cover

སྔ་འགྱུར་བཀའ་མའི་ཆོས་སྡེའི་གླེགས་བམ་བཅོ་བརྒྱད་པ།

གླེགས་བམ། ཛ༽

དྷརྨ་ཤྲཱི། ཛྙཱ་ན། འགྱུར་མེད་རྡོ་རྗེ། རང་བྱུང་རྡོ་རྗེ། དྷརྨ་ཤྲཱི། འཇིགས་མེད་གླིང་པ། འགྱུར་མེད་ཚེ་དབང་མཆོག་གྲུབ། འགྱུར་མེད་ཚེ་དབང་མཆོག་གྲུབ། ཛྙཱ་ན། འགྱུར་མེད་རྡོ་རྗེ། རང་བྱུང་རྡོ་རྗེ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

འདུས་པ་མདོའི་དབང་གི་སྤྱི་དོན་རྒྱུད་ལུང་མན་ངག་གི་གནད་གསལ་བྱེད་སྒྲོན་མེ། དྷརྨ་ཤྲཱི།

ཏ ནྟྲ ག མོ དེ ཤཱ ནྟཾ མ རྨ བྱ ཉྫ ན དཱི པ ནཱ མ སཾ གྲ ཧ སཱུ ཏྲ བྷི ཥི ཉྩ ས མཱ ནྱཱ རྠ བི ཧ ར ཏི སྨ། །
འདུས་པ་མདོའི་དབང་གི་སྤྱི་དོན་རྒྱུད་ལུང་མན་ངག་གི་གནད་གསལ་བྱེད་སྒྲོན་མེ་ཞེས་བྱ་བ་བཞུགས་སོ། །
ༀ་སིདྡྷི་རསྟུ། འདུས་པ་ཆེན་པོ་མདོའི་དབང་གི་སྤྱི་དོན་རྒྱུད་ལུང་མན་ངག་གི་གནད་གསལ་བར་བྱེད་པའི་སྒྲོན་མེ་ཞེས་བྱ་བ། བླ་མ་དང་བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །ཨེ་གསང་ཀུན་ཏུ་བཟང་མོའི་མཁའ་དབྱིངས་སུ། །རང་རིག་ཡེ་ཤེས་མི་འགྱུར་མཆོག་བདེའི་ཝཾ། །གཉིས་མེད་འཁོར་ཞིའི་སྒྱུ་འཕྲུལ་ཟློས་གར་ཅན། །ཁྱབ་བདག་རྡོ་རྗེ་སློབ་དཔོན་སྤྱི་བོས་མཆོད། །དབྱིངས་དང་ཡེ་ཤེས་གཉིས་སུ་མེད་གང་ཆོས་ཀུན་གནས་ལུགས་གདོད་མའི་གཤིས། །དཀྱིལ་འཁོར་གསུམ་དུ་མ་འདྲེས་སྣང་ཡང་བྱང་ཆུབ་སེམས་སུ་ཡོངས་རྫོགས་པ། །ཀུན་ཁྱབ་སྲིད་དང་ཞི་བའི་དཔལ་གྱུར་སྐུ་ལྔའི་བདག་ཉིད་བཅོམ་ལྡན་འདས། །ཀུན་གྱི་སྔོན་རོལ་མངོན་པར་བྱང་ཆུབ་ཀུན་བཟང་གདོད་མའི་མགོན་དེས་སྐྱོངས། །གང་གི་རྣམ་འགྱུར་ཞི་དང་ཁྲོ་ཚུལ་སྒྱུ་མའི་མིག་འཕྲུལ་ངོ་མཚར་གཟུགས། །དཔག་མེད་ཡེ་ཤེས་རོལ་མོའི་སྤྲིན་འཕྲོ་དྭངས་པའི་མཚོ་ནང་གཟའ་སྐར་བཞིན། །ཤིན་ཏུ་རྣམ་དག་བདེ་གཤེགས་སྣང་བ་ཇི་སྙེད་ཇི་བཞིན་རྟེན་བརྟེན་པར། །མངོན་པར་འཆར་བ་འདུས་པ་ཆེན་པོའི་དཀྱིལ་འཁོར་འཁོར་ལོར་བཅས་ལ་འདུད། །དཔལ་ལྡན་གསང་བདག་དཔའ་བོའི་མཐུས་དྲངས་རིགས་ཅན་ལྔ་དང་སྐལ་ལྡན་ཛཿ དབང་བཞིའི་བཅུད་འདུས་རོ་ལངས་བདེ་བ་འགྲེལ་མཛད་བདེ་བ་གསལ་ལ་སོགས། །རྒྱ་བལ་བྲུ་ཤའི་ལོ་པན་ཚོགས་དང་ཁྱད་པར་ཁམས་གསུམ་འགྲོ་བའི་མགོན། །རྒྱལ་བའི་རྒྱལ་ཚབ་པདྨ་ཀ་རའི་ངོ་མཚར་རྣམ་ཐར་དད་བརྒྱའི་གསོས། །བསྐྱེད་རྫོགས་གསུམ་གྱི་ཆུ་གཏེར་ལ་རོལ་གྲུབ་གཉིས་ནོར་བུའི་གདེངས་ཀ་ཅན། །བཤད་སྒྲུབ་ཕྲིན་ལས་ཆུ་འཛིན་འཁྲིགས་ལས་ཕན་བདེའི་ཆར་འབེབས་ཀླུའི་དབང་པོ། །གནུབས་ཆེན་ཡབ་སྲས་ཟུར་ཆེན་མེས་དཔོན་གླན་སྟོན་རྡོ་རྗེ་འོད་ལ་སོགས། །ཕྱི་ནང་སྒྲུབ་གསང་དབང་བཞིའི་ཆུ་རྒྱུན་འབེབས་མཁས་རྩ་བརྒྱུད་བླ་མ་རྒྱལ། །འདུས་པ་མདོ་ཡི་བསྙེན་སྒྲུབ་རྣམ་བཞི་དང་། །འབྲེལ་བའི་ཟབ་རྒྱས་ཆུ་བོ་བཞི་ཡི་དབང་། །རྒྱུད་དང་མན་ངག་དགོངས་དོན་མ་འདྲེས་པར། །སྟོན་མཁས་འདི་ན་ཁོ་བོའི་ཡོངས་འཛིན་ཙམ། །གང་དེའི་དྲིན་ལས་རང་གི་རྟོགས་པའི་དོན། །དེ་ལྟར་གཞན་ལ་སྟོན་འདོད་ལྷག་བསམ་གྱིས། །དྲངས་པའི་སྤྱི་དོན་རྒྱུད་ལུང་མན་ངག་གནད། །གསལ་བྱེད་ལེགས་བཤད་སྒྲོན་མེ་དེང་འདིར་སྤྲོ། །དེ་ཡང་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཟུང་འཇུག་རོ་གཅིག་ཏུ་བཞུགས་པའི་བདག་ཉིད། འཕགས་མཆོག་རྣམས་ཀྱི་ཐུགས་སུ་ལེགས་པར་ཆུད་ཅིང་། ཐར་འདོད་ཀྱི་སྐྱེས་བུ་རྣམས་ཀྱིས་རྟོགས་པར་བྱ་བའི་ཡུལ་ནི། དབྱིངས་དང་ཡེ་ཤེས་ཟུང་དུ་འཇུག་པའི་མཚན་ཉིད་ཅན། དཀྱིལ་འཁོར་རྣམ་གསུམ་དབྱེར་མེད་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པ་ཉིད་དེ། སྤྱི་མདོ་དགོངས་པ་འདུས་པ་ལས། ཐམས་ཅད་བདག་ཉིད་དེར་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་གསུངས། དེ་ཡང་དཀྱིལ་འཁོར་རྣམ་པ་གསུམ་གང་ཞེ་ན། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཀྱི་རང་རྩལ་དུ་འདུ་ཞིང་། སེམས་ཉིད་སྐྱེ་མེད་སྤྲོས་པ་དང་བྲལ་བ་ནི་ཡུམ་ཀུན་ཏུ་བཟང་མོའི་མཁའ་ཀློང་རྣམ་པར་དག་པ་ཡེ་ཇི་བཞིན་པའི་དཀྱིལ་འཁོར་ཏེ། དེ་ལས། ཐམས་ཅད་ཀྱི་རང་བཞིན་གང་ལགས་པ་དེ་མ་བཅོས་མ་སླད་མ་བྱུང་མ་སྐྱེས་ཇི་བཞིན་པའི་དེ་ཁོ་ན་ཉིད་ཡེ་ཇི་བཞིན་པའི་དཀྱིལ་འཁོར་དུ་མཐོང་ལགས་སོ། །ཞེས་སོ། །དེ་ཉིད་ཐམས་ཅད་དུ་མ་འགགས་པར་རང་སྣང་རིས་མེད་ཀུན་ཁྱབ་ཏུ་ཤར་བ་ནི། ཀུན་ཏུ་བཟང་པོ་རང་བྱུང་གི་ཡེ་ཤེས་རང་བཞིན་ལྷུན་གྲུབ་ཀྱི་དཀྱིལ་འཁོར་ཏེ། ཐམས་ཅད་ཀྱིས་དེ་ཉིད་དུ་སངས་རྒྱས་ཏེ་ཀུན་ལ་ཁྱབ་པའི་སླད་དུ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་མཐོང་ལགས་སོ། །ཞེས་སོ། །དེ་གཉིས་ཀྱང་ངོ་བོ་ཐ་མི་དད་པར་ཟུང་འཇུག་ཏུ་གནས་པ་ནི། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཏེ། ཐམས་ཅད་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་མཐོང་ལགས་སོ། །ཞེས་གསུངས་པའི་ཕྱིར། དེ་ཡང་ཆོས་སྤྱི་སྐད་དང་བསྟུན་ན། སྲིད་ཞི་ཀུན་ཁྱབ་ཀྱི་ཡེ་ཤེས་ཆོས་ཀྱི་དབྱིངས་འགྱུར་བ་མེད་པ་བདེ་བར་གཤེགས་པའི་སྙིང་པོའམ་ཀུན་གཞིའི་ཡེ་ཤེས་ཞེས་བསྙད་ཅིང་། དེ་ཉིད་ཀྱི་རང་བཞིན་ཤེས་བྱ་ཐམས་ཅད་ལ་རིས་མེད་ཀུན་ཁྱབ་དང་། ཁྱད་པར་ལུས་ཅན་རྣམས་ལ་མགོན་དང་བཅུད་དུ་བཞུགས་པས་ན། གནས་སྐབས་དང་མཐར་ཐུགས་གི་སྡུག་བསྔལ་བསལ་ཞིང་བདེ་བ་བསྐྱེད་པ་པོ་དང་རིག་པ་དང་གྲུབ་པའི་མཐའ་དུ་མ་དང་། ལམ་སྟོན་པ་པོ་ལ་སོགས་ཏེ་བདེ་བ་དམ་པའི་རྒྱུར་བརྟན་གཡོ་ཐམས་ཅད་པའི་རྣམ་པས་འགྲོ་བའི་དོན་སྤྱོད་པའམ་གདོད་མའི་མགོན་པོ་དེའི་རྣམ་འགྱུར་དུ་གསལ་ཞིང་། ཁྱད་པར་དྲི་མ་སྦྱོང་བའི་གཞི་གནས་ལུགས་དེ་ཉིད་ཀྱི་མདངས་འོད་སྦྱང་བྱའི་དྲི་མ་འཁོར་བའི་ཆོས་དང་འཛོམ་པ་ལས་སྦྱོང་བྱེད་ལམ་གྱི་རྣམ་པར་ཤར་ནས། དེས་སྦྱང་བྱ་སྦྱོང་བའི་གཉེན་པོར་གྱུར་པ་ཡིན་ལ། དེ་ཡང་དགོངས་འདུས་ལས། འདོད་ལ་ཞེན་དང་ངེས་པར་འབྱུང་། །གདུལ་དཀའ་དྲག་པོའི་ག དུལ་བྱའོ། །ཞེས་པས་ལས་རྒྱུན་གཅོད་པའི་ཕྲིན་ལས་འཚམས་པར་སྣང་བའི་དབང་དུ་བྱས་ཏེ། གང་ཞིག་འདེགས་པར་བྱ་བའི་ཡུལ་གདུལ་བྱ་གསུམ་དུ་ངེས་པར་བཤད་ཅིང་། དེ་གསུམ་གང་གིས་འདེགས་པར་བྱེད་པའི་རྩལ་ཡང་། དེ་ཉིད་ལས། འཁོར་ལོ་རྒྱུན་དང་དོན་དམ་ངེས། །ཆོ་འཕྲུལ་མངོན་པར་འབྱུང་བ་གསུམ། །ཞེས་པས་ཐེག་པ་གསུམ་དུ་འདུལ། དེ་གསུམ་གྱིས་ཇི་ལྟར་འདེགས་པར་བྱེད་པའི་ཐབས་ཀྱང་། དེ་ལས། རང་བཞིན་ཤུགས་དང་གཉེན་པོ་ཐབས། །ལས་རྒྱུན་གཅོད་པ་འབའ་ཞིག་གོ། །ཞེས་འདུལ་ཐབས་གསུམ་དུ་ངེས་ཏེ། དང་པོ་འདོད་ལ་ཞེན་པའི་གདུལ་བྱ་ཉོན་མོངས་པ་རགས་པ་མ་སྐྱེས་ཤིང་། ངེས་འབྱུང་གི་བློ་ཡང་མེད་པས་གནས་སྐབས་ཀྱི་བདེ་བ་ཙམ་དོན་དུ་གཉེར་བ་ལ། འཁོར་ལོ་རྒྱུན་གྱི་ཐེག་པས་རང་བཞིན་ཤུགས་ཀྱིས་འདུལ་ཐབས་འབྱུང་བ་ལྔར་ཤར་ནས། སྐྱེད་པའི་རྒྱུ། འཚོ་བའི་རྐྱེན། བརྟེན་པའི་གནས་ལ་སོགས་ཏེ་འདོད་པ་ཙམ་གྱི་བདེ་བ་ལ་སྦྱོར་བ་ཡང་གདོད་མའི་མགོན་པོ་དེའི་ཕྲིན་ལས་སོ། །གཉིས་པ་འཁོར་བ་ལས་ངེས་པར་འབྱུང་བར་འདོད་པའི་གདུལ་བྱ་ལ། དོན་དམ་ངེས་པའི་ཐེག་པས་གཉེན་པོ་ཐབས་ཀྱིས་འདུལ་བའི་ཐབས་བློའི་རིམ་པ་ལྟར་ཐེག་པ་དགུར་སྣང་ནས་ཉོན་མོངས་པ་སྤོང་སྦྱོང་དབང་དུ་བྱེད་པས་དོན་མཛད་པའི་ཕྲིན་ལས་སོ། །གསུམ་པ་གདུལ་དཀའ་དྲག་པོའི་གདུལ་བྱ་ལ། ཆོ་འཕྲུལ་མངོན་འབྱུང་གི་ཐེག་པས་ལས་རྒྱུན་གཅོད་པའི་ཐབས་ཀྱིས་འདུལ་བའི་ཐབས་འབྱུང་བ་ཁྲོས་པའི་ཆོ་འཕྲུལ་ཕྱི་ནང་གི་བསྐལ་བ་ཟུང་གསུམ་གྱིས་རྒྱུ་ཕྱི་སྣང་བ་དང་ནང་ཞེན་པའི་ལས་ངན་གྱི་རྒྱུན་མྱོང་ཐབས་ཀྱིས་སྦྱངས་པས། འབྲས་བུ་གནས་ངན་གྱི་སྡུག་བསྔལ་ལས་གྲོལ་བར་བྱེད་པའི་ཕྱིར་དོན་མཛད་པའི་ཕྲིན་ལས་སོ། །དེ་ལྟར་འདུལ་ཐབས་གསུམ་ལས། བར་པ་དོན་དམ་ངེས་པའི་ཐིག་པ་ནི། སྤྱིར་ལངྐར་གཤེགས་པ་ལས། ཇི་སྲིད་འདུ་ཤེས་ཡོད་ཀྱི་བར། །ཐེག་པའི་མཐའ་ལ་ཐུག་པ་མེད། །ཅེས་པས་ཐེག་པའི་སྒོ་བསམ་གྱིས་མི་ཁྱབ་ཀྱང་། མདོ་བསྡུ་ན་རྣམ་པ་གསུམ་སྟེ། དགོངས་འདུས་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་པས་ཀུན་འབྱུང་འདྲེན་པའི་ཐེག་པ་ཉན་རང་བྱང་སེམས་གསུམ་དང་། དཀའ་ཐུབ་རིག་བྱེད་ཀྱི་ཐེག་པ་བྱ་སྤྱོད་རྣལ་འབྱོར་གསུམ་དང་། དབང་སྒྱུར་ཐབས་ཀྱི་ཐེག་པ་བསྐྱེད་དང་རྫོགས་དང་ཡོངས་སུ་རྫོགས་པ་གསུམ་སྟེ། གདུལ་བྱ་བློ་རབ་འབྲིང་ཐ་གསུམ་རེ་རེ་ལའང་ནང་གསེས་ཀྱི་ཆུང་ངུའི་ཆུང་ངུ་སོགས་གསུམ་གསུམ་དུ་ཕྱེ་བས་དགུར་སྣང་བའོ། །འོ་ན་ལང་གཤེགས་སུ། ལྷ་ཡི་ཐེག་དང་ཚངས་པའི་ཐེག །ཅེས་གསུངས་པ་ལྟར་གྱི་ལྷ་མིའི་ཐེག་པ་འདིར་མི་སྟོན་པ་ཅི་སྙམ་ན། འདིར་ནི་འཁོར་བ་ལས་ངེས་པར་འབྱུང་བའི་གདུལ་བྱ་ལ་དགོངས་ནས་རྣམ་པར་གྲོལ་བའམ་ངེས་པར་ལེགས་པའི་ཐེག་པ་ཁོ་ན་བསྟན་མོད། འོན་ཀྱང་རིན་ཆེན་ཕྲེང་བ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་པ་ལྟར་མངོན་མཐོའི་སྐས་ལ་འཛེགས་ནས་ངེས་ལེགས་ཀྱི་ཐེག་པའི་ཁང་བཟང་དུ་འཇུག་པར་གསུངས་པས་ན། གདུལ་བྱ་རིམ་གྱིས་པ་ལ་ལམ་སྟེགས་སུ་སྦྱོར་བའམ། མ་སྦྱར་ཀྱང་ཐེག་པ་འདི་བདེ་འགྲོའི་རྟེན་སྒྲུབ་བྱེད་ཡིན་པས་སྔོན་དུ་འགྲོ་བ་དོན་གྱིས་ཐོབ་ཅིང་། དེ་ལྟ་ནའང་འདི་སྙམ་དུ། ལྷ་དང་མིའི་ཐེག་པས་བགྲོད་པར་བྱེད་པའི་རྟེན་ནི། ཕྱི་ནང་གཉིས་ཀ་ལ་ཡོད་པ་ལས། ཐར་པ་དོན་གཉེར་གྱི་བློ་མེད་ནའང་དཀོན་མཆོག་གསུམ་ལ་བྱ་བ་བྱེད་པར་མོས་པའི་སྒོ་ནས་སྐྱབས་སུ་འཛིན་པས་ནང་པའི་དབང་དུ་བྱས་པ་སོར་གཞག་ལྷ་མིའི་ཐེག་པ་ནི། རྣམ་གྲོལ་གྱི་ཐེག་པའི་ལམ་སྟེགས་སུ་འགྲོ་བར་རིགས་མོད། གཞན་དུ་སློབ་དཔོན་དཔའ་བོས། ཁྱོད་ཀྱི་བསྟན་ལ་མི་ཕྱོགས་པའི། །སྐྱེ་བོ་མ་རིག་གིས་ལྡོངས་པ། །སྲིད་རྩེའི་བར་དུ་སོང་ནས་ཀྱང་། །སྡུག་བསྔལ་ཡང་འབྱུང་སྲིད་པ་སྒྲུབ། །ཅེས་གསུངས་པ་ལྟར་ཕྱི་རོལ་པའི་དབང་དུ་བྱས་པའི་ལྷ་མིའི་ཐེག་པ་ནི། ལོག་པར་རྟོགས་པའི་གྲུབ་མཐའ་ཡིན་པས། དེ་འདྲ་རྣམ་གྲོལ་གྱི་ལམ་སྟེགས་སུ་ཇི་ལྟར་འགྲོ་སྙམ་ན། ཕྱི་རོལ་པའི་བསྟན་པའང་རྒྱལ་བའི་གང་འདུལ་གྱི་ཕྲིན་ལས་སུ་སྣང་བས་ན་རྣམ་གྲོལ་གྱི་ལམ་སྟེགས་སུ་འགྲོ་བའི་སྐབས་ཡོད་དགོས་པས་སྐྱོན་མེད་དོ། །དེ་ལྟར་ཡང་བྱང་ཆུབ་སེམས་དཔའ་རྡོ་རྗེ་ཆོས་ཀྱིས་མཛད་པའི་ཐུགས་རྗེ་དཔྱངས་ཐག་གནས་ཀྱི་ལུང་ལས། ཐུགས་རྗེའི་འཇུག་པ་སྣ་ཚོགས་པས། །ཇི་ལྟར་འོས་པས་འདུལ་མཛད་དེ། །ཕྱི་རོལ་བྱེད་པའི་སྡེ་རྣམས་ལ། །དེ་དང་དེར་སྣང་སྟོན་པས་གསུངས། །ཞེས་འབྱུང་ཞིང་། རིགས་པས་ཀྱང་གྲུབ་སྟེ། ཕྱི་རོལ་པའི་རྟག་ཆད་ཀྱི་མཐའ་སྟོན་པའི་གཞུང་ལུགས་དེ་དག་ཀྱང་། ཤིན་ཏུ་རྨོངས་པའི་གང་ཟག་ལ་བློ་གྲོས་ཀྱི་འཇུག་པ་གསར་དུ་སྐྱེ་བའི་རྒྱུ་ཡིན་པས། ཐལ་འགྱུར་རྣམ་དག་འགོད་མཁན་གྱི་རྒོལ་བ་དང་འཕྲད་པའམ། བློ་གྲོས་ཤིན་ཏུ་བྱང་བའི་ཚེ་རང་སྟོབས་ཀྱིས་ཀྱང་ཡང་དག་པའི་ལམ་དུ་འཇུག་པའི་སྐབས་སྲིད་པས་ན། བརྒྱུད་ནས་རྒྱལ་བའི་ཕྲིན་ལས་སུ་འགྲོ་བ་ཡོད་དགོས་པ་ལ་དགོངས་ནས། དེ་ལྟར་གསུངས་མོད། འོན་ཀྱང་རེ་ཞིག་ཐར་ལམ་ལ་འཇུག་པའི་སྐལ་བ་མེད་པ་ལ་དེ་ལྟར་སྣང་བའི་ཕྱིར། གཞུང་དེ་དག་གི་ལུགས་སྐྱོང་བ་རྣམས་ཕྱིན་ཅི་ལོག་ལ་ཞུགས་པ་ཞེས་ཀྱང་གསུངས་སོ། །དེའི་ཕྱིར་སངས་རྒྱས་ཀྱི་བསྟན་པ་ཁོ་ན་ལས་གཞན་དུ་རྣམ་པར་གྲོལ་བའི་ཐབས་སྟོན་པའི་ལམ་མེད་པས། དངོས་སུ་ན་རྒྱལ་བའི་བསྟན་པ་ཉིད་ཐར་འདོད་རྣམས་ཀྱིས་འཇུག་པར་བྱ་བའི་སྒོ་ཡིན་ལ། དེ་ཡང་དབྱེ་བསྡུའི་ཁྱད་པར་གྱིས་ཐེག་པ་གསུམ་མམ་དགུ་ཞེས་བརྗོད་མོད་ཀྱི། དེ་ལྟ་ནའང་ཆེས་ཐ་དད་པའི་རིམ་པ་གསུམ་མམ་དགུ་ཡོད་པ་ནི་མ་ཡིན་ཏེ། ཇི་ལྟར་ཞེ་ན། ཉན་རང་གི་ཐེག་པས་དངོས་སུ་ལམ་གྱི་ཆ་ཤས་ཙམ་སྟོན་པས། འབྲས་བུའང་ཐར་པའི་ཆ་ཤས་ཙམ་ཞིག་ཐོབ་པ་ཡིན་གྱི། རྣམ་གྲོལ་གྱི་ལམ་དང་འབྲས་བུ་ཡོངས་སུ་རྫོགས་པ་མི་སྟོན་ཅིང་། མཐར་ཐུག་ཐེག་པ་ཆེན་པོ་ལ་འཇུག་དགོས་པས་རང་རྐྱ་མ་ཐུབ་པའི་ཕྱིར་ཐེག་ཆེན་དུ་འདུ་ལ། ཐེག་པ་ཆེན་པོ་དེ་ལའང་། རྒྱུ་ཕ་རོལ་ཏུ་ཕྱིན་པ་དང་། འབྲས་བུ་རྡོ་རྗེ་ཐེག་པ་གཉིས་ཞེས་འབྱུང་བ་ལས། ཕ་རོལ་ཏུ་ཕྱིན་པའི་ཐེག་པར་ནི། མཐར་ཐུག་གི་འབྲས་བུར་བགྲོད་བྱེད་ཀྱི་ལམ་རྫོགས་པར་མི་འབྱུང་ཞིང་། སྔགས་ཀྱི་ཐེག་པས་ནི་ཡོངས་སུ་རྫོགས་པར་བསྟན་པས་འཕགས་པ་མ་ཟད། ཕ་རོལ་ཏུ་ཕྱིན་པའི་ལམ་དང་འབྲས་བུའི་རྣམ་པ་ཐམས་ཅད་རྡོ་རྗེ་ཐེག་པར་ཚང་ལ། སྔགས་རང་གི་ཐུན་མོང་མ་ཡིན་པའི་ཁྱད་ཆོས་རྣམས་ཕར་ཕྱིན་ཐེག་པར་མེད་ཅིང་། དོད་ཐུབ་ཀྱང་བཞག་ཏུ་མེད་པས་ན་ཐེག་པ་ཆེན་པོ་ཕ་རོལ་ཏུ་ཕྱིན་པའི་ཐེག་པ་ཡང་རྡོ་རྗེ་ཐེག་པའི་ནང་དུ་དོན་གྱིས་འདུས་པ་ཡིན་ནོ། །དེ་ལྟར་ན་གང་འདུལ་གྱི་སྤྲུལ་པས་འགྲོ་བ་འདྲེན་པའི་ཐབས་སུ་གསུངས་པ་ཀུན་འབྱུང་འདྲེན་པའི་ཐེག་པ་གསུམ་དང་། ཕྱི་ལུས་ངག་གི་དཀའ་ཐུབ་ཀྱིས་ནང་མཚན་མ་མེད་པའི་དོན་རིག་པར་བྱེད་པ་སྔགས་ཕྱི་བ་དཀའ་ཐུབ་རིག་བྱེད་ཀྱི་ཐེག་པ་གསུམ་སྟེ། དེ་དྲུག་གིས་མཐར་ཕྱིན་པར་བསྒྲུབ་པས་རང་རང་གི་ལམ་དེ་དང་དེས་ཐོབ་བྱའི་འབྲས་བུ་ཐོབ་པ་ཡང་། མཐར་གྱིས་ཆོས་ཐམས་ཅད་ལ་རིག་པ་རང་དབང་སྒྱུར་ཞིང་ཉོན་མོངས་པ་ལ་སྤྱད་ཀྱང་མི་འཆིང་བར་གྲོལ་བའི་ཐབས་མཁས་དང་ལྡན་པ་དབང་སྒྱུར་ཐབས་ཀྱི་ཐེག་པའམ། སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་དངོས་གྲུབ་གཞན་ནས་མི་འཚོལ་བར་རང་བྱུང་གི་ཡེ་ཤེས་སུ་གཏན་ལ་འབེབས་པས་ནང་རྒྱུད་ཅེས་གྲགས་པ་སྟེ། མི་འགྱུར་བའི་བདེ་བ་སྙིང་རྗེ་ཆེན་པོ་དང་རྣམ་ཀུན་མཆོག་ལྡན་གྱི་སྟོང་ཉིད་ཟུང་དུ་འཇུག་པའི་ལམ་མཆོག་བླ་ན་མེད་པ་བསྐྱེད་རྫོགས་རྣམ་པ་གསུམ་གྱི་ཐེག་པ་ལ་ཞུགས་ནས་མཐར་ཐུག་གི་འབྲས་བུ་ལ་སྦྱོར་དགོས་པའི་ཕྱིར། དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ་ཆེས་མཆོག་ཏུ་གྱུར་པས་ཐེག་པ་ཐམས་ཅད་ཀྱི་རྩེ་མོར་སོན་པ་ནི་སྔགས་ནང་པ་བསྐྱེད་རྫོགས་གསུམ་ཡིན་ལ། དེའི་ནང་ནས་ཀྱང་འདིར་བསྐྱེད་པ་མ་ཧཱ་ཡོ་ག་དང་། ཡོངས་སུ་རྫོགས་པ་ཨ་ཏི་ཡོ་གའི་ཐེག་པ་གཉིས་ཀྱི་མཚམས་སྦྱོར་དུ་གྱུར་པ། རྫོགས་པ་ལུང་ཨ་ནུ་ཡོ་ག་འདུས་པ་ཆེན་པོ་མདོ་ཞེས་བྱ་བ་རྒྱུད་ལུང་ཐམས་ཅད་ཀྱི་ནང་ནས་ཟབ་ཅིང་རྒྱ་ཆེ་བ་དེ་ཉིད་འཆད་པར་བྱེད་པ་ཡིན་ནོ། ༈ །དེ་ལ་སྤྱིར་ལུང་ཨ་ནུ་ཡོ་གའི་ལུགས་ཀྱིས། རྟོགས་བྱ་གཞི་དང་། རྟོགས་བྱེད་ཀྱི་ལམ་གཉིས་རྣལ་འབྱོར་གསུམ་དུ་བསྡུས་ནས་བཤད་དེ། ཇི་སྐད་དུ། སྤྱི་མདོ་ལས། གྲོགས་པོ་དག །དེ་བས་ན་བསམ་གྱིས་མི་ཁྱབ་པའི་རྣམ་པ་གང་ཞེ་ན། འདི་ལྟར་བསམ་གྱིས་མི་ཁྱབ་པའི་ཆོས་ཐམས་ཅད་ཀྱི་རྣམ་པ་ནི། རྣལ་འབྱོར་རྣམ་པ་གསུམ་གྱིས་ཡོངས་སུ་འགྲེལ་པ་སྟེ། གསུམ་གང་ཞེ་ན། བྱ་བའི་རྣལ་འབྱོར་དང་། བྱ་བ་བྱེད་པའི་རྣལ་འབྱོར་དང་། བྱ་བ་མེད་པའི་རྣལ་འབྱོར་རོ། །ཞེས་དང་། རྩ་རྒྱུད་ཀུན་འདུས་ལ། ཆོས་ཐམས་ཅད་ནི་རྣལ་འབྱོར་རྣམ་པ་གསུམ་དུ་འདུས་པར་ཤེས་པར་བྱའོ། །གསུམ་གང་ཞེ་ན། རྒྱུའི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་རོ། །ཞེས་གསུངས་ཤིང་། རྩ་བཤད་ཀྱི་རྒྱུད་དེ་གཉིས་ཀྱི་ལུང་དོན་དགོངས་པ་གཅིག་ཏུ་སྒྲིལ་ནས་ཐ་སྙད་བཏགས་པ་ནི། མདོ་འགྲེལ་ལུང་བསྟན་མ་ལས། ཇི་སྙེད་ཆོས་རྣམས་འདིར་འདུས་ལ། །འདི་ཉིད་རྣལ་འབྱོར་གསུམ་དུ་གནས། །རྒྱུ་དང་རྐྱེན་དང་འབྲས་བུ་རྣམས། །བྱ་དང་བྱེད་དང་བྱ་མེད་དོ། །ཇི་སྙེད་ཆོས་རྣམས་ཐམས་ཅད་ཀུན། །ནང་དང་ཕྱི་དང་ཕྱི་ནང་ཆོས། །སངས་རྒྱས་སེམས་ཅན་དབྱེར་མེད་པ། །དང་པོའི་རྣལ་འབྱོར་དུ་བཤད་དོ། །ཞེས་དང་། དོན་བསྡུས་ལས་ཀྱང་། ཀུན་བཟང་ཐུགས་རྗེས་འགྲོ་དོན་དུ། །ཐེག་པ་གསུམ་སྣང་འདུལ་མཛད་པའི། །དོན་དམ་ངེས་པའི་ཐེག་པ་ལས། །གསང་སྒོ་མཚོན་པའི་མདོ་རྒྱུད་དོན། །རྣམ་པ་གསུམ་དུ་ཤེས་བྱ་སྟེ། །བྱ་བ་རྒྱུ་དང་བྱེད་པ་རྐྱེན། །བྱ་བྲལ་འབྲས་བུའི་རྣལ་འབྱོར་དག །ཇི་སྙེད་ཆོས་ཀྱི་རྩ་བར་བཤད། །ཅེས་པས་བྱ་བ་རྒྱུའི་རྣལ་འབྱོར། བྱེད་པ་རྐྱེན་གྱི་རྣལ་འབྱོར། བྱ་བྲལ་འབྲས་བུའི་རྣལ་འབྱོར་དང་གསུམ། དང་པོ་ནི། ཆོས་ཐམས་ཅད་ཀྱི་གཤིས་ལུགས་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་ཉིད་ཡིན་ཏེ། དེ་ལས། ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པ། །ཤེས་པར་བྱ་བའི་རྒྱུད་དོན་ཡིན། །ཞེས་སོ། །གཉིས་པ་ནི། ལམ་གྱི་རྩོལ་བ་དང་བཅས་པའི་བྱེད་པས་འཁོར་བ་ལས་འདྲེན་ཞིང་རང་རང་གི་འདོད་པའི་འབྲས་བུ་ལ་འཇུག་པར་བྱེད་པ་ཉན་རང་བྱང་སེམས་ཀྱི་ཐེག་པ་གསུམ་སྟེ། དེ་ལས། རྩོལ་བཅས་སྤྱོད་པས་འདྲེན་འཇུག་པའི། །ཐེག་པ་དེ་ནི་བྱ་བྱེད་རྐྱེན། །ཞེས་སོ། །གསུམ་པ་ནི། སེམས་ཉིད་གདོད་མ་ནས་རང་བཞིན་གྱིས་རྣམ་པར་དག་པས་འབྲས་བུ་གཞན་ནས་འཚོལ་བའི་རྩོལ་སྒྲུབ་དང་བྲལ་བ་སྔགས་ཕྱི་ནང་གི་ཐེག་པ་སྟེ། དེ་ལས། གཞན་དུ་འབྲས་བུ་རེ་རྩོལ་མེད། །བསྒྲུབ་བྱ་ཉིད་ལ་ལམ་གནས་པས། །ཐབས་ཆེན་ཐེག་འདི་བྱ་བྲལ་བའོ། །ཞེས་སོ། །དེ་ལྟར་རྐྱེན་འབྲས་ཀྱི་རྣལ་འབྱོར་གཉིས་པོ་དེ་ལ་ཐུན་མོང་སྤྱིའི་ལམ་ཞེས་བྱ་ཞིང་། དེའི་ནང་ནས་ཀྱང་མདོ་ཁྱད་པར་ཅན་གྱི་ལམ་ལ་དབྱེ་ན། དེ་ལས། ངོ་བོ་ཐབས་དང་ཤེས་རབ་སྟེ། །ཞེས་པས་ཐབས་ཀྱི་ངེས་པའི་ལམ་དང་། ཤེས་རབ་རྣམ་པར་གྲོལ་བའི་ལམ་གཉིས་སུ་གྲངས་ངེས་པ་ལས། དང་པོ་ནི། ཞུ་བདེ་འགྱུར་མེད་ཀྱི་བདེ་ཆེན་ལྷན་ཅིག་སྐྱེས་པའི་ཡེ་ཤེས་སྒྲུབ་པའི་ཐབས་གང་ཞིག །འཁོར་ལོ་བཞིའི་སྒོམ་ཐབས་ལ་བརྟེན་ནས་ལྷན་སྐྱེས་ཀྱི་ཡེ་ཤེས་རིམ་གྱིས་འདྲེན་པའི་ཐབས་སྟེང་སྒོའི་མན་ངག་དང་། མཁའ་གསང་གཉིས་ཀྱི་སྙོམས་འཇུག་ལ་བརྟེན་ནས་ལྷན་སྐྱེས་ཀྱི་ཡེ་ཤེས་ཅིག་ཅར་དུ་འདྲེན་པའི་ཐབས་འོག་སྒོའི་མན་ངག་གཉིས་ཏེ། དེ་ལས། རོལ་པའི་ཀ་ར་ལ་སོགས་པ། །མན་ངག་ཐབས་ཀྱིས་དེར་འཇུག་དང་། །ཞེས་གསུངས། གཉིས་པ་ནི། དེའི་འཕྲོས་ལས། ཐོས་བསམ་སྒོམ་པའི་ཚུལ་འགྲོ་བའོ། །དེར་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དང་ཡི་གེ་ཡི། །རྗེས་འཇུག །ཅེས་པས། རྟོག་དཔྱོད་ཀྱི་རྗེས་སུ་འཇུག་པ་ལྟ་བ་གཏན་ལ་དབབ་པ་ནི། ལམ་སྒོམ་པའི་སྔོན་དུ་འགྲོ་དགོས་ཏེ། དེ་ཡང་ཆོས་ཅན་ཤེས་བྱའི་དོན་ལ། ཤེས་བྱེད་རིགས་པའི་གཏན་ཚིགས་རྣམས་ཀྱིས་སོ་སོར་བརྟགས་པས། ཆོས་ཐམས་ཅད་གནས་ལུགས་ཆོས་ཉིད་ཇི་བཞིན་པ་དཀྱིལ་འཁོར་རྣམ་གསུམ་དབྱེར་མེད་བསམ་བརྗོད་དང་བྲལ་བར་གཏན་ལ་ཕེབས་པ་ནི་གྲུབ་མཐའ་འོ། །དོན་གྱི་རྗེས་སུ་འཇུག་པ་ནི། རྣམ་པར་མི་རྟོག་པའི་ཏིང་ངེ་འཛིན་བསྒོམ་པའི་རིམ་པ་ཡིན་ཏེ། བསྒོམ་བྱའི་དོན་ཆོས་ཉིད་སྙིང་པོ་ཇི་བཞིན་པའི་ངང་ལ། སྒོམ་བྱེད་ཀྱི་བློ་དེ་བཞིན་པར་གཞག་ནས་སྒོམ་པའི་ཕྱིར། དེ་ལྟར་ཡང་སྤྱི་མདོ་ལས། ཇི་བཞིན་པ་ཡི་ཆོས་ཉིད་ལ། །དེ་བཞིན་པ་ཡི་བློ་གཞག་ནས། །བརྗོད་པ་མེད་པའི་ངང་ཉིད་ལས། །མ་ཡེངས་རྒྱུན་དུ་དྲན་པའོ། །ཞེས་སོ། །ཡི་གེའི་རྗེས་སུ་འཇུག་པ་ནི། །མཚན་བཅས་ལྷའི་ཏིང་ངེ་འཛིན་སྒོམ་པའི་རིམ་པ་སྟེ། བསྐྱེད་སྔགས་བརྗོད་པ་ཙམ་གྱིས་ཆུ་ལས་ཉ་ལྡང་བ་ལྟར་སྣོད་བཅུད་ལྷའི་དཀྱིལ་འཁོར་དུ་གསལ་ལ་མ་འདྲེས་པར་སྒོམ་པ་གཙོ་བོར་བྱེད་པའི་ཉམས་ལེན་ནོ། །དེ་ལྟར་ཡང་བང་མཛོད་འཕྲུལ་ལྡེ་ལས། ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་པས། །མ་བསྐྱེད་རྫོགས་པའི་ལྷ་རུ་བསྒོམ། །ཞེས་སོ། །དེ་ཡང་བློ་ཆེ་བ་ཅིག་ཅར་བས་ནི། ཆིག་ཆོད་དུ་རྟོགས་གོམས་མཐར་ཕྱིན་པར་བྱེད་པས་ས་ལམ་རིམ་པར་བགྲོད་པའི་རྩོལ་བ་དང་བྲལ་བ་ཡིན་ལ། བློ་ཆུང་འབྲིང་གཉིས་ནི། ས་བཅུས་བསྡུས་པའི་སློབ་ལམ་བཞི་རིམ་གྱིས་སམ། ཐོད་བརྒལ་གང་རུང་གིས་བགྲོད་ནས། །མི་སློབ་པའི་ལམ་མཐར་ཐུག་གི་འབྲས་བུ་ལ་སྦྱོར་བར་བྱེད་པ་སྟེ། དེ་ལ་ས་བཅུ་གང་ཞེ་ན། དང་པོ་འགྱུར་པ་མ་ངེས་པའི་ས། གཉིས་པ་བརྟེན་པ་གཞིའི་ས། གསུམ་པ་གལ་ཆེན་སྦྱོང་བའི་ས། བཞི་པ་བསླབ་པ་རྒྱུན་གྱི་ས། ལྔ་པ་བསོད་ནམས་རྟེན་གྱི་ས། དྲུག་པ་བརྟེན་པས་ཁྱད་པར་དུ་འགྲོ་བའི་ས། བདུན་པ་དམིགས་པས་འབྲས་བུ་སྐྱེ་བའི་ས། བརྒྱད་པ་གནས་པའི་མི་འགྱུར་བའི་ས། དགུ་པ་བརྡལ་བ་ཆོས་ཉིད་ཀྱི་ས། བཅུ་པ་རྫོགས་པ་ཅིར་ཆིབ་ཀྱི་ས་རྣམས་སོ། །དེ་དག་ཀྱང་། འདུན་པ་སྐྱེ་བའི་སྐབས་སོགས་ས་བཅུ་པོ་རེ་རེ་དང་སྦྱར་བའི་གནས་སྐབས་བཅུར། ཆོས་ཉིད་སྙིང་པོ་ཇི་བཞིན་པའི་རྗེས་སུ་འཇུག་པའི་རང་སའི་ལམ་ན་འཕར་བའི་རིམ་པ་ལྟར་བསྒོམས་པས། ས་བཅུ་རང་རང་གི་སྤྱད་བྱ། རྐྱེན་འགྱུར་ལས་ཀྱི་བག་ཆགས་རགས་ཕྲ་གཉིས་དང་། མངོན་དུ་རྒྱུའི་བག་ཆགས་རགས་འབྲིང་ཕྲ་གསུམ་དང་། ཀུན་འགྲོ་དང་། ལྷན་ཅིག་གནས་པ་དང་། བག་ལ་ཉལ་རགས་འབྲིང་ཕྲ་གསུམ་གྱི་སྒྲིབ་པ་རྣམས་རིམ་པར་དག་ནས། ས་གོང་མ་གོང་མ་ལ་སྦྱོར་བའི་གཡོ་བ་བྱང་ཆུབ་ཀྱི་སེམས་ལ་སོགས་ཏེ་སེམས་བཅུ་པོ། དཔེ་སྐར་མ་ཕྲ་མོ་ལྟ་བུ་ལ་སོགས་པ་བཅུ་དང་སྦྱར་ནས་བསྒྲོད་པར་རྩ་རྒྱུད་ཀུན་འདུས་ཀྱི་ལེའུ་གཉིས་པ་སོགས་མདོའི་རྩ་བཤད་ཀྱི་རྒྱུད་དང་མན་ངག་རྣམས་ལས་རྒྱ་ཆེར་གསུངས་སོ། །དེ་རྣམས་སློབ་པའི་ལམ་བཞིས་ཇི་ལྟར་བསྡུས་ཚུལ་ནི། ས་དང་པོ་དང་། གཉིས་པ་གཉིས་ཚོགས་ལམ་འདུན་པ་སེམས་པའི་རྣལ་འབྱོར་གྱིས་བསྡུས་ཏེ། དེ་ཐོབ་པས་སྤྱན་དང་མངོན་ཤེས་དང་རྫུ་འཕྲུལ་ཕྲ་མོས་སྤྲུལ་སྒྱུར་ནུས་པ་སོགས་མཐུན་མོང་གི་དངོས་གྲུབ་རྣམས་རིམ་གྱིས་གྲུབ་ཅིང་སངས་རྒྱས་སྤྲུལ་པའི་སྐུའི་ཞལ་མཐོང་པ་སོགས་ཚོགས་ལམ་གྱི་ཡོན་ཏན་རྣམས་འཆར་རོ། །དེ་ནས་ས་གསུམ་པ། བཞི་པ། ལྔ་པ་གསུམ་ནི་སྦྱོར་ལམ་རིགས་ཆེན་འབྱེད་པའི་རྣལ་འབྱོར་གྱིས་བསྡུས་ཏེ། དེར་རླུང་སེམས་ཙམ་གྱིས་ལྷ་སྐུ་གྲུབ་ཅིང་། ཉིན་སྣང་མཚན་སྣང་གི་བར་མཚམས་མེད་པར་ཐམས་ཅད་སྒྱུ་མ་ལྟ་བུར་རྟོགས་པ་སོགས་སྦྱོར་ལམ་གྱི་ཡོན་ཏན་རྣམས་འཆར་རོ། །དེ་ཉིད་དུ་ཚོགས་ཀྱི་སྤྱོད་པའི་ཉེ་རྒྱུ་སྤྱད་པས། ཁུ་རྡུལ་རླུང་ཡིད་ཀྱི་འགྱུར་བདེ་རགས་པ་བཅོམ་སྟེ། འཇིགས་པ་ལྔ་དང་བྲལ་ཞིང་ཟག་པ་ཟད་ནས། དྲུག་པ་བརྟེན་པས་ཁྱད་པར་དུ་འགྲོ་བའི་ས་མཐོང་ལམ་དབུགས་ཆེན་ཕྱིན་པའི་རྣལ་འབྱོར་གྱིས་བསྡུས་པ། ཆོས་ཉིད་རང་མཚན་མངོན་སུམ་དུ་མཐོང་བའི་སྟོབས་ཀྱིས། བདེ་སྟོང་ཡེ་ཤེས་འོད་གསལ་ཡི་ལྷ་སྐུ་གྲུབ་ཅིང་། ཡོན་ཏན་བརྒྱ་ཕྲག་བཅུ་གཉིས་ལ་དབང་ཐོབ། །ལོངས་སྐུ་རིགས་ལྔའི་ཞིང་བགྲོད་ནས་ཆོས་ཉན་པ་སོགས་མཐོང་ལམ་གྱི་ཡོན་ཏན་ཐམས་ཅད་འཆར་རོ། །དེ་ནས་མཐོང་ལམ་འོད་གསལ་ལས་ལངས་པའི་རྗེས་ལ་མངོན་རྟོགས། བདུན་པ་དམིགས་པས་འབྲས་བུ་སྐྱེ་བའི་ས་སྒོམ་ལམ་ལུང་ཆེན་ཐོབ་པའི་རྣལ་འབྱོར་གྱིས་བསྡུས་པ་ཐོབ་པས། ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་ཆད་པ་ཟུང་འཇུག་གི་སྐུ་གྲུབ་ཅིང་། དེ་ནས་ས་བརྒྱད་པ། དགུ་པ། བཅུ་པ་གསུམ་ནི་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་པ་ཡིན་ལ། དེ་ལྟར་སྒོམ་མཐར་གྱི་ལམ་གྱི་ས་བཞི་པོ་དེ་ཐུན་མོང་བ་ལྟར་ན། སྒོམ་ལམ་རྒྱུན་ཐ་དང་བཅས་པའི་ས་དགུས་བསྡུས་པས་ན། དེ་རྣམས་སུ་སྔར་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་པོ་དེ་སྟོང་འགྱུར་ནས། ཞིང་ཁམས་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང་མཉམ་པའི་བར་དུ་རིམ་པར་འཕེལ་ཞིང་། ཆོ་འཕྲུལ་བཞི་དང་། དབང་བཅུ་ལ་སོགས་པའི་ཡོན་ཏན་རྣམས་འཆར་བ་ཡིན་ནོ། །དེ་ལྟར་སློབ་པའི་ལམ་བཞིར་ཟུང་འཇུག་གི་ལམ་ཉམས་སུ་བླངས་པས་མཐར་ཕྱིན་པའི་འབྲས་བུ་མི་སློབ་པའི་ལམ་བརྙེས་ཏེ། མདོ་སྡེ་རྒྱན་ལས། སྒོམ་པ་ཐ་མ་རྫོགས་ནས་ནི། །འོད་ཟེར་ཆེན་པོས་དབང་བསྐུར་བ། །ཞེས་འབྱུང་བ་ལྟར་སྔགས་ཀྱི་ཐེག་པར་སློབ་ལམ་གྱི་རྩེ་མོ་ས་བཅུ་རྒྱུན་གྱི་ཐ་མར་འདོད་ཆགས་ཆེན་པོའི་ལམ་གྱིས་འབྲས་བུའི་དབང་བསྐུར་བས་དགའ་བཞི་ལུགས་འབྱུང་ལྡོག་གི་མཐར་ཁུ་རྡུལ་ཕྲ་མོ་སྟེང་འོག་ཏུ་འགག་ཅིང་། དེའི་སྐད་ཅིག་གཉིས་པར་རླུང་ཕྲ་མོ་འགགས་པས། འགྱུར་བདེ་མྱོང་བའི་ཤེས་རིག་ཕྲ་མོའང་རྒྱུན་ཆད་པ་ན། སྤྱི་མདོ་ལས། གཞན་ནས་མ་བྱུང་རང་བྱུང་བ། །ཞེས་དང་། ལུང་བསྟན་མ་ལས། ཐ་མ་ཡིད་བཞིན་ནོར་བུ་ལྟར། །མ་བསགས་ཟད་འཕེལ་མེད་པའི་སྐུ། །གདུལ་བྱའི་དོན་སྣང་དངོས་གཞི་མེད། །ལྷུན་གྲུབ་ཡོན་ཏན་རང་སྣང་བའོ། །ཞེས་གསུངས་པ་ལྟར་གཞི་ལ་ཡོན་ཏན་ལྷུན་གྲུབ་ཏུ་བཞུགས་པ་ཉིད་མངོན་དུ་གྱུར་པ་ཙམ་ལས། དོན་དམ་པར་དྲི་མ་སྔར་ཡོད་བསལ་རྒྱུ་དང་ཡོན་ཏན་སྔར་མེད་སྒྲུབ་ཏུ་མེད་ཀྱང་། སྣང་ལུགས་ལ་གློ་བུར་གྱི་དྲི་མ་མཐའ་དག་བྲལ་སྟོབས་ཀྱིས་སྤོངས་རྟོགས་ཀྱི་ཡོན་ཏན་གསར་དུ་ཐོབ་པ་ལྟར་སྣང་སྟེ། མི་སློབ་པའི་ཟུང་འཇུག་འབྲས་བུའི་ཆོས་ལྔའམ་ཉི་ཤུ་རྩ་ལྔ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞི་ཡེ་ཤེས་ལྔའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ལ་དབང་འབྱོར་བས། རྟག་ཁྱབ་ལྷུན་གྱིས་གྲུབ་པའི་ཕྲིན་ལས་ཀྱིས་དོན་མཛད་དོ། །དེ་ལྟར་ཡང་དོན་བསྡུས་ལས། འབྲས་བུ་ཉིད་ནི་རྫོགས་སངས་རྒྱས། །སྐུ་གསུང་ཐུགས་དང་ཡོན་ཏན་ལས། །ཉི་ཤུ་རྩ་ལྔས་བསྡུས་མཐའ་ཡས། །ལྷུན་རྫོགས་རྣམ་ཀུན་མཁྱེན་པའོ། །ཞེས་གསུངས་སོ། །དེ་ལྟར་ན་ཟག་བཅས་ཀྱི་ལམ་ཚོགས་སྦྱོར་དུ་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་ཟག་མེད་ཀྱི་ལམ་སློབ་པ་དང་མི་སློབ་པའི་ཟུང་འཇུག་གིས་བསྡུས་པའི་འབྲས་བུ་རྣམས་ནི། ལམ་བསྒོམས་པ་ལ་བརྟེན་ནས་ཐོབ་པའི་ལག་རྗེས་ཡིན་པས། ལམ་རིམ་པ་གཉིས་ལ་འབྲེལ་ཞིང་། རིམ་པ་གཉིས་པོ་དེ་རྟེན་དམ་ཚིག་དང་སྡོམ་པ་ལ་འབྲེལ། དེ་སྨིན་བྱེད་ཀྱི་དབང་ལ་འབྲེལ་བའི་ཕྱིར། དབང་བསྐུར་བ་ནི། རྡོ་རྗེ་ཐེག་པའི་ལམ་གྱི་འཇུག་སྒོ་ཡང་ཡིན་ལ། ལམ་གྱི་དངོས་གཞི་ཡང་ཡིན་ནོ། །དེ་ལ་འཇུག་སྒོ་ཡིན་ཏེ། སྨིན་བྱེད་ཀྱི་དབང་ཐོབ་པ་སྔོན་དུ་མ་སོང་བར། གྲོལ་བྱེད་ཀྱི་ལམ་རིམ་པ་གཉིས་སྒོམ་པ་དང་། རྒྱུད་འཆད་ཉན་སོགས་བྱར་མི་རུང་བའི་ཕྱིར། དེ་སྐད་དུའང་སྒྱུ་འཕྲུལ་རྩ་རྒྱུད་སྙིང་པོ་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་དང་། རྔམ་གློག་ལས། དབང་མཆོག་དམ་པ་མ་ཐོབ་པར། །སྒྲུབ་པ་ཅི་ཡང་མི་འགྲུབ་པས། །ཇི་ལྟར་དབང་བསྐུར་མཚན་ཉིད་ལགས། །ཞེས་དང་། མདོའི་མན་ངག་གསང་བ་ལས། དབང་མ་ཐོབ་པར་ལས་རྩོམ་པ། །འབྲས་བུ་མེད་ཅིང་བརླག་པར་འགྱུར། །ཞེས་སོ། །ལམ་གྱི་དངོས་གཞི་ཡང་ཡིན་ཏེ། རྡོ་རྗེ་ཐེག་པའི་ལམ་མཐའ་དག་སྨིན་གྲོལ་གཉིས་སུ་འདུས་པར་གསུངས་པ་གང་ཞིག །ལམ་སྒོམ་པ་ལ་མ་ལྟོས་པར་སྐལ་ལྡན་ཁ་ཅིག་དབང་ཐོབ་ནས་དམ་ཚིག་མ་ཉམས་པ་ཉིད་ཀྱིས་སྐྱེ་བ་བདུན་ནམ་བཅུ་དྲུག་ནས་མཆོག་གྲུབ་པ་དང་། ཆེས་སྐལ་བ་དང་ལྡན་པ་ཁ་ཅིག་དབང་དུས་སུ་གྲོལ་བའང་ཡོད་དགོས་པའི་ཕྱིར་རོ། །དང་པོ་གྲུབ་སྟེ། རྡོ་རྗེ་རྩེ་མོ་ལས། སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་གསུངས་པའི་ཕྱིར། གཉིས་པ་གྲུབ་སྟེ། ཀུན་འདུས་ལས། དབང་རྣམས་ལེགས་པར་རྫོགས་གྱུར་པས། །རྩ་བ་ཡན་ལག་དམ་ཚིག་ཀུན། །མ་ཉམས་རབ་ཏུ་བསྲུང་བར་བྱ། །དེས་ནི་དངོས་གྲུབ་མཆོག་ཐོབ་འགྱུར། །ཞེས་དང་། གསང་མཛོད་ལས། དབང་བསྐུར་ཡང་དག་བྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ན་ནི། །མ་བསྒོམས་པར་ཡང་སངས་རྒྱས་འགྱུར། །ཞེས་དང་། ཚོགས་འཁོར་དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ནས་འགྲུབ། །ཅེས་གསུངས་པའི་ཕྱིར། གསུམ་པ་གྲུབ་སྟེ། སྟོན་པས་སྤྲུལ་པའི་དཀྱིལ་འཁོར་དུ་རྒྱལ་པོ་ཨིནྡྲ་བྷཱུ་ཏི་ལ་དབང་བསྐུར་བས་དུས་དེ་ཉིད་དུ་རྒྱལ་པོས་ཟུང་འཇུག་གི་སྐུ་བརྙེས་པར་བཤད་པ་བཞིན། དབང་དུས་སུ་གྲོལ་བ་དགག་ཏུ་མེད་པའི་ཕྱིར་རོ། །འདིར་ལམ་གྱི་འཇུག་སྒོ་ཞེས་བྱ་བའང་། སངས་རྒྱས་ཀྱི་བསྟན་པ་ཐར་འདོད་རྣམས་ཀྱི་འཇུག་སྒོ་ཡིན་པ་བཞིན་ཏེ། ལམ་རིམ་པ་གཉིས་ཀྱང་དབང་གིས་ཇི་ལྟར་སྨིན་པ་དང་རྗེས་སུ་མཐུན་པའི་དབང་དོན་སྒོམ་པ་ཡིན་པའི་གནད་ཀྱིས་སོ། ༈ །དེ་བས་ན་འདིར་གང་བཤད་པར་བྱ་བའི་ཆོས་ནི། འདུས་པ་ཆེན་པོ་མདོའི་བསྙེན་སྒྲུབ་ཡན་ལག་བཞི་དང་འབྲེལ་བར་བསྐུར་བའི་དབང་གི་ཆུ་པོ་བཞིས་བསྡུས་པ་ཡོ་ག་བཞི་རྫོགས་ཀྱི་དབང་གི་དོན་ནོ། །དེ་གང་གིས་འཆད་ན། རྩ་བའི་རྒྱུད་ཀུན་འདུས་རིག་པའི་མདོ་དང་། བཤད་རྒྱུད་དགོངས་པ་འདུས་པ། གཞན་ཡང་ཡེ་ཤེས་རྔམ་པ་གློག་གི་འཁོར་ལོ་དང་། ཧེ་རུ་ཀ་འདུས་པ་སོགས་མདོའི་རྒྱུད་ལུང་དགོངས་འགྲེལ་དང་བཅས་པ་དང་། དྲུག་གསུམ་བཅོ་བརྒྱད་ཀྱི་མན་ངག་རྣམས་གཙོ་བོར་བཟུང་། བླ་མ་གོང་མ་རྣམས་ཀྱི་ཕྱག་བཞེས་ཀྱི་སྲོལ་མི་འདྲ་བ་དུ་མའི་ལས་ཐོ་དང་། ཆོག་སྒྲིགས་རྣམས་ཀྱི་ལེགས་ཆ་བླངས་ཏེ། རྫེ་བཙུན་བླ་མ་དམ་པ་མཁས་པ་ལ་དངོས་གྲུབ་ཀྱིས་བརྒྱན་པའི་དཔལ་རྣལ་འབྱོར་གྱི་དབང་ཕྱུག་གཏེར་ཆེན་ཆོས་ཀྱི་རྒྱལ་པོའི་དགོངས་པ་ཇི་ལྟ་བ་བཞིན་དུ་མ་འདྲེས་གཙང་དག་གི་སྒོ་ནས་སོ། །དེ་ལ་དྲུག་གསུམ་བཅོ་བརྒྱད་ཀྱི་མན་ངག་གང་ཞེ་ན། གཏད་རྒྱའི་རྩ་བ་ལས། དང་པོ་གབ་པའི་དབང་ལེ་དྲུག །སྤྱི་དབང་ཆེན་པོའི་གླེང་གཞི་དང་། །འདྲེན་པའི་ལས་བྱང་ཆེ་ལེ་དང་། །འདྲེན་པའི་ལས་བྱང་ཆུང་ལེ་དང་། །ཡོངས་སུ་གྲུབ་པའི་དབང་ལེ་དང་། །ལྟ་བ་ཡེ་འབྱམས་དབང་ལེ་དང་། །ཀུན་བཟང་ཐུགས་ཀྱི་གདམས་ལེ་སྟེ། །རྣམ་པར་དྲུག་ཏུ་ལུང་ཉེར་བསྡུས། །བར་དུ་དགོས་པའི་སྒྲུབ་ཐབས་དྲུག །དབང་དོན་བསྡུས་དང་དབང་དོན་འབྱེད། །དབང་དོན་རྒྱ་ཆེར་འབྱེད་པ་དང་། །ལས་ཐོ་རབ་གནས་བཤད་པ་དང་། །ན་རག་དོང་སྤྲུགས་བཤད་པ་དང་། །དྲུག་གིས་སྒྲུབ་པའི་དོན་རྣམས་བཤད། །ཐ་མར་དགོས་པའི་ཆ་རྐྱེན་དྲུག །སྦྱིན་སྲེག་ལྷག་ཆོག་དཀྱིལ་འཁོར་ཐིག །ཕྱི་ནང་གཉིས་ཀྱི་ཙ་ཀ་ལི། །བརྒྱུད་ཁུངས་གཏད་རྒྱའི་གླིང་གཞི་དྲུག །དྲུག་གསུམ་བཅོ་རྒྱད་ཡི་གེ་འདི། །སངས་རྒྱས་ཡེ་ཤེས་བདག་གིས་རྙེད། །སྣོད་ལྡན་རྣམས་དང་འཕྲད་པར་ཤོག །ཅེས་གསུངས་ཏེ། དེ་ལ་དབང་ལེ་དྲུག་ནི། རྒྱབ་བརྟེན་གྱི་རྒྱུད་རྣམ་པར་སྣང་མཛད་ཐིག་ལེ་དབང་གི་ཏནྟྲ་ལས་ལེའུ་དྲུག་ཕྱུང་བ་ཀལྤ་དུམ་བུའི་རྒྱུད་ཡིན་ལ། སྒྲུབ་ཐབས་དྲུག་དང་ཆ་རྐྱེན་དྲུག་ནི། སློབ་དཔོན་ཆེན་པོ་བདེ་བ་གསལ་མཛད་ཉིད་ཀྱིས་མཛད་པའོ། །དཔེ་ལ་ལར། ན་རག་གདོང་སྤྲུགས་ཀྱི་དོད་དུ་དབང་གི་མན་ངག་གསང་བ་བགྲངས་པའང་སྣང་ངོ་། ༈ །ཇི་ལྟར་འཆད་པའི་ཚུལ་ལ་གསུམ་སྟེ། རྟོག་ལྡན་འཇུག་ཕྱིར་བརྒྱུད་པའི་ལོ་རྒྱུས་བརྗོད་པས་ཡིད་ཆེས་བསྐྱེད། བཤད་བྱའི་དོན་ཁོང་དུ་ཆུད་ཕྱིར་སྔོན་རྗེས་ཀྱི་ཆུ་བོ་བཞིའི་དབང་གི་རང་བཞིན་གཏན་ལ་དབབ། གདུལ་བྱ་སྤྲོ་བ་བསྐྱེད་ཕྱིར་འཆད་ཉན་ཀྱི་ཕན་ཡོན་བསྟན་པས་འཇུག་བསྡུ་བའོ། །དང་པོ་ནི། སྤྱི་མདོ་ལས། ཀྱེ་གསང་བའི་བདག་པོ། ཉིད་ཀྱི་ཐེག་པ་ཆེན་པོ་གསང་བ་དམ་པ་འབྱུང་བའི་ཚུལ་སྟོན་པས་ལུང་བསྟན་པ་གཏམ་བརྒྱུད་དུ་བརྗོད་པའི་སྐབས་སུ། བརྒྱུད་པ་ཐབས་ཀྱིས་གྲགས་པ་ནའང་འབྱུང་ཞེས་བཀོད་པ་དེ་ཇི་ལྟར་བརྒྱུད་ཅིང་གང་དུ་གྲགས་པ་ལགས། སྨྲས་པ། ལངྐའི་བདག་པོ། དགོངས་པ་བརྒྱུད་དེ་ཚིག་ཏུ་གྲགས་པས་ལྷ་དང་མིའི་འཇིག་རྟེན་དུ་སྣང་བར་གྱུར་པ་ཡིན་ནོ། །ཞེས་གསུངས་པའི་དོན། ཇི་སྐད་དུ། རྒྱལ་བ་སེམས་དཔའ་རྣལ་འབྱོར་དང་། །དགོངས་རིག་རྣ་བར་བརྒྱུད་པ་སྟེ། །གང་ལ་ཐུག་གི་བར་དུའོ། །ཞེས་པས་གསུམ་སྟེ། རྒྱལ་བ་དགོངས་པས་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་རྣ་བར་བརྒྱུད་པའོ། །དང་པོ་ནི། བདག་ཅག་གི་སྟོན་པ་འདི་གཞི་གདོད་མའི་དབྱིངས་སུ་རིག་པའི་ཡེ་ཤེས་གྲོལ་བས། ཐོག་མ་མེད་པའི་དུས་ནས་མངོན་པར་བྱང་ཆུབ་སྟེ། སྐུ་དང་ཡེ་ཤེས་འདུ་འབྲལ་མེད་པའི་ངང་ལ་དུས་གསུམ་གྱི་བདེ་བར་གཤེགས་པ་ཐམས་ཅད་དང་དགོངས་པ་ཐ་མི་དད་པར་བཞུགས་པ་ལས། ཆོས་ཀྱི་སྐུའི་ཞིང་ཁམས་འོག་མིན་ཆེན་པོ་ཆོས་ཐམས་ཅད་ཀྱི་དེ་ཁོ་ན་ཉིད་སྙིང་པོ་བྱང་ཆུབ་ཅེས་བྱ་བར། སྟོན་པ་ཆོས་ཀྱི་སྐུ་རྒྱལ་མཆོག་ཀུན་ཏུ་བཟང་པོ་རྡོ་རྗེ་འཆང་ཆེན་པོ་ཉིད། རང་སྣང་གི་འཁོར་དེ་བཞིན་གཤེགས་པ་ལྔ་ལ་སོགས་ཏེ། རྒྱལ་ཚབ་སྐྱེས་བུ་བསམ་གྱིས་མི་ཁྱབ་པའི་དབུས་སུ། ཆོས་གདོད་ནས་རང་བཞིན་གྱིས་རྣམ་པར་དག་པའི་ཆོས་ཉིད་དེ་བཞིན་ཉིད་ཀྱི་དགོངས་པ་བརྗོད་དུ་མེད་པ་ཉིད། དུས་བཞི་མཉམ་པ་ཉིད་ཀྱི་དབྱིངས་སུ་རང་ཤར་བའི་ཚུལ་གྱིས་སྣང་བར་གྱུར་ཏོ། །དེ་ལྟར་ཡང་སྤྱི་མདོ་ལས། ཆོས་ཀྱི་སྐུའི་ཞིང་ཁམས་སྙིང་པོ་བྱང་ཆུབ་ཅེས་བྱ་བ་ན། རྒྱལ་མཆོག་སྐྱེས་བུ་ཞེས་བྱ་བ། རྒྱལ་ཚབ་སྐྱེས་བུ་བསམ་གྱིས་མི་ཁྱབ་པའི་འཁོར་དང་བཅས་ཏེ། སེམས་ཀྱི་རང་བཞིན་ཡེ་ནས་སངས་རྒྱས་པར་གྱུར་བ་གསང་སྔགས་ཀྱི་ངོ་བོ་དེ་བཞིན་ཉིད་ལ་དགོངས་པ་ངེས་པར་འགྲེལ་ཏོ། །ཞེས་གསུངས། དེ་ཉིད་ཀྱི་ངང་ལས་གཞན་སྣང་ལོངས་སྐུའི་ཞིང་ཁམས་མངོན་པར་དགའ་བ་ལ་སོགས་པར། སྟོན་པ་རིགས་དྲུག་པ་ཉིད་འཆད་པའི་སྐྱེས་བུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་རིགས་ལྔར་བཞེངས་ཏེ། རང་རང་གི་རིགས་ཀྱི་བྱང་ཆུབ་སེམས་དཔའ་ཆེན་པོ་བྱེ་བ་ཕྲག་ས་ཡའི་འཁོར་གྱིས་ཡོངས་སུ་བསྐོར་བའི་དབུས་ན། ཆོས་སེམས་ཉིད་འོད་གསལ་བའི་ཟུང་འཇུག་སྔགས་ཀྱི་ངོ་བོ་ཉིད་དགོངས་པ་བརྡའི་གསུང་གིས། དུས་འགྲོ་སྒྲོལ་གྱི་བར་དུ་རྒྱུན་མི་ཆད་པར་སྟོན་པ་ལས་མ་གཡོས་བཞིན་དུ། འཁོར་གྱི་སེམས་དཔའ་དེ་དག་གིས་ཀྱང་རང་གི་སྟོན་པ་ལ་ཉན་ནས། དེ་ཉིད་རང་བཞིན་སྤྲུལ་པའི་དག་ཞིང་རྣམས་སུ། རང་གི་ཉེ་བའི་འཁོར་གདུལ་བྱ་དག་པ་རྣམས་ལ་སྟོན་པར་བྱེད་ཅིང་། དེར་མ་ཟད་སྤྲུལ་པའི་སྐུ་ཡོངས་སུ་མྱ་ངན་ལས་འདས་པའི་འཁོར་རྣམས་ལའང་། ཆོས་ཉིད་མ་བཅོས་པའི་དོན་ཉིད་བརྡ་དང་ཚིག་གི་སྒོ་ནས་བགྲོ་བར་བྱེད་དེ། སྤྱི་མདོ་ལས། སངས་རྒྱས་མི་བསྐྱོད་པའི་ཞིང་ཁམས་མངོན་པར་དགའ་བ་ཞེས་བྱ་བ་རྡོ་རྗེ་འོད་ཟེར་གྱི་རྒྱན་གྱིས་རྣམ་པར་བརྒྱན་པ་ན། རྡོ་རྗེ་ཕུང་པོའི་རི་བོ་ལ། སྐྱེས་བུ་ཆེན་པོ་སེམས་དཔའ་རྡོ་རྗེ་ཞེས་བྱ་བར། བྱང་ཆུབ་སེམས་དཔའ་བྱེ་བ་ཕྲག་ས་ཡའི་འཁོར་དང་བཅས་ཏེ། སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་དེ་ཉིད། རང་གི་སྟོན་པ་ལ་ཉན་ཅིང་། རང་གིས་ཉེ་འཁོར་ལ་དེ་བཞིན་སྟོན་ཏེ། ཡོངས་སུ་འདས་ནས་ཀྱང་དེ་བཞིན་ཉིད་དུ་སྙད་པའི་སྒོ་ནས་དེ་རྣམ་པར་བགྲོ་བར་བྱེད་དོ། །ཞེས་གསུངས། དེ་བཞིན་དུ་ཞིང་ཁམས་དཔལ་དང་ལྡན་པ་དང་། བདེ་བ་ཅན་དང་། རྣམ་པར་དག་པ་དང་། བྱང་ཆུབ་སྙིང་པོ་ཅན་བཞིར། སྐྱེས་བུ་ཆེན་པོ་རྡོ་རྗེ་རིན་ཆེན་དང་། ཆོས་ཀྱི་སྤྲིན་དང་། རྡོ་རྗེ་ལས་དང་། རྡོ་རྗེ་འཛིན་པ་ཞེས་རིགས་གཞན་བཞི་ལའང་འགྲེས་སྦྱར་རོ། །དེའི་ངང་ལས་གདུལ་བྱ་དག་མ་དག་སྣ་ཚོགས་པའི་ངོར། མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུར། འགྲོ་འདུལ་སྤྲུལ་པའི་སྐུ་ཐུབ་པའི་དབང་པོ་ལ་སོགས་ཏེ། མི་དང་ལྷ་དང་ལྷ་མ་ཡིན་ལ་སོགས་པའི་གནས་རིས་སོ་སོར་གང་འདུལ་གྱི་སྤྲུལ་པ་སྣ་ཚོགས་པའི་ཚུལ་གྱིས། རང་རང་གི་སྐད་དང་མོས་པ་ཐ་དད་པས་ཆོས་སྟོན་པར་མཛད་དེ། དེ་ལས། སངས་རྒྱས་ཤཱཀྱ་ཐུབ་པའི་ཞིང་ཁམས་མོས་པ་ཅན་མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུ་ཞེས་བྱ་བ་རྡོ་རྗེ་གདན་གྱིས་རྣམ་པར་བརྒྱན་པ། ཞེས་སོགས་དང་། དེ་བཞིན་དུ་སེམས་ཅན་གྱི་རིས་བསམ་གྱིས་མི་ཁྱབ་པ། ཞེས་པ་ནས་གསང་སྔགས་ཀྱི་ངོ་བོ་དེ་ཉིད་རང་རང་གི་ཐུབ་པའི་དབང་པོ་ལ། རང་རང་གི་སྐད་དང་བརྡ་དང་མོས་པ་སྣ་ཚོགས་ཀྱིས་ཉན་ཅིང་། མིང་དང་མཚན་མ་ཐ་དད་པར་བརྟགས་པའི་སྒོ་ནས་རང་རང་གི་ཉེ་འཁོར་ལ་དེ་བཞིན་དུ་སྟོན་ཏོ། །ཞེས་པའི་བར་གསུངས་སོ། །དེ་ལྟར་སྐུ་གསུམ་དབྱེར་མི་ཕྱེད་པའི་རང་སྣང་གི་སྟོན་པ་ཆོས་ཀྱི་སྐུ་དང་། གཞན་སྣང་ལོངས་སྐུ་རིགས་ལྔ་དང་། སྤྲུལ་སྐུ་ཐུབ་པའི་དབང་པོ་རྣམས་ཀྱིས་ཀྱང་གསང་སྔགས་ཀྱི་དོན་དེ་ཉིད་དུས་ཐ་དད་པ་མ་ཡིན་པར་སྟོན་པར་མཛད་པ་ཡིན་ཏེ། སྒྱུ་འཕྲུལ་རྩ་རྒྱུད་ལས། དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོའི་དབང་གི་སོ་སོར་སྣང་། །ཞེས་སོ། །དེ་ལྟར་ངེས་པར་བྱས་ཏེ། ཇི་ལྟར་བརྒྱུད་པའི་ཚུལ་ནི། སྟོན་པ་རིགས་དྲུག་པ་རྒྱལ་མཆོག་ཀུན་ཏུ་བཟང་པོས། རྒྱལ་ཚབ་སྐྱེས་བུ་རིགས་ལྔ་ལ། དེས་རྒྱལ་སྲས་བྱང་ཆུབ་སེམས་དཔའ་སོགས་ལྷན་ཅིག་པའི་འཁོར་རྣམས་ལ་འབྲས་བུའི་དབང་བསྐུར་བའི་སྒོ་ནས་བརྒྱུད་དེ། སྤྱི་མདོ་ལས། གང་གིས་གང་ལ་གང་བརྒྱུད་པ། །དེ་བཞིན་ཉིད་དོ་དེའོ་ཞེས། །ཆོས་ཀྱི་རྒྱལ་པོས་རྒྱལ་ཚབ་ལ། །དགོངས་པ་གསང་བ་ངེས་པར་བརྒྱུད། །ཅེས་གསུངས་པའི་ཕྱིར་རོ། ༈ །གཉིས་པ་ལ་གཉིས་ཏེ། རིག་པ་འཛིན་པ་མི་མ་ཡིན་པ་ལ་བརྒྱུད་པ་དང་། མི་དང་མི་མ་ཡིན་པ་གཉིས་ཀ་ལ་བརྒྱུད་པའོ། །དང་པོ་ནི། རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་རྒྱལ་སྲས་རིགས་གསུམ་གྱིས་གདུལ་བྱ་རང་རང་གི་ལུས་དང་བསམ་པ་དང་མཐུན་པར་སྣང་བས་བསྟན་ཅིང་དར་བར་མཛད་དེ། འཇམ་དཔལ་རྡོ་རྗེ་རྣོན་པོ་གཞོན་ཚུལ་མཛེས་པའི་སྐུར་བསྟན་པས། ལྷ་གྲགས་ལྡན་མཆོག་སྐྱོང་ལ་བཤད། དེས་རིན་ཆེན་འོད་འབར་ལ། དེས་སྐྱེ་དགུའི་བདག་པོ་ཚངས་པ་ལ། དེས་ཚངས་པ་ཀུན་གྲོལ་ལ། དེས་ཚངས་པ་གཙུག་ཕུད་འཛིན་ལ། དེས་དབང་པོ་བརྒྱ་བྱིན་ལ། དེས་ལྷའི་རིག་འཛིན་ཚོམ་བུ་འབུམ་སྡེ་ལ་བཤད་ཅིང་དར་བར་བྱས། སྤྱན་རས་གཟིགས་བདུད་རྩི་སྨན་གྱི་སྐུར་བསྟན་པས། ཀླུ་རྒྱལ་མགྲིན་པ་ནག་པོ་ལ་བཤད། དེས་ཀླུ་མོ་ཁ་འདུལ་མ་ལ། དེས་ཀླུ་མོ་འདུལ་ཚངས་མ་ལ། དེས་ཀླུ་ཡིད་འོང་དགའ་བ་ལ། དེས་ཀླུ་འཇོག་པོ་ལ། དེས་ཀླུའི་ཚོམ་བུ་འབུམ་སྡེ་ལ་བཤད་ཅིང་དར་བར་བྱས། ཕྱག་ན་རྡོ་རྗེ་འཇིགས་ཚུལ་སྡིགས་པའི་སྐུར་བསྟན་པས། གནོད་སྦྱིན་ཀུན་ཏུ་བཟང་པོ་ལ་བཤད། དེས་གནོད་སྦྱིན་ལག་ན་རྡོ་རྗེ་ལ། དེས་གནོད་སྦྱིན་གྲགས་ལྡན་ཕྱོགས་སྐྱོང་ལ། དེས་གནོད་སྦྱིན་སྐར་མདའ་གདོང་ལ། དེས་གནོད་སྦྱིན་ཚོམ་བུ་འབུམ་སྟེ་ལ་བཤད་ཅིང་དར་བར་བྱས་ཏེ། ལྷ་ཀླུ་གནོད་སྦྱིན་དེ་དག་ཀྱང་བྱང་ཆུབ་སེམས་དཔའི་རིག་འཛིན་ཅིང་སངས་རྒྱས་རྣམས་ཀྱི་གདུང་འཚོབ་པར་གྱུར་ཏོ། །གཉིས་པ་ནི། ཐོག་མར་ལུང་བསྟན་བརྒྱུད་པའི་འབྲེལ་བསླང་བར་བྱ་སྟེ། སྤྱི་མདོ་ལས། འདི་ལྟར་མི་མཇེད་ཅེས་བྱ་བའི་འཇིག་རྟེན་གྱི་ཁམས་ན་བཞུགས་པའི་སྟོན་པ་རྡོ་རྗེ་ཐུབ་པའི་དབང་པོ་དེ། སྐྱེ་དགུའི་ཚེ་ལོ་བརྒྱ་པ་ལ་བྱུང་སྟེ། ཡུན་ཧ་ཅང་མི་རིང་བ་ཞིག་བཞུགས་ཏེ། ཡོངས་སུ་མྱ་ངན་ལས་འདའ་བར་དགོངས་ནས། ཡུལ་ཡངས་པ་ཅན་ཞེས་བྱ་བར་འཁོར་མང་པོ་དང་ཐབས་གཅིག་ཏུ་བཞུགས་པ། དབྱར་གྱི་ངོ་གསུམ་འདས་ནས། འཇིག་རྟེན་གྱི་སློབ་མ་ལ་གདམས་ངག་གསུམ་འཇོག་པའི་སླད་དུ་འཁོར་འདུས་པ་རྣམས་ཀྱི་ནང་ན་རྫུ་འཕྲུལ་ཆེར་སྤྱོད་ལ་བཀའ་སྩལ་པ། རྫུ་འཕྲུལ་ཅན་ཁྱོད་དེངས་ལ། འཇིག་རྟེན་དྲུག་གི་ཕྱོགས་བཅུ་ན་ངའི་སློབ་མ་གང་དག་འཁོད་པ། འདུ་བར་ཕྱོགས་པ་དག་གང་ཇི་སྙེད་པ་རྣམས་སྡུས་ཤིག །ངེས་པར་གཞག་པར་བྱ་བ་དག་ཡོད་དོ། །ཞེས་གསུངས་པ་དང་། རྫུ་འཕྲུལ་ཅན་དེས་ཆོས་ཀྱི་སྐད་ཅིག་གིས་གོ་བར་བསྒྲགས་ནས་ཐམས་ཅད་སྡུད་པ་ནི། འདི་ལྟ་སྟེ། རྒྱལ་བའི་ཞིང་གྱུར་རིགས་དྲུག་གང་སུ་དག །འདུ་བར་ངེས་ཤིང་ཕྱོགས་པ་ཀུན་ཉོན་ཅིག །དེང་འདིར་རྒྱལ་བས་བདུད་རྩི་གསུམ་འཇོག་གིས། །དུག་གསུམ་འཇོམས་པར་འདོད་པ་ཀུན་འདུས་ཤིག །ཅེས་གསུངས་པ་དང་ཚིག་དོན་ཆ་འདྲ་བར་ཤེར་ཕྱིན་སྒོ་མཐའ་ཡས་པ་ལས་ཀྱང་འབྱུང་ངོ་། །དེ་ལྟར་བསྒྲགས་པ་ན། དམ་པའི་རིགས་ཅན་ལྔ་ནང་དུ་ཡང་དག་འཇོག་པ་ལ་གནས་པས་མ་འདུས་ལ། དེ་ལས་གཞན་པའི་འཁོར་ཐམས་ཅད་འདའ་ཀ་ཞལ་ཆེམས་ཉན་པའི་ཆེད་དུ་སྟོན་པའི་སྤྱན་སྔར་ལྷགས་པ་ལ། བཀའ་སྩལ་པ། ཀྱེ་གྲོགས་པོ་དག་ཤེས་པར་གྱིས་ཤིག །ཆོས་ཐམས་ཅད་ནི་མི་རྟག་པའོ། །འབྱོར་པ་ཐམས་ཅད་ནི་མཐར་རྒུད་པའོ། །དངོས་པོ་ཐམས་ཅད་ནི་ངེས་པར་འཇིག་པའོ། །གང་ཟག་གི་སྲོག་གི་དབང་པོ་ལ་སྐྱེ་འཆི་ཡོད་པའི་ཕྱིར། ང་ཡོངས་སུ་མྱ་ངན་ལས་འདའ་བས། སུ་དག་ཐེ་ཚོམ་མ་ཆོད་པ་རྣམས་དྲི་བ་གྱིས་ཤིག །ཅེས་བཀའ་སྩལ་པ་དང་། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུཉྫ་ར་ཞེས་བྱ་བ་སྟན་ལས་ལངས་ཏེ། སེང་གེའི་ལྟ་སྟངས་ཀྱིས་སྟོན་པའི་ཞལ་ལ་བལྟས་ཏེ་འདི་སྐད་ཅེས། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་ལ་མཐུན་མཇུག་ཏུ། །འདའ་བས་ཡོངས་སུ་འདུལ་བར་དགོངས། །ཁྱོད་ནི་འཇིག་རྟེན་སྒྲོན་མར་ཤར། །ལྷ་མིའི་འཇིག་རྟེན་ཐམས་ཅད་ཀྱི། །མུན་པའི་དཀྱིལ་འཁོར་ཀུན་གསལ་ནས། །སེམས་ཀྱི་དཀྱིལ་འཁོར་གསལ་མཛད་དེ། །ཞེས་སྔོན་དུ་འགྲོ་བས་དྲི་བ་ལྔ་དྲིས་པའི་དང་པོ། ས་དང་རྣམ་ཐར་ལ་སྤྱད་པས། བྱང་ཆུབ་ཐོབ་པར་འགྱུར་བ་ཡི། །འདྲེན་པའི་ཐེག་པ་རྣམ་གསུམ་ལ། །གང་དག་རིམ་པར་བཀོད་ལགས་ན། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དཔག་གིས་མི་ལང་བའི། །ངེས་པའི་ཐེག་ཆེན་ཡོངས་མ་གསུངས། །ཞེས་རྒྱུའི་ཐེག་པ་སྔར་གསུངས་ནའང་། འབྲས་བུའི་ཐེག་པ་མ་གསུངས་པས་ད་ནམ་འབྱུང་ཞེས་ཞུས་པའོ། །དེའི་ལན་དུ་སྟོན་པས་དེ་ཁོ་ན་ཉིད་ངེས་པའི་ཐེག་པ་ཆེན་པོ་དེ་གནས་སྐབས་བཅུ་གཉིས་སུ་འབྱུང་བར་གསུངས་པའི་ནང་ཚན་བཅུ་པ། ལུང་ཆེན་ངེས་པར་བསྟན་པ་ནའང་འབྱུང་། ཞེས་གསང་སྔགས་ཕྱིས་འབྱུང་བར་གསུངས་པའི་དོན་འོག་ཏུ། རྗེས་སུ་འབྱུང་བར་ལུང་བསྟན་པའི་ལེའུ་བཞི་བཅུ་རྩ་གསུམ་པ་ལས་འདི་སྐད་ཅེས། ང་ནི་འདི་ནས་མི་སྣང་ན། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་ཏེ། །རྒྱལ་པོ་ཛཿཞེས་བྱ་བ་ལ། །སྔོན་དུ་ལྟས་སྣང་སྣང་འགྱུར་ཏེ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལངྐའི་བདག་པོ་ལ་སོགས་པ། །ལག་ན་རྡོ་རྗེས་སྣང་བར་འགྱུར། །ཞེས་ལུང་བསྟན་པ་ལྟར་སྟོན་པ་མྱ་ངན་ལས་འདས་པའི་འོག་ཏུ། བཅུ་གཉིས་ནི་བཅུ་ཚན་གཉིས་ཏེ་ཉི་ཤུ་དང་། བརྒྱད་དང་བཅུ་གཉིས་ཞེས་པ་གྲངས་ཀྱི་གནས་གཞན་འགོད་པའི་རིག་པ་ལ་དགོངས་པས། དོན་ལ་ལོ་ཉི་ཤུ་རྩ་བརྒྱད་འདས་པ་ན། ལྷ་གྲགས་ལྡན་མཆོག་སྐྱོང་བློ་གྲོས་མཐའ་ཡས་དང་། ཀླུ་རྒྱལ་འཇོག་པོ་བློ་གྲོས་རྒྱ་མཚོ་དང་། གནོད་སྦྱིན་སྐར་མདའ་གདོང་བློ་གྲོས་དད་སེལ་དང་། སྲིན་པོ་ལངྐའི་བདག་པོ་མགྲིན་བཅུ་བློ་གྲོས་ཐབས་ལྡན་དང་། མིའི་དགེ་བསྙེན་ལི་ཙ་བཱི་དྲི་མེད་གྲགས་པ་བློ་གྲོས་རབ་ཞི་སྟེ། དམ་པའི་རིགས་ཅན་དྲྭ་མ་ལྔ་པོ་ནང་དུ་ཡང་དག་འཇོག་ལས་ལངས་པ་དང་། སྟོན་པ་ཐུབ་པའི་དབང་པོ་མྱ་ངན་ལས་འདས་པར་ཤེས་པས་མྱ་ངན་གྱིས་གདུངས་ཏེ། རང་རང་གི་མངོན་པར་ཤེས་པས་ལངྐའི་ཡུལ་གྱི་གྲོང་བརྡལ་གྱི་མཚོ་གླིང་རི་མ་ལ་ཡ་གནམ་ལྕགས་ཡོད་པའི་རྩེར་རྫུ་འཕྲུལ་གྱི་བྱ་བས་འདུས་ནས། ཕྱོགས་བཅུའི་སངས་རྒྱས་ཐམས་ཅད་ཡིད་ལ་བྱས་ཏེ་གདུང་ཚིག་སྨྲས་པ། ཨེ་མའོ་ཀྱི་ཧུད་ཨེ་མའོ་བློང་། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་པ་ནས། ད་ལྟར་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ། །ཨེ་མའོ་ཀྱི་ཧུད་ཨེ་མའོ་བློང་། །ཞེས་པའི་བར་གདུང་ཚིག་ཉེར་གསུམ་བཏོན་པས་ཕྱོགས་བཅུའི་རྒྱལ་བ་ཐམས་ཅད་ཀྱིས་གསང་བའི་བདག་པོ་ལ། གསང་བ་པོ་ཡི་བདག་པོ་ཁྱོད། །སྔོན་གྱི་གོ་ཆ་ཡལ་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་ནས་ཀྱང་། །འཇིག་རྟེན་གདུང་བ་བསལ་བར་རིགས། །ཞེས་བསྐུལ་བས། གསང་བདག་གིས་གདུལ་བྱའི་ངོར་ཆོ་འཕྲུལ་བསྟན་ནས་ཞལ་གྱིས་བཞེས་པ་འདི་སྐད་དུ། འཇིག་རྟེན་ལོག་པའི་གཙོ་བོ་རྣམས། །སྐལ་དང་ལྡན་པར་ལུང་བསྟན་པ། །ལས་དང་སྐལ་བར་རབ་ལྡན་ཞིང་། །རྒྱལ་བས་འབྱུང་བར་ལུང་བསྟན་པའི། །བསོད་ནམས་ཆེན་པོ་སྐལ་ཅན་རྣམས། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟར་དུས་ལ་འདིར་བབས་ཀྱིས། །འཁོར་ལ་སྙིང་པོར་ལུང་བསྟན་ཕྱིར། །ཆོ་འཕྲུལ་རྣམས་ཀྱི་བྱིན་བརླབས་ཀྱིས། །བསྟན་པའི་སྙིང་པོ་དམ་པ་ཞིག །ཇི་ལྟར་བཤད་ཅིང་ལུང་བསྟན་བཞིན། །སྐལ་ལྡན་རྣམས་ལ་བགྲོ་བར་བྱ། །དྲག་ཤུལ་ཅན་ཞེས་བྱ་བའི་རི། །དགོན་པ་ཆེན་པོའི་གནས་འདི་ནི། །ཡེ་ཤེས་སྙིང་པོ་ཅན་རྣམས་ཀྱིས། །ཐེག་ཆེན་གསང་བ་འབྱུང་བའི་གནས། །ཐོག་མ་ཐ་མའི་དུས་མེད་པར། །དམ་པ་རྣམས་ཀྱིས་བསྔགས་པ་ཡིན། །ཐོག་མ་ཐ་མ་མེད་པ་ཡི། །རྒྱལ་བ་དཔག་ཏུ་མེད་པ་ཡིས། །དམ་པའི་དགོན་གནས་ཆེན་པོ་དེར། །སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་བདག་གིས་ཀྱང་། །ཐོག་མ་ཐ་མ་མེད་པ་རུ། །བདག་གི་དམ་བཅའ་མི་འདོར་བས། །བསྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་གསུངས་ནས་རྨད་དུ་བྱུང་བའི་ཆོ་འཕྲུལ་གྱིས་གཤེགས་ཏེ། གནས་ལངྐའི་ཡུལ་གྱི་རི་བོ་མ་ལ་ཡའི་རྩེ་མོར། སྟོན་པ་གསང་བའི་བདག་པོ་ཉིད་ཀྱིས། འཁོར་དམ་པའི་རིགས་ཅན་ལྔ་སོགས་རིག་འཛིན་འདུས་པ་ཕལ་མོ་ཆེ་ལ། ཆོས་མདོ་དགོངས་པ་འདུས་པ་ལ་སོགས་རྒྱུད་དཔག་ཏུ་མེད་པ་སྔར་འོག་མིན་དུ་སྟོན་པ་རིགས་དྲུག་པས་གསུངས་པ་ཉིད་སླར་ཡང་འདིར་བཟླས་ཏེ། སྟོན་པ་གསང་བའི་བདག་པོའི་ཐུགས་ཀྱི་རིག་པ་ཇི་ལྟ་བ་བཞིན་དུ་འཁོར་རྣམས་ཀྱིས་རྟོགས་ཤིང་ཁོང་དུ་ཆུད་པའི་ཚུལ་དུ་བཤད། དུས་ནི་ཐུབ་དབང་མྱ་ངན་ལས་འདས་ནས་ལོ་ཉེར་བརྒྱད་ཀྱི་དུས་ནའོ། །སྡུད་པ་པོ་ནི་ལིངྐའི་བདག་པོ་བློ་གྲོས་ཐབས་ལྡན་གྱིས་ཚིག་དང་ཡི་གེར་བསྡུས་པ་གསེར་གྱི་བྱང་བུ་ལ་བཻཌཱུརྱ་ཞུན་མས་བྲིས་ཏེ་གླེགས་བམ་དུ་བྱས་པ། དགོངས་པའི་རྩལ་བདུན་གྱིས་མདུན་གྱི་ནམ་མཁའ་ལ་སྦས་སོ། །དེ་ལྟར་ཡང་སྤྱི་མདོ་ལས། རྡོ་རྗེ་གསང་ཆེན་གསང་བ་ཡི། །ངེས་དོན་དམ་པའི་མཛོད་མཆོག་རྣམས། །འདིར་བགྲོས་གསལ་བར་བཤད་སྦྱར་ནས། །ལྷ་དང་མི་ཡི་རིག་འཛིན་ལ། །རིམ་པར་བརྒྱུད་དེ་གྲགས་པར་གྱུར། །ཞེས་སོ། །གསང་བདག་གི་ཆོས་འཁོར་བསྐོར་བའི་གནས་འདི་ཕྱོགས་གང་ན་ཡོད་ཅེ་ན། དེ་ལས། མི་ཡི་གནས་ཀྱི་འཇིག་རྟེན་ཁམས། །གླིང་བཞི་པ་ལ་འཛམ་གླིང་གི། །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་ས་ཡིན་ཏེ། །ཆོས་འཛིན་རིགས་ཀྱི་གྲུབ་གནས་སུ། །ཞེས་པས་གླིང་བཞིར་ཕྱེ་བའི་ཛམ་བུ་གླིང་གི་ནང་ཚན་གླིང་ཆུང་ཞིག་ཡིན་ལ། དེ་ཡང་མདོ་འགྲེལ་སྨན་པ་ལྕགས་འགྲོལ་ལས། ཟ་ཧོར་ཡུལ་གྱི་ཉེ་འཁོར་ན། །མཐུ་སྟོབས་ཞབས་བཅགས་མ་ལ་ཡ། །གནམ་ལྕགས་འབར་བའི་རི་རྩེ་ན། །ཞེས་པས་ཛམ་བུ་གླིང་གི་ཤར་ལྷོ་བྷཾ་ག་ལ་དང་ཉེ་བའི་གླིང་ཆུང་སྔོན་སྲིན་པོས་བཟུང་བས་ལངྐའི་ཡུལ་ཞེས་གྲགས་ཏེ། སྟོན་པ་ལངྐའི་བདག་པོ་སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ནས། བློ་གྲོས་ཆེན་པོས་ཞུས་པ་ལངྐར་གཤེགས་པའི་མདོ་གསུངས་པའི་གནས་དེ་ཡིན་ལ། ཕྱིས་དེད་དཔོན་སེང་གེས་བཟུང་བས་དེང་སང་སིངྒ་ལའི་གླིང་དུ་གྲགས་སོ། །ཡུལ་དེའི་མཚན་ཉིད་ནི། རྒྱ་མཚོའི་ངོ་ལ་གནས་པའི་གླིང་ས་པདྨ་འདབ་བཞིའི་རྣམ་པ་ཅན་གྱི་དབུས་སུ་དྲག་ཤུལ་ཅན་ཞེས་བྱ་བའི་རི་བོ་མ་ལ་ཡ་སྟེ། ད་ལྟ་ཡུལ་དེར་ཁ་སྐད་དུ་སུ་མན་ཀཱུ་ཱུཊ་ཞེས་འབོད་པའི་རི་བོ་དབྱིབས་ཟླུམ་པོ་བང་རིམ་དྲུག་དང་ལྡན་པ་སུམ་གཅིག་ཡན་ཆད་རིའི་སྙིང་པོ་ལྟ་བུ་ངོས་ཁོ་ར་ཁོར་ཡུག་ཏུ་བྲག་རི་བརྩེགས་པ་མཐོ་ཞིང་གཟར་པོས་ཡོངས་སུ་བསྐོར་བས་སྐྱེ་བོ་ཕལ་གྱིས་བགྲོད་པར་མི་ནུས་པ་སྟེ། དེ་ལས། རྩེ་ན་རྩལ་གྱི་རྒྱལ་པོ་གནས། །ངོས་ལ་བྲག་དཀར་ཁྱི་ཚུགས་པ། །སེང་གེ་གནམ་དུ་མཆོང་འདྲས་བརྒྱན། །རྩི་སྨན་རྩ་བརྒྱད་ཚང་བར་འཁྲུངས། །འདུ་བའི་ནད་ཀྱིས་ཡོངས་མི་ཚུགས། །སྤྱི་བོར་ཀ་ལནྟ་ཀ་ནི། །མི་གཉིས་གཅིག་པུར་གནས་པ་ཡི། །མཛོད་ལྡན་དེ་ཡི་ཚང་བཅས་པ། །སྐལ་ལྡན་རྣམས་ཀྱིས་བགྲོད་པར་སླ། །སྐལ་མེད་རྣམས་ཀྱིས་ཡོངས་མི་ཐར། །ཞེས་གསུངས་པ་ལྟར། རི་བོ་དེའི་རྩེ་མོ་ན་རི་དྭགས་ཀྱི་རྒྱལ་པོ་སེང་གེ་དང་། འདབ་ཞོལ་ན་གཅན་གཟན་གྱི་རྒྱལ་པོ་སྟག་གི་ཁྲ་ས། སྟེང་ན་བྱ་ཀ་ལནྟ་ཀའི་ཚང་བཅས་པས་ཆོས་ཐམས་ཅད་ཐིག་ལེ་ཉག་ཅིག་ཏུ་སྒྲོག་པ། རྩ་བར་བདུད་རྩིའི་ཆུ་མིག་རང་བརྡོལ་བ་དང་། མདུན་ན་མེ་ཏོག་གི་སྣམ་བུས་བྲེས་ཤིང་། ཙནྡན་ལ་སོགས་པ་སྨན་ཤིང་གི་ནགས་ཚལ་རྒྱས་པ། རི་དེའི་ཤར་ལྷོའི་ངོས་ན་ཏྲི་ཤང་ཨ་སུ་ར་ཞེས་པའི་བྲག་ཕུག་ཐོག་སུམ་རིམ་ཕུགས་སུལ་བརྒྱད་པ་ཉི་ཟླའི་རི་མོ་རང་སྣང་བ། སྒོ་ཟླ་གམ་ལ་ངོ་མཚར་གྱི་རི་མོ་རང་བྱུང་བ་ཡོད་པར་བཤད་དོ། །དེ་ཡང་མདོ་ཆེན་པོ་ལས། ལངྐ་ཡུལ་གྱི་གྲོང་བརྡལ། མཚོ་ཀོ་ཁ་ཐང་དམར་གྱི་གླིང་། །བྱན་ལག་མཆོངས་ཀྱི་རི་མ་ལ་ཡ་གནམ་ལྕགས་ཡོད་པའི་རྩེ། ཞེས་རྒྱ་མཚོའི་དོ་ལ་གནས་པའི་གླིང་ཆུང་དེ་ལ་ཀོ་ཁ་ཐང་དམར་ཞེས་འབོད་པ་ནི། གླིང་དེར་སྲིན་པོ་ལངྐ་མགྲིན་བཅུ་བསད་པའི་ཁྲག་གིས་སྤགས་པའི་རྡོ་དམར་པོས་སྔ་དྲོ་ཙམ་གྱི་སའི་ཆ་ཁྱབ་པར་ཡོད་ཅེས་གྲགས་པས་བཏགས་ལ། གཞན་ཡང་རི་དེའི་རྩེ་མོར་དེ་བཞིན་གཤེགས་པ་བཞིའི་ཞབས་རྗེས་དང་། རིའི་རྩ་བ་དང་ཉེ་བའི་བྱང་ངོས་སུ་གུ་ཎ་ཝེ་ར་ཞེས་པའི་མཆོད་རྟེན་ཆེན་པོ་སོགས་དེ་བཞིན་གཤེགས་པའི་གདུང་རིང་བསྲེལ་བཞུགས་པའི་མཆོད་རྟེན་མང་པོ་དང་། གུ་ཎ་ཝེ་རེའི་ནུབ་ཕྱོགས་ན་བུདྡྷ་ཤ་ར་ཎ་ཞེས་པ་དེ་བཞིན་གཤེགས་པས་ཞག་བདུན་རྩ་བར་མཉམ་བཞག་ལ་བཞུགས་པའི་བོ་དེ་ཙེའི་ཤིང་གི་སྡོང་པོ་དང་། ནགས་ཚལ་ཐམས་ཅད་གླང་པོ་ཆེ་དང་། ས་ཐམས་ཅད་འབྲུ་དང་རིན་པོ་ཆེ་དང་། ཆུ་ཐམས་ཅད་མུ་ཏིག་དང་། ཁྱིམ་ཐམས་ཅད་པདྨ་ཅན་གྱིས་གང་བས་ཛམ་བུ་གླིང་ལས་ཡོན་ཏན་ཆེས་ལྷག་པ་ཡིན་ཞེས་གྲགས་སོ། ༈ །གསུམ་པ་གང་ཟག་རྣ་བར་བརྒྱུད་པ་ལ་གཉིས་ཏེ། རྒྱུད་ལུགས་མདོ་རྩ་བའི་དཀྱིལ་འཁོར་དུ་ཆུ་བོ་བཞི་རྫོགས་སུ་བསྐུར་བའི་དབང་གི་བརྒྱུད་ཚུལ་སྤྱིར་བཤད་པ་དང་། མན་ངག་ལུགས་ཡན་ལག་གི་དཀྱིལ་འཁོར་སོ་སོར་ཕྱེ་སྟེ་ཆུ་བོ་བཞི་རྫོགས་སུ་བསྐུར་བའི་དབང་གི་བརྒྱུད་པའི་ཁྱད་པར་བྱེ་བྲག་ཏུ་བཤད་པའོ། །དང་པོ་ལའང་གཉིས་ཏེ། མི་ཡུལ་དུ་བསྟན་པ་བབས་ཚུལ་དང་། དེ་ལས་ཇི་ལྟར་བརྒྱུད་ཚུལ་ལོ། །དང་པོ་ནི། སྤྱི་མདོ་ལས། སྤྲུལ་པས་ཇི་ལྟར་ལུང་བསྟན་བཞིན། །ད་ལྟར་དུས་ལ་འདིར་བབ་ཀྱིས། །ཞེས་པའི་སྐབས་ཀྱི་འགྲེལ་པ་ལུང་བསྟན་མར། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ཛམ་བུ་གླིང་གི་ཤར་ཕྱོགས་སུ། །རྒྱལ་པོ་ཛཿཞེས་བྱ་བ་ལ། །ཚེ་གཅིག་འདི་ལ་འགྲུབ་པ་ཡི། །གསང་བའི་ཐེག་པ་དམ་པ་ཞིག །ཕྱག་ན་རྡོ་རྗེས་སྟོན་པར་འགྱུར། །ཞེས་སྣང་ངོ་། །དེ་བས་ན་བདག་ཀྱང་སྐལ་ལྡན་དུ་ལུང་བསྟན་པ་ནི་ཐོབ་བོ། །ད་ལྟར་དུས་ལ་བབ་པ་ནི་གདུང་བ་བཏོན་པ་དང་། ལོ་ཉི་ཤུ་རྩ་བརྒྱད་ལོན་པའི་ཕྱིར་རོ། །ཞེས་འབྱུང་བ་ལྟར། གསང་བདག་གིས་རི་མ་ལ་ཡའི་རྩེར་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་བརླབས་ཀྱིས། ས་ཧོ་རའི་རྒྱལ་པོ་དྷརྨ་ཏ་ཛྙཱ་ནའི་སྲས་སྐལ་ལྡན་རྒྱལ་པོ་ཛཿསྟེ་མཚན་གཞན་ཨིནྡྲ་བྷཱུ་ཏིའམ་ལུང་བསྟན་རྡོ་རྗེ་ལ་རྨི་ལྟས་བདུན་ཤར་ཏེ། མི་ལས་རྒྱལ་རིགས་དྲྭ་མ་ཆེ། །རྒྱལ་བུ་རིགས་ཅན་ལྟས་སུ་ཤར། །ཞེས་པའི་སྐབས་ཀྱི་ལུང་བསྟན་མར། །མི་ལས་རྒྱལ་རིགས་ཞེས་པ་གཉིས་ནི། བདག་ཉིད་ལ་ལྟས་བདུན་ཤར་བ་སྟེ། འདི་ཡང་། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱས་པ་དང་། །ཀུན་གྱིས་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། །རིན་ཆེན་ཆར་དུ་བབས་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་གསུངས་པ་ལྟར་རྨི་ལྟས་བདུན་ལས་གཉིས་པ་དང་གསུམ་པ་གོ་བརྗེས་པ་ཙམ་མ་གཏོགས་ཚིག་དོན་གཉིས་ཀ་འདི་དང་འདྲ་བ་མདོ་འགྲེལ་ཡེ་ཤེས་སྣང་བ་རྒྱན་ལས་ཀྱང་འབྱུང་མོད། དེ་ལྟར་ནའང་རྨི་ལམ་བདུན་པོའི་དོན་བཤད་དང་འཁྲུགས་བསྡེབས་ཀྱི་གོ་རིམ་རྒྱལ་པོ་ཉིད་ཀྱིས་ཚིགས་སུ་བཅད་པའི་སྒོ་ནས་འདི་ལྟར་གསུངས་ཞེས་གྲགས་ཏེ། ཇི་སྐད་དུ། མདང་སུམ་བདག་ལ་རྨི་ལམ་འདི་ལྟར་རྨིས། །རི་བོ་མ་ལ་ཡ་གནམ་ལྕགས་ཡོད་པའི་རྩེར། ཕྱག་ན་རྡོ་རྗེ་ཕོ་བྲང་གནས་བཞུགས་ཏེ། །སྐུ་ལས་འོད་འཕྲོས་སྣང་སྲིད་བྱི་དོར་བྱས། །གསུང་གི་སྒྲ་ཡིས་སྣང་སྲིད་གཡོ་ཞིང་འགུལ། །ཐུགས་ལས་འོད་འཕྲོས་བདག་གི་སྙིང་གར་ཐིམ། །ཉི་ཟླ་སྤྱི་བོ་རྐང་པའི་མཐིལ་དུ་ནུབ། །བདག་གི་ལྟོ་ན་སྣང་སྲིད་འཕྱོ་བ་རྨིས། །དང་པོ་འདི་ནི་བག་ཆགས་འབྱོངས་པའི་ལྟས། །དེ་ནས་བདག་དང་སངས་རྒྱས་མང་པོ་རྣམས། །རྨད་བྱུང་གསང་བའི་དོན་ལ་བགྲོ་བ་མཛད། །ཉི་ཟླ་པདྨ་སེང་གེའི་ཁྲི་སྟེང་ནས། །ཆོས་ཀྱི་འཁོར་ལོ་འགྲོ་ལ་བསྐོར་བ་རྨིས། །གཉིས་པ་ཡིན་ཏེ་ཆོས་ལ་དབང་ཐོབ་ལྟས། །དེ་ནས་མཁའ་ལ་རིན་ཆེན་སྤྲིན་འཁྲིགས་ཏེ། །སྙན་པའི་འབྲུག་བསྒྲགས་གསལ་བའི་གློག་འགྱུས་ནས། །རིན་ཆེན་ཆོས་ཀྱི་ཆར་ཆེན་བབས་པ་རྨིས། །གསུམ་པ་ཡིན་ཏེ་འདི་ནི་དགེ་བའི་ལྟས། །འགྲོ་ལ་ཐུགས་རྗེས་ཆོས་ཆར་འབེབས་པའི་རྟགས། །དེ་ནས་འཇིག་རྟེན་རིན་ཆེན་གྱིས་གང་སྟེ། །ནོར་བུ་འོད་འབར་འགྲོ་བའི་མུན་བསལ་ནས། །བདུད་རྩི་སྨན་གྱི་ཆུ་རྒྱུན་བབས་པ་ཡིས། །འགྲོ་བའི་ནད་རྙིང་རྟག་ཏུ་སྦྱངས་བྱས་ཤིང་། །འགྲོ་ཀུན་རྣལ་འབྱོར་ཞེས་སྒྲར་དར་དིར་དུ། །གྲགས་པར་བྱས་པ་རྨི་ལམ་བཞི་པ་སྟེ། །འགྲོ་ཀུན་རྡོ་རྗེའི་གྲལ་དུ་བཞག་པའི་རྟགས། །ཉི་མའི་དཀྱིལ་འཁོར་འོད་ཟེར་འབར་ནང་ནས། །དཔལ་བེའུ་སྒྲོམ་བུའི་ནང་ནས་གླེགས་བམ་ནི། །གསེར་ལ་བཻ་ཌཱུརྱ་ཡིས་ལེགས་བྲིས་པ། །མངོན་སུམ་བབ་པ་རྨིས་ཏེ་ལྔ་པ་ཡིན། །ཆོས་ཀྱི་རྒྱལ་པོར་དབང་ནི་བསྐུར་བའི་རྟགས། །དྲུག་པའི་རྨི་ལམ་གླེགས་བམ་དེ་དག་ལ། །སངས་རྒྱས་བྱང་སེམས་རིག་འཛིན་ཚོགས་མང་པོས། །ཡོན་ཏན་སྒྲོག་ཅིང་མཆོད་བསྟོོད་སྐོར་བྱེད་རྨིས། །རྨད་བྱུང་ཆེན་པོར་སྟོན་པའི་སྔ་ལྟས་ཡིན། །ཐ་མ་ནམ་མཁའི་དབྱིངས་ཀྱི་སྤྲིན་གསེབ་ནས། །ཆོ་འཕྲུལ་རང་སྒྲས་བདག་ལུང་སྟོན་པའི་ཚིག །རིམ་གྱིས་གསང་བ་དམ་པར་སྒྲ་སྒྲོག་རྨིས། །གསང་བ་དམ་པ་རྒྱ་ཆེར་སྒྲོགས་པའི་རྟགས། །ཞེས་གསུངས། དེའི་ལུང་བསྟན་པའི་སྒྲ་ནི་འདི་ཡིན་ཏེ། ལས་དང་སྐལ་བར་རབ་ལྡན་ཞིང་། །རྒྱལ་བས་འབྱུང་བར་ལུང་བསྟན་པའི། །བསོད་ནམས་ཆེན་པོའི་དྲྭ་མ་ཁྱོད། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟ་དུས་འདིར་མངོན་ཤར་གྱིས། །འཁོར་བའི་གཉེན་པོར་བྱ་བའི་ཕྱིར། །ང་ཡི་ཆོ་འཕྲུལ་བྱིན་བརླབས་ཀྱིས། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་བསྟན་པར་བྱ། །ཞེས་པའོ། །དེའི་ལྟ་བུའི་རྨི་ལམ་རྣམས་ནང་པར་འཁོར་རྣམས་ལ་བཟླས་ཏེ། ལྟས་འདི་དག་དང་སྦྱར་ན་བདག་སྐལ་བ་དང་ལྡན་པར་ངེས་སོ། །ཞེས་གསུངས་པས་ཐམས་ཅད་ངོ་མཚར་སྐྱེས་ནས། ལེགས་སོ་ཨ་ཧོ་ཞེས་གསོལ་ཏོ། །དེ་ནས་རྒྱལ་པོས་ཕོ་བྲང་གི་ཡང་ཐོག་ཏུ་བྱོན་པས་རྒྱུ་རིན་པོ་ཆེ་སྨུག་པོ་ལས་གྲུབ་པའི་གསང་བདག་གི་སྐུ་ཁྲུ་གང་བ་ཞིག་འདུག་པ་མཐོང་བས་དགྱེས་ཏེ། ཕྱག་མཆོད་སྐོར་བ་སྔོན་དུ་འགྲོ་བས་ཞབས་ལ་སྤྱི་བོས་གཏུགས་ཏེ། སྔོན་ཚེ་གོང་ནས་བསྒྲུབས་པ་ཡི། །ལས་ཀྱི་མཇལ་བའི་ལྷ་མཆོག་ཁྱོད། །བསྐལ་པ་བརྒྱར་ཡང་མི་གཏོང་ངོ་། །ཨེ་མ་ངོ་མཚར་མཆོག་གི་སྐུ། །འདྲེན་པ་མཆོག་གི་དཔལ་ལགས་གྲང་། །མོས་པའི་གཟུངས་སུ་ལྷ་མཆོག་འཛིན། །ཞེས་གསུངས་ཏེ། ཡི་དམ་གྱི་ལྷར་བཟུང་ནས་ཟླ་བ་བདུན་གྱི་བར་བསྒྲུབས་པས་རྨི་ལམ་དང་མཐུན་པར་གླེགས་བམ་རྣམས་མངོན་སུམ་དུ་བབས་སོ། །དེ་ཡང་ཡུལ་གང་དུ་བབ་ཅེ་ན། ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་ཐབས་ཀྱི་ལམ་མཆོག་འདུས་པའི་རྒྱུད་ཀྱི་ལེའུ་ལྔ་པར། མ་ཧཱ་ཡོ་གའི་རྒྱུད་རྣམས་ནི་རྒྱལ་པོ་ཛའི་ཁང་སྟེང་དུ་འབབ་པར་འགྱུར་ལ། ཨ་ནུ་ཡོ་གའི་རྒྱུད་རྣམས་ནི་སིངྒ་ལའི་ནགས་ཚལ་དུ་འབྱུང་བར་འགྱུར་ཏེ། ཞེས་ལུང་བསྟན་པ་ལྟར། མ་ཧཱ་ཡོ་གའི་རྒྱུད་སྡེ་ཆེན་པོ་བཅོ་བརྒྱད་ནི་ཟ་ཧོར་གྱི་ཡུལ་དང་། མདོ་དགོངས་འདུས་སོགས་ལུང་ཨ་ནུ་ཡོ་གའི་རྒྱུད་རྣམས་ནི་ལངྐའི་ཡུལ་དུ་གྲགས་པ་སིངྒ་ལའི་གླིང་དུ་བབས་སོ། །དེར་རྒྱལ་པོས་གླེགས་བམ་རྣམས་ལ་བརྟགས་པས་རྟོགས་པར་འདུག་ཀྱང་། གདུལ་བྱ་རྒྱུད་ལ་རང་གར་འཇུག་པ་དགག་པའི་ཕྱིར། བརྡའ་མ་འཕྲོད་པའི་ཚུལ་མཛད་དེ། འཇིག་རྟེན་ན་མཁྱེན་པ་སུ་ཆེ་དྲིས་པས། ཨུ་པ་རཱ་ཛ་མཁྱེན་པ་ཆེ་ཟེར། དེ་སྤྱན་འདྲེན་དུ་མངགས་པས་འབྱོན་དུ་མ་བཞེད་ནས། ཚུར་སྤྱན་དྲོངས་ཤིག་དང་བརྟག་གོ་གསུངས་པས། གླེགས་བམ་རྣམས་བཀུར་སྟི་ཆེན་པོ་དང་བཅས་གླང་པོ་ཆེ་ལ་བཀལ་ནས་སྤྱན་དྲངས་ཏེ་བསྟན་པས་བརྡ་མ་འཇལ་ཏེ། འདི་བདག་ག ི་སྤྱོད་ཡུལ་དུ་མ་གྱུར་པས་རྒྱལ་པོ་ཉིད་ཀྱི་དགོངས་པའི་རྩལ་གྱིས་དཔག་འཚལ་ལོ་ཞེས་ཚུར་བསྲིངས་སོ། །ཡང་དྲིས་པས། སངས་རྒྱས་རིན་ཆེན་མང་གི་སྤྲུལ་པ་དགེ་སློང་ཀུ་ཀུ་རཱ་ཛ་མཁྱེན་པ་ཆེ་ཟེར་བས་སྤྱན་དྲངས་ཀྱང་མ་བྱོན་ཏེ། གླེགས་བམ་རྣམས་སྔར་ལྟར་བསྐུར་བ་ལ། དེས་བརྟགས་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ནས་བསྒྲུབས་པས་གྲུབ་སྟེ། ཕྱག་ན་རྡོ་རྗེས་བསྟན་པ་ལྟར་རྒྱལ་པོ་ལ་བཤད་དོ་ཡང་ཟེར། རྒྱལ་པོ་ཉིད་ཀྱིས་མཆོད་དེ་གསོལ་བ་བཏབ་པས་རྡོར་སེམས་ཞལ་མཐོང་གི་ལེའུ་རྟོགས་ནས། དེའི་གཞུང་བཞིན་དུ་བསྒྲུབ་པས། རྡོ་རྗེ་སེམས་དཔས་ཞལ་མངོན་སུམ་དུ་བསྟན་ཏེ། རིགས་ཀྱི་བུ་དངོས་གྲུབ་ཅི་འདོད་ཅེས་གསུངས་པ་ལ། བདག་གིས་གླེགས་བམ་འདི་རྣམས་ཀྱི་དོན་རྟོགས་པའི་དངོས་གྲུབ་ཞུའོ་ཞེས་གསོལ་བས་ལན་དུ། རིགས་ཀྱི་བུ་རང་གི་ཕུང་པོ་སྦྱོངས་དང་། ཕྱག་ན་རྡོ་རྗེས་སྟོན་པར་འགྱུར་རོ་ཞེས་གསུངས་ནས་མི་སྣང་བར་གྱུར། དེ་ལ་སྤྲོ་བ་སྐྱེས་ཏེ་བསྒྲུབས་པས་ཕྱག་ན་རྡོ་རྗེ་མངོན་སུམ་བྱོན་ནས། རྡོ་རྗེ་ལན་གསུམ་ནམ་མཁའ་ལ་སྤར་ཏེ། སྤོང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །ཅེས་དོན་གྱི་བསྟན་པ་དང་ཐེག་པ་ཐམས་ཅད་རྫོགས་པའི་དབང་བསྐུར། ཚིག་གི་བསྟན་པ་དགེ་བསྙེན་ལི་ཙ་བཱི་དྲི་མ་མེད་པ་ལ་ཞུས་ཤིག་ཅེས་ལུང་བསྟན་པ་ལྟར་བསྒྲུབས་པས་གླེགས་བམ་གྱི་དོན་མ་ལུས་པ་མཁྱེན་པར་གྱུར་རོ། །ཞེས་ལུགས་གཉིས་འབྱུང་བ། གང་ལྟར་བཤད་ཀྱང་མི་འགལ་ཏེ། རྒྱལ་པོ་ཉིད་ཀྱིས་རྟོགས་ཀྱང་གཟུ་ལུམ་ཅན་རྣམས་རང་གར་འཇུག་པ་དགག་པའི་ཕྱིར་ཀུ་ཀུ་རཱ་ཛ་ལ་བརྟེན་ནས་རྟོགས་པ་ལྟར་མཛད་པའི་ཕྱིར་རོ། །དེ་བས་ན་གཉིས་པོ་དྲང་ངེས་ཀྱི་ཁྱད་པར་ཡིན་པས། འདིར་ཕྱི་མ་ལྟར་རྒྱལ་པོ་རང་ཉིད་ཀྱིས་རྟོགས་པའི་ཕྱོགས་ལེགས་པ་ཡིན་ཏེ། ཉིད་ཀྱིས་མཛད་པའི་སྒྱུ་འཕྲུལ་ལམ་རྣམ་བཀོད་ལས། ཤར་ཕྱོགས་ཨིནྡྲའི་ལུང་པ་ན། །རྒྱ་ལུང་རྡོ་རྗེ་བརྩེགས་པར་རུ། །རིགས་ཅན་ཨིནྡྲ་བྷཱུ་ཏི་ངས། །གསང་བའི་བདག་པོས་མངོན་བསྟན་པའི། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤོང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་དང་། སློབ་དཔོན་སངས་རྒྱས་གསང་བའི་ལམ་རིམ་ལས་ཀྱང་། འབྲེལ་བས་སྣང་ལ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བརྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱང་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །ཞེས་རང་གིས་རྟོགས་པར་བཤད་ཀྱིས། གཞན་ལ་བསྟེན་པར་མ་བཤད་པའི་ཕྱིར་དང་། ཨ་ཏི་ཟབ་དོན་སྙིང་པོའི་ལོ་རྒྱུས་ལས་ཀྱང་དེ་ལྟར་གསུངས་པའི་ཕྱིར་རོ། །འཕྲོས་དོན་གསང་སྔགས་བབས་ཚུལ་འདི་ལ། གཞན་གྱིས་བརྟགས་པའི་རྩོད་པ་འགོད་པ་དང་། དེ་སྤང་བའོ། །དང་པོ་ནི། མཁས་པ་དག །གླེགས་བམ་བལྟས་ནས་བསྒྲུབས་པས་འགྲུབ་ན། གསང་སྔགས་རང་ཉིད་ལེན་པར་འགྱུར་ཞིང་། བླ་མ་མེད་པར་མི་འགྲུབ་པར་བཤད་པ་དང་ཡང་འགལ་ལ། ཤར་ལྷོའི་མཚམས་དེ་ཨོ་རྒྱན་གྱི་ཡུལ་ཡིན་ཟེར་བའང་མངོན་སུམ་དང་འགལ་བས་རྫུན་གཏམ་མོ་ཞེས་གསུངས་སོ། །གཉིས་པ་ནི། སྐལ་མེད་ལ་དེ་ལྟར་འགལ་ཡང་སྐལ་ལྡན་ལ་ངེས་པ་མེད་པས་མི་འགལ་བ་ཡོད་དེ། ཅིའི་ཕྱིར་ཞེ་ན། སྐྱེ་བ་སྔ་མར་དམ་ཚིག་མ་ཉམས་པ་ཡིན་ན། འདིར་ལས་འཕྲོ་བཟང་པོས་གླེགས་བམ་བལྟས་ནས་འགྲུབ་པའང་མི་འགལ་བའི་ཕྱིར་དང་། ཚེ་འདིར་ཡང་དམ་ཚིག་མ་ཉམས་པ་སྟེར་མཁན་གྱི་སྐྱེ་བ་སྔ་མ འི་བླ་མ་ཡང་བླ་མ་ཡིན་དགོས་པའི་ཕྱིར་དང་། གསང་སྔགས་གང་དུ་བབས་པའི་གནས་ཤར་ལྷོ་མཚམས་ཀྱི་ཡུལ་དེའི་ངོས་འཛིན་སྔར་བཤད་པ་ལྟར་ཡིན་པས། དེ་ལ་ཨོ་རྒྱན་གྱི་ཡུལ་དུ་འབོད་པ་སྔ་འགྱུར་གྱི་གཞུང་ཁུངས་མ་གང་ནས་ཀྱང་མ་བཤད་པའི་ཕྱིར་རོ། །དེར་མ་ཟད་ཐུན་མོང་དུ་གྲགས་པའི་ལུང་གི་སྒྲུབ་བྱེད་ཀྱང་མང་དུ་ཡོད་དེ། དཔལ་སྡོམ་པ་འབྱུང་བའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་སྟེ། །འཛམ་གླིང་ཤར་ལྷོའི་ཕྱོགས་མཚམས་ན། །དཔལ་ཞེས་བྱ་བའི་རི་བོ་ལ། །ཐུགས་རྗེས་མཐུན་པའི་བྱིན་བརླབས་ཀྱིས། །རྒྱལ་པོ་ཛཿཞེས་བྱ་བ་ལ། །ལག་ན་རྡོ་རྗེས་སྣང་བར་བྱེད། །ཅེས་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཚུལ་བརྒྱ་ལྔ་བཅུ་པའི་འགྲེལ་པ་ལས། གསུང་རབ་འདིའི་ལོ་རྒྱུས་བཤད་ན། སྔོན་པ་སངས་རྒྱས་མི་ཡུལ་དུ་ལོ་བརྒྱད་ཅུ་བཞུགས་པའི་ཚེ་ན། སརྦ་བུདྡྷ་ས་མ་ཡོ་ག་དང་། གུ་ཧྱ་ས་མ་ཡ་ལ་སོགས་པ་འདུལ་ཞིང་། དེ་ནས་ཐེག་པ་དེ་དག་གི་སྣོད་དུ་གྱུར་པར་འཛམ་བུ་གླིང་གི་མི་ཡུལ་ན་མེད་པས་རྒྱལ་ཆེན་རིགས་བཞི་ལ་སོགས་པའི་གནས་ན། ལྷ་རྣམས་དང་སྐལ་བ་བཟང་པོའི་བྱང་ཆུབ་སེམས་དཔའ་ལ་སོགས་པ་སྣོད་དུ་གྱུར་ནས། དེའི་ཚེ་མདོ་སྡེ་དེ་ན་བཞུགས་སོ། །སླད་ཀྱིས་སངས་རྒྱས་མྱ་ངན་འདས་པའི་འོག་ཏུ་ཟ་ཧོར་གྱི་རྒྱལ་པོ་འཁོར་དང་བཅས་པ་ངོ་མཚར་དུ་གྱུར་ཏེ། ཆོས་ལ་དད་པ་དག་ཅིག་འདུས་པ་ཐེག་པ་དེའི་འདུལ་སྐལ་དུ་གྱུར་ཅིང་སྣོད་དུ་གྱུར་ནས། སརྦ་བུདྡྷ་ས་མ་ཡོ་ག་ལ་སོགས་པ་མདོ་སྡེ་ཆེན་པོ་བཅོ་བརྒྱད་ཕྱག་ན་རྡོ་རྗེའི་བྱིན་བརླབས་ཀྱིས་ཟ་ཧོར་གྱི་ཡུལ་དུ་གཤེགས་པ་དང་། ཟ་ཧོར་གྱི་རྒྱལ་པོ་ཨིནྡྲ་བྷཱུ་ཏིས་མདོ་སྡེ་དག་བལྟས་པས་བརྡ་མ་འཕྲོད་ནས། གང་གིས་ཤེས་མངོན་ཤེས་ཀྱིས་བལྟས་པ་ན། ཡུལ་དབུས་སུ་སློབ་དཔོན་ཀུ་ཀུ་རཱ་ཛ་ཉིན་རེ་བཞིན་ཀྱི་སྟོང་ལ་ཆོས་མཆད། མཚན་རེ་བཞིན་ཁྱི་དེ་དག་ལ་དམ་ཚིག་གི་ལོངས་སྤྱོད་མཛད་པ་ཞིག་བཞུགས་པ་དེ་ཐེག་པའི་སྣོད་དུ་གྱུར་ལ། བདག་གི་འདུལ་སྐལ་དུ་འགྱུར་བ་ཡང་འདྲ་ནས། རྒྱལ་པོས་ཕོ་ཉ་བཏང་སྟེ་སློབ་དཔོན་སྤྱན་དྲངས་པ་དང་། སློབ་དཔོན་གྱིས་མངོན་ཤེས་ཀྱིས་བཏགས་པས། བདག་གི་འདུལ་སྐལ་དུ་ཡང་བབ། བདག་ཀྱང་མདོ་སྡེ་དེའི་སྣོད་དུ་འགྱུར་བར་ཤེས་མོད་ཀྱི། འོན་ཀྱང་མདོ་སྡེ་དེ་དག་སྔར་མ་བལྟས་ནས། བརྒྱ་ལ་རྒྱལ་པོའི་ཐེ་ཚོམ་དག་མ་སེལ་བར་གྱུར་ན་མི་རུང་སྙམ་ནས་མདོ་སྡེ་ཚུར་བླངས་ཏེ་བལྟས་པ་ན། མགོ་མཇུག་གར་བལྟ་བའི་ཆ་མ་མཆིས་ནས། དེ་ཉིད་དུ་ལུས་བརྡབས་ཏེ། མགོན་མེད་དོ། །སྐྱབས་མེད་དོ། །ཞེས་བོས་པ་དང་། དཔལ་རྡོ་རྗེ་སེམས་དཔའ་མངོན་པར་གཤེགས་ཏེ། ཁྱོད་ཅི་འདོད་ཅེས་དྲིས་པས། བདག་མདོ་སྡེ་ཟབ་མོ་འདི་བལྟས་པ་ཙམ་གྱིས་ཤེས་པར་འདོད་ཅེས་གསོལ་པ་དང་། དེ་བཞིན་གནང་ངོ་། །དེ་ནས་སརྦ་བུདྡྷ་ས་མ་ཡོ་ག་ལ་སོགས་པའི་གླེགས་བམ་རྣམས་མ་ཕྱེ་བར་དེ་དག་གི་དོན་ཡིད་ལ་མངོན་སུམ་དུ་གསལ་བར་གྱུར་ཏོ། །དེ་ནས་སློབ་དཔོན་དེ་ཟ་ཧོར་གྱི་ཡུལ་དུ་གཤེགས་ནས་རྒྱལ་པོ་འཁོར་དང་བཅས་པ་ལ་ཆོས་དེ་དག་བཤད་དོ། །དཔལ་རྡོ་རྗེ་སེམས་དཔས་ལུང་བསྟན་ནས་རྒྱལ་པོ་འཁོར་དང་བཅས་པ་རྣམས་རྡོ་རྗེ་དབྱིངས་ཀྱི་དཀྱིལ་འཁོར་ལྟར་བཀོད་ནས་སྒོམ་དུ་བཅུག་པས་རིམ་པ་ལྟར་རྒྱལ་པོ་འཁོར་བཅས་དང་། དེའི་སྲས་འཁོར་བཅས་དང་། སྲས་མོ་འཁོར་དང་བཅས་པ་རྣམས་ས་ལ་གནས་པའི་རིག་འཛིན་དུ་གྲུབ་བོ། །དེ་ནས་སྲས་མོ་དེས་རྒྱལ་བུ་ལ་ལུང་དང་མན་ངག་བཞག་པ་ལས་འཕེལ་བ་ནི་དིང་སང་གི་འདི་ལགས་ཏེ། ཞེས་བཤད་པ་དང་། བརྒྱ་བྱིན་སྡོང་པོས་མཛད་པའི་མཉམ་སྦྱོར་གྱི་འགྲེལ་པ་ལས་ཀྱང་། སྤྲུལ་པའི་སྐུ་འདས་ཕྱི་མའི་དུས་ཤིག་ཚེ། །རྒྱལ་བའི་བཀའ་གསང་འཛམ་གླིང་གནས་སུ་ཤར། །རྒྱལ་པོའི་ཁབ་ཏུ་སྤྱན་དྲངས་མཆོད་བྱས་ཏེ། །དགའ་ཞིང་གུས་བསྟོད་ལེགས་བལྟས་བརྡ་མ་འཇལ། །ཐུགས་རྗེའི་འབྲེལ་ཤུགས་གསང་སྔགས་འཛིན་པར་གྲགས། །དམ་པར་བཟུང་སྟེ་གླེགས་བམ་གཟིགས་པར་ཞུས། །སྒྱུ་འཕྲུལ་ཐིག་ལེ་སྟོང་པའི་དཀྱིལ་འཁོར་གཞུང་། །གྲུབ་ཐོབ་ལྷག་པའི་ལྷ་ཡིས་ལུང་བསྟན་མཛད། །རྡོ་རྗེ་ཐེག་པའི་གཞུང་ལུགས་སྣ་ཚོགས་མཐའ། །དམ་པ་རྣམས་ཀྱི་གདམས་པ་ཇི་བཞིན་པ། །མི་འགལ་ལེགས་པར་བསྡུས་ཤིག་ལེགས་བཀྲལ་ཏེ། །འགྲེལ་དང་བསྡུས་དོན་སྒྲུབ་ཐབས་མང་དུ་བསྟན། །ཞེས་གསུངས་ཤིང་། ལོ་ཙཱ་བ་གཟུ་དགའ་རྡོར་གྱིས། །ཤྲཱི་ན་ལེནྡཱའི་གཙུག་ལག་ཁང་དུ་པུསྟིའི་ཆར་བབས་པའི་བཀོད་པ་རི་མོར་བྲིས་པ་གཟིགས་པའི་ལོ་རྒྱུས་སོགས་མཁས་པ་ལ་གྲགས་པའི་གཏམ་ངེས་པ་ཅན་མང་དུ་སྣང་བས་ལོག་རྟོག་བསལ་ནས་ཤིན་ཏུ་ཡིད་ཆེས་པའི་གནས་སུ་བཟུང་བར་མཛོད་ཅིག ༈ །གཉིས་པ་དེ་ལས་ཇི་ལྟར་བརྒྱུད་ཚུལ་ལ་རྒྱ་བོད་གཉིས་ལས། དང་པོ་རྒྱ་གར་གྱི་བླ་མ་བརྒྱུད་པའི་ལོ་རྒྱུས་ནི། དེ་ལྟར་གསང་བདག་ཕྱག་ན་རྡོ་རྗེས་སྐལ་ལྡན་རྒྱལ་པོ་ཛཿལ་ཡེ་ཤེས་ཀྱི་དཀྱིལ་འཁོར་དུ་དབང་བསྐུར་ཏེ། བསྟན་པ་དང་ཐེག་པ་ཐམས་ཅད་ཀྱི་དོན་ཐུགས་སུ་ཆུད་པར་གྱུར་ནའང་། གསང་སྔགས་ལ་རང་དགར་འཇུག་པ་དགག་པའི་ཕྱིར། མིའི་རིག་འཛིན་དགེ་བསྙེན་ལི་ཙ་བཱི་དྲི་མེད་གྲགས་པ་བསྟེན་པའི་ཚུལ་བསྟན་ཏེ། དེ་ཉིད་ལ་རིན་པོ་ཆེ་ཨིནྡྲ་ནཱི་ལ་ཁྲུ་གང་ཕུལ་ནས། ཏྲི་ཤཾ་ཨ་སུ་རའི་བྲག་ཕུག་ཏུ་ཆུ་བོ་བཞིའི་དབང་རྫོགས་པར་ཞུས། གསང་མཚན་རྡོ་རྗེ་ཉི་འོད་རྩལ་དུ་བཏགས། །ཚིག་གི་བསྟན་པ་ཐམས་ཅད་ཀྱང་གསན། དེ་ལ་ཚིག་གི་བསྟན་པ་ཞེས་པ་ནི་རྒྱུད་སྡེ་རྣམས་ཀྱི་བཤད་པ་ཡིན་གསུང་། དེ་ནས་མ་ཧཱའི་རྒྱུད་སྡེ་ཆེན་པོ་བཅོ་བརྒྱད་དང་། ལུང་གི་མདོ་ལྔ་མདོ་ཕྲན་དང་བཅས་པ་རྣམས་སོ་སོར་ཕྱེ་ནས་བཤད། སྤྱི་མདོའི་འགྲེལ་པ་ལུང་བསྟན་མ་དང་སྒྱུ་དྲྭའི་ལམ་རྣམ་བཀོད་སོགས་དགོངས་འགྲེལ་ཀྱང་མཛད། ཚོགས་ཀྱི་སྤྱོད་པའི་ཉེ་རྒྱུས་འཁོར་ཚོམ་བུ་སྟོང་ལྔ་བཅུ་སྟེ་ཁྲི་ཕྲག་ལྔ་དང་བཅས་པ་བདེ་བ་ཆེན་པོའི་ལམ་གྱིས་རྡོ་རྗེ་འཆང་གི་སར་མངོན་དུ་གཤེགས་སོ། །རྒྱལ་པོ་ཛཿས་སྔར་རང་ཉིད་ལི་ཙ་བཱི་ལ་བརྟེན་པའི་དུས་འགྲོགས་པའི་གྲོགས་ཨུ་པ་རཱ་ཛ་དང་། རང་གི་སྲས་རྒྱལ་བུ་བུ་ཏྲི་གསུམ་ལ་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་གདམས་ངག་བཞག་སྟེ། ཨུ་པ་རཱ་ཛ་ལ་གྲོང་ཁྱེར་དཔལ་ཡོན་ཅན་དུ་དབང་བསྐུར། ཡོན་དུ་རྒྱལ་སྲིད་རིན་པོ་ཆེ་སྣ་བདུན་ཕུལ། གསང་མཚན་རྡོ་རྗེ་ཡང་དག་རྩལ། གྲོང་ཁྱེར་སྐྱིད་པའི་འབྱུང་གནས་སུ་སྲས་གསུམ་ལ་དབང་བསྐུར་ཏེ། ཡོན་དུ་ལྷའི་རིན་པོ་ཆེ་བསམ་འཕེལ་ཕུལ། དེ་གསུམ་གྱི་གསང་མཚན་ནི། ཤ་ཀྲ་པུ་ཏྲིའམ་ཨིནྡྲ་བོ་དྷི་ལ་རྡོ་རྗེ་གསལ་མཛེས་རྩལ། ནཱ་ག་པུ་ཏྲི་ལ་ཐིག་ལེ་བསྐྱོད་མེད་རྩལ། གུ་ཧྱ་པུ་ཏྲི་ལ་རྡོ་རྗེ་གསལ་འཕྲོ་རྩལ་ཞེས་བཏགས། དེ་བཞི་ཀ་བདེ་བ་ཆེན་པོའི་ལམ་གྱི་ཉེ་རྒྱུ་སྤྱད་པས་རང་རང་གི་ཚོམ་བུ་དང་བཅས་ཏེ་རིག་འཛིན་གྱི་སར་གཤེགས། དེ་ལས་ནཱ་ག་པུ་ཏྲི་ནི་ཀླུ་བ་སུ་རིགས་དྲུག་གིས་ལོ་དགུའི་བར་དུ་གཞན་ལ་ཤོད་དུ་མ་བཅུག་ཅེས་ཀྱང་གྲགས་སོ། །སྲས་གསུམ་གྱི་ནང་ནས་ཨིནྡྲ་བོ་དྷིས། རྒྱལ་པོ་སིངྷ་པུ་ཏྲ་དང་། ཀུ་ཀུ་རཱ་ཛ་ཕྱི་མ་གཉིས་ལ་ཕྱིའི་རྒྱ་མཚོའི་འགྲམ་དུ་དབང་བསྐུར་ཞིང་བཤད། སིདྷས་བཻ་ཌཱུརྱ་སྔོན་པོ་ཕུལ། གསང་མཚན་རྡོ་རྗེ་འོད་ཟེར་རྩལ། ཀུ་ཀུ་རཱ་ཛས་རིན་པོ་ཆེའི་དྲིལ་གཡེར་སྟོང་ཕུལ། གསང་མཚན་རྡོ་རྗེ་བདེ་མཆོག་རྩལ། གཉིས་ཀ་འཁོར་ཚོམ་བུ་དང་བཅས་པས་རིག་འཛིན་གྱི་གནས་ཐོབ་བོ། །ཀུ་ཀུ་རཱ་ཛས་སློབ་དཔོན་ཆེན་པོ་རོ་ལངས་བདེ་བའི་དངོས་གྲུབ་ལ། གླང་ཆེན་སྣའི་བྲག་ཕུག་ཏུ་དབང་བསྐུར་ཞིང་བཤད། ལྷ་ཀླུ་མིའི་ཡུལ་གྱི་རྩི་སྨན་སྣ་ཚོགས་ཕུལ། གསང་མཚན་བདུད་འདུལ་དྲག་པོ་རྩལ་དུ་བཏགས། དེ་ཡང་རོ་ལངས་བདེ་བ་ནི་སྤྲུལ་པའི་སྐུ་དགའ་རབ་རྡོ་རྗེའི་མཚན་གྱི་རྣམ་གྲངས་ཏེ། རོ་ལངས་ཐལ་མདོག་དང་དགྱེས་པ་རྡོ་རྗེ་དང་བཞད་པ་རྡོ་རྗེ་ཞེས་ཀྱང་གྲགས། ཕྱག་ན་རྡོ་རྗེས་རྒྱལ་ཐབས་སྤྱི་བླུགས་རྫོགས་པའི་དབང་བསྐུར་ཞིང་། བསྟན་པའི་རྩེ་མོ་ཀློང་དགུ་བམ་པོ་ཉི་ཁྲི་ལ་སོགས་པ་རྫོགས་པ་ཆེན་པོའི་རྒྱུད་ལུང་ཐམས་ཅད་བཤད་པ་སློབ་དཔོན་གྱིས་གླེགས་བམ་དུ་བཀོད་དེ་ཌཱ་ཀི་མ་རྣམས་ལ་གཏད། མདོ་ཡོངས་རྫོགས་ཀྱི་དབང་གི་ཆུ་བོ་བྱེ་བྲག་པ་རྣམས་ཀྱི་བཀའ་ཡང་བབས། ཨ་ཌཱི་ཡ་ནའི་ཡུལ་དང་རྒྱ་གར་གྱི་མཚམས་མ་ག་ཏའི་ཕུག་ཏུ་ཚོགས་བསྒྲུབས་པས་འཁོར་ཁྲི་ཕྲག་གཅིག་དང་བཅས་པས་ཟུང་འཇུག་གི་སྐུ་བརྙེས་སོ། །དེས་སངས་རྒྱས་རྣམ་པར་གཟིགས་ཀྱི་སྤྲུལ་པ་སློབ་དཔོན་རྡོ་རྗེ་བཞད་པ་ལ་ཨུ་ཏ་པ་རའི་ཚལ་དུ་དབང་བསྐུར་ཞིང་བཤད། ཡོན་དུ་ནོར་བུའི་རིན་པོ་ཆེ་འོད་འབར་བ་ཕུལ། གསང་མཚན་རྡོ་རྗེ་བདེ་བྱེད་རྩལ་དུ་བཏགས། བདེ་བ་ཆེན་པོའི་ལམ་གྱིས་མཆོག་གྲུབ། རྣལ་འབྱོར་རིག་པའི་ཉི་མ་ཞེས་བྱ་བ་མདོའི་ཟབ་ལམ་གཏན་ལ་འབེབས་པའི་བསྟན་བཅོས་ཀྱང་མཛད་དོ། །དེས་སློབ་དཔོན་པྲ་ཧསྟི་ལ་ག་ཛ་ནིའི་ཡུལ་ཆུ་བོ་སིནྡྷུའི་འགྲམ་དུ་དབང་བསྐུར་ཞིང་བཤད། ཡོན་དུ་རིན་པོ་ཆེ་ཀེ་ཀེ་རུ་ཕུལ། གསང་མཚན་ཐིག་ལེ་བདེ་བྱེད་རྩལ་དུ་བཏགས། སློབ་དཔོན་འདི་ནི་རིག་འཛིན་འདུས་པ་རྩ་བའི་རྒྱུད་ལས། ཐོར་ཅོག་ཡུལ་དུ་སྐྱེས་པ་དེས། །ཕྲིན་ལས་སྤྱོད་པ་གཙོ་བོར་སྟོན། །ཞེས་ལུང་བསྟན་པ་ལྟར། ཡུལ་ཨ་ཌཱི་ཡ་ན། རིགས་ས་ཧོ་རའི་རྒྱལ་རིགས། རབ་ཏུ་བྱུང་བའི་མཚན་ཤཱཀྱ་པྲ་བྷཱ་ཞེས་སྒྲུབ་སྡེའི་ཕུར་པ་ཕྲིན་ལས་ཀྱི་བཀའ་བབས་པ་དེ་ཉིད་ཡིན་ཏེ། ཕུར་པ་བཀའ་མའི་ཡིག་རྙིང་ལས། ཨོ་རྒྱན་ཐོར་ཅོག་ཅན་གྱི་ཡུལ། །རིགས་ནི་ཟ་ཧོར་རྒྱལ་པོའི་རིགས། །དགེ་སློང་མིང་ནི་ཤཱཀྱ་འོད། །སློབ་དཔོན་པྲ་ཆེན་ཧསྟི་རྩལ། །ཞེས་འབྱུང་བའི་ཕྱིར་རོ། །དེས་སློབ་མ་ཤཱཀྱ་གསུམ་ལ་ས་ཧོ་རའི་རྒྱལ་ཁབ་ཏུ་དབང་བསྐུར་ཞིང་བཤད། རང་རང་གི་བདོག་དགུའི་འབྱོར་པས་མཆོད། གསང་མཚན་ཤཱཀྱ་སེང་གེ་ལ་རྡོ་རྗེ་ཐོད་ཕྲེང་རྩལ། ཤཱཀྱ་པྲ་བྷཱ་ཆུང་བ་ལ་རྡོ་རྗེ་ཐིག་ལེ་རྩལ། ཤཱཀྱ་མུ་དྲ་ལ་རྡོ་རྗེ་ཐོགས་མེད་རྩལ་དུ་བཏགས། དེ་ལ་ཤཱཀྱ་སེངྒེ་ནི། དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་སྤྲུལ་པའི་སྐུ་ཨ་ཌཱུ་ཡ་ནའི་སློབ་དཔོན་ཆེན་པོ་པདྨ་འབྱུང་གནས་ཏེ་དྷ་ན་ཀོ་ཥའི་མཚོ་དབུས་སུ་པདྨའི་སྡོང་པོ་ལས་སྐུ་འཁྲུངས། རིག་པའི་གནས་ཐམས་ཅད་ལ་བྱང་ཞིང་རིག་སྔགས་ཀྱི་མཐུས་ཐུན་མོང་གི་དངོས་གྲུབ་ཐམས་ཅད་ལ་དབང་འབྱོར་ནའང་། མཆོག་གི་དངོས་གྲུབ་འདོད་པས་ཤཱཀྱ་པྲ་བྷཱ་ཆེན་པོ་སྟེ་པྲ་ཧསྟི་ལས་རབ་ཏུ་བྱུང་། མདོ་སྡེ་དང་གསང་སྔགས་ཕྱི་ནང་གི་རྒྱུད་མཐའ་དག་ཐུགས་སུ་ཆུད། དིང་སང་འཕགས་ཡུལ་དུ་གྲགས་པར་ཤར་ཕྱོགས་བྷངྒ་ལའི་ཡུལ་གྲོང་ཁྱེར་པཎྜུའི་བྱང་ངོས་པཪྴི་ཞེས་པའི་ནགས་ཀྱི་མཐོངས་ན་རི་དིའུ་ཞིག་ཡོད་པ་དེར་ཡིན་ཟེར། སྔར་བོད་དུ་གྲགས་པར་མཱ་ར་ཏི་ཀ་ཞེས་པའི་གནས་སུ་ལས་རྒྱ་པདྨ་ཅན་མནྡཱ་ར་བ་ལ་བརྟེན་ནས་བདེ་བ་ཆེན་པོའི་ལམ་གྱི་ཉེ་རྒྱུའི་སྤྱོད་པས་མཐོང་ལམ་འོད་གསལ་གྱི་སྐུ་ཚེ་ལ་དབང་བའི་རིག་འཛིན་གྲུབ། དེ་ནས་ནེ་པཱ་ལའི་ཡུལ་ཡང་ལེ་ཤོད་ཀྱི་བྲག་ཕུག་ཏུ་དཔལ་ཧེ་རུ་ཀའི་སྒྲུབ་པ་ཚོམ་བུ་ལྔ་པའི་ཚོགས་ཀྱི་སྤྱོད་པས་འོད་གསལ་ལས་ཟུང་འཇུག་གི་སྐུར་བཞེངས་ཏེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཧེ་རུ་ཀའི་གོ་འཕང་མངོན་དུ་མཛད། རྒྱ་བལ་བོད་ཡུལ་རྔ་ཡབ་གླིང་སོགས་སུ་མི་དང་མི་མ་ཡིན་གདུག་པ་ཅན་ཐམས་ཅད་བཏུལ། འགྲོ་བ་མཐའ་དག་རྫུ་འཕྲུལ་གྱིས་དད་པར་བྱས་ཏེ། དམ་པའི་ཆོས་ལ་བཀོད་པའི་ཕྲིན་ལས་ཀྱི་མཐའ་ནི་འདི་ཙམ་མོ་ཞེས་གཞལ་དུ་མེད། ཉེ་བརྒྱུད་ལ་རྒྱལ་པོ་ཛཿཉིད་ལའང་གསན་པར་ཨ་ཏིའི་ལོ་རྒྱུས་ལས་བཤད། སློབ་དཔོན་འདི་ནི་འཇམ་དཔལ་སྒྱུ་དྲྭ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་འཆང་། ཞེས་དང་། རིག་འཛིན་འདུས་པ་རྩ་བའི་རྒྱུད་ལས། བཀའ་རྒྱུད་དེ་ཡི་དོན་འགྲེལ་བཅས། །མ་ལུས་གསལ་བར་བྱེད་པ་ནི། །དྷ་ན་ཀོ་ཥའི་མཚོ་གླིང་ལས། །པདྨའི་སྟེང་དུ་རྫུས་སྐྱེས་པ། །རྒྱལ་པོའི་སྲས་སུ་རབ་བསྐུལ་བའི། །རིག་པ་འཛིན་པ་དེར་སྣང་འགྱུར། །ཞེས་ལུང་བསྟན་ནོ། །དེས་ལྷའི་བཤོས་ཁང་དགུ་ཐོག་ཏུ་སློབ་དཔོན་དྷ་ན་རཀྵི་ཏ་ལ་དབང་བསྐུར་ཞིང་རྒྱུད་དང་གདམས་ངག་ཐམས་ཅད་བཤད། ཡོན་དུ་ལྷའི་བདུད་རྩི་བསིལ་མཆོག་གིས་མཆོད། གསང་མཚན་སེང་གེ་སྒྲ་སྒྲོགས་རྩལ་དུ་བཏགས། མདོའི་རྣམ་གྲངས་འཆད་པའི་བསྟན་བཅོས་ཀྱང་བརྩམས། ཡིག་རྙིང་འགའ་ཞིག་ཏུ་སློབ་དཔོན་འདི་ཤཱཀྱ་སེང་གེ་དང་གཅིག་ཅེས་གསུངས་པ་ནི། མདོའི་ཁོག་དབུབ་ཏུ་ཤཱཀྱ་སེང་གེས་ཞེས་པའི་རྣམ་དབྱེ་གསུམ་པའི་ས་སྒྲ་ཆད་དེ། ཤཱཀྱ་སེང་གེ་དྷ་ན་རཀྵི་ཏ་ཞེས་པའི་ཡིག་སྐྱོན་དང་། ཕུར་པའི་ལོ་རྒྱུས་འགར་ཨོ་རྒྱན་གྱི་ཡུལ་དུ་རྒྱལ་རིགས་སྲི་ག་དྷ་རིའི་བུ་དྷ་ན་རཀྵི་ཏའམ་ཤཱནྟ་རཀྵི་ཏ་ཞེས་མཚན་འདྲ་བར་བྱུང་བས་ཀྱང་འཁྲུལ་ལམ་སྙམ་མོ། །སློབ་དཔོན་དྷ་ན་རཀྵི་ཏས་ནུབ་ཕྱོགས་ཨོ་རྒྱན་གྱི་ཡུལ་རྡོ་རྗེའི་ཕུག་ཏུ་ཧཱུཾ་མཛད་རྡོ་རྗེ་ལ་དབང་བསྐུར་ཞིང་བཤད། གསང་མཚན་རྡོ་རྗེ་ཉི་འོད་རྩལ། འདིས་རྩ་རྒྱུད་ཀྱི་རྒྱ་བདུན་འགྲེལ་དང་། འགྲེལ་ཆུང་རྣལ་འབྱོར་སའི་སྒྲོན་མ་མཛད། དེས་སློབ་དཔོན་སྠི་ར་མ་ཏི་ལ་ག་རུམ་གྱི་བྲག་ཕུག་ཏུ་དབང་བསྐུར་ཞིང་བཤད། ཡོན་གསེར་ཏོ་ལ་བརྒྱ་ཕྲག་གིས་མཆོད། གསང་མཚན་རྡོ་རྗེ་ཡང་དག་རྩལ་དུ་བཏགས། མདོའི་སྐབས་འགྲེལ་རྣམ་པར་བཤད་པ་དང་། སྐབས་འགྲེལ་བྱེ་བྲག་ཏུ་བཤད་པ། དཀའ་གཅོད། ཐེག་པ་གསལ་བྱེད་སྒྲོན་མེ་ལ་སོགས་པའི་བསྟན་བཅོས་ཀྱང་བརྩམས། རྒྱ་གར་དང་ཏཱ་སིག་གི་མཚམས་ཨ་སུ་རའི་བྲག་ཕུག་ཏུ་ལས་ཀྱི་ཕྱག་རྒྱ་མ་ག་ག་སིདྡྷི་ལ་བརྟེན་ནས་དངོས་གྲུབ་ཐོབ། སློབ་དཔོན་འདིས་དྷ་ན་རཀྵི་ཏ་ལའང་ཐུགས་པར་གྲགས་ཏེ་རྒྱུད་དང་གདམས་ངག་གི་བཀའ་སྲོལ་ལུགས་གཅིག་ཡིན་པར་མངོན། དེས་སློབ་དཔོན་བདེ་བ་གསལ་མཛད་ལ་གྲོང་ཁྱེར་དཔལ་ཡོན་ཅན་དུ་དབང་བསྐུར་ཞིང་བཤད། ཅི་མཉེས་ཀྱི་དངོས་པོ་མཆོག་གིས་བཀུར། གསང་མཚན་དབང་ཕྱུག་འཇིགས་མེད་རྩལ་དུ་བཏགས། འདིས་སློབ་དཔོན་ཧཱུཾ་མཛད་རྡོ་རྗེ་ལའང་གསན་ཞེས་གྲགས། རིགས་སྔགས་གྲུབ་སྟེ་འཆི་མེད་ཀྱི་རིག་འཛིན་བརྙེས། མདོ་དབང་གི་ཡིག་སྣ་དྲུག་གསུམ་བཅོ་བརྒྱད་དང་། རྣལ་འབྱོར་གྱི་རིམ་པ་ཐེག་ཆེན་སྒྲོན་མེ་སོགས་བསྡུས་ཤིང་བརྩམས་སོ། །དེས་སྐལ་བ་མཆོག་ཏུ་གྱུར་པའི་སྐྱེས་བུ་བཞི་ལ་དབང་བསྐུར་ཏེ། མ་གྷ་དྷར་མདོ་མཁན་དྷརྨ་བོ་དྷི་ལ་དབང་བསྐུར། རྟ་དང་གླང་པོ་ཆེ་ཡོན་དུ་ཕུལ། གསང་མཚན་ཤེས་རབ་མཐར་ཕྱིན། རྩལ་དུ་བཏགས། མདོའི་དོན་བསྡུས་དང་། ཤེས་རབ་སྒྲོན་མེ། བཀོལ་མདོ་རྣམས་བརྩམས། ཤྲཱི་ན་ལེནྡཱར་མཁན་པོ་ཆོས་རྒྱལ་སྐྱོང་ལ་དབང་བསྐུར། འདོད་པའི་ཡོན་ཏན་ལྔས་མཆོད། གསང་མཚན་རྡོ་རྗེ་བདེ་བྱེད་རྩལ། བལ་པོའི་རྒྱལ་པོ་བ་སུ་དྷ་ར་དང་། རྒྱ་གར་གཙུག་ལག་དཔལ་དགེ་གཉིས་ལ། རྒྱལ་པོའི་ཁབ་ཏུ་དབང་བསྐུར། གསེར་བཟང་པོའི་ཡོན་ཕུལ། བ་སུ་དྷ་རའི་གསང་མཚན་རྡོ་རྗེ་ཐུགས་མཆོག་རྩལ། གཙུག་ལག་དཔལ་དགེའི་གསང་མཚན་རྡོ་རྗེ་གཙུག་ཏོར་རྩལ་ཞེས་བཏགས། དྷརྨ་བོ་དྷི། དྷརྨ་རཱ་ཛ། བ་སུ་དྷ་ར་གསུམ་གྱིས་བྲུ་ཤའི་ལོ་ཙཱ་བ་ཆེ་བཙན་སྐྱེས་ལ་རྒྱ་གར་གྱི་ཡུལ་དབུས་སུ་དབང་བསྐུར་ཞིང་། སུ་ཝ་ཪྞའི་དཀོར་ཆ་མང་པོས་སོ་སོར་མཆོད། གསང་མཚན་རྡོ་རྗེ་ལེགས་ཐོབ་རྩལ་དུ་བཏགས། ཡང་ཉེ་བརྒྱུད་ལ་དབང་བསྐུར་བ་པོའི་སློབ་དཔོན་དེ་གསུམ་ཀ་ས་དྷ་ན་རཀྵི་ཏ་ལའང་ཐོབ་ཅེས་འབྱུང་མོད། གཏད་རྒྱ་ལྟར་ན་དབང་བཀའི་བརྒྱུད་པ་དཀྱུས་སུ་བཀོད་པ་ཉིད་ཡིན་པར་གསལ་བས། བཤད་བཀའ་དང་མན་ངག་གི་བཀའི་ཉེ་བརྒྱུད་དུ་སྣང་ངོ་། །དེ་ལྟར་སྨོས་པའི་བརྒྱུད་པ་དེ་ཐམས་ཅད་ཀྱང་དབང་བརྒྱུད་ཙམ་དུ་མ་ཟད། རྒྱུད་ཀྱི་བཤད་བཀའ་དང་མན་ངག་གི་བཀའ་ཐམས་ཅད་འདུས་པའི་བརྒྱུད་ལུགས་ཏེ། བཤད་བཀའ་ལ་རྣམ་པ་གཅིག་ཏུ་ན། དྷ་ན་རཀྵི་ཏ་བྲུ་ཤའི་སློབ་དཔོན་ཆེ་བཙན་སྐྱེས་ཀྱིས་སྤྱན་དྲངས་ཏེ། མདོ་དགོངས་འདུས་བྲུ་ཤའི་ཡུལ་དུ་སྒྱུར་བར་བརྩམས་པ་ལ། མོས་པ་ཆུང་བས་མ་འགྱུར་ཏེ་བལ་ཡུལ་དུ་བྱོན། དེར་དྷརྨ་བོ་དྷི་དང་བ་སུ་དྷ་ར་ལ་བཤད། ཕྱིས་བྲུ་ཤའི་ཡུལ་དུ་མདོ་མཁན་དྷརྨ་བོ་དྷི་དང་། རིང་ལུགས་པ་ཆེན་པོ་དྷ་ན་རཀྵི་ཏའི་སྤྱན་སྔར་ལོ་ཙཱ་བ་ཆེ་བཙན་སྐྱེས་ཀྱིས་བྲུ་ཤའི་སྐད་དང་ཡི་གེ་ལས་བོད་སྐད་དུ་བསྒྱུར་ཞིང་། དེའི་དུས་སུ་མི་མ་ཡིན་ཞིག་གིས་འཛམ་བུ་གླིང་ན་མེད་པའི་ལྷའི་མེ་ཏོག་པ་ཏ་ལའི་མདོག་ཤིང་རྟའི་འཕང་ལོ་ཙམ་ཞིག་ལག་ཏུ་ཐོགས་ཏེ་འོངས་ནས། སུ་ལ་ཐོས་ཞེས་གླེང་བ་ན། མཁན་པོ་དག་གིས། དཔལ་རྡོ་རྗེ་སེམས་དཔའ་ཐོས་ཞེས་བརྗོད་པས། དེས་མེ་ཏོག་གཏོར་ཞིང་སྐོར་བ་ལན་གསུམ་བསྐོར་ཏེ་མངོན་པར་འདུད་ནས། གླང་པོ་ཆེའི་བརྟུལ་ཞུགས་ལྟ་བུས་ཐེ་ཚོམ་མེད་པར་བཀུར་ཞིང་། ཛི་ན་རཱ་ཛ་ཞེས་ཟེར་ནས་སླར་སོང་ངོ་། །དེ་ལ་མཁན་པོ་དག་ངོ་མཚར་ཆེར་སྐྱེས་ཤིང་། ལེགས་པའི་ཡོན་ཏན་ཡང་མང་དུ་བྱུང་ཞེས་གྲགས་ཏེ། རི་བོ་སྤོས་ངད་ལྡང་ལ་བྱང་ཆུབ་སེམས་དཔའི་སྤྲུལ་པ་གླང་པོ་ཆེ་ས་སྲུངས་བྱ་བ་ཞིག་གནས་པས། དེའི་ཆོ་འཕྲུལ་ཡིན་པར་སླད་ནས་རྟོགས་སོ་ཞེས་འབྱུང་ངོ་། །དེ་ལ་ལོ་ཙཱ་བ་ཆེ་བཙན་སྐྱེས་ནི། ཡུལ་ཡར་ལུངས་པ་ཡིན། སྐད་རིགས་གསུམ་ལ་སྦྱངས་ནས་ཕྱིས་བྲུ་ཤའི་ཡུལ་དུ་ཕྲིན་ལས་བསྐྱངས་པས་བྲུ་ཤའི་སློབ་དཔོན་དུ་གྲགས་ཤིང་། བྲུ་ཤའི་ཡུལ་དེ་ཁྲོམ་གེ་སར་གྱི་ཡུལ་དང་གཅིག་པར་བཤད་དོ། །དེ་ལྟར་རྒྱ་བལ་བྲུ་ཤའི་སློབ་དཔོན་དེ་ཐམས་ཅད་ཀྱང་། སྡེ་སྣོད་གསུམ་དང་གསང་སྔགས་ཕྱི་ནང་གི་རྒྱུད་སྡེ་མཐའ་དག་ལ་མཁས། རིག་པའི་གནས་སུ་གྱུར་པ་གང་ཡང་མི་མཁྱེན་པ་མེད། རིག་སྔགས་གྲུབ་པས་ཡེ་ཤེས་ཀྱི་ལྷས་མངོན་སུམ་དུ་དབང་བསྐུར་ཞིང་། ཡི་དམ་གྱི་ལྷ་དང་བཀའ་མཆིད་མོལ་བར་མཛད། རྡོ་རྗེའི་མཁའ་འགྲོ་ཐམས་ཅད་དབང་དུ་འདུས་ཤིང་བྲན་དུ་ཁོལ། རིམ་གཉིས་ཀྱི་ལམ་གྱིས་དངོས་གྲུབ་བརྙེས་པས་རིག་པ་འཛིན་པའི་ས་ལ་བཞུགས་པ་ཤ་སྟགས་ཡིན་ནོ། ༈ །གཉིས་པ་བོད་ཀྱི་བླ་མ་བརྒྱུད་པའི་ལོ་རྒྱུས་ནི། སྔོན་རིག་འཛིན་པདྨ་སཾ་བྷ་ཝ་དང་། ལོ་ཙཱ་བ་ཆེན་པོ་བཻ་རོ་ཙ་ནས་རྩ་རྒྱུད་རྡོ་རྗེ་བཀོད་པ་ཀུན་འདུས་ཀྱི་མདོ་བསྒྱུར་བས་མཚོན་ཏེ། འདུས་པ་མདོའི་རྒྱུད་མང་ཞིག་འགྱུར་ཞིང་སྐ་བ་དཔལ་བརྩེགས་ཀྱིས་མདོའི་བཀའ་འགྲེལ་མི་ཤེས་མདུད་འགྲོལ་ཞེས་པའང་མཛད་འདུག་པས་ན། དེ་དག་གི་བཤད་སྒྲུབ་ཀྱི་རྒྱུན་དང་དབང་བཀའ་ཡང་ཡོད་དགོས་པའི་ཕྱིར། བོད་འདིར་སྔར་མངའ་བདག་ཁྲི་སྲོང་ལྡེའུ་བཙན་ཡབ་སྲས་ཀྱི་དུས་ནས་ཀྱང་དར་མོད་ཀྱི། དེ་ལྟ་ནའང་དིང་སང་བཞུགས་པའི་དབང་བཀའ་དང་བཤད་སྒྲུབ་ཀྱི་རྒྱུན་འདི་རྣམས་ནི་གཙོ་བོར་ཕྱིས་གནུབས་ཆེན་གྱིས་རྒྱ་བལ་བྲུ་ཤའི་ཡུལ་དུ་བྱོན་ནས་གསན་པ་ལས་བརྒྱུད་པ་སྟེ། དེ་ལ་ལོ་ཙཱ་བ་ཆེན་པོ་གནུབས་སངས་རྒྱས་ཡེ་ཤེས་འདི་ནི། ཡབ་གནུབས་རིགས་གསལ་བ་དབང་ཕྱུག་དང་། ཡུམ་མཆིམས་མོ་བཀྲ་ཤིས་འཚོའི་སྲས་སུ། ཤིང་ཕོ་བྱི་བའི་ལོ་དཔྱིད་ཟླ་ར་བ་ལ། དབུས་རིའི་བརྒྱུད་སྒྲགས་ཀྱི་ཕུར་འཁྲུངས། ཕ་མེས་ཀྱི་དུར་ས་སྒྲགས་རི་བོ་ཆེར་ཙནྡན་གྱི་སྡོང་པོ་སྐྱེས་པ་ལ་རྒྱ་ནག་ཧྭ་ཤང་གིས་བརྟགས་ཏེ་སྤྲུལ་པའི་སྐུ་འཁྲུངས་པའི་ལྟས་ཡིན་པས་གསོ་བའི་ཆོ་ག་འདི་ལྟར་གྱིས་ཞེས་སྔོན་ནས་ལུང་བསྟན་པ་བཞིན་བསྒྲུབས། མཚན་སྐྱ་མིང་རྡོ་རྗེ་ཁྲི་གཙུག །ཆོས་མིང་སངས་རྒྱས་ཡེ་ཤེས། གསང་མཚན་རྡོ་རྗེ་ཡང་དབང་གཏེར་ཞེས་གྲགས། དགུང་ལོ་བདུན་ནས་འོ་བྲན་དཔལ་གྱི་གཞོན་ནུའི་ཕྱག་ཕྱིར་འབྲངས་ཏེ་རིག་པའི་གནས་ཐམས་ཅད་ལ་བྱང་བར་མཛད། རིག་འཛིན་འདུས་པ་རྩ་བའི་རྒྱུད་དུ། རཏྣ་བུདྡྷ་ཛྙཱ་ན་ཡིས། །ཁྱད་པར་སྐུ་ཡི་གསང་བ་སྟོན། །ཞེས་ལུང་བསྟན་པ་ལྟར་གཞོན་ནུའི་དུས་སློབ་དཔོན་ཆེན་པོ་པདྨ་ལ་བཀའ་བརྒྱད་ཀྱི་དབང་གསན་པའི་ཚེ་མེ་ཏོག་འཇམ་དཔལ་སྐུའི་དཀྱིལ་འཁོར་ལ་ཕོག་ཅིང་བསྒྲུབས་པས་གྲུབ་རྟགས་མངོན་དུ་ཕྱུང་། ཕྱིས་རྒྱ་བལ་གྱི་རུ་མཚམས་རྡོ་རྗེ་རྩེ་ལྔའི་ཕུག་ཏུའང་དབང་རྒྱུད་མན་ངག་མང་དུ་གསན། གཞན་ཡང་ཤྲཱི་སིདྷ། བི་མ་ལ། ཀ་མ་ལ་ཤཱི་ལ། དྷ་ན་དྷ་ལ། ཁྲག་འཐུང་ནག་པོ། ཤཱནྟིཾ་གརྦྷ། དྷ་ན་སཾ་སྐྲྀ་ཏ། སོ་ཀྱ་དེ་བ། དྷ་ན་རཀྵི་ཏ། བྲམ་ཟེ་གསལ་བའི་རྒྱན། དྷརྨ་བོ་དྷི། དྷརྨ་རཱ་ཛ། གཙུག་ལག་དཔལ་དགེ། བ་སུ་དྷ་ར། ཆེ་བཙན་སྐྱེས་སོགས་རྒྱ་བལ་བྲུ་ཤའི་ལོ་པཎ་རྣམས་དང་། བོད་ཀྱི་མཁས་པ་གཉགས་ལོ་ཡེ་ཤེས་གཞོན་ནུ། དེའི་སློབ་མ་དཔལ་གྱི་བུ་བརྒྱད་ཐམས་ཅད་དང་། དེའི་ནང་ནས་ཀྱང་སོགས་པོ་དཔལ་ཡེ་དང་། རྨ་གཉགས་ཐུན་མོང་གི་ཡང་སློབ་ཞང་རྒྱལ་བའི་ཡོན་ཏན་གཉིས་ལ་གཙོ་བོར་བསྟེན་ནས་མདོ་དང་སྔགས་ཕྱི་ནང་གི་རྒྱུད་སྡེ་མན་ངག་དང་བཅས་པ་མཐའ་དག་ལ་སྦྱངས་ཏེ་མཁས་པར་མཛད། རྒྱ་བལ་གྱི་ཡུལ་དུ་ལན་བདུན་བྱོན་ནས་རྒྱུད་དང་མན་ངག་ཆོག་ཡིག་བསྟན་བསྲུང་དང་བཅས་པ་མང་པོ་བསྒྱུར། ནུས་པ་ཕུན་སུམ་ཚོགས་པས་མངོན་སྤྱོད་ཀྱི་ཕྲིན་ལས་དང་རྫུ་འཕྲུལ་གྱིས་ཁེང་ལོག་སོགས་གདུག་པ་ཅན་ཐམས་ཅད་ཚར་བཅད་ཅིང་། ལྷ་སྲིན་ཐམས་ཅད་ཀྱིས་ཀྱང་སྟངས་ཕུལ། ཁྱད་པར་དགུང་ལོ་ལྔ་བཅུ་རྩ་བཞི་པ་མེ་སྦྲུལ་གྱི་ལོར་བལ་ཡུལ་དུ་བྱོན་ནས་བ་སུ་དྷ་ར་ལ་དབང་དང་གདམས་པ་དཔག་མེད་ཞུས་ཤིང་། ཆོས་ཕྱིར་གཏོང་བ་དང་དད་གུས་ཀྱིས་མཉེས་པར་མཛད་པས། རུའི་ཞལ་ནས། རྒྱ་གར་ན་ངའི་སློབ་དཔོན་གསལ་བའི་རྒྱན་ཞེས་བྱ་བ་ལོ་སྟོང་དྲུག་བརྒྱ་ལོན་པ་ཞིག་བཞུགས་ཀྱིས། དེའི་དྲུང་དུ་སོང་ལ་ཆོས་ཞུས་ཤིག་གསུང་བ་ལྟར་བྱོན་པས། ཝཱ་རཱ་ཎ་སཱིར་ཨཱ་ཙཱརྱ་གསལ་བའི་རྒྱན་གྱི་ཞལ་མཐོང་། ཆོས་མང་དུ་ཞུས། ཁྱད་པར་དུ་མདོ་ཡོངས་སུ་རྫོགས་པའི་དབང་དང་དགོངས་འདུས་ཀྱི་གདམས་ངག་ཀྱང་གསན། སློབ་དཔོན་འདི་ནི་བདེ་བ་གསལ་མཛད་དང་གཅིག་པར་རོག་བརྩོན་སེང་བཞེད། དེ་ནས་དགོངས་འདུས་ཀྱི་གཞུང་བཤད་ཞུས་པས། རུའི་ཞལ་ནས། དྷ་ན་རཀྵི་ཏ་དང་། དྷརྨ་བོ་དྷི་དང་། དྷརྨ་རཱ་ཛ་རྣམས་ཆེ་བཙན་སྐྱེས་ཀྱིས་སྤྱན་དྲངས་ནས་བྲུ་ཤའི་ཡུལ་དུ་བཞུད་པས། དེར་ཞུས་ཤིག་གསུངས་པ་ལྟར་། བྲུ་ཤའི་ཡུལ་དུ་བྱོན་ཏེ་ལོ་པཎ་བཞི་ལ་གཙོ་བོར་གཞུང་བཤད་དང་། གཞན་ཡང་དབང་བཀའ་དང་ཕྱག་བཞེས་ཀྱི་ཕྲ་གཅོད་སོགས་གདམས་ངག་གི་གནད་ལ་ཞུན་ཐར་བཅད་དེ་ཐུགས་བཅུད་ལོངས་པར་མཛད། དེ་ནས་གྲུབ་པ་བརྙེས་ཚུལ་ཀྱང་། ཉུག་གི་རྡོ་རྗེ་སྒྲོམ་བུར་ཟླ་བ་དགུ་ན་ཐུགས་རྒྱུད་གྲོལ་ཏེ་གནས་ལུགས་གཏན་ལ་ཕེབས། རྡོ་རྗེ་གདན་དང་གཡུང་དྲུང་རིན་ཆེན་གཏེར་གནས་སུ་གསང་བདག་གིས་ཞལ་མངོན་དུ་བསྟན་ནས་ཕྱག་མཚན་གྱི་རྡོ་རྗེ་ཕྱག་ཏུ་བབ་ཅིང་མིང་གི་དབང་བསྐུར། འོལ་མོ་ཚལ་དུ་དྲི་ཟའི་ཕྲུག་གུས་སངས་རྒྱས་ཀྱི་མཚན་གསོལ། གང་བཟང་དུ་གནོད་སྦྱིན་དང་གླིང་དགུའི་མཚོ་འགྲམ་དུ་ཀླུ་ཕྲུག་སྤུན་གསུམ་གྱིས་མཆོད། དུར་ཁྲོད་ལྷས་སུ་ཡི་དྭགས་ཕྲུག་གུས་ཞབས་ལ་གཏུགས། འོད་མའི་ཚལ་དུ་ཡ་མཱནྟ་ཀས་ཞལ་བསྟན་ནས་དབང་དང་དངོས་གྲུབ་སྩལ་ཞིང་། ལྷ་སྲིན་དབང་དུ་འདུས་ནས་གསང་སྔགས་ཀྱི་བདག་པོར་དབང་བསྐུར། མ་གཤིན་མཁའ་འགྲོ་དབང་ཕྱུག་རྣམས་བསྲུང་མར་གཏད། འཇམ་དཔལ་གྱིས་ལུང་བསྟན་པ་བཞིན་རྒྱ་གར་དུར་ཁྲོད་གསང་ལུང་ནག་པོར་ཨེ་ཀ་ཛཱ་ཊིས་དངོས་གྲུབ་ཀྱི་རྫས་བྱིན་པས་དབྱིངས་ལ་ཡེ་ཤེས་ཤར་ཏེ་ས་ཆེན་པོའི་རྟོགས་པ་མངོན་དུ་གྱུར། པདྨ་གར་དབང་དང་། གཤིན་རྗེ་གཤེད་ཀྱི་དཀྱིལ་འཁོར་ཡོངས་སུ་རྫོགས་པ་ཞལ་གཟིགས་ཤིང་དབང་དང་དངོས་གྲུབ་ཐོབ། གཞན་ཡང་ཐོགས་པ་མེད་པའི་མངོན་ཤེས་དང་ལྷའི་སྤྱན་སོགས་མངའ། ཆུ་ལ་མི་བྱིང་ཞིང་རི་བྲག་ལ་ཐལ་ལེར་གཤེགས་པ་སོགས་ངོ་མཚར་བའི་རྣམ་ཐར་བསམ་གྱིས་མི་ཁྱབ། དོན་དུ་ན་མདོ་སྡེ་ལས་ས་བཞི་པའི་བྱང་ཆུབ་སེམས་དཔའ་ཡིན་པ་དང་། སྟོན་པ་འདས་ནས་ལོ་ཉིས་སྟོང་ན་འབྱོན་ཞེས་ལུང་བསྟན། མི་ཡུལ་དུ་ལོ་བརྒྱ་དང་བཅུ་གསུམ་གྱི་བར་དུ་བཞུགས་ནས། མདོའི་འགྲེལ་ཆེན་མུན་པའི་གོ་དང་། དཀའ་གཅོད་སྨྲ་བའི་མཚོན་ཆ། སྒྱུ་འཕྲུལ་བརྒྱད་ཅུ་པའི་མངོན་རྟོགས་འགྲེལ། རྫོགས་ཆེན་གྱི་མན་ངག་བསམ་གཏན་མིག་སྒྲོན་སོགས་བསྟན་བཅོས་རྩོམ་པ་དང་། བཤད་སྒྲུབ་ཀྱི་ཕྲིན་ལས་ཀྱིས་བསྐྱེད་རྫོགས་གསུམ་གྱི་བསྟན་པས་ས་སྟེང་ཁྱབ་པར་མཛད། མ་འོངས་པའི་དོན་དུ་ཆོས་དང་དྲག་སྔགས་མང་པོའང་གཏེར་དུ་སྦས། འདི་ལ་སློབ་མ་མང་ཡང་། ཁྱད་པར་དུ་འཕགས་པའི་སློབ་མ་ཐུགས་ཟིན་གྱི་སྲས་བཞི་སྲས་ཀྱི་དམ་པ་གཅིག་དང་ལྔ་བྱུང་སྟེ། སློབ་དཔོན་ཉིད་ཀྱི་མགུར་ལས། གནུབས་བན་ཡང་དབང་གཏེར། །ཤེས་རབ་ནགས་ཚལ་ལ། །ཡོན་ཏན་ལྗོན་ཤིང་འཁྲུངས། །སྣོད་ཀྱི་མཆོག་ལྔར་བླུགས། །གཅིག་གིས་རྩ་བ་ཁྱེར། །བློན་ཆེན་འཕགས་པ་ཡིན། །གཅིས་གིས་ལོ་མ་ཁྱེར། །ལེགས་པའི་སྒྲོན་མེ་ཡིན། །གཅིག་གིས་མེ་ཏོག་ཁྱེར། །དན་གྱི་ཡོན་ཏན་མཆོག །གཅིག་གིས་འབྲས་བུ་ཁྱེར། །ཡེ་ཤེས་དབང་ཕྱུག་ཡིན། །གཅིག་གིས་ཐམས་ཅད་ཁྱེར། །ཡོན་ཏན་རྒྱ་མཚོ་ཡིན། །ཞེས་གསུངས་པ་ལྟར། སྲས་བཞི་ནི། རྩ་བ་རྒྱུད་ལ་མཁས་པ་སྤ་གོར་བློན་ཆེན་འཕགས་པ། ལོ་མ་བདུད་རྩི་ལ་མཁས་པ་སྲུའི་སྟོན་པ་ལེགས་པའི་སྒྲོན་མེ། མེ་ཏོག་བརྒལ་ལན་ལ་མཁས་པ་དན་ཡོན་ཏན་མཆོག །འབྲས་བུ་ལྟ་དགོངས་ཀྱི་གནད་ལ་མཁས་པ་སོ་ཡེ་ཤེས་དབང་ཕྱུག་གོ། །སྲས་ཀྱི་དམ་པ་གཅིག་ནི། དེ་བཞི་ཀ་ལ་མཁས་པ་ཁུ་ལུང་པ་ཡོན་ཏན་རྒྱ་མཚོའོ། །ཡང་མདོ་དབང་རང་གི་ལོ་རྒྱུས་རྣམས་སུ། ཁུ་ལུང་པ་ལ་དབང་རྒྱུད་གདམས་ངག་གི་བཀའ་བབས། སྲུ་ལ་དབང་བཞི་ཆུ་བོའི་བཀའ་བབས་ཞེས་ཀྱང་འབྱུང་ངོ་། །དེ་ལ་གནུབས་ཆེན་ཉིད་སྟོན་པ་མྱ་ངན་ལས་འདས་ནས་ལོ་ཉིས་སྟོང་ན་འབྱོན་པར་ལུང་བསྟན་པའང་ཉིས་སྟོང་ལ་ཉེ་བའི་རགས་རྩིས་ཏེ། དེང་སང་ཡོངས་གྲགས་ཀྱི་དུས་འཁོར་བའི་བསྟན་རྩིས་དང་བསྟུན་ཏེ་ཞིབ་མོར་བརྩིས་ན་ཆིག་སྟོང་བདུན་བརྒྱ་བཅུ་གཉིས་ན་བྱོན་པ་ཡིན། དེའི་རྒྱུ་མཚན་སྟོན་པ་ལྕགས་འབྲུག་ལ་གཤེགས་པའི་དབང་དུ་བྱས་ཏེ། དེ་ནས་ཉེར་བརྒྱད་པ་ས་སྤྲེལ་ལ་རྒྱལ་པོ་ཛའི་ཁང་སྟེང་དུ་གསང་སྔགས་བབས། དེ་ནས་ཆིག་སྟོང་དྲུག་བརྒྱ་བརྒྱད་ཅུ་གྱ་བཞི་པ་ཆུ་བྱི་ལ་གནུབས་ཆེན་འཁྲུངས། ཆུ་བྱི་འདི་ཁྲི་སྲོང་ལྕགས་རྟ་ལ་འཁྲུངས་པའི་ཞེ་གསུམ་པ་དང་། མེ་ལུག་ལ་སད་མི་མི་བདུན་རབ་ཏུ་བྱུང་བའི་དྲུག་པ་ཡིན། གནུབས་ཆེན་གྱི་དགུང་ལོ་བཅུ་བདུན་བ་ཞེས་པའི་ས་སྟག་ལ་ཁྲི་སྲོང་སྐུ་གཤེགས། དེ་ནས་ལོ་བརྒྱད་ཅུ་གྱ་ལྔ་པ་ཆུ་སྟག་ལ་གནུབས་ཆེན་གཤེགས་པས་ན། དར་མས་བསྟན་པ་བསྣུབས་པའི་འོག་ཏུའང་ལོ་སུམ་ཅུ་སོ་བདུན་ཙམ་བཞུགས་པར་མངོན་ནོ། །དེ་ཡང་སྔར་གྱི་ཡི་གེ་འགར། གནུབས་ཆེན་གྱི་སློབ་མ་ལ་བུ་བཞི་དང་དགེ་མཆེད་བཅོ་ལྔ་ཞེས་འདྲེན་ཅིང་། བུ་བཞི་སྔར་གྱི་ཐུགས་སྲས་བཞི་ཡིན་ལ། དགེ་མཆེད་བཅོ་ལྔའི་ཁྲོད་ནས་ལ་ལ་བཀའ་ཡོངས་སུ་རྫོགས་པ་ཐོབ་པའང་ཡོད་མོད། ཕལ་ཆེ་བས་གནུབས་ཆེན་ཞལ་མཐོང་ཙམ་ལས་ཆོས་མ་གསན་པས། དགེ་མཆེད་བཅོ་ལྔ་པོ་ཐམས་ཅད་སྲུ་ལེགས་སྒྲོན་གྱི་སློབ་མ་ཡིན་ཞེས་ཟེར་ཞིང་། དངོས་གྲུབ་བསྐུལ་ཚིག་ལས་ཀྱང་འབྱུང་ནའང་། དགེ་མཆེད་ཀྱི་ནང་ཚན་དུ་ཁུ་ལུང་པ་ཡོན་ཏན་རྒྱ་མཚོ་བགྲངས་པའང་བྱུང་བས། དེ་འདྲ་གནུབས་ཆེན་གྱིི་ཐུགས་སྲས་འགྲན་ཟླ་མེད་པ་ཡིན་པས་སྲུ་ལ་གསན་པ་ཅི་འདྲ་སྙམ་བརྟགས་པའི་གནས་སུ་མཐོང་ངོ་། །འདིར་ཇི་ལྟར་བརྒྱུད་ཚུལ་ནི། གནུབས་ཆེན་སངས་རྒྱས་ཡེ་ཤེས་ཞབས་ནས་ཐུགས་ཟིན་གྱི་སྲས་མཆོག་གཉིས་ལ་བརྒྱུད་པ་ལས། དང་པོ་ནི། གོང་གི་ལུང་བསྟན་ལས། ས་བཞི་པའི་བྱང་ཆུབ་སེམས་དཔའ་དེས་ས་གསུམ་པའི་བྱང་ཆུབ་སེམས་དཔའ་ཞིག་ལ་སྟོན་པར་འགྱུར་རོ། །ཞེས་པ་ལྟར་གནུབས་ཆེན་གྱི་ཐུགས་སྲས་རྣམས་ཀྱི་ནང་ནས་མཆོག་ཏུ་གྱུར་པ་ཁུ་ལུང་པ་ཡོན་ཏན་རྒྱ་མཚོ་ཞེས་འོད་བྱེད་ཀྱི་ས་ལ་བཞུགས་པའི་བྱང་ཆུབ་སེམས་དཔའ་དེ་ལ་བརྒྱུད་དེ། ཡབ་གནུབས་ཁྲི་རྗེ་རྨུ་ཐོན་བཙན་དང་། ཡུམ་ཁྲོམ་བཟའ་འོད་ལྡན་གྱི་སྲས་སུ་གནུབས་ཡུལ་རོང་དུ་འཁྲུངས། དགུང་ལོ་སུམ་ཅུ་པ་ལ་རི་དྭགས་གཤོར་དུ་ཕྱིན་པས། རྗེ་སངས་རྒྱས་ཡེ་ཤེས་སྣར་གྱི་ཤུག་པ་ནག་པོར་བཞུགས་པ་དང་མཇལ་ཏེ། རུས་གང་ཡིན་གསུངས་པ་ལ། གནུབས་ཡིན་ཞུས་པས། འོ་སྐོལ་གཉིས་ཚེ་སྔ་མ་ཕ་བུར་འབྲེལ་ཞིང་རུས་ཀྱང་གཅིག །ཆོས་ཀྱི་ལས་འཕྲོའང་འདུག་གསུངས་ནས་ཆོས་སྒོར་བཅུག་པ་ལ། དབང་རྒྱུད་མན་ངག་བསྟན་པ་བསྲུང་བའི་ལས་ཁ་དང་བཅས་པ་ཐམས་ཅད་ཚང་སྤྲུགས་སུ་གནང་བས་བཀའི་བཅུད་དང་ཐུགས་ཀྱི་སྙིང་ཁུ་ཐམས་ཅད་བབས་ཏེ། ཁྱད་པར་གྱི་ཆོས་སྡེ་སུམ་ཅུ་རྩ་ལྔ་ལ་མཁས་པར་གྱུར། ཁྱད་པར་སྣར་གྱི་ཡང་གསང་བྲག་ཕུག་ཏུ་དབང་གི་ཆུ་བོ་བཞི་རྫོགས་པར་བསྐུར། དབང་གི་ཡིག་མད་བཅོ་བརྒྱད་གཏད། དབང་རྟགས་སུ་དབང་བསྐུར་རྒྱལ་པོའི་རྒྱུད་བྱིན། ཡོན་དུ་སྟོད་ཀྱི་ལས་སྒོ་ལན་གསུམ་བླངས་ཏེ། གཡུ་དཀར་པོ་འོད་འཛག །བེར་ཤ་བ་ཅན། རྟ་ཚལ་ནག་སེང་གེ། དར་མེན་གྱི་ན་བཟའ། ལ་རྫས་ཀྱི་དཀོར་ཆ་དང་རྩི་སྨན་དཔག་ཏུ་མེད་པ་ཕུལ། གསང་མཚན་རྡོ་རྗེ་གཏེར་བཞད་རྩལ་ལམ་རྡོ་རྗེ་རིག་འཛིན་གཏེར་དུ་གྲགས། གཞན་ཡང་སྐུ་ཚེ་སྔ་མའི་སྤུན་དུ་གྱུར་པ་རྒྱ་གར་གྱི་སློབ་དཔོན་དྷ་ན་དྷ་ལ་ཞེས་སྒྲ་སྐད་ཉི་ཤུ་རྩ་གཅིག་ལ་མཁས་ཤིང་འཆི་མེད་ཀྱི་རིག་འཛིན་གྲུབ་པ་དེས། རང་གི་ནུ་བོ་དགའ་ཆུང་རོང་ན་གྲོང་བན་ཞིག་ཏུ་སྐྱེས་པ་མངོན་ཤེས་ཀྱིས་མཁྱེན་ཏེ་ཕན་གདགས་པའི་ཕྱིར་རྐང་མགྱོགས་གྲུབ་པས་ནུབ་གཅིག་ལ་རོང་དུ་བྱོན་ནས་གཤིན་རྗེ་གཤེད་དམར་ནག་སོགས་ཆོས་དང་དྲག་སྔགས་ཟབ་ལ་མང་བ་སྩལ། ཡང་རྒྱ་གར་ཙནྡྲ་ཀིརྟི་ཞེས་བྱ་བས་ཀྱང་ཐེབས་རྒྱ་བཤད། ཁུ་ལུང་མཁར་གདོང་ལ་སོགས་པར་སྒྲུབ་པ་མཛད་པས། མཆོག་གི་དངོས་གྲུབ་ཆོས་ཉིད་ཀྱི་དོན་རྟོགས། ཟག་མེད་ཀྱི་མངོན་ཤེས་ཤར། འབྱུང་བ་ལ་རང་དབང་བསྒྱུར། ཐུགས་དམ་གྱི་ལྷ་དུ་མའི་ཞལ་གཟིགས། དམ་ཅན་རྣམས་བྲན་དུ་ཁོལ། རྗེའི་ཁེང་ལོག་གི་འགྲས་ཀྱིས་རང་གསོད་པའི་གཤེད་མ་བརྒྱད་བཏང་བ་སྤྲུལ་པ་རང་འདྲ་བ་བརྒྱར་སྤྲུལ་ནས་བཏུལ་བ་སོགས་རྫུ་འཕྲུལ་དང་། དྲག་སྔགས་ལ་རྟགས་ཐོན་པས་བསྟན་པ་བསྲུངས་ཏེ་ནུས་པ་ལ་མངའ་བརྙེས་པ་ཡིན་ནོ། །གོང་གི་ལུང་བསྟན་ལས། དེས་ས་གཉིས་པའི་བྱང་ཆུབ་སེམས་དཔའ་ཞིག་ལ་གཏོད་པར་འགྱུར། ཞེས་རྗེ་ཡོན་ཏན་རྒྱ་མཚོས་ས་གཉིས་པར་ལུང་གིས་ཟིན་པའི་སྲས་ཡེ་ཤེས་རྒྱ་མཚོ་ལ་བརྒྱུད་དེ། སྤྱིར་ཡོན་ཏན་རྒྱ་མཚོ་ལ་རིགས་ཀྱི་སྲས་སྔ་ཚར། བར་ཚར། ཕྱི་ཚར་གསུམ་ལས། སྔ་ཚར་གྱི་སྲས་གསུམ་བླ་མ་ལ་དམ་ཚིག་ཉམས་པས་ར་བ་གསུམ་དུ་སྤྱུགས། དེ་རྗེས་གླན་རྡོ་རྗེ་འབར་གྱི་སྲིང་མོ་སོ་མ་ལེགས་ཁབ་ཏུ་བཞེས་པ་ལ། གཅེན་ཡེ་ཤེས་རྒྱ་མཚོ། གཅུང་པདྨ་དབང་རྒྱལ། ལྕམ་ཨུཏྤལ་སྒྲོན་རྣམས་བྱུང་སྟེ་བར་ཚར་ཡིན། ཕྱིས་སྟག་རམ་དཔལ་གྱི་ལྕམ་ལ་ཕྱི་ཚར་གྱི་སྲས་གཉིས་བྱུང་བའི་གཅུང་རོ་ཟན་ནག་པོས་རྒྱུད་ཀྱི་རོ་ལངས་གྲུབ། དེའི་སྲས་བརྒྱུད་ལ་ཁྲོ་ཕུ་ལོ་ཙཱ་བ་སོགས་བྱུང་། དེ་ལྟར་སྲས་དྲུག་ལས་ཁྱད་པར་དུ་གྱུར་པ་ནི། བར་ཚར་གྱི་སྲས་གཉིས་ཡིན་ཏེ། གཅེན་ཡེ་ཤེས་རྒྱ་མཚོ་ནི། སྐུ་ཚེ་སྔ་མ་ལ་ཚོགས་བསགས་ཤིང་བཟོད་པ་གོམས་པས་སྐུ་བྱད་མཚར་ཞིང་ཐུགས་དུལ་བས་ཀུན་གྱི་ཡིད་དུ་འོང་། བླ་མ་ལ་མཆོག་ཏུ་གུས་པས་སྒོ་གསུམ་གྱི་ཞབས་ཏོག་ཅི་མཉེས་སུ་བསྒྲུབས་ཤིང་། ཤེས་རབ་དང་དད་བརྩོན་གྱི་སྤྱོད་པ་ཕུལ་དུ་གྱུར་པས་ཐུགས་ཀྱི་དགོངས་པ་ལོན་ཏེ། རྒྱུད་ལུང་མན་ངག་ཐམས་ཅད་གྱི་བདག་པོར་མངའ་བསྐུར། དབང་གི་མཛོད་ཐམས་ཅད་ཀྱི་བཅུད་བཏིགས་པས་ཡབ་ལ་མངའ་བའི་ཆོས་ཐམས་ཅད་བུམ་པ་གང་བྱོའི་ཚུལ་དུ་མངའ། ཁྱད་པར་ཁུ་ལུང་མཁར་ལུང་དུ་ཆུ་བོ་བཞིའི་དབང་བསྐུར། གསང་མཚན་རྡོ་རྗེ་དབང་གྲུབ་རྩལ་དུ་བཏགས། བསྙེན་སྒྲུབ་མཐར་ཕྱིན་པས་མཆོག་གི་དངོས་གྲུབ་གནས་ལུགས་ཀྱི་དོན་རྟོགས། ཡི་དམ་གྱི་ལྷ་དུ་མའི་ཞལ་གཟིགས། སྐུ་ལུས་ལྷའི་དཀྱིལ་འཁོར་དུ་གཞན་ལ་སྟོན་པར་ནུས། དམ་ཅན་རྣམས་བྲན་དུ་འཁོལ། མི་མ་ཡིན་ཐམས་ཅད་ཀྱིས་སྲོག་སྙིང་ཕུལ། མངོན་སྤྱོད་ཀྱི་ལས་གང་ལའང་འཕྲལ་དུ་རྟགས་འབྱིན་པས་ནུས་རྩལ་ཐོབ་པ་ཡིན་ནོ། །གཅུང་པདྨ་དབང་རྒྱལ་གྱིས་གཤིན་རྗེ་གཤེད་གྲུབ། ལས་གཤིན་གྱིས་སྲོག་སྙིང་ཕུལ། དབུས་སུ་གཙང་ཆབ་ལུད་པ་ལ་ཆུ་ཁར་སེང་ལྡེང་གི་ཕུར་བུ་བཏབ་པས་ཞག་གཅིག་ཉིད་ལ་འབེན་གང་ཙམ་དུ་ཕྱིར་འགྱུར་བ་དང་། བོན་པོ་ནུས་ཅན་དགུ་དུས་གཅིག་ཏུ་བསྒྲལ་བ་སོགས་མངོན་སྤྱོད་དྲག་པོའི་ལས་ལ་ཐོགས་པ་མེད་པའི་མཐུ་སྟོབས་སུས་ཀྱང་འགྲན་པར་མི་ནུས། ཁ་སྐད་དུའང་། མེ་རི་འབར་བ་དང་དུ་བཞེས་པ་ནི་འཇམ་དཔལ་བཤེས་གཉེན། བོད་དུ་བསྒྱུར་བ་པོ་ནི་དྷ་ན་དྷ་ལ། ཕྱག་ཏུ་བཞེས་པ་ནི་ཡོན་ཏན་རྒྱ་མཚོ། སྒྲུབ་པ་གདེངས་སུ་གྱུར་པ་ནི་པདྨ་དབང་རྒྱལ་ལོ། །ཞེས་གྲགས། གཅེན་ཡེ་ཤེས་རྒྱ་མཚོ་སློབ་མ་མང་ནའང་། མཆོག་ཏུ་གྱུར་པ་སྒྱུ་འཕྲུལ་དང་སེམས་ཕྱོགས་ཀྱི་བཀའ་བབས་པ་ཉང་ཤེས་རབ་མཆོག་དང་། མདོའི་བཀའ་བབས་པ་བྱང་ཆུབ་རྣམ་གསུམ་སྟེ། ཁོང་གསུམ་ལ་ཁུ་ལུང་མཁར་གདོང་དུ་ཆུ་བོ་བཞི་རྫོགས་ཀྱི་དབང་བསྐུར་བས། ཡོན་དུ་རྒྱ་སྟོན་བློ་གྲོས་བྱང་ཆུབ་ཀྱིས་གཡུ་དམར་གྱིས་སྣ་དྲངས་པའི་ནོར་མང་པོ་ཕུལ། གསང་མཚན་རྡོ་རྗེ་ལས་གྲུབ་རྩལ། མར་པ་ཡོན་ཏན་བྱང་ཆུབ་ཀྱིས་རྟ་བཟང་པོ་ཕུལ། གསང་མཚན་རྡོ་རྗེ་ལྷུན་གྲུབ་རྩལ། སྣ་ནམ་ཚུལ་ཁྲིམས་བྱང་ཆུབ་ཀྱིས་ཁྲབ་དང་ལྷོ་རྫས་ཕུལ། གསང་མཚན་རྡོ་རྗེ་གྲུབ་མཆོག་རྩལ་དུ་བཏགས། དེ་གསུམ་ཀས་བསྐྱེད་རྫོགས་ལ་བརྟན་པར་ཐོབ། གཞན་དོན་ཕྲིན་ལས་ཀྱི་རྒྱུན་མར་པ་ནས་ཆེར་མ་མཆེད། གཞན་གཉིས་ཀྱིས་བཤད་སྒྲུབ་གྱི་སྒོ་ནས་གདུལ་བྱ་དཔག་མེད་སྨིན་གྲོལ་ལ་བཀོད་དེ། བསྟན་པ་རྒྱས་པར་མཛད། ཁྱད་པར་རྒྱ་སྟོན་བློ་གྲོས་བྱང་ཆུབ་ཀྱིས་ཁྲ་བོ་ཆེ་ཁྱིམ་ཕྱོགས་ཀྱི་ཐོ་གར་ནམ་མཁའ་ལྡེ་ལ་ཕུང་པོ་རི་བོ་ཆེར་ཆུ་བོ་བཞི་རྫོགས་ཀྱི་དབང་བསྐུར་ཞིང་། རྒྱུད་མན་ངག་དང་བཅས་པ་རྫོགས་པར་བཤད། ཡོན་དུ་ནས་ཁལ་བརྒྱ་དང་གླང་བཟང་པོ་ཞིག་ཕུལ། གསང་མཚན་རྡོ་རྗེ་དངོས་གྲུབ་གཏེར་དུ་གྲགས། སྤྱིར་བསྐྱེད་རྫོགས་གསུམ་དང་སྒོས་ལུང་ཨ་ནུ་ཡོ་ག་ལ་མཁས་ཤིང་གྲུབ་པའི་རྩེ་མོར་སོན་ཏེ། སྐུ་ཚེའི་སྟོད་ལ་ལྷོ་བྲག་གི་སྣ་ནམ་ཞང་མིག་ཡོན་པོ། ཤངས་ཀྱི་སྟོང་ཚབ་འཕགས་པ་རྒྱ་མཚོ། སྣ་ནམ་གྱི་འགར་སྟོན་ཚུལ་ཁྲིམས་བཟང་པོ། འུ་ཡུག་གི་དབྱར་གསལ་བའི་བྱང་ཆུབ་སྟེ་བཞི་ལ་བཤད། བར་དུ་ཞུ་སྟོན་བསོད་ནམས་ཤཱཀྱ་ལ་བཤད། ཐ་མར་ལྷ་རྗེས་ཟུར་པོ་ཆེ་ལ་བཤད་ཅེས་འབྱུང་། ཡང་གནུབས་ཆེན་གྱི་ཐུགས་ཟིན་གྱི་སྲས་དབང་བཞིའི་ཆུ་བོའི་བཀའ་བབས་སྲུ་སྟོན་ལེགས་པའི་སྒྲོན་མེས། ཉང་སྨད་རྒྱལ་ཆེན་གྱི་ཞུ་སྟོན་བསོད་ནམས་ཤཱཀྱ་ལ་དབང་བསྐུར་ཏེ། གསང་མཚན་ཕྲིན་ལས་མཐར་ཕྱིན་རྩལ་དུ་བཏགས། དེས་ཀྱང་ལྷ་རྗེ་ཟུར་པོ་ཆེ་ལ་བཤད་དོ། །དེ་ལ་ཟུར་པོ་ཤཱཀྱ་འབྱུང་གནས་ནི། མེས་ཟུར་ཨ་ཙ་རའི་སྲས་བཟང་མིག་པོ་ཆེ་ལ་སྲས་བཞི་བྱུང་བའི་ནང་ནས་མཆོག་ཏུ་གྱུར་པ་སྟེ། རྒྱལ་པོ་བཀའ་ཆེམས་ཆུང་བ་ཞིག་ནས་ལོ་ཙཱ་བ་ཆེན་པོ་བཻ་རོ་ཙ་ན་ཟུར་ཚོ་བརྒྱུད་དུ་འབྱོན་པར་གསུངས་པ་དེ་ཡིན་ཞེས་གོང་མ་རྣམས་གསུང་ཞིང་། དེ་དང་མཐུན་པར་རྡོ་རྗེ་གླིང་པའི་གཏེར་ལུང་ལས་ཀྱང་གསལ་བར་བསྟན། རྟེན་ཚངས་པར་སྤྱོད་པ་ཡིན། ཆུང་ངུ་ནས་མཚན་ཉིད་དང་སྔགས་ཀྲི་ཡོག་ལ་སྦྱངས་ཤིང་། གླེའུ་ཀླུ་མོ་དང་མེས་པོ་ལ་སྒྱུ་འཕྲུལ་གྱི་བཤད་པའང་ཉན་མོད། དེས་ཐུགས་ཐག་མ་ཆོད་པར་ནགས་ཚལ་སྒྲིལ་གསུམ་གྱི་སློབ་དཔོན་རྣམས་ལ་གཏུགས་ཏེ། ཆོས་ལུང་གི་ཉང་ཡེ་ཤེས་འབྱུང་གནས་ལ་སྒྱུ་འཕྲུལ་དང་སེམས་ཕྱོགས། ལྕེ་ལ་བདུད་རྩི། གཉན་ལ་ཐབས་ལམ། འདྲེ་ལ་ཀ་དག་ལྷུན་གྲུབ་ཀྱི་བཤད་ཐབས་ལམ་རིན་ཆེན་མོ། རོག་ལ་ཡང་དག །གཞན་ཡང་སྟོན་ཚབ་འཕགས་བྱང་སོགས་བླ་མ་བརྒྱད་ཅུ་ཙམ་བསྟེན་ནས་ཐོས་བསམ་གྱི་སྒྲོ་འདོགས་ཆོད་པར་མཛད་དེ། རྩ་རྒྱུད་དང་བཤད་རྒྱུད་དུ་ཕྱེ། རྩ་བ་དང་འགྲེལ་པར་བསྡེབས། རྒྱུད་དང་སྒྲུབ་ཐབས་སུ་སྦྲེལ། སྒྲུབ་ཐབས་དང་ཆོག་ཡིག་ཏུ་བསྡེབས་ནས་བཤད་སྒྲུབ་ཀྱི་བསྟན་པ་རྒྱས་པར་སྤེལ། ཁྱད་པར་སྐུ་ཚེའི་སྟོད་ལ་བཀའ་སྟོད་ཡེ་ཤེས་སྙིང་པོ་ལ་མདོ་དགོངས་འདུས་སོགས་གསན་པས། དེ་ཕྱིན་བཀའ་སྡེ་ཟུར་པར་གྲགས། བར་དུ་སྒྲོལ་གྱི་སེ་ཐོག་གི་ཕུར་ཐོ་གར་ནམ་མཁའ་ལྡེ་ལ་འདུས་པ་མདོའི་དབང་བཀའ། བཤད་བཀའ། མན་ངག་གི་བཀའ་ཐམས་ཅད་རྫོགས་པར་གསན། ཡོན་དུ་རྟ་བཟང་པོས་སྣ་དྲངས་པའི་ནོར་སྣ་མང་པོ་ཕུལ། གསང་མཚན་རྡོ་རྗེ་བདུད་འདུལ་རྩལ་དུ་གྲགས། སྐུ་ཚེའི་སྨད་ལ་ཞུ་སྟོན་བསོད་ནམས་ཤཱཀྱ་ལའང་མདོའི་དབང་དང་གདམས་པ་གསན། འཁོར་གསུམ་ཡོངས་དག་གི་དངོས་པོས་མཆོད། གསང་མཚན་རྡོ་རྗེ་ཞི་བ་རྩལ་དུ་བཏགས། སྒྲུབ་པ་མཛད་པའི་ཐོག་མ་རྟ་ནག་གི་འུག་ཚང་ཡོད་པའི་བྲག་ཕུག་ཁ་ཤར་བལྟ་ཞིག་ཏུ་ཡང་དག་བསྒྲུབས་པས་ལྷ་དགུའི་ཞལ་གཟིགས། མ་དག་པའི་སྣང་བ་འགོག་ནུས་པའི་བསྐྱེད་རིམ་ལ་བརྟན་པ་ཐོབ། སྟོང་ཉིད་ཀྱི་ལྟ་བ་དང་རྫོགས་རིམ་གྱི་ཡེ་ཤེས་ལ་དབང་འབྱོར། ལྷའི་མིག་དང་རྫུ་འཕྲུལ་ཐོགས་མེད་གྲུབ་པས་འུག་པ་ལུང་པ་ཞེས་གནས་ལས་མཚན་དུ་གྲགས། ཤངས་མདའ་སྲམ་པར་བཞུགས་ཚེ་ལྷོ་ཁའི་རི་ནས་ཤར་ན་རྡོ་རྗེ་སེམས་དཔའ་གཙོ་འཁོར་ལྔའི་ཞལ་གཟིགས། ཕྱིས་དེར་ལྷ་ཁང་བཞེངས་པ་ལ་འུག་པ་ལུང་དུ་གྲགས། དེ་ཉིད་དུ་ཐུགས་དམ་གྱི་ལྷ་མང་པོ་ཞལ་གཟིགས། དཔལ་ཆེན་པོ་དང་རྟག་ཏུ་མི་ལབ་པ་བཞིན་བཞུགས། པན་ནས་བྱང་དུ་གཟིགས་པས་རྒྱ་བོའི་རི་ཐམས་ཅད་ཁྲག་འཐུང་ང་བརྒྱད་ཀྱི་དཀྱིལ་འཁོར་དུ་གཟིགས། སྲམ་པར་བརྟེན་བཞེངས་དུས་སྐུ་ལུས་དཔལ་ཆེན་པོའི་སྐུར་བཞེངས་ནས་འཁོར་རྣམས་ལ་མངོན་དུ་བསྟན། དེ་དུས་འོག་གདོང་གི་ཀླུ་ལ་ལས་བཅོལ་བས་རྫ་མ་ཁ་ལ་རྒྱ་བཏབ་པ་ཞིག་ནས་ཆང་ཟད་མེད་བྱུང་བ་དང་། བསད་གསོ་གྲུབ་པས་རབ་གནས་ཀྱི་ཉིན་གྲོང་པའི་ཕྱུགས་རྣམས་གཡར་ནས་ཤ་སྟོན་བྱས་རྗེས་སོ་སོར་གཏད། སྲམ་མདའི་ཕ་བོང་ཁར་བྲོ་འཁྲབས་པས་ཞབས་རྗེས་བཞག་པ་ལ་ཟུར་ཆུང་པས་བྱིན་བརླབས་ཞུས་པའི་དབུའི་རྗེས་ཀྱང་ཡོད། འབྲོག་མི་ལོ་ཙཱ་བ་པཎྜི་ཏ་རྫོང་པའི་གསེར་གྱི་མ་ལྡངས་པ་ལ་ལྷ་རྗེས་ཐག་གི་རྒྱ་བོ་དང་ཉེ་བའི་གཞི་བདག་ཅིག་ལ་གསེར་བསླངས་པས་ཁུང་བུ་གཅིག་ཉིད་ནས་གསེར་སྲང་བརྒྱ་ཐོན་པ་བསྣམས་ཏེ་འབྲོག་མི་ལ་ཕུལ་བའི་ལན་དུ་བསམ་མི་ཁྱབ་ཀྱི་གདམས་པ་གནང་། ཉ་རིར་སྒྲོ་ཕུག་བརྩིགས་ཏེ་ཕྱི་སྐྱ་ལོངས་ཙམ་ན་ཟུར་ཆུང་པ་ལ་གཏད་ནས། དགུང་ལོ་རེ་གཅིག་པའི་ཐོག་འུག་པ་ལུང་དུ་སྐུ་གཤེགས་སོ། །དེ་ལ་སློབ་མ་མང་ཡང་། ཡོངས་སུ་གྲགས་པ་རྩེ་མོ་བཞི། རྩེ་ལྐོག་དང་ལྔ། སྒོམ་ཆེན་བརྒྱ་རྩ་བརྒྱད་ཅེས་གྲགས་པ་ལས། ཐུགས་སྲས་རྩེ་མོ་བཞི་ནི། ལྟ་སྒོམ་གྱི་རྩེ་མོ་བདེ་གཤེགས་རྒྱ་བོ་པ། སྒྱུ་འཕྲུལ་གྱི་བཤད་པ་ཕྱོགས་གཅིག་གི་རྩེ་མོ་མི་ཉག་འབྱུང་གྲགས། མཁྱེན་རབ་ཀྱི་རྩེ་མོ་ར་སའི་ཞང་འགོས་ཆུང་བ། སྒོམ་སྒྲུབ་ཀྱི་རྩེ་མོ་མཚོ་ཉའི་བཟང་སྒོམ་ཤེས་རབ་རྒྱལ་པོའོ། །རྩེ་ལྐོག་ནི་ཆོས་ཀྱི་སྟེང་དུ་མི་ཆོས་ཀྱི་ཕོ་ཟོའི་རྩེ་མོ་གྲམ་གྱི་རྩགས་བླ་མའོ། །ཡང་ལོ་རོག་དང་ལོ་ཐུང་སོགས་རྩེ་ལྐོག་བརྒྱད་དུ་འདོད་པའང་ཡོད་དོ། །ཁྱད་པར་མདོ་སེམས་ཀྱི་སྐོར་ཡོངས་རྫོགས་བདེ་གཤེགས་རྒྱ་བོ་པ་ཉིད་ལ་བཀའ་གཏད་དེ། འདིའི་ཡབ་ནི་ཟུར་ཨ་ཙ་རའི་སྲས་ཟུར་སྒོམ་བྱ་བ་དང་། ཡུམ་ཤེས་རབ་སྐྱིད་ཀྱི་སྲས་སུ་ཤིང་ཕོ་སྟག་གི་ལོ་ལ། ཐག་གི་རྒྱབ་རི་དཔལ་བཤོས་གནམ་དུ་བསླང་བ་ལྟ་བུའི་མདུན་རྒྱ་འབར་གདོང་བྱ་བར་འཁྲུངས། དགུང་ལོ་བདུན་ནས་འདྲི་ཀློག་དང་ཞི་ཁྲོའི་ཆོག་ཕྲིན་སོགས་རྩོལ་མེད་དུ་མཁྱེན། ཡབ་ཀྱི་ཕྱིར་འབྲངས་ནས་འུག་པ་ལུང་དུ་ཐེགས་པས། ལྷ་རྗེ་ཟུར་པོ་ཆེས། ཁྱོད་ཀྱི་རུས་གང་ཡིན། མིང་ལ་ཅི་ཟེར་གསུང་བ་ལ། རུས་ཟུར་ཆུང་ཆུང་ཞིག་ལགས། མིང་ཤེས་རབ་གྲགས་པ་བྱ་བ་ལགས་ཞུས་པས། འོ་ན་ཟུར་ཆུང་ཤེས་རབ་གྲགས་པ་ཟེར་བ་གྱིས་གསུང་། དེར་ཡབ་ལ་བཙུན་ཆུང་འདི་ངའི་རྩར་ཞོག་གསུང་བ་ལྟར་ལྷ་རྗེའི་དྲུང་དུ་བཞག་སྟེ། སློབ་གཉེར་བྱེད་དུ་བཅུག་པས། ཤེས་རབ་ཀྱི་རྩལ་ཆེ། རིག་པའི་རྣམ་འགྱུར་བཟང་། དད་བརྩོན་གྱི་གྲོགས་དང་ལྡན། སྒོ་གསུམ་གྱི་སྤྱོད་ལམ་གྱིས་ཀྱང་བླ་མའི་ཐུགས་ཟིན་ཏེ། དབང་བཀའ། བཤད་བཀའ། གདམས་ངག་གི་བཀའ་ཐམས་ཅད་བུམ་པ་གང་བྱོའི་ཚུལ་དུ་སྩལ། ཁྱད་པར་འུག་པ་ལུང་གི་གཙུག་ལག་ཁང་དུ་མདོའི་དབང་ཆུ་བོ་བཞི་རྫོགས་སུ་བསྐུར་ཞིང་། གསང་མཚན་རྡོ་རྗེ་ལྷུན་གྲུབ་རྩལ་དུ་བཏགས། དེ་དུས་ཡུལ་སྣང་ཐམས་ཅད་འདུས་པ་ཆེན་པོའི་དཀྱིལ་འཁོར་དུ་གསལ་བ་ལས་བླ་མ་ཉིད་གཙོ་བོ་དང་དབྱེར་མེད་དུ་གཟིགས། དེ་ཡང་ཐོས་བསམ་མཛད་པའི་ཚེ་ཐོག་མའི་དུས་ཡོ་བྱད་བཀྲེན་པར་བྱུང་ཡང་། བླ་མའི་བཀའ་བཞིན་པན་ཁང་སྔོན་གྱི་ཕྱུག་མོ་མ་སྨད་ལ་བརྟེན་པས་དོན་གྲུབ་ཅིང་། དེ་རྟིང་ཁྱིམ་ལས་བྱུང་སྟེ། སྔར་གྱི་འཕྲོ་འཐུད་ནས་ཤེས་རབ་གསུམ་ལ་ལེགས་པར་སྦྱངས་པས། གཞུང་ལུགས་ཐམས་ཅད་ཐུགས་སུ་ཆུད་དེ་མཁྱེན་པ་རྒྱས། ཉམས་རྟོགས་ཀྱི་ཀློང་བརྡོལ། མི་མ་ཡིན་པ་ཐམས་ཅད་ཀྱིས་ཀྱང་ཞབས་ལ་བཏུད་དེ། ལུང་སྟོངས་ཀྱི་བྱེ་མའི་གསེབ་ཏུ་ཞལ་སྐྱེམས་དང་། རི་རྩེར་ཞལ་ཟས་འདྲེན་པ་སོགས་ཐུགས་ལ་གང་བཞེད་འབད་མེད་དུ་གྲུབ་པ་བྱུང་བས། ད་ནི་ངས་འགྲོ་དོན་བྱས་ཀྱང་འགྲུབ་པར་འདུག་སྙམ་ཙ་ན། བླ་མའི་ཞལ་ནས། ད་ཁྱོད་ཀྱིས་བཤད་པ་གྱིས་གསུངས་པས། ཟུར་ཆོས་བསྐྱངས་ཏེ་མདོ་དགོངས་འདུས་བཤད་པས་དུས་གཅིག་ལ་དཔེ་འགྲེམས་སུམ་བརྒྱ་བྱུང་། དེ་ཡང་རྗེ་འདི་ཆུང་ངུའི་དུས་མཆོད་རྟེན་ལ་ས་ལས་ཞབས་ཁྲུ་གང་ཙམ་དུ་འཕགས་ནས་བསྐོར་བ་མཛད་པ་དང་། སྲམ་པར་ཡང་དག་ལོ་སྒྲུབ་ཀྱི་དུས་སུ་རྩེ་མོ་བཞི་དང་དགོངས་པ་འགྲན་པའི་ཚེ་ཐམས་ཅད་དགོངས་པ་གཡོ་འགུལ་མེད་པར་བཞུགས་པ་ལས་ཁྱད་པར་ཟུར་ཆུང་པ་ཤིང་ཏཱ་ལ་གང་ཙམ་འཕགས་པ་དང་། ཟུར་ཆུང་བའི་རུ་ལའི་སྒྲ་སྒྲུབ་ཁང་གི་ཕྱི་ནང་དང་རི་ཟུར་འདས་ནས་ཉན་པ་རྣམས་ལ་གདངས་ཆེ་ཆུང་མེད་པ་བྱུང་བས། དེ་དུས་ཟུར་པོ་ཆེའི་ཞལ་ནས། རྩེ་མོ་གཞན་གསུམ་ལ་ཁྱེད་རྣམས་མཆེད་གྲོགས་མཉམ་པ་ཡིན་ཀྱང་། ཟུར་ཆུང་པའི་གྲིམ་མ་ལ་མ་འགོང་ཞེས་བསྔགས་པར་མཛད་པ་དང་། ལན་གཅིག་ཟུར་ཆུང་པ་འུག་པ་ལུང་གི་རྟེན་གཙོའི་ཐུགས་ཀར་ཐིམ་སོང་བའི་མོད་ལ་རྒྱ་ཕུབས་ཀྱི་སྟེང་ན་ལིང་ངེ་གཤེགས་པ་དང་། སྲམ་པའི་རབ་གནས་ཀྱི་ཚེ་གྲོང་པའི་ཕྱུགས་གཡར་ནས། ཟུར་པོ་ཆེས་ཟུར་ཆུང་ལ་ཁྱོད་ཀྱིས་སྒྲོལ་ལམ་གསོ་གསུང་བ་ལ། ཟུར་ཆུང་བས་གསོ་བར་ཞུས་པས། རུས་དགོངས་པ་ལ་བཞུགས་ཏེ་ཡུངས་ཀར་རེ་གཏོར་བས་ཕྱུགས་ཐམས་ཅད་སྤུངས་ཀྱིས་འགྱེལ། ཤ་སྟོན་ཟིན་རྗེས་ད་གསོས་ཤིག་གསུང་བ་ལ། ཀོ་བའི་སྟེང་དུ་རུས་པ་རྣམས་སྤུངས་ཏེ་སེ་གོལ་ལན་གསུམ་ཏོག་པར་མཛད་པས་ཐམས་ཅད་ལངས་ཏེ་སྔར་ལས་ཉམས་བཟང་བར་གྱུར། དེ་ནས་གཡས་རུ་ཁང་ཁྲིའི་ལྷ་ཁང་དུ་འཆད་ཉན་སྐྱོང་བའི་དུས་སུ་གྲྭ་པ་རྣམས་གོ་མ་ཆོད་མི་གསུམ་ལ་གཏད་ནས་སྐྱོང་དུ་བཅུག་སྟེ། བྲག་རྒྱ་བོར་སྒྲུབ་པ་ལ་གཤེགས་པ་ན། དང་པོར་ཆོ་འཕྲུལ་ཤིན་ཏུ་ཆེ་ཡང་མ་འཛེམ་པར་བཞུགས་ཏེ། རྡོ་རྗེ་སེམས་དཔའི་ཁང་བུར་ཞི་བ་ཕྱག་རྒྱ་བསམ་གཏན་གྱི་སྒོ་ནས་བསྒྲུབས་པས་རྡོ་རྗེ་སེམས་དཔའ་ཡེ་ཤེས་སྒྱུ་མའི་སྐུར་ཞལ་གཟིགས། ཐག་གི་ལུང་པ་ཐམས་ཅད་རྡོ་རྗེ་སེམས་དཔས་ཁེང་། སྣང་བ་ཟད་པར་གྱི་སྐྱེ་མཆེད་བརྙེས་ཤིང་། ཅིར་སྣང་ཐམས་ཅད་ལྷའི་རང་བཞིན་དུ་བཀྲ་ལམ་མེ་ཤར་བ་ལ། དེ་དག་ཀྱང་བཟང་རྟོག་གི་མཐུ་བརྟས་པ་ཡིན། ཡང་དག་པར་གཏད་སོ་མེད་སྙམ་དུ་དགོངས་ནས། བསམ་གཏན་གྱི་ཁང་བུར་རྫོགས་པ་ཆེན་པོ་རྩོལ་བྲལ་གྱི་ངང་ལ་བཞུགས་པས། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཤར། ས་རྡོ་རི་བྲག་ཐམས་ཅད་ལ་ཐོགས་རྡུགས་མེད་པའི་རྫུ་འཕྲུལ་གྲུབ། སྐབས་ཤིག་མཚན་ཉིད་པའི་སྟོན་པ་རྦ་དགེ་མཐོང་བྱ་བས། ཁོ་རང་གི་སློབ་མ་སྟོན་པ་བཟང་བ་ཞིག་ལྷ་རྗེའི་དྲུང་དུ་རྩོད་པ་བྱེད་དུ་བཏང་བྱུང་བ་ལ། ཁོས་མདུན་ན་ཀ་བ་ཡོད་པ་ཆོས་ཅན་དུ་བཞག་ནས། ཀ་བ་ཆོས་ཅན་བྱས་པ་ལ། ལྷ་རྗེས། ཀ་བ་ཆོས་ཅན། ཁྱོད་འཇིག་རྟེན་རང་རྒྱུད་པའི་འཁྲུལ་ངོ་ལ་ཀ་བ་རང་རྒྱུད་དུ་སྣང་ཡང་། རྫོགས་པ་ཆེན་པོ་རང་སྣང་རིས་མེད་ཀྱི་དོན་ལ་ཀ་བ་གྲུབ་པ་མི་གདའ་གསུངས་ནས་ཕྱག་ཡུག་ཡུག་མཛད་པས། ཀ་བ་ལ་ཆགས་ཐོགས་མེད་པར་ཐལ་ལེར་སོང་། དེར་ཁོ་བོ་མཚར་སྐྱེས་ནས་རྗེའི་སློབ་མ་བྱས་པ་ནི་མ་ཐོག་བྱང་འབར་ཡིན་ནོ། །དེ་ལྟར་རྒྱ་བོར་ལོ་ཉི་ཤུ་རྩ་གཅིག་བཞུགས་པར་དགོངས་པ་ལ། ལོ་བཅུ་བཞིའི་ངོ་མཐོང་ཙ་ན། དེ་ནས་འབྱོན་དགོས་པའི་རྐྱེན་གཉིས་ཏེ། གཅིག་སྔར་གྲྭ་ས་སྐྱོང་དུ་བཅུག་པའི་སློབ་མ་གསུམ་གྱིས་རྒྱབ་ཚོལ་ཚོལ་ནས་མདུན་ཤོར་ཏེ། བསྟན་པ་མ་འཁྱོངས་པར་གོ་མ་ཆོད་དུ་སོང་བས་གྲྭ་ས་བསྐྱང་དགོས་པ་དང་། གཅིག་ཟུར་པོ་ཆེའི་ཕྱག་རྗེས་སྒྲོ་ཕུག་གི་ལྷ་ཁང་འཕྲོར་ལུས་པའི་འཇུག་སྐྱོང་དགོས་པས་བྱོན་པ་ཡིན་སྐད། གཞན་ཡང་སྐྱོ་བ སངས་ལ་བྱོན་ནས་དྲོ་གསོལ་བའི་སར་ཙནྡན་དཀར་པོ་གདུགས་ཙམ་ཞིག་སྐད་ཅིག་ལ་སྐྱེས། དེ་ཉིད་དུ་ཕྱིས་ལྷ་ཁང་བཞེངས་པ་ནི་མཁའ་འགྲོ་ལྷ་ཁང་དུ་གྲགས། ཡང་ཉང་རོར་ཁྱུང་པོ་གྲགས་སེས་རང་གི་གྲྭ་པ་སྟོན་པ་བཟང་པོ་སྐྱོ་མདའ་ཡང་གླན་བཞི་རྩོད་པ་བྱེད་དུ་བཏང་བ་ན། རྩོད་པ་བྱས་ཚད་མཚོ་ལ་ཁ་བ་བབས་པ་བཞིན་སོང་བས་སྤོབས་པ་བཅོམ། ཁོང་བཞི་ཡང་དད་པ་སྐྱེས་ཏེ་སང་ཕོད་སློབ་མར་འདུས་པ་ནི་ཐུགས་སྲས་ཀ་བ་བཞིའོ། །དེ་ཡང་ལྷ་རྗེ་ཟུར་ཆུང་པ་སྐུ་བསོད་རྒྱས་པས་བོད་ཀྱི་སྔགས་པ་ཐམས་ཅད་ཀྱིས་ཕྱག་འབུལ་ཞིང་གྲལ་གོང་དུ་བཀུར་བ་ལས། འགོས་ལོ་ཙཱ་བ་ན་རེ། ངེད་རང་གསར་མ་བ་ཚོ་ཁོ་ལ་ཕྱག་འཚལ་དོན་ཡང་མེད། གྲལ་ཞབས་སུ་སྒྲིག་དོན་ཡང་མེད་པས། ངེད་རང་ཚོ་ཁྲིམས་གྱིས་ཤིག་ཅེས་ཁྲིམས་བཅས་པ་ལས། ནམ་ཞིག་སྔགས་པ་ཐམས་ཅད་ཤངས་སུ་སྟོན་མོ་ཞིག་ལ་འཛོམས་པ་ན། ཟུར་ཆུང་པ་གྲལ་འགོར་བཞུགས་པའི་སྤྱན་སྔར་འགོས་ལོ་ཙཱ་བ་ཕྱག་མཛད་ཀྱིན་འདུག་པས། གཞན་ཐམས་ཅད་ཀྱིས་ཀྱང་ཕྱག་ཕུལ། སྟོན་མོ་གྱེས་ནས་ཁོང་རྣམས་ན་རེ། ཟུར་ཆུང་པ་ལ་ཕྱག་མི་བྱེད་པའི་ཁྲིམས་བཅས་ནས་རང་ཕྱག་མཛད་པ་ཅི་ཡིན་ཟེར་བ་ལ། འགོས་ན་རེ། ཁོའི་དྲུང་དུ་ཕྱིན་ཙ་ན་བཅོམ་ལྡན་འདས་དཔལ་ཆེན་པོའམ་འདི་ཀ་ཡིན་པར་འདུག་སྙམ་པ་ལས། མི་ཡིན་པའི་འདུ་ཤེས་མི་སྐྱེ་བར་འདུག་གསུང་ངོ་། །དེ་ལྟར་བཤད་སྒྲུབ་ཀྱི་མཛད་པས་བདེ་བ་གཤེགས་པའི་བསྟན་པ་རྒྱས་པར་མཛད་ནས། དྲུག་ཅུ་རེ་གཅིག་པ་ཤིང་སྟག་གི་ལོར་འབྲུམ་པའི་ནད་ཀྱིས་སྐུ་གཤེགས་སོ། །འདི་ལ་སྐུའི་སྲས་ལྕམ་སྲིང་གསུམ་བྱུང་སྟེ། རྩགས་བླ་མའི་སྲིང་མོ་དྷརྨ་བོ་དྷིའི་སྲས་སུ། རྩགས་ཚ་རྡོ་རྗེ་འབར་དང་། ཇོ་སྲས་མ་ཤཱཀྱ་ལྕམ་གཉིས་འཁྲུངས། མདའ་ཏིག་གི་སྲིང་མོ་གཙུག་ཏོར་ལྕམ་གྱི་སྲས་སུ་གསང་བདག་སྒྲོ་ཕུག་པ་ཤཱཀྱ་སེང་གེ་འཁྲུངས་སོ། །ཆོས་སྲས་ཀྱི་སློབ་མ་ཡོངས་སུ་གྲགས་པ་ནི། ཀ་བ་བཞི། གདུང་བརྒྱད། ཕྱམ་བཅུ་དྲུག །དྲལ་མ་སུམ་ཅུ་རྩ་གཉིས། སྒོམ་ཆེན་མི་གཉིས། ཡུས་པོ་ཆེ་མི་གཅིག །དཀྱུས་མ་མི་གཉིས། སྟ་གུར་མི་གཉིས། གོ་མ་ཆོད་མི་གསུམ་ལ་སོགས་པ་མང་དུ་བྱུང་བ་ལས། ཀ་བ་བཞི་ནི། སེམས་ཕྱོགས་ཀྱི་ཀ་བ་གོང་བུའི་སྐྱོ་སྟོན་ཤཱཀ་ཡེ། མདོའི་ཀ་བ་བསྐྱེད་ལུང་གི་ཡང་ཁྱེད་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀ་བཟང་། ཕྲིན་སྒྲུབ་ཀྱི་ཀ་བ་ནག་མོ་རིའི་མདའ་ཏིག་ཆོས་ཤག་གོ། །ཡང་མ་ཐོག་བྱང་འབར་དང་བརྒྱུད་པ་ལྔ་ཞེས་ཀྱང་གྲགས་སོ། །གདུང་བརྒྱད་ནི། མ་ཐོགས་པ་དང་། སྐྱོ་སྟོན་ཆོས་སེང་། གླན་ཤཱཀ་བྱང་། རྩགས་ཤཱཀ་རིངས། གནུབས་སྟོན་བག་མ། དབུས་པ་ས་འཐོར། ཤུ་སྟོན་ཟླ་གྲགས། རྩེ་ཁྲོམ་བྱང་དཔལ་དང་བརྒྱད་དོ། །ཡང་ལང་གཟི་ཆེན། ནལ་རྦ་སྙིང་པོ། རམ་སྟོན་རྒྱལ་མཚན་དང་གསུམ་བཅུག་པའང་སྣང་ངོ་། །སྒོམ་ཆེན་མི་གཉིས་ནི། ཟ་སྒོམ་དིག་མ་དང་། བོན་སྒོམ་ངོ་པའོ། །ཡུས་པོ་ཆེ་ནི་ལ་སྟོད་ཀྱི་ཟི་སྟོན་བསོད་རྒྱལ་ལོ། །སྟ་གུར་ནི་ཞང་སྟོན་སྔགས་སེ་དང་། ཁྱུང་པོ་རྟ་ཆུང་གྲགས་སེའོ། །གོ་མ་ཆོད་མི་གསུམ་ནི། མགོ་བྱ་ཚ། མིག་ཆུང་དབང་སེང་། འགོས་ཆུང་དབང་དེའོ། །ཕྱམ་དང་དྲལ་མ་དང་དཀྱུས་མའི་མིང་མ་སྨོས་སོ། །དེ་ཡང་ལྷ་རྗེ་རྒྱ་བོ་པས་ཐུགས་སྲས་ཀ་ཆེན་བཞི་དང་། ཉ་ཚལ་པ་གླན་ཤཱཀྱ་བྱང་ཆུབ་ལ་བརྒྱུད་དེ། དེ་ལ་ཀ་ཆེན་བཞི་པོ་འདི་ནི། དགེ་བཤེས་ཁྱུང་པོ་གྲགས་སེའི་གྲྭ་པ་མཚན་ཉིད་ལ་ཤིན་ཏུ་མཁས་པ་ཡིན་པ་ལ། ནམ་ཞིག་ལྷ་རྗེ་ཟུར་ཆུང་པ་དང་། ཁྱུང་པོ་གྲགས་སེ་གཉིས་ཡོན་བདག་ཞིག་གིས་ཉང་རོར་སྤྱན་དྲངས་ཏེ། ཆོས་འཁོར་སྟབས་གཅིག་ཏུ་བཙུགས་པའི་དུས་སུ། ཁྱུག་པོ་ཁོང་བཞི་ལ། ཟུར་ཆུང་ཤེས་རབ་གྲགས་པ་བྱ་བ་ཆོས་ལོག་མཁན་འདི་སུན་ཕྱུང་ལ་ཤོག་གསུངས་ནས་བཏང་། དེར་ཁོང་བཞི་པོས་ལྷ་རྗེའི་དྲུང་དུ་ཕྱིན་ནས། ཐོག་མར་སྐྱོ་སྟོན་ཤཱཀ་ཡེས་དྲིས་པ། ལྷ་རྗེ་ཆེན་པོ་ལགས། ཁྱེད་རྫོགས་པ་ཆེན་པོའི་ལུགས་ཀྱི་སྒོམ་ཁོ་ན་ལ་གཙོ་བོར་མཛད་པ་ལགས་སམ་ཞུས་པས། ང་དམིགས་པ་གང་ལ་གཏད་འདུག་གསུང་། འོ་ན་མི་སྒོམ་པ་ལགས་སམ་ཞུས་པས། ང་གང་ལ་ཡེངས་འདུག་གསུངས་པས་སྤོབས་པ་བཅོམ། དེའི་རྗེས་སུ་གླན་ཤཱཀ་བཟང་གིས་དྲིས་པ། ཁྱེད་གསང་བ་སྒྱུ་འཕྲུལ་བའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་འདོད་པ་ལགས་སམ་ཞུས་པས། ཡུལ་བེམ་པོ་རང་རྒྱུད་དུ་སྣང་བ་མངོན་སུམ་གྱི་ཚད་མ་སུས་ཁེགས་གསུང་། འོ་ན་མི་འདོད་དམ་བྱས་པས། སེམས་ཅན་རྣམས་ཀྱི་མ་དག་པའི་འཁྲུལ་སྣང་རང་རྒྱུད་པ་སྦྱོང་བར་བྱ་བའི་ཆེད་དུ་བཀའ་མདོ་རྒྱུད་དུ་མ་ལས་འབྱུང་བ་དང་སུས་འགལ་བར་ནུས་གསུངས་པས། ལན་མེད་པར་གྱུར་ཏོ། །དེ་ལྟར་ཁོང་བཞིས་རིམ་པར་དྲིས་པས་ཐམས་ཅད་སྤོབས་པ་ལན་མེད་དུ་གྱུར་ཏེ། ཁོང་རྣམས་ན་རེ། ཐེག་པ་ཆེན་པོའི་ཆོས་ཕྱིན་ཅི་མ་ལོག་པར་རྟོགས་པ། རིགས་པ་དང་གྲོལ་བའི་སྤོབས་དང་ལྡན་པ་འདི་འདྲ་བའི་བཤེས་གཉེན་གང་ནས་ཀྱང་མི་རྙེད་པས། ཐབས་ཀྱིས་རང་གི་སློབ་དཔོན་དང་བྲལ་ནས་ཟུར་ཆུང་པའི་དྲུང་དུ་མི་འདུད་རེའི་དམ་བཅས་པ་ལྟར། སང་ཕོད་ལྷ་རྗེའི་ཞབས་དྲུང་དུ་འདུས་ནས་སློབ་མར་གྱུར་པ་ནི་ཐུགས་སྲས་ཀ་བ་བཞི་ཡིན་ཏེ། རྗེ་རྒྱ་པོ་པས་ཁོང་བཞི་སྐལ་ལྡན་དུ་གཟིགས་ནས། སྤྱིར་བསྐྱེད་རྫོགས་གསུམ་སྒྲུབ་སྡེ་དང་བཅས་པའི་དབང་རྒྱུད་མན་ངག་དང་བཅས་པ་སྩལ་ཞིང་། ཁྱད་པར་གཡས་རུའི་མཁའ་འགྲོ་ལྷ་ཁང་དུ་འདུས་པ་མདོའི་ཆུ་བོ་བཞི་རྫོགས་ཀྱི་དབང་བསྐུར། སོ་སོས་མཉེས་པའི་ཡོ་བྱད་ཀྱིས་མཆོད། གསང་མཚན་མདའ་ཏིག་ལ་རྡོ་རྗེ་དངོས་གྲུབ་རྩལ། གླན་ལ་རྡོ་རྗེ་མྱུ་གུ་རྩལ། སྐྱོ་ལ་རྡོ་རྗེ་སྙིང་པོ་རྩལ། ཡང་ཁྱེད་ལ་ཐིག་ལེ་འགྱུར་མེད་རྩལ་ཞེས་བཏགས། དེ་བཞི་ཀ་དང་པོར་མཚན་ཉིད་ཀྱི་གཞུང་ལུགས་སྤྱི་དང་ཁྱད་པར་དབུ་ཚད་ལ་མཁས། གསང་སྔགས་ཀྱང་བསྐྱེད་རྫོགས་གསུམ་ཀ་མཁས་པར་མཁྱེན་མོད། ཁྱད་པར་མདའ་ཏིག་ཆོས་ཀྱི་ཤཱཀྱ་ནི་ཕྲིན་སྒྲུབ་ལ་མཁས་ཤིང་གྲུབ་པ་བརྙེས། རྡོ་རྗེ་ཕྲ་མོའི་ཏིང་ངེ་འཛིན་ལས་སུ་རུང་བར་གྱུར། གཡས་རུ་ཆུ་བར་གྱི་གླན་ཤཱཀྱ་བཟང་པོ་ནི་སྒྱུ་འཕྲུལ་གྱི་བཤད་པ་ལ་མཁས་ཤིང་གྲུབ་པ་བརྙེས་ཏེ། བསྐྱེད་རིམ་གྱིས་ཐ་མལ་གྱི་སྣང་བ་འགོག་ནུས་པ་དང་། རྫོགས་རིམ་གྱི་ཡེ་ཤེས་ལ་དབང་འབྱོར། སྐྱོ་སྟོན་ཤཱཀྱ་ཡེ་ཤེས་ནི་རྫོགས་ཆེན་ལ་མཁས་ཤིང་རྟོགས་པ་མངོན་དུ་གྱུར། སྣང་བ་སྐུ་དང་ཡེ་ཤེས་སུ་ཤར། དམ་པ་སངས་རྒྱས་ཀྱིས་ཀྱང་གཅོད་ཀྱི་གདམས་པ་སྒོར་སྐྱལ་དུ་བཤད་ཅིང་། འདིའི་དབོན་པོ་སྐྱོ་ཤེས་རབ་བླ་མས་མ་གཅིག་ལབ་སྒྲོན་ལ་བཤད་ཅིང་འབྱུང་། ཡང་ཁྱེད་བླ་མ་ནི་འདུས་པ་མདོ་ལ་མཁས་ཤིང་། དཀྱིལ་འཁོར་གསུམ་དབྱེར་མེད་དུ་རྟོགས་པའི་དགོངས་པ་ཤར། རྡོ་རྗེ་མི་བསྐྱོད་པ་ཞལ་གཟིགས། འདི་ཉིད་སྔར་གྲྭ་པའི་དུས་ཤིན་ཏུ་བཀྲེན་པ་ཞིག་ཡིན་པ་ལ། ལན་གཅིག་ཟུར་ཆུང་པ་ཁོང་གི་བྲང་ཁང་དུ་བསེའི་གའུ་ཕུལ་དགུ་ཙམ་ཤོང་པ་ཞིག་བསྣམས་ནས་བྱོན་ཏེ། ང་ཁ་སྐོམས་ཁྱོད་ལ་སྐོམ་མེད་དམ་གསུང་། ཟན་ཆང་ཞིག་བདོག་ཞུས་པས། འོ་ན་ཁྱེར་ཤོག་གསུང་། བོན་པོའི་ཡས་སྟགས་བསྡུས་པའི་ཟན་ཆང་ཡོད་པ་དྲངས་པས་གའུ་དོ་གསོལ་ནས། ད་མེད་དམ་གསུང་། ཡང་དྲངས་པས་གང་གསོལ་ནས། ཡོན་ན་ད་དུང་ཁྱོག་གསུང་། ཡང་གང་དྲངས་པ་ན་ད་མེད་དམ་གསུང་། ད་དུང་བྲེ་གང་ཙམ་བདོག་ཞུས་པས། འོ་ན་མི་ཡོག་པར་འདུག་ཡོག་ན་ཁྱོད་ལ་བསོད་ནམས་བོད་འདིར་མི་ཤོང་བ་ཞིག་འོང་བ་ཡིན་ཏེ། འོན་ཀྱང་བསོད་ནམས་ཆེ་བ་ཞིག་འོང་གི་གསུངས་ནས། ནས་ཁལ་གསུམ་རྒྱུད་གནང་ནས་དེ་བར་འདི་ཟོ། དེ་ནས་ཁྱེད་རང་ལ་སྟེར་བ་འོང་གི་གསུང་། དེ་བཞིན་དུ་ནས་དེ་ཟད་པ་དང་སྐུ་བསོད་རྒྱས་པར་བྱུང་ཞེས་གྲགས་སོ། །དེ་ལྟར་ཀ་བ་བཞི་ཀ་རྒྱུད་ལུང་མན་ངག་ལ་མཁས་ཤིང་བསྐྱེད་རྫོགས་ལ་བརྟན་པ་ཐོབ། སྣང་སྲིད་ཀྱི་ལྷ་འདྲེ་བྲན་དུ་ཁོལ་ཞིང་བཀའ་ཇི་ལྟར་བསྒོས་པ་བཞིན་དུ་ཉན་པས་ཕྲིན་ལས་ལ་ཐོགས་པ་མེད། བཤད་སྒྲུབ་ཀྱིས་བསྟན་པ་རྒྱས་པར་མཛད་པ་ཡིན་ནོ། །ཡང་གདུང་བརྒྱད་ཀྱི་ནང་ནས་གླན་ཤཱཀྱ་བྱང་ཆུབ་ནི། ཟུར་ཆུང་པའི་ཞབས་ལ་གཏུགས་ཏེ། བསྐྱེད་རྫོགས་གསུམ་གྱི་ཆོས་ཐམས་ཅད་གསན་ཞིང་། མཆོག་ཏུ་རྫོགས་པ་ཆེན་པོའི་ཆོས་ལ་མངའ་བརྙེས། ལྟ་དགོངས་ཕུལ་དུ་གྱུར། ཤེས་བྱ་ཐམས་ཅད་ཐོགས་མེད་དུ་མཁྱེན། གསང་སྔགས་ཀྱི་བདག་པོར་གྱུར་པ་ཞིག་སྟེ། ཁྱད་པར་འདུས་པ་མདོའི་དབང་དང་བཤད་པ་རྫོགས་པར་ཞུས། གསང་མཚན་རྡོ་རྗེ་དྲག་པོ་རྩལ་ཞེས་བཏགས་སོ། །དེ་ལྟར་ཀ་བ་བཞི་དང་གླན་ཤཱཀྱ་བྱང་ཆུབ་ལ་གསང་བདག་ཆེན་པོ་སྒྲོ་ཕུག་པས་བསྐྱེད་རྫོགས་གསུམ་གསན་ཞིང་། ཁྱད་པར་འདུས་པ་མདོའི་སྐོར་རྣམས་མདོའི་ཀ་བ་ཡང་ཁྱེད་བླ་མ་ལ་གཙོ་བོར་གཏུགས་ཏེ་མཁས་པར་མཛད། དེ་ལ་གསང་བདག་ཆེན་པོ་སྒྲོ་ཕུག་པ་འདི་ནི་ལྷ་རྗེ་ཟུར་ཆུང་པའི་ཕྱི་ཚུར་གྱི་སྐུའི་སྲས་ཏེ། ཡུམ་མདའ་མོ་གཙུག་ཏོར་དབང་ཕྱུག་བྱ་བ་ཇོ་མོར་བསུས་པ་ཞིག་མིན་ཀྱང་། རིགས་སྲས་གསང་བདག་ཉིད་བསྐྱེད་པར་ནུས་པའི་བུད་མེད་མཚན་ལྡན་དུ་དགོངས་ཏེ། རྟེན་འབྲེལ་སྒྲིགས་ནས་སྲས་བསྐྱེད་པའི་ཆོ་གས་ཚོགས་འཁོར་མཛད་པས་ལྷུམས་སུ་ཞུགས་པ་ན། མོ་ཐུ་བས་གྲྭ་པ་རྣམས་ལ་སྡང་བར་བྱས་པའི་རྐྱེན་གྱིས་ཐམས་ཅད་བགྲོས་ནས་འདོན་པར་བྱས་པ་ལ། སྐྱོ་སྟོན་ཤཱཀ་ཡེ་ན་རེ། འདིའི་སྲིན་ལག་ལ་བསྟན་པའི་གཙོ་བོ་ཞིག་འདུག་པ་ཁོ་བོ་ལ་རྨིས་པས། གལ་ཏེ་སྲས་འདྲ་བ་མཐོང་ན་འུ་ཅག་རྣམས་ལ་ཕན་ཐོགས་པ་ཞིག་འོང་སྲིད་པས་ཞོག་གསུངས་པ་ལྟར་མ་བཏོན་པར་བཞག་པས། ཤིང་ཕོ་སྟག་གི་ལོ་ལ་རྗེ་སྒྲོ་ཕུག་པ་འཁྲུང་། ཡབ་ཀྱི་ཞལ་ནས། སྐྱོ་སྟོན་གྱི་རྨི་ལམ་ཀྱང་བཟང་། ངའི་བུ་འདི་བསྟན་པའི་གཙོ་བོ་དང་ཚུལ་མཐུན་པ་འགྲོ་བ་ལ་ཕན་ཐོགས་པ་ཞིག་འོང་བར་འདུག་པས་མིང་ཡང་ཤཱཀྱ་སེང་གེར་ཐོགས་གསུངས། ཡུམ་གྱི་ཞལ་ནས། ངའི་བུ་འདི་ཞང་པོ་མདའ་ཏིག་གི་ཚ་ཡིན། མིག་རྩ་དྲུང་ཧོར་པའི་མིག་འདྲ་བས་མིང་མདའ་ཚ་ཧོར་པོར་ཐོགས་གསུངས། སྒྲོ་ཕུག་པ་འཁྲུངས་ནས་ཟླ་བ་བརྒྱད་སོང་བ་ན་ཡབ་སྐུ་གཤེགས་པས་ཡུམ་དང་ཞང་པོ་མདའ་ཏིག་གིས་བསྐྱངས་ཏེ་མདའ་ཕུར་ལོ་བཅོ་ལྔ་བཞུགས་ནས་སློབ་གཉེར་ལ་ནན་ཆགས་མཛད། དེ་ནས་ཆུ་བར་དུ་གླན་དང་སྐྱེད་ལུང་དུ་ཡང་ཁྱེད་ཀྱི་སར་བྱོན་ནས་ལོ་གསུམ་གྱི་བར་དུ་ཆོས་གསན། དགུང་ལོ་བཅུ་དགུ་ལ་ཆེ་འདོན་མཛད་དེ་མདོ་སྒྱུ་གཉིས་བཤད་པས་སྐུ་བསོད་རྒྱས་ཏེ། ཐུགས་གཉེར་གྱི་འཕྲོ་སྐྱོང་བའི་སྐབས་མ་བྱུང་། འོན་ཀྱང་སྐབས་བཙལ་ནས་གོང་བུར་སྐྱོའི་སར་ལོ་གཅིག་བྱོན། དེ་ནས་སྐུ་བསོད་ཇེ་རྒྱས་སུ་སོང་བས་གཞན་དུ་འབྱོན་པའི་སྐབས་མ་བྱུང་ནས་བླ་མ་རྣམས་ཚུར་གདན་དྲངས་ཏེ། གཞན་དོན་དང་སྦྲགས་ནས་སློབ་གཉེར་རྣམས་ཚར་བར་མཛད། དེ་ཡང་ཀ་བ་བཞི་ལ་བསྐྱེད་རྫོགས་གསུམ་སྒྲུབ་སྡེ་དང་བཅས་པའི་དབང་དང་རྒྱུད་བཤད་མན་ངག་ཕྲིན་སྒྲུབ་ཀྱི་ཕྱག་བཞེས་རྣམས་བུམ་པ་གང་བྱོའི་ཚུལ་དུ་གསན་ཞིང་། གླན་ཤཱཀ་བྱང་ལ་རྫོགས་ཆེན་སྐོར་ལུགས་དང་། ལྷ་རྗེ་ཤངས་པ་ནག་པོ་ལ་རྫོགས་ཆེན་བརྒྱུད་པ་ཐ་མའི་སྐོར་རྒྱུད་གདམས་ངག་དང་བཅས་པ་གསན། ཁྱད་པར་འདུས་པ་མདོའི་དབང་མདའ་ཕུར་མདའ་ཏིག་ཆོས་ཤཱཀ་དང་། ཆུ་བར་ལི་ཐུང་དུ་གླན་ལའང་གསན་མོད། གཙོ་བོར་མདོའི་ཀ་བ་ཡང་ཁྱེད་བླ་མ་ལ་གཏུགས་ཏེ། འདུས་པ་མདོའི་དབང་གི་ཆུ་བོ་བཞི་རྒྱུད་དང་མན་ངག་གི་ལུགས་ཡོངས་སུ་རྫོགས་པ་དང་། མདོའི་བཤད་པ་འགྲེལ་ཆེན་ལུགས། གཞན་ཡང་མདོའི་རྒྱུད་སྐོར་གདམས་ངག་དང་བཅས་པ་གསན་ནས་ཞུན་མཐར་བཅད། གསང་མཚན་དབང་ཕྱུག་རྫོགས་པ་རྩལ་དུ་གྲགས། བླ་མ་སོ་སོ་ལ་ཡུམ་རྒྱས་འབྲིང་བསྡུས་གསུམ་གྱིས་སྣ་དྲངས་པའི་ཡོན་གྱི་འབུལ་བ་དཔག་ཏུ་མེད་པས་མཉེས་པར་མཛད། འགྲེལ་པ་ལུང་བསྟན་མའི་ལུགས་སྣ་ནམ་ཚུལ་ཁྲིམས་བྱང་ཆུབ་ནས་མར་ཆུང་ལྷོ་བྲག་པ་ལ་བརྒྱུད་དེ། ལྷ་རྗེ་ཤངས་ཆུང་པ་དར་མ་བསོད་ནམས་ལ་རྒྱུན་ཡོད་པ་མཁྱེན་ཏེ་ཚུར་སྤྱན་དྲངས་ནས་གསན། དེ་ལྟར་ཐོས་བསམ་གྱི་སྒྲོ་འདོགས་ཆོད་རྗེས་ཉ་རི་སྒྲོ་ཕུག་ཏུ་ཕྱགས་ཕབ་ནས་སྒྲུབ་པ་མཛད་པས་ཉམས་རྟོགས་མཐར་ཕྱིན། སངས་རྒྱས་ཀྱི་ཞིང་དང་ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། སྣང་བ་དབང་དུ་འདུས་པས་ཐམས་ཅད་ཟིལ་གྱིས་ནོན། སྐབས་ཤིག་དཔོན་གཡོག་ལྔས་དིང་རིར་དམ་པ་རྒྱ་གར་གཟིགས་སུ་བྱོན་པས། དེར་ཕེབས་རྒྱུའི་ཉིན་དམ་པས། དེ་རིང་ཕྱག་ན་རྡོ་རྗེ་འདིར་འབྱོན་པར་ཡོད་པས་བསུ་བ་བགྱིས་པ་འཐད་གསུང་བ་ལ། ཉི་མ་ནུབ་ཀར་སྔགས་པ་ལྔ་བྱུང་སྟེ། དམ་པ་ལ་ཞུས་པས། དེ་བ་རང་དུ་གདའ་ཡི་གསུང་། དཔོན་སློབ་ལྔས་ཀྱང་དམ་པའི་མངོན ཤེས་བརྟག་ཕྱིར། གྲྭ་པ་གཉིས་སྔོན་དུ་བཏང་བའི་རྟིང་ལ་ལྷ་རྗེས་བྱོན་ནས་ཕྱག་མཛད་པས། དམ་པའི་གསུང་ནས། ཕྱག་སྣ་བནྡེ་ལྦ་བ་ཅན་གྱིས་དྲོངས། དཔོན་སློབ་གོ་མ་ལོག་པ་ལེགས་གསུང་། དམ་པ་ཤིན་ཏུ་མཉེས་པས་མན་ངག་ཟབ་མོ་ཞུས་ལན་གྱི་ཚུལ་དུ་བསྟན་ལ་གེགས་སེལ་སྒྲོན་མེ་ཞེས་བཏགས། དེ་ཡང་རྗེ་སྒྲོ་ཕུག་པ་འདི་ནི་གསང་བདག་ཕྱག་ན་རྡོ་རྗེ་ཉིད་གསང་སྔགས་ཀྱི་བསྟན་པ་རྒྱས་པར་མཛད་པའི་ཕྱིར་བྱོན་པས་གདུལ་བྱ་དཔག་ཏུ་མེད་པའི་དོན་མཛད་དེ། དབྱར་ཆོས་དགུན་ཆོས་སོགས་ཀྱི་དབྱེ་བ་མེད་པར་དུས་རྟག་ཏུ་ཕྱོགས་མེད་ཀྱི་སྐལ་ལྡན་འདུས་པ་ལ་ཆོས་འཁོར་བསྐོར་བས། རྒྱུད་ལ་དཔེ་འགྲེམས་སྟོང་ལྔ་བཅུ་ཙམ་གྱིས་ཉུང་མཐའ་བྱས་པ་ཁོར་མོར་བྱུང་། ལམ་སྙིང་པར་གསུམ་གྱི་ཕྱག་དཔེ་ཚར་སུམ་ཅུ་བསྐོར་ཡོད་ནའང་། མ་དཔེར་དུས་གཅིག་ལ་འགོ་མཇུག་ཚང་བ་སུས་ཀྱང་མི་ཐོབ། ཆོས་ཐུན་གྲོལ་དུས་ཀ་བ་ལི་བལྟབ་པའི་སྒྲོས་ཚོང་པའི་ཁལ་མ་འདྲོགས་པའང་བྱུང་སྐད། དབྱར་དགུན་གྱི་ཆོས་སྒང་ལ་རྒྱུད་གཏོར་རྒྱས་པ་རེ་མཛད་པར། ནས་ཁལ་བརྒྱ་ཙམ་གྱི་གཏོར་མ་དང་ཚོགས་འཁོར་གཏོང་། དེ་དུས་སྒྲོ་ཕུག་གི་རྒྱུད་གཏོར་ལྟད་མོ་ལ་འགྲོ་ཟེར་མཆོར་ཆས་དང་རྩེད་སྣའི་རྣམ་འགྱུར་ཇི་སྙེད་པ་དང་བཅས་པའི་འདུ་བ་ཆེན་པོ་འོང་། མདོར་ན་ལྷ་རྗེ་འདི་ལ་སློབ་མ་དགེ་བའི་བཤེས་གཉེན་གྲྭ་ས་འཛིན་ཞིང་བསྟན་པ་སྐྱོང་བའི་གདུགས་ཐོགས་སྟོང་ཐོན་ནས་གསང་སྔགས་ཀྱི་བསྟན་པ་དར་ཞིང་རྒྱས་པར་མཛད་དེ། ཉི་ཟླ་ལྟར་ཡོངས་སུ་གྲགས་པ་ཡིན་ནོ། །དེ་རྣམས་ཀྱི་ནང་ནས་ཀྱང་གཅེན་རྩགས་ཚ་རྡོ་རྗེ་འབར་གྱི་སྲས་རྩགས་ཚ་ཤཱཀ་རྡོར་ནི་ཁུ་བོ་སྒྲོ་ཕུག་པ་ལ་མངའ་བའི་ཆོས་ཐམས་ཅད་བུམ་པ་གང་བྱོའི་ཚུལ་དུ་མངའ་ཞིང་གདན་ས་བསྐྱངས་ནས་བཤད་སྒྲུབ་ཀྱི་སྲོལ་མི་ཉམས་པར་མཛད་པས་མཆོག་ཏུ་གྱུར་པ་ཡིན་ནོ། །གཞན་ཡང་ཐུགས་ཟིན་གྱི་སློབ་མ་བཞི་གསུམ་བཅུ་གཉིས་ལས། སྟོན་པ་བཞི་ནི། ཉེ་སྟོན་ཆོས་སེང་། གྱབས་སྟོན་རྡོ་རྗེ་མགོན། རྒྱ་སྟོན་འབྱུང་གནས། ཞང་སྟོན་རིན་ནེའམ། ཕྱི་མ་གཉིས་ཕྲི་ནས་ཁ་རག་སྟོན་སྙིང་དང་། གཉན་སྟོན་བཅུག་པའང་སྣང་ལ། ཡང་གཞན་སྔ་མ་དང་འདྲ་བ་ལས་ཞང་སྟོན་གྱི་ཚབ་ཏུ་མཁོན་སྟོན་གྲགས་པ་བགྲངས་པའང་ཡོད་དོ། །མེ་བཞི་ནི། གཡུ་སྟོན་ཧོར་པོ། སྤོང་སྟོན་ལྕགས་ཀྱུ། གཙང་པ་བྱིས་སྟོན། དབུས་པ་ཆོས་སེང་ངམ། ཕྱི་མ་གཉིས་ཕྲི་ནས་བྱ་སྟོན་རྡོ་རྗེ་གྲགས་དང་། ཤངས་པ་རྩེ་སེར་བ་བསྣན་པའང་ཡོད་དོ། །ནག་པོ་བཞི་ནི། ལྕེ་སྟོན་རྒྱ་ནག་པ་སྟེ་མཚན་དངོས་དམ་པ་ཤཱཀ་རྒྱལ། ཟུར་ནག་འཁོར་ལོ། །ཉང་ནག་ཇོ་མདོ། འདར་ནག་གཙུག་ཏོར་དབང་ཕྱུག་གམ། ཁ་ཅིག་ལྕེ་དཔལ་སེང་ཞེས་ཟེར་རོ། །ཡང་ཟུར་ཚོ་སྟོད་ལུགས་པ་རྣམས་ནི། བཅུ་གཉིས་པོའི་སྟེང་དུ་བླ་མ་བཞི་བསྣན་ནས་བཅུ་དྲུག་ཏུ་འདོད་དེ། ཤངས་ཀྱི་གླན་བླ་མ། རྟ་ནག་གི་སྒེར་བླ་མ། བྲམ་གྱི་རྩགས་བླ་མ། འོམ་ཁའི་དཔང་བླ་མ་རྣམས་སོ། །དུས་ལན་གཅིག་གི་ཚེ་རྗེ་སྒྲོ་ཕུག་པས། །སྟོན་པ་བཞི་ལ་ཚོགས་འཁོར་གྱི་ཆ་རྐྱེན་འདྲ་ཁྱེར་ལ་ཤོག །ངས་ཀྱང་ཁྱེར་ལ་འོང་གི་གསུངས་ནས། སྒྲོ་ཕུག་གི་ལྟག་ན་རི་སྤོ་ཏོ་ཞིག་ཡོད་པའི་ཁར་བྱོན་ནས་ཚོགས་འཁོར་བསྐོར། མན་ངག་ཟབ་མོ་འགའ་ཞིག་གསུངས་ནས། ཁྱེད་རྣམས་ང་མེད་པ་ལ་མྱ་ངན་མ་བྱེད་ཅིག །ད་རེས་ངས་ལུས་མ་སྤངས་པར་རིག་འཛིན་གྱི་ས་ལ་སོང་བ་འདིས། ཁྱེད་རྣམས་ལ་ཤུལ་དུ་བཀྲ་ཤིས་ཤིང་མི་བརྒྱུད་དང་བསྟན་པ་འཕེལ་བ་ཞིག་འོང་བ་ཡིན་གསུངས་ནས། མགུར་རེ་བཞེངས་ནས་ནམ་མཁའ་ལ་ཇེ་མཐོ་ཇེ་མཐོར་འཕགས་ཏེ། མཐར་ནམ་མཁའི་དབྱིངས་མིག་གིས་མི་མངོན་པའི་སར་གཤེགས། དེར་ཁོང་རྣམས་ཀྱིས་མ་བཟོད་པར་དུ་ཆོང་འདེབས་ཤིང་མཚན་ནས་བོས་པས། མར་བྱོན་ཏེ། ཁྱེད་རྣམས་ཞན། དེ་ལྟར་མི་བྱེད་པ་ཡིན་ཏེ། ངས་གོང་དུ་ཁ་ཆོས་ནི་ལེགས་པར་བཅུག །ད་རྟེན་འབྲེལ་འཆུགས་པས་ངའི་མི་བརྒྱུད་ལ་བཀྲ་ཤིས་པ་དང་དར་རྒྱས་ཆེན་པོ་མི་འོང་གསུངས། དེའི་ཕྱི་ལོ་དགུང་ལོ་རེ་གཅིག་པ་ཤིང་སྟག་ལ་ཇོ་མོ་ལ་ཅུང་ཟད་ཐུགས་ཚིག་རྐྱེན་གྱིས་སྒྲོ་ཕུག་གི་ལྕགས་རིར་ཕྱག་གིས་ཅབ་ཅབ་མཛད་ནས་ཁྱོད་ཀྱི་ནང་དུ་དུས་དེ་རིང་ནས་མི་སྡོད་གསུངས་ཏེ། གཙང་པོ་ཕ་ཁར་གཡང་ཆོས་དགོན་པར་བྱོན་མ་ཐག་གཟིམས་ཁང་དུ་ཕྱགས་ལྷྭམ་ཡ་གཅིག་ཕུད་པའི་བརྡ་མཛད་དེ་བསྙུང་བ་མེད་པར་སྐུ་འདའ་ཚུལ་བསྟན། སྤུར་སྦྱོང་བའི་དུས་སྔགས་པ་གཞོན་ནུ་ཞིག་གིས་རྟ་ངང་པ་དུང་རང་གུག་གི་སྒ་གཏད་པ་ཞིག་ཕུལ། འབུལ་མཁན་དེ་འདི་ཡིན་དང་། འདིར་སོང་མ་བྱུང་སྟེ་ལྷས་འདེགས་བསྐྱལ་བ་ཡིན་ཟེར། དེ་བཞིན་དུ་བཙན་དང་མ་མོ་དང་ཀླུས་ཀྱང་འདེགས་བསྐྱལ་བས་མི་ལ་མེད་པའི་ནོར་སྣ་བཞི་བྱུང་ཞེས་གྲགས་སོ། །དེས་འོག་གདོང་གི་ལྷ་རྗེ་འགར་སྟོན་ཟུང་དེ་ལ་བརྒྱུད་དེ། འདི་ནི་མདོ་སྒྱུ་སེམས་གསུམ་ཡང་ཕུར་མ་མོ་རྣམས་ལ་མཁས། འདུས་པ་མདོའི་དབང་ཡང་དང་པོར་ཆུ་བར་གྱི་གླན་ཤཱཀ་བཟང་དང་། ཉ་ཚལ་བ་གླན་ཤཱཀ་བྱང་ལའང་གསན་མོད། ཕྱིས་རྗེ་སྒྲོ་ཕུག་པ་ཆེན་པོའི་ཞབས་ལ་གཏུགས་ཏེ་ཆུ་བོ་བཞི་རྫོགས་ཀྱི་དབང་དང་། འདུས་པ་མདོའི་བཤད་པ་གདམས་ངག་དང་བཅས་པའང་གསན། གསང་མཚན་རྡོ་རྗེ་དྲག་པོ་རྩལ་དུ་བཏགས། ཤངས་མདའ་འོག་གདོང་གི་དབེན་གནས་སུ་སྒྲུབ་པ་ལ་བཞུགས་པས་ཞུ་བདེའི་ཡེ་ཤེས་འབར་ནས་རྟག་ཏུ་ཟག་མེད་ཀྱི་བདེ་བའི་ཉམས་དང་མི་འབྲལ། ཡེ་ཤེས་ཀྱི་མཁའ་འགྲོ་མས་དངོས་སུ་དབང་བསྐུར་ཞིང་བྱིན་གྱིིས་བརླབས། སྐབས་ཤིག་ང་འུག་པ་ལུང་དུ་བླ་མ་ཟུར་པའི་སྤྱན་སྔར་འགྲོ་གསུངས་ནས་ཐེགས་ཙ་ན། ས་གཡོས་ཤིང་སྒྲ་ཆེན་པོ་གྲགས། བལྟས་པས་ལྷ་རྗེ་འགར་རྩད་པོ་སྤུར་ཁའི་རིའི་ནམ་མཁའ་ལ་བསྐོར་བ་མཛད་ཀྱིན་འདུག་པ་ཀུན་གྱིས་མཐོང་། གཞན་ཡང་བྲག་ལ་ཕུར་བུ་བཏབ་པ་སོགས་རྫུ་འཕྲུལ་ལ་མངའ་བརྙེས་ཤིང་། ཟུར་པའི་ཕྲིན་ལས་གྱི་རྒྱུན་བསྐྱངས་པས་སྐལ་ལྡན་མང་པོ་སྨིན་གྲོལ་ལ་བཀོད་དོ། །དེས་འོག་གདོང་དུ་སྲེགས་སྟོན་རྡོ་རྗེ་རྒྱལ་མཚན་ལ་འདུས་པ་མདོའི་དབང་བསྐུར་ཞིང་རྒྱུད་གདམས་དང་བཅས་པ་བཤད། གསང་མཚན་རྡོ་རྗེ་འཇིགས་མེད་རྩལ་དུ་བཏགས། འདི་ནི་མཁྱེན་རྟོགས་གཉིས་ཀའི་ཕྱོགས་ནས་བླ་མའི་ཐུགས་ཟིན་པ་ཞིག་སྟེ། དབང་གི་ཆུ་བོ་བཞི་ཆར་གྱི་བཀའ་བབས། རྒྱུད་ལུང་མན་ངག་གསུམ་ལ་ཐུགས་སྦྱངས་པས་ཡོན་ཏན་ཆེན་པོ་དུ་མ་མངའ། ཁྱད་པར་དཀྱིལ་འཁོར་གྱི་བདག་པོ་མཛད་ནས་ཕྱག་བཞེས་ཐམས་ཅད་ཕུལ་དུ་གྱུར་པ་མཁྱེན། ཐོགས་པ་མེད་པའི་སྤྱན་དང་མངོན་ཤེས་མངའ། འཆུམས་ཀྱི་འཆད་འགོ་དགོན་པར་བཞུགས་ནས་བཤད་སྒྲུབ་ཀྱི་ཕྲིན་ལས་རྒྱ་ཆེར་བསྐྱངས་སོ། །དེས་གླན་སྟོན་ཆེན་པོ་རྡོ་རྗེ་འོད་ལ་བཤད་དེ། འདི་ནི་ཤངས་ཉ་ཚལ་དུ་གླན་གྱི་རིགས་སུ་འཁྲུངས། གཙང་ནག་པ་སོགས་མཁས་པ་མང་པོའི་དྲུང་དུ་མཚན་ཉིད་ཀྱི་གཞུང་ལུགས་རྣམས་དང་། ཐུན་མོང་གི་རིག་གནས་ལའང་མཁས་པར་སྦྱངས། རྩགས་ཚ་ཤཱཀ་འབྱུང་། ཁ་རག་སྟོན་སྙིང་། གཉོས་ཆུ་བོ་རི་པ་དར་མ་རྡོ་རྗེ། ཤངས་པ་ནག་པོ་སོགས་བླ་མ་མང་པོ་བསྟེན་ནས་གསང་སྔགས་ཕྱི་ནང་གི་དབང་གདམས་ངག་བཤད་བཀའ་མཐའ་ཡས་པ་གསན་པས་རྒྱུད་ལུང་མན་ངག་ཐམས་ཅད་ཀྱི་བདག་པོར་གྱུར། ཁྱད་པར་འཆུམས་ཀྱི་འཆད་འགོ་དགོན་པར་སྲེགས་སྟོན་རྡོ་རྗེ་རྒྱ་མཚན་ལ་འདུས་པ་མདོའི་དབང་ཡོངས་སུ་རྫོགས་པ་གསན་ཞིང་། ཡོན་ཏུ་གཡུ་མོ་ཆེས་སྣ་དྲངས་པའི་ཟང་ཟིང་གི་དངོས་པོས་མཆོད། གསང་མཚན་རྡོ་རྗེ་དྲག་པོ་རྩལ། བླ་མ་དེ་ཉིད་དང་། གཞན་ཡང་སྟོན་སྙིང་། ལྡན་མ། རྩགས་ཚ། སུམ་པ། སྐྱ་རྣམས་ལ་མདོའི་བཤད་པ་མན་ངག་དང་བཅས་པ་གསན། ཤར་རི་རྒྱ་གར་གླིང་ཆུང་དུ་སྒྲུབ་པ་མཛད་པས་གསན་ལུགས་ཀྱི་ལྟ་བ་རྟོགས། ཞུ་བདེའི་ཡེ་ཤེས་འབར། སྣང་འབྱེད་ཀྱི་ཏིང་འཛིན་ཐོབ། ཕྱག་ན་རྡོ་རྗེས་ཞལ་མངོན་དུ་བསྟན་ནས་དབང་བསྐུར་ཞིང་ལུང་བསྟན། ཆོས་ཀྱི་མིག་རྡུལ་བྲལ་བརྙེས་པས་གཞན་གྱི་རྒྱུད་ཚོད་མཁྱེན། ལུང་རིགས་སྨྲ་བ་ལ་འགྲན་གྱི་དོ་མེད་དུ་གྱུར་པས་དཔལ་གསང་ཕུ་ནེའུ་ཐོག་གི་གདན་སར་སྤྱན་དྲངས་ཀྱང་། སྔགས་ཀྱི་བཤད་སྒྲུབ་དོན་ཆེ་བར་གཟིགས་ནས་མ་བྱོན། ཉ་ཚལ་རི་མཐིལ་སོགས་སུ་ཆོས་གྲྭ་ཁོར་མོར་བསྐྱངས་ཏེ་བསྟན་པ་རྒྱས་པར་མཛོད། ཞིང་འདིའི་གདུལ་བྱ་རྫོགས་ནས་ཤམྦྷ་ལར་གཤེགས་པ་ཡིན་ནོ། །དེས་རང་གི་སྐུའི་སྲས་སྤྲུལ་སྐུ་བརྩོན་འགྲུས་སེང་གེ་དང་། གླན་སྟོན་བསོད་ནམས་རྒྱལ་པོ་གཉིས་པ་ཉ་ཚལ་དུ་ཆུ་བོ་བཞིའི་དབང་བསྐུར་ཞིང་། རྒྱུད་བཤད་གདམས་ངག་དང་བཅས་པ་གནང་། དེ་ལ་གླན་བརྩོན་འགྲུས་སེང་གེ་ནི། རྟེན་རབ་བྱུང་ཡིན། གསང་མཚན་རྡོ་རྗེ་དྲག་པོ་རྩལ། གཟང་ཐང་སྐྱར་ཞིག་པོ་བདུད་རྩིའི་གདན་ས་མཛད་ཅིང་། ཞིག་པོའི་ཕྱི་རྟེན་དུ་ཐང་སྐྱ་འབུམ་མོ་ཆེ་བཞེངས་པ་སོགས་ཕྲིན་ལས་རྒྱ་ཆེ། གླན་བསོད་རྒྱལ་གྱི་གསང་མཚན་ཕྲིན་ལས་མཐར་ཕྱིན་རྩལ། འདིས་རང་གི་ཡབ་ཀྱིས་ཐོག་དྲངས་པའི་བླ་མ་མང་པོ་ལ་གཏུགས་ཏེ། མདོ་སྔགས་ཀྱི་ཆོས་ཐམས་ཅད་ལ་མཁས་པའི་གནས་ཐོབ། སྐུ་ཚེ་སྔ་མར་ཤེས་རྒྱུད་འབྱོངས་པ་ཉིད་འདིར་ཡང་སྒྲུབ་པ་ལ་བརྩོན་པས་སད་དེ། ཡི་དམ་གྱི་ལྷས་དངོས་སུ་དབང་བསྐུར། དབང་གི་ཆུ་བོ་རྫོགས་པས་དེ་བཞིན་གཤེགས་པ་རྣམས་ཀྱིས་ལུང་སྟོན། གནས་ལུགས་ཇི་བཞིན་པ་ཐུགས་སུ་ཆུད། བཤད་སྒྲུབ་གང་ལའང་བར་ཆད་ཀྱིས་མི་ཚུགས། གདུལ་བྱ་ཐམས་ཅད་སྨིན་གྲོལ་ལ་བཀོད། ཁྱད་པར་མདོ་དབང་ཡབ་ལ་གསན་ནའང་། གཏད་རྒྱ་གསན་མ་ཐུབ་པས་ཕྱིས་ཡབ་ཀྱི་སློབ་མ་རིག་འཛིན་ཆོས་ཀྱི་སྡོང་པོ་དཀོན་མཆོག་རིན་ཆེན་ལ་གསན་ཞིང་དད་གུས་ཆེན་པོས་བཀུར་བར་མཛད། སྡོང་པོ་དཀོན་རིན་དེའང་ཕྲིན་ལས་ལ་ཐོགས་པ་མེད་ཅིང་། ཆོས་ཐམས་ཅད་སྒྱུ་མ་ལྟ་བུར་གཟིགས་པས་མངོན་ཤེས་ལ་དབང་འབྱོར་བ་ཡིན་ནོ། །གླན་བསོད་རྒྱལ་གྱིས་གུ་ལང་དཔལ་གྱི་དགོན་པར་སྤྲུལ་སྐུ་ལྷ་རྗེ་ལྷ་འབུམ་ལ་ཆུ་བོ་བཞིའི་དབང་བསྐུར་ཞིང་རྒྱུད་གདམས་ངག་དང་བཅས་པ་བཤད། གསང་མཚན་རྡོ་རྗེ་དྲག་པོ་རྩལ། རྒྱུད་ལུང་མན་ངག་ཐམས་ཅད་ལ་མཁས་པས་འཆད་ཕྲིན་གྱིས་བློ་གསལ་མང་པོའི་མིག་ཕྱེ། གྲུབ་པའི་ཉིན་གཅིག་ལའང་སྐུའི་བཀོད་པ་དུ་མ་བསྟན་ནས། ཤངས་ཀྱང་ཁང་དང་། ཉང་སྟོད་ལྕོག་སྤེ་ལ་སོགས་པའི་ལྷ་ཁང་བཅུ་གསུམ་གྱི་རབ་གནས་དུས་གཅིག་ལ་མཛད། སྐུ་གཤེགས་པའི་དུས་སུ་ཡང་ཉ་ཚལ་དུ་ཆོས་འཆད་པ། གཙང་པོའི་ཆབ་ཁར་ཆུ་སྒྲོལ་བ། ཚོང་འདུས་སུ་ཉོ་ཚོང་མཛད་པ་གསུམ་དུས་གཅིག་ལ་བསྟན། མངོན་སྤྱོད་ལ་དུས་བཏབ་ཆོག་པས་དྲག་པོའི་ཕྲིན་ལས་ལ་མངའ་བརྙེས་སོ། །དེས་གླན་ཆོས་ཀྱི་སེང་གེ་ལ་དབང་བསྐུར་ཞིང་བཤད་པ་དང་གདམས་ངག་བསྟན། གསང་མཚན་རྡོ་རྗེ་དྲག་པོ་རྩལ། ཉེ་བརྒྱུད་ལ་འདིས་གླན་བསོད་རྒྱལ་ལའང་དབང་གསན། མདོ་སྔགས་སྤྱི་དང་ཁྱད་པར་རྒྱུད་ལུང་མན་ངག་ལ་མཁས་པར་སྦྱངས། བསྐྱེད་རྫོགས་ཀྱི་དོན་བསྒོམས་པས་རྟོགས་པ་གདེངས་སུ་གྱུར་ཅིང་། ཏིང་ངེ་འཛིན་ལ་དྲོད་ཐོབ། དུས་དེའི་དགེ་བཤེས་སྔགས་པ་ཀུན་གྱིས་བཏུད་ཅིང་བཀུར་ཞེས་གྲགས་སོ། །དེས་ཤར་རི་རྒྱ་གར་གླིང་དུ་གླན་སྟོན་སངས་རྒྱས་དཔལ་ལ་དབང་བསྐུར་ཞིང་རྒྱུད་བཤད་མན་ངག་དང་བཅས་པ་སྩལ། རབ་བཤད་སྒྲུབ། འབྲིང་ལུས་ངག་གི་སྤྱོད་ལམ། ཐ་མ་ཟང་ཟིང་གསུམ་ཀའི་སྒོ་ནས་ཐུགས་ཟིན། གསང་མཚན་རྡོ་རྗེ་བདེ་བྱེད་རྩལ་དུ་བཏགས། སྤྱིར་མདོ་སྔགས་ཐམས་ཅད་ལ་མཁྱེན་རབ་ཀྱི་རྩལ་ཐོན། དམ་པའི་མཛོད་གསུམ་འཛིན་ཞིང་དབང་གི་ཆུ་བོ་རྫོགས། བླ་མ་དམ་པའི་ཕྱག་བཞེས་ལ་རང་བྱན་ཆུད། ཁྱད་པར་མདོ་དབང་ཟུར་ལུགས། གླན་ལུགས། སེ་ལུགས། ཞང་ལུགས་ཐམས་ཅད་གསན་ཞིང་མཁྱེན། རྫ་ལུང་དཔལ་གྱི་དགོན་པ་ལ་སོགས་པར་བཤད་སྒྲུབ་ཀྱི་ཕྲིན་ལས་རླབས་པོ་ཆེས་བསྟན་པ་གསལ་བར་མཛད་དོ། །དཔལ་ལྡན་ཆོས་སེང་དང་སངས་རྒྱས་དཔལ་གཉིས་ཀྱིས་གླན་སྟོན་བསོད་ནམས་མགོན་པོ་ལ་ཆུ་བོ་བཞི་རྫོགས་ཀྱི་དབང་བསྐུར་ཞིང་བཤད་སྒྲུབ་ཕྱག་བཞེས་དང་བཅས་པ་བུམ་པ་གང་བྱོའི་ཚུལ་དུ་གནང་། གསང་མཚན་རྡོ་རྗེ་དྲག་པོ་རྩལ་ལམ་ཐིག་ལེ་དྲག་པོ་རྩལ་དུ་གྲགས། འདིའི་ཡབ་ལྷ་རྗེ་ལྷ་འབུམ་ཡིན་ཀྱང་མདོ་དབང་ཁུ་བོ་གཉིས་ལ་གསན་དགོས་པ་བྱུང་། ཡང་གླན་རྡོ་རྗེ་འོད་ནས་ཉེ་སྟོན་ལ་བརྒྱུད་དེ་ཞང་སྟོན་ཀུན་དགའ་འབུམ་ལའང་གསན་ཞེས་འབྱུང་ཞིང་། ཁ་ཅིག་འདི་གཏད་རྒྱའི་བརྒྱུད་པ་ཡིན་ཞེས་ཀྱང་གསུང་། དེ་ཡང་དང་པོར་བླ་མ་འཕགས་པའི་དྲུང་དུ་གཙུག་ཕུད་ཕུལ་ཞིང་དགེ་བསྙེན་གྱི་སྡོམ་པ་གསན། གྲུ་རྡོ་རྗེ་སེང་གེ་ལ་བརྟེན་ནས་ཀླུ་གདོན་གྱི་རྟོག་པ་ལས་གྲོལ། ཤེས་བྱ་ཐམས་ཅད་ལ་སྦྱངས་པས་ཕྱོགས་མེད་དུ་མཁྱེན། ཁྱད་པར་བསྐྱེད་རྫོགས་གསུམ་ལ་མཁས་པའི་གྲགས་པ་ཐོན། བསྙེན་སྒྲུབ་ལས་གསུམ་མཐར་ཕྱིན་པས་རྟག་ཏུ་ཏིང་ངེ་འཛིན་གྱི་དགོངས་པ་ལས་གཞན་དུ་མི་གཡོ་ཞིང་། མཚན་མོའི་དུས་སུའང་སྐུ་སྲངས་ཏེ་བསམ་གཏན་གྱི་འདུག་སྟངས་ཁོ་ནར་བཞུགས། རྨི་ལམ་འབྱོངས་པས་སྤྲུལ་སྒྱུར་ནུས། མདོ་མགོན་ལེགས་ལྡན་ཆེད་དུ་མ་བསྒྲུབས་ཀྱང་ཤིན་ཏུ་འགོ་བས་འགལ་བྱེད་རྣམས་ཚར་གཅོད་པའི་རྟགས་ཕྲལ་དུ་སྟོན། སློབ་དཔོན་ཆེན་པོ་པདྨའི་ལུང་བསྟན་བཞིན་བསམ་ཡས་པེ་ཧར་གླིང་ནས་ཟབ་ཆོས་ཤོག་དྲིལ་བཅོ་ལྔ་གཏེར་ནས་བཏོན་ཏེ་བླ་མ་སྨན་ལུང་དབུས་པ་ལ་གནང་། འདུས་པ་མདོའི་དབང་ལན་བཅུ་གཅིག་དང་། དགོངས་འདུས་ཀྱི་བཤད་པའང་མང་དུ་མཛད། གཞན་ཡང་སྒྱུ་འཕྲུལ་ཞི་ཁྲོ། དོང་སྤྲུགས། ཡང་དག་སོགས་ཀྱི་དབང་དང་གདམས་ངག་བཤད་པ་ཕྱག་བཞེས་དང་བཅས་པས་གདུལ་བྱ་མཐའ་ཡས་པའི་དོན་མཛད་དོ། །དེས་འཇམ་དཔལ་བསམ་འགྲུབ་རྡོ་རྗེ་རྗེས་སུ་བཟུང་སྟེ། འདིའི་གདུང་རུས་འབྲོ་ཡབ་འབུམ་འཕེལ་གྱི་སྲས་སུ་ཤིང་ཕོ་རྟའི་ལོ་ལ་རྟ་ནག་གནས་གསར་དུ་འཁྲུངས། ཟུར་བྱམས་པ་སེང་གེ་ལ་གཙོ་བོར་བརྟེན་ཅིང་། ཟུར་བདེ་བྱེད་མགོན་པོ་དང་མདའ་ཤཱཀྱ་འཕེལ་ལའང་ཞར་ཆོས་སུ་གསན་ཏེ། གསང་སྙིང་གི་རྒྱུད་དང་ལམ་རིམ་ཆེན་མོའི་བཤད་པ་གདམས་ངག་དང་བཅས་པ་ལ་མཁས་པའི་མཆོག་ཏུ་གྱུར། གཞན་ཡང་སེམས་སྡེ་སོགས་ཆོས་མཐའ་ཡས་པ་གསན་ཞིང་ཆུབ་པར་མཛད། ཆོས་ལུང་མཁན་ཆེན་བསོད་ནམས་གྲགས་ལ་ཡོངས་རྫོགས་དགེ་བསྙེན། སློབ་དཔོན་ཀུན་དགའ་བཟང་པོར་ཕར་ཚད་སོགས་མཚན་ཉིད་ཀྱི་གཞུང་ལུགས་དང་བདེ་དགྱེས་ཀྱི་སྐོར། བྱང་སེམས་རྒྱལ་ཡེ་ལ་སྦྱོར་དྲུག །མཁས་བཙུན་བསོད་ནམས་བློ་གྲོས་ལ་སྙིང་ཐིག་རྣམ་གཉིས་དང་རྒྱུད་འབུམ་ལ་སོགས་པ། གཞན་ཡང་ཉང་སྟོན་རྡོ་རྗེ་སེང་གེ། མཁས་བཙུན་དཀོན་མཆོག་དབང་པོ། སྐྱི་མཁར་ཀུན་གསལ་བ་བླ་མ་ཀུན་རྡོར་སོགས་མཁས་གྲུབ་ཀྱི་བླ་མ་མང་པོ་བསྟེན་ནས་གསར་རྙིང་གི་ཆོས་དཔག་ཏུ་མེད་པ་གསན། ཁྱད་པར་ཤངས་ཉ་ཚལ་ལྷུན་གྲུབ་སྡིངས་སུ་གླན་སྟོན་བསོད་ནམས་མགོན་པོ་ལ་འདུས་པ་མདོའི་དབང་གསན། དབང་གོས་སྔོན་པོ་དང་གན་གོས་ཀྱི་བེར་སོགས་ཀྱི་དབང་ཡོན་རྒྱས་པར་བསྟབས། གསང་མཚན་རྡོ་རྗེ་བདེ་ཆེན་རྩལ་ཞེས་བཏགས། བླ་མ་ཉིད་དཀྱིལ་འཁོར་གྱི་གཙོ་བོར་གཟིགས་ཤིང་ལྷ་ཚོགས་རྣམས་རང་གི་ཐུགས་ཀར་ཐིམ་པའི་གསལ་སྣང་དང་། བྱིན་ཕེབས་པས་བདེ་གསལ་མི་རྟོག་པའི་ཉམས་ཁྱད་པར་ཅན་འཁྲུངས། བླ་མ་འདི་ལ་སྒྱུ་འཕྲུལ་ཞི་ཁྲོ་དང་དོང་སྤྲུགས་ཡང་དག་ལ་སོགས་པའི་དབང་དང་། མདོ་དགོངས་འདུས་ཀྱི་བཤད་པ་རྒྱས་པ་སོགས་རྒྱུད་ལུང་མན་ངག་གི་སྐོར་མང་དུ་གསན། གཏད་རྒྱ་གསན་པ་མ་གྲུབ་པས་ཕྱིས་གླན་གྱི་ཕྱི་ཚར་གྱི་སློབ་མ་ཤངས་གྱང་ཁང་པ་གཟི་སྟོན་ཤཱཀྱ་བཟང་པོ་ལ་གཏད་རྒྱ་དང་མདོ་ཡོངས་རྫོགས་ཀྱི་ཕྱག་བཞེས་གསན། དེ་ལྟར་ཐོས་བསམ་གྱི་སྒྲོ་འདོགས་ཆོད་ནས། བྱེ་མ་སེང་གེར་སྙིང་ཐིག་ལ་ཐུགས་དམ་མཛད་པས་ཐིག་ལེ་ཆེན་པོའི་སྐུར་གྱུར་ནས་བདེ་བ་ཅན་སོགས་སངས་རྒྱས་ཀྱི་ཞིང་མང་པོར་བྱོན་པ་དང་། ཡིག་བརྒྱའི་སྒྲུབ་པ་ལ་བཞུགས་པའི་ཐོ་རེངས་ཀྱི་དུས་ཤིག་སྒྲུབ་ཁང་འོད་ཀྱི་དྲྭ་བས་ཁྱབ་པའི་དབུས་སུ་དམ་པ་རིགས་བརྒྱ་པདྨ་བརྒྱ་ལྡན་གྱི་དཀྱིལ་འཁོར་ཡོངས་རྫོགས་ཀྱི་ཞལ་གཟིགས་པ་དང་། གཙུག་ཏོར་འཁོར་ལོ་སྒྱུར་བ་ལ་ཐུགས་དམ་མཛད་དུས་སྣང་སྲིད་འཁོར་ལོ་རྩིབས་བཅུར་གྱུར་པའི་ལྟེ་བར་རང་ཉིད་གཙུག་ཏོར་འཁོར་ལོ་སྒྱུར་བར་དངོས་སུ་སྣང་ཞིང་རྩིབས་ཀྱི་ཁྲོ་བོ་རྣམས་ཀྱང་ཤིན་ཏུ་གསལ་བ་དང་། གཞན་ཡང་འཇམ་དབྱངས་སྨྲ་སེང་། ཚེ་དཔག་མེད་སོགས་ལྷག་པའི་ལྷ་མང་པོའི་ཞལ་གཟིགས། དགུང་ལོ་ཉི་ཤུ་རྩ་བཞི་ནས་བཟུང་རྒྱུད་ཀྱི་བཤད་གྲྭ་མ་ཆགས་པ་སོགས་བཤད་སྒྲུབ་ཀྱིས་བསྟན་པ་རྒྱས་པར་མཛད་དེ་བརྒྱད་ཅུ་གྱ་གཉིས་བཞེས་པ་ཤིང་ཡོས་དབོ་ཟླའི་ཉེར་བདུན་གྱི་ཉིན་རང་གི་སྲས་ལ། ང་བདེ་བ་ཅན་དུ་འགྲོ། ཉིད་ཀྱང་བརྒྱད་ཅུ་རྩ་གཉིས་ཐུག་བར་འདུག་སྟེ། དེ་ནས་བདེ་བ་ཅན་དུ་ཤོག་གསུངས་ནས་གཤེགས་སོ། །དེ་ལ་སློབ་མ་ཟུར་སེང་གེ་དཔལ། ཟུར་ཤཱཀ་འབྱུང་ཁུ་དབོན། ཐག་པ་ཤཱཀྱ་རྒྱལ་མཚན་དང་ཤཱཀྱ་རྡོ་རྗེ་སོགས་བསླབ་རྫོགས་ཀྱི་སློབ་མ་ཤིན་ཏུ་མང་ཡང་། མདོ་དབང་ནི་རང་གི་སྲས་སངས་རྒྱས་རིན་ཆེན་དང་། ཟུར་ཧམ་ལྕམ་སྲིང་གཉིས་ནས་གྱེས་པའི་རྒྱུད་ལུགས་གསུམ་བྱུང་བ་ལས། དང་པོ་རང་གི་སྲས་ལས་བརྒྱུད་ཚུལ་ནི། སྒྲོལ་ཆེན་སངས་རྒྱས་རིན་ཆེན་རྒྱལ་མཚན་དཔལ་བཟང་པོ་འདི་འཇམ་དབྱངས་བསམ་གྲུབ་རྡོ་རྗེའི་སྲས་སུ་ལྕགས་སྟག་གི་ལོ་ལ་རྟ་ནག་གནས་གསར་དུ་འཁྲུངས། དགུང་ལོ་དྲུག་པ་ལ་གསང་སྙིང་གི་རྒྱུད་ཐུགས་སུ་ཆུད། བརྒྱད་པ་ལ་གསང་སྙིང་རྒྱ་འགྲེལ་སྤར་ཁབ་དང་བཅས་པ་མཁས་པར་མཁྱེན། མདོར་ན་མདོ་སྒྱུ་སེམས་གསུམ་ཡང་ཕུར་མ་གཤིན་བདུད་རྩི་སོགས་ཡབ་ལ་བཞུགས་པའི་ཆོས་ཐམས་ཅད་བུམ་པ་གང་བྱོའི་ཚུལ་དུ་མངའ་ཞིང་། ཁྱད་པར་མདོའི་ཆུ་བོ་བཞིའི་དབང་གཏད་རྒྱ་བཤད་པ་གདམས་ངག་ཕྱག་བཞེས་དང་བཅས་པ་རྫོགས་པར་གསན། གསང་མཚན་རྡོ་རྗེ་ཐུགས་མཆོག་རྩལ་དུ་བཏགས། བཅོ་བརྒྱད་པ་ལ་རྒྱལ་སྲས་ཐོགས་མེད་པར་ཡོངས་རྫོགས་དགེ་བསྙེན་དང་བློ་སྦྱོང་། གཞན་ཡང་ཟུར་ཧམ་ལྕམ་སྲིང་། ཀུན་དགའ་ལེགས་པ། གྲུབ་ཆེན་མགོན་པོ་དཔལ། བདག་ཆེན་ཀུན་དགའ་བཀྲ་ཤིས། རྗེ་བློ་བཟང་གྲགས་པ་སོགས་མཁས་གྲུབ་ཀྱི་བླ་མ་མང་པོ་ལ་གསར་རྙིང་གི་དབང་ལུང་བཤད་པ་གདམས་ཁྲིད་སོགས་གསན་ནས་ཐུགས་སུ་ཆུད་པར་མཛད། གཞོན་ནུའི་དུས་ནས་རབ་ཏུ་བྱུང་སྟེ་མཚན་ཉིད་ཀྱི་གྲྭར་གཤེགས་པར་བཞེད་པ་ལ། སྲས་གཞན་མེད་པས་ཡབ་ཀྱི་བཀའ་མ་ཁྲོལ་ཏེ། ཉི་ཤུ་རྩ་དྲུག་པ་ལ་མ་གཅིག་འཇམ་དཔལ་འབུམ་ཁབ་ཏུ་བསུས་པར་སྲས་ལྕམ་སྲིང་རྣམས་འཁྲུངས། ང་བདུན་པ་ལ་ཁྱིམ་སྤངས་ཏེ་ཆོས་འཁོར་སྒང་དུ་ལོ་ཆེན་སྐྱབས་མཆོག་པའི་དྲུང་དུ་ཆིག་རྫོགས་མཛད་ཅིང་། ལུང་དང་མདོ་རྩ་སོགས་ཞིབ་ཏུ་གསན་ནས་གནང་བཀག་གི་བསླབ་བྱ་ལ་མཁས་པར་གྱུར། སྒྲུབ་པ་མཛད་པའི་ཚུལ་ཀྱང་དགུང་ལོ་སོ་ལྔ་པའི་དུས་བདེ་ཆེན་སྒྲོལ་མར་སྐུ་མཚམས་ལ་བཞུགས་ནས་ལོ་གཅིག་སོང་བ་དང་ནམ་ལངས་ཀར་གཟིམས་ཁང་འོད་ཀྱི་དྲྭ་བས་ཁེབས་པའི་དབུས་སུ་ཚེ་དཔག་མེད་ཀྱི་ཞལ་མངོན་དུ་བསྟན་ནས་ཕྱི་མ་བདེ་བ་ཅན་དུ་འཁྲུངས་པར་ལུང་བསྟན། གཞན་ཡང་ཡི་དམ་གྱི་ལྷ་དུ་མའི་ཞལ་གཟིགས་པ་དང་། འཇམས་དཔལ་ཕྱག་རྒྱ་ཟིལ་གནོན་གྲུབ་སྟེ་མཐུ་སྟོབས་ལ་ཐོགས་པ་མེད། མགོན་པོ་ལེགས་ལྡན་གྱིས་ལས་སྒྲུབ་པ་སོགས་ཡོན་ཏན་མཐའ་ཡས། གསང་སྙིང་དང་ལམ་རིམ་འགྲེལ་ཆེན་སོགས་བསྟན་བཅོས་ཀྱི་རྩོམ་པ་དང་། བཤད་སྒྲུབ་ཀྱི་ཕྲིན་ལས་རྒྱུན་མི་ཆད་དུ་བསྐྱངས་པས། མཁས་བཙུན་ཆོས་གྲགས་དཔལ་བཟང་། དགེ་བསྙེན་རྡོ་རྗེ་འཛིན་པ་ནམ་མཁའ་རྒྱལ་མཚན་སོགས་སྐུའི་སྲས་མཆེད་ལྔ་དང་། འགོས་ལོ་ཙཱ་བ་ཆེན་པོ་གཞོན་ནུ་དཔལ། ཐག་པ་ནམ་མཁའ་སངས་རྒྱས། སོ་སྟོན་ཧཱུཾ་ཀ་ར་སོགས་བསླབ་རྫོགས་ཀྱི་སློབ་མ་མཐའ་ཡས་པ་དང་། གཞན་ཡང་རྫོང་པ་ཀུན་དགའ་རྒྱལ་མཚན། སྣར་ཐང་པ་ཤེས་རབ་སེང་གེ། པཎ་ཆེན་དགེ་འདུན་གྲུབ་སོགས་བསྟན་པ་ཡོངས་རྫོགས་ཀྱི་བཤེས་གཉེན་མང་པོར་ཡང་ཕུར་པ་ཚེ་བདག་རྟ་མགྲིན་ལ་སོགས་པའི་དབང་ལུང་གིས་བསྐྱངས་ཤིང་། གོང་མ་དབང་གྲགས་རྒྱལ་དང་། ཆུ་མིག་བདག་ཆེན། རིན་སྤུངས་པ། ཡར་རྒྱབ་པ། སྣེལ་པ། ཆུ་ཤུལ་སྟོང་དཔོན་སོགས་དབུས་གཙང་གི་སྡེ་དཔོན་ཐམས་ཅད་ཀྱིས་ཀྱང་ཞབས་ལ་བཏུད་དེ་དབང་དང་གདམས་ངག་མང་དུ་ཞུས། ལྕགས་ཕག་བརྒྱད་ཅུ་གྱ་གཉིས་བཞེས་པ་ན་བཀའ་ལས། ཕ་རྒོད་འཇམ་དབྱངས་བསམ་གྲུབ་རྡོ་རྗེ་ཕེབས་བྱུང་། བུ་ང་ནི་བདེ་བ་ཅན་གྱི་ཞིང་དུ་འགྲོ་བའི་དུས་ལ་བབ་གསུང་བས། ང་མི་རྒན་ཡང་བདེ་བ་ཅན་དུ་འགྲོ་བར་འདུག་གསུངས་ནས་སྐུ་གཤེགས་ཤིང་། དབུ་ཐོན་རིལ་པོ་ཧོར་དཀོན་མཆོག་རིན་ཆེན་གྱིས་འཕྱོང་རྒྱས་སྟག་རྩེར་སྤྱན་དྲངས་ཏེ་དངུལ་གྱི་མཆོད་རྟེན་བཞེངས་པར་བཞུགས་སུ་གསོལ་ལོ། །དེས་ཞང་སྟོན་ནམ་མཁའ་རྡོ་རྗེ་ལ་བརྒྱུད་དེ། འདི་ནི་སྒྲོལ་མ་བ་ཡབ་སྲས་གཉིས་ཀའི་བསླབ་རྫོགས་ཀྱི་སློབ་མ་མཁས་པ་ཞིག་སྟེ། འཇམ་དབྱངས་བསམ་གྲུབ་རྡོ་རྗེ་གཤེགས་པའི་མཆོད་འབུལ་ལ། བུ་ཆེན་གྱི་མཆོག་ཏུ་གྱུར་པའི་བླ་མ་རྣམས་ཀྱིས་དབུ་མཛད་པའི་ཆོག་གྲྭ་བཅུ་བཞི་ཙམ་བསྒྲུབས་པའི་བུ་ཆེན་འདྲེན་དུས་བླ་མ་ཟུར་ཆེན་པ་དང་། བླ་མ་གནམ་སྡིངས་པ་དང་། ཞེས་རྣམ་ཐར་དུ་གྲངས་པ་དེ་ཡིན། ཁྱད་པར་མདོ་དབང་གཏད་རྒྱ་བཤད་པ་གདམས་ངག་དང་བཅས་པ་སྲས་སངས་རྒྱས་རིན་ཆེན་ལ་བདེ་ཆེན་སྒྲོལ་མར་གསན། གསང་མཚན་རྡོ་རྗེ་དྲག་པོ་རྩལ་དུ་བཏགས། རྒྱུད་ལུང་མན་ངག་སྒྲུབ་སྡེ་དང་བཅས་པ་ཐམས་ཅད་ལ་མཁས། རྟ་ནག་གནམ་སྡིངས་ཀྱི་སྒྲུབ་ཁང་དུ་ཉམས་ལེན་ལ་གཙོ་བོར་སྒྲིལ་བས་རླུང་སེམས་ལ་བརྟན་པ་ཐོབ། བསྐྱེད་རྫོགས་ཀྱི་དགོངས་པ་མངོན་དུ་གྱུར། ཕྲིན་ལས་བཞི་ལ་དབང་འབྱོར་བས་གདུལ་བྱའི་དོན་མཛད་དོ། །དེས་མཁས་གྲུབ་ཤ་མི་རྡོ་རྗེ་རྒྱལ་མཚན་ལ་གནམ་སྡིངས་དཔལ་གྱི་སྒྲུབ་ཁང་དུ་དབང་བསྐུར་ཞིང་བཤད་པ་གདམས་ངག་དང་བཅས་པ་གནང་། གསང་མཚན་རྡོ་རྗེ་དྲག་པོ་རྩལ། དབེན་གནས་བདེ་ཆེན་དུ་སྒྲུབ་པ་ལ་བཞུགས་པས་བསྐྱེད་རིམ་ལ་བརྟན་པ་ཐོབ་སྟེ་ལས་བཞི་ཐོགས་མེད་དུ་འགྲུབ། རྫོགས་རིམ་གྱི་ཉམས་རྟོགས་མཐར་ཕྱིན། བཤད་སྒྲུབ་གཉིས་ཀའི་ཕྱོགས་ནས་བསྟན་པའི་དོན་མཛད་དོ། །དེས་རིག་འཛིན་གཡུ་འབྲུག་རྡོ་རྗེ་ལ་བདེ་ཆེན་གྱི་སྒྲུབ་གནས་སུ་འདུས་པ་མདོའི་དབང་གཏད་རྒྱ་དང་བཅས་པ་རྫོགས་པར་བསྐུར་ཞིང་། བཤད་པ་དང་གདམས་ངག་ཀྱང་སྩལ། གསང་མཚན་རྡོ་རྗེ་དྲག་པོ་རྩལ་དུ་གྲགས། འོན་དང་རྡོ་སོགས་དབུས་རིའི་དབེན་གནས་རྣམས་དང་གཙོ་བོར་གཡས་རུ་རྟ་ནག་གི་ལ་རྒུ་རྡོས་དགོན་དུ་ཉམས་ལེན་ལ་ཆིག་སྒྲིལ་གྱིས་བཞུགས་པས་བླ་མ་སྒྲུབ་ཆེན་པ་ཞེས་ཀྱང་མཚན་དུ་གྲགས། ཉམས་རྟོགས་མཐར་ཕྱིན་པ་བརྙེས། བྱིན་བརླབས་མཛད་པ་ཙམ་གྱིས་ནང་གདོན་ལས་གྲོལ་བ་སོགས་མཐུ་སྟོབས་ནུས་པའི་རྩལ་ཐོན། དགུང་ལོ་ཡང་ཤིན་ཏུ་སྨིན་པར་བཞུགས་ཏེ་དབེན་པར་ཉམས་ལེན་དང་སྦྲགས་ནས་ཐར་འདོད་ཀྱི་གདུལ་བྱ་སྐལ་ལྡན་རྣམས་སྨིན་གྲོལ་ལ་འགོད་པར་མཛད་དོ། །དེས་གཉགས་ཛྙཱ་ན་ཀུ་མཱ་རའི་སྤྲུལ་པ་མཁས་གྲུབ་བློ་གྲོས་རྒྱལ་མཚན་དཔལ་བཟང་པོ་ལ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་བཤད་པ་གདམས་ངག་ཕྱག་བཞེས་དང་བཅས་པ་སྩལ། གསང་མཚན་དྲི་མེད་ཟླ་ཤར་རྩལ་དུ་བཏགས། འདི་ནི་གཙང་གཡས་རུའི་ཐག་གདོང་ཁར་དུ་ལྡོངས་ཀྱི་རིགས་སུ་འཁྲུངས། ཆུང་ངུ་ནས་ཐ་སྙད་ཀྱི་རིག་པ་རྣམས་ཚེགས་མེད་པར་མཁྱེན་ཅིང་། ཁྱད་པར་གསོ་རིག་ལ་མཁས། གཞོན་ནུའི་དུས་སྡེ་པ་གདོང་ཁར་བའི་ཞབས་ཕྱིར་བཞུགས་པས་མཚན་གདོང་ཁར་འཚོ་བྱེད་དུ་གྲགས། དར་ལ་བབ་པ་ན་རིགས་སད་དེ་རབ་ཏུ་བྱུང་ནས། བླ་ཆེན་རྡོ་རྗེ་འཆང་གྲགས་པ་རིན་ཆེན། ཡོངས་འཛིན་ངག་དབང་གྲགས་པ། པད་གླིང་ཐུགས་སྲས་ཟླ་བ་རྒྱལ་མཚན། གཏེར་སྟོན་ཞིག་པོ་གླིང་པ། སྐུ་ལུས་མ་སྤངས་པར་མཁའ་སྤྱོད་དུ་གཤེགས་པ་རྡོ་རྗེ་སེང་གེ་སོགས་མཁས་གྲུབ་ཀྱི་བླ་མ་དམ་པ་དུ་མའི་ཞབས་ལ་གཏུགས་ཏེ། ཆོས་ཀྱི་སྒོ་མཐའ་ཡས་པ་ཞིག་ངོམ་པ་མེད་པར་གསན་ཞིང་། དེ་ཡང་གསན་ལོ་ཙམ་དུ་མ་བཞག་པར་སྒྲོ་འདོགས་ཆོད་པར་མཛད་ནས། འདུ་འཛི་དང་གཡེངས་པས་མི་འཕྲོག་པར་ཉམས་བཞེས་ལ་འབད་པས་ཐོས་བསམ་སྒོམ་གསུམ་ཅིག་ཅར་དུ་གྲུབ། དེའི་མཐུས་ཉམས་རྟོགས་དང་མཁྱེན་རབ་ཀྱི་ཀློང་ནང་ནས་བརྡོལ་ཏེ། མདོ་སྔགས་ཀྱི་གཞུག་ལུགས་སྤྱི་དང་ཁྱད་པར་སྔ་འགྱུར་བཀའ་གཏེར་གྱི་ཆོས་གང་ལའང་ཐོགས་པ་མེད་པའི་མཁྱེན་རབ་རྒྱས། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཤར། རྩ་རླུང་ཐིག་ལེའི་འགྲོས་དབུ་མར་ཐིམ། རྨི་ལམ་སྦྱོང་སྤེལ་སྤྲུལ་བསྒྱུར་ལ་དབང་འབྱོར་བས་དག་པའི་ཞིང་བགྲོད་ནས། སངས་རྒྱས་དང་བྱང་སེམས་མང་པོའི་ཞལ་མཇལ་ཞིང་ལུང་བསྟན་ཐོབ། ནུས་པས་བོད་འཕུང་བྱེད་ཀྱི་འབྱུང་པོ་དང་མཐའ་དམག་གདུག་པ་ཅན་རྣམས་ཚར་གཅོད་པ་དང་བསྲུང་ཞིང་བཟློག་པའི་རྟགས་འཕྲལ་དུ་ཐོན་པས་སྙན་གྲགས་ཀྱིས་ཀུན་ཏུ་ཁྱབ། སྐུ་ཚེའི་སྨད་ལ་ཉང་སྨད་སྐྱིད་སྦུག་ཏུ་བཞུགས་ནས་འོད་གསལ་རྡོ་རྗེ་སྙིང་པོའི་དགོངས་པ་ལས་མ་གཡོས་བཞིན་དུ་དབང་བསྐུར་བཤད་ལུང་ཟབ་ཁྲིད་སོགས་གདུལ་བྱའི་དབང་པོ་དང་འཚམས་པའི་ཆོས་འཆད་སྤེལ་རྒྱུན་ཆགས་སུ་མཛད་པས་སོ་སོའི་རེ་བ་སྐོང་ཞིང་། རྣམ་བཤད་སྒྲུབ་ཡིག་ཆོག་ཕྲིན་ཕྱག་བཞེས་ཆོས་འབྱུང་རྩོད་ལན་སོགས་ཀྱི་རྩོམ་པ་དང་། གསེར་པོད་ཀྱི་རྒྱུད་བཅུ་བདུན་བི་མ་སྙིང་ཐིག་བདེ་འདུས་སོགས་ཀྱིས་མཚོན་བཀའ་གཏེར་གྱི་གླེགས་བམ་དུ་མ་བཞེངས་པ་ལ་སོགས་ཏེ་བཤད་སྒྲུབ་ལས་གསུམ་གྱི་ཕྲིན་ལས་རླབས་པོ་ཆེས་སྔ་འགྱུར་གྱི་བསྟན་པ་གསལ་ཞིང་རྒྱས་པར་མཛད། འདིས་འཆི་བ་བརྟག་བསླུའི་ཡི་གེ་དེ་དགུང་ལོ་བདུན་ཅུ་དོན་གསུམ་པ་ལ་མཛད་པར་གསལ་བས་སྐུ་ཚེ་ཡང་རིང་པོར་བཞུགས་པར་མངོན་ནོ། །དེས་གོང་ར་ལོ་ཆེན་གཞན་ཕན་རྡོ་རྗེ་ལ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་བཤད་པ་གདམས་ངག་ཕྱག་བཞེས་དང་བཅས་པ་གནང་ཞིང་། གསང་མཚན་རྡོ་རྗེ་ཡེ་ཤེས་རྩལ་དུ་བཏགས། དམ་པ་འདི་ནི་གནུབས་ཁྲོ་ཕུ་བའི་གདུང་རིགས་རྟོགས་ལྡན་ཆོས་ཉིད་རང་གྲོལ་གྱི་ཡང་ཚ་ལོ་ཆེན་ངག་གི་དབང་པོའི་གཅུང་དཔོན་ཆེན་ཞེས་པའི་སྲས་སུ་ཤིང་ཕོ་རྟའི་ལོ་ལ་འབྲས་ཡུལ་བཀྲ་ཤིས་གླིང་དུ་འཁྲུངས། བྱིས་པའི་དུས་ཐུགས་རྒོད་ཅིང་བརྟུལ་ཞུགས་ཆེ་བས་སུ་ལའང་མི་འཇིགས་པའི་སྤོབས་པ་མཐོ། ཆུང་ངུ་ནས་ཆགས་བྲལ་གྱི་རྟེན་ལ་འདུན་པ་ལྟར་ཞྭ་དམར་ཆོས་ཀྱི་དབང་ཕྱུག་གི་དྲུང་དུ་དགུང་ལོ་བཅུ་གཉིས་པ་ལ་དགེ་ཚུལ་དང་། ཉེར་གཅིག་པ་ལ་བསྙེན་རྫོགས་བཞེས་ནས་སྐུ་བཙུན་པའི་མཆོག་ཏུ་གྱུར། རང་གི་ཁུ་བོ་ཞྭ་དམར་པའི་རིག་གནས་ཀྱི་སློབ་དཔོན་དུ་སྤྱན་དྲངས་པའི་ཕྱག་ཕྱིར་འབྲངས་ཏེ། སྒྲ་ཀ་ལཱ་པ། སྙན་ངག་མེ་ལོང་། སྡེབ་སྦྱོར། སྐར་རྩིས། རྒྱ་བོད་ཀྱི་ཡིག་སྣ་སོགས་བརྡ་སྤྲོད་ཡན་ལག་དང་བཅས་པ་ལ་མཁས་པར་སྦྱངས། ཆོས་རྗེ་ཉིད་དང་རིན་པོ་ཆེ་སྨྲ་སེང་སོགས་ལས་མཚན་ཉིད་ཀྱི་གཞུང་ཅི་རིགས་པའང་སློབ་པར་མཛད་ཅིང་ཆོས་གསུངས་པ་རྣམས་ཀྱང་ཞར་ཆོས་སུ་གསན། ཁྱད་པར་རང་གི་ཁུ་བོ་ལོ་ཆེན་ངག་གི་དབང་པོ། མཁས་གྲུབ་བློ་གྲོས་རྒྱལ་མཚན། གསུང་སྤྲུལ་ཚུལ་ཁྲིམས་རྡོ་རྗེ། སྙིང་ཕུ་བ་རིག་འཛིན་སྙིང་པོ། རྩེ་ལེ་པདྨ་ལེགས་གྲུབ། ཀཿཐོག་པ་པདྨ་བློ་གྲོས། ཡོན་ངོ་བ་བཀྲ་ཤིས་ལྷུན་གྲུབ་སོགས་སྐྱེས་ཆེན་མང་པོ་བསྟེན་ནས། སྔ་འགྱུར་བཀའ་གཏེར་གྱི་ཆོས་དཔག་ཏུ་མེད་པ་གསན་ཅིང་སྒྲོ་འདོགས་ཆོད་པར་སྦྱངས། བསྐྱེད་རྫོགས་ཀྱི་སྒོམ་སྒྲུབ་ལ་བརྩོན་པར་མཛད་པས་ཉམས་རྟོགས་མཐར་ཕྱིན། འཇིག་རྟེན་ཆོས་བརྒྱད་ཀྱི་འདུ་འཛིས་མ་གོས་པས་རྗེས་སུ་འབྲང་བ་ཐམས་ཅད་ཀྱང་དམ་པའི་ཆོས་ལ་ངང་གིས་དབང་སྦྱོར། རྙིང་མ་རྒྱུད་འབུམ་ཚར་གསུམ་བཞེངས་པའི་དང་པོ་གཉིས་བསྟན་རྒྱུན་ལ་དགོངས་ནས་ཁམས་དང་ཀོང་ཡུལ་དུ་སྐྱེལ་བར་མཛད་པས་མཚོན་འགྲོ་དོན་ནུས་པ་ལ་ཕྱག་དཔེ་སོགས་ཕྱག་ན་གང་ཡོད་སྩོལ་ཞིང་མེད་ནའང་སྒྲུབ་པའི་རྒྱུའི་དངོས་པོ་ལྷུག་པར་གཏོང་། མདོ་སྔགས་རིག་གནས་དང་བཅས་པའི་འཆད་ཕྲིན་རྒྱུན་མི་ཆད་པས་གདུལ་བྱའི་རེ་བ་རྫོགས་པར་མཛད་ཅིང་། ཆོས་ཉན་པ་རྣམས་ལ་འཚོ་བས་ཀྱང་རྟག་ཏུ་སྐྱོང་། མདོར་ན་མཁས་བཙུན་བཟང་གསུམ་གྱི་ཡོན་ཏན་གྱིས་མཐོ་ཞིང་། བཤད་སྒྲུབ་ལས་གསུམ་གྱི་ཕྲིན་ལས་ནམ་མཁའ་དང་མཉམ་པའི་ངང་ནས། དགུང་ལོ་རེ་གཅིག་བཞེས་པ་དགུང་ཀེག་གི་ཐོག་ཏུ་ཞི་བའི་དབྱིངས་སུ་གཤེགས་སོ། །དེས་གནུབས་ཆེན་སངས་རྒྱས་ཡེ་ཤེས་ཀྱི་ཡང་སྲིད་གསང་བདག་ཕྲིན་ལས་ལྷུན་གྲུབ་ལ་བརྒྱུད་དེ། འདི་ནི་ཡབ་སྨྱོས་སྟོན་མཁས་གྲུབ་ཆེན་པོ་མདོ་སྔགས་བསྟན་འཛིན་གྱི་སྲས་སུ་ལྕགས་མོ་ཕག་གི་ལོ་ལ་ཆག་བྱང་ཆུབ་གླིང་དུ་འཁྲུངས། དགུང་ལོ་ལྔ་ནས་བྲི་ཀློག་གཉིས་ཀ་བྱང་བར་མཁྱེན། བརྒྱད་ལ་ཡབ་རྗེའི་དྲུང་དུ་དགེ་བསྙེན་གྱི་སྡོམ་པ་གསན། མཚན་ཨོ་རྒྱན་ཚེ་འཕེལ་དུ་གསོལ། དེ་ནས་བརྩས་ཏེ་ཕྲིན་སྒྲུབ་ཕྱག་ལེན་གྱི་སྐོར་ནས་ཀུན་མཁྱེན་ཆེན་པོའི་གསུང་རབ་རྣམས་དང་། སྒྲ་རྩིས་སོགས་ཐ་སྙད་ལའང་སྦྱངས་པས་བློ་གྲོས་ཀྱི་མཐུ་ཐོབ། ཁྱད་པར་ཡབ་རྗེ་ལས་བླ་རྫོགས་ཐུགས་གསུམ་སྒྲུབ་སྡེ་བརྒྱད་སོགས་བཀའ་གཏེར་གྱི་དབང་ཁྲིད་བཤད་ལུང་དུ་མ་གསན་ཅིང་བསམ་སྒོམ་གྱིས་གཏན་ལ་ཕབ། སྐྱེས་ཆེན་གཙུག་ལག་རྒྱ་མཚོ་ལས་རབ་ཏུ་བྱུང་ཞིང་མཚན་ཕྲིན་ལས་ལྷུན་གྲུབ་དཔལ་བཟང་པོར་སྩལ། གསུང་ཆོས་ཀྱང་ཅི་རིགས་པ་གསན། གཞན་ཡང་གསུང་སྤྲུལ་ཚུལ་ཁྲིམས་རྡོ་རྗེ། ལོ་ཆེན་གཞན་ཕན་རྡོ་རྗེ། ལྷ་བཙུན་ཀུན་བཟང་རྣམ་རྒྱལ། རྫོགས་ཆེན་པ་འབྲུག་སྒྲ་བཟང་པོ། བོན་ལུང་པ་ཚུལ་ཁྲིམས་རྒྱལ་མཚན། ཟུར་ཆོས་དབྱིངས་རང་གྲོལ། འཁྲུལ་ཞིག་ནོར་བུ་ཆོས་བརྟན་སོགས་རྙིང་ལུགས་དང་། རྒྱལ་ཚབ་གྲགས་པ་མཆོག་དབྱངས། མགོན་པོ་བསོད་ནམས་མཆོག་ལྡན་སོགས་གསར་མ་སྟེ། གསར་རྙིང་གི་བླ་མ་དམ་པ་སུམ་ཅུ་ལྷག་ཙམ་བསྟེན་ནས་མདོ་སྔགས་ཀྱི་ཆོས་མཐའ་ཡས་པ་ངོ མ་པ་མེད་པར་གསན་ཅིང་། བྱེ་བྲག་འདུས་པ་མདོའི་དབང་ནི། དགུང་ལོ་བརྒྱད་པ་ལ་སྔགས་འཆང་ཀུན་བཟང་དཔལ་འབྱོར་བྱང་ཆུབ་གླིང་དུ་སྤྱན་དྲངས་ཏེ་ཡབ་རྗེ་དང་ལྷན་དུ་ཁམས་ལུགས་ཉིད་གསན། ཉེར་གཅིག་པ་ལ་ལྷ་བཙུན་ཀུན་བཟང་རྣམ་རྒྱལ་ལ་ཁམས་ལུགས་ཀྱི་ཡི་གེའི་སྟེང་ནས་གསན། ཉི་ཤུ་རྩ་དགུ་པ་ས་ཡོས་ཧོར་ཟླ་བཞི་པ་ལ་གོང་ར་ལྷུན་གྲུབ་སྡིངས་སུ་མ་ཧཱ་ལོ་ཙཱ་བ་གཞན་ཕན་རྡོ་རྗེའི་དྲུང་དུ་འདུས་པ་མདོའི་རྩ་བ་དང་ཡན་ལག་གི་དཀྱིལ་འཁོར་ཐམས་ཅད་རྡུལ་ཚོན་གྱིས་བཞེངས་པར། གཉལ་པ་བདེ་ལེགས་པའི་ཡི་གེའི་སྟེང་ནས་ཆུ་བོ་བཞིའི་དབང་གཏད་རྒྱ་སྒོམ་རིམ་མན་ངག་དང་བཅས་པ་སྒྲུབ་ཆེན་གྱི་ལས་རིམ་དང་འབྲེལ་པར་ཞག་བཅུ་བདུན་གྱི་ཁོངས་སུ་རྫོགས་པར་གསན། གསང་མཚན་རྡོ་རྗེ་བདུད་འདུལ་རྩལ་དུ་བཏགས། གོང་ལོ་དེ་ཉིད་སྐལ་ལྡན་ལ་ཆོས་སྦྱིན་ལྷུག་པར་སྩོལ་བ་ལས། འམ་བུ་ཆོས་མི་འཚོང་གསུངས་ནས་སུའི་ཡང་ཆོས་ཡོན་མི་བཞེས་པར་ཕྱིར་སློག་པར་མཛད་ནའང་། རྗེ་འདིས་དབང་བུམ་གྲྭ་ཚར་དགུ་ཕུལ་བ་མཉེས་མཉེས་ཀྱིས་བདག་གིར་མཛད་ཅེས་གྲགས་ཏེ། དབང་གི་ཆུ་བོའི་སྣོད་དུ་གཟིགས་ཤིང་བསྟན་པ་སྤེལ་བའི་རྟེན་འབྲེལ་སྒྲིག་བྱེད་ཀྱི་བརྡའ་ཐབས་བསྟན་པར་མངོན། དེ་ལྟར་ཐོས་བསམ་གྱི་སྒྲོ་འདོགས་ཡིན་ལུགས་སུ་བཅད་ནས། དབེན་པའི་གནས་དུ་མར་སྙིང་པོའི་ལམ་སྲོལ་ཇི་བཞིན་པ་ཐུགས་ཉམས་སུ་བཞེས་པས། མ་དག་པའི་སྣང་བ་འགོག་ནུས་པའི་བསྐྱེད་རིམ་གྱི་གསལ་སྣང་ལ་རེག་མཐོང་གི་མཚན་མ་ཐོབ་སྟེ། ཕྲིན་ལས་གང་བརྩམས་ཐོགས་མེད་དུ་འགྲུབ། རྫོགས་རིམ་ཀ་དག་གཞི་རྫོགས་འཕོ་འགྱུར་མེད་པའི་གནས་ལུགས་ཇི་ལྟ་བ་ཉིད་རྟོགས་པས། འཁོར་འདས་བདེན་འཛིན་གྱི་འཁྲི་བ་ཆོད། སྣང་སྲིད་ལྷུན་གྲུབ་འོད་གསལ་གྱི་ཀློང་དུ་དྭངས་པས་ཡི་དམ་གྱི་ལྷ་དུ་མའི་གཟིགས་སྣང་ཤར་ཞིང་ལུང་བསྟན་ཐོབ། རང་དོན་ཡིད་བྱེད་ཀྱི་འཛིན་པ་ཞིག་པས་གཞན་ཕན་མཁའ་ཁྱབ་ཀྱི་ཐུགས་རྗེ་རྩོལ་མེད་ཤུགས་འབྱུང་གི་སྒོ་ནས། ཐར་བ་དོན་གཉེར་གྱི་སྐལ་ལྡན་མཆོག་དམན་མང་པོར་བཤད་སྒྲུབ་ཀྱི་ཆོས་འཁོར་རྒྱུན་ཆགས་སུ་བསྐོར་བས་བསྟན་འགྲོའི་ཕན་བདེ་རྒྱས་པར་མཛད་ཅིང་། ཁྱད་པར་སྐུ་གསུང་ཐུགས་ཀྱི་སྲས་མཆོག་གཏེར་ཆེན་ཆོས་ཀྱི་རྗེ་ལ་ཟབ་རྒྱས་ཀྱི་ཆོས་ཐམས་ཅད་ཚང་སྤྲུགས་སུ་སྩལ་ཏེ་རྒྱལ་ཚབ་ཏུ་མངའ་བསྐུར་ནས། དགུང་ལོ་ང་གཉིས་པ་ཆུ་སྟག་དབོ་ཟླའི་ཉེར་གཉིས་ལ་དབུ་གཙུག་ཕྱུར་བུར་འཕར་བ་ལས་ཟླ་བའི་ཟིལ་པ་སྐྱ་ཆ ིལ་ལེ་བ་དང་སྤོས་དུད་ལྟ་བུའི་རླངས་པ་འཕྲོ་བཞིན་དུ་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས་སོ། །དེས་ལོ་ཆེན་ཆོས་རྒྱལ་བསྟན་འཛིན་རྗེས་སུ་བཟུང་སྟེ། འདི་ནི་ཨེ་འདམ་སྔོན་པོ་གྲོང་སྨད་དུ་ལྕགས་ལུག་ལ་འཁྲུངས། སྐུ་ཚེ་སྔ་མའི་བག་ཆགས་གསལ་བས་གྲྭ་རིགས་རྣམས་ཀྱིས་བདག་སྤྲད་དེ་དྭགས་སྟོད་གླིང་སོགས་གོང་མའི་དགོན་པ་རྣམས་སུ་སྤྱན་དྲངས། བྲི་ཀློག་དང་ཆོག་ཕྲིན་རྣམས་ཚེགས་མེད་པར་ཐུགས་སུ་ཆུད་ནས། འཕྱོང་རྒྱས་དཔལ་རི་གྲྭ་ཚང་དུ་ཐུགས་གཉེར་ལ་བྱོན། གདན་ས་བ་བསོད་ནམས་རིན་ཆེན་ལས་རབ་ཏུ་བྱུང་ཞིང་། མཚན་ཆོས་རྒྱལ་བསྟན་འཛིན་དུ་གསོལ། དབང་ལུང་ཡང་ཅི་རིགས་པ་གསན། དགོངས་འདུས་ལ་སོགས་པའི་ཆོ་གའི་ཚིག་འཛིན་དང་། དེ་དག་གི་བྲི་ཐིག་འཆམས་དབྱངས་སོགས་ནས་བརྩམས་ཏེ། ཀུན་མཁྱེན་ཆེན་པོའི་བསྟན་བཅོས་སེམས་ཉིད་ངལ་གསོ་རྩ་འགྲེལ་རྣམས་ལ་སྦྱངས། དེར་གནུབས་སྟོན་གྲགས་པ་དབང་པོ་ལ་ཡང་བཟློག་དང་ལོཀྟྲི་སོགས་དྲག་སྔགས་ཀྱི་ལག་ལེན་དང་རྩིས་དཀར་ནག་ཀྱང་བསླབས། དགུང་ལོ་བཅོ་བརྒྱད་པ་ས་ཕོ་བྱི་བའི་ལོར་གྲྭ་སའི་དགེ་བསྐོས་མཛད་པས་ནོན་ཆེ་བའི་དཔེར་འཇོག་པ་བྱུང་ཞིང་། ལོ་དེའི་ནང་དུ་རིག་འཛིན་ཕྲིན་ལས་ལྷུན་གྲུབ་འཕྱོང་རྒྱས་དཔལ་རིར་སྤྱན་དྲངས་ཏེ། སྤྲུལ་པའི་སྐུ་མཆོག་ཕྲིན་ལས་རྣམ་རྒྱལ་གྱིས་དབུས་གྲྭ་གཙང་ཡོངས་རྫོགས་ལ་འདུས་པ་མདོའི་དབང་བསྐུར་གདམས་ངག་གཏད་རྒྱ་དང་བཅས་པ་རྡུལ་ཚོན་གྱི་དཀྱིལ་འཁོར་དུ་སྒྲུབ་ཆེན་དང་འབྲེལ་བར་ཟུར་ལུགས་དང་། ཞར་བྱུང་དཔོན་སློབ་ཉུང་འདུས་ལ་རས་རིས་ཀྱི་སྟེང་ནས་ཁམས་ལུགས་གཉིས་སྩལ་བའི་ཚེ་ལྷན་ཅིག་ཏུ་གསན་ཅིང་། གསང་མཚན་རྡོ་རྗེ་ཡོངས་གྲོལ་རྩལ་དུ་གྲགས། ཕྱིས་སུའང་གནས་དུས་ཅི་རིགས་པར་བཀའ་བརྒྱད་བདེ་འདུས། དགོངས་འདུས། བི་མ་སྙིང་ཐིག །ཞིག་གླིང་གི་གཏེར་ཆོས་སོགས་མང་དུ་གསན། གཞན་ཡང་ལྷ་བཙུན་ནམ་མཁའ་འཇིགས་མེད། གསུང་སྤྲུལ་ཚུལ་ཁྲིམས་རྡོ་རྗེ་སོགས་མཁས་གྲུབ་ཀྱི་བླ་མ་དམ་པ་མང་པོ་བསྟེན་ནས་བཀའ་གཏེར་གྱི་དབང་ལུང་ཁྲིད་བཀའ་དུ་མ་དང་། རྒྱ་རི་དབོན་སའི་ལུང་གིས་བསྐུལ་བས་གོང་རར་ཐེགས་ཏེ། ཉང་སྟོན་བློ་མཆོག་རྡོ་རྗེ་ལ། སྒྲ་ཀ་ལཱ་པ་དང་། སྙན་ངག །སྡེབ་སྦྱོར་སོགས་བརྡ་སྤྲོད་ཡན་ལག་དང་བཅས་པ་གསན་ཏེ་མཁྱེན་པར་མཛད། དེ་ལྟར་གསན་པ་རྫོགས་རྗེས་ཨེ་མཐོང་སྨོན་དང་མཚོ་མེར་སྟེང་དུའང་ཅི་རིགས་བཞུགས་ཤིང་། གཙོ་བོར་དྭགས་སྟོད་གླིང་གི་དགོན་པར་སྟན་འཇགས་ཏེ་སྦས་ཚུལ་གྱིས་བསྙེན་སྒྲུབ་ལ་བརྩོན་པར་མཛད་པས་ཉམས་རྟོགས་བཟང་པོ་འཁྲུངས། སྲུང་མ་ལས་ལ་ཁོལ་བའི་མཐུ་རྟགས་ནར་མར་འོང་བས་ཡུལ་དེ་དག་གི་གྲོང་པ་རྣམས་ཀྱང་བླ་མ་གླིང་པའི་བཀའ་དང་འགལ་ན་ཆོས་སྐྱོང་གི་བཀའ་ཆད་འོང་ཞེས་འཇིགས་པར་བྱེད། ཁྱད་པར་དགུང་ལོ་སོ་གཉིས་པ་ཆུ་སྟག་ལོར་དར་གླིང་དུ་ཕེབས་ཏེ་བདག་གི་རྗེ་བླ་མ་ལ་པད་གླིང་གི་ཆོས་བཀའ་འགའ་ཞིག་གསན། དེ་དུས་ཡབ་རྗེ་ལས་གསན་པའི་མདོའི་དབང་རྒྱུན་ཕྱག་བཞེས་དང་བཅས་པ་རྣམ་པར་དག་པ་འདུག་པར་མཁྱེན་ཏེ། ཕྱིས་གདན་སར་སྤྱན་འདྲེན་གནང་བ་ལྟར་བྱོན་ནས་རྗེ་གཏེར་ཆེན་བླ་མ་ལ་མདོ་དབང་འབུལ་བར་མཛད་པས་སྔ་འགྱུར་གྱི་བསྟན་པ་ལ་ཕན་པ་བླ་ན་མེད་པར་གྱུར། དགུང་ལོ་དོན་བརྒྱད་པ་ས་བྱི་ཧོར་ཟླ་བཞི་པ་ལ་དྭགས་སྟོད་གླིང་གི་དགོན་པར་སྐུ་གཤེགས་སོ། །ཡང་བརྒྱུད་ལུགས་གཅིག་ལ། མཁས་གྲུབ་བློ་གྲོས་རྒྱལ་མཚན་ལ་ཟབ་ལུང་པ་ཀརྨ་མི་འགྱུར་དབང་གི་རྒྱལ་པོ་སྟེ། གསང་མཚན་རྡོ་རྗེ་རོལ་པ་རྩལ་ཞེས་གྲགས་པ་དེས་གསན། དེ་ལ་ལྷ་བཙུན་ཀུན་བཟང་རྣམ་རྒྱལ་ཞེས་རྫོགས་པ་ཆེན་པོའི་རྟོགས་པ་ཀློང་དུ་གྱུར་པའི་གྲུབ་པའི་དབང་ཕྱུག་ཆེན་པོ་མན་ངག་སྙིང་ཐིག་གི་བསྟན་པའི་བདག་པོར་གྱུར་པ་དེས་གསན། དེ་ལ་རིག་འཛིན་ཕྲིན་ལས་ལྷུན་གྲུབ་ཀྱིས་ཀ་ཐོགཿརྡོར་བཟང་བའི་དབང་ཆོག་གི་སྟེང་ནས་གསན་ཏེ། སྤྱིར་བརྒྱུད་ལུགས་འདི་ལའང་ཀཿཐོག་རྡོར་བཟང་བའི་སློབ་མ་འཕགས་མཆོག་བྱ་བཏང་ཆེན་པོ་སྟེ། གསང་མཚན་རྡོ་རྗེ་བདུད་འདུལ་རྩལ་ཞེས་གྲགས་པ་ལའང་ཤ་མི་རྡོར་རྒྱལ་གྱིས་གསན་པས་ཁམས་ལུགས་ཀྱི་བརྒྱུད་པ་འདྲེས་མོད། ཕྱག་བཞེས་ལ་གཉལ་པའི་ཡི་གེའི་སྟེང་ནས་མཛད་སྲོལ་འདུག་ཀྱང་འདིར་དཔེ་རྒྱུན་གྱི་སྟབས་ཀྱི་ཀཿཐོག་པའི་ཡི་གེའི་ཐོག་ནས་གསན་པར་མངོན་ནོ། ༈ །གཉིས་པ་ཟུར་ལྕམ་སྲིང་གཉིས་ལས་བརྒྱུད་ཚུལ་ནི། གཏད་རྒྱའི་ལོ་རྒྱུས་ཟུར་ཧམ་གྱིས་མཛད་པ་ལས། བླ་མ་བསམ་གྲུབ་པ་དེས། བདག་ཟུར་ཧམ་ཤཱཀྱ་འབྱུང་གནས་དང་། སྲིང་གཅིག་ཟུར་མོ་དགེ་འདུན་འབུམ་ལ་གཏད་རྒྱ་དང་བཅས་ནས་གནང་ངོ་། །ཞེས་སྒྲོལ་ཆེན་བསམ་གྲུབ་རྡོ་རྗེས་ཟུར་ཧམ་ལྕམ་སྲིང་གཉིས་ལ་བསྐུར་བ་ལས། དང་པོ་ཟུར་ཧམ་ཤཱཀྱ་འབྱུང་གནས་ལས་བརྒྱུད་ཚུལ་ནི། ཟུར་ཧམ་འདི་ཟུར་པཀྴི་བཟང་པོ་དཔལ་གྱི་སྲས་ཡིན། དགུང་ལོ་བདུན་འགྲོ་བ་ནས་རང་གི་ཁུ་བོ་ཟུར་སེང་གེ་དཔལ་ལོ་བཅུ་ལོན་པ་ཞིག་དང་མཉམ་དུ་ས་ཕོ་འབྲུག་གི་ལོར་སྒྲོལ་ཆེན་བསམ་གྲུབ་རྡོ་རྗེའི་ཞབས་ལ་གཏུགས་ཏེ་གསང་སྙིང་གི་རྒྱུད་བཤད་གསན་པས་ཁུ་དབོན་གཉིས་ཀས་སྦྲུལ་ལོའི་དབྱར་ཆོས་ཐོག་བློ་བཤད་ཐོངས་པ་ལ། ཟུར་ཧམ་གྱིས་མེས་ཤཱཀྱ་སེང་གེ་བ་ཤིན་ཏུ་མཉེས་ཞེས་གྲགས། དེ་ལྟར་སྒྲོལ་ཆེན་གྱིས་ཆུང་དུ་ནས་དྲུང་དུ་བཞག་པས་རྒྱུད་ལུང་མན་ངག་ཐམས་ཅད་ལ་མཁས་ཤིང་ཉམས་རྟོགས་ཀྱང་མཐར་ཕྱིན། འོད་གསལ་གྱི་སྣང་བ་ལ་ཐུབ་དབང་དང་རིགས་ལྔའི་ཧེ་རུ་ཀ་སོགས་ཀྱི་ཞལ་གཟིགས། བླ་མས་ཀུན་སྤངས་པ་ལ་དགེ་ཚུལ་དང་། ཆོས་ལུང་མཁན་པོ་བསོད་ནམས་གྲགས་ལས་བསྙེན་རྫོགས་གསན། ཁྱད་པར་འཇམ་དབྱངས་བསམ་གྲུབ་རྡོ་རྗེ་ལ་འུག་པ་ལུང་གི་ཡང་དབེན་དུ་འདུས་པ་མདོའི་དབང་ལན་གཉིས་གསན། གསང་མཚན་རྡོ་རྗེ་ཐོད་ཕྲེང་རྩལ་དུ་གྲགས། ཡང་དབེན་དུ་བཤད་གྲྭ་དང་སྒྲུབ་གྲྭའི་རྒྱུན་མ་ཆག་པར་བསྐྱངས་པས་བཀའ་སྡེ་ཟུར་པའི་བསྟན་པ་རྒྱས་པར་མཛད་ནས་དགུང་ལོ་སོ་བརྒྱད་པ་སྐུ་གཤེགས། སྔར་སྒྲོལ་མ་བ་ཡབ་སྲས་ཡན་ཆད་གླན་ལུགས་པ་རྣམས་ཀྱི་ཕྱག་བཞེས་སུ་ཡོ་ག་མན་ཡན་ལག་གི་དཀྱིལ་འཁོར་རྣམས་ཀྱང་རེ་རེ་ལས་མི་མཛད་ཅིང་། དབང་ཆོག་ཀྱང་གླན་ལུགས་ཀྱི་དུམ་དུམ་ཁྲིགས་ཀྱི་ཐོག་ནས་བསྐུར་བར་མཛད་མོད། ཟུར་ཧམ་གྱིས་མདོ་རྩ་བ་དང་ཡན་ལག་གི་དཀྱིལ་འཁོར་བསྡོམས་པ་ལ་གྲངས་བཞི་བཅུ་རྩ་གསུམ་ལ་སོགས་པར་ཕྱེ་བའི་བཀའ་སྲོལ་ལྟར་གཉལ་པ་བདེ་ལེགས་པས་ཆོག་ཁྲིགས་སུ་བཀོད་པ་ནས་བཟུང་། ཡིག་ཆ་དེའི་ཐོག་ནས་དབང་བསྐུར་མཛད་པ་རྣམས། ཟུར་ཧམ་གྱི་ཕྱག་ལེན་ཡིན་པ་ལ་བསམ་ནས་ཟུར་ལུགས་ཞེས་མིང་དུ་བཏགས་པ་ཡིན་ནོ། །ཟུར་ཧམ་ཤཱཀ་འབྱུང་ལ་གདན་ས་ཡང་དབེན་དུ་རི་ཕུག་པ་ལང་གྲོ་ཚེ་དབང་རྒྱལ་པོས་གསན་ཏེ། གསང་མཚན་རྡོ་རྗེ་ཐོགས་མེད་རྩལ། དེ་ལ་ཆུ་བར་ཉི་སྦུག་པ་བརྒྱུད་འཛིན་ལེགས་པ་དཔལ་བཟང་གིས་གསན། གསང་མཚན་རྡོ་རྗེ་དབང་སྡུད་རྩལ། དེ་ལ་མངའ་རིས་དབུ་རྩེ་བ་འཇམ་དབྱངས་རིན་ཆེན་རྒྱལ་མཚན་གྱིས་གསན། དེས་ཡོས་ཀྱི་ལོ་ལ་མངའ་རིས་གློ་བོ་མ་ཐང་དུ་སྲས་པཎ་ཆེན་སྐུ་མཆེད་ལ་དབང་བསྐུར་ཏེ། གཉིས་ཀ་མཁས་ཤིང་གྲུབ་པའི་དབང་ཕྱུག་ཏུ་གྱུར་ཅིང་། ཟབ་མོ་གཏེར་གྱི་བཀའ་ཡང་བབས། ཁྱད་པར་གཅུང་རིག་འཛིན་ལེགས་ལྡན་རྗེས་མདོ་དབང་གསན་དུས་དགུང་ལོ་བརྒྱད་པ་ཡིན། སྤྱིར་བརྒྱ་དང་བཅུ་གསུམ་བཞུགས་ནས་བཤད་སྒྲུབ་ཀྱི་ཕྲིན་ལས་རླབས་པོ་ཆེས་བསྟན་འགྲོའི་དོན་མཛད། དེ་ལ་འཇམ་དབྱངས་མཁྱེན་བརྩེ་ཁུ་དཔོན་གྱིས་གསོལ་བ་བཏབ་པ་ལ་བརྟེན་ནས་ཉུག་གི་རྒྱལ་ཁང་དུ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་དང་བཅས་གནང་བའི་དུས་སྐྱི་སྟོན་ཚེ་རིང་དབང་པོས་ཀྱང་གསན་ཅིང་། གསང་མཚན་རོལ་པའི་རྡོ་རྗེ་ཞེས་གྲགས། དེས་གཙང་བསམ་གྲུབ་རྩེའི་སྤེལ་དཀར་དུ་མདོ་དབང་གཏད་རྒྱ་དང་བཅས་གནང་བའི་ཚེ་བླ་ཆེན་བྲེས་གཤོངས་པ་གཉགས་སྟོན་ཆོས་རྒྱལ་རྡོ་རྗེ་ཆུང་ངུ་ཞིག་ཡབ་མང་ར་བ་པདྨ་བདུད་འདུལ་གྱིས་ཁྲིད་དེ་རྫོགས་པར་གསན། ཕྱིས་གོང་ར་ལྷུན་གྲུབ་སྡིངས་སུ་ལོ་ཆེན་གཞན་ཕན་རྡོ་རྗེ་དང་། གཙང་ཐེག་མཆོག་གླིང་འདུས་པ་དང་ལྷན་ཅིག་རྫོགས་ཆེན་པ་ནམ་མཁའ་འབྲུག་སྒྲ་བཟང་པོ་ལའང་གསན་ཅིང་། གསང་མཚན་རིག་འཛིན་འདུས་པ་རྩལ་དུ་གྲགས། འདི་ནི་མངའ་རིས་འོད་གསལ་མཆོག །གོང་ར་ལོ་ཆེན། ལྷ་བཙུན་ནམ་མཁའ་འཇིགས་མེད་གསུམ་རྩ་བའི་བླ་མར་འཁུར་ཞིང་། དེ་སོགས་བླ་མ་དམ་པ་མང་པོ་བསྟེན་ནས་གསན་པ་རྒྱ་ཆེ། རྟེན་ཚངས་སྤྱོད་གྲུབ་པའི་དབང་ཕྱུག་ཆེན་པོའོ། །དེས་རོང་སྨུའི་ཤམ་བར་དུ་སྐུ་མཚམས་དམ་པོར་བཅད་དེ་ཡང་ཏི་ནག་པོའི་ཁྲིད་མཛད་པའི་ཟོལ་གྱིས་གསང་ཁོག་ཏུ་སྨན་ལུང་པ་ཆེན་པོ་ཉང་སྟོན་བློ་མཆོག་རྡོ་རྗེ་ཉིད་ལ་ཆིག་བརྒྱུད་དུ་མདོ་དབང་གཏད་རྒྱ་དང་བཅས་པ་གནང་། གསང་མཚན་རིག་པའི་རྡོ་རྗེ་རྩལ་དུ་གྲགས། དེའི་གོང་དུ་ལོ་ཆེན་གཞན་ཕན་རྡོ་རྗེ་ལའང་སྒྲུབ་ཆེན་དང་འབྲེལ་བར་རྡུལ་ཚོན་གྱི་དཀྱིལ་འཁོར་དུ་གསན་ཅིང་རྩ་བའི་བླ་མ་མཆོག་ཏུ་འཛིན། སྤྱིར་མདོ་སྔགས་རིག་གནས་དང་བཅས་པ་མཁྱེན་ཅིང་། ཁྱད་པར་ཆོས་དབང་གི་གཏེར་ཆོས་ལ་མཁས། རྒྱ་མཆོག་ལྔ་པ་ཆེན་པོས་ཏི་ཤྲིར་བཀུར་བ་སོགས་མཁས་གྲུབ་མང་པོའི་གཙུག་རྒྱན་ནོ། །དེས་སྔ་འགྱུར་བསྟན་པའི་མངའ་བདག་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་མདོ་དབང་གཏད་རྒྱ་མན་ངག་ཕྱག་བཞེས་དང་བཅས་པ་མཐའ་རྒྱས་སུ་སྩལ་ཞིང་། གསང་མཚན་རྡོ་རྗེ་བདུད་འཇོམས་རྩལ་དུ་གསོལ། དམ་པ་འདི་ནི་སྣ་ནམ་རྡོ་རྗེ་བདུད་འཇོམས་ཀྱི་ཡང་སྲིད་རིག་འཛིན་རྗེའི་སྐྱེ་བ་སྤྲུལ་པའི་སྐུ་སྟེ། མོན་མཁར་རྣམ་སྲས་གླིང་དུ་བྱ་ནག་གི་རིགས་ལས་སྡེ་པ་ཀརྨ་ཕུན་ཚོགས་དབང་པོའི་སྲས་སུ་ལྕགས་མོ་སྦྲུལ་ཡི་ལོ་ལ་འཁྲུངས། བྱང་པ་རིག་འཛིན་ངག་གི་དབང་པོའི་སྔོན་རབས་གསལ་བར་སད་པས་དགུང་ལོ་དྲུག་པ་ལ་གོང་མའི་གདན་སར་སྤྱན་དྲངས། འབྲི་ཀློག་དང་ཕྲིན་སྒྲུབ་ནས་བཟུང་། གཞུང་ལུགས་ཀྱི་ཐུགས་སྦྱངས་པར་ཚེགས་མེད་པར་མཁྱེན། ཀུན་མཁྱེན་རྒྱལ་མཆོག་ལྔ་པ་ཆེན་པོར་གཙུག་ཕུད་ཕུལ་ཏེ། མཚན་ཀུན་བཟང་པདྨ་ཕྲིན་ལས་སུ་སྩལ། ཕྱིས་དེ་ཉིད་ཀྱི་ཞབས་དྲུང་དུ་བསྙེན་པར་རྫོགས་ཤིང་ཟབ་ཆོས་མང་དུ་གསན། གཞན་ཡང་ཟུར་ཆེན་ཆོས་དབྱིངས་རང་གྲོལ། མགོན་པོ་བསོད་ནམས་མཆོག་ལྡན་སོགས་མཁས་གྲུབ་ཀྱི་བླ་མ་མང་དུ་བསྟེན་ནས། གསར་རྙིང་གི་དབང་ཁྲིད་བཤད་ལུང་མན་ངག་སོགས་ཆོས་བཀའ་མཐའ་ཡས་པ་ཞིག་ངོམ་པ་མེད་པར་གསན་ཅིང་། བསམ་བྱུང་གིས་གཏན་ལ་ཕབ་པས་ཐོགས་པ་མེད་པའི་མཁྱེན་རབ་རྒྱས། ཡང་རྫོང་ཆུ་བོ་རི་གདན་ས་ལ་སོགས་པར་སྒོམ་པའི་ཤེས་རབ་ཀྱིས་ཉམས་སུ་བཞེས་པས་བསྐྱེད་རིམ་ལ་བརྟན་པ་ཐོབ། རྫོགས་རིམ་གྱི་ཡེ་ཤེས་དབང་འབྱོར་བས་མཁས་གྲུབ་ཆེན་པོར་གྱུར་ཏེ། མཁྱེན་བརྩེ་ནུས་པའི་ཕྲིན་ལས་བཤད་སྒྲུབ་ལས་གསུམ་གྱི་འཁོར་ལོ་ལས་ནམ་ཡང་མི་གཡེལ་བ་དང་། ཁྱད་པར་ཀུན་མཁྱེན་རྒྱལ་བ་མཆོག་གི་ལུང་གིས་བསྐུལ་ཏེ་འདུས་པ་མདོའི་དབང་ཆོག་དཀྱིལ་འཁོར་རྒྱ་མཚོའི་འཇུག་ངོགས་ཞེས་བྱ་བའི་བཀའ་རྩོམ་དང་། མདོ་དབང་ཀྱང་ཚར་མང་དུ་མཛད་པ་སོགས་ཀྱིས་མདོའི་བསྟན་པ་ལ་ཕན་པ་ཆེན་པོར་གྱུར་ཅིང་། ད་ལྟ་དགུང་ལོ་བདུན་ཅུ་པའི་ཐོག་ཏུ་ཕེབས་ཏེ་གསར་རྙིང་རིས་མེད་ཀྱི་ཆོས་སྒོ་སྤེལ་བའི་ཕྲིན་ལས་རྒྱུན་ཆགས་སུ་སྐྱོང་བས་བསྟན་འགྲོའི་དོན་རླབས་པོ་ཆེ་མཛད་བཞིན་པར་འཚོ་ཞིང་གཞེས་པ་འདིའོ། ༈ །གཉིས་པ་ཟུར་ཧམ་གྱི་སྐུའི་སྲིང་མོ་ཟུར་མོ་དགེ་འདུན་འབུམ་ལས་བརྒྱུད་པ་ནི། ཟུར་མོ་འདི་དོན་ལ་རང་བཞིན་གྱི་རྣལ་འབྱོར་མ་ཡིན་མོད། རྣམ་པ་གཞོན་ནུ་ནས་འཁོར་བའི་སྐྱོན་དང་བྲལ་བས་སྐུ་བཙུན། བསྐྱེད་རྫོགས་གསུམ་སྒྲུབ་སྡེ་དང་བཅས་པ་ལ་སྦྱངས་པས་མཐར་སོན། གནས་ལུགས་རྟོགས་ཤིང་ཏིང་ངེ་འཛིན་གྱི་སྒོ་དུ་མ་ལ་དབང་འབྱོར་བས། མཁས་གྲུབ་མ་ཆེན་མོར་གྱུར་ཏེ། ཉང་སྨད་རྩེ་རྒྱལ་གྱི་སྒོམ་ཁང་དུ་བཞུགས་ནས་འགྲོ་བའི་དོན་མཛད། དེས་ཡང་དབེན་གསང་སྔགས་གླིང་པ་ཟུར་སྟོན་ཤཱཀྱ་བཤེས་གཉེན་ལ་དབང་བསྐུར། དེས་མཁས་གྲུབ་བྲའོ་ཆོས་འབུམ་ལ། དེས་བཤེས་གཉེན་དཀོན་མཆོག་བཟང་པོ་ལ། དེས་ཀཿཐོག་པ་རྨོག་སྟོན་རྡོ་རྗེ་བཟང་པོ་ལ་དབང་བསྐུར། འདིས་གླན་ལུགས་ཀྱི་དབང་ཆོག་དུམ་དུམ་ཁྲིགས་ཉིད་གཞིར་བྱས་པ་ལ། འགོས་རྩི་ལུང་པའི་ཕྱག་བཞེས་གྲོ་སྟོན་དཔལ་ལྡན་གྲགས་ཀྱི་ཆོག་ཁྲིགས་ཀྱིས་ཀྱང་བརྒྱན། སྒྱུ་འཕྲུལ་ཞི་ཁྲོ་དང་སེམས་སྡེ་ཨ་དོན་བཅོ་བརྒྱད་ཀྱི་དབང་སོགས་སྒོས་བཀའ་ཡང་སྦྱར་ཏེ། དབང་ཆོག་སྦྲང་རྩིའི་ཆུ་རྒྱུན་བརྩམས། དེ་ནས་བཟུང་སྟེ་བརྒྱུད་པ་འདི་ལ་ཁམས་ལུགས་སུ་བཏགས། མཛད་པ་པོ་ཉིད་འཆི་མེད་ཀྱི་རིག་འཛིན་གྲུབ་པར་གྲགས་ཤིང་སྐྱེས་མཆོག་དམ་པ་ཡིན་ངེས་སུ་མ་ཟད། བསྐུལ་བ་པོའང་བཤེས་གཉེན་འགྲན་ཟླ་དང་བྲལ་བ་མང་པོས་མཛད་པས་ཁམ་ཆེ་མོད། ཡིག་ཆའི་ངོས་ནས་མདོ་རང་ལུགས་གཙང་དག་ཏུ་མ་མཐོང་ཡང་། འདྲེན་པའི་ལས་བྱང་ཆུབ་ལེར་བཤད་པའི་སྒྲུབ་རྫས་ཐུན་མོང་བ་བཅོ་ལྔའི་དབང་གཉལ་པའི་ཆོག་ཁྲིགས་སུ་ཆད་པ་འདིར་འབྱུང་བ་དང་། སྒྱུ་འཕྲུལ་ཞི་བའི་ཟབ་དབང་གི་བཀའ་དབུས་གཙང་དུ་ཆད་པ་འདིར་ཀཿཐོག་ལུགས་ཀྱི་རྒྱུན་བཞུགས་པས་གསོས་ཤིང་། སེམས་སྡེ་ཨ་དོན་བཅོ་བརྒྱད་ཀྱི་དབང་རྒྱུན་ཀྱང་འདིས་བཟུང་བས་བསྟན་རྒྱུན་ལ་ཕན་པ་ཆེན་པོའི་སྒོར་གྱུར་བ་ཡིན་ནོ། །རྨོག་སྟོན་རྡོ་རྗེ་བཟང་པོས་བྱང་ཆུབ་སེམས་དཔའ་ཆེན་པོ་དར་ལུང་པ་རྡོ་རྗེ་རྣམ་རྒྱལ་ལ། དེས་མོན་མཁར་ཁྱུང་ཚང་པ་འཁྲུལ་ཞིག་བློ་གྲོས་དཔལ་ལྡན་ལ། དེས་དབང་ལུང་གདམས་པའི་ཆོས་གཏེར་དབང་སྟོན་ཀརྨ་གུ་རུ་ལ། དེས་རླུང་སེམས་ལ་རྩལ་འབྱོངས་པའི་སྔགས་འཆང་ཀུན་བཟང་དཔལ་འབྱོར་ལ། དེས་གསང་བདག་ཆེན་པོ་རིག་འཛིན་ཕྲིན་ལས་ལྷུན་གྲུབ་ལ། དེས་ལོ་ཆེན་དྭགས་སྟོན་ཆོས་རྒྱལ་བསྟན་འཛིན་ལའོ། །ཁམས་ལུགས་འདི་ལ་དེང་སང་གཏད་རྒྱའི་རྒྱུན་མི་བཞུགས་སོ། ༈ །དེ་ལྟར་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུ་དང་། གླིང་པ་ལོ་ཆེན་དྭགས་སྟོན་ཆོས་རྒྱལ་བསྟན་འཛིན་གཉིས་ལ། བདག་ཅག་གི་དཔལ་ལྡན་བླ་མ་དམ་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཞིའི་བདག་ཉིད་གཏེར་ཆེན་ཆོས་ཀྱི་རྒྱལ་པོས་གསན་ཏེ། དེ་ལ་རྗེ་བཙུན་དམ་པ་འདི་ནི། གསང་བའི་བདག་པོ་རྡོ་རྗེ་ཆོས་ཉིད་གསང་སྔགས་ཀྱི་བསྟན་པ་སྤེལ་བའི་ཕྱིར། སྐལ་ལྡན་རྒྱལ་པོ་ཛཿདང་། ལོ་ཙཱ་བ་ཆེན་པོ་བཻ་རོ་ཙ་ན་དང་། ཟུར་པོ་ཆེ་ཤཱཀྱ་འབྱུང་གནས་ལ་སོགས་པ་གང་ལ་གང་འདུལ་གྱི་སྐུའི་བཀོད་པ་མཐའ་ཡས་པར་བསྟན་ནས་དོན་མཛད་པ་སྟེ། དེ་ཡང་སྙིགས་མ་ལྔ་བདོའི་དུས་འདིར་བསྟན་འགྲོའི་དཔུང་གཉེན་དུ་སྐྱེ་སྲིད་བཟུང་བའི་ཚུལ་ནི། སྐུ་ཚེ་སྔ་མའི་སྐུ་རྟེན་འཆི་སྲིད་འོག་གསལ་གྱི་དབྱིངས་སུ་བསྡུས་པ་ལས། རིག་གདངས་མཁའ་འགྲོའི་གླུས་གཞན་དོན་དུ་བསྐུལ་བའི་རྐྱེན་གྱིས། ཡེ་ཤེས་ཀྱི་སྐུ་ཧེ་རུ་ཀའི་རྣམ་པར་བཞེངས་ནས་ལྷུམས་སུ་ཞུགས་ཏེ། ཡབ་སྨྱོས་སྟོན་གསང་བདག་ཆེན་པོ་ཕྲིན་ལས་ལྷུན་གྲུབ་དང་། ཡུམ་རྗེ་རིགས་ལྷ་འཛིན་དབྱངས་ཅན་སྒྲོལ་མའི་སྲས་སུ་མེ་ཁྱིའི་ལོ་དབོ་ཟླའི་ཚེས་བཅུ་ལ་ས་གཡོ་ཞིང་འཇའ་འོད་འཁྲིགས་པ་སོགས་ངོ་མཚར་བའི་ལྟས་དང་བཅས་ཏེ། གྲྭ་ནང་དར་རྒྱས་ཆོས་གླིང་དུ་སྐུ་བལྟམས། བཙས་མ་ཐག་ཡབ་རྗེས་བློ་རྣོ་བའི་རྟེན་འབྲེལ་དང་། བར་ཆད་བསྲུང་བའི་དབང་བསྐུར་བྱིན་བརླབས་དུ་མ་མཛད། དེ་དུས་ཀྱི་ཡུལ་དང་བྱ་སྤྱོད་ཀྱི་རྣམ་པ། དེ་ནས་བཟུང་སྟེ་ལོ་གསུམ་གྱི་བར་ཛོ་ཀ ི་སྔོ་སངས་ཐོར་ཚུགས་ཅན་ཞིག་དང་། བུད་མེད་མཛེས་མ་གཉིས་ཀྱི་རྒྱུན་དུ་སྲི་ཞུ་བྱས་པའི་དངོས་གནས་རྣམས་ད་ལྟ་ཡང་ཐུགས་ལ་གསལ་བའི་དྲན་ཤེས་ཁྱད་པར་ཅན་མངའ། པང་དུ་འཚོ་བའི་དུས་ཉིད་ནས་ཏིང་ངེ་འཛིན་ལ་དབང་འབྱོར་བའི་རྣམ་འགྱུར་དང་། གཞོན་ནུ་རོལ་རྩེད་ཀྱི་ཚེ་ཡང་རྒྱལ་བའི་རིགས་སད་པའི་ངང་ཚུལ་དགེ་བས་བློ་ལྡན་རྣམས་དང་བར་མཛད། དགུང་ལོ་བཞིའི་ཐོག་ཡབ་རྗེ་ལས་བཀའ་བརྒྱད་གསང་རྫོགས་ཀྱི་དབང་གསན་པའི་ཚེ་ཡུལ་སྣང་ཐམས་ཅད་ལ་དཀྱིལ་འཁོར་གྱི་འཁོར་ལོས་རྒྱས་ཐེབས་པས་གཙོ་བོ་དང་བླ་མ་དབྱེར་མེད་དུ་གཟིགས་ཤིང་དབང་བཞིའི་ས་བོན་ཐུགས་རྒྱུད་ལ་ཐེབས་པ་ཉིད། བཅུ་པ་ཤིང་ལུག་གི་སྟོན་བདེ་འདུས་ཀྱི་དབང་གསན་དུས་འོད་གསལ་གྱི་སྣང་བར་སློབ་དཔོན་ཆེན་པོ་པདྨས་དབང་བསྐུར་ཞིང་བྱིན་གྱིས་བརླབས་པའི་ནུས་པས་འཕེལ་ཏེ་བུམ་དབང་གི་ཉམས་མྱོང་ཡུལ་སྣང་སྒྱུ་མ་ལྟ་བུར་གཏན་ལ་ཕེབས། དེ་ཡན་ཆད་དུ་བྲི་ཀློག་དང་། རང་ལུགས་ཀྱི་སྒྲུབ་དཀྱིལ་དབང་རྗེས་གནང་རབ་གནས་གནས་ལུང་སོགས་ཆོག་ཕྲིན་རྣམས་ཀྱི་ཚིག་འཛིན་དང་། ཕྱག་བཞེས་ཐམས་ཅད་ཚེགས་མེད་དུ་ཆུབ་སྟེ། དེ་ནས་བརྩམས་ཏེ་ཡབ་རྗེའི་སྐུ་ཚབ་མཛད་ནས་ཕྲིན་ལས་ཀྱང་ཅི་རིགས་པ་སྐྱོངས་བར་མཛད། དགུང་ལོ་བཅུ་གཅིག་པ་ལ་དཔལ་ལྡན་འབྲས་སྤུངས་སུ་ཁམས་གསུམ་པའི་གཙུག་གི་ནོར་བུར་ཀུན་མཁྱེན་རྒྱལ་བ་ལྔ་པའི་དྲུང་དུ་གཙུག་ཕུད་ཕུལ་ཏེ། མཚན་ངག་དབང་པདྨ་བསྟན་འཛིན་དུ་སྩལ། སྐྱིད་གྲོང་གི་རང་བྱུང་འཕགས་པ་ཐོག་མར་ཕེབས་པ་དང་དུས་འགྲིག་པས་གོང་ནས་རྟེན་འབྲེལ་བཟང་ཞེས་དགྱེས་པར་དབུགས་དབྱུང་ཞིང་། དེ་དུས་འཕགས་པའི་སྐུ་ཞི་འཛུམ་ཆགས་པའི་ཉམས་གསལ་བའི་ཐུགས་ཀ་ནས་འོད་ཟེར་ཉིད་ཀྱི་སྐུ་ལ་ཐིམ་པ་དང་། བཅུ་བདུན་པ་ལ་བསམ་ཡས་སུ་རྗེས་རྒྱལ་བའི་དབང་པོ་འཇལ་པའི་ཚེ་སྐུ་སྤྱན་རས་གཟིགས་ཀྱི་རྣམ་པར་གཟིགས། རིམ་པ་ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོ་དང་། ཡབ་རྗེ་གསང་བདག་ཕྲིན་ལས་ལྷུན་གྲུབ་གཉིས་ནི། སྐུ་དངོས་ཀྱིས་རྗེས་སུ་བཟུང་བའི་བཀའ་དྲིན་ཕུལ་དུ་བྱུང་བར་མ་ཟད། ཕྱིས་ཡེ་ཤེས་ཀྱིས་སྐུས་ཀྱང་བྱིན་གྱིས་བརླབས་པའི་གནད་ཀྱིས་བཀའ་དྲིན་མཚུངས་པ་མེད་པའི་རྩ་བའི་བླ་མ་རྣམ་པ་གཉིས་དང་། གཞན་ཡང་སྨིན་གྲོལ་ཟབ་ལམ་གསན་པའི་བསྟན་འཛིན་ཆེན་པོ་བཅུ་དྲུག །ཟབ་ཆོས་སྣ་ཚོགས་གསན་པའི་ཡོངས་འཛིན་སུམ་ཅུ་རྩ་ལྔ་རྣམས་བསྟེན་ཏེ། ཡུལ་དུས་ཅི་རིགས་པར་ཡོངས་རྫོགས་དགེ་བསྙེན། བྱང་སྡོམ་བཀའ་སྲོལ་གསུམ། སྔར་སྨོས་པ་ལྟར་བཀའ་བརྒྱད་ཡོངས་རྫོགས་ཀྱི་དབང་བརྡ་དོན་འཕྲོད་པ་ཐོག་མའི་སྨིན་བྱེད་དུ་གསན་པས་སྡོམ་པ་གསུམ་གྱི་གཞི་བཟུང་སྟེ། མདོ་སྒྱུ་སེམས་གསུམ་མཉམ་སྦྱོར་ཡང་ཕུར་གཤེད་སྐོར་སོགས་སྔ་འགྱུར་བཀའ་མ་དིང་སང་རྒྱུན་ཡོད་དོ་ཅོག་དང་། གཏེར་མ་བླ་རྫོགས་ཐུགས་གསུམ་སྒྲུབ་སྡེ་སྤྱི་དང་བྱེ་བྲག་གི་བཀའ་སྲོལ་རིགས་མི་འདྲ་བ་དུ་མས་མཚོན་ཡོངས་གྲགས་ཕལ་མོ་ཆེ། གསར་མའི་རྡོར་ཕྲེང་བརྒྱ་རྒྱམ་སོགས་སྤྱི་བཀའ་དང་། བདེ་དགྱེས་དུས་གསང་གཤེད་སྐོར་ཀྲི་ཡོག་སོགས་ཀྱི་ཟུར་བཀའ། མདོ་ཕྱོགས་མང་པོ་དང་བཅས་པའི་དབང་ཁྲིད་བཤད་ལུང་། དེ་ཐམས་ཅད་ཀྱི་རྩ་བར་གྱུར་པ་བཀའ་འགྱུར་རོ་ཅོག་གི་ལུང་སོགས་ཆོས་བཀའ་གསན་པ་ནི་མཐའ་ཡས་ཏེ་མིང་ཙམ་འཛིན་པའང་དཀའ་བའི་གནས་སོ། །དགུང་ལོ་བཅུ་གསུམ་པ་ཙམ་ནས་བཟུང་། རྩ་རྒྱུད་གསང་བ་སྙིང་པོ། རྒྱུད་བླ། སེམས་ཉིད་ངལ་གསོ། ཡིད་བཞིན་མཛོད་རྩ་འགྲེལ་རྣམས་ཐུགས་ལ་བཟུང་ནས་ཡབ་རྗེ་ལས་གསུང་བཤད་རིམ་པར་གསན་ཅིང་། ཕྱིས་གནུབས་ཟུར་རོང་ཟོམ་རྣམས་ཀྱི་གསུང་རབ་དང་། ས་སྐྱ་པཎྜི་ཏའི་རབ་དབྱེ། བཅོམ་ལྡན་རལ་གྲིའི་སྤྱི་རྣམ། རང་བྱུང་ཞབས་ཀྱི་ནང་དོན་རྣམས་ཀྱང་ཐུགས་ལ་བཙུད་ཅིང་། ཁྱད་པར་ཀུན་མཁྱེན་ཆེན་པོའི་གསུང་རབ་རྣམས་ལ་གཟིགས་རྟོག་ནན་ཏན་མཛད་པས་བློ་གྲོས་ཀྱི་རྣམ་པར་དཔྱོད་པའི་མཐུ་ཐོགས་པ་མེད་པ་བརྙེས་ཏེ། ཇི་སྙེད་པའི་ཆོས་ཐམས་ཅད་ལ་སྒྲོ་འདོགས་ཆོད། ཁྱད་པར་འདུས་པ་མདོའི་དབང་ནི། དྭགས་སྟོན་ཆོས་རྒྱལ་བསྟན་འཛིན་ལ་དབང་ཆོག་རིན་ཆེན་ཕྲེང་བའི་སྟེང་ནས་དཀྱིལ་འཁོར་བཞི་བཅུ་རྩ་ལྔར་ཕྱེ་བ་ལས་ཆུ་བོ་བཞི་ཡོངས་རྫོགས་གཏད་རྒྱ་མཐའ་བརྟེན་ཚེ་དབང་དང་བཅས་པའི་དབང་གདམས་ངག་བཤད་ལུང་དང་བཅས་པ་དང་། དབང་ཆོག་སྦྲང་རྩིའི་ཆུ་རྒྱུན་གྱི་སྟེང་ནས་དཀྱིལ་འཁོར་ཉི་ཤུ་རྩ་གཅིག་རས་བྲིས་ལ་བརྟེན་པར་དབང་ལུང་གདམས་ངག་དང་བཅས་པ་རྣམས་གསན། ཡང་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་དཀྱིལ་འཁོར་ཉི་ཤུ་རྩ་བདུན་དུ་བསྡུས་པའི་རྩ་དཀྱིལ་རས་བྲིས་དང་དེ་ཕྱིན་ཚོམ་བུ་ལ་བརྟེན་ཏེ་དབང་ཆོག་རིན་ཆེན་ཕྲེང་བའི་ཐོག་ནས་དབང་གདམས་ངག་བཤད་ལུང་དང་བཅས་པ་མཐའ་རྒྱས་སུ་གསན་ཅིང་། གསང་མཚན་གཉིས་ཀས་འགྱུར་མེད་རྡོ་རྗེ་རྩལ་དུ་གསོལ། སྨོན་ལམ་གྱི་འབྲེལ་པ་སད་པས་ཟབ་གཏེར་གྱི་བཀའ་བབ་ཚུལ་ཀྱང་། དགུང་ལོ་བཅོ་བརྒྱད་པ་ཆུ་ཡོས་ཟླ་བ་ལྔ་པའི་ཚེས་བཅུ་ལ་གཡའ་མ་ལུང་ནས་རིག་འཛིན་ཐུགས་ཐིག །ཉེར་གཉིས་པ་མེ་ལུག་ཁྲུམས་ཟླའི་ཚེས་བརྒྱད་ལ་རྫུ་འཕྲུལ་གྱི་བཀོད་པས་ཤེལ་བྲག་ནས་གཤིན་རྗེ་གཤེད་དྲེགས་འཇོམས། སོ་གཅིག་པ་མེ་འབྲུག་སྟག་ཟླའི་ཉ་ལ་ཨོ་དཀར་བྲག་ནས་གུར་དྲག་རྡོར་སེམས་ཨ་ཏིའི་སྐོར། སོ་ལྔ་པ་ལྕགས་སྤྲེལ་ཆུ་སྟོད་ཟླ་བའི་ཉེར་དགུ་ལ་ཤ་འུག་སྟག་སྒོ་ནས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱིས་ཆོས་སྐོར་ཁྲོམ་གཏེར་དུ་སྤྱན་འདྲེན་པར་མཛད་ཅིང་། དེ་དག་གི་སྔ་ཕྱི་ཅི་རིགས་པར་བྲག་དམར་མཆིམས་ཕུ། གཡའ་མ་ལུང་སོགས་གྲུབ་པའི་གནས་ཆེན་ངོ་མཚར་ཅན་རྣམས་དང་། གདན་ས་གསར་རྙིང་གི་གཟིམས་ཆུང་། གཟིམས་སྤྱིལ་འོད་གསལ་རྩེ་དང་བསམ་གཏན་རྩེ་སོགས་དབེན་པ་རྣམས་སུ་སྐུ་མཚམས་ལོ་སྦྲེལ་མ་དང་། ཟླ་དྲུག་མ། ཟླ་གསུམ། ཟླ་གཅིག་གིས་མཐའ་བརྟེན་པ་ཡན་གྱིས། བླ་མ་ཞི་དྲག །རྡོར་སེམས། བཀའ་བརྒྱད། ཐུགས་རྗེ་ཆེན་པོ། ཡང་ཕུར། གཤིན་རྗེ་གཤེད། རྟ་མགྲིན། མཁའ་སྤྱོད་མ་སོགས་ཡི་དམ་གྱི་ལྷ་སུམ་ཅུ་རྩ་ལྔ་ཙམ་གྱི་བསྙེན་སྒྲུབ་དང་། རྫོགས་པ་ཆེན་པོ་ཁྲེགས་ཆོད་ཀྱི་ཉམས་བཞེས་ལ་སྙིང་པོར་དྲིལ་ནས། ཐོད་རྒལ་དང་རླུང་སྦྱོར་སོགས་ཀྱང་དུས་གནས་དང་བསྟུན་ཏེ་ཐུགས་ཉམས་སུ་བཞེས་པས། མ་དག་པའི་སྣང་བ་འགོག་པའི་བསྐྱེད་རིམ་ལ་བརྟན་པ་ཐོབ་སྟེ། ལས་བཞི་གང་ཡང་ཐོགས་མེད་དུ་གྲུབ། རྫོགས་རིམ་རྩ་རླུང་ཐིག་ལེའི་འགྲོས་དྷཱུ་ཏིར་དག་པས་ཞུ་བདེའི་ཡེ་ཤེས་ཕྱོགས་བརྒྱར་འབར། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་འཁྲུངས་པས་གཟུང་འཛིན་གྱི་མཚན་མ་རང་སར་གྲོལ། འཁོར་འདས་ཐམས་ཅད་གཞི་མེད་རྩ་བྲལ་མཉམ་ཡང་ཁྱབ་བརྡལ་ཆེན་པོར་བྱང་ཆུབ། མཉམ་རྗེས་རིས་མེད་འོད་གསལ་འཁོར་ཡུག་གི་ཏིང་ངེ་འཛིན་ལ་དབང་འབྱོར། སྣང་སྤྱོད་ཐམས་ཅད་ཡེ་ཤེས་ཀྱི་རོལ་པར་ཤར་བས། སློབ་དཔོན་ཆེན་པོ་པདྨ་དང་། བི་མ་ལ། ཧཱུཾ་མཛད། སངས་རྒྱས་གསང་བ། བཻ་རོ་ཙ་ན། མཚོ་རྒྱལ། ཉང་རལ། ཀུན་མཁྱེན་ཆོས་རྗེ་སོགས་རྒྱ་བོད་ཀྱི་པཎ་གྲུབ་དུ་མའི་ཡེ་ཤེས་ཀྱི་སྐུ་མངོན་དུ་སྣང་བས་སྤྲུལ་པའི་དཀྱིལ་འཁོར་སྤྲོས་ཏེ། རང་གཏེར་གྱིས་མཚོན་པའི་བཀའ་གཏེར་དུ་མའི་དབང་བསྐུར་ཞིང་ཟབ་ལམ་གྱི་གདམས་པའི་གནད་ཐམས་ཅད་ལྷུག་པར་བཀྲལ་ནས་སྟོན་པ་དང་། རྡོ་རྗེ་གཞོན་ནུ། རྡོར་སེམས། ཡང་དག །ཐུགས་རྗེ་ཆེན་པོ་ཞི་ཁྲོ། རྣལ་འབྱོར་མ་སོགས་ཡི་དམ་གྱི་ལྷ་དུ་མས་ཀྱང་ཞལ་བསྟན་ཏེ་དབང་བསྐུར་བྱིན་གྱིས་བརླབས་པ་དང་། བདེ་བ་ཅན་དང་རྔ་ཡབ་དཔལ་རི་སོགས་དག་པའི་ཞིང་ཁམས་མང་པོར་བགྲོད་པས་ཞིང་ཡོངས་སུ་འབྱོངས་པའི་ཏིང་ངེ་འཛིན་ལ་དབང་འབྱོར་པ་དང་། མཁའ་འགྲོ་ཆོས་སྐྱོང་རྣམས་ལས་ལ་ཁོལ་བས་ཕྲིན་ལས་ཐོག་མེད་དུ་སྒྲུབ་ཅིང་ལུང་སྟོན་པ་སོགས་ངོ་མཚར་བའི་གཟིགས་སྣང་མཐའ་ཡས། ཆགས་ཐོགས་མེད་པའི་མངོན་ཤེས་མངའ་བས་དུས་ཀྱི་འགྱུར་ལྡོག་སོགས་ཀྱི་ལུང་བསྟན་པ་རྣམས་ཀྱང་ཕྱིས་ཐོག་ཏུ་བབ་པས་ཡིད་ཆེས་ཀྱི་གཏན་ཚིགས་མང་དུ་སྣང་སྟེ་མ་སྤྲོས་སོ། །དེ་ཡང་དགུང་ལོ་སོ་གཅིག་པ་ཡན་ཆོད་དུ་སྔར་ཐུགས་རྒྱུད་ལ་སྨིན་བྱེད་ཀྱི་ས་བོན་ཐེབས་པ་ཉིད་རིམ་གྱིས་འཕེལ་བས་བུམ་དབང་གི་ཉམས་མྱོང་ཡུལ་སྣང་ཐམས་ཅད་གསལ་སྟོང་སྒྱུ་མ་ལྟ་བུར་གཏན་ལ་ཕེབས་པས། ཤས་ཆེར་སྐུའི་འགྲོ་དོན་སྤྱོད་པའི་དུས་ཡིན་པའི་ཕྱིར། ཤོད་ཆེན་སྐྱི་ལུང་སོགས་ལྷོ་བྱང་གི་ཡུལ་ཐ་དད་པ་དུ་མར་ཆིབས་བསྐྱོད་ནས་སྐུའི་དཀྱིལ་འཁོར་མཐོང་བ་ཙམ་གྱིས་རིས་མེད་ཀྱི་གདུལ་བྱ་བསམ་གྱིས་མི་ཁྱབ་པའི་རྒྱུད་ལ་རྣམ་གྲོལ་གྱི་ས་བོན་བཞག་སྟེ་འཁོར་བ་མཐའ་ཅན་དུ་མཛད་པ་དང་། སོ་གཉིས་བཞེས་པ་མེ་སྦྲུལ་དབོ་ཟླ་ནས་བཟུང་གསང་དབང་གི་ཉམས་མྱོང་རང་རིག་གསལ་སྟོང་དུ་ཤར་ཏེ་གཟུང་འཛིན་དབྱིངས་སུ་གྲོལ་བས། གསུང་གི་འགྲོ་དོན་ལ་གཙོ་བོར་སྤྱོད་པའི་དུས་ཡིན་པའི་ཕྱིར། མཆོག་དམན་བར་པའི་སྐལ་ལྡན་ཚོགས་ལ་ཟབ་རྒྱས་ཀྱི་ཆོས་འཁོར་བར་མེད་དུ་བསྐོར་བར་མཛད་པ་དང་། སོ་བརྒྱད་བཞེས་པ་ཆུ་ཕག་ཁྲུམས་ཟླ་ནས་ཕོ་ཉའི་ལམ་གྱིས་ཞུ་བདེའི་དཔེས་མཚོན་པའི་དོན་གྱི་ཡེ་ཤེས་རིག་སྟོང་བདེ་བ་ཆེན་པོ་ལྷན་སྐྱེས་མི་འགྱུར་བའི་དགའ་བཞི་ཐུགས་རྒྱུད་ལ་འཁྲུངས་པའི་ཉམས་མྱོང་རིམ་གྱིས་འཕེལ་བས་ཐུགས་ཀྱི་འགྲོ་དོན་ལ་ཤས་ཆེར་སྤྱོད་པའི་དུས་ཡིན་པའི་ཕྱིར། དེ་ཕྱིན་ཆད་སྤྱི་ཆོས་བཀའ་རིས་མེད་དུ་གསུངས་པ་ཡིན་ནའང་། ཁྱད་པར་ཟབ་ཁྲིད་ཀྱི་གདམས་པ་ཉིད་རྒྱུད་ཐོག་ཏུ་ཅི་སྨིན་འདེབས་པར་མཛད་པས་སྐལ་ལྡན་རྣམས་རང་བྱུང་གི་ཡེ་ཤེས་ཞལ་ལྟ་བ་ལ་བཙན་ཐབས་སུ་དཀྲི་བའི་མཛད་པ་ཁོ་ན་གཙོ་བོར་བདག་གིར་བཞེས་པ་དང་། དེ་ལྟར་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་རོ་མཉམ་པའི་བདག་ཉིད་དུ་གྱུར་པས་ཕྲིན་ལས་ཀྱི་འགྲོ་དོན་མཉམ་ཡངས་ཁྱབ་བརྡལ་དུ་སྤྱོད་པའི་དུས་ཡིན་པའི་ཕྱིར། མཛད་སྤྱོད་ཐམས་ཅད་རང་དོན་ཡིད་བྱེད་ཀྱི་འཁྲི་བ་ལས་རྣམ་པར་གྲོལ་ནས། བསྟན་འགྲོའི་ཕན་བདེ་འབའ་ཞིག་ཐུགས་སུ་གཅགས་པའི་སྙིང་སྟོབས་ཆེན་པོས་བཤད་སྒྲུབ་ལས་གསུམ་གྱི་ཕྲིན་ལས་རྣམ་པར་དཀར་བས་དུས་འདའ་བ་སྟེ། དེ་ལ་འཆད་པའི་ཕྲིན་ལས་ནི། གཙོ་བོར་ཀུན་མཁྱེན་རྒྱལ་མཆོག་ལྔ་པ་ཆེན་པོས་ཟབ་རྒྱས་ཀྱི་ཆོས་སྐོར་ཇི་སྙེད་པ་ཞིག་གསན་ནས་ཏི་ཤྲིར་བཀུར་ཞིང་། དེས་མཚོན་ཏེ་ས་ཕག་སྟག་འབྲི་སོགས་ཆེན་པོའི་གོ་སར་བཞུགས་པའི་སྐྱེས་མཆོག་དུ་མ་དང་། དཔོན་ཆེན་དཔོན་སྐྱ་སོགས་མི་ཆེན། བསྟན་པ་གསལ་བར་མཛད་པའི་བཤེས་གཉེན་སྐུའི་སྲས་མཆེད་རྣམས་དང་། གསུང་གི་སྲས་དམ་པ་མང་པོས་མཚོན་དབུས་གཙང་ཁམས་ཀོང་ལྷོ་མོན་མངའ་རིས་སོགས་ནས་དད་འདུས་ཀྱི་སྐལ་ལྡན་མཆོག་དམན་མཐའ་ཡས་པ་རྣམས་སོ་སོའི་བློ་དང་འཚམས་པའི་སྔ་འགྱུར་བཀའ་གཏེར་དང་སྔགས་གསར་མ་མདོ་ཕྱོགས་སྐོར་སོགས་ཀྱི་དབང་ཁྲིད་བཤད་ལུང་གི་ཆོས་སྒོ་དུ་མ་ཞིག་རྒྱུན་ཆགས་སུ་སྩོལ་བའི་འཆད་ཕྲིན་འགྲན་ཟླ་མེད་པས་བསྟན་པ་གསལ་ཞིང་རྒྱས་པར་མཛད་པ་དང་། བསྟན་པ་ཡུན་རིང་དུ་གནས་པའི་ཕྱིར་བཀའ་གཏེར་གྱི་སྒྲུབ་དཀྱིལ་ཁྲིད་ཡིག་རྣམ་བཤད་ཞལ་གདམས་སོགས་ལེགས་བཤད་ཀྱི་བཀའ་རྩོམས་ཀྱང་མང་དུ་མཛད། སྒྲུབ་པའི་ཕྲིན་ལས་ནི། རང་ཉིད་མཉམ་རྗེས་ཁོར་ཡུག་གི་ཏིང་ངེ་འཛིན་ལས་མི་གཡོ་བཞིན་དུ་སྒོམ་ཁྲིད་འབོགས་པ་རྣམས་གོ་ཡུལ་ཙམ་དུ་མ་ལུས་པར་མངོན་སུམ་རིག་ཐོག་ཏུ་ངོ་སྤྲོད་ཅིང་། དབང་དུས་སུ་ཡེ་ཤེས་ཀྱི་བྱིན་སློབ་མའི་རྒྱུད་ལ་དངོས་སུ་ཕེབས་པ་དང་། བསྙེན་སྒྲུབ་ཀྱི་ལས་རབ་འབྱམས་ཐམས་ཅད་ཀྱང་བཤད་པ་ཙམ་དུ་མ་ལུས་པར་ཕྱག་བཞེས་སུ་ཐེབས་པར་མཛད་པ་ཡིན་ནོ། །བྱ་བ་ལས་ཀྱི་འཁོར་ལོའི་ཕྲིན་ལས་ནི། གོང་ཞབས་ཡས་ཕྱིན་སོགས་ཀྱིས་བླ་ནས་སྩལ་པ་དང་། དད་ལྡན་རྣམས་ཀྱིས་ཕུལ་བའི་དངོས་པོ་རྣམས་མཛོད་ཕུགས་མའི་སྒོ་ལྕགས་མི་སྡོམ་པར། སྡོམ་པ་གསུམ་གྱིས་རྒྱུད་བསྡམས་ཤིང་བཤད་སྒྲུབ་ཀྱི་བྱ་བས་དུས་འདའ་བའི་འདུས་སྡེ་ཨོ་རྒྱན་སྨིན་གྲོལ་གླིང་པ་དགེ་འདུན་སུམ་བརྒྱར་ཉེ་བ་ཙམ་གསར་དུ་བསྡུ་བར་མཛད་པ་ལ་རུང་བའི་རྙེད་བཀུར་གྱིས་མི་བྲེལ་བར་རྒྱུད་ཆགས་པ་དང་། དེ་དག་གི་གནས་མལ་དང་རྟེན་གསུམ་མཆོད་ཆ། དུས་བཞིའི་སྒྲུབ་མཆོད་ཀྱི་ཡོ་བྱད་དང་རྙེད་པ། གཞན་ཡང་བྲིས་འབུར་གྱི་སྐུ་བརྙན་མང་པོ་དང་། གསེར་དངུལ་གྱི་བཀའ་འགྱུར་གྱིས་མཚོན་པའི་གླེགས་བམ་ལྔ་བརྒྱ་བརྒལ་བ་དང་། སྔ་འགྱུར་གྱི་འགྲེལ་བཤད་ཆོག་ཕྲིན་ལ་སོགས་པའི་པར་མང་པོ། སྐུ་འབུམ་མཐོང་གྲོལ་ཆེན་མོས་ཐོག་དྲངས་པའི་ཐུགས་རྟེན་དུ་མ་རྣམས་བཞེངས་པར་མཛད་ཅིང་། གཏོད་བ་ཕུན་སུམ་ཚོགས་པས་རིས་མེད་པའི་མཆོད་སྦྱིན་གྱི་ཡུལ་རྣམས་ལ་ཚོགས་གཉིས་ཀྱི་རྒྱུར་ལྷུག་པར་གཏོང་བ་སོགས་བསྟན་འགྲོའི་ཕན་བདེ་རྒྱས་པའི་མཛད་པ་རླབས་ཆེན་ཁོ་ན་བདག་གིར་བཞེས་པ་ནི་ངོ་མཚར་རྨད་དུ་བྱུང་བའི་རྣམ་ཐར་རོ། །ཁྱད་པར་སྐུ་གསུང་ཐུགས་ཀྱི་སྲས་མཆོག་པདྨ་འགྱུར་མེད་རྒྱ་མཚོས་ཐོག་དྲངས་སྨིན་གྲོལ་གླིང་འདུས་ཚོགས་སོགས་བདག་ཅག་གཉུག་མར་གནས་པ་རྣམས་དང་། ཏྲེའོ་སྤྲུལ་པའི་སྐུ། རབ་འབྱམས་པ་ཆགས་པ་ཆོས་འཕེལ། དཔལ་རི་གདན་ས་པ། སྤོ་བོ་བླ་མ་སོགས་གློ་བུར་ལྷགས་པའི་དོན་གཉེར་ཅན་ཏེ་ཁྱོན་འདུས་པ་སུམ་བརྒྱ་སྐོར་ལ། རྩ་བ་དང་ཡན་ལག་གི་དཀྱིལ་འཁོར་གྱི་དབྱེ་བསྡུ་ལྷ་རྗེ་འགར་དང་གླན་སྔ་ཕྱི་སོགས་སྒྲོལ་ཆེན་ཡན་ཆད་ཕྱག་ལེན་གྱི་སྲོལ་གཅིག་ཏུ་འབབ་པའི་ལུགས་ལྟར། རྡུལ་ཚོན་གྱི་དཀྱིལ་འཁོར་ལ་བརྟེན་པའི་འདུས་པ་མདོའི་ཆུ་བོ་བཞི་རྫོགས་གཏད་རྒྱ་གདམས་ངག་བཤད་པ་མཐའ་བརྟེན་དང་བཅས་པ་སྒྲུབ་ཆེན་གྱི་ལས་རིམ་དང་འབྲེལ་བར་ལྕགས་ལུག་ཁྲུམས་ཟླའི་ཚེས་བདུན་ནས་བཅོ་བརྒྱད་ཀྱི་བར་ཞག་བཅུ་གཅིག་གི་ཁོངས་སུ་རྫོགས་པའི་སྨིན་རྒྱས་སུ་སྩལ་བས་མཚོན་བསྟན་འགྲོའི་དོན་རླབས་པོ་ཆེ་རྒྱུན་ཆགས་སུ་མཛད་བཞིན་པར་ད་ལྟ་དགུང་ལོ་དྲུག་ཅུ་རེ་ལྔའི་སྟེང་དུ་ཕེབས་པ་འདི་ལགས་ཏེ། ད་དུང་ཡང་མཁའ་ཁྱབ་ཀྱི་སེམས་ཅན་ཐམས་ཅད་བདག་ཉིད་ཆེན་པོའི་གོ་འཕང་མཆོག་ལ་འགོད་པའི་ཕྲིན་ལས་རྒྱ་ཆེ་རྒྱུན་མི་ཆད་པ་དེ་སྲིད་དུ་གཟུགས་སྐུ་འདི་ཉིད་ཀྱང་འཆར་ནུབ་དང་བྲལ་བར་གཡོ་མེད་དུ་བཞུགས་པར་གསོལ་བ་འདེབས་སོ། །དེ་དག་གི་ནང་ནས་དཔལ་རྟ་མགྲིན་གྱི་རྣམ་སྤྲུལ་སྐུའི་སྲས་མཆོག་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེ་དཔལ་བཟང་པོ་ནི། རྗེ་གཏེར་ཆེན་བླ་མའི་སྲས་སུ་མེ་སྟག་གི་ལོ་ལ་འཁྲུངས། ཆུང་ངུ་ནས་རིགས་སད་པའི་རྟགས་མངའ་བས་དགུང་ལོ་བདུན་པ་ལ་འདུས་ཚོགས་ཀྱི་དབུས་སུ་གསང་སྙིང་ཐུགས་ལས་གསུངས་པས་ཐམས་ཅད་ངོ་མཚར་སྐྱེས། དེས་མཚོན་ཏེ་སྐྱེ་བས་ཐོབ་པའི་ཐུགས་རབ་ཕུལ་དུ་བྱུང་བ་ཉིད། ཡབ་རྗེ་ཆོས་ཀྱི་རྒྱལ་པོ་སོགས་བཤེས་གཉེན་དམ་པ་རྣམས་ཀྱི་བདག་རྐྱེན་གྱིས་སད་པས། མདོ་སྔགས་གསར་རྙིང་གི་ཆོས་དཔག་ཏུ་མེད་པ་ཞིག་གསན་ཅིང་། མདོ་རྒྱུད་རིག་གནས་དང་བཅས་པ་ལ་མཁས་པའི་རྩེ་མོར་སོན། དགུང་ལོ་ཉི་ཤུ་པ་ལ་ཆིག་རྫོགས་མཛད། ལོ་སྒྲུབ་དང་ཟླ་སྦྲེལ་སོགས་ཀྱི་སྐུ་མཚམས་བཅད་དེ་ལྷག་པའི་ལྷ་མང་པོ་ལ་བསྙེན་སྒྲུབ་མཐར་ཕྱིན་པར་མཛད་པས་གྲུབ་པའི་མཚན་མ་བརྙེས། དགུང་ལོ་བཅུ་གཅིག་པ་ལ་གཅུང་རིན་པོ་ཆེ་དང་ཐང་འབྲོག་སྤྲུལ་པའི་སྐུ་སོགས་ལ་རྙིང་མ་རྒྱུད་འབུམ་གྱི་ལུང་ཡོངས་རྫོགས་མཛད་པ་ནས་བརྩམས་ཏེ། དུས་འཁོར་ཀུན་རིགས་སོགས་གསར་མའི་དབང་དང་། བཀའ་བརྒྱད་བདེ་འདུས། སྒྱུ་འཕྲུལ་ཞི་ཁྲོ། མཉམ་སྦྱོར་ཡང་དག་སོགས་རྙིང་མའི་དབང་གིས་མཚོན་དབང་ཁྲིད་བཤད་ལུང་སོགས་མདོ་སྔགས་ཀྱི་ཆོས་སྒོ་མཐའ་ཡས་པ་དང་། སྒྲ་སྙན་སྡེབ་སྦྱོར་རྩིས་སོགས་ཐུན་མོང་རིག་གནས་ཀྱི་སྐོར་འཆད་པ་དང་རྩོམ་པའི་བྱ་བས་གདུལ་བྱ་སོ་སོའི་བློའི་རེ་བ་སྐོང་བར་མཛད་ཅིང་། ཁྱད་པར་འདི་ལོ་ལྕགས་སྟག་ཉེར་ལྔའི་དགུང་ཀེག་གི་སྟེང་དུ་ཕེབས་པ་མཆུ་ཟླ་ཆོ་འཕྲུལ་གྱི་དུས་ཆེན་ཐོག །ཞབས་དྲུང་སྐུ་མཆེད་དང་། ཁམས་པ་རྫོགས་ཆེན་སྤྲུལ་སྐུ་སོགས་སྐྱེས་ཆེན་དུ་མ་དང་སྐལ་ལྡན་གྱི་སློབ་མ་མང་པོར་འདུས་པ་མདོའི་དབང་གཏད་རྒྱ་གདམས་ངག་དང་བཅས་པས་སྨིན་གྲོལ་ལ་འགོད་པར་མཛད་པ་སོགས་བསྟན་འགྲོའི་དཔུང་གཉེན་དུ་འཚོ་ཞིང་གཞེས་པ་ཡིན་ནོ། །བདག་སྨྱོས་ཀྱི་དགེ་སློང་རྨོངས་པ་དྷརྨཱ་ཤྲཱིས་ཀྱང་དེ་ཉིད་ཀྱི་ཞབས་ཕྱིར་གཏེར་ཆེན་བླ་མ་མཆོག་ལས་འདུས་པ་མདོའི་དབང་ནོད་ཅིང་། གསང་མཚན་རྡོ་རྗེ་གཟི་འབར་རྩལ་དུ་སྩལ། རང་ལ་ནུས་པ་མེད་ཀྱང་བླ་མ་དམ་པའི་ཐུགས་རྗེ་རྒྱུད་ལ་ཞུགས་པས། སྔར་ཕན་ཆད་མདོ་དབང་ལན་གསུམ་བསྐུར་བའི་བར་མ་ལ། རྗེ་བླ་མ་དམ་པའི་སྐུའི་སྲས་མཆེད་དང་། འོད་མཆོག་སྤྲུལ་པའི་སྐུ། ཐང་འབྲོག་སྤྲུལ་པའི་སྐུ། བོན་ལུང་སྤྲུལ་པའི་སྐུ་སོགས་དང་། ཕྱི་མ་ལ་གསུང་སྤྲུལ་ངག་དབང་ཀུན་བཟང་རྡོ་རྗེ། ཡོན་དོ་སྤྲུལ་པའི་སྐུ། ཁམས་པ་སྤྲུལ་པའི་སྐུ། རྣ་བོ་གདུང་བརྒྱུད། རོང་པ་རྫོགས་ཆེན་སྤྲུལ་སྐུ་སོགས་བསྟན་པའི་གསལ་བྱེད་སྐྱེས་ཆེན་དམ་པ་མང་པོས་ཀྱང་གསན་ཞིང་། དེ་དག་གི་ནང་ནས་དམ་པ་འགའི་གསུང་གིས་བསྐུལ་བའི་ངོ་མ་ཆོག་པ་དང་། རྗེ་བླ་མ་དམ་པ་མཆོག་གིས་མཛད་པའི་མདོ་རྩ་བའི་སྒྲུབ་ཐབས་དངོས་གྲུབ་ཆར་འབེབས་དང་། དཀྱིལ་ཆོག་དྲི་མེད་འོད་ཕྲེང་གཉིས་ཀྱི་ཁ་སྐོངས་ཞབས་འདེགས་སུ་དམིགས་ནས། ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། རྒྱུད་དང་མན་ངག་གཅིག་དྲིལ་གྱི་དབང་ཆོག་རྡོ་རྗེའི་ཐེམ་སྐས། སྒྲུབ་ཁོག་རིན་ཆེན་འོད་ཀྱི་སྣང་བ། ཟུར་འདེབས་དཔག་བསམ་སྙེ་མ་ཞེས་བྱ་བའི་ཡིག་ཆ་རྣམས་ཕྱག་བཞེས་བཞིན་ཁྲིགས་སུ་བྱས་པས་མདོའི་བསྟན་པ་ལ་ཕན་པའི་རྣམ་དཀར་གྱི་བྱ་བ་ཆ་ཙམ་འགྲུབ་པ་ལྟར། སླད་ཀྱི་ཚེ་མཇུག་འདི་དང་ཕྱི་མའི་ཚེ་རབས་ཀྱི་ཕྲེང་བར་དུས་གསུམ་རྒྱལ་བའི་སྤྱི་གཟུགས་གཏེར་ཆེན་བླ་མ་དམ་པ་རིགས་བདག་ཏུ་མི་འབྲལ་བས་སྔ་འགྱུར་གྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གྱི་སྒོ་ནས་དར་ཞིང་རྒྱས་པར་བྱེད་ནུས་པའི་སྐྱེས་བུ་མཐུ་ལྡན་དུ་སྨོན་པ། དེ་ཁོ་ན་བཞིན་དུ་འགྲུབ་པར་བྱིན་གྱིས་རློབ་ཏུ་གསོལ་ལོ། ༈ །གཉིས་པ་མན་ངག་ལུགས་ཡན་ལག་གི་དཀྱིལ་འཁོར་སོ་སོར་ཕྱེ་སྟེ་ཆུ་བོ་བཞི་རྫོགས་སུ་བསྐུར་བའི་དབང་གི་བརྒྱུད་པའི་ཁྱད་པར་བྱེ་བྲག་ཏུ་བཤད་པ་ལ་གཉིས་ཏེ། དངོས་དང་། འཕྲོས་དོན་བསྐྱེད་རྫོགས་གསུམ་སོ་སོའི་བརྒྱུད་ཚུལ་འདིར་དྲངས་པ་ལ་དོགས་པ་དཔྱད་པའོ། །དང་པོ་ནི། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་གསུངས་པ་ལས། མདོ་ཡོངས་རྫོགས་ཀྱི་རང་སྐད་ལྟར་ན། ལྷ་མིའི་ཐེག་པ་ཆུ་བོ་ནཻ་རཱཉྫ་ནའི་འགྲམ་དུ་གསུངས། ཉན་ཐོས་ཀྱི་ཐེག་པ་ཝཱ་རཱ་ཎ་སཱིར། རང་སངས་རྒྱས་ཀྱི་ཐེག་པ་རི་བོ་བྱ་རྐང་ཅན་དུ། བྱང་སེམས་ཀྱི་ཐེག་པ་རྒྱལ་པོའི་ཁབ་ཀྱི་བྱ་རྒོད་ཕུང་པོའི་རིར། ཀྲི་ཡ་ཝཱ་རཱ་ཎ་སཱིར། ཡོ་ག་རི་རབ་ཀྱི་རྩེའམ་མེ་རི་འབར་བའི་རྩེར། ནང་རྒྱུད་སྡེ་གསུམ་སྤྱིར་ཡེ་ཤེས་རང་སྣང་གི་གནས་ལ་སོགས་པ་དང་། བྱེ་བྲག་ཆུ་བོ་བཞིའི་དབང་བསྐུར་བའི་གནས་རིམ་པར། དགའ་ལྡན་དང་། ནཻ་རཱཉྫ་ནའི་འགྲམ་དང་། བྱང་ཆུབ་ཀྱི་ཤིང་དྲུང་དང་། དབང་སྒྱུར་གྱི་ཁང་བཟང་རྣམས་སུ་གསུངས་པ་ཉིད། མི་ཡུལ་དུ་ཇི་ལྟར་བབས་ཚུལ་ནི། རྒྱལ་པོ་ཛཿལ་རྒྱུད་ལུང་གི་གླེགས་བམ་བབས་པ་དང་དུས་མཚུངས་པར་ལམ་སྟེགས་ཀྱི་ཐེག་པ་རྣམས་ལས། ཀྲི་ཡ་ཝཱ་རཱ་ཎ་སཱི་དང་། ཡོ་ག་རྣམས་མེ་རི་འབར་བའི་རྩེར་གླེགས་བམ་དང་བཅས་བབས་ཤིང་། ཀུན་འབྱུང་འདྲེན་པའི་ཐེག་པ་རྣམས་ཀྱི་གླེགས་བམ་དངོས་སུ་བབས་པའི་གསལ་ཁ་མི་སྣང་ཡང་། གང་དུ་བྱུང་བའི་གནས་ནི། ལྷ་མི་དང་ཉན་ཐོས་ཀྱི་ཐེག་པ་གཉིས་ནཻ་རཱཉྫ་ནའི་གནས་སུ། རང་སངས་རྒྱས་ཀྱི་ཐེག་པ་རྒྱལ་བྱེད་ཚལ་གྱི་ཀུན་དགའ་ར་བར། བྱང་སེམས་ཀྱི་ཐེག་པ་བྱ་རྒོད་ཕུང་པོའི་རི་བོ་རྣམས་སུ་བབས་པར་བཤད། དེ་ཐམས་ཅད་སློབ་དཔོན་ཆེན་པོ་རོ་ལངས་བདེ་བ་ལ་བཀའ་བབས་ཏེ། མཚན་ཉིད་སྡེ་གསུམ། ཕྱི་རྒྱུད་སྡེ་གསུམ། ནང་རྒྱུད་གསུམ་ལས། རྒྱུད་ལུང་གཉིས་རྣམས་མི་ཡུལ་དུ་བབས་ཏེ་དར་ཞིང་རྒྱས་ལ། མན་ངག་རྫོགས་པ་ཆེན་པོ་མ་བྱུང་བའི་དུས་ན། ནུབ་ཕྱོགས་ཨོ་རྒྱན་གྱི་ཡུལ་དུ་ཡབ་རྒྱལ་པོ་དྷ་ན་ཨ་ཀོ་ཤའམ་ཨུ་པ་རཱ་ཛ་ཞེས་གྲགས་པ་ལ། བུ་མོ་སྲིད་པ་གཡུང་དྲུང་འཚོའམ་མེ་ཏོག་གསལ་བྱ་བ་མཚན་དང་ལྡན་པ་ཞིག་ཡོད་པ་དེ། དྷ་ན་ཀོ་ཤའི་གླིང་ཕུག་རིན་ཆེན་གཡུ་སྡིངས་ཚལ་དུ་རབ་ཏུ་བྱུང་ནས། དགེ་སློང་མའི་ཁྲིམས་ལ་གནས་པ་ལ། ནམ་ཞིག་ཕྱག་ན་རྡོ་རྗེ་བྱ་ངང་པའི་གཟུགས་སུ་སྤྲུལ་པ་མངོན་དུ་བྱུང་སྟེ། སྙིང་གར་མཆུ་ལན་གསུམ་གཏུགས་ནས་ལུང་བསྟན། དེའི་ནུབ་མོ་རྨི་ལམ་དུ་ཤེལ་གྱི་མི་དཀར་པོ་ཞིག་གིས་རིན་པོ་ཆེའི་བུམ་ཆུ་སྤྱི་བོར་གཏིགས་ཏེ་དབང་བསྐུར་བས། གསང་བདག་གིས་སྤྲུལ་པའི་སྲས་ལྷུམས་སུ་ཆགས་ཀྱང་སྦྲུམ་པའི་རྣམ་པ་མེད་པར་ཟླ་དགུ་ངོ་བཅུ་ན། ཐུགས་ཀ་ནས་གསེར་གྱི་རྡོ་རྗེ་འོད་འབར་བ་ཞིག་ཐོན་པ་ཞུ་བ་ལས་ཁྱེའུ་མཚན་དང་ལྡན་པ་རྡོ་རྗེ་སེམས་དཔའ་ནམ་མཁའ་ཆེ་ཁ་ཏོན་དུ་མཛད་པ་ཞིག་བྱུང་བ་དང་། གཡོག་མོས་ཕ་མེད་པའི་བུ་འདི་འདྲ་བ་ལྟས་ངན་ནོ་སྙམ་དུ་ཐལ་ཁུང་དུ་བོར་ནས་ཞག་དྲུག་ལོན་པའི་ཚེ་བལྟས་པས། ཅི་ཡང་མ་ཉེས་པར་མདངས་ཡལ་ལེ་འདུག་པ་བླངས་ཏེ། མཚན་རོ་ལངས་ཐལ་མདོག་ཏུ་བཏགས་ཤིང་། སྣང་སྲིད་བདེ་བ་ལ་བཀོད་པས་རོ་ལངས་བདེ་བ་ཞེས་གྲགས་སྐད། འདི་ནི་སྤྲུལ་པའི་སྐུ་ངོ་མཚར་ཅན་ནོ་ཞེས་ཐམས་ཅད་དགའ་བ་རབ་ཀྱི་རྩེ་མོར་སོན་ཞིང་ཕྱག་ན་རྡོ་རྗེ་བསྣམས་པས་དགའ་རབ་རྡོ་རྗེ་ཞེས་ཀྱང་མཚན་དུ་གསོལ་ཏེ། ཆུང་ངུ་ནས་སངས་རྒྱས་ཀྱི་ཆོས་ཐམས་ཅད་ཐུགས་ལ་རང་ཤར་དུ་མཁྱེན། གསང་བའི་བདག་པོས་རང་བཞིན་རྫོགས་པ་ཆེན་པོའི་ཆོས་བསྟན་ནས་བསྟན་པའི་བདག་པོར་དབང་བསྐུར། ཁྱད་པར་རྒྱལ་པོ་དྷ་ཧེ་ནའི་བུ་མོ་རིན་ཆེན་གསལ་སྒྲོན་གྲོགས་སུ་ཁྲིད་ནས། ཟླ་གམ་འོད་འཕྲོ་སེང་གེ་ནགས་བརྟེན་གྱི་ཚལ་དུ་ཨཱ་ཙཱརྻ་ཀིངྐ་ར་ལ། རྩལ་ཆེན་གྱི་དབང་ཞེས་བྱ་བ་ཕ་རོལ་ཏུ་ཕྱིན་པ་མཛད་པ་ཉི་ཤུའི་དབང་ནོས། དེ་ནས་པདྨ་མེ་ཏོག་ལྗོན་ཤིང་གི་ཚལ་དུ་ཨ་ཙཱརྻ་ནཱ་གརྫུ་ན་ཙཎྜཱི་ཀ་ལ་གཏན་ཚིགས་བགྲོ་གླིང་གི་དབང་ཞེས་བྱ་བ་ཀྲི་ཡའི་དབང་མཆོག་ཉི་ཤུ་རྩ་དྲུག་ནོས། དེ་ནས་ལྷ་བྱ་སྐད་སྙན་ལྗོན་ཤིང་གི་ཚལ་དུ་ཨ་ཙཱརྻ་པདྨ་ཀུ་མ་ཏི་ལ་ཡོ་ག་བཀྲ་ཤིས་དྲུག་ཅུ་རྩ་གཉིས་ཀྱི་དབང་ནོས། དེ་ལྟར་ཕྱི་དབང་བརྒྱ་རྩ་བརྒྱད་རྫོགས་ནས། རྡོ་རྗེ་གདན་དུ་ཨ་ཙཱརྻ་རབ་ཏུ་གསལ་བ་ལ། མཉམ་སྦྱོར། ཟླ་གསང་། གསང་འདུས་སྙིང་ཞགས་སོགས་ཏནྟྲ་མཐའ་ཡས་པ་ནོས་ཏེ་རྒྱུད་ལུང་ཐམས་ཅད་ཀྱི་བཀའ་བབས། དེ་ནས་བྱི་རུ་དམར་པོ་ཆུ་མིག་དགུ་སྒྲིལ་གྱི་ཚལ་དུ་སློབ་དཔོན་རོ་ལངས་བདེ་བ་དང་། རིན་ཆེན་གསལ་སྒྲོན་གཉིས་ལ་དབང་བཞི་རྫོགས་པར་བསྐུར་ཏེ། ཕྱི་ཡོ་བྱད་རྫས་ཀྱི་དབང་། ནང་རིག་པ་ཏིང་ངེ་འཛིན་གྱི་དབང་། གསང་བ་ཡེ་ཤེས་ལྔའི་དབང་། དེ་ཁོ་ན་ཉིད་ཆོས་ཉིད་བྱང་ཆུབ་སེམས་ཀྱི་དབང་བསྐུར་བས། རྟོག་ཚོགས་ལྷའི་དཀྱིལ་འཁོར་དུ་དབང་སྒྱུར་ནས། དབང་རྟགས་སུ་སློབ་དཔོན་ལ་ཤེལ་གྱི་ཕྱག་ཤིང་རིན་པོ་ཆེ་སྣ་ལྔས་བརྒྱན་པ་དང་། གྲོགས་མོ་ལ་སྣང་སྲིད་གསལ་བའི་མེ་ལོང་ཞིག་བྱིན། དེ་ནས་དྷ་ན་ཀོ་ཤའི་གླིང་ཕུག་རིན་ཆེན་གཡུ་སྡིངས་ཚལ་དུ་གཤེགས་ཏེ་བཞུགས་པ་ན། ཨོ་རྒྱན་གྱི་རྒྱལ་པོ་དྷརྨ་ཀཱ་ཡ་དང་། ཀླུའི་བུ་མོ་རྒྱ་མཚོ་གཉིས་ཀྱིས་སློབ་དཔོན་ཡབ་ཡུམ་སྤྱན་དྲངས། ཨོ་རྒྱན་གྱི་ཡུལ་ནས་སློབ་མ་བསྡུསཏེ། རྒྱ་གར་དང་ཨོ་རྒྱན་གྱི་ཡུལ་གྱི་མཚམས་མ་ག་ཏའི་བྲག་ཕུག་ཏུ་ཉེ་རྒྱུའི་སྤྱོད་པ་ཚོགས་ཀྱི་སྒྲུབ་པ་མཛད་པས། ཚོམ་བུ་ཁྲི་ཕྲག་གཅིག་དང་བཅས་ཏེ། མི་སློབ་པའི་ཟུང་འཇུག་སངས་རྒྱས་ཀྱི་ས་མངོན་དུ་བརྙེས། དེ་ནས་ཨོ་རྒྱན་ཡི་རྒྱལ་པོ་དྷརྨ་ཀཱ་ཡས། ས་ཧོ་རའི་རྒྱལ་པོ་ལ། དེས་སིདྒ་ལའི་རྒྱལ་པོ་ལ། དེས་དགེ་སློང་སོཀྱ་དེ་ཝ་ལ། དེས་སྒེག་པ་རྡོ་རྗེ་ལ། དེས་ཆོས་བློ་བདེ་བ་ལ། དེས་མཁན་པོ་ཆོས་རྒྱལ་སྐྱོང་ལ་དབང་བསྐུར་རོ་ཞེས་འབྱུང་བ་ནི་མདོ་ཡོངས་རྫོགས་ཀྱི་བརྒྱུད་པ་བྱེ་བྲག་པ་ལུགས་གཅིག་གི་འདྲེན་ཚུལ་དུ་ཟད་ལ། འདིར་བརྒྱུད་ལུགས་གཙོ་བོ་ནི། སྔར་རྒྱས་པར་བཤད་པ་ལྟར། སློབ་དཔོན་རོ་ལངས་བདེ་བ་ནས། རྡོ་རྗེ་བཞད་པ་ལ་བརྒྱུད་པས། དེ་མན་ཆད་མདོ་རྩ་བ་དང་ཡོངས་རྫོགས་ཀྱི་ཆུ་བོ་བཞིའི་བརྒྱུད་ལུགས་གཉིས་ཀ་ཆུ་བོ་གཅིག་འདྲེས་སུ་འདོད་དགོས་ཏེ། མདོ་ཡོངས་རྫོགས་ཀྱི་དབང་བསྐུར་བའི་ཕྱག་བཞེས་ཡིན་ན། སློབ་དཔོན་ཆེན་པོ་བདེ་བ་གསལ་མཛད་ཀྱི་ལས་ཐོ་སོགས་ཡིག་སྣ་བཅོ་བརྒྱད་ལ་བརྟེན་ནས་བསྐུར་དགོས་པ་གང་ཞིག །བཤད་མ་ཐག་པའི་མདོ་ཡོངས་རྫོགས་ཀྱི་བརྒྱུད་པ་བྱེ་བྲག་པ་དེའི་ནང་དུ་བདེ་བ་གསལ་མཛད་མ་བྱུང་བའི་ཕྱིར་རོ། །དེས་ན་འདི་ནི་ལུང་སྤྱི་དང་མ་སྦྲེལ་བར། ཡན་ལག་གི་དཀྱིལ་འཁོར་འབྱུང་བའི་ཆུ་བོ་མན་ཆད་ཀྱི་བཀའ་བྱེ་བྲག་ཏུ་ཕྱུང་སྟེ། སློབ་དཔོན་དྷརྨ་རཱ་ཛས་གནུབས་ཆེན་ལ་བསྐུར་བའི་བརྒྱུད་ཚུལ་གྱི་ཉེ་བརྒྱུད་ལུགས་གཅིག་ཡིན་པ་སྙམ་མོ། ༈ །གཉིས་པ་ནི། འདི་སྙམ་དུ། འདྲེན་པའི་ལས་བྱང་ཆེ་ལེར། དེ་ནས་བྱིན་པ་སློབ་དཔོན་གྱི་དབང་ནི། དུས་གསུམ་གྱི་རྡོ་རྗེ་སློབ་དཔོན་གྱི་མཚན་དང་གསང་མཚན་དང་བཅས་པས་དབང་བསྐུར་ཏེ། དེ་ཡང་དམ་ཚིག་དབང་གི་སློབ་དཔོན་དང་། ཤེས་རབ་རྒྱུད་ཀྱི་སློབ་དཔོན་དང་། མན་ངག་འབྲས་བུའི་སློབ་དཔོན་གྱི་རིམ་པས་དབང་བསྐུར་རོ། །ཞེས་གསུངས་པའི་དོན་དབང་ཆོག་རྣམས་སུ་མ་ཧཱ་ཨ་ནུ་ཨ་ཏིའི་བརྒྱུད་ཚུལ་གསུམ་གྱི་བཀའ་གནུབས་ཆེན་ལ་བབས་པས། དེ་མན་ཆད་ཆུ་བོ་གཅིག་འདྲེས་སུ་གསུངས་པ་མ་ཡིན་ནམ། ཡིན་ན་འདིར་སྔར་མདོ་རྩ་བ་དང་ཡོངས་རྫོགས་ཀྱི་བརྒྱུད་ལུགས་གཉིས་རོ་ལངས་བདེ་བ་ལ་བཀའ་བབས་པས། དེ་མན་ཆད་བརྒྱུད་པ་གཅིག་འདྲེས་སུ་བཤད་པ་དང་འགལ་བ་ཇི་ལྟར་སྤོང་ཞེ་ན། འདི་ལ་གསུམ་སྟེ། མདོའི་དབང་ལ་མ་ཧཱ་དང་ཨ་ཏིའི་བརྒྱུད་པ་འདྲེན་པ་ལ་གནོད་བྱེད་ཡོད་ཚུལ། དབང་ཆོག་རྣམས་སུ་དེ་གསུམ་ཆུ་བོ་གཅིག་འདྲེས་སུ་དྲངས་པའི་དགོངས་པ་ཇི་ལྟར་ཡིན་པ། དེས་ན་འདིར་བཤད་ཉིད་འཐད་ལྡན་དུ་སྒྲུབ་པའོ། །དང་པོ་ནི། བདག་གི་རྗེ་བླ་མ་གཏེར་ཆེན་ཆོས་ཀྱི་རྒྱལ་པོས་དགུང་ལོ་ཞེ་བཞི་པ་ས་སྦྲུལ་གྱི་ལོ་མདོ་དབང་གི་ཕྱག་བཞེས་ལ་དོགས་གནས་ཀྱི་དྲི་བའི་ཕྲེང་བ་ཚིགས་སུ་བཅད་པ་ཉི་ཤུ་ཡོད་པ་ཞིག་མཛད་དེ། དེར་བརྒྱུད་པ་འདྲེན་ཚུལ་གྱི་སྐབས་ལས་བརྩམས་ཏེ་འདི་སྐད་ཅེས། ཡོ་ག་གསུམ་ཀའི་བརྒྱུད་པའི་ཚུལ། །སྐབས་འདིར་གནུབས་ལ་འདྲེན་དགོས་ན། །དེ་ཡི་གོང་དུ་འདུས་པ་མདོའི། །དབང་བསྐུར་མེད་པར་མི་འགྱུར་རམ། །ཞེས་གསུངས་ཏེ། འདི་ལྟར་འདྲི་བར་མཛད་པའི་དགོངས་པ་ལ་གཉིས་ཏེ། འདྲི་དགོས་པའི་རྒྱུ་མཚན་དང་། མ་དྲིས་ན་སྐྱོན་ཡོད་ཚུལ་ལོ། །དང་པོ་ནི། འདིར་ཞུགས་པའི་ཕྱིས་ཀྱི་སྔགས་པ་ཕལ་ཆེར། མདོ་ཡོངས་རྫོགས་ཀྱི་དབང་ཡིན་ན། ཐེག་དགུའི་དབང་ཡིན་དགོས་ལ། དེ་ཡིན་ན་ཐེག་བརྒྱད་སྒོས་ཀྱི་ཆོ་ག་སོ་སོ་ལས་བཏུས་ཏེ་སྤྱིའི་ཆོ་གར་བྱས་པ་ཡིན་དགོས་སྙམ་པ་དང་། རྒྱུ་མཚན་དེས་ཐེག་བརྒྱད་གཞན་ཐམས་ཅད་ཀྱི་བརྒྱུད་པའང་སོ་སོར་འདྲེན་རིགས་ཀྱང་། ཡོ་ག་མན་བཏང་སྙོམས་སུ་བྱས་ཏེ། བསྐྱེད་རྫོགས་གསུམ་གཙོ་ཆེ་བས་འདིར་སྒོས་ཀྱི་བརྒྱུད་པ་དྲངས་པའོ་སྙམ་པའི་རྟོག་པ་སྐྱེས་པ་ཤ་སྟག་སྣང་བས་སོ། ༈ །གཉིས་པ་ནི་དེ་ལྟར་ན་དྲི་བར་བཀའ་སྩལ་བའི་གནོད་བྱེད་དེ་རི་གཟར་གྱི་རྦབ་ལྟར་བཟློག་ཏུ་མེད་པར་འགྱུར་ཏེ། འདི་ལྟར་ཡོ་ག་གསུམ་གྱི་སྒོས་ཀྱི་བརྒྱུད་པ་གནུབས་ཆེན་ལ་བབས་པས་དེ་མན་གཅིག་འདྲེས་ཡིན་པར་འདོད་པ་ལྟར་ན། གནུབས་ཆེན་ཡན་ཆད་ལ་མདོ་ཡོངས་རྫོགས་ཀྱི་དབང་བསྐུར་བའི་ཕྱག་བཞེས་མེད་པར་འདོད་དགོས་ལ། དེ་ལྟར་འདོད་པ་དེའི་ཚེ་མདོ་རྩ་བར་གསུངས་པའི་ཕྱི་དབང་རྩ་བ་བཅུ་ལ། མདོ་ཡོངས་རྫོགས་ཀྱི་སྐབས་སུ་དབང་དོན་རྒྱ་ཆེར་འབྱེད་པར་བཀྲལ་བ་ལྟར་ཡན་ལག་རགས་པ་བརྒྱ་རྩ་བརྒྱད་དུ་ཕྱེ་བའི་བཀའ་རོ་ལངས་བདེ་བ་ལ་བབས་པར་གསུངས་པ་དང་། ནང་དབང་གི་དཀྱིལ་འཁོར་ལྷ་དབང་དང་བཅས་འདྲེན་པའི་ལས་བྱང་ཆེ་ལེར་གསུངས་པ་དེ་དག་གནུབས་ཆེན་ཡན་ཆད་ལ་མེད་པར་འདོད་དགོས་ལ། འདོད་ན། གབ་པའི་དབང་ལེ་ནི་བདེ་བ་གསལ་མཛད་ཀྱིས་རྣམ་པར་སྣང་མཛད་ཐིག་ལེ་དབང་གི་ཏནྟྲ་ནས་བཏུས་ཤིང་། དབང་དོན་རྒྱ་ཆེར་འབྱེད་པའང་དེས་མཛད་པར་བཤད་པ་དང་འགལ་ཏེ། གནུབས་ཆེན་ཡན་ཆད་ལ་དེ་དང་དེའི་རྣམ་གཞག་མེད་པར་ཁས་བླངས་པའི་ཕྱིར་རོ། །གལ་ཏེ་བྱིན་བརླབས་ཀྱི་ཆུ་རྒྱུན་གནུབས་ཆེན་ལ་འདྲེས་པས། དེ་ལྟར་དྲངས་པ་ལ་སྐྱོན་མེད་དོ་སྙམ་ན། དྲི་བ་དེ་ཉིད་ཀྱི་འཕྲོས་ལས། འོན་ཀྱང་བྱིན་རླབས་ཆུ་བོའི་རྒྱུན། །འདྲེས་ཕྱིར་ཞེ་ན་མཐའ་མེད་ཅིང་། །འོན་ཏེ་ཨ་ཏི་སྒྱུ་འཕྲུལ་གཉིས། །འདྲེན་པ་ཙམ་ཞིག་འཐད་ཅེ་ན། །ཨ་ཏི་སྒྱུ་འཕྲུལ་བརྒྱུད་པ་ལས། །མདོ་ཡི་དབང་བསྐུར་ཇི་ལྟར་འབྱུང་། །འབྱུང་ན་ཨ་ཏི་སྒྲུ་འཕྲུལ་ལའང་། །མདོ་ཡི་བརྒྱུད་པ་འདྲེན་ལགས་སམ། །ཞེས་གསུངས་པའི་གནོད་བྱེད་འབབ་སྟེ། དེའི་དགོངས་པ་བཀའ་ཐ་དད་པའི་བརྒྱུད་པ་འདྲེས་པ་ཙམ་གྱིས་དེ་ལྟར་དྲངས་ཆོག་ན། སྨད་འདུལ་ལམ་ཁ་ཆེའི་སྡོམ་རྒྱུན་ལས་བསྙེན་རྫོགས་དང་། ཇོ་བོ་ཨ་ཏི་ཤ་ལས་བརྒྱུད་པའི་བྱང་སྡོམ་ཐོབ་པའི་རྡོ་རྗེ་སློབ་དཔོན་ཞིག་གིས་འདུས་པ་མདོའི་དབང་བསྐུར་བའི་ཚེ། ཉན་ཐོས་དང་བྱང་སེམས་ཀྱི་ཐེག་པའི་སྐབས་སུ་དེ་དང་དེའི་བརྒྱུད་པ་དྲངས་ཆོག་གམ་མི་ཆོག །ཆོག་ན་མཐའ་མེད་དུ་འགྱུར་ཏེ། ཀྲི་ཡོག་སྡེ་གསུམ་དང་བླ་མེད་ཀྱ ི་སྒོས་བཀའ་སློབ་དཔོན་དེས་ཐོབ་པ་དུ་མ་ཞིག་ཡོད་ཀྱང་དེ་ཐམས་ཅད་དྲངས་ཆོག་པར་འགྱུར་བའི་ཕྱིར། མི་ཆོག་ན། གནུབས་ཆེན་ལ་བསྐྱེད་རྫོགས་གསུམ་གྱི་བརྒྱུད་པའི་ཆུ་བོ་འདྲེས་པ་འདིར་དྲངས་པ་ལའང་མཚུངས་པའི་ཕྱིར་དང་། གལ་ཏེ་མ་ཧཱ་དང་ཨ་ཏི་ཙམ་ཞིག་བླ་མེད་ནང་མཐུན་ཡིན་པས་འདྲེན་པ་འཐད་ཅེ་ན། འོ་ན་ཨ་ཏི་དང་མ་ཧཱ་སྒྱུ་འཕྲུལ་གྱི་དབང་ལྟ་བུ་ལའང་ཨ་ནུ་ཡོ་གའི་བརྒྱུད་པ་འདྲེན་རིགས་པར་འགྱུར་ཏེ། དེ་གཉིས་ཕན་ཚུན་རིག་པ་མཚུངས་པའི་ཕྱིར། དེ་ཡང་འདོད་ན། སེང་གེའི་ཕྲུག་གུ་གླང་ཆེན་མོ་ལས་སྐྱེས་ནས། དེ་འདྲ་དེ་སྔོན་མེད་པའི་སྲོག་ཆགས་སུ་འགྱུར་བ་ལྟར་རིགས་ལམ་ལས་འདས་ཏེ། སྐྱོན་དང་བཅས་པའོ། །གཉིས་པ་ནི། འདིར་ནང་དབང་འབྱུང་བའི་ཆུ་བོ་དང་། སྒྲུབ་དབང་གྲགས་པའི་ཆུ་བོ་དང་། གསང་དབང་རྫོགས་པའི་ཆུ་བོ་གསུམ་ལ་བསྐྱེད་རྫོགས་གསུམ་དུ་ཕྱེ་བ་ནི། ཨ་ནུ་ཡོ་ག་ཉིད་ལ་གསུམ་དུ་ཕྱེ་བས་ཨ་ནུའི་མ་ཧཱ་སོགས་གསུམ་ཡིན་མོད། འོན་ཀྱང་ནང་གསང་གཉིས་མ་ཧཱ་ཨ་ཏི་གཉིས་དང་འདྲ་བར་བཀྲལ་བ་ནི། སྤྱིར་མདོ་ཡོངས་རྫོགས་ཀྱི་ཆུ་བོ་བཞི་ལས། ཕྱི་ནང་གཉིས་ཀྱིས་བསྡུས་པའི་ཆུ་བོ་བྱ་སྤྱོད་གཅིག་ཏུ་བྱས་ཏེ་ལྷ་མི་ནས་མ་ཧཱའི་བར་ལམ་སྟེགས་ཀྱི་ཐེག་པ་བདུན་པོའང་། གོང་མར་འོག་མ་འདུ་བའི་གནད་ཀྱིས་ཐེག་པ་སོ་སོའི་ལམ་དང་འདྲ་རུང་དུ་བཀྲལ་ཞིང་། དེ་ཐམས་ཅད་ཨ་ནུའི་ཐབས་མཁས་ཀྱིས་ཟིན་པས་རང་རང་གི་སྤངས་ཐོབ་ཀྱི་ཡོན་ཏན་དེ་དང་དེ་བསྐྱེད་པའི་མྱུར་ལམ་དུ་འགྱུར་ཞིང་། གསང་དབང་རྫོགས་ཆུ་ཨ་ཏི་དང་ཚུལ་འདྲ་བར་བྱས་པའང་། ཤེར་ཕྱིན་སྔགས་ལུགས་དང་། བྱ་སྤྱོད་ཀྱི་ལྷའི་སྒྲུབ་ཐབས་འགའ་ཞིག་བླ་མེད་དུ་བཀྲལ་བ་ལྟར། ཨ་ནུ་རང་ལུགས་ཀྱི་རྫོགས་རིམ་མཐར་ཐུག་དེ་ཨ་ཏིའི་ལམ་དང་འདྲ་རུང་དུ་བཀྲལ་བས། དེ་དང་རིགས་འདྲའི་ཡོན་ཏན་ཐོབ་བྱེད་ཀྱི་ཤིན་ཏུ་མྱུར་ལམ་དུ་འགྱུར་ཏེ། དཔེར་ན་སྨན་དཔྱད་ལ་མ་ལྟོས་པར་རིག་སྔགས་རྣོན་པོས་ནད་བཙན་ཐབས་སུ་གསོ་བ་བཞིན་ནོ། །རྒྱུ་མཚན་དེས་འདིར་མ་ཧཱ་དང་ཨ་ཏིའི་བརྒྱུད་པའི་བླ་མ་རྣམས་དབང་གི་སྐབས་སུ་གསུངས་པ་ཡང་། རྒྱུད་ལུགས་མདོ་རྩ་བའི་དབང་སུམ་ཅུ་རྩ་དྲུག་དང་། མན་ངག་ལུགས་མདོ་ཡོངས་རྫོགས་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལ་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་བའི་བཀའ་སྲོལ་གཉིས་ཀའི་བླ་བརྒྱུད་མ་ཡིན་མོད། དེ་ལྟ་ནའང་ཚོགས་ཞིང་དང་འཇུག་པའི་བྱིན་འབེབས་ཀྱི་སྐབས་དང་། ཡེ་ཤེས་ཀྱི་དཀྱིལ་འཁོར་སྤྱན་འདྲེན་པ་ལ་སོགས་པའི་ཚེ་སངས་རྒྱས་ཀྱི་ཞིང་རབ་འབྱམས་ནས་རིས་མེད་པའི་དེ་བཞིན་གཤེགས་པ་ཐམས་ཅད་སྤྱན་འདྲེན་པ་ལྟར། གནུབས་ཆེན་ཉིད་ལ་བཀའ་བབས་པའི་བསྐྱེད་པ་དང་རྫོགས་པ་ཆེན་པོའི་བླ་མ་བརྒྱུད་པའི་རིམ་པ་ཐ་དད་པ་དེ་དག་ཀྱང་མ གྲོན་ཐབས་སུ་ངོ་མཚར་སྒྲིགས་ལྟ་བུར་མཛད་ནས། རིག་འཛིན་དེ་རྣམས་ཀྱི་བྱིན་རླབས་ཀྱི་འཕོ་བའི་རྒྱུན་གཅིག་ཏུ་འདྲིལ་བས་སློབ་མའི་རྒྱུད་བྱིན་གྱིས་བརླབ་པའི་ཕྱིར་ཕྱག་བཞེས་སུ་མཛད་པ་སྟེ། བླ་མའི་བྱིན་འབེབས་པ་ལྟ་བུར་ཕྱོགས་བཅུ་དུས་གསུམ་ན་བཞུགས་པའི་བླ་མ་ཞེས་འདོན་པའང་གསང་བ་སྤྱིའི་སྲོལ་ཡིན་པ་བཞིན་ནོ། །གསུམ་པ་ནི། གབ་པའི་དབང་ལེར་གསུངས་པའི་དུས་གསུམ་གྱི་སློབ་དཔོན་ཞེས་པའང་། ཨ་ནུ་རང་ལུགས་ཀྱི་དབང་བསྐུར་བའི་དུས་ཀྱི་སློབ་དཔོན་གང་ཡིན་པ་དེ་དམ་ཚིག་དབང་གི་སློབ་དཔོན་དང་། རྒྱུད་འཆད་པའི་དུས་ཀྱི་སློབ་དཔོན་དེ། ཤེས་རབ་རྒྱུད་ཀྱི་སློབ་དཔོན་དང་། མན་ངག་སྟེར་བའི་དུས་ཀྱི་སློབ་དཔོན་དེ་མན་ངག་འབྲས་བུའི་སློབ་དཔོན་ཡིན་ལ། འདིར་ནི་དེ་གསུམ་ཀ་མདོ་རྩ་བའི་བཤད་སྒྲུབ་ཀྱི་བརྒྱུད་པ་སོ་སོའི་རྣམ་ཐར་དང་བཅས་པ་སྔར་རྒྱས་པར་བཤད་པ་དང་། དེ་ལས་ཕྱེ་བའི་མདོ་ཡོངས་རྫོགས་ཀྱི་བཀའི་བབས་སོ་སློབ་དཔོན་ཆེན་པོ་རོ་ལངས་བདེ་བ་ལ་བབས་ཚུལ་བཤད་པའི་བརྒྱུད་ལུགས་གཉིས་པོ་དེ་ལ་ཚང་ཞིང་། བཤད་ཚུལ་དེ་ཉིད་མདོ་དབང་གི་བླ་བརྒྱུད་འདྲེན་ལུགས་རྣམ་དག་ཏུ་ལུང་རིགས་གཉིས་ཀས་གྲུབ་པའི་ཕྱིར་སྤྲོས་པས་ཆོག་གོ། ༈ །སྤྱི་དོན་གཉིས་པ་བཤད་བྱའི་དོན་ཁོང་དུ་ཆུད་ཕྱིར་སྔོན་རྗེས་ཀྱི་ཆུ་བོ་བཞིའི་དབང་གི་རང་བཞིན་གཏན་ལ་དབབ་པ་ལ་གསུམ་སྟེ། སྔོན་བྱུང་དང་རྗེས་འཇུག་གི་དབང་གཉིས་ཀྱི་དབྱེ་བ་སྤྱིར་བསྟན། དེ་ལས་རྗེས་འཇུག་གི་དབང་གི་གོ་དོན་བྱེ་བྲག་ཏུ་བཤད། དེ་བསྐུར་བའི་ཕྱག་བཞེས་ཀྱི་མཐའ་དཔྱད་པའོ། །དང་པོ་ནི། འགྲེལ་པ་ལུང་བསྟན་མ་ལས། ཇི་ལྟར་རྒྱལ་སྲས་བཅས་པ་ལ། །མཛེས་པའི་ཡོན་ཏན་རྫོགས་པ་ཡིས། །དབང་བསྐུར་ཁུངས་སུ་ཡིད་ཆེས་ནས། །དམ་པ་བརྒྱུད་པའི་མན་ངག་གིས། །རྗེས་འཇུག་ཏུ་ཡང་ཤེས་པར་བྱ། །ཞེས་པས་དོན་གཉིས་ཏེ། སྔོན་བྱུང་རྒྱལ་བའི་མཛད་སྤྱོད་ཀྱི་སྒོ་ནས་གདུལ་བྱ་སྤྲོ་བ་བསྐྱེད་པའི་དབང་དང་། རྗེས་འཇུག་གི་གང་ཟག་ཉམས་ལེན་ཐབས་ཀྱི་སྒོ་ནས་གདུལ་བྱ་ཆུད་མི་ཟ་བར་བསྐུར་ཐབས་སོ། །དེ་གཉིས་ཀྱང་དོན་དུའི་སྒོ་ནས་སྟོན་ཞེ་ན། དགོངས་འདུས་ལས། ཁུངས་དང་གྲགས་པ་ཆུ་བོ་དང་། །ཡུལ་དང་དབང་པོ་དགོས་པ་དང་། །ཐབས་དང་གནས་དང་རྟགས་དང་དོན། །བསྡུས་པ་འདི་ཡིས་རྫོགས་པ་ཡིན། །ཞེས་དོན་བཅུའི་སྒོ་ནས་སྔོན་བྱུང་གི་དབང་ཚིག་ཟིན་གྱིས་དངོས་སུ་བསྟན་ཅིང་། དེས་རྗེས་འཇུག་གི་དབང་ཡང་ཤུགས་ཀྱིས་འཕངས་ཏེ། ལུང་བསྟན་མ་ལས། ཇི་ལྟར་སྔོན་དུ་དེ་བཞིན་གཤེགས་པ་དེ་ཉིད་ཇི་ལྟ་བའི་ཐབས་མེད་ན་གདུལ་བྱ་ལ་ཕན་འདོགས་པ་མ་ཡིན་ནོ། །ཞེས་གསུངས་མོད་ཀྱི། དེ་ལྟ་ནའང་སློབ་དཔོན་བདེ་བ་གསལ་མཛད་ཀྱིས། ཁུངས་སོགས་དང་པོ་གསུམ་བཏང་སྙོམས་སུ་མཛད་ནས། དེ་ཕྱིན་ཡུལ་སོགས་དྲུག་གིས་སྔོན་བྱུང་དང་། བཅུ་པ་དོན་ལ་ནང་གསེས་ཀྱིས་བདུན་དུ་ཕྱེ་བས་རྗེས་འཇུག་ལམ་པའི་དབང་བསྟན་པ་ཤས་ཆེ་བའི་དབང་དུ་མཛད་ནས། སྔོན་བྱུང་དང་རྗེས་འཇུག་ལམ་པའི་དབང་གཉིས་སྡོམས་ཀྱི་དོན་བཅུས་དངོས་སུ་བསྡུས་པར་བཀྲལ་ཞིང་། དེས་དཔགས་ཏེ། རྗེས་འཇུག་ལས་དང་པོ་པ་མ་སྨིན་པར་སྨིན་པར་བྱེད་པའི་དབང་གི་རིམ་པ་གཙོ་བོར་བསྟན་པ་ཆུ་བོ་བཞིས་བསྡུས་པའང་ཤུགས་ལས་བསྟན་པར་བཞེད་དེ། དབང་དོན་བསྡུས་པ་ལས། སེམས་ཅན་རྣམས་ཀྱི་དོན་ཆེད་དུ། །དབང་གི་དོན་རྣམས་བསྡུ་བར་བྱ། །ཆུ་བོ་ཆེན་པོ་བཞི་རྣམས་ལ། །སྔོན་བྱུང་དང་ནི་རྗེས་སུ་འཇུག །སྔོན་བྱུང་ཆུ་བོ་རྣམ་བཞི་ལ། །ཡུལ་དང་དབང་པོ་དགོས་ཆེད་དང་། །ཐབས་དང་རྟགས་དང་གནས་དང་དྲུག །རྗེས་འཇུག་ལམ་པ་དང་པོ་གཉིས། །ལམ་པ་ཆུ་བོ་རྣམ་བཞི་ལ། །རྒྱུད་དང་ཐོབ་དང་མི་ཐོབ་དང་། །ཡུལ་དང་སྣོད་དང་ཁྱད་པར་རྟགས། །བདུན་གྱིས་འདི་ཡི་དོན་བསྡུས་པའོ། །རྗེས་འཇུག་ལས་ཀྱི་དང་པོ་ལ། །ཆུ་བོ་བཞི་ཡི་དབང་བསྐུར་བ། །ཡོ་ག་ལ་སོགས་ཐེག་དྲུག་ལ། །ཕྱི་དབང་རྒྱུད་ཀྱི་ཆུ་བོས་བྱ། །བསྐྱེད་པ་མ་ཧཱ་ཡོ་ག་ལ། །ནང་དབང་འབྱུང་བའི་ཆུ་བོས་བྱ། །རྫོགས་པ་ཨ་ནུ་ཡོ་ག་ལ། །སྒྲུབ་དབང་གྲགས་པའི་ཆུ་བོས་བྱ། །རྫོགས་ཆེན་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པའོ། །སུམ་ཅུ་རྩ་དྲུག་ལེགས་དབང་བསྐུར། །ཞེས་གསུངས་པའི་ཕྱིར་རོ། །དེ་ལ་སྤྱིར་སྔོན་བྱུང་གི་དབང་ནི། སློབ་དཔོན་རྫོགས་པའི་སངས་རྒྱས་ཀྱིས་སློབ་མ་རྒྱུའི་ཐེག་པའི་མི་སློབ་ལམ་བརྙེས་པའི་རྒྱལ་བ་དང་། སྔགས་རང་ལུགས་ཀྱི་མཐར་ལམ་རྒྱུན་མཐའ་ལ་བཞུགས་པ་སྟེ། ཆོས་ལྔ་དང་ལྡན་པའི་རྒྱལ་ཚབ་སྐྱེས་བུ་དམ་པར་གྱུར་པ་རྣམས་ལ། ཡེ་ཤེས་རང་སྣང་ལས་གྲུབ་པ་རང་བཞིན་གྱི་དཀྱིལ་འཁོར་དུ་འབྲས་དུས་ཀྱི་དབང་བསྐུར་བས། མཐར་ཐུག་གི་འབྲས་བུའི་གོ་འཕང་ཐོབ་པའི་རྟགས་རྒྱལ་བའི་ཞིང་ཀུན་ཏུ་ཡོངས་སུ་གྲགས་ཤིང་སྣང་བར་གྱུར་པ་སྟེ། དགོངས་འདུས་ལས། ལངྐའི་བདག་པོ་འདི་ལྟ་སྟེ། དཔེར་ན་གང་དྲྭ་མ་ཆེན་པོར་ཀུན་གྱི་སྤྱི་བོར་གྱུར་པ་དག །རྒྱལ་པོ་རྒྱལ་རིགས་ཀྱི་རྒྱུད་དུ་བྱུང་བ་དང་། མཚན་དང་ལྡན་པ་དང་། ཆོས་ཤེས་པ་དང་། འཁོར་དང་ལྡན་པ་དང་། དབང་ཐོབ་པ་དང་ལྡན་ན། མང་པོས་བཀུར་བ་ཐོབ་པ་དེ་བཞིན་དུ། སྐྱེས་བུ་དམ་པ་དེ་དག་ཀྱང་། རྒྱལ་བ་ཀུན་གྱི་རྒྱུད་དུ་བྱུང་བ་དང་། མཚན་དང་དཔེ་བྱད་ཀྱི་རྟགས་དང་ལྡན་པ་དང་། ཆོས་ཤེས་པ་དང་། བསྡུ་བའི་འཁོར་དང་ལྡན་པ་དང་། དབང་བཅུ་ཐོབ་པ་སྟེ། ཆོས་དེ་དག་དང་ལྡན་པས་ན། དེའི་ཕྱིར་རྒྱལ་ཚབ་སྐྱེས་བུ་ཞེས་བྱ་བར་གྲགས་སོ། །ཞེས་དང་། ཡང་། ལངྐའི་བདག་པོ། དེ་ལྟར་ཆོས་ལྔ་དང་ལྡན་པའི་སྐྱེས་བུ་དམ་པ་དེ་དག །དབུགས་ཆེན་པོ་ཡོངས་སུ་ཕྱིན་པའི་གནས་གང་ན་བ་དེར། དམ་པ་རྣམས་ཀྱི་ཁམས་མཐའ་ཐུག་པ་མེད་པ་ནས་རྒྱལ་བ་དཔག་ཏུ་མེད་པ་དག །ཇི་ལྟར་མཁའ་ལ་དབྱར་གྱི་སྤྲིན་ཕུང་བཞིན་ཡོངས་སུ་འདུ་བར་འདུས་ནས། ཀུན་ཀྱང་གསུང་གཅིག་ཏུ། རྒྱལ་ཚབ་སྐྱེས་བུ་དམ་པ་ཆོས་ཀྱི་རྒྱལ་པོ་ཞེས་བྱ་བའི་མིང་གི་གྲགས་པའི་དབང་གིས་དབང་བསྐུར་རོ། །ཞེས་དང་། དབང་ཆོག་ལས། སངས་རྒྱས་རྡོ་རྗེ་འཛིན་པ་ལ། །ས་མཐའི་སེམས་དཔའ་ཆེན་པོ་ཡིས། །ཇི་ལྟར་མཆོད་ཅིང་ཞུས་པ་ལྟར། །ཞེས་དང་། གཞན་ལས་ཀྱང་། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །ཞེས་པ་ལྟར་རོ། །དེ་ཡང་དགོངས་འདུས་ཀྱི་ལུང་འོག་མ་དེས་ནི། རྒྱལ་བའི་རིགས་རྒྱུད་དུ་ཇི་ལྟར་ངེས་པའི་ཁུངས་བསྟན་ཅིང་། དེ་ལྟར་ལ་ལས་ནི་རྡོ་རྗེའི་གདུང་དང་སྡེའི་རྒྱུད་དུ་དབང་གིས་དབང་བྱིན་ནོ། །དེ་བཞིན་དུ་རིན་ཆེན་དང་། པདྨ་དང་། གཞོན་ནུ་སྟེ་ལས་དང་། གླང་པོ་སྟེ་དེ་བཞིན་གཤེགས་པའི་རིགས་ཞེས་འགྲེས་སྦྱར་ཏེ། དེ་ཡང་གདུང་ནི་གཙོ་བོ་ལྔ་དང་། སྡེ་ནི་དེ་དག་གི་འཁོར་ཏེ། དེ་ལྟར་རྒྱལ་བ་ཇི་སྙེད་པ་ཐམས་ཅད་དེ་བཞིན་གཤེགས་པ་རིགས་ལྔའི་སྐུར་མ་འདྲེས་པར་སོ་སོར་སྣང་བས། རྒྱལ་ཚབ་སྐྱེས་བུ་རྣམས་ལ་དབང་བསྐུར་བས་རིགས་ལྔའི་གདུང་བརྒྱུད་འཛིན་པར་འགྱུར་ཏེ། ཞིང་ཁམས་སོ་སོའི་རིགས་ལྔར་གྲགས་པའི་དབང་ཐོབ་ཅིང་། ལ་ལས་མཚན་གྱི་འོད་ཟེར་གྱི་དབང་གིས་དབང་བྱིན་ནོ། །དེ་བཞིན་དུ་དཔེ་བྱད་ཀྱི། རྒྱན་གྱི། ཁ་དོག་དྲུག་གི། ཞེས་འགྲེས་སྦྱར་བས། རྫོགས་པའི་སངས་རྒྱས་རིགས་ལྔའི་སྐུ་ལ་མཚན་དང་། དཔེ་བྱད་དང་། རྒྱན་དང་། ཁ་དོག་གི་འོད་ཟེར་ཁྱད་པར་ཅན་མངའ་བ་དེ་དང་དེའི་གནས་ནས་འོད་ཟེར་སྤྲོས་ཏེ། རྒྱལ་ཚབ་སྐྱེས་བུ་རྣམས་ལ་ཐིམ་པས་སྐུའི་ཡོན་ཏན་དེ་དག་དང་ལྡན་པའི་དབང་དང་། ལ་ལས་ནི་ཆོས་མ་འདྲེས་པའི་དབང་གིས་དབང་བྱིན་ནོ། །ཞེས་སོགས་ཀྱིས་ཐུགས་ཀྱི་ཡོན་ཏན་མ་འདྲེས་པ་བཅོ་བརྒྱད། སྟོབས་བཅུ། མི་འཇིགས་པ་བཞི། སོ་སོ་ཡང་དག་པའི་རིག་པ་བཞིན་རྣམས་དང་། ལ་ལས་ནི་མཐུན་པས་བསྡུ་བའི་དབང་གིས་དབང་བྱིན་ནོ། །ཞེས་སོགས་ཀྱིས་འཁོར་སྡུད་པའི་ཕྲིན་ལས་ཐུན་མོང་མ་ཡིན་པ་བཅུ་གཅིག་དང་། ལ་ལས་ནི་གང་དུ་དབང་བའི་དབང་གིས་དབང་བྱིན་ནོ། །ཞེས་སོགས་ཀྱིས་ཚེ་ལ་དབང་བ་སོགས་དབང་བཅུ་སྟེ། དེ་རྣམས་ཀྱི་ཡོན་ཏན་མངའ་བ་དེ་དང་དེས་རྒྱལ་ཚབ་སྐྱེས་བུ་རྣམས་ལ་དབང་བསྐུར་བས། འགྲོ་བའི་དོན་ཡོངས་སུ་རྫོགས་པའི་ཡོན་ཏན་དང་ལྡན་པར་གྱུར་བ་ནི་ཞིང་ཁམས་སུ་གྲགས་པའི་དབང་དང་། ཡང་། ལ་ལས་ནི་རྒྱལ་ཚབ་སྐྱེས་བུའི་དབང་གིས་དབང་བྱིན་ནོ། །ལ་ལས་ནི་བྱིན་གྱིས་བརླབས་ཀྱི་དབང་གིས་དབང་བྱིན་ནོ། །ལ་ལས་ནི་ལུང་སྟོན་པའི་དབང་གིས་དབང་བྱིན་ནོ། །ལ་ལས་ནི་རྩལ་ཆེན་ནུས་པའི་དབང་གིས་དབང་བྱིན་ནོ། །ཞེས་པས་རྒྱལ་ཚབ་གྲགས་པ་བཞིའི་དབང་དང་། ལ་ལས་ནི་རྒྱུད་ཀྱི་ཆུ་བོའི་དབང་གིས་དབང་བྱིན་ནོ། །ལ་ལས་ནི་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་རྫོགས་པའི་ཆུ་བོའི་དབང་གིས་དབང་བྱིན་ནོ། །ཞེས་པས་རྒྱུན་མི་ཆད་པ་ཆུ་བོ་བཞིའི་དབང་སྟེ། སྔར་གྱི་རྒྱལ་ཚབ་སྐྱེས་བུ་ལྔ་ལ་ཐུན་མོང་དུ་བསྐུར་བའང་མི་འགལ་མོད་ཀྱི། འོན་ཀྱང་འདིར་ཚུལ་བསྟན་གྱི་དབང་དུ་དམ་པ་ཏོག་དཀར་སོགས་བཞི་ལ་ཕལ་ཆེར་སྐལ་བ་ཆེ་ཆུང་གིས་བསྐུར་བས་ཐུན་མོང་མ་ཡིན་པའོ། །ཡུལ་སོགས་དྲུག་དབང་དོན་བསྡུས་པར་སྡོམས་སུ་བསྟན་པ་དེ་ཉིད། དབང་དོན་རྣམ་པར་འབྱེད་པ་ལས་སོ་སོར་བཀྲལ་བ་ནི་འདི་ཡིན་ཏེ། ཕྱི་རབས་རྣལ་འབྱོར་དོན་ཆེད་དུ། །དབང་གི་དོན་རྣམས་དབྱེ་བར་བྱ། །རྒྱུད་དང་འབྱུང་བའི་ཆུ་བོ་དང་། །གྲགས་དང་རྫོགས་པའི་ཆུ་བོ་བཞི། །སྔོན་བྱུང་བདེ་གཤེགས་གནས་སྐབས་ན། །ཆོས་རྒྱལ་བྱིན་བརླབས་དབང་ལྡན་དང་། །སྒྲོན་མ་གསང་བ་འཛིན་པ་རུ། །དབང་བསྐུར་ཡུལ་ནི་སློབ་མའི་ཚུལ། ༈ །ཆོས་རྒྱལ་རིགས་ཀྱི་སངས་རྒྱས་དང་། །དཔག་མེད་རྒྱལ་བ་གཟུགས་སྐུ་གཉིས། །དབང་བསྐུར་བ་ཡི་སློབ་དཔོན་ཚུལ། ༈ །རྒྱལ་སའོ་གཟུགས་སྐུར་སངས་རྒྱས་དང་། །ལུང་ཐོབ་གསང་བའི་སྙིང་པོ་ཡི། །ངེས་པ་དུས་ལ་བབ་པའི་ཕྱིར། །དབང་བསྐུར་བ་ཡི་དགོས་ཆེད་དོ། ༈ །དབུ་རྒྱན་ཉི་ཟླ་རྡོ་རྗེ་འབར། །རིགས་ཀྱི་རྒྱ་དང་ཕ་ལམ་གྱི། །རྫས་ལ་བརྟེན་ནས་དབང་བསྐུར་ཐབས། ༈ །དགའ་ལྡན་གནས་དང་འོག་མིན་གནས། །བྱང་ཆུབ་ཤིང་དྲུང་དབང་སྒྱུར་གྱི། །ཁང་བཟང་ལ་སོགས་གནས་ཡིན་ནོ། ༈ །རྒྱལ་ཚབ་རྫོགས་ལོངས་སྤྱོད་པ་དང་། །ཆོས་ཀྱི་མངའ་བདག་གསང་བའི་བདག །ཡེ་ཤེས་རང་སྣང་གཟུགས་བརྙན་ཏེ། །དབང་ཐོབ་པ་ཡི་རྟགས་ཡིན་ནོ། །ཞེས་གསུངས་པའི་དོན་འདི་དག་ཚུལ་བསྟན་གྱི་དབང་དུ་བྱས་ཏེ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དམ་པ་ཏོག་དཀར་པོ་ཉིད་ཆོས་ཀྱི་རྒྱལ་སར་རྒྱལ་ཚབ་ཏུ་དབྱུང་བའི་ཕྱིར། དགའ་ལྡན་གྱི་གནས་སུ། སློབ་དཔོན་ཕྱོགས་བཅུའི་རྒྱལ་བ་ཐམས་ཅད་ཆོས་ཀྱི་རྒྱལ་པོ་ལྟ་བུར་བསྟན་པས། རིན་པོ་ཆེའི་ཏོག་སྟོང་འོད་འབར་བའི་དབུ་རྒྱན་གྱི་རྫས་ལ་བརྟེན་ནས། སྤྲུལ་པའི་རྒྱལ་ཚབ་སྐྱེས་བུ་ཐུག་པ་མེད་པ་རྒྱུན་མི་ཆད་པར་འབྱུང་བ་རྒྱུད་ཀྱི་ཆུ་བོའི་དབང་བྱིན་པས། ཐོབ་པའི་རྟགས་ཆོས་ཀྱི་རྒྱལ་ཚབ་ཉིད་དུ་མངོན་པར་སྣང་བར་གྱུར་ཏོ། །དེ་བཞིན་དུ། སྲིད་པ་ཐ་མ་པའི་བྱང་ཆུབ་སེམས་དཔའ་རྒྱལ་བུ་དོན་གྲུབ་ཉིད། གཟུགས་སྐུ་རྣམ་པར་སྣང་མཛད་དུ་འཚང་རྒྱ་བའི་ཕྱིར། ནཻ་རཱཉྫ་ནའི་འགྲམ་དུ་དཀའ་ཐུབ་མཛད་པའི་ཚེ་ཡེ་ཤེས་ཀྱི་ལུས་འོག་མིན་དུ་གཤེགས་པ་ལ། སློབ་དཔོན་རྒྱལ་བ་ཐམས་ཅད་རིགས་ལྔའི་སངས་རྒྱས་སུ་སྣང་བས། གསང་བའི་ཉི་ཟླ་རྡོ་རྗེ་ལྟར། །གཉིས་སུ་མེད་པར་འབར་བའི་རྫས་ལ་བརྟེན་ནས། མངོན་བྱང་ལྔའི་བྱིན་བརླབས་ཀྱིས་ལོངས་སྤྱོད་རྫོགས་པ་ཆེན་པོ་ཞིང་དག་པ་དང་འཁོར་སྨིན་པ་བར་མ་ཆད་པར་འབྱུང་བའི་ཆུ་བོའི་དབང་བྱིན་པས། ཐོབ་པའི་རྟགས་ལོངས་སྤྱོད་རྫོགས་པའི་སྐུ་ཉིད་དུ་གྱུར་ཏོ། །ཡང་བཅོམ་ལྡན་འདས་ཐུབ་པའི་དབང་པོ་ཉིད་ཆོས་ཀྱི་སྒྲོན་མར་ལུང་མངོན་དུ་ཐོབ་པའི་ཕྱིར། སྙིང་པོ་བྱང་ཆུབ་ཀྱི་ཤིང་དྲུང་དུ། སློབ་དཔོན་ཕྱོགས་བཅུའི་རྒྱལ་བ་དཔག་ཏུ་མེད་པ་འདུས་པས། རྡོ་རྗེ་དང་འཁོར་ལོ་ལ་སོགས་པ་རིགས་ལྔའི་ཕྱག་རྒྱ་མང་པོའི་རྫས་ལ་བརྟེན་ནས། སྟོང་གསུམ་གྱི་སྟོང་ཆེན་པོ་རེ་རེའི་ཞིང་ཁམས་ཀུན་ཏུ་ཐུབ་པའི་དབང་པོ་རེ་རེར་གྲགས་པའི་ཆུ་བོས་ཆོས་ཀྱི་སྒྲོན་མར་ལུང་སྟོན་པའི་དབང་བྱིན་པས། ཐོབ་པའི་རྟགས་ཆོས་ཀྱི་མངའ་བདག་ཉིད་དུ་གྱུར་ནས། ཆོས་ཀྱི་འཁོར་ལོ་ཟླ་མེད་པ་བསྐོར་བར་མཛད་དོ། །ཡང་གསང་བདག་ལག་ན་རྡོ་རྗེ་ཉིད་རྡོ་རྗེ་ཐེག་པའི་མཛོད་གསང་བའི་སྙིང་པོ་མཐའ་དག་ངེས་པར་འཛིན་པའི་དུས་ལ་བབ་པའི་ཕྱིར། དབང་སྒྱུར་ཀྱི་ཁང་བཟང་དང་གྱད་ཡུལ་གྱི་གནས་སུ། སློབ་དཔོན་ལོངས་སྐུ་རྣམ་པར་སྣང་མཛད་དང་སྤྲུལ་སྐུ་ཐུབ་པའི་དབང་པོ་སྟེ་གཟུགས་སྐུ་གཉིས་སུ་བསྟན་པས། རྡོ་རྗེ་ཕ་ལམ་ལྟ་བུའི་རྫས་ལ་བརྟེན་ནས། དོན་ཟབ་མོ་མཐར་རྫོགས་པས་གསང་བའི་མཛོད་འཛིན་ཅིང་སྟོན་པར་ནུས་པ་ལོག་སྡེ་ཚར་གཅོད་པའི་དབང་བྱིན་པས། ཐོབ་པའི་རྟགས་གསང་བ་འཆད་པའི་བདག་པོར་མངོན་དུ་སྣང་བར་གྱུར་ཏོ། །ཡུལ་སོགས་དྲུག་པོ་དེ་དག་ཀྱང་། དགོངས་འདུས་ལས། ལངྐའི་བདག་པོ། སྐྱེས་བུ་དམ་པ་དེ་དག་ཀྱང་། ལ་ལ་ནི་ཆོས་ཀྱི་རྒྱལ་པོར་དབང་འབྱིན་ནོ། །ཞེས་པ་ནས། ལ་ལ་ནི་གསང་བའི་བདག་པོ་ལྟ་བུ་བྱིན། ཞེས་པའི་བར་གྱིས་བསྟན་ནོ། ༈ །གཉིས་པ་རྗེས་འཇུག་གི་དབང་ལ་གཉིས་ལས། དང་པོ་ལམ་པའི་དབང་ལའང་དོན་བདུན་དུ་སྡོམས་སུ་བསྡུས་པ་ཉིད་སོ་སོར་བཀྲལ་བ་ནི་འདི་ཡིན་ཏེ། དབང་དོན་རྣམ་པར་འབྱེད་པ་ལས། རྗེས་འཇུག་ལམ་པའི་གནས་སྐབས་ན། །རྒྱུ་ནི་རྣལ་འབྱོར་རྣམ་པ་ལྔ། །འདུན་པ་སེམས་པ་རིགས་ཆེན་འབྱེད། །རྒྱུད་ཀྱི་ཆུ་བོའི་རྒྱུ་ཞེས་བྱ། །དབུགས་ཆེན་འབྱུང་བའི་ཆུ་བོའི་རྒྱུ། །ལུང་ཆེན་གྲགས་པའི་ཆུ་བོའི་རྒྱུ། །རྩལ་ཆེར་རྫོགས་པའི་ཆུ་བོའི་རྒྱུ། ༈ །བསླབ་པ་ཆུབ་དང་དེ་ཉིད་མཐོང་། །ཤེས་བྱ་གང་ལའང་མ་རྨོངས་དང་། །གང་འཇིགས་པ་དང་བྲལ་བ་ནི། །ཆུ་བོ་བཞི་ཡི་དབང་ཐོབ་ཚད། ༈ །རློམ་དང་དེ་ཉིད་མཐོང་བ་མེད། །ཤེས་བྱ་གང་ལའང་ཕྱོགས་ཆར་དམིགས། །ཡེ་ཤེས་ཡོན་ཏན་མི་འབྱུང་བ། །དེ་ནི་དབང་རྣམས་མི་ཐོབ་བོ། ༈ །མཆོད་རྟེན་སྒྲ་སྙན་ཚད་མ་ངེས། །དབང་ཐོབ་ཡུལ་ནི་སློབ་དཔོན་ཏེ། །ངོ་མཚར་རྫས་རྙེད་བླ་མ་དང་། །ལུང་བསྟ ན་ཐོབ་པའི་བླ་མ་དང་། །བདེ་གཤེགས་ཞལ་མཐོང་བླ་མ་དང་། །བདེ་གཤེགས་ཉིད་དུ་གྱུར་བ་ཡིན། ༈ །རྒྱུད་དུ་བྱུང་དང་རྩལ་རྫོགས་དང་། །ཐུགས་རྗེ་འབྱུང་དང་གཞན་དབང་གྱུར། །ཆུ་བོ་བཞི་ཡི་སྣོད་གྱུར་པའོ། ༈ །ཁྱད་པར་རྩལ་གྱིས་ཐོབ་པ་དང་། །བསྐུར་བས་ཐོབ་པ་རྣམ་པ་གཉིས། །རྒྱལ་བ་ཀུན་གྱི་གསང་བའི་ཐུགས། །རྟོགས་ནས་སྨྲ་བར་གང་བྱེད་པ། །དབང་རྣམས་ཀུན་གྱི་མཆོག་ཡིན་ཏེ། །སྲིད་པ་གསུམ་གྱིས་དེ་དབང་བསྐུར། ༈ །གཙུག་ཏོར་དམ་པ་འབྱུང་བ་དང་། །གང་ལ་མ་བཞག་ལྷན་ནེ་བ། །ལྷུན་གྱིས་ཡོངས་སུ་གྲུབ་པ་དང་། །འོད་ཟེར་མཐའ་ཡས་རྒྱས་པ་རྟགས། །བདུན་གྱིས་ལམ་པའི་དོན་བསྡུས་པའོ། །ཞེས་གསུངས་པ་ལྟར་དོན་བདུན་ལས། དང་པོ་དབང་གི་རྒྱུ་ནི། རྣལ་འབྱོར་ལྔ་ལས། འདུན་པ་སེམས་པ་དང་། རིགས་ཆེན་འབྱེད་པ་སྟེ་ཚོགས་སྦྱོར་གྱི་རྣལ་འབྱོར་གཉིས་རྒྱུད་ཀྱི་ཆུ་བོའི་རྒྱུ་དང་། དེ་བཞིན་མཐོང་ལམ་དབུགས་ཆེན་འབྱིན་པ་འབྱུང་ཆུའི་དང་། སྒོམ་ལམ་ལུང་ཆེན་ཐོབ་པ་གྲགས་པའི་ཆུ་བོའི་དང་། མཐར་ལམ་རྩལ་ཆེན་རྫོགས་པ་ནི་རྫོགས་པའི་ཆུ་བོའི་རྒྱུ་སྟེ། དགོངས་འདུས་ལས། ལངྐའི་བདག་པོ། དེ་ལ་རྒྱུ་ནི་རྣལ་འབྱོར་ཆེན་པོ་ལྔ་སྟེ། འདུན་པའི་རྣལ་འབྱོར་དང་། རིགས་ཆེན་འབྱེད་པའི་རྣལ་འབྱོར་དང་། དབུགས་ཆེན་འབྱིན་པའི་རྣལ་འབྱོར་དང་། ལུང་ཆེན་ཐོབ་པའི་རྣལ་འབྱོར་དང་། རྩལ་ཆེན་རྫོགས་པའི་རྣལ་འབྱོར་རྣམས་སུ་རིག་པར་བྱའོ། །ཞེས་གསུངས་པའི་ཕྱིར། གཉིས་པ་ཐོབ་པར་འགྱུར་པའི་དུས་ཀྱི་ཚད་ནི། གང་བསླབ་པར་བྱ་བའི་མཐའ་བཅུ་ཡོངས་སུ་ཆུབ་པ་ཚོགས་སྦྱོར་དང་། སེམས་ཀྱི་དེ་ཁོ་ན་ཉིད་ཇི་ལྟ་བ་མངོན་སུམ་དུ་མཐོང་བའི་ལམ་དང་། ཏིང་ངེ་འཛིན་གྱི་སྒོ་འབུམ་ཕྲག་དུ་མ་ལ་གོམས་པས་ཤེས་བྱ་གང་ལ་ཡང་མ་རྨོངས་པ་སྒོམ་ལམ་དང་། རྩལ་རྫོགས་པས་འཇིགས་པ་དང་བྲལ་བ་ཚད་དུ་ཕྱིན་པ་མཐར་ལམ་པ་རྣམས་ནི། ཆུ་བོ་བཞིའི་དབང་ཐོབ་པར་འགྱུར་བའི་ཚད་དུ་རིམ་བཞིན་སྦྱར་བར་བྱ་བ་སྟེ། དེ་ལས་ལངྐའི་བདག་པོ། ཐོབ་པའི་ཚད་ནི་འདི་ལྟ་སྟེ། བསླབ་པ་ཡོངས་སུ་ཆུབ་པ་དང་། དེ་ཁོ་ན་ཉིད་མཐོང་བ་དང་། ཤེས་བྱ་གང་ལའང་ཉམ་མི་ང་བ་དང་། གང་གི་འཇིགས་པ་དང་བྲལ་བའོ། །ཞེས་གསུངས། ཧཱུཾ་མཛད་ཀྱིས་ཀུན་འདུས་དཀའ་འགྲེལ་དུ། ཚོགས་སྦྱོར་གཉིས་སོ་སོར་ཕྱེ་ནས་ཆུ་བོ་བཞི་དང་སྦྱར་ཞིང་། མཐར་ལམ་པ་དབང་གི་འབྲས་བུར་བཤད་དེ། དེ་སྐད་དུའང་། དབང་འདི་དག་ཀྱང་རྣལ་འབྱོར་པའི་དབང་དུ་སྟེ། འདུན་པའི་རྣལ་འབྱོར་པ་ལ་ནི་ཕྱིའི་དབང་ངོ་། །རིགས་ཆེན་འབྱེད་པ་ལ་ནི་ནང་གི་དབང་ངོ་། །དབུགས་ཆེན་འབྱིན་པ་ལ་ནི་སྒྲུབ་པའི་དབང་ངོ་། །ལུང་ཆེན་ཐོབ་པ་ལ་ནི་གསང་བའི་དབང་ངོ་། །རྩལ་ཆེན་རྫོགས་པ་ནི་དབང་གི་འབྲས་བུའོ། །ཞེས་གསུངས་སོ། །གསུམ་པ་མི་ཐོབ་པའི་གེགས་ནི། བསླབ་པའི་དོན་མ་ཆུབ་པར་རློམ་སེམས་སུ་བྱེད་པ་དང་། དོན་ངེས་པར་མ་རྟོགས་པས་མ་ངེས་པ་དང་། བསྒོམ་བྱའི་དོན་དང་ཤེས་བྱ་ལ་ཕྱོགས་ཆར་དམིགས་ཏེ་འཛིན་པ་དང་། ཡེ་ཤེས་དང་ཡོན་ཏན་གྱི་རྩལ་མི་འབྱུང་བ་རྣམས་ནི་མི་ཐོབ་པའི་གེགས་ཏེ། དགོངས་འདུས་ལས། གང་མི་ཐོབ་པ་ནི། གང་རློམ་པ་དང་། གང་དག་མ་ངེས་པ་དང་། གང་ལ་དམ་པར་དམིགས་པ་དང་། གང་དུ་མི་འབྱུང་བའོ། །ཞེས་སོ། །བཞི་པ་གང་ལས་ཐོབ་པའི་ཡུལ་སློབ་དཔོན་ནི། ཀུན་གྱིས་མཆོད་པའི་རྟེན་དུ་གྱུར་པའི་བླ་མ་ངོ་མཚར་གྱི་རྫས་རྙེད་ཅིང་བདེན་པ་མཐོང་བ་དང་། དངོས་སུ་སྒྲ་སྙན་གྱིས་ལུང་ཐོབ་པ་དང་། རྩལ་ཆེན་བློ་གྲོས་ངེས་པའི་ཚད་མས་བདེ་གཤེགས་ཀྱི་ཞལ་མཐོང་བ་དང་། ཡང་དག་པ་ཉིད་དུ་ངེས་པ་རྙེད་ཟིན་པའི་བདེ་བར་གཤེགས་པ་རྣམས་ནི་རིམ་པར་ཆུ་བོ་བཞིའི་དབང་བསྐུར་བ་པོའི་སློབ་དཔོན་ཏེ། དེ་ལས། ལངྐའི་བདག་པོ། ཡུལ་ནི་མཆོད་རྟེན་དང་། སྒྲ་སྙན་དང་། ཚད་མ་དང་། ངེས་པའོ། །ཞེས་སོ། །ལྔ་པ་གང་ལ་བསྐུར་བྱའི་སློབ་བུ་ནི། ལམ་ལྔ་གོང་མས་འོག་མ་ལ་བསྐུར་བ་སྟེ། ཡིད་ལ་བྱེད་པ་དང་འཕྲོ་འདུ་གཅིག་པ་ལ་སྦྱངས་པས་རྒྱལ་བའི་གདུང་ཚབ་ཀྱི་རྒྱུད་དུ་བྱུང་བ་དང་། ཡེ་ཤེས་དང་ཏིང་འཛིན་གྱི་རྩལ་རྫོགས་པས་དོན་རྟོགས་ཏེ་འཇིགས་པ་དང་བྲལ་བ་དང་། ལུང་ཐོབ་ཅིང་གདེངས་དང་ལྡན་པས་གཞན་དོན་གྱི་ཐུགས་རྗེ་འབྱུང་བ་དང་། རྩལ་ཆེན་རྫོགས་པས་ཐམས་ཅད་དབང་དུ་གྱུར་པ་ནི་རིམ་བཞིན་ཆུ་བོ་བཞིའི་དབང་སྦྱིན་བྱའི་སྣོད་དེ། དེ་ལས། ལངྐའི་བདག་པོ། གང་སྣོད་དུ་གྱུར་པ་ནི། རྒྱུད་དུ་བྱུང་བ་དང་། རྩལ་རྫོགས་པ་དང་། ཐུགས་རྗེ་འབྱུང་བ་དང་། གཞན་པ་དབང་དུ་གྱུར་པའོ། །ཞེས་སོ། །དྲུག་པ་གང་གིས་ཐོབ་པའི་ཁྱད་པར་ལ་གཉ ིས་ཏེ། དེ་ལས། ལངྐའི་བདག་པོ། ཁྱད་པར་ནི་འདི་ལྟར། རྩལ་གྱིས་ཐོབ་པ་དང་། བསྐུར་བས་ཐོབ་པའོ། །ཞེས་པས་དབང་རྣོན་རིག་པའི་རྩལ་གྱིས་ཅིག་ཅར་དུ་ཐོབ་པ་དང་། དབང་རྟུལ་བསྐུར་བས་རིམ་པར་ཐོབ་པའོ། །དང་པོ་ནི། བདག་དོན་དུ་རྒྱལ་བ་ཀུན་གྱི་ཐུགས་ཀྱི་གསང་བ་དཀྱིལ་འཁོར་རྣམ་གསུམ་དབྱེར་མི་ཕྱེད་པའི་གནས་ལུགས་ཀྱི་དོན་རྟོགས་ནས། དེ་ཉིད་གཞན་དོན་དུ་གསལ་བར་སྟོན་ནུས་པ་དེ་ནི་ཐོབ་བྱའི་ཕུལ་དུ་གྱུར་པ་ཐོབ་པའི་ཕྱིར། སྲིད་པ་གསུམ་ལ་དབང་སྒྱུར་བའི་བདག་པོར་གྱུར་པ་སྟེ། དེ་ལས། ལངྐའི་བདག་པོ། རྩལ་གྱིས་ཐོབ་པ་ནི་འདི་ལྟ་སྟེ། རྒྱལ་བ་རྣམས་ཀྱི་གསང་བའི་ཐུགས། །རྟོགས་ནས་གང་ལ་གསལ་བྱེད་པ། །དབང་རྣམས་ཀུན་གྱི་མཆོག་ཡིན་ཏེ། །སྲིད་པ་གསུམ་གྱིས་དེ་དབང་བསྐུར། །ཞེས་གསུངས་པའི་ཕྱིར། གཉིས་པ་ནི། དེ་ལས། ལངྐའི་བདག་པོ། གང་བསྐུར་བས་ཐོབ་པ་ནི། གང་ལ་ཕན་པ་དང་། གང་གི་ནུས་པ་ཙམ་དུ་ཤེས་པར་བྱའོ། །ཞེས་གསུངས་པའི་དོན། འགྲེལ་པ་མུན་པའི་གོ་ཆར། བསོད་ནམས་ཀྱི་ས་བོན་དུ་གྱུར་པས་ས་བོན་ངན་པ་སྤོང་བ་དང་། སྒོ་གསུམ་གྱི་རྩལ་གྱིས་བདག་གཞན་གྱི་དོན་ནུས་པའོ། །དེ་ཡང་བུམ་པའི་དབང་ལ་སོགས་པ་དང་། རབ་འབྱམས་འཆད་པ་ལ་སོགས་པའོ། །ཞེས་གསུངས་ཤིང་། དེ་ཡང་ལམ་ལྔ་གོང་མ་གོང་མས་འོག་མ་འོག་མ་ལ་རང་བཞིན་དང་སྤྲུལ་པའི་དཀྱིལ་འཁོར་ལ་སོགས་པར་བསྐུར་བས་ནུས་པ་དངོས་སུ་ཐོབ་པ་དང་། ཏིང་ངེ་འཛིན་ལ་བརྟན་པ་ཅི་རིགས་ཐོབ་པའི་སློབ་དཔོན་གྱིས་ལྷག་པ་གཟུགས་བརྙན་གྱི་དཀྱིལ་འཁོར་དུ་སྐལ་ལྡན་གྱི་སློབ་མ་ལ་དབང་བསྐུར་བས་ཐོབ་པ་ནི་མོས་སློབ་ཙམ་ཡིན་པས་ནུས་པ་སྐྱེ་རུང་དུ་སྨིན་པ་སྟེ། དེ་ལས་སྐབས་འདིར་བསྟན་ནི་སྔ་མའོ། །དེ་ལྟར་ན་རྣལ་འབྱོར་བཞི་ལ་ཕན་ནུས་སོགས་ཆུ་བོ་བཞིའི་དབང་བསྐུར་བའམ། ཡང་ན་ཕན་དབང་སྔོན་དུ་སོང་བ་གཞིར་བཞག་ནས། ལམ་གང་དང་གང་ཐོབ་པའི་ཕྱིར་ནུས་པའི་དབང་རིམ་པར་བསྐུར་ཚུལ་ཀྱང་གསུངས་ཏེ། དགོངས་འདུས་ལས། འདུན་པའི་རྣལ་འབྱོར་པ་དག་ལ། །གླེགས་བམ་བཅུ་གཉིས་བྱིན་པར་བྱ། །གང་སྦྱོར་བ་ཡི་རྣལ་འབྱོར་ལ། །ཉི་ཟླ་གཉིས་ནི་བྱིན་པར་བྱ། །དབུགས་ཆེན་ཕྱིན་པའི་རྣལ་འབྱོར་ལ། །རིན་ཆེན་བདུན་ཉིད་ངེས་པར་ཐོབ། །ལུང་ཆེན་ཐོབ་པའི་རྣལ་འབྱོར་པས། །གཡུང་དྲུང་བརྒྱད་དག་ཐོབ་པ་ཡིན། །རྩལ་ཆེན་རྫོགས་པའི་རྣལ་འབྱོར་པས། །རྩལ་བཅུའི་ཁྱད་པར་དེ་ཉིད་ཐོབ། །ཀུན་གྱི་བླ་མ་དམ་པས་ནི། །ཏོག་སྟོང་འབར་བ་བླ་མེད་ཐོབ། །ཅེས་པས་ཚོགས་ལམ་དུ་ཉན་དབང་བསྐུར་བའི་རྫས་ཐོས་བསམ་གྱི་རྟེན་གླེགས་བམ་བྱིན་ཏེ། བཅུ་གཉིས་ནི། དྲན་པ་ཉེར་བཞག་བཞི། ཡང་དག་སྤོང་བ་བཞི། རྫུ་འཕྲུལ་རྐང་པ་བཞི་རྣམས་མཚོན་པ་གསུང་རབ་ཡན་ལག་བཅུ་གཉིས་སོ། །སྦྱོར་ལམ་དུ་སྒོམ་དབང་གི་རྫས་ཉི་ཟླ་བྱིན་ཏེ། སྣང་སྟོང་ཟུང་འཇུག་ཏུ་ཉམས་སུ་བླངས་ཤིང་བསྒོམས་པས་རང་རང་གི་མི་མཐུན་ཕྱོགས་ལ་དབང་སྒྱུར་ཞིང་འཇོམས་པར་བྱེད་པའི་དབང་པོ་དང་སྟོབས་ལྔ་མཚོན་པའོ། །མཐོང་ལམ་པ་ལ་འཁོར་ལོས་སྒྱུར་བའི་རྒྱལ་པོའི་ཚུལ་གྱིས་བདག་གཞན་གྱི་དོན་ལ་དབང་སྒྱུར་ཞིང་འཇོམས་པར་བྱེད་པའི་དབང་པོ་དང་སྟོབས་ལྔ་མཚོན་པའོ། །མཐོང་ལམ་པ་ལ་འཁོར་ལོས་སྒྱུར་བའི་རྒྱལ་པོའི་ཚུལ་གྱིས་བདག་གཞན་གྱི་དོན་ལ་དབང་སྒྱུར་བའི་ཕྱིར། རིན་ཆེན་སྣ་བདུན་བྱིན་ཏེ། བྱང་ཆུབ་ཡན་ལག་བདུན་མཚོན་པའོ། །སྒོམ་ལམ་པ་ལ་དམ་པ་རྣམས་ཀྱི་ཐུགས་ཀྱི་སྲས་སུ་བཀྲ་ཤིས་པར་བྱིན་གྱིས་བརླབས་པའི་ཕྱིར། བཀྲ་ཤིས་རྫས་བརྒྱད་བྱིན་ཏེ། འཕགས་ལམ་ཡན་ལག་བརྒྱད་མཚོན་པའོ། །མཐར་ལམ་པ་ལ་སྟོབས་བཅུའི་དབང་བྱིན་པས། མི་མཐུན་པ་ཟིལ་གྱིས་གནོན་ཅིང་། མཐུན་པའི་ཡེ་ཤེས་ཀྱི་རྩལ་བཅུའི་ཁྱད་པར་ས་བཅུ་པ་མཐར་ཕྱིན་པའོ། །ཀུན་གྱི་བླ་མ་ནི་ལམ་པ་ཀུན་གྱི་སློབ་དཔོན་མི་སློབ་པའི་གོ་འཕང་ཡིན་པས། དེར་མངའ་དབང་སྒྱུར་བའི་ཕྱིར། རིན་པོ་ཆེའི་ཏོག་སྟོང་ཀུན་ཏུ་འོད་འབར་བའི་དབུ་རྒྱན་ཅོད་པན་དང་བཅས་པས་དབང་བསྐུར་ཏེ། འདི་ནི་འབྲས་དབང་དུ་འདུའོ། །བདུན་པ་དབང་ཐོབ་པའི་རྟགས་ནི། ལམ་འོག་མ་འོག་མ་ལ་དབང་བསྐུར་བས་ཐོབ་པའི་རྟགས་རང་རང་གི་ལམ་གོང་མ་ཐོབ་པ་སྟེ། དེ་ཡང་ཚོགས་སྦྱོར་གྱི་རྟེན་ལ་དབང་བསྐུར་བའི་རྟགས་མཐོང་ལམ་ཐོབ་པས་ཀུན་གྱིས་བཀུར་གནས་ཐོབ་པ་དང་། མཐོང་བའི་དོན་དེ་ལས་མི་གཡོ་བར་གོམས་པར་བྱེད་པ་སྒོམ་ལམ་ལྷག་པའི་ཡེ་ཤེས་འབྱུང་བ་དང་། དེ་ལས་རིག་པའི་རྩལ་ལ་གོམས་པ་རྩོལ་མེད་ལྷུན་གྲུབ་ཏུ་མཐར་སོན་པ་མཐར་ལམ་པ་དང་། དེ་ལས་རྫོགས་པའི་སངས་རྒྱས་ཀྱི་ས་བརྙེས་པས་དོན་གཉིས་མཐར་ཕྱིན་པའི་ཆེ་བའི་ཡོན་ཏན་གྱི་འོད་ཟེར་ཀུན་ཏུ་རྒྱས་པ་སྟེ། དགོངས་འདུས་ལས། ལངྐའི་བདག་པོ་རྟགས་ནི་འདི་ལྟ་སྟེ། གཙུག་ཏོར་དམ་པ་འབྱུང་བ་དང་། གང་ལ་མ་གཞག་ལྷན་ནེ་བ་དང་། ལྷུན་གྱིས་ཡོངས་སུ་གྲུབ་པ་དང་། འོད་ཟེར་མཐའ་ཡས་རྒྱས་པའོ། །ཞེས་གསུངས་སོ། ༈ །གཉིས་པ་རྗེས་འཇུག་ལས་དང་པོ་པའི་དབང་ནི། དབང་དོན་བསྡུས་པ་ལས། རྗེས་འཇུག་ལས་ཀྱི་དང་པོ་ལ། །ཆུ་བོ་བཞི་ཡི་དབང་བསྐུར་བ། །ཡོ་ག་ལ་སོགས་ཐེག་དྲུག་ལ། །ཕྱི་དབང་རྒྱུད་ཀྱི་ཆུ་བོས་བྱ། །ཞེས་སོགས་ཀྱི་དོན། དབང་དོན་རྣམ་པར་བྱེད་པ་ལས། དང་པོ་རྒྱལ་པོ་བཀའ་རྟགས་དབང་། །ཞེས་སོགས་ཀྱིས་བཀྲལ་ཞིང་དེ་རེ་རེ་ལའང་དབང་དོན་རྒྱ་ཆེར་འབྱེད་པ་ལས། དང་པོ་རྒྱལ་པོ་བཀའ་རྟགས་ཉི་ཤུ་དང་། །ཞེས་སོགས་ཀྱིས་དབྱེ་བ་མདོར་བསྟན། དང་པོ་རྒྱལ་པོ་བཀའ་རྟགས་ཉི་ཤུ་ནི། །ཅོད་པན་ལྷ་མོ་སེང་གེ་གླང་པོ་ཆེ། །ཞེས་སོགས་ཀྱིས་རྒྱས་པར་ཕྱེ་བའི་སྒོ་ནས་བཀྲལ་བ་རྣམས་ཡིན་ཏེ། འཆད་པར་འགྱུར་པ་ལས་ཤེས་པར་བྱའོ། །ད་ནི་སྔར་བཤད་ཟིན་དང་། ཕྱིས་འཆད་འགྱུར་ཀུན་ཏུ་ཁྱེར་ཤེས་པའི་གནད་ཚུལ་འདི་དག་ལ་དཔྱད་པར་བྱ་སྟེ། རྗེས་འཇུག་ལམ་པའི་དབང་འཆད་པའི་སྐབས་སུ། གང་ལ་བསྐུར་བྱའི་ཡུལ་གྱི་སློབ་མ་ཚོགས་སྦྱོར་གཉིས་གཅིག་ཏུ་བསྡུས་ཤིང་། མཐོང་སྒོམ་མཐར་གསུམ་མི་སློབ་ལམ་བཞིར་བཞག་ནས། དེ་དང་དེ་ལ་དབང་གི་ཆུ་བོ་བཞི་རིམ་གྱིས་བསྐུར་བས་ལམ་གོང་མ་གོང་མ་ལ་སྦྱོར་བར་གསུངས་པ་ནི། དངོས་བཏགས་མ་ཕྱེ་བའི་ལམ་དུས་ཀྱི་དབང་སྟེ། གཞན་དུ་སྔར་མ་སྨིན་པ་སྨིན་བྱེད་ཀྱི་དབང་གི་སྐབས་ཡིན་ན། ཤིན་ཏུ་དབང་རྣོན་དབང་དུས་སུ་གྲོལ་ནུས་པའི་གང་ཟག་ཁྱད་པར་ཅན་ཁ་ཅིག་ལ་མ་གཏོགས་པ་དེ་འདྲ་མི་སྲིད་པས། སྨིན་བྱེད་ལ་ལྟོས་ནས་ཆུ་བོ་བཞིའི་ནང་ཚན་གྱི་དབང་དེ་དང་དེ་བསྐུར་བས་མཐོང་སྒོམ་མཐར་གསུམ་གྱི་སློབ་ལམ་དང་། མི་སློབ་ལམ་སངས་རྒྱས་ཀྱིས་ཐོབ་པར་འགྱུར་ངེས་ཀྱི་རྟེན་འབྲེལ་སྒྲིག་བྱེད་ཙམ་སྟེ། མ་འོངས་པ་ན་ཐོབ་འགྱུར་དེ་ཡང་། དམ་ཚིག་མ་ཉམས་ཤིང་རིམ་གཉིས་སྒོམ་པའི་མཐུན་རྐྱེན་ཚང་བ་ཞིག་གི་དབང་དུ་བྱས་ན། སྐྱེ་བ་འདིའམ། ཐ་ནའང་སྐྱེ་བ་ཕྱི་མའི་ཐ་ཚུན་ཆོད་ལས་མི་འགྱངས་པ་ཡིན་ནོ། །དེར་མ་ཟད། ལམ་དབང་ལ་ལྟོས་ནས་ཀྱང་། དབང་དེ་དང་དེར་རང་ལམ་གོང་མའི་དངོས་རྒྱུན་ཡིན་པར་མ་ངེས་ཏེ། དཔེར་ན་ཚོགས་སྦྱོར་ལ་གནས་པའི་གང་ཟག་དེ་མཐོང་ལམ་ལ་སྦྱོར་བ་ལ་དུས་དེར་ཕྱི་དབང་རྒྱུད་ཀྱི་ཆུ་བོ་བསྐུར་དགོས་པས་མ་ཁྱབ་ཅིང་། འོན་ཀྱང་ལམ་གོང་མ་ལ་སྦྱོར་བའི་རྟེན་འབྲེལ་སྒྲིག་བྱེད་ཀྱི་རྒྱུ་འབྲས་ཙམ་དུ་འགྱུར་བས་ན། ས་མཚམས་དེ་དག་ཀྱང་གཙོ་ཆེ་བའི་དབང་དུ་བྱས་ཀྱི་མཐའ་གཅིག་ཏུ་ངེས་པ་མི་འཆའོ། ༈ །དེ་ཡང་སྤྱིར་དབང་ལ་རྒྱུ་ལམ་འབྲས་བུའི་དབང་གསུམ་སྟེ། དེ་གསུམ་བསྐུར་བའི་དུས་ཀྱང་། རྒྱུ་དུས་ཀྱི་དབང་ནི་ཐོག་མར་བསྐུར་དགོས་ཏེ། དེ་མ་སྨིན་པ་སྨིན་བྱེད་ཀྱི་དབང་ཡིན་པ་གང་ཞིག །དེ་ཡིན་ན་ལམ་སྒོམ་པའི་སྔོན་དུ་བསྐུར་དགོས་པས་ཁྱབ་པའི་ཕྱིར། ལམ་དུས་ཀྱི་དབང་ནི། ནམ་དུས་ལ་བབས་པ་དེའི་ཚེ་བསྐུར་དགོས་ཏེ། དེ་ལམ་གྱི་བོགས་འདོན་ཡིན་པའི་ཕྱིར། དེ་ཡིན་ཏེ། ལམ་དུས་ཀྱི་དབང་ཡིན་ན་སྔར་རྒྱུད་སྨིན་པའི་རྒྱུན་དེ་ཉིད་འཕེལ་ཞིང་རྒྱས་པར་བྱེད་པའི་དབང་ཡིན་དགོས་པ་གང་ཞིག །ཇི་ཙམ་འཕེལ་བའི་ཆ་དེ་དང་དེ་དབང་དེ་ལས་གསར་ཐོབ་ཏུ་འགྱུར་ཡང་། ཐོབ་བྱ་སྡོམ་པའི་ངོ་བོ་རིགས་མི་འདྲ་བ་གཞན་མེད་པས་སྨིན་བྱེད་ཀྱི་ཐ་སྙད་མི་འཇུག་པའི་ཕྱིར། འབྲས་དུས་ཀྱི་དབང་ནི། ས་བཅུའི་རྒྱུན་མཐར་བསྐུར་དགོས་ཏེ། དེ་མཐར་ཐུག་གི་འབྲས་བུར་སྦྱོར་བྱེད་ཡིན་པའི་ཕྱིར་རོ། །དེས་ན་སྔར་བཤད་སྔོན་བྱུང་གི་དབང་ནི། འབྲས་དུས་ཀྱི་དབང་གི་རིགས་སུ་འདུ་ཞིང་། རྒྱུ་ལམ་གྱི་དབང་གཉིས་ནི། རྗེས་འཇུག་གི་དབང་སྟེ། འདིར་དངོས་བསྟན་སློབ་ལམ་བཞི་ལ་ཆུ་བོ་བཞིའི་དབང་སྐབས་བབས་སུ་བསྐུར་བར་གསུངས་པ་ལ། སློབ་དཔོན་གྱིས་རྗེས་འཇུག་ལམ་པའི་དབང་ཞེས་ཐ་སྙད་མཛད་མོད། དེ་ལྟ་ནའང་སྔ་མ་གསུམ་པོ་ལམ་དུས་ཀྱི་དབང་དངོས་ཡིན་ཀྱང་། ཕྱི་མ་གཅིག་པོ་ལ་དངོས་བཏགས་ཀྱི་ཆ་གཉིས་ཀ་ཡོད་དེ། སྤྱིར་མཐར་ལམ་པ་ལ་བསྐུར་བའི་དབང་ཙམ་དང་། བྱེ་བྲག་རྒྱུན་མཐར་རང་ལམ་གོང་མ་ལ་སྦྱོར་བྱེད་ཀྱི་དབང་གཉིས་སྲིད་པས་ན། ཕྱི་མ་དེ་འབྲས་དུས་ཀྱི་དབང་དུ་འགྱུར་ཀྱང་། ལམ་དབང་གི་ཁོངས་སུ་བསྡུས་ནས་དེར་བཏགས་སོ། །ཡང་ལམ་དབང་ཡིན་ན། དེའི་སྔོན་དུ་རྒྱུ་དབང་སོང་བས་ཁྱབ་པའི་ཕྱིར། སྨིན་བྱེད་ཀྱི་དབང་ཡང་ཤུགས་ཀྱིས་འཕངས་པར་མངོན་ཞིང་། སློབ་དཔོན་གྱིས་རྗེས་འཇུག་ལས་དང་པོ་པའི་དབང་ཞེས་ཐ་སྙད་མཛད་པ་ལ། རྒྱུ་ལམ་གྱི་དབང་གཉིས་ཀའི་ཆ་ཡོད་ཀྱང་། གཙོ་ཆེ་བའི་དབང་དུ་བྱས་ན་རྒྱུ་དུས་ཀྱི་དབང་དུ་འགྱུར་རོ། ༈ །གཉིས་པ་རྗེས་འཇུག་གི་དབང་གི་གོ་དོན་བྱེ་བྲག་ཏུ་བཤད་པ་ནི། འདིར་རྗེས་འཇུག་ལས་དང་པོ་པའི་དབང་གཙོ་ཆེ་བ་ཡིན་ནོ། །དེ་ལ་གསུམ་སྟེ། དབང་གི་ངོ་བོ། ངེས་ཚིག །དབྱེ་བའོ། །དང་པོ་ནི། ཧེ་རུ་ཀ་འདུས་པའི་རྒྱུད་ལས། གང་གིས་གང་ལ་གང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་པའི་དོན་བྱ་བྱེད་ལས་གསུམ་གྱི་ངེས་པ་ལས་ཤེས་པར་བྱ་བ་ཡིན་ཏེ། བྱེད་པ་པོ་མཚན་ཉིད་དང་ལྡན་པའི་རྡོ་རྗེ་སློབ་དཔོན་གྱིས། ལས་ནི་སྟ་གོན་གྱིས་རྒྱུད་སྦྱངས་པའི་སློབ་བུ་སྣོད་ལྡན་གྱི་རྒྱུད་ལ། བྱེད་པ་རྫས་སྔགས་ཏིང་ངེ་འཛིན་གསུམ་ཚོགས་པའི་ཆོ་ག་ཁྱད་པར་ཅན་གྱི་དབང་བསྐུར་བས། བྱ་བ་སློབ་མའི་རྟོག་ཚོགས་གདོད་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པའི་ཐོབ་བྱ་རང་གནས་ཀྱི་ཡེ་ཤེས་ཉིད་ངོ་འཕྲོད་པས། རང་སྐལ་གྱི་སྒྲིབ་པ་ཅི་རིགས་རང་སངས་ཀྱིས་དག་པའམ་ཉམས་སྨད་པར་གྱུར་ཅིང་། ལམ་རིམ་པ་གཉིས་ཀྱིས་ཡེ་ཤེས་དངོས་སུ་སྐྱེས་སམ་སྐྱེ་ངེས་ཀྱི་ནུས་རུང་དུ་སྨིན་པར་བྱས་པས་རྒྱུད་འགྱུར་བའི་ཁྱད་པར་གང་ཡིན་པའོ། །ཐོབ་བྱ་དེ་ཡང་གང་ཞེ་ན། དབང་རང་རང་གི་མཚུངས་ལྡན་གྱི་རྒྱུ་དང་རྣམ་པ་འདྲ་བའི་དབང་རྫས་སོ་སོ་ལ། རྫོགས་སངས་རྒྱས་ཀྱི་འབྲས་ཆོས་ཀྱི་ཡོན་ཏན་ཀྱང་། མཚུངས་ལྡན་གྱི་རྒྱུ་གང་ལ་རང་ཆོས་ཉིད་དུ་སོང་བའི་ལྡོག་ཆ་དེ་དང་དེས་རབ་ཏུ་གནས་པར་བྱས་པའི་ཡེ་ཤེས་དང་། རང་བཞིན་ཐ་མི་དད་པའི་རང་གནས་ཀྱི་ཡེ་ཤེས་གང་ཡིན་པ་ཉིད་དེ། དབང་གི་མན་ངག་གསང་བ་ལས། རྫས་ལ་རབ་གནས་ཡེ་ཤེས་དང་། །ཐ་མི་དད་པའི་ཐོབ་བྱ་དེ། །དབང་གི་ངོ་བོ་ཞེས་བྱའོ། །ཞེས་གསུངས་པའི་ཕྱིར་རོ། །གཉིས་པ་ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན། ཨ་བྷི་ཞེས་པ་མངོན་དུའམ་མངོན་པ། སཉྩ་ཞེས་པ་གཏོར་ཞིང་འཁྲུད་པའམ་ཆུ་བླུགས་པ་ལྟ་བུ་ལའང་འཇུག་པས། མངོན་པར་གཏོར་བས་ན་དབང་སྟེ། སྦྱང་བྱ་སྒོ་གསུམ་གྱི་དྲི་མ་རགས་ཕྲ་གཏོར་ཞིང་འཁྲུད་པར་བྱེད་པའི་ཕྱིར། མངོན་པར་བླུགས་པས་ན་དབང་སྟེ། ལམ་སྒོམ་རུང་དང་འབྲས་བུ་ཐོབ་རུང་གི་ནུས་པ་ཁྱད་པར་ཅན་རྒྱུད་ལ་འཇོག་པའི་ཕྱིར། དེ་ལྟར་ཡང་བརྟག་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས་ཤིང་། དེ་ལྟར་སྤངས་ཐོབ་ཀྱི་ནུས་པ་བཞག་པ་དེ་ཉིད་ཀྱང་རྒྱུན་མི་ཆད་པར་འཇུག་པ་ཡིན་པས། ཕྱིས་སློབ་དཔོན་ལས་དབང་སླར་ཡང་བླངས་པའམ། སྡོམ་ལྡན་རང་ཉིད་ཀྱིས་བླངས་ཏེ་ཐོབ་པ་དང་། སྔར་ཐོབ་ཀྱི་རྒྱུན་དེ་ཉིད་ལམ་རིམ་པ་གཉིས་ཀྱིས་བསྐྱངས་ཀྱང་རུང་སྟེ། ཇེ་བཟང་དུ་འཕེལ་ཞིང་རྒྱས་པའི་ཆ་དེ་དང་དེ་ཡང་རྒྱུན་མི་ཆད་པར་གོང་འཕེལ་གྱི་ཚུལ་དུ་འཇུག་པ་ཡིན་ནོ། །དེ་ལྟར་ཡང་མན་ངག་གསང་བ་ལས། ཁྱད་པར་ཅན་གྱི་ནུས་འཇོག་ཅིང་། །རྒྱུན་མི་ཆད་དང་འཁྲུ་ཕྱིར་རོ། །ཞེས་སོ། །གསུམ་པ་དབྱེ་བ་ལ་བཞི་སྟེ། བསྐུར་བྱ་ཆུ་བོ་བཞིའི་སྒོ་ནས་དབྱེ་བ། ཐོབ་བྱེད་རྒྱུ་རྐྱེན་གྱི་སྒོ་ནས་དབྱེ་བ། འབྲས་བུ་བྲལ་ཐོབ་ཀྱི་སྒོ་ནས་དབྱེ་བ། སྤང་བླང་སྐྱོན་ཡོན་གྱི་སྒོ་ནས་དབྱེ་བའོ། །དང་པོ་ནི། རྩ་རྒྱུད་ལས། འདུས་པ་ཆེན་པོའི་རྣལ་འབྱོར་པ། །སྲིད་པ་གསུམ་གྱིས་ཕྱག་བྱས་པའི། །བླ་མའི་ས་ལ་གནས་པ་ཡི། །དབང་མཆོག་སུམ་ཅུ་རྩ་དྲུག་ཡིན། །ཕྱི་ཡི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་དང་། བཤད་རྒྱུད་དགོངས་འདུས་ལས། ལ་ལས་ནི་རྒྱུད་ཀྱི་ཆུ་བོའི་དབང་གིས་དབང་བྱིན་ནོ། །ལ་ལས་ནི་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་རྫོགས་པའི་ཆུ་བོའི་དབང་གིས་དབང་བྱིན་ནོ། །ཞེས་དང་། བཤད་རྒྱུད་རྔམ་གློག་ལས་ཀྱང་། དང་པོ་ཕྱི་ཡི་དབང་བཅུ་བསྐུར། །དེ་ནས་ནང་དབང་བཅུ་དང་གཅིག །དེ་ནས་སྒྲུབ་དབང་བཅུ་དང་གསུམ། །ཐ་མར་གསང་བ་རྣམ་པ་གཉིས། །བཅུ་ཕྲག་གསུམ་དང་དྲུག་དག་གིས། །དབང་མཆོག་དམ་པ་བསྐུར་བ་ཡིན། །ཞེས་པས་འདུས་པ་མདོའི་དབང་ལ་དབྱེ་ན་ཆུ་བོ་བཞི་སྟེ། ཕྱི་དབང་རྒྱུད་ཀྱི་ཆུ་བོ། ནང་དབང་འབྱུང་བའི་ཆུ་བོ། སྒྲུབ་དབང་གྲགས་པའི་ཆུ་བོ། གསང་དབང་རྫོགས་པའི་ཆུ་བོའོ། །མཚན་ཉིད་རིམ་བཞིན། ཆུ་བོ་བཞི་ཡི་ནང་ཚན་གང་ཞིག །རང་ཐོབ་བྱེད་འདུས་པ་མདོའི་རྩ་བའི་དཀྱིལ་འཁོར་ཐུན་མོང་ཐུན་མིན་གང་རུང་ངམ། བསྙེན་པ་དང་འབྲེལ་བ་ཡན་ལག་གི་དཀྱིལ་འཁོར་སོ་སོར་ཕྱེ་བ་གང་རིགས་ལ་བརྟེན་ནས་བསྐུར་བས། སློབ་བུའི་རྒྱུད་ལ་ཡོ་ག་མན་ཆད་ཐེག་པ་དྲུག་པོ་སོ་སོ་རང་རང་གི་སྤངས་ཐོབ་དང་རིགས་འདྲའི་ཡོན་ཏན་གྱི་ཆ་དེ་དང་དེ་སྐྱེས་སམ་སྐྱེ་རུང་གི་དགེ་བའི་ས་བོན་གསོས་ཐེབས་ཤིང་། རང་འབྲས་ནང་དབང་བསྐུར་རུང་གི་སྐལ་བ་ཅན་དུ་བསྒྲུབས་པ་དེ་ཕྱི་དབང་གི་མཚན་ཉིད། དབྱེ་ན། ཕྱི་དབང་རྩ་བ་བཅུའམ། དེ་ལས་ཕྱེ་བའི་བྱེ་བྲག་བརྒྱ་རྩ་བརྒྱད་ལ་སོགས་པའོ། །ཆུ་བོ་བཞིའི་ནང་ཚན་གང་ཞིག །རང་ཐོབ་བྱེད་འདུས་པ་མདོའི་རྩ་བའི་དཀྱིལ་འཁོར་ཐུན་ཐུན་མིན་གང་རུང་ངམ། ཉེ་བསྙེན་གྱི་ཡན་ལག་དང་འབྲེལ་བ་ཚོགས་ཆེན་འདུས་པ་ཐུན་མོང་གི་དཀྱིལ་འཁོར་ལ་བརྟེན་ནས་བསྐུར་བས། སློབ་བུའི་རྒྱུད་ལ་མ་ཧཱ་ཡོ་གའི་སྤངས་ཐོབ་དང་རིགས་འདྲའི་ཡོན་ཏན་སྐྱེས་སམ་སྐྱེ་རུང་གི་ས་བོན་ཐེབས་ཤིང་། རང་འབྲས་སྒྲུབ་དབང་བསྐུར་རུང་གི་སྐལ་བ་ཅན་དུ་བསྒྲུབས་པ་དེ་ནང་དབང་གི་མཚན་ཉིད། དབྱེ་ན། ནང་དབང་རྩ་བ་བཅུ་གཅིག་གམ། དེ་ལས་ཕྱེ་བའི་བྱེ་བྲག་དྲུག་བརྒྱ་དང་དྲུག་ལ་སོགས་པའོ། །ཆུ་བོ་བཞིའི་ནང་ཚན་གང་ཞིག །རང་ཐོབ་བྱེད་འདུས་པ་མདོའི་རྩ་བའི་དཀྱིལ་འཁོར་གཉིས་གང་རུང་ངམ། སྒྲུབ་པའི་ཡན་ལག་དང་འབྲེལ་བ་ཚོགས་ཆེན་འདུས་པ་ཐུན་མོང་མ་ཡིན་པའི་དཀྱིལ་འཁོར་ལ་བརྟེན་ནས་བསྐུར་བས། སློབ་བུའི་རྒྱུད་ལ་ཨ་ནུའི་ཐེག་པ་རང་ལུགས་ཀྱི་སྤངས་ཐོབ་ཀྱི་རིགས་སུ་གནས་པའི་ཡོན་ཏན་སྐྱེས་སམ་སྐྱེ་རུང་གི་ནུས་པ་ཁྱད་པར་ཅན་གསོས་ཐེབས་ཤིང་། རང་འབྲས་གསང་དབང་བསྐུར་རུང་གི་སྐལ་བ་ཅན་དུ་བསྒྲུབས་པ་དེ་སྒྲུབ་དབང་གི་མཚན་ཉིད། དབྱེ་ན། སྒྲུབ་དབང་རྩ་བ་བཅུ་གསུམ་མམ། དེ་ལས་ཕྱེ་བའི་བྱེ་བྲག་བརྒྱ་དང་བཅོ་ལྔ་ལ་སོགས་པའོ། །ཆུ་བོ་བཞིའི་ནང་ཚན་གང་ཞིག །རང་ཐོབ་བྱེད་འདུས་པ་མདོའི་རྩ་བའི་དཀྱིལ་འཁོར་གཉིས་གང་རུང་ང མ། སྒྲུབ་པ་ཆེན་པོའི་ཡན་ལག་དང་འབྲེལ་བ་ཡན་ལག་གི་དཀྱིལ་འཁོར་ཁྱད་པར་བ་ལ་བརྟེན་ནས་བསྐུར་བས། སློབ་བུའི་རྒྱུད་ལ་ཨ་ཏི་ཡོ་གའི་སྤངས་ཐོབ་ཀྱི་ཡོན་ཏན་དང་རིགས་འདྲའི་ཨ་ནུ་རང་ལུགས་ཀྱི་རྫོགས་རིམ་མཐར་ཐུག་གསང་བ་བྱང་སེམས་རྣམ་པར་གཉིས་ཀྱི་ཡེ་ཤེས་སྐྱེས་སམ་སྐྱེ་རུང་གི་ནུས་པ་ཁྱད་པར་ཅན་དུ་བསྒྲུབས་པ་དེ་གསང་དབང་རྫོགས་པའི་ཆུ་བོའི་མཚན་ཉིད། དབྱེ་ན། ཀུན་རྫོབ་བྱང་སེམས་ཀྱི་དབང་ལུས་ལ་བསྐུར་བ་དང་། དོན་དམ་བྱང་སེམས་ཀྱི་དབང་སེམས་ལ་བསྐུར་བའོ། །གཉིས་པ་ཐོབ་བྱེད་རྒྱུ་རྐྱེན་གྱི་སྒོ་ནས་དབྱེ་བ་ལ་གཉིས་ཏེ། རྒྱུ་གཉིས་དང་། རྐྱེན་བཞིའོ། །དང་པོ་ནི། མན་ངག་གསང་བ་ལས། རྒྱུ་གཉིས་མཚུངས་རྒྱུ་རང་ལ་གནས། །ཐབས་ཀྱི་ཡན་ལག་ལྷན་ཅིག་བྱེད། །ཅེས་པས་གཉིས་ཏེ། མཚུངས་ལྡན་གྱི་རྒྱུ་དང་། ལྷན་ཅིག་བྱེད་པའི་རྒྱུའོ། །དང་པོ་ནི། སློབ་བུའི་རྟོག་ཚོགས་སུ་སྣང་བའི་ཆོས་ཅན་སོ་སོ་ལ་ཆོས་ཉིད་དུ་སོང་བའི་སེམས་ཀྱི་ཆོས་ཉིད་རང་གནས་རང་བྱུང་གི་ཡེ་ཤེས་ཏེ། དགོངས་འདུས་ལས། རང་བཞིན་ནི་ཆོས་ཉིད་ཀྱིས་སོ། །ཞེས་པའི་འགྲེལ་པ་མུན་པའི་གོ་ཆར། དབང་གི་རང་བཞིན་ནི་ཡེ་ནས་རང་གི་སེམས་ཀྱི་ཆོས་ཉིད་ལ་མ་བཙལ་བར་ལྡན་པར་ཉིད་དོ། །ཞེས་གསུངས་པའི་ཕྱིར་དང་། དབང་བསྐུར་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པར་ག་ལ་འགྱུར། །བྲ་སྲན་འབྲས་སུ་དབང་བསྐུར་ཀྱང་། །དེ་ལ་འབྲས་ཀྱི་དངོས་སྣང་མེད། །ཅེས་སོ། །གཉིས་པ་ནི། དབང་རྫས་རབ་གནས་དང་ལྡན་པ་སྟེ། བུའི་མཚུངས་ལྡན་གྱི་རྒྱུ་རྟོག་ཚོགས་སུ་སྣང་བའི་ཆོས་ཅན་གང་དང་གང་ལ་རང་གནས་ཀྱི་ཡེ་ཤེས་དེ་ཆོས་ཉིད་དུ་སོང་བའི་ལྡོག་ཆ་སོ་སོ་དང་གཉིས་སུ་མེད་པའི་སངས་རྒྱས་ཀྱི་ཡེ་ཤེས་དང་ཡོན་ཏན་ཁྱད་པར་ཅན་གྱིས་བྱིན་གྱིས་བརླབས་པས། དབང་རྫས་དེ་དང་དེ་ནུས་མཐུ་ཅན་དུ་བསྒྲུབས་པའོ། །གཉིས་པ་རྐྱེན་བཞི་ལ་གཉིས་ཏེ། ངོ་བོ་མདོར་བསྟན་པ་དང་། འཕྲོས་དོན་རྒྱས་པར་བཤད་པའོ། །དང་པོ་ནི། མན་ངག་གསང་བ་ལས། དབང་གི་ཤེས་པ་རྐྱེན་བཞི་སྟེ། །ཀུན་གཞི་བག་ཆགས་རྒྱུ་ཡི་རྐྱེན། །སློབ་དཔོན་དབང་ལྡན་བདག་པོའི་རྐྱེན། །ཐོབ་པར་བྱ་རྒྱུ་དམིགས་པའི་རྐྱེན། །གཅིག་ཐོབ་གཅིག་གིས་གོ་འབྱེད་པ། །དེ་མ་ཐག་པའི་རྐྱེན་ཞེས་བྱ། །ཞེས་པས་བཞི་སྟེ། རྒྱུའི་རྐྱེན། བདག་པོའི་རྐྱེན། དམིགས་པའི་རྐྱེན། དེ་མ་ཐག་རྐྱེན་ནོ། །དང་པོ་ནི། ཀུན་གཞི་ལ་དཀར་པོའི་བག་ཆགས་ཡོད་པ་རང་བཞིན་ནམ་རྐྱེན་གྱིས་སད་དམ་སད་དུ་རུང་བས། བློའི་རིམ་པ་དང་འཚམས་པར་དབང་བསྐུར་དུ་རུང་བའི་སྐལ་ལྡན་གྱི་སློབ་བུའོ། །གཉིས་པ་ནི། རྫོགས་པའི་སངས་རྒྱས་ནས་དབང་གི་ཆུ་བོ་རྒྱུན་མ་ཆད་པར་ཡོད་ཅིང་། ཐུགས་དགྱེས་པ་དང་བཅས་པས་སློབ་བུའི་རྒྱུད་ལ་དབང་གི་ནུས་པ་ཇི་ལྟར་རིགས་པ་འཇོག་ནུས་པའི་སློབ་དཔོན་ནོ། །གསུམ་པ་ནི། དཔོན་སློབ་གཉིས་ཀས་སེམས་ཡེངས་པ་མེད་པའི་སྒོ་ནས་རྫས་སྔགས་ཏིང་འཛིན་གསུམ་འཛོམ་པའི་ཆོ་ག་རྣམ་པར་དག་པ་བྱས་པ་ལས་བྱུང་བའི་བུའི་རྒྱུད་ལ་ཐོབ་བྱའི་དབང་གི་ནུས་པ་ཁྱད་པར་ཅན་ནོ། །བཞི་པ་ནི། དབང་སྔ་མ་སྔ་མས་རྒྱུད་སྦྱངས་པས་གོ་ཕྱེ་ནས་ཕྱི་མ་ཕྱི་མ་བསྐུར་རུང་དུ་སྨིན་པའོ། །གཉིས་པ་ལ། རྐྱེན་དང་པོར་མ་ཟད་གཉིས་པ་ལའང་རྒྱུའི་ཐ་སྙད་བཏགས་ཚུལ་སྤྱིར་བཤད་པ་དང་། རྐྱེན་བཞི་སོ་སོ་ལས་འཕྲོས་པའི་དོན་བྱེ་བྲག་ཏུ་ཕྱེ་སྟེ་བཤད་པའོ། །དང་པོ་ནི། རྒྱུའི་རྐྱེན་སློབ་བུ་དང་། བདག་པོའི་རྐྱེན་སློབ་དཔོན་གཉིས་ལ། སྤྱི་མདོར་བསྐུར་བྱའི་རྒྱུ་དང་། ཐོབ་བྱའི་རྒྱུ་ཞེས་རྒྱུའི་ཐ་སྙད་མཛད་དེ། ལེའུ་བདུན་ཅུ་པ་ལས། གྲོགས་པོ་དག །དེ་ལས་རྒྱུ་ནི་ཡོ་བྱད་ཆེན་པོ་ལྔ་ཁོ་ནའོ། །ཞེས་པའི་དོན་འགྲེལ་པ་ལུང་བསྟན་མ་ལས། ཡོ་བྱད་ལྔ་དང་མི་ལྡན་ན། །སྐྱེ་བོ་དེ་ནི་དབུལ་པོ་ཡིན། །དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྔ། །ཞེས་གསུངས་ཤིང་། མུན་པའི་གོ་ཆར། སྒྲུབ་པའི་རྒྱུ་དང་ཐོབ་པར་བྱ་བའི་རྒྱུ་གཉིས་ལས། འདིར་ཐུན་མོང་མ་ཡིན་པའི་ཡོ་བྱད་ལྔས་ཕྱུག་པའི་བླ་མའི་བྱིན་དང་། སློབ་མ་ཡང་ལྔ་དང་ལྡན་པའི་སྣོད་གཉིས་ཀ་ཐུན་མོང་དུ་འཇལ་བར་བྱའོ། །ཞེས་པས། ཐོབ་བྱའི་རྒྱུ་ཡོ་བྱད་ལྔ་དང་ལྡན་པའི་བླ་མའི་བྱིན་བརླབས་དང་། བསྐུར་བྱའི་རྒྱུ་ཡོ་བྱད་ལྔ་ཚང་བའམ་ཚང་རུང་གི་སྣོད་དང་ལྡན་པའི་སློབ་མ་ལ་བཞེད་པའི་ཕྱིར་དང་། རྩ་རྒྱུད་ལས་ཀྱང་། སྣོད་ལྡན་བཅུད་རྫོགས་དབང་རྟོགས་ནས། །དབང་མཆོག་ཐོབ་པའི་རྒྱུ་ཞེས་བཤད། །ཅེས་པའི་འགྲེལ་པར། སྒོ་གསུམ་གྱི་སྐྱོན་སྤངས་པས་ཡོན་ཏན་རྣམས་དང་ལྡན་ཞིང་། བཤད་པའི་ཚད་དུ་ཕྱིན་པ་དང་། ཤེས་བྱ་རྣམས་ཁོང་དུ་ཆུད་པ་དང་། དབང་གི་སྐྱོན་ཡོན་རིག་པ་དང་ལྡན་ན་དབང་ཐོབ་པའི་རྒྱུ་སྟེ། ཡོ་བྱད་ལྔ་དང་ལྡན་པ་ཁོ་ནའོ། །ཞེས་གསུངས་པའི་ཕྱིར། གཉིས་པ་ལ། རྒྱུའི་རྐྱེན་གང་ལ་བསྐུར་བ་སློབ་མ་བཤད། བདག་པོའི་རྐྱེན་གང་གིས་བསྐུར་བའི་སློབ་དཔོན་བཤད། དམིགས་པའི་རྐྱེན་གྱི་མཐའ་གཅོད་འཕྲོས་དོན་དང་བཅས་པ་བཤད། དེ་མ་ཐག་རྐྱེན་ལས་འཕྲོས་པ་དབང་བསྐུར་བའི་རིམ་པ་ལ་དཔྱད་པའོ། །དང་པོ་ལ་གཉིས་ཏེ། བཟུང་བྱ་སྣོད་ལྡན་དང་། སྤང་བྱ་སྣོད་མིན་གྱི་སློབ་མའི་མཚན་ཉིད་དོ། །དང་པོ་ནི། སྤྱིར་དད་བརྩོན་ཤེས་རབ་གསུམ་དང་ལྡན་ཞིང་། སྒོམ་སྒྲུབ་ལ་དགའ་བ་དང་། ཆོས་ཕྱིར་གཏོང་ཕོད་ཆེ་བ། དམ་ཚིག་ལ་ཡིད་རྟོན་པ་ལ་སོགས་པའི་ཡོན་ཏན་མངའ་བ་སྟེ། རྒྱུད་ལས། སྒྲུབ་དང་སྒོམ་ལ་དགའ་བ་དང་། །རྟག་ཏུ་བླ་མ་ལ་གུས་ཤིང་། །དུས་གསུམ་བླ་མ་མཆོད་བྱེད་པ། །ཡོན་ཏན་དང་ལྡན་སློབ་མ་ཡིན། །ཞེས་དང་། ཁྱད་པར་དབང་བྱིན་པའི་སྣོད་ནི། རྩ་རྒྱུད་ལས། སྣོད་ལྡན་བཅུད་རྫོགས་དབང་རྟོགས་ནས། །དབང་མཆོག་ཐོབ་པའི་རྒྱུ་ཞེས་བཤད། །ཅེས་པའི་དོན་ཧཱུྃ་མཛད་ཀྱིས་རྣལ་འབྱོར་སའི་སྒྲོན་མར། སྣོད་ནི་གང་ཟག་སྟེ་རང་བཞིན་གྱི་ཡོན་ཏན་ནོ། །བཅུད་ནི་བསླབ་པའི་མཚན་ཉིད་དེ། མངོན་པར་འདུ་བྱེད་པའི་ཡོན་ཏན་ནོ། །ཞེས་དང་། ཡང་ཁྱེད་བླ་མས། སྣོད་དང་ལྡན་པ་ནི་སྤྲོ་རིང་བ། རྒྱུད་འཇམ་པ། དད་པ་ཆེ་བ། ཆགས་པ་མེད་པའི་སློབ་མ་དེ་ནི་དབང་ཐོབ་པའི་རྒྱུ་ཡིན་པར་བསྟན་པ་དང་། བཅུད་ནི་ཤེས་བྱ་ཐམས་ཅད་ལ་མ་རྨོངས་ན་དབང་ཐོབ་པའི་རྒྱུ་ཡིན་པ་དང་། དབང་གི་དོན་ཇི་ལྟར་ཡིན་པ་སྟོང་པ་ཆེན་པོའི་ངང་ཉིད་བརྡལ་བ་ཆེན་པོར་རྟོགས་ན་དབང་ཐོབ་པའི་རྒྱུ་ཡིན་པའོ། །ཞེས་གསུངས། བྱེ་བྲག་ཏུ་ཕན་ནུས་ཟབ་མོའི་དབང་གསུམ་བསྐུར་བའི་སྣོད་རིམ་གྱི་ཁྱད་པར་ནི། མན་ངག་གསང་བ་ལས། དད་བརྩོན་བརྟུལ་ཞུགས་ལྡན་པ་སྣོད། །བདག་གཞན་གཉིས་ཀའི་བརྩོན་འགྲུས་ལྡན། །སྤྱོད་དང་རིག་དང་མཉམ་པར་གནས། །ཞེས་པས་ཕྱི་ཕན་པའི་དབང་རྒྱུད་ཀྱི་ཆུ་བོ་བསྐུར་བའི་སྣོད་དད་པ་ཅན། ནང་ནུས་པའི་དབང་འབྱུང་བའི་ཆུ་བོ་དང་སྒྲུབ་དབང་གྲགས་ཆུ་གཉིས་བསྐུར་བའི་སྣོད་བརྩོན་འགྲུས་ཅན་ཏེ། བདག་དོན་ནུས་པའི་བརྩོན་འགྲུས་ཅན་ལ་ཉན་སྒོམ། གཞན་དོན་ནུས་པའི་བརྩོན་འགྲུས་ཅན་ལ་འཆད་ཕྲིན། གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་བོའོ། །ཟབ་དབང་བསྐུར་བའི་སྣོད་བརྟུལ་ཞུགས་ཅན་ཏེ། སྤྱོད་པ་དང་རིག་པའི་བརྟུལ་ཞུགས་ཅན་གཉིས་ལ་ཀུན་རྫོབ་བྱང་སེམས་གསང་དབང་དང་ཤེར་དབང་བསྐུར་ཞིང་། མཉམ་པའི་བརྟུལ་ཞུགས་ཅན་ལ་དོན་དམ་བྱང་སེམས་རིག་པ་རྩལ་གྱི་དབང་བསྐུར་པའོ། །འོ་ན་སྒྲུབ་དབང་གྲགས་ཆུ་ནུས་དབང་ལྔ་གང་དུ་འདུ་ཞེ་ན། དངོས་གྲུབ་སྒྲུབ་པའི་ཉེ་རྒྱུའི་སྤྱོད་པའི་དབང་ཡིན་པས་སྒོམ་དབང་དུ་འདུ་སྟེ། རྩ་རྒྱུད་ལས། ནང་དུ་འཇུག་པའི་དབང་ཐོབ་ནས། །དེ་ནས་ཀུན་ལ་སྤྱོད་སྒྲུབ་པའི། །དབང་མཆོག་དམ་པ་སྦྱིན་པར་བྱ། །ཞེས་གསུངས་པའི་ཕྱིར། ཡང་ནུས་དབང་བསྐུར་བས་ཐོབ་པའི་ཚད་དང་སྦྱར་བའི་སྣོད་རིམ་གྱིས་ཀྱང་གསུངས་ཏེ། འདི་ལྟར་དད་བརྩོན་དང་སྲི་ཞུ་ཚད་དུ་ཕྱིན་ན་ཉན་དབང་། ལས་རྣམ་བཞི་ཚད་དུ་ཕྱིན་ན་ལས་ཀྱི་རྡོ་རྗེའི་དབང་། མ་འགགས་པའི་ཤེས་རབ་ཚད་དུ་ཕྱིན་ན་རྒྱལ་འཐེབ་འཆད་པའི་དབང་། ལུང་རིགས་མན་ངག་གི་ཚད་མ་གསུམ་དང་ལྡན་ཞིང་རྐྱེན་ཐུབ་ན་རྡོ་རྗེ་སློབ་དཔོན་གྱི་དབང་། དམ་པའི་མཛོད་གསུམ་སོགས་ཐེག་པ་ཐམས་ཅད་ལ་ཕྱོགས་རིས་མེད་པར་མཁས་པས་འཆད་རྩོམ་ནུས་ན་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་ཐོབ་པའི་ཚད་དུ་བཤད་དེ། རྩ་རྒྱུད་ལས། དབང་གི་ཚད་ནི་འདི་ལྟ་སྟེ། །དད་ལྡན་སྲི་ཞུར་ལྡན་པ་ལ། །གསང་བ་ཉན་པའི་དབང་ཆེན་བསྐུར། །རྣམ་བཞི་ལས་ཀྱི་དོན་ཚང་ན། །ལས་རྣམས་བྱེད་པའི་དབང་ཐོབ་བོ། །ལྟ་བའི་དམིགས་བུས་ཆོས་མཐོང་ན། །རྒྱལ་འཐེབ་འཆད་པའི་དབང་ཐོབ་བོ། །རྐྱེན་ཆུབ་ཚད་མ་གསུམ་ལྡན་ན། །བླ་མ་རྡོ་རྗེ་སློབ་དཔོན་དབང་། །དམ་པའི་མཛོད་གསུམ་ཐམས་ཅད་ལ། །ཕྱོགས་མེད་པར་ནི་འཆད་ཤེས་ན། །རབ་འབྱམས་རྒྱལ་པོའི་དབང་ཐོབ་བོ། །ཞེས་དང་། རྔམ་གློག་ལས་ཀྱང་། དད་པ་ལྡན་ཤིང་བརྩོན་འགྲུས་ཆེ། །མཉན་བསམ་སློབ་ལ་མི་སྐྱོ་ན། །གསང་བ་ཉན་པའི་དབང་བསྐུར་རོ། །རྣམ་བཞི་ལས་ཀྱི་དགོས་པ་ཚང་། །བྱ་བའི་ལས་ལ་མ་རྨོངས་ན། །ཀརྨ་ལས་ཀྱི་དབང་བསྐུར་རོ། །ལྟ་བས་མཉམ་པའི་དོན་མཐོང་ན། །རྒྱལ་ཐེབས་འཆད་ཅིང་སྟོན་པའི་དབང་། །ཚད་མ་གསུམ་དང་རབ་ལྡན་ཞིང་། །རྐྱེན་ཐུབ་རྡོ་རྗེ་སློབ་དཔོན་དབང་། །ཐེག་པའི་རིམ་པ་ཐམས་ཅད་ལ། །ཕྱོགས་རིས་མེད་ཅིང་མ་རྨོངས་ན། །རབ་འབྱམས་རྒྱལ་པོའི་དབང་ཐོབ་བོ། །ཞེས་གསུངས་པས་རྩ་རྒྱུད་ཀྱི་དོན་བཀྲལ་ཞིང་། དེ་ཉིད་ཀྱི་འཕྲོས་ལས། རྐྱེན་ཐུབ་བརྟུལ་ཞུགས་ཆེ་བ་དང་། །སྐྱོན་རྣམས་སྤངས་ཤིང་དམ་ཚིག་ལྡན། །གསང་དབང་སྒྲུབ་པའི་དབང་ཐོབ་བོ། །ཞེས་ཀྱང་འབྱུང་ངོ་། །མདོར་ན་དབང་ཐམས་ཅད་རྫོགས་པར་ཐོབ་པ་ཞེས་དབང་བསྐུར་བས་རྒྱུད་ལ་ཡེ་ཤེས་དངོས་སུ་སྐྱེས་པའི་དུས་ནི། གང་ལ་བསྐུར་བའི་སྣོད་སློབ་མའི་རྒྱུད་ལ་ཡོན་ཏན་དགུ་དང་ལྡན་དགོས་པར་བཤད་དེ། དགུ་གང་ཞེ་ན། ཟག་བཅས་ཀྱི་བསླབ་པའི་མཐའ་བཅུ་རྫོགས་པ་བསོད་ནམས་གཏེར་གྱི་ས་ལྟ་བུ་སྦྱོར་ལམ་གྱི་ཡོན་ཏན་མཐར་ཕྱིན་པ་དང་། མཚན་བཅས་མཚན་མེད་ཀྱི་ཏིང་ངེ་འཛིན་ལ་ཉེ་བར་འདྲིས་པ་སྟེ་གོམས་པ་དང་། མ་སྲིང་དམ་ཅན་དང་གཟུངས་མ་སོགས་རིགས་ཅན་འདུ་བ་དང་། དེ་ཁོ་ན་ཉིད་གསལ་བར་ངེས་པ་ཐོབ་པའི་ལྟ་བ་དང་། ཏིང་ངེ་འཛིན་ལས་སུ་རུང་བ་དང་། ལྟ་སྒོམ་ལ་གདེངས་ཐོབ་པའི་དྲོད་རྟགས་ཀྱི་མཚན་མ་མཐོང་བ་དང་། སྐྱེ་བོ་ཀུན་གྱིས་བཀུར་ཞིང་བསྔགས་པ་དང་། དོན་རིག་པའི་ཉམས་རྙེད་པ་དང་། བདག་གཞན་གྱི་བྱ་བ་ཕྲིན་ལས་རྣམ་བཞི་ལ་ཐོགས་པ་མེད་པ་རྣམས་ཏེ། དགོངས་འདུས་ལས། དུས་ནི་མཐའ་བཅུ་རྫོགས་པ་དང་། ཉེ་བར་འདྲེས་པ་དང་། རིག་ཅན་འདུ་བ་དང་། གསལ་བ་ཐོབ་པ་དང་། ལས་སུ་རུང་བ་དང་། མཚན་མ་བྱུང་བ་དང་། མང་པོས་བསྔགས་པ་དང་། ཉམས་རྙེད་པ་དང་། བྱ་བ་རྫོགས་པའོ། །ཞེས་སོ། །གཉིས་པ་ནི། རྩ་རྒྱུད་ལས། དད་མེད་བློ་ཞན་རྫོབ་པ་ཆེ། །ཚུལ་འཆོས་མཁན་ལ་རས་ཆོད་བྱེད། །དེ་ནི་དབང་གིས་ཚིག་པར་བཤད། །གསང་མེད་བརྗེད་ངས་དབང་མི་ཆགས། །དད་མེད་གཡེང་རྨུགས་དབང་མི་འགོས། །སྣོད་མེད་བཅུད་བྲལ་ཀུན་སྟོངས་པ། །དེས་ནི་དབང་ཐོབ་མ་ཡིན་ནོ། །ཞེས་དང་། དགོངས་འདུས་ལས། གྲོགས་པོ་དག །གེགས་གང་ཞེ་ན། མི་ཐོབ་པ་དང་། མི་ཆགས་པ་དང་། མི་འགོས་པ་དང་། སྲེག་པའོ། །ཞེས་དབང་གིས་སྟོངས་པ་དང་། དབང་མི་ཆགས་པ་དང་། དབང་མི་འགོས་པ་དང་། དབང་གི་ཚིག་པའི་གེགས་བཞི་བཤད་ཅིང་། གཞན་ཡང་རྔམ་གློག་ལས། རས་ཆོད་བྱེད་ཅིང་ཚུལ་འཆོས་པ། །དད་དང་མི་ལྡན་བརྩོན་འགྲུས་ཆུང་། །བློ་ཞན་ངེས་མེད་འཆར་ལ་གཡེང་། །བླ་མ་སྤུན་ལ་སྲི་ཞུ་ཆུང་། །དེ་ནི་དབང་གི་སྣོད་མ་ཡིན། །ཞེས་སོ། །གཉིས་པ་བདག་པོའི་རྐྱེན་གང་གིས་བསྐུར་བའི་སློབ་དཔོན་བཤད་པ་ལ་གཉིས་ཏེ། སློབ་དཔོན་གྱི་མཚན་ཉིད། ཇི་ལྟར་བསྟེན་ཚུལ་འཐད་པ་དང་བཅས་པའོ། །དང་པོ་ལ། མཚན་ཉིད་སྤྱིར་བསྟན་པ་དང་། ཁྱད་པར་དབང་བསྐུར་བ་པོའི་སློབ་དཔོན་གྱི་མཚན་ཉིད་བྱེ་བྲག་ཏུ་བཤད་པའོ། །དང་པོ་ནི། དགོངས་འདུས་ལས། རིགས་བཟང་སེམས་བཟང་ཁོང་དུལ་དང་། །གཟི་ལྡན་བརྗིད་ཆེ་ཡུལ་མི་འཇུག །ཤེས་བྱའི་ཡོན་ཏན་ཟད་མི་ཤེས། །ཚད་མེད་ཡངས་པའི་བློ་གྲོས་དང་། །རྐྱེན་ཐུབ་བཟོད་ལྡན་ཀུན་ཏུ་དྲང་། །གསོང་ཞིང་སྤྱོད་ལམ་གྱ་གྱུ་མེད། །འདུ་འཛི་དམན་པའི་ལས་རྣམས་སྤངས། །འཕྱོར་དང་གཡེང་བྲལ་དབེན་པ་བརྟེན། །འདི་དང་གང་ལྡན་དམ་པའི་འོས། །ཞེས་རང་བཞིན་གྱི་ཡོན་ཏན་རྣམས་ཚང་ཞིང་། དེ་དག་གི་སྟེང་དུ་སྦྱངས་པའི་ཡོན་ཏན་དང་བཅས་པས་འཕགས་པ་ནི། སྒྱུ་འཕྲུལ་རྡོ་རྗེ་ལས། མང་དུ་ཐོས་ཤིང་ཤེས་རབ་ཆེ། །ལུང་གི་དགོངས་པ་ངེས་པར་རྟོགས། །ཟང་ཟིང་རྙེད་པ་དོན་མི་གཉེར། །དཀའ་བ་སྤྱོད་ཅིང་སྐྱོ་ངལ་ཆུང་། །མན་ངག་ཆེ་ཞིང་ལས་ལས་གྲོལ། །རིགས་ལ་མཁས་ཤིང་དྲོད་ཚད་ཤེས། །བྱང་ཆུབ་སེམས་ལྡན་སྙིང་རྗེ་ཆེ། །བརྒྱུད་ལྡན་བཀའ་བབས་སྒྲུབ་ལ་མཁས། །མཛོད་ལྡན་ཆུ་བོ་ཡོངས་སུ་རྫོགས། །རང་རྒྱུད་གྲོལ་ཞིང་གཞན་དོན་བརྩོན། །གསང་སྔགས་བླ་མའི་མཚན་ཉིད་དོ། །ཞེས་དང་། དགོངས་འདུས་ལས། །སློབ་དཔོན་མཚན་ཉིད་བརྟག་པ་ནི། །ཡེ་ཤེས་སྙིང་པོ་ཁྱོད་ཉོན་ཅིག །བརྟན་ཞིང་དུལ་ལ་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་རྣམས་ལ་མི་འཇིགས་བྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཞེས་དང་། དེ་ཉིད་བཅུ་ཡང་རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟང་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་ཡང་སྡུད་པའི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་ནང་དང་ཕྱིའི་དེ་ཉིད་བཅུ་སྟེ། བླ་མེད་དང་སྔགས་ཕྱི་པའི་སློབ་དཔོན་གྱིས་ཤེས་དགོས་པ་ལ་སྦྱར་རོ། །གཉིས་པ་བསྟན་བཤད་གཉིས་ཀྱི་དང་པོ་ནི། དགོངས་འདུས་ལས། གྲོགས་པོ་དག་ཚད་ནི་འདི་ལྟ་སྟེ། དེད་དཔོན་དང་། སྔ་ལྟས་དང་། སྨིན་པའོ། །ཞེས་པས་འདྲེན་པའི་དེད་དཔོན་བླ་མར་གྱུར་པའི་དང་། ཐོབ་པའི་སྔ་ལྟས་མཐོང་བའི་དང་། དབང་ཐོབ་པའི་འབྲས་བུ་སྨིན་པའི་ཚད་ཀྱི་ཡོན་ཏན་དང་ལྡན་པའོ། །གཉིས་པ་རྒྱས་བཤད་ལ། དེ་ལྟར་གསུམ་ལས། དང་པོ་འདྲེན་པའི་དེད་དཔོན་དུ་གྱུར་པའི་བླ་མའི་ཚད་ནི། ཡོན་ཏན་ལྔ་ལྡན་ཏེ། དེ་ལས། གྲོགས་པོ་དག །དེད་དཔོན་གང་ཞེ་ན། འདི་ལྟ་སྟེ། གོམས་པ་དང་། རིག་པ་དང་། འདུ་བ་དང་། ཐོབ་པ་དང་། རྫོགས་པའོ། །ཞེས་གསུངས་པའི་དོན། འགྲེལ་པ་ལུང་བསྟན་མར། གོམས་པ་ནི་ལས་དང་བྱ་བ་དང་ཆོ་ག་ལ་མ་རྨོངས་པའོ། །རིག་པ་ནི་གསང་བའི་དོན་མ་ནོར་བར་ཤེས་པའོ། །འདུ་བ་ནི་མན་ངག་དང་ལྡན་ཞིང་འགྲོགས་པ་བདེ་བས་གཟུངས་མ་མང་བའོ། །ཐོབ་པ་ནི་དབང་རིམ་པར་ཐོབ་ཅིང་བརྒྱུད་པ་བར་མ་ཆད་པའི་མན་ངག་དང་ལྡན་པའོ། །རྫོགས་པ་ནི་བསླབ་པ་དང་། བསྙེན་སྒྲུབ་དང་། དབང་དང་། མན་ངག་ཐོབ་ཅིང་། གཞན་ལ་རག་མ་ལས་པས་རེ་དོགས་མེད་དེ་མི་རྩོལ་བའོ། །ཞེས་སོ། །གཉིས་པ་ཐོབ་པའི་སྔ་ལྟས་མཐོང་བའི་ཚད་ནི། ཡོན་ཏན་བཞི་ལྡན་ཏེ། གྲོགས་པོ་དག །སྔ་ལྟས་ནི་འདི་ལྟ་སྟེ། མཐོང་བ་དང་། འབྱོར་པ་དང་། ནུས་པ་དང་། ཐོབ་པའོ། །ཞེས་པའི་དོན་འགྲེལ་པར། མཐོང་བ་ནི་ལྟ་བས་ཤེས་བྱའི་དོན་རྟོགས་པའོ། །འབྱོར་པ་ནི་ཐུན་མོང་དང་ཐུན་མོང་མ་ཡིན་པའི་དབང་གི་རྫས་དང་ནུས་པ་ཡོད་པའོ། །ནུས་པ་ནི་བྱིན་བརླབས་ཀྱིས་ཕན་འདོགས་ནུས་པའོ། །ཐོབ་པ་ནི་ལུང་བསྟན་པ་གསུམ་ཐོབ་པའམ། ཡང་ན་བླ་མས་གནང་བ་བྱིན་པའོ། །ཞེས་སོ། །གསུམ་པ་འབྲས་བུ་སྨིན་པའི་ཚད་ནི། ཡོན་ཏན་གཉིས་ལྡན་ཏེ། གྲོགས་པོ་དག །སྨིན་པ་ནི་འདི་ལྟ་སྟེ། མངོན་སྤྱོད་དང་། མི་སྐྱོར་བའོ། །ཞེས་པའི་དོན་འགྲེལ་པར། མངོན་སྤྱོད་ནི་མངོན་དུ་ཐོབ་པས་རྟགས་ཤར་བ་སྟེ། ལྟ་བའི་ཉམས་སྐྱེས་པ་དང་། བྱིན་རླབས་ཆེ་བ་དང་། ཐུགས་རྗེ་འབྱུང་བའོ། །མི་སྐྱོར་བ་ནི། དེ་ལྟར་དབང་ཐོབ་པར་ངེས་ན་ཕྱིས་བསྐུར་མི་དགོས་པའོ། །ཞེས་གསུངས་སོ། །གཉིས་པ་དེ་ལྟར་བསྟེན་ཚུལ་འཐད་པ་དང་བཅས་པ་ནི། དེ་ལྟ་བུའི་མཚན་ཉིད་དང་ལྡན་པའི་བླ་མ་དམ་པ་རྙེད་ནས་དད་གུས་དང་། སྲི་ཞུ་ཕུན་སུམ་ཚོགས་པས་བསྟེན་དགོས་ཏེ། ཚུལ་བཞིན་དུ་བསྟེན་པ་དང་མ་བསྟེན་པ་ལས་ཁེ་ཉེན་ཆེས་ཆེ་བ་འབྱུང་བའི་ཕྱིར། དེ་ལྟར་ཡང་དགོངས་འདུས་ལས། ཆོས་ཀུན་མི་ཤེས་མ་རྟོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་གནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་རབ་གཤིན་པོ་ལ། །ས་བོན་བཏབ་ན་རྒྱས་འཕེལ་ཞིང་། །ཞེས་དང་། དམ་ཚིག་མཆོག་གི་རྒྱུད་ལས། ལུས་དང་ངག་དང་ཡིད་སྟོབས་ཀྱིས། །ཅི་ནུས་པ་ཡིས་བླ་མ་ལ། །བསྙེན་བཀུར་སྲི་ཞུ་སུས་བྱས་པ། །འདི་ལ་མཐུ་དང་ནུས་པའི་ཚོགས། །བྱིན་རླབས་ཐོགས་པ་མེད་པར་འབྱུང་། །ཞེས་ཚུལ་བཞིན་དུ་བསྟེན་པའི་བར་ཡིན་ནོ། །ཡང་ཚུལ་བཞིན་དུ་མ་བསྟེན་པས་ཉེས་དམིགས་ཅིར་འགྱུར་ཞེ་ན། དགོངས་འདུས་ལས། སློབ་མར་གྱུར་ནས་ངན་སེམས་ཀྱིས། །དམ་པ་དེ་ལ་བརྙས་བྱེད་གང་། །སངས་རྒྱས་ཀུན་ལ་བརྙས་པས་ན། །དེ་དག་སྤྱིའུ་ཚུགས་དམྱལ་བར་འགྲོ། །བཀའ་བཅག་ལུགས་བོར་ཐུགས་འགལ་ན། །རྡོ་རྗེ་དམྱལ་བར་དེ་འགྲོ་སྟེ། །མི་བཟད་སྡུག་བསྔལ་མྱོང་བར་འགྱུར། །ཚེ་འདིར་རྒྱལ་པོའི་ཆད་པ་སོགས། །ཉེས་པ་ཐམས་ཅད་དེ་ལ་འབྱུང་། །ཞེས་དང་། ཧེ་རུ་ཀ་འདུས་པའི་རྒྱུད་ལས། གང་ཞིག་དད་མེད་མ་གུས་དང་། །གེགས་དང་བླ་མའི་ཉམས་ལེན་ཞིང་། །གསང་བའི་དོན་ལ་སྨོད་བྱེད་པ། །བར་མའི་སྲིད་པ་མི་འབྱུང་བར། །རྡོ་རྗེ་འབར་བའི་གནས་སུ་སྐྱེས། །ཞེས་སོ། །ཡང་དུས་དབང་གིས་བླ་མ་མཚན་ཉིད་ཐམས་ཅད་ཚང་བ་མ་རྙེད་ན་གང་ཡོན་ཏན་ཤས་ཆེ་བ་ཉིད་ལ་བསྟེན་པར་གསུངས་ཏེ། དོན་དམ་བསྙེན་པ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་དང་བྲལ་བ་ཡོད་མ་ཡིན། །དེ་ཕྱིར་ཡོན་ཏན་ལྷག་པ་ཡང་ནི་ལེགས་དཔྱད་དེ། །བུ་རྣམས་ཀྱིས་ནི་དེ་ལ་བསྟེན་པར་གྱུར་པའོ། །ཞེས་གསུངས་ཤིང་། གལ་ཏེ་བླ་མ་དེ་མཚན་ཉིད་དང་ལྡན་པ་ཞིག་མ་ཡིན་ནའང་། སྔར་མ་བརྟགས་པར་བླ་མར་བཟུང་ཕན་ཆད་ཚུལ་བཞིན་དུ་བསྟེན་དགོས་ཏེ། དགོངས་འདུས་ལས། བླ་མ་མཆོག་ཏུ་བཀུར་བྱས་ནས། །དམ་པར་གྱུར་པ་མ་ཡིན་ཀྱང་། །དམ་པ་མཆོག་བཞིན་ཕུ་དུད་བྱ། །གལ་ཏེ་བརྙས་ཤིང་ཁྱད་བསད་ན། །མཐུར་དུ་བལྟས་ཏེ་དམྱལ་བར་འཚེད། །ཅེས་སོ། །དེ་ལྟར་ཁེ་ཉེན་ཆེ་བའི་འཐད་པ་ཡང་། གསང་སྔགས་རྡོ་རྗེ་ཐེག་པ་འདི་ལས། དཀྱིལ་འཁོར་གྱི་ལྷ་ཚོགས་ཐམས་ཅད་རྡོ་རྗེ་སློབ་དཔོན་གྱི་སྐུ་ལ་རྗེས་སུ་འཇུག་པའི་ཚུལ་གྱིས་འགྲོ་བའི་དོན་མཛད་པར་གསུངས་པའི་ཕྱིར། རྒྱུ་མཚན་དེས་རྡོ་རྗེ་སློབ་དཔོན་ལ་བརྙས་ན་དཀྱིལ་འཁོར་གྱི་ལྷ་ཐམས་ཅད་ལ་བརྙས་པར་འགྱུར་ཏེ། འཇམ་དཔལ་ཞལ་ལུང་ལས། མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང་། །ཞེས་དང་། ཡང་རྡོ་རྗེ་སློབ་དཔོན་མཆོད་པས་དཀྱིལ་འཁོར་གྱི་ལྷ་ཐམས་ཅད་མཆོད་པར་འགྱུར་བ་ཡིན་ཏེ། དེ་ལས། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་གསུངས་པའི་ཕྱིར་རོ། །གསུམ་པ་དམིགས་རྐྱེན་གྱི་མཐའ་དཔྱོད་འཕྲོས་དོན་དང་བཅས་པ་བཤད་པ་ལ། རྫས་སྔགས་ཏིང་འཛིན་གསུམ་གང་གཙོར་དཔྱད་པ་དང་། འཕྲོས་དོན་དབང་བསྐུར་བསྟིམ་གྱི་གནས་བཤད་པའོ། །དང་པོ་ནི། སློབ་དཔོན་དབང་བསྐུར་བའི་ཏིང་ངེ་འཛིན་གྱི་དགོངས་པ་ལ་བཞུགས་པ་ཉིད་གཙོ་ཆེ་ཞིང་། དེའི་གྲོགས་སྔགས་དང་ཕྱག་རྒྱའང་ངེས་པར་གལ་ཆེ་སྟེ། ཏིང་ངེ་འཛིན་དང་བྲལ་བའི་དབང་བསྐུར་སྟེར་བ་རྒྱུད་སྡེ་རྣམས་སུ་ནམ་ཡང་མ་གསུངས་པའི་ཕྱིར་དང་། སྔགས་རྒྱའང་ཆ་རྐྱེན་དུ་མེད་ཐབས་མེད་པའི་ཕྱིར་རོ། །རྫས་ནི་མ་འབྱོར་ན་གནང་བའི་སྐབས་ཡོད་དེ། དཔོན་སློབ་གཉིས་ཀ་ཀུན་སྤངས་ཀྱི་སྤྱོད་པ་ཅན་ལ་རྫས་དང་ཡོ་བྱད་ཅི་རིགས་པ་ནས་མཐའ་དག་སྤངས་པའི་བར་གྱིས་དབང་བསྐུར་སྦྱིན་པར་གསུངས་པའི་ཕྱིར། དེ་ལྟར་ཡང་དུས་འཁོར་བསྡུས་རྒྱུད་ལས། རྫས་རྣམས་མེད་པའི་མངོན་པར་དབང་བསྐུར་རྒྱལ་བའི་བདག་པོའི་བཀའ་ཡིས་ཀུན་སྤངས་ལ་ནི་སྦྱིན་པར་བྱ། །ཞེས་གསུངས་ཤིང་། སློབ་དཔོན་ཨ་བྷ་ཡཱ་ཀ་རས་ཀྱང་། འབྱོར་པ་དང་ལྡན་ཡང་རུང་ལྷག་པར་མོས་པ་བརྟན་པོ་ཅན་ལ་རྫས་ཀྱི་ནང་ཚན་གཟུགས་བརྙན་གྱི་དཀྱིལ་འཁོར་ལ་མ་བརྟེན་པར་ཏིང་ངེ་འཛིན་ཁོ་ནའི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་དུ་རུང་བར་བཤད་ན། གཞན་ལྟ་སྨོས་ཀྱང་ཅི་དགོས་སྙམ་མོ། །ཡང་བླ་མ་ཏིང་ངེ་འཛིན་གྱི་དགོངས་པ་དང་ལྡན་ཡང་། སློབ་མས་དམིགས་པ་ཇི་ལྟ་བ་བཞིན་འཛིན་པར་མི་ནུས་ན་དབང་ཇི་ལྟར་ཐོབ་ཞེ་ན། སློབ་མའི་རྒྱུད་ལ་དད་པ་དང་འདུན་པ་ཡོད་ན་དམིགས་པ་འཛིན་མི་ཤེས་ཀྱང་བླ་མའི་བྱིན་རླབས་ཀྱིས་དབང་ཐོབ་པ་ཡོད་དགོས་ཏེ། དཔེར་ན་རྟེན་གྱིས་དམིགས་པ་མི་འཛིན་ཀྱང་སྔགས་མཁན་གྱིས་རབ་གནས་ཀྱི་ཆོ་ག་རྣམ་དག་བགྱིས་པའི་བྱིན་བརླབས་འཇུག་པ་ཡོད་དགོས་པའི་ཕྱིར། དེ་ལྟར་ཡང་སྡོམ་གསུམ་རབ་དབྱེ་ལས། ལྷ་ལ་རབ་ཏུ་གནས་པ་དང་། །མི་ལ་དབང་བསྐུར་བྱ་བ་སོགས། །ཞེས་དེ་གཉིས་དོན་མཚུངས་པར་བཤད་པའི་ཕྱིར། དེ་ལ་འདི་སྙམ་དུ། དབང་ནི་སློབ་མའི་རྒྱུད་ལ་གོ་འཕང་གི་ཆོས་འཇོག་བྱེད་ཡིན་པས་གཞན་སྟོབས་ཀྱིས་ནུས་པར་མ་ཟད། རང་སྟོབས་ཀྱིས་དམིགས་པ་འཛིན་པའང་ངེས་པར་དགོས་པ་མ་ཡིན་ནམ་ཞེ་ན། གོ་འཕང་གི་ཆོས་རྒྱུད་ལ་འཇོག་ནའང་དེར་མ་ངེས་ཏེ། དཔེར་ན་རྒྱལ་པོའི་བུ་རང་སྟོབས་ཀྱི་འཕྲུལ་དང་བློ་གྲོས་མེད་ནའང་ཡབ་རྒྱལ་པོས་ཅོད་པན་བཅིངས་ཏེ་རྒྱལ་སར་བཏོན་པས་འབངས་ལ་དབང་སྒྱུར་བའི་ནུས་པ་ཐོབ་པ་ལྟར། རྒྱལ་པོའི་རིགས་དང་འདྲ་བའི་མཚུངས་ལྡན་གྱི་རྒྱུ་གང་ལ་མངའ་བའི་སློབ་མ་ཉིད། བླ་མ་ནུས་པ་ཅན་གྱིས་དཀྱིལ་འཁོར་དུ་བཅུག་ཅིང་དབང་བསྐུར་བས་རང་གི་གོ་འཕང་གི་ཆོས་ལ་དབང་སྒྱུར་ཐོབ་པ་ཡོད་དགོས་པའི་ཕྱིར་རོ། །གཉིས་པ་ནི། སྒྱུ་འཕྲུལ་གྱི་དབང་གི་ངེས་འབྱེད་ལས། བཞག་པའི་གནས་དང་བསྟིམ་པའི་གནས། །དེ་བཞིན་ཁོང་དུ་ཆུད་པ་གཅེས། །ཞེས་པ་ལྟར་གཉིས་ཀྱི། དང་པོ་བསྐུར་གནས་ལའང་། དེ་ལས། གནས་ནི་སྤྱི་དང་ཁྱད་པར་ཉིད། །སྤྱི་དབང་ལུས་ལ་བསྐུར་བ་སྟེ། །ཞེས་པས་དབང་རྫས་འཇོག་པའི་གནས་སྤྱིར་ལུས་དང་། ཁྱད་པར་བུམ་དབང་སྤྱི་བོར་བསྐུར་བ་སོགས་དབང་རྫས་གང་དང་གང་ལུས་ཀྱི་གནས་དེ་དང་དེར་བསྐུར་ཚུལ་དབང་ཆོག་གི་དཀྱུས་ལས་འབྱུང་བ་བཞིན་ཏེ། དབང་རིན་ཆེན་འཁོར་ལོ་ལས། དེ་ནས་སྤྱི་བོར་བུམ་བརྟན་བྱ། །ཕྱི་ཡི་སྤྱི་བོར་སྤྱི་ཡི་ཁྲུས། །ཞེས་གསུངས་ཤིང་། མན་ངག་གསང་བ་ལས་ཀྱང་། མགོ་སྙིང་ཡན་ལག་ལྔ་སོགས་གནས། ཞེས་སོ། །གཉིས་པ་བསྟིམ་གནས་ནི། རང་རང་གི་མཚུངས་ལྡན་གྱི་རྒྱུ་ལ་བསྟིམ་སྟེ། རྔམ་གློག་ལས། དང་པོ་གསང་བ་ཉན་པའི་དབང་། །རིན་ཆེན་རིགས་ཀྱི་རྣ་བ་ལ། །ཞེས་སོགས་གསུངས་པ་ལྟ་བུའོ། །བཞི་པ་དེ་མ་ཐག་རྐྱེན་ལས་འཕྲོས་པ་དབང་བསྐུར་བའི་རིམ་པ་ལ་དཔྱད་པ་ནི། སྤྱིར་བཏང་ལ་སྔར་བཤད་པ་ལྟར་དབང་སྔ་མ་སྔ་མས་རྒྱུད་སྦྱངས་པས་ཕྱི་མ་ཕྱི་མ་བསྐུར་རུང་དུ་སྨིན་པར་བྱས་པ་སྟེ། སྒྱུ་འཕྲུལ་རྡོ་རྗེ་ལས་རིམ་ལས། རིམ་པ་སྐས་ཀྱི་ཚུལ་དག་གིས། །ལྟོས་ནས་རྒྱུ་འབྲས་གོ་འབྱེད་པ། །དེ་མ་ཐག་པའི་མཚན་ཉིད་དོ། །ཞེས་སོ། །དེའི་རྒྱུ་མཚན། སྤྱིར་རྒྱུད་སྨིན་ཚུལ་ལ་ལྟོས་ནས་གང་ཟག་ཐམས་ཅད་རིམ་གྱིས་པ་ཡིན་པས། དབང་གོང་མ་གོང་མའི་རྟེན་དུ་འོག་མ་འོག་མ་ངེས་པར་འགྲོ་དགོས་ཏེ། རྩ་རྒྱུད་ལས་ཀྱང་ཕྱི་ནང་སྒྲུབ་གསང་གི་ཆུ་བོ་བཞི་པོ་སྔ་མ་སྔ་མ་ཐོབ་ནས་ཕྱི་མ་ཕྱི་མ་སྟེར་བར་གསུངས་པའི་ཕྱིར་དང་། དེ་བཞིན་དུ་ལམ་སྒྲུབ་པ་ལའང་སྔ་མ་སྔ་མ་ལ་དྲོད་རྟགས་མ་ཐོབ་པར་ཕྱི་མ་ལ་མོས་ཤིང་འཇུག་པ་མི་སྲིད་པ་ཡིན་ནོ། །རྐྱེན་སད་ཚུལ་ལ་ལྟོས་ནས་ནི། དབང་གི་རིམ་པ་དེ་ཁོ་ན་ལྟར་བསྐུར་དགོས་པའི་ངེས་པ་མེད་པར་ཐོག་མ་ཉིད་ནས་གང་ལ་མོས་པ་དེར་དབང་ནོད་ནས་དེའི་འཇུག་པ་དང་མཐུན་པའི་ལམ་སྒོམ་པའང་མི་འགལ་ཏེ། གངས་ཅན་འདིར་དུས་འཁོར་བ་ཆེན་པོ་དག །ཐོག་མ་ཉིད་ནས་དབང་གོང་མ་བསྐུར་ཏེ་སྦྱོར་དྲུག་གི་ལམ་ལ་འཇུག་པར་མཛད་པའི་ཕྱག་བཞེས་བཞིན་ནོ། །དེའི་འཐད་པ་ནི། དབང་གསུམ་པའི་དཔེ་ཙམ་ལ་ལྟོས་མི་དགོས་པའི་བཞི་པའི་སྣོད་ལྡན་དེས། ཐོག་མ་ནས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རིག་པ་རྩལ་གྱི་དབང་ནོད་ནས། དེ་ཁོ་ན་ཉིད་ཀྱི་ལམ་ལ་བསླབ་པའང་མི་འགལ་བས་ན་རིམ་གྱིས་པ་དེ་ཡང་ཚེ་འདི་ཁོ་ན་ལ་རྩེག་དགོས་པས་ཁྱབ་པ་མ་ཡིན་ནོ། ༈ །གསུམ་པ་འབྲས་བུ་བྲལ་ཐོབ་ཀྱི་སྒོ་ནས་དབྱེ་བ་ལ་ལྔ་སྟེ། དབང་ཐོབ་པས་སྒྲིབ་པ་གང་འདག་པ། དབང་ཇི་ལྟར་ཐོབ་པའི་ཚད། དེ་ལྟར་ཐོབ་པས་ཆོས་གང་ཉན་པར་དབང་བ། གནས་སྐབས་དང་མཐར་ཐུག་གི་འབྲས་བུ་གང་ཐོབ་པ། དགོས་པ་ས་ལམ་བགྲོད་པའོ། །དང་པོ་ནི། མན་ངག་གསང་བ་ལས། ལས་དང་ཉོན་མོངས་ཤེས་བྱ་ཡི། །སྒྲིབ་པ་རིམ་པར་འབྱང་བའོ། །ཞེས་པས་སྦྱང་བྱའི་སྒྲིབ་པ་ནི་གསུམ་སྟེ། ལས་དང་། ཉོན་མོངས་པ་དང་། ཤེས་བྱའི་སྒྲིབ་པའོ། །དང་པོ་ནི། ཟག་བཅས་ཀྱི་ལས་ཐམས་ཅད་དོ། །གཉིས་པ་ནི། ཁམས་གསུམ་གྱི་ཉོན་མོངས་པ་ཐམས་ཅད་དང་། །གཙོ་བོར་བདག་འཛིན་དང་མཚུངས་པའི་ཡིད་དོ། །གསུམ་པ་ནི། དུས་གསུམ་ཡིད་བྱེད་ཀྱི་རྟོག་པའོ། །དེ་ལྟར་ཡང་རྒྱུད་བླ་ལས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །ཅེས་སོ། །སྦྱོང་བྱེད་ནི། དབང་བསྐུར་བའི་ཆོ་གས་རང་གནས་ཀྱི་ཡེ་ཤེས་གསོས་ཐེབ་པས་ནུས་པ་མཐུ་ཅན་དུ་གྱུར་པ་དེས་གཉེན་པོའི་ཕྱོགས་བཟུང་ནས། རང་དང་ལྷན་ཅིག་གནས་པའི་སྦྱང་བྱ་དང་ནུས་པ་འགྲན་པའི་ཚུལ་གྱིས་སུན་འབྱིན་པར་བྱེད་ལ། གལ་ཏེ་དབང་དུས་སུ་ཡེ་ཤེས་དངོས་སུ་མ་སྐྱེས་ནའང་། སྐྱེ་རུང་གི་ནུས་མཐུ་ཅན་དུ་བྱས་པ་དེས་དྲི་མ་སྦྱོང་བའི་འགོ་རྩོམ་པ་ཡིན་ནོ། །དེ་བས་ན་ལྷ་མི་ནས་བརྩམས་ཏེ་ཨ་ཏིའི་བར་གྱི་དབང་རིམ་བཅུ་ནོད་པས་སློབ་ལམ་བཞིས་བསྡུས་པའི་ས་བཅུ་པོ་རང་རང་གིས་སྦྱང་བྱ་རྐྱེན་འགྱུར་ལས་ཀྱི་བག་ཆགས་རགས་པ་སོགས་སྒྲིབ་པ་བཅུ་པོ་སྦྱོང་བར་བྱེད་ཅིང་། དབང་རིམ་བཅུ་པོ་ཡང་ཆུ་བོ་བཞིར་འདུས་པས། དེ་བཞིས་རང་སྐལ་གྱི་སྒྲིབ་པ་གསུམ་ཅི་རིགས་པ་སྦྱོང་བར་བྱེད་དེ། ཆུ་བོ་བཞི་པོ་དེ་ཡོ་ག་བཞི་རྫོགས་ཀྱི་དབང་དུ་རིམ་པར་སྦྱོར་བ་གང་ཞིག །ཕྱི་དབང་རྒྱུད་ཀྱི་ཆུ་བོ་ཐོབ་པས་ཀྲི་ཡོག་མན་ཆད་ཀྱི་སྤང་གཉེན་གྱི་རིགས་འདྲ་དེ་དང་དེ་སྐྱེ་འགག་བྱེད་ཅིང་། དེ་བཞིན་དུ་ནང་དབང་། སྒྲུབ་དབང་། གསང་དབང་གསུམ་ཐོབ་པས་ཀྱང་བསྐྱེད་རྫོགས་གསུམ་གྱི་སྤང་གཉེན་གྱི་རིགས་འདྲ་དེ་དང་དེ་སྐྱེ་འགག་བྱེད་པ་ཡིན་པའི་ཕྱིར་རོ། །དེར་མ་ཟད་མདོའི་དབང་གི་ཆུ་བོ་བཞི་དང་། བླ་མེད་སྤྱིའི་དབང་བཞི་གྲངས་ནང་མཐུན་གྱིས་སོ་སོར་བྲང་སྤྲད་པར་བྱ་བ་མ་ཡིན་ཀྱང་། མདོའི་ཆུ་བོ་བཞིའི་ནང་དུ་བླ་མེད་སྤྱིའི་དབང་བཞི་འདུས་པའི་ཕྱིར། དབང་བཞིའི་དག་པ་དང་སྦྱར་ནས་བཤད་ན། བུམ་དབང་ལྟ་བུས་ཀྱང་རང་སྐལ་གྱི་སྒྲིབ་པ་གསུམ་ཀ་ཅི་རིགས་པར་སྦྱོང་མོད་ཀྱི། དེ་ལྟ་ནའང་གཙོ་ཆེ་བའི་སྒོ་ནས་སྨོས་ན། དབང་བཞི་ནི་མཐར་ཐུག་གི་འབྲས་བུ་རྫོགས་པའི་སངས་རྒྱས་ཀྱི་རྡོ་རྗེ་བཞི་ཐོབ་པའི་རྟེན་འབྲེལ་སྒྲིག་བྱེད་ཡིན་པའི་གནད་ཀྱིས། བུམ་དབང་གིས་གཙོ་བོར་ལས་ཀྱི་སྒྲིབ་པ། གསང་དབང་གིས་ཉོན་སྒྲིབ། ཤེར་དབང་གིས་ཤེས་བྱའི་སྒྲིབ་པ། དབང་བཞི་པས་ཤེས་སྒྲིབ་ཆེས་ཕྲ་བའམ་ཀུན་འབྱུང་ཕྲ་བའི་མཐར་ཐུག་འཕོ་བའི་བག་ཆགས་ཀྱི་སྒྲིབ་པ་རྣམས་གཙོ་བོར་སྦྱོང་བར་བྱེད་དེ། ཐོབ་བྱའི་འབྲས་བུ་སྐུ་བཞི་པོ་ངོ་བོའི་སྒོ་ནས་དབྱེར་མེད་ཡིན་ཀྱང་། དག་པའི་ལྡོག་ཆ་ནས་དེ་དང་དེར་སོ་སོར་བརྟགས་པའི་ཕྱིར་རོ། །དེ་ལྟར་ཡང་། གསེར་འོད་དམ་པ་ལས། ཉོན་མོངས་པའི་སྒྲིབ་པ་རྣམ་པར་དག་པས་ལོངས་སྤྱོད་རྫོགས་པའི་སྐུར་སྣང་བར་འགྱུར་རོ། །ལས་ཀྱི་སྒྲིབ་པ་རྣམ་པར་དག་པས་སྤྲུལ་པའི་སྐུར་སྣང་བར་འགྱུར་རོ། །ཡེ་ཤེས་ཀྱི་སྒྲིབ་པ་རྣམ་པར་དག་པས་ཆོས་ཀྱི་སྐུར་སྣང་བར་འགྱུར་རོ། །ཞེས་སོ། །དེས་མཚོན་ནས་དབང་བཞིས། སྒོ་གསུམ་འཕོ་བ་དང་བཅས་པའི་ཐིག་ལེ་བཞི་དང་། གནས་སྐབས་བཞིའི་སྒྲིབ་པ་འདག་ཅིང་། བདུད་བཞི་འཇོམས་པར་འགྱུར་ཏེ། བུམ་དབང་གིས་ལུས་ཀྱི་ཐིག་ལེའི་སྒྲིབ་པ་དང་། སད་པའི་གནས་སྐབས་ཀྱི་སྒྲིབ་པ་འདག་ཅིང་། ཕུང་པོའི་བདུད་འཇོམས་པར་འགྱུར་ལ། དེ་བཞིན་དུ་གསང་དབང་གིས། ངག་གི་ཐིག་ལེའི། རྨི་ལམ་གྱི་གནས་སྐབས། ཉོན་མོངས་པའི་བདུད། ཤེར་དབང་གིས། ཡིད་ཀྱི་ཐིག་ལེའི། གཉིད་འཐུག་གི་གནས་སྐབས། འཆི་བདག་གི་བདུད། དབང་བཞི་པས་འཕོ་བའི་ཐིག་ལེའི། སྙོམས་འཇུག་གི་གནས་སྐབས། ལྷའི་བུའི་བདུད་རྣམས་འདག་ཅིང་འཇོམས་པར་བྱེད་དེ་སྤྲོས་པས་ཆོག་གོ། ༈ །གཉིས་པ་དབང་ཇི་ལྟར་ཐོབ་པའི་ཚད་ནི། མན་ངག་གསང་བ་ལས། དབང་ཐོབ་ཚད་ནི་རྣམ་པ་གསུམ། །གོ་མ་འགགས་དང་བརྒྱུད་ནས་ཐོབ། །མངོན་སུམ་དག་ཏུ་ཐོབ་པའོ། །ཞེས་པ་སྟེ། ཆོ་ག་རྣམ་པར་དག་པའི་སྒོ་ནས་དབང་བསྐུར་བ་ནོད་པས་དུས་དེར་དབང་གི་ཡེ་ཤེས་དངོས་སུ་མ་སྐྱེས་ཀྱང་། དྲི་མ་འཁྲུད་པའམ་ནུས་པ་འཇོག་པའི་ཐ་སྙད་ཐོབ་སྟེ། གསོལ་བཞིའི་ཆོ་ག་རྣམ་དག་ལ་བརྟེན་ནས་དགེ་སློང་གི་སྡོམ་པ་ཐོབ་པ་ན། སྒོམ་སྟོབས་ཀྱི་ཡེ་ཤེས་མ་སྐྱེས་ཀྱང་འཆལ་ཚུལ་གྱི་རྒྱུན་སྤང་བའི་གནས་སྐབས་ཐོབ་པ་ལྟར། སྔགས་སྡོམ་ཐོབ་པ་དེས་ཀྱང་། དབང་དུས་སུ་ཡེ་ཤེས་མ་སྐྱེས་རུང་ལམ་རིམ་པ་གཉིས་ཀྱིས་བསྐྱངས་པས་ཕྱིས་ཡེ་ཤེས་སྐྱེ་ངེས་ཀྱི་ནུས་རུང་དུ་སྨིན་པར་བྱས་པ་ལ། འདིར་བརྒྱུད་ནས་ཐོབ་པ་ཞེས་ཐ་སྙད་བཏགས་ཏེ། དེ་ལྟར་འདོགས་པའི་རྒྱུ་མཚན་ཡང་དབང་དུས་སུ་ཡེ་ཤེས་སྐྱེས་པ་ལ་མངོན་སུམ་དུ་ཐོབ་པ་ཞེས་པའི་ཐ་སྙད་ཐོབ་པ་ལ་ལྟོས་ནས་སོ། །གཞན་དུ་ན་བརྒྱུད་ནས་ཐོབ་པ་ཞེས་པ་ཕྱིས་དབང་ཐོབ་འགྱུར་ལ་འཇོག་པ་ནི་མ་ཡིན་ཏེ། དེའི་རྒྱུ་མཚན་ཕྱིས་ནས་ཡེ་ཤེས་སྐྱེ་རུང་གི་ནུས་པ་བཞག་པ་ལ་རྒྱུད་སྨིན་པའི་ཐ་སྙད་ཐོབ་ཅིང་། དེ་ཐོབ་པས་དབང་ཐོབ་པ་དང་། སྔགས་སྡོམ་ཐོབ་པ་དང་། སྔགས་ཀྱི་དམ་ཚིག་ཐོབ་པ་ཞེས་པའི་ཐ་སྙད་ཀྱང་ཐོབ་སྟེ། དེ་དག་དང་རྒྱུད་སྨིན་པ་དོན་གཅིག་མིང་གི་རྣམ་གྲངས་ཡིན་པའི་ཕྱིར་རོ། །དེ་ལྟར་བརྒྱུད་ནས་སམ་མངོན་སུམ་དུ་ཐོབ་པ་གང་ཡིན་ཀྱང་རུང་སྟེ། དབང་གི་ས་བོན་བཞག་པ་དེ་ཉིད་རང་རྒྱུད་ལ་ཐོབ་ནས་རྒྱུན་མི་ཆད་པར་འཇུག་པར་མ་ཟད། གོ་མ་འགགས་པའི་དོན་གཞན་ལ་བསྐུར་ནའང་། དབང་གི་ཆུ་རྒྱུན་དེ་ཉིད་བསྐུར་བྱའི་རྒྱུད་དེ་ལ་ཡང་བར་མ་ཆད་པར་འཇུག་སྟེ། རྫོགས་པའི་སངས་རྒྱས་ནས་རྩ་བའི་བླ་མའི་བར་དབང་གི་ཆུ་རྒྱུན་བར་མ་ཆད་པར་རྒྱུན་ཆགས་སུ་འཇུག་པ་ཡོད་དགོས་པའི་ཕྱིར། དེ་ལྟར་ཡང་སྔ་མའི་འཕྲོས་ལས། རང་གི་ཐོབ་ནས་གཞན་ལ་བསྐུར། །ཕྱི་མར་འབྲས་བུ་འབྱུང་བ་དང་། །དེ་དུས་རིག་པ་རང་ཤར་བའོ། །ཞེས་སོ། །དེས་ན་དབང་དུས་དེར་ཡེ་ཤེས་དངོས་སུ་མ་སྐྱེས་ཀྱང་། དབང་གིས་སྨིན་པའི་ཚད་དུ་འགྲོ་བའི་འཐད་པ་ནི། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་སྤྱད་དུ་རུང་བས་སྨིན་འདོད་ལྟར། །དེ་བཞིན་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པར་བསྟན། །ཞེས་ཕར་ཕྱིན་ཐེག་པར་རྟེན་དེ་ཉིད་ལ་མཐོང་སྤང་རྣམས་སྤང་རུང་དང་། མཐོང་ལམ་སྐྱེ་རུང་ལ་སྨིན་པའི་ཚད་དུ་འཇོག་པ་ལྟར། གསང་སྔགས་བླ་ན་མེད་པའི་ཐེག་པ་འདིར་ཞུགས་ནས་བར་ཆད་མེད་པའི་དབང་དུ་བྱས་ན། ཚེ་འདི་ཉིད་ལ་སྤང་བྱ་སྒྲིབ་གཉིས་སྤང་རུང་དང་། ཐོབ་བྱ་མཆོག་གི་དངོས་གྲུབ་ཐོབ་རུང་གི་ནུས་པ་ཡིན་པས་ན། དབང་གི་ས་བོན་རྒྱུད་ལ་ཐེབས་པ་ཉིད་སྨིན་པའི་ཚད་དུ་འགྱུར་བ་ཡིན་ནོ། ༈ །གསུམ་པ་དེ་ལྟར་ཐོབ་པས་ཆོས་གང་ཉན་པར་དབང་བ་ནི། མན་ངག་གསང་བ་ལས། ཕྱི་ནང་གསང་བ་མཐར་ཐུག་པའི། །ཆོས་ནི་རིམ་པར་མཉན་དུ་རུང་། །ཞེས་པས། ཐོབ་བྱ་དབང་གི་ཆུ་བོ་བཞི་ལས། དང་པོ་རྒྱུད་ཀྱི་ཆུ་བོའི་དབང་ཐོབ་པས་ཕྱི་ཀུན་འབྱུང་འདྲེན་པ་དང་དཀའ་ཐུབ་རིག་བྱེད་ཀྱི་ཐེག་པ་སྟེ། ཡོ་ག་མན་ཆད་ཀྱི་ཐེག་པ་མཐའ་དག་དང་། དེ་རྣམས་དང་ཐུན་མོང་དུ་གྱུར་པ་ཨ་ནུ་རང་ལུགས་ཀྱི་ཆོས་དྲང་དོན་གཙོ་བོར་སྟོན་པ་རྣམས་མཉན་དུ་རུང་བར་བྱས་སོ། །གཉིས་པ་འབྱུང་བའི་ཆུ་བོའི་དབང་ཐོབ་པས་ནང་མ་ཧཱ་ཡོ་གའི་ཐེག་པ་དང་། དེ་དང་ཐུན་མོང་དུ་གྱུར་པ་ཨ་ནུ་རང་ལུགས་ཀྱི་བསྐྱེད་རིམ་གཙོ་བོར་སྟོན་པའི་ཆོས་རྣམས་མཉན་དུ་རུང་བའོ། །གསུམ་པ་གྲགས་པ་ཆུ་བོའི་དབང་ཐོབ་པས། གསང་བའི་ཐེག་པ་ཨ་ནུ་རང་ལུགས་ཀྱི་དངོས་གྲུབ་སྒྲུབ་པའི་ཐབས་ཟབ་མོའི་བསྐྱེད་རིམ་རྣམས་དང་། དེ་དང་ཐུན་མོང་པའི་རྫོགས་རིམ་རྗེས་མཐུན་པ་ཞུ་བདེ་སྒྲུབ་པའི་ཐབས་རྣམས་མཉན་དུ་རུང་བའོ། །བཞི་པ་རྫོགས་པའི་ཆུ་བོ་ཐོབ་པས། ཨ་ནུ་རང་ལུགས་ཀྱི་མཐར་ཐུག་གི་རྫོགས་རིམ་ཟབ་མོ་ལྷན་སྐྱེས་མི་འགྱུར་བའི་བདེ་ཆེན་སྒྲུབ་པའི་ཐབས་རྣམས་མཉན་དུ་རུང་བ་སྟེ། དེ་ཐམས་ཅད་ཀྱང་མཉན་དུ་རུང་བ་ཞེས་པའི་ཟླ་སྟོབས་ཀྱིས་མཚོན་ནས། ཉན་བཤད་སྒྲུབ་པ་ཐམས་ཅད་ལ་དབང་བར་བྱས་པ་ཡིན་ནོ། །བཞི་པ་གནས་སྐབས་དང་མཐར་ཐུག་གི་འབྲས་བུ་གང་ཐོབ་པ་ནི། མན་ངག་གསང་བ་ལས། འབྲས་བུ་མཐོ་རིས་ཐར་པའོ། །ཞེས་གསུངས་ཏེ། དབང་ཐོབ་པས་གནས་སྐབས་ཀྱི་འབྲས་བུ་དམ་པའི་ཆོས་སྒྲུབ་པའི་འགལ་རྐྱེན་མེད་ཅིང་མཐུན་རྐྱེན་ཚང་བའི་མཐོ་རིས་ཀྱི་རྟེན་ཕུན་སུམ་ཚོགས་པ་ཐོབ་པ་དང་། ཁྱད་པར་དབང་གིས་ཇི་ལྟར་སྨིན་པ་དང་རྗེས་སུ་མཐུན་པའི་ལམ་རིམ་པ་གཉིས་བསྒོམས་པས་ལས་དང་ཐུན་མོང་གི་དངོས་གྲུབ་ཐམས་ཅད་འགྲུབ་ཅིང་། མཐར་ཐུག་མཆོག་གི་དངོས་གྲུབ་སློབ་པ་དང་མི་སློབ་པའི་ཟུང་འཇུག་གིས་བསྡུས་པ་ཐར་པ་བླ་ན་མེད་པའི་འབྲས་བུ་ཐོབ་པར་འགྱུར་པ་ཡིན་ནོ། །ལྔ་པ་ཐོབ་པའི་དགོས་པ་ས་ལམ་བགྲོད་པ་ནི། མན་ངག་གསང་བ་ལས། ལམ་མཐར་ཕྱིན་དང་ནུས་མཐར་ཕྱིན། །རིག་འཛིན་དང་ནི་བདེ་གཤེགས་ཏེ། །ལམ་ལྔ་བགྲོད་པ་དགོས་པའོ། །ཞེས་པས་ཆུ་བོ་བཞིའི་དབང་ནི་ལམ་གོང་མ་གོང་མར་སྦྱོར་བའི་རྟེན་འབྲེལ་སྒྲིག་བྱེད་ཡིན་པའི་གནད་ཀྱིས། དབང་གི་ས་བོན་རྒྱུད་ལ་ཐེབས་པ་དེ་ལམ་རིམ་པ་གཉིས་ཀྱིས་ལེགས་པར་བསྐྱངས་པས་འབྲས་བུ་ཕྱི་དུས་ལ་མ་ལུས་པར་བདེ་མྱུར་གྱི་སྒོ་ནས་ས་ལམ་བགྲོད་པར་འགྱུར་ཏེ། སྤྱིར་ལམ་སོ་སོའི་ཉམས་རྟོགས་མཐར་ཕྱིན་པའི་མཐུས། ལམ་དེ་དང་དེས་དོན་གཉིས་སྒྲུབ་པའི་རང་སའི་ནུས་པའང་མཐར་ཕྱིན་པར་འགྱུར་ལ། བྱེ་བྲག་ཚོགས་སྦྱོར་གྱི་ཡོན་ཏན་མཐར་ཕྱིན་པས་ཚར་གཅོད་རྗེས་འཛིན་གྱིས་ནུས་པ་ཐོབ་སྟེ་ཐུན་མོང་གི་དངོས་གྲུབ་མཐར་ཕྱིན་པ་དང་། སྦྱོར་ལམ་གྱི་རྒྱུན་མཐར་སྤྱོད་པའི་ཉེ་རྒྱུས་སློབ་པའི་ཟུང་འཇུག་མཐོང་སྒོམ་མཐར་གསུམ་གྱིས་བསྡུས་པ་རིག་པ་འཛིན་པའི་ཡེ་ཤེས་ཀྱི་སྐུ་རིམ་གྱིས་བརྒྱུད་ནས། མཐར་ཐུག་གི་འབྲས་བུ་བདེ་བར་གཤེགས་པའི་ས་མཆོག་ནོན་པའི་དགོས་པ་ཡོད་དོ། ༈ །བཞི་པ་སྤང་བླང་སྐྱོན་ཡོན་གྱི་སྒོ་ནས་དབྱེ་བ་ལ་གཉིས་ཏེ། དབང་མ་ཐོབ་པའི་སྐྱོན་དང་། ཐོབ་པའི་ཡོན་ཏན་ནོ། །དང་པོ་ནི། དེ་ལས། དབང་མ་ཐོབ་པར་ལས་རྩོམ་པ། །འབྲས་བུ་མེད་ཅིང་བརླག་པར་འགྱུར། །ཞེས་པས་ཆུ་བོ་བཞིས་བསྡུས་པའི་དབང་རྒྱུད་ལ་མ་ཐོབ་པར། གསང་སྔགས་ཀྱི་ཆོས་ཟབ་མོ་རང་དགར་ཉན་སྒོམ་འཆད་ཕྲིན་ལ་སོགས་པའི་ལས་རྩོམ་པར་བྱེད་པ་རྣམས་ལ། ཚེ་འདིར་ཡང་བསྒྲུབས་པའི་འབྲས་བུ་དངོས་གྲུབ་མེད་ཅིང་། ཆོས་ཟབ་མོ་ལ་དབང་ཟོས་པའི་རྐྱེན་གྱིས་ཚེ་ཕྱི་མར་ངན་འགྲོར་ལྷུངས་ཏེ། སྡུག་བསྔལ་དྲག་པོ་མྱོང་བས་རེ་བའི་འདོད་དོན་ཐམས་ཅད་བརླག་པར་འགྱུར་བ་ཡིན་ཏེ། སྒྱུ་འཕྲུལ་རྩ་རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་དང་། ཧེ་རུ་ཀ་འདུས་པ་ལས། དབང་དང་མན་ངག་བྲལ་བ་ཡིས། །གསང་བའི་དོན་ལ་ཅི་སྤྱད་ཀྱང་། །བླུན་པོས་རལ་གྲི་བསྐོར་བ་ལྟར། །འདོད་པའི་དོན་དང་བྲལ་ནས་ཀྱང་། །རང་ཉིད་བརླག་ཅིང་འཆི་བར་འགྱུར། །ཞེས་དང་། ལས་རྒྱ་མཚོའི་རྒྱུད་ལས་ཀྱང་། དབང་རྣམས་ཐོབ་པར་མ་བྱས་པར། །གསང་སྔགས་སྒྲུབ་པ་ལོག་པར་འགྱུར། །ཞེས་དང་། སངས་རྒྱས་ཐོད་པའི་རྒྱུད་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོངས་པ་ཉིད། །དེ་བཞིན་དབང་དང་བྲལ་བ་ནི། །ཡེ་ཤེས་ཀུན་གྱིས་སྟོང་པ་ཉིད། །ཅེས་སོ། །གཉིས་པ་ནི། མན་ངག་གསང་བ་ལས། དབང་ཐོབ་ཕན་ཆད་རྒྱལ་བའི་སྲས། །ཚེ་རིང་ལོངས་སྤྱོད་ཕུན་སུམ་ཚོགས། །མཐོ་རིས་ཐར་པའི་བདག་པོར་གནས། །ཡོན་ཏན་ཁྱད་པར་བསམ་མི་ཁྱབ། །ཅེས་པས་ཆུ་བོ་བཞིའི་དབང་རྫོགས་པར་ཐོབ་པའི་དུས་འདི་ཕན་ཆད་རྒྱལ་མཆོག་ཀུན་ཏུ་བཟང་པོའི་སྲས་སུ་འགྱུར་ཏེ། གསང་རྒྱུད་ལས། གསང་བའི་དབང་ནི་ཐོབ་མ་ཐག །ཀུན་བཟང་དོན་གྱི་སྲས་སུ་འགྱུར། །ཞེས་སོ། །དེ་ཡང་འདིར་ཡོན་ཏན་གྱི་ཐོག་མ་སྨོས་པ་ཡིན་པས། དབང་ཐོབ་ནས་རྒྱལ་བའི་སྲས་ཞེས་མིང་ཐོབ་ཅིང་། དེ་ཉིད་ཀྱིས་རིག་པ་འཛིན་པའི་ས་ཐོབ་པའི་ཚེ་རྒྱལ་བའི་སྲས་ཉིད་དུ་འགྱུར་བ་ཡིན་ཏེ། དཔེར་ན་ཕ་རོལ་ཏུ་ཕྱིན་པར་རྒྱལ་བའི་སྲས་ཉིད་དུ་འགྱུར་བའི་དུས་ནི་བདེན་པ་མཐོང་ཕན་ཆད་ནས་ཡིན་ཀྱང་། རྒྱལ་སྲས་ཀྱི་མིང་ནི་བྱང་ཆུབ་ཏུ་སེམས་བསྐྱེད་མ་ཐག་ནས་ཐོབ་པར་གསུངས་ཏེ། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ནས་སྐད་ཅིག་ལ། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པ་ལྟར། དེ་ལྟར་དབང་ཐོབ་ཕྱིན་ཆད་ཚེ་འདིར་ཡང་ཚེ་རིང་ཞིང་ལོངས་སྤྱོད་ཕུན་སུམ་ཚོགས་པའི་དཔལ་འབྱོར་དང་ལྡན་པས་ཡིད་ལ་རེ་བ་ཇི་བཞིན་དུ་འགྲུབ་པ་དང་། ཕྱི་མར་ཡང་ངན་སོང་དུ་ལྟུང་བའི་ལས་སྲབས་ཤིང་ཟད་པར་བྱས་པས་མཐོ་རིས་ཀྱི་འཇིག་རྟེན་ལྷ་དང་མིའི་ནང་དུ་སྐྱེས་ནས། བདེ་བ་ཕུན་སུམ་ཚོགས་པ་ལ་སྤྱོད་ཅིང་། མཐར་ཐུག་ཐར་པའི་ལམ་སྟོན་པའི་བདག་པོ་དགེ་བའི་བཤེས་གཉེན་དང་། ཐར་པ་ཉིད་ཀྱི་བདག་པོ་དོན་གཉིས་མཐར་ཕྱིན་བླ་ན་མེད་པའི་བྱང་ཆུབ་ཀྱི་གོ་འཕང་དཀའ་བ་མེད་པར་ཐོབ་པར་འགྱུར་ཏེ། གསང་སྙིང་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོང་རིས་ཐར་པའི་བདག་པོར་འགྱུར། །ཞེས་དང་། རྔམ་གློག་ལས། གསང་བ་མཆོག་གི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །དེས་ནི་ཚེ་འདི་ཉིད་ལ་ཡང་། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ཞེས་དང་། ཧེ་རུ་ཀ་འདུས་པ་ལས། རྒྱལ་བའི་དཀྱིལ་འཁོར་བཀོད་པ་ལ། །མཐོང་དང་མོས་ཤིང་མཆོད་པས་ཀྱང་། །རྡོ་རྗེ་འཛིན་དང་མཉམ་འགྱུར་ཞིང་། །ཚེ་འདིར་བདེ་བ་ཐོབ་འགྱུར་ན། །ཞུགས་ཤིང་དབང་བསྐུར་ཐོབ་པ་དང་། །བསྒོམས་དང་ཉམས་ལ་གནས་པ་དང་། །བསྟན་ཞིང་ཡོངས་སུ་རྫོགས་པ་ཉིད། །དཀའ་ཐུབ་གནོད་མེད་བདེ་བ་ཡིས། །ལོ་ཟླ་དུས་ཚོད་བྲལ་བ་ཡི། །ད་ལྟ་ཉིད་དུ་བདེ་མཆོག་འགྲུབ། །དཀའ་དང་འབྲེལ་བ་མེད་པར་ནི། །ཐུན་མོང་དངོས་གྲུབ་སྨོས་ཅི་དགོས། །ཞེས་དང་། ཁ་སྦྱོར་ཐིག་ལེའི་རྒྱུད་ལས་ཀྱང་། དབང་ཐོབ་བདེ་བ་ཕུན་སུམ་ཚོགས། །ཚེ་འདིར་ལེགས་པ་ཀུན་འགྲུབ་ཅིང་། །ངན་སོང་ཐམས་ཅད་མེད་པ་དང་། །ཕྱི་མར་དོན་གཉིས་ལྷུན་གྲུབ་འགྱུར། །ཞེས་གསུངས་པ་ཡིན་ནོ། ༈ །གསུམ་པ་རྗེས་འཇུག་གི་དབང་བསྐུར་བའི་ཕྱག་བཞེས་ཀྱི་མཐའ་དཔྱད་པ་ནི། གླན་ཆེན་པོ་རྡོ་རྗེ་འོད་ཀྱི་སློབ་མའི་མཆོག་འགོས་རྩིས་ལུང་བ་གཙང་པ་དྷརྨ་བཛྲ་གྱི་ཕྱག་བཞེས་ལྟར། འགོས་དངོས་གྲུབ་མགོན་གྱིས་མཛད་པའི་མདོ་དབང་གི་ཡིག་སྣ་དུམ་དུམ་ཁྲིགས་གྲོ་སྟོན་དཔལ་ལྡན་གྲགས་ཀྱིས་ཕྱོགས་གཅིག་ཏུ་བསྡུས་པའི་ནང་ཚན་ལོ་རྒྱུས་ཀྱི་སྐབས་ལ། དེ་ལ་གསང་སྔགས་མདོའི་དབང་ལ་གཉིས་ཏེ། རང་བཞིན་གྱིས་སྣོད་དུ་གྱུར་པ་ལ་ཀུན་འདུས་དང་རྔམ་གློག་ལྟར་ཞི་ཁྲོ་བརྩེགས་མའི་དཀྱིལ་འཁོར་བཞེངས་ལ། མདོ་དབང་དངོས་སུམ་ཅུ་རྩ་དྲུག་བསྐུར་བ་དང་། སྦྱངས་པས་སྣོད་དུ་གྱུར་པ་ལ་ཐེག་པ་ཐམས་ཅད་འདུས་པའི་མདོ་དབང་བསྐུར་བའོ། །ཞེས་དང་། གླན་བསོད་ནམས་མགོན་པོའི་ལས་ཁྲིགས་ལས་ཀྱང་། ད་ནི་དབང་གི་དངོས་གཞིའི་ཆོ་ག་བཤད་པར་བྱ་སྟེ། དེ་ལ་མདོ་ཡོངས་རྫོགས་དང་། ཁྱད་པར་བ་གཉིས་ལས། དང་པོ་ལ། ཡན་ལག་གི་དཀྱིལ་འཁོར་དང་། རྩ་བའི་དཀྱིལ་འཁོར་གཉིས་སུ་ངོས་བཟུང་སྟེ། ཞེས་གསུངས་པ་ལྟར། རྒྱུད་ལུགས་དང་མན་ངག་གི་ལུགས་ཀྱི་དབང་གཉིས་སོ་སོའམ་གཅིག་ཏུ་སྒྲིལ་བའི་དབྱེ་བས་བསྐུར་ཚུལ་རྣམ་པ་གསུམ་སྟེ། རྒྱུད་ལུགས་མདོ་རྩ་བའི་དཀྱིལ་འཁོར་དུ་མདོ་དབང་དངོས་སུམ་ཅུ་རྩ་དྲུག་བསྐུར་ཚུལ། མན་ངག་གི་ལུགས་མདོ་ཡོངས་རྫོགས་ཀྱི་དཀྱིལ་འཁོར་དུ་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་ཚུལ། དེ་གཉིས་ད་ལྟའི་དུས་ཀྱི་ཕྱག་ལེན་ལྟར་གཅིག་ཏུ་སྒྲིལ་ནས་བསྐུར་བའི་འདོར་ལེན་བྱ་ཚུལ་ལོ། །དང་པོ་ལ་གཉིས་ཏེ། རྩ་བའི་དཀྱིལ་འཁོར་ངོས་བཟུང་། དེར་རྒྱུད་ལས་དངོས་བསྟན་གྱི་དབང་སོ་དྲུག་བསྐུར་ཚུལ་བཤད་པའོ། །དང་པོ་ནི། ཐུན་མོང་དང་ཐུན་མོང་མ་ཡིན་པའི་རྩ་བའམ་ཁྱད་པར་གྱི་དཀྱིལ་འཁོར་གཉིས་ཞེས་སམ། ཡང་ན་ཐུན་ཐུན་མིན་གྱི་ཚོགས་ཆེན་འདུས་པའི་དཀྱིལ་འཁོར་ཞེས་བྱ་བ་གཉིས་སུ་འགྱུར་ཏེ། ཇི་ལྟར་ཞེ་ན། ཐུན་མོང་མ་ཡིན་པའི་དཀྱིལ་འཁོར་ནི། རྩ་རྒྱུད་ཀྱི་ཚོགས་ཆེན་འདུས་པའི་སྒྲུབ་ལུགས་ཀྱི་ལེའུ་ལས་བཤད་པའི་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་གྲགས་པའི་ཁྲོ་དཀྱིལ་དང་། བཤད་རྒྱུད་རྔམ་གློག་ནས་བཤད་པའི་ཞི་དཀྱིལ་གཉིས་སྦྲེལ་བ་དེ་ཡིན་ཏེ། དེ་ཉིད་ཡན་ལག་གི་དཀྱིལ་འཁོར་སོ་སོར་ཕྱེ་བ་མདོ་ཡོངས་རྫོགས་ཀྱི་སྐབས་སུ་སྒྲུབ་དབང་གྲགས་ཆུའི་དཀྱིལ་འཁོར་ཡིན་པས་ན། ཐུན་མོང་མ་ཡིན་པའི་མདོ་རྩ་བའམ་ཁྱད་པར་བའི་དཀྱིལ་འཁོར་ཞེས་བཏགས་སོ། །དེ་ལྟར་ཡང་རྩ་རྒྱུད་ལས། དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་འདི་རྒྱ་ཆེར་བཤད་དོ། །དཀྱིལ་འཁོར་དཀྱིལ་འཁོར་ཐམས་ཅད་ཀྱི། །རྩ་བའི་དཀྱིལ་འཁོར་ཆེན་པོ་འདི། །འཁོར་བ་ཐམས་ཅད་བསྒྲལ་བའི་ཕྱིར། །རྣལ་འབྱོར་ཅན་ལ་བཤད་པར་བྱ། །ཞེས་གསུངས་ཤིང་། དེའི་རྒྱ་མདུད་འགྲེལ་ལས། དུར་ཁྲོད་གསང་བའི་ཞེས་པ་དཀྱིལ་འཁོར་འདི་ཀུན་གྱི་ཐུན་མོང་མ་ཡིན་པས་ཁྱད་པར་དུ་གྱུར་པ་བཀའ་སྩོལ་བར་གོ་ཆ་བགོས་པའོ། །དཀྱིལ་འཁོར་དཀྱིལ་འཁོར་ཐམས་ཅད་ཀྱི། །ཞེས་པ་རྣམས། ཕྱི་དང་ནང་གི་དཀྱིལ་འཁོར་རིལ་གྱི་གཞི་རྩར་གྱུར་པ་དུར་ཁྲོད་གསང་བའི་དཀྱིལ་འཁོར། ཞེས་སོགས་གསུངས་པ་ལྟར་རོ། །རྩ་བའི་དཀྱིལ་འཁོར་ཐུན་མོང་བ་ནི། རྣམ་པར་སྣང་མཛད་ཐིག་ལེ་དབང་བསྐུར་བ་རྒྱལ་པོའི་རྒྱུད་ཀྱི་ནང་ནས་གབ་པའི་དབང་ལེ་དྲུག་ཀལྤ་དུམ་བུར་ཕྱུང་བའི་རྒྱུད་ཀྱི་འདྲེན་པའི་ལས་བྱང་ཆེ་ལེར་གསུམ་པའི་ཞི་ཁྲོའི་དཀྱིལ་འཁོར་དང་། ཧེ་རུ་ཀ་འདུས་པའི་རྒྱུད་ཀྱི་ལེའུ་དགུ་པར་གསུངས་པའི་ཁྲོ་ད ཀྱིལ་དང་རྔམ་གློག་ཏུ་གསུངས་པའི་ཞི་དཀྱིལ་གཉིས་སྦྲེལ་བའི་ཞི་ཁྲོའི་དཀྱིལ་འཁོར་གཉིས་དགོངས་པའི་གནད་གཅིག་པར་གྱུར་པ་གང་ཡིན་པ་སྟེ། དེ་ཡང་གབ་པའི་དབང་ལེར། བང་རིམ་དང་པོའི་སྟེང་དུ་ཞི་བའི་ལྷ་ཞེ་གཉིས་དགོད། བར་པ་ལ་ཁྲོ་བོའི་ལྷ་བདུན་ཅུ་རྩ་བརྒྱད་དགོད། ཐ་མར་མཁའ་འགྲོ་དང་ཕོ་ཉ་དང་གིང་དང་མ་མོ་དང་སྲིང་མོ་དགོད། ཟླ་གམ་ཁ་སྤྲོད་ལ་དུས་གསུམ་གྱི་རིག་འཛིན་སློབ་དཔོན་བཞུགས། ཕྱོགས་མཚམས་སྟེང་འོག་དང་མཎྜལ་གྱི་རྩ་ཕུར་པའི་ལྷ་ཞེ་གཉིས་དགོད་དོ། །ཞེས་ལྷ་འགོད་ཚུལ་ཙམ་ལས་སྒོའི་བརྩེགས་རིམ་གསལ་བར་མ་བསྟན་ཅིང་། ཧེ་རུ་ཀ་འདུས་པར། གནས་མ་ཁྱམས་དང་པོ་ལ་བཀོད། ཕོ་ཉའི་ཁྱམས་གསུམ་གཅིག་ཏུ་བསྡུས་ནས་སྒོ་བརྒྱད་བརྩེགས་སུ་གསུངས་ནའང་། རྩ་རྒྱུད་ལས། སྒོ་དགུས་ཀུན་ཏུ་གསལ་བར་གྱུར་པའི་གནས་ན། ཞེས་པའི་རྒྱ་མདུད་འགྲེལ་ལས། ཐེག་པ་དགུ་མཐར་ཕྱིན་པའི་ཕྱིར་གཞལ་ཡས་ཁང་སྒོ་དགུ་རིམ་དུ་གྱུར་པ་ནི་གཞིའི་དོན་ནོ། །ཞེས་རྩ་དཀྱིལ་ཐུན་མོང་མ་ཡིན་པ་སྒོ་དགུ་རིམ་དུ་གསལ་བར་གསུངས་པ་ལྟར། དེའི་ཟླ་སྟོབས་ཀྱིས་རྩ་དཀྱིལ་ཐུན་མོང་པ་ལའང་སྒོ་དགུ་བརྩེགས་སུ་བཀྲལ་བའི་ཡིག་རྙིང་གི་ཐིག་རྩ་སོགས་ཡོད་པར་མ་ཟད། ཁྱད་པར་དབང་དོན་རྒྱ་ཆེར་འབྱེད་པ་ལས། དཀྱིལ་འཁོར་དགུ་བརྩེགས་དཔལ་གྱི་ཕྱག་རྒྱའི་རིམ། །ཞེས་ནང་དབང་རང་གི་བདུན་པ་ཕྱག་རྒྱ་གཟུགས་བརྙན་གྱི་དབང་གི་སྐབས་སུ་གསུངས་པ་ལྟར། རྩ་དཀྱིལ་ཐུན་མོང་པ་འདི་ཡང་སྒོ་དགུ་བརྩེགས་སུ་མཛད་ནས། ལྷ་འགོད་པའི་རིམ་པའང་། གནས་མ་གློ་འབུར་དང་གྲུ་ཆད་བཞིར་བཀོད། དེ་ཕྱིན་སྒོ་དགུ་བརྩེགས་ལ་ཧེ་རུ་ཀ་འདུས་པར་གསུངས་པའི་གོ་རིམ་ལྟར་འགོད་པ་བླ་མ་རྒྱུད་པའི་མན་ངག་གི་ཕྱག་བཞེས་རྣམ་དག་ཡིན་ཏེ། རྗེ་བླ་མས་མཛད་པའི་སྒྲུབ་ཐབས་ལས། གབ་པའི་དབང་ལེར་ཕོ་ཉའི་ཁྱམས་ཀྱི་ཕྱིར་མ་སྲིང་སོགས་བཀོད་པ་དང་། ཡིག་རྙིང་གཞན་དུ་རོལ་པ་ཆེན་པོའི་དཀྱིལ་འཁོར་ཉིད་ཕྲིན་ལས་མྱུར་མགྱོགས་ཀྱི་དཀྱིལ་འཁོར་ནང་དུ་བཀོད་པ་སོགས་སྣང་ནའང་། འདིར་བཀོད་ཧེ་རུ་ཀ་འདུས་པའི་ལེའུ་དགུ་པར་བཤད་པ་བཞིན་བླ་མ་གོང་མ་རྣམས་ཀྱི་ཕྱག་ལེན་བརྒྱུས་པ་ལས་བྱུང་བ་ལྟར་ཏེ། འོན་ཀྱང་ཕོ་ཉ་ལ་འདིར་ཁྱམས་གསུམ་དུ་བྱུང་བ་ཧེ་རུ་ཀ་འདུས་པར་གཅིག་ཏུ་བསྡུས་ཤིང་། ཁྱམས་དང་པོ་ལ་གནས་མ་བཀོད་པས་སྒོ་བརྒྱད་བརྩེགས་སུ་འབྱུང་བ་ཙམ་ཁྱད་པར་རོ། །ཞེས་གསུངས་པ་ལྟར་ཡིན་ལ། མདོ་ཡོངས་རྫོགས་ཀྱི་ཚེ་འདི་ཉིད་ནང་དབང་འབྱུང་ཆུའི་དཀྱིལ་འཁོར་ཡིན་པས་ན། མ་ཧཱའི་དཀྱིལ་འཁོར་དང་ཐུན་མོང་དུ་གྱུར་པ་གང་ཞིག །མོས་སློབ་ཙམ་ལ་གྲགས་གསང་གི་ཆུ་བོ་གཉིས་ཀྱང་དཀྱིལ་འཁོར་འདི་ཉིད་དུ་བསྐུར་རུང་བས་རྩ་བའི་དཀྱིལ་འཁོར་དུའང་འགྱུར་བའི་ཕྱིར། ཐུན་མོང་བའི་རྩ་བའི་དཀྱིལ་འཁོར་ཞེས་ཐ་སྙད་བཏགས་པ་ཡིན་ནོ། །གཉིས་པ་དེར་རྒྱུད་ལས་དངོས་བསྟན་གྱི་དབང་སོ་དྲུག་བསྐུར་ཚུལ་བཤད་པ་ལ་གསུམ་སྟེ། བསྐུར་བྱའི་དབང་སོ་དྲུག་རྒྱུད་ལས་བཤད་ཚུལ། དེ་རྩ་དཀྱིལ་ཐུན་ཐུན་མིན་གང་རུང་དུ་རྫོགས་པར་བསྐུར་རུང་བའི་འཐད་པ། ཇི་ལྟར་བསྐུར་བའི་ཆོ་གའི་ཁྱད་པར་བཤད་པའོ། །དང་པོ་ནི། རྩ་རྒྱུད་ལས། དེ་ནས་ཡང་སེམས་དཔའ་རྡོ་རྗེ་དེས་ཡོངས་སུ་རྫོགས་པའི་དབང་གི་ལེའུ་འདི་གསུངས་སོ། །འདུས་པ་ཆེན་པོའི་རྣལ་འབྱོར་པ། །ཞེས་པ་ནས། རྣམ་པ་གཉིས་ཀྱིས་རྫོགས་པར་འགྱུར། །ཞེས་པའི་བར་གྱིས་མདོར་བསྟན་ནས། དེའི་དོན་རྒྱས་པར་བཤད་པ་ལ་ཆུ་བོ་བཞི་ལས། དང་པོ་ཕྱི་དབང་རྒྱུད་ཀྱི་ཆུ་བོ་ནི། དེ་ལ་དང་པོར་སྦྱིན་པའི་དབང་ནི་འདི་ཡིན་ཏེ། ༀ་ཧཱུཾ་སྭཱ་ཧྲཱིཿཧཱ། ཀུན་གྱིས་འདའ་བར་དཀའ་བ་ཡི། །ཞེས་པ་ནས། འཇིག་རྟེན་ཀུན་ལ་ཁ་ལོ་བསྒྱུར་བ་ཡི། །དབང་མཆོག་རྒྱལ་པོ་འདི་ཡང་སྦྱིན་པར་བྱ། །ཞེས་པའི་བར་གྱིས་བཀའ་རྟགས་ཕྱག་རྒྱའི་དབང་དང་། རྟགས་ཀྱི་མཚན་མའི་དབང་དང་། ཤེས་རབ་གཟུངས་ཀྱི་དབང་དང་། བཀྲ་ཤིས་བུམ་པའི་དབང་དང་། བཀྲ་ཤིས་རྫས་བརྒྱད་ཀྱི་དབང་དང་། རིན་ཆེན་བདུན་གྱི་དབང་དང་། གདན་ཁྲིའི་དབང་དང་། རྒྱན་ཆ་རྟགས་ཀྱི་དབང་དང་། མིང་གི་དབང་དང་། འཁོར་ལོའི་དབང་སྟེ། ཕན་དབང་ངམ་ཕྱི་དབང་བཅུ་བསྐུར་ཚུལ་བཤད། གཉིས་པ་ནང་དབང་འབྱུང་བའི་ཆུ་བོ་ནི། ཕྱི་འཁོར་སྐྱོང་བའི་རྒྱལ་པོར་གྱུར་ཕན་ཆད། །བླ་མེད་མཆོག་གི་རྟགས་དང་ལྡན་འགྱུར་པས། །གསང་སྒོ་ཕྱེ་ནས་ནང་དུ་གཞུག་པར་བྱ། །ཤིན་ཏུ་གསང་བའི་རྫས་དང་ལྡན་གྱུར་ནས། །གསང་སྒོ་གང་ལས་འདོད་པའི་དོན་རྣམས་ཞུ། །གནང་བ་ཆེན་པོའི་རྟགས་སུ་བྱིན་གྱིས་བརླབ། །ཅེས་པས་ཕྱི་དབང་ཐོབ་ནས་སྣོད་རུང་དུ་བྱས་པ་དེ་ནང་གི་དཀྱིལ་འཁོར་དུ་གཞུག་ཅིང་། རང་བློ་དང་ཐེག་ཚད་ཀྱི་དབང་བསྐུར་ཚུལ་མདོར་བསྟན་པས་མཚམས་སྦྱར་ནས། བསྐུར་ཐབས་རྒྱས་པར་བཤད་པ་ནི། གསང་བའི་དོན་ལ་ཉན་ཅིང་སློབ་པའི་དབང་། །ཞེས་པ་ནས། རྩལ་གྱི་ཐིག་ལེ་རྡོ་རྗེ་བྱིན། །ཞེས་པའི་བར་གྱིས་གསང་བ་ཉན་ཅི་ཀློག་པའི་དབང་དང་། རྣམ་བཞི་ལས་ཀྱི་དབང་དང་། རྒྱལ་ཐེབ་འཆད་པའི་དབང་དང་། རྡོ་རྗེ་རྒྱལ་པོར་དབང་བསྐུར་བ་དང་། ཟིལ་གནོན་གདན་གྱི་དབང་དང་། ཁྱད་པར་གྱི་རིན་ཆེན་སྣ་བདུན་དང་། ཕྱག་རྒྱ་གཟུགས་བརྙན་གྱི་དབང་དང་། ཡེ་ཤེས་ཐུགས་ཀྱི་དབང་དང་། སྐུ་གསུང་ཐུགས་ཀྱི་དབང་དང་། བདུད་འདུལ་བཀྲ་ཤིས་རྫས་ཀྱི་དབང་དང་། གསང་བ་མིང་གི་དབང་སྟེ། ནང་ནུས་པའི་དབང་བཅུ་གཅིག་བསྐུར་ཚུལ་བཤད། གསུམ་པ་སྒྲུབ་དབང་གྲགས་པའི་ཆུ་བོ་ནི། ནང་དུ་འཇུག་པའི་དབང་ཐོབ་ནས། །དེ་དག་ཀུན་ལ་སྤྱོད་སྒྲུབ་པའི། །དབང་མཆོག་དམ་པ་སྦྱིན་པར་བྱ། །ཞེས་ནང་དབང་ཐོབ་ནས། དེ་དག་གི་དོན་ཁྱད་པར་ཅན་སྒྲུབ་པའི་ཐབས་སྤྱོད་པའི་དབང་སྦྱིན་ཚུལ་མདོར་བསྟན་པས་མཚམས་སྦྱར་ནས་བསྐུར་ཐབས་རྒྱས་པར་བཤད་པ་ནི། སྐྱེ་མེད་ཆོས་ཀྱི་དབྱིངས་ཉིད་ལ། །ཞེས་པས། རྡོ་རྗེ་མིང་ནི་སྦྱིན་པར་བྱ། །ཞེས་པའི་བར་གྱིས་ཤེས་རབ་རིག་པའི་དབང་དང་། སྙིང་རྗེ་རྟགས་ཀྱི་དབང་དང་། འགྲོ་དོན་རྫོགས་པའི་དབང་དང་། དུག་གསུམ་གཏིང་ནས་སྤྲུགས་པའི་དབང་དང་། སྲིད་གསུམ་སྒྲོལ་བའི་དབང་དང་། སྐྱོན་གྱིས་མ་གོས་པའི་དབང་དང་། ལས་རྣམས་རྫོགས་པའི་དབང་དང་། གཉིས་མེད་འཁྲིལ་བའི་དབང་དང་། གསང་བ་སྦྱོར་བའི་དབང་དང་། འདོད་ཡོན་ལོངས་སྤྱོད་ཀྱི་དབང་དང་། སྒྲུབ་པའི་རྒྱལ་པོའི་དབང་དང་། སྒྲུབ་རྫས་ཐམས་ཅད་ཀྱི་དབང་དང་། གཉིས་མེད་མིང་གི་དབང་སྟེ། སྒྲུབ་དབང་བཅུ་གསུམ་བསྐུར་ཚུལ་བཤད་དེ། ཆུ་བོ་བཞི་པོ་ཕན་ནུས་ཟབ་མོའི་དབང་གསུམ་དུ་བསྡུ་བའི་ཚེ་འདི་ནི་ནུས་དབང་གི་ནང་ཚན་ནོ། །བཞི་པ་གསང་དབང་རྫོགས་པའི་ཆུ་བོ་ནི། སྒྲུབ་པའི་དབང་མཆོག་ཐོབ་པ་དང་། །གསང་བའི་བདག་པོ་ཡིན་པས་ན། །གསང་བའི་དབང་མཆོག་སྦྱིན་པར་བྱ། །ཞེས་པས་མཚམས་སྦྱར་ཏེ། དགའ་བ་བྱང་ཆུབ་སེམས་ཆེན་པོ། །ཞེས་པ་ནས། དེ་ལ་དབང་མཆོག་བསྐུར་བར་འགྱུར། །ཞེས་པའི་བར་གྱིས་ཀུན་རྫོབ་བྱང་སེམས་ཀྱི་དབང་ལུས་དང་། དོན་དམ་བྱང་སེམས་ཀྱི་དབང་སེམས་ལ་བསྐུར་ཚུལ་བཤད་དོ། །དེ་བཞིན་དུ་བཤད་རྒྱུད་རྔམ་གློག་ལས་ཀྱང་། དབང་སོ་དྲུག་གི་རྐང་གྲངས་གསལ་བར་བསྟན་ཏེ། ཇི་སྐད་དུ། དང་པོ་བཀའ་རྟགས་ཕྱག་རྒྱའི་དབང་། །གཉིས་པ་རྟགས་ཀྱི་མཚན་མའི་དབང་། །གསུམ་པ་ཤེས་རབ་གཟུངས་ཀྱི་དབང་། །བཞི་པ་བཀྲ་ཤིས་བུམ་པའི་དབང་། །ལྔ་པ་བཀྲ་ཤིས་རྫས་ཀྱི་དབང་། །དྲུག་པ་རིན་ཆེན་སྣ་བདུན་དབང་། །བདུན་པ་གདན་མཆོག་དམ་པའི་དབང་། །བརྒྱད་པ་མཛེས་པ་རྒྱན་གྱི་དབང་། །དགུ་པ་གསང་བ་མིང་གི་དབང་། །བཅུ་པ་རྒྱལ་སྟོབས་འཁོར་ལོ་སྟེ། །ཕྱི་དབང་བཅུ་པ་རྫོགས་པ་དང་། །རྡོ་རྗེས་ནང་དུ་གཞུག་བྱ་བ། །དང་པོ་གསང་བ་ཉན་ཅིང་ཀློག་པའི་དབང་། །གཉིས་པ་གླེགས་བམ་ཟབ་མོ་གཏད་པའི་དབང་། །གསུམ་པ་རྣམ་བཞི་ལས་ཀྱི་རྫས་ཀྱང་བྱིན། །བཞི་པ་རྒྱལ་ཚབ་དམ་པའི་མཛོད་གསུམ་བྱིན། །ལྔ་པ་སློབ་དཔོན་ཐེག་ཆེན་དགུ་ཡི་རྟགས། །དྲུག་པ་ཉི་ཟླ་པདྨ་སེམས་ཅན་གདན། །བདུན་པ་རྒྱལ་པོ་གསང་བའི་རིན་ཆེན་བདུན། །བརྒྱད་པ་གཟུགས་བརྙན་སྤྱི་བོར་བཞག །དགུ་པ་སྐུ་གསུམ་ཡེ་ཤེས་བྱིན། །བཅུ་པ་བཀྲ་ཤིས་ནང་རྫས་དབང་། །དེ་ལ་ལག་ཏུ་རྡོ་རྗེ་བྱིན། །བཅུ་དང་གཅིག་གིས་ནང་བཅུག་ནས། །སྒྲུབ་པའི་དབང་མཆོག་སྦྱིན་པར་བྱ། །དང་པོ་སེམས་ཀྱི་གཏན་ཚིགས་བྱིན། །གཉིས་པ་སྙིང་རྗེའི་དབང་བསྐུར་བྱིན། །གསུམ་པ་ཡི་གེ་འཁོར་ལོ་བྱིན། །བཞི་པ་ཐོང་གཤོལ་འབར་བ་བྱིན། །བྷཉྫ་གང་བ་སྦྱིན་དང་ལྔ། །དྲུག་པ་མཚོན་ཆ་སྣ་ཚོགས་ཏེ། །བདུན་པ་སྐྱོན་མེད་པདྨ་བྱིན། །བརྒྱད་པ་ཏི་རའི་དབྱུག་པ་བྱིན། །དགུ་པ་སྦྲུལ་ནག་ཆུན་པོ་བྱིན། །བཅུ་པ་དྲི་མེད་ལྷ་མོ་བྱིན། །གཅིག་ལ་འདོད་པའི་ལོངས་སྤྱོད་བྱིན། །གཉིས་ལ་སྒྲུབ་རྫས་ཐམས་ཅད་བྱིན། །གསུམ་ལ་རྡོ་རྗེ་གསང་མིང་བྱིན། །བཅུ་དང་གསུམ་པོ་རྫོགས་པ་དང་། །གསང་བ་དམ་པ་སྦྱིན་པ་ཡང་། །དཀར་དམར་འདྲེས་པའི་བྱང་ཆུབ་སེམས། །བུ་མཆོག་དེ་ཡི་ལྕེ་ལ་བཞག །སྙིང་པོ་དོན་དམ་བྱང་ཆུབ་སེམས། །དེ་ཡི་བློ་ལ་བཞག་པར་བྱ། །ཞེས་སོ། །གཉིས་པ་ལ། རྩ་དཀྱིལ་ཐུན་མོང་མ་ཡིན་པ་དང་། རྩ་དཀྱིལ་ཐུན་མོང་པར་དབང་སོ་དྲུག་བསྐུར་རུང་བའི་འཐད་པའོ། །དང་པོ་ནི། འགྲེལ་པ་ལུང་བསྟན་མ་ལས། དང་པོ་རྩ་བའི་རྒྱུད་ཀྱི་ལེའུ་དགུ་པ་དང་། སྤྱིའི་ཆོ་གས་དཀྱིལ་འཁོར་གཉིས་ཀྱི་བསྙེན་པ་དང་། ལྷག་པར་གནས་པའི་ཆོ་ག་རྫོགས་པར་བྱའོ། །དེ་ནས་ལེའུ་བཅུ་གཉིས་པ་ཚོགས་ཆེན་འདུས་པའི་ལུགས་ཀྱི་དཀྱིལ་འཁོར་བྲི་བ་དང་། རྒྱན་དགྲམ་པ་དང་། སྔོན་དུ་འགྲོ་བ་བྱས་ལ། དཀྱིལ་འཁོར་གསུམ་བསྲེ་བ་དང་། མཆོད་པ་ལ་སོགས་པ་བྱའོ། །དེ་ནས་རྡོ་རྗེ་རྣལ་འབྱོར་འཇུག་པ་ལྟར་ཞུགས་པའམ། འདི་ཉིད་ཀྱི་རུ་དྲ་འཇུག་པ་ལྟར་གཞུག་པའི་ཆོ་ག་བྱས་ལ། རྡོ་རྗེ་དབང་གི་ལེའུ་དང་། ལེའུ་བདུན་ཅུ་པ་དང་། ལེའུ་འདི་ཉིད་དང་གསུམ་གྱིས་དབང་བསྐུར་བར་བྱའོ། །ཞེས་པ་ལྟར་བསྙེན་པ་དང་ལྷག་གནས་སྔོན་དུ་བཏང་ནས། རྩ་རྒྱུད་ལས་གསུངས་པའི་རྩ་བའི་དཀྱིལ་འཁོར་ཐུན་མོང་མ་ཡིན་པ། འདིར་ནི་རྡོ་རྗེ་མུ་ཁྱུད་བདུན། །འབྱུང་བའི་རིམ་པ་དྲུག་བར་དུ། །འཁོར་ལོ་དྲུག་བརྩེགས་སྙིང་པོ་འབར། །ཞེས་སོགས་འབྱུང་བ་ལྟར་གྱི་ཁྲོ་དཀྱིལ་དང་། དེ་སྟེང་རྔམ་གློག་ནས་བཤད་པའི་ཞི་དཀྱིལ་བཀོད་དེ། ཞི་ཁྲོ་བརྩེགས་མའི་དཀྱིལ་འཁོར་བཞེངས་ལ་དེར་འཇུག་པའི་ཆོ་ག་རྩ་རྒྱུད་ཀྱི་རྡོ་རྗེ་རྣལ་འབྱོར་འཇུག་པའི་ལེའུ་ལས་བཤད་པ་ལྟར་རམ། དགོངས་འདུས་ཀྱི་རུ་དྲ་དཀྱིལ་འཁོར་དུ་གཞུག་པའི་ཆོ་ག་གཉིས་གང་རུང་གིས་བཅུག་ལ། དགོངས་འདུས་ཀྱི་ལེའུ་བདུན་ཅུ་པ་དང་། བཅུ་གསུམ་པ་གཉིས་ཀྱིས་སྤྱི་ཁོག་དབུབ་ཅིང་། ཇི་ལྟར་བསྐུར་བའི་ཆོ་ག་རྩ་རྒྱུད་ཀྱི་རྡོ་རྗེ་དབང་གི་ལེའུ་ལས་བཤད་པ་ལྟར་གྱིས་ཆུ་བོ་བཞི་རྫོགས་སུ་བསྐུར་བར་གསུངས་པ་ཡིན་ནོ། །འདིར་རྩ་རྒྱུད་ཀྱི་དཔེ་རྒྱུན་ཕལ་མོ་ཆེར། ཚོགས་ཆེན་འདུས་པའི་སྒྲུབ་ལུགས་ལེའུ་བཅུ་བཞི་པར་སྣང་བས་ལུང་བསྟན་མའི་འགྲེལ་ཚིག་འདི་དང་འགལ་ལོ་སྙམ་ན། དེ་ནི་འགྲེལ་པ་སོ་སོའི་དགོངས་པས་རྒྱུད་ཀྱི་ལེའུའི་གཅོད་མཚམས་ཐ་དད་པར་བྱུང་བ་ཡིན་ཏེ། དཔེར་ན་འགྲེལ་ཆུང་དུ་རྩ་རྒྱུད་ཀྱི་རྒྱུན་གྱི་ཏིང་ངེ་འཛིན་དང་། རྡོ་རྗེ་མཆོག་ཆེན་གྱི་ལེའུ་གཉིས་སོ་སོར་ཕྱེ་བ་དང་། རྒྱུད་རང་གི་གླེགས་བམ་ཕལ་ཆེ་བར། འཇུག་པ་དང་དབང་ལེའུ་སོ་ལྔ་པ་དང་སོ་དྲུག་པར་བྱས་ཏེ། སྤྱིར་རྒྱུད་ལ་ལེའུ་སོ་བདུན་དུ་ཕྱེ་ཡང་། རྒྱ་མདུད་འགྲེལ་དུ་སྤྱིར་ལེའུ་སོ་དྲུག་ཏུ་བསྡུས་ནས། འཇུག་པ་དང་དབང་སོ་བཞི་སོ་ལྔ་གཉིས་ལ་སྣང་ཞིང་། ཚོགས་ཆེན་འདུས་པའི་སྒྲུབ་ལུགས་ཀྱང་ལེའུ་བཅུ་གཉིས་པ་རང་ལ་ཡོད་པས་ལུང་བསྟན་མའི་འགྲེལ་ཚིག་འདི་ཡིག་ནོར་རོ་སྙམ་དུ་བསམ་པར་མི་བྱའོ། །གཉིས་པ་ནི། གསང་བདག་ཆེན་པོ་སྒྲོ་ཕུག་པས་མཛད་པའི་གསང་སྔགས་ལུང་གི་འདུས་པ་མདོའི་དབང་གི་མཛད་བྱང་ཞེས་པར། ཞི་ཁྲོའི་དཀྱིལ་འཁོར་ཚོགས་ཆེན་འདུས་པ་ཐུན་མོང་བའི་ལུགས་སུ་བཞེངས་ནས། དེར་སྔར་ལྟར་འཇུག་པ་དང་དབང་སོ་དྲུག་རྩ་རྒྱུད་བཞིན་དུ་རྫོགས་པར་བསྐུར་ཚུལ་གསུངས་ཤིང་། དབང་ཆོག་འདི་ནི་རྒྱུད་ལུགས་ཀྱི་མདོ་དབང་ཉུང་གསལ་རྫོགས་པའི་ཡིག་ཆ་ངོ་མཚར་ཅན་དུ་སྣང་མོད། དེ་ལྟ་ནའང་ཧ་ཅང་ཚིག་སྣ་ཐུང་བས་མ་ཁྲོལ་བ་ཡིན་ནམ། ཕྱིས་ཀྱི་གང་ཟག་རྣམས་ཀྱིས་ནི་སྤངས་པ་ལྟ་བུར་གྱུར་ཏོ། །དེ་ལྟར་རྩ་བའི་དཀྱིལ་འཁོར་གཉིས་གང་རུང་དུ་མདོ་དབང་དངོས་སུམ་ཅུ་རྩ་དྲུག་རྫོགས་པར་བསྐུར་བའི་ཕྱག་བཞེས་འདི་ནི། འདུས་པ་མདོའི་རྒྱུད་རྩ་བཤད་ཀྱིས་དངོས་བསྟན་ལྟར་གྱི་མདོའི་དབང་ཐུན་མོང་མ་ཡིན་པར་སྣང་བས། གཙོ་ཆེ་བའི་ངོས་ནས་རྒྱུད་ལུགས་ཞེས་བྱ་ཞིང་། བདེ་བ་གསལ་མཛད་ཀྱིས་དབང་དོན་རྣམ་པར་འབྱེད་པར་རྗེས་འཇུག་ལས་དང་པོ་ལ་ཆུ་བོ་བཞི་བསྐུར་ཚུལ་བཤད་པའི་མན་ངག་དང་ཡང་འབྲེལ་ཏེ། རང་བཞིན་གྱིས་སྣོད་དུ་གྱུར་པའི་སྐལ་ལྡན་གྱི་སློབ་མ་ཁྱད་པར་ཅན་རྣམས་ལ་བསྐུར་བྱའི་དབང་ཡིན་ནོ། །གསུམ་པ་རྩ་དཀྱིལ་གཉིས་གང་རུང་དུ་ཇི་ལྟར་བསྐུར་བའི་ཆོ་གའི་ཁྱད་པར་བཤད་པ་ལ། སྒྱུ་འཕྲུལ་ལམ་རིམ་ལས། གཞི་དང་གཞུང་གིས་རྫོགས་པར་འགྱུར། །ཕུན་སུམ་ཚོགས་པ་ལྔ་གཞི་ལ། །བསྙེན་སྒྲུབ་བཞི་ཡིས་གཞུང་བསྲང་བའང་། །ཞེས་པས་གཉིས་ཏེ། སྒྲུབ་པའི་གཞི་བཟུང་བ་དང་། སྒྲུབ་པའི་གཞུང་སྲོང་ཞིང་དབང་བསྐུར་བའོ། །དང་པོ་ལ་ལྔ་སྟེ། གང་གིས་སྒྲུབ་པའི་སྟོན་པ་རྡོ་རྗེ་རྒྱལ་པོ། གང་དང་ལྷན་ཅིག་སྒྲུབ་པའི་འཁོར། གང་དུ་སྒྲུབ་པའི་གནས། གང་ལ་བརྟེན་ནས་སྒྲུབ་པའི་ཡོ་བྱད། གང་གི་ཚེ་སྒྲུབ་པའི་དུས་སོ། །དང་པོ་ནི། རྩ་རྒྱུད་ལས། བླ་མ་རྡོ་རྗེ་འཁོར་ལོ་རྒྱལ། །ཡོན་ཏན་མཆོག་གི་གཏེར་གྱུར་ཅིང་། །སྲིད་པར་ཞུས་ཀྱང་ཟད་མི་ཤེས། །རྐྱེན་ཐུབ་དབང་ལུང་རྫོགས་པ་བཟུང་། །ཞེས་པས་ལྟ་སྒོམ་སྤྱོད་གསུམ་རྣམ་པར་དག་པས་ཡོན་ཏན་མཆོག་གི་གཏེར་དུ་གྱུར་ཅིང་། ལུང་རིགས་མན་ངག་ཀུན་ལ་མཁས་པས་མཁྱེན་པ་ཟད་མི་ཤེས་པ། དབང་ལུང་མན་ངག་རྫོགས་ཤིང་དམ་ཚིག་གཙང་བས་གསང་གཉེར་ཐུབ་པ། བཤད་སྒྲུབ་རྐྱེན་ཁར་མི་གཏོང་བའི་གཞན་རྗེས་སུ་འཛིན་པའི་ཐབས་མཁས་ཐུགས་རྗེར་ལྡན་པའོ། །གཉིས་པ་ནི། སྔར་བསྟན་པ་ལྟར་སྤྱིར་སློབ་མའི་སྣོད་ཀྱི་ཡོན་ཏན་རྣམས་ཚང་ཞིང་། བྱེ་བྲག་ཏུ། དེ་ལས། རྡོ་རྗེ་ཅན་གྱི་གཟུངས་འཛིན་མ། །ཞེས་སོགས་ཚིགས་བཅད་བཞིས། འཆད་མཁས་པའི་རྡོ་རྗེ་རྒྱལ་ཐེབ། སྦྱོར་བའི་སྒྱུ་རྩལ་ཤེས་པའི་གཟུངས་མ། དཔའ་བརྟུལ་ཆེ་བའི་ཀངྐི་ར། དྲོད་འཛིན་པའི་རྡོ་རྗེ་བྱ་རོག །མཐོང་བཟློག་ནུས་པའི་རྡོ་རྗེ་སྤྱན་པ། སྐད་གདངས་སྙན་ཞིང་ལས་ཁྲིགས་བྱང་བའི་རྡོ་རྗེ་ལས་མཁན། གཡོས་མཁས་ཤིང་ཁ་སྐ་བའི་རྡོ་རྗེ་བྱན་པོ། ཕྱི་ནང་བརྡ་སྦྱོར་མཁས་པའི་རྡོ་རྗེ་རྡུལ་ཕྱགས་སོགས་དངོས་ཤུགས་ཅི་རིགས་པས་ཚོམ་བུར་འབྲེལ་བའི་འཁོར་བསྟན་ནོ། །གསུམ་པ་ནི། དེ་ལས། སྒྲུབ་པའི་གནས་མཆོག་དམ་པ་དག །སྐྱོན་ཡོན་གཉིས་ཀྱི་བྱེ་བྲག་ནི། །ངེས་པར་བརྟགས་ཏེ་ཤེས་པ་ལས། །བླང་དོར་གཉིས་སུ་སྦྱར་བར་བྱ། །ཞེས་པ་ལྟར། ཡི་དྭགས་གདུགས་པ་ཅན་གྱི་འགྱུ་སྲང་དང་དགྲ་རྐུན་གཅན་གཟན་སོགས་ཀྱིས་འཚེ་བ་མེད་ཅིང་། སྟོན་པའི་ཞབས་ཀྱིས་བཅགས་པས་བྱིན་ཆེ་བ། རིག་འཛིན་གོང་མ་རྣམས་ཀྱིས་གྲུབ་པ་བརྙེས་པས་བཀྲ་ཤིས་པ། གནམ་ས་བར་སྣང་གི་དཔྱད་ལེགས་པས་ཉམས་དགའ་ཞིང་ཡིད་དུ་འོང་བ། ཁྱད་པར་གཞུང་དང་མཐུན་པས་སྒྲུབ་ཐག་ཉེ་བ་སོགས་བཀྲ་ཤིས་དགེ་མཚན་དང་ལྡན་པའི་གནས་སུ་སྒྲུབ་ཁང་སུམ་ཐོག་ཁོར་ཁང་རིམ་པ་གསུམ་པ་གནོད་པ་ཞི་བའི་རྫས་ཀྱིས་བྱུགས་པ་འདུ་བྱ་བ་སྟེ། རྔམ་གློག་ལས། རི་བོ་འདུས་པའི་རྩེ་རྣམས་དང་། །ཙནྡན་ནགས་ཚལ་མེ་ཏོག་ཚལ། །ཡིད་འོང་བཀྲ་ཤིས་ཉམས་དགའ་བའི། །གནས་སུ་དཀྱིལ་འཁོར་བྲི་བར་བྱ། །གནམ་དང་ས་དང་བར་སྣང་རྣམས། །ལེགས་པར་བརྟགས་ཏེ་ལས་རྣམས་བྱ། །ཞེས་དང་། སྒྱུ་འཕྲུལ་ལས་རིམ་ལས། རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དུ་འཚམས་པར་བྱ། །ཁོར་ཁང་ཕྱི་ནང་བར་ལྡན་པར། །རིན་ཆེན་བྱུག་པས་བསྲུང་བ་དང་། །རིན་ཆེན་སྤྲུལ་པའི་གཞལ་ཡས་ཁང་། །ཡིད་འོང་བྱ་བ་ཤིན་ཏུ་གཅེས། །ཞེས་སོ། །བཞི་པ་ནི། རྩ་རྒྱུད་ལས། དེར་ནི་ཡོད་བྱད་ཕུན་སུམ་ཚོགས། །ཅི་འདོད་བལྟས་ཏེ་མ་ཐོགས་པར། །ཞེས་སོགས་གསུངས་པ་ལྟར་ལྔ་ལས། སྒྲུབ་རྫས་གསང་བའི་ཡོ་བྱད་ནི། ཐོད་སྐུ་སོགས་སྒྲུབ་པའི་རྟེན་གསུམ་བྱིན་ཅན་དང་། རྨད་དུ་བྱུང་བའི་དམ་རྫས་བམ་གཙང་མ་སོགས་དངོས་གྲུབ་སྒྲུབ་པའི་རྫས་དང་དབང་གི་རྫས་ཐུན་མོང་མ་ཡིན་པ་རྣམས་སོ། །མཆོད་རྫས་དག་པའི་ཡོ་བྱད་ནི། ཕྱི་ནང་གི་ཉེར་སྤྱོད། སྨན་གཏོར་རཀྟ། རོལ་མོའི་བྱེ་བྲག །སྒྲུབ་ཁང་དང་དཀྱིལ་འཁོར་གྱི་རྒྱན་གྱི་ཁྱད་པར་ལ་སོགས་པའོ། །བར་གཅོད་རྐྱེན་བཟློག་གི་ཡོ་བྱད་ནི། ནད་སེལ་བའི་སྨན་དང་སྨན་པ། དགྲ་བཟློག་གི་གོ་མཚོན། བགེགས་བཟློག་གི་ཉུལ་ལེ་སྐྲོད་པའི་བྲབ་བདུག་གི་རྫས་ལ་སོགས་པ་རྣམས་སོ། །འཚོ་བ་ཉེར་མཁོའི་ཡོ་བྱད་ནི། གོས་སྟན་བཟའ་བཏུང་སོགས་མ་འགྲུབ་ན་སྤོགས་ཆོག་དགོས་པའི་ཕྱིར་ལྡབ་ལྡང་དུ་གསོག་པའོ། །དགོས་པ་མཆོག་གི་ཡོ་བྱད་ནི། ཉམས་ལེན་ལ་ཐེ་ཚོམ་གཅོད་པའི་སྤྱི་དང་ཁྱད་པར་གྱི་རྒྱུད་ལུང་མན་ངག་རྣམས་ཚང་བར་འདུ་བྱ་ཞིང་། ལྷག་པའི་ཡོ་བྱད་ལྔ་ལ་རང་བྱན་ཚུད་པའོ། །ལྔ་པ་ནི། སྤྱིར་དབྱར་དགུན་སྟོན་དཔྱིད་ཀྱི་དུས་ཆ་བཞིའི་དང་པོ་སྟེ་ར་བ་བཞི་དང་། བྱེ་བྲག་ཏུ་ཉི་མ་འཕེལ་བའི་དུས་བྱང་བགྲོད། ཟླ་བ་འཕེལ་བའི་དུས་ཡར་ངོ་། དེའི་ནང་ནས་ཀྱང་ཚེས་གྲངས་བརྒྱད་ནས་བཅོ་ལྔའི་བར་ལ། རྒྱལ་ཕུར་འཛོམ་པ་ལྟ་བུའི་གཟའ་སྐར་སྦྱོར་བྱེད་བཟང་པོ་ནས་སྒྲུབ་པའི་འགོ་རྩོམ་པ་ཤིས་པ་ཡིན་ཏེ། རྩ་རྒྱུད་ལས། འདི་ལྟར་སྦྱར་བའི་དུས་ཆེན་ཡང་། །ངེས་པར་བརྟགས་ཏེ་མདོ་བཟུང་ལ། །རིག་བྱེད་དག་གི་ཡན་ལག་ལས། །ཤེས་པར་བྱ་སྟེ་ལེགས་སྦྱར་བ། །བཀྲ་ཤིས་ལྷ་ཡི་ཉི་མ་དང་། །སྦྱོར་དང་དུས་ཚིགས་བཟང་པོ་རྣམས། །འཇིག་རྟེན་མཚན་མའི་རྟོག་པ་སྟེ། །བརྟགས་ན་བཀྲ་ཤིས་མཚན་མ་འབྱུང་། །ཞེས་དང་། བདེ་འདུས་དབང་བྱང་ལས། དུས་ནི་དབྱར་དགུན་སྟོན་དཔྱིད་ཀྱི། །ར་བ་དག་ལ་རབ་ཏུ་ཤིས། །བརྒྱད་ནས་ཉ་ཡི་བར་ལ་གཏད། །བཀྲ་ཤིས་གཟའ་སྐར་ཤིས་པ་བླང་། །ཞེས་དང་། གཟའ་སྐར་ཡང་། འཇམ་དཔལ་རྩ་རྒྱུད་ལས། ཚེས་གྲངས་གཟའ་ནི་དམ་པར་ལྡན། །ཕུར་བུ་པ་སངས་ཟླ་བ་དང་། །གཟའ་ལྷག་མཆོག་གི་ལས་ཀུན་ལ། །གཟའ་མཆོག་འདི་དག་རྟག་ཏུ་ནི། །བཞི་པ་ཚེས་དང་ལྡན་པ་ནི། །ས་སྟེང་འཇིག་རྟེན་ཀུན་ཏུ་ནི། །འགྲོ་བའི་ལས་ནི་འགྲུབ་པར་བྱེད། །ཅེས་དང་། ཐ་སྐར་སྣར་མ་ཉིད་དང་ནི། །རྒྱལ་དང་ཁྲུམས་ནི་སྟོད་སྨད་གཉིས། །ནམ་གྲུ་དང་ནི་ལྷ་མཚམས་དག །བཟླས་པའི་དུས་སུ་རབ་ཏུ་བསྔགས། །འདི་དག་ལ་ནི་སྔགས་རྣམས་འགྲུབ། །གྲུབ་པའི་དོན་ཡང་སྟེར་བར་བྱེད། །སྐར་མ་དག་ནི་འདི་དག་ལ། །དཀྱིལ་འཁོར་ཉིད་ཀྱང་བྲི་བར་བྱ། །ཞེས་སོ། །གཞན་ཡང་རྩ་རྒྱུད་དུ་དབྱར་སྟོན་དགུན་དཔྱིད་ཀྱི་ར་བ་བཞི་པོ་རིམ་པར་ཞི་རྒྱས་དབང་དྲག་གི་ལས་སོ་སོ་སྒྲུབ་པ་ལ་ཤིས་པར་བསྟན་པ་དང་། བམ་རྙེད་པའམ་གཟུངས་མ་འདུ་བྱ་དང་། བསླབ་བཅུ་མཐར་ཕྱིན་ཅིང་སྒྲོལ་བའི་ཚད་ལ་བབས་ནའང་དུས་ཡིན་པར་གསུངས་སོ། །ཡང་སྒྲུབ་པ་ཇི་ཙམ་བྱེད་པའི་དུས་ནི། སྨིན་སློབ་ཀྱི་དབང་དུ་བྱས་ན། །ཟླ་བ་དྲུག་དང་ལོ་གཅིག་ལ་སོགས་པ་དངོས་གྲུབ་ཀྱི་མཚན་མ་གཏན་ལ་མ་ཕེབས་ཀྱི་བར་དེ་སྲིད་དུ་སྒྲུབ་སྟེ། ཧེ་རུ་ཀ་འདུས་པ་ལས། ལོའམ་ཟླ་བའི་གྲངས་བཞིན་དུ། །ཐབས་དང་ཆོ་གར་ལྡན་སྤྱོད་པས། །ཟག་མེད་སྣང་བའི་ལམ་ལ་གནས། །སྐྱེ་འཇིག་མེད་པའི་སྐུར་གྱུར་ཏེ། །བསྐལ་པ་གྲངས་མེད་ཚེ་ལ་དབང་། །བདེན་པའི་དོན་མཐོང་འཇིགས་པ་མེད། །ཅེས་སོ། །མོས་སློབ་ལ་ནི་ཞག་ཉི་ཤུ་རྩ་གཅིག་གམ་ཞག་བཅུ་གཅིག་ལྟ་བུ་ལ་བསྙེན་སྒྲུབ་ཡན་ལག་བཞི་ཚང་བར་ཉམས་སུ་ལེན་པའོ། །ཁྱད་པར་དབང་བསྐུར་བའི་དུས་ནི། བསྙེན་སྒྲུབ་རྫོགས་ནས་ལྷག་པའི་སེམས་སྐྱེས་པའི་དུས་ཏེ། ངེས་འབྱེད་ལས། དང་པོ་སེམས་བསྐྱེད་འཇུག་དུས་སུ། །རྫས་ཀྱི་དབང་བཅུ་རྫོགས་པར་སྦྱིན། །ཞེས་སོ། །གཉིས་པ་སྒྲུབ་པའི་གཞུང་སྲོང་ཞིང་དབང་བསྐུར་བ་ནི། རྩ་རྒྱུད་ལས། རྡོ་རྗེ་ཚོགས་ཏེ་བསྙེན་པ་དང་། །ཉེ་བ་དང་ནི་སྒྲུབ་པ་དང་། །སྒྲུབ་པ་ཆེན་པོར་སྦྱར་བར་བྱ། །ཞེས་གསུངས་པ་ལྟར། བསྙེན་སྒྲུབ་ཡན་ལག་བཞི་ལ་གཉིས་ཏེ། ངེས་རྫོགས་དང་། མོས་སློབ་བོ། །དང་པོ་ནི། ལྟ་བ་ཆོས་ཉིད་ཇི་བཞིན་པ་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་རྟོགས་ནས། འདུན་པ་སེམས་པའི་རྣལ་འབྱོར་ལ་བརྟན་པ་ཐོབ་པས། རིགས་ཆེན་འབྱེད་པའི་རྣལ་འབྱོར་ལ་ཞུགས་ཏེ། མཆོག་གི་དངོས་གྲུབ་དབུགས་ཆེན་ཕྱིན་པའི་རྣལ་འབྱོར་ལ་སྦྱོར་བའི་བར་ཆད་མེད་ལམ་མོ། །དེ་ལ་བཞི་ལས། དང་པོ་བསྙེན་པ་ནི། རིམ་པ་གཤོམས་དང་འབྲེལ་བ་སྟེ། རྩ་བའི་སྒྲུབ་བྱང་ལས། ཧེ་རུ་ཀ་ཡི་སྒྲུབ་ཐབས་ལ། །བསྙེན་སྒྲུབ་རྣམ་བཞི་གསུངས་པ་ལས། །རིམ་པ་གཤོམས་ཀྱིས་འབྲེལ་བའི་ཕྱིར། །བསྙེན་པ་ཞེས་སུ་བཤད་པ་ཡིན། །ཞེས་སོ། །གཉིས་པ་ཉེ་བསྙེན་ནི། གསང་བའི་དཀྱིལ་འཁོར་གྱི་སྒོར་ཞུགས་ནས་བྱིན་དང་ལྡན་པས་དངོས་གྲུབ་ལ་ཉེ་བར་བྱེད་པ་སྟེ། དེ་ལས། ཁྲག་འཐུང་རོལ་པའི་དཀྱིལ་འཁོར་དུ། །གསང་སྒོར་ཞུགས་ནས་བྱིན་ལྡན་ཕྱིར། །ཉེ་བའི་བསྙེན་པར་དེ་བརྗོད་དོ། །ཞེས་སོ། །གསུམ་པ་སྒྲུབ་པ་ནི། ཚོམ་བུ་ཚོགས་ཀྱི་སྒྲུབ་པ་དངོས་ལ་ཞུགས་ཏེ། མ་གྲུབ་ན་སྤོགས་ཆོག་དང་བཅས་པས་དངོས་གྲུབ་ཀྱི་མཚན་མ་གཏན་ལ་མ་ཕེབས་ཀྱི་བར་དེ་སྲིད་དུ་སྒྲུབ་པར་བྱེད་པ་སྟེ། དེ་ལས། རྡོ་རྗེ་རིགས་ཀྱི་སྒྲུབ་པ་ལ། །གང་ཡང་བར་མཚམས་མིག་ཡེང་ཕྱིར། །དམ་པའི་གཞུང་ཉིད་འཛིན་པས་ན། །སྒྲུབ་པ་ཞེས་བྱར་དེ་བརྗོད་དོ། །ཞེས་སོ། །བཞི་པ་སྒྲུབ་པ་ཆེན་པོ་ནི། རྟགས་དང་མཚན་མ་གཏན་ལ་ཕེབས་ནས། ནུབ་ཐ་མ་ལ་རང་དོན་དུ་དངོས་གྲུབ་ལེན་པའི་ཐབས་ཀྱིས་དབུགས་ཆེན་ཕྱིན་པའི་རྣལ་འབྱོར་ལ་སྦྱར་རྗེས། གཞན་དོན་དབང་བསྐུར་བའི་ཕྲིན་ལས་ལ་འཇུག་པ་སྟེ། དེ་ལས། ཁྲག་འཐུང་ལས་ཀྱི་རིམ་པ་ལས། །རྣལ་འབྱོར་དྲོད་ཀྱི་རྩལ་འཆང་བས། །དོན་མཆོག་མངོན་དུ་བྱ་བའི་ཕྱིར། །སྒྲུབ་པ་ཆེན་པོ་ཞེས་སུ་བརྗོད། །ཅེས་སོ། །གཉིས་པ་མོས་སློབ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་མོས་པས་སྤྱིའི་རྣམ་པ་ཙམ་ལམ་དུ་བྱེད་པ་སྟེ། དེ་ལ་བཞི་ལས། དང་པོ་བསྙེན་པ་ལའང་གཉིས་ཏེ། སྔོན་དུ་བྱ་བའི་དང་། བསྙེན་པའི་ཡན་ལག་དངོས་སོ། །དང་པོ་ནི། རང་གཞི་ལུས་ཀུན་བཟང་ལ་ཞི་བ་དང་། ཆེ་མཆོག་ལ་ཁྲོ་དཀྱིལ་ཐུན་ཐུན་མིན་གཉིས་གང་རིགས་ཀྱི་ལྷ་ལུས་དཀྱིལ་དུ་བཀོད་པའི་ཨ་ནུ་རང་ལུགས་ལྟར་ཉམས་སུ་ལེན་པའི་སྒོ་ནས་མཚན་དུས་གྲངས་གསུམ་གང་རུང་གི་གཞིའི་བསྙེན་པ་ཁ་སྐོང་དང་བཅས་པ་བྱེད་པ་སྟེ། རྔམ་གློག་ལས། དུས་དང་གྲངས་དང་མཚན་མ་ཡིན། །བསྙེན་པ་རབ་ཏུ་རྫོགས་པ་གཅེས། །ཞེས་སོ། །དེ་ལྟར་རྩ་བསྙེན་ཐེམས་པའི་སློབ་དཔོན་ལ། སློབ་བུས་གསོལ་བ་འདེབས་ན་སྣོད་བརྟགས་ཏེ། སྣོད་རུང་དུ་མཐོང་ནས་བགེགས་སྦྱང་ཞིང་བསྲུང་བ་བྱས་ལ། རྒྱུད་སྦྱོང་བའི་མན་ངག་ཀྱང་བསྟན་ནས། སློབ་དཔོན་བདག་ཉིད་ལྷ་ལ་གནང་བ་ཞུ་བའི་དོན་དུ་བསྙེན་པ་ཁ་གསོ་བ་ལ་འཇུག་པའོ། །གཉིས་པ་ལ་གཉིས་ཏེ། སྡོམས་དང་། དེའི་དོན་བཤད་པའོ། །དང་པོ་ནི། སྒྲུབ་བྱང་ལས། བཤམ་དང་བརྟག་བསླང་སྦྱང་བ་དང་། །མནན་པ་བྱིན་བརླབས་བསྐྱེད་པ་དང་། །མཚམས་དང་དམ་སྲི་སྒོ་བྱང་དང་། །ཚོགས་བསགས་གཞལ་ཡས་ཁང་བསྐྱེད་པ། །བཅུ་དང་གཉིས་ཀྱིས་རྒྱས་པར་འགྱུར། །ཞེས་པའོ། །གཉིས་པ་ནི། ཧེ་རུ་ཀ་འདུས་པ་ལས། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་པ་ལྟར་གསུམ་ལས། འདིས་བྱིན་བརླབས་དང་བསྐྱེད་པ་གཉིས་འཁྲུགས་བསྡེབས་ཀྱིས་གོ་བརྗེས་ནས་ནུབ་དང་པོ་དང་གཉིས་པའི་བྱ་བ་སྟོན་ཏེ། དེ་ལ་དོན་བཅུ་གཉིས་ཀྱི་དང་པོ་བཤམ་པ་ནི། སློབ་དཔོན་བསྙེན་པ་ཁ་གསོ་ལ་བཞུགས་པའི་བར་སློབ་བུས་བསག་སྦྱངས་དང་ལྷན་ཅིག་སྒྲུབ་དབང་གི་རྫས་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚང་བར་གསོག་པའོ། །གཉིས་པ་ས་བརྟག་པ་ནི། རྔམ་གློག་ལས། གནམ་དང་ས་དང་བར་སྣང་རྣམས། །ལེགས་པར་བརྟགས་ཏེ་ལས་རྣམས་བྱ། །ཞེས་པས་སྦྱིར་གནམ་ས་བར་སྣང་གི་དཔྱད་དེ་གཞི་ལ་བརྟག་པ་དང་། བྱེ་བྲག་འོག་ཏུ་ས་སྦྱང་བ་དང་འབྲེལ་བར་བརྐོས་ཏེ། ས་རང་གི་མཚན་ཉིད་ལ་བརྟག་ནས་སྤང་བླང་མ་ནོར་བར་བྱའོ། །དེ་ལྟར་རྩ་རྒྱུད་ལས། གནས་རབ་བརྟག་པའི་གལ་ཆེན་ཡང་། །ནམ་མཁའ་འཁོར་ལོ་རྡོ་རྗེ་དང་། །ཞེས་སོགས་ཀྱིས་བླང་བྱ་དང་། སྐྱོན་གྱི་གནས་དག་སྤང་བ་ནི། །གཤིན་རྗེ་གདུག་པའི་མདུང་རྩེ་དང་། །ཞེས་སོགས་ཀྱིས་སྤང་བྱ་བསྟན་ནོ། །གསུམ་པ་ས་བསླང་བ་ནི། བརྟགས་པས་རུང་བར་མཐོང་ན་སྣང་བ་མི་དང་མི་སྣང་བ་ས་བདག་ལ་རིན་འཇལ་ཞིང་བདེན་པ་བརྗོད་པས་བསླང་སྟེ། རྔམ་གློག་ལས། མངོན་དང་མི་མངོན་བདག་པོ་ལ། །རྩོད་པ་ཉེ་བར་ཞི་བའི་ཕྱིར། །སེར་སྣ་སྤངས་པའི་སེམས་ཀྱིས་ནི། །རིན་དང་བདེན་པ་བརྗོད་ལ་བསླང་། །ཞེས་སོ། །བཞི་པ་སྦྱང་བ་ནི། སྔར་མ་དུལ་བའི་ས་ཡིན་ན་རོ་ལྔ་བསལ་ཕྱིར་བརྐོ་བའི་ཐོག་མར་ལྟོ་འཕྱེ་བརྟག་དགོས་ཏེ། བམ་བརྒྱད་འགྲེལ་པར། ལྟོ་འཕྱེ་གནས་པའི་མཚན་ཉིད་ནི། །སྟོན་ཟླ་གསུམ་གྱི་ཟླ་བ་ལ། །ཉི་མ་འགྲོ་བའི་རིམ་པ་ཡིས། །མགོ་ཤར་ཁ་ལྷོ་གཡོན་གྱིས་ཉལ། །ཞེས་སོགས་གསུངས་པའི་དགོངས་པ་ལྟར་བརྩི་བ་ནི། ཉིན་གུང་གི་དུས་སུ་ཐུར་ཤིང་བཙུགས་པས་ཕྱོགས་བཙལ་ནས་ཚངས་ཟུར་གྱི་ཐིག་བཏབ་སྟེ། ལོགས་བཞི་བཅད་པའི་ཕྱོགས་རེར་ཆ་མཉམ་པ་གསུམ་གསུམ་དུ་བགོས་པ་ཁྱིམ་ཟླ་བཅུ་གཉིས། དེ་རེ་རེ་བཞིན་ཡང་སུམ་ཅུ་རེར་གསིལ་བ་ཁྱིམ་ཞག་སྟེ། ལྟོ་འཕྱེ་གཞོགས་ཡོན་འོག་ཏུ་བཅུག་ནས་གཡས་སྐོར་གྱིས་ཞག་རེ་བཞིན་རེའུ་མིག་རེ་རེར་འཕོ་བ་ཡིན་པས་ན། བརྐོ་ས་གར་ཡོད་གློ་བུར་དུ་བརྟག་པའི་ཐིག་གདབ་ཚུལ་ནི་འདི་ལྟ་སྟེ། ས་གཞི་གང་ཡིན་སྙོམས་བྱས་ལ། །ཚངས་ཟུར་ཐིག་གིས་ཕྱོགས་བཙལ་ནས། །ཇི་ཙམ་འོས་པའི་ལོགས་བཞི་བཅད། །དེ་ཡི་སྟེང་ནས་ལྟོ་འཕྱེ་ཡི། །མགོ་བོ་གར་གནས་ཟླ་ཞག་བཙལ། །དེ་དང་ཐད་དྲང་ཕྱོགས་གཞན་སྟེང་། །ཐིག་གདབ་བརྩི་བྱའི་ཚངས་ཐིག་སྟེ། །དེ་ཡི་དཀྱིལ་ནས་གདེངས་ཀའི་བར། །ཆ་མཉམ་ལྔ་རུ་བགོས་བྱས་ལ། །དེ་ཡི་ཆ་གཅིག་གིས་ཚད་པས། །གདེངས་ཀའི་རྩེ་ནས་མར་གསུམ་དང་། །ཚངས་ཐིག་མདུན་དུ་ཕྱེད་དང་གཉིས། །དོར་བའི་ཡས་མར་ཆ་གཅིག་དང་། །ཕྲེད་ལ་ཆ་ཕྱེད་གནས་པ་དེ། །ལྟོ་བའི་ཐད་ཡིན་བརྐོ་བའི་ས། །མགོ་བོའི་གདེངས་ཀའི་གནས་ལུགས་ནི། །ཁྲུམས་ཉ་སྟོན་རར་རྩིས་པ་ཡི། །བུ་མོའི་ཁྱིམ་ཟླ་ནས་བརྩམས་ཏེ། །སྟོན་གསུམ་ཤར་ལ་དགུན་གསུམ་ལྷོ། །དཔྱིད་གསུམ་ནུབ་ལ་དབྱར་གསུམ་བྱང་། །ཞེས་སྨྲས་སོ། །དེ་ཡང་ལེགས་གྲུབ་ཀྱི་རྒྱུད་ཆེན་པོ་ལས། ཉི་མའི་བགྲོད་པའི་ཚེས་གཅིག་ལ་སོགས་པར། །ཉིན་ཞག་རེ་རེ་བཞིན་ཡང་ཆ་རེ་རེ། །ཞེས་གསུངས་པའི་དོན། ཉི་མའི་བགྲོད་པ་ཞེས་པ་ཁྱིམ་ཞག་དང་། ཉིན་ཞག་ཅེས་པས་དེ་དང་ལྟོ་འབྱོར་བའི་ཉིན་ཞག་དེ་དང་དེ་ལ་བརྩི་དགོས་པར་བསྟན་པས་ན། ཁྱིམ་གྱི་ཟླ་ཞག་འཚོལ་བའི་མན་ངག་ཀྱང་འདི་ཡིན་ཏེ། གང་བརྩིའི་ཉི་སྐར་མཁའ་རོས་སྒྱུར། །ཆུ་ཚོད་བཅུག་ལ་མདའ་ཡོན་ཟླས། །ཐོབ་པ་ལུག་ཁྱིམ་ནས་བརྩམས་ཏེ། །ཁྱིམ་ཟླ་འདས་པའི་གྲངས་ཡིན་ནོ། །ལྷག་མ་མཁའ་མེས་སྒྱུར་བ་ལ། །ཆུ་སྲང་མིག་གིས་བགོས་ཐོབ་གཞུག །མདའ་ཡོན་ཟླས་ཐོབ་རྩི་བཞིན་པའི། །ཞག་འདི་དང་བཅས་ད་ལྟར་པའི། །ཁྱིམ་གྱི་འདས་ཞག་རྟོགས་པར་འགྱུར། །ལུག་གླང་འཁྲིག་པ་ཀརྐ་ཊ། །སེང་གེ་བུ་མོ་སྲང་སྡིག་གཞུ། །ཆུ་སྲིན་བུམ་པ་ཉ་རྣམས་ནི། །དཔྱིད་འབྲིང་ནག་ཟླ་ནས་བཟུང་སྟེ། །ལྟོ་འབྱོར་ཁྱིམ་ཟླ་བཅུ་གཉིས་མིང་། །ཞེས་སྨྲས་སོ། །དེ་ལྟར་བརྐོས་ངེས་པར་བྱས་ནས་དངོས་གྲུབ་རབ་འབྲིང་ཐ་གསུམ་གྱི་ཆེད་དུ་སྐེད་པ་དང་ལྟེ་བ་དང་པུས་མོ་ནུབ་པ་ཙམ་དུ་བརྐོས་པས་རོ་ལྔའི་སྐྱོན་མེད་ན་དགེ་ཞིང་། གལ་ཏེ་སྐྱོན་དང་བཅས་ན་བསལ་ནས། དེ་ཉིད་དུ་གཏེར་བཅུག་སྟེ་སྟེགས་བུ་བརྩིག་པའོ། །དེ་ལྟར་ཡང་རྩ་རྒྱུད་ལས། རོ་ལྔའི་མཚན་མ་བརྟག་པར་བྱ། །དགེ་བར་གྱུར་ན་དེར་གནས་བྱ། །གལ་ཏེ་ཤིས་པར་མ་གྱུར་ན། །སྐྱེས་བུ་ཐབས་ལ་མཁས་པ་ཡིས། །མནན་ནམ་སྤོ་བའི་ལས་ཀྱིས་སྦྱར། །དེར་ནི་བསོད་ནམས་གཏེར་ལྡན་ཞིང་། །རིན་ཆེན་ལྔ་ལ་སོགས་པའི་རྫས། །ས་གཞི་གཏེར་ཆེན་རྒྱས་པར་བྱ། །བཀྲ་ཤིས་མཆོག་ཏུ་བསྔགས་པ་ཡིན། །ས་ཞག་སྤོས་ཆེན་རྣམ་ལྔའི་ཁུ། །བསྲེས་པས་ཀུན་ཏུ་གྲུ་བཞི་ནི། །མཎྜལ་རྒྱས་པའི་དབྱིབས་འདྲ་ལ། །ཞེས་སོ། །ལྔ་པ་མནན་པ་ནི། སྦྱང་བ་དངོས་ཏེ། དེ་ལྟར་བརྐོས་པས་མཚན་མ་ངན་ན། དེ་ཉིད་ཀྱི་འཕྲོས་ལས། ཏིང་འཛིན་ཕྱག་རྒྱ་སྔགས་ལྡན་པས། །མཚན་མའི་དངོས་པོ་ཀུན་སྦྱངས་ཏེ། །ཞེས་དང་། སྒྱུ་འཕྲུལ་རྡོ་རྗེ་ལས་རིམ་ལས། ཀུན་ནས་མཚན་མ་ངན་གྱུར་ན། །གཞན་དུ་བགྲོད་དམ་ཞི་བ་ཡི། །མེ་ཡིས་རབ་ཏུ་དག་པར་འགྱུར། །ཞེས་པས་སྔགས་རྒྱ་ཏིང་ངེ་འཛིན་ནམ་སྦྱིན་སྲེག་གིས་མཚན་མ་ངན་པ་རྣམས་ཟིལ་གྱིས་མནན་པར་བྱ་བའོ། །དྲུག་པ་བསྐྱེད་པ་ནི། ས་བཟུང་ཞིང་བསྲུང་བ་སྟེ། གཞི་དེར་སློབ་དཔོན་གྱིས་དཀྱིལ་འཁོར་གྱི་འཁོར་ལོ་བསྐྱེད་དེ། མཁའ་ཁྱབ་ཏུ་སད་པའི་དེ་བཞིན་གཤེགས་པ་རྣམས་མཆོད། དེ་ནས་ཕྱོགས་བཞིའི་སློབ་མའི་གསོལ་གདབ་དང་། སློབ་དཔོན་གྱིས་ཀྱང་ནམ་མཁའི་དེ་བཞིན་གཤེགས་པ་བསྐུལ་ནས་རང་ལ་བསྡུས་ཏེ། ཞེ་སྡང་རྡོ་རྗེའི་སྙེམས་པས་བགེགས་ལ་བཀའ་བསྒོ་ཞིང་། འབར་བའི་སྤྱན་དང་རྡོ་རྗེའི་འགྲོས་སོགས་སྟངས་སྟབས་ཀྱིས་ཀྱང་བསྐྲད་དེ་ས་གཞི་རྡོ་རྗེའི་རང་བཞིན་ཅན་དུ་བྱིན་གྱིས་བརླབ་པ་ནི་བཟུང་བའི་ཆོ་གའོ། །དེ་ནས་རྒྱལ་པོ་བཙོན་དུ་བཅུག་ན་དམངས་ཆམ་ལ་ཕེབས་པ་ལྟར་བགེགས་རྣམས་ལྡང་མི་ནུས་པའི་ཕྱིར། རྔམ་གློག་ལས། སེང་ལྡེང་ཕུར་བུ་སོར་བརྒྱད་པ། །ཁྲོ་བོར་བྱིན་བརླབས་གདབ་པར་བྱ། །ཞེས་པ་ལྟར་ཁྲོ་བཅུའི་ཕུར་གདབ་ཀྱིས་བགེགས་ཀྱི་གཙོ་བོ་ཕྱོགས་སྐྱོང་བཅུ་བཅིང་བའི་སྒོ་ནས་ས་བསྲུང་བར་བྱ་བ་སྟེ། ནུབ་དང་པོ་སའི་ཆོ་གའོ། །དེ་ལ་དཀྱིལ་འཁོར་ཁང་པ་རྙིང་པ་ཡིན་ན་རྡུལ་ཚོན་གྱི་དཀྱིལ་འཁོར་བཞེངས་པ་ལའང་ས་ཆོག་མ་བྱས་པས་ཆོག་མོད། གནས་ཁང་གསར་པ་ཡིན་ན་རས་བྲིས་ལ་རྟེན་པའི་ཚེའང་ས་ཆོག་བྱས་པ་ལེགས་ཏེ། ས་ཆོག་ནི་ས་གཞི་ལ་དཀྱིལ་འཁོར་བྲི་བ་ཁོ་ནའི་ཆེད་མ་ཡིན་གྱི། ཕྱི་ནང་གི་བདུད་དང་བར་ཆད་གཞོམ་པའི་ཆེད་ཡིན་པས་ན། རས་བྲིས་ཀྱི་ཕྱོགས་ལ་ས་ཆོག་མཐའ་གཅིག་ཏུ་བྱ་མི་དགོས་པར་འདོད་པ་ལ་སྙིང་པོ་མེད་དོ། །བདུན་པ་བྱིན་གྱིས་བརླབ་པ་ནི། ཡན་ལག་དང་། ཡན་ལག་ཅན་གྱི་ལྷག་གནས་ཏེ། དང་པོ་ནི། བསང་གཏོར་བྱ་བའི་ཕྱིར་ཐོག་མར་ལས་བུམ་དང་། དེ་རྗེས་རྡོར་དྲིལ། ཐོད་ཆུ། ཐིག་སྐུད། རྡུལ་ཚོན་ཏེ་རྫས་ལྔ་བརླབ་པའོ། །གཉིས་པ་ལྷ་བུམ་སློབ་མའི་སྟ་གོན་གསུམ་ལས། ལྷ་སྟ་གོན་ནི། ལག་ལེན་བདེ་ཕྱིར་ཉེ་བསྙེན་ལས་ཐིག་གིས་བྲི་བ་འདིར་བླངས་ཏེ། རྩ་རྒྱུད་ལས། རྡོ་རྗེ་སྲད་བུས་ཐིག་གདབ་པའི། །ཆོ་ག་རྣམ་པར་བཤད་བགྱི་བ། །ཞེས་སོགས་གསུངས་པ་ལྟར་ཐིག་གི་སྲད་བུའི་རྒྱུ་ཚད་གྲངས་དང་ཐིག་གཡོག་སོགས་ངེས་པས་སྟེགས་བུ་ལ་བདུད་རྩི་ལྔའི་གོ་མ་ཡེ་བཏང་ལ། གདབ་ཐབས་དང་སྤྱོད་ལམ་མ་འཁྲུལ་པས་གནམ་ཐིག་ཡེ་ཤེས་ལྔ་དང་ས་ཐིག་སྐུ་གསུང་ཐུགས་ཀྱི་རང་བཞིན་དུ་ཆ་དབྱེ་བ་ཟླུམ་སྐོར་དང་བཅས་པ་རྩ་དཀྱིལ་གཉིས་གང་བྱེད་ཀྱི་ལུགས་ལྟར་བཏབ་པའི་ལྷ་གནས་སོ་སོར་དྲིའི་ཐིག་ལེ་ཚོམ་བུ་དང་བཅས་པ་བཀོད་ལ། ལྷར་བསྐྱེད་བསྟིམ་མཆོད་བསྟོད་དང་སྙན་གསན་ཕབ་སྟེ་ས་གཞིར་བསྟིམ་པས་ཐམས་ཅད་དཀྱིལ་འཁོར་གྱི་རང་བཞིན་དུ་བྱིན་གྱིས་བརླབ་པའོ། །དེ་ལྟར་ཡང་ཧེ་རུ་ཀ་འདུས་པ་ལས། ཐིག་གདབ་ཆོ་ག་ཇི་བཞིན་བྱ། །དྲི་ཡི་ཐིག་ལེའི་མཚན་མ་དགོད། །ནམ་མཁའི་དཀྱིལ་འཁོར་ཕབ་ཅིང་མཆོད། །ཅེས་སོ། །འདི་ནི་རྡུལ་ཚོན་དུ་མ་ཟད་རས་བྲིས་ཀྱི་ཕྱོགས་ལའང་འགྲུབ་ན་ལེགས་ཏེ། སྙན་གསན་དབབ་པ་ནི་དཀྱིལ་འཁོར་བྲི་བ་ཁོ་ནར་མ་ཟད་སྒྲུབ་ཅིང་མཆོད་པའི་ཕྱིར་ཡང་ཡིན་པས་སོ། །བུམ་པ་སྟ་གོན་ནི། མཚན་ཉིད་དང་ལྡན་པའི་བུམ་པ་ལྷ་གྲངས་དང་མཉམ་པའམ་གཅིག་ཏུ་བསྡུས་ཀྱང་རུང་སྟེ། ཆས་སུ་བཅུག་ལ་རྫས་སོ་ལྔ་དང་དྲིའི་ཆུས་བཀང་བ་བཀོད་ནས། རང་རང་གི་ལྷའམ་གཅིག་ལས་མེད་ན་དེར་དཀྱིལ་འཁོར་ཡོངས་རྫོགས་བསྐྱེད་བསྟིམ་མཆོད་བསྟོད་བཟླས་པ་བྱས་མཐར་འོད་ཞུ་བྱ་བའོ། །སློབ་མ་སྟ་གོན་ནི། ཧེ་རུ་ཀ་འདུས་པ་ལས། སྣོད་དང་ལྡན་པའི་སློབ་མ་དག །མོས་པས་ཁྲུས་བྱས་སེམས་བསྐྱེད་དེ། །ལྷག་པར་གནས་པ་ཇི་བཞིན་བྱ། །ཞེས་པ་ལྟར་སེམས་བསྐྱེད་ཅིང་བགེགས་དང་སྡིག་སྒྲིབ་སྦྱངས་པའི་སློབ་བུ་རྣམས་ལྷར་བསྐྱེད་དེ་སྐུ་གསུང་ཐུགས་བྱིན་གྱིས་བརླབས་ནས། དངོས་གྲུབ་ཀྱི་ལྟས་བརྟགས་པའི་ཕྱིར་སོ་ཤིང་དོར་བ་དང་། རྨི་ལམ་བརྟགས་པ་གཉིས་ལས། ཕྱི་མའི་སྔོོན་འགྲོར། རྨི་ལམ་གསལ་ཕྱིར་ཁྱོར་ཆུ། བར་ཆད་ཀྱིས་མི་སྒྲིབ་པའི་ཕྱིར་དཔུང་སྐུད་དང་ཕུར་བུ། མི་འཁྲུག་པའི་ཕྱིར་ཀུ་ཤའི་སྔས་སྟན་རྣམས་བྱིན་ནས། དངོས་གཞི་རྨི་ལམ་བརྟགས་ལ་ངན་ན་ནངས་པར་བཟློག་པའི་ཆོ་ག་བྱ་བ་རྣམས་ཏེ། ནུབ་གཉིས་པའི་བྱ་བའོ། །བརྒྱད་པ་མཚམས་བཅད་པ་ནི། རྩ་རྒྱུད་ལས། གསང་བའི་ལས་ཀྱི་སྔོན་ལོགས་སུ། །བསྟན་པ་སྐྱོང་བའི་མགོན་པོ་ལ། །སྦྱིན་མཆོད་བསྲུང་བའི་ལས་ཆེན་བཅོལ། །ཞེས་པ་ལྟར་ཕྱི་མཚམས་རྒྱལ་ཐོ་དང་། དེ་ནས་རྡོ་རྗེ་ནང་དག་ཏུ། །ཞེས་སོགས་གསུངས་པ་ལྟར་འབར་བ་ལྟ་བའི་མཚམས་དང་། ཁྲོ་བོ་རོལ་པའི་མཚམས་དང་། མཚོན་ཆ་འཆོལ་པའི་མཚམས་དང་། སྲེག་བྱེད་མེའི་མཚམས་རྣམས་ཀྱིས་ནང་མཚམས་བཅད་དོ། །དགུ་པ་དམ་སྲི་མནན་པ་ནི། དེ་ལས། སྒྲུབ་པའི་རྩལ་འདི་མཐར་དབྱུང་ཞིང་། །རྐྱེན་གྱི་བར་ཆད་བསལ་བ་དང་། །གསང་བའི་མན་ངག་སྤྱད་པའི་ཕྱིར། །འཇུག་སྲེད་དམ་སྲི་མནན་པར་བྱ། །ཞེས་པ་ལྟར་བར་མཚམས་དམ་སྲི་མནན་དགོས་ཏེ། དེ་སྔོན་དམ་འདྲེས་པས་མཚམས་ཀྱི་སྦྱོར་བ་གཞན་གྱིས་མི་ཐུབ་པའི་ཕྱིར་རོ། །བཅུ་པ་སྒོ་བྱང་ནི། དེ་ལས། དེ་ནས་ལས་ཀྱི་གནས་སྐབས་འདིར། །ཞེས་སོགས་གསུངས་པ་ལྟར་སྒོའི་ཕྱིར་ལས་གཤིན་གྱི་རྟེན་བཀོད་པ་ལ་དགུག་བསྟིམ་མཆོད་ནས་བར་གཅོད་བསྲུང་བ་བཀའ་སྒོ་བའོ། །བཅུ་གཅིག་པ་ཚོགས་བསགས་པ་ནི། བསོད་ནམས་ཀྱི་དཔུང་བསྐྱེད་ཕྱིར་རྒྱབ་རིམ་ཅི་འགྲུབ་བྱེད་པའོ། །བཅུ་གཉིས་པ་གཞལ་ཡས་ཁང་བསྐྱེད་པ་ནི། དེ་ལས། ཆོས་ཉིད་བརྡལ་བའི་ནམ་མཁའ་ལ། །ཞེས་སོགས་དབང་སྒྱུར་ཐབས་ཀྱི་ཏིང་ངེ་འཛིན་གྱིས་གནས་བྱིན་གྱིས་བརླབ་ཅིང་། དེ་དང་རྗེས་འབྲེལ་དུ། ཕྱག་རྒྱ་ཆེན་པོའི་ཏིང་ངེ་འཛིན་གྱིས་འཁོར་དང་། ཚོགས་ཆེན་འདུས་པའི་ཏིང་ངེ་འཛིན་གྱིས་ཡོ་བྱད་བརླབ་པ་རྣམས་སོ། །གཉིས་པ་ཉེ་བསྙེན་ལ་གཉིས་ཏེ། སྡོམས་དང་། དེའི་དོན་བཤད་པའོ། །དང་པོ་ནི། སྒྲུབ་བྱང་ལས། གཉིས་པ་ཐིག་ཚོན་བྲི་བ་དང་། །གཏོར་མ་ཕྱི་མཚམས་རྫས་སྦྱང་དང་། །བསྐྱེད་དང་རྫས་རྣམས་དགོད་པ་དང་། །གླེང་གཞི་དབང་བསྐུར་བྱིན་དབབ་དང་། །བརྡ་སྒོ་བཤགས་དང་དམ་བཅའ་དང་། །བྱིན་དབབ་མ་ཊཾ་དམ་སྲི་མནན། །རྟགས་གདབ་མཆོད་པ་བྱིན་བརླབ་པ། །ལྔ་གཉིས་བདུན་གྱིས་རྫོགས་པར་འགྱུར། །ཞེས་པའོ། །གཉིས་པ་ལ་དོན་བཅུ་བདུན་ལས། དང་པོ་བྲི་བ་ནི། ཐིག་གིས་བྲི་བ་སྔར་སོང་བས། འདིར་སྟ་གོན་གྱི་ལྷ་ནམ་མཁར་བཏེག་ལ། རྩ་རྒྱུད་ལས། མཚོན་པ་ཁྲིད་པར་བྱེད་པ་ཡི། །རྡུལ་ཚོན་འདུ་བྱས་རྒྱུ་རྣམས་ལས། །བརྙན་མ་ཡི་ནི་དཀྱིལ་འཁོར་དག །སོ་སོར་བརྟགས་ཏེ་བཤད་པར་བྱ། །ཞེས་པ་ལྟར་ཚོན་གྱི་རྒྱུ་གྲངས་སོགས་ངེས་པས་ལག་པ་བྱིན་གྱིས་བརླབས་ཏེ། སྔར་བསྒྲུབས་པའི་ཚོན་གྱིས་ལྟེ་བའི་ཕུར་ཁུང་དགང་ཞིང་ཚོན་པྲ་བརྟགས་ནས། རྩ་བའི་དཀྱིལ་འཁོར་ཐུན་ཐུན་མིན་གང་བྱེད་ཀྱི་ལུགས་བཞིན་དུ་ཐིག་ཇི་ལྟར་བཏབ་པའི་གཞི་ལ་རིམ་པར་བཀྱེ་བར་བྱའོ། །གཉིས་པ་གཏོར་མ་དང་། གསུམ་པ་ཕྱི་མཚམས་ནི། ཕྱི་རོལ་དུ་ཆ་གསུམ་གཏོར་མ་བཏང་ལ། རྒྱལ་ཐོ་བཞི་གསོ་བའོ། །བཞི་པ་སྦྱང་བ་དང་། ལྔ་པ་བསྐྱེད་པ་ནི། དཀྱིལ་འཁོར་དང་སྒྲུབ་དབང་མཆོད་པའི་རྫས་རྣམས་ཀྱི་བགེགས་སྦྱངས་ཤིང་བསྲུངས་ནས། མཚན་མ་རྣམས་དེ་དང་དེའི་རྣམ་པར་བསྐྱེད་པས་བྱིན་གྱིས་བརླབ་པའོ། །དྲུག་པ་རྣམ་པ་དགོད་པ་ནི། རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་པའི་རིམ་པ་ལྟར་ལྷ་གནས་སོ་སོར་རང་རང་གི་མཚན་མ་བྲིས་འབུར་གང་རིགས་འགོད་པའམ་ཚོན་གྱིས་བྲི་ཞིང་། དཀྱིལ་འཁོར་གྱི་རྒྱན་དང་སྒྲུབ་དབང་གི་རྫས་རྣམས་སོ་སོའི་གནས་སུ་དགོད་པའོ། །འཁྲུགས་སྡེབས་ཀྱི་རིམ་པས་བདུན་པ་བྱིན་དབབ་པ་ནི། ཞི་ཁྲོའི་ལྷ་ཚོགས་མཁའ་ཁྱབ་ཏུ་སད་པ་བདག་གནས་དཀྱིལ་འཁོར་ཡོ་བྱད་དང་བཅས་པ་ལ་བསྟིམ་པས་གཟི་བྱིན་བསྐྱེད་དོ། །བརྒྱད་པ་གླེང་གཞི་དང་། དགུ་པ་དབང་བསྐུར་བ་ནི། དབང་གི་གླེང་གཞི་བཤད་པས་སྤྲོ་བ་བསྐྱེད་ནས་བསྙེན་པར་གནང་བའི་དབང་བསྐུར་བའོ། །བཅུ་པ་བརྡའ་སྒོ་དབྱེ་བ་ནི། ཡེ་ཤེས་བཞིའི་སྒོ་ཕྱེ་བས་སྣོད་བཅུད་དཀྱིལ་འཁོར་གྱི་རང་བཞིན་དུ་བཞུགས་པའི་ཞལ་མངོན་དུ་གྱུར་པ་ལ། ལྷ་དང་བདག་རིག་པའི་ངང་དུ་གཉིས་སུ་མེད་པར་བརྡ་ཕྱག་བྱ་བའོ། །དེ་ནས་ལས་ཀྱི་དབུ་དྲང་བ་དང་མཚམས་གཅོད་སྔོན་དུ་འགྲོ་བས། བཅུ་གཅིག་པ་བཤགས་པ། བཅུ་གཉིས་པ་དམ་བཅའ། བཅུ་གསུམ་པ་བྱིན་དབབ་པ་རྣམས་སྒྲུབ་ཐབས་ལྟར་བྱས་ལ། བཅུ་བཞི་པ་མ་ཊཱཾ་མནན་པ་ནི། གཟུགས་བཅས་ཏེ་དགུག་བསྒྲལ་སྤར་ལ་ཁོག་པ་གཞལ་ཡས་ཁང་དུ་བརླབ་པའོ། །བཅོ་ལྔ་པ་དམ་སྲི་མནན་པ་ནི། ཁྲོ་བཅུའི་སྟངས་སྟབས་ཀྱིས་བགེགས་དང་དམ་སྲི་གདུགས་པ་ཅན་རྣམས་གཟིར་ཞིང་མནན་པའོ། །བཅུ་དྲུག་པ་རྟགས་གདབ་པ་ནི། བདག་ཉིད་མ་མོ་དང་མཁའ་འགྲོ་རྣམས་ཀྱིས་རང་གི་སྡེ་ཚན་དུ་ཤེས་པའི་ཕྱིར་བྱུག་རྩི་གསུམ་གྱིས་རྟགས་གདབ་པའོ། །བཅུ་བདུན་པ་མཆོད་པ་བྱིན་གྱིས་བརླབ་པ་ནི་སྒྲུབ་ཐབས་ལྟར་རོ། །གསུམ་པ་སྒྲུབ་པ་ལ་གཉིས་ཏེ། སྡོམ་དང་། དེའི་དོན་བཤད་པའོ། །དང་པོ་ནི། སྒྲུབ་བྱང་ལས། གསུམ་པ་ཕྲིན་ལས་གཞུང་བསྲང་དང་། །ཛཔ྄་ཚོགས་ལྷག་མ་མཚམས་སྦྲེལ་དང་། །སྦྱིན་སྲེག་བཟོད་གསོལ་རང་སྟན་བརླབ། །ཏན་གན་སྐབས་སྦྱར་ཉུལ་ལེ་བཟློག །རྣམ་པ་བཅུ་ཡིས་སྒྲུབ་གཞུང་སྲོང་། །ཞེས་པའོ། །གཉིས་པ་ལ་བཅུ་ལས། དང་པོ་ལས་གཞུང་བསྲང་བ་ནི། རྩ་རྒྱུད་ལས། རྡོ་རྗེ་གསང་སྒོ་ཕྱེ་ནས་ནི། །ཏིང་འཛིན་དཀྱིལ་འཁོར་ཀུན་རྫོགས་ནས། །རང་བཞིན་ཡུལ་ནས་ཕབ་ནས་ནི། །སྒྲུབ་པའི་དཀྱིལ་འཁོར་དེར་རྫོགས་བྱ། །ཞེས་པ་ལྟར་རྩ་བའི་དཀྱིལ་འཁོར་ཐུན་མོང་དང་ཐུན་མོང་མ་ཡིན་པ་གང་བྱེད་ཀྱི་ཞི་ཁྲོའི་ཆོ་ག་གཞུང་དུས་དྲུག་ཏུ་སྲོང་བའོ། །གཉིས་པ་ཛཔ྄་ནི། ཛཔ྄་ཁང་ཕྱེ་ལ་དམ་ཡེ་འཕྲོ་འདུ་གསུམ་གསལ་བས་ཛཔ྄་འབུལ་བའོ། །གསུམ་པ་ཚོགས་དང་། བཞི་པ་ལྷག་མཚམས་སྦྲེལ་བ་ནི། ཛཔ྄་ཁང་བསྡུས་རྗེས་ཚོགས་མཆོད་དབུལ། གཏོར་མ་གསར་རྙིང་མཚམས་སྦྱར་ལ་ལྷག་མ་གཏོང་བའོ། །ལྔ་པ་སྦྱིན་སྲེག་ནི། རྒྱས་པའི་སྲེག་བླུགས་ཆོ་ག་བཞིན་དུ་དབུལ་ལོ། །དྲུག་པ་བཟོད་པར་གསོལ་བ་ནི། སྐོང་ཆེན་ལྔ་དག་གྱུར་དང་བཅས་པའི་ཆོ་གས་ཉམས་ཆག་བསྐང་ཞིང་བཟོད་པར་གསོལ་བའོ། །བདུན་པ་རང་སྟན་བརླབ་པ་ནི། འདུག་པའི་ཚེ་སྟན་བྱིན་གྱིས་བརླབ་ཅིང་འགྲོ་ན་ཕྲེང་བས་བསྲུང་དུ་གཞུག་གོ། །བརྒྱད་པ་ཏ་ན་དང་། དགུ་པ་ག་ན་ནི། སྒྲོལ་བ་དང་སྦྱོར་བ་སོ་སོའི་སྐབས་དང་སྦྱར་སྟེ། གནས་སུ་སྟོབ་པ་དང་བྱིན་གྱིས་བརླབ་པའི་ཐབས་ཀྱིས་མཆོད་དོ། །བཅུ་པ་ཉུལ་ལེ་བཟློག་པ་ནི། ཐུན་མཐར་དུས་དྲུག་གི་ཉུལ་ལེ་བརྟགས་ལ་རང་རང་གི་གཉེན་པོས་བཟློག་པར་བྱ་ཞིང་། དུས་དེར་དངོས་གྲུབ་སྟེར་བའི་ཕོ་ཉ་རེ་ཡང་འོང་བས་ཉུལ་ལེ་བཟློག་པའི་རྗེས་དེ་མ་ཐག་པར་བྱིན་དབབ་པའང་བྱ་བ་ཡིན་ནོ། །བཞི་པ་སྒྲུབ་པ་ཆེན་པོ་ལ་གཉིས་ཏེ། སྡོམས་དང་། དེའི་དོན་བཤད་པའོ། །དང་པོ་ནི། སྒྲུབ་བྱང་ལས། བཞི་པ་རྟགས་བཤམ་སྦྱིན་སྲེག་དང་། །དངོས་གྲུབ་བླང་དང་དབང་བསྐུར་དང་། །བཀྲ་ཤིས་སྨོན་ལམ་གཏོར་མ་གཏེར། །བསྡུ་དང་གནས་བསྲུང་ལྔ་གཉིས་གཅིག །ཅེས་པའོ། །གཉིས་པ་ལ་བཅུ་གཅིག་ལས། དང་པོ་རྟགས་དང་། གཉིས་པ་བཤམ་པ་ནི། དེ་ལྟར་བསྒྲུབས་པས་གྲུབ་པའི་རྟགས་མཚན་གཏན་ལ་ཕེབས་པ་དང་། ནུབ་ཐ་མ་ལ་དངོས་གྲུབ་ཀྱི་རྫས་བཤམ་ཞིང་། གསུམ་པ་སྦྱིན་སྲེག་ནི། དབང་གི་སྲེགས་བླུགས་ཕུལ་ནས། རྩ་རྒྱུད་ལས། རྨད་བྱུང་སྒྲུབ་པའི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །ཞེས་པ་ལྟར། བཞི་པ་དངོས་གྲུབ་བླང་ཞིང་། ལྔ་པ་དབང་བསྐུར་བ་ནི། སྒྲུབ་པ་པོ་བདག་ཉིད་དཀྱིལ་འཁོར་དུ་ཞུགས་ཏེ་ཚོམ་བུའི་འཁོར་དང་བཅས་པས་རང་དོན་དུ་དངོས་གྲུབ་བླངས་རྗེས། གཞན་དོན་སློབ་བུ་རྣམས་རྩ་རྒྱུད་ཀྱི་རྣལ་འབྱོར་འཇུག་པའི་ལེའུའམ། དགོངས་འདུས་ཀྱི་དུས་དཀྱིལ་འཁོར་དུ་གཞུག་པ་གང་རུང་གི་ཆོ་གས་དཀྱིལ་འཁོར་དུ་བཅུག་ནས། རྩ་རྒྱུད་ཀྱི་རྡོ་རྗེ་དབང་གི་ལེའུ་ལས་བཤད་པ་ལྟར་རྒྱུད་ལུགས་ཀྱི་དབང་ཆུ་བོ་བཞིས་བསྡུས་པའི་སུམ་ཅུ་རྩ་དྲུག་སྣོད་ཀྱི་ཐེག་ཚད་དང་སྦྱར་ཏེ་བསྐུར་པའོ། །དེ་ནས་རྗེས་ཆོ ག་གི་རིམ་པ། དྲུག་པ་བཀྲ་ཤིས། བདུན་པ་སྨོན་ལམ། བརྒྱད་པ་གཏོར་མ། དགུ་པ་གཏེར་རྣམས་ནི། རྩ་རྒྱུད་ལས། གནས་སུ་བཀྲ་ཤིས་ལ་སོགས་ཀྱིས། །སྒྲུབ་པ་རྫོགས་པར་མཐར་དབྱུང་ངོ་། །ཞེས་པས། དབང་དང་དངོས་གྲུབ་བརྟན་པའི་ཕྱིར་ཤིས་པ་བརྗོད་ཅིང་། ལས་བྱས་པ་དོན་ཡོད་པར་བྱ་བའི་ཕྱིར་མར་མེ་སྨོན་ལམ་གདབ། དེ་ལས། གཏོར་མ་ལ་སོགས་རྫས་རྣམས་ནི། །ཆ་གསུམ་དག་ཏུ་བགོས་ནས་ཀྱང་། །གཅིག་ནི་སྦྱིན་སྲེག་ལས་ཆོག་བྱ། །གཅིག་ནི་རྣལ་འབྱོར་ལོངས་སྤྱོད་གཏེར། །གཅིག་ནི་མཁའ་འགྲོའི་འཁོར་ཚོགས་བསྐྱང་། །ཞེས་པས་ལྟར་གཏོར་མ་ཆ་གསུམ་དུ་བགོས་ལ། ཞི་བའི་སྲེག་བླུགས་དང་གཏེར་དུ་སྦ། ཆ་གཅིག་གིས་གཏོར་སྐྱོང་བྱ་ཞིང་། ལྷག་ཆོག་དང་བརྟན་མའང་བསྐྱང་ངོ་། །བཅུ་པ་བསྡུ་བ་ནི། ཏིང་ངེ་འཛིན་གྱི་དཀྱིལ་འཁོར་འོད་གསལ་དུ་བསྡུ་ཞིང་། དེ་ལས་ལངས་ནས་མཚམས་བཀྲོལ་ཏེ། མཚན་མའི་དཀྱིལ་འཁོར་བསྡུས་ལ་རྡུལ་ཚོན་ཆུ་བོར་གཤེགས་སོ། །བཅུ་གཅིག་པ་གནས་བསྲུང་བ་ནི། སྒྲུབ་པ་པོ་རྣམས་ཞག་གཅིག་གི་རིང་ཕྱི་རོལ་དུ་མི་འགྲོ་ཞིང་མཚམས་རིམ་གྱིས་དགྲོལ་ལོ། ༈ །གཉིས་པ་མན་ངག་གི་ལུགས་མདོ་ཡོངས་རྫོགས་ཀྱི་དཀྱིལ་འཁོར་དུ་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་ཚུལ་ནི། སློབ་དཔོན་ཆེན་པོ་བདེ་བ་གསལ་མཛད་ཀྱི་ལས་ཐོའི་དགོངས་པ་ཡིན་པས་མན་ངག་གི་ལུགས་ཞེས་བྱ་སྟེ། སྨིན་མོས་ཀྱི་ཁྱད་པར་ནི། འདིར་ཉེ་བསྙེན་དང་སྒྲུབ་པ་གཉིས་ལ་ཞག་བདུན་རེའི་ཞལ་གསལ་ཡོད་པས་མོས་སློབ་གཙོ་ཆེ་ཞིང་། དེ་གཉིས་ཞག་གྲངས་འདྲ་བར་མཛད་པ་སྒྱུ་འཕྲུལ་ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷར་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞེས་པའི་ལུགས་དང་འདྲ་བར་སྣང་ཡང་། འདིར་ཉེ་བསྙེན་དང་སྒྲུབ་པ་གཉིས་རྒྱུད་ལུང་གི་དཀྱིལ་འཁོར་སོ་སོ་བ་ཡིན་པས་ཁྱད་པར་ཆེའོ། །དེ་ལྟར་ངེས་པར་བྱས་ནས། ཇི་ལྟར་བསྐུར་ཚུལ་ལ་གཉིས་ཏེ། ཕུན་སུམ་ཚོགས་པ་ལྔས་གཞི་བཟུང་བ། བསྙེན་སྒྲུབ་བཞིས་གཞུང་སྲོང་དང་འབྲེལ་བར་ཆུ་བོ་བཞིའི་དབང་བསྐུར་བའོ། །དང་པོ་ནི། ལས་ཐོ་ལས། དང་པོ་ཕུན་སུམ་ཚོགས་ལྡན་ཏེ། །ཚད་ཕྱིན་རབ་འབྱམས་སློབ་དཔོན་གྱིས། །སྣོད་དང་ལྡན་པའི་འཁོར་བསྡུས་ནས། །གཞུང་དང་མཐུན་པའི་གནས་དག་ཏུ། །ས་ཆོག་རྫོགས་བྱས་གནས་ཁང་ལྡན། །དགོས་པ་ཚང་བའི་ཡོ་བྱད་རྫོགས། །དུས་ཆ་བཞི་ཡི་དང་པོ་ལ། །ཉི་ཟླ་གཟའ་སྐར་ཚེས་གྲངས་བརྟག །ཅེས་གསུངས་ཏེ། དེ་དག་གི་དོན་ནི་སྔར་བཤད་ཟིན་ཏོ། །གཉིས་པ་ནི། སློབ་དཔོན་གཞིའི་བསྙེན་པ་སྔོན་དུ་ཐེམས་པས་སློབ་མ་བཟུང་ཞིང་། རང་གི་བསྙེན་པ་ཁ་གསོས་རྗེས་བསྙེན་སྒྲུབ་ལ་འཇུག་པ་ཡིན་པས། དེ་ལ་བཞི་སྟེ། བསྙེན་པའི་ཡན་ལག་ཕྱི་དབང་རྒྱུད་ཀྱི་ཆུ་བོ། ཉེ་བསྙེན་གྱི་ཡན་ལག་ནང་དབང་འབྱུང་བའི་ཆུ་བོ། སྒྲུབ་པའི་ཡན་ལག་སྒྲུབ་དབང་གྲགས་པའི་ཆུ་བོ། སྒྲུབ་ཆེན་གྱི་ཡན་ལག་གསང་དབང་རྫོགས་པའི་ཆུ་བོ་བསྐུར་བའི་རིམ་པའོ། །དང་པོ་ལ། གང་དུ་བསྐུར་བའི་དཀྱིལ་འཁོར་དང་། གང་བསྐུར་བྱའི་དབང་གཉིས་ལས། དང་པོ་ནི། དབང་དོན་བསྡུས་པ་ལས། ཡོ་ག་ལ་སོགས་ཐེག་དྲུག་ལ། །ཕྱི་དབང་རྒྱུད་ཀྱི་ཆུ་བོས་བྱ། །ཞེས་པས། ལྷ་མི་ནས་ཡོ་གའི་བར་བྱ་སྤྱོད་གཅིག་ཏུ་བྱས་པའི་དཀྱིལ་འཁོར་དྲུག་ཏུ་སྣང་བ་རིགས་བསྡུས་ན་མདོ་རྒྱུད་གཉིས་ལས། དང་པོ་ནི། ལས་ཐོ་ལས། དང་པོ་ཕྱི་དབང་རྒྱུད་ཆུ་བོ། །མཚན་ཉིད་སྡེ་གསུམ་ལུགས་དག་ཏུ། །ཉེའུ་འདོན་སྲོག་སྐྱོབ་སྦྱིན་པ་བཀྱེ། །ནད་གསོའི་སྨན་དང་ཀློག་གདོན་བྱ། །རྒྱུད་དགྲོལ་ཆོས་དང་ལམ་འཕྲང་བསལ། །སཱཙྪ་དཔང་སྐོངས་དཀྱིལ་འཁོར་མཆོད། །ལས་དང་པོ་ལ་ཕྱང་ཚུལ་བསྟན། །ཞེས་པ་སྟེ། གོང་དུ། ས་ཆོག་རྫོགས་བྱས། ཞེས་པ་ལྟར། ཐོག་མར་དཀྱིལ་འཁོར་ཁང་པ་གསར་རྙིང་གི་ཁྱད་ཀྱིས་འདོར་ལེན་ཤེས་པས་དཀྱིལ་ཆོག་ལྟར་སའི་ཆོ་ག་བྱ་ཞིང་། ས་སྦྱང་བའི་ཚེ་སྟེགས་བུ་ལ་བ་བྱུང་དང་སྤོས་ལྔས་ཆག་ཆག་འདེབས་པ་ལས་འདིར་བདུད་རྩི་ལྔ་མི་བསྲེ་བ་ཁྱད་པར་རོ། །སྤོས་ལྔའི་ངོས་འཛིན་ཀྱང་གཞན་དང་མི་འདྲ་སྟེ། འདིར་རྣལ་འབྱོར་སའི་སྒྲོན་མ་ལས། ག་བུར་ཙནྡན་ལི་ཤི་དང་། །རྒྱ་སྤོས་ཛཱ་ཏི་ཕ་ལ་ལྔ། །ཞེས་གསུངས་སོ། །དེ་ནས་དགེ་བའི་དཔུང་བསྐྱེད་པའི་ཕྱིར། ཉེའུ་འདོན་པ། སྲོག་བསླུ་བྱ་ཞིང་རི་རྒྱ་ཀླུངས་རྒྱ་བསྡམ་པ། འཕོངས་པ་ལ་བཟའ་བཏུང་དང་། ནད་པ་ལ་སྨན་སྦྱིན། ལམ་འཕྲང་བསལ་བ་སོགས་རྒྱབ་རིམ་ཅི་འགྲུབ་སྔོན་དུ་གཏོང་ཞིང་། ཁྱད་པར་གནས་དེ་ཉིད་དུ་སློབ་མ་འདུས་པ་རྣམས་ཀྱིས། འབུམ་ལྔ་དང་དཔང་སྐོངས་ཀྱི་གསུང་རབ་ཀློག །མཆེད་ཀྱི་མི་གྲངས་སམ་ལོ་གྲངས་ཀྱི་སཱཙྪ་གདབ། ཁྱད་པར་སྦྱིན་པའི་ནང་ཚན་ཕྱི་ནང་གི་ཐུགས་དམ་སྐོང་བའི་ཕྱིར་དུ། ཕྱི་ལྟར་ཆ་གསུམ་གྱི་དཀྱིལ་འཁོར་བཤམས་ནས་མགྲོན་རྣམ་བཞི་ལ་སྤྱིར་མཆོད་སྦྱིན་བྱ་ཞིང་། ཁྱད་པར་སྒོས་ཀྱི་མཆོད་གཏོར་ཀྱང་ཅི་ནུས་གཏོང་། ནང་ལྟར་ན་མ་མོའི་རྒྱུད་ལས། ཆོ་ག་འདི་ལ་བརྟེན་བྱེད་ན། །ཆ་མཐུན་སྤྲུལ་པའི་མ་མོ་མཉེས། །འཇིག་རྟེན་དབང་ཆེན་ཐམས་ཅད་ཀྱིས། །བྱང་ཆུབ་སེམས་ལྟར་བཀུར་སྟི་བྱེད། །ཚེ་དང་དབང་ཐང་འཕེལ་བ་དང་། །བསྒོ་བའི་ཚིག་རྣམས་ཉན་པར་འགྱུར། །ཞེས་དང་། ལྷ་བུ་དྲི་མེད་འཆི་བ་འདི་ཡིས་སླུས། །མི་ལ་སོགས་པ་གཞན་ལ་སྨོས་ཅི་དགོས། །ཞེས་པས་གནས་སྐབས་དང་། འདི་ཡི་ཡོན་ཏན་བསོད་ནམས་ཀྱིས། །ཕྱི་མའི་དངོས་གྲུབ་མཆོག་སྟེར་ཏེ། །བསོད་ནམས་མཆོག་ནི་བླ་ན་མེད། །མཐོ་རིས་ཐར་པའི་ལམ་ཐོབ་སྟེ། །རིག་འཛིན་ས་ལ་སྐྱེལ་བར་བྱེད། །འདི་ཡི་བསོད་ནམས་གོང་ཉིད་དུ། །ཆོ་ག་གཞན་གྱིས་རྙོགས་པ་མེད། །དམ་ལ་གནས་པའི་རྣལ་འབྱོར་པས། །ཆོ་ག་འདི་ལ་བརྟེན་བྱས་ན། །ཇི་ལྟར་བསམ་པ་བཞིན་དུ་འགྲུབ། །མ་དང་མཁའ་འགྲོས་བྱིན་གྱིས་བརླབ། །སངས་རྒྱས་རྣམས་ཀྱིས་དངོས་གྲུབ་སྟེར། །ཞེས་མཐར་ཐུག་གི་ཕན་ཡོན་ཀྱང་མཐའ་ཡས་པའི་ཕྱིར། །མ་མོ་གླིང་བཞིའི་མདོས་ཀྱིས་ཕྱི་ཆ་མཐུན་སྤྲུལ་པའི་མ་མོ་བསྐང་ཞིང་། མ་འགྲུབ་ན་སྒང་ཤར་ལས། ཕྱི་རབས་རྣལ་འབྱོར་དམ་ལྡན་ལ། །མ་མོ་ཁྲོས་ཤིང་ལོག་གྱུར་པར། །སྲིད་པ་སྤྱི་མདོས་མི་འགྲུབ་ན། །གླིང་གི་བསྐང་བ་ངས་བཤད་དོ། །ཞེས་སློབ་དཔོན་ཆེན་པོ་པདྨས་མ་མོ་རིན་ཆེན་ཕྲ་བཀོད་ལས་ཕྱུང་བ་གླིང་གི་བསྐང་བ་ལྟ་བུ་ཞིག་གིས་མཆོད་པས་དོན་འགྲུབ་བོ། །དེ་བཞིན་དུ་ནང་གསང་རང་བཞིན་གྱི་མ་མོ་སྟེ་བཞི་པོ་བསྐང་ཞིང་། ཁྱད་པར་ཚོགས་ལས་ཀྱིས་ཉམས་ཆག་སྐོང་བ་རྣམས་བྱའོ། །དེ་ནས་མཆེད་གསར་རྙིང་གི་ཁྱད་པར་གྱིས་བསྲེ་བསྣན་བྱས་ཏེ། གབ་པའི་དབང་ལེ་དྲུག་གི་དང་པོ་སྤྱི་དབང་ཆེན་པོའི་གླེང་གཞིའི་ལེའུ་ལས་གསུངས་པ་ཕྱག་རྡོར་ངན་སོང་གནས་འདྲེན་གྱི་དཀྱིལ་འཁོར་དུ་རྒྱུད་དགྲོལ་བའི་ཟབ་མོའི་ཆོས་དང་གླེང་གཞི་བཤད་པས་ངེས་ཤེས་བསྐྱེད་ནས། རྒྱུད་སྦྱོང་ཞིང་སྣོད་རུང་དུ་སྒྲུབ་པའི་ཕྱིར་མཆོག་དབང་བཅུ་དྲུག་སྒོ་འབྱེད་ཀྱི་ཚུལ་དུ་བསྐུར་ཏེ་ནུབ་དང་པོའི་བྱ་བའོ། །དེ་ནས་ནུབ་གཉིས་པ་ནས་བཟུང་ཕྱི་དབང་རྣམས་ཞག་གྲངས་རྒྱས་བསྡུས་སྐབས་དང་སྦྱར་ཏེ། ལྷ་མི། ཉན་ཐོས། རང་རྒྱལ། བྱང་སེམས་བཞིའི་དཀྱིལ་འཁོར་བཤམ་ཞིང་། སོ་སོའི་སྒྲུབ་མཆོད་གཏོར་ཆོ ག་དང་བཅས་སོང་བ་དང་། ལས་དང་པོ་པ་རྣམས་རང་རང་གི་ངེས་འབྱུང་སྟེ། ལྷ་མིས་ངན་སོང་། ཉན་རང་གིས་འཁོར་བ། བྱང་སེམས་ཀྱིས་མཐའ་གཉིས་ལས་ངེས་པར་འབྱུང་བའི་ཚུལ་བཞིས་སོ་སོའི་སྡོམ་པ་འབོགས་ཆོག་གིས་དཀྱིལ་འཁོར་དུ་འཇུག་པའོ། །གཉིས་པ་རྒྱུད་ནི། ལས་ཐོ་ལས། དེ་ནས་ཕྱི་རྒྱུད་ཐེག་པ་ཡིས། །རིགས་གསུམ་ཉི་ཤུ་རྩ་གཅིག་དང་། །རྡོ་རྗེ་དབྱིངས་ཀྱི་དཀྱིལ་འཁོར་བཞེངས། །སྤྱན་དྲངས་མཆོད་པ་སྦྱིན་སྲེག་སྙེག །བཟླས་བརྗོད་བསྙེན་སྒྲུབ་རྫོགས་པ་དང་། །ཞེས་པ་སྟེ། ཀྲི་ཡོ ག་གཉིས་རང་རང་གི་སྟ་གོན་སྔོན་དུ་འགྲོ་བས། ཀྲི་ཡ་རྩ་བའི་ལྷ་རིགས་གསུམ་ཉི་ཤུ་རྩ་གཅིག་གི་དཀྱིལ་འཁོར་དང་། ཡོ་ག་རྡོ་རྗེ་དབྱིངས་ཀྱི་དཀྱིལ་འཁོར་སོ་སོའི་ལུགས་བཞིན་བཞེངས་ནས། ཏིང་ངེ་འཛིན་གྱིས་བསྐྱེད་ཅིང་། ཡེ་ཤེས་པ་སྤྱན་དྲངས་ལ་མཆོད་བསྟོད་བཟླས་པ་དང་། འགྲུབ་ན་སྦྱིན་སྲེག་ཀྱང་དབུལ་ཞིང་། དེ་ལྟར་སྒྲུབ་མཆོད་གྲུབ་པ་དང་བདག་ཉིད་དཀྱིལ་འཁོར་དུ་ཞུགས་རྗེས། སློབ་མ་དཀྱིལ་འཁོར་དུ་གཞུག་པའི་ཆོ་ག་རྣམས་བྱ་བའོ། །གཉིས་པ་གང་བསྐུར་བྱའི་དབང་ནི། ལས་ཐོར། ཕྱི་དབང་རྩ་བ་བཅུ་པོ་ལ། །ཡན་ལག་བརྒྱ་རྩ་བརྒྱད་དུ་བསྐུར། །རྒྱུད་ཀྱི་ཆུ་བོའི་ལས་ཐོའོ། །ཞེས་གསུངས་ཏེ། དེ་ལ་ཕྱི་དབང་རྩ་བ་བཅུ་ནི། དབང་དོན་རྣམ་པར་འབྱེད་པ་ལས། དང་པོ་རྒྱལ་པོ་བཀའ་རྟགས་དབང་། །གཉིས་པ་རྟགས་ཀྱི་མཚན་མའི་དབང་། །གསུམ་པ་ཐུགས་རྗེ་གཟུངས་ཀྱི་དབང་། །བཞི་པ་ཤེས་རབ་བུམ་པའི་དབང་། །ལྔ་པ་ཁྱད་པར་གདན་གྱི་དབང་། །དྲུག་པ་རྒྱལ་སྲིད་རིན་ཆེན་དབང་། །བདུན་པ་བཀྲ་ཤིས་རྫས་ཀྱི་དབང་། །བརྒྱད་པ་ཤེས་བྱ་མ་རྨོངས་དབང་། །དགུ་པ་མཛེས་པ་རྒྱན་ཆའི་དབང་། །བཅུ་པ་དབང་སྒྱུར་མིང་གི་དབང་། །ཕྱི་འཁོར་སྐྱོང་བའི་རྒྱལ་པོར་འགྱུར། །ཞེས་སོ། །དེ་ལས་ཡན་ལག་རགས་པ་བརྒྱ་རྩ་བརྒྱད་དུ་དབྱེ་བ་ལ་བསྟན་བཤད་གཉིས་ལས། མདོར་བསྟན་ནི། དབང་དོན་རྒྱ་ཆེར་འབྱེད་པ་ལས། ཆུ་བོ་བཞི་ཡི་དབང་གི་རིམ་པ་ལས། །དང་པོ་རྒྱུད་ཀྱི་ཆུ་བོ་རྣམ་གྲངས་བཅུ། །དང་པོ་རྒྱལ་པོ་བཀའ་རྟགས་ཉི་ཤུ་དང་། །གཉིས་པ་མཚན་མ་རྟགས་དབང་ཉི་ཤུ་དྲུག །གསུམ་པ་ཐུགས་རྗེ་གཟུངས་ཀྱི་དབང་བཅུ་གཅིག །བཞི་པ་ཤེས་རབ་བུམ་པའི་དབང་ལ་གཅིག །ལྔ་པ་ཁྱད་པར་གདན་གྱི་དབང་ལ་གསུམ། །དྲུག་པ་རྒྱལ་སྲིད་རིན་ཆེན་དབང་བཅུ་དྲུག །བདུན་པ་བཀྲ་ཤིས་དབང་ལའང་བཅུ་དྲུག་གོ། །བརྒྱད་པ་ཤེས་བྱ་མ་རྨོངས་དབང་ལ་བདུན། །དགུ་པ་མཛེས་པ་རྒྱན་ཆའི་དབང་ལ་དྲུག །བཅུ་པ་དབང་བསྒྱུར་མིང་གི་དབང་ལ་གཉིས། །ཞེས་སོ། །གཉིས་པ་རྒྱས་བཤད་ནི། དེ་ལས། དང་པོ་རྒྱལ་པོ་བཀའ་རྟགས་ཉི་ཤུ་ནི། །ཅོད་པན་ལྷ་མོ་སེང་གེ་གླང་པོ་ཆེ། །རས་གོས་ཁྲུས་བུམ་མིང་འདོགས་རྒྱན་བྱེ་བྲག །ཡི་གེ་མདའ་གཞུ་བཙུན་མོ་ཤིང་རྟའི་དབང་། །ཆིབས་མཆོག་ཤན་གྲི་གསེག་པར་ན་བཟའ་ངུར། །འབྲས་ཆན་རྩྭ་སྟན་སྦྲང་རྩི་བུར་སྦྲང་སྟེ། །རྒྱ་ཆེ་རོལ་པའི་འགྲོ་འདུལ་མཚན་ཉིད་དབང་། ༈ །གཉིས་པ་མཚན་མ་རྟགས་དབང་ཉེར་དྲུག་ནི། །རི་རབ་མཆོད་རྟེན་དཔག་བསམ་ཤིང་རྒྱ་མཚོ། །ས་གཞི་བདུད་རྩི་དར་བུ་ཁྲི་རྐང་དབང་། །མེ་ཏོག་རྔ་ཡབ་རྡུལ་ཡབ་སྦྲང་ཡབ་དང་། །བླ་རེ་རྒྱལ་མཚན་གདུགས་དང་ཉ་རྒྱ་དང་། །སྐ་རགས་སྤོས་ལྔ་སྙིང་པོ་རིན་ཆེན་ལྔ། །འབྲུ་ལྔ་སྟག་ཚེར་སེང་ཚེར་ཤུ་དག་དང་། །དབང་ལག་ཀཎྜ་ཀ་སྟེ་ཀྲི་ཡའི་དབང་། །ཕྱག་ན་རྡོ་རྗེ་དབང་བསྐུར་རྒྱུད་ལས་བཀྲོལ། ༈ །གསུམ་པ་ཐུགས་རྗེ་གཟུངས་དབང་བཅུ་གཅིག་ལ། །སྐུ་གཟུགས་ཕྱག་རྒྱ་གསུང་གཟུངས་ཡིག་འབྲུ་དང་། །ཐུགས་ཀྱི་གསེར་ཐུར་མེ་ལོང་འཁོར་ལོ་དུང་། །ཡོན་ཏན་མེ་ཏོག་ཕྲེང་བ་ཕྲིན་ལས་ལ། །རྡོ་རྗེ་རིན་ཆེན་པདྨ་རྒྱ་གྲམ་མོ། ༈ །བཞི་པ་ཤེས་རབ་བུམ་པ་གཅིག་པུ་ཉིད། ༈ །ལྔ་པ་ཁྱད་པར་གདན་དབང་ཟིལ་གནོན་གྱི། །སེང་གེ་མུན་སེལ་ཉི་མ་ཚ་སེལ་ཟླ། ༈ །དྲུག་པ་རྒྱལ་སྲིད་རིན་ཆེན་བཅུ་དྲུག་ནི། །འཁོར་ལོ་རྟ་མཆོག་གླང་པོ་ནོར་བུ་དང་། །བློན་པོ་བཙུན་མོ་དམག་དཔོན་རིན་ཆེན་བདུན། །རལ་གྲི་མདའ་གཞུ་གནམ་རལ་ཤན་གྲི་དང་། །ཞྭ་དང་ཁབ་སྐུད་ན་བཟའ་ཕྱགས་མཆོག་དང་། །ཀྲིཥྞའི་པགས་གདན་ཉེ་བའི་རཏྣ་དགུ། ༈ །བདུན་པ་བཀྲ་ཤིས་རྫས་དབང་བཅུ་དྲུག་ནི། །ཡུངས་ཀར་ཞོ་ཕོར་རྩ་དུར་ལི་ཁྲི་མཚལ། །མེ་ལོང་འབུད་དུང་གིའུ་ཝཾ་བིལྦ་རྫས། །དཔལ་བེའུ་འཁོར་ལོ་པདྨ་རྒྱལ་མཚན་དང་། །བུམ་པ་གདུགས་དུང་གསེར་ཉ་རྟགས་བཀྲ་ཤིས། ༈ །བརྒྱད་པ་ཤེས་བྱ་མ་རྨོངས་དབང་བདུན་ནི། །རྒྱ་གྲམ་ཅོད་པན་པཱུ་ཛ་ཀ་པཱ་ལི། །ཕྱག་ཤིང་འཆད་པོད་རྡོ་རྗེ་དྲིལ་བུའི་དབང་། ༈ །དགུ་པ་མཛེས་པ་རྒྱན་ཆས་དབང་དྲུག་ནི། །དབུ་རྒྱན་དཔུང་རྒྱན་ཞབས་གདུབ་ཕྱག་གདུབ་དང་། །དོ་ཤལ་དར་གྱི་ཅོད་པན་དབང་བསྐུར་རོ། ༈ །བཅུ་པ་རྒྱུ་དང་འབྲས་བུའི་མིང་དབང་སྟེ། །དཀོན་མཆོག་སློབ་དཔོན་ཕ་རོལ་ཕྱིན་ལས་གྲས། །འཇིག་རྟེན་ཐ་མལ་ཞེན་ལྡོག་རྒྱུ་ཡི་མིང་། །རྡོ་རྗེ་དབང་ཕྱུག་ཅེས་པ་འབྲས་བུའི་མིང་། །དེ་ལྟར་ཕྱི་དབང་རྒྱུད་ཀྱི་ཆུ་བོ་ལ། །དབང་དོན་རྒྱས་པ་ཡན་ལག་བརྒྱ་རྩ་བརྒྱད། །ཅེས་གསུངས་པ་ལས། དང་པོ་རྒྱལ་པོ་བཀའ་རྟགས་ཉི་ཤུའི་དབང་ནི། མཚན་ཉིད་ཐེག་པའི་དབང་སྟེ། དེ་ཡང་ལྷ་མི། ཉན་ཐོས། རང་རྒྱལ་གསུམ་ལ་དེའི་ནང་ནས་བཏུས་ཏེ་དབང་བསྐུར་དགོས་པས། ལྷ་མིའི་ཐེག་པའི་དབང་ལ། ཅོད་པན་ནས་བཙུན་མོའི་བར་བཅུ་གཅིག་དང་། དེའི་སྟེང་དུ་ལྷག་པོར་རྒྱ་བོད་ཀྱི་ཡི་གེ་རྣམས་བསྐུར། ཉན་ཐོས་ཀྱི་ཐེག་པའི་དབང་ལ། དྲུག་པ་ཁྲུས་བུམ་དང་། བདུན་པ་མིང་དབང་གི་སྟེང་དུ། ཤིང་རྟ་ནས་སྦྲང་རྩིའི་བར་བརྒྱད་དང་། ལྷག་པོར་མུ་ནེའི་གཟུངས་རྣམས་བསྐུར། རང་རྒྱལ་གྱི་ཐེག་པའི་དབང་ལ། བུམ་པ། མིང་དབང་། ཤན་གྲི། ངུར་སྨྲིག །རྩྭ་གདན། སྦྲང་རྩི་སྟེ་དྲུག་གི་སྟེང་དུ་ལྷག་པོར་རྟེན་འབྲེལ་བཅུ་གཉིས་ཀྱི་གཟུགས་རྣམས་བསྐུར། བྱང་སེམས་ཀྱི་ཐེག་པ་ལ་རྒྱལ་པོ་བཀའ་རྟགས་ཀྱི་དབང་ཉི་ཤུ་པོ་ཚང་བར་བསྐུར་བའོ། །དེ་ནས་ཀྲི་ཡའི་དཀྱིལ་འཁོར་དུ་གཉིས་པ་མཚན་མ་རྟགས་དབང་ཉེར་དྲུག་དང་། ཡོ་གའི་དཀྱིལ་འཁོར་དུ་གསུམ་པ་ཐུགས་རྗེ་གཟུངས་དབང་བཅུ་གཅིག་ནས། བཅུ་པ་རྒྱུ་དང་འབྲས་བུའི་མིང་དབང་གི་བར་ཏེ་དྲུག་ཅུ་རེ་གཉིས་བསྐུར་བའོ། །དེ་ལྟར་ཕྱི་དབང་བརྒྱ་རྩ་བརྒྱད་ཀྱི་སྟེང་དུ། ལྷ་མི་ཉན་རང་གསུམ་དེའི་ནང་ནས་བཏུས་ཤིང་རང་རང་གི་སྒོས་ཆོས་ལྷག་པོ་དང་བཅས་སུམ་ཅུ་སོ་གཅིག་བྱུང་བ་རྣམས་བསྣན་པས་ཕྱི་དབང་ལ་ཆིག་བརྒྱ་སོ་དགུར་འགྱུར་ཞིང་། དེ་ཐམས་ཅད་རྫས་དབང་རྐྱང་པའི་གྲངས་ཡིན་པས། ད་དུང་དེའི་སྟེང་དུ་སོ་སོའི་ལྷ་དབང་བསྐུར་དགོས་ལ། དེ་ཡང་ཕྱི་དབང་གི་སྐབས་འདིར་དཀྱིལ་འཁོར་གྱི་ལྷ་གྲངས་དབྱེ་བསྡུའི་ཁྱད་པར་ལས་གྲངས་མཐའ་གཅིག་ཏུ་བཞག་དཀའ་བར་སྣང་ངོ་། །གཉིས་པ་ཉེ་བསྙེན་གྱི་ཡན་ལག་ནང་དབང་འབྱུང་བའི་ཆུ་བོ་བསྐུར་བ་ལ། གང་དུ་བསྐུར་བའི་དཀྱིལ་འཁོར་དང་། གང་བསྐུར་བྱའི་དབང་གཉིས་ལས། དང་པོ་ནི། དབང་དོན་བསྡུས་པ་ལས། བསྐྱེད་པ་མ་ཧཱ་ཡོ་ག་ལ། །ནང་དབང་འབྱུང་བའི་ཆུ་བོས་བྱ། །ཞེས་པས། ནང་དབང་གང་དུ་བསྐུར་བ་མ་ཧཱ་ཡོ་གའི་དཀྱིལ་འཁོར་ནི། ཚོགས་ཆེན་འདུས་པ་ཐུན་མོང་པའི་དཀྱིལ་འཁོར་ཏེ། འདྲེན་པའི་ལས་བྱང་ཆེ་ལེར་གསུངས་པ་ཉིད་ཡིན་པས། དེ་བཤད་པ་ལ་གསུམ་སྟེ། སྟ་གོན། དཀྱིལ་འཁོར་བཞེངས་སྒྲུབ། དེར་འཇུག་པའོ། །དང་པོ་ནི། ལས་ཐོར། དེ་ནས་ནང་དབང་ཆུ་བོའི་དུས། །དཔང་སྐོངས་སྦྱིན་སྲེག་སྟ་གོན་བྱ། །ཞེས་པས་དཔང་བསྐོངས་ཀློག་ཅིང་། ཞི་གཞུང་བསྲང་ནས་ཚོགས་དང་ཞི་བའི་སྦྱིན་སྲེག་དབུལ་བ་སྔོན་དུ་འགྲོ་བས། ཡན་ལག་རབ་གནས་རྫས་ལྔ་བརླབ་པ་དང་། ཡན་ལག་ཅན་ལྷ་བུམ་སློབ་མའི་སྟ་གོན་རྣམས་བྱ་བའོ། །གཉིས་པ་ལ། མཚམས་བཅད་པ། གནས་འཁོར་ཡོ་བྱད་བརླབ་པ། དཀྱིལ་འཁོར་བཞེངས་པ། སྒྲུབ་ཅིང་མཆོད་པའོ། །དང་པོ་ནི། དེ་ལས། ཆ་གསུམ་གསེར་སྐྱེམས་གསར་པ་འགྱེད། །རྒྱལ་ཆེན་ཕྱོགས་སྐྱོང་བཀའ་བསྒོས་ལ། །ཕྱི་མཚམས་བསྲུང་བའི་ཕྲིན་ལས་བཅོལ། །བར་མཚམས་ཁྲོ་བཅུས་མཚམས་བཅད་དེ། །འཇུག་སྲེད་མནན་ལ་ནང་མཚམས་བཅད། །ཅེས་པས་ནངས་པར་ཆ་གསུམ་གྱི་གཏོར་མ་དང་གསེར་སྐྱེམས་བཏང་། དྲག་སྔགས་ཐུན་བྲབ་སྤོས་རོལ་དང་བཅས་པའི་ཚམ་རྔམས་ཀྱིས་བགེགས་བསྐྲད་དེ། སྒྲུབ་ཁང་ནས་གོམ་པ་བདུན་ཅུ་གཞལ་བའི་སར་རྒྱལ་ཆེན་བཞི་དང་ཕྱོགས་སྐྱོང་བཅུའི་ཐོ་བསྡམས་པས་ཕྱི་མཚམ་བཅད། ཁྲོ་བཅུའི་ཕུར་བུ་སྔར་ས་ཆོག་དུས་བཏབ་ན་འདིར་ཕྲིན་ལས་བསྐུལ་བ་ཙམ་དང་མ་བཏབ་ན་འདིར་གདབ་ཅིང་། དམ་སྲི་མནན་པས་བར་མཚམས་བཅད། འབར་བ་ལྟ་བ། ཁྲོ་བོ་རོལ་པ། མཚོན་ཆ་འཆོལ་བ། སྲེག་བྱེད་མེ་སྟེ་བཞིས་ནང་མཚམས་གཅོད་ཅིང་། གཅད་བྱ་གཅོད་བྱེད་ཐམས་ཅད་དམིགས་མེད་དུ་རྒྱས་འདེབས་པས་གསང་བ་དེ་ཁོ་ན་ཉིད་ཀྱི་མཚམས་ཀྱང་བཅད་དོ། །གཉིས་པ་ནི། དེ་ལས། དབང་སྒྱུར་ཕྱག་རྒྱ་ཚོགས་ཆེན་རྫོགས། །གནས་འཁོར་ཡོ་བྱད་བྱིན་བརླབས་ནས། །ཞེས་པས། དབང་སྒྱུར་གྱི་ཏིང་ངེ་འཛིན་གྱིས་གནས། ཕྱག་རྒྱ་ཆེན་པོའི་ཏིང་ངེ་འཛིན་གྱིས་འཁོར། ཚོགས་ཆེན་འདུས་པའི་ཏིང་ངེ་འཛིན་གྱིས་ཡོ་བྱད་བརླབས་པ་རྣམས་སོ། །གསུམ་པ་ནི། དེ་ལས། གོ་མ་ཡེ་བཏང་གཟུངས་མ་བརླབ། །ཐིག་ཚོན་ཕྱག་རྒྱ་རྫས་ཆེན་དགོད། །ཚོགས་ཆེན་འདུས་པའི་དཀྱིལ་འཁོར་བཞེངས། །ཞེས་པ་སྟ་གོན་གྱི་ལྷ་བཏེགས་ནས། སྟེགས་བུ་ལ་དམ་རྫས་བདུད་རྩི་ལྔའི་གོ་མ་ཡེ་བཏང་ལ། རང་ཉིད་ལྷར་གསལ་བས་གཟུངས་མ་ཡུམ་དུ་བརླབས་པའི་གཉིས་ཀའི་གནས་ལྔར་རིགས་ལྔ་དང་མཁའ་གསང་བརླབ་པ་སོགས་བྱས་ཏེ། གནམ་ཐིག་དང་ས་ཐིག་གི་བྱ་བ་སྔར་ལྷ་སྟ་གོན་གྱི་སྔོན་དུ་བཏབ་ཟིན་པས། འདིར་ལག་པ་བྱིན་གྱིས་བརླབས་ནས་སྔར་བསྒྲུབས་པའི་རྡུལ་ཚོན་ཐིག་ཇི་ལྟར་བཏབ་པའི་གཞི་ལ་རིམ་པར་དགྱེ་བས། ཚོགས་ཆེན་འདུས་པས་ཐུན་མོང་བའི་དཀྱིལ་འཁོར། ཁྱམས་རིམ་དགུ་པའི་ལྟེ་བ་རྩིབས་བརྒྱད་པའི་ཁྲོ་དཀྱིལ་གྱི་སྟེང་དུ་ཞི་དཀྱིལ་བཀོད་དེ། ཞི་ཁྲོ་བརྩེགས་མའི་ལུགས་སུ་བཞེངས་ལ། ཕྱག་རྒྱའི་རྣམ་པ་དང་། མཆོད་རྫས་སྒྲུབ་དབང་གི་རྫས་སོགས་ཡོ་བྱད་ཐམས་ཅད་ཚང་བར་དགོད་ཅིང་བྱིན་གྱིས་བརླབ་པའོ། །བཞི་པ་ནི། དེ་ལས། ཞི་ཁྲོའི་ལམ་རིམ་གཞུང་བསྲངས་བསྐྱེད། །སྤྱན་དྲངས་མཆོད་བསྟོད་སྦྱིན་སྲེག་དབུལ། །བཟླས་པས་བསྙེན་སྒྲུབ་ཚོགས་མཆོད་བྱ། །ཞག་བདུན་དུས་དྲུག་རྫོགས་པ་དང་། །ཞེས་པས་དུས་དྲུག་ཏུ་ཞི་ཁྲོའི་རྟེན་དང་བརྟེན་པར་བཅས་པའི་ཏིང་ངེ་འཛིན་གྱི་དཀྱིལ་འཁོར་བསྒོམ་ཞིང་། རང་བཞིན་ཡེ་ཤེས་ཀྱི་འཁོར་ལོ་སྤྱན་དྲངས་ནས་གཉིས་སུ་མེད་པར་བྱས་པ་ལ། མཆོད་བསྟོད་སོགས་ལས་ཀྱི་གཞུང་བསྲངས་ནས། ཛཔ྄་ཁང་ཕྱེ་སྟེ་གསལ་བ་གསུམ་དང་ལྡན་པས་བཟླས་བསྙེན་བྱ་ཞིང་། སྦྱིན་སྲེག་དང་ཚོགས་གཏོར་རྣམས་ཀྱང་གཏོང་སྟེ་དཀྱིལ་འཁོར་སྒྲུབ་མཆོད་དོ། །གསུམ་པ་འཇུག་པ་ནི། དེ་ལས། ཀུན་བྱས་དབང་ཕྱུག་རིག་པས་འཇུག །བུ་རྣམས་ཕྲིན་གདགས་སེམས་བསྐྱེད་དེ། །དཀྱིལ་འཁོར་འཇུག་པ་རིམ་བཞིན་བྱ། །ཞེས་པས་སློབ་དཔོན་གྱིས་སྒྲུབ་མཆོད་ཀྱི་བྱ་བ་ཀུན་བྱས་ནས། ཞག་བདུན་རྫོགས་པའི་ཐ་མ་ལ་བདག་ཉིད་དཀྱིལ་འཁོར་དུ་རིག་པས་ཞུགས་རྗེས། སློབ་བུ་རྣམས་ཀུན་རྫོབ་དང་དོན་དམ་པའི་བྱང་ཆུབ་ཏུ་སེམས་བསྐྱེད་དེ་དཀྱིལ་འཁོར་དུ་ཕྱི་དང་ནང་གི་འཇུག་པ་རིམ་བཞིན་བྱའོ། །གཉིས་པ་གང་བསྐུར་བྱའི་དབང་ནི། དེ་ལས། དེ་ལ་ནང་དབང་བཅུ་གཅིག་པོ། །ཡན་ལག་དྲུག་བརྒྱ་དྲུག་གིས་བསྐུར། །འབྱུང་ཆུའི་རབ་གནས་ལས་ཐོའོ། །ཞེས་གསུངས་ཏེ། དེ་ལ་ནང་དབང་རྩ་བ་བཅུ་གཅིག་ནི། དབང་དོན་རྣམ་པར་འབྱེད་པ་ལས། དེ་ནས་ནང་དུ་འཇུག་པར་བྱ། །དང་པོ་གསང་བ་ཉན་པའི་དབང་། །གཉིས་པ་རྣམ་བཞི་ལས་ཀྱི་དབང་། །གསུམ་པ་རྒྱལ་ཐེབ་འཆད་པའི་དབང་། །བཞི་པ་རྡོ་རྗེ་རྒྱལ་པོའི་དབང་། །ལྔ་པ་ཟིལ་གནོན་གདན་གྱི་དབང་། །དྲུག་པ་ཁྱད་པར་རིན་ཆེན་དབང་། །བདུན་པ་ཕྱག་རྒྱ་གཟུགས་བརྙན་དབང་། །བརྒྱད་པ་ཡེ་ཤེས་ཐུགས་ཀྱི་དབང་། །དགུ་པ་སྐུ་གསུང་ཐུགས་ཀྱི་དབང་། །བཅུ་པ་བདུད་འདུལ་བཀྲ་ཤིས་དབང་། །བཅུ་གཅིག་གསང་བ་མིང་གི་དབང་། །ཞེས་སོ། །དེ་ལས་ཡན་ལག་དྲུག་བརྒྱ་དྲུག་ཏུ་དབྱེ་བ་ལ་བསྟན་བཤད་གཉིས་ལས། མདོར་བསྟན་ནི། དབང་དོན་རྒྱ་ཆེར་འབྱེད་པ་ལས། གཉིས་པ་འབྱུང་བའི་ཆུ་བོ་བཅུ་གཅིག་ལ། །དང་པོ་གཉིས་གསུམ་བཞི་ལྔ་རེ་རེ་ལ། །དྲུག་བདུན་བདུན་ལ་ལྔ་བརྒྱ་བརྒྱད་ཅུ་གསུམ། །བརྒྱད་དགུ་རེ་རེ་བཅུ་པ་བཀྲ་ཤིས་བརྒྱད། །བཅུ་གཅིག་གསང་བ་མིང་གི་དབང་དེ་གཅིག །ཅེས་སོ། ༈ །གཉིས་པ་རྒྱས་བཤད་ནི། དེ་ལས། དང་པོ་གསང་བ་ཉན་དབང་རྣ་བ་ལ། །རཏྣ་རིགས་ཀྱིས་བསྐུར་དང་བསྒྲགས་རྫས་བྱིན། ༈ །གཉིས་པ་རྣམ་བཞི་ལས་དབང་ལག་པ་ལ། །ལས་ཀྱི་རིགས་ཀྱིས་བསྐུར་དང་བསྒྲགས་རྫས་བྱིན། ༈ །གསུམ་པ་རྒྱལ་ཐེབ་འཆད་དབང་ལྕེ་ལ་སྟེ། །པདྨ་རིགས་ཀྱིས་བསྐུར་དང་བསྒྲགས་རྫས་བྱིན། ༈ །བཞི་པ་རྡོ་རྗེ་རྒྱལ་དབང་སྤྱི་བོ་ལ། །དེ་བཞིན་རིགས་ཀྱིས་དབང་བསྐུར་བསྒྲགས་རྫས་བྱིན། ༈ །ལྔ་པ་ཟིལ་གནོན་གདན་དབང་རྐང་པ་ལ། །འཇིག་རྟེན་དྲེགས་པ་ཁྱོ་ཤུགས་གདན་དབང་བསྐུར། ༈ །དྲུག་པ་ཐུན་མོང་མ་ཡིན་རཏྣ་བདུན། །འཁོར་ལོས་དབང་བསྐུར་སྐྱེ་བ་བཞིར་དབང་སྒྱུར། །བཙུན་མོ་འབྱུང་བ་བཞི་ཡིས་མཉེས་པ་འབུལ། །དམག་དཔོན་ཚུལ་དགུས་ཕ་རོལ་དམག་དཔུང་འཇོམས། །ཁྱིམ་བདག་ཚད་མེད་བཞི་ཡིས་ཆབ་སྲིད་འཛིན། །གླང་ཆེན་སྟོབས་བཅུས་བདག་དང་གཞན་དོན་མཛད། །རྟ་མཆོག་རྫུ་འཕྲུལ་མྱུར་མགྱོགས་གནས་སླེབས་བྱེད། །ནོར་བུ་རིན་ཆེན་རྣམ་བཞི་རེ་འདོད་སྐོང་། ༈ །བདུན་པ་ཕྱག་རྒྱ་གཟུགས་བརྙན་དབང་བསྐུར་བ། །དཀྱིལ་འཁོར་དགུ་བརྩེགས་དཔལ་གྱི་ཕྱག་རྒྱའི་རིམ། །ཀུན་གྱི་སྤྱི་དཔལ་ཀུན་བཟང་བདེ་ཆེན་དཀྱིལ། །ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དང་། །ཆེ་མཆོག་ཡབ་ཡུམ་ཆོས་སྐུ་རྫོགས་པའི་དཀྱིལ། །ཁྲག་འཐུང་འབར་བ་རྩ་བའི་དཀྱིལ་འཁོར་དང་། །ཌཱ་ཀི་ལས་ཀྱི་དཀྱིལ་འཁོར་སུམ་ཅུ་གཉིས། །སྐྱེས་བུ་ཀིང་ཆེན་བཅོ་བརྒྱད་སྒྲོལ་བའི་དཀྱིལ། །ཁྲག་འཐུང་རོལ་དཀྱིལ་སྤྲུལ་པའི་དཀྱིལ་འཁོར་དང་། །མགྱོགས་འགྲོ་ཡིད་ཀྱིས་དཀྱིལ་འཁོར་ཕྱོགས་ཕོ་ཉ། །དམ་ཚིག་ཆེན་པོ་མ་སྲིང་འོག་ཕོ་ཉ། །རྡོ་རྗེ་འཆང་གི་དཀྱིལ་འཁོར་སློབ་དཔོན་དབང་། །བདེ་ཆེན་གཅིག་དང་བཞི་བཅུ་རྩ་གཉིས་དང་། །ཆེ་མཆོག་གཉིས་དང་བདུན་ཅུ་རྩ་བརྒྱད་དང་། །དྲུག་བཅུ་བཞི་བཅུ་སོ་གཉིས་བཅོ་བརྒྱད་བདུན། །བཞི་དང་སུམ་བརྒྱ་དཀྱིལ་འཁོར་བརྒྱད་ལྷའི་གྲངས། །དཀྱིལ་འཁོར་ཐ་མ་བྱིན་བརླབས་སློབ་དཔོན་དབང་། །དཀྱིལ་འཁོར་དགུ་ཡི་རིམ་པར་སློབ་དཔོན་གདན། །མ་གཏོགས་ལྷ་ལ་ལྔ་བརྒྱ་བརྒྱད་ཅུ་གསུམ། ༈ །བརྒྱད་པ་ཡེ་ཤེས་ཐུགས་དབང་གནས་ལྔར་བསྐུར། །ཡེ་ཤེས་ལྔའམ་དགུ་རྟགས་མེ་མར་བྱིན། ༈ །དགུ་པ་སྐུ་གསུང་ཐུགས་ཀྱི་དབང་བསྐུར་བ། །སྤྱི་བོ་ལྕེ་སྙིང་ལྟེ་བ་གསང་གནས་སུ། །སྐུ་གསུང་ཐུགས་ཡོན་ཕྲིན་ལས་ལྔ་རེ་རེ། །ཕྱག་རྒྱ་སྔགས་དང་ཏིང་འཛིན་ལྡན་པས་བསྐུར། ༈ །བཅུ་པ་བདུད་འདུལ་བཀྲ་ཤིས་རྫས་བརྒྱད་ལུས། ༈ །བཅུ་གཅིག་གསང་བ་མིང་དབང་རྣ་སྙིང་ལ། །རྡོ་རྗེ་རྩལ་གྱི་ཐིག་ལེ་སྦྱིན་པར་བྱ། །དེས་ན་ནང་དབང་འབྱུང་བའི་ཆུ་བོ་ལ། །དྲུག་བརྒྱ་དྲུག་ཏུ་གྱེས་པ་བསྐུར་བར་བྱ། །ཞེས་གསུངས་སོ། །འདིར་བདུན་པ་ཕྱག་རྒྱ་གཟུགས་བརྙན་གྱི་སྐབས་སུ། བདེ་ཆེན་གཅིག་དང་བཞི་བཅུ་རྩ་གཉིས་དང་། །ཞེས་པ་ལ། དཔེ་ཁ་ཅིག་ཏུ། བདེ་ཆེན་གཅིག་དང་བརྒྱད་ཅུ་རྩ་གཉིས་དང་། །ཞེས་འབྱུང་བ་ལྟར། ཟུར་ཧམ་གྱི་ཕྱག་ལེན་རྒྱུན་བཞིན་བྲིས་པའི་ཙཀླིར་ཡང་ཞི་བ་ཞེ་གཉིས་ཀྱི་སྟེང་དུ་རིགས་ཆུང་གི་སེམས་དཔའ་ཡབ་ཡུམ་བཞི་བཅུ་བསྣན་ཏེ། ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་གྲངས་ལ་བརྒྱད་ཅུ་རྩ་གཉིས་སུ་མཛད་པ་ནི་མི་རིགས་ཏེ། འདྲེན་པའི་ལས་བྱང་ཆེ་ལེར། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས་སྐད་ཅིག་ཡུད་ལ་ནམ་མཁའ་གང་ནས་གང་དུ་ཁྱབ་པ་ཐམས་ཅད་དུ་དབང་གི་དཀྱིལ་འཁོར་ཞི་ཁྲོའི་ལྷ་ལྔ་བརྒྱ་དང་བརྒྱད་ཅུ་རྩ་གསུམ་གྱིས་གང་བར་མཛད་ནས། ཞེས་སྤྱི་བསྡོམས་ཀྱི་གྲངས་བཤད་ནས། དེ་དཀྱིལ་འཁོར་དུ་འགོད་པའི་ཚེ། བང་རིམ་དང་པོའི་སྟེང་དུ་ཞི་བའི་ལྷ་ཞེ་གཉིས་དགོད། ཅེས་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་གྲངས་ཞེ་གཉིས་སུ་གསུངས་པ་དང་། ཕྱོགས་མཚམས་སྟེང་འོག་དང་མཎྜལ་གྱི་རྩར་ཕུར་པའི་ལྷ་ཞེ་གཉིས་དགོད་དོ། །ཞེས་ཁྲག་འཐུང་རོལ་པ་དང་སྤྲུལ་པའི་དཀྱིལ་འཁོར་གཉིས་སོ་སོར་ཕྱེ་སྟེ། ཕྱི་མ་ལ་རྡོ་རྗེ་གཞོན་ནུ་ཁྲོ་བཅུ་ཡབ་ཡུམ་ཁྲ་ཐབས་ཉི་ཤུ་དང་བཅས་གསུངས་པས་ན། ད་ལྟའི་དབང་ཙཀ་རྣམས་སུ་བསྲུང་འཁོར་གྱི་ཁྲོ་བཅུ་ཡབ་ཡུམ་ཙམ་ལས་མི་འབྱུང་ཡང་། ཁྲ་ཐབས་ཉི་ཤུ་བསྣན་དགོས་པར་མངོན་ཞིང་། ཧེ་རུ་ཀ་འདུས་པ་ལས་ཀྱང་། ཕྱི་རོལ་ཁྲོ་བཅུ་ཡབ་ཡུམ་སྟེ། །ཕྲ་མེན་ཉི་ཤུ་ཡང་སྤྲུལ་དག །བྱེ་བ་ཕྲག་ནི་ས་ཡ་འཕྲོ། །ཞེས་གསུངས་པའི་ཕྱིར་རོ། །གསུམ་པ་བསྒྲུབ་པའི་ཡན་ལག་སྒྲུབ་དབང་གྲགས་པའི་ཆུ་བོ་བསྐུར་བ་ལ། གང་དུ་བསྐུར་བའི་དཀྱིལ་འཁོར་དང་། གང་བསྐུར་བྱའི་དབང་གཉིས་ལས། དང་པོ་ནི། དབང་དོན་བསྡུས་པ་ལས། རྫོགས་པ་ཨ་ནུ་ཡོ་ག་ལ། །སྒྲུབ་དབང་གྲགས་པའི་ཆུ་བོ་བྱ། །ཞེས་པས་སྒྲུབ་དབང་གང་དུ་བསྐུར་བ་ཨ་ནུ་ཡོ་གའི་དཀྱིལ་འཁོར་ནི། ཚོགས་ཆེན་འདུས་པ་ཐུན་མོང་མ་ཡིན་པའི་དཀྱིལ་འཁོར་ཏེ། རྩ་རྒྱུད་དུ་དེའི་སྒྲུབ་ལུགས་ཀྱི་ལེའུ་ལས་གསུངས་པ་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་དེ་ཉིད་ཡིན་པས། དེ་བཤད་པ་ལ་དྲུག་སྟེ། མཚམས་བཅད་པ། གནས་འཁོར་ཡོ་བྱད་བརླབ་པ། དཀྱིལ་འཁོར་བཞེངས་པ། སྒྲུབ་ཅིང་མཆོད་པ། ནུབ་ཐ་མར་སློབ་དཔོན་འཇུག་ཅིང་དངོས་གྲུབ་བླང་བ། སློབ་མ་དཀྱིལ་འཁོར་དུ་གཞུག་པའོ། །དང་པོ་ནི། ལས་ཐོར། དེ་ནས་སྒྲུབ་དབང་གྲགས་ཆུའི་དུས། །ཕྱི་ནང་བར་མཚམས་ནང་དང་འདྲ། །གཤིན་རྗེའི་རྒྱལ་པོའི་སྒོ་བྱང་བྱ། །ཕྲིན་ལས་བཅོལ་ཏེ་བར་མཚམས་བཅད། །ཅེས་པ་སྟེ། ནང་དབང་དང་སྒྲུབ་དབང་གཉིས་དགོས་དབང་གིས་དུས་ཚིགས་སོ་སོར་བཅད་ནས་བསྐུར་བའི་ཚེ། ཕྱི་མཚམས་རྒྱལ་ཐོ་དང་ཕྱོགས་སྐྱོང་གི་ཐོ་སྡོམ་ཞིང་། བར་མཚམས་ཕྱོགས་སྐྱོང་ཕུར་གདབ་དང་དམ་སྲི་གནོན་པའང་སྒེར་དུ་བྱ་དགོས་མོད། འདིར་བསྙེན་སྒྲུབ་བཞི་སྟན་ཐོག་གཅིག་ཏུ་བྱེད་པའི་ལུགས་ལྟར་ན། ཕྱི་མཚམས་ཀྱི་ཐོ་གཉིས་པོ་གསོ་ཞིང་། བར་མཚམས་ལ་གསུམ་ལས། མཚམས་ཕུར་ལ་ཕྲིན་ལས་བསྐུལ་བ་དང་། དམ་སྲི་སྔར་མནན་ཟིན་གྱི་སྟེང་དུ་བྲོས་གཟིར། ཁྱད་པར་འདིར་གཤིན་རྗེའི་རྒྱལ་པོའི་སྒོ་བྱང་འདོགས་པའོ། །ནང་མཚམས་འབར་བ་ལྟ་བའི་མཚམས་སོགས་བཞི་ནང་དབང་གི་དུས་དང་འདྲ་བར་བཅད་དོ། །གཉིས་པ་ནི། དེ་ལས། གནས་དང་འཁོར་དང་ཡོ་བྱད་བརླབ། །ཅེས་པས་ཏིང་ངེ་འཛིན་གསུམ་གྱིས་སྔར་ལྟར་བྱིན་གྱིས་བརླབ་པའོ། །གསུམ་པ་ནི། དེ་ལས། གོ་མ་ཡེ་བཏང་ཐིག་གཡོག་བརླབ། །རང་བཞིན་ཏིང་འཛིན་གཟུགས་བརྙན་ཐིག །ཚོན་བཀྱེ་ཕྱག་རྒྱ་མར་མེ་དགོད། །མཆོད་པའི་བྱེ་བྲག་ཚང་བར་དགྲམ། །དུར་ཁྲོད་གསང་བའི་ལུགས་སུ་བཞེངས། །ཞེས་པས། སྟེགས་བུར་བདུད་རྩི་ལྔས་གོ་མ་ཡེ་བཏང་ལ་ཐིག་གཡོག་བརླབས་ཏེ། སྟེང་གི་ནམ་མཁའ་རང་བཞིན་ཡེ་ཤེས་ཀྱི་ཐིག་དང་། འོག་ཏུ་ས་གཞི་ལ་གཟུགས་བརྙན་ལས་ཀྱི་ཐིག་ཆོ་ག་བཞིན་དུ་གདབ་ཅིང་། ཐིག་ཇི་ལྟར་བཏབ་པའི་གཞི་ལ་ཚོན་རིམ་པར་བཀྱེ་བས་རྩ་རྒྱུད་ཀྱི་ཚོགས་ཆེན་འདུས་པའི་སྒྲུབ་ལུགས་ཀྱི་ལེའུ་ལྟར། འོག་ཁང་ཁྲོ་བོའི་དཀྱིལ་འཁོར་ལྟེ་བ་རེའུ་མིག་དགུ་པའི་ཕྱི་རོལ་འཁོར་ལོ་རྩིབས་བརྒྱད་པ་དྲུག་རིམ་གྲུ་ཆད་དང་བཅས་པའི་མཐར་ཁྱམས་གྲུ་བཞི་རིམ་པ་ལྔས་བསྐོར་བའི་ནང་མ་བཞིའི་ཕྱོགས་རེར་སྒོ་སྒོ་ཁྱུད་ཅན་རྒྱན་མེད་གཉིས་གཉིས་ཏེ་བརྒྱད་དང་། ཁྱམས་ལྔ་པ་ལ་སྒོ་རྒྱན་རྟ་བབས་སོགས་ཀྱིས་བརྒྱན་པའི་སྒོ་གཅིག་སྟེ། སྒོ་དགུ་པའི་དཀྱིལ་འཁོར་དུར་ཁྲོད་གསང་བའི་ལུགས་སུ་བཞེངས་ཤིང་། སྟེང་ཁང་ཞི་དཀྱིལ་ནང་དབང་གི་སྐབས་དང་འདྲ་བ་སྦྲེལ་བའི་ཞི་ཁྲོ་བརྩེགས་མའི་དཀྱིལ་འཁོར་བྲིས་ལ། བགེགས་བསྐྲད་དེ་མཚན་མ་བྱིན་གྱིས་བརླབས་ནས་སྐུ་རྟེན་སོགས་ཕྱག་རྒྱའི་རྣམ་པ། སྒྲུབ་རྟེན་མར་མེ་སོགས་སྒྲུབ་དབང་གི་རྫས། མཆོད་པའི་ཡོ་བྱད་དང་དཀྱིལ་འཁོར་གྱི་རྒྱན་རྣམས་ཚུལ་བཞིན་དུ་དགོད་པའོ། །བཞི་པ་ལ་སྦྱོར་དངོས་གཉིས་ལས། སྦྱོར་བ་སྒྲུབ་པའི་འགོ་འཛིན་པའི་ལས་ཕྲེང་ན། དེ་ལས། གསང་སྒོ་ཕྱེ་ལ་བརྡ་ཕྱག་འཚལ། །རྟགས་གདབ་རྒྱན་གྱིས་ལེགས་པར་བརྒྱན། །བྱིན་དབབ་ཕྱག་འཚལ་དམ་ཡང་བཅའ། །དངོས་གྲུབ་གསོལ་ཞིང་བསྐང་དང་བཤགས། །ལས་ཀྱི་ཕྲེང་བ་རྫོགས་བྱས་ཏེ། །ཞེས་པས་བརྡ་སྒོ་ཕྱེ་ལ་བརྡ་ཕྱག་འཚལ། དཔོན་སློབ་ཐམས་ཅད་ལ་རྟགས་གདབ་ཅིང་། གོས་རྒྱན་བཟང་པོ་བསྟར་ཏེ་དཀྱིལ་འཁོར་ལ་བྱིན་དབབ། གྲལ་ཕྱག་དང་ཚུལ་ཕྱག་བྱས་ཏེ་སྟན་ལ་འདུག་ནས། དམ་བཅའ་དང་དངོས་གྲུབ་གསོལ་ཞིང་བསྐང་བཤགས་བྱ་བ་རྣམས་སོ། །དངོས་གཞི་ལས་གཞུང་བསྲང་བ་ནི། དེ་ལས། ཏིང་འཛིན་བསྐྱེད་དང་རང་བཞིན་དྲངས། །གཉིས་མེད་མཆོད་པ་རིམ་བཞིན་འབུལ། །བཟླས་བརྗོད་བསྙེན་སྒྲུབ་རྣམ་བཞི་བསྲང་། །སྟོང་ཚིགས་རྐང་ཐོན་མཆོད་པ་བྱ། །དུས་དྲུག་ལས་ཕྲེང་ཚོགས་མཆོད་སྙེག །དུས་དྲུག་བསྐང་གསོའི་ཆོ་ག་བྱ། །དུས་དྲུག་བར་གཅོད་ཉུལ་ལེ་བཟློག །ཅེས་པས་སྒྲུབ་པ་ཞག་གྲངས་ཇི་ཙམ་བྱེད་པའི་དཀྱིལ་འཁོར་ཞག་གི་ཆོག་ཁྲིགས་ཏེ། ལས་ཀྱི་དབུ་དྲང་བ་སོགས་ལས་གཞུང་གི་སྔོན་འགྲོ་ཇི་ལྟར་རིགས་པ་སྔོན་དུ་འགྲོ་བས། དངོས་གཞི་ཉིན་མཚན་དུས་དྲུག་ཏུ། ཞི་ཁྲོའི་དམ་ཚིག་གི་དཀྱིལ་འཁོར་བསྐྱེད་པ། རང་བཞིན་ཡེ་ཤེས་ཀྱི་དཀྱིལ་འཁོར་སྤྱན་དྲང་བ། དམ་ཡེ་གཉིས་མེད་དུ་བྱས་པ་ལ་མཆོད་པ། ཛཔ྄་ཁང་ཕྱེ་སྟེ་གསལ་བ་གསུམ་གྱིས་ཛཔ྄་བཟླས་བྱ་བ་སྟེ། ལས་ཀྱི་རིམ་པ་རྣམ་པ་བཞིས་བསྙེན་སྒྲུབ་ཀྱི་གཞུང་བསྲང་། ཐུན་མཐར་ལྷའི་རྐང་ཐོན་དུ་སྟོང་ཚིགས་ཀྱིས་མཆོད་ཅིང་བསྟོད། ཚོགས་མཆོད། སྐོངས། ཉུལ་ལེ་འདུལ་བ་རྣམས་ཀྱང་ཐུན་དྲུག་ཀའི་མཇུག་ཏུ་བྱ་བ་ཡིན་ནོ། །ལྔ་པ་ནི། དེ་ལས། ཞག་བདུན་ཐ་མར་སློབ་དཔོན་འཇུག །དངོས་གྲུབ་རྣམ་བཞི་རིམ་གྱིས་བླང་། །ཛཔ྄་སྐོར་དང་པོས་ཐུགས་དམ་བསྐུལ། །བར་དུ་སྦྱིན་སྲེག་མཆོད་པ་བྱ། །ཐ་མ་གནད་ལ་དབབ་པ་དང་། །གཤེགས་ཤིང་གསོལ་བྱང་བསྟིམ་པར་བྱ། །ཞེས་པས་སྒྲུབ་ཞག་བདུན་རྫོགས་པའི་ཐ་མ་ལ་སློབ་དཔོན་བདག་ཉིད་དཀྱིལ་འཁོར་དུ་ཞུགས་ནས་ལྷ་དང་རྫས་ལས་དངོས་གྲུབ་བླང་སྟེ། དེ་ལ་ལྷ་ལས་བླང་བ་ལ་བཞི་ལས། དང་པོ་དངོས་གྲུབ་བསྐུལ་བའི་ཛཔ྄་ནི། ཛཔ྄་ཁང་ཕྱེ་ལ། མདུན་བསྐྱེད་ལས་དངོས་གྲུབ་ཀྱི་འོད་ཟེར་ཚུར་བསྡུས་ཏེ་བདག་ལ་བསྟིམ་པ་ཁོ་ནས་ཛཔ྄་བཟླ་བའོ། །གཉིས་པ་སྦྱིན་སྲེག་ནི། བསྒྲུབ་བྱའི་དངོས་གྲུབ་སྤེལ་བའམ་དབང་དུ་བྱ་བའི་ཕྱིར་རྒྱས་པ་དང་དབང་གང་རིགས་ཀྱི་སྲེག་བླུགས་འབུལ་བའོ། །གསུམ་པ་གནད་ལ་དབབ་པ་ནི། དེ་ལས། དངོས་གྲུབ་བསྐུལ་བའི་རིམ་པ་རྣམས། །སྤྱིར་བསྐུལ་བ་དང་གནད་ནས་བསྐུལ། །ཉེ་བར་བསྐུལ་བའི་རིམ་པ་ཡིན། །ཞེས་པས་སྒྲུབ་ཁོག་ཏུ་བཀོད་པ་ལྟར་སྤྱིར་བསྐུལ་བ། གནད་ནས་བསྐུལ་བ། ཉེ་བར་བསྐུལ་བ་རྣམས་ཏེ། འདིའི་སྤྱི་དང་གནད་ནས་བསྐུལ་བ་གཉིས་ཀྱི་གྱེར་ཚིག་གོ་བརྗེས་ན་འཐད་དམ་སྙམ་པ་ཁོ་བོའི་རྣམ་རྟོག་གོ། །བཞི་པ་གཤེགས་ཤིང་གསོལ་བྱང་བྱས་ལ་བསྟིམ་པ་ནི། ལྷ་རྗེ་འགར། ལྷ་རྗེ་རྩགས། སྲེགས་སྟོན་གསུམ་ཕྱག་བཞེས་མི་མཐུན་པ་ལས། འདིར་གླན་ཆེན་པོ་རྡོ་རྗེ་འོད་སྲེགས་སྟོན་གྱི་ལུགས་སུ་མཛད་པ་ལྟར། ཞི་ཁྲོ་སྟེང་འོག་འཇུ་འདུལ་གྱི་ཚུལ་གྱིས་ཁྲོ་དཀྱིལ་ལས་གསལ་ཤིང་གི་དངོས་གྲུབ་ལེན་པའོ། །དེ་ནས་རྫས་ལས་དངོས་གྲུབ་བླང་བ་ནི། དེ་ལས། མེ་ཏོག་འཐོར་དང་བདུད་རྩི་ཡི། །དངོས་གྲུབ་བླང་བ་ཚུལ་བཞིན་བྱ། །བཀྲ་ཤིས་ཟས་ཚེའི་དངོས་གྲུབ་ནི། །ཟླ་གམ་དབང་གི་གཞལ་ཡང་ནས། །བཀྲ་ཤིས་བརྗོད་དང་ཆ་ལྔར་བགོ། །རུ་ལུའི་བརྗོད་པ་མ་ལུས་བྱ། །ཞེས་པས་དཀྱིལ་འཁོར་ལ་མེ་ཏོག་དོར་ནས་སྨན་གྱི་དངོས་གྲུབ་བླང་། དེ་རྗེས་མར་མེ། ཚེ་དང་ཛ་གད། བཀྲ་ཤིས་ཀྱི་རྫས་རྣམས་ལས་དངོས་གྲུབ་བླང་ཞིང་། ཤིས་པ་བརྗོད་པས་བརྟན་པར་བྱ་བ་རྣམས་སོ། །རྗེས་ཆོག་གི་རྫས་ཆ་ལྔར་བགོ་བ་སོགས་དབང་གི་མཐར་བྱ་ཞིང་། རུ་ལུའི་ཛཔ྄་བྲོ་ལྷ་རྗེ་གླན་དབང་གི་རྗེས་དང་། རྩི་ལུང་པ་འདིར་མཛད་ཅེས་འགོས་ཀྱི་ལས་ཐོར་བཤད་དོ། །དྲུག་པ་ནི། དེ་ལས། ཡབ་ཡུམ་སྦྱོར་བ་མཛད་པའི་སེམས། །ལྷ་དང་དབྱེར་མེད་གྱུར་པ་ཡི། །སློབ་དཔོན་གྲུབ་ཐོབ་བཞུགས་པ་དེས། །བུ་རྣམས་གསང་བའི་དཀྱིལ་འཁོར་བཅུག །ཅེས་པས་སྒྲུབ་ཆེན་གྱི་འགངས་ཆེ་ཤོས་དངོས་གྲུབ་ཡུམ་གྱི་མཁའ་ལས་བླང་བ་ཡིན་པས། སློབ་དཔོན་གྱིས་རང་དོན་དུ་ཡབ་ཡུམ་རྗེས་ཆགས་ཀྱི་སྦྱོར་བའི་ཉེ་རྒྱུས་དངོས་གྲུབ་བླངས་རྗེས། གཞན་དོན་སློབ་བུ་རྣམས་ཐབས་ཤེས་རོལ་པའི་འོད་ཟེར་གྱིས་ཞལ་དུ་བཅུག་པ་མཁའ་ནང་དུ་སྦྱངས་ཏེ་ལྷར་བྱས་པས་གསང་བའི་དཀྱིལ་འཁོར་དུ་གཞུག་པའོ། །གཉིས་པ་གང་བསྐུར་བྱའི་དབང་ནི། དེ་ལས། སྒྲུབ་དབང་བཅུ་གསུམ་ལས་ཀྱིས་བསྐུར། །གྲགས་པའི་ཆུ་བོའི་ལས་ཐོའོ། །ཞེས་གསུངས་ཏེ། དེ་ལ་སྒྲུབ་དབང་རྩ་བ་བཅུ་གསུམ་ནི། དབང་དོན་རྣམ་པར་འབྱེད་པ་ལས། དེ་དག་ཀུན་ལ་སྤྱོད་སྒྲུབ་པའི། །སྒྲུབ་པའི་དབང་རྣམས་བསྐུར་བར་བྱ། །དང་པོ་ཤེས་རབ་རིག་པའི་སེམས་ལོན་གཏན་ཚིགས་བྱིན། །གཉིས་པ་སྙིང་རྗེ་རྟགས་དབང་ཉི་ཟླའི་དཀྱིལ་འཁོར་བྱིན། །གསུམ་པ་འགྲོ་དོན་རྫོགས་པའི་ཐོང་གཤོལ་འབར་བ་བྱིན། །བཞི་པ་དུག་གསུམ་སྤྲུགས་པ་གའུ་རྣམ་གསུམ་བྱིན། །ལྔ་པ་སྲིད་གསུམ་སྒྲོལ་བའི་ཀ་ཏར་མཚོན་ཆ་བྱིན། །དྲུག་པ་སྐྱོན་གྱིས་མ་གོས་རྣམ་དག་པདྨ་བྱིན། །བདུན་པ་ལས་རྣམས་རྫོགས་པའི་ཏི་རའི་དབྱུག་པ་བྱིན། །བརྒྱད་པ་གཉིས་མེད་འཁྲིལ་བ་སྦྲུལ་ནག་ཆུན་པོ་བྱིན། །དགུ་པ་གསང་བ་ཤེས་རབ་ལྷ་མོའོ། །བཅུ་པ་ཀུན་ལ་དབང་བའི་འདོད་ཡོན་སྣ་ལྔ་བྱིན། །བཅུ་གཅིག་སྒྲུབ་པའི་རྒྱལ་པོ་དཀྱིལ་འཁོར་གཙོ་བོ་བྱིན། །བཅུ་གཉིས་ཐམས་ཅད་སྒྲུབ་པའི་སྒྲུབ་རྫས་ཐམས་ཅད་བྱིན། །བཅུ་གསུམ་གཉིས་སུ་མེད་པ འི་ཐིག་ལེ་མིང་གི་དབང་། །ཞེས་སོ། །དེ་ལས་ཡན་ལག་བརྒྱ་དང་བཅོ་ལྔར་དབྱེ་བ་ནི། སྔོན་གྱི་སློབ་དཔོན་རྣམས་ཀྱིས་སློབ་མ་ཐུན་མོང་བ་རྣམས་ཕྱི་དང་ནང་གི་ཆུ་བོ་གཉིས་ཀྱིས་སྨིན་པར་མཛད་ནས། སྒྲུབ་གསང་གི་ཆུ་བོ་གཉིས་དུས་ཚིགས་རེ་བར་དུ་བཅུག་ནས་སློབ་མ་ཁྱད་པར་བ་རྣམས་ལ་ལོགས་སུ་མཛད་སྲོལ་བྱུང་བ་ལྟར། ཐུན་མོང་པའི་ངོར་དཔེ་མཁྱུད་ཀྱིས་དབང་དོན་རྒྱ་ཆེར་འབྱེད་པའི་ཡིག་རྒྱུན་རྣམས་ལའང་མང་ཉུང་དང་ཚིག་མི་འདྲ་བ་ཅི་རིགས་སྣང་བས། འདིར་དབྱེ་ཚུལ་མཁས་གྲུབ་གཡུང་སྟོན་རྡོ་རྗེ་དཔལ་གྱིས་མཛད་པའི་རྣམ་བཤད་དུ། བཞི་པ་གའུའི་དབང་ལ་གསུམ། ལྔ་པ་མཚོན་ཆའི་དབང་ལ་དྲུག །བཅུ་པ་འདོད་ཡོན་གྱི་དབང་ལ་ལྔ། བཅུ་གཅིག་པ་སྒྲུབ་པའི་རྒྱལ་པོའི་དབང་ལ་ལྔ། བཅུ་གཉིས་པ་སྒྲུབ་རྫས་ཐམས་ཅད་ཀྱི་དབང་ལ་བརྒྱད་ཅུ་གྱ་བརྒྱད་རྣམས་དང་། ལྷག་མ་བརྒྱད་པོ་ལ་རེ་རེ་སྟེ། ཁྱོན་དྲིལ་བས་ཡན་ལག་བརྒྱ་དང་བཅོ་ལྔ་ཡོད་པར་གསུངས་པ་ལས། སྒྲུབ་རྫས་ཐམས་ཅད་ཀྱི་དབང་གི་སྐབས་འདིར། སྒྲོལ་ཆེན་བསམ་གྲུབ་རྡོ་རྗེའི་ཕྱག་བྲིས་ཀྱི་དབང་དོན་རྒྱ་ཆེར་འབྱེད་པར། བཅུ་གཉིས་སྒྲུབ་རྫས་ཀུན་གྱི་དབང་བསྐུར་ལ། །ཡང་དག་དུར་ཁྲོད་བརྡལ་དང་ཕུར་བུ་རྫས། །བདུད་རྩི་ཕོ་བྲང་བདེ་ཆེན་དབང་བསྐུར་རོ། །ཞེས་དང་། གྲོ་སྟོན་དཔལ་ལྡན་གྲགས་ཀྱི་ཕྱག་དཔེར། བཅུ་གཅིག་བཅུ་གཉིས་སྒྲུབ་པའི་རིམ་པ་ལ། །རྡོ་རྗེ་ཚེ་དང་ཐུགས་སྒྲུབ་སྨན་ལ་སོགས། །འདས་དང་འཇིག་རྟེན་སྒྲུབ་པ་མ་ལུས་པའི། །གཙོ་དང་སྒྲུབ་ཐབས་ཐམས་ཅད་བསྐུར་བར་བྱ། །བྱེ་བྲག་བརྗོད་ན་བསམ་འདས་བརྗོད་མི་ལང་། །ཞེས་དང་། རྩ་རྒྱུད་ཀྱི། རྡོ་རྗེ་ཚེ་དང་སྨན་ལ་སོགས། །སྒྲུབ་པ་མ་ལུས་སྒྲུབ་ཤིག་ཅེས། །སྒྲུབ་རྫས་ཐམས་ཅད་བྱིན་པར་བྱ། །ཞེས་པའི་སྐབས་ཀྱི་མཆན་ཡོལ་དགེ་བསྙེན་གྱི་ཕྱག་བྲིས་མར། ཡང་ཕུར་བདུད་རྩི་སོགས་ཀྱིས་དབང་སྟེ་རྗེས་སུ་གནང་བའོ། །ཞེས་པ་ཙམ་ལས་མི་འབྱུང་ཡང་། ཟུར་ཧམ་ལྕམ་སྲིང་ནས་བརྒྱུད་པའི་དབང་ཆོག་ལུགས་གཉིས་ལ་གཅིག་ཏུ་ཆད་པའི་རྒྱུན་ཅིག་ཤོས་ཀྱིས་གསོས་ཤིང་འཐོར་བ་བསྡུས་ནས། ད་ལྟའི་ཕྱག་བཞེས་ཀྱི་དབང་ཆོག་ལྟར་བརྩིས་ན། འདྲེན་པའི་ལས་བྱང་ཆུང་ངུས་བསྐུར་བའི་སྒྲུབ་རྫས་ཐུན་མོང་པ་བཅོ་ལྔ། ཐུན་མོང་མ་ཡིན་པའི་སྒྲུབ་རྫས་རོལ་པའི་ཆས་བཅུ། ཁྱད་པར་གྱི་སྒྲུབ་རྫས་ལ་སྤྱི་དང་བྱེ་བྲག་གཉིས་ལས། སྤྱི་ལ། དཔལ་བཤོས། དབང་བཤོས། གསལ་ཤིང་གི་ཟླ་གམ། ཛ་གད། བཀྲ་ཤིས་གཙང་མའི་བམ་དང་། དག་པ་ལྷའི་རྫས་ཀྱི་བམ། མདའ། རལ་གྲི། མེ་ལོང་། ཕུར་བུ་བཞི་པོ་རེ་རེའང་བཞི་བཞི་སྟེ་བཅུ་དྲུག །ཚོན་སྐུད། དུར་ཁྲོད་ཀྱི་རྒྱན་ཆས། སྐུ་རྟེན་ཐོད་སྐུ། གསུང་རྟེན་གྱི་ཐོད་པ། ཐུགས་རྟེན་རྡོ་རྗེ་དང་། དྲིལ་བུ། གསང་བའི་རྔེའུ་ཆུང་། རྐང་གླིང་། བགྲང་འཕྲེང་རྣམས་དང་། བྱེ་བྲག་གི་སྒྲུབ་རྫས་ལ། གཤིན་རྗེ་གཤེད་ཀྱི་སྒོ་བྱང་། རྟ་མགྲིན་གྱི་སྒོ་བྱང་། ཡང་དག་གི་མར་མེ། ཆེ་མཆོག་གི་སྨན། རྡོ་རྗེ་གཞོན་ནུའི་བསྙེན་ཕུར་དང་། མཚམས་ཕུར་རྣམས་སོ་སོར་བརྩིས་པས་བཅུ། མ་མོའི་མདོས་དང་། རཀྟ། དྲེགས་པའི་གཏོར་མ་དང་། སྨན་ཕུད། དྲག་སྔགས་ཀྱི་ཞི་རྒྱས་དབང་དྲག་གི་ཧོ མ་སྟེ་བཞི། དམར་གཏོར། ཀོང་ཟོར། བྲུབ་ཁུང་། ཉ་བོ། གདབ་ཕུར་རྣམས། རིག་འཛིན་གྱི་གཏོར་མ་དང་། སྨན་ཕུད། ཚེའི་འབྲང་རྒྱས་དང་། ཚེ་ཆང་རྣམས་ཏེ་དྲིལ་བས་བརྒྱད་ཅུ་གྱ་བརྒྱད་དོ། །དེ་ལྟར་བྱེ་བྲག་སྒྲུབ་སྡེའི་སྒྲུབ་རྫས་ཀྱི་དབང་ཀྱང་སྐབས་འདིར་བསྐུར་བ་ནི། གནུབས་ཆེན་གྱི་གསུང་ལས། ཚོགས་ཆེན་འདུས་པའི་དཀྱིལ་འཁོར་དུ། །ཐེག་པ་འདུས་དང་དབང་འདུས་དང་། །སྒྲུབ་ཆེན་དཀྱིིལ་འཁོར་འདུས་པའི་ཕྱིར། །འཇམ་དཔལ་སྐུ་དང་པདྨ་གསུང་། །ཡང་དག་ཐུགས་དང་བདུད་རྩི་ཕུར། །མ་མོ་མཆོད་བསྟོད་དྲག་སྔགས་རྣམས། །ཆ་རྐྱེན་ཡིན་ཕྱིར་རིག་འཛིན་བརྒྱད། །ཚེ་ནི་སྤྱི་ཡི་ཁ་སྐོང་ཡིན། །སྒོ་བྱང་ཕྱི་ནང་དགྲ་བགེགས་སྐྲོད། །རྫས་སྐོངས་མར་མེ་བདུད་རྩི་སྨན། །མཚམས་ཕུར་གདབ་ཁ་བསྙེན་ཕུར་རྟེན། །མ་ཆེན་རཀྟས་ཐུགས་དམ་བསྐངས། །འཇིག་རྟེན་མཆོད་རྟེན་དྲག་ཟོར་གཏོར། །རིག་འཛིན་གཏོར་ཕུད་ཚེ་ཟན་རྫས། །ཞེས་གསུངས་པ་ལྟར་རོ། །བཞི་པ་སྒྲུབ་ཆེན་གྱི་ཡན་ལག་གསང་དབང་རྫོགས་པའི་ཆུ་བོ་བསྐུར་བ་ནི། དབང་དོན་བསྡུས་པ་ལས། རྫོགས་པ་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །ཞེས་གསུངས། དེ་ལ་དབྱེ་ན། དབང་དོན་རྣམ་པར་འབྱེད་པ་ལས། སྒྲུབ་དབང་བཅུ་གསུམ་རྫོོགས་པ་དང་། །གསང་བ་ཀུན་གྱི་བདག་ཡིན་པས། །དཀར་དམར་འདྲེས་པའི་བྱང་ཆུབ་སེམས། །དབང་ཐོབ་དེ་ཡི་ལྕེ་ལ་བཞག །གཉིས་མེད་དོན་དམ་བྱང་ཆུབ་སེམས། །དབང་ཐོབ་དེ་ཡི་སེམས་ལ་བཞག །ཅེས་དང་། ལས་ཐོར། རྡོ་རྗེ་སློབ་དཔོན་ཡབ་ཡུམ་སྦྱོར། །དཀར་དམར་འདྲེ་པའི་བྱང་ཆུབ་སེམས། །བུ་མཆོག་དེ་ཡི་ལྕེ་ལ་བཞག །དོན་དམ་བྱང་ཆུབ་སེམས་ཆེན་པོ། བུ་མཆོག་དེ་ཡི་སྙིང་ལ་བཞག །རྫོགས་པའི་ཆུ་བོའི་ལས་ཐོའོ། །ཞེས་པས་ཀུན་རྫོབ་བྱང་སེམས་དང་། དོན་དམ་བྱང་སེམས་ཀྱི་དབང་གཉིས་སུ་དབྱེ་བ་ལས། ཡན་ལག་གཞན་སྤྲོ་རུ་མེད་དེ། །དབང་དོན་རྒྱ་ཆེར་འབྱེད་པ་ལས། །བཞི་པ་གསང་བའི་དབང་ཆུ་དུ་མར་སྤྲོ་རུ་མེད། །ཅེས་གསུངས་པའི་ཕྱིར། དེ་ལ་དང་པོ་ཀུན་རྫོབ་བྱང་སེམས་ཀྱི་དབང་ལུས་ལ་བསྐུར་བའི་དཀྱིལ་འཁོར་ལ། ལས་ཐོར། རྡོ་རྗེ་སློབ་དཔོན་ཡབ་ཡུམ་སྦྱོར། །ཞེས་པ་ནི་གསང་དབང་གི་ཁོངས་སུ་ཤེར་དབང་སྦས་པས་བླ་མའི་མན་ངག་ལ་ལྟོས་དགོས་པའི་ཕྱིར། འདིར་ཕྱག་བཞེས་ལྟར། གསང་དབང་ལ་བླ་མ་ཡབ་ཡུམ་གྱི་ལུས་དཀྱིལ་དང་། ཤེར་དབང་ལ་ཕྱག་རྒྱ་མའི་མཁའ་གསང་གི་དཀྱིལ་འཁོར་གཉིས་འཇུག་བྱའི་དཀྱིལ་འཁོར་ཡིན་ལ། དེ་མཚོན་བྱེད་བརྡའི་དཀྱིལ་འཁོར་ནི། གསང་རྫས་ཀྱི་བདུད་རྩི་དང་། མེ་ལོང་གི་དཀྱིལ་འཁོར་གཉིས་ཀྱིས་མཚོན་པར་བྱ་བ་ཡིན་ནོ། །ཇི་ལྟར་བསྐུར་ཚུལ་ནི། ལྕེ་ལ་བཞག །ཅེས་པས། གསང་དབང་ནི་བླ་མ་ཡབ་ཡུམ་མཉམ་པར་སྦྱོར་བའི་བྱང་ཆུབ་ཀྱི་སེམས་བུའི་ལྕེ་ལ་བཞག་ནས་བསྐུར་ཞིང་། ཤེར་དབང་ནི་སློབ་བུ་ཉིད་ཤེས་རབ་མ་དང་སྙོམས་པར་ཞུགས་པའི་ཁུ་རྡུལ་གསང་རྩ་ཕན་ཚུན་དུ་ལྟེམས་པ་ཡབ་ཀྱི་གསང་བ་རྡོ་རྗེའི་ལྕེ་ལ་བཞག་ནས་བསྐུར་བས་འབྱུང་ལྡོག་གི་དགའ་བ་བཞི་ལ་ངོ་སྤྲོད་པའོ། །གཉིས་པ་དོན་དམ་བྱང་སེམས་ཀྱི་དབང་སེམས་ལ་བསྐུར་བའི་དཀྱིལ་འཁོར་ནི། མཚོན་བྱ་སེམས་ཉིད་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་ཉིད་ཡིན་ལ། དེ་ཡང་དབྱིངས་དང་ཡེ་ཤེས་ཟུང་དུ་འཇུག་པ་སྟེ། དེའི་ཡེ་ཤེས་ཀྱི་རྩལ་སྣང་ཚོགས་བརྒྱད་དང་། དབྱིངས་ཀྱི་རྩལ་སྣང་ཡུལ་བརྒྱད་དེ། བཅུ་དྲུག་པོའང་དབྱིངས་དང་ཡེ་ཤེས་སུ་འདུ་བའི་ཕྱིར། དེ་མཚོན་བྱེད་ཙིཏྟ་རིན་པོ་ཆེའི་དཀྱིལ་འཁོར་ལ་རྩ་བ་དབྱིངས་ཡེ་ཤེས་གཉིས་དང་། དེ་གཉིས་ཀྱི་རྩལ་ཡུལ་ཡུལ་ཅན་བཅུ་དྲུག་མཚོན་པའི་ཨ་ཡིག་བཅོ་བརྒྱད་ཀྱི་རྣམ་པ་བཀོད་པ་ཉིད་ཡིན་པས། མཚོན་བྱེད་ཀྱི་བརྡའ་དེ་ལ་བརྟེན་ནས་མཚོན་བྱ་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་བྱ་རྩོལ་མེད་པའི་ཤེས་རབ་ཀྱིས་ཞུགས་ཏེ། ཡེ་ཇི་བཞིན་པའི་གནས་ལུགས་རྟོགས་པའི་དོན་དེ་ཉིད། རྣམ་པར་སྣང་མཛད་ཐིག་ལེ་དབང་གི་ཏནྟྲ་ལས་ཕྱུང་བ་ལྟ་བ་ཡེ་འབྱམས་ཀྱི་དབང་ལེ་དང་། ཡོངས་སུ་གྲུབ་པའི་དབང་ལེ་གཉིས་ཀྱིས་ངེས་ཤེས་བསྐྱེད་ཅིང་། ཀུན་བཟང་ཐུགས་ཀྱི་གདམས་ལེས་གསང་གཉེར་གཏོད་པའི་ཚུལ་གྱིས་རིག་པའི་རྩལ་དབང་བསྐུར་བའོ། །དེ་ལྟར་ཡན་ལག་དང་ཡན་ལག་ཅན་རྩ་བའི་དཀྱིལ་འཁོར་རྣམས་སུ་རྩ་བའི་དབང་ཆུ་བོ་བཞིས་བསྡུས་པ་སུམ་ཅུ་རྩ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་ཚུལ་འདི་ནི། སྦྱངས་པས་སྣོད་དུ་གྱུར་པའི་སློབ་མ་ལ་མདོ་ཡོངས་རྫོགས་ཀྱི་དཀྱིལ་འཁོར་དུ་ཐེག་པ་ཐམས་ཅད་འདུས་པའི་མདོ་དབང་བསྐུར་ཚུལ་སློབ་དཔོན་བདེ་བ་གསལ་མཛད་ཀྱི་ལས་ཐོས་བཀྲལ་བའི་མན་ངག་གི་ལུགས་ཏེ། འདིར་ཡན་ལག་བརྒྱད་བརྒྱ་སོ་གཅིག་ལ་རགས་པ་ཞེས་ཟེར་བ་ནི། དབང་དོན་རྒྱ་ཆེར་འབྱེད་པ་ལས། བྱེ་བྲག་ཕྱེ་ན་བསམ་འདས་བརྗོད་མི་ལང་། །ཞེས་གསུངས་པ་ལྟར། ཡན་ལག་བརྒྱད་བརྒྱ་སོ་གཅིག་ལས་འཕྲོས་པའི་ཉིང་ལག་ཕྱེ་ན་མཐའ་ཡས་པར་འགྱུར་བ་ཡིན་ཏེ། དེའི་རྒྱུ་མཚན་ཕྱི་དབང་གི། །དང་པོ་རྒྱལ་པོ་བཀའ་རྟགས་ཉི་ཤུ་དང་། །ཞེས་གསུངས་པའི་མཛད་པ་ཉི་ཤུའི་དབང་རྣམས་བྱང་སེམས་ཀྱི་དཀྱིལ་འཁོར་དུ་ཚང་བར་བསྐུར་དགོས་ཤིང་། ལྷ་མི་ཉན་རང་གསུམ་ལ་དེའི་ནང་ནས་བཏུས་པའི་ཉིང་ལག་གི་གྲངས་ཉི་ཤུ་རྩ་བདུན་དང་། རང་རང་གི་སྒོས་ཆོས་རྒྱ་ཡིག་དང་བོད་ཡིག །མུ་ནེའི་གཟུངས། རྟེན་འབྲེལ་གྱི་གཟུངས་རྣམས་བསྣན་པ་དང་བཅས་པས་སུམ་ཅུ་རྩ་གཅིག་པོ་ཐམས་ཅད་རྫས་དབང་རྐྱང་པའི་གྲངས་ཡིན་ལ། ད་དུང་དེའི་སྟེང་དུ་ཕྱི་དབང་གི་དཀྱིལ་འཁོར་དྲུག་པོའི་ལྷ་དབང་དང་། མདོ་ཡོངས་རྫོགས་ཀྱི་སྐབས་འདིར་སྒྲུབ་དབང་རྣམས་རྩ་བའི་དཀྱིལ་འཁོར་ཐུན་མིན་ལ་བརྟེན་ནས་བསྐུར་བའི་ལུགས་ཡིན་པས་ན། བཅུ་གཅིག་པ་སྒྲུབ་པའི་རྒྱལ་པོའི་དབང་གི་སྐབས་སུ་རྒྱས་པར་ཁྲག་འཐུང་དྲུག་ཅུ་རྩ་བཞི་གཙོ་བོ་དང་བཅས་པ་ལྷ་དབང་དང་། སྒྲུབ་རྫས་རྫོགས་པའི་མཇུག་ཏུ་གནས་མ་སོགས་བཀའ་ཉན་གྱི་འཁོར་དང་རིག་འཛིན་གྱི་ལྷ་དབང་རྣམས་ཀྱང་བསྐུར་བར་གསུངས་ཤིང་། དེར་མ་ཟད་གབ་པའི་དབང་ལེ་དང་པོར་བསྟན་པའི་ཕྱི་དབང་བཅུ་དྲུག་སྒོ་འབྱེད་ཀྱི་ཚུལ་དུ་ཐོག་མར་བསྐུར་བའི་ཕྱག་ལེ་དང་། རྒྱལ་པོར་དབང་བསྐུར་བ་ལ་དེའི་བཀའ་རྟགས་སྟེར་བ་དང་འདྲ་བར་མདོའི་དབང་རྫོགས་པར་ཐོབ་ཅིང་བདག་གཞན་གྱི་དོན་ནུས་པ་ལ་མཇུག་ཏུ་གཏད་རྒྱའི་དབང་དང་། མཐའ་རྟེན་དུ་ཚེའི་དབང་བསྐུར་བ་སོགས་ཡན་ལག་གི་དཀྱིལ་འཁོར་གཞན་ལ་བརྟེན་པའི་དབང་དེ་དག་ཀྱང་སྤྱིའི་གྲངས་བརྒྱད་བརྒྱ་སོ་གཅིག་གི་ནང་དུ་འདུས་པ་མ་ཡིན་པའི་ཕྱིར་རོ། །དེ་ལ་སྤྱིར་རྒྱུད་དང་མན་ངག་གི་རྗེས་སུ་འབྲངས་ནས་མདོ་ཁྱད་པར་བ་དང་ཡོངས་རྫོགས་ཀྱི་དཀྱིལ་འཁོར་སོ་སོར་དབང་བསྐུར་ཚུལ་གཉིས་པོ་དེ། རང་བཞིན་དང་སྦྱངས་པས་སྣོད་དུ་གྱུར་པའི་སློབ་མ་ཟབ་པ་དང་རྒྱ་ཆེ་བ་ལ་མོས་པའི་ཁྱད་པར་གྱིས་བསྐུར་ལུགས་ཐ་དད་པ་ཡིན་པས་ན། ལུགས་སོ་སོ་མ་འདྲེས་པར་བསྐུར་ན་ཕྱག་ལེན་གཙང་ཞིང་ལེགས་པར་འགྱུར་ལ། དེས་ན་སྔོན་གྱི་བླ་མ་གོང་མ་རྣམས་ཀྱིས་ཀྱང་། མདོ་ཁྱད་པར་བ་རྩ་བའི་དཀྱིལ་འཁོར་གཉིས་གང་རུང་དུ་བསྐུར་བ་དེ་སྐལ་ལྡན་གྱི་སློབ་མ་ཉུང་འདུས་ལ་ལྐོག་ཆོས་སུ་གསུངས་པ་ལས་ཁྱབ་བརྡལ་དུ་སྤེལ་བར་མ་མཛད་དེ། དཔེར་ན་རྩ་བའི་དཀྱིལ་འཁོར་ཐུན་མོང་བར་རྗེས་སྒྲོ་ཕུག་པའི་ཡིག་ཆ་ལ་བརྟེན་ནས། མཁས་པ་གཡུ་ཟུར་གཉིས་ལ་བརྒྱུད་དེ། ལྷོ་བྲག་གི་འབྲེ་ཇོ་སྲས་སོགས་དམ་པ་འགའ་ཞིག་ལ་བསྐུར་བའི་ཕྱག་སྲོལ་བྱུང་བ་ནི་སྔོན་གྱི་ཡི་གེ་ལས་ཤེས་ཤིང་། དེ་དང་འདྲ་བར་མཁས་པ་འགར་དང་། གླན་སྟོན་ཆེན་པོ་སོགས་ལའང་ཡོད་དགོས་པར་ལུགས་གཉིས་འདོར་ལེན་གྱི་གནད་ཀྱིས་གཅིག་ཏུ་དྲིལ་ནས་བསྐུར་བའི་ཕྱག་བཞེས་འདིས་རྗེས་སུ་དཔག་ནུས་པར་གྱུར་ལ། མདོ་ཡོངས་རྫོགས་ཀྱི་དཀྱིལ་འཁོར་དུ་བསྐུར་ཚུལ་འདི་ལའང་། གཡུང་སྟོན་ཆེན་པོའི་ཞལ་ནས། བླ་མ་ལ་ལས། ཡོ་ག་མན་ཆད་ཡན་ལག་གི་དཀྱིལ་འཁོར་དུ་ཕྱི་དབང་རྒྱུད་ཀྱི་ཆུ་བོ་དང་། ཚོགས་ཆེན་འདུས་པ་ཐུན་མོང་པའི་དཀྱིལ་འཁོར་དུ་ནང་དབང་འབྱུང་བའི་ཆུ་བོས་སློབ་མ་ཐུན་མོང་བ་རྣམས་སྨིན་པར་མཛད་ནས། སྒྲུབ་དབང་དང་གསང་དབང་གཉིས་དུས་ཚིགས་རེ་བར་དུ་བཅུག་སྟེ་སློབ་མ་ཐུན་མོང་མ་ཡིན་པ་ལ་ལོགས་སུ་མཛད་ཅིང་། ཡིག་ཆ་ལའང་དཔེ་མཁྱུད་ཅི་རིགས་པས། སྟོང་ལེགས་པ་དང་། ཟུ་ལུང་བ་དང་། གླན་ལ་སོགས་པའི་མདོ་དབང་གི་ཡིག་ཆ་རྣམས་སུ་སྒྲུབ་དབང་དང་གསང་དབང་གི་ཆུ་བོ་གཉིས་ཆད་ནས་འདུག་གོ། །ཞེས་གླན་ཉ་ཚལ་བའི་ཡིག་ཆར་ཡང་སྒྲུབ་གསང་གཉིས་ཆད་པར་གསུངས་པས། གླན་ཆེན་པོ་རྡོ་རྗེ་འོད་ཀྱི་ཕྱག་བཞེས་ཀྱི་ལུགས་འདི་ལའང་ཡིག་ཆ་ཕྱི་ནང་གི་ཁྱད་པར་ཡོད་པར་མངོན་ནོ། །ཡང་དེ་ལས། དེ་ལྟ་བུའི་ཚུལ་མ་གོ་བ་ཁ་ཅིག་ན་རེ། མདོ་རྒྱུད་གཉིས་ལ་དཀྱིལ་འཁོར་སོ་སོར་གསལ་བ་མེད་ཟེར་ནས། ཚོགས་ཆེན་འདུས་པའི་དཀྱིལ་འཁོར་དུ་ནང་དབང་དང་སྒྲུབ་དབང་སྦྲེལ་ནས་འདོགས་པ་དང་། དེས་ཀྱང་ཐེག་པ་རིམ་དགུ་མ་ཚང་བས་ཨ་ཏིའི་དབང་ཡིན་ཟེར་ནས། ལ་ལས་སེམས་ཕྱོགས་དང་། ལ་ལས་གསང་རྫོགས་ཀྱི་ངོ་སྤྲོད་བྱེད་པ་འདི་རྣམས་ནི་ཨ་ནུའི་རྒྱུད་འགྲེལ་མན་ངག་གང་ནས་ཀྱང་མ་གསུངས་པའི་ཕྱིར། དབང་གི་ཆུ་བོ་བཞིའི་ཕྱག་ལེན་དང་བྲལ་བ་རྣམས་ཀྱི་འདོད་རྒྱལ་དུ་རིག་པར་བྱའོ། །ཞེས་གསུངས་པ་ལྟར་ན། ཁམས་ལུགས་སུ་སེམས་སྡེ་ཨ་དོན་བཅོ་བརྒྱད་ཀྱི་དབང་སྦྱར་བ་ལ་དཔགས་ནའང་། གླན་ལུགས་འདི་ལ་ཡི་གེ་ཕྱི་ནང་ཡོད་པའི་ལྐོག་ཡིག་རྣམས་མ་ངེས་པར་ཆོག་ཁྲིགས་མཛད་པའི་སྐྱོན་དུ་སྣང་ཞིང་། དེས་ན་ཡོ་ག་མན་ཆད་ཡན་ལག་གི་དཀྱིལ་འཁོར་དྲུག་ཏུ་ཕྱི་དབང་བརྒྱ་རྩ་བརྒྱད་དང་། འདྲེན་པའི་ལས་བྱང་ཆེ་ལེར་གསུངས་པའི་ཚོགས་ཆེན་འདུས་པའི་དཀྱིལ་འཁོར་དུ་ནང་དབང་དྲུག་བརྒྱ་དྲུག་དང་། དུར་ཁྲོད་གསང་བ་མཆོག་གི་དཀྱིལ་འཁོར་དུ་སྒྲུབ་དབང་བརྒྱ་བཅོ་ལྔ་དང་། བྱང་སེམས་རྣམ་པ་གཉིས་ཀྱི་དཀྱིལ་འཁོར་དུ་གསང་དབང་རྫོགས་པའི་ཆུ་བོ་གཉིས་ཏེ། བདེ་བ་གསལ་མཛད་ཀྱི་ལས་ཐོའི་དགོངས་པ་བཞིན་དུ་མདོ་ཡོངས་རྫོགས་ཀྱི་དབང་། སོ་དཔལ་ལྡན་གྱི་ཡབ་དང་། གླན་སྒྱེད་ཁ་བ་དང་། གཡུ་སྟོན་ཆོས་མགོན་དང་། ལྕེ་བྱམས་སྲས་བཞི་ལ་སློབ་དཔོན་ཨ་མེས་ཀྱིས་གསན། དེས་སོ་དཔལ་ལྡན་ལ། དེས་རོག་སྟོན་ཀུན་དགའ་དོན་གྲུབ་ལ། དེས་གཡུང་སྟོན་རྡོ་རྗེ་དཔལ་ལ་སྙེ་མདོའི་གཙུག་ལག་ཁང་དུ་བསྐུར་ཞིང་། དེས་ཀྱང་སོ་སྟོན་ཤཱཀྱ་དཔལ་སོགས་ལ་བསྐུར་བར་མཛད་དོ། །དེ་ལྟར་རྒྱུད་དང་མན་ངག་གི་ལུགས་དེ་གཉིས་ཀས་ཐེག་དགུའི་དབང་དང་ཡོ་ག་བཞི་རྫོགས་ཀྱི་དབང་རྫོགས་པ་ལ་འདྲ་བ་ཡིན་ཏེ། མདོ་རང་ལུགས་ཀྱི་ས་དང་པོ་འགྱུར་བ་མ་ངེས་པ་ནས། ས་བཅུ་པ་རྫོགས་པ་ཅིར་ཆིབ་ཀྱི་བར་ནོན་པར་བྱ་བའི་ཆེད་དུ་ལྷ་མི་ནས་བརྩམས་ཏེ་ཨ་ཏིའི་བར་བྱ་སྤྱོད་སོ་སོར་གྲངས་པས་དབང་རིམ་བཅུ་བྱུང་བ་དེ་ཉིད་བྱ་སྤྱོད་གཅིག་ཏུ་བསྡུས་ནས་ཐེག་དགུ་དང་ཚུལ་འདྲ་བས་ཐེག་དགུའི་དབང་ཞེས་བཏགས་པ་གང་ཞིག །ཕྱི་དབང་རྒྱུད་ཀྱི་ཆུ་བོ་བཅུ་ཐོབ་པས་ས་བདུན་པ་དམིགས་པས་འབྲས་བུ་སྐྱེ་བའི་ས་མན་ཆད་ནོན་ནས་ཡོ་ག་སྟེ་རྣལ་འབྱོར་དུ་འགྱུར། ནང་དབང་འབྱུང་བའི་ཆུ་བོ་བཅུ་གཅིག་ཐོབ་པས་ས་བརྒྱད་པ་གནས་པ་མི་འགྱུར་བའི་ས་ནོན་ནས་མ་ཧཱ་ཡོ་ག་སྟེ་རྣལ་འབྱོར་ཆེན་པོར་འགྱུར། སྒྲུབ་དབང་གྲགས་པའི་ཆུ་བོ་བཅུ་གསུམ་ཐོབ་པས་ས་དགུ་པ་བརྡལ་བ་ཆོས་ཉིད་ཀྱི་ས་ནོན་ནས་ཨ་ནུ་ཡོ་ག་སྟེ་རྗེས་སུ་རྣལ་འབྱོར་དུ་འགྱུར། གསང་དབང་རྫོགས་པའི་ཆུ་བོ་གཉིས་ནོད་པས་ས་བཅུ་པ་རྫོགས་པ་ཅིར་ཆིབ་ཀྱི་ས་ནོན་ནས་ཨ་ཏི་ཡོ་ག་སྟེ་ཤིན་ཏུ་རྣལ་འབྱོར་དུ་འགྱུར་བའི་ཕྱིར། དེ་ལྟར་ཡང་དབང་དོན་རྣམ་པར་འབྱེད་པ་ལས། བཅུ་ཡིས་བྱང་ཆུབ་རིགས་ཅན་འགྱུར། །བཅུ་གཅིག་གསང་བ་ནང་པར་འགྱུར། །བཅུ་གསུམ་བླ་མ་ཆེན་པོར་གྲགས། །གཉིས་ཀྱིས་ཐེག་དགུའི་དབང་རྫོགས་པའོ། །ཞེས་གསུངས་པའི་ཕྱིར་རོ། ༈ །གསུམ་པ་རྒྱུད་དང་མན་ངག་གི་ལུགས་དེ་གཉིས་ད་ལྟའི་དུས་ཀྱི་ཕྱག་ལེན་ལྟར་གཅིག་ཏུ་སྒྲིལ་ནས་བསྐུར་བའི་དོན་འདོར་ལེན་བྱ་ཚུལ་ནི། ཐོག་མར་གབ་པའི་དབང་ལེ་དང་པོ་ནས་བཤད་པའི་མཆོད་དབང་བཅུ་དྲུག་སྒོ་དབྱེའི་ཚུལ་དུ་བསྐུར། དེ་རྗེས་ལྷ་མི་ནས་ཡོ་གའི་བར་ཡན་ལག་གི་དཀྱིལ་འཁོར་དྲུག་ཏུ་ཕྱི་དབང་རྒྱུད་ཀྱི་ཆུ་བོ་བརྒྱ་རྩ་བརྒྱད་ལས་འདོར་ལེན་གྱིས་ཉིང་ལག་སོ་སོར་ཕྱེ་བ་ལྷ་དབང་གི་འདོགས་དང་བཅས་ཏེ་མན་ངག་གི་ལུགས་མདོ་ཡོངས་རྫོགས་ལྟར་རིམ་པར་བསྐུར། དེ་ནས་ཚོགས་ཆེན་འདུས་པ་ཐུན་མོང་བའི་རྩ་དཀྱིལ་འདྲེན་པའི་ལས་བྱང་ཆེ་ལེ་ལྟར་བཞེངས་ནས། དེར་རྒྱུད་ལུགས་ཀྱི་ཕྱི་དབང་རྩ་བ་བཅུ་དང་། རྒྱུད་དང་མན་ངག་གི་ལུགས་ཀྱི་ནང་དབང་འབྱུང་བའི་ཆུ་བོ་རྩ་བ་བཅུ་གཅིག་ལས་ཡན་ལག་དྲུག་བརྒྱ་དྲུག་གི་སྟེང་། ཕྱག་རྒྱའི་དབང་གི་རྗེས་འབྲེལ་དུ་རིག་འཛིན་སློབ་དཔོན་གྱི་དབང་དང་བཅས་པ་བསྐུར་རྗེས། ཚོགས་སྒྲུབ་དུས་དབང་གིས་སྨིན་སློབ་མི་མཛད་པ་ཤས་ཆེ་བས་ཅུང་ཟད་གནད་ཆུང་བར་དགོངས་ནས། ཚོགས་ཆེན་འདུས་པ་ཐུན་མོང་མ་ཡིན་པའི་རྩ་དཀྱིལ་དུར་ཁྲོད་གསང་བ་མཆོག་གི་དཀྱིལ་འཁོར་བཞེངས་པ་བཏང་སྙོམས་སུ་མཛད་དེ། རྩ་དཀྱིལ་ཐུན་མོང་བ་ནང་དབང་གི་དཀྱིལ་འཁོར་དེ་ཉིད་དུ་སྒྲུབ་དབང་གྲགས་པའི་ཆུ་བོ་རྩ་བ་བཅུ་གསུམ་ལས་ཡན་ལག་བརྒྱ་བཅོ་ལྔར་ཕྱེ་སྟེ་བསྐུར་བའི་མཇུག་ཏུ་གསང་དབང་རྫོགས་པའི་ཆུ་བོ་གཉིས་ཀྱང་བསྡུས་པ་རེ་སྦྲེལ། དེ་རྗེས་ཡན་ལག་གི་དཀྱིལ་འཁོར་དུ་སླར་ཡང་མཆོག་དབང་གོང་མ་གཉིས་རྒྱས་པར་བསྐུར་ཞིང་། མཐའ་བརྟེན་གཏད་རྒྱ་དང་ཚེ་དབང་རྣམས་ཀྱང་སྦྲེལ་བར་མཛད་པ་ཡིན་ཏེ། དེ་ལྟར་ན། ཕྱི་དབང་ལུགས་གཉིས་དབང་གི་གྲངས་དང་བསྐུར་ཐབས་ཆེས་མི་མཐུན་པས་མ་འདྲེས་པར་སོ་སོར་བསྐུར་ཞིང་། ནང་དབང་ལུགས་གཉིས་ཀ་གཅིག་ཏུ་འབབ་པས་འདོར་ལེན་མ་དགོས་ལ། སྒྲུབ་དབང་གང་དུ་བསྐུར་བྱའི་དཀྱིལ་འཁོར་མན་ངག་གི་ལུགས་ཐུན་མོང་མ་ཡིན་པའི་རྩ་དཀྱིལ་དོར་ནས་རྒྱུད་ལུགས་ཉིད་གཙོ་བོར་བསྟན། གསང་དབང་རྫོགས་པའི་ཆུ་བོ་ནི་སློབ་མ་ཐམས་ཅད་ལ་ཁྱབ་བརྡལ་དུ་བསྐུར་རུང་མི་རུང་གི་དབྱེ་བས། རྒྱུད་ལུགས་ལ་ཟབ་ཁྱད་མ་སྦྱར་བས་སློབ་མ་ཐུན་མོང་བ་རྣམས་རྗེས་སུ་འཛིན་པའི་ཕྱིར་མདོར་བསྡུས་ཙམ་ཞིག་སྒྲུབ་དབང་གི་མཇུག་ཏུ་སྦྲེལ་བས་ས་ཁོངས་གཟུང་། དེ་རྗེས་རྫོགས་རིམ་དོན་དུ་གཉེར་བའི་སློབ་མ་ཁྱད་པར་ཅན་ཡང་འབྱུང་སྲིད་པས་དེ་དག་རྗེས་སུ་འཛིན་པའི་ཆེད་དུ་མན་ངག་གི་ལུགས་མདོ་ཡོངས་རྫོགས་ཀྱི་བསྐུར་ཐབས་དེ་ཉིད་ཟུར་དུ་ཕྱེ་ནས་བསྐུར་བའི་ཕྱག་ལེན་མཛད་པ་ཡིན་པས་ན། ཕྱག་ལེན་འདི་ལ་ཕྱི་དབང་དང་གསང་དབང་གཉིས་རྒྱུད་དང་མན་ངག་གི་ལུགས་གཉིས་ཀ་བསྐུར་བས་ཟློས་ཤིང་། སྒྲུབ་དབང་གང་དུ་བསྐུར་བའི་དཀྱིལ་འཁོར་དོར་བས་ཆད་པ་དང་ལྷག་པ་གཉིས་ཀའི་སྐྱོན་གནས་སམ་སྙམ་དུ་རྟོག་པར་མི་བྱའོ། །དེ་ལྟར་ལུགས་གཉིས་འདོར་ལེན་གྱི་གནད་ཀྱིས་གཅིག་ཏུ་སྒྲིལ་ནས་བསྐུར་ཚུལ་འདི་ནི། རྗེ་གསང་བདག་སྒྲོ་ཕུག་པ་ཆེན་པོ་ཤཱཀྱ་སེང་གེ། གླན་ཉ་ཚལ་བ་ཤཱཀ་བྱང་། གླན་ཆུ་བར་པ་ཤཱཀ་བཟང་སྟེ། བླ་མ་དེ་གསུམ་གྱི་ཐུགས་ཀྱི་སྲས་ལྷ་རྗེ་འགར་གྱི་ལས་ཐོ་དང་། གླན་ཆེན་པོ་རྡོ་རྗེ་འོད་ཀྱི་ཕྱག་བཞེས་འགོས་རྩིས་ལུང་པ་ལ་བརྒྱུད་པའི་ལས་ཐོ་དང་། གཞན་ཡང་ལྷ་རྗེ་འཁུན་དང་། ལྷ་རྗེ་ཤཱཀ་མགོན་དང་། གླན་སྟོན་བསོད་ནམས་མགོན་དང་། སྐྱི་ལུགས་རྣམས་སོ་སོའི་ལས་ཐོ་དང་། དེང་སང་ཡོངས་གྲགས་ཀྱི་མདོ་དབང་ཟུར་ཧམ་ལྕམ་སྲིང་ལས་བརྒྱུད་པའི་ལུགས་སྲོལ་གཉིས་སོགས་བླ་མ་གོང་མ་རྣམས་ཀྱི་ཕྱག་ལེན་སོ་སོའི་བཞེད་ཕྱོགས་དང་བརྗོད་ཚུལ་རྩིང་ཞིབ་ཀྱི་ཁྱད་པར་ཅུང་ཟད་མི་འདྲ་ཙམ་ལས་གཙོ་བོའི་དོན་གཅིག་ཏུ་འབབ་ཅིང་། དེ་ཡང་ལུགས་གཉིས་གཅིག་ཏུ་དྲིལ་ནས་བསྐུར་བས་གནས་སྐབས་སུ་བྱ་སླ་བ་དང་། བརྒྱུད་ནས་ལུགས་གཉིས་པོ་གཅིག་གིས་གཅིག་མི་ནུབ་པར་སྲོལ་གཉིས་ཆབས་གཅིག་ཏུ་འཕེལ་བའི་དགོས་པ་ཁྱད་པར་ཅན་མངའ་བ་ཡིན་ཏེ། དཔེར་ན་གསར་མ་བ་རྣམས་རྡོ་རྗེ་ཕྲེང་བའི་དབང་གི་སྟེང་དུ་བྱ་བཏུས་ཀྱི་དགེ་ལེགས་སུ་བྱེད་བའི་དཀྱིལ་འཁོར་གསུམ་བསྣན་ནས། དེ་གཉིས་ཀའི་དབང་རྫོགས་པར་མཛད་པའི་ཕྱག་སྲོལ་བཞིན་ནོ། །དེ་ལྟར་རྒྱུད་དང་མན་ངག་གི་ལུགས་གཉིས་ལག་ལེན་གཅིག་གི་ཁོག་ཏུ་ཚང་བར་བསྐུར་ཚུལ་འདི་ཉིད་བསྙེན་སྒྲུབ་ཡན་ལག་བཞི་དང་འབྲེལ་བར་བསྐུར་ན། གོང་དུ་དེ་དང་དེ་སོ་སོར་བསྐུར་ཐབས་བཤད་པས་རྗེས་སུ་དཔག་ནུས་པར་མ་ཟད། སྒྲུབ་ཁོག་རིན་ཆེན་འོད་ཀྱི་སྣང་བར་རྒྱས་པར་བཀྲལ་ཡོད་པས་ཤེས་སླ་བའི་ཕྱིར་འདིར་མ་སྤྲོས་ལ། ལུགས་གཉིས་སོ་སོའམ་གཅིག་ཏུ་སྒྲིལ་བ་གང་ཡིན་ཀྱང་རུང་བསྙེན་སྒྲུབ་ཡན་ལག་བཞི་དང་མ་འབྲེལ་བར་དབང་རྐྱང་གི་ལུགས་སུ་བསྐུར་ཀྱང་འགལ་བ་མེད་དེ། འགྲེལ་པ་ལུང་བསྟན་མ་ལས་རྩ་བཤད་ཀྱི་རྒྱུད་གཉིས་སྦྱར་ནས་དབང་བསྐུར་ཚུལ་བཤད་པའི་ལུང་སྔར་དྲངས་པ་ལྟར་གྱི་དགོངས་པ་དང་འབྱོར་བའི་ཕྱིར་རོ། ༈ །དེ་ལ་སྤྱིར་འདུས་པ་མདོའི་དབང་འདི་ཉིད་གང་ཟག་ཐོས་པའི་ཤེས་རབ་ཅན་ལ་དབང་བསྐུར་དུ་བྱེད་པ། བསམ་པའི་ཤེས་རབ་ཅན་ལ་བཤད་པ་བྱེད་པ། སྒོམ་པའི་ཤེས་རབ་ཅན་ལ་ཁྲིད་དུ་འདེབས་པའི་ལུགས་གསུམ་ལས། དང་པོ་ཐོས་པའི་ཤེས་རབ་ཅན་ལ་དབང་བསྐུར་གྱི་ལུགས་སུ་བྱེད་པ་ནི། སྔར་བཤད་མ་ཐག་པ་ཉིད་ཡིན་ཏེ། དེས་གོ་འཕང་གི་ཆོས་རྒྱུད་ལ་འཇོག་པར་བྱེད་པའོ། །དེ་ལྟར་ཡང་རྩ་རྒྱུད་ལས། ཇི་ལྟར་རྒྱལ་རིགས་རྒྱུད་བྱུང་བ། །མང་པོ་དབང་པོར་དཔོན་བསྟབས་ཏེ། །འཁོར་ལོ་ལ་སོགས་རིན་ཆེན་གྱིས། །ཀུན་ལ་དབང་སྒྱུར་ཐོབ་པ་ལྟར། །དེ་བཞིན་རྣལ་འབྱོར་རྒྱུད་བྱུང་བ། །ཆོས་ཀྱི་དབང་པོར་དཔོན་བསྟབས་ཏེ། །ཕྱག་རྒྱ་ལ་སོགས་རྟགས་ཆེན་གྱིས། །རིམ་པ་ཀུན་གྱི་ཐོག་མར་འགྲོ། །འདི་ནི་དབང་གི་ཁྱད་པར་ཏེ། །ས་ལ་རིམ་པར་བྱུང་བ་ཡི། །རྩལ་གྱིས་བགྲོད་ཅིང་བསླབ་པའི་མཐའ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ལྟར་རོ། །གཉིས་པ་བསམ་པའི་ཤེས་རབ་ཅན་ལ་བཤད་པའི་ལུགས་སུ་བྱེད་པ་ནི། དབང་སོ་སོ་དང་རྗེས་འབྲེལ་དུ་ཐེག་པ་སོ་སོའི་ལམ་ཁྱེར་བཞི་དང་། འགག་དྲུག་འཆད་པར་མཛད་པའི་བཀའ་སྲོལ་ལྟར། སྤྲོ་ན་དེ་དང་དེས་ས་ཁོངས་བཟུང་སྟེ་འཆད་པ་པོས་རྒྱས་པར་བཤད་པར་བྱ་ཞིང་། གཞན་ཡང་མདོ་རྩ་བཤད་ཀྱི་རྒྱུད་རྣམས་ཀྱི་འགྲེལ་པ་སྤྱི་དོན་སྟོང་ཐུན་སོགས་གདུལ་བྱའི་བློའི་སྐལ་བ་དང་འཚམས་པར་འཆད་པ་པོས་བཤད་ལ། ཉན་པ་པོས་ཀྱང་ཐོས་དོན་འཛིན་ཅིང་བསམ་པའི་ཤེས་རབ་ཀྱིས་རྟོག་དཔྱོད་ལ་འབད་པས་རྒྱུད་དགྲོལ་བར་བྱེད་པ་སྟེ། རྩ་རྒྱུད་ལས། ཇི་ལྟར་ཅང་ཤེས་གྱི་ལིང་དག །སྡོམ་བྱེད་སྒྲོག་གིས་བཅིངས་གྱུར་པ། །བཀྲོལ་ནས་བདེ་བླག་བཏང་གྱུར་ན། །ཅི་ལའང་ཐོགས་མེད་འགྲོ་བ་ལྟར། །སེམས་ཀྱི་ཅང་ཤེས་དབང་པོ་འདི། །མི་ཤེས་འཆིང་བས་བཅིངས་གྱུར་པ། །རྣམ་གྲོལ་ཐོས་པའི་སྒོ་མོ་ཡིས། །ཤེས་རྒྱུད་ཀུན་གྲོལ་ཐོགས་མེད་འགྲོ། །འདི་ནི་མི་ཤེས་རྒྱུད་དགྲོལ་བའི། །བཅིངས་པར་བྱས་པ་དགྲོལ་བ་སྟེ། །རྒྱུད་ནས་འགྲོལ་བའི་བསླབ་པ་རུ། །གོམས་པར་བྱ་བ་རབ་ཏུ་གཅེས། །ཞེས་གསུངས་པའི་ཕྱིར། དེ་ཡང་འདིར་ཐེག་པ་ལམ་ཁྱེར་གྱི་དུས་སུ་བཤད་པ་ལྟར། འཇིག་རྟེན་དང་འཇིག་རྟེན་ལས་འདས་པའི་ཐེག་པའི་སྒོ་ཐམས་ཅད་ངོམ་པ་མེད་པའི་རྩོལ་བས་ཤེས་པར་བྱས་ན་གོལ་སྒྲིབ་ཀྱི་སྒྲོ་འདོགས་ལེགས་པར་གཅོད་དོགས་ཏེ། དེ་ལས། དཔེར་ན་བུང་བ་ཚང་འཚོལ་བ། །ཀུན་ཏུ་འཇུག་ཅིང་བྱུང་ནས་ནི། །རང་གི་འཛུལ་ཁུང་གང་ཡིན་པར། །ངེས་པར་འཇུག་ཅིང་གནས་པ་ལྟར། །རྣལ་འབྱོར་དོན་གྱི་རྗེས་འཚོལ་བ། །སྤྱོད་སྒོ་ཅི་ཡོད་བསྟུན་ཅིང་བསྡུར། །ལྟ་སྒོར་འཇུག་ཅིང་བརྟགས་བསྡུར་ནས། །མ་ནོར་ངེས་པའི་དབུ་མ་ལ། །ཆོས་ཉིད་དོན་གྱི་རྗེས་གཅོད་ཕྱིར། །སྒོ་མོ་ཀུན་ནས་བསྡུར་བ་ཡི། །བསླབ་པར་བྱ་བའི་ཐབས་ཡིན་ཏེ། །གོམས་པར་བྱ་བ་རབ་ཏུ་གཅེས། །ཞེས་གསུངས་པ་ཡིན་ནོ། །གསུམ་པ་སྒོམ་པའི་ཤེས་རབ་ཅན་ལ་ཁྲིད་ཀྱི་ལུགས་སུ་འདེབས་པ་ནི། དབང་སོ་སོའི་རྗེས་འབྲེལ་དུ་གདམས་ངག་དང་སྒོམ་གྱི་ཁྲིད་འདེབས་པར་མཛད་པ་ཉིད་ཡིན་ཏེ། དེ་ཡང་ཐོག་མར་ལམ་ལ་འཇུག་པའི་སྒོར། ཚེ་འདི་དང་འཁོར་བ་ལ་ཡིད་ངེས་པར་བྱུང་བའི་སྐྱོ་ཤས་དང་། ལས་འབྲས་བསླུ་བ་མེད་པར་ཡིད་ཆེས་པའི་ངེས་ཤེས་དང་ལྡན་པའི་སྒོ་ནས། དཀོན་མཆོག་གསུམ་གྱི་ཡོན་ཏན་དྲན་པས་སྒོ་འབྱེད་ཀྱི་དབང་གི་རྗེས་འབྲེལ་དུ་འབྱུང་བ་བཞིན་སྐྱབས་འགྲོ་ལམ་དུ་ཁྱེར་བར་བྱ་ཞིང་། གནས་ལུགས་མ་རྟོགས་པའི་སེམས་ཅན་རྣམས་ལ་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་པ་དང་། བྱིན་རླབས་ཀྱི་འཇུག་སྒོར་བླ་མའི་རྣལ་འབྱོར་བསྒོམ་པ་རྣམས་ཀྱིས་ཐུན་ཐམས་ཅད་ཀྱི་འགོ་བཟུང་བར་བྱ་བ་ཡིན་ནོ། །དེ་ནས་ཁྲིད་དངོས་ལ། སྒྱུ་འཕྲུལ་རྩ་རྒྱུད་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ལྟར། ལྷ་མིའི་ཐེག་པས་རང་གི་འབྲས་བུའི་མི་མཐུན་ཕྱོགས་ངན་སོང་གིས་འཇིགས་ནས་མཐོ་རིས་ཀྱི་བདེ་འབྲས་དོན་དུ་གཉེར་བས་མངོན་མཐོའི་རྟེན་སྒྲུབ་པར་བྱེད་པ་སྟེ། ཕ་རོལ་ཏུ་ཕྱིན་པའི་མན་ངག་སྐྱེས་བུ་གསུམ་གྱི་ལམ་རིམ་དང་སྦྱར་ན། སྐྱེས་བུ་ཆུང་ངུའི་ལམ་སྟེ། ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །ཞེས་གསུངས། དེའི་ལམ་ཇི་ལྟར་སྒོམ་ཚུལ་ནི། མི་དགེ་བཅུ་སྤོང་ཞིང་དགེ་བཅུ་ལ་བསླབ་པ་འཇིག་རྟེན་པའི་ཡང་དག་པའི་ལྟ་བ་ལ་གནས་པས་ཚད་མེད་བཞི་དང་བསམ་གཟུགས་ཀྱི་ཏིང་ངེ་འཛིན་སྒོམ་པར་བྱེད་པ་སྟེ། དེས་འཇིག་རྟེན་ལས་འདས་པའི་ཏིང་ངེ་འཛིན་སྐྱེད་པའི་རྟེན་དུ་འགྲོ་བ་ཡིན་ནོ། །དེ་ནས་འཁོར་བ་ལ་འཇིགས་ནས་རང་དོན་དུ་ཞི་བདེའི་འབྲས་བུ་དོན་དུ་གཉེར་བ་ནི། སྐྱེས་བུ་འབྲིང་གི་ལམ་སྟེ། དེ་ལས། སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་གསུངས། དེའི་ལམ་ཇི་ལྟར་བསྒོམ་པ་ལ་གཉིས་ལས། །དང་པོ་ཉན་ཐོས་ཀྱི་ཁྲིད་ནི། མི་སྡུག་པའི་ཏིང་ངེ་འཛིན་གྱིས་སེམས་ལས་སུ་རུང་བའི་ཞི་གནས་བསྒྲུབས་ནས། ལྷག་མཐོང་གང་ཟག་གི་བདག་མེད་པ་བསྒོམ་པར་བྱ་བའོ། །གཉིས་པ་རང་རྒྱལ་གྱི་ཁྲིད་ནི། རྟེན་འབྲེལ་ལུགས་འབྱུང་ལྡོག་དང་། གང་ཟག་གི་བདག་མེད་རྟོགས་པའི་སྟེང་དུ་གཟུང་བ་ཆོས་ཀྱི་བདག་མེད་བསྣན་ནས་བསྒོམ་པ་ཡིན་ནོ། །དེ་གཉིས་ཀྱི་རྟོགས་བྱ་ཐམས་ཅད་འདིར་ཡང་རྟོགས་དགོས་པ་ཡིན་མོད། ཐོབ་བྱ་རྣམས་ནི་ཐེག་ཆེན་གྱི་གོལ་ས་ཡིན་པས་མངོན་དུ་བྱེད་དགོས་པ་མ་ཡིན་ནོ། །དེ་ནས་སྲིད་ཞིའི་མཐའ་གཉིས་ཀྱིས་འཇིགས་ནས་མི་གནས་པའི་མྱང་འདས་དོན་དུ་གཉེར་བ་ནི། སྐྱེས་བུ་ཆེན་པོའི་ལམ་སྟེ། དེ་ལས། རང་རྒྱུད་རྟོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས། དེའི་ལམ་བྱང་སེམས་ཀྱི་ཐེག་པའི་ཁྲིད་ནི། སྨོན་འཇུག་གི་སེམས་བསྐྱེད་དང་ལྡན་པས་མཉམ་བཞག་ཏུ་རྣམ་པར་མི་རྟོག་པའི་ཏིང་ངེ་འཛིན་གྱིས་བདག་མེད་གཉིས་བསྒོམ་ཞིང་། རྗེས་ཐོབ་ཏུ་གང་ཤར་གྱི་སྣང་བ་ཐམས་ཅད་སྒྱུ་མ་ལྟ་བུར་ལམ་དུ་ཁྱེར་བའོ། །དེ་ལྟར་བཞིས་ངེས་པར་བྱུང་བའི་མཐར་ཐེག་པ་གཅིག་པུ་སྟེ། འབྲས་བུ་སྔགས་ཀྱི་ཐེག་པ་ལ་རིམ་གྱིས་ཁྲིད་པར་བྱེད་པ་ཡིན་པས། བྱ་སྤྱོད་ཐུན་མོང་བའི་ཁྲིད་མཚན་བཅས་དང་མཚན་མེད་ཀྱི་ཏིང་ངེ་འཛིན་གྱིས་བདེན་གཉིས་རེས་འཇོག་ཏུ་ཉམས་སུ་ལེན་པར་བྱེད་པ་ཡིན་ལ། དེ་ལ་གོམས་ནས་ཡོ་གའི་ཐེག་པའི་ཁྲིད་དོན་དམ་མཚན་མ་མེད་པའི་ངོ་བོ་ལ་མཉམ་པར་འཇོག་པ་དང་། དེའི་བྱིན་བརླབས་ཀུན་རྫོབ་ཡེ་ཤེས་ཀྱི་སྣང་བ་ལྷའི་ལམ་ཁྱེར་གྱིས་གཉིས་སུ་མེད་པའི་ངང་ལ་མ་བཅོས་པར་སྒོམ་པ་ཡིན་ནོ། །དེ་ནས་བློ་ན་འཕར་བའི་རིམ་པས་གསང་སྔགས་བླ་ན་མེད་པའི་ལམ་རིམ་ལ་འཇུག་སྟེ། དེ་ཡང་ནང་དབང་དང་འབྲེལ་བ་མ་ཧཱ་ཡོ་ག་དང་ཐུན་མོང་བའི་སྒོམ་ཐབས་དང་སྒོམ་འབྲིང་པོ་དང་། སྒྲུབ་དབང་དང་འབྲེལ་བ་ཨ་ནུ་རང་ལུགས་ཀྱི་སྒོམ་ཐབས་དང་སྒོམ་ཆེན་པོ་དང་། གསང་དབང་རྫོགས་པའི་ཆུ་བོ་དང་འབྲེལ་བ་ལ་གཉིས་ཀྱི། དང་པོ་ཀུན་རྫོབ་བྱང་སེམས་དང་འབྲེལ་བའ ི་གདམས་པ་སྟེང་སྒོ་རླུང་དང་ཐིག་ལེ་འཇུ་འདུལ་གྱི་མན་ངག་དང་འོག་སྒོ་ཁམས་གསུམ་རོལ་པའི་མན་ངག་གཉིས་ལ་བརྟེན་ནས་འཛག་མེད་བདེ་སྟོང་གི་ཡེ་ཤེས་བསྐྱེད་པ་ལ་བསླབ་པའོ། །གཉིས་པ་དོན་དམ་བྱང་སེམས་ཀྱི་དབང་དང་འབྲེལ་བའི་གདམས་པ་ནི། རྟེན་ཅན་སྙིང་གའི་མི་ཤིགས་པའི་ཐིག་ལེ་ལ་རླུང་སེམས་ཀྱི་དྭངས་མ་ཐམས་ཅད་ཐིམ་སྟེ་དབྱིངས་རིག་གཉིས་མེད་བདེ་བ་ཆེན་པོའི་ཡེ་ཤེས་འཆར་བས་ཁམས་གསུམ་བདེ་བ་ཆེན་པོར་གྲོལ་བར་བྱེད་པའི་མན་ངག་དང་། རྟེན་མེད་མི་གཡོ་གསུམ་ལྡན་གྱི་གནད་ཀྱིས་རྣམ་པར་མི་རྟོག་པའི་ངང་ལ་བསལ་བཞག་མེད་པར་བསྐྱངས་པས་ཡུལ་ཆོས་ཉིད་དོན་གྱི་ཡེ་ཤེས་དང་། ཡུལ་ཅན་ཆོས་སྐུ་གཞིའི་ཡེ་ཤེས་དབྱེར་མེད་པའི་རིག་པ་དབྱིངས་ཡེ་ཟུང་འཇུག་ཏུ་རྟོགས་པས། དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གཏན་ལ་འབེབས་པར་བྱེད་པའོ། །དེ་ལྟར་ཡང་སྤྱི་མདོ་ལས། ཀྱེ་འདུས་པའི་ཚོགས་རྒྱལ་བའི་སྲས་རྣམས་རང་རང་གི་དེ་ཁོ་ན་ཉིད་མཐོང་བར་འདོད་ན། དཀྱིལ་འཁོར་ཆེན་པོ་གསུམ་གྱི་སྒོ་འབའ་ཞིག་ཏུ་འཇུག་པ་བྱའོ། །དེ་ཡང་རྩ་བ་བྱང་ཆུབ་སེམས་ཀྱི་དཀྱིལ་འཁོར་འབའ་ཞིག་གི་སྒོར་འཇུག་པར་བྱའོ། །དེ་ཅིའི་ཕྱིར་ཞེ་ན། དཀྱིལ་འཁོར་ཆེན་པོ་གསུམ་དང་རང་རང་གི་དེ་ཁོ་ན་ཉིད་སོ་སོ་མ་ཡིན་ཐ་མི་དད་དོ། །དེ་ཡང་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་འདུ་བའི་ཕྱིར། ཞེས་གསུངས་པ་ལྟར་བསྒོམས་ལ། ཉམས་མྱོང་ཅན་གྱི་བླ་མ་དམ་པས་ཉམས་རྟོགས་སྐྱེ་རིམ་ནས་ངོ་སྤྲོད་ཅིང་། གེགས་སེལ་བོགས་འདོན་གྱི་བློའི་རིམ་པ་དང་འཚམས་པར་འཁྲིད་པས། ཐབས་གྲོལ་གྱི་ལམ་གཉིས་རང་རང་གི་སེམས་བཅུ་སྐབས་བཅུ་དཔེ་རྟགས་བཅུ་དང་སྦྱར་ནས་འབྲས་བུ་ལ་བགྲོད་པར་བྱེད་པ་ཡིན་ནོ། །དེ་ཡང་བྱིང་རྒོད་མེད་པར་གསལ་ལ་མི་གཡོ་བའི་ཏིང་ངེ་འཛིན་གྱིས་ཉམས་སུ་བླང་སྟེ། རྩ་རྒྱུད་ལས། དཔེར་ན་རྒྱ་མཚོར་ནོར་ལེན་པ། །སྦྲུལ་དང་ཆུ་སྲིན་སྦྲང་མ་ལ། །སོགས་པ་གདུག་པའི་སྡུག་བསྔལ་ཀུན། །དཀའ་བ་ཉམས་སུ་བླངས་པས་འགྲུབ། །དེ་བཞིན་རྣལ་འབྱོར་བདེ་འཚོལ་བ། །རྣམ་རྟོག་བྱིང་རྨུགས་འཕྱར་གཡེང་དགྲ། །གཞོམ་པར་དཀའ་བའི་ལས་འདི་དག །ཉམས་སུ་བླངས་ན་བདེ་ཐོབ་རྙེད། །ཅེས་གསུངས། དེ་ཡང་རྟོགས་པ་དོན་གྱི་མན་ངག་གིས་འབད་རྩོལ་མེད་པར་བསྒྲུབ་བྱ་འབྲས་བུའི་དོན་སྒྲུབ་པར་བྱེད་པ་སྟེ། དེ་ལས། ཇི་ལྟར་མུན་པ་དུག་དང་རྫས། །སྨན་སྣོད་གསེར་དུ་སྒྱུར་བ་ལ། །འགྱུར་རྩིའི་མན་ངག་མེད་པའི་མིས། །དཀའ་བའི་ལས་ཆེན་སྣ་ཚོགས་པས། །སྡུག་བསྔལ་སྤྱད་ཀྱང་མི་འགྲུབ་སྟེ། །སུ་ཞིག་མན་ངག་ལྡན་པའི་མིས། །ཚེགས་མེད་གྱིན་འདའི་ཚུལ་གྱིས་ནི། །བསྒྱུར་བས་སྨན་སྣོད་གསེར་འགྱུར་ལྟར། །རྣལ་འབྱོར་ཆེན་པོའི་དོན་སྒྲུབ་པའི། །ཀུན་གཞི་གནས་འགྱུར་མན་ངག་དང་། །གང་དག་མི་ལྡན་པ་དག་གིས། །དཀའ་བ་སྤྱད་ཀྱང་འགྲུབ་པ་མིན། །སེམས་ཀྱི་གསང་འདི་སུས་མཐོང་བ། །དེ་དག་མན་ངག་ལྡན་པ་སྟེ། །འདོད་པའི་དོན་མཆོག་གང་ཡིན་པ། །དེ་དག་ཚེགས་མེད་གྱིན་འདས་འགྲུབ། །ཅེས་གསུངས་པ་བཞིན་ནོ། ༈ །སྤྱི་དོན་གསུམ་པ་གདུལ་བྱ་སྤྲོ་བ་བསྐྱེད་པའི་ཕྱིར་འཆད་ཉན་གྱི་ཕན་ཡོན་བསྟན་པས་འཇུག་བསྡུ་བ་ནི། དབང་བསྐུར་ཐོབ་གྱི་ཕན་ཡོན་བྱེ་བྲག་པ་རྣམས་ནི་སྔར་བཤད་གྲུབ་པས། འདིར་འཆད་ཉན་སྤྱི་ཙམ་གྱི་ཕན་ཡོན་བཤད་པ་ལ་གཉིས་ཏེ། དམ་པའི་ཆོས་བཤད་པའི་ཕན་ཡོན་དང་། ཉན་པའི་ཕན་ཡོན་ནོ། །དང་པོ་ལ། སྐྱེས་བུ་བྱེད་པའི་འབྲས་བུ། རྣམ་སྨིན་གྱི་འབྲས་བུ། རྒྱུ་འཐུན་གྱི་འབྲས་བུ་དང་གསུམ་ལས། དང་པོ་ནི། ཆོས་བཤད་པས་སློབ་མས་བཤད་བྱའི་ཚིག་དོན་རྟོགས་པར་བྱེད། འཆད་པ་པོ་རང་གི་རྟོགས་པ་རྣམ་པར་སྦྱོང་། ཐུན་མོང་དུ་བཤད་སྒྲུབ་ཀྱི་བྱ་བས་སངས་རྒྱས་ཀྱི་བསྟན་པ་གསལ་ཞིང་གནས་པར་བྱེད་དོ། །དེ་ལྟར་ཡང་སྒྱུ་མ་མཁན་རབ་ཏུ་བཟང་པོས་ཞུས་པའི་མདོ་ལས། རང་རང་གཞན་གྱི་ཤེས་རབ་སྦྱོང་བ་དང་། །ཞེས་དང་། དེ་བཞིན་གཤེགས་པའི་གསང་བ་བསྟན་པ་ལས། དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་མཛད་ཀྱང་། །མཐའ་མར་ཕྱིན་པར་གྱུར་མ་ལགས། །ཞེས་སོ། །གཉིས་པ་ནི། རྟག་ཏུ་སྐྱེ་བ་དྲན་ཞིང་ཆོས་ཀྱིས་འཕོངས་པར་མི་འགྱུར་ཏེ། རིན་ཆེན་ཕྲེང་བ་ལས། ཆོས་ཀྱི་ཆེད་དང་དེ་བཞིན་དུ། །གཞུང་གི་དོན་དག་དྲན་པ་དང་། །ཆོས་ཀྱི་སྦྱིན་པ་དྲི་མེད་པས། །ཚེ་རབས་དྲན་པ་ཐོབ་པར་འགྱུར། །ཞེས་དང་། བློ་གྲོས་རྒྱ་མཚོས་ཞུས་པ་ལས། དེ་བཞིན་གཤེགས་པའི་དམ་པའི་ཆོས་འཛིན་པ། །དྲན་དང་བློ་གྲོས་ལྡན་ཞིང་བློ་ལྡན་འགྱུར། །ཤེས་རབ་རྒྱ་ཆེན་ཀུན་ནས་ཡེ་ཤེས་ལྡན། །མཁས་པ་བག་ཆགས་བཅས་པའི་ཉོན་མོངས་སྤོང་། །ཞེས་སོ། །གསུམ་པ་ནི། གནས་སྐབས་སུ་གཞན་ལ་ཆོས་སྟོན་པའི་དགེ་བའི་བཤེས་གཉེན་དང་། མཐར་ཐུག་ཆོས་ཀྱི་རྒྱལ་པོ་རྫོགས་པའི་སངས་རྒྱས་སུ་འགྱུར་ཞིང་། ཐར་པ་ཆ་མཐུན་གྱི་འབྲས་བུ་གཞན་ལ་ཆོས་བསྟན་པས་འབྲས་བུ་མྱ་ངན་ལས་འདས་པ་ཐོབ་པར་འགྱུར་ཏེ། ཟང་ཟིང་གི་སྦྱིན་པ་ལས་མཆོག་ཏུ་གྱུར་པ་ཡིན་ནོ། །དེ་ལྟར་ཡང་བྱམས་པ་སེང་གེ་སྒྲའི་མདོ་ལས། གང་གིས་གངྒཱའི་བྱེ་སྙེད་སངས་རྒྱས་ཞིང་། །རིན་ཆེན་བདུན་གྱིས་ཡོངས་སུ་བཀང་བྱས་ནས། །དགའ་རབ་སེམས་ཀྱིས་རྒྱལ་ལ་ཕུལ་བ་བས། །གང་གིས་སེམས་ཅན་གཅིག་ལ་ཚིགས་བཅད་བྱིན། །རིན་ཆེན་བྱིན་པ་ཤིན་ཏུ་རྒྱ་ཆེ་དེས། །ཚིགས་བཅད་བྱིན་པ་སྙིང་རྗེས་བསྒྲུབས་དེ་ལ། །ཆར་ཡང་མི་ཕོད་གྲངས་སུའང་མ་ཡིན་ན། །གཉིས་དང་གསུམ་དུ་བསམ་དུ་ག་ལ་ཡོད། །ཅེས་དང་། གཞན་ཡང་མདོ་ལས། སྟོང་གསུམ་འཇིག་རྟེན་ཁམས་འདི་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །ཚིག་བཞི་ཚིགས་སུ་བཅད་པ་གཅིག་བརྗོད་པ། །དེ་ཡི་ཕན་འདོགས་དེ་འདྲ་དེ་ལ་མེད། །ཅེས་གསུངས་ཏེ་ཆོས་ཙམ་བཤད་པའི་ཕན་ཡོན་ནོ། །ཁྱད་པར་ཐེག་པ་ཆེན་པོའི་ཆོས་བཤད་པའི་ཕན་ཡོན་ནི། སེམས་ཅན་གང་ཇི་སྙེད་མཆིས་པ་དེ་ཐམས་ཅད་འཕགས་པ་དགྲ་བཅོམ་པའི་གོ་འཕང་ལ་བཀོད་པ་བས་ཐེག་པ་ཆེན་པོའི་ཆོས་གླེགས་བམ་ལ་བྲིས་ནས་བྱིན་པ་ཕན་ཡོན་ཆེས་ལྷག་སྟེ། སྡུད་པ་ལས། སེམས་ཅན་ཇི་སྙེད་འཁོད་ཀུན་དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཞེས་གསུངས་པའ ི་ཕྱིར། དེ་ལས་ཀྱང་གསང་སྔགས་ཀྱི་ཆོས་བཤད་པའི་ཕན་ཡོན་ནི་མཐའ་ཡས་ཏེ། གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་དང་། རྔམ་གློག་ལས། གཞུང་འདི་སྟོན་པའི་བླ་མ་རྡོ་རྗེ་སློབ་དཔོན་ནི་སྐྱེས་བུ་དམ་པ་འབའ་ཞིག་ཏུ་མ་ཟད་དེ། དེ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་རྡོ་རྗེ་འཛིན་པ་ཆེན་པོ་ཉིད་དུ་བལྟ་བར་བྱའོ། །ཞེས་དང་། གཞན་ལས་ཀྱང་། ཐེག་ཆེན་གསང་བ་ཚིག་ལམ་གཅིག །གང་དུ་ཆུད་པར་གྱུར་པ་ནི། །སྐྱེ་བོ་ཉན་ཐོས་བསམ་ཡས་དང་། །རྒྱལ་བ་བསམ་ཡས་སྲས་བཅས་ལ། །མཆོད་ཡོན་ཚོགས་རྣམས་སྤེལ་བས་ན། །འབུམ་གྱི་ཆར་ཡང་མི་ཕོད་དོ། །ཞེས་དང་། རྩ་རྒྱུད་ལས། སྐུ་དང་གསུང་དང་ཐུགས་རྡོ་རྗེ། །དོན་དུ་ངེས་པར་སྒྲུབ་པ་རྣམས། །རྟོགས་ནས་སྨྲ་བར་གང་བྱེད་པ། །གོམས་པས་བརྗོད་དང་སྨོན་པ་ཡིས། །ཆོས་ཀྱི་རྒྱལ་པོར་དེ་འགྱུར་ཏེ། །ཡོན་ཏན་རྫོགས་པ་ཉིད་དུ་འགྱུར། །ཞེས་དང་། གང་འདིར་སྔགས་རྣམས་བརྗོད་བྱེད་པ། །གསང་བདག་ཆོས་ཀྱི་རྒྱལ་པོར་འགྱུར། །དེས་ན་ཐེག་ཆེན་གསང་བ་འདི། །ཀུན་ལ་བསྔགས་པ་བརྗོད་པར་གྱིས། །ཞེས་སོ། །གཉིས་པ་ཉན་པ་པོས་ཐོབ་པའི་ཕན་ཡོན་ནི། ཆོས་རྔ་སྒྲོག་པ་ཐོས་པ་ཙམ་གྱིས་ཀྱང་བྱང་ཆུབ་ཐོབ་པར་འགྱུར་ན། ཆོས་ཉན་པའི་ཆེད་དུ་ལྷགས་པ་ལྟ་སྨོས་ཀྱང་ཅི་དགོས་ཏེ། །གཎྜཱིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔའམ་གཎྜཱི་བརྡུངས་པའི་སྒྲ། །ཐོས་པས་བྱང་ཆུབ་ཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་སོ། །ཆོས་ཐོས་པས་བླང་དོར་གྱི་གནས་རྣམས་ཁོང་དུ་ཆུད་པར་འགྱུར་ཏེ། བྱང་ཆུབ་སེམས་དཔའི་སྡེ་སྣོད་ལས། མིག་ལྡན་མར་མེ་ཡོད་གྱུར་ན། །གཟུགས་རྣམས་མཐོང་བ་ཇི་ལྟ་བར། །དེ་བཞིན་དགེ་དང་མི་དགེའི་ཆོས། །ཐོས་པས་རྣམ་པར་ཤེས་པར་འགྱུར། །ཞེས་དང་། རྒྱུད་བླ་ལས། ཤེས་རབ་ཉོན་མོངས་ཤེས་བྱ་ཀུན་སྤོང་དེ་ཡི་ཕྱིར། །འདི་ཡིས་མཆོག་ཉིད་དེ་ཡི་རྒྱུ་ནི་ཐོས་པ་ཡིན། །ཞེས་སོ། །གཞན་ཡང་། ཐོས་པས་ཆོས་རྣམས་ཤེས་པར་བྱེད། །ཐོས་པས་སྡིག་ལས་བཟློག་པར་བྱེད། །ཐོས་པས་དོན་མ་ཡིན་པར་སྤོང་། །ཐོས་པས་མྱ་ངན་འདས་པ་ཐོབ། །ཅེས་དང་། མྱ་ངན་མེད་སྦྱིན་པ་ལུང་བསྟན་པའི་མདོ་ལས་ཀྱང་། ཀུན་དགའ་བོ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་སྟེ་སྦྱིན་པ་བྱིན་པ་བས། གང་གི་ཚེ་ཆོས་ཀྱི་རྣམ་གྲངས་འདི་ཐ་ན་རྣ་ལམ་དུ་ཐོས་ན། འདི་ནི་དེ་བས་བསོད་ནམས་མང་དུ་བསྐྱེད། ཅེས་དང་། འཕགས་པ་དེ་བཞིན་གཤེགས་པའི་སྙིང་རྗེ་ཆེན་པོ་ཞེས་བྱ་བ་ཐེག་པ་ཆེན་པོའི་མདོ་ལས། སངས་རྒྱས་སྤྱན་གྱིས་ཞིང་ཁམས་གང་མཐོང་ཡང་། །རིན་ཆེན་གྱིས་བཀང་དེ་བཞིན་གཤེགས་བྱོན་ཡང་། །འདི་ལྟ་བུ་ཡི་ཆོས་འདི་མ་ཐོས་ན། །དེ་ནི་བསོད་ནམས་ཆུང་ཞེས་ང་སྨྲའོ། །གང་གིས་དམ་པའི་དོན་ལྡན་ཟབ་ཅིང་ཕྲ། །མདོ་སྡེ་ཟབ་མོ་འདི་ནི་ཐོས་གྱུར་ནས། །ཀུན་ཏུ་འཛིན་ཅིང་གཟུང་ནས་ཀློག་བྱེད་པ། །འདི་ནི་དེ་བས་བསོད་ནམས་མཆོག་ཏུ་འཕགས། །ཞེས་དང་། རྔམ་གློག་ལས། རིགས་ཀྱི་བུ་དད་པ་ཅན་གྱི་སྐྱེ་བོ་བླ་མ་འཁོར་དང་བཅས་པ་དང་། གསང་བའི་ཐེག་པ་འདི་ལ་མོས་ཤིང་དད་པ་དང་། རྣ་བའི་དབང་པོས་ཉན་ཅིང་གཡོ་སྒྱུ་དང་གསོག་འཇོག་སྤངས་པ་དེའི་རྣམ་པར་སྨིན་པའི་ལེགས་པའི་ཡོན་ཏན་བརྗོད་ཅིང་ཚད་གཟུང་བར་རབ་ཏུ་དཀའ་འོ། །ཞེས་དང་། སྒྱུ་འཕྲུལ་རྩ་རྒྱུད་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་གྱུར། །ཞེས་དང་། དཔལ་མགོན་འཕགས་པ་ཀླུ་སྒྲུབ་ཀྱིས། །རི་དབང་རྩེ་ནས་འགའ་ཞིག་ལྷུངས་གྱུར་ན། །ལྟུང་བར་མི་བྱ་སྙམ་ཡང་ལྟུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ནས། །གྲོལ་བར་མི་བྱ་སྙམ་ཡང་གྲོལ་བར་འགྱུར། །ཞེས་གསུངས་སོ། །མདོར་ན་གཏི་མུག་མེད་པ་དགེ་བའི་རྩ་བ་ཡིན་པས་ན། ཆོས་ཐོས་པས་ཚོགས་རྒྱ་ཆེན་པོར་འགྱུར་བ་དང་། ཚེ་འདིར་ཡོན་ཏན་གྱི་ཆོས་ཐོས་པ་དང་། རིམ་དང་ཅིག་ཅར་གྱིས་བསམ་པ་དང་སྒོམ་པ་ལ་འཇུག་པས་མཐར་ཐུག་གི་འབྲས་བུ་འཚང་རྒྱ་བར་འགྱུར་ཞིང་། གནས་སྐབས་ཀྱི་འབྲས་བུ་ཚེ་འདིར་ཡང་། སྒྲོ་འདོགས་ཆོད་པས་ཤེས་རབ་སྐྱེ་བ་དང་། ཐམས་ཅད་ཀྱིས་བཀུར་ཞིང་བསྟོད་པའི་གནས་ཐོབ་པ་དང་། ལམ་ཉམས་སུ་ལེན་པ་ལ་གཞན་གྱི་དྲིང་མི་འཇོག་པ་ཡིན་ནོ། །མདོར་ན་འཆད་ཉན་བྱས་པའི་ཕན་ཡོན་ནི་འདི་ཙམ་མོ་ཞེས་རྫོགས་པའི་སངས་རྒྱས་ཀྱིས་ཀྱང་གསུང་བར་དཀའ་ན་སྐྱེ་འཕགས་གཞན་དག་གིས་བརྗོད་པའི་ཡུལ་ལས་ཤིན་ཏུ་འདས་ཏེ། འཕགས་པ་བློ་གྲོས་མི་ཟད་པའི་མདོ་ལས། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །བཞི་པོ་འདི་དག་བསོད་ནམས་མཐའ་ཡས་ཏེ། །དེ་དག་མཐའ་ནི་རྒྱལ་བ་མི་གསུང་ངོ་། །ཞེས་འབྱུང་བ་ཡིན་ནོ། །འདིར་སྨྲས་པ། མཐའ་ཡས་རྒྱལ་ཀུན་ཐུགས་ཀྱི་གསང་བའི་མཛོད། །ཨ་ནུ་ཡོ་ག་དཔལ་ལྡན་འདུས་པ་མདོའི། །དབང་གི་སྤྱི་དོན་རྒྱུད་ལུང་མན་ངག་གནད། །གསལ་བྱེད་རིན་ཆེན་སྒྲོན་མེ་དེང་འདིར་འབར། །གསང་ཆེན་རྒྱུད་ལུང་མ་དྲོས་ཆུ་གཏེར་ལས། །སྒྲིབ་གཉིས་འཁྲུད་བྱེད་དབང་གི་ཆུ་བོ་བཞི། །གཏེར་ཆེན་བླ་མའི་ཕྲིན་ལས་འབབ་སྟེགས་ལས། །སྐལ་བཟང་ཡོངས་ཀྱི་གདུང་སེལ་དཔྱིད་དུ་བབས། །གང་གི་དྲིན་ལས་བློ་དམན་བདག་ལྟས་ཀྱང་། །ཕྱོགས་ཙམ་རྟོགས་སྙམ་རྒྱུད་ལུང་རྒྱ་མཚོ་ལས། །བློ་གྲོས་ཕྲ་མོའི་སྐྲ་རྩེས་ཐིག་པའི་ཚུལ། །ཅུང་ཟད་བླངས་ནས་ཡི་གེའི་ལམ་དུ་བྱས། །ཟབ་བརླིང་རྒྱུད་སྡེའི་གནས་ཚུལ་དཔག་པར་དཀའ། །བྱིས་པའི་བློ་མིག་གསལ་ཀྱང་ཕྱོགས་མཐོང་ཙམ། །དེ་ཕྱིར་འགལ་ཟློས་ལོག་པར་བཤད་པ་སོགས། །ཉེས་ཀུན་དམ་པ་རྣམས་ལ་བཟོད་པར་གསོལ། །ལེགས་པར་བཤད་པའི་དགེ་ཚོགས་འོད་སྟོང་གིས། །མཐའ་ཡས་འགྲོ་བའི་མ་རིག་མུན་བསལ་ཞིང་། །ཆོས་མཆོག་ཕན་བདེའི་སྣང་བ་ཆེར་འབར་བས། །དཔལ་ལྡན་སྐུ་བཞིའི་པད་ཚལ་རྒྱས་གྱུར་ཅིག །བདག་ཀྱང་དེང་ནས་ཚེ་རབས་དུས་ཀུན་ཏུ། །རྗེ་བཙུན་བླ་མའི་གསུང་ངག་བདུད་རྩིའི་རྒྱུན། །འཐུངས་ལས་ཤེས་རབ་དབང་པོ་རབ་རྒྱས་ཏེ། །རྣམ་གྲོལ་ཆོས་ཀྱི་དཔལ་ལ་སྤྱོད་གྱུར་ཅིག །མདོར་ན་བདག་གི་བྱ་བ་གང་བསྒྲུབས་ཀུན། །སྔ་འགྱུར་བསྟན་པ་རྒྱས་པའི་རྒྱུར་གྱུར་ནས། །བཤད་སྒྲུབ་ཡིད་བཞིན་རིན་ཆེན་དབང་གི་རྒྱལ། །ཐུབ་བསྟན་རྒྱལ་མཚན་རྩེ་མོར་འགོད་པར་ཤོག །འདུས་པ་ཆེན་པོ་མདོའི་དབང་གི་དོན་གཏན་ལ་འབེབས་པར་བྱེད་པའི་སྤྱི་དོན་རྒྱུད་ལུང་མན་ངག་གི་གནད་གསལ་བར་བྱེད་པའི་སྒྲོན་མེ་ཞེས་བྱ་བ་འདི་ནི། དམ་པ་དུ་མའི་གསུང་གིས་རིང་མོ་ནས་བསྐུལ་ཞིང་། ཁྱད་པར་རྒྱལ་ཀུན་སྤྱི་གཟུགས་ཁྱབ་བདག་འཁོར་ལོའི་མགོན་པོ་གཏེར་ཆེན་ཆོས་ཀྱི་རྒྱལ་པོ་ཡབ་སྲས་ཀྱི་བཀའ་ལུང་སྩལ་བ་དད་བརྒྱའི་སྤྱི་བོས་ནོད་དེ། གང་གི་གཞལ་དུ་མེད་པའི་བཀའ་དྲིན་ཆེན་པོས་འཚོ་བའི་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་རང་ལོ་ལྔ་བཅུ་ང་བདུན་པ་རྣམ་འགྱུར་ལྕགས་སྟག་གི་ལོ་དགུན་འབྲིང་རྒྱལ་ཟླའི་ཚེས་ཉི་ཤུའི་སྔ་དྲོའི་ཉི་མ་མེ་བཞིའི་འགྲུབ་སྦྱོར་ལ། བཤད་སྒྲུབ་ཀྱི་ཆུ་བོ་མ་ལུས་པ་འདུ་བའི་ཡོན་ཏན་རིན་པོ་ཆེའི་འབྱུང་གནས་ཨོ་རྒྱན་སྨིན་གྲོལ་གླིང་གི་ཆོས་གྲྭར་སྦྱར་བའོ། །འདིས་ཀྱང་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་པའི་རྒྱུར་གྱུར་ཅིག །ཤུ་བྷ་མསྟུ།། །།

