སྒྱུ་འཕྲུལ་ཞི་བ་དྲྭ་ཆེན།

མ ཡཱ ཤཱི བ མ ཧཱ ཛ ཡཱ སྱ ཤཱི ཪྵ མ།
སྒྱུ་འཕྲུལ་ཞི་བ་དྲྭ་ཆེན་གྱི་དབུའོ། །
ༀ་སྭ་སྟི། སྐུ་ལྔ་ལྷུན་གྲུབ་རྡོ་རྗེ་དབང་ཆེན་ལ། །ཀུན་ནས་དྭང་བས་ཕྱག་འཚལ་ལོ། །རྟེན་གྱི་གང་ཟག་ཤེས་རབ་མཆོག་དང་ལྡན་པས། ཕྱི་ནང་གི་དམ་ཚིག་རྣམས་མ་ཉམས་ལ་ཡོངས་སུ་རྫོགས་པ། དབང་ཐམས་ཅད་ཀྱི་རྒྱལ་སར་ཆུད་པ། ཤེས་རབ་ཐམས་ཅད་ཀྱི་རྩལ་དང་ལྡན་ཞིང་། བརྩོན་འགྲུས་ཀྱི་གོ་ཆ་བགོས་པ་ཞིག་གིས། ཚེ་འདི་ཉིད་ལ་སངས་རྒྱས་ཀྱིས་མངོན་སུམ་དུ་བྱ་བར་འདོད་པས། སྐུ་གསུམ་ལྷུན་གྱི་གྲུབ་པའི་དཀྱིལ་འཁོར་དུ་འཇུག་པར་བྱ་སྟེ། དེ་ལའང་རྣམ་པ་གཉིས་ཏེ། མ་བསྒྱུར་རྣལ་མའི་དཀྱིལ་འཁོར་དང་། བསྒྱུར་བ་ཁྲག་འཐུང་གི་དཀྱིལ་འཁོར་རོ། །མ་བསྒྱུར་རྣལ་མའི་དཀྱིལ་འཁོར་ལ་བཞི་སྟེ། དེ་བཞིན་ཉིད་ཀྱི་ཏིང་ངེ་འཛིན་དང་། ཀུན་སྣང་གི་ཏིང་ངེ་འཛིན་དང་། རྒྱུའི་ཏིང་ངེ་འཛིན་དང་། ཡོངས་སུ་རྫོགས་པའི་ཏིང་ངེ་འཛིན་ནོ། །དེ་ལ་དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། སྟན་བདེ་བ་ལ་འདུག་སྟེ། བསམ་གཏན་གྱི་ཕྱག་རྒྱ་ལྔས། ལུས་སེམས་ཚགས་སུ་སྩལ་ཏེ། བསམ་གཏན་ལ་མཉམ་པར་བཞག་པ་ནི། ལུང་ལས། དངོས་རྣམས་ཉིད་ན་དངོས་མེད་པར། །རྟོགས་པའི་སྨྲ་བསམ་ཡུལ་ལས་འདས། །ཞེས་འབྱུང་སྟེ། ཕྱི་ནང་གི་ཆོས་ཐམས་ཅད་སྣང་ལ་རང་བཞིན་མེད་པ། ཆོས་ཀྱི་དབྱིངས་སེམས་ཀྱི་དེ་ཁོ་ན་ཉིད་དུ་རིག་པས་ཉམས་སུ་མྱོང་བར་བྱའོ། །དེ་ནི་ཆོས་ཐམས་ཅད་ཀྱི་དེ་བཞིན་ཉིད་ཅེས་བྱའོ། །ཀུན་ཏུ་སྣང་བའི་ཏིང་ངེ་འཛིན་ནི། སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །ཞེས་པས། དེ་ལྟར་ཆོས་ཀྱི་དབྱིངས་ཀྱིས་གར་ཁྱབ་པར། །དེ་མ་རྟོགས་པའི་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་པར། རྣལ་འབྱོར་པའི་རྟོགས་པའི་བྱིན་རླབས་ཀྱི་སྙིང་རྗེས་ཁྱབ་སྟེ། དེ་ལྟར་རྣལ་འབྱོར་པའི་རིག་པ་ཁྱབ་བདལ་དུ་གསལ་བ་དང་། དེ་མ་རྟོགས་པའི་སེམས་ཅན་གྱི་ཁམས་ཆོས་ཀྱི་དབྱིངས་ཉིད་ལས་སྣང་བ་ནི། ཀུན་ཏུ་སྣང་བའི་ཏིང་ངེ་འཛིན་ཅེས་བྱའོ། །དེ་ནས་རྒྱུའི་ཏིང་ངེ་འཛིན་ལ་དོན་རྣམ་པ་གཉིས་ཀྱི་བསྟན་ཏེ། ཏིང་ངེ་འཛིན་རང་གི་ངོ་བོ་དང་། ཕྲ་མོའི་ཏིང་ངེ་འཛིན་ལ་ཐུགས་ཀྱི་སྒྲིབ་པ་སྦྱང་བའོ། །དེ་ལ་རང་གི་ངོ་བོ་ནི། །ཡི་གེ་མཆོག་ནི་བསྒོམ་པར་བྱ། །ཞེས་པས། བྱང་ཆུབ་སེམས་ཀྱི་རང་བཞིན་ཡི་གེ་ཨ་དཀར་པོ་བསྒོམ་པར་བྱའོ། །ཕྲ་མོའི་ཏིང་ངེ་འཛིན་ལ་ཐུགས་ཀྱི་སྒྲིབ་པ་སྦྱང་བ་ནི། ཨ་དཀར་རབ་ཏུ་བརྟེན་གྱུར་ལས། །ཤིན་ཏུ་ཕྲ་བའི་ཨ་རྣམས་སྤྲོས། །ཞེས་པས། ཨ་སྥ་ར་ན་ཕཊ྄། ཨ་དཀར་པོ་དེ་ལ་བརྟེན་ནས། དེ་ལ་ཨ་དཀར་པོ་གཅིག་སྤྲོས། དེ་ལ་བརྟེན་ནས་གཉིས་སྤྲོས། དེ་ལ་བརྟེན་ནས་བཞི་སྤྲོས་ཏེ། དེ་བཞིན་དུ་ཇེ་མང་ཇེ་མང་། ཇེ་རིང་ཇེ་རིང་དུ་སྤྲོས་ཏེ། གཞུགས་སེམས་ཀྱི་ཁྱབ་ཚད་ཀྱི་ཨ་དཀར་པོ་ཡུངས་འབྲུ་ཙམ་གྱིས་གང་ནས། སཾ་ཧ་ར་ཎ་ཧཱུྃ། སླར་འོད་ཟེར་ཚུར་འདུས་ཀྱང་གཞི་པོའི་ཨ་མ་འཕེལ། ཕྱིར་ཨ་མང་པོ་སྤྲོས་ཀྱང་གཞི་བོའི་ཨ་མ་འགྲིབ། དེ་བྱང་ཆུབ་སེམས་ཀྱི་མཚན་ཉིད་ཡིན་པར་ཤེས་པར་བྱ། ཡི་གེ་གཞན་གང་སྤྲོ་ན་ཡང་། ཚུལ་དེ་བཞིན་དུ་ཤེས་པར་བྱ། འདི་མན་ཆད་ཡོངས་སུ་རྫོགས་པའི་ཏིང་ངེ་འཛིན་ལ་བཞིས་བསྟན་པའི་དང་པོ། བསྐྱེད་པའི་ཆོ་འཕྲུལ་ལ་གཉིས་ཏེ། རྟེན་བསྐྱེད་པ་དང་། བརྟེན་པ་ལྷའི་དཀྱིལ་འཁོར་བསྐྱེད་པའོ། །དེ་ལ་རྟེན་བསྐྱེད་པ་ལ་གཉིས་ཀྱི་དང་པོ་འོག་གཞི་བསྐྱེད་པ་ནི། ཨ་ལས་ཨེ་ཡྃ་བྃ་ལྃ་སུྃ་རྃ་རྣམས་སྤྲོས་པ་ལས། ཨེ་ལས་ཆོས་འབྱུང་གྲུམ་གསུམ་མཐིང་ཀ་རྒྱ་ཁྱོན་ནམ་མཁའ་དང་མཉམ་པ། ཡྃ་ལས་རླུང་གི་དཀྱིལ་འཁོར་སྲ་ཞིང་མཁྲེགས་པ། ཁ་དོག་དུད་ཁ་དབྱིབས་ཟླ་གམ་དུ་གྱུར་པར་བསྒོམ། དེའི་སྟེང་དུ་བྃ་ལས་ཆུའི་དཀྱིལ་འཁོར་དཀར་ལ་ཟླུམ་པ། ཐ་མ་བུམ་པས་མཚན་པ། དེའི་སྟེང་དུ་ལྃ་ལས་གསེར་གྱི་ས་གཞི་གྲུ་བཞི་སེར་པོ། ཐ་མ་བུམ་པ་རྡོ་རྗེས་མཚན་པ། དེའི་སྟེང་དུ་སུྃ་ལས་རིན་པོ་ཆེ་སྣ་བཞི་ལས་གྲུབ་པ་རིའི་རྒྱལ་པོ་རི་རབ། དབྱིབས་གྲུ་བཞི་པ་ཁ་ཁྱེར་དང་རྒྱ་མཉམ་པ། དེའི་སྟེང་དུ་རཾ་ལས་མེའི་དཀྱིལ་འཁོར་དུ་གྱུར་ཏེ། ཕྱེད་མར་འཕྲོས་པས་འོག་གི་འབྱུང་བ་རྣམས་ཆ་སྙོམས། ཕྱེད་རི་རབ་ཀྱི་ཁ་རྒྱན་དུ་མེ་རི་འབར་བའི་དཀྱིལ་འཁོར་དུ་གྱུར་པར་བསྒོམ། ཧཱུྃ་མར་འཕྲོས་ཏེ་རྡོ་རྗེ་རྒྱ་གྲམ་དུ་གྱུར། ༀ་བཛྲ་རཀྵ་རཀྵ་ཧཱུྃ་བྷྲཱུྃ། རྒྱ་གྲམ་རྡོ་རྗེའི་གུར་ཟླུམ་པོར་གྱུར་པར་བསྒོམ། གདམ་ངག་གི་བར་འདིར་སྣ་ཚོགས་རྡོ་རྗེ་ལས་གུར་ཁང་གཞུང་བཞིན་དུ་བྱ་གསུང་། དེ་ནས་བཞུགས་གནས་བསྐྱེད་པ་ནི། བྷྲཱུྃ་སྤྲོས་པ་ལས། བྷྲཱུྃ་བྷི་ཤྭ་བྷི་ཤུདྡྷེ། ཞེས་སྐབས་འདིར་ཧཱུྃ་ལས་སྣ་ཚོགས་རྡོ་རྗེ་རྒྱ་གྲམ་ལས་གུར་ཁང་དུ་བསྒོམ་པ་མན་ངག་གི་ཁ་བསྐང་ཡང་ཟེར། མཆན། བརྗོད་པས། ཆོས་ཀྱི་རང་བཞིན། རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་། ཆོས་ཀྱི་དབྱིངས་རང་བཞིན་རྒྱ་ཆད་པ་མེད་པའི་རྟགས་སུ། རྒྱ་ཁྱོན་ཚད་བཟུང་དུ་མེད་པ། ཤར་དཀར་པོ་འཁོར་ལོས་བརྒྱན་པ། ལྷོ་སེར་པོ་རིན་པོ་ཆེས་བརྒྱན་པ། ནུབ་དམར་པོ་པདྨས་བརྒྱན་པ། བྱང་ལྗང་གུ་རལ་གྲིས་བརྒྱན་པ། སྟེང་མཐིང་ཀ་རྡོ་རྗེས་བརྒྱན་པ། མུ་ཏིག་གི་དྲྭ་བ་དང་དྲྭ་བ་ཕྱེད་པས་བརྒྱན་པ། ཀ་རྒྱན་དང་ཀ་ཞུ་ཐམས་ཅད་རིན་པོ་ཆེ་འབར་བ་ལ་བྱས་པ། ཏ་ར་ན་ཡིས་བཟུང་བ། ཉི་མ་དང་ཟླ་བ་ཕྱེད་པ། རང་སའི་སྐར་ཁུང་ལྡིང་པ། རྔ་ཡབ་དང་རྔ་ཡབ་ཆེན་པོའི་བསིལ་ཡང་དུ་འཕྱོ་བ། དྲིལ་བུ་དང་དྲིལ་བུ་ཆེན་པོའི་སྒྲ་འཁྲོལ་བ། ཀུན་ཏུ་བཟང་པོའི་ཐུགས་མཁྱེན་པའི་ཡེ་ཤེས་ལ། འདོད་སྤྱོད་རྣམ་པ་ལྔར་སྣང་ཞིང་། དེ་ཡང་ཆོས་ཉིད་ཀྱི་རྒྱན་དུ་རིག་པའི་རྟགས་སུ། གཟུགས་སྡུག་པ་སྣ་ཚོགས་དང་། སྒྲ་སྙན་པ་སྣ་ཚོགས་དང་། དྲི་ཞིམ་པ་སྣ་ཚོགས་དང་། རོ་མངར་བ་སྣ་ཚོགས་དང་། རེག་བྱ་འཇམ་པ་སྣ་ཚོགས་ནམ་མཁའ་ལ་སྤྲིན་བཞིན་དུ་འཁྲིགས་པ། བར་སྣང་ལ་ཆར་བཞིན་དུ་འབབ་པ། ས་གཞི་ལ་རྩི་ཤིང་བཞིན་དུ་སྐྱེས་ཏེ། ལིང་ལོང་བྱེད་པར་བསྒོམ་མོ། །གཞན་ཡང་དེའི་ཕྱི་རོལ་ན། ཏ་ལའི་ཕྲེང་བ་གསེར་གྱི་ཙོང་ཙོང་གིས་སྦྲེལ་བ། དཔག་བསམ་གྱི་ཤིང་གསེར་གྱི་ཙོང་ཙོང་གིས་བྲེས་པ་དང་། རྣམ་པར་ཐར་པ་བརྒྱད་ཀྱི་རྫིང་བུ་བདུད་རྩིས་གང་བ་རྣམས་ཀྱི་ཐམས་ཅད་དུ་ཁྱབ་པར་བསྒོམ་མོ། །གཞལ་ཡས་ཁང་དེའི་ནང་གི་དབུས་འཁོར་ལོའི་ལྟེ་བ་ཟླུམ་པོ་མཐིང་ཀ་ལ། རྩིབས་བཞི་སེར་པོ་བྱུང་བའི་རྩིབས་མཆན་སྔོན་པོ། དེའི་ཕྱི་རོལ་མུ་ཁྱུད་རྡོ་རྗེ་རྭ་བས་བརྒྱན་པ་ལ། རྡོ་རྗེའི་ཀ་བ་བརྒྱད་ཟུག་པ། དེའི་ཕྱི་རོལ་གྲུ་ཆད་བཞི་དང་། གློ་འབུར་མཁར་ཐབས་བཞི་དང་ལྡན་པ། དེའི་ཕྱི་རོལ་ལྷ་སྣམ་སྒོ་བཞི་དང་བཅས་པའོ། །དེ་ནས་གདན་བཏིང་བ་ནི། དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པས། དབུས་སུ་མི་འཇིགས་པ་བཞིའི་རྟགས་སུ། སེང་གེ་བརྒྱད་ཀྱི་ཁྲི་བྱུང་བར་གྱུར་ཏོ། །ཤར་དུ་སྟོབས་བཅུ་དང་ལྡན་པའི་རྟགས་སུ། གླང་པོ་ཆེ་བརྒྱད་ཀྱི་ཁྲི་བྱུང་། ལྷོར་རྫུ་འཕྲུལ་གྱི་རྐང་པ་བཞི་དང་ལྡན་པའི་རྟགས་སུ། རྟ་བརྒྱད་ཀྱི་ཁྲི་བྱུང་། ནུབ་ཏུ་དབང་བཅུའི་རྟགས་སུ། རྨ་བྱ་བརྒྱད་ཀྱི་ཁྲི་བྱུང་། བྱང་དུ་ཕྲིན་ལས་བཞིའི་རྟགས་སུ། ཤང་ཤང་བརྒྱད་ཀྱི་ཁྲི་བྱུང་། དེ་དག་གི་བར་མཚམས་སུ། རིན་པོ་ཆེའི་ཁྲི་ཀ་བས་བརྒྱན་པ་ལ། རིན་པོ་ཆེའི་ཁྲིའི་སྟེང་ན་མུ་ཏིག་གི་དྲྭ་བས་གཡོག་པ། དེའི་སྟེང་དུ་པདྨ་འདབ་མ་སྟོང་དང་ལྡན་པ། དེའི་སྟེང་ན་ཉི་མ། དེའི་སྟེང་ན་ཟླ་བ། རྩིབས་མཆན་བཞི་གྲུ་ཆད་བཞི་དང་བརྒྱད་ལ། རིན་པོ་ཆེའི་ཁྲིའི་སྟེང་ཉི་ཟླ་པདྨ་གསུམ་བརྩེགས་དང་ལྡན་པ་རེ་རེ། ལྷ་སྣམ་ལ་པདྨ་བརྒྱད། སྒོ་བཞིར་བདུད་བཞིའི་སྟེང་དུ་ཉི་མའོ། །དེ་ལྟར་གདན་བཏིང་ནས། ད་ནི་བརྟེན་པ་ལྷའི་དཀྱིལ་འཁོར་བསྐྱེད་པའི་ཆོ་འཕྲུལ་ལ་གསུམ་སྟེ། གསུང་ཡིག་འབྲུའི་ཆོ་འཕྲུལ་དང་། ཐུགས་ཕྱག་མཚན་གྱི་ཆོ་འཕྲུལ་དང་། སྐུ་ཕྱག་རྒྱའི་ཆོ་འཕྲུལ་ལོ། །དང་པོ་གསུང་གི་ཆོ་འཕྲུལ་ནི། ཨ་དཀར་པོ་ལས་ཀྵ་སྔོན་པོ་བྱུང་། ཨ་དང་ཀྵའི་ཁྱད་པར་ལས། ཡི་གེ་བཞི་བཅུ་གཉིས་བྱུང་སྟེ། དབུས་སུ་ཐ་སྔོན་པོ་གཉིས། ཤར་དུ་ཧ་དཀར་པོ་གཉིས། ལྷོར་ད་སེར་པོ་གཉིས། ནུབ་ཏུ་དྷ་དམར་པོ་གཉིས། བྱང་དུ་ན་ལྗང་གུ་གཉིས། ཤར་ལྷོར་ཀ་དང་ཙ། ལྷོ་ནུབ་ཏུ་ཁ་དང་ཚ། ནུབ་བྱང་དུ་ག་དང་ཛ། བྱང་ཤར་དུ་གྷ་དང་ཛྷ། ཤར་ལྷོའི་གྲུ་ཆད་ལ་པ་དང་ཡ། ལྷོ་ནུབ་ཀྱི་གྲུ་ཆད་ལ་ཕ་དང་ཝ། ནུབ་བྱང་གི་གྲུ་ཆད་ལ་བ་དང་ར། བྱང་ཤར་གྱི་གྲུ་ཆ ད་ལ་བྷ་དང་ལ། ཤར་སྒོར་ང་དང་ཤ། ལྷོ་སྒོར་ཉ་དང་ཥ། ནུབ་སྒོར་མ་དང་ས། བྱང་སྒོར་ཨ་དང་ཧ། ཤར་སྟོད་དུ་ཀྵ། ཤར་སྨད་དུ་ཨི། ལྷོ་སྟོད་དུ་ཨཻ། ལྷོ་སྨད་དུ་ཨཱུ། ནུབ་སྟོད་དུ་ཨ། ནུབ་སྨད་དུ་ཨཱུ། བྱང་སྟོད་དུ་ཨེ། བྱང་སྨད་དུ་ཨཻ། དེ་རྣམས་ལ་འོད་འཕྲོས་པས། འཕགས་པའི་གསུང་གི་རྒྱུད་བསྐུལ། འགྲོ་བ་སེམས་ཅན་གྱི་ངག་གི་སྒྲིབ་པ་སྦྱངས། སླར་ཚུར་འདུས་པ་ལས། ཐུགས་ཀྱི་ཆོ་འཕྲུལ་དུ་གྱུར་ཏེ། དབུས་སུ་རྡོ་རྗེ་དང་དྲིལ་བུ། ཤར་དུ་འཁོར་ལོ་དང་དྲིལ་བུ། ལྷོར་རིན་པོ་ཆེ་དང་དྲིལ་བུ། ནུབ་ཏུ་པདྨ་དང་དྲིལ་བུ། བྱང་དུ་རལ་གྲི་དང་དྲིལ་བུ། ཤར་ལྷོའི་རྩིབས་མཆན་དུ་རིན་པོ་ཆེའི་མྱུ་གུ་དང་མེ་ལོང་། ལྷོ་ནུབ་ཏུ་རལ་གྲི་དང་རིན་པོ་ཆེའི་ཕྲེང་བ། ནུབ་བྱང་དུ་པདྨ་དཀར་པོ་དང་པི་ཝཾ། བྱང་ཤར་དུ་རྡོ་རྗེ་དང་གར་གྱི་ལག་པ། ཡང་། ཤར་ལྷོའི་གྲུ་ཆད་ལ་ཀླུ་ཤིང་བདུག་སྤོས། ལྷོ་ནུབ་ཏུ་ཆོས་ཀྱི་འཁོར་ལོ་དང་མེ་ཏོག་གི་ཕྲེང་བ། ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཤར་སྒོར་ཐོད་དབྱུག་དང་ལྕགས་ཀྱུ། ལྷོ་སྒོར་རྡོ་རྗེའི་དབྱུག་པ་དང་ཞགས་པ། ནུབ་སྒོར་པདྨའི་དབྱུག་པ་དང་ལྕགས་སྒྲོག །བྱང་སྒོར་རྡོ་རྗེ་རྒྱ་གྲམ་གྱི་དབྱུག་པ་དང་དྲིལ་བུ། ཤར་སྟོད་དུ་རྡོ་རྗེ་དཀར་པོ་རྩེ་ལྔ་པ། ཤར་སྨད་དུ་པི་ཝང་། ལྷོ་སྟོད་དུ་གོ་ཆ། ལྷོ་སྨད་དུ་སྲེག་ཤང་དང་པར་བུ། ནུབ་སྟོད་དུ་ཆོས་འབྱུང་། ནུབ་སྨད་དུ་ཆོས་ཀྱི་གླེགས་བམ། བྱང་སྟོད་དུ་རིན་པོ་ཆེ། བྱང་སྨད་དུ་མེ་ཆུ་གཉིས། དེ་རྣམས་ལ་འོད་ཟེར་ཕྱོགས་བཅུར་འཕྲོས་པས། འཕགས་པའི་ཐུགས་དམ་གྱི་རྒྱུད་བསྐུལ། སེམས་ཅན་གྱི་ཡིད་ཀྱི་སྒྲིབ་པ་སྦྱངས། སླར་འདུས་པ་ལས་སྐུ་ཕྲ་མོར་གྱུར། སྐུ་ཕྲ་མོ་ལས་སྐུ་ཕྲ་མོ་སྤྲོས་པས། འཕགས་པའི་སྐུའི་རྒྱུད་བསྐུལ། སེམས་ཅན་གྱི་ལུས་ཀྱི་སྒྲིབ་པ་སྦྱངས། སླར་འདུས་སྐུ་ཕྲ་མོ་ལ་ཐིམས་པ་ལས། སྐུ་ཕྱག་རྒྱའི་ཆོ་འཕྲུལ་དུ་བསྐྱེད་པ་ནི། ཧཱུྃ་བཛྲ་དྷྲིཀ྄ །མཱུཾ་དྷ་ཏུ་ཤྭ་རི། ཞེས་བརྗོད་པས། དབུས་སུ་མི་བསྐྱོད་པ། ཆོས་ཀྱི་དབྱིངས་ཀྱི་ཡེ་ཤེས་ལས་བྱུང་བའི་རྟགས་སུ། སྐུ་མདོག་མཐིང་ཀ་ཞལ་གསུམ་ཕྱག་དྲུག །ཞལ་གཡས་དཀར་གཡོན་དམར། དབུས་སྐུ་དང་མཐུན་པ། དབུ་རལ་པའི་ཐོར་ཚུགས་ནག་པོ་འགྱིང་བ། ཕྱག་དྲུག་གི་དང་པོ་གཉིས་རྡོ་རྗེ་དང་དྲིལ་བུ་བསྣམ་སྟེ་ཡུམ་ལ་འཁྱུད་པ། གཡས་བར་མ་ན་འཁོར་ལོ། ཐ་མ་ན་རིན་པོ་ཆེ། གཡོན་བར་མ་ན་པདྨ། ཐ་མ་ན་རལ་གྲི། ཕྱག་རྒྱ་དེ་དག་ལ་ཡེ་ཤེས་ཀྱི་མེ་འབར་བ། ཞབས་གཉིས་མཉམ་པའི་སྐྱིལ་མོ་ཀྲུང་དུ་བཞུགས་པ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་ལྡན་པ། ཡུམ་རྡོ་རྗེ་དབྱིངས་ཕྱུག་མ་སྐུ་མདོག་ཡབ་དང་མཐུན་པ། ཞལ་གཅིག་ཕྱག་གཉིས་གཡས་པས་ཡབ་ལ་འཁྱུད་ཅིང་། གཡོན་པས་དྲིལ་བུ་བསྣམས་པའོ། །ༀ་ཛི་ན་ཛིཀ྄ །ལྃ་ཏེ་ཤྭ་ར་ཏི། ཞེས་བརྗོད་པས། ཤར་དུ་རྣམ་པར་སྣང་མཛད་མེ་ལོང་ལྟ་བུའི་ཡེ་ཤེས་ལས་བྱུང་བའི་རྟགས་སུ། སྐུ་མདོག་དཀར་པོ་ཞལ་གསུམ་ཕྱག་དྲུག་ཞལ་གཡས་སྔོ། གཡོན་དམར། ཕྱག་དྲུག་གི་དང་པོ་གཉིས་འཁོར་ལོ་དང་དྲིལ་བུ་བསྣམས་ཏེ་ཡུམ་ལ་འཁྱུད་པ། གཡས་བར་མ་ན་རྡོ་རྗེ། ཐ་མ་ན་རིན་པོ་ཆེ། གཡོན་བར་མ་ན་པདྨ། ཐ་མ་ན་རལ་གྲི། གཞན་གོང་དང་འདྲ། སྭ་རཏྣ་དྷྲྀཀ྄ །མཱཾ་མོ་ཧ་ར་ཏི། ཞེས་བརྗོད་པས། ལྷོ་ཕྱོགས་སུ་རིན་ཆེན་འབྱུང་ལྡན། མཉམ་པ་ཉིད་ཀྱི་ཡེ་ཤེས་ལས་བྱུང་བའི་རྟགས་སུ། སྐུ་མདོག་སེར་པོ་ཞལ་གསུམ་ཕྱག་དྲུག །ཞལ་གཡས་སྔོ་གཡོན་དམར། ཕྱག་དང་པོ་གཉིས་རིན་པོ་ཆེ་དང་དྲིལ་བུས་ཡུམ་ལ་འཁྱུད་པ། གཡས་བར་མ་ན་རྡོ་རྗེ། ཐ་མ་ན་འཁོར་ལོ། གཡོན་བར་མ་ན་པདྨ། ཐ་མ་ན་རལ་གྲི། ཨཱྃ་ཨཱ་རོ་ལིཀ྄ །པྱྃ་རཱ་ག་ར་ཏི། ཞེས་བརྗོད་པས། ནུབ་ཕྱོགས་སུ། སྣང་བ་མཐའ་ཡས་སོ་སོར་རྟོགས་པའི་ཡེ་ཤེས་ལས་བྱུང་བའི་རྟགས་སུ། སྐུ་མདོག་དམར་པོ་ཞལ་གསུམ་ཕྱག་དྲུག །ཞལ་གཡས་དཀར། གཡོན་སྔོ། ཕྱག་དང་པོ་གཉིས་པདྨ་དང་དྲིལ་བུས་ཡུམ་ལ་འཁྱུད་པ། གཡས་བར་མ་ན་རྡོ་རྗེ། ཐ་མ་ན་འཁོར་ལོ། གཡོན་བར་མ་ན་རིན་པོ་ཆེ། ཐ་མ་ན་རལ་གྲི། ཧ་པྲཛྙཱ་ཧྲྀཀ྄ །ཏཱཾ་བཛྲ་ར་ཏི། ཞེས་བརྗོད་པས། བྱང་དུ་དོན་ཡོད་གྲུབ་པ། བྱ་བ་གྲུབ་པའི་ཡེ་ཤེས་ལས་བྱུང་བའི་རྟགས་སུ། སྐུ་མདོག་ལྗང་ཀུ། ཞལ་གསུམ་ཕྱག་དྲུག །ཞལ་གཡས་དཀར་གཡོན་དམར་བ། ཕྱག་དང་པོ་གཉིས་རལ་གྲི་དང་དྲིལ་བུ་བསྣམས་ཏེ་ཡུམ་ལ་འཁྱུད་པ། གཡས་བར་མ་ན་རྡོ་རྗེ། ཐ་མ་ན་འཁོར་ལོ། གཡོན་བར་མ་ན་རིན་པོ་ཆེ། ཐ་མ་ན་པདྨ། ཕྱག་མཚན་དེ་དག་ལ་ནི་ཡེ་ཤེས་ཀྱི་མེ་འབར་བ། དེ་བཞིན་གཤེགས་པ་དེ་དག་ཐམས་ཅད་རལ་པའི་ཐོར་ཚུགས་ནག་པོ་འགྱིང་བ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་ལྡན་པ། ཞབས་གཉིས་མཉམ་པའི་བརྟུལ་ཞུགས་ཀྱིས། སྐྱིལ་མོ་ཀྲུང་གིས་རང་རང་གི་གདན་ལ་བཞུགས་པ། ཡུམ་ཐམས་ཅད་སྐུ་མདོག་ཡབ་དང་འདྲ་བ། ཞལ་གཅིག་ཕྱག་གཉིས་གཡས་ཡབ་ལ་འཁྱུད་ཅིང་། གཡོན་དྲིལ་བུ་བསྣམས་པ། ཡབ་ཡུམ་བཅུ་པོ་དེ་རྣམས་ནི་ལོངས་སྤྱོད་རྫོགས་པའི་སྐུ་ཡིན་ཏེ། དབྱིངས་དང་ཡེ་ཤེས་དབྱེར་མེད་པའི་རྟགས་སུ། ཡབ་ཡུམ་ཞལ་སྦྱོར་དུ་གནས་ཤིང་། སྤྱན་ཡང་གཅིག་གིས་གཅིག་ལ་གཟིགས། ཡང་རྣམ་པ་གཅིག་ཏུ་ན། དེ་བཞིན་གཤེགས་པ་ཐམས་ཅད་ཀྱང་འབྱུང་བ་ལྔ་ཆོས་ཀྱི་དབྱིངས་སུ་གཟིགས་པའི་རྟགས་སུ། ཡབ་ཐམས་ཅད་ཡུམ་ལ་གཟིགས། ཆོས་ཀྱི་དབྱིངས་ཉིད་ཕུང་པོ་ལྔ་སོགས། ཆོས་ཐམས་ཅད་བཀག་པ་མེད་པར་ཤར་བའི་དུས་ན། འཇུག་མའི་སྲིན་བུ་ཡན་ཆད་ཕུང་པོ་ལྔར་འདུས་ཤིང་། དེ་དག་ཐམས་ཅད་དེ་བཞིན་གཤེགས་པའི་མཁྱེན་པའི་ཡེ་ཤེས་ཁྱབ་བདལ་མེད་པར་ཤར་བའི་རྟགས་སུ། ཡུམ་ཐམས་ཅད་ལ་གཟིགས་སོ། །དེ་དག་ཐམས་ཅད་དབྱེར་མེད་པའི་རྟགས་སུ། ཡབ་ཡུམ་ཐམས་ཅད་ཞལ་སྦྱོར་དུ་གནས་སོ། །དེ་ནས་སེམས་དཔའ་ཡབ་ཡུམ་བསྐྱེད་པ་ནི། ཀྵིཾ་ཧི་ར་ཙ་ཡ། ཧཱུྃ་ལཱ་སྱེ་ས་མ་ཡ་སྟྭཾ། ཞེས་བརྗོད་པས། ཤར་ལྷོའི་རྩིབས་མཆན་ལ་སའི་སྙིང་པོ་ཡབ་ཡུམ་སྐུ་མདོག་དཀར་པོ། ཞལ་གཅིག་ཕྱག་གཉིས་ཡབ་ཀྱི་ཕྱག་གཡས་ན། རིན་པོ་ཆེའི་མྱུ་གུ། གཡོན་ན་སྐྱབས་སྦྱིན་ནམ། ཡང་ན་དྲིལ་བུ་བསྣམས་པའོ། །ཡུམ་གྱི་ཕྱག་གཉིས་ཀྱིས་མེ་ལོང་བསྣམས་པ། ཞབས་གཉིས་ཕྱེད་ཀྲུང་དུ་བཞུགས་པ། ཡབ་ཡུམ་ཞལ་སྦྱོར་དུ་གནས་པའོ། །ཡབ་ཡུམ་དེ་གཉིས་ནི་དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུ་དང་ཐུགས་ལས་བྱུང་བའོ། །ཏྲཱི་ཨཱ་གརྦྷ་ཡ། ཏྲཱཾ་མ་ལྱེ་ས་མ་ཡ་སྟྭཾ་ཧོ། ཞེས་པས། ལྷོ་ནུབ་ཀྱི་རྩིབས་མཆན་ལ་ནམ་མཁའི་སྙིང་པོ་དང་། ཡུམ་རིན་པོ་ཆེའི་ཕྲེང་བ་མ། སྐུ་མདོག་སེར་མོ་ཞལ་གཅིག་ཕྱག་གཉིས། ཡབ་ཀྱི་ཕྱག་གཡས་ན་རལ་གྲི། ཡུམ་གྱི་ཕྱག་ན་རིན་པོ་ཆེའི་ཕྲེང་བ་བསྣམས་ཏེ། ཡབ་ཀྱི་དབུ་ཐོད་བཅིངས་པའོ། །ཧྲཱིཿཧཱ་ཧཱུྃ་པདྨ་བྷ་ཏ་མ། ཧྲཱིཿགིརྟི་རཱ་ག་ཡ་ཧོ། ཞེས་བརྗོད་པས། ནུབ་བྱང་གི་རྩིབས་མཆན་ལ་སྤྱན་གཟིགས་རས་དབང་ཕྱུག་དང་། ལྷ་མོ་དབྱངས་མཁན་མ་སྐུ་མདོག་དམར་མོ། ཡབ་ཀྱི་ཕྱག་གཡས་ན་པདྨ་དཀར་པོ་བསྣམས་པ། ཡུམ་གྱི་ཕྱག་གཉིས་ཀྱིས་ཆོས་ཀྱི་པི་ཝཾ་བཏེགས་པའོ། །ཛིཾ་ཀུ་རུ་པཱ་ཎི་ཧྲཱིཿ ཨ་ནིརྟི་རཱ་ག་ཡ་མི། ཞེས་པས། བྱང་ཤར་གྱི་རྩིབས་མཆན་ལ། ཕྱག་ན་རྡོ་རྗེ་དང་། ལྷ་མོ་གར་མཁན་མ། སྐུ་མདོག་ལྗང་ཀུ། ཡབ་ཀྱི་ཕྱག་གཡས་ན་རྡོ་རྗེ་དཀར་པོ་རྩེ་ལྔ་པ་བསྣམས་པ། ཡུམ་གྱི་ཕྱག་གཉིས་ཀྱིས་གར་གྱི་ལག་པ་བསྒྱུར་ནས། ཞལ་ཟས་རོ་མཆོག་བརྒྱ་དང་ལྡན་པ་ཡབ་ཀྱི་ཞལ་དུ་སྟོབས་པའོ། །མཻ་དྷ་ར་ནི་སྭཱ་ཧཱ། ཛཿདྷཱུ་པེ་པྲ་ཝེ་ཤཱ། ཞེས་བརྗོད་པས། ཤར་ལྷོའི་གྲུ་ཆད་ལ། བྱམས་པ་དང་བདུག་སྤོས་མ་སྐུ་མདོག་དཀར་མོ། ཡབ་ཀྱི་ཕྱག་ན་ཀླུ་ཤིང་དང་གྷནྡྷེ་བསྣམས་པ། ཡུམ་གྱི་ཕྱག་གཉིས་ཀྱིས་བདུག་སྤོས་བསྣམས་པའོ། །ཐླྷིཾ་ནིསྶ་རཾ་པ་ཡེ་སྭཱ་ཧཱ། ཧཱུྃ་པུཥྤེ་ཨཱ་བེ་ཤཱ། ཞེས་བརྗོད་པས། ལྷོ་ནུབ་ཀྱི་གྲུ་ཆད་ལ་སྒྲིབ་པ་ཐམས་ཅད་རྣམ་པར་སེལ་བ་དང་། ལྷ་མོ་མེ་ཏོག་མ་སྐུ་མདོག་སེར་པོ། ཡབ་ཀྱི་ཕྱག་གཡས་ན་ཆོས་ཀྱི་འཁོར་ལོ་བསྣམས་པ། ཡུམ་གྱི་ཕྱག་ན་མེ་ཏོག་གི་ཕྲེང་བ་བསྣམས་པའོ། །ཧཱུྃ་སྭ་རཱ་ཙ་ཡ་སྭཱ་ཧཱ། བྃ་དཱི་བ་སུ་ཀི་ནཱི། ཞེས་པས། ནུབ་བྱང་གི་གྲུ་ཆད་ལ་ཀུན་ཏུ་བཟང་པོ་དང་། ལྷ་མོ་མར་མེ་གཉིས་སྐུ་མདོག་དམར་མོ། ཡབ་ཀྱི་ཕྱག་ན་རིན་པོ་ཆེའི་སྙེ་མ་བསྣམས་པ། ཡུམ་གྱི་ཕྱག་ན་མར་མེ་བསྣམས་པའོ། །མཱུྃ་ཤྲཱི་ཨ་རཾ་གཱ་ཡ་སྭཱ་ཧཱ། ཧོཿགྷནྡྷེ་ཙིཏྟ། ཞེས་པས། བྱང་ཤར་གྱི་གྲུ་ཆད་ལ་འཇམ་དཔལ་གཞོན་ནུར་གྱུར་པ་དང་། ལྷ་མོ་དྲི་ཆ བ་མ་སྐུ་མདོག་ལྗང་ཀུ། ཡབ་ཀྱི་ཕྱག་གཡས་ན་ཨུཏྤལ་བསྣམས་པ། ཡུམ་གྱི་ཕྱག་གཉིས་ཀྱི་དྲི་ཆབ་བསྣམས་པའོ། །སེམས་དཔའ་ཡབ་ཡུམ་དེ་རྣམས་ནི། ཀུན་ཀྱང་དབུ་རལ་པའི་ཐོར་ཚུགས་མངའ་བ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་ལྡན་པ། ཞབས་ཐམས་ཅད་ཕྱེད་ཀྲུང་གིས་བཞུགས་པ། ཡབ་ཡུམ་ཐམས་ཅད་ཞལ་སྦྱོར་དུ་གནས་ཏེ། ཐུགས་རྗེས་སེམས་ཅན་ཐམས་ཅད་ལ་བུ་གཅིག་ལ་མས་བྱམས་པ་བཞིན་དུ་སེམས་པ་སྟེ། ཡབ་ཡུམ་དེ་རྣམས། མངོན་པར་བྱང་ཆུབ་པའི་སྐུའོ། །ཧཱུྃ་ཧཱུྃ་ཧཱུྃ། བཛྲ་ཙིཏྟ་ཧཱུྃ། ཞེས་པས། ཤར་སྟོད་དུ་བཅོམ་ལྡན་འདས་རྡོ་རྗེ་ཕྱེད་པ་པོ་ཡིད་ཀུན་ཏུ་བཟང་པོ་སྐུ་མདོག་སྔོན་པོ། ཞལ་གཅིག་ཕྱག་གཉིས་པ། ཕྱག་གཉིས་མཉམ་པའི་ཕྱག་རྒྱའི་དཀྱིལ་ན། རྡོ་རྗེ་དཀར་པོ་རྩེ་ལྔ་པ་ལས་ཡེ་ཤེས་ཀྱི་འོད་ཟེར་འཕྲོ་བ། ཞབས་མཉམ་པའི་སྐྱིལ་མོ་ཀྲུང་གི་པདྨའི་གདན་ལ་བཞུགས་པ། ཨ་ཨ་ཨ་བཛྲ་བྷ་དྲ་ས་མཱནྟ་ༀ། ཞེས་བརྗོད་པས། ནུབ་སྟོད་དུ། ཆོས་འདུས་བྱས་དང་འདུས་མ་བྱས་ཐམས་ཅད་གནས་སུ་དག་པའི་རྟགས་སུ། ཡུམ་ཀུན་ཏུ་བཟང་མོ། ཤེས་བྱའི་བག་ཆགས་དག་པའི་རྟགས་སུ། སྐུ་མདོག་དཀར་མོ་ཕྱག་གཉིས་ཆོས་འབྱུང་གི་ཕྱག་རྒྱ་བཅས་ཏེ། གདན་པདྨའི་སྟེང་དུ་ཞབས་མཉམ་པའི་སྐྱིལ་མོ་ཀྲུང་གིས་བཞུགས་པ། ཡབ་ཡུམ་དེ་གཉིས་ནི་ཆོས་ཀྱི་སྐུ་ཡིན་ཏེ། དབྱིངས་མཁྱེན་པ་དང་ལྡན་པའི་རྟགས་སུ་ཡུམ་གྱི་ཞལ་ཤར་དུ་གཟིགས་པ། མཁྱེན་པའི་ཡེ་ཤེས་ཤེས་བྱའི་དངོས་པོ་ཐམས་ཅད་དབྱིངས་སུ་གཟིགས་པའི་རྟགས་སུ། ཡབ་ཀྱི་ཞལ་ནུབ་ཏུ་གཟིགས་སོ། །ༀ་མུ་ནེ་ཀྲེཾ་སྭཱ་ཧཱ། ཞེས་པས། ཤར་སྨད་དུ་ལྷའི་ཐུབ་པ་དབང་པོ་བརྒྱ་བྱིན་སྐུ་མདོག་དཀར་པོ། ཕྱག་ན་པི་ཝང་བསྣམས་པ། འཁོར་ལྷ་དམག་འབུམ་དང་བཅས་པ་ཤར་སྨད་དུ་བསྒོམ། ༀ་མུ་ནེ་སྲུཾ་སྭཱ་ཧཱ། ཞེས་པས། ལྷོ་སྟོད་དུ་ལྷ་མ་ཡིན་གྱི་ཐུབ་པ་དཔའ་བརྗིད་གོ་ཆ་ཅན། སྐུ་མདོག་ལྗང་ནག་ཁྲོས་པའི་ཆ་བྱད་ཅན། ཕྱག་གཡས་ན་རལ་གྲི། གཡོན་ན་ཁྲབ་བསྣམས་པའོ། །ༀ་མུ་ནེ་ཧཱུྃ་ཏྲུཾ་སྭཱ་ཧཱ། ཞེས་པས། ལྷོ་སྨད་དུ་མི་ཡི་ཐུབ་པ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། ཕྱག་གཡས་ན་སྲེག་ཤང་། གཡོན་ན་བར་བུ་བསྣམས་པའོ། །ༀ་མུ་ནེ་བྲེཾ་སྭཱ་ཧཱ། ཞེས་པས། ནུབ་སྨད་དུ་བྱོལ་སོང་གི་ཐུབ་པ། སེང་གེ་དམ་བརྟན་གསེར་གྱི་ཁ་དོག་དན། སྤྱི་བོར་ཆོས་ཀྱི་གླེགས་བམ་ཁུར་བ། བྱོང་སོང་གི་ཁམས་ཀྱི་མ་རིག་པའི་མུན་ཁང་འབྱེད་པར་བསྒོམ། ༀ་མུ་ནེ་ཀྵཾ་སྭཱ་ཧཱ། ཞེས་པས། བྱང་སྟོད་དུ་ཡི་དྭགས་ཀྱི་ཐུབ་པ་ཁ་འབར་མ་བུད་མེད་ཀྱི་གཟུགས་ཅན། སྐུ་མདོག་ལྗང་སེར་དུ་འདུག་པ། སྐྲ་དང་སྨ་ར་ཁམས་པ་སེན་མོ་རིང་བ། ཕྱག་ན་རིན་པོ་ཆེའི་ཟ་མ་ཏོག་བསྣམས་པའི་ནང་ནས། ཡི་དྭགས་ཐམས་ཅད་ལ་མཆོད་སྦྱིན་གཏོར་བར་བསྒོམ་མོ། །ༀ་མུ་ནེ་ཡེ་སྭཱ་ཧཱ། ཞེས་པས། བྱང་སྨད་དུ་དམྱལ་བའི་ཐུབ་པ་སྐུ་མདོག་ནག་པོ། གཤིན་རྗེའི་སྟབས་སུ་འདུག་པ། ཕྱག་གཡས་ན་མི་བསྣམས་ཏེ་གྲང་བའི་སྡུག་བསྔལ་སེལ་བར་བྱེད་པ། གཡོན་ན་ཆུ་བསྣམས་ཏེ་ཚ་བའི་སྡུག་བསྔལ་སེལ་བར་བྱེད་པར་བསྒོམ་མོ། །ཐུབ་པ་དེ་རྣམས་ནི་སྤྲུལ་པའི་སྐུ་ཡིན་ཏེ། འགྲོ་བའི་དོན་ལ་ཐུགས་བསྙེལ་བ་མི་མངའ་བར་དོན་མཛད་པའི་རྟགས་སུ། པདྨའི་གདན་ལ་བཞེངས་པའོ། །བཤད་རྒྱུད་བླ་མ་ལས། ཐུབ་དྲུག་ཀུན་དགེ་སློང་གི་ཆ་བྱད་ཅན་དུ་བཞེང་། གཞུགས་གནས་ཤར་ལྷོ། ལྷོ། ལྷོ་ནུབ། ནུབ། ནུབ་བྱང་། བྱང་། བྱང་ཤར། དྲུག་ཏུ་བཞེད། ལྷ་དཀར། ལྷ་མིན་མཐིང་། མི་སེར། བྱོལ་སོང་ལྗང་ནག །ཡི་དྭགས་ལྗང་སེར། དམྱལ་བ་ནག་པོ། འོད་རིམ་ལས། ཤར་ལྷོར་ལྷ་ལ་ལྷོ་ཕྱོགས་མི། །ལྷོ་ནུབ་ནུབ་བྱང་ཡི་དྭགས་བྱོལ། །བྱང་དང་བྱང་ཤར་ལྷ་མིན་དམྱལ། །ཅེས་སོ། །ཧཱུྃ་ཡ་མཱནྟ་ཀྲྀཏ་ཕཊ྄། ༀ་བཛྲ་དྷ་ར་མ་ཧཱ་ཀྲོ་ཏི་ཤྭ་རི་ཛྭ་ལ་ནཱི་ཧཱུྃ་ཕཊ྄། ཅེས་བརྗོད་པས། ཤར་སྒོར་ཁྲོ་བོ་གཤིན་རྗེ་དང་ཡུམ་རྡོ་རྗེ་ལྕགས་ཀྱུ་མ་གཉིས་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ་མཆེ་བ་བཞི་གཙིགས་པ། ཡབ་ཀྱི་ཕྱག་གཡས་ན་ཐོད་དབྱུག་གཡོན་ཐོད་ཁྲག །ཡུམ་གྱི་གཡས་ན་ལྕགས་ཀྱུ་བསྣམས་པ། གཡོན་ཐོད་ཁྲག །དཔལ་གྱི་ཆས་ཆེན་པོ་བཅུ་དྲུག་གིས་བརྒྱན་པ། ཕུང་པོའི་བདུད་ཀྱི་གདན་ལ་བཞུགས་པར་བསྒོམ། ཧཱུྃ་པྲཛྙཱ་ཏ་ཀྲིཏ་ཕཊ྄། ༀ་རཏྣ་དྷ་ར་མ་ཧཱ་ཀྲོ་ཏི་ཤྭ་རཱི་ཛྭ་ལ་ནཱི་ཧཱུྃ་ཕཊ྄། ཅེས་པས། ལྷོ་སྒོར་ཁྲོ་བོ་སྟོབས་པོ་ཆེ་དང་། ཡུམ་རྡོ་རྗེ་ཞགས་པ་མ་སྐུ་མདོག་སེར་ནག །ཡབ་ཀྱི་ཕྱག་གཡས་ན་རྡོ་རྗེའི་དབྱུག་པ། གཡོན་ཐོད་ཁྲག །ཡུམ་གྱི་གཡས་ན་ཞགས་པ་བསྣམས་པ། འཆི་བདག་གི་བདུད་ཀྱི་གདན་ལ་བཞུགས་པའོ། །ༀ་པདྨ་ཏ་ཀྲིཏ་ཕཊ྄། ༀ་པདྨ་དྷ་ར་མ་ཧཱ་ཀྲོ་ཏི་ཤཱ་རི་ཛྭ་ལ་ནཱི་ཧཱུྃ་ཕཊ྄། ཅེས་པས། ནུབ་སྒོར་ཁྲོ་བོ་རྟ་མགྲིན་དང་། ཡུམ་རྡོ་རྗེ་ལྕགས་སྒྲོག་མ་གཉིས་སྐུ་མདོག་དམར་ནག །ཡབ་ཀྱི་གཡས་ན་པདྨའི་དབྱུག་པ་སྦྲུལ་གྱིས་དཀྲིས་པ་བསྣམས་པ། གཡོན་ཐོད་ཁྲག །ཡུམ་གྱི་ཕྱག་གཡས་ན་ལྕགས་སྒྲོག་བསྣམས་པ། ཉོན་མོངས་པའི་བདུད་ཀྱི་གདན་ལ་བཞུགས་པའོ། །ཧཱུྃ་བིགྣཱན་ཏ་ཀྲི་ཏ་ཕཊ྄། ༀ་ཀརྨ་དྷ་ར་མ་ཧཱ་ཀྲོ་དྷི་ཤྭ་རཱི་ཛྭ་ལ་ནཱི་ཧཱུྃ་ཕཊ྄། བྱང་སྒོར་ཁྲོ་བོ་ཆེན་པོ་བདུད་རྩི་འཁྱིལ་བ་དང་། ཡུམ་རྡོ་རྗེ་དྲིལ་བུ་མ་གཉིས་སྐུ་མདོག་ལྗང་ནག །ཡབ་ཀྱི་ཕྱག་གཡས་ན་རྡོ་རྗེ་རྒྱ་གྲམ་གྱི་དབྱུག་པ། གཡོན་ཐོད་ཁྲག །ཡུམ་གྱི་གཡས་ན་གསེར་གྱི་དྲིལ་ཆེན་འཁྲོལ་བ། ལྷའི་བུའི་བདུད་ཀྱི་གདན་ལ་བཞུགས་པའོ། །ཁྲོ་བོ་ཡ་ཡུམ་དེ་རྣམས་ནི་རྡོ་རྗེའི་སྐུ་ཡིན་ཏེ། ཀུན་ཀྱང་སྤྱན་གསུམ་མཆེ་བ་བཞི་གཙིགས་པ། ཆས་ཆེན་པོ་བཅུ་དྲུག་གིས་བརྒྱན་པ། གཡོན་ཐམས་ཅད་ཐོད་པ་ཁྲག་གི་བཀང་བ་ཐོགས་པའོ། །གཞལ་ཡས་ཁང་ཐམས་ཅད་ཀྱང་ཁྲོ་བོ་དེ་དག་གི་མེ་དཔུང་གི་འཁྲིགས་ཏེ། མེ་རི་འབར་བའི་དཀྱིལ་འཁོར་ན་བདེ་བར་གཤེགས་པ་རྣམས་བཞུགས་པའོ། །བདག་གི་དཀྱིལ་འཁོར་འདི་ན་གནས་པ་བཞིན་དུ། འཇིག་རྟེན་དྲུག་གི་ཕྱོགས་བཅུའི་ཆོས་ཀྱི་དབྱིངས་ཀྱི་གར་ཁྱབ་པ་དེ་དག་ཐམས་ཅད་རྒྱལ་བའི་དཀྱིལ་འཁོར་གྱིས་ཁྱབ། རྒྱལ་བའི་དཀྱིལ་འཁོར་གྱིས་གར་ཁྱབ་པ་དེ་ཡང་། ཆོས་ཀྱི་དབྱིངས་ཀྱིས་ཁྱབ་པ་ཤེས་པར་བྱའོ། །དེ་ནི་ཡོངས་སུ་རྫོགས་པའི་ཏིང་ངེ་འཛིན་བཞིས་བསྟན་པའི་དང་པོ་བསྐྱེད་པའི་ཆོ་འཕྲུལ་དེ་སོང་། ཡོངས་སུ་རྫོགས་པའི་ཏིང་ངེ་འཛིན་གྱིས་གཉིས་པ་དབང་བསྐུར་བའི་ཆོ་འཕྲུལ་ནི། དོན་ཡེ་ཤེས་ཀྱི་དབང་དང་། རྟགས་རྒྱལ་བ་རིགས་ལྔས་དབུ་བརྒྱན་པའི་དབང་ངོ་། །དེ་ཡང་། ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོ྅་ཧཾ། ཞེས་པས། ཆོས་ཐམས་ཅད་དོན་དམ་རྒྱལ་བའི་དཀྱིལ་འཁོར་དེ་དག་ཆོས་ཀྱི་དབྱིངས་མཉམ་པ་ཆེན་པོའི་རང་བཞིན་ལ་གཡོས་པ་མེད་པར་རྟོགས་པ་ནི་དོན་གྱི་དབང་ངོ་། །རྟགས་ཀྱི་དབང་ནི། རྒྱལ་བ་དེ་དག་གི་སྤྱི་གཙུག་ཏུ་མི་བསྐྱོད་པ་སྐུ་མདོག་སྔོན་པོ་རེ་རེས་དབུ་བརྒྱན་པར་བྱའོ། །ༀ་མ་ཧཱ་ཨཱ་དཱཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། དོན་དམ་པར་རྒྱལ་བའི་དཀྱིལ་འཁོར་དེ་དག་ཐམས་ཅད་ཀྱང་། ཆོས་ཀྱི་དབྱིངས་ལ་འགག་པ་མེད་པའི་ཡེ་ཤེས་རང་སྣང་བའོ། །རྟགས་རྒྱལ་བ་དེ་དག་གི་དཔྲལ་བར་རྣམ་པར་སྣང་མཛད་སྐུ་མདོག་དཀར་པོ་རེ་རེ་བསྒོམ་པར་བྱའོ། །ༀ་མ་ཧཱ་ས་མཱནྟ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། དོན་དམ་པར་རྒྱལ་བའི་དཀྱིལ་འཁོར་མ་འགག་པར་སྣང་བ་དང་། ངོ་བོ་ཆོས་ཀྱི་དབྱིངས་ལས་མ་གཡོས་པ་གཉིས་ཡེ་ནས་དབྱེར་མེད་པར་ཤེས་པར་བྱའོ། །རྟག རྣ་ལྟག་གཡས་སུ་རིན་ཆེན་འབྱུང་ལྡན། སྐུ་མདོག་སེར་པོ་རེ་རེ་བསྒོམ་པར་བྱའོ། །ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། རྒྱལ་བ་དེ་དག་ཀྱང་གདུལ་བྱ་ཐ་དད་ལ་མོས་པ་འབྱུང་བར་ཤེས་པར་བྱའོ། །རྟགས་ནི། ལྟག་པའི་སྟེང་དུ་སྣང་བ་མཐའ་ཡས་སྐུ་མདོག་དམར་པོ་རེ་རེ་བསྒོམ་པར་བྱའོ། །ༀ་མ་ཧཱ་ཀྲྀ་ཏྱཱ་ནུཥྚན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། རྒྱལ་བའི་དཀྱིལ་འཁོར་དུ་མ་འགགས་པར་སྣང་བ་ནི་གཞན་དོན་ནོ། །ངོ་བོ་མ་སྐྱེས་པ་ནི་བདག་དོན་ཏེ། དེ་གཉིས་དུས་གཅིག་པ་ནི་དོན་གཉིས་ཕུན་སུམ་ཚོགས་པའོ། །རྟགས་ནི། རྣ་ལྟག་གཡོན་པའི་སྟེང་དུ་དོན་ཡོད་གྲུབ་པ་རེ་རེ་བསྒོམ་མོ། །རྒྱལ་བ་དེ་རྣམས་ཀྱི་དབུ་ལ་རིན་པོ་ཆེའི་དབུ་རྒྱན་དང་། རལ་ཆིངས་དང་། སྙན་ཆ་དང་། མགུར་ཆུ་དང་། དོ་ཤལ་དང་། སེ་མོ་དོ་དང་། དཔུང་རྒྱན་དང་། གདུའུ་དང་། ཆོས་གོས་དང་། ཤམ་ཐབས་ལ་སོགས་པ་རྒྱན་ཆེན་པོ་རྣམས་ཀྱིས་བརྒྱན་པར་བྱའོ། །དེ་ནི་དབང་བསྐུར་བའི་ཆོ་འཕྲུལ་ལོ། །ཡོངས་སུ་རྫོགས་པའི་གསུམ་པ་བྱིན་གྱི་རླབས་པའི་ཆོ་འཕྲུལ་ནི། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། བདག་གི་དབུའི་དུང་ཁང་གི་ནང་དུ་ཟླ་བའི་དལ་གྱི་སྟེང་དུ། སྐུ་རྡོ་རྗེ་སྐུ་མདོག་དཀར་པོ་འཁོར་ལོ་དང་དྲིལ་བུ་ཅན། དེའི་ཐུགས་ཀར་འཁོར་ལོ་ༀ་གྱིས་མཚན་པའོ། །ༀ་སརྦ་ཏ་ཐཱ་ག་ཏ་མ་ཧཱ་ཝཱཀྐ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། བདག་གི་ལྕེ་ཐོག་ཏུ་པདྨའི་སྟེང་དུ། གསུང་རྡོ་རྗེ་སྐུ་མདོག་དམར་པོ་པདྨ་དང་དྲིལ་བུ་ཅན། དེའི་ཐུགས་ཀར་པདྨ་ཨཾ་གིས་མཚན་པའོ། །ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས། བདག་གི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ། ཐུགས་རྡོ་རྗེ་སྐུ་མདོག་མཐིང་ནག །རྡོ་རྗེ་དང་དྲིལ་བུ་ཅན། དེའི་ཐུགས་ཀར་རྡོ་རྗེ་ཧཱུྃ་གིས་མཚན་པའོ། །ༀ་སརྦ་ཏ་ཐཱ་ག་ཏ་མ་ཧཱ་ༀ་ནུ་རཱ་ག་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ཞེས། ལྟེ་བ་རིན་ཆེན་ཟུར་བརྒྱད་ཀྱི་སྟེང་དུ། ཆགས་པའི་རྡོ་རྗེ་སྐུ་མདོག་སེར་པོ་རིན་པོ་ཆེ་དང་དྲིལ་བུ་ཅན། དེའི་ཐུགས་ཀར་རིན་པོ་ཆེ་སྭཱས་མཚན་པའོ། །ༀ་སརྦ་ཏ་ཐཱ་ག་ཏ་མ་ཧཱ་པུཙྪ་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ཞེས། གསང་གནས་སུ་ཆོས་འབྱུང་གྲུ་གསུམ་གྱི་སྟེང་དུ་མཆོད་པའི་རྡོ་རྗེ་སྐུ་མདོག་ལྗང་ཀུ་རལ་གྲི་དང་དྲིལ་བུ་ཅན། དེའི་ཐུགས་ཀར་རལ་གྲི་ཧཾ་གིས་མཚན་པའོ། །ལྷ་དེ་དག་གི་ཐུགས་ཀར་ཡེ་ཤེས་སེམས་དཔའ་རང་འདྲ་བ་རེ་རེ་ལ་གདན་ནི་རིགས་ལྔ་ཡབ་ཡུམ་དང་། སེམས་དཔའ་ཡབ་ཡུམ་ཀུན་བཟང་ཡབ་ཡུམ་ལ་ཉི་ཟླ་པདྨ་གསུམ་བརྩེགས། ཐུབ་དྲུག་དང་བཟང་མོ་ལ་པདྨ། སྒོ་བ་བཞི་ལ་ཉི་མའོ། །ལྷ་དེ་དག་གི་ཐུགས་ཀར་ཉི་མའི་སྟེང་དུ་ཐུགས་ཕྱག་མཚན་ལ། གསུང་ཡིག་འབྲུའི་མཚན་པ་ལ་ལུགས་གཉིས་ཏེ། བསྐྱེད་པའི་ས་བོན་ལ་ཨཱ་ལི་དང་། སྔགས་ཀྱི་ཡི་གེ་དང་པོས་མཚན་པ་གཉིས་ལས། འདིར་ཕྱག་ལེན་ལ་ཐུབ་དྲུག་མ་གཏོགས་པ་སྔགས་ཀྱི་ཡི་གེ་དང་པོས་མཚན་ལ། ཐུབ་དྲུག་ལ་ཀྲེ་ལ་སོགས་པའོ། །སྒོ་བ་བཞི་ལ་ཧཱུྃ་བཞི། ཡུམ་ལ་ཛ་ཧཱུྃ་བྃ་ཧོ་བཞིས་མཚན་པ་དེའི་མཐའ་བསྐོར་དུ། རང་གི་སྔགས་ཀྱིས་བསྐོར་བའོ། །ལྷ་དེ་དག་གི་ཐུགས་ཀར་ཐུགས་ཡེ་ཤེས་སེམས་དཔའ་རང་དང་འདྲ་བ་རེ་རེ་བསྒོམ། དེའི་ཐུགས་ཀར་ཐུགས་ཕྱག་མཚན་ལ་སྔར་གྱི་ཡི་གེ་རྣམས་ཀྱིས་མཚན་པར་བསྒོམ་མོ། །དེའི་མཐའ་བསྐོར་དུ་རང་རང་གི་སྔགས་ཀྱིས་འཁོར་བར་བསྒོམ་མོ། །དེ་ནས་བསམ་ཡས་ལྷུན་གྲུབ་ཀྱི་དཀྱིལ་འཁོར་ཕྱོགས་བཅུ་ནས་སྤྱན་དྲངས་ཏེ་བསྟིམས་པ་ནི། དབྱིངས་ཀྱི་དཀྱིལ་འཁོར་གྱིས་བརླབས་པའོ། །ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་ཏྲྀ་ཤྱ་ཧོ། ས་མ་ཡ་ཧོ། ས་མ་ཡ་སྟཾ། ཛ་ཧཱུྃ་བྃ་ཧོ། ཞེས་དབྱེར་མེད་པར་བྱའོ། །དེ་དག་ནི་བྱིན་གྱིས་རླབས་པའི་ཆོ་འཕྲུལ་ལོ། །ཡོངས་སུ་རྫོགས་པའི་ཏིང་ངེ་འཛིན་ལ་བཞིས་བསྟན་པའི་ཐ་མ། མཆོད་པའི་ཆོ་འཕྲུལ་ལ་དོན་རྣམ་པ་དགུ་སྟེ། བསྟོད་པའི་མཆོད་པ་དང་། ཀུན་ཏུ་བཟང་པོའི་མཆོད་པ་དང་། ཕྱིའི་མཆོད་པ་དང་། ཕྱག་རྒྱ་གར་གྱི་མཆོད་པ་དང་། སྦྱོར་བའི་མཆོད་པ་དང་། སྒྲོལ་བའི་མཆོད་པ་དང་། བདུད་རྩི་སྨན་གྱི་མཆོད་པ་དང་། རྨད་དུ་བྱུང་བ་གཏོར་མ་བདུད་རྩི་ལྔའི་མཆོད་པ་དང་། ཚོགས་ཀྱི་མཆོད་པ་དང་། གླུ་ཡེ་ཤེས་ཀྱི་མཆོད་པ་དང་། སྒྲ་སྙན་གྱི་མཆོད་པའོ། །དེ་ནས་ཡང་བསྟོད་པ་བྱ། བསྙེན་པ་བྱ། དེ་ནས་ལྷག་མའི་ཆོ་ག་བྱ། དེ་ནས་དཀྱིལ་འཁོར་བསྡུའོ། །སྒྱུ་འཕྲུལ་ཞི་བའི་དཀྱིལ་འཁོར། བླ་མ་ཤར་བ་ཆེན་པོ་སྤོབས་པ་མཐའ་ཡས་ཀྱིས་སྦྱར་བའོ། །ༀ་སྭ་སྟི། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མངོན་པར་རྟོགས་པ་འདི་ལ་དོན་གསུམ་སྟེ། སྔོན་དུ་འགྲོ་བའི་ཆོ་ག་དང་། ཏིང་ངེ་འཛིན་བཞིས་མངོན་པར་རྟོགས་པའི་གཞུང་བསྲང་བ་དང་། དངོས་གྲུབ་བླང་ཞིང་རྗེས་ཀྱི་ཆོ་ག་བྱ་བའོ། །སྔོན་དུ་འགྲོ་བའི་ཆོ་ག་ལ་གསུམ་སྟེ། གནས་བཙལ་བ་དང་། ཕྱིའི་ཆོ་ག་བྱ་ཞིང་མཚམས་བཅད་པ་དང་། བདེན་པ་གཉིས་ཀྱི་ཚུལ་གྱིས་བྱང་ཆུབ་མཆོག་ཏུ་སེམས་བསྐྱེད་པའོ། །མངོན་པར་རྟོགས་པའི་ཏིང་ངེ་འཛིན་ལ་བཞི་སྟེ། དེ་བཞིན་ཉིད་དང་། ཀུན་ཏུ་སྣང་དང་། རྒྱུའི་དང་། ཡོངས་སུ་རྫོགས་པའི་ཏིང་ངེ་འཛིན་ནོ། །དེ་ལ་ཡང་གཉིས་ཏེ། ལྷག་པ་ཏིང་ངེ་འཛིན་གྱི་སྒོ་ནས་བསྐྱེད་པ་དང་། དབང་བསྐུར་བ་དང་། བྱིན་གྱིས་བརླབས་པའི་ཆོ་འཕྲུལ་བསྟན་པ་དང་། ཚིགས་སུ་བཅད་པ་དང་། སྔགས་དང་ཏིང་ངེ་འཛིན་གྱི་སྒོ་ནས་བྱིན་གྱིས་བརླབས་ཤིང་མཆོད་པའི་ཆོ་འཕྲུལ་བསྟན་ཏེ། དེ་ལ་ཡང་བདུན་ཏེ། སྙན་གསན་དབབ་པ་དང་། སྤྱན་དྲང་བ་དང་། བརྟན་པར་བཞུགས་སུ་གསོལ་བ་དང་། ཕྱག་འཚལ་བར་བྱ་བའི་ཕྱིར་བསྟོད་པ་བྱ་བ་དང་། མཆོད་པ་འབུལ་བ་དང་། བསྟོད་པ་དང་། བཟླས་པ་བྱ་བའོ། །དང་པོ་སྙན་གསན་དབབ་པ་ནི། སེ་གོལ་བསྣོལ་མ་གཏོགས་ཤིང་། མེ་ལོང་གཡའ་དག་པ་ལ་གཟུགས་བརྙན་ཤར་བ་ལྟར། ཆོས་སྐུ་ལ་གཟུགས་སྐུར་བཞེངས་ནས་བྱོན་མ་རག་པར་བསམ་ལ། ཧཱུྃ། དམིགས་མེད་མཁའ་ལྟར་དག་ཅིང་ཁྱབ་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེས་ངང་ཅན་ཆོས་སྐུ་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ༀ་བཛྲ་ས་མན་ཛ་ཧཱུྃ་ཛ། དེ་ནས་སྤྱན་དྲང་བ་ནི། ཧོ་ཡོད་མེད་སྟོང་པ་ཤིན་ཏུ་རྣལ་འབྱོར་མཐུས། །ནམ་མཁའ་བཞིན་ལ་དམ་ཚིག་ཉེ་བར་གཤེགས། །ཡེ་ཤེས་རྒྱ་མཚོ་རྣམ་པར་རོལ་པའི་ཀློང་། །མི་གནས་མི་དམིགས་ནམ་མཁའི་དབྱིངས་ནས་བཞེངས། །ཚོགས་ཆེན་གཉིས་རྫོགས་ཐུགས་དམ་དབྱིངས་ཀྱི་ལྷ། །ལོངས་སྤྱོད་རྫོགས་མཛད་རོལ་པ་ཆེན་པོའི་སྐུ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཐབས་ཀྱིས་མ་རྨོངས་བདེ་ཆེན་དབྱིངས་ནས་བཞེངས། །ཡེ་ཤེས་སྒྱུ་མ་རྣམ་པར་རོལ་པའི་སྐུ། །ཐུགས་རྗེ་སྤྲུལ་པ་མང་པོ་འབྱུང་བའི་གནས། །ཐབས་དང་ཤེས་རབ་ཆེ་ལ་མངའ་བརྙེས་པའི། །བདེ་གཤེགས་བདེ་བར་གཤེགས་པ་གཤེགས་སུ་གསོལ། །ༀ་ཨེ་ཧྱ་ཧི་བྷ་ག་ཝན། མ་ཧཱ་ཀཱ་རུ་ཎི་ཀ་ཏྲི་ཤྱ་ཧོ། ས་མ་ཡ་ཧོ། ས་མ་ཡ་སྟྭཾ། ཛ་ཧཱུྃ་བྃ་ཧོ༔ ཨ་གཙྪ་ཡ། ཨ་གཙྪ་ཡ་ཧཱུྃ་ཛཿ ཞེས་ཕོ་བྲང་དང་ཉེ་བར་མདུན་དུ་བྱོན་པར་བསྒོམ་ལ་བརྟེན་པར་བཞུགས་སུ་གསོལ་བ་ནི། ཧཱུྃ་བདེ་བར་གཤེགས་སོ་བཅོམ་ལྡན་འདས། །ཐུགས་རྗེ་ཆེན་པོ་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །དགྱེས་ཤིང་བརྟེན་པར་བཞུགས་སུ་གསོལ། །ༀ་བཛྲ་ས་མ་ཡ་ཛཿ ༀ་བཛྲ་ས་མ་ཡ་ཧཱུྃ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོ། ཞེས་པས་དབྱེར་མེད་པར་བསྟིམ་མོ། ཕྱག་འཚལ་བའི་ཕྱིར། བསྟོད་པ་བྱ་བ་ནི། ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོ། །ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོ། །ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ཏུ་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱི། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །མཆོད་པ་ལ་དོན་དགུ་སྟེ། ཀུན་ཏུ་བཟང་པོའི་མཆོད་པ་དང་། ཕྱིའི་མཆོད། ཕྱག་རྒྱ་གར་གྱི་མཆོད། སྦྱོར་བའི། སྒྲོལ་བའི། རྨད་དུ་བྱུང་བའི། བདུད་རྩི། གཏོར་མའི། འདོད་ཡོན་ཚོགས་ཀྱི། གླུ་ཡེ་ཤེས་ཀྱི། མཆོད་པའི་ཡོན་ཏན་ནོ། །གོང་དུ་ཕྱག་འཚལ་བ་ནི། བསྟོད་པའི་མཆོད་པ་དང་ཐུན་མོང་བའོ། །གཉིས་པ་ཀུན་ཏུ་བཟང་པོའི་མཆོད་པ་ནི། ༈ བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱི། །སྲིད་པ་རྒྱ་མཚོ་མཐའ་ཡས་ཀྱི། །སྤྱོད་པ་རྒྱ་མཚོ་རྨད་བྱུང་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏ་བྷྱོ། བྷི་ཤྭ་མུ་ཁེ་བྷྱ། སརྦ་ཏད་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཕྱིའི་མཆོད་པ་ནི། མཆོད་པའི་ཕྱག་རྒྱ་ཆེན་པོ་ནི། སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་ཀྱིས། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོའི་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་པ། །ཕྱོགས་བཅུ་ནམ་མཁའི་ཁམས་བཀང་ནས། །བླ་མ་རྣམས་དང་དཀོན་མཆོག་གསུམ། །དཀྱིལ་འཁོར་ཀུན་ལ་རྒྱས་པར་འབུལ། །ཕྱག་རྒྱ་གར་གྱི་མཆོད་པ་ནི། །སྒྱུ་འཕྲུལ་དྲྭ་བ་མངོན་རྫོགས་པའི། །དབང་པོའི་ཡུལ་དུ་གང་གྱུར་བ། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོག་གསལ་ན། །ཐམས་ཅད་བྱང་ཆུབ་མཆོག་གི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཐབས་དང་ཤེས་རབ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམ་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །འདི་ནི་སྤྱི་རྒྱ་ཆེན་པོ་སྟེ། །བླ་མེད་ཆེན་པོས་འདི་སྐད་གསུངས། །གསུང་བ་དེ་ཉིད་ངེས་པ་ཡི། །སྙིང་པོ་ཕྱག་རྒྱ་འདའ་དཀའ་འོ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲད་པ་ལ། །སྦྱོར་བའི་ཕྱག་རྒྱ་འབྱུང་བའི་རྒྱུ། །ༀ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱུྃ་བཛྲ་དྷིཀ྄ །འབྲུ་བཞི་སྦས་ནས་ཐུགས་ཀར་བཀན། །མཱུྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱུྃ་དྷཱ་ཏཱི་ཤྭ་རི། འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ༀ་ཛི་ན་ཛིཀ྄ །འབྲུ་བཞི་སྦས་ནས་ཐུགས་ཀར་བཀན། །ལཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ལཱྃ་དེ་ཥ་ར་ཏི། འབྲུ་བཞི་སྦས་ནས་ཐུགས་ཀར་བཀན། །སྭཱ་སྒྲེང་རྩེ་མོར་རིན་ཆེན་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །སྭཱ་རཏྣ་དྷྲི་ཀ྄ །འབྲུ་བཞི་སྦས་ནས་ཐུགས་ཀར་བཀན། མཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་མཛུམ་པའི་མདངས་ཀྱིས་བལྟ། །མཱྃ་མོ་ཧ་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཨཱྃ་སྒྲེང་རྩེ་མོར་པདྨ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། ཨཱཾ་ཨ་རོ་ལིཀ྄ །འབྲུ་བཞི་སྦས་ནས་ཐུགས་ཀར་བཀན། །པཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །པྱཱྃ་རཱ་ག་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཧ་སྒྲེང་རྩེ་མོར་རལ་གྲི་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱ་པྲཛྙཱ་དྷྲིཀ྄ །འབྲུ་བཞི་སྦས་ནས་ཐུགས་ཀར་བཀན། །ཏཱྃ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུང་དེ་འཛུམ་པའི་མདང་བགྱིས་བལྟ། །ཏཱྃ་བཛྲ་ར་ཏི། རྡོ་རྗེ་ཐུགས་ཀར་རིན་ཆེན་འཛིན། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །སའི་སྙིང་པོའི་ཕྱག་རྒྱ་ཡིན། །ཀྵི་ཧི་རཱ་ཙ་ཡེ། རྡོ་རྗེ་རིན་ཆེན་ཁུ་ཚུར་བཅས། །སྐུའི་ཐད་ཀར་བཟུང་བ་དང་། །འཛུམ་པའི་མདངས་ཀྱིས་བལྟ་བ་ནི། །སྒེག་མོའི་ཕྱག་རྒྱ་ཡིན་པར་བཤད། །ཧཱུྃ་ལ་སྱེ་ས་མ་ཡ་སྟྭྃ། རྡོ་རྗེ་རལ་གྲིའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །ནམ་མཁའི་སྙིང་པོའི་ཕྱག་རྒྱ་ཡིན། །ཏྲཱཾ་ཨ་གརྦྷ་ཡ། རྡོ་རྗེ་རིན་ཆེན་རྣ་ལྟག་བཞག །རིན་ཆེན་ཕྲེང་བ་བཟུང་པ་རུ། །འཛུམ་པའི་མདངས་ཀྱིས་བལྟ་བ་ནི། །ཕྲེང་བའི་ཕྱག་རྒྱ་ཡིན་པར་བཤད། །ཏྲཱྃ་མཱ་ལྱེ་ས་མ་ཡ་ཧོ། །རྡོ་རྗེ་པདྨའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །སྤྱན་རས་གཟིགས་ཀྱི་ཕྱག་རྒྱ་ཡིན། །ཧྲཱིཿཧ་ཧཱུྃ་པདྨ་བྲ་ད་མ། །རིན་ཆེན་པི་ཝྃ་འཛིན་པ་ཡི། །རྡོ་རྗེ་ལེན་པར་བྱས་ནས་ནི། །འཛུམ་པའི་མདངས་ཀྱིས་བལྟ་བ་ནི། །དབྱངས་ཀྱི་ཕྱག་རྒྱ་ཡིན་པར་གསུངས། །ཧྲཱིཿགིརྟི་རཱ་ག་ཡ་ཧྃ། །རྡོ་རྗེ་རྡོ་རྗེའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །ཕྱག་ན་རྡོ་རྗེའི་ཕྱག་རྒྱ་ཡིན། །ཛིཾ་ཀུ་རུ་པཱ་ཎ་ཧྲཱིཿ རིན་ཆེན་གར་ཐབས་བསྣོལ་ནས་ནི། །རྡོ་རྗེ་ཐལ་མོ་ལས་ལ་འཁྲིལ། །འཛུམ་པའི་མདངས་ཀྱིས་བལྟ་བ་ནི། །གར་གྱི་ཕྱག་རྒྱ་དཔའ་བོས་བཤད། །ཨ་ནིརྟི་རཱ་ག་ཡཱ་མི། །རྡོ་རྗེ་ཀླུ་ཤིང་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །བྱམས་པ་མེ་ཏྲིའི་ཕྱག་རྒྱ་ཡིན། །མཻ་དྷ་རཱ་ནི་སྭཱ་ཧཱ། རིན་ཆེན་བདུག་སྤོས་ཐུགས་ཀར་འཛིན། །རྡོ་རྗེ་ལས་ལ་རབ་ཏུ་འཁྲིལ། །འཛུམ་པའི་མདངས་ཀྱིས་བལྟ་བ་ནི། །བདུག་པའི་ཕྱག་རྒྱ་ཡིན་པར་བཤད། །ཛ་དྷུཔྤེ་པྲ་བེ་ཤཱ་ཡ། །རྡོ་རྗེ་པོ་ཏིའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །སྒྲིབ་པ་རྣམ་སེལ་ཕྱག་རྒྱ་ཡིན། །ཐླྷིཾ་ནི་སྶ་རཾ་བྷ་ཡེ་སྭཱ་ཧཱ། །རྡོ་རྗེ་རིན་ཆེན་རྣ་ལྟག་ཏུ། །མེ་ཏོག་སྣོད་བཅས་འཛིན་པ་ལ། །འཛུམ་པའི་མདངས་ཀྱིས་བལྟ་བ་ནི། །མེ་ཏོག་ཕྱག་རྒྱ་ཡིན་པར་བཤད། །ཧཱུྃ་པུཥྤེ་ཨཱ་བེ་ཤཱ་ཡ། རྡོ་རྗེ་སྙེ་མའི་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་བལྟ་བ་ནི། །ཀུན་ཏུ་བཟང་པོའི་ཕྱག་རྒྱ་ཡིན། །ཧཱུྃ་སྭ་རཱ་ཙ་ཡ་སྭཱ་ཧཱ། རིན་ཆེན་མར་མེའི་ཐུགས་ཀ་ནས། །རྡོ་རྗེ་སེམས་དཔའ་ལས་ལ་འཁྲིལ། །འཛུམ་པའི་མདངས་ཀྱིས་འདུད་པ་ནི། །མར་མེའི་ཕྱག་རྒྱ་དཔའ་བོས་བཤད། །པྃ་དཱི་པ་སུ་ཀི་ནཱི། རྡོ་རྗེ་ཨུཏྤལ་ཐུགས་ཀ་ནས། །རིན་ཆེན་དྲིལ་བསིལ་ཆོས་ལ་བརྟེན། །འཛུམ་པའི་མདངས་ཀྱིས་འདུད་པ་ནི། །འཇམ་དཔལ་གྱིས་ནི་ཕྱག་རྒྱ་ཡིན། །མཱུྃ་ཤྲཱི་ཨ་རཱཾ་གཱ་ཡེ་སྭཱ་ཧཱ། རིན་ཆེན་དབྱུག་པ་ཐུགས་ཀ་ནས། །རྡོ་རྗེས་མྱུག་པར་བྱེད་པ་དང་། །འཛུམ་པའི་མདངས་ཀྱིས་འདུད་པ་ནི། །དྲི་ཡི་ཕྱག་རྒྱ་ཡིན་པར་བཤད། །ཧོ་གྷནྡྷེ་ཙིཏྟ། ཪྣྲི་མགོ་གདེངས་བ་གཤེད་པོ་སྟེ། །ཧཱུྃ་ཡ་མཱནྟ་ཀྲིཏ་ཕཊ྄། འཛུམ་གཉིས་བཀུག་པ་ལྕགས་ཀྱུའི་རྒྱ། །ༀ་བཛྲ་དྷཱ་རོ་མ་ཧཱ་ཀྲོ་ཏེ་ཤྭ་རཱི་ཛྭ་ལི་ནཱི་ཧཱུྃ་ཕཊ྄། རྡོ་རྗེ་རྣོན་པོ་སྟོབས་ཆེན་རྒྱ། །ཧཱུྃ་པྲཛྙཱ་ཏ་ཀྲྀཏ་ཕཊ྄། མཛུབ་གཉིས་རྩེ་སྤྲད་ཞགས་པའི་རྒྱ། །ༀ་རཏྣ་དྷ་རོ་མ་ཧཱ་ཀྲོ་ཏི་ཤྭ་རཱི་ཛྭ་ལི་ནཱི་ཧཱུྃ་ཕཊ྄། ཐོད་སྦྲུལ་གནོན་པ་རྟ་མགྲིན་རྒྱ། །ༀ་པདྨནྟ་ཀྲྀཏ་ཕཊ྄། མཛུབ་གཉིས་འཁྱུད་པ་ལུ་གུ་རྒྱུད། །ༀ་པདྨ་དྷ་རོ་མ་ཧཱ་ཀྲོ་ཏི་ཤྭ་རཱི་ཛྭ་ལི་ནཱི་ཧཱུྃ་ཕཊ྄། རྒྱ་གྲམ་གནོན་པ་འཁྱིལ་པའི་རྒྱ། །ཧཱུྃ་བིགྣཱནྟ་ཀྲྀཏ་ཕཊ྄། བསྐྱོད་པར་གྱུར་ན་འབེབས་མའོ། །ༀ་ཀརྨ་དྷ་རོ་མ་ཧཱ་ཀྲོ་ཏི་ཤྭ་རཱི་ཛྭ་ལི་ནཱི་ཧཱུྃ་ཕཊ྄། པི་ཝཾ་ལན་པ་ལྷའི་རྒྱ། ༀ་མུ་ནེ་ཀྲེཾ་སྭཱ་ཧཱ། མི་ནི་སྲེག་པར་འཛིན་པ་སྟེ། ༀ་མུ་ནེ་ཧཱུྃ་ཏྲཱུྃ་སྭཱ་ཧཱ། ལྷ་མིན་ཕྱག་རྒྱ་གོ་ཆ་ཡིན། །ༀ་མུ་ནེ་སྲུཾ་སྭཱ་ཧཱ། ཆོས་ཀྱི་འཁོར་ལོ་བྱོལ་སོང་རྒྱ། །ༀ་མུ་ནེ་བྲེཾ་སྭཱ་ཧཱ། ཟ་མ་ཏོག་ནི་ཡི་དྭགས་རྒྱ། །ༀ་མུ་ནེ་ཀྵཾ་སྭཱ་ཧཱ། མེ་ཆུ་གཉིས་ནི་དམྱལ་བའི་རྒྱ། །ༀ་མུ་ནེ་ཡེ་སྭཱ་ཧཱ། ཡབ་ཀྱི་སྤྱི་རྒྱ་ཀུན་བཟང་གིས། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། །ཡུམ་གྱི་སྤྱི་རྒྱ་བཟང་མོར་བཤད། །ཨ་ཨ་ཨ་བཛྲཱི་བྷ་དྲ་ས་མནྟ་ༀ། ཡང་ན་ཀུན་བཟང་ཡབ་ཡུམ་གྱིས། །རྡོ་རྗེ་ཐལ་མོ་ཉིད་དུ་བཤད། །སྦྱོར་བའི་མཆོད་པ་ནི། རིན་ཆེན་པདྨ་དཀྱིལ་འཇམ་འདི། །འཛུམ་པའི་མདངས་ཀྱིས་འབུལ་ལགས་ན། །དགྱེས་པས་རྡོ་རྗེ་བསོར་མཛད་ནས། །བྱང་ཆུབ་སེམས་སྤྲིན་དབབ་ཏུ་གསོལ། །རྡོ་རྗེ་བསོར་བའི་དགའ་མཆོག་འདི། །འཛུམ་ཞིང་འཁྱིལ་བའི་གནས་སུ་བསོར། །མི་དམིགས་བདེ་དང་འཕྲོ་འདུ་ནི། །རྡོ་རྗེ་འཛིན་མར་ལྡན་ལས་བྱུང་། །ཤེས་རབ་དབྱིངས་མ་ཡུམ་གྱི་གཞལ་ཡས་སུ། །རྒྱལ་བའི་དཀྱིལ་འཁོར་མ་ལུས་རབ་བཀོད་དེ། །ཐབས་དང་ཤེས་རབ་འབྲེལ་བའི་སྦྱོར་མཆོད་ཀྱིས། །རྒྱལ་བའི་དཀྱིལ་འཁོར་ཚོགས་ལ་མཆོད་པར་འབུལ། །ༀ་བཛྲ་པྲ་བེ་ཤ་ཡ་ཨ་ལ་ལ་ཧོ། སྒྲོལ་མཆོད་ནི། བདག་གི་ཐུགས་ཀ་ནས་རྃ་ཡྃ་ཁྃ་གིས་སྣོད་བཅུད་ཀྱི་སེམས་ཅན་ཐམས་ཅད་སྦྱང་སྟེ་སེམས་ཅན་ཐམས་ཅད་ཨ་དཀར་པོར་གྱུར་ནས་བདག་གི་ཐུགས་ཀར་བསྟིམ་མོ། མཆན། དེ་ལ་མཆོད་སྦྱིན་དམ་པ་ནི། །ཐོག་མར་བདག་ཉིད་རྟོག་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་དཀྱིལ་དུ་མཁས་པས་བཞག །ང་རྒྱལ་ལག་གིས་འདུ་བྱེད་བསྒོམ། །ཧཱུྃ་དུ་གྱུར་ནས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུ་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྦྱོར་སྒྲོལ་བྱ་བ་ཀུན་བྱས་ཀྱང་། །དེ་ལ་བྱས་པ་རྡུལ་ཙམ་མེད། །སྨན་གྱི་མཆོད་པ་ནི། ཧོ་རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔའི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྷ་མིན་གསང་བ་ཡི། །ཐུགས་དམ་དབྱིངས་ཉིད་བསྐུལ་བའི་མཆོག །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། །ཧོ་རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པའི་སྡུག་བསྔལ་ཞི་མཛད་པའི། །བདེར་གཤེགས་ཀུན་བཟང་ཡབ་ཡུམ་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། །ཕུང་པོ་ལྔ་དང་འབྱུང་བ་ལྔ། །ཡེ་ཤེས་དབྱིངས་སུ་རྣམ་དག་པའི། །རིགས་ལྔ་བདེར་གཤེགས་ཡབ་ཡུམ་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། རྣམ་ཤེས་ཚོགས་དང་སྤྱོད་ཡུལ་རྣམས། །བྱང་ཆུབ་སེམས་སུ་རྣམ་དག་པའི། །སེམས་དཔའ་ལྕམ་དྲལ་ཚོགས་རྣམས། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། ཐུགས་རྗེ་ཆེན་པོའི་བྱིན་རླབས་ཀྱིས། །འགྲོ་དྲུག་དབྱིངས་སུ་སྦྱོར་མཛད་པ། །སྤྲུལ་སྐུ་ཐུབ་པ་དྲུག་རྣམས་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། ཕྱི་ནང་བདུད་ཚོགས་ཐམས་ཅད་འདུལ་མཛད་པ། །གནས་ཡུལ་རོ་ལང་རྡོ་རྗེ་བཅིང་བསྡོམས་འབེབ། །སྤྲུལ་པའི་སྒོ་སྐྱོང་ཁྲོ་རྒྱལ་ཡབ་ཡུམ་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། དུག་ལྔ་མ་སྤངས་དུག་གསུམ་རྣམ་དག་པའི། །དུས་གསུམ་བཞུགས་པའི་རྡོ་རྗེ་སློབ་དཔོན་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། ཚེ་རབས་སྔོན་ནས་ལས་ཀྱིས་འཕྲོ་འཐུད་པའི། །མཆེད་དང་ལྕམ་དྲལ་ཀརྨ་གིང་ལ་སོགས། །རྡོ་རྗེ་ལྕམ་དྲལ་མ་ལུས་འཁོར་བཅས་ལ། །དམ་ཚིག་མཆོག་གི་མཆོད་པ་འབུལ། །ༀ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་ཧོ། རྨད་དུ་བྱུང་བ་གཏོར་མའི་མཆོད་པ་ནི། ཧཱུྃ་གཟུགས་ནི་ལག་གཉིས་མེ་ལོང་འཛིན། །གཟུགས་མཛེས་སྤྱོད་པས་ཕྱོགས་བཅུར་གཡོ། །ཤིན་ཏུ་སྒེག་པའི་གཟི་བརྗིད་འབར། །གཟུགས་ཀྱི་ལྷ་མོ་སྤྱན་ལ་ཐིམ། །ༀ་བཛྲ་རཱུ་པ་ཧཱུྃ། སྒྲ་ནི་ལག་གཉིས་པི་ཝཾ་བཏེགས། །བདེ་བའི་སྒྲ་སྙན་ཕྱོགས་བཅུར་སྒྲོགས། །དབྱངས་སྙན་ཡིད་འཕྲོག་གཟི་ལྡན་འབར། །སྒྲའི་ལྷ་མོ་སྙན་ལ་ཐིམ། །ༀ་བཛྲ་ཛི་ཀ་ར་ཧཱུྃ། དྲི་ནི་ལག་གཉིས་སྤོས་བསྣམས་ཏེ། །སྤོས་ཀྱི་སྤྲིན་ལྡིང་བདུག་པ་འཕྲོ། །ཀུན་ཏུ་ཚིམ་བྱེད་དྲི་བསྲུང་ལྡན། །དྲིའི་ལྷ་མོ་ཤངས་ལ་ཐིམ། །ༀ་བཛྲ་དྷུ་པེ་ཧཱུྃ། རོ་ནི་ལག་གཉིས་སྣོད་བསྣམས་ཏེ། །བཅུད་ལྡན་རོ་ལ་མཆོག་ལྔ་བརྒྱར་འཕྲོ། །ཤིན་ཏུ་སྒེག་པའི་གཟི་བརྗིད་འབར། །རོའི་ལྷ་མོ་ལྗགས་ལ་ཐིམ། ༀ་བཛྲ་ནཻ་ཝིཏྱེ་ཧཱུྃ། རིག་ནི་རྡོ་རྗེ་ཡང་འཁྱུད་མ། །མཉེན་འཇམ་རེག་ན་བདེ་བ་ཡིན། །གཟུགས་མཛེས་སྤྱོད་པ་ཕྱོགས་བཅུར་གཡོ། །ཤིན་ཏུ་སྒེག་པའི་གཟི་བརྗིད་འབར། །རེག་གི་ལྷ་མོ་སྐུ་ལ་འཁྲིལ། །ༀ་བཛྲ་བྷནྡྷེ་ཧཱུྃ། ཆོས་ནི་འདུས་བྱས་འདུས་མ་བྱས། །སྣང་སྟོང་རྡོ་རྗེ་ནམ་མཁའི་སྐུ། །ཤིན་ཏུ་སྒེག་པའི་གཟི་བརྗིད་འབར། །ཆོས་ཀྱི་ལྷ་མོ་ཐུགས་ཀར་ཐིམ། །ༀ་དྷརྨ་དྷརྡྷུ་སྭཱ་བྷཱ་ཝ་ཨཱཏྨ་ཀོ྅་ཧཾ། ཧཱུྃ་བཛྲ་དྷྲྀཀ྄ །མཱུྃ་དྷཱ་ཏཱི་ཤྭ་རཱི། མ་ཧཱ་བ་ལིང་ཏ་ཁཱ་ཧི། ཞེས་རྒྱས་པར་མཆོད་དོ། །མཆོད་པའི་ཡོན་ཏན་ནི། བཟའ་དང་བཅའ་དང་བཏུང་དང་བགོ། །སྟེང་འདོད་ཡོན་གྱི་ལྷ་མོ་དཀར་སེར་དམར་ལྗང་རྣམས་ཀྱིས་སྤྱན་ཤངས་ཐུགས་ཀ་སྐུ་ལུས་ལ་ཐིམ། དེ་ནས་བར་བདུད་རྩི་རྒྱ་མཚོ་ལྷ་རྣམས་ཀྱི་ལྗགས་རྡོ་རྗེའི་སྦུ་གུར་གྱུར་ནས་གསོལ་བར་བསམ་ལ། རང་གི་སྔགས་ལ་ཁཱ་ཧི་བཏགས་པ་འབུལ་ལོ། །མཆན། ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །སྒྱུ་འཕྲུལ་དྲྭ་བ་མངོན་རྫོགས་པའི། །དཀྱིལ་འཁོར་བརྟེན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུམ་ལམ་ནམ་མཁའ་འགྲོ་བར་འགྱུར། །གླུ་ཚིགས་སྒྲའི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྱུར། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨ་ལི་ཀཱི་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །བསྟོད་པ་ནི། ཞི་བའི་གླུ་དྲུག་ཉིད་དམ། ཐབས་ཀྱི་ཞགས་པ་ནས་བྱུང་བའི་གླུ་བརྒྱད་ཀྱིས་བསྟོད་དོ། །ༀ་ཕྱོགས་བཅུའི་འཇིག་རྟེན་རབ་འབྱམས་ནས། །རྒྱལ་བ་གང་བཞུགས་འཁོར་དང་བཅས། །བླ་མེད་ལྷ་དང་ལྷ་མོ་ཡིས། །གྲུབ་པའི་བྱིན་རླབས་བསམ་མི་ཁྱབ། །ༀ་སེམས་དཔའ་བཅུ་དྲུག་རིགས་ཀྱི་གཙོ། །སེམས་མ་བཅུ་དྲུག་རིགས་ཀྱི་ཡུམ། །མཐུ་ཆེན་ཁྲོ་བོ་ཁྲོ་མོ་དང་། །ཕོ་ཉ་འཇིག་རྟེན་སྐྱོངས་བར་ལྡན། །ༀ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་ཐམས་ཅད་མ་ལུས་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ༀ་དཔའ་བོ་ཆེན་པོ་མཐུ་ལྡན་རྣམས། །ཐུགས་རྗེ་ཆེན་པོའི་བྱིན་རླབས་ཀྱིས། །བདག་གིས་ལྷག་པའི་བསམ་པ་རྣམས། །གྲུབ་པར་བྱིན་གྱིས་བརླབ་ཏུ་གསོལ། །ༀ་ཁམས་གསུམ་ཞིང་དུ་སྦྱོར་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་བའི་སྐུ་ལ་ཕྱག་འཚལ་ལོ། །དེ་ནས་བསྙེན་པ་བྱའོ། །དེ་ནས་དམ་བླང་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་བཅའ་ལ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་རྣམས། །འགྲོ་ལ་ཕན་པའི་དོན་དུ་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མོ་གཏོང་ན། །རྡོ་རྗེ་རྒྱལ་པོས་བྱིན་རློབས་ཤིག །ཀཱ་ཡ་ཝཱཀྐ་ཙིཏྟ། བྷོ་དྷི་ཙིཏྟ། ས་མ་ཡ་ཧཱུྃ། ༀ་ཨཱཿཧཱུྃ། ཞེས། སྤྱི་བོ་མགྲིན་པ། སྙིང་ཁ་གནས་གསུམ་དུ་གཏུག་གོ། ༈ །རྗེས་ཀྱི་ཆོ་ག་བྱ་བ་ནི། ལྷག་མ་དང་། དཀྱིལ་འཁོར་བསྡུ་བ་དང་། ཐུན་མཚམས་ཀྱི་རྣལ་འབྱོར་རྣམས་ཏེ། དང་པོ་ལྷག་མ་བྱ་བ་ནི། བདག་གི་ཐུགས་ཀ་ནས་ཁྲོ་བོ་འདོད་པའི་རྒྱལ་པོ་བྱུང་སྟེ། མཁའ་འགྲོ་མ་སུམ་ཅུ་རྩ་དྲུག་རང་དབང་མེད་པར་སྤྱན་དྲངས་ནས། བཅོམ་ལྡན་འདས་རིགས་ལྔའི་འཁོར་དུ་ཕྱོགས་བཞིར་བརྒྱད་བརྒྱད་ཟུར་བཞིར་བཞི་བཞུགས་སོ། །དེ་ནས་ལྕགས་ཀྱུའི་ཕྱག་རྒྱ་བཅས་ཏེ། ཌཱཀྐི་རཱ་ཛཿཧཱུྃ། ཌཱ་ཱཀི་རཱ་ཛ་ཛ། ཨཱ་གཙྪ་ཡ། ཨཱ་གཙྪ་ཡ། པྲ་བེ་ཤ་ཡ། པྲ་བེ་ཤ་ཡ། ཨཱ་བེ་ཤ་ཡ། ཨཱ་བེ་ཤ་ཡ། ཏིསྟ་ཡཱ། ཏིསྟ་ཡཱ། བྷན་དྷ་ཡཱ། བྷན་དྷ་ཡཱ། དོ་ཥ་ཡཱ། དོ་ཥ་ཡཱ། མོ་ཧ་ཡཱ། མོ་ཧ་ཡཱ། སརྦ་བཛྲ་ན་ནཾ། ཌཀྐི་ནི་ཧྲཱི་ད་ཡ་ཧཱུྃ་ཕཊ྄། ཅེས་བརྗོད་པས། སོ་སོའི་སྲོག་སྙིང་ཕུལ་ནས། ཞིང་ཚལ་བའི་གདན་ལ་བཞུགས་ཏེ། ཤར་གྱི་བརྒྱད་དཀར། ལྷོའི་བརྒྱད་སེར། ནུབ་ཀྱི་བརྒྱད་དམར། བྱང་གི་བརྒྱད་ལྗང་། མཚམས་རྣམས་ཀྱང་ཚུལ་དེ་ལྟར་དུ་བྱའོ། །ཀུན་ཀྱང་ལག་ན་གྲི་གུག་དང་། ཐོད་ཁྲག་ཐོགས་པ། རུས་པའི་རྒྱན་གྱིས་གྲུབ་པའོ། །དེ་ནས་མཆོད་དེ། ཧཱུྃ་བཛྲ་ཌཱཀྐ་ཌཱཀྐི་ནི། པྲ་ཏིཙྪ་ཨེ་མྃ་བྷ་ལིངྟ་ཧཱུྃ་ཕཊ྄་ཁཱ་ཧི། ༀ་སརྦ་བྷུདྡྷ་ཌཱཀྐ་ཌཱཀྐི་ནི། པྲ་ཏིཙྪ་ཨེ་མྃ་བྷ་ལིངྟ་ༀ་ཕཊ྄་ཁཱ་ཧི། དེ་ཤར་གྱི་དགུའོ། །ཏྲཱྃ་སརྦ་རཏྣ་ཌཱཀྐ་ཌཱཀྐི་ནི། པྲ་ཏིཙྪ་ཨེ་མྃ་བྷ་ལིངྟ་ཏྲཱཾ་ཕཊ྄་ཁཱ་ཧི། ལྷོའི་དགུའོ། །ཧྲཱིཿསརྦ་པདྨ་ཌཱཀྐ་ཌཱཀྐི་ནི་ཧྲཱིཿཕཊ྄ཿཔྲ་ཏིཙྪ་ཨེ་མྃ་བྷ་ལིངྟ་ཧྲཱིཿཕཊ྄་ཁཱ་ཧི། ནུབ་ཀྱི་དགུའོ། །ཧ་སརྦ་ཀརྨ་ཌཱཀྐ་ཌཱཀྐི་ནི་པྲ་ཏིཙྪ། ཨེ་མྃ་བྷ་ལིངྟ་ཧ་ཕཊ྄་ཁཱ་ཧི། བྱང་གི་དགུའོ། །འདི་རྣམས་རྒྱས་པར་ན་སོ་སོའི་གྲངས་དང་ཚད་དུ་བཟླའོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ལྗགས་ཀྱི་རྩེ་མོ་ལས། བདུད་རྩིའི་ཆར་འཕྲོས་པས། མཁའ་འགྲོ་མ་རྣམས་ཀྱི་ཞལ་དུ་ཐིམ་པར་བསྒོམ་པ་ནི། ཁ་ཆུའི་དགོངས་པའོ། །གཏོར་མ་བདུད་རྩིའི་རྒྱ་མཚོར་གྱུར་ནས། མཁའ་འགྲོ་མ་རྣམས་ཀྱིས་གསོལ་བར་སྒོམ་པ་ནི་བདུད་རྩིའི་དགོངས་པའོ། །དུག་གསུམ་གྱི་ཤ་ཁྲག་ཏུ་གྱུར་ནས། མཁའ་འགྲོ་མ་རྣམས་ལ་བསྟབ་པ་ནི། དུག་གསུམ་གྱི་དགོངས་པའོ། །དེ་ནས་མཁའ་འགྲོ་མ་རྣམས་ཀྱི་ཅག་གེ་ཉན་པར་བསྒོམ་ཞིང་། རྡོ་རྗེ་དྲིལ་བུ་ཐོགས་ལ་འདི་སྐད་དོ། །ཧཱུྃ་བཅོམ་ལྡན་འདས་རྡོ་རྗེ་སེམས་དཔའ་ལ། །མཁའ་འགྲོའི་ཚོགས་ཀྱིས་བསྐོར་བ་ནི། །མངོན་པར་དགའ་བའི་འཇིག་རྟེན་ནས། །རྡོ་རྗེ་ནམ་མཁར་འགྲོ་བ་རྣམས། །ཡི་དྭགས་སྟན་ལ་ཡང་དག་བཞུགས། །དཔའ་བོ་འཇིགས་པའི་གཟུགས་འཛིན་ཏེ། །སྐལ་ལྡན་རང་གི་ལག་ཆར་ལྡན། །གདུག་པའི་སེམས་ཀྱིས་བསྡིག་བྱེད་ཅིང་། །ཤ་ཁྲག་དང་ནི་རྒྱུ་མ་དང་། །རྐང་དང་ཚིལ་བུ་ཟ་སྤྱོད་རྣམས། །ཟ་བར་བྱེད་ཅིང་འདྲེན་པར་བྱེད། །གསོད་པར་བྱེད་ཅིང་ཕྲོག་པར་བྱེད། །ཀུན་ཀྱང་རང་གི་དམ་ཚིག་ལྡན། །ཤར་གྱི་ཕྱོགས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །དཔལ་དང་ལྡན་པའི་འཇིག་རྟེན་ནས། །རྡོ་རྗེ་ནམ་མཁར་འགྲོ་མ་རྣམས། །གཟི་བརྗིད་ཆེ་དང་འབར་བྱེད་མ། །འཛེམ་བྱེད་མ་དང་བོང་བུའི་མགོ། །ཀུན་ཀྱང་རང་གི་དམ་ཚིག་ལྡན། །ལྷོའི་ཕྱོགས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །བདེ་བ་ཅན་གྱི་འཇིག་རྟེན་ནས། །རྡོ་རྗེ་ནམ་མཁར་འགྲོ་མ་རྣམས། །ཆགས་ཆེན་མ་དང་ཆགས་བྲལ་མ། །འཁོར་ལོ་མ་དང་རྒྱས་འདེབས་མ། །ཀུན་ཀྱང་རང་གི་དམ་ཚིག་ལྡན། །ནུབ་ཀྱི་ཕྱོགས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །རྣམ་པར་དག་པོའི་འཇིག་རྟེན་ནས། །རྡོ་རྗེ་ནམ་མཁར་འགྲོ་མ་རྣམས། །སྣ་ཚོགས་ལུས་དང་བསྲུང་བ་མོ། །གནོད་སྦྱིན་མ་དང་ཡང་དག་འཕྲོག །ཀུན་ཀྱང་རང་གི་དམ་ཚིག་ལྡན། །བྱང་གི་ཕྱོགས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །ཤ་ཆེན་སྤུངས་པའི་འཇིག་རྟེན་ནས། །བྱ་རོག་གདོང་ནི་མིག་འཕྲུལ་ཅན། །འཇིགས་པའི་མིག་དང་འཇིགས་པའི་གདུང་། །ཤར་ལྷོ་ནམ་མཁར་འགྲོ་མ་རྣམས། །ལག་པར་གྲི་དང་ཁྲག་གཞོང་ཐོགས། །མཆོག་ཏུ་ཤ་དང་ཁྲག་ལ་དགྱེས། །ཀུན་ཀྱང་རང་གི་དམ་ཚིག་ལྡན། །ཤར་ལྷོའི་མཚམས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །ཀེང་རུས་སྤུངས་པའི་འཇིག་རྟེན་ནས། །བཞད་དང་འུག་པ་གདོང་རིང་མ། །ཁྲོས་པ་ཁྱི་དང་ཕག་གི་གདོང་། །ལྷོ་ནུབ་ནམ་མཁར་འགྲོ་མ་རྣམས། །ལྟོ་འཕྱང་པོ་ལ་བུམ་པ་འཛིན། །ཀུན་ཀྱང་རང་གི་དམ་ཚིག་ལྡན། །ལྷོ་ནུབ་མཚམས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །རཀྟ་ཁྲག་གི་རྦ་ཀློང་ནས། །རྔ་མོང་བོང་བུའི་གདུང་འཛིན་ཏེ། །ཁྲོས་པས་ར་དང་བྱི་ལའི་གདོང་། །ནུབ་བྱང་ནམ་མཁར་འགྲོ་མ་རྣམས། །རྒྱུ་མའི་མགོ་ནས་ཟ་བར་བྱེད། །ཀུན་ཀྱང་རང་གི་ལག་ཆ་ལྡན། །ནུབ་བྱང་མཚམས་ནས་གཤེགས་སུ་གསོལ། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །ཐལ་ཆེན་སྤུངས་པའི་འཇིག་རྟེན་ནས། །ཀེང་རུས་དཀར་པོ་འཛིན་པ་སྟེ། །ཁྲོས་པས་རུས་པའི་ཕྲེང་བ་ཀླུབ། །བྱང་ཤར་ནམ་མཁར་འགྲོ་མ་རྣམས། །ཕན་ཚུན་འཐབ་ཅིང་རྩོད་པར་བྱེད། །འཇིགས་བྱེད་དྲག་པོའི་མཆེ་བ་ཅན། །ལྕེ་སྤྱང་གི་ནི་འཁོར་གྱིས་བསྐོར། །ཀུན་ཀྱང་རང་གི་དམ་ཚིག་ལྡན། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །དཔལ་ལྡན་རྡོ་རྗེ་སེམས་དཔའ་ཡི། །དཀྱིལ་འཁོར་དེའི་གྲ་བཞི་ནས། །འཇིགས་བྱེད་མཁའ་འགྲོ་བཞི་བྱུང་བ། །ཤར་གྱི་ཕྱོགས་ནས་བྱུང་བ་ནི། །རྡོ་རྗེ་མཁའ་འགྲོ་ཆེན་མོ་སྟེ། །སྲིན་པོ་བུམ་རྣ་གཤེགས་སུ་གསོལ། །འཇིགས་བྱེད་འབུམ་ཕྲག་དགུ་དང་བཅས། །ཀུན་ཀྱང་རང་གི་དམ་ཚིག་ལྡན། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །ལྷོའི་ཕྱོགས་ནས་བྱུང་བ་ནི། །རིན་ཆེན་མཁའ་འགྲོ་ཆེན་མོ་སྟེ། །རྡོ་རྗེ་དུས་མཚན་གཤེགས་སུ་གསོལ། །འཇིགས་བྱེད་འབུམ་ཕྲག་ལྔ་དང་བཅས། །ཀུན་ཀྱང་རང་གི་དམ་ཚིག་ལྡན། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །ནུབ་ཀྱི་ཕྱོགས་ནས་བྱུང་བ་ནི། །པདྨ་མཁའ་འགྲོ་ཆེན་མོ་སྟེ། །རྡོ་རྗེ་དུས་ཀྱི་འཁོར་ལོ་ཡང་། །འཇིགས་བྱེད་འབུམ་ཕྲག་གསུམ་དང་བཅས། །ཀུན་ཀྱང་རང་གི་དམ་ཚིག་ལྡན། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་མཛད་དུ་གསོལ། །བྱང་གི་ཕྱོགས་ནས་བྱུང་བ་ནི། །ལས་ཀྱི་རིགས་ཀྱི་མཁའ་འགྲོ་མ། །རྡོ་རྗེ་ལང་ཀ་མགྲིན་བཅུ་ཡང་། །གནོད་སྦྱིན་བྱེ་བ་འབུམ་དང་བཅས། །ཀུན་ཀྱང་རང་གི་དམ་ཚིག་ལྡན། །འདིར་གཤེགས་རྒྱན་གྱི་གཏོར་མ་བཞེས། །བཀའི་ཕ་འབབ་འདི་གསོལ་ལ། །བདག་གི་བསམ་པ་ཉེ་བར་བསྒྲུབ། །ལས་བཅོལ་ཕྲིན་ལས་གྲུབ་པར་མཛོད། །མཁའ་འགྲོ་ཕོ་མོ་ཁྱེད་རྣམས་ཀྱང་། །སྔོན་ཚེ་བཅོམ་ལྡན་རིགས་ལྔ་ཡིས། །ཕོ་རྣམས་བཏུལ་ཏེ་གདན་དུ་བཏིང་། །མོ་རྣམས་བཏུལ་ཏེ་མཛའ་མོར་བྱས། །སོ་སོའི་དམ་ཚིག་བགོས་པ་བཞིན། །བདག་ཀྱང་རྒྱལ་བའི་བསྟན་བསྲུང་ན། །ལས་བཅོལ་ཕྲིན་ལས་མཛད་དུ་གསོལ། །བར་དུ་གཅོད་པའི་དགྲ་བགེགས་རྣམས། །མྱུར་དུ་སྒྲོལ་ལ་མེད་པར་མཛོད། །བདུད་འདུལ་མཐུ་དང་སྐལ་ལྡན་ཚེ། །མཛོད་ལྡན་ནོར་དང་འཁོར་རྣམས་ཀྱིས། །དངོས་གྲུབ་དམ་པ་སྩལ་དུ་སྩོལ། །ཅེས་མཆོད་པ་བསྐྱལ་ལ། མཁའ་འགྲོ་མ་རྣམས་སོ་སོའི་རིགས་ལ་བསྡུ། ཡི་གེ་བརྒྱ་པ་བརྗོད། དེ་ནས་དཀྱིལ་འཁོར་བསྡུ། སླར་སྐད་ཅིག་གིས་རྡོ་རྗེ་སེམས་དཔའི་སྐུར་བསྐྱེད། ལུས་བསྲུང་། གོ་བགོ། སྤྱོད་ལམ་གྱི་བྱ་བ་རྣམས་བྱའོ། །གཏོར་མ་བསྐྱོང་ཐོན་ནས། སྣང་སྲིད་ལྷར་བརླབས་ལ། གཞལ་ཡས་ཁང་ལ་བསྡུ། དེ་སྒོ་བ་ལ་བསྡུ། དེ་ཐུབ་དྲུག་དང་ཀུན་བཟང་ཡབ་ཡུམ་ལ། དེ་རྡོ་རྗེ་སེམས་དཔའ་ཡབ་ཡུམ་ལ། དེ་རིགས་བཞི་ཡབ་ཡུམ་ལ། དེ་གཙོ་བོ་ལ། དེ་རྡོ་རྗེ་སེམས་དཔའ་ལ། དེ་རྡོ་རྗེ་ལ། དེ་ཧཱུྃ་ལ། དེ་ཞབས་ཀྱུ་ལ། དེ་འ་ལ། དེ་ཧ་ལ། དེ་ཟླ་ཚེས་ལ། དེ་ཐིག་ལེ་ལ། དེ་མི་དམིགས་པ་ལ་བཞག་གོ། །དེའི་ངང་ལ་སྔགས་བརྗོད་པས། རང་ཉིད་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ། ཕྱག་མཚན་དང་རྒྱན་མེད་པའོ། །ལུས་བསྲུང་། གོ་བགོ། །།