སྤྱོད་པ་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་སྟེ་སུམ་ཅུ་ལྔ་པ།

དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་ལ་འདི་སྐད་ཅེས་སྨྲས་ཏེ་དྲིས་པ། གསང་བ་པའི་བདག་པོ་གསང་སྔགས་ཀྱི་བྱིན་གྱི་རླབས་ལས་སྣང་བའི་སངས་རྒྱས་རྣམས་ཀྱི་ཡོན་ཏན་དང་ཕྲིན་ལས་ཇི་ལྟར་སྣང་བ་ལགས། གསང་བ་པའི་བདག་པོས་སྨྲས་པ། ལང་ཀའི་བདག་པོས་གསང་སྔགས་ཀྱི་བྱིན་གྱི་རླབས་ལས་སྣང་བའི་སངས་རྒྱས་རྣམས་ཀྱི་ཡོན་ཏན་དང་། ཕྲིན་ལས་ནི་འདི་ལྟར་སྣང་བར་རིག་པར་བྱའོ། །གང་ཞེ་ན། འདི་ལྟ་སྟེ། མི་རྟོག་གང་ལ་རྟག་ཉིད་དུ། །བརྟགས་ལས་རྟོགས་པའི་བྱིན་བརླབས་འབྱུང་། །མི་ཟད་རིན་ཆེན་ནམ་མཁའི་མཛོད། །བྱིན་བརླབས་ཆེན་པོ་རྒྱུན་མི་འཆད། །གསང་ཉིད་སྙིང་པོའི་བྱིན་བརླབས་ནི། །གང་དུ་རྣམ་པར་མི་རྟོག་བཞིན། །འདོད་འབྱུང་བྱ་བ་ཐམས་ཅད་བྱེད། །དེ་ལ་བྱེད་པ་ཅི་ཡང་མེད། །ཀུ་བ་གཅིག་གིས་བྱིན་བརླབས་ཀྱིས། །ལྗགས་ནི་སྟོང་སྙེད་བསྒྱུར་བ་བཞིན། །གསང་བའི་དོན་མཐོང་སྐད་ཅིག་གིས། །ཐམས་ཅད་གསང་བའི་སྙིར་པོར་འགྱུར། །མར་མེ་གཅིག་གི་བྱིན་བརླབས་ཀྱིས། །བསྐལ་པའི་མུན་ནག་སེལ་བ་བཞིན། །སྙིང་པོ་དོན་རིག་སྐད་ཅིག་མས། །བསྐལ་པར་གནས་པའི་སྒྲིབ་པ་སེལ། །ནོར་བུ་རིན་ཆེན་གང་སེལ་བ། །དབུལ་བའི་འཇིགས་པ་མེད་པ་ལྟར། །སྙིང་པོ་དོན་སད་གང་སེལ་བ། །ལྟུང་གནས་འཁོར་བའི་འཇིགས་པ་མེད། །ཉི་ཟླའི་འོད་འབར་རིན་ཆེན་གྱིས། །རིན་ཆེན་རིན་ཐང་འབུམ་ཆར་མིན། །དཀར་པོར་མཐར་ཐུག་བསོད་ནམས་ཀྱིས། །གསང་ཉིད་སྐད་ཅིག་འབུམ་ཆར་མིན། །འགྲོ་གང་འོ་མའི་རྒྱ་མཚོ་ཇི་སྙེད་དུ། །སེང་གེའི་འོ་མ་གཅིག་བླུགས་རླག་པ་ལྟར། །ལས་དང་ཉོན་མོངས་སྡུག་བསྔལ་རྒྱ་མཚོར་ནི། །གསང་ཉིད་སྐད་ཅིག་སྣང་བས་ཐམས་ཅད་མེད། །འཁོར་ལོས་སྒྱུར་རྒྱལ་གང་རྟེན་འཇིགས་མེད་ལྟར། །གསང་ཉིད་ངེས་ལ་ལོག་པའི་དགྲས་མི་འཇིགས། །རྡོ་རྗེ་ཉམས་ཀྱང་རིན་ཆེན་ཟིལ་གནོན་ཅིང་། །རིན་ཆེན་མི་བརླག་དབུལ་བའི་སྡུག་བསྔལ་སེལ། །གསང་ཉིད་རྡོ་རྗེ་སྙིང་པོ་ཉམས་འགྱུར་ཡང་། །ཉན་ཐོས་ལ་སོགས་དབུ་མ་ཟིལ་གནོན་ཅིང་། །གསང་ཉིད་ངེས་སྣང་ཆོས་ཀྱི་དབུལ་བ་སེལ། །སེང་གེ་ཕྲུག་གུའི་དྲིས་ནི་གར་ཁྱབ་པར། །གང་དག་མི་བཟོད་ཐམས་ཅད་འབྲོས་པར་འགྱུར། །སྙིང་པོ་དོན་ལ་རིག་