འདུས་པ་མདོའི་དབང་གི་བརྒྱུད་འདེབས། ཛྙཱ་ན།

འདུས་པ་མདོའི་དབང་གི་བརྒྱུད་འདེབས་ནི། ཁྱབ་བདག་གདོད་མའི་མགོན་པོ་ཀུན་ཏུ་བཟང་། །རྒྱལ་ཚབས་རིགས་ལྔ་རྒྱལ་སྲས་རིགས་གསུམ་མགོན། །དམ་པའི་རིགས་ཅན་རྣམ་ལྔ་རྒྱལ་པོ་ཛཿ ཨུ་པ་རཱ་ཛ་རྣམས་ལ་གསོལ་བ་འདེབས། །ཨིནྡྲ་བྷཱུ་ཏི་ནཱ་ག་པུ་ཏྲ་དང་། །གུ་ཧྱ་པུ་ཏྲི་ཀུ་ཀུ་རཱ་ཛའི་ཞབས། །རོ་ལངས་བདེ་བ་རྡོ་རྗེ་བཞད་པ་དང་། །པྲ་བྷཱ་ཧསྟི་རྣམས་ལ་གསོལ་བ་འདེབས། །ཤཱཀྱ་སེང་གེ་དྷ་ན་རཀྵི་ཏ། །རྡོ་རྗེ་ཧཱུཾ་མཛད་སྠི་ར་མ་ཏི། །བདེ་བ་གསལ་མཛད་དྷརྨ་བོ་དྷི་དང་། །མཁན་པོ་ཆོས་རྒྱལ་སྐྱོང་ལ༴ བལ་པོ་ནོར་འཛིན་བྲུ་ཤ་ཆེ་བཙན་སྐྱེས། །གནུབས་ཆེན་ཡབ་སྲས་ཡེ་ཤེས་རྒྱ་མཚོ་དང་། །བློ་གྲོས་བྱང་ཆུབ་ཐོ་དཀར་ནམ་མཁའ་སྡེ། །ཟུར་ཆེན་མེས་དཔོན་རྣམས་ལ༴ ཡང་ཁྱེད་སྒྲོ་ཕུག་པ་དང་འགར་སྟོན་པ། །སྲེགས་དང་གླན་སྟོན་རྡོར་འོད་བརྩོན་འགྲུས་སེང་། །བསོད་རྒྱལ་ལྷ་འབུམ་ཆོས་སེང་སངས་རྒྱས་དཔལ། །བསོད་ནམས་མགོན་པོ་རྣམས་ལ༴ སྒྲོལ་ཆེན་ཡབ་སྲས་ནམ་མཁའ་རྡོ་རྗེ་དང་། །ཤ་མི་ལ་གུ་པ་དང་བློ་གྲོས་རྒྱལ། །གཞན་ཕན་ཕྲིན་ལས་ལྷུན་གྲུབ་ཡོངས་གྲོལ་མཚན། །འགྱུར་མེད་རྡོ་རྗེ་རྣམས་ལ༴ ངག་དབང་ཆོས་དཔལ་རིན་ཆེན་རྣམ་པར་རྒྱལ། །ཨོ་རྒྱན་བསྟན་འཛིན་ཕྲིན་ལས་རྣམ་རྒྱལ་སྡེ། །པདྨ་དབང་རྒྱལ་སངས་རྒྱས་ཀུན་དགའ་བཟང་། །མདོ་སྔགས་བསྟན་འཛིན་རྣམས་ལ༴ རིགས་ཀུན་ཁྱབ་བདག་ཕན་བདེའི་འོད་ཟེར་ཞབས། །བརྒྱུད་སྲོལ་ཀུན་འདུས་རྩ་བའི་བླ་མ་དང་། །ཡི་དམ་ཞི་ཁྲོ་རབ་འབྱམས་འཁོར་ལོའི་སྤྲིན། །མཁའ་འགྲོ་དམ་ཅན་རྣམས་ལ་གསོལ་བ་འདེབས། །སེམས་ཀྱི་ཆོས་ཉིད་དབྱིངས་ཡེ་གཉིས་མེད་པར། །ཡེ་ནས་མ་འདྲེས་ཡོངས་རྫོགས་དཀྱིལ་འཁོར་གསུམ། །ཇི་བཞིན་བྱེད་པ་རྐྱེན་དང་བྲ་བྲལ་གྱི། །རྣལ་འབྱོར་ལམ་བཞིན་མཐའ་རུ་ཕྱིན་པར་ཤོག །ཅེས་འདུས་མདོའི་བརྒྱུད་འདེབས་གཏེར་ཆེན་རིན་པོ་ཆེའི་གསུང་སོར་བཞག་ལ་བརྒྱུད་པའི་ཁྱད་པར་གྱིས་གཏེར་ཆེན་ནས་རང་གི་རིགས་བདག་བླ་མའི་བར་ཁ་སྐོང་བ་པོ་ནི་ཛྙཱ་ནའོ།། །།

འདུས་པ་མདོའི་དབང་གི་བརྒྱུད་འདེབས། འགྱུར་མེད་རྡོ་རྗེ།

འདུས་པ་མདོ་བའི་དབང་གི་བརྒྱུད་འདེབས་ནི། ཁྱབ་བདག་གདོད་མའི་མགོན་པོ་ཀུན་ཏུ་བཟང་། །རྒྱལ་ཚབ་རིགས་ལྔ་རྒྱལ་སྲས་རིགས་གསུམ་མགོན། །དམ་པའི་རིག་ཅན་རྣམ་ལྔ་རྒྱལ་པོ་ཛ། །ཨུ་པ་རཱ་ཛ་རྣམས་ལ་གསོལ་བ་འདེབས། །ཨིནྟྲ་བྷུ་ཏཱི་ན་ག་སུ་ཏྲ་དང་། །ག་ཡ་སུ་ཏྲི་ཀུ་ཀུ་རཱ་ཛའི་ཞབས། །རོ་ལངས་བདེ་བ་རྡོ་རྗེ་བཞད་པ་དང་། །པྲ་བྷ་ཧ་སྟི་རྣམས་ལ་གསོལ་བ༴ ཤཱཀྱ་སེང་གེ་དྷ་ན་རཀྵི་ཏ། །རྡོ་རྗེ་ཧཱུྃ་མཛད་སྠི་ར་མ་ཏི། །བདེ་བ་གསལ་མཛད་དྷརྨ་བོ་དྷི་དང་། །མཁན་པོ་ཆོས་རྒྱལ་སྐྱོང་ལ་གསོལ་བ་འདེབས། །བལ་པོ་ནོར་འཛིན་འབྲུ་ཤ་ཆེ་བཙན་སྐྱེས། །གནུབས་ཆེན་ཡབ་སྲས་ཡེ་ཤེས་རྒྱ་མཚོ་དང་། །བློ་གྲོས་བྱང་ཆུབ་ཐོད་དཀར་ནམ་མཁའ་སྡེ། །ཟུར་ཆེན་མེས་དབོན་རྣམས་ལ་གསོལ་བ་འདེབས། །ཡང་ཁྱེད་སྒྲོ་ཕུག་པ་དང་འགར་སྟོན་པ། །སྲེགས་དང་གླན་སྟོན་རྡོར་འོད་བརྩོན་འགྲུས་སེང་། །བསོད་རྒྱལ་ལྷ་འབུམ་ཆོས་སེང་སངས་རྒྱས་དཔལ། །བསོད་ནམས་མགོན་པོ་རྣམས་ལ་གསོལ་བ་འདེབས། །སྒྲོལ་ཆེན་ཡབ་སྲས་ནམ་མཁའ་རྡོ་རྗེ་དང་། །ཤ་མི་ལ་དགུ་བ་དང་བློ་གྲོས་རྒྱལ། །གཞན་ཕན་འཕྲིན་ལས་ལྷུན་གྲུབ་ཡོངས་གྲོལ་མཚན། །འགྱུར་མེད་རྡོ་རྗེ་རྣམས་ལ་གསོལ་བ་འདེབས། །ངག་དབང་ཆོས་དཔལ་འགྱུར་མེད་རྒྱ་མཚོའི་སྡེ། །ཨོ་རྒྱན་བསྟན་འཛིན་ཀུན་བཟང་ཐེག་མཆོག་མཚན། །རིག་འཛིན་བཟང་པོ་རྡོ་རྗེ་མྱུ་གུ་རྩལ། །རིག་པའི་རྡོ་རྗེ་རྣམས་ལ་གསོལ་བ་འདེབས། །འཇམ་དབྱངས་བླ་མ་མཁྱེན་བརྩེའི་དབང་པོའི་གཏེར། །པདྨ་མདོ་སྔགས་བསྟན་འཛིན་དཔལ་བཟང་པོ། །ཨོ་རྒྱན་མདོ་སྔགས་ཆོས་ཀྱི་ཉི་མ་སོགས། །རྩ་བརྒྱུད་བླ་མ་རྣམས་ལ་གསོལ་བ་འདེབས། །ཤྭ་ལོ་ཀ་འདི་དཔལ་ཆེན་འདུས་པས། སེམས་ཀྱི་ཆོས་ཉིད་དབྱིངས་ཡེ་གཉིས་མེད་པས། །ཡེ་ནས་མ་འདྲེས་ཡོངས་རྫོགས་དཀྱིལ་འཁོར་གསུམ། །ཇི་བཞིན་བྱེད་པ་རྐྱེན་དང་བྱ་བྲལ་གྱི། །རྣལ་འབྱོར་ལམ་བཞིན་མཐའ་རུ་ཕྱིན་པར་ཤོག །ཅེས་འདུས་མདོའི་བརྒྱུད་འདེབས་གཏེར་ཆེན་རིན་པོ་ཆེའི་གསུངས་སོར་བཞག་ལ་བཙུན་པ་གཞན་ཕན་མཐའ་ཡས་པས་ཁ་བརྐང་བགྱིས་པའོ། །འདུས་མདོ་ཁམས་ལུགས་ཀྱི་བརྒྱུད་པ་ལྟར་ན། ཡང་ཁྱེད་སྒྲོ་ཕུག་པ་དང་འཛམ་སྟོན་ཆེ། །འགྲོ་བའི་མགོན་པོ། དམ་པ་བདེ་གཤེགས་གཙང་སྟོན་རྡོ་རྗེ་རྒྱལ། །བྱམས་པ་འབུམ་དང་རྩ་སྡེ་སྤྱན་སྔ་བ། །ཉག་གྲོ་ཐུགས་རྗེ་ཡེ་ཤེས་གསོལ་བ་འདེབས། །སྟོན་པ་དབང་འབྱོར་རྡོ་རྗེ་དཔལ་བ་དང་། །མགོན་པོ་རྒྱལ་མཚན་མང་ཁྲོད་ཚུལ་ཁྲིམས་རྒྱལ། །བྲ་བོ་ཆོས་འབུམ་ཡེ་ཤེས་རྒྱལ་མཚན་དཔལ། །ནམ་མཁའ་རྒྱལ་མཚན་རྣམས་ལ༴ བསོད་ནམས་འབུམ་དང་སྒྲོ་འདོགས་ནམ་མཁའ་དཔལ། །ནམ་མཁའ་རྒྱ་མཚོའི་ཀུན་དགའ་ཟླ་བ་དང་། །བསོད་ནམས་རྒྱལ་མཚན་ཧོར་པོ་ཆོས་དབང་བ། །བསོད་ནམས་རྡོ་རྗེ་རྣམས་ལ༴ སྟོན་པ་སེངྒེ་བཀྲ་ཤིས་རིན་ཆེན་དང་། །རིན་ཆེན་རྡོ་རྗེ་ཀུན་བཟང་ཤེས་རབ་ཆེ། །ལྷུན་གྲུབ་རྒྱ་མཚོ་པདྨ་ནོར་བུའི་དཔལ། །ཀརྨ་ཆོས་དཔལ་རྣམས་ལ༴ པདྨ་སྦྱིན་པ་པདྨ་བཟོད་པ་དང་། །པདྨ་མདོ་སྔགས་བསྟན་འཛིན་ཕན་བདེའི་གཏེར། །ཨོ་རྒྱན་མདོ་སྔགས་ཆོས་ཀྱི་ཉི་མ་ཆེ། །རྒྱལ་མཚན་འོད་ཟེར་རྣམས་ལ༴ ཐམས་ཅད་མཁྱེན་པ་ཆོས་ཀྱི་རྒྱ་མཚོ་དང་། །རྟོགས་པའི་དབང་ཕྱུག་པདྨ་ལས་འབྲེལ་དང་། །སྨིན་གྲོལ་མཛོད་འཛིན་རྡོ་རྗེ་ལེགས་བཤད་རྩལ། །རྩ་བའི་བླ་མའི་ཞབས་ལ་གསོལ་བ་འདེབས། །སེམས་ཀྱི་ཆོས་ཉིད་སོགས་དང་སྦྲེལ། ཞེས་པའང་རིག་འཛིན་དཔལ་ཆེན་འདུས་པའི་གསུངས་སོ།། །།

ཚོགས་ཆེན་འདུས་པའི་སྒྲུབ་ཐབས་དངོས་གྲུབ་ཆར་འབེབས། འགྱུར་མེད་རྡོ་རྗེ།

ཚོགས་ཆེན་འདུས་པའི་སྒྲུབ་ཐབས་དངོས་གྲུབ་ཆར་འབེབས་ཞེས་བྱ་བ་བཞུགས་སོ། །ༀ་སིདྡྷི་རསྟུ། ལུང་ཨ་ནུ་ཡོ་ག་ཚོགས་ཆེན་འདུས་པའི་དཀྱིལ་འཁོར་གྱི་སྒྲུབ་ཐབས་དངོས་གྲུབ་ཆར་འབེབས་ཞེས་བྱ་བ། དཔལ་སྒྲོལ་བྱེད་ཐུགས་རྗེའི་རྒྱལ་པོ་ལ་ཕྱག་འཚལ་ལོ། །འགྱུར་མེད་མཆོག་ཏུ་བདེ་ཆེན་བདུད་རྩི་ཡིས། །དང་པོར་སྨིན་མཛད་བླ་མར་ཕྱག་བགྱིས་ནས། །གང་གི་སྒྱུ་འཕྲུལ་རབ་འབྱམས་ཞི་དང་ཁྲོ། །ཚོགས་ཆེན་འདུས་པའི་དཀྱིལ་འཁོར་རྣམས་ལའང་འདུད། །ཧེ་རུ་ཀ་དཔལ་ཐུགས་ཀྱི་རྡོ་རྗེའི་དབྱིངས། །སེམས་ཅན་སེམས་ཉིད་མཁའ་དང་མི་ཕྱེད་པའི། །རང་བཞིན་རྣམ་དག་དཀྱིལ་འཁོར་འཁོར་ལོ་ཆེར། །མངོན་པར་མཚོན་བྱེད་ཐབས་ཚུལ་བླ་ན་མེད། །དེ་ཕྱིར་དུས་གསུམ་མགོན་པོས་བགྲོད་པའི་ལམ། །ཐར་མཆོག་གྲོང་ཁྱེར་ཆེན་པོར་འཇུག་པའི་སྒོ། །སྐད་ཅིག་ཉིད་ལ་ཁྲག་འཐུང་དཔའ་བོའི་སར། །བགྲོད་བྱེད་ལམ་གྱི་རིམ་པ་འདིར་གསལ་བྱ། །འདི་ལ་གསུམ་སྟེ། སྒྲུབ་པ་པོ་གང་ཟག །སྒྲུབ་པ་ལམ་རིམ། གྲུབ་པ་འབྲས་བུའོ། །དང་པོ་ནི། རྟེན་གྱི་གང་ཟག་དང་པོའི་རིགས་ཅན་གྱི་དབང་དུ་བྱས་ཏེ། ཐུན་མོང་གི་ལམ་གྱིས་རྒྱུད་སྦྱངས་ནས། དཀྱིལ་འཁོར་འདིར་ཞུགས་ཤིང་དམ་ཚིག་དང་ལྡན་པ་གསང་བའི་ཆོ་ག་ལ་མཁས་པ་སོགས་ཀྱི་སྒོ་ནས་སྣོད་ལྡན་དུ་རུང་བའོ། །གཉིས་པ་ལམ་ལ། སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། སྔོན་འགྲོ་ལའང་བདུན་གྱི། དང་པོ་བྱ་བའི་སྔོན་འགྲོ་ནི། རྒྱུད་ལས་བསྔགས་པའི་གནས་ཕུན་སུམ་ཚོགས་པར་བྱི་དོར་དང་རྒྱན་བཀོད། རྟེན་དང་མཆོད་གཏོར་སོགས་དམ་ཚིག་གི་ཡོ་བྱད་རྣམས་ཚོགས་པར་བཤམས་ནས། གྲལ་ཕྱག་དང་། ཚུལ་ཕྱག་སྔོན་དུ་འགྲོ་བས་འཇམ་ཞིང་བདེ་བའི་སྟན་ལ་གནས་པའོ། །གཉིས་པ་བློ་བཅོས་ཏེ་ལས་ཀྱི་དབུ་དྲང་བ་ནི། ཁྱད་པར་གྱི་ཐེག་པས་འདུལ་བའི་ཡུལ་ལ། ཁྱད་པར་ཅན་གྱི་འདུལ་བྱེད་ཟབ་མོ་བརྩམ་པར་བྱའོ་སྙམ་དུ་ལྷག་པའི་བསམ་པ་རྩེ་གཅིག་པས། ཧཱུཾ། གདོད་ནས་མ་སྐྱེས་རྣམ་དག་ཆོས་ཀྱི་སྐུ། །ཆོས་ཉིད་བྱང་ཆུབ་སེམས་སུ་དབྱེར་མེད་ཀྱང་། །སྲིད་པ་སྲོག་གིས་བསྡུས་པའི་འཇིག་རྟེན་པ། །ལོག་རྟོག་དངོས་པོར་གོལ་བའི་དབང་གིས་ན། །ཉོན་མོངས་བརྒྱད་ཁྲི་བཞི་སྟོང་རང་ལས་བྱུང་། །སྡུག་བསྔལ་བརྒྱད་དང་གསུམ་གྱིས་གཟིར་བ་རྣམས། །རྒྱུ་འབྲས་ཐེག་པ་གཞན་གྱིས་མི་འདུལ་ཏེ། །གསང་སྔགས་གསང་ཆེན་ངེས་པའི་དུས་ལ་བབ། །ན་མོ་ཧཱུཾ། སྲིད་པ་ཕྱི་ནང་སྣོད་བཅུད་ཐམས་ཅད་ནི། །སྙིགས་མ་ལྔ་དང་སྐྱེ་འགྲོ་མ་ལུས་ཀུན། །ཐམས་ཅད་སངས་རྒྱས་ཉིད་ཀྱི་རང་བཞིན་པས། །ཐབས་ལ་མཁས་པས་འདི་ལྟར་བརྟག་ཅིང་བསྒོམ། །ཞེས་པས་སེམས་བསྐྱེད་གསལ་གདབ་ཅིང་། ན་མོ་ཧཱུཾ་གིས་གཟི་བྱིན་བསྐྱེད་པ་སྟེ། ཚུལ་འདི་སླད་ནས་འབྱུང་འགྱུར་རྣམས་ལའང་འགྲེ་ཤེས་པར་བྱའོ། །གསུམ་པ་མཚམས་བཅད་པ་ནི། འདི་ལྟར་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་སྟོང་ཞིང་བདག་མེད་པ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་རང་རྩལ་ལས། བཛྲ་མ་ཧཱ་ཤྲཱི་ཧེ་རུ་ཀ །ཞེས་བརྗོད་པས། བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྡོ་རྗེ་རལ་གྲི་དགྲ་སྟྭ། གཡོན་གསུམ་ཞགས་པ་ལྕགས་སྒྲོག་ཐོང་གཤོལ་འཛིན་པ། ཉི་མ་འབུམ་གྱི་གཟི་བརྗིད་ཅན། གར་དགུའི་ཉམས་ཀྱིས་སྒེག་ཅིང་། དུར་ཁྲོད་རོལ་པའི་ཆས་ཀྱིས་བརྒྱན་པ། ཡུམ་ཀྲོ་དྷེ་ཤྭ་རཱི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ། བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་བརྗོད་པས་ཤངས་ཀྱི་ཧཱུཾ་རིང་དང་། བྱང་ཆུབ་ཀྱི་སེམས་སྤྲིན་ལས། རྡོ་རྗེ་ཡེ་ཤེས་ཀྱི་སྣང་བའི་མཚོན་ཆ་དང་། ཁྲོ་བོ་འཆོལ་བའི་ཚོགས་སྤྲོས་པས། །ཕྱོགས་བཅུའི་དྲེགས་ཅན་ཐམས་ཅད་ཚར་བཅད། ཚུར་འདུས་པ་ལས་སྟེང་འོག་ཕྱོགས་མཚམས་བཅུར་ཉི་མ་དང་ཕྱོགས་སྐྱོང་གི་གདན་ལ་ཁྲོ་བོ་བཅུར་གྱུར་ཏེ་འཁོད་པ་ནི། ༀ་ཧཱུཾ་ཀཱ་ར་བཛྲ་མ་ཧཱ་ཀྲོདྷ་ཧཱུཾ་ཧཱུཾ་ཕཊ། ༀ་བི་ཛ་ཡ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ནཱི་ལ་དཎྜ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཡ་མཱནྟ་ཀ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཨཱརྱ་ཨ་ཙ་ལ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཧ་ཡ་གྲཱི་ཝ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཨ་པ་རཱ་ཛི་ཏ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཨ་མྲྀ་ཏ་ཀུཎྜ་ལཱི་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་ཏྲཻ་ལོཀྱ་བི་ཛ་ཡ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ༀ་མ་ཧཱ་བ་ལ་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། ཞེས་བརྗོད་པའི་རྐྱེན་གྱིས་རིམ་པ་བཞིན། སྟེང་དུ་ཧཱུཾ་མཛད། ཤར་དུ་རྣམ་པར་རྒྱལ་བ། ཤར་ལྷོར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། ནུབ་བྱང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ཆེན་པོ་ཞལ་གསུམ་ཕྱག་དྲུག་པ། སྨད་ཕུར་བུ་འབར་བའི་རྣམ་པས་བགེགས་ལ་གཟིར་བ། དབྱིངས་ཀྱི་ཡུམ་ཅན་སྤྲུལ་པ་དང་ཡང་སྤྲུལ་མཚོན་ཆ་སྣ་ཚོགས་པའི་སྤྲིན་སྤྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་ཞིང་། ཧཱུཾ། སྟེང་འོག་ཕྱོགས་མཚམས་དངོས་པོ་ཅིར་སྣང་ཡང་། །ཁྲོ་བཅུ་ཡབ་ཡུམ་བསྒོམས་པའི་བྱིན་རླབས་ཀྱིས། །ཕྱོགས་བཅུར་གནས་པའི་བགེགས་རྣམས་ཀུན་བསལ་ནས། །སྒྲུབ་པའི་བར་གཅོད་མིང་ཡང་མེད་པར་ཤོག །ན་མོ་ཧཱུཾ། ཞེས་མཚམས་བཅད། བཞི་པ་བཤགས་པ་བྱ་བ་ནི། བཛྲ་ས་མཱ་ཛཿས་བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མཁའ་ཁྱབ་ཏུ་སད་པའི་སྤྱན་སྔར་བཤགས་སྡོམ་གྱི་བསམ་པ་དྲག་པོས། ཧཱུཾ། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་པ། །འདི་གཤེགས་བདག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་གསང་བའི་བྷ་ག་ལས། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་ངང་དུ་རོ་གཅིག་པ། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུགས་ཅན་བདག་ཉིད་མ། །མཁའ་དབྱིངས་ཀློང་ཡངས་པདྨོ་འཁྱིལ་བ་ལ། །གཉིས་མེད་ཐེག་ལེ་ཆེན་པོར་འོད་གསལ་ཞིང་། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ལྷ་ཚོགས་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །ཕྱི་ནང་མཁའ་འགྲོ་རྣལ་འབྱོར་མ་ཡི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཧཱུཾ། ཐུགས་རྗེ་གདུང་ཚབ་རིག་འཛིན་བདག་ཅག་གིས། །འགྲོ་བའི་དོན་དུ་བྱང་ཆུབ་སེམས་བསྐྱེད་དེ། །བླ་མེད་གོ་འཕང་བགྲོད་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱིར་ནོས་ཤིང་གཉེར་དུ་སྨྲས་སོ་འཚལ། །ཡུན་དུ་མི་གཏོང་འདའ་བར་མི་བགྱིད་ཅིང་། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམ་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོག་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་འཕྲད་པར་མི་བྱ་ཞེས། །བཀའ་ལས་བྱུང་ཞིང་དེ་ལྟར་མ་ལྕོགས་ཏེ། །གསང་སྒོ་འཆོལ་བས་དབྱེ་བསལ་དཀས་པ་དང་། །མངོན་ཤེས་མེད་པས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མིན་རྣམས་ལ་ཆོས་བཤད་དང་། །ཉམས་ལ་མི་འཛེམས་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གིས། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས། །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས། །བྱམས་པའི་ཐུགས་བརྩེས་བདག་ལ་དགོངས་ནས་ཀྱང་། །གཉིས་མེད་དབྱིངས་ལས་མི་འགྱུར་བདག་བཀོད་དེ། །དམིགས་མེད་བཏང་སྙོམས་ངང་ལ་བཞུགས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་དམིགས་མེད་སྤྲོས་ལས་འདས་པ་ན། །རྣམ་རྟོག་གང་ཡང་དམིགས་པར་མི་འགྱུར་ཞིང་། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པར་མཆིས་ན་རབ་ནོངས་བཟོད་པར་གསོལ། །རྩ་མདོར་འདི་དང་ཚིག་རིགས་མི་འདྲ་བ་ཅི་རིགས་སྣང་ཡང་བརྗོད་བདེ་བའི་ཕྱིར་སྤྱི་ལྟར་བཀོད་དོ། །ཧཱུཾ། སྒྲིབ་པ་རྣམ་གཉིས་དངོས་པོ་ཅིར་སྣང་ཡང་། །ཡིད་ཀྱིས་མངོན་དུ་བཤགས་པའི་བྱིན་རླབས་ཀྱིས། །སྒྲིབ་པ་ཡེ་ནས་དག་པའི་དོན་རྟོགས་ནས། །སེམས་ཉིད་རང་བཞིན་མེད་པའི་དོན་རྟོགས་ཤོག །ན་མོ་ཧཱུཾ། ཞེས་བཤགས་པས་སྡིག་སྒྲིབ་ཐམས་ཅད་ཡེ་ནས་རང་བཞིན་མེད་པའི་དབྱིངས་སུ་དག་པར་བསམ་མོ། །ལྔ་པ་དམ་བཅའ་བ་ནི། རྩིས་འགོས་མ་བསྡུས་ཀྱང་ཕྱག་ལེན་དུ་མཛད་པ་ལྟར། སྤྲོ་ན་པུཎྜ་རི་ཀའི་རྒྱུད་ནས་འབྱུང་བའི་དམ་བཅའ་རྒྱས་བསྡུས་གང་རུང་སྒྱུ་འཕྲུལ་དུ་བཀོད་པ་ལྟར་བྱའོ། །དྲུག་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ༀ་ཧཱུཾ་ཨ་ལ་ལ་ཧོཿབྷ་ག་ཝཱན་ས་མ་ཡ་ཧོཿས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦྱར་ཞིང་། ཧཱུཾ་ཧཱུཾ་ཧཱུཾ་ཧཱུཾ་གིས་བྱིན་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ་ཞིང་། ཧཱུཾ། མཐུ་དང་བྲལ་བའི་སྡུག་བསྔལ་ཅིར་སྣང་ཡང་། །བདེ་གཤེགས་བྱིན་རླབས་གསལ་བར་རྫོགས་པའི་མཐུས། །རྒྱལ་བའི་སྐུ་རུ་ལྷུན་གྱིས་གྲུབ་ནས་ཀྱང་། །ཐམས་ཅད་བྱིན་རླབས་མཐུ་ཉིད་གྲུབ་པར་ཤོག །ན་མོ་ཧཱུཾ། ཞེས་བྱིན་དབབ་བོ། །བདུན་པ་མཆོད་རྫས་བྱིན་གྱིས་རློབ་པ་ནི། རྫས་ཐམས་ཅད་ལ་དམིགས་ཏེ། རཾ་ཡཾ་ཁཾ། ཞེས་བརྗོད་པས། མཆོད་རྫས་ཀྱི་དངོས་འཛིན་མ་དག་པའི་དྲི་མ་ཐམས་ཅད་ལྷག་མཐོང་གི་མེས་བསྲེགས། ཐོགས་མེད་ཀྱི་རླུང་གིས་གཏོར། ཞི་གནས་ཀྱི་ཆུས་བཀྲུས་ཏེ་སྟོང་པར་སྦྱངས། བྱེ་བྲག་ཏུ། སྟོང་པའི་ངང་ལས། བྷྲཱུཾ་བི་ཤྭ་བི་ཤུདྡྷེ། ཞེས་བརྗོད་པས་བདུད་རྩིའི་སྣོད་བྷཉྫ་འབར་བའི་གཞལ་ཡས་ཁང་གི་ནང་དུ་ཤ་ལྔ་དང་བདུད་རྩི་ལྔ་ཡེ་ཤེས་ལྔའི་ངོ་བོར་གནས་པའི་དབུས་སུ་ཆེ་མཆོག་ཧེ་རུ་ཀའི་དཀྱིལ་འཁོར་དང་། བདག་ཉིད་བདུད་རྩི་འཁྱིལ་བར་གནས་པའི་གཡོན་པའི་མཐེབ་སྲིན་ལ་རྟ་མགྲིན་ཡབ་ཡུམ་གསལ་བར་གྱུར། བཛྲ་ཨ་མྲྀ་ཏ་ༀ་ཨཱཿཧཱུཾ་ཧྲཱིཿཋཱ། ཅེས་པ་བརྒྱའམ་ཉེར་གཅིག་བརྗོད་པས། བདག་གི་འོད་ཀྱིས་འཁོར་འདས་ཀྱི་བདུད་རྩི་ཐམས་ཅད་བསྡུས་ནས་ཐིམ་པས་ཞུ་ཞིང་། བདུད་རྩིའི་རྒྱ་མཚོར་འཁྱིལ་བ་ལ་རྟ་མགྲིན་ཡབ་ཡུམ་མཉམ་པར་རོལ་པའི་བྱང་སེམས་བབས་པ་རོ་གཅིག་ཏུ་འདྲེས་ནས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། ཞེས་སྐུ་གསུང་ཐུགས་ཀྱི་དངོས་གྲུབ་བླང་། ༀ་དྷརྨཱ་ཨ་མྲྀ་ཏ་ཧཱུཾ་ཕཊ། མཆོད་རྫས་རྣམས་ལ་གཏོར་བས་ཉེས་སྐྱོན་སྦྱངས། ༀ་བི་ཤུདྡྷེ་ཨ་མྲྀ་ཏ་ཧཱུཾ་ཕཊ། མཆེད་རྣམས་ལ་གཏོར་བས་འཁོན་གཅུག་སྦྱངས། ༀ་བཛྲ་ཡཀྵ་ཀྲོ་དྷ་ཧ་ན་ཧ་ན་ཧཱུཾ་ཕཊ། བདུད་རྩིའི་ཟེགས་མ་ཁྲོ་བོའི་སྤྲིན་དུ་སྤྲོས་པས་བགེགས་དང་ལོག་འདྲེན་ཐམས་ཅད་བསྐྲད་པར་བསམ་ལ་བསང་གཏོར་བྱའོ། །གཏོར་མ་སྟོང་པའི་ངང་ལས། བྷྲཱུཾ་བ་ལིཾ་ཏ་བི་ཤྭ་ཙཀྲ་བྷྲཱུཾ། གཏོར་གཞོང་ཡུམ་ལྔའི་མཁའ་ཀློང་རྣམ་པར་དག་པར། ༀ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བདྱ་གུ་ཧྱ་ས་མ་ཡ་ཧཱུཾ་ཕཊ། ཅེས་ལན་བདུན་བརྗོད་པས་གཏོར་མ་ཡེ་ཤེས་ལྔའི་རོལ་པ་འདོད་ཡོན་གྱི་ཕུང་པོ་ཅིར་ཡང་འཆར་བའི་ལོངས་སྤྱོད་ཀྱི་གཏེར་དུ་གྱུར་པར་བསམ་མོ། །རཀྟ་སྟོང་པའི་ངང་ལས། བྷྲཱུཾ་བྷཉྫ་ཀ་པཱ་ལ་བྷྲཱུཾ། རཀྟའི་སྣོད་པདྨ་འབར་བའི་དབྱིངས་སུ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋཱ། ཅེས་ལན་བདུན་བརྗོད་པས་རཀྟ་ཡེ་ཤེས་ཀྱི་རྦ་ཀློང་འཁྲུག་པ་ལ་ཁམས་གསུམ་གྱི་རཀྟ་ཐམས་ཅད་ཞུ་ཞིང་འདྲེས་པ་ལས། དམར་གྱི་རྒྱ་མཚོ་འདོད་ཡོན་གྱི་རླབས་ཕྲེང་འཁྲུག་པར་བསམ་མོ། །རྫས་ཐུན་མོང་པ་རྣམས། སྟོང་པའི་ངང་ལས་མཆོད་སྣོད་དབྱིངས་ཀྱི་ཞིང་ཁམས་བསམ་གྱིས་མ་ཁྱབ་པར། ན་མཿས་མནྟ་བུདྡྷ་ནཱཾ་ག་ག་ན་ཁ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཞེས་བརྗོད་པས་མཆོད་རྫས་ཡེ་ཤེས་ལྔའི་རྣམ་རོལ་རྡོ་རྗེ་ཞབས་བསིལ་མ་སོགས་འདོད་པའི་ཡོན་ཏན་རྣམ་པ་ཐམས་ཅད་པའི་སྒྱུ་འཕྲུལ་གྱི་སྤྲིན་རབ་འབྱམས་སུ་འཕྲོ་བས་ནམ་མཁའ་གང་བར་བསམ་ལ། ཧཱུཾ། ཐུན་མོང་རྫས་ཀྱི་དངོས་པོ་ཅིར་སྣང་ཡང་། །མཆོད་པ་བྱིན་གྱིས་བརླབས་པའི་ནུས་མཐུ་ཡིས། །འདོད་པའི་ཡོན་ཏན་ཡོངས་སུ་རྫོགས་གྱུར་ནས། །དུས་གསུམ་བདེ་གཤེགས་མ་ལུས་མཆོད་པར་ཤོག །ན་མོ་ཧཱུཾ། ཞེས་པ་རྣམས་ཀྱིས་བརླབས་གསལ་སྦར་རོ། །གཉིས་པ་དངོས་གཞི་ལ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་དང་གསུམ་ལས། དང་པོ་ལ་ཡང་གསུམ་གྱི། དེ་བཞིན་ཉིད་ནི། མི་གནས་མི་རྟོགས་བསམ་དང་བྲལ། །མ་ཆགས་ཆགས་བྲལ་ཡུལ་ལས་འདས། །ཅི་ཡང་མི་འགྱུར་ཅི་མ་ཡིན། །རང་བྱུང་རང་ཞི་བརྗོད་དང་བྲལ། །འདི་ལྟར་སྣང་བའི་ཆོས་ཐམས་ཅད་སྐྱེ་བ་མེད་པའི་དབྱིངས་ཡེ་ཇི་བཞིན་པ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་དཀྱིལ་འཁོར་དུ་གནས་པར་བསམ་ལ། ཧཱུཾ། གནམ་ས་རི་བྲག་དངོས་པོ་ཅིར་སྣང་ཡང་། །དེ་བཞིན་ཉིད་ཀྱི་ཏིང་འཛིན་བསྒོམས་པའི་མཐུས། །ཆོས་ཉིད་སྟོང་པ་ཉིད་དུ་དོན་རྟོགས་ནས། །སྤྲོས་པ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའོ། །ཀུན་སྣང་ནི། ཡོངས་ལ་ཁྱབ་པ་ཉི་མའི་འོད། །སྙིང་རྗེ་བྱང་ཆུབ་སེམས་ཡིན་ཏེ། །རྣམ་རྟོག་མུན་པ་སེལ་བར་སྣང་། །ཡིད་བཞིན་རིན་ཆེན་འབར་བའོ། །ཞེས་པས། དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འགག་མེད་སྙིང་རྗེ་རིག་པའི་རྩལ་སྣང་ཡེ་ཤེས་ཀུན་ཏུ་བཟང་པོའི་རོལ་པ་རང་བཞིན་ལྷུན་གྲུབ་ཀྱི་དཀྱིལ་འཁོར་དུ་སྣང་བར་བསམ་ལ། ཧཱུཾ། མ་རྟོགས་སེམས་ཅན་སྡུག་བསྔལ་ཅིར་སྣང་ཡང་། །ཀུན་ཏུ་སྣང་བའི་ཏིང་འཛིན་བསྒོམས་པའི་མཐུས། །ཆོས་ཉིད་སྐྱེ་བ་མེད་པའི་དོན་རྟོགས་ནས། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའོ། །རྒྱུའི་ཏིང་ངེ་འཛིན་ནི། ཨ་ནི་ཆགས་མེད་ཡི་གེའི་མཛོད། །ཆོ་འཕྲུལ་རྟོག་པ་ཀུན་གྱི་རྒྱུ། །ཉོན་མོངས་སྐྱོན་བྲལ་ཟླ་བའི་མདོག །ཆོ་འཕྲུལ་སྣ་ཚོགས་འབྱུང་བའི་རྒྱུ། །ཞེས་པས། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཨ་དཀར་པོའི་རང་བཞིན་དུ་སྣང་བར་བསམ་ལ། ཧཱུཾ། མ་རིག་སེམས་ཀྱི་དངོས་པོ་ཅི་སྣང་ཡང་། །རྒྱུ་ཡི་ཏིང་འཛིན་བསྒོམས་པའི་བྱིན་རླབས་ཀྱིས། །ཆོས་ཉིད་བྱང་ཆུབ་སེམས་ཀྱི་དོན་རྟོགས་ནས། །རང་བྱུང་ཡེ་ཤེས་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའོ། །གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། རྩ་བ་བྱང་ཆུབ་སེམས་ཀྱི་རྒྱུ་ལས། ཨེ་ཡཾ་ར་སུཾ་ཀེཾ་རཾ། ཞེས་ཆོ་འཕྲུལ་གྱི་རང་སྒྲར་གྲགས་པ་ལས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པ་ནི། རྡོ་རྗེ་རིན་པོ་ཆེའི་འོད་སྣང་བས་ཀུན་ཏུ་མདངས་ཕྱུངས་པའི་མཁའ་ལ། རླུང་ནག་གི་ཕུང་པོ་རྒྱ་ཡོངས་སུ་མ་ཆད་པར་མཉམ་པ། ཁྲག་གི་ཕུང་པོ་རྦ་ཀློང་དུ་འཁྲུག་པ་རྒྱ་ཡོངས་སུ་མ་ཆད་པ། མ་ཏྲཾ་གྱི་གནས་དང་། སྤྲིས་མ་འབུར་འཕང་བར་ཆགས་པ། རུས་པའི་ཕུང་པོ་རྒྱ་ཀུན་ཏུ་མཉམ་པའི་གཞི་ལ། མུ་ཏིག་གི་གཅལ་དང་། ཨསྨ་གརྦྷ་འོད་འཁྲིགས་པའི་ནོར་བུ་རིན་པོ་ཆེ་འབར་བའི་བྲག་གཏམས་པ། བསྐལ་པའི་མེའི་ཕུང་པོ་རབ་ཏུ་འབར་ཞིང་འཁྲུག་པས་འབྱམས་ཀླས་པར་བསམ་མོ། །གཉིས་པ་རྟེན་གཞལ་ཡས་ཁང་དངོས་བསྒོམ་པ་ནི། ཡུམ་ལྔའི་མཁའ་ཀློང་རྣམ་པར་དག་པའི་སྙིང་པོ་ལས་ཆོ་འཕྲུལ་གྱི་སྒྲར་སྣང་བ་ནི། བྷ་ག་གསང་བའི་འོད་ཟེར་ལས། །བདེ་གཤེགས་བཞུགས་པའི་གཞལ་ཡས་ཁང་། །ནམ་མཁའི་མཐའ་ལྟར་དཔག་ཏུ་མེད། །དུས་གསུམ་རྒྱལ་བ་རྒྱ་མཚོའི་དབྱིངས། །བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ། ཞེས་པའི་སྒྲ་གདངས་ཀྱི་རྐྱེན་ལས་ནམ་མཁའ་ཐམས་ཅད་ཕོ་བྲང་གི་གཞལ་ཡས་ཁང་འབྱམས་ཀླས་པར་གྲུབ་པ་ནི། འོག་ཁང་འབར་བའི་གཞལ་ཡས་ཁང་ཕྱི་ནང་དུ་རིམ་པ་དགུ་པ། འོད་ཟེར་ཀུན་ཏུ་འཕྲོ་བ། ག་བུ་ཆུང་བརྩེགས་པའི་རྩིག་པ་ལ་གནམ་ལྕགས་ཀྱི་གཟེར་ཏ་ལེ་བར་བཏབ་པ། རྩིབས་ཀུན་ཏུ་ཉི་མ་དང་ཟླ་བ་རངས་པ་དང་མ་རངས་པ་འཕྱོ་བ། ཉ་ཆེན་པོའི་ཀ་གདུང་ལ། ཉ་ཕྲན་གྱི་དྲལ་གྲབ་གཏམས་པ། ཟླ་བའི་ཀ་རྟེན་དང་། ཉི་མའི་ཀ་ལོ་དང་། སྦྲུལ་ཆུན་གྱི་ཀ་རྒྱན་ལ་སོགས་པ། ཧཱུཾ་གི་ཐོག་དང་། མེའི་ཆར་མངོན་པར་འབབ་པ། ཆོས་ཉིད་ཀྱི་བླ་རེས་རྣམ་པར་བརྒྱན་པ། ཡེ་ཤེས་ཀྱི་ལྡ་ལྡིས་མངོན་པར་བྲེས་པ། རྡོ་རྗེའི་རྒྱན་དང་འཕན་གྱིས་ཀླུབས་པ། སྦྲུལ་ནག་གི་ཟ་ར་ཚགས་དང་། །སྤྲིན་ནག་གི་གྲིབ་སོ་ལྟ་བུས་གཞོལ་བའི་བར་བར་ཐམས་ཅད་ན། རིན་པོ་ཆེ་དང་། མུ་ཏིག་དང་། མེ་ཏོག་གིས་མཛེས་པ། འཁོར་བའི་མཎྜལ་ཡོ་བཀྲམ་པ་ལ། བམ་ཆེ་ཆུང་དང་། ཁོག་སྐམ་སྟོད་སྨད་དང་། ཡན་ལག་རིང་ཐུང་དང་། དབང་པོའི་ཕྲེང་བ་དང་། རྡོ་རྗེ་ཀུན་ཏུ་སྤྲས་པ། སྒོ་དགུས་ཀུན་ཏུ་གསལ་བར་གྱུར་པའི་བར་ཁྱམས་དགུ་ནང་ནས་རིམ་པ་བཞིན། དང་པོ་སེར་པོ། གཉིས་པ་དཀར་པོ། གསུམ་པ་དམར་པོ། བཞི་པ་སེར་པོ། ལྔ་པ་དམར་པོ། དྲུག་པ་དཀར་པོ། བདུན་པ་ནག་པོ། བརྒྱད་པ་ཕྱོགས་མདོག །དགུ་པ་ལྗང་གུ། སྒོ་ཕྱི་མ་ལ་རྒྱུ་འབྲས་ཀྱི་རྟ་བབས་ལ་སོགས་ཏེ་རྒྱན་ཐམས་ཅད་ཀྱིས་བརྒྱན་པའི་དབུས་སུ། གྲུ་ཆད་བཞི་གློ་འབུར་གྱིས་མཛེས་པའི་སྟེང་ན་འཁོར་ལོ་སེར་པོ་རྩིབས་བརྒྱད་པ་ལྟེ་བ་དང་བཅས་པ་རྣམས་རིམ་པ་བཞིན་ཁྱད་པར་དུ་གྱུར་པས་སྤགས་པ། ཕོ་བྲང་དབུས་མའི་སྟེང་ཁང་ཞི་བའི་དཀྱིལ་འཁོར་ཆེན་པོར་གནས་པ་ནི། གྲུ་བཞི་ལྷམ་པ་མཛེས་པར་སྣང་། །རིན་ཆེན་སྣ་བཞིའི་རྒྱུ་ལས་གྲུབ། །གློ་འབུར་བཞི་ཡང་མཁར་ཐབས་ཚུལ། །རིན་ཆེན་བཞི་ལས་གྲུབ་པའོ། །བུམ་པའི་རྩེ་མོ་ཆོས་ཀྱི་ཏོག །རྨ་བྱའི་མདོངས་ལྟར་ལྡན་པའོ། །སྒོ་བཞི་སྒོ་ཁྱུད་རྣམས་ཀྱིས་བརྒྱན། །རྟ་བབས་བརྒྱད་དང་ཡང་དག་ལྡན། །དབུས་ན་འཁོར་ལོ་རྩིབས་བཞི་པ། །ལྟེ་བར་བཅས་ཤིང་རྩིབས་བརྟེན་ལྡན། །གྲུ་ཆད་བར་ཁྱམས་མཛེས་པར་འབར། །རིན་ཆེན་འོད་ཟེར་འབར་བས་འཁྲིགས། །ཕོ་བྲང་འོག་མའི་སྒོའི་ཕྱི་ཁྱམས་ཀྱི་ཁོར་ཡུག་ཟླུམ་པོ་པདྨའི་ལྟེ་བ་ལ་རྫོགས་པའི་མཐར། རུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད། དུར་ཁྲོད་ཀྱི་ཆོས་རྣམས་ཀྱིས་འཇིགས་པར་བྱས་པའི་ཕྱི་ནས་རྡོ་རྗེ་བསྲུང་བའི་གུར་ཁང་འབར་བ་མེའི་འོད་ཟེར་ཀུན་ཏུ་འཕྲོ་བས་ཡོངས་སུ་བསྐོར་བའོ། །གསུམ་པ་གདན་བསྐྱེད་པ་ནི། དཀྱིལ་འཁོར་འོག་མའི་དབུས་ཀྱི་ལྟེ་བར་རྡོ་རྗེ་བྲག་ཆེན་གཏམས་པ་ལ་པདྨ་དམར་པོ་འདབ་མ་སྟོང་དུ་གདལ་བ། དེའི་སྟེང་དུ་ཐབས་ཤེས་ཉི་ཟླ་བརྩེགས་པ་ལ་དབང་ཕྱུག་ཁྱོ་ཤུག་ཉི་ཤུ་རྩ་བཞི་རྫོགས་པའི་སྟེང་ན། དཔའ་གཏུམ་སྟག །འཇིགས་བྱེད་སེང་གེ། གདུག་པ་གཟིག །གཏུམ་པ་དོམ། སྟོབས་ཀྱི་གླང་པོ། བརྗིད་པའི་མ་ཧེ། འཛིན་པ་ཆུ་སྲིན། ཞེ་སྡང་སྦྲུལ་ཏེ། བྱོལ་སོང་གཙོ་བོ་བརྒྱད་རེ་རེས་དྲེགས་པ་ཕོ་མོ་མནན་པ། དབང་མཆོག་དང་། ཧེ་རུ་ཀ་དགུའི་གནས་སུ་པདྨ་དང་ཉི་ཟླ་བརྩེགས་པ་ལ་དྲེགས་པ་ཁྱོ་ཤུག་བསྣོལ་བ་བཅུ་ལས། རིགས་ལྔའི་གནས་སུ་བྱོལ་སོང་གདུག་པ་ཅན་ཟུང་རེས་ལྷག་པ། ལྷ་གནས་གཞན་རྣམས་སུ་པད་ཉི་ཟླ་བ་ཞིང་རྐྱང་ལ་སོགས་པ་རིགས་དང་མཐུན་པའི་གདན་རེ་རེ། ཕོ་བྲང་སྟེང་མའི་འཁོར་ལོའི་ལྟེ་བར་སེང་གེའི་ཁྲི་ཆ་གཉིས། རྩིབས་བཞིར་གླང་པོ། རྟ་མཆོག །རྨ་བྱ། ཤང་ཤང་གིས་བཏེགས་པའི་ཁྲི་རེ་རེ། དེ་རྣམས་ཀྱི་སྟེང་དུ་པད་ཉི་ཟླ་བ་སྟེ་ལྔ་བརྩེགས། སེམས་དཔའ་བརྒྱད་ཀྱི་གནས་སུ་པད་ཉི་ཟླ་བ། བྱ་བྱེད་གཉིས་ལ་རིན་པོ་ཆེའི་ཁྲི་དང་པད་ཉི་ཟླ་བ། ཐུབ་པ་དྲུག་ལ་པད་རྐྱང་དང་སྒོ་བ་བཞི་ལ་ཉི་མའི་གདན་རེ་རེ་གསལ་བར་བསྒོམས་ལ། ཧཱུཾ། སྣོད་ཀྱི་འཇིག་རྟེན་འབྱུང་བ་ཅིར་སྣང་ཡང་། །གཞལ་ཡས་དབང་ཆེན་བསྒོམས་པའི་བྱིན་རླབས་ཀྱིས། །ཆོས་ཉིད་མཐའ་དབུས་མེད་པའི་དོན་རྟོགས་ནས། །འོག་མིན་གནས་སུ་ལྷུན་གྱིས་གྲུབ་པར་ཤོག །ན་མོ་ཧཱུཾ། དུར་ཁྲོད་རྫས་ཀྱི་དངོས་པོ་ཅིར་སྣང་ཡང་། །འབར་བའི་གཞལ་ཡས་བསྒོམས་པའི་བྱིན་རླབས་ཀྱིས། །རྫས་སུ་ལྟ་བའི་རྟོག་པ་ཀུན་བྲལ་ནས། །གནས་མཆོག་རབ་འབྱམས་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པས་གསལ་བཏབ་ཅིང་གཟི་བྱིན་བསྐྱེད་དོ། །གཉིས་པ་བརྟེན་པ་ལྷ་བསྐྱེད་པ་ལ། ཇི་ལྟར་བསྒོམ་པའི་ཚུལ་དང་། སྒོམ་པའི་རིམ་པའོ། །དང་པོ་ནི། འདི་ལྟར་སྣང་བའི་ཆོས་ཐམས་ཅད་བདག་གི་ཕུང་ཁམས་སྐྱེ་མཆེད་དུ་འདུ་ལ། དེ་ཐམས་ཅད་ལྷའི་རང་བཞིན་དུ་ཡེ་ནས་སངས་རྒྱས་པར་ཤེས་པས་ལྷ་རྣམས་ཀྱི་གསང་སྔགས་ཆོས་ཉིད་ཀྱི་རང་སྒྲར་བསྒྲགས་པ་ཙམ་གྱིས་དྭངས་པའི་མཚོ་ལ་ཉི་ཟླ་གཟའ་སྐར་གཅིག་ཅར་དུ་ཤར་བ་ལྟར་བསྒོམ་པའོ། །གཉིས་པ་ལ། ལྷ་བསྐྱེད་པ་དངོས་དང་། དབང་བསྐུར་བྱིན་རླབས་བྱ་བ་གཉིས་ཀྱི། དང་པོ་ལའང་། སྟེང་ཁང་ཞི་བའི་དཀྱིལ་འཁོར་བསྐྱེད་པ་དང་། འོག་ཁང་ཁྲོ་བོའི་དཀྱིལ་འཁོར་བསྐྱེད་པ་དང་། ཕྱི་ཁྱམས་རིག་འཛིན་གྱི་དཀྱིལ་འཁོར་བསྐྱེད་པ་དང་གསུམ་ལས། དང་པོ་ནི། ཧཱུཾ་ཧཱུཾ་ཧཱུཾ། བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ དབུས་ཀྱི་གདན་ལ་བཅོམ་ལྡན་འདས་དཔལ་ཀུན་ཏུ་བཟང་པོ་མཐིང་ག་མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རྡོ་རྗེ་དང་དྲིལ་བུ། གཉིས་པ་བྱང་ཆུབ་མཆོག་གི་ཕྱག་རྒྱ། གསུམ་པ་མཉམ་བཞག་མཛད་པ། ཀུན་ཏུ་བཟང་མོ་སྔོན་མོ་དང་འཁྲིལ་བ། ཧཱུཾ་བཛྲ་དྷྲིཀ྄ །མུཾ་དྷཱ་ཏྭེ་ཤྭ་རཱི། གཙོ་བོའི་མདུན་དུ་མི་བསྐྱོད་པ་སྔོན་པོ་མཐིང་དཀར་དམར་བའི་གཞལ་གསུམ་ཕྱག་དྲུག་གི་དང་པོ་གཉིས་ཀྱིས་རྡོ་རྗེ་དང་དྲིལ་བུ། གཉིས་པས་འཁོར་ལོ་དང་པདྨ། གསུམ་པས་རིན་པོ་ཆེ་དང་རལ་གྲི་འཛིན་པ། དབྱིངས་ཕྱུག་མ་སྔོན་མོ་རྡོར་དྲིལ་འཛིན་པས་འཁྱུད་པ། ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ཤར་གྱི་རྩིབས་ལ་རྣམ་སྣང་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གསུམ་འཁོར་ལོ་རྡོ་རྗེ་རིན་ཆེན། གཡོན་གསུམ་དྲིལ་བུ་པདྨ་རལ་གྲི་འཛིན་པ། སྤྱན་མ་དཀར་མོ་འཁོར་ལོ་དང་དྲིལ་བུ་འཛིན་པས་འཁྱུད་པ། སྭཱཾ་རཏྣ་དྷྲིཀ྄ །མཱཾ་མོ་ཧ་ར་ཏི། ལྷོའི་རྩིབས་ལ་རིན་ཆེན་འབྱུང་ལྡན་སེར་པོ་སེར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གསུམ་རིན་ཆེན་རྡོ་རྗེ་འཁོར་ལོ། གཡོན་གསུམ་དྲིལ་བུ་པདྨ་རལ་གྲི་འཛིན་པ། མཱ་མ་ཀཱི་སེར་མོ་རིན་པོ་ཆེ་དང་དྲིལ་བུ་འཛིན་པས་འཁྱུད་པ། ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི། ནུབ་ཀྱི་རྩིབས་ལ་སྣང་མཐའ་དམར་པོ་དམར་དཀར་སྔོ་བའི་ཞལ་གསུམ་ཕྱག་དྲུག་གི། གཡས་གསུམ་པདྨ་རྡོ་རྗེ་འཁོར་ལོ། གཡོན་གསུམ་དྲིལ་བུ་རིན་ཆེན་རལ་གྲི་འཛིན་པ། གོས་དཀར་མོ་དམར་མོ་པདྨ་དང་དྲིལ་བུ་འཛིན་པས་འཁྱུད་པ། ཧཱུཾ་པྲཛྙཱ་དྷྲིཀ྄ །ཏཱཾ་བཛྲ་ར་ཏི། བྱང་གི་རྩིབས་ལ་དོན་ཡོད་གྲུབ་པ་ལྗང་གུ་ལྗང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རལ་གྲི་རྡོ་རྗེ་འཁོར་ལོ། གཡོན་གསུམ་དྲིལ་བུ་རིན་ཆེན་པདྨ་འཛིན་པ། དམ་ཚིག་སྒྲོལ་མ་ལྗང་གུ་རལ་གྲི་དང་དྲིལ་བུ་འཛིན་པས་འཁྱུད་པ། ཡབ་རྣམས་རྫོགས་པའི་སྐྱིལ་མོ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་གིས་རོལ་པའོ། །ཧཱུཾ། ཕུང་པོ་ལྔ་དང་འབྱུང་བ་ཅིར་སྣང་ཡང་། །རིགས་ལྔ་ཡབ་ཡུམ་བསྒོམས་པའི་བྱིན་རླབས་ཀྱིས། །ཡབ་ཡུམ་གཉིས་སུ་མེད་པའི་དོན་རྟོགས་ནས། །ཐབས་དང་ཤེས་རབ་འདུ་འབྲལ་མེད་པར་ཤོག །ན་མོ་ཧཱུཾ། འཁོར་ལོའི་མཆན་བཞི་ལ་ཤར་ལྷོ་ནས་རིམ་པ་བཞིན། ཀྵིཾ་ཧི་རཱ་ཛ་ཡ། ཧཱུཾ་ལཱ་སྱེ་ས་མ་ཡ་སྟྭཾ། ས་སྙིང་དཀར་པོ་རིན་པོ་ཆེའི་མྱུ་གུ་འཛིན་པ། སྒེག་མོ་དཀར་མོ་མེ་ལོང་བསྣམས་ལ། ཏྲཾ་ཨཱ་གརྦྷ་ཡ། ཏྲཾ་མཱ་ལྱེ་ས་མ་ཡ་ཧོཿ ནམ་སྙིང་སེར་པོ་རལ་གྲི༴ ཕྲེང་བ་མ་སེར་མོ་རིན་པོ་ཆེའི་ཕྲེང་བ༴ ཧྲཱིཾ་ཧཱ་ཧཱུཾ་པདྨ་པྲ་ད་མ། ཧྲཱིཾ་གཱི་ཏི་རཱ་གོ་ཧཾ། སྤྱན་རས་གཟིགས་དམར་པོ་པདྨ༴ གླུ་མ་དམར་མོ་པི་ཝཾ༴ ཛྲིཾ་ཀུ་རུ་པཱ་ཎ། ཨཾ་ནིརྟི་རཱ་ག་ཡ་མྱེ། ཕྱག་རྡོར་མཐིང་ག་རྡོ་རྗེ༴ གར་མ་ལྗང་གུ་གར་རྒྱ་མཛད་པའོ། །གྲུ་ཆད་བཞིའི་ཤར་ལྷོ་ནས་རིམ་པ་བཞིན། མཻ་དྷཱ་ར་ཎི་སྭཱ་ཧཱ། ཛཿདྷཱུ་པེ་པྲ་བེ་ཤ །བྱམས་པ་དཀར་སེར་ཀླུ་ཤིང༴ སྤོས་མ་དཀར་སེར་སྤོས་ཁང་༴ ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་པུཥྤེ་ཨཱ་བེ་ཤ །སྒྲིབ་སེལ་དམར་སེར་འཁོར་ལོ༴ མེ་ཏོག་མ་དམར་སེར་མེ་ཏོག་གི་ཕྲེང་བ། ཧཱུཾ་ས་རཱ་ཛཱ་ཡ་སྭཱ་ཧཱ། བཾ་དཱི་པ་སུ་གི་རཱི། ཀུན་བཟང་དམར་ལྗང་རིན་པོ་ཆེའི་སྙེ་མ༴ མར་མེ་མ་དམར་ལྗང་མར་མེ༴ མུཾ་ཤྲཱི་ཨཾ་རཱ་གཱ་ཡ་སྭཱ་ཧཱ། ཧོཿགནྡྷེ་ཙིཏྟ། འཇམ་དཔལ་དཀར་ལྗང་ཨུཏྤལ༴ དྲི་ཆབ་མ་དཀར་ལྗང་དུང་ཕོར་བསྣམས་པ་སྟེ། ཡབ་རྣམས་གཡོན་དྲིལ་བུ་འཛིན་ཅིང་ཕྱེད་སྐྱིལ་གྱིས་རོལ་པའི་གཡོན་ནས་ཡུམ་རྣམས་གཡས་དྲིལ་བུ་འཛིན་པས་འཁྱུད་པ། གཤེགས་པ། གཤེགས་མ། སེམས་དཔའ། སེམས་མ་དེ་རྣམས་དར་དང་རིན་པོ་ཆེའི་རྒྱན་སོགས་འཁོར་ལོས་སྒྱུར་བའི་ཆ་ལུགས་ཅན་ནོ། །ཧཱུཾ། དབང་པོ་རྣམ་ཤེས་ཡུལ་དུས་ཅིར་སྣང་ཡང་། །སེམས་དཔའ་སེམས་མ་བསྒོམས་པའི་བྱིན་རླབས་ཀྱིས། །ཐམས་ཅད་ལྷ་དང་ལྷ་མོའི་དོན་རྟོགས་ནས། །རྒྱལ་བའི་སྲས་སུ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཁྱམས་ཀྱི་ཤར་དུ་བྱེད་པ་པོ་ཀུན་ཏུ་བཟང་པོ་མཉམ་བཞག་སྐྱིལ་ཀྲུང་ཅན། ཨ་ཨ་ཨ་བཛྲཱི་བྷ་དྲ་ས་མནྟ་ཨ། ཁྱམས་ཀྱི་ནུབ་ཏུ་ཀུན་ཏུ་བཟང་མོ་དཀར་མོ་ཆོས་འབྱུང་གི་ཕྱག་རྒྱ་ཅན་རྒྱན་སྤངས་པའོ། །ཧཱུཾ། ཡིད་དང་ཆོས་ཀྱི་དངོས་པོ་ཅིར་སྣང་ཡང་། །ཀུན་བཟང་ཡབ་ཡུམ་བསྒོམས་པའི་བྱིན་རླབས་ཀྱིས། །དབྱིངས་དང་ཡེ་ཤེས་གཉིས་མེད་དོན་རྟོགས་ནས། །ཆོས་སྐུ་འགྱུར་མེད་ལྷུན་གྱིས་གྲུབ་པར་ཤོག །ན་མོ་ཧཱུཾ། ༀ་མུ་ནེ་ཀྲིཾ་སྭཱ་ཧཱ། ༀ་མུ་ནེ་ཧཱུཾ་ཏྲུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ྄་སྭཱ་ཧཱ། ༀ་མུ་ནེ་ཡེ་སཱ་ཧཱ། ཁྱམས་ཀྱི་ཤར་ལྷོར་ལྷའི་ཐུབ་པ་དཀར་པོ་པི་ཝཾ་འཛིན་པ། བྱང་དུ་ལྷ་མིན་ཐུབ་པ་མཐིང་ག་གོ་ཆ༴ ལྷོར་མིའི་ཐུབ་པ་སེར་པོ་གསེག་པར༴ ནུབ་བྱང་དུ་བྱོལ་སོང་གི་ཐུབ་པ་དམར་ནག་པུསྟི༴ ལྷོ་ནུབ་ཏུ་ཡི་དྭགས་ཀྱི་ཐུབ་པ་སེར་ནག་སྒྲོམ་བུ༴ བྱང་ཤར་དུ་དམྱལ་བའི་ཐུབ་པ་དུད་ཁ་མེ་ཆུ་འཛིན་པ། ཐམས་ཅད་ཀྱང་མཆོག་གི་སྤྲུལ་སྐུའི་ཆ་བྱད་ཅན། འགྲོ་བའི་དོན་ལ་བཞེངས་སྟབས་ཀྱིས་གནས་པའོ། །ཧཱུཾ། འགྲོ་བ་རིགས་དྲུག་དངོས་པོ་ཅི་སྣང་ཡང་། །ཐུབ་པ་དྲུག་ཏུ་བསྒོམས་པའི་བྱིན་རླབས་ཀྱིས། །རོལ་པ་ཅིར་ཡང་སྣང་བའི་དོན་རྟོགས་ནས། །སངས་རྒྱས་མཛད་པ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཧཱུཾ་ཡ་མཱནྟ་ཀྲྀཏ་ཕཊ། ༀ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ཤར་སྒོར་གཤིན་རྗེ་གཤེད་སྨུག་ནག་ནྲི་མགོ་གདེངས་པ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ་དང་རོལ་བ། ཧཱུཾ་པྲཛྙཱནྟ་ཀྲྀ ཏ་ཕཊ། ༀ་རཏྣ་དྷ་རོ་མ་ཧཱ༴ ལྷོ་སྒོར་སྟོབས་པོ་ཆེ་སེར་ནག་རྡོ་རྗེ། ཞགས་པ་མ་སེར་ནག་ཞགས་པ་འཛིན་པ་དང་རོལ་བ། ཧཱུཾ་པདྨཱནྟ་ཀྲྀཏ་ཕཊ། ༀ་པདྨ་དྷ་རོ་མ་ཧཱ༴ ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ། ལྕགས་སྒྲོག་མ་དམར་མོ་ལྕགས་སྒྲོག་འཛིན་པ་དང་རོལ་བ། ཧཱུཾ་བིགྷྣཱནྟ་ཀྲྀཏ་ཕཊ། ༀ་ཀརྨ་དྷ་རོ༴ བྱང་སྒོར་བདུད་རྩི་འཁྱིལ་བ་ལྗང་ནག་རྒྱ་གྲམ་འཛིན་པ། དྲིལ་བུ་མ་ལྗང་ནག་དྲིལ་བུ་འཛིན་པ་དང་རོལ་བ། ཐམས་ཅད་ཀྱང་ཁྲོ་གཏུམ་མི་བཟད་པའི་ཉམས་ཅན་གྱད་ཀྱི་དོར་སྟབས་ཀྱིས་བཞུགས་པའོ། །ཧཱུཾ། ཡན་ལག་བཞི་ཡི་དངོས་པོ་ཅིར་སྣང་ཡང་། །སྒོ་བ་ཡབ་ཡུམ་བསྒོམས་པའི་བྱིན་རླབས་ཀྱིས། །ཡབ་ཡུམ་འདུ་འབྲལ་མེད་པའི་དོན་རྟོགས་ནས། །ཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ན་མོ་ཧཱུཾ། གཉིས་པ་འོག་ཁང་ཁྲོ་བོའི་དཀྱིལ་འཁོར་བསྐྱེད་པ་ལ། རྩ་བའི་དཀྱིལ་འཁོར་བསྐྱེད་པ་དང་། བཀའ་ཉན་གྱི་དཀྱིལ་འཁོར་བསྐྱེད་པ་གཉིས་ལས། དང་པོ་ནི། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་དྷེ་ཤྭ་རཱི་ཧཱུཾ་ཕཊ། ཅེས་བརྗོད་པས། རྒྱུ་བྱང་ཆུབ་ཀྱི་སེམས་ཉིད་སྔགས་ཀྱི་སྒྲ་གདངས་ཀྱི་རྐྱེན་གྱིས་སད་པ་ལས། དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་ཆེ་མཆོག་ཧེ་རུ་ཀ་སྐུ་མདོག་མཐིང་ནག་ཉི་མ་བྱེ་བའི་འོད་ལྟར་འབར་བའི་གཟི་བརྗིད་ཅན། ཞལ་ཉི་ཤུ་རྩ་གཅིག །ཕྱག་བཞི་བཅུ་རྩ་གཉིས་པ། རྩ་ཞལ་སྐུ་ལུས་དང་མཚུངས་པ། གཡས་ཞལ་གསུམ་སེར་དམར་ལྗང་བ། གཡོན་ཞལ་གསུམ་དམར་སྔོ་ལྗང་བ། དེའི་སྟེང་གི་དབུས་ཞལ་སེར་པོ། གཡས་གཉིས་དམར་ལྗང་། གཡོན་གཉིས་མཐིང་དཀར། དེའི་སྟེང་གི་དབུས་ཞལ་མཐིང་ག །གཡས་གཉིས་སེར་ལྗང་། གཡོན་གཉིས་དམར་དཀར། དེའི་སྟེང་གི་དབུས་སྨུག །གཡས་དཀར་གཡོན་ལྗང་། ཀུན་གྱི་སྟེང་ཞལ་དམར་པོ་རྟ་སྐད་འཚེར་བ། ཞལ་རེ་རེ་བཞིན་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཅིང་། མཆེ་བ་རྣོན་པོ་བཞི་བཞི་གཙིགས་པ། རྣམ་པར་འགྱུར་བའི་ཁྲོ་གཉེར་ཅན། ཕྱག་ཞེ་གཉིས་ཀྱི། དང་པོ་གཉིས་ཀྱིས་ཀུན་བཟང་ཡབ་ཡུམ་ཐུགས་ཀར་བསྣོལ་ནས་འཛིན་པ། ལྷག་མ་གཡས་ཀྱི་ཉི་ཤུ་ན་རིགས་ལྔ། སེམས་དཔའ་བརྒྱད། ཁྲོ་བོ་བཞི། ལྷ། མི། ལྷ་མིན་གྱི་ཐུབ་པ་གསུམ། གཡོན་པ་ཉི་ཤུ་ན་ཡུམ་ལྔ། སེམས་མ་བརྒྱད། ཁྲོ་མོ་བཞི། བྱོལ་སོང་། ཡི་དྭགས། དམྱལ་བའི་ཐུབ་པ་རྣམས་འཛིན་པ། ཞིང་གི་གཡང་གཞི་དང་གླང་པོ་ཆེའི་ཀོ་བརློན་པས་སྟོད་གཡོགས་ཤིང་། སྟག་གི་པགས་པའི་ཤམ་ཐབས་གྲོལ་བ། མགོ་བོའི་དོ་ཤལ་དང་། ཕྱག་རྒྱ་དྲུག །ཁྲག་ཞག་ཐལ་བ་སོགས་དུར་ཁྲོད་རོལ་པའི་ཆས་བརྒྱད་དང་། དཔལ་གྱི་ཆས་བརྒྱད་རྫོགས་པ། རལ་པ་དམར་སེར་འབར་ཞིང་། དབུ་རྒྱན་འཁོར་ལོ་དང་། མཆོད་རྟེན་དང་། རིན་པོ་ཆེར་སྣང་བ་ལས་རྒྱལ་བྱེད་དཔའ་རྟགས་ཀྱི་མཚན་མ་འབར་བ། གར་གྱི་ཉམས་དགུས་སྒེག་ཅིང་། སྤྲུལ་པའི་འོད་ཟེར་མཐའ་ཡས་པར་སྤྲོ་བ། ཡུམ་གནམ་ཞལ་དབྱིངས་ཀྱི་དབང་ཕྱུག་མ་སྔོན་མོ་དབུ་དགུ་ཕྱག་བཅོ་བརྒྱད་པ། རྩ་ཞལ་མཐིང་ག་ཧེ་རུ་ཀའི་གསང་བའི་རྡོ་རྗེ་དང་སྦྱོར་བ། གཡས་ཞལ་བཞི་ལྗང་དམར་མཐིང་སེར་ཡབ་ཀྱི་ཞབས་གཡས་པ་བཞི་དང་སྦྱོར་བ། གཡོན་ཞལ་བཞི་དམར་ལྗང་དཀར་དམར་ཡབ་ཀྱི་ཞབས་གཡོན་པ་བཞི་དང་སྦྱོར་བ། ཕྱག་དང་པོ་གཉིས་ཀྱིས་རྡོ་རྗེ་དང་དུང་ཁྲག །ལྷག་མ་གཡས་པ་བརྒྱད་ན་གནས་ཀྱི་མ་མོ་བརྒྱད། གཡོན་པ་བརྒྱད་ན་ཡུལ་གྱི་ཕྲ་མེན་བརྒྱད་བསྣམས་པ། གཟིག་གི་པགས་པའི་ཤམ་ཐབས་སོགས་ཁྲོ་མོའི་ཆས་ཀྱིས་བརྒྱན་པ། ཞབས་བཞི་བགྲད་པའི་སྟབས་ཀྱིས་སྟན་ལ་རོལ་ཞིང་། ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས་དབུའི་གཙུག་ཏོར་མན་ཆད་ལ་རྫོགས་པར་སྣང་བའི་བདག་ཉིད་ཆེན་པོར་གྱུར་པའོ། །ༀ་སརྦ་ཏ་ཐཱ་ག་ཏ་ཤྲཱི་ཧེ་རུ་ཀ་ཧཱུཾ། སརྦ་ཏ་ཐཱ་ག་ཏ་ཀྲོ་དྷེ་ཤྭ་རཱི་ཧཱུཾ། དབང་མཆོག་ཧེ་རུ་ཀ་མཐིང་ནག །དབུ་དགུ་ཕྱག་བཅོ་བརྒྱད་ཞབས་བཞི་པ། རྩ་ཞལ་གསུམ་མཐིང་དཀར་དམར་བ། བར་པའི་ཞལ་གསུམ་སྔོ་དམར་མཐིང་ག །སྟེང་ཞལ་གསུམ་སྔོན་པོ། ཕྱག་བཅོ་བརྒྱད་ཀྱི་གཡས་པ་དགུས། རྡོ་རྗེ་གློ་སྙིང་ཞིང་དབྱུག་ཞགས། །ཉི་མ་ཁྱུང་ཆེན་མེ་དཔུང་མཚོ། །ཐོད་པའི་གའུ་དེ་བཞིན་གཡོན། །བྷནྡྷ་ཞིང་ཆུང་ཏིར་དབྱུག་དང་། །ཞིང་ཆེན་ཟླ་བ་འུག་པ་ཀླུ། །རིན་པོ་ཆེ་དང་རི་རབ་བོ། །ཡུམ་ཁྲོ་མོའི་དབང་ཕྱུག་མ་རྡོ་རྗེ་དང་དུང་ཁྲག་འཛིན་པ་དང་སྦྱོར་བ། པད་ཉི་རུ་དྲའི་གདན་ལ་རོལ་པའོ། །ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ཧཱུཾ། བཛྲ་ཧེ་རུ་ཀ་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྡོ་རྗེ་རལ་གྲི་དགྲ་སྟྭ། གཡོན་གསུམ་ཞགས་པ་ལྕགས་སྒྲོག་ཐོང་གཤོལ། ཀྲོ་དྷི་དུང་ཁྲག་སྟོབ་པ་དང་སྦྱོར་ཞིང་དོམ་གྱི་གདན་ལ་རོལ་བ། ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཧཱུཾ། རྩིབས་བརྒྱད་ཀྱི་ཤར་དུ། སངས་རྒྱས་ཁྲག་འཐུང་སྨུག་ནག་སྨུག་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་འཁོར་ལོ། རྒྱུ་ཞགས། ཁྱུང་ཁྲ། གཡོན་གསུམ་ཐོད་ཁྲག །ཞགས་པ། མི་མགོ། སངས་རྒྱས་ཁྲག་འཐུང་མ་དུང་ཁྲག་སྟོབ་པ་དང་སྦྱོར་ཞིང་། ཁྱུ་མཆོག་གི་གདན་ལ་རོལ་བ། ༀ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་ཧཱུཾ། ལྷོར་རིན་ཆེན་ཁྲག་འཐུང་སེར་སྔོ་དམར་བའི་ཞལ་གསུམ་ཕྱག་དྲུག་གི། གཡས་གསུམ་རིན་ཆེན། དགྲ་སྟྭ། འཇིག་རྟེན། གཡོན་གསུམ་བྷན་དམར། རྒྱུ་ཞགས། རི་རབ། རིན་ཆེན་ཁྲག་འཐུང་མ་དུང་ཁྲག་སྟོབ་པ་དང་སྦྱོར་ཞིང་མ་ཧེའི་གདན་ལ་རོལ་བ། ༀ་པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རཱི་ཧཱུཾ། ནུབ་ཏུ་པདྨ་ཁྲག་འཐུང་དམར་དཀར་སྔོ་བའི་ཞལ་གསུམ་ཕྱག་དྲུག་གི། གཡས་གསུམ་པདྨ། དགྲ་སྟྭ། བེ་ཅོན། གཡོན་གསུམ་བྷན་དམར། ཐོང་གཤོལ། འཇིག་རྟེན། པདྨ་ཁྲག་འཐུང་མ་དུང་ཁྲག་སྟོབ་པ་དང་སྦྱོར་ཞིང་སྟག་གི་གདན་ལ་རོལ་བ། ༀ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷེ་ཤྭ་རཱི་ཧཱུཾ། བྱང་དུ་ལས་ཀྱི་ཁྲག་འཐུང་ལྗང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྒྱ་གྲམ། རལ་གྲི། དགྲ་སྟྭ། གཡོན་གསུམ་བྷན་དམར། ཐོང་གཤོལ། ཞགས་པ། ལས་ཀྱི་ཁྲག་འཐུང་མ་དུང་ཁྲག་སྟོབ་པ་དང་སྦྱོར་ཞིང་གཟིག་གི་གདན་ལ་རོལ་བའོ། །ༀ་རཀྴ་ཤྲཱི་ཧེ་རུ་ཀ་རཀྴ་ཀྲོ་དྷེ་ཤྭ་རཱི་ཧཱུཾ། ཤར་ལྷོར་རཀྴ་ཧེ་རུ་ཀ་མཐིང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྡོ་རྗེ། ཁ་ཊྭཱཾ། རྔེའུ་ཆུང་། གཡོན་གསུམ་བྷན་དམར། ཐོ་བ། ཞགས་པ། རཀྴ་དབྱིངས་ཕྱུག་མ་དུང་ཁྲག་སྟོབ་པ་དང་སྦྱོར་བ། ༀ་ས་ནུ་ཤྲཱི་ཧེ་རུ་ཀ་ས་ནུ་ཀྲོ་དྷེ་ཤྭ་རཱི་ཧཱུཾ། ལྷོ་ནུབ་ཏུ་ས་ནུ་ཧེ་རུ་ཀ་སེར་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་ཁ་ཊྭཱཾ། རྩེ་གསུམ། ཐོད་རྔ། གཡོན་གསུམ་བྷནྡྷ། ཐོད་དབྱུག །མི་མགོ། ས་ནུ་དབྱིངས་ཕྱུག་མ་དུང་ཁྲག་སྟོབ་པ་དང་སྦྱོར་བ། ༀ་གུ་ཧྱ་ཤྲཱི་ཧེ་རུ་ཀ་གུ་ཧྱ་ཀྲོ་དྷེ་ཤྭ་རཱི་ཧཱུཾ། ནུབ་བྱང་དུ་གུ་ཡ་ཧེ་རུ་ཀ་དུད་ཁ་དུད་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་གྲི་གུག །ཁ་ཊྭཱཾ། དབྱུག་ཏོ། །གཡོན་གསུམ་བྷན་དམར། མདུང་ཐུང་། རྔ་ཡབ། གུ་ཧྱ་དབྱིངས་ཕྱུག་མ་དུང་ཁྲག་སྟོབ་པ་དང་སྦྱོར་བ། ༀ་ཡཀྴ་ཤྲཱི་ཧེ་རུ་ཀ་ཡཀྴ་ཀྲོ་དྷེ་ཤྭ་རཱི་ཧཱུཾ། བྱང་ཤར་དུ་ཡཀྴ་ཧེ་རུ་ཀ་ལྗང་དཀར་དམར་བའི་ཞལ་གསུམ་ཕྱག་དྲུག་གི། གཡས་གསུམ་རྒྱ་གྲམ། ཁ་ཊྭཱཾ། དགྲ་སྟྭ། གཡོན་གསུམ་བྷན་དམར། རལ་གྲི། ཞིང་དབྱུག །ཡཀྴ་དབྱིངས་ཕྱུག་མ་དུང་ཁྲག་སྟོབ་པ་དང་སྦྱོར་བ། ཐམས་ཅད་ཀྱང་གར་དགུའི་རོས་སྒེག་ཅིང་དུར་ཁྲོད་རོལ་པའི་ཆས་ཀྱིས་བརྒྱན་པའོ། །ཧཱུཾ། རུ་དྲ་རྣམ་གསུམ་དངོས་པོ་ཅིར་སྣང་ཡང་། །ཁྲག་འཐུང་དགུ་རུ་བསྒོམས་པའི་བྱིན་རླབས་ཀྱིས། །བདུད་དང་སྲིན་པོའི་བར་ཆད་ཀུན་བསྒྲལ་ནས། །ཡེ་ཤེས་དགུ་རུ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཁམས་གསུམ་ས་དགུའི་དངོས་པོ་ཅིར་སྣང་ཡང་། །ཡུམ་ཆེན་དགུ་རུ་བསྒོམས་པའི་བྱིན་རླབས་ཀྱིས། །མ་བདུད་སྲིན་མོའི་བར་ཆད་ཀུན་བསལ་ནས། །ཐིག་ལེ་དགུ་རུ་ལྷུན་གྱིས་གྲུབ་པར་ཤོག །ན་མོ་ཧཱུཾ། གློ་འབུར་བཞི་ལ་རིམ་པ་བཞིན། །ༀ་བཛྲ་ག་རཱི་ཧཿ ཤར་དུ་མཛོད་ལྡན་མ་ནག་མོ་ཞིང་དབྱུག་དང་བྷན་དམར། ༀ་བཛྲ་ཙ་རཱི་ཧཿ ལྷོར་ཚོམ་རྐུན་མ་སེར་མོ་མདའ་གཞུ་འགེངས་པ། ༀ་བཛྲ་པྲ་མོ་ཧཱེ་ཧཿ ནུབ་ཏུ་རབ་རྨོངས་མ་དམར་མོ་ཆུ་སྲིན་གྱི་རྒྱལ་མཚན་དང་ཐོད་ཁྲག །ༀ་བཛྲ་བེ་ཏ་ལཱི་ཏཿ བྱང་དུ་རོ་ལངས་མ་ནག་མོ་རྡོ་རྗེ་དང་ཞིང་ཆུང་། གྲུ་ཆད་བཞི་ལ་རིམ་པ་བཞིན། ༀ་བཛྲ་པུཀྐ་སཱི་ཧཿ ཤར་ལྷོར་སྤོས་མོ་དམར་སེར་ཞིང་ཆུང་གི་རྒྱུ་མ་འདྲེན་པ། ༀ་བཛྲ་གྷསྨ་རཱི་ཧཿ ལྷོ་ནུབ་ཏུ་དྲོད་མོ་ལྗང་གུ་དུང་ཁྲག་རྡོ་རྗེས་དཀྲུག་པ། ༀ་བཛྲ་སྨ་ཤ་ནཱི་ཧཿ ནུབ་བྱང་དུ་དུར་ཁྲོད་མ་མཐིང་ནག་ཞིང་ཆུང་གི་གློ་སྙིང་ཟ་བ། ༀ་བཛྲ་ཙཎྜ་ལཱི་ཧཿ བྱང་ཤར་དུ་གཏུམ་མོ་སེར་མོ་ཞིང་ཆུང་གི་མགོ་ལུས་འདྲལ་བའོ། །ཧཱུཾ། རྣམ་ཤེས་བརྒྱད་ཀྱི་དངོས་པོ་ཅིར་སྣང་ཡང་། །ག་རཱི་བརྒྱད་དུ་བསྒོམས་པའི་བྱིན་རླབས་ཀྱིས། །ཡུལ་ལ་མངོན་པར་རྟོག་པ་ཀུན་བཅོམ་ནས། །རྣམ་པར་རྟོག་པའི་འདུ་ཤེས་མེད་པར་ཤོག །ན་མོ་ཧཱུཾ། ཁྱམས་དང་པོའི་ཕྱོགས་མཚམས་བརྒྱད་དུ་རིམ་པ་བཞིན། ༀ་བཛྲ་སིངྷ་མུ་ཁཱི་ཧེ། ཤར་དུ་སེང་གདོང་མ་སེར་མོ་རོ་ཟ་ཞིང་ལག་གཉིས་ཐུགས་ཀར་བསྣོལ་བ། ༀ་བཛྲ་བྱཱ་གྷྲྀ་མུ་ཁཱི་ཧེ། ལྷོར་སྟག་གདོང་མ་དམར་མོ་ལག་གཉིས་མཐུར་དུ་བསྣོལ་བ། ༀ་བཛྲ་ཤྲི་གཱ་ལ་མུ་ཁཱི་ཧེ། ནུབ་ཏུ་ཝ་གདོང་མ་ནག་མོ་ཞིང་ཆུང་ལྕེས་ལྡག་པ། ༀ་བཛྲ་ཤྭ་ན་མུ་ཁཱི་ཧེ། བྱང་དུ་ཁྱི་གདོང་མ་མཐིང་ནག་ཞིང་གི་ཁོག་པ་འདྲལ་བ། ༀ་བཛྲ་གྲྀདྡྷ་མུ་ཁཱི་ཧེ། ཤར་ལྷོར་རྒོད་གདོང་མ་དམར་མོ་ཞིང་གི་རྒྱུ་མ་འདྲེན་པ། ༀ་བཛྲ་ཀངྐ་མུ་ཁཱི་ཧེ། ལྷོ་ནུབ་ཏུ་དུར་བྱའི་གདོང་མ་དམར་མོ་བམ་རོ་ཕྲག་པར་འཁུར་བ། ༀ་བཛྲ་ཀཱ་ཀ་མུ་ཁཱི་ཧེ། ནུབ་བྱང་དུ་ཁྭ་གདོང་མ་ནག་མོ་རལ་གྲི་དང་བྷན་དམར། ༀ་བཛྲ་ཨུ་ལཱུ་ཀཱ་མུ་ཁཱི་ཧེ། བྱང་ཤར་དུ་འུག་གདོང་མ་མཐིང་ག་རྡོ་རྗེའི་དབྱུག་པ་འཛིན་པའོ། །ཧཱུཾ། དུར་ཁྲོད་བརྒྱད་ཀྱི་དངོས་པོ་ཅིར་སྣང་ཡང་། །ཕྲ་མེན་བརྒྱད་དུ་བསྒོམས་པའི་བྱིན་རླབས་ཀྱིས། །མཚན་མར་སྣང་བའི་དངོས་པོ་ཀུན་བྲལ་ནས། །རྣམ་པར་རྟོག་པའི་བག་ཆགས་མེད་པར་ཤོག །ན་མོ་ཧཱུཾ། སྒོ་བཞིར། ༀ་བཛྲ་ཨཱརྱ་ཏེ་ཛ་ཏེ་ང་ཛཿ ཤར་སྒོར་རྟ་གདོང་མ་དཀར་མོ་ལྕགས་ཀྱུ་དང་ཐོད་ཁྲག །ༀ་བཛྲ་ཨ་མུ་ཁེ་ཧཱུཾ། ལྷོ་སྒོར་ཕག་གདོང་མ་སེར་མོ་ཞགས་པ། ༀ་བཛྲ་ལོ་ཀ་བཾ། ནུབ་སྒོར་སྤྲེའུ་གདོང་མ་དམར་མོ་ལྕགས་སྒྲོག །ༀ་བཛྲ་བྷསྨི་པ་ལ་ཡ་བ་ཏུ་ཧོཿ བྱང་སྒོར་སྤྱང་གདོང་མ་ལྗང་གུ་དྲིལ་བུ་དང་ཐོད་ཁྲག་བསྣམས་པའོ། །ཧཱུཾ། ཆུ་བོ་བཞི་ཡིས་དངོས་པོ་ཅིར་སྣང་ཡང་། །སྒོ་མ་བཞི་རུ་བསྒོམས་པའི་བྱིན་རླབས་ཀྱིས། །ཚད་མེད་བཞི་རུ་རྫོགས་པའི་དོན་རྟོགས་ནས། །ཕྲིན་ལས་རྣམ་བཞི་འདུ་འབྲལ་མེད་པར་ཤོག །ན་མོ་ཧཱུཾ། དཀྱིལ་འཁོར་གཉིས་པའི་ཁྱམས་ལ་རིམ་པ་བཞིན། ༀ་བཛྲ་ཨ་པྲ་ཏི་ཧ་ཨཱརྱ་ནི་ཙ་ཏུར་ཏ་ར་ཕཊ་རཀྨོ་ཧཱུཾ། ཞེས་པ་བརྒྱད་ཀའི་འགོར་སྦྱར་ཏེ། ཤར་དུ་འབར་མ་ཉི་ཟེར་ཅན་དམར་མོ་ཉི་ཟེར་གྱི་ཞགས་པ། ཤར་ལྷོར་མེ་ཁྱེར་གློག་ཕྲེང་མ་དམར་མོ་གློག་ཞགས། ལྷོར་སྐར་མདའ་འཕེན་སྔོན་མོ་མདུང་ཐུང་དང་སྐར་མདའ་འཕེན་པ། ལྷོ་ནུབ་ཏུ་སྲིན་མོ་རླུང་ནག་རལ་གྲིའི་སྐྲ་ཅན་སྔོན་མོ་ཁྱུང་ཁྲ་འགྱེད་པ། ནུབ་ཏུ་ཀླུ་མོ་ལྕེ་འབེབས་མ་དཀར་མོ་ཐོག་འབེབས་པ། ནུབ་བྱང་དུ་གནོད་སྦྱིན་ཁྱུང་ཐོགས་མ་སྔོན་མོ་ཁྱུང་འཛིན་པ། བྱང་དུ་བ་ལང་སྣ་གླང་པོའི་གདོང་ཅན་སྔོ་ནག་ཐོག་སེར་འབེབས་པ། བྱང་ཤར་དུ་མིག་འབྱིན་སྙིང་སྲེག་མ་ཐལ་ཀར་རལ་གྲི་འཕྱར་བའོ། །ཧཱུཾ། ཕྱོགས་མཚམས་བརྒྱད་ཀྱི་དངོས་པོ་ཅིར་སྣང་ཡང་། །སྤོར་མ་བརྒྱད་དུ་བསྒོམས་པའི་བྱིན་རླབས་ཀྱིས། །སྣང་སྲིད་སྡེ་བརྒྱད་བར་ཆད་ཀུན་བསལ་ནས། །འཇིག་རྟེན་བར་ཆད་མིང་ཡང་མེད་པར་ཤོག །ན་མོ་ཧཱུཾ། སྒོ་བཞིར། ༀ་ཤྲཱི་བཛྲ་མུངྒ་ར་མུ་ཁ་ཤྭ་ར་ཡཱ་ཡ་ན་མཿ ཤར་སྒོར་དཀར་མོ་མིག་གཅིག་རྒྱས་འདེབས་མ་རྡོ་རྗེ། ༀ་ཤྲཱི་བཛྲ་ར་ག་མ་ཤྭ་ར་ཡཱ་ཡ་ན་མཿ ལྷོ་སྒོར་སེར་མོ་ལས་མཁན་ཚེ་འཕེལ་མ་མདའ་གཞུ་འགེངས་པ། ༀ་ཤྲཱི་བཛྲ་ཁ་ཊྭཱཾ་ཀ་པྲ་ཛྭ་ལ་ཡཱ་ཡ་ན་མཿ ནུབ་སྒོར་དམར་མོ་ཟ་བྱེད་དབང་སྡུད་མ་རྒྱལ་མཚན། ༀ་ཤྲཱི་བཛྲ་གྷཎྜེ་པྲ་ཛྭ་ལ་ཡཱ་ཡ་ན་མཿ བྱང་སྒོར་ནག་མོ་རལ་གཅིག་རྨོངས་བྱེད་མ་དྲིལ་བུ་བསྣམས་པའོ། །ཧཱུཾ། འབྱུང་བ་བཞི་ཡི་དངོས་པོ་ཅིར་སྣང་ཡང་། །གསང་བའི་ཡུམ་བཞི་བསྒོམས་པའི་བྱིན་རླབས་ཀྱིས། །ཆོས་ཉིད་དྭངས་སྙིགས་མེད་པའི་དོན་རྟོགས་ནས། །ཐབས་དང་ཤེས་རབ་འདུ་འབྲལ་མེད་པར་ཤོག །ན་མོ་ཧཱུཾ། དཀྱིལ་འཁོར་གསུམ་པའི་ཁྱམས་ལ། མ་ནུ་རཀྵ་སཱི་བྷྱོ། བྲ་ཧྨ་ཎཱི་བྷྱོ། ར་ཏྲཱི་བྷྱོ། བེཥྞ་བཻ་བྷྱོ། ཀུ་མཱ་རཱི་བྷྱོ། ཨིནྡྲ་ཎཱི་བྷྱོ། ཤར་སྟོད་ནས་རིམ་བཞིན། སྲིན་མོ་སྨུག་ནག་གཡག་གདོང་རྩེ་གསུམ་འཛིན། ཚངས་མ་དམར་སེར་སྦྲུལ་གདོང་རྩེ་ལྔ་དང་བྷན་དམར༴ འཁྲུག་མོ་དམར་སེར་གཟིག་གདོང་དབྱུག་ཏོ་དང་སྙིང་༴ ཁྱབ་འཇུག་མ་སེར་མོ་ཕ་ཝཾ་གདོང་ཅན་འཁོར་ལོ་དང་གུནྡྷེ༴ དབང་མོ་དམར་སྐྱ་དྲེད་གདོང་བམ་དབྱུག༴ བརྒྱ་བྱིན་མ་དཀར་དམར་སྲེ་མོང་མགོ་ཅན་ཐོད་ཁྲག་འཛིན་པའོ། །བཛྲ་པིངྒ་ལཾ་བྷྱོ། ཨ་མྲྀ་ཏཾ་བྷྱོ། སོ་མྱ་བྷྱོ། དཎྜ་དཾ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ལྷོ་སྟོད་ནས་རིམ་བཞིན། ཞི་བ་དམར་མོ་དོམ་མགོ་དུང་དམར་དང་རྒྱུ་ཞགས་འཛིན་པ། བདུད་རྩི་མ་སྔོན་མོ་ཆུ་སྲིན་མགོ་ཅན་བུམ་པ༴ ཞི་བ་མ་སྔོ་སྐྱ་སྡིག་པའི་མགོ་ཅན་ཐོད་པ་བམ་རིལ་དང་ཏི་ར༴ བེ་ཅོན་མ་ནག་མོ་ཁྲ་མགོ་ཅན་ཐོད་རློན༴ སྲིན་མོ་དམར་ནག་ཝ་གདོང་ཞིང་གི་རྒྱུ་མ་འདྲེན་པ། ཟ་བྱེད་ནག་མོ་སྟག་མགོ་བམ་སྙིང་འབྱིན་པའོ། །ར་ཏི་བཛྲ་བྷྱོ། རུ་དྷི་ར་མཏྟཱ་བྷྱོ། ཨེ་ཀ་ཙ་རི་ཎཱི་བྷྱོ། མ་ནོ་ཧ་རཾ་བྷྱོ། སིདྡྷི་ཀཾ་བྷྱོ། བཱ་ཡ་བཱི་བྷྱོ། ནུབ་སྟོད་ནས་རིམ་བཞིན། དགའ་བྱེད་དམར་མོ་རྒོད་གདོང་རལ་གྲི་དང་འཁོར་ལོ་འཛིན་པ། ཁྲག་འཐུང་མ་དམར་ནག་རྟ་གདོང་རྡོ་རྗེའི་དབྱུག་པ་དང་དུང་དམར༴ རྡོ་རྗེ་སེར་མོ་ཁྱུང་གདོང་རྡོ་རྗེ་དང་བྷན་དམར༴ འདོད་པ་དམར་སེར་ཁྱི་གདོང་ཞིང་ཆེན་ཟ་བ། ནོར་སྲུང་དཀར་དམར་པུ་ཤུད་མགོ་ཅན་པདྨ༴ རླུང་མོ་དམར་སྐྱ་ཤ་བའི་མགོ་ཅན་བམ་རོ་ཟ་བའོ། །མ་ཧཱ་མཱ་ར་ཎ་བཛྲ་བྷྱོ། ཨགྣཱི་བྷྱོ། བཱ་ར་ཧཱི་བྷྱོ། ཙ་མུཎྜི་བྷྱོ། སུ་ཏ་ནཾ་བྷྱོ། ཝ་རུ་ཎཱི་བྷྱོ། བྱང་སྟོད་ནས་རིམ་བཞིན། གསོད་བྱེད་མ་ལྗང་ནག་སྤྱང་གདོང་བམ་ཆེན་དང་རྔེའུ་ཆུང་འཛིན་པ། མེ་མོ་ལྗང་དམར་སྐྱིན་གདོང་མེ་སྒྲོན་དང་རྒྱུ་མ༴ ཕག་མོ་ལྗང་སེར་ཕག་གདོང་རྩེ་གསུམ་འཛིན་པ། རྒན་བྱེད་ལྗང་སྔོན་ཁྲ་མགོ་ཅན་རྒྱུ་མ་འདྲེན་ཅིང་དུང་ཁྲག་འཐོར་བ། སྣ་ཆེན་ལྗང་དམར་གླང་པོའི་གདོང་ཅན་བམ་རོ་འཛིན་པ། ཆུ་ལྷ་མ་ལྗང་ནག་སྦྲུལ་གདོང་དུང་དམར་དང་སྦྲུལ་ཞགས་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙ་ཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦོ་ད་ར་བྷྱོ། ཤར་སྒོར་ནག་མོ་ཆེན་མོ་ཁུ་བྱུག་མགོ་ཅན་ལྕགས་ཀྱུ་འཛིན་པ། ལྷོ་སྒོར་ར་གདོང་སྔོན་མོ་རྒྱུ་ཞགས༴ ནུབ་སྒོར་སེང་གདོང་དམར་མོ་ལྕགས་སྒྲོག༴ བྱང་སྒོར་སྐྱ་ཀའི་མགོ་ཅན་ལྗང་ནག་དྲིལ་བུ་འཛིན་པའོ། །ཧཱུཾ། སྒལ་ཚིགས་ཉེར་བརྒྱད་དངོས་པོ་ཅིར་སྣང་ཡང་། །དབང་ཕྱུག་ཉེར་བརྒྱད་བསྒོམས་པའི་བྱིན་རླབས་ཀྱིས། །རྣམ་པར་རྟོག་པའི་བར་ཆད་ཀུན་བསལ་ནས། །བར་ཆད་རྐྱེན་གྱི་སྡུག་བསྔལ་མེད་པར་ཤོག །ན་མོ་ཧཱུཾ། གཉིས་པ་བཀའ་ཉན་གྱི་དཀྱིལ་འཁོར་བསྐྱེད་པ་ལ། ཕྲིན་ལས་མྱུར་མགྱོགས་ཀྱི་དཀྱིལ་འཁོར། དམ་ཚིག་རྒྱ་མཚོའི་དཀྱིལ་འཁོར། སྒྲོལ་བ་གིང་གི་དཀྱིལ་འཁོར། ཕོ་ཉའི་དཀྱིལ་འཁོར་དང་བཞི་ལས། དང་པོ་ནི། དཀྱིལ་འཁོར་བཞི་པའི་ཁྱམས་ལ་མཁའ་འགྲོ་སུམ་ཅུ་སོ་གཉིས་ནི། ཨེ་ཨཱ་ར་ལི་ཧཱུཾ། ལན་བདུན་བརྗོད་པས། ཤར་དུ་མཁའ་འགྲོ་དགའ་བྱེད་མ། འདྲེན་བྱེད་མ། གསོད་བྱེད་མ། སྤོར་བྱེད་མ། འབར་བྱེད་མ། གཟི་བརྗིད་མ། ཁྲོ་གཉེར་མ་དང་བདུན་ནོ། །དེ་བཞིན་དུ་བསྐྱེད་སྔགས་བདུན་གྱིས། ལྷོར་མཁའ་འགྲོ་འཇོམས་བྱེད་མ། ཆགས་བྱེད་མ། ཆགས་བྲལ་མ། འཁོར་ལོ་མ། རྒྱས་འདེབས་མ། སྣ་ཚོགས་ལུས་འཆང་མ། བསྲུང་བ་མོ་དང་བདུན་ནོ། །དེ་བཞིན་དུ་བསྐྱེད་སྔགས་བདུན་གྱིས། ནུབ་ཏུ་མཁའ་འགྲོ་གནོད་སྦྱིན་མ། ཡང་དག་འཕྲོག་མ། བྱ་རོག་གདོང་མ། འཇིགས་བྱེད་མ། བཞད་མགོ་མ། འུག་གདོང་མ། ཁྱི་གདོང་མ་དང་བདུན་ནོ། །དེ་བཞིན་དུ་བསྐྱེད་སྔགས་བདུན་གྱིས། བྱང་དུ་མཁའ་འགྲོ་ཕག་གདོང་མ། རྔ་མོང་མགོ་མ། བོང་བུའི་གདོང་མ། འཇོམས་གཅོད་མ། རུས་འཆའ་མ། ཨུ་སྟིང་མ། རུས་པའི་ཕྲེང་ཅན་མ་དང་བདུན་ནོ། །སྔགས་ཚན་བཞིས། ཤར་སྒོར་མཁའ་འགྲོ་བུམ་སྣ་མ། །ལྷོ་སྒོར་གཤིན་རྗེ་རྣམ་འཇོམས་མ། ནུབ་སྒོར་དྷ་ཤ་གྲཱི་ཝ། བྱང་སྒོར་འབོད་སྒྲོག་མ་དང་བཞིའོ། །ཧཱུཾ། སོ་དང་རུས་པའི་དངོས་པོ་ཅིར་སྣང་ཡང་། །མཁའ་འགྲོ་སོ་གཉིས་བསྒོམས་པའི་བྱིན་རླབས་ཀྱིས། །བར་དུ་གཅོད་པ་མ་ལུས་ཀུན་བསྒྲལ་ནས། །སྒྲུབ་པའི་བར་ཆད་མིང་ཡང་མེད་པར་ཤོག །ན་མོ་ཧཱུཾ། གཉིས་པ་ནི། ཁྱམས་ལྔ་པ་ལ་མ་བདུན་སྲིང་བཞི་སྟེ། མ་མ་དྷཱ་ཏུ་ཧཱུཾ། ལན་བདུན་བརྗོད་པས། ཤར་དུ་རྡོ་རྗེ་ཀུན་གྲགས་མ་དང་ཀུན་ཏུ་བཟང་མོ། ལྷོར་རྡོ་རྗེ་ཀུན་གསལ་མ་དང་རྡོ་རྗེ་ཡེ་ཤེས་མ། ནུབ་ཏུ་རྡོ་རྗེ་འོད་ཆགས་མ་དང་རྡོ་རྗེ་འོད་འཕྲོས་མ། བྱང་དུ་རྡོ་རྗེ་གཡུའི་སྒྲོན་མའོ། །བཛྲ་དུནྟིཾ་བྷྱོ། ལན་བཞིས། ཤར་སྒོར་གླིང་བཞི་མགྱོགས་མ། ལྷོ་སྒོར་མཁའ་ལ་ཁྱུང་ལྡིང་མ། ནུབ་སྒོར་དམར་མོ་གཡག་ཐོད་མ། བྱང་སྒོར་ནག་མོ་སྡེར་ཆེན་མ་དང་བཞིའོ། །ཧཱུཾ། ཤ་ཁྲག་རྩ་ཡི་དངོས་པོ་ཅིར་སྣང་ཡང་། །མ་བདུན་སྲིང་བཞི་བསྒོམས་པའི་བྱིན་རླབས་ཀྱིས། །ཚེ་སྲོག་གནོད་པའི་བར་ཆད་ཀུན་བསྒྲལ་ནས། །ཉིན་མཚན་རྟག་ཏུ་ཐམས་ཅད་སྐྱོབ་པར་ཤོག །ན་མོ་ཧཱུཾ། གསུམ་པ་ནི། ཁྱམས་དྲུག་པ་ལ་གིང་བཅོ་བརྒྱད་དེ། ཀིཾ་ཀ་ར་ཧ་ཧ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་ལན་བཅོ་བརྒྱད་བརྗོད་པས། རྡོ་རྗེ་འབྱུང་པོ་དང་། རྡོ་རྗེ་གནོད་སྦྱིན་དང་། རྡོ་རྗེ་སྤྱང་ཀི་དང་། རྡོ་རྗེ་གཤིན་རྗེ་དང་། རྡོ་རྗེ་རོལ་པ་དང་། རྡོ་རྗེ་འཆི་བདག་དང་། རྡོ་རྗེ་དུས་མཚམས་དང་། རྡོ་རྗེ་རོ་ལངས་དང་། རྡོ་རྗེ་འཇོམས་པ་དང་། རྡོ་རྗེ་གིང་ལྕམ་དང་། རྡོ་རྗེ་དབང་བསྐུར་དང་། རྡོ་རྗེ་འཕྲུལ་མོ་ཆེ་དང་། རྡོ་རྗེ་གློག་འགྱུ་མ་དང་། རྡོ་རྗེ་མཐུ་མོ་ཆེ་དང་། རྡོ་རྗེ་རྣ་ཉན་ཕྲ་མ་མཁན་དང་། རྡོ་རྗེ་སྒྲོལ་བྱེད་མ་རྣམས་ཁྱམས་ཀྱི་ཕྱོགས་རེར་གསུམ་གསུམ་དང་། སྒོ་བཞིར་རེ་རེ། ཁྲོ་བོ་ཀིཾ་ཀ་ར་དང་། ཁྲོ་མོ་དབུགས་སྡུད་མ་གཉིས་བཀའ་ནོད་པའི་ཚུལ་གྱིས་ཁྱམས་ཀྱི་ཤར་ནུབ་ཏུ་གནས་པའོ། །ཧཱུཾ། གུར་རྩིབས་བཅོ་བརྒྱད་དངོས་པོ་ཅིར་སྣང་ཡང་། །གིང་ཆེན་བཅོ་བརྒྱད་བསྒོམས་པའི་བྱིན་རླབས་ཀྱིས། །བསྒྲལ་བའི་ཞིང་བཅུ་མ་ལུས་ཀུན་བསྒྲལ་ནས། །སངས་རྒྱས་ཞིང་ཁམས་ཡོངས་སུ་དག་པར་ཤོག །ན་མོ་ཧཱུཾ། བཞི་པ་ཕོ་ཉའི་དཀྱིལ་འཁོར་ལ། ཁྲོ་བོ་རོལ་པའི་དཀྱིལ་འཁོར། མགྱོགས་འགྲོ་ཡིད་ཀྱི་དཀྱིལ་འཁོར། དམ་ཚིག་རྒྱ་མཚོའི་དཀྱིལ་འཁོར་དང་གསུམ་ལས། དང་པོ་ནི། དཀྱིལ་འཁོར་བདུན་པའི་ཁྱམས་ལ་ཁྲོ་བོ་ཡབ་ཡུམ་དྲུག་ཅུ་ནི། ཀྲོ་དྷ་ཀྲོ་དྷཱི་ཧཱུཾ། ཞེས་ལན་སུམ་ཅུ་བརྗོད་པས། འཇིག་བྱེད་ཆེན་པོའི་སྐུའི་འོད་ཟེར་མཐིང་ནག་ལས། རྣམ་པར་རྒྱལ་བ་དང་སྙེམས་མ། དབྱུག་སྔོན་ཅན་དང་སྡེར་མོ། གཤིན་རྗེ་གཤེད་དང་དུར་ཁྲོད་མ། མི་གཡོ་བ་དང་གཏུན་ཁུང་མ། རྟ་མགྲིན་དང་གཏུམ་མོ། །གཞན་གྱིས་མི་ཐུབ་པ་དང་མདའ་སྙེམས་མ། བདུད་རྩི་འཁྱིལ་བ་དང་རླུང་འབྱིན། ཁམས་གསུམ་རྣམ་རྒྱལ་དང་གསོད་བྱེད་མ། སྟོབས་པོ་ཆེ་དང་བསྐྱོད་བྱེད་མ། ཧཱུཾ་མཛད་དང་སྒྲ་འབྱིན་མ། རྡོ་རྗེ་ཕུར་བུ་དང་རྒྱས་འདེབས་མ། རྨེ་བ་བརྩེགས་པ་དང་འདམ་འབྱིན་མ། རྡོ་རྗེ་གནོད་སྦྱིན་དང་ཡཀྨོ། ཁྲོ་བོ་དམར་ནག་དབང་སྒྱུར་མ། ཁྲོ་བོ་ས་འོག་དང་ས་འོག་མ། རབ་འཁྲུགས་དང་རབ་འཇིགས་མ། མ་ཧཱ་ཀཱ་ལ་དང་རལ་སྒྲེང་མ། མི་འཆི་ཐབས་སྦྱོར་དང་འཇོམས་ཆེན་མ། གུ་ལང་དང་ལས་ཀུན་མ། རབ་རྔམས་དང་གཏུམ་ཆེན་མ། འཇིག་རྟེན་གསུམ་སྣང་དང་མི་ཕམ་མ། འཇིག་རྟེན་གསུམ་འདུལ་དང་ལྕགས་ཀྱུ་མ། རྔམས་ཆེན་དང་དབང་སྡུད་མ། འཇིག་རྟེན་གསུམ་འཇིགས་དང་ཁྲོ་གཉེར་ཅན། འཇིག་རྟེན་གསུམ་འཆིང་དང་ཞགས་པ་མ། ཁྲོ་བོ་པད་རྒྱལ་དང་རོ་ལངས་མ། ཁྲོ་བོ་བེ་ཅོན་དང་ལྕགས་སྒྲོག་མ། རྡོ་རྗེ་ཐོ་བ་དང་ཟ་བྱེད་མ། བཛྲ་ཀ་ཏ་རི་དང་རལ་གཅིག་མ། རྡོ་རྗེ་གོ་ཆ་དང་དྲིལ་བུ་མ་རྣམས་སོ། །དེ་ཐམས་ཅད་ཀྱང་ཁྲོ་གཏུམ་འཇིགས་པའི་ཆས་ཅན་ཁྱམས་ཀྱི་ཕྱོགས་མཚམས་བརྒྱད་དུ་གསུམ་གསུམ་དང་། ཤར་ནུབ་ཀྱི་ནང་དང་སྒོ་བཞིར་རེ་རེ་གནས་པོའོ། །ཧཱུཾ། རུས་མགོ་ཚིགས་མགོའི་དངོས་པོ་ཅིར་སྣང་ཡང་། །ཁྲོ་བོ་དྲུག་ཅུ་བསྒོམས་པའི་བྱིན་རླབས་ཀྱིས། །ཁམས་གསུམ་གདུག་པ་མ་ལུས་ཀུན་བསྒྲལ་ནས། །སངས་རྒྱས་ཕྲིན་ལས་ལྷུན་གྱིས་གྲུབ་པར་ཤོག །ན་མོ་ཧཱུཾ། གཉིས་པ་ནི། དཀྱིལ་འཁོར་བརྒྱད་པའི་ཁྱམས་ལ་ཕོ་ཉ་ཉིས་བ རྒྱ་དང་བཞི་བཅུ་ལས། བྷ་ན་བྷ་ན་ཨངྐུ་ཤ་ཛཿ ཞེས་ལན་དྲུག་ཅུ་བརྗོད་པས། སྐུའི་འོད་ཟེར་དཀར་པོ་ལས་ཤར་ཕྱོགས་སུ་སྐུའི་ཕོ་ཉ་མོ་དྲུག་ཅུ། ཧ་ལ་ཧ་ལ་པཱ་ཤ་ཧཱུཾ། ཞེས་དྲུག་ཅུ་བརྗོད་པས། སྐུའི་འོད་ཟེར་སེར་པོ་ལས་ལྷོ་ཕྱོགས་སུ་ཡོན་ཏན་གྱི་ཕོ་ཉ་མོ་དྲུག་ཅུ། གརྫ་གརྫ་སྥོ་ཊ་པཾ། ཞེས་སྔར་བཞིན་བརྗོད་པས། སྐུའི་འོད་ཟེར་དམར་པོ་ལས་ནུབ་ཕྱོགས་སུ་གསུང་གི་ཕོ་ཉ་མོ་དྲུག་ཅུ། པ་ཙ་པ་ཙ་གྷཎྜེ་ཧོ། སྔར་བཞིན་བརྗོད་པས། སྐུའི་འོད་ཟེར་སྔོན་པོ་ལས་བྱང་ཕྱོགས་སུ་ཕྲིན་ལས་ཀྱི་ཕོ་ཉ་མོ་དྲུག་ཅུ་རྣམས་གསལ་བར་བསམ་ལ། ཧཱུཾ། རྩ་ཕྲན་མང་པོའི་དངོས་པོ་ཅིར་སྣང་ཡང་། །ཕོ་ཉ་ཉིས་བརྒྱ་བཞི་བཅུ་བསྒོམས་པའི་མཐུས། །དམ་ཚིག་ཉམས་དང་དགྲ་བགེགས་ཀུན་བསྒྲལ་ནས། །གནོད་པའི་བར་ཆད་མིང་ཡང་མེད་པར་ཤོག །ན་མོ་ཧཱུཾ། གསུམ་པ་ནི། དཀྱིལ་འཁོར་དགུ་པའི་ཁྱམས་ལ་མ་མོ་དྲུག་ཅུ་སྟེ། མ་མོ་ཤྭ་ར་ཧཱུཾ། ཞེས་དྲུག་ཅུ་བརྗོད་པས། སྐུའི་འོད་ཟེར་སྨུག་ནག་ལས་ལས་བྱེད་ཀྱི་ཕོ་ཉ་མ་མོ་དྲུག་ཅུ་ཁྱམས་ཀྱི་ཕྱོགས་རེར་བཅོ་ལྔ་བཅོ་ལྔ་བཞུགས་པར་བསམ་ལ། ཧཱུཾ། ཤ་དང་ཁྲག་གི་དངོས་པོ་ཅིར་སྣང་ཡང་། །མ་མོ་དྲུག་ཅུ་བསྒོམས་པའི་བྱིན་རླབས་ཀྱིས། །སྲིད་གསུམ་གདུག་པ་མ་ལུས་ཀུན་བསྒྲལ་ནས། །ཕྲིན་ལས་ཐམས་ཅད་ལྷུན་གྱིས་གྲུབ་པར་ཤོག །ན་མོ་ཧཱུཾ། གསུམ་པ་རིག་འཛིན་རྩལ་འཆང་གི་དཀྱིལ་འཁོར་བསྐྱེད་པ་ལ། དངོས་དང་ཞར་བྱུང་གཉིས་ལས། དང་པོ་ནི། ༀ་མ་ཧཱ་གུ་རུ་ཤ་རི་རཾ་གཱི་ལི་ཧཱུཾ། ཞེས་བརྗོད་པས། རྒྱུའི་རྟ་བབས་ཀྱི་ཕྱི་རོལ་འཁོར་ཡུག་ཟླུམ་པོ་ལ་དམ་པའི་རིགས་ཅན་དྲ་མ་ལྔ་ལ་སོགས་པ་ནས་འཁོར་ལོའི་དབང་ཕྱུག་རྩ་བའི་བླ་མའི་བར་དུ་བྱོན་པའི་རྒྱ་བོད་ཀྱི་རིག་འཛིན། འདུན་པ་སེམས་པ་དང་། རིགས་ཆེན་འབྱེད་པ་དང་། དབུགས་ཆེན་འབྱིན་པ་དང་། ལུང་ཆེན་ཐོབ་པ་དང་། རྩལ་ཆེན་རྫོགས་པའི་རྣལ་འབྱོར་གྱི་ས་ལ་བཞུགས་པའི་དུས་གསུམ་གྱི་རིག་འཛིན་བླ་མ་བྱེ་བ་ས་ཡའི་ཚོགས་རྣམས་གསལ་བར་གྱུར། ཧཱུཾ། རིག་འཛིན་བླ་མ་བྱིན་རླབས་ལྡན་པའི་ཚོགས། །བརྒྱུད་པ་གསུམ་ལྡན་བསྒོམས་པའི་བྱིན་རླབས་ཀྱིས། །བསྐྱེད་རྫོགས་གསུམ་གྱི་དགོངས་པའི་དོན་རྟོགས་ནས། །རྒྱུད་ལུང་མན་ངག་ལྷུན་གྱིས་གྲུབ་པར་ཤོག །ན་མོ་ཧཱུཾ། གཉིས་པ་ཞར་བྱུང་མགྲོན་ཐབས་ཀྱི་ལྷ་བསྒོམ་པ་ནི། གཞན་ཡང་སྤྲུལ་པ་དང་། ཡང་སྤྲུལ་ནག་མོ་མཆེ་གཤོག་ཅན་དང་། འཛིན་བྱེད་དང་། སྒྲོལ་བྱེད་ལ་སོགས་པ་ཕྱག་བརྙན་འབུམ་ཕྲག་མཐའ་ཡས་པའི་ཚོགས་བསམ་གྱིས་མི་ཁྱབ་པས་ཀུན་ཏུ་ཁྱབ་ཅིང་གང་བར་བསམ་མོ། །དེ་ལྟར་དབྱིངས་རྩ་བ་བྱང་ཆུབ་སེམས་ཀྱི་རང་རྩལ་འགག་མེད་ཡེ་ཤེས་ཀྱི་འཁོར་ལོ་ཕྲིན་ལས་རྣམ་པར་བཞིའི་སྒྱུ་འཕྲུལ་གྱི་རོལ་པ་སེམས་ཅན་ཐམས་ཅད་ཀྱི་མོས་པ་དང་། བསམ་པ་དང་། དབང་པོའི་ཁྱད་པར་ཇི་ལྟ་བ་དང་འཚམས་པར་འཆར་བའི་དཀྱིལ་འཁོར་གྱི་སྤྲིན་ཆེན་པོར་རྟག་ཏུ་སྣང་ཞིང་འབར་བར་བསམ་མོ། །འདིར་རྣམ་གྲངས་ཀྱི་ངེས་པ་ཅུང་ཟད་བཤད་ན། རྩ་རྒྱུད་ཀུན་འདུས་སུ། ལྟེ་བ་འཁོར་ལོ་དྲུག་བརྩེགས་ལ་ཆོ་འཕྲུལ་དམ་ཚིག་ལ་སོགས་པའི་ལྷ་ཚོགས་དྲུག་ཅུ་རྩ་བཞི་གྲུ་ཆད་སོགས་ལ་གནས་ཡུལ་སྒོ་སྐྱོངས་སོགས་ལེའུ་སོ་གཅིག་པར་གསུངས་པའི་བསྐྱེད་སྔགས་ཀྱིས་བསྐྱེད་ཅིང་། དེའི་ཕྱི་རོལ་ཏུ་ཁྲོ་བཅུ་ནས་རིམ་པར་ཕོ་ཉའི་བར་དགོད་པར་བཤད། གབ་པའི་དབང་ལེར་ཕོ་ཉའི་ཁྱམས་ཀྱི་ཕྱིར་མ་སྲིང་སོགས་བཀོད་པ་དང་། ཡིག་རྙིང་གཞན་དུ་རོལ་པ་ཆེན་པོའི་དཀྱིལ་འཁོར་ཉིད་ཕྲིན་ལས་མྱུར་མགྱོགས་ཀྱི་དཀྱིལ་འཁོར་ནང་དུ་བཀོད་པ་སོགས་སྣང་ནའང་། འདིར་བཀོད་ཧེ་རུ་ཀ་འདུས་པའི་ལེའུ་དགུ་པར་བཤད་པ་བཞིན་བླ་མ་གོང་མ་རྣམས་ཀྱི་ཕྱག་ལེན་བརྒྱུད་པ་ལས་འབྱུང་བ་ལྟར་ཏེ། འོན་ཀྱང་ཕོ་ཉ་ལ་འདིར་ཁྱམས་གསུམ་དུ་བྱུང་བ་ཧེ་རུ་ཀ་འདུས་པར་གཅིག་ཏུ་བསྡུས་ཤིང་། ཁྱམས་དང་པོ་ལ་གནས་མ་བཀོད་པས་སྒོ་བརྒྱད་བརྩེགས་སུ་འབྱུང་བ་ཙམ་ཁྱད་པར་རོ། །གཉིས་པ་དབང་བསྐུར་ཞིང་བྱིན་གྱིས་རློབ་པ་ནི། རང་གི་སྤྱི་བོའི་གནས་ལྔར་དེ་གཞིན་གཤེགས་པ་རིགས་ལྔ་ཡབ་ཡུམ་སྙོམས་པར་ཞུགས་པའི་རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བར་བསམ་ལ། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་། ཨཱོྂ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨཱོྂ་མ་ཧཱ་ཨཱ་ད་ཪྴ༴ ཨཱོྂ་མ་ཧཱ་ས་མ་ཏཱ༴ ཨཱོྂ་མ་ཧཱ་པྲ་ཏྱ་བེཀྵ་ཎ༴ ཨཱོྂ་མ་ཧཱ་ཀྲྀ་ཏྱཱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་དབང་སྔགས་རྣམས་རིམ་པར་བརྗོད་ལ། དབང་བསྐུར་བས་ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་སྒྱུར། ཆུ་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པར་བསམ་མོ། །བྱིན་གྱིས་བརླབ་པ་ནི། སྤྱི་བོར་ཟླ་བ་ལ་གནས་པའི་ཨཱོྂ་དཀར་པོ། དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཨཱོྂ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར། ཨཱོྂ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ཨཱོྂ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྤ་ཀོ྅་ཧཾ། མགྲིན་པར་པདྨ་ལ་གནས་པའི་ཨཱཿདམར་པོ། དེའི་འོད་ཟེར་གྱིས༴ གསུང་རྡོ་རྗེའི༴ ཨཱཿལ་ཐིམ། དེ་བཞིན་གཤེགས་པ་ཐམས་ཅད་ཀྱི་གསུང་དང་༴ ཨཱཿཡོངས་སུ་གྱུར་པ་ལས་སྣང་མཐའ་དམར་པོ་པདྨ༴ རྡོ་རྗེའི་ཕྱག་རྒྱ་མགྲིན་པར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ༴ སྙིང་གར་ཉི་མ་ལ་གནས་པའི་ཧཱུྃ་སྔོན་པོ། དེའི་འོད་ཟེར༴ ཐུགས་རྡོ་རྗེའི༴ ཧཱུཾ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་ཐུགས་དང་༴ ཧཱུཾ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ་རྡོ་རྗེ༴ རྡོ་རྗེའི་ཕྱག་རྒྱ་སྙིང་གར་གཏུགས་ལ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ཅིང་། སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱས་ལ། ཧཱུཾ། ལུས་ངག་ཡིད་གསུམ་དངོས་པོ་ཅིར་སྣང་ཡང་། །དབང་བསྐུར་བྱིན་གྱིས་བརླབས་པའི་ནུས་མཐུ་ཡིས། །ཉོན་མོངས་དངོས་པོ་མ་ལུས་ཀུན་བྱང་ནས། །སྐུ་དང་ཡེ་ཤེས་ལྷུན་གྱིས་གྲུབ་པར་ཤོག །ན་མོ་ཧཱུཾ། གསུམ་པ་ལས་ཀྱི་རིམ་པའི་ཏིང་ངེ་འཛིན་ལ། ཡེ་ཤེས་ཀྱི་འཁོར་ལོ་སྤྱན་དྲང་ཞིང་བསྟིམ་པ། ཕྱག་བྱ་བ། དམ་བཅའ་བ། མཆོད་པ་དབུལ་བ། དངོས་གྲུབ་གསོལ་བ། འཛབ་བཟླ་བའོ། །དང་པོ་ནི། ག་གོ་ནའི་རྒྱ་བཅིངས་ཏེ། རང་གི་སྙིང་གའི་འོད་དང་རོལ་པ་ཆེན་པོའི་གླུས་བསྐུལ་བས་ནམ་མཁའ་གང་བའི་དེ་བཞིན་གཤེགས་པ་ཐམས་ཅད་བདེ་བ་ཆེན་པོའི་ངང་ལས་ཆོ་འཕྲུལ་གྱི་རྣམ་རོལ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་ཆེན་པོར་སད་པར་བསམ་ལ། ཧཱུཾ། ཚོགས་ཆེན་གཉིས་རྫོགས་ཐུགས་དམ་དབྱིངས་ཀྱི་ལྷ། །ལོངས་སྤྱོད་རྫོགས་མཛད་རོལ་པ་ཆེན་པོའི་སྐུ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཐབས་ཀྱི་རོལ་པས་བདེ་ཆེན་དབྱིངས་ནས་བཞེངས། །བཛྲ་ས་མཱ་ཛཿ རུ་ལུ་རུ་ལུ་ཧཱུཾ། ཞེས་སྙན་གསན་དབབ་པས་འབྱོན་མ་རག་པར་བསམ་ལ། ཧཱུཾ། ཆོས་སྐུ་རིག་པ་རང་སྣང་བ། །རྡོ་རྗེ་དབྱིངས་ཀྱི་ལྷ་ཚོགས་དང་། །ཁམས་གསུམ་མ་ལུས་འདུལ་པ་ཡི། །ཁྲག་འཐུང་དཀྱིལ་འཁོར་འཁོར་བཅས་དང་། །རྡོ་རྗེ་འཆང་གྲལ་རིམ་བརྙེས་པའི། །རྣལ་འབྱོར་ཆེན་པོའི་རིག་འཛིན་རྣམས། །སྨོན་ལམ་དམ་ཚིག་ཚུལ་བཞིན་དུ། །གནས་འདིར་མ་ལུས་གཤེགས་སུ་གསོལ། །ཛཿཧཱུཾ་བཾ་ཧོཿ ཨེ་ཧྱེ་ཧི། རུ་ལུ་རུ་ལུ་ཧཱུཾ་བྷྱོ་ཛཿཛཿ ཞེས་པས་དམ་ཚིག་གི་འཁོར་ལོ་དང་ཉེ་བར་སྤྱན་དྲངས་ཏེ། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉ་གནས་བསྐྱོད་ལ། །བདེ་གཤེགས་བཞུགས་ཞིང་རྣམ་གྲོལ་དགྱེས་པ་བསྐྱེད། །ཛཿཧཱུཾ་བཾ་ཧོཿ བཛྲ་ས་མ་ཡ་མུ་དྲ་ཨ། བཛྲ་ཤྲཱི་ཧེ་རུ་ཀ་ཏིཥྛ་ས་མ་ཡ་ལྷན། ཞེས་པས་རང་བཞིན་གྱི་དཀྱིལ་འཁོར་ཏིང་ངེ་འཛིན་གྱི་དཀྱིལ་འཁོར་ལ་ཆུ་ལ་ཆུ་བཞག་པ་ལྟར་དབྱེར་མེད་དུ་བསྟིམ་ནས་བརྟན་པར་བཞུགས་སུ་གསོལ་ལ། ཧཱུཾ། སངས་རྒྱས་སེམས་ཅན་དངོས་པོ་ཅིར་སྣང་ཡང་། །བདེ་གཤེགས་སྤྱན་དྲངས་བསྟིམ་པའི་བྱིན་རླབས་ཀྱིས། །ཡེ་ནས་གཉིས་སུ་མེད་པའི་དོན་རྟོགས་ནས། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། གཉིས་པ་ཕྱག་བྱ་བ་ནི། ཧཱུཾ། རྡོ་རྗེ་རྐང་ལག་མཛེས་པའི་གར། །ནམ་མཁའི་རྡུལ་སྙེད་རབ་སྤྲུལ་ཏེ། །འབར་བའི་དཀྱིལ་འཁོར་མཉེས་བྱའི་ཕྱིར། །དཀྱིལ་འཁོར་ལྷ་ལ་ཕྱག་འཚལ་ལོ། །ཨེ་མའོ་ངོ་མཚར་ཡ་མཚན་གྱི། །ཆོ་འཕྲུལ་ཀུན་གྱི་འབྱུང་གནས་གཙོ། །ངོ་མཚར་ཀུན་གྱིས་བདག་པོ་མཆོག །རྡོ་རྗེ་རྒྱལ་ལ་ཕྱག་འཚལ་ལོ། །བྱང་ཆུབ་སེམས་དང་དཀྱིལ་འཁོར་དང་། །ཕྱག་རྒྱ་བསྙེན་སྒྲུབ་སྒྲུབ་པ་དང་། །སྡོམ་དང་བརྟུལ་ཞུགས་ལས་རྣམས་དང་། །ནན་ཏུར་བདག་པོ་ཁྱོད་ལ་འདུད། །ཁྱོད་ནི་སངས་རྒྱས་ཀུན་གྱི་ཡབ། །དེ་བཞིན་རྒྱལ་བའི་སྙིང་པོར་གྱུར། །བདག་ཅག་རྣམས་ཀྱི་བརྟེན་པའི་གནས། །མ་རུང་འདུལ་ཁྲོ་ཁྱོད་ལ་འདུད། །ཨ་ཏི་པུ་ཧོཿ པྲ་ཏི་པུ་ཧོཿ ཞེས་པས་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་རྟོགས་པ་ཉིད་འདྲེས་པ་ནན་ཏན་གྱི་ཕྱག་ཡིན་ལ། དེའི་ཕྱིར་ཕྱག་མཆོད་བྱ་བར་མི་དམིགས་ཀྱང་། འཇིག་རྟེན་སྲི་ཞུའི་ཚུལ་དུ། བདག་གི་སྤྲུལ་པའི་མཆོད་སྤྲིན་དང་། ནམ་མཁའ་གང་བའི་ཡེ་ཤེས་ཀྱི་ལྷ་ཚོགས་ཐམས་ཅད་ལྷ་ལ་ལྷ་རོལ་པའི་ཚུལ་གྱིས་རོལ་པར་བསམ་པ་སྟེ། ཕྱག་མཆོད་ཀྱི་གནས་སྐབས་ཐམས་ཅད་ལ་ཤེས་པར་བྱའོ། །ཧཱུཾ། བདག་དང་གཞན་དུ་ཁྱད་པར་ཅིར་སྣང་ཡང་། །དཀྱིལ་འཁོར་ལྷ་ལ་ཕྱག་བཙལ་བྱིན་རླབས་ཀྱིས། །ཡེ་ནས་འདྲེས་པ་ཆེན་པོའི་དོན་རྟོགས་ནས། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། གསུམ་པ་དམ་བཅའ་བ་ནི། ༀ་ཧཱུཾ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབ། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་པས་དམིགས་པའི་ཡུལ། སྒྲུབ་པའི་ཐབས། གྲུབ་པའི་ཕྲིན་ལས་གསུམ་གྱི་དོན་ལ་ལྷག་པའི་བསམ་པ་རྩེ་གཅིག་པར་དམ་བཅས་ལ། ཧཱུཾ། འགྲོ་དྲུག་སེམས་ཅན་སྡུག་བསྔལ་ཅིར་སྣང་ཡང་། །དམ་བཅའ་རྣམ་གསུམ་བྱས་པའི་བྱིན་རླབས་ཀྱིས། །བསམ་པ་མཐའ་རུ་ཕྱིན་པའི་དོན་རྟོགས་ནས། །བདག་གཞན་གཉིས་ཀའི་དོན་རྣམས་མཐར་ཕྱིན་ཤོག །ན་མོ་ཧཱུཾ། བཞི་པ་མཆོད་པ་ལ་བཅུ་གཅིག་ལས། དང་པོ་ཕྱག་རྒྱའི་མཆོད་པ་ནི། ལག་པ་གཡས་ཀྱི་སོར་མོའི་བྲེ་ཁ་ལྔ་ལ། མ་སཱུརྱ་མཎྜ་ལ། ཉི་མའི་དཀྱིལ་འཁོར་ལྔ། གུང་མཛུབ་པ་དབང་མོ་ཆུང་དུ་སྦོམ་པོ་རྣམས་ལ། ༀ་ཧཱུཾ་སྭཱ་ཨཱཾ་ཧཱ། གཡོན་གྱི་སོར་མོའི་བྲེ་ཁ་ལྔ་ལ། ཨ་ཙནྡྲ་མཎྜ་ལ། ཟླ་བའི་དཀྱིལ་འཁོར་ལྔ། གུང་མཛུབ་སོགས་ལ། མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པར་གྱུར། ༀ་དང་མཱུཾ་གཉིས་རྩེ་སྤྲད་ལ། །དེ་བཞིན་ཧཱུཾ་དང་ལཱཾ་དུ་སྦྱར། །ཧཱ་དང་པཱཾ་ཡང་དེ་བཞིན་ཏེ། །ཨཱཾ་དང་ཏཱཾ་དུ་སྦྱར་བ་ལས། །རྒྱབ་སྦྱར་སྭཱ་དང་མཱཾ་སྒྲེང་བ། །འདི་ནི་ཡབ་ཀྱི་སྤྱི་རྒྱ་ཡིན། །ཧཱུཾ་བཛྲ་དྷྲིཀ྄ །ཅེས་པས་བདུན་དུ་བསྒྱུར་ནས་གཡོན་དུ་དཀྲོལ། ལག་པ་ཐལ་མོ་སྦྱར་བ་ལས། ༀ་དང་མཱུཾ་སྦྱར་ཧཱུཾ་དང་ནི། །ལཱཾ་སྦྱར་སྭཱ་དང་པཱཾ་དུ་སྦྱར། །ཨཾ་དང་མཱཾ་སྦྱར་ཧཱ་ཱཏཱཾ་སྒྲེང་། །ཡུམ་གྱི་སྤྱི་རྒྱ་ཡིན་པར་བཤད། །མཱུཾ་དྷཱ་ཏྭེ་ཤྭ་རཱི། ཞེས་པས་མདུན་དུ་བསྒྱུར་ནས་གཡས་སུ་དགྲོལ། དེའི་ཚེ་ལྷར་གསལ་བ་ཕྱག་ཆེན། ས་བོན་ཆོས་རྒྱ། བཅའ་བ་དམ་རྒྱ། གྲོལ་བ་ལས་རྒྱའོ། །དེ་ནས་ཁྲག་འཐུང་སོ་སོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ང་རྒྱལ་བྱས་ལ། ཧཱུཾ། ཆོས་ཀུན་མཉམ་པའི་ངང་རྟོགས་ནས། །བསྒུལ་ཞིང་གསིགས་པ་ཐམས་ཅད་ཀུན། །ཕྱག་རྒྱ་ཡིན་པར་དཔའ་བོས་གསུངས། །རང་གི་ལྷ་ཡི་ཏིང་འཛིན་གྱིས། སྟངས་སྟབས་འདི་ལ་གང་གནས་པ། །སངས་རྒྱས་ཉིད་ཀྱང་སྐྲག་འགྱུར་ན། །དྲེགས་པའི་ཚོགས་ལྟ་སྨོས་ཅི་དགོས། །ལག་གཉིས་ཐལ་སྦྱར་སྤྱི་གཙུག་བཞག །རྐང་གཉིས་མཐིལ་སྦྱར་རྩེ་མོ་བཙུགས། །མགོ་མཚན་རྡོ་རྗེའི་སྙིང་པོར་བསྒོམ། །རྩེ་གཅིག་རྩེ་གསུམ་རྩེ་ལྔ་དང་། །རྩེ་དགུ་བཅུ་གཅིག་རྡོ་རྗེར་བསྒོམས། །ས་སྟེང་ཀུན་ཏུ་མཆོད་བྱེད་པ། །འཇིགས་བྱེད་ཆེན་པོའི་ཕྱག་རྒྱ་ཡིན། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་མ་ཧཱ་མུ་དྲ་ཧཱུཾ། ལག་གཡས་གུང་མོའི་སྙིང་པོར་བྱ། །ལྷག་མ་རྣམས་ནི་རྡོ་རྗེའི་ཚུལ། །གཡོན་པ་བྷནྡྷ་ལྟར་བྱས་ནས། །དཀྲུགས་ནས་ཞལ་དུ་གསོལ་བ་ནི། །རྡོ་རྗེ་ཁྲག་འཐུང་ཕྱག་རྒྱ་ཡིན། །འབར་བའི༴ མཆོད་བཞེས༴ ༀ་རུ་ལུ༴ ལག་པ་གཡས་པ་བརྐྱང་བྱས་ཏེ། །གུང་མཛུབ་སྲིན་ལག་རྩེ་གསུམ་ཚུལ། །མཐེ་བོས་མཐེའུ་ཆུང་མནན་པར་བྱ། །གཡོན་པ་དུང་དམར་རཀྟ་འཐུང་། །འདི་ནི་རིན་ཆེན་ཁྲག་འཐུང་རྒྱ། །འབར་བའི༴ མཆོད་བཞེས༴ ༀ་རུ་ལུ༴ དེ་ཉིད་གུང་མཛུབ་སྲིན་ལག་གཞིབས། །རལ་གྲི་གདེངས་པ་ལྟར་བྱས་ལ། །པདྨ་ཁྲག་འཐུང་ཕྱག་རྒྱ་ཡིན། །འབར་བའི༴ མཆོད་བཞེས༴ ༀ་རུ་ལུ༴ དེ་ཉིད་གཡས་པ་ཁུ་ཚུར་བཅང་། །མཐེ་བོང་མཐེའུ་ཆུང་གུང་མོ་རྣམས། །སོ་སོར་བརྐྱང་བ་རྒྱ་གྲམ་ཚུལ། །ལས་ཀྱི་ཁྲག་འཐུང་ཕྱག་རྒྱར་བཞག །འབར་བའི༴ མཆོད་བཞེས༴ ༀ་རུ་ལུ༴ གཡས་པ་གཙོ་ལ་འཁྱུད་ཚུལ་དུ། །གཡོན་པ་རཀྟ་སྟོབ་པ་ནི། །རིགས་ལྔ་ཀྲོ་དྷཱི་ཀུན་གྱི་རྒྱ། །འབར་བའི༴ མཆོད་བཞེས༴ ༀ་རུ་ལུ༴ འདིར་ཀེ་སིང་སོགས་ཀྱི་ཕྱག་རྒྱའང་རྒྱས་པར་འབྱུང་མོད། ཧ་ཅང་མང་བས་བཏང་སྙོམས་སུ་བཞག་ལ། གཞན་དུ་འཁོར་རྣམས་ཀྱི་ཕྱག་རྒྱ་བྱེད་པར་སྤྲོ་ན། གནས་ཡུལ་དབང་ཕྱུག་མ་རྣམས་ཧེ་རུ་ཀ་འདུས་པར་གསུངས་པ་དང་ཚིག་དོན་མཐུན་པའི་ཕྱིར་སྒྱུ་འཕྲུལ་ཁྲོ་བོའི་སྒྲུབ་ཐབས་སུ་བཤད་པ་ལྟར་བླངས་པའི་རྗེས་སུ། ལྷག་མ་རྣམས་འདི་ལྟར་སྦྲེལ་ཏེ། འབར་མ་རྣམས་ཀྱི་ཕྱག་རྒྱ་ནི། །སྐུ་མདོག་གདུལ་བྱའི་ཚུལ་འདྲ་ཞིང་། །གཡས་པ་རྡོ་རྗེ་འབར་བ་སྟེ། །གཡོན་པ་བྷནྡྷ་རཀྟ་འཛིན། །འབར་བའི་གདན་ལ༴ མཆོད་བཞེས་དམ་སྐོངས༴ ༀ་རུ་ལུ་རུ་ལུ༴ མཁའ་འགྲོ་རྣམས་ཀྱི་ཕྱག་རྒྱ་ནི། །རྡོ་རྗེ་གཤོག་པས་ཟིལ་གནོན་ཅིང་། །བྷནྡྷ་ཁྲག་འཐུང་ཆགས་པ་ཆེ། །འདོད་ཆགས་ཚུལ་གྱིས་འགྲོ་བ་འདུལ། །འབར་བའི༴ མཆོད་བཞེས༴ ༀ་རུ་ལུ༴ མ་བདུན་སྲིང་བཞིའི་ཕྱག་རྒྱ་ནི། །འཇོ་སྒེག་མཛེས་དམར་ཟོལ་གྱིས་ལྟ། །གཡས་པ་འཁྱུད་ཚུལ་འཛིན་སྟབས་སྟོན། །གཡོན་པ་དུང་ཁྲག་འཐུང་བྱེད་པའོ། །འབར་བའི༴ མཆོད་བཞེས༴ ༀ་རུ་ལུ༴ རྡོ་རྗེ་གིང་ཆེན་བཅོ་བརྒྱད་ནི། །སྔོ་སྐྱ་འཇིགས་པའི་ཚུལ་སྟོན་ཅིང་། །གཡས་པ་གྲི་དང་མཚོན་ཆ་ཐོགས། །གཡོན་པས་འཛིན་ཅིང་གསོད་པར་བྱེད། །འབར་བའི༴ མཆོད་བཞེས༴ ༀ་རུ་ལུ༴ ཕོ་ཉ་སུམ་བརྒྱ་དྲུག་ཅུའི་ཚུལ། །དཀར་དང་སྔོ་དང་དམར་དང་ནག །གསེར་དང་བྱུ་རུའི་མདོག་འདྲ་བ། །དྲུག་ཅུ་དྲུག་གིས་རྫོགས་པ་ནི། །ལྕགས་ཀྱུ་ཞགས་པ་ལྕགས་སྒྲོག་དང་། །ཐོ་བ་གཤོག་པ་གཏུམ་ཚོགས་འཛིན། །མ་ལུས་ཁྱབ་པའི་ཚུལ་གྱིས་གནས། །འབར་བའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་མ་ཧཱ་མུ་དྲ་ཧཱུཾ། ཧཱུཾ། གཟུང་འཛིན་རྣམ་རྟོག་དངོས་པོ་ཅིར་སྣང་ཡང་། །ཕྱག་རྒྱའི་མཆོད་པ་ཕུལ་བའི་བྱིན་རླབས་ཀྱིས། །ཕྱག་རྒྱ་རྣམ་བཞི་ལྷུན་གྱིས་གྲུབ་ནས་ཀྱང་། །ཐམས་ཅད་ཕྱག་རྒྱ་ཆེན་པོར་ལྷུན་གྲུབ་ཤོག །ན་མོ་ཧཱུཾ། གཉིས་པ་ཀུན་བཟང་ནི། ཧཱུཾ། འཁོར་བ་རྒྱ་མཚོའི་ཡོ་བྱད་རྣམས། །མཆོད་པ་རྒྱ་མཚོའི་རྒྱན་ཡིན་ཏེ། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་འཁོར་འདས་ཀྱིི་འདོད་པའི་ཡོན་ཏན་མཐའ་དག་སྤྱོད་ཡུལ་རྣམ་པར་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་སྤེལ་ལ། ཧཱུཾ། ཕྱི་ནང་གསང་བའི་དངོས་པོ་ཅིར་སྣང་ཡང་། །ཀུན་ཏུ་བཟང་པོའི་མཆོད་པ་ཕུལ་བ་ཡིས། །དངོས་པོ་ཐམས་ཅད་མཆོད་པར་གྱུར་ནས་ཀྱང་། །སྤྱོད་ཡུལ་ཐམས་ཅད་ཡོངས་སུ་དག་པར་ཤོག །ན་མོ་ཧཱུཾ། གསུམ་པ་མཆོད་པ་ལྔ་ནི། ཧཱུཾ། འབྱུང་བ་ཆེན་པོ་ནམ་མཁའ་ནི། །འབྱུང་བ་ཆེན་པོ་ལྔ་ཡི་མཛོད། །ནམ་མཁའ་ལས་ནི་འདོད་པ་འབྱུང་། །འདོད་པའི་མཆོད་པ་འབྱུང་འགྱུར་ཅིག །ༀ་ཨཱཿཧཱུཾ། སུ་ར་ཏོ་མ་ཧཱ་རཱ་ག་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ༀ་ཨཱཿཧཱུཾ། ཞེས་པས་མཆོད་སྤྲིན་སྤྲོས་ལ། ཡང་དག་དོན་དུ་དག་མོད་ཀྱང་། །འགྲོ་བ་ཡོངས་ཀྱི་དོན་སླད་དུ། །ཕྱག་དང་ཞབས་ནི་བསིལ་ནས་ཀྱང་། །རྡོ་རྗེའི་གདན་ལ་བཞུགས་སུ་གསོལ། །ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཧཱུཾ། སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་གདུགས་ཀྱིས་འགེབས། །བྱམས་པ་ཐབས་དང་ཤེས་རབ་ལས། །བཛྲ་དྷཱུ་པེའི་མཆོད་པར་རོལ། །ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ཨུཏྤལ་མཐིང་ག་མེ་ཏོག་འཐོར། །སྣ་ཚོགས་རིན་ཆེན་འོད་དུ་འཕྲོ། །སྙིང་རྗེ་ཐབས་དང་༴ བཛྲ་པུཥྤེའི༴ ༀ་ཤྲཱི་བཛྲ་རཱ་ག་པུཥྤེ་པུ། དབང་གི་ཕྱག་ན་སྒྲོན་མ་རྣམས། །ཆོས་ཀྱི་རྒྱལ་པོ་འབར་བ་འཛིན། །དགའ་བ་ཐབས་དང་༴ བཛྲཱ་ལོ་ཀེའི༴ ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿ ཙནྡ་བདུད་རྩིའི་ཆར་འབེབས་མ། །དཀྱིལ་འཁོར་གསལ་བའི་ཐིག་ལེ་འབེབས། །བཏང་སྙོམས་ཐབས་དང་༴ བཛྲ་གནྡྷེའི་མཆོད་པར༴ ༀ་ཤྲཱི་བཛྲ་རཱ་ག་གནྡྷེ་གན། ཞེས་པས་མཆོད་ལ། ཧཱུཾ། བདག་གཞན་དངོས་པོ་ཁྱད་པར་ཅིར་སྣང་ཡང་། །མཆོད་པ་རྣམ་ལྔ་ཕུལ་བའི་བྱིན་རླབས་ཀྱིས། །ཐམས་ཅད་འགག་པ་མེད་པའི་དོན་རྟོགས་ནས། །འཁོར་གསུམ་མ་ལུས་ཡོངས་སུ་དག་པར་ཤོག །ན་མོ་ཧཱུཾ། བཞི་པ་སྨན་མཆོད་ནི། སྟོང་གསུམ་བྷནྡྷའི་བཟེད་ཁོང་དུ། །སྲིད་གསུམ་སེམས་ཅན་དུག་ཆེན་ལ། །དུས་གསུམ་སངས་རྒྱས་རྩིར་སྦྱར་བས། །བདུད་རྩིའི་དཀྱིལ་འཁོར་ལྷུན་གྱིས་རྫོགས། །འཆི་མེད་བདུད་རྩི་གཡུང་དྲུང་ཆུ། །རོ་ཡི་ཁམས་རྣམས་སློང་བར་བྱེད། །དུག་གི་ཕུང་པོ་འཇོམས་བྱེད་པ། །རྩི་མཆོག་སྨན་གྱི་མཆོད་པ་བཞེས། །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་དང་། ༀ་ཤྲཱི་ཧེ་རུ་ཀ་མ་ཧཱ་ཀྲོ་དྷེ་ཤྭ་རཱི་ཧ་ཧེ་ཕཊ། རུ་ལུ་རུ་ལུ་ཧཱུཾ། མ་ཧཱ་པཉྩ་ཨ་མྲྀ་ཏ་ར་ས་ཡ་ན་ཨ་ལ་ལ་ཧོཿ ཞེས་སྤྱིར་དབུལ་ཞིང་། གཞན་ཡང་། ཀུན་བཟང་རིགས་ལྔ་རིགས་གསུམ་དྲྭ་མ་ལྔ། །ལུང་བསྟན་རྡོ་རྗེེ་ཨུ་པ་རཱ་ཛ་དང་། །ཨིནྡྲ་བྷཱུ་ཏི་ནཱ་ག་པུ་ཏྲ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གུ་ཧྱ་པུ་ཏྲི་ཀུ་ཀུ་རཱ་ཛ་དང་། རོ་ལངས་བདེ་བ་རྡོ་རྗེ་བཞད་པ་རྩལ། །པྲ་བྷཱ་ཧསྟི་ཤཱཀྱ་སེང་གེ་ལ། །སྨན་མཆོད་འབུལ་ལོ༴ ༀ་མ་ཧཱ་པཉྩ༴ དྷ་ན་རཀྵི་རྡོ་རྗེ་ཧཱུཾ་ཀཱ་ར། །སྠི་ར་མ་ཏི་བདེ་བ་གསལ་མཛད་དང་། །དྷརྨ་བོ་དྷི་མཁན་པོ་ཆོས་སྐྱོང་ལ། །སྨན་མཆོད༴ ༀ་མ་ཧཱ༴ བ་སུ་དྷ་ར་བྲུ་ཤ་ཆེ་བཙན་སྐྱེས། །གནུབས་ཆེན་ཡབ་སྲས་ཡེ་ཤེས་རྒྱ་མཚོའི་ཞབས། །བློ་གྲོས་བྱང་ཆུབ་ཐོ་དཀར་ནམ་མཁའ་ལ། །སྨན་མཆོད༴ ༀ་མ་ཧཱ༴ ཟུར་ཆེན་ཡབ་སྲས་ཡང་ཁྱེད་སྒྲོ་ཕུག་པ། །འགར་སྟོན་སྲེགས་དང་གླན་སྟོན་རྡོ་རྗེ་འོད། །བརྩོན་འགྲུས་སེང་གེ་བསོད་ནམས་རྒྱལ་པོ་ལ། །སྨན་མཆོད༴ ༀ་མ་ཧཱ༴ ལྷ་འབུམ་ཆོས་ཀྱི་སེང་གེ་སངས་རྒྱས་དཔལ། །བསོད་ནམས་མགོན་པོ་སྒྲོལ་ཆེན་དགེ་འདུན་འབུམ། །ཤཱཀྱ་བཤེས་གཉེན་ཆོས་འབུམ་དཀོན་མཆོག་བཟང་། །སྨན་མཆོད༴ ༀ་མ་ཧཱ༴ རྡོ་རྗེ་དཔལ་བཟང་རྡོ་རྗེ་དཔང་སྟོན་རྗེ། །ཀུན་བཟང་དཔལ་འབྱོར་ཕྲིན་ལས་ལྷུན་གྲུབ་ཞབས། །ཆོས་རྒྱལ་བསྟན་འཛིན་འགྱུར་མེད་རྡོ་རྗེ་ལ། །སྨན་མཆོད༴ ༀ་མ་ཧཱ༴ ཆོས་དཔལ་རྒྱ་མཚོ་རིན་ཆེན་རྣམ་པར་རྒྱལ། །བསྟན་འཛིན་རྡོ་རྗེ་ཀརྨ་བི་ཛ་ཡ། །པདྨ་དབང་རྒྱལ་སངས་རྒྱས་ཀུན་དགའ་ལ། །སྨན་མཆོད༴ ༀ་མ་ཧཱ༴ མཚུངས་མེད་མདོ་སྔགས་བསྟན་འཛིན་ནོར་བུའི་སྡེ། །ཁྱབ་བདག་འགྱུར་མེད་ཕན་བདེའི་འོད་ཟེར་ཞབས། །བརྒྱུད་སྲོལ་ཀུན་འདུས་རྩ་བའི་བླ་མ་ལ། །སྨན་མཆོད༴ ༀ་མ་ཧཱ༴ ལོ་ཆེན་མན་གྱི་བརྒྱུད་རིམ་ཁ་སྐོང་ཛྙཱ་ནས་སོ། །གཞན་ཡང་སྒྲོ་ཕུག་པ་ནས་ཁར་རག་སྟོན་སྙིང་ལ་བརྒྱུད་པ་དང་། གླན་ནས་འགོས་ལ་བརྒྱུད་པ་སོགས་སྔ་བརྒྱུད་དང་། ཕྱི་བརྒྱུད་ལུགས་ཐ་དད་སོགས་གང་མོས་བསྒྱུར་ཞིང་སྤྲོས་པས་ཆོག་གོ། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཐུབ་དྲུག་སྒོ་སྐྱོང་བཞི། །བདེ་གཤེགས་རྡོ་རྗེ་དབྱིངས་ཀྱི་ལྷ་ཚོགས་ལ། །སྨན་མཆོད༴ ༀ་མ་ཧཱ༴ ༀ། ཚོགས་རྗེ་ཚོགས་བདག་ཆེ་མཆོག་ཧེ་རུ་ཀ །ཁྲག་འཐུང་ཡབ་ཡུམ་གནས་ཡུལ་སྒོ་མ་བཞི། །སྤོར་མ་གསང་ཡུམ་དབང་མོ་ཉེར་བརྒྱད་ལ། །སྨན་མཆོད༴ ༀ་མ་ཧཱ༴ མཁའ་འགྲོ་མ་སྲིང་གིང་དང་ཕོ་ཉའི་ཚོགས། །ད མ་ཅན་ལྕམ་དྲལ་རིགས་དྲུག་ཕ་མ་སོགས། །འཁོར་འདས་བྱང་ཆུབ་སེམས་ཀྱི་དཀྱིལ་འཁོར་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ༀ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་གུ་ཡ་ལག་གི་ཕྱག་རྒྱས་གཏོར་བས་ཡེ་ཤེས་ཀྱི་བདུད་རྩིའི་ཟེགས་མའི་སྤྲིན་ལས་བདུད་རྩིའི་ཆར་བབས་པས་ལྷ་ཐམས་ཅད་མཉེས་ཚིམ་གཟི་བརྗིད་དང་ལྡན་པར་བསམ་ལ། མཐར་དངོས་གྲུབ་བླང་བ་ནི། རང་གི་ལྕེ་ལ་ཧཱུཾ་ཡིག་དང་། སྨན་གྱི་སྟེང་དུ་འབྲུ་གསུམ་བསྒོམས་ཏེ། རྡོ་རྗེ་དམ་ཚིག་མཆོག་གསུམ་པོ། །བདག་གཞན་བྱིན་རླབས་བླངས་བཀོད་ན། །ནམ་མཁའི་མཐས་གཏུགས་སྐུ་གསུང་ཐུགས། །བྱིན་རླབས་བརྟན་པ་ཉིད་དུ་འགྱུར། །ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། ཞེས་རིམ་པར་བླངས་ཏེ། ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་ལ། ཧཱུཾ། བཞི་བརྒྱ་རྩ་བཞིའི་ནད་རྣམས་ཅིར་སྣང་ཡང་། །བདུད་རྩི་སྨན་མཆོད་བྱས་པའི་བྱིན་རླབས་ཀྱིས། །འཕྲལ་དུ་སྐབས་འཚོལ་གནོད་པ་ཀུན་བསལ་ནས། །སྐྱེ་ཤི་མེད་པར་ལྷུན་གྱིས་གྲུབ་པ་ཤོག །ན་མོ་ཧཱུཾ། ལྔ་པ་གཏོར་མའི་མཆོད་པ་ནི། ཧཱུཾ། ཟླ་རྒྱས་ལ་སོགས་སྙིང་པོ་མཆོག །མཱ་ས་ལ་སོགས་རྣམ་ལྔའི་རྫས། །མེ་ཏོག་ལ་སོགས་ཙནྡན་ཕྲེང་། །སྣ་ཚོགས་མཆོད་པ་འབྱུང་གྱུར་ཅིག །ཨི་དཾ་པུཥྤ། དྷཱུ་པ། བ་ལིཾ་པྲ་ཏཱིཙྪ་ཧོཿ ཁ་རཾ་ཁཱ་ཧི། ཞེས་མཆོད་ལ། ཧཱུཾ། སྟོང་ཕྲག་བརྒྱད་ཅུའི་བགེགས་རྣམས་ཅིར་སྣང་ཡང་། །དམ་རྫས་གཏོར་མ་ཕུལ་བའི་བྱིན་རླབས་ཀྱིས། །ཡུན་དུ་གླགས་ལྟའི་གནོད་པ་ཀུན་ཞི་ནས། །འཕོ་འགྱུར་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། དྲུག་པ་རཀྟའི་མཆོད་པ་ནི། ཧཱུཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་ཀྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་བཞེས་ནས་བསྣམས་སུ་གསོལ། །མ་ཧཱ་རཀྟ་རུ་ཏི་ཏིཀྞ྅྅྅་པཉྩ་ཨ་མྲྀ་ཏ། ཙིཏྟ། བ་སུ་ཏ། གོ་རོ་ཙ་ན། ཏ་ཀི་ནི། ཡོ་གི་ནི་མ་ཧཱ་ཙིཏྟ་ཁ་རཾ་ཁཱ་ཧི། ཞེས་ཕུལ་ལ། ཧཱུཾ། ཞེན་ཅིང་ཆགས་པའི་དངོས་པོ་ཅིང་སྣང་ཡང་། །ཁམས་གསུམ་ཁྲག་གི་རྒྱ་མཚོ་ཕུལ་བའི་མཐུས། །ཉོན་མོངས་སེམས་སུ་གསལ་བའི་དོན་རྟོགས་ནས། །སེམས་ཉིད་དབྱེ་བ་མེད་པའི་དོན་རྟོགས་ཤོག །ན་མོ་ཧཱུཾ། བདུན་པ་ལྷག་པའི་ཏིང་ངེ་འཛིན་གྱི་མཆོད་པ་ནི། ཧཱུཾ། ཇི་ལྟར་འདོད་ཅིང་ཡིད་འོང་བའི། །ཡོ་བྱད་ནམ་མཁའ་ཁྱབ་པར་སྤྲུལ། །མོས་པ་དག་པའི་ཁྱད་པར་བཞིན། །འཁོར་གསུམ་དག་པའི་སྟོབས་ཀྱིས་འབུལ། །ཞེས་ཕུལ་ལ། ཧཱུཾ། སེམས་ཀྱི་རྟོག་པའི་དངོས་པོ་ཅིར་སྣང་ཡང་། །ལྷག་པ་ཏིང་འཛིན་མཆོད་པའི་བྱིན་རླབས་ཀྱིས། །དངོས་པོ་ཡོ་བྱད་ལྔ་རུ་གྲུབ་ནས་ཀྱང་། །རིག་པ་ཅིར་ཡང་སྣང་བ་ལྷུན་གྲུབ་ཤོག །ན་མོ་ཧཱུཾ། བརྒྱད་པ་སྦྱོར་སྒྲོལ་གྱི་མཆོད་པ་ནི། ཧཱུཾ། འཁོར་བ་ཤེས་རབ་ཡུམ་ཉིད་ལ། །སྙིང་རྗེ་ཐབས་ཀྱི་རྒྱལ་པོ་ཡིས། །འདུ་འབྲལ་མེད་པར་སྦྱར་བས་ནི། །ཐམས་ཅད་རྒྱལ་བའི་སྲས་སུ་སྐྱེས། །ཞེས་པས་ལྷ་ཐམས་ཅད་སྙོམས་པར་འཇུག་པའི་བདེ་བ་ཆེན་པོའི་རོལ་མོས་མཉེས་པར་བསམ་མོ། །ཧཱུཾ། འཁོར་བ་བསྒྲལ་བའི་ཞིང་འདི་དག །ཡེ་ཤེས་འབར་བའི་མཚོན་ཆེན་གྱིས། །རང་བཞིན་མེད་པར་བསྒྲལ་ནས་ནི། །མཉམ་ཉིད་ཆོས་སྐུ་ཆེན་པོར་བཏོན། །ཞེས་པས་འཁོར་བའི་འཁྲུལ་རྟོག་ངར་འཛིན་ཐམས་ཅད་ཆོས་ཉིད་བྱང་ཆུབ་སེམས་ཀྱི་དབྱིངས་སུ་བསྒྲལ་བར་བསམ་ཞིང་། ཧཱུཾ། ཆགས་སྡང་རྣམ་གཉིས་དངོས་པོ་ཅིར་སྣང་ཡང་། །ཏན་གན་རྣམ་གཉིས་མཆོད་པའི་བྱིན་རླབས་ཀྱིས། །སྤྱོད་ཡུལ་ཡོངས་སུ་དག་པའི་དོན་རྟོགས་ནས། །བདག་གཞན་དོན་གཉིས་ལྷུན་གྱིས་གྲུབ་པར་ཤོག །ན་མོ་ཧཱུཾ། དགུ་པ་འདོད་ཡོན་རོ་མཉམ་གྱི་མཆོད་པ་ནི། བཟའ་དང་བཅའ་དང་བཏུང་དང་བགོ། །འདོད་པའི་ཡོན་ཏན་ལྔ་ལྡན་པ། །ནམ་མཁའི་སྤྲིན་ལྟར་གཏིབས་སྤུངས་ནས། །དཀྱིལ་འཁོར་ཉིད་ལ་དཀྱིལ་འཁོར་ཐིམ། །ཞེས་པས་ལྷ་ཐམས་ཅད་འདོད་ཡོན་ལྔའི་བདེ་བས་དགྱེས་པར་བསམ་ཞིང་། ཧཱུཾ། ཡུལ་དང་དབང་པོའི་དངོས་པོ་ཅིར་སྣང་ཡང་། །འདོད་ཡོན་ལྔ་ཡི་མཆོད་པ་ཕུལ་བའི་མཐུས། །ཡུལ་སེམས་གཉིས་སུ་མེད་པའི་དོན་རྟོགས་ནས། །སྤྱོད་ཡུལ་མ་ལུས་ཡོངས་སུ་དག་པར་ཤོག །ན་མོ་ཧཱུཾ། བཅུ་པ་རོལ་མོ་ཡེ་ཤེས་ཀྱི་མཆོད་པ་ནི། ཧཱུཾ། ཤ་ཏ་པ་ལ་སོགས་པ་ཡིས། །བརྡུང་དང་བཀྲོལ་བ་ལ་སོགས་པའི། །རོལ་མོའི་སྦྱོར་བ་མཐའ་ཡས་པ། །གླུ་དང་ཚིགས་སུ་བཅད་པ་ཡིས། །དར་དིར་སྙན་པར་བཅས་པའི་དབྱངས། །ལྷ་མོ་རྡུལ་སྙེད་མདངས་ལྡན་པས། །མ་ལུས་ཁྱབ་ཅིང་མཉེས་པར་བྱ། །ཁ་ཁ་ལི། ཤ་ཏ་པ་ཁ་ཧི། ཨ་ལ་ལ་ཧོཿ ཞེས་འབུད་དཀྲོལ་གྱི་རོལ་མོ་སྣ་ཚོགས་པའི་སྒྲ་སྦྱར་ལ། ཧཱུཾ། ཉོན་མོངས་སྡུག་བསྔལ་དངོས་པོ་ཅིར་སྣང་ཡང་། །གླུ་དང་སྒྲ་སྙན་རོལ་མོ་ཕུལ་བ་ཡིས། །ཐམས་ཅད་ཐེག་པ་ཆེན་པོའི་སྒྲར་གྱུར་ནས། །གསང་སྔགས་དོན་ཉིད་ཀུན་གྱིས་རྟོགས་པར་ཤོག །ན་མོ་ཧཱུཾ། བཅུ་གཅིག་པ་བསྟོད་པའི་མཆོད་པ་ནི། ཨེ་མ་རང་སྣང་དབྱེར་མེད་སྐུ། །རྣམ་དག་བསོད་ནམས་མཚན་གྱིས་བརྒྱན། །དཔེ་བྱད་འབྲུ་བཀོད་བལྟས་མི་ངོམ། །སྐུ་ལྔའི་མཆོག་ལ་ཕྱག་འཚལ་ལོ། །ཨེ་མ་རྣམ་དག་ནམ་མཁའི་དབྱིངས། །ཅི་གསུང་སྣ་ཚོགས་སྒྲར་རིག་མཁྱེན། །བསམ་འདས་བརྗོད་མེད་རྡོ་རྗེའི་གསུང་། །གསུང་ལྔའི་མཆོག་ལ་ཕྱག་འཚལ་ལོ། །ཨེ་མ་གསང་བ་ནམ་མཁའི་ཐུགས། །མཉམ་ཉིད་མི་གཡོ་སོ་སོར་གསལ། །ཀུན་རིག་སྙིང་པོ་ཡེ་ཤེས་མཆོག །ཐུགས་ལྔའི་མཆོག་ལ་ཕྱག་འཚལ་ལོ། །ཨེ་མ་རྡོ་རྗེ་སེམས་ཆེན་པོ། །རང་རིག་མཁྱེན་པའི་ཡེ་ཤེས་འབར། །མགོན་པོ་ཡོན་ཏན་བསམ་ལས་འདས། །རྒྱལ་མཆོག་ཁྱོད་ལ་ཕྱག་འཚལ་ལོ། །ཨེ་མ་མི་མཛད་མཛད་པ་ཆེ། །མ་ཆགས་ཆགས་བྲལ་འདོད་ཆགས་མཛད། །ཐམས་ཅད་སྒྲོལ་བའི་ལས་པོ་ཆེ། །ཕྲིན་ལས་མཆོག་ལ་ཕྱག་འཚལ་ལོ། །ཞེས་དང་། ཨེ་མ་ཧོཿ ཉེས་བཅོམ་ལེགས་ལྡན་མཚན་ཞི་མཐའ་ལས་འདས། །བདག་མེད་བྱམས་སྙོམས་དོན་གྱི་བདག་གཞན་དཔལ། །དོན་དམ་གསང་སྦས་ནམ་མཁའི་ཀློང་དུ་འཁྱིལ། །རྡོ་རྗེ་ཆེ་མཆོག་དབང་ཕྱུག་ཀུན་གྱི་བདག །འཛིན་པ་མི་རྟོག་ཤ་རུས་ཁྲག་ལ་རོལ། །ཐུགས་ཀྱི་གདུང་ཐག་འཁོར་བའི་མཐའ་ལ་རྗེ། །ཡུལ་མེད་མ་སྐྱེས་མཚན་མའི་གཡུལ་ལས་རྒྱལ། །བདེ་མཆོག་རྒྱལ་པོ་ཁྱོད་ལ་ཕྱག་འཚལ་བསྟོད། །ཤེས་རབ་ཆེན་པོ་ནམ་མཁའི་ཉི་མར་གསལ། །བྱང་ཆུབ་སེམས་ཀྱི་འོད་ཟེར་དབྱིངས་སུ་འཆར། །དཔའ་བརྟུལ་མྱུར་བའི་ཤུགས་ཀྱིས་འགྲོ་དྲུག་སྒྲོལ། །རྟོག་འཇོམས་ཡེ་ཤེས་རྡོ་རྗེ་ཆོ་འཕྲུལ་འཕྲོ། །དམ་པའི་དོན་གསུང་གཉིས་མེད་སྟོན་པའི་སྐུ། །སྨྲ་བའི་སེང་གེ་ཁྱོད་ལ་ཕྱག་འཚལ་བསྟོད། །ༀ། ཕྱོགས་བཅུའི་ཞིང་ཁམས་ཀུན་ལས་འདུས་པའི་གཙོ། །རྒྱལ་བ་སྲས་བཅས་ཡུམ་ཚོགས་སྤྲུལ་པར་བཅས། །ཉིད་ལས་མི་གཞན་འཁོར་དུ་སྐུ་སྤྲུལ་པ། །དབྱིངས་ཀྱི་ངང་ལས་མི་འདའི་དམ་ཚིག་ཅན། །ཞི་ཁྲོའི་འཁོར་ཚོགས་ཀུན་ལ་ཕྱག་འཚལ་བསྟོད། །ཨ་ལ་ལ་ཧོཿ ཧཱུཾ། ང་རྒྱལ་བསྙེམས་པའི་རྟོག་པ་ཅིར་སྣང་ཡང་། །ཞི་ཁྲོའི་ལྷ་ལ་བསྟོད་པའི་བྱིན་རླབས་ཀྱིས། །ཆེ་བའི་ཡོན་ཏན་ལྔ་རུ་ལྷུན་གྲུབ་ནས། །ཅིར་སྣང་དག་པ་རབ་འབྱམས་ལྷུན་གྲུབ་ཤོག །ན་མོ་ཧཱུཾ། ཞེས་པ་འདི་རིགས་འགྲེས་ནས་གསར་དུ་སྦྱར་བ་ཡིན་ནོ། །ལྔ་པ་དངོས་གྲུབ་གསོལ་ཞིང་སྨོན་ལམ་གདབ་པ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རིགས་ལྔ་རྒྱལ་བ་རྒྱ་མཚོ་འཁོར་བསམ་གྱིས་མི་ཁྱབ་པ་དང་བཅས་པ་ཐམས་ཅད་དང་། བཅོམ་ལྡན་འདས་ཆེ་མཆོག་ཧེ་རུ་ཀ་ལ་སོགས་པ་ཧེ་རུ་ཀ་དགུ་ཀློང་འབར་བ། ཁྲོ་བོ་དང་ཁྲོ་མོ་བསམ་གྱིས་མི་ཁྱབ་པ་ཐམས་ཅད་གསན་ཅིང་དགོངས་སུ་གསོལ། བདག་ཅག་རྣལ་འབྱོར་གྱི་མཆོད་པ་དམ་པ་རིག་པའི་ཁྱད་པར་ལས་བྱུང་བ། ཕྱི་ནང་གསང་བ་གསུམ་གྱི་ཚུལ་དུ་ཕུལ་བས་སྐུ་གསུང་ཐུགས་ཀྱི་རྒྱུད་མཉེས་པ་ཆེན་པོས་ཁྱབ་པར་གྱུར་ཅིག །དེའི་བྱིན་རླབས་ཀྱིས་མཐའ་ཡས་པའི་སེམས་ཅན་ཐམས་ཅད་རྡོ་རྗེ་འཆང་གི་གྲལ་ཐོབ་པར་གྱུར་ཅིག །བདག་ཅག་གི་དམ་ཚིག་ཉམས་པ་ཐམས་ཅད་སྐོངས་ཏེ་དངོས་གྲུབ་ཀྱི་སྣོད་དུ་གྱུར་ནས། ཡི་གེ་འཁོར་ལོ་ཚོགས་ཆེན་གྱི་སར་སངས་རྒྱས་ཏེ་འཁོར་བ་ཀར་དག་པར་གྱུར་ཅིག །ཨ་ལ་ལ་ཧོཿ ཞེས་དང་། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་ལ་སྩལ་དུ་གསོལ། །ཞེས་གསོལ་བ་གདབ་ཅིང་། ཧཱུཾ། ཡིད་ལ་བསམ་པའི་དངོས་པོ་ཅིར་སྣང་ཡང་། །སྨོན་ལམ་མངོན་དུ་བཏབ་པའི་བྱིན་རླབས་ཀྱིས། །ཡིད་ལ་ཅི་བསམ་ལྷུན་གྱིས་གྲུབ་ནས་ཀྱང་། །འགྲོ་དོན་མ་ལུས་ལྷུན་གྱིས་གྲུབ་པ་ཤོག །ན་མོ་ཧཱུཾ། དྲུག་པ་འཛབ་ལ། འཛབ་ཁང་དབྱེ་བ། འཛབ་དངོས། སྐབས་ཀྱི་མཇུག་བསྡུ་བ་དང་གསུམ་ལས། དང་པོ་ནི། དབྱེ་གཞིའི་དཀྱིལ་འཁོར་གསལ་བཏབ་ནས། བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ་ཕཊ་ཛཿ ཧཱུཾ་ༀ་སྭཱ་ཨཱཾ་ཧཱ་ཕཊ་ཛཿ ཧཱུཾ་ཧ་ཧེ་ཕཊ་བྷྱོ་རཾ་ཕཊ་ཛཿ ཞེས་བརྗོད་པས། ཏིང་ངེ་འཛིན་གྱི་དཀྱིལ་འཁོར་ལས་རང་བཞིན་གྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབ་འབྱར་གྱི་ཚུལ་དུ་བཞུགས་པར་མོས་པའོ། །གཉིས་པ་ལ། ཐུན་མོང་དང་། ཁྱད་པར་བ་གཉིས་ལས། དང་པོ་ནི། བདག་མདུན་གྱི་ལྷ་རྣམས་ཀྱི་ཡེ་ཤེས་སེམས་དཔའི་ཐུགས་ཀར་རང་རང་གི་ཕྱག་མཚན་ས་བོན་གྱིས་མཚན་པ་བཟླ་བྱའི་སྔགས་ཀྱིས་བསྐོར་བར་གསལ་བཏབ་ལ། སྔགས་ཟློས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་ལ། དམ་ཡེ་འཕྲོ་འདུ་སྟེ་གསལ་བ་གསུམ་དང་ལྡན་པའི་ངང་ནས། སྐྱོན་བཅུ་སྤངས་ཏེ། བཟླ་བྱའི་སྔགས་ནི། ཀུན་བཟང་སོགས་ཞི་བའི་བསྐྱེད་སྔགས་དང་། ཁྲོ་བོ་ལ་སོ་སོའི་བསྐྱེད་སྔགས་ལ་རུ་ལུ་སྦྲེལ་བ་གཙོ་འཁོར་གྱི་འགྲོས་སྦྱར་ཏེ་ཇི་ལྟར་རིགས་པ་བཟླའོ། །གཉིས་པ་ནི། འཛབ་ཁང་དབྱེ་འམ། མ་དབྱེ་ཡང་རུང་སྟེ། ལུས་ཀྱི་བསྒུལ་བསྐྱོད་ཐམས་ཅད་དམ་ཚིག་གི་ཕྱག་རྒྱར་ཤེས་པ་དང་། ངག་གི་བཟླས་བརྗོད་ཐམས་ཅད་ཆོས་ཉིད་ཀྱི་སྒྲ་གདངས་སུ་འཆར་བ་དང་། སེམས་ཀྱི་དྲན་རྟོག་ཐམས་ཅད་རྩ་བ་བྱང་ཆུབ་སེམས་ཀྱི་ངོ་བོར་རྟོགས་པ་སྟེ། སྣང་སྲིད་ཡེ་རྫོགས་དཀྱིལ་འཁོར་གསུམ་གྱི་ང་རྒྱལ་དང་མ་བྲལ་བས། འཁོར་བ་ཆོས་ཀྱི་དབྱིངས་ཉིད་ལས། །སེམས་ཅན་སངས་རྒྱས་སྙིང་པོར་ཤར། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་བཟླས་བརྗོད་སྔགས་ཀྱི་ཚིག །ཅེས་རྟོགས་པར་བྱས་ནས། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་རླུང་སྔགས་སེམས་གསུམ་དབྱེར་མི་ཕྱེད་པའི་ངང་ནས་ཅི་ནུས་བཟླས་ལ། ཧཱུཾ། རྒྱུ་འབྲས་རྩོལ་བའི་སྡུག་བསྔལ་ཅིར་སྣང་ཡང་། །བསྙེན་སྒྲུབ་རྣམ་བཞི་འཛབ་བསྙེན་བྱས་པའི་མཐུས། །ཐམས་ཅད་ཀུན་ཏུ་བཟང་པོའི་དོན་རྟོགས་ནས། །དངོས་གྲུབ་རྣམ་གསུམ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའོ། །གསུམ་པ་སྐབས་ཀྱི་མཇུག་བསྡུ་བ་ལ། བསྟོད་པ། བཤགས་པ། འཛབ་ཁང་བསྡུ་བ་དང་གསུམ་ལས། དང་པོ་ནི། སྔར་བཤད་པའམ། སྒྱུ་འཕྲུལ་ཞི་ཁྲོའི་བསྟོད་པ་སྦྲེལ་བ་གང་བདེ་བྱའོ། །གཉིས་པ་ནི། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ། །ཞེས་བཟླས་པའི་ཉེས་བྱས་སུ་གྱུར་པ་རྣམས་བཤགས་པར་བྱའོ། །གསུམ་པ་ནི། རང་བཞིན་དང་ཏིང་ངེ་འཛིན་གྱི་དཀྱིལ་འཁོར་དབྱེར་མེད་དུ་རྟོགས་པར་བྱས་ལ། ཧཱུཾ་ཞེས་བརྗོད་པས། ཡེ་ཤེས་ཀྱི་དཀྱིལ་འཁོར་དམ་ཚིག་གི་དཀྱིལ་འཁོར་ལ་གཉིས་མེད་དུ་བསྟིམ་ནས། གསལ་ཞིང་བརྟན་པའི་ཕྱིར་ཡི་གེ་བརྒྱ་པའང་བཟླའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། བགོ་གོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔའོ། །དང་པོ་ཚོགས་མཆོད་ལའང་ལྔ་ལས། དང་པོ་བཤམ་ཞིང་བྱིན་གྱིས་བརླབ་པ་ནི། དམ་རྫས་སུ་འོས་པའི་ཡོ་བྱད་རྣམས་བཤམས་ནས། དྲི་ཆབ་ཀྱིས་གཏོར་ལ། ༀ་ཀྲོ་དྷཱི་ཤྭ་རཱི་སརྦ་དྲ་བྱཾ་ཤྭ་དྷ་ནེ་ཧཱུཾ་ཕཊ་ཀྱིས་བསང་། རཾ་ཡཾ་ཁཾ། ཞེས་བརྗོད་པས། ཡེ་ཤེས་ཀྱི་འོད་ཟེར་མེ་རླུང་ཆུར་བྱུང་བས་དངོས་འཛིན་ཉེས་སྐྱོན་ཐམས་ཅད་བསྲེགས་གཏོར་སྦྱངས་ཏེ་སྟོང་པར་གྱུར། སྟོང་པའི་ངང་ལས་ཚོགས་གཞོང་བྷནྡྷ་འབར་བའི་སྣོད་དུ་ཚོགས་རྫས་ཡེ་ཤེས་ཀྱི་བདུད་རྩི་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པའི་སྤྲིན་འཕྲོ་བའི་ལོངས་སྤྱོད་ཀྱི་གཏེར་དུ་གྱུར་པར་བསམ་ཞིང་། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབ། གཉིས་པ་སྤྱན་དྲང་བ་ནི། ༀ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ཛཿཧཱུཾ་བཾ་ཧོཿ ཨེ་ཧྱེ་ཧི། རུ་ལུ་རུ་ལུ་ཧཱུཾ་བྷྱོ་ཛཿཛཿ ཞེས་པས་སྤྱན་དྲངས་ལ་དགུག་གཞུག་བཅིང་མཉེས་བྱ། གསུམ་པ་མཆོད་པ་ལ་གསུམ་ལས། དང་པོ་སྤྱིར་མཆོད་པ་ནི། ཧཱུཾ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པར་བཞེས་སུ་གསོལ། །ༀ་ཨཱཿཧཱུཾ། སུ་ར་ཏོ་མ་ཧཱ་རཱ་ག་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿསརྦ་མ་ཧཱ་སུ་ཁ་སིདྡྷི་ཧུ། ༀ་ཨཱཿཧཱུཾ། ཞེས་མཆོད། གཉིས་པ་བྱེ་བྲག་ཏུ་མཆོད་པ་ནི། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཞེས་པ ས་བཞི་བསྣོལ་དང་། ༀ་ཤྲཱི་བཛྲ་རཱ་ག་ལཱ་སྱ་ཧཱུཾ། དེ་བཞིན་དུ། མཱ་ལེ་ཏྲཱཾ། གཱི་ཏི་ཧྲཱིཿ ནིརྟི་ཨཱཿ ཞེས་དང་། སྤྲོ་ན་སུ་ར་ཏོ་བཅུ་དྲུག་གིས་ཀྱང་མཆོད་དོ། །གསུམ་པ་ཁྱད་པར་གྱི་མཆོད་པ་ལ་གསུམ་ལས། ཐོག་མར་ཚོགས་ཕུད་ཆ་གསུམ་མམ་བཞིར་སྤྲོས་ཏེ། དང་པོ་མཆོད་པ་ནི། ༀ། དགྱེས་པར་ཚིམ་པའི་ལོངས་སྤྱོད་དག །ཇི་ལྟར་ཡིད་བཞིན་ནོར་བུའམ། །དཔག་བསམ་ཤིང་ཆེན་འདོད་འཇོའི་བ། །མ་རྨོས་ལོ་ཏོག་རྒྱས་པ་ལྟར། །རྣལ་འབྱོར་ལོངས་སྤྱོད་ཆེན་པོ་དག །ནམ་མཁའི་ཁམས་སུ་གཏིབས་ནས་ཀྱང་། །རྡོ་རྗེ་དགྱེས་ཚོགས་ཀུན་འདུས་ནས། །སྐལ་ལྡན་རྣམས་ཀྱིས་རབ་སྤྲུལ་ཅིང་། །རྡོ་རྗེ་གར་གྱི་དབང་བསྒྱུར་ནས། །སྒེག་སོགས་ལྷ་མོའི་འཇོ་ཚུལ་དག །འདུད་ཅིང་བསྟོད་པའི་ཚུལ་གྱིས་ནི། །རོལ་མོའི་ཚོགས་ཀྱིས་དགྱེས་པར་མཛོད། །ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷཱུ་པ། པུཥྤ། དཱི་པཾ། གནྡྷ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱཾ་ཁ་ཁ་ཁཱ་ཧི་ཁཱ་ཧི། ཞེས་འདོད་ཡོན་དྲུག་གིས་མཆོད་པས་དགྱེས་ཤིང་ཚིམ་པར་བསམ་མོ། །བར་པ་བཤགས་པ་ནི། ཧཱུཾ། ཚེ་རབས་ཐོག་མ་མེད་པ་ཚུན་ཆད་ནས། །ད་ལྟའི་ལུས་འདི་བླངས་པ་ཡན་ཆོད་དུ། །ལུས་ཀྱིས་སྡིག་བྱས་སྤྱོད་པ་ངན་དུ་སྤྱད། །ངག་གིས་ཚིག་འཁྱལ་སྨྲ་བ་ངན་དུ་བརྗོད། །སེམས་ཀྱིས་བློ་ནོར་ལོག་པར་བསམ་པ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་པ། །བཀྲ་བའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང་། །དེ་ཡི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙམ་ན་བར་ཆད་རྩོམ། །ནོངས་ཤིང་འགལ་འཁྲུལ་ཅི་བགྱིས་མཐོལ་ཞིང་བཤགས། །ཞེས་དང་། ཡི་གེ་བརྒྱ་པ་བརྗོད་ཅིང་། འཁོན་གཅུགས་ཐམས་ཅད་དག་པར་བསམ་མོ། །ཐ་མ་ཕྲིན་ལས་བསྐུལ་བ་ལ། རྟེན་བཅའ་བ། འགུག་པ། ལས་ལ་སྦྱོར་བ། སྟོབ་པ་དང་བཞི་ལས། དང་པོ་ནི། ལིངྒ་ལོགས་སུ་བཅས་པ་མེད་ན། སྔར་གྱི་ཚོགས་ཕུད་ཐ་མ་དེའི་འདོད་ཡོན་གྱི་ལྷ་མོ་ཧཱུྃ་ཞེས་པས་རང་ལ་བསྡུས་ནས་མདུན་དུ་བཀོད། གཉིས་པ་ནི། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བཅོམ་ལྡན་འདས་བདེ་གཤེགས་ཞི་ཁྲོ་རབ་འབྱམས་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས། མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ནྲྀ་ཡཾ་ཛཿ ནྲྀ་བཛྲ་ཨཾ་ཀུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨཾ་ཀུ་ཤ་ཛཿ ཛཿཧཱུཾ་བཾ་ཧོཿ ཞེས་པས་དགུག་བཅིངས་བསྡམས་ནས་མྱོས་པར་བྱའོ། །གསུམ་པ་ནི། དམིགས་བྱ་མགོན་མེད་སྐྱབས་བྲལ་རྣམ་པར་འགྱུར་བའི་ཚུལ་དུ་གནས་པ་ལ། བདག་གི་ཐུགས་ཀ་ནས་ཡེ་ཤེས་ཀྱི་འོད་ཟེར་མཚོན་ཆ་སྣ་ཚོགས་པའི་སྤྲིན་དུ་འཕྲོས། དམིགས་བྱ་ལ་ཕོག་པས། དུག་ལྔ་ཡེ་ཤེས་ལྔར་སྦྱངས། དྭངས་མ་བདེ་ཆེན་བྱང་ཆུབ་སེམས་ཀྱི་ངོ་བོར་སད་པར་བསམ་ཞིང་། ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམས་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པ་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ལ་ཚོགས་ལ་དབུལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་སརྦ་དུཥྚཱན་མཱ་ར་ཡ་ཧཱུཾ་ཕཊ། ཅེས་མཚོན་ཆས་དུམ་བུར་གཏུབ་ཅིང་བསྒྲལ་ལོ། །བཞི་པ་ནི། དཀྱིིལ་འཁོར་པ་ཐམས་ཅད་སྐུ་འབར་བ་ཆེན་པོ་ཁྲོ་བོར་སྣང་བའི་ཞལ་གྱི་ཧོམ་ཁུང་མཁའ་ལྟར་ཡངས་པའི་ནང་དུ་ལོག་འདྲེན་ཐམས་ཅད་བདུད་རྩིའི་དྭངས་མར་དྲངས་ནས་གསོལ་བར་བསམ་ཞིང་། ཧཱུཾ། རྡོ་རྗེ་རོལ་པའི་ཚོགས་མཆོད་འདི། །མཆོད་སྤྲིན་ཀུན་ཏུ་རྒྱས་གྱུར་ཅིག །དུག་གསུམ་བརྩེགས་པའི་རི་བོ་འདི། །སྐུ་གསུང་ཐུགས་ཀྱི་ཀློང་དུ་སྟོབས། །དུག་ལྔ་རོལ་པའི་ཚོགས་མཆོད་འདི། །ཡེ་ཤེས་ལྔ་ཡི་ཀློང་དུ་ཐིམ། །གཟུང་འཛིན་རྟོག་པའི་མཚན་མ་འདི། །དབྱིངས་དང་ཡེ་ཤེས་ཀློང་དུ་ཐིམ། །འཁོར་བ་མཚན་མའི་ཆོས་ཅན་འདི། །ཆོས་ཉིད་དབྱིངས་ཀྱི་ངང་དུ་ཐིམ། །ཕུང་པོ་ཚོགས་ཀྱི་ཡན་ལག་འདི། །རྣམ་གྲོལ་ཕུང་པོ་ལྔ་རུ་ཐིམ། །འབྱུང་ཆེན་རྒྱུ་ལྔའི་མཚན་མ་འདི། །མཁའ་ཀློང་འབར་བ་ལྔ་རུ་ཐིམ། །རོལ་པ་ཆེན་པོའི་མཆོད་སྦྱིན་ལ། །རྒྱལ་བ་རྒྱ་མཚོའི་ཚོགས་རྣམས་རོལ། །བླ་མེད་ཏན་གན་མཆོད་པ་འདི། །སྔོན་ཆད་རྒྱལ་བ་བགྲོད་པའི་ལམ། །དུག་གསུམ་གཏིང་ནས་གསོད་པའི་ཐབས། །སྔོན་གྱི་ཐུགས་དམ་བཞིན་དུ་བཞེས། །མི་མོ་རྣམས་ཀྱི་རེག་བྱ་མཆོག །འཁྲིལ་འཁྱུད་སྦྱོར་བའི་གཟུངས་ཆེན་མ། །དབང་པོ་སྦྱོར་བའི་དགྱེས་མཆོད་དེ། །བདེ་བའི་མཆོད་པས་ཚིམ་གྱུར་ཅིག །ཅེས་དང་། རྩ་སྔགས་ཀྱི་མཐར་ཁཱ་ཧི་བཏགས་པས་སྟོབ་པ་བྱ་ཞིང་། ཕྲིན་ལས་ཀྱི་སྦྱོར་བ་མཐར་ཕྱིན་པར་བསམ་མོ། །བཞི་པ་ཚོགས་ལ་རོལ་བ་ནི། བརྡ་དང་བརྡའི་འབུལ་ལེན་སོགས་སྤྱི་དང་འདྲ་བར་བྱས་ནས། དཀྱིལ་འཁོར་པ་ཐམས་ཅད་ཀྱང་རང་གི་ཕུང་ཁམས་སྐྱེ་མཆེད་དུ་སྣང་བ་ལས་གཞན་དུ་མ་གྱུར་པར་ཤེས་པས། བདག་མཆོད་ཀུན་མཉེས་ཐམས་ཅད་ཚིམ། །ཀུན་ལ་ཕན་པའི་སྨན་ཡིན་ཏེ། །རྣལ་འབྱོར་བདག་ཉིད་ཆེན་པོ་ཡིས། །ཐམས་ཅད་བཟའ་ཞིང་བརྒྱན་པར་བྱ། །ཨ་ལ་ལ་ཧོཿ ཞེས་དང་། བཟའ་དང་བཅའ་དང་བཏུང་དང་བགོ། །འདོད་པའི་ཡོན་ཏན་ལྔ་ལྡན་པ། །ནམ་མཁའི་སྤྲིན་ལྟར་གཏིབས་དཔུངས་ནས། །དཀྱིལ་འཁོར་ཉིད་ལ་དཀྱིལ་འཁོར་ཐིམ། །ཞེས་པའི་མཐར། ཨ་ལ་ལ་ཧོཿ ཞེས་ནང་གི་སྦྱིན་སྲེག་གིས་ཚིམ་པར་རོལ་ལ། ཧཱུཾ། ལོངས་སྤྱོད་ཚོགས་ཀྱི་དངོས་པོ་ཅིར་སྣང་ཡང་། །ཚོགས་ཀྱི་མཆོད་པ་ཕུལ་བའི་བྱིན་རླབས་ཀྱིས། །མཐའ་ལ་ཞེན་པའི་གདུང་བ་ཀུན་བྲལ་ནས། །བདེ་བ་ཆེན་པོའི་ལོངས་སྤྱོད་རྫོགས་པར་ཤོག །ན་མོ་ཧཱུཾ། ཞེས་བརྗོད། བསྡུས་པར་ན། ཚོགས་བྱིན་གྱིས་བརླབས་པའི་རྗེས་ཉིད་དུ་ལོངས་སྤྱོད་པའི་ཆོ་ག་བྱ་སྟེ། རྩ་བའི་གཞུང་གི་དངོས་བསྟན་དང་ཡང་འབྱོར་རོ། །ལྔ་པ་ལྷག་མའི་ཆོ་ག་ལ། བཤམ་ཞིང་བྱིན་གྱིས་བརླབ་པ། མགྲོན་འགུགས་ཤིང་དབང་དུ་བྱ་བ། མཆོད་པའི་ལས་རིམ། བཤགས་ཤིང་བསྡུ་བའོ། །དང་པོ་ནི། ལྷག་མ་རྣམས་སྣོད་གཅིག་ཏུ་བསྡུས་པའི་དམེ་གཏོར་དང་། སྔར་ཟུར་དུ་བཅད་པའི་ཕུད་དང་། མཆོད་པའི་རས་མ། མར་མེ་དང་བཅས་པ་རྣམས། དཀྱིལ་འཁོར་ལས་ཧ་ཅང་མི་རིང་བའི་ཤར་ལྷོར་ཞིང་ལྤགས་ལ་རཀྟས་ཆོས་འབྱུང་ཟླ་གམ་དང་བཅས་པ་བྲིས་པའི་ཁར་བཞག །རྩ་བའི་དཀྱིལ་འཁོར་གསལ་བ་ལས། ཁྱད་པར་ལྷག་མའི་གནས་སུ། ཨེ་བྷྲཱུཾ། ཞེས་པས་ལྷག་མའི་དཀྱིལ་འཁོར་མཚན་ཉིད་རྫོགས་པ་གདན་དང་བཅས་པར་བསྐྱེད། ཧཱུཾ་ཧ་ཧེ་ཕཊ། ཅེས་པས་དེར་ངོ་མཚར་ཚོགས་ཀྱི་དཀྱིལ་འཁོར་པ་རྣམས་སྐད་ཅིག་གིས་གསལ་བར་བལྟས་ལ། གཏོར་མའི་གནས་སུ་ཟླ་བ་ལ་གནས་པའི་ཧྲཱིཿཡིག་དམར་པོ་འབར་བར་བསམ་ནས། གཡོན་པའི་མཐེབ་སྲིན་སྦྱར་བ་རེག་སྟེ། ༀ་བཛྲ་ཨ་མྲྀ་ཏ་ཨ་དྷིཥྛ་མཾ་ཧཱུཾ་ཧྲཱིཿཋཱ། ཅེས་བཟླས་པས་འདོད་ཡོན་བདུད་རྩིའི་ཕུང་པོ་བསམ་གྱིས་མི་ཁྱབ་པར་བསམ་མོ། །གཉིས་པ་ནི། ཐོད་པ་དམར་གྱིས་བཀང་བ་ཧེ་རུ་ཀའི་དམ་རྒྱས་བཟུང་བ་གཏོར་མར་འབེབས་བཞིན་པས། ༀ་ཤྲཱི་ཧེ་རུ་ཀ་མ་ཧཱ་བཛྲཿཨཱ་གཙྪ་ཨཱ་གཙྪ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ། བྷནྡྷ་ཡ། ཏོ་ཥ་ཡ། ཏོ་ཥ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲྀ་ད་ཡ་ཧཱུཾ་ཧཱུཾ་ཕཊ། ཅེས་བརྗོད་ཅིང་སྤྱུགས་གླུས་འབོད། སླར་ཡང་དམ་རྒྱ་དཔྲལ་བའི་ཐད་ཀར་གཡོན་དུ་ལན་གསུམ་བསྐོར་བས། ལྷག་མའི་མགྲོན་རྣམས་སྐད་ཅིག་གིས་འདུས་ནས་རང་གི་གནས་སུ་འཁོད་པར་བསམ་མོ། །དེ་ནས་འདོད་རྒྱལ་གྱིས་བསྙེམས་པས། དེའི་དམ་རྒྱ་སྙིང་གར་བཅིངས་ཏེ། ༀ་ཊཀྐི་ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ། བྷནྡྷ་ཡ། ཏོ་ཥ་ཡ། ཏོ་ཥ་ཡ། མོ་ཧ་ཡ། མོ་ཧ་ཡ། བཛྲ་ཌཱ་ཀི་ནཱི་ནཱཾ། ཧྲི་ད་ཡ་ཧཱུཾ་ཕཊ། ༀ་ཊཀྐི་ཧཱུཾ་ཛཿ ཞེས་པས་ཇི་ལྟར་འདོད་པའི་ལས་བྱེད་པར་བསམ་མོ། །དེ་ནས་རྟ་གདོང་གི་བསྙེམས་པས། རྟའི་རྒྱ་སྤྱི་བོར་བཅིངས་ལ། ཧྲཱིཿཔདྨ་བ་ཌ་བ་མུ་ཁ། ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ། བྷནྡྷ་ཡ། ཏོ་ཥ་ཡ། ཏོ་ཥ་ཡ། མོ་ཧ་ཡ། མོ་ཧ་ཡ། བཛྲ་ཌཱ་ཀི་ནཱི་ནཱཾ། ཧྲྀ་ད་ཡ་ཧཱུཾ་ཕཊ། ཧ་ཧ་ཧི་ཧི། ཞེས་བརྗོད་པས་དབང་དུ་འདུས་ཤིང་བཀའ་ནོད་པར་བསམ་མོ། །གསུམ་པ་མཆོད་པ་ལ། སྤྱིར་མཆོད་པ་དང་། བྱེ་བྲག་ཏུ་མཆོད་པ་གཉིས་ལས། དང་པོ་ནི། མགྲོན་རྣམས་རིགས་ལྔའི་ཚོམ་བུར་བཞུགས་པས་གཏོར་མ་བཞེས་པར་བསམ་ལ། ཧེ་རུ་ཀའི་ཐོད་རྒྱ་བཅས་ཏེ། ༀ་བཛྲ་ཌཱ་ཀི་ནཱི་པྲ་ཏཱིཙྪ་མཾ་བ་ལིཾ་ཏ་ཧཱུཾ་ཕཊ། དེ་བཞིན་དུ། བུདྡྷ་ཌཱ་ཀི་ནཱི་སོགས་ནས། ༀ་ཕཊ། རཏྣ་དང་ཏྲཱཾ་ཕཊ། པདྨ་དང་ཧྲཱིཿཕཊ། ཀརྨ་དང་ཨ་ཕཊ། ཅེས་མཆོད་ཅིང་དམར་གྱི་ཨརྒྷ་ཡང་སྒྲེང་ངོ་། །གཉིས་པ་ནི། གཏོར་མ་ཕུད་དང་བཅས་པ་དམེ་གཏོར་དུ་བླུག་ནས། ལྕེ་རྟ་མགྲིན་ཡབ་ཡུམ་རོལ་པ་མཛད་པའི་བྱང་སེམས་ཛ་གད་ཀྱི་ཁ་ཕྲུ་དང་རོ་གཅིག་པ་ཧེ་རུ་ཀའི་དམ་རྒྱས་དབབ་ཅིང་། ༀ་གུ་རུ་ཀྲོ་དྷ་རཏྣ་ས་མ་ཡ་པྲཱི་ཤ་པུརྦ་བུདྡྷ་ཀྵེ་ཏྲ་པཱ་ལ་ཀྵོ་བྷ་ཀ་ར་ཧཱུཾ་ཕཊ། ཅེས་པས་བྱིན་གྱིས་བརླབ། ཚུལ་འདི་རྣལ་འབྱོར་པའི་གོ་འཕང་དང་སྦྱར་ཞེས་འབྱུང་མོད། འདིར་ལྷའི་རྣལ་འབྱོར་ལ་གནས་པ་གཞིར་བཞག་གིས་གང་ལྟར་ཡང་མི་འགལ་བར་བཟུང་ཞིང་། མགྲོན་འགུགས་པ་ལ་སོགས་པའི་རིམ་པ་གཞན་དུ་བཤད་པ་དང་མི་མཐུན་ཡང་། འདིར་རྒྱུད་ཀྱི་དངོས་བསྟན་ཕྱོགས་གཅིག་པའོ། །དེ་ནས། ཧཱུཾ། བཅོམ་ལྡན་རྡོ་རྗེ་མི་བསྐྱོད་པས། །དཔལ་ཆེན་བཛྲ་ཧེ་རུ ར་སྤྲུལ། །དབུས་ཀྱི་ཡི་དྭགས་སྲིན་པོ་བཏུལ། །ལྷག་མ་བྱིན་ཏེ་དམ་ལ་བཏགས། །སྔོན་གྱི་དག་ལས་མ་འདའ་བར། །བཀའ་ཡི་གཏོར་མ་འདི་ལོངས་ལ། །བཅོལ་བའི་ཕྲིན་ལས་སྒྲུབ་པར་མཛོད། །བཅོམ་ལྡན་རྣམ་པར་སྣང་མཛད་ཀྱིས། །དཔལ་ཆེན་བུདྡྷ་ཧེ་རུར་སྤྲུལ། །ཤར་གྱི་དྲི་ཟ་སྲིན་པོ་བཏུལ། །ལྷག་མ་བྱིན་ཏེ་དམ་ལ་བཏགས། །སྔོན་གྱི་དམ་ལས་མ་འདའ་བར། །བཀའ་ཡི༴ བཅོལ་བའི༴ བཅོམ་ལྡན་རིན་ཆེན་འབྱུང་ལྡན་གྱིས། །དཔལ་ཆེན་རཏྣ་ཧེ་རུར་སྤྲུལ། །ལྷོ་ཕྱོགས་གཤིན་རྗེ་སྲིན་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ བཅོམ་ལྡན་སྣང་བ་མཐའ་ཡས་ཀྱིས། །དཔལ་ཆེན་པདྨ་ཧེ་རུར་སྤྲུལ། །ནུབ་ཕྱོགས་ཀླུ་ཡི་སྲིན་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ བཅོམ་ལྡན་དོན་ཡོད་གྲུབ་པ་ཡིས། །དཔལ་ཆེན་ཀརྨ་ཧེ་རུར་སྤྲུལ། །བྱང་ཕྱོགས་གནོད་སྦྱིན་སྲིན་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ རིགས་ཀྱི་ཡུམ་ཆེན་ལྔ་རྣམས་ཀྱིས། །ཁྲོ་མོ་ཆེན་མོ་ལྔ་རུ་སྤྲུལ། །སྲིན་མོ་ཆེན་མོ་ལྔ་རྣམས་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ སེམས་དཔའ་ཆེན་པོ་བརྒྱད་རྣམས་ཀྱིས། །མ་མོ་ཁྲོ་མོ་བརྒྱད་དུ་སྤྲུལ། །སྲིན་མོ་ཆེན་མོ་བརྒྱད་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ སེམས་མ་ཆེན་མོ་བརྒྱད་རྣམས་ཀྱིས། །ཕྲ་མེན་ཡུལ་མ་བརྒྱད་དུ་སྤྲུལ། །སྲིན་མོ་མགོ་བརྙན་བརྒྱད་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ ཡིད་ཆོས་ཐུབ་དྲུག་བརྒྱད་པོ་ཡིས། །སྤོར་མ་ཆེན་མོ་བརྒྱད་དུ་སྤྲུལ། །སྲིན་མོ་འབར་མ་བརྒྱད་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ ཚད་མེད་སྒོ་བ་རྣམ་བཞི་ཡིས། །སྒོ་སྐྱོང་གདོང་མོ་བཞི་རུ་སྤྲུལ། །སྲིན་པོའི་སྒོ་བསྲུང་བཞི་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ སེམས་དཔའ་སུམ་ཅུ་རྩ་གཉིས་ཀྱི། །ཌཱ་ཀི་སུམ་ཅུ་གཉིས་སུ་སྤྲུལ། །སྲིན་མོ་ཌཱ་ཀི་སོ་གཉིས་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ དཔལ་ཆེན་ཞལ་བཞད་སྤྲུལ་པ་ལས། །སྐྱེས་བུ་གིང་ཆེན་བཅོ་བརྒྱད་སྤྲུལ། །སྲིན་པོ་སྒྲོལ་གིང་བཅོ་བརྒྱད་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ འོད་ཟེར་སུམ་བརྒྱ་དྲུག་ཅུ་ལས། །ཕོ་ཉ་སུམ་བརྒྱ་དྲུག་ཅུ་སྤྲུལ། །སྲིན་པོའི་ཕོ་ཉ་སུམ་བརྒྱ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ དཔལ་ཆེན་ཐུགས་ལས་ཧཱུཾ་བདུན་འཕྲོས། །མ་མོ་ཆེན་མོ་བདུན་དུ་སྤྲུལ། །སྲིན་མོ་ཆེན་མོ་བདུན་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི༴ དཔལ་ཆེན་གསང་བའི་གཟུངས་བཞི་ལས། །སྲིན་མོ་ཆེན་མོ་བཞི་རུ་སྤྲུལ། །སྲིན་མོ་མགྱོགས་བྱེད་བཞི་པོ་བཏུལ། །ལྷག་མ༴ སྔོན་གྱི༴ བཀའ་ཡི༴ བཅོལ་བའི་ཕྲིན་ལས་སྒྲུབ་པར་མཛོད། །བྷྱོཿ ཚངས་མ་ལ་སོགས་ཉི་ཤུ་བརྒྱད། །ལོ་ཀ་རྣམས་ཀྱི་སྲིན་མོ་སྟེ། །ལག་ན་གློ་སྙིང་ནང་ཁྲོལ་ཐོགས། །ལྷག་མ་བྱིན་ཏེད་མ་ལ་བཏགས། །སྔོན་གྱི་དམ་ལས་མ་འདའ་བར། །བཀའ་ཡི་གཏོར་མ་འདི་ལོངས་ལ། །བཅོལ་བའི་ཕྲིན་ལས་སྒྲུབ་པར་མཛོད། །ཅེས་དང་སྨན་རཀ་གིས་ཀྱང་མཆོད་དོ། །བཞི་པ་ནི། ཧོཿ ལྷག་མའི་ལྷ་ཚོགས་ཐམས་ཅད་དགོངས་སུ་གསོལ། །ཕུད་དང་ལྷག་མར་བཅས་པ་བཞེས་སུ་གསོལ། །དམ་ཚིག་ཉམས་པ་ཐམས་ཅད་སྐོང་པར་མཛོད། །དངོས་གྲུབ་རིམ་པ་མ་ལུས་སྩལ་དུ་གསོལ། །ཕྲིན་ལས་རྒྱ་མཚོ་ཐམས་ཅད་སྒྲུབ་པར་མཛོད། །ཅེས་འདོད་དོན་གསོལ་ལ། ཧཱུཾ། ལོ་ཟུར་ཟླ་སྐེག་གནོད་པ་ཅིར་སྣང་ཡང་། །མཁའ་འགྲོ་དབང་ཕྱུག་ལྷག་ཕུད་མཆོད་པའི་མཐུས། །མོ་ངན་རྨི་ངན་གནོད་པ་ཀུན་བསལ་ནས། །བར་ཆད་རྐྱེན་གྱི་སྡུག་བསྔལ་མེད་པར་ཤོག །ན་མོ་ཧཱུཾ། ཞེས་སྨོན་ལམ་བཏབ་ནས། ཡ་ཧི་གཙྪས་ཕྱི་འཁོར་གྱི་མགྲོན་རྣམས་རང་གནས་སུ་གཤེགས་ལ་གཏོར་མ་ཕྱིར་དོར། ཧཱུཾ། ཞེས་པས་ལྷག་མའི་དཀྱིལ་འཁོར་གྱི་ལྷ་ཚོགས་རང་གི་སྙིང་གར་བསྡུའོ། །གཉིས་པ་བརྟན་མ་བསྐྱང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ་རཏྣ་ཏྲཻ་ལོཀྱ་ཕཊ། ཅེས་བརྗོད་པས་གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབ། ཧཱུཾ། ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་སྤྱོན་དམ་སྐོངས་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་སྤྱོན་དམ་སྐོངས་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་མོ་རྗེས་དགོངས་ལས། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་སྒྲུབ་པར་མཛོད། །ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུཾ་བྷྱོ་ཧཱུཾ་ཧཱུཾ། ཞེས་དང་། མ་ཧཱ་པཉྩ་སོགས་ཀྱིས་སྨན་གཏོར་རཀྟས་མཆོད་ཅིང་སྨན་རཀ་སྦྲེང་། ཕྲིན་ལས་གསོལ་ལ། ཧཱུཾ། འཇིག་རྟེན་སྲིང་མོ་འགྲོ་དྲུག་ཅིར་སྣང་ཡང་། །གཏོར་མ་དབྲི་བཀོལ་མེད་པར་བསྔོས་པའི་མཐུས། །འཇིག་རྟེན་སྲིང་མོ་འགྲོ་དྲུག་ཀུན་ཚིམ་ནས། །ཞིང་བཅུ་སྒྲོལ་བའི་འགྲོ་དོན་རྫོགས་པར་ཤོག །ན་མོ་ཧཱུཾ། ཞེས་བརྗོད་ནས། ཡ་ཧི་གཙྪས་གཤེགས་སུ་གསོལ་ལ་གཏོར་མ་གཙང་སར་སྐྱེལ་ལོ། །གསུམ་པ་ཉེར་བསྡུ་ནི། སྐབས་འདིར་མཆོད་བསྟོད་ནོངས་བཤགས་ཡོད་མེད་ཇི་ལྟར་ཡང་རུང་བ་ལས། ཐུན་མཚམས་ལ་འཇུག་པའམ་ཉལ་བ་ན། གཞིའི་དཀྱིལ་འཁོར་གསལ་བཏབ་ལ། རྟག་པའི་མཐའ་བསལ་ཕྱིར། ཧཱུཾ། ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་ལ་ཐིམ། དེ་འཁོར་རྣམས་ལ་ཐིམ། འཁོར་རྣམས་རིམ་བཞིན་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་འཛིན་སེམས་དཔའ་ལ། དེ་ཧཱུཾ་ལ། ཧཱུཾ་གྱེན་རྫོགས་ནཱ་དའི་བར་དུ་བསྡུས་ནས་དབྱིངས་དང་ཡེ་ཤེས་གཉིས་སུ་མེད་པ་བྱང་ཆུབ་སེམས་ཀྱི་ཐིག་ལེའི་དབྱིངས་སུ་མཉམ་པར་བཞག་ལ། ཧཱུཾ། གཟུང་འཛིན་རྣམ་གཉིས་དངོས་པོར་ཅིར་སྣང་ཡང་། །ལྷ་དང་གཞལ་ཡས་བསྡུས་པའི་བྱིན་རླབས་ཀྱིས། །རྟག་ཆད་གཉིས་སུ་སྣང་བའི་མཐའ་བསལ་ནས། །སྣང་སྲིད་ཆོས་ཀྱི་སྐུ་རུ་རྫོགས་པར་ཤོག །ན་མོ་ཧཱུཾ། ཞེས་བརྗོད། ཆད་མཐའ་བསལ་ཕྱིར། ཉལ་བ་ལས་ལངས་པའམ་། སྤྱོད་ལམ་ལ་འཇུག་པ་ན། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ། ཅེས་བརྗོད་པས། ཧེ་རུ་ཀ་ཕྱག་གཉིས་པའི་སྐུར་ལངས་ལ། ཧཱུཾ། རྣམ་རྟོག་ལུས་ཀྱི་དངོས་པོ་ཅིར་སྣང་ཡང་། །སྤྱོད་ཡུལ་རྒྱུན་གྱི་ཏིང་འཛིན་བྱིན་རླབས་ཀྱིས། །བདག་ཉིད་ཡི་དམ་ལྷ་རུ་གྱུར་ནས་ཀྱང་། །འགྲོ་དོན་མ་ལུས་རྫོགས་པར་བྱེད་པར་ཤོག །ན་མོ་ཧཱུཾ། ཞེས་བརྗོད། བཞི་པ་གོ་བགོ་ལུས་བསྲུང་ནི། རང་གི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུཾ་ཡིག་རྣམས་ཀྱིས་མཚན་པར་བསམ་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་པས་ལུས་རྡོ་རྗེའི་གོ་ཁྲབ་ཀྱིས་བཅིངས་ཏེ་ཅིས་ཀྱང་མི་ཤིགས་པར་བསམ་ལ། བཛྲ་ཀ་པཱ་ལ་མཱ་ལ་ཨ་བྷི་ཥིཉྩ་ཏྲཾ་ཏྲཾ། ཞེས་དབུ་རྒྱན་དང་། ༀ་ཨཱརྻ་ལཾ་བྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿ ཞེས་ཅོད་པན་བཅིང་། ༀ་གུ་ཧྱ་ས་མ་ཡ་སྟྭཾ། ཞེས་པས་བརྟན་པར་བྱ་ཞིང་། ཡི་གེ་བརྒྱ་པའང་བརྗོད་ལ་ཤིན་ཏུ་བརྟན་པར་བྱས་ནས། དགེ་བ་བསྔོ་ཞིང་ཤིས་པ་བརྗོད་པ་རྣམས་ཀྱིས་མཐའ་རྒྱས་པར་བྱའོ། །ལྔ་པ་སྤྱོད་ལམ་རྒྱུན་གྱི་རྣལ་འབྱོར་ནི། སྣོད་ཐམས་ཅད་གཞལ་ཡས་ཁང་། བཅུད་ཐམས་ཅད་ཧེ་རུ་ཀའི་རང་བཞིན་དུ་ཤེས་པ་དང་མི་འབྲལ་བ་ལ་བསླབ་ཅིང་། དེ་ཡང་གནས་སྐབས་བློས་བྱས་ཀྱིས་བསྒོམས་པ་ཙམ་ལ་རག་མ་ལུས་པར། ཡེ་ནས་གསལ་འགྲིབ་མེད་པར་མ་འདྲེས་ཡོངས་རྫོགས་སུ་བཞུགས་པའི་ངེས་ཤེས་བསྐྱེད་པར་བྱ་སྟེ། ཆོས་ཀུན་མ་འདྲེས་ཡོངས་རྫོགས་པར། །ཇི་བཞིན་ངང་དུ་ཡེ་གནས་པ། །ཤེས་པར་བྱ་བའི་རྒྱུད་དོན་ཡིན། །ཞེས་དང་། སྣང་སྲིད་རྣམ་དག་ལྷ་དང་ལྷ་མོའི་དབྱིངས། །ཞེས་གསུངས་པ་བཞིན་ནོ། །སྒོམ་པས་དུབ་ན། གཉུག་མའི་ཧེ་རུ་ཀའི་རང་བཞིན་ཡོངས་སུ་ཤེས་པའི་གསལ་སྣང་དང་ལྡན་པའི་སྤྱི་བོར་ཐིག་ལེ་དམར་པོ་སྲན་འབྲུ་ཙམ་ཞིག་སྒོམ། དེ་ལས་ཁྲུ་གང་ཙམ་གྱི་སྟེང་དུ་ཐིག་ལེ་དཀར་པོ་སྲན་མ་ཙམ་ཞིག་སྒོམ། དེ་ནས་སྣ་བུག་གཡོན་ནས་འོད་ཀྱི་ཐིག་ལེ་དམར་པོ་སྔར་གྱི་ཚད་ཙམ་པ་ཞིག་འཕྲོས་པ་སྤྱི་བོའི་ཐིག་ལེ་ལ་ཕོག་པའི་རྐྱེན་གྱིས། དེ་ལས་འོད་ཟེར་མཁའ་ཁྱབ་ཏུ་འཕྲོས། སངས་རྒྱས་ཀྱི་མཛད་པ་བསྒྲུབས། ཚུར་འདུས་ཐིག་ལེ་དམར་པོ་ལ་ཐིམ། ཡང་སྣང་བུག་གཡས་ནས་ཐིག་ལེ་དཀར་པོ་སྔར་བཞིན་འཕྲོས། དོན་གཉིས་བྱས་ནས་འདུས་པ་སྔར་གྱི་ཐིག་ལེ་དཀར་པོ་ལ་ཐིམ། ཐིག་ལེ་དཀར་པོ་ཡང་དམར་པོ་ལ་ཞུགས་པ་སྤྱི་བོ་ནས་སྙིང་གི་དབུས་སུ་ཐིམ་པར་བསམ་ལ། བདེ་སྟོང་གཉིས་སུ་མེད་པ་སྤྲོས་བྲལ་དེ་ཁོ་ན་ཉིད་ཀྱི་ངང་ལ་མཉམ་པར་བཞག་གོ། །ཟས་ཀྱི་རྣལ་འབྱོར་ནི། དཔལ་ཆེན་ཞལ་གྱི་ཧོམ་ཁུང་དུ། །ཉོན་མོངས་ལྔ་ཡི་ཡམ་ཤིང་ལ། །ཡེ་ཤེས་ལྔ་ཡི་མེ་སྦར་ཏེ། །གཟུང་འཛིན་རྫས་རྣམས་བསྲེགས་སྦྱངས་ཐིམ། །ཞེས་པས་བཟའ་བཏུང་ལ་ཐ་མལ་གྱི་གཙང་ཞེན་སྤངས་ནས་བདུད་རྩིར་སྦར་བ་ལྷ་ལ་ལྷ་རོལ་པའི་ཚུལ་གྱིས་རོལ་བ་ནང་གི་སྦྱིན་སྲེག་དང་ལྡན་པར་བྱའོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་བསྒྲུབས་པ་དང་། དེས་གྲུབ་པའི་ཚད་བསྟན་པའོ། །དང་པོ་ནི། འདྲེན་པ་ཆེན་པོའི་སྡེ་སྣོད་དང་། །གྲུབ་པ་ཐབས་ཀྱི་འཇུག་སྒོ་དང་། །དམ་པ་ཆེན་པོའི་མཛོད་གསུམ་མོ། །ཞེས་པས་དབང་པོའི་ཁྱད་པར་གྱིས་འདི་ཉིད་དུ་རིམ་པར་འཇུག་པའམ་བཙན་ཐབས་སུ་འཇུག་ཀྱང་རུང་སྟེ། ཁྱད་པར་གྱི་ལམ་ནི། ངོ་བོ་ཐབས་དང་ཤེས་རབ་སྟེ། །ཞེས་པས་ཐབས་ཀྱིས་ངེས་པའི་ལམ་སྟེང་འོག་གི་སྒོ་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྐྱེད་པ་དང་། ཤེས་རབ་ངེས་པའི་ལམ་ལ་བརྟེན་ནས་ཤེས་བྱའི་ཆོས་ཐམས་ཅད་དཀྱིལ་འཁོར་རྣམ་པ་གསུམ་དབྱེར་མེད་པའི་རང་བཞིན་མ་འདྲེས་ཡོངས་རྫོགས་སུ་རྟོགས་པའི་ལྟ་བ་དང་། དེ་ལྟར་ངེས་པས་དོན་གྱི་རྗེས་སུ་འཇུག་པ་མཚན་མེད་རྣམ་པར་མི་རྟོག་པའི་ཏིང་ངེ་འཛིན་དང་། ཡི་གེའི་རྗེས་སུ་འཇུག་པ་མཚན་བཅས་ལྷའི་རྣལ་འབྱོར་ཅིར་སྣང་དག་པ་རབ་འབྱམས་སུ་རྒྱས་འདེབས་པ་ལས་མི་འབྲལ་བར་བསླབ་པའོ། །གཉིས་པ་ནི། དེ་ལྟར་ངེས་རྫོགས་སུ་བསླབ་པས། འགྱུར་བ་མ་ངེས་པ་དང་། བརྟེན་པ་གཞིའི་ས་གཉིས་ཀྱིས་བསྡུས་པའི་ཚོགས་ལམ་འདུན་པ་སེམས་པ་ལས་དང་པོ་པའི་རྣལ་འབྱོར་ལས་སུ་རུང་བས་ཐུན་མོང་གི་དངོས་གྲུབ། དེ་ཚེ་རོ་ཡི་ལྕེ་བཅད་ནས། །ཞེས་སོགས་རོ་ལངས་བསྒྲུབ་པ་ལ་བརྟེན་ནས། གསེར་འགྱུར། རལ་གྲི། གོ་ཆ། པྲ་སེ་ན། རྐང་མགྱོགས་རྣམས་གྲུབ་པ་དང་། གཞན་ཡང་རྩ་རྒྱུད་འདིར། རྡོ་རྗེ་ཚེ་དང་། དབང་པོ་དྲུག་གི་མངོན་ཤེས་དང་། སྒྱུ་མ་རྡོ་རྗེ་ལ་སོགས་པའི་གྲུབ་པ་དང་། ལས་ཆེན་བཞི་སོགས་ཇི་སྐད་གསུངས་པ་ལྟར་གྲུབ་པས་དོན་བྱེད་ཅིང་། དེ་ནས་གལ་ཆེན་སྦྱོར་བ། བསླབ་པ་རྒྱུན། བསོད་ནམས་བརྟེན་གྱིས་གསུམ་པོས་བསྡུས་པ་རིགས་ཆེན་འབྱེད་པའི་རྣལ་འབྱོར་ཟག་བཅས་ཀྱི་ལམ་གྱི་རྩེ་མོ་སྦྱོར་ལམ་བརྙེས་ནས། ཇི་སྐད་དུ། ལོའམ་ཟླ་བའི་གྲངས་བཞིན་དུ། །ཐབས་དང་ཆོ་གར་ལྡན་སྤྱོད་པས། །ཟག་མེད་སྣང་བའི་ལམ་ལ་གནས། །སྐྱེ་འཇིག་མེད་པའི་སྐུར་གྱུར་ཏེ། །བསྐལ་པ་གྲངས་མེད་ཚེ་ལ་དབང་། །བདེན་པའི་ངོས་མཐོང་འཇིགས་པ་མེད། །ཞེས་གསུངས་པ་ལྟར་སྒྲུབ་པའི་ཉེ་རྒྱུ་ལ་བརྟེན་ནས། མཆོག་གི་དངོས་གྲུབ་བརྟེན་པས་ཁྱད་པར་དུ་འགྲོ་བའི་སས་བསྡུས་པ་མཐོང་ལམ་དབུགས་ཆེན་འབྱིན་པའི་རྣལ་འབྱོར་ཐོབ་སྟེ། ཆོས་ཉིད་རང་མཚན་མངོན་སུམ་དུ་མཐོང་བས་ཟག་མེད་ཀྱི་ལམ་གྱི་ཐོག་མར་གྱུར་ལ། དེ་ནས་མཐོང་ཟིན་གོམས་པར་བྱེད་པའི་ལམ་དམིགས་པ་འབྲས་བུ་སྐྱེ་བའི་སས་བསྡུས་པ་སྒོམ་ལམ་ལུང་ཆེན་ཐོབ་པའི་རྣལ་འབྱོར། གནས་པ་མི་འགྱུར་བ། བརྡའ་བ་ཆོས་ཉིད། རྫོགས་པ་ཅིར་ཆིབ་ཀྱི་ས་རྣམ་པ་གསུམ་པོས་བསྡུས་པ་མཐར་ལམ་རྩལ་ཆེན་རྫོགས་པའི་རྣལ་འབྱོར་རྣམས་རིམ་དང་ཐོད་རྒལ་གང་རུང་གིས་བགྲོད་ནས། རང་གནས་ཀྱི་དོན་ཉིད་སྒྲིབ་བྱེད་ཀྱི་ཞེན་པ་མཐའ་དག་དང་བྲལ་བར་མངོན་དུ་གྱུར་པ་ཡི་གེ་འཁོར་ལོ་ཚོགས་ཆེན་གྱི་སས་བསྡུས་པ་མཐར་ཐུག་གི་འབྲས་བུ་སྐུ་བཞིའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ལ་གནས་པར་འགྱུར་རོ། །དེ་ལྟར་ཡང་། ཨ་ནུ་ཡོ་གའི་ཐེག་པ་ནི། །བར་མ་ཆོད་པར་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་དང་། འབྲས་བུ་ཉིད་ནི་རྫོགས་སངས་རྒྱས། །སྐུ་གསུང་ཐུགས་དང་ཡོན་ཏན་ལས། །ཉི་ཤུ་རྩ་ལྔས་བསྡུས་མཐའ་ཡས། །ལྷུན་རྫོགས་རྣམ་ཀུན་མཁྱེན་པའོ། །ཞེས་གསུངས་པ་བཞིན་ནོ། །གསང་ཆེན་རྗེས་སུ་རྣལ་འབྱོར་ཆེན་པོའི་རྒྱུད། །གྲུབ་མཆོག་རིག་འཛིན་ཚོགས་ཀྱིས་གཤེགས་པའི་ཤུལ། །སྐལ་བཟང་ཡོངས་ཀྱི་འཇུག་ངོགས་བླ་མེད་ཕྱིར། །བློ་རྨོངས་བདག་ཀྱང་གནས་འདིར་རྩོལ་བར་གྱུར། །རྨད་བྱུང་ལམ་བཟང་སྙིང་པོའི་མཐར་ཐུག་འདི། །དུས་མཐའི་སྔགས་པས་མིང་ཙམ་ཐོས་དཀོན་ན། །བློ་དམན་དོན་གཉེར་གནས་ཀྱང་ཅི་ཞིག་རྙེད། །དེ་ཕྱིར་འདི་འདྲའི་ལམ་རྙེད་རྒྱལ་བའི་མཐུ། །སྣ་ཚོགས་གཞུང་མང་བསྡུས་པའི་གླེགས་བམ་གྱིས། །ལམ་གྱི་རང་རྐང་ཚུགས་པ་ག་ལ་ཞིག །རང་གཞུང་མ་འདྲེས་སྙིང་པོར་འདྲིལ་བའི་ངག །རྣམ་དག་གཞུང་འགྲེལ་དཔང་དུ་གྱུར་ན་ཀོ །འདི་ཙམ་ལམ་གྱི་ཕྱོགས་མཚོན་ངེས་པས་ཀྱང་། །ཟབ་རྒྱས་མདོ་ཡིས་རྒྱ་མཚོ་ཆེར་འཇུག་པའི། །བློ་མཐུ་ཐོབ་པར་འགྱུར་སྙམ་གཞུང་འགྲེལ་གྱིས། །དགོངས་པ་ཉུང་ངུའི་ཚིག་གིས་གསལ་བར་བྱས། །གང་ཞིག་མཆོག་དང་ཐུན་མོང་དངོས་གྲུབ་ཀུན། །འདོད་རྒུའི་ཆར་དུ་འབེབས་པའི་ངོ་མཚར་སྤྲིན། །རྨད་བྱུང་སྒྲུབ་པའི་ཐབས་འདིས་མཚོན་པའི་ཕྱིར། །དངོས་གྲུབ་ཆར་འབེབས་ཉིད་དུ་ལེགས་པར་གྲུབ། །རྨོངས་དང་ལེ་ལོ་རྣམ་གཡེང་ཉེས་པ་ཡིས། །ནོངས་པར་གྱུར་གང་རྡོ་རྗེ་ཅན་ལ་བཤགས། །རྟག་ཏུ་བརྩེ་བའི་ཐུགས་ཀྱིས་རྗེས་སྐྱོངས་ལ། །ལམ་འདི་འཕེལ་ཞིང་རྒྱས་པར་བྱིན་རླབས་མཛོད། །འདིས་ཐོབ་བསོད་ནམས་ཐབས་ཤེས་ཉི་ཟླའི་འགྲོས། །ཟུང་འཇུག་མཁའ་ལ་རྟག་ཏུ་བསྒྱུར་བ་ཡིས། །ཁམས་གསུམ་སྙིང་གི་མུན་པ་ཀུན་བསལ་ནས། །ཧེ་རུ་ཀ་དཔལ་སྣང་བར་རྟག་འཆར་ཤོག །ལུང་ཨ་ནུ་ཡོ་ག་ཚོགས་ཆེན་འདུས་པའི་དཀྱིལ་འཁོར་གྱི་སྒྲུབ་ཐབས་དངོས་གྲུབ་ཆར་འབེབས་ཞེས་བྱ་བ་འདི་ནི་རང་གཞན་མང་པོ་ལ་ཕན་པའི་སྒོ་ཆེན་པོར་འགྱུར་བར་མཐོང་ནས། འདི་ཉིད་ཀྱི་རྩ་བའི་གཞུང་འགྲེལ་རྣམས་དང་། བླ་མའི་མན་ངག་གི་གནད་གསང་ཐེག་པ་རང་གཞུང་གི་ངེས་པའི་མཚན་ཉིད་ཅན་དུ་ཇི་ལྟར་གནས་པ་བཞིན་དུ། གསང་བདག་དཔའ་བོ་ཕྲིན་ལས་ལྷུན་གྲུབ་ཀྱི་བཀའ་དྲིན་གྱིས་འཚོ་བའི་རིག་པ་འཛིན་པ་འགྱུར་མེད་རྡོ་རྗེས་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་དུ་ཨངྐི་རའི་ལོ་ཆུ་སྟོད་ཅན་ཀྱི་དུས་དགེ་བ་ལ་གྲུབ་པར་སྦྱར་བའི་ཡི་གེ་པ་ནི་གསང་ཆེན་རྒྱུད་སྡེའི་དོན་ལ་བློ་གྲོས་ཀྱི་མཐུ་མཆོག་ཏུ་གྲུབ་པའི་གནས་བརྟན་ལོ་ཙཱ་བ་དྷརྨ་ཤྲིས་བགྱིས་པའོ། །འདིས་ཀྱང་ཆོས་ཚུལ་མཆོག་འདི་དར་ཞིང་རྒྱས་ལ་རབ་ཏུ་འཕེལ་བའི་རྒྱུར་གྱུར་ཅིག། །།

