རྣལ་འབྱོར་མིག་གི་སྒྲོན་མ་བསྟན་པའི་ལེའུ་སྟེ་དྲུག་ཅུ་པ།
དེ་ནས་ཡང་ལང་ཀའི་མངའ་བདག་ལ་སོགས་པ་གྲོགས་ཀྱི་སེམས་དཔའ་རྣམས་ཀྱིས་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ་འདིར་རིན་པོ་ཆེ་འབར་བའི་སྒྲོན་མ་བསྲེལ་བར་བྱའོ་ཞེས་དམ་བཅའ་བར་དགོངས་པ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲི་བ་ཡོངས་སུ་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་གྲོགས་པོ་དག་རིན་པོ་ཆེ་འབར་བ་ནི་འོད་ཀྱི་འབྱུང་གནས་ལགས་ཏེ། འཐོར་རླུང་ཚོགས་ཀྱིས་ཀྱང་མི་སོང་པས་མུན་པ་སེལ་བར་བྱེད་པ་ཁོ་ན་བས་སྒྲོན་མེ་ཞེས་བྱའོ། །དེ་ནི་འདི་ལྟར་མི་ཤེས་པ་སེལ་བའི་ཤེས་པ་ཉིད་ཡིན་ཏེ། ཉི་མའི་སྙིང་པོའམ་རིན་པོ་ཆེའི་སྒྲོན་མ་ལ་མུན་པའི་གཞི་མེད་པ་བཞིན་གང་ཤེས་པའི་རང་བཞིན་ལ་མི་ཤེས་པའི་གཞི་མེད་དོ། །དེ་ཡང་འདི་ལྟར་སྒྲོན་མ་དམ་པ་ནུབ་པར་གྱུར་པ་ན་ཀུན་གྱི་དེ་ཉིད་གཅིག་ཁོ་ན་ལ་ཁྱད་པར་གྱི་རྣམ་པར་འབྱུང་བར་འགྱུར་བ་ནི་འདི་ལྟ་སྟེ། མུན་པའི་ཤེས་པ་དང་། ཡ་མཚན་ཅན་གྱི་ཤེས་པ་དང་། བྱིས་པ་རྣམས་ཀྱི་ཤེས་པ་དང་། ཕྱོགས་སུ་རིགས་པའི་ཤེས་པ་དང་། མཐའ་དབུས་འབྱེད་པའི་ཤེས་པ་དང་། དམ་པ་ཉིད་ཀྱི་ཤེས་པའོ། །ཀྱེ་གྲོགས་པོ་དག་གང་མུན་པའི་ཤེས་པ་ནི་གང་འདི་ལས་ལོག་པར་ཤེས་པའོ། །ལོག་སྲེད་ཅན་གྱི་ཤེས་པ་ནི་ཐ་དད་སྨྲ་ཞིང་གཉིས་སུ་འདོད་པའོ། །བྱིས་པ་རྣམས་ནི་འདི་ལྟ་སྟེ། གང་མེད་བར་སྨྲ་ཞིང་ཐམས་ཅད་ཡོད་པར་འདོད་པའོ། །དེ་ཡང་འདི་ལྟར་རྡུལ་ནས་དཔག་ཚད་སྐད་ཅིག་མ། །བསྐལ་པ་སྐར་མ་ཉི་ཟླ་དང་། །རི་བོ་ཁོར་ཡུག་ལུས་ཅན་ལུས། །སེམས་དང་ཚེ་ལ་ལོངས་སྤྱོད་ཚད། །དུས་གནས་འཇིག་ནུབ་མཚན་ཉིད་ལས། །ཐ་དད་བྱེ་བྲག་ཐམས་ཅད་དུ། །བཤིག་ནས་མེད་སྨྲ་ཡོད་ཅེས་འདོད། །མོས་པ་ཆུང་བས་དེ་ལས་མིན། །གང་འདིར་རྣལ་འབྱོར་ཕྱོགས་རིག་པ། །འདི་ཀུན་གང་འདིར་ཁོ་ན་བས། །དངོས་མེད་རྣམ་ཤེས་ཉིད་དུ་སྣང་། །དེ་ཉིད་མ་བཅོས་དེ་བཞིན་ཉིད། །ཡོད་པས་ཆོས་སྐུ་རྟག་པར་འདོད། །ངེས་པར་འབྱེད་པའི་རྣལ་འབྱོར་པ། །གང་དག་སྒྱུ་མའི་མཚན་ཉིད་དུ། །སྣང་བས་ཀུན་རྫོབ་བྱ་བ་བྱེད། །ངེས་པར་དབྱེ་བ་མེད་པའོ། །ལ་ལ་དེ་ལྟར་དེ་ངེས་ཏེ། །དེ་ལས་མ་གཏོགས་དེ་འོག་མིན། །དེ་ཉིད་དེས་ནི་དངོས་མེད་ཕྱིར། །དམ་པ་ཉིད་དུ་མེད་པའོ། །ལ་ལ་གང་མ་ཟིན་པའི་ཕྱིར། །དེ་སྣང་བ་ནི་གང་ནའང་རུང་། །ཕྲ་རབ་ས་ནི་རྣམ་ཀུན་མཁྱེན། །སླུ་འདྲིད་པ་ལྟར་ཡོད་མ་ཡིན། །དམ་པ་ཉིད་ཀྱི་དམ་པ་གང་། །ཆོས་ཉིད་ཡེ་ནས་སངས་རྒྱས་ལ། །དེ་མིན་ལྟ་བ་བཟློག་པའི་ཕྱིར། །ཡེ་ནས་སངས་རྒྱས་ཞེས་བརྗོད་པ། །ཐ་སྙད་ཙམ་དུ་བརྗོད་པར་ཟད། །ཡེ་ནས་བརྗོད་པ་ཚིག་གི་ལམ། །ཐ་སྙད་གཉིས་དང་བྲལ་བ་ལ། །སྒྲོ་སྐུར་ཚིག་གི་སྙད་མི་གདགས། །བརྗོད་པའི་ཐ་སྙད་ཚིག་ལམ་འདས། །ནམ་མཁའ་འདི་ནི་ཡོད་མེད་ཅེས། །བླུན་པོ་རྣམས་ནི་རྩོད་པར་འགྱུར། །མཁས་པ་རྣམས་ནི་དེ་ལྟ་མིན། །གང་དེ་རྩོད་ལ་ངོ་མཚར་ཆེ། །དེ་བཞིན་ཉིད་འདི་ཡོད་མེད་ཅེས། །བྱིས་པ་རྣམས་ནི་རྩོད་པར་འགྱུར། །སྐྱེས་བུ་གང་དག་དེ་ལྟ་མིན། །རྩོད་པ་ཤེས་རབ་འཆལ་བར་ཟད། །འདི་ལྟར་སྣང་བའི་ཆོས་ཐམས་ཅད། །ཡེའམ་ངང་གིས་སངས་རྒྱས་ལ། །མིན་ལས་ཡིན་པར་འགྱུར་མ་ཡིན། །ངོ་བོ་ཉིད་ཀྱི་དེ་ཉིད་ལ། །ཡིན་དང་མིན་ཞེས་ཅི་བྱར་ཡོད། །ནམ་མཁའ་འདི་ནི་མེད་དོ་ཞེས། །མི་ཤེས་གང་གིས་རྟོག་པར་བྱེད། །གང་ཤེས་ཡེ་ནས་ཡང་མི་རྟོག །མིན་པར་མི་རྟོག་ཚིག་མི་བརྗོད། །རྒྱུ་དང་ལས་དང་རྣམ་གྲངས་ལ། །མཚན་ཉིད་ངེས་པ་ངོ་བོ་དང་། །འབྲས་བུ་དགོས་ཆེད་རེ་རེ་འབྱུང་། །འདི་ལྟར་འདིར་ནི་གང་གི་རྒྱུ། །རང་འབྱུང་དེ་ཉིད་རྟོག་དཔྱོད་བཅས། །གང་དག་གང་ལ་སྐྱེ་མཆེད་པ། །གཉིས་པོ་འདི་དག་ཉིད་ཀྱི་རྒྱུ། །གང་ལས་གང་མིན་ཇི་སྙེད་པ། །ཁྱད་པར་བྱེ་བྲག་ཐ་དད་པ། །ངེས་འབྱེད་འཇུག་འབྲེལ་སྦྱོར་བཅས་པ། །དེ་འཛིན་ཕྱིན་ཅི་མ་ལོག་པ། །མངོན་འབྱིན་དོན་འདོད་འབྲེལ་པའོ། །རྣམ་གྲངས་རྣམ་གཉིས་དོན་བཞིན་ནོ། །ཀུན་ལ་ངེས་པར་བྱེད་པ་ཡིན། །དེ་ཉིད་མ་འདྲེས་ཡོངས་རྫོགས་པ། །དངོས་མེད་མི་རྟོག་ཡོགས་སུ་རྫོགས། །སོ་སོ་ཐ་དད་བསམ་མི་ཁྱབ། །མ་འདྲེས་དེ་ལྟར་ཇི་བཞིན་བྱེད། །གང་འདིར་ཕྱིན་ཅི་མ་ལོག་པར། །ཡོངས་སུ་ཆུབ་པ་ཕུལ་ཉིད་དོ། །ཀུན་ནས་མ་རྨོངས་ཐམས་ཅད་གསལ། །གང་ལ་མ་འགགས་ཐོགས་པ་མེད། །ཀུན་འཇུག་གང་མ་རིག་པ་གཅོད། །སྐྱེ་མཆེད་ཀུན་དུ་གྱུར་པ་ཉིད། །གང་མཆེད་གང་གི་རླུང་ཞུགས་པ། །མཁས་པའི་ཡེ་ཤེས་ཚད་མེད་པའོ། །གང་ལ་ལོག་པ་དེ་ཉིད་དག །དེ་ཉིད་ཕུལ་དུ་ཕྱིན་པའི་ཕྱིར། །དམིགས་བུ་གསལ་བའི་སྒྲོན་མ་ཡིས། །དེ་ཉིད་དེ་ལ་བལྟ་བར་བྱ། །སྒྲོན་མའི་སྣང་བ་མི་ཤེས་པ། །མཐོང་བྱ་ཀུན་ལ་མུན་པས་བསྒྲིབས། །ནམས་ཀྱང་སྣང་བར་མི་འགྱུར་ཏེ། །ལོང་བའི་གྲོང་ཁྱེར་ཆེན་པོར་འགྲོ། །སྒྲོན་མ་འབར་བ་གང་སྲེལ་བ། །ཀུན་ལ་མུན་པས་སངས་གསལ་བའི། །མ་ནོར་མ་བཅོས་དེ་བཞིན་ཉིད། །སྒྲོན་མ་དམིགས་བུས་མཐོང་བར་འགྱུར། །དེ་ལྟར་དམ་པའི་གྲོགས་པོ་དག །རིན་ཆེན་སྒྲོན་མ་འབར་བའི་མེ། །མུན་སྣང་དམིགས་བུར་མ་བསྲེལ་བར། །དེ་ཉིད་གསེར་མཐོང་ག་ལ་རིགས། །གྲོགས་པོ་དག་དེ་དག་ནི་སྒྲོན་མ་དམ་པ་བསྲེལ་བར་བྱའོ་ཞེས་དགོངས་པ་དམ་པ་ལེགས་པར་བགྲོས་པར་ཤེས་པར་བྱའོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྣལ་འབྱོར་མིག་གི་སྒྲོན་མ་བསྟན་པའི་ལེའུ་སྟེ་དྲུག་ཅུ་པའོ།། །།