ཕུར་པའི་བརྒྱུད་འདེབས། མགོན་པོ་རྒྱལ་མཚན།
༈ ༀ་སྭ་སྟི། ཆོས་ཉིད་གདལ་ཁྱབ་ཆེན་པོའི་ཕོ་བྲང་ནས། །དཔལ་ལྡན་ཀུན་བཟང་རྡོ་རྗེ་འཆང་ཆེན་དང་། །གསང་བའི་བདག་པོ་ཙ་བྱི་དྲི་མེད་བ་དང་། །པྲ་ཏི་ཧ་ལོ་ཨིནྡྲ་བྷུ་དྷི་དང་། །རོ་ལང་བདེ་བ་དྷ་ན་སཾ་ཏྲི་དང་། །པདྨ་འབྱུང་གནས་མཁའ་འགྲོ་མཚོ་རྒྱལ་དང་། །དཔལ་གྱི་མཆོད་གནས་སྟག་གི་རྡོ་རྗེ་དང་། །ཀླུའི་རྒྱལ་མཚན་བྱང་ཆུབ་ཤེས་རབ་དང་། །ཡེ་ཤེས་དབང་ཕྱུག་བྱང་ཆུབ་རྡོ་རྗེ་དང་། །བྱང་ཆུབ་ཚུལ་ཁྲིམས་ག་ལྗང་དབང་ཕྱུག་དང་། །གྱེ་རེ་གྲགས་པ་ཤོ་མང་ཅན་པའི་ཞབས། །རྡོ་རྗེ་རྒྱལ་མཚན་དམ་པ་བདེ་གཤེགས་དང་། །འགྲོ་མགོན་གཙང་པ་བྱམས་ཆོས་རྣམ་གཉིས་དང་། །སྤྱན་དང་ཞང་སྟོན་རྣམ་གཉིས་ཡེ་ཤེས་འབུམ། །བྱང་ཆུབ་དཔོན་པོ་བྱང་ཆུབ་རྡོ་རྗེ་དང་། །སང་ག་གུ་རུ་བཛྲ་ཤྲཱི་དང་ནི། །བྷུནྡྷ་བྷ་དྲ་བཀྲ་ཤིས་བླ་མ་དང་། །ཛྙཱ་ན་ཀེ་དུ་དྷརྨཱ་རཏྣ་དང་། །བཛྲ་ཀུ་མ་ར་ཡི་ལྷ་ཚོགས་དང་། །ཕྱི་ནང་ཆོས་སྐྱོང་དམ་ཅན་རྒྱ་མཚོའི་ཚོགས། །བདག་ཅག་གུས་པའི་ཡིད་ཀྱིས་གསོལ་འདེབས་ན། །བར་ཆད་ཞི་ཞིང་བདུད་ལས་རྒྱལ་བ་དང་། །དམ་ཅན་རྒྱ་མཚོའི་ཚོགས་རྣམས་བཀའ་ཉན་ཅིང་། །ཕྲིན་ལས་རྒྱ་མཚོ་མ་ལུས་འགྲུབ་པ་དང་། །དངོས་གྲུབ་རྒྱ་མཚོའི་ཚོགས་རྣམས་འབྱུང་བ་དང་། །རྡོ་རྗེའི་སྐུ་ཐོབ་དོན་གཉིས་ལྷུན་གྲུབ་ཤོག །ཕུར་བརྒྱུད་ཀྱི་གསོལ་འདེབས་བསྡུས་པ་འདི། མགོན་པོ་རྒྱལ་མཚན་གྱིས་བཀོད་པའོ།། །།