འདུས་པ་མདོའི་ཆོ་གའི་ལྷན་ཐབས་བསྟན་པ་རྒྱ་མཚོའི་གྲུ་གཟིངས། རང་བྱུང་རྡོ་རྗེ།

འདུས་པ་མདོའི་ཆོ་གའི་ལྷན་ཐབས་བསྟན་པ་རྒྱ་མཚོའི་གྲུ་གཟིངས་ཞེས་བྱ་བ་བཞུགས་སོ། །ན་མོ་གུ་རུ་ནིརྨ་མཱ་རི་ཙྱཻཿ ཁམས་དྲུག་ལྡན་པ་རྡོ་རྗེ་ལུས་ཀྱི་གྲོང་། །ཡོངས་གྲུབ་གདན་གསུམ་ཚང་བའི་འཁོར་ལོ་ཅན། །དག་མཉམ་ཡེ་ཤེས་དབྱིངས་ལ་རོལ་པའི་ལྷ། །རྗེས་སུ་རྣལ་འབྱོར་ལུང་གི་དབྱིངས་ལ་འདུད། །རྡོ་རྗེ་ཐེག་པ་སྔ་འགྱུར་ལ་མདོ་སྒྱུ་སེམས་གསུམ་གྱི་གྲུབ་པའི་མཐའ་གསུམ་ལས། རྩ་རྒྱུད་རྡོ་རྗེ་བཀོད་པ་ཀུན་འདུས་རིག་པའི་མདོ་ལུང་འོག་མིན་ཚོགས་ཆེན་འདུས་པའི་དཀྱིལ་འཁོར་དུ་ཞུགས་ཤིང་དངོས་གྲུབ་བརྙེས་པར་འདོད་པའི་རྟེན་ནི་རིམ་པ་དགུའི་དཀྱིལ་འཁོར་དུ་སྨིན་ཅིང་དམ་ཚིག་ལ་གནས་པ། དེ་ཉིད་བཅུའི་གནས་ལ་བྱང་ཆུབ་པ་དག་གིས་རྡུལ་ཚོན་གྱི་ཆོ་ག་དང་སྦྲེལ་བའི་རིམ་པ་ནི་དཀྱིལ་ཆོག་ལས་ཤེས་ལ། འཇུག་པ་བདེ་ཕྱིར་རས་བྲིས་ལ་བརྟེན་ནའང་། ས་གཟུང་བ་དང་བསྲུང་བ་བགྱི་བ་ཉིད་ལེགས་སོ། །དཀྱིལ་འཁོར་རྒྱན་དགོད་དབང་རྫས་མཆོད་གཏོར་སོགས་མཐོང་བརྒྱུད་བཞིན་ལས། འདིར་ཆོ་གའི་བྱ་བ་ལ་སྔོན་འགྲོ། དངོས་གཞི། རྗེས་གསུམ་ལས། དང་པོ་ནི། རྡོ་རྗེ་ལས་རིམ་ལས། ཕྱོགས་བཅུ་སྲས་དང་བཅས་པ་དང་། །དབང་ཕྱུག་སངས་རྒྱས་ད་ལྟ་བདག །མ་འོངས་རང་བཞིན་སེམས་ཅན་ལ། །དགོས་པ་གསུམ་ཕྱིར་ལུས་དབུལ་བྱ། །ཞེས་བསོད་ནམས་ཀྱི་ཁྱད་པར་དུས་གསུམ་གྱི་སངས་རྒྱས་ལ་ལུས་དབུལ་བ་སོགས་ཀྱི་ལྷག་པའི་བདུན་རྣམ་དག་གི་དོན་དྲན་པས། རྡོ་རྗེ་སློབ་དཔོན་སངས་རྒྱས་དཔལ། །སོགས་ནས། བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ། གཉིས་པ་སྔགས་ཀྱི་ཐེག་པ་བྱེ་བྲག་པ་འདིས་སེམས་ཅན་ཀྱི་ཁམས་ཚད་མེད་པ་བསྒྲལ་བའི་བྱང་ཆུབ་ཀྱི་སེམས་ལྷག་པའི་བརྟུལ་ཞུགས་བསྐྱེད་པ་ནི། ཧཱུྃ། གདོད་ནས་མ་སྐྱེས་རྣམ་དག་ཆོས་ཀྱི་སྐུ། །སོགས། དཀྱིལ་འཁོར་དགུ་པའི་ཁྱམས་ལ་མ་མོ་དྲུག་ཅུ་སྟེ། མ་མོ་ཤྭ་ར་ཧཱུྃ་ཞེས་དྲུག་ཅུ་བརྗོད་པས། སྐུའི་འོད་ཟེར་སྨུག་ནག་ལས། ལས་བྱེད་ཀྱི་ཕོ་ཉ་མོ་དྲུག་ཅུ་ཁྱམས་ཀྱི་ཕྱོགས་རེར་བཅོ་ལྔ་བཅོ་ལྔ་བཞུགས་པར་བསམ་ལ། གསུམ་པ་ནི། འདུན་པ་སེམས་པ་ལ་སོགས་ལམ་ལྔས་བསྡུས་པའི་མགྲོན་ཐབས་རིམ་པ་གསུམ་ལས། དང་པོ་མདོའི་ཡན་ལག་གི་དཀྱིལ་འཁོར་རྣམས་བསོད་ནམས་ཀྱི་ཞིང་དུ་གསལ་གདབ་པ་ནི། རྒྱུའི་རྟ་བབས་ཀྱི་ཕྱོགས་བཞིའི་སྣམ་བུ་བརྒྱད་པ་རྣམས་ལ་མ་ཧཱ་ཡོ་གའི་ལྷ་ཚོགས་བཞུགས་པ་ནི། ཤར་ཕྱོགས་སུ་སངས་རྒྱས་མཉམ་སྦྱོར་དང་ཧེ་རུ་ཀ་གལ་པོ། ལྷོ་ཕྱོགས་སུ་ཟླ་གསང་ཐིག་ལེ་དང་དཔལ་མཆོག་དང་པོ། ནུབ་ཕྱོགས་སུ་གསང་བ་འདུས་པ་དང་རྟ་མཆོག་རོལ་པ། བྱང་ཕྱོགས་སུ་རྒྱུད་སྡེ་སྒྱུ་འཕྲུལ་དང་། སྒྲུབ་སྡེ་བཀའ་བརྒྱད་ལ་སོགས་པའི་དཀྱིལ་འཁོར་གྱི་ལྷ་ཚོགས་རྣམས་དམ་ཚིག་དང་ཐུགས་རྗེས་འཁོད་པའོ། །སྣམ་བུ་བདུན་པ་བཞི་ལ་རྣལ་འབྱོར་རྒྱུད་ཀྱི་ལྷ་ཚོགས་བཞུགས་པ་ནི། ཤར་ཕྱོགས་སུ་རྣམ་སྣང་ཀུན་ཏུ་ཞལ། རིགས་ཀྱི་ཡུམ་བཞིའི་ངོ་བོ། རྡོ་རྗེ་མི་བསྐྱོད་པ། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་ཆགས་པ། རྡོ་རྗེ་ལེགས་པའོ། །ལྷོ་ཕྱོགས་སུ་རིན་ཆེན་འབྱུང་ལྡན། རྡོ་རྗེ་རིན་ཆེན་དང་། རྡོ་རྗེ་གཟི་བརྗིད། རྡོ་རྗེ་ཕྱག་མཚན། རྡོ་རྗེ་བཞད་པའོ། །ནུབ་ཕྱོགས་སུ་སྣང་བ་མཐའ་ཡས། རྡོ་རྗེ་ཆོས། རྡོ་རྗེ་རྣོན་པོ། རྡོ་རྗེ་རྒྱུ། རྡོ་རྗེ་སྨྲ་བའོ། །བྱང་ཕྱོགས་སུ་དོན་ཡོད་གྲུབ་པ། རྡོ་རྗེ་ལས། རྡོ་རྗེ་སྲུང་བ། རྡོ་རྗེ་གནོད་སྦྱིན། རྡོ་རྗེ་ཁུ་ཚུར་རོ། །མཚམས་ལ་མཆོད་པའི་ལྷ་མོ་བརྒྱད། བྱང་ཆུབ་སེམས་དཔའ་བྱམས་པ། མཐོང་བ་དོན་ཡོད། ངན་སོང་ཀུན་འདྲེན། མྱ་ངན་མུན་འཇོམས། སྤོས་ཀྱི་གླང་པོ། དཔའ་བར་འགྲོ་བ། ནམ་མཁའ་མཛོད། ཡེ་ཤེས་ཏོག །འོད་དཔག་མེད། ཟླ་འོད། བཟང་སྐྱོང་། དྲྭ་བ་ཅན་གྱི་འོད། རྡོ་རྗེ་སྙིང་པོ། བློ་གྲོས་མི་ཟད་པ། སྤོབས་པ་བརྩེགས་པ། ཀུན་ཏུ་བཟང་པོ་སྟེ་བསྐལ་བཟང་གི་སེམས་དཔའ་བཅུ་དྲུག་རྣམས་ཕྱོགས་བཞིར་བཞི་བཞི་བཞུགས་པའོ། །སྣམ་བུ་དྲུག་པ་རྣམས་ལ་སྤྱོད་པའི་རྒྱུད་ཀྱི་ལྷ་ཚོགས་བཞུགས་པ་ནི། ཤར་ཕྱོགས་སུ་བཅོམ་ལྡན་འདས་རྣམ་པར་སྣང་མཛད། རིགས་བཞིའི་སངས་རྒྱས། ལྷོ་ཕྱོགས་སུ་མཆོད་པའི་ལྷ་མོ་བརྒྱད། ནུབ་ཕྱོགས་སུ་དུས་ལྡན་མ། པདྨ་ཅན། འཇིགས་བྲལ་མ། འོད་ལྡན་མ། མདངས་ལྡན་མ། དྲི་མེད་མ། རྒྱལ་བའི་གདུང་མ། ཡིད་བཟང་མ་སྟེ། བཀྲ་ཤིས་ཀྱི་ལྷ་མོ་བརྒྱད། བྱང་ཕྱོགས་སུ་ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། ཕྱོགས་སྐྱོང་བཅུ། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ། རྒྱལ་པོ་ཆེན་པོ་བཞི་སྟེ་དཔལ་མགོན་བདུན་ཅུ་རྩ་ལྔ་བཞུགས་པའོ། །སྣམ་བུ་ལྔ་པ་རྣམས་ལ་བྱ་བའི་རྒྱུད་ཀྱི་ལྷ་ཚོགས་བཞུགས་པ་ནི། ཤར་དུ་རྒྱལ་སྲས་རིགས་གསུམ་མགོན་པོ། ལྷོར་སྦྱོང་བའི་ལྷ་ཤཱཀྱ་ཐུབ་པ། སྤེལ་བའི་ལྷ་རྣམ་པར་སྣང་མཛད། བསྒྱུར་བའི་ལྷ་བདུད་རྩི་འཁྱིལ་བ། ཐོབ་པའི་ལྷ་རིན་ཆེན་འབྱུང་ལྡན། ཚིམ་པའི་ལྷ་དོན་ཡོད་གྲུབ་པ། དབང་བྱེད་ཀྱི་ལྷ་ཕྱག་རྡོར་ཏེ་ཀྲྀ་ཡ་དོན་གྱི་ལྷ་དྲུག །ནུབ་ཏུ་སྒེག་མོ་མ་སོགས་ལྷ་མོ་བརྒྱད། བྱང་དུ་སྒོ་མ་བཞི་རྣམས་བཞུགས་པའོ། །སྣམ་བུ་བཞི་པ་རྣམས་ལ་བྱང་ཆུབ་སེམས་དཔའི་ལྷ་ཚོགས་བཞུགས་པ་ནི། ཤར་ཕྱོགས་སུ་སངས་རྒྱས་བཅོམ་ལྡན་འདས། ཡུམ་ཆེན་མོ། ཤཱ་རིའི་བུ། སྤྱན་རས་གཟིགས་ལ་སོགས་ཉེ་བའི་སྲས་བརྒྱད། སེམས་དཔའ་བརྒྱད། ལྷོ་ཕྱོགས་སུ་སངས་རྒྱས་དགའ་བའི་དཔལ། དཀོན་མཆོག་འབྱུང་གནས། མྱ་ངན་མེད། རིན་ཆེན་འོད་འཕྲོ། རྒྱལ་བའི་དབང་པོ། པདྨོ་དམ་པའི་དཔལ། ཉི་མ་སྣང་བའི་དཔལ། གདུགས་ཆེན་དམ་པའི་དཔལ། གླང་པོ་དམ་པའི་དཔལ། པདྨོའི་དཔལ་ཏེ་ཕྱོགས་བཅུའི་སངས་རྒྱས་རྣམས་དང་མཆོད་པའི་ལྷ་མོ་ལྔ། ནུབ་ཕྱོགས་སུ་སྣང་བ་དམ་པའི་དཔལ། ཏིང་འཛིན་རྒྱལ་པོ། ཟླ་འོད་གཞོན་ནུ། ཆོས་ཀྱི་རྒྱལ་མཚན། དབང་ཕྱུག་རྒྱལ་པོ། བཀོད་པའི་རྒྱལ་པོ། རིན་ཆེན་འོད་འཕྲོ། པདྨའི་རྒྱལ་པོ། རྡོ་རྗེ་མི་གཡོ། ཐོགས་མེད་རྒྱལ་པོ་ལ་སོགས་པའོ། །བྱང་ཕྱོགས་སུ་ཡེ་ཤེས་འོད། གདུགས་མཛེས་དམ་པ། གཞོན་ནུ་རྒྱལ་མཚན། སྐྱེས་བུ་དམ་པ། སེང་གེ་སྒྲ། རྒྱལ་བའི་དབང་པོ། གྲུབ་པ་སྔོན་པོ། དགའ་བ་དམར་པོ། མི་གཡོ་བ་ལ་སོགས་བཞུགས་པའོ། །སྣམ་བུ་གསུམ་པ་བཞི་ལ་རང་རྒྱལ་གྱི་ལྷ་ཚོགས་བཞུགས་པ་ནི། ཤར་དུ་རྒྱལ་བ་ཤཱཀྱ་ཐུབ་པ་ལ་རང་སངས་རྒྱས་བསེ་རུ་ལྟ་བུ་དང་། ཚོགས་ན་སྤྱོད་པའི་ཚོགས། ལྷོར་འཇིགས་པ་མེད་པ། སྣང་བ་བརྩེགས་པ། དཔའ་བོ་འདུལ་བ། ཉོན་མོངས་གདུང་སེལ། ནུབ་ཏུ་ཤེས་རབ་མགྱོགས་ཆེན། རྫུ་འཕྲུལ་ཆེར་སྟོན། གདུང་བ་སེལ་བྱེད། སྒྲ་ཆེན་པོ། བྱང་དུ་བསེ་རུ་ལྟ་བུ། རིའི་རྒྱལ་པོ། སེང་གེ་ལྟ་བུ། ཡིད་གྱུར་ཏེ་ཐམས་ཅད་ཀྱང་དགེ་སློང་དགྲ་བཅོམ་པའི་ཆ་ལུགས་གཙུག་ཏོར་ཅུང་ཟད་དང་བཅས་པའོ། །སྣམ་བུ་གཉིས་པ་བཞི་ལ་ཉན་ཐོས་ཀྱི་ལྷ་ཚོགས་བཞུགས་པ་ནི། ཤར་དུ་བཅོམ་ལྡན་འདས་ཤཱཀྱའི་རྒྱལ་པོ་དང་བསྐལ་པ་བཟང་པོའི་སངས་རྒྱས་སྟོང་། ལྷོར་ཀུན་དགའ་བོ། ཤཱ་རིའི་བུ། མངྒལ་གྱི་བུ། རབ་འབྱོར། མ་འགགས་པ། འཆར་ཀ །ཀ་ཌི་ནྱ། རྟ་ཐུལ་ཏེ་སྤྲུལ་པའི་གང་ཟག་བརྒྱད། ཉེ་བ་འཁོར། བ་གླང་བདག །འོད་སྲུངས། སྒྲ་གཅན་ཟིན། གཅུང་དགའ་བོ། མིང་ཅན། ནོར་སྦྱིན། གང་པོ་སྟེ་རང་རྒྱུད་པ་བརྒྱད། ནུབ་ཏུ་འཕགས་པའི་གནས་བརྟན་ཡན་ལག་འབྱུང་། མ་ཕམ་པ། ནགས་ན་གནས། དུས་ལྡན། རྡོ་རྗེ་མོའི་བུ། བཟང་པོ། གསེར་བེའུ། བྷ་ར་དྷྭ་ཛ། བ་ཀུ་ལ། སྒྲ་གཅན་འཛིན། ལམ་ཕྲན་བསྟན། གསེར་ཅན། ལམ་བསྟན། ཀླུའི་སྡེ། སྦེད་བྱེད། མི་ཕྱེད་པ་རྣམས་དང་། དགེ་ཚུལ་ཙུནྡ། དགེ་བསྙེན་དྷརྨཱ་ཏ་རྣམས་སྦྱངས་པའི་ཡོན་ཏན་བཅུ་གཉིས་དང་ལྡན་པའོ། །བྱང་དུ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་། ཕྱིར་མི་འོང་བ། དགྲ་བཅོམ་པ་སྟེ་ཞུགས་གནས་ཀྱི་བྱེ་བྲག་ལས་སྐྱེས་བུ་ཟུང་བཞི་ཡ་བརྒྱད། སྐྱེ་དགུའི་བདག་མོ་ལ་སོགས་པའི་དགེ་སློང་མ་ལྔ་བརྒྱ། དགེ་བསྙེན་ལི་ཙ་བཱི་དྲི་མེད་གྲགས་པ་དང་། དགེ་བསྙེན་མ་ས་ག་སོགས་དགེ་བསྙེན་ཕ་མའི་ཚོགས་རྣམས་བཞུགས་པའོ། །སྣམ་བུ་དང་པོ་བཞི་ལ་དུས་བཟང་དང་དུས་ཆེན་པོའི་ལྷ་ལ་འཇིག་རྟེན་དང་མཐུན་པར་འཇུག་པའི་འཁོར་ཅན་ལྷ་མིའི་ཐེག་པའི་ལྷ་ཚོགས་ནི། ཤར་དུ་བཅོམ་ལྡན་འདས་ཀུན་རིག་རྣམ་པར་སྣང་མཛད་དང་། རྡོ་རྗེ་མི་འཁྲུགས་པ། ལྷོར་ཤཱཀྱའི་རྒྱལ་པོ། ནུབ་ཏུ་སྨན་པའི་རྒྱལ་པོ་བཞི་ལ་རིམ་པ་བཞིན། དབང་པོ་ཡབ་ཡུམ། ཚངས་པ་ཡབ་ཡུམ། ཁྱབ་འཇུག་ཡབ་ཡུམ། དབང་ཕྱུག་ཡབ་ཡུམ་རྣམས་རང་རང་གི་མངག་གཞུག་ཕོ་ཉ་དང་བཅས་པས་སངས་རྒྱས་ལ་འདུད་པའོ། །གཉིས་པ་རིག་འཛིན་རྩལ་འཆང་ནི། ༀ་མ་ཧཱ་གུ་རུ་ཤཱ་རི་རཾ་གཱི་ལི་ཧཱུྃ། འབྲས་བུའི་རྟ་བབས་ཀྱི་ཐད་ཀའི་སྟེང་གི་ནམ་མཁའ་ལ། ཨ་ཏི་ཡོ་གའི་ཤིང་རྟ་ཆེན་པོ་གྲགས་ཆེན་ཀྱི་སྟོན་པ་བཅུ་གཉིས། སྤྲུལ་པའི་སྐུ་དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིངྷ། ཛྙཱ་ན་སཱུ་ཏྲ། བི་མ་ལ་མི་ཏྲ། དྷ་ཧེ་ན་ཏ་ལ་སོགས་པའི་རྒྱལ་རིགས་བཞི། དགེ་སློང་མ་ཀུན་དགའ་མོ་ལ་སོགས་པ་མིག་བསྒྱུར་མ་བདུན། སློབ་དཔོན་ཀུ་ཀུ་རཱ་ཛ་ལ་སོགས་པའི་གྲུབ་ཆེན་ལྔ། སློབ་དཔོན་ནཱ་གཱ་རྫུ་ན་ལ་སོགས་པཎྚི་ཏ་ལྔ། སངས་རྒྱས་གཉིས་པ་པདྨ་སམྦྷ་ཝ། ལོ་ཆེ་བཻ་རོ་ཙ་ན། རྒྱལ་མོ་གཡུ་སྒྲ་སྙིང་པོ། གཉགས་ཛྙཱ་ན་ཀུ་མཱ་ར། ལྡང་མ་བ་ལྷུན་གྲུབ་རྒྱལ་མཚན་ནས་རྩ་བའི་བླ་མའི་བར་གྱི་རིག་འཛིན་གྱི་ས་ལ་གཤེགས་པ་རྣམས་དང་། ༀ་མ་ཧཱ་གུ་རུ་ཤཱ་རི་རཾ་གཱི་ལི་ཧཱུྃ། ལུང་ཆེན་ཨ་ནུ་ཡོ་གའི་ཤིང་རྟ་ཆེན་པོ་ལྷ་བློ་གྲོས་མཐའ་ཡས། གནོད་སྦྱིན་བློ་གྲོས་དད་སེལ། སྲིན་པོ་བློ་གྲོས་ཐབས་ལྡན། ཀླུ་རྒྱལ་བློ་གྲོས་རྒྱ་མཚོ། ལི་ཙ་བཱི་བློ་གྲོས་རབ་ཞི་སྟེ་དམ་པའི་རིགས་ཅན་དྲ་མ་ལྔ། ཆོས་རྒྱལ་ལུང་བསྟན་རྡོ་རྗེ། རྒྱལ་པོ་ཨིནྡྲ་བྷུ་ཏི། ཟ་ཧོར་རྒྱལ་པོ་པྲ་བྷ་ཧ་ཏི་ལ་སོགས་པའི་རྒྱལ་རིགས་ཆེན་པོ་དྲུག །ཨུ་པ་རཱ་ཛ་ལ་སོགས་པའི་གྲུབ་ཐོབ་གསུམ། རོ་ལངས་བདེ་བ་དང་། ཨཱ་ཙརྱ་གསལ་བའི་རྒྱན་ལ་སོགས་པའི་པཎྜི་ཏ་བདུན། མདོ་མཁན་དྷརྨ་བོ་དྷི། མཁན་པོ་ཆོས་རྒྱལ་སྐྱོང་། ཡར་ཀླུངས་པ་ཆེ་བཙན་སྐྱེས། གནུབས་ཆེན་རྡོ་རྗེ་ཡང་དབང་། ཐུགས་ཀྱི་སྲས་བཞི་དང་སྲས་ཀྱི་དམ་པ་གཅིག །དགེ་བའི་མཆེད་བཅོ་ལྔ། རྒྱ་སྟོན་བྱང་ཆུབ་བློ་གྲོས། ཐོ་གར་ནམ་མཁའ་སྡེ། བསྟན་པའི་རྩ་ལག་བདེ་གཤེགས་ཟུར་པོ་ཆེ། སློབ་མ་རྩེ་མོ་བཞི་དང་རྩེ་ལྐོག་གཅིག །ཁྱད་པར་གྲུབ་ཐོབ་ཆེན་པོ་ཟུར་ཆུང་པ་ཤེས་རབ་གྲགས། སློབ་མ་ཀ་བཞི་གདུང་བརྒྱད། སྲས་གསང་བདག་སྒྲོ་ཕུག་པ་ཆེན་པོ། སློབ་བརྒྱུད་གདུགས་ཐོགས་སྟོང་། ཁྱད་པར་མགར་སྲེག་གླན་ཟུར་དངོས་དང་བརྒྱུད་པའི་ཚོགས་མ་ཚང་བ་མེད་པ་དང་། ༀ་མ་ཧཱ་གུ་རུ་ཤཱ་རི་རཾ་གཱི་ལི་ཧཱུྃ། བསྐྱེད་པ་མ་ཧཱ་ཡོ་ག་ཏནྟྲ་བཅོ་བརྒྱད་ཀྱི་བཀའ་བབས་བརྙེས་པ་སྐལ་ལྡན་རྒྱལ་པོ་ཛཿལ་སོགས་པའི་རྒྱལ་རིགས་བཞི། སྲས་མོ་གོ་མ་དེ་ཝཱི། མཻ་ཏྲི་ཀ་མཱ་ལ། རྡོ་རྗེ་བཞད་པ། ཉིན་བྱེད་སེང་གེ། སངས་རྒྱས་གསང་བ། སྒེག་པའི་རྡོ་རྗེ། རྨ་བན་རིན་ཆེན་མཆོག་ལ་སོགས་རྒྱ་བོད་ཀྱི་པཎ་གྲུབ་དམ་ཚིག་དབང་གི་སློབ་དཔོན། ཤེས་རབ་རྒྱུད་ཀྱི་སློབ་དཔོན། མན་ངག་འབྲས་བུའི་སློབ་དཔོན་དུ་གྱུར་ཏོ་ཅོག་དང་། བྱེ་བྲག་ཏུ་གངས་རིའི་ཁྲོད་ན་མདོ་སྒྱུ་སེམས་གསུམ་གྱི་བསྟན་པ་མི་ནུབ་པའི་རྒྱལ་མཚན་དུ་གྱུར་པ་རོང་ཟོམ་པཎྜི་ཏ་ཆེན་པོ། རྒྱལ་བ་ཀློང་ཆེན་རབ་འབྱམས། གཡུང་སྟོན་རྡོ་རྗེ་དཔལ། པཎྜི་ཏ་ཡེ་ཤེས་རོལ་པ་ལ་སོགས་ངོ་མཚར་བརྒྱུད་པའི་བླ་མ་དམ་ཚིག་གི་དཀྱིལ་འཁོར་ཆེན་པོའི་བདག་ཉིད་གཅིག་ཏུ་བཞུགས་པ་ནས། འཁོར་ལོའི་དབང་ཕྱུག་སོགས་མཇུག་ཏུ་སྤྱོད་ལམ་གྱི་རྣལ་འབྱོར་བ་སླེབས་ཚེ། སྒོམ་པས་དུབ་ན་སོགས། དྲན་རྫོགས་ཡོངས་གྲུབ་ཆེན་པོ་མཉུག་མའི་ཧེ་རུ་ཀར་མངོན་བྱང་ཆུབ་པའི་འདུན་པ་སེམས་པ་ལ་བསླབས་པས་དག་བྱ་དག་འབྲས་ལས་རིགས་ཆེན་འབྱེད་པ་དང་། དབུགས་ཆེན་འབྱིན་པ་དང་། ལུང་ཆེན་ཐོབ་པ་དང་། རྩལ་ཆེན་རྫོགས་པའི་གོ་འཕང་ལ་སོན་པའི་མཆོག་གི་དངོས་གྲུབ་མི་སློབ་པའི་ཟུང་འཇུག་མངོན་དུ་འགྱུར་བའོ། །འདུས་པ་མདོའི་རྒྱུད་ལུགས་ཀྱི་ཞི་ཁྲོའི་དབང་བྱང་ལ་སོགས་པའི་ཡི་གེ་ཟུར་ཧམ་ལྕམ་དྲལ་གྱི་སློབ་བརྒྱུད་ལས་ཟུར་ལུགས་དང་ཁམས་ལུགས་གཉིས་སུ་དར་ཆེ་བ་ལ་སྔོན་གྱི་བླ་མ་རྣམས་ཀྱིས་དཔྱད་པ་དང་དགག་སྒྲུབ་ཅི་རིགས་པ་མཐོང་མོད། དེ་ཀུན་ཀྱང་ལ་ལ་རྩ་བའི་རྐང་ཚུགས། ལ་ལ་དགོས་དབང་དང་འབྲེལ་བས་ཆོས་ནི་ཚིག་ལ་མི་རྟོན་དོན་ལ་རྟོན་ཕྱིར་ནོར་བ་མངོན་གྱུར་ཅན་ལས་གཞན་དུ་ཐལ་འགྱུར་མི་དགོད་ལ། འདིར་ནི་གླན་ལུགས་ཀྱི་རྒྱུན་རྒྱུད་ལུགས་འཇུག་བདེ་ལ། ལུང་ལུགས་ཀྱི་སྨོན་ལམ་སྦྱར་ནས་འཇུག་བདེར་བསྡེབས་པ་ཆོས་སྦྱིན་གྱི་ཕྱི་མོར་འཁོད་པ་དཔེ་རྒྱུན་རྙེད་སླ་བའི་ཕྱིར་སོར་བཞག་པ་ལ་སྨོན་ལམ་རྣམས་རྒྱུད་ཀྱི་དགོངས་པར་མི་འབྲེལ་ཞིང་ཆོ་ག་ཉོག་པས་དོར། ལམ་སྲོལ་འདིར་མདོ་སྔགས་ཀྱི་བསྟན་པ་ཡོངས་རྫོགས་རིག་འཛིན་གྱི་སྡེ་སྣོད་དུ་བཀྲལ་བས་རྟེན་དང་བརྟེན་པའི་རྣམ་གཞག་ཀྱང་རྒྱལ་བའི་མཚན་དཔེ་དང་། བྱང་ཕྱོགས་ཀྱི་ཆོས། ས་ལམ་དང་རྣམ་པར་ཐར་པའི་བརྡ་དོན་རྟགས་གསུམ་གྱིས་གྲུབ་པ་ལ་ཕྱི་ནང་དང་། མཐའ་དཀྱིལ་དུ་ཞེས་པ་ནི་བྱིས་པ་ཉེར་སྤྱོད་ཀྱི་བློ་གྲོས་གྱི་ན་བ་ཡིན་ནོ། །དེའི་ཕྱིན་ཡན་ལག་གི་དཀྱིལ་འཁོར་ལྷ་ཚོགས་ཀྱང་ཐེག་པའི་གདགས་གཞི་དང་མཐུན་པ་ཟུར་ལུགས་ཀྱི་ཡི་གེ་རྙིང་པའི་ས་བཅད་ལྟར་བཀོད། སྤྱིར་སྨན་བླ་མདོ་སྔགས་གཉིས་ཆར་དུ་བཀྲལ་ཞིང་། བྱེ་བྲག་ཏུ་མགྲོན་ཐབས་ནི་ཀུན་རིག་ལ་སོགས་པར་ཡང་དཀོན་མཆོག་གསུམ་དངོས་བསྟན་དུ་ཚང་བའི་དཀྱིལ་འཁོར་དུ་བསྔགས་པས་མཚོན། མདོ་སྔགས་ཀྱི་འགལ་འབྲེལ་བསམ་པའི་དམ་གཞག་མེད། སྟོན་པ་མྱ་ངན་ལས་འདའ་ཁར་ཀུན་དགའ་བོའི་ལག་པ་ནས་བཟུང་སྟེ། ངའི་ཆོས་དཀོན་མཆོག་གི་མཛོད་འདུན་པ་དང་། བརྩོན་འགྲུས། བག་ཡོད་པ་གསུམ་གྱིས་སྲུངས་ཤིག །ཅེས་གདམས་ན། ལྔ་བརྒྱའི་མཐའ་མ་འདིར་བསྟན་པ་ཡོངས་རྫོགས་གང་ཟག་གི་རྒྱུད་ལ་བསྒྲུབ་པའི་བློ་མཐུ་ཆུང་ཞིང་རྒྱུད་སྡེ་ཆེན་པོའི་ལམ་ལ་སྨིན་པར་སློབ་པ་ཉུང་ནའང་མོས་སློབ་ཀྱི་སྒྲུབ་མཆོད་རིག་འཛིན་གྱི་སྡེ་སྣོད་ཆེན་པོ་འདི་ལ་བསྙེན་པ་རྣམས་ལ་བསྟན་པ་སྒོ་ཐམས་ཅད་ནས་མཆོད་པའི་བསོད་ནམས་དཔག་ཏུ་མེད་པ་འཕེལ་བ་ཡིན་ནོ། །ཞེས་པའང་རྫོགས་ཆེན་པ་རང་བྱུང་རྡོ་རྗེས་སོ།། །།

ཚོགས་ཆེན་འདུས་པའི་དཀྱིལ་འཁོར་གྱི་ཆོ་ག་དྲི་མེད་འོད་ཀྱི་ཕྲེང་བ། འགྱུར་མེད་རྡོ་རྗེ།

ཚོགས་ཆེན་འདུས་པའི་དཀྱིལ་འཁོར་གྱི་ཆོ་ག་དྲི་མེད་འོད་ཀྱི་ཕྲེང་བ་ཞེས་བྱ་བ་བཞུགས་སོ། །ཚོགས་ཆེན་འདུས་པའི་དཀྱིལ་འཁོར་གྱི་ཆོ་ག་དྲི་མེད་འོད་ཀྱི་ཕྲེང་བ་ཞེས་བྱ་བ། དཔལ་ལྡན་བླ་མ་ཧེ་རུ་ཀ་ལ་ཕྱག་འཚལ་ལོ། །རྒྱལ་བ་ཀུན་དངོས་གཅིག་ཉིད་དུ་མའི་གར། །སྤྲོ་བསྡུའི་བྱེད་པོ་ཁྱབ་བདག་བླ་མ་ཀྱེ། །ཧེ་རུ་ཀ་དཔལ་སྙིང་རྗེའི་བདུད་རྩི་ཡིས། །བདག་གི་སྙིང་ལ་ཉེར་ཞུགས་དབུགས་དབྱུང་མཛོད། །ཚོགས་ཆེན་འདུས་པ་སྙིང་པོའི་དཀྱིལ་འཁོར་ཆེར། །ཡང་དག་ཐབས་ཀྱི་བདེ་བར་འཇུག་པའི་སྒོ། །ཟབ་རྒྱས་ལུང་དང་དམ་པའི་མན་ངག་བཞིན། །རབ་གསལ་དྲི་མེད་འོད་ཀྱི་ཕྲེང་བ་སྤེལ། །འདི་ལ་གསུམ་སྟེ། གང་སྒྲུབ་པའི་གཞི། གང་གི་སྒྲུབ་པའི་ཐབས། དེས་གྲུབ་པའི་འབྲས་བུའོ། །དང་པོ་ནི། ཇི་སྐད་དུ། ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་གསུངས་པ་ལྟར། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་དབྱིངས་དང་ཡེ་ཤེས་གཉིས་སུ་མེད་པ་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དུ་སངས་རྒྱས་པའི་ངོ་བོར་བཞུགས་པ་ནི་གཞིའི་རྒྱུད་ཅེས་བྱ་བ་གདུལ་བྱའི་རྒྱུད་ཀྱིས་བསྡུས་པ་ཉིད་དོ། །གཉིས་པ་ནི། གཞིའི་རྒྱུད་དེ་ཉིད་ལྷན་ཅིག་སྐྱེས་པ་དང་ཀུན་ཏུ་བརྟགས་པའི་མ་རིག་པའི་སྦུབས་ལས་འགྲོལ་ཞིང་རྣམ་བྱང་གི་ཡོན་ཏན་མངོན་དུ་བྱེད་པ་ནི་ཐབས་ཀྱི་རྒྱུད་ཅེས་བྱ་བ་ལམ་གྱི་དངོས་པོས་བསྡུས་པ་སྟེ། རྩ་བའི་མདོར། ཡུལ་གསུམ་ངེས་པར་སྣང་བ་ནི། །ཐ་མ་འབྲིང་དང་རབ་ཏུ་སྣང་། །ཞེས་པས་ཡུལ་གདུལ་བྱའི་རིགས་གསུམ་སོ་སོའི་གཉེན་པོར། ཀུན་འབྱུང་འདྲེན་པ་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་འདུལ་བྱེད་ཐབས་ཀྱི་རིམ་པ་ཡང་སོ་སོར་སྟོན་པ་ལས། འདིར་གསུམ་པ་ཡན་ལག་ཅན་རྩ་བའི་དཀྱིལ་འཁོར་གྱི་ལས་ལ་འཇུག་པ་སྟེ། དེ་ལ་ཡང་། སྦྱོར་བ་དང་། དངོས་གཞི་དང་། མཇུག་གི་བྱ་བ་དང་གསུམ་དུ་གནས་པའོ། །སྦྱོར་བ་ལའང་བཞི་སྟེ། བསྙེན་པའི་ཆོ་ག་དང་། གཞི་བཟུང་བ་དང་། སའི་ཆོ་ག་དང་། སྟ་གོན་གྱི་ཆོ་གའོ། །དང་པོ་ལ། དབང་བསྐུར་ཙམ་གྱི་ཆེད་དུ་ཡིན་ན་་མོས་སློབ་ཀྱི་ཚུལ་གྱིས་མཚན་མ་དང་། དུས་དང་། གྲངས་ཀྱི་བསྙེན་པ་གསུམ་རབ་འབྲིང་ཐ་མའི་སྒོ་ནས་ཇི་ལྟར་ནུས་པ་སྔོན་དུ་འགྲོ་བ་གཞིར་བྱས་ནས་ཁྱད་པར་གྱི་དོན་དུ་བསྙེན་པ་ཁ་གསོ་ལ་འཇུག་ཅིང་། ཚོགས་སྒྲུབ་ལ་ནི་ལམ་ངེས་རྫོགས་ཀྱི་ཚུལ་གྱིས་ཡི་གེའི་རྗེས་སུ་འཇུག་པ་མཚན་བཅས་ལྷའི་རྣལ་འབྱོར་ལ་བརྟན་པ་ཐོབ་ཀྱི་བར་དེ་སྲིད་དུ་བྱ་བ་ཉིད་དོ། །གཉིས་པ་ལས་ཀྱི་གཞི་བཟུང་བ་ནི། བླ་མ་རྡོ་རྗེ་འཁོར་ལོ་རྒྱལ། །ཡོན་ཏན་མཆོག་གི་གཏེར་གྱུར་ཅིང་། །ཞེས་སོགས་ཀྱིས་མཚན་ཉིད་ཅན་གྱི་རྡོ་རྗེ་རྒྱལ་པོ་འཁོར་དང་བཅས་པས། གནས་དུས་ཡོ་བྱད་སོགས་ཕུན་སུམ་ཚོགས་པའི་ཆ་རྐྱེན་ཐམས་ཅད་ཚོགས་པར་བྱ་བའོ། །གསུམ་པ་སའི་ཆོ་ག་ལ། ས་བརྟག་པ། བསླང་བ། སྦྱང་བ། བཟུང་བ། བསྲུང་བ། བྱིན་གྱིས་རློབ་པའོ། །དང་པོ་ལ། ནམ་མཁའ་བརྟག་པ། ས་གཞི་བརྟག་པ། སྐྱོན་ཅན་སྤང་བ་དང་གསུམ་ལས། དང་པོ་ནི། ནམ་མཁའ་འཁོར་ལོ་རྡོ་རྗེ་དང་། །རིན་ཆེན་ཟུར་བརྒྱད་པདྨའི་དབྱིབས། །རྒྱ་གྲམ་ལ་སོགས་འདྲ་བར་བརྟག །ཅེས་པས་ནམ་མཁའ་འཁོར་ལོ་ལ་སོགས་པ་ཕྱག་རྒྱ་ལྔའི་རྣམ་པར་མངོན་ཅིང་། བར་ཁ་དོག་ལྔ་མ་འདྲེས་པ་གསལ་བའོ། །གཉིས་པ་ནི། ས་གཞི་ཡང་ནི་དེ་བཞིན་ཏེ། །རི་བོ་བརྩེགས་དང་གཟུར་བ་དང་། །དེ་བཞིན་སྒྲེང་དང་གཏམས་པའི་ཚུལ། །ཞེས་པས་འཁོར་ལོ་བརྩེགས་པ་དང་། རིན་ཆེན་ཟུར་བརྒྱད་པ་དང་། རྡོ་རྗེ་སྒྲེང་བ་དང་། པདྨ་དང་རྒྱ་གྲམ་གཏམས་པ་འདྲ་བ་རྣམས་ལས་རིགས་དེ་དང་དེ་སྒྲུབ་པའི་གནས་སུ་ཤེས་པར་བྱའོ། །གསུམ་པ་ནི། སྐྱོན་གྱི་གནས་དག་སྤང་བ་ནི། །གཤིན་རྗེ་གདུག་པའི་མདུང་རྩེ་དང་། །ཞེས་སོགས་ཀྱི་སའི་དགྲ་རྣམས་དང་། མི་དང་མི་མ་ཡིན་གདུག་པ་ཅན་གྱིས་བདག་ཏུ་བཟུང་བ་སོགས་བར་ཆད་ཀྱི་རྐྱེན་དུ་འགྱུར་པའི་སྐྱོན་དང་ལྡན་པ་རྣམས་སོ། །གཉིས་པ་བསླང་བ་ལ། སྣང་བ་ལས་བསླང་བ་དང་། མི་སྣང་བ་ལས་བསླང་བའོ། །དང་པོ་ནི། བརྟགས་པས་རུང་བའི་ས་དེ་རྒྱལ་པོ་ལ་སོགས་པ་གཞན་དབང་བ་ཞིག་ན་རིན་དང་བདེན་པའི་ངག་གིས་བླངས་ཏེ་རང་དབང་དུ་བྱ་བའོ། །གཉིས་པ་ལ། སའི་བདག་པོ་ལ་བསླང་བ་དང་། སའི་དཔང་པོ་གསོལ་བའོ། །དང་པོ་ནི། གཞི་དེར་སའི་བདག་པོའི་མཆོད་གཏོར་གསེར་སྐྱེམས་དང་བཅས་པ་བཤམས་ལ། རྃ་ཡྃ་ཁྃ་གིས་བསང་སྦྱངས། ༀ་ཨཱཿཧཱུཾ་གིས་འདོད་ཡོན་བདུད་རྩིའི་ཕུང་པོར་བྱིན་གྱིས་རློབས་ལ། སྙིང་གའི་འོད་ཟེར་དང་། སྠཱ་ན་པ་ཏི་ཀྵེ་ཏྲ་པཱ་ལ་ས་པ་རི་ཝཱ་ར་ཨེ་ཧྱེ་ཧི། ཞེས་པས་སྤྱན་དྲངས་པ་མཆོད་ནས། ཨ་ཀཱ་རོའི་སྔགས་ཀྱིས་གཏོར་མ་ཕུལ་ལ། ཧཱུཾ། དགོངས་ཀུན་ཤིག་ཐུགས་རྗེ་རྒྱལ་བའི་ལྷ། །ལྷ་ཀླུ་གནོད་སྦྱིན་སྡེ་དཔུང་བཅས། །གངས་རིའི་རྩེ་དང་རིན་ཆེན་རི། །ཀུན་དགའ་ལྡུམ་ར་སྐྱེད་མོས་ཚལ། །མཚོ་རྫིང་ལུ་མ་འབབ་ཆུར་གནས། །འཇིག་རྟེན་འཇིག་རྟེན་ཐམས་ཅད་ཀྱིས། །གང་དག་བདག་པོར་གྱུར་པ་རྣམས། །རྣལ་འབྱོར་དབང་ཕྱུག་བདག་ཉིད་ཀྱིས། །ས་འདི་ལྷུན་གྱིས་གྲུབ་བྱའི་ཕྱིར། །འཛམ་གླིང་གྲུབ་པའི་ས་སློང་ན། །འཁོར་དང་བཅས་པ་འདིར་འཁོད་ལ། །རིན་ཆེན་གཏེར་གྱི་ས་འདི་སྩོལ། །ཞེས་གསོལ་ཞིང་གསེར་སྐྱེམས་ཀྱང་ཕུལ་ལ་མཆོད་གཏོར་རྣམས་གཤེགས། གཉིས་པ་ནི། དཀྱིལ་འཁོར་གྱི་གནས་སུ་ས་ལྷའི་མཎྜལ་ཚོམ་བུ་ཅན་མཆོད་གཏོར་དང་བཅས་པ་བཤམས་ལ་སྔར་བཞིན་བྱིན་གྱིས་བརླབ། ལག་པ་གཡས་པར་ཟླ་བ་ལ་ཧཱུཾ་ཡིག་བཀོད་དེ་ཐལ་མོས་ས་ལ་བསྣུན་པའི་སྒྲ་དང་། ཧཱུཾ་གི་འོད་ཀྱིས་བསྐུལ་བས་ས་འོག་ནས་སའི་ལྷ་མོ་འཁོར་དང་བཅས་པ་བྱོན་ཏེ། ཚོམ་བུའི་གནས་སུ་འཁོད་པ་ནི། སྐུ་མདོག་སེར་མོ་ཞི་ཞིང་འཛུམ་པའི་ཉམས་ཅན་དར་དང་རིན་པོ་ཆེས་བརྒྱན་པ་གསེར་གྱི་བུམ་པ་དང་མཆོག་སྦྱིན་གྱི་ཕྱག་རྒྱ་མཛད་པ་བཀའ་ནོད་པའི་ཚུལ་དུ་གནས་པ་ལ། ཀུན་བཟང་། ཞབས་བསིལ། བཞི་བསྣོལ་དང་། འབྲུ་གསུམ་གྱིས་ནང་མཆོད། ༀ་བ་སུ་དྷ་རཱི་ས་པ་རི་ཝཱ་ར་ཨི་དཾ་བ་ལིཾ་ཏ་སོགས་བཏགས་པས་གཏོར་མ་ཕུལ་ལ། ཀུན་སྔོན་ཚེ་དཔལ་ཆེན་གར་དབང་གི། །ཐུགས་རྗེ་ས་ལ་གཤེགས་ནས་ཀྱང་། །རུ་དྲ་སྡེ་བཞི་བསྒྲལ་ནས་ནི། །གསང་བའི་བསྟན་པ་རྒྱས་མཛད་དེ། །འགྲོ་དྲུག་ཐུགས་རྗེས་བསྒྲལ་བ་ལྟར། །རྣལ་འབྱོར་ས་ལ་སྦྱོར་ཚེ་འདིར། །ལྷ་མིས་མཁྱེན་པར་མཛད་ནས་ཀྱང་། །བདེ་ཆེན་ས་ལ་བགྲོད་པའི་ཚེ། །རུ་དྲ་རྒོལ་བར་བྱུང་བ་ན། །སྤྱན་ལྡན་ཁྱོད་ཀྱིས་དཔང་མཛོད་ཅིག །ཅེས་གསོལ་བས་ལྷ་མོ་དགྱེས་པའི་མདངས་ཀྱིས་གནང་བ་བྱིན་ནས་དེ་ཉིད་དུ་ཐིམ་པར་བསམ་མོ། །འདིར་ས་ལྷ་དམ་ཚིག་པ་བསྐྱེད་ནས་ཡེ་ཤེས་པ་དགུག་པ་སོགས་དང་མཐར་ནམ་མཁར་བཀོད་ནས་དཔང་གསོལ་བའང་འབྱུང་སྟེ། དོན་གྱི་གནད་གཅིག་པས་དེ་ཙམ་མོ། །གསུམ་པ་ས་སྦྱང་བ་ལ། རོ་ལྔ་བསལ་བ། གཏེར་གཞུག་པ། སྟེགས་བུ་བྱས་ཏེ་སྦྱང་བའོ། །དང་པོ་ནི་དཀྱིལ་འཁོར་གྱི་ས་གཞི་གསར་དུ་སྒྲུབ་ན། ས་བདག་ལྟོ་འཕྱེའི་དུས་ཚོད་ཤེས་པས། དེའི་ལྟོ་བ་ལས་ཅུང་ཟད་མདུན་གྱི་ཆ་ནས་དང་པོར་བརྐོ་ཞིང་། དེ་ནས་དཀྱིལ་འཁོར་ཉིས་འགྱུར་གྱི་རྒྱ་ཙམ་གཡས་བསྐོར་དུ་ཁྲུ་གང་ཁྲུ་དོ་སོགས་ཅི་རིགས་པར་བརྐོ་ཞིང་། གྱོ་མོ་དང་། རུས་པ་དང་། གསེག་མ་དང་། ཟུག་རྡོ་དང་། ཤིང་སོལ་ལ་སོགས་ཏེ་རོ་ལྔའི་སྐྱོན་མེད་ཅིང་། ས་སྣུམ་ལ་འཇམ་པ་ནོར་བུ་སོགས་དང་ལྡན་པར་མཐོང་ན་དགེ་བར་འགྱུར་ལ། གལ་ཏེ་ཟུག་རྔུ་དང་བཅས་པ་ཞིག་ན་སའི་སེལ་རྣམས་དག་པར་བསལ་ལ་ཞི་དྲག་གི་སྦྱིན་སྲེག་གིས་མཚན་མ་ངན་པ་དག་ཟིལ་གྱིས་མནན་པར་བྱའོ། །གཉིས་པ་ནི། བརྐོས་པའི་ཁུང་བུ་དེ་ཉིད་དུ་རིན་པོ་ཆེ་ལྔ་ལ་སོགས་པའི་སྙིང་པོ་ཅན་གྱི་བུམ་པ་ཨ་ལས་ཟླ་བའི་སྟེང་དུ་ཏྲཾ་ལས་རིན་པོ་ཆེའི་བུམ་པ་དགོས་འདོད་འབྱུང་བའི་གཏེར་དུ་དམིགས་ནས་གཞུག་པའོ། །གསུམ་པ་ལ། སྟེགས་བུ་རྩིག་པ་དང་། སྦྱང་བ་དངོས་གཉིས་ལས། དང་པོ་ནི། བརྐོས་པའི་ས་ཉིད་ཤེས་པའི་ས་བཟང་པོ་གཞན་དང་བཅས་པ་བདུད་རྩི་ལྔ་དང་སྤོས་ལྔ་ལ་སོགས་པའི་ཆུས་བྲན་ནས་འཐས་པར་བཅགས་པའི་སྟེགས་བུ་དཔངས་སུ་ཁྲུ་གང་དང་། རྒྱར་དཀྱིལ་འཁོར་ལས་ཉིས་འགྱུར་ཙམ་གྲུ་བཞི་སྙོམས་ཤིང་འཇམ་པ་རིམ་པ་ཅན་ནམ། རིམ་པ་མེད་པ་གང་གི་ཚེ་ཡང་ཅུང་ཟད་དབུས་མཐོ་ཞིང་དབང་ལྡན་གཞོལ་བ་ཅན་དུ་བྱ་ཞིང་། སྔོན་ནས་དུལ་བའི་གནས་ཡིན་ན་ནི་བརྐོ་བ་སོགས་མི་དགོས་སོ། །གཉིས་པ་ལ་སྔགས་རྒྱས་སྦྱང་བ་དང་། ཏིང་ངེ་འཛིན་གྱིས་སྦྱང་བ་གཉིས་ལས། དང་པོ་ནི། གཞི་དེར་བ་བྱུང་ལྔ་དང་། སྤོས་ལྔ་དང་། བདུད་རྩི་ལྔ་རྣམས་ཀྱིས་གཡོན་བསྐོར་དུ་ཁྱེམ་མེད་པར་བྱུགས་ལ། རང་ཉིད་ཁྲོ་བོ་བདུད་རྩི་འཁྱིལ་བར་གསལ་བའི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུཾ་ཡིག་མཐིང་ག་རེ་རེས་མཚན་པ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ཧཱུཾ་གིས་མཚན་པར་བསམ་ལ། ༀ་བཛྲ་ཧ་ན་ཧ་ན་ཧཱུྃ་ཕཊ། ཅེས་བརྗོད་ཅིང་ས་ལ་ལན་གསུམ་དུ་བསྣུན་པས། རྡོ་རྗེ་དང་ཧཱུཾ་གི་འོད་ཀྱིས་སའི་ཉེས་སྐྱོན་ཐམས་ཅད་སྦྱངས་ནས་ཡེ་ཤེས་རང་སྣང་གི་གཞིར་གྱུར་པར་བསམ་པའོ། །གཉིས་པ་ལ། མཚན་མེད་དང་། མཚན་བཅས་ཀྱི་ཏིང་ངེ་འཛིན་གྱིས་སྦྱང་བ་ལས། དང་པོ་ནི། ས་དང་སར་འཛིན་གྱི་འཁྲུལ་རྟོག་ཐམས་ཅད་སྟོང་ཉིད་དེ་བཞིན་ཉིད་ཀྱི་དབྱིངས་སུ་རྣམ་པར་དག་པར་བསམ་ལ། ༀ་མ་ཧཱ་ཤཱུ་ཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་སྦྱང་ངོ་། །གཉིས་པ་ནི། ཧཱུཾ་གི་སྒྲ་རིང་པོར་བརྗོད་པས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་ཀྱི་སེམས་ཧཱུཾ་ཡིག་མཐིང་ནག་འབར་བའི་སྤྲིན་ལས་ཨེ་ཡཾ་ར་སུཾཾ་ཀེཾ་རཾ། ཞེས་ཆོ་འཕྲུལ་གྱི་རང་སྒྲར་གྲགས་པ་ལས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པར་གྱུར། སླར་ཡང་། བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ། ཞེས་པའི་སྒྲ་གདངས་ཀྱི་རྐྱེན་ལས་ནམ་མཁའ་ཐམས་ཅད་ཕོ་བྲང་གི་གཞལ་ཡས་ཁང་ཇི་ལྟར་འབྱུང་བར་འགྱུར་བ་བཞིན་དུ་བཀྲ་ལམ་གྱིས་གསལ་བར་གྱུར་པར་བསམ་མོ། །བཞི་པ་ས་བཟུང་བ་ནི། གནས་ཁང་མཛེས་པར་བརྒྱན་པའི་གཞི་ལ་དྲིས་བྱུགས་ཤིང་མེ་ཏོག་གི་སིལ་མ་བཀྲམ་པའི་དཀྱིལ་འཁོར་གྱི་སའི་དབུས་སུ་སློབ་དཔོན་ཧེ་རུ་ཀའི་ཆས་སྣ་ཚོགས་ཀྱིས་བརྒྱན་ཏེ། རྡོ་རྗེ་དང་དྲིལ་བུ་འཛིན་པ་ཁ་ཤར་དུ་ཕྱོགས་ནས་འཁོད་པས། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་དྷེ་ཤྭ་རཱི་ཧཱུཾ་ཕཊ། ཅེས་བ རྗོད་པས་བདག་ཉིད་དཀྱིལ་འཁོར་གྱི་བདག་པོ་དཔལ་ཆེན་པོ་ཆེ་མཆོག་ཧེ་རུ་ཀ་ཡུམ་དང་བཅས་པའི་སྐུར་བསྒོམས་ལ། འཁོར་གྱི་གསང་སྔགས་རྣམས་བརྗོད་པའི་རྐྱེན་གྱིས་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་བསྐྱེད་ལ། ༀ་བཛྲ་ས་མཱ་ཛཿ རུ་ལུ་རུ་ལུ་ཧཱུཾ། ཞེས་བསྐུལ་བས། ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་མཁའ་ཁྱབ་ཏུ་སད་པར་བྱས་ལ། ཀུན་བཟང་། ཞབས་བསིལ། བཞི་བསྣོལ་རྣམས་ཀྱིས་མཆོད་ཅིང་བསྟོད་པར་བྱའོ། །དེ་ནས་ཕྱོགས་བཞིར་གནས་པའི་སློབ་མ་གསང་བའི་ཡུམ་བཞིའི་ང་རྒྱལ་འཛིན་པ་བཞིས་གཙོ་བོ་ལ་རིམ་པ་བཞིན་མཆོད་པ་དང་བསྟོད་པ་སྔོན་དུ་འགྲོ་བས། ཤར་ནས། ཞི་བའི་ཡེ་ཤེས་རང་སྣང་བའི། །རྒྱན་རྣམས་ཀུན་གྱིས་རབ་མཛེས་པ། །སངས་རྒྱས་ཀུན་གྱི་སྐུ་ཡི་མཆོག །དཀྱིལ་འཁོར་ཆེན་པོ་གསུང་དུ་གསོལ། །ལྷོ་ནས། ཡོན་ཏན་རིན་ཆེན་འབྱུང་བའི་གཙོ། །མ་ལུས་ཀུན་གྱི་རེ་སྐོང་བ། །སངས་རྒྱས་ཀུན་གྱི་ཡོན་ཏན་མཆོག །དཀྱིལ་འཁོར་ཆེན་པོ་གསུང་དུ་གསོལ། །ནུབ་ནས། རང་བཞིན་དག་པས་གོས་པ་མེད། །འདོད་ཆགས་ཕ་རོལ་ཕྱིན་པ་བརྙེས། །སངས་རྒྱས་ཀུན་གྱི་གསུང་གི་མཆོག །དཀྱིལ་འཁོར་ཆེན་པོ་གསུང་དུ་གསོལ། །བྱང་ནས། བསམ་པ་ཐམས་ཅད་ཡོངས་རྫོགས་པས། །ཐམས་ཅད་སྒྲོལ་བའི་དེད་དཔོན་མཆོག །སངས་རྒྱས་ཀུན་གྱི་ཕྲིན་ལས་བདག །དཀྱིལ་འཁོར་ཆེན་པོ་གསུང་དུ་གསོལ། །ཐམས་ཅད་ཀྱིས་ཐུན་མོང་དུ། ཐམས་ཅད་བདག་ཉིད་དགོངས་སུ་གསོལ། །འདུས་པ་ཆེན་པོའི་དཀྱིལ་འཁོར་འདི། །སངས་རྒྱས་ཀུན་བདག་གྲོང་ཁྱེར་ཉིད། །དེ་རིང་ཤིས་པར་སློབ་ཏུ་གསོལ། །ཞེས་གསོལ་བ་བཏབ་ཅིང་། བཞི་མེད་ན་གཅིག་གིས་ཀྱང་ཕྱོགས་དེ་དག་ཏུ་སོང་ནས་བྱ། དེ་ཡང་མེད་ན་བསྒོམ་པས་ཀྱང་རུང་དོ། །དེ་ནས། རང་གི་སྙིང་གའི་འོད་ཀྱིས་གདོད་ནས་ལྷུན་གྱིས་གྲུབ་པ་ནམ་མཁའ་གང་བའི་དེ་བཞིན་གཤེགས་པ་ཡབ་ཡུམ་འཁོར་དང་བཅས་པ་ཐམས་ཅད་རྗེས་སུ་བསྐུལ་ནས། ཧཱུཾ་བཞིས་རང་གི་ལུས་ལ་བསྡུས་ཏེ། སྙིང་གར་ཧཱུཾ་གི་ངོ་བོར་གནས་པ་ལས་མི་ཤིགས་པའི་འོད་ཟེར་གྱིས་ཕུང་ཁམས་སྐྱེ་མཆེད་ཐམས་ཅད་ཁྱབ་ཅིང་བརྟན་པར་བྱས་ལ། སྐྱིལ་ཀྲུང་གཤིག་ནས་སྙེམས་པ་དང་བཅས་པས་ལང་སྟེ། འགྲོ་བ་རྣམས་ལ་སྙིང་རྗེས་བལྟས་ནས། སླར་ཡང་ཧཱུཾ་ཞེས་བརྗོད་པས་རང་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པ་མི་བཟད་པའི་ཁྲོ་བོའི་སྤྲིན་སྤྲོ་བའི་སྐུར་གྱུར་པའི་མིག་གཉིས་མ་དང་ཊ་ལས་ཉི་མ་དང་ཟླ་བ་མིག་འབྲས་ཧཱུཾ་ལས་བསྐལ་པའི་མེ་འབར་བས་ཀུན་ཏུ་བལྟ་ཞིང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་རྡོ་རྗེར་མི་ཕྱེད་པའི་ང་རྒྱལ་དང་ལྡན་པས། ཧཱུཾ། ང་ནི་སངས་རྒྱས་ཀུན་གྱི་བདག །གསང་བའི་དཀྱིལ་འཁོར་ཆེན་པོ་འདིར། །དབང་མཆོག་སྒྲུབ་པའི་ལས་བྱེད་ཀྱིས། །བགེགས་རྣམས་ཐམས་ཅད་གཞན་དུ་དེངས། །ཞེས་བརྗོད་པས་ཐུགས་ཀའི་ཧཱུཾ་ལས་ཁྲོ་བོའི་སྤྲིན་མི་བཟད་པར་སྤྲོ་ཞིང་རྐང་མཐིལ་གཉིས་སུ་ཧཱུཾ་ལས་འབར་བའི་རྡོ་རྗེ་རེ་རེས་མཚན་པར་བསམ་ལ། རྡོ་རྗེ་གསོར་བ་དང་དྲིལ་བུ་འཁྲོལ་བཞིན་པར་ཧཱུཾ་བཞི་པའི་སྔགས་དྲག་ཏུ་བརྗོད། གུ་གུལ་གྱིས་བདུག །ཡུངས་ཐུན་གྱིས་བྲབ་པ་སོགས་དྲག་པོའི་ཚམ་རྔམས་དང་བཅས་པའི་རྡོ་རྗེའི་འགྲོས་ཀྱིས་གར་བྱེད་ཅིང་གཡས་སུ་བསྐོར་བའི་མཐར་ཁྲོོ་བོ་རང་རང་གི་སྔགས་རྣམས་བརྗོད་བཞིན་དུ་ཁྲོ་བཅུའི་སྟངས་སྟབས་དང་བཅས་པས་བགེགས་རྣམས་བསལ་བར་བྱའོ། །ལྔ་པ་ས་བསྲུང་བ་ནི། བཛྲ་མ་ཧཱ་ཤྲཱི་ཧེ་རུ་ཀ་ཞེས་བརྗོད་པས་བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་སོགས་ནས། མཚོན་ཆ་སྣ་ཚོགས་པའི་སྤྲིན་སྤྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་པའི་བར་སྒྲུབ་ཐབས་བཞིན་དང་། འདི་དང་འབྲེལ་བར་ཕུར་བུས་གདབ་པའི་ལས་བྱས་ཀྱང་སྐབས་སུ་བབ་པ་ཙམ་ཡིན་ཅིང་། གཞན་ཡང་འདི་དག་ཏུ་ཁྲོ་བོ་རོལ་པའི་སྟབས་དང་། མ་མོའི་མཆོངས་སྟབས་དང་། ཕྲ་མེན་གྱི་རྔམས་སྟབས་ལ་སོགས་པའི་འགྲོས་རྣམས་ཀྱིས་དཀྱིལ་འཁོར་གྱི་མཐའ་བསྐོར་ཞིང་འབར་བའི་མིག་གི་ལྟ་སྟངས་གཡོ་བ་དང་བཅས་པས་སྐུའི་ཕྱག་རྒྱ་རྣམས་བསྒྱུར་བ་ལས་ཁྲོ་བོའི་ཚོགས་ཀྱི་སྤྲིན་མཐའ་ཡས་པར་སྤྲོས་ནས་མཚོན་ཆའི་ཆར་མི་བཟད་པ་འབེབས་ཤིང་འབར་བ་མེའི་ཕྲེང་བ་དྲག་པོར་འཁྲུག་པས་བདུད་བགེགས་ལོག་པར་འདྲེན་པ་ཐམས་ཅད་ཚར་བཅད་ནས་ཕྱོགས་ཐམས་ཅད་དུ་རྡོ་རྗེ་བསྲུང་བའི་ར་བས་བཅིངས་ཏེ་ཅིས་ཀྱང་མི་ཤིགས་པར་བསམ་མོ། །དེ་ལྟར་ཆོས་ཐམས་ཅད་སེམས་ལས་ལོགས་སུ་མེད་ལ། སེམས་ཀྱང་སྟོང་ཉིད་ནམ་མཁའི་རང་བཞིན་དུ་གནས་པས་བར་དུ་གཅད་བྱ་གཅོད་བྱེད་ཐམས་ཅད་དམིགས་སུ་མ་གྲུབ་པ་དེ་ཁོ་ན་ཉིད་དོ། །ཞེས་ངེས་པར་བྱས་ནས་བསྲུང་བའོ། །དེ་ཡང་ས་བསྲུང་བ་འདིའི་ཁོངས་སུ་ཕྱི་ནང་གི་མཚམས་གཅོད་པ་སོགས་འབྱུང་ཡང་དབང་རྐྱང་དང་སྒྲུབ་མཆོད་དཀྱུས་མ་ཙམ་ལ་དེ་དག་མེད་ཀྱང་ཆོ་ག་ཉམས་པར་མི་འགྱུར་ཏེ། འདི་ཙམ་གྱིས་དོན་གྱི་དགོས་པ་གྲུབ་པའི་ཕྱིར་དང་། སྐབས་འདིར་བསྲུང་བའི་དངོས་གཞི་ཁྲོ་བོ་བཅུའི་བསྲུང་འཁོར་ལ་བརྟེན་ནས། དེ་དང་འབྲེལ་བར་རོལ་པའི་མཚམས་སོགས་ལྷག་མ་གསུམ་པོ་ཡང་འབྲེལ་ཆགས་སུ་ཚང་བས་གཞུང་དངོས་བསྟན་གྱི་དོན་ལ་འབྱོར་བའོ། །དྲུག་པས་བྱིན་གྱིས་རློབ་པ་ནི། ལྷ་ལྷག་པར་གནས་པ་དང་དོན་གཅིག་པས་འོག་ཏུ་སྟོན་ནོ། །དེ་དག་ནི་སའི་ཆོ་ག་སྟེ་ནུབ་དང་པོའི་བྱ་བའོ། །བཞི་པ་སྟ་གོན་ནམ་ལྷག་པར་གནས་པའི་ཆོ་ག་ལ། ཡན་ལག་རབ་གནས་དང་། ཡན་ལག་ཅན་གྱི་རབ་གནས་སོ། །དང་པོ་ལ་ཤོམ་དང་ཆོ་ག་དངོས་གཉིས་ཀྱི། དང་པོ་ནི། རྩ་བའི་དཀྱིལ་འཁོར་གང་དུ་བྱ་བའི་དབང་ལྡན་གྱི་ཕྱོགས་སུ་ཁྲུ་དོ་པའི་མཎྜལ་དྲིས་བྱུགས་ལ་སྣ་ཚོགས་པདྨ་འདབ་མ་བརྒྱད་པ་རྡོ་རྗེའི་ར་བ་དང་བཅས་པ་བྲི། དེའི་དབུས་སུ་ལས་བུམ་ཆས་ལྡན་རྡོ་རྗེ་རྒྱ་གྲམ་གྱིས་མཚན་མ་ཅན་དགོད། ཤར་དུ་ཡེ་ཤེས་དང་ལས་ཀྱི་ཐིག་སྐུད། ལྷོར་རྡོ་རྗེ། ནུབ་ཏུ་ཐོད་ཆུ་བདུད་རྩི་ལྔ་དང་ལྡན་པ་དང་གོ་མ་ཡེའི་དམ་རྫས་ལྔའི་བྷནྡྷ། བྱང་དུ་དྲིལ་བུ། དབུས་དང་མཚམས་ཀྱི་པད་འདབ་བཞི་ལ་རྡུལ་ཚོན་ལྔ་མདོག་རིགས་སྡེབས་པ་དཔའ་བོ་འབྲུ་ལྔ་བཀོད་པ་དང་། དེ་དག་གི་མཐར་མཆོད་གཏོར་སྤྱི་དང་མཐུན་པར་བཤམ་མོ། །གཉིས་པ་ནི། སྔོན་འགྲོ་ནས་བཟུང་བདག་གི་རྣལ་འབྱོར་བཟླས་པའི་བར་སྔོན་དུ་འགྲོ་བས་ལས་བུམ་བསང་སྦྱངས། སྟོང་པའི་ངང་ལས་བུམ་པའི་གནས་སུ་བྷྲཱུཾ་ཞེས་བརྗོད་པས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཉི་མའི་གདན་ལ། ཧཱུཾ་བིགྷྣཱནྟ་ཀྲྀཏ་ཕཊ། ཅེས་བརྗོད་པས་ཁྲོ་བོ་མི་འཆི་ཐབས་སྦྱོར་ལྗང་ནག་རྒྱ་གྲམ་དང་དྲིལ་བུ་འཛིན་པའི་སྐུར་གྱུར་པར་བསམ་ལ། ལས་རིགས་བདག་པོར་བྱས་པའི་ཡེ་ཤེས་ལྔས་དབང་བསྐུར། སྐུ་གསུང་ཐུགས་བྱིན་གྱིས་རློབ། བཛྲ་ས་མཱ་ཛཿས་སྙན་གསན་དབབ། ཨེ་ཧྱེ་ཧིས་སྤྱན་དྲངས། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམ། ཀཱ་ཡ་ཝཱ་ཀ་ཙིཏྟ་བཛྲས་བརྟན་པར་བྱས། ཀུན་བཟང་ཞབས་བསིལ་བཞི་བསྣོལ་གྱིས་མཆོད། རྡོ་རྗེ་རྩེ་གཅིག་པའི་རྒྱས་ལས་བུམ་ལ་རེག་སྟེ། ཧཱུཾ་བིགྷྣཱནྟ་ཀྲྀཏ་ཕཊ། ཞེས་བརྒྱ་རྩ་བརྒྱད་བཟླས་པའི་མཐར། ལྷ་འོད་དུ་ཞུ་ནས་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བར་བསམ་ཞིང་། བུམ་ཆུ་འཐོར་ཡབ་ཀྱིས་བླངས་ཏེ། ༀ་སྭ་བྷཱ་ཝ་བི་ཤུདྡྷེ་དྷརྨ་ཏཱ་བཛྲ་སིདྡྷི་ཧཱུཾ། ཞེས་བརྗོད་ཅིང་། བདག་གནས་ཡོ་བྱད་ཐམས་ཅད་ལ་གཏོར་བས་ཉེས་སྐྱོན་ཐམས་ཅད་དག་པར་བསམ་མོ། །དེ་ནི་ལྷག་གནས་ཐམས་ཅད་ལ་བསང་གཏོར་གྱི་ཕྱིར་སྔོན་དུ་འགྲོ་བའོ། །ཐིག་གི་ལྷག་གནས་ནི། རྒྱུ། གྲོགས། ཚད། གྲངས། རབ་གནས། གདབ་ཐབས། སྤྱོད་ལམ་དང་བདུན་ལས། རྒྱུ་དམ་ཚིག་གི་ཐིག་སྐུད་རོ་སྐྲའམ་པདྨའི་རྒྱུས་པ་དང་། ཡེ་ཐིག་གི་རྒྱུ་རྡོ་རྗེའི་རྒྱུན་ཐག་ཞེས་བ་སུ་ཏ་སྟེ། གཉིས་ཀའང་རས་བལ་གཙང་མ་དང་སྦྲེལ་བའོ། །གྲོགས་གཞོན་ནུ་མ་མཚན་ལྡན་ནམ་དེར་བཏགས་པའོ། །ཚད་སྲིད་དུ་མཎྜལ་འཁོར་ཁྱུད་ཅེས་པ་འགྲེལ་ཆུང་དུ་དཀྱིལ་འཁོར་ལས་ཉིས་འགྱུར་དུ་བཤད་པ་བཞིན་ཏེ། དེ་ཡང་འཇུར་མདུད་མེད་པའོ། །སྦོམས་སུ་སྒོའི་ཉི་ཤུ་ཆ་སྟེ་ཆ་ཆུང་གི་ལྔ་ཆའོ། །གྲངས་ནི་ཡེ་ཤེས་ཀྱི་ཐིག་སྐུད་ཚོན་སྣ་ལྔས་བསྒྱུར་བ་ལྔ་ཚན་ལྔའམ་ལྔ་ཚན་གཅིག་དང་། དམ་ཚིག་གི་ཐིག་སྐུད་དཀར་དམར་སྔོ་བ་གསུམ་མཚན་གསུམ་མམ་གསུམ་ཚན་གཅིག་གོ། །རབ་གནས་ནི། བདག་ཉིད་དཀྱིལ་འཁོར་གྱི་བདག་པོར་གསལ་བའི་གནས་ལྔར། ཧཱུཾ་ༀ་སྭཱ་ཨཱཾ་ཧཱ་དང་། ཐིག་གཡོག་རིགས་ཀྱི་ཡུམ་དུ་གསལ་བའི་གནས་ལྔར་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པ་རྣམས་རིགས་ལྔ་ཡབ་ཡུམ་སོ་སོའི་སྐུར་གྱུར་པའི་གཙོ་བོ་ཡབ་ཡུམ་གྱི་གནས་གསུམ་དུ་ༀ་ཨཱཿཧཱུཾ་གིས་མཚན་པ་ལས་འོད་ཟེར་འཕྲོས། དེ་བཞིན་གཤེགས་པ་རྣམས་རྗེས་སུ་བསྐུལ། སྐུ་གསུང་ཐུགས་ཀྱི་དབང་ཐོབ། སླར་ཡང་སྙིང་གའི་འོད་ཟེར་གྱིས་མཁའ་ཁྱབ་ཀྱི་རྒྱལ་བ་ཐམས་ཅད་རིགས་ལྔའི་རྣམ་པར་སྤྱན་དྲངས། དེ་རྣམས་ཀྱིས་ཡེ་ཤེས་ལྔས་དབང་བསྐུར་ནས་འོད་དུ་ཞུ་བ་རང་ལ་བསྟིམ་ནས། ཡབ་ཀྱི་གསང་གནས་རྡོ་རྗེ་རྩེ་ལྔ་པའི་བུམ་པར་ཧཱུཾ་ཡིག་དང་། ཡུམ་གྱི་མཁའ་ལ་པདྨ་འདབ་མ་བརྒྱད་པའི་སྙིང་པོར་ཧྲཱིཿཡིག་འབར་བས་མཚན་པར་གྱུར་པ་ལ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་ཐིག་སྐུད་དང་རོ་གཅིག་པ་ཡེ་ཤེས་ལྔའི་ངོ་བོར་སྤྲོས་པ་ཡུམ་གྱི་མཁའ་ཀློང་དུ་འབྱུང་བར་འགྱུར་བའི་དཀྱིལ་འཁོར་དུ་ཤར་བར་བསམ་ལ། ས་བོན་བཅུ་པོ་བརྗོད་བཞིན་པར་ཡབ་ཀྱིས་སྙོད་ནས་ཡུམ་གྱིས་འཁེལ་བ་ནི་ཡེ་ཐིག་གི་སྐུད་པ་བྱིན་གྱིས་རློབ་པའོ། །དེ་བཞིན་དུ་བྱང་སེམས་སྲད་བུ་དང་རོ་གཅིག་པ་སྐུ་གསུང་ཐུགས་ཀྱི་ངོ་བོར་སྤྲོ་བ་དང་། འབྲུ་གསུམ་བརྗོད་བཞིན་པར་སྙོད་འཁེལ་བྱ་བ་ནི་ལས་ཐིག་གི་བྱིན་རླབས་སོ། །འདིར་ཐིག་སྐུད་བརླབ་པ་དང་གདབ་པའི་ཆོ་ག་དོན་གཅིག་ཏུ་འདུ་བའི་ཕྱིར་འོག་ཏུ་གདབ་པའི་སྐབས་དང་སྦྲེལ་ན་ལེགས་པར་འགྱུར་རོ། །གདབ་ཐབས་དང་སྤྱོད་ལམ་ནི་འོག་ཏུ་སྟོན་ནོ། །དེ་ནས་ཚོན་གྱི་ལྷག་གནས་ནི། དགོས་ཆེད། རྒྱུ། གྲངས། རབ་གནས། དགྱེ་ལུགས། ཉེས་སྤོངས་དང་དྲུག་ལས། དགོས་ཆེད་ནི། མཚོན་བྱ་ཡེ་ཤེས་ལྔ་མཚོན་བྱེད་རྡུལ་ཚོན་དུ་བསྟན་པ་སྟེ། མཚོན་༼ཀུན་༽ པ་འཁྲིད་པར་བྱེད་པ་ཡིས། །རྡུལ་ཚོན་འདུ་བྱས་རྒྱུ་རྣམས་ལས། །བརྙན་མ་ཡི་ནི་དཀྱིལ་འཁོར་དག །སོ་སོར་རྟོགས་ཏེ་བཤད་པར་བྱ། །ཞེས་པ་བཞིན་ནོ། །རྒྱུ་ནི། ར བ་རིན་པོ་ཆེ་ལྔའི་ཕྱེ་མ་དང་། འབྲིང་འབྲུའི་ཕྱེ་མ་ཁ་དོག་བསྒྱུར་བ་དང་། ཐ་མ་སོ་ཕག་ལ་སོགས་པའི་ཕྱེ་མ་ཚོན་སྣ་ལྔས་ཁ་བསྒྱུར་བའོ། །གང་ལྟར་ཡང་ཐལ་ཆེན་དང་ཅུང་ཟད་བསྲེས་པ་སྟེ། རིན་ཆེན་༼ཁུག་༽ལྔ་དང་འབྲས་ལྔ་དང་། །འབྱུང་ཁུངས་ལྔ་ལྡན་ཁ་དོག་ལ། །ཞེས་པ་བཞིན་ནོ། །གྲངས་ནི། ཚོན་སྣ་ལྔ་སོ་སོར་ལ་ལྔ་ཚན་དུ་ཕྱེ་བའམ། ལྔ་ཚན་གཅིག་གིས་ཀྱང་སྟེ། ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །ཞེས་པ་བཞིན་ནོ། །རབ་གནས་ནི། བསང་སྦྱངས། སྟོང་པའི་ངང་ལས་ཚོན་སྣ་ལྔ་སོ་སོའི་གནས་སུ། ཧཱུཾ་ༀ་སྭཱ་ཨཱཾ་ཧཱ། མཱུཾ་ལཱཾ་མཱཾ་པཱཾ་ཏཱཾ། ཞེས་བརྗོད་པས་དམ་ཚིག་གི་ཚོན་དེ་བཞིན་གཤེགས་པ་རིགས་ལྔའི་ངོ་བོར་གནས་པར་གྱུར་པ་རྣམས་གཙོ་བོའི་སྐུ་ལ་ཞུགས། བྱང་ཆུབ་ཀྱི་སེམས་སུ་ཞུ་བ་ཚོན་རྩི་ལ་ཐིམ་པར་བསམ་ཞིང་། ས་བོན་བཅུ་པོ་དང་། ༀ་ཨཱཿསརྦ་པཉྩ་རཏྣ་ས་མ་ཡེ་ཧཱུཾ་ཧཱུཾ། ཞེས་ཅི་ནུས་བཟླས་པའི་མཐར། ཧཱུཾ་ཞེས་བརྗོད་པས་རིན་པོ་ཆེའི་རྡུལ་ཕྲ་རབས་ཀྱི་རྡུལ་ཚོན་འབར་བར་བསམ་མོ། །དགྱེ་བ་དང་། ཉེས་སྤོང་ནི་འོག་ཏུ་སྟོན་ནོ། །དེ་ནས་རྡོ་རྗེ་དང་དྲིལ་བུའི་རབ་གནས་ནི། སྔར་བཞིན་བསང་སྦྱངས། སྟོང་པའི་ངང་ལས་རྡོ་རྗེའི་ལྟེ་བ་ལ་དཔལ་ཆེན་པོ། ཡར་གྱི་རྭ་ལྔ་ལ་ཁྲག་འཐུང་རིགས་ལྔ། མར་གྱི་རྭ་ལྔ་ལ་རིགས་ཀྱི་ཡུམ་ལྔ། ཡས་མས་ཀྱི་པདྨའི་འདབ་མ་བརྒྱད་ལ་གནས་མ་བརྒྱད་དང་། ཡུམ་མ་བརྒྱད། དྲིལ་བུའི་ལྟེ་བ་དང་པདྨའི་འདབ་མ་བརྒྱད་ཀྱི་ཕྱོགས་བཞིར་རིགས་ཀྱི་ཡུམ་ལྔ། མཚམས་བཞིར་གསང་བའི་ཡུམ་བཞི། ཞལ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། རྩེ་མོའི་རྡོ་རྗེ་ཁྲག་འཐུང་རིགས་ལྔ་རྣམས་ཀྱི་སྐུར་བསྐྱེད། རྩེ་དགུ་པ་ལ་ནི། མཚམས་ཀྱི་རྭ་བཞི་ལ་ལུང་གི་ཁྲོ་བོ་ཡབ་ཡུམ་བསྒོམ་པ་ཙམ་ཁྱད་པར་རོ། །གང་ལྟར་ཡང་བསྐུར། རློབ། དབབ། དྲངས། བསྟིམ། བརྟན། མཆོད་ནས། ཧཱུཾ་ཨ་ཞེས་བརྗོད་པས་ལྷ་རྣམས་འོད་དུ་ཞུ། བཛྲ་གྷཎྜེ། ཞེས་བརྗོད་པས་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ་དང་། གཉིས་ཀའང་དོན་དམ་པར་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ཧཱུཾ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་གཉིས་མེད་པའི། །འཁོར་དང་མྱ་ངན་འདས་པ་ཡིས། །ཆོས་ལ་དེ་བཞིན་དབང་བསྒྱུར་ཤོག །ཅེས་བརྗོད་ཅིང་རྡོ་རྗེ་གསོར། དྲིལ་བུ་དཀྲོལ་བར་བྱའོ། །ཐོད་ཆུའི་རབ་གནས་ནི། བསང་སྦྱངས། སྟོང་པའི་ངང་ལས་དམ་རྫས་ཀྱི་གནས་སུ། ཧཱུཾ་ཧ་ཧེ་ཕཊ་བྷྱོ་རཾ་ཕཊ་ཛཿ ཞེས་བརྗོད་པས་ཁྲག་འཐུང་རོལ་པའི་དཀྱིལ་འཁོར་ཐམས་ཅད་གསལ་བར་བསྐྱེད། བསྐུར། རློབ། དབབ། དྲངས། བསྟིམ། བརྟན། མཆོད་ལ། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་ཅུང་ཟད་བཟླས་ལ། ཧཱུཾ་ཞེས་བརྗོད་པས་འོད་དུ་ཞུ་བ་ཡེ་ཤེས་ཀྱི་བདུད་རྩིར་འཁྱིལ་བར་བསམ་མོ། །གཉིས་པ་ཡན་ལག་ཅན་གྱི་རབ་གནས་ལ། ལྷ། བུམ་པ། སློབ་མ་ལྷག་པར་གནས་པ་དང་གསུམ་ལས། དང་པོ་ལྷ་ལྷག་པར་གནས་པ་ལ། གོ་མ་ཡེ་བཏང་བ། ཐིག་གདབ་པ། ལྷག་གནས་དངོས་དང་གསུམ་ལས། དང་པོ་ནི། སྔར་འདུ་བྱས་པའི་སྟེགས་བུ་འཇམ་ཞིང་ལྷམ་པ་ལ། དམ་རྫས་བདུད་རྩི་རྣམ་པ་ལྔས་ཆག་ཆག་འདེབས་བཞིན་པས། ཧཱུཾ། རང་བྱུང་རྣམ་དག་བྱིན་བརླབས་ཅན། །ཡེ་ཤེས་རང་བྱུང་གྲུབ་པའི་རྫས། །བཀའ་གསང་རྨད་བྱུང་ཕོ་བྲང་དུ། །དུར་ཁྲོད་རྫས་ལྔས་སྐྱང་ནུལ་བྱ། །པཉྩ་ཨ་མྲྀ་ཏ་མཎྜ་ལ་ཧཱུཾ། ཞེས་ཁྱེམ་མེད་པར་བྱུག་གོ། །གཉིས་པ་ཐིག་གདབ་པ་ལ། སྔོན་དུ་བྱ་བ་དང་། ཐིག་གདབ་པ་དངོས་ལས། དང་པོ་ནི། རྡོ་རྗེ་རྒྱལ་པོ་དང་། རྒྱལ་ཐེབས་སོ་སོའི་ཡུམ་དང་བཅས་པ་བཞིའམ། སློབ་དཔོན་ཐིག་གཡོག་དང་བཅས་པ་གཉིས་ཀྱིས་ཀྱང་སྟེ། རང་རང་གི་ཆས་སུ་ཞུགས་པའི་དཀྱིལ་འཁོར་གྱི་བདག་པོ་ཡབ་ཡུམ་གྱི་སྐུ་ལ་བཀོད་པའི་རིགས་ལྔ་དང་བཅས་པ་གསལ་གདབ་ཅིང་། མཁའ་གསང་བརླབ་པ་རྣམས་སྔར་ཐིག་སྐུད་སྒྲུབ་པའི་སྐབས་བཞིན་བྱས་ནས་བགེགས་བསྐྲད་དོ། །སྟོང་གསུམ་གསང་བའི་དཀྱིལ་འཁོར་དུ། །རྨད་བྱུང་རྡོ་རྗེའི་ཐིག་འགྱེད་ན། །གསང་བའི་དམ་ལ་མི་གནས་པའི། །འབྱུང་པོ་སྐྱེ་བོ་གདོལ་པ་ཅན། །འདི་རུ་མ་འདུག་གཞན་དུ་དེངས། །ཞེས་བརྗོད་ཅིང་། ཤངས་ཀྱི་ཧཱུཾ་རིང་དང་བྱང་ཆུབ་ཀྱི་སེམས་སྤྲིན་ཁྲོ་བོ་དང་མཚོན་ཆའི་ཚོགས་སུ་སྤྲོས་པས་བགེགས་ཐམས་ཅད་ཚར་བཅད་ནས་ཚུར་འདུས་པ་བསྲུང་བའི་གུར་དུ་འཁྲིགས་པར་བསམ་མོ། །དེ་ནས་ཐིག་གདབ་པའི་ལས་ཡུམ་ལ་བསྒོ་བ། ཤེས་རབ་ལྷ་མོ་གསང་བའི་ཡུམ། །འདོད་དགུར་སྒྱུར་བའི་འཕྲུལ་མོ་ཆེ། །ཆགས་པའི་ཚུལ་གྱི་ཐབས་ལ་འདུད། །གཡོན་དུ་འཁྲིལ་ཞིང་གཡས་སུ་འཁྱུད། །འཛུམ་པའི་མདངས་ཀྱིས་ཟླ་གམ་སྦྱོར། །གསང་བའི་བྱང་ཆུབ་སེམས་འདྲེན་མ། །ཁྱོད་ནི་ལྷ་མོ་རྒྱལ་བའི་སྲས། །རང་བཞིན་ཆོས་ཀྱི་མཚན་ལྡན་མ། །རྡོ་རྗེ་ལས་ཀྱི་ཡུམ་ཡིན་གྱི། །གསང་བའི་ལས་རྣམས་ཀུན་བྱོས་ཤིག །ཅེས་བསྒོོ་བར་བྱའོ། །གཉིས་པ་ཐིག་གདབ་པ་དངོས་ལ། གནམ་ཐིག་གདབ་པ་དང་། ས་ཐིག་གདབ་པ་གཉིས་ལས། དང་པོ་ནི། ཡབ་ཡུམ་གཉིས་ཀྱི་ལག་པའི་འཁོར་ལོར་ཉི་ཟླ་ལ་བྱང་ཆུབ་སེམས་ཀྱི་ཐིག་ལེ་རིགས་ལྔའི་ཡི་གེའི་ངོ་བོར་གནས་པར་བསམས་ཏེ། སློབ་དཔོན་ནུབ་ནས་ཤར་དུ་ཕྱོགས་པའི་གཡོན་པའི་ཁུ་ཚུར་གྱི་ཐིག་སྐུད་བཟུང་བའི་རྩེ་མོ་གཡས་པས་ཐིག་གཡོག་ཤར་ནས་ནུབ་ཏུ་ཕྱོགས་པ་ལ་གཏད་དེ། ལས་ཀྱི་རྡོ་རྗེ་འབར་བ་འདིས། །རྡོ་རྗེ་གར་གྱི་ཕྱག་རྒྱ་ཡིས། །བྱང་ཆུབ་སེམས་ཀྱི་ཐིག་འདི་དྲོངས། །རྡོ་རྗེ་གསང་བའི་ལས་འདི་གྱིས། །ཙནྡ་དྷ་ར་ཧྲཱིཿཞེས་གླུར་བླངས་ཏེ་གཏད་པ་ན་བྱང་ཆུབ་སེམས་ཀྱི་སྤྲིན་ཡེ་ཤེས་ལྔའི་རང་བཞིན་ཐིག་སྐུད་དང་རོ་གཅིག་པར་སྤྲོས་པས་ཕྱི་ནང་གསང་བ་རང་བཞིན་གྱི་དཀྱིལ་འཁོར་ཐམས་ཅད་གསལ་ཞིང་མཚོན་པར་བསམ་ཏེ། ཆོས་ཀྱི་དབྱིངས་ཀྱི་གཞལ་ཡས་སུ། །མི་དམིགས་གདལ་བའི་མཎྜ་ལ། །ཡེ་ཤེས་ལྔ་ཡི་ཐིག་འཕྲོས་པས། །བདེ་ཆེན་རྣམ་པ་ཕྱག་རྒྱར་འབར། །ཞེས་པ་ཙམ་བརྗོད་ཅིང་གནམ་ཐིག་ཕྱོགས་བཞིར་རྒྱ་གྲམ་དུ་བྲི་བའམ། ཡང་ན་ནུབ་ནས་ཤར་ཏུ་བལྟ་བས་ཚངས་ཐིག་དང་པོ་དང་། ལྷོ་ནས་བྱང་དུ་བལྟ་བས་ཚངས་ཐིག་གཉིས་པ་ཙམ་བཏབ་པས་ཀྱང་རུང་ཞིང་། དེའི་སྟེང་དུ། མེ་ནས་རླུང་དུ་བལྟ་བས་ཟུར་ཐིག་དང་པོ། བདེན་བྲལ་ནས་དབང་ལྡན་དུ་བལྟ་བས་ཟུར་ཐིག་གཉིས་པ་དང་། མེ་ནས་བྱང་དུ་བལྟ་བས་ཤར་གྱི་རྩ་ཐིག །རླུང་ནས་ལྷོར་བལྟ་བས་ནུབ་ཀྱི་དང་། སླར་ཡང་རླུང་ནས་ཤར་དུ་བལྟ་བས་བྱང་གི་དང་། མེ་ནས་ནུབ་ཏུ་བལྟ་བས་ལྷོའི་རྩ་ཐིག་སྟེ། ཐིག་ཆེན་བརྒྱད་པོ་དཀྱིལ་འཁོར་སྟེང་གི་ནམ་མཁའ་ལ་སེ་གོལ་གྱི་སྒྲ་དང་བཅས་པས་གདབ་ཅིང་། སྔགས་ནི་ཐམས་ཅད་ལ། ༀ་ཛྙཱ་ན་ཙཀྲ་སཱུ་ཏྲ་མ་ཏི་ཀྲ་མ་ཧཱུཾ། ཞེས་པ་ཁོ་ནའོ། །གཉིས་པ་ནི། དམ་ཚིག་གི་ཐིག་སྐུད་དྲི་ཞིམ་པོའི་ཐིག་ཆལ་ལས་ཕྱུངས་པ་རྡོ་རྗེ་གསུམ་གྱི་ང་རྒྱལ་དང་ལྡན་པས་གཏོང་ལེན་སྔར་བཞིན་བྱས་ནས་ཡེ་ཐིག་གདབ་པའི་རིམ་པ་དང་མཐུན་པར། དང་པོར་ཤར་ནུབ་ཚངས་ཐིག་གདབ། །དབུས་ནས་ཕྱོགས་བཞིར་མཚན་མ་བྱ། །ཤར་ནུབ་ཚད་ནས་གཉིས་པ་དང་། །ཕྱོགས་བཞི་ཚད་ནས་ཟུར་ཐིག་བཙལ། །ཚངས་པའི་ཐིག་གི་ཕྱོགས་བཞི་རུ། །ཆ་མཉམ་གསུམ་གསུམ་རན་པར་གདབ། །དང་པོ་ལྟེ་བ་འཁོར་ལོའི་ས། །ཕྱི་མ་གཉིས་པོ་ཆ་ལྔ་རུ། །བགོས་པའི་ནང་མ་བཞི་པོ་ཡང་། །ཕྱེད་ཕྱེད་བགོས་པ་ནང་སྒོ་བརྒྱད། །ཅེས་སམ། ཡང་ན་དབུས་ནས་རྟ་བབས་ཀྱི། །འཁོར་ལོའི་གདུགས་ཀྱི་ཏོག་རྩེའི་བར། །ཆ་མཉམ་བདུན་དུ་གཞལ་བ་ལས། །ཆ་གཅིག་ལྟེ་བ་འཁོར་ལོའི་ས། །དེ་ལྷག་ཆ་མཉམ་གཉིས་བཅད་པའི། །ནང་མ་བརྒྱད་གཏུབས་ནང་སྒོ་བརྒྱད། །ཅེས་པ་སྟེ། དཀྱིལ་འཁོར་ཆེན་པོ་བཞེངས་པ་ལ་ཕྱི་མ་འདི་ལེགས་ཤིང་། གང་ལྟར་ཀྱང་། ཕྱི་མ་ཕྱི་ཡི་སྒོ་ཡིན་ཏེ། །རེ་རེའང་ཆ་གསུམ་དག་ཏུ་བགོ། །དེ་ལྟར་བགོས་པའི་ནང་མ་རྣམས། །ཁྱམས་ཡིན་བར་མ་དབུས་དོར་མཐའ། །བཏབ་པའི་རྩིག་པ་འདོད་སྣམ་དང་། །ཕ་གུའི་གནས་ཡིན་ཕྱི་མ་ཉིད། །ཕྱེད་གདབ་ཕྱི་མ་བསིལ་བ་ནི། །མུན་པ་མདའ་ཡབ་ཤར་བུའི་གནས། །ནང་སྒོ་བརྒྱད་པོའི་གཡས་གཡོན་དུ། །ཚངས་པའི་ཐིག་ལས་རང་ཚད་ཀྱི། །ཆ་ཕྲན་ལྔ་གདབ་སྒོ་ཁྱུད་དང་། །རྩིག་པའི་གནས་སུ་འགྱུར་བ་ཡིན། །ཕྱི་མའི་སྒོ་ཡི་གཡས་གཡོན་དུ། །རང་ཚད་ཆ་ཆེན་གཉིས་གཉིས་དང་། །མདའ་ཐིག་ཕྱི་རུ་ཆ་ཆེན་གསུམ། །བཏབ་པའི་གཡས་གཡོན་ཆ་ཆེན་གྱི། །དང་པོ་ཕྱེད་གདབ་ཕྱི་མ་བསིལ། །གཉིས་པ་ཆ་བཞིར་བགོས་པ་རྣམས། །འགྲམ་ལོགས་རྩིག་པ་མུན་པ་དང་། །ཀ་བ་ཀ་རྒྱན་རྣམས་ཀྱི་ས། །ཕྱི་ཡི་ཆ་ཆེན་གསུམ་པོ་ལས། །ནང་མ་གཉིས་པོ་ཆ་བཞི་སྟེ། །རྟ་བབས་བརྒྱད་པོ་ཆ་མཉམ་ལས། །དང་པོ་ཀ་རྒྱན་མཐའ་དང་མཉམ། །གཉིས་གསུམ་དེ་ལས་གཅིག་ཕྱིར་དགྱེད། །བཞི་པ་གཉིས་བསྐུམ་ལྔ་པ་གཅིག །ཕྱིར་འཕྱར་དྲུག་པ་གཉིས་སུ་བསྐུམ། །བདུན་བརྒྱད་རིམ་བཞིན་རེ་རེ་འཕྱར། །རིམ་པར་རྟ་རྐང་ཆུ་སྐྱེས་དང་། །སྒྲོམ་དང་ཟ་ར་ཚགས་སྣ་མཆོད། །སྒྲིལ་འཕྱང་ཤར་བུ་ཁྱུང་མགོའོ། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཛོམ་ས་ནས་བཟུང་སྟེ། །ཆ་ཕྲན་གཉིས་ཀྱི་གླང་རྒྱབ་དབུས། །མུན་པའི་ཕྱི་ཐིག་ཚངས་གནས་ཀྱི། །གཡས་གཡོན་ཆ་ཕྲན་གཉིས་འདས་ནས། །སྔར་བཞིན་བསྐོར་བ་མུན་པའི་མཐོངས། །མུ་རན་ཆ་ཕྲན་གཅིག་གིས་བསྐོར། །འཁོར་ལོ་ཉིས་འབྱུང་པདྨ་དང་། །གདུགས་ནི་ཆ་ཕྲན་རེ་རེའོ། །སྣ་ཚོགས་རྡོ་རྗེའི་གཡས་གཡོན་རྭ། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་གཉིས་ཕྱིན་འཛོམ་ས་ནས། །བཟུང་སྟེ་ཀ་རྒྱན་རྩེ་ནས་བསྐོར། །དེ་ནས་ཕྲེང་གཉིས་ཕྱི་རུ་གཅིག །ཕྱིན་ཏེ་སྔ་མའི་ཚད་དེས་བསྐོར། །དབུས་རྭ་རྩ་བའི་རྒྱ་ཚད་དུ། །ཆ་ཆེན་གཅིག་ཡིན་མི་མཐོང་ཡང་། །རིམ་ཕྲ་རྩེ་མོ་ཆ་ཕྲན་གཉིས། །པད་འཁོར་གདུགས་ཀྱི་འོག་ཏུ་བྲི། །ལྟེ་བའི་སུམ་ཆ་ཟླུམ་པོར་བསྐོར། །དེ་མཐར་གསུམ་བསྐོར་ཆ་བྲན་རེ། །དེ་མཐར་གྲུ་ཐིག་ལ་རེག་པར། །བསྐོར་བའི་ནང་དུ་ཆ་བྲན་གཅིག །རིམ་པར་བསྐོར་བ་ལྟེ་བ་དང་། །མུ་ཁྱུད་རྩིབས་དང་རྩིབས་བརྟེན་ནོ། །ཕྱི་ཡི་མདའ་ཐིག་ཕྱི་རོལ་དུ། །ཆ་ཕྲན་གཉིས་གཉིས་ཆ་ཆེན་གཅིག །ཕྱེད་དང་གཅིག་ཏུ་བསྐོར་བ་ནི། །རིག་འཛིན་སྣམ་བུ་པདྨ་དང་། །དུར་ཁྲོད་རྡོ་ར་མེ་རིའི་ས། །སྟེང་ཁང་ཞི་བའི་དཀྱིལ་འཁོར་ནི། །ལྟེ་བ་ནས་བཟུང་མེ་རིའི་བར། །སྒྱུ་འཕྲུལ་ཞི་བ་དང་མཚུངས་ཕྱིར། །གཞན་དུ་བཤད་ལས་ཤེས་པ་སྟེ། །མཎྜལ་སོགས་ལ་འགོད་པ་ཡིན། །ཞེས་པ་བཞིན་ཤེས་པར་བྱ་བ་སྟེ། །མན་ངག་གིས་བཀྲལ་བའི་ལུགས་སོ། །རྒྱུད་ཀྱི་དངོས་བསྟན་ནི། །འདིར་ནི་རྡོ་རྗེའི་མུ་ཁྱུད་བདུན། །འབྱུང་བའི་རིམ་པ་དྲུག་བར་དུ། །འཁོར་ལོ་དྲུག་བརྩེགས་སྙིང་པོ་འབར། །ཞེས་སོགས་གསུངས་པ་བཞིན་ཏེ། གང་གི་ཚེ་ཡང་ཁྲོ་དཀྱིལ་གྱི་སྒོ་ནི་དགུ་བརྩེགས་ཁོ་ན་ཡིན་ཏེ། སྔར་གསལ་སྒོ་དགུ་ཤར་དུ་བརྩེགས། །ཞེས་གསུངས་པ་ཚད་ལྡན་གྱི་འགྲེལ་བྱེད་མཁན་པོ་ཐམས་ཅད་ཀྱི་སྒོ་དགུ་བརྩེགས་ཉིད་དུ་བཀྲལ་བའི་ཕྱིར། བཅུ་གཅིག་བརྩེགས་སུ་འདོད་པ་སོགས་ནི་སྤྲོས་འདོད་ཙམ་མོ། །དེ་ལྟར་ཐིག་འདེབས་པའི་དུས་ཐམས་ཅད་དུ་སློབ་དཔོན་ཐིག་གཡོག་དང་བཅས་པ་གཡས་བསྐོར་དུ་འགྲོ་ཞིང་ཕྱོགས་ཐམས་ཅད་མཉམ་པ་ཉིད་དུ་མོས་པར་བྱའོ། །ཐིག་གི་བྱ་བ་རྫོགས་པ་ན། ཐིག་སྐུད་སྔར་གྱི་སྣོད་དུ་བཞག་པ། ཀུན་བཟང་། ཞབས་བསིལ། བཞི་བསྣོལ་རྣམས་ཀྱིས་མཆོད་ནས། བཛྲ་མུཿ ཞེས་པས་ཐིག་སྐུད་ཀྱི་ཡེ་ཤེས་པ་གཤེགས་སུ་གསོལ་ནས། དབེན་པར་བཞག་གོ། །དེ་ནས་ཧྲཱིཿཞེས་པའི་སྒྲ་རིང་པོ་དང་འདེགས་པའི་རྒྱས་ཡེ་ཤེས་ཀྱི་ཐིག་བཏེག་ནས་ནང་དུ་ཞུགས། ཧི་ཧི་ཞེས་སྒོའི་རྩ་ཐིག་དབྱིའོ། །ཐིག་གི་སྤྱོད་ལམ་ནི། སྐུད་པ་ཆད་ན་སློབ་དཔོན་འཆི། །ཐིག་སྣ་ཤོར་ན་སློབ་བུ་འཆི། །ཕྱོགས་འཁྲུལ་པས་ནི་གཉ ིས་ཀ་ཉམས། །རྒྱུན་ཆད་ལམ་ལ་གནོད་པར་འགྱུར། །ཞེས་གཞན་དུ་འབྱུང་བ་བཞིན་འདིར་ཡང་ཤེས་པར་བྱའོ། །ཐིག་གི་བྱ་བ་འདིར་བཤད་པ་ཉིད་ལུགས་འདིའི་ཁྱད་པར་གྱི་དགོས་ཆོས་སུ་གསུངས་པའི་ཕྱིར་འདི་ཁོ་ན་ལྟར་བྱའོ། །གསུམ་པ་སྟ་གོན་དངོས་ནི། རྒྱུད་ཀྱི་དངོས་བསྟན་དུ་སྐབས་འདིར་གསལ་བར་མ་གསུངས་ཀྱང་རིགས་མཐུན་གྱི་རྒྱུད་ཧེ་རུ་ཀ་འདུས་པར། ཐིག་གདབ་ཆོ་ག་ཇི་བཞིན་བྱ། །དྲི་ཡི་ཐིག་ལེའི་མཚན་མ་དགོད། །ནམ་མཁའི་དཀྱིལ་འཁོར་ཕབ་ཅིང་མཆོད། །ཅེས་པ་དང་མཐུན་པར་གསང་བདག་སྒྲོ་ཕུག་པ་ཆེན་པོས་གནམ་སའི་ཐིག་ལེགས་པར་བཏབ། དེ་ནས་སྟ་གོན་བྱའོ། །ཞེས་གསུངས་པ་བཞིན་ཤེས་པར་བྱ་བ་ནི། ཐིག་གིས་མཚོན་པའི་ལྷ་གནས་སོ་སོར་དྲི་བཟང་དང་བདུད་རྩི་ལྔས་གཙོ་བོའི་གནས་སུ་གྲུ་བཞི། འཁོར་གྱི་གནས་སུ་ཟླུམ་པོར་བྱས་ལ། སོ་སོའི་སྔགས་ཀྱིས་མེ་ཏོག་གི་ཚོམ་བུ་འགོད། མཐའ་མཆོད་པའི་ཚོགས་ཀྱིས་བསྐོར་ཏེ། བསང་སྦྱངས་བྱིན་གྱིས་བརླབས་ནས། ས་ཆོག་སྔོན་དུ་འགྲོ་ན་ནམ་མཁའི་ལྷ་ཕབ་པ་ཙམ་གྱིས་ཆོག་ཀྱང་། ལག་ལེན་ལ་དམ་ཚིག་པའང་བསྐྱེད་པར་མཛད་པས། དེ་ལྟར་ན་བདག་ཉིད་དཀྱིལ་འཁོར་གྱི་བདག་པོའི་ང་རྒྱལ་དང་ལྡན་པའི་ཐུགས་ཀར་མི་ཤིགས་པའི་ཐིག་ལེ་ཧཱུཾ་གི་ངོ་བོར་གནས་པར་བསལ་ལ། ཨེ་ཡཾ་ར་སུཾ་ཀེཾ་རཾ། ཞེས་ཆོ་འཕྲུལ་གྱི་རང་སྒྲར་སྒྲོགས་པས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པར་གྱུར། སླར་ཡང་བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ། ཞེས་པས་སྒྲ་གདངས་ཀྱི་རྐྱེན་ལས་ཇི་ལྟར་འབྱུང་བར་འགྱུར་པའི་གཞལ་ཡས་ཁང་གདན་དང་བཅས་པ་གསལ་བཏབ་ལ། ཧཱུཾ་ༀ་སྭཱ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་རཾ། ཞེས་བརྗོད་པས་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་ལྟར་བཀྲ་ལམ་གྱིས་གསལ་བར་བསྐྱེད་ལ། བསྐུར། རློབ། དབབ། དྲངས། བསྟིམ། བརྟན། མཆོད་ཅིང་བསྟོད་པ་རྣམས་བྱས་ལ། སྤོས་དང་བཅས་པའི་རྡོར་དྲིལ་འཛིན་བཞིན་པས། མགོན་པོ་ཀུན་མཁྱེན་བདག་ཉིད་ཅན། །གཅིག་དང་དུ་མ་ཡོངས་བྲལ་ཕྱིར། །མ་ལུས་བདག་ཉིད་དགོངས་སུ་གསོལ། །ཁྱེད་རྣམས་མོས་ཤིང་མཆོད་པ་དང་། །ཁམས་གསུམ་ཡོངས་སུ་བཟུང་བྱ་ཞིང་། །རང་བཞིན་མཉམ་པར་སྦྱར་བའི་ཕྱིར། །རིག་པ་འཛིན་བདག་དཀྱིལ་འཁོར་གྱི། །ལས་རྣམས་ཡོངས་སུ་རྫོགས་པར་བགྱིད། །ཐུགས་རྗེ་ཉེ་བར་དགོངས་མཛད་དེ། །དཀྱིལ་འཁོར་བྱིན་གྱིས་བརླབས་ནས་ནི། །ས་གཞི་ཡོངས་སུ་བཟུང་བར་མཛོད། །ༀ་བཛྲ་ས་མ་ཡ་སྟྭཾ། ཞེས་ལན་གསུམ་དུ་གསོལ་བཏབ་པས་ལྷ་རྣམས་དགྱེས་པར་རོལ་པའི་གཟི་བྱིན་མཐའ་ཡས་པས་དེ་ཉིད་དུ་ཐིམ་པས་ཐམས་ཅད་དཀྱིལ་འཁོར་གྱི་རང་བཞིན་དུ་གསལ་བར་བསམ་མོ། །གཉིས་པ་བུམ་པའི་ལྷག་གནས་ལ། ཤོམས་དང་། ལྷག་གནས་དངོས་གཉིས་ལས། དང་པོ་ནི། རིན་པོ་ཆེ་ལ་སོགས་པའི་བུམ་པ་ལྟོ་བ་ཟླུམ་ཞིང་མགྲིན་པ་རིང་བ་མཆུ་འཕྱང་བ་སོགས་ཀྱིས་མཚན་ཉིད་དང་ལྡན་པ་ལྷ་གྲངས་སམ་རིགས་ཀྱི་གྲངས་དང་མཐུན་པ་སྟེ། བུམ་པ་ལྔའམ་བཅུ་ཡང་རུང་ཞེས་རིགས་ཀྱི་སྒོ་ནས་ལྔ་དང་དགུར་བྱས་པ་ལས། ལྷག་མ་བཅུ་པ་ནི། སྔར་བཤད་པའི་ལས་བུམ་ཉིད་དོ། །ཇི་ལྟར་འབྱོར་པའམ། གང་ལྟར་ཡང་གུ་གུལ་གྱིས་བདུག་ཅིང་། བགེགས་བསྐྲད། མགུལ་ཆིངས་ལ་སོགས་པའི་ཆས་སུ་གཞུག །རྫས་སོ་ལྔའི་བཅུད་ཀྱིས་འགེང་བ་སོགས་སྤྱི་དང་མཐུན་པར་བཤམ་ཞིང་། ཤིན་ཏུ་བསྡུ་ན། རྣམ་རྒྱལ་དང་། ལས་བུམ་གཉིས་ལས། རྣམ་རྒྱལ་ཡང་དབུས་ཀྱི་ཁྲོ་བོ་གསང་བུམ་ཁོ་ན་ལ་བརྟེན་ནས་འགྲུབ་སྟེ། ཡང་ན་བུམ་པའི་སྐྱིན་པ་རུ། །ཞེས་པ་ནས། གང་བའི་བྷནྡྷ་དེ་བཞིན་བཞག །ཞེས་གསུངས་པའི་ཚུལ་ནི། ཕོ་མོའི་ཐོད་པ་མཚན་ལྡན་ཆང་དང་རྫས་སོ་ལྔའི་བཅུད་ཀྱིས་བཀང་བ་དར་མཐིང་དམར་གྱིས་བཅིངས་ཤིང་ལྕང་ལོས་བརྒྱན་པ་སྟེ། དཀྱིལ་འཁོར་གྱི་ལྟེ་བ་ལ་སོགས་པའི་ལྷའི་གནས་རྣམས་སུ་རིགས་མ་འཆོལ་བར་བཞག །བུམ་པ་གཅིག་ལས་མེད་ན་གཙོ་བོའི་གནས་སུ་དགོད། མཐའ་མཆོད་པ་རྣམས་ཀྱིས་ཇི་ལྟར་མཛེས་པར་བསྐོར། ལས་བུམ་རང་གི་མདུན་སོགས་གང་བདེར་བསང་གཏོར་གྱི་དོན་དུ་བཞག །གཉིས་པ་ནི། བུམ་པ་རྣམས་བསང་། ཤཱུནྱ་ཏཱས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ཞེས་བརྗོད་པས་ཡེ་ཤེས་རིན་པོ་ཆེའི་རང་བཞིན་ཅན་གྱི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་གཞལ་ཡས་ཁང་གི་ནང་དུ། ཧཱུཾ་ༀ་སྭཱ་ཨཱཾ་ཧཱ། ཧཱུཾ་ཧ་ཧེ་ཕཊ་བྷྱོ་རཾ། ཞེས་བརྗོད་པས་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ལ་སོགས་ཏེ་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་བཞིན་བཀྲ་ལམ་གྱིས་གསལ་བར་བསྐྱེད་ལ། བསྐུར། རློབ། དབབ། དྲངས། བསྟིམ། བརྟན། མཆོད་བསྟོད་རྣམས་བྱས་ནས། གཟུངས་ཐག་ལ་འཇུས་ཏེ། བདག་གི་ཞལ་ནས་སྔགས་ཀྱི་ཕྲེང་བ་གཟུངས་ཐག་ལ་འཁྲིལ་ཏེ་སོང་བས་བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། སྙོམས་པར་ཞུགས་པའི་བྱང་སེམས་ཡེ་ཤེས་ཀྱི་བདུད་རྩིར་བབས་པས་བུམ་པ་གང་བར་བསམ་ཞིང་། ལྷ་སོ་སོའི་རྩ་སྔགས་གཙོ་འཁོར་གྱི་འགྲོས་སྦྱར་བ་ཅི་ནུས་སུ་བཟླ་ཞིང་། དེ་ཙམ་མི་ནུས་ན། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་པ་ཙམ་བཟླས་པས་ཀྱང་འགྲུབ་ཅིང་། གང་ལྟར་ཡང་བཟླས་པ་རྫོགས་པའི་མཐར་གཙོ་བོའི་སྔགས་ཀྱིས་ཐོད་ཆུ་བུམ་ནང་དུ་ཕུལ་བས། ལྷ་ཐམས་ཅད་ཆགས་པ་ཆེན་པོས་ཡེ་ཤེས་ཀྱི་བདུད་རྩིར་ཞུ་བ་བུམ་ཆུ་དང་རོ་གཅིག་ཏུ་གྱུར་པར་བསམ་ཞིང་། བདུག་སྤོས་ཀྱིས་ཀྱང་བདུག་པར་བྱའོ། །བུམ་པ་མང་པོའི་ཚེ་ན་རིགས་ཀྱི་དབྱེ་བསྡུའི་བསྐྱེད་ཚུལ་ཤེས་དགོས་ཀྱང་རྣམ་རྒྱལ་གཅིག་ཉིད་ལ་བསྡུ་བའི་དབང་དུ་བྱས་ནས་འདིར་མ་སྤྲོས་སོ། །དབང་བསྐུར་རབ་གནས་བདག་འཇུག་སོགས་ལ་བུམ་པ་ངེས་པར་དགོས་ཀྱང་། སྒྲུབ་མཆོད་ཙམ་ལ་ནི་བུམ་པ་མ་འགྲུབ་ནའང་དགག་བྱ་ཆུང་ཞིང་། སྟ་གོན་གྱི་སྐབས་འདི་མ་གཏོགས་དངོས་གཞི་སྒྲུབ་པའི་སྐབས་སུ་ནི། བདག་མདུན་བུམ་གསུམ་དབྱེར་མེད་དུ་ཤེས་པའི་གནད་གོ་བར་བྱའོ། །གསུམ་པ་སློབ་མ་སྟ་གོན་གྱི་ཆོ་ག་ནི། སྐབས་འདིར་བྱ་བ་སྟེ། དབང་ཆོག་ལས་ཤེས་ཤིང་། ཆོག་ཁྲིགས་འགའ་ཞིག་ཏུ་ལྷ་སྟ་གོན་གྱི་རྗེས་སུ་སློབ་མ་སྟ་གོན་བྱས་ནས་སླར་བུམ་པའི་སྟ་གོན་མཛད་མོད། ཧེ་རུ་ཀ་འདུས་པར་འདིར་བསྟན་གྱི་རིམ་པ་བཞིན་འབྱུང་བ་ལྟར། ད་ལྟའི་ལག་ལེན་གྱི་རྒྱུན་ལ་ཡང་ཡོད་པ་བཞིན་བྱས་ཀྱིས། གང་ལྟར་བྱས་ཀྱང་འགལ་བའི་སྐྱོན་ཡོད་པར་ནི་མི་སེམས་སོ། །དེ་དག་ནི་སྟ་གོན་གྱི་ཆོ་ག་སྟེ་ནུབ་གཉིས་པའི་བྱ་བའོ། །སྤྱི་དོན་གཉིས་པ་དངོས་གཞིའི་ཆོ་ག་ལ། དཀྱིལ་འཁོོར་བྲི་བ། རྣམ་པ་དགོད་པ། རབ་གནས་བྱ་བ། དཀྱིལ་འཁོར་སྒྲུབ་པ། དབང་བསྐུར་བའོ། །དང་པོ་ནི། ནངས་པར་སྔ་བར་ལངས་ལ། བེ་གཱ་ཀྲ་མ་ཡཾ། ཞེས་འདེགས་པའི་རྒྱས་སྟ་གོན་གྱི་ལྷར་ནམ་མཁར་བཏེག །ཚོམ་བུ་རྣམས་གཞན་དུ་བསལ། སྔར་བསྒྲུབས་པའི་ཚོན་རྩི་རྣམས་ཉེ་བར་བསར་ལ། དཀྱིལ་འཁོར་གྱི་དབུས་སུ་ཕུར་བུ་དངོས་སུ་བཏབ་པ་ཡིན་ན་ཚོན་སྣ་ལྔ་འབྱུང་རིགས་སྡེབས་པ་སོ་སོའི་སྙིང་པོས་བཀང་བ་འབྱུང་བ་རིམ་བརྩེགས་སུ་གསལ་ལ། སླར་ཡང་གཡས་པའི་མཐེབ་སྲིན་གྱིས་ཚོན་སྣ་ལྔ་ཅུང་ཟད་བླངས་པ་གཡོན་པའི་ལག་མཐིལ་དུ་བཞག་ལ། ༀ་ཨཱཿསརྦ་པཉྩ་རཏྣ་ས་མ་ཡ་ཧཱུཾ་ཧཱུཾ་ཧཱུཾ། ཞེས་བཟླས་ལ། གཡས་པའི་སོར་མོ་ལྔ་ལ་ཉི་མའི་སྟེང་དུ་ཡབ་ཀྱིི་འབྲུ་ལྔ། གཡོན་པའི་སོར་མོ་ལྔ་ལ་ཟླ་བའི་སྟེང་དུ་ཡུམ་གྱི་འབྲུ་ལྔ་བཀོད་ནས། གཡས་པའི་སོར་མོ་ལྔ་ཚོམས་ཀྱིས་གཡོན་པའི་ཚོན་རྩི་བླངས་པ་དཀྱིལ་འཁོར་གྱི་ཁུང་བུའི་སྟེང་དུ་བཀོད་ལ། དོན་ཡེ་ཤེས་རིན་པོ་ཆེའི་རང་བཞིན་རྟགས་ཀེང་རུས་ཆེན་པོའི་རི་རབ་ཏུ་གྱུར་པར་བསམ་མོ། །ཡང་ན་ཕུར་ཁུང་དུ་ལྷ་ཚང་བའི་སྔགས་ཀྱིས་ཡུངས་ཀར་བླུགས་པར་ཡང་བཤད་དེ། དེ་ལྟར་ན་ཐིག་བཏབ་པའི་རྗེས་འབྲེལ་ཁོ་ནར་བྱའོ། །དེ་ནས་སློབ་དཔོན་དཀྱིལ་འཁོར་གྱི་དབུས་སུ་གནས་པས་གཡོན་པའི་ཁུ་ཚུར་གྱིས་དབང་ལྡན་ནས་བརྩམས་ཏེ། ཕྱི་ནས་ལྗང་དམར་སེར་དཀར་སྔོ་བའི་རིམ་པས་རྩིག་པ་ལྔ་མ་ཡོ་མ་འདྲེས་པར་དབང་ལྡན་གྱི་མཚམས་ནས་ཤར་དུ་སྒོ་ཚད་གཅིག་བྲིས་ལ། ཐོད་པས་བཀབ་ནས་ཕྱིས་རྩིག་པ་སྦྲེལ་རན་པ་ན་བཏེག་ནས་མཚན་མ་བརྟག་གོ། །དེ་ཡང་ཐིག་ཕྱི་ནས་གདབ་ཅིང་། ཚོན་ནང་ནས་དགྱེ་བ་ཡང་བཤད་དོ། །དང་པོར་སློབ་དཔོན་ནམ་རྒྱལ་ཐེབས་ཀྱིས་བྲི་སྟེ། མཐོ་ཞིང་དྲང་བར་བྱའོ། །དེ་ཡང་། རེ་ཁཱ་དམའ་བས་མི་འགྲུབ་ཅིང་། །ཞེས་སོགས་གསུངས་པའི་སྐྱོན་དང་བྲལ་བར་བྲི་ཞིང་། ཇི་བཞིན་མ་འགྲུབ་ན། དེ་ཁོ་ན་ཉིད་ཀྱི་ཏིང་ངེ་འཛིན་གྱིས་སྐྱོན་ཐམས་ཅད་སེལ་བ་ཡིན་ནོ། །དེ་ནས་སློབ་མ་རྣམས་ཀྱིས་ཀྱང་ལག་པ་བྱིན་རླབས་དང་ལྡན་པས་བྲི་བར་བྱ་སྟེ། དེ་ལྟར་ཡང་། སྟེང་ཁང་སྒྱུ་འཕྲུལ་ཞི་བ་བཞིན། །འོག་གཞི་དབུས་མཐིང་མུ་ཁྱུད་སྔོ། །རྩིབས་སེར་མཆན་དམར་མུ་ཁྱུད་མཐིང་། །གྲུ་ཆད་ལྗང་གུ་ཁྱམས་རིམ་དགུ། །ནང་ནས་སེར་དཀར་དམར་སེར་དམར། །དཀར་ནག་ཕྱོགས་མདོག་ལྗང་གུའོ། །གློ་འབུར་སྒོ་དང་ཀ་བ་དང་། །སྣ་ཚོགས་རྡོ་རྗེ་ཕྱོགས་ཀྱི་མདོག །ནང་རྩིག་བརྒྱད་པོ་ལྗང་ཁུ་ལ། །ཕྱི་མ་ལྔ་སྦྲག་འདོད་སྣམ་དམར། །ཕ་གུ་སེར་པོ་མུན་སྣམ་ནག །ཤར་བུ་སྔོ་ལ་མདའ་ཡབ་དཀར། །མུན་པ་གླང་རྒྱབ་ནག་པོ་ལ། །རྟ་རྐང་སྔོན་པོ་ཆུ་སྐྱེས་དམར། །སྒྲོམ་ལྗང་ཟ་ར་ཚགས་དཀར་པོ། །སྣ་འཕྱོང་སེར་པོ་སྒྲིལ་འཕྱང་ནག །ཤར་བུ་སྔོན་པོ་རྒྱ་ཕུབས་མཐིང་། །པདྨ་དམར་པོ་འཁོར་ལོ་སེར། །ས་གཞི་ལྗང་གུ་ཁོར་ཡུག་སེར། །པདྨ་སྣ་ཚོགས་དུར་ཁྲོད་དང་། །རྡོ་ར་གཞི་མཐིང་རྡོ་རྗེ་དཀར། །མེ་རི་སྣ་ལྡན་འབར་བའོ། །གཞན་ཡང་འོས་སུ་གྱུར་པ་ཡི། །རྒྱན་གྱི་ཁྱད་པར་ཇི་སྙེད་པ། །སྒྲུབ་ཐབས་ཉིད་དང་མཐོང་རྒྱུད་ལས། །འབྱུང་བ་ཉིད་དུ་ཤེས་པར་བྱ། །དེ་ལྟར་ཚོན་གྱིས་བྲི་བའི་ལས་རྣམས་རྫོགས་པའི་མཐར། ཚོན་ལྷག་ཀུན་བཟང་། ཞབས་བསིལ། བཞི་བསྣོལ་སོགས་ཀྱིས་མཆོད་ནས། བཛྲ་མུཿཡེ་ཤེས་པ་ནམ་མཁའི་ལྷའི་ཐུགས་ཀར་གཤེགས་ནས་དམན་པ་རྣམས་དབེན་པར་བཞག་གོ། །ཉེས་སྤོང་ནི་ཐིག་གི་སྐབས་བཞིན་འདིར་ཡང་ཤེས་པར་བྱའོ། །གཉིས་པ་རྣམ་པ་དགོད་པ་ལ། ཇི་ལྟར་འགོད་པ་དང་། འགོད་པའི་ཆོ་ག་གཉིས་ལས། དང་པོ་ལ། མཚན་མ་དངོས་དང་། རྒྱན་དགྲམ་པ་གཉིས་ཀྱི། དང་པོ་ནི། ཤིང་ཤུན་སོགས་ལ་བྲིས་པ་དང་། རྡོ་དང་ཤེལ་རྡོ་སོགས་ལ་བརྐོས་པ་དང་། གསེར་དངུལ་སོགས་ལ་ལུགས་སུ་བླུག་པ་སྟེ། དེ་ལ་སོགས་པ་རྒྱུ་རྣམས་ལ། ཡི་གེའམ་ཡང་ན་མཚན་རྟགས་སམ། །མིང་ངམ་ཐིག་ལེར་རྫས་ལ་བྲི། །ཞེས་པ་དང་། འགྲེལ་པར། གོང་མ་དག་གི་རྒྱུ་རྣམས་ལས། །ཙ་ཀ་ལི་ལ་སོགས་པ་དག །ཇི་ལྟར་འབྱོར་པ་དེ་ལྟར་བྲི། །ཞེས་གསུངས་པས་སྐུ་གཟུགས་ལ་སོགས་པའི་མཚན་མ་ཡོད་ན་ལོགས་སུ་བསར་ལ་འགོད་པའི་ཆོ་ག་འོག་ཏུ་འབྱུང་བ་བཞིན་དུ་འགོད་ཅིང་། མེད་ན་ཚོན་གྱིས་བྲི་བའི་རྗེས་འབྲེལ་ཉིད་དུ་སྐུ་གཟུགས་སམ། ཡིག་འབྲུའམ། ཕྱག་མཚན་ནམ། རང་མདོག་དང་མཚུངས་པའི་ཐིག་ལེའི་རྣམ་པ་ཅན་གྱི་བར་ཅི་ནུས་སུ་བྲིའོ། །གཉིས་པ་ནི། སྔར་ལྷག་གནས་བྱས་པའི་བུམ་པ་རྣམས་སྤོས་དང་རོལ་མོས་སྣ་དྲངས་ཏེ། དཀྱིལ་འཁོར་ལ་གཡས་སུ་བསྐོར་ནས་ལྷ་སོ་སོའི་གནས་སུ་མཉྫི་ལ་སོགས་པའི་སྟེགས་ལ་དགོད་ཅིང་། བུམ་པ་གཅིག་ཏུ་བསྡུས་པ་ལ་ནི། གསང་བུམ་དང་ལྷན་ཅིག་པར་དབུས་སུ་དགོད་ཅིང་བྷནྡྷ་དུམ་བུ་ཅིག་པ་ལ་ཡབ་ཡུམ་གྱི་སྙིང་པོ་བྲིས་པ་གཡས་གཡོན་ནས་རྡོ་རྗེ་དྲིལ་བུས་བརྟེན་པ་ཡང་རྣམ་རྒྱལ་དང་གོས་མཚུངས་པར་འཇོག་སྟེ། བྷནྡྷ་དཔལ་ལྡན་མཚན་ལྡན་ལ། །ཡབ་ཡུམ་སྙིང་པོ་བྲིས་པ་ནི། །དབུས་ཀྱི་ཕོ་བྲང་ཉིད་ལ་བཞག །ཐ་མ་རྡོ་རྗེ་དྲིལ་བུས་བརྟེན། །ཞེས་འབྱུང་བ་བཞིན་བཀོད། དཀྱིལ་འཁོར་གྱི་མཐར་དྲི་བཟང་གིས་བྱུག་ཅིང་། མེ་ཏོག་གི་སིལ་མ་དགྲམ། ཕྱོགས་ཀུན་ཏུ་བླ་རེ་དང་ཡོལ་བ་དང་གདུགས་དང་རྒྱལ་མཚན་དང་བ་དན་སྣ་ཚོགས་པས་བརྒྱན། ཕྱིའི་གྲྭ་རྣམས་སུ་དར་གྱིས་བརྒྱན་པའི་མདའ་དར ། རལ་གྲི་དང་། མེ་ལོང་དང་། ཚོན་སྣའི་དྲྭ་བ་ལ་སོགས་པས་བཀོད་ལེགས་སུ་བརྒྱན་པར་བྱ་ཞིང་། བདུག་སྤོས་དང་། མེ་ཏོག་དང་། མར་མེ་དང་། དྲི་ལ་སོགས་པ་རྣམས་ལྷའི་གྲངས་མཐུན་ནམ་ཅི་འབྱོར་དང་། ཞབས་བསིལ་ལ་སོགས་པ་ཕྱིའི་མཆོད་པ་རྣམས་དང་། སྨན་གཏོར་ལ་སོགས་པ་ནང་གི་མཆོད་པ་རྣམས་དང་། ཞིང་གི་བཅད་དུམ་ལ་སོགས་པ་ཁྱད་པར་གྱི་རྫས་རྣམས་དང་། གཞན་ཡང་སྒྲུབ་པའི་དམ་རྫས་སུ་འོས་པའི་ཡོ་བྱད་ཐམས་ཅད་ཀྱང་ཚོགས་པར་བཤམ་སྟེ། ༼ཀུན་༽མཆོད་པའི་ཡོ་བྱད་ཐམས་ཅད་དང་། །རྨད་དུ་བྱུང་བའི་རྫས་མཆོག་དག །རྡོ་རྗེ་གསང་བའི་རིམ་གྱིས་དགོད། །ཅེས་གསུངས་པ་བཞིན་ནོ། །གཉིས་པ་འགོད་པའི་ཆོ་ག་ལ། བགེགས་བསྐྲད་པ། མཚན་མ་རློབ་པ། སྒོ་དབྱེ་བའོ། །དང་པོ་ནི། བདག་ཉིད་ཞེ་སྡང་རྡོ་རྗེར་གསལ་བས། ཕཊ་ཕཊ། བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་སོགས་ཀྱིས་སྤྲུལ་པའི་ཁྲོ་བོ་དང་མཚོན་ཆའི་སྤྲིན་སྤྲོ་ཞིང་དྲག་པོའི་ཚམ་རྔམས་དང་བཅས་པས་བགེགས་བསྐྲད་ལ་བསྲུང་བའི་མཚམས་བཅིང་ངོ་། །གཉིས་པ་ནི། གཟུགས་བརྙན་གྱི་དཀྱིལ་འཁོར་རཾ་ཡཾ་ཁཾ་གིས་སྦྱངས་ཏེ། བདག་ཉིད་དཀྱིལ་འཁོར་གྱི་བདག་པོར་གནས་པའི་ཐུགས་ཀ་ནས་འབྱུང་ལྔ་རིམ་བརྩེགས་གཞལ་ཡས་ཁང་དང་བཅས་པ་སྤྲོས། གཟུགས་བརྙན་གྱི་དཀྱིལ་འཁོར་ལ་ཐིམ་པས་བསྲུང་འཁོར་གཞལ་ཡས་ཁང་གདན་དང་བཅས་པར་གྱུར། སླར་ཡང་ཧཱུཾ་ༀ་སྭཱ་ཨཱཾ་ཧཱ། ཧཱུཾ་ཧ་ཧེ་ཕཊ་བྷྱོ་རཾ། ཞེས་བརྗོད་པས་ཡབ་ཡུམ་སྙོམས་པར་ཞུགས་པའི་མཁའ་ལས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པར་འཐོན་ཏེ། རང་རང་གི་མཚན་མ་རྣམས་ལ་ཐིམ་པས་ལྷ་དེ་དང་དེའི་རྣམ་པར་བཀྲ་ལམ་གྱིས་བཞུགས་པར་བསམ་ཞིང་། རིག་འཛིན་རྣམས་ནི། བཛྲ་ཡོ་གི་ཛཿས་སྤྱན་དྲངས་ནས་མཚན་མ་རྣམས་ལ་ཐིམ་པས་སོ་སོའི་སྐུར་བསྐྱེད། སྒྲུབ་རྫས་གཞན་རྣམས་ལ་མཁའ་ཁྱབ་ཀྱི་དེ་བཞིན་གཤེགས་པ་ཐམས་ཅད་ཀྱི་གཟི་བྱིན་ཧཱུཾ་ཞེས་བསྡུས་ནས་སྒྲུབ་རྫས་སོ་སོ་ལ་ཐིམ་པར་བསམ་པའོ། །གསུམ་པ་ནི། རྡོ་རྗེ་ནང་བསྡམས་ཕྱིར་འབྱེད་པ་སྒོ་དབྱེ་བའི་རྒྱས། ༀ་བཛྲ་ཙཀྲ་མཎྜལ་པྲ་ཝེ་ཤ་ཡ་ཕཊ། ཅེས་ཕྱོགས་བཞི་ནས་རེ་རེའམ་ཤར་ནས་ལན་བཞི་བརྗོད་པས། དཀྱིལ་འཁོར་གྱི་ཕྱོགས་བཞིའི་སྒོ་རིམ་རྣམས་ཤག་གིས་ཕྱེ་བས་ལྷ་རྣམས་ཀྱི་ཞལ་མངོན་དུ་གྱུར་པར་བསམ་ལ། ཨ་ལ་ལ་ཧོཿཞེས་ཕྱག་ཀྱང་བྱའོ། །གསུམ་པ་རབ་གནས་བྱ་བ་ནི། ཆོ་ག་ཟུར་དུ་བཤད་པ་ལས་ཤེས་པར་བྱ་བ་སྟེ། དེ་ལ་ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དང་། རང་བཞིན་ཡེ་ཤེས་ཀྱི་དཀྱིལ་འཁོར་སྟ་གོན་གྱི་ལྷ་དང་བཅས་པ་སྒྲུབ་པའི་དཀྱིལ་འཁོར་ལ་ཕབ་ཅིང་བསྟིམ་ནས། དབང་པོའི་སྐྱོན་སྦྱང་བ་དང་། མཆོད་པ་དང་། མངའ་གསོལ་བ་རྣམས་བྱ་བ་ཡིན་ལ། རབ་གནས་སྔོན་སོང་གི་རས་བྲིས་ལ་བརྟེན་པའི་སྒྲུབ་མཆོད་རྐྱང་པ་ཙམ་ལ་ནི། དངོས་གཞིའི་སྐབས་རྣམ་པའི་དཀྱིལ་འ ཁོར་ལ་རང་བཞིན་གྱི་དཀྱིལ་འཁོར་བསྟིམ་པ་ཉིད་ཀྱིས་དོན་གྱི་གནད་འགྲུབ་པར་འགྱུར་རོ། །དེ་དག་ནི། རྡོ་རྗེ་གསང་སྒོ་ཕྱེ་ནས་ནི། །ཏིང་འཛིན་དཀྱིལ་འཁོར་ཀུན་རྫོགས་ནས། །རང་བཞིན་ཡུལ་ནས་ཕབ་ནས་ནི། །སྒྲུབ་པའི་དཀྱིལ་འཁོར་དེར་རྫོགས་བྱ། །ཞེས་གསུངས་པའི་དོན་ནོ། །བཞི་པ་དཀྱིལ་འཁོར་སྒྲུབ་པ་ལ། སྔོན་དུ་བྱ་བ་དང་། སྒྲུབ་པ་དངོས་ལས། དང་པོ་ནི། དེ་ནས་རྡོ་རྗེ་རྒྱལ་པོ་དང་། རྒྱལ་ཐེབ་དང་། ལས་ཀྱི་ཕྱག་རྒྱ་དང་། རྡོ་རྗེ་བརྡའ་སྦྱོར་བ་ལ་སོགས་པ་རྣམས་སོ་སོའི་བྱ་སྟེ་གོ་འཕང་དང་སྦྱར་བའི་གདན་བཤམས་པ་ལ་འཁོད་ནས་བློ་བཅོས་ཏེ། ལས་ཀྱི་དབུ་དྲང་བ་ནས་བཟུང་། མཆོད་རྫས་བྱིན་གྱིས་རློབ་པའི་བར་དཀྱུས་བཞིན་བྱ་བའོ། །གཉིས་པ་དངོས་གཞི་ལ། སྒྲུབ་གཞི་བདག་དང་གཟུགས་བརྙན་གྱི་དཀྱིལ་འཁོར་གཉིས་ཀ །སྒྲུབ་ཆོས་དེ་བཞིན་ཉིད་ཀྱི་ཏིང་ངེ་འཛིན་ནས་བཟུང་། དཀྱིལ་འཁོར་གྱི་སྤྲིན་ཆེན་པོར་རྟག་ཏུ་སྣང་ཞིང་འབར་བར་བསམ་པའི་བར་གྱིས་དམ་ཚིག་གི་འཁོར་ལོ་བདག་མདུན་དབྱེར་མེད་དུ་གསལ་བཏབ་ལ། དབང་བསྐུར་ཞིང་བྱིན་གྱིས་བརླབས་ནས། ཡེ་ཤེས་ཀྱི་དཀྱིལ་འཁོར་ལ་སྙན་གསན་དབབ་པ་དང་། སྤྱན་དྲང་བ། བརྟན་པར་བཞུགས་སུ་གསོལ་བའི་བར་སྒྲུབ་ཐབས་བཞིན་ནོ། །དེ་ཡང་ཇི་ལྟར་སྒྲུབ་པའི་ཚུལ་ལ། བདག་མདུན་དབྱེར་མེད་དུ་བྱེད་པ་དང་། ཐ་དད་དུ་བྱེད་པའི་ལུགས་གཉིས་ཡོད་པ་ལས། དང་པོ་ཉིད་སྐབས་འདིའི་དོན་གྱི་དགོངས་པར་གྲུབ་སྟེ། དེ་༼རྔམ་༽ནས་སྔགས་པ་མཉམ་བཞག་སྟེ། ཏིང་འཛིན་དཀྱིལ་འཁོར་གསལ་བར་བསྒོམ། །གསལ་བ་གཉིས་མིན་དཀྱིལ་འཁོར་དུ། །རང་བཞིན་ཀུན་རྫོབ་སྤྱན་དྲངས་ཏེ། །དབབ་དང་གཞུག་དང་བརྟན་པའོ། །ཞེས་གསུངས་པ་ལྟར་རྣམ་པར་རྟོག་པ་སྣ་ཚོགས་པའི་གཉེན་པོར་ཡང་སྒོམ་པའི་རིམ་པ་འདི་ཁོ་ན་ཁྱབ་ཆེ་བ་དང་། མཚོན་བྱེད་གཟུགས་བརྙན་གྱི་དཀྱིལ་འཁོར་ཉིད་མཚོན་བྱ་ཀུན་རྫོབ་སྣང་ཆའི་དཀྱིལ་འཁོར་དུ་རྣལ་འབྱོར་པའི་སྒོམ་སྟོབས་ཀྱིས་རྒྱས་བཏབ་པས་མ་ཁྱབ་པའི་ཁྱབ་བྱ་དམིགས་སུ་གྲུབ་པ་མེད་པའི་ཕྱིར་འདི་ཁོ་ན་ལམ་འདིའི་སྒོམ་རིམ་ཟླ་མེད་པར་གྲུབ་ཅིང་། དེས་མཚོན་ནས་བུམ་པའི་སྒོམ་དོན་ཀྱང་དེ་དང་དབྱེར་མེད་དུ་བྱེད་པ་ཉིད་དོན་ལ་གནས་པ་སྟེ། དམིགས་པ་བརྟན་པའི་རྣལ་འབྱོར་པས་བདག་མདུན་དབྱེར་མེད་དུ་སྒོམ་ཞེས་པ་ཡང་རྒྱུད་སྡེ་གཟིགས་པའི་ཆེན་པོ་དག་ལ་གྲགས་པའི་གཏམ་ཡིན་ནོ། །གཞན་དུ་བདག་མདུན་ཐ་དད་དུ་བྱེད་པའི་ལུགས་ལ་ཡང་ཐོག་མར་བདག་བསྐྱེད་ཀྱི་རྣལ་འབྱོར་བསྒོམས་ནས་སླར་མདུན་བསྐྱེད་སྒྲུབ་པ་ལ་འཇུག་མོད། སྒོམ་པའི་བློ་ངོ་རུ་སྣོད་བཅུད་དཀྱིལ་འཁོར་གཅིག་ཏུ་འཆར་བ་ལས་མ་དམིགས་པའི་ཕྱིར། ཐ་མལ་པའི་སྣང་བ་རང་མཚན་པ་གཅིག་གི་གོ་ས་ན་དཀྱིལ་འཁོར་དེ་དག་ཕན་ཚུན་རྟེན་གྲལ་སྒྲིགས་པ་ལྟ་བུའི་དམིགས་རྣམས་འཛིན་པ་དག་གིས་ནི་བདག་མདུན་ཐ་དད་དུ་སྒྲུབ་པ་དང་། དབྱེར་མེད་དུ་སྒྲུབ་པའི་ཚུལ་གཉིས་ཀའི་དོན་སྤྱི་ཙམ་ཡང་མཚོན་པར་མི་ནུས་སོ། །གཉིས་པ་མཆོད་བསྟོད་སོགས་བྱ་བ་ནི། དབྱིངས་དང་ཡེ་ཤེས་གཉིས་སུ་མེད་པའི་ངང་དུ་རོ་མཉམ་པས་ལྷ་ལ་ལྷ་རོལ་པའི་ཚུལ་དུ་སྤྱོད་པ་སྟེ། ཕྱག་ནས་བཟུང་དངོས་གྲུབ་གསོལ་བའི་བར་སྒྲུབ་ཐབས་བཞིན་ཤེས་པར་བྱའོ། །གསུམ་པ་འཛབ་བཟླ་བ་ནི། ས་བཅད་ཀྱི་ཆིངས་སྒྲུབ་ཐབས་བཞིན་ལས་འཛབ་ཁང་དབྱེ་པའི་ཚེ་དབྱེ་གཞིའི་དཀྱིལ་འཁོར་གསལ་བ་ལས། བྷྲཱུཾ་བི་ཤྭ་སོགས་ཀྱིས་བདག་དམ་ཚིག་གི་འཁོར་ལོ་ལས་མདུན་བསྐྱེད་ཡེ་ཤེས་ཀྱི་འཁོར་ལོའི་ངོ་བོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབ་འབྱར་གྱི་ཚུལ་དུ་བཞུགས་པར་མོས་པ་ཙམ་སྟེ། དམིགས་པའི་རྣམ་པ་ལ་དབྱེ་བ་མེད་ཀྱང་། དོན་གྱི་ངོ་བོ་ལས་དམིགས་རྣམ་ཕྱེད་པའི་གནད་ཤེས་པར་བྱས་ནས། དམ་ཡེ་འཕྲོ་འདུ་སྟེ་གསལ་བ་གསུམ་ལྡན་གྱི་ངང་ནས་ལྷ་སོ་སོའི་སྒོས་འཛབ་དང་། གཙོ་བོར་སྤྱི་འཛབ་ལ་སྦྲེལ་ནས་བཟླ་ཞིང་སོ་སོའི་སྒོས་འཛབ་བཟླ་བའི་ཚེ་སྤྲོ་ན་རང་རང་གི་འཛབ་བསྐུལ་ཀྱང་སྦྱོར་ཏེ་གཞན་ལས་ཤེས་པར་འགྱུར་ལ། གང་ལྟར་ཡང་གཙོ་འཁོར་གྱི་འགྲོས་སྦྱར་ནས་ཅི་ནུས་སུ་བཟླ་བ་དང་། ཁྱད་པར་གྱི་བཟླས་པ་དང་སྐབས་ཀྱི་མཇུག་བསྡུ་བའི་ལས་རིམ་རྣམ་པ་གསུམ་ཡང་སྒྲུབ་ཐབས་བཞིན་ནོ། །དེ་དག་ནི་སྒྲུབ་ཅིང་མཆོད་པའི་ཆོ་གའོ། །ལྔ་པ་དབང་བསྐུར་བ་ལ། བདག་ཉིད་འཇུག་པ་དང་། སློབ་མ་ལ་དབང་བསྐུར་བའོ། །དང་པོ་ནི། སློབ་མ་འཇུག་པ་ཇི་ལྟ་བ་བཞིན་དཀྱིལ་འཁོར་དུ་ཞུགས་ལ་དབང་བླང་བའམ། བདག་ཉིད་དཀྱིལ་འཁོར་གྱི་ལྷ་དང་དབྱེར་མེད་པར་བསྒོམས་ནས་རིག་པའི་མེ་ཏོག་དོར་བ་ཉིད་ཏིང་ངེ་འཛིན་གྱི་དཀྱིལ་འཁོར་དུ་ཞུགས་པའང་ཡིན་ཅིང་། བླ་མ་བརྒྱུད་པའི་ཕྱག་ལེན་ཀྱང་འདི་ལ་མཛད་དོ། །གང་གི་ཚེ་ཡང་སློབ་མ་འཇུག་པར་གནང་བ་ནོད་པ་རྣམས་སོ། །གཉིས་པ་སློབ་མ་གཞུག་ཅིང་དབང་བསྐུར་བ་ནི། དབང་གི་ཆོ་ག་ལས་ཤེས་པར་བྱའོ། །སྤྱི་དོན་གསུམ་པ་རྗེས་ཀྱི་ཆོ་ག་ལ་ལྔ་ལས། དང་པོ་ཚོགས་མཆོད་དང་། གཉིས་པ་བརྟན་མ་བསྐྱང་བ་རྣམས་ནི་སྒྲུབ་ཐབས་བཞིན་དང་། གསུམ་པ་ཉེར་བསྡུའི་ཚེ། གཏང་རག་གི་མཆོད་པ་བཤམས་ལ་བྱིན་གྱིས་བརླབས་ཏེ། ཀུན་བཟང་། ཞབས་བསིལ། བཞི་བསྣོལ། སྨན་གཏོར་རཀྟ་རྣམས་ཀྱིས་མཆོད། །བསྟོད་པ་རྒྱས་བསྡུས་ཅི་རིགས་པས་བསྟོད། ཡིག་བརྒྱ་དང་བཟོད་གསོལ་རྣམས་བྱས་ལ། རས་བྲིས་ཀྱི་དཀྱིལ་འཁོར་ལ་ཡེ་ཤེས་པ་བརྟན་བཞུགས་དང་། དམ་ཚིག་གི་དཀྱིལ་འཁོར་གསལ་བཏབ་ལ། ཧཱུཾ་ཞེས་བརྗོད་པས་དཀྱིལ་འཁོར་གྱི་འཁོར་ལོ་བསྡུས་ལ་གོ་བགོ་ལུས་བསྲུང་སོགས་མཐའ་རྒྱས་རྣམས་སྒྲུབ་ཐབས་ལྟར་བྱ་ཞིང་། རྡུལ་མཚོན་ལ་བརྟེན་པའི་སྒྲུབ་མཆོད་ཞག་སྦྲེལ་མར་བྱེད་པའི་ཉིན་སྔ་མ་རྣམས་ལའང་དེ་བཞིན་ནོ། །གཟུགས་བརྙན་གྱི་དཀྱིལ་འཁོར་གཤེགས་གསོལ་བྱེད་ན། བེ་གཱ་ཀྲ་མ་ཡཾ། ཞེས་པས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཏེག་ནས། གཏང་རག་གི་མཆོད་བསྟོད་དང་། བཟོད་གསོལ་སྔར་བཞིན་བྱས་ནས། ༀ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར། ཛྙཱ་ན་མཎྜ་ལ་བཛྲ་མུཿ ཞེས་ཡེ་ཤེས་པ་གཤེགས། དམ་ཚིག་གི་འཁོར་ལོ་སྔར་བཞིན་བསྡུས་ནས། གོ་ཆ་བགོ་ཞིང་ལུས་བསྲུང་བ་བྱས་ལ། ཆོས་ཐམས་ཅད་སྟོང་པ་ཉིད་དུ་མོས་ཏེ། རོལ་མོའི་སྒྲ་དང་བཅས་པས་ཨ་ཀཱ་རོ་བཟླ་ཞིང་རྡོ་རྗེ་དང་བཅས་པའི་ལག་གིས་ཐོག་མར་ལྷ་མཚན་རྣམས་བསྡུས་ལ་ཅུང་ཟད་མགོ་བོར་བཀོད། ལྷག་མ་རྣམས་དབང་ལྡན་ནས་བརྩམས་ཏེ། གཙོ་བོའི་གནས་ཀྱི་བར་དུ་ཕྱགས་ལ་བུམ་པ་ལ་སོགས་པའི་སྣོད་བཟང་པོར་བླུག་ནས་མཆོད་པ་དང་བཀུར་སྟི་ཆེན་པོས་ཆུ་ཀླུང་དུ་དོར། སླར་ཡང་སྣོད་དེ་ཉིད་ཆུས་བཀང་ནས་ནང་དུ་འོངས་ཏེ། དཀྱིལ་འཁོར་ཁང་པ་རྣམས་བསང་གཏོར་བྱས། དེ་ནས་སྔར་ས་བསྲུང་དང་འབྲེལ་བར་ཕུར་བུ་དངོས་སུ་བཏབ་པ་ཡིན་ན་སྐབས་འདིར་རྡོ་རྗེ་སྐམ་པའི་རྒྱས་འོག་གི་ཕུར་བུ་ནས་བཟུང་ཁྲོ་བོ་བཅུའི་ཕུར་བུ་རྣམས་མས་རིམ་གྱིས་ཕྱུངས་ལ། སྤྱན་མའི་སྔགས་བཟླས་པའི་འོ་མས་ཕུར་རྩེ་དང་ཕུར་ཁུང་རྣམས་ལ་གཏོར་བས་བགེགས་རྣམས་བདེ་སྟོང་གི་ངོ་བོར་སངས་རྒྱས་པར་བསམ་མོ། །དེ་ན ས་དགེ་བ་བསྔོ་ཞིང་སྨོན་ལམ་གདབ་པ་དང་། བཀྲ་ཤིས་བརྗོད་ཅིང་། དགའ་སྟོན་བྱ་བ་རྣམས་གསང་བ་སྤྱིའི་འགྲོས་བཞིན་མཐའ་རྒྱས་སུ་བྱའོ། །དེ་ལྟར་དབང་རྐྱང་དང་སྒྲུབ་མཆོད་ཀྱི་ཆོ་ག་དཀྱུས་མ་ཙམ་ལ་ཇི་ལྟར་མཁོ་བ་དག་སྙིང་པོར་དྲིལ་ནས་ལག་ཏུ་བླང་བདེ་བ་གཙོ་བོར་བྱས་ནས་སྨོས་ཀྱི། གཞན་དུ་སྨིན་སློབ་སྒྲུབ་ཆེན་གྱི་ལུགས་སུ་བྱེད་པ་ལ་ནི། བསྙེན་སྒྲུབ་རྣམ་པ་བཞིའི་ཆིངས་ཀྱིས་བསྡུས་པ་སྟེ། སོ་སོའི་རྩིས་འགོའི་སྡོམ་སྒྲུབ་བྱང་དུ་གསུངས་པ་ནི། བཤམ་དང་བརྟག་བསླང་སྦྱང་བ་དང་། །མནན་པ་བྱིན་རློབ་བསྐྱེད་པ་དང་། །མཚམས་དང་དམ་སྲི་སྒོ་བྱང་དང་། །ཚོགས་བསག་གཞལ་ཡས་ཁང་བསྐྱེད་པ། །བཅུ་དང་གཉིས་ཀྱིས་རྒྱས་པར་འགྱུར། །ཞེས་བསྙེན་པའི་ལས་དང་། གཉིས་པ་ཐིག་ཚོན་བྲི་བ་དང་། །གཏོར་མ་ཕྱི་མཚམས་རྫས་སྦྱང་དང་། །བསྐྱེད་དང་རྫས་རྣམས་དགོད་པ་དང་། །གླེང་གཞི་དབང་བསྐུར་བྱིན་དབབ་དང་། །བརྡ་སྒོ་བཤགས་དང་དམ་བཅའ་དང་། །བྱིན་དབབ་མ་ཊཱཾ་དམ་སྲི་མནན། །རྟག་གདབ་མཆོད་པ་བྱིན་རློབ་པ། །ལྔ་གཉིས་བདུན་གྱིས་རྫོགས་པར་འགྱུར། །ཞེས་ཉེ་བའི་བསྙེན་པ་དང་། གསུམ་པ་འཕྲིན་ལས་གཞུང་བསྲང་དང་། །འཛབ་རྫོགས་ལྷག་མ་མཚམས་སྦྲེལ་དང་། །སྦྱིན་སྲེག་བཟོད་གསོལ་རང་སྟན་རློབ། །ཏན་གན་སྐབས་སྦྱང་ཉུལ་ལེ་བཟློག །རྣམ་པ་བཅུ་ཡིས་སྒྲུབ་གཞུང་སྲོང་། །ཞེས་སྒྲུབ་པ་དང་། བཞི་པ་རྟགས་གདབ་སྦྱིན་སྲེག་དང་། །དངོས་གྲུབ་བླང་དང་དབང་བསྐུར་དང་། །བཀྲ་ཤིས་སྨོན་ལམ་གཏོར་མ་གཏེར། །བསྡུ་ལྡང་གནས་བསྲུང་ལྔ་གཉིས་གཅིག །ཅེས་སྒྲུབ་པ་ཆེན་པོའི་ལས་ཏེ། སྡོམས་སུ་བསྟན་པ་དེ་དག་ཟུངས་སུ་བཟུང་ནས། རྩ་བའི་མདོ་ཉིད་ལས་ཇི་ལྟར་འབྱུང་བ་རྣམས་གཞིར་བཞག་པ་ལ། ལྷག་མ་རྣམས་རྒྱ་བོད་ཀྱི་གཞུང་རྙིང་ཁུངས་མ་དག་ལས་ཐོབ་ཐང་ཇི་ལྟར་ཡོད་པ་ཙམ་གུང་སྡེབས་ན་ཟོར་ཡང་ཞིང་ལེགས་པ་ཞིག་ཀྱང་འབྱུང་མོད་ཀྱི། རེ་ཞིག་མ་བྲིས་སོ། །གྲགས་ཆེ་བའི་ཆོག་སྒྲིགས་ཀྱི་སྲོལ་ཁ་གཉིས་ཞེས་ད་ལྟ་ལག་ལེན་དུ་བྱེད་པ་རྣམས་སུ་ཡང་སྒྱུ་འཕྲུལ་སོགས་དང་མཐུན་རུང་དུ་སྦྱར་བ་ལས་ལུགས་འདིའི་རང་རྐང་ཚུགས་པའི་ངེས་པ་ཅན་དུ་མ་མཐོང་བ་ཡང་རྣམ་དཔྱོད་ཀྱི་མིག་དང་ལྡན་པ་རྣམས་ཀྱིས་མཐོང་བར་འགྱུར་རོ། །སྤྱི་དོན་གསུམ་པ་གྲུབ་པ་འབྲས་བུའི་ཚུལ་ལ། ཇི་ལྟར་བསྒྲུབས་པ་དང་། དེས་གྲུབ་པའི་ཚད་བསྟན་པ་སྟེ་སྒྲུབ་ཐབས་སུ་བཤད་པ་བཞིན་ཤེས་པར་བྱ་བ་ཡིན་ནོ། །ཟབ་ཡངས་རྒྱུད་དོན་རྒྱ་མཚོ་ཆེན་པོའི་འཇིང་། །བློ་རྨོངས་སྙིམ་པའི་སྐྱོགས་ཀྱིས་མཚོན་མིན་ཡང་། །རྙོག་བྲལ་ཆུ་ཡི་ཐིགས་པ་ཕྲ་མོས་ཀྱང་། །གདུང་སེལ་འདོད་སྟེར་བྱེད་པ་མངོན་སུམ་ཉིད། །དེ་ཕྱིར་དྲི་མེད་ལུང་སྟོན་བདུད་རྩི་ཡི། །ཆ་ཤས་ཀུན་ནས་གང་བའི་ངོ་མཚར་ནི། །སྐལ་བཟང་བདེ་འབྱུང་རལ་པའི་ཅོད་པན་དུ། །ཤར་རོ་དྲི་མེད་འོད་ཀྱི་ཕྲེང་བ་གསལ། །འདིས་ཐོབ་དགེ་བ་མཁའ་དང་མཉམ་གྱུར་ནས། །དབྱིངས་དང་ཡེ་ཤེས་གཉིས་མེད་བདེ་བ་ཆེ། །མདོད་མའི་མགོན་པོའི་ཆེ་མཆོག་ཧེ་རུ་ཀའི། །གོ་འཕང་ལུས་ཅན་ཡོངས་ཀྱིས་ཐོབ་ཕྱིར་བསྔོ། །ཚོགས་ཆེན་འདུས་པའི་དཀྱིལ་འཁོར་གྱི་ཆོ་ག་དྲི་མེད་འོད་ཀྱི་ཕྲེང་བ་ཞེས་བྱ་བ་འདི་ཡང་རིག་པ་འཛིན་པ་འགྱུར་མེད་རྡོ་རྗེས་རྩ་བའི་མདོ་དང་གཞུང་རྙིང་རྣམས་ཀྱི་ལེགས་བཤད་སྙིང་པོར་དྲིལ་ཏེ་རང་ལོ་ཞེ་བརྒྱད་པ་ལ་སྦྱར་བའི་ཡི་གེ་པ་ནི་གནས་བརྟན་ལོ་ཙཱ་བ་དྷརྨཱ་ཤྲཱིའོ།། །།སརྦ་མངྒ་ལཾ།།

