འདས་པ་སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་གཅིག་པ།
དེ་ནས་ཡི་དྭགས་དྲག་པོ་དེ་ང་རྒྱལ་གྱི་གཏུམ་སྐད་འབྱིན་ཏེ། ཨེ་མའོ་ཐམས་ཅད་ཀྱི་དབང་ཕྱུག་ཆེན་པོ་ནི་བདག་ཡིན་ན། བདག་ལས་གཞན་པའི་དབང་ཕྱུག་དང་ཕྲུ་མ་ཡོད་ན་དེ་ཡང་དག་གིར་འགྱུར་ན། བདག་ནི་འགྲན་གྱི་ཟླ་མེད་ཆེ་བཙན་གཅིག་པུར་བྱུང་ངོ་ཞེས་ང་རྒྱལ་གྱི་གདངས་ངར་སྒྲོགས་སོ། །དེའི་ཚེ་འགྲོ་བ་རྣམས་ཀྱི་ཚུལ་འདི་ལྟར་བྱུང་སྟེ། ཤེས་བློ་ཐམས་ཅད་རྨུགས་ཤིང་བདུད་ཀྱིས་བྱིན་གྱིས་བརླབས་པས་ཐམས་ཅད་ཀྱང་ཤིན་ཏུ་སྟོང་པ་རྒྱུན་ཆད་དུ་གྱུར་ཏེ་མཐའ་ཟད་པ་ཤ་དག་གོ། །བདག་ཏུ་ཞེན་པར་གྱུར་ཏེ་ཐེར་ཟུག་པ་ཤ་དག་གོ། །འགོག་པ་འཇུག་པར་གྱུར་ཏེ་འགགས་ཤིང་འདས་པ་ཤ་དག་གོ། །གདུག་ཅིང་གཏུམ་པར་གྱུར་ཏེ་འོ་དོད་འབོད་པར་ལྟུང་བ་ཤ་དག་གོ། །ལོག་པར་ལྟ་བར་གྱུར་ཏེ་མནར་མེད་པར་ལྟུང་བ་ཤ་དག་གོ། །བརྐམ་ཞིང་འཇུངས་པར་གྱུར་ཏེ་གཤིན་རྗེའི་འཇིག་རྟེན་དུ་ལྟུང་བ་ཤ་དག་གོ། །ཤིན་ཏུ་གཡེང་བ་ཆེན་པོར་གྱུར་ཏེ་མི་ཁོམ་པའི་གནས་སུ་ལྟུང་བ་ཤ་དག་གོ། །ཤིན་ཏུ་གཏི་མུག་གིས་རྨོངས་པར་གྱུར་ཏེ་བྱོལ་སོང་གི་གནས་སུ་ལྟུང་བ་ཤ་དག་གོ། །ཤིན་ཏུ་ཆགས་པས་མྱོས་པར་གྱུར་ཏེ་མངལ་གྱི་ཁམས་སུ་འགྲོ་བ་ཤ་དག་གོ། །བྱང་ཆུབ་ཀྱི་ཤིང་སྐམས་པས་སེམས་ཀྱི་རྩ་བ་ཚིག་པ་ཤ་དག་གོ། །ལང་ཀའི་བདག་པོ་དེ་ཡང་འདི་ལྟར་གྲགས་ཤིང་གྲགས་ཏེ་གྲགས་པར་གྱུར་ཏོ། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་སྟོང་པ་ཉིད་ལ་བརྩོན། །སྟོང་པ་ཉིད་དུ་མུ་ཆད་པས། །ཆད་པའི་ཁམས་ཆེན་ཉིད་དུ་གྱུར། །དེ་ནས་སླར་ཡང་འཕོས་པ་ཡིས། །གྲོལ་ཐར་ལམ་ནི་ཆད་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བདག་ཏུ་ལྟ་ལ་བརྩོན། །ཐེར་ཟུག་རྟག་པ་བདག་ཆེན་གྱིས། །ཐམས་ཅད་རྟག་པ་ཉིད་དུ་འགྱུར། །དེ་ནས་དེ་ཉིད་བླར་བྱུང་བས། །དམ་པ་དག་ལ་རྨོངས་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་འགོག་ལ་བརྩོན་པར་འགྱུར། །ཤིན་ཏུ་འགོག་པའི་སྦྱོར་བ་ཡིས། །འགགས་ཤིང་ཡོངས་སུ་འདས་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུངས་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཁྲོ་གཏུམ་གདུག་པར་འགྱུར། །ཤིན་ཏུ་ཁྲོ་གཏུམ་གདུག་པ་ཡིས། །འོ་དོད་འབོད་པར་ལྟུང་བར་འགྱུར། །དེ་ནས་འཕོས་པའི་སེམས་ཅན་དེ། །བག་ཆགས་ལས་ཀྱིས་མཚམས་སྦྱར་ནས། །ཤིན་ཏུ་གདུག་པ་ཆེན་པོར་འགྱུར། །བློ་ཡང་བདུད་ཀྱིས་བྱིན་བརླབས་ནས། །དུག་ནད་རིམས་དང་ཕྲ་མེན་མ། །གནོད་པའི་ཟུག་རྔུ་གཟེར་མདའ་འཕྲོ། །བདུད་དང་ལོག་འདྲེན་རྣམ་ཐར་འཚེ། །ཤིན་ཏུ་གཏུམ་རྔམ་མ་རུངས་པས། །འཇིག་རྟེན་གསུམ་དག་འཇིག་བྱེད་ཅིང་། །དམ་ཚིག་དག་ལ་ཟ་བ་དང་། །དམ་པའི་ཆུ་བོ་རྐ་བཟློག་སྟེ། །ལྷ་མི་འཇིག་རྟེན་འཕོ་བར་བྱེད། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ལོག་པར་ལྟ་ལ་གནས་པར་འགྱུར། །ལྟ་བ་ཤིན་ཏུ་ལོག་པ་ཡིས། །མནར་མེད་དམྱལ་བ་ཆེན་པོར་ལྟུང་། །དེ་ནས་གལ་ཏེ་སླར་བྱུང་ན། །དམ་པའི་ལམ་ཉིད་ཆད་པར་འགྱུར། །འདས་པའི་དུམ་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བརྐམ་ཞིང་འཇུངས་པར་འགྱུར། །ཤིན་ཏུ་གདུངས་འཇུངས་བརྐམ་པ་ཡིས། །ཡི་དྭགས་གཤིན་རྗེའི་ཁམས་སུ་ལྷུང་། །དེ་ནས་དེ་ཉིད་སླར་བྱུང་བས། །ཤིན་ཏུ་སྐེམ་པོ་དབུལ་པོར་གྱུར། །བཀྲེས་སྐོམ་ཤིན་ཏུ་གདུངས་པ་ཡིས། །ཕན་ཚུན་གསོད་ཅིང་འཇོམས་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ལེ་ལོས་གཡེང་བར་འགྱུར། །ཤིན་ཏུ་གཡེང་བའི་ལེ་ལོ་ཡིས། །མི་ཁོམ་གནས་སུ་ལྟུང་བར་འགྱུར། །དེ་ནས་དེ་ཉིད་སླར་བྱུང་བས། །བསྐལ་པ་གསུམ་གྱི་བསྐལ་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་གཏི་མུག་རྨོངས་པར་འགྱུར། །ཤིན་ཏུ་གཏི་མུག་རྨོངས་པ་ཡིས། །གཏི་མུག་བྱོལ་སོང་ཉིད་དུ་ལྟུང་། །དེ་ནས་དེ་ཉིད་སླར་བྱུང་བས། །མཐོང་སྣང་ལམ་ཡང་ཆད་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཆགས་པས་མྱོས་པར་གྱུར། །ཤིན་ཏུ་ཆགས་པས་མྱོས་པ་ཡིས། །མངལ་གྱི་གྲོང་ཁྱེར་ཉིད་དུ་ལྟུང་། །དེ་ནས་དེ་ཉིད་སླར་བྱུང་བས། །འདོད་པའི་མེ་ཡིས་གདུང་བར་འགྱུར། །ཞེས་ཐམས་ཅད་དུ་གྲག་གོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་འདས་པ་སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་གཅིག་པའོ།། །།