སྒྱུ་འཕྲུལ་བརྒྱུད་པའི་གསོལ་འདེབས་བཀའ་བརྒྱུད་གསེར་ཕྲེང། ཐུབ་བསྟན་ཆོས་ཀྱི་གླང་པོ།

སྒྱུ་འཕྲུལ་བརྒྱུད་པའི་གསོལ་འདེབས་བཀའ་རྒྱུད་གསེར་ཕྲེང་ཞེས་བྱ་བ་བཞུགས་སོ། །ན་མོ་རཏྣ་གུ་རུ་ཡེ། ཀ་དག་ཀུན་བཟང་གདོད་ནས་ཡེ་སངས་རྒྱས། །འཁོར་འདས་མཉམ་ཉིད་གཉིས་མེད་ཀློང་དུ་གྱུར། །དང་པོའི་སངས་རྒྱས་དཔལ་ལྡན་རྡོ་རྗེ་འཆང་། །གསང་བདག་ཆེན་པོ་ཁྱེད་ལ་མི་ཕྱེད་འདུད། །རྒྱལ་སྲས་དབང་ཕྱུག་གསང་བའི་བདག་པོའི་སྐུ། །སངས་རྒྱས་སྟོང་གི་བསྟན་པ་འཛིན་བྱེད་ཅིང་། །གདུལ་དཀའ་འདུལ་མཛད་ཕྱག་ན་རྡོ་རྗེ་བསྣམས། །གསང་བདག་གཉིས་པའི་ཞབས་ལ་གསོལ་བ་འདེབས། །ཐུབ་པ་ལུང་བསྟན་ཨོ་རྒྱན་མཁའ་འགྲོའི་གཙོ། །གསང་སྔགས་རྒྱུད་སྡེ་ཟབ་མོའི་རྒྱུད་འཆང་བ། །རིན་ཆེན་མང་གི་རྣམ་འཕྲུལ་ཐམས་ཅད་མཁྱེན། །ཀུ་རུ་ར་ཙའི་ཞབས་ལ་གསོལ་བ་འདེབས། །རྒྱལ་བའི་ཞབས་སློབ་མ་འོངས་ལུང་བསྟན་པ། །ཆོས་ཀྱི་རྒྱལ་པོ་ངེས་སྟོན་རྒྱ་མཚོའི་བདག །ཚེ་གཅིག་སངས་རྒྱས་ས་ལ་གཤེགས་མཛད་པ། །ཨིནྟྲ་བོ་དྷིའི་ཞབས་ལ་གསོལ་བ་འདེབས། །གསུང་རབས་རྒྱུད་སྡེ་ཟབ་མོའི་ཕ་རོལ་ཕྱིན། །དོན་བཅུད་གསང་སྔགས་ཟབ་མོའི་གནས་ལུགས་རྟོགས། །འདོད་ཡོན་སྤང་མེད་རྣམ་དག་ལམ་དུ་ཁྱེར། །ཤཱཀྱ་པུ་ཏྲའི་ཞབས༴ གསུང་རབ་རྒྱ་མཚོའི་གཞུང་དོན་ཁོང་དུ་ཆུད། །ཀ་དག་གནས་ལུགས་རང་བྱུང་འགྱུར་མེད་རྟོགས། །ས་བརྒྱད་མནོན་མཛད་སྟོབས་ཀྱི་ཕ་རོལ་ཕྱིར། །ས་བརྒྱད་སེམས་མའི་ཞབས༴ ཐེག་ཆེན་རྣལ་འབྱོར་གསང་སྔགས་ཟབ་མོའི་བདག །བླ་མེད་རྡོ་རྗེ་ཐེག་པའི་དོན་རྟོགས་ནས། །ཚེ་གཅིག་ཚེ་འདིར་རིག་འཛིན་མཆོག་ཐོབ་པ། །རྡོ་རྗེ་ཡོན་ཏན་གཟུངས་ལ་གསོལ༴ ཡན་ལག་ཐུགས་ཀྱི་སྒོར་ཞུགས་དངོས་གྲུབ་བརྙེས། །མི་འགྱུར་བདེ་སྟོང་དབྱེར་མེད་རྡོ་རྗེ་འཛིན། །ཟབ་མོའི་བསྟན་པའི་མངའ་བདག་ཆོས་ཀྱི་རྗེ། །གྲུབ་ཆེན་ཧཱུཾ་ཀ་ར་ལ༴ གསང་སྔགས་ཕྱི་ནང་ཆོས་ལ་མངའ་བརྙེས་ཤིང་། །རྒྱལ་བའི་དཀྱིལ་འཁོར་ཚོགས་རྣམས་ཞལ་གཟིགས་ནས། །སྣ་ཚོགས་ཐབས་ཀྱིས་འགྲོ་བའི་དོན་མཛད་པ། །པྲ་ཆེན་ཧ་སྟིའི་ཞབས༴ འཇམ་དཔལ་དབྱངས་ཀྱི་ཐུགས་རྗེས་རྗེས་བཟུང་ནས། །ཕྱི་ནང་ཐེག་པའི་ཆོས་རྣམས་ཐུགས་ལ་རྫོགས། །ངོ་མཚར་གཞུང་དང་གདམས་པ་དུ་མའི་གཏེར། །སངས་རྒྱས་གསང་བའི་ཞབས༴ འོད་དཔག་མེད་ཀྱི་རྣམ་འཕྲུལ་འཆི་མེད་སྐུ། །དྷ་ན་ཀོ་ཤའི་མཚོ་གླིང་པདྨར་སྐྱེས། །སངས་རྒྱས་བསྟན་པ་རྒྱས་མཛད་ཆོས་གཏེར་བདག །ཨོ་རྒྱན་པདྨ་ཞབས༴ པཎ་ཆེན་དུ་མ་མཛེས་པའི་དབུས་ན་མཛེས། །རིགས་པའི་གནས་ལྔ་མ་ལུས་ཐུགས་ལ་རྫོགས། །རྒྱ་གར་མཁས་པའི་མཆོག་གྱུར་བི་མ་ལ། །དྲི་མེད་བཤེས་གཉེན་ཞབས༴ ལུང་རིག་གསུང་གི་དབང་ཕྱུག་མངའ་བརྙེས་ཤིང་། །ཕ་རོལ་སྨྲ་བའི་ལོག་རྟོག་ཚར་གཅོད་ཅིང་། །ཟབ་རྒྱས་ཆོས་ཀྱི་རྒྱ་མཚོར་བསྒྱུར་མཛད་པ། །ལོ་ཙཱ་རིན་ཆེན་ཞབས༴ ཐུབ་དབང་བསྟན་པའི་རྒྱུ་འབྲས་ཐེག་པ་ལ། །ཇི་བཞིན་མ་ནོར་མངོན་སུམ་རྟོགས་གྱུར་ནས། །ཟག་མེད་དགོང་པ་མཆོག་ལ་མངའ་བརྙེས་པ། །ཀྱེ་རེ་མཆོག་སྐྱོང་ཞབས༴ རྣམ་དག་ཐེག་པའི་ལུང་ཆོས་ཐུགས་ལ་རྫོགས། །གསང་སྔགས་ཟབ་མོའི་སྒྲུབ་རྒྱུད་བསྟན་པ་འཛིན། །ཟག་མེད་ཟུང་འཇུག་མངོན་སུམ་རྟོགས་པ་ཡི། །རྒྱལ་བ་ཡོན་ཏན་ཞབས༴ ཐུབ་དབང་བསྟན་པའི་དཔལ་ལ་མངའ་བརྙེས་ཤིང་། །མི་འགྱུར་ཡེ་ཤེས་གོ་འཕང་མཆོག་ཐོབ་ནས། །ལུས་ཅན་ཐེག་མཆོག་ལམ་ལ་བཀོད་མཛད་པ། །ཡེ་ཤེས་རིན་ཆེན་ཞབས་ལ༴ མཁྱེན་རབ་སྟོང་ཉིད་རྒྱ་མཚོ་ཆེན་པོ་ལ། །འགགས་མེད་སྙིང་རྗེའི་རླབས་ཆེན་ཀུན་ནས་གཡོས། །གསང་སྔགས་ཟབ་དོན་རིན་ཆེན་འབྱུང་བའི་གནས། །ཡོན་ཏན་རྒྱ་མཚོའི་ཞབས༴ དེ་ཉིད་སྐུ་ཡི་སྲས་གྱུར་གསང་སྔགས་འཛིན། །རབ་འབྱམས་བསྟན་པའི་སྲོག་ཤིང་མཛོད་གསུམ་བདག །ཚད་མེད་ཐུགས་རྗེའི་བསླབ་བྱ་གཏིང་ནས་རྫོགས། །ཡེ་ཤེས་རྒྱ་མཚོའི་ཞབས༴ གསང་སྔགས་ཟབ་མོའི་གནས་ལུགས་ཁོང་དུ་ཆུད། །ཡང་ཕུར་སྨན་གསུམ་རྒྱུད་ལུང་མན་ངག་བཅས། །མཁས་གྲུབ་གཉིས་ཀྱི་རྒྱལ་རྒྱུད་འཛིན་མཛད་པ། །བློ་གྲོས་བྱང་ཆུབ་ཞབས༴ སྒྱུ་འཕྲུལ་ཐེག་པའི་ཆོས་ལ་དབང་ཐོབ་ནས། །ཉོན་མོངས་ཡེ་ཤེས་ཆེན་པོར་ལམ་དུ་ཁྱེར། །གསང་སྔགས་མངའ་བརྙེས་བསྟན་འཛིན་ཆོས་ཀྱི་རྗེ། །ཤཱཀྱ་འབྱུང་གནས་ཞབས༴ བསྐལ་མང་སྔོན་ནས་སྦྱང་པ་ཞིབ་པའི་མཐུས། །ཐེག་ཆེན་གསང་སྔགས་ཟབ་མོའི་དོན་རྟོགས་ནས། །བདག་གཞན་མཆོག་གི་ས་ལ་སྦྱོར་མཛད་པ། །ཟུར་ཆུང་ཤེས་གྲགས་ལ༴ གནས་ཀྱི་ཁྱད་འཕགས་རྐེད་ལུང་ཞེས་བྱ་དེར། །མདོ་བཞི་བསྡོམས་ལྔ་ལ་སོགས་གསང་སྔགས་ཆོས། །མ་ལུས་ཐུགས་སུ་ཆུད་ནས་བསྒྲུབ་པ་མཛད། །ཡང་ཁིང་བླ་མའི་ཞབས༴ གཞུང་ལུགས་རབ་འབྱམས་དོན་ལ་མངའ་བརྙེས་ཤིང་། །གདུལ་བྱ་མཐའ་དག་ཐེག་པའི་ལམ་ལ་གཟུང་། །སངས་རྒྱས་བསྟན་པ་རྒྱ་ཆེར་སྤེལ་མཛད་པ། །ཤཱཀྱ་སེང་གེའི་ཞབས༴ ཐེག་པ་མཐའ་དག་ཁོང་ཆུད་རྫོགས་ཆེན་པོ། །ཇི་བཞིན་རྟོགས་ནས་གཟུང་འཛིན་རང་སར་གྲོལ། །བདག་གཞན་དོན་གཉིས་ཕུན་སུམ་ཚོགས་པའི་དཔལ། །རྫོགས་ཆེན་པ་ཞེས་ཞབས་ལ༴ ༈ རྒྱ་གར་ཡུལ་དུ་བྱང་ཆུབ་སེམས་སྦྱང་ནས། །གངས་ཅན་ཁྲོད་འདིར་གསང་སྔགས་བསྟན་པ་སྐྱོང་། །བདེ་བ་ཅན་དེར་རྒྱལ་སྲས་བྱང་ཆུབ་སེམས། །ས་བཅུའི་དབང་ཕྱུག་དམ་པ་དེ་ལ་འདུད། །ལུང་རིགས་མན་ངག་ཀུན་ལ་མཁས་གྱུར་པ། །མདོ་རྒྱུད་དགོངས་པའི་ཐུགས་ལ་ཉི་མ་ཤར། །བསྐྱེད་རྫོགས་གཉིས་ཀྱི་བདག་གཞན་རྒྱུད་སྦྱངས་པ། །ཆོས་རྗེ་གཙང་སྟོན་ཞབས༴ ཆོས་ཉིད་རྣམ་དག་བྱམས་པའི་རི་བོ་ལ། །སྙིང་རྗེའི་འབྲས་ལྡན་དཔག་བསམ་འབུམ་གྱིས་བརྒྱན། །མཚན་མཆོག་དོན་ལྡན་འགྲོ་མགོན་ཆོས་ཀྱི་རྗེ། །བྱམས་པ་ཆེན་པོའི་ཞབས༴ སྣང་སྟོང་གཉིས་མེད་ཆོས་དབྱིངས་ནམ་མཁའ་ལ། །གནས་ལུགས་འགྱུར་མེད་རང་བྱུང་རྡོ་རྗེའི་སྐུ། །ལུང་བསྟན་མཆོག་ཐོབ་རྩ་སྟེ་སྤྱང་ང་བ། །ནམ་མཁའ་རྡོ་རྗེའི་ཞབས་ལ༴ རྒྱུད་སྡེ་བསྲུང་ཞིང་གསང་སྔགས་རྡོ་རྗེ་འཛིན། །ཐོས་བསམ་བསྒོམས་པའི་བྱ་བ་མཐར་ཕྱིན་ནས། །འཆད་རྩོད་བརྩམས་པའི་དོན་ལ་མ་རྨོངས་པ། །ཐུགས་རྗེའི་ཡེ་ཤེས་ཞབས་ལ༴ ལྡེམ་དགོངས་བརྒྱད་དང་མཐའ་དྲུག་ཚུལ་བཞིན་དང་། །བརྟོན་པ་བཞི་དང་གཞུང་གི་འབོད་ལེན་གྱིས། །གསང་སྔགས་ཟབ་མོའི་རྒྱུད་གཞུང་གཏན་ལ་དབབ། །སྟོན་པ་དབང་འབྱོར་ཞབས༴ དམ་རྫས་བདུད་རྩིའི་རྒྱ་མཚོའི་ཆེན་པོ་བསྐྱིལ། །ལུང་རིགས་དྲི་མེད་པདྨོའི་ཁ་ཕྱེས་ནས། །བློ་གསལ་རྐང་དྲུག་ལྡན་ལ་དགའ་སྟོན་འགྱེད། །རྗེ་བཙུན་དཔའ་འབར་ཞབས༴ ཀུན་མཁྱེན་ཟབ་ཡང་བསྟན་པའི་མཛོད་འཛིན་པ། །སྡོམ་གསུམ་རྣམ་དག་ཉེས་ལྟུང་དྲི་མས་དབེན། །མཚུངས་མེད་ཆོས་རྗེ་གདུལ་བྱའི་མགོན་གྱུར་པ། །སྟོན་པ་མགོན་རྒྱལ་ཞབས༴ དྲི་མེད་ཚུལ་ཁྲིམས་རྣམ་དག་རྒྱལ་བའི་མཚན། །ཐེག་མཆོག་ཟབ་དོན་མ་ལུས་ཐུགས་སུ་ཚུད། །མཁྱེན་རབས་འཇམ་དཔལ་དབྱངས་དང་གཉིས་མེད་པ། །ཚུལ་ཁྲིམས་རྒྱལ་མཚན་ཞབས༴ མཁས་པ་རྒྱ་མཚོ་ཚོགས་པའི་དབུས་ན་མཛེས། །སྣ་ཚོགས་ཐེག་པའི་གཞུང་ལུགས་བཤད་རྩལ་ཆེ། །རང་འདོད་མེད་ཅིང་གཞན་ཕན་ཁོ་ནར་སེམས། །དྷརྨཱ་ཀླཀྵའི་ཞབས༴ མདོ་སྔགས་རྒྱ་མཚོའི་དབུས་སུ་ལེགས་འཁྲུངས་ཤིང་། །གསུང་རབ་པདྨོའི་མངའ་བདག་ཆོས་ཀྱི་རྗེ། །དོན་བཅུ་སྦྲང་རྩི་ལྟ་བུའི་བཅུད་ལྡན་པ། །ཛྙཱ་ན་ཀེ་ཏུའི་ཞབས༴ མང་ཐོས་གསུང་རབ་ཀུན་གྱི་མཐར་སོན་ཅིང་། །རྒྱལ་བའི་དབང་པོ་ཇི་བཞིན་མཁྱེན་གྱུར་པ། །མཁས་མཆོག་རྣམས་ཀྱི་གཙུག་གི་རྒྱན་གྱུར་པ། །ནམ་མཁའ་རྒྱལ་མཚན་ཞབས༴ ནམ་མཁའ་ལྟ་བུར་ཆོས་ཉིད་ཀློང་གྱུར་ཞིང་། །འགྲོ་བའི་དཔལ་མགོན་བསྟན་པའི་མངའ་བདག་མཆོག །པདྨས་ལུང་བསྟན་སྐྱེས་མཆོག་སྒྲོ་འདོགས་པ། །ནམ་མཁའ་དཔལ་བའི་ཞབས༴ མཁྱེན་གཉིས་ཡེ་ཤེས་ནམ་མཁའི་ནོར་བུ་ལྟར། །ཀློང་གྱུར་མདོ་སྔགས་རྒྱ་མཚོ་སྟོན་མཛད་པ། །སྔ་འགྱུར་བསྟན་པའི་རྒྱལ་མཚན་ཁ་བ་དཀར། །ནམ་མཁའ་རྒྱ་མཚོའི་ཞབས༴ བསོད་ནམས་དཔུང་ལྡན་འཇམ་དབྱངས་རྣམ་འཕྲུལ་མཆོག །མདོ་སྔགས་བསྟན་པའི་རྒྱལ་མཚན་རིན་པོ་ཆེ། །སྙིང་བསྟན་འཛིན་མཛད་ཆོས་རྗེ་ཡང་ཁྲོད་པ། །བསོད་ནམས་རྒྱལ་མཚན་ཞབས༴ འགྲོ་བའི་བསོད་ནམས་ལེགས་འཁྲུངས་རྒྱལ་བའི་སྲས། །བླ་མེད་རྡོ་རྗེ་ཐེག་པའི་མཛོད་འཛིན་པ། །ཀཿཐོག་བསྟན་པའི་ཁུར་བརྗིད་མཆོད་ཁང་བ། །བསོད་ནམས་རྡོ་རྗེའི་ཞབས༴ བསྟན་པའི་རྒྱལ་ཚབ་ཆོས་ཉིད་ཀློང་གྱུར་ནས། །ཕྱག་རྫོགས་དགོངས་པ་གསལ་མཛད་བསྟན་པའི་ཉི། །མི་ཡི་སེང་གེ་འཕྲུལ་ཞིག་རྒྱ་སྡོང་བ། །བསྟན་པ་སེང་གེའི་ཞབས༴ མ་འོངས་འགྲོ་ལ་བཀྲ་ཤིས་དཔལ་འབར་ཞིང་། །སྒྱུ་འཕྲུལ་ཐེག་པའི་རིན་ཆེན་མཛོད་འཆང་བ། །མདོ་སྔགས་ཆར་འབེབས་རྡོ་རྗེ་འཛིན་པ་ཆེ། །འཇམ་དབྱངས་བདུན་རྒྱུད་ཐ་མ་ཡོང་ཁྲོད་དབོན། །མངྒ་རཏྣའི་ཞབས༴ ཆོས་ཉིད་ཟབ་ཡངས་རིན་ཆེན་འབྱུང་བའི་གནས། །མདོ་སྔགས་ཆར་འབེབས་རྡོ་རྗེ་འཛིན་པ་ཆེ། །འགྲོ་བའི་རེ་སྐོང་བསྟན་པའི་རྒྱན་གྱུར་པ། །རཏྣ་བཛྲ་ཞབས་ལ་གསོལ་བ་འདེབས། །ནམ་མཁའ་དཔལ་མན་ཆད་ཀྱི་བླ་མ་བརྒྱུད་པའི་གསོལ་འདེབས་ཤྭ་ལོ་ཀ་རྣམས་རང་གི་དད་རྟེན་དུ་པདྨ་བཀྲ་ཤིས་སོགས་དོན་གཉེར་འགའི་དོན་དུ་གནས་ཆེན་རྨུགས་སངས་དུ་རྡོ་རྗེ་ཀུན་བཟང་རྒྱ་མཚོས་བྲིས་པ་བཀྲ་ཤིས་དཔལ་འབར་ནམ་མཁའི་མཐའ་མཉམ་འཕེལ་བར་གྱུར་ཅིག །དེ་ནས་ཀཿཐོག་ཏུ་སྒྱུ་འཕྲུལ་དབང་གི་བརྒྱུད་པ་ལྟར་ན། ཚེ་གཅིག་སངས་རྒྱས་སྒྲུབ་པའི་བརྟུལ་ཞུགས་ཅན། །རིམ་གཉིས་ལམ་བརྟགས་མངོན་གྱུར་སྤྲོས་མེད་ཀྱི། །སྤྱོད་པས་གདུག་འདྲེའི་གནོད་པ་དབྱིངས་སུ་ཞི། །བུདྡྷ་མངྒའི་མཚན་ལ་གསོལ་བ་འདེབས། །བརྩེ་ཆེན་ཐུགས་རྗེས་གདུལ་བྱའི་ཁམས་དབང་བཞིན། །ཆོས་ཀྱི་དགའ་སྟོན་སྤེལ་ལ་མངའ་བརྙེས་པས། །སྐལ་ལྡན་ཐར་གླིང་འདྲེན་པའི་དད་དཔོན་མཆོག །ཤཱཀྱ་ཚེ་རིང་དཔལ་ལ༴ བསྐྱེད་རྫོགས་ཟ བ་མོའི་དོན་ལ་དབང་འབྱོར་བས། །རབ་འབྱམས་དཀྱིལ་འཁོར་རྒྱ་མཚོའི་ལྷ་ཞལ་མཇལ། །དབུགས་དབྱུང་གཟེངས་བསྟོད་ས་ལམ་ཡོན་ཏན་རྫོགས། །ཨོ་རྒྱན་ཕུན་ཚོགས་མཆོག་ལ༴ རྒྱུད་རྒྱལ་གསང་བ་སྙིང་པོའི་དགོངས་པའི་དོན། །ཇི་བཞིན་མངོན་གྱུར་གྲུབ་པའི་རྟགས་མཚན་གྱིས། །འགྲོ་མང་དབང་སྡུད་ཟུང་འཇུག་ལམ་ལ་བཀོད། །གྱི་ལིང་ཐུགས་ཀྱི་རྡོ་རྗེར་གསོལ༴ དམ་པའི་རིས་སད་མཁས་གྲུབ་དུ་མ་ལས། །མདོ་སྔགས་སྙིང་པོའི་བཅུད་བླངས་བྱ་བཏང་གིས། །ཚེ་གཅིག་སྤྲོས་མེད་སྒྲུབ་པའི་རྒྱལ་མཚན་བཙུགས། །མ་ཏི་བྷ་དྲིའི་ཞབས་ལ༴ མདོ་བརྒྱུད་ཟབ་དགུའི་ཆུ་གཏེར་སྲུབ་པ་ལས། །ལེགས་ཐོན་བཤད་སྒྲུབ་བསྟན་པའི་ཉིན་བྱེད་ཀྱིས། །ལུང་རྟོགས་ཆོས་ཀྱི་གཟི་འོད་རབ་འབར་བ། །ཨོ་རྒྱན་ཆོས་ཀྱི་རྒྱ་མཚོ༴ དྲི་མེད་བཤེས་གཉེན་གསང་གསུམ་རོལ་པའི་ཀར། །ཐེག་མཆོག་བསྟན་པའི་ཉིན་བྱེད་ཤར་རིའི་ཕྲག །ལེགས་འཆར་སྙིང་པོའི་བསྟན་པ་མཁའ་ལྟར་བརྡལ། །ཀུན་མཁྱེན་ངག་གི་དབང་པོ༴ འཇམ་དབྱངས་བླ་མའི་ཕྲིན་ལས་གཅིག་བསྡུས་པ། །གཟུང་སྤོབས་བློ་གྲོས་མཆོག་ལ་དབང་འབྱོར་བས། །རིས་མེད་བརྟན་དང་འགྲོ་བའི་སྒྲོན་མེ་ཆེ། །བློ་གྲོས་རྒྱ་མཚོའི་དཔལ་ལ༴ དམ་པ་དེ་གསུམ་ཀ་ལས། ལུང་རིག་མན་ངག་རྫོགས་པའི་ལེགས་བཤད་ཀྱིས། །སྐལ་བཟང་བློ་ཡི་པདྨོ་འདབ་བརྒྱར་བཀྲོལ། །སྨིན་གྲོལ་གདམས་པའི་ཟབ་མཛོད་ནུབ་མེད་བསྐྱངས། །ཐུབ་བསྟན་དུལ་བའི་སྡེ་ལ༴ ཞེས་སྒྱུ་འཕྲུལ་ཁམས་ལུགས་དབང་བརྒྱུད་ལྟར་ཁ་སྐོང་བའོ། ༈ །རྨད་བྱུང་ལེགས་བཤད་གསུང་གི་ཉིན་འོད་ཀྱིས། །རྨོངས་པའི་རབ་རིབ་ཀུན་ནས་འཕྲོག་བྱེད་ཅིང་། །སྐལ་བཟང་ཐར་པའི་པད་འཚལ་རྒྱས་མཛད་པ། །དཔལ་ལྡན་བླ་མའི་ཞབས༴ འབད་དེ་རྒྱལ་བའི་དཀྱིལ་འཁོར་ལྷ་ཚོགས་དང་། །བསྟན་སྲུང་མ་མགོན་ལྕམ་དྲལ་ཚོགས་བཅས་ཀྱི། །དབང་བཞི་ཆུ་བོས་བདག་རྒྱུད་སྨིན་མཛད་ནས། །མོས་གུས་གདུང་བའི་གསོལ་འདེབས་ཕྱག་འཚལ་ལོ། །དེ་ལྟར་བཀའ་རྒྱུད་དྲི་མེད་གསེར་ཕྲེང་ལ། །ཕྱག་འཚལ་གསོལ་བཏབ་བདེན་པའི་བྱིན་རླབས་ཀྱི། །རང་རྒྱུད་སྨིན་ཅིང་གཞན་རྒྱུད་གྲོལ་བ་དང་། །སྐུ་ལྔ་ཡོངས་རྫོགས་གདུལ་བྱའི་དཔལ་དུ་ཤོག །ཅེས་སྒྱུ་འཕྲུལ་བརྒྱུད་པའི་གསོལ་འདེབས་བཀའ་རྒྱུད་གསེར་ཕྲེང་ཞེས་བྱ་བ་འདི་ནི་མཁས་གྲུབ་ཆོས་རྗེ་ཡེ་ཤེས་རྒྱལ་མཚན་པས་མཛད་ནས་དར་རྒྱས་པར་བྱའོ། །ཡང་ན་བརྒྱུད་པའི་ཁ་སྐོང་དཔལ་ཡུལ་ལྟར་ན། རཏྣ་བཛྲ་རྗེས། ཀུན་བཟང་དགོངས་དོན་མཁའ་ལྟར་ཀློང་གྱུར་ནས། །ཤེས་རབ་སྒྲོན་མེའི་རིག་མུན་ཚོགས་རྩོམ། །རྙིང་བསྟན་མངའ་བདག་བོད་ཁམས་མུན་སེལ་རྗེ། །ཀུན་བཟང་ཤེས་རབ་ཞབས་ལ༴ རྣམ་སྨིན་ཚེ་དབང་ཕྱག་ཆེན་རིག་པ་འཛིན། །སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོ། །ཡེ་ཤེས་རྒྱ་མཚོའི་འཁོར་གྱིས་རྟག་རོལ་བ། །ལྷུན་གྲུབ་རྒྱ་མཚོའི་ཞབས་ལ་གསོལ་བ་འདེབས། །ལྟ་སྤྱོད་དཀྱིལ་འཁོར་དབང་བསྐུར་དམ་ཚིག་དང་། །མཆོད་སྔགས་ཏིང་འཛིན་ཕྲིན་ལས་སྒྲུབ་པ་ཡིས། །པདྨའི་བསྟན་འཛིན་དགོས་འབྱུང་ནོར་བུའི་དབྱིག །པདྨ་ནོར་བུའི་ཞབས་ལ༴ དག་མཉམ་བདེན་པ་དབྱེར་མེད་ཆོས་སྐུར་རྟོགས། །ཕྲིན་ལས་རྟག་ཁྱབ་ལྷུན་གྲུབ་དཔལ་དང་ལྡན། །མཁས་བཙུན་བཟང་པོའི་རྣམ་ཐར་རྨད་དུ་བྱུང་། །ཆོས་དཔལ་བཟང་པོའི་ཞབས༴ སྡོམ་གསུམ་གནང་བཀག་གཙང་མའི་པདྨའི་ཚལ། །ལེགས་བཤད་མགྲིན་གླུ་སྒྲོགས་པའི་ཁྲ་མ་ར། །ཟབ་རྒྱས་ཆོས་ཀྱི་སྦྱིན་པ་འགྱེད་མཁས་པ། །པདྨ་སྦྱིན་པའི་ཞབས་ལ༴ པདྨའི་བཀའ་སྲོལ་སྔ་འགྱུར་བསྟན་ལ་ཞུགས། །དཀའ་ཐུབ་བཟོད་པའི་གོ་ཆ་ཆེར་བསྒོས་པས། །ཚེ་གཅིག་གྲུབ་པའི་གོ་འཕང་མཐོན་པོར་གཤེགས། །པདྨ་བཟོད་པའི་ཞབས་ལ༴ ཕྱག་ན་པདྨའི་གསང་གསུམ་སྒྱུ་འཕྲུལ་བདར། །སྔ་འགྱུར་མདོ་སྔགས་བསྟན་པའི་རྒྱལ་མཚན་འཛིན། །བསྟན་འགྲོའི་དོན་ཆེན་སྒྲུབ་པའི་མཐུ་སྟོབས་ཅན། །མདོ་སྔགས་བསྟན་འཛིན་ཞབས་ལ༴ ཕྱོགས་དུས་རྒྱལ་བའི་མཁྱེན་རྩེ་ནུས་པའི་གཏེར། །ཁམས་གསུམ་ཆོས་ཀྱི་རྒྱལ་པོ་ཉི་མའི་གཉེན། །རབ་འབྱམས་འགྲོ་ཁམས་རྒྱ་མཚོའི་གཙུག་ན་བརྗིད། །ཆོས་ཀྱི་ཉི་མའི་ཞབས་ལ་གསོལ་བ་འདེབས། །རྨད་བྱུང་ལེགས་བཤད་སོགས་དང་སྦྲེལ། ཞེས་པའང་ཐུབ་བསྟན་ཆོས་ཀྱི་གླང་པོས་སྒོ་གསུམ་གུས་པས་གསོལ་བཏབ་པ་དགེ། །།