འདུས་པ་མདོའི་སྒྲུབ་ཁོག་རིན་ཆེན་འོད་ཀྱི་སྣང་བ། དྷརྨ་ཤྲཱི།

འདུས་པ་མདོའི་སྒྲུབ་ཁོག་རིན་ཆེན་འོད་ཀྱི་སྣང་བ་ཞེས་བྱ་བ་བཞུགས་སོ། །འདུས་པ་མདོའི་སྒྲུབ་ཁོག་བསྙེན་སྒྲུབ་ཡན་ལག་བཞིའི་དོན་གསལ་བར་བྱེད་པ་རིན་ཆེན་འོད་ཀྱི་སྣང་བ་ཞེས་བྱ་བ། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་ལ་ཕྱག་འཚལ་ལོ། །མཆོག་ཏུ་མི་འགྱུར་ལྷན་སྐྱེས་བདེ་ཆེན་ཉིད། །སྒྲིབ་བྲལ་བླ་མེད་ཡོན་ཏན་ཀུན་རྫོགས་པས། །རིགས་བརྒྱའི་འཁོར་ལོར་དབང་སྒྱུར་རྡོ་རྗེ་འཆང་། །བཀའ་དྲིན་མཉམ་མེད་གཏེར་ཆེན་བླ་མར་འདུད། །གང་ཞིག་བསྟེན་ན་མཆོག་ཐུན་དངོས་གྲུབ་ཀུན། །ཚེ་འདི་ཉིད་ལ་ཐོབ་བྱེད་འདུས་པ་མདོའི། །བསྙེན་སྒྲུབ་ཡན་ལག་རྣམ་བཞིའི་དོན་གསལ་བྱེད། །རིན་ཆེན་འབར་བའི་འོད་ཀྱི་སྣང་བ་སྤྲོ། །འདི་ལ་གསུམ་སྡེ། གང་ལ་དམིགས་པའི་ཡུལ་བསྒྲུབ་བྱ། གང་གིས་སྒྲུབ་བྱེད་ཐབས། གང་གྲུབ་པ་འབྲས་བུའོ། །དང་པོ་ནི། ལམ་རྐྱེན་དང་འཕྲད་ན་འབྲས་བུའི་ཡོན་ཏན་རྣམས་འབྱུང་རུང་དུ་ངེས་པས་བྲོད་པ་བསྐྱེད་དེ། ཐོབ་བྱའི་དངོས་གྲུབ་དོན་གཉིས་ཕུན་སུམ་ཚོགས་པ་དེ་ཉིད་དམིགས་ཡུལ་དུ་བྱས་ནས། སྒྲུབ་བྱེད་ལམ་ལ་འབད་པས་གཞིའི་སྟེང་དུ་དྲི་མ་སྦྱོང་དགོས་པའི་ཕྱིར། དམིགས་ཡུལ་ནི་སྦྱངས་འབྲས་དངོས་གྲུབ་བོ། །དེ་ལྟ་མོད་ཀྱི་བསྒྲུབ་བྱ་སྒྲུབ་བྱེད་ཀྱི་གནད་སྒྲུབ་གཞི་ངེས་པ་ལ་རག་ལས་པས་ན། སྒྲུབ་གཞིའམ་སྦྱང་གཞི་ནི། ཆོས་ཐམས་ཅད་ཀྱི་གཤིས་ལུགས་སེམས་ཉིད་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་སྟེ། སྤྱི་མདོ་ལས། ཐམས་ཅད་བདག་ཉིད་དེར་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་གསུངས་སོ། ༈ །གཉིས་པ་གང་གིས་སྒྲུབ་བྱེད་ཐབས་ལ་སྤྱི་དོན་གསུམ་སྟེ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ་དང་འདྲེལ་བར་ཆུ་བོ་བཞིའི་དབང་བསྐུར་བ། རྗེས་དོན་བརྒྱད་ཀྱིས་མཇུག་བསྡུ་བའོ། །སྤྱི་དོན་དང་པོ་ནི། སློབ་དཔོན་བདེ་བ་གསལ་མཛད་ཀྱི་ལས་ཐོ་ལས། དང་པོ་ཕུན་སུམ་ཚོགས་ལྡན་ཏེ། །ཚད་ཕྱིན་རབ་འབྱམས་སློབ་དཔོན་གྱིས། །སྣོད་དང་ལྡན་པའི་འཁོར་བསྡུས་ནས། །གཞུང་དང་མཐུན་པའི་གནས་དག་ཏུ། །ས་ཆོག་རྫོགས་བྱས་གནས་ཁང་ལྡན། །དགོས་པ་ཚང་བའི་ཡོ་བྱད་རྫོགས། །དུས་ཆ་བཞི་ཡི་དང་པོ་ལ། །ཉི་ཟླ་གཟའ་སྐར་ཚེས་གྲངས་བརྟག །ཅེས་པ་ལྟར་ཕུན་སུམ་ཚོགས་པ་ལྔ་ལས། དང་པོ་གང་གིས་སྒྲུབ་ཅིང་སྟོན་པའི་སློབ་དཔོན་ནི། ལྟ་དགོངས་སྤྱོད་པ་རྣམ་པར་དག་པའི་ཡོན་ཏན་གྱི་གཏེར་དུ་གྱུར་ཅིང་། མཁྱེན་པ་ཟད་མི་ཤེས་པ། ཁུངས་ཀྱི་དབང་ལུང་མན་ངག་རྫོགས་ཤིང་དམ་ཚིག་དང་ལྡན་པ། བཤད་སྒྲུབ་རྐྱེན་ཁར་མི་གཏོང་བས་གཞན་རྗེས་སུ་འཛིན་པའི་ཐབས་མཁས་ཐུགས་རྗེར་ལྡན་པ་སོགས་གསང་སྔགས་ཀྱི་ལས་རབ་འབྱམས་ལ་དབང་འབྱོར་བས་སློབ་དཔོན་གྱི་ཡོན་ཏན་རྣམས་ཚད་དུ་ཕྱིན་པ་སྟེ། རྩ་རྒྱུད་ལས། བླ་མ་རྡོ་རྗེ་འཁོར་ལོ་རྒྱལ། །ཡོན་ཏན་མཆོག་གི་གཏེར་གྱུར་ཅིང་། །སྲིད་པར་ཞུས་ཀྱང་ཟད་མི་ཤེས། །རྐྱེན་ཐུབ་དབང་ལུང་རྫོགས་པ་བཟུང་། །ཞེས་སོ། ༈ །གཉིས་པ་གང་དང་ལྷན་ཅིག་སྒྲུབ་པ་དང་ཉན་པའི་འཁོར་ནི། སྤྱིར་བརྟན་ཞིང་དུལ་ལ་དད་བརྩོན་ཤེས་རབ་ཆེ་བ་དམ་ཚིག་དང་སྡོམ་པ་ལ་ཡིད་རྟོན་པའི་འཁོར་དང་། བྱེ་བྲག་ཏུ་སློབ་དཔོན་དང་དགོངས་པ་ཆ་འདྲ་ཞིང་འཆད་མཁས་པའི་རྡོ་རྗེ་རྒྱལ་ཐེབ། སྦྱོར་བའི་སྒྱུ་རྩལ་ཤེས་ཤིང་བརྩེ་གདུང་ཆེ་བའི་གཟུངས་མ། དཔའ་བརྟུལ་ཆེ་བའི་རྡོ་རྗེ་ཀིངྐ་ར། དྲོད་འཛིན་པའི་རྡོ་རྗེ་བྱ་རོག །མཐོང་བཟློག་ནུས་པའི་རྡོ་རྗེ་སྤྱན་པ། སྐད་སྙན་ཞིང་ཕྲིན་ལས་ཀྱི་གོ་རིམ་མཁས་པའི་ལས་མཁན། གཡོས་མཁས་ཤིང་ཁ་སྐ་བའི་རྡོ་རྗེ་བྱན་པོ། ཕྱི་ནང་བརྡ་སྦྱོར་མཁས་པའི་རྡུལ་ཕྱག་སྐྱེས་བུ་ལ་སོགས་པ་ཚོམ་བུར་འབྲེལ་བའི་འཁོར་རྣམས་ཏེ། རྩ་རྒྱུད་ལས། རྡོ་རྗེ་ཅན་གྱི་གཟུངས་འཛིན་མ། །ཞེས་པ་ནས། ལས་ཀྱི་ཕྲེང་བ་རྫོགས་བྱེད་པའོ། །ཞེས་པའི་བར་གྱིས་བསྟན་ནོ། ༈ །གསུམ་པ་གང་དུ་སྒྲུབ་པའི་གནས་ནི། ཡི་དྭགས་གདུག་པ་ཅན་གྱི་འགྱུ་སྲང་དང་གཅན་གཟན་དགྲ་རྐུན་སོགས་ཀྱི་གནོད་པ་མེད་ཅིང་། རྒྱལ་བས་ཞབས་ཀྱིས་བཅགས་པས་བྱིན་ཆེ་བ། གོང་མས་གྲུབ་པ་བརྙེས་པས་བཀྲ་ཤིས་པ། གནམ་ས་བར་སྣང་གི་དཔྱད་ལེགས་པས་ཡིད་དུ་འོང་ཞིང་། ཁྱད་པར་གཞུང་དང་མཐུན་པས་སྒྲུབ་ཐག་ཉེ་བ་སོགས་གནས་ཀྱི་མཚན་ཉིད་རྣམས་ལེགས་པར་ཚང་བ་སྟེ། བཤད་རྒྱུད་རྔམ་གློག་ལས། རི་བོ་འདུས་པའི་རྩེ་རྣམས་དང་། །ཙནྡན་ནགས་ཚལ་མེ་ཏོག་ཚལ། །ཡིད་འོང་བཀྲ་ཤིས་ཉམས་དགའ་བའི། །གནས་སུ་དཀྱིལ་འཁོར་བྲི་བར་བྱ། །གནམ་དང་ས་དང་བར་སྣང་རྣམས། །ལེགས་པར་བརྟགས་ཏེ་ལས་རྣམས་བྱ། །ཞེས་གསུངས། དེ་ལྟ་བུའི་བཀྲ་ཤིས་དགེ་མཚན་དང་ལྡན་པའི་གནས་དེར་ས་ཆོག་སྔོན་དུ་འགྲོ་བས་ཚོམ་བུའི་གྲངས་དང་འཚམས་པའི་གནས་ཁང་མཚན་ཉིད་དང་ལྡན་པ་འདུ་བྱ་བའོ། ༈ །བཞི་པ་གང་ལ་བརྟེན་ནས་སྒྲུབ་པའི་ཡོ་བྱད་ནི། རྩ་རྒྱུད་ལས། དེར་ནི་ཡོ་བྱད་ཕུན་སུམ་ཚོགས། །ཞེས་སོགས་གསུངས་པ་ལྟར་ལྷ་སྒྲུབ་པའི་སྐུ་གསུང་ཐུགས་ཀྱི་རྟེན་རབ་གནས་ཅན་དང་། དངོས་གྲུབ་སྒྲུབ་པའི་རྫས་ཐུན་མོང་མ་ཡིན་པ་རྣམས་དང་། རྨད་དུ་བྱུང་བའི་དམ་རྫས་བམ་གཙང་མ་སོགས་ཏེ་སྒྲུབ་རྫས་གསང་བའི་ཡོ་བྱད། དཀྱིལ་འཁོར་གྱི་རྒྱན་དང་སྨན་གཏོར་རཀྟ་སོགས་ཕྱི་ནང་གི་མཆོད་པ་རོལ་མོའི་བྱེ་བྲག་སོགས་ཏེ་མཆོད་རྫས་དག་པའི་ཡོ་བྱད། ནད་སེལ་བའི་སྨན་དང་སྨན་པ། དགྲ་བཟློག་གི་གོ་མཚོན། བགེགས་བཟློག་གི་ཉུལ་ལེ་བསྐྲད་པའི་ཆས་སོགས་ཏེ་བར་ཆད་རྐྱེན་བཟློག་གི་ཡོ་བྱད། བཟའ་བཏུང་གོས་སྟན་སོགས་འཚོ་བ་ཉེར་མཁོའི་ཡོ་བྱད། གཞན་ལས་སྒྲུབ་ཆོས་ཕུན་སུམ་ཚོགས་པ་ཞེས་བཤད་པ་ལྟར་ཉམས་ལེན་ལ་ཐེ་ཚོམ་གཅོད་པའི་ཡོ་བྱད་སྤྱི་དང་བྱེ་བྲག་གི་རྒྱུད་ལུང་མན་ངག་རྣམས་ཏེ་དགོས་པ་མཆོག་གི་ཡོ་བྱད་རྣམས་ཀྱང་འདུ་བྱ་བའོ། ༈ །ལྔ་པ་གང་གི་ཚེ་སྒྲུབ་པའི་དུས་ནི། སྤྱིར་རྩ་རྒྱུད་ལས། དཔྱིད་དབྱར་སྟོན་དགུན་ཏེ་དུས་བཞིར་ཕྱེ་བ་རེ་རེ་ལའང་རབ་འབྲིང་ཐ་གསུམ་གྱི་དང་པོ་རབ་བཞི་པོ་ཕྲིན་ལས་བཞིའི་དུས་ལ་དགེ་བར་གསུངས་ཤིང་། ཁྱད་པར་སྒྲུབ་པ་འགོ་རྩོམ་པའི་དུས་ཀྱང་དེ་བཞི་བཟང་བར་ལས་ཐོ་ལས་བཤད་པ་ལྟར། བདེ་འདུས་དབང་བྱང་ལས་ཀྱང་། དུས་ནི་དབྱར་དགུན་སྟོན་དཔྱིད་ཀྱི། །ར་བ་དག་ལ་རབ་ཏུ་ཤིས། །བརྒྱད་ནས་ཉ་ཡི་བར་ལ་གཏད། །བཀྲ་ཤིས་གཟའ་སྐར་ཤིས་པ་བླང་། །ཞེས་པས་དུས་ཆ་བཞིའི་དང་པོ་སྟེ་ར་བ་བཞི་དང་། དེའི་ནང་ནས་ཀྱང་ཉི་མ་འཕེལ་བའི་དུས་བྱང་བགྲོད། ཟླ་བ་འཕེལ་བའི་དུས་ཡར་ངོ་། །དེ་ལས་ཚེས་གྲངས་བརྒྱད་ནས་བཅོ་ལྔའི་བར་དགེ་བ་ལ་རྒྱལ་ཕུར་འཛོམ་པ་ལྟ་བུའི་གཟའ་སྐར་བཟང་པོ་ནས་འགོ་བརྩམ་སྟེ། རྩ་རྒྱུད་ལས། འདི་ལྟར་སྦྱར་བའི་དུས་ཆེན་ཡང་། །ངེས་པར་བརྟགས་ཏེ་མདོ་བཟུང་ལ། །རིག་བྱེད་དག་གི་ཡན་ལག་ལས། །ཤེས་པར་བྱ་སྟེ་ལེགས་སྦྱར་བ། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚིགས་བཟང་པོ་རྣམས། །འཇིག་རྟེན་མཚན་མའི་རྟོག་པ་སྟེ། །བརྟགས་ན་བཀྲ་ཤིས་མཚན་མ་འབྱུང་། །ཞེས་སོ། །ཡང་སྒྲུབ་པ་ཇི་ཙམ་བྱེད་པའི་དུས་ནི། སྨིན་སློབ་ཀྱི་དབང་དུ་བྱས་ན་ལོའམ་ཟླ་བ་དྲུག་ལ་སོགས་པ་དངོས་གྲུབ་ཀྱི་མཚན་མ་གཏན་ལ་མ་ཕེབས་ཀྱི་བར་དེ་སྲིད་དུ་སྒྲུབ་ཅིང་། མ་གྲུབ་ན་སྤོགས་ཆོག་དང་བཅས་པས་མཐའ་གཅིག་ཏུ་མ་ངེས་ལ། མོས་སློབ་ལ་ནི་ཞག་ཉི་ཤུ་རྩ་གཅིག་གམ། ཞག་བཅུ་གཅིག་ལྟ་བུ་ལ་བསྙེན་སྒྲུབ་བཞི་ཚང་བར་ཉམས་སུ་ལེན་པའོ། །བྱེ་བྲག་དབང་བསྐུར་བའི་དུས་ནི། བསྙེན་པ་རྫོགས་ནས་ལྷག་པའི་སེམས་བསྐྱེད་པའི་དུས་ཏེ། ངེས་འབྱེད་ལས། དང་པོ་སེམས་བསྐྱེད་འདུག་དུས་སུ། །རྫས་ཀྱི་དབང་བཅུ་རྫོགས་པར་བྱིན། །ཞེས་གསུངས་སོ། ༈ །སྤྱི་དོན་གཉིས་པ་བསྙེན་སྒྲུབ་ཡན་ལག་བཞིས་གཞུང་བསྲང་ཞིང་དབང་བསྐུར་བ་ལའང་གཉིས་ཏེ། རྒྱུད་དང་མན་ངག་གི་ལུགས་གཉིས་ཕྱེད་པའི་ཆེད་དུ་སོ་སོའི་ཐོ་བྱང་སྨོས་པ་དང་། དེ་གཉིས་ད་ལྟའི་དུས་ཀྱི་ཕྱག་ལེན་ལྟར་གཅིག་ཏུ་དྲིལ་ནས་སྒྲུབ་པའི་ཆོ་ག་བཤད་པའོ། །དང་པོ་ལ་གཉིས་ཏེ། རྒྱུད་ལུགས་མདོ་རྩ་བའི་དཀྱིལ་འཁོར་ལ་བརྟེན་པ་དང་། མན་ངག་གི་ལུགས་ཡན་ལག་དང་ཡན་ལག་ཅན་རྩ་བའི་དཀྱིལ་འཁོར་སོ་སོར་ཕྱེ་བ་མདོ་ཡོངས་རྫོགས་ལ་བརྟེན་པའོ། །དང་པོ་ནི། རྗེ་བླ་མ་དམ་པས་དཀྱིལ་ཆོག་དྲི་མེད་འོད་ཕྲེང་གི་མཇུག་ཏུ་དྲང་བར་མཛད་པའི་སྒྲུབ་བྱང་གི་སྡམས་ཀྱིས་བསྡུས་པ་སྟེ། དེ་ལ་བསྙེན་སྒྲུབ་ཡན་ལག་བཞིའི། དང་པོ་བསྙེན་པ་ལའང་གཉིས་ལས། སྔོན་དུ་བྱ་བའི་བསྙེན་པ་ནི། རྩ་རྒྱུད་ཀྱི་ལེའུ་དགུ་པ་དང་། སྤྱིའི་ཆོ་གས་ཞི་ཁྲོ་གཉིས་ཀྱི་བསྙེན་པ་བྱ་བའོ། །བྱ་བ་ལས་ཀྱི་བསྙེན་པ་ནི། བཤམས་པ་ནས་གཞལ་ཡས་ཁང་བསྐྱེད་པའི་བར་དོན་བཅུ་གཉིས་ཀྱིས་བསྡུས་པ་རིམ་པ་ཤོམས་དང་འབྲེལ་བ་སྟེ། རྩ་བའི་སྒྲུབ་བྱང་ལས། ཧེ་རུ་ཀ་ཡི་སྒྲུབ་ཐབས་ལ། །བསྙེན་སྒྲུབ་རྣམ་བཞི་གསུངས་པ་ལས། །རིམ་པ་ཤོམས་ཀྱིས་འབྲེལ་བའི་ཕྱིར། །བསྙེན་པ་ཞེས་སུ་བཤད་པ་ཡིན། །ཞེས་གསུངས། དེ་ལ་དོན་བཅུ་གཉིས་ཏེ། རྫས་བསག་ཅིང་བཤམ་པ། ས་བརྟག་པ། ས་བསླང་བ། རོ་བསལ་ཞིང་གཏེར་བཅུག་ལ་སྟེགས་བུ་རྩིག་པའི་སྒོ་ནས་སྦྱང་པ། དེའི་ཚེ་ངན་ན་སྔགས་རྒྱ་ཏིང་ངེ་འཛིན་ནམ་སྦྱིན་སྲེག་གིས་མཚན་མ་ཟིལ་གྱིས་མནན་པ། འཁྲུགས་སྡེབས་ཀྱི་རིམ་པས་དེར་དཀྱིལ་འཁོར་བསྐྱེད་ནས་གསོལ་གདབ་བགེགས་བསྐྲད་སོགས་ཀྱིས་ས་བཟུང་ཞིང་བསྲུང་བ་སྟེ་ནུབ་དང་པོ་སའི་ཆོ་གའོ། །ནང་པར་བྱིན་གྱིས་བརླབ་པ་ནི་ཡན་ལག་དང་ཡན་ལག་ཅན་གྱི་ལྷག་གནས་སོ། །དེ་ནས་ཕྱི་མཚམས་རྒྱལ་ཐོ་དང་ནང་མཚམས་འབར་བ་ལྟ་བའི་མཚམས་སོགས་བཞི་བཅད། བར་མཚམས་དམ་སྲི་མནན་པ་དང་ཡེ་ཤེས་ལྷའི་སྒོ་བྱང་གདགས། བསོད་ནམས་ཀྱི་དཔུང་བསྐྱེད་ཕྱིར་སྐབས་འདི་དང་སྒྲུབ་པ་ཐོག་མར་འགོ་འཛུགས་པའི་དུས་སུ་ཚོགས་བསག་ཅི་ནུས་བྱ། དབང་བསྒྱུར་གྱི་ཏིང་ངེ་འཛིན་གྱིས་དེར་གཞལ་ཡས་ཁང་བསྐྱེད་པས་གནས་བྱིན་གྱིས་བརླབ་ཅིང་། དེ་དང་རྗེས་འབྲེལ་དུ་ཕྱག་རྒྱ་དང་ཚོགས་ཆེན་འདུས་པའི་ཏིང་འཛིན་གྱིས་འཁོར་དང་ཡོ་བྱད་བརླབ་པ་རྣམས་སོ། །གཉིས་པ་ཉེ་བསྙེན་ནི། ཐིག་ཚོན་གྱིས་བྲི་བ་ནས་མཆོད་པ་བྱིན་རླབས་ཀྱི་བར་དོན་བཅུ་བདུན་གྱིས་བསྡུས་པ་སྟེ། དེ་ལས། ཁྲག་འཐུང་རོལ་པའི་དཀྱིལ་འཁོར་དུ། །གསང་སྒོར་ཞུགས་ནས་བྱིན་ལྡན་ཕྱིར། །ཉེ་བའི་བསྙེན་པར་དེ་བརྗོད་དོ། །ཞེས་གསུངས། དེ་ལ་དོན་བཅུ་བདུན་ཏེ། དམིགས་རྟེན་གྱི་དཀྱིལ་འཁོར་ཐིག་ཚོན་གྱིས་བྲིས་ལ། ཕྱིར་ཆ་གསུམ་གཏོར་མ་བཏང་། ཕྱི་མཚམས་གསོས་ལ། ནང་དུ་དཀྱིལ་འཁོར་དང་རྫས་རྣམས་སྦྱང་ཞིང་། བསྐྱེད་པས་བྱིན་གྱིས་བརླབས་ཏེ། རྣམ་པ་དང་རྒྱན་རྫས་རྣམས་དགོད། །དེ་ནས་འཁྲུགས་སྡེབས་ཀྱི་རིམ་པས་དཀྱིལ་འཁོར་བྱིན་དབབ། གླེང་གཞི་བཤད་པ་སྤྲོ་བ་བསྐྱེད་ནས། བསྙེན་པར་གནང་བའི་དབང་བསྐུར། བརྡ་སྒོ་ཕྱེ་སྡེ་བརྡ་ཕྱག་བཙལ་ལ། བཤགས་པ་བྱ། དམ་བཅའ། བྱིན་དབབ། མ་ཊཱཾ་དང་། དམ་སྲི་མནན། རྟགས་གདབ། མཆོད་པ་བྱིན་གྱིས་བརླབ་པ་རྣམས་སོ། །གསུམ་པ་སྒྲུབ་པ་ནི། སྒྲུབ་གཞུང་བསྲང་བ་སོགས་དོན་བཅུས་སྨིན་སློབ་ལ་དངོས་གྲུབ་ཀྱི་མཚན་མ་གཏན་ལ་མ་ཕེབས་ཀྱི་བར་དང་། མོས་སློབ་ལ་དུས་ཇི་ལྟར་རིགས་ཀྱི་བར་དུ་སྒྲུབ་པ་སྟེ། དེ་ལས། རྡོ་རྗེ་རིགས་ཀྱི་སྒྲུབ་པ་ལ། །གང་ཡང་བར་ཆད་མི་གཡེང་ཕྱིར། །དམ་པའི་གཞུང་ཉིད་འཛིན་པས་ན། །སྒྲུབ་པ་ཞེས་བྱར་དེ་བརྗོད་དོ། །ཞེས་གསུངས། དེ་ལ་དོན་བཅུ་སྟེ། རྩ་བའི་དཀྱིལ་འཁོར་ཐུན་མོང་དང་ཐུན་མིན་གང་བྱེད་སྐབས་བབས་ཀྱིས་དུས་དྲུག་ཏུ་ཞི་ཁྲོའི་གཞུང་བསྲང་། གསལ་བ་གསུམ་གྱི་ཛཔ྄་བྱ། ཚོགས་རློབ་ཅིང་དབུལ། གཏོར་མ་གསར་རྙིང་མཚམས་སྦྱར་ལ་ལྷག་མ་བཏང་། ལས་གང་ལ་དམིགས་པ་དེའང་སྤྱི་ཙམ་དུ་རྒྱས་པའི་སྦྱིན་སྲེག་བྱ། བསྐང་བཤགས་ཀྱིས་བཟོད་པར་གསོལ། འདུག་པའི་ཚེ་རང་གི་སྟན་བྱིན་གྱིས་རློབ་ཅིང་འགྲོ་ན་ཕྲེང་བས་བསྲུང་དུ་གཞུག །གནས་ཀྱི་ཏིང་ངེ་འཛིན་གྱིས་ཏ་ན་སྒྲོལ་བ་དང་། ག་ན་སྦྱོར་བ་བྱིན་གྱིས་བརླབ་ཅིང་སྐབས་དང་སྦྱར་ཏེ་མཆོད། དུས་དྲུག་ཏུ་ཉུལ་ལེ་བཟློག་པ་རྣམས་སོ། །བཞི་པ་སྒྲུབ་ཆེན་ནི། རྟགས་ནས་གནས་བསྲུང་བའི་བར་དོན་བཅུ་གཅིག་གིས་བསྡུས་པ་ནུབ་ཐ་མ་དངོས་གྲུབ་ལེན་ཅིང་དབང་བསྐུར་བའི་ཆོ་ག་སྟེ། དེ་ལས། ཁྲག་འཐུང་ལས་ཀྱི་རིམ་པ་ལས། །རྣལ་འབྱོར་དྲོད་ཀྱི་རྩལ་འཆང་བས། །དོན་མཆོག་མངོན་དུ་བྱ་བའི་ཕྱིར། །སྒྲུབ་པ་ཆེན་པོ་ཞེས་སུ་བརྗོད། །ཞེས་གསུངས། དེ་ལ་དོན་བཅུ་གཅིག་སྟེ། གྲུབ་པའི་རྟགས་མཚན་གཏན་ལ་ཕེབས་པ་དང་། ནུབ་ཐ་མ་དངོས་གྲུབ་ཀྱི་རྫས་བཤམ། དབང་གི་སྦྱིན་སྲེག་བྱ། རང་དོན་དུ་དངོས་གྲུབ་བླང་ཞིང་། གཞན་དོན་སློབ་མ་ལ་རྒྱུད་ལུགས་ཀྱི་དབང་ཆུ་བོ་བཞིས་བསྡུས་པའི་སུམ་ཅུ་རྩ་དྲུག་སྐལ་བ་དང་འཚམས་པར་བསྐུར་ལ། བཀྲ་ཤིས་དང་། མར་མེ་སྨོན་ལམ་གདབ། གཏོར་མ་ཆ་གསུམ་དུ་བགོས་ལ་ཞི་བའི་སྲེགས་བླུགས་དང་ཕྱི་རོལ་དུ་གཏོར་སྐྱོང་བྱ། ཆ་གཅིག་གཏེར་དུ་སྦ། མཚམས་དགྲོལ་བ་སོགས་དཀྱིལ་འཁོར་བསྡུ་བའི་རིམ་པ་རྣམས་བྱས་ཏེ། ཞག་གཅིག་གནས་བསྲུང་བ་རྣམས་སོ། ༈ །གཉིས་པ་མན་ངག་གི་ལུགས་ཡན་ལག་དང་ཡན་ལག་ཅན་རྩ་བའི་དཀྱིལ་འཁོར་སོ་སོར་ཕྱེ་བ་མདོ་ཡོངས་རྫོགས་ལ་བརྟེན་པ་ནི། སློབ་དཔོན་བདེ་བ་གསལ་མཛད་ཀྱི་ལས་ཐོའི་དགོངས་པ་སྟེ། སྨིན་མོས་ཀྱི་ཁྱད་པར་ནི། འདིར་ཉེ་བསྙེན་དང་སྒྲུབ་པ་གཉིས་ལ་ཞག་བདུན་ཕྲག་རེའི་ཞལ་གསལ་ཡོད་པས་མོས་སློབ་གཙོ་ཆེ་ཞིང་། དེ་གཉིས་ཞག་གྲངས་མཉམ་པར་མཛད་པ་སྒྱུ་འཕྲུལ་བའི་ལུགས་དང་འདྲ་ནའང་། འདིར་དེ་དང་དེ་རྒྱུད་དང་ལུང་གི་དཀྱིལ་འཁོར་སོ་སོ་བ་ཡིན་པའི་ཕྱིར་ཁྱད་ཆེ་བས་མ་འདྲེས་པར་བྱའོ། །དེ་ལ་ཐོག་མར་རྡོ་རྗེ་སློབ་དཔོན་གཞིའི་བསྙེན་པ་ཁ་སྐོངས་དང་བཅས་པ་སྔོན་དུ་ཐེམ་པས། སློབ་མ་བཟུང་ཞིང་རང་གི་བསྙེན་པ་ཁ་གསོས་ནས། གདོད་བསྙེན་སྒྲུབ་ལ་འཇུག་སྟེ། དེ་ལ་བསྙེན་སྒྲུབ་ཡན་ལག་བཞི་ལས། དང་པོ་བསྙེན་པའི་ཡན་ལག་ཕྱི་དབང་རྒྱུད་ཀྱི་ཆུ་བོ་བསྐུར་བའི་རིམ་པ་ནི། སྔར་གནས་བཤད་པའི་ཚེ། ས་ཆོག་རྫོགས་བྱས། ཞེས་གསུངས་པ་ལྟར། ས་བརྟག །བསླང་། སྦྱང་། བཟུང་། བསྲུང་བ་རྣམས་དཀྱིལ་ཆོག་ལྟར་ལས། དཀྱིལ་འཁོར་ཁང་པ་གསར་རྙིང་གི་ཁྱད་ཀྱི་འདོར་ལེན་ཤེས་པར་བྱས་རྗེས། དང་པོ་ཕྱི་དབང་རྒྱུད་ཆུ་བོ། །མཚན་ཉིད་སྡེ་གསུམ་ལུགས་དག་ཏུ། །ཞེས་པ་ནས། སཱཙྪ་དཔང་སྐོང་དཀྱིལ་འཁོར་མཆོད། །ཅེས་པའི་བར་གསུངས་པ་ལྟར་བསོད་ནམས་ཀྱི་དཔུང་བསྐྱེད་པའི་ཕྱིར་ཉེའུ་འདོན་པ་ནས་དཔང་སྐོང་གི་བར་ཚོགས་གསོག་ཅི་འགྲུབ་དང་། དཀྱིལ་འཁོར་མཆོད། ཅེས་པས། ཆ་གསུམ་དང་མ་མོ་གླིང་བཞིའི་མདོས་ཀྱི་དཀྱིལ་འཁོར་བཤམ་མཆོད་ཀྱིས་ཐུགས་དམ་བསྐང་། ཕྱག་རྡོར་ངན་སོང་གནས་འདྲེན་གྱི་དཀྱིལ་འཁོར་དུ་སྤྱི་དབང་ཆེན་པོའི་གླེང་གཞི་དང་འབྲེལ་བར་མཆོག་དབང་བཅུ་དྲུག་གིས་རྒྱུད་སྦྱངས་ཏེ་སྣོད་རུང་དུ་བསྒྲུབས་པས་སྒོ་དབྱེ་བ་རྣམས་ནི་ནུབ་དང་པོའི་བྱ་བའོ། །དེ་ནས་ནུབ་གཉིས་པ་ནས་བཟུང་ཕྱི་དབང་རྣམས་ཀྱི་ཞག་གྲངས་རྒྱས་བསྡུས་སྐབས་དང་སྦྱར་ཏེ། ཕྱི་དབང་གི་དཀྱིལ་འཁོར་དྲུག་ལས། ལྷ་མི། ཉན་ཐོས། རང་རྒྱལ། བྱང་སེམས་བཞི་ནི་སྔར་དྲངས་པའི། དཀྱིལ་འཁོར་མཆོད། །ཅེས་པ་བར་གྱི་གསལ་བྱེད་ཡིན་པས་འདིར་ཡང་སྦྱར་ཏེ། དེ་བཞིའི་དཀྱིལ་འཁོར་བཤམ་སྒྲུབ་སོང་བ་དང་། ལས་དང་པོ་པ་རྣམས་རང་རང་གི་ངེས་པར་འབྱུང་བའི་ཚུལ་བཞིས་སོ་སོའི་སྡོམ་པ་ཕོག་པས་དཀྱིལ་འཁོར་དུ་བཅུག་ཅིང་། ཀྲི་ཡོག་གཉིས་ལ་རང་རང་གི་སྟ་གོན་སྔོན་དུ་འགྲོ་བས། ཀྲི་ཡ་རྩ་བའི་ལྷ་རིགས་གསུམ་ཉི་ཤུ་རྩ་གཅིག་གི་དཀྱིལ་འཁོར་དང་། ཡོ་ག་ལ་རྡོ་རྗེ་དབྱིངས་ཀྱི་དཀྱིལ་འཁོར་སོ་སོའི་ལུགས་ལྟར་བཞེངས་སྒྲུབ་དེར་འཇུག་པ་རྣམས་བྱས་རྗེས། ཕྱི་དབང་རྩ་བ་བཅུ་ལ་ཡན་ལག་རགས་པ་བརྒྱ་རྩ་བརྒྱད་དུ་ཕྱེ་ནས་སོ་སོའི་དབང་འདོར་ལེན་གྱི་གནད་ཀྱིས་བསྐུར་བར་བྱ་བ་ཡིན་ནོ། །གཉིས་པ་ཉེ་བསྙེན་གྱི་ཡན་ལག་ནང་དབང་འབྱུང་བའི་ཆུ་བོ་བསྐུར་བའི་རིམ་པ་ནི། དཔང་སྐོང་བཀླག །ཞི་གཞུང་བསྲངས་ལ་ཚོགས་དང་སྦྱིན་སྲེག་དབུལ། ཡན་ལག་དང་ཡན་ལག་ཅན་གྱི་རབ་གནས་རྣམས་བྱ། སང་ནངས་པར་ཆ་གསུམ་དང་གསེར་སྐྱེམས་བཏང་། རྒྱལ་ཆེན་དང་ཕྱོགས་སྐྱོང་གི་ཐོས་ཕྱི་མཚམས། ཁྲོ་བཅུའི་མཚམས་དང་དམ་སྲི་མནན་པས་བར་མཚམས། ལྟ་བའི་མཚམས་སོགས་བཞིས་ནང་མཚམས་བཅད། ཏིང་འཛིན་གསུམ་གྱིས་གནས་འཁོར་ཡོ་བྱད་བརླབ། སྟེགས་བུ་ལ་གོ་མ་ཡེ་བཏང་། གཟུངས་མ་བརླབས་ཏེ་ཐིག་གདབ་པ་དང་། ཚོན་བཀྱེ་བས་ཚོགས་ཆེན་འདུས་པའི་དཀྱིལ་འཁོར་འདྲེན་པའི་ལས་བྱང་ཆེ་ལེ་ལྟར་བྲིས་ལ། ཕྱག་རྒྱའི་རྣམ་པ་དང་མཆོད་རྫས་སྒྲུབ་རྫས་སོགས་རྒྱན་བཀོད་བྱས་ནས། དུས་དྲུག་ཏུ་ཞི་ཁྲོའི་ལས་གཞུང་བསྲང་ཞིང་། བཟླས་བསྙེན་ཚོགས་གཏོར། སྦྱིན་སྲེག་རྣམས་བྱ། ཚུལ་དེས་ཞག་བདུན་རྫོགས་པའི་ཐ་མ་ལ་སློབ་དཔོན་བདག་ཉིད་དཀྱིལ་འཁོར་དུ་རིག་པས་ཞུགས་རྗེས། སློབ་མ་བཅུག་སྟེ། ནང་དབང་རྩ་བ་བཅུ་གཅིག་ལ་ཡན་ལག་དྲུག་བརྒྱ་དང་དྲུག་ཏུ་ཕྱེ་ནས་བསྐུར་རོ། །གསུམ་པ་སྒྲུབ་པའི་ཡན་ལག་སྒྲུབ་དབང་གྲགས་པའི་ཆུ་བོ་བསྐུར་བའི་རིམ་པ་ནི། ཕྱི་ནང་བར་གསུམ་གྱི་མཚམས་སྔར་ལྟར་བཅད། ཁྱད་པར་བར་མཚམས་ལ་གཤིན་རྗེ་གཤེད་ཀྱི་སྒོ་བྱང་གདགས། གནས་ཡོ་འཁོར་གསུམ་རློབ། སྟེགས་བུར་གོ་མ་ཡེ་བཏང་། ཐིག་གཡོག་བརླབས་ཏེ་རང་བཞིན་ཏིང་འཛིན་གྱི་གནམ་ཐིག་དང་། གཟུགས་བརྙན་ལས་ཀྱི་ས་ཐིག་གདབ་ཅིང་། ཚོན་བཀྱེ་བས་རྩ་རྒྱུད་ཀྱི་ཚོགས་ཆེན་འདུས་པའི་སྒྲུབ་ལུགས་ཀྱི་ལེའུ་ལྟར། དཀྱིལ་འཁོར་དུར་ཁྲོད་གསང་བའི་ལུགས་སུ་བཞེངས་པ་ལ། ཕྱག་རྒྱའི་རྣམ་པ་སྒྲུབ་རྟེན་མར་མེ། མཆོད་རྫས་དང་དཀྱིལ་འཁོར་གྱི་རྒྱན་རྣམས་དགོད། དེ་ནས་བརྡ་སྒོ་ཕྱེ་ལ། བརྡ་ཕྱག་འཚལ། རྟགས་གདབ། གོས་རྒྱན་བསྟར། བྱིན་དབབ། ཕྱག་འཚལ། དམ་བཅའ། དངོས་གྲུབ་གསོལ་བ། བསྐང་བཤགས་ཏེ་ལས་ཀྱི་ཕྲེང་བ་རྫོགས་པར་བྱས་ལ། དཀྱིལ་འཁོར་བསྐྱེད་དྲངས་མཆོད་བཟླས་ཏེ་ལས་རྣམ་བཞིས་བསྙེན་སྒྲུབ་ཀྱི་གཞུང་བསྲང་། ལྷའི་རྐང་འདོན་དུ་སྟོང་ཚིགས་ཀྱིས་མཆོད་ཅིང་བསྟོད། ཚོགས་མཆོད། བསྐང་བཤགས། ཉུལ་ལེ་བཟློག་པ་རྣམས་དུས་དྲུག་ཏུ་བྱ། ཚུལ་དེས་ཞག་བདུན་རྫོགས་པའི་ཐ་མ་ལ། སློབ་དཔོན་བདག་ཉིད་དཀྱིལ་འཁོར་དུ་ཞུགས་ཏེ། ལྷ་དང་རྫས་ལས་དངོས་གྲུབ་བླངས་རྗེས། སློབ་བུ་དཀྱིལ་འཁོར་དུ་བཅུག་སྟེ། སྒྲུབ་དབང་རྩ་བ་བཅུ་གསུམ་ལ་ཡན་ལག་བརྒྱ་དང་བཅོ་ལྔར་ཕྱེ་ནས་བསྐུར་རོ། །བཞི་པ་སྒྲུབ་པ་ཆེན་པོའི་ཡན་ལག་གསང་དབང་རྫོགས་པའི་ཆུ་བོ་བསྐུར་བའི་རིམ་པ་ནི། འདི་དངོས་གྲུབ་ཆེན་པོ་ཡུམ་གྱི་མཁའ་ལས་བླང་བ་ཉིད་ཡིན་པས་སྒྲུབ་ཆེན་ཏེ། དེ་ལ་བརྡའི་དཀྱིལ་འཁོར་བཤམ་སྒྲུབ་བྱས་ལ། ཀུན་རྫོབ་དང་དོན་དམ་བྱང་སེམས་ཀྱི་དཀྱིལ་འཁོར་དུ་བཅུག་ནས། གསང་དབང་རྫོགས་པའི་ཆུ་བོ་རྣམ་པ་གཉིས་བསྐུར་བ་ཡིན་ནོ། །རྒྱུད་དང་མན་ངག་གི་ལུགས་གཉིས་སོ་སོའི་ཐོ་བྱང་མདོ་ཙམ་བཤད་ཟིན་ཏོ།། །།

འདུས་པ་མདོའི་དབང་རྒྱུད་དང་མན་ངག་གི་ལུགས་གཅིག་ཏུ་དྲིལ་ནས་བསྙེན་སྒྲུབ་ཡན་ལག་བཞི་དང་འབྲེལ་བར་བསྐུར་བའི་སྒྲུབ་ཁོག་གི་ཆིངས་རིན་ཆེན་འོད་ཀྱི་སྣང་བ། དྷརྨཱ་ཤྲཱི།