པའི་མཐུ་མེད་ཀྱང་། །སེམས་བསྐྱེད་ཙམ་གྱིས་དབུ་མ་ཟིལ་གྱིས་གནོན། །ལོག་པའི་དགྲ་རྣམས་ཟིལ་གནོན་སྐྲག་འགྱུར་ཞིང་། །རང་རང་གནས་ནས་ཟུག་རྔུས་གཟིར་བར་འགྱུར། །སྐྱེས་བུ་རྐང་ལག་བཅད་དེ་ཉམས་ཀྱང་འཚོ། །ཇི་ལྟར་སྙིང་ཕྱུང་འཚོ་བའི་གླགས་མེད་ལྟར། །ཡན་ལག་ལྟ་བུའི་དབུ་མ་ཉམས་ཀྱང་འཚོ། །སྙིང་དང་འདྲ་བའི་གསང་ཉིད་མེད་ན་རླག །གང་ཞིག་རྡོ་རྗེ་སྙིང་པོ་གསང་འཛིན་པ། །ཤིང་རྟ་ལ་སོགས་རྟ་ལ་འདུག་སྤྱོད་པ། །དེ་ཡི་བྱ་བ་བྱེད་པ་གཞན་མེད་ལྟར། །དེ་ཡི་རྟ་སྟེགས་རྒྱལ་བའི་དབུས་བཀུར་མཛད། །དབུ་མ་རྣམ་ཐར་གསུམ་སྒོར་བསྐལ་སྤྱད་ཀྱང་། །དེ་ལ་རྒྱལ་བ་མི་དགོངས་བཀུར་མི་མཛད། །སྙིང་པོ་དོན་རིག་སྐད་ཅིག་ཙམ་གྱིས་ཀྱང་། །བྱིན་བརླབས་ཡོན་ཏན་རྒྱལ་བས་བཤད་མི་རྫོགས། །དཀར་པོ་མཐའ་ཐུག་བསོད་ནམས་ཀུན། །སེན་མོ་ཐོག་གི་ས་རྡུལ་འདྲ། །རྡོ་རྗེ་སྙིང་པོར་གཅིག་སྐྱེད་པ། །ས་ཡི་དཀྱིལ་འཁོར་ཆེན་པོ་ཙམ། །དཀར་པོ་ཕྱོགས་ཀྱི་མཐའ་ཐུག་པ། །དེ་ནི་མུན་ཁང་སྒྲོན་མེ་ཙམ། །རྡོ་རྗེ་སྙིང་པོར་གཅིག་རིག་པ། །དུས་མཐའི་བསྐལ་པའི་མེ་ཆེན་འདྲ། །དབུ་མར་སྣང་བའི་ནམ་མཁའ་ནི། །གང་གི་གསེང་ཁུང་ནམ་མཁའོ། །རྡོ་རྗེ་གསང་བའི་ནམ་མཁའ་ནི། །འབྱུང་ཆེན་གཏོས་ཀྱི་ནམ་མཁའ་འདྲ། །མཛད་པའི་བརླབས་ཀྱི་ཞི་བ་ནི། །སྟོངས་པའི་བསྐལ་པ་ལྟ་བུར་སྣང་། །ཐམས་ཅད་རྒྱས་པར་མཛད་པ་ཡང་། །གནས་པའི་བསྐལ་པ་ལྟ་བུར་སྣང་། །ཐུགས་རྗེའི་དབང་དུ་མཛད་པ་ཡང་། །ཆགས་པའི་བསྐལ་པ་ལྟ་བུར་སྣང་། །མངོན་པར་སྤྱོད་པ་མཛད་པ་ནི། །འཇིག་པའི་བསྐལ་པ་ལྟ་བུའོ། །ལང་ཀའི་བདག་པོ་དེ་དག་ནི་ཡོན་ཏན་མི་ཟད་པ་མཛོད་ཀྱི་བཀོད་པ་དང་། ཕྲིན་ལས་རླབས་ཀྱིས་མཛད་པའི་བྱིན་རླབས་ལས་སྣང་བར་རིག་པར་བྱའོ། །དེ་སྐད་ཅེས་སྨྲས་པས་དམན་པའི་ལུས་ཀྱི་སེམས་དཔའ་རྣམས་གསང་བ་དམ་པ་ཁོ་ན་ཉིད་བྱིན་གྱིས་བརླབས་ལས་སྣང་བར་རིག་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་སྤྱོད་པ་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་སྟེ་སུམ་ཅུ་ལྔ་པའོ།། །།ཐེག་པ་ཆེན་པོ་རེས་པར་འབྱུང་བའི་ཚུལ་ལས་བྱིན་གྱིས་རླབས་ཀྱི་སྣང་བ་ན་ཡང་འབྱུང་བའི་གཏམ་རྒྱུད་བརྗོད་པའི་ཕྱག་རྒྱ་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་བདུན་པའོ།། །།