མདོ་རྒྱ་ཆེར་འགྲེལ་པའི་ལེའུ་སྟེ་ལྔ་བཅུ་གསུམ་པ།
དེ་ནས་ཡང་ལང་ཀའི་བདག་པོས་གསང་བ་པའི་བདག་པོ་ལ་དྲིས་པ། ཀྱེ་གསང་བ་པའི་བདག་པོ་མདོ་ཡོངས་སུ་དགྲོལ་བ་ཞེས་བགྱི་བ་ཇི་ལྟར་ལགས། དེ་སྐད་ཅེས་དྲིས་པ་ལས་གསང་བ་པའི་བདག་པོས་སྨྲས་པ། ལང་ཀའི་བདག་པོ་མདོ་འདི་ནི་འདི་ལྟར་གང་དུ་གང་ལར་བརྗོད་པ་ཐམས་ཅད་མདོ་བཞི་པོ་འདི་དག་ཁོ་ནར་ཟད་དོ། །ལང་ཀའི་བདག་པོ་བཞི་གང་ཞེ་ན། འདི་ལྟ་སྟེ། གང་ཐོས་པས་ངེས་པར་འབྱུང་བ་དང་། གང་གིས་མཐོང་བས་ངེས་པར་འབྱུང་བ་དང་། གང་གིས་མངོན་སུམ་པར་འབྱུང་བ་དང་། གང་ནས་གང་དུ་ངེས་པར་འབྱུང་བ་མེད་པའོ། །ལང་ཀའི་བདག་པོ་དེ་ལ་གང་ཐོས་པས་ངེས་པར་འབྱུང་བ་ནི། ཀུན་གྱི་རང་བཞིན་དེ་བཞིན་ཉིད། །གང་གིས་ཐོས་པ་དེ་ཉིད་དུ། །དངོས་པོ་མེད་པར་ཀུན་ཁྱབ་རྒྱས། །དེ་ཤེས་དེ་བཞིན་ཉིད་དུ་ཆུབ། །ལང་ཀའི་བདག་པོ་གང་གིས་མཐོང་བ་ངེས་པར་འབྱུང་བ་ནི་འདི་ལྟ་སྟེ། །གང་གིས་དེ་བཞིན་དེ་མཐོང་ན། །མཐོང་བས་སྣང་སྲིད་ཡོངས་སུ་དག །གང་ལའང་ཉམ་ང་ཡོད་མ་ཡིན། །དེ་བཞིན་ཉིད་དེར་ཀུན་སངས་རྒྱས། །ལང་ཀའི་བདག་པོ་གང་གིས་མངོན་སུམ་པར་ངེས་པར་འབྱུང་བ་ནི་འདི་ལྟ་སྟེ། གང་གིས་སྟོང་ཉིད་དེ་ཤེས་པ། །དེར་ནི་ཐམས་ཅད་མངོན་སུམ་དུ། །སྟོང་པ་ཉིད་དུ་ངེས་པར་ཟད། །དེ་ཉིད་མངོན་སུམ་སངས་རྒྱས་ཡིན། །ལང་ཀའི་བདག་པོ་གང་ནས་གང་དུ་ངེས་པར་འབྱུང་བ་མེད་པ་ནི་འདི་ལྟ་སྟེ། ཐམས་ཅད་དེ་བཞིན་ཉིད་དབྱིངས་སུ། །ཡེ་ནས་རྣམ་རྟོག་མེད་སངས་རྒྱས། །གདོད་སངས་རྒྱས་སུ་ག་ལ་ཡོད། །དེ་བཞིན་དེ་ཉིད་ཁོ་ནའོ། །ལང་ཀའི་བདག་པོ་དེ་དག་ནི་མདོ་སྟེ། གང་གིས་གང་ལ་གང་ལྟར་བརྗོད་པ་མཐའ་ཡས་པ་མདོ་བཞི་པོ་དེ་དག་འབའ་ཞིག་ཁོ་ནར་ཟད་དོ། །དེ་དག་ནི་གང་གི་མདུད་པ་རྣམ་པར་འགྲོལ་བ་སྟེ། ཆོས་ཐམས་ཅད་རྣམ་པར་གྲོལ་ཅིང་རྒྱ་ཆེར་འགྲེལ་བ་ཉིད་དུ་ཤེས་པར་བྱའོ། །གསང་བ་པའི་བདག་པོས་དེ་སྐད་ཅེས་སྨྲས་པས་དམན་པའི་ལུས་ཀྱི་སེམས་དཔའ་རྣམས་ཕྱོགས་ཐམས་ཅད་གསལ་བར་ཡོངས་སུ་ཆུབ་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་མདོ་རྒྱ་ཆེར་འགྲེལ་པའི་ལེའུ་སྟེ་ལྔ་བཅུ་གསུམ་པའོ།། །།