ༀ་སྭ་སྟི། ཟླ་ཉི་རླུང་སེམས་འགྱུར་བའི་སྒྲིབ་པ་བཞི། །བསྙེན་སྒྲུབ་རྣམ་བཞིས་གཏན་མེད་བཅོམ་ལས་སླར། །དྲི་བྲལ་རྡོ་རྗེ་བཞི་ཡི་རྒྱལ་ཐབས་ལ། །དབང་བསྒྱུར་སྐུ་བཞིའི་བདག་ཉིད་བླ་མར་འདུད། །རྒྱུད་ལུང་མན་ངག་ལུགས་གཉིས་གཅིག་དྲིལ་གྱིས། །ཆུ་བོ་བཞིའི་དབང་བསྙེན་སྒྲུབ་རྣམ་བཞི་ཡི། །ཆོས་ཀྱི་སྒྲོམས་སུ་བཅུག་ནས་བསྐུར་བའི་ཆིངས། །ཉུང་གསལ་རྫོགས་པའི་དཔལ་འདི་དེ་རིང་བྱིན། །ད་ནི་གཉིས་པ་རྒྱུད་དང་མན་ངག་གི་ལུགས་གཉིས་ད་ལྟའི་དུས་ཀྱི་ཕྱག་ལེན་ལྟར་གཅིག་ཏུ་དྲིལ་ནས་སྒྲུབ་པའི་ཆོ་ག་ལ། རྩ་རྒྱུད་ལས། རྡོ་རྗེ་ཚོགས་ཏེ་བསྙེན་པ་དང་། །ཉེ་བ་དང་ནི་སྒྲུབ་པ་དང་། །སྒྲུབ་པ་ཆེན་པོར་སྦྱར་བར་བྱ། །ཞེས་པ་ལྟར་བཞི་ལས། དང་པོ་བསྙེན་པའི་ཡན་ལག་ལ་གསུམ་སྟེ། སློབ་དཔོན་གྱིས་སྔོན་དུ་བྱ་བའི་བསྙེན་པ། སློབ་མ་བཟུང་ཞིང་རང་གི་བསྙེན་པ་ཁ་གསོ་བ། བསྙེན་པའི་ཡན་ལག་དངོས་སོ། །དང་པོ་ལའང་སྨིན་མོས་གཉིས་ལས། ཚོགས་སྒྲུབ་མཚན་ཉིད་པའི་སྔོན་དུ་བྱ་བའི་བསྙེན་པ་ནི། སྨིན་སློབ་སྟེ། ལྟ་བ་དབྱིངས་ཡེ་ཤེས་གཉིས་མེད་དུ་རྟོགས་པས། དོན་དང་ཡི་གེའི་རྗེས་སུ་འཇུག་པའི་ཏིང་ངེ་འཛིན་རིམ་གྱིས་སམ་གཅིག་ཆར་གང་རུང་གི་སྒོ་ནས་བརྟན་པ་ཐོབ་པར་བྱེད་པ་སྟེ། མཚན་མའི་བསྙེན་པ་ལའང་གསུམ་གྱི་རབ་ཡིན་ནོ། །གལ་ཏེ་ཏིང་ངེ་འཛིན་སྤྱིའི་རྣམ་པ་ལམ་དུ་བྱེད་པའི་ཚོགས་སྒྲུབ་མོས་སྒོམ་ལ་བརྟེན་པ་དང་དབང་བསྐུར་བ་ཙམ་གྱི་ཆེད་དུ་བྱ་བའི་བསྙེན་པ་ནི། མོས་སློབ་ཀྱིས་ཀྱང་རུང་སྟེ། དབེན་པའི་གནས་སུ་མཚམས་བ ཅད་ལ། རང་གཞི་ལུས་ཀུན་བཟང་དང་ཆེ་མཆོག་ལ། ཞི་ཁྲོ་ལུས་དཀྱིལ་དུ་བཀོད་པ་ཨ་ནུ་རང་གཞུང་གི་སྒྲུབ་ལུགས་ལྟར་ཉམས་སུ་བླངས་པས་མཚན་མ་ཅི་རིགས་མཐོང་བའམ། ཐ་ནའང་དུས་དང་གྲངས་ཀྱི་བསྙེན་པ་གང་རུང་ཁ་སྐོངས་ཀྱི་སྦྱིན་སྲེག་དང་བཅས་པ་བྱ་བའོ། །གཉིས་པ་ནི། དེ་ལྟར་རྩ་བསྙེན་ཐེམས་པའི་བླ་མ་ལ། དད་གུས་དང་ལྡན་པའི་སློབ་མས་གསོལ་བ་ལན་གསུམ་དུ་བཏབ་ཅིང་། རུས་ཀྱང་འདོད་དོན་དྲི་བ་སོགས་ཀྱིས་མཚན་ཉིད་ལེགས་པར་བརྟགས་ཏེ། སྣོད་རུང་དུ་མཐོང་ན་གནང་བ་བྱིན་ལ། ཏིང་ངེ་འཛིན་གྱིས་བུའི་བགེགས་སྦྱང་ཞིང་བསྲུང་བ་བྱས་ཏེ། རྒྱུད་སྦྱང་བའི་མན་ངག་བསྟན་ནས་སློབ་དཔོན་བདག་ཉིད་ལྷ་ལ་གནང་བ་ཞུ་བའི་དོན་དུ་བསྙེན་པ་ཁ་གསོ་བ་ལ་འཇུག །དེའི་ཚེ་འགྲུབ་ན་མདོ་རྩ་བའི་རྣམ་བུམ་སྟ་གོན་བཞིན་དུ་འདུ་བྱས་ལ། ཐུན་མཇུག་རྣམས་སུ་བུམ་པའི་བསྐྱེད་བཟླས་ཀྱང་ཅི་ནུས་བྱ། དེའི་བར་དུ་བུས་ཀྱང་ལུས་སྲོག་གི་བར་ཆད་དུ་འགྲོ་བའི་གནས་རྣམས་སུ་འགྲོ་འདུག་སོགས་སྤངས་ལ། བསག་སྦྱངས་ལ་འབད་ཅིང་། སྒྲུབ་མཆོད་དང་དབང་གི་ཡོ་བྱད་སོགས་འདིར་དགོས་པའི་ཆ་རྐྱེན་ཐམས་ཅད་ཚོགས་པར་བསག་གོ། །གསུམ་པ་ལ་གསུམ་སྟེ། སའི་ཆོ་ག་བྱ་བ། སྤྱིའི་སྔོན་འགྲོས་གཞི་བཟུང་བ། བྱེ་བྲག་ཡན་ལག་དང་ཡན་ལག་ཅན་རྩ་བའི་དཀྱིལ་འཁོར་ལ་བརྟེན་པའི་བསྙེན་པའོ། །དང་པོ་ནི། དཀྱིལ་འཁོར་ཁང་པ་གསར་པའི་ཕྱོགས་ལ་རས་བྲིས་དང་རྡུལ་ཚོན་གང་ལ་བརྟེན་ཀྱང་རུང་སའི་ཆོ་ག་བྱ་དགོས་ཏེ། འདི་ལ་ཕྱག་ལེན་ཕལ་ཆེ་བར། ས་སྦྱང་བ་ཡན་ཆད་ལས་མི་མཛད་པའི་སྲོལ་སྣང་ནའང་། རྒྱུད་དང་མན་ངག་གི་ལུགས་ཀྱི་ལས་ཐོ་གཉིས་ཀ་ལས་དེ་འདྲའི་དམིགས་འབྱེད་མ་གསུངས་པས། དཀྱིལ་ཆོག་ལྟར་སའི་ཆོ་ག་ཚང་བར་བྱ་བ་ལ་ལེགས་ཤིང་། གལ་ཏེ་དཀྱིལ་འཁོར་ཁང་པ་རྙིང་པ་ལྟ་བུ་ཡིན་ཀྱང་། ལས་དང་བྱ་བའི་སྒོ་ནས་བརྟག་སྦྱང་མ་གཏོགས་ལྷག་མ་རྣམས་ཕྱག་བཞེས་མི་ནུབ་པའི་ཆེད་དུ་མཛད་པའི་ལུགས་ཀྱང་སྣང་སྟེ། སྤྲོ་ན་བྱར་རུང་ངོ་། །གཉིས་པ་ལ་ལྔ་སྟེ། དགེ་བའི་དཔུང་བསྐྱེད་པ། ཕྱི་ནང་གི་ཐུགས་དམ་སྐོང་བ། ཚོགས་ལས་ཀྱིས་ཉམས་ཆག་སྐོང་བ། མ་འདྲེས་པ་བསྲེ་ཞིང་འདྲེས་པ་བསྣན་པ། ཟབ་མོའི་ཆོས་བཤད་དང་འབྲེལ་བར་སྒོ་འབྱེད་ཀྱི་དབང་བསྐུར་བའོ། །དང་པོ་ནི། སྒྲུབ་པ་ལ་འཇུག་པའི་གོང་ནས་ཀྱང་། རྟེན་གསུམ་མཆོད་པ། གསུང་སྒྲོག །དགེ་འདུན་ལ་བསྙེན་བཀུར། ཆུ་གཏོར། སྨན་དང་བཟའ་བཏུང་སྦྱིན་གཏོང་། སྲོག་བསླུ། ཉེའུ་འདོན་པ། རི་རྒྱ་ཀླུངས་རྒྱ་བསྡམ་པ། སཱཙྪ་གདབ་པ། ལམ་འཕྲང་བསལ་བ་སོགས་གནས་དེ་ཉིད་དམ་གཞན་དུའང་རུང་སྟེ། རང་ངམ་གྲོགས་ལ་བཅོལ་ནས་རྒྱབ་རིམ་ཅི་འགྲུབ་སྔོན་དུ་གཏོང་ཞིང་། ཁྱད་པར་གནས་དེ་ཉིད་དུ་སློབ་མ་འདུས་པ་རྣམས་ཀྱིས། དཀོན་བརྩེགས། མྱང་འདས། ཡུམ་རྒྱས་པ། ཕལ་ཆེན། ལངྐར་གཤེགས་པ་སྟེ་འབུམ་སྡེ་ལྔའམ། མི་ནུས་ན། དེ་ལྔ་ལས་བཏུས་པ། ལྟུང་བཤགས། འདའ་དཀའ་ཡེ་ཤེས། ཤེར་སྙིང་། བཟང་སྤྱོད། རྣམ་འཇོམས་ལྔ་དང་། དཔང་སྐོང་རྣམས་ཀློག །ཁྲུས་དང་གཙང་སྦྲ་སྔོན་དུ་འགྲོ་བས་ཡི་དམ་གྱི་སྔགས་བཟླ་བཞིན་དུ་སཱཙྪ་གདབ་པ་སོགས་ཅི་ལྕོགས་ཀྱིས་འབད་པར་བྱ་སྟེ། རྒྱུད་འབྱོངས་ཤིང་བར་ཆད་མི་འབྱུང་བའི་དགོས་པ་ཡོད་དོ། །གཉིས་པ་ནི། ཕྱི་ལྟར་ན། སྤྱིར་མགྲོན་རྣམ་པ་བཞི་ལ་སྒྲུབ་ཐབས་ལྟར་ཆ་གསུམ་གྱི་ཆོ་གས་ཐུགས་དམ་བསྐང་། ཁྱད་པར་དཀོན་མཆོག་མཆོད་ཅིང་གསོལ་བ་གདབ། སྲུང་མ་ཐུགས་དམ་ཅན་སྤྱི་སྒོས་ཐམས་ཅད་ལ་མཆོད་གཏོར་ཕུལ་ནས་སྒྲུབ་པའི་སྟོངས་གྲོགས་ཞུ། འཇིག་རྟེན་གྱི་ལྷ་འདྲེ་ཐམས་ཅད་ལ་ཕུད་གཏོར་བཏང་ལ་བར་ཆད་མི་བྱེད་པར་བཀའ་བསྒོ། བྱེ་བྲག་གཉུག་མར་གནས་པའི་གཞི་བདག་ལ་གསེར་སྐྱེམས་དང་གཏོར་མ་བྱིན་ནས་སྟོངས་གྲོགས་བཅོལ་ལོ། །ནང་ལྟར་ན། མ་མོ་བཞི་བསྐང་བ་སྟེ། དེ་ལ་ཕྱི་མ་མཐུན་སྤྲུལ་པའི་མ་མོ་བསྐང་བ་ནི། སྲིད་པའི་སྤྱི་མདོས་སམ། མ་གྲུབ་ན་མ་མོ་རིན་ཆེན་ཕྲ་བཀོད་ལས་ཕྱུངས་པ་གླིང་གི་བཀོད་པ་ལྟ་བུའི་མདོས་བཞེངས་ནས་གཞུང་བཞིན་མཆོད་ལ་བར་ཆད་སྲུངས་ཤིག་པར་ཐུགས་དམ་བསྐུལ། ནང་ཏིང་ངེ་འཛིན་གྱི་མ་མོ་ཡིག་འབྲུའི་སྒོ་ནས་བསྐྱེད་ཅིང་སྤྱན་དྲངས་བསྟིམ་ལ་མཆོད་བསྟོད་འདོད་པའི་དོན་ལ་གསོལ་བ་གདབ། གསང་བ་ཐིག་ལེའི་མ་མོ། ཙཎྜ་ལཱིའི་མན་ངག་གིས་རྩ་རླུང་གཅུན། རང་བཞིན་ལྷུན་གྲུབ་ཀྱི་མ་མོ་མཁའ་ཀློང་གཉིས་མེད་དུ་ལ་བཟླ་བར་བྱའོ། །གསུམ་པ་ནི། མཎྜལ་ལ་ཉི་ཟླ་བྱང་སེམས་ཀྱིས་ཆག་ཆག་བཏབ་པའི་སྟེང་དུ་ཡི་དམ་གྱི་སྐུ་བཞུགས་སུ་གསོལ་བའམ་ཡང་ན་ཚོམ་བུ་ལྔ་བཀོད། དེའི་མདུན་དུ་དམ་རྫས་སུ་འོས་པའི་ཡོ་བྱད་བཤམས་ལ། ལས་མཁན་གྱིས་ཞི་ཁྲོའི་ལས་གཞུང་སྲོང་བའམ་མ་གྲུབ་ན། སྟོང་པའི་ངང་ལས་སྲུང་འཁོར་གྱི་དབུས་སུ་བསྐྱེད་སྔགས་བརྗོད་པས་རྡོ་རྗེ་གཞོན་ནུའམ་ཞེ་སྡང་རྡོ་རྗེ་ལྟ་བུ་གཉུག་མའི་ལྷ་ཕྱག་རྒྱ་གཅིག་པའི་སྐུར་ལངས་ལ། ཆ་གསུམ་གྱི་དྲི་ཆབ་ཀྱིས་བསངས་ཏེ། ལས་གཞུང་ལྟར་ཚོགས་བྱིན་གྱིས་རློབ་ཅིང་། ཚོགས་ཞིང་རྣམས་སྤྱན་དྲངས་པ་མཎྜལ་ལ་བཞུགས་སུ་གསོལ་ཏེ། དང་པོས་མཆོད། བར་པས་བཤགས། ཐ་མས་སྟོབ་པ་བྱ་ཞིང་། དེ་དང་སྦྲེལ་ནས་དམ་སྲིའི་ལིངྒ་བཅས་པ་ལ་དགུག་བསྟིམ་བྱས་ཏེ་ཕུར་བུས་གདབ་བོ། །བཞི་པ་ལ་གཉིས་ལས། དང་པོ་མ་འདྲེས་པ་རྣམས་བསྲེ་བའི་ཆོ་ག་ནི། གསར་བུ་རྣམས་སྣོད་རུང་དུ་བྱ་བའི་ཕྱིར། རྡོ་རྗེ་སློབ་དཔོན་སངས་རྒྱས་དཔལ། །ཞེས་སོགས་རྒྱུན་བཤགས་ལན་གསུམ་བྱེད་དུ་བཅུག་ལ། རུས། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་བཛྲ་ཡཀྵ་ཀྲོ་དྷ་ཧ་ན་ཧ་ན་ཧཱུཾ་ཕཊ། ཅེས་པས་བདུད་རྩི་བྱིན་གྱིས་བརླབས་ལ། ཧཱུཾ། ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དང་རྡོ་རྗེ་འཛིན། །དེ་བཞིན་སྒྲུབ་པོ་རྣལ་འབྱོར་པ། །དེ་དག་ལ་ནི་སྙིང་རིང་ན། །རྡོ་རྗེ་ཡཀྵ་གནོད་སྦྱིན་གྱིས། །ཁྱོད་ཀྱི་སྙིང་ལ་བཞོས་ཏེ་འཐུང་། །སྙིང་ལ་ཡང་དག་གནས་པའོ། །འདི་ནི་སེམས་ཅན་དམྱལ་བའི་ཆུ། །དམ་ཚིག་ཉམས་པ་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅེས་བརྗོད་ཅིང་། བདུད་རྩི་ཧཱུཾ་ཡིག་རེར་གྱུར་ནས་སོ་སོའི་སྙིང་དཀྱིལ་དུ་ཐིམ་པས་ཤེས་པ་ཧཱུཾ་དུ་གྱུར་པས་མོས་ལ། ༀ་ཨཱཿཧཱུཾ་ཞེས་རྡོ་རྗེས་བདུད་རྩི་ཐིགས་པ་གསུམ་ལྕེ་ལ་བཞག །བུས་ཀྱང་མྱང་ཞིང་། བཛྲ་ས་མ་ཡ་ཨི་དནྟེ་ན་ར་ཀན། ཞེས་བྲོ་བོར་རོ། །གཉིས་པ་འདྲེས་ཟིན་བསྣན་པ་ནི། མཆེད་གསར་རྙིང་ཐམས་ཅད་ཀྱི་ལྕེ་ལ་བདུད་རྩི་བཞག་ཅིང་གནས་གསུམ་དུ་ཐིག་ལེ་བྱས་ལ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭབྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ་ཝཱ་ཀ་དང་ཙིཏྟ་ལའང་སྦྱར། དེ་ནས་དམ་ཚིག་བསྲུང་ཐབས་ཀྱང་མདོ་ཙམ་བཤད་ནས། དེང་ཕྱིན་ཆད་མཆེད་གསར་རྙིང་སྐལ་བ་མཉམ་པར་གྱུར་པ་ཡིན་ནོ། །ཞེས་བརྡ་སྤྲད་ལ་གྲལ་བསྲེའོ། །ལྔ་པ་ནི། སྒྲུབ་ཐབས་ལྟར་ཕྱག་རྡོར་ངན་སོང་གནས་འདྲེན་གྱི་དཀྱིལ་འཁོར་བཤམ་སྒྲུབ་སྔོན་དུ་འགྲོ་བས། དབང་ཆོག་ལྟར་ཟབ་མོའི་ཆོས་དང་གླེང་གཞི་བཤད་ནས་སྒོ་འབྱེད་ཀྱི་དབང་བསྐུར་རོ། །དེ་རྗེས་དཔོན་སློབ་ཐམས་ཅད་ཚོགས་ལ་རོལ་ཞིང་ལྷག་གཏོར་བཏང་། ཡོ་བྱད་མ་ཚོགས་པ་ཀུན་དེའི་ཉིན་མོ་འཛོམ་པར་བསག་གོ། །དེ་ཡན་ཆད་ནུབ་དང་པོའི་ཆོ་ག་སྟེ། སྤྱིའི་སྔོན་འགྲོས་གཞི་བཟུང་བ་ཚར་རོ། ༈ །གསུམ་པ་ཡན་ལག་དང་ཡན་ལག་ཅན་རྩ་བའི་དཀྱིལ་འཁོར་ལ་བརྟེན་པའི་བསྙེན་པ་ལ་གཉིས་ལས། དང་པོ་ཡན་ལག་གི་དཀྱིལ་འཁོར་ལ་བརྟེན་པ་ནི། མན་ངག་གི་ལུགས་ཀྱི་ཕྱི་དབང་དྲུག་བསྐུར་བའི་བྱ་བ་སྟེ། དེ་ལ་ལྷ་རྗེ་ཤཱཀ་མགོན་ཕྱི་དབང་རྣམས་ལའང་ཞག་རེ་རེ་མཛད་པར་གྲགས་པ་མདོ་དབང་རྒྱས་པ་ཞག་ཉེར་གཅིག་པའི་ལུགས་ཡིན་ལ། འདིར་འབྲིང་པོ་ཞག་བཅུ་གཅིག་པའི་དབང་དུ་བྱས་ན། ལྷ་རྗེ་འགར་དང་གླན་ཆེན་པོ་རྡོ་རྗེ་འོད་ཀྱི་ཕྱག་བཞེས་འགོས་ཀྱི་ལས་ཐོ་ལྟར། ནུབ་གཉིས་པ་ལ་ལྷ་མི། ཉན་ཐོས། རང་རྒྱལ། བྱང་སེམས་བཞི་བསྐུར་ཏེ། སྔོན་འགྲོ་ཚར་བའི་ནུབ་མོ་ལས་མཁན་གྱིས་སྟེགས་བུ་དྲི་དང་བ་བྱུང་གིས་ཆག་ཆག་བཏབ་པ་དེ་ཐིག་གིས་གླིང་བཞིར་བཅད་ནས། ཤར་ལྷོར་ལྷ་མི། ལྷོ་ནུབ་ཏུ་ཉན་ཐོས། ནུབ་བྱང་དུ་རང་རྒྱལ། བྱང་ཤར་དུ་བྱང་སེམས་ཀྱི་དཀྱིལ་འཁོར་བཤམ་ཞིང་། སང་ཉིན་སྒྲུབ་མཆོད་སོ་སོ་དང་། གཏོར་ཆོག་གཅིག་ཏུ་བསྡུ་ཞིང་། དབང་བཞི་པོ་རིམ་པར་བསྐུར། དེ་ནུབ་ཀྲི་ཡའི་སྟ་གོན་བྱས་ནས། ཉིན་གསུམ་པ་ལ་དཀྱིལ་འཁོར་བཞེངས་སྒྲུབ་འཇུག་པ་དབང་བསྐུར་རྣམས་བྱ། དེ་ཚར་བ་དང་ཡོ་གའི་སྟ་གོན་བྱས་ཏེ། ཉིན་བཞི་པ་ལ་དཀྱིལ་འཁོར་སྒྲུབ་མཆོད་དང་། དེར་སློབ་མ་བཅུག་ནས་དབང་བསྐུར་བྱ་བ་རྣམས་ཏེ། དེ་དག་གི་ཆོ་གའི་ལས་རིམ་ནི་སྒྲུབ་ཐབས་དངོས་གྲུབ་འདོད་འཇོ་དང་དབང་ཆོག་ལས་ཤེས་པར་བྱ་ཞིང་། སྔོན་འགྲོའི་དུས་གྱི་ཚོགས་ལས་ཀྱི་ཉི་ཟླའི་དཀྱིལ་འཁོར་མ་བསྡུས་པར་བཞག་ནས། དེ་བར་ནུབ་རེ་བཞིན་ལས་མཁན་གྱིས་ཞི་ཁྲོའི་གཞུང་བསྲངས་ཏེ་ཚོགས་མཆོད་དང་ལྷག་མ་གཏོང་ཞིང་། སྲུང་མའི་གཏོང་ཆོག་རེ་ཡང་མཛད་དོ། །མན་ངག་གི་ལུགས་ཀྱི་བསྙེན་པའི་ཡན་ལག་ཕྱི་དབང་བསྐུར་བའི་རིམ་པ་ཚར་རོ། །གཉིས་པ་ཡན་ལག་ཅན་རྩ་བའི་དཀྱིལ་འཁོར་ལ་བརྟེན་པའི་བསྙེན་པའི་ཡན་ལག་ནི། སའི་ཆོ་ག་གོང་དུ་སོང་བས། འདིར་ནུབ་ལྔ་པའི་ཆོག་ཁྲིགས་ལ། སྔ་དྲོ་དཔང་སྐོང་དང་། དོང་སྤྲུགས་འདོན། ཞི་གཞུང་བསྲངས་ལ། ཚོགས་མཆོད་དབུལ། སྤྲོ་ན་ཞི་བའི་སྦྱིན་སྲེག་ཀྱང་བྱ། དེ་ནས་དཀྱིལ་ཆོག་ལྟར། ལས་བུམ། ཐིག་ཚོན། རྡོར་དྲིལ། ཐོད་ཆུ་སྟེ་ཡན་ལག་གི་རབ་གནས་དང་། ཡན་ལག་ཅན་ལ་སྟེགས་བུར་གོ་མ་ཡེ་བཏང་སྟེ་གནམ་སའི་ཐིག་བཏབ་ནས་ལྷ་སྟ་གོན་དང་། རྣམ་བུམ་བཤམས་ནས་བུམ་པ་སྟ་གོན་བྱས་ལ་བཅས་རྣམས་བསྒྲིགས་ཏེ། དབང་ཆོག་ལྟར་སློབ་མ་སྟ་གོན་བྱས་རྗེས། ཚོགས་ལ་རོལ་ཞིང་། གཏོར་མ་བཏང་ནས་རྣལ་འབྱོར་དང་ལྡན་པས་ཉལ། རྨི་ལམ་ངན་ན་ནང་པར་བཟློག་པའི་ཆོ་ག་བྱ་བ་རྣམས་སོ། །ནུབ་དྲུག་པའི་ཆོག་ཁྲིགས་ལ། སྔ་དྲོ་རྨི་ལམ་ངན་བཟློག་གི་ཞི་དྲག་གང་རུང་གི་སྦྱིན་སྲེག་བྱེད་དགོས་ན། བདག་བསྐྱེད་དེས་གོ་ཆུ་རུག་ཏུ་འགྲོ་མོད། དེ་མི་དགོས་ན་ནང་པར་སྔ་བར་ལངས་ལ། བདག་བསྐྱེད་རྒྱས་བསྡུས་ཅི་རིགས་གསལ་བཏབ་སྟེ། དཀྱིལ་ཆོག་ལྟར་སྟ་གོན་གྱི་ལྷ་བཏེགས་ནས། རྡུལ་ཚོན་བཀྱེ་བ་ནི། དང་པོར་སློབ་དཔོན་གྱིས་ཅུང་ཟད་བྲིས་རྗེས། སློབ་མ་གཞན་དག་ཀྱང་འབྲིར་བཅུག་ལ། ཕྱི་དྲོ་ལས་མཁན་གྱིས་ཆ་གསུམ་གྱི་གཏོར་ཆོག་བྱས་ལ། ཆ་གསུམ་པ་ཕྱིར་གཏོར་བ་དང་མཉམ་དུ་དྲག་སྔགས་བཟླ་ཞིང་ཐུན་གྱིས་བྲབ། ལྕེ་བོག་ནག་པོའི་དུད་པས་བདུག །རོལ་མོའི་སྒྲ་དང་བཅས་པའི་ཚམ་རྔམས་བྱའོ། །དེ་ནས་མཚམས་བཅད་པ་ལ་གསུམ་ལས། དང་པོ་ཕྱི་མཚམས་ནི། སྒྲུབ་ཁང་ནས་ཕྱི་རོལ་གོམ་པ་བདུན་ཅུ་གཞལ་བའི་ཕྱོགས་བཞིར་དྲིའི་མཎྜལ་པད་འདབ་བརྒྱད་པ་རེའི་སྟེང་དུ་ལས་དང་མཐུན་པའི་དབྱིབས་མདོག་ཅན་གྱི་ཐོ་བཞི་བརྩིགས་པ་ལ། རྒྱལ་ཆེན་སོ་སོའི་སྐུ་རབ་གནས་ཅན་རྒྱལ་མཚན་དང་བཅས་པ་བཙུགས། སོ་སོའི་མདུན་དུ་མཆོད་པ་ལྔ་དང་། གཏོར་མ་ཤར་དུ་དྲིས་བརྒྱན་པའི་དཀར་ཟླུམ། ལྷོར་ཉ་དང་ཤ་ཁྲག་གིས་བརྒྱན་པའི་གྲུ་གསུམ་ནག་པོ། ནུབ་ཏུ་འོ་མ་དང་མེ་ཏོག་གིས་བརྒྱན་པའི་ཟླ་གམ་དམར་པོ། བྱང་དུ་ཤིང་ཐོག་དང་དར་སྣ་རཏྣ་སོགས་ཀྱིས་བརྒྱན་པའི་གྲུ་བཞི་སེར་པོ་རྣམས་བཤམ་ཞིང་། དྲི་ཆབ་ཀྱིས་བསང་ལ། ཆ་དང་པོ་ལྟར་མཆོད་པ་འབྲུ་གསུམ་དང་གཏོར་མ་བརྟག་པ་བཞིས་བྱིན་གྱིས་བརླབ། རྟེན་བསང་སྦྱངས། སྟོང་པའི་ངང་ལས་བྷྲཱུཾ་ཞེས་བརྗོད་པས་ཐོ་ཕོ་བྲང་དུ་གྱུར་པའི་ནང་དུ་ༀ་དྷྲྀ་ཏ་རཱཥྚཱ་ཡ་སྭཱ་ཧཱ། ཞེས་བརྗོད་པས་ཤར་དུ་རྒྱལ་པོ་ཆེན་པོ་ཡུལ་འཁོར་སྲུང་སྐུ་མདོག་དཀར་པོ་ཞི་ཞིང་བརྗིད་པའི་ཆས་ཅན་པི་ཝང་བསྣམས་པ་འཁོར་དང་བཅས་པའི་སྐུར་གྱུར། རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་བཅས་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་དྷྲྀ་ཏ་རཱཥྚཱ་ས་པ་རི་ཝཱ་ར་པུཥྤེ་ནས། ཤཔྡའི་བར་གྱིས་མཆོད། མཚན་སྔགས་དེ་ཉིད་ལ་ནམ་མཁའ་མཛོད་ཀྱི་སྔགས་བཏགས་པས་གཏོར་མ་ཕུལ་བས་མཉེས་ནས་ཅི་བཅོལ་སྒྲུབ་པར་བསམ་སྟེ། རི་རབ་གླིང་བཞིའི་ཤར་ཕྱོགས་ནས། །རྡོ་རྗེ་གསང་བདག་དབང་གི་མཐུས། །འཇིག་རྟེན་སྐྱོང་བའི་ཐ་ཚིག་ཅན། །མཐུ་ཆེན་མགོན་པོ་ཡུལ་འཁོར་སྲུང་། །ཤར་ཕྱོགས་བགེགས་རིགས་འདུལ་ལ་མཁས། །ཆོས་སྐྱོང་ལོངས་སྤྱོད་རྫོགས་པའི་སྐུ། །ཞི་བའི་ཕྲིན་ལས་མཐར་ཕྱིན་པས། །རིགས་ཀྱི་ཁ་དོག་དཀར་ཞིང་གསལ། །རང་རྟགས་ལྷ་ཡི་པི་ཝང་ཐོགས། །ཕྱི་འཁོར་སྐྱོང་བའི་རྫུ་འཕྲུལ་ཅན། །བདག་ཅག་རྣལ་འབྱོར་རྩལ་སྦྱོང་གིས། །རང་གི་འཁོར་རྣམས་ཐུབ་པར་མཛོད། །ཅེས་དང་། ༀ་དྷྲྀ་ཏ་རཱཥྚཱ་ཡ་སྭཱ་ཧཱ། ཞེས་བཟླ་ཞིང་ཏིཥྛ་བཛྲ་ཞེས་བརྟན་བཞུགས་བྱའོ། །ཕྱོགས་གཞན་གསུམ་ཡང་དེས་རིགས་འགྲེ་བ་ལས། སོ་སོའི་ཁྱད་པར། ༀ་བི་རཱུ་ཌྷ་ཀ་ཡ་སྭཱ་ཧཱ། ཞེས་བརྗོད་པས་ལྷོར་རྒྱལ་པོ་ཆེན་པོ་འཕགས་སྐྱེས་པོ་སྐུ་མདོག་སྔོན་པོ་ཅུང་ཟད་ཁྲོ་ཉམས་བརྗིད་པའི་ཆས་ཅན་རལ་གྲི་བསྣམས་པ༴ རི་རབ་ཀྱི་ལྷོ་ཕྱོགས་ནས་རྒྱལ་པོ་ཆེན་པོ་འཕགས་སྐྱེས་པོ་འཁོར་བཅས་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་བཻ་རཱུ་ཌྷ་ཀཱ་ས་པ་རི་ཝཱ་ར་པུཥྤེ་ནས་ཤཔྡའི་བར་གྱིས་མཆོད་ཅིང་གཏོར་མ་ཕུལ། རི་རབ་གླིང་བཞིའི་ལྷོ་ཕྱོགས་ནས། །རྡོ་རྗེ་གསང་བདག་དབང་གི་མཐུས། །འཇིག་རྟེན་སྐྱོང་བའི་ཐ་ཚིག་ཅན། །མཐུ་ཆེན་མགོན་པོ་འཕགས་སྐྱེས་པོ། །ལྷོ་ཕྱོགས་བགེགས་རིགས་འདུལ་ལ་མཁས། །ཆོས་སྐྱོང་ལོངས་སྤྱོད་རྫོགས་པའི་སྐུ། །དྲག་པོའི་ཕྲིན་ལས་མཐར་ཕྱིན་པས། །རིགས་ཀྱི་ཁ་དོག་སྔོན་པོར་གསལ། །རང་རྟགས་རལ་གྲི་འབར་བ་ཐོགས། །ཕྱི་འཁོར་སྐྱོང་བའི་རྫུ་འཕྲུལ་ཅན། །བདག་ཅག་རྣལ་འབྱོར་རྩལ་སྦྱོང་གིས། །རང་གི་འཁོར་རྣམས་ཐུབ་པར་མཛོད། །ༀ་བི་རཱུ་ཌྷ་ཀཱ༴ ཏིཥྛ༴ ༀ་བི་རཱུ་པཱཀྵཱ་ཡ་སྭཱ་ཧཱ། ནུབ་ཏུ་རྒྱལ་པོ་ཆེན་པོ་མིག་མི་བཟང་སྐུ་མདོག་དམར་པོ་འཛུམ་ཞིང་བརྗིད་པའི་ཆས་ཅན་སྦྲུལ་ཞགས་དང་མཆོད་རྟེན་བསྣམས་པ༴ རི་རབ་ཀྱི་ནུབ་ཕྱོགས་ནས་རྒྱལ་པོ་ཆེན་པོ་མིག་མི་བཟང་འཁོར་བཅས་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་བི་རཱུ་པཱ ཀྵཱ་ས་པ་རི་ཝཱ་ར་པུཥྤེ་ནས་ཤཔྡའི་བར་གྱིས་མཆོད་ཅིང་གཏོར་མ་ཕུལ། རི་རབ་གླིང་བཞིའི་ནུབ་ཕྱོགས་ནས། །རྡོ་རྗེ་གསང་བདག༴ འཇིག་རྟེན་སྐྱོང་བའི༴ མཐུ་ཆེན་མགོན་པོ་མིག་མི་བཟང་། །ནུབ་ཕྱོགས་བགེགས་རིགས༴ ཆོས་སྐྱོང་ལོངས་སྤྱོད༴ དབང་གི་ཕྲིན་ལས་མཐར་ཕྱིན་པས། །རིགས་ཀྱི་ཁ་དོག་དམར་པོར་གསལ། །རང་རྟགས་མཆོད་རྟེན་སྦྲུལ་ཞགས་ཐོགས། །ཕྱི་འཁོར་སྐྱོང་བའི༴ བདག་ཅག་རྣལ་འབྱོར༴ རང་གི་འཁོར་རྣམས་ཐུབ༴ ༀ་བི་རཱུ་པཱཀྵཱ་ཡ༴ ཏིཥྛ༴ ༀ་བཻ་ཤྲ་བ་ཎ་ཡ་སྭཱ་ཧཱ། བྱང་དུ་རྒྱལ་པོ་ཆེན་པོ་རྣམ་ཐོས་སྲས་སྐུ་མདོག་སེར་པོ་བཞད་ཅིང་བརྗིད་པའི་ཆས་ཅན་བེ་ཅོན་དང་ནེའུ་ལེ་བསྣམས་པ་འཁོར་དང་༴ རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་བྱང་ཕྱོགས་ནས་རྒྱལ་པོ་ཆེན་པོ་རྣམ་ཐོས་སྲས་འཁོར་བཅས་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་བཻ་ཤྲ་བ་ཎ་ས་པ་རི་ཝཱ་ར་པུཥྤེ་ནས་ཤཔྡའི་བར་གྱིས་མཆོད་ཅིང་གཏོར་མ་ཕུལ། རི་རབ་གླིང་བཞིའི་བྱང་ཕྱོགས་ནས། །རྡོ་རྗེ་གསང་བདག༴ འཇིག་རྟེན་སྐྱོང་བའི༴ མཐུ་ཆེན་མགོན་པོ་རྣམ་ཐོས་སྲས། །བྱང་ཕྱོགས་བགེགས་རིགས༴ ཆོས་སྐྱོང་ལོངས་སྤྱོད༴ རྒྱས་པའི་ཕྲིན་ལས༴ རིགས་ཀྱི་ཁ་དོག་གསེར་ལྟར་གསལ། །རང་རྟགས་བེ་ཅོན་ནེའུ་ལེ་ཐོགས། །ཕྱི་འཁོར་སྐྱོང་བའི༴ བདག་ཅག་རྣལ་འབྱོར༴ རང་གི་འཁོར་རྣམས་ཐུབ་པར་མཛོད། །ༀ་བཻ་ཤྲ་བ་ཎ་ཡ་སྭཱ་ཧཱ། ཏིཥྛ་བཛྲ། ཞེས་སྦྱར་རོ། །ཕྲིན་བཅོལ་བའི་རྩ་རྒྱུད་དུ། རི་རབ་གླིང་བཞི་ཕྱོགས་ཕྱོགས་ནས། །ཞེས་སོགས་བཞི་ཀ་སྡེབས་སུ་གསུངས་ཀྱང་འདིར་སྒོས་ཆོས་སྒྱུར་ནས་ཁ་ཕྲལ་བ་ཡིན་ནོ། །ཡང་ཕྱོགས་སྐྱོང་ཐོ་སྡོམ་རྩ་རྒྱུད་དུ་མ་གསུང་ཀྱང་། བདེ་བ་གསལ་མཛད་ཀྱི་ལས་ཐོར་བཤད་པ་ལྟར། སྤྲོ་ན། ཕྱོགས་མཚམས་བརྒྱད་དང་། སྟེང་ཤར་སྟོད་དང་འོག་ནུབ་སྨད་དུ་ཐོ་བརྩེགས་པར་སོ་སོའི་སྐུའམ་སྔགས་བྱང་བཙུགས། མདུན་དུ་མཆོད་པ་ལྔ་དང་། གཏོར་མ་རེ་བཤམས་པའི་བྱིན་གྱིས་རློབས། སྟོང་པའི་ངང་ལས་ཐོ་ཕོ་བྲང་དུ་གསལ་བའི་ནང་དུ་ༀ་ཨིནྡྲཱ་ཡ་སྭཱ་ཧཱ། ཞེས་པས་ཤར་དུ་དབང་པོ་བསྐྱེད། ༀ་ཨིནྡྲཱ་ཡ་ཧཱུཾ་ཛཿས་སྤྱན་དྲངས། ཛཿ ཧཱུཾ་བཾ་ཧོཿ ས་བསྟིམ། ༀ་ཨིནྡྲཱ་ཡ་ས་པ་རི་ཝཱ་ར་པུཥྤེ་ནས་ཤཔྡའི་བར་དང་། རང་སྔགས་ལ་ནམ་མཁའ་མཛོད་ཀྱི་སྔགས་བཏགས་པས་གཏོར་མ་ཕུལ། དབང་པོ་རྡོ་རྗེ་སོགས་ཤློ་ཀ་གཅིག་གི་མཐར། འཁོར་དང་བཅས་པ་མ་ལུས་ཀུན། །ཕྱི་འཁོར་སྐྱོང་བའི་རྫུ་འཕྲུལ་ཅན། །བདག་ཅག་རྣལ་འབྱོར་རྩལ་སྦྱོང་གིས། །རང་གི་འཁོར་རྣམས་ཐུབ་པར་མཛོད། །ༀ་ཨིནྡྲཱ་ཡ་སྭཱ་ཧཱ། ཏིཥྛ་བཛྲ་ཞེས་བརྟན་བཞུགས་བྱ། དེ་བཞིན་དུ་ཕྱོགས་གཞན་རྣམས་རིགས་འགྲེ་བ་ལས། ཁྱད་པར་ཤར་ལྷོར། སྟོང་པའི་ངང་ལས༴ ༀ་ཨགྣེ་ཡེ་སྭཱ་ཧཱ། ཞེས་པས་མེ་ལྷ་བསྐྱེད། ༀ་ཨགྣ་ཡེ་ཧཱུཾ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་ཨགྣ་ཡེ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། མེ་སྟེ་བསྲེག་བྱ་སོགས་ཀྱི་མཐར། འཁོར་དང་བཅས་པ༴ ཕྱི་འཁོར་སྐྱོང་བའི༴ བདག་ཅག་རྣལ་འབྱོར༴ རང་གི་འཁོར་རྣམས༴ ༀ་ཨགྣ་ཡེ་སྭཱ་ཧཱ། ཏིཥྛ་བཛྲས་བརྟན། ལྷོར། སྟོང་པའི་ངང་ལས༴ ༀ་ཡ་མཱ་ཡ་སྭཱ་ཧཱ། ཞེས་པས་གཤིན་རྗེ་བསྐྱེད། ༀ་ཡ་མཱ་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ཡ་མཱ་ཡ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། གཤིན་རྗེ་བེ་ཅོན་སོགས་ཀྱི་མཐར། འཁོར་དང་བཅས་པ༴ ཕྱི་འཁོར་སྐྱོང་བའི༴ བདག་ཅག་རྣལ་འབྱོར༴ རང་གི་འཁོར་རྣམས༴ ༀ་ཡ་མཱ་ཡ་སྭཱ་ཧཱ། ཏིཥྛ་བཛྲས་བརྟན། ལྷོ་ནུབ་ཏུ། སྟོང་པའི་ངང་ལས༴ ༀ་ནཻ་ཏྲི་ཏྱ་ཡ་སྭཱ་ཧཱ། ཞེས་པས་སྲིན་པོ་བསྐྱེད། ༀ་ནཻ་ཏྲི་ཏྱ་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ནཻ་ཏྲི་ཏྱ་ཡ་ས་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། བདེན་དང་བྲལ་བ་སོགས་ཀྱི་མཐར། འཁོར་དང་བཅས་པ༴ ཕྱི་འཁོར་སྐྱོང་བའི༴ བདག་ཅག་རྣལ་འབྱོར༴ རང་གི་འཁོར་རྣམས༴ ༀ་ནཻ་ཏྲི་ཏྱ་ཡ་སྭཱ་ཧཱ། ཏིཥྛ་བཛྲས་བརྟན། ནུབ་ཏུ། སྟོང་པའི་ངང་ལས༴ ༀ་ཝ་རུ་ཎཱ་ཡ་སྭཱ་ཧཱ། ཞེས་པས་ཆུ་ལྷ་བསྐྱེད། ༀ་ཝ་རུ་ཎཱ་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ཝ་རུ་ཎཱ་ཡ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། ཞགས་པ་ཐོགས་པ་སོགས་ཀྱི་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་ཝ་རུ་ཎཱ་ཡ་སྭཱ་ཧཱ། ཏིཥྛ་བཛྲས་བརྟན། ནུབ་བྱང་དུ། སྟོང་པའི་ངང་ལས༴ ༀ་ཝཱ་ཡ་ཝེ་སྭཱ་ཧཱ། ཞེས་པ་རླུང་ལྷ་བསྐྱེད། ༀ་ཝཱ་ཡ་ཝེ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ཝཱ་ཡ་ཝེ་ས་པ་རི་ཝཱ་ར་པུཥྤེ་སོགས་ཀྱི་མཆོད་ཅིང་གཏོར་མ་ཕུལ། རླུང་སྟེ་སྲོག་ཀྱང་སོགས་ཀྱི་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་ཝཱ་ཡ་ཝེ་སྭཱ་ཧཱ། ཏིཥྛ་བཛྲས་བརྟན། བྱང་དུ། སྟོང་པའི༴ ༀ་ཀུ་བེ་རཱ་ཡ་སྭཱ་ཧཱ། ཞེས་པས་གནོད་སྦྱིན་བསྐྱེད། ༀ་ཀུ་བེ་རཱ་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ཀུ་བེ་ར་ཡ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། གནོད་སྦྱིན་ལག་ན་སོགས་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་ཀུ་བེ་ར་ཡ་སྭཱ་ཧཱ། ཏིཥྛ་བཛྲས་བརྟན། བྱང་ཤར་དུ། སྟོང་པའི༴ ༀ་ཨཱི་ཤ་ནཱ་ཡ་སྭཱ་ཧཱ། ཞེས་པས་དབང་ལྡན་བསྐྱེད། ༀ་ཨཱི་ཤ་ན་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་ཨཱི་ཤ་ནཱ་ཡ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། དབང་དང་ལྡན་པ་སོགས་ཀྱིས་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་ཨཱི་ཤ་ནཱ་ཡ་སྭཱ་ཧཱ། ཏིཥྛ་བཛྲས་བརྟན། སྟེང་དུ། སྟོང་པའི༴ ༀ་བྲཧྨ་ཎ་སཱུརྻ་ཙནྡྲ་ཡ་སྭཱ་ཧཱ། ཞེས་པས་ཚངས་པ་བསྐྱེད། ༀ་བྲཧྨ་ཎ་སཱུརྻ་ཙནྡྲ་ཡ་ཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་བྲཧྨ་ཎ་ས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། སྟེང་གི་ཚངས་པ་སོགས་ཀྱི་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་བྲཧྨ་ཎ་སཱུརྻ་ཙནྡྲ་ཡ་སྭཱ་ཧཱ། ཏིཥྛ་བཛྲས་བརྟན། འོག་ཏུ། སྟོང་པའི༴ ༀ་པྲྀ་ཐི་ཝཱི་བྷྱཿནཱ་ཱགེ་བྷྱཿཨ་སུ་རེ་བྷྱཿསྭཱ་ཧཱ། ཞེས་པས་ཀླུ་བསྐྱེད། ༀ་པྲྀ་ཐི་ཝཱི་བྷྱཿ ནཱ་གེ་བྷྱཿཨ་སུ་རེ་བྷྱཿཧཱུཾ་ཛཿས་དྲངས། ཛཿཧཱུཾ་བཾ་ཧོཿས་བསྟིམ། ༀ་པྲྀ་ཐི་ཝཱི་བྷྱཿནཱ་གེ་བྷྱཿཨ་སུ་རེ་བྷྱཿས་པ་རི་ཝཱ་ར་པུཥྤེ་སོགས་ཀྱིས་མཆོད་ཅིང་གཏོར་མ་ཕུལ། འོག་གི་ཀླུ་སྟེ་སོགས་ཀྱི་མཐར། འཁོར་དང་༴ ཕྱི་འཁོར༴ བདག་ཅག༴ རང་གི༴ ༀ་པྲྀ་ཐི་ཝཱི་བྷྱཿནཱ་གེ་བྷྱཿཨ་སུ་རེ་བྷྱཿསྭཱ་ཧཱ། ཏིཥྛ་བཛྲ་ཞེས་བརྟན་བཞུགས་བྱ། ༼འདིར་ཕྱོགས་སྐྱོང་གི་སོགས་ཁུང་རྣམས་བློ་རྨོངས་འཇུག་བདེ་བའི་ཕྱིར་དཀྱུས་སུ་གསལ་བར་བྱས་པ་ཡིན། མཆན། ༽དེ་ལྟར་རྒྱལ་པོ་ཆེན་པོ་བཞི་དང་ཕྱོགས་སྐྱོང་བ་བཅུ་རང་རང་གི་དཔུང་དང་བཅས་པས་ཁོར་ཡུག་ཐམས་ཅད་བར་མཚམས་མེད་པར་གཏམས་ཏེ་ཅིས་ཀྱང་མི་ཤིགས་པའི་རྒྱལ་ཐབས་ཀྱི་གུར་ཕུབ་པར་བསམ་མོ། །གཉིས་པ་བར་མཚམས་ལ་གསུམ་ལས། དང་པོ་ཁྲོ་བོ་བཅུས་མཚམས་བཅས་པ་ནི། ས་བསྲུང་བ་དང་འབྲེལ་བར་ཁྲོ་བཅུའི་ཕུར་བུ་བཏབ་ན། འདིར་བསྐྱེད་ཆོག་མི་དགོས་པས། ཕུར་བུ་རྣམས་གུ་གུལ་གྱིས་བདུག་ཅིང་མཆོད་ལ། ཇི་སྲིད་བསྙེན་སྒྲུབ་ཀྱི་བྱ་བ་མཐར་མ་ཕྱིན་གྱི་བར་དུ་བགེགས་ཐམས་ཅད་བཟློག་པའི་ཕྲིན་ལས་མཛོད་ཅིག །ཅེས་བསྐུལ་བ་ཙམ་གྱིས་ཆོག །སྔར་མ་བཏབ་ན་སེང་ལྡེང་གི་ཕུར་བུ་སོར་བརྒྱད་པ་ཙནྡན་གྱིས་ཁ་བསྒྱུར་བ་དར་གྱི་ཅོད་པན་ཅན་བཅུ་མདུན་དུ་བཀོད་ལ། བཛྲ་མ་ཧཱ་ཤྲཱི་ཧེ་རུ་ཀ །ཞེས་བརྗོད་པས་བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་གསུམ་རྡོ་རྗེ་རལ་གྲི་དགྲ་སྟྭ། གཡོན་གསུམ་ཞགས་པ་ལྕགས་སྒྲོག་ཐོང་གཤོལ་འཛིན་པ། ཉི་མ་འབུམ་གྱི་གཟི་བརྗིད་ཅན། གར་དགུའི་ཉམས་ཀྱིས་སྒེག་ཅིང་། དུར་ཁྲོད་རོལ་པའི་ཆས་ཀྱིས་བརྒྱན་པ། ཡུམ་ཀྲོ་དྷཱི་ཤྭ་རཱི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་བརྗོད་པས་ཤངས་ཀྱི་ཧཱུཾ་རིང་དང་། བྱང་ཆུབ་ཀྱི་སེམས་སྤྲིན་ལས། རྡོ་རྗེ་ཡེ་ཤེས་ཀྱི་སྣང་བའི་མཚོན་ཆ་དང་། ཁྲོ་བོ་འཆོལ་པའི་ཚོགས་སྤྲོས་པས་ཕྱོགས་བཅུའི་དྲེགས་པ་ཅན་ཐམས་ཅད་ཚར་བཅད། གཙོ་བོ་ཕྱོགས་སྐྱོང་བཅུ་བཀུག་སྟེ། སྟེང་འོག་ཕྱོགས་མཚམས་བཅུར་ཉི་མའི་གདན་རེ་རེའི་སྟེང་དུ་མྱོས་ཤིང་འགྱེལ་སྟབས་སུ་འཁོད་པར་གྱུར། སླར་ཡང་ཁྲོ་བོའི་ཚོགས་རྣམས་ཚུར་འདུས། མདུན་དུ་བཀོད་པའི་ཕུར་བུ་རྣམས་ལ་ཐིམ་པས་ཁྲོ་བོ་བཅུར་གྱུར། ༀ་ཧཱུཾ་ཀཱ་ར་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། བི་ཛ་ཡ༴ ཡ་མཱནྟ་ཀ༴ ཧྱ་གྲཱི་ཝ༴ ཨ་མྲྀ་ཏ་ཀུཎྜ་ལི༴ ནཱི་ལ་དཎྜ༴ ཏྲཻ་ལོ་ཀྱ་བི་ཛ་ཡ༴ ཨ་པ་རཱ་ཛི་ཏ༴ ཨཱརྱ་ཨ་ཙ་ལ༴ མ་ཧཱ་བ་ལ༴ ཅེས་ཁྲོ་བཅུ་སོ་སོའི་སྔགས་མཐར། ༀ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ་བཛྲ་དྷ་ར་ཨཱ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཱ་ཀྩིཏྟ་བཛྲ་ཀཱི་ལ་ཡ་ཧཱུཾ་ཕཊ། ཅེས་བཏགས་པ་ཟློས་ཤིང་། བཏབ་པས་རིམ་པ་བཞིན། སྟེང་དུ་ཧཱུཾ་མཛད། ཤར་དུ་རྣམ་པར་རྒྱལ་བ། ཤར་ལྷོར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། ནུབ་བྱང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ཆེན་པོ་ཞལ་གསུམ་ཕྱག་དྲུག་པ། སྨད་ཕུར་བུ་འབར་བའི་རྣམ་པས་བགེགས་ལ་གཟིར་བ། དབྱིངས་ཀྱི་ཡུམ་ཅན་སྤྲུལ་པ་དང་ཡང་སྤྲུལ་མཚོན་ཆ་སྣ་ཚོགས་པའི་སྤྲིན་སྤྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་ལ། ཕྱོགས་གཡས་བསྐོར། མཚམས་གཡོན་བསྐོར། སྟེང་ཤར་གྱི་ཤར་དང་། འོག་ནུབ་ཀྱི་ནུབ་ཏུ་གདབ་བོ། །གཉིས་པ་དམ་སྲི་མནན་པ་ནི། རའི་སོག་པའམ་དུག་ཤོག་ལ་དམ་སྲིའི་གཟུགས་ལྟོ་བ་ཆེ་བ་ཡན་ལག་རིད་ཅིང་འཁུམས་པའི་སྙིང་གར་ཏྲིའི་མཐར་དངོས་གྲུབ་ལ་བར་དུ་གཅོད་པའི་དམ་སྲི་ཕོ་མོ་ཐམས་ཅད་མཱ་ར་ཡ་ཕཊ། ཡ་མ་དམ་སྲི་སྟམྦྷ་ནི་ཛཿཛཿ ཞེས་བྲིས་པ་ཐོད་ངན་དུ་བཅུག་ལ། སྒྲུབ་ཁང་གི་ཐེམ་པའི་ཕྱི་རོལ་དུ་དོང་གྲུ་གསུམ་བྲུས་པའི་ནང་དུ་གན་རྐྱལ་དུ་བཞག་ལ། ཨེ་རཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་ཕོ་མོ་རིད་ཅིང་ཉམ་ཐག་པའི་ལུས་ཅན་དུ་གྱུར། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང་། །ཆོས་ཉིད་རྣམ་པར་དག་པའི༴ ཆོས་ཅན་རྒྱུ་འབྲས་བསླུ་བ་མེད་པའི༴ བཅོམ་ལྡན་འདས་བདེ་གཤེགས་ཞི་ཁྲོ་རབ་འབྱམས་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི༴ སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། དངོས་གྲུབ་སྒྲུབ་པ་ལ་བར་དུ་གཅོད་པའི་ཡ་མ་དམ་སྲི་འཁོར་བཅས་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུཾ་བཾ་ཧོཿ ཞེས་པས་དགུག་བསྟིམ་ཡིད་ཆེས་པར་བྱས་ལ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་སརྦ་དུཥྚཱན་ཡ་མ་དམ་སྲི་མཱ་ར་ཡ་ཧཱུཾ་ཕཊ། ཅེས་ཕུར་བུ་བཏབ་ལ། ཧཱུཾ། དུར་ཁྲོད་ཆེན་པོའི་གནས་དག་ཏུ། །རྣལ་འབྱོར་གསང་བའི་མིག་འཇོར་ཞིང་། །དངོས་གྲུབ་ཆུ་ལ་རྡུལ་འཇུག་པ། །ཁྲོ་བོ་ཧཱུཾ་ཆེན་ཀུན་འདུས་ནས། །བསད་ཅིང་མནན་པའི་ལས་བྱ་སྟེ། །རི་རབ་ཆེན་པོའི་རྨང་དུ་བཏང་། །ཡ་མ་རཱ་ཛའི་ཟས་སུ་སྦྱར། །ཆུ་སྲིན་འབར་བའི་ཁ་རུ་རྫངས། །འཁོར་ལོ་འབར་བའི་ཕྱག་རྒྱ་མནན། །བདུན་བརྒྱུད་རིགས་ནི་བརླག་གྱུར་ནས། །ནམ་ཡང་ལྡང་བར་མི་ནུས་ཏེ། །བྱང་ཆུབ་སེམས་ནི་སྐྱེས་ན་བཏང་། །ཞེས་བརྗོད་ཅིང་ལིངྒ་སྤྱིའི་ཚུགས་སུ་མནན། དུག་སྣ། ཁྲག་སྣ། རྡོ་ཕྱེ། ལྕགས་ཕྱེ། རུས་ཆེན་རྣམས་བཏབ་པའི་ཁར། རོ་གཡམ་ལ་རྒྱ་གྲམ་གྱི་སྟེང་སུཾ་བྲིས་པ་རི་རབ་ཏུ་གྱུར་པས་མནན། གཤིན་རྗེའི་ལྟོར་བཅུག །ཆུ་སྲིན་གྱི་ཁར་བརྫངས། འཁོར་ལོ་དང་རྒྱ་གྲམ་གྱིས་མནན་པར་བསམ་ལ་སས་སུ བས། བཛྲ་མུཔྟི་བཾ། ཞེས་རྡོ་རྗེའི་དབྱུག་པའི་རྒྱས་བརྡེག །མ་མ་པཱ་ཤཾ་ཀུ་རུ་ནན། ཞེས་བདག་གིས་དབང་དུ་བྱ། སུམྦྷ་ནི་སུམྦྷ་ནི་ནན། ཞེས་པས་ཁྲོ་བོ་སྟོབས་པོ་ཆེས་མནན་པར་བསམ། དེའི་སྟེང་དུ་བྲོ་ར་གྲུ་གསུམ་རྩེ་མོ་ལྷོར་བསྟན་པ་བཅས་ལ། ལག་པ་བསྣོལ་ནས་མཐེའུ་ཆུང་སྒྲེལ། ཨེ་བྷྲཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཞེས་པས་སྣོད་བཅུད་ཁྲག་འཐུང་འབར་བའི་དཀྱིལ་འཁོར་དུ་བཞེངས་པར་བསམས་ཏེ། ཧཱུཾ། ཞེ་སྡང་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཐལ་བའི་རྡུལ་བཞིན་བརླག་ནས་ཀྱང་། །དྲག་པོའི་ཕྲིན་ལས་སྒྲུབ་པར་མཛོད། །སུམྦྷའི་མཐར། ཡ་མ་དམ་སྲི་མཱ་ར་ཡ་ཕཊ། ཅེས་བྲོ་བརྡུང་ངོ་། །གསུམ་པ་སྒོ་བྱང་གདགས་པ་ནི། རྩ་རྒྱུད་དང་ལས་ཐོར་གཤིན་རྗེ་གཤེད་ཀྱི་སྒོ་བྱང་ལས་མ་གསུངས་ཀྱང་། གནུབས་ཆེན་གྱིས། སྒོ་བྱང་ཕྱི་ནང་དགྲ་བགེགས་བསྐྲད། །ཅེས་པ་ལྟར་སྒོ་བྱང་ཕྱི་མ་ལུག་གམ་རྐྱང་གི་སོག་པ་གཡོན་པ་དང་། ནང་མར་སོག་གམ། ཡང་ན་གཉིས་ཀ་དུར་ཁྲོད་ཀྱི་རས་ལྟ་བུར་བྲིས་ཀྱང་རུང་སྟེ། སྐུའི་རྒྱབ་ཏུ་སོ་སོའི་སྔགས་དང་གསོལ་བྱང་བྲིས་ལ། སྒོའི་ཡ་ཐེམ་གྱི་ཕྱི་ལ་གཤིན་རྗེ་གཤེད་དང་། ནང་ངོས་སུ་རྟ་མགྲིན་གདགས། མཆོད་གཏོར་རེ་ཡང་བཤམས་པ་བྱིན་གྱིས་བརླབ་ལ། ཕྱི་རྟེན་བསང་སྦྱངས། སྟོང་པའི་ངང་ལས་ༀ་ཡ་མཱནྟ་ཀ་ཧཱུཾ། ཞེས་བརྗོད་པས་གཤིན་རྗེ་གཤེད་སྨུག་ནག་འཁོར་ལོ་དང་བེ་ཅོན་འཛིན་པ་མ་ཧེའི་ཁྲི་ལ་དོར་སྟབས་ཀྱིས་བཞུགས་པའི་སྐུར་གྱུར། ཡེ་ཤེས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཞེས་པས་སྤྱན་དྲངས་ཤིང་བསྟིམ་ལ། ༀ་ཡ་མཱནྟ་ཀ་ས་པ་རི་ཝཱ་ར་པུཥྤེ་ནས་ཤཔྡའི་བར་གྱིས་མཆོད། མཚན་སྔགས་དེ་ཉིད་ལ་ནམ་མཁའ་མཛོད་ཀྱི་སྔགས་བཏགས་པས་གཏོར་མ་ཕུལ་ལ། ཧཱུཾ། གསང་ཆེན་ལྷུན་གྲུབ་ཕོ་བྲང་ནས། །ལས་ཀྱི་གཤིན་རྗེའི་བདག་པོ་ལ། །བཅོམ་ལྡན་ཆོས་རྗེས་བཀའ་སྩལ་ལྟར། །དེ་བཞིན་རིག་འཛིན་སྒྲུབ་པ་པོ། །བཀའ་གསང་གཞུང་ཆེན་འདི་སྒྲུབ་ཅིང་། །ཡང་དག་དོན་ལ་བདག་འཇུག་ན། །འདི་དག་ནོར་བུ་རིན་ཆེན་ཏེ། །འདི་ལ་གནོད་ཅིང་བར་གཅོད་པའི། །ལྷ་སྲིན་འབྱུང་པོ་སྡེ་བརྒྱད་ཀུན། །ཁྱོད་ཀྱི་འཁོར་དང་གཡོག་ཡིན་གྱི། །རྣམ་པར་སྨིན་པའི་ཆོས་ཤོད་ལ། །གསང་བ་མཆོག་གི་རྣལ་འབྱོར་པས། །བླ་མེད་འབྲས་བུ་མ་ཐོབ་པར། །ས་འདི་ཡན་ཆད་མ་བཏང་ཞིག །དཔལ་ཆེན་མི་ཕམ་བཀའ་མ་འདའ། །བདག་ཅག་ཡེ་ནས་གཉིས་མེད་དེ། །ད་ཙམ་དོན་གྱི་དབྱིངས་སུ་གཅིག །ཕྱི་འཁོར་སྐྱོང་བའི་མུ་རན་ལ། །རྡོ་རྗེ་ཡལ་གམ་ཐུབ་པར་མཛོད། །བཛྲ་ཡ་མ་རཱ་ཱཛ་ས་མ་ཡ་སྟྭཾ། ཞེས་བཟླས་ནས་མེ་ཏོག་འཐོར་ཞིང་བརྟན་བཞུགས་བྱ། དེ་ནས་ནང་གི་རྟེན་བསང་སྦྱངས། སྟོང་པའི་ངང་ལས་ༀ་ཧ་ཡ་གྲཱི་ཝ་ཧཱུཾ། ཞེས་བརྗོད་པས་རྟ་མགྲིན་དམར་པོ་ཐོད་དབྱུག་དང་སྡིགས་མཛུབ་ཅན་པད་ཉི་ལ་དོར་སྟབས་ཀྱིས་བཞུགས་པའི་སྐུར་གྱུར། དྲངས་བསྟིམ་དང་། ༀ་ཧ་ཡ་གྲཱི་ཝ་ས་པ་རི་ཝཱ་རའི་མཐར་སྔགས་སྔར་བཞིན་སྦྲེལ་བས་མཆོད་གཏོར་ཕུལ། ཧཱུཾ། དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ཕོ་ཉའི་ལས་མཛད་པ། །སྤྱན་རས་གཟིགས་དབང་རྟ་མགྲིན་གྱིས། །གདོན་བགེགས་སྦྱོར་བ་རྒྱུན་ཆོད་ཅིག །ༀ་ཧྲཱིཿཔདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་ཝ་ས་མ་ཡ་སྟྭཾ། ཞེས་བཟླ་ཞིང་བརྟན་བཞུགས་བྱ་བའོ། །གསུམ་པ་ནང་མཚམས་ལ་བཞི་ལས། དང་པོ་འབར་བ་ལྟ་བའི་མཚམས་ནི། མཆེད་ཀུན་ནང་དུ་ཞུགས་ལ། ཧཱུཾ། ཞེས་བརྗོད་པས་རང་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པའི་སྐུར་གྱུར་པའི་མིག་གཉིས་མ་དང་ཊ་ལས་ཉི་མ་དང་ཟླ་བ། མིག་འབྲས་ཧཱུཾ་ལས་བསྐལ་པའི་མེ་འབར་ཞིང་རྡོ་རྗེའི་ཚྭ་ཚྭ་འཕྲོ་བའི་བལྟ་བས་བདུད་བགེགས་ལོག་པར་འདྲེན་པའི་ཚོགས་ཐམས་ཅད་བསྡིགས་བསྐྲད་བརླག་པར་བྱས། རྐང་མཐིལ་གཉིས་སུ་ཧཱུཾ་ཡིག་འབར་བའི་རྡོ་རྗེའི་གོམ་སྟབས་ལས་རྡོ་རྗེ་འབར་བའི་སྤྲིན་འཕྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་ལ། ཧཱུཾ། རྡོ་རྗེ་ཡི་ནི་ནང་དག་ཏུ། །སེང་གེའི་ལྟ་བས་བལྟས་ནས་ནི། །རྡོ་རྗེའི་གོམ་པས་ཕྱོགས་བྱས་ནས། །ཁྲོ་མིག་འབར་བས་ཕྱིར་བལྟས་ཏེ། །འགྱིང་བག་ཚུལ་དུ་བརྗིད་པ་ཡིས། །འབར་པའི་རྡོ་རྗེ་སྤར་ནས་ནི། །ཕྱི་ནང་རྡུལ་ཆེན་གསལ་བར་བྱ། །ཞེས་དང་། ཧཱུཾ་བཞི་པའི་སྔགས་བརྗོད་ཅིང་། འགྱིང་བ་དང་བཅས་པའི་སྙེམས་པས་རྡོ་རྗེ་གསོར། དྲིལ་བུ་བཀྲོལ་སེང་གེའི་ལྟ་སྟངས་ཀྱིས་ཕྱོགས་ཐམས་ཅད་དུ་བལྟ་ཞིང་དབང་ལྡན་ནས་རྡོ་རྗེའི་འགྲོས་ཀྱིས་གཡས་སུ་བསྐོར་བའི་གར་གྱིས་བཅག་གོ། །གཉིས་པ་ཁྲོ་བོ་རོལ་པའི་མཚམས་ནི། རང་ཉིད་ཞེ་སྡང་རྡོ་རྗེར་གསལ་པའི་ཐུགས་ཀའི་ཧཱུཾ་ལས་ཁྲོ་བོའི་སྤྲིན་མི་བཟད་པ་སྤྲོས། གསང་སྤྱོད་བལྟ་བར་མི་དབང་བའི་བགེགས་དང་ལོག་འདྲེན་ཐམས་ཅད་བཅོམ། སླར་འདུས་པ་ལས་ཁྲོ་ཚོགས་འབར་བའི་གུར་གྱིས་ཕྱོགས་ཀུན་གཏམས་པར་བསམ་ལ། ཧཱུཾ། སྟོང་གསུམ་སྟོང་གི་འཇིག་རྟེན་ན། །སྐྱེ་འགྲོ་རྩི་ཤིང་ནགས་ཚལ་དང་། །མཐོང་ཡོད་སྣང་གྲགས་ཇི་སྙེད་པ། །ཀུན་ཀྱང་འབར་བ་ཁྲག་འཐུང་སྟེ། །རྔམས་ཆེན་གཏུམ་ཐུང་ཤ་ཐག་འབར། །དུར་ཁྲོད་དཀྱིལ་འཁོར་ལྷུན་གྱིས་གྲུབ། །རཀྴ་རཀྴ་ཧེ་རུ་ཀ །རཀྟ་ཀྲོ་དྷ་ཛྭ་ལ་ཁ། ཧ་ལ་ཧ་ལ་ཏིསྟ་ཕཊ། ཅེས་བརྗོད། སྤྲོ་ན་ཁྲོ་བཅུའི་སྟངས་སྟབས་དང་། མ་མོའི་མཆོངས་སྟབས་དང་། ཕྲ་མེན་མའི་རྔམས་སྟབས་སོགས་ཀྱང་བྱའོ། །གསུམ་པ་མཚོན་ཆ་འཆོལ་བའི་མཚམས་ནི། ཁྲོ་བོའི་ཚོགས་ལས་མཚོན་ཆ་མི་བཟད་པའི་སྤྲིན་སྤྲོས་པས་ཕྱོགས་ཀུན་བཅིངས་པར་བསམ་ལ། ཧཱུཾ། རྡོ་རྗེ་འཁྲིགས་པའི་ཕྲེང་བ་དང་། །ཐོ་བ་ལྕགས་ཀྱུ་འབར་བ་དང་། །འཁོར་ལོ་རལ་གྲི་ལ་སོགས་རྫས། །ཀུན་གྱི་ཕྱག་རྒྱའི་མཚན་མས་བསྐོར། །རྡོ་རྗེའི་ཕྱག་རྒྱ་བཅས་ལ། ༀ་བཛྲ་ཀྲོ་དྷ་ཧ་ན་ཧ་ན་ཧཱུཾ་ཕཊ། ཐོ་བའི་རྒྱ་དང་། ༀ་བཛྲ་ཀྲོ་དྷ་མུངྒ་ར་ཨ་ཀོ་ཊ་ཡ་ཧཱུཾ་ཕཊ། ལྕགས་ཀྱུའི་རྒྱ་དང་། ༀ་བཛྲ་ཀྲོ་དྷ་ཨངྒུ་ཤ་ཧཱུཾ་ཕཊ། འཁོར་ལོའི་རྒྱ་དང་། ༀ་བཛྲ་ཀྲོ་དྷ་ཛྙཱ་ན་ཙཀྲ་ཧཱུཾ་ཕཊ། རལ་གྲིའི་རྒྱ་དང་། ༀ་བཛྲ་ཀྲོ་དྷ་ཏཱིཀྵྞ་ས་མ་ཡ་ཧཱུཾ་ཕཊ། ཅེས་བརྗོད། བཞི་པ་སྲེག་བྱེད་མེའི་མཚམས་ནི། བདག་གི་ཐུགས་ཀ་ནས་སུ་ཡིག་འཕྲོས། གསེར་གྱི་རི་རབ་རྩེ་མོ་རྩིབས་བརྒྱད་པའི་རྣམ་པ་ལ་ལྷ་ཆེན་བརྒྱད་འགྱེལ་སྟབས་སུ་ཁྲོ་བོའི་དབང་ཕྱུག་བརྒྱད་ཀྱིས་མནན་པ། དེའི་སྟེང་དུ་ཐུགས་ཀ་ནས་སྤྲོས་པའི་ཧཱུཾ་ཡིག་ཡོངས་སུ་གྱུར་པ་ལས་བདག་ཉིད་དང་གཉིས་སུ་མེད་པའི་ཞེ་སྡང་རྡོ་རྗེ་མཐིང་ནག་མ་ཊཱཾ་གྱི་ཞིང་དབྱུག་བསྣམས་པ། ཁྱབ་འཇུག་གི་པགས་པས་སྟོད་གཡོགས་གསོལ་ཞིང་། སྟག་དང་བྱ་རྒོད་ཀྱི་མགོ་ཅན་སོགས་ཕྲ་མེན་དགུ་ཁྲིས་བསྐོར་བ། འཇིགས་ཤིང་རྔམས་པའི་སྐུར་གྱུར་པའི་ཐུགས་ཀ་དང་། སྤྱན་པ་སོགས་པའི་ཧཱུཾ་ཡིག །མཚོན་ཆའི་གུར་རྣམས་ལས་ཀྱང་བསྐལ་པའི་མེ་དཔུང་རྣོན་པོ་འབར་ཤིང་འཁྲུགས་པས་བགེགས་ཐམས་ཅད་སྲེགས་ཤིང་འབར་བའི་ཀློང་གིས་ཕྱོགས་ཀུན་གཏམས་པར་བསམ་ལ། ཧཱུཾ་རཾ་རྡོ་རྗེ་མེ་ཡི་རི། །ལྷུན་པོ་འབར་བའི་རྩེ་བརྒྱད་ལ། །འབར་བའི་ལྷ་ཆེན་སྒྱེལ་ནས་ཀྱང་། །དབང་ཆེན་རྡོ་རྗེ་བཀའ་སྡོད་གནས། །ཤིན་ཏུ་མི་བཟད་འབར་བ་ཡི། །གཏུམ་ཆེན་ཧ་ལ་རྔམས་པའི་གཟུགས། །ལྷ་ཆེན་ཁྱབ་འཇུག་ལྤགས་བཤུས་ནས། །ཞིང་ཆེན་གཡང་གཞི་ན་བཟར་མནབས། །གཤིན་རྗེ་མ་ཊཱཾ་འབར་བ་ཡི། །རོ་དབྱུག་ཆེན་པོ་ཕྱག་ན་འཕྱར། །ཕྲ་མེན་དགུ་ཁྲི་མང་པོ་དག །འབར་བའི་ཚོགས་ནི་གཏིབས་ཐག་བཅད། །གང་ལ་ཅིས་འདུལ་དེར་སྟོན་པའི། །ཙིཏྟ་འབར་བའི་མེ་ཕྲེང་གིས། །དོ་ཤལ་མགུར་ཆུའི་ཕྲེང་བ་འདྲེན། །བསྐལ་པའི་མེ་དཔུང་འབར་བའི་ཀློང་། །སྲིད་པའི་རྩེ་མོར་འཁྱིལ་ཞིང་འཕྲོ། །ནམ་མཁའི་ཁམས་ཀུན་མེ་དཔུང་གཏིབས། །རྡོ་རྗེ་འཁོར་ལོའི་མེ་ལྕེ་འཐོར། །དུར་ཁྲོད་དགོན་པའི་ས་ཕྱོགས་དག །མེ་ཡི་རི་བོ་འབར་བ་ལ། །མེ་ཡི་ཡི་དྭགས་མེ་དག་ལས། །གང་ཡང་གནས་པར་མི་ཕོད་པ། །སྟེང་གི་མེ་ལྕེ་འབར་བ་ནི། །འོག་གི་ཕྱོགས་སུ་འཕྲོ་ཞིང་འཁྲུག །འོག་གི་མེ་ལྕེ་འབར་བ་ཡང་། །གྱེན་དུ་འཁྱིལ་ཞིང་སྟེང་དུ་ཐལ། །མེ་ལྕེ་དགུ་ཕྲེང་འབར་བ་དག །འུར་ཆེམ་ཆད་པས་འཐབ་ཅིང་འཁྲུག །དུར་ཁྲོད་མེ་ནི་སྨུག་ཅིང་འབར། །ཞེ་སྡང་འཇོམས་པ་མཐིང་ནག་འཚུབ། །ང་རྒྱལ་སྲེག་པས་སེར་ནག་འབར། །འདོད་ཆགས་སྐེམས་པས་དམར་ནག་འཕྲོ། །ཕྲག་དོག་སྲེགས་པས་ལྗང་ནག་འཁྲུག །གཏི་མུག་སེལ་བས་སྨུག་ནག་འཁྱིལ། །འབར་ཆེན་ཀློང་གི་འཁོར་ལོས་གཏམས། །རྡོ་རྗེ་མེའི་ཕྱག་རྒྱ་བཅས་པ་བསྐོར་ཞིང་། ཛྭ་ལ་མཎྜ་ལ། ཧ་ལ་ཧ་ལ་རཾ། ཞེས་བརྗོད་དོ། །དེ་ནས་བར་དུ་གཅད་བྱ་གཅོད་བྱེད་ཐམས་ཅད་སེམས་ཀྱི་རྟོག་པ་སྟེ། སེམས་ཉིད་དབྱིངས་དང་ཡེ་ཤེས་གཉིས་མེད་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་རྟོགས་པས། བར་ཆད་ཀྱི་མིང་ཙམ་ཡང་དམིགས་སུ་མ་གྲུབ་པ་ནི་མི་ཤིགས་རྡོ་རྗེའི་མཚམས་གཅོད་ཅེས་བྱ་སྟེ། དོན་ལ་གསང་བ་དེ་ཁོ་ན་ཉིད་ཀྱི་མཚམས་སོ། །དེ་ནས་གནས་འཁོར་ཡོ་བྱད་བྱིན་གྱིས་བརླབ་པ་ལ་གསུམ་ལས། དང་པོ་དབང་བསྒྱུར་གྱི་ཏིང་ངེ་འཛིན་གྱིས་གནས་བྱིན་གྱིས་བརླབ་པ་ནི། དོན་ཆོས་ཉིད་ཀྱི་རོལ་པ་ཡེ་ཤེས་ལྔར་མ་འགགས་པར་སྣང་བའི་རྟགས་སུ་ཀུན་གཞི་བྱང་ཆུབ་ཀྱི་སེམས་ཧཱུཾ་ཡིག་འབར་བའི་སྤྲིན་ལས། ཨེ་ཡཾ་ར་སུཾ་ཀེཾ་རཾ། ཞེས་ཆོ་འཕྲུལ་གྱི་རང་སྒྲར་གྲགས་པ་ལས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པར་གྱུར། སླར་ཡང་བྷྲཱུཾ་ཞེས་པའི་སྒྲ་གདངས་ཀྱི་རྐྱེན་ལས་ནམ་མཁའ་ཐམས་ཅད་ཕོ་བྲང་གི་གཞལ་ཡས་ཁང་འབྱམས་ཀླས་པར་བསམ་ལ། བྲུཾ་ཁཾ་ཏཾ་ཁ་ཏ་ལི་བྷྲཱུཾ། ཞེས་བརྗོད་ཅིང་གནས་ཁང་གི་ཕྱོགས་ཀུན་ཏུ་བདུད་རྩི་ལྔས་གཏོར་ཞིང་བྱུག་གོ། །གཉིས་པ་ཕྱག་རྒྱ་ཆེན་པོའི་ཏིང་འཛིན་གྱིས་འཁོར་བརླབ་པ་ནི། ཐོག་མར་རྟགས་གསུམ་གདབ་སྟེ། མགྲིན་པར་ཞག་གི་ཟོ་རིས་ཟླ་གམ་དུ་གདབ་ཅིང་། ཧཱུཾ། ཆོས་རྣམས་ཡེ་ནས་གཉིས་མེད་པའི། །བྱང་ཆུབ་སེམས་སུ་གཅིག་པའི་ཕྱིར། །ཞག་གི་ཟོ་རིས་མཚན་མ་ནི། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་དུ། །སངས་རྒྱས་ཀུན་དང་གཅིག་པའི་ཕྱིར། །འདི་ཡང་སྔོན་གྱི་དམ་ཚིག་ལགས། །འདི་ཡང་རྟགས་ཀྱི་ཕྱག་རྒྱའོ། །ༀ་མ་ཧཱ་སྨྲི་ཏི་མཎྜ་ལ་ཧཱུཾ། དཔྲལ་པར་ཐལ་ཆེན་གྱི་ཚོམ་བུ་རྩེ་གསུམ་རིས་སུ། ཧཱུཾ། ཆོས་རྣམས་ཡེ་ནས་གཉིས་མེད་པའི། །བྱང་ཆུབ་སེམས་སུ་གཅིག་པའི་ཕྱིར། །ཐལ་ཆེན་ཚོམ་བུའི་མཚན་མ་ནི། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་དུ། །ཀེང་ཆེན་ཀུན་དང་གཅིག་པའི་ཕྱིར། །འདི་ཡང་སྔོན་གྱི་དམ་ཚིག་ལགས། །འདི་ཡང་རྟགས་ཀྱི་ཕྱག་རྒྱའོ། །ༀ་མ་ཧཱ་ཀེཾ་ནི་རི་ཏི་ཛྭ་ལ་མཎྜ་ལ་ཧཱུཾ། དཔྲལ་ཀོས་མཁུར་ཚོས་བཞིར་རཀྟའི་ཐིག་ལེ། ཧཱུཾ། ཆོས་རྣམས༴ བྱང་ཆུབ༴ རཀྟའི་ཐིག་ལེའི་མཚན་མ་ནི། །ཧེ་རུ་ཀ་ཡི༴ དུར་ཁྲོད་ཆེན༴ མཁའ་འགྲོ་ཀུན་དང་༴ འདི་ཡང་སྔོན༴ འདི་ཡང་རྟགས༴ ༀ་མ་ཧཱ་རཀྟ་ཏི་ལ་ཀ་མཎྜ་ལ་ཧཱུཾ། ཞེས་གདབ། དེ་ནས་ཐམས་ཅད་བདུད་རྩི་ལྔས་ཁྲུས་བྱས་ལ། སློབ་དཔོན་གྱི་ཕྱག་སོར་གཡས་གཡོན་གྱི་ཉི་ཟླའི་དཀྱིལ་འཁོར་ལ་རིགས་ལྔ་ཡབ་ཡུམ་གྱི་ས་བོན་བཀོད་པའི་འོད་ཀྱིས་མཆེད་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས་པས། སེམས་ཀྱི་རྟོག་པ་དང་། དེ་ལས་བྱུང་བའི་ལུས་ངག་ཡུལ་དང་བཅས་པ་སྦྱངས་ཏེ། སེམས་ཉིད་འོད་ཀྱི་ཐིག་ལེ་གསེར་ཞུན་ལྟ་བུར་གྱུར་པ་ལས། སློབ་དཔོན་གྱིས་ཧཱུཾ་ཞེས་བརྗོད་པས་རིགས་ལྔ་འདུས་པའི་སྲས་མཆོག་རྡོ་རྗེ་སེམས་དཔའི་སྐུར་སད་པའི་གནས་གསུམ་དུ་ༀ་ཨཱཿཧཱུཾ་གི་རྒྱས་བཏབ་པས་བྱིན་གྱིས་བརླབས། སྤྱི་བོ་ཧཾ་བཀོད་པ་ཞུ་བའི་འོད་ཀྱིས་སྐུའི་ཆ་ཐམས་ཅད་རྡོ་རྗེའི་རྡུལ་ཕྲ་རབ་ཀྱིས་གཏམས་པར་བསམ་ལ། རྡོར་དྲིལ་ལག་ཏུ་གཏད་དེ། གསང་བའི་སྤྱོད་པ་རྨད་དུ་བྱུང་བ་ལ་བསླབ་པར་གདམས་པ་ནི། འཇིག་རྟེན་སྤྱོད་ཚུལ་ཐམས་ཅད་ནི། །སྒྱུ་མ་ཡིན་ཕྱིར་ཤིན་ཏུ་སྤང་། །འཇིག་རྟེན་འདས་པའི་སྤྱོད་ཚུལ་དག །ཇི་ལྟར་འབྱུང་བ་དེ་ལྟར་སྤྱོད། །ཅེས་གདམས། སླར་ཡང་དམ་པའི་ཚིག་བརྗོད་ཅིང་གསལ་གདབ་པ་ནི། ཨེ་མའོ་དུར་ཁྲོད་གསང་བ་ཡི། །རྨད་བྱུང་ཞིང་ཁམས་དགའ་ཚལ་འདིར། །སྐལ་ལྡན་དབང་ཕྱུག་རྒྱལ་བའི་སྲས། །འདུས་ཤིང་ཚོགས་པའི་རིག་འཛིན་རྣམས། །ཨེ་མའོ་དགའ་མཆོག་བདེ་ཆེན་གྲོགས། །དམ་ཚིག་སྲོག་གི་ལུ་གུ་རྒྱུད། །ཐབས་དང་ཤེས་རབ་འབྲེལ་བ་ཡི། །སྤྲུལ་པའི་གཤོག་བུ་གྲ་རྒྱས་པས། །ཚོགས་གཉིས་རྩལ་གྱི་རླབས་སྤགས་ནས། །ཆོས་ཉིད་མཁའ་ལ་ལྡིང་བར་རིགས། །དེ་ནས་མཆེད་ཀུན་ལྷར་གསལ་བ་ཉི་མའི་དཀྱིལ་འཁོར་གྱི་སྟེང་དུ་བཞག་ལ། ཨེ་ཡཾ། ཞེས་བརྗོད་པས། རླུང་གིས་བཏེགས། ཁྱུང་ཕྲུག་རྩལ་སྦྱོང་བ་བཞིན་ནམ་མཁའ་ལ་ལྡིང་བར་གྱུར། ཛྭ་ལཾ་ཁཾ་ལྷན། ཞེས་བརྗོད་པས་མཁའ་ལས་བབས་ཏེ་སོ་སོའི་གནས་སུ་འཁོད་པ་ལ་གནང་བ་བྱིན་པ་ནི། དེ་རིང་ཕན་ཆད་རྒྱལ་བའི་སྲས། །དབང་ཕྱུག་ཡིན་པས་ཅི་བདེར་སྤྱོད། །ཅེས་བརྗོད་དོ། །གསུམ་པ་ཚོགས་ཆེན་འདུས་པའི་ཏིང་ངེ་འཛིན་གྱིས་ཡོ་བྱད་བརླབ་པ་ལས། སྤྱིར་རློབ་པ་ནི། སྟོང་པའི་ངང་ལས་མཱཾ་ཡིག་ཡོངས་སུ་གྱུར་པ་ལས། ཡུམ་མཱ་མ་ཀཱི་སྔོན་མོ་བདུད་རྩིའི་བུམ་པ་འཛིན་པའི་སྐུར་གྱུར་པའི་ཐུགས་ཀའི་མཱཾ་ལས་བདུད་རྩིའི་ཆུ་རྒྱུན་བབས་པས་རྫས་རྣམས་སྦྱངས་ནས་བདུད་རྩིའི་རྒྱ་མཚོར་གྱུར། བྱེ་བྲག་ཏུ་རློབ་པ་ནི། ཡོ་བྱད་ཚོ་གསུམ་དུ་བཅད་ལ། ཚོ་གཅིག་གོང་དུ་ནམ་མཁའ་མཛོད་ཀྱི་སྔགས་རྒྱས་མང་པོར་སྤེལ་ལ་སྔོན་འགྲོའི་དུས་སུ་མཆོད་སྦྱིན་བྱ། ཚོ་གཅིག་མཇུག་ཏུ་དགའ་སྟོན་གྱི་ཕྱིར་གུད་དུ་བཞག །ཚོ་གཅིག་སྒྲུབ་པའི་ཆ་རྐྱེན་བྱ་ཕྱིར་རས་སམ་ཤིང་གཞོང་ལ་སོགས་པའི་སྣོད་དུ་བླུགས་དུར་ཁྲོད་ཀྱི་རས་ཀྱིས་ཁ་དགབ། བདུད་རྩི་ལྔ་གཏོར་བས་སྦྱངས། ཞིང་ཆེན་པོའི་ཤ་ཚིལ་གྱི་གསུར་དང་གུ་གུལ་གྱི་དུད་པས་བདུག །འབར་བའི་ལྟ་བས་ཁྲོ་བོའི་སྟངས་སྟབས་ཀྱིས་བསྐོར་ཞིང་ཚམ་རྔམ་བྱས་ལ། ཡོ་བྱད་ཐམས་ཅད་དམ་རྫས་བདུད་རྩི་ལྔར་གསལ་བའི་སྟེང་དུ་ཧཱུཾ་ༀ་སྭཱ་ཨཱཾ་ཧཱས་མཚན་པ་སྤྲོ་བསྡུས་རིགས་ལྔའི་ཕྱག་མཚན་དུ་གྱུར། དེ་ལས་འོད་ཟེར་སྤྲོ་བསྡུས་རྫས་ཀྱི་དངོས་པོ་སྦྱངས་ཏེ་ཡེ་ཤེས་ཀྱི་བདུད་རྩི་འདོད་ཡོན་གྱི་སྤྲིན་འཕྲོ་བར་བསམ་མོ། །དེ་ཡན་ཆད་བསྙེན་པའི་ཡན་ལག་གོ། ༈ །གཉིས་པ་ཉེ་བསྙེན་གྱི་ཡན་ལག་ནི། རྒྱུད་ཀྱི་ལུགས་འདིར་དམིགས་རྟེན་གྱི་དཀྱིལ་འཁོར་ཐིག་ཚོན་གྱིས་བྲིས་ནས་འགོ་འཛིན་པ་ཡིན་ནའང་། མོས་སློབ་ཀྱི་སྐབས་སུ་ལག་ལེན་བདེ་ཕྱིར་བསྙེན་པའི་ཡན་ལག་གི་མཚམས་རིམ་གཅོད་པའི་གོང་དུ་མཛད་པ་ལྟར་བཀོད་པ་ཡིན་ནོ། །དེའང་གཏོར་མ་དང་ཕྱི་ནང་བར་གསུམ་གྱི་མཚམས་གཅོད་སོགས་བྱེད་པའི་བར་དུ་མཆེད་འགའ་ཞིག་གིས་དཀྱིལ་འཁོར་གྱི་འཕྲོས་བྲིར་བཅུག་པ་ཟིན་པ་དང་། རྣམ་པ་འགོད་པ་ནི། སྒྲུབ་དབང་མཆོད་པའི་རྫས་རྣམས་མདུན་དུ་ཞིང་ལྤགས་སྟེང་བཀྲམ་ལ། སློབ་དཔོན་གྱིས་དཀྱིལ་ཆོག་ལྟར་བགེགས་བསྐྲད་སྔོན་དུ་འགྲོ་བས་མཚན་མ་བྱིན་གྱིས་བརླབས་ནས། ལས་མཁན་གྱིས་རིམ་པ་བཞིན་དགོད་པར་བྱ་སྟེ། ཇི་ལྟར་ན། དཀྱིལ་འཁོར་གྱི་དབུས་སུ་ལྡིང་ཁྲི་རིམ་པ་གསུམ་པ་བཀོད་པའི་འོག་མའི་དབུས་སུ་སྐུ་རྟེན་ཐོད་སྐུ་དང་། དེའི་རྒྱབ་བམ་སྐུ་རྟེན་མེད་ན་དེའི་གོ་སར་གསུང་རྟེན་ཡབ་ཡུམ་གྱི་སྙིང་པོ་བྲིས་པའི་ཐོད་པ། ཐུགས་རྟེན་རྡོར་དྲིལ་གྱིས་གཡས་གཡོན་བརྟེན་པ་དང་བཅས་པ། ཧཱུཾ། དབྱིངས་དང་ཡེ་ཤེས་ངོ་བོ་ཉིད། །ཁྲག་འཐུང་འབར་བའི་དཀྱིལ་འཁོར་གཙོ། །ཡེ་ཤེས་མཚན་ལྡན་ཀ་པཱ་ལ། །དཔལ་ཆེན་ཡབ་ཡུམ་རྫས་སུ་བཀོད། །བཛྲ་ཀ་པཱ་ལ་ཨཿབོ་དྷི་ཙིཏྟ་ༀ། ཞེས་དགོད། ལྷ་ཙཀ་རྣམས་རང་རང་གི་སྔགས་ཀྱིས་ལྷ་གནས་སོ་སོར་འགོད་དགོས་ནའང་། ལག་ལེན་ལ་མི་བདེ་བས་ཞི་ཁྲོའི་སྤྱི་སྔགས་ཀྱིས་ཐམས་ཅད་སྦམས་ཏེ་འགོད་པ་ཡིན་པས། ཞི་བ་དང་ཁྲོ་བོ་རྩ་བའི་ལྷ་རྣམས་ཐོད་སྐུའི་མདུན་དང་། དེ་ལྷག་སྡེ་ཚན་བཞིར་བགོས་པ་སྦམས་ཏེ་ཕྱོགས་བཞིར་འགོད། ལྡིང་ཁྲི་བར་མའི་དབུས་སུ་སྨན་སྒྲུབ་དང་འབྲེལ་ན། སྨན་བསྡུ་ཞིང་བཏགས་བཙག་བསྲེ་སྦོལ་གྱི་དགོངས་པ་ཕྱག་བཞེས་ལྟར་བྱས་ནས་གསང་བུམ་ཐོད་པ་ཁ་སྦྱོར་དུ་བླུགས་པའམ། མ་འབྲེལ་ན་སྨན་ཕུད་བླུགས་པ་ཆེ་མཆོག་གི་སྔགས་ཀྱིས་བཞུགས་སུ་གསོལ། མར་མེ་ནི། ཞུན་ཆེན་གསལ་བའི་མར་མེ་ནི། །སྐྱེ་མེད་བྱང་ཆུབ་སེམས་ཀྱི་དོན། །སྐྱེ་བ་མེད་པའི་ཆོས་དབྱིངས་ནས། །མ་རིག་མུན་པ་སེལ་བྱེད་པ། །ཡེ་ཤེས་གསལ་བྱེད་དོན་དུ་དགོད། །ཅེས་པས་གཅིག་ལས་མེད་ན་སྨན་གྱི་མདུན་དང་། ལྔའམ་དགུ་ཡོད་ན་ལྷག་རྣམས་ཕྱོགས་དང་མཚམས་སོ་སོར་དགོད། སྔར་ལྷག་གནས་བྱས་པའི་བུམ་པ་རྣམས་སྤོས་རོལ་གྱིས་སྣ་དྲངས་ཏེ་དཀྱིལ་འཁོར་ལ་གཡས་སུ་བསྐོར་ནས། ཧཱུཾ། བུམ་པ་མ་ལགས་རྒྱལ་པོ་ལགས། །རྒྱལ་པོའི་སྔགས་ཀྱིས་བཏབ་ནས་ཀྱང་། །རྒྱལ་པོ་ཆེན་པོ་མངའ་གསོལ་གྱི། །རྒྱལ་པོའི་ཚུལ་དུ་བཞུགས་སུ་གསོལ། །ཞེས་དང་། ཞི་ཁྲོའི་སྤྱི་སྔགས་བརྗོད་ཅིང་། བུམ་པ་དགུའམ་ལྔ་ཡོད་ན་ལྡིང་ཁྲི་སྟེང་མར་རིགས་དང་མཐུན་པའི་ཕྱོགས་སོ་སོ། གཅིག་ལས་མེད་ན་དབུས་སུ་དང་། ལས་བུམ་དཀྱིལ་འཁོར་གྱི་བྱང་ཤར་རམ་རང་གི་མདུན་དུ་དགོད། དབང་རྫས་གཞན་རྣམས་སྣོད་དུ་བླུགས་ལ་དཀྱིལ་འཁོར་གྱི་བྱང་ཤར་དུ་འཇོག་ཅེས་ལྷ་རྗེ་ཆེན་པོས་གསུངས་པ་ལྟར་རམ། ཡང་ན་དབུ་རྒྱན་སོགས་དབང་རྫས་དངོས་སུ་འབྱོར་པ་རྣམས་དེ་བཞིན་དང་། དེ་ལྷག་ནང་དབང་གི་རིག་འཛིན་བླ་མའི་ལྷ་ཙཀ །ཕྱི་དབང་། ནང་དབང་། སྒྲུབ་དབང་ལས་ཁྱད་པར་གྱི་སྒྲུབ་རྫས་སྤྱི་ཡན་ཆད་ཀྱི་རྫས་དབང་ཙཀླི་རྣམས་སྡེ་ཚན་དུ་སྦམས་ཏེ་ལྡིང་ཁྲི་འོག་མའི་ཕྱོགས་བཞིར་བཀོད་ཀྱང་མི་འགལ། བྱེ་བྲག་སྒྲུབ་སྡེའི་དབང་རྫས་རྣམས་ཙཀླི་ཙམ་ལ་བརྟེན་ན་སྒྲུབ་རྫས་སྤྱིའི་རྗེས་སུ་དང་། དངོས་སུ་བཤམ་ན་དཀྱིལ་འཁོར་གྱི་མཐའ་ལ་འགོད་དེ། དེ་ལ་ཕྱི་ནང་གི་སྒོ་བྱང་གཉིས་དབང་གི་ངུས་སྒོའི་དེ་ཀ་གཡར་ནས་བྱེད་པ་ཡིན་ནའང་། ལག་ལེན་ལ་མི་བདེ་བས་གཞན་ཞིག་བྲིས་ལ་བསྐྱེད་བསྟིམ་བྱས་ནས། ཕྱིའི་སྒོ་བྱང་དཀྱིལ་འཁོར་གྱི་ལྷོ་དང་། ནང་གི་སྒོ་བྱང་ནུབ་ཏུ་འགོད། མར་མེ་སྣོད་བཅུད་དབྱིངས་དང་ཡེ་ཤེས་སུ་རྟོགས་པའི་ཏིང་ངེ་འཛིན་གྱིས་བརླབས་ཏེ་ཤར་དུ་འགོད། བསྙེན་ཕུར་བྱུག་བདུག་བྲབ་གསུམ་གྱིས་གཟི་བྱིན་བསྐྱེད་ནས་སྟོང་པའི་ངང་ལས་ཧཱུཾ་ལས་རྡོ་རྗེ་གཞོན་ནུར་བསྐྱེད་ཅིང་བྱིན་གྱིས་བརླབས་ཏེ་བྱང་དང་། ཁྲོ་བཅུའི་མཚམས་ཕུར་བསྲུང་བའི་དུས་བཏབ་པ་ལྟར་ཕྱོགས་མ་འཁྲུལ་བར་དཀྱིལ་འཁོར་གྱི་མཐའི་ཕྱོགས་མཚམས་སུ་འགོད། མ་མོའི་མདོས་ཤེས་པ་བཞི་ལྡན་མ་འདྲེས་ཡོངས་རྫོགས་ཀྱི་རོལ་མོར་འཆར་ཞིང་། རཀྟ་སྣང་བ་ཆགས་ཞེན་གྱི་རྟོག་ཚོགས་གཉིས་མེད་བྱང་ཆུབ་སེམས་ཀྱི་མཁའ་ཀློང་དུ་སྒྲོལ་བའི་ཏིང་ངེ་འཛིན་གྱིས་བརླབས་ཏེ་ཤར་ལྷོར་འགོད། ཆོས་སྐྱོང་སྤྱི་གཏོར་གྲུ་གསུམ་མཐེབ་ཀྱུ་སུམ་ཅུས་བསྐོར་བ་དང་། སྨན་ཕུད་གཉིས་འདོད་ཡོན་བདུད་རྩིའི་རང་བཞིན་དུ་བརླབས་ཏེ་ནུབ་བྱང་དུ་འགོད། ཨེ་ཝཾ་མ་ཡ་བཞི་ལས་བསྐྱེད་པའི་ལས་བཞིའི་ཧོམ། དམར་གཏོར་ཐོག་མདེའུའི་དབྱིབས་ཅན། ཀོང་ཟེར། གདབ་ཕུར་རྣམས་དུག་མཚོན་གྱི་ནུས་པ་ཅན་དུ་བརླབས་པ་དང་། ཨེ་ལས་བྲུབ་ཁུང་དུ་ཉ་འོ་ཁ་སྦྱོར་དབྱེ་བ་བྱས་པ་རྣམས་བྱང་ཤར་དུ་འགོད། རིག་འཛིན་སྤྱི་གཏོར་ཟླུམ་བརྗིད་པད་འདབ་བཞིས་བསྐོར་བ་གཏོར་སྣོད་ཆོས་དབྱིངས་ཀྱི་ཀློང་དུ་གཏོར་རྫས་ཡེ་ཤེས་ལྔའི་རང་བཞིན་རིག་འཛིན་བླ་མའི་དཀྱིལ་འཁོར་འདོད་ཡོན་གྱི་མཆོད་སྤྲིན་འཕྲོ་བ་དང་བཅས་པར་བརླབས་པ་དང་། སྨན་ཕུད་བདུད་རྩིར་བརླབས་ཏེ་ཤར་ལྷོར་འགོད། ལྔ་ཚན་ལྔ་དང་སྙིང་པོ་ལྔའི་རྫས་སྦྱར་བའི་ཚེ་འབྲང་བུམ་གཟུགས་ཚེ་རིལ་གྱིས་གཅེར་བ་དང་། ཚེ་ཆང་གཉིས་སྣོད་གཞལ་ཡས་ཁང་དུ་བཅུད་ཨཱཾ་པཱཾ་ལས་ཚེ་དཔག་མེད་ཡབ་ཡུམ་དཀར་པོ་པདྨ་དང་ཚེ་བུམ་འཛིན་པར་བསྐྱེད་ཅིང་སྟོང་ཁམས་ཀྱི་ཚེ་སྲོག་བསྡུས་ནས་བསྟིམ་པ་ཤར་དུ་སྟེ། དེ་ཐམས་ཅད་བཀའ་སོ་སོའི་སྔགས་བརྗོད་བཞིན་དུ་འགོད་པར་བྱའོ། །གཞན་ཡང་སྒྲུབ་རྫས་སྤྱིའི་ནང་ཚན། དཔལ་བཤོད་པདྨ་འདབ་བཞིའི་སྟེང་དུ་ཟླ་གམ་ཁ་སྦྱོར་སྟེང་དཀར་འོག་དམར་བའི་ཁ་རྒྱ་གྲམ་གྱིས་བཅད་ཅིང་རྡོ་རྗེ་ཕྱེད་པའི་ཏོག་ཅན་བསང་སྦྱངས། རང་གི་ཐུགས་ཀ་ནས་ཧཱུཾ་དཀར་པོ་དང་མཱུཾ་དམར་པོ་འཕྲོས་པ་ཞུ་བ་ལས་ཐབས་ཤེས་ཉི་ཟླ་ཁ་སྦྱོར་བདེ་ཆེན་བྱང་ཆུབ་སེམས་ཀྱི་ངོ་བོ་ལས་འདོད་ཡོན་ལོངས་སྤྱོད་ཀྱི་སྤྲིན་འཕྲོ་བར་བསམས་ལ་ཤར་དུ་འགོད། དབང་བཤོས་ཟླ་གམ་དམར་པོ་གྱེན་བསླང་ཉི་ཟླའི་ཏོག་ཅན་ལ། བདག་གི་ཐུགས་ཀ་ནས་ཏྲཱཾ་འཕྲོས་ཞུ་བ་ལས་རིན་པོ་ཆེའི་མཆོད་སྡོང་ལས་ཕྱི་ནང་གསང་བའི་མཆོད་སྤྲིན་འབྱུང་བར་བརླབས་ལ་ནུབ་ཏུ་འགོད། དཀར་གསུམ་མངར་གསུམ་ཕྱེ་དང་སྦྱར་བའི་འབྲང་རྒྱས་རྩ་བ་གསུམ་གཅིག་ཟླུམ་པོ་དང་སྟོད་སུམ་གཉིས་གཤོག་པ་གཉིས་པ་ཟླ་གམ་གཟུགས་གཡས་གཡོན་དུ་བཀྲ་ཤིས་ཀྱི་བྱ་ཁ་སྤྲོད་ཅན་ལ་གསལ་ཤིང་རིམ་པ་བཅུ་བཞི་བཙུགས་པ་བཟའ་བཅའ་བཏུང་བའི་དངོས་གྲུབ་ཀྱི་རྫས་མཆེད་ལྕམ་གྱི་གྲངས་ལས་ལྷག་པས་བསྐོར་བ་ལ་འཁོར་འདས་སྣོད་བཅུད་ཀྱི་ཡོན་ཏན་མ་ལུས་པ་བསྡུས་ཤིང་བསྟིམ་པས་བརླབས་ལ་ལྷོར་འགོད། གསོལ་བྱང་ཐོད་པ་མཚན་ལྡན་དུ་ཛ་གད་བུར་སྦྲང་གི་འཕྲད་དང་བདུད་རྩི་རིལ་བུའི་ཕབ་སྦྱར་བའི་སྟེང་དུ། རང་གི་ཐུགས་ཀ་ནས་བྷྲཱུཾ་འཕྲོས་པས་འཁོར་ལོ་མུ་ཁྱུད་དང་བཅས་པའི་ལྟེ་བར་ཧཱུཾ་ཟུང་དང་ཧ་བརྒྱད་འཕྲོས་པ་ལས་དཔལ་ཆེན་པོ་ཆེ་མཆོག་ཧེ་རུ་ཀ་ཡབ་ཡུམ་ལ་ཀ་རཱི་སོགས་ཁྲོ་མོ་བརྒྱད་ཀྱིས་བསྐོར་བར་བསྐྱེད་ཅིང་། གནས་གསུམ་གྱི་ཡིག་འབྲུའི་འོད་ཟེར་གྱིས་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་བསྡུས་ཏེ་ཐིམ་པས་གསོལ་བྱང་ལ་ཡི་གེ་འབྲུ་གསུམ་གྱི་རྣམ་པར་ཤར་བར་བསམ་ལ། ༀ་ཨཱཿཧཱུཾ་ཅི་རིགས་བཟླས་ནས་བྱང་དུ་བཀོད་པ་ནི་ཆེ་མཆོག་བརླང་པོའི་དཀྱིལ་འཁོར་ཞེས་བྱ་སྟེ་གསང་བ་བརྟུལ་ཞུགས་སྤྱོད་པའི་སྒྲུབ་རྫས་སོ། །དཀྱིལ་འཁོར་གྱི་རྒྱན་ནི་ཟུར་བཞིར་མདའ་དར། གྲྭ་བཞིར་གྲི་དང་མེ་ལོང་། སྒོ་བཞིའི་ཐད་ཀར་ལས་བཞིའི་ཕུར་བུ། ཟུར་བཞིར་རྒྱལ་མཚན་དང་ཕྱོགས་བཞིར་བ་དན་རྣམས་ཚོན་སྐུད་ཀྱི་དྲྭ་བས་སྦྲེལ་ཞིང་། གཞན་ཡང་སྟེང་དུ་གདུགས་དང་བླ་རེ། ཕྱོགས་ཀུན་ཡོལ་བ་དང་ལྡ་ལྡི་ལ་སོགས་པས་མཛེས་པར་བརྒྱན། མཆོད་རྫས་ནི། དཀྱིལ་འཁོར་གྱི་མདུན་དུ་ཞི་གཏོར་ཟླུམ་བརྗིད་དཀར་པོ་མཐེབ་ཀྱུ་ཞེ་གཉིས་དང་། ཁྲོ་གཏོར་དཔལ་བཤོས་དམར་པོ་ཟུར་གསུམ་པ་ལ་འཁོར་རང་འདྲ་བརྒྱད་དང་མཐེབ་ཀྱུ་དྲུག་ཅུས་གཅེར་བ། གཞན་ཡང་བཀའ་སྲུང་དཔལ་མགོན་ལྕམ་དྲལ་སོགས་སྲུང་མ་སྤྱི་བྲེ་བྲག་གི་གཏོར་མ་རྣམས་ཀྱང་ཅི་བདེར་སྒྲིག་ཅིང་གཡས་གཡོན་དུ་སྨན་རཀ །དཀྱིལ་འཁོར་གྱི་མཐར་ཕྱི་ནང་གི་མཆོད་རྫས་རྣམས་ཅི་འབྱོར་བ་བཟང་ཞིང་བཀོད་ལེགས་པར་བཤམ་པ་སོགས་འདིར་དགོས་པའི་ཡོ་བྱད་ཐམས་ཅད་ཚོགས་པར་བྱའོ། །དེ་ནས་གྲལ་བཤམ་པ་ནི། རྣལ་འབྱོར་པ་རྟོགས་གོམས་ཀྱི་ཁྱད་པར་གྱིས། དཀྱིལ་འཁོར་གྱི་ཤར་ཕྱོགས་སུ་སེང་གེས་བཏེག་པའི་འཁོར་ལོའི་སྟན་ཉི་ཟླའི་ཞབས་བརྟེན་བྱས་པ་ལ་རྡོ་རྗེ་རྒྱལ་པོ་ཡབ་ཡུམ་བཞུགས། ལྷོར་སེང་གེའི་ཚབ་ཏུ་གླང་ཆེན་དང་ཞབས་བརྟེན་པདྨས་བྱས་པ་ལ་རྡོ་རྗེ་རྒྱལ་ཐེབ་ཡབ་ཡུམ། བྱང་དུ་པདྨ་དང་རྡོ་རྗེས་བཏེག་པའི་རྒྱ་གྲམ་གྱི་གདན་ལ་ཀརྨ་ཡབ་ཡུམ། ནུབ་དང་བྱང་གི་ཕྱོགས་སམ་མཚམས་རྣམས་སུ་གཞི་གཅིག་ལས་བྱས་པའི་སྟན་རྒྱུན་མ་ཆད་པ་རྡོ་རྗེ་རྐྱང་པ་གཏམས་པའི་རྩེ་མོ་ལུག་རྒྱུད་དུ་སྦྲེལ་བའི་སྟེང་དུ་པདྨ་ཕྱོགས་གཅིག་ཏུ་བསྟན་པས་ལས་འོད་འཕྲོ་བ་ལ། རང་རང་གི་མཚན་མ་ཟླ་བ་ཉ་གང་བར་རྡོ་རྗེ་རྩེ་གསུམ་པ་དང་། རྩེ་གཅིག་པ་དང་། ཕྱེད་པ་རྣམས་ཀྱིས་མཚན་པ་དང་། ལ་ལར་ཟླ་བ་ཕྱེད་པའི་བཅད་ཁ་ནང་བསྟན་ལ། རྡོ་རྗེ་རྩེ་གཅིག་རྣོ་བ་དང་། པདྨ་བརྩེགས་པས་མཚན་པའམ། ཟླ་རྐྱང་ལས་རྒྱན་མེད་པ་དང་། རྣལ་འབྱོར་པ་ཕལ་པ་རྣམས་ལ་ནར་མ་མིའི་གདན་ཞེས་རས་བལ་གྱི་སྟན་ནང་ཚངས་ཅན་སོགས་འདིང་བར་བཤད་ནའང་། མོས་སློབ་ཙམ་ལ་ཡུལ་ལུགས་དང་འཚམས་པའི་ཁྲི་བཤམས་པ་ལ་རྡོ་རྗེ་སློབ་དཔོན་དང་། འཁོར་རྣམས་སྟན་གྱི་རིམ་པ་ཇི་ལྟར་རིགས་པ་ལ་འཁོད་ནས། དཀྱིལ་འཁོར་བྱིན་དབབ་པ་ནི། དཔོན་སློབ་ཐམས་ཅད་ཞྭ་གོས་དང་རྒྱན་བཟང་པོ་བསྟར། རྣལ་འབྱོར་ཕོ་རྣམས་ཀྱིས་ཧསྟ་དང་། མོ་རྣམས་ཀྱིས་ཕྲེང་བས་གཡོབ། སྦྱར་སྤོས་ཀྱིས་བདུག་ཅིང་འབུད་བཀྲོལ་བརྡུང་བྱའི་རོལ་མོ་དང་གདུང་དབྱངས་སྤྱུགས་གླུའི་སྒྲ་རྣམས་ཀྱིས་བསྐུལ་བས། ཞི་ཁྲོའི་ལྷ་ཚོགས་ཐམས་ཅད་ནམ་མཁའ་འགེངས་པ་ཙམ་དུ་འཐིབས་ཀྱིས་བྱོན་ནས། བདག་གནས་དཀྱིལ་འཁོར་ཡོ་བྱད་དང་བཅས་པ་ལ་ཐིམ་པས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་མོས་ལ། ཧཱུཾ། ནམ་མཁའི་མཐའ་དང་མཉམ་པའི་འཇིག་རྟེན་ནས། །རྣལ་འབྱོར་དབང་ཕྱུག་རིགས་ཀྱི་ཡུམ་དང་བཅས། །རྒྱལ་བའི་སྲུང་མར་གྱུར་པའི་དམ་ཚིག་ཅན། །མཆོད་དོ་བླ་མ་རྣམས་ལ་སྐྱབས་སུ་མཆི། །ཧཱུཾ། མི་གནས་ཡེ་ཤེས་ཐུགས་ཀྱི་དཀྱིལ་འཁོར་ནས། །བཅོམ་ལྡན་ཆེ་མཆོག་ཁྲོ་རྒྱལ་འཁོར་དང་བཅས། །སྔགས་ཚིག་སྤྱུགས་པའི་བརྡ་ཡིས་སྤྱན་འདྲེན་གྱི། །ཕྱག་རྒྱ་གར་གྱི་བརྡ་ཡིས་གཡབ་འདོར་ན། །དཔལ་ཆེན་ཡབ་ཡུམ་ཐུགས་དམ་རྗེས་དགོངས་ལ། །ཐུགས་དམ་བརྡ་ལ་དགོངས་ཏེ་གཤེགས་སུ་གསོལ། །ཧཱུཾ། ཆོས་ཉིད་བདེ་བ་ཆེན་པོའི་སྐུ་བྱུང་བ། །བཅོམ་ལྡན་ཆེ་མཆོག་ཡབ་ཡུམ་གཤེགས་སུ་གསོལ། །དུར་ཁྲོད་དྲེགས་པའི་ཚོགས་རྣམས་འཇོམས་མཛད་པ། །རྒྱུད་ལུང་ཁྲོ་རྒྱལ་ཡབ་ཡུམ་གཤེགས་སུ་གསོལ། །ཡེ་ཤེས་འབར་བ་བརྒྱད་ཀྱི་དཀྱིལ་འཁོར་ནས། །ག་རཱི་ཁྲོ་མོ་བརྒྱད་པོ་གཤེགས་སུ་གསོལ། །ཆོས་ཉིད་མཁའ་ལྟར་དག་པའི་དཀྱིལ་འཁོར་ནས། །སིངྷ་ཕྲ་མེན་བརྒྱད་པོ་གཤེགས་སུ་གསོལ། །འབར་བའི་བར་ཁྱམས་དུར་ཁྲོད་ནང་ཤེད་ནས། །སྤོར་མ་གསང་ཡུམ་ཚོགས་རྣམས་གཤེགས་སུ་གསོལ། །ཚད་མེད་སྒོ་བཞི་གསང་བའི་དཀྱིལ་འཁོར་ནས། །རྟ་གདོང་སྒོ་མ་འཁོར་བཅས་གཤེགས་སུ༴ དམ་ཚིག་ལྷུན་གྱིས་གྲུབ་པའི༴ དབང་ཕྱུག་མིང་སྲིང་འཁོར་བཅས༴ ཞེ་སྡང་འབར་བ་ཐུགས་ཀྱི་དཀྱིལ༴ ཁྲོ་རྒྱལ་སྲིན་པོ་འཁོར་བཅས་གཤེགས༴ དུར་ཁྲོད་འབར་བ་ཆེན་པོའི༴ མཁའ་འགྲོ་སུམ་ཅུ་རྩ་གཉིས་གཤེགས༴ སྒྲོལ་བྱེད་འབར་བ་ལས་ཀྱི༴ རྡོ་རྗེ་གིང་ཆེན་འཁོར་བཅས༴ ཅི་བགྱིས་བཀའ་ཉན་ལས་ཀྱི༴ ཕོ་ཉ་སྡེར་མོ་འཁོར་བཅས༴ ལས་རྣམས་ཡོངས་སུ་གྲུབ་པའི༴ ཡེ་ཤེས་མ་མོའི་ཚོགས་རྣམས༴ སྡོམ་པ་ས་ལ་གནས་པའི༴ རིག་འཛིན་རྩལ་འཆང་འཁོར་བཅས་གཤེགས་སུ་གསོལ། །དེང་གི་གནས་མཆོག་དུར་ཁྲོད་ཚོགས་དེ་འདྲ། །བྷཉྫ་གསར་རྙིང་ཚོགས་ནི་རྫ་ལྟར་ལྷགས། །ཀེང་རུས་གསར་རྙིང་ཚོགས་ནི་རི་ལྟར་སྤུངས། །རཀྟ་གསར་རྙིང་ཚོགས་ནི་རྒྱ་མཚོར་བསྐྱིལ། །མཱཾ་ས་གསར་རྙིང་ཚོགས་ནི་ཐང་ལྟར་གདལ། །ཞིང་ཆེན་གསར་རྙིང་ཚོགས་ནི་བྱེ་ལྟར་བཀྲམ། །ཙིཏྟ་གསང་རྙིང་ཚོགས་ནི་རླུང་ལྟར་སྤུངས། །བྱང་ཆུབ་སེམས་ཀྱི་ཚོགས་ནི་གངས་ལྟར་ཆགས། །རྒྱན་ཆ་གསར་རྙིང་ཚོགས་ནི་སྤྲིན་ལྟར་གཏིབས། །ཏ་ན་ག་ནའི་ཚོགས་ནི་དབྱིངས་ལྟར་རོལ། །རྡོ་རྗེ་མཆེད་ལྕམ་ལྷ་དང་ལྷ་མོར་རོལ། །མ་མོ་མཁའ་འགྲོའི་ཚོགས་ནི་ནམ་མཁར་འཐིབས། །རྣལ་འབྱོར་ལོངས་སྤྱོད་ཆེ་ལ་སྤྱན་འདྲེན་ན། །ཐུགས་དམ་བརྡ་ལ་དགོངས་ཏེ་གཤེགས་ནས་ཀྱང་། །དཀྱིལ་འཁོར་ཆེན་པོ་འདི་ལ་བྱིན་ཕོབ་ལ། །སྒྲུབ་པའི་རྟགས་དང་མཚན་མ་བསྟན་ནས་ཀྱང་། །བླ་མེད་སྐུ་གསུང་ཐུགས་ཀྱི་དངོས་གྲུབ་སྩོལ། །ༀ་བཛྲ་ས་མ་ཡ་སིདྡྷི་ཕཻཾ་ཕཻཾ། བཛྲ་ཡོ་གི་ནཱི་ས་མ་ཡ་ཛཿ བཛྲ་ཨཱ་བེ་ཤ་ཡ་ཨ་ཨ། ཞེས་བརྗོད་པས། དཀྱིལ་འཁོར་གྱི་ལྷ་ཚོགས་ནམ་མཁའ་གང་བར་བྱོན། པྲ་བེ་ཤ་ཡ་ཕཊ་ཀྱིས་སྒོ་ཕྱེ། ཨཱ་བེ་ཤ་ཡ་ཨ་ཨས་གཉིས་མེད་དུ་བསྟིམ་པས། དཀྱིལ་འཁོར་གྱི་ལྷ་ཚོགས་རྣམས་དང་བདག་གནས་ཡོ་བྱད་དང་བཅས་པ་ཐམས་ཅད་གཟི་བྱིན་དང་ལྡན་པར་བསམ་མོ། །དེ་ནས་བསྙེན་པར་གནང་བའི་དབང་བསྐུར་བ་ནི། སློབ་དཔོན་གྱི་ཐུགས་ཀའི་ཧཱུཾ་ལས་འོད་ཟེར་འཕྲོས། སློབ་མའི་སེམས་ཀྱི་རྟོག་པ་དང་། དེ་ལས་བྱུང་བའི་ལུས་ངག་སྦྱངས་ཏེ་མི་དམིགས་པའི་ངང་ལས་ཧཱུཾ་ཞེས་བརྗོད་པས་དཔལ་ཆེན་པོ་བཛྲ་ཧེ་རུ་ཀའི་སྐུར་གྱུར་པ་ལ། ཧཱུཾ་ལས་བྱུང་བའི་ཡེ་ཤེས་ཀྱི་རྡོ་རྗེ་ལག་གཡས་དང་། ཨ་ལས་བྱུང་བའི་སྟོང་ཉིད་ཀྱི་ཆོས་སྒྲ་སྒྲོགས་པའི་དྲིལ་བུ་ལག་གཡོན་དུ་གཏད་པས་ཐབས་ཤེས་གཉིས་སུ་མེད་པར་འབྲེལ་བའི་དབང་ཐོབ་པར་བསམ་ལ། ཧཱུཾ། རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་གཉིས་མེད་པའི། །འཁོར་དང་མྱ་ངན་འདས་པ་ཡི། །ཆོས་ལ་དེ་བཞིན་དབང་བསྐུར་རོ། །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་རླབས་ཀྱིས། སྐལ་ལྡན་རིག་པ་འཛིན་པ་ཁྱོད་རྣམས་ལ་རྡོ་རྗེ་དང་དྲིལ་བུའི་དབང་བསྐུར་བས། གསང་བའི་དཀྱིལ་འཁོར་ཆེན་པོར་ཞུགས་ཏེ་བསྙེན་སྒྲུབ་རྣམ་བཞིའི་སྒོ་ནས་ཕྲིན་ལས་རྣམ་པ་བཞིར་ལོངས་སྤྱོད་པ་ལ་ཐབས་དང་ཤེས་རབ་གཉིས་སུ་མེད་པར་འབྲེལ་བའི་དབང་དམ་པ་ཐོབ་པར་གྱུར་ཅིག །ༀ་བཛྲ་གྷཎྜེ་ཏིཥྛ་ཨ་བྷི་ཥིཉྩ་ཧཱུཾ། ཞེས་རྡོ་རྗེ་གསོར་ཞིང་དྲིལ་བུ་བཀྲོལ་ནས་སྙིང་གར་གཏུགས་ལ་ལག་ཏུ་གཏད་དོ། །ཕུར་བུ་ༀ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ་ཅེས་པས་སྲས་མཆོག་གི་སྐུར་གྱུར་པའི་གནས་གསུམ་དུ་ༀ་ཨཱཿཧཱུཾ་གི་འཕྲོ་འདུས་རྡོ་རྗེ་གསུམ་དུ་བྱིན་གྱིས་བརླབས་པ་ལག་ཏུ་གཏད་ལ། ཧཱུཾ། མི་གཡོ་ཆོས་སྐུ་ཡོན་ཏན་མཆོག་མངའ་བ། །སྡུག་བསྔལ་ལོག་པར་འཁྱམས་པའི་སེམས་ཅན་རྣམས། །ཐུགས་རྗེས་གཉིས་མེད་དབྱིངས་སུ་སྒྲོལ་མཛད་པ། །ཁྲོ་རྒྱལ་འབར་བའི་དབང་འདི་ཁྱོད་ལ་བྱིན། །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད༴ སྐལ་ལྡན་རིག་པ་འཛིན་པ་ཁྱོད་རྣམས་ལ་ཕུར་བུས་དབང་བསྐུར་བས། བར་དུ་གཅོད་པའི་བགེགས་དང་ལོག་འདྲེན་ཡ་མ་དམ་སྲི་ཐམས་ཅད་འདུལ་བའི་དབང་དམ་པ་ཐོབ་པར་གྱུར་ཅིག །ༀ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ཞེས་ཕུར་བུ་སྙིང་གར་གཏུག་ཅིང་བགེགས་ལ་སྒྲིལ་ལོ། །ཕྲེང་བ་ཨ་ཙནྡྲ་ཞེས་པས་ཟླ་བའི་དཀྱིལ་འཁོར་ལ་གནས་པའི་ཏྲཱཾ་ཡིག་ཟུང་ལྔར་གྱུར་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་ཡོན་ཏན་ཐམས་ཅད་བསྡུས་ཏེ་ཐིམ་པ་ལས་ཕྲེང་བར་གྱུར་པ་གཏད་ལ། ཧཱུཾ། རྡོ་རྗེ་རུ་དྲ་བཞད་པ་ཆེ། །ཁུར་བ་དབུགས་ཀྱི་རླུང་འབྱིན་པ། །འབྲུག་གི་སྒྲ་ལྟར་ཟབ་པ་ཡི། །རུ་ལུ་རུ་ལུའི་སྒྲ་སྒྲོག་བཞད། །ཕྱག་རྒྱ་འདི་ཡིས་དབང་བསྐུར་རོ། །ན་མོ། ཕྱོགས་བཅུ་དུས་བཞིའི་དེ་བཞིན་བཤེགས་པ༴ སྐལ་ལྡན་རིག་པ་འཛིན་པ་ཁྱོད་རྣམས་ལ་ཕྲེང་བའི་དབང་བསྐུར་བས་ལྷའི་ཐུགས་དམ་བསྐུལ་བའི་ཛཔ྄་བཟླ་བ་དང་སངས་རྒྱས་ཐམས་ཅད་ཀྱི་གསུང་སྒྲ་དབྱངས་མི་ཟད་པའི་དབང་དམ་པ་ཐོབ་པར་གྱུར་ཅིག །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ་ཨ་བྷི་ཥིཉྩ་ཧཱུཾ། ཞེས་ཕྲེང་བ་སྙིང་གར་གཏུག་ཅིང་རུ་ལུའི་ཛཔ྄་ཅུང་་ཟད་བཟླར་གཞུག་གོ། །རྔ་ཉི་མ་ལ་གནས་པའི་ཧཱུཾ་ཡིག །བཛྲ་ཙ་མ་ར་ཛཿ མ་ར་ཡ་ཧཱུཾ། ཞེས་པས་སྐྱེ་མེད་ཀྱི་སྒྲ་སྒྲོག་པའི་ཡེ་ཤེས་ཀྱི་རྔར་གྱུར་པ་གཏད་ལ། ཧཱུཾ། ཆོས་སྐུ་མཆོག་མངའ་ཡེ་ཤེས་ཀྱི་ཆོ་འཕྲུལ་ལྡན། །དཔལ་གྱི་ཕྱག་རྒྱ་ཡེ་ཤེས་ཙ་མ་ར། །རིགས་ཀྱི་བུ་མཆོག་ཁྱོད་ལ་དབང་བསྐུར་བས། །མ་མོ་མཁའ་འགྲོ་ཐམས་ཅད་དབང་སྡུད་ཅིང་། །ཐུགས་དམ་གནད་ནས་བསྐུལ་བས་བྲན་བཞིན་དུ། །འཁོལ་བའི་དབང་མཆོག་དམ་པ་ཐོབ་པར་ཤོག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ༴ སྐལ་ལྡན་རིག་པ་འཛིན་པ་ཁྱོད་རྣམས་ལ་ཡེ་ཤེས་ཀྱི་རྔས་དབང་བསྐུར་བས། མ་མོ་དང་མཁའ་འགྲོ་དབང་དུ་སྡུད་ཅིང་བྲན་དུ་འཁོར་བའི་དབང་དམ་པ་ཐོབ་པར་གྱུར་ཅིག །བཛྲ་ཙ་མ་ར་ཛཿམ་ར་ཡ་ཨ་བྷི་ཥིཉྩ་ཧཱུཾ། ཞེས་སྙིང་གར་གཏུག་ཅིང་བརྡུང་ངོ་། །དེ་ནས་བརྡ་སྒོ་དབྱེ་ཞིང་བརྡ་ཕྱག་འཚལ་བ་ནི། དཀྱིལ་ཆོག་གི་རྣམ་པ་འགོད་པའི་ཆོ་གའི་ས་བཅད་གསུམ་པ་ལྟར་བགྱིས་པས་ཀྱང་རུང་མོད། འདིར་ཕྱག་བཞེས་སུ་ཚིགས་སུ་བཅད་པ་དང་བཅས་ཏེ་མཛད་པས། ཕྱོགས་བཞི་ནས་རྡོ་རྗེ་ནང་བསྡམས་ཕྱིར་དགྲོལ་བ་སྒོ་དབྱེ་བའི་རྒྱས། ཧཱུཾ། ཡེ་ནས་མཉམ་ཉིད་མི་འདའི་ཕྱིར། །གཟུང་འཛིན་བསྣོལ་བས་སྒོ་བཅད་དེ། །བདག་མེད་མི་གནས་ཡེ་ཤེས་ཀྱིས། །ཡུལ་ལས་འདས་པའི་སྒོ་ཕྱེ་ཞིག །ༀ་བཛྲ་ཙཀྲ་མཎྜ་ལ་པྲ་བེ་ཤ་ཡ་ཕཊ། ཅེས་ལན་བཞི་བརྗོད་པས། དཀྱིལ་འཁོར་གྱི་ཕྱོགས་བཞིའི་སྒོ་རིམ་རྣམས་ཤག་གིས་བྱེ་བས་ལྷ་རྣམས་ཀྱི་ཞལ་མངོན་དུ་གྱུར་པར་བསམ་ལ། བརྡ་ཕྱག་ནི། ཧཱུཾ། ཤར་ལྷོ་ནུབ་བྱང་སྒོ་བཞི་ནས། །ཡེ་ཤེས་བཞི་ཡི་སྒོ་ཕྱེ་སྟེ། །ཞི་ཁྲོ་གསང་བའི་དཀྱིལ་འཁོར་ལ། །རྣལ་འབྱོར་མཆོག་གིས་ཕྱག་བགྱིད་དོ། །ཨ་ལ་ལ་ཧོཿ ཞེས་ཕྱག་བཙལ་བས་ལྷ་དང་བདག་རང་རིག་པའི་ངང་དུ་དབྱེར་མ་ཕྱེད་པར་བསམ་མོ། །དེ་ནས་སྒྲུབ་ཐབས་ལྟར་ལས་ཀྱི་དབུ་དྲང་བ་སྔོན་དུ་འགྲོ་བས། མཚམས་གཅོད། བཤགས་པ། དམ་བཅའ། བྱིན་འབེབས་རྣམས་བྱས་རྗེས། མ་ཊཱཾ་མནན་པ་ནི། དཀྱིལ་འཁོར་གྱི་བྱང་ཤར་དུ་ཆོས་འབྱུང་མེ་རི་དང་བཅས་པ་བྲིས་པའི་དབུས་སུ། ཐལ་ཆེན་དང་བསྲེས་པའི་འཇིམ་པའམ་ངར་ཟན་ལ་མ་ཊཱཾ་གྱི་གཟུགས་སྔོ་སྐྱ་ཁྲོ་བཞིན་ཅན་སྐྲ་འབལ་བ་བྱས་པ་མགོ་ལྷོ་ནུབ་ལ་བསྟན་ཏེ་གན་རྐྱལ་དུ་བཞག །བཛྲ་ཧེ་རུ་ཀོ྅་ཧཾ་ཞེས་པས་བདག་ཉིད་དཔལ་ཆེན་པོ་ཞེ་སྡང་རྡོ་རྗེ་ཁྲོ་གཏུམ་བཟོད་པར་དཀའ་བའི་གཟི་བྱིན་འབར་བར་གྱུར། ལྕགས་ཀྱུའི་ཕྱག་རྒྱ་བཅས་ལ། བདེན་སྟོབས་བརྗོད་དེ། མ་ཊཱཾ་རུ་དྲ་གདུག་པ་ཅན་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །མ་ཊཱཾ་རུ་དྲ་ཨངྐུ་ཤ་ཛཿ ཛཿཧཱུཾ་བཾ་ཧོཿ ཞེས་ལན་གསུམ་བརྗོད་པས། བདག་གི་སྐུ་ལས་འོད་ཟེར་ལྕགས་ཀྱུ་ལྟ་བུ་འཕྲོས་ལོག་པར་ལྟ་བའི་སྡིག་ཅན་གདུག་པ་ཅན་ཐམས་ཅད་འུབ་ཀྱིས་འདུས་ཏེ་མདུན་གྱི་རྟེན་ལ་ཐིམ་པར་གྱུར། ཁ་ཊྭཱཾ་ཀའི་ཕྱག་རྒྱ་བཅས་ཏེ། ཧཱུཾ། དྲེགས་པ་རུ་དྲ་སྡིག་ཅན་འདི། །ནམ་ཡང་བསྒྲལ་བའི་ཞིང་ཡིན་ཏེ། །ཐུགས་རྗེ་ཆེན་པོའི་ཐབས་ཀྱིས་བསྒྲལ། །ཁ་ཊྭཱཾ་ཕྱག་རྒྱས་བསྒྱེལ་ནས་ནི། །མ་རིག་མུན་པའི་སྒོ་ཕྱེ་ནས། །རྣམ་ཤེས་ཨ་རུ་བྱིན་རླབས་ཏེ། །གསང་ཆེན་ཐུགས་ཀྱི་ཀློང་དུ་བསྟིམ། །སྦུབས་ནི་གཞལ་ཡས་འབར་བར་གྱུར། །ཛཿཧཱུཾ་བཾ་ཧོཿམ་ཧཱ་ཤྲཱི་ཧེ་རུ་ཀ་མ་ཊཱཾ་རུ་དྲ་ཧ་ཧ་པྲ་བི་ཤ་ཕཊ། ཅེས་བསྣུན་པས་གྱད་ཀྱིས་སྡོང་གོག་སྐྱུར་བ་བཞིན་ལྷོ་ནུབ་རུ་མགོ་ཕྱོགས་པས་གན་རྐྱལ་དུ་འགྱེལ། གཟུགས་ཕུང་ཁྲོལ་གྱིས་ཞིག་པས་མ་རིག་པའི་སྦུབས་དྲལ་ནས། ཤེས་པ་སྐྱེ་མེད་ཀྱི་རང་བཞིན་ཨ་དཀར་པོ་འབར་བར་གྱུར་པ་བདག་ཉིད་དཔལ་ཆེན་པོའི་ཐུགས་ཀའི་ཧཱུཾ་ལ་ཐིམ། ཁོག་པ་གཞལ་ཡས་ཁང་དང་གཉིས་མེད་དུ་གྱུར་པར་མོས་ལ། ཡན་ལག་རྣམས་སོ་སོར་ཕྲལ་ཏེ། མགོ་བོ་དཀྱིལ་འཁོར་གྱི་ལྷོ། ལག་གཡས་ཤར་ལྷོ། གཡོན་ལྷོ་ནུབ། རྐང་གཡས་བྱང་ཤར། གཡོན་ནུབ་བྱང་། སྙིང་ཤར། ནང་རོལ་ནུབ། ཕོ་མཚན་བྱང་རྣམས་སུ་བཀོད་པ་དུར་ཁྲོད་གནས་བརྒྱད་དུ་བསམ་མོ། །དེ་ནས་ཁྲོ་བཅུའི་སྟངས་སྟབས་ཀྱི་བགེགས་དང་དམ་སྲི་བརྡུང་བ་ནི། བདག་ཉིད་དཔལ་ཆེན་པོར་གསལ་བ་ལས་ཁྲོ་ཚོགས་དཔག་ཏུ་མེད་པ་སྤྲོས། ནམ་མཁའི་ཁམས་ཐམས་ཅད་ཁྱབ། གདུག་པ་ཅན་ཐམས་ཅད་རྡོ་རྗེའི་སྟངས་སྟབས་ཀྱིས་གཟིར་ཞིང་ཚར་བཅད་པར་གྱུར། ལག་པ་ཐལ་སྦྱར་གྱེན་དུ་སྒྲེང་། །རྐང་པ་ཕྲལ་ནས་བརྐྱང་བསྐུམ་བྱ། །གོམ་པའི་སྟབས་ཀྱིས་གར་བྱེད་པ། །འདི་ནི་ཧཱུཾ་མཛད་ཕྱག་རྒྱ་ཡིན། །ༀ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ་ཕཊ། རྐང་པ་གཡོན་གྱིས་གཡས་ལ་འཁྱུད། །ལག་པ་གར་སྟབས་བསྐོར་ནས་ཀྱང་། །ཐལ་མོ་དྲག་ཏུ་བརྡབ་པ་ནི། །རྣམ་པར་རྒྱལ་བའི་ཕྱག་རྒྱ་ཡིན། །ༀ་བཛྲ་ཀྲོ་དྷ་བི་ཛ་ཡ་ཧཱུཾ་ཧ་ན་ཧ་ན་ཧཱུཾ་ཕཊ། ལག་པ་གཡས་པའི་མཐེ་བོ་ཡིས། །མཐེའུ་ཆུང་སེན་མོའི་མཐིལ་དུ་མནན། །གདེངས་པའི་སྟབས་སུ་སྒྲེང་བ་ནི། །དབྱུག་པ་སྔོན་པོའི་ཕྱག་རྒྱ་ཡིན། །ༀ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ལག་པ་གཡས་པ་ཁུ་ཚུར་ནི། །བརྡེག་པའི་སྟབས་སུ་གདེངས་པ་དང་། །གཡོན་པ་དཀུ་ལ་བརྟེན་པ་ནི། །གཤིན་རྗེ་འཇོམས་པའི་ཕྱག་རྒྱ་ཡིན། །ༀ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ལག་པ་གཡས་པའི་ཐལ་མོ་ནི། །བརྡེག་པའི་སྟབས་སུ་གདེངས་པ་དང་། །གཡོན་པས་འཛིན་པ་ལྟར་བྱེད་པ། །མི་གཡོ་མགོན་པོའི་ཕྱག་རྒྱ་ཡིན། །ༀ་བཛྲ་ཀྲོ་དྷ་ཨཱརྻ་ཨ་ཙ་ལ་ཧཱུཾ་བནྡྷ་བནྡྷ་ཧཱུཾ་ཕཊ། ལག་པ་ཐལ་མོ་སྦྱར་ནས་ནི། །མཛུབ་མོ་རྒྱབ་ཏུ་བསྣོལ་བར་བྱ། །མཐེ་བོང་གཉིས་ཀྱང་ཕྲལ་ཏེ་སྒྲེང་། །སྤྱི་བོར་བཞག་པ་གྲཱི་ཝའི་རྒྱ། །ༀ་བཛྲ་ཀྲོ་དྷ་ཧ་ཡ་གྲཱི་ཝ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། རྐང་པ་གཡས་པ་མཐུར་དུ་ཟུག །ལག་པ་གཡས་པ་གྱེན་དུ་སྒྲེང་། །གཡོན་གྱི་རྐང་པ་འཕྱར་བ་ནི། །གཞན་གྱིས་མི་ཐུབ་ཕྱག་རྒྱ་ཡིན། །ༀ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུཾ་ཏིཥྛ་ཏིཥྛ་ཧཱུཾ་ཕཊ། ལག་པ་གཡས་གཡོན་དཀུར་བརྟེན་ཏེ། །རྐང་པ་གཤིབས་ཏེ་མཆོང་བ་ནི། །བདུད་རྩི་འཁྱིལ་བའི་ཕྱག་རྒྱ་ཞེས། །དཔའ་པོ་ཆེན་པོས་ཡང་དག་བཤད། །ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུ་ཾཙྪི ནྡ་ཙྪིནྡ་ཧཱུཾ་ཕཊ། ལག་པ་གཡས་གཡོན་གསྣོལ་བ་དང་། །རྐང་པ་བརྐྱང་བསྐུམ་བྱས་པ་ནི། །ཁམས་གསུམ་རྣམ་རྒྱལ་ཕྱག་རྒྱ་ཞེས། །མགོན་པོ་དཔའ་བོས་ཡང་དག་བཤད། །ༀ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུཾ་བྷིནྡ་བྷིནྡ་ཧཱུཾ་ཕཊ། རྐང་ཕྲལ་མཐིལ་ནི་མཐུར་དུ་ཟུག །ལག་པ་ཕྲལ་ནས་གར་བྱེད་ཅིང་། །སྟབས་སུ་མཆོང་བར་བྱེད་པ་སྟེ། །འདི་ནི་སྟོབས་ཆེན་ཕྱག་རྒྱ་ཡིན། །ༀ་བཛྲ་ཀྲོ་དྷ་མ་ཧཱ་བ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། ཅེས་སོ་སོའི་ཕྱག་རྒྱ་བཅས་ལ་བསྐོར་ཞིང་འགྱིང་བར་བྱའོ། །ཁྲོ་བོའི་ཚོགས་རྣམས་སླར་འདུས་པ་ལས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་གྱུར། དེ་ནས་མཆོད་པ་བྱིན་རླབས་ནས་བརྩམས་ཏེ། སྒྲུབ་ཐབས་ལྟར་ལས་གཞུང་བསྲང་ལ། ཛཔ྄་ཀྱང་ཚང་བར་བཟླ་ཞིང་། ཚོགས་མཆོད་དང་། ལྷག་ཆོག་བྱས་ལ་སྐེ་ཚང་དུ་བསག་སྟེ། ཞག་དྲུག་པའི་ཕྲིན་ལས་སོ། །དེ་ནས་ནམ་ལངས་པ་དང་རས་བྲིས་གསར་པའམ་རྡུལ་ཚོན་གྱི་ཕྱོགས་ལ་ཟུར་འདེབས་ལྟར་དཀྱིལ་འཁོར་རབ་གནས་ཀྱི་ཆོ་ག་བྱ་བ་སྟེ། དེ་ཡན་ཆད་ཉེ་བསྙེན་ཡིན་ལ། གཞན་དུ་རབ་གནས་སྔོན་སོང་གི་རས་བྲིས་ཡིན་ན་ཞག་དྲུག་པའི་ཕྲིན་ལས་ཀྱི་མཆོད་པ་བྱིན་རླབས་ཡན་ཆད་ཉེ་བསྙེན་གྱི་ཡན་ལག་གོ། ༈ །གསུམ་པ་སྒྲུབ་པའི་ཡན་ལག་ནི། སྒྲུབ་པ་ཞག་གྲངས་ཇི་ཙམ་བྱེད་པའི་དཀྱིལ་འཁོར་ཞག་གི་ཆོག་ཁྲིགས་ཀྱི་རིམ་པ་སྟེ། དེ་ཡང་འདིར་མདོ་དབང་འབྲིང་པོ་ཞག་བཅུ་གཅིག་པའི་དབང་དུ་བྱས་པ་ལ། དཀྱིལ་འཁོར་རབ་གནས་མི་དགོས་ན། ཞག་དྲུག་པའི་ནུབ་མོའི་ཕྲིན་ལས་ཀྱི་དངོས་གཞི་ཏིང་འཛིན་གསུམ་གྱིས་ཁོག་དབུབ་པ་ནས་སྒྲུབ་པའི་འགོ་འཛིན་པ་ཡིན་ལ། རབ་གནས་དགོས་པའི་ཕྱོགས་ལ་ཞག་བདུན་པའི་ནུབ་མོའི་ཕྲིན་ལས་ནས་འགོ་བརྩམས་པ་ཡིན་པས། གང་ལྟར་ཀྱང་ཞག་དགུ་པའི་ཕྲིན་ལས་ཀྱི་བར་དུའོ། །དེ་ལ་ཞག་བདུན་པའི་ཆོག་ཁྲིགས་ནི། རབ་གནས་ཟིན་པའི་དགོང་མོ། ཆ་གསུམ་བཏང་རྗེས་ཐོ་གསོ་བར་བྱ་སྟེ། དེ་གཉིས་ནུབ་དང་པོ་ཁྱད་པར་རོ། །དེ་ནས་རྒྱུན་དུ་མཆོད་གཏོར་གསོས་ལ། གྲལ་ཕྱག་དང་ཚུལ་ཕྱག་སྔོན་དུ་འགྲོ་བས། ལས་ཀྱི་དབུ་དྲང་བ་ནས། བྱིན་འབེབས་ཡན་ཆད་སོང་བ་དང་། ནུབ་དང་པོ་ལ་རྟགས་གསུམ་འདིར་གདབ། དེ་རྗེས་མཆོད་པ་བྱིན་རླབས་ནས་བཟླས་པའི་བར་སྒྲུབ་ཐབས་ལྟར་གཞུང་བསྲང་། སྤྲོ་ཞིང་ནུས་ན་བཟླས་པའི་དུས་སུ། ཞི་བ་ལ། རིག་པ་གསུང་གི་སོགས་ཛཔ྄་བསྐུལ་དང་རྗེས་ཀྱི་བསྟོད་པ། ཁྲོ་བོ་ལ་སྟོན་པ་ཀུན་ཏུ་བཟང་པོ་གནས་གྱུར་པ་སོགས་སོ་སོའི་གནས་གྱུར་གྱིས་བསྟོད་པ་རྣམས་ཟུར་འདེབས་ལྟར་སྦྱར་བར་བྱ། དེ་ལྟར་བཟླས་པ་ཟིན་པ་དང་། བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ། ཧཱུཾ་ༀ་སྭཱ་ཨཱཾ་ཧཱ། ཧཱུཾ་ཧ་ཧེ་ཕཊ་བྷྱོ། ཞེས་པས་བདག་ཉིད་ཏིང་འཛིན་དམ་ཚིག་གི་དཀྱིལ་འཁོར་དུ་གནས་པ་ཉིད་སླར་ཡང་གསལ་བཏབ་ལ། དེ་ཉིད་གདོད་ནས་རང་བཞིན་གྱིས་རྣམ་པར་དག་པའི་དཀྱིལ་འཁོར་གྱི་འཁོར་ལོ་རྫོགས་པའི་ངེས་ཤེས་བསྐྱེད་ནས། མདུན་བསྐྱེད་ཡེ་ཤེས་ཀྱི་འཁོར་ལོའི་དབུས་ཀྱི་སྙིང་པོའི་དཀྱིལ་འཁོར་རྣམས་བདུད་རྩི་བདེ་བ་ཆེན་པོའི་དཀྱིལ་འཁོར་དུ་གྱུར་པ་ནི། ཕོ་བྲང་འོག་མའི་དབུས་ཀྱི་གྲུ་ཆད་བཞི་གློ་འབུར་གྱིས་མཛེས་པའི་སྟེང་འཁོར་ལོ་རྩིབས་བརྒྱད་པའི་ལྟེ་བར། བདུད་རྩིའི་སྣོད་བྷཉྫ་འབར་བར་བཅུད་ཤ་ལྔ་བདུད་རྩི་ལྔ་ཡེ་ཤེས་ལྔའི་ངོ་བོར་གནས་པའི་ཕྱི་རོལ་རྩིབས་བརྒྱད་ལ་མཐར་བྱེད་བརྒྱད། དེའི་སྟེང་གི་ཕྱོགས་བཞིར་རིགས་ཀྱི་ཧེ་རུ་ཀ་བཞི་གནས་པའི་དབུ་བཛྲ་ཧེ་རུ་ཀའི་ཞབས་བཞིས་བརྫིས་པ། དེའི་སྟེང་ན་ཡུམ་གནམ་ཞལ་མ་དབུ་དགུ་ཕྱག་བཅོ་བརྒྱད་པ་ཞབས་བཞིས་བཛྲ་ཧེ་རུ་ཀའི་གཡས་གཡོན་གྱི་དབུ་བརྫིས་ཤིང་། རྩ་ཞལ་གྱི་དབུ་མའི་སྤྱན་བྷ་གར་ཕྱེད་ནུབ་ཙམ་དུ་ཚུད་པ། དེའི་སྟེང་དུ་ཆེ་མཆོག་ཧེ་རུ་ཀ་དབུ་ཉི་ཤུ་རྩ་གཅིག །རྩེ་མོ་རྟ་ཞལ་གྱི་རྣམ་པར་སྟོན་པ། ཕྱག་ཞེ་གཉིས་ཀྱིས་ཞི་བའི་ལྷ་ཚོགས་བསྣམས་པ། གསང་བའི་རྡོ་རྗེ་དང་ཞབས་བརྒྱད་ཡུམ་གྱི་ཞལ་དགུ་དང་སྦྱོར་བར་བསྒོམས་ལ། ཞལ་བྱང་གིས་གསལ་གདབ་པ་ནི། ཨེ་མའོ་དཔལ་ཆེན་ཆེ་མཆོག་ཧེ་རུ་ཀ །ཉི་ཤུ་རྩ་གཅིག་དབུ་ཡིས་ས་རྣམས་ལྷུན་གྱིས་གྲུབ། །སྒྲིབ་སྦྱོང་ཡེ་ཤེས་དབུ་ནི་ཁྲོ་ཆེན་སྟོབས་པོ་ཆེ། །དང་པོ་རབ་ཏུ་དགའ་བའི་ས་ནི་ནོན་པའོ། །སྐྱོན་མེད་ཡེ་ཤེས་དབུ་ནི་ཁྲོ་ཆེན་ཁམས་གསུམ་རྒྱལ། །གཉིས་པ་དྲི་མ་མེད་པའི་ས་ནི་ནོན་པའོ། །བདུད་འཇོམས་ཡེ་ཤེས་དབུ་ནི་ཁྲོ་ཆེན་བདུད་རྩི་འཁྱིལ། །གསུམ་པ་འོད་འཕྲོ་བ་ཡིས་ནི་ནོན་པའོ། །རྟོག་འཇོམས་ཡེ་ཤེས་དབུ་ནི་ཁྲོ་ཆེན་འདོད་པའི་རྒྱལ། །བཞི་པ་འོད་བྱེད་པ་ཡི་ས་ནི༴ གཟིར་མནན་ཡེ་ཤེས་དབུ་ནི་ཁྲོ་ཆེན་རྟ་མཆོག་དཔལ། །ལྔ་པ་སྦྱང་དཀའ་བ་ཡི་ས་ནི༴ རྣམ་དག་ཡེ་ཤེས་དབུ་ནི་ཁྲོ་ཆེན་མི་གཡོ་མགོན། །དྲུག་པ་མངོན་དུ་གྱུར་པའི་ས་ནི༴ ཐབས་མཁས་ཡེ་ཤེས་དབུ་ནི་ཁྲོ་ཆེན་གཤིན་རྗེ་གཤེད། །བདུན་པ་རིང་དུ་སོང་བའི་ས་ནི༴ སྟོབས་ལྡན་ཡེ་ཤེས་དབུ་ནི་ཁྲོ་ཆེན་དབྱུག་སྔོན་ཅན། །བརྒྱད་པ་མི་གཡོ་བ་ཡི་ས་ནི༴ མཁྱེན་ལྡན་ཡེ་ཤེས་དབུ་ནི་ཁྲོ་ཆེན་རྣམ་པར་རྒྱལ། །དགུ་པ་ལེགས་པའི་བློ་གྲོས་ས་ནི༴ བརྗིད་གནོན་ཡེ་ཤེས་དབུ་ནི་ཁྲོ་ཆེན་ཧཱུཾ་ཀཱ་ར། །བཅུ་པ་ཆོས་ཀྱི་སྤྲིན་གྱི་ས་ནི༴ མངོན་ཤེས་ཡེ་ཤེས་དབུ་ནི་ཡཀྵ་ཧེ་རུ་ཀ །བཅུ་གཅིག་ཀུན་ཏུ་འོད་ཀྱི་ས་ནི༴ ཀུན་མཁྱེན་ཡེ་ཤེས་དབུ་ནི་གུ་ཧྱ་ཧེ་རུ་ཀ །བཅུ་གཉིས་རྡོ་རྗེ་འཛིན་པའི་ས་ནི༴ བྱམས་མགོན་ཡེ་ཤེས་དབུ་ནི་ས་ནུ་ཧེ་རུ་ཀ །བཅུ་གསུམ་རྡོ་རྗེ་འཆང་གི་ས་ནི༴ རྔམས་བརྗིད་ཡེ་ཤེས་དབུ་ནི་རཀྵ་ཧེ་རུ་ཀ །བཅུ་བཞི་སྟུག་པོ་བཀོད་པའི་ས་ནི༴ སྤྲུལ་པ་ཡེ་ཤེས་དབུ་ནི་ཀརྨ་ཧེ་རུ་ཀ །བཅོ་ལྔ་པདྨ་ཅན་གྱི་ས་ནི༴ ཆགས་མེད་ཡེ་ཤེས་དབུ་ནི་པདྨ་ཧེ་རུ་ཀ །བཅུ་དྲུག་འཁོར་ལོ་ཚོགས་ཆེན་ས་ནི༴ ཡིད་བཞིན་ཡེ་ཤེས་དབུ་ནི་རཏྣ་ཧེ་རུ་ཀ །བཅུ་བདུན་དེ་བ་ཀོ་ཤའི་ས་ནི༴ འབར་འཕྲོ་ཡེ་ཤེས་དབུ་ནི་བུདྡྷ་ཧེ་རུ་ཀ །བཅོ་བརྒྱད་ཀུན་བཟང་དབྱེ་བ་མེད་པའི་ས་ནི༴ སྟོབས་ལྡན་ཡེ་ཤེས་དབུ་ནི་བཛྲ་ཧེ་རུ་ཀ །བཅུ་དགུ་རྫོགས་པ་བླ་མའི་ས་ནི༴ ཁྱབ་བརྡལ་ཡེ་ཤེས་དབུ་ནི་ཆེ་མཆོག་ཉིད་ཀྱི་དབུ། །ཉི་ཤུ་སྲིད་གསུམ་ངང་རྫོགས་ས་ནི༴ འུབ་ཆུབ་ཡེ་ཤེས་དབུ་ནི་རྟ་སྐད་ནམ་མཁར་འཚེར། །རྩ་གཅིག་ཡེ་ཤེས་བླ་མའི་ས་ནི་ནོན་པའོ། །གཡས་ཀྱི་ཞལ་གདངས་མཆེ་བ་གཙིགས་པ་ཡིས། །འཁོར་བའི་སྐྱེ་ཤི་རྩད་ནས་གཅོད་པར་མཛད། །གཡོན་གྱི་ཞལ་གདངས་མཆེ་བ་གཙིགས་པ་ཡིས། །འཁོར་བའི་ཉོན་མོངས་སྡུག་བསྔལ་ཟད་པར་བྱེད། །དབུས་ཀྱི་དབུ་རྣམས་ཞལ་གདངས་མཆེ་བ་གཙིགས། །ཆོས་ཉིད་ཀློང་དུ་ཐམས་ཅད་རྡུབ་པར་མཛད། །གཡས་སྤྱན་བཟློག་པས་བདུད་བགེགས་ཐལ་བར་རློག །གཡོན་སྤྱན་བཟློག་པས་ངན་སོང་སྡུག་བསྔལ་བསལ། །དབུས་སྤྱན་བཟློག་པས་ཆོས་དབྱིངས་ས་ལེར་གཟིགས། །མཆེ་བ་དཀར་པོ་ཟངས་ཡག་གཙིགས་པ་ཡིས། །འཁོར་བའི་བག་ཆགས་སྐྱེ་ཤི་རྩད་ནས་གཅོད། །རལ་པ་དམར་པོ་གྱེན་དུ་བརྫེས་པ་ཡིས། །ཆོས་དབྱིངས་ཡེ་ཤེས་མཐར་ཐུག་འགྲན་ཟླ་མེད། །བཞི་བཅུ་རྩ་གཉིས་ཕྱག་ནི་མངོན་སངས་རྒྱས། །བཞི་བཅུ་རྩ་གཉིས་གཡས་ཀྱི་དང་པོ་ནི། །ཀུན་ཏུ་བཟང་པོ་མཉམ་པའི་ཕྱག་རྒྱ་ཅན། །བཞི་བཅུ་རྩ་གཉིས་གཡོན་གྱི་དང་པོ་ན། །ཀུན་ཏུ་བཟང་མོ་ཐལ་མོ་མཉམ་སྦྱོར་ཕྱག །བཞི་བཅུ་རྩ་གཉིས་གཡས་ཀྱི་གཉིས་པ་ན། །རྣམ་པར་སྣང་མཛད་གསེར་གྱི་འཁོར་ལོ་བསྣམས། །བཞི་བཅུ་རྩ་གཉིས་གཡོན་གྱི་གཉིས་པ་ན། །སངས་རྒྱས་སྤྱན་མ་གསེར་གྱི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་གསུམ་པ་ན། །རྡོ་རྗེ་སེམས་དཔའ་རྡོ་རྗེ་རྩེ་ལྔ་བསྣམས། །བཞི་བཅུ་རྩ་གཉིས་གཡོན་གྱི་གསུམ་པ་ན། །རྡོ་རྗེ་དབྱིངས་ཕྱུག་ཤེལ་གྱི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་བཞི་པ་ན། །རིན་ཆེན་འབྱུང་ལྡན་རིན་ཆེན་ཟུར་བརྒྱད་བསྣམས། །བཞི་བཅུ་རྩ་གཉིས་གཡོན་གྱི་བཞི་པ་ན། །མཱ་མ་ཀཱི་ནི་གཡུ་ཡི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་ལྔ་པ་ན། །སྣང་བ་མཐའ་ཡས་པདྨ་འདབ་བརྒྱད་བསྣམས། །བཞི་བཅུ་རྩ་གཉིས་གཡོན་གྱི་ལྔ་པ་ན། །ན་བཟའ་དཀར་མོ་བྱུ་རུའི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་དྲུག་པ་ན། །དོན་ཡོད་གྲུབ་པ་རྡོ་རྗེ་རྒྱ་གྲམ་བསྣམས། །བཞི་བཅུ་རྩ་གཉིས་གཡོན་གྱི་དྲུག་པ་ན། །དམ་ཚིག་སྒྲོལ་མ་མཐིང་གི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་བདུན་པ་ན། །ས་ཡི་སྙིང་པོ་རིན་ཆེན་མྱུ་གུ་བསྣམས། །བཞི་བཅུ་རྩ་གཉིས་གཡོན་གྱི་བདུན་པ་ན། །ལཱ་སྱེ་དཀར་མོ་མེ་ལོང་རྒྱ་གྲམ་བསྣམས། །བཞི་བཅུ་རྩ་གཉིས་གཡས་ཀྱི་བརྒྱད་པ་ན། །ནམ་མཁའི་སྙིང་པོ་གཅོད་བྱེད་རལ་གྲི༴ བཞི་བཅུ་རྩ་གཉིས་གཡོན་གྱི་བརྒྱད་པ་ན། །མཱ་ལྱེ་སྔོན་མོ་རིན་ཆེན་ཕྲེང་བ་བསྣམས། །བཞི་བཅུ་རྩ་གཉིས་གཡས་ཀྱི་དགུ་པ་ན། །སྤྱན་རས་གཟིགས་དབང་པདྨ་དཀར་པོ་བསྣམས། །བཞི་བཅུ་རྩ་གཉིས་གཡོན་གྱི་དགུ་པ་ན། །གཱིརྟི་དམར་མོ་ལྕགས་སྒྲོག་པི་ཝང་བསྣམས། །བཞི་བཅུ་རྩ་གཉིས་གཡས་ཀྱི་བཅུ་པ་ན། །ཕྱག་ན་རྡོ་རྗེ་རྡོ་རྗེ་རྩེ་ལྔ་བསྣམས། །བཞི་བཅུ་རྩ་གཉིས་གཡོན་གྱི་བཅུ་པ་ན། །ནིརྟི་ལྗང་གུ་དར་གྱི་ཅོད་པན་བསྣམས། །བཞི་བཅུ་རྩ་གཉིས་གཡས་ཀྱི་བཅུ་གཅིག་ན། །མགོན་པོ་བྱམས་བ་ཀླུ་ཤིང་གུནྡྷེ་བསྣམས། །བཞི་བཅུ་རྩ་གཉིས་གཡོན་གྱི་བཅུ་གཅིག་ན། །ལྷ་མོ་དྷཱུ་པེ་མ་ནི་བདུག་སྤོས༴ བཞི་བཅུ་རྩ་གཉིས་གཡས་ཀྱི་བཅུ་གཉིས་ན། །སྒྲིབ་པ་རྣམ་སེལ་གསུང་རབ་པུསྟི༴ བཞི་བཅུ་རྩ་གཉིས་གཡོན་གྱི་བཅུ་གཉིས་ན། །ལྷ་མོ་པུཥྤེ་མ་ནི་མེ་ཏོག་བསྣམས། །བཞི་བཅུ་རྩ་གཉིས་གཡས་ཀྱི་བཅུ་གསུམ་ན། །ཀུན་ཏུ་བཟང་པོ་རིན་ཆེན་སྙེ་མ་བསྣམས། །བཞི་བཅུ་རྩ་གཉིས་གཡོན་གྱི་བཅུ་གསུམ་ན། །ལྷ་མོ་ཨཱ་ལོ་ཀེ་ནི་མར་མེ་བསྣམས། །བཞི་བཅུ་རྩ་གཉིས་གཡས་ཀྱི་བཅུ་བཞི་ན། །འཇམ་དཔལ་གཞོན་ནུ་མེ་ཏོག་ཨུཏྤལ་བསྣམས། །བཞི་བཅུ་རྩ་གཉིས་གཡོན་གྱི་བཅུ་བཞི་ན། །ལྷ་མོ་གནྡྷེ་མ་ནི་དྲི་ཆབ་བསྣམས། །བཞི་བཅུ་རྩ་གཉིས་གཡས་ཀྱི་བཅོ་ལྔ་ན། །གཤིན་རྗེ་གཤེད་པོ་ཐོད་དབྱུག་གདེངས་པ་བསྣམས། །བཞི་བཅུ་རྩ་གཉིས་གཡོན་གྱི་བཅོ་ལྔ་ན། །འགུགས་བྱེད་ལྕགས་ཀྱུ་མ་ནི་ལྕགས་ཀྱུ་བསྣམས། །བཞི་བཅུ་རྩ་གཉིས་གཡས་ཀྱི་བཅུ་དྲུག་ན། །ཤེས་རབ་མཐར་བྱེད་རྡོ་རྗེ་རྩེ་ལྔ་བསྣམས། །བཞི་བཅུ་རྩ་གཉིས་གཡོན་གྱི་བཅུ་དྲུག་ན། །འཆིང་བྱེད་ཞགས་པ་མ་ནི་ཞགས་པ་བསྣམས། །བཞི་བཅུ་རྩ་གཉིས་གཡས་ཀྱི་བཅུ་བདུན་ན། །པདྨ་མཐར་བྱེད་ཐོད་དབྱུག་སྦྲུལ་དཀྲིས་བསྣམས། །བཞི་བཅུ་རྩ་གཉིས་གཡོན་གྱི་བཅུ་བདུན་ན། །སྡོམ་བྱེད་ཉི་ཟླ་མ་ནི་ལྕགས་སྒྲོག་བསྣམས། །བཞི་བཅུ་རྩ་གཉིས་གཡས་ཀྱི་བཅོ་བརྒྱད་ན། །བགེགས་རྣམས་མཐར་བྱེད་རྡོ་རྗེ་རྒྱ་གྲམ་བསྣམས། །བཞི་བཅུ་རྩ་གཉིས་གཡོན་གྱི་བཅོ་བརྒྱད་ན། །ཐལ་བྱེད་དྲིལ་བུ་མ་ནི་དྲིལ་བུ་བསྣམས། །བཞི་བཅུ་རྩ་གཉིས་གཡས་ཀྱི་བཅུ་དགུ་ན། །ལྷ་དབང་བརྒྱ་བྱིན་སྒྲ་བརྙན་པི་ཝང་བསྣམས། །བཞི་བཅུ་རྩ་གཉིས་གཡོན་གྱི་བཅུ་དགུ་ན། །པརྞ་ཤ་བ་རི་ནི་པུསྟི༴ བཞི་བཅུ་རྩ་གཉིས་གཡས་ཀྱི་ཉི་ཤུ་ན། །ཤཱཀྱ་ཐུབ་པ་གསེག་ཤང་པར་བུ་བསྣམས། །བཞི་བཅུ་རྩ་གཉིས་གཡོན་གྱི་ཉི་ཤུ་ན། །ཁ་འབར་དེ་ཝ་རིན་ཆེན་སྒྲོམ་བུ༴ བཞི་བཅུ་རྩ་གཉིས་གཡས་ཀྱི་ཐ་མ་ན། །ལྷ་མིན་ཐག་བཟང་རིས་ནི་གོ་ཆ་བསྣམས། །བཞི་བཅུ་རྩ་གཉིས་གཡོན་གྱི་ཐ་མ་ན། །ཨ་ཝ་གླང་མགོ་བསིལ་དྲོད་མེ་ཆུ་བསྣམས། །ཏིང་འཛིན་ཞབས་ཀྱིས་ཁྲོ་མོའི་དབུ་བརྒྱད་བརྫིས། །ཞབས་བརྒྱད་གཡས་ཀྱི་དང་པོ་བགྲད་པ་ཡིས། །ཐིག་ལེ་ཆེན་པོའི་ཏིང་འཛིན་ཆེན་པོ་དང་། །ཡེངས་པ་མེད་པ་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡས་ཀྱི་གཉིས་པ་བགྲད་པ་ཡིས། །བདེ་བ་ཆེན་པོའི་ཏིང་འཛིན་ཆེན་པོ་དང་། །ཀློང་དུ་གྱུར་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡས་ཀྱི་གསུམ་པ་བགྲད་པ་ཡིས། །རྡོ་རྗེ་ལྟ་བུའི་ཏིང་འཛིན་ཆེན་པོ་དང་། །སྐྱེ་ཤི་མེད་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡས་ཀྱི་ཐ་མ་བགྲད་པ་ཡིས། །ཐམས་ཅད་འབྱུང་གནས་ཏིང་འཛིན་ཆེན་པོ་དང་། །ཟད་པ་མེད་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡོན་གྱི་དང་པོ་བགྲད་པ་ཡིས། །ཆགས་པ་མེད་པའི་ཏིང་འཛིན་ཆེན་པོ་དང་། །ཡེ་ནས་དག་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡོན་གྱི་གཉིས་པ་བགྲད་པ་ཡིས། །འདའ་བར་དཀའ་བའི་ཏིང་འཛིན་ཆེན་པོ་དང་། །མཐོང་བ་མེད་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡོན་གྱི་གསུམ་པ་བགྲད་པ་ཡིས། །དམིགས་སུ་མེད་པའི་ཏིང་འཛིན་ཆེན་པོ་དང་། །རང་བཞིན་མེད་པའི་ཆོས་ཀྱི་དབྱིངས་སུ་སྦྱོར། །ཞབས་བརྒྱད་གཡོན་གྱི་ཐ་མ་བགྲད་པ་ཡིས། །སྐྱེ་ཤི་མེད་པ འི་ཏིང་འཛིན་ཆེན་པོ་དང་། །འདུ་འབྲལ་མེད་པའི་ཆོས་ཀྱི་དབྱིངས་སུ་སྦྱོར། །དབུ་སྐྲ་ཁམ་ནག་གྱེན་དུ་འཁྱིལ་བ་ནི། །སྲིད་པ་གསུམ་ལས་རྣམ་པར་རྒྱལ་བའི་རྒྱན། །རྟ་མགོ་ལྗང་ཁུ་རྟ་སྐད་སྒྲོགས་པ་ནི། །སྣང་སྲིད་ཐམས་ཅད་དབང་དུ་སྡུད་པའི་རྟགས། །སྨིན་མཚམས་ཁྲོ་གཉེར་གློག་ལྟར་འགྱུ་བ་ནི། །མ་རིག་རྨོངས་པའི་མུན་པ་སེལ་བའི་རྟགས། །ཚངས་པའི་གཡང་གཞི་ན་བཟར་གསོལ་བ་ནི། །ལོངས་སྤྱོད་རྫོགས་སྐུ་མངོན་དུ་བསྟན་པའི་རྟགས། །སྐུ་མདོག་མཐིང་ནག་འཇིགས་པར་བསྟན་པས་ནི། །ཆོས་ཀྱི་སྐུ་ལ་འགྱུར་བ་མེད་པའི་རྟགས། །སྐུ་སྨད་སྟག་གི་ཤམ་ཐབས་མནབས་པ་ནི། །སྤྲུལ་པ་སྐུ་ཡིས་ཅིར་ཡང་དོན་མཛད་རྟགས། །སྐུ་སྟོད་གླང་ཆེན་ཀོ་རློན་གསོལ་བ་ནི། །ཐེག་པ་རིམ་དགུས་འགྲོ་དོན་མཛད་པའི་རྟགས། །ཞིང་ཆེན་གཡང་གཞི་སྐུ་ལ་གསོལ་བ་ནི། །ཐུགས་རྗེ་ཚད་མེད་བཞི་དང་ལྡན་པའི་རྟགས། །ཐོད་པ་སྐམ་པོས་དབུ་ལ་བརྒྱན་པ་ནི། །དུས་གསུམ་རྒྱལ་བས་བསྙེན་བཀུར་མཛད་པའི་རྟགས། །སྦྲུལ་ནག་སྟོང་གི་གདེངས་ཀས་བརྒྱན་པ་ནི། །ཀླུ་རྒྱལ་རིགས་བཞི་དབང་དུ་སྡུད་པའི་རྟགས། །ཁྲག་ཞག་ཐལ་བའི་ཐིག་ལེས་བརྒྱན་པ་ནི། །མ་མོ་མཁའ་འགྲོ་དབང་དུ་སྡུད་པའི་རྟགས། །བསྐལ་པའི་མེ་དཔུང་ཀློང་ན་བཞུགས་པ་ནི། །ཡེ་ཤེས་ལྔ་ཡི་འོད་ཟེར་འཕྲོ་བའི་རྒྱན། །རྡོ་རྗེའི་གཤོག་པ་ནམ་མཁར་གདེངས་པ་ནི། །སྟོང་གསུམ་འཇིག་རྟེན་ཟིལ་གྱིས་གནོན་པའི་རྟགས། །འབར་བ་ཆེན་པོའི་གར་དགུས་སྒེག་པ་ནི། །ཆེ་བཙན་དཔེར་བྱ་ཀུན་ལས་འདས་པའི་རྟགས། །ཁྲོ་རྒྱལ་ཆེ་མཆོག་འབར་བའི་ཞབས་འོག་ན། །ཤིན་ཏུ་རྔམས་པའི་ཁྲོ་མོ་གནམ་ཞལ་མ། །སྐུ་གདོག་དུད་ཁ་སྣ་ཚོགས་ཅིར་ཡང་སྟོན། །དབུ་དགུ་ཕྱག་ནི་བཅོ་བརྒྱད་ཞབས་བཞི་བགྲད། །རྣམ་ཐར་དབུ་བརྒྱད་གྱེན་དུ་བྱུང་བ་ནི། །གསང་བའི་ཐུགས་རྗེ་ཐབས་དང་ཤེས་རབ་ལྡན། །བྱང་ཆུབ་སེམས་ནི་བདུད་རྩི་ག་འུར་སྐྱིལ། །འཇམ་དཔལ་གཞོན་དུ་བདུད་རྩིའི་ཕོ་བྲང་བསྣམས། །རྟ་མགྲིན་ཡབ་ཡུམ་བདུད་རྩིའི་ཕོ་བྲང་སྐྱིལ། །སྟོང་པ་བཅོ་བརྒྱད་ཕྱག་ནི་མྱ་ངན་འདས། །བཅོ་བརྒྱད་ཕྱག་གི་གཡས་གཡོན་དང་པོ་གཉིས། །བྷཉྫ་རཀྟས་བཀང་བ་རྡོ་རྗེས་དཀྲུག །བཅོ་བརྒྱད་ཕྱག་གི་གཡས་ཀྱི་དང་འོག་ན། །ག་རཱི་བྷན་དམར་ཞིང་གི་དབྱུག་ཏོ་འཕྱར། །བཅོ་བརྒྱད་ཕྱག་གི་གཡོན་གྱི་དང་འོག་ན། །སིཾ་ཧ་མུ་ཁཱི་ཁ་རོ་སེང་གེ་མགོ། །བཅོ་བརྒྱད་ཕྱག་གི་གཡས་ཀྱི་གསུམ་པ་ན། །ཙ་རཱི་སེར་མོ་མདའ་གཞུ་འགེངས་པའི་ཚུལ། །བཅོ་བརྒྱད་གི་གཡོན་གྱི་གསུམ་པ་ན། །བྱཱ་གྷྲི་མུ་ཁཱི་གནས་ལྟ་རྟ་མགོ་ཅན། །བཅོ་བརྒྱད་ཕྱག་གི་གཡས་ཀྱི་བཞི་པ་ན། །པྲ་མོ་དམར་མོ་ཆུ་སྲིན་རྒྱལ་མཚན་འཕྱར། །བཅོ་བརྒྱད་ཕྱག་གི་གཡོན་གྱི་བཞི་པ་ན། །ཤྲི་གཱལ་བྱིས་རོ་ལྕེས་ལྡག་ཝ་མགོ་ཅན། །བཅོ་བརྒྱད་ཕྱག་གི་གཡས་ཀྱི་ལྔ་པ་ན། །བེ་ཏ་བྱིས་ཟ་རྡོ་རྗེ་རྩེ་དགུ་འཕྱར། །བཅོ་བརྒྱད་ཕྱག་གི་གཡོན་གྱི་ལྔ་པ་ན། །ཤཱ་ན་འདྲལ་ལྟ་སྤྱང་ཀིའི་མགོ་བོ་ཅན། །བཅོ་བརྒྱད་ཕྱག་གི་གཡས་ཀྱི་དྲུག་པ་ན། །པུཀྐ་དམར་སེར་ཞིང་ཆུང་རྒྱུ་མ་འདྲེན། །བཅོ་བརྒྱད་ཕྱག་གི་གཡོན་གྱི་དྲུག་པ་ན། །གྲྀདྡྷ་དམར་མོ་རྒྱུ་འདྲེན་རྒོད་གདོང་ཅན། །བཅོ་བརྒྱད་ཕྱག་གི་གཡས་ཀྱི་བདུན་པ་ན། །གྷསྨ་ལྗང་ཁུ་དུང་ཁྲག་རྡོ་རྗེས་དཀྲུག །བཅོ་བརྒྱ་ཕྱག་གི་གཡོན་གྱི་བདུན་པ་ན། །ཀཾ་ཀ་ཞིང་ཕྲག་དུར་བྱའི་མགོ་ཅན་དམར། །བཅོ་བརྒྱད་ཕྱག་གི་གཡས་ཀྱི་བརྒྱད་པ་ན། །སྨ་ཤ་མཐིང་ནག་བྱིས་རོའི་སྙིང་ཟ་མ། །བཅོ་བརྒྱད་ཕྱག་གི་གཡོན་གྱི་བརྒྱད་པ་ན། །ཀཱ་ཀ་ཁ་རོ་བྷན་གྲི་བྱ་རོག་མགོ། །བཅོ་བརྒྱད་ཕྱག་གི་གཡས་ཀྱི་ཐ་མ་ན། །ཙཎྜ་སེར་སྐྱ་མཆོག་ལུས་འདྲལ་བར་བྱེད། །བཅོ་བརྒྱད་ཕྱག་གི་གཡོན་གྱི་ཐ་མ་ན། །ཨུ་ལུ་ཀཱ་མཐིང་འུག་གདོང་ལྕགས་ཀྱུ་བསྣམས། །ཞབས་བཞི་བགྲད་པས་རིགས་བཞིའི་དབུ་ནས་བརྫིས། །ཞབས་བཞི་གཡས་ཀྱི་དང་པོ་བགྲད་པ་ཡིས། །ཀློང་དུ་གྱུར་པ་གསང་བའི་བྷ་ག་དང་། །བདེ་བ་ཆེན་པོའི་བྱང་ཆུབ་སེམས་སུ་སྦྱོར། །ཞབས་བཞི་གཡོན་གྱི་དང་པོ་བགྲད་པ་ཡིས། །ཟད་སྟོང་མེད་པ་གསང་བའི་བྷ་ག་དང་། །ཐམས་ཅད་འབྱུང་བའི་བྱང་ཆུབ་སེམས་སུ་སྦྱོར། །ཞབས་བཞི་གཡས་ཀྱི་གཉིས་པ་བགྲད་པ་ཡིས། །འདུ་འབྲལ་མེད་པ་གསང་བའི་བྷ་ག་དང་། །སྐྱེ་ཤི་མེད་པའི་བྱང་ཆུབ་སེམས་སུ་སྦྱོར། །ཞབས་བཞི་གཡོན་གྱི་གཉིས་པ་བགྲད་པ་ཡིས། །གདོད་ནས་དག་པ་གསང་བའི་བྷ་ག་དང་། །རྡོ་རྗེ་ལྟ་བུའི་བྱང་ཆུབ་སེམས་སུ་སྦྱོར། །ཁྲོ་མོ་གནམ་ཞལ་འབར་བའི་ཞབས་འོག་ན། །སྐུ་གདུང་འབར་བའི་དཔལ་ཆེན་ཡབ་ཡུམ་བཅུ། །སྔོ་ནག་སྨུག་ནག་སེར་ནག་དམར་ནག་དང་། །ལྗང་ནག་ཞལ་གསུམ་ཕྱག་དྲུག་ཞབས་བཞི་བགྲད། །རྡོ་རྗེ་ཁོར་ཡུག་དུང་ཆེན་གང་བ་དང་། །རང་གྲི་ཐོང་གཤོལ་དགྲ་སྟྭ་ལ་སོགས་བསྣམས། །སྦྲུལ་དང་ཐོད་ཕྲེང་གླང་ཆེན་ཀོ་རློན་དང་། །ཞིང་ཆེན་གཡང་གཞི་སྟག་ལྤགས་ཤམ་ཐབས་དང་། །ཐལ་ཆེན་ཞག་དང་རཀྟའི་ཐིག་ལེས་བརྒྱན། །བསྐལ་པའི་མེ་དཔུང་འབར་བའི་ཀློང་ན་བཞུགས། །གནས་ཡུལ་ཁྲོ་མོ་བཅུ་དྲུག་བརྗིད་པའི་ཚུལ། །ཕྱག་རྒྱའི་ཁྲོ་མོ་བཞི་ཡིས་སྒོ་བཞི་བསྲུང་། །སྤོར་མ་བརྒྱད་དང་དབང་མོ་ཉི་ཤུ་བརྒྱད། །རང་རང་སྟན་དང་ལག་ཆ་སྣ་ཚོགས་ཐོགས། །ཅི་བགྱི་ཞེས་གསོལ་ཆས་ཏེ་གནས་པར་གྱུར། །དེ་ལྟར་རྩ་བའི་དཀྱིལ་འཁོར་གསལ་བཀོད་ནས། །ཌཱ་ཀི་མ་སྲིང་ཀིང་དང་ཕོ་ཉར་བཅས། །སྣང་སྲིད་ཐམས་ཅད་འབར་བའི་དཀྱིལ་འཁོར་གསལ། །ཕྱོགས་བཅུ་རྒྱལ་བའི་འཁོར་ལོར་སངས་རྒྱས་ནས། །འཇིགས་བྱེད་ཆེན་པོའི་དཀྱིལ་འཁོར་བཞུགས་སོ་འཚལ། །སྐད་ཅིག་གཅིག་ལ་བདེ་གཤེགས་སྐུར་སྟོན་ལ། །བྱིན་རླབས་མཆོག་དང་ལྡན་པར་མཛད་དུ་གསོལ། །ཞེས་དཀྱིལ་འཁོར་སྒྱུར་ཞིང་གསལ་གདབ་བོ། །འདིར་ཡིག་རྙིང་དུ་སྔོན་འགྲོར། ཁྲོ་བཅུའི་མཚམས་གཅོད། བཤགས་པ། དམ་བཅའ། བདུད་རྩི་རློབ་ཅིང་གསང་གཏོར་རྣམས་དང་། དངོས་གཞིར་ཏིང་འཛིན་གསུམ། རྟེན་དང་བརྟེན་པ་བསྐྱེད་ཅིང་བསྐུར་རློབ་སྔོན་དུ་བཏང་ནས། ཞལ་བྱང་གྱེར་བའི་མཇུག་ཏུ། དྲངས་བསྟིམ་ཕྱག་མཆོད་དང་། རྗེས་ཚོགས་མཆོད་བཅས་འབྱུང་ནའང་། སྨན་རྐྱང་སྒྲུབ་བམ་ཡང་ན། ལུང་གི་ཞི་བ་གཞུང་བསྲངས་རྗེས། ཁྲོ་བོ་འདི་ཉིད་ཀྱིས་ཁོག་དབུབ་པའི་དབང་དུ་མཛད་པར་སྣང་ལ། དེས་ན་ཡི་གེའི་རྒྱུན་མི་ནུབ་པའི་ཕྱིར་ལུགས་དེའི་ཆོག་ཁྲིགས་ཀྱང་ཟུར་འདེབས་སུ་འདྲི་བར་བྱ་ཞིང་། འདིར་ལུང་གི་ཞི་ཁྲོ་བཟླས་པའི་བར་གཞུང་བསྲངས་ནས། སྐབས་འདིར་ཁྲོ་དཀྱིལ་གྱི་སྙིང་པོའི་དཀྱིལ་འཁོར་ཞལ་བསྒྱུར་བ་ཙམ་ཡིན་པས་ཆོ་གའི་སྤྲོས་པ་གཞན་རྣམས་མི་དགོས་སོ། །བཟླས་པ་ནི། རང་གི་ཐུགས་ཀའི་སྔགས་ཕྲེང་ལས་བྱུང་བའི་འོད་ཟེར་དང་། མཐེབ་སྲིན་རྟ་མགྲིན་ཡབ་ཡུམ་དུ་མཉམ་པར་རོལ་པའི་བྱང་ཆུབ་སེམས་ཀྱི་འོད་ཟེར་གཟུངས་ཐག་རྡོ་རྗེ་ལུ་གུ་རྒྱུད་ཀྱི་ཁོང་གསེང་ནས་སོང་བ་བདུད་རྩིའི་ཕོ་བྲང་ལ་ཕོག །དེས་བདུད་རྩི་སྦྱངས་བཞུ་སྦར་བའི་རླངས་པས་དཀྱིལ་འཁོར་གྱི་ལྷ་ཚོགས་ཐམས་ཅད་ཐུགས་རྒྱུད་བསྐུལ། རྗེས་ཆགས་ཀྱིས་རོལ་པའི་བྱང་ཆུབ་སེམས་ཀྱི་འོད་ཟེར་ཕྱོགས་བཅུར་འཕྲོས་པས་འཁོར་འདས་ཀྱི་བདུད་རྩི་ཐམས་ཅད་བསྡུས་ནས། ཡབ་ཡུམ་དགྱེས་པར་རོལ་པའི་བྱང་ཆུབ་ཀྱི་སེམས་རྒྱུན་བབས་པ་དང་ལྷན་ཅིག་བདུད་རྩི་ལ་ཐིམ་པས་ཞུ་ཞིང་འདྲེས་ནས་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བར་བསམ་ཞིང་། ༀ། རྫོགས་པའི་ཡེ་ཤེས་རྨད་པོ་ཆེ། །ཟླ་གམ་དཀྱིལ་འཁོར་རིན་ཆེན་དབང་། །ཤར་གྱི་ཕྱོགས་སུ་ཁ་བལྟས་ནས། །འདས་པའི་བུདྡྷ་སྤྱན་ཡང་འདྲེན། །མཆོད་ཁང་ཡིད་བཞིན་རིན་པོ་ཆེ། །རུ་ལུ་འབྲུ་བརྒྱད་ཡེ་ཤེས་འཕྲེང་། །ཕར་འཕྲོས་པས་ནི་ཐུགས་དམ་བསྐུལ། །སླར་འདུས་པས་ནི་དངོས་གྲུབ་སྩོལ། །འདི་ཡང་བསྙེན་པའི་མཆོག་ཡིན་ཏེ། །ནམ་ཡང་ཉམས་པའི་དུས་མཐའ་མེད། །དུག་གསུམ་དབྱིངས་སུ་སྦྱོང་བར་མཛོད། །ཅེས་བསྐུལ་ནས། གཡོན་པའི་མཐེབ་སྲིན་གྱིས་གཟུངས་ཐག་ལ་འཇུས་ཏེ། གུ་ཧྱ་བཅོ་ལྔ་པ་དང་། རུ་ལུ་འབྲུ་བརྒྱད་པ་གཉིས་གཙོ་བོར་བཟླ། མཇུག་ཏུ་བཛྲ་ཨ་མྲྀ་ཏ་ༀ་ཨཱཿཧཱུཾ་ཧྲཱིཿཥྛཞེས་པའང་ཅུང་ཟད་བཟླས་ལ། སྐབས་བསྡུ་བ་ནི། བསྟོད་བཤགས་ཛཔ྄་ཁང་བསྡུ་བ་གསུམ་དང་། ཚོགས་མཆོད་རྣམས་སྒྲུབ་ཐབས་ལྟར་བྱའོ། །འདི་ནི་ཆོ་ག་རྒྱས་པའི་ཁྲིགས་ཏེ། སྲོད་ཐུན་གྱི་ཆོ་གའོ། །ནམ་གུང་གི་ཐུན་ལ། དབྱེ་གཞིའི་དཀྱིལ་འཁོར་སྐད་ཅིག་གིས་གསལ་བཏབ་ནས་ཛཔ྄་ཁང་ཕྱེ་ལ། ཞི་བ་རིགས་དྲུག་གི་སྔགས་དང་། ཁྲོ་བོ་ཆེ་མཆོག་དང་རྒྱུད་ལུང་གི་ཧེ་རུ་ཀ་བཅུ་གཅིག་གི་སྔགས་ལ་རུ་ལུ་སྦྲེལ་བ་ཅུང་ཟད་རེ་དང་། སྒོ་གསུམ་ལྷ་སྔགས་འོད་གསལ་གྱིས་རྒྱས་བཏབ་ནས་གཙོ་བོར་སྤྱི་སྔགས་གུ་ཧྱ་ཛྙཱ་ན་ལ་དྲིལ་ནས་བཟླས་རྗེས་ཛཔ྄་ཁང་བསྡུས་ལ་ཚོགས་མཆོད་དབུལ། ཐོ་རེངས་ཁམས་གསུམ་དཀྱིལ་འཁོར་གྱི་འཁོར་ལོར་གསལ་བཏབ་ལ། ཞི་སྔགས་བོ་དྷི་ཙིཏྟ། ཁྲོ་བོར་རུ་ལུ། ཐུན་མོང་དུ་གུ་ཧྱ་ཛྙཱ་ན་ལ་དྲིལ་ཞིང་ཚོགས་དབུལ། ནམ་ལངས་པ་དང་ལས་མཁན་གྱིས་ལྷག་གཏོར་བསྔོས་ལ་གཏོར་མ་སྐེ་ཚང་དུ་བསག་གོ། །དེ་ནས་ཉིན་མོའི་ཆོ་ག་ལ། སྔ་དྲོ་ཆོ་ག་འབྲིང་པོ་སྟེ། གྲལ་ཕྱག་ནས་བཟུང་ཛཔ྄་ཁང་དབྱེ་བའི་བར་སྒྲུབ་ཐབས་ལྟར་ལས། བྱིན་འབེབས་ཀྱི་རྗེས་སུ་རྟགས་གསུམ་གདབ། ཛཔ྄་ལ་ཞི་བ་ལ་རིགས་དྲུག་དང་། བོ་དྷི་ཙིཏྟ། ཁྲོ་བོར་ཆེ་མཆོག །དབང་མཆོག །ཧེ་རུ་ཀ་དགུ་རྣམས་དང་རུ་ལུ། ཞི་ཁྲོ་ཐུན་མོང་དུ་གུཧྱ་ཛྙཱ་ན་བཟླ་ཞིང་། སྤྲོ་ན་ཛཔ྄་དབྱངས་དང་བཅས་ཏེ་ཛཔ྄་བསྐོར་ཡང་བྱས་ལ། ཛཔ྄་ཁང་བསྡུས་རྗེས། སླར་ཡང་ཕཊ་ཛཿས་བུམ་པའི་དཀྱིལ་འཁོར་ལོགས་སུ་ཕྱེ་ནས་མདུན་གྱི་ནམ་མཁར་བཞུགས་པ་ལ། གཟུངས་ཐག་གཏད་དེ། སྟ་གོན་ལྟར་ཛཔ྄་དམིགས་གསལ་བཏབ་ནས་གུ་ཧྱ་ཛྙཱ་ན་ཅི་འགྲུབ་བཟླས་ལ་འོད་ཞུ་བྱ་ཞིང་། ཚོགས་དབུལ། འབྲིང་པོའི་ལས་ཁྲིགས་སོ། །ཉིན་གུང་དང་དགོང་མོ། ཁྲོ་བཅུའི་སྔགས་ཀྱིས་མཚམས་བཅད། ཡེ་ནས་མཉམ་ཉིད་ཀྱིས་བཤགས། ཀུན་ཏུ་བཟང་པོས་དམ་བཅའ། བྱིན་དབབ། མཆོད་པ་རྣམས་ཀྱང་སྔགས་ཀྱིས་རློབ། རྟེན་དང་བརྟེན་པའི་དཀྱིལ་འཁོར་ཡང་སོ་སོའི་བསྐྱེད་སྔགས་བརྗོད་པ་ཙམ་གྱིས་གསལ་བཏབ་ལ། ཀུན་བཟང་། ཞབས་བསིལ། བཞི་བསྣོལ། སྨན་གཏོར་རཀྟ་རྣམས་སྔགས་མཆོད་ཙམ་གྱིས་ཕུལ། ཞི་ཁྲོ་སོ་སོ་ལ་བོ་དྷི་ཙིཏྟ་དང་རུ་ལུའི་ཛཔ྄་དང་། སྤྱིར་གུ་ཧྱ་ཛྙཱ་ན་བཟླས་ལ། བརྗོད་མེད་ཤེས་རབ་ཀྱིས་བསྟོད། ཚོགས་བསང་སྦྱངས་འབྲུ་གསུམ་གྱི་བརླབས་ལ། དྲང་མཆོད་བཤགས་སྟོབ་ཐམས་ཅད་སྔགས་ཙམ་གྱིས་བྱ་ཞིང་། འདི་ནི་ཆུང་ངུའི་ལས་ཁྲིགས་ཏེ། ལུང་ཚིག་གིས་གསལ་གདབ་པ་དང་ན་མོ་ཧཱུཾ་གིས་གཟི་བྱིན་བསྐྱེད་པའང་མི་མཛད་དོ། །དེ་དག་ནི་དཀྱིལ་འཁོར་ཞག་གི་ཆོ་ག་སྟེ། སྒྲུབ་པ་ཞག་གྲངས་དུ་བྱེད་ཀྱང་དེ་ལྟར་བྱ་བ་ཡིན་ནོ། །དེ་ལྟར་ཐུན་དྲུག་ཏུ་བྱེད་པ་ནི། བདེ་བ་གསལ་མཛད་ཀྱི་ལས་ཐོར ། །ཞི་ཁྲོ་ལས་རིམ་གཞུང་བསྲངས་བསྐྱེད། །སྤྱན་དྲངས་མཆོད་བསྟོད་སྦྱིན་སྲེག་དབུལ། །བཟླས་དང་བསྙེན་སྒྲུབ་ཚོགས་མཆོད་བྱ། །ཞག་བདུན་དུས་དྲུག་རྫོགས་པ་དང་། །ཞེས་གསུངས་པའི་དགོངས་པ་ཡིན་པས་ཅི་འགྲུབ་བྱ་དགོས་མོད། འོན་ཀྱང་མི་ནུས་ན། གུང་གཉིས་དོར་ནས་ཐུན་བཞིར་བསྡུ་ཞིང་། དེ་ལྟར་གྱི་ཚེ་ཕྱི་དྲོ་ཡང་ཆོག་ཁྲིགས་འབྲིང་པོ་དང་། ཐོ་རེངས་ཆུང་བ་ལ་བརྟེན་ན་ལེགས་སོ། །སྦྱིན་སྲེག་ནི་ཐུན་ཐམས་ཅད་ལ་གསུངས་ཀྱང་འགྲུབ་དཀའ་བས་ཕྱི་ནང་གི་སྦྱིན་སྲེག་ཚོགས་ལ་རོལ་བ་ཙམ་གྱིས་ས་ཁོངས་བཟུང་། རབ་གནས་དགོས་ན་དེའི་ཚེ་རྒྱས་པའི་སྦྱིན་སྲེག་འབྱུང་མོད། མི་དགོས་ན་སྒྲུབ་པའི་དེའི་ཁོངས་སུ་ཉིན་གུང་གི་དུས་གནད་དང་བསྟུན་ལ་ཕྲིན་ལས་ཐུང་བ་དང་སྦྲེལ་ནས་རྒྱས་པའི་སྦྱིན་སྲེག་ལན་གཅིག་ངེས་པར་བྱ། གཏོར་མ་བཏང་བ་ནི། དགོང་ཐུན་གྱི་མཇུག་ཏུ་ལས་མཁན་གྱིས་ཆ་གསུམ་འགོའི་འདས་གཏོར་དང་། ལེགས་ལྡན་ཚོགས་ཀྱི་བདག་པོ་སོགས་སྲུང་མ་རྣམས་ཀྱི་གཏོར་ཆོག །འཇིག་རྟེན་པའི་ཆ་གསུམ་གཏོར་མ་རྣམས་གཏོང་། ཚེ་དབང་བསྐུར་བ་ནི། འགོས་ཀྱི་ལས་ཐོར་ཐུན་ཐམས་ཅད་ལ་བྱ་བར་བཤད་ནའང་འགྲུབ་དཀའ་བས། ཐུན་གང་རུང་གཅིག་དང་སྦྲེལ་ནས། སྔར་ཚེ་བཤམ་པའི་དུས་ཀྱི་དམིགས་པ་དེ་ཉིད་གསལ་བཏབ་ལ། བྷྲཱུཾ་བཛྲ་ཨཱ་ཡུ་ཥེ་ཧཱུཾ་ཨཿ ཞེས་བརྒྱ་རྩ་བརྒྱད་བཟླས་ལ། ཧྲཱིཿ ནུབ་ཕྱོགས་པདྨ་དབང་གི་གཞལ་ཡས་ནས། །བཅོམ་ལྡན་རིགས་ལྔ་ཡབ་ཡུམ་ཚེ་དཔག་མེད། །སེམས་དཔའ་སེམས་མ་སྒོ་མར་བཅས་རྣམས་ཀྱིས། །ཚེ་དང་ཡེ་ཤེས་དགུག་པའི་ལས་མཛོད་ཅིག །ༀ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ་ཛཿཛཿཧཱུཾ་ཨ། ཞེས་ཚེ་བཀུག །དེ་ནས་དབང་བསྐུར་བ་ནི། ཨཱཾ་བཛྲ་ཨཱ་ཡུ་ཥེ་ཨ་བྷི་ཥིཉྩ་ཧཱུཾ། ༀ་བཛྲ་ཨཱ་ཡུ་ཥེ༴ སྭཱ་བཛྲ་ཨཱ་ཡུ་ཥེ༴ ཧཱུཾ་བཛྲ་ཨཱ་ཡུ་ཥེ༴ ཧཱ་བཛྲ་ཨ་ཡུ་ཥེ་ཨ་བྷི་ཥིཉྩ་ཧཱུཾ། ཞེས་ཚེ་འབྲང་གཡས་བསྐོར་དུ་སྤྱི་བོར་བཞག་ཅིང་། ཚེ་ཆང་གཡོན་བསྐོར་དུ་འཐུང་དུ་བཅུག་པས་སྙིང་གའི་ཚེ་རྟེན་ལ་བསྟིམ་པའི་མཐར་ཟུང་འཇུག་འཆི་མེད་གཉུག་མའི་ངང་ལ་དར་གཅིག་མཉམ་པར་བཞག་པས་ཚེ་སྦ་ཞིང་རྒྱས་གདབ་བོ། །ལས་ཐོར། དུས་དྲུག་ལས་ཕྲེང་ཚོགས་མཆོད་སྙེག །དུས་དྲུག་བསྐང་གསོའི་ཆོ་ག་བྱ། །དུས་དྲུག་བར་གཅོད་ཉུལ་ལེ་བཟློག །ཅེས་པས་ཚོགས་མཆོད་ནི། སྔར་ལས་ཁྲིགས་སུ་བཤད་མ་ཐག་པ་ལྟར་ཐུན་ཐམས་ཅད་ལ་ཅི་འགྲུབ་བྱ་ཞིང་། གལ་ཏེ་མི་འགྲུབ་ན་སྲོད་ཐུན་དང་ཞོག་ཐུན་གྱི་མཐར་བྱའོ། །གང་ལྟར་ཀྱང་ལྷག་མ་རྣམས་བསྡུས་པ་ནང་པར་ལྷག་ཆོག་གཅིག་གིས་བསྔོས་ནས་སྒྲུབ་པ་མ་གྲོལ་བར་སྐེ་ཚང་དུ་བསག་པ་ཕྱག་ལེན་ནོ། །བསྐང་གསོ་ནི། རྟོགས་པ། སྨན་གཏོར་རཀྟ་མར་མེ་ལྔའི་སྐོངས་དག་གྱུར་དང་བཅས་པ་དོང་སྤྲུགས་ལྟར་ཐུན་ཐམས་ཅད་ལ་མ་འབྱོར་ཡང་ཉིན་ཞག་གི་ཁོངས་སུ་ལན་རེ་བྱའོ། །ཉུལ་ལེ་བཟློག་པ་ནི། ཧེ་རུ་ཀ་གལྤོ་ལས། བར་ཆད་བྱེད་པའི་བགེགས་ཆེན་ཡང་། །འཇིགས་པ་མེད་པའི་སེམས་ཀྱིས་བཟློག །དངོས་གྲུབ་སྦྱིན་པའི་གཟུངས་ཅན་ཡང་། །རེ་དང་དོགས་དང་དགའ་བ་ཡི། །ངན་པའི་དོན་གྱིས་སེམས་མི་དབྱུང་། །ཞེས་པས་སྤྱིར་རེ་དོགས་ཀྱི་སྙེམས་བཅད་ནས་ཅི་ཡོང་བ་ཤོག །གང་དགའ་བ་གྱིས་སྙམ་དུ་ཐག་བཅད་པར་བྱའོ། །བྱེ་བྲག་དུས་དྲུག་གི་ཉུལ་ལེ་ངོས་བཟུང་ནས་རང་རང་གི་གཉེན་པོས་བཟློག་པའི་ཐབས་ནི། གལྤོའི་བརྟག་པ་བཅོ་ལྔ་པ་དང་། བཀའ་བརྒྱད་ཀྱི་དུས་ཀྱི་བསྙེན་པའི་སྒྲུབ་ཁོག་སོགས་ལས་ཤེས་པར་བྱ་ཞིང་། འདིར་ནི་སྤྱི་ཙམ་དུ་ཉུལ་ལེའི་ལིངྒ་བཅས་ལ་བྲུབ་ཁུང་དུ་བཅུག །ཨེ་རཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དངོས་གྲུབ་ལ་བར་དུ་གཅོད་ཅིང་ལོག་པར་འདྲེན་པའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་པ་ཐམས་ཅད་འདུས་པའི་ངོ་བོ་རིད་ཅིང་ཉམ་ཐག་པའི་ལུས་ཅན་དུ་གྱུར། ཞེས་དམིགས་བྱ་བསྐྱེད་ལ། བདེན་སྟོབས་བརྗོད་པའི་མཐར། དངོས་གྲུབ་ལ་བར་དུ་གཅོད་ཅིང་ནས། བདུད་ཀྱི་རིགས་སུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུཾ་བཾ་ཧོཿས་དགུག་བསྟིམ་བྱས་ལ། བྱུག་བདུག་བྲབ་གསུམ་གྱིས་གཟི་བྱིན་བསྐྱེད་པའི་ཕུར་བུ་སྟོང་པའི་ངང་ལས་ཧཱུཾ་ལས་བྱུང་བའི་སྲས་མཆོག་ཏུ་མངའ་གསོལ་ལ། ཨེ་ཡི་ཚོགས་ཀྱི་སོགས་ཚིགས་བཅད་གཉིས་ཀྱི་མཐར་རུ་ལུའི་ཤམ་བུར་སརྦ་བིགྷྣཱན་དུཥྚཱན་མཱ་ར་ཡ་ཧཱུཾ་ཕཊ། ཅེས་གདབ་ཅིང་། ཐུན་དང་མཚོན་ཆའི་ཆར་དབབ། དེ་ནི་གནས་སྐབས་ཀྱིས་བཟློག་པ་ཞེས་བྱའོ། །ཡང་ཤིན་ཏུ་གལ་ཆེ་ན་བདེ་གཤེགས་སྤྱི་དྲིལ་གྱིས་བསྲུང་ཞིང་བཟློག་པར་བྱ་སྟེ། སྔགས་པ་དྲག་པོའི་ཆས་སུ་ཞུགས་ལ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ། ཅེས་བརྗོད་པས། བདག་ཉིད་དཔལ་ཆེན་པོ་ཆེ་མཆོག་ཧེ་རུ་ཀ་འཇིགས་ཤིང་རྔམས་པའི་སྐུར་བསྐྱེད་པའི་སྤྱི་བོར་གཤིན་རྗེ་གཤེད་དཀར་པོ་འཁོར་ལོ་དང་སྡིགས་མཛུབ། མགྲིན་པར་རྟ་མགྲིན་དམར་པོ་སྦྲུལ་ཞགས་དང་སྡིགས་མཛུབ། སྙིང་གར་བཛྲ་ཧེ་རུ་ཀ་མཐིང་ག་རྡོར་དྲིལ། ལྟེ་བར་རྡོ་རྗེ་གཞོན་ནུ་ལྗང་ཁུ་ཕུར་བུ་དང་སྡིགས་མཛུབ། དེ་ཐམས་ཅད་ཀྱི་སྐུ་ལས་རྡོ་རྗེ་མཚོན་ཆའི་ཆར་དང་བསྐལ་པའི་མེའི་ཚྭ་ཚྭ་རྣོན་པོ་འབར་ཞིང་འཁྲུག་པས་བགེགས་ཐམས་ཅད་བསྲེགས་བཅོམ་བསྐྲད་པར་བསམ་ཞིང་། རྡོ་རྗེ་སྲིན་པོའི་ངུར་སྒྲས། ༀ་པདྨ་ཀྲོ་དྷཱི་ཤྭ་རཱི་བཛྲ་ཀཱི་ལ་ཡ་མ་ཧཱ་ཡཀྴ་ཀརྨ་རཾ་རཾ་བཛྲ་ཛྭ་ལ་རཾ་རཾ་ཧཱུཾ་ཕཊ། ཅེས་དྲག་ཏུ་བཟླ་ཞིང་སྤོས་རོལ་དང་ཐུན་བྲབ་ཀྱིས་ཚམ་རྔམས་བྱའོ། །དེ་ལྟར་ཉུལ་ལེ་འདུལ་བ་ཐུན་ཐམས་ཅད་ཀྱི་མཐའ་འམ་མི་ནུས་ན་ཐུན་ཐ་མ་ཁོ་ནའི་རྗེས་སུ་ལན་རེ་ངེས་པར་བྱ་ཞིང་། གང་ལྟར་ཀྱང་དུས་དེར་དངོས་གྲུབ་སྟེར་བའི་ཕོ་ཉ་རེའང་འོང་བས་ཉུལ་ལེ་བསྐྲད་པའི་རྗེས་དེ་མ་ཐག་ཏུ་བྱིན་འབེབས་ཀྱང་བྱའོ། །ཁྱད་པར་བཟླས་བརྗོད་ཐུན་དྲུག་གམ་བཞིའི་དུས་སུ་བྱེད་པར་མ་ཟད་བསྙེན་གྲོགས་ཡོད་ན་གསུང་མི་ཆག་པར་ཁོར་ཡུག་ཏུ་བཟླར་འཇུག་ཅིང་། ལྕོགས་ན་སྤྱི་སྔགས་ཀྱི་སྔགས་རྒྱུན་དང་། གཞན་ཞིག་གིས་བདུད་རྩི་བདེ་བ་ཆེན་པོའི་དཀྱིལ་འཁོར་དུ་སྒྱུར་ནས་གཟུངས་ཐག་ལ་འཇུས་ཏེ་སྨན་ཛཔ྄་ཀྱང་གསུང་མི་ཆག་ཏུ་འགྲུབ་ན་ལེགས་སོ། །གལ་ཏེ་མཚན་བཅས་སྤྲོས་པའི་ཆོ་གས་ངལ་ཞིང་དུབ་པའི་དུས་སུ་མཚན་མ་མེད་པའི་རྫོགས་རིམ་གྱི་དོན་ཉམས་སུ་བླང་ཞིང་། མདོར་ན་གནས་སྐབས་ཀུན་ཏུ་ལྷ་སྔགས་འོད་གསལ་གྱི་འཁོར་ལོས་བྱེད་སྤྱོད་ཐམས་ཅད་ལ་རྒྱས་གདབ་པར་བྱའོ། །དེ་ཡན་ཆད་ནི་སྒྲུབ་པའི་ཡན་ལག་གོ། ༈ །བཞི་པ་སྒྲུབ་པ་ཆེན་པོའི་ཡན་ལག་ནི། སྨིན་སློབ་ལ་གྲུབ་པའི་རྟགས་མཚན་ཡིད་ཆེས་པར་བྱུང་བ་དང་། ནུབ་ཐ་མ་དངོས་གྲུབ་བླང་བར་བྱ་བ་ཡིན་མོད། འདིར་མོས་སློབ་ཞག་བཅུ་གཅིག་པའི་དབང་དུ་བྱས་ན། གླན་བསོད་མགོན་དང་། སྨྱལ་པ་ཞག་བཅུ་འགྲོ་བའི་དགོང་མོ་ནས་འགོ་འཛིན་པར་མཛད་ནའང་ལག་ལེན་ལ་མི་བདེ་བས། འདིར་གླན་རྡོ་རྗེ་འོད་ཀྱི་ཕྱག་བཞེས་འགོས་ཀྱི་ལས་ཐོ་ལྟར་ཞག་དགུ་འགྲོ་བའི་དགོང་ཐུན་ལ་ཕྲིན་ལས་ཐུང་བ་དང་སྦྲེལ་ནས་དབང་གི་སྦྱིན་སྲེག་བྱ། དེ་ནས་རྩ་རྒྱུད་ལས། རྨད་བྱུང་སྒྲུབ་པའི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །ཞེས་པའི་དོན་རིན་ཆེན་ཕྲེང་བར། སློབ་མ་དཀྱིལ་འཁོར་དུ་བཅུག་ནས་དངོས་གྲུབ་བླང་། དེ་ནས་དབང་བསྐུར་མཛད་པ་ནི་ཅུང་ཟད་རྩིངས་པ་སྟེ། འདིར་འཇུག་དང་དངོས་གྲུབ་གསོལ་བ་དང་། །ཞེས་པའི་འཇུག་པ་ནི་སློབ་དཔོན་བདག་ཉིད་དཀྱིལ་འཁོར་དུ་ཞུགས་ནས་དངོས་གྲུབ་བླངས་ལ། གཟོད་སློབ་མ་དཀྱིལ་འཁོར་དུ་བཅུག་སྟེ་དབང་བསྐུར་བ་ལ་དགོངས་པ་ཡིན་གྱི། སློབ་མ་དཀྱིལ་འཁོར་དུ་བཅུག་ནས་དངོས་གྲུབ་ལེན་པའི་དོན་མ་ཡིན་ནོ། །དེ་ལྟར་ཡང་བདེ་བ་གསལ་མཛད་ཀྱི་ལས་ཐོར། ཞག་བདུན་ཐ་མར་སློབ་དཔོན་འཇུག །དངོས་གྲུབ་རྣམ་བཞི་རིམ་གྱིས་བླངས། །ཞེས་གསུངས་པའི་ཕྱིར། དེས་ན་རྒྱུད་དང་མན་ངག་གི་དགོངས་པའི་གནད་ནི། བསྒྲུབ་པའི་རྟགས་མཚན་ཅི་རིགས་པ་མཐོང་ནས་སློབ་དཔོན་དཀྱིལ་འཁོར་དུ་ཞུགས་ལ། བདག་ཉིད་ཚོམ་བུའི་འཁོར་དང་བཅས་ཏེ་རང་དོན་དུ་དངོས་གྲུབ་བླངས་རྗེས། གཞན་དོན་སློབ་མར་དབང་བསྐུར་བའི་ཕྲིན་ལས་ལ་སྦྱར་བར་བྱ་བ་ཡིན་པའི་ཕྱིར། ཚོམ་བུར་འབྲེལ་བའི་སྟོན་འཁོར་མཚན་ཉིད་དང་ལྡན་པས་སྨིན་སློབ་ཀྱི་སྒྲུབ་ཆེན་ལ་འཇུག་ན་ལྟ་ཅི་སྨོས། གཞན་དུ་སྟོན་འཁོར་ཆ་འདྲ་འདུས་པས་མོས་སློབ་སྒྲུབ་པའི་ཞག་གྲངས་ཁྲིགས་བཅད་མ་བདུན་ཡན་ཆད་ཙམ་བྱེད་ཀྱང་རུང་སྟེ། དེ་དང་དེའི་ཚེ་གཞུང་བཞིན་བྱ་བ་ལེགས་མོད། འོན་ཀྱང་ད་ལྟའི་དུས་སུ་སྒྲུབ་པའི་ཕྱག་བཞེས་སྟོན་པའི་ཆེད་དུ་དབང་ཞུ་མི་རྣམས་ཀྱང་སྒྲུབ་ཆེན་གྱི་ཁོངས་སུ་འདུ་བའི་ཕྱག་ལེན་ལྟར་ན། སྔར་འདི་ཉིད་ཀྱི་དཀྱིལ་འཁོར་དུ་དབང་མ་ཐོབ་པར་མ་ཟད། རིགས་མཐུན་བླ་མེད་རྒྱུད་ལུང་གཞན་གྱི་དབང་ཡང་མ་ཐོབ་པའི་སློབ་བུ་གསར་པ་འབྱུང་སྲིད་པས། དེ་དག་ཀྱང་གྲུབ་པའི་འབྲས་བུ་དངོས་གྲུབ་ལེན་པའི་སྤྱོད་པ་རྨད་དུ་བྱུང་བ་ལ་འཇུག་རུང་གི་སྐལ་པ་ཅན་དུ་སྒྲུབ་པའི་ཕྱིར། མོས་སློབ་ཀྱིའང་འདྲ་འབག་ལྟ་བུའི་སྐབས་འདིར་དབང་སྐུར་བྱས་ཟིན་པའི་རྗེས་སུ་དངོས་གྲུབ་ལེན་པའི་ལུགས་ལག་ལེན་ལ་བདེ་བས། དེའི་ལས་ཁྲིགས་ནི། དབང་གི་སྦྱིན་སྲེག་གྲུབ་རྗེས་དགོང་ཐུན་གྱི་འཕྲོས་ཀྱི་གཏོར་ཆོག་དང་། སྲོད་ཐུན་དང་གུང་ཐུན་སྔར་ལྟར་བྱ། ཐོར་ཐུན་ལ་ལས་གཞུང་འབྲིང་པོ་བསྲངས་ནས་བུམ་བཟླས་འོད་ཞུའི་བར་གྲུབ་རྗེས། ཚོགས་བྱིན་རླབས་ནས་ཐ་མ་སྟོབ་པའི་བར་དཀྱུས་ལྟར་དང་། ཚོགས་ལ་རོལ་བ་དབང་གི་མཐར་མཛད་པ་ཕྱག་ལེན་ཡིན་པས་བཞག་ལ། ནངས་པར་ཞག་བཅུ་པའི་ཉི་མ་ཤར་ཁར་དབང་ཆོག་ལྟར་སློབ་དཔོན་བདག་ཉིད་དཀྱིལ་འཁོར་དུ་འཇུག་པའི་ཆོ་ག་རྒྱས་བསྡུས་ཇི་ལྟར་རི་གས་པ་དང་། སློབ་མ་འཇུག་པར་གནང་བ་ཞུ་ཞིང་། དགོངས་པ་བསྐུལ་བའི་གླུ་བླང་བ་རྣམས་སྔོན་དུ་འགྲོ་བས། སློབ་མ་དཀྱིལ་དུ་བཅུག་ནས་ཕྱི་ནང་སྒྲུབ་གསང་བཞིས་བསྡུས་པའི་དབང་སུམ་ཅུ་རྩ་དྲུག་བསྐུར་བའི་མཐར་ཚོགས་ལ་རོལ་ཞིང་། ལྷག་ཆོག་དང་གཏོར་ཆོག་རྣམས་བྱ་སྟེ། དེ་ཡན་ཉིན་མོ་ཚར་ན། ནུབ་མོ་ཡན་ལག་གི་དཀྱིལ་འཁོར་དུ་གསང་དབང་ཤེར་དབང་སྟེ་ཀུན་རྫོབ་བྱང་སེམས་ཀྱ ི་ཟབ་དབང་གཉིས་བསྐུར་བ་དུས་གནད་དང་འབྲེལ་ལ། གལ་ཏེ་རྩ་དབང་ཉིན་མོ་མ་ཟིན་པའམ་རང་དགོས་ཀྱི་གཤོམས་བཀོད་སོགས་མ་གྲུབ་ན། དེ་ནུབ་མཚན་མོའི་ཐུན་གྱི་ཆོ་གའི་བབས་སྔར་ལྟར་ལས། སྲོད་ཐུན་ལ་ཆོག་ཁྲིགས་རྒྱས་པ་མ་གྲུབ་ན་བསྡུས་པས་གཞུང་བསྲངས་ནས་བདུད་རྩིའི་དཀྱིལ་འཁོར་དུ་བསྒྱུར་བ་སོགས་བྱ་བ་ཡིན་ནོ། །དེ་ནས་ཞག་བཅུ་གཅིག་པའི་སྔ་དྲོ་རྩ་བའི་དཀྱིལ་འཁོར་གྱི་མདུན་ལྟ་བུ་ཅི་བདེར་ཡན་ལག་གི་དཀྱིལ་འཁོར་རྣམས་སྒྲུབ་ཐབས་ལྟར་བཤམས་སྒྲུབ་ཚར་བ་དང་། དབང་ཆོག་ལྟར་བྱང་སེམས་རྣམ་གཉིས་ཀྱི་གསང་དབང་རྫོགས་པའི་ཆུ་བོ་གཉིས་སམ། ནུབ་མོ་ཀུན་རྫོབ་བྱང་སེམས་ཀྱི་དབང་སོང་ན་འདིར་དོན་དམ་བྱང་སེམས་ཀྱི་དབང་དང་། སྐབས་སུ་བབ་ན་གཏད་རྒྱའང་བྱས་རྗེས། མཐའ་རྟེན་གྱི་ཚེའི་དབང་བསྐུར་ཞིང་། སོ་སོའི་རྗེས་ཆོག་རྣམས་ཀྱང་སྒྲུབ་ཐབས་བཞིན་བྱའོ། །དེ་ནས་དངོས་གྲུབ་བླང་བ་ནི། ཕྱི་དྲོ་དཀྱིལ་འཁོར་གྱི་མདུན་ངོས་སུ་སྟེགས་ཇི་ལྟར་རིགས་པ་ལ་འབྲས་སཱ་ལུའི་ཕྱེས་རྡོ་རྗེ་རྒྱ་གྲམ་བྲིས་པའི་སྟེང་དུ་དངོས་གྲུབ་ཀྱི་རྫས་རྣམས་འདུ་བྱ་སྟེ། དེའང་སྔར་དཀྱིལ་འཁོར་གྱི་མཐར་བཀོད་པའི་དངོས་གྲུབ་ཀྱི་རྫས་རྣམས་ཕབ་ལ། སྟེགས་ཀྱི་དབུས་མཉྫི་ཉིས་གཤིབས་ཀྱི་གཡས་པར་གསལ་ཤིང་རིམ་པ་བཅུ་བཞི་བཙུགས་པའི་འབྲང་རྒྱས་ཟླ་གམ་དང་། གཡོན་པར་གསོལ་བྱང་གི་སྨན་ཐོད་བཀོད། དེ་དག་གི་ཕྱིའི་ཤར་དུ་དཔལ་བཤོས་ཉི་ཟླ་ཁ་སྦྱོར། ལྷོར་ཚེ་རིལ། ནུབ་ཏུ་དབང་བཤོས་ཟླ་གམ། བྱང་དུ་ཛ་གད་ཀྱི་སྣོད་རྣམས་དང་། གཞན་ཡང་རྡོ་རྗེ་ཚེ་སྟེ་ཟན། ཛཀྟི་འམ་མཱཾ་ས་སྟེ་ཤ །ཛ་གད་དམ་དཔའ་བྱེད་དེ་ཆང་། །འཇམ་དེས་སམ་ཟླ་བ་དཀར་བ་དེ་མར། ཟླ་རྒྱས་ཏེ་ཞོ་དང་ཁུར་བ། ཟླ་ཁྲོམ་སྟེ་ཐུད་དང་ཁྲུམ། གལ་ཕྱིས་ཏེ་སྤོད་སྣ་ཚོགས་ཀྱི་གཡོས། བྲན་མོ་སྟེ་ཚོད་མ། གཡོན་ཅན་ཏེ་སྒོག་པ། ཀུན་ཏུ་རྒྱུ་སྟེ་ཚྭ། ཚེ་ཁྲིད་དེ་སྐྱུར་ལོ། །ཤམ་མོ་སྟེ་སིང་པོ་སོགས་བཟའ་བཅའ་བཏུང་བའི་བྱེ་བྲག་ཚོགས་ཚད་གསར་དུའང་འདུ་བྱས་པས་མཐའ་བསྐོར་དུ་གཅེར། དེ་རྣམས་ཀྱི་སྟེང་ནས་ཤིང་སྒྲོམས་ལ་བརྟེན་པའི་དར་རམ་རས་དཀར་རྡོ་རྗེ་རྒྱ་གྲམ་བྲིས་པས་བཀབ། དཀྱིལ་འཁོར་གྱི་ལྡིང་ཁྲི་བར་པ་ལ་མར་མེ་དགུ་བཀོད་ཡོད་ན ། ཆེ་མཆོག་གཉིས་དང་རྒྱུད་ལུང་ཁྲོ་བོའི་མར་མེ་གསུམ་དེས་གོ་ཆོད། ལྔ་ཡོད་ན་གཙོ་བོ་དང་རྒྱུད་ཀྱི་ཁྲོ་བོ། གཅིག་ལས་མེད་ན་ཆེ་མཆོག །དབང་མཆོག་བཛྲ་ཧེ་རུ་ཀ་སྟེ། གང་ལྟར་ཡང་དེ་རྣམས་སྤར། ཕྱི་མའི་དབང་དུ་བྱས་ན། ལྷག་མ་རྒྱུད་དང་། ལུང་གི་ཁྲག་འཐུང་དང་། ག་རཱཾ་མ་དང་། ཕྲ་མེན་ཕན་ཆད་ཁྱམས་དགུ་དང་། །ཁོར་ཡུག་རིག་འཛིན་རྣམས་ཀྱི་གནས་སུ་མར་མེ་རེ་རེ་སྟེ་ཁྱོན་བཅུ་བཞི་བཀོད། ཡང་རས་བྲིས་ཆུང་ངུ་ལྟ་བུ་ལ་བརྟེན་ཏེ་ལྷ་གནས་སོ་སོར་བཀོད་མི་ཐུབ་ན་བཅུ་བཞི་པོ་ཐམས་ཅད་ལྡིང་ཁྲི་བར་པའམ་དཀྱིལ་འཁོར་གྱི་ཕྱི་རོལ་དུ་བཀོད་པ་ལས་འོས་མེད་དོ། །དེ་ནས་སྒྲུབ་པ་པོ་རྣམས་རྒྱན་གོས་བཟང་པོ་བསྟར་ལ། ལས་ཀྱི་དབུ་དྲང་བ་ནས་བཟུང་བུམ་ཛཔ྄་དོར་བ་མ་གཏོགས་གཞན་ལས་ཁྲིགས་འབྲིང་པོ་ལྟར་ཞི་ཁྲོའི་གཞུང་ཚོགས་ཐ་མའི་བར་བསྲངས་ལ། དེ་ནས་དངོས་གྲུབ་ལེན་པ་ལ་འཇུག་སྟེ། ཐོག་མར་སྔོན་འགྲོ་ནི། འབྱུང་པོ་ལྟ་ཉན་ཚར་གཅོད་པའི་ཕྱིར་ཁྲོ་བཅུའི་སྔགས་ཀྱིས་མཚམས་བཅད། ལྷ་དང་འཁོན་གཅུགས་སྦྱོང་བའི་ཕྱིར་ཡེ་ནས་མཉམ་ཉིད་ཀྱིས་བཤགས། འགྲོ་དོན་མཐར་དབྱུང་བའི་ཕྱིར། ༀ། ཀུན་ཏུ་བཟང་པོ་བླ་ན་མེད་པ་ཡི། །སོགས་ཀྱིས་དམ་བཅའ། རང་ཉིད་གཟི་བྱིན་བསྐྱེད་ཕྱིར་བབ་དྲུག་འདས་བཞིས་བྱིན་དབབ། དངོས་གྲུབ་ཀྱི་རྫས་དཔལ་བཤོས། དབང་བཤོས། ཟླ་གམ་བཟའ་བཏུང་གི་ལོངས་སྤྱོད་དང་བཅས་པ། གསོལ་བྱང་ཐབས་ཤེས་ཀྱི་ཚེ་རྫས་རྣམས་དཀྱིལ་འཁོར་ལ་འགོད་དུས་ཀྱི་སོ་སོའི་དགོངས་པ་གསལ་བཏབ་ནས། དང་པོ་གསུམ་ལ་གུ་ཧྱ་ཛྙཱ་ནའི་ཤམ་བུར། སརྦ་སིདྡྷི་ཛཿཧཱུཾ་ཨ། ཞེས་བཏགས་པ་དང་། གསོལ་བྱང་ལ་འབྲུ་གསུམ། ཚེ་རྫས་ལ་ༀ་བྷྲཱུཾ་བཛྲ་ཨཱཿཡུ་ཥེ་ཧཱུཾ་ཨཱཿ ཞེས་པ་རྣམས་བདུན་བདུན་བཟླས་པས་རྫས་རྣམས་ནུས་ལྡན་དུ་གྱུར་པར་བསམ་མོ། །དངོས་གཞི་ལ། ལས་ཐོར། དངོས་གྲུབ་རྣམ་བཞི་རིམ་གྱིས་བླང་། །ཛཔ྄་བསྐོར་དང་པོས་ཐུགས་དམ་བསྐུལ། །བར་དུ་སྦྱིན་སྲེག་མཆོད་པ་བྱ། །ཐ་མ་གནད་ལ་དབབ་པ་དང་། །གཤེགས་ཤིང་གསོལ་བྱང་བསྟིམ་པར་བྱ། །ཞེས་པ་ལྟར་བཞི་ལས། དང་པོ་ཛཔ྄་ཀྱིས་ཐུགས་དམ་བསྐུལ་བ་ནི། དཀྱིལ་མཆོག་ལྟར་ཛཔ྄་ཁང་དབྱེ་བའི་ཆོ་གས་མདུན་བསྐྱེད་ཡེ་ཤེས་པའི་ངོ་བོར་ཕྱེ་ལ། འོད་ཟེར་ཕར་མི་སྤྲོ་བར། ལྷ་ཚོགས་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པར་རང་རང་དང་དངོས་གྲུབ་ཀྱི་རྫས་རྣམས་ལ་ཐིམ་པར་བསམ་ཞིང་། བོ་དྷི་ཙིཏྟ། རུ་ལུ། གུ་ཧྱ་ཛྙཱ་ན་རྣམས་བཟླའོ། །གཉིས་པ་སྦྱིན་སྲེག་ནི། བསྒྲུབ་བྱའི་དངོས་གྲུབ་འཕེལ་ཞིང་རྒྱས་པའམ་དབང་དུ་བྱ་བའི་ཕྱིར་རྒྱས་པ་དང་དབང་གི་སྦྱིན་སྲེག་གང་རིགས་བྱེད་པར་བཤད་པ་ལྟར་ལག་ལེན་བདེ་ཕྱིར་གོང་དུ་མཛད། གསུམ་པ་གནད་ལ་དབབ་སྟེ་བསྐུལ་བ་ལ། ལས་ཐོར། དངོས་གྲུབ་བསྐུལ་བའི་རིམ་པ་རྣམས། །སྤྱིར་བསྐུལ་བ་དང་གནད་ནས་བསྐུལ། །ཉེ་བར་བསྐུལ་བའི་རིམ་པ་ཡིན། །ཞེས་པ་ལྟར་གསུམ་ལས། དང་པོ་ལྷ་ཚོགས་ཐམས་ཅད་རིགས་ལྔར་བསྡུས་ནས་སྤྱིར་བསྐུལ་བ་ནི། སྤོས་བཏུལ་ཞིང་རོལ་མོའི་སྒྲ་དང་བཅས་པས། ཧཱུཾ། ང་ནི་དཔལ་ལྡན་རྡོ་རྗེ་འཆང་། །ཐུགས་ཀྱི་འཁོར་ལོ་རབ་བསྐོར་ཞིང་། །བཛྲ་ཁྲག་འཐུང་འཁོར་དང་བཅས། །ཉིད་ཀྱི་བཀའ་བཞིན་སྤྱན་འདྲེན་ན། །དམ་ཚིག་ཚུལ་བཞིན་གཤེགས་སུ་གསོལ། །དམ་ཚིག་ཚུལ་བཞིན་མི་གཤེགས་ན། །གྲུབ་མཆོག་དངོས་གྲུབ་མི་སྩོལ་ན། །སྐུ་གསུང་ཐུགས་དང་འགལ་བར་མཆི། །དམ་ཚིག་མཆོག་ལ་དགོངས་ནས་ཀྱང་། །ཐུགས་ཀྱི་དངོས་གྲུབ་སྩལ་དུ་གསོལ། །ཧཱུཾ། ང་ནི་དཔལ་ལྡན་འཁོར་ལོ་འཆང་། །སྐུ་ཡི་འཁོར་ལོ་རབ་བསྐོར་ཞིང་། །བུདྡྷ་ཁྲག་འཐུང་འཁོར་དང་བཅས། །ཉིད་ཀྱི་བཀའ་བཞིན་སྤྱན་འདྲེན་ན། །དམ་ཚིག་ཚུལ་བཞིན་གཤེགས་སུ་གསོལ། །དམ་ཚིག་ཚུལ་བཞིན་མི་གཤེགས་ན། །གྲུབ་མཆོག་དངོས་གྲུབ་མི་སྩོལ་ན། །སྐུ་གསུང་ཐུགས་དང་འགལ་བར་མཆི། །དམ་ཚིག་མཆོག་ལ་དགོངས་ནས་ཀྱང་། །སྐུ་ཡི་དངོས་གྲུབ་སྩལ་དུ་གསོལ། །ཧཱུཾ། ང་ནི་དཔལ་ལྡན་རིན་ཆེན་འཆང་། །ཡོན་ཏན་འཁོར་ལོ་རབ་བསྐོར་ཞིང་། །རཏྣ་ཁྲག་འཐུང་འཁོར་དང་བཅས། །ཉིད་ཀྱི་བཀའ་བཞིན་སྤྱན་འདྲེན་ན། །དམ་ཚིག་ཚུལ་བཞིན་གཤེགས་སུ་གསོལ། །དམ་ཚིག་ཚུལ་བཞིན་མི་གཤེགས་ན། །གྲུབ་མཆོག་དངོས་གྲུབ་མི་སྩོལ་ན། །སྐུ་གསུང་ཐུགས་དང་འགལ་བར་མཆི། །དམ་ཚིག་མཆོག་ལ་དགོངས་ནས་ཀྱང་། །ཡོན་ཏན་དངོས་གྲུབ་སྩལ་དུ་གསོལ། །ཧཱུཾ། ང་ནི་དཔལ་ལྡན་པདྨ་འཆང་། །པདྨའི་འཁོར་ལོ་རབ་བསྐོར་ཞིང་། །པདྨ་ཁྲག་འཐུང་འཁོར་དང་བཅས། །ཉིད་ཀྱི་བཀའ་བཞིན་སྤྱན་འདྲེན་ན། །དམ་ཚིག་ཚུལ་བཞིན་གཤེགས་སུ་གསོལ། །དམ་ཚིག་ཚུལ་བཞིན་མི་གཤེགས་ན། །གྲུབ་མཆོག་དངོས་གྲུབ་མི་སྩོལ་ན། །སྐུ་གསུང་ཐུགས་དང་འགལ་བར་མཆི། །དམ་ཚིག་མཆོག་ལ་དགོངས་ནས་ཀྱང་། །གསུང་གི་དངོས་གྲུབ་སྩལ་དུ་གསོལ། །ཧཱུཾ། ང་ནི་དཔལ་ལྡན་ཀརྨ་འཆང་། །ལས་ཀྱིི་འཁོར་ལོ་རབ་བསྐོར་ཞིང་། །ཀརྨ་ཁྲག་འཐུང་འཁོར་དང་བཅས། །ཉིད་ཀྱི་བཀའ་བཞིན་སྤྱན་འདྲེན་ན། །དམ་ཚིག་ཚུལ་བཞིན་གཤེགས་སུ་གསོལ། །དམ་ཚིག་ཚུལ་བཞིན་མི་གཤེགས་ན། །གྲུབ་མཆོག་དངོས་གྲུབ་མི་སྩོལ་ན། །སྐུ་གསུང་ཐུགས་དང་འགལ་བར་མཆི། །དམ་ཚིག་མཆོག་ལ་དགོངས་ནས་ཀྱང་། །ལས་ཀྱི་དངོས་གྲུབ་སྩལ་དུ་གསོལ། །ཞེས་བརྗོད། གཉིས་པ་དངོས་གྲུབ་ཀྱི་སྣོད་རུང་དུ་ཆགས་སྒྲིབས་མེད་པར་སལ་ལེར་གཟིགས་པའི་ཕྱིར་ད་ནི་དངོས་གྲུབ་སྩོལ་བའི་དུས་ལ་བབ་བོ་ཞེས་གནད་ནས་བསྐུལ་བ་ནི། ཧཱུཾ། ནམ་མཁའི་མཐའ་ཀླས་ཆོས་ཀྱི་དབྱིངས་ཀྱིས་ཁྱབ། །མ་ཆགས་སྤྱན་མངའ་མ་བསྒྲིབ་ཡེ་ཤེས་གསལ། །ཀུན་ནས་ཀུན་ཏུ་དངོས་གྲུབ་སྩལ་དུ་གསོལ། །རྡོ་རྗེའི་ཞག་ཀྱང་ཚང་ལགས་སོ། །བཟླས་བརྗོད་གྲངས་ཀྱང་ཐེམས་ལགས་སོ། །དངོས་གྲུབ་སྩོལ་བའི་དུས་འདི་ལགས། །འགྲོ་བ་མང་པོ་བདག་གིས་སྒྲོལ། །བླ་མེད་བྱང་ཆུབ་བདག་གིས་སྒྲུབ། །མཐུ་ཆེན་མཐུ་སྩོལ་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་གི་ལས་འབྲས་མཆིས་པར་མཛོད། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༀ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བརྗོད། གསུམ་པ་ཉེ་བར་བསྐུལ་བ་ལ། བླང་བྱ་དངོས་གྲུབ་དང་། སྩོལ་བ་པོ་ལྷའི་རྐང་ཐོན་ནས་བསྐུལ་པ་གཉིས་ལས། དང་པོ་ནི། ཧཱུཾ། མཉམ་པའི་དོན་ལ་མ་སྐྱེས་གཉིས་མེད་ཕྱིར། །དངོས་གྲུབ་སྩོལ་དང་གསོལ་བར་མི་དམིགས་ཀྱང་། །རིག་དང་མ་རིག་སྒྱུ་མའི་ཁྱད་པར་གྱིས། །སྒྱུ་མའི་སྤྱོད་ཡུལ་མཉམ་པར་མ་གྲུབ་ཅིང་། །རྒྱལ་བའི་དགོངས་སྤྱོད་ཀློང་དུ་མ་གྱུར་པས། །ལོག་རྟོག་སྲིད་པའི་ཞེན་པ་མ་བཟློག་ན། །མཁྱེན་རབ་ཏིང་འཛིན་དངོས་གྲུབ་སྩལ་དུ་གསོལ། །ཆགས་པའི་ནད་ཀྱིས་གདུངས་པའི་སྡུག་བསྔལ་ལ། །བདུད་དང་སྲིན་པོ་ཞེ་སྡང་གློ་བུར་གྱིས། །སྒྱུ་མའི་ལུས་སྲོག་ཚེ་ལ་བར་གཅོད་ན། །ཁྲོ་རྒྱལ་མཐུ་ཡིས་ཟིལ་གྱིས་གནོན་པའི་ཕྱིར། །རྫུ་འཕྲུལ་ལམ་མཆོག་དངོས་གྲུབ་སྩལ་དུ་གསོལ། །གསུང་རབ་རྒྱ་མཚོ་བདུད་རྩིའི་ཆར་ཕབ་ཚེ། །བག་ཆགས་སྐྱོན་གྱི་དྲི་མས་རྨོངས་པ་ལས། །ཤེས་ཤིང་རྟོགས་པའི་ཤེས་རབ་མི་ལྡན་ན། །ཤེས་བྱར་ཐོགས་མེད་དངོས་གྲུབ་སྩལ་དུ་གསོལ། །འབད་པས་བཙལ་བའི་དུས་གསུམ་དགེ་བཤེས་དེ། །སྲིད་ལ་ཕན་འདོགས་སྟོན་པའི་དཔལ་མགོན་ལས། །དྲིན་ལ་ལན་ལྡོན་གང་ལགས་མ་འཚལ་ན། །སེམས་ཀྱི་མངོན་ཤེས་དངོས་གྲུབ་སྩལ་དུ་གསོལ། །རྣམ་རྟོག་ཞེན་པའི་བག་ཆགས་སྟུག་པོ་ཡིས། །དུས་གསུམ་ཆོས་རྣམས་མུན་པའི་རྫས་ལྟར་སྒྲིབས། །དུས་གསུམ་དགེ་བཤེས་དྲིན་ལ་ལན་སླན་ཕྱིར། །དུས་ལ་རྨོངས་པའི་སེམས་ཅན་དོན་བགྱིད་ན། །མངོན་ཤེས་དྲུག་གི་དངོས་གྲུབ་སྩལ་དུ་གསོལ། །རྒྱུད་དྲུག་རིམ་གྱིས་དྲང་པའི་དོན་སླད་དུ། །ཁམས་གསུམ་མ་ལུས་ཁྱབ་པར་འགྲོ་བའི་ཚེ། །སེམས་ཀྱི་གདོས་སུ་བདག་གི་ལུས་མཆིས་ན། །ཐོགས་མེད་རྐང་མགྱོགས་དངོས་གྲུབ་སྩལ་དུ་གསོལ། །དྲེགས་པས་མྱོས་པའི་བར་སྣང་ལྷ་བྲན་དང་། །ཆེ་བས་འགྱིང་བའི་མཁའ་འགྲོ་མང་པོའི་ཚོགས། །རྡོ་རྗེའི་གཤོག་པས་ཟིལ་གྱིས་གནོན་པའི་ཕྱིར། །ནམ་མཁར་ཐོགས་མེད་དངོས་གྲུབ་སྩལ་དུ་གསོལ། །ལོག་རྟོག་མང་པོས་ཤེས་རྒྱུད་གཡེངས་པ་ཡིས། །སྟོན་པས་གསུངས་པའི་བཀའ་བརྒྱུད་ཇི་སྙེད་པ། །དོན་དང་ཡི་གེ་བརྗོད་མེད་མ་བསམ་ན། །མི་བརྗེད་གཟུངས་ཀྱི་དངོས་གྲུབ་སྩལ་དུ་གསོལ། །རང་ཉིད་རྣམ་རྟོག་ལས་ཀྱི་དབང་གྱུར་ཅིང་། །སྡུག་བསྔལ་མང་པོས་བཅིངས་པའི་འགྲོ་བ་རྣམས། །འདུལ་ཐབས་མང་པོས་འགྲོ་བའི་དོན་བགྱིད་ཀྱི། །རྣམ་བཞི་ལས་ཀྱི་དངོས་གྲུབ་སྩལ་དུ་གསོལ། །རང་གི་རྣམ་རྟོག་ལས་ཀྱི་དབང་གྱུར་ཅིང་། །བླང་དོར་མེད་པའི་དོན་ལ་ཐུགས་བརྩེའི་ཕྱིར། །སོ་སོའི་བློ་ལ་ཇི་ལྟར་འཐད་པ་བཞིན། །མཐུན་འཇུག་ཐབས་ཀྱིས་འགྲོ་བ་འདུལ་ལགས་ཀྱིས། །པྲ་སེ་ན་ཡི་དངོས་གྲུབ་སྩལ་དུ་གསོལ། །དུག་གསུམ་ཞེན་པས་འཁོར་བའི་གཅོང་བཏབ་ན། །འཚོ་བྱེད་སྨན་པའི་རྒྱལ་པོས་བཅོས་སུ་གསོལ། །སྐུ་གསུང་ཐུགས་ཀྱི་དངོས་གྲུབ་དམ་པ་སྟེ། །དངོས་གྲུབ་རྫས་ལ་བརྟེན་ནས་བདག་ལ་སྩོལ། །སྐྱ་རེངས་དང་པོའི་དངོས་གྲུབ་དུས་ལ་བབ། །ཁྲག་འཐུང་འཁོར་བཅས་དངོས་གྲུབ་སྩལ་དུ་གསོལ། །ཁམས་གསུམ་དྲེགས་པ་མ་ལུས་འདུས་འཚལ་གྱིས། །བཅོམ་ལྡན་དཔལ་ཆེན་དངོས་གྲུབ་སྩལ་དུ་གསོལ། །ཡེ་ཤེས་ཐབས་ཀྱིས་འགྲོ་དོན་ཀུན་བགྱིད་ཀྱི། །ཁྲོ་མོ་བརྒྱད་ཀྱི་དངོས་གྲུབ་སྩལ་དུ་གསོལ། །དུར་ཁྲོད་རོལ་པས་ཁམས་གསུམ་དབང་སྡུད་ཀྱི། །ཕྲ་མེན་བརྒྱད་ཀྱི་དངོས་གྲུབ་སྩལ་དུ་གསོལ། །ཕྲིན་ལས་རྣམ་བཞི་འགྲོ་བའི་དོན་བགྱིད་ཀྱི། །ཁྲོ་བོ་བཅུ་ཡི་དངོས་གྲུབ་སྩལ་དུ་གསོལ། །སྤྲུལ་པ་མང་པོས་སེམས་ཅན་ཀུན་འདུལ་ཕྱིར། །ཡང་སྤྲུལ་ཉིང་སྤྲུལ་དངོས་གྲུབ་སྩལ་དུ་གསོལ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། གཉིས་པ་ནི། ཆོས་ཉིད་བདེ་བ་ཆེན་པོའི་སྐུར་བྱུང་བ། །བཅོམ་ལྡན་ཆེ་མཆོག་ཡབ་ཡུམ་དངོས་གྲུབ་སྩོལ། །དུར་ཁྲོད་དྲེགས་པའི་ཚོགས་རྣམས་འཇོམས་མཛད་པ། །རྒྱུད་ལུང་ཁྲོ་རྒྱལ་ཡབ་ཡུམ་དངོས་གྲུབ་སྩོལ། །ཡེ་ཤེས་འབར་བ་བརྒྱད་ཀྱི་དཀྱིལ་འཁོར་ནས། །ག་རཱི་ཁྲོ་མོ་བརྒྱད་ཀྱིས་དངོས་གྲུབ་སྩོལ། །ཆོས་ཉིད་མཁའ་ལྟར་དག་པའི་དཀྱིལ་འཁོར་ནས། །སིངྷ་ཕྲ་མེན་བརྒྱད་ཀྱིས་དངོས་གྲུབ་སྩོལ། །ཚད་མེད་བཞི་རྫོགས་གསང་བའི་དཀྱིལ་འཁོར་ནས། །རྟ་གདོང་སྒོ་མ་བཞི་ཡིས་དངོས་གྲུབ་སྩོལ། །འབར་བའི་བར་ཁྱམས་དུར་ཁྲོད་ནང་ཤེད་ནས། །སྤོར་མ་གསང་ཡུམ་ཚོགས་བཅས་དངོས་གྲུབ་སྩོལ། །དམ་ཚིག་ལྷུན་གྱིས་གྲུབ་པའི་དཀྱིལ་འཁོར་ནས། །དབང་ཕྱུག་མ་སྲིང་ཚོགས་ཀྱིས་དངོས་གྲུབ་སྩོལ། །དུར་ཁྲོད་འབར་བ་ཆེན་པོའི་དཀྱིལ་འཁོར་ནས། །མཁའ་འགྲོ་སུམ་ཅུ་རྩ་གཉིས་དངོས་གྲུབ་སྩོལ། །ཕྲིན་ལས་མྱུར་མགྱོགས་ཆེན་པོའི་དཀྱིལ་འཁོར་ནས། །མ་བདུན་སྲིང་བཞིའི་ཚོགས་ཀྱིས་དངོས་གྲུབ་སྩོལ། །སྒྲོལ་བྱེད་རབ་ཏུ་འབར་བའི་དཀྱིལ་འཁོར་ནས། །རྡོ་རྗེ་ཀིང་ཆེན་བཅོ་བརྒྱད་དངོས་གྲུབ་སྩོལ། །ཞེ་སྡང་འབར་བ་ཐུགས་ཀྱི་དཀྱིལ་འཁོར་ནས། །ཁྲོ་རྒྱལ་ཡབ་ཡུམ་དྲུག་ཅུས་དངོས་གྲུབ་སྩོལ། །ཅི་བགྱི་བཀའ་ཉན་ལས་ཀྱི་དཀྱིལ་འཁོར་ནས། །ཕོ་ཉ་ཉིས་བརྒྱ་བཞི་བཅུས་དངོས་གྲུབ་སྩོལ། །ལས་རྣམས་ཡོངས་སུ་གྲུབ་པའི་དཀྱིལ་འཁོར་ནས། །ཡེ་ཤེས་མ་མོ་དྲུག་ཅུས་དངོས་གྲུབ་སྩོལ། །སྡོམ་པའི་ས་ལ་གནས་པའི་དཀྱིལ་འཁོར་ནས། །རིག་འཛིན་རྩལ་འཆང་ཚོགས་ཀྱིས་དངོས་གྲུབ་སྩོལ། །ༀ། གནས་མཆོག་ཡང་དག་དོན་གྱི་འོག་མིན་ནས། །རྒྱལ་བ་ཀུན་བཟང་ཡབ་ཡུམ་དངོས་གྲུབ་སྩོལ། །འོག་མིན་དབང་ཕྱུག་ཆེན་པོའི་གནས་མཆོག་ནས། །གསང་སྔགས་རྡོ་རྗེ་ཐེག་པ་འབྱུང་བའི་གནས། །རྡོ་རྗེ་སེམས་དཔའ་རིགས་ལྔ་ཡབ་ཡུམ་བཅས། །ལོངས་སྤྱོད་རྫོགས་པའི་སྐུ་ཡི་དངོས་གྲུབ་སྩོལ། །ལྷ་ཀླུ་གནོད་སྦྱིན་སོ་སོའི་གནས་མཆོག་ནས། །བཅོམ་ལྡན་རིགས་གསུམ་མགོན་པོས་དངོས་གྲུབ་སྩོལ། །ༀ་རྒྱན་དྷ་ན་ཀོ་ཤའི་གླིང་ཕུག་ཏུ། །རྡོར་སེམས་སྤྲུལ་པ་དགའ་རབ་རྡོ་རྗེ་དང་། །རྒྱལ་པོའི་བུ་མོ་རིན་ཆེན་གསལ་སྒྲོན་མར། །རྡོ་རྗེ་སེམས་དང་གསང་བདག་དངོས་བྱོན་ནས། །དབང་བཞི་རྫོགས་བསྐུར་རྟོག་ཚོགས་ལྷར་ངོ་སྤྲོད། །དབང་རྟགས་ཕྱག་ཤིང་མེ་ལོང་རྣམས་གཉིས་བྱིན། །རིག་འཛིན་ཁྲི་ཕྲག་དུ་མ་སངས་རྒྱས་པ། །དེ་ཡི་དངོས་གྲུབ་དམ་པ་ཆ་གཅིག་ཀྱང་། །དེ་རིང་གསང་བའི་གནས་མཆོག་ཆེན་པོ་འདིར། །སྒྲུབ་མཆོག་སྐལ་ལྡན་བདག་ལ་སྩལ་དུ་གསོལ། །རྒྱ་གར་ཡུལ་ཡི་ཕ་རོལ་ན། །ཨོ་རྒྱན་ཡུལ་གྱི་ཚུར་མཚམས་ན། །མ་ག་དྷ་ཡི་བྲག་ཕུག་ཏུ། །རྒྱལ་པོ་དྷརྨ་ཀཱ་ཡ་དང་། །ཀླུ་ཡི་བུ་མོ་རྒྱ་མཚོ་ཡིས། །དགའ་རབ་རྡོ་རྗེ་སྤྱན་དྲངས་ནས། །ཚོམ་བུ་སྟོང་གི་དཀྱིལ་འཁོར་སྒྲུབས། །ཁྲི་ཕྲག་གཅིག་ནི་སངས་རྒྱས་པ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་གྱི་མར་མཚམས་ན། །ཟ་ཧོར་ཡུལ་གྱི་ཡར་མཚམས་སུ། །རྡོ་རྗེ་འོད་འཕྲོའི་གླིང་ཚལ་དུ། །རྒྱལ་པོ་ཨིནྡྲ་བོ་དྷི་དང་། །སྲས་མོ་ནཱི་ལནྡྷ་ར་ཡིས། །ཚོམ་བུ་ལྔ་བརྒྱའི་དཀྱིལ་འཁོར་སྒྲུབས། །ཁྲི་ཕྲག་གཅིག་ནི་སངས་རྒྱས་པ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་གྱི་མར་མཚམས་ན། །སིང་གྷ་ལ་ཡི་ཡར་མཚམས་སུ། །གཡུ་མཚོ་གླིང་དགུའི་བྲག་ཕུག་ཏུ། །སིང་རྒྱལ་ཨུ་པ་རཱ་ཛ་དང་། །སྲས་མོ་གོ་མ་དེ་ཝཱི་ཡིས། །ཚོམ་བུ་ལྔ་བཅུའི་དཀྱིལ་འཁོར་སྒྲུབས། །བརྒྱ་ཕྲག་དུ་མ་སངས་རྒྱས་པ། །དེ་ཡིས་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་དབུས་མ་གྷ་དྷ། །ཝཱ་རཱ་ཎ་སཱིའི་གནས་དག་ཏུ། །དགེ་སློང་ཉིན་བྱེད་སེང་གེ་དང་། །སྲིན་པོའི་བུ་མོ་ན་ཤི་ཡིས། །ཚོམ་བུ་གསུམ་པའི་དཀྱིལ་འཁོར་སྒྲུབས། །འཁོར་ནི་ལྔ་བརྒྱ་སངས་རྒྱས་པ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་གྱི་ཚུར་ནང་ན། །བལ་པོ་ཡུལ་གྱི་ཕར༴ དགེ་སློང་སོ་ཀྱ་དེ་བ་དང་། །ལྷ་མོ་མཾ་ག་ལ་སིདྡྷིས། །ཚོམ་བུ་གཅིག་པའི་དཀྱིིལ་འཁོར༴ དེ་ཡི་དངོས་གྲུབ་ཆ༴ དེ་རིང་གསང་བའི་གནས༴ སྒྲུབ་མཆོག་བདག་ལ༴ རྒྱ་གར་ཡུལ་གྱི་ཚུར༴ བལ་པོ་ཡུལ་གྱི་ཕར༴ ཡང་ལེ་ཤོད་ཀྱི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །བལ་མོ་ཤཱཀྱ་དེ་བ་ཡིས། །ཚོམ་བུ་ལྔ་པའི་དཀྱིལ་འཁོར༴ དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ རྒྱ་གར་ཡུལ་གྱི་ཡར༴ ཏཱ་སིག་ཡུལ་གྱི་མར༴ ཨ་སུ་ར་ཡི་བྲག་ཕུག་ཏུ། །སློབ་དཔོན་སྠི་ར་མ་ཏི་དང་། །བུ་མོ་ག་ག་སིདྡྷི་ཡིས། །ཇི་ལྟར་སྒྲུབས་ཤིང་བརྙེས་པ་ཡི། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ བོད་ཀྱི་ཡུལ་གྱི་ཡར༴ ཞང་ཞུང་ཡུལ་གྱི་མར༴ གངས་དཀར་ཏི་སེའི་བྲག་ཕུག་ཏུ། །སློབ་དཔོན་སངས་རྒྱས་གསང་བ་དང་། །ལྷ་མོ་དམར་མོ་ཆོས་འཚོ་ཡིས། །ཇི་ལྟར་སྒྲུབས་ཤིང་བརྙེས་པ་ཡི། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ བོད་ཀྱི་ཡུལ་གྱི་ཕར༴ མོན་གྱི་ཡུལ་གྱི་ཚུར༴ སྤ་གྲོས་སྟག་ཚང་སེང་ཕུག་ཏུ། །སློབ་དཔོན་པདྨ་འབྱུང་གནས་དང་། །མཁར་ཆེན་ཡེ་ཤེས་མཚོ་རྒྱལ་གྱིས། །ཇི་ལྟར་སྒྲུབ་ཤིང་༴ དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ བོད་ཀྱི་ཡུལ་གྱི་མར་མཚམས་ན། །ཁམས་ཀྱི་དནྟིག་བྲག་ཕུག་ཏུ། །སློབ་དཔོན་རྒྱལ་བའི་བློ་གྲོས་དང་། །ལྷ་མོ་སུམ་བཟའ་སེར་མོ་ཡིས། །ཇི་ལྟར་སྒྲུབས༴ དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག༴ བོད་ཡུལ་གཙང་གི་གཡས་རུའི་ཕྱོགས། །ཉུག་གི་རྡོ་རྗེ་སྒྲོམ་བུ་རུ། །གནུབས་བན་སངས་རྒྱས་ཡེ་ཤེས་ཀྱིས། །རང་བྱུང་ཐིག་ལེ་ཉག་གཅིག་དོན། །ཟླ་བ་དགུ་ཡིས་སེམས་ཉིད་གྲོལ། །དངོས་པོའི་གནས་ལུགས་གཏན་ལ་ཕེབས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཁུ་ལུང་ཡོན་ཏན་རྒྱ་མཚོ་ནི། །ཐུགས་སྲས་ནང་ནས་མཆོག་ཏུ་གྱུར། །སྤྲུལ་པ་མང་པོའི་ཞལ་གཟིགས་ཤིང་། །མཆོག་དང་ཐུན་མོང་དངོས་གྲུབ་བརྙེས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ལྷན་གྱི་ཕྱག་ཤམ་དགོན་པ་རུ། །སོ་ནི་ཡེ་ཤེས་དབང་ཕྱུག་གིས། །ཆོས་ཉིད་རང་གྲོལ་ཐུགས་སུ་ཆུད། །རྫོགས་ཆེན་ལྟ་བའི་བཀའ་ཡང་བབས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཤོ་ཡག་སྡིངས་ཀྱི་གནས་མཆོག་ཏུ། །དབང་བཞི་ཆུ་བོའི་བཀའ་བབས་པ། །སྲུ་ནི་ལེགས་པའི་སྒྲོན་མ་ཡིས། །དགེ་མཆེད་བཅོ་ལྔའི་སློབ་བུ་སྨིན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ དེ་དག་ནང་ནས་ཞུ་ཡི་རུས། །བསོད་ནམས་ཤཱཀྱ་ཞེས་སུ་གྲགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གནུབས་སྲས་ཡེ་ཤེས་རྒྱ་མཚོ་ལས། །རྒྱ་སྟོན་བློ་གྲོས་ལ་བརྒྱུད་དེ། །ཐོ་དཀར་ནམ་མཁར་བཀའ་བབས་པ། །དབང་རྒྱུད་མདོ་ལུང་བཤད་སྒྲུབ་ཀྱི། །བཀའ་སྲོལ་ཟླ་མེད་མཆོག་བརྙེས་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ བོད་ཡུལ་གཙང་གི་གཡོན་རུའི་ཕྱོགས། །འུག་པ་ལུང་གི་ཡང་དབེན་དུ། །ཟུར་ཆེན་ཤཱཀྱ་འབྱུང་གནས་ནི། །བཀའ་བརྒྱུད་ལུང་དང་མན་ངག་ལ། །ཕུལ་གྱུར་ཤེས་བྱ་མ་ལུས་མཁྱེན། །རྒྱལ་བ་སངས་རྒྱས་ཐམས་ཅད་ཀྱིས། །བསྟན་པའི་བདག་པོར་ལུང་བསྟན་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གཡས་རུ་རྒྱ་བོ་དགེ་གནས་སུ། །ཟུར་ཆུང་ཤེས་རབ་གྲགས་པ་ནི། །ལྟ་དགོངས་རྩེ་མོའི་ཕུལ་དུ་གྱུར། །སྣང་གྲགས་སྒྱུ་མར་མཁྱེན་པ་ཡིས། །སྐལ་ལྡན་གདུལ་བྱ་སྨིན་གྲོལ་མཛད། །དེ་ཡི་དངོས་གྲུབ༴ དེ་རིང་གསང༴ སྒྲུབ་མཆོག་བདག་ལ༴ གཡས་རུ་ཆུ་བར་ལེ་ཐུང་དུ། །གླན་སྟོན་ཤཱཀྱ་བཟང་པོ་ནི། །སྣང་སྲིད་ལྷ་འདྲེ་བྲན་དུ་ཁོལ། །ཕྲིན་ལས་སྤྱོད་ལ་ཐོགས་པ་མེད། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གཡས་རུ་ཤངས་ཀྱི་ཉ་ཚལ་གྱི། །ཁང་སྟོང་མན་ངག་འབྱུང་ས་རུ། །ལྷ་རྗེ་ཤཱཀྱ་བྱང་ཆུབ་ནི། །རྫོགས་ཆེན་ལྟ་བའི་ཕུལ་དུ་གྱུར། །ཐོགས་མེད་ཤེས་བྱ་མ་ལུས་མཁྱེན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གཙང་སྟོད་བསྐྱེད་ལུང་གནས་མཆོག་ཏུ། །འདུས་པ་མདོ་ཡི་བཤད་སྒྲུབ་ཀྱི། །ཀ་བ་ཡང་ཁྱེད་བླ་མ་ཞེས། །རྡོ་རྗེ་མི་འཁྲུག་ཞལ་གཟིགས་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གཡོན་རུ་ཉ་རི་སྒྲོ་ཕུག་ཏུ། །གསང་བདག་དངོས་བྱོན་ཤཱཀྱ་སེང་། །སྟོན་བཞིའི་ཚོགས་གྲལ་མགུར་བཞེས་ནས། །རྫུ་འཕྲུལ་བཀོད་པས་མཁའ་ལ་གཤེགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ འོག་གདོང་ལྷ་རྗེ་འགར་ཟུང་དེ། །ཡེ་ཤེས་མཁའ་འགྲོས་བྱིན་བརླབས་པས། །ཟག་མེད་བདེ་བའི་ཉམས་དང་ལྡན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ འཆུམས་ཀྱི་འཆད་འགོ་གནས་མཆོག་ཏུ། །སྲེགས་སྟོན་རྡོ་རྗེ་རྒྱལ་མཚན་ནི། །ཡོན་ཏན་བསམ་གྱིས་མི་ཁྱབ་མངའ། །དབང་གི་ཆུ་བོའི་བཀའ་རྣམས་རྫོགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཤར་རི་རྒྱ་གར་གླིང་ཆུང་དུ། །མཁས་པ་གླན་བན་རྡོ་རྗེ་འོད། །གསང་བདག་ཞལ་གཟིགས་དུས་གསུམ་མཁྱེན། །ཤམྦྷ་ལ་རུ་མ་འོངས་འཁོར། །འདྲེན་པར་ལུང་བསྟན་ཆོས་མིག་ཅན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ དམ་ཆོས་འབྱུང་གནས་ཤ་རི་མོར། །གླན་སྟོན་བརྩོན་འགྲུས་སེང་གེ་ནི། །གདུལ་བྱ་ཡང་དག་ས་ལ་འགོད། །སྤྲུལ་པས་འགྲོ་བ་མ་ལུས་འདྲེན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གུ་ལང་དཔལ་གྱི་དགོན་པ་རུ། །མཁས་པ་བསོད་ནམས་རྒྱལ་པོ་ནི། །དབང་གི་ཆུ་བོས་གདུལ་བྱ་ཡི། །འགྲོ་བ་ཐམས་ཅད་སྨིན་པར་མཛད། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ སྤྲུལ་སྐུ་ལྷ་རྗེ་ལྷ་འབུམ་ནི། །དྲག་པོས་གདུལ་བྱའི་འགྲོ་བ་རྣམས། །སྨིན་མཛད་སྤྲུལ་པའི་སྐུར་བྱོན་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག༴ ཤར་རི་རྒྱ་གར་གླིང་ཆུང་དུ། །གླན་སྟོན་ཆོས་ཀྱི་སེང་གེ་ནི། ཏིང་འཛིན་དགོངས་པའི་དྲོད་དང་ལྡན། །བསྐྱེད་རྫོགས་གསུམ་གྱི་དགོངས་པ་རྟོགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ རྫ་ལུང་དཔལ་གྱི་དགོན་པ་རུ། །ལྷ་རྗེ་གླན་བན་སངས་རྒྱས་དཔལ། །དབང་གི་ཆུ་བོ་ཡོངས་རྫོགས་པས། །སྙིགས་མའི་དུས་འདིར་འགྲོ་དོན་མཛད། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག ༴ ཉ་ཚལ་ཆོས་ཀྱི་འབྱུང་གནས་སུ། །གླན་སྟོན་བསོད་ནམས་མགོན་པོ་ནི། །བསྐྱེད་རྫོགས་གསུམ་གྱི་བཅུད་འདུས་ཤིང་། །དབང་ལུང་མན་ངག་བདག་པོར་གྲགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ གཙང་གི་བྱེ་མ་སེང་གེ་རུ། །འབྲོ་སྟོན་བསམ་གྲུབ་རྡོ་རྗེ་ནི། །རྡོ་རྗེ་སེམས་དཔའི་ལུང་བསྟན་གསན། །ཧེ་རུ་ཀ་ཡི་སྐུ་རུ་གཟིགས། །སྔགས་འཆང་ཀུན་གྱི་སྤྱི་དཔལ་བཞུགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག༴ རྟ་ནག་སྒྲོལ་མའི་དབེན་གནས་སུ། །འབྲོ་སྟོན་སངས་རྒྱས་རིན་ཆེན་ནི། །ཚེ་དཔག་མེད་ཀྱི་ལུང་བསྟན་ཐོབ། །རྒྱུད་ལུང་མན་ངག་ཀུན་གྱི་བདག །དེ་ཡི་དངོས་གྲུབ༴ དེ་རིང་གསང་བའི༴ གྲུབ་མཆོག་བདག་ལ༴ གནམ་སྡིངས་དཔལ་གྱི་སྒྲུབ་ཁང་དུ། །བསྐྱེད་རྫོགས་དགོངས་པ་མངོན་གྱུར་པ། །ཞང་སྟོན་ནམ་མཁའ་རྡོ་རྗེ་ཞེས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ དབེན་གནས་དཔལ་གྱི་བདེ་ཆེན་དུ། །མཁས་གྲུབ་རྣལ་འབྱོར་རིག་པ་འཛིན། །ཤ་མི་རྡོ་རྗེ་རྒྱལ་མཚན་དཔལ། །དེ་ཡི་དངོས༴ དེ་རིང་གསང་བའི༴ སྒྲུབ་མཆོག་བདག་ལ༴ ལ་རྒུ་རྡོས་དགོན་སྒྲུབ་ཁང་དུ། །སྦས་པའི་རྣལ་འབྱོར་ནུས་པའི་བདག །རིག་འཛིན་གཡུ་འབྲུག་རྡོ་རྗེའི་མཚན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཉང་སྨད་སྐྱིད་སྦུག་དབེན་གནས་སུ། །མཁས་དང་གྲུབ་པའི་དཔའ་བོ་མཆོག །ཀུན་མཁྱེན་བློ་གྲོས་རྒྱལ་མཚན་དཔལ། །དེ་ཡི་དངོས་གྲུབ༴ དེ་རིང་གསང་བའི༴ གྲུབ་མཆོག་བདག་ལ༴ ལྷུན་གྲུབ་སྡིངས་ཀྱི་དབེན་གནས་སུ། །སྐད་གཉིས་སྨྲ་བའི་སྡོམ་བརྩོན་ཆེ། །སྐྱེས་མཆོག་གཞན་ཕན་རྡོ་རྗེ་རྩལ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །ཡང་ན་བློ་གྲོས་རྒྱལ་མཚན་ནས། ཟབ་ལུང་གསང་སྔགས་ཕོ་བྲང་ནས། །ཀརྨ་མི་འགྱུར་དབང་གི་རྒྱལ། །དེ་ཡིས་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཤེས་རི་དཔལ་ཆེན་གྲུབ་གནས་སུ། །ལྷ་བཙུན་ཀུན་བཟང་རྣམ་རྒྱལ་ཞེས། །གཉིས་འཛིན་འཁྲུལ་པ་དབྱིངས་སུ་ཞིག །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །དེ་དང་གཞན་ཕན་རྡོ་རྗེ་ནས། མཁའ་སྤྱོད་དཔལ་གྱི་དར་སྡིངས་སུ། །བཀའ་གཏེར་བསྟན་པ་རྒྱ་མཚོའི་བདག །གནུབས་ཆེན་ཡང་སྲིད་རིག་པ་འཛིན། །གསང་བདག་ཕྲིན་ལས་ལྷུན་གྲུབ་དཔལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ དྭགས་སྟོད་གླིང་གི་དགོན་པ་ན། །གྲུབ་མཆོག་ལམ་འདིའི་སྲོག་འཛིན་པ། །ཡོངས་གྲོལ་ཆོས་ཀྱི་རྒྱལ་བསྟན་འཛིན་ཞེས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ་སྩལ་དུ་གསོལ། །ཡང་ན་སྒྲོལ་ཆེན་ནས། བདུད་རྩི་ཆུ་རྒྱུན་ཡང་དབེན་དུ། །ཟུར་ཧམ་ཤཱཀྱ་འབྱུང་གནས་ནི། །ཀུན་མཁྱེན་འཇིག་རྟེན་གསུམ་གྱི་མགོན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ རི་སྦུག་དཔལ་གྱི་དགོན་པ་རུ། །ལང་གྲོ་ཚེ་དབང་རྒྱལ་པོ་ནི། །མཐུ་སྟོབས་དབང་ཕྱུག་སྤྲུལ་པའི་གར། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ དབེན་གནས་ཆུ་དབར་ཉི་སྦུག་རུ། །བརྒྱུད་འཛིན་ལེགས་པ་དཔལ་བཟང་ནི། །རིག་འཛིན་གོང་མའི་གདུང་འཚོབ་རྗེ། །དེ་ཡི་དངོས་གྲུབ༴ དེ་རིང་གསང་བའི་སྒྲུབ་མཆོག་བདག་ལ༴ གློ་བོ་མ་ཐང་ཆོས་སྡིངས་སུ། །འཇམ་དབྱངས་རིན་ཆེན་རྒྱལ་མཚན་ནི། །མཁས་དང་གྲུབ་པའི་འཁོར་ལོས་སྒྱུར། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གྲུབ་པའི་གནས་ཆེན་ཆུ་བོ་རིར། །རིག་འཛིན་བདུད་འཇོམས་རྡོ་རྗེ་ནི། །མཐུ་སྟོབས་ནུས་པའི་བདག་ཉིད་ཅན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ བྲག་དམར་ཆོས་ལུང་དགོན་པར་རུ། །སྐྱི་སྟོན་ཚེ་རིང་དབང་པོ་ནི། །དབང་ལུང་གདམས་པའི་ཐོས་པ་འཛིན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ གཙང་སྟོད་བྲེས་ཀྱི་རི་ཁྲོད་དུ། །བླ་ཆེན་ཆོས་རྒྱལ་རྡོ་རྗེ་ནི། །མདོ་དབང་བརྒྱུད་སྲོལ་རིས་མེད་སྤེལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ སྨན་ལུང་དམ་པའི་དབེན་གནས་སུ། །ཉང་སྟོན་རིག་པའི་རྡོ་རྗེ་ནི། །མཁས་བཙུན་ཆེན་པོའི་གཙུག་གི་རྒྱན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཨེ་ཝཾ་ཐུབ་བསྟན་ཆོས་གྲྭ་རུ། །རིག་འཛིན་པདྨ་ཕྲིན་ལས་ནི། །བཀའ་གཏེར་བསྟན་པ་རྒྱ་མཚོའི་བདག །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཡང་ན་སྒྲོལ་ཆེན་ནས། ཉང་སྨད་རྩེ་རྒྱལ་སྒོམ་ཁང་དུ། །མ་གཅིག་ཟུར་མོ་དགེ་འདུན་འབུམ། །མཁས་བཙུན་གྲུབ་བརྙེས་རྣལ་འབྱོར་མ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཡང་དབེན་གསང་སྔགས་ཕོ་བྲང་དུ། །ཟུར་སྟོན་ཤཱཀྱ་བཤེས་གཉེན་ཞེས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ འདུ་འཛི་སྤངས་པའི་དབེན་གནས་སུ། །མཁས་གྲུབ་བྲའོ་ཆོས་འབུམ་དང་། །བཤེས་གཉེན་དཀོན་མཆོག་བཟང་པོ་གཉིས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ སྒྲུབ་པའི་གནས་བཟང་མངོན་དགའ་རུ། །རྨོག་སྟོན་རྡོ་རྗེ་བཟང་པོ་ཞེས། །འཆི་མེད་རིག་འཛིན་བརྙེས་པར་གྲགས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ གྲྭ་སྟོད་དར་ལུང་དགོན་པ་རུ། །མཁས་གྲུབ་རྡོ་རྗེ་རྣམ་རྒྱལ་ཞེས། །བདག་བས་གཞན་གཅེས་ཐུགས་གོམས་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ མོན་མཁར་ཁྱུང་ཚང་དགོན་པ་རུ། །འཁྲུལ་ཞིག་བློ་གྲོས་དཔལ་དང་ལྡན། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ར་མོ་ཀརྨའི་ལྷ་ཁང་དུ། །དཔང་སྟོན་ཀརྨ་གུ་རུ་བ། །དབང་ལུང་མན་ངག་ཐོས་པས་ཕྱུག །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག༴ ཕྱོགས་མེད་མོན་བོད་དབེན་གནས་སུ། །སྔགས་འཆང་ཀུན་བཟང་དཔལ་འབྱོར་ནི། །མང་ཐོས་ཏིང་འཛིན་རིག་རྩལ་འབྱོངས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ལྷོ་དབུས་གོང་མའི་གདན་ས་རུ། །བཤད་སྒྲུབ་ཆོས་གཏེར་གསང་བའི་བདག །རིག་འཛིན་ཕྲིན་ལས་ལྷུན་གྲུབ་དཔལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ དེ་ཡིས་རྗེས་བཟུང་གཙང་སྒོམ་ལུས། །དྭགས་སྟོན་ཆོས་རྒྱལ་བསྟན་འཛིན་ནི། །རྣམ་དག་བརྒྱུད་སྲོལ་སྲོག་འཛིན་པ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ་སྩལ་དུ་གསོལ། །དེ་དང་རིག་འཛིན་པདྨ་ཕྲིན་ལས་ནས། སྨིན་གྲོལ་ཆོས་ཀྱི་རྒྱལ་ཁབ་ཏུ། །བཀའ་གཏེར་བསྟན་པའི་རྒྱལ་སྲིད་འཛིན། །འགྲན་ཟླ་ཀུན་བྲལ་ཆོས་ཀྱི་རྗེ། །གཏེར་ཆེན་འགྲོ་འདུལ་གཏེར་བདག་གླིང་། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ༴ ཤེས་བྱ་ཀུན་མཁྱེན་ཕོ་བྲང་དུ། །རྒྱུད་ལུང་མན་ངག་རྒྱ་མཚོའི་མཛོད། །ངེས་པ་དོན་གྱི་ཐམས་ཅད་མཁྱེན། །ལོ་ཆེན་ཆོས་དཔལ་རྒྱ་མཚོའི་སྡེ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ ཆོས་འཁོར་ལྷུན་པོའི་གཞལ་མེད་དུ། །བཀའ་གཏེར་རྒྱ་མཚོའི་སྲོག་རྩ་འཛིན། །རྒྱལ་སྲས་རིན་ཆེན་རྣམ་པར་རྒྱལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ འོག་མིན་གྲུབ་པའི་བསྟི་གནས་སུ། །གསང་ཆེན་མཛོད་ལ་མངའ་དབང་བསྒྱུར། །གྲུབ་མཆོག་པདྨ་བསྟན་འཛིན་རྗེ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག་བདག་ལ་སྩལ༴ ངེས་དོན་ཆོས་ཀྱི་དགའ་ཚལ་དུ། །མདོ་སྔགས་བསྟན་པའི་འཁོར་ལོས་སྒྱུར། །ཨོ་རྒྱན་བསྟན་འཛིན་རྡོ་རྗེ་མཆོག །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ མཁའ་སྤྱོད་དཔལ་རིའི་ཕོ་བྲང་དུ། །ཐེག་མཆོག་མཛོད་ལ་རང་དབང་བསྒྱུར། །སྨྱོས་སྟོན་ཕྲིན་ལས་རྣམ་པར་རྒྱལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ གར་བཞུགས་ཆོས་ཀྱི་ཕོ་བྲང་དུ། །གསང་ཆེན་བདུད་རྩིའི་གྲུ་ཆར་འབེབས། །རིག་འཛིན་པདྨ་དབང་གི་རྒྱལ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ བདེ་ཆེན་འབར་བའི་གཞལ་མེད་དུ། །རྒྱུད་ལུང་མན་ངག་གསང་མཛོད་འཛིན། །ཁྲི་ཆེན་སངས་རྒྱས་ཀུན་དགའི་ཞབས། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ དབང་ཆེན་གྲུབ་པའི་ཕོ་བྲང་དུ། །དགོངས་བརྒྱུད་བདུད་རྩིའི་བང་མཛོད་འཆང་། །མདོ་སྔགས་བསྟན་འཛིན་ནོར་བུའི་སྡེ། །དེ་ཡི་དངོས་གྲུབ༴ དེ་རིང་གསང་བའི༴ སྒྲུབ་མཆོག༴ དག་པ་རབ་འབྱམས་གཞལ་མེད་དུ། །ཆོས་སྐུའི་ཡེ་ཤེས་ཕ་ཕོག་སྟེར། །འགྱུར་མེད་ཕན་བདེའི་འོད་ཟེར་དཔལ། །ལོ་ཆེན་ནས་བདག་གི་འདྲེན་མཆོག་ཕན་བདེའི་འོད་ཟེར་བར་གྱི་བརྒྱུད་པའི་ཞལ་སྐོང་ཛྙཱ་ནས་སོ། །མཆན། དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །སྤྱི་གཙུག་ཉི་ཟླའི་གདན་སྟེང་དུ། །རྩ་བའི་བླ་མ་བཀའ་དྲིན་ཅན། །རྡོ་རྗེ་འཆང་གི་ངོ་བོ་ཉིད། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །སྒྲུབ་མཆོག་བདག་ལ་སྩལ་དུ་གསོལ། །རྩ་བརྒྱུད་བླ་མ་དམ་པ་རྣམས། །ཡི་དམ་མཁའ་འགྲོའི་སྤྲིན་ཕུང་འཁྲིགས། །བྱིན་རླབས་དངོས་གྲུབ་ཆར་ལྟར་འབེབས། །གནས་མཆོག་འདི་རུ་བྱིན་ཆེན་ཕོབ། །མཆོག་དང་ཐུན་མོང་དངོས་གྲུབ་སྩོལ། །ཞེས་བསྐུལ་ཞིང་གསོལ་བ་གདབ་བོ། །བཞི་པ་གཤེགས་ཤིང་གསོལ་བྱང་བྱས་ལ་བསྟིམ་པ་ནི། འདི་ཡེ་ཤེས་ལྷའི་དངོས་གྲུབ་བླང་བ་དངོས་ཡིན། དེ་ལ་ལྷ་རྗེ་འགར་གྱི་ཞལ་ནས། ཡང་དག་གི་དུས་མིན་པ་གསལ་ཤིང་གི་ཆོ་ག་ལ་གནད་ཆེ་རྒྱུ་མེད། ཅེས་གསལ་ཤིང་མི་མཛད་པས་དམིགས་པ་ཁོ་ནས་དཀྱིལ་འཁོར་གྱི་ལྷ་རྣམས་ལས་མར་མེ་གཅིག་ལས་གཉིས་ཆད་ལྟར་མདུན་དུ་གཤེགས་སུ་གསོལ་བ་ལ་མཆོད་བསྟོད་བཟླས་པ་གསོལ་བྱང་གི་སྨོན་ལམ་དང་བཅས་པ་མཛད་ནས་རང་ལ་བསྟིམ་པར་བཞེད། ཞུ་བསོད་ཤཱཀ །གནུབས་ཆེན་གྱིས། ཚོགས་ཆེན་ཡོངས་འདུས་དཀྱིལ་འཁོར་དུ། །ཐེག་པ་འདུས་དང་དབང་འདུས་དང་། །སྒྲུབ་ཆེན་དཀྱིལ་འཁོར་འདུས་པའི་ཕྱིར། །ཞེས་རྒྱུད་སྡེ་དང་སྒྲུབ་སྡེ་ཐམས་ཅད་འདུས་པར་མ་ཟད། ཁྱད་པར་ལྷ་དགུ་ཀུན་གྱི་རྩ་བ་དང་། ལྷ་མང་ང་བརྒྱད་དང་དྲུག་ཅུ་རྩ་བརྒྱད་པ་སོགས་ཡང་དག་ཐམས་ཅད་འདིར་ཚང་བས་གསལ་ཤིང་ལས་དངོས་གྲུབ་ལེན་པ་ཤིན་ཏུ་འཐད་གསུང་། དེ་ལའང་ལྷ་རྗེ་རྩགས། ཞི་ཁྲོ་གཉིས་ཀ་ལ་ལེན་དགོས་པར་བཞེད་པ་དང་། སྲེགས་རྡོ་རྗེ་རྒྱལ་མཚན་ནི་ཞི་ཁྲོ་སྡེང་འོག་འོད་ཟེར་འཇུ་འདུལ་གྱི་ཚུལ་དུ་ཡོད་པས་ཞི་བ་ལ་གསལ་ཤིང་གི་ཆོ་ག་མི་དགོས་གསུང་བ་ལས། འདིར་གླན་རྡོ་རྗེ་འོད་ཀྱི་ཕྱག་བཞེས་ཀྱི་རྒྱུན་ལ། རྩ་རྒྱུད་ཀུན་འདུས་དང་། ཧེ་རུ་ཀ་འདུས་པ་སོགས་རྡོ་རྗེ་རིགས་ཀྱི་ཁྲོ་བོ་ཡང་དག་གི་རྒྱུད་དང་འབྲེལ་བས་གསལ་ཤིང་གི་ཆོ་ག་སྦྱར་བ་མི་འགལ་ཞིང་། དེའང་སྲེགས་ཀྱི་རྗེས་སུ་འབྲངས་ནས་ཞི་བར་གསལ་ཤིང་གི་ཆོ་ག་མི་དགོས་པའི་ལུགས་ཕྱག་བཞེས་སུ་མཛད་དོ། །དེ་ལ་ཆོ་གའི་རིམ་པ་ནི། ཐོག་མར་གང་ལས་བླང་བའི་གཞི་སྒྲུབ་པ་སྤྱིའི་ཆོ་ག་བྱ་སྟེ། སྟེང་ཁང་ཞི་བའི་ལྷ་ཚོགས་ཀྱི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཀྱི་སྐལ་བ་ཐམས་ཅད་འོད་དང་འོད་ཟེར་གྱི་རྣམ་པ་ཅན་དུ་བྱུང་བ་འོག་ཁང་ཁྲོ་བོའི་ལྷ་ཚོགས་རང་རང་གི་གནས་གྱུར་གང་དང་གང་ཡིན་པ་དེ་དང་དེ་ལ་གཉིས་མེད་དུ་ཐིམ་པ་ནི། ཀུན་བཟང་གི་འོད་ཟེར་ཆེ་མཆོག །རིགས་ལྔ་རྒྱུད་ཀྱི་ཧེ་རུ་ཀ་ལྔ། སེམས་དཔའ་བརྒྱད་གནས་མ། སེམས་མ་བརྒྱད་ཡུལ་མ། བྱ་བྱེད་དང་ཐུབ་དྲུག་འབར་མ། མཐར་བྱེད་ཡབ་ཡུམ་གྱི་འོད་ཟེར་སྒོ་སྐྱོང་གདོང་མོ་བཞི་ལ་ཐིམ་པར་བསམ་པ་འཇུ་འདུལ་གྱི་དགོངས་པའོ། །དེ་ནས་དཀྱིལ་འཁོར་ལ་བཀོད་པའི་མར་མེ་རྣམས་སྦར་ཏེ། གསལ་གདབ་པ་ནི། ཕོ་བྲང་དབུས་ཀྱི་མར་མེ་བཅོམ་ལྡན་འདས་ཆེ་མཆོག །དབང་མཆོག །བཛྲ་ཧེ་རུ་ཀ་གསུམ། ཕྱོགས་མཚམས་ཀྱི་མར་མེ་རྒྱུད་ལུང་གི་ཧེ་རུ་ཀ་ཡབ་ཡུམ། གློ་འབུར་དང་གྲུ་ཆད་ཀྱི་གནས་མ། ཁྱམས་དགུ་ལ་དང་པོ་ནས་བཟུང་སྟེ་རིམ་པར། ཡུལ་མ་བརྒྱད་དང་སྒོ་སྐྱོང་བཞི། སྤོར་མ་བརྒྱད་དང་གསང་ཡུམ་བཞི། དབང་མོ་ཉེར་བརྒྱད། མཁའ་འགྲོ་སོ་གཉིས། ཀིངྐ་ར་བཅོ་བརྒྱད། ཁྲོ་བོ་ཁྲོ་མོ་ཡ་དྲུག་ཅུ། ཕོ་ཉ་ཉིས་བརྒྱ་བཞི་བཅུ། མ་མོ་དྲུག་ཅུ། རྒྱུའི་རྟ་བབས་ཀྱི་ཕྱི་རོལ་ཁོར་ཡུག་ཟླུམ་པོ་ལ་རིག་འཛིན་བླ་མ་རྣམས་དྭངས་པའི་མཚོ་ལ་གཟའ་སྐར་ཤར་བ་ལྟར་མ་འདྲེས་ཡོངས་རྫོགས་སུ་བཀྲ་ལམ་མེར་གསལ་བར་གྱུར། ༀ་མ་ཧཱ་ཤཱུ་ནྱ་ཏཱ་སོགས་ལྔས་དབང་བསྐུར། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་སོགས་གསུམ་གྱིས་བྱིན་གྱིས་བརླབ། བཛྲ་ས་མཱ་ཛཿརུ་ལུ་རུ་ལུ་ཧཱུཾ། ཞེས་པས་སྙན་གསན་དབབ། ཛཿཧཱུཾ་བཾ་ཧོཿ ཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱོཿཛཿཛཿ ཞེས་པས་ཡེ་ཤེས་པ་ནམ་མཁའ་འགེངས་པ་ཙམ་དུ་སྤྱན་དྲངས། ཛཿཧཱུཾ་བཾ་ཧོཿབཛྲ་ས་མ་ཡ་མུ་དྲ་ཨ། བཛྲ་ཤྲཱི་ཧེ་རུ་ཀ་ཏིཥྛ་ས་མ་ཡ་ལྷན། ཞེས་པས་ཕོ་བྲང་གི་མར་མེ་ལྷར་གསལ་བ་ལ་གཉིས་མེད་དུ་བསྟིམ་ནས་བརྟན་པར་བཞུགས་སུ་གསོལ་ལོ། །དེ་ཡན་ཆད་ནི་གང་ལས་སྤྱན་དྲང་པའི་གཞི་སྒྲུབ་པའོ། །དེ་ནས་སོ་སོའི་དངོས་གྲུབ་བླང་བའི་ལས་རིམ་ལ། སྤྱན་དྲངས་མཆོད་དང་བཟླས་པ་དང་། །བསྟོད་དང་སྨོན་ལམ་བསྡུ་བ་དྲུག །ཅེས་རེ་རེ་ལ་དོན་དྲུག་དྲུག་གི་སྒོ་ནས་བླང་སྟེ། དང་པོ་གཙོ་བོ་གསུམ་ལ་བླང་བ་ནི། ལྕགས་ཀྱུའི་ཕྱག་རྒྱ་བཅས་ཏེ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ་ཀ་ཏ་མ་ཧཱ་ཀྲོ་དྷེ་ཤྭ་རཱི་ཧཱུཾ་ཕཊ། ༀ་སརྦ་ཏ་ཐཱ་ག་ཏ་ཤྲཱི་ཧེ་རུ་ཀ་ཧཱུཾ་སརྦ་ཏ་ཐཱ་ག་ཏ་ཀྲོ་དྷེ་ཤྭ་རཱི་ཧཱུཾ། ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ཧཱུཾ། བཛྲ་ཨཾ་ཀུ་ཤ་ཛཿ རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་དཀྱིལ་འཁོར་དབུས་ཀྱི་མར་མེ་ལས་དཔལ་འབར་གྱིས་བླངས་ཏེ་གསལ་ཤིང་དང་པོ་སྦར་བས། ཕོ་བྲང་དབུས་ཀྱི་དཔལ་ཆེན་པོ་ཆེ་མཆོག་ཧེ་རུ་ཀ །དབང་མཆོག །བཛྲ་ཧེ་རུ་ཀ་གསུམ་ཡབ་ཡུམ་འོད་དང་སྤྲུལ་པར་བཅས་ཏེ་གསལ་ཤིང་གི་རྩེ་མོར་བྱོན་པར་གྱུར་པ་ལ། མ་ཧཱ་པཉྩ་ཨ་མྲྀ་ཏ། མ་ཧཱ་བ་ལིཾ་ཏ། མ་ཧཱ་རཀྟ་ཁ་རཾ་ཁཱ་ཧི། ཞེས་སྨན་གཏོར་རཀྟས་མཆོད་ནས། བཟླས་པ་ནི། ༀ། བཅོམ་ལྡན་ཆེ་མཆོག་ཡབ་ཡུམ་དང་། །དབང་མཆོག་ཧེ་རུ་ཀ་ཡབ་ཡུམ་དང་། །བཛྲ་ཁྲག་འཐུང་ཡབ་ཡུམ་སྟེ། །གཙོ་བོ་རྣམ་གསུམ་ཐུགས་ཀ་ནས། །ཟུར་བརྒྱད་དཀྱིལ་ནས་འབྲུ་བརྒྱད་ཤར། །སྙིང་པོ་རུ་ལུ་འབྲུ་བརྒྱད་དང་། །གུ་ཧྱ་ཛྙཱ་ནའི་འོད་འཕྲོས་པས། །ཕར་འཕྲོས་དཔལ་ཆེན་ཐུགས་དམ་བསྐང་། །ཚུར་འདུས་བདག་ལ་དངོས་གྲུབ་སྩོལ། །གཙོ་བོ་གསུམ་གྱི་སྔགས་ལ་རུ་ལུ་སྦྲེལ་བ་དང་། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་བཟླས་ལ། བསྟོད་པ་ནི། ༀ། བཅོམ་ལྡན་ཆེ་མཆོག་ཧེ་རུ་ཀ །བླ་མེད་ཡུམ་ཆེན་ཁྲོ་མོའི་རྒྱལ། །མཐིང་ནག་འཇིགས་སྐུ་བདུད་བཞི་འདུལ། །ཉི་ཤུ་རྩ་གཅིག་ས་རྣམས་ནོན། །བཞི་བཅུ་རྩ་གཉིས་མངོན་སངས་རྒྱས། །ཞབས་བརྒྱད་ཏིང་འཛིན་དབྱིངས་སུ་སྦྱོར། །རྒྱན་རྣམས་མ་ལུས་སྐུ་ལ་རྫོགས། །ཁྲོ་རྒྱལ་སྐུ་ལ་ཕྱག་འཚལ་བསྟོད། །བཅོམ་ལྡན་དབང་མཆོག་ཧེ་རུ་ཀ །དབུ་དགུ་ཕྱག་ནི་བཅོ་བརྒྱད་དེ། །སྟོང་པ་བཅོ་བརྒྱད་ཡོངས་སུ་རྫོགས། །མཐིང་ནག་དགྱེས་པ་ཆེན་པོའི་སྐུ། །ཞབས་བཞིས་རུ་དྲ་ཕོ་མོ་མནན། །འཇིགས་བྱེད་སྐུ་ལ་ཕྱག་འཚལ་བསྟོད། །རྡོ་རྗེ་རིགས་མཆོག་བདུད་འདུལ་གཙོ། །གདུག་པ་འདུལ་བ་ཐབས་ཆེན་པོས། །བདུད་རིགས་རྡུལ་དུ་རློག་མཛད་པ། །དཔལ་ཆེན་ཡབ་ཡུམ་སྐུ་ལ་བསྟོད། །རུ་ལུ་དང་། གུ་ཧྱ་ཛྙཱ་ན། གསོལ་བྱང་གི་སྨོན་ལམ་ནི། ཧོཿ བཅོམ་ལྡན་འདས་ཆེ་མཆོག་ཧེ་རུ་ཀ་དང་། །དབང་མཆོག་དང་། བཛྲ་ཧེ་རུ་ཀ་རྣམས་ཡུམ་དང་བཅས་པ་ལ་དངོས་གྲུབ་ཏུ་གསོལ་བའི་མདོ་ནི། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ལ། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས་དངོས་གྲུབ་ཀྱི་སྐལ་བ་དང་རིགས་རྒྱུད་གང་ལགས་པ་ཐམས་ཅད་ཕྱི་མར་སྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། ཞེས་བརྗོད། བསྡུ་བ་ནི། བཛྲ་ཨངྐུ་ཤ་ཛཿ ཞེས་ལན་གསུམ་གྱིས། དང་པོས་འོད་དང་སྤྲུལ་པ། གཉིས་པས་ཡིག་འབྲུ། གསུམ་པས་སྐུ་འོད་དུ་ཞུ་ནས་རང་ལ་ཐིམ་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གཟི་བྱིན་དང་ལྡན་པར་བསམ་མོ། །གཉིས་པ་རྒྱུད་ཀྱི་ཧེ་རུ་ཀ་བཞི་ནི། ལྕགས་ཀྱུའི་རྒྱ་དང་། ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཧཱུཾ། དེ་བཞིན་དུ། རཏྣ། པདྨ། ཀརྨ་རྣམས་བཅུག །བཛྲ་ཨངྐུ་ཤ་ཛཿརུ་ལུ༴ ཞེས་ཕྱོགས་རྩིབས་ཀྱི་མར་མེ་ལས་གསལ་ཤིང་གཉིས་པ་སྦར་བས། རིགས་བཞིའི་ཧེ་རུ་ཀ་ཡབ་ཡུམ་འོད་དང་སྤྲུལ་པར་བཅས་ཏེ་གསལ་ཤིང་གི་རྩེ་མོར་བྱོན། སྨན་གཏོར་རཀྟས་མཆོད། ༀ། རིགས་བཞི་ཁྲག་འཐུང་ཐུགས་ཀ་ནས། །ཟུར་བརྒྱད་དཀྱིལ་ན་འབྲུ་བརྒྱད་ཤར། །སྙིང་པོ་རུ་ལུ་འབྲུ་བརྒྱད་དང་། །གུ་ཧྱ་ཛྙཱ་ནའི་འོད་འཕྲོས་པས། །ཕར་འཕྲོས་དཔལ་ཆེན་ཐུགས་དམ་བསྐང་། །ཚུར་འདུས་བདག་ལ་དངོས་གྲུབ་སྩོལ། །རིགས་བཞིའི་སྔགས་ལ་རུ་ལུ་སྦྲེལ་བ་དང་། གུ་ཧྱ་ཛྙཱ་ན་བཟླ། ཧཱུཾ། འཇིགས་བྱེད་འདས་པའི་དུས་ན་སྔོན་བྱུང་བ། །གདུག་པ་འདུལ་ཕྱིར་དུས་ལས་མི་འདའ་བའི། །དཔལ་ཆེན་ཁྲག་འཐུང་ཆེན་པོ་རྣམ་པ་བཞི། །རང་རང་བཙུན་མོར་བཅས་ལ་ཕྱག་འཚལ་བསྟོད། །ཧོཿ བཅོམ་ལྡན་འདས་རིགས་བཞི་ཧེ་རུ་ཀ་ཡབ་ཡུམ་ལ་དངོས་གྲུབ་ཏུ་གསོལ་བ་ནི། བདག་ཅག་གསང་བའི་སོགས་སྦྱར་རོ། །བཛྲ་ཨངྐུ་ཤ་ཛཿ གསུམ་གྱིས། དང་པོས་འོད་དང་སྤྲུལ་པ། གཉིས་པས་ཡིག་འབྲུ། གསུམ་པས་སྐུ་འོད་དུ་ཞུ་ནས་རང་ལ་ཐིམ་པས་གཟི་བྱིན་དང་ལྡན་པར་གྱུར། གསུམ་པ་ལུང་གི་ཧེ་རུ་ཀ་བཞི་ནི། ལྕགས་ཀྱུའི་རྒྱ་དང་། ༀ་རཀྴ་ཤྲཱི་ཧེ་རུ་ཀ་རཀྴ་ཀྲོ་དྷེ་ཤྭ་རཱི་ཧཱུཾ། དེ་བཞིན་དུ། ས་ནུ། གུ་ཧྱ། ཡཀྴ། བཛྲ་ཨཾ་ཀུ་ཤ་ཛཿརུ་ལུ༴ མཚམས་རྩིབས་ཀྱི་མར་མེ་ལས་གསལ་ཤིང་གསུམ་པ་སྦར་བས། ལུང་གི་ཧེ་རུ་ཀ་བཞི་འོད་དང་སྤྲུལ་པར་བཅས་ཏེ་གསལ་ཤིང་གི་རྩེ་མོར་བྱོན། སྨན་གཏོར་རཀྟས་མཆོད། ༀ། ལུང་གི་ཁྲག་འཐུང་ཐུགས་ཀ་ནས། །ཟུར་བརྒྱད་དཀྱིལ་ན་འབྲུ་བརྒྱད་ཤར། །སྙིང་པོ་རུ་ལུ་འབྲུ་བརྒྱད་དང་། །གུ་ཧྱ་ཛྙཱ་ནའི་འོད་འཕྲོས་པས། །ཕར་འཕྲོས་དཔལ་ཆེན་ཐུགས་དམ་བསྐང་། །ཚུར་འདུས་བདག་ལ་དངོས་གྲུབ་སྩོལ། །ལུང་གི་ཁྲོ་བོ་བཞིའི་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། སྦྱོར་བ་དམ་ཚིག་གསང་བ་སྒྲོལ་བའི་དབྱིངས། །ལོག་ལྟ་མྱོང་བྱེད་སྐྱེ་གནས་རེག་བྱ་འཇོམས། །ག་ན་ཉམས་པ་ཏ་ན་མཚན་མ་སྒྲོལ། །ལུང་གི་ཁྲོ་རྒྱལ་ཡབ་ཡུམ་བཞི་ལ་བསྟོད། །ཧོཿ བཅོམ་ལྡན་འདས་ལུང་གི་ཧེ་རུ་ཀ་ཡབ་ཡུམ་ལ་དངོས་གྲུབ་ཏུ་གསོལ་བ་ནི། བདག་ཅག་གསང་བའི་སོགས་སོ། །བཛྲ་ཨཾ་ཀུ་ཤ་ཛཿ གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཞི་པ་གནས་མ་བརྒྱད་ནི། ལྕགས་ཀྱུའི་རྒྱ་དང་། ༀ་བཛྲ་ག་རཱི་ཧ། དེ་བཞིན་དུ་ཙ་རཱི། པྲ་མོ་ཧེ། བེ་ཏ་ལཱི། པུཀྐ་སཱི། གྷསྨ་རཱི། སྨ་ཤ་ནཱི། ཙཎྜ་ལཱི། བཛྲ་ཨཾ་ཀུ༴ རུ་ལུ༴ གློ་འབུར་དང་གྲུ་ཆད་ཀྱི་མར་མེ་ལས་གསལ་ཤིང་བཞི་པ་སྦར་བས། གནས་ཀྱི་མ་མོ་བརྒྱད་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། གནས་མ་བརྒྱད་ཀྱི་ཐུགས་ཀ་ནས། །སྙིང་པོ་རུ་ལུ༴ གུ་ཧྱ༴ ཕར་འཕྲོས༴ ཚུར་འདུས༴ སྔགས་བརྒྱད་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ག་རཱི་ལ་སོགས་ཁྲོ་མོ་ཆེན་མོ་བརྒྱད། །གདུག་པ་ཐབས་ཀྱིས་འདུལ་བའི་དྲག་ཤུལ་ཅན། །སྐུ་མདོག་ཕྱག་རྒྱ་སྣ་ཚོགས་ཅིར་ཡང་སྟོན། །ཡེ་ཤེས་ཁྲོ་མོ་བརྒྱད་ལ་ཕྱག་འཚལ་བསྟོད། །ཧོཿ ཁྲོ་མོ་བརྒྱད་ལ་དངོས་གྲུབ་ཏུ་གསོལ་བ་ནི་སོགས་སོ། །བཛྲ་ཨཾ་ཀུ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །ལྔ་པ་ཕྲ་མེན་བརྒྱད་སྒོ་མ་དང་བཅས་པ་ནི། ལྕགས་ཀྱུའི་རྒྱ་དང་། ༀ་བཛྲ་སིངྷ་མུ་ཁཱི་ཧེ། དེ་བཞིན་དུ། བྱཱ་གྷྲ། ཤྲི་གཱ་ལ། ཤྭ་ནཱ། གྲྀཌྜཱ། ཀངྐ་། ཀཱ་ཀ །ཨུ་ལཱུ་ཀ །ༀ་བཛྲ་ཨཱརྻ་ཏེ་ཛ་ཏེ་ང་ཛཿ ཨ་མུ་ཁེ་ཧཱུཾ། ལོ་ཀ་བཾ། བྷསྨི་པ་ལ་ཡ་བ་ཏུ་ཧོཿ ཨཾ་ཀུ་ཤ་དང་། རུ་ལུ༴ ཁྱམས་དང་པོ་སྒོ་དང་བཅས་པའི་མར་མེ་ལས་གསལ་ཤིང་ལྔ་པ་སྦར་བས། ཡུལ་མ་བརྒྱད་དང་གདོང་མོ་བཞི་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། ཕྲ་མེན་བརྒྱད་ཀྱི་ཐུགས་ཀ་ནས། །སྙིང་པོ་རུ་ལུ༴ གུ་ཧྱ་ཛྙཱ་ན༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ རང་སྔགས་བཅུ་གཉིས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ཡེ་ཤེས་ལས་ལ་འགྱེད་པའི་ཕྲ་མེན་མ། །རྣམ་འཕྲུལ་ཐབས་ཀྱི་འགྲོ་བ་འདུལ་མཛད་པ། །སེང་གདོང་ལ་སོགས་ཕྲ་མེན་བརྒྱད་རྣམས་དང་། །སྒོ་སྐྱོང་གདོང་མོ་བཞི་ལ་ཕྱག་འཚལ་བསྟོད། །ཧོཿ རྡོ་རྗེ་ཕྲ་མེན་མའི་ཚོགས་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །དྲུག་པ་འབར་མ་གསང་ཡུམ་དང་བཅས་པ་ནི། ལྕགས་ཀྱུའི་རྒྱ་དང་། ༀ་བཛྲ་ཨ་པྲ་ཏི་ཧ་ཨཱརྱ་ནི་ཙཏུ་ར་ཏ་ར་ཕཊ་རཀྨོ་ཧཱུཾ། ༀ་ཤྲཱི་བཛྲ་མུངྒ་ར་མུ་ཁ་ཤྭ་ར་ཡཱ་ཡ་ན་མཿ དེ་བཞིན་དུ། ར ག་མ་ཤྭ་ར་ཡཱ་ཡ། ཁ་ཊྭཱཾ་ཀཱ་པྲ་ཛྭ་ལ་ཡཱ་ཡ། གྷཎྜེ་པྲ་ཛྭ་ལ་ཡཱ་ཡ། ཨཾ་ཀུ་ཤ༴ རུ་ལུ༴ ཁྱམས་གཉིས་པ་སྒོ་དང་བཅས་མར་མེ་ལས་གསལ་ཤིང་དྲུག་པ་སྦར་བས། འབར་མ་བརྒྱད་དང་གསང་ཡུམ་བཞི་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། འབར་མ་གསང་ཡུམ་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ སོ་སོའི་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ཆོས་དབྱིངས་རྣམ་དག་ངང་ལས་རང་སྣང་བ། །སྣ་ཚོགས་ཅིར་ཡང་འགྱུར་བའི་སྐུར་སྟོན་མ། །སྤོར་མ་ཆེན་མོ་བརྒྱད་དང་གསང་བ་ཡི། །དགྱེས་བསྐྱེད་ཡུམ་ཆེན་བཞི་ལ་ཕྱག་འཚལ་བསྟོད། །ཧོཿ འབར་མ་བརྒྱད་དང་གསང་ཡུམ་བཞི་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བདུན་པ་དབང་མོ་ཉེར་བརྒྱད་ནི། ལྕགས་ཀྱུའི་རྒྱ་དང་། མ་ནུ་རཀྵ་སཱི་བྷྱོ། བྲཧྨ་ཎཱི་ར་ཏྲཱི། བེཥྞ་བཻ། ཀུ་མཱ་རཱི། ཨིནྡྲ་ཎཱི། བཛྲ་པིངྒ་ལཾ། ཨ་མྲྀ་ཏ། ས་མྱ། དཎྜ་དཾ། རཀྵ་སཱི། བྷཀྵ་སཱི། ར་ཏི་བཛྲ། རུ་དྷི་ར་མཏྟཱ། ཨེ་ཀ་ཙ་རི་ཎཱི། མ་ནོ་ཧ་རཾ། སིདྡྷི་ཀཾ །ཝཱ་ཡ་ཝཱི། མ་ཧཱ་མཱ་ར་ཎ་བཛྲ། ཨགྣཱི། ཝཱ་ར་ཧཱི། ཙ་མུཎྜཱི། སུ་ཏ་ནཾ། ཝ་རུ་ཎཱི། བཛྲ་མ་ཧཱ་ཀཱ་ལི། བཛྲ་ཙ་ཀཱ་ལ། བཛྲ་ཀུམྦྷ་ཀརྞ། བཛྲ་ལམྦོ་དྷ་ར། དེ་ཐམས་ཅད་ཀྱི་མཐར་བྷྱོ་རེ་སྦྱར། ཨུངྐུ་ཤ༴ རུ་ལུ༴ ཁྱམས་གསུམ་པ་སྒོ་དང་བཅས་པའི་མར་མེ་ལས་གསལ་ཤིང་བདུན་པ་སྦར་བས། དབང་མོ་ཉི་ཤུ་རྩ་བརྒྱད་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། དབང་ཕྱུག་ཉེར་བརྒྱད་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ སོ་སོའི་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། མི་ཡི་སྲིན་མོ་ལ་སོགས་ཉི་ཤུ་བརྒྱད། །དྲེགས་པ་ལྷ་ཆེན་རྣམས་ཀྱི་ཆུང་མ་སྟེ། །དབང་དྲག་ལས་ལ་ཐོགས་པ་མེད་པར་སྤྱོད། །དབང་མོ་ཉི་ཤུ་བརྒྱད་ལ་ཕྱག་འཚལ་བསྟོད། །ཧོཿ དབང་མོ་ཉེར་བརྒྱད་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ་ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བརྒྱད་པ་མཁའ་འགྲོ་སོ་གཉིས་ནི། ལྕགས་ཀྱུའི་རྒྱ་དང་། ཨེ་ཨཱ་ར་ལི་ཧཱུཾ། ཨངྐུ་ཤ༴ རུ་ལུ༴ ཁྱམས་བཞི་པ་སྒོ་དང་བཅས་པའི་མར་མེ་ལས་གསལ་ཤིང་བརྒྱད་པ་སྤར་བས། མཁའ་འགྲོ་སུམ་ཅུ་སོ་གཉིས་འོད་དང་སྤྲུལ་པར་བཅས་ཏེ་བྱོན། སྨན་ག ཏོར་རཀྟས་མཆོད། ༀ། མཁའ་འགྲོ་སོ་གཉིས་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ ཨེ་ཨཱ་ར་ལི་ཧཱུཾ་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །མཁའ་འགྲོ་སུམ་ཅུ་གཉིས་ལ་ཕྱག་འཚལ་བསྟོད། །ཧོཿ མཁའ་འགྲོ་སུམ་ཅུ་རྩ་གཉིས་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །དགུ་པ་མ་བདུན་སྲིང་བཞི་ནི། ལྕགས་ཀྱུའི་རྒྱ་དང་། མ་མ་དྷཱ་ཏུ་ཧཱུཾ། བཛྲ་དུནྟིཾ་བྷྱོ། ཨཾ་ཀུ་ཤ །རུ་ལུ༴ ཁྱམས་ལྔ་པ་སྒོ་དང་བཅས་པའི་མར་མེ་ལས་གསལ་ཤིང་དགུ་པ་སྦར་བས། མ་བདུན་སྲིང་བཞི་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། མ་བདུན་སྲིང་བཞིའི་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འགྲོས་དཔལ་ཆེན༴ ཚུར་འདུས་བདག་ལ༴ སྔགས་ཚན་གཉིས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། འཇིག་རྟེན་དྲེགས་པ་འདུལ་མཛད་མ་མོའི་ཚོགས། །ཕྱི་འཁོར་བསྲུང་ཞིང་ནང་འཁོར་སྐྱོང་མཛད་མ། །དུར་ཁྲོད་མ་བདུན་ལས་ཀྱི་སྲིང་མོ་བཞི། །བགེགས་འདུལ་མ་སྲིང་ཚོགས་ལ་ཕྱག་འཚལ་བསྟོད། །ཧོཿ མ་བདུན་སྲིང་བཞི་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཅུ་པ་ཀིང་ཆེན་བཅོ་བརྒྱད་ནི། ལྕགས་ཀྱུའི་རྒྱ་དང་། ཀིངྐ་ར་ཧ་ཧ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨ ངྐུ་ཤ༴ རུ་ལུ༴ ཁྱམས་དྲུག་པ་སྒོ་དང་བཅས་པའི་མར་མེ་ལས་གསལ་ཤིང་བཅུ་པ་སྦར་བས། ཀིངྐ་ར་བཅོ་བརྒྱད་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། ཀིང་ཆེན་བཅོ་བརྒྱད་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ རང་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ཁམས་གསུམ་སྒྲོལ་བར་བྱེད་པའི་གིང་བཅོ་བརྒྱད། །སྲིད་གསུམ་ལས་ལ་ཐོགས་མེད་སྒྲོལ་ལ་བརྩོན། །བསྒྲལ་བའི་ཞིང་བཅུ་གཏན་ནས་བརླག་པར་བྱེད། །ཀིང་ཆེན་ཀིང་ལྕམ་ཚོགས་ལ་ཕྱག་འཚལ་བསྟོད། །ཧོཿ ཀིང་ཆེན་པོ་བཅོ་བརྒྱད་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཅུ་གཅིག་པ་སྟེང་གི་ཕོ་ཉ་དྲུག་ཅུ་ནི། ལྕགས་ཀྱུའི་རྒྱ་དང་། ཀྲོ་དྷ་ཀྲོ་དྷཱི་ཧཱུཾ། ཨངྐུ་ཤ༴ རུ་ལུ༴ ཁྱམས་བདུན་པ་སྒོ་དང་བཅས་པའི་མར་མེ་ལས་གསལ་ཤིང་བཅུ་གཅིག་པ་སྦར་བས། སྟེང་གི་ཕོ་ཉ་ཁྲོ་བོ་ཁྲོ་མོ་ཡ་དྲུག་ཅུ་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། ཁྲོ་བོ་ཁྲོ་མོའི་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ རང་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། བཅོམ་ལྡན་ཧཱུཾ་མཛད་ས་གསུམ་བརྗིད་ཀྱིས་གནོན། །ཁམས་གསུམ་འདུལ་མཛད་ཡེ་ཤེས་ལྷ་ཡི་ལྷ། །འཇིགས་བྱེད་འབར་བས་གདུག་པའི་ཚོགས་རྣམས་འཇོམས། །ཁྲོ་བོ་ཁྲོ་མོ་རྣམས་ལ་ཕྱག་འཚལ་བསྟོད། །ཧོཿ སྟེང་གི་ཕོ་ཉ་ཁྲོ་ཚོགས་དྲུག་ཅུ་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཅུ་གཉིས་པ་ཕྱོགས་བཞི་ལས་ཀྱི་ཕོ་ཉ་དྲུག་ཅུ་ཕྲག་བཞི་ནི། ལྕགས་ཀྱུའི་རྒྱ་དང་། བྷ་ན་བྷ་ན་ཨངྐུ་ཤ་ཛཿ ཧ་ལ་ཧ་ལ་པཱ་ཤ་ཧཱུཾ། གརྫ་གརྫ་སྥོ་ཊ་བཾ། པ་ཙ་པ་ཙ་གྷཎྜེ་ཧོཿ ཨངྐུ་ཤ༴ རུ་ལུ༴ ཁྱམས་བརྒྱད་པའི་མར་མེ་ལས་གསལ་ཤིང་བཅུ་གཉིས་པ་སྦར་བས། ཕྱོགས་ཀྱི་ཕོ་ཉ་ཉིས་བརྒྱ་བཞི་བཅུ་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། ཕྱོགས་བཞི་ཕོ་ཉའི་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ སྔགས་ཚན་བཞི་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། ཡེ་ཤེས་ཐུགས་རྗེས་ཕྱོགས་ཀུན་ཁྱབ་པ་ཡིས། །གདོན་བགེགས་འདུལ་བའི་ཕྲིན་ལས་ཐོགས་པ་མེད། །ཅི་བགྱིའི་བཀའ་ཉན་ལས་རྣམས་མྱུར་སྒྲུབ་པའི། །ཕྱོགས་བཞིའི་ཕོ་ཉའི་ཚོགས་ལ་ཕྱག་འཚལ་བསྟོད། །ཧོཿ ཕྱོགས་ཀྱི་ཕོ་ཉ་ཉིས་བརྒྱ་བཞི་བཅུ་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཅུ་གསུམ་པ་འོག་གི་ཕོ་ཉ་དྲུག་ཅུ་ནི། ལྕགས་ཀྱུའི་རྒྱ་དང་། མ་མེ་ཤྭ་ར་ཧཱུཾ། ཨངྐུ་ཤ༴ རུ་ལུ༴ ཁྱམས་དགུ་པའི་མར་མེ་ལས་གསལ་ཤིང་བཅུ་གསུམ་པ་སྤར་བས། འོག་གི་ཕོ་ཉ་མ་མོ་དྲུག་ཅུ་འོད་དང་སྤྲུལ་པར་བཅས་ཏེ་བྱོན། སྨན་གཏོར་རཀྟས་མཆོད། ༀ། མ་མོ་དྲུག་ཅུའི་ཐུགས་ཀ་ནས། །སྙིང་པོ་རུ་ལུ་འབྲུ༴ གུ་ཧྱ་ཛྙཱ་ནའི༴ ཕར་འཕྲོས་དཔལ་ཆེན༴ ཚུར་འདུས་བདག་ལ༴ རང་སྔགས་ལ་རུ་ལུ་སྦྲེལ་བ་དང་། གུ་ཧྱ་བཟླ། ཧཱུཾ། སྟོང་ཁམས་ཡོངས་ཀྱི་ལས་ལ་དབང་བྱེད་པའི། །མ་ཆེན་རྒྱལ་མོ་སྲིད་པ་གསུམ་གྱི་བདག༴ ཡུམ་ཆེན་ལས་ལ་དབང་བའི་དབང་མོ་ཆེ། །མ་མོ་དྲུག་ཅུའི་ཚོགས་ལ་ཕྱག་འཚལ་བསྟོད། །ཧོཿ འོག་གི་ཕོ་ཉ་མ་མོ་དྲུག་ཅུ་ལ་དངོས་གྲུབ་ཏུ་གསོལ་བ་ནི་སོགས་སོ། །ཨངྐུ་ཤ་གསུམ་གྱིས། འོད་དང་སྤྲུལ་པ། ཡིག་འབྲུ། སྐུ་འོད་དུ་ཞུ་སྟེ་རང་ལ་བསྟིམ་མོ། །བཅུ་བཞི་པ་རིག་འཛིན་རྩལ་འཆང་གི་བླ་མ་ཐམས་ཅད་ལ་བླང་བ་ནི། ལྕགས་ཀྱུའི་རྒྱ་དང་། ༀ་མ་ཧཱ་གུ་རུ་ཤ་རི་རཾ་གཱི་ལི་ཧཱུཾ། བཛྲ་ཡོ་གི་གུ་རུ་ས་མ་ཡ་ཛཿ ཞེས་ཕྱིའི་ཁོར་ཡུག་གི་མར་མེ་ལས་གསལ་ཤིང་བཅུ་བཞི་པ་སྦར་བས། དུས་གསུམ་གྱི་རིག་འཛིན་བླ་མ་བྱེ་བ་ས་ཡའི་ཚོགས་རྣམས་འོད་དང་སྤྲུལ་པར་བཅས་ཏེ་གསལ་ཤིང་གི་རྩེ་མོར་བྱོན། མ་ཧཱ་པཉྩ་ཨ་མྲྀ་ཏ། མ་ཧཱ་བ་ལིཾ་ཏ། མ་ཧཱ་རཀྟ་ཁ་རཾ་ཁཱ་ཧིས་སྨན་གཏོར་རཀྟ་ཕུལ། ༀ། རྒྱུད་ལུང་མན་ངག་འཆང་བ་ཡི། །རིག་འཛིན་བླ་མའི་ཐུགས་ཀ་ནས། །སྙིང་པོ་རུ་ལུ་འབྲུ་བརྒྱད་དང་། །གུ་ཧྱ་ཛྙཱ་ནའི་འོད་འཕྲོས་པས། །ཕར་འཕྲོས་མཆོད་པས་ཐུགས་དམ་བསྐང་། །ཚར་འདུས་བདག་ལ་དངོས་གྲུབ་སྩོལ། །རང་སྔགས་ལ་རུ་ལུ་སྦྲེལ་བ་དང་། གུ་ཧྱ་ཛྙཱ་ནའང་བཟླ། ཧཱུཾ། རིག་འཛིན་བླ་མ་བྱིན་རླབས་ལྡན་པའི་ཚོགས། །རྣལ་འབྱོར་ལྔ་ཡི་ས་ལ་རབ་བཞུགས་པའི། །རྒྱ་བོད་རིག་འཛིན་གྲུབ་ཐོབ་ཚོགས་ལ་བསྟོད། །བསྐྱེད་རྫོགས་གསུམ་གྱི་དངོས་གྲུབ་འདིར་སྩོལ་ཅིག །ཧོཿ རིག་འཛིག་རྩལ་འཆང་རྩ་བརྒྱུད་ཀྱི་བླ་མའི་ཚོགས་ལ་དངོས་གྲུབ་ཏུ་གསོལ་བ་ནི་ཞེས་སོགས་སོ། །བཛྲ་ཨངྐུ་ཤ་ཛཿགསུམ་གྱིས། དང་པོས་འོད་དང་སྤྲུལ་པ། གཉིས་པས་ཡིག་འབྲུ། གསུམ་པས་སྐུ་འོད་དུ་ཞུ་སྟེ་རང་ལ་ཐིམ་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གཟི་བྱིན་དང་ལྡན་པར་བསམ་མོ། །དེ་ཡན་ཆད་ལྷ་ལས་དངོས་གྲུབ་བླང་བའོ། །དེ་ནས་རྫས་ལས་བླང་བ་ནི། ལས་ཐོར། མེ་ཏོག་གཏོར་དང་བདུད་རྩི་ཡི། །དངོས་གྲུབ་བླང་བ་ཚུལ་བཞིན་བྱ། །བཀྲ་ཤིས་ཟས་ཚེའི་དངོས་གྲུབ་ནི། །ཟླ་གམ་དབང་གི་གཞལ་ཡས་ནས། །བཀྲ་ཤིས་བརྗོད་དང་ཆ་ལྔར་བགོ། །རུ་ལུའི་བརྗོད་པ་མ་ལུས་བྱ། །ཞེས་པས། དང་པོ་བདུད་རྩི་སྨན་གྱི་དངོས་གྲུབ་བླང་སྟེ། རུ་ལུ་དང་གུ་ཧྱ་ཛྙཱ་ན་ཅུང་ཟད་བཟླས་ནས། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་བསྙེན་སྒྲུབ་ཡན་ལག་བཞིའི་སྒོ་ནས་བཟླས་བརྗོད་གྱི་མཆོད་པ་འབུལ་ཞིང་མཆི་ན། ཐུགས་རྗེ་ཆེན་པོས་དགོངས་ཤིང་བཞེས་ནས་བདག་ཅག་ལ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། ཞེས་དཀྱིལ་འཁོར་ལ་འདུད་ཅིང་མེ་ཏོག་དོར་ནས། ལྡིང་ཁྲི་བར་མའི་དབུས་ཀྱི་སྨན་གྱི་གསང་བུམ་སྤྱན་དྲངས་ལ་སློབ་དཔོན་གྱི་སྤྱི་བོར་བླངས་ཏེ། བདག་ཉིད་རང་བཞིན་གྱི་དཀྱིལ་འཁོར་དུ་གསལ་བ་ལ་བདུད་རྩིའི་དཀྱིལ་འཁོར་གཉིས་མེད་དུ་ཐིམ་པར་བསམ་ཞིང་། རུ་ལུ་དང་གུ་ཧྱ་ཛྙཱ་ནའི་མཐར། ཨ་མྲྀ་ཏ་ཀཱ་ཡ་ཝཱཀ་ཙིཏྟ་སིདྡྷི་ཕ་ལ་ཧོཿ ཞེས་རང་ཉིད་ཀྱིས་དངོས་གྲུབ་བླངས་རྗེས་སློབ་མ་རྣམས་ལའང་རིམ་པར་བསྐུར་རོ། །སྨན་གྱི་མདུན་གྱི་མར་མེ་བླངས་ཏེ། ཧོཿ འདུས་པ་ཆེན་པོའི་ལྷ་ཚོགས་རྣམས་ཀྱི་མི་གནས་པའི་ཡེ་ཤེས་དང་། སྟོང་པ་ཉིད་ཀྱི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོག་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་དང་། ཀློང་དུ་གྱུར་པའི་ཡེ་ཤེས་དང་། དབྱིངས་སུ་སྒྲོལ་བའི་ཡེ་ཤེས་དང་། འདའ་དཀའ་ཐུགས་ཀྱི་ཡེ་ཤེས་ཏེ། ཐུགས་ཡེ་ཤེས་དགུ་ནང་ནས་འཆར་བའི་དངོས་གྲུབ་བདག་ཅག་རྣམས་ཀྱིས་ཐོབ་བོ། །ཨ་ལ་ལ་ཧོཿ ཞེས་ཀུན་གྱི་ལག་ཏུ་འགྲིམ་ཞིང་སྙིང་གར་ཞུན་མར་བྱུག་གོ། །ཚེ་རིལ་དང་ཚེའི་ཛ་གད་བཏེག་ལ། ༀ། ཨཱ་ཡུཿདམར་པོ་རྡོ་རྗེ་དབང་