཏུ་སྤྲོ་བས་ཞི་བའི་ཕྲིན་ལས་མཛད་པར་བསམ་ལ། སྨུག་ནག་སྔོ་ནག་སེར་ནག་དང་། །ཞེས་པ་ནས། ཅི་བགྱི་ཞེས་ནི་ཆས་ཏེ་གནས། །ཞེས་པའི་བར་གྱིས་གསལ་བཏབ་ལ། རིགས་ལྔའི་དབང་རྒྱ་གནས་སོ་སོར་བཞག་སྟེ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏྨ་ཀོ྅་ཧཾ། དེ་བཞིན་དུ། ༀ་མ་ཧཱ་ཨ་དཪྴ་ཛྙཱ་ན༴ ༀ་མ་ཧཱ་ས་མ་ཏཱ༴ ༀ་མ་ཧཱ་པྲ་ཏྱ་བེཀྵ་ཎ༴ ༀ་མ་ཧཱ་ཀྲྀ་ཏྱཱ་ནུཥྛཱ་ན༴ རྡོ་རྗེའི་ཕྱག་རྒྱ་གནས་གསུམ་དུ་བཞག་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱ་ཀ༴ ཙིཏྟ༴ ཞེས་བརྗོད་ཅིང་སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱའོ། །ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་ཀྱི་འཁོར་ལོ་སྤྱན་དྲངས་པར་བསམ་ལ། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་འདྲེན་གྱིས། །དུར་ཁྲོད་ཆེན་པོའི་གནས་འདི་རུ། །ཞིང་ཆེན་གསར་རྙིང་སྟན་དུ་བཏིང་། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ནས་བསྣམས་སུ་གསོལ། །ༀ་རུ་ལུ་རུ་ལུ་ཧཱུྃ། ཨེ་ཧྱེ་ཧི་ཨཱ་ན་ཡ་ཛཿཧཱུྃ་བཾ་ཧོཿ ཞེས་དམ་ཚིག་པ་དང་དབྱེར་མེད་དུ་བསྟིམ་པར་བསམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེའི་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ༀ་བུདྡྷ་ཤྲཱི་ཧེ་རུ་ཧཱུྃ་ཞེས་བདུན་གྱིས་བཀང་བའི་དགང་བླུགས་ཁ་སྦྱར་བ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་སྤེལ་ཚིག་སྔར་ལྟར་བཏགས་པས་ལན་གསུམ་ཕུལ། དེ་ནས་ཡམ་ཤིང་དང་མར་ཁུ་སོགས་བསྲེག་རྫས་གཞན་རྣམས་ཀྱང་རུ་ལུ་ཁོ་ནས་གཙོ་འཁོར་སྤྱིར་བརྒྱའམ་ཉེར་གཅིག་སོགས་བཅུ་ཚན་ལྟ་བུའི་མཚམས་ཇི་ལྟར་རིགས་པར་སྤེལ་ཚིག་སྤེལ་ནས་ཕུལ་ལོ། །གསུངས་པས་བསྙེན་པའི་ཁ་སྐོང་ལ། རྣལ་འབྱོར་པ་བདག་གི་རྩ་བ་དང་ཡན་ལག་གི་དམ་ཚིག་ཉམས་ཆག་དང་འགལ་འཁྲུལ་དུ་གྱུར་པ། ལྷ་ཉེ་བར་མ་སྒོམ་པ། སྙིང་པོ་དག་པར་མ་བགྲངས་པ། ཛབ་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ་ལ་སོགས་པའི་ཉམས་ཤིང་ཞིག་རལ་ཏུ་གྱུར་པ་ཅི་མཆིས་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ། དེ་ནས་རུ་ལུའི་མཐར། མ་ཧཱ་བ་ལིངྟ་ཁཱ་ཧི། བཏགས་པས་འདས་པའི་ལས་གཏོར་དང་། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་རཀ་བྲན་ལ། ཧཱུྃ། གཏུམ་ཆེན་དུས་མཐའི་མེ་ལྟར་འབར། །ཞེས་སོགས་ཀྱིས་བསྟོད་ལ། ཐབ་ཏུ་ཡུངས་ཀར་འཐོར་ཞིང་། ཧཱུྃ། ཡེ་ཤེས་ཀློངས་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འབར་བའི་སྦྱིན་སྲེག་འབུལ། །བདག་གིས་ཞི་བའི་ཕྲིན་ལས་མཐར་ཕྱིན་ནས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་མཛོད། །ཅེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས། བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ། དེ་ནས་གཏང་རག་གི་མཆོད་བསྟོད་དང་བཟོད་གསོལ་བྱས་ལ། ཡེ་ཤེས་པ་རང་བཞིིན་གྱི་གནས་སུ་གཤེགས། དམ་ཚིག་པ་གཞལ་ཡས་ཁང་གདན་དང་བཅས་པ་རང་ལ་ཐིམ་པར་བསམ་མོ། །སླར་ཡང་། ༀ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊ། ཅེས་བླུགས་གཟར་གྱིས་མར་ཁུ་ཕུལ་བས་མེ་གསོས་ཏེ། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། ༀ་ཨགྣེ་དེ་ཝ་རྀ་ཥི་ཧ་བྱ་སོགས་ཀྱིས་བསྲེག་རྫས་ལྷག་རྣམས་ཕུལ། ཀུན་བཟང་སོགས་ཀྱིས་མཆོད། ༀ་ཨགྣེ་དེ་ཝ་རི་ཥི་མ་ཧཱ་བ་ལིངྟ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་ལས་གཏོར་དང་སྨན་རཀ་ཕུལ། མེ་སྟེ་བསྲེག་བྱས་བསྟོད། ཡིག་བརྒྱས་ནོངས་པ་བཤགས། བཛྲ་མུཿས་མེ་ལྷ་ཡེ་ཤེས་པ་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམ་ལ། ལས་ཀྱི་རྗེས་བསྡུ་ཞིང་བསྔོ་ཤིས་ཀྱིས་མཐའ་བརྒྱན་པར་བྱའོ། །དེ་ལྟར་སྦྱིན་སྲེག་ཟིན་ནས་ལས་ཀྱི་མཇུག་བསྡུ་ཚུལ་ནི། མེ་རང་ཞིར་འཇུག་པའམ། ལོང་མེད་ན་འོ་མ་དང་དྲི་དཀར་པོས་གཞིལ་བར་བྱས་ནས་ཐལ་བ་འབབ་ཆུར་བསྐྱལ་ལོ། །ཅེས་པ་འདི་ནི་རང་དང་སྐལ་མཉམ་གྱི་གང་ཟག་ཆོ་གའི་ལག་ལེན་ལ་ཆེར་མ་འདྲིས་པ་འགའ་ཞིག་ལ་ཉེར་མཁོའི་ཆེད་དུ་པདྨ་བཛྲ་པས་བྲིས་པ་དགེ་ལེགས་འཕེལ། །དགེའོ།། །།

སྒྱུ་འཕྲུལ་དྲྭ་བ་ལས་ཁྲོ་བོའི་དཀྱིལ་འཁོར་དུ་བསྙེན་པའི་ཚུལ་གྱི་ལྷན་ཐབས་རིག་འཛིན་དགའ་སྟོན། ངག་དབང་དཔལ་བཟང་།

སྒྱུ་འཕྲུལ་དྲྭ་བ་ལས་ཁྲོ་བོའི་དཀྱིལ་འཁོར་དུ་བསྙེན་པའི་ཚུལ་གྱི་ལྷན་ཐབས་རིག་འཛིན་དགའ་སྟོན་ཅེས་བྱ་བ་བཞུགས་སོ། །ཆོས་ཉིད་ཞི་ལས་མ་གཡོས་ཀྱང་། །འབར་བ་ཁྲག་འཐུང་ཁྲོ་བོའི་ཚོགས། །དབྱེར་མེད་དཔལ་ལྡན་བླ་མ་ལ། །རྣམ་ཀུན་དད་པས་ཕྱག་བྱས་ཏེ། །གང་ཞིག་ལམ་འདིར་འཇུག་པ་ལ། །མ་ནོར་གནད་ཀྱི་མན་ངག་ནི། །ཞལ་ནས་སྙན་དུ་བརྒྱུད་པ་ཡི། །ཤིན་ཏུ་གསང་བའི་ཡི་གེ་སྤེལ། །དེ་ལ་འདིར་སྒྱུ་འཕྲུལ་ཞི་བའི་བསྙེན་པ་སྔོན་དུ་སོང་ནས། ཁྲོ་བོའི་བསྙེན་པར་འཇུག་པར་འདོད་པ་གང་དག་གིས་ཤེས་པར་བྱེད་པ་ལ་གསུམ། སྒྲུབ་པ་པོའི་གང་ཟག །སྒྲུབ་པའི་ལམ་རིམ། གྲུབ་པའི་འབྲས་བུའོ། །དང་པོ་ནི། སྒྲུབ་པ་པོ་དཀྱིལ་འཁོར་ཆེན་པོ་འདིར་ཞུགས་ཤིང་། ཕྱི་ནང་གི་དབང་ཐོབ་པའི་རྩ་བ་དང་ཡན་ལག་གི་དམ་ཚིག་ལ་ཡང་དག་པར་གནས་པའོ། །གཉིས་པ་ལམ་གྱི་སྔོན་འགྲོ་དང་། དངོས་གཞི། རྗེས་ཀྱི་རིམ་པ་གསུམ་སྒྱུ་འཕྲུལ་ཞི་བའི་བསྙེན་ཡིག་ལས་ཇི་སྐད་བཤད་པ་ལྟར་ལས། འདིར་ནི་ཁྲོ་བོའི་སྒོས་ཆོས་ཉེ་བར་མཁོ་བ་འགའ་ཞིག་བརྗོད་པར་བྱའོ། །དེ་ཡང་གནས་དུར་ཁྲོད་དང་རི་བོ་དབེན་པ་གསུངས་ཀྱང་། ཞི་ཁྲོ་གཉིས་ཏེ་བསྙེན་པ་བཏང་ན། ཞི་བའི་བསྙེན་པ་བཏང་བའི་གནས་ལས་གཞན་མི་དགོས་ལ། བླ་མ་གོང་མའི་ཞལ་རྒྱུན་ལ། ཞི་བ་གནས་དག་དང་། ཁྲོ་བོ་གནས་གྱུར་དུ་སྒྲུབ་པ་ཡིན་པས། དང་པོ་ཞི་བའི་བསྙེན་པ་རྒྱས་པའམ། ལས་རུང་ཙམ་སྔོན་དུ་མ་སོང་ན། ཁྲོ་བོ་སྒྲུབ་པ་འཚུབས་ཆེ་ཞིང་འཆུན་དཀའ་བར་གསུངས་པ་བཞིན། འདིར་ཡང་ཞི་བསྙེན་སྔོན་དུ་སོང་བའི་གང་ཟག་གིས་ཁྲོ་བོར་ཡང་བསྙེན་པ་བཏང་ན། རྒྱུད་སྒྱུ་འཕྲུལ་དྲྭ་བ་ཆེན་པོའི་རྒྱུད་དོན་གྱི་གནད་མ་ཚང་བ་མེད་པ་ལགས་པས། དུས་ཡུན་འཁོར་བ་ཙམ་གྱིས་ལེ་ལོ་དང་སྙོམས་ལས་སྤངས་ཏེ། ཞི་ཁྲོ་གཉིས་ཀ་ལ་བསྙེན་པ་ཞིག་བཏང་ན། དལ་འབྱོར་གྱི་ལུས་རྟེན་ལན་ཅིག་རྙེད་པ་ལ་སྙིང་པོ་ལེགས་པར་ལོན་པ་ཡིན་པས་དགའ་སྤྲོ་དང་བཅས་པས་འཇུག་པར་རིགས་སོ། །དེ་ཡང་ཕྱི་ནང་གི་མཆོད་གཏོར་སོགས་མཁོ་བའི་ཡོ་བྱད་རྣམས་ཚོགས་པར་བྱས་ནས། གཟའ་སྐར་ལེགས་པར་ཕྱི་དྲོ་དབང་གི་དུས་མཚམས་ཀྱི་དབུ་འཛུགས་སོགས་ཞི་བའི་བསྙེན་ཡིག་ཇི་ལྟ་བ་བཞིན་ལས། འདིར་ནི་སྒོས་ཆོས་མཚམས་བཅད་ཀྱི་སྐབས་སུ། མཚམས་ཀྱི་བཅད་ཚུལ་གྱི་གོ་དོན་ལ་ཁྲོ་བཅུ་འབར་བ་མཚམས་ཀྱི་རྒྱུད་ལས། སྔོན་དེ་བཞིན་གཤེགས་པ་སྔོན་བྱུང་གི་རྒྱལ་པོའི་བསྟན་པ་ལ། བྲམ་ཟེའུ་སཾ་གྷ་དང་། དབྱིངས་མ་ཞེས་བྱ་བའི་ཕ་མ་གཉིས་ལ་བུ་བརྒྱད་བྱུང་། དེ་དག་ལ་ཆུང་མ་བརྒྱད་བསུས། དེའི་ཚེ་མུ་གེ་ཆེན་པོ་ཞིག་བྱུང་བས་དེ་དག་གིས་མི་དགེ་བཅུ་སྤང་གི་སྡོམ་པ་བླངས་ཏེ་ཐུགས་ཇི་ལྟར་བསྐྱེད་པ་ལ་མ་འོངས་པའི་གང་ཟག་རིག་པ་འཛིན་པ་རྣམས་ཀྱིས་དངོས་གྲུབ་སྒྲུབ་པའི་བར་ཆད་སྲུང་ཞིང་མཆོག་ཐུན་མོང་གི་དངོས་གྲུབ་སྦྱིན་པར་སྨོན་ལམ་བཏབ་པས། དེ་དག་ཚེ་འཕོས་ཏེ་ཕྱི་མ་ལ་འོག་མིན་གྱི་ཞིང་དུ་རྡོ་རྗེ་མི་བསྐྱོོད་པའི་སྲས་སུ་གྱུར་ནས་ཕ་མ་གཉིས་སྟེང་འོག་གི་ཁྲོ་བོ་གཉིས་དང་། བུ་བརྒྱད་ཆུང་མར་བཅས་པས་ཕྱོགས་མཚམས་ཀྱི་ཁྲོ་བོ་བརྒྱད་དུ་སངས་རྒྱས་པའི་ཐུགས་བསྐྱེད་དང་སྨོན་ལམ་ཡང་དག་པའི་མཐུས། ད་ལྟ་སྒྲུབ་པ་གང་ལ་ཡང་ཁྲོ་བོ་བཅུའི་སྲུང་བའི་འཁོར་ལོ་བསྒོམ་ན་མི་འཐད་པ་མེད་ཅིང་། ཁྱད་པར་རྟེན་གཞལ་ཡས་ཁང་གི་ཁྲོ་བོ་གང་ཡིན་ཀྱང་གཙུག་ཏོར་འཁོར་ལོའི་སྒྱུར་བའི་ས་བོན་བྷྲཱུྃ་ལས་བསྐྱེད་དགོས་པ་དེ་དག་གིས་ཡིན་ཅིང་། དཀྱིལ་འཁོར་གཞལ་ཡས་ཁང་གི་རྩིག་པ་དང་བྷྲཱུྃ་གྱི་ཡི་གེ་དེ་དག་སྦྱོར་དུ་འཆད་པ་ནི་ཕྱོགས་རེ་བྱེད་པའོ། །འདི་ལ་སྤྱི་དང་བྱེ་བྲག་གཉིས་ལས། དང་པོ་ནི། ཁྲོ་བཅུ་འབར་བ་མཚམས་ཀྱི་རྒྱུད་ལས་བསྟན་པ་ནི། རང་ཉིད་ཁྲོ་བོ་གནོད་མཛེས་རྡོ་རྗེ་ཐོ་བ་དང་ལྕགས་ཀྱུ་འཛིན་པ་གསལ་ཞིང་། ཧཱུྃ་སྥ་ར་ཎ་ཕཊ། སཾ་ཧ་ར་ཎ་ཧཱུྃ་གིས། ཐུགས་ཀ་ནས་མ་དམར་པོ་ཞིག་འཕྲོས། མ་སུརྻ་མཎྜལ་ཞེས་པས་ཉི་མའི་གདན་དུ་གྱུར་ནས། ༀ་ཤྲཱི་བཛྲ་ཧཱུྃ་ཀཱ་ར་བཛྲ་མཎྜལ་ལ་ཧཱུྃ་ཕཊ། ཅེས་པས་སྔགས་ཀྱིས་རྐྱེན་གྱིས་ཁྲོ་བོ་ཧཱུྃ་ཀཱ་ར་གསལ་བ་ནི། ཧཱུྃ། ཉི་མའི་དཀྱིལ་འཁོར་དབུས་གནས་པ། །དབྱར་གྱི་ཆར་སྤྲིན་ལྟ་བུའི་མདོག །བསྐལ་པའི་མེ་དཔུང་བཞིན་དུ་འབར། །དོར་སྟབས་ཚུལ་དུ་ཞབས་བསྒྲད་ཅིང་། །སྨིན་མཚམས་ཁྲོ་གཉེར་འབར་བ་ཅན། །ཞལ་གསུམ་མཆེ་གཙིགས་རྣམ་པར་འགྱུར། །ཕྱག་གཉིས་ཧཱུྃ་གིས་རྒྱ་བཅིང་ནས། །རྡོ་རྗེ་དང་ནི་དྲིལ་བུ་དང་། །གཡས་གཉིས་ལྕགས་ཀྱུ་རལ་གྲི་དང་། །གཡོན་གཉིས་དགྲ་སྟྭ་ཞགས་པ་བསྣམས། །འདི་འདྲའི་གཟུགས་ནི་བསམ་ནས་ཀྱང་། །རང་གི་དེ་ལ་བཀའ་སྩལ་ཏོ། །ཞེས་དང་། ཧཱུྃ་བཞིའི་སྔགས་དང་བཅས་པ་བརྗོད་པས། གནོད་མཛེས་ཀྱི་ཧཱུྃ་ཀཱ་ར་ལ་ཕྱོགས་བཅུར་ཁྲོ་བོའི་གདན་ཤོམ་ཞིག་ཅེས་བཀའ་སྩལ་ནས། ཐུགས་ཀ་ནས་ཐོ་བ་དང་ལྕགས་ཀྱུ་ཐོགས་ནས་གཏད། དེ་ནས་ཧཱུྃ་ཀཱ་རས་ཞལ་ནས་ༀ་ཤྲཱི་ཊཀྐི་རཱ་ཛ་བཛྲ་མ་ཧཱ་ཀྲོ་ཏ་ཧཱུྃ་ཕཊ། ཅེས་བརྗོད་པས་བསྐུལ་བས་ཁྲོ་བོ་འདོད་པའི་རྒྱལ་པོ་སྔོ་སྐྱ་གཡས་དཀར་གཡོན་དམར། །ཕྱག་དང་པོ་གཉིས་རང་གི་ཕྱག་རྒྱ་བཅིང་བ། བར་པ་ལྕགས་ཀྱུ་དང་ཞགས་པ། གཡས་ཐ་མ་མདའ་གཞུ། གཡོན་ཐ་མ་ཉི་མའི་གདན་བསྣམས་པ་ལ། ཡང་ཧཱུྃ་ཀཱ་རས་མ་སུརྻ་མཎྜ་ལ་ཞེས་དང་། ཧཱུྃ་བཞི་བརྗོད་ནས། ཁྲོ་བོ་བཅུའི་གདན་ཤོམ་ཞིག་ཅེས་བཀའ་བསྒོ་བ་དང་མཉམ་དུ། འདོད་རྒྱལ་གྱི་ཐུགས་ཀ་ནས་མ་བཅུ་ཕྱོགས་བཅུར་སྤྲོས་ཏེ་ཉི་གདན་གསལ་བ་ལ། དེ་ནས་ཧཱུྃ་ཀཱ་རའི་ཞལ་ནས། ཧཱུྃ། ཁྲོ་བོའི་རྒྱལ་པོ་འདི་དག་ནི། །བགེགས་ཀྱི་ཚོགས་ཀུན་ཀུན་ནས་བཤིགས། །བློ་ལྡན་རབ་ཏུ་སྦྱར་བ་ཡི། །ཆོ་ག་བཞིན་དུ་ཕུར་བུས་གདབ། །ཅེས་གསུངས་ཤིང་། འདོད་རྒྱལ་གྱི་ཕྱག་ཏུ་ཧཱུྃ་ཀཱ་རས་ཐོ་བ་དང་ལྕགས་ཀྱུ་གཏད་པ་དང་། དེས་ཕྱོགས་བཅུར་ཕྱིན་ཏེ། ཕྱོགས་སྐྱོང་བཅུ་ལྕགས་ཀྱུས་བཟུང་ཐོ་བས་བརྡུང་ནས་ཉིལ་གྱིས་བཏང་ནས། ཕྱོགས་བཅུར་ཉི་མའི་སྟེང་དུ་ཕོ་མོ་བསྣོལ་ནས་བཞག་སྟེ། ཁྲོ་བོ་སྤྱན་འདྲེན་པའི་ཚིག་འདོད་རྒྱལ་གྱིས་འདི་སྐད་བརྗོད་པར་མོས་ཏེ། ཧཱུྃ། གདན་བཏིང་ལགས་སོ་ཁྲོ་རྒྱལ་ཚོགས། །ཞེ་སྡང་རྡོ་རྗེའི་དཀྱིལ་འཁོར་ནས། །ཁྲོ་ཆེན་རྔམ་བརྗིད་སྤྲུལ་པའི་སྐུ། །ཉི་མའི་གདན་ལ་བཞུགས་སུ་གསོལ། །ཅེས་པས་ཁྲོ་བོ་བཅུ་སྤྱན་དྲངས་ཏེ། དེ་ནས་འདོད་པའི་རྒྱལ་པོ་ཧཱུྃ་ཀཱ་ར་ལ་ཐིམ། དེ་ནས་ཧཱུྃ་ཀཱ་རས་ཧཱུྃ་བཅུ་བརྗོད་ནས། གཟུགས་ཅན་འབར་བ་འཇིགས་བྱེད་པ། །ཁྲོ་བོ་བཅུ་དག་བྱུང་ནས་ནི། །ཧཱུྃ་ལས་བསྐྱེད་པའི་ཉི་མའི་གདན། །སྨད་ནི་རྩེ་མོའི་རྣམ་པར་བསམ། །ཕྱོགས་བཅུའི་དཀྱིལ་འཁོར་ཕྱོགས་རྣམས་སུ། །རིམ་པ་བཞིན་དུ་ཀུན་ཏུ་འཁོད། །བགེགས་རྣམས་ཐམས་ཅད་བཤིག་པའི་ཕྱིར། །གནོད་མཛེས་བཀའ་རྩལ་ཕུར་པས་བཏབ། །ༀ་གྷ་གྷ་གྷ་ཏ་ཡ་སོགས་ཞེས་བསྐུལ་ཞིང་། གནོད་མཛེས་ཀྱིས་ཀྱང་ཧཱུྃ། ཐོ་བ་ཕྱག་ན་བསྣམས་པའི་མཆོག །གནོད་མཛེས་རྒྱལ་པོའི་རྣམ་པར་བསམ། །ཧཱུྃ་བརྗོད་འབར་བ་བལྟ་བ་ཡིས། །བགེགས་ཀྱི་ཚོགས་རྣམས་བཤིག་པའི་ཕྱིར། །གནོད་མཛེས་བཀའ་སྩལ་ཕུར་བུས་ཐོབ། །གྷ་ཏ་ཡ་ཞེས་བརྗོད་ཅིང་། ཡང་གནོད་མཛེས་ཀྱི། ཧཱུྃ། ཁྲོ་བོའི་རྒྱལ་པོ་འཇིགས་བྱེད་བཅུ། རྡོ་རྗེ་ཕུར་བུ་ཉིད་གནས་པ། །ཨུཏྤལ་སྔོན་པོའི་མདོག་འདྲ་བ། །འབར་བའི་ཕྲེང་བ་འཁྲིགས་པའི་འོད། །ལྟེ་བ་མན་ཆད་ཆས་རྣམས་ནི། །རྩེ་མོ་ཕུར་བུའི་རྣམ་པ་ལ། །སྐུ་སྟོད་ཁྲོ་བོ་ཆེན་པོ་སྟེ། །ཞལ་གསུམ་པ་ལ་ཕྱག་དྲུག་པ། །བགེགས་ཀྱི་ཚོགས་རྣམས་འོག་ཏུ་གཟིར། །དེ་ཡི་སྔགས་ནི་བརྗོད་བྱས་ནས། །རྡོ་རྗེ་ཕུར་བུ་ངེས་བཏབ་ན། །བགེགས་ལུས་ཤིན་ཏུ་མི་གཡོའོ། །ༀ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ་གརྫ་གརྫ་ཧཱུྃ་ཕཊ་སོགས་ཁྲོ་བོ་བཅུའི་སྔགས་དང་། གྷ་ཏ་ཡ་ཞེས་བརྗོད་ནས། ཁྲོ་བོ་རྣམས་རིམ་པ་བཞིན་ཕྱོགས་བཅུའི་ཕྱོགས་སྐྱོང་རྣམས་ཀྱི་སྙིང་གར་བབས་པས། ལུས་ཕུག་སྟེ་འོག་གི་ཉི་མའི་གདན་ལ་སྦྲགས་པར་བསམ་མོ། །དེ་ལྟར་བཏབ་པའི་དགོས་པ་ནི། རྒྱལ་པོ་བཙོན་དུ་བཟུངས་ན་དམངས་ཆམ་ལ་འབེབས་པ་ལྟར། བགེགས་ཀྱི་གཙོ་བོ་ཕྱོགས་སྐྱོང་བཅུ་ལ་ཕུར་པ་བཏབ་པས་བགེགས་ཕྲན་གཞན་ལྡང་མི་ནུས་པར་འགྱུར་བའོ། །འཆད་ཚུལ་གཞན་དུ་འདོད་པའི་རྒྱལ་པོས་གདན་བཏིང་ནས། ཧཱུྃ་ཀཱ་ར་ལ་ཐིམ་པ་དང་། འོག་གི་ཁྲོ་བོ་གནོད་མཛེས་ཐོ་བ་དང་སྡིག་མཛུབ་ཅན་གྱི་རྣམ་པར་ཐོན་ནས། ཧཱུྃ་ཀཱ་རས་སྐེད་པར་སྡིགས་མཛུབ་ཀྱིས་བརྡུངས་ཏེ་སྟེང་ཕྱོགས་ཚངས་པའི་གདན་དུ་ཐོ་བས་བཏབ་པར་བསམ་ཞིང་རིམ་པར་སྟེང་དང་ཕྱོགས་མཚམས་རྣམས་བཏབ་ཟིན་པ་ན། ཐོ་བ་ཧཱུྃ་ཀཱ་རའི་ཕྱག་ཏུ་གཏད་ནས་དེའི་གནོད་མཛེས་འོག་གིས་བདག་གི་གདན་ལ་བཏབ་པའི་གསུང་རྒྱུན་སྣང་བས་གང་ལྟར་བཏབ་ཀྱང་ཆོག །དེ་ནས་ཡང་རང་གི་ཐུགས་ཀ་ནས་མཚོན་ཆ་སྣ་ཚོགས་པའི་ཆར་འཕྲོས་ཏེ་སྲིད་པ་གསུམ་གྱི་བགེགས་བཅོམ་སྟེ། ཚུར་འདུས་པས་ཁྲོ་བོ་རྣམས་ཀྱི་ཕྱི་རོལ་དུ་མཚོན་ཆའི་གུར་དང་ར་བར་གྱུར་པར་བསམ་པའོ། །གཉིས་པ་བྱེ་བྲག་ཏུ། འདིར་ནི་སྒྲུབ་ཐབས་ལྟར་ན། མཚན་མེད་ཀྱི་མཚམས་དང་། མཚན་བཅས་ཀྱི་མཚམས་གཉིས་ལས། དང་པོ་ནི། ལྟ་པ་དག་མཉམ་བདེན་པ་དབྱེར་མེད་དུ་ངེས་པས་ཐ་མལ་གྱི་བདེན་འཛིན་རང་བཞིན་མེད་པར་རྟོགས་པ་ནི་མཚམས་གཅོད་ཐམས་ཅད་ཀྱི་རྒྱལ་པོ་ཡིན་ལ། གཉིས་པ་མཚན་བཅས་ཀྱི་མཚམས་གཅོད་ནི། སྟོང་པ་ཉིད་དེའི་ངང་ལས་པད་ཉི་ལ་གནས་པའི་ཧཱུྃ་ལས་སྣ་ཚོགས་རྡོ་རྗེ་ཧཱུྃ་ཡིག་གིས་མཚན་པ་དེ་ལས་འོད་ཟེར་འཕྲོས། རྡོ་རྗེའི་ས་གཞི་ར་བ་དྲྭ་གུར་བླ་བྲེའི་ཕྱི་རོལ་དུ་བསྐལ་པའི་མེ་དཔུང་རབ་ཏུ་འབར་བས་བསྐོར་བའི་དབུས་སུ་བྷྲཱུྃ་ལས་འཁོར་ལོ་སེར་པོ་མཚོན་ཆའི་རྩིབས་ཅན་ཆ་ལང་ཁ་སྦྱར་བ་ལྟ་བུའི་སྟེང་འོག་གི་རྩིབས་གཉིས་མདུང་རྩེ་ལྟར་སྟེང་འོག་གི་རྡོ་རྗེའི་བླ་རེ་དང་ས་གཞི་གཉིས་ལ་ཟུག་པ་ཕྱོགས་མཚམས་ཀྱི་རྩིབས་བརྒྱད་སྦུབས་སྟོང་གི་རྣམ་པ་རྩེ་མོ་རྣོ་བའི་དབལ་དང་ལྡན་པ་དྲག་ཏུ་འཁོར་བ། ཁོག་པ་སྟོང་པ་ཆོས་ཀྱི་དབྱིངས་དང་མཉམ་པར་གསུངས་པ་ལ། བསྒོམ་དོན་ལ། སྲུང་བའི་འཁོར་ལོ་རང་གི་གནས་ཀྱི་གནམ་ས་འབྱར་བར་སྣང་བ་ཚུན་ཆོད་དུ་བསྒོམ་པ་ཞལ་ཤེས་ཡིན་པས་འཁོར་ལོའི་ལྟེ་བའི་དབུས་སུ་པད་ཉི་ལ་གནས་པའི་ཧཱུྃ་སྔོན་པོ་འབར་བར་གྱུར་པ་དེ་ལས་འོད་ཟེར་གྱིས་སངས་རྒྱས་ཐམས་ཅད་ཀྱི་ཐུགས་དམ་བསྐུལ། གཅིག་ཏུ་འདུས་ནས་ཧཱུྃ་ལ་ཞུགས་པས། བཛྲ་མ་ཧཱ་ཤྲཱི་ཧེ་རུ་ཀ་ཞེས་བརྗོད་པའི་རྐྱེན་གྱིས་བདག་ཉིད་ཞེ་སྡང་རྡོ་རྗེ་ཡབ་ཡུམ་གྱི་སྐུར་གསལ་བའི་དེའི་ཐུགས་ཀའི་ཧཱུྃ་ལས་མ་བཅུ་འཕྲོས་པས་རྩིབས་རྣམས་ཀྱི་ནང་དུ་ཉི་གདན་བཅུར་གྱུར། སླར་རང་གི་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་འཕྲོས་ཏེ་ཕྱོགས་བཅུའི་བགེགས་རྣམས་བཀུག་སྟེ་ཉི་གདན་གྱི་སྟེང་དུ་སྨྱོས་ཤིང་འགྱེལ་སྟབས་ཀྱི་བཞག་སྟེ། ཞལ་ནས་ཧཱུྃ་བཞི་དང་ཕྱོགས་སྐྱོང་བཅུའི་སྔགས་བརྗོད་དེ་ཁྲོ་བཅུའི་གདན་བཏིང་བའི་སྟེང་དུ། བདག་ཉིད་ཞེ་སྡང་རྡོ་རྗེའི་ཐུགས་ཀ་ནས་ཧཱུྃ་ཡིག་བཅུ་འཕྲོས་སོ་སོའི་གདན་ལ་འཁོད་པར། ༀ་བཛྲ་ཀྲོ་དྷ་ཧཱུྃ་ཀ་ར་ཧཱུྃ་གརྫ་གརྫ་ཧཱུྃ་ཕཊ་སོགས་ཁྲོ་བོ་བཅུའི་སྔགས་བརྗོད་པའི་རྐྱེན་གྱིས། ཧཱུྃ་ཡིག་བཅུ་པོ་རིམ་པ་བཞིན། ཧཱུྃ་མཛད་ལ་སོགས་པ་ཁྲོ་བོ་བཅུ་གྱུར་ཏེ། ཐམས་ཅད་ཀྱང་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་ཐོ་བ་དང་། ལྕགས་ཀྱུ་འཛིན་པ་སྐུ་སྨད་ཕུར་བུ་འབར་བའི་རྣམ་པ་ཅན་དུ་གྱུར་པར་བསམ་ཞིང་། དེ་ནས་ཁྲོ་བོ་བདུད་རྩི་འཁྱིལ་བ་ཐོ་བ་ཐོགས་པ་རང་གི་ཐུགས་ཀ་ནས་ཐོན་ཏེ། ༀ་གྷ་གྷ་གྷ་ཏ་སོགས་བརྗོད་བཞིན་པས། ཁྲོ་བོ་རྣམས་ཀྱི་རྐེད་པ་ནས་སྡིགས་མཛུབ་ཀྱིས་བསྣམས་ཏེ་ཕུར་བུའི་ཚུལ་དུ། ཕྱོགས་བཅུའི་བགེགས་སོ་སོར་སྟེང་གི་ཁྲོ་བོ་ནས་རིམ་པར། ཐོ་བས་ལན་གསུམ་དུ་བཏབ་པས་བགེགས་རྣམས་ཀྱི་ལུས་འགུལ་མི་ཤེས། ངག་མི་སྨྲ། སེམས་ཀྱི་དྲན་པ་ཉམས་ཏེ་ཆོས་ཉིད་དུ་བརྒྱལ་བར་བསམ་ཏེ་བགེགས་རྣམས་གཡོ་འགུལ་མེད་པར་བྱས་ཏེ། སླར་ཡང་ཁྲོ་བོ་དེ་རྣམས་ལས་སྤྲུལ་པ་དང་ཡང་སྤྲུལ་མཚོན་ཆ་སྣ་ཚོགས་དང་བཅས་པའི་འོད་ཟེར་རྣོན་པོ་འཁྲུགས་ཤིང་འབར་བ་སྲུང་བའི་འཁོར་ལོས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་མོ། །འདི་ལྟར་སྲུང་བའི་འཁོར་ལོ་གསལ་བ་འདི་ཐུན་རེ་རེ་བཞིན་ངག་གི་བརྗོད་ཚིག་རྒྱས་བསྡུས་ལ་མ་ལྟོས་པར་ཡིད་ཀྱིས་གསལ་བཏབ་སྟེ་མཚམས་མ་གྲོལ་བར་མི་བསྡུའོ། །དེ་ནས་བཤགས་པ་སོགས་དཀྱུས་བཞིན་བཏང་། ཐུན་ཕྱི་མ་གསུམ་ལ་རྒྱུད་སྦྱང་ཡན་ལག་བདུན་པ་དང་སེམས་བསྐྱེད་གཉིས་ལས་གཞན་རྣམས་བཞག་ན་ཆད་པའི་སྐྱོན་མེད་དོ། །གཉིས་པ་དངོས་གཞི་ཏིང་ངེ་འཛིན་བསྒོམ་པ་ལ་ཁྱད་པར་གྱི་སྦྱོར་བ་དགོས་ཆེད་ཀྱི་སྒོ་ནས་སེམས་བསྐྱེད་པ་ནི་ཐབས་བསྐྱེད་པའི་རིམ་པ་ཇི་སྙེད་པ་ཐེག་པ་ཆེན་པོའི་ལམ་དུ་གྱུར་པའི་བྱེད་པོ་ཡིན་པས། སྤྱིར་སེམས་ཅན་ཐམས་ཅད་ཡེ་ནས་སེམས་ཉིད་རང་བཞིན་རྣམ་དག་གི་སངས་རྒྱས་ཡིན་པ་ལ། དེ་ལྟར་མ་རྟོགས་ནས་མེད་སྣང་འཁྲུལ་པས་བསླུས་པ་ལ་སྙིང་རྗེ་ཆེན་པོ་རྩོལ་མེད་དུ་ཤར་བའི་སྒོ་ནས། འཁྲུལ་བའི་སེམས་ཅན་རྣམས་རང་གནས་ཀྱི་ཡེ་ཤེས། རང་བཞིན་ལྷུན་གྱིས་གྲུབ་པ། ལྷག་པའི་དཀོར་བདུན་ངོ་བོ་ཉིད་ལྷུན་གྱིས་གྲུབ་པའི་སངས་རྒྱས་ཀྱི་ས་ལ་འགོད་པར་འདོད་པ་དང་། ཁྱད་པར་དུ་ཁྲོ་བོའི་སྒོས་ཆོས། སྔོན་གྱི་གླེང་གཞི་དང་མཐུན་པར་སེམས་བསྐྱེད་པ་ནི། དེ་བཞིན་གཤེགས་པ་གདུག་པ་ཅན་གྱི་ཡུལ་ལ་ཐུགས་རྗེ་ཆེན་པོ་ཆེར་ཁྲོས་ནས་འདུལ་བར་མཛད་པ་དེ་བཞིན་དུ། ཤིན་ཏུ་གདུག་ཅིང་གཏུམ་པའི་འགྲོ་བ་རྣམས་ལ་རྗེས་སུ་ཆགས་པའི་སྙིང་རྗེ་ཆེན་པོ་རྡོ་རྗེ་ཁྲོ་བོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ་འཁོར་གྱི་གོ་འཕང་བདག་གིས་སྒྲུབས་ནས། ལོག་པར་རྟོག་པའི་དབང་གིས་གདུལ་ཞིང་དབང་མེད་དུ་འཁོར་བའི་སེམས་ཅན་རྣམས་སངས་རྒྱས་ཀྱི་ས་ལ་འགོད་འདོད་ཀྱིས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་དང་། །ང་རྒྱལ་ཆེན་པོ་བསྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་སྔོན་དེ་བཞིན་གཤེགས་པས་རུ་ཏྲ་གདུག་པ་ཅན་འཁོར་དང་བཅས་པ་ཐབས་ལ་མཁས་པས་བཏུལ་ཞིང་རྒྱུད་སྦྱངས་ནས་ཡང་དག་པའི་ལམ་ལ་འགོད་པ་དེ་བཞིན་དུ་བྱང་ཆུབ་ཏུ་སེམས་བསྐྱེད་པར་བྱའོ་སྙམ་དུ་དམ་བཅའ་ཞིང་སེམས་བསྐྱེད་པ་ལ་དོ་གལ་བྱའོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ་ཏིང་ངེ་འཛིན་གསུམ་གྱི་ཁོག་དབུབ་པ། བདག་སྲས་དང་གཞན་སྲས་ཀྱི་སྒོ་ནས་རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་གསུམ་ལས། དང་པོ་ལའང་གསུམ་སྟེ། དེ་བཞིན་ཉིད་ཀྱི་ཏིང་ངེ་འཛིན། ཀུན་ཏུ་སྣང་བའི་ཏིང་ངེ་འཛིན། རྒྱུ་ཡི་ཏིང་ངེ་འཛིན་དང་གསུམ་ནི་སྔ་འགྱུར་རྙིང་མའི་ཆོས་སྐད་ཐུན་མོང་མ་ཡིན་པ་ཡིན་པས། གཞན་ལུགས་ལ་ཡེ་ཤེས་ཀྱི་ཚོགས་བསགས་ཀྱི་རྗེས་སུ་བར་སྲིད་ལྷར་བསྐྱེད་པ་ལས་མི་འབྱུང་ལ། འདིར་ནི་སྟོང་ཉིད་སྙིང་རྗེ་སྙིང་པོ་ཅན་གྱིས་འཕེན་པས་སྤྲུལ་པའི་ལྷ་སྐུ་ཞལ་ཕྱག་གི་རྣམ་པར་བཞེངས་ནས། ཕྲིན་ལས་རྣམ་པ་བཞིས་གཞན་ཕན་སྒྲུབ་པ་ནི་ཚོགས་གཉིས་ཟུང་དུ་འཇུག་པའི་ཐེག་ཆེན་གྱི་ལམ་མ་ནོར་བ་ཡིན་ཞིང་། མར་མ་དག་འཁོར་བའི་དུས་ན་ཡང་སྐྱེ་གནས་གང་དུ་འཕེན་བྱེད་ཀྱི་ལས་དེ་སྲེད་ལེན་གྱི་གསོས་མ་བཏབ་ན་མངལ་དུ་འཇུག་མི་ནུས་པས། སྲེད་ལེན་གྱིས་གསོས་བཏབ་ནས་འཇུག་པ་ལྟར། འདིར་ཡང་ཐུགས་རྗེ་ཆེན་པོའི་འཕེན་པས་གསོས་བཏབ་པ་འོད་གསལ་སྟོང་ཉིད་ཀྱི་ངང་ལས་དཀྱིལ་འཁོར་གྱི་ལྷའི་སྐྱེ་བར་འཛིན་པས་མར་སྦྱངས་བྱ་མཐུན། མཐར་ཐུག་གི་འབྲས་བུའི་གནས་སྐབས་ན་ཡང་། རྟོག་པ་དང་བྲལ་བའི་ཐུགས་རྗེ་ཆེན་པོས་ཆོས་སྐུའི་ངང་ལས་གཟུགས་སྐུར་བཞེངས་ནས། ནམ་མཁའི་མཐའ་ཁྱབ་ཀྱི་དོན་མཛད་པ་དང་ཆོས་མཐུན། སྟོང་ཉིད་སྙིང་རྗེའི་རྩལ་དང་མ་བྲལ་བས་བསྐྱེད་རིམ་རང་རྒྱུད་དུ་གོལ་མི་སྲིད་ཅིང་། ལམ་ངེས་རྫོགས་ལྟར་བསྒོམ་ནས་དེ་བཞིན་ཉིད་ཀྱི་ཏིང་ངེ་འཛིན་ལ་བརྟན་པ་ཐོབ་པར་བྱ་བ་ནི་བསྐྱེད་རྫོགས་ཟུང་འཇུག་ཏུ་འགྱུར་ཞིང་། སློབ་དཔོན་སངས་རྒྱས་ཡེ་ཤེས་ཞབས་ཀྱིས་བཞེད་པའི་ཟབ་གསལ་གཉིས་མེད་ཀྱི་རྫོགས་རིམ་མཚན་ཉིད་པ་རྒྱུད་ལ་སྐྱེས་པས། སློབ་དཔོན་གྱིས་བཞེད་པ་བསྐྱེད་རིམ་ལ་རྫོགས་རིམ་གྱིས་རྒྱས་བཏབ་ནས་བསྒོམ་པ་ཞེས་གསུངས་སོ། །འདི་ལྟ་བུའི་ཏིང་ངེ་འཛིན་གསུམ་པོ་ཡང་ལམ་ངེས་རྫོགས་ལྟར་བསྒོམ་ན་ཤེས་བྱ་ལྟ་བའི་དེ་ཉིད་ངོ་སྤྲོད་དང་གཏན་ཚིགས་ལ་བརྟེན་ནས་ཡིད་ཆེས་པར་བྱས་ཏེ། མཐོང་བའི་ཆོས་ལ་འཇོག་པ་དང་། རིག་པ་སྤྱི་བླུགས་སུ་འཇོག་པའི་ཐབས་གང་རུང་གིས་སེམས་མ་བཅོས་སྤྲོས་བྲལ་རང་བབས་སུ་ལྷོད་ཀྱིས་ལྷོད་ལ་དྲན་རྟོག་གི་འགྱུ་བའི་ཡུན་ཐག་བཅད་དེ། བྱིང་རྒོད་ཀྱི་རྟ་སྐྱོན་དང་བྲལ་བར་བཞག་ཅིང་། འཇོག་ཚུལ་སེམས་གྲིམ་ལྷོད་སྙོམས་པར་རྩེ་གཅིག་ཏུ་བཞག །ཤེས་པ་ཁོང་ལྷོད་ལ་བཞག །འཛིན་སྟངས་ཀྱི་ངར་ཆ་མི་ལྷོད་པར་བཞག །ངར་ཆ་ཤོར་ན་ཡང་སེམས་གྲིམས་སུ་བཏང་ལ་བཞག་པ་སོགས་སེམས་གནས་པའི་ཐབས་བསྒྲུབ་ཚུལ་སྒྱུ་འཕྲུལ་ཞི་བའི་བསྙེན་ཡིག་ལྟར་འདིར་བླངས་ཏེ་ཉམས་ལྔ་མཐར་ཕྱིན་པར་བསྒོམ། ཞི་བའི་སྐབས་ནས་བསམ་གཏན་འགྲུབ་ཟིན་ན་འདིར་ས་བཅད་རེ་རེ་ནས་ཐུན་ཆ་ཤས་ལས་ཡུན་རིང་པོར་མི་དགོས་པས། དེ་ཉིད་གོམས་པས་རླུང་སེམས་དབུ་མར་འདུས་ཏེ་རྟགས་བཅུའི་མཐོང་སྣང་རྫོགས་ཤིང་། གང་ཟག་དབང་རབ་ཀྱིས་སྣང་གསུམ་བརྟེན་པའི་དཔེའི་ཡེ་ཤེས་ཀྱང་བསྐྱེད་ནུས། དེ་ལྟར་མིན་ཀྱང་སྟོང་ཉིད་སྤྲོས་དང་བྲལ་བའི་གོ་ཡུལ་དང་མ་བྲལ་བའི་སེམས་གནས་ལ་བརྟན་པ་ཐོབ་ཚེ་མེད་བཞིན་དུ་སྣང་བའི་འཁོར་བ་ལ་བལྟས་ནས་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་བསྒོམ་པ་ལ་སྙིང་རྗེས་དང་སྙིང་རྗེའི་ཏིང་ངེ་འཛིན་ལ་བློ་སྦྱང་། དེ་ཉིད་གོམས་པས་སྟོང་ཉིད་ལ་བློ་བཞག་ཚེ་སྙིང་རྗེའི་རྩི་དང་མ་བྲལ་བ། དེ་ལྟར་མ་རྟོགས་པའི་སེམས་ཅན་མེད་སྣང་འཁྲུལ་པས་བསླུས་པ་ལ་སྙིང་རྗེ་རྩོལ་མེད་དུ་སྐྱེ་ཞིང་། སྙིང་རྗེ་བསྒོམ་ཀྱང་སྟོང་ཉིད་ཀྱི་རྩི་དང་མ་བྲལ་བ་བདག་གཞན་ཨ་འཐས་སུ་མི་གོལ་ཞིང་རྟེན་འབྲེལ་རང་བཞིན་མེད་པ་སྒྱུ་མ་ལྟ་བུའི་སྣང་བ་ལས་དོན་དུ་རང་བཞིན་མ་གྲུབ་པའི་སྟོང་ཉིད་ཀྱི་ངེས་ཤེས་སྐྱེས་པ་ན་སྟོང་ཉིད་སྙིང་རྗེ་སྙིང་པོ་ཅན་ལ་གོམས་པར་བྱ་བ་ནི། དེ་བཞིན་ཉིད་དང་། ཀུན་སྣང་གཉིས་ཀའི་དོན་ཡིན་པས། ལམ་འདི་གཉིས་ཡ་མ་བྲལ་བར་ཉམས་སུ་བླང་དགོས་པས། གཞུང་གི་དེ་བཞིན་ཉིད་ཀྱི་ཏིང་ངེ་འཛིན། ཨེ་མ་ཧོཿ ངོ་མཚར་སོགས་བརྗོད་ནས་དེ་ལ་བློ་འཇོག་ཚུལ་གོང་དུ་བཤད་པ་ལྟར་འཇོག །དེ་གོམས་ནས་ཀུན་སྣང་གི་ཏིང་ངེ་འཛིན། ཨེ་མ་ཧོཿ ཀུན་ཏུ་བཟང་པོ་ནི་སོགས་བརྗོད་དེ། ཀུན་ཏུ་སྣང་བའི་ཏིང་ངེ་འཛིན་བསྒོམ། དེ་གཉིས་རེ་རེ་ཡ་བྲལ་དུ་བསྒོམ་པས་རྫོགས་པའི་བྱང་ཆུབ་སྒྲུབ་མི་ནུས་ན་གཉིས་ཀ་དང་བྲལ་བས་ལྟ་ཅི་སྨོས་ཏེ། གྲུབ་བརྒྱའི་སྤྱི་མེས་ས་ར་ཧས། སྙིང་རྗེ་དང་བྲལ་སྟོང་པ་ཉིད་ལྟ་བ། །དེས་ནི་ལམ་མཆོག་རྙེད་པ་མ་ཡིན་ཏེ། །གལ་ཏེ་སྙིང་རྗེ་འབའ་ཞིག་བསྒོམ་ན་ཡང་། །འཁོར་བ་འདིར་གནས་ཐར་པ་ཡོད་དམ་ཅི། །གང་གི་གཉིས་པོ་སྦྱོར་བ་ནུས་པ་ནི། །སྲིད་པར་མི་གནས་མྱ་ངན་འདས་མི་གནས། །ཞེས་ཤེས་རབ་ཀྱི་སྲིད་རྩ་བདེན་པར་འཛིན་པའི་ལོག་རྟོག་བཅད་ནས་སྲིད་པར་མི་གནས་ཤིང་། སྙིང་རྗེས་བདག་འདོད་ཡིད་བྱེད་ཀྱི་འཛིན་པ་བཅད་ནས་ཞི་བ་ཉན་རང་གི་མཐའ་ལ་མི་གནས་པ་ཇི་སྐད་དུ། ཤེས་པས་སྲིད་པ་མི་གནས་ཤིང་། །སྙིང་རྗེ་ཞི་ལ་མི་གནས་པ། །མྱ་ངན་འདས་དང་འཁོར་མི་གནས། །མི་གནས་ཁྱེད་ལ་ཕྱག་འཚལ་ལོ། །ཞེས་པ་བཞིན་སྟོང་ཉིད་སྙིང་རྗེ་སྙིང་པོ་ཅན་གྱི་རྒྱལ་སྲས་སྤྱིའི་ལམ་ཆེན་ཡིན་པས་ནམ་ཡང་ཏིང་ངེ་འཛིན་གསུམ་ཡ་མ་བྲལ་བ་བསྒོམ་པ་ཤིན་ཏུ་གསང་བའི་ཟབ་མོའི་གནད་ཁྱད་པར་དུ་འཕགས་པ་འདིར་ནི། ངོ་བོ་སྟོང་པ་ཉིད། གདངས་སྙིང་རྗེ་ཆེན་པོ། རྣམ་པ་རྒྱུའི་ཡི་གེ་ཞི་ཁྲོ་གང་ཡང་རུང་བའི་ས་བོན་དུ་གསལ་བས། དཀྱིལ་འཁོར་གྱི་འཁོར་ལོ་རྟེན་བརྟེན་པར་བཅས་པ་སྟོང་ཉིད་དང་སྙིང་རྗེ་ཟུང་དུ་འཇུག་པ་ལས་བསྐྱེད་པ་རྟེན་འབྲེལ་དུ་རང་བཞིན་མེད་པའི་འཆར་ཚུལ་དུ་གནད་གལ་ཆེ་བས། དེ་ལྟ་བུའི་སྟོང་ཉིད་སྙིང་རྗེ་སྙིང་པོ་ཅན་གྱི་རྩལ་སྣང་རྒྱུའི་ས་བོན་གང་ཡང་རུང་བ་སྒོམ་པ་ལས། སྐབས་འདིར་ནི། ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡིས། །འཇིགས་པ་ཡི་ནི་དུས་ལྟར་དྲག །ཞེས་རང་རིག་སྣང་སྟོང་གཉིས་སུ་མེད་པའི་རང་བཞིན་ཧཱུྃ་ཡིག་མཐིང་ནག་ཏུ་གསལ་ཞིང་འབར་བར་གྱུར་པ་ལ་སེམས་བཟུང་ལ་བསྒོམ། དེ་བརྟན་པ་ན་འོད་ཟེར་སྤྲོ་བསྡུས་དོན་གཉིས་བྱས་ནས་གནམ་ལྕགས་ཀྱི་རྡོ་རྗེ་སྔོན་པོ་རྩེ་དགུ་པར་བསྒོམ་པ་སོགས་ལ་སེམས་གནས་སྒྲུབ་ཚུལ་ཞི་བ་ལྟར་ལགས། དེ་ཉིད་གོམས་ནས་ཅི་ཙམ་འདོད་ཀྱི་བར་དུ་མཉམ་པར་བཞག་ནུས་པའི་སྐབས་སུ་གཟོད་ཡིག་འབྲུ་དེ་ལ་དེ་འདྲ་གྲངས་མེད་པ་སྤྲོས་ཏེ་ནམ་མཁའི་ཁྱོན་གང་བ་དང་། སླར་ཡང་ཡིག་འབྲུ་དེ་ཉིད་ལ་བསྡུས་ཏེ་མཉམ་པར་འཇོག་པ་སོགས་ལ་གསལ་བརྟན་གྱི་ཚད་བརྒྱད་མ་ཐོབ་ཀྱི་བར་དུ་བསླབ་པ་ནི་ཕྲ་བ་ཡིག་འབྲུ་ལ་བསླབ་པ་ཞེས་བྱ་སྟེ། འདི་ཁོ་ན་གོམས་པས་ཀྱང་ཐུན་མོང་གི་དངོས་གྲུབ་དང་གྲུབ་རྟགས་ཅི་འདོད་པར་སྒྲུབ་ནུས་པས། དེ་ལྟར་ཏིང་ངེ་འཛིན་གསུམ་པོ་ལམ་ངེས་རྫོགས་ཀྱི་དབང་དུ་ན་བསྐྱེད་རིམ་རྒྱས་པ་བདག་སྲས་དང་གཞན་སྲས། འབྲིང་པོ་མངོན་བྱང་ལྔ་བསྐྱེད་དང་བཞི་བསྐྱེད། བསྡུས་པ་རྡོ་རྗེ་ཆོ་ག་གསུམ་བསྐྱེད་སོགས་གང་བསྒོམ་པ་ལ་མེད་ན་ཐབས་ཆག་ཅིང་། ཡོད་ན་དེས་ཆོག་གི་ཏིང་ངེ་འཛིན་ཡིན་པས་འདི་ལ་བློ་སྦྱང་བར་གོམས་པ་གཅེས་སོ། །དེ་ལྟར་ངེས་རྫོགས་ཙམ་མ་བྱུང་ཀྱང་། མོས་བསྒོམ་དུ་བྱེད་ཚེ་ཡང་ཐུན་ཐམས་ཅད་ཀྱི་མགོར་ཚིག་ཙམ་གྱིས་ཆོག་ཤེས་མི་བྱ་བར་ཆོ་གའི་ཡན་ལག་རྣམས་རྫོགས་པ་དང་། བློ་ལྷོད་ཀྱིས་ཀློད་ལ། དེ་ཏིང་ངེ་འཛིན་དང་ཀུན་སྣང་ལ། སེམས་མ་ཟིན་གྱི་བར་དུ་མཉམ་པར་བཞག །དེ་ནས་རྒྱུའི་ཏིང་ངེ་འཛིན་སོགས་རིམ་པ་ལྟར་བསྒོམ་ཞིང་ཉམས་ལེན་གྱི་གཙོ་བོ་སྟོང་ཉིད་སྙིང་རྗེ་དང་མ་བྲལ་བའི་བསྐྱེད་རིམ་མ་བརྟན་གྱི་བར་དུ་བཟླས་པ་དང་སྤྲོ་བསྡུ་སོགས་ལ་དོ་གལ་མི་བྱེད། མོས་བསྒོམ་དང་ངེས་རྫོགས་གང་ལྟར་བསྒོམ་ཀྱང་བསྐྱེད་རིམ་གྱི་སྐབས་ཐམས་ཅད་དུ་ཏིང་ངེ་འཛིན་གསུམ་ཡ་མ་བྲལ་བར་བསྒོམ་པ་ལས་རེས་འཇོག་གིས་མི་མཐུས། དེ་ཡང་དཔེར་ན་རྩིག་ངོར་རི་མོ་བྱེད་པའི་ཚེ་རྩིག་པ་ནི་གཞི་ཡིན་པས། དེ་མེད་ན་རི་མོ་གང་ལ་བྱེད། རྩིག་པ་ཡོད་ཀྱང་ཞལ་ལ་མེད་ན་རྩིག་ངོར་རི་མོ་འབྲི་མི་ནུས་པས་ཞལ་ལ་ནི་རི་མོ་དང་རྩིག་པ་ལྷན་ཅིག་བྱེད་པའི་རྐྱེན་ཡིན་ལ། རི་མོ་བྲིས་ཟིན་པའི་སྐབས་ན་ཡང་རྩིག་པ་དང་རི་མོ་ཞལ་ལ་བཅས་པ་ཕུན་སུམ་ཚོགས་པ་ཡོད་པ་ལྟར། རྒྱུའི་ཏིང་ངེ་འཛིན་ལས་དཀྱིལ་འཁོར་གྱི་འཁོར་གྱི་འཁོར་ལོ་རྫོགས་པར་བསྒོམ་པའི་གནས་སྐབས་ན་ཡང་སྟོང་ཉིད་སྙིང་རྗེའི་རྩལ་སྣང་ལྷར་ཤར་བས་གསུམ་ཀ་ཡ་མ་བྲལ་བར་ཡོད་དགོས་ཏེ། རྒྱུ་མཚན་ཅིའི་ཕྱིར་སྙམ་ན། ཐ་མལ་གྱི་སྣང་བ་སྟོང་ཉིད་དུ་མ་དག་ན་དཀྱིལ་འཁོར་གྱི་འཁོར་ལོ་གང་དུ་བསྒོམ། དེས་ན་ཆོས་ཐམས་ཅད་སྟོང་པ་ཉིད་ཡིན་པ་དང་། འཁོར་འདས་དབྱེར་མེད་ཡིན་པའི་རྒྱུ་མཚན་གྱིས་དཀྱིལ་འཁོར་གྱི་འཁོར་ལོ་བསྒོམ་ནས་མངོན་དུ་བྱེད་ནུས་པ་ཡིན་ཞིང་། སྟོང་ཉིད་ནི་བསྐྱེད་རིམ་གྱི་གཞི་ཡིན་ཏེ། མགོན་པོ་ཀླུས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །ཞེས་པ་བཞིན་ཆོས་ཐམས་ཅད་སྟོང་པ་ཉིད་མ་ཡིན་ཞིང་ཐ་མལ་གྱི་སྣང་བ་བདེན་པར་གྲུབ་ན་ནི་བསྐྱེད་རིམ་བསྒོམ་མི་ནུས་ཏེ། ཇི་སྐད་དུ། གྲོ་སྲན་འབྲས་བུ་དབང་བསྐུར་ཡང་། །དེ་ལ་འབྲས་ཀྱི་དངོས་སྣང་མེད། །ཅེས་པ་ལྟར། ཡེ་ནས་བདེན་གཉིས་དབྱེར་མེད་དག་མཉམ་ཆེན་པོར་གནས་པ་ལ། བློ་འཁྲུལ་པས་གནས་སྣང་མི་མཐུན་པར་བཟུང་སྟེ། ལོག་རྟོག་བདེན་པར་ཞེན་པས་ཐ་མལ་གྱི་སྣང་བ་འདི་ལ་བདེན་བདེན་གྲུབ་གྲུབ་ལྟར་ཞེན་པའི་དབང་གིས་སྣང་བ་ལས། ཡུལ་རང་གི་སྟེང་ན་བདེན་པ་གྲུབ་པའི་རང་མཚན་གྱིས་གྲུབ་པ་ཅུང་ཟད་ཀྱང་མེད་པས་སྣང་བ་འདི་བློས་ཕར་བཏགས་པའི་འཁྲུལ་པ་མེད་པ་གསལ་སྣང་ཉག་གཅིག་ཏུ་འཇོག་པར་འདུས་པ་མདོའི་ལེའུ་ཉེར་བདུན་པ་དང་། ང་གཅིག་པར་གསུངས་པ་དང་། ངང་བསྒོམ་གྱི་རྣལ་འབྱོར་ཆེན་པོ་ཡན་ཆད་དུ་ཀུན་རྫོབ་བཏགས་ཡོད་འབའ་ཞིག་པར་གསུངས་པ་དང་། སྒྱུ་འཕྲུལ་གྱི་ལེའུ་གསུམ་པ་ནས། ལོག་རྟོག་ཉིད་ལ་ཉིད་སྤྱོད་པས། །ལོག་རྟོག་སྒྱུ་མ་ཉིད་ཀྱང་ངོ་། །ཞེས་སོགས་ཀྱིས་གསལ་བ་དང་རྒྱས་པར་བསྟན་པར་ལྟར་རོ། །དེ་ནས་ཆོས་ཐམས་ཅད་སྟོང་ཉིད་དུ་ཤེས་ཀྱང་སྙིང་རྗེ་ཆེན་པོའི་འཕེན་པ་དང་བྲལ་བ་ནི་གཞན་དོན་དུ་གཟུགས་ཀྱི་སྐུ་བཞེངས་མི་ནུས་ཏེ་ཉན་རང་འགོག་པར་ཞུགས་པ་ལ་གཟུགས་སྐུའི་འགྲོ་དོན་མཛད་པ་མི་འབྱུང་བ་བཞིན་ཡིན་པས། རྒྱུ་བསྐྱེད་རིམ་གྱི་དཀྱིལ་འཁོར་བསྒོམ་པ་ལ་སྟོང་ཉིད་སྙིང་རྗེ་གཉིས་གལ་ཆེ་བར་མ་ཟད་འབྲས་བུ་ཆོས་ཀྱི་སྐུ་ལས་གཟུགས་ཀྱིས་སྐུར་བཞེངས་པ་ལ་མེད་དུ་མི་རུང་བས་ཏིང་ངེ་འཛིན་གསུམ་པོ་གལ་ཆེ་བས་རྒྱས་པར་བཤད་པའོ། །གཉིས་པ་རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི་རྟེན་བརྟེན་པའི་དཀྱིལ་འཁོར་བསྒོམ་པ་ལ། སྔ་འགྱུར་བ་རང་ལུགས་ལ་སྐྱེ་གནས་བཞིའི་བག་ཆགས་སྦྱང་བ་ལམ་བསྐྱེད་རིམ་བསྒོམ་ཚུལ་ལའང་བཞི་སྟེ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་ནི་རྣམ་པ་བཞི། སྤྲོས་བཅས་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་པ་བཞིའོ། །ཞེས་འཁོར་བའི་འདྲ་འབག་སྐྱེ་གནས་རྣམ་པ་བཞིའི་བག་ཆགས་སྦྱོང་བ་ལ་ལྟོས་ཏེ་བསྐྱེད་ཚུལ་རྣམ་པ་བཞིར་བསྟན་པའི་དང་པོ་སྒོང་སྐྱེས་ཀྱི་བག་ཆགས་སྦྱོང་བ་རྒྱས་པ་ཆེན་པོ་བདག་སྲས་གཞན་སྲས་རྣམ་པ་གཉིས་ཀྱི་སྒོ་ནས་བསྐྱེད་ཚུལ་ཡང་། དེང་སང་ཁྲོ་བོ་དང་བཀའ་བརྒྱད་གཉིས་ལ་སྦྱར་ཚུལ་ཞིག་ཡོད་པ་ལས། སྒྱུ་འཕྲུལ་ཞི་བ་ལ་བདག་སྲས་དང་གཞན་སྲས་ཀྱི་བསྐྱེད་ཚུལ་གྱི་གོ་བ་ཞིག་ཀྱང་ཆགས་མི་སྣང་བས། ཞི་བར་སྦྱར་བའི་ཚུལ་སྒྱུ་འཕྲུལ་ལས། རང་བྱུང་དངོས་དང་མི་འགལ་ཞིང་། །འབྲས་བུ་ཉིད་ལ་ལམ་ཤེས་པས། །མ་ལུས་དཀྱིལ་འཁོར་ཐིག་ལེ་རྣམས། །བདག་གི་སྲས་སུ་བསྒོམ་པར་བྱ། །ཞེས་དང་། ཡེ་ཤེས་རྩེ་མོ་ལས། ཇི་ལྟར་སངས་རྒྱས་མཐུ་ལས་བྱུང་། །ལྷུན་གྱིས་གྲུབ་པའི་ཆོ་ག་དང་། །ཆོ་གའི་ཡན་ལག་རྫོགས་པ་ལ། །མཁས་པ་སངས་རྒྱས་སྲས་ཡིན་ནོ། །ཞེས་དང་། སྒྱུ་འཕྲུལ་ལས། གང་གིས་གང་ལ་གསོལ་བཏབ་པས། ཐུགས་རྗེ་བྱིན་བརླབས་སྦྱང་བྱས་ནས། །ཐུགས་ཞུགས་འདྲེས་པར་དབྱེར་མེད་ན། །སྲས་གྱུར་དགོངས་པ་ཅི་ལ་གནས། །ཞེས་པས། སྒྱུ་འཕྲུལ་དྲྭ་བ་ཆེན་པོ་རང་གི་རྒྱུད་ཀྱིས་དངོས་བསྟན་གྱིས་ཞི་བ་ལ་རྒྱས་པར་སྦྱར་ཡོད་མོད་ཀྱང་། འདིར་ནི་སྒྱུ་འཕྲུལ་ཁྲོ་བོ་དང་སྦྱར་ནས་འཆད་པ་སྐབས་སུ་བབས་པས། བདག་སྲས་དང་གཞན་སྲས་ཞེས་པའི་དོན་ནི། དེའང་ཐོག་མར་སྒོ་ང་དེ་ལས་གཟུགས་སུ་སྨིན་པ་ལྟར་གཉིས་ཀྱི་སྲིད་པའི་བག་ཆགས་སྦྱོང་བའི་གཉེན་པོའི་ཁྱད་པར་བདག་སྲས་གཞན་སྲས་ཀྱི་རྣམ་པས་བསྟན་པའི་དང་པོ་བསྐྱེད་གཞི་དབང་དུ་ན། བསྐྱེད་གཞི་བདག་གི་ཆོས་ཉིད་བདེ་བར་གཤེགས་པའི་སྙིང་པོ། རྒྱུའི་རྡོ་རྗེའི་འཛིན་པའི་རྣམ་པར་གསལ་བས། གཞན་འཁོར་འདས་སུ་བཟུང་བའི་སྣང་ཞེན་ཐམས་ཅད་བར་སྲིད་བསྡུ་བ་དང་མངལ་འབྱིན་གྱི་སྒོ་ནས་སྲས་སུ་བསྐྲུན་པ་ལ་བདག་གི་སྲས་སུ་གཞན་བྱ་བ་དང་། གཞན་འཁོར་འདས་སུ་སྣང་ཞིང་བཟུང་བ་ཐམས་ཅད་དཀྱིལ་འཁོར་གྱི་གཙོ་བོ་རྡོ་རྗེ་འཛིན་པར་གསལ་ལ། བདག་གི་ཕུང་ཁམས་སྐྱེ་མཆེད་དུ་འཛིན་པའི་ཆོས་ཐམས་ཅད་ཡིག་འབྲུ་དང་། མངལ་འབྱིན་གྱི་བྱ་བས་བསྐྲུན་པས་གཞན་གྱི་སྲས་སུ་བདག་བྱ་བ་ཞེས་གསུངས་ཤིང་། གཉིས་པ་བསྐྱེད་ཚུལ་དབང་གིས་གཞན་དཀྱིལ་འཁོར་གྱི་འཁོར་ལོའི་ལྷ་ཚོགས་སུ་སྣང་བ་ཐམས་ཅད། བདག་འཁོར་བའི་སེམས་ཅན་གྱི་སྲིད་པ་སྐྱེ་བའི་རིམ་པ་དང་སྒོ་བསྟུན་ནས་ཡབ་ཡུམམཉམ་པར་སྦྱོར་བ་དང་། མངལ་འབྱིན་གྱི་སྒོ་ནས་བསྐྱེད་པ་ལ་བདག་གི་སྲས་སུ་གཞན་བྱ་བ་ཞེས་དང་། བདག་འཁོར་བའི་སེམས་ཅན་དེ་ཉིད་གཞན་དུས་གསུམ་གྱི་སངས་རྒྱས་ཐམས་ཅད་མངོན་པར་རྫོགས་པར་བྱང་ཆུབ་པའི་ཚུལ་ལྷུན་གྱིས་གྲུབ་པའི་ཆོ་གའི་ཡན་ལག་རྫོགས་པའི་སྒོ་ནས། དཀྱིལ་འཁོར་གྱི་གཙོ་བོ་བསྐྱེད་པ་སངས་རྒྱས་ཀྱི་སྲས་སུ་བདག་བྱ་བ་ཞེས་གསུངས་ལ། ཞལ་རྒྱུན་ལ། སྔ་མ་རང་གི་རིགས་བདེ་བར་གཤེགས་པའི་སྙིང་པོའི་ཆེ་བ་འབྱིན་པའི་དོན་དང་། ཕྱི་མ་དེ་བཞིན་གཤེགས་པའི་གདུང་གི་རིགས་རྒྱུན་མི་བཅད་པའི་དགོས་པ་ཡིན་གསུངས་སོ། །འདིར་མན་ངག་ཏུ་བསྟན་པ་རིག་འཛིན་ཆེན་པོ་པདྨ་སམྦྷའི་དགོངས་པ་ལྟར་འཆད་པ་ལ། དང་པོ་སྒོ་ང་དེ་སྨིན་ནས་སེམས་ཅན་གྱུར་པ་བཞིན། དང་པོ་བདག་གི་སྲས་སུ་གཞན་བྱ་བ་ལ་ལྔ། གཞན་གྱི་སྲས་སུ་བདག་བྱ་བ་ལ་བརྒྱད་ལས། དང་པོ་ལ་རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ་དང་གཅིག །ཕྱོགས་བཅུའི་སངས་རྒྱས་བཀུག་ནས་ཡུམ་གྱི་མཁའ་རུ་བསྟིམ་པ་དང་གཉིས། སེམས་ཅན་རྣམས་བཀུག་ལ་སྒྲིབ་པ་སྦྱང་བ་དང་གསུམ། གཉིས་སུ་མེད་པ་ལ་ཆེ་བ་བརྗོད་པ་དང་བཞི། མཁའ་ནས་བཏོན་ལ་དཀྱིལ་འཁོར་འགོད་པ་དང་ལྔ་ལས། དང་པོ་ནི་བསྒྲུབ་གཞིའི་རྣམ་པར་སྨིན་པའི་ལུས་ཏིང་ངེ་འཛིན་གསུམ་གྱིས་སྦྱངས་ནས་སྲུང་བའི་འཁོར་ལོའི་སྟེང་གི་བླ་བྲེས་ཀྱི་འོག་ནམ་མཁའི་དབྱིངས་སུ་རྒྱུའི་རྡོ་རྗེ་འཛིན་པ་ཡབ་ཡུམ་བསྐྱེད་པ་ནི། སྒྲུབ་པའི་ཐབས་ཀྱི་ངེས་པ་ལས་ནི་སོགས་ནས། གར་དགུ་དང་ལྡན་པར་གྱུར་ཞེས་པའི་བར་གྱི་བསྟན་ཏེ། རྒྱུའི་ཡི་གེ་ཧཱུྃ་ཡིག་མཐིང་ནག་ལ་སེམས་དམིགས་པ་བརྟན་པར་གྱུར་པ་ནི་གཟོད་དེ་ལས་ཧཱུྃ་གིས་འོད་ཟེར་ནམ་མཁའ་གང་བར་འཕྲོས་ནས་དོན་གཉིས་བྱས། མཁའ་ཁྱབ་ཀྱི་ཧཱུྃ་རྣམས་གཞིའི་ཧཱུྃ་ལ་ཐིམ། དེ་འོད་དུ་ཞུ་བ་ལས་རྡོ་རྗེ་སྔོན་པོ་རྩེ་དགུ་པར་གྱུར། ཡང་དེ་ལས་འོད་ཟེར་འཕྲོས་རང་གཞན་གྱི་དོན་གཉིས་བྱས་ནས། ཚུར་འདུས་ཡོངས་སུ་གྱུར་པ་ལས། རྒྱུའི་ཧེ་རུ་ཀ་སྐུ་མདོག་སྨུག་ནག་ཅིར་ཡང་འགྱུར་བ་རྡོ་རྗེ་དང་དུང་ཁྲག་འཛིན་པ་འབར་བའི་གར་དགུ་དང་ལྡན་པ་གསལ་ནས། གསལ་བརྟན་གྱི་ཚད་མངོན་དུ་མ་གྱུར་པར་བསྒོམ། གཉིས་པ་དེའི་མཁའ་གསང་དུ་ཕྱོགས་བཅུའི་སངས་རྒྱས་རྣམས་སྤྱན་དྲངས་ནས་བདག་གི་སྲས་སུ་བྱ་བའི་ས་བོན་སྒྲུབ་པ་ནི། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས། དང་པོ་ལ་གསུམ་ལས། གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། རྒྱུའི་ཧེ་རུ་ཀའི་ཐུགས་ཀའི་ཧཱུྃ་ལས་ཡུམ་ལྔའི་ས་བོན། ཨེ་ཡཾ་ར་སུཾ་ཀེཾ་རཾ་རྣམས་ཆད་ཞེས་པ་ནས། སྟེང་གི་འབར་བའི་ཀློང་དཀྱིལ་ན། ཞེས་པའི་བར་གྱིས་གསལ་གདབ་སྟེ། དེ་དག་ཀྱང་ཕྱི་ལྟར་ན་འབྱུང་བ་ལྔ། ནང་ལྟར་ན་སེམས་ལྔའི་རང་བཞིན། གསང་བ་ལྟར་ན་ཡུམ་ལྔའི་མཁའ་ཀློང་རྣམ་པར་དག་པའོ། །ཞེས་དག་དྲན་དང་བཅས་ཏེ་གསལ་བར་བསྒོམ། གཉིས་པ་རྟེན་གཞལ་ཡས་ཁང་བསྒོམ་པ་དངོས་ནི། རི་རབ་ཀྱི་སྟེང་དུ་སོགས་ནས། འབར་བའི་ཕྲེང་བ་མང་པོ་འཁྲུགས། །ཞེས་པའི་བར་གྱིས་སྲུང་བའི་འཁོར་ལོའི་ལྟེ་བར་འབྱུང་ལྔ་རིམ་བརྩེགས་ཀྱི་རི་རབ་སྟེང་དུ་གཞལ་ཡས་ཁང་ཕྱི་ནང་རིམ་པ་གཉིས་ཀྱི་ཕྱི་བྷནྡྷ་འམ་རིན་པོ་ཆེ་ནང་ཐོད་པས་བརྩིགས་པའི་གཞལ་ཡས་ཁང་གསལ་བར་བསྒོམ། གསུམ་པ་གདན་བསྐྱེད་པ། གཞལ་ཡས་ཁང་གི་སོགས། དབང་ཕྱུག་ལྷ་ཆེན་ལ་སོགས་བཟུང་། །ཞེས་པའི་བར་གྱིས་གཙོ་འཁོར་རང་རང་དང་འཚམས་པའི་གདན་གསལ་བཏབ། དེ་ནས་གཉིས་པ་ལྷ་བསྐྱེད་པ་ནམ་མཁར་གནས་པའི་སོགས་ནས། འབྲས་བུའི་ཧེ་རུ་ཀར་གྱུར་པ་ནི། ཞེས་པའི་བར་གྱིས་བདག་གི་སྲས་སུ་བྱ་བའི་ས་བོན་བསྒྲུབ་པ་དང་། གསུམ་པ་སེམས་ཅན་རྣམས་བཀུག་ནས་སྒྲིབ་པ་སྦྱངས་ཏེ། འཁོར་འདས་རོ་གཅིག་ཏུ་ཞུ་བ་དང་། བཞི་པ་གཉིས་མེད་ཀྱི་རང་བཞིན་ལ་ཆེ་བ་བརྗོད་པ་རྣམས་བསྟན་ཏེ། ནམ་མཁར་གནས་པའི་རྒྱུའི་ཧེ་རུ་ཀ་སྐར་མདའ་ཆད་པ་བཞིན་དུ་དཀྱིལ་འཁོར་གྱི་ཏོག་གི་རྩེ་མོ་ནས་མར་བབས། དཀྱིལ་འཁོར་གྱི་དབུས་ཀྱི་གདན་དུ་འཁོད་པ་ལས། དེ་ཉིད་སྐད་ཅིག་གིས་དཔལ་ཆེན་པོ་སྐུ་མདོག་སྨུག་ནག་ཅིར་ཡང་འགྱུར་བ་དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་དང་མཉམ་པས་མཚོན་ཆ་སྣ་ཚོགས་འཛིན་པ་གྱུར་ཏེ། ཆོས་ཉིད་དེ་བཞིན་ཉིད་ཀྱི་དབྱིངས་ལས་ཁྲོ་མོ་དབྱིངས་ཕྱུག་མ་ཆེན་པོ་མངོན་དུ་ཕྱུང་ཏེ་ཧི་ཧི་ཞེས་དགྱེས་པའི་གདངས་ཀྱིས་ཡབ་ལ་སྲས་བསྐྱེད་པར་གསོལ་བ་བཏབ་པས། ཡབ་ཀྱི་ཞལ་ནས་ཧཱུྃ་ཧཱུྃ་ཧཱུྃ་བི་ཤྭ་སོགས་ཀྱི་སྔགས་བརྗོད་པ་དང་ཡབ་ཡུམ་གཉིས་ཀྱི་སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ལས་གླེང་གཞི་ལྟར་འཇིག་རྟེན་དྲུག་གི་ཕྱོགས་བཅུར་ཁྱབ་པར་ཁྲོ་བོ་འཆོལ་བ་མཚོན་ཆ་སྣ་ཚོགས་ཀྱི་ཆར་འབེབས་པ་དཔག་ཏུ་མེད་པ་སྤྲོས། ལྟས་ཆེན་པོ་བཅོ་ལྔས་གདུག་པ་ཅན་གྱི་ཚོགས་རྣམས་ཚར་བཅད་ནས། ཕྱོགས་བཅུའི་སངས་རྒྱས་ཀྱི་སྤྲུལ་པའི་ཁྲོ་བོ་རྣམས་ལས་རྡོ་རྗེ་རིགས་ཀྱི་ཁྲོ་བོ་རྣམས་རང་ལ་བསྟིམ་པས་སྲས་ཀྱི་ས་བོན་བསྐྲུན། གདུག་པ་ཅན་གྱི་གཙོ་བོ་བྱས་ཏེ་སེམས་ཅན་ཐམས་ཅད་ཀྱི་སྒྲིབ་པ་སྦྱང་། དྭངས་མའི་ངོ་བོ་སེམས་ཉིད་ཀྱི་ཡེ་ཤེས་བཀུག་སྟེ་སྔ་མའི་རང་གི་བྱང་ཆུབ་ཀྱི་སེམས་དང་གཉིས་མེད་དུ་འདྲེས་པས་འཁོར་འདས་རོ་གཅིག་ཏུ་ཞུ་བས་འཁོར་འདས་གཉིས་མེད་ཀྱི་རང་བཞིན་ལ་ཆེ་བའི་ང་རྒྱལ་བརྗོད་པ་ནི། བདག་ཉིད་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །ཞེས་ང་རྒྱལ་གསལ་བའོ། །ལྔ་པ་དེའི་རྐྱེན་གྱིས་འབྲས་བུའི་རྡོ་རྗེའི་འཛིན་པར་བཞེངས་པའི་མཁའ་གསང་ནས་འཁོར་རྣམས་བཏོན་ཏེ་དཀྱིལ་འཁོར་དུ་འགོད་པ་ལ་བདག་གི་སྲས་སུ་སངས་རྒྱས་བྱ་བ་ནི། སྒྲུབ་ཐབས་ཀྱི་འབྲས་བུའི་ཧེ་རུ་ཀར་གྱུར་པ་ནི། ༀ་བཛྲ་ཤྲཱི་ཧེ་རུ་ཀ་ཧཱུྃ་སོགས་ནས། རྒྱན་ཆ་ལུགས་གསལ་ཞིང་གཟི་བརྗིད་དང་ལྡན་པར་གྱུར་བར་གྱིས་བསྟན་པས། དེ་ལ་ནང་གསེས་སུ་འབྲས་བུའི་ཧེ་རུ་ཀ་ཞལ་གསུམ་ཕྱག་དྲུག་པ་སྐུ་མདོག་མཐིང་ནག་ཆར་སྤྲིན་ལྟར་གནག་པ་ཉི་མ་བྱེ་བའི་གཟི་བྱིན་འབར་བ། ཡུམ་ཀྲོ་ཏི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ་པ་གཅེར་བུ་སྐྲ་གྲོལ་བ་ལང་ཚོས་སྒེག་པའི་རྣམ་འགྱུར་ཅན། སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན་དུ་གསལ་ཞིང་། དེ་ནས་གཉིས་པ་རིགས་བསྡུ་བསྔར་སྔགས་ཀྱིས་སྤྲུལ་པ་སྤྲོ་བའི་རྡོ་རྗེ་རིགས་ཀྱི་ཁྲོ་བོ་རྣམས་གཙོ་བོ་ཡབ་ཡུམ་ལ་བསྟིམ་པའི་ལྷག་མ། དེ་བཞིན་གཤེགས་པའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་ཀྱི་ཁྲོ་བོ་བསམ་གྱིས་མི་ཁྱབ་པའི་ཚོགས་སྤྲོས་པ་རྣམས་ཕྱོགས་སོ་སོར་འདུས་ནས་གཅིག་ཏུ་གྱུར་ནས། རིགས་བཞིའི་ཧེ་རུ་ཀའི་སྐུར་གྱུར་ནས་ཕྱོགས་བཞིའི་འཁོར་ལོའི་རྩིབས་བཞིར་རང་རང་གི་གདན་ལ་བཞུགས་པ་གསལ་བ་ནི། སྒྲུབ་ཐབས་ཀྱི་དེ་བཞིན་གཤེགས་པའི་རིགས་སོགས་ནས་གཡས་བརྐྱང་བའི་སྟབས་ཀྱིས་བཞུགས་པའོ། །ཞེས་པའི་བར་གྱིས་གསལ་བཏབ། གསུམ་པ་སྲས་མོ་ཉི་ཤུ་མངལ་འབྱིན་གྱི་སྒོ་ནས་བསྐྱེད་པ་ནི། དེ་ནས་རིགས་ལྔའི་ཁྲག་འཐུང་སོགས་ནས་གཟི་བརྗིད་དང་ལྡན་པར་བསམ་གྱི་བར་གྱིས་བསྟན་པས། རིགས་ལྔའི་ཁྲག་འཐུང་ཡབ་ཡུམ་རྣམས་རྗེས་སུ་ཆགས་པར་སྙོམས་པར་ཞུགས་ཏེ། དགྱེས་པའི་བཞད་སྒྲ་ཧ་ཞེས་བརྗོད་པ་དང་། བྱང་ཆུབ་སེམས་ཀྱི་སྤྲིན་ལས་ཁྲོ་མོ་བརྒྱད་ཕྲག་ལྔ་ཐོན་ནས། སླར་ཡང་རིགས་གཅིག་ཏུ་བསྡུས་ཏེ། འཁོར་ལོའི་གྲྭ་དང་གྲུ་ཆད་བཞིའི་ཀ་རཱི་མ་བརྒྱད་གསལ་ལ། དེ་བཞིན་དུ་ཧེ་བརྒྱད་ཀྱིས་གསེར་ཁྱམས་གྱི་ཕྱོགས་མཚམས་བརྒྱད་དུ་སེང་ཧ་མ་བརྒྱད་གསལ་བཏབ། སླར་ཡང་དགྱེས་པའི་བཞད་སྒྲ་ཕཊ་ཅེས་བརྗོད་པ་དང་བྱང་ཆུབ་ཀྱི་སྤྲིན་ལས་སྒོ་སྐྱོང་བཞི། བཞི་ཕྲག་ལྔ་ཐོན་ནས་སླར་ཡང་རིགས་བསྡུས་ཏེ་སྒོ་བཞིར་སྒོ་མ་བཞི་གསལ་གདབ་པ་སྟེ། དེ་དག་ནི་ཡབ་ཡུམ་གྱི་མཁའ་ལས་ངོ་མཚར་སྲས་ཀྱི་དཀྱིལ་འཁོར་ཡུམ་གྱི་མཁའ་ལས་བཏོན་ཏེ་དཀྱིལ་འཁོར་ལ་འགོད་པའོ། །འདི་དག་ནི་བདག་གི་སྲས་སུ་གཞན་བྱ་བ་ལ་ས་བཅད་ལྔར་གསུངས་པ་འདིར་སྒྱུ་འཕྲུལ་ཁྲོ་བོ་དང་སྦྱར་ཏེ་ནང་གི་དབྱེ་བ་རྣམས་ནི་སྒྲུབ་ཐབས་ཀྱི་དཀྱུས་བཞིན་བཤད་པ་དང་སྒྲུབ་ཐབས་གཞན་ལའང་ཅི་རིགས་པས་སྦྱར་དུ་རུང་བར་བྱས་པའོ། །གཉིས་པ་གཞན་སྲས་ཀྱི་བྱ་བ་ལ། སྒོ་ང་སྨིན་པས་སེམས་ཅན་དུ་གྱུར་པ་དང་མཐུན་པར་སྦྱང་བྱེད་ཀྱི་གཉེན་པོ་ལ་བརྒྱད་དེ། གཙོ་བོ་ཡབ་ཡུམ་ཞུ་སྟེ་རྒྱུའི་ས་བོན་དུ་གྱུར་པ་དང་གཅིག །དེ་ལས་ཡབ་ཡུམ་དུ་བསྐྱེད་པ་དང་གཉིས། ཡབ་ཀྱི་རྟོག་ཚོགས་ལས་ཡི་གེ་བསྐྱེད་པ་དང་གསུམ། ཡུམ་ལས་འོད་འཕྲོས་ཞིང་ལྷ་ལ་སྲས་བསྐྲུན་པར་གསོལ་བ་གདབ་པ་དང་བཞི། དཀྱིལ་འཁོར་ཐམས་ཅད་བདག་ཡབ་ཡུམ་ལ་བསྟིམ་པས་ཡེ་ཤེས་པར་ང་རྒྱལ་བསྐྱེད་པ་དང་ལྔ། ཡབ་ཡུམ་སྦྱོར་བ་བྱ་ཞིང་མཁའ་རུ་དཀྱིལ་འཁོར་བསྐྱེད་པ་དང་དྲུག །བདག་གི་རྟོག་པ་ཞེ་གཉིས་ལྷ་སྐུར་གྱུར་ཏེ་ཕྱིར་གདོན་པ་དང་བདུན། ཡེ་ཤེས་པ་སྤྱན་དྲངས་ཤིང་རྒྱས་གདབ་པ་དང་བརྒྱད་ལས། དང་པོ་ལ་ཞལ་རྒྱུན་དུ་གཙོ་བོ་འོད་དུ་ཞུ་ནས་ཐིག་ལེ་མཐིང་ནག་གི་གོང་བུ་ས་བོན་ཕྱག་མཚན་གྱིས་མཚན་པར་གྱུར་པའི་སྒོ་ང་གཉིས་པ་དེ་འབྲས་བུའི་རྡོ་རྗེ་འཛིན་པར་བཞེངས་པ་སྒོང་ཁྱིམ་བརྟོལ་ནས་བཙས་པ་སོགས་གསུངས་ཀྱང་། འདིར་ནི་སྒྱུ་འཕྲུལ་རང་གི་དགོངས་པ་ལྟར། སྣང་བའི་ཞེན་པ་སྦྱོང་བ་དང་། སྟོང་པའི་འཛིན་པ་སྦྱང་བ་གཉིས་ལས། དང་པོ་སྣང་ཞེན་སྦྱོང་བ་ལའང་། བསྐུལ་ཚིག་ཏིང་ངེ་འཛིན་གསལ་གདབ་པ་དང་གསུམ་ལས། དང་པོ་ནི་དཀྱུས་ལས་གཙོ་བོའི་སོགས་ནས། བདག་སྦྱོར་ཅིག་གི་བར་གྱིས་བསྟན་ཏེ། གཙོ་བོའི་ཐུགས་ཀ་ནས་རིག་པའི་ཀུན་ཏུ་བཟང་པོ་སེམས་དཔའི་རྒྱུན་ལྡན་རྣམ་སྨིན་ལུས་ཀྱི་རྣམ་པ་ཅན་རྐང་པའི་ལོང་བུ་སྤྲད་ཅིང་ཐལ་མོ་སྦྱར་བའི་རྣམ་པ་ཐོན། དཀྱིལ་འཁོར་ལ་བསྐོར་ནས་ཤར་ཕྱོགས་དགའ་བ་ཆེན་པོའི་སྒོ་ནས་མེ་ཏོག་གཏོར་ནས། ༀ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་གསོལ་བ་བཏབ་བོ། །གཉིས་པ་ནི་སྒྲུབ་ཐབས་ལས། ལྷ་རྣམས་ཀྱི་རྗེས་སུ་གནང་བ་སོགས་ནས། གོང་བུར་འབར་བར་གྱིས་བསྟན་པས། ལྷ་རྣམས་ཀྱིས་བདག་ལ་རྗེས་སུ་དགོངས་ཏེ་ཐབས་དང་ཤེས་རབ་ཀྱི་འོད་ཟེར་སྤྲོས་པས། བདག་གི་སེམས་དང་སེམས་བྱུང་གི་རྟོག་པ་དང་། དེ་ལས་གྱུར་པའི་རྣམ་སྨིན་ལུས་ངག་སྦྱང་། གཟུང་འཛིན་གཉིས་བྲལ་གྱི་རང་བཞིན་གསེར་ཞུན་མ་ལྟ་བུའི་གོང་བུར་གྱུར་པ་ལ། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་འོད་ཟེར་ཡི་གེ་གསུམ་གྱི་རྣམ་པས་བདག་ལ་བསྟིམ་པས། གོང་བུ་ཉིད་ཀྱང་དེ་དང་གཉིས་སུ་མེད་པའི་ༀ་ཨཱཿཧཱུྃ་གསུམ་དུ་གྱུར་ནས། ༀ་ཨཱཿལ་ཐིམ། ཨཿཧཱུྃ་ལ་ཞུགས་པ་ཟླ་བ་དང་རླུང་དཀྱིལ་ལ་གནས་པར་གྱུར་པས། དེ་རླུང་གིས་བཏེགས་པས་བུང་བ་མེ་ཏོག་ལ་ལྡིང་བ་ལྟར། དཀྱིལ་འཁོར་ཐམས་ཅད་ལ་ལན་གསུམ་བསྐོར་ནས་གཙོ་བོའི་ཐུགས་ཀར་མདའ་འཕང་བ་ལྟར་སོང་བའི་རྐྱེན་གྱིས་ཡབ་ཡུམ་བདེ་བའི་རོས་ཚིམ་ནས་བྱང་ཆུབ་ཀྱི་སེམས་དང་གཉིས་སུ་མེད་པར་ཞུ་བ་སྐུའི་དབྱིབས་བརྒྱུད། རྡོ་རྗེའི་ལམ་ནས་ཡུམ་གྱི་པདྨར་ཐོན་པ་འོད་ཀྱི་གོང་བུ་གནས་པ་ལས་གཙོ་བོ་ཡབ་ཡུམ་ཡང་རྗེས་སུ་ཆགས་པའི་སྦྱོར་བས་བདེ་བའི་ངོ་བོར་ཞུ། འཁོར་རྣམས་ཀྱང་ཧཱུྃ་ཧ་ཧེ་ཕཊ་ཅེས་རང་རང་གི་གསང་སྔགས་བརྗོད་པའི་རྐྱེན་གྱི་དབུས་ཀྱི་ཐིག་ལེ་ལ་རོ་གཅིག་ཏུ་གྱུར་པ་ལས་གསེར་ཞུན་ལྟ་བུའི་འོད་ཀྱི་གོང་བུར་གྱུར་པར་བསམ། ཞལ་རྒྱུན་དུ་གཙོ་འཁོར་རྣམས་འོད་དུ་ཞུ་བ་རང་གི་ཁ་དོག་ཅན་ས་བོན་གྱིས་མཚན་པ་རང་རང་གི་གདན་ཐོག་ཏུ་སྒོང་ཁྱིམ་བཀྲམ་པ་ལྟར་གསལ་བ་ཞིག་སྣང་། གསུམ་པ་ནི་གཞུང་གི། ཐབས་དང་ཤེས་རབ་གཉིས་མེད་པ། །ཡེ་ཤེས་ཀྱིས་ནི་རྣམ་རྟོག་ཀྱང་། །གསེར་ཞུན་ལྟ་བུའི་སེམས་དག་ལས། །གསུང་གི་བྱིན་བརླབས་འོད་ཀྱི་འབྲུ། །ཐུགས་ཀར་ཐིམ་ནས་སྐུ་ཡི་དབྱིབས། །རྡོ་རྗེའི་ལམ་ནས་ཡུམ་གྱི་མཁར། །ཆོས་སྐུ་བྱང་ཆུབ་སེམས་སུ་གནས། །ལྷ་རྣམས་སོ་སོའི་སྙིང་པོའི་སྒྲ། །ཧཱུྃ་ཧ་ཧེ་ཕཊ་ཅེས་བྱུང་བ། །བྱང་ཆུབ་སེམས་སུ་གཅིག་པར་ཐིམ། །ཞེས་ཤིན་ཏུ་གསལ་གདབ་བོ། །གཉིས་པ་སྟོང་ཕྱོགས་ཀྱི་ཞེན་པ་སྦྱོང་བ། དེ་ལས་འབྲས་བུའི་རྡོ་རྗེ་འཛིན་པ་ཡབ་ཡུམ་སྐྱེ་མཆེད་རྫོགས་པ་སྒོང་ཁྱིམ་བརྟོལ་བ་ལྟར་བསྐྱེད་པ་ལ། སྒྲུབ་ཐབས་ལས་གཙོ་བོ་ཡབ་ཡུམ་བསྐྱེད་པ། ཡན་ལག་གི་ལྷ་བསྒོམ་པ། འཁོར་སྤྲོ་བ་གསུམ་དུ་བསྟན་པའི་དང་པོ་ནི། ཧཱུྃ་ཧཱུྃ་ཞེས་པ་ནས། དབང་ཕྱུག་ཆེན་པོའི་ངོ་བོར་བཞུགས་པའི་བར་གྱིས་བསྟན་ཏེ། བཀའ་བརྒྱད་ལས། འདི་ནས་ཆོས་ཉིད་སྟོང་པའི་དབྱིངས་ནས་ཡུམ་གནམ་ཞལ་དབྱིངས་ཀྱི་དབང་ཕྱུག་མ་མཐིང་སྐྱ་དབུ་དགུ་ཕྱག་བཅོ་བརྒྱད་པའི་རྣམ་པར་བཞེངས་ཏེ། བཅོམ་ལྡན་འདས་ཆོས་སྐུ་ཞི་བའི་དབྱིངས་ལས་གཟུགས་ཀྱི་སྐུར་བཞེངས་པར་བསྐུལ་བ། ཡེ་ཤེས་རྒྱ་མཚོ་རྣམ་པར་གྲོལ་ཀློང་སོགས་ཀྱིས་བསྐུལ་བ་གསན་ནས་འབྲས་བུའི་རྡོ་རྗེ་འཛིན་པ་གསུངས་ཀྱང་། འདི་ནི་ཧཱུྃ་ཧཱུྃ་ཞེས་བརྗོད། གདན་སྟེང་གི་འོད་ཕུང་དེ་ཉིད་ཧཱུྃ་ཟུང་གཅིག་ཏུ་གྱུར་པ་འོད་ཟེར་གྱི་འཕྲོ་འདུས་དོན་གཉིས་བྱས། སླར་འདུས་ཧཱུྃ་ལ་ཐིམ། འོད་དུ་ཞུ་བ་ལ། ༀ་བཛྲ་གྷཎྜེ་ཞེས་བརྗོད་པས། རྡོ་རྗེ་རྩེ་དགུ་པ་དང་། དྲིལ་བུ་ཧཱུྃ་ཡིག་གིས་མཚན་པར་གྱུར་པ་ལས། སླར་ཡང་འོད་ཟེར་འཕྲོ་འདུས་འོད་དུ་ཞུ་བ་ལས། ༀ་ཤྲཱི་ཧེ་རུ་ཀ་ཧཱུྃ་སོགས་གོང་བཞིན་དུ་གཙོ་བོ་བསྐྱེད་པའོ། །ནང་གསེས་གཉིས་པ་ཡན་ལག་གི་ལྷ་བསྐྱེད་པ་ནི། རང་གི་ཐུགས་ཀར་རིན་པོ་ཆེའི་གུར་ཁྱིམ་སོགས་ནས། ཨཏྨ་ཀོ྅་ཧྃ་བར་གྱིས་སེམས་དཔའ་སུམ་བརྩེགས་སུ་གསལ་བ་ལ་ཡེ་ཤེས་ལྔའི་དབང་བསྐུར། རྡོ་རྗེ་གསུམ་གྱིས་རྒྱས་གདབ་པའོ། །རྩ་བའི་གསུམ་པ་ཡབ་ཀྱི་རྟོག་ཚོགས་ཡི་གེ་བསྐྱེད་པ་དང་། སྒྲུབ་ཐབས་ཀྱི་གསུམ་པ་ངོ་མཚར་སྲས་ཀྱི་དཀྱིལ་འཁོར་སྤྲོ་བ་དང་། དབང་ཕྱུག་མ་ཉེར་བརྒྱད་ཀྱི་དཀྱིལ་འཁོར་སྤྲོ་བ་གཉིས་ཀྱི་དང་པོ་སྲས་སྤྲོ་བ་ལ་མཁའ་གསང་བྱིན་གྱི་བརླབས་པ། གསལ་གདབ་པ། སྐུ་བསྐྱེད་པ་དང་གསུམ་ལས། དང་པོ་ནི་སྒྲུབ་ཐབས་ལས། ཡབ་ཀྱི་གསང་གནས་སོགས་ནས། བཀྲ་ལམ་གྱིས་གསལ་བར་གྱུར་གྱི་བར་གྱིས་བསྟན་པས། འདས་རྩ་བའི་གསུམ་པ་དབང་པོ་ཡུལ་ལ་སད་པའི་རྟོག་ཚོགས་ཡི་གེ་སྤྲིན་དུ་སྤྲོས་ནས། ལྷའི་དཀྱིལ་འཁོར་དུ་སྒྲུབ་པའི་ཡབ་ཀྱི་རྩ་ཁམས་སུ་ཧཱུྃ་ཧ་ཧེ་ཕཊ་ཀྱི་ཡི་གེ་གསལ་བ་དང་། རྩ་བའི་བཞི་པ་ཡུམ་ལས་འོད་འཕྲོས་ལྷ་ལ་གསོལ་བ་གདབ་པ་ནི། ཡབ་ཡུམ་འདོད་ཆགས་ང་རོ་བརྗོད། །བྱིན་གཉིས་དམ་དུ་རབ་འཁྱུད་དེ། །ལག་པ་དམ་འཁྱུད་མ་མཆུ་གཞིབ། །སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་བཟད་པ། །སྐུ་ཡི་དབྱིག་ཏུ་སྲས་བསྐྱེད་ཅིག །ཅེས་གསོལ་བ་བཏབ་པར་བསམ་མོ། །རྩ་བའི་ལྔ་པ་བཀའ་བརྒྱད་ལྟར་ན། ལྷ་གནས་སོ་སོར་ས་བོན་སྒོང་ཁྱིམ་ལྟར་བཀྲམ་པའི་དཀྱིལ་འཁོར་ཐམས་ཅད་གཙོ་བོའི་ཤངས་ཀྱི་རླུང་རིང་ནང་དུ་རྔུབས་པ་དང་ལྷན་ཅིག་པར་སྒོང་ཁྱིམ་ཐམས་ཅད་ཤངས་ཀྱི་རླུང་དང་འདྲེས་ནས་རང་གི་བྱང་ཆུབ་ཀྱི་སེམས་ལ་བསྟིམ་པར་བསམ་ནས། འདོད་ཆགས་ཆེན་པོའི་ཚུལ་གྱིས་ནི། །ཡེ་ཤེས་དཀྱིལ་འཁོར་ཀུན་བསྡུས་ཏེ། །འཁོར་རྣམས་ཐུགས་ལ་བཞུགས་པ་ཡི། །ཤེས་རབ་མ་ནི་དགའ་བར་བྱ། །ཞེས་པ་བཞིན་བསམ་མོ། །རྩ་བའི་དྲུག་པ་མཁའ་གསང་བྱིན་གྱིས་བརླབས་ཏེ་ཕྱག་རྒྱ་བཞིས་སྙོམས་པར་ཞུགས་པ་སྒྲུབ་ཐབས་གཞུང་གིས་དངོས་སུ་བསྟན་པ་སྟེ། ཆགས་པ་ལྕགས་ཀྱུ་ཞེས་བྱ་སྟེ། །པདྨར་བཙུད་པ་ཞགས་པ་མོ། །ཁ་འགྱེད་པ་ནི་སྒྲོག་ཡིན་ཏེ། །སྒྲ་གྲགས་པ་ནི་དྲིལ་བུའོ། །ཞེས་སོ། །ཕྱག་རྒྱ་བཞིའི་བགྲོད་ཀྱིས་སྙོམས་པར་ཞུགས་ནས་བདེ་བ་ཆེན་པོའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཞལ་དུ་ཞུགས་པས་རྗེས་སུ་ཆགས་པའི་མེས་བྱང་ཆུབ་ཀྱི་སེམས་སུ་ཞུ་བས་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨོར་ལན་གསུམ་དུ་སྤྲོས་པ་ལས། བཀའ་བརྒྱད་ལྟར་ན། ཆོས་སྐུ་བྱང་ཆུབ་སེམས་སུ་གནས། །དང་པོར་བབ་པ་གཞལ་མེད་ཁང་། །གཉིས་པ་གདན་གྱུར་གསུམ་པ་ལས། །ཡབ་ཀྱི་རྟོག་ཚོགས་ཡི་གེར་རྫོགས། །བྷ་ག་ཉིད་དུ་ལྷ་རྣམས་བསམ། །ཞེས་ཡི་གེའི་ས་བོན་ཡོངས་སུ་གྱུར་པ་ལས། ཡུམ་མཁར་ལྷ་ཚོགས་གསལ་གདབ་པ། ལྷ་སོ་སོའི་གསང་སྔགས་བརྗོད་པའི་རྐྱེན་གྱིས་སྐུ་ཡོངས་སུ་རྫོགས་པར་གྱུར་པ། དེ་རྣམས་ཛཿཞེས་བརྗོད་པ་ཙམ་གྱིས་ཡུམ་གྱི་མཁའ་ནས་བཏོན་ཏེ་མདུན་གྱི་ནམ་མཁའ་བཞག་པ་ལ་ༀ་ཨཱཿཧཱུྃ་གིས་སྐུ་གསུང་ཐུགས་སུ་བྱིན་གྱིས་བརླབས། འོད་ཟེར་འཕྲོ་འདུས་སངས་རྒྱས་ཀྱི་མཛད་པ་བསྒྲུབས་ནས་རང་རང་གི་གདན་ལ་བཞུགས་པར་བསམ་པའོ། །སྒྲུབ་ཐབས་འདིར་ནི་བྱང་ཆུབ་ཀྱི་སེམས་ཡུམ་གྱི་མཁར་ལན་གསུམ་དུ་སྤྲོས་པའི་དང་པོས་ཐིག་གདབ། གཉིས་པས་གཞལ་ཡས་ཁང་དུ་བྱིན་གྱིས་བརླབས། གསུམ་པས་གཞལ་ཡས་ཁང་དེར་ལྷ་རྣམས་ཀྱི་ས་བོན་ཡིག་འབྲུའི་དཀྱིལ་འཁོར་བཀྲ་ལམ་གྱིས་གསལ་བར་བསམ་ལ། གཉིས་པ་དེའི་དོན་ནན་ཏན་གྱིས་གསལ་གདབ་པ་ནི། བསྙེན་པ་དང་ནི་ཉེར་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨོའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་དུ། །སངས་རྒྱས་སྤྲིན་ཚོགས་མ་ལུས་པ། །དགྱེས་མཉམ་མཆོག་གི་སྦྱིན་པས་བསྟིམ། །ཞེས་སོ། །རྩ་བའི་བདུན་པ་བདག་གི་རྟོག་ཚོགས་ལྷ་གྱུར་ནས་ཕྱིར་གདོན་པ་ནི། གསུམ་པ་ལྷར་བསྐྱེད་པ་ནི། ༀ་བཛྲ་མ་ཧཱ་ཤྲཱི་ནས། ཛྭ་ལ་ནི་ཧཱུྃ་ཕཊ་ཞེས་སོགས་ནས། ཞལ་ཕྱིར་ཕྱོགས་ནས་བཞེངས་པའོ། །ཞེས་པས་བར་གྱིས་ངོ་མཚར་སྲས་ཀྱིི་དཀྱིལ་འཁོར་རིགས་ལྔ་སོགས་སྒོ་མ་བཞི་བཅས་མངལ་འབྱིན་གྱི་སྒོ་ནས་སྤྲོས་པ་ནི། གཙོ་བོའི་སྔགས་བརྗོད་པའི་རྐྱེན་གྱིས། ཡུམ་མཁའ་གཞལ་ཡས་ཁང་གི་དབུས་ཀྱི་ཧཱུྃ་གཉིས་བཛྲ་ཧེ་རུ་ཀ་ཡབ་ཡུམ་གྱི་སྐུ་གྱུར་པ། ཕཊ་ཛཿཞེས་པས་མཁའ་ལས་སྤྲོས་ཏེ་མདུན་གྱི་ནམ་མཁར་བཞུགས་པར་གྱུར་ནས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས། བདག་ཉིད་གཙོ་བོ་ཡབ་ཡུམ་ལ་ཐིམ་ནས་གཉིས་སུ་མེད་པར་གྱུར་པར་བསམ་མོ། །དེ་བཞིན་དུ་རིགས་བཞིའི་ས་བོན་རྣམས་རིམ་པ་བཞིན་རིགས་བཞིའི་ཧེ་རུ་ཀ་ཡབ་ཡུམ་གྱི་སྐུར་གྱུར་པ། ཕཊ་ཛཿས་མཁའ་ལས་བཏོན་ཏེ། ཕྱོགས་བཞིའི་གདན་གྱི་ནམ་མཁར་བཞུགས་ནས་སྔར་བཞིན་འོད་ཟེར་སྤྲོ་བསྡུའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ། ཕྱོགས་བཞི་རང་རང་གི་གདན་སྟེང་དུ་བཞུགས་པ་གསལ་གདབ། དེ་བཞིན་དུ་ཀ་རཱི་མ་བརྒྱད། སེང་ཧ་མ་བརྒྱད། སྒོ་མ་བཞི་དང་བཅས་པ་མངལ་འབྱིན་གྱི་ཆོ་གས་བསྐྱེད་ནས། གཉིས་པ་དབང་ཕྱུག་མ་ཉི་ཤུ་རྩ་བརྒྱད་ནི། གླེང་གཞིའི་སྐབས་བཞིན་སྲས་ཉི་ཤུ་བསྐྱེད་པའི་ཡུམ་དུ་གྱུར་པས་མངལ་བྱིན་གྱིས་མི་བསྐྱེད་པར་བདག་ཉིད་བཛྲ་ཧེ་རུ་ཀར་གསལ་བའི་ཐུགས་ཀ་ནས་བྷྱོ་ཡིག་ཉེར་བརྒྱད་འཕྲོས་པས། རང་སྔགས་བརྗོད་པའི་རྐྱེན་གྱིས་ཁྱམས་ཕྱི་མའི་ཕྱོགས་བཞིར་དྲུག་དྲུག་དང་། སྒོ་བཞིར་རེ་རེ་རང་རང་གི་སྟན་ལ་འཁོད་པར་གསལ་གདབ་པ་སྟེ་ལྷ་ཐམས་ཅད་ཀྱི་སྲོག་གི་གོར་ཡེ་ཤེས་སེམས་དཔའ་དྭངས་མའི་སྲོག་ཡིག་བཅས་པས་མཚེན་པར་གསལ་ངེས་པར་བྱའོ། །རྩ་བའི་བརྒྱད་པ་ཕྱག་རྒྱ་བཞིས་བཅིངས་ནས་ཡེ་ཤེས་པ་སྤྱན་དྲངས་ཤིང་རྒྱས་གདབ་པ་ནི། སྒྲུབ་ཐབས་ལས། གསལ་གདབ་པ་ལ་སྔགས་དང་ཚིགས་ཀྱིས་གསལ་གདབ་པའི་ཕྱི་མ་ལ་ཆེ་བ་བསྐྱེད་པ་དང་། གསལ་གདབ་དངོས་གསུངས་པ་རྣམས་ཀྱིས་མཚོན་པས་ཧཱུྃ་ཧ་ཧེ་ནས། འབར་བའི་དཀྱིལ་འཁོར་གསལ་བར་སྣང་། །ཞེས་པའི་བར་གྱིས་བསྟན་ཏེ། ཕྱག་རྒྱ་བཞིའི་རྒྱས་ཆིངས་ཀྱིས་བཅིངས་པ་ནི། དེ་ལྟར་གསལ་བའི་ལྷ་ཚོགས་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་རྣམས་ལ་གསལ་སྣང་ཐོན་པ་ནི་སྐུ་ཕྱག་རྒྱ་ཆེན་པོ། ཆོས་རྒྱ་ལ་གཉིས་ཀྱི། བསམ་པ་ཆོས་རྒྱ་ནི། ལྷ་རྣམས་ཀྱི་སྲོག་གི་གོར་རང་འདྲའི་ཡེ་ཤེས་སེམས་དཔའ་དྭངས་མའི་སྲོག་ཡིག་དང་བཅས་པ་གསལ་བ། བརྗོད་པ་ཆོས་རྒྱ་ནི། ལྷ་རྣམས་ཀྱི་རང་རང་གི་བསྐྱེད་སྔགས་བརྗོད་པ་རྣམས་ཡིན་ལ། བཅའ་བ་དམ་རྒྱ་དང་། དཀྲོལ་བ་ལས་རྒྱ་གཉིས་འོག་གི་ཕྱག་རྒྱའི་མཆོད་པའི་སྐབས་ཀྱི། ཧཱུྃ། རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །སོགས་ཀྱིས་མཚོན་པའི་བཅའ་བ་དམ་ཚིག་གི་ཕྱག་རྒྱ་དང་། དཀྲོལ་བ་ལས་ཀྱི་ཕྱག་རྒྱ་བཞི་དང་ལྡན་པར་གསལ་བ་རྣམས་ཡིན་ནོ། །དེ་དག་ལ་ཆེ་བ་བསྐྱེད་པ་ནི། རྒྱུད་ལས། ས་ལ་སོགས་ལ་ཕྱག་རྒྱར་བྱས། །རྣམ་གྲོལ་རིམ་པར་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པ། །སྨོས་ཅི་དགོས་ཏེ་དེ་ཉིད་ཡིན། །ཞེས་པས་ཕྱག་རྒྱ་བཞིས་རྡོ་རྗེ་འཆང་གི་དངོས་གྲུབ་སྒྲུབ་པ་ལ་མི་བསླུ་བར་བྱིན་གྱིས་བརླབས་པའི་དོན་ལ་ངེས་པའི་བློ་བཞག་གོ། །དེ་ལྟར་ཕྱག་རྒྱ་བཞིས་བཅིངས་ཤིང་གསལ་གདབ་ནས་ཡེ་ཤེས་པ་སྤྱན་དྲངས་ཤིང་སྐུ་གསུང་ཐུགས་དང་ཡེ་ཤེས་ལྔའི་རྒྱས་གདབ་པ་ནི། སྒྲུབ་ཐབས་ཀྱི་གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་ནང་གསེས་དྲུག་གི། དང་པོ་ལ་བཞི། སྙན་གསན་དབབ་པ། སྤྱན་དྲངས་པ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པ་རྣམས་ཀྱིས་བསྟན་པས། སྒྲུབ་ཐབས་ཀྱི་དཀྱུས་བཞིན་དུ་ཤེས་པར་བྱའོ། །དེ་ནས་སྔ་དྲོ་ལས་བྱང་རྒྱས་པ་བཏང་ནས་བསྙེན་པའི་མགོ་ནས་ལྷའི་གསལ་སྣང་ལ་བསླབ། ཐུན་ཕྱི་མ་གསུམ་ལ་སེམས་བསྐྱེད་ནས་ལྷ་བསྐྱེད་རྒྱས་པར་བཏང་། སྤྱན་འདྲེན་བཞུགས་གསོལ་གཉིས་གཞུང་བཞིན་ལ། མཆོད་པ་ཀུན་བཟང་བཞི་བསྣོལ་དང་། སྨན་རཀ་གཏོར་གསུམ་སྔགས་ཙམ་དང་། བསྟོད་པ་གཞུང་བཞིན་དུ་བཏང་། བཤགས་པ་དང་། དངོས་གྲུབ་གསོལ་བ་དང་། དམ་བཅའ་བ་གསུམ་བཞག་ཀྱང་ཆོག་ལ། བསྙེན་པའི་མགོར་ལྷའི་གསལ་སྣང་ལ་བསླབ་པའི་ཚུལ། ཁྲིད་ཐང་མདུན་མཆོད་པ་མཚོན་ཙམ་བཤམ། རང་ཉིད་དེའི་མདུན་དུ་ཉེ་རིང་འཚམས་པར་འདུག་ནས། ལྷ་སྐུ་ལ་མིག་གིས་བལྟ་ཞིང་། ཡང་མིག་བཙུམ་ནས་དེ་འདྲ་ཡིད་ལ་ཨི་འཆར་བལྟ་ནས་སྒོམ་ཚུལ་ཞི་བའི་བསྙེན་ཡིག་ལྟར། ལྷ་སྣང་ལ་བསླབ་པ། ང་རྒྱལ་ལ་བསླབ་པ། དག་དྲན་ལ་བསླབ་པ་རྣམས་འདིར་བླངས། ཁྱད་པར་ཁྲོ་བོ་ལ་སྤྱན་དབུས་མར་སེམས་བཞིན་བསླབ་སྟེ། བཛྲ་ཧེ་རུ་ཀ་སྐུ་མདོག་མཐིང་ནག་དབྱར་གྱི་ཆར་སྤྲིན་ལྟར་གནག་པ། ཉི་མ་བྱེ་བའི་གཟི་བྱིན་འབར་བ། དབུ་གསུམ་གྱི་གཡས་གཡོན་གཉིས་ལ་མགྲིན་པ་དང་བཅས་པར་གསལ་བ་ལས། མགོ་གསུམ་ལྷན་དུ་འབྱར་བ་འདྲ་བ་ཞིག་མིན་པ། གཡས་ཞལ་དཀར་ལ་བཞད་པ། གཡོན་ཞལ་དམར་ལ་གཤེ་བ། དབུས་མཐིང་ནག་དྲག་པོ་ཁྲོས་པའི་ཉམས་ཅན། ཞལ་རེ་རེར་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ་རྣམ་པར་འགྱུར་བའི་ཞལ་གདངས་ཤིང་། མཆེ་བ་བཞི་བཞི་གཙིགས་པ། གློག་ལྟར་འཁྱུག་པའི་ལྗགས་འདྲིལ་བ། རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུྃ་སྒྲ་འབྱིན་པ། རྫི་སྨིན་སྨ་ར་ལས་འབར་བའི་མེ་འཁྱོགས་པར་འཕེན་པ། སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན། རྡོ་རྗེའི་བ་སྤུས་གཏམས་པ། དེ་ཡང་ཆགས་ཉམས་ཀྱིས་སྒེག་པ། ཁྲོ་ཉམས་ཀྱིས་དཔའ་བ། རྨོངས་ཉམས་ཀྱིས་མི་སྡུག་བ་སྟེ་སྐུའི་གར་གསུམ། ཧ་ཧ་ཧི་ཧི་ལ་སོགས་པ་བཞད་པའི་གད་མོ་འབྱིན་པ། ཟུངས་ཤིག་རྒྱོབ་ཅིག་ལ་སོགས་པ་གཤེ་བ། དེ་དག་ཀྱང་འབྲུག་སྟོང་དུས་གཅིག་ལ་ལྡིར་བའམ། ཐོག་སྟོང་དུས་གཅིག་ལ་ལྷུང་བ་ལྟ་བུའི་སྒྲ་གདངས་དང་ལྡན་པ་དྲག་ཤུལ་ཏེ་གསུང་གི་གར་གསུམ། རྨོངས་པའི་འགྲོ་བ་རྗེས་སུ་འཛིན་པའི་སྙིང་རྗེ་དང་། མ་རུངས་པའི་སེམས་ཅན་ཁྲོ་བོའི་འདུལ་བས་རྔམ་པ། ཐམས་ཅད་ཆོས་ཉིད་དུ་རོ་མཉམ་པར་གཟིགས་པའི་ཞི་བ་སྟེ་ཐུགས་ཀྱི་གར་གསུམ་དང་ལྡན་པ། དེ་ལྟར་གར་གྱི་ཉམས་དགུས་རབ་ཏུ་རྒྱས་པ་མེ་དཔུང་འབར་བའི་དབུས་ན་ཞབས་བཞི་གཡས་བརྐྱང་གཡོན་བསྐུམ་པའི་གྱད་ཆེན་པོའི་སྟབས་ཀྱིས་རང་གི་གདན་ལ་རོལ་པ་དེ་ལྟར་གསལ་ཐེབས་པར་གསལ་གདབ་ལ་བསྒོམ། དེ་ཡང་ལྷ་སྣང་སྤྱི་དང་བྱེ་བྲག་རྒྱན་ཕྱག་མཚན་སོགས་ལ་སེམས་འཛིན་ཚུལ་ཞི་བའི་བསྙེན་ཡིག་ལྟར་ལགས། དེ་ལྟར་བསྒོམ་པས་མདུན་གྱི་ལྷ་སྐུ་ལ་གསལ་སྣང་ལེགས་པར་ཐོན་པ་ན་གཟོད་དེ་རང་གི་ལུས་ལ་སྤོས་ཏེ་བསྒོམ་པས་ནམ་ཞིག་གསལ་བརྟན་གྱི་ཚད་བརྒྱད་འབྱུང་སྟེ། དེ་ཡང་གསལ་བའི་ཚད་བཞི་ནི། དེ་ལྟར་ལྷ་བསྒོམ་ཡང་སྐུའི་སྣང་ཆ་སྤྱན་གྱི་དཀར་ནག་ཚུན་ཆད་མ་འདྲེས་པ་གསལ་བས་སལ་ལེ། དེ་ཡང་རིག་པའི་གསལ་ངར་དང་བྲལ་བའི་བྱིང་ཉམས་ཅན་མ་ཡིན་པ་རིག་པ་གསལ་སྟོང་སེང་བག་དང་བཅས་པའི་རིག་པ་ངར་དང་ལྡན་པས་སེང་ངེ། བསྒོམ་པའི་ལྷ་དེ་དག་ཀྱང་སེམས་མེད་བེམ་པོའི་རྣམ་པ་འཇའ་ཚོན་ལྟ་བུར་མ་ཡིན་པར་བ་སྤུའི་ཁུང་བུ་དང་དབུ་སྐྲའི་ཉག་མ་ཚུན་ཆད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པས། དབང་ཤེས་དྭངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཁྲིག་གིས་བཞུགས་པས་ན་ལྷག་གེ། དེ་ལྟ་བུའི་སྐུ་དེ་ཡང་དེ་ལྟར་ཡིན་ནོ་བ་དང་ཡོད་དོ་ཙམ་གྱིས་རྗེས་དཔག་གི་བློ་རྟོག་མ་ཡིན་པར་ཡིད་ངོར་ན་མངོན་སུམ་ལྟ་བུ་བཀྲ་ལྷང་ངེ་འཆར་བ་ལྷང་ངེ་བ་སྟེ་གསལ་བའི་ཚད་བཞི། དཔལ་སྤྲུལ་རིན་པོ་ཆེ་བཀའ་དྲིན་ཅན་གྱིས་ཁོང་གིས་རྟ་ཐོག་འབུད་དུས་ཞབས་གཡོན་པ་ཡོབ་ཆེན་ནང་བཞག་ནས། གཡས་ཡོབ་གནོན་བར་དུ་བཀའ་བརྒྱད་བདུན་བརྒྱ་ཉེར་ལྔའི་ལྷ་ཚོགས་རྣམས་སྐུ་མདོག་ཕྱག་མཚན་རྒྱན་ཆ་ལུགས་རྣམས་མ་འདྲེས་པར་གསལ་ནུས་ཀྱང་། ད་དུང་འདི་བསྐྱེད་རིམ་མཚན་ཉིད་པ་ཅི་ཡིན་སྣང་མེད་ཁྱེད་རྣམས་ཀྱིས་བསྐྱེད་རིམ་རྩིས་མེད་དུ་མ་འདོར་བར་གསལ་བརྟན་གྱི་ཚད་བརྒྱད་མ་བྱུང་བར་བསྒོམ་དགོས་ཞེས། བདག་གི་བླ་མ་བཀའ་དྲིན་ཅན་ལ་གསུངས་པས་དེ་ལྟར་གསལ་བརྟན་གྱི་ཚད་མངོན་དུ་མ་གྱུར་བར་བསྒོམ་དགོས། བརྟན་པ འི་ཚད་བཞི་ནི། ལེ་ལོ་ལ་སོགས་པ་ཕྱིའི་སྐྱོན་གྱིས་མི་གཡོ། རབ་རིབ་མོག་མོག་ལ་སོགས་འགྱུར་བའི་སྐྱོན་གྱིས་མི་འགྱུར། དེ་ཡང་ཡུན་ཐུང་ངུ་ཙམ་མ་ཡིན་པར་ཉིན་མཚན་དུ་མཉམ་པར་བཞག་ཀྱང་རྣམ་རྟོག་ཕྲ་མོས་ཀྱང་མི་བརྫི་བ་གསལ་བ་མངོན་པར་མི་འགྱུར་བ། སྐུ་མདོག་དང་ཞལ་ཕྱག་དང་བྱོན་བཞུགས་དང་འོད་ཟེར་སྤྲོ་བསྡུའི་རྣམ་པ་ལ་སོགས་ཇི་ལྟར་བསྒོམ་ཡང་དེ་ལྟར་འབྱུང་བ་ནི་ཅིར་ཡང་བསྒྱུར་དུ་བཏུབ་པ་སྟེ་བརྟན་པའི་ཚད་བཞིའོ། །ལར་ལྷ་བསྒོམ་པའི་དུས་གསལ་ཞིང་བཞག་པས། བཞག་ཏུ་བཏུབ་པ་ནི་ཡོན་ཏན་ཡིན་ཅིང་། བསྒོམ་པའི་དུས་ཧ་ཅང་མི་གསལ་ཞིང་། མ་བསྒོམ་ན་ལྷ་སྐུའི་རྣམ་པ་ཡིད་ངོར་ལམ་ལམ་གསལ་བ་དང་། གསལ་བའི་དེ་ཉིད་ལ་ཞེན་པ་ཡོད་ན་སྐྱོན་ཡིན་པས་གསལ་སྣང་གོམས་ནས་བསྡུ་རིམ་ལ་བྱང་དགོས་པ་གནད་དུ་ཆེ་བས། དེང་སང་ཕལ་ཆེ་བས་ཐུན་རྗེས་མ་མ་གཏོགས་བསྡུ་རིམ་མི་བྱེད་པ་དང་། ཡང་དུས་རྒྱུན་དཀྱིལ་འཁོར་གསུམ་དང་མ་བྲལ་བར་བྱེད་དགོས་པས་བསྡུ་རིམ་མི་བྱེད་ཟེར་བ་སོགས་ནི་བསྐྱེད་རྫོགས་ཀྱི་གནད་ཐུན་མོང་མ་ཡིན་པའི་ཕྱོགས་ཙམ་ཡང་མི་ཤེས་པ་དང་། གྱ་ནོམ་ལྷར་ཞེན་གྱི་མཚན་འཛིན་ལ་སྐྱོན་དུ་མ་མཐོང་བའི་རྨོངས་པའི་རང་རྟགས་ཟངས་མར་བསྟན་པར་ཟད་དོ། །དེས་ན་བསྡུ་རིམ་ནི་འཆི་བའི་བག་ཆགས་སྦྱོང་ཞིང་ཆོས་སྐུའི་རྟེན་འབྲེལ་བསྒྲིགས་པ་དང་། སྒྱུ་ལུས་འོད་གསལ་དུ་བསྡུ་བའི་རྫོགས་རིམ་གྱི་ལམ་གྱི་སྨིན་བྱེད་ཡིན་པ་མ་ཟད། སྤྱིར་རྡོ་རྗེ་ཐེག་པའི་ལམ་གྱི་ཡོན་ཏན་ཐམས་ཅད་རྡོ་རྗེའི་ལུས་ལ་གནད་དུ་བསྣུན་ནས་རྩ་རླུང་ཐིག་ལེ་དབུ་མར་འདུས་པའི་བྱེད་པ་ལས་སྐྱེ་བ་ཤ་སྟག་ཡིན་ཞིང་། དེས་དོན་གྱི་འོད་གསལ་རང་རྒྱུད་ལ་བསྐྱེད་ཅིང་འབྱུང་བའི་རྒྱུད་རིམ་ལས་རྟགས་བཅུའི་སྣང་བ་འཆར་ཞིང་རང་བཞིན་གྱི་ཐིམ་རིམ་ལ་སྣང་གསུམ་གྱི་འོད་གསལ་ཤར་བའི་ཀློང་དུ་ཐ་མལ་གྱི་འཁྲུལ་སྣང་ཐམས་ཅད་ནུབ་ནས་སྣང་གསུམ་འོད་གསལ་དུ་ཐིམ་པའི་གནས་སྐབས་ན་ཆོས་ཉིད་སྤྲོས་པ་དང་བྲལ་བའི་ཡེ་ཤེས་འཆར་བ་ངེས་པ་ཅན་ཡིན་པས། མཚན་མོ་གཉིད་འཐུག་དང་། རྨི་ལམ་གྱི་དགེ་སྦྱོར་ལ་བརྩོན་པར་འདོད་པ་དང་། ཉིན་མོ་རླུང་སེམས་དབུ་མར་འདུས་པའི་ཐབས་ལ་སྤྲོ་བ་ཡོད་པ་དང་། ཐུན་མོང་མ་ཡིན་པའི་རྫོགས་རིམ་སྒྱུ་ལུས་དང་འོད་གསལ་མངོན་དུ་བྱེད་འདོད་པ་དང་། དེ་ལས་ཐ་མལ་གྱི་ལུས་རྟེན་དོར་ནས་སློབ་པའི་ཟུང་འཇུག་གི་སྐུར་བཞེངས་པར་འདོད་པ་དང་། མཐར་ཐུག་མ་རིག་བག་ཆགས་ཀྱི་ཡིད་ལུས་ཀྱང་འོད་གསལ་དུ་བསྡུས་ཏེ་མི་སློབ་པའི་ཟུང་འཇུག་གི་གོ་འཕང་མངོན་དུ་བྱེད་པར་འདོད་པ་དང་། གལ་ཏེ་ཚེ་འདིར་མ་གྲོལ་ཀྱང་བར་དོ་དང་པོའི་འོད་གསལ་ཆོས་སྐུའི་དགོངས་པ་ལ་མཉམ་པར་བཞག་ནས་ཟུང་འཇུག་གི་ལོངས་སྤྱོད་རྫོགས་སྐུར་བཞེངས་པར་འདོད་པ་རྣམས་ཀྱིས་ནི། བསྐྱེད་རིམ་གྱི་རྗེས་སུ་བསྡུ་རིམ་ལ་དོ་གལ་བྱ་དགོས་སོ། །དེ་ལྟར་མ་ཡིན་པར་ཡི་དམ་གྱི་གསལ་སྣང་དང་སྤྲོ་བསྡུས་དམིགས་པ་ཙམ་ལ་བརྟེན་ནས་འདྲེ་འདུལ་དང་སྲུང་སྐྱོབ་ཀྱི་ཕྲིན་ལས་ཕྲན་བུ་རེ་སྒྲུབ་པར་འདོད་པ་རྣམས་ལ་ནི་མུ་སྟེགས་བྱེད་དང་ཐུན་མོང་པའི་གསལ་སྣང་དང་ང་རྒྱལ་དེས་ཆོག་གོ། །ནང་བསྡུ་རིམ་མ་གོམས་རྗེས་སུ་ལྷ་བསྒོམ་ན། འདི་དག་གི་སྐབས་སུ་བཀའ་བརྒྱད་ཀྱི་རྒྱུད་གསང་བ་ཡོངས་རྫོགས་དང་། ཧེ་རུ་ཀ་གལ་པོའི་རྒྱུད་རྣམས་དཔང་པོར་བཞག་སྟེ་བརྩད་པས་ཆོག་གོ། །དེས་ལྷ་སྣང་ལ་བརྟན་པ་ཁྱད་པར་ཐོབ་པའོ། །བསྙེན་པ་ཅི་ཙམ་བཏང་བའི་ཕྱེད་ཡན་ཆད་ནས་ཞི་བའི་སྐབས་ལྟར་རྫོགས་རིམ་ལ་བསླབ་པར་བྱའོ། །དེ་ཡང་བསྐྱེད་རིམ་ལ་ཨ་འཐས་ཤིང་། རྫོགས་རིམ་ལ་མི་མོས་པ་དང་། རྫོགས་རིམ་གྱི་སྟོང་སྐད་ལ་ཞེན་ནས་བསྐྱེད་རིམ་བཅོས་མའི་ལམ་དུ་གོལ་ནས། བསྐྱེད་རྫོགས་ཡ་བྲལ་དུ་ཉམས་སུ་ལེན་པར་འདོད་པ་དག་ནི་སངས་རྒྱས་ཆོས་གཟུགས་གཉིས་ཀྱི་ཐུན་མོང་མ་ཡིན་པའི་རྒྱུ་སྒྱུ་ལུས་དང་འོད་གསལ་གཉིས་ལ་སྐུར་པ་བཏབ་པའི་རྣམ་སྨིན་ངན་སོང་ལས་འགྲོ་ས་མེད་པ་རྒྱུ་འབྲས་ངེས་པ་ཚད་མའི་རིག་པས་གྲུབ་བོ། །དེ་ནས་བསྙེན་པ་བཏང་བ་འཛབ་ཁང་དབྱེ་བ་སོགས་ཞི་བའི་སྐབས་ལྟར་ལ། བསྙེན་པ་རྒྱས་པའི་དབང་དུ་ན། གཙོ་བོ་ཡབ་ཡུམ་གྱི་རྩ་སྔགས་དང་རུ་ལུ་སྦྲེལ་བ་བྱེ་བ་གཅིག །འཁོར་རིགས་བཞིའི་ཁྲག་འཐུང་ལ་དེའི་བཞི་ཆ། ཀ་སེང་སྒོ་མ་དབང་ཕྱུག་རྣམས་ལ་དེའི་བཞི་ཆ། བསྡུས་པའི་དབང་དུ་བྱས་ན་གཙོ་བོ་ཡབ་ཡུམ་ལ་རུ་ལུ་སྦྲེལ་བ་འབུམ་ཕྲག་བཞི། ཁྲག་འཐུང་རིགས་ལྔ་འབུམ་ཕྲག་རེ། ཀ་སེང་སྒོ་མ་དབང་ཕྱུག་ཉེར་བརྒྱད་བཅས་རང་སྔགས་དང་རུ་ལུ་སྦྲེལ་བ་ཁྲི་རེ་རེ། ཤིན་ཏུ་བསྡུས་ན། གཙོ་བོ་ཡབ་ཡུམ་སྔགས་རྐྱང་པ་འབུམ་ཕྲག་བཞི། དེ་བཞིན་དུ་རིགས་བཞི་འབུམ་ཕྲག་རེ། འཁོར་རྣམས་ཁྲི་རེ། རུ་ལུ་རྐྱང་པ་བྱེ་བ་གཅིག་བཅས་ལམ་མོས་སྒོམ་པའི་དབང་དུ་བྱས་པའོ། །ལམ་ངེས་རྫོགས་ཀྱི་དབང་དུ་ན། རྟགས་དུས་གྲངས་ཀྱི་བསྙེན་པས་ཕྱེ་བའི་རབ་འབྲིང་ཐ་མའི་རྟགས་རྫོགས་ཀྱི་བར་དུ་བྱ་བར་གསུངས་སོ། །ཐུན་འཇུག་ཐམས་ཅད་བསྟོད་བཤགས་ཡེ་ཤེས་བསྡུ་བ་དང་བཅས་པ་གྲུབ་པ་དང་། ཐུན་མཚམས་ཀྱི་བྱ་བ་ཉེར་བསྡུ་གོ་བསྒོ་ལུས་སྲུང་མན་ཆད་གཞུང་བཞིན་དུ་བྱའོ། །འདིར་ནི་སྒྲུ་འཕྲུལ་ཁྲོ་བོའི་སྒོས་ཆོས་རྣམས་བཤད་པའི་ཁྱད་པར་མ་གཏོགས། སྦྱོར་དངོས་རྗེས་ཀྱི་བྱ་བ་ཕལ་ཆེར་ཞི་བའི་བསྙེན་ཡིག་ལས་ཤེས་པར་བྱ་དགོས་པ་ཁོ་ནའོ། །སླར་སྨྲས་པ། མདོ་སྒྱུ་སེམས་གསུམ་རྒྱུད་དང་ལེགས་བཤད་གཞུང་། །མཚན་ཙམ་ཐོས་པའི་བསོད་ནམས་བསམ་འདས་ན། །འཆད་རྩོད་རྩོམ་པས་གཏན་ལ་དབབ་པ་འདི། །བསྐལ་མང་བསོད་ནམས་མཐུ་ལས་ཡིན་ནམ་སྙམ། །རྒྱལ་བའི་བསྟན་པ་སྙིགས་མར་གཟིམ་ལ་ཉེ། །རང་འདོད་འབྱུང་བྱའི་དགའ་སྟོན་ཤར་བའི་དུས། །ཐོས་བསམ་བསྒོམ་པ་ངེས་པའི་བློ་དམན་ཡང་། །སྐལ་ལྡན་དོན་མཐུན་འགའ་ལ་ཕན་བློས་བྲིས། །མ་རྟོགས་ལོག་པར་རྟོག་པའི་ཉེས་པའི་ཆ། །བླ་མ་ཡི་དམ་མཁའ་འགྲོ་སྲུང་མ་དང་། །ཆོས་ཀྱི་སྤྱན་ལྡན་འཕགས་མགོན་རྣམས་ཀྱི་དྲུང་། །ཐོག་མེད་བསགས་པའི་སྡིག་དང་ལྷན་ཅིག་འཆག །འདིས་ཐོབ་དགེ་བ་ཉིན་བྱེད་འབུམ་བརྡལ་བས། །སྔ་འགྱུར་རིང་ལུགས་པད་ཚལ་རྒྱས་པ་དང་། །གྲུབ་གཉིས་ཡིད་བཞིན་འཇོ་བའི་དགའ་སྟོན་གྱིས། །མ་ལུས་སྐྱེ་དགུའི་རེ་བ་སྐོང་བར་ཤོག །ཅེས་པའང་སྒྱུ་འཕྲུལ་ཁྲོ་བོའི་བསྙེན་པ་ཇི་ལྟར་བཏང་བའི་ཚུལ། རང་དགོན་མཆོག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་དངོས་དང་ཡི་གེའི་ལམ་ནས་སྔ་ཕྱིར་བསྐུལ་བ་དང་། རྒྱ་ར་མཁན་པོ་མགོན་པོས་ཀྱང་ཆེད་དུ་བསྐུལ་བའི་ངོར། དཔལ་ཀཿཐོག་པ་ཆེན་པོ་སི་ཏུ་ཆོས་ཀྱི་རྒྱ་མཚོའི་བཀའ་དྲིན་གྱིས་འཚོ་བ་པདྨ་ལས་འབྲེལ་རྩལ་གྱིས་དཔྱད་གསུམ་དག་པའི་སྒོ་ནས་སྤེལ་བ་དགེའོ།། །།

ཁྲག་འཐུང་ཁྲོ་བོའི་འཆམས་ཀྱི་བརྗེད་བྱང་ཀུན་བཟང་རྣམ་པར་རྩེན་པའི་རོལ་པ། དྷརྨཱ་ཤྲཱི།

ཁྲག་འཐུང་ཁྲོ་བོའི་འཆམས་ཀྱི་བརྗེད་བྱང་ཀུན་བཟང་རྣམ་པར་རྩེན་པའི་རོལ་པ་ཞེས་བྱ་བ་བཞུགས་སོ། །ༀ་སིདྡྷི་རསྟུ། ཁྲག་འཐུང་ཁྲོ་བོའི་འཆམས་ཀྱི་བརྗེད་བྱང་ཀུན་བཟང་རྣམ་པར་རྩེན་པའི་རོལ་པ་ཞེས་བྱ་བ། དཔལ་ལྡན་བླ་མ་དམ་པ་ཧེ་རུ་ཀའི་ངོ་བོ་ཉིད་ལ་གུས་པས་ཕྱག་འཚལ་ལོ། །སྟོང་ཉིད་མི་ཕྱེད་རྡོ་རྗེའི་དོ་ར་ཆེ། །སྙིང་རྗེ་རྣམ་པ་གསུམ་གྱི་གར་སྟབས་ཀྱིས། །སྲིད་ན་རོལ་པའི་སྐུར་སྟོན་ཧེ་རུ་ཀ །བདེ་ཆེན་སྒྱུ་མའི་གར་མཁན་དེར་བཏུད་ནས། །རྡོ་རྗེ་ཁྲོ་བོ་རོལ་པའི་ཕྱག་རྒྱ་ཆེས། །རྡོ་རྗེའི་ལུས་ལ་མི་ཕྱེད་རྒྱས་གདབ་ཕྱིར། །རྡོ་རྗེ་འཛིན་པའི་ཕྱག་བཞེས་ཇི་ལྟ་བར། །རྡོ་རྗེ་གར་གྱི་ལུས་འགྱུར་འདིར་གསལ་བྱ། ༈ །དེ་ཡང་ལྟ་བ་འཁོར་འདས་མཉམ་ཉིད་དུ་རྟོགས་ཤིང་། ཏིང་ངེ་འཛིན་ལས་སུ་རུང་བས་སྣང་སྤྱོད་ཐམས་ཅད་ལ་ལྷའི་ཕྱག་རྒྱས་ཐེབས་པ། བྱེད་སྤྱོད་གར་གྱི་འདུ་འཕྲོ་ལ་རང་བྱན་ཚུད་པའི་སྔགས་པས་བསྐྱེད་རིམ་ཕྱག་རྒྱ་གར་འཆམས་ཀྱི་སྤྱོད་པ་ལ་འབད་པར་བྱ་རིགས་པ་ཉིད་དེ། ཅིའི་ཕྱིར་ན་རྡོ་རྗེའི་ལུས་ཀྱི་སྤྱོད་པ་ལ་བརྟེན་ནས་ཚོགས་གཉིས་རླབས་པོ་ཆེ་སྤེལ་ཞིང་། ལས་དང་དངོས་གྲུབ་བདེ་བླག་ཏུ་སྒྲུབ་པའི་ཐབས་མཆོག་རྨད་དུ་བྱུང་བ་ཡིན་པའི་རྒྱུ་མཚན་གྱིས་སོ། །དེ་ལྟར་ཡང་རྔམ་གློག་ལས། ཆོས་ཀུན་མཉམ་པའི་ངང་རྟོགས་ན། །བསྒུལ་ཞིང་གསིགས་པ་ཐམས་ཅད་ཀུན། །ཕྱག་རྒྱ་ཡིན་པར་དཔའ་བོས་གསུངས། །རང་གི་ལྷ་ཡི་ཏིང་འཛིན་གྱིས། །སྟངས་སྟབས་འདི་ལ་གང་གནས་པ། །སངས་རྒྱས་ཉིད་ཀྱང་སྐྲག་འགྱུར་ན། །དྲེགས་པའི་ཚོགས་ལྟ་སྨོས་ཅི་དགོས། །ཞེས་དང་། ཐབས་ཞགས་ལས། ཕྱག་རྒྱ་འདི་དག་བཅིངས་ནས་ནི། །སྟབས་ཆེན་དྲག་ཏུ་མཆོངས་བྱས་ན། །ཁམས་གསུམ་དག་ལས་མཆོངས་པར་འགྱུར། །གཞན་ཡང་གོ་འཕང་ཐམས་ཅད་ཀུན། །འགྲུབ་པར་འགྱུར་ཏེ་ཐེ་ཚོམ་མེད། །ཅེས་གསུངས་ཤིང་། དེ་ཇི་ལྟར་སྒྲུབ་པའི་ཚུལ་ནི། འདི་ལྟར་རྒྱུད་ཀྱི་རྒྱལ་པོ་དཔལ་སྒྱུ་འཕྲུལ་དྲྭ་བ་རྩ་བཤད་ཀྱི་རྒྱུད་དང་། འཇིག་རྟེན་འདས་མདོ། ཧེ་རུ་ཀ་གལ་པོ་སོགས་རྡོ་རྗེའི་རིགས་ཀྱི་རྒྱུད་བླ་ན་མེད་པ་དག་ལས་གསུངས་པ་ཉིད་རྒྱ་བོད་ཀྱི་རིག་འཛིན་རྣམས་ཀྱིས་བཀྲལ་བ་ལྟར་ལག་ལེན་དུ་བྱ་བའི་རིམ་པ་ལ། ཧེ་རུ་ཀ་འདུས་པ་ལས། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་ནུབ་གསུམ་གྱི་བྱ་བའི་རིམ་པས་བསྟན་པ་ལས། འདིར་ནུབ་དང་པོ་དཀྱིལ་འཁོར་ཆེན་པོའི་ས་ཆོག་གི་སྐབས་ཀྱི་ཏིང་ངེ་འཛིན་གྱི་སྦྱང་བ་ཡན་ཆད་རྫོགས་པར་བྱས་ལ། དེ་ནས་ས་གཞི་བྱིན་གྱིས་རློབ་པ་དང་། ས་བསྲུང་བ་གཉིས་གར་འཆམས་དང་སྦྱར་ནས་བྱ་སྟེ། དེ་ལ་ཐོག་མར་སྡོམས་ནི། ཆས་གཞུག་གསེར་སྐྱེམས་འཆམས་རར་འགྲོ། །རང་གནས་འདུག་སྟེ་དཀྱིལ་འཁོར་སྤྲོ། །ཡུམ་རློབ་གསོལ་གདབ་རྣམ་པ་གཉིས། །བཀའ་བསྒོས་བགེགས་སྐྲོད་ཁྱད་པར་དུ། །དཀྱིལ་འཁོར་ལྷ་ཡི་སྟངས་སྟབས་དང་། །ཕུར་བུ་གདབ་པས་རློབ་ཅིང་བསྲུང་། །རྟག་ཆད་མཐའ་བསལ་བསྔོ་ཤིས་བྱ། །ཞེས་དོན་བཅུ་གསུམ་ལས། ༈ དང་པོ་ཆས་སུ་འཇུག་པ་ནི། རང་ལུས་ལ་བར་ཆད་ཀྱི་བགེགས་ཀྱིས་མི་ཚུགས་པར་བྱ་བའི་ཆེད་དུ་ཆས་གོས་ལུས་ལ་བགོ་ཞིང་ཕྱག་མཚན་བཟུང་བར་བྱ་སྟེ། ཆས་འཇུག་ཁང་པར་སོང་ལ། ཐོག་མར་ཡོ་བྱད་རྣམས་བྱིན་གྱིས་རློབ་པ་ནི། ལམ་རིམ་ལས། གསང་སོགས་ཡོ་བྱད་ལྔ་པོ་རྣམས། །རིག་ཕྱིར་ཡེ་ཤེས་མ་འདྲེས་གསལ། །ཆོས་ཉིད་ཡེ་ཤེས་རོལ་པར་སྒོམ། །ཞེས་གསུངས་པས། ཆས་གོས་ལག་ཆ་རྣམས་རང་རང་གི་མདུན་དུ་བཀོད་དེ་སྐྱབས་སེམས་སྔོན་དུ་འགྲོ་བས། ཤཱུ་ནྱ་ཏཱས་ཆོས་ཐམས་ཅད་སྟོང་པ་ཉིད་དུ་སྦྱང། དེའི་ངང་ལས་སྐད་ཅིག་གིས་ལྷའི་ང་རྒྱལ་བཟུང་ལ། རང་སེམས་ལྷག་པ་བདེན་པ་དབྱེར་མེད་ཀྱི་ཆོ་འཕྲུལ་ལས་ཁྲག་འཐུང་འབར་བའི་གོས་རྒྱན་ལག་ཆ་ལ་སོགས་པ་ཐམས་ཅད་ཆོས་ཉིད་ཡེ་ཤེས་ཀྱི་རོལ་པར་རང་སྣང་བར་བསམ་ལ། ཞྭ་གོས་ལྕང་ལོ་སོགས་གཡས་ནས་རྔམ་ཞིང་གཡོན་ཕྱོགས་ནས་གྱོན། ཕྱག་མཚན་པད་སྐོར་གྱི་ལག་གིས་བླངས་ལ་བཟུང་བར་བྱའོ། ༈ །གཉིས་པ་གསེར་སྐྱེམས་ནི། ལྷ་ཡི་ཕྱག་རྒྱ་མི་བཟོད་ཅིང་། །བྱེར་དང་མཁུ་ལྡོག་བྱེད་པ་ཡི། །ཡུལ་བདག་ཀུན་ལ་གསེར་སྐྱེམས་སྦྱིན། །བདེན་པའི་ཚིག་གིས་བཀའ་བསྒོ་བྱ། །ཞེས་པས་ལྷ་སྲིན་གྱི་ཟེར་མི་ལྡང་བའི་ཕྱིར་གསེར་སྐྱེམས་བསྔོ་སྟེ། ཕྱག་བཞེས་སུ་ཕྱི་རོལ་ན་གནས་པའི་རོལ་མོ་བ་རྣམས་ཀྱིས་གསེར་སྐྱེམས། རཾ་ཡཾ་ཁཾ་གིས་སྦྱང་། འབྲུ་གསུམ་གྱིིས་འདོད་ཡོན་བདུད་རྩིའི་ཕུང་པོར་བྱིན་གྱིས་བརླབས་ལ། བྱིན་རླབས་མཆོག་སྩོལ་གྱི་རྐང་པ་གཉིས་པའི་གནས་སུ། །ཡི་དམ་ཞི་ཁྲོ་རབ་འབྱམས་དཀྱིལ་འཁོར་ལྷ། །ཞེས་དང་། ཤོ་ལོ་ཀ་གསུམ་ཀའི་རྐང་པ་བཞི་པའི་གནས་སུ། གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །ཅེས་བསྒྱུར་བས་བསྔོ་བར་མཛད་དོ། ༈ །གསུམ་པ་འཆམས་རར་འགྲོ་བ་ནི། གང་དག་མ་སྨིན་འགྲོ་གང་ལ། །གསང་སྒྲོགས་ཉེས་པ་དོར་བའི་ཕྱིར། །ཡིད་ཀྱི་དཀྱིལ་འཁོར་འདི་བསྒོམ་བྱ། །ཞེས་གསུངས་ཏེ། གསལ་བཀྲ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མིན་དང་། །ཞེས་གསུངས་པ་ལྟར། ཆོས་ཀུན་རང་རིག་རང་སྣང་གི་ཆོ་འཕྲུལ་དུ་གསལ་བར་རྟོགས་པ་ན་བསྟན་བྱའི་ཡུལ་དང་། སྟོན་མཁན་གྱི་གང་ཟག་གཉིས་སོ་སོར་མ་དམིགས་པའི་ཕྱིར། འདི་ན་སྣོད་མིན་སེམས་ཅན་གང་ཡང་མེད། །ཅེས་པའི་ཚུལ་གྱིས་གསང་སྒྲོགས་ཀྱི་ཉེས་པ་མི་འབྱུང་ནའང་། རྣལ་འབྱོར་པ་རྟོགས་པའི་གདིང་མ་ཚུད་པ་རྣམས་ཀྱིས་གདོད་ནས་འགྲོ་བ་མ་ལུས་པ་དག་པའི་འཁོར་ལོར་གྲུབ་པར་མོས་པས་སྣོད་བཅུད་དཀྱིལ་འཁོར་དུ་གསལ་བའི་ཏིང་ངེ་འཛིན་དང་ལྡན་པའི་སྒོ་ནས་ལུས་འགྱུར་ལ་ཐུན་མོང་དུ་གཅེས་པའི་ཡན་ལག །མགོ་བོ་ལ་བརྗིད་ཆགས་པ། རོ་སྟོད་ལ་སེང་ཆགས་པ། སྐེད་པ་ལ་འཁྲིལ་ཆགས་པ། སྒྱིད་པ་ལ་ལྡེམ་ཆགས་པ། ཚིགས་བཞི་ལ་འཕྲུལ་ཆགས་པ། རྐང་མགོ་ལ་བདེ་ཆགས་པ། བཞག་ཤ་ལ་ལྷོད་ཆགས་པ། རྣམ་འགྱུར་ལ་འགྱིང་ཆགས་པ། ཤ་འགྱུར་ལ་མེར་ཆགས་པ། སྤྱོད་པ་དལ་ལ་དོད་པ། ཕྱག་རྒྱ་གཡས་སུ་བཅས་པ་འགྲོལ་ན་གཡོན་དང་། གཡོན་དུ་བཅས་པ་འགྲོལ་ན་གཡས་སུ་དང་། དབུས་སུ་བཅའ་འགྲོལ་ལ་ཐད་ཀར་བལྟ་ཞིང་འགྱིང་བ་སྟེ་བཅའ་བསྒྱུར་བཤིག་པ་ལ་མཁས་པ། གཞན་ཡང་ཕོད་ཁའི་ཐང་ཤ་བཅད། རལ་པའི་འཁྲིལ་བཤིག །ལུས་ཀྱི་འཛུམ་བསྟན་པ་སྟེ། རིམ་པ་ཇི་ལྟ་བར་དཔེ་བྱ་ཁྱུང་མཁའ་ལ་ལྡིང་བ་དང་། སེངྒེ་རལ་པ་སྤྲུག་པ་དང་། རྒྱ་སྟག་ནགས་ཚལ་དུ་འགྱིང་བ་ལྟ་བུའི་ཡོན་ཏན་དང་ལྡན་པས། ཕྱི་རོལ་ནས་སྤོས་བཏུལ་ཞིང་། རོལ་མོ་ཆིག་བརྡེག་ཆེ་བ་དང་། ཆུང་གསུམ་རོལ་འཐབ་དང་བཅས་པ་སྤེལ་མར་བརྡུངས་པས་བསྐུལ་ཏེ། ནང་གི་འཆམས་པ་བ་རྣམས་སློབ་དཔོན་གྱིས་སྣ་དྲངས། དེ་རྗེས་ཤར་བ། བྱང་པ། ནུབ་པ། ལྷོ་པ་རྣམས་རང་རང་གི་འཁོར་ཇི་ཙམ་ཡོད་པའི་དབུས་སུ་ཕྱོགས་དཔོན་འོང་བར་བྱས་ལ། རིམ་པ་མ་འཆོལ་བར་བསྒྲིགས་ནས། རོལ་འགྲོས་གསེར་སྐྱེམས་མཇུག་གི་སིལ་འབེབས་དང་པོར་འཆམས་དཔོན་དོན། གཉིས་པའི་སིལ་བརྡུངས་གཅིག་ལ་འགྱེད། གསུམ་པའི་སིལ་བརྡུངས་ནས་རོལ་འགྲོས། མཆན། ཀྱི་དོན་ཏེ་དཀྱིལ་འཁོར་འབྲི་སར་སླེབས་པ་དང་བསྐོར་ལམ་ལ་གྲལ་ཕྲེང་བ་ལྟར་མཉམ་པས་འགྲོ་ཞིང་། འཁོར་བ་ལ་ཉེ་བ་ན་སློབ་དཔོན་དབུས་སུ་རིམ་གྱིས་ཞུགས་ཏེ། དོ་ར་འཁོར་མཚམས། དང་པོ་དང་གཉིས་པ་སོང་ནས་གསུམ་པ་ནས་སྟོན་པར་བྱེད་པ་འདི་ལྟར། ཞེས་བརྡའ་སྦྱར་ནས། ཆིག་རྡུངས་རོལ་པ་དང་། རྐང་པ་གཡས་དང་གཡོན་དང་གཡས་པ་རྣམས་ལྕགས་རིས་སུ་འདེགས་འབབ་ཀྱིས་གཡས་གཡོན་དབུས་གསུམ་དུ་ལག་རོལ་པའི་འགྱིང་གསིག་རེ་སོང་བ་དང་། ༈ བཞི་པ་རང་གནས་སུ་འདུག་པ་ནི། སློབ་དཔོན་རྡོར་དྲིལ་འཛིན་ཅིང་དབུས་སུ་ཁྲིའུ་ལ་ཤར་དུ་ཕྱོགས་པས་བཞུགས་པའི་མདུན་དུ། ཞབས་བསིལ་དང་བཞི་བསྣོལ་ཏེ་རྣམ་ལྔ་དང་སྨན་གཏོར་རཀྟ་རྣམས་བཤམས། འཁོར་རྣམས་རང་རང་གི་རིགས་དང་མཐུན་པའི་ཕྱོགས་སོ་སོར་མཉམ་པའི་སྟབས་ཀྱིས་འགྲེངས་ཏེ་འཁོད་པའི་ཕྱོགས་དཔོན་བཞིའི་མདུན་དུའང་མཆོད་པ་སྣ་ལྔ་རེ་སློབ་དཔོན་ལ་ལྟོས་པའི་གཡོན་ཕྱོགས་ནས་འགོ་བརྩམ་མོ། ༈ །ལྔ་པ་དཀྱིལ་འཁོར་སྤྲོ་བ་ནི། ཐོག་མར་ཐུན་མོང་དུ་མཆོད་རྫས་བྱིན་རློབ་སྟེ། ༀ་མ་ཧཱ་ཀྲོ་དྷཱི་ཤྭ་རཱིས་སརྦ་དྲ་བྱཾ་བི་ཤྭ་དྷ་ནི་ཧཱུཾ་ཕཊ། བསང་། རཾ་ཡཾ་ཁཾ་གིས་སྦྱང་། སྟོང་པའི་ངང་ལས་མཆོད་སྣོད་པདྨ་འབར་བར་ཕྱི་ནང་གསང་བའི་མཆོད་རྫས་རྣམས་དྭངས་ཤིང་ཐོགས་པ་མེད་པ་འདོད་པའི་ཡོན་ཏན་རྣམ་པ་ཐམས་ཅད་པའི་སྒྱུ་འཕྲུལ་གྱི་སྤྲིན་རབ་འབྱམས་སུ་འཕྲོ་བས་ནམ་མཁའ་གང་བར་གྱུར། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨ་ལོ་ཀེ་ཧྲཱིཿ གནྡྷེ་གན། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱཿ ༀ་བ་ལིངྟ་ཏེ་ཛྭ་བ་ལིངྟེ་བ་ལ་བཱ་ཏེ་གུ་ཧྱ་ས་མ་ཡེ་སྭཱ་ཧཱ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋཱཿ ཞེས་པས་རློབ། དེ་ནས་སློབ་དཔོན་གྱིས། རང་ཉིད་གཙོ་བོ་ཡབ་ཡུམ་དུ་བསྐྱེད་ལ་གཞན་སྲས་ཀྱི་བྱ་བས་འཁོར་སྤྲོ་བ་སྒྲུབ་ཐབས་ལྟར་བྱ་བའམ། དེ་ཙམ་གྱི་སྤྲོས་པ་མི་ནུས་ན། ཧཱུྃ་ཧཱུྃ་སྥ་ར༴ སཾ༴ ༀ་བཛྲ་གྷཎྜེ། སྥ་ར༴ སཾ༴ ༀ་བཛྲ་ཤྲཱི་ཧེ་རུ་ཀ་ཧཱུཾ། བཛྲ་ཀྲོ་དྷཱི་ཤྭ་རཱི་སྟྭཾ། ཞེས་བརྗོད་པས་བདག་ཉིད་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་ཡབ་ཡུམ་དུ་གྱུར་པ་ལ། ཡེ་ཤེས་ལྔས་དབང་བསྐུར། སྐུ་གསུང་ཐུགས་སྔགས་ཀྱིས་བྱིན་གྱིས་རླབས་ནས། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ྅ཧཾ། ཨ་ནུ་རཱ་ག་ཡཱ་མི། ཛཿཧཱུྃ་བཾ་ཧོཿ ཧཱུཾ་ཧ་ཧེ་ཕཊ་བྷྱོ། ཞེས་བརྗོད་པས་ཡབ་ཡུམ་མཉམ་པར་སྦྱོར་བའི་སེམས་སྤྲིན་ལས་རིགས་བཞིའི་ཧེ་རུ་ཀ་ཡབ་ཡུམ་གནས་ཡུལ་སྒོ་སྐྱོང་དང་བཅས་པ་རྣམས་དང་། ཐུགས་ཀ་ནས་དབང་མོ་རྣམས་སྤྲོས་ཏེ་རང་རང་གི་གདན་ལ་རྔམས་པའི་སྟབས་ཀྱིས་འཁོད་པར་གྱུར། སླར་ཡང་བྱང་ཆུབ་སེམས་ཀྱི་འོད་ཟེར་གྱིས་དཀྱིལ་འཁོར་པ་དང་བཅས་པའི་དུས་གསུམ་གྱི་མགོན་པོ་སྲས་དང་བཅས་པ་ཐམས་ཅད་མཁའ་ཁྱབ་ཏུ་སད་པར་བསམ་ཞིང་། ༀ་རུ་ལུ་རུ་ལུ་ཧཱུཾ། ཞེས་སྙན་གསན་དབབ། ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿས་སྤྱན་དྲངས་པ་ལ། ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་སོགས་ཀྱིས་ཀུན་བཟང་། ༀ་ཨཱ་ཧ་ར་སོགས་ཀྱིས་ཞབས་བསིལ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ་སོགས་ཀྱིས་བཞི་བསྣོལ། ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་བ་ལིཾ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། ཞེས་པས་སྨན་གཏོར་རཀྟ་ཕུལ་ནས། ཆོས་སྐུ་ནམ་མཁས་བསྟོད། ༈ དྲུག་པ་ཡུམ་བྱིན་གྱིས་རློབ་པ་ནི། སློབ་དཔོན་གྱིས་རིགས་བཞིའི་ཡུམ་གྱིས་བསྐྱེད་སྔགས་རྣམས་བརྗོད་པས། ཕྱོགས་ཀྱི་སློབ་མ་བཞི་པོ་རིགས་བཞི་ཁྲོས་པའི་རྒྱལ་མོ་བཞིར་བསྐྱེད་ལ། བསྐུར། རློབ། དབབ། དྲངས། བསྟིམ། བརྟན་རྣམས་བྱ། ༈ བདུན་པ་སློབ་མས་གསོལ་བ་གདབ་པ་ནི། ཤར་གྱི་ཕྱོགས་དཔོན་གྱིས་བསྐུལ་ནས་ཕྱོགས་བཞིའི་སློབ་མ་རྣམས་ཀྱིས་ཐུན་མོང་དུ་སློབ་དཔོན་ལ་ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། རྔ་སིལ་གྱི་རོལ་མོ་དབྱངས་ཀྱི་འགྱུར་བ་དང་བཅས་པས། ཤར་ནས། ཨེ་མ་རང་སྣང་དབྱེར་མེད་སྐུ། །རྣམ་དག་བསོད་ནམས་མཚན་གྱིས་བརྒྱན། །དཔེ་བྱད་འབྲུ་བཀོད་ལྟས་མི་ངོམས། །སྐུ་ལྔའི་མཆོག་ལ་ཕྱག་འཚལ་ལོ། །ཞི་བའི་ཡེ་ཤེས་རང་སྣང་བའི། །རྒྱན་རྣམས་ཀུན་གྱིས་རབ་མཛེས་པ། །སངས་རྒྱས་ཀུན་གྱི་སྐུ་ཡི་མཆོག །དཀྱིལ་འཁོར་ཆེན་པོ་གསུང་དུ་གསོལ། །ལྷོ་ནས། ཨེ་མ་རྡོ་རྗེ་སེམས་ཆེན་པོ། །རང་རིག་མཁྱེན་པའི་ཡེ་ཤེས་འབར། །མགོན་པོ་ཡོན་ཏན་བསམ་ལས་འདས། །རྒྱལ་མཆོག་ཁྱོད་ལ་ཕྱག་འཚལ་ལོ། །ཡོན་ཏན་རིན་ཆེན་འབྱུང་བའི་གཙོ། །མ་ལུས་ཀུན་གྱི་རེ་སྐོང་བ། །སངས་རྒྱས་ཀུན་གྱི་ཡོན་ཏན་མཆོག །དཀྱིལ་འཁོར་ཆེན་པོ་གསུང་དུ་གསོལ། །ནུབ་ནས། ཨེ་མ་རྣམ་དག་ནམ་མཁའི་དབྱིངས། །ཅི་གསུང་སྣ་ཚོགས་སྒྲ་རིགས་མཁྱེན། །བསམ་འདས་བརྗོད་མེད་རྡོ་རྗེའི་གསུང་། །གསུང་ལྔའི་མཆོག་ལ་ཕྱག་འཚལ་ལོ། །རང་བཞིན་དག་པས་གོས་པ་མེད། །འདོད་ཆགས་ཕ་རོལ་ཕྱིན་པ་བརྙེས། །སངས་རྒྱས་ཀུན་གྱི་གསུང་གི་མཆོག །དཀྱིལ་འཁོར་ཆེན་པོ་གསུང་དུ་གསོལ། །བྱང་ནས། ཨེ་མ་མི་མཛད་མཛད་པ་ཆེ། །མ་ཆགས་ཆགས་བྲལ་འདོད་ཆགས་མཛད། །ཐམས་ཅད་སྒྲོལ་བའི་ལས་པོ་ཆེ། །ཕྲིན་ལས་མཆོག་ལ་ཕྱག་འཚལ་ལོ། །བསམ་པ་ཐམས་ཅད་ཡོངས་རྫོགས་པས། །ཐམས་ཅད་སྒྲོལ་བའི་དེད་དཔོན་མཆོག །སངས་རྒྱས་ཀུན་གྱི་ཕྲིན་ལས་བདག །དཀྱིལ་འཁོར་ཆེན་པོ་གསུང་དུ་གསོལ། །ཐམས་ཅད་ཀྱིས་ཐུན་མོང་དུ། ཨེ་མ་གསང་བ་ནམ་མཁའི་ཐུགས། །མཉམ་ཉིད་མི་གཡོ་སོ་སོར་གསལ། །ཀུན་རིག་སྙིང་པོ་ཡེ་ཤེས་མཆོག །ཐུགས་ལྔའི་མཆོག་ལ་ཕྱག་འཚལ་ལོ། །བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །དཀྱིལ་འཁོར་སྙིང་པོ་བཤད་དུ་གསོལ། །ཞེས་སོ། ༈ །བརྒྱད་པ་སློབ་དཔོན་གྱིས་གསོལ་བ་གདབ་པ་ནི། རྡོར་དྲིལ་འཛིན་ཅིང་འཛུམ་མདངས་ཀྱིས་བལྟ་བཞིན་པར། ཕྱོགས་བཅུ་མ་ལུས་དུས་གསུམ་གྱི། །རྒྱལ་བ་སྲས་བཅས་དགོངས་སུ་གསོལ། །སེམས་ཅན་ཀུན་གྱི་དོན་གྱི་ཕྱིར། །དཀྱིལ་འཁོར་ཆེན་པོ་བདག་བགྱིད་པས། །བདག་ཅག་རྗེས་སུ་བཟུང་བའི་ཕྱིར། །ས་འདི་ཤིས་པར་བྱིན་རློབ་པ། །བདེ་བར་གཤེགས་པས་མཛད་དུ་གསོལ། །ཞེས་པས་མཁའ་ཁྱབ་ཀྱི་དེ་བཞིན་གཤེགས་པ་ཐམས་ཅད་བསྐུལ་ཏེ་ཧཱུཾ་ཧཱུཾ་ཧཱུཾ་ཧཱུཾ་ཞེས་པས་ནམ་མཁའ་གང་བའི་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་བྱིན་བསྡུས་ནས་བསྒོམ་ཤིང་སྤྲོས་པའི་དཀྱིལ་འཁོར་དང་བཅས་ཏེ་རང་ལ་བསྟིམ་མོ། ༈ །དགུ་པ་བཀའ་བསྒོ་བས་བགེགས་བསྐྲད་པ་ནི། སློབ་དཔོན་སྙེམས་པ་དང་བཅས་པས་ལངས་ལ་སེམས་ཅན་མ་རིག་པའི་མུན་པར་ལྷུངས་ཤིང་བདུད་ཀྱིས་བྱིན་གྱིས་བརླབས་པ་རྣམས་ལ་མངོན་པར་བལྟས་ནས། དེ་རྣམས་ཀྱི་བདུད་བསལ་བར་བྱ་བའི་ཕྱིར། རང་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པ་མི་བཟད་པའི་ཁྲོ་བོའི་སྤྲིན་སྤྲོ་བའི་སྐུར་གྱུར་པའི་མིག་གཉིས་མ་དང་ཊ་ལས་ཉི་མ་དང་ཟླ་བ། མི་འབྲས་ཧཱུཾ་ལས་བསྐལ་པའི་མེར་འབར་བར་གྱུར་པར་བསམ་ཞིང་། འཁོར་རྣམས་ཀྱིས་རོལ་སྒྲ་དང་སྦྱར་ཏེ། ཇི་སྐད་དུ། རྡོ་རྗེ་ལྟ་བས་ཆགས་པ་ནི། །དག་པས་མིག་ནི་རབ་ཏུ་བགྲད། །ཅེས་གསུངས་པ་ལྟར་རང་ཉིད་རྗེས་སུ་ཆགས་པའི་རྣམ་པས་མིག་འབུར་ཚུགས་སུ་བགྲད་རྡོ་རྗེའི་ལྟ་བས་ཀུན་ཏུ་བལྟ་ཞིང་། གཡས་པའི་རྡོ་རྗེ་གསོར་བ་དང་། གཡོན་དྲིལ་བུ་གསིལ་བཞིན་དུ། རྐང་པ་གཡས་གཡོན་གཉིས་ཀྱིས་རྭ་བཙལ་བའི་རྡོ་རྗེ་ཕྱེད་འགྲོས་འོག་ཏུ་འབྱུང་བ་ལྟར་ལས། གཅིག །གཉིས་གཉིས་ཞེས་པར་ལག་གཉིས་དཀུར་མི་བརྟེན་པར་དེ་ཉིད་དུ་འགྱིང་བ་ཙམ་གྱི་ཁྱད་པར་གྱིས་བྱང་ཤར་དུ་སོང་ལ། འཆད་འགྱུར་གྱི་དགུ་བརྡུངས་དང་བསྟུན་ཕྱོགས་དཔོན་བཞི་ཡང་དོ་རའི་ནང་དུ་ཞུགས་ཏེ་སློབ་དཔོན་གྱི་གཡོན་དུ་ཤར་དང་ལྷོ། གཡས་སུ་ནུབ་དང་བྱང་གི་ཕྱོགས་དཔོན་རྣམས་འཁོད་པའི་མཐར་རྔ་ཐོགས་པའི་འཆམས་པ་གཞན་རྣམས་ཀྱིས་བསྐོར་ཏེ། སྔར་གྱི་ཕྱེད་འགྲོས་ཀྱི་མཐའི་གཉིས་གཉིས་ཞེས་པའི་རྗེས་དེ་མ་ཐག་པར་རྔ་སྟེང་དུ་བསྒྱུར་ལ། སྦིར་སྦྲམ་ཞེས་པ་ལན་གཉིས་ཀྱི་ཛམ་ལེན་ནས་རྔ་དགུ་བརྡུངས་ཀྱི་བརྒྱད་གྲངས་པར་གཡས་སྔོན་བཏེག་གི་རྐང་གཉིས་རེ་མོས་སུ་འདེགས་འགྱིང་རེས་འཐེན་གྱིས་རྡོ་རྗེའི་རྭ་བཙལ་ནས། གྲངས་དགུ་པར་གཡས་པ་འདེག །འབབ་དབུས་རྭ་དང་། འཛག་གཉིས་ལ་དེ་ཁར་སྡད་དེ། །ཧཱུཾ། རྡོ་རྗེ་འཛིན་པ་ཉི་མ་དང་། །ཆོས་དང་རྟ་མཆོག་སྣང་མཛད་ཀྱང་། །བདག་ཉིད་ཆེན་པོ་ང་ཉིད་ཡིན། །ཐམས་ཅད་བཀའ་ལས་དེ་མ་འདའ། །ང་ནི་སངས་རྒྱས་ཀུན་གྱི་བདག །གསང་བའི་དཀྱིལ་འཁོར་ཆེན་པོ་འདིར། །དབང་མཆོག་སྒྲུབ་པའི་ལས་བྱེད་ཀྱིས། །བགེགས་རྣམས་ཐམས་ཅད་གཞན་དུ་དེངས། །ཞེས་པ་ལ་བསྒྲལ་མཆོད་ཀྱི་དབྱངས་བཀབ་ནས། རྔ་འོག་བརྡུངས་སུ་བསྒྱུར་ཏེ། ཚིག་རྐང་དང་པོ་བཞི་ལ་རྐང་གཡས་གཡོན་རེ་མོས་སུ་འདེགས་འགྱིང་གིས་རྭ་ཕྱོགས་སུ་བསྐོར་བས་རྡོ་རྗེའི་རྭ་བཙལ་ནས། ང་ནི་སངས་རྒྱས་མན་ཆོད་ཀྱི་རྐང་པ་རེ་རེ་བཞིན་གྱི་འགོར་རྔ་འོག་བརྡུང་གིས་གཡས་སུ་ཛམ་དྲག་པོ་རེའི་རྗེས་རྔ་བྲང་ཐད་དུ་བསླང་སྟེ་རྡོ་རྗེའི་མིག་གིས་ལྟ་བཞིན་དུ་རྐང་པ་གཡས་གཡོན་འདེགས་འཇོག་སྤེལ་བས་གཡོན་བསྐོར་ཕྱོགས་སུ་ཕྱིན་ནས་རྔ་གཡས་སུ་འོག་བརྡུངས་ཆེ་བཞི་དང་། གཡོན་དུ་དྲང་ཐད་བསླང་བའི་ཆུང་བཞི་སྤེལ་བ་ལན་གསུམ་ལྡབས་པའི་གཡས་ཀྱི་ཆེ་ཐོག་ནས་ཆེམས་བརྡུངས་དྲག་འབེབས་དང་། ཡང་རྔ་སྟེང་བརྡུངས་སུ་བསྒྱུར་ཏེ། རང་སར་ཛམ་ཆུང་གཉིས་བརྡུངས་ནས་དགུ་བརྡུངས་འཛག་གཉིས་མའི་འགྲོས་དང་། བཀའ་བསྒོའི་ཚིག་དབྱངས་འགྲོས་སྟབས་དང་བཅས་པ་ཐམས་ཅད་རྔ་སྟེང་བརྡུངས་དང་རྐང་པ་གཡས་གཡོན་སྔ་ཕྱི་གོ་ལྡོག་པ་ཙམ་ལས་གཞན་སྔར་ལྟ་བུས་གཡོན་དུ་ཛམ་དྲག་ནས་གཡས་ཕྱོགས་ལ་ཕྱིར་ལོག་ཏུ་བསྐོར་རྗེས། གཡོན་དུ་སྟེང་བརྡུངས་ཆེ་བཞི་དང་། གཡས་སུ་རྔ་དྲང་ཐད་ཀྱི་ཆུང་བཞི་སྤེལ་བ་སྔར་ལྟ་བུས་གཡོན་གྱི་ཆེ་ཐོག་ནས་དྲག་འབེབས་དང་། ཡང་རྔ་དགུ་བརྡུངས་ནས་འགྲོས་དབྱངས་འགྲོ་ཕྱོགས་རྔ་སྟབས་ཐམས་ཅད་བཀའ་བསྒོ་དང་པོ་ཇི་ལྟ་བ་བཞིིན་བྱས་རྗེས། བཞི་བརྡུངས་ཆེ་ཆུང་སྤེལ་བ་ལན་གསུམ་གྱི་གཡས་ཀྱི་ཆེ་བཞིའི་ཐོག་ཆེམས་བརྡུངས་དྲག་པོར་ཕབ་པ་དང་བསྟུན་ཀིངྐ་རའི་ཆས་སུ་ཞུགས་པའི་འཆམས་པ་རྣམས་གློ་འབུར་དུ་མཆོངས་སྟབས་རྒྱུགས་ཤར་གྱིས་དོན་ནས་ཚམ་རྔམས་བྱ་ཞིང་གུ་གུལ་གྱིས་བདུག །ཡུངས་ཐུན་གྱིས་བྲབ། ཧཱུཾ་བཞི་བའི་སྔགས་དྲག་པོར་བཟླས་པས། ཐུགས་ཀའི་ཧཱུཾ་ལས་ཁྲོས་པའི་ཁྲོ་སྤྲིན་དང་། སྤྱན་གྱི་ཉི་ཟླ། རྐང་མཐིལ་གྱི་རྡོ་རྗེ་རྣམས་ལས་འབར་བའི་འོད་ཟེར་འཕྲོས་པས་བགེགས་ཐམས་ཅད་སྲེག་བཅོམ་བསྐྲད་ཅིང་དཀྱིལ་འཁོར་གྱི་གཞི་རྡོ་རྗེའི་རང་བཞིན་དུ་བརྟན་པར་མོས་ལ། སླར་ཡང་གཡོན་བརྩམས་ཀྱི་ཛམ་གཉིས་དགུ་བསྐོར་འཛག་གཉིས་མ་དང་སྦྱར་བའི་འགྲོས་བྱས་རྗེས་རོལ་མོ་རྣམས་བཞག་གོ། ༈ །བཅུ་པ་དཀྱིལ་འཁོར་ལྷའི་སྟངས་སྟབས་ལ། གནད་སྡོམས་པས་སྤྱིའི་ཁོག་འགྲོལ་བ་དང་། འཆམས་ཚུལ་དངོས་བཤད་པ་གཉིས་ལས། དང་པོ་ལའང་། རྣམ་འགྱུར་འགྲིག་ཐབས་རོལ་ཚིག་བཤད། །ཀུན་འགྲོའི་ལུས་འགྱུར་གཅེས་བསྡུས་བཤད། །སྔོན་རྗེས་བྱ་བའི་སྦྱོར་སྡོམས་བཤད། །ཅེས་པ་ལྟར་གསུམ་ལས། དང་པོ་ནི། འདི་ལྟར་ཤེས་པར་བྱ་སྟེ། འཆམས་ཀྱི་ལུས་འགྱུར་འགྲིག་པ་ཡང་། །རྔ་ཡི་སྒྲ་གདངས་ལ་ལྟོས་ཕྱིར། །ཐོག་མར་རྔ་བརྡུངས་རིམ་པ་སློབས། །རོལ་འགྲོས་གཡས་གཡོན་མཆོངས་སྟབས་དང་། །བསྐྱོད་འགྲོས་འགྲོ་ཕྱོགས་གཡས་མཆོངས་ལ། །ཆིག་རྡེག་ཆེ་བ་རེ་རེ་སྟེ། །དེ་རྗེས་སྐོར་ཞིང་འགྱིང་པའི་བར། །ཆུང་བརྡུངས་གསུམ་ཙམ་རོལ་འཐབ་བཅས། །བསྐྱོད་འགྲོས་གཡས་གཡོན་ལྕགས་རིས་སུ། །འབེབས་ཚེ་ཆེ་བརྡེག་དྲག་པོར་གཅོད། །གཡབ་མོའང་བསྐྱོད་འགྲོས་ལྟ་བུ་ལས། །འབེབས་ཚེ་ཅུང་ཟད་ཆུང་བས་གཅོད། །རོལ་འགྱིང་ངང་ལས་འཆམས་སྐད་དག །སྒྱུར་བ་རྫོགས་པའི་དེ་མ་ཐག །རྐང་གཡས་མདུན་དུ་འབབས་པ་དང་། །གཡས་དང་གཡོན་དུ་གཡོམ་འགྱིང་ལ། །སྦྲམ་ཞེས་ཆེ་བརྡེག་རེ་རེའོ། །གཡོམ་འགྱིང་བཞི་གྲངས་ལ་བཅུག་ཚེ། །གཡས་སུ་བཞི་རྫོགས་གཡོན་དེ་ཕྱེད། །ཆེ་བརྡེག་མཉམ་སྟེ་གཡོན་པ་ཡི། །གསུམ་བཞིར་ཅུང་ཟད་ཆེ་དལ་བརྡེག །བཞི་པད་མཆོངས་པད་ཡངས་པད་ལ། །རེ་རེར་ཆུང་བརྡེག་གསུམ་གསུམ་སྟེ། །ཛམ་ཆུང་ཤིན་ཏུའང་ཆུང་བརྡེག་གསུམ། །པད་ཛམ་གཉིས་ཀྱི་སྦྲམ་སྦིར་སྦམ། །གསུམ་པོ་རིམ་བཞིན་ཆེར་བསྐྱེད་བརྡུངས། །ཆིག་བརྡུངས་རོལ་པའི་སྦྲམ་ལ་ཆེ། །གྲངས་ལ་ཅུང་ཆུང་ཐེངས་བརྡུངས་རྗེས། །ཆུང་བ་བཞི་ལྔ་རོལ་འཐབ་བཅས། །གཡབ་མོ་སྟེང་བར་འོག་གི་ཛམ། །དེ་འདྲ་ཁྱད་པར་ཆུང་བརྡེག་བྱ། །པད་རོལ་བཞི་གྲངས་ལ་འཇུག་ཚེ། །རྟིང་གསིག་གར་འཕོག་ཆེ་བརྡེག་དང་། །རོལ་པར་ཐེང་མ་མངོན་ཙམ་གནད། །སོ་སོའི་ཕྱག་རྒྱ་བསྒྱུར་བའི་དུས། །འཆམ་སྐོར་དང་ནི་དཔའ་བསྐྱེད་ནས། །བཟུང་སྟེ་སྤྱུགས་པའི་བར་དག་དང་། །གདགས་རྒྱན་མ་གཏོགས་འགྱིང་ཆེན་ནས། །ཡུམ་བར་ཆིག་བརྡེག་བཞི་བཞི་དང་། །ཆོས་དབྱིངས་ཐོད་སྐམ་གཉིས་ལྔར་བརྡེག །སྟེང་བར་འོག་གསུམ་བརྒྱད་བརྡེག་ལ། །མགོ་བོའི་དོ་ཤལ་དྲུག་བརྡེག་སྟེ། །སྦྲམ་ལ་བརྡུངས་ཤིང་གྲངས་རྣམས་ལ། །ནན་ཙམ་བྱས་ནས་ཁ་འབྲལ་བ། །སེ་འབྲོ་ཟུར་གྱི་ལུགས་ཡིན་ལེགས། །དེ་ཀུན་ཐ་མའི་གྲངས་གཅིག་པོར། །ཅུང་ཟད་ཆུང་བརྡེག་གཞོལ་ལེན་ཚེ། །དེ་ཡང་སྦྲམ་ལས་ཆེར་བསྐྱེད་བརྡུངས། །གཞོལ་ལེན་མ་གཏོགས་ཐམས་ཅད་ཀྱི། །མཚམས་སུ་སྦྲམ་སྦིར་སྦྲམ་ཞེས་པར། །དང་པོ་ཆུང་ཞིང་ཆེ་རིམ་བསྐྱེད། །འགྲོལ་བསྡུ་གཞོལ་སྟབས་རྣམ་གཉིས་ལ། །སྦིར་སྦྲམ་རྗེས་སུའང་ཆུང་བརྡེག་གཅིག །གཞོལ་ལ་དངོས་གཞིའི་གྲངས་རྫོགས་རྗེས། །སྦྲམ་ཞེས་མཚམས་ལེན་དེ་ཡང་ཆེ། །རླུང་དང་ཆུ་ཡི་དཀྱིལ་འཁོར་དང་། །ཁྲོ་མོ་བརྒྱད་དང་བམ་སྤྲོ་སྟོབ། །ལྔ་བརྡུངས་ཆེ་ཆུང་སྤེལ་མ་སྟེ། །དེ་ཡི་དུས་སུ་བཞི་ཞེས་པར། །ཆེ་བརྡེག་འཐེང་ཙམ་བྱས་ན་ལེགས། །རྡོ་རྗེ་ཕྱེད་འགྲོས་བརྐྱང་སྤགས་དང་། །མཁའ་དང་ས་དཀྱིལ་ཀེང་རུས་མེ། །སྒོ་མ་བམ་གྱི་རྡོར་འགྲོས་དང་། །སྟོབ་འཆམས་བརྡོག་འགྲོས་བཅས་པ་རྣམས། །བཞི་གྲངས་མཐའ་ཐོག་ཆེ་བ་སྟེ། །ལ་ལར་བར་གྱི་གཅིག་ཞེས་པར། །མཉམ་བརྡེག་གཉིས་གཉིས་སྤྱིར་བཏང་དུས། །ཆེ་བརྡེག་ཡིན་ཏེ་ལྡེམ་འགྲོས་ལ། །འཇུག་ཚེ་དེ་ཉིད་ཆུང་བརྡེག་བྱ། །ཕྲ་མེན་བརྒྱད་ལ་བཞི་བརྡུངས་ནི། །ཐེང་མ་ཆེ་སྐད་ཆུང་སྐད་སྤེལ། །འདི་དང་གནས་མའི་རྐང་གཡས་ཀྱི། །འགྲོལ་བསྡུ་ཆེ་སྐད་རེས་ཡིན་ཀྱང་། །འབྲིང་བརྡེག་བྱས་ན་མཛེས་ཞེས་གསུངས། །གཞལ་ཡས་དབང་མོའི་འདུར་འཆམས་དང་། །རོལ་པ་དང་ནི་སྦྲུལ་ནག་གིས། །བམ་འཚོལ་རྡེའུས་བརྟག་པ་དང་། །ལྷག་མ་འཁུར་ནས་རྒྱུག་པ་རྣམས། །ཕལ་ཆེར་ཉིས་བརྡུངས་འཐེང་མ་སྟེ། །རྡེའུའི་གཡས་གཡོབ་གཡོན་གཡོབ་ཀྱི། །ནང་དང་རྡོར་འགྲོས་གཡས་ནང་འགྲོ། །རྡེའུ་འཕངས་ནས་ཕྱིར་འགྲོས་རྣམས། །ཆེ་མཉམ་བྲེལ་བ་བཞི་བཞི་བརྡེག །མདོར་ན་རང་རང་ཕྱག་རྒྱ་རྣམས། །སྒྱུར་དུས་དམིགས་བསལ་འགའ་མ་གཏོགས། །ཆེ་བརྡེག་ཡིན་ཏེ་སོ་སོ་ཡི། །བར་མཚམས་རོལ་འགྲོས་ལྡེམ་འགྲོས་དག །ཆུང་བརྡེག་དེས་མཚོན་ཀུན་ཏུའང་། །ཆེ་སྐད་ཆུང་སྐད་འཐོན་པ་དང་། །མཚམས་ཆོད་དལ་བྲེལ་སྐབས་ཐོབ་བྱེད། །སྤྱིར་ན་རོལ་མོ་དལ་བ་མཛེས། །ཞེས་པ་སྟེ་མཚོན་པ་ཙམ་མོ། །གཉིས་པའང་འདི་ལྟ་ཤེས་པར་བྱ་སྟེ། གོང་འོག་ཀུན་ཏུ་འགྲོ་བ་ཡི། །ལུས་འགྱུར་གཅེས་བསྡུས་འདིར་གསལ་བྱ། །ལག་གཉིས་ནང་གདེངས་རྐང་གཡོན་དང་། །ཕྱིར་གདེངས་རྐང་གཡས་འགྲོ་ཕྱོགས་སུ། །གསིག་མཆོངས་བྱས་རྗེས་སྔ་མས་ཕྱི། །ཕྱི་མས་ནང་དུ་བསྐོར་ནས་འགྱིང་། །རྐང་པ་དང་མཐུན་ལག་པའང་། །བསྡུ་བ་རོལ་པའི་རྣམ་པ་ཅན། །དེ་ནི་རོལ་འགྲོས་ཞེས་བྱའོ། །ལག་གཉིས་གཡོན་ཕྱོགས་ཁ་སྦུབ་དང་། །གཡས་ཕྱོགས་གྱེན་བསྟན་གཞོལ་བ་ཡི། །རོལ་པོ་གཉིས་རྗེས་རྐང་གཡས་གཡོན། །འདེགས་བཞག་ལག་པ་རོལ་སྟབས་མཐར། །གཡོན་འདེགས་ལེན་ཆུང་དང་བསྟུན་ནས། །ལག་པ་གཡོན་པར་གཡས་པ་ཡིས། །ནང་སྐོར་སྟེང་དུ་འཕྱར་བྱེད་པ། །འདི་ནི་ཆིག་བརྡུངས་རོལ་པ་ཡིན། །རྐང་པ་གཡས་པས་མདུན་དུ་དང་། །གཡོན་པས་གཡས་དང་གཡས་པས་དབུས། །གཡས་ཀྱིས་གཡོན་དང་གཡོན་པ་ཡིས། །དབུས་སུ་ཡངས་པད་སྐྱུར་བ་རེ། །རྫོགས་པར་བྱེད་པ་བཞི་པད་དོ། །རྐང་གཡས་ཁོ་ནས་དབུས་དང་གཡོན། །གཡོན་གྱིས་དབུས་དང་གཡས་ཕྱོགས་སུ། །ཡངས་པད་སྐྱུར་རྫོགས་མཆོངས་པད་ཡིན། །ཆུང་བརྡེག་གསུམ་ལ་བྷན་ཕུར་གཉིས། །ཐུགས་ཀར་མཉམ་ནས་གཡོན་གཡས་སུ། །གཅུ་ཞིང་རྐང་གཡོན་འདེགས་ཆུང་གིས། །ལེན་པ་དེ་ནི་ཛམ་ཆུང་ངོ་། །སྦྲམ་སྦིར་སྦྲམ་ལ་རྐང་ལག་གཡས། །གཡས་སུ་འབེབས་འདེགས་གཡོན་དུའང་། །དེ་ལྡོག་གཡོན་པས་འགྲོལ་བྱེད་ཅིང་། །དབུས་སུ་པད་བསྐོར་གྱིས་བསྡུ་བ། །འགྲོལ་བསྡུ་ཞེས་སུ་གྲགས་པ་ཡིན། །རྐང་གཡས་གཡས་འཐེན་འགྲོ་ཕྱོགས་སུ། །སྦྲམ་ལ་རྟིང་གསིག་ཕུར་དར་གཡོབ། །སྦིར་ཞེས་སྐྱུར་རྗེས་སྦྲམ་སྦྲམ་ལ། །གཡས་ཕོབ་གཡོན་པ་འགྲོ་ཕྱོགས་སུ། །གོམ་གང་ནུར་ནས་རྐང་ལག་གཡོན། །གཞོལ་ནས་སྦིར་སྦྲམ་ལ་བྷན་སྐྲ། །ཕྱིར་སྐྱུར་རྐང་གཡོན་འདེགས་འབེབས་དག །བྱེད་པ་གཡས་པའི་གཞོལ་ཡིན་ཏེ། །དེ་ལྡོག་གཡོན་པའི་གཞོལ་དུ་གྲགས། །ཕུར་དར་གཡོན་པའི་འཁྲིག་མ་ནས། །དྲངས་ཏེ་ལག་གཉིས་ཕྱིར་གདེངས་དང་། །མཉམ་དུ་རྐང་གཡས་འགྲོ་ཕྱོགས་མཆོངས། །དེའི་རྩར་རྐང་གཡོན་གྲུད་པའི་སྣར། །གཡས་པའི་རྟིང་གཏད་གསིག་ཅིང་འགྱིང་། །བསྐྱོད་འགྲོས་ཞེས་གྲགས་དེ་ཡི་ཚེ། །ལག་གཉིས་བརྒྱང་བ་མཚམས་ཆེན་ཏེ། །དཀུར་བརྟེན་བྱས་ན་མཚམས་ཆུང་ཟེར། །དེ་བཞིན་ལག་གཉིས་དཀུར་བརྟེན་ནས། །རྐང་པ་རོལ་འགྲོས་ལྟར་འགྲོ་བ། །ཆིག་བརྡུངས་ལྡེམ་སྟེ་ལག་དེ་བཞིན། །བྱས་ལ་རྐང་པ་བཞི་འགྲོས་ལྟར། །འགྲོ་བ་བཞི་བརྡུངས་ལྡེམ་དུ་གྲགས། །བཞི་པད་མཆོངས་པད་འགྲོལ་བསྡུ་དང་། །རོལ་པ་རྣམས་ནི་བཞི་བརྡུངས་དང་། །དེ་བཞིན་ལྔ་བརྡུངས་ཀྱིས་བཅིངས་ན། །དེ་དང་དེ་ཡི་དེར་གྲགས་མོད། །འོན་ཀྱང་མཆོངས་པད་ཡོངས་རྫོགས་ནི། །གཅིག་བརྡུངས་ལས་གཞན་མཛད་སྲོལ་མེད། །མདོར་ན་གྲལ་རིམ་བར་ཐག་རྣམས། །ཕྲེང་བ་རྒྱུས་འདྲ་དོ་ར་སྙོམས། །ཧ་ཅང་མི་དལ་མི་བྲེལ་ལ། །རྣམ་འགྱུར་མ་འདོམ་བདེ་ཞིང་འགྲིག །འགྱིང་དང་སྤྲུག་སོགས་ལུས་འགྱུར་དག །ཉམས་ཀྱིས་ཀུན་ཏུ་མཛེས་པ་གཅེས། །ཞེས་སྨྲས་སོ། །གསུམ་པའང་འདི་ལྟར་ཤེས་པར་བྱ་སྟེ། འཆམས་གང་སོ་སོའི་སྔོན་རྗེས་སུ། །བཞི་པད་མཆོངས་པད་གཞོལ་སྟབས་དང་། །འགྲོལ་བསྡུ་གང་བྱེད་སྡོམ་ཚིག་བཤད། །ཆོས་དབྱིངས་མཁའ་འགྲོ་དཔའ་བསྐྱེད་དང་། །བླ་འགུགས་དམ་ཅན་འབོད་པ་དང་། །སྟེང་བར་འོག་གསུམ་བྱིན་གྱིས་རློབ། །ནམ་མཁའ་རླུང་དང་ཆུ་དཀྱིལ་དང་། །འགྱིང་ཆེན་ནས་བཟུང་སྒོ་མའི་བར། །བཞི་པད་སྔོན་འགྲོ་མཆོངས་པད་རྗེས། །རྡོ་རྗེ་བརྐྱང་མ་ས་དཀྱིལ་དང་། །མེ་དཀྱིལ་བཞི་པད་སྔོ་འགྲོ་ལས། །རྗེས་སུ་བཞི་བརྡུངས་ལྡེམ་ལ་འཇུག །ཀེང་རུས་གཞལ་ཡས་ཁང་གཉིས་ཀྱི། །སྔོན་རྗེས་གཉིས་གར་མཆོངས་པད་དང་། །གཡབ་མོ་རྡོ་རྗེ་ཕྱེད་འགྲོས་དང་། །སྤགས་འགྲོས་དབང་ཕྱུག་ལས་བཞིའི་འཚམས། །རོལ་པ་དང་ནི་སྦྲུལ་ནག་གིས། །བམ་འཚོལ་བ་དང་རྡེའུ་བརྟག །རྡོར་འགྲོས་བརྟག་དང་བརྡོག་འགྲོས་བཅས། །དགུ་ལ་སྔོན་དུ་མཆོངས་པད་བྱ། །རྗེས་སུ་རང་རང་བསྐོར་བའི་འགྲོས། །སྤྲོ་སྟོབ་སྔོན་དུ་བཞི་པད་ཡིན། །དཔལ་བསྐྱེད་བླ་འགུགས་དམ་ཅན་འབོད། །གཙོ་བོའི་གཡས་གཡོན་བར་ཐའི་ཕྱག །ཞབས་དང་དོ་ཤལ་གོས་རྣམ་གསུམ། །ཁྱུང་གཤོག་རྣམས་ལ་གཞོལ་སྟབས་བྱ། །སྟེང་བར་འོག་གསུམ་བྱིན་རློབ་དང་། །མཁའ་དཀྱིལ་འགྱིང་ཆེན་འགྱིང་ཆུང་དང་། །དབུ་དང་རྩ་ཕྱག་ཐོད་སྐམ་རྒྱན། །རྩེ་གསུམ་རིགས་བཞིའི་གྱད་འཆམས་དང་། །ཡུམ་དང་ཁྲོ་མོ་ཕྲ་མེན་དང་། །སྒོ་མ་རྣམས་ལ་འགྲོལ་བསྡུའོ། །གང་ཞིག་མཐོང་བ་བརྒྱུད་པ་ཡིས། །སྦྱངས་རྗེས་ནམ་ཞིག་བརྗེད་སྲིད་ན། །འདི་ཙམ་བལྟས་པས་དྲན་སོས་ནས། །རྩོལ་མེད་ཐོན་ཕྱིར་གཅེས་པར་བཟུང་། །ཞེས་གདམས་སོ། ༈ །གཉིས་པ་འཆམས་ཚུལ་དངོས་བཤད་པ་ལ། སྔོན་འགྲོའི་སྟངས་སྟབས་ཀྱིས་སྤྱིར་རློབ་པ་དང་། དངོས་གཞི་སོ་སོའི་སྟངས་སྟབས་ཀྱིས་བྱེ་བྲག་ཏུ་རློབ་པ་གཉིས་ལས། དང་པོ་སྡོམ་ནི། འཆམས་སྐོར་གསུམ་དང་ཆོས་དབྱིངས་བསྐྱེད། །དབང་སྡུད་མཁའ་འགྲོ་དཔའ་བསྐྱེད་དང་། །ཉམས་པའི་བླ་འགུགས་དམ་ཅན་འབོད། །ནམ་མཁའ་བར་སྣང་ས་གཞི་གསུམ། །འཁོར་ལོ་རྟགས་བརྒྱད་པདྨར་རློབ། །རྡོ་རྗེ་ཕྱེད་བརྐྱང་སྤགས་གསུམ་གྱིས། །ས་བཙལ་འདུལ་ཞིང་རློབ་པའོ། །ཞེས་དོན་བཅུ་གཉིས་ལས། དང་པོ་འཆམས་སྐོར་གསུམ་ནི། སྔར་གྱི་བགེགས་བསྐྲད་སོང་ནས་རོལ་མོ་རྣམས་བཞག་རྗེས། ཐམས་ཅད་བྷན་ཕུར་ཐོགས་ཏེ་ས་གཞི་རྣམས་ཁོད་སྙོམས་པར་བྱ་བའི་ཕྱིར་འཆམས་སྐོར་ལན་གསུམ་གྱིས་གཏན་ལ་དབབ་པ་ལས། འཆམས་སྐོར་དང་པོ། ཞེས་བརྡའ་སྦྱར། ཆིག་བརྡུངས་རོལ་པའི་རྗེས་རྐང་གཡས་བཏེག་སྟེ་རོལ་འགྲོས་ལ་བཅུག་ནས་ཇི་ལྟར་རིགས་པ་བསྐོར་མཚམས། འཆམས་བསྐོར་གཉིས་པ། ཞེས་ལག་གཉིས་ཕྱིར་གདེངས་ཏེ་རྐང་གཡས་གཡོན་གྱི་རྩེར་ལྕགས་རིས་སུ་བཞག་ནས། ཆེ་བརྡེག་བཞི་ལ་ལུས་གཡས་སུ་བསྐོར་བའི་དོ་རའི་རྒྱབ་ཏུ་ཆུང་གསུམ་ལ་ཡངས་པད་སྐྱུར་གཏོད་ནས། ཆེ་བཞིར་རྐང་པ་ལྕགས་རིས་ལྡོག་པས་ལུས་གཡོན་དུ་བསྐོར་བའི་ཆུང་གསུམ་ལ་དོ་རའི་ནང་དུ་ཡངས་པད་སྐྱུར་གཏོད་དང་། རྐང་གཡོན་འགྲོ་ཕྱོགས་སུ་ཕབ་སྟེ་རོལ་འགྲོས་ནས། འཆམས་སྐོར་གསུམ་པ། རྐང་གཡོན་ལྕགས་རིས་ཀྱི་གཡོན་དུ་བསྐོར་བའི་དོ་རའི་ཕྱི་དང་། དེ་ལྡོག་གཡས་སྐོར་གྱིས་ནང་དུ་ཡངས་པད་སྐྱུར་གཏོད་དང་རྐང་གཡས་ཟུར་དུ་ཕབ་ནས་རོལ་འགྲོས་ལ་འཇུག །གཉིས་པ་ནི། ཆོས་ཀྱི་དབྱིངས་བསྐྱེད་པར་བྱ་བའི་ཕྱིར་བསྐོར་བ་ལན་གསུམ་དུ་བྱ་བ། ཞེས་ལག་གཉིས་ཕྱིར་གདེངས་པའི་གཡས་གཡོན་དུ་གཡོམ་འགྱིང་། བཞི་པད་ཚང་མ། ཛམ་ཆུང་ནས་རྐང་གཡས་བཏེག་སྟེ་གཡོན་གསིགས་ཀྱི་ཆེ་ལྔ་ལ་བདུན་ནས་གཡས་བསྐོར་དུ་ཕྱོགས་བཞིར་འབེབས་ཤིང་། ལྔ་པ་མདུན་དུ་འགྱིང་བཅས་ཀྱིས་འབེབས་པ་དང་འགོ་བརྩམས་པའི་མཆོངས་པད་ཡོངས་རྫོགས། ཆིག་བརྡུངས་རོལ་པ། བསྐྱོད་འགྲོས་མཚམས་ཆེན་ནས་རོལ་འགྲོས་ལ་འཇུག །གསུམ་པ་ནི། སྣང་སྲིད་རྣམས་དབང་དུ་བསྡུ་བའི་ཕྱིར་གཡོབ་མོ་ལན་གསུམ་དུ་བྱ་བ། གཡོམ་འགྱིང་། མཆོངས་པད་ཡོངས་རྫོགས་ཀྱི་པད་སྐོར་རྟིང་མར་ཕྱག་མཚན་བརྗེ་ཞིང་རྐང་གཡས་རྒྱབ་འཐེན། རྔ་གཉིས་བརྡེག་ཐེང་མ་ཆུང་གསུམ་ལ་ལག་གཉིས་པད་ཆུང་གི་ཛམ་ནས་དེ་བས་ཆུང་གསུམ་རོལ་འཐབ་བཅས་པར་ལག་གཡོན་དཀུར་བརྟེན་ཏེ། སྦིར་སྦྲམ་ཞེས་གསུམ་ལ་རྐང་གཡས་འདེགས་འཇོག་གིས། གཡོན་གཡས་དབུས་རྣམས་སུ་འགྱིང་གསིག་གི་གཡོབ་མོ་རེ་བྱས་ཏེ་རོལ་འགྲོས། བཞི་པ་ནི། མཁའ་འགྲོ་རྣམས་དཔའ་བསྐྱེད་པར་བྱ་བའི་ཕྱིར་སིག་སིག་ལན་གསུམ་དུ་བྱ་བ། གཡོམ་འགྱིང་། བཞི་པད་ཡོངས་རྫོགས་ཀྱི་དང་པོར་ཕྱག་མཚན་བརྗེ། ཛམ་ཆུང་ནས། རྔ་ཆེ་བ་བཞི་རེར། རྐང་པ་གཡས་གཡོན་རེས་བརྐྱང་གིས་གཡས་དང་། གཡོན་དང་། དབུས་རྣམས་སུ་གསིག་ཅིང་རེ་རེའི་མཚམས་སུ་སྦྲམ་སྦིར་སྦྲམ་ལ་གཡས་གཡོན་དུ་གཅུ་བའི་ལེན་འགྱིང་རེ་བྱས་ནས་མཇུག་ཏུ་གཡས་པའི་གཞོལ། མཆོངས་པད་སོང་ནས་བརྩམས་པའི་དོན་གྱིས་ཡངས་པད་གཅིག་དང་སྐྱུར་གཏོད་ཆིག་བརྡུངས་རོལ་པ། བསྐྱེད་འགྲོས་མཚམས་ཆེན་ནས་རོལ་འགྲོས། ལྔ་པ་ནི། དམ་ཉམས་ཀྱི་བླ་འགུགས་པའི་ཕྱིར་མགོ་གུག་ལན་གསུམ་དུ་བྱ་བ། གཡོམ་འགྱིང་། བཞི་པད་སོང་ནས་བརྩམ་པའི་དོན་གྱི་ཡངས་པད་གཅིག་དང་སྐྱུར་གཏོད། ཛམ་ཆུང་ནས། ལག་དཀུར་བརྟེན་གྱིས་རྐང་སྟབས་དཔའ་བསྐྱེད་ལྟར་ལས་གཡས་གཡོན་དབུས་སུ་གསིག་དུས་མགོ་གུག་ཙམ་རེ་བྱས་རྗེས། གཡས་གཞོལ། མཆོངས་པད་སོང་། ཆིག་རོལ། བསྐྱོད་ཆེན་ནས་རོལ་འགྲོས། དྲུག་པ་ནི། དམ་ཅན་རྣམས་འབོད་པར་བྱ་བའི་ཕྱིར་སྤྱུགས་པ་ལན་གསུམ་དུ་འདོན་པ། གཡོམ་འགྱིང། བཞི་པད་སོང་། ཛམ་ཆུང་ནས། ལག་གཉིས་ཀྱི་སྲིན་ལག་དང་མཐེའུ་ཆུང་གཉིས་མཐེ་བོང་གིས་མནན་ཅིང་གུང་མཛུབ་བརྐྱང་བ་ཁའི་ཐད་དུ་བསྒྱུར་ཞིང་རྔ་ཆེ་བཞིར་དབུས་སུ་གཡས་གཡོན་རེ་མོས་ཀྱིས་གསིག་པ་དང་སྤྱུགས་པ་རེ་བཏོན་ལ། གཡས་གཞོལ། མཆོངས་པད་སོང་། ཆིག་རོལ། བསྐྱོད་ཆེན་ནས་རོལ་འགྲོས། བདུན་པ་ནི། སྟེང་བྱིན་གྱིས་རློབ་པར་བྱ་བའི་ཕྱིར་གནམ་འཁོར་ལོ་རྩིབས་བརྒྱད་དུ་བྲི་བ། གཡོམ་འགྱིང་། བཞི་པད་ཡོངས་རྫོགས་ཀྱི་རྟིང་མར་རྐང་གཡས་རྒྱབ་འཐེན་དང་། པད་ཆུང་གི་ཛམ་གསུམ་ནས། ལག་གཡོན་དཀུར་བརྟེན་ཅིང་རྐང་གཡས་གཡོན་པའི་བརླ་ལ་གཏད་ལ་གཡོན་འཕར་གསིགས་ཀྱིས་གཡས་བསྐོར་དུ་ཆིག་བརྡེག་བརྒྱད་ཀྱི་བར་ཕུར་རྩེས་སྟེང་དུ་རྩིབས་བརྒྱད་བྲི་ཚུལ་གྱིས་དལ་བུས་སྐོར་རྗེས། འགྲོལ་བསྡུ། མཆོངས་པད་སོང་། ཆིག་རོལ། བསྐྱེད་འགྲོས་མཚམས་ཆུང་ནས་ཆིག་བརྡུངས་ལྡེམ་འགྲོས། བརྒྱད་པ་ནི། བར་བྱིན་གྱིས་རློབ་པར་བྱ་བའི་ཕྱིར་ལོགས་བཀྲ་ཤིས་རྟགས་བརྒྱད་དུ་བྲི་བ། གཡོམ་འགྱིང་། བཞི་པད་སོང་། གཞན་སྔར་ལྟར་ལས་ཕུར་རྩེ་ལོགས་བསྟན་གྱིས་བྲི་ཚུལ། དགུ་པ་ནི། འོག་བྱིན་གྱིས་རློབ་པར་བྱ་བའི་ཕྱིར་ས་པདྨ་འདབ་བརྒྱད་དུ་བྲི་བ། སྔར་ལྟར་ལས་ཕུར་རྩེ་འོག་བསྟན་གྱིས་བྲི་ཚུལ། རྗེས་སུ་མཚམས་ཆེན་ནས་རོལ་འགྲོས། བཅུ་པ་ནི། རྡོ་རྗེ་ཕྱེད་འགྲོས་ཀྱིས་ས་བཙལ་བ། གཡོམ་འགྱིང་། སྦྲམ་སྦྲམ་ཞེས་པའི་ལེན་ནས། བཞི་བརྡུངས་ལ་བསྒྱུར་ཏེ། བཞི་གྲངས་གཉིས་ལ་མཆོངས་པད་སོང་དོན་གྱི་ཡངས་པད་སྐྱུར་གཏོད་དང་རྐང་གཡོན་བཏེག་པའི་ལེན་ནས། བཞི་གྲངས་གསུམ་གྱི་རེ་རེ་ལ། ལག་བྷན་ཕུར་གཏོད་པ། ཡངས་པད་སྐྱུར་བ། ཐུགས་ཀ་བསྣོལ་བ་དང་བསྟུན་ནས་རིམ་པར་རྐང་གཡོན་རྒྱབ་ཏུ་བསྐུམ་པའི་གཡས་པ་འགྲོ་ཕྱོགས་ཀྱི་གཡོན་དང་། གཡས་དང་། དབུས་རྣམས་སུ་ཕབ་པས། རྭ་བཙལ་ལ། དེའི་ངང་ནས་ལག་པད་སྐྱུར་དང་བསྟུན་བཞི་བརྡེག་ཆེ་བ་གཅིག་ལ་རྐང་གཡས་གཡས་སུ་མཆོངས་སྟབས་ཀྱི་འབེབས་པ་དང་། གཡོན་འདེགས་འབེབས་ཀྱི་རོལ་ལེན་ནས། གཅིག་ཅེས་རྐང་གཡས་མདུན་དུ་ཕབ་པའི་ལྕགས་མདའ་དང་ལག་དཀུར་བརྟེན་གྱི་ངང་ནས་གཉིས་གཉིས་ཞེས་དེ་ཁར་འགྱིང་ཡང་རྐང་པ་གཡོན་པས་ལྡོག་སྟེ་སྔར་ལྟར་རྭ་བཙལ་ནས་གཡོན་དུ་མཆོངས་མཐར་ལག་དཀུར་བརྟེན་གྱི་རྐང་གཡོན་མདུན་དུ་གཅིག་ཅེས་ཕབ་ནས། གཉིས་གཉིས་ཞེས་བཞི་བརྡུངས་ལྡེམ་འགྲོས་ལ་འཇུག །བཅུ་གཅིག་པ་ནི། ལྡེམ་འགྲོས་ཀྱི་གཡོན་པའི་གསུམ་ཐོག་ནས། རྡོ་རྗེ་བརྐྱངས་འགྲོས་ཀྱིས་ས་འདུལ་བ། བཞི་བརྡེག་གཉིས་ཀྱི་དང་པོར་གཡས་དང་། གཉིས་པའི་གཅིག་གཉིས་ལ་གཡོན་དུ་གཡོམ་འགྱིང། གསུམ་བཞི་ནས་བརྩམས་ཏེ་གྲངས་ཕྱེད་ལེན་གྱིས་རྩིས་པའི་བཞི་གྲངས་གཉིས་གཉིས་ལ་ཡངས་པད་སྐྱུར་གཏོད་རྣམས་རྫོགས་པ་རེ་བྱས་པའི་བཞི་པད་ཡོངས་རྫོགས་ཀྱི་པད་སྐོར་རྟིང་མ་ལེན་དུས་རྐང་གཡས་ཀྱིས་ལྟེ་བ་བསྐོར་རྗེས་འགྲོ་ཕྱོགས་སུ་རྐང་གཡས་ཀྱི་ཕྱེད་འགྲོས་ལྟར་རྭ་བཙལ་བའི་དབུས་རྭ་རྫོགས་པ་དང་། གཅིག་ལ་རྐང་གཡས་ཕབ། གཉིས་གཉིས་ལ་བྷན་ཕུར་གདེངས་རྐང་གཡོན་བཏེག་ཅིང་། གཡས་པའི་རྟིང་གསིག་གིས་ཡོངས་ཕྱོགས་སུ་ཁ་བསྒྱུར་ནས་རྐང་གཡོན་གྱིས་རྭ་གསུམ་བཙལ་ལ་གཡོན་དུ་མཆོངས་མཐར་སྔར་བཞིན་བཞི་བརྡུངས་ལྡེམ་འགྲོས། བཅུ་གཉིས་པ་ནི། ལྡེམ་འགྲོས་གཡོན་པའི་གསུམ་ཐོག་ནས། རྡོ་རྗེ་སྦག་འགྲོས་ཀྱིས་ས་གཞི་བྱིན་གྱིས་རློབ་པ། བཞི་གྲངས་ཕྱེད་གཉིས་ལ་གཡོམ་འགྱིང་། མཆོངས་པད་སོང་བརྩམས་ཀྱིས་ཡངས་པད་ནས་ལེན་གྱི་བར་ཕྱེད་འགྲོས་ལྟར་ལས། རྐང་པ་གཡས་པ་དོ་རའི་ནང་དུ་རྭ་གསུམ། གཅིག །གཉིས་གཉིས་ལ་བརྐྱང་མ་ལྟར་བསྐོར་ནས། གཡོན་པས་ཡོངས་ཕྱོགས་སུ་རྭ་གསུམ། གཅིག་ལ་གཡོན་ཕབ། གཉིས་གཉིས་ལ་གཡས་བཏེག་ནས་རྒྱབ་ཏུ་གཡས་པས་རྭ་གསུམ། སྔར་ལྟར་བསྐོར་ཏེ་གཡོན་པས་འགྲོ་ཕྱོགས་སུ་རྭ་གསུམ་བཙལ་ནས། གཡོན་དུ་མཆོངས་མཐར་ལྡེམ་འགྲོས་ལ་སྔར་བཞིན་བཅུག །དེའི་ངང་ནས་གཡས་པའི་གསུམ་ཐོག་མཆོངས་པད་སོང་ནས་བརྩམས་ཞེས་བཞི་བརྡུངས་གཡོམ་འགྱིང་ཡངས་པད་སྐྱུར་གཏོད། རོལ་པ་རྣམས་བྱས་ལ། བསྐྱོད་འགྲོས་མཚམས་ཆེན་ནས་རོལ་འགྲོས་ལ་འཇུག་པའོ། ༈ །གཉིས་པ་དངོས་གཞི་ལ། རྟེན་དང་། བརྟེན་པ་བསྐྱེད་པ་གཉིས་ལས། དང་པོའི་སྡོམས་ནི། མཁའ་རླུང་རཀྟ་ཞིང་ཆེན་དང་། །ཀེང་རུས་མེ་དཀྱིལ་གཞལ་ཡས་ཁང་། །ཞེས་པ་ལྟར་བདུན་ལས། དང་པོ་ནི། གྲུ་གསུམ་མཐིང་ནག་འབར་བའི་ནམ་མཁའ་ལ། །གཡོམ་འགྱིང་། རྔ་བཞི་བརྡུངས་ལ་བསྒྱུར་ཏེ། བཞི་པད་སོང་དོན་གྱི་ཡངས་པད་སྐྱུར་གཏོད་དང་རྐང་གཡོན་བཏེག་ལེན་ནས། རྐང་པ་ལྕགས་རིས་དང་སྟོད་གཡོན་གཡས་སུ་གཅུ་ཞིང་ལག་ཕྱེད་པད་ཕྱིར་གཡུགས་ཀྱི་རྣམ་པའི་གཡོམ་གསིག་གསུམ། གཅིག་ལ་རྐང་གཡས་མདུན་དྲང་པོར་མཆོངས་འབེབས་དང་། གཉིས་གཉིས་ལ་གཡོན་བཏེག་གཡས་པའི་རྟིང་གསིགས་ཀྱིས་རྒྱབ་ཟུར་ནང་ལོགས་ཙམ་དུ་ཕབ་ནས་གཡོམ་གསིག་གསུམ། དེ་བཞིན་དུ་བར་རྣམས་ལ་བཞི་གྲངས་ཆུང་བ་རེར་གཡོན་པའི་མཁྲིག་མ་ནས་ཕུར་དར་འདྲེན་བཞིན་དུ་ཛམ་ཁྲུད་ཀྱིས་གཡས་སུ་བསྐོར་ཏེ། གཅིག་ཅེས་པར་རྐང་གཡས་དོ་རའི་རྒྱབ་ཟུར་དང་དོ་རའི་རྒྱབ་ཏུ་ཁ་བལྟ་བའི་གཡས་རྣམས་སུ་ཕབ་ཅིང་། གཉིས་གཉིས་ལ་གཡོན་བཏེག་ནས་སྔ་མ་སྔ་མའི་རྐང་གཡས་ཀྱི་ཤུལ་དུ་ཕབ་པས་ཆོས་འབྱུང་གི་རྣམ་པ་བཙལ་ལ། གཡོམ་གསིག་གསུམ་རེའི་རྟིང་མ་རྫོགས་རྗེས་ཛམ་ཁྲུད་ཀྱིས་ནང་དུ་ཁ་བསྒྱུར་ནས། བཞི་བརྡུངས་ཀྱི་འགྲོལ་བསྡུ། མཆོངས་པད་སོང་བརྩམས་རོལ་པ་དང་། བསྐྱོད་འགྲོས་མཚམས་ཆུང་ནས་ཆིག་བརྡུངས་ལྡེམ་འགྲོས། གཉིས་པ་ནི། འཐོར་བྱེད་རླུང་ནག་ཚོགས་ཀྱིས་རྒྱ་གྲམ་གཏམས། །གཡོམ་འགྱིང་། སྦྲམ་སྦྲམ་གྱི་ལེན་ནས་ལྔ་བརྡུངས་ཀྱི། དང་པོ་ཆེ་བརྡེག་ལ་བཞི་པད་སོང་དོན་གྱི་ཡངས་པད་སྐྱུར་གཏོད་བཞི་ཕན་ལ་རྫོགས་ནས་ལྔ་ཞེས་པར་གཡས་སུ་ཅུང་འགྱིང་། གཉིས་པ་ཆུང་བརྡེག་ལ་བྷན་ཕུར་གྱེན་བསྟན་མདུན་མཉམ་གྱི་ཛམ་ལེན་རྗེས། ཆེ་ཆུང་སྤེལ་མ་བཞི་ལ། རྐང་ལག་གཡས་གཡོན་མཐུན་པར་མདུན་ཕྱོགས་སུ་ནང་སྐོར་ཕྱེད་པ་རེ་དང་། ཕྱི་སྐོར་ཕྱེད་པ་རེ་གཞུ་དབྱིབས་ལྟར་བསྐོར་ནས་ཆེ་བརྡེག་ལ་མཆོངས་པད་སོང་། ལྔ་བརྡེག་དལ་མཉམ་གཅིག་གི་གཅིག་གཉིས་ལ་ཕུར་དར་ཕྱིར་བསྐོར་གྱིས་གཡས་སུ་གཞོལ། གསུམ་དང་བཞི་ལ་རྐང་པ་གཡོན་གཡས་འདེགས་འཇོག་དང་། ལྔ་ལ་གཡོན་བཏེག་འབེབས་ཀྱི་ལེན་པ་ལྔ་བརྡུངས་རོལ་པ་ནས། བསྐྱོད་འགྲོས་མཚམས་ཆུང་ཆིག་བརྡུངས་ལྡེམ་འགྲོས། གསུམ་པ་ནི། ཆགས་པ་རཀྟའི་རྒྱ་མཚོ་རྦ་ཀློང་འཁྱིལ། །གཡོམ་འགྱིང་སྔར་ལྟར་ལྔ་བརྡུངས་ཀྱི་བཞི་པད་སོང་། ཛམ་ལེན་ནས། ལྔ་བརྡེག་ཆེ་ཆུང་སྤེལ་མ་བཞི་ལ། ལན་གཅིག་ཤོས་དཀུར་བརྟེན་ཏེ་གཡས་གཡོན་མཆན་ཁུང་ནས་ཕྱིར་བསྐོར་དང་བསྟུན་རྐང་པ་གཡས་གཡོན་གྱིས་ཕྱིར་བསྐོར་ཟླུམ་པོ་རེ་དང་། ལག་གཉིས་སྒེག་མོའི་ཚུལ་གྱི་རྐང་གཡས་གཡས་སུ་ཕབ་པ་ལ་གཡོན་པས་ནང་བསྐོར་གཅིག་དང་། མདུན་དུ་ཡངས་པད་སྐྱུར་གཏོད་ཆུང་བ་གཅིག་ལ་གཡས་སུ་མཆོངས་པད་སོང་། ལྔ་བརྡུངས་རོལ་པ། བསྐྱོད་ཆུང་ནས་ཆིག་བརྡུངས་ལྡེམ་འགྲོས། བཞི་པ་ནི། ཞིང་ཆེན་གཏམས་པའི་ས་གཞི་མཐའ་དབུས་བརྡལ། །གཡོམ་འགྱིང་། སྦྲམ་སྦྲམ་གྱི་ལེན་ནས་རྔ་བཞི་བརྡུངས་ལ་བསྒྱུར་ཏེ། བཞི་པད་སོང་དོན་གྱི་ཡངས་པད་སྐྱུར་གཏོད་ལེན་ནས། རྐང་ལག་རྡོ་རྗེ་ཕྱེད་འགྲོས་ལྟར་ལས་དབུས་རྭ་དོར་ཏེ། རྐང་པ་གཡས་པས་དོ་རའི་ནང་ཟུར་གྱི་གཡོན་དང་གཡས་སུ་གྲུ་རེ་བཙལ་ནས། གཅིག་ཅེས་པར་གཡས་གསིགས་དང་། གཉིས་གཉིས་ལ་གཡས་འདེགས་འཇོག་གིས་གཡོན་བསྐོར་དུ་ཕྱིར་ལོག་སྟེ་རྐང་གཡོན་པས་དོ་རའི་རྒྱབ་ཟུར་གཡས་གཡོན་དུ་གྲུ་རེ་བཙལ་རྗེས། ཕྱེད་འགྲོས་ལྟར་གཡོན་མཆོངས་ལེན་ནས་བཞི་བརྡུངས་ལྡེམ་འགྲོས། ལྔ་པ་ནི། ཀེང་རུས་བརྩེགས་པའི་རི་རབ་མེ་ཆེན་འབར། །བཞི་བརྡུངས་གཡོམ་འགྱིང་། མཆོངས་པད་སོང་དོན་གྱི་ཡངས་པད་སྐྱུར་གཏོད་ནས། གསུམ་བཞི་ལ། ལག་གཉིས་གྱེན་བསྟན་གྱིས་ཅུང་འགྱིང་རྗེས། རྐང་གཡས་ཟོལ་བཏེག་གིས་ནང་བསྐོར་དང་ལག་གཉིས་གཡས་ཕྱོགས་ནས་གར་བསྐོར་གྱིས་བཞི་གྲངས་གཅིག་ལ་འགྱིང་ནས། གཅིག་གཉིས་ལ་རྐང་ལག་མཉམ་དུ་འགྲོ་ཕྱོགས་སུ་འབེབས་ཅིང་གསེག །ཡང་གསུམ་བཞི་ལ་ལག་གྱེན་བསྟན་དང་། བཞི་གྲངས་ཕྱེད་གཉིས་ལ་རྐང་ལག་ལྡོག་པས་ཕྱིར་བསྐོར་ནས་ཡོངས་ཕྱོགས་སུ་འབེབས་གསིག་གཡས་པས་སྔར་ལྟར་ནང་བསྐོར་གྱིས་འགྲོ་ཕྱོགས་སུ་འབེབབ་པ་དང་རྐང་གཡོན་སྤོས་ནས་བཞི་འགྲོས་གཅིག་བླངས་ཏེ། ཁ་ནང་དུ་བལྟ་བས་གཅིག་གཉིས་ཞེས་ལན་གཉིས་ཀྱི་བར་ལག་གཉིས་ཐལ་སྦྱར་གྱིས་དབུས་སུ་གསིགས་ལ། བཞི་ཚན་གཅིག་གིས་གཅིག་གཉིས་ལ་ཕྱག་རྒྱ་དེ་གཡས་སུ་ཅུང་གཞོལ་རྗེས། གསུམ་བཞི་ནས་མཆོངས་པད་སོང་། བཞི་བརྡུངས་རོལ་བ། བསྐྱོད་ཆུང་ནས་གཉིས་གཉིས་ཞེས་བཞི་བརྡུངས་ལྡེམ་འགྲོས། དྲུག་པ་ནི། ཡེ་ཤེས་འབར་བའི་མེ་འོད་ཀུན་ཏུ་འཕྲོ། །བཞི་བརྡུངས་གཡོམ་འགྱིང་། བཞི་པད་སོང་། བཞི་བརྡུངས་ཆུང་གཉིས་ཀྱི་དང་པོར་ལག་ཕུར་བུ་འོག་ནས་བྷནྡྷར་གཏོད་ཅིང་རྐང་གཡས་འགྲོ་ཕྱོགས་སུ་བལྟ་བའི་མདུན་ནས་གཡས་ཟུར་གོམ་དོ་ནུར། གཉིས་པར་ལག་ལྡོག་སྟེ་རྐང་གཡོན་གྱིས་གཡོན་ཟུར་དུ་གོམ་དོ་ནུར་རྗེས། བཞི་བརྡུངས་ཆེ་བ་གཅིག་ལ་གཡས་མཆོང་གི་རོལ་ལེན་དང་། གཅིག །གཉིས་གཉིས་ལ་གཡས་མདུན་ཕབ་ཀྱིས་ལྡེམ་འགྱིང་རྣམས་ཕྱེད་འགྲོས་ལྟར་བྱ། ཡང་གཡོན་ནས་བརྩམས་ཏེ་ལྡོག་པས་གྲུ་གསུམ་སྔར་ལྟར་ལོགས་འགྲོ་ཕྱོགས་སུ་བསྟན་པ་བཙལ་ནས། གཅིག་ཅེས་པར་གཡོན་མདུན་དུ་ཕབ་ལ་བཞི་བརྡུངས་ལྡེམ་འགྲོས། བདུན་པ་ནི། བྷྲཱུཾ་ལས་དུར་ཁྲོད་འབར་བའི་གཞལ་ཡས་ཁང་། །བཞི་བརྡུངས་གཡོམ་འགྱིང་ནས། ཉིས་བརྡུངས་འཐེངས་མར་བསྒྱུར་བའི་མཆོངས་པད་སོང་དོན་གྱི། ཉིས་བརྡུངས་རེ་ལ་ཡངས་པད་སྐྱུར་གཏོད་རེ་རེ་དང་། རོལ་པ་གསུམ་ནས་ལག་རེས་འཕྱར་དང་རྐང་པ་ཤུད་འགྲོས་ཀྱིས། སྒོ་ཁྱུད་འགྲམ་ལོགས་ཡ་ཕུབས་སོགས་བཙལ་བའི་སྒོའི་འཁྱོག་མཚམས་རྣམས་སུ་རྔ་སྐད་ཆེ་བ་རེ་དང་བསྟུན་ལག་གདེངས་ཙམ་རེ་བྱས་ནས་འཁོར་མཚམས། མཆོངས་པད་སོང་། ཆིག་རོལ། བསྐྱོད་འགྲོས་མཚམས་ཆེན་ནས་རོལ་འགྲོས་ལ་འཇུག་པའོ། ༈ །གཉིས་པ་བརྟེན་པ་བསྐྱེད་པ་ལ། སྤྱིའི་སྡོམས་ནི། གཙོ་བོ་དང་ནི་རིགས་བཞི་དང་། །རིགས་ལྔའི་ཡུམ་དང་ག་རཱི་བརྒྱད། །སིདྷ་མ་བརྒྱད་སྒོ་མ་བཞི། །དབང་ཕྱུག་མ་དང་ཕྲ་མེན་གྱི། །བམ་ཆེན་དཔལ་ཆེན་སྟོབ་འཆམས་སོ། །ཞེས་པ་ལྟར་དགུ་ལས། དང་པོ་གཙོ་བོ་དཔལ་ཆེན་པོའི་འགྱིང་འཆམས་ཀྱི་སྡོམ་ནི། འགྱིང་ཆེན་འགྱིང་ཆུང་དབུ་དང་ཕྱག །ཞབས་དང་གདགས་རྒྱན་བྱུག་རྩི་དང་། །བགོ་བའི་གོས་དང་ཁྱུང་གཤོག་གོ། །ཞེས་དགུ་ལས། དང་པོ་ནི། བཛྲ་ཧེ་རུ་ཀའི་ཕྱག་རྒྱ་ལས་དཔལ་ཆེན་པོའི་འགྱིང་ཆེན། ཆིག་བརྡེག་གཡོམ་འགྱིང་། བཞི་པད་སོང་། ཛམ་ཆུང་ནས། ཆེ་བརྡེག་བཞི་རེར། གཡས་བརྐྱང་གིས་གཡས་དང་གཡོན་བརྐྱང་གིས་གཡོན་དུ་གསིག་ཅིང་རེ་རེའི་མཇུག་ཏུ་འགྲོལ་བསྡུ། ཡངས་པད། ཛམ་ཆུང་། ཡང་དབུས་སུ་རེས་བརྐྱང་གིས་ཆེ་བཞིར་གསིགས་ནས། འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་འགྲོས་མཚམས་ཆུང་ནས་ཆིག་བརྡུངས་ལྡེམ་འགྲོས། གཉིས་པ་ནི། དཔལ་ཆེན་པོའི་འགྱིང་ཆུང་། གཡོམ་འགྱིང་། བཞི་པད་སོང་། ཛམ་ཆུང་ནས། ལག་གཉིས་དཀུར་བརྟེན་ཏེ་ཆེ་བཞིར་རེས་བརྐྱང་གིས་དབུས་མ་ལྟར་གསིགས་རྗེས། འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་ཆུང་། ཆིག་ལྡེམ། གསུམ་པ་ནི། དབུ་གསུམ་རྫོགས་སུ་བསྐྱེད་པ། གཡོམ་འགྱིང་། བཞི་པད་སོང་། ཛམ་ཆུང་དང་བསྟུན་གཡས་དཀར་གཡོན་དམར་དབུས་མཐིང་ཞལ། ཆེ་བཞིར་གཡས་གཡོན་དབུས་སུ་གསིག་ཅིང་མཚམས་ཀྱི་འགྲོལ་བསྡུ་པད་ཛམ་དང་བཅས་པ་འགྱིང་ཆེན་ལྟར་ལས། ལག་སྟབས་ཀྱི་ཁྱད་པར་ཐལ་མོ་ཁོང་སྟོང་གི་སྟངས་ཀ་གཡས་གཡོན་དབུས་གསུམ་གྱི་གསིག་དང་བསྟུན་ནས། རྣ་བ་གཡས་དང་། གཡོན་དང་། གདོང་ཐད་རྣམས་སུ་གཅུ་ཙམ་རེ་བྱ་ཞིང་། རྗེས་འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་ཆུང་ནས། ཆིག་ལྡེམ། བཞི་པ་ནི། དེའི་ངང་ནས་རྐང་གཡོན་འདེགས་གསིག་དང་བསྟུན། ཕྱག་དྲུག་རྫོགས་སུ་བསྐྱེད་པ་ལས། རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །གཡོམ་འགྱིང་། བཞི་པད་སོང་། ཛམ་ཆུང་། ཆེ་བཞིར་ལག་གཉིས་ཐུགས་ཀར་བསྣོལ་ནས་རྐང་པ་རེས་བརྐྱང་གིས་དབུས་སུ་གསིག །འགྲོལ་བསྡུ། ཡངས་པད། ཛམ་ཆུང་ནས། ཆེ་བརྡེག་བཞི་རེར་ལག་གཡོན་དཀུར་བརྟེན་དང་གཡས་རྡོ་རྗེ་གདེངས་སྟབས་ཀྱི་རྒྱ་མཐོ་བ་དང་། ཏི་རའི་རྒྱ་ཐད་ཀར་བརྒྱངས་ནས་རྐང་གཡས་བཏེག་འབེབས་ཀྱིས་གཡས་ཕྱོགས་སུ་གསིག་འགྲོས་རེ་རེ་དང་། གཉིས་ཀའི་མཇུག་ཏུ་གཡས་གཞོལ། ཡངས་པད། ཛམ་ཆུང་། དེ་བཞིན་དུ་གཡས་དཀུར་བརྟེན་དང་གཡོན་དུང་དམར་འཛིན་རྒྱ་མཐོ་བ་དང་། འཇིག་རྟེན་འདེགས་རྒྱ་ཐད་ཀར་བརྒྱངས་ནས་གཡོན་དུ་གསིག་འགྲོས་རེ་རེ་དང་། གཉིས་ཀའི་མཇུག་ཏུ་གཡོན་གཞོལ་རྗེས་སྔ་མར་པད་ཛམ། ཕྱི་མར་མཆོངས་པད་སོང་། ཆིག་རོལ། བསྐྱོད་ཆུང་ནས་ཆིག་ལྡེམ། ལྔ་པ་ནི། ཞབས་བཞི་རྫོགས་སུ་བསྐྱེད་པ། གཡོམ་འགྱིང་། བཞི་པད་སོང་། ཛམ་ཆུང་ནས། ཆེ་བཞིར་ལག་གཉིས་པུས་སྟེང་དུ་བརྐྱང་ལ་རྐང་གཡས་བརྐྱང་གིས་རྣམ་པས་གཡས་གཡོན་དུ་གཅུ་ཞིང་གསིགས་རྗེས། གཡས་གཞོལ། མཆོངས་པད་སོང་། ཆིག་རོལ། བསྐྱོད་ཆུང་ནས་ཆིག་ལྡེམ། དྲུག་པ་ནི། གདགས་པའི་རྒྱན་གཉིས་ཀྱི་ཐོག་མར་ཐོད་པ་སྐམ་པོ་ལྔའི་དབུ་རྒྱན། གཡོམ་འགྱིང་། བཞི་པད་སོང་། ཛམ་ཆུང་། ཆེ་ལྔ་ལ་བྷན་ཕུར་སྦྱར་བ་དཔྲལ་བའི་དབུས་དང་། དེའི་གཡས་གཡོན། རྣ་ལྟག་གཡས་གཡོན་རྣམས་སུ་འཛིན་རྒྱ་དང་བསྟུན་གསིགས་ལ་འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་ཆུང་ཆིག་ལྡེམས་ནས། འཛག་པའི་མགོ་བོ་ལྔ་བཅུའི་དོ་ཤལ། གཡོམ་འགྱིང་། བཞི་པད་སོང་དོན་གྱི་པད་སྐྱུར་གཏོད་རྗེས། ཆུང་གསུམ་ལ་གཡས་པས་སྐྲ་ནས་བཟུང་བའི་བྷནྡྷ་རྣ་བ་གཡོན་པའི་ཐད་དུ་འཕྱར་བ་ཆེ་དྲུག་ལ་དེ་ཉིད་ནས་དལ་བུས་བསུས་པའི་མཐའ་བསྐོར་ཏེ་ཆུང་གསུམ་ལ་གཡས་སུ་འཕྱར་ནས། ཆེ་དྲུག་ལ་སྔར་ཤུལ་དུ་ལྡོག་པའི་རྗེས་ཀྱི་སྦྲམ་དྲུག་ཅེས་པར་རྐང་གཡོན་བཏེག་ལེན་གྱིས་གཡས་གཞོལ་མཆོངས་པད་སོང་། ཆིག་རོལ། བསྐྱོད་ཆུང་ནས་ཆིག་ལྡེམ། བདུན་པ་ནི། བྱུག་པའི་རྩི་གསུམ་གི་ཐོག་མར་རཀྟའི་ཐིག་ལེ། གཡོམ་འགྱིང་། བཞི་པད་སོང་། ཛམ་ཆུང་ངུས་གཡས་པའི་སོར་མོ་དབུས་མ་གསུམ་གྱིས་བྷནྡྷ་ནས་རཀྟ་བླངས་ཏེ། ཆེ་བཞིར་གཡས་གཡོན་རེས་གསིག་དང་བསྟུན་གུང་མོས་སྨིན་ཕྲག །སྲིན་མཛུབ་ཀྱིས་མཁུར་ཚོས་གཉིས། གུང་མོས་སྣ་རྩེ་དང་ཨོལ་ཀོ་རྣམས་སུ་ཐིག་ལེ་བྱས་རྗེས་ཕུར་རྩེ་ནང་བསྐོར་ཕྱིར་བསྟན་གྱིས་འཕེན་ཚུལ་ནས། འགྲོལ་བསྡུ། ཡངས་པད་དང་བསྟུན། ཐལ་ཆེན་གྱི་ཚོམ་བུ། ཛམ་ཆུང་ངུས་སྔར་བཞིན་ཐལ་ཆེན་བླངས་ཏེ། ཆེ་བཞིར་སྐྲ་མཚམས་ཀྱི་དབུས་དང་། གཡས་དང་། གཡོན་དང་། དཔྲལ་བ་རྣམས་སུ་ཚོམ་བུ་རེ་བྱས་ལ། གཡས་འཕེན་འགྲོལ་བསྡུ། ཡངས་པད་དང་བསྟུན། ཞག་གི་ཟོ་རིས། ཛམ་ཆུང་ངུས་ཞག་བླངས་ཏེ། ལུས་མི་གཅུ་བར་གཡོན་བརྐྱང་གིས་འདུག་ལ། སོར་མོ་བཞི་བརྐྱང་བས་ཆེ་བཞིར་ནུ་མ་གཡོན་ནས་གཡས་ཀྱི་བར་ཟླུམ་མོ་ཕྱེད་པའི་རྣམ་པར་བྱུགས་ལ། མི་འཕེན་པར་འགྲོལ་བསྡུ། མཆོངས་པད་སོང་། ཆིག་རོལ་བསྐྱོད་ཆུང་ནས། ཆིག་ལྡེམ། བརྒྱད་པ་ནི། བགོ་བའི་གོས་གསུམ་གྱི་ཐོག་མར་གླང་ཆེན་གྱི་ཀོ་རློན། གཡོམ་འགྱིང་། བཞི་པད་སོང་། ཛམ་ཆུང་ལ་ཕུར་དར་བརྒྱངས་ཏེ་པགས་པ་འཛིན་ཚུལ་གྱི། ཆེ་བརྡེག་བཞི་བཞིར་གཡས་གཡོན་དབུས་གསུམ་དུ་གསིག་ཅིང་གཞོལ་སོགས་མཁའ་འགྲོ་དཔའ་བསྐྱེད་བཞིན་ལས། མཇུག་ཏུ་བསྐྱོད་ཆུང་ཆིག་ལྡེམ་ནས། ཞིང་ཆེན་གྱི་གཡང་གཞི། གཡོམ་འགྱིང་། བཞི་པད་སོང་དོན་པད་སྐྱུར་གཏོད་རྗེས། སྦྲམ་སྦིར་ལ། ཕུར་དར་བརྒྱངས་ཏེ་བཟུང་ནས་གཡས་སུ་འཕྱར། སྦྲམ་ལ་གཡོན་བཏེག་ལེན་གྱིས་གྱོན་ཚུལ་བྱས་ཏེ། ཆེ་བཞིར་ཁ་ཕྱིར་བལྟས་ཀྱིས་གཡས་སུ་འཕར་གསིག་གིས་འགྲོ། ཆུང་གསུམ་ལ་གཡས་འཕྱར་གྱི་ཛམ་ལེན་ནས་ཆེ་བཞིར་ཁ་ནང་བལྟའི་གཡས་སུ་འཕར་གསིག་གིས་འགྲོ། ཆུང་གསུམ་ལ་གཡས་འཕྱར་འགྱིང་ཛམ་ལེན་ནས་ཆེ་བཞིར་དབུས་སུ་རེས་གསིག་བྱས་ལ། གཡས་གཞོལ། མཆོངས་པད་སོང་། ཆིག་རོལ། བསྐྱོད་ཆུང་ཆིག་ལྡེམ་ནས། སྟག་ལྤགས་ཀྱི་ཤམ་ཐབས། གཡོམ་འགྱིང་། བཞི་པད་སོང་། ཛམ་ཆུང་ལ་ཕུར་དར་བཟུང་བརླ་སྟེང་དུ་བརྐྱངས་ནས། ཆེ་བཞིར་གཡས་གཡོན་རེས་བརྐྱང་གི་གསིགས་རྗེས། གཡས་གཞོལ། མཆོངས་པད་སོང་། ཆིག་རོལ་བསྐྱོད་ཆུང་ནས་ཆིག་ལྡེམ། དགུ་པ་ནི། ཁམས་གསུམ་ཟིལ་གྱིས་གནོན་པ་རྡོ་རྗེའི་ཁྱུང་གཤོག །གཡོམ་འགྱིང་། བཞི་པད་སོང་། ཛམ་ཆུང་ནས་གཡས་གཡོན་དབུས་གསུམ་དུ་གསིག་པ་འགྱིང་ཆེན་ལྟར་ལས། སྔ་མ་གཉིས་ལ་གཡས་གཡོན་གྱི་གཞོལ་ཏེ་མོས་ཀྱི་རྗེས་སུ་ཡངས་པད་ཛམ་ཆུང་། དབུས་གསིག་གི་རྗེས་སུ་གཡས་གཞོལ། མཆོངས་པད་སོང་། ཆིག་རོལ། བསྐྱོད་འགྲོས་མཚམས་ཆེན་ནས་རོལ་འགྲོས་ལ་འཇུག ༈ །གཉིས་པ་རིགས་བཞིའི་གྱད་འཆམས་ནི། ཆིག་བརྡེག་རོལ་འགྲོས་ཀྱི་ངང་ནས་རིགས་བཞི་ཁྲོ་བོའི་གྱད་འཆམས་ལས། བུདྡྷ་ཧེ་རུ་ཀའི་ཕྱག་རྒྱ། གཡོམ་འགྱིང་། བཞི་པད་སོང་། ཛམ་ཆུང་དང་བསྟུན། གཡས་དཀར་གཡོན་སེར་དབུས་སྨུག་ཞལ། །ཆེ་བཞིར་བྷན་ཕུར་རྣ་བའི་གཡས་གཡོན་དུ། ཐལ་མོ་ཕྱིར་བསྟན་པ་བཟུང་སྟེ་དབུ་གསུམ་གྱི་ཚུལ་གྱིས་གཙོ་བོའི་འགྱིང་ཆུང་ལྟར་གསིགས་ནས། འགྲོལ་བསྡུ། ཡངས་པད་ཀྱི་ཕུར་དར་སྐྱུར་བ་ནས་ཛམ་ཆུང་རྫོགས་པའི་བར་དེར། འཁོར་ལོ་རྡོ་རྗེ་ཏི་ར་གཡས། །དྲིལ་བུ་དུང་དམར་ཏྲི་ཤུལ་གཡོན། །ཆེ་བ་བཞི་ཚན་གསུམ་གྱི། དང་པོར་ལག་གཉིས་ཐུགས་ཀར་བསྣོལ། །གཉིས་པར་ལག་གཉིས་མཐོ་བར་བརྒྱངས། །གསུམ་པར་ཐད་ཀར་བརྒྱངས་ཏེ་སྔར་བཞིན་གསིགས་ལ་རེ་རེའི་མཇུག་ཏུ་འགྲོལ་བསྡུ་པད་ཛམ་རེ་བྱས་པའི་རྟིང་མ་ཛམ་ཆུང་གི་དུས། ཞབས་བཞི་གཡས་བརྐྱང་གཡོན་བསྐུམ་སྟབས། །ཆེ་བཞིར་ལག་གཉིས་དཀུར་བརྟེན་ནས་གསིགས་རྗེས། །འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་ཆུང་ནས་ཆིག་ལྡེམ་མོ། །རིགས་གཞན་གསུམ་ཡང་ཕྱག་རྒྱ་བསྒྱུར་ཁ་ཙམ་མ་གཏོགས་དེ་དང་འདྲ་ཞིང་། ཀརྨ་ཧེ་རུ་ཀ་རྫོགས་རྗེས་བསྐྱོད་འགྲོས་མཚམས་ཆེན་ནས་རོལ་འགྲོས་ལ་འཇུག་པ་ཁྱད་པར་རོ། །བསྡུས་པ་ལ་དགའ་ན། རིགས་སྔ་མ་གསུམ་པོའི་ཞབས་སོང་རྗེས་ཀྱི་ཡངས་པད་དང་བསྟུན་རང་གི་ཕྱི་མའི་རིགས་དེའི་འཆམས་སྐད་སྐྱུར་ཀྱང་རུང་སྟེ། དེང་སང་ཕྱག་ལེན་ལའང་འདི་མཛད་དོ། །དེ་ལ་སོ་སོའི་ཕྱག་རྒྱ་ནི། རཏྣ་ཧེ་རུ་ཀའི་ཕྱག་རྒྱ། གཡས་དཀར་གཡོན་དམར་དབུས་སེར་ཞལ། །རིིན་ཆེན་རྡོ་རྗེ་ཏི་ར་གཡས། །དྲིལ་བུ་དུང་དམར་དགྲ་སྟྭ་གཡོན། །ཞབས་བཞི༴ པདྨ་ཧེ་རུ་ཀའི་ཕྱག་རྒྱ། གཡས་དཀར་གཡོན་སེར་དབུས་དམར་ཞལ། །པདྨ་རྡོ་རྗེ་ཏི་ར་གཡས། །དྲིལ་བུ་དུང་དམར་རྔེའུ་ཆུང་གཡོན། །ཞབས་བཞི༴ ཀརྨ་ཧེ་རུ་ཀའི་ཕྱག་རྒྱ། གཡས་དཀར་གཡོན་དམར་དབུས་ལྗང་ཞལ། །རྒྱ་གྲམ་རྡོ་རྗེ་ཏི་ར་གཡས། །དྲིལ་བུ་དུང་དམར་ཐོང་གཤོལ་གཡོན། །ཞབས་བཞི༴ ༈ གསུམ་པ་རིགས་ལྔའི་ཡུམ་གྱི་འཆམས་ནི། རོལ་འགྲོས་ལས། རིགས་ལྔ་ཡུམ་གྱི་ཕྱག་རྒྱ། གཡོམ་འགྱིང་། བཞི་པད་སོང་། ཛམ་ཆུང་ལ། ཞལ་གཅིག་ཕྱག་གཉིས་རིགས་ཀྱི་མདོག །ཆེ་བཞིར་བྷན་ཕུར་ཞལ་ཐད་དུ་གཙོ་བོའི་དབུས་ཞལ་ལྟར་གསིག་ནས། འགྲོལ་བསྡུ། ཡང་པད། ཛམ་ཆུང་ལ། གཡས་པ་ཤེས་རབ་ཐབས་ལ་བརྟེན། །ལག་གཡོན་དཀུར་བརྟེན་དང་བཅས་ཡབ་ཀྱི་མགུལ་ནས་འཁྱུད་རྒྱས་རྐང་པ་གཡས་བརྐྱང་གིས་ཆེ་བཞིར་གཡས་སུ་གསིག་ལ། འགྲོལ་པད། ཛམ་ཆུང་ལ། གཡོན་པས་དུང་དམར་གཙོ་ལ་སྟོབ། །ལག་གཡས་དཀུར་བརྟེན་ཅིང་གཡོན་དུ་དུང་དམར་སྟོབ་ཚུལ་གྱིས་ཆེ་བཞིར་རྐང་གཡོན་བཏེག་འགྱིང་ནས་འགྲོལ་པད། ཛམ་ཆུང་ལ། ཀྲོ་དྷཱི་རིགས་ལྔ་དབྱིངས་ཀྱི་རྒྱ། །ཆེ་བཞིར་ལག་འཁྱུད་རྒྱ་དང་རྐང་གཡས་བཏེག་འགྱིང་ནས། འགྲོལ་བསྡུ། མཆོངས་པད་སོང་། ཆིག་རོལ། བསྐྱོད་ཆེན་ནས་རོལ་འགྲོས་ལ་འཇུག ༈ །བཞི་པ་ག་རཱི་བརྒྱད་ཀྱི་འཆམས་ནི། ཁྲོ་མོ་བརྒྱད་ཀྱི་བརྗིད་འཆམས་ལས། ག་རཱི་བྷན་དམར་ཞིང་དབྱུག་སྔོ། །ཙ་རཱི་མདའ་གཞུ་འགེངས་མ་སེར། །གཡོམ་འགྱིང་། ལྔ་བརྡུངས་ཆེ་ཆུང་སྤེལ་མར་བསྒྱུར་ཏེ། ཆེ་བརྡེག་ལ་བཞི་པད་སོང་དོན་གྱི་ཡངས་པད་སྐྱུར་གཏོད་དང་། ཆུང་བརྡེག་ལ་བྷན་ཕུར་མདུན་མཉམ་གྱི་ཛམ་ཡན་རླུང་དཀྱིལ་དང་འདྲ། དེ་ནས་ལག་གཡས་ཕུར་པ་འཕྱར་སྟབས་དང་གཡོན་བྷནྡྷ་ཐུགས་ཀར་གྱེན་བསྟན་གྱིས་བཟུང་ནས། རྐང་གཉིས་ལྕགས་མདའ་གཡོན་བརྐྱང་གི་ཆེ་བརྡེག་ལ་གཡས་ཟུར་དུ་འཐེན་གསིག་དང་། ཆུང་བརྡེག་ལ་ཡངས་པད་རེ། དེ་ལྟར་སྤེལ་བ་ཐེངས་གསུམ་གྱི་མཐར། འགྲོལ་བསྡུ། ཆེ་བརྡེག་ལ་མདུན་དུ་ཡངས་པད་དང་། ཆུང་བརྡེག་གི་གཅིག་གཉིས་ལ་གཡས་སུ་ཡངས་པད་དང་། གསུམ་ནས་རྐང་གཡས་གཡོན་བསྐོར་གྱི་ཁ་ཕྱིར་བལྟས་ཏེ་མདའ་གཞུ་འགེངས་རྒྱས་གཡས་སུ་འཐེན་གསིག་དང་། ཡངས་པད་སྤེལ་བ་ཐེངས་གསུམ་གྱི་མཐར། འགྲོལ་བསྡུས་ཁ་ནང་དུ་བསྒྱུར་རྗེས་མདུན་དུ་ཡངས་པད་དང་། གཡས་སུ་མཆོངས་པད་སོང་། ལྔ་བརྡུངས་རོལ་པ། བསྐྱོད་འགྲོས་མཚམས་ཆུང་ནས་ཆིག་ལྡེམ་མོ། །པྲ་མོ་སོགས་དྲུག་ཀྱང་ཕྱག་རྒྱའི་བསྒྱུར་ཁ་མ་གཏོགས་འདྲ་བ་ལས། ཙཎྜའི་རྗེས་སུ་བསྐྱོད་ཆེན་ནས་རོལ་འགྲོས་སོ། །སོ་སོའི་ཕྱག་རྒྱའི་ཁྱད་པར་ནི། པྲ་མོ་ཆུ་སྲིན་རྒྱལ་མཚན་དམར། །བཻ་ཏ་བྱིས་ཟ་རྡོར་འཕྱར་ནག །ཞེས་པའི་སྔ་མ་ནང་དུ་ལག་གཡོན་བྷནྡྷ་ཁ་སྦུབ་པའི་སྟེང་དུ་གཡས་པའི་ལག་ངར་སྒྲེང་བ་རྒྱལ་མཚན་གྱི་རྒྱ་དང་། ཕྱི་མ་རྒྱབ་ཏུ་ལག་གཡས་འཕྱར་སྟབས་དང་གཡོན་བྷནྡྷ་སྦུབ་པ་ཁའི་ཐད་དུ་འཛིན་པའོ། །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་ཁྲག་དཀྲུག་འཐུང་ལྗང་། །སྔ་མ་ནང་དུ་བྷནྡྷ་བརླ་གཡོན་ཐད་བཟུང་བའི་སྐྲ་ཉག་ལག་གཡས་པས་ནུ་གཡས་ཀྱི་ཐད་དུ་བརྐྱང་ནས་འཛིན་པ་རྒྱུ་མ་འདྲེན་ཚུལ་དང་། ཕྱི་མ་རྒྱབ་ཏུ་བྷནྡྷ་ཐུགས་ཀར་བཟུང་བ་ཕུར་རྩེས་ལན་གསུམ་དཀྲུགས་ནས་ཞལ་དུ་གསོལ་ཚུལ་དང་ལག་གཡས་བརྐྱང་པའོ། །སྨེ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འདྲལ། །སྔ་མ་ནང་དུ་བྷན་ཕུར་ཞལ་གྱི་ཐད་དུ་མཉམ་པར་བཟུང་རྗེས་ལག་གཉིས་བཤད་ཀྱིས་བསྐྱོད་པ་དང་། ཕྱི་མ་རྒྱབ་ཏུ་བྷན་ཕུར་བརླ་གཡོན་པའི་ཐད་དུ་བཟུང་བའི་སྐྲ་ནས་གཡས་པས་བཟུང་བ་གཏོད་པ་དང་མཉམ་དུ་ཕུར་དར་ཕྲག་གཡས་པར་འགེལ་བའོ། ༈ །ལྔ་པ་སེདྷ་མ་བརྒྱད་ཀྱི་འཆམས་ནི། ཕྲ་མེན་བརྒྱད་ཀྱི་ཤོན་འཆམས་ལས། སིདྷ་ཁ་རོ་བསྣོལ་སེར་སེང་། །བྱཱ་གྷྲྀ་གནས་ལྟག་བསྣོལ་མར་སྟག །གཡོམ་འགྱིང། བཞི་བརྡུང་འཐེང་མ་ཆེ་ཆུང་སྤེལ་མར་བསྒྱུར་ཏེ། བཞི་པད་སོང་ནས་བརྩམས་པའི་བཞི་བརྡུངས་ཆེ་སྐད་ཀྱི། གཅིག་ལ་པད་སྐོར་གཉིས་ལ་སྐྱུར། གསུམ་ལ་གཏོད། བཞི་པར་གཡས་སུ་ཅུང་འགྱིང་། ཆུང་བརྡེག་ལ་མདུན་མཉམ་གྱི་ཛམ་ལེན་ནས་ལག་གཉིས་དཔུང་པར་བསྣོལ་བའི་རྒྱས་རྐང་གཡས་མདུན་དུ་བཏད་ནས་ཆེ་བརྡེག་པ་གཡས་གསིག་གཉིས་དང་། ཆུང་བརྡེག་ལ་རྐང་གཡས་གཡས་ཟུར་དུ་འཐེན་འགྱིང་གི་ལེན་ཏེ། དེ་ལྟར་སྤེལ་བ་ཐེངས་གསུམ་དང་ལག་གཉིས་ལྟེ་བར་སོར་མོ་མཐུར་བསྟན་གྱིས་བསྣོལ་བའི་རྒྱས་ཆེ་བརྡེག་ལ་སྔར་བཞིན་གཡས་གསིག་གཉིས་དང་། ཆུང་བརྡེག་ལ་ལེན་འགྱིང་སྤེལ་བ་ཐེངས་གསུམ་ནས། འགྲོལ་བསྡུ། མཆོངས་པད་སོང་བརྩམས་རྗེས། བཞི་བརྡེག་འཐེང་མེད་དལ་བ་གཅིག་གི། གཅིག་ལ་འགྱིང་། གཉིས་དང་གསུམ་ལ་རྐང་གཡོན་གཡས་བཏེག་འབེབས་དང་། བཞི་ལ་གཡོན་འདེགས་འཇོག་གི་ལེན་ནས། བསྐྱོད་ཆུང་ཆིག་ལྡེམ་མོ། །སྲྀ་ལ་སོགས་དྲུག་ལའང་འཆམས་ཚུལ་དེ་དང་འདྲ་བ་ལས་སོ་སོའི་ཕྱག་རྒྱ་བསྒྱུར་ཞིང་། ཨུ་ལཱུའི་རྗེས་སུ་བསྐྱོད་ཆེན་ནས་རོལ་འགྲོས་སོ། །སོ་སོའི་ཕྱག་རྒྱའི་ཁྱད་པར་ནི། སྲྀ་གལ་ནག་མོ་བྱིས་ལྡག་ཝ། །ཤྭ་ན་འདྲལ་ལྟ་མཐིང་ཁ་སྤྱང་། །ཞེས་པའི་སྔ་མར་བྷན་ཕུར་མཉམ་པ་ཞལ་ཐད་གཡས་གཡོན་དུ་འཛིན་པ་དང་། ཕྱི་མ་ལག་གཉིས་ཐུགས་ཀར་ཕྱིར་བསྟན་མཉམ་པ་ལ་ལྟ་ཞིང་གཡས་གཡོན་དུ་བརྒྱང་བའོ། །གྲྀ་ཌྷ་མགྲིན་དམར་རྒྱུ་འདྲེན་རྒོད། །ཀངྐ་ཀང་ཕྲག་སྣར་མགོ་རིང་། སྔ་མ་བརླ་གཡོན་ཐད་གཟུང་བའི་བྷན་སྐྲའི་ཉག་མ་གཡས་ནུ་གཡས་ཐད་དུ་འདྲེན་ཚུལ་དང་། ཕྱི་མ་ཕུར་དར་དང་བྷན་སྐྲ་གཉིས་ཕྲག་གཡས་གཡོན་དུ་སོ་སོར་བཀལ་བའོ། །ཀཱ་ཀ་ཁ་རོ་བྷན་གྲི་ནག །ཨུ་ལུ་ལྕགས་ཀྱུ་མཐིང་ཚོགས་འུག །སྔ་མ་ལག་གཡོན་ཐུགས་ཀར་བྷནྡྷ་གྱེན་བསྟན་དང་གཡས་སྲིན་ལག་དང་མཐེའུ་ཆུང་གཉིས་མཐེ་བོང་གི་བསྣན་ནས་གུང་མཛུབ་སྒྲེང་བ་གྲི་རྒྱ་འདེབས་ཚུལ་དང་། ཕྱི་མ་ལག་གཡོན་སྔར་ལྟར་དང་གཡས་ཁུ་ཚུར་ལས་མཛུབ་མོ་ལྕགས་ཀྱུ་ལྟར་བྱས་པས་འདྲེན་ཚུལ་ལོ། ༈ །དྲུག་པ་སྒོ་མ་བཞིའི་འཆམས་ནི། སྒོ་སྐྱོང་གདོང་མོ་བཞིའི་རྔམས་འཆམས་ལས། རྟ་གདོང་སྔོན་མོ་ལྕགས་ཀྱུ་འཛིན། །ཁ་དོ་རའི་ཕྱིར་བལྟས་ཏེ། །གཡོམ་འགྱིང་། བཞི་བརྡུངས་ལ་བསྒྱུར་ཏེ། བཞི་པད་སོང་དོན་གྱི་ཡངས་པད་ནས་ལེན་གྱི་རྡོ་རྗེ་ཕྱེད་འགྲོས་ལྟར་ལས། བཞི་གྲངས་གསུམ་ལ་མཁའ་དཀྱིལ་ལྟར་གཡོན་གསིག་གསུམ་བྱས་རྗེས། གཅིག་གཅིག །གཉིས་གཉིས་ཞེས་པར་ལག་གཡས་ཨུ་ལུ་ལྟ་བུའི་རྒྱས་ལྕགས་ཀྱུ་འདེགས་ཚུལ་གྱིས་རྐང་བཏེག་པའི་གཡས་ཟུར་དུ་གསིག་གཉིས་དང་། བཞི་བརྡེག་གཅིག་གི་གཅིག་གཉིས་ལ་རྐང་གཡས་འབེབས་ཤིང་གཡོན་རྒྱབ་ཏུ་བསྐུམ་པ་དང་ལག་གཉིས་ཐུགས་ཀར་བསྣོལ་རྒྱ་ལས། གསུམ་བཞི་ལ་ལག་པད་བསྐོར་གྱི་རྒྱ་དཀྲོལ་ཞིང་རྐང་གཡས་གཡས་སུ་བསྐོར་བའི་ལེན་ནས། བཞི་གྲངས་གསུམ་གྱི། དང་པོ་གཅིག་གཉིས་ལ་གཡས་དེར་ཕབ་ཅིང་གཡོན་གྲུད་ཙམ་བྱ། གསུམ་བཞི་ལ་སྔར་ལྟར་ལག་པད་དང་། རྐང་གཡས་གཡོན་བསྐོར་གྱི་ལེན་ནས་གཉིས་པའི་གཅིག་གཉིས་ལ། རྐང་གཡོན་གཡོན་དུ་འདེགས་འབེབས་གྲུད་བཅས་དང་། གསུམ་བཞི་ལ་རྐང་གཡོན་གཡས་ལྡོག་པའི་ལེན་བྱ། གསུམ་པའི་གཅིག་གཉིས་ལ་རྐང་གཡས་གཡས་སུ་འདེགས་འབེབས་ནས་གསུམ་བཞི་ལ་ལྡོག་པའི་བར་དེར། ཕག་གདོང་ནག་མོ་མཆེ་ཞགས་ཅན། །ཞེས་བརྡའ་སྦྱར་ནས་གཡོམ་གསིག་གསུམ་སོགས་འཆམས་ཚུལ་གཞན་སྔར་ལྟར་ལས། ཕྱག་རྒྱ་ནི་གཅིག་གཅིག་ལ་ལག་གཡོན་པའི་སྟེང་དུ་གཡས་སྡིགས་མཛུབ་མཐུར་བསྟན་གྱིས་ཕྱིར་བསྐོར་བ། གཉིས་གཉིས་ལ་དེ་ཉིད་གྱེན་བསྟན་གྱི་གཡོན་པའི་ནང་ནས་ཕྱིར་སྐྱུར་བ་ཞགས་རྒྱས་འཆིང་ཚུལ་དང་། དེ་བཞིན་དུ་འཆམས་སྐད་གཏོད་ཚུལ་སོགས་སྔར་ཇི་ལྟ་བ་ལས། སེང་གདོང་དམར་མོ་ལྕགས་སྒྲོག་སྡོམ། །ཞེས་པ་ལག་གཉིས་ཁུ་ཚུར་གྱེན་བསྟན་ལས་མཛུབ་མོ་དང་མཐེའུ་ཆུང་བརྐྱང་བ་ལྕགས་སྒྲོག་གི་རྒྱ་དང་། སྤྱང་གདོང་ལྗང་ནག་དྲིལ་འཁྲོལ་དགྱེས། །ཞེས་པ་ལག་གཡས་དཔུང་པའི་ནང་ཐད་དུ་མཁྲིག་མ་ནང་དུ་བཀུག་ནས་དྲིལ་བུ་འཁྲོལ་ཚུལ་ཏེ། དྲིལ་བུ་མའི་བཞི་གྲངས་གསུམ་པོ་རྫོགས་རྗེས། འགྲོལ་བསྡུས་དོ་རའི་ནང་དུ་ཁ་བསྒྱུར་ནས། བཞི་བརྡུངས་ཀྱི་མཆོངས་པད་སོང་དོན་གྱིས་ཡངས་པད། རོལ་པ་བྱས་ལ། བསྐྱོད་ཆེན་ནས་རོལ་འགྲོས་ལ་འཇུག ༈ །བདུན་པ་དབང་མོའི་འཆམས་ནི། དབང་ཕྱུག་མ་ལས་བཞིའི་འདུར་འཆམས་མཆོངས་པད་སོང་ནས་བརྩམས། ཞེས་གཡོམ་འགྱིང་། ཉེས་བརྡུངས་འཐེང་མའི་ཡངས་པད་སྐྱུར་གཏོད། རོལ་པ་གསུམ་ནས། ལག་གཡས་འཕྱར་ཞིང་གཡོན་དཀུར་བརྟེན་ཏེ་ཤུད་འགྲོས་ཀྱིས་ཅུང་ཟད་ཕྱིན་ནས་རྐང་གཡོན་ཐོག །ཤར་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་ཞི་བའི་ལས་མཛོད་ཅིག །ཅེས་པ་ནས་ཤུགས་ཆེར་བཏང་སྟེ། བྲོ་ར་ཟླུམ་པོར་བསྐོར་ནས་འགྲོ་བ་ནི་ཤར་གྱི་མ་བདུན་གྱི་འདུར་འཆམས་སོ། །དེ་ཉིད་ལས་མཆོངས་པད་སོང་། རོལ་པ་གསུམ་ནས། ལག་སྟབས་ལྡོག་སྟེ་གྲུ་བཞིར་བསྐོར་བ་ལྷོའི་མ་བདུན་ཏེ། ལྷོ་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་རྒྱས་པའི་ལས་མཛོད་ཅིག །དེ་བཞིན་དུ་མཚམས་སུ་མཆོངས་པད་སོང་བརྩམས་དང་རོལ་པ་ནས་ལག་ལྡོག་སྟེ། བྲོ་ར་ཟླ་གམ་དང་། གྲུ་གསུམ་དུ་བསྐོར་བས་འགྲོ་བ་ནུབ་དང་བྱང་གི་མ་བདུན་ཏེ། ནུབ་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་དབང་གི་ལས་མཛོད་ཅིག །བྱང་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་དྲག་པོའི་ལས་མཛོད་ཅིག །ཅེས་སྦྱར་བ་སོགས། འགྲེའོ། ༈ །བརྒྱད་པ་ཕྲ་མེན་མའི་བམ་ལེན་གྱི་འཆམས། བམ་བཙལ་བ། བརྟག་པ། སྤྲོས་ཏེ་སྟོབ་པ་དང་གསུམ། དང་པོ་བཙལ་ལའང་། རོལ་འགྲོས་དང་། སྦྲུལ་ནག་འཁྱིལ་འགྲོས་ཀྱིས་བཙལ་བ་གཉིས་ལས། དང་པོ་ནི། དབང་མོའི་འདུར་འགྲོས་ཀྱི་ངང་ནས། བམ་རོལ་བས་བཙལ་བ་མཆོངས་པད་སོང་ནས་བརྩམས་ཞེས་གཡོན་ལེན་ཡངས་པད་སྐྱུར་གཏོད་དང་། རོལ་པ་གསུམ་ནས་ལག་གཉིས་གཡོན་གཡས་སུ་ཁྱེར་བའི་རོལ་པ་དང་རྐང་པ་ཤུད་འགྲོས་དྲག་ཅིང་མྱུར་ལ་ཁྲོ་བོའི་གདངས་མིག་གིས་ཀུན་ཏུ་བལྟ་ཞིང་འགྲོ་བའོ། །གཉིས་པ་ནི། བམ་སྦྲུལ་ནག་འཁྱིལ་འགྲོས་ཀྱིས་བཙལ་བ་མཆོངས་པད་སོང་ནས་བརྩམས་ཞེས་པད་རོལ་སྔར་ལྟར་ལས། ལག་གཡོན་དཀུར་བརྟེན་དང་གཡས་སྟེང་དུ་འཕྱར་ནས་སེང་གེ་ལྟར་འགྱིང་བཞིན་དུ་ཤུད་འགྲོས་ཀྱིས་འགྲོ་བས་ཇི་ལྟར་རིགས་པ་བསྐོར་རྗེས། ལག་གཉིས་གདེངས་ཏེ་བྱ་རྒོད་ལྡིང་བ་ལྟར་འགྲོ་བས། སྦྲུལ་འཁོར་བ་བཞིན་དུ་འཁྱིལ་བསྐོར་བྱ་ཞིང་འགུགས་མཚམས་སུ་རྔ་དྲག་ཏུ་བརྡུངས་ཤིང་ལག་གཉིས་རོལ་པ་དང་ལུས་བཅུམས་ཏེ་དུར་བྱ་འདུར་བ་ལྟར་བསྐོར་བ་འཁོར་མཚམས། འཆམས་དཔོན་གྱིས་བྷནྡྷའི་སྐྲ་ནས་བཟུང་བ་བརྣར་ཏེ་རོལ་དཔོན་གྱི་མདུན་དུ་སླེབས་པ་དང་། རྐང་གཡོན་ཐོག་ཁ་སྦུབ་ཏུ་བཞག་ནས་ཟེམ་འགྲོས་ལ་འཇུག་པ་དང་མཉམ་དུ་འཆམས་པ་གཞན་རྣམས་བྷནྡྷ་བརྣར་ཏེ་ཤུད་འགྲོས་རང་གིས་འགྲོ་ཞིང་། འཆམས་དཔོན་རང་གི་བྷནྡྷའི་ཐད་དུ་འཁོར་མཚམས་ཐམས་ཅད་ཀྱིས་བྷནྡྷ་ཁ་སྦུབ་ཏུ་བཞག་ནས་འཆམས་དཔོན་ལྟར་ཟེམ་ལ་འཇུག །གཉིས་པ་ལ། རྡེའུས་བརྟག་པ་དང་། རྡོར་འགྲོས་ཀྱིས་བརྟག་པ་གཉིས་ལས། དང་པོ་ནི། ཟེམ་གྱི་ངང་ནས་རང་རང་གི་བྷནྡྷའི་ཐད་དུ་སླེབས་པ་དང་། བམ་རྡེའུས་བརྟག་པ་དང་པོ་མཆོངས་པད་སོང་ནས་བརྩམ། ཞེས་པད་རོལ་ནས། ཉིས་བརྡུངས་འཐེངས་མ་གསུམ་ལ་ལག་གཡོན་དཀུར་བརྟེན་དང་གཡས་གཡོབ་ཅིང་གཡས་ཀྱི་རྒྱབ་ཟུར་དུ་གོམ་གསུམ་ནུར་ནས། བཞི་བརྡུངས་དྲག་པ་གཅིག་ལ་གཡས་སྡིགས་མཛུབ་བྷནྡྷ་ལ་སྟོབ་ཅིང་རྐང་གཡས་བརྐྱང་ནས་ཧཱུ་ལུའི་སྡང་མིག་གིས་ནང་དུ་གསིག་འགྲོས་གསུམ་དང་། ཡངས་པད་རོལ་པ་ནས་གཡོན་གྱི་རྒྱབ་ཟུར་དང་ནང་དུ་ཚུལ་དེ་ཉིད་རྐང་ལག་ལྡོག་པས་བྱས་རྗེས། ཡངས་པད་ནས། ལག་གཉིས་མཐེབ་མཛུབ་སྤྲད་པའི་རྡེའུ་འབེབས་ཚུལ་དང་མིག་ཟུར་བྷནྡྷ་ལ་བལྟ་བས་རྐང་གཡོན་སྔོན་འགྲོའི་ནང་དུ་འཐེངས་འགྲོས་གསུམ་བྱས་ལ། ཕུར་དར་འཁྲིག་མ་ནས་འདྲེན་བཞིན་དུ་བྲེད་ཚུལ་གྱིས་གཡོན་བརྐྱང་བའི་ཟུར་འཐེན་བཞིས་ཕྱིར་རྒྱང་གི་འོང་བ་བྱ་རོག་གྲ་འཐེངས་ཀྱི་འགྲོས་དེ་ཉིད་ལན་གསུམ་ལྡབས་རྗེས། ནང་གི་འཐེངས་ནས་བཞི་བཞི་ཞེས་རྐང་གཡས་ཕྱིར་བསྐོར་བས་བླངས་པའི་ཟེམ་འགྲོས་ཀྱིས་ཏབ་ཏབ་པོར་བསྐོར་ལམ་ལ་ཞུགས་ཏེ་འཁོར་མཚམས། བམ་རྡེའུས་བརྟག་པ་གཉིས་པ་མཆོངས་པད་སོང་ནས་བརྩམ། ཞེས་སྔར་ཇི་ལྟ་བ་བཞིན་ལྡབ། སླར་ཡང་ཟེམ་གྱིས་སོ་སོའི་བྷནྡྷ་ལ་བསྐོར་བ་འཁོར་མཚམས། བམ་བརྡེའུས་བརྟག་པ་གསུམ་པ་མཆོངས་པད་སོང་ནས་བརྩམ། ཞེས་སྔར་ལྟར་ལྡབས་ནས་ཟེམ་གྱིས་བསྐོར་ལམ་འཇུག །ལན་རྗེས་མ་གཉིས་སྔ་མ་ལས་ཅུང་ཟད་སྙིང་ཁམས་ཇེ་ཆེར་སོང་ཚུལ་གྱིས་ནང་དུ་བམ་ལ་ཉེ་བར་འགྲོ་ཞིང་ཕྱིར་འགྲོས་ཆུང་དུ་གཏོང་བ་ཁྱད་པར་རོ། །གཉིས་པ་ནི། ཟེམ་གྱིས་འཁོར་མཚམས། བམ་རྡོ་རྗེ་འགྲོས་ཀྱིས་བརྟག་པ་མཆོངས་པད་སོང་ནས་བརྩམ། ཞེས་རོལ་འབེབས་དང་བསྟུན། ཕོད་ཤམ་ཐུ་བར་བསྡུས་ནས་ཙོག་པུར་འདུག་སྟེ། མཁའ་དཀྱིལ་ལྟ་བུའི་བཞི་བརྡུངས་ཀྱིས་སྟོད་གཡོམ་གསུམ་ནས། ཆེ་བཞིར་གཡས་སུ་རྡོར་འགྲོས་གསུམ་དང་། ཡང་གཡོམ་གསུམ་ནས་གཡོན་མདུན་བསྟན་གྱི་ནང་དུ་རྡོར་འགྲོས་གསུམ་ཕྱིན་ནས་བཞི་བརྡེག་གཉིས་ཀྱི་དང་པོའི་གཅིག་གཉིས་ལ་བྲེད་བཞིན་དུ་བྷནྡྷའི་སྐྲ་ནས་འཐེན་ཏེ་གྲུད་པ་ཤྭ་ནའི་བརྟུལ་ཞུགས་དང་། གསུམ་བཞི་ལ་དྲི་སྣོམ་པ་སྲྀ་ལའི་བརྟུལ་ཞུགས་དང་། གཉིས་པའི་གཅིག་གཉིས་ལ་བམ་འགྲེ་ལྡོག་སྒྱུར་བ་མཚོན་བྱེད་བྷནྡྷ་ཁ་གྱེན་དུ་བསྒྱུར་བ་སྟག་གི་བརྟུལ་ཞུགས་ཏེ་སྙིང་ཁམས་རིམ་གྱིས་བསྐྱེད་ནས་གསུམ་བཞི་ལ་ལངས་ཏེ་ཟེམ་ལ་འཇུག་གོ། །སྐབས་འདིར་རྡོར་འགྲོས་ཀྱིས་བརྟག་པ་ལན་གསུམ་ལྡབས་ནས་དང་པོར་སྐྲ་ནས་འཐེན། གཉིས་པར་དྲི་སྣོམ། གསུམ་པར་འགྲེ་ལྡོག་བྱེད་པ་སོགས་ཡིག་རྙིང་དག་ལས་འབྱུང་ཞིང་བྱ་གཅན་སོ་སོའི་རྣམ་འགྱུར་དང་སྦྱར་ཏེ་ཕྲ་མེན་སོ་སོའི་ཏིང་ངེ་འཛིན་ལ་འཇུག་ཚུལ་དང་། ཁྲོ་བོའི་གྱད་སྟོབས་དང་། དཔའ་བོའི་འཇུག་འགྲོས་ལ་སོགས་པའི་འགྲོས་དང་། མིག་གིས་ལྟ་བསྒྱུར་དང་། གདངས་སྐད་ཀྱི་བསྒྱུར་ཚུལ་སོགས་རྒྱུད་དང་མན་ངག་རྣམས་ལས་རྒྱ་ཆེར་གསུངས་པ་མཐོང་ཡང་ཧ་ཅང་མང་བས་འཇིགས་ཕྱིར་རེ་ཞིག་དེ་ཙམ་སྟེ། སྤྲོ་ན་ཇི་ལྟར་རིགས་པ་སྦྱར་བས་ཆོག་ཅིང་། རྡེའུའི་འགོའི་གཡབ་མོ་ལའང་དེང་སང་ནང་འཇུག་ཀྱང་ཕྱིར་འགྲོ་ལྟར་འཐེངས་སྐད་ཀྱི་གོམ་ནུར་བྱེད་ནའང་མཁས་པ་འདར་སོགས་ཀྱི་ཡིག་རྙིང་ལས་འདིར་བཀོད་པ་ལྟར་འབྱུང་ངོ་། །གང་ལྟར་ཀྱང་འདི་དག་བླ་ན་མེད་པའི་རྒྱུད་ཀྱི་གསང་བའི་སྤྱོད་པ་རྨད་དུ་བྱུང་བ་ཡིན་པས་བྲོ་མཁན་གྱི་བརྟུལ་ཞུགས་ཁོ་ན་ལྟ་བུར་ལེན་པ་རྣམས་དང་མ་འདྲེས་པར་བྱེད་པ་གཅེས་སོ། །གསུམ་པ་ནི། ཟེམ་གྱི་འཁོར་མཚམས། བམ་སྤྲོས་ཏེ་སྟོབ་པ། ཞེས་སྤྱུགས་པའི་སྒྲས་འབོད་ཅིང་རོལ་འབེབས་དང་བསྟུན། སྔར་ལྟར་ཙོག་པུར་འདུག་སྟེ་གཡོམ་གསུམ་ནས་རྡོར་འགྲོས་ཀྱིས་བྷནྡྷའི་རྩར་ཕྱིན་ལ་རུས་སྦལ་གྱི་སྟབས་སམ་ཕྱེད་སྐྱིལ་གང་རུང་གིས་འདུག་ལ། ལྔ་བརྡུངས་ཆེ་ཆུང་སྤེལ་མར་བསྒྱུར་ཏེ། བཞི་པད་ཡོངས་རྫོགས་དང་ཆུང་སྐད་ལ་གཡས་སུ་ལེན་པད་གཅིག་ནས། འདི་མན་ཐམས་ཅད་དུ་ཆུང་རེས་ལ་ཡངས་པད་དང་། ཆེ་རེས་ལ་སོ་སོའི་ཕྱག་རྒྱ་བསྒྱུར་བ་གཉིས་སྤེལ་མ་ཁོ་ན་སྟེ། སོ་སོའི་ཕྱག་རྒྱ་ལ་གསུམ། མགྲོན་དྲང་བ། བྱིན་གྱིས་རློབ་པ། བསྒྲལ་ཏེ་སྟོབ་པའོ། །དང་པོ་ནི། ཆེ་བརྡེག་རེ་ལ་ལག་གཡས་འཕྱར་གྱིས་གཡས་ཕྱོགས་ནས་གཡོབས་པས་ཞི་བའི་ལྷ་ཚོགས་སྤྱན་དྲངས། དེ་བཞིན་དུ་གཡོན་གཡོབ་ཀྱིས་ཁྲོ་བོའི་ལྷ་ཚོགས། མདུན་མཉམ་གཡོབ་ཀྱིས་བླ་མ། གཡས་ཀྱི་རྒྱབ་ཟུར་ནས་གཡས་པས་གཡོབ་པས་དམ་ཅན་ཕོ་རྒྱུད། དེ་ལྡོག་གཡོབ་པས་མོ་རྒྱུད་རྣམས་སྤྱན་དྲང་བའོ། །གཉིས་པ་ཡང་ཆེ་བརྡེག་རེ་ལ་གཡོན་པའི་ཁུ་ཚུར་གྱི་སྟེང་གཡས་སྐྱབས་སྦྱིན་མེ་ལོང་གི་རྒྱས་གཟུགས། གཡོན་ཁུ་ཚུར་སྒྲེང་བའི་མཁྲིག་མར་གཡས་པའི་གུང་མཛུབ་ཀྱིས་བསྐུལ་བ་པི་ཝང་གི་རྒྱས་སྒྲ། ལག་གཉིས་ཐལ་མོ་ཕྱིར་བསྟན་གྱི་རྒྱས་དྲི་མཆོག །དེ་ཉིད་གྱེན་བསྟན་གྱི་རྒྱས་རོ་མཆོག །ལག་གཉིས་ཀྱི་ཕུར་དར་བརྐྱང་ནས་འཕྱར་བའི་རྒྱས་རེག་བྱ་སྟེ། བམ་བསྒྲལ་བྱ་ཀུན་འདུས་ཀྱི་རྣམ་པར་གསལ་བ་ཉིད་ངོ་བོ་འདོད་ཡོན་ལྔར་བྱིན་གྱིས་རློབ་པའོ། །གསུམ་པའང་། ཆེ་བརྡེག་རེ་ལ། དཔུང་པ་གཡས་དང་། གཡོན་དང་། དཔྲལ་བའི་ཐད་རྣམས་སུ་ཕུར་བསྒྲིལ་རེ་དང་། གཡས་སུ་བདར་ནས་བམ་ལ་བཏབ་སྟེ་བསྒྲལ་དེ་རྗེས་གཡས་པས་ཕུར་བུ་བཏབ་ནས་གཡོན་དང་། ལྷན་ཅིག་པས་རིམ་པ་བཞིན་སྟོབ་པ་བྱ་སྟེ། ཆེ་བརྡེག་རེ་རེ་ལ། གཡས་སུ་ཞི་བ། གཡོན་དུ་ཁྲོ་བོ། དབུས་སུ་བླ་མ་རྣམས་སྨིན་མཚམས་ཀྱི་ཐད་ཙམ་ནས་འབུལ་ལོ། །གཡས་ཀྱི་རྒྱབ་ཟུར་དུ་དམ་ཅན་ཕོ་རྒྱུད་དང་། གཡོན་གྱི་རྒྱབ་ཟུར་དུ་དམ་ཅན་མོ་རྒྱུད་གཉིས་ལ་དཔུང་པའི་ཐད་ཙམ་ནས་འབུལ། གཡས་སུ་གྲོགས་ཕོ་རྒྱུད་དང་། གཡོན་དུ་གྲོགས་མོ་རྒྱུད་རྣམས་ལ་རང་གི་རྐང་པའི་ཐད་ཙམ་ནས་སྟོབ། དེ་ནས་རང་ཉིད་ལོངས་སྤྱོད་ཚུལ། ཨམ་ཕྲག་ཏུ་འཇུག་ཚུལ་རྣམས་བྱས་རྗེས་རོལ་མོ་ཆེམ་བརྡུངས་ལ། ལག་གཡོན་བྷནྡྷའི་སྐྲ་ནས་བཟུང་། གཡས་ཕུར་པ་ས་ལ་བཙུགས་ནས་མི་ཐེག་ཅིང་འདར་བའི་ཚུལ་ཅུང་ཟད་བྱས་ལ་དལ་བུས་ལངས་ཏེ། རྐང་གཡོན་ལེན་འདེགས་དང་མཉམ་དུ་བྷནྡྷ་ཕྲག་ལ་བཀལ་ཏེ་ཉིས་བརྡུངས་འཐེངས་མ་དྲག་ལ་མྱུར་བས་ཤུད་འགྲོས་ཀྱིས་བསྐོར་ལམ་ལ་རྒྱུད་པའི་འཁོར་མཚམས། ༈ དགུ་པ་སྟོབ་འཆམས་ནི། དཔལ་ཆེན་པོའི་སྟོབ་འཆམས། ཞེས་རྐང་གཡས་ཕྱིར་ལོག་སྟེ་རྐང་གཡོན་འགྲོའི་ཡོངས་ཕྱོགས་སུ་བཞི་འགྲོས་གསུམ་ནས། གཅིག་ཅེས་རྐང་གཡས་གཡས་སུ་ནེམ་འཇོག །གཉིས་གཉིས་ལ་རྐང་གཡས་གཡོན་བསྐོར་གྱི་ལེན་ནས་རྐང་པ་གཡོན་པ་དང་གཡས་པས་རང་ཕྱོགས་སུ་འབེབས་བསྐོར་སྒོམ་ལྟར་བྱས་རྗེས། རྐང་གཡས་ནང་དུ་ཕབ་པའི་སྦིར་སྦྲམ་གཉིས་ཀྱི་ཛམ་ལེན་ནས། རྐང་གཡས་སྔོན་འགྲོའི་འགྲོ་ཕྱོགས་སུ་བཞི་འགྲོས་གསུམ་དང་། གཅིག་ཅེས་རྐང་གཡོན་གཡོན་དུ་ནེམ་འཇོག་སོགས་རྐང་པ་ལྡོག་པས་འབེབས་བསྐོར་སྔར་ལྟར་བྱས་ལ། གཡོན་ནང་ཕབ་ཀྱི་ཛམ་ལེན་ནས། རྐང་གཡས་སྔོན་འགྲོས་བཞི་འགྲོས་གསུམ་དབུས་སུ་ཕྱིན་རྗེས་སྦིར་སྦྲམ་གཉིས་ལ། གཡས་གཡོན་དུ་ལག་གི་སྟོབ་པའི་སྟངས་ཀ་རེ་བྱས་ལ་རོལ་མོ་འབེབས་པ་སྟེ། དེ་དག་གི་དཀྱིལ་འཁོར་ལྷའི་སྟངས་སྟབས་སོང་ངོ་། ༈ །བཅུ་གཅིག་པ་ཕུར་བུ་གདབ་པས་བསྲུང་བ་ནི། སློབ་དཔོན་དབུས་ནས་ཤར་དུ་ཕྱོགས་པའི་མདུན་དུ་མཚན་ཉིད་ཇི་ལྟ་བ་བཞིན་དུ་འདུ་བྱས་པའི་ཕུར་བུ་རྣམས་བཞག་ལ། མིག་ལ་སོགས་པའི་ཧཱུྃ་ཡིག་ལས་འོད་ཟེར་འཕྲོས། རྡོ་རྗེ་ས་གཞིའི་ར་བ་དྲྭ་བ་གུར་བླ་རེ་ཕྱི་རོལ་བསྐལ་པའི་མེ་དཔུང་རབ་ཏུ་འབར་བའི་དབུས་སུ་བྷྲཱུཾ་ལས་བྱུང་བའི་འཁོར་ལོ་སེར་པོ་རྩིབས་བརྒྱད་ལ་སོགས་དང་། རྩ་རྩེ་སྟེང་འོག་ཏུ་ཕྱོགས་ཤིང་རྣོ་བའི་དབལ་དང་ལྡན་པ། ལྟོ་བ་ཆོས་ཀྱི་དབྱིངས་དང་མཉམ་པའི་དབུས་བདག་ཉིད་ཞེ་སྡང་རྡོ་རྗེར་གནས་པའི་ཐུགས་ཀའི་ཧཱུྃ་ལས་མ་བཅུ་འཕྲོས་པ་རྩིབས་ནང་སོ་སོར་ཉི་གདན་བཅུར་གྱུར། སླར་ཡང་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་འཕྲོས། ཕྱོགས་བཅུའི་བགེགས་རྣམས་བཀུག་སྟེ་ཉི་གདན་རྣམས་ཀྱི་སྟེང་དུ་མྱོས་ཤིང་འགྱེལ་སྟབས་སུ་འཁོད་པར་གྱུར། སུམ་བྷའི་སྔགས་བརྗོད། སླར་ཡང་ཐུགས་ཀ་ནས་ཁྲོ་བོ་བཅུ་ཕྱུངས་ཏེ་མདུན་དུ་བཀོད་པའི་ཕུར་བུ་རྣམས་དང་གཉིས་སུ་མེད་པར་གྱུར་པ་ནི་སྟོད་ཁྲོ་བོའི་གཟུགས་ཅན་སྨད་ཕུར་བུ་འབར་བའི་རྣམ་པ་ཅན་དུ་གྱུར་པར་བསམ་ལ། སློབ་དཔོན་གྱི་ཐོ་བ་ཕུར་བུ་བཅུ་པོ་རེ་རེ་ནས་ཐོགས་ལ། ༀ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ་ཕཊ། ཅེས་སོགས་ཁྲོ་བོ་བཅུའི་སྔགས་ཀྱི་མཐར། ༀ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ་ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ། བཛྲ་དྷ་ར་ཨཱ་ཛྙཱ་པ་ཡ་ཏི། སརྦ་བིགྷྣཱཾ་ཀཱ་ཡ་ཝཱ་ཀཱ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་བཏགས་ཏེ། ཁྲོ་བཅུ་སོ་སོའི་སྔགས་རྣམས་ལ། སྟེང་དང་ཕྱོགས་ཀྱི་ཁྲོ་བོ་རྣམས་ༀ་བཛྲ་ཀྲོ་དྷ་ལ་རྐང་གཡོན་བཏེགས་འབེབས་ཀྱི་ལེན་ནས་དྲང་པོར་བཙུགས་པ་ལ་ཧཱུཾ་ཀཱ་ར་ཧཱུཾ་གརྫ་གརྫ་ཞེས་པ་ལྟ་བུ་ཁྲོ་བོ་རང་རང་གི་མིང་དང་ལས་བྱེ་བྲག་པའི་སྔགས་རྣམས་ལ་རྐང་གཡས་གཡོན་ཕྱོགས་སུ་བསྐོར། དེ་བཞིན་དུ་མཚམས་དང་འོག་གི་ཁྲོ་བོ་རྣམས་རྐང་གཡས་བཏེག་ལེན་གྱི་དྲང་པོར་བཙུགས་པ་ལ་རྐང་གཡོན་གྱིས་གཡས་ཕྱོགས་སུ་བསྐོར་ཞིང་བཅུ་གའི་མཇུག་གི་ཧཱུཾ་ཕཊ་ལ་རྐང་གཡོན་མདུན་དུ་བརྐྱང་ཞིང་། འཆམས་པ་གཞན་རྣམས་ཀྱིས་ཀྱང་ཕུར་བུ་གཡོན་དུ་སྤོས་ནས་སློབ་དཔོན་དང་མཐུན་པར་མདུན་དུ་གདེངས་སྟབས། ༀ་གྷ་གྷ་ནས་སརྦ་དུཥྚན་གྱི་བར་ལ་རྐང་ལག་གཡས་པ་ཕྱིར་འཐེན་ཞིང་འགྱིང་ནས། ཕཊ་ལ་རྐང་གཡོན་ནང་དུ་ཕབ་སྟེ་སློབ་དཔོན་གྱིས་གཡས་ཐོ་བ་འཕྱར་ཞིང་གཞན་རྣམས་ཀྱིས་ཀྱང་སྟངས་ཀ་བྱ། ཀཱི་ལ་ཡ་ནས་ཧཱུཾ་ཧཱུཾ་གྱི་བར་འགྱིང་སྟབས་ནས་རྐང་གཡས་ཟོལ་གྱིས་ཅུང་ཟད་བཏེག་པ་ཧཱུཾ་ལ་ནང་དུ་ཕབ་སྟེ་བཛྲ་ཀཱི་ལ་ཡ་ཞེས་པའི་བར་ཐོ་བས་ཕུར་བུ་བརྡུང་། བཛྲ་དྷ་ར་ཨཱ་ཛྙཱ་པ་ཡ་ཏི་ལ་རྐང་གཡོན་ནང་དུ་ཕབ་ལ་བརྡུང་། སརྦ་བིགྷྣཱཾ་ནས་ཀཱི་ལ་ཡའི་བར་རྐང་གཡས་ནང་དུ་སྤོ་ཞིང་བརྡུང་། ཧཱུཾ་ཕཊ་ལ་གཡོན་སྤོ་ཞིང་བརྡུང་བ་སྟེ། ཚུལ་དེ་ཁོ་ནས་ཕྱོགས་ཀྱི་ཕུར་བུ་གཡས་བསྐོར་དང་མཚམས་ཀྱི་ཕུར་བུ་གཡོན་བསྐོར། སྟེང་གི་ཕུར་བུ་ཤར་དང་འོག་གི་ཕུར་བུ་ནུབ་ཏུ་གདབ་ཅིང་། ཁྲོ་བོ་རྣམས་ཕྱོགས་བཅུའི་བགེགས་ལ་ཕུར་བུའི་ཚུལ་དུ་བཏབ་པས། དེ་རྣམས་ཀྱིས་ལུས་ཕུག་སྟེ་གཡོ་འགུལ་མེད་ཅིང་འོད་གསལ་བར་གྱུར་པར་བསམ་མོ། ༈ །བཅུ་གཉིས་པ་རྟག་ཆད་ཀྱི་མཐའ་བསལ་བ་ནི། ཆིག་བརྡུངས་རོལ་པ་དང་། ཆིག་བརྡེག་ཆེ་བཞི་བར་མཚམས་རོལ་འཐབ་དང་བཅས་པར་རྐང་གཡས་བཏེག་ཅིང་གཡོན་པའི་རྟིང་གསིག་གིས་དོ་རའི་མདུན་དང་། གཡས་དང་། རྒྱབ་དང་། གཡོན་རྣམས་སུ་རིམ་གྱིས་ཕབ་ཅིང་གོམ་ཆུང་གིས་དོ་ར་མཉམ་ལ། གཡོན་བཏེག་ལེན་ནས་བཞི་བརྡུངས་ཀྱིས་མཆོངས་པད་སོང་དོན་ཡངས་པད་སྐྱུར་གཏོད་ནས། རྐང་གཡས་ཁོ་ནས་རྭ་བཙལ་ཞིང་གཉིས་གཉིས་ཞེས་པར་རྐང་གཡས་གཡོན་འདེགས་འབེབས་བྱས་པའི་རྡོ་རྗེ་ཕྱེད་འགྲོས་ཚར་གསུམ་གྱིས་སྒོ་གསུམ་རྡོ་རྗེ་གསུམ་གྱི་རང་བཞིན་དུ་དབྱེར་མི་ཕྱེད་པའི་བསྡུ་བྱའི་དཀྱིལ་འཁོར་ཉིད་གསལ་བཏབ་ནས། བཞི་འགྲོས་ཀྱིས་མཚན་འཛིན་གྱི་ཁོང་མདུད་གཞིག་ཕྱིར་སྦྲུལ་ནག་འཁྱིལ་འགྲོས་ཀྱིས་ཆས་འཇུག་ཁང་པར་རིམ་གྱིས་སོང་སྟེ་རྒྱན་ཆས་རྣམས་བཀྲོལ་ལ་རྟེན་དང་བརྟེན་པའི་དཀྱིལ་འཁོར་བསྡུས་ཏེ་མི་དམིགས་པ་ཐིག་ལེའི་དབྱིངས་སུ་ཐིམ་པར་བསམ་པས་རྟག་མཐའ་བསལ་ཞིང་། སླར་ཡང་རྒྱུན་ཆས་ལ་འཇུག་པ་ན་ཧེ་རུ་ཀའི་སྐུར་སྐད་ཅིག་གིས་ལངས་ཏེ་གོ་བགོ་ལུས་བསྲུང་བྱ་བས་ཆད་མཐའ་བསལ་ལོ། ༈ །བཅུ་གསུམ་པ་བསྔོ་ཤིས་བྱ་བ་ནི། དགེ་བ་བསྔོ་བ་དང་ཤིས་པ་བརྗོད་པས་མཐའ་རྒྱས་སུ་བྱ་ཞིང་། དེ་ཐམས་ཅད་ཀྱང་སེམས་དང་ཡེ་ཤེས་རང་སྣང་བའི་མཚན་ཉིད་ཙམ་དུ་ཤེས་པས་སྐབས་ཇི་ལྟ་བའི་ཆོ་གའི་ཁྲིགས་རིམ་གྱི་དཀྱུས་དང་སྦྱར་རོ། ༈ །གལ་ཏེ་དཀྱིལ་འཁོར་གྱི་ལྷའི་སྟངས་སྟབས་ཀྱི་བཀོད་པ་སྔར་སྨོས་པ་དག་མི་ནུས་པས་བསྡུས་པ་ལ་དགའ་ན། བཀའ་བསྒོས་བགེགས་བསྐྲད་པ་སོང་རྗེས་དཔལ་ཆེན་པོ་ཁྲོ་བོ་བཅུ་དང་བཅས་པའི་སྟངས་སྟབས་བཅུ་གཅིག་པོ་བྱས་ལ་སྔར་བཞིན་ཕུར་བུ་གདབ་པས་བསྲུང་བ་ཙམ་བྱས་ནའང་དགོས་དོན་འགྲུབ་སྟེ། དེ་ལྟར་ཁྲོ་བོའི་སྟང་སྟབས་ཀྱིས། །སྔགས་དང་ཏིང་འཛིན་ཕྱག་རྒྱར་བཅས། །དཀྱིལ་འཁོར་མཐའ་མར་བསྐོར་བ་ཡིས། །བགེགས་ཀྱི་ཚོགས་རྣམས་བརླག་པར་བྱེད། །ཅེས་གསུངས་པའི་ཕྱིར་རོ། །དེའི་ཚུལ་གང་ཞེ་ན། འཕགས་པ་ཐབས་ཀྱི་ཞགས་པར་གསུངས་པའི་སྟངས་སྟབས་བཅུ་གཅིག་སྟེ། དེ་ཡང་ཕྱག་རྒྱ་ཇི་ལྟར་བཅའ་བའི་ཚིག་དང་བསྐུལ་སྔགས་ལ་ཟུར་འདྲ་མིན་འགའ་རེ་སྣང་ཡང་འདིར་རྒྱུད་ཀྱི་རྡོ་རྗེའི་ཚིག་ཁོ་ན་འབྲི་བར་བྱ་བ་ལས། ཐོག་མར་གཙོ་བོ་དཔལ་ཆེན་པོའི་ལས་བཞིའི་ཕྱག་རྒྱ་ནི། ལག་པ་ཐལ་སྦྱར་གྱེན་དུ་སྒྲེངས། །རྐང་གཉིས་མཐིལ་སྦྱར་མཐུར་དུ་གཟུག །ཚིག་ཆེན་བཞི་ཡང་གཞིག་པར་བྱ། །མགོ་དང་མཚན་མ་སྙིང་པོར་བརྟག །རྡོ་རྗེ་རྩེ་དགུ་རྩེ་ལྔ་དང་། །བཅུ་གཅིག་ཏུ་ཡང་རྣམ་བརྟག་སྟེ། །འདི་ནི་ཁྲག་འཐུང་ཆེན་པོ་ཡི། །ཕྱག་རྒྱ་ཡིན་ཞེས་དཔའ་བོས་བཤད། །ཅེས་གསུངས་པའི་བཅའ་ཚུལ་ནི། སྒྱུ་འཕྲུལ་བཤད་རྒྱུད་ལས། ས་བླག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོ་རབ་ཏུ་བསྒོམ། །ཞེས་པའི་སྤྱན་འགྲེལ་དུ། ལས་ཀྱི་ཕྱག་རྒྱ་ནི་མགོ་བོ་རྩེ་བཅུ་གཅིག་པར་བསམ་པ་བཅའ་བ་དང་། གཞན་སོར་མོ་གཡས་གཡོན་བྲི་བསྣན་གྱིས་རྩེ་ལྔ་པ་དང་། རྩེ་བཅུ་པ་དང་། བཅུ་གཅིག་པ་ནི་ཞི་རྒྱས་དབང་དྲག་གི་རིམ་པ་བཞིན་ནོ། །ཞེས་པ་ལྟར་ལས་ཏེ། སྤྲོ་ན་སྒེག་མོའི་སྙེམས་གླུ་དང་སྦྱར་ལ། རྐང་སྟབས་གཞི་བཅའ་ལ་ལག་སྟབས་ལག་པ་ཞེས་པར་པད་སྐོར། ཐལ་ཞེས་པར་ལག་གཡས་པུས་སྟེང་ཕབ་པར་སྦྱར་ལ་གདེངས། གྱེན་ལ་རྐང་གཡས་བརྐྱང་དང་རྡོར་དྲིལ་སྙིང་གར་སྟེང་འོག་ཏུ་སྤྲད། དུ་སྒྲེངས་ལ་སྤྱི་བོར་ཐལ་སྦྱོར་དང་། རྐང་གཉིས་མཐིལ་སྦྱར་ལ་རྐང་མཐིལ་གཉིས་སྦྱར་ཏེ་རྩེ་བཙུག་པ་མཐུར་དུ་གཟུག་ལ་པུས་མོ་ཅུང་ཟད་བཅག་ནས་ཟླུམ་སྟབས་བྱ་བ་ནི་ཞི་བ་ལས་རྒྱ་རྩེ་གཅིག་པའོ། །ཚིག་ལ་རོ་སྟོད་ཅུང་ཟད་གཡས་སུ་གཡོམ་པ་ཛམ་ནས། ཆེན་བཞི་ལ་ལག་སྔར་ཉིད་ལས་རྐང་གཡས་བརྐྱང་གིས་གཡས་ཕྱོགས་སུ་གསིགས་འགྲོས་གཉིས། ཡང་ལ་སྟོད་གཡོན་ཕྱོགས་ལ་གཡོན་པའི་ཛམ་ནས། གཞིག་པར་ལ་གཡོན་དུ་གསིགས་འགྲོས་གཉིས་བྱས་ནས། བྱ་ཞེས་པར་རང་སར། མགོ་དང་མཚན་མ་སྙིང་པོར་བརྟག་ལ་བཞི་པད་མཐར་ལག་གཉིས་སོ་སོར་གཞོལ། རྐང་པ་རང་ས་ལས་ལག་གཉིས་རྡོ་ལ་ཅུང་ཟད་ནང་བསྐོར་གྱིས་ཛམ་ནས་རྗེ་ལ་ཕྱག་རྒྱའི་རྒྱུ་ཐལ་སྦྱར་རྩེ་དགུ་ལ་ཐལ་མོ་རྟིང་སྤྲད་ནས་གུང་གཉིས་རྩེ་སྤྲད་པ་དབུས་རྭ་དང་། སོར་མོ་གཞན་རྣམས་བརྐྱང་ནས་བསྐོར་བ་རྭ་ཕྲ་མེན་གྱི་ཚུལ་ཏེ་དབང་གི་ལས་རྒྱ་རྩེ་དགུ་པའོ། །རྩེ་ལྔ་དང་ལ་དེ་ཉིད་ལ་སྲིན་ལག་གཉིས་བསྡོམས། མཐེ་བོང་དང་མཐེའུ་ཆུང་སོ་སོར་གཤིབ་ནས་བསྒྲེངས། མཛུབ་མོ་གཉིས་གུང་མོའི་རྒྱབ་ཏུ་སྒྲེང་བ་སྟེ་རྒྱས་པའི་ལས་རྒྱ་རྩེ་ལྔ་པའོ། །དེ་ནས་མགོ་བོ་དབུས་རྭ་དང་གཡས་གཡོན་གྱི་ལག་སོར་བཅུ་པོ་དཔུང་པའི་ཐད་ཀར་གདེངས་པ་རྭ་བཅུའི་དོད་དེ་བཅུ་ཞེས་པར་གཡོན་དང་གཅིག་ལ་གཡས་སུ་ཐལ་མོ་བསྐོར་ཚུལ་བྱས་པ་སྟེ་དྲག་པོའི་ལས་རྒྱ་བཅུ་གཅིག་པའོ། །ཏུ་ཡང་ལ་ལག་པད་རྣམ་བརྟག་ལ་ལག་གཡས་པུས་སྟེང་སྟེ་ལ་རྡོར་གདེངས། འདི་ནི་ཁྲག་འཐུང་ཆེན་པོ་ཡི་ཞེས་པར་བཞི་པད་མཐར་ལག་སོར་གཞོལ། ཕྱག་རྒྱ་ཡིན་ཞེས་དཔའ་བོས་བཤད་ཅེས་ལག་པ་དང་རྐང་པ་བཞི་གཡོན་དཀྲུགས་མཐར་གཡོན་བརྐྱང་ཞིང་ལག་རྡོ་རྗེ་ཐུགས་ཀ་དང་དྲིལ་བུ་དཀུར་བརྟེན། དེའི་བསྐུལ་བསྔགས་ནི། ༀ་བཛྲ་ཀྲོ་དྷ་ཤྲཱི་ཧེ་རུ་ཀ་ཧཱུྃ། ཨ་ཨ་ཨ་ཧཱུྃ་ཕཊ། ཅེས་པར་རྐང་ལག་གི་སྟབས་རང་ས་ལས། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཕུར་གདབ་ཀྱི་ཕྱོགས་ཀྱི་ཁྲོ་བོ་ལྟར་གཡོན་དུ་བསྐོར་མཐར་རྐང་གཡོན་བརྐྱང་པ་དང་ལག་གཡོན་འཕྱར་གཡས་ཐུགས་ཀར་སྡིགས་མཛུབ་བྱ་ཞིང་། ཡང་གར་དབྱངས་ཀྱི་སྤྲོས་པ་དེ་ཙམ་མི་ནུས་ན། ཕྱག་རྒྱ་བཅའ་བའི་ཚིག་དང་བསྟུན་ནས་རྒྱ་བཅའ་ཞིང་བསྐུལ་སྔགས་ལ་བསྐོར་འགྱིང་ཙམ་བྱས་ཀྱང་འགལ་བ་མེད་དོ། །ཁྲོ་བོ་གཞན་རྣམས་ནི་གང་གི་ཚེ་སོ་སོའི་ཚིགས་བཅད་ལ་རྒྱ་བཅའ་ཞིང་མཇུག་གི་བསྐུལ་སྔགས་ལ་ཕུར་གདབ་ལྟར་སྟེང་དང་ཕྱོགས་ཀྱི་ཁྲོ་བོ་གཡོན་དང་། མཚམས་དང་འོག་གི་ཁྲོ་བོ་གཡས་སུ་བསྐོར་ཞིང་མཇུག་ཏུ་ཕཊ་ལ་སྟེང་དང་ཕྱོགས་གཙོ་བོ་ལྟར་དང་། མཚམས་དང་འོག་དེ་ལས་ལྡོག་སྟེ་རྐང་གཡས་བརྐྱང་ངོ་། །སོ་སོའི་ཕྱག་རྒྱ་ནི། ལག་པ་ཐལ་སྦྱར་གྱེན་དུ་སྒྲེང་། །རྐང་པ་ཕྲལ་ནས་བརྐྱང་བསྐུམ་བྱ། །གོམ་པའི་སྟབས་ཀྱིས་གར་བྱེད་པ། །འདི་ནི་ཧཱུྃ་མཛད་ཕྱག་རྒྱ་ཡིན། །ༀ་བཛྲ་ཀྲོ་དྷ་ཧཱུྃ་ཀཱ་ར་ཧཱུྃ་གརྫ་གརྫ་ཧཱུྃ་ཕཊ། རྐང་པ་རྐང་མགོ་གཡོན་གྱིས་གཡས་བརླ་ལ་ལ་འཁྱུད། །ལག་པ་གར་སྟབས་བསྐོར་ནས་ཀྱང་། །ཐལ་མོ་དྲག་ཏུ་བརྡེབ་པ་ནི། །རྣམ་པར་རྒྱལ་བའི་ཕྱག་རྒྱ་ཡིན། །ༀ་བཛྲ་ཀྲོ་དྷ་བི་ཛ་ཡ་ཧཱུྃ་ཧ་ན་ཧ་ན་ཧཱུྃ་ཕཊ། ལག་པ་གཡས་པའི་མཐེ་བོང་གིས། །མཐེའུ་ཆུང་སེན་མོའི་མཐིལ་དུ་མནན། །གདེངས་པའི་སྟབས་སོར་མོ་གསུམ་ཀྱིས་སྒྲེངས་པ་ཡི། །དབྱུག་པ་སྔོན་པོའི་ཕྱག་རྒྱ་ཡིན། །ༀ་བཛྲ་ཀྲོ་དྷ་ནཱི་ལ་དཎྜ་ཧཱུྃ་ད་ཧ་ད་ཧ་ཧཱུྃ་ཕཊ། ལག་པ་གཡས་པའི་ཁུ་ཚུར་ནི། །བརྡེག་པའི་སྟབས་སུ་གདེངས་པ་དང་། །གཡོན་པ་དཀུ་ལ་བརྟེན་པ་ནི། །གཤིན་རྗེ་འཇོམས་པའི་ཕྱག་རྒྱ་ཡིན། ༀ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུྃ་ཕཊ། ལག་པ་གཡས་པའི་ཐལ་མོ་ནི། །བརྡེག་པའི་སྟབས་སུ་གདེངས་ཀ་དང་། །གཡོན་པས་འཛིན་པ་ལྟར་བྱེད་པ། །མི་གཡོ་མགོན་པོའི་ཕྱག་རྒྱ་ཡིན། །ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ་བྷནྡྷ་བྷནྡྷ་ཧཱུྃ་ཕཊ། ལག་པ་ཐལ་མོ་སྦྱར་བ་ནི། །མཛུབ་མོ་རྒྱབ་ཏུ་བསྣོལ་བར་བྱ། །མཐེ་བོང་གཉིས་ཀྱང་ཕྲལ་ཏེ་སྒྲེངས། །སྤྱི་བོར་བཞག་པ་གྲཱི་ཝའི་རྒྱ། །ༀ་བཛྲ་ཀྲོ་དྷ་ཧྱ་གྲཱི་ཝ་ཧཱུཾ་ཧུ་ལུ་ཧུ་ལུ་ཧཱུྃ་ཕཊ། རྐང་པ་གཡས་པ་མཐུར་དུ་གཟུག །ལག་པ་གཉིས་པོ་གྱེན་དུ་སྒྲེངས། །གཡོན་གྱི་རྐང་པ་འཕྱར་བ་ནི། །གཞན་གྱིས་མི་ཐུབ་ཕྱག་རྒྱ་ཡིན། །ༀ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ་ཏིཥྛ་ཏིཥྛ་ཧཱུྃ་ཕཊ། ལག་པ་གཡས་གཡོན་དཀུར་བརྟེན་ཏེ། །རྐང་པ་གཤིབས་ཏེ་མཆོང་བ་ནི། །བདུད་རྩི་འཁྱིལ་བའི་ཕྱག་རྒྱ་ཞེས། །དཔའ་བོ་ཆེན་པོས་ཡང་དག་བཤད། །ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ལག་པས་གཡས་གཡོན་བསྣོལ་ཐུགས་ཀར་བ་དང་། །རྐང་པ་བརྐྱང་བསྐུམ་བྱས་པ་ནི། །ཁམས་གསུམ་རྣམ་རྒྱལ་ཕྱག་རྒྱ་ཞེས། །མགོན་པོ་དཔའ་བོས་ཡང་དག་བཤད། །ༀ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུྃ་བྷིནྡྷ་བྷིནྡྷ་ཧཱུྃ་ཕཊ། རྐང་ཕྲལ་མཐིལ་ནི་ཐུར་དུ་ཟུག །ལག་པ་ཕྲལ་ནས་གར་བྱེད་ཅིང་། །སྟབས་སུ་མཆོང་བར་བྱེད་པ་སྟེ། །འདི་ནི་སྟོབས་ཆེན་ཕྱག་རྒྱ་ཡིན། །ༀ་བཛྲ་ཀྲོ་དྷ་མ་ཧཱ་བཱ་ལ་ཧཱུྃ་སྥོ་ཊ་སྥོ་ཊ་ཧཱུྃ་ཕཊ། ཅེས་ཁྲོ་བོ་གང་དང་གང་གི་སྟངས་སྟབས་བྱས་པ་དེའི་ཚེ་དེ་དང་དེའི་སྤྲུལ་པ་གྲངས་མེད་པ་འཕྲོས་ནས་སྟོང་གསུམ་གང་། བགེགས་ཐམས་ཅད་ཚར་བཅད། སླར་འདུས་པ་ལས་ཁྲོ་བོའི་སྤྲིན་གྱིས་ཕྱོགས་བཅུར་གཏམས་ཏེ་ཅིས་ཀྱང་མི་ཤིགས་པར་བསམ་མོ། ༈ །དེ་ནས་སྒྲུབ་པའི་ཞག་བདུན་པ་ལྟ་བུའི་ཚོགས་མཆོད་ཀྱི་སྟོབ་པ་དང་སྦྲེལ་བའམ། གནས་སྐབས་གང་ཡང་རུང་བར་རྫས་ཀྱི་སྒོ་ནས་དྲག་པོའི་ཕྲིན་ལས་ལ་སྦྱོར་བའི་ཕྱིར་དགྲ་བགེགས་བྲུབ་ཀྱི་འཆམས་བྱ་བར་འདོད་ན། ཆས་འཇུག་ཁང་པར་སོང་ལ་ཆས་གོས་བརླབས་ཤིང་བགོ་བ་དང་། ཕྱི་ནས་གསེར་སྐྱེམས་བསྔོ་བ་རྣམས་རྩ་འཆམས་ལྟར་བྱས་རྗེས་རྟེན་བཅའ་བ། དཀྱིལ་འཁོར་བསྐྱེད་པ། ལས་ལ་གཟུད་པ། བདེན་པ་བརྡར་བ། ཕོ་ཉ་འགྱེད་པ་ཡན་སྒྱུ་འཕྲུལ་ཁྲོ་བོའི་སྒྲུབ་ཐབས་ལས་བྱུང་བ་ལྟར། ཐུགས་རྗེ་འཛིན་གིང་དུ་མངའ་གསོལ་བ་ཡོད་ན་དང་། མེད་ན་མཆོད་གཡོག་གིས་ལིངྒ་བསྐྱལ་ལ། གསེར་སྐྱེམས་སྔོན་དུ་འགྲོ་བས། ཨེ་རྃ་ཛྭ་ལ་རྃ། ཕྱི་སྣོད་ཀྱི་འཇིག་རྟེན་ཐམས་ཅད་ཆོས་ཀྱི་འབྱུང་གནས་གྲུ་གསུམ་མཐིང་ནག་འབྱམས་ཀླས་ལ་བསྐལ་པའི་མེ་དཔུང་འབར་བར་གྱུར། ཧཱུྃ་ཧ་ཧེ་ཕཊ་བྷྱོ་རཾ། ཞེས་བརྗོད་པས་ནང་བཅུད་ཀྱི་སེམས་ཅན་ཐམས་ཅད་ཁྲག་འཐུང་འབར་བའི་དཀྱིལ་འཁོར་དུ་བཞེངས་པར་གྱུར། ཞེས་བསྐྱེད། ༀ་བ་ཧུ་བེ་དྷ། རོ་ཧ་ཏི། པཉྩ་ཏི། ཨ་ཤི་ཥ། ནི་ཤེ་ཥ། བཱ་ད་བི་ན་ཡ། བིདྱཱ་ག་ཏེ། ཙ་ལེ། པྲ་ཙ་ལྀ། གུརྦ་གུརྦ། བི་གུརྦ། བཛྲ་སཾ་པ་ལེ། ཙ་ལེ་ཙ་ལེ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཞེས་ལས་ལ་གཟུད་པས་ལྷ་ཚོགས་རྣམས་དྲག་པོའི་ལས་ལ་རྔམ་ཞིང་ཁྲོས་པར་བསམ་ནས། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བཅོམ་ལྡན་འདས་དཔལ་ཆེན་པོ་ཁྲག་འཐུང་རོལ་པའི་དཀྱིལ་འཁོར་གྱི་ལྷ་ཚོགས་ཀྱི་བདེན་པ་དང་། སྤྲུལ་པ་ཡང་སྤྲུལ་བཀའ་སྡོད་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་མ་རུང་བའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་ལ་མཆིས་པར་གྱུར་ཅིག །ནྲྀ་ཡཾ་ཛཿ ནྲྀ་བཛྲ་ཨངྐུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུཾ་བཾ་ཧོཿ ཞེས་ཕྱག་རྒྱ་བཞིས་བསྟིམ་པ་ཙམ་བྱས་རྗེས་ཕྱི་རོལ་ནས་སྤོས་བཏུལ་ཞིང་རོལ་མོའི་སྒྲ་ཚམ་རྔམས་དང་བཅས་པས་བསྐུལ་ཏེ། འཆམས་དཔོན་གྱིས་སྙེམས་པ་དང་བཅས་པས་དོན་ཏེ་སྒོའི་ཕྱི་མཚམས་ནས་འགྲོ་ཕྱོགས་སུ་ལུས་ཀྱི་གཡོན་བསྟན་ནས་དལ་བུས། སྦིར་སྦྲམ་ཞེས་གཉིས་བརྡུང་འཐེང་མ་གཉིས་ལ་འགྱིང་བ་དང་བཅས་པས་གཡོན་གཡས་ཀྱིས་ཛམ་བླང་སྟེ། བཞི་བརྡུང་འགྲོས་ཀྱིས་རྐང་གཡོན་པའི་གསུམ་ཐོག་ནས་ཡངས་པད་ཀྱི་འགོ་བརྩམ། གཅིག་གཉིས་ཞེས་པར་དགག་པད་ལེན། གསུམ་བཞི་ལ་ལག་གཡས་ཕྱིར་འཐེན་ཏེ་མྱང་ནས། གཅིག་གཉིས་ལ་དེ་གར་འགྱིངས། གསུམ་བཞི་ལ་ཕུར་དར་བསྒྱུར། ཡང་གཅིག་གཉིས་ལ་བྷན་དྷར་ཕུར་རྩེ་གཏོད། གསུམ་བཞི་ལ་ལག་གཡས་གཡོན་པར་ནང་བསྐོར་གྱིས་ཕུར་དར་སྟེང་དུ་དོར་བ་དང་མཉམ་དུ་རྐང་གཡོན་གཡས་ནས་འདེགས་འབེབས་ནས་བཞི་འགྲོས་ལ་ཞུགས་པ་དང་བསྟུན་གཞན་རྣམས་ཀྱང་གྲལ་ཕྲེང་བ་དང་མཉམ་པས་རིམ་པར་དོན་ཏེ་གཡོན་པའི་བཞི་འགྲོས་སྐབས་ལག་གཡས་ཕྱར། གཡོན་ཕྱར། གཉིས་ཀ་བརྒྱང་བ། གཉིས་ཀ་དཀུར་བརྟེན་པའི་ཚུལ་གྱིས་བཞི་བརྡུངས་འགྲོས་ཁོ་ནས་དོར་མ་འཁོར་བར་འགྲོ་སྟེ། རྡོ་རྗེ་ལམ་འགྲོས་ཞེས་བྱ་བའོ། །དེ་ལས་ལག་དཀུར་གྱི་རྔ་གསུམ་པའི་ཐོག་ཕཊ་ཀྱིས་བསྒྱུར་ཏེ་ཡང་པད་བརྩམས་ནས། དགག་པད་ལེན་སྒྱུར་གཏོད་པ་རྣམས་སྔར་བཞིན་དང་རྩ་འཆམས་ཀྱི་སྣ་ཚོགས་རྡོ་རྗེའི་མཇུག་གི་བཞི་བརྡུང་རོལ་པ་ཇི་ལྟ་བ་བཞིན་བྱས་རྗེས་ཆིག་བརྡེག་ཆེ་གསུམ་རོལ་འཐབ་དང་བཅས་པ་ཆུང་གཅིག་ལ་རྐང་གཡས་གཡོན་རེ་མོས་ཀྱིས་དོ་རའི་མདུན་དང་། རྒྱབ་དང་། འགྲོ་ཕྱོགས་དང་། འོང་ཕྱོགས་ཀྱི་ཟུར་རྣམས་སུ་འབེབས་ཤིང་། དེ་བསྟུན་ལག་ཀྱང་རིམ་བཞིན་གཉིས་ཀ་གདེངས་པ་དང་། གཡས་བསྡུ་ཞིང་། ཕྱིར་བསྐོར་གྱི་མདུན་དུ་གྱེན་གཞོལ། ཧཱུྃ་རྒྱ་ལྟ་བུས་མདུན་དུ་མཉམ་པ་སྟེ། དཔལ་ཆེན་པོའི་སྒེག་འགྲོས་སམ་དགའ་བ་ཡོངས་སུ་བསྒྱུར་བ་ཞེས་བྱ་བའོ། །དེ་ལས་ཕཊ་ཀྱིས་བསྒྱུར་ཏེ་སྦྲམ་སྦྲམ་ལ་ཡངས་པད་ཀྱིས་འགོ་བརྩམས་ནས་སྦིར་སྦྲམ་ཚན་གསུམ་གྱི་རེ་རེ་ལ་དགག་སྐྱུར་གཏོད་གསུམ་ནས་རྩ་འཆམས་ལྟར་ཆིག་བརྡུང་རོལ་པ་བྱས་རྗེས། སྦིར་ཞེས་ཆིག་བརྡུང་ཆེ་བ་རོལ་འཐབ་དང་བཅས་པ་ལ་ལག་གཉིས་ཕྱིར་གདེངས་ནས་རྐང་གཡས་འགྲོ་ཕྱོགས་སུ་བགྲད་སྟབས་ཀྱིས་འདེགས་འབེབས་དང་ནང་དུ་བསྐོར་འགྱིང་ནས་སྦྲམ་ལ་ལག་མདུན་དུ་མཉམ་ཞིང་རྐང་གཡོན་ཟུར་དུ་བརྗིད་འབེབས་ལས་ཟླུམ་སྟབས་བྱ་སྟེ་སེངྒེའི་བརྗིད་འཆམས་ཞེས་བྱའོ། །དེ་ལས་ཕཊ་ཀྱིས་བསྒྱུར་ཏེ། པད་བརྩམས་དགག་སྐྱུར་གཏོད་པས་ཆིག་རོལ་ནས་རྔ་ཆེན་བཞི་ལ་རྐང་གཡས་ལྕགས་རིའི་མདུན་དང་། གཡས་དང་། རྒྱབ་དང་། གཡོན་རྣམས་སུ་འདེགས་འབེབས་དང་དེ་བསྟུན་ལག་གཉིས་ཀྱང་གསིག་རྗེས་རྔ་ཆུང་གཅིག་ལ་རྐང་གཡོན་མདུན་དུ་བསྐོར་འབེབས་ཀྱིས་གཡོན་གཡས་ཀྱི་ཛམ་བླངས་ནས་བཞི་འགྲོས་ལ་འཇུག་སྟེ་སྟག་མོའི་རྔམས་འཆམས་ཞེས་བྱའོ། །དེ་ལས་ཕཊ་ཀྱིས་བསྒྱུར་ཏེ་པད་རྩམས་དགག་སྐྱུར་གཏོད་པ་ནས། སྦྲམ་གཅིག་ནས་གསུམ་གྱི་བར་རོལ་པ་བྱས་རྗེས་བཞི་པར་གཡས་སུ་འཕར་བ་བསིགས་ཀྱི་ཛམ་ལེན་ནས་རྐང་གཡས་བཏེགས། རྔ་བྲེལ་བ་དྲུག་གི་བར་གཡོན་པའི་རྟིང་བསིགས་ཀྱིས་ཆོས་བསྐོར་དུ་བསྐོར་ནས། བདུན་ལ་རྐང་གཡས་ཕྱེ་དང་། བརྒྱད་ལ་གཡོན་ཟུར་དུ་ཕབ། དགུ་དགུ་ཞེས་པའི་ཛམ་ལ་གཡོན་གཡས་ཀྱི་ཛམ་བླང་ནས་བཞི་འགྲོས་ལ་འཇུག་སྟེ་ལྕེ་སྤྱང་གི་བསིགས་འགྲོས་ཀྱིས་བསྐོར་བ་ཞེས་བྱའོ། །དེ་ལས་ཕཊ་ཀྱིས་བསྒྱུར་ཏེ། སྦིར་སྦྲམ་ཚན་གཉིས་ལ་མདུན་དུ་དགག་པད་དང་ལག་གཡས་འཐེན་བརྒྱང་། སྦྲམ་སྦྲམ་ལ་རྐང་གཡོན་འདེགས་འབེབས་ཀྱིས་གཡས་སུ་ཁ་བསྐྱུར་ཏེ། སྦིར་སྦྲམ་ཚན་གསུམ་ལ་དགག་པད་སྐྱུར་གཏོད་བྱས་རྗེས། རྔ་ཐིང་ཆུང་བཞིའི་བར་ལ་ལག་གཡོན་དཀུར་བརྟེན་དང་གཡས་བརྐྱངས་པས་གཡབ་ཅིང་ཕྱིར་གོམ་གསུམ་ནུར་ནས། བཞི་བརྡུངས་དྲག་པོ་གཅིག་ལ་གཡས་སྡིགས་མཛུབ་ལིངྒར་བསྡིགས་པས་རྐང་གཡས་བརྐྱང་གིས་ནང་དུ་བསིགས་འགྲོས་གསུམ། དེ་ནས་རྔ་ཆུང་གཉིས་ལ་རང་སར་བསྡད་ནས་ཆེ་གཉིས་ལ་རྐང་གཡས་འདེགས་འབེབས་ཀྱིས་གཡོན་ཕྱོགས་སུ་ཁ་བསྒྱུར་ནས་ལག་པད་སྐྱུར་གཏོད་ནས། རྔ་ཐིང་ཆུང་བཞི་ལ་གཡོན་པས་ཕྱིར་གཡོབ་པ་དང་། ཆེ་བཞི་ལ་གཡོན་བརྐྱང་གིས་ནང་དུ་བསིགས་འགྲོས་གསུམ་ནས་ཆུང་གཉིས་ལ་རང་ས་དང་། འབྲིང་བརྡེག་གཉིས་ལ་གཡས་སུ་ལྡོག་གཡོམ་གྱིས་རོལ་བསིག་རྗེས། གཡོན་གཡས་ཀྱིས་ཛམ་བླངས་ནས་བཞི་འགྲོས་ལ་འཇུག་སྟེ་སྤྱང་མོ་འདུར་འགྲོས་ཀྱིས་གཡབ་ཅིང་འཆམས་ཞེས་བྱའོ། །དེ་ལས་ཕཊ་ཀྱིས་བསྒྱུར་ཏེ་སྦིར་སྦྲམ་ཚན་གཉིས་ལ་མདུན་དུ་དགག་པ་དང་གཡས་འཐེན་བརྒྱང་། སྦྲམ་སྦྲམ་ལ་རྐང་གཡོན་གྱིས་གཡས་སུ་ཁ་བསྒྱུར་ཏེ་སྦིར་སྦྲམ་ཚན་གཉིས་ལ་དགག་པད་འཐེན་བརྒྱངས། དེ་བཞིན་དུ་མདུན་དུ་རྐང་གཡས་ཀྱིས་བསྒྱུར་བའི་དགག་པད་འཐེན་བརྒྱངས་དང་། རྐང་གཡོན་གྱིས་གཡས་སུ་ཁ་བསྒྱུར་ཏེ་དགག་པད་སྐྱུར་གཏོད་བྱས་རྗེས། གཅིག་གཅིག །གཉིས་གཉིས་ཞེས་འཐེར་བརྡུང་ཁོ་ན་ལས་འཐེན་བསྲིག་རྣམས་ཆེ་རྒྱག་དང་། གཞན་ཆུང་རྒྱག་གིས། གཅིག་གཅིག་ལ་སྡིགས་མཛུབ་གཉིས་ནང་དུ་ལིངྒར་བསྡིག་ཅིང་། གཉིས་གཉིས་ལ་རྐང་གཡས་འཐེན་ནས་གཡོན་ལྕགས་རིས་ལ་བསྒྱུར་ཅིང་སྡིགས་མཛུབ་གཉིས་ཕྱིར་འཕྱང་ནས་གཅིག་གཅིག་ལ་རང་སར། གཉིས་གཉིས་ལ་རྐང་གཡོན་འདེགས་འདེབས་དང་གཡས་ལྕགས་རིས་གཉིས་གཅིག་གཅིག །གཉིས་གཉིས་ལ་སྡིགས་མཛུབ་ནང་བསྡིགས། ཡང་སྡིགས་མཛུབ་ཕྱིར་འཕྱར་གྱིས་གཅིག་གཅིག་ལ་རང་ས་དང་། གཉིས་གཉིས་ལ་པུས་མོ་གཡོ་བཙུག་ཀྱིས་ཙོག་པུར་ལྷན་གྱིས་འདུག་ནས་གཡོན་གཡས་སུ་རོལ་པ་གཉིས་རེ་བྱས་རྗེས་ཧར་ལངས་ཀྱིས་ལག་གཡོན་དཀུར་བརྟེན་དང་གཡས་འཕྱར་བས། རྔ་དགུ་བརྡུངས་ཀྱི་དྲུག་གི་བར་རྟིང་བསིགས་གཡོན་དུ་བསྐོར་ནས་བདུན་བརྒྱད་ལ་ལག་གཡས་ཕྱིར་བསྐོར་བས་དགུ་ལ་ལིངྒ་སྡིགས་མཛུབ་གྱེན་བསྟན་གྱིས་བསྡིགས། བཞི་བརྡེག་ཆུང་བྲེལ་ཕྱེད་གཉིས་ལ་རང་ས་དང་། གསུམ་བཞི་ལ་རྐང་གཡས་ཀྱིས་གཡོན་དུ་བསྒྱུར་ཏེ་དགག་པད་འཐེན་བརྒྱངས། གཡོན་གྱིས་ནང་དུ་ལྡོག་སྟེ་དགག་པད་འཐེན་བརྒྱངས། གཡས་ཀྱིས་གཡོན་དུ་ལྡོག་སྟེ་དགག་པད་སྐྱུར་གཏོད་བྱས་རྗེས། གཅིག་གཅིག །གཉིས་གཉིས་ཞེས་རྔ་འཐེང་བརྡུངས་ལ་སྡིགས་མཛུབ་ནང་དུ་ལིངྒར་བསྡིགས་ཤིང་རྐང་གཡོན་འཐེན་པ། རྐང་གཡས་ལྕགས་རིས་སུ་བསྒྱུར་བ་སོགས་གཡས་གཡོན་གོ་ལྡོག་པ་མ་གཏོགས་སྔར་ཇི་ལྟ་བ་ལས། ལག་གཡས་འཕྱར་གྱིས་དགུ་ལ་ལིངྒར་སྡིགས་མཛུབ་གྱེན་བསྟན་གྱིས་བསྡིགས་ནས་བཞི་བརྡུངས་ཆུང་བྲེལ་ཕྱེད་གཉིས་ལ་རང་སར་བསྡད་རྗེས། ཕྱེད་ཕྱི་མར་གཡས་སུ་སྟོད་གཡོམ་གྱིས་རལ་བསིགས་ནས་གཡོན་གཡས་ཀྱི་ཛམ་ལེན་ཏེ་དྲེད་མོའི་རྒྱུག་འགྲོས་ཀྱིས་འཁྱིལ་ཞིང་བསྡིགས་པ་ཞེས་བྱའོ། །དེ་ནས། ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ནས་ཚོགས་ལ་འབུལ། །ཞེས་པ་ལ་གདབ་ཁའི་རྩ་དབྱངས་བཅུག་སྟེ་འགྲོས་སྟབས་ཚིག་རྐང་རེ་ལ་བཞི་འགྲོས་ཚར་གཉིས་གཉིས་ལས་མི་འདྲ་བའི་ཁྱད་པར་གཡོན་པའི་བཞི་འགྲོས་ཀྱི་གསུམ་བཞི་ཞེས་པར་གཡས་སུ་འཐེན་ཏེ་འཆམས་པ་ཙམ་མོ། །དེ་ཡང་ཁམས་གསུམ་སྒྲོལ་གིང་དུ་མངའ་གསོལ་བའི་འཆམས་དཔོན་གྱིས་གདབ་ཕུར་ཐོགས་ལ། ཨེ་ཡི་ཞེས་པར་གཡས་ནས་བརྩམས་པའི་འགྲོས་བླངས་ཏེ། ཇི་སྲིད་རྐང་པ་བདུན་པ་རྫོགས་པའི་བར་དང་། བརྒྱད་པའི་རྡུལ་དུ་ཞེས་པ་ཡན་ལ་འཇམ་འགྲོས་བྱས་ནས་ཚོགས་ལ་འབུལ་ཞེས་པར་རྐང་པ་བཏེགས་ནས་ཤུགས་ཆེར་བསྐྱོད་ཅིང་དབྱངས་འགྲོས་འཚུབ་པ་དང་འཆམས་དཔོན་ནང་དུ་རིམ་གྱིས་ཞུགས་ནས་རྐང་པ་ཐ་མར་ལིངྒའི་མདུན་དུ་སླེབ་པར་བྱས་ནས་དབྱངས་རྫོགས་པའི་བའི་བའི་ལ་རྐང་གཡོན་བཏེགས་པའི་པད་བརྩམ་ནས་བཟུང་། ནང་དུ་བསིགས་འགྲོས་ཀྱིས་འགྲོ་བའི་སར་སྤྱང་མོ་འདུར་འགྲོས་ཀྱིས་གཡས་གཡོན་ཇི་ལྟ་བ་བཞིན་བྱ་སྟེ་རྔ་ཆུང་གཉིས་ལ་རང་སར་བསྡད་རྗེས། གསུམ་བཞི་ལ་ལག་ཡངས་པད་དང་། རྐང་གཡས་འདེགས་འབེབས་ཀྱིས་གཡོན་དུ་བསྐོར་ནས། རྐང་གཡོན་བཏེགས་ཏེ་གཅིག་གཉིས་ལ་རང་སར་འགྱིང་། གསུམ་བཞི་ལ་ཡངས་པད་དང་རྐང་གཡོན་གྱིས་ཕྱིར་ལྡོག་སྟེ་གཡས་བཏེགས་ནས་བཞི་གྲངས་གཅིག་ལ་དེ་ཁར་འགྱིང་ནས། སྦིར་སྦྲམ་ལ་གཡོན་པའི་རྟིང་བསིག་གིས་འཕར་ཏེ་རྐང་གཡས་སུ་ཕབ་ཅིང་གཡས་ཕྱོགས་སུ་རོལ་བསིགས་དང་། དེ་བཞིན་དུ་ནང་དུ་ཕྱིར་ཕྱོགས་སུ་རོལ་བསིགས་ཀྱིས་ཛམ་ནས། རབ་འབེབས་དང་བསྟུན་ནང་དུ་གཡས་སྔོན་འགྲོའི་གོམ་གཉིས་ནུར་ནས་ཙོག་པུར་བསྡད། ལིངྒའི་གནས་གསུམ་དུ་ཕུར་བུ་གདབ། དེའི་ཚེ་སློབ་དཔོན་དཔལ་ཆེན་པོའི་ང་རྒྱལ་ལ་གནས་པས་ཏིང་ངེ་འཛིན་གྱིས་སྒྲོལ་བའི་ཐབས་ཀྱིས་མཛད་སྤྱོད་ཚེ་ཁྲུས་ཀྱི་དགོངས་པ་ལ་བཞག་གོ། །དེ་ནས་སྒྲོལ་གྲི་ཐོགས་ཏེ་རོལ་པ་གཉིས་བླང་རྗེས་ཧར་ལངས་ཀྱིས་རྐང་གཡས་ལྕགས་རིས་སུ་བཀོད་ནས་རྐང་པ་མི་བཏེགས་པ་མ་གཏོགས་གཞན་སྔར་བཞིན་ལྕེ་སྤྱང་གི་བསིགས་འགྲོས་ཇི་ལྟ་བས་བསྐོར་བས་མཇུག་གི་གཡོན་གཡས་ཀྱི་ཛམ་ནས། ཧཱུྃ། ཞེ་སྡང་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཐལ་བ་བཞིན་དུ་བརླག་བྱས་ནས། །དྲག་པོའི་ཕྲིན་ལས་འགྲུབ་པར་མཛོད། །ཅེས་པར་དབྱངས་འགྲོས་གཉིས་ཀ་སྔར་ལྟར་ལ་བསྡད་ནས་སྒྲོལ་གྲིས་དམིགས་ཡུལ་ཕོ་མོའི་ཁྱད་པར་གྱིས་རྐང་པ་གཡས་གཡོན་གང་རིགས་ནས་བརྩམས་ཏེ་དུམ་བུར་གཏུབ་ཅིང་། སྔ་ཕྱི་གཉིས་ཀའི་གདབ་སྔགས་སོ་སོར་བཤད་པ་བཞིན་ནམ་བསྡུས་པ་ལ་དགའ་ན་གཉིས་ཀ་ལ་རུ་ལུའི་རྗེས་སུ། སརྦ་དུཥྚན་མཱ་ར་ཡ་ཧཱུྃ་ཕཊ། །ཅེས་སྤེལ་བས་ཀྱང་རུང་ངོ་། །དེ་ནས་ལངས་ཏེ་ལྕེ་སྤྱང་གི་བསིགས་འགྲོས་ལྟ་བུས་བསྐོར་བའི་ཚེ། འཆམས་དཔོན་གྱིས་གྲངས་བདུན་གྱི་བར་བརྒྱང་འགྲོས་ཀྱིས་གྲལ་དུ་ཞུགས་ནས་གཡོན་གཡས་ཀྱི་ཛམ་རྗེས་ཕཊ་ཀྱིས་བསྒྱུར་ཏེ། ལྔ་དྲུག་གི་བར་དགུ་སྐོར་རླུང་འཚུབས་མ་སྤྱི་ལྟར་ལས། བདུན་ལ་རྐང་གཡོན་མི་འབེབས་པར། བརྒྱད་ལ་ཕབ་རྗེས། དགུ་དགུ་ཞེས་པར་རྐང་གཡས་གཡོན་འདེགས་འཇོག་དང་བསྟུན་ལག་སྟབས་ཀྱི་ཁྱད་པར་དགུ་བསྐོར་ཚར་བཞིའི་དང་པོ་ལ་གཡས་འཕྱར། གཉིས་པར་གཡོན་འཕྱར། གསུམ་པར་གཉིས་ཀ་བརྒྱངས་པ། བཞི་པར་དཀུར་བརྟེན་པ་རྣམས་ཏེ། །དེ་དག་ལ་ཕོ་ཉའི་བསྒྲལ་འཆམས་ཞེས་བྱའོ། །དེ་ནས་ཡེ་ཤེས་སྟོབ་གང་གི་ཆས་སུ་ཞུགས་པ་ཡོད་ན་དང་། མེད་ན་ལས་རྡོར་གྱིས་ལིང་རོ་ཞིང་ལྤགས་ཀྱི་སྣོད་དུ་སྤུངས་ལ་རོག་དང་བཅས་པས་བཏེགས་ནས་སྨན་རཀ་སྦྲེང་ཞིང་། འཆམས་དཔོན་གྱིས་ཕཊ་ཀྱིས་བསྒྱུར་ཏེ་བཞི་འགྲོས་བླངས་ནས་གཡས་པའི་གསུམ་བཞིའི་འགྲོས་ཐོག་ཡངས་པད་བྱ་སྟེ་མདུན་དུ་ལག་གྱེན་བསྟན་གྱིས་བསྙབ་ནས། ཧཱུྃ། བཻ་ཌཱུར་སྔོན་པོའི་རིན་ཆེན་རི་རབ་ལ། །ཉི་མ་སྟོང་གི་འོད་ཟེར་བརྡལ་བ་ལྟར། །ཞེས་པ་ལ་སྟོབ་དབྱངས་ཆེ་བ་འགྲོས་དང་བཅས་པ་བྱ་སྟེ། བཻ་ཌཱུར་སྔོན་ཡན་ལ་རྐང་གཡོན་བརྐྱང་དང་ལག་གཉིས་མདུན་དུ་གྱེན་བསྟན་མཉམ། པོའི་ལ་རྐང་གཡོན་མདུན་དང་གཡས་ཀྱིས་འགྲོས་སུ་ཅུང་ཟད་སྤོ་ཞིང་ལག་གཉིས་གཡས་འཕྱར་གྱིས་སྟོབ་པའི་སྟངས་ཀ །རིན་འས་ལ་རྐང་གཡོན་བཏེགས་འབེབས་དང་ལག་གཉིས་གཞོལ། ཆེན་ལ་རྟིང་བསིགས་དང་ལག་གཉིས་སྟོབ་ཚུལ། རི་ལ་རྐང་གཡས་གཡོན་བསྐོར་གྱིས་འགྲོ་ཕྱོགས་འབེབས་པ་དང་གཡོན་སྟོབ། རབ་ལའང་རྐང་གཡས་བཏེགས་འབེབས་དང་གཡོན་སྟོབ། ལ་ཞེས་པར་རྐང་གཡས་མདུན་དུ་ཟོལ་པོ་དང་ལག་གྱེན་མཉམ། ཝ་ལ་གཡོན་དྲུད་ཅིང་དབུས་སྟོབ། བའི་ལ་རྐང་གཡས་ཅུང་ཟད་སྤོས་ཏེ། བའི་ཉི་ཡ་མ་ཞེས་པར་གཡོན་པའི་རྟིང་བསིགས་ཀྱིས་གཡས་གཡོན་དུ་ལྡོག་སྟེ། སྟོང་ལ་རྐང་གཡས་གཡས་འཐེན་དང་ལག་གཉིས་གཡས་སུ་སྟོབ་པའི་སྟོང་ག་གི་འོད་ཟེར་བརྡལ་ལ་ཞེས་པ་ཡན་སྔར་ལྟར་ལས། བ་ཞེས་པར་རྐང་གཡས་ཅུང་ཟད་བཏེགས་འབབ་དང་གཡོན་དྲུད་དེ་དབུས་སུ་སྟོབ། ལྟར་ར་ལ་རྐང་གཡོན་འགྲོ་ཕྱོགས་སུ་སྤོ་ཞིང་གཡས་ཕྱིར་དྲུད། འ་ཝའི་ལ་རྐང་གཡོན་བཏེག་ལེན་ནས་རོལ་འགྲོས་ལ་འཇུག །སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅན། །དཔལ་ལྡན་གཟི་བྱིན་འབར་ལ་ཕྱག་འཚལ་ལོ། །ཞེས་པའང་དབྱངས་འགྲོས་གཉིས་ཀ་སྔ་མ་ཉིད་ལྡབ། དེ་ནས། འོད་ཕུང་སྟུག་པོ་སྤྲིན་ལྟར་འཁྲིགས་པ་ཡི། །འཇིགས་བྱེད་རྔམས་སྟབས་བརྐྱང་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་ལྟར་འབར་བ་སྟེ། །གདུག་པ་ཐམས་ཅད་རྡོ་རྗེའི་ཞལ་དུ་འདྲེན། །མི་བཟད་མཆེ་བ་གཙིགས་པའི་ཞལ་གདངས་ཤིང་། །ཁམས་གསུམ་ཟ་བར་ཆས་པའི་རྐན་སྒྲ་ཅན། །ཉི་ཟླ་རབ་ཏུ་འབར་བའི་སྡང་མིག་གིས། །བདུན་དཔུང་བསྲེག་པར་མཛད་ལ་ཕྱག་འཚལ་ལོ། །ཞེས་པའི་ཤྭ་ལོ་ཀ་གཉིས་པོ་ལ་ལྷའི་རྐང་སྟོན་སྟོབ་པའི་རྩ་དབྱངས་བཅུག་སྟེ། འོད་ཕུང་སྟུག་པོ་ཞེས་པའི་བར་རྐང་གཡོན་བརྐྱང་དང་ལག་མཉམ་སྟེ་འདུག །སྤྲིན་ལྟར་ལ་སྟོད་གཡོམ་དང་བཅས་པ་རྐང་གཡས་གཡས་སུ་སྤོས་ནས། འཁྲིགས་པ་ལ་རྐང་གཡོན་དྲུད་ཅིང་ལག་གཉིས་གཡས་སྟོབ། ལ་འ་ཞེས་པར་རྐང་གཡོན་བཏེགས་ནས་ཡི་ཡ་དོར་སྟབས་སུ་ཕབས། འ་ཝའི་འེ་ཡ་རྣམས་ལ་རང་སར་འགྱིང་། འཇིགས་བྱེད་རྔམ་སྟབས་ཀྱིས་རྐང་པ་གཅིག་པོར་རྐང་ལག་ལྡོག་པས་གཡོན་སྟོབ་སྟེ། ཚུལ་དེས་གཡས་གཡོན་རེས་མོས་ཀྱིས་ཤྭ་ལོ་ཀ་དང་པོ་སོང་བའི་མཇུག་གི་འེ་ཡ་ཞེས་པར་རྐང་གཡས་གཡས་སུ་སྤོས་པའི་ལེན་ནས་ཡོང་ཕྱོགས་སུ་རྐང་གཡོན་ནས་བརྩམས་པའི་བཞི་འགྲོས་ལ་བཅུག་པའི་གཡོན་འགྲོས་ཀྱིས་གསུམ་བཞི་ཞེས་པར་ཡངས་པད་མཐར་ལག་གྱེན་བསྟན་མཉམ་ནས། མི་བཟད་མཆེ་བ་སོགས་ལ་དབྱངས་འགྲོས་གཞན་སྔར་ལྟར་ལས་ཐོག་མར་གཡོན་སྟོབ་དང་མཇུག་ཏུ་གཡས་ནས་བརྩམ་པའི་བཞི་འགྲོས་ཀྱིས་འགྲོ་ཕྱོགས་ལ་བསྐོར་མཐར་ལག་གྱེན་མཉམ་ནས། དུག་གསུམ་སྟོབ་པ་རྒྱས་པ་ནི། འབྱུང་པོའི་ཤ་ནི་ཟན་ལས་ཞིམ། །གཏི་མུག་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །སྐུ་ཡི་དངོས་གྲུབ་སྩལ་དུ་གསོལ། །འབྱུང་པོའི་ཁྲག་ནི་ཆང་ལས་ཞིམ། །འདོད་ཆགས་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །གསུང་གི་དངོས་གྲུབ་སྩལ་དུ་གསོལ། །འབྱུང་པོའི་རུས་པ་མར་ལས་ཞིམ། །ཞེ་སྡང་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །ཐུགས་ཀྱི་དངོས་གྲུབ་སྩལ་དུ་གསོལ། །ཞེས་ཤྭ་ལོ་ཀ་གསུམ་པོ་ལ་རེ་རེ་ལ་གཡས་གཡོན་དབུས་རྣམས་སུ་འགྲོ་ཞིང་། བསྡུས་པ་ལ་དགའ་ན། དུག་གསུམ་དགྲ་བགེགས་བསྒྲལ་བ་ཡི། །ཤ་ཁྲག་རུས་གསུམ་སོགས་ཀྱི་ཤྭ་ལོ་ཀ་གཅིག་པོར་དུག་གསུམ་སྟོབ་ཀྱི་རྩ་དབྱངས་རྩ་གདངས་སུ་གྲགས་པས་བཀབ་སྟེ་ཧཱུྃ་ལ་རྐང་གཡོན་བཏེགས་པའི་ལེན་ནས། ཚིག་རྐང་གི་འོག་ཐམས་ཅད་ལ་རྐང་གཡས་འདེགས་པ་ཕྱོགས་སོ་སོར་ལྡོག་ཚུལ་ཤེས་པར་བྱས་ལ། ལག་གཉིས་སྟོབ་པའི་སྟངས་ཀ་གཡས་གཡོན་ཁྱེར་ཞིང་རྐང་པ་གཡས་གཡོན་རེ་མོས་ཀྱིས་འདེགས་འབེབས་བྱེད་ལ་འཇོལ་འགྲོས་སུ་གྲགས་པས་ཚིག་རྐང་དང་པོ་ལ་ཡོང་ཕྱོགས། གཉིས་པར་འགྲོ་ཕྱོགས། གསུམ་པར་དོ་རའི་རྒྱབ། བཞི་པར་དབུས་སུ་འགྲོ་བ་སྟེ། དེ་དག་ལ་རྡོ་རྗེ་སྲིན་པོའི་བསྟབ་འཆམས་ཞེས་བྱའོ། །དེ་ནས་དབྱངས་མཇུག་གི་གསོལ་ལ་ཞེས་པར་རྐང་གཡོན་བཏེགས་པས་ལེན་ནས་ཕཊ་ཀྱིས་བསྒྱུར་ཏེ། རྡོ་རྗེ་ཕྱེད་འགྲོས་ཚར་གསུམ་དང་སྦྲུལ་ནག་འཁྱིལ་འགྲོས་ཀྱིས་ཆས་འཇུག་ཁང་པར་རིམ་གྱིས་འགྲོ་ཚུལ་ནི་རྩ་འཆམས་ཇི་ལྟ་བའོ། །འདིར་རྡོལ་ཐབས་སུ་སྨྲ་བ་ཁ་ཅིག །རྩ་འཆམས་དང་གྲུབ་འཆམས་འདི་ཕུར་པའི་འཆམས་ཡིན་པས་སྒྱུ་འཕྲུལ་སོགས་ལ་སྦྱོར་བ་ནི་རིགས་པ་མ་ཡིན་ཞེས་ག་ཞ་བྱེད་པ་ནི་རང་རང་གི་མཐོང་རྒྱ་དང་རྣམ་དཔྱོད་ཆུང་བ་སྟོན་པ་ཙམ་སྟེ། རྒྱུ་མཚན་སྒྱུ་འཕྲུལ་ཁྲག་འཐུང་གི་འཆམས་ཀྱི་ཕྱག་བཞེས་ཟུར་ཆེ་ཆུང་ནས་རིམ་པར་འདར་ལ་བབ་སྟེ། ཆོས་རྗེ་བསོད་རྒྱན་པའི་བཀའ་བཞིན་ཤེས་རབ་སྣང་བས་ལམ་གྱི་དཀའ་སྤྱད་བཟོད་པར་བྱས་ནས་འདར་སྟོན་གྱི་དྲུང་དུ་ཕྱིན་ཏེ་ཚུལ་འདི་ལ་མཁས་པར་སྦྱངས་ཏེ། རྗེས་ཆོས་རྗེ་ཨེ་ཝཾ་རིམ་པར་རྣམས་ལ་བསླབས་ནས་ཕུར་པ་ལའང་སྒྱུ་འཕྲུལ་ཁྲོ་བོའི་རྩ་འཆམས་ཁོ་ནའི་ཕྱག་ལེན་ཚར་གཉིས་མཛད་ནས་སླད་ཀྱིས་ཕུར་འཆམས་སུ་བསྒྱུར་བ་ཡིན་པར་ལུས་འགྱུར་སྣང་བ་ལས། བདག་གིས་བླ་མའི་གནང་བ་ཐོབ། །བཀའ་བཞིན་བགྲོད་དཀའི་གནས་སུ་ཕྱིན། །དགོངས་བཞིན་སློབ་དཔོན་དམ་པ་རྙེད། །ཚུལ་བཞིན་འདི་དོན་བརྩོན་པས་སྦྱང་། །བཞེད་བཞིན་ལུས་བསྒྱུར་ཇི་བཞིན་ལོན། །ཆོས་ཀྱི་རྗེ་ལ་གཟིགས་པར་ཕུལ། །ཇི་བཞིན་ཡིན་ཞེས་རྗེས་སུ་གནང་། །བཀའ་འཁོར་དང་བཅས་རྣམས་ལ་བསླབ། །འདི་ལ་ཕྱག་ལེན་ལན་གཉིས་མཛད། །དེ་རྗེས་འབྱུང་གཞི་རཀྟ་དང་། །ཀེང་རུས་གཞལ་ཡས་ཁང་རྣམས་བསྣན། །ཀ་རི་སེང་ཧའི་འཆམས་ཚུལ་རྣམས། །ཕྱག་བརྙན་ཕྲ་མེན་ཕྱག་རྒྱར་བསྒྱུར། །འདི་ལ་ཕྱག་ལེན་མང་དུ་མཛད། །ཅེས་གསུངས་པ་ལྟར་ཡིན་པས་འདིར་སྒྱུ་འཕྲུལ་ཁྲོ་བོ་ལ་སྦྱར་བ་ནི་རང་ནོར་རང་གིས་སྤྱོད་པའི་ཕྱིར་ཤིན་ཏུའང་རིགས་ཤིང་འཐད་པ་ལགས་སོ། །དེས་ན་འདི་ཡི་ལག་ཁྲིད་ཀྱི་བརྒྱུད་པའང་། རྒྱལ་པོ་ཛཿནས་མཁས་པ་མི་གསུམ་ལ་བརྒྱུད་དེ་བོད་ཀྱི་ལོ་ཆེན་རྨ་གཉགས། གནུབས་ཆེན་ཡབ་སྲས། ཟུར་ཆུང་བ། གླན་ཆུ་བར་པ། རྒྱལ་བ་རྒྱ། སྒོམ་ཕུག་པ། འདར་སྟོན་གྲུབ་རྒྱལ། སྟོང་གསུམ་རྒྱལ་པོ། འདར་སྟོན་མཆེད་གཉིས། འདར་ཆོས་དབང་། དཔའ་འདར་རྣམ་གཉིས་དང་འབྲོ་སྟོན་ལ་བསྟན་པ་ལས། འདར་སྟོན་རིན་རྒྱལ། ཆོས་སློང་བ་བསོད་ནམས་དཔལ། སློབ་དཔོན་བྲག་རྡོར་པ། ཆོས་བསོད་གཉིས། ཆོས་རྒྱལ་གྲགས་པ་འབྱུང་གནས། གར་ཐིག་པ་ཆོས་དབང་། ཁོས་སྔགས་འཆང་ངག་དབང་གྲགས་པ། མི་ཡི་དབང་པོ་བི་ཛ་ཡ། གར་ཐིག་པ་ཀུན་འབྱུང་། མཁས་པ་བློ་བཟང་རབ་བརྟན་ཏེ་དེ་ཉིད་ཀྱི་དྲུང་དུ་ཁོ་བོ་ཅག་གིས་ཀྱང་རྗེ་བླ་མའི་བཀའ་སྩལ་ཐོད་དུ་བཅིངས་ནས་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་ཆེན་པོ་འདི་ཉིད་དུ་ཚུལ་བཞིན་དུ་སྦྱངས་པ་ལས་ཅུང་ཟད་ཤེས་པར་རློམ་པ་ཡིན་ནོ། །གཞན་ཡང་སེང་རྒྱ་མཁར་བ་དང་། སོ་ལུང་བའི་ཁྲག་འཐུང་རྩ་འཆམས། ཟུར་ཡང་དབེན་པའི་དམ་ཅན་གྱི་འཆམས་རྣམས་མཐོང་ཞིང་འཆམས་ཚུལ་གྱི་གནད་ཅུང་ཟད་རིགས་པར་བྱས་ཏེ། ཡི་གེ་འདི་ཡང་འདར་གྱི་ཡིག་རྙིང་དང་ལུས་འགྱུར་སྣང་བའི་ནང་གི་ཁྲོ་བོ་ང་བརྒྱད་ཀྱི་ཕྱག་ཆེན་བསྒྱུར་ཚུལ་སོགས་ལ་གཙོ་བོར་བརྟེན་ཅིང་། སེ་དང་རོག་གི་ཡི་གེ་སོགས་ལའང་ལེགས་པར་བརྟགས་ཏེ་ཁུང་དག་ཅིང་གོ་བདེ་བར་སྤེལ་བ་ཡིན་ནོ། །དཔལ་ལྡན་ཁྲག་འཐུང་སྒྱུ་འཕྲུལ་རྡོ་རྗེའི་གར། །ཀུན་བཟང་རྣམ་པར་རྩེན་པའི་རོལ་པ་ཡི། །གསལ་བར་མཚོན་འདི་མྱོས་བཙུན་གར་ཐིག་པ། །དྷརྨཱ་ཤྲཱིས་བརྗེད་བྱང་ཉིད་དུ་སྤེལ། །འདི་ལས་རབ་དཀར་བསོད་ནམས་གང་ཐོབ་དེས། །རྡོ་རྗེ་ལུས་ཀྱི་སྤྱོད་པ་རྨད་བྱུང་ལ། །བརྟེན་ནས་འགྲོ་ཀུན་ལས་དང་དངོས་གྲུབ་ཆེར། །བདག་གིར་སྐལ་བ་བཟང་པོ་མྱོང་གྱུར་ཅིག །ཤུ་བྷཾ་མསྟུ། སརྦ་ཛ་ག་ཏཾ།། །།

མཆོད་གར་གྱི་བརྗེད་བྱང་མཆོད་སྤྲིན་རྣམ་པར་སྤྲོ་བའི་རོལ་མོ། དྷརྨཱ་ཤྲཱི།

མཆོད་གར་གྱི་བརྗེད་བྱང་མཆོད་སྤྲིན་རྣམ་པར་སྤྲོ་བའི་རོལ་མོ་ཞེས་བྱ་བ་བཞུགས་སོ། །མཆོད་སྤྲིན་རྣམ་པར་སྤྲོ་བའི་རོལ་མོ་ཞེས་བྱ་བའི་གར་གྱི་བསྟན་བཅོས། དཔལ་བདེ་བ་ཆེན་པོ་གར་གྱི་དབང་ཕྱུག་ལ་ཕྱག་འཚལ་ལོ། །དབང་པོའི་སྤྱོད་ཡུལ་དག་པས་ཆོས་སོ་ཅོག །ཀུན་ཏུ་བཟང་པོའི་རོལ་མོར་རྟག་འཆར་བའི། །སྒྱུ་འཕྲུལ་རྡོ་རྗེའི་གར་མཁན་མཆོག་དེ་ལ། །བཏུད་ནས་རྡོ་རྗེ་གར་གྱི་བསྟན་བཅོས་བྱ། །འདིར་དཔལ་སངས་རྒྱས་ཐམས་ཅད་མཉམ་པར་སྦྱོར་བའི་རྒྱུད་དང་། ཟླ་གསང་ཐིག་ལེ་རྣལ་འབྱོར་ནང་པའི་ཚོགས་རྒྱུད་སོགས་བླ་ན་མེད་པའི་རྒྱུད་སྡེ་དུ་མ་ནས་གསུངས་པའི་རྡོ་རྗེའི་ལྷ་མོ་རྣམས་ཀྱི་བཞི་བསྣོལ་དང་། སུ་ར་ཏོ་བཅུ་དྲུག་གི་སྒོ་ནས་མཆོད་པའི་གླུ་གར་ཇི་ལྟར་བསྒྲུབ་པའི་ཆོ་ག་རོང་ཟོམ་ཆེན་པོས་མཛད་པའི་གར་ཡིག་གི་དགོངས་པ་སོར་བཞག་པ་ལ། ཡུན་རིང་པོའི་དུས་ཀྱི་བསྐལ་པས་ལུས་ངག་གི་ཉམས་དང་འགྱུར་བའི་ཁྱད་པར་ཅུང་ཟད་ཉམས་པ་དག །ཕྱི་འགྱུར་བའི་ལག་ལེན་བརྒྱུད་པ་དང་སྦྱར་ན་མི་འགལ་བར་མཐོང་ནས། ཐུན་མོང་གི་འགྱུར་བ་ཇི་ལྟར་རིགས་པ་གུར་གར་སོགས་ལས་ཀྱང་ཁ་བསྐང་སྟེ་བཤད་པར་བྱའོ། །དེ་ལ་རེ་ཞིག་ལུས་འགྱུར་སྤྱིའི་ཉམས་འདོན་ཚུལ་སྨོས་ཏེ། ཇི་སྐད་དུ། ཆུ་སྐྱེས་ཞལ་ནི་འཛུམ་བཅས་པ། །ཡངས་པའི་སྤྱན་གྱིས་གར་མཛད་དེ། །ཕྱག་དང་ཞབས་ནི་བསྒྱུར་བ་ཡིས། །རབ་ཏུ་དགྱེས་ལྡན་སྨིན་མ་བསྒྱུར། །ཡིད་ཙམ་འཛུམ་པའི་སྤྱན་ཟུར་གཟིགས། །ཤ་རྒྱས་བརླ་ནི་ནུ་མར་འདུད། །སྐེད་པའི་དབྱིབས་ནི་རྣམ་པར་སྤང་། །སྣམས་ཀྱི་ངོས་ཀྱང་ཆེ་ལ་མཛེས། །ཆགས་པ་ཅུང་ཟད་ཚེམས་ཀྱི་གནོན། །ཚེམས་ཀྱི་ཕྲེང་བ་ཀུནྡཱ་ཟླ། །མི་དྲག་ཟློག་པའི་དབུགས་འབྱིན་ཅིང་། །རབ་ཏུ་དགའ་ཆེན་དགྱེས་པས་བསྟོད། །ཕྱག་གཉིས་གར་དང་བཅས་པ་ཡིས། །མདུན་དུ་ཐལ་མོ་བཞག་པར་བྱ། །སོར་མོ་ཀུན་གྱི་རྩེ་མོ་ལ། །ཕ་རོལ་ཕྱིན་པའི་ཚོགས་རྣམས་བསམ། །ཞེས་གསུངས་པ་ལྟར། སྤྱིར་གཅེས་པའི་ཉམས་དང་ལྡན་པས་གར་བྱ་བའི་རིམ་པ་ལ། ཐོག་མར་གནས་དབེན་པར་སྐྱབས་སེམས་སྔོན་དུ་འགྲོ་བས་ལྷའི་ང་རྒྱལ་བརྟན་པར་བཟུང་ནས། ཆ་བྱད་རྣམས་སེམས་ཉིད་འགགས་པ་མེད་པའི་ཡེ་ཤེས་ཀྱི་རོལ་རྩལ་ཙམ་དུ་རང་སྣང་བར་སེམས། ལྷའི་ཆ་བྱད་ལྟ་བུའི་ཆས་སུ་ཞུགས་ནས། ༈ གང་དུ་ལས་བྱ་བའི་གཞིར་འགྲོ་བ་དང་ལྷན་ཅིག་ཁྲོ་བོའི་བརྗིད་གླུ་སྲིན་པོའི་ང་རོ་དང་སྦྱར་བའི་སུམྦྷའི་གླུ་འགྲོས་ཀྱིས་བགེགས་གཞོམ་པར་བྱ་སྟེ། ༀ་སུམྦྷ་དྲིལ་བུའི་འོག་ཏུ་རྡོ་རྗེ་འགྲེང་སྟབས་སུ་བཟུང་རྐང་གཡས་བཏེག་སྟེ་འགྲོ་ཕྱོགས་སུ་གོམ་གང་ནུར་ནས་རྐང་གཡོན་གྲུད། ནི་སུམྦྷ་དེ་ཉིད་དུ་སླར་ཡང་རྐང་གཡས་འདེབས་འབབ། ཧཱུྃ་ཕཊ། ལ་དེ་ཁར་འགྱིངས་ནས་དྲིལ་བུ་གསིལ། གྷྲྀཧྞ་རྐང་གཡོན་འགྲོ་ཕྱོགས་སུ་གོམ་གང་ནུར་ནས་གཡས་གྲུད། གྷྲྀ་ཧྞ་དེ་ཉིད་དུ་གཡོན་འདེབས་འབབ། ཧཱུྃ་ཕཊ། དེར་འགྱིངས་ཤིང་དྲིལ་གསིལ། གྷྲྀཧྞ་པ་ཡ་རྐང་གཡས་འགྲོ་ཕྱོགས་ལ་རྒྱབ་འགྲོས་ཀྱིས་གོམ་གང་ནུར་ཞིང་གཡོན་ཕྱིར་གྲུད། དེ་བཞིན་དུ་ལུས་ཀྱང་ཅུང་ཟད་གཅུ། གྷྲྀཧྞ་པ་ཡ་དེ་ཉིད་དུ་སླར་ཡང་གཡས་རྒྱབ་ནུར་ཧཱུྃ་ཕཊ། ལ་འགྱིངས་ཤིང་དྲིལ་གསིལ། ཨཱ་ན་ཡ་ཧོཿ དེ་ཉིད་དུ་གནས་པས་རྐང་གཡོན་བཏེག་སྟེ་རྐང་མགོ་གཡོན་ཕྱོགས་སུ་ཅུང་ཟད་བསྐོར་ཞིང་འགྱིངས། བྷ་ག་ཝཱན་ལ་རྐང་སྟབས་དེ་ཁོ་ན་ལྟར་བྱ། བིདྱཱ་ལ་ཅུང་ཟད་ཛམ་ནས། རཱ་ཛ་ཡ་མདུན་དུ་གཡོན་བཏེག་འབེབས་ཀྱིས་ལེན་ནས། ཧཱུྃ་ཕཊ། རྡོ་རྗེ་གསོར་ཞིང་དྲིལ་བུ་གསིལ་བ་དང་བཅས་པས་རྐང་གཡས་འགྲོ་ཕྱོགས་སུ་བོར་པའི་གོམ་ཆུང་སྟེ། ཚུལ་དེས་ཆས་འཇུག་ཁང་པ་ནས་རིམ་པར་དོན་ཏེ་དོར་འཁོར་བ་དང་། སུམྦྷ འི་གླུ་ཚར་གཅིག་ལ་གཞན་སྔར་དང་འདྲ་བ་ལས། རྐང་སྟབས་ཀྱི་ཁྱད་པར། ༀ་སུམྦྷ་ནི་སུམྦྷ་རྐང་གཡས་བཏེག་སྟེ་ཆོས་བསྐོར་ལ་དལ་བུས་བསྐོར་ནས། ཧཱུྃ་ཕཊ། ལ་འགྲོ་ཕྱོགས་སུ་རྐང་གཡས་ལྕགས་རིས་ལྟ་བུར་ཕབ། གྲྀཧྞ་གྲྀཧྞ་ཧཱུྃ་ཕཊ། རྐང་གཡོན་མདུན་དུ་གོམ་གང་ནུར་ཏེ་ལུས་གཡས་སུ་གཅུ། འགྲོ་ཕྱོགས་ལ་རྒྱབ་ཟུར་ཅུང་ཟད་ཕྱོགས་པས་རྐང་པ་བསྣོལ་མར་འོང་བ་བྱ་སྟེ། དེ་མན་ཆད་སྔར་ལྟར་རོ། ༈ །དེ་ནས་སྒེག་འགྲོས་ཀྱིས་དབང་པོའི་སྤྱོད་ཡུལ་ཐམས་ཅད་ལྷ་དང་ལྷ་མོའི་རོལ་པར་གསལ་གདབ་པས་མཆོད་པའི་གཞི་བཟུང་བ་ནི། དྲི་ཟའི་རྒྱུད་མང་འཁྲོལ་བ་ཞེས་བྱ་བའི་གླུ་དང་སྦྱར་ཏེ། ༀ་ལག་གཉིས་དཔུང་ཐད་ཙམ་དུ་ཕྱིར་གདེངས་ནས་རྐང་གཡས་བཏེག་ལ་དེ་ཉིད་དུ་ཟོལ་འབེབ། བཛྲ་བགྱིང་བ་དང་བཅས་པས་ལག་གཉིས་པད་བསྐོར་དང་རྐང་གཡོན་འདེབས་འབབ། ལཱ་སྱེ། མདུན་དུ་རྐང་གཡས་འདེབས་འབབ་དང་ལག་གཉིས་ཁ་སྦུབ་ལས་ཕྱེད་པད་ཀྱི་རྡོ་རྗེ་ཁུ་ཚུར་གཉིས་ལུས་བག་དང་བཅས་པས་དཀུར་བརྟེན། མཱ་ལེ། རྐང་གཡོན་འགྲོ་ཕྱོགས་སུ་གོམ་གང་ཕྱིན་ནས་གཡས་བརྐྱང་དང་། ལག་གཉིས་ཁུ་ཚུར་གཡོན་པར་གཡས་པས་ནང་བསྐོར་གྱི་སྙིང་ག་ནས་གྱེས་ཏེ་དཔུང་བའི་ཐད་ཀ་ཙམ་ནས་ཕྱིར་སྟོན། གཱིརྟི། རྐང་གཡས་གཡོན་པའི་མདུན་ནས་འགྲོ་ཕྱོགས་ལ་གོམ་གང་ཕྱིན། ལག་གཡོན་ཁུ་ཚུར་ནང་བསྟན་གྱི་སྒྲེང་བའི་གྲུ་མོའི་འོག་ཏུ་གཡས་པའི་ཁུ་ཚུར་ནང་དུ་ཕྱོགས་པས་རྒྱུད་བརྟུལ་ཚུལ། ནྲཱྀ་ཏྱེ། རྐང་གཡོན་བཏེག་ཅིང་ལག་གཉིས་གྱེན་བསྟན་མཐུར་བབ་མས་གཡས་དང་གཡོན་དུ་གར་བསྒྱུར་ཏེ། ཧཱུྃ་ཕཊ། རྡོ་རྗེ་གསོར་ཞིང་དྲིལ་བུ་གསིལ་བ་དང་བཅས་པས་རྐང་གཡས་མདུན་དུ་གོམ་གང་བོར་བའི་གོམ་ཆུང་གིས་འགྲོ་བ་སྟེ། ཚུལ་དེ་ལན་གསུམ་ལྡབ་བོ། ༈ །དེ་ནས་མཉམ་སྦྱོར་ལས་གསུངས་བའི་རབ་ཏུ་དགའ་བའི་གླུ་ཚིག་རྐང་པ་དྲུག་དང་། གཏོར་རྒྱུད་ལས། ༀ་མུ་དང་ནི་ཧུ་མུ་དང་། །ཧུ་ཡི་ཁ་བརྒྱན་དང་བཅས་པས། །ལྷ་མོ་བཞི་བསྣོལ་གསལ་བར་བྱེད། །དོན་དམ་གླུ་དང་ཆགས་ཆེན་གླུ། །ཏ་ཐཱའི་གླུ་དང་དམ་ཚིག་གླུ། །ཐམས་ཅན་བདེ་བ་ཆེན་པོའི་གླུ། །ཞེས་པ་ལྟར་ཨོ་སོགས་གླུའི་རྒྱན་ལྔ་དང་སྦྱར་བའི། དོན་དམ་གྱི་གླུ་སོགས་གླུ་ལྔ་དང་བཅས་པས་མཆོད་པའི་སྤྲིན་སྤྲོ་བ་ལས། དང་པོ་རབ་དགའི་གླུ་འགྲོས་ནི། དྲང་སྲོང་གི་སྙེམས་གླུ་ཤངྑཱའི་སྒྲ་ལྟ་བུ་དང་སྦྱར་ཏེ། རབ་ཏུ་ལ་ཛམ་ནས། དགའ་བའི་རྐང་གཡས་ནང་དུ་སྔོན་འགྲོའི་མཉམ་པ་ལག་གཡས་ནང་བསྐོར་གྱི་འོག་ནས་སྟེང་དུ་འཕྱར་བའི་དཔྲལ་ཐད་ཐལ་མོ་དང་ལག་གཡོན་དྲིལ་བུ་ཕྱིར་བསྟན་གྱི་གདེངས་གཞོལ། བདག་ལག་གཡས་གཡོན་པའི་སྟེང་ནས་ཕྱིར་འཐེན་ཅིང་། རྐང་གཡས་ཕྱིར་ནུར། ལ་ཞེས་པར་རྐང་གཡོན་ནང་དུ་བཏེགས་འབབ་ནས། ཕྱག་འཚལ་ལོ། །ལག་གཡས་དཔུང་ཐད་གདེངས་སྟབས་དང་། གཡོན་གདེངས་གཞོལ་གྱི་བོན་བསྐོར་ལ་དལ་བུས་བསྐོར། འ་འི་ཝ་འ་འི། རྐང་གཡོན་ཕྱིར་འཐེན་ཅིང་རྐང་གཡས་འདེབས་འབབ་ཀྱི་གཡས་བརྐྱང་དང་ལག་གཉིས་སྙིང་གར་ཐལ་སྦྱར། དེ་བཞིན་རྐང་གཡས་མདུན་དུ་ཟོལ་གྱི་སྤོས་པའི་རྒྱབ་ཏུ་རྐང་གཡོན་བོར། ལག་གཉིས་ཐལ་མོ་རྒྱབ་སྤྲོད་ཀྱི་རྣམ་པ་སོ་སོར་རིམ་ཕྲལ་གྱིས་གཡས་དཔུང་རེག་དང་གཡོན་གདེངས་གཞོལ། གཤེགས་པ་ཐམས་ཅད་རྐང་གཡས་ཕྱིར་ཟོལ་ལྡོག་ནས་གཡོན་པའི་རྒྱབ་ཏུ་གཡས་པ་བོར་ཞིང་། ལག་གཡས་རིམ་གྱིས་ཕབ་པའི་གདེངས་གཞོལ་དང་། གཡོན་དཔུང་རེག །གྲུབ་པར་གཡས་སྔོན་འགྲོའི་རྐང་མཉམ། ལག་གཡས་ནང་བསྐོར་སྟེང་འཕྱར་གྱི་དཔྲལ་ཐལ་དང་གཡོན་གདེངས་གཞོལ། མཛོད། །དེ་ཉིད་དུ་ལུས་ལྡེམ་བག་དང་བཅས་པས་གནས་ནས་ལག་གཡས་དཔུང་རེག །དེ་བཞིན་ལག་གཉིས་དཔུང་ཐད་ཙམ་དུ་ཕྱིར་གདེངས་ནས་རྐང་གཡས་གཡས་ཕྱོགས་སུ་འདེབས་འབེབས། གཤེགས་པའི་རྐང་གཡོན་གཡོན་དུ་འདེབས་འབེབས་དང་། ལག་གཡས་གཡོན་སྟེང་ནས་ཕྱིར་འཐེན་ཅིང་རྐང་གཡས་ཕྱིར་ནུར་བས་ཛམ་ནས། དམ་ལ་རྐང་གཡོན་ནང་དུ་རྐྱང་། པ་གྲུབ་པར་ལག་གཉིས་པད་བསྐོར་དང་། རྐང་གཡས་ནང་དུ་བོར་བའི་རྒྱབ་ཏུ་གཡོན་དང་། གཡོན་པའི་རྒྱབ་ཏུ་གཡས་ནུར། མཛོད། །རྐང་གཡོན་གཡོན་ཕྱོགས་སུ་ཁྱེར་བའི་རོལ་འབེབས་དང་བསྟུན་ལག་གཉིས་ཀྱང་ཁ་སྦུབ་གཡོན་དུ་མཉམ་རོལ། འ་འི་ཝ་རྐང་གཡས་གཡས་དང་ལག་གཉིས་དེ་ལྡོག་གཡས་རོལ། འ་འི་རྐང་གཡོན་གཡོན་དུ་བོར་ཞིང་ལག་གཉིས་གྱེན་བསྟན་གཞོལ་གྱི་མཐེབ་མཛུབ་སྤྲད་པའི་སེ་གོལ། དམ་ཚིག་རྐང་གཡོན་འདེབས་དང་ལག་གཉིས་གྱེན་བསྟན་གཡས་ཕྱོགས་སུ་འཕྱར། དམ་པ་རྐང་གཡས་འདེབས་འབེབས་དང་ལག་གཉིས་གྱེན་བསྟན་གཡོན་འཕྱར། གྲུབ་ལག་གཡས་ཐུགས་ཀར་རྡོ་རྗེ་འགྲེང་བུར་བཟུང་བ་ལྡེམ་བག་དང་བཅས་པས་གཡས་སུ་བསྐོར་ཞིང་གཡོན་དྲིལ་བུ་གདེངས་གཞོལ་གྱིས། རྐང་གཡས་ནང་དུ་བོར་བའི་རྒྱབ་ཏུ་གཡོན་དང་། གཡོན་རྒྱབ་གཡས་ནུར། པར་གཡོན་འདེབས་འབེབས་ཀྱི་རྐང་མཉམ། མཛད་དུ་གསོལ། །རྐང་གཡོན་ཕྱིར་འཐེན་དང་གཡས་བརྐྱང་། ལག་གཡས་དཔྲལ་ཐལ་དང་གཡོན་གདེངས་གཞོལ། མཆོད་པ་ལག་གཉིས་ཕྱིར་གདེངས་ནས་རྐང་གཡས་འདེབས་ཆུང་། ཆེན་པོ་གཡོན་འདེབས་ཆུང་དང་། རྐང་ལག་གཡས་ཕྱིར་འཐེན་གྱི་ཛམ་ནས། ཐམས་ཅད་རྐང་ནང་དུ་གཡོན་བརྐྱང་། དག་པར་མཛོད། །ལག་པད་བསྐོར་དང་། རྐང་གཡས་ནང་བོར་གྱི་རྒྱབ་ཏུ་གཡོན་དང་། གཡོན་རྒྱབ་གཡས་ནུར་རྗེས། གཡོན་ཟོལ་འབེབས་ཀྱི་རྐང་མཉམ། འ་འི་ཝ་རྐང་གཡས་བཏེག་ཅིང་ལག་གཉིས་ཆོས་འཆད། འ་འི་རྐང་མཉམ། ལག་གཡས་དཔུང་རེག་དང་གཡོན་གདེངས་གཞོལ། མཆོད་པ་ཆེན་པོ་ལ་གཡས་གཡོན་གྱི་འདེབས་ཆུང་ཛམ་དང་བཅས་པ་སྔར་ལྟར་ལས། ཐམས་ཅད་ལག་པད་སྐོར། རྐང་གཡས་ནང་བོར་གྱི་རྒྱབ་ཏུ་རྐང་གཡོན་དང་། གཡོན་རྒྱབ་གཡས་ནུར། གྲུབ་པར་རྐང་གཡོན་དང་ལག་གཉིས་ཁ་སྦུབ་ཀྱི་གཡོན་རོལ་དང་། རྐང་གཡས་གཡས་ཕྱོགས་བོར་ཞིང་། ལག་གཉིས་གཡས་གཞོལ་གྱེན་བསྟན་གྱི་མཐེབ་མཛུབ་སྤྲད་པའི་སེ་གོལ། མཛོད། །དེ་ཉིད་དུ་ལག་གཡས་དཔྲལ་ཐལ་དང་། གཡོན་གདེངས་གཞོལ་ལོ། ༈ །གཉིས་པ་རྒྱན་ལྔ་དང་སྦྱར་བའི་གླུ་ལྔས་མཆོད་སྤྲིན་སྤྲོ་བའི་གླུ་འགྲོས་ནི། ཝཾ་སའི་འགྱུར་གླུ་ཆུ་བྱའི་འགྲོས་ལྟ་བུ་དང་སྦྱར་ཏེ། ལག་པད་སྐོར་དང་། རྐང་པ། ༀ་པ་ན་པེཾ་ལ་རྐང་གཡས་ནང་དུ་བོར། པེ་ནུ་སུ་ར་ཏོ། རྐང་གཡོན་གཡས་ཀྱི་རྒྱབ་ཏུ་ནུར། ཏི་པུ་པ་ར་མུ་རྐང་གཡས་གཡོན་པའི་རྒྱབ་ཏུ་ནུར། སརྦ་ཏ་ཐཱ་ག་ཏ་གཡོན་ཟོལ་འབེབས་ཀྱིས་རྐང་མཉམ་རྗེས་ལ་ལག་གཉིས་ནང་དུ་བསྐོར་བས་ཛམ་ནས། སིདྡྷི་ཧུ་ལ་ལག་གཉིས་སྙིང་གར་ཐལ་སྦྱར་དང་རྐང་གཡས་བརྐྱང་། ས་མ་ཡོ་ཏ་མུ་རྐང་གཡས་སྔོན་འགྲོའི་མདུན་མཉམ་དང་ལག་གཉིས་སྤྱི་བོར་ཐལ་སྦྱར། སརྦ་མ་ཧཱ་སུ་ཁ་སིདྡྷི་ཧུ། རྐང་གཡོན་རྒྱབ་ནུར་གྱིས་གཡས་བརྐྱང་དང་ལག་གཉིས་སྙིང་གར་ཐལ་མོ་སྦྱར་རོ། །དེ་ནས་མཉམ་སྦྱོར་ལས། གྱེན་དུ་འཐོར་ཞིང་མཐུར་དུ་འབེབས། །བསྐོར་ཞིང་དེ་བཞིན་ཉུག་པ་དག །མེ་ཏོག་བདུག་པ་མར་མེ་མཆོག །དྲི་ཡི་མཆོད་པ་འབྱུང་བའི་མཆོག །གང་བའམ་སྟེ་སྟོང་པའང་རུང་། །ཞེས་གསུངས་པའི་ཕྱག་ཆེན་དང་སྦྱར་ནས་ལྷ་མོ་བཞི་བསྣོལ་དབུལ་བའི་གླུ་འགྲོས་ནི། གླུ་རྟ་སྔ་མ་ཉིད་དེ་བསྐུལ་མཚམས་མེད་པར་སྦྲེལ་ལ། ༀ་ཤྲཱི་ལག་པད་སྐོར་དང་། རྐང་གཡོན་འགྲོ་ཕྱོགས་སུ་ཕྱིན་པའི་རྩེར་རྐང་གཡས་འབེབས་པ་དང་མཉམ་དུ། བཛྲ་རཱ་ག་དྷུ་པེ་དྷུ། ཞེས་ལག་གཉིས་ཁུ་ཚུར་སྙིང་གའི་ཐད་ནས་མཐུར་དུ་སྦུབ་པ་བདུག་པའི་རྒྱ་བཅའ། ༀ་ཤྲཱི་རྐང་གཡས་ནང་བསྐོར་གྱིས་ཡོང་ཕྱོགས་སུ་ལོག་པའི་རྩེར་གཡོན་ཕབ་ཅིང་རྐང་གཡས་ཕྱིར་འཐེན་པ་དང་མཉམ་དུ། བཛྲ་རཱ་ག་པུཥྤེ་པུ། ཁུ་ཚུར་གྱེན་བསྟན་གྱི་མེ་ཏོག་འཐོར་ཚུལ། ༀ་ཤྲཱི་གཡོན་འགྲོས་ཀྱི་ལོག་པའི་རྐང་རྩེར་གཡས་ཕབ་ཅིང་གཡོན་ཕྱིར་ནུར་གྱིས། བཛྲ་རཱ་ག་ཨཱ་ལོ་ཀེ་ཧྲཱིཿ ཞེས་ཁུ་ཚུར་གཡས་གཡོན་མཐེ་བོང་གཉིས་སྦྲེང་བ་མར་མེའི་སྡོང་བུ་འཛིན་ཚུལ། ༀ་ཤྲཱི་གཡས་འགྲོས་ཀྱི་ལོག་པའི་རྐང་རྩེར་གཡས་ཕབ་ཅིང་གཡོན་ཕྱིར་ནུར་གྱིས། བཛྲ་རཱ་ག་གནྡྷེ་གན། ཞེས་ཐལ་མོ་གཉིས་ཕྱིར་བསྟན་དྲི་བྱུག་པའི་ཚུལ་ཏེ། འདི་བཞི་སོ་སོའི་ཕྱག་ཆེན་བཅིངས་པ་དང་ལུས་ཅུང་ཟད་དགྱེ་བས་མཆོད་པ་འབུལ་བ་ལྟར་བྱའོ། ༈ །དེ་ནས་ཟླ་གསང་ཐིག་ལེ་ལས། ཐལ་མོ་དེ་ཉིད་སྦྱར་བྱས་ཏེ། །རྡོ་རྗེ་བཅིངས་བྱས་བཅིངས་བཅས་ཡང་པར་བྱ། །དེ་ནས་དགའ་བྱེད་དབང་བསྐྱེད་དེ། །མདའ་ཡིས་ཚུལ་དུ་བཟུང་བར་བྱ། །ཞེས་གསུངས་པ་ལ་སོགས་པར་སོ་སོའི་ཕྱག་ཆེན་སུ་ར་ཏའི་སྔགས་དང་སྦྱར་ཏེ་ལྷ་མོ་བཅུ་དྲུག་གི་གར་བྱ་བ་ནི། སྒེག་མོའི་སྙེམས་གླུ་པི་ཝང་འགྱུར་གདངས་ལྟ་བུ་དང་སྦྱར་ཏེ། འདི་ཞེས་པར་ཛམ་ནས། ནི་རབ་དགྱེས་གཙོ་ལ་ལག་གཉིས་པད་བསྐོར། རྐང་པ་གཡས་ནང་དུ་ཐད་ཀར་བོར་བའི་གཡོན་དུ་རྐང་གཡོན་དང་། གཡོན་རྒྱབ་གཡས་དང་། གཡས་ཀྱི་རྒྱབ་ཏུ་གཡོན་བོར་བ་ནི་གར་གྱི་གཞི་བཅའ་བ་སྟེ། འོག་ཏུ་རྐང་ལག་སྟབས་ཅིག་དང་འདྲ་བ་ལ་བཞི་པད་དང་། རྐང་པ་འདྲ་བ་ལ་གཞི་བཅའ་ཞེས་ཟེར་རོ། །བོ་ཡི། །རྐང་གཡས་བརྐྱང་དང་ལག་གཉིས་ཁ་སྦུབ་མཉམ་བརྐྱང་ལས་གྱེན་བསྟན་སོ་སོར་གཞོལ། ཕ་རོལ་རྐང་གཡོན་བརྐྱང་དང་ལག་གཉིས་དབུང་རེག །ཕྱིན་མཆོག་སྡུད་པ་ཡིན། །རྐང་གཡས་གཡོན་གྱི་བྱིན་པར་བསྡུ་ཞིང་ལག་གཉིས་ཐུགས་ཀར་ཆོས་འཆད་ཀྱི་རྒྱ། སངས་རྒྱས་རྣམས་ཀྱི་ལག་གཉིས་ཁ་སྦུབ་ཕྱེད་པད་ཀྱིས་བླངས་པའི་ཁུ་ཚུར་དཀུར་བརྟེན་པ་སྒེག་མོའི་ཚུལ་དང་རྐང་གཡས་བཏེགས་མཚམས་ཀྱི་ཆོས་བསྐོར་ལ་དལ་བུས་བསྐོར། མྱོས་བྱེད་པ། །རྐང་གཡས་བཏེག་ཅིང་ལག་གཉིས་གཡས་ཀྱི་པུས་མོའི་ཐད་ནས་ཁྱེར་ཏེ་གཡོན་ཕྱོགས་སུ་ཐལ་མོ་གྱེན་བསྟན་འཕྱར་བ་དང་། དེ་ལས་རྐང་ལག་ལྡོག་ནས་བྱ་བ་དང་། གཡས་གཡོན་གྱི་ཁྱམས་བཅས་པའི་མཐར་རྐང་གཡས་བརྐྱང་དང་ལག་གཉིས་གྱེན་བསྟན་སོ་སོར་གཞོལ། དཔའ་བོ་ཐམས་ཅད་གཡས་སྔོན་འགྲོའི་རྐང་པ་མདུན་མཉམ་དང་། ལག་གཉིས་དཔྲལ་བར་ཐལ་སྦྱར། རྨོངས་པར་བྱེད། །རྐང་གཡོན་ཕྱིར་ནུར་ཞིང་གཡས་བརྐྱང་དང་། ལག་གཡས་རྡོ་རྗེ་ཐུགས་ཀར་འགྲེང་། གཡོན་དྲིལ་བུ་དཀུར་བརྟེན། ༈ དེ་ནས་ལྔ་པའི་ཀླུ་ཞེས་པ་མེ་ཏོག་ལྡན་དུས་ཁུ་བྱུག་སྒྲོགས་པ་ལྟ་བུ་དང་སྦྱར་ཏེ། ༀ་སུ་ར་ཏ་ལག་གཉིས་ཕྱེད་པད་འཁྱུད་རྒྱ། མ་ནོ་བྷ་ཝ་ཧྲཱིཿ རྡོ་རྗེ་ཐལ་མོ་ལས་རྡོ་རྗེ་བཅིངས་ཏེ་སྲིན་ལག་གཉིས་བརྐྱང་པ་ཅུང་ཟད་གཡོན་དུ་བསྐོར་ནས་གཡོན་དུ་རྩེ་མོ་ཕྱོགས་པ་མདའ་བཟུང་བའི་ཚུལ་ལོ། །པཱུ་ཛ་མེ་གྷ་ས་མུ་དྲ་ལག་གཉིས་གྱེན་བསྟན་པར་བསྣོལ་དང་རྐང་པ་གཞི་བཅའ། སྥ་ར་ཎ་མ་ཡེ་ཧཱུྃ། ལག་གཡོན་དཀུར་བརྟེན་ཅིང་གཡས་མཆོག་སྦྱིན་སྨིན་མཚམས་སུ་ཕྱར། རྐང་གཡས་བཏེག་མཚམས་ཀྱིས་ཆོས་སྐོར་དུ་བསྐོར་མཐར་གཡས་མཆོད་སྦྱིན་གྱིས་གཞོལ། ཏེ་རྐང་གཡས་བརྐྱང་ལག་གཡས་ཚིགས་ཕྱིར་འབྱིན་དང་གཡོན་དཀུར་བརྟེན། ན་རྐང་ལོག་སྟེ། རྐང་ལག་གཡོན་བཏེག་པའི་གར་དང་། ན་རྐང་ལག་གཡས་བཏེག་པའི་གར་ཏེ། བསྒྱུར་ཚུལ་ནྲྀ་ཏྱེ་དང་འདྲའོ། །འ་འ་འ་འ་རྐང་པ་གཞི་བཅའ་དང་། ལག་གཉིས་ཚིགས་ནང་འབྱིན་གཡས་གཡོན་རེ་མོས་ཁྱེར་མཐར་གྱེན་བསྟན་སོ་སོར་གཞོལ། ཏེ་བཞི་པད་མཐར་གཡས་བརྐྱང་དང་ལག་འཁྱུད་རྒྱ། ན་ལག་གཉིས་གྱེན་བསྟན་གཡོན་དུ་ཁྱེར་ཏེ་མཐེབ་གུང་སྤྲད་པའི་སེ་གོལ་སྒྲ་བྱ་སྟེ། ཀརྨ་མཱ་ལེར། རྡོ་རྗེ་སེ་གོལ་གཏོག་པ་ཡིས། །སངས་རྒྱས་ཐམས་ཅད་བསྡུ་བར་བྱ། །ཞེས་གསུངས་པའི་ཕྱིར་དང་། ཏེ་ཞེས་བྱ་བ་གླུ་ཡི་རྒྱུ། །ཐམས་ཅད་དགའ་བས་རབ་བསྒྲུབ་པ། །ན་ནི་ཤིན་ཏུ་རྣམ་འཕྲུལ་བའོ། །ཞེས་པ་ལྟར་རྒྱུད་གཞན་ལས་ཀྱང་ཏེ་ན་དང་སྦྱར་བའི་གླུ་མང་དུ་བྱུང་བ་ལྟར་དང་། པཱུ་ཛ་མེ་གྷ་སོགས་མཆོད་སྤྲིན་སྤྲོ་བའི་སྔགས་ཀྱང་ཀརྨ་མཱ་ལེར་གསུངས་པས་འདིར་ཡང་སྦྱར་རོ། །དེའི་རྒྱས་གདབ་ཀརྨ་མཱ་ལེ་ལས། ཀ་ཀ་ལ་ཡི་གླུ་ཡི་དབྱངས། །དུས་སུ་རབ་ཞི་བླང་བར་བྱ། །ཞེས་འབྱུང་བ་ལྟར་རབ་ཞིའི་འདར་ཁུགས་ཀྱི་གླུ་དང་། ཕོ་རོག་མདོ་སྡེ་མགོན་གྱི་ཕྱག་སྲོལ་ལས་བྱུང་བའི་དྲིལ་སྟབས་རྒྱ་སྦྱར་ཏེ། ཕྱག་རྐང་གཡས་གཡོན་འདེབས་འབེབས་དང་ལག་པའི་ཛམ་ལེན་ནས། ཝ་རྐང་གཡས་འགྲོ་ཕྱོགས་སུ་བོར། །རྡོ་རྗེ་གསོར་ཞིང་དྲིལ་བུ་གསིལ། །འ་འི་ཝའི་ལག་གཡས་ས་གནོན། །རྒྱ་ཝ་གཡས་སྐྱབས་སྦྱིན་དང་གཡོན་དྲིལ་བུ་གསིལ། འདི་ཡ་རྐང་གཡས་རྐང་གཡོན་གྱི་རྟིང་པའི་ཕྱི་ལོགས་སུ་བོར་ཞིང་ལག་གཡས་མཉམ་བཞག ། འེ་ཡ་རྐང་གཡོན་གཡས་པའི་རྩར་བསྡུ་ཞིང་། ལག་གཡས་མཆོག་སྦྱིན། ཡིས་ཕྱག་སྐྱབས་སྦྱིན་དྲིལ་གསིལ་ནས་རྐང་གཡོན་བཏེགས་པའི་ཛམ་ལེན། རྒྱས་ཡ་རྡོར་གསོར་དྲིལ་གསིལ། འེ་ལག་གཡས་ས་གནོན། ཡ་སྐྱབས་སྦྱིན། དྲིལ་གསིལ། བཏབ་ཝ་རྐང་གཡས་གཡོན་གྱི་རྟིང་པའི་ཕྱི་ལོགས་སུ་བོར་ཞིང་ལག་མཉམ་བཞག །པས། །རྐང་གཡོན་བསྡུ་ཞིང་ལག་གཡས་མཆོག་སྦྱིན། ཡ་སྐྱབས་སྦྱིན་དྲིལ་གསིལ། འོ་ཝའི་ཡའི་ཕྱི་མའི་ཛམ་བླངས་ཏེ། གསང་བའི་སྙིང་གའི་པདྨོ་ལ། །ཤིན་ཏུ་དགྱེས་པས་མཉེས་པར་གྱུར། །ཞེས་རྐང་པ་ཕྱི་མ་གཉིས་ལའང་འགྲོས་སྔ་མ་ཉིད་ལྡབ་བོ། །ཡང་སྒེག་མོའི་སྙེམས་གླུ་དང་སྦྱར་ཏེ། རྒྱ་ལ་ཛམ་ནས། འདིས་ལས་ཀུན། བཞི་པད། བྱེད་འགྱུར་ཏེ། །གཡས་པའི་གར་བསྒྱུར་ནས་རྐང་གཡས་བཏེག་སྟེ་ཆོས་སྐོར་ལ་བསྐོར། བདུད་རྣམས་རྐང་གཡས་གཡོན་པའི་རྒྱབ་ཏུ་བོར། ལག་གཡོན་ཁུ་ཚུར་ནང་བསྟན་དུ་སྒྲེང་བའི་གྲུ་མོའི་འོག་ཏུ་གཡས་པའི་ཁུ་ཚུར་ནང་དུ་བཞག །ཐམས་ཅད་འཇིགས་པར་བྱེད། །རྐང་པ་གཞི་བཅའ་དང་ལག་གཉིས་གྱེན་བསྟན་པར་བསྣོལ་གྱི་མཐར། སོ་སོར་གཞོལ་ཞིང་རྐང་གཡས་བརྐྱང་། རྒྱལ་བ་རྐང་གཡོན་བརྐྱང་དང་ལག་གཉིས་དཔུང་རེག །འདོད་ཆགས་བྲལ་སྤྱོད་པའང་། །གཡས་གཡོན་གྱི་གར་ཁྱམས་བཅས་མཐར་ལག་གཉིས་གྱེན་བསྟན་སོ་སོར་གཞོལ་ཞིང་རྐང་གཡས་བརྐྱང་། ཐམས་ཅད་འདི་ཡིས་རྐང་མདུན་མཉམ་དང་ལག་གཉིས་དཔྲལ་ཐལ། སློང་བར་བྱེད། །རྐང་གཡོན་ཕྱིར་ནུར་ཞིང་གཡས་བརྐྱང་དང་ལག་གཉིས་འཁྱུད་རྒྱས་ལྔ་པའི་གླུ་དང་སྦྱར་ཏེ། ༀ་སུ་ར་ཏ་ཕྱེད་པད་འཁྱུད་རྒྱ། བཛྲ་ཀཱི་ལི་ཀཱི་ལི་ཧཱུྃ། རྐང་པ་གཡོན་བརྐྱང་དང་། ལག་སྔར་མདའ་བཟུང་བའི་ཚུལ་གྱི་ཕྱག་རྒྱ་དེ་ཉིད་སྙིང་གར་བཙུགས་པའོ། །པཱུ་ཛ་མེ་གྷ་མན་ཆད་སྔར་ལྟར་རོ། །ཕྱག་རྒྱ་འདི་ཡིས་རྒྱས་བཏབ་སྟེ། །རྡོ་རྗེ་པད་མོ་ཕྱེ་བ་ཡིས། །ནམ་མཁའི་དཀྱིལ་འཁོར་མཐའ་དག་ཏུ། །མཛེས་པའི་སྐྱོན་དང་རོལ་ཅིང་འགྲོ། །ཞེས་རྒྱས་གདབ་འདི་ལ་ཡང་སྔ་མའི་མདའ་རྒྱ་སྙིང་གར་བཙུགས་པའི་ཕྱག་རྒྱ་དེ་ཉིད་དོ། །རྡོ་ཐལ་སྙིང་གར་བཅས་ནས། ཕྱག་རྒྱ་འདི་ན་ཆུ་སྲིན་ཞེས། །རྒྱལ་མཚན་ལྡན་པར་བཤད་པ་ཡིན། །རྡོ་རྗེ་སེམས་དཔའི་སྤྲུལ་པ་སྟེ། །འདོད་ཆགས་བྲལ་བར་གྲུབ་པ་ཡིན། །ༀ་སུ་ར་ཏ་བཛྲ་སྨྲེ་ཧཱ་ཧྲཱིཿ ཞེས་པའི་སྔགས་ལ་རྡོར་ཐལ་དེ་ཉིད་བཅིངས་པ་གྱེན་དུ་བཟུང་ཞིང་མཐེའུ་ཆུང་གཉིས་སྒྲེང་། མཐེ་བོང་གཉིས་བརྐྱང་པའོ། །རྒྱ་དེ་ཉིད་མ་བཤིག་པར། འདི་ནི་ཆགས་པ་ཐམས་ཅད་ལ། །འདོད་ཆགས་བདེ་བྱེད་སྙོམས་པ་ཐོབ། །འདི་ཡིས་འགྲོ་བ་གསུམ་དག་ཏུ། །དངོས་གྲུབ་མྱུར་དུ་ཐོབ་པར་བྱེད། །ཅེས་པ་སྟེ། དེ་བཞིན་དུ་གླུ་འགྲོས་མེད་པ་ཐམས་ཅད་ལ། ལྷ་མོ་རེ་རེ་ལ་ཚིགས་སུ་བཅད་པ་གཉིས་གཉིས་ཀྱི། དང་པོ་ཕྱག་རྒྱ་རྩ་བའི་ཚིགས་བཅད་རྣམས་ལ་ཕྱག་རྒྱའི་རྒྱུ་རྡོ་རྗེ་ཐལ་མོ་དང་། སྔགས་རྣམས་ལ་སོ་སོའི་ཕྱག་ཆེན་བསྒྱུར་ཞིང་པཱུ་ཛ་སོགས་ཀྱི་ཤམ་བུ་ཡང་མི་སྦྱར་རོ། །ཕྱི་མ་རྒྱས་འདེབས་ཀྱི་ཚིགས་བཅད་ལའང་རང་རང་གི་ཕྱག་ཆེན་མ་བཤིག་པར་འཇོག་པ་སྟེ། འོག་མ་ཐམས་ཅད་འགྲེ་ཤེས་པར་བྱའོ། །རྡོར་ཐལ་མཉམ་དུ་བཟུང་ནས་འགྱིང་བའི་གར་གྱིས་བསྐོར་ལ་ཁུ་ཚུར་གཉིས་ལ་འགྱིང་བ་དང་བཅས་པས་དཀུར་གཡོན་དུ་བརྟེན་ཏེ། ཕྱག་རྒྱ་འདི་ནི་རྒྱལ་ལ་སོགས། །བདེ་བ་དམ་པས་མཆོད་བྱས་ཏེ། །འགྱིང་བའི་སྦྱོར་བས་གར་བྱས་ན། །དངོས་གྲུབ་ཐམས་ཅད་བསྒྲུབ་པར་བྱེད། །ༀ་སུ་ར་ཏ་བཛྲ་གརྦྷེ་ཧཱུྃ། ཕྱག་རྒྱ་འདི་ཡིས་རྒྱས་བཏབ་པས། །སྡིག་པ་སྐད་ཅིག་མེད་པར་འགྱུར། །ཁམས་གསུམ་འདི་ནི་དངོས་གྲུབ་ཆེ། །དཔལ་གྱི་བསྒྱིངས་པ་ཐོབ་པར་འགྱུར། །ཞེས་པའི་རྒྱས་བཏབ་འདི་ལའང་རབ་ཞིའི་འདར་ཁུག་དང་སྦྱར་བའི་གླུ་འགྲོས་སྔར་བཞིན་ནོ། ༈ །དེ་ནས་སྒེག་མོའི་སྙེམས་གླུ་དང་སྦྱར་ཏེ། འདི་ལ་ཛམ་ནས། ནི་རྐང་གཡས་སྔོན་འགྲོའི་མདུན་མཉམ་དང་། ལག་གཡོན་དཀུར་བརྟེན་ཞིང་གཡས་ཐལ་མོ་གྱེན་བསྟན་སྨིན་མཚམས་སུ་འདེགས། སངས་རྒྱས་རྐང་གཡོན་ཕྱིར་ནུར་རྐང་གཡས་གཡོན་པའི་རྒྱབ་ཏུ་བོར་ཞིང་། ལག་གཉིས་ཐལ་མོ་གྱེན་བསྟན་ནུ་མར་རེག །ཐམས་ཅད་ཀྱི། །རྐང་པ་གཞི་བཅའ་དང་། ལག་གཉིས་གྱེན་བསྟན་བར་བསྣོལ་མཐར་སོ་སོར་གཞོལ་ཞིང་རྐང་གཡས་བརྐྱང་། རྨད་བྱུང་རྐང་གཡས་གཡས་ཀྱི་ནང་དུ་བོར་བའི་རྒྱབ་ཏུ་རྐང་གཡོན་འཐེན་ཅིང་། ལག་གཉིས་ཁུ་ཚུར་གྱེན་བསྟན་ལས། གཡས་པའི་ཁུ་ཚུར་གྱིས་བླངས་ཏེ་མཛུབ་མོ་ནས་རིམ་གྱིས་བཀྲོལ་བས་གྱེན་དུ་འཐོར་ཚུལ། དམ་པ་མཆོད་བྱས་པ། །བཞི་པད་མཐར་རྐང་པ་གཡས་བརྐྱང་དང་ལག་གཉིས་གྱེན་བསྟན་སོ་སོར་གཞོལ། སྦྱོར་བ་རྐང་པ་གཡོན་བརྐྱང་ཞིང་ལག་གཡས་དཔུང་རེག་དང་གཡོན་དཀུར་བརྟེན། གར་གྱི་མཆོད་པ་ཡིས། །གཡས་གཡོན་གྱི་ཁྱམས་བཅས་མཐར་ལག་གཉིས་སོ་སོར་གྱེན་གཞོལ་དང་རྐང་གཡས་བརྐྱང་། ཐམས་ཅད་རྐང་གཡོན་སྔོན་འགྲོའི་མདུན་མཉམ། ལག་གཉིས་ཐལ་མོ་གྱེན་བསྟན་གཤིབས་ཏེ་སྨིན་མཚམས་སུ་འཕྱར། ལས་བྱེད་དངོས་གྲུབ་བོ། །རྐང་གཡས་ཕྱིར་ནུར་ཞིང་གཡོན་བརྐྱང་དང་ཐལ་མོ་སྙིང་གར་སྦྱོར། ལྔ་པའི་གླུ་དང་སྦྱར་ཏེ། ༀ་སུ་ར་ཏ། ཕྱེད་པད་འཁྱུད་རྒྱ་དང་། བཛྲ་མ་དུ་ག་ཏེ་གུམ་གུམ། རྐང་པ་གཉིས་ཀྱི་པུས་མོའི་ལྷ་ང་བརྐྱང་ཞིང་སོར་མོ་ཕྱིར་བསྟན་པ་ས་གའི་སྟབས་དང་། ལག་པ་རྡོ་རྗེ་ཐལ་མོ་ལས་འདབ་མ་གར་དང་བཅས་པས་མྱུར་དུ་སྟེང་དུ་དོར་བའོ། །པཱུ་ཛ་མེ་གྷ། མན་ཆད་སྔར་བཞིན་ནོ། །འདི་ནི་སངས་རྒྱས་ཐམས་ཅད་ཀྱི། །རབ་དགྱེས་ཐོབ་པ་རྨོངས་བྱེད་མ། །རྡོ་རྗེ་ཡེ་ཤེས་ཐུགས་གནས་པའི། །དངོས་གྲུབ་ཐམས་ཅད་སྒྲུབ་བྱེད་པའོ། །རྡོར་ཐལ་ལས། ལག་པའི་འདབ་མ་གར་དང་བཅས་པས་འོག་ཏུ་དོར་ནས་སྟེང་དུ་ཅུང་ཟད་བསྒྱུར་བར་བྱས་ཏེ། འདི་ནི་སངས་རྒྱས་ཐམས་ཅད་ཀྱི། །བདེ་མཆོག་ཡིད་ནི་ཚིམ་བྱེད་པ། །འདི་ནི་བཅིངས་པ་ཙམ་གྱིས་ཀྱང་། །བདུད་རྣམས་ཤིན་ཏུ་རིང་བར་འགྱུར། །ༀ་སུ་ར་ཏ་བཛྲ་མེ་གྷ་ཏཾ་ཏཾ། འདི་ནི་སངས་རྒྱས་ཐམས་ཅད་ཀྱི། །ཡིད་ཀྱི་དངོས་གྲུབ་ཐོབ་བྱེད་དེ། །འདི་ནི་འདོད་པ་ཐམས་ཅད་རྣམས། །ཡིད་དགེས་སྐད་ཅིག་གྲུབ་པར་བྱེད། །རྡོར་ཐལ་ལས་མཐེ་བོང་གཉིས་སྒྲེང་སྟེ་ལྷག་མ་ཉི་མ་ལྟར་བྱས་ལ། འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་མཆོག་ཏུ་སྣང་བྱེད་པ། །ཐོག་མ་མེད་ནས་དྲི་མས་བགོས། །འདི་ཡིས་གཏི་མུག་འཕྲོག་བྱེད་དོ། །ༀ་སུ་ར་ཏ་བཛྲ་ཤ་ར་ད་ཨ་ཨ། འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་སྣང་བ་རབ་སྒྲུབ་པ། །ཡི་གེ་ཕྱག་རྒྱ་འདིས་བཏབ་ན། །སངས་རྒྱས་ཡེ་ཤེས་མཆོད་པར་བྱེད། །ལག་པ་གཡས་གཡོན་བརྗིད་པས་གར་བྱ་ཞིང་ཐལ་མོ་མཉམ་པོར་བྱས་ལ་གཡོན་གྱི་མཁུར་ཚོས་ནས་སྤྱི་བོར་བཞག་སྟེ། རྒྱལ་བ་རྣམས་ཀྱི་ཕྱག་རྒྱ་འདི། །མཆོད་པ་ཐམས་ཅད་སྒྲུབ་བྱེད་དེ། །ཐམས་ཅད་དོན་རྣམས་བསྒྲུབ་པས་དགེ། །བཀྲ་ཤིས་རྣམ་རྒྱལ་ཐོབ་པར་བྱེད། །ༀ་སུ་ར་ཏ་བཛྲ་ཤེ་ཤྲི་ཧོ་ཧཿ འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོ་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །སྣ་ཚོགས་ཡེ་ཤེས་དངོས་གྲུབ་བོ། །ཞེས་པའི་རྒྱས་བཏབ་འདི་ལའང་རབ་ཞིའི་འདར་ཁུག་གི་གླུ་དང་སྦྱར་བའི་འགྲོས་བྱའོ། །དེ་ནས་སྒེག་མོའི་སྙེམས་གླུ་དང་སྦྱར་ཏེ། །འདི་ལ་ཛམ་ནས། ནི་སངས་རྒྱས་རྐང་པ་གཞི་བཅའ་དང་། ལག་གཡོན་དཀུར་བརྟེན་གཡས་ཐལ་མོ་གྱེན་བསྟན་མདུན་དུ་ཕྱིར་བསྐོར། ཀུན་གྱི་སྒེག །རྐང་གཡས་བཏེག་མཚམས་ཀྱི་ཆོས་སྐོར་དུ་བསྐོར་ཞིང་ལག་གཡས་ཐལ་མོ་ནང་བསྟན་གཡོན་མིག་གི་ཐད་ཀའི་གཡས་ཕྱོགས་སུ་ཁྱེར་མཐར་གཡས་སུ་གྱེན་གཞོལ། ཤིན་ཏུ་སྒེག་པས་རྐང་པ་གཞི་བཅའ་དང་ལག་གཉིས་བར་བསྣོལ་གྱེན་བསྟན། སྒྲུབ་བྱེད་ཡིན། །རྐང་གཡས་བརྐྱང་དང་ལག་གཉིས་ཁུ་ཚུར་ཕྱིར་བསྟན་དཔུང་པའི་ཐད་ཙམ་དུ་འཕྱར། པདྨོའི་རྐང་མཉམ་ལག་གཡས་དཔུང་རེག་དང་གཡོན་དཀུར་བརྟེན། ཚུལ་གྱི་སྒེག་པ་ཡིས། །གཡས་གཡོན་ཁྱམས་ཀྱི་མཐར་ལག་གཉིས་གྱེན་གཞོལ་དང་རྐང་གཡས་བརྐྱང་། རྡོ་རྗེ་རྐང་མདུན་མཉམ་ལག་གཡོན་དཀུར་བརྟེན་དང་གཡས་མཆོག་སྦྱིིན་སྨིན་མཚམས་སུ་འདེགས། ཆེན་པོ་དེ་དངོས་གྲུབ། །རྐང་གཡས་ཕྱིར་ནུར་ཞིང་གཡོན་བརྐྱང་དང་ཐལ་མོ་སྙིང་གར་སྦྱར། ལྔ་པའི་གླུ་དང་སྦྱར་ཏེ། ༀ་ཧེ་མ་ཧཱ་ཕྱེད་པད་འཁྱུད་རྒྱ། སུ་ར་ཏ་བི་ལཱ་སི་ནི་ཏྲ་ཏྲ། རྐང་གཉིས་སོར་མོ་ཕྱིར་བསྟན་པ་ལས་པུས་མོ་དམད་པ་ཟླུམ་པོའི་སྟབས་དང་ལག་རྡོ་རྗེ་ཁུ་ཚུར་གཉིས་སྒེག་པའི་ཚུལ་གྱིས་བཀུར་བརྟེན། པཱུ་ཛ་མེ་གྷ། མན་ཆད་སྔར་ལྟར་རོ། །འདི་ནི་སངས་རྒྱས་ཐམས་ཅད་ཀྱི། །སྒེག་པར་བྱ་བ་སྤྲུལ་པ་ཡིན། །འདི་དང་མཉམ་པར་སྦྱར་བ་ཡིས། །སྒེག་མོས་ཡེ་ཤེས་བསྐྱེད་པར་བྱེད། །རྡོར་ཐལ་རྒོད་པའི་ཚུལ་དུ་ཀུན་ཏུ་བསྐོར་ནས་ཁུ་ཚུར་གཉིས་ཁ་འགྲམ་དུ་བཞག་ནས། འདི་ནི་སངས་རྒྱས་ཐམས་ཅད་ཀྱི། །བཞད་མོར་ཡོངས་སུ་བསྒྲགས་པ་ཡིན། །རྣལ་འབྱོར་གསང་བའི་དབང་ཕྱུག་ལ། །གསང་བ་ཆེན་པོའི་མགུ་བར་བྱེད། །ༀ་ཧེ་མ་ཧཱ་སུ་ར་ཏ་བཛྲ་ཧ་སྱ་ཧ་ཧཿ ཡི་གེ་ཕྱག་རྒྱ་འདི་ཡིས་ནི། །ཉིད་ཀྱི་སྙིང་ལ་རྒྱས་བཏབ་ན། །ཕྲེང་བ་རྒྱན་གྱིས་རྣམ་པར་བརྒྱན། །དཔལ་ལྡན་དེ་མ་ཐག་དུ་འགྱུར། །ལག་གཡོན་ཁུ་ཚུར་ནང་བསྟན་གྱིས་སྒྲེངས་པའི་གྲུ་མོའི་འོག་ཏུ་གཡས་པའི་ཁུ་ཚུར་མཛུབ་མོ་སྒྲེངས་པ་ནང་དུ་ཕྱོགས་པས་པི་ཝཾ་གི་རྒྱུད་བརྡུང་བ་ལྟར་བྱས་ཏེ། ཇི་སྙེད་ཡིད་འོང་གླུ་དག་ནི། །འཇིག་རྟེན་གྲགས་པའི་བདེ་བ་དག །སྒྲ་ཡིས་བསྐྱེད་པ་རྣམ་འགྱུར་བ། །དེ་མཐུན་དབྱངས་འདིར་སྒྲུབ་པར་བྱེད། །ༀ་ཧེ་མ་ཧཱ་སུ་ར་ཏ་བཛྲ་གཱིརྟི་ཏེ་ཏེ། སེམས་ཀྱི་ཕྱག་རྒྱའི་ཡི་གེ་འདི། །འདི་ཡིས་བྱིན་རླབས་དག་པ་དག །སྦྱོར་བ་འདི་ཡིས་སྦྱར་བ་ཡིས། །འདོད་བྱེད་ཐམས་ཅད་ཐོབ་པར་འགྱུར། །རྡོར་ཐལ་ཉིད་གར་གྱི་སྦྱོར་བས་བསྒྱུར་ནས་མཐར་ཐལ་མོ་ཁོང་སྟོང་དུ་སྦྱར་ལ་སྤྱི་བོར་བཞག་སྟེ། ཇི་སྙེད་གར་གྱི་གཙུག་ལག་ལས། །འགྱུར་བར་བྱེད་པར་བཤད་པ་དང་། །ཇི་སྙེད་དེ་སྙེད་ཕྱག་རྒྱ་རྣམས། །གཉིས་མེད་འདུས་པས་འདི་དངོས་གྲུབ། །ༀ་ཧེ་མ་ཧཱ་སུ་ར་ཏ་བཛྲ་ནྲྀ་ཏྱེ་པེ་བ་པེ་བ། རྣལ་འབྱོར་འདི་ཡིས་རྒྱས་བཏབ་ན། །བདེ་ལྡན་གར་ནི་བྱེད་ཅིང་སྤྲོ། །འོག་མིན་གྱི་ནི་གནས་ཆེན་དུ། །སངས་རྒྱས་རྣམས་དང་ཐབས་གཅིག་འགྲོགས། །ཞེས་པའི་རྒྱས་བཏབ་འདི་ལའང་། རབ་ཞིའི་འདར་ཁུག་གི་གླུ་དང་འགྲོས་བྱའོ། །དེ་ནས་ཡང་སྒེག་མོའི་སྙེམས་གླུ་དང་སྦྱར་ཏེ། འདི་ལ་ཛམ་ནས། ཡིས་རྐང་པ་མདུན་མཉམ་དང་། ལག་གཡས་པ་གཡོན་པའི་ནང་ནས་ཕྱིར་བཏོན་ནས་མཆོག་སྦྱིན་ལས་མཐེབ་མཛུབ་སྤྲད་པའི་ཚིག་ནང་བྱིན་དང་གཡོན་དཀུར་བརྟེན། སངས་རྒྱས་རྐང་གཡས་ཕྱིར་ནུར་ཞིང་རྐང་གཡོན་གཡས་པའིི་རྒྱབ་ཏུ་བོར། ལག་གཡས་གཡོན་པར་ནང་བསྐོར་ལས་སྐྱབས་སྦྱིན་དང་། གཡོན་དཀུར་བརྟེན། ཐམས་ཅད་ཉིད། །རྐང་གཡོན་ཕྱིར་ནུར་ཞིང་གཡས་གཡོན་པའི་རྒྱབ་ཏུ་བོར། ལག་གཉིས་གྱེན་བསྟན་བར་བསྣོལ་ལས་ཁ་སྦུབ་སོ་སོར་གཞོལ། ཤིན་ཏུ་རྨད་བྱུང་བཞི་པད། ཐོབ་པར་འགྱུར། །རྐང་གཡས་གཡོན་པའི་བྱིན་པར་བསྡུ་ཞིང་ལག་གཉིས་སྙིང་གར་ཐལ་མོ་ཁ་ཕྱེ་བ་སྟེང་འོག །རྣལ་འབྱོར་རྐང་མཉམ་ལག་གཡས་དཔུང་རེག་དང་གཡོན་དཀུར་བརྟེན། ཀུན་གྱི་བདེ་འབྲེལ་བ། །གཡས་གཡོན་གྱི་ཁྱམས་མཐར་རྐང་གཡས་བརྐྱང་དང་ལག་གཉིས་གྱེན་བསྟན་སོ་སོར་གཞོལ། རྡོ་རྗེ་རྐང་མདུན་མཉམ། ལག་གཡོན་དཀུར་བརྟེན་དང་གཡས་མཆོག་སྦྱིན་སྨིན་མཚམས། བློ་མཆོག་དངོས་གྲུབ་བོ། །རྐང་གཡས་ཕྱིར་ནུར་དང་གཡོན་བརྐྱང་ཞིང་། ལག་གཉིས་ཐུགས་ཀར་ཐལ་སྦྱར། ལྔ་པའི་གླུ་དང་སྦྱར་ཏེ། ༀ་སུ་ར་ཏ་ཕྱེད་པད་འཁྱུད་རྒྱ། བཛྲ་མ་ཧཱ་བི་ཤྭ་རཱུ་པི་ཛ་ཛཿ རྐང་གཡོན་དྲང་པོ་དང་རྐང་གཡས་གཡོན་པའི་རྒྱབ་ཏུ་ནུར་ནས་པུས་མོ་ཅུང་ཟད་དམའ། ལག་གཉིས་རྡོ་རྗེ་བསྡམས་པ་ལས་མཛུབ་མོ་ལྕགས་ཀྱུ་ལྟར་བྱས་པའི་དབུས་སུ་མཐེ་བོང་གཉིས་བཞག །པཱུ་ཛ་མེ་གྷ་མན་ཆད་སྔར་ལྟར་རོ། །ཕྱག་རྒྱ་ཡེ་ཤེས་རྨད་བྱུང་བ། །འདི་ནི་ཐབས་ཀྱིས་མཉམ་བཞག་ན། །ནམ་མཁའ་ཉི་མ་འབུམ་འདྲ་བར། །དེ་ནི་དེ་མ་ཐག་ཏུ་འགྱུར། །རྡོ་རྗེ་བསྡམས་པ་ལས་མཛུབ་མོའི་རྩེ་མོ་ཞགས་པ་ལྟར་བྱས་ཏེ། བུད་མེད་པདྨོ་ཨུཏྤལ་དང་། །མ་ལུས་རྒྱལ་བ་རྣམས་དང་རྩེན། །རྡོ་རྗེ་པདྨོར་སྦྱོར་བས་ནི། །དགའ་བྱེད་མྱུར་དུ་དངོས་གྲུབ་བོ། །ༀ་སུ་ར་ཏ་བཛྲ་མ་ཧཱ་ཤཔྟ་སུ་ཀེ་ཧཱུྃ་ཧཱུྃ། ཕྱག་རྒྱ་འདི་ནི་བདེ་མཆོག་སྟེ། །བར་ཆད་མེད་པར་ཐོབ་པར་འགྱུར། །ཁམས་གསུམ་ངོ་བོ་ཐམས་ཅད་ན། །སྒྲ་ཡིས་ཐོས་པ་དངོས་གྲུབ་བོ། །རྡོ་རྗེ་བསྡམས་པ་ལས་མཛུབ་མོ་དང་མཐེ་བོང་ལུ་གུ་རྒྱུད་ལྟར་སྦྲེལ་ཏེ། འདི་ནི་བློ་ལྡན་རབ་དགྱེས་པའི། །རྡོ་རྗེ་དཔེ་མེད་དྲི་དང་ལྡན། །དགའ་བྱེད་ལྷན་ཅིག་རྩེན་བྱས་ན། །དབང་ཕྱུག་དམ་པའི་དངོས་གྲུབ་འགྱུར། །ༀ་སུ་ར་ཏ་བཛྲ་མ་ཧཱ་གྷནྡྷ་སུ་ཀེ་བཾ་བཾ། འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཡེ་ཤེས་འགྲུབ་འགྱུར་ཏེ། །བདག་ཉིད་རྡོ་རྗེས་བརྒྱན་པ་ཡིན། །འདི་ནི་མཚན་ལྡན་ཀུན་དང་རྩེན། །རྡོ་རྗེ་བསྡམས་པ་ལས་མཐེའུ་ཆུང་དང་སྲིན་ལག་གི་མཚམས་སུ་མཐེ་བོང་བཅུག་ནས་བསྐྱེད་དེ། བཅོམ་ལྡན་རྡོ་རྗེ་སེམས་དཔའ་ཉིད། །དཔལ་ལྡན་དཔེ་མེད་བདེ་བ་དང་། །སྣ་ཚོགས་སྦྱོར་བ་སྣ་ཚོགས་དག །འདི་ཡིས་རབ་ཏུ་དགྱེས་པར་གྱུར། །ༀ་སུ་ར་ཏ་བཛྲ་མ་ཧཱ་རཱ་སྱེ་ཧོ་ཧོཿ དགྱེས་པ་ཆེན་པོའི་དྲི་མཆོག་གི། །རྒྱལ་མཚན་ལྡན་མ་ཞེས་བྱ་བ། །སངས་རྒྱས་ཀུན་དང་རོལ་པ་ཡིས། །མཆོད་པ་མི་ཟད་བྱེད་པར་འགྱུར། །དེ་ནས་སཏྭ་འགྲོས་ཀྱིས་དཀྱིལ་འཁོར་ལ་བསྐོར་ཏེ་ནང་དུ་འགྲོ་བ་ནི། དྲུག་སྐྱེས་ཀྱི་གླུ་རྨ་བྱ་མྱོས་པའི་ང་རོ་ལྟ་བུ་དང་སྦྱར་ཏེ། ༀ་ལག་གཉིས་ཕྱིར་གདེངས་ནས་རྐང་གཡོན་འདེགས་ཆུང་། བཛྲ་རྐང་གཡས་འདེགས་ཆུང་དང་། ལག་གཉིས་ཁུ་ཚུར་གཡས་གཡོན་སྟེང་འོག་ཏུ་ཕྱོགས་པའི་པད་ཆུང་འགྱིང་ཅན། སཏ་རྐང་གཡོན་རྒྱབ་ཏུ་ནུར་ཏེ་གཡས་བརྐྱང་འགྱིང་ཅན་དང་། ལག་གཡས་རྡོ་རྗེ་ཐུགས་ཀར་འགྲེངས་སྟབས་དང་གཡོན་དཀུར་བརྟེན། ཏྭ་རྐང་གཡས་གྲུད་དེ་གཡོན་མདུན་དུ་གོམ་གང་ནུར་ནས། ཀྲོ་དྷ་གཡས་བརྐྱང་འགྱིང་ཅན་དང་ལག་གཡས་སྡིགས་མཛུབ་གཡོན་ལ་བསྐོར་ནས་སྙིང་གར་འཛིན་ཅིང་། ལག་གཡོན་སྡིགས་མཛུབ་གཡོན་ཕྱོགས་སུ་འཕྱར། ཡ་རྐང་གཡས་གཡོན་པའི་རྩར་སྐྱལ་ཏེ་མཉམ་ལ། ཧཱུཾ་ཕཊ། རྡོ་རྗེ་གསོར་ཞིང་དྲིལ་བུ་གསིལ་བ་དང་བཅས་པས་རྐང་གཡོན་འགྲོ་ཕྱོགས་སུ་སྔོན་ལ་བོར་པའི་གོམ་ཆུང་གིས་འགྲོ་སྟེ་གཡོན་པའི་འགྲོས་སོ། །ཡང་ལག་གཉིས་ཕྱིར་གདེངས་ནས། ༀ་ལ་རྐང་གཡས་འདེགས་ཆུང་། བཛྲ་གཡོན་འདེགས་ཆུང་། སཏ་རྐང་གཡས་གཡས་སུ་འཐེན་ཏེ་གཡོན་བརྐྱང་འགྱིངས་ཅན་དང་། ལག་གཡས་སྡིགས་མཛུབ་གཡོན་ལ་བསྐོར་ནས་གཡས་ཕྱོགས་སུ་འཕྱར་ཞིང་གཡོན་སྡིགས་མཛུབ་ཐུགས་ཀར། ཏྭ་རྐང་གཡོན་བཏེག་ཙམ་ནས་རྐང་གཡས་མདུན་དུ་གོམ་གང་ནུར་ལ། ཀྲོ་དྷ་ལ་གཡས་བརྐྱང་འགྱིང་ཅན་དང་། ལག་གཡོན་སྡིགས་མཛུབ་འཕྱར་ཞིང་གཡས་སྡིགས་མཛུབ་ཐུགས་ཀར། ཡ་རྐང་གཡོན་གཡས་པའི་རྩལ་སྐྱལ་ཏེ་མཉམ་ལ། ཧཱུྃ་ཕཊ། རྡོ་རྗེ་གསོར་ཞིང་དྲིལ་བུ་གསིལ་བ་དང་བཅས་པས་རྐང་གཡས་སྔོན་ལ་བོར་བའི་གོམ་ཆུང་གིས་འགྲོ་བ་གཡས་པའི་འགྲོས་ཏེ། གཡས་གཡོན་གྱི་འགྲོས་གཉིས་པོ་སྤེལ་བས་ཆས་འཇུག་ཁང་པར་རིམ་གྱིས་སོང་ལ། གཉུག་མར་གནས་པའི་ཆས་སུ་བྱས་ཏེ་སྐབས་ཇི་ལྟ་བའི་ཆོ་གའི་དཀྱུས་ལ་འཇུག་གོ། ༈ །གཞན་དུ་ཚོགས་ཀྱི་འཁོར་ལོ་མཚན་ཉིད་པ་དང་འབྲེལ་བ་ལྟ་བུ་ལ་ནི། སྔར་གྱི་ལྷ་མོ་བཅུ་དྲུག་པོའི་གར་སོང་མ་ཐག །ལྷ་མོ་དེ་དག་གིས་དབྱངས་དང་བཅས་པས་སྦྱོར་བ་ཆེན་པོ་ལ་བསྐུལ་བ་སོགས་གསང་བའི་སྤྱོད་པ་ཁྱད་པར་བ་དང་འབྲེལ་བའི་གར་རྣམས་ཀྱང་བྱ་བར་གསུངས་ཏེ། འདིར་ནི་མཆོད་གར་ཙམ་བསྡུས་ཀྱི་དེ་དག་བྱེད་པར་སྤྲོ་ན་རོང་ཟོམ་ཆེན་པོའི་ཚོགས་ཡིག་སོགས་ལས་ཤེས་པར་བྱའོ། །འདིར་སྨྲས་པ། རྡོ་རྗེའི་ལུས་ཀྱི་སྤྱོད་པ་རྨད་བྱུང་ལ། །ཡེ་ནས་ལས་དང་དངོས་གྲུབ་སྒྲུབ་པའི་ཐབས། །འདི་ཉིད་ཡིན་ཞེས་ཕྱོགས་ཞེན་རབ་རིབ་དང་། །བྲལ་བའི་རྣམ་དཔྱོད་མིག་ལྡན་རྣམས་ཀྱིས་མཐོང་། །དེ་ཕྱིར་མཆོད་སྤྲིན་རྣམ་པ་ཐམས་ཅད་པར། །སྤྲོ་བའི་རོལ་མོས་རབ་འབྱམས་དཀྱིལ་འཁོར་ཀུན། །མཉེས་བྱེད་གར་གྱི་བསྟན་བཅོས་སྔོན་མེད་འདི། །གཏེར་ཆེན་བླ་མའི་ཞབས་སེན་ཉི་འོད་རྡུལ། །སྤྱི་བོའི་ཆུ་སྐྱེས་གེ་སར་དང་འགྲོགས་པའི། །སྨྱོས་ཀྱི་བན་ཆུང་དྷརྨ་ཤྲཱིས་སྤེལ། །ཚུལ་བཞིན་སྦྱངས་པས་འཁྲུལ་པ་མེད་སྙམ་རློམ། །འོན་ཀྱང་བྱིས་བློས་ནོངས་ན་མཁས་ལ་བཤགས། །འདིར་འབད་དགེ་བས་འགྲོ་ཀུན་གཉུག་མའི་ལུས། །རྡོ་རྗེ་ཟླ་བ་སྟོབས་སུ་གྱུར་པ་ཡིས། །འགྲོ་བའི་ལུས་ཀྱི་དྲི་མ་དྲུང་ཕྱུང་སྟེ། །འཆི་མེད་སྐུ་ཡི་རྡོ་རྗེར་བྱང་ཆུབ་ཤོག །ཤུ་བྷཾ་མསྟུ།། །།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་གྲོལ་བྱེད་ལམ་གྱི་སྙིང་པོའི་དོན་ཁྲིད་རྡོ་རྗེ་གཟི་བརྗིད།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་གྲོལ་བྱེད་ལམ་གྱི་སྙིང་པོའི་དོན་ཁྲིད་བཞུགས་སོ། །ༀ་སྭ་སྟི་སིདྡྷཾ། ཚོགས་གཉིས་མཐར་ཕྱིན་རྣམ་གྲོལ་དཔག་བསམ་ཤིང་། །མཐའ་ཡས་ཡོན་ཏན་མེ་ཏོག་འབྲས་བཀྲ་ཞིང་། །ཕན་བདེའི་གྲིབ་བསིལ་སྲིད་ཞིའི་དབྱིངས་ཀུན་ཁྱབ། །རྒྱལ་བའི་བྱང་ཆུབ་ལྗོན་ཤིང་ལ་ཕྱག་འཚལ། །དེ་ལ་འདིར་གསང་སྔགས་རྙིང་མ་ངེས་པ་དོན་གྱི་སྙིང་པོ་སྒྱུ་འཕྲུལ་དྲྭ་བ་ཆེན་པོའི་རིམ་པ་གཉིས་ཀྱི་རྣལ་འབྱོར་ཟབ་མོ་ལ་བརྟེན་ནས། ཐུན་མོང་གི་སྔོན་འགྲོས་རྒྱུད་ལས་སུ་རུང་བའི་སྐལ་ལྡན་གྱི་སློབ་མ་སངས་རྒྱས་ཀྱི་སར་བདེ་མྱུར་གྱི་སྒོ་ནས་འཁྲིད་པ་ལ། བླ་མ་བརྒྱུད་པའི་རིམ་པ་དང་། གདམས་ཁྲིད་དངོས་གཉིས་ལས། དང་པོ་ནི། རྒྱལ་བ་དགོངས་པས་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་སྙན་ཁུང་དུ་བརྒྱུད་པ་དང་གསུམ་ལས། དང་པོ་ནི། ཆོས་སྐུ་ཀུན་ཏུ་བཟང་པོ། ལོངས་སྐུ་རིགས་ལྔའི་སངས་རྒྱས། སྤྲུལ་སྐུ་རིགས་གསུམ་མགོན་པོས་གནས་རིགས་སོ་སོར་མི་མ་ཡིན་གྱི་རིག་འཛིན་ཐ་དད་ལ་བརྒྱུད་པའོ། །གཉིས་པ་ནི། ཕྱག་ན་རྡོ་རྗེ་ལ་རྒྱལ་པོ་ཛཿས་ཞུས། དེ་ནས་རིམ་པ་བཞིན། ཨིནྡྲ་བྷཱུ་ཏི། སྲས་ཤཱཀྱ་བྷཱུ་ཏི། ཀུ་ཀུ་རཱ་ཛ། ནཱ་གཱརྫུ་ན། པདྨ་སཾ་བྷ་ཝ། བི་མ་ལ་མི་ཏྲའོ། །གསུམ་པ་ནི། གཉགས་ཛྙཱ་ན་ཀུ་མཱ་ར། རྨ་རིན་ཆེན་མཆོག །གྱེ་རེ་མཆོག་སྐྱོང་། དར་རྗེ་དཔལ་གྱི་གྲགས་པ། གནུབས་སངས་རྒྱས་ཡེ་ཤེས། སྤ་གོར་བློན་ཆེན་འཕགས། དན་ཡོན་ཏན་མཆོག །བེགས་གསལ་བའི་བྱང་ཆུབ། རྒྱ་བློ་གྲོས་གཞོན་ནུ། འགར་ཚུལ་ཁྲིམས་བཟང་པོ། མཚུར་ཡེ་ཤེས་དབང་པོ། དན་ཆོས་ཀྱི་དབང་ཕྱུག །ཞང་མཆོག་གི་བླ་མ། ཀྱི་ཡོན་ཏན་འབྱུང་གནས། སློབ་དཔོན་གཞོན་ནུ་དོན་གྲུབ། དེས་བསམ་ཡས་པ་ངག་གི་དབང་པོ་ལའོ། །རྒྱལ་བ་ཀུན་གྱི་རྣམ་འཕྲུལ་མཆོག །ཡོན་ཏན་རྒྱ་མཚོའི་ཕ་རོལ་ཕྱིན། །རླབས་ཆེན་ཕྲིན་ལས་དཔག་ཏུ་མེད། །བླ་མ་ཀུན་ལ་ཕྱག་འཚལ་ལོ། །གཉིས་པ་ནི། གཉིས་སུ་མེད་པ་བླ་ན་མེད་པའི་རྒྱུད་ཀྱི་དོན་སྒྱུ་འཕྲུལ་དྲྭ་བ་ཆེན་པོ་སྒོམ་པ་ལ། བསྐྱེད་རྫོགས་སྤྱིར་བསྒོམ་པ་དང་། ཟབ་ལམ་བྱེ་བྲག་ཏུ་བསྒོམ་པ་གཉིས་ལས། དང་པོ་ལ། སྐྱེ་བ་བཞིའི་བག་ཆགས་སྦྱོང་ཚུལ་ལ་ལྟོས་ནས་སྒོམ་ཚུལ་བཞི་ལས། སྒོང་སྐྱེས་སྦྱོང་བ་རྒྱས་པ་ཆེན་པོའི་བསྐྱེད་རིམ་ནི། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་ནས། མདུན་གྱི་ནམ་མཁར་ཞི་ཁྲོའི་དཀྱིལ་འཁོར་སྤྱན་དྲངས་ཏེ། མཆོད་པ་དང་བསྟོད་པ་དང་གསོལ་བ་གདབ་པ་དང་སྡོམ་པ་བཟུང་བ་རྣམས་ཡེ་ཤེས་སྐུ་མཆོག་གི་ཚིག་གི་ཕྱིར་སེམས་གཞོལ་བར་བྱས་ཏེ། སླར་ཡང་བཛྲ་མུཿས་སྟོང་པའི་ངང་དུ་མཉམ་པར་བཞག་ནས། དེ་བཞིན་ཉིད་དང་། ཀུན་ཏུ་སྣང་དང་། རྒྱུའི་ཏིང་ངེ་འཛིན་བསྒོམ་པའི་ཨ་དཀར་ལས་ལྷའི་ས་བོན་དཀྱིལ་འཁོར་སོ་སོའི་གདན་ལ་བབས་ནས། ལྷར་གྱུར་པའི་ཚུལ་གྱིས་སྒྱུ་འཕྲུལ་ཞི་ཁྲོའི་དཀྱིལ་འཁོར་བསྐྱེད་ལ། ཡེ་ཤེས་པ་བསྟིམས་ནས། མཆོད་པ་དང་། བསྟོད་པ་དང་། འཕྲོ་འདུ་འཛབ་ཀྱི་བཟླས་པའི་བར། རྒྱས་པར་བྱས་ནས་ཚོགས་ལ་རོལ་བའམ་མེད་ཀྱང་རུང་སྟེ། རྫོགས་རིམ་གཉིས་པོ་བསྒོམས་ལ་བསྔོ་བ་བྱའོ། །འདི་དག་རྒྱས་པར་ཞི་བ་རིན་པོ་ཆེའི་དྲྭ་བ་དང་། ཁྲོ་བོ་སྣང་བ་རྒྱན་དུ་བལྟ་བར་བྱའོ། །དེ་ནས་མངལ་སྐྱེས་སྦྱོང་བ་རྒྱས་པ་འབྲིང་གི་སྒོམ་ཚུལ་ནི་སྔར་ལས། བསོད་ནམས་ཞིང་བསམ་སྟེ་མི་དམིགས་པ་བོར་ལ། གཞན་དེ་དང་འདྲ་བར་བསྒོམ་པའོ། །དེ་ནས་དྲོད་གཤེར་སྐྱེས་ཀྱི་བག་ཆགས་སྦྱང་བའི་ཕྱིར་བསྡུས་པ་བསྒོམ་པ་ནི་སྐྱབས་འགྲོ་སེམས་བསྐྱེད་བྱས་ནས། སྟོང་པའི་ངང་ལས་རྟེན་གཞལ་ཡས་ཁང་དང་། བརྟེན་པ་ལྷའི་དཀྱིལ་འཁོར་རྣམས་སོ་སོའི་མཚན་བརྗོད་པ་ཙམ་གྱིས་ཞི་ཁྲོའི་ལྷར་གསལ་བཏབ་པས། འདི་ནི་དབང་རྫོགས་ཞེས་པ་ནས། ཐམས་ཅད་ལྷ་དང་ལྷ་མོའི་ངང་། །ཞེས་པའི་བར་ལན་གཅིག་བརྗོད་ནས་རང་ཉིད་ཡེ་ནས་ལྷའི་རང་བཞིན་དུ་སངས་རྒྱས་པའི་ངོ་བོར་རྟོགས་པ་ལས། ཐུགས་ཀའི་པདྨ་ཉི་ཟླའི་སྟེང་གི་ཀུན་བཟང་ཡབ་ཡུམ་གྱི་ཧཱུཾ་ལས་འོད་འཕྲོས། མ་རྟོགས་པའི་སེམས་ཅན་གྱི་སྒྲིབ་པ་སྦྱངས། ལྷར་གྱུར། འཕགས་པ་མཆོད། སྔགས་ཀྱི་རང་སྒྲས་འཇིག་རྟེན་ཁྱབ་པར་བསམས་ལ། ༀ་ཨཱཿཧཱུྃ། ༀ་ཧཱུྃ་ཏྲཱྃ་ཧྲཱིཿཨཱཿཞེས་ཅི་འགྲུབ་བཟླས་ལ། རྫོགས་རིམ་གཉིས་གང་རུང་བསྒོམས་ནས་བསྔོ་བ་བྱའོ། །དེ་ནས་རྫུས་སྐྱེས་ཀྱི་བག་ཆགས་སྦྱང་བ་ཤིན་ཏུ་བསྡུས་པ་ནི། སྐྱབས་འགྲོ་སེམས་བསྐྱེད་བྱས་ནས། སྟོང་པའི་ངང་ལས་སྐད་ཅིག་གིས་གསལ་བཏབ་ནས་སྔགས་བཟླས་ཏེ་རྫོགས་རིམ་བསྒོམ་པ་ལས། སྐབས་འདིར་སེམས་བསྐྱེད་ནས་ནམ་མཁའི་དཀྱིལ་དུ་ཉི་ཟླའི་སྟེང་ན་ཀུན་བཟང་ཡབ་ཡུམ་ཞལ་སྦྱར་རྡོ་རྗེ་སྐྱིལ་ཀྲུང་མཉམ་གཞག་མཛད་པ་ལས། འོད་འཕྲོས་སྣང་སྲིད་ཐམས་ཅད་ཡེ་ཤེས་ལྔའི་ཞིང་ཁམས་སུ་དག་པར་བྱས། འཁོར་འདས་ཐམས་ཅད་རོ་གཅིག་ཡེ་ནས་དག་པའི་སངས་རྒྱས་སུ་གསལ་བཏབ་ལ། ༀ་ཨཱཿཧཱུྃ་ཞེས་ཅི་འགྲུབ་བཟླས་ནས་དེའི་ངང་ལ་གློད་པས་བསམ་མི་ཁྱབ་པའི་འོད་གསལ་འཆར་རོ། །རྗེས་ལ་བསྔོ་བ་བྱའོ། །འདི་ནི་རྒྱལ་བ་གཅིག་བསྒོམས་ཀུན་གྱི་ངང་། །ཞེས་བྱ་སྟེ། རིགས་ཐམས་ཅད་ཀྱི་བདག་པོ། དཀྱིལ་འཁོར་ཐམས་ཅད་ཀྱི་དབང་ཕྱུག །རང་བྱུང་གདོད་མའི་མགོན་པོ། སངས་རྒྱས་ཐམས་ཅད་ཀྱི་མེས་པོ་དམ་པ་བསྒོམ་པའི་ཕྱིར་རོ། །གསང་སྙིང་ལས། མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་མ་ལུས་པ། །ཐམས་ཅད་འདི་ཡིས་སྒོམ་པར་འགྱུར། །ཞེས་གསུངས་སོ། །དེ་ནས་ཟབ་ལམ་བྱེ་བྲག་ཏུ་བསྒོམ་པ་ལ། བྱིན་རླབས་དངོས་གྲུབ་ཀྱི་གནད། སྔོན་འགྲོ་ལམ་སེལ་གྱི་གནད། དངོས་གཞི་ཁྱད་པར་གྱི་གནད་དང་གསུམ་ལས། དང་པོ་ནི། སྐྱབས་སུ་འགྲོ་བ་དང་སེམས་བསྐྱེད་ནས། སྟོང་པའི་ངང་ལས་རང་ཉིད་ལྷར་བསྐྱེད་པའི་སྤྱི་བོར་བླ་མའི་རྣལ་འབྱོར། ཡབ་ཡུམ་འཁྲིལ་སྦྱོར་ཅན་དཔའ་བོ་མཁའ་འགྲོ་ཟུང་འཇུག་མཛད་པར་བསྒོམ་ལ། མཆོད་པ་དང་། བསྟོད་པ་དང་། གསོལ་བ་བཏབ་ནས། སྦྱོར་མཚམས་ནས་བདུད་རྩིའི་རྒྱུན་བབས་པས་ལུས་ངག་ཡིད་གསུམ་ལ་ཐིམ། དབང་དང་པོ་གསུམ་ཐོབ། དེ་ཐམས་ཅད་བདེ་བའི་ངོ་བོར་ཞུ་བ་རང་གི་སྙིང་གར་བབས་པས་གཉིས་སུ་མེད་པའི་ཡེ་ཤེས་རྡོ་རྗེའི་རང་བཞིན་ཚིག་དབང་རིན་པོ་ཆེ་རང་འཁྲུངས་སུ་ཐོབ་པར་བསམ་ལ་དར་ཅིག་གློད་ལ་བཞག །རྗེས་ལ་བསྔོ་བ་བྱའོ། །འདིས་ནི་བྱིན་རླབས་དངོས་སུ་འབབ། རྟོགས་པ་ཤུགས་ལས་འཆར། ལམ་གྱི་བར་ཆད་སེལ། གེགས་དང་གོལ་ས་ཆོད། དངོས་གྲུབ་རྣམ་གཉིས་ཐོབ་པས་རབ་ཏུ་གསང་བའི་གནད་དོ། །དེ་ནས་སྔོན་འགྲོ་ལམ་སེལ་གྱི་གནད་ལ་གསུམ་ལས། རྩ་སྦྱོང་བ་སྟོང་རའི་གནད་ནི། སྔོན་འགྲོ་བཤད་མ་ཐག་པ་ལྟར་བསྒོམ་ལ། འཁོར་ལོ་བཞིའི་དབུས་ན་རོ་རྐྱང་ཀུན་འདར་མ་གསུམ་ཀ་བའི་ཚུལ་དུ་ཡོད་པའི་ནང་སྦུག་མ་སྟོང་སང་ངེ་བ་ལ་དམིགས་པ་འཛིན་པ་ཡིན་ཏེ། གཙོ་མོ་དབུ་མའི་ནང་ཕྲུ་མ་ཕུས་བཏབ་པ་ལྟ་བུ། དང་པོ་མདའ་སྨྱུག་གི་ནང་ཙམ། དེ་ནས་སྤོས་དོང་ཙམ། དེ་ནས་བཞོ་ཟོའི་ནང་ཙམ། དེ་ནས་ལུས་ཐམས་ཅད་དབུ་མའི་ནང་ཙམ་དུ་བསྒོམ་མོ། །འདིས་ནི་རླུང་སེམས་ཐམས་ཅད་རང་གི་དབུ་མར་ཚུད་པའི་གནད་དོ། །དེ་ནས་རླུང་སྦྱོང་བ་སྲོག་གི་གནད་ནི། དེ་ལྟར་དབུ་མ་དང་འཁོར་ལོ་བཞི་སྟོང་པར་གསལ་བའི་གཡས་གཡོན་གྱི་རོ་རྐྱང་ཡར་སྣ་གཉིས་སྨིན་མཚམས་ནས་སྣ་བུག་གི་ནང་གཉིས་ལ་ཟུག་ཅིང་། མར་སྣ་གཉིས་ལྟེ་བའི་འོག་སོར་བཞིའི་ཆ་སྤུ་ན་གུའི་ཐད་ནས་དབུ་མར་གུག་པའི་སྣ་ཚུད་པར་བསམ་ལ། རླུང་རོ་བུས་ནས་ཕྱིར་འཕངས་དུས་ནད་དང་སྡིག་སྒྲིབ་ཐམས་ཅད་ཕྱིར་སོང་། ནང་དུ་འདྲེན་དུས་སྣོད་བཅུད་བརྟན་གཡོའི་འཇིག་རྟེན་སངས་རྒྱས་བྱང་ཆུབ་སེམས་དཔའི་ཡོན་ཏན་དང་བཅས་པ་རླུང་གི་རྣམ་པས་སྣ་བུག་ནས་རོ་རྐྱང་གི་ནང་ལ་བྱུང་བ་དབུ་མའི་ནང་དུ་ཚུད་པ་ལ་དམིགས་པ་བཟུང་ནས། འཇམ་རླུང་དལ་བུས་འཛིན་ཅིང་། རང་བབ་ཀྱི་འབྱུང་རྔུབ་ལས་ཆ་བབས་སུ་འཛིན་པ་ནི་གནད་ཡང་དག་པའོ། །དེ་ལྟར་བྱས་ནས་རླུང་སྐྱོན་མེད་པར་ངང་གིས་རླུང་ཟིན་ཅིང་འབྱོངས་པའི་གནད་དོ། །དེ་ནས་ཐིག་ལེ་སྦྱོང་བ་རྩོལ་བའི་གནད་ནི། གཏུམ་མོའི་རྣལ་འབྱོར་བསྒོམ་པ་སྟེ། རླུང་བསྒོམས་པ་ཡན་ཆད་སྔར་བཞིན་བྱས་པའི་ལྟེ་བའི་ཐར་སྤྲུལ་པའི་འཁོར་ལོའི་དབུས་དབུ་མའི་ནང་ན། མི་ཡི་དྭངས་མ་རྒྱ་ཁབ་ཀྱི་རྩེའམ་ཉུང་ཀར་གྱི་ཡང་ཞུན་ཙམ་ལ། ཨ་ཤད་ཀྱི་རྣམ་པ་ཅན་རེག་བྱ་ཤིན་ཏུ་ཚ་བ་ཞིག་བསྒོམ་ལ། རོ་རྐྱང་གི་རླུང་དབུ་མའི་མར་སྣར་ཞུགས་དྭངས་མ་དེས་སྦར་བས་མེ་རྟ་རྔའི་ཉག་ཙམ་འབར་བ། དབུ་མའི་ནང་བདེ་ཆེན་འཁོར་ལོའི་ཐད་ཀའི་དཀྱིལ་ཧྃ་མགོ་ཐུར་དུ་ལྟ་བ་སྲན་མའི་གའུ་ཙམ་ལ་རེག་པས། ཐིག་ལེ་དཀར་དམར་གྱི་ཐིགས་པ་ཕྲ་མོ་མར་བབ། ལྟེ་བའི་མེའི་གསོས་བྱས། དེ་བས་ཀྱང་མེ་ཆེར་འབར་བ་བཞིན། ཧྃ་ལས་ཐིགས་པ་ཆེར་བབས་པས་དབུ་མའི་ནང་ཁེངས། དྭངས་མ་འཁོར་ལོ་བཞི་ཡི་རྩ་འདབ་སྟོང་པ་རྣམས་གང་བ་ལ་མ་ཡེངས་པར་བསྒོམ་པས། ལུས་སེམས་བདེ་བ་ཆེན་པོ་ངང་གིས་འཆར་རོ། །དེ་ནས་དངོས་གཞི་ཁྱད་པར་གྱི་གནད་ལ། ཡས་བརྟན་གྱི་ཡེ་ཤེས། མས་བརྟན་གྱི་ཡེ་ཤེས། ཀུན་ཏུ་བཟང་པོ་བསམ་གྱིས་མི་ཁྱབ་པའི་ཡེ་ཤེས་དང་གསུམ་ལས། དང་པོ་ལ་བཞི་ལས། བདེ་ཆེན་འཁོར་ལོའི་མན་ངག་ནི། འཁོར་ལོ་བཞིའི་དབུས་ན་དབུ་མ་ཡེ་ཤེས་ཀྱི་རྩ་ལ། དྭངས་མའི་དྭངས་མ། དཀར་དམར་འདྲེས་པ་ཉུངས་འབྲུ་ཙམ་གྱི་རྟེན་ལ་འོད་ལྔའི་གོང་བུ་སྲན་མ་རྡོག་པོ་ཙམ་རེ་བསམ་པའི་སྤྱི་གཙུག་གི་དྭངས་མ་ཉུངས་འབྲུ་ཙམ་ལ། མགྲིན་པའི་དྭངས་མ་འོད་དང་བཅས་པའི་དྲོད་ཀྱིས་ཞུ་བས། བྱང་ཆུབ་སེམས་ཀྱི་ཐིགས་པ་སྐྲའི་ཉག་ཙམ་བབས་པས་སྤྱི་བོའི་རྩ་འདབ་དང་། མགྲིན་པའི་རྟེན་གྱི་དྭངས་མ་ལ་ཞུགས། ཚད་མེད་བདེ་བས་ཁྱབ་པར་བསམ་ལ་འཇམ་རླུང་རང་ཞིར་བཟུང་ངོ་། །དེ་ནས་སྙིང་ཁའི་འོད་དང་དྭངས་མའི་དྲོད་ཀྱིས་མགྲིན་པའི་རྟེན་གྱི་དྭངས་མ་ཞུ་བས། ལོངས་སྤྱོད་འཁོར་ལོའི་རྩ་འདབ་དང་སྙིང་གའི་རྟེན་ལ་ཞུགས། ཟག་པ་མེད་པའི་བདེ་བར་སྐྱེས་པར་བསམ་མོ། །དེ་ནས་ལྟེ་བའི་འོད་དང་ཐིག་ལེའི་དྲོད་ཀྱིས་སྙིང་གའི་རྟེན་གྱི་དྭངས་མ་ཞུ་བས། ཆོས་ཀྱི་འཁོར་ལོའི་རྩ་འདབ་དང་། ལྟེ་བའི་རྟེན་གྱི་ཐིག་ལེ་ལ་ཞུགས། མཆོག་ཏུ་བདེ་བའི་ཡེ་ཤེས་སྐྱེས་པར་བསམ་མོ། །དེ་ནས་སྙིང་གའི་འོད་དང་རྟེན་གྱི་དྭངས་མའི་དྲོད་མར་སོང་། ལྟེ་བའི་རྟེན་གྱི་དྭངས་མ་ཞུ་བའི་དྭངས་མ་རླངས་ཀྱི་ཚུལ་དུ་རགས་པ་མ་ཡིན་ཕྲ་ལ་དྭངས་པར་སྤྲུལ་པའི་འཁོར་ལོའི་རྩ་འདབ་དང་། རོ་རྐྱང་དབུ་མའི་ནང་ཀུན་ཁྱབ་པར་ཞུགས་པས་ཉེ་བར་ཞི་བའི་བདེ་བས་ཁྱབ་སྟེ། དགའ་བཞིའི་ཡེ་ཤེས་སྐྱེས་པར་བསམ་མོ། །དེ་ནས་མས་བརྟན་གྱི་ཡེ་ཤེས་ལའང་བཞི་ལས། དང་པོ་སྙིང་གའི་འོད་ལས་ཟེར་འཕྲོས་ཏེ་ལྟེ་བར་སོང་བས་ཐིག་ལེ་རྟེན་དང་བཅས་པ་ཇེ་ཕྲ་ཇེ་ཆུང་ལ་ཡར་འདུས་སྙིང་གའི་འོད་དང་ཐིག་ལེ་ལ་ཐིམ་པའི་ངང་ལ་བཞག་གོ། །དེ་ནས་འོད་ཟེར་མགྲིན་པར་འཕྲོས་ཇེ་ཕྲ་ལས་སྙིང་གར་འདུས་པའི་ངང་ལ་བཞག་གོ། །དེ་ནས་ཡང་འོད་ཟེར་སྤྱི་བོའི་ཐིག་ལེ་རྟེན་དང་བཅས་པ་ལ་ཕོག་པས། ཇེ་ཕྲ་ཇེ་ཆུང་ལས་སྙིང་གར་འདུས་པའི་ངང་ལ་བཞག་གོ། །དེ་ནས་སྙིང་གའི་རྩ་འདབ་ཀྱི་དྭངས་མ་ལ་འདུས། དེ་ཡང་བརྟེན་པ་ཐིག་ལེ་སྲན་མ་ཙམ་ལ་འདུས། འོད་ལྔ་པོའང་དབུས་ཀྱི་མཐིང་ག་ནམ་མཁའ་ལྟ་བུའི་ངང་དུ་འདུས། དེ་ཡང་གདངས་ཇེ་ཕྲ་ལས་མཐར་ཡིད་ལ་མི་བྱེད་པ་ཀུན་ཏུ་བཟང་མོ་ཆོས་ཉིད་སྟོང་པ་ཆེན་པོའི་དབྱིངས་སུ་དག་པའི་ངང་ལ་མཉམ་པར་བཞག་གོ། །དེ་ནས་ཀུན་ཏུ་བཟང་མོ་བསམ་གྱིས་མི་ཁྱབ་པའི་ཡེ་ཤེས་ནི། དེའི་ཚེ་ལུས་རི་རྒྱལ་ལྟར་མི་གཡོ། ངག་ལྐུག་པ་ལྟར་མི་བརྗོད། སེམས་ནམ་མཁའ་ལྟར་མི་རྟོག་པའི་ངང་ལ་བཞག་པས། གང་ཡང་ཡིད་ལ་མི་བྱེད་པའི་སྟོང་པ་ནི་ཀུན་ཏུ་བཟང་མོ་ཆོས་ཉིད་དོན་གྱི་ཡེ་ཤེས་ལ། རང་གསལ་དྭངས་དང་བཅས་པའི་རིག་པ་གསལ་དྭངས་ཕྱེད་པའི་སྣང་ཆ་ནི་ཀུན་ཏུ་བཟང་པོ་ཆོས་སྐུ་བཞིའི་ཡེ་ཤེས་འདི་གཉིས་དབྱེར་མེད་རིག་པ་ཕྱི་ནང་བར་མེད་དུ་ཕྱམ་གདལ་བ་ནི་དབྱིངས་དང་ཡེ་ཤེས་དབྱེར་མེད་ཀུན་བཟང་ཡབ་ཡུམ་ཟུང་འཇུག་གཉུག་མའི་ཡེ་ཤེས་རྫོགས་པ་ཆེན་པོ་ཞེས་བྱའོ། །ཚུལ་འདི་ནི་སྒྱུ་འཕྲུལ་དོན་གྱི་རྫོགས་རིམ་བླ་ན་མེད་པའི་མཐར་ཐུག་ངེས་པ་དོན་གྱི་བཅུད་ཀྱི་སྙིང་པོ་དེ་ཁོ་ན་ཉིད་ངེས་པའི་གནད་བསྟན་པའོ། །ཚུལ་འདི་གསང་སྔགས་རྡོ་རྗེ་ཐེག་པའི་ལམ། །ཟབ་ཅིང་རྒྱ་ཆེ་གསང་བ་མཆོག་གི་གནས། །མྱུར་དུ་རྫོགས་པའི་སངས་རྒྱས་སྒྲུབ་བྱེད་ཡིན། །སྐལ་བཟང་སྐྱེ་བོས་དང་དུ་བླང་བར་མཛོད། །དགེ་བ་འདི་ཡིས་མ་ལུས་འགྲོ་བ་ཀུན། །གསང་སྔགས་རྡོ་རྗེ་ཐེག་ལ་རབ་ཞུགས་ཏེ། །ཉིན་མཚན་རིམ་གཉིས་འཁོར་ལོའི་བཞོན་པ་ཡིས། །དངོས་གྲུབ་ཡིད་བཞིན་གླིང་དུ་ཕྱིན་པར་ཤོག །སྣ་ཚོགས་ཁམས་ཅན་འཁོར་བའི་རང་བཞིན་དང་། །གཉིས་མེད་མྱ་ངན་འདས་པ་རོ་གཅིག་ཏུ། །ནམ་ཞིག་ནུས་ལྡན་ཐབས་ཀྱིས་འདྲེས་པའི་ཚེ། །གཞན་དོན་ལྷུན་གྲུབ་ཆོས་ཀྱི་ཆར་འབེབས་ཤོག །ཀུན་མཁྱེན་ངག་གི་དབང་པོ་རྡོ་རྗེ་གཟི་བརྗིད་ཀྱིས་མཛད་པའི་རྫོགས་པ་ཆེན་པོ་སེམས་ཉིད་ངལ་གསོའི་དགེ་བ་གསུམ་གྱི་དོན་ཁྲིད་བྱང་ཆུབ་ལམ་བཟང་ལས་ཁོལ་དུ་ཕྱུང་བའོ། །ཕྱོགས་དང་དུས་ཐམས་ཅད་དུ་བཀྲ་ཤིས་ཀྱི་དཔལ་རབ་ཏུ་འབར་བས་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག །མངྒ་ལཾ།། །།

སྒྱུ་འཕྲུལ་དྲྭ་བའི་གཞལ་མེད་ཁང་གི་རྣམ་པར་བཞག་པ་གསལ་བའི་སྒྲོན་མེའི་རྩ་བ། དྷརྨ་ཤྲཱི།

སྒྱུ་འཕྲུལ་དྲྭ་བའི་གཞལ་མེད་ཁང་གི་རྣམ་པར་བཞག་པ་གསལ་བའི་སྒྲོན་མེའི་རྩ་བ་བཞུགས་སོ། །ན་མོ་བཛྲ་སཏྭ་ཡ། རིགས་རྣམས་ཀུན་གྱི་བདག་པོ་མཆོག །སངས་རྒྱས་ཀུན་གྱི་སྤྱི་གཟུགས་ཅན། །དྲུག་པ་ཀུན་ཏུ་བཟང་པོ་དང་། །དབྱེར་མེད་ཀུན་མཁྱེན་བླ་མ་ལ། །དངོས་པོ་ཀུན་གྱི་ཕྱག་བཙལ་ནས། །སྒྱུ་འཕྲུལ་དྲྭ་བའི་གཞལ་ཡས་ཁང་། །བསྒོམ་བྱ་བཞིན་དུ་བཞེངས་པའི་ཚུལ། །མཚུངས་མེད་བླ་མའི་གསུང་བཞིན་བྲི། །དེ་ལ་ཁོར་ཡུག་༡འོག་གཞི་༢ལོགས་༣། །ཐོག་འབུབབས་༤སྒོ་དང་༥རྟ་བབས་༦སོ། ༈ །ཁོག་ཡུག་༡མེ་གུར་ཆ་ཆེན་གཅིག །དེ་ཕྱེད་རྡོ་རྗེ་རྭ་བའི་ནང་། ༈ །འོག་གཞི་༢མདའ་ཡབ་ཟུར་ཐིག་ནས། །ཆ་ཆེན་ཕྱེད་དོར་ཟླུམ་པོ་རུ། །བསྐོར་བ་པདྨའི་ལྟེ་བའི་མཐར། །ཆ་ཕྲན་གཉིས་པའི་འདབ་མས་བསྐོར། །དེ་སྟེང་པད་ལྟེ་དང་མཉམ་པའི། །འཁོར་ལོ་རྩིབས་བཞི་ལྟེ་བ་དང་། །རྩིབས་བརྟེན་མུ་ཁྱུད་ལྡན་པ་སྟེ། །འདིའི་དཔངས་ཆ་ཆེན་གཅིག་ཡིན་རྡོ་རྗེ་སྔོན་པོ་འགྲེང་བུ་གྲངས་མེད་ཀྱིས་ཡར་སྤགས་པའོ། །རྒྱུད་དང་མན་ངག་གཞན་ཕལ་མོ་ཆེ་བ་ལ་ནི་སྣ་ཚོགས་རྡོ་རྗེར་བཞེད། ༈ །ལོགས་༣ནི་དབུས་ནས་ཆ་ཆེན་བཞི། །དོར་བའི་ཕྱི་རོལ་རྩིག་པ་ནི། །དཔངས་སུ་ཆ་བྲན་བཅུ་གསུམ་སྟེ། །ཆ་བྲན་གཅིག་ཞེང་ལྔ་སྦྲགས་སོ། །དེ་ཡི་རྩ་བར་འདོད་ཡོན་གྱི། །ཟུར་བཞི་དང་དབུས་བརྒྱད་ལ་ཟླ་ཕྱེད་རྡོ་རྗེས་མཚན་པ་བཅུ་གཉིས་ཀྱིས་བརྒྱན། སྣམ་བུ་ཞེང་དང་དཔངས་གཉིས་ཀར། །ཆ་ཆ ེན་ཕྱེད་རེ་སྒོ་ཁྱུད་ཀྱི། །རྩིག་པའི་ཕྱི་ལ་ཐུག་པས་བསྐོར། །རྩིག་སྟེང་སེར་པོ་ཕྲ་ཅན་རིན་ཆེན་ཕ་གུ་ནི། །ཆ་ཕྲན་གཅིག་དཔངས་ཞེང་ཕྱེད་གཉིས། །ཕྱེད་པོ་རྩིག་པའི་ཕྱིར་འཕྱང་བ། །དེ་ཉིད་འདེགས་བྱེད་སེང་མགོ་ཡི། །ཁ་ནས་མུ་ཏིག་དོ་ཤལ་འཕྱང་། །ཕ་གུའི་སྟེང་དུ་བྲེ་སྤུངས་དཔངས། །ཆ་ཕྲན་ཕྱེད་དང་གཉིས་པ་སྟེ། །ཡང་ན་ཀ་ཐུང་ཆ་ཕྲན་གཅིག །གཞུ་ལ་ཆ་ཕྲན་ཕྱེད་པའོ། །བྲེ་དམར་སྤུངས་དང་ཀ་བ་གང་བྱེད་ཀྱང་། །ཟུར་དུ་རེ་རེ་ཕྱོགས་བཞི་པོར། །གསུམ་གསུམ་ཁྱོན་དྲིལ་བཅུ་དྲུག་གོ། །དེ་སྟེང་གདུང་ལེབ་བརྩིག་མཐའ་དང་། །ཁད་མཉམ་ཞེང་དུ་ཆ་བྲན་གཅིག །དཔངས་སུ་ཆ་བྲན་ཕྱེད་པས་འགེབས། །ཕྱོགས་མདོག་གདུང་སྟེ་ཕྱམ་ཉེར་བརྒྱད་གྱི་ཚད་དཔངས་ལ། །ཆ་ཕྲན་ཕྱེད་དང་གདུང་ཕྱིར་ཡང་། །དེ་ཙམ་འཕྱར་སྣེ་ཙི་པ་ཏྲའི། །ཁ་ནས་རིན་ཆེན་དྲྭ་བ་དང་། །དྲྭ་བ་ཕྱེད་སྣེ་ལ་དྲིལ་ཆུང་དང་ཉི་ཟླ་ནོར་བུ་སོགས་རླུང་བསྐྱོད་ཅན། པ་འཕྱང་བའོ། །དེ་ཉིད་ནང་དུ་མི་འཕོས་པའི། །ཐབས་སུ་གདུང་དང་གཞུའི་ངོས་ལ། །གཟེར་བཏབ་གསེར་སྐུད་བཞི་པོ་སྦྲགས། །ཕྱམ་སྟེང་ཆ་ཆུང་གཅིག་ཙམ་པའི། །དཔངས་ལ་བགོས་པའི་བྱི་རྩེ་དང་། །བྱ་འདབ་བཀལ་བ་འདོད་སྣམ་གྱི། །ཕྱི་མཐའི་ཁ་ད་ཆད་དུ་བྱ། །འོག་ཏུ་བྱ་འདབ་ནང་ཙམ་ནས། །ཆ་ཕྲན་དཀར་པོ་ཆུ་བུམ་ཐུར་བསྟན་ལྟ་བུ། གཅིག་པའི་ཤར་བུ་འཕྱང་། །ཐོག་སྟེང་པུ་ཤུད་དཀར་པོ་ལ་དམར་པོའི་པུ་ཤུད་དོད་པ། ཆ་བྲན་གཅིག །རྩིག་པའི་དྲང་ཐད་བསླང་བའོ། ༈ །ཐོག་འབུབས་༤རྩིག་ནང་སེང་གདུང་གིས། །བཏེགས་པའི་ཀ་ཐུང་ཆ་ཕྲན་གསུམ་རེའི་སྟེང་དུ། གདུང་ཟླུམ་བཏང་བའི་ཁར། །གདུང་ལེབ་སྟེང་གི་ཕྱམ་བཀལ་ཏེ། །གཡབ་སྒོར་ཚུལ་དུ་ཕྱམ་གྱི་ཐོག །གློ་འབུར་ཕྱི་མཐའི་ཁད་མཉམ་འབུབས། །ཁྱམས་ཀྱི་ས་རིན་ཆེན་སྣ་ཚོགས། གཞི་སྒོ་ཁང་ལས། །ཆ་བྲན་གཅིག་གིས་མཐོ་བར་བྱ། །ཁྱམས་ཞེང་ཆ་བྲན་གསུམ་པའི་ནང་། །གློ་འབུར་ཆ་བྲན་གཅིག་པའོ། །དེ་ནང་མུ་ཁྱུད་རྡོར་ཕྲེང་དང་། །རྩིབས་བཞི་ལྟེ་བར་བཅས་པར་བྱ། །གྲུ་ཆད་རྡོར་ཕྲེང་རྩིབས་ལྟེ་བ། །རིམ་པར་ཆ་ཕྲན་རེ་རེ་སྤགས། །གློ་འབུར་གྲུ་ཆད་ལས་ཐིག་གང་། །མཐོའོ་རྩིབས་མཆན་རྡོར་ཕྲེང་ལས། །དེ་ཙམ་དམའ་བར་བྱས་ན་མཛེས། །ཐོག་འབུབས་བར་པ་གདུང་ཟླུམ་སྟེང་། །བུམ་པའི་རྩིག་དཔངས་ཆ་ཕྲན་བདུན། །བུམ་གདན་ཆ་ཕྲན་གཅིག །ལྟོ་བའི་ཚུལ་ནི་ཆ་ཆེན་གཅིག་ཕྱིར་གྱེས་པ་ལྟ་བུ། ཆ་ཕྲན་བར་ནང་དུ་རྒྱུ་བ་ལྟ་བུའོ། །དེ་སྟེང་གདུང་ཟླུམ་ཆ་ཕྱེད་འགེབས། །ནང་གི་རྡོར་ཕྲེང་ལ་བརྟེན་པའི། །གཞུ་དང་ཀ་གདན་བཅས་པའི་དཔངས། །ཆ་བྲན་ཉི་ཤུ་རྩ་གཅིག་རེ། །ཡོད་པའི་ཀ་བ་ཕྱོགས་རེ་རེར། །གཉིས་གཉིས་བརྒྱད་ཕྱོགས་མདོག་རིན་པོ་ཆེ་ལས་གྲུབ་པ། ཀྱིས་བཏེགས་པའི་སྟེང་། །དཔངས་སུ་ཆ་བྲན་ཕྱེད་ལྡན་པའི། །རྡོ་རྗེའི་ཏལ་གདུང་བཞིས་རྒྱུག་པས། །མིག་མངས་རིས་སུ་བྲིས་པའི་སྣེ། །གདུང་ཟླུམ་སྟེང་དུ་ཁེལ་བར་བྱ། །དེ་སྟེང་ཆ་ཆུང་གཅིག་དཔངས་ལ། །བགོས་པའི་ཕྱམ་རྩ་ཉེར་བརྒྱད་དང་། །བྱ་འདབ་ཟླུམ་པོ་ཕྱོགས་བཞིར་དྲུག་རེ་མཚམས་བཞིར་རེ་རེ། ཕྱི་ཁྱམས་སྣེ་རྣམས་ཙི་པ་ཏྲའི་ཁ་ནས་དྲྭ་བ་དང་དྲྭ་ཕྱེད་འཕྱང་བས་བུམ་ལྟོ་ཁེབས་པའོ། །གདུང་ཟླུམ་ཕྱིར། །ཆ་ཆུང་གཉིས་པའི་འཕྱར་ལྡན་པས། །རེ་མིག་དབུས་མ་མ་གཏོགས་སྤང་ལེབ་དང་ཐོག་སས་བརྡལ། མཐར་རྒྱ་ཕུབ་དང་པུ་ཤུ་གཉིས་གྲུ་བཞིའི་ཚུལ་དུ་བསྐོར་དགོས། ཕུབ། །དབུས་ཀྱི་མཐོང་ཁ་གྲུ་བཞི་པའི། །ཟུར་བཞིར་ཀ་གདུང་གཞུ་བཅས་དཔངས། །ཆ་ཆེན་གཅིག་གོ་ཕྱོགས་བཞི་ལ་སྐར་ཁུང་བཞི། དེ་ཡི་སྟེང་། །གདུང་ལ་ཆ་བྲན་ཕྱེད་ཡིན་ཏེ། །རྒྱ་ཕུབ་ཆ་ཕྲན་གཅིག་པའོ། །དེ་སྟེང་པདྨ་ཆ་ཕྲན་གཅིག །ཆོས་འཁོར་བཅུ་གསུམ་ཆར་ཁེབས་བཅས། །བསྡོམས་པའི་དཔངས་ལ་ཆ་ཆེན་གཉིས། །རྩེ་མོར་སྒྱུ་འཕྲུལ་ཞི་བ་ལ། རྡོ་རྗེ་ནོར་བུ་ཡི། །ཏོག་དཔངས་ཆ་ཕྲན་ཕྱེད་བདུན་ནོ། ༈ །སྒོ་ནི་ཕྱོགས་༥བཞིའི་རྩིག་པའི་དབུས། །ཆ་ཆེན་གཅིག་པའི་སྒོ་བྱ་སྟེ། །མདུན་དུ་སྒོ་ཁྱུད་སྒོ་ཡི་ཚད། །དེ་ཡི་གཡས་གཡོན་སྒོའི་ཕྱེད་རེ། །བཀྱེད་ནས་འཐེན་པ་སྒོ་འགྲམ་སྟེ། །དེ་མདུན་དེ་མཉམ་སྒོ་ལོགས་འཐེན། །སྒོ་དང་ཁྱུད་འགྲམ་ལོགས་བཞི་ཀ །དཔངས་སུ་ཆ་ཆེན་ཕྱེད་གསུམ་དང་། །ཆ་ཆུང་གཅིག་གི་སུམ་གཉིས་ལྡན། ༈ །སྒོ་ལོགས་མཐའ་ཡི་རྩིག་མཚམས་ནས། །ནང་ཐད་ཆ་ཕྲན་ཕྱེད་གཉིས་རེ། །གཞལ་མཚམས་ཆ་ཆུང་ཕྱེད་པ་ཡི། །ཞེང་ལྡན་ཀ་བ་དཔངས་ཆ་བྲན། །ཕྱེད་བརྒྱད་ལྡན་པས་བཏེགས་པ་ཡི། །ཆ་བྲན་ཕྱེད་པའི་གདུང་མ་གཏོད། །དེ་སྟེང་ཀ་ཐོག་ཀ་བཞག་གིས། །ཀ་ཐུང་དཔངས་སུ་ཆ་ཆུང་ནི། །ཕྱེད་གཉིས་ཀྱིས་བཏེགས་སྔར་འདྲ་ཡི། །གདུང་བཀལ་དེ་སྟེང་སྒོ་ལོགས་ནས། །འཁོར་བ་ཡ་ཕུབས་རྩིག་པའོ། །ཀ་ཐུང་བར་སྟོང་གསུམ་པོ་དེར། །གཡས་གཡོན་གསུམ་གསུམ་དབུས་སུ་ལྔའི། །བཅུ་གཅིག་རྡོ་རྗེའི་དྲྭ་མིག་བྱ། །རྩ་ཐིག་དང་ནི་སྒོ་ཁྱུད་གཉིས། །ཕྲད་མཚམས་གཡས་གཡོན་ཆ་ཆུང་ཕྱེད། །སྟེང་འོག་ཆ་ཕྲན་རེ་རེ་ཡི། །རུ་བཞིའི་དབུས་སུ་སྒོ་གླེགས་ནི། །ཆ་ཕྲན་བདུན་དཔངས་ཉིས་རལ་འཛུགས། ༈ །རྟ་བབས་༦ལ་ནི་རྒྱུ་འབྲས་གཉིས། །རྒྱུ་ཡི་རྟ་བབས་ཐེམ་སྐས་ཏེ། །སྒོ་ཁང་ཕྱི་མ་ལས་ནང་མ། །ཆ་ཆུང་གཅིག་གིས་སྤགས་པ་ལ། །ཕྱི་ཡི་ཐེམ་སྐས་བཞི་པོ་འཛུགས། །སྒོ་ཁང་ནང་མ་ལས་ཀྱང་ཁྱམས། །མཐོ་བ་དེ་མཉམ་ཐེམ་པ་ཡི། །འོག་ཏུའང་ཡོད་ཕྱིར་ཐེམ་པའི་ཕྱིར། །ནང་གི་ཐེམ་སྐས་བཞི་པོ་འཛུགས། ༈ །གཉིས་པ་འབྲས་བུའི་རྟ་བབས་ནི། །འདེགས་བྱེད་ཀ་བ་སྒོ་ལོགས་ཀྱི། །གཡས་གཡོན་ཆ་ཕྲན་རེ་རེ་དང་། །མདུན་དུའང་ཆ་བྲན་གཉིས་གཅིག་སྙམ་ལགས། དོར་མཐར། །སྟེགས་བུ་གྲུ་བཞི་ཆ་ཆུང་གཅིག །དེ་སྟེང་བུམ་པའང་ཚད་དེ་མཉམ། །བརྩེགས་པས་ཆ་ཆུང་གཉིས་པའི་སྟེང་། །ཀ་བ་གཞུར་བཅས་ཆ་ཆུང་ལྔ ། །བསྡོམས་པས་དཔངས་སུ་ཆ་ཕྲན་བདུན། །ཞེང་ལ་ཆ་ཕྲན་གཅིག་ལྡན་པའི། །ཀ་བ་ཕྱི་མ་གཉིས་པོ་འཛུགས། །དེ་དང་ཁད་མཉམ་འདོད་སྣམ་ལ། །རེག་པའི་ཀ་བ་ནང་མ་གཉིས། །བཙུགས་པའི་ཀ་བ་བཞི་པོ་ཡིས། །དཔངས་ཞེང་ཆ་ཕྲན་རེ་ལྡན་པའི། །གདུང་སྣ་བརྒྱད་བཏེགས་རྟ་བབས་རྨང་། །རྒྱབ་གདུང་དུམ་བུ་གཉིས་ཡིན་ཕྱིར། །ནང་གི་གདུང་སྣ་གཉིས་པ་དེ། །སྒོ་འགྲམ་རྩིག་པ་དག་ལ་བརྟེན། །རྒྱབ་མདུན་གདུང་གཉིས་ཀ་བ་ལས། །གཡས་གཡོན་ཆ་ཕྲན་རེ་འཕྱར་བ། །ཀ་རྒྱན་གླང་སེང་དག་གིས་བཏེགས། །གདུང་སྟེང་རྟ་རྐང་སྣམ་བུ་ནི། །མདུན་སྣམ་གདུང་དང་དཔངས་ཞེང་མཉམ། །གཡས་གཡོན་ཞེང་ལ་ཆ་ཆེན་རེ། །ཡོད་ཕྱིར་ཀ་རྒྱན་མཐའ་དང་མཉམ། །དཀྱུས་སུ་ཆ་བྲན་ལྔ་པའོ། །དེ་སྟེང་ཆུ་སྐྱེས་དང་སྒྲོམ་གཉིས། །མདུན་དུ་སྔར་དང་འདྲ་བ་ལས། །གཡས་གཡོན་ཆ་ཕྲན་གཅིག་རེ་འཕྱར། །སྣམ་བུ་དེ་གསུམ་མདུན་ངོས་སུ། །སོ་སོར་རེ་ཁཱས་བཅད་པ་ལས། །ནང་ནི་ཁོང་སྟོང་འབྲེལ་བར་འདོད། །གཡས་གཡོན་མདུན་གྱི་སྣམ་བུ་རྣམས། །སྒོ་ཁང་རྩིག་པར་ཆ་བྲན་རེས། །མ་རེག་མུན་པ་པ་ཏིའོ། །སྣམ་བུ་ཁོང་སྟོང་འབྲེལ་ཁོག་ཏུ། །འོག་གི་ཀ་ཐོག་ཀ་བཞག་གི། །ཀ་བ་བཞི་དང་སྒོ་ལོགས་ཀྱི། །རྩིག་པའི་ཐད་ཀྱི་མདུན་ངོས་སུའང་། །ཀ་བ་གཉིས་ཏེ་དྲུག་བཙུགས་པའི། །ཀ་དཔངས་ཆ་བྲན་གཉིས་དང་ནི། །ཐིག་སྐུད་གཉིས་དང་དེ་ཕྱེད་ལྡན། །དེ་སྟེང་གདུང་དཔངས་ཐིག་སྐུད་གང་། །མདུན་དང་གཡས་གཡོན་ཁོར་མོར་བཀབ། །དེ་སྟེང་སྒོ་ཁང་སྟེང་གི་ནི། །ཕྱམ་སྣེ་བཀལ་ཏེ་ཐོག་ཕུབ་པའི། །ཕྱམ་བཅས་ཐོག་གི་འཐུག་རྔམས་ལ། །ཐིག་སྐུད་ཕྱེད་དང་གཉིས་པའོ། །སྒོ་ཁྱུད་གཡས་གཡོན་རྩིག་ཐད་སྟེང་། །བྱ་འདབ་པུ་ཤུ་མཚོན་ཙམ་བྱ། །དེ་ལྟར་སྒོ་ཁང་དང་ནི་སྒྲོམ། །ཐོག་རྒྱུན་གཅིག་ཏུ་གྱུར་པའི་སྟེང་། །དཔངས་སུ་ཆ་ཕྲན་ཕྱེད་བཞི་རེ། །ཡོད་པའི་ཀ་བ་བརྒྱད་པོ་ནི། །ཟུར་བཞིར་ལོགས་ཀྱི་རྩིག་མཐའ་དང་། །ཐད་ཀར་ཕྱི་ཀ་བཞི་པོ་འཛུགས། །སྒོ་ཁྱུད་རྩིག་པའི་ནང་མཐའ་དང་། །ཐད་མཉམ་མདུན་རྒྱབ་ནང་ཀ་བཞི། །བཙུགས་པས་རྒྱབ་ཀ་བཞི་པོ་ནི། །འགྲམ་རྩིག་ཕྱི་དང་ཁ་ད་ཆད། །མདུན་ཀ་བཞི་པོ་རྟ་བབས་ཀྱི། །སྣམ་བུའི་ཕྱི་མཐའ་ལས་ནང་དུ། །ཐིག་གང་དོར་བའི་ནང་དུའོ། །ཀ་སྟེང་ཆ་ཕྲན་ཕྱེད་པ་ཡི། །ཏལ་གདུང་བཞི་ཡིས་གྲུ་བཞིར་ཕུབས། །ཟར་ཚགས་སྣ་འཕྱོང་ཤར་བུ་གསུམ། །ཀ་གདུང་ངོས་ལ་སྦྲགས་པ་སྟེ། །སྤང་ལེབ་ཟུར་ལངས་ལྟ་བུ་ཡིན། །ཆུན་འཕྱང་གཞི་མ་བར་སྟོངས་ལ། །རིན་ཆེན་སྒྲིལ་བའི་དྲྭ་བ་འཕྱང་། །གདུང་སྟེང་རྒྱ་ཕུབས་ཁྱུང་མགོ་འགེབས། །མདུན་ངོས་རྟ་བབས་བདུན་ཁང་མཉམ། །ཁྱུང་མགོ་ཆ་བྲན་ཕྱེད་ཙམ་འཕྱར། །དཔངས་ནི་ཐམས་ཅད་ཆ་རེར་མཉམ། །གཡས་གཡོན་སྒྲོམ་ལས་ཟ་ར་ཚགས། །ཆ་ཕྲན་གཉིས་ཐུང་དེ་ལ་ནི། །སྣ་འཕྱོང་ཆ་ཕྲན་གཅིག་གིས་རིང་། །དེ་ལས་ཆུན་འཕྱང་གཉིས་ཀྱིས་ཐུང་། །དེ་ལས་ཤར་བུ་གཅིག་གིས་རིང་། །དེ་ལས་ཁྱུང་མགོ་གཅིག་འཕྱར་རོ། །མདུན་གྱི་རྟ་བབས་སྣམ་བུ་རྣམས། །གླང་རྒྱབ་ཐད་ཀར་ཆད་པ་ཡིན། །དེ་ལ་གླང་རྒྱབ་མིག་གསུམ་གྱི། །དབུས་མ་སྒྲོམ་དང་ཟ་ར་ཚགས། །སྣ་འཕྱོང་ཆུན་འཕྱང་ཕྱེད་མན་ཏེ། །རྟ་རྐང་ཆུ་སྐྱེས་གཉིས་པོ་ལ། །གཡས་གཡོན་མིག་སྟེ་སྒྲོམ་མ་མཐར། །དབུས་མའི་མིག་དང་སྦྲེལ་མཚམས་འོང་། །ཕྱི་མ་ཆ་ཆུང་གཅིག་པ་ཡི། །མུ་རན་དག་གིས་མཛེས་པར་བྱ། །བར་སྟོང་ཞེང་ལ་མིག་དབུས་མའི། །ཆེ་སར་ཆ་ཆེན་གཅིག་པ་སྟེ། །གཡས་གཡོན་མིག་གཉིས་དེ་ཉིད་ལས། །ཆ་བྲན་གཉིས་རེ་ཕྱིར་བསྐྱེད་དོ། །རྒྱ་ཕུབས་སྟེང་དབུས་པདྨ་ནི། །དཔངས་སུ་ཆ་གཅིག་ཞེང་ལ་གཉིས། །ཆོས་འཁོར་ཆ་གཉིས་གདུགས་ལ་གཅིག །པདྨ་ལས་ནི་ཆ་བྲན་ཕྱེད། །གཞལ་མཐར་རི་དྭགས་ཕོ་མོའི་གཟུགས། །ཆ་ཆུང་གཅིག་ཏུ་མགྲིན་བཅས་གདོང་། །འགྲེང་ཞིང་འཁོར་ལོའི་རྩེ་ལ་བལྟ། །རྟ་བབས་གླང་རྒྱབ་དོ་ཤལ་ནང་། །པུ་ཤུའི་ཁོ་ར་ཁོར་ཡུག་སོགས། །ཕྱོགས་ཀུན་གདུགས་འཕན་རྒྱལ་མཚན་དང་། །མེ་ཏོག་ཕྲེང་བ་སོགས་ཀྱིས་བརྒྱན། །སྒོ་བཞི་རེ་རེར་གླང་ཆེན་དང་། །གཡས་གཡོན་ཏ་ལའི་ཤིང་རེ་རེ། །ཕྱོགས་བཞིར་དཔག་བསམ་ལྗོན་ཤིང་དང་། །རིན་ཆེན་འབར་བའི་ཕུང་པོ་ནི། །གཉིས་གཉིས་བརྒྱད་ཀྱིས་ལེགས་པར་བཀོད། །རྡོ་རྗེ་ར་བའི་ནང་ཁོངས་ཀྱི། །པདྨའི་ལྟེ་བའི་ཁ་ཁྱེར་སྟེང་། །འཁོར་ལོའི་རྩིབས་རྟེན་མུ་ཁྱུད་ལ། །ལྷ་ཆེན་ཕྱོགས་སྐྱོང་བརྒྱད་ལ་སོགས། །རང་རང་མཆོད་ཡོན་ཐོགས་ལ་འགོད། །འདི་ནི་སྒྱུ་འཕྲུལ་ཞི་དཀྱིལ་གྱི། །རྣམ་པར་བཞག་པ་བརྗོད་པ་སྟེ། །ཁྲོ་དཀྱིལ་ལ་སོགས་སྒོ་སྦྲགས་དང་། །བཀའ་བརྒྱད་ལྟ་བུ་གཅིག་གི་ནང་། །ཕོ་བྲང་དགུ་རྫོགས་ཡོད་པ་དང་། །ཐོག་འབུབས་ལ་སོགས་མི་འདྲའི་ཁྱད། །མཐའ་དག་བརྗོད་པར་མི་ནུས་པས། །འདི་ལས་དཔགས་ཏེ་ཤེས་པར་བྱ། །དེ་ལྟར་སྒྱུ་འཕྲུལ་དྲྭ་བ་ཡི། །རྟེན་གྱི་དཀྱིལ་འཁོར་གསལ་སྒྲོན་འདི། །རྗེ་བཙུན་བླ་མའི་དགོངས་པ་བཞིན། །སྨྱོས་བཙུན་དྷརྨ་ཤྲཱི་ཡིས། །ཚིག་སྦྱོར་སྤངས་ཏེ་གོ་བདེར་སྦྱར། །འདི་ནི་མཁས་འདོད་མ་ཡིན་ཏེ། །སྔགས་པ་བློ་གསར་དོན་དུའོ། །དགེ་བས་འགྲོ་ཀུན་འཚང་རྒྱ་ཤོག །ཤུ་བྷཾ།། །།

སྒྱུ་འཕྲུལ་དྲྭ་བའི་གཞལ་མེད་ཁང་གི་རྣམ་པར་བཞག་པ་གསལ་བའི་སྒྲོན་མེའི་འགྲེལ་པ། དྷརྨ་ཤྲཱི།

སྒྱུ་འཕྲུལ་དྲྭ་བའི་གཞལ་མེད་ཁང་གི་རྣམ་པར་བཞག་པ་གསལ་བའི་སྒྲོན་མེའི་འགྲེལ་པ་བཞུགས་སོ། །བླ་མ་དམ་པའི་ཞབས་ལ་ཕྱག་འཚལ་ལོ། །ད་ནི་གཞུང་གི་དཀའ་བའི་དོན་རྣམས་ཅུང་ཟད་དགྲོལ་བར་བྱའོ། །འདི་ལ་ཁོར་ཡུག །འོག་གཞི། ལོགས། ཐོག་འབུབས། སྒོ། རྟ་བབས་དང་དྲུག །དང་པོ་ཁོར་ཡུག་ལ། འདིར་མེ་རི། རྡོ་ར། པད་ར་གསུམ་ལས་མི་བྱེད་པ་ནི། རྡོ་རྗེ་ལས་རིམ་ལས། རྡོ་རྗེ་ལག་ཆུ་མེ་རི་ཧར། །ཕྱོགས་རྣམས་ཀུན་ཏུ་ཁྱབ་པར་བྱ། །ཞེས་དང་། བདེ་འདུས་ཞི་བ་རིགས་བརྒྱའི་སྒྲུབ་ཐབས་སློབ་དཔོན་གྱིས་མཛད་པ་ལས་ཀྱང་། པད་ཕྲེང་མེ་འོད་རྡོ་རྗེའི་ཕྲེང་བས་མཛེས་པར་བསྐོར། ཞེས་གསུངས་པས་སོ། །འོ་ན་ཁོར་ཡུག་གི་ཚད་རྡོ་ར་ཆ་ཕྲན་གཉིས་སོགས་བྱེད་པ་གང་ཞེ་ན། སྤྱིར་སྲུང་འཁོར་གྱི་རྭ་གུར་འདི་རྣམས་དམིགས་པའི་དུས་སུ་ཇི་ཙམ་ནུས་པ་བསྒོམ་གྱི་ཚད་གཅིག་ཏུ་མ་ངེས་མོད། འོན་ཀྱང་གཟུགས་བརྙན་བཞེངས་པ་ལ་སོགས་ལ་དེ་ལྟར་མི་རུང་བས་ཚད་རྣམ་པར་བཞག་པ་ནི། རྡོ་རྗེ་ལས་རིམ་ལས། རྡོ་རྗེ་ལག་ཆུ་ཧར་བཅས་པ། །རྟ་བབས་ཕྱེད་དང་གསུམ་དུ་བྱ། །ཞེས་གསུངས་པའི་རྟ་བབས་ཕྱེད་དང་གསུམ་ནི་ཆ་ཕྲན་ཕྱེད་གསུམ་ཡིན་ནམ་སྙམ་དུ་རྟོགས་པར་མི་བྱ་སྟེ། འདི་ནས་རྟ་རྐང་གི་མཐའ་གཅིག་ནས་མཐའ་ཤོས་ཀྱི་བར་རྟ་བབས་ཀྱི་ཕྲེང་ལ་ཆ་ཆེན་བཞི་ཡོད་ལ། དེའི་ཕྱེད་ཆ་ཕྱེད་གཉིས་ཡིན་པའི་ཕྱིར། རྟ་བབས་ཕྱེད་དང་། ཞེས་གསུངས། ཆ་ཆེན་གཉིས་པོ་དེ་ལས་ཀྱང་ཕྱེད་ནང་མ་ཕྱེད་དུ་གཏུབས་ཏེ། ཆ་ཆེན་གཅིག་ཤོས་དང་བཅས་པས་གསུམ་འབྱུང་བའི་ཕྱིར། གསུམ་དུ་བྱ། །ཞེས་གསུངས་པ་སྟེ། འདི་ཡང་ཚད་དེ་ལྟར་དུ་བགྱིས་སོ། །དེ་ཡང་སྲུང་འཁོར་རྒྱས་པའི་སྐབས་སུ་མཚོན་ཆ་འཆོལ་བ། མཚོན་ཆ་དམ་ཚིག །བསྲུང་བ་འཁོར་ལོ། ཁྲོ་བཅུ་རོལ་པ་རྣམས་ཡོད་པ་ལས། བླ་མ་གོང་མ་རྣམས། ཞི་བ་ལ་མཚོན་ཆ་དམ་ཚིག་མཛད་པར་གྲགས་པ་ལྟར་ན། དེ་ལའང་གུར་རིམ་པ་མང་པོ་ཡོད་ཀྱང་། བྲིས་པའི་དཀྱིལ་འཁོར་དང་བསྟུན་ནས་སྲུང་འཁོར་ལ་ཡོད་པ་ཐམས་ཅད་བྲིས་ཆ་ལ་མ་བྲིས་ཀྱང་ཆོག་པའི་རིག་པས་འདིར་རྡོ་རྗེ་དང་མེ་གུར་གཉིས་སུ་བསྡུ་བར་མཛད་དོ། །དེ་ལྟར་ན་རྡོ་རྗེ་ས་གཞི་དང་ར་བ་སོགས་མེད་དམ་སྙམ་ན། གུར་གྱི་སྐད་དོད། པཉྩ་ར་ཞེས་པ། ཟ་མ་ཏོག་ལྟ་བུའི་སྣོད་དང་། གཟེབ་མ་དང་། དྲྭ་བ་ལའང་འཇུག་པའི་ཕྱིར། འདིར་གུར་ཞེས་པ་རྡོ་རྗེའི་ས་གཞི་ར་བ་སོགས་ཐམས་ཅད་ཀྱི་སྤྱི་མིང་དུ་བྱ་སྟེ། དཔེར་ན། ཟ་མ་ཏོག་ཞེས་པ་དེའི་མཐིལ་དང་ལོགས་དང་ཁེབས་ཐམས་ཅད་ཀྱི་སྤྱི་མིང་ཡིན་པ་ལས་སོ། །སོ་སོར་དབྱེ་བ་མེད་པ་བཞིན་ནོ། །རྡོ་རྗེའི་ར་བ་བརྩིགས་ལུགས་ནི། འོག་གཞི་རྡོ་རྗེའི་ས་གཞི་བརྡལ་བ་ལོགས་ཆ་ཆུང་གཉིས་ལ་རྡོ་རྗེ་སྔོན་པོ་གྱེན་ལང་གི་ར་བ་ཟླུམ་པོ་གཞལ་ཡས་ཁང་དང་མཉམ་པའི་སྟེང་དུ་རྡོ་རྗེའི་གུར་བྱ་བ་བཞེད་ལ། དེ་དག་ལས་མེ་དཔུང་མཐའ་མེད་དུ་འཕྲོ་བ་ནི་མེའི་གུར་རོ། །དེ་ལྟར་ནའང་བཤད་རྒྱུད་ལས། ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་གསུངས་པའི་ཕྱིར། ཕྱོགས་སྐྱོང་སྣམ་བུ་མི་དགོས་སམ་ཞེ་ན། དེ་ནི་སྤྱན་འགྲེལ་ལས། ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ཞེས་པ་འཁོར་བའི་ཆོས་རྣམས་ཀྱང་བདག་ཉིད་དུ་རང་སྣང་བའི་ཕྱིར། ཕྱི་རོལ་དུ་མ་ཧཱ་དེ་ཝ་ལ་སོགས་པའི་ལྷ་ཆེན་པོ་རྣམས་ཀྱིས་བསྐོར་ཏེ། རང་རང་གི་མཆོད་ཡོན་དང་རྒྱན་དང་ལྡན་པར་འཁོད་པའོ། །དེ་བས་ན་རང་བཞིན་ཀྱང་འདི་ལྟར་བཞུགས་ལ། བྲི་ཡང་དེ་ཁོ་ན་ལྟར་རོ། །བསྒོམ་ཡང་འདི་བཞིན་ཏེ། ལྷག་པ་གཉིས་ཐུན་མོང་པའོ། །ཞེས་ལྷག་པ་གཟུགས་བརྙན་ལའང་བྲི་བར་གསུངས་པས་སྣམ་བུ་སྒེར་པ་བྱས་ཀྱང་མི་འགལ་མོད། འོན་ཀྱང་རྡོ་རྗེའི་ལས་རིམ་གྱི་ཐིག་གི་སྐབས་སུ་མ་གསུངས་པའི་ཕྱིར་འདིར་མ་བྱས་ལ། དེ་ནས་བདེ་འདུས་ཀྱི་དཀྱིལ་འཁོར་བྱ་བའི་རིམ་པ་ལས། ཕྱོགས་སྐྱོང་སྣམ་བུ་དཀར་པོའི་སྣ་ཚོགས་པདྨ། རྡོ་ཕྲེང་ནག་པོ། འབར་ཕྲེང་དམར་སེར། ཞེས་དང་། ཐིག་ཆོག་ལས། དང་པོ་འཇིག་རྟེན་ཕྱོགས་སྐྱོང་ལ། །ཞེས་པད་རའི་ས་ལ་མཛད་སྣང་བ་བྲིས་ཆ་ལ་དགོས་ཀྱི། སླད་དུ་པད་འདབ་ནི་ལོགས་ལོངས་ཅན་མིན་པས་འགོད་དཀའ་བའི་ཕྱིར། འདིར་འོག་ཏུ། རྡོ་རྗེ་ར་བའི་ནང་ཁོངས་ཀྱི། །ཞེས་སོགས་པདྨའི་ལྟེ་བའི་ཕྱི་མཐའ་འཁོར་ལོའི་མུ་ཁྱུད་ཀྱིས་ཁྱབ་པ་དེ་ལ་བཀོད་པ་ཡིན་ནོ། །གཉིས་པ་འོག་གཞི་ནི། རྡོ་རྗེར་བའི་ཁོར་ཡུག་གི་ནང་དུ་སྣ་ཚོགས་པད་འདབ། དེའི་ལྟེ་བ་ཟླུམ་པོ་ལེབ་ཆགས་ཅན་གྱི་རྒྱ་ནི། ཕྱོགས་གཅིག་ནས་གཅིག་གི་བར་ལ་ཆ་ཕྲན་བདུན་ཅུ་རྩ་གཉིས་པ། དེའི་སྟེང་དུ་འཁོར་ལོ་ནི། རྩ་རྒྱུད་ལས། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལས། ཞེས་པའི་དོན། རྒྱ་ཆེར་འགྲེལ་དུ། གཞི་ཚད་མེད་པའི་ཡེ་ཤེས་ཀྱི་འཁོར་ལོ་དཔག་ཏུ་མེད་པ་ཞིག་བསྒོམ། ཞེས་དང་། འཁོར་ལོའི་སྟེང་དུ་བྷྲཱུྃ་ཞེས་སོགས་གཞལ་ཡས་ཁང་བསྐྱེད་པར་མཛད་ཅེས་ལྷ་རྗེ་སོ་གསུངས་སོ། །འཁོར་ལོ་དེའི་ཚད་ནི། ཀ་རྒྱན་གྱི་ཕྱི་མཐའ་དང་མདའ་ཡབ་ཀྱི་ཕྱི་ཐིག་ཕྲད་མཚམས་ནས་ཟླུམ་པོར་བསྐོར་བ་ནི་ལྟེ་བ་དང་དེའི་མཐར་ཆ་ཕྲན་གཅིག་པའི་མུ་ཁྱུད་དང་པདྨའི་ལྟེ་བའི་ཕྱི་མཐའ་དང་མཉམ་པའི་ཕྱིའི་མུ་ཁྱུད་ཆ་ཕྲན་གཅིག་པ་ཞིག་ཀྱང་བསྐོར་ནས། དེའི་བར་ཆ་ཆེན་གཉིས་ཀྱི་དེ་ལ་རྩིབས་བྲི། ཁ་དོག་ནི། དབུས་མཐིང་། ཤར་དཀར་བ་སོགས་རིགས་ཀྱིས་དབྱེའོ། །འོ་ན། སྤར་ཁབ་ཀྱི་ལེའུ་དགུ་པར། གཞི་ཚད་མེད་པའི་འཁོར་ལོའི་སྟེང་དུ་འཁོར་ལོ་ལྔ་སྟེ་འཁོར་ལོ་དྲུག་པའོ། །ཞེས་པ་དང་འགལ་ལོ་ཞེ་ན། མི་འགལ་ཏེ། དེ་ནི་ནང་གི་གཞི་གདན་གྱི་འཁོར་ལོ་ལ་དགོངས་པའི་ཕྱིར་རོ། །དེ་དང་མཐུན་པ་འོད་རིམ་ལས་ཀྱང་། ཚད་མེད་རྩིབས་བཞིའི་འཁོར་ལོ་ལ། །རྩིབས་བཞི་མུ་ཁྱུད་པཉྩར་ལྡན། །ཞེས་སོ། །དེ་བས་ན་གཞི་ཚད་མེད་པའི་འཁོར་ལོ་ཡང་རྣམ་པ་གཉིས་སུ་འགྱུར་ཏེ། གཞལ་ཡས་ཁང་སྤྱིའི་འོག་གཞི་ནི། བཤད་རྒྱུད་རོལ་པ་ཆེན་པོའི་རྒྱུད་ཀྱི་ལེའུ་ལྔ་པར། ཀུན་ནས་མེ་འོད་འཁྲིགས་པའི་དབུས། །འོག་མིན་ལ་སོགས་རིམ་བཞིན་ཆར། །འཁོར་ལོ་ཆེན་པོའི་ས་གཞི་ལ། །ཁང་པར་གྲུ་བཞི་རྣམ་པར་བརྗིད། །ཅེས་དང་། སངས་རྒྱས་གསང་བའི་ཆོས་དོན་དུ། །འོག་གཞིའི་དབྱིབས་ནི་ཚད་མེད་དེ། །རྒྱ་མ་ཆད་པ་ཆ་ལེ་བའོ། །ཞེས་པའི་དོན་རྟགས་འཆད་པའི་སྐབས་སུ་ཡེ་ཤེས་ལྔ་དང་སྦྱར་བའི་ཕྱིར། དེའི་རྟགས་འཁོར་ལོ་རྩིབས་བཞི་བར་སྦྱར་བའང་འབྲེལ་ལ། ཕྱོགས་བཅུ་མུན་སེལ་གྱི་ལེའུ་དང་པོར་ཡང་། རྩིབས་བཞི་ལྟེ་བ་དང་བཅས་པ་མ་འདྲེས་པ་དང་རང་གསལ་བའི་སྟེང་ལའོ། །ཞེས་དང་། ལེའུ་དགུ་པ་བྷྲཱུཾ་བི་ཤྭ་བི་ཤུདྡྷེ་ཞེས་པས་གཞི་ཚད་མེད་པའི་ཡེ་ཤེས་ཀྱི་འཁོར་ལོ་ལ་གནས་པའི་གཞལ་ཡས་ཁང་ཆེན་པོ། ཞེས་སོགས་གཞལ་ཡས་ཁང་གི་འོག་གཞིར་མཛད་པ་དང་སྔར་དྲངས་པའི་རྒྱ་ཆ ེན་འགྲེལ་གྱི་ལུང་དེས་ཀྱང་དེ་ལྟར་གྲུབ་པའི་ཕྱིར་རོ། །བྱེ་བྲག་གདན་གྱི་འོག་གཞི་ནི། འོག་གཞི་ཆོས་ཀྱི་འཁོར་ལོ་བསྐོར་བའི་གདན་ཞེས་སྔོན་གྱི་མཁན་པོ་རྣམས་གསུངས་ཏེ། གཞལ་ཡས་ཁང་གི་ནང་གི་འཁོར་ལོའོ། །ཡང་རྗེ་སྒྲོལ་མ་ལ་སོགས་པ་ཕལ་ཆེ་བ་ནི། དཀྱིལ་འཁོར་སྤྱི་དང་བསྟུན་ཏེ་འོག་གཞི་སྣ་ཚོགས་རྡོ་རྗེར་མཛད་པ་དང་། དེའི་འཐད་པ་ལ་བླ་མ་འགའ་ཞིག །ཐལ་རྒྱུད་ལས། འབྱུང་བ་རིམ་བརྩེགས་སྟེགས་དང་བཅས ། །རྡོ་རྗེ་རྒྱ་གྲམ་ས་གཞི་གང་། །ཞེས་དང་། བླ་མ་ལས་ཀྱང་། འོག་རྡོ་རྗེ་རྒྱ་གྲམ་མིག་མང་རིས་སུ་གཏམས་པ། ཞེས་པའི་སྣ་ཚོགས་རྡོ་རྗེ་དགོས་ཞེས་གསུངས་ནའང་། ཐལ་རྒྱུད་ཀྱི་ལུང་དེ་ཁོ་བོས་མཐོང་བའི་རྒྱུད་ཀྱི་དཔེ་ལ་མི་སྣང་བའི་ཡོད་མེད་ཀྱང་མ་ངེས་ལ། གལ་ཏེ་ཡོད་སྲིད་ཀྱང་སྐྱོན་མེད་དེ། ཉི་སེང་གི་ལུང་རང་གི་རྣམ་བཤད་དྲངས་པར། རྒྱ་གྲམ་ལ་ནི་ས་གཞི་དང་ཚད་མེད་པའི་འཁོར་ལོའི་བར་ན་གནས་སོ། །ཞེས་པས་རྒྱ་གྲམ་ཡོད་པའི་ཕྱོགས་ལའང་འཁོར་ལོའི་རྩིབས་ཀྱིས་བསྒྲིབས་ནས་མི་མཐོང་བའི་ཕྱིར་དང་། བླ་མའི་ལུང་དོན་ནི་དེ་ལྟར་མ་ཡིན་ཏེ། གལ་ཏེ་ཡིན་ན་རྒྱ་གྲམ་ཞེས་སྨོས་པ་ཧ་ཅང་ཐལ་བའི་ཕྱིར། ཡང་ཁ་ཅིག་འདི་སྙམ་དུ། ཨ་བྷ་ཡས། པདྨ་དང་རྒྱ་གྲམ་ཐབས་ཤེས་ཡིན་པས། པདྨ་ཡོད་ན་རྒྱ་གྲམ་ཡང་དགོས་པར་གསུངས་པས་གནོད་དོ་ཞེ་ན། དེའི་སྐྱོན་མི་འཇུག་སྟེ། སྔར་བཤད་པ་ལྟར་རྒྱ་གྲམ་འཁོར་ལོའི་འོག་ན་ཡོད་པར་བཞེད་པའི་ཕྱིར་དང་། དེ་མི་བཞེད་པའི་ཕྱོགས་ལའང་པདྨ་དང་འཁོར་ལོ་ཐབས་ཤེས་སུ་འགྱུར་བའི་ཕྱིར། དེ་ལྟར་ཡང་། བདེ་འདུས་བསྐྱེད་རྫོགས་འབྲིང་པོའི་ལས་བྱང་ལས། དེ་སྟེང་ཐབས་ཀྱི་འཁོར་ལོ་རྩིབས་སྟོང་འབར། །འོག་ཏུ་ཤེས་རབ་པདྨ་འདབ་སྟོང་བརྡལ། །ཞེས་འོག་གཞིའི་པདྨ་དང་གུར་གྱི་འཁོར་ལོ་གཉིས་ཐབས་ཤེས་སུ་གསུངས་པ་བཞིན་ནོ། །འོ་ན་སྣ་ཚོགས་རྡོ་རྗེ་བྱེད་པའི་ཕྱོགས་ལ་དེའི་བྱ་ཚུལ་ཇི་ལྟར་ཞེ་ན། སྣ་ཚོགས་རྡོ་རྗེའི་ལྟེ་བ་གྲུ་བཞི་པ། ཤར་ནུབ་ཀྱི་རྒྱར་ཆ་ཆེན་བཅུ་གཉིས་དང་དཔངས་སུ་ཆ་ཆེན་གཅིག་པའོ། །དེ་ལ་འཐོན་པའི་རྭ་ནི། དབུས་རྭ་སྦོམ་པ་ལ་ཆ་ཆེན་གཅིག་དང་། རྩེ་མོ་ཆ་ཕྲན་གཉིས། གཡས་གཡོན་གྱི་རྭ་གཉིས་སྦོམ་ས་ཆ་ཕྲན་གསུམ་དང་། རྩེ་མོ་རིམ་གྱིས་ཕྲ་བའོ། །རིང་ཐུང་དབུས་རྭ་ནི། རྟ་བབས་སྒོ་ཚད་གསུམ་མ་དང་། གཉིས་མ་དང་། གཅིག་མ་སོགས་ལ་ལྟོས་ནས་ཆ་ཆེན་བཞི་དང་། གསུམ་དང་། གཉིས་སོགས་གཅིག་ཏུ་མ་ངེས་པ་ཡིན་ལ། གཡས་གཡོན་གྱི་རྭ་གཉིས་དབུས་རྭ་དང་རིང་ཐུང་འདྲ་ཡང་གུག་པའི་ཆས་རྩེ་མོར་མ་སླེབ་པའོ། ༈ །གསུམ་པ་ལོགས་ལ། རྩིག་པ། འདོད་སྣམ། ཕ་གུ། དྲྭ་ཕྱེད། བྱ་འདབ། ཤར་བུ། པུ་ཤུ་དང་བདུན། དང་པོ་ལ། པཉྩ་རེ་ཁཱ་ལྔ་སྟེང་ནས་སྟེང་དུ་བརྩེགས་པའི་ལུགས་དང་། ཕྱི་ནང་སྦྲགས་མའི་ལུགས་གཉིས་ལས། འདི་གང་ལྟར་ཡང་མི་འགལ་ཏེ། དང་པོ་ནི། རྡོ་རྗེ་ལས་རིམ་ལས། ཡེ་ཤེས་རིན་ཆེན་རིམ་བརྩེགས་ཚུལ། །ཞེས་གསུངས་པ་ལྟར་སྔ་རབས་པ་ཕལ་ཆེར་བཞེད། གཉིས་པ་ནི། ཆོས་དོན་ལས། ཕྱི་ནི་རིན་ཆེན་ལྔ་རུ་སྦྲགས། །ཞེས་དང་། བླ་མ་ལས་ཀུན་གྱི་ཕྱི་རོལ་ནག་པོར་བཤད་པ་དང་། བདེ་འདུས་ལས། ཀུན་གྱི་ཐ་མ་ལྗང་གིས་བསྐོར། །ཞེས་གསུངས་ཤིང་། ཙགས་ཚ་སོགས་སྔ་རབས་པ་འགའ་དང་། སྒྲོལ་ཆེན་ཡབ་སྲས་སོགས་ཕྱི་རབས་པ་ཕལ་ཆེར་ཡང་སྦྲགས་མར་བཞེད་དོ། །དེ་ལ་སྒོའི་ཐད་དུ་ཕྱི་མ་བདེ་བས་འདིར་ཡང་རེ་ཞིག་ཕྱི་ནང་སྦྲགས་མར་བྱས་སོ། །པཉྩ་རེ་ཁཱའི་ཁ་དོག་གི་རིམ་པ་ནི། ཧེ་རུ་ཀ་འདུས་པ་ལས། སྔོ་དང་དཀར་དང་སེར་དང་དམར། །ཀུན་གྱི་ཐ་མ་ལྗང་གུ་སྟེ། །ཞེས་དང་། བདེ་འདུས་རིགས་བརྒྱའི་སྒྲུབ་ཐབས་ལས། རྩིག་པ་རིགས་ཀྱི་དབྱེ། ཞེས་གསུངས་པ་ལྟར། སྲབ་འཐུག་ཆ་ཆུང་གཅིག་ལ་རེ་ཁཱ་ལྔ་པོ་གཙོ་བོའི་དབང་གིས་ནང་ནས་རིམ་པ་བཞིན་མཐིང་དཀར་སེར་དམར་ལྗང་གུ་སྟེ། ཕན་ཚུན་རེག་ལ་མ་འབྱར་བའི་ཚུལ་དུ་བྱའོ། །ཡང་གཞུང་གཞན་ལས་རེ་ཁཱ་ལྔ་པོ་ནས་གང་གིས་མ་རེག་པར་གསུངས་པ་ལ་ཁ་ཅིག །ཆ་ཆུང་གཅིག་གི་ཁྱོན་ལ་བར་ནས་ཚར་རེ་བཞག་པ་མི་འོས་ཟེར་ནའང་། ཆ་ཆུང་ནི་གཙོ་བོའི་ཁྲུ་གང་ཡིན་ལ། ནས་ནི་དེ་བརྒྱ་རེ་གྱད་གྱི་ཆ་གཅིག་ཡིན་པའི་ཕྱིར་སྐྱོན་མེད་དོ། །དཔངས་ནི། རྟ་བབས་སྒོ་ཚད་གསུམ་མ་དང་། གཉིས་མ་དང་། གཅིག་མ་ལ་ལྟོས་ཏེ་ཆེ་འབྲིང་ཆུང་གསུམ་དུ་བྱ་བ་འཐད་ཀྱིས། ཕྱོགས་གཅིག་ཁོ་ནར་ངོས་བཟུང་བྱས་པ་ལ་ཤེས་བྱེད་མེད་དོ། །དེས་ན་འདིར་འབྲིང་ཚད་ཀྱི་དབང་གིས་ཆ་ཕྲན་བཅུ་གསུམ་དུ་བྱས་སོ། །གཉིས་པ་ལ། རྩིག་པའི་སྟེང་ན་ཡོད་པའི་ལུགས་དང་། ཕྱི་འགྲམ་ན་ཡོད་པའི་ལུགས་གཉིས་ལས། དང་པོ་ནི། མེ་ལོང་ལྟ་བུའི་སྒྲུབ་ཐབས་དང་། བདེ་འདུས་ཞི་བ་ཞེ་གཉིས་ཀྱི་སྒྲུབ་ཐབས་གཉིས་ཚིག་དོན་མཐུན་པར། ཀུན་ནས་བསྐོར་བའི་ཁ་ཁྱེར་ལ། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་གསུངས་པའི་རྗེས་སུ་འབྲངས་པར་རློམ་ནས་བྱས་པར་སྣང་མོད་ཀྱང་། ལུང་དེའི་དགོངས་པ་དེ་ལྟར་མ་ཡིན་པས་མི་རིགས་ཏེ། རྒྱུ་མཚན། རྡོ་རྗེ་རྩེ་མོ་ལས། ཀུན་ནས་བསྐོར་བའི་ཕྱི་རོལ་དུ། །རྡོ་རྗེའི་ཁ་ཁྱེར་ཡང་དག་ལྡན། །ཞེས་འདོད་སྣམ་ལ་ཁ་ཁྱེར་ཞེས་བྱས་ནས་དེ་གཞལ་ཡས་ཁང་གི་ཕྱིར་ཡོད་པར་བཤད་པ་དང་། གཞན་ཡང་ནང་གི་ལྷ་སྣམ་ལའང་ཁ་ཁྱེར་དུ་བཤད་པ་དང་། སྒོ་ཁ་ཁྱེར་དང་བྲལ་བ་བཤད་པ་སོགས་མང་དུ་སྣང་བས་གནོད་པའི་ཕྱིར། གཉིས་པ་ནི། རྩིག་པའི་ཕྱི་ངོས་སུ་འགྲམ་སྟེགས་ཀྱི་ཚུལ་དུ་ཡོད་པར་འདོད་པ་འདི་ལེགས་ཏེ། བདེ་འདུས་རིགས་བརྒྱའི་སྒྲུབ་ཐབས་ལས། ལོངས་སྤྱོད་འགྲམ་གྱི་ཆ། ཞེས་དང་། གཤེད་མར་གཞོན་ནུ་རོལ་པའི་སྒོམ་བྱང་ལས་ཀྱང་། ཕྱི་འདོད་ཡོན་དམར་པོས་འགྲམ་སྟེགས་སུ་བསྐོར་བ། ཞེས་གསུངས་ཤིང་། བེ་དི་ཀཿཞེས་པའི་སྒྲ་ལས་དྲངས་ནའང་། ཁ་ཁྱེར་དང་། ཁ་རན་དང་། གཟུངས་དང་། སྟེགས་བུ་རྣམས་ལ་འཇུག་པའི་རྒྱུ་མཚན་གྱིས་སོ། །དཔངས་ཆ་ཕྲན་གཅིག་བྱེད་པ་ལ་ཤེས་བྱེད་མེད་ཅིང་། བླ་མ་དགོངས་འདུས་ལས། དཔངས་སུ་ཁྲུ་དོ་ཡིན་ལ། ཞེས་དང་། འཆད་འགྱུར་ལྟར་རྟ་བབས་ཀྱིས་ཀྱང་ཀ་བ་སོགས་ཀྱི་དཔགས་ནུས་པའི་ཕྱིར། འདིར་ཆ་ཕྲན་གཉིས་པར་བྱས་སོ། །དེ་ཡང་བཤད་རྒྱུད་མེ་ལོང་ལས། ཟླ་ཕྱེད་རྡོ་རྗེ་འདོད་ཡོན་དང་། །ཞེས་དང་། སྙིང་པོ་རོལ་པ་ཆེན་པོའི་རྒྱུད་ལས། ཟླ་ཕྱེད་རྡོ་རྗེ་མི་འཇིགས་སྟོབས། །འདོད་ཡོན་ལྷ་མོ་ཕྱོགས་པར་འཁྲིགས། །ཞེས་པའི་འདོད་སྣམ་གྱི་སྒོ་ཁྱུད་ཀྱི་མཚམས་དང་། ཤར་ལྷོ་ལ་སོགས་པའི་མཚམས་རྣམས་སུ་ཟླ་ཕྱེད་རྡོ་རྗེ་དང་། ཕྱོགས་བཞིར་གཟུགས་ལ་སོགས་པའི་ལྷ་མོ་འགོད་དེ། དེའི་ཚུལ་ནི་ལཱ་སྱེ་མ་དཀར་མོ་མེ་ལོང་། སྒྲ་མ་དམར་མོ་པི་ཝཾ། དྲི་མ་སྔོན་མོ་དྲིའི་དུང་ཆོས། །རོ་མ་སེར་མོ་གཡོས་ཀྱིས་གང་བའི་ཁར་གཞོང་། རེག་བྱ་མ་དཀར་མོ་ལྷའི་གོས་པཉྩ་ལི་ཀ་ཐོགས་པ་སྟེ། རྒྱུད་ལས་ལྷ་མོ་དེ་ལྔ་ལས་མ་གསུངས་ཤིང་། རྡོ་རྗེ་ལས་རིམ་ལས་ཀྱང་། གཟུགས་ལ་སོགས་པ་མཆོད་པ་ལྔ། །ཞེས་པས་དེ་ཙམ་གྱི་ཆོག་ལ་གཞན་དུ། ཆོས་དོན་ལས། ལོངས་སྤྱོད་འདོད་ཡོན་སྣམ་བུ་ལ། །གཟུགས་མཛེས་སྒྲ་སྙན་དྲི་མཆོག་དང་། །རོ་ཞིམ་ཡིད་འོང་ཆོས་རྣམས་ཀྱི། །ལྷ་མོ་རྣམས་ཀྱིས་དགྱེས་པར་རོལ། །ཞེས་ཆོས་ཀྱི་ལྷ་མོ་གསུངས་པ་ལྟར་ན་ཆོས་དབྱིངས་མ་ཆོས་འབྱུང་འཛིན་པ་སྟེ། དེ་དག་ཀྱང་བསྒོམ་དབང་དུ་ནི་ཕྱོགས་ཀུན་ཏུ་འཁྲིགས་པའོ། །དེ་ལྟར་ཡང་འོད་རིམ་ལས། གཟུགས་སོགས་ལྷ་མོས་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་ཀུན་སྤྲིན་ཕུང་བཞིན། །ཞེས་སོ། ༈ །གསུམ་པ་ཕ་གུ་ནི། འགའ་ཞིག་འདོད་སྣམ་གྱི་ཕྱི་རོལ་ན་ལྕགས་ཆུང་གི་ཚུལ་དུ་ཡོད་གསུངས་ནའང་། འདིར་ཆོས་དོན་ལས། སྤྱི་ཡི་རྩེ་ལ་ཕ་གུ་གཏོད། །ཅེས་དང་། འོད་རིམ་ལས། ཡེ་ཤེས་བརྩེགས་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧར། །ཕ་གུ་མཛེས་པའི་བད་དང་ལྡན། །ཞེས་གསུངས་པ་ལྟར། རྩིག་པའི་སྟེང་དུ་ཕ་གུ་གཞི་སེར་པོ་ལ་རིན་པོ་ཆེའི་ཕྲས་མཛེས་པར་བད་ཀྱི་ཚུལ་དང་། སེང་མགོ་ནི་འདེགས་བྱེད་པད་ཕུར་གྱི་ཚུལ་དུ་ཡོད་པ་སྣེ་ལ་བརྐོས་པའོ། །འོ་ན་རྩིག་པ་ལྔ་སྟེང་ནས་སྟེང་དུ་བརྩེགས་པ་མི་འདོད་པའི་ལུགས་ལ་ལ་དེའི་སྣམ་བུའི་གཞི་དམར་པོ་དང་། ལྔ་བརྩེགས་སུ་འདོད་པའི་ལུགས་ལ་བརྩེགས་པ་དང་པོའི་ཁ་དོག་ཏུ་ཕྲེང་བར་བཤད་མོད། འདིར་སེར་པོ་བྱེད་པ་གང་ཞེ་ན། ཧེ་རུ་ཀ་གལ་པོའི་བརྟགས་པ་བདུན་པར། འདོད་ཡོན་དམར་ལ་ཕ་གུ་སེར། །ཞེས་དང་། བདེ་འདུས་རིགས་བརྒྱའི་སྒྲུབ་ཐབས་ལས་ཀྱང་། འདོད་ཡོན་ཁྱམས་དམར་རིན་ཆེན་ཕ་གུ་སེར། །ཞེས་གསུངས་ཤིང་། ཤྲ་དྷའི་གཞུང་ལས་དེ་ལྟར་འབྱུང་བར་གྲགས་སོ། །སེང་མགོའི་ཁ་ནས་ཧར་གྱི་སྒྲས། ཧཿར་དོ་ཤལ་དང་ཕྲེང་བ་ལ་འཇུག་པས། མུ་ཏིག་གི་ཕྲེང་བ་འཕྱངས་པ་ཡིན་ལ། འདིར་དོ་ཤལ་ཕྱེད་པ་མ་བྱས་ཀྱང་ཆོག་སྟེ། ཨརྔྷ་ཧ་ར་ཞེས་པ་མ་བྱུང་བའི་ཕྱིར། ༈ བཞི་པ་དྲྭ་བ་དང་དྲྭ་བ་ཕྱེད་པའི་ས་ནི། ཕ་གུའི་སྟེང་དུ་བྲེ་དཔུངས་སམ་ཀ་ཐུང་དང་། དེས་བཏེགས་པའི་གསེར་གདུང་རྣམས་ནི་གོ་སླ་ཞིང་། ཀ་ཐུང་རེ་རེའི་ཐད་ཀྱི་གཞུ་དང་གདུང་མའི་ཆ་ཕྲན་ཕྱེད་ཙམ་ཕྱིར་འབུར་བའི་གཟེར་བུ་བཞི་བཞི་བཏབ་པ་ལ་གསེར་སྐུད་དཀྲིས་ཏེ་ཕན་ཚུན་གཅིག་ནས་གཅིག་ལ་འཕྲད་ངོས་སུ་འཐེན་པ་ནི་གསེར་གྱི་སྐ་རགས་བཞི་ཞེས་གྲགས་སོ། །དྲྭ་བ་དྲྭ་ཕྱེད་ནི་གཞན་དག་སྐ་རགས་དང་པོ་གཉིས་ལ་ཆུ་སྲིན་མ་ཀ་རའི་མགོ་སྦྲགས་པ་ལས་འཕྱང་བར་འདོད་ཀྱང་། འདིར་ཆོས་དོན་ལས། ལོགས་རྒྱན་ཁྱམས་མགོ་ཙི་པ་ཏྲའི། །ཁ་ནས་ཕྲེང་བ་རིན་ཆེན་ནི། །དྲྭ་བ་དྲྭ་བ་ཕྱེད་གྱུར་པ། །ཞེས་པས་གསེར་གདུང་གི་སྟེང་དུ་ཕྱམ་གྱི་ཕྱི་མ་དཔངས་ཆ་ཕྲན་ཕྱེད་རེ་འཕྱར་བ་གསེར་སྐེད་དང་ཐད་མཉམ་དུ་འོང་བར་བྱས་ནས་ཕུབས་པའི་ཕྱམ་སྣེ་རྣམས་ལ་བཀོད་པའི་ཙི་པ་ཏྲའི་ཁ་ནས་དྲྭ་བ་དང་དྲྭ་བ་ཕྱེད་པ་གསེར་སྐུད་ཀྱི་ཕྱིའི་ངོས་སུ་རིང་བ་རྣམས་ཕ་གུ་ལ་རེག་ཏུ་ཉེ་བ་ཙམ་དུ་འཕྱང་བ་སྟེ། དེ་ལ་དྲྭ་བ་ནི་ནོར་བུའི་ཕྲེང་བ་ཙི་པ་ཏྲའི་ཁ་གཅིག་ནས་གཅིག་པར་སྦྲེལ་ཏེ་དཔྱངས་པའི་འགུགས་ཅན་ཡིན་ལ། དྲྭ་ཕྱེད་ནི་བགྲངས་ཕྲེང་གི་བཅུ་ཤད་ལྟ་བུ་ཁའི་དབུས་ནས་མཐུར་དུ་འཕྱང་བའི་རྩེ་མོ་ལ་ནོར་བུ་སྦོམ་པོ་དང་ལྡན་པའོ། །གཞན་ཡང་། རྔ་ཡབ་ནོར་བུའི་ཡུ་བ་ཅན་དང་། དྲིལ་བུའི་མཐར་ཉི་ཟླ་དང་རྔ་ཡབ་ཀྱི་རླུང་བསྐྱོད་ཅན་སོགས་ཀྱང་ཇི་ལྟར་རིགས་པར་བྱ་སྟེ། རྔམ་གློག་ལས། ཕོ་བྲང་དེ་ཡི་རྒྱན་མཆོག་ཀྱང་། །ཉི་ཟླ་ནོར་བུ་རིན་ཆེན་འབར། །བླ་རེ་རྒྱལ་མཚན་ན་བཟའ་གདུགས། །དར་དང་དོ་ཤལ་མུ་ཏིག་ཕྲེང་། །དྲིལ་བུ་དང་ནི་རྔ་ཡབ་སོགས། །རོལ་མོའི་ཆ་བྱད་སྣ་ཚོགས་བརྒྱན། །ཞེས་གསུངས་པའི་རྒྱན་རྣམས་གཞན་དུའང་ཅི་རིགས་འགོད་པ་འབྱུང་མོད་ཀྱི། ཕལ་ཆེར་འདིར་འགོད་དོ། །ཡང་ལྷ་རྗེ་སོའི་ཞལ་ནས། འོད་རིམ་ལས། མཐའ་མའི་འདབ་མས་ཀུན་གཡོགས་པའི། །ཡེ་ཤེས་བརྩེགས་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་འབར། །ཞེས་པའི་མུ་ཏིག་གི་ཧ་ར་དང་། རྐང་པ་ཐ་མའི་དྲྭ་བ་དྲྭ་ཕྱེད་གཉིས་དོན་གཅིག་པ་ཡིན་ཏེ། ཐིག་གི་པཎྜིརྠ་ལས། རྩིག་ཕྱིར་དྲྭ་བ་མགུལ་འཁོར་འབར། །ཞེས་གསུངས་པའི་ཕྱིར། ཕ་གུ་ལ་དྲྭ་བ་དྲྭ་ཕྱེད་འཕྱངས་ལ། བྲེ་ཕུལ་གྱི་སྣམ་བུར་དར་རས་ལས་གྲུབ་པའི་ཤར་བུར་སྔོན་པོ་དང་དཀར་པོ་འཕྱང་བ་ཡིན་གསུང་ཡང་། བི་མ་ལས། རྩིག་ཕྱིར་དྲྭ་བ་མགུལ་འཁོར་འབར། །ཞེས་གསུངས་པ་དེ་དྲྭ་བ་དང་དྲྭ་བ་ཕྱེད་པ་ལ་དགོངས་པ་མ་ཡིན་པས་མི་རིགས་སོ། །འོ་ན་གང་ཞེ་ན། ཕ་གུ་ལས་རྩིག་པའི་ཕྱིར་འཕྱངས་པའི་མུ་ཏིག་གི་དྲྭ་བ་དེ། རྩིག་པའི་ཡ་ཐ་ན་བད་ཀྱི་ཚུལ་དུ་ཡོད་པའི་ཕ་གུ་གདོང་གི་ཚུལ་ཅན་དེ་ཉིད་ཀྱི་མགུལ་འཁོར་བའི་ཚུལ་དུ་འདོད་པ་བཞེད་པ་སྟེ། དེ་ནི་འོད་རིམ་གྱིས། ཡེ་ཤེས་རྩིག་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧར། །ཕ་གུ་མཛེས་པའི་བད་དང་ལྡན། །ཞེས་རྐང་པ་གསུམ་པ་དེའི་དོན་ཡིན་ནོ། །དྲྭ་བ་དྲྭ་ཕྱེད་མགུལ་འཁོར་འབར། །ཞེས་པ་ནི། གང་གིས་མཐའ་མའི་འདབ་མས་ཀུན་གཡོགས་པའི། །ཞེས་པ་ལ་སྙེགས་པ་སྟེ། མཐའ་མའི་འདབ་མ་ནི་བྱ་འདབ། དེས་ཀུན་ནས་གཡོགས་པའི་འོག་ཏུ། མས་ནས་ཡར་རྩིག་པ་དང་སེང་མགོ་ལས་འཕྱང་བའི་མུ་འཕྲེང་དང་། ཕ་གུ་རྣམས་རིམ་པར་བརྩེགས་པའི་སྟེང་དུ། དྲྭ་བ་དང་དྲྭ་བ་ཕྱེད་པ་རྣམས་ནི། བྱ་འདབ་དེས་མགུལ་འཁོར་བའི་ཚུལ་དུ་ཡོད་ཅེས་པའི་དོན་ཏེ། དོན་འདི་ལ་དགོངས་ནས་རྗེ་སྒྲོ་ཕུག་པའི་གསུང་སྒྲོས་རིིམ་པར་བརྒྱུད་པ་ལས་ཀྱང་། སྟེང་གི་བྱ་འདབ་ཀྱི་འོག །ཀ་གདུང་བཅུ་དྲུག་གི་འཕྲག །དྲྭ་བ་དྲྭ་ཕྱེད་ཀྱི་གསེབ། ཅེས་ཀ་ཐུང་དང་དྲྭ་བ་དྲྭ་ཕྱེད་ཀྱི་ས་གཅིག་ཏུ་མཛད་པ་ཡིན་ནོ། །དེའི་ཕྱིར་རིག་པའི་བསྟན་བཅོས་ལས། སྤྱིར་བཏང་བསྟན་བཅོས་ངེས་པ་ལས། བྱེ་བྲག་སྟོབས་དང་ལྡན་པར་བརྗོད། །ཅེས་པ་ལྟར། སྤྱི་བྱེ་བྲག་འདོམས་ན་བྱེ་བྲག་དབང་བཙན་པའི་རིག་པས། སྤྱི་བཏང་ཙམ་དུ་དཀྱིལ་འཁོར་ཕལ་ཆེ་བར་དྲྭ་བ་དྲྭ་ཕྱེད་གཉིས་ཕ་གུའམ་བྲེ་ཕུལ་གྱི་སྣམ་བུ་གང་རིགས་ལ་འདོགས་པ་ལས་གཉིས་ཀ་འདོགས་པའི་ཕྱག་ལེན་འབྱུང་བ་བདེན་ནའང་། བྱེ་བྲག་ཏུ་སྔར་དྲངས་པའི་འོད་རིམ་གྱིས་ལུང་དང་། སློབ་དཔོན་རྒྱལ་བ་བཟང་པོ་དཔལ་སྦས་ཀྱི་སྒྱུ་འཕྲུལ་འོད་ཀྱི་ཕྱག་ལས་ཀྱང་། སེང་མགོའི་ཁ་ནས་མུ་ཏིག་འཕྲེང་། །ཕ་གུ་དྲྭ་བ་དྲྭ་ཕྱེད་དང་། །ཞེས་སོགས་འདི་ཉིད་ཀྱི་ཐུན་མོང་མ་ཡིན་པའི་མན་ངག་ཕལ་ཆེ་བར་མུ་འཕྲེང་དང་དྲྭ་བ་དྲྭ་ཕྱེད་གཉིས་ཐ་དད་དུ་གསུངས་པའི་ལུང་ཆེས་གསལ་བ་མང་དུ་བཞུགས་པའི་ཕྱིར་དང་། དར་རས་ལས་གྲུབ་པའི་ཤར་བུ་ཞེས་པའང་མི་རིགས་ཏེ། རྩ་རྒྱུད་ལས། ཡེ་ཤེས་རིན་པོ་ཆེའི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། ཞེས་ཤར་བུའི་རྒྱུ་རིན་པོ་ཆེར་བཤད་པའི་ཕྱིར་རོ། ༈ །ལྔ་པ་བྱ་འདབ་ནི། ཁྱམས་ཀྱི་ཕྱམ་སྟེང་དུ་ཆ་ཆུང་གཅིག་གི་དཔངས་ལ་བབས་སམ་བྱི་རྩེར་གྲགས་པ་དང་། དེའི་སྟེང་དུ་བྱ་འདབ་བཀལ་བ་ཁྱམས་ལས་ཀྱང་ཆ་ཆུང་ཕྱེད་གཉིས་ཙམ་ཕྱིར་འཕྱར་འདོད་སྣམ་དང་ཁ་ད་ཆད་དུ་བྱ་གསུངས་པ་ལྟར་རམ། དེ་ལས་ཅུང་ཟད་རིང་བར་བྱས་ནའང་། མི་འགལ་ཏེ། ཆུ་འདོད་སྣམ་གྱི་ཕྱིར་འབབས་པ་བཀོད་པ་ལེགས་པས་སོ། །དེ་ལ་བྱ་འདབ་ནི། གསེར་ཐོག་གཡུ་ཐོག་སོགས་དང་རྣམ་པ་འདྲ་བ་སྟེ། གྱོ་མོའི་ཝ་ཁ་འོག་དང་སྟེང་དུ་བལྟ་བའི་ཁྱད་པར་གྱིས་ཕོ་གྱོ་མོ་གྱོ་ཞེས་གྲགས་ཤིང་། དེ་ཡང་སྔ་རབས་པ་རྣམས་ཕོ་གྱོའི་མཐའ་དགག་ལ་ཁྱུང་མགོ་བྱས་པ་བྱ་དང་། མོ་གྱོའི་མཐའ་འཕྱང་ལ་པད་འདབ་ཕྱེད་པའི་རྣམ་པ་ལྟ་བུ་བྱས་པས་འདབ་མ་ཞེས་གྲགས་པར་བཞེད། ཕྱིས་ཀྱི་ལོ་ཙཱ་བ་རྒྱ་གར་མཁས་པའི་ལག་རྒྱུན་གཟིགས་པ་དག་ཕྱམ་སྣ་དང་བྱི་རྩེའི་ཕྱི་ངོས་རིན་པོ་ཆེས་མཛེས་པར་བྱས་པ་ལ་བྱ་འདབ་སྟེང་འོག་ཅེས་བཞེད་པའང་ཡོད་དོ། ༈ །དྲུག་པ་ཤར་བུ་ནི། བྱ་འདབ་གྱི་ནང་ཙམ་ནས་སྤྱི་བླུགས་མགོ་མཐུར་བསྟན་ལྟ་བུའི་ཤར་བུའི་ཕྲེང་བ་དཀར་པོས་ཀུན་ཏུ་བསྐོར་བ་རྩེ་མོ་ཕྱམས་ཀྱི་མ་མཐའི་ཐད་ཀར་སླེབ་པ་ཙམ་བྱའོ། །གཞུང་ཁ་ཅིག་ཏུ། ནོར་བུ་མིག་གསུམ་མགོ་ཐུར་དུ་བསྟན་ནས་བསྒྲིགས་པ་ལྟ་བུའང་ཡོད་པར་འདོད་དོ། ༈ །བདུན་པ་པུ་ཤུ་ནི། ཀུན་མཁྱེན་ཆེན་པོས། གདུང་སྣ་གནོན་པ་ལ་རིན་པོ་ཆེའི་པུ་ཤུ་མཆོད་རྟེན་རྩིགས་སུ་བསྒྲིགས་པ། ཞེས་གསུངས་པ་ལྟར། རྩིག་པའི་དྲང་ཐད་ནས་ཐོག་མཐིལ་ནས་རིན་པོ་ཆེའི་པང་ལེབ་དཀར་པོ་གྱེན་ལང་ཆ་ཕྲན་གཅིག་པ་གཡས་གཡོན་དུ་མཐོ་དམན་གྱི་སྟག་སོ་རིས་རིམ་པ་བཞི་བཞི་ཡོད་པ། རྒྱང་ནས་བལྟས་ན་མཆོད་རྟེན་འདྲ་བ་ལ་པུ་ཤུ་མཆོད་རྟེན་རྩེགས་སུ་གྲགས་ཤིང་། པདྨ་ཕྱེད་པར་གསུངས་པ་ཡང་འདབ་མ་ཡན་གར་བ་ཞིག་མ་ཡིན་ཏེ། འདབ་མ་བརྒྱད་པའི་པདྨ་ལ་གཞུང་ཐིག་བཏབ་ནས་བཅད་པའི་ཁ་མཐུར་དུ་བསྟན་ནས་བསྒྲིགས་པ་ལྟ་བུ་སྟེ་མཆོད་རྟེན་རྩིགས་དང་གནད་གཅིག་པ་ཡིན་ཞེས་གསུངས་སོ། །གཞུང་ཁ་ཅིག་ཏུ། རིན་པོ་ཆེའི་དྲྭ་མིག་སེང་མ་ཁ་དོག་སྣ་ཚོགས་ཀྱི་སྤྲས་པར་འདོད་པའང་སྣང་ངོ་། ༈ །བཞི་པ་ཐོག་འབུབ་ལ་རིམ་པ་གསུམ་འབུབ་པའི་འཐད་པ་དང་། ཇི་ལྟར་འབུབ་ལུགས་གཉིས། དང་པོ་ནི། ཆོས་དོན་ལས། ཕུག་ན་ཀ་བ་བརྒྱད་པོ་ཡིས། །གདུང་ཆེན་བཞི་ཡི་རྩེ་ནས་བཏེགས། །གདུང་ཆེན་བཞི་ཡི་རེ་མིག་ཀྱང་། །ཕྱམ་རྩ་ཉི་ཤུ་བརྒྱད་ཀྱིས་བཀབ། །དེ་བཞིན་གྲལ་ཐོག་ཅི་རིགས་པའོ། །ཞེས་གསུངས་པའི་དོན་ལ། བར་སྐབས་ཀྱི་མཁས་པ་དག་ན་རེ། གསེར་གདུང་གི་གདུང་བཞི་མིག་མང་རིས་སུ་བཏང་ལ། རེ་མིག་ཕྱི་མ་བརྒྱད་པོ་ཕུབ་རེ་མིག་དབུས་མ་ཕྱུར་བུར་བྱས་ཏེ་ཐོག་ཉིས་རིམ་ཁོ་ནར་ངེས་ཞེས་གསུངས་པ་ནི་ལུང་དེའི་དགོངས་པ་མ་ཡིན་ཏེ། གལ་ཏེ་ཡིན་ན། གཞུང་དེ་ལས། ཕྱི་དབྱིབས་མཆོད་རྟེན་དུ་བྱ་བ་ཡང་གསུངས་པའི་ཕྱིར། ཐོག་སྟེང་དུ་མཆོད་རྟེན་བརྗིད་ཅན་འགེལ་བའམ། གཞན་དུ་ན་མཆོད་རྟེན་ཆུང་ངུ་ཐོག་མཐིལ་དུ་བཞག་པ་ལྟ་བུ་ཞིག་མ་གཏོགས་བྱ་དཀའ་བའི་ཕྱིར་དང་། བཀའ་བརྒྱད་ལྟ་བུ་གདུང་བཞི་མིག་མང་རིས་སུ་ཕུབ་པའི་སོ་སོའི་ནང་ཁོངས་སུ་གཞལ་ཡས་ཁང་དགུ་ཚོམ་བྱས་པ་དེའི་ཚེ་དབང་མོའི་ཁྱམས་བྱ་ས་མེད་པའི་ཕྱིར་དང་། ཁྱད་པར་སྒྱུ་འཕྲུལ་བ་རྣམས་ནི་འོད་རིམ་གྱི་ལུང་ཁས་བླངས་དགོས་ལ་དེ་ལྟར་ན། དེ་ཉིད་ལས། ཡང་ཐོག་མཐོ་དམན་རིམ་པར་ལྡན། །ཞེས་པའི་ཡང་ཐོག་གི་དོན་ནི། འོག་ཐོག །སྟེང་ཐོག །ཡང་ཐོག་ཞེས་འཇིག་རྟེན་དུ་ཐ་སྙད་གྲགས་པ་ལྟར་ཡིན་པའི་ཕྱིར། སྟེང་ཐོག་ལ་མཐོ་དམའི་རིམ་པ་འདོད་དགོས་ན། དེ་ལྟར་ཡང་བྱར་མི་རུང་བའི་ཕྱིར། ཡང་འོད་རིམ་གྱི་ལུང་དོན་དེ་ལ་ཁ་ཅིག །ཐ་སྙད་སེམས་ཕྱིར་བུམ་པ་གཅིག །རྨ་བྱའི་མདངས་ལྟར་ཅི་ཡང་སྣང་། །མཐོ་དམན་ཚད་མེད་བྱ་འདབ་ལྡན། །ཐུགས་རྗེས་ཀུན་སྙོམས་ཁྱབ་ཕྱིར་རོ། །ཡང་ཐོག་མཐོ་དམན་རིམ་ལྡན་པར། །མཐའ་མའི་འདབ་མ་ཀུན་གཡོགས་པའི། །ཞེས་དབུས་བུམ་པ་ཟླུམ་པོའི་བྱ་འདབ་དང་། མཐའ་མ་སྟེང་འོག་ཐོག་གི་བྱ་འདབ་སྟེ། དེ་གཉིས་ལ་དགོངས་ནས་ཡང་ཐོག་མཐོ་དམན་ཞེས་སོགས་གསུངས་པའི་ཕྱིར་ཉིས་ཐོག་གོ་ཟེར། དེ་ལྟར་ན་ཁང་པ་ཐོག་གཅིག་མ་རྣམས་ཀྱང་སྟེང་ཐོག་ཅན་དུ་ཐལ་བའི་ཕྱིར་མི་རིགས་སོ། །འོ་ན་གང་ཞེ་ན། དབུས་བུམ་པ་ཟླུམ་པོ་ཁ་དོག་ཅིར་ཡང་སྣང་བ་མཐོ་དམའི་ཚད་དཔག་ཏུ་མེད་པ། དེའང་ཐུགས་རྗེས་ཀུན་ལ་སྙོམས་ཁྱབ་ཀྱི་རྟགས་སུ་བྱ་འདབ་ཅན་ནོ། །དེའི་སྟེང་དུ་བྲེ་མཚོན་པའི་ཕྱུར་བུའི་ཐོག་གྲུ་བཞི་པ་ལའང་བྱ་འདབ་བཀལ་བ་ན། ཡང་ཐོག་མཐོ་དམན་རིམ་པར་ལྡན། །ཞེས་དང་། རྒྱ་ཆེར་འགྲེལ་ལས་ཕྱི་དབྱིབས་མཆོད་རྟེན་དུ་གསུངས་པའིི་ལུང་དོན་ཀྱང་གྲུབ་བོ། །དེ་བས་ན་བྱ་འདབ་འོག་མ་འོག་མ་ལས་སྟེང་མ་སྟེང་མ་རྒྱ་ཇེ་ཆུང་དུ་སོང་བའི་ཕྱིར། ཕྱི་ནས་བལྟས་ན། སྟེང་མ་སྟེང་མ་ལ་འོག་མ་འོག་མ་ཕྱི་འཁོར་བའི་ཚུལ་དུ་ཡོད་ལ་དེའི་ཕྱིར་འོག་ཐོག་གི་བྱ་འདབ་ལ་མཐའ་མའི་འདབ་མ་ཞེས་གསུངས་སོ། །ཡང་བར་སྐབས་ཀྱི་ཟུར་ལུགས་པ་འགའ་ཞིག །དབུས་བུམ་པ་ཟླུམ་པོ་འཁྱིལ་བའི་དོན་གུར་གྱི་རྣམ་པར་བཞེད་པ་ལའང་འོད་རིམ་གྱི་ལུང་འདིས་གནོད་དམ་སྙམ་མོ། ༈ །གཉིས་པ་ཇི་ལྟར་འབུབས་ལུགས་ལ་ཐོག་རིམ་གསུམ་ལས། དང་པོ་འོག་ཐོག་ནི་འདིར་གཞུང་རྣམས་སུ་འདེགས་བྱེད་ཀྱི་ཀ་བ་གསལ་བར་མ་གསུངས་པས་རྩིག་ནང་ནས་སེང་གདུང་ཟུར་ནས་རིང་བ་དང་། ངོས་ནས་ཐུང་བ་བཏང་བའི་ཤིང་བརྩེགས་ཀྱི་བཀོད་པ་ཇི་ལྟར་རིགས་པས་གདུང་ཟླུམ་བཏེགས་ནས་ཡ་ཕུབས་ཏེ་གོ་སླའོ། ༈ །གཉིས་པ་བར་ཐོག་ནི། འདིའི་ཀ་བ་རྣམས་འཁོར་ལོའི་རྩིབས་སྟེང་རྡོར་ཕྲེང་གི་སྟེང་ནས་འཛུགས་དགོས་པས་ཐོག་མར་ནང་གི་བཤད་པ་བྱ་སྟེ། སྒོ་ཁྱུད་ཀྱི་བར་སྟོད་གྲུ་བཞི་པ་ལ་སྒོ་ཕུགས་དང་འགྲམ་གྱི་ཕྱི་སྒོ་ལོགས་གཉིས་ཀྱི་བར་ལ་སྒོ་གཡབ་ཅེས་ཟེར་ལ། དེ་གཉིས་ཀའི་སྤྱི་མིང་ནི་སྒོ་ཁང་ངོ་། །དེ་ལ་འདིར་ཕྱི་ནང་གི་ཐེམ་སྐས་འཛུག་དགོས་པའི་གནད་ཀྱིས་སྒོ་གཡབ་ལས་སྒོ་ཕུགས་ཆ་ཕྲན་གཅིག་དང་། དེ་ལས་ཀྱང་ཁྱམས་ཆ་ཕྲན་གཅིག་གི་མཐོ་བར་བྱ་དགོས་པའི་ཕྱིར། ནང་གི་ཁྱམས་དང་ཕྱི་འདོད་སྣམ་དཔངས་མཉམ་པར་སོང་བས། དེའི་ཕྱིར་རྩིག་པའི་དཔངས་ཀྱང་སྟེགས་བུ་གྲུ་བཞི་པ་གཅིག་གི་སྟེང་ནས་ཆ་ཕྲན་བཅུ་གཅིག་བསླང་བ་ལྟ་བུ་ཞིག་འོང་ངོ་། །ཁྱམས་ཞེང་ཆ་ཕྲན་གསུམ་པར་བྱ་བ་སོགས་ནི་གོ་སླ་ལ། འོན་ཀྱང་ལྷ་རྣམས་སྒེག་པ་བཞེད་པའི་ཕྱོགས་ལ་ཁྱམས་ཆ་ཕྲན་གསུམ་པ་དེ་ལས་ཕྱིར་ཆ་ཕྲན་གཅིག་དོར་ནས་ཆ་ཕྲན་གཉིས་པའི་ལྷ་སྣམ་བྱ། དེ་ལའང་ཁྱད་འབྱེད་མཐོ་དམན་ཅུང་ཟད་བྱས་ན་ལེགས་གསུང་ངོ་། །འདིར་སྒོ་ལས་ཁྱམས་དང་དེ་ལས་གྲུ་ཆད། དེ་ལས་རྩིབས་ཀྱི་ཕྱིའི་མུ་ཁྱུད་རྡོར་ཕྲེང་། དེ་ལས་རྩིབས། དེ་ལས་ལྟེ་བ་རྣམས་ཆ་ཕྲན་རེ་རེས་སྤགས་པ་ནི། ཐེག་པ་གཞན་ལས་འདིར་འཕར་བའི་དོན་ལ་སྟེ། སྤར་ཁབ་ལས། ལམ་གཞན་ལས་ནི་འདིར་འཕར་བའི། །སྒོ་ལ་སོགས་པའི་རིམ་པ་དང་། །ཞེས་སོ། །གློ་འབུར་གྲུ་ཆད་ལས་ཐིག་གང་གིས་མཐོ་བ་དང་རྩིབས་མཆན་རྡོར་འཕྲེང་ལས་དེ་ཙམ་གྱི་དམའ་བར་བྱས་པ་ནི་གཞུང་ལས་མ་བཤད་ཀྱང་ཁྱད་འབྱེད་ཙམ་མོ། །ཐིག་སྐུད་གང་ལ་ཚད་ཇི་ཙམ་ཞེ་ན། ཆ་ཕྲན་གཅིག་གི་ཆ་ལྔ་སྟེ། ཧེ་རུ་ཀ་འདུས་པའི་རྒྱུད་ལས། སྦོམ་ཕྲ་སྒོ་ཡི་ཉི་ཤུ་ཆ། །ཞེས་སོ། །གློ་འབུར་གྱི་དབྱིབས་ནི་གྲུ་ཆད་ལས་ཆ་ཆུང་གཅིག་པོ་ཕྱིར་འཕྱར་བའིི་ཕིབ་ཆུང་གི་རྣམ་པའོ། །འདིར་སྔ་རབས་པ་འགའ་ཞིག །འོག་གི་གྲུ་ཆད་ཁྱམས་སྟོད་ཀྱི་ཚུལ་དུ་ཅུང་ཟད་མཐོ་བས། སྟེང་གི་གྲུ་ཆད་བྱ་འདབ་ཀྱི་ཚུལ་ཡོད་དོ། །འོག་གི་གློ་འ བུར་གྲུ་ཆད་ཀྱི་ཕྱོགས་བཞི་ན་ཁྲི་སྟེགས་ཀྱི་ཚུལ་དུ་ཡོད་ལ། སྟེང་གི་གློ་འབུར་ནི་བྱ་འདབ་ཀྱི་སྟེང་ན་ལྕོག་བཞིའི་ཚུལ་དུ་ཡོད་དོ། །ཞེས་གསུངས། དེ་ལ་ཕྱིས་ཀྱི་བླ་མ་མཁས་པ་དག་ན་རེ། དཀྱིལ་འཁོར་གྱི་དབུས་ཀྱི་མུ་ཁྱུད་ཟླུམ་པོའི་ཕྱི་རིམ་དུ་ཕྱོགས་བཞིའི་ལྷ་སྣམ་དེས་བཅད་པས་ཟུར་བཞིར་གྲུ་ཆད་རིང་ཐུང་དུ་བྱུང་བ་དེ་ལ་ཟེར་གྱི། འོག་གི་གྲུ་ཆད་ཁྱམས་སྟོད་ཀྱི་ཚུལ་དུ་ཅུང་ཟད་མཐོ་བ་འོང་དོན་ཅི་ཡང་མེད། སྟེང་གི་གཞལ་ཡས་ཁང་གི་ཐོག་གིས་ཁྱབ་པའི་སྟེང་དུ་གྲུ་ཆད་ནི་དེ་བས་ཀྱང་འོང་དོན་མེད། འོག་གི་གློ་འབུར་ཁྲི་སྟེགས་ཀྱི་ཚུལ་དུ་ཡོད་ན་དེར་སུ་ཞིག་གི་སྡོད་ས་ཡིན། ཞེས་སོགས་དང་། སྟེང་གི་གློ་འབུར་བྱ་འདབ་ཀྱི་སྟེང་དུ་ལྕོག་རྒྱབ་པ་འདི་འདྲ་ཨི་སྲིད། ཅེས་སོགས་དང་། འདིར་སྒོ་ཁང་ཕྱིར་འབུར་བ་གཞལ་ཡས་ཁང་གི་རྩིག་པ་དང་ཆ་ཕྲན་གཉིས་ཀྱི་བར་འགྱངས་ཡོད་པ་འདི་ལ་གོ་སླ་ཞིང་། བློས་བསླང་གི་དཀྱིལ་འཁོར་མ་མཐོང་བའི་སྐྱོན་དུ་སྣང་། ཞེས་སོགས་བརྒལ་བརྟག་མང་དུ་མཛད་དོ། །དེ་ལ་སྟེང་གི་གྲུ་ཆད་དང་། སྟེང་གི་གློ་འབུར་གྱི་འདོད་པ་དེ་དག་ལ་དགག་པ་མཛད་པ་བདེན་མོད་ཀྱི། དེ་ལྟར་ནའང་མཁས་པའི་གསུངས་དེ་དག་ལའང་གསུང་རབ་དང་ལྟག་འཆུས་ཆེས་པའི་སྐྱོན་འདི་དག་མཐོང་སྟེ། ཞི་བ་བསྡུས་པ་ལྟ་བུ་བར་ཁྱམས་མེད་ཅིང་འཁོར་ལོའི་མུ་ཁྱུད་ཀྱི་སྟེང་ནས་བུམ་པ་ཟླུམ་པོའི་ཕྱུར་བུར་འདེགས་བྱེད་ཀྱི་ཀ་བ་འཛུག་དགོས་པའི་རིགས་ལ། འོག་ཏུ་རྡོར་འཕྲེང་ལས་འཕྱར་བའི་གློ་འབུར་དང་། སྒོའི་འགྲོ་འོང་བདེ་ཁྱད་ཀྱི་ཆ་ཆེན་བཞི་པའི་མཐའ་ནས་ཆ་ཕྲན་གཉིས་ཙམ་ཕྱིར་དོར་བའི་ནང་དུ་རྩིབས་ཀྱི་མུ་ཁྱུད་བསྐོར་དགོས་པས། ངོས་ཀྱི་ཁྱམས་ཐུང་སར་གསེར་གདུང་དང་གདུང་ཟླུམ་ཐུག་ལ་ཁད་པ་ཞིག་འོང་ལ། དེའི་དབང་གི་སྟེང་དུ་གདུང་ཟླུམ་ཁའི་བུམ་པ་ཟླུམ་པོའི་རྩིག་པ་དང་པུ་ཤུ་གཉིས། ངོས་ཀྱི་དབུས་སུ་ཐུག་འགྲོ་བས་ཐོག་མཐིལ་གྱི་ཟུར་བཞིར་གྲུ་ཆད་རིང་ཐུང་དུ་བྱུང་བའི་གྲུ་ཆད་ཡིན་པའི་ཕྱིར་དང་། གསང་རྫོགས་མ་ཧཱའི་སྒོམ་རིམ་ལས། འཁོར་བའི་གཡུལ་ལས་རྒྱལ་ཞིང་བདུད་བཞི་བཅོམ་པའི་བརྡར་གྲུ་ཆད་བཞིར་རྒྱལ་མཚན། ཞེས་གསུངས་པའི་རྒྱལ་མཚན་དེ་ཡང་ནང་དུ་འཛུག་དགོས་པར་ཐལ་བའི་ཕྱིར་དང་། ཕ་རོལ་པོས་བྱ་འདབ་ཀྱི་ཚུལ་དུ་ཡོད་པར་འདོད་པའི་སྐྱོན་ངན་པ་དེ་ལ་དགག་པ་མཛད་ཐང་བ་ལམ་མཛད་འདུག་པའི་ཕྱིར་དང་། བྱ་འདབ་ཀྱི་སྟེང་དུ་ལྕོག་བརྒྱབ་པ་དེ་འདྲ་བ་འདིར་མི་འོང་ཡང་ལར་ནས་མི་སྲིད་པ་མ་ཡིན་ཏེ། བསམ་ཡས་ཀྱི་གཙུག་ལག་ཁང་ལ་སོགས་པ་དེ་ལྟར་སྣང་བའི་ཕྱིར་དང་། ཁྱད་པར་འོག་གི་གྲུ་ཆད་ཁྱམས་སྟོད་ཀྱི་ཚུལ་དུ་ཅུང་ཟད་མཐོ་བ་འོང་དོན་མེད་ན། སྤར་ཁབ་ལས། སྒོ་ལ་སོགས་པའི་རིམ་པ་དང་། །ཞེས་སྤགས་པར་གསུངས་པའང་མི་རིགས་པར་འགྱུར་བའི་ཕྱིར་དང་། འོག་གི་གློ་འབུར་ཞེས་དང་། དེ་ཁྲི་སྟེགས་ཀྱི་ཚུལ་དུ་ཡོད་པར་མི་རིགས་ན། རྔམ་གློག་ལས། སྤྱན་ལྔའི་གློ་འབུར་མཛེས་པ་ལས། །ཕྱག་ན་རྡོ་རྗེ་སྔོ་སྐྱའི་མདོག །ཅེས་དང་། འགྲེལ་ཆུང་ལས། གློ་འབུར་བཞི་ལ་རིགས་ཡབ་ཡུམ་འཁྲིལ་བའི་ཚུལ། ཞེས་གློ་འབུར་ལ་ནང་སེམས་བཞི་འགོད་པར་བཤད་པའང་མི་རིགས་པར་ཐལ་བའི་ཕྱིར་དང་། སྒོ་བཞི་ཁོ་ན་ལྷག་པའི་གློ་འབུར་དུ་བཞེད་ན། བདེ་འདུས་ཞི་བ་འབྲིང་པོའི་སྒོམ་རིམ་ལས། ཡེ་ཤེས་གཅིག་གི་ནང་དུ་ཀུན་ཚངས་པའི་ཕྱིར། གྲུ་ཆད་ལ་མཁར་ཐབས་གློ་འབུར་དུ་འགྱུར་རོ་ཞེས་དང་། སྤྱན་འགྲེལ་ལས། རྩ་བ་བཞིའི་ཕྱིར་གློ་འབུར་དུ་སྣང་བའོ། །ཞེས་འཁོར་ལོའི་རྩིབས་བཞི་ཕྱི་དེ་ན་གློ་འབུར་ཡོད་པར་བཤད་པ་དང་འགལ་བའི་ཕྱིར་དང་། ཐིག་གི་པཎྜིརྠ་ལས་ཀྱང་། གློ་འབུར་ཆ་ཕྲན་སྒོ་ཁྱམས་གཉིས། །ཞེས་སྒོ་ཁང་གི་འབུར་ཐབས་ལ་ཆ་ཕྲན་གཅིག་ལས་མེད་པར་འགྱུར་བས། ཆ་ཕྲན་གཉིས་ཡོད་པར་བཤད་པ་དང་འགལ་སྣང་བའི་ཕྱིར་རོ། །ཡང་རྗེ་སྒྲོལ་གཡུང་གཉིས་ཀྱི་ཊཱི་ཀར། རྩ་རྒྱུད་ཀྱི་དབང་དུ་ལྷ་མེད་པའི་ཁང་སྟོང་བཞི། ཞེས་གསུངས་ཡང་། འགྲེལ་ཆུང་ལས་ལྷ་ཡོད་པར་བཤད་ལ། དེ་རྩ་རྒྱུད་ཀྱི་འགྲེལ་པ་ཡིན་པའི་ཕྱིར་འཐད་པར་མ་མཐོང་ངོ་། །དེས་ན་གློ་འབུར་གྱི་དོན་འདི་ལ་སྔ་རབས་པ་ཕལ་ཆེ་བས་ཕྱོགས་རེ་ཁོ་ན་ལ་བཤད་པ་མཛད་པས་འཐེན་ཁྱེར་བྱུང་བ་ཡིན་ལ། ཁོ་བོ་ནི་འདི་ལྟར་སེམས་ཏེ། སྙིང་པོ་རོལ་པ་ཆེན་པོའི་རྒྱུད་ལས། ལྷག་པའི་ཡེ་ཤེས་རིན་པོ་ཆེ། །ཉི་ཤུ་རྩ་ལྔའི་རྟགས་རྣམས་ཀྱིས། །རང་གི་དཀྱིལ་འཁོར་མཛེས་བྱ་བ། །ཞེས་དང་། སྤྱན་འགྲེལ་ལས། དྲུག་པའི་ཡེ་ཤེས་སྙིང་རྗེ་ངོ་བོ་ཉིད་གཞི་དང་། དེ་རེ་རེ་ལའང་བཞི་བཞིར་གསལ་བས། རྒྱས་པའི་དབང་དུ་ཕོ་བྲང་རྩིབས་བཞི་ལྔར་སྣང་བའོ། །འབྲིང་བསྡུས་ལྟར་རྩ་བ་བཞིའི་ཕྱིར་གློ་འབུར་དུ་སྣང་བའོ། །ཞེས་པས་རྩ་བའི་ཡེ་ཤེས་ལྔ་ནི། དབུས་བུམ་པ་ཟླུམ་པོ་དང་སྒོ་བཞིའི་གློ་འབུར་བཞིའོ། །དེ་རེ་རེའང་ལྷག་པའི་ཡེ་ཤེས་བཞི་བཞི་རྩ་བ་དང་བཅས་པའི་ལྔ་ལྔ་སྟེ་ཉི་ཤུ་རྩ་ལྔའོ། །དེའི་རྟགས་སུ་དབུས་བུམ་པ་ཟླུམ་པོ་ཆོས་དབྱིངས་ཡེ་ཤེས་ཀྱི་ཕྱག་རྒྱར་གྱུར་པའི་ལྷག་ནང་གི་གློ་འབུར་བཞི་དང་། སྒོ་བཞི་ནི་མེ་ལོང་ཡེ་ཤེས་ལ་སོགས་པ་སྟེ། རེ་རེ་ཡང་རྩིག་པ་རིམ་པ་ལྔ་ལྔས་ཕྱེ་བས་ཉི་ཤུ་རྩ་ལྔར་འགྱུར་རོ། །དེ་ལྟར་ཡང་རྗེ་སྒྲོ་ཕུག་པ་ཆེན་པོའི་གསུང་རྒྱུན་ལས། ཡེ་ཤེས་རེ་རེའང་ལྷག་པའི་ཡེ་ཤེས་བཞི་བཞི་དང་ལྡན་པ། ཞེས་དང་། སྨན་ཊཱིཀ་ལས་ཀྱང་། ཡེ་ཤེས་རེ་རེ་ཡང་ལྔ་ལྔས་ཁྱད་པར་དུ་བྱས་པ། ཞེས་སོ། །ཡང་རྔམ་གློག་ལས། གློ་འབུར་བཞི་ཡང་མཁར་ཐབས་ཚུལ། །ཞེས་པའི་མཁར་ཐབས་ཀྱིས་སྒྲས་ཕྱིའི་གློ་འབུར་ཁོ་ན་ངེས་སོ་སྙམ་ན་མ་ཡིན་ཏེ། ནང་གི་གློ་འབུར་ཡང་མཁར་ཐབས་སུ་སྔར་དྲངས་པའི་བདེ་འདུས་ཀྱི་ལུང་གིས་གྲུབ་པའི་ཕྱིར་དང་དེའི་དོན་ཀྱང་། ལྷ་རྗེས་མང་མཁར་བ་སེང་ཧ་པྲ་བྷས། གྲུ་ཆད་ལ་བ་གམ་གྱི་ཚུལ་དུ་ཕྱིར་འཕྱར་བ་དེ་མཁར་གྱི་འབུར་ཐབས་ལྟ་བུའི་ཚུལ་དུ་ཡོད་དོ་ཞེས་གསུངས་པ་ལྟར་ཏེ། མཁར་དངོས་ཡིན་མི་དགོས་ལ། གལ་ཏེ་དགོས་ན་པུ་ཤུ་མཆོད་རྟེན་ཚད་ལྡན་བྱ་དགོས་པར་ཐལ་ལོ། །ཐོག་འབུབ་དངོས་ནི། སེང་གདུང་གི་བཏེགས་པའི་གདུང་ཟླུམ་སྟེང་དུ་རྩིག་དཔངས་ཆ་ཕྲན་བདུན་ལས། བུམ་རྟེན་ལ་གཅིག །བུམ་པ་ལ་དྲུག །དེའི་སྟེང་ནང་གི་རྡོ་ཕྲེང་ལ་བརྟེན་པའི་ཀ་བ་ཆ་ཆེན་ལྔ་དང་ཆ་ཕྲན་གཅིག་གིས་བཏེགས་པའི་གདུང་ཟླུམ་དང་། ཏལ་གདུང་བཞི་སྡོམ་པའི་དཔངས་ཆ་ཕྲན་གཅིག །དེ་སྟེང་ཕྱམ་དང་བྱ་འདབ་ལ་གཅིག་གི་སྟེ་ཁྱོན་ཆ་ཆེན་གཉིས་དང་ཆ་ཕྲན་གཅིག་ཏུ་འགྱུར་བས། གསང་རྫོགས་ཀྱི་ཐིག་རྩ་སློབ་དཔོན་གྱིས་མཛད་པ་ལས། བུམ་རྟེན་ལ་ནི་ཆ་ཕྲན་གཅིག །བུམ་པ་ཆ་ཆེན་གཉིས་ཚད་དོ། །ཞེས་པ་དང་ཚད་མཚུངས་སོ། །བུམ་པའི་ཕྱོགས་བཞིར་བུམ་སྒོ་བྱས་ན་ནང་མཐོང་དཀར་ཕྱིར་མཛེས་པ་ཞིག་འོང་བས་གྲུབ་ན་བྱ། གདུང་ཟླུམ་སྟེང་དུ་གདུང་བཞི་བརྒྱུགས་པའི་བར་སེང་དེ་དགག་པའི་ཕྱིར། གདུང་སྣ་བརྒྱད་ལ་རིན་པོ་ཆེའམ་པདྨ་ལྟ་བུ་ཅི་མཛེས་བརྐོས་ལ་དེ་དང་བར་མ་ཆད་པའི་དེ་འདྲའི་ཕྲེང་བས་བསྐོར་ཞིང་། བྱ་འདབ་ཀྱི་སྣ་ལས་རིན་པོ་ཆེའི་དྲྭ་བ་དྲྭ་ཕྱེད་མ་བྱས་ཀྱང་ཆོག་ལ་བྱས་ཀྱང་མི་འགལ་ལོ། །འདིར་ལྷ་རྗེ་སོ། ཕྱི་དབྱིབས་རྒྱལ་ཁབ་རྒྱ་ཕུབས་ཅན་མཛད་ནའང་། རིགས་པར་མ་མཐོང་སྟེ། རྩ་རྒྱུད་ལས། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཞེས་དང་། བཤད་རྒྱུད་ཐལ་བ་ལས། སྤྱི་བོ་ཤིན་ཏུ་འཁྱིལ་བར་གནས། །ཞེས་དང་། བཤད་རྒྱུད་ཡེ་ཤེས་སྙིང་པོ་ལས། རྩེ་མོ་གཅིག་པ་རུ་འདུས་པ་དབྱེར་མེད་པའི་རོ་དང་ལྡན་པས་ཐིག་ལེ་ཟླུམ་པ། ཞེས་དང་། རྒྱ་མཚོ་ལས། གྲུ་བཞི་སྤྱི་བོ་འཁྱིལ་སྣང་བའོ། །ཞེས་སོགས་རྩ་བཤད་ཀུན་ལས་ཟླུམ་པོར་བཤད་པ་དང་འགལ་ལོ། །ཟླུམ་པོ་དེ་ཡང་བུམ་པའི་རྣམ་པ་ཅན་ཏེ། བླ་མ་ལས། བུམ་པའི་ཚུལ་དུ་དབྱིབས་རྡོ་རྗེ་རྒྱ་གྲམ་མིག་མང་རིས་འཁྱིལ་བ། ཞེས་དང་། རྔམ་གློག་ལས། བུམ་པའི་རྩེ་མོ་ཆོས་ཀྱི་ཏོག །རྨ་བྱའི་མདངས་ལྟར་བཀྲ་བའོ། །ཞེས་དང་། འོད་རིམ་ལས། ཐ་སྙད་སེམས་ཕྱིར་བུམ་པ་གཅིག །ཅེས་སོགས་རྣམ་པ་དུ་མར་དབྱིབས་བུམ་པར་བཤད་པའི་ཕྱིར་རོ། །འདི་ཡི་ཀ་བ་དང་ཏལ་གདུང་བཞི་གཏོང་ཚུལ་ནི། ཕུག་ན་ཀ་བ་བརྒྱད་པོ་ཡིས། །ཞེས་པའི་དགོངས་པ་ཡིན་ལ། གདུང་ཟླུམ་བཏང་བ་སངས་རྒྱས་གསང་བའི་གཞུང་འདི་ལས་མི་འབྱུང་ནའང་། དཔལ་མཆོག་གི་འགྲེལ་པར། ཀ་བ་བརྒྱད་ཀྱི་སྟེང་དུ་རྡོ་རྗེའི་ཕྲེང་བ་ཟླུམ་པོས་ཡོངས་སུ་བསྐོར་བའོ། །ཞེས་པ་ལྟར་འདིར་ཡང་བུམ་པ་ཟླུམ་པོའི་གནད་ཀྱིས་བྱ་དགོས་མོད། འོན་ཀྱང་དེ་ཀ་བས་མི་འདེགས་པ་ནི་བྱེ་བྲག་དབང་བཙན་པར་བྱས་པའོ། །གཞན་དག་ནང་ཀ་ལ་ཀ་གདན་མི་བྱེད་པར་འདོད་ཀྱང་། འདིར་ཀ་གདན་བུམ་པ་ཆ་ཕྲན་གཅིག་དང་། དེའི་སྟེང་དུ་ཀ་བ་གཞུ་དང་བཅས་པ་བྱ་དགོས་ཏེ། ཆོས་དོན་ལས། ཀ་གདན་བསྙེན་གནས་ཀླུ་ཆེན་བརྒྱད། ཀ་བ་འཕགས་ལམ་ཕྱོགས་སྐྱོང་བརྒྱད། ཀ་གཞུ་རྣམ་ཐར་ལྷ་ཆེན་བརྒྱད། གདུང་བཞི་མི་འཇིགས་རྒྱལ་ཆེན་བཞི། །ཞེས་གསུངས་པའི་ཕྱིར། གཞུང་འདིའི་རྗེས་སུ་འབྲངས་ཏེ་བུ་སྟོན་རིན་པོ་ཆེས་ཀྱང་ནང་གི་ཀ་བ་ལ་ཀ་གདན་མཛད་པ་ལ། མཁས་པ་དག་ན་རེ། ནང་གི་ཀ་བ་ལ་ཀ་གདན་བྱེད་པའང་ཕྲེང་བའི་དགོངས་པ་མ་ཡིན་ཏེ། རྟ་བབས་ཀྱི་ཀ་བ་རྣམས་ནི་སྟེགས་གྲུ་བཞི་པ་དང་བུམ་པ་ལ་གནས། ཞེས་པའི་སྒྲས་ངེས་པར་བཟུང་བའི་ཚིག་གིས་ལོགས་སུ་བཀར་བའི་ཕྱིར། ཞེས་ཕྲེང་བ་མཁན་པོའི་ལུང་གིས་གནོད་བྱེད་འབེབས་པར་མཛད་མོད། དེ་ནི་པཎ་གྲུབ་གཅིག་གི་རྗེས་སུ་འབྲངས་པ་ལ་གཅིག་ཤོས་དང་མི་མཐུན་པའི་གནོད་བྱེད་འབེབས་པར་མཛད་པའི་ཕྱིར། ཤིན་ཏུ་རིགས་པ་མ་མཐོང་སྟེ། ཅིའི་ཕྱིར་ན། ཁོ་བོ་ཅག་གི་ཕར་ཟློག་སྟེ། ནང་ཀ་ལ་ཀ་གདན་མེད་པའང་སངས་རྒྱས་གསང་བའི་དགོངས་པ་མ་ཡིན་ཏེ། ཀ་གདན་བསྙེན་གནས་ཀླུ་ཆེན་བརྒྱད། །ཅེས་ནང་ཀ་ལ་ཀ་གདན་བྱ་བར་གསུངས་པའི་ཕྱིར། ཞེས་སྨྲས་ན་མཚུངས་པའི་ཕྱིར་དང་། ཨ་བྷ་ཡ་དང་སངས་རྒྱས་གསང་བ་གཉིས་པཎ་གྲུབ་ཡིན་མཉམ་ལས། ད་རུང་སངས་རྒྱས་གསང་བ་ལ་འགྲན་དུ་མེད་པར་གྲུབ་པའི་ཕྱིར། གཞན་ཡང་ཁྱོད་ཀྱིས་དཔྱོད་པ་དང་ལྡན་པ་སུ་ཞིག་དགའ་བ་སྐྱེ་བར་འགྱུར་ཞེས་དང་། མཁས་པ་གཞན་དག་གིས་ཀྱང་ལུང་དེ་སངས་རྒྱས་གསང་བའི་ཡིན་པར་བརྫུས་མར་སྣང་ཞིང་། ཞེས་གསུངས་པ་རྣམས་དབང་ཆེ་བ་ཙམ་དུ་ཟད་དེ། རྫུན་ལུང་ཡིན་པའི་གཏན་ཚིགས་འཆད་རྒྱུ་མ་བྱུང་འདུག་པའི་ཕྱིར་རོ། །ཡང་མཁས་པ་འགའ་ཞིག་ན་རེ། སངས་རྒྱས་གསང་བས་མཛད་ཟེར་བའི་ཆོས་དོན་ནི། ཞི་ཁང་དང་། ཁྲོ་ཁང་དང་། ལྷ་ཆེན་བརྒྱད་ཀྱི་ཀ་བ་སོགས་རྣམ་དག་མང་བས་བོད་ཀྱི་རྙིང་མ་བ་རྣམས་ཀྱིས་བྱས་པར་མཁས་པ་རྣམས་བཞེད་དོ། །ཞེས་གསུངས་པ་ཡང་ཕྱོགས་གཏམ་སྟེ། ཞི་ཁང་དང་ཁྲོ་ཁང་བཤད་པས་བོད་མར་གྱུར་ན། ལྷ་ཞི་ཁྲོ་ཡང་བོད་མར་ཐལ་བའི་ཕྱིར་དང་། རྣམ་དག་མང་བས་བོད་མར་གྱུར་ན། དུས་ཀྱི་འཁོར་ལོའི་དཀྱིལ་འཁོར་ལྟ་བུ་ཕྱི་ནང་གི་དག་སྦྱོར་ཤིན་ཏུ་མང་བ་བཤད་པ་དེ་དག་ཀྱང་བོད་མར་བའི་ཕྱིར་དང་། བོད་ཀྱིས་བྱས་པར་མཁས་པ་རྣམས་བཞེད་ཅེས་པ་ལའང་སྙིང་པོ་མེད་དེ། བུ་སྟོན་སོགས་སྔ་རབས་ཀྱི་མཁས་གྲུབ་ཆེན་པོ་རྣམས་རྣམ་དག་ཏུ་བཞེད་པར་སོ་སོའི་གསུང་རབ་ལ་བལྟས་པས་ཤེས་པའི་ཕྱིར་རོ། །དེས་ན་རང་གི་ཞེ་འདོད་དང་མ་མཐུན་པ་ཙམ་ཞིག་རྒྱུ་མཚན་དུ་བྱས་ཏེ་བོད་མར་འདོད་པ་དེ་དག་སྙིང་པོ་མེད་པར་ཤེས་པར་བྱའོ། །ཡང་རྡོ་རྗེ་ལས་རིམ་ལས། རྡོ་རྗེ་ནོར་བུས་ཉེར་མཛེས་པའི། །ཀ་བ་ཕྱག་རྒྱའི་གདུང་བཞིར་སྦྱར། །ཞེས་པས་འདིར་རྡོ་རྗེས་མཚན་པའི་ནོར་བུ་རིན་པོ་ཆེའི་ཀ་བ་ཕྱོགས་མདོག་ཅན་བརྒྱད་པོ་ཕྱག་རྒྱ་བཞི་མཚོན་པའི་ཏལ་གདུང་བཞི་ལ་སྦྱར་བ་སྟེ། བདེ་འདུས་ཞི་བའི་རྩ་རྒྱུད་ལས། རྡོ་རྗེའི་ཀ་བས་བརྒྱན་པ། ཞེས་དང་། ཀླུའི་བློས་ཀྱང་། རྡོ་རྗེས་མཚན་ཞིང་ལེགས་མཛད་པའི། །ཀ་བ་བརྒྱད་ནི་ནང་དུ་བྲི། །ཞེས་བཤད་པའི་ཕྱིར་རོ། ༈ །གསུམ་པ་སྟེང་ཐོག་ནི། དབུས་བུམ་པ་ཟླུམ་པོའི་རེའུ་མིག་དབུས་མ་མ་ཕུབ་པར་བཞག་པ་དེའི་སྟེང་དུ་བྲེས་མཚོན་པའི་སྟེང་ཁང་གྲུ་བཞི་པ་འབུབས་ཏེ། དེའི་ཚུལ་ནི་མཐོང་ཁའི་ཟུར་བཞིར་བཙུག་པ་ཀ་བ་ཆ་ཕྲན་ཕྱེད་བཞིར། གཞུ་དང་གདུང་ལ་ཆ་ཕྲན་ཕྱེད་རེ། དེའི་སྟེང་དུ་ཆ་ཕྲན་གཅིག་པའི་རྒྱ་ཕུབས་འགེབས། འདི་དང་བུམ་ཟླུམ་གྱི་བྱ་འདབ་ཀྱི་རྩ་བ་གནོན་པའི་ལན་ཀན་ནི་ཚན་གཅིག་ཏུ་མ་ངེས་ཀྱང་། ཆ་ཕྲན་གཅིག་ལས་ཆེ་བ་མི་ལེགས་སོ། །རྒྱ་ཕུབ་ཀྱི་འོག་ཏུ་བླ་བྲེ་ཕུབ། སྟེང་གི་དབུས་སུ་པདྨ་ལ་གནས་པའི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་མཛེས་ཤིང་ཏོག་དང་བཅས་པ་བྱའོ། །དེ་ལྟར་ཡང་རྡོ་རྗེ་མེ་ལོང་ལས། ཆོས་ཀྱི་འཁོར་ལོ་བསྐོར་བྱས་ཤིང་། །ཉོན་མོངས་ཚད་པའི་གདུང་བ་སེལ། །ཐུགས་རྗེ་གདུགས་ཀྱི་འཁོར་ལོ་བསྟན། །མ་ལུས་གཅིག་ཏུ་འདུས་པ་ནི། །ཏོག་སྟོང་འོད་ཟེར་འབར་བ་སྟེ། །ཞེས་དང་། ཆོས་དོན་ལས། རྩེ་རྒྱན་རྣམ་དག་མཆོད་རྟེན་ལ། །སྲོག་ཤིང་སྐུ་གསུང་ཐུགས་སུ་བསྟན། །འཁོར་ལོ་ས་ཡི་ཁྱད་པར་ཡིན། །ཆར་ཁེབས་ཐུགས་རྗེ་ཆེན་པོ་སྟེ། །འཕན་ནི་མཆོད་པའི་ལྷ་མོ་ལ། །དྲིལ་བུ་སྟོང་པ་ཉིད་ཀྱི་སྒྲ། །ཟླ་ཚེས་ཐབས་དང་ཤེས་རབ་ཡིན། །ཏོག་ནི་མི་ནུབ་རྒྱལ་མཚན་ནོ། །ཞེས་གསུངས་པའི་འཕན་དང་དྲིལ་བུ་ནི་ཆར་ཁེབས་ལས་འཕྱངས་ལ། ཟླ་ཚེས་ནི་དྲིལ་བུའི་རླུང་བསྐྱོད་དོ། །རྡོ་རྗེ་རིན་པོ་ཆེའི་ཏོག་ནི། ཁ་ཅིག་རྒྱུ་ནོར་བུ་རིན་པོ་ཆེའི་ཏོག་རྡོ་རྗེ་ལས་གྲུབ་པར་འདོད། ཁ་ཅིག་རྒྱུ་ནོར་བུ་ལས་བྱས་པའི་ཕྱག་མཚན་རྡོ་རྗེ་རྩེ་ལྔ་པའི་དབྱིབས་སུ་འདོད། ཕལ་ཆེར་ནོར་བུ་དང་རྡོ་རྗེ་གཉིས་ཀའི་དབྱིབས་དགོས་པར་འདོད། ལ་ལ་དག །བུམ་པ་ཏོག་དང་བཅས་པའི་རྣམ་པ་ག་ཊི་རར་གྲགས་པ་ཉིད་ཏེ། གལ་ཏེ་རྡོ་རྗེའི་རྣམ་པ་དགོས་ནའང་རྭ་ཕྲེང་ཉིད་རྡོ་རྗེའི་རྭའི་རྣམ་པ་ཡིན་པས་དེ་ཙམ་ལ་བྱའི། ཕྱག་མཚན་གྱི་རྡོ་རྗེའི་རྣམ་པ་གསལ་དོད་པ་མི་དགོས་གསུངས། དེ་དག་ལས་འདིར་སྙིང་པོ་རོལ་པ་ཆེན་པོའི་རྒྱུད་དུ། རྩེ་མོ་ནོར་བུ་འབར་བ་ལ། །རིགས་ཀྱི་མཚན་མ་རྒྱན་དུ་བྱས། །ཞེས་གསུངས་པའི་ལུང་དོན་ལ་ལུགས་གསུམ་པ་ཉིད་ཉེ་བར་མངོན་ནོ། །དེ་ལྟར་ཕྱི་དབྱིབས་མཆོད་རྟེན་དུ་བྱ་ཚུལ་འདི་ལ་ཁ་ཅིག་འདི་སྙམ་དུ། ཆོས་དོན་ལས། རེ་ཞིག་བྱང་ཆུབ་ཆེན་པོ་ལས། །དྲན་དང་ཡང་དག་རྫུ་འཕྲུལ་དབང་། །བང་རིམ་བཞི་ཡི་དོན་དུ་བཞེད། །བུམ་སྟེགས་སྟོབས་ཏེ་བུམ་པ་ནི། །བྱང་ཆུབ་ལམ་ཡིན་བྱེ་བྲག་ནི། །འཕགས་པའི་ལམ་དུ་ཤེས་པར་བྱ། །ཞེས་པས་གཞལ་ཡས་ཁང་དངོས་གཞིའི་སྟེང་དུ་བང་རིམ་བཞི་བུམ་རྟེན་བུམ་པ་བྲེ་སོགས་བྱང་ཆེན་མཆོད་རྟེན་གྱི་རྣམ་པར་བྱ་བར་བཤད་པ་དང་འགལ་ལོ་སྙམ་ན། དེ་ལྟར་བཤད་པ་བདེན་མོད། འོན་ཀྱང་འདིར་དེའི་སྐྱོན་མེད་དེ། དེ་ཉིད་ལས། གཞལ་ཡས་ཕྱིའི་དོན་རྟགས་རྣམས། །མཆོད་རྟེན་བརྒྱད་སོགས་བསྟན་པ་ནི། །སྡུག་བསྔལ་བརྒྱད་སྒྲོལ་མཛད་པ་བརྒྱད། །ཅེས་བྱང་ཆེན་ཁོ་ནར་མ་ངེས་པའི་ཕྱིར་དང་། ལུང་སྔ་མའི་རེ་ཞིག་ཅེས་པའི་ནུས་པས་ཀྱང་ཐོན་པའི་ཕྱིར་རོ། །དེས་ན་རྒྱུད་འགྲེལ་བཤད་སྒྲུབ་ཐབས་རྣམས་ནས་བུམ་པའི་དབྱིབས་སུ་བཤད་ལ། བང་རིམ་བྱ་བ་མ་བཤད་པའི་ཕྱིར་འདིར་མ་བྱས་སོ། །དེ་ལྟར་ནའང་ཆོས་དོན་དང་མི་འགལ་ཏེ། མྱང་འདས་མཆོད་རྟེན་དུ་འགྱུར་བའི་ཕྱིར། གཞན་ཡང་། རྔམ་གློག་ལས། གྲུ་བཞི་ལྷམ་པ་མཛེས་པར་སྣང་། །རིན་ཆེན་སྣ་བཞིའི་རྒྱུ་ལས་གྲུབ། །ཅེས་དང་། ཧེ་རུ་ཀ་གལྤོ་ལས། བྷནྡྷ་གསར་རྙིང་བརྩེགས་པའི་གཞལ་ཡས་ཁང་། །ཡོན་ཏན་ཆེ་རྒྱས་གྲུ་བཞི་ལྷམ་པའི་དབྱིབས། །ཞེས་དང་། གསང་འདུས་ལས། གྲུ་བཞི་ལྷམ་པ་ཤིན་ཏུ་མཛེས། །ཞེས་གསུངས་པའིི་ལྷམ་པའི་དོན་ཁ་ཅིག །སྟེང་འོག་གྲུ་བཞི་པར་ངེས་པས་གཞལ་ཡས་ཁང་གི་འོག་ཐོག་མན་ཆད་རྒྱ་དཔངས་མཉམ་ཟེར་ནའང་། འདུས་པའི་འགྲེལ་པ་སྒྲོན་གསལ་དུ། ལྷམ་པའི་དོན་ཟླུམ་པོ་མ་ཡིན་པ་དང་། ཡ་ཡོ་མེད་པ་ལ་བཤད་པ་དང་། ནོར་བུ་རྒྱས་པའི་ལེའུ་ལྔ་པར། རས་ཁ་ཚར་མ་ཆད་པ་རྒྱ་མོད་པ་གྲུ་དོ་གྲུ་བཞི་ལྷམ་པ་ལ། ཞེས་གསུངས་པས་ལུང་དེའི་དོན་དེ་ལྟར་མ་ཡིན་ཞེས་མཁས་པ་དག་གསུངས་སོ། །འདིར་གཞལ་ཡས་ཁང་འོག་ཐོག་གི་གསེར་གདུང་མན་ཆད་ལ་ནང་གི་ཆ་ཕྱེད་དཔངས་དང་། རྩེ་མོའི་ཏོག་མན་ཆད་རྟ་བབས་ཀྱི་ཀ་བའི་ཕྱི་མཐའ་དང་རྒྱ་དཔངས་མཉམ་པ་སྟེ། གཞན་དུ་ན་སྔར་བཤད་པ་ལྟར་རྩིག་པ་མཐོ་དམན་གྱི་ཚད་ཆེ་འབྲིང་ཆུང་གསུམ་ལས་དཔངས་མཐའ་གཅིག་ཏུ་ངེས་པ་མ་ཡིན་ནོ། ༈ །ལྔ་པ་སྒོ་ནི། ཕྱོགས་བཞིའི་རྩིག་པའི་དབུས་སུ་བྲིས་ཆ་ལ་ཇི་ལྟར་ཡོད་པ་ལྟར། ཚངས་ཐིག་གི་གཡས་གཡོན་དུ་ཆ་ཆུང་གཉིས་གཉིས་ཏེ་སྡོམ་པས་ཆ་ཆེན་གཅིག་པའི་ཧར་བཏོན་པ་དེ་ནི་སྒོ་དངོས་སོ། །མཚམས་དེའི་རྩིག་སྣེ་ནས་མདུན་དུ་ཆ་ཆེན་རེ་འཐེན་པ་སྒོ་ཁྱུད། དེའི་སྣེ་ནས་གཡས་གཡོན་དུ་ཆ་ཕྲན་གཉེས་རེ་ངོས་སུ་བཀྱེད་དེ་འཐེན་པ་སྒོ་འགྲམ། དེའི་ངོས་ནས་མདུན་དུ་ཆ་ཕྲན་གཉིས་འཐེན་པ་ནི་སྒོ་ལོགས་སོ། །ཁྱུད་འགྲམ་ལོགས་སུམ་ཀའི་རྩིག་དཔངས་ནི་སྒོ་ཡི་ཧར་དང་མཉམ་ལ། དེའི་ཚད་རྩིག་པ་མཐོ་དམན་འབྲིང་གསུམ་གྱི་དབང་ལས་གཅིག་ཏུ་མ་ངེས་ཀྱང་། འདིར་འབྲིང་ཚད་ཀྱི་དབང་དུ་བྱས་ནས་ཆ་ཕྲན་བཅུ་དང་ཆ་ཕྲན་གཅིག་གི་སུམ་གཉིས་སུ་བྱས་སོ། །འདིར་མཁས་མཆོག་དག་གིས་མཛད་ཟེར་བའི་དོང་སྤྲུགས་ཀྱི་དཀྱིལ་ཆོག་ཏུ། འགྲམ་ལོགས་དང་བྲལ་བའི་སྒོ་བྱས་ཏེ། དེའི་རྗེས་འབྲངས་འགས་རྒྱབ་བརྟེན་དུ། ཕྲེང་བར། ཆུ་སྲིན་ཁ་ན་ཆུ་སྲིན་འབར། །རྟ་བབས་སྒོ་ལས་སུམ་འགྱུར་རོ། །ཞེས་དང་། མཁའ་འགྲོ་རྒྱ་མཚོ་ལས། ཀ་བའི་རྩེ་ནས་འཐོན་རྩེ་མོ། །སྣ་ཚོགས་རྡོ་རྗེ་འོད་པོ་ཆེ། །ཞེས་པའི་ལུང་གཉིས་དང་དགོངས་པ་མཐུན་ཞེས་མཆན་གྱིས་གསལ་བར་བྱས་སོ། །དེ་ནི་དོང་སྤྲུགས་རང་གི་ལག་ལེན་མན་ངག་བརྒྱུད་པ་ཅན་ཡིན་ན་མི་འགལ་བ་སྲིད་མོད། དེ་ལས་གཞན་དུ་སྒྱུ་འཕྲུལ་གྱི་རྒྱུད་སྒྲུབ་ཐབས་རྣམས་ལས་ཀྱང་། སྒོ་བཞི་སྒོ་ཁྱུད་ཅན། ཞེས་འགྲམ་དང་ལོགས་ཀྱི་མིང་དངོས་སུ་མ་གསུང་པས་བྱ་མི་དགོས་སམ་སྙམ་དུ་བསམས་ནས་དེ་ལྟར་བྱས་པ་ཡིན་ན་མི་འཐད་དེ། བི་མ་ལས། ཁོར་ཡུག་གསུམ་པའི་ཞེང་ཚད་ལ་རྟ་བབས་ཕྱེད་དང་གསུམ་དུ་བྱ་བར་བཤད་པ་ལྟར། རང་གི་ཡི་གེར་ཡང་རྡོར་ཆ་ཕྲན་གཉིས་པ་ལ་སོགས་པར་བྱས་པ་དང་ནང་འགལ་བའི་ཕྱིར་དང་། ཐིག་གི་པཎྜིརྠ་ལས། ཁྱུད་སོགས་ཕོ་བྲང་ཞེང་དང་མཉམ། །ཞེས་གསུངས་པས་སྐབས་འདིར་ཁྱུད་ནི་འགྲམ་ལ་བྱ་སྟེ། དེ་ལྟར་ན་འགྲམ་ལོགས་ཀྱི་ཚད་གང་ཞེ་ན། དེ་ཆ་ཕྲན་གཉིས་པར་སྟོན་པ་ལ། དེ་ལས། ཚངས་ཐིག་གཡས་གཡོན་ཆ་ཆེན་ཕྱེད། །ཅེས་ཕོ་བྲང་གི་ཕྱོགས་རེའི་ཞེང་ཚད་གསུངས་པ་འདིས་བསྟན་པས་ན། འགྲམ་ལོགས་ཚད་དང་བཅས་ཏེ་གསུངས་པའི་ཕྱིར་དང་། ཁྲོ་བོའི་སྐབས་སུའང་། ནང་གི་སྒོ་ཀུན་ཆ་ཕྲན་གཉིས། །ཁྱུད་དང་ལོགས་ནི་རེ་རེའོ། །དེ་ལ་འདི་སྙམ་དུ་འགྲམ་གྱི་མིང་ལ་ཁྱུད་ཟེར་བ་ནོར་རོ་ཞེ་ན། གཞུང་ཁུངས་གཞན་དག་ལས་ཀྱང་གཅིག་ཏུ་མ་ངེས་པ་འདི་ལྟར་འབྱུང་སྟེ། བདེ་འདུས་ཞི་བ་རིགས་བརྒྱའི་གཏེར་དཔེ་དངོས་ལས། དབུས་བརྒྱད་ཆ་ལ་སྒོ་འགྲམ་དང་། །ཞེས་ཁྱུད་ལ་འགྲམ་དུ་གསུངས་ཤིང་། དུས་འཁོར་གྱི་འགྲེལ་ཆེན་དྲི་མེད་འོད་ལས་ཀྱང་། འགྲམ་དང་ལོགས་ཀྱི་ཐ་སྙད་གོ་ལྡོག་ཏུ་གསུངས་པའི་ཕྱིར་མཐའ་གཅིག་ཏུ་མ་ངེས་སོ། །འོན་ཀྱང་ཐིག་གི་པཎྜིརྠིའི་དཔེ་དག་པ་བྱུང་ན་ད་དུང་དཔྱད་པར་བྱའོ། །དེ་མ་ཟད་སུམ་པ་དང་རྒྱ་སྟོན་གྱི་ཕྱག་བཞེད་ལྟར་རྡོ་རྗེ་རིན་ཆེན་གྱིས་བྲིས་པའི་ཆོས་དོན་གྱི་ཐིག་ཆོག་ལས་ཀྱང་། སྒོ་ནི་དཀྱིལ་འཁོར་བརྒྱད་ཆ་གཅིག །དེ་ཡི་ཕྱེད་ལ་སྒོ་འགྲམ་བྱ། །ཞེས་སོགས་སྔོན་གྱི་སློབ་དཔོན་གྲུབ་པའི་དབང་ཕྱུག་རྣམས་ཀྱིས་མཛད་པའི་ཐིག་ཆོག་རྣམས་སུའང་འགྲམ་ལོགས་ཡོད་པར་མཛད་ཅིང་། སྨན་ཊཱིཀ་ཏུའང་། སྒོ་ཁྱུད་ཅེས་པ་ངོས་དང་ལོགས་དང་འགྲམ་ཡ་ཕུབས་ལ་སོགས་པའོ། །ཞེས་པས་འགྲམ་ལོགས་ཡོད་པར་གྲུབ་བོ། །དེ་ལྟར་ན་ལུགས་འདི་ལ་སྒོ་ཁང་སྤྱིའི་མིང་ལ་སྒོ་ཁྱུད་ཅེས་འབོད་པར་སྣང་སྟེ། ཀུན་མཁྱེན་ཆེན་པོས་ཀྱང་། སྒོ་ཁྱུད་རེ་རེ་བཞིན་སྒོ་སུམ་སྒྲིགས་རེ་རེས་བརྒྱན་པ། ཞེས་པའང་ཡ་ཕུབས་འདེགས་བྱེད་ཀྱི་ཀ་བས་སུམ་རལ་ལྟ་བུར་གྱུར་པ་ལ་དགོངས་པའོ། །གཞན་ཡང་ཁྱེད་ལྟར་ན། བཀའ་བརྒྱད་ཞི་དཀྱིལ་ལའང་འགྲམ་ལོགས་བྱ་མི་དགོས་པར་ཐལ། བདེ་འདུས་ཞི་བ་ཞེ་གཉིས་ཀྱི་སྒྲུབ་ཐབས་ལས། རྣམ་ཐར་བཞི་ཡི་སྒོ་ཁྱུད་ལ། །ཞེས་པ་ལས་མ་གསུངས་པའི་ཕྱིར། འདོད་མི་ནུས་ཏེ། རིགས་བརྒྱའི་སྒྲུབ་ཐབས་སུ། རྩ་བ་དབུས་ཆ་གཉིས་ཏེ་མཐའ་གཉིས་དོར་བ་སྒོ་རྒྱན་དང་བཅས་བྱ་དབུས་བརྒྱད་ཆ་ལ་སྒོ་འགྲམ་དང་། ཡ་ཕུབས་ལོགས་དང་སྒོ་ཁྱུད་རོལ་པ་ཚོན་སྣ་ལྔས། བསྐོར་བྱ་ཞེས་དང་། ཐིག་ཆོག་ཏུའང་། ཆ་གཉིས་སྒོ་སྟེ་གསུམ་པ་ཁྱུད། །བཞི་པ་འགྲམ་སྟེ་ལྔ་པ་ལོགས། །དྲུག་པ་ནམ་མཁའ་སྟོང་པ་ཡིན། །བདུན་དང་བརྒྱད་ལ་ཀ་བ་བྱ། །ཞེས་གསུངས་པ་དང་འགལ་བའི་ཕྱིར། ཕྲེང་བ་དང་མཁའ་འགྲོ་རྒྱ་མཚོའི་ལུང་དེས་ཀྱང་ལུང་མི་འགྲུབ་སྟེ། ལུང་དེ་གཉིས་ནི་ལོགས་དང་ཀ་བའི་བར་ན་མུན་སྣང་མེད་པར་འདོད་པའི་ལུང་ཡིན་གྱི། འགྲམ་ལོགས་མི་འདོད་པའི་ལུང་མ་ཡིན་པར་སྔོན་གྱི་མཁས་གྲུབ་རྣམས་ཀྱིས་གཏན་ལ་ཕབ་ཚར་བ་ལྟར་ཡིན་པས་མང་དུ་མི་སྤྲོའོ། །སྒོ་ལོགས་ཀྱི་རྩིག་པའི་ནང་ནས་ཆ་ཆུང་ཕྱེད་གཉིས་ནང་དུ་ཕྱིིན་པའི་སར་ཡ་ཕུབས་འདེགས་བྱེད་ཀྱི་ཀ་བ་ཞེང་ཆ་ཕྲན་ཕྱེད། དཔངས་ཕྱེད་དང་བརྒྱད་ཡོད་པ་ཞིག་བཙུགས་པའི་ནང་མཐའ་དང་། སྒོ་ཁྱུད་ཀྱི་རྩིག་པའི་ནང་མཐའ་དྲང་ཐད་དུ་འོང་བར་བྱའོ། །དེའི་སྟེང་དུ་གདུང་དཔངས་ཆ་ཕྲན་ཕྱེད་པ་ཞིག་སྒོ་ལོགས་ཀྱི་རྩིག་པ་ལ་གདུང་ཁུང་བྲུས་ནས་བཙུགས་ཏེ་འགེབས། ཀ་བ་འོག་མའི་ཀ་ཐོག་ཀ་བཞག་གི་ཀ་ཐུང་ཆ་ཕྲན་ཕྱེད་གཉིས་དང་། གདུང་ལ་ཕྱེད་བྱ། ཀ་ཐུང་གི་བར་ལ་རྡོ་རྗེ་བཅུ་གཅིག་འགྲེང་བུར་བསླང་བའི་དྲྭ་མིག་དང་གདུང་གི་སྟེང་དུ་ཡ་ཕུབས་ཀྱི་རྩིག་དཔངས་ཆ་ཕྲན་གྱི་སུམ་གཉིས་ཡོད་པས་གཅིག་འཁོར་རོ། །འདིར་ཁ་ཅིག་ཡ་ཕུབས་ཀྱི་སྟེང་དུ་རྩིག་པ་མི་འཁོར་བ་བཞེད་ནའང་། བདེ་འདུས་ལས། ཡ་ཕུབས་ལོགས་དང་སྒོ་ཁྱུད་རོལ་པ་ཚོན་སྣ་ལྔས། བསྐོར་བྱ། ཞེས་པས་ལུང་དེས་འཁོར་བ་ལེགས་སོ། །བཅུ་གཅིག་རྡོ་རྗེའི་དྲྭ་མིག་བྱེད་པའི་རྒྱུ་མཚན་ནི། ཆོས་དོན་ལས། སྒོ་ཁང་སྒོ་སྲུང་ཁང་པ་སྟེ། །སྟེང་གི་མ་རིག་མུན་པ་ལས། །ཡེ་ཤེས་མཐོང་ཁང་དབྱེ་བའི་ཕྱིར། །བཅུ་གཅིག་རྡོ་རྗེ་དྲྭ་མིག་བྱེད། །ཅེས་སོ། །དེའི་ཚད་ཀྱང་གསང་རྫོགས་ལས། བཅུ་གཅིག་རྡོ་རྗེའི་ཆ་ཕྲན་གཅིག །ཅེས་པའི་བར་སྟོད་ཆ་ཕྲན་ཕྱེད་གཉིས་ལས་ཆ་ཕྲན་གྱི་བཞི་ཆ་རེ་ཙམ་པའི་རྡོ་རྗེའི་བརྟེན་ས་ཡས་མས་གཉིས་ཀ་ལ་གདུང་ལས་ནང་དུ་ཅུང་ཟད་བསྐུམ་པ་རེ་བཏང་བའི་བར་དུ་རྡོ་རྗེའི་དཔངས་ལ་ཆ་ཕྲན་གཅིག་རེ་བྱའོ། །ལྷ་རྗེ་མང་མཁར་བ་སོགས་འདི་དང་རྟ་རྐང་གི་སྣམ་བུའི་རྡོ་རྗེའི་དོན་གཅིག་ཏུ་མཛད་ནས། དེ་ནས་རྡོ་རྗེ་བཅུ་གཅིག་གི་གྲངས་ངེས་མཛད་པ་སོགས་ནི་འཐད་པ་མ་མཐོང་སྟེ། སློབ་དཔོན་པདྨས་མཛད་པའི་གསང་རྫོགས་མ་ཧཱའི་སྒོམ་རིམ་ལས། སྒོ་ཁང་བཞི་མཐིང་ནག་གྲིབ་སོས་བརྒྱན་པ་ལ། ཡ་ཕུབ་རྡོ་རྗེ་བཅུ་གཅིག་གིས་གནམ་མཐོང་གསལ་བ། ཞེས་གསུངས་པ་དང་འགལ་བའི་ཕྱིར་རོ། །སྒོ་གླེགས་འཛུག་ས་ལ། ཁ་ཅིག་སྒོ་ཁྱུད་ཀྱི་ནང་དང་། ཁ་ཅིག་ཁྱུད་འགྲམ་གྱི་མཚམས་དང་། ལ་ལ་དག་ཕྱི་ནང་གཉིས་ཀར་འཛུག་པར་འདོད་པའི་ལུགས་གསུམ་ལས། འདིར་སྒོ་ཁྱུད་ཀྱི་ནང་དུ་འཛུག་པ་ཉིད་རྗེ་བླ་མའི་དགོངས་པ་ཡིན་ཏེ་ལེགས་སོ། །དེ་ལྟར་ན་བུ་སྟོན་རིན་པོ་ཆེས། དེ་ཉིད་བསྡུས་པར། སྒོ་རྣམས་ཀུན་གྱི་ནང་དུ་ནི། །སྒོ་བསྲུང་རྣམས་ནི་དགོད་པར་བྱ། །ཞེས་པས་སྒོ་ཁྱུད་ཀྱི་ཕྱིར་ཡང་སྒོ་གླེགས་འཛུག་དགོས་པ་གསུངས་པས་གནོད་དོ་ཞེ་ན། མི་གནོད་དེ་སྒོ་བསྲུང་གི་ཕྱི་རོལ་ན་སྒོ་ཡོད་ཀྱང་། དེ་ལ་སྒོ་གླེགས་དགོས་པར་མ་ངེས་ཏེ། གལ་ཏེ་དགོས་ན། སློབ་དཔོན་ཚུལ་ཁྲིམས་བསྐྱང་གིས། རྟ་བབས་ལའང་སྒོ་དང་པོ་ལས་གསུངས་པ་དང་། ཆོས་དོན་ལས་ཀྱང་། སྒོ་ལ་སྟེང་དང་འོག་ཡིན་ཏེ། །འོག་གི་སྒོ་དང་སྒོ་ཁང་ཅན། །སྟེང་ནི་སྐས་དང་གླང་རྒྱབ་སོགས། །ཇི་ལྟར་མཛེས་པའི་ཚུལ་དུ་བཞེངས། །ཞེས་གླང་རྒྱབ་ཀྱང་སྒོར་གསུངས་པའི་ཕྱིར། རྟ་བབས་དང་གླང་རྒྱབ་སོགས་ལའང་སྒོ་གླེགས་གཞུག་དགོས་ན་ཧ་ཅང་ཐལ་ལོ། ༈ །དྲུག་པ་རྟ་བབས་ནི། རྡོ་རྗེ་མེ་ལོང་ལས། ལམ་བརྒྱད་རིམ་པར་བགྲོད་པ་ཡིས། །འབྲས་བུའི་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཞེས་པས་རྣམ་ཐར་གྱི་ཐེག་པ་བརྒྱད་ལ་སྦྱངས་པ་རྟོགས་པའི་རྟགས་སུ་རྒྱུའི་རྟ་བབས་དང་། ཐེག་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་འབྲས་བུའི་རྟ་བབས་བརྒྱད་དེ་བཅུ་དྲུག་གོ། །དེ་ལྟར་ཡང་སྒྱུ་འཕྲུལ་བྱེ་བྲག་བསྟན་པ་ལས། ཐེག་པ་བརྒྱད་ཀྱི་ངེས་འབྱུང་བའམ། །རྒྱུ་འབྲས་ཆ་ཡིས་ཕྱི་ནང་གིས། །ཐེམ་སྐས་བརྒྱད་དུ་རྣམ་པར་སྣང་། །ཞེས་པའི་རྒྱུའི་རྟ་བབས་བསྟན། དེའི་འཕྲོས་ལས། དེ་ཡི་གྲུབ་པའི་མཐའ་རྫོགས་པའི། །ཡོན་ཏན་བརྒྱད་ཕྱིར་རྟ་རྐང་དང་། །ཆུ་སྐྱེས་སྒྲོམ་དང་ཟ་ར་ཚགས། །སྣ་འཕྱང་ཆུན་འཕྱང་ཤར་བུ་དང་། །ཁྱུང་མགོ་མཛེས་པས་རིམ་པར་འཁྲིགས། །ཞེས་པའི་འབྲས་བུའི་རྟ་བབས་བསྟན་ནོ། །དེ་ལྟར་གཉིས་ལས། དང་པོ་རྒྱུའི་རྟ་བབས་ནི། རྒྱས་པ་དང་། ལེ་ལག་དང་། རྡོ་རྗེ་གསང་བའི་སྙིང་པོའི་རྒྱུད་རྣམས་ཚིག་དོན་མཐུན་པར་འདི་སྐད་དུ། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། །དེར་འགྲོ་ལམ་སྟེགས་བརྒྱད་དང་ལྡན། །རྟ་བབས་བརྒྱད་དུ་འགྱུར་བ་ཡིན། །ཞེས་དང་། འོད་རིམ་ལས། སྒོ་ཁྱུད་བཞི་ལྡན་རྟ་བབས་བཅས། །བསྟི་གནས་ལམ་གྱི་བགྲོད་ཕྱིར་རོ། །ཞེས་སོ། །འདི་ལ་སྔ་རབས་ཀྱི་བླ་མ་ཕལ་ཆེར་སྒོ་ཁང་དང་ཁྱམས་ལས་སྒོ་ཅུང་ཟད་མཐོ་བས། ཐེམ་སྐས་ནང་ནས་བཞི། ཕྱི་ནས་བཞི་སྟེ་བརྒྱད་དོ་གསུངས། རྗེ་སེ་སྟོན་ཆེན་པོ་ནི། ཕྱོགས་བཞིར་རྟ་བབས་ཞོན་གྱི་ས་ནས་སྒོར་འཇུག་པའི་བར་དུ་ཐེམ་སྐས་གཉིས་གཉིས་ཏེ་བརྒྱད་དོ་གསུངས། དེ་གཉིས་ཀ་མི་རིགས་ཏེ། སྒོམ་ཐེམ་ལ་ཕྱི་ནང་ནས་སྐས་འཛུག་ས་བཀོད་པ་ཤིན་ཏུ་མི་བདེ་བའི་ཕྱིར་དང་། ཕྱོགས་རེ་རེ་ཐེམ་སྐས་གཉིས་རེ་ཡོད་པ་སྡོམ་པས་རྟ་བབས་བརྒྱད་དུ་འགྱུར་ན་རྒྱན་གྱི་རྟ་བབས་ལའང་མཚུངས་པའི་ཕྱིར་རོ། །ཡང་ལུགས་ཕྱི་མ་དེ། འགྲེལ་པ་ཉི་སེང་མར་སྒོ་རེ་རེ་ལ་ཐེམ་སྐས་གཉིས་གཉིས་སུ་གསུངས་པའི་དགོངས་པའོ་ཞེ་ན་མ་ཡིན་ཏེ། འགྲེལ་པའི་དགོངས་པ་ནི་སྒོ་རེ་རེ་ལ་སྐས་ཕྱི་ནང་གཉིས་ཡོད་པ་ལ་དགོངས་པའི་ཕྱིར། འོ་ན་གང་ཞེ་ན། སྔོན་གྱི་མཁས་གྲུབ་ཆེན་པོ་རྣམས་ཀྱིས། ཐེམ་སྐས་ཕྱི་ནས་བཞི། ནང་ནས་བཞི་ཞེས་གསུངས་པའི་དོན་སྒོ་གཡབ་དང་སྒོ་ཕུབས་ཀྱི་མཚམས་སུ་ཕྱིའི་ཐེམ་སྐས་བཞི་དང་། སྒོ་ཕུགས་དང་ཁྱམས་ཀྱི་མཚམས་སུ་ནང་གི་ཐེམ་སྐས་བཞི་འཛུག་པ་ཡིན་ནོ། །འདིར་ཕྱིས་ཀྱི་མཁས་པ་དག་ན་རེ། གསར་མའི་རོང་པ་ཆོས་མགོན་དང་རྙིང་མའི་རོག་ཤེས་རབ་འོད་སོགས་ཀྱིས་སྒོའི་ཕྱིར་རྟ་བབས་ཞོན་གྱི་ཚུལ་དུ་ཡོད་པས་རྟ་བབས་སུ་འདོད་པ་ཤིན་ཏུ་འཁྲུལ་བས། བུ་སྟོན་དང་སྟག་ཚང་ལོ་ཙཱ་བ་སོགས་ཀྱིས་བཀག་པ་ལ་ལེགས་སོ་དང་བཅས་ཏེ་སྨྲ་བ་དང་། མཁས་དབང་ལ་ལ་དག་རྟ་བབས་ཞོན་གྱི་ས་ཡིན་པས་རྟ་བབས་ཞེས་པ་ལེགས་སྦྱར་གྱི་ཚིག་དོན་ལ་མ་ཞུགས་སོ། །ཞེས་གསུངས་ཀྱང་། བྲིས་ཀྱི་སྐབས་ཀྱི་རྟ་བབས་འདི་ཉིད་ཐེམ་སྐས་སུ་འདོད་མཁན་ཡོད་ན་ནི་ངེས་པར་འཁྲུལ་ལ། གཞན་སྐྱོན་མེད་དེ། ལེགས་སྦྱར་གྱི་སྐད་དུ། ཏྭ་ར་ཎ་ཞེས་པ་མངོན་པར་འཕྱང་བའི་དོན་ཡིན་པས་ཐེམ་སྐས་ལ་དཔྱངས་པའི་དོན་མི་ཚང་བ་བདེན་ཡང་། གཞན་དུ་ཉོན་མོངས་མེད་པ་ལའང་འཇུག་པས་དེའི་ཕྱག་རྒྱར་གྱུར་པའི་ཕྱིར་དང་། རྣམ་པ་གཅིག་ཏུ་ན་ཏུ་རིང་ཏ་གམ་མ་ཎ་ཞེས་པ་རྟ་ལ་བྱ་བས། ཕོ་བྲང་དུ་འཇུག་པ་ན་འདི་དག་རྟ་བབས་ཞོན་གྱི་སྟེགས་ཡིན་པས་ན་དེ་སྐད་དུ་གྲགས་སོ་ཞེས་སྔོན་གྱི་ལོ་ཙཱ་བ་ཆེན་པོ་དག་གསུངས་པའི་ཕྱིར་དང་། ཕྱོགས་བཅུ་མུན་སེལ་ལས་ཀྱང་། ཏྭ་ར་ཎའི་སྒྲ་བར་སྣང་གི་རྒྱན་དང་། སྒོ་སྐྱབས་དང་། རྟ་བབས་ཞོན་གྱི་སྟེགས་དང་། ཐེམ་སྐས་ལ་འཇུག་པ་གསུངས་པ་ལྟར་ཡིན་པས་ལེགས་སྦྱར་གྱི་སྒྲ་ལ་མ་ཞུགས་པའི་སྐྱོན་མེད་ལ། དེ་མེད་པ་ཉིད་ཀྱི་གེགས་སྔ་མའང་སེལ་ལོ། །ཡང་ཆོས་དོན་ལས། ལམ་སྟེགས་བརྒྱད་ནི་འཕགས་ལམ་དང་། །ཐེག་པ་བརྒྱད་དང་རྣམ་ཐར་བརྒྱད། །ཅེས་ཐེམ་སྐས་ཕྱི་ནང་གཉིས་ཐུན་མོང་གི་དོན་རྟགས་དང་། སྒོ་སྟེགས་རྟ་བབས་བཞི་པོ་ནི། གསུམ་ནི་ཁམས་གསུམ་བཞི་པོ་ནི། འཕགས་ལམ་པདྨ་མཚན་པ་ཅན། །ཞེས་ཕྱི་ནང་གི་ཐེམ་སྐས་རེ་རེ་ལ་རིམ་པ་བཞི་བཞིར་ཡོད་པའི་དོན་རྟགས་ཀྱང་གསུངས་སོ། ༈ །གཉིས་པ་འབྲས་བུའི་རྟ་བབས་ནི། སྒོ་ལོགས་ཀྱི་ཕྱི་ཟུར་བྲིས་ཆའི་ཀ་བའི་སྣེ་མོ་བཞིས་སླེབས་པའི་སྟེང་དུ་ཕྱི་ནང་གི་ཀ་བ་བཞི་པོ་འཛུགས་སོ། །འོ་ན་ཀ་གདན་དང་བཅས་པའི་ཀ་དཔངས་ཆ་ཕྲན་བདུན་པ་བྱས་པ་འདི་ནི། ཕྲེང་བར། རྟ་བབས་ཀྱི་ཀ་བ་རྩིག་པའི་ཐིག་ལ་འཐོན་ཅིང་། ཆ་ཆུང་བདུན་པའོ། །ཞེས་པའི་ཕྱོགས་ནི་མི་རིགས་ཏེ། གཞལ་ཡས་ཁང་ལས་ཅུང་ཟད་རིང་བར་རྟ་བབས་ཀྱི་ཀ་བ་རྣམས་རེ་རེ་བཞི་སྟེགས་བུ་གྲུ་བཞི་པ་ལ་གནས་པའི་ཕྱིར་ས་མཉམ་པོ་ལ་གནས་པ་ཉིད་ཀྱིས་སྟེགས་བུ་དང་འབྲེལ་བ་བཞིན་མཐོང་བས། སྟེགས་བུའི་ཕྱི་ངོས་སུ་འདི་རྣམས་བྲི་བར་རིགས་སོ། །ཞེས་ཀ་བ་ཆ་ཆུང་བདུན་པ་བཀག་པས་མི་རིགས་སོ་ཞེ་ན། ཕྲེང་བའི་དགོངས་པ་ནི་དེ་ལྟར་མ་ཡིན་ཏེ། གང་ཞེ་ན། ཕྲེང་བའི་ཕྱོགས་སྔ་མ་དེའི་ཞེ་འདོད་ལ། རྟ་བབས་ཀྱི་ཀ་བ་རྩིག་པའི་ཐིག་ལ་ཐོན་པ་བྱ་དགོས་ཏེ། ཀ་དཔངས་ལ་ཆ་ཆུང་བདུན་དགོས་ལ། དེ་འདོད་རྣམས་ཀྱི་ཆ་ཆུང་གཉིས་པོ་མ་བསྣན་ན་མི་ལོངས་པའི་ཕྱིར་སྙམ་དུ་བསམ་མོ། །འདོད་པ་དེ་ཕྲེང་བ་མཁན་པོས་དགག་པ་ན། ཀ་བ་ཆ་ཆུང་བདུན་དགོས་ཀྱང་། བྲིས་ཀྱི་ཀ་བ་ཆ་ཆུང་ལྔ་པོ་དེ་བསླངས་པའི་ཚེ་རེ་རེ་བཞིན་སྟེགས་བུ་གྲུ་བཞི་པ་བུམ་པ་དང་བཅས་པའི་ཆ་ཆུང་གཉིས་ལ་གནས་པའི་ཕྱིར། ཀ་གདན་དེ་འདོད་སྣམ་དང་དཔངས་ཁད་མཉམ་དུ་སོང་བས། རྒྱང་ནས་བལྟས་ན་ཀ་བ་ཆ་ཆུང་ལྔ་པོ་དེ་འདོད་སྣམ་གྱི་སྟེང་དུ་བཙུགས་པ་ལྟ་བུར་འབྲེལ་བར་མཐོང་བ་ཞིག་འོང་བས་བྲིས་ཀྱི་དུས་སུ་ཀ་གདན་བྲི་མི་དགོས་ལ། གལ་ཏེ་བྲིས་ན་རྟ་བབས་ཀྱི་ཀ་བ་ནང་མ་གཉིས་ཀྱི་འཛུག་པའང་གཞལ་ཡས་ཁང་ལས་ཆ་ཕྲན་གཉིས་ཀྱི་བར་ཡོད་པས་ཅུང་ཟད་རིང་བའི་སར་འཛུག་དགོས་པ་ཉིད་ཀྱིས། རྩིག་པའི་ཐིག་ལས་ཐོན་པ་བྱས་ན་བསླངས་པའི་དུས་སུའང་རྩིག་པ་ལ་རེག་པའི་སར་འཛུགས་དགོས་སམ་སྙམ་པའི་དོགས་པ་དེ་སྐྱེ་སྲིད་པའི་ཕྱིར། ལག་ལེན་དེ་འདྲ་ལེགས་པ་མ་ཡིན་ནོ། །དེའི་ཕྱིར་སྟེགས་བུའི་ཕྱིར་ངོས་སུ་འདི་རྣམས་བྲི་བར་བྱའོ། །ཞེས་པའི་དོན་ནོ། །འདིར་མཁས་པ་འགའ་ཞིག་གི་ཀ་བ་གཞལ་ཡས་ཁང་ལས་ཅུང་ཟད་རིང་བའི་དོན་ཀ་བའི་དཔངས་ལ་བྱས་ཏེ་གཞལ་ཡས་ཁང་ཤིན་ཏུ་དམའ་བར་བྱས་པ་དང་། གཞན་དག་ཀ་གདན་ཀ་བའི་དཔངས་ཆ་ཆུང་ལྔ་པའི་ཁོག་ཏུ་བརྩིབས་ལ་སོགས་པ་རྣམས་ནི་འཐད་པར་མ་མཐོང་ངོ་། །དེ་ལྟར་ནའང་སྟེགས་བུ་གྲུ་བཞི་པ་ལ་གནས་པའི་ཕྱིར་ཞེས་པ་ལས་མི་འབྱུང་བ་ལ། འདིར་བུམ་པ་དང་བཅས་པའི་ཆ་ཆུང་གཉིས་པར་བྱེད་པར་མི་རིགས་སོ་ཞེ་ན། དེ་ནས་ཀ་གདན་གྲུ་བཞི་པ་དེས་བུམ་པ་ཡང་མཚོན་དགོས་པ་སྟེ། ཕྲེང་བ་ཉིད་ལས་རྟ་བབས་ཀྱི་ཀ་བ་རྣམས་ནི་སྟེགས་བུ་གྲུ་བཞི་པ་དང་བུམ་པ་ལ་གནས་པས། ཞེས་དང་། ལངྐ་རྒྱལ་བཟང་གིས། སྟེགས་བུ་བུམ་པ་ལས་བྱུང་བའི། །རྟ་བབས་ཀ་བ་དྲང་པོར་བྱ། །ཞེས་གསུངས་པའི་ཕྱིར་རོ། །ཀ་བ་བཞི་པོའི་སྟེང་དུ་རྟ་བབས་འདེགས་བྱེད་ཀྱི་གདུང་ཡོད་པ་དང་མེད་པའི་ཕྱོགས་གཉིས་ལས། འདིར་གདུང་ཡོད་པའི་ཕྱོགས་བསྟན་ཏེ། །ཆོས་དོན་ལས། སྒོ་ཁང་ཕྱིར་ཟུར་བཞི་པོ་ན། །ཀ་བ་བཞི་བཞིའི་གདུང་རྩ་ནི། །བརྒྱད་བརྒྱད་བཏེགས་པ་རྟ་བབས་རྨངས། །ཀ་གདན་ཀ་གཞུ་ཅི་རིགས་པའོ། །ཞེས་སོ། །གདུང་འདིའི་དཔངས་ནི་ཆ་ཕྲན་གཅིག་པ་སྟེ། ཐིག་གི་པཎྜིརྠ་ལས། གདུང་དང་རྟ་བབས་བརྒྱད་ཆ་མཉམ། །ཞེས་སོ། །རྒྱབ་གདུང་གི་སྣེ་ནང་མ་གཉིས་སྒོ་འགྲམ་གྱི་རྩིག་པའི་ཕྱི་མཐར་གདུང་ཁུང་བྲུས་ནས་བཏང་བས་དུམ་བུ་གཉིས་སུ་སོང་བས་ན་གདུང་ལྔར་འགྱུར་བའི་ཕྱིར། ཆོས་དོན་ལས། གདུང་བཞི་བསྣོལ་མར་བཏང་བ་ནི། བདེན་བཞི་བསམ་གཏན་བཞི་དང་ལྡན། །ཞེས་གདུང་བཞིར་གསུངས་པ་དང་འགལ་ལོ་ཞེ་ན། རྒྱབ་ཀྱི་གདུང་ཟླུམ་པོ་གཉིས་པོ་དེ་རྒྱབ་ཕྱོགས་ཀྱི་གདུང་ཞེས་རིགས་བསྡུས་ནས་གསུངས་པ་ཡིན་པའི་ཕྱིར་སྐྱོན་མེད་དེ། དཔེར་ན་རྡོ་རྗེ་འབྱུང་བར། རྟ་བབས་བཞི་དང་ཀ་བ་བརྒྱད། །ཅེས་རྟ་བབས་ཀྱི་ཀ་བ་བཅུ་དྲུག་པོ་ཕྱོགས་རེ་རེ་ལ་ཀ་བ་གཉིས་གཉིས་རིགས་བསྡུས་ཏེ་བརྒྱད་དུ་གསུངས་པ་དང་། ལངྐ་རྒྱལ་བཟང་གིས། སྒོ་ཁྱུད་བཞི་རུ་བརྗོད་པ་ཡིན། །ཞེས་པའང་ཕྱོགས་རེ་རེ་ལ་སྒོ་ཁྱུད་གཉིས་གཉིས་ཡོད་ཀྱང་རིགས་བསྡུས་ནས་བཞིར་གསུངས་པ་ལྟར་རོ། །དེའི་ཕྱིར་སློབ་དཔོན་གྱིས་ནང་གི་གདུང་མ་ལ། གདུང་ཆེན་བཞི་ཡི་རྩེ་ནས་བཏེགས། །ཞེས་གསུངས་པ་ལ། འདིར་གདུང་རྩ་ནི། བརྒྱད་བརྒྱད་བཏེགས་པ་ཞེས་གསུངས་པའང་འདི་ལྟ་བུའི་འཁྲུལ་གཞི་སྐྱེ་སྲིད་པ་ལ་དགོངས་པའོ། །དེས་ན་འདིར་གདུང་བཞི་ནི་རིགས་བསྡུས་པ་ཡིན་ལ། བསྣོལ་མར་བཏང་བ་ནི་གདུང་རྩ་བརྒྱད་པོ་བསྣོལ་བ་ལ་དགོངས་སོ། །རྒྱབ་མདུན་གྱི་གདུང་ཀ་བའི་ཕྱིར་ཆ་ཕྲན་རེ་རེ་ཐལ་བའི་འོག་ཏུ། གླང་པོ་ཆེའི་སྟེང་དུ་སེང་གེའི་ལག་གཅིག་གིས་གླང་པོའི་སྤྱི་བོར་མནན་ཅིང་། དཔུང་པ་གཅིག་བཏེགས་ཏེ་འཕྱར་བ། དེ་ཡི་ཁ་ནས་རིན་པོ་ཆེ་འཕྱང་བ་སྟེ། སྦྱོང་རྒྱུད་ལས། སེང་གེ་བ་གླང་རྣམས་ཀྱིས་བརྒྱན། །ཞེས་པ་དང་མཐུན་ལ་བླ་མ་དགོངས་འདུས་ལས་གླང་ཆེན་སེང་གེའི་རྐང་པ་གཉིས་ཀྱིས་མནན་ཅིང་ལང་བའི་ལག་གཉིས་ཀྱིས་གདུང་འདེགས་པ་གསུངས་སོ། ༈ །གདུང་གི་སྟེང་དུ་རྟ་བབས་བྱ་སྟེ། འདི་ལ་སྔ་རབས་པ་འགའ་ཞིག་ན་རེ། རྟ་རྐང་ནི་རྟ་བབས་འདེགས་པའི་ཀ་བ། ཆུ་སྐྱེས་ནི་པདྨ། སྒྲོམ་ནི་བྲེ། ཟ་ར་ཚགས་ནི་གདུང་ཤམས། སྣམ་འཕྱོང་ནི་ཟུར་དྲིལ། ཆུན་འཕྱང་ནི་རྡོ་རྗེ་རིན་ཆེན་དང་དར་འཕྱངས། ཕྲེང་བ་ནི་མུ་ཕྲེང་ངམ་མུན་པའི་ཁ་རྒྱན་ཤར་བུ། ཁྱུང་མགོ་ནི་བྲེ་ལོགས་བཞི་ལའོ། །མཛེས་པས་རིམ་པར་འཁྲིགས་པ་ནི། རྡོ་རྗེ་ཕྲེང་བར། གསེར་དང་། ཤར་བུ། ཞེས་སོགས་གསུངས་པའི་སྣམ་བུ་བཅུ་གཅིག་པོ་སྟེ། རིམ་པར་རྩིག་པ་ཡོན་ཏན་བརྒྱད་ལྡན་ནོ་ཟེར་བ་ནི། རྒྱུད་སྒྲུབ་ཐབས་ཐམས་ཅད་ནས་རྟ་བབས་སྣམ་བུ་བརྒྱད་དུ་བཤད་པ་དོར་ནས། ཕྲེང་བར་སྣམ་དུ་བཅུ་གཅིག་པ་བྲིས་སྣང་བའི་ཕྱིར་ཤིན་ཏུ་མི་རིགས་སོ། །ཡང་ཆོས་དོན་འབྲེལ་བ་བྱེད་པ་ཁ་ཅིག །རྟ་རྐང་ཀ་བ། ཆུ་སྐྱེས་དང་སྒྲོམ་གཉིས་རྒྱབ་ཕུབས་ཀྱི་ཕོ་གྱོ་མོ་གྱོ། ཟ་ར་ཚགས། སྣ་འཕྱང་ཆུན་འཕྱང་། ཕྲེང་བ་བཞི་པོ་གྱོ་མོ་ཁ་ནས་འཕྱོངས་ལ། ཁྱུང་མགོ་ནི་རྒྱ་ཕུབས་ཀྱི་སྟེང་གཡས་གཡོན་གཉིས་ནའོ་ཟེར་བའང་སྔར་ལྟར་འཁྲུལ་ལོ། །ཡང་ལྷ་རྗེ་རོག་སྟེང་རྒྱན་ནི་ཟག་པ་མེད་པའི་རིན་པོ་ཆེ་དང་གོས་སྣ་ཚོགས་ཀྱི་བླ་རེ་དང་། གདུགས་དང་། རྒྱལ་མཚན་དག་ལ། སྣ་འཕྱོང་དང་། ཆུན་འཕྱོང་དང་། ཕྲེང་བ་སྣ་ཚོགས་པས་བརྒྱན་ཅིང་། སྣ་ཚོགས་པའི་ཁྱུང་མགོ་དག་གིས་མཛེས་པར་གྱུར་པ་སྟེ། པཎྜིརྠ་ལས། ཞབས་དང་མ་ཆགས་ཟ་ར་ཚགས། །ཞེས་སོགས་འདྲེན་པར་མཛད་དོ། །དེ་ཡང་འཐད་པ་མ་མཐོང་སྟེ། རྒྱན་གྱི་རྟ་བབས་རྐང་དོར་བའི་ཕྱིར་རོ། །ཡང་མཁས་གྲུབ་ཆེན་པོ་དག་གི་ཕྱག་ལེན་དུ་གྲགས་པ་ལས། དྲྭ་མིག་དཔངས་ཆ་ཕྲན་གཅིག་དང་། ཆུ་སྐྱེས་དང་ཕ་གུ་གཉིས་ལ་ཕྱེད་ཕྱེད། སྒྲོམ་ཆ་ཕྲན་གཉིས་དང་། ཡང་ཆུ་སྐྱེས་ཕྱེད་དང་སྒྲོམ་ཕྱེད་དང་གཉིས་དང་། ཕ་གུ་དང་ཁྱུང་མགོ་གཉིས་ལ་རེ་རེ་བཞེད་ཅེས་འབྱུང་ནའང་། མི་རིགས་ཏེ། རྡོ་རྗེ་ལས་རིམ་ལས། རྟ་བབས་བརྒྱད་པོ་ཆ་མཉམ་ཞིང་། །ཞེས་གསུངས་པ་དང་འགལ་ཞིང་། ཆུ་སྐྱེས་ཕ་གུ་སྒྲོམ་གསུམ་ལྡབས་པའང་། རྒྱུད་སྒྲུབ་ཐབས་རྣམས་སུ་གསུངས་པ་མ་མཐོང་ངམ། ཡང་ཕྱིས་ཀྱི་ཕྱག་ལེན་འགར། གསེར་གདུང་ཀ་རྒྱན་མཐའ་དང་མཉམ། །རྟ་རྐང་དང་ནི་ཆུ་སྐྱེས་གཉིས། །དེ་ལ་ཆ་ཕྲན་གཅིག་གི་རིང་། །རིན་ཆེན་དེ་ལས་གཉིས་ཀྱི་ཐུང་། །སྒྲོམ་བུ་དེ་ལས་གཅིག་གི་རིང་། །ཟར་ཚགས་པདྨ་མདའ་ཡབ་གསུམ། །རིམ་བཞིན་ཆ་ཕྲན་རེ་རེ་བསྐུམ། །ཞེས་འབྱུང་བའང་། སྒྱུ་འཕྲུལ་གྱི་ལུགས་འདིར་མི་རིགས་ཏེ། འདིར་གསེར་གདུང་སྣམ་བུ་བརྒྱད་ཀྱི་ནང་དུ་གྲངས་ལ། ཐིག་གི་པཎྜིརྠར། གདུང་དང་རྟ་བབས་བརྒྱད་ཆ་མཉམ། །ཞེས་པའི་དང་སྒྲས་ཐ་དད་དུ་ཕྱེ་བའི་ཕྱིར་རོ། །ཡང་ལྷ་རྗེ་སེ་སྟོན་ཆེན་པོས། སྣམ་བུ་དང་པོ་ཀ་རྒྱན་མཐའ་དང་མཉམ། དེ་ནས་རིམ་པར་གཅིག་འཕྱར་གཅིག་བསྡུ་བའི་རིམ་པ་དང་། ཁྱུང་མགོ་ཆ་ཕྲན་གཉིས་བསྐུམ་པའོ་གསུངས། དེ་ལྟར་ན་སྒྲིལ་འཕྱང་གི་གཞི་བར་སྟོང་ལ་འཕྱར་དང་། དེའི་སྟེང་འོག་གི་སྣམ་བུ་གཉིས་ལ་བསྐུམ་གྱི་རེས་བབས་པས། དེ་འདྲ་མི་སྲིད་ཅིང་། སྒྲིལ་འཕྱང་དང་ཤམ་བུ་བཞེད་པའང་། འོད་རིམ་ལས། རིན་ཆེན་སྒྲིལ་འཕྱང་། ཞེས་གསུངས་པས་གནོད་དོ། །ཡང་སྒྲོལ་ཊཱིཀ་ཏུ། ལས་རིམ་ལས། རྟ་རྐང་ཆུ་སྐྱེས་ཕ་གུ་སྒྲོམ། །སྣམ་འཕྱོང་སེང་མགོ་ཤར་བུ་ཕྲེང་། །ཞེས་དྲང་ནས་དེ་ལྟར་བཞེད་ལ། གཡུང་ཊཱིཀ་ཏུའང་དེ་དང་མཐུན་པར་གསུངས་སོ། །དེའི་དོན་གཞན་ནི་སྤྱི་དང་མཐུན་ལ། ཕྲེང་བ་ནི་པུ་ཤུའི་ཕྲེང་བས་བསྐོར་བའོ། །འོན་ཀྱང་ལས་རིམ་གྱི་དཔེ་རྣམས་ལུང་དེ་དང་དེའི་དོད་ཐུབ་གང་ཡང་མ་མཐོང་བས་ད་དུང་དཔྱད་པར་བྱའོ། །འོ་ན་འདིར་ཇི་ལྟར་བྱ་ཞེ་ན། རང་གི་རྗེ་བླ་མའི་དགོངས་པས། རྟ་བབས་སྒོ་ཚད་གཉིས་ལ་སྣམ་བུ་བརྒྱད་དུ་ཕྱེ་བ་ལ་རིམ་བཞིན། རྟ་རྐང་གཞི་སྔོན་པོ་ལ་གསེར་གྱི་རྡོ་རྗེ་འགྲེང་བུར་བསྒྲིགས་པ། ཆུ་སྐྱེས་ནི་པདྨ་དམར་པོ། སྒྲོམ་གྱི་མཐའ་དང་དབུས་སུ་ཀ་ཆུང་བཞི་བཙུགས་པ་ལ་སྒྲོམ་ལེབ་ཁ་དོག་ཅི་མཛེས་བཅུག་པའོ། །སྣམ་བུ་དེ་གསུམ་མདུན་དང་གཡས་གཡོན་གསུམ་པོ་སྒོར་མོ་སྒོ་ཁང་གི་རྩིག་པ་ལ་ཆ་ཕྲན་རེས་མ་རེག་པ་བྱ་སྟེ། བྲིས་ཆའི་སྐབས་སུ་སྒོ་ལོགས་དང་ཡ་ཕུབས་ཀྱི་རྩིག་པའི་ཕྱིར་མུན་པ་པ་ཏི་འཁོར་བ་དེ་ཡིན་ལ། ཤྲདྡྷཱ་དང་སྨྲྀ་ཏིས་ཀྱང་། རྟ་བབས་ཡ་ཕུབས་དག་ལས་ནི། །ཆ་གཅིག་དོར་བའི། ཞེས་པའང་འདི་ལ་དགོངས་པའོ། །དེ་ཡང་རྟ་བབས་འདེགས་བྱེད་ཀྱི་གདུང་རྒྱབ་ལ་དུམ་བུ་གཉིས་པོ་དེ་སྒོ་ཁང་གི་རྩིག་པ་ལ་བརྟེན་པའི་ཕྱིར། དེའི་སྟེང་དུ་སྣམ་བུ་འཁོར་མོར་རྒྱུག་གམ་སྙམ་ན། མུན་པའི་ཆ་ཆུང་གཅིག་པོའི་ས་ལ་མི་རྒྱུག་པ་ཡིན་ནོ། །སྣམ་བུ་གསུམ་པོ་དེ་རྣམས་ནང་ཁོང་སྟོང་ཅན་གྱི་ཁོག་ཏུ་ཀ་བ་དང་། དེས་བཏེགས་པའི་གདུང་བཏང་སྟེ། སྒོ་ཁང་གི་ཐོག་དང་ཆ་མཉམ་དུ་དབུབ་བོ། །དེའི་སྟེང་དུ་ཀ་བ་བརྒྱད་དང་། དེས་བཏེགས་པའི་གདུང་བཞི་སྒོ་མོར་བཏང་བ་ལ། སྒྲིལ་འཕྱང་མ་གཏོགས་པའི་སྣམ་བུ་གཞན་རྣམས་ཀ་བའི་ཕྱི་ངོས་ལ་སྲབ་འཐུག་ཐིག་སྐུད་གང་ཙམ་གྱི་པང་ལེབ་ཟུར་ལངས་བརྩེགས་པ་ལྟ་བུའི་སྣམ་བུ་རྣམས་སྦྲགས་ལ། ཁྱུང་མགོ་སྟེང་ནས་ཕུབས་པས་ཟར་ཚགས་ཡན་ཆད་སྒོ་སྟེང་གི་བ་གམ་བསིལ་བའི་ཁང་བུར་གྱུར་ཏེ། རོང་ཟོམ་ཆེན་པོའི་ཊཱི་ཀ་ལས་ཀྱང་། སྒོའི་བསིལ་ཁང་རྣམས་དང་ལྡན་པར་གྲགས་པས་གཞལ་མེད་ཁང་གི་སྒོ་ཐམས་ཅད་སྤྱིར་ཤེས་པར་བྱ་བ་ཡིན་ནོ། །ཞེས་དང་། ཆོས་དོན་གྱི་རྣམ་བཤད་མཛད་པ་པོ་དག་གིས་ཀྱང་། རྟ་བབས་ནང་ཅན་མཐོང་ཁུང་ཅན་དུ། །ཞེས་གསུངས་པའང་འདི་ལ་དགོངས་པར་མངོན་ནོ། །དེའང་ཟར་ཚགས་ཀྱི་སྣམ་བུ་སྣ་འཕྱང་ལས་འཕྱང་བ། སྣ་འཕྱོང་ནི་གཞི་སེར་པོ་དཀྱིལ་འཁོར་གྱི་ཕ་གུ་དང་མཚན་ཉིད་འདྲ་བ། ཆུན་འཕྱང་ནི་གཞན་ལས་སེང་མགོའི་སྣམ་བུ་ཞེས་འབྱུང་བས། གཞི་བར་སྟོང་ལ་སེང་མགོའི་ཁ་ནས་དཔྱངས་པའི་རིན་པོ་ཆེའི་དོ་ཤལ་དང་དོ་ཤལ་ཕྱེད་པ། ཤར་བུ་ནི་དཀྱིལ་འཁོར་གྱི་ཤར་བུ་དང་མཚུངས་པ་ལས་འདིར་གཞི་སྔོན་པོའི་སྟེང་དུ་སྒྲིགས་པ་ཡིན་ནོ། །དེ་མན་གྱི་སྣམ་བུ་བདུན་པོ་དེ་མདུན་ངོས་སུ་ཕར་བསྐུམ་ཚུར་འཕྱར་མེད་པའི་ཕྱིར། མཚམས་གཅོད་ཀྱི་རི་མོ་ཡོད་པ་མ་གཏོགས་ཁད་མཉམ་ལ། གཡས་གཡོན་དུ་འཕྱར་བའི་འདོད་ཡོན་གྱི་ཆ་རྣམས་པང་ལེབ་སྲབ་མོས་དགབ་དགོས་པས། ཆུ་སྐྱེས་ལ་འོག་གཞི་དང་། སྒྲོམ་ལ་སྟེང་ཁེབ། སྣ་འཕྱོང་ལ་འོག་གཞི་ཁ་ཁེབ་གཉིས་ཀ་དགོས་སོ། །ཤར་བུའི་སྣམ་བུའི་སྟེང་དུ་ཁྱུང་མགོ་ནི། བྱ་འདབ་དང་འདྲ་བ་ལས་ཟུར་བཞིར་ཁྱུང་མགོའི་ལྐོག་མ་ནས་ཟུར་དྲིལ་དང་བཅས་པ་རྟ་བབས་འོག་མ་རྣམས་ལས་མདུན་དུའང་འཕྱར་ཆ་ཕྲན་ཕྱེད་ཙམ་ཡོད་པ་ཞིག་བྱའོ། །སྣམ་བུ་དེ་རྣམས་གཡས་གཡོན་དུ། གསེར་གདུང་དང་རྟ་རྐང་ཀ་རྒྱན་དང་ཁད་མཉམ་ལ། དེ་ནས་ཆུ་སྒྲོམ་གཉིས་ཆ་ཕྲན་གཅིག་འཕྱར། ཟར་ཚགས་གཉིས་བསྐུམ། སྣ་འཕྱང་གཅིག་འཕྱར། ཆུ་འཕྱང་གཉིས་བསྐུམ། ཤར་བུ་གཅིག་འཕྱར། དེ་ལས་ཁྱུང་མགོ་གཅིག་འཕྱར་བའོ། ༈ །དེ་ལྟར་རྟ་བབས་འགོད་པའི་རིམ་པ་འདི་ནི། འོད་རིམ་ལས། འབྲས་བུའི་ཡོན་ཏན་ཀུན་རྫོགས་ཕྱིར། །རྟ་རྐང་ཆུ་སྐྱེས་རིན་ཆེན་སྒྲོམ། །སྣ་འཕྱང་གཞི་ལས་ཟ་ར་ཚགས། །རིན་ཆེན་སྒྲིལ་འཕྱངས་ཤར་བུ་ཁྱུང་། །རིམ་བཞིན་དབྱིབས་མདོག་མཛེས་པར་བྱ། །ཞེས་དང་། རྡོ་རྗེ་ལས་རིམ་ལས། ཞབས་དང་པདྨ་རིན་ཆེན་སྣོད། །སྣ་འཕྱངས་ལས་བྱུང་ཟ་ར་ཚགས། །ཆུན་འཕྱངས་ཤར་བུ་བྱ་ཁྱུང་མགོ། །རིམ་བཞིན་ཁ་དོག་མཛེས་པར་བྱ། །ཞེས་དང་། འགྲེལ་པ་མུན་སེལ་ལས། ངོ་བོ་ཕྱིར། རྟ་རྐང་། པདྨ། སྒྲོམ། ཟ་ར་ཚགས། སྣ་འཕྱོང་། ཆུན་འཕྱོང་། ཤར་བུ། བྱ་ཁྱུང་སྟེ། རྟ་བབས་གདུང་བཞིའི་སྟེང་དུའོ། །ཞེས་གསུངས་ཤིང་། འདི་དག་སྔར་དྲངས་པའི་སྒྱུ་འཕྲུལ་བྱེ་བྲག་བསྟན་པའི་ལུང་དང་ཡང་མཐུན་ནོ། །གཞན་དུ་ན། རྒྱས་པ་ལས། ཞབས་དང་མ་ཆགས་ཟ་ར་ཚགས། །སྣ་འཕྱོང་ཆུན་འཕྱང་འཕྲེང་བ་དང་། །སྣ་ཚོགས་ཁྱུང་མགོས་རིམ་པར་འཁྲིགས། །ཞེས་འབྱུང་སྟེ། རྒྱུད་འཁྲུགས་པ་ཤིང་རྟ་ཆེན་པོའི་སློབ་དཔོན་རྣམས་ཀྱི་མན་ངག་གིས་འཆད་དགོས་པའི་ཕྱིར། འོད་རིམ་ལ་སོགས་པ་ལྟར་ལག་ཏུ་བླང་ན་ལེགས་པར་སྣང་བས་དེ་བཞིན་དུ་བྱས་སོ། །སྣམ་བུ་རྣམས་ནི་མདུན་ངོས་སུ་གླང་རྒྱབ་བརྐོས་པའི་མིག་འོག་མ་དང་ནང་གི་བཅུ་གཅིག་རྡོ་རྗེའི་དྲྭ་མིག་ཁད་མཉམ་དུ་ཡོད་ཅིང་། སྒོ་ཁང་གི་གདུང་དང་ཐོག་འབུབས་ཀྱང་ཕྱི་ནས་མཐོང་བས། དེ་ལ་བསིལ་ཁང་གི་ནང་རྣམས་ཕྱོགས་མདོག་ཅན་ཡིན་པའི་དེ་དང་མཐུན་པའི་ཚོན་རྩིས་བྱུགས་ནས་མཛེས་པར་བྱ་ཞིང་། གདུང་དེའི་འོག་ཡ་ཕུབས་ཀྱི་པཉྩ་རེ་ཁཱའི་མདུན་དུ་བླ་རེ་དབུབ། དེའི་ཕྱི་མཚམས་སུམ་ཕུབས་ཀྱི་བྱ་འདབ་ཀྱི་སྣ་ལས་རིན་པོ་ཆེའི་དྲྭ་བ་ཅུང་ཟད་རེ་འཕྱང་བ་བྱས་ཀྱང་མི་འགལ། གླང་རྒྱབ་ཀྱི་མིག་དབུས་མའི་ནང་དུ་སྒྲིལ་འཕྱང་གི་སྣམ་བུའི་དྲྭ་བ་མཐོང་བས་དྲྭ་ཕྱེད་ཟུར་པ་མ་བྱས་ཀྱང་ཆོག །བྱེད་ན་ཆུ་སྲིན་གྱི་ཁ་ནས་བྱུང་བའི་མུ་ཏིག་གི་དོ་ཤལ་དང་དོ་ཤལ་ཕྱེད་པ་དྲིལ་བུ་རྔ་ཡབ་དང་བཅས་པ་བྱའོ། །འདིར་ཆོས་དོན་ལས། སྟེང་ནི་གླང་དང་སྐས་རྒྱབ་སོགས། །ཇི་ལྟར་མཛེས་པའི་ཚུལ་དུ་བཞེངས། །ཞེས་པ་ལས། མཁས་མཆོག་བུའི། ཤྲཱདྡྷའི་རྟ་བབས་སྒོ་ཚད་མ་གཅིག་མའི་སྣམ་བུ་དང་པོ་ལ་སྐབས་སུ་བཤད་པ་ཤར་བུ་དང་འགྱུར་ཁྱད་དུ་མངོན་ལ། རྟ་བབས་ཀྱི་ཤར་བུ་དང་དེའི་སྟེང་དུ་གླང་རྒྱབ་མཚོན་ཙམ་བྱེད་པ་ཡིན་འདྲ་གསུངས་ནའང་གཞུང་དེ་ཉིད་ལས། སྐས་དང་གླང་པོ་རྒྱབ་འདྲ་དང་། །ཞེས་སོགས་ཀྱི་མཐར། ཇི་ལྟར་མཛེས་པར་བསྟན་པ་ཡིན། །ཞེས་དེ་གཉིས་འདམ་ཁར་གསུངས་པ་འདྲ་བས། སྤྱི་མིང་བྱེ་བྲག་ལ་དགར་ཏེ། མིག་གསུམ་མ་ལ་གླང་རྒྱབ་ཏུ་བྱས་ནས། དེ་བྱེད་དམ། ཡང་ན་སྐྱོགས་པོ་བདུན་པ་དང་དགུ་པ་སོགས་དེང་སང་པུ་ཎ་ཧ་རིར་འབོད་པ་འདི་བྱས་པའི་ཚེ་གཡས་གཡོན་བར་སྟོང་གི་མུན་པའི་དབྱིབས་ཐེམ་སྐས་ཀྱི་རིམ་པ་ལྟ་བུ་ཞིག་འོང་བ་ལ་དགོངས་སམ་སྙམ་མོ། །འོན་ཀྱང་། སྔ་རབས་ཀྱི་ཡོ་ག་བ་འགའ་ཞིག །ཤར་དུ་གླང་པོའི་རྒྱབ་དང་། ལྷོར་རིན་པོ་ཆེ་དང་། ནུབ་ཏུ་པདྨ་དང་། བྱང་དུ་སྐས་ཀྱི་རྣམ་པར་བྱ། ཞེས་ཟེར་བའང་སྣང་བས་ད་དུང་དཔྱད་པར་བྱའོ། །རྒྱ་ཕུབས་ཀྱི་དབུས་སུ་ཆོས་འཁོར་གྱི་གདན་པདྨ་དམར་པོ་རྒྱ་ཆ་ཆུང་གཉིས་དང་དཔངས་སུ་གཅིག །དེའི་སྟེང་དུ་སྨན་ཊཱིཀ་པས། ཆོས་འཁོར་བཅུ་གསུམ་བརྩེགས་མར་བཤད་ཀྱང་། སངས་རྒྱས་གསང་བས། འཁོར་ལོ་ས་ཡི་ཁྱད་པར་ཡིན། །ཞེས་པ་རྩེ་མཆོད་རྟེན་གྱི་དབྱིབས་ལ་དགོངས་ཀྱི་འདིར་དེ་ལྟར་བྱ་དགོས་པའི་ངེས་པ་མེད་པ་དང་། ཐིག་ཆོག་ཏུ་ཆ་ཆུང་གཉིས་པའི་དཔངས་ལས་མ་གསུངས་པའི་ཕྱིར་མི་མཛེས་པས། འདིར་གསེར་གྱི་འཁོར་ལོ་རྒྱ་ཆ་ཆུང་གཉིས་པ་ལྔ་ཆ་ཕྲན་དང་ལྡན་པའི་མུ་ཁྱུད་ཅན་རྩིབས་བརྒྱད་པ་བསླང་བའི་ཁར་གདུགས་དཀར་པོ་དབུབ། གཡས་གཡོན་དུ་མི་རིང་བར་གསེར་ལས་བྱས་པའི་རི་དྭགས་ཀྱི་གཟུགས་ཕོ་ནི་རྭ་དང་བཅས་པ་དང་། མོ་ནི་རྭ་མེད་པ་རིན་པོ་ཆེའི་རྒྱན་གྱིས་སྤྲས་པའོ། །འདིར་བི་མ་ལས། ཆོས་ཀྱི་འཁོར་ལོ་ཆ་གཉིས་ཏེ། །གདུགས་དང་ཡུ་བ་ཆ་རེའོ། །ཞེས་ཆ་ཆེན་གཅིག་ལ་འཁོར་ལོ་ཆ་ཕྲན་གཉིས་དང་། གདུགས་ལ་གཉིས་ཏེ། པདྨ་མ་བཤད་དོ། །དེ་ལྟར་ནའང་བཀའ་བརྒྱད་ཞི་བའི་ཐིག་ཆོག་ཏུ། པདྨ་འཁོར་ལོ་རི་དྭགས་དང་། །གདུགས་རྣམས་ཆ་ཕྲན་བཞི་པའོ། །ཞེས་གསུངས་ཤིང་། བླ་མ་རྣམས་ཕྱག་ལེན་དུའང་ཡོད་པའི་ཕྱོགས་མཛད་དེ། དེ་ལྟར་ན་པདྨ་ཡོད་པའི་ཁྱད་ཀྱི་གདུགས་ཀྱི་ཡུ་བ་ཆ་ཕྲན་གཅིག་པོ་འཁོར་ལོའི་ཕག་ཏུ་བཏང་ནས། ཆ་ཕྲན་གཅིག་པའི་གདུགས་བྱ་བའམ། ཡང་ན་གསང་རྫོགས་ལས། གདུགས་ཆ་ཕྱེད་ལས་ཡུ་བ་ཕྱེད། །ཅེས་པ་ལྟར་ཆ་ཕྲན་ཕྱེད་ཕྱེད་དུ་བྱེད་པའམ། རྣམ་པ་གཅིག་ཏུ་ན། པདྨའི་དཔངས་ཆ་ཕྲན་གཅིག་གི་ཕྱེད་རྒྱ་ཕུབས་ཀྱི་ལན་ཀན་ཕག་ཏུ་འགྲོ་བར་བྱས་ནས་ཇི་ཙམ་སོང་བའི་ཚད་ཀྱི་གདུགས་ཀྱི་ཡུ་བ་མཐོང་བར་བྱས་ཀྱང་མི་འགལ་ལོ། །ཆོས་ཀྱི་འཁོར་ལོའི་ཐད་ཀའི་འོག་བསིལ་ཁང་གི་ནང་དུ་ཅོང་དང་། གཎྜི་དང་། རྡོ་རྗེ་དང་། དྲིལ་བུ་རྣམས་ཀྱང་འདོགས་པར་བཞེད་དོ། །ཆོས་དོན་ལས། ཆོས་ཀྱི་འཁོར་ལོ་གཙོ་བོའི་བརྡ། །རི་དྭགས་འཁོར་གྱི་བརྡ་ཡིན་ཏེ། །ཅོང་ནི་ངེས་དོན་བརྡ་སྒྲ་ཡིན། །གཎྜི་དྲང་དོན་བརྡ་ཡིན་ཏེ། །རྡོར་དྲིལ་ཐབས་དང་ཤེས་རབ་བརྡ། །ཞེས་བརྡ་དྲུག་བཤད་དོ། །དེ་ལྟར་རྟ་བབས་ཀྱི་སྐོར་འདི་ལ་མཁས་པ་གཞན་ཡང་ཁང་ཐོག་འཕང་དམས་པའི་སྐྱོན་དང་། ལྕོག་གི་མཛེས་ཆ་ལས་སྒོ་མདུན་དུ་རྒྱན་མེད་པ་མི་མཛེས་པར་ཆེ་བར་འདོད་པ་དང་རྟ་བབས་མདུན་དུ་བསླང་བའི་སྒོ་ཚད་གཅིག་མ་སོགས་སྒོའི་ཧར་མི་སྒྲིབས་པ་མཐོང་ནས། སྒོམ་དོན་གྱི་རྟ་བབས་སྒོ་ཚད་གསུམ་མས་ཁྱབ་པས་གཅིག་མ་གསུངས་པ་རྣམས་བྲིས་ཆ་ཁོ་ནར་དགོངས་པར་འཆད་པ་དང་། གླང་རྒྱབ་མིག་གསུམ་མ་རྟ་བབས་ཀྱི་འོག་ཏུ་སྒོའི་རླུང་པོ་སྒྲིབས་བྱེད་ཀྱི་ཚུལ་དུ་འདོད་པ་སོགས་ཕེབ་ཀ་རིས་ཀྱི་བཤད་པ་སྣ་ཚོགས་བྱུང་བ་དེ་དག །ད་ཕྱིན་ཆད་ཆུ་ཤིང་གི་འབྲས་བུ་ལྟར་སྙིང་པོ་མེད་པར་འགྱུར་ཞིང་། ཡང་དག་པའི་གཞུང་འདི་ལ་ངེས་པར་འབྲངས་པར་འགྱུར་ཏེ། བདག་གི་རྗེ་བླ་མའི་ལེགས་བཤད་འདིའི་མཐུ་ལས་སོ། ༈ །རྒྱན་གྱི་ཁྱད་པར་ནི། རྡོ་རྗེ་ལས་རིམ་ལས། རྔ་ཡབ་ལྷབ་ལྷུབ་ཕྲེང་བ་ཡིས། །ངེས་པར་ཕྱོགས་བཅུར་འཁྲིགས་པར་བྱ། །ཞེས་གསུངས་པ་ལྟར་སྔར་སོ་སོའི་སྐབས་སུ་སྨོས་པ་རྣམས་དང་། དེར་མ་ཟད་བདེ་འདུས་རིགས་བརྒྱའི་སྒྲུབ་ཐབས་ལས། བ་དན་འཕན་དང་རྡོ་རྗེ་རིན་ཆེན་རྒྱལ་མཚན་མཛེས་པར་བྱ། ཞེས་དང་། སྙིང་པོ་རོལ་པ་ཆེན་པོའི་རྒྱུད་ལས། གདུགས་དང་བ་དན་རྒྱལ་མཚན་ཚོགས། །རྡོ་རྗེ་རིན་ཆེན་མཚན་པ་དང་། །ཞེས་པས། གཞལ་ཡས་ཁང་དངོས་གཞིའི་པུ་ཤུའི་ཟུར་བཞི་དང་། སྒོའི་བསིལ་ཁང་གི་མདུན་གྱི་ཀ་བ་ནང་མ་གཉིས་ཀྱི་ཕྱི་མཚམས་ཀྱི་ཐད་སྟེང་རྣམས་སུ་དར་ལྕེའི་ཤམ་བུ་དང་བཅས་པའི་གདུགས་དཀར་པོ་རྡོ་རྗེ་རིན་པོ་ཆེའི་ཏོག་ཅན། ཡུ་བ་ཆ་ཆུང་ཕྱེད་དང་གསུམ་ཡོད་པ་རེ་རེ་སྟེ། གཞུང་གཞན་ལས་སྤྲེའུའི་གཟུང་བར་བཤད་དོ། །ཐོག་གི་པུ་ཤུའི་ཁོ་ར་ཁོར་ཡུག་དང་། རྟ་བབས་ཀྱི་སྟེང་གི་ཟུར་བཞི་དང་སྒྲོམ་གྱི་སྣམ་བུའི་མཐའ་རྣམས་སུ་རིན་པོ་ཆེའི་བུམ་པ་ལ་གནས་པའི་རྒྱལ་མཚན་དང་བ་དན་སྒྲེང་བའོ། །དེ་ལ་རྒྱལ་མཚན་ནི། རིན་པོ་ཆེའི་དབྱུག་པའི་རྩེར་ཏོག་གི་གདན་ཟླུམ་པོའི་སྟེང་འོག་ཏུ་རེ་ཁཱའི་བང་རིམ་ཅི་རིགས་པ་དང་བཅས་པ། དེའི་སྟེང་གི་དཀྱིལ་དུ་རིན་པོ་ཆེ་དང་རྡོ་རྗེའི་ཏོག་བྱས་པའི་ཏོག་གི་གདན་དང་དབྱུག་པའི་མཚམས་ནས་གཡས་གཡོན་གྱི་ཕྱོགས་སུ་དྲིལ་བུ་དང་བཅས་པའི་དར་དཔྱངས་སམ་འཕན་རིང་བཏགས་པ་རླུང་གིས་བསྐྱོད་པས་སུམ་འཁྱོག་ཏུ་ལྡིང་བ། བ་དན་ནི་གཞན་དེ་དང་འདྲ་བ་ལ་ཏོག་གི་གདན་མི་དགོས་པ་ཡིན་ནོ། །གཞུང་གཞན་ལས་ནི་རྒྱལ་མཚན་གྱི་ཏོག་སྲོག་ཆགས་ཀྱི་གཟུགས་ཀྱིས་བྱས་པ་འདོད་པའང་ཡོད་དོ། །གཞལ་ཡས་ཁང་དབུས་ཀྱི་རྩེ་མོའི་ཏོག་ནས་གསེར་གྱི་ཐི་གུའི་པུ་ཤུའི་ཁའི་དབྱུག་པ་རིང་པོ་ལ་བཅིངས་པའི་བ་དན་གྱི་མགུལ་མཚམས་ལ་དཀྲིས་ནས་རྟ་བབས་ཀྱི་འཁོར་ལོའི་སྟེང་གི་གདུགས་ཀྱི་རྩེ་མོའི་བར་དུ་འཐེན་པ་ལ། གསེར་གྱི་དྲིལ་བུ་རྔ་ཡབ་དང་ཉི་ཟླའི་རླུང་བསྐྱོད་ཅན་གྱི་ཚར་སྒྲེང་བ་ལས་སྒྲ་སྐད་སྙན་པ་སྒྲོགས་པ་སྟེ། རྔམ་གློག་ལས། རྟ་བབས་རྣམས་ཀྱི་རྩེ་མོ་ལ། །གསེར་གྱི་དྲིལ་བུ་འབར་བ་དག །དཀོན་མཆོག་གསུམ་གྱི་སྒྲ་ཡང་སྒྲོགས། །ཞེས་དང་། བདེ་འདུས་ཞི་བའི་ཐིག་ཆོག་ལས། བ་དན་དྲིལ་བུ་ལེགས་པར་བརྒྱན། །ཞེས་གསུངས་པའི་དོན་ནོ། །སྒོ་རྒྱན་ནི། རྔམ་གློག་ལས། གཞལ་ཡས་དེ་ཡི་སྒོ་བཞི་ན། །གླང་ཆེན་རྣམས་ཀྱི་མཛེས་པར་བྱ། །ཞེས་པའམ། དཔེ་ཁ་ཅིག་ཏུ། གླང་སེང་གཉིས་ཀྱིས་མཛེས་པར་བྱ། །ཞེས་པའི་ཕྱི་མ་ལྟར་ན། གཙུག་དགུ་ལས། སྒོ་བཞི་ཡི་ནི་ལོགས་དག་ཏུ། །གླང་ཆེན་དང་ནི་སེང་གེ་བྲི། །ཞེས་སྒོ་ལོགས་ལ་བྲི་བར་བཤད་ཅིང་། དཀོན་མཆོག་འགྲེལ་ལས། ཕྱི་རོལ་སྒོ་བ་གླང་སེང་དང་། །ཞེས་སོ། །རྒྱས་པར་སྤྲོ་ན། ཆོས་དོན་ལས། སྒོ་ཁང་ནང་གི་རྒྱན་དགུ་ནི། །རྨང་ན་ཉོན་མོངས་ཟིལ་གྱིས་གནོན། །གླང་དང་སེང་གེ་ངང་པ་དང་། །སྟོབས་དང་མི་འཇིགས་ཚད་མེད་དོ། །ས་ལེའི་ཤིང་གི་ཚལ་ཡིན་ན། །བར་ན་ལས་རྣམས་སོ་སོར་འབྱེད། །རི་དྭགས་མི་དང་སྲང་ཁམ་དང་། །གཡོ་དང་འབྱེད་དང་སྟོབས་པ་སྟེ། །བློན་པོ་རིན་པོ་ཆེ་བཞིན་ནོ། །སྟེང་ན་སྡུག་བསྔལ་དང་དུ་ལེན། །ཀླུ་དང་ཆུ་སྲིན་ག་རུ་ཌ། །ཡེ་ཤེས་ཐུགས་རྗེའི་ཕྲིན་ལས་ཏེ། །ཁྱུང་གི་ཀླུ་རྒྱལ་བླང་བ་བཞིན། །ཞེས་དང་། སློབ་དཔོན་ཆེན་པོ་པདྨས་མཛད་པའི་གསང་རྫོགས་མ་ཧཱའི་སྒོམ་རིམ་ལས་ཀྱང་། སྒོ་ཁང་མུན་ནག་གྲིབ་སོས་བརྒྱན་པ་ལ། །བྱ་ཁྱུང་ཆུ་སྲིན་ཀླུ་ཕྲུག་གསུམ། །དགེ་སྡིག་བྱ་ར་རི་དྭགས་ཤང་ཤང་གསུམ། །སེང་གེ་གླང་ཆེན་ངང་པ་གསུམ་སྟེ་དགུ་པ་ཏྲས་སྦྲེལ་བ། ཞེས་གསུངས་པས་སྒོ་ཁང་ནང་གི་སྒོའི་གཡས་གཡོན་དུ་རིམ་པ་གསུམ་དུ་བགོས་པའི་སྨད་དུ་གླང་སེང་ངང་པ། བར་དུ་རི་དྭགས་ཤ་ར་བྷན། མི་ཆུང་བྱ་ར་བ། ཤང་ཤང་། སྟེང་དུ་ཆུ་སྲིན། ཀླུ་ཕྲུག །སྒོའི་སྟེང་གི་དབུས་སུ་བྱ་ཁྱུང་། དེ་དག་པ་ཏྲ་རིས་སྦྲེལ་ཞིང་། །རྒྱབ་ནས་ས་ལེའི་ལྗོན་ཤིང་སྐྱེ་བའི་འདབ་མ་བར་བར་ནས་མཐོང་བའོ། །ཡང་ཆོས་དོན་ལས། དབང་གི་རྟགས་བཅུ་འདི་ལྟར་ཏེ། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ནི་ཡེ་ཤེས་དང་། །ཆོས་མོས་རྫུ་འཕྲུལ་སྨོན་ལམ་དང་། །སྐྱེ་ལས་ཚེ་དང་ལོངས་སྤྱོད་དང་། །སེམས་ལ་དབང་བའི་གོ་རིམ་བཞིན། །ཞེས་པའི་སྟོང་ཚར་རྣམས་སུ་དབུ་རྒྱན་སོགས་རྟགས་བཅུ་ཡང་འགོད་དོ། །སྒོ་རྒྱན་གྱི་རྒྱན་འདི་དག་རྒྱ་བལ་དུ་བྲིས་པའི་ཐང་སྐུ་འགའ་ཞིག་ལའང་དེ་བཞིན་སྣང་ངོ་། །ཞེས་མཁས་མཆོག་བུ་སྟོན་རིན་པོ་ཆེས་གསུངས། ཁ་ཅིག་དབང་གི་རྟགས་བཅུ་ལོགས་སུ་འགོད་མི་དགོས་ཏེ། དང་པོ་བཞི་དང་ཕྱག་རྒྱ་སྒོ་བ་ལ་བརྩིའོ། །རྒྱལ་མཚན་དང་གདུགས་ནི་སྒོ་ཁང་སྟེང་ནའོང་། བཟའ་བཏུང་ནི་འདོད་ཡོན་ལྷ་མོས་སོ། །བུམ་པ་སྙིང་པོ་ལྔས་གདབ་ནི། རྟ་བབས་ཀྱི་སྣམ་བུ་རྣམས་ལའོ། །ཞེས་གསུངས་ཏེ་བརྟགས་པར་བྱའོ། །ཡང་དེ་ཉིད་ལས། རིན་ཆེན་བདུན་ནི་འདི་ལྟར་ཏེ། །དབང་ནི་འཁོར་ལོ་རིན་ཆེན་དང་། །ཡིད་བཞིན་ནོར་བུ་རིན་ཆེན་དང་། །ལྷ་མོ་བཙུན་མོ་རིན་ཆེན་དང་། །སྒོ་བ་དམག་དཔོན་ཚུལ་དགུ་དང་། །མངོན་ཤེས་བློན་པོ་བྱ་ར་བ། །སྟོབས་བཅུ་གླང་པོ་རིན་ཆེན་དང་། །རྫུ་འཕྲུལ་རི་དྭགས་རྟ་ཡི་ཚུལ། །རྫས་བརྒྱད་ལ་ནི་འདི་ལྟར་ཏེ། །བདུད་འཇོམས་མི་ནུབ་རྒྱལ་མཚན་དང་། །ཐུགས་རྗེ་གདུགས་དང་དཔལ་བེའུ་དང་། །བདུད་རྩི་བུམ་པ་མི་བསྙེལ་རྟ། །ཆོས་ཀྱི་དུང་དང་དགོས་འདོད་འབྱུང་། །སྐུ་ལྔ་བགྲོད་པའི་འཁོར་ལོའོ། །ཞེས་གསུངས་པའི་རིན་ཆེན་བདུན་དང་། རྫས་བརྒྱད་ཀྱང་གོང་མ་དག་ལོགས་སུ་འགོད་མི་དགོས་པར་བཞེད་དེ། གསང་རྫོགས་མ་ཧཱའི་སྒོམ་རིམ་ལས་ཀྱང་། རིན་ཆེན་བདུན་དང་བཀྲ་ཤིས་བརྒྱད། །དབང་བཅུ་དེ་ལ་དོན་གྱི་རྫོགས་པས། ཞེས་གསུངས་པའི་དགོངས་པ་ཡིན་ནོ་སྙམ་མོ། །འོན་ཀྱང་གཞན་དུ་འབྱུང་བ་ལྟར་བཀོད་ནའང་མི་འགལ་ལམ་སྙམ་སྟེ། དེའི་ཕྱིར་སྤྱི་དང་བསྟུན་ན་འཁོར་ལོ་རྩིབས་བརྒྱད་པ་སེར་པོ། གླང་ཆེན་མཆེ་བ་དྲུག་པ་དཀར་པོ། རྟ་ལྗང་གུ། བུད་མེད་སྔོ་སངས་མ། ནོར་བུ་ཟུར་བརྒྱད་པ་སྔོན་པོ། བློན་པོ་དམར་པོ། དམག་དཔོན་ནག་པོ་རྣམས་ཕྱི་རོལ་དཔག་བསམ་ཤིང་ལ་གནས་པར་བྱའོ། །རྫས་བརྒྱད་ནི་རྟ་བབས་ཀྱི་ངོས་གཉིས་སུ་རེ་རེ་འགོད་དོ། །ཤར་དུ་དཔལ་བེའུ་དང་འཁོར་ལོ། ལྷོར་པདྨ་དང་རྒྱལ་མཚན། ནུབ་ཏུ་གདུགས་དང་བུམ་པ། བྱང་དུ་དུང་དང་ཉའོ། །དེ་དག་ནི་སློབ་དཔོན་ཆེན་པོ་སངས་རྒྱས་གསང་བས་ཆོས་དོན་དུ་གསུངས་པའི་སྒོ་རྒྱན་ཏེ་མ་གྲུབ་ན། འདིར་མེད་དུ་མི་རུང་བའི་རྒྱན་ནི། སྒོ་ནང་གི་རྒྱན་གླང་སེང་ཙམ་བྲི། ཕྱིའི་རྒྱ་ལས། སྒོའི་གཡས་གཡོན་གཉིས་ན་ཏཱ་ལའི་ལྗོན་ཤིང་རེ་རེ་དང་། དཔག་བསམ་གྱི་ལྗོན་ཤིང་ཡང་རེ་རེ་སྟེ། དེ་རྣམས་གསེར་གྱི་ཐི་གུས་སྦྲེལ་བ་ལ། དྲིལ་བུ་དང་གཡེར་ཁ་འཕྱང་བ། ཤིང་དེ་དག་ལ་ཁུ་བྱུག་སོགས་བྱས་བརྒྱན་པ་དང་། ཁྲུས་རྫིང་ཁྲུས་ཀྱི་ལྷ་མོས་མཛེས་པ་དང་། ཕྱོགས་བཞི་ན་རིན་པོ་ཆེའི་ཕུང་པོ་འོད་འབར་བ་གཉིས་གཉིས་ཏེ་བརྒྱད་ཀྱིས་བསྐོར་བའོ། །དེ་ལྟར་ཡང་རྔམ་གློག་ལས། སྒོ་དྲུང་དེ་དག་རེ་རེ་ན། །ཏཱ་ལའི་ལྗོན་ཤིང་ཅོང་ཅོང་སྦྲེལ། །དྲི་དང་གཟུགས་དང་འོད་དང་ལྡན། །ཏཱ་ལའི་སྐྱེ་ཤིང་དེ་དག་ལ། །ཁུ་བྱུག་ལ་སོགས་བཀྲ་ཤིས་པའི། །བྱ་རྣམས་སྙན་པའི་སྐད་ཀྱང་སྒྲོགས། །སྒོ་དྲུང་དེ་དག་རེ་རེ་ན། །ཁྲུས་ཀྱི་རྫིང་བུ་དབྱིབས་ལེགས་པ། །བྲོ་མཆོག་ཡན་ལག་བརྒྱད་ལྡན་ཆུ། །གྲངས་མེད་དེ་དག་རེ་རེ་ན། །ལྷ་དང་ལྷ་མོ་བསམ་མི་ཁྱབ། །ཅེས་དང་། ལེ་ལག་ལས། ཏཱ་ལའི་ལྗོན་ཤིང་རང་བཞིན་གནས། །དཔག་བསམ་ཤིང་གི་རིན་ཆེན་འབར། །ཡིད་བཞིན་རིན་ཆེན་བརྒྱད་ཀྱིས་བསྐོར། །ཞེས་དང་། དེའི་སྤྱན་འགྲེལ་ལས། བདེན་པ་གསུམ་པའི་ངང་ལས་དུས་གསུམ་དུ་སྐྱེ་བ་མེད་པའི་ཕྱིར་ཏཱ་ལ་ཟུང་བཞིས་བརྒྱན་པའོ། །རེ་བ་སྐོང་ཕྱིར་རིན་ཆེན་ཕུང་པོ་བརྒྱད་ཀྱིས་བསྐོར་བ་སྟེ། ཞེས་དང་། འོད་རིམ་ལས་ཀྱང་། སྒོ་བཞི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཅོང་ཅོང་སྦྲེལ། །དྲིལ་བུ་གཡེར་ཁ་ཐེག་ཆེན་སྒྲོགས། །བཀྲ་ཤིས་བྱ་སྙན་སྒྲ་སྒྲོགས་ལྡན། །ཡིད་བཞིན་རིན་ཆེན་བརྒྱད་བསྐོར་བ། །རིན་ཆེན་ཕུང་པོ་བཞི་གཉིས་ལྡན། །ཞེས་སོ། །འདི་དག་བསྒོམ་བྱ་ཙམ་དུ་མ་ཟད་ངེས་པར་བྲི་དགོས་ཏེ། བཤད་རྒྱུད་མེ་ལོང་ལས། རིན་ཆེན་ས་གཞི་སྐྱེ་ཤིང་དང་། །རྫིང་བུ་དྲིལ་བུ་གཡེར་ཁས་སྤྲས། །རྟག་ཏུ་བྲི་ཞིང་བསྒོམ་པར་བྱ། །ཞེས་གསུངས་པའི་ཕྱིར་ཡང་། རྡོ་རྗེ་ལས་རིམ་ལས། འཁོར་གྱི་གཙོ་བོས་ཡོངས་བསྐུལ་བའི། །མཆོག་གསུམ་ལྷ་སོགས་རྣམས་མང་པོ། །རྒྱན་དང་མཆོད་པ་ལྡན་པར་བྲི། །ཞེས་དང་། འོད་རིམ་ལས། ལྷ་ཆེན་ཕྱོགས་སྐྱོང་བརྒྱད་ཀྱིས་བསྐོར། །ཞེས་པས། མཆོག་གསུམ་གྱི་ལྷ་ནི། ཁྱབ་འཇུག །ཚངས་པ། མ་ཧཱ་དཱེ་ཝ་སྟེ། སོགས་ཁོང་ནས་ཕྱོགས་སྐྱོང་བ་བརྒྱད་སོགས་ལྷ་ཆེན་པོ་རྣམས་ཀྱང་འགོད་པར་གསུངས་ཤིང་། སྒྲོ་ཕུག་པའི་དངོས་སློབ་ཁ་རག་སྲོ་སྙིང་གི་འགྲེལ་པར། ཐམས་ཅད་དུ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་པས་གཞལ་ཡས་ཁང་གི་ཕྱི་རོལ་ན་མ་ཧཱ་དེ་ཝ་ལ་སོགས་ལྷ་ཆེན་བརྒྱད་དང་། ནོར་རྒྱལ་ལ་སོགས་ཀླུ་ཆེན་བརྒྱད་དང་། ཉི་མ་ལ་སོགས་གཟའ་ཆེན་བརྒྱད་དང་། སྨིན་དྲུག་ལ་སོགས་པ་རྒྱུ་སྐར་ཉི་ཤུ་རྩ་བརྒྱད་ཀྱིས་བསྐོར་བའོ། །ཞེས་ལྷ་ཀླུ་གཟའ་སྐར་སོགས་ཀྱང་དགོད་པར་བཞེད་ཅིང་། དེ་རྣམས་གང་དུ་འགོད་པའི་ས་སྔར་བཤད་གྲུབ་བོ། །འདི་དག་སྒྱུ་འཕྲུལ་ཞི་དཀྱིལ་གྱི་གཞལ་ཡས་ཁང་གི་རྣམ་བཞག་ཆེ་ལོང་ཙམ་བརྗོད་པ་སྟེ། འདི་དག་ལ་དཔགས་ཏེ་ཁྲོ་དཀྱིལ་ཁྱམས་གཉིས་པ་ལྟ་བུའི་ཐོག་ཕུབ་ནི། བར་ཁྱམས་ཕྱི་མ་སེང་གདུང་ངམ་ཀ་བས་བཏེགས་པའི་གཡབ་སྒོར་གྲུ་བཞི་པའི་ཚུལ་དུ་ཕུབས་པའི་ཁྱམས་ནང་དུ། རིན་ཆེན་གར་དགུ་སྟེགས་བུ་གྲུ་བཞི་པ་དཔངས་ཆ་ཕྲན་བཅུ་གཅིག་པ་ལ་གནས་པའི་དཀྱིལ་འཁོར་ཕྱི་མའི་ཕྱེད་ཚད་ཀྱི་རྩིག་པ་སྒོ་སྒོ་ཁྱུད་ལ་སོགས་པ་བྱས་པའི་གཞལ་ཡས་ཁང་ནང་མ་ཕྱི་མ་ལས་ཆ་ཆེན་གཅིག་ཙམ་གྱིས་ཕྱི་ནས་བལྟས་ན་མཐོ་བ། ཡངས་པ་ཞིག་བྱས་པའི་ཐོག་འབུབས་རིམ་པ་གསུམ་སོགས་ཞི་བ་ལྟར་ལས་ནང་སྒོ་ལ་རྟ་བབས་མེད་པའི་ཕྱིར། དེ་འདེགས་བྱེད་ཀ་བ་སོགས་ཀྱང་མི་དགོས་པས་སྒོའི་ཡ་ཕུབས་ཀྱི་རྩིག་པའི་སྟེང་བར་འཁོར་མོ་ཕ་གུ་སོགས་གཞལ་ཡས་དངོས་གཞི་ལྟར་བྱ་ཞིང་། འབར་བའི་རྒྱན་གྱིས་སྤྲས་པའོ། །དེ་ལྟར་ཡང་། རྡོ་རྗེ་མེ་ལོང་ལས། གདུག་པ་འདུལ་བའི་དཀྱིལ་འཁོར་ལས། །ཐོད་པ་སྣ་ལྔ་སྣ་གསུམ་དང་། །ཐོད་སྐམ་རྩིག་པ་རིམ་པ་བཞིན། །ཚངས་དང་ལྷ་དབང་ལ་བརྟེན་པ། །མཆོག་ཆེན་བརྒྱད་ཀ་ཡིན་པར་འདོད། །ལྷག་མ་རྣམས་ནི་ཐོག་ཕུབས་ཏེ། །གཟའ་བརྒྱད་ཉི་ཟླའི་གློ་སྐར་ལྡན། །སྦྲུལ་དང་ཐོད་པའི་ཕྲེང་བ་ཉིད། །དྲྭ་བ་དྲྭ་ཕྱེད་རྣམ་པར་སྤྲས། །ཕྱི་ནང་རྒྱུ་འབྲས་གདུག་པ་དག །འདུལ་ཕྱིར་རྟ་བབས་བཞིར་བཤད་དོ། །སོར་ཕྲེང་ཐོད་པའི་ཕྲེང་བ་དང་། །དབང་པོ་ཉི་ཟླའི་ཕྲེང་བས་སྤྲས། །ཁྲོ་བོ་ཤ་ལྔ་བདུད་རྩི་དང་། །དུར་ཁྲོད་འདོད་ཡོན་ལྡན་པའོ། །དུར་ཁྲོད་ས་གཞི་ཁྲག་དང་བཅས། །སྐྱེས་བུ་གསལ་ཞིང་ཕྱོགས་མཚམས་བརྒྱན། །རཀྟའི་མཚོ་བརྒྱད་རྦ་རླབས་འཁྱིལ། །ཐོད་ཚལ་བརྒྱུས་པ་དུར་ཁྲོད་རླུང་། །འཇིགས་པའི་སྒྲ་དང་མེ་འོད་ལྡན། །ཞིང་འཕན་ཕྱོགས་མཚམས་བརྒྱད་དང་ལྡན། །ལྷ་ཆེན་ཐོད་པ་སྦུབས་སྟེང་ན། །ཙིཏྟའི་ཏོག་ལས་འོད་ཟེར་འཕྲོ། །ཧེ་རུ་ཀ་ཡི་དཀྱིལ་འཁོར་ཉིད། །མ་ལུས་བྲི་ཞིང་བསྒོམ་པར་བྱ། །ཞེས་གསུངས་པས་གཞན་རྣམས་གོ་སླ་ལ། རྩིག་པ་ནི། ཕྱི་མ་ཐོད་པ་སྣ་ལྔ་དང་། ནང་མ་སྐམ་རློན་རྙིང་གསུམ་གྱིས་བརྩིགས་ཤིང་། ཁྱམས་ལས་གྲུ་ཆད་སྟེགས་བུའི་རྣམ་པར་ཐོད་སྐམ་གྱི་རྩིག་པས་འཕགས་པའོ། །རྟ་བབས་བཞི་ནི། ཕྱོགས་བཞིའི་དབྱེ་བས་ཏེ། དེ་རེ་རེ་ལ་སྣམ་ཕྲན་བརྒྱད་བརྒྱད་དོ། །དེ་ལའང་ཕྱི་ནང་རྒྱུ་འབྲས། ཞེས་པས་ཕྱི་ནང་གི་ཐེག་བརྒྱད་མཚོན་པའི་རྒྱུའི་རྟ་བབས་དང་། དེའི་ཡོན་ཏན་རྫོགས་པའི་འབྲས་བུའི་རྟ་བབས་གཉིས་སོ། །འདིར་དཀྱིལ་འཁོར་ནང་མ་སྟེགས་བུ་ལ་གནས་པའི་ཕྱིར། དེ་ལ་འཛེགས་པའི་ཐེམ་སྐས་ཀྱང་འཛུག་དགོས་པར་མངོན་ནོ། །དེ་ལྟ་བུས་མཚོན་ནས་སྒྱུ་འཕྲུལ་བླ་མ་ལས་གསུངས་པ་ལྟར། སྤོར་མའི་ས་སྤར་ཏེ་སྒོ་བྲག་རིམ་པ་གསུམ་དུ་བྱ་བ་འམ། ཡང་ཚོགས་ཆེན་འདུས་པ་ལྟ་བུ་སྒོ་སྦྲག་ཤིན་ཏུ་མང་བ་ལའང་སྦྱར་བས་ཁང་བརྩེགས་མཆོད་རྟེན་གྱི་བང་རིམ་འདྲ་བ་ཤིན་ཏུ་མཛེས་པ་ཞིག་འབྱུང་ངོ་། །ཡང་བཀའ་བརྒྱད་ལྟ་བུ་གཞལ་ཡས་ཁང་གཅིག་གི་ནང་དུ་ཕོ་བྲང་དགུ་རྫོགས་སོགས་ཡོད་པའི་རིགས་ལ། ཁྱམས་ཆ་ཕྲན་གསུམ་གྱི་ཆ་གཡབ་གྲུ་བཞི་པའི་ཚུལ་དུ་ཕུབས་པའི་གྲུ་ཆད་དང་ཁྱམས་ཀྱི་མཚམས་ཚངས་ཐིག་ནས་གྲུ་ཆད་ཀྱི་མཐའ་ཐིག་བར་ཆ་གསུམ་དུ་བགོས་པའི་སུམ་ཆ་ནང་མའི་ཕྱི་མཚམས་སུ་ཀ་བ་རེ་རེ་སྟེ་བརྒྱད་བཙུགས་པའི་སྟེང་དུ་གདུང་ཀ་བ་གྲུ་བཞི་པས་བཀབ། དེའི་ཁར་ཏལ་བཞི་མིག་མང་རིས་སུ་བྲིས་ཏེ་འབུབས་སོ། །འདིར་བསྒོམ་བྱ་ལ་ཏལ་གདུང་བཞིའི་འོག་ཏུ་ཡོད་པའི་གྲུ་བཞི་པ་དེ་ཨ་ལོང་གྲུ་བཞི་པ་ལྟ་བུ་ཡིན་པའི་ཕྱིར་ཟུར་བཞིར་འདེགས་བྱེད་ཀྱི་ཀ་བ་ཡིན་དགོས་གསུང་ཡང་འདི་ལྟ་བུའི་བཀོད་པ་བཟོ་བའི་དུས་འདི་ལྟར་བྱས་ན་བརྟན་ཞིང་མཛེས་བྱེད་དུ་འགྲོའོ། །གསང་རྫོགས་མ་ཧཱའི་བསྒོམ་རིམ་ལས། ནང་ཀ་བཞི་ཞིང་ཏྲཾ་བཞི་ལ་བྱས་པ། ཞེས་གསུངས་པ་ལྟར། རྒྱལ་སྲས་སྨན་ལུང་པ་ཆེན་པོས་ཕྱག་ལེན་དུ་བཏབ་པ་མཐོང་བས་ཀྱང་། གདུང་བཞི་མིག་མང་རིས་ཕུབ་པའི་དབུས་ཀྱི་བསྣོལ་མཚམས་སུ་ཀ་བ་རེ་བཙུགས་འདུག་སྟེ། གཞལ་ཡས་ཁང་གི་བཀོད་པ་ཤིན་ཏུ་ཆེ་བ་བཞེངས་པ་ལ་དེ་ལྟ་བུ་ངེས་པར་དགོས་སོ། །ཡང་གསང་རྫོགས་མ་ཧཱའི་བསྒོམ་རིམ་ལས། ཆོས་སྐུ་ཀུན་ལ་ཁྱབ་བརྡལ་མཐའ་བརྒྱད་རང་དག་གི་བརྡར། བུམ་པ་སུལ་བརྒྱད་པ་བྲེ་དང་བཅས། ཞེས་གསུངས་པ་ལྟར་ན་ཤིང་བརྩེགས་ཇི་ལྟར་རིགས་པས་བཏེགས་པའི་གདུང་བརྒྱད་ཕྱོགས་བཞི་ཟུར་བཞིར་བཏང་ལ་ཕུབ་སྟེ། བུམ་པ་ཟུར་བརྒྱད་ལོགས་བརྒྱད་པ་ཞིག་བྱ་སྟེ་མཆོད་རྟེན་གྱི་བྱ་འདབ་འགེབ་པ་དང་། གདུང་ཟླུམ་བཏང་བ་སོགས་ལག་ལེན་ལ་ཤིན་ཏུ་བདེ་བ་ཞིག་བྱར་ཡོད་དོ། །གཞན་ཡང་རྟ་བབས་སྒོ་ཚད་གསུམ་མ་ལྟ་བུ་ལ། རྩིག་པའི་དཔངས་ཆ་ཆེན་བཞི་དང་སྒོ་ཁང་གི་རྩིག་པ་ལ་ཆ་ཆེན་གསུམ་དང་ཆ་ཕྲན་ཕྱེད། རྟ་བབས་སྒོ་ཚད་གཅིག་མ་ལ་རྩིག་དཔངས་ཆ་ཆེན་གཉིས་དང་ཆ་ཕྲན་གསུམ། སྒོ་ཕན་ཆད་དེ་ལས་ཆ་ཕྲན་གཅིག་གིས་དམའ་བའོ། །འབྲིང་ཚད་ནི་འདི་ཉིད་དུ་སྔར་བཤད་པ་ལྟར་རོ། །དེ་ལྟར་ན་རྩིག་དཔངས་མཐོ་བའི་ཕྱོགས་ལ་རྩིག་པ་རང་ལ་ནང་གི་རྒྱ་ཕྱེད་དཔངས། འབྲིང་ལ་གསེར་གདུང་མན་ཆད་ལ། དམའ་བ་ལ་ཐོག་གི་འཐུག་རྔམ་མན་ཆད་ལ་རྒྱ་ཕྱེད་དཔངས་ཡོད་དོ། །དེ་བས་ན་སྐབས་ཐོབ་བརྩི་དགོས་ཀྱི། ཕྱོགས་གཅིག་ཁོ་ནར་ངེས་བཟུང་བྱེད་པ་ལ་ཤེས་བྱེད་མེད་ཅིང་། གནོད་བྱེད་མང་ངོ་། ༈ །གང་ལྟར་ཡང་ཕྱི་དབྱིབས་ནི། མཆོད་རྟེན་དང་། མཁར་ཐབས་དང་། རྒྱལ་ཁབ་དང་། གུར་གྱི་རྣམ་པ་སྟེ། ཆོས་དོན་ལས། ཕྱི་དབྱིབས་མཆོད་རྟེན་མཁར་ཐབས་དང་། །རྒྱལ་ཁབ་རི་བོ་གུར་དུ་འདོད། །ཅེས་དང་། གསང་རྫོགས་ལས་ཀྱང་། དབྱིབས་ནི་མཆོད་རྟེན་རིས་མཁར་ཐབས། །གུར་དང་རྒྱལ་ཁབ་འདྲ་བ་ཡིན། །ཞེས་གསུངས་པ་ལྟར་རོ། །དེ་ལས། དང་པོ་མཆོད་རྟེན་གྱི་དབྱིབས་བྱེད་ལུགས་ལའང་དགོངས་པ་མི་མཐུན་པ་གཉིས་ཏེ། སྔ་རབས་ཀྱི་བླ་མ་ཕལ་ཆེ་བ་ནི། གཞལ་ཡས་ཁང་དངོས་གཞིའི་པུ་ཤུ་མན་ཆད་མཆོད་རྟེན་གྱི་རྨང་ལྟ་བུར་བྱས་ལ། དེའི་སྟེང་དུ་བྱང་ཆེན་སོགས་མཆོད་རྟེན་གྱི་དབྱིབས་གང་བདེ་བྱ་བ་བཞེད། གསང་རྫོགས་ལས་གསུངས་པ་ལྟར་ཉང་སྟོན་ཆེན་པོའི་ཕྱག་ལེན་དུ་བཏབ་པའི་ལུགས་ནི། ད་རུ་ཀད། འདོད་སྣམ་ཁྱམས། ཕོ་བྲང་རྣམས་ཕྱི་ནས་ནང་དུ་རིམ་པར་ཆ་ཆེན་གཅིག་ནས་བཞིའི་བར་འཕགས་པའི་བང་རིམ་བཞིའི་རྣམ་པ་ཅན་གྱི་སྟེང་དུ། བུམ་རྟེན། བུམ་པ། བྲེ་སོགས་བྱས་ཏེ་བྱང་ཆེན་རྨང་མེད་པ་ལྟ་བུའི་ཕྱོགས་བཞིར། རྟ་བབས་བཞི་ཡང་ཀ་བ་ཆ་ཆེན་གསུམ་པས་བཏེགས་ནས། སྒོའི་སྟེང་ནས་ཡར་མཆོད་རྟེན་གྱི་རྣམ་པར་བྱས་ཏེ། ཕྱི་དབྱིབས་མཆོད་རྟེན་རྩེ་ལྔ་པའི་རྣམ་པར་བཞེད་དོ། །གཉིས་པ་མཁར་ཐབས་ནི། ཁ་ཅིག་སྟེང་ཁང་གྲུ་བཞི་པ་ལ་དགོངས་པར་འཆད་པ་མི་རིགས་གསུངས་སོ། །མཁས་པ་དག །བདུད་དཔུང་འཇོམས་པའི་དག་པར་གསུངས་པའི་རྫོང་གི་རྣམ་པའོ། །ཞེས་གསུངས་སོ། །དེ་ཙམ་ལས་བྱ་ཐབས་ཞིབ་པར་མ་གསུངས་ནའང་། འོས་མེད་ཀྱི་རིགས་པས་འདི་ལྟར་གྲུབ་སྟེ། འཇམ་དཔལ་ཕྱག་རྒྱ་ཟིལ་གནོན་ལས། ཨེ་ཡི་ཕོ་བྲང་ཟླ་གམ་གསུམ༔ ཐོད་པའི་མཁར་བཞི་འཁོར་ལོ་བརྒྱད༔ ལྕགས་མཁར་བཅུ་གཉིས་བར་ཁྱམས་བཞི༔ སྒོ་བཞི་རྟ་བབས་བརྒྱད་དང་ལྡན༔ འོབས་ཆེན་བཅུ་དྲུག་རྡོ་རྗེའི་གུར༔ བྱས་པ་མེད་པར་ལྷུན་གྱིས་གྲུབ༔ བཤིག་པ་མེད་པར་ངང་གི་སྟོང༔ ཞེས་གསུངས་པས། དཀྱིལ་འཁོར་གྱི་མཐར་འོབས་བཅུ་དྲུག་དང་། དེ་བསྲུང་མི་འོབས་བསྲུང་ཆེན་པོ་བཅུ་དྲུག་སོགས་གསུངས་པས། རྫོང་གི་སྒྲ་དུརྒ་ཞེས་པས་བགྲོད་དཀའ་བའི་དོན་ཡིན་པའི་ཕྱིར། དེ་ཙམ་ལ་བྱའི། དེ་ལས་གཞན་དུ་རྫོང་གི་རྣམ་པ་བཟོ་ཚུལ་འཚོལ་དགོས་ན་ཧ་ཅང་ཐལ་ལོ། །གསུམ་པ་རྒྱལ་ཁབ་ཀྱི་རྣམ་པ་ནི། རྒྱ་གར་གྱི་རྒྱལ་པོའི་ཁབ་ཀྱི་ཁང་བཟང་གི་རྣམ་པ་སྟེ། རྒྱ་ཕུབ་འཇིག་རྟེན་གྱི་ལུགས་དང་མཐུན་པར་བྱས་པའི་ཁང་པ་བརྩེགས་པའོ། །བཞི་པ་གུར་གྱི་རྣམ་པ་ནི། དབུས་མཐོ་བའི་ཕུར་བུ་ཟླུམ་པོ་རྒྱ་གུར་རྣམ་པ་སྟེ། དབུས་གདུང་ཟླུམ་ལ་བཙུགས་ནས་འབུབས་ཚུལ་བུམ་པ་ཟླུམ་པོ་དང་གནད་གཅིག་གོ། །ཕྱི་དབྱིབས་ཇི་ལྟར་བྱེད་ཀྱང་རྩེ་མོར་རྡོ་རྗེ་རིན་པོ་ཆེའི་ཏོག་ནི་ངེས་པར་བྱ་དགོས་ཏེ། ཐམས་ཅད་བཤད་པ་མི་ལངས་པའི་ཕྱིར། རེ་ཞིག་འདིར་དེ་ཙམ་མོ། །གཞན་དུ་ན། རྒྱུད་སྡེ་གོང་འོག་རྣམས་ནས་དཀྱིལ་འཁོར་བཀོད་པ་གཅིག་ཏུ་མ་ངེས་པ་དུ་མ་ཞིག་འབྱུང་སྟེ། སོ་སོའི་རྒྱུད་འགྲེལ་སྒྲུབ་ཐབས་དང་། རྡོ་རྗེ་སློབ་དཔོན་གྱི་གསུང་ངག་ལས་སོགས་དགོས་པ་ཉིད་དོ། །རྒྱལ་བའི་ཕོ་བྲང་ཉམས་དགའ་བར། །རྒྱལ་བ་ཉིད་ཀྱིས་གསུངས་པ་བཞིན། །རྒྱལ་སྲས་རྣམས་ཀྱིས་བཀྲལ་བའི་དོན། །རྒྱལ་མཆོག་གཏེར་ཆེན་ཆོས་ཀྱི་རྗེའི། །གསུང་ལས་ཅུང་ཟད་ཟིན་པ་རྣམས། །སྨྱོས་བཙུན་དྷརྨཱ་ཤྲཱི་ཞེས། །དཱ་རི་དྲ་བ་དེ་ཡིས་སྦྱར། །ཉེས་ཀུན་མཁས་ལ་བཟོད་པར་གསོལ། །ལེགས་བཤད་གང་མཆིས་དགེ་བ་དེས། །རྗེ་བཙུན་བླ་མའི་ཞབས་བརྟན་ཅིང་། །མཁའ་ཁྱབ་འགྲོ་ཀུན་ཕྱམ་གཅིག་པར། །རྡོ་རྗེ་སེམས་དཔའ་ཉིད་གྱུར་ཅིག །ཅེས་ཁྲོ་བོའི་ལོ་ནག་པ་ཟླ་བའི་མར་ངོའི་དུས་ཚེས་བཅུའི་ཉིན་ཨོ་རྒྱན་སྨིན་གྲོལ་གླིང་གི་ཆོས་གྲྭར་སུག་བྲིས་སུ་སྦྱར་བའོ། །དགེའོ།། །།

མ་ཧཱ་ཡོ་གའི་དབང་ཐམས་ཅད་ཀྱི་ཐོག་མཐར་འགྲོ་བའི་རྒྱུག་བྱང་ལྷན་ཐབས། རྒྱལ་སྲས་གཞན་ཕན་མཐའ་ཡས།

མ་ཧཱ་ཡོ་གའི་དབང་ཐམས་ཅད་ཀྱི་ཐོག་མཐར་འགྲོ་བའི་རྒྱུག་བྱང་ལྷན་ཐབས་བཞུགས། བླ་མ་དང་དབྱེར་མ་མཆིས་པ་དཔལ་ཧེ་རུ་ཀ་ལ་ཕྱག་འཚལ་ལོ། །ལྷན་སྐྱེས་བདེ་ཆེན་རིག་པའི་རྡོ་རྗེ་ཡིས། །ལོག་རྟོག་བདག་ལྟའི་རི་བོ་ཀུན་འཇོམས་པའི། །ཧེ་རུ་ཀ་དཔལ་བླ་མ་ལ་བཏུད་དེ། །སྨིན་བྱེད་དབང་གི་མཚམས་སྦྱོར་འདིར་གསལ་བྱ། །དེ་ཡང་སྔ་འགྱུར་རྙིང་མ་བཀའ་མའི་ཕྱོགས་ཐེག་པ་རིམ་པ་དགུའི། ཕྲིན་ལས་ཀྱི་ཆོ་ག་མཐའ་དག་ཕྱོགས་གཅིག་ཏུ་བསྡུས་ནས་གཏན་ལ་ཕབ་པ་ལས། འདིར་དེ་ཉིད་ཀྱི་བྱེ་བྲག་རྣལ་འབྱོར་བླ་མེད་ཀྱི་ནང་ཚན་མ་ཧཱ་ཡོ་གའི་དབང་ཐམས་ཅད་ཀྱི་ཐོག་མཐའ་སོགས་སུ་སྦྱོར་རྒྱུའིི་ལྷན་ཐབས་རྒྱུག་བྱང་འགོད་པ་ལ། ཐོག་མར་དཀྱིལ་འཁོར་གྱི་ཆོ་ག་དང་དབང་སྒྲུབ་ཀྱི་བྱ་བ་རྣམས་བདག་འཇུག་གནང་བ་ནོད་པའི་མཐར་ཐུག་པ་གྲུབ་ནས་སློབ་བུ་རྣམས་སྒྲུབ་ཁང་གི་སྒོར་འདུས་པ་དང་། སློབ་དཔོན་གྱིས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུཾ། ཞེས་དང་། ཧཱུྃ་བིགྷྣཱནྟ་ཀྲྀཏ་ཕཊ། ལྟ་བུ་རང་རང་གི་ལས་སྔགས་དང་། ཡི་གེ་བརྒྱ་པ་བརྗོད་བཞིན་ལས་ཀྱི་རྡོ་རྗེས་ལས་བུམ་ཐོགས་ཏེ་དཀྱིལ་འཁོར་གྱི་ཕྱི་རོལ་དུ་ཕྱིན་ནས་སློབ་བུ་རྣམས་ལ་ཁྲུས་བྱ། དེ་ནས་སློབ་བུ་རྣམས་ཀྱིས་ཕྱག་བྱས་ནས་གྲལ་དུ་འཁོད་པ་དང་བསྟུན། སློབ་དཔོན་གྱིས་སྔོན་གཏོར་ལ། ལས་སྔགས་ཀྱིས་བུམ་ཆུ་འཐོར་ཞིང་བསང་། ༀ་སྭ་བྷཱ་ཝ་ཤུདྡྷ་སརྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། ཞེས་པས་སྟོང་པར་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བསམ་ལ། ༀ་ཨཱཿཧཱུཾ་གིས་བྱིན་གྱིས་བརླབ། ༀ་སརྦ་བྷཱུ་ཏ་ཨ་ཀཪྵ་ཡ་ཛཿས་མགྲོན་རྣམས་བཀུག །ༀ་སརྦ་བིགྷྣཱཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལིཾ་ཏེ་སྭཱ་ཧཱ། ཞེས་ལན་གསུམ་གྱིས་བསྔོས་ལ། ན་མོ་དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་སློབ་མ་ལྷག་གནས་ཀྱི་ཆོས་རྣམས་སྒྲུབ་པ་ལ་བར་དུ་གཅོད་པར་བྱེད་པའི་འབྱུང་པོ་གདོན་བགེགས་ཀྱི་ཚོགས་ཐམས་ཅད་འདིར་མ་གནས་པར་གཞན་དུ་འགྲོ་བར་གྱིས་ཤིག །ཅེས་པ་དང་དབང་དངོས་གཞིའི་སྐབས་སུ། བདེན་པ་ཆེན་པོའི་བྱིན་གྱི་རླབས་ཀྱིས་དེང་འདིར་སྐལ་ལྡན་གྱི་སློབ་བུ་འདི་རྣམས་ལ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་ཀྱི་དབང་བསྐུར་བ་ལ་བར་དུ་གཅོད་པར་བྱེད་པའི་ཚོགས་ཞེས་འཇུག་བསྒྱུར། དེ་ནས། ༀ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། མ་ཧཱ་ཀྲོ་དྷེ་ཤྭ་རཱི་སྟྭཾ། ཞེས་པ་ལྟ་བུ་ཆོ་ག་རང་རང་གི་གཙོ་བོ་ཡབ་ཡུམ་གྱི་བསྐྱེད་སྔགས་བརྗོད་པས་ལྷ་སྣང་གསལ་བཏབ་ལ། ཧཱུྃ་ཧཱུྃ་ཧཱུྃ། བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས་ཡབ་ཡུམ་མཉམ་པར་རོལ་པའི་སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ལས་ཁྲོ་བོ་འཆོལ་བའི་ཚོགས་བསམ་གྱིས་མི་ཁྱབ་པ་ཕྱིར་འཕྲོས་ཏེ་བདུད་བགེགས་ལོག་པར་འདྲེན་པ་ཐམས་ཅད་ཚར་བཅད་པར་བསམ་ལ། ༀ་སུམྦྷ་ནི་སུམྦྷ་ཧཱུཾ། གྲིཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ན་ཡ་ཧོཿ བྷ་ག་ཝན་བིདྱཱ་རཱ་ཛ་ཧཱུཾ་ཕཊ། སོགས་དྲག་སྔགས་བཟླ་ཞིང་ཐུན་གྱིས་བྲབས་ཏེ་སྤོས་རོལ་དང་བཅས་མཚམས་རྔམས་ཀྱིས་བགེགས་རྣམས་ཕྱིར་བསྐྲད། དེ་ནས། ༀ་བཛྲ་རཀྵ་རཀྵ་ཧཱུཾ། ཞེས་བརྗོད་པས་ཕྱོགས་མཚམས་སྟེང་འོག་ཐམས་ཅད་རྡོ་རྗེ་སྲུང་བའི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་། དུས་མཐའི་རླུང་ནག་རྒྱ་མཚོའི་རྦ་རླབས་འཁྲུགས་པའི་ར་བ་སུམ་རིམ་གྱིས་ཕྱོགས་ཀུན་ཁྱབ་པས་མཚམས་བཅད་པར་བསམ་ལ་སྲུང་འཁོར་གསལ་བཏབ། དེ་ནས་ལས་ཀྱི་རྡོ་རྗེས་མེ་ཏོག་བཀྲམ་བསྡུ་བྱ་ཞིང་། སློབ་དཔོན་གྱིས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་མངོན་པར་དབང་བསྐུར་བའི་སྦྱོར་བ་སློབ་མ་ལྷག་གནས་ཀྱི་ཆོས་རྣམས་ཞུས་ནས་སྨིན་གྲོལ་ལམ་གྱི་དངོས་གཞི་ལའང་རིམ་པ་བཞིན་དུ་བསླབ་པར་བགྱིའོ་སྙམ་པས་བྱང་ཆུབ་མཆོག་ཏུ་སེམས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་ཡང་སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །ཞེས་དང་། གཞན་ཡང་། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་དཔའ་སོགས། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་གསུངས་པ་ལྟར། དགེ་བའི་བཤེས་གཉེན་ལ་གུས་པ་དང་ལྡན་པས་སྒོ་གསུམ་ལེགས་པར་བསྡམས་ཏེ་གཞན་དུ་མ་ཡེངས་པའི་སྒོ་ནས་གསན་པར་ཞུ་འཚལ། དེ་ཡང་འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་མངའ་བ་དེ་ཉིད་ཀྱིས། སེམས་ཅན་རྣམས་ཀྱི་བསམ་པ་དང་། །དབང་པོ་དང་། སྐལ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་བསྟན་པ་ཐམས་ཅད་ཀྱང་བསྡུ་ན་ཐེག་པ་ཆེ་ཆུང་གསུམ་དུ་འདུ་སྟེ། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང་། །ལྔ་པ་ཐུབ་པའི་དགོངས་པ་མིན། །ཞེས་གསུངས་པས། ཉན་ཐོས་དང་། རང་རྒྱལ་དང་། ཐེག་པ་ཆེན་པོ་སྟེ། ཐེག་པ་གསུམ་དུ་རྣམ་གྲོལ་གྱི་ཐེག་པ་ཐམས་ཅད་འདུས་པས་ཐེག་པ་བཞི་པ་མེད་མོད་ཀྱང་། གསུམ་པོའི་ནང་གསེས་ཀྱི་དབྱེ་བ་ལ་བརྟེན་པའི་ཐེག་པའི་རྣམ་གྲངས་ནི་མང་དུ་འབྱུང་བ་མི་འགལ་ཏེ། ལང་ཀར་གཤེགས་པ་ལས། ཐེག་པ་རྣམ་པ་མང་བཤད་པ། །སེམས་ཅན་རྣམས་ནི་དྲངས་པའི་ཕྱིར། །ཐེག་པ་ཐ་དད་ངས་བཤད་དེ། །ཐེག་པ་གཅིག་ཏུའང་ངས་བསྟན་ཏོ། །ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་གསུངས་པའི་ཕྱིར་རོ། །དེས་ན་སྤྱིར་མངོན་མཐོའི་ཐེག་པ་གཉིས། ངེས་པར་ལེགས་པའི་ཐེག་པ་གསུམ་དང་ལྔར་མདོ་སྡེ་ལས་གསུངས་ཏེ། ཇི་སྐད་དུ། ལྷ་ཡི་ཐེག་དང་ཚངས་པའི་ཐེག །དེ་བཞིན་དུ་ནི་ཉན་ཐོས་དང་། །དེ་བཞིན་གཤེགས་དང་རང་རྒྱལ་གྱི། །ཐེག་པ་ཐ་དད་ངས་བཤད་དོ། །ཞེས་དང་། ཡང་མངོན་མཐོའི་ཐེག་པ་གཉིས་གཅིག་ཏུ་བསྡུས། །ངེས་ལེགས་ཀྱི་དེ་བཞིན་གཤེགས་པའི་ཐེག་པ་ལ་བྱང་སེམས་དང་སྔགས་གཉིས་སུ་ཕྱེས་ནས་ལྔར་བཤད་པའང་ཡོད་དེ། གསང་སྙིང་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས། དེ་ལ་མངོན་མཐོའི་ཐེག་པ་ནི། ལས་འབྲས་ལ་ཡིད་ཆེས་པའི་སྒོ་ནས་དགེ་མི་དགེའི་བླང་དོར་མ་ནོར་བར་སྤྱད་པས་མི་དང་འདོད་ལྷའི་གོ་འཕང་ཐོབ་ནུས་པ་དེའི་ཕྱིར། གཙོ་བོའི་སྒྲས་སྨོས་ཏེ། ལྷའི་ཐེག་པ་ཞེས་གསུངས་པ་དང་། དེའི་སྟེང་དུ་འཇིག་རྟེན་པའི་བསམ་གཏན་དང་གཟུགས་མེད་ཀྱི་ཏིང་ངེ་འཛིན་བསྒོམ་པ་ནི་འདོད་ཉོན་གྱིས་གཙང་བས་ཚངས་པའི་ཐེག་པ་སྟེ། དེ་གཉིས་འཇིག་རྟེན་པའི་ཐེག་པ་ཡིན་པས། །འཁོར་བ་ལས་འཕགས་པར་མི་ནུས་པའི་ཕྱིར། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། དགའ་བསྐྱེད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་འདའ། །ཞེས་པ་ལས་གཞན་དུ་གྱུར་པས་ན་ཐེག་པ་དངོས་མ་ཡིན་མོད་ཀྱི། དེ་ལྟ་ནའང་ཡང་དག་པའི་ལྟ་བ་དང་ལྡན་པས་དགེ་བཅུའི་ལས་ལམ་ལ་སྤྱོད་པ་ནི། རྣམ་གྲོལ་གྱི་ཐེག་པ་ཐམས་ཅད་ཀྱི་གཞིའམ་སྔོན་དུ་འགྲོ་བ་ཡིན་པས་ལམ་སྟེགས་སུ་འགྱུར་ཏེ། དགྱེས་རྡོར་ལས། དགེ་བ་བཅུ་ལས་བརྩམས་ནས་ནི། །དེ་ཡིས་ཆོས་ནི་རབ་ཏུ་བྱེད། །ཅེས་དང་། སློབ་དཔོན་སངས་རྒྱས་གསང་བའི་ལམ་རིམ་དུ། གཞི་ཡི་ཐེག་པ་དང་པོར་ཞོག །ཅེས་གསུངས་ཤིང་། རིན་ཆེན་ཕྲེང་བ་ལས་ཀྱང་། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེག་ན་ཐར་པ་གམ་ན་འདུག །ཅེས་པ་ལྟར་མངོན་མཐོའི་ཐེམ་སྐས་ལ་འཛེགས་ནས་བགྲོད་བྱའི་གནས། ངེས་ལེགས་སམ་རྣམ་པར་གྲོལ་བའི་ཐེག་པ་དེ་ལའང་སྔ་འགྱུར་རང་སྐད་ཀྱི་དབང་དུ་བྱས་ནས། སྤྱི་མདོ་དགོངས་པ་འདུས་པ་ལས། ལང་ཀའི་བདག་པོ་གཞན་ཡང་གང་། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་རིགས། །དབང་བསྒྱུར་ཐབས་ཀྱི་ཐེག་པའོ། །ཞེས་གསུམ་དུ་སྣང་བ་ལས། རེ་རེ་ལའང་གསུམ་གསུམ་དུ་ཕྱེ་བས་ཐེག་པ་དགུར་འགྱུར་ཏེ། ཀུན་འབྱུང་འདྲེན་པའི་ཐེག་པ་ནི་ཉན་ཐོས། རང་རྒྱལ། བྱང་སེམས་ཏེ་མཚན་ཉིད་སྡེ་གསུམ་དང་། དཀའ་ཐུབ་རིགས་བྱེད་ཀྱི་ཐེག་པ་ནི་ཀྲི་ཡ། ཨུ་པ། ཡོ་ག་སྟེ་ཕྱི་རྒྱུད་སྡེ་གསུམ་དང་། དབང་བསྒྱུར་ཐབས་ཀྱི་ཐེག་པ་ནི་རྒྱུད་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་རྣམས་སུ་དབྱེར་ཡོད་ཅིང་། གསུམ་མམ་དགུར་ཕྱེ་བ་དེ་ཡང་བསྡུ་ན། ཀུན་བྱེད་རྒྱལ་པོ་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །ཞེས་པས། རྒྱུ་ཕ་རོལ་ཏུ་ཕྱིན་པའི་ཐེག་པ་དང་། །འབྲས་བུ་སྔགས་ཀྱི་ཐེག་པ་གཉིས་སུ་འདུ་ཞིང་། དེ་གཉིས་ཀྱི་ཁྱད་པར་ནི། སྔགས་དང་སྦྱོར་བ་གཙོ་བོར་སྟོན་པ་དང་མི་སྟོན་པའི་ཁྱད་པར་སྟེ། རབ་དབྱེ་ལས་ཀྱང་། མདོ་དང་སྔགས་ཀྱི་ཁྱད་པར་ནི། །ཆོ་གའི་བྱ་བ་ཡོད་མེད་ཡིན། །ཞེས་པའང་དོན་འདི་ལ་དགོངས་པར་སྣང་ངོ་། །འོ་ན་ཕ་རོལ་ཏུ་ཕྱིན་པའི་ཚུལ་ལས། སྔགས་ཀྱི་ཚུལ་གང་གིས་ཁྱད་པར་དུ་འཕགས་སྙམ་ན། དོན་གསུམ་གྱིས་མདོ་ལས་སྔགས་མཆོག་ཏུ་གྱུར་པ་སྟེ། གསུམ་གང་ཞེ་ན། མྱུར་བ་དང་། བདེ་བ་དང་། ཐབས་ལ་མཁས་པའི་ཁྱད་པར་རོ། །དེ་ལ་མྱུར་བ་ནི། ཕར་ཕྱིན་ཐེག་པའི་རང་ལམ་གྱི་བྱང་ཆུབ་ཐོབ་པ་ལ་བསྐལ་པ་གྲངས་མེད་གསུམ་ཐོགས་མོད། སྔགས་ལས་ནི། ཀྲི་ཡས་མི་ཚེ་བདུན་ནམ་བསྐལ་པ་བརྒྱད། ཨུ་པ་ཡས་མི་ཚེ་ལྔའམ་བསྐལ་པ་གཅིག་གམ་གསུམ། ཡོ་གས་ཚེ་ལོ་བརྒྱ་པའི་མིའི་སྐྱེ་བ་གསུམ་མམ་བཅུ་དྲུག །བླ་མེད་ཀྱིས་སྐྱེ་བ་འདིའམ་བར་དོར་བྱང་ཆུབ་ཐོབ་པར་གསུངས་ཤིང་། དེ་ལྟར་མྱུར་བའི་རྒྱུ་ཡང་། སྔགས་སུ་ནི། ཆོ་གའི་ཁྱད་པར་གྱིས་ལྷ་རྣམས་དངོས་སུ་མཆོད་པ་ལེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་བླ་མའི་སྐུ་ལ་ཞུགས་ནས་སྒྲུབ་པ་པོའི་མཆོད་པ་ལེན་པ་ལ་སོགས་པས་ཡོངས་སུ་སྤྱད་པ་ལས་བྱུང་བའི་བསོད་ནམས་ཡོད་པ་དང་། སྔགས་དང་ཕྱག་རྒྱའི་མཐུས་ཆུ་ཐིགས་རེ་ཡང་གཱངྒའི་རྡུལ་སྙེད་དུ་འཕེལ་བས་དེ་སྙེད་ཀྱི་བསོད་ནམས་འབྱུང་བ་དང་། མ་དག་པའི་སྣང་བ་འགོག་པའི་ཞིང་སྦྱང་བའི་ཏིང་ངེ་འཛིན་ལས་དང་པོ་པའི་དུས་ནས་ཀྱང་མངོན་དུ་བྱེད་ནུས་པ་དང་། སྔགས་དང་ཕྱག་རྒྱ་དང་ཏིང་ངེ་འཛིན་གྱི་ཁྱད་པར་རེ་རེས་ཀྱང་སེམས་ཅན་མཐའ་ཡས་པ་སྨིན་པའི་རྒྱུ་ཁྱད་པར་ཅན་བྱེད་ནུས་པ་འདི་དག་སྔགས་ཀྱི་ཐེག་པ་ལ་ཞུགས་ཙམ་ཉིད་ནས་ཡོད་པའི་རྒྱུས་མྱུར་བ་ཡིན་ནོ། །གཉིས་པ་བདེ་བ་ནི། ལུས་སེམས་ལ་ཚོར་བ་རྩུབ་མོ་མེད་པ་སྟེ། དེའི་རྒྱུ་ཡང་འདི་ལས་སྐལ་བ་དྲུག་ལྡན་གྱི་ལུས་ཀྱང་ཚེགས་མེད་པར་གྲུབ་པ་དང་། རྫུ་འཕྲུལ་དང་ཏིང་ངེ་འཛིན་མང་པོ་ཐོབ་པ་དང་། སྔགས་ཀྱི་མཐུས་དེ་བཞིན་གཤེགས་པ་རྣམས་མངོན་དུ་བཞུགས་ཤིང་འགྲོ་བའི་བསམ་པ་ཐམས་ཅད་སྒྲུབ་ནུས་པའི་རྒྱུས་བདེ་བ་ཡིན་ནོ། །གསུམ་པ་ཐབས་ལ་མཁས་པ་ནི། རིག་པ་འཛིན་པ་རྣམས་དང་ཚུལ་ཁྲིམས་མཉམ་པས་ལྷ་དགྱེས་པ་དང་། སྤྱོད་ཡུལ་ཁྱད་པར་ཅན་དང་འབྲེལ་བའི་ཏིང་ངེ་འཛིན་དང་། ཤེས་རབ་རྨད་དུ་བྱུང་བས་སྣོད་བཅུད་དག་མཉམ་ཆེན་པོར་གཏན་ལ་ཕེབ་པ་དང་། སྤྱོད་ཡུལ་ཐམས་ཅད་དུ་ལྷ་དང་སྔགས་ཀྱི་ཐབས་ལ་འཇུག་ནུས་པས་ན་ཐབས་ལ་མཁས་པ་ཡིན་ནོ། །དེར་མ་ཟད་ཕ་རོལ་ཏུ་ཕྱིན་པའི་རང་ལམ་གྱིས་གྲངས་མེད་གསུམ་དུ་ཚོགས་བསགས་པས་ས་བཅུ་པའི་བྱང་ཆུབ་སེམས་དཔའ་སངས་རྒྱས་ཀྱི་རྒྱལ་ཚབ་ཆེན་པོའི་གོ་འཕང་ལས་ལྷག་པ་ཐོབ་མི་ནུས་ཀྱང་། སྐབས་དེར་སྔགས་ཀྱི་ཐེག་པ་ལ་ཞུགས་ནས་རྫོགས་པའི་སངས་རྒྱས་ཐོབ་དགོས་པས་ན། སྔགས་ཀྱི་ཐེག་པ་ནི་བགྲོད་པ་གཅིག་པའི་ལམ་དུ་འགྱུར་བའི་ཕྱིར། མཐར་ཐུག་གི་ཐེག་པ་གཅིག་ཉིད་དུ་ངེས་པས་ཀྱང་འཕགས་ཏེ། སྤྱི་མདོ་དགོངས་འདུས་ལས། ཐེག་པ་དཔག་མེད་བསྟན་པ་ཡང་། །ཇི་ལྟར་མོས་པ་ཐ་དད་པས། །འཁྲིད་པར་བྱ་བའི་ཐབས་སུ་ཟད། །རྡོ་རྗེ་ཐེག་པ་ཉིད་ལས་མེད། །ཅེས་དང་། སྒྱུ་འཕྲུལ་རྩ་རྒྱུད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། སྒྱུ་འཕྲུལ་བརྒྱད་ཅུ་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས་པ་ཡིན་ནོ། །འོ་ན་གསང་སྔགས་རྡོ་རྗེ་ཐེག་པ་ཉིད་སྡེ་སྣོད་གསུམ་གང་དུ་འདུ་ཞེ་ན། དགོངས་པ་མི་མཐུན་པ་མང་སྟེ། གང་དག་མངོན་པའི་སྡེ་སྣོད་ལ་ཕྱི་ནང་གཉིས་ལས་སྔགས་ནི་ནང་གི་མངོན་པའོ། །ཞེས་བཞེད་པ་དང་། ཟབ་མོའི་དོན་མདོར་བསྡུས་ཏེ་སྟོན་པས་ན་མདོ་སྡེའོ། །ཞེས་བཞེད་པའང་ཡོད་མོད། རང་ལུགས་ནི་རིག་པ་འཛིན་པའི་སྡེ་སྣོད་ཅེས་སྡེ་སྣོད་གསུམ་ལས་ལོགས་པར་རྐང་ཐུབ་པ་གཅིག་ཏུ་བྱས་ཏེ། སྡེ་སྣོད་བཞི་པར་བཞག་ན་ལེགས་པར་མངོན་ནོ། །དེ་ལྟར་ཡང་། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་དང་། དཔུང་བཟང་གིས་ཞུས་པ་ལས་ཀྱང་། བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུངས། །ཞེས་དང་། སློབ་དཔོན་སངས་རྒྱས་གསང་བས་མཛད་པའི་རྣམ་འཇོམས་ཀྱི་གཟུངས་འགྲེལ་ལས། སངས་རྒྱས་མཆོག་གིས་ཆོས་གསུངས་པ། །འདུལ་བ་མདོ་སྡེ་མངོན་པ་དང་། །རིག་པ་འཛིན་པའི་སྡེ་བཞིར་གནས། །ཞེས་གསུངས་པའི་ཕྱིར། རྡོ་རྗེ་ཐེག་པའི་སྡེ་སྣོད་དང་། །རིག་པ་འཛིན་པའི་སྡེ་སྣོད་དང་། །སྔགས་ཀྱི་སྡེ་སྣོད་དང་། སྡེ་སྣོད་བཞི་པ་དང་། ཆོས་འདི་པ་རྣམས་ཀྱི་རྒྱུད་ཅེས་པ་རྣམས་མིང་གི་རྣམ་གྲངས་སོ། །དེ་ལས་སྔགས་ཀྱི་མཚན་གཞི་ནི། སྦྱང་གཞི་དབྱིངས་རང་བཞིན་གྱིས་རྣམ་པར་དག་པ་དང་། དེ་ལ་བརྟེན་པའི་ཆོས་སྦྱང་བྱ་སྦྱོང་བྱེད་དང་བཅས་པ་ཐམས་ཅད་ཡིན་ཞིང་། དེ་ཡང་སྦྱང་གཞི་ལ་བརྟེན་པའི་སྦྱང་བྱ་གློ་བུར་གྱི་དྲི་མ་རྣམས། དབང་གིས་རྒྱུད་སྨིན་པར་བྱས་ནས། །དེ་དང་འབྲེལ་བའི་རྗེས་སུ་ལམ་བསྒོམ་པ་དང་། དེས་བྲལ་ཐོབ་ཀྱི་ཡོན་ཏན་ལམ་གྱི་ཆར་གཏོགས་པ་རྣམས་སྦྱོང་བྱེད་ཡིན་ལ། དེ་ལྟར་སྦྱངས་པས་དབྱིངས་ལ་སྒྲིབ་བྱེད་ཀྱི་དྲི་མ་ཕྲ་རགས་ཐམས་ཅད་དག་ནས། གཞིའི་ཡོན་ཏན་ཇི་ལྟ་བ་བཞིན་མངོན་དུ་གྱུར་པ་ན་འབྲས་བུ་སྟེ། དེ་སྐད་དུའང་། གསང་བ་གྲུབ་པ་ལས། དབྱིངས་ལ་བྲལ་བ་དག་ཐོབ་འབྲས། །གསང་སྔགས་རྣམ་པ་བཞིར་བཤད་དེ། །ཞེས་སོ། །སྔགས་ཀྱི་མཚན་ཉིད་ནི། ཆོས་ཀྱི་དབྱིངས་རང་བཞིན་གྱི་རྣམ་པར་དག་པ་དང་། རྗོད་བྱེད་ཐུགས་རྡོ་རྗེའི་གསང་བ་འཁོར་དང་བཅས་པ་སྟེ། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་སོ། །སྔགས་ཀྱི་ངེས་ཚིག་ནི། མནྟྲ་ཞེས་པའི་སྒྲ་ལས་དྲངས་ན། ཡིད་ཤེས་བདེ་མྱུར་དུ་སྐྱོབ་པས་ན་སྔགས་ཏེ། གསང་འདུས་ཀྱི་རྒྱུད་ཕྱི་མ་ལས། ཡིད་དེ་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །ཞེས་སོ། །གསང་སྔགས་ཀྱི་དབྱེ་བ་ནི། གསར་རྙིང་ཐུན་མོང་གི་བཞེད་པའི་དབང་དུ་བྱས་ན་བཞིར་འགྱུར་ཏེ། རྡོ་རྗེ་སྙིང་པོ་བཀོད་པའི་རྒྱུད་ལས། བདེ་བར་གཤེགས་པས་དགོངས་པའི་རྒྱུད། །རྣམ་པར་བཞི་རུ་ཡང་དག་བཤད། །བྱ་སྤྱོད་རྣལ་འབྱོར་བླ་མེད་དོ། །ཞེས་གསུངས། དེ་ཡང་བཞིར་འབྱེད་པའི་རྒྱུ་མཚན་ནི་ལྔ་ལས། དང་པོ་མི་རིགས་བཞི་ཡི་སྤྱོད་པ་ལ་དགོངས་ནས། དེ་འདུལ་བའི་ཕྱིར་བཞིར་གསུངས་ཏེ། དུར་ཁྲོད་རྒྱན་གྱི་རྒྱུད་ལས། བྲམ་ཟེ་རྒྱལ་རིགས་རྗེ་རིགས་དང་། །དམང་རིགས་གདོལ་པ་འདུལ་དོན་དུ། །རྒྱུད་ནི་རྣམ་པ་བཞིར་གསུངས་ཏེ། །བྱ་སྤྱོད་རྣལ་འབྱོར་བླ་མེད་དོ། །ཞེས་གསུངས། གཉིས་པ་གང་ཟག་གི་བློ་རིགས་བཞི་ལ་དགོངས་ནས་ཀྱང་བཞིར་གསུངས་ཏེ། བསམ་གཏན་ཕྱི་མ་ལས། སེམས་ཅན་དམན་ལ་བྱ་བའི་རྒྱུད། །དེ་ལྷག་རྣམས་ལ་སྤྱོད་པའི་རྒྱུད། །སེམས་ཅན་མཆོག་ལ་རྣལ་འབྱོར་རྒྱུད། །དེ་ལྷག་རྣམས་ལ་བླ་མེད་རྒྱུད། །ཅེས་གསུངས་སོ། །གསུམ་པ་རྫོགས་ལྡན་ལ་སོགས་པའི་དུས་བཞི་ལ་དགོངས་ནས་ཀྱང་བཞིར་གསུངས་ཏེ། དཔལ་ཕྲེང་བ་དམ་པའི་རྒྱུད་ལས། གསང་སྔགས་བྱུང་ཚུལ་རྣམ་བཞི་སྟེ། །བསྐལ་པ་རྫོགས་ལྡན་གསུམ་ལྡན་གཉིས། །རྩོད་དུས་རྒྱུད་ཀྱང་རིམ་བཞིན་དུ། །གདུལ་བྱའི་ངོ་ལ་སྣང་བ་ཡིན། །ཞེས་གསུངས། བཞི་པ་སྦྱང་གཞིར་འདོད་ཆགས་ཀྱི་འཇུག་ཚུལ་བཞི་ལ་དགོངས་ནས་ཀྱང་བཞིར་གསུངས་ཏེ། བརྟག་གཉིས་ལས། བལྟས་དང་དགོད་དང་ལག་བཅང་དང་། །འཁྱུད་དང་གཉིས་སྤྲད་ལ་སོགས་པས། །རྒྱུད་ཀྱང་རྣམ་པ་བཞིར་གསུངས་སོ། །ཞེས་གསུངས། ལྔ་པ་ལྷ་བཞིའི་རྗེས་སུ་འཇུག་པའི་ཕྱིན་ཅི་ལོག་བཞི་དྲངས་པ་ལ་དགོངས་ནས་ཀྱང་བཞིར་གསུངས་ཏེ། གཏི་མུག་ཅན་ཚངས་པ་གཙང་སྦྲ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་བྱ་བའི་རྒྱུད། ཞེ་སྡང་ཅན་ཁྱབ་འཇུག་འཚེ་བ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་སྤྱོད་རྒྱུད་དང་། ང་རྒྱལ་ཅན་བརྒྱ་བྱིན་འབྱོར་པ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་རྣལ་འབྱོར་རྒྱུད། འདོད་ཆགས་ཅན་དབང་ཕྱུག་འདོད་ཆགས་ཆོས་སུ་སྨྲ་བ་རྗེས་སུ་འཛིན་པའི་ཕྱིར་རྣལ་འབྱོར་བླ་ན་མེད་པའི་རྒྱུད་གསུངས་པ་ཡིན་ཏེ། དེ་ལྟར་རྒྱུད་སྡེ་བཞི་ལས་འདིར་གསང་སྔགས་བླ་མེད་འཆད་པ་སྐབས་སུ་བབ་པ་ཡིན། དེ་ལ་ཡང་རྒྱུད་མ་ཧཱ་ཡོ་ག་ལུང་ཨ་ནུ་ཡོ་ག་མན་ངག་ཨ་ཏི་ཡོ་ག་སྟེ་གསུམ་དུ་ཡོད་པའི། དང་པོ་མ་ཧཱ་ཡོ་ག་ལ་ནང་གསེས་ཏནྟྲ་སྡེ་བཅོ་བརྒྱད་དུ་གྲགས་པ་ལས་འདི་ནི། ཞེས་སོ་སོའི་གཞུང་ལ་འཇུག །དངོས་གཞིའི་ཉིན་མེ་ཏོག་བཀྱེ་བསྡུའི་མཚམས་ནས་གཞུང་རང་རང་གི་དངོས་གཞིའི་ཆོས་བཤད་ལ་འཇུག་པར་བྱ་སྟེ། ༈ དེ་ཡང་རྒྱས་པར་སྤྲོ་ན་དབང་བཤད་སོ་སོའི་རྣལ་འབྱོར་བླ་ན་མེད་པའི་རྒྱུད་གཉིས་སུ་ཡོད་པ་ལས། ཞེས་པའི་འཕྲོར། འདི་ནི་རྣལ་འབྱོར་བླ་ན་མེད་པ་སྟེ་དེ་ལའང་དབྱེ་ན། གངས་ཅན་གྱི་ལྗོངས་འདིར་གསང་སྔགས་གསར་རྙིང་གི་ལུགས་སྲོལ་གཉིས་བྱུང་། དེ་གཉིས་ཀྱི་ཁྱད་པར་ནི། ལོ་ཙཱ་བ་རིན་ཆེན་བཟང་པོ་མ་བྱོན་གོང་དུ་འགྱུར་བའི་མདོ་རྒྱུད་རྣམས་སྔ་འགྱུར་དང་། དེ་ཕྱིན་འགྱུར་བ་རྣམས་གསང་སྔགས་གསར་མ་ཡིན་ཞེས་བཞེད་དེ། གཙོ་ཆེ་བའི་དབང་དུ་བྱས་ནས་གསུངས་པ་ཡིན། དེ་ལྟར་གསར་རྙིང་གཉིས་ལས། འདིར་གསར་མ་ལས་ཁྱད་པར་དུ་གྱུར་པ་གསང་སྔགས་རྙིང་མ་ཡིན། དེ་ཡང་གང་གིས་ཁྱད་པར་དུ་གྱུར་ཞེ་ན། ལོ་ཙཱ་བ་ཆེན་པོ་རོང་ཟོམ་ཆོས་ཀྱི་བཟང་པོའི་ཞལ་སྔ་ནས། གསང་སྔགས་རྙིང་མ་བ་རྣམས་ལ་གསར་མ་ལས་ཁྱད་པར་དུ་འཕགས་པའི་ཆེ་བ་དྲུག་ཡོད། ཅེས་གསུངས་པ་ལྟར། དང་པོ་སྤྱན་འདྲེན་པ་པོ་ཡོན་བདག་གི་ཆེ་བ་ནི། སྔ་འགྱུར་གྱི་ཡོན་བདག་འཕགས་པ་རིགས་གསུམ་མགོན་པོ་རྣམ་པ་རྒྱལ་པོའི་ཚུལ་དུ་བཟུང་བ་མངའ་བདག་མེས་དབོན་རྣམ་གསུམ་ཡིན་པས། ཕྱིས་འགྱུར་བ་རྣམས་ཀྱི་ཡོན་བདག་དང་མི་འདྲ། གཉིས་པ་གང་དུ་བསྒྱུར་ཞིང་གཏན་ལ་ཕབ་པའི་གནས་ནི། སྔོན་སྤྲུལ་པའི་གཙུག་ལག་ཁང་བསམ་ཡས་སོགས་ཆོས་འཁོར་སྟོད་སྨད་དུ་ཡིན་པས། ད་ལྟའི་དགོན་ཕག་ཕུག་ཏུ་བསྒྱུར་བ་འདི་དང་མི་འདྲ། གསུམ་པ་སྒྱུར་བྱེད་ལོ་ཙཱ་བའི་ཁྱད་པར་ནི། སྔོན་གྱི་ལོ་ཙཱ་བ་སྒྲ་སྒྱུར་བཻ་རོ་ཙ་ན་དང་སྐ་ཅོག་ཞང་གསུམ། རྨ་གཉགས་སོགས་སྤྲུལ་པའི་ལོ་ཙྭ་བས་བསྒྱུར་བའི་ཆོས་ཡིན། ད་ལྟའི་ལོ་ཙཱ་བ་དབྱར་མང་ཡུལ་དུ་བསྡད། དགུན་རྒྱ་བལ་དུ་ཡུག་རེ་ཕྱིན་ནས་བསྒྱུར་བ་དང་མི་འདྲ། བཞི་པ་པཎྜི་ཏའི་ཁྱད་པར་ནི། སྔོན་གྱི་པཎྜི་ཏ་མཁན་པོ་ཞི་བ་འཚོ་དང་། སངས་རྒྱས་གསང་བ་དང་། སློབ་དཔོན་ཆེན་པོ་པདྨ་འབྱུང་གནས་དང་། པཎ་ཆེན་བི་མ་ལ་མི་ཏྲ་སོགས་སངས་རྒྱས་དང་། ས་ཆེན་པོ་ལ་བཞུགས་པའི་བྱང་འཕགས་རྣམས་ཀྱིས་སྤྱན་དྲངས་པའི་ཆོས་ཡིན། ད་ལྟའི་གསེར་ཚོལ་དུ་འཁྱམས་པའི་པཎྜི་ཏ་དང་མི་འདྲ། ལྔ་པ་ཞུ་རྟེན་མེ་ཏོག་གི་ཁྱད་པར་ནི། གསེར་ཤ་བའི་བླུད་བུ་བཀང་བ་དང་། བྲེས་གཞལ་ནས་ཕུལ་ཏེ་ཞུས་པའི་ཆོས་ཡིན། ད་ལྟ་མཆན་ནས་གསེར་ཞོ་རེ་རེ་གཉིས་གཉིས་བཏོན་ནས་ཞུས་པ་དང་མི་འདྲ། དྲུག་པ་ཆོས་ཀྱི་ཁྱད་པར་ནི། སྔོན་འཕགས་ཡུལ་དུ་སངས་རྒྱས་ཀྱི་བསྟན་པ་གྲ་མ་ཉམས་པའི་དུས་སུ་བསྒྱུར་བ་མ་ཟད། འཕགས་ཡུལ་ན་མེད་པའི་རྒྱུད་དབང་ཐོབ་པའི་བྱང་ཆུབ་སེམས་དཔའ་དང་། གྲུབ་པ་དང་། རིག་པ་འཛིན་པ་དང་། མཁའ་འགྲོ་མ་རྣམས་ཀྱིས་བཟུང་སྟེ་དག་པའི་ཞིང་ན་བཞུགས་པ་དང་། ཛམ་བུ་གླིང་གི་ཆ་ཤས་སིངྒ་ལ་དང་། ནུབ་ཕྱོགས་ཨོ་རྒྱན་གྱི་ཡུལ་སོགས་ནས་སློབ་དཔོན་ཆེན་པོ་པདྨ་དང་བི་མ་ལ་སོགས་ཀྱིས་རྫུ་འཕྲུལ་གྱི་བཀོད་པས་བླངས་ནས་བསྒྱུར་བས་རྒྱ་གར་དུ་པཎ་གྲུབ་ཡོངས་ལ་མ་གྲགས་པ་མང་པོ་ཞིག་ཀྱང་བོད་ཀྱི་བསོད་ནམས་ཀྱི་སྐལ་བར་བྱོན། འགྱུར་ཀྱང་སྔོན་གྱི་ལོ་ཙཱ་བ་རྣམས་སྤྲུལ་པའི་སྐུ་ཡིན་པས་དོན་ཇི་ལྟ་བ་བཞིན་དུ་གཏན་ལ་ཕེབས་པས་གོ་སླ་ཞིང་དབྱིངས་འཇལ་བ་ལ་རླབས་ཆེ། ཕྱིས་ཀྱི་ལོ་ཙཱ་བ་རྣམས་ཀྱིས་དོན་བསྒྱུར་མ་ནུས་པར་རྒྱ་དཔེའི་གོ་རིམ་ལྟར་སྒྲ་འགྱུར་བྱས་པས་ཚིག་སྒྲིམ་ལ་གོ་དཀའ། དབྱིངས་འཇལ་བ་ལ་རླབས་ཆུང་བ་ལྟར་སྣང་བས་མི་འདྲ་བ་ཡིན་ནོ། །ཁྱད་པར་དེ་ལྡན་གྱི་གསང་སྔགས་རྙིང་མ་དེ་ལའང་། ཞལ་ནས་གསུངས་པའི་བཀའ་མ། རྗེས་སུ་གནང་བའི་གཏེར་མ། བྱིན་གྱིས་བརླབས་པའི་དག་སྣང་མ་སྟེ། བརྒྱུད་པའི་བཀའ་སྲོལ་གསུམ་དུ་གནས་ཤིང་། དེ་ཐམས་ཅད་ཀྱི་བརྗོད་བྱ་རྗོད་བྱེད་སྤྱིའི་ལུས་ཀྱིས་ཕྱེ་ན། རྒྱུད་སྡེ་དང་། སྒྲུབ་སྡེ་གཉིས་སུ་འདུས་པ་ལས། དེའི་དང་པོ་རྒྱུད་སྡེ་ལའང་གསུམ་སྟེ། རྒྱུད་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་གའོ། །དེ་གསུམ་གྱི་ཁྱད་པར་ལ། ལྷ་རྗེ་ཟུར་ཆུང་བའི་ཞལ་ནས། རིག་པའི་ཆོ་འཕྲུལ་དུ་སྣང་བ་མ་ཧཱ། རང་རིག་པའི་རྩལ་དུ་སྣང་བ་ཨ་ནུ། རིག་པར་སྣང་བ་ཨ་ཏིའོ། །ཞེས་གསུངས་པའི་དགོངས་པ་ནི། ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ཀྱི་ཆོ་འཕྲུལ་དུ་རྟོགས་པས། ཐབས་བསྐྱེད་པའི་རིམ་པ་དང་སྤྱོད་པ་ལ་གཙོ་བོར་བརྟེན་པ་རྒྱུད་མ་ཧཱ་ཡོ་ག །ཆོས་ཐམས་ཅད་སེམས་ཉིད་དབྱིངས་ཡེ་གཉིས་སུ་མེད་པའི་རྩལ་དུ་རྟོགས་པས། ཤེས་རབ་རྫོགས་པའི་རིམ་པ་དང་ཏིང་ངེ་འཛིན་གཙོ་བོར་བརྟེན་པ་ལུང་ཨ་ནུ་ཡོ་ག །ཆོས་ཐམས་ཅད་ཡེ་ནས་སྐྱེ་འགགས་མེད་པའི་རང་བྱུང་གི་ཡེ་ཤེས་རང་སྣང་བར་རྟོགས་པས། ཡེ་ཐོག་ཏུ་གྲོལ་བར་བྱེད་པའི་ཐབས་སྤངས་བླང་རེ་དོགས་དང་བྲལ་བ་སྟེ། ལྟ་བ་ལ་གཙོ་བོར་བརྟེན་པ་རྫོགས་པ་ཆེན་པོ་ཨ་ཏི་ཡོ་གའོ། །དེ་ལྟར་གསུམ་ལས། འདི་ནི་དང་པོ་ཡིན་ཞིང་། དེ་ཡང་མ་ཧཱ་ཡོ་ག་ཞེས་པའི་སྒྲ་ལས་དྲངས་ན་རྣལ་འབྱོར་ཆེན་པོ་སྟེ། གཉིས་མེད་ཀྱི་དོན་ལ་བློ་འབྱོར་བས་ཡོ་ག་ཕྱི་པ་ལས་ཆེས་ཁྱད་པར་དུ་འཕགས་པའི་ཕྱིར་རོ། །ངོ་བོ་ནི། བསྐྱེད་རྫོགས་ཟུང་འཇུག་གི་སྒོ་ནས་འཁོར་འདས་མཉམ་པ་ཉིད་ཀྱི་དོན་ལ་རྟོགས་གོམས་ཀྱིས་སྦྱོར་བས་གྲོལ་བ་ཐོབ་པའི་རང་བཞིན་ནོ། །འདི་ནི་ཐེག་པ་འོག་མ་རྣམས་ཀུན་རྫོབ་རྫས་ཡོད་དང་བརྟགས་ཡོད་དུ་བཟུང་ནས་བཟང་ངན་བླང་དོར་དུ་ལྟ་བ་ལས་འཕགས་ཏེ། འདིར་ཆོས་རྣམས་ལ་མི་གཉིས་པའི་བསམ་སྤྱོད་དང་ལྡན་པས། འབྲས་བུའི་ངོ་བོ་སྣང་སྟོང་ཟུང་འཇུག་གི་ཆོས་སྐུར་རྟོགས་པར་བྱས་ནས། དེ་དང་རྗེས་སུ་མཐུན་པའི་ཏིང་ངེ་འཛིན་གྱིས་གོམས་པར་བྱེད་པའི་ཕྱིར་ཏེ། སློབ་དཔོན་སངས་རྒྱས་གསང་བས། ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས། དེ་ཇི་ལྟར་ཉམས་སུ་ལེན་པའི་ཁྱད་པར་ཡང་། ཡེ་ཤེས་ཐིག་ལེ་ལས། རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་དང་། སྒྱུ་འཕྲུལ་རྩ་རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་བུམ་དབང་གི་སྟེང་དུ། ཐུན་མོང་མ་ཡིན་པ་མཆོག་དབང་གོང་མ་གསུམ་བསྣན་ནས་དབང་བཞི་བསྐུར་བས་སྣོད་རུང་དུ་བྱས་ལ། ལམ་བསྐྱེད་རིམ་མ་དག་པའི་སྣང་བ་དབྱིངས་སུ་སྦྱངས་པའི་དཀྱིལ་འཁོར་གྱི་འཁོར་ལོར་བསྒོམ་ཞིང་། དབང་དང་བསྐྱེད་རིམ་གཉིས་ཀ་ལ། ཡར་འབྲས་བུའི་བཞུགས་ཚུལ་དང་རྣམ་པ་མཐུན་པའི་ལམ་དུ་བྱེད་ཚུལ་དང་། མར་འཁོར་བ་དང་རྣམ་པ་མཐུན་པའི་དྲི་མ་སྦྱོང་ཚུལ་ཏེ། སྦྱང་གཞི། སྦྱང་བྱ། སྦྱོང་བྱེད། སྦྱང་འབྲས་རྣམས་ཞིབ་མོར་སྦྱོར། ཐུན་མཚམས་སུ་ཡང་སྣང་བ་ཐམས་ཅད་ལྷར་བསྒོམ། རྫོགས་རིམ་རྡོ་རྗེའི་ལུས་ལ་གནད་དུ་བསྣུན་པའི་ཐབས་ཀྱིས། སེམས་དང་། ཡིད་དང་། རླུང་རྣམས་དབུ་མར་ཐིམ་པས་མངོན་དུ་གྱུར་པའི་བདེ་སྟོང་ཟུང་འཇུག་སྒྲུབ། སྤྱོད་པ་རྣམ་པ་གསུམ་གྱི་ཉེ་རྒྱུས་འབྲས་བུ་ལ་སྦྱོར་བར་བཞེད། དེ་ཡང་བསམ་པའི་སྟོབས་ཆེ་བ་གཅིག་གིས་འབད་པས་བསྒོམས་ན། ཚེ་ལོ་བརྒྱ་པའི་ཚེ་གང་གཅིག་གི་ཡུན་ལ་ལམ་གཞན་ལ་མ་ལྟོས་པར་འཚང་རྒྱ་ནུས་པར་གསུངས། དེ་ལྟ་བུའི་མ་ཧཱ་ཡོ་ག་དེ་ལའང་བསྐྱེད་རིམ་ཐབས་ཀྱི་ཆ་སོགས་རང་རང་གི་གཞུང་ལ་འཇུག་པར་བྱའོ། །ཡང་མེ་ཏོག་དང་མིག་དར་དགོས་པའི་རིགས་ལ་མཎྜལ་གྱི་མཇུག་ཏུ། འོ་དེ་ལྟར་མཎྜལ་འབུལ་བའི་རིམ་པ་དེ་སོང་ནས། སླར་ཡང་ཁྱེད་ཅག་རྣམས་སྔོན་ཆད་མིང་འདི་ཞེས་བྱ་བའི་དཀྱིལ་འཁོར་དུ་མ་ཞུགས་པའམ། ཞུགས་སུ་ཟིན་ཀྱང་སྐབས་འདིར་ཡང་བསྐྱར་ནས་འཇུག་དགོས་པས་ད་ལྟའི་དཀྱིལ་འཁོར་གསར་པ་འདི་ཉིད་མཐོང་བ་ལ་སྒྲིབ་པར་བྱེད་པ་མ་རིག་པའི་ལིང་ཐོག་མཚོན་ཕྱིར་རས་ཡུག་དམར་པོ་སོགས་རེ་རེས་མིག་བཀབ་པའི་མོས་པ་མཛོད། ཨ་ཁཾ་ཝཱི་ར་ཧཱུྃ། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་རུང་བས་ཕྱག་རྟེན་གྱི་སླད་དུ་མེ་ཏོག་ཨུ་དུམ་ཝ་ར་ལ་སོགས་པའི་ཆུན་པོ་ཁ་དོག་ལྔ་ལྡན་རེ་ཕྱག་ཏུ་ཐོགས་པའི་མོས་པ་མཛོད། ༀ་ཨཱཿཧཱུྃ་ཞེས་པའམ་ཡང་ན་སྔགས་སྔ་མས་གཏད་ཀྱང་རུང་ངོ་། །དེ་ལྟར་མེ་ཏོག་གཏད་ནས། གསོལ་འདེབས་ཡོད་པའི་རིགས་ལ། སླར་ཡང་སྙིམ་པ་མེ་ཏོག་དང་བཅས་ཏེ་ཐལ་མོ་སྦྱར་ནས་གསོལ་བ་གདབ་པ་འདིའི་རྗེས་ཟློས་མཛོད། ཅེས་མཚམས་སྦྱར། དེ་བཞིན་དུ། མེ་ཏོག་དོར་བའི་ཚེ། སླར་ཡང་ལྷ་གང་དང་སྨོན་ལམ་གྱིས་འབྲེལ་པ་བརྟག་པའི་དོན་དུ་མེ་ཏོག་དོར་བ་ལ་ཚིག་འདིའི་རྗེས་ཟློས་མཛོད། ཅེས་དང་། མིག་དར་འབྱེད་པའིི་ཚེ། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་གསེར་གྱི་ཐུར་མ་འདྲ་བ་འཕྲོས་པས་ཁྱེད་རང་རྣམས་ཀྱི་མ་རིག་པའི་ལིང་ཐོག་མིག་དར་དང་ལྷན་ཅིག་བསལ་ནས་དག་པ་ཡེ་ཤེས་ཀྱི་སྤྱན་དང་ལྡན་པར་གྱུར་པའི་མོས་པ་མཛོད། ཅེས་དང་། འཇུག་པ་རྫོགས་ནས་དབང་དངོས་གཞིའི་མགོར་སླེབ་པ་དང་། འོ་དེ་དག་གིས་འཇུག་པའི་ཆོས་རྣམས་ལེགས་པར་སོང་ནས་སླར་ཡང་དབང་དངོས་གཞི་ཞུ་བའི་ཡོན་དུ་མཎྜལ་འབུལ་མཛོད། ཅེས་པ་ལྟ་བུ་སྐབས་ཐོབ་ཤེས་པས་མཚམས་སྦྱོར་ཅི་རིགས་པ་སྦྱར་བར་བྱའོ། །དེ་དག་ནི་དབང་ཐམས་ཅད་ཀྱི་སྔོན་འགྲོ་སྦྱོར་བའི་སྐབས་ཀྱི་རྒྱུག་བྱང་ངོ་། ༈ །དེ་ནས་རྗེས་ཀྱི་བྱ་བ་ནི། སྟ་གོན་གྱི་མཇུག་ཏུ་བཀྲ་ཤིས་རྒྱ་ཆེར་བརྗོད་པས་མཐའ་བརྒྱན་པར་བྱ་སྟེ། དེ་ཡང་འདི་ལྟར། འོ་དེ་དག་གིས་སྟ་གོན་གྱི་ཆོས་རྣམས་ལེགས་པར་གྲུབ་སྟེ་སླར་ཡང་ཕྱོགས་བཅུའི་རྒྱལ་བ་སྲས་དང་སློབ་མར་བཅས་པ་ཐམས་ཅད་མདུན་གྱི་ནམ་མཁར་བྱོན་ཏེ། ཕྱག་ནས་མེ་ཏོག་གི་སིལ་མ་ཀུན་ཏུ་འཐོར་ཞིང་ཞལ་ནས་བཀྲ་ཤིས་པའི་གླུ་དབྱངས་ཕྱོགས་བཅུར་སྒྲོགས་པའི་མོས་པ་མཛོད་ཅིག །ༀ་ཡེ་དྷརྨཱ་ཏེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ་ཡེ་སྭཱ་ཧཱ། དཀོན་མཆོག་གསུམ་ལ་ཕྱག་འཚལ་ལོ། །འཇིག་རྟེན་འདིའམ་གང་དག་འདས་པ་དང་། །མཐོ་རིས་དག་ན་རིན་ཆེན་མཆོག་ཡོད་པ། །དེ་བཞིན་གཤེགས་པ་ལྷ་ཡི་ལྷར་གྱུར་པ། །མི་ཡི་མཆོག་དང་འདིར་ནི་མཚུངས་པ་མེད། །དེ་བས་འདི་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ཟད་པ་ཆགས་བྲལ་བདུད་རྩི་འདུས་མ་བྱས། །ཤེས་པས་ཤཱཀྱ་ཐུབ་དེས་རབ་ཏུ་ཕྱེ། །བདུད་རྩི་ཞི་བ་འདུས་བྱས་མ་ཡིན་པ། །ཆོས་དེ་དང་ནི་མཚུངས་པ་གང་ཡང་མེད། །དེ་བས་འདི་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །མཆོག་ཏུ་གང་འདོད་ཚུལ་བཞིན་རབ་བསྟན་པ། །སྟོན་པའི་རྣལ་འབྱོར་བླ་མེད་རྟག་སྒྲུབ་པ། །རྡོ་རྗེ་ལྟ་བུའི་མིག་གཉིས་ལམ་མཐོང་བ། །ཏིང་འཛིན་དེ་དང་མཉམ་པ་ཡོད་མ་ཡིན། །དེ་བས་འདི་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །གང་ཟག་ཆེན་པོ་བརྒྱད་པོ་རབ་བསྔགས་ཤིང་། །གང་ཟག་ཟུང་བཞིར་བརྗོད་པ་དེ་དག་ནི། །དྲང་སྲོང་ཆེན་པོ་གང་ཟག་མཚུངས་མེད་པ། །བདེ་བར་གཤེགས་པས་སྦྱིིན་པའི་གནས་ཞེས་གསུངས། །དེ་ལ་སྦྱིན་ན་འབྲས་བུ་ཆེར་འགྱུར་ཏེ། །ཞིང་རབ་གཤིན་ལ་ས་བོན་བཏབ་པ་བཞིན། །འདི་ནི་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །གང་དག་བསྟན་པའི་ཡིད་ཀྱིས་རབ་བརྩོན་ཞིང་། །ག་ཏ་མ་ཡི་བསྟན་ལ་འཇུག་བྱེད་པ། །དེ་དག་ཐོབ་ནས་བདུད་རྩི་འཇུག་ཐོབ་སྟེ། །མུན་པ་བསལ་ནས་མྱ་ངན་འདས་ཐོབ་པ། །དེ་བས་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ལྟ་བ་འདི་ལ་སྦྱར་མ་ཐག་ཏུ་ནི། །འཇིག་ཚོགས་ལྟ་དང་ཚུལ་ཁྲིམས་བརྟུལ་ཞུགས་དང་། །ཐེ་ཚོམ་དང་ནི་ཉོན་མོངས་གསུམ་པོ་དག །ཅིག་ཆར་སྤངས་ཏེ་འཕགས་པའི་བདེན་མཐོང་བ། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ལུས་སམ་ངག་གམ་འོན་ཏེ་ཡིད་ཀྱི་ཀྱང་། །སྡིག་པ་རྣམ་གསུམ་ནམ་ཡང་མི་བྱེད་ཅིང་། །གློ་བུར་བྱས་ནའང་འཆབ་པར་མི་བྱེད་ལ། །དེ་ལྟར་དེ་དག་ལྟ་བས་འཛིན་མི་བྱེད། །དེ་བས་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ཇི་ལྟར་དབང་པོའི་སྡོང་པོ་སར་བཙུགས་པ། །ཕྱོགས་བཞིའི་རླུང་རྣམས་ཀྱིས་ནི་མི་གཡོ་ལྟར། །འཕགས་པའི་ལམ་གྱི་དམ་པ་མཐོང་བ་ཡི། །གང་ཟག་འཕགས་པའི་དགེ་འདུན་དེ་བཞིན་ནོ། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ཤེས་རབ་ཟབ་མོས་ཤིན་ཏུ་བསྟན་པ་ཡི། །འཕགས་པའི་བདེན་པ་སུ་དག་རྣམ་སྒོམ་ཞིང་། །ལུས་ཀྱང་སྦྱིན་པར་ཡིད་ལ་བྱས་པ་ནི། །དེ་དག་འཇིགས་པ་བརྒྱད་དང་འཕྲད་མི་འགྱུར། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག །ཇི་ལྟར་མེ་ནི་རླུང་གིས་རབ་གཏོར་བ། །ལག་ཏུ་བླངས་ཏེ་བགྲང་དུ་མེད་པ་ཉིད། །དེ་ལྟར་ཀུན་ཏུ་སྦྱར་བ་རབ་བཏང་བ། །སངས་རྒྱས་སྲས་རྣམས་བསྟན་དུ་མེད་པར་འགྲོ། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག ༈ །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །སྟོན་མཆོག་ལྷ་དང་མིས་ནི་མཆོད་འོས་པ། །སངས་རྒྱས་ཕྱག་འཚལ་དེང་འདིར་དགེ་བར་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །ཞི་བ་ཆགས་བྲལ་ལྷ་མིས་མཆོད་འོས་པ། །ཆོས་ལ་ཕྱག་འཚལ་དེང་འདིར་དགེ་བར་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེ་གྱུར་ཅིག །ཚོགས་ཀྱི་དམ་པ་ལྷ་མིས་མཆོད་འོས་པ། །དགེ་འདུན་ཕྱག་འཚལ་དེང་འདིར་དགེ་བར་ཤོག ༈ །གང་ལ་སེར་སྣ་རྣམས་ཆགས་པ། །རྣམ་བཅོམ་དྲི་མ་མེད་མཛད་ཅིང་། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་འགྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེས། །ཁྱེད་ལ་བདེ་ལེགས་མཛད་པར་འགྱུར། །སྟོན་པ་རྒྱུག་པ་རྣམ་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་གིས་བདེ་བ་མངའ་མཛད་དེས། །ཁྱེད་ལ་བདེ་ལེགས་མཛད་པར་འགྱུར། །སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་འཁོར་བར་འཁོར་བ་ཡི། །སེམས་ཅན་ཀུན་གྱི་རྟེན་གྱུར་ཅིང་། །གླིང་དང་དཔུང་གཉེན་གྱུར་པ་དེས། །ཁྱེད་ལ་བདེ་ལེགས་མཛད་པར་འགྱུར། །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་བསླུ་བ་མི་མངའ་ལ། །གསུང་གཙང་གཙང་མར་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་འབྱོར་གྱུར་ཅིང་། །དོན་གྲུབ་ཚོགས་ཀྱང་གྲུབ་པ་དེས། །ཁྱེད་ལ་བདེ་ལེགས་མཛད་པར་འགྱུར། གང་ཞིག་སྐྱེས་པས་ས་རྣམས་དང་། །ནགས་ཚལ་བཅས་པར་རབ་གཡོས་ཤིང་། །སེམས་ཅན་ཐམས་ཅད་རབ་དགའ་དེས། །ཁྱེད་ལ་བདེ་ལེགས་མཛད་པར་འགྱུར། །བྱང་ཆུབ་སྙིང་པོར་གང་ཞིག་གིས། །ས་དག་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ་ལེགས་མཛད་པར་འགྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམ་གསུངས་པ། །ཐུབ་པའི་སྙན་པ་གང་བྱུང་དེས། །ཁྱེད་ལ་བདེ་ལེགས་མཛད་པར་འགྱུར། །ཡིད་འཕྲོག་གང་གིས་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང་། །ཚོགས་ཀུན་དབང་དུ་མཛད་པ་དེས། །ཁྱེད་ལ་བདེ་ལེགས་མཛད་པར་འགྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་བཅས་ལྷ་བདེ་ལེགས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ཀྱི་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀྱིས་ནི་བསམ་པ་ཡིས། །ཁྱེད་ཀྱི་དོན་འདོད་གང་ཡིན་པ། །དོན་དེ་དེ་རིང་འགྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་གྱུར། །ཁྱེད་ཅག་ལམ་འགྲོ་བདེ་ལེགས་ཤོག །ཕྱིར་ལྡོག་དག་ཀྱང་བདེ་གྱུར་ཅིག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལའང་བདེ་ལེགས་ཤིང་། །ཁྱེད་ཅག་ཀུན་ཏུ་བདེ་ལེགས་ཤོག །ཁྱེད་ཅག་སྡིག་པར་མ་གྱུར་ཅིག །ཅེས་དང་། ༈ འཇིག་རྟེན་འདི་དང་གཞན་དང་མཐོ་རིས་ན། །རིན་ཆེན་རྒྱ་ཆེན་མཆོག་ནི་གང་ཡོད་པ། །དེས་ནི་རྫོགས་པའི་སངས་རྒྱས་རིན་ཆེན་ལ། །ཅིས་ཀྱང་གྲངས་དང་བགྲང་དང་ཆ ར་མི་ཕོད། །ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདི་ནི་ཤིན་ཏུ་བདེ་ལེགས་ཤོག །ཞི་འགོག་བདུད་རྩིའི་ཤིན་ཏུ་གྱ་ནོམ་གང་། །ཤཱཀྱ་ཐུབ་པས་མཉམ་བཞག་ཐུགས་ཆུད་པ། །ཆོས་དེ་དང་ནི་མཚུངས་པ་ཡོད་མིན་ཏེ། །དེ་སྔོན་བྱས་ན་ཕྱིན་ཆད་མྱ་ངན་མེད། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དམ་པའི་ཆོས་ཀྱི་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །རྒྱལ་བས་གང་དག་གང་ཟག་བརྒྱད་གསུངས་པ། །དེ་དག་རྣམས་ནི་སྐྱེས་བུ་ཟུང་བཞི་སྟེ། །སྦྱིན་གནས་དེ་དག་ས་སྟེང་ཤིན་ཏུ་དཀོན། །དེ་དག་རྣམས་ལ་བྱིན་ན་དཔག་མེད་གྱུར། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག ༡ །དམ་པ་གཙོ་བོ་མཆོག་སྦྱིན་གྱ་ནོམ་པ། །འོད་མཆོག་དཔའ་བོ་དམ་པ་མཆོག་གི་གནས། །ཤེས་རབ་དམ་པ་མཆོག་གི་དམ་པ་མཆོག །མཆོག་མིན་མཆོག་མཁྱེན་འདི་ནི་བཅོམ་ལྡན་གཅིག །ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །ཏིང་འཛིན་དམ་པ་བར་ཆད་མེད་པ་གང་། །མཐའ་ཡས་བློ་ལྡན་དེ་བཞིན་གཤེགས་གསུངས་པ། །ཏིང་འཛིན་དེ་བརྟན་རྡོ་རྗེ་དཔེར་བྱས་པ། །ཏིང་འཛིན་དེ་དང་མཚུངས་པའི་ཏིང་འཛིན་མེད། །ངོ་མཚར་ཤིན་ཏུ་རྨད་བྱུང་དཔག་མེད་དེ། །ཏིང་ངེ་འཛིན་གྱི་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །ཇི་ལྟར་སྒོ་གཏན་དམ་ཞིང་རབ་དམ་སྟེ། །སྟོབས་ཆེན་རླུང་བཞི་དག་གིས་མི་བསྐྱོད་པ། །དེ་ལྟར་མཁས་པ་བདེན་བཞི་མཐོང་གནས་པ། །འཇིག་རྟེན་སྨྲ་བ་རྣམས་ཀྱིས་འདིར་མི་གཡོ། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག ༢ །ཐམས་ཅད་ཟིལ་གནོན་ཀུན་མཁྱེན་ཐམས་ཅད་གཟིགས། །ཐམས་ཅད་མཁྱེན་པ་སྟོབས་རྣམས་ཀུན་དང་ལྡན། །ཀུན་གྱི་དམ་པ་འཇིགས་པ་ཀུན་དང་བྲལ། །བསམ་པ་ཀུན་མཁྱེན་འདི་ནི་བཅོམ་ལྡན་གཅིག །ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །སྲིད་པ་འགོག་ཅིང་མི་གཡོ་འགྱུར་བ་མེད། །སྐྱོན་མེད་འཇིགས་པ་ཀུན་ལས་རྣམ་པར་གྲོལ། །ཤིན་ཏུ་འགོག་ཅིང་གྱ་ནོམ་ངེས་པར་འབྱུང་། །ཤིན་ཏུ་དྲི་མེད་ཞི་བ་བློས་མི་འཕྲོག །ངོ་མཚར་ཤིན་ཏུ་རྨད་བྱུང་དཔག་མེད་དེ། །དམ་པ འི་ཆོས་ཀྱི་རིིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །ཤིན་ཏུ་སྡུག་བསྔལ་སྟོན་ཅིང་བདེ་སྦྱིན་པའི། །བདེན་རྣམས་མཐོང་སྟེ་གང་དག་བག་ཡོད་པ། །བདེན་པ་རིན་ཆེན་རྣམས་ལ་དོགས་བྲལ་བ། །དེ་དག་སྐྱེ་བ་བརྒྱད་པ་ཕྱིས་མི་ལེན། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག ༣ །དམ་པ་རྣམས་ཀྱིས་དམ་པ་དོན་དམ་མཁྱེན། །མཆོག་དང་མཆོག་མིན་མཁྱེན་ཅིང་དོན་དམ་བརྩོན། །གཞན་གྱིས་མི་ཕྲོགས་དམ་པ་ཐུགས་ཆུད་རྟོགས། །ཤིན་ཏུ་སྡུག་བསྔལ་རྣམས་ཀྱི་དཔུང་གཉེན་མཆོག །ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །འདུན་པ་བསྐྱེད་ནས་རྣལ་འབྱོར་ལྡན་གྱུར་ཅིང་། །ག་ཏམ་བསྟན་ལ་རྟག་བརྩོན་རབ་གྲོལ་ནི། །གཞན་གྱིས་མི་བཀྲི་བ་དག་ཞི་བདེར་རེག །འདི་ལ་དེ་རེག་གྲངས་སུ་ཕྱིན་མི་འགྱུར། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །བདེན་པ་མཐོང་བས་བརྗེད་པས་བརྒྱ་ལམ་ན། །གལ་ཏེ་སྡིག་པ་འགའ་ཞིག་བྱས་གྱུར་ཀྱང་། །དེ་ནི་དེ་འཆལ་པ་ཡི་འོས་མིན་ཏེ། །ཆོས་ཉིད་འདི་ནི་མི་གཡོ་གནས་ཕྱིར་རོ། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག ༤ །ལྷ་དང་བཅས་པའི་འཇིག་རྟེན་ཐམས་ཅད་ན། །སངས་རྒྱས་དང་ནི་ལྷག་པའམ་མཚུངས་པ་མེད། །ལྷ་དང་མི་ཡི་སྟོན་པ་བླ་ན་མེད། །སྟོན་པ་དེད་དཔོན་སྨན་པ་རྣམས་ཀྱི་མཆོག །ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །ས་གའི་ཟླ་བ་དང་པོར་ཐུབ་པ་ཡིས། །ནགས་ཁྲོད་ཆོས་ཀྱི་དམ་པ་རབ་བརྙེས་པ། །ཆོས་དེ་དང་ནི་ལྷག་པའམ་མཚུངས་པ་མེད། །འདི་ལ་དེ་རེག་གྲངས་སུ་ཕྱིན་མི་འགྱུར། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དམ་པ འི་ཆོས་ཀྱི་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །སྡིག་པ་རྙེད་ཟད་གསར་དུ་བྱས་མེད་ལ། །རིམས་ནད་མེད་པས་འཇིགས་མེད་མྱ་ངན་བྲལ། །རྩ་བ་འགགས་པས་སྲེད་པ་མི་སྐྱེད་པ། །བསྟན་པ་མར་མེ་བཞིན་དུ་འབར་བར་འགྱུར། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །བདེ་ལེགས་ཀྱི་ཚིགས་སུ་བཅད་པ་རྫོགས་སོ། །ཞེས་དང་། ༈ བཅོམ་ལྡན་རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་འོད་དཔག་མེད་དང་དོན་ཡོད་གྲུབ། །རིགས་ལྔ་བདེ་གཤེགས་རྣམས་ཀྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་སེམས་མ་དང་ནི་རིན་ཆེན་སེམས་མ་དང་། །ཆོས་ཀྱི་སེམས་མ་དང་ནི་ལས་ཀྱི་སེམས་མར་བཅས། །བཅོམ་ལྡན་ཡུམ་མཆོག་རྣམས་ཀྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་སེམས་དཔའ་དང་ནི་རྡོ་རྗེ་རྒྱལ་པོ་དང་། །རྡོ་རྗེ་ཆགས་པ་དང་ནི་རྡོ་རྗེ་ལེགས་པར་བཅས། །བཅོམ་ལྡན་མི་བསྐྱོད་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་རིན་ཆེན་དང་ནི་རྡོ་རྗེ་གཟི་བརྗིད་དང་། །རྡོ་རྗེ་རྒྱལ་མཚན་དང་ནི་རྡོ་རྗེ་བཞད་པར་བཅས། །བཅོམ་ལྡན་རིན་འབྱུང་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་ཆོས་རབ་དང་ནི་རྡོ་རྗེ་རྣོན་པོ་དང་། །རྡོ་རྗེ་འཁོར་ལོ་དང་ནི་རྡོ་རྗེ་སྨྲ་བར་བཅས། །བཅོམ་ལྡན་སྣང་མཐའི་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་ལས་རབ་དང་ནི་རྡོ་རྗེ་བསྲུང་བ་དང་། །རྡོ་རྗེ་གནོད་སྦྱིན་དང་ནི་རྡོ་རྗེ་ཁུ་ཚུར་བཅས། །བཅོམ་ལྡན་དོན་གྲུབ་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ལྷ་མོ་སྒེག་མོ་དང་ནི་ལྷ་མོ་ཕྲེང་བ་མ། །ལྷ་མོ་གླུ་མ་དང་ནི་ལྷ་མོ་གར་མར་བཅས། །ནང་གི་མཆོད་པའི་ལྷ་མོའི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ལྷ་མོ་བདུག་སྤོས་མ་དང་ལྷ་མོ་མེ་ཏོག་མ། །ལྷ་མོ་མར་མེ་མ་དང་ལྷ་མོ་དྲི་མར་བཅས། །ཕྱི་ཡི་མཆོད་པའི་ལྷ་མོའི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །སྒོ་བ་ལྕགས་ཀྱུ་མ་དང་སྒོ་བ་ཞགས་པ་དང་། །སྒོ་བ་ལྕགས་སྒྲོག་མ་དང་སྒོ་བ་དྲིལ་བུར་བཅས། །བཅོམ་ལྡན་སྒོ་སྲུང་རྣམས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ཞེས་དང་། ༈ བཅོམ་ལྡན་རྣམ་པར་གཟིགས་ནི་རྒྱལ་རིགས་གབ་བརྗིད་ཅན། །ཚེ་ལོ་བརྒྱད་ཁྲིའི་དུས་ན་གྲོང་ཁྱེར་མཛེས་ལྡན་དུ། །ཤི་རི་ཤ་ཡི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །བདེ་གཤེགས་གཙུག་ཏོར་མངའ་བ་རྒྱལ་རིགས་རྫུ་འཕྲུལ་ཅན། །ཚེ་ལོ་བདུན་ཁྲིའི་དུས་ན་སུ་ཀའི་གྲོང་ཁྱེར་དུ། །ཤིང་མཆོག་སུམ་དྷའི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །རྒྱལ་བ་ཐམས་ཅད་སྐྱོབ་པ་རྒྱལ་རིགས་བློ་གྲོས་ཅན། །ཚེ་ལོ་དྲུག་ཁྲིའི་དུས་ན་གྲོང་ཁྱེར་མཉམ་མེད་དུ། །ཤིང་མཆོག་སཱ་ལའི་དྲུང་དུ་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །ཐུབ་པ་འཁོར་བ་འཇིག་ནི་སྟོབས་ལྡན་བྲམ་ཟེའི་རིགས། །ཚེ་ལོ་བཞི་ཁྲིའི་དུས་ན་གྲོང་ཁྱེར་མཛེས་ལྡན་དུ། །ཤི་རི་ཤ་ཡི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །འདྲེན་པ་གསེར་ཐུབ་བསླབ་པ་མཆོག་ལྡན་བྲམ་ཟེའི་རིགས། །ཚེ་ལོ་སུམ་ཁྲིའི་དུས་ན་གྲོང་ཁྱེར་བདེ་ལྡན་དུ། །ཨུ་དུམ་བཱ་རའི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །སྐྱོབ་པ་འོད་སྲུང་རྒྱལ་རིགས་བླ་མེད་ཡོན་ཏན་ཅན། །ཚེ་ལོ་ཉི་ཁྲིའི་དུས་ན་ཝཱ་ར་ཎཱ་སཱི་རུ། །ནྱ་གྲོ་དྷ་ཡི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །འགྲོ་མགོན་ཤཱཀྱ་ཐུབ་པ་རྒྱལ་རིགས་བརྩོན་འགྲུས་ཅན། །ཚེ་ལོ་བརྒྱ་པའི་དུས་ན་སེར་སྐྱའི་གྲོང་ཁྱེར་དུ། །ཨ་ཤྭཪྠ་ཡི་ཤིང་དྲུང་མངོན་པར་སངས་རྒྱས་པ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །སངས་རྒྱས་རབས་བདུན་བཀྲ་ཤིས་ཕུན་སུམ་ཚོགས་པ་གང་། །ཕྱོགས་དུས་ཀུན་གྱི་བདེ་གཤེགས་བྱིན་རླབས་རྨད་བྱུང་བ། །ཆོས་དབྱིངས་རྣམ་དག་རྟེན་འབྲེལ་སྟོབས་ལྡན་མི་འགྱུར་བ། །དེང་འདིར་བདེ་གཤེགས་བཀྲ་ཤིས་ཕུན་སུམ་ཚོགས་གྱུར་ཅིག །ཅེས་དང་། ༈ རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པའི་མཐར་ཕྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོང་བ། །མགོན་པོ་ཡོན་ཏན་ཐམས་ཅད་རྫོགས་པའི་བཀྲ་ཤིས་པ། །དགེ་མཉམ་བསམ་སེམས་ལྡན་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །སངས་རྒྱས་ཡོན་ཏན་ཀུན་གྱི་རྒྱན་གྱིས་བརྒྱན་མཛད་ཅིང་། །ཡང་དག་བདེན་པའི་འབྱོར་པ་སྦྱིན་མཛད་མི་སླུ་བ། །རིན་ཆེན་འབྱུང་ལྡན་ཞེས་བྱའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །བསམ་གཏན་ཏིང་འཛིན་ཡེ་ཤེས་དམ་པ་ཕ་རོལ་ཕྱིན་པའི་གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་ཞིང་། །ཚེ་གྲངས་མེད་པར་བྱིན་གྱིས་རློབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །སེམས་ཅན་དོན་གྱི་ལས་ལ་ཐུགས་ནི་སྦྱོར་མཛད་ཅིང་། །འགྲོ་བ་ཀུན་གྱི་འཆིང་བས་བཅིངས་ལས་གྲོལ་མཛད་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཅེས་དང་། ༈ བཅོམ་ལྡན་གསེར་མདོག་རི་ཡི་རྒྱལ་པོ་འདྲ། །འཇིག་རྟེན་གསུམ་མགོན་འཇམ་དཔལ་གཞོན་ནུའི་སྐུ། །བདེ་གཤེགས་སྐུ་ཡི་བཀྲ་ཤིས་གང་ཡིན་པ། །བཀྲ་ཤིས་དེས་ནི་དེང་འདིར་བདེ་ལེགས་ཤོག །བཅོམ་ལྡན་དུང་མདོག་རི་ཡི་རྒྱལ་པོ་འདྲ། །འཇིག་རྟེན་གསུམ་མགོན་སྤྱན་རས་གཟིགས་ཀྱི་དབང་། །བདེ་གཤེགས་གསུང་གི་བཀྲ་ཤིས་གང་ཡིན་པ། །བཀྲ་ཤིས་དེས་ནི་དེང་འདིར་བདེ་ལེགས་ཤོག །བཅོམ་ལྡན་ལྗང་སེར་རི་ཡི་རྒྱལ་པོ་འདྲ། །འཇིག་རྟེན་གསུམ་མགོན་ཕྱག་ན་རྡོ་རྗེ་སྟེ། །བདེ་གཤེགས་ཐུགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་དང་། ༈ རྒྱ་མཚོ་ལྟ་བུར་བརྒལ་དཀའ་འཁོར་བའི་འདམ་ལས་བརྒལ། །བསོད་ནམས་ཡེ་ཤེས་ཚོགས་གཉིས་བསགས་དཀའ་མ་ལུས་རྫོགས། །འགྲོ་བ་ཀུན་གྱི་གཉེན་གཅིག་གྱུར་པ་དེ་བཞིན་གཤེགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །རང་དོན་སྤངས་ཤིང་གཞན་དོན་རྟག་ཏུ་ལྷུར་ལེན་ཅིང་། །འདོད་པའི་འདོད་ཡོན་ལྔ་ལ་ལྟ་བ་རྒྱངས་བསྲིངས་ཏེ། །དད་དང་བརྩོན་འགྲུས་ལྷུར་ལེན་གྲོགས་མཆོག་བྱང་ཆུབ་སེམས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །སྐྱེ་འགགས་མེད་ཅིང་རྟོག་པའི་འཆིང་བྱེད་མཐའ་དག་སྤངས། །མ་རིག་མུན་པ་འཇོམས་བྱེད་སྟོང་ཉིད་སྒྲོན་མའི་མཆོག །དམིགས་པ་སྣ་ཚོགས་སྤངས་པ་ལ་ལམ་གྱི་བདེ་སྒྲུབ་ཆོས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཅེས་དང་། ༈ ཡོན་ཏན་རྒྱས་པའི་རྟགས་སུ་སྐུ་མདོག་གསེར་འདྲ་བ། །ཤེས་རབ་རྟགས་སུ་རལ་གྲི་པོ་ཏི་ཕྱག་ན་བསྣམས། །འཕགས་པ་འཇམ་དཔལ་གཞོན་ནུའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཐུགས་རྗེའི་རྟགས་སུ་སྐུ་མདོག་ཟླ་བའི་འོད་ཆགས་པ། །སྐྱོན་གྱིས་མ་གོས་ཕྱག་མཚན་ཕྱག་ན་པདྨ་བསྣམས། །འཕགས་པ་སྤྱན་རས་གཟིགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཆོས་ཉིད་མི་འགྱུར་རྟགས་སུ་སྐུ་མདོག་མཐིང་ནག་སྔོ། །ཐབས་དང་ཤེས་རབ་གཉིས་མེད་ཕྱག་ན་རྡོ་རྗེ་བསྣམས། །འཕགས་པ་ཕྱག་ན་རྡོ་རྗེའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཅེས་དང་། ༈ ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་དང་པོའོ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་རྒུ་རྣམས་ལ་ཞི་བྱེད་པ། །དེ་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པའི་ཆོས་ལྡན་ཐོབ་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །དེ་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །སེམས་ཅན་ཀུན་ལ་ཕན་ཕྱིར་བྱང་ཆུབ་མངའ་བ་པོ། །དོན་རྣམས་ཐམས་ཅད་འགྲུབ་པར་བརྟུལ་བ་ཡོངས་ལྡན་པ། །ཚོགས་ཀྱི་ལམ་དགྱེས་ཐུབ་པའི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་དེ་བཞིན་གཤེགས་པ་དགའ་ལྡན་ལྷའི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་ཏེ། །དབང་བཅས་ལྷ་ཡིས་བསྐོར་བའི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ལོ་མ་མེ་ཏོག་འོད་འབར་ཉམས་དགའ་ལུམྦིའི་ཚལ། །ལྷ་མང་དག་གིས་བསྟེན་པར་མགོན་པོ་བལྟམས་པ་ན། །སྲིད་པ་མཐར་ཕྱིན་པ་ཡི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །གྲོང་ཁྱེར་སེར་སྐྱའི་གནས་ནས་རྒྱལ་པོའི་ཕོ་བྲང་དུ། །ལྷུམས་ནས་བལྟམས་པ་སྟོན་པ་བདེ་གཤེགས་ཟས་གཙང་སྲས། །མྱུར་བསྐྲུན་བདུད་རྩིའི་ཆུས་གཏོར་བ་ཡི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །གྲོང་ཁྱེར་དམ་པ་སེར་སྐྱའི་གནས་ཞེས་བྱ་བར་ནི། །རྨད་དུ་གྲགས་པ་ཆེ་བའི་ལྷ་ཡིས་མངོན་བསྟོད་པ། །བསམ་ཡས་དགེ་བསྒྲུབས་བསོད་ནམས་ཕུང་པོའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །དགྱེས་ཤིང་ནམ་ཕྱེད་གྲོང་ཁྱེར་མཆོག་ནས་མངོན་བྱུང་སྟེ། །དཀའ་ཐུབ་ཚལ་དུ་མངོན་པར་གཤེགས་ཤིང་ཚངས་ལ་སོགས། །ལྷ་ཡི་ཚོགས་ཀྱིས་ཡོངས་སུ་བསྐོར་བའི་བཀྲ་ཤིས་གང་། །བཀྲ་ཤིས་དེ་ནི་སྐྱེ་རྒུ་རྣམས་ལ་ཞི་བྱེད་ཤོག །རབ་ཏུ་འོད་འབར་གསེར་དང་འདྲ་བའི་སྐུ་མངའ་ཞིང་། །བཻ་ཌཱུརྱ་ལྟར་སྔོ་བའི་རྩ་བཏིང་སྟེང་བཞུགས་ཏེ། །སྐྱིལ་མོ་ཀྲུང་བཅས་མི་གཡོ་མཆོག་གི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཆུ་བོའི་འགྲམ་ན་རྩྭ་ཤའི་ཕྲེང་གིས་ཡོངས་བསྐོར་བ། །ཤིན་ཏུ་རྨད་དུ་བྱུང་བའི་སྲིད་པ་སེལ་མཛད་པ། །ཀླུ་ཡིས་རྒྱལ་པོས་ཕྱག་བྱས་པ་ཡི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཤིང་རྒྱལ་དྲུང་གཤེགས་བྱམས་པའི་སྟོབས་ཀྱིས་བདུད་ཀྱི་ཕྱོགས། །མང་པོ་བཏུལ་ཏེ་ས་སྟེང་དང་ནི་ནམ་མཁའ་ལ། །བཅོམ་ལྡན་བཀྲ་ཤིས་རྣམ་པ་སྣ་ཚོགས་གང་བྱུང་བ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །སྡུག་བསྔལ་མཐའ་དག་གཞིག་ཕྱིར་རྡོ་རྗེའི་གདན་བཞུགས་ཏེ། །ནམ་གྱི་ཐོ་རངས་བདུད་བཞི་དགྲ་བོ་རྣམས་བཏུལ་བ། །སྟོན་པ་བདེ་བར་གཤེགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །གྲོང་ཁྱེར་ཝ་ར་ཎཱ་སིར་དྲང་སྲོང་མཆོག་བཞུགས་ནས། །ཆོས་ཀྱི་འཁོར་ལོ་མཆོག་བརྟན་པ་ཡི་བཀྲ་ཤིས་གང་། །ལྷ་ཡུལ་དེང་འདིར་ཤིན་ཏུ་རྨད་དུ་བྱུང་གྱུར་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །བཀྲ་ཤིས་གང་ཞིག་ཕན་བྱེད་དམ་པ་དག་བྱེད་པ། །བསོད་ནམས་བྱ་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཤཱཀྱ་ཐུབ་པའི་སེང་གེས་གང་གསུངས་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །མུ་སྟེགས་བྱེད་པ་ཀུན་གྱི་ང་རྒྱལ་གཞོམ་པ་དང་། །འགྲོ་ལ་བདེ་བ་བསྐྱེད་ཕྱིར་ཆོ་འཕྲུལ་དག་པ་དག །ཉེ་བར་སྟོན་པ་རྒྱལ་བའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་མཐོ་རིས་ནས་ནི་འདིར་གཤེགས་ཏེ། །ཚངས་པ་ལ་སོགས་ལྷ་ཚོགས་ལག་ན་རྔ་ཡབ་གདུགས། །སྣ་ཚོགས་ཐོགས་པས་ཡོངས་སུ་བསྐོར་བའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །དེ་བཞིན་གཤེགས་པ་ཞི་བ་མཆོག་ཏུ་ཉེར་གཤེགས་པ། །མནྡྷ་ར་བའི་མེ་ཏོག་མང་པོས་མངོན་མཆོད་པ། །ལྷ་མཆོག་རྣམས་ཀྱིས་མངོན་པར་བསྟོད་པའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ལྷ་དང་ཀླུ་དང་མི་ཡི་དབང་པོས་ཕྱག་བྱས་པ། །མཁའ་ལྡིང་གནོད་སྦྱིན་དྲི་ཟའི་དབང་པོས་མཆོད་གྱུར་པ། །དེ་བཞིན་གཤེགས་པའི་སྟོབས་བཅུ་ལྡན་པའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཅེས་དང་། ༈ ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་འཕེལ་བ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ཏེ། །བདེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་སུ་བཅད་པ། བཅོམ་ལྡན་འདས་ཀྱིས་ཁྱིམ་བདག་དེས་པ་ལ་གསུངས་པ་རྫོགས་སོ། །རྒྱ་གར་གྱི་མཁན་པོ་ཛི་ན་མི་ཏྲ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ། ༈ །ཞེས་པ་རྣམས་ལས་གང་རུང་རེ་བླངས་ནས་བརྗོད་པར་བྱའོ། ༈ །དངོས་གཞིའི་ཉིན་དབང་རྫོགས་པ་དང་། འོ་དེ་ལྟར་དབང་བསྐུར་ལེགས་པར་ཐོབ་པ་དེ་ལ། ཕྱོགས་བཅུའི་རྒྱལ་བ་སོགས་སྟ་གོན་གྱི་སྐབས་ལྟར་བརྗོད་པའི་བཀྲ་ཤིས་མཐར་དམ་ཚིག་གི་རྣམ་དབྱེ་གང་ནུས་བཤད་ནས། འོ་དེ་ལྟར་རྩ་བ་དང་ཡན་ལག་གིས་བསྡུས་པའི་དམ་ཚིག་གི་རིམ་པ་རྣམས་རྡོ་རྗེ་སློབ་དཔོན་གྱི་བཀའ་ཇི་ལྟར་སྩལ་བ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱི། །ཞེས་ལན་གསུམ། དེ་ལྟར་དབང་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་མཎྜལ་ཕུལ། ཞེས་བརྗོད། སླར་ཡང་རང་རང་རྣམས་ཀྱི་ལུས་ལོངས་སྤྱོད་དུས་གསུམ་དུ་བསགས་པའི་དགེ་ཚོགས་རྒྱ་མཚོ་དང་བཅས་པ་ཐམས་ཅད་གཅིག་ཏུ་བསྡོམས་ནས་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ཏེ་འབུལ་ན་ཆ་ཤས་ནས་ལོངས་སྤྱོད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱིས་སློབ་མར་གཟུང་བ་དང་། །ཆ་ཤས་ཀྱང་ནི་སྤྱད་དུ་གསོལ། །ཞེས་ལན་གསུམ། དེ་ལྟར་དབང་ལེགས་པར་ཐོབ་པའི་དགེ་རྩ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་མངོན་དུ་འཐོབ་པའི་ཆེད་དུ་ཡོངས་སུ་བསྔོ་བའི་ཐུགས་འདུན་གནང་འཚལ། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཞེས་སོགས་དང་། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཅེས་སོགས་བསྔོ་སྨོན་གྱིས་མཐའ་བརྒྱན་པར་བྱའོ། །ཞེས་པ་འདི་ཡང་རྣལ་འབྱོར་མ་ཨཀྵ་ར་ཤྲཱི་དཱི་པཾ་གྱིས་མཛད་པའི་ཞི་ཁྲོ་ན་རཀ་དོང་སྤྲུགས་ཀྱི་དབང་གི་མཚམས་སྦྱོར་དང་། ལོ་ཆེན་རིན་པོ་ཆེ་དྷརྨ་ཤྲཱིའི་དབང་གི་འཁྱོགས་མཚམས་ཀྱི་བཤད་པ་དག་ལས་ཁོལ་དུ་བཏོན་ནས་འཁྲུགས་བསྡེབས་ཀྱི་རིམ་པས་གཏན་ལ་ཕབ་པ་སྟེ། བཙུན་པ་གཞན་ཕན་པས་སྔ་འགྱུར་བཀའ་མའི་དབང་ཆོག་རྣམས་ཀྱི་ཡན་ལག་ཏུ་ལེགས་པར་སྦྱར་བའོ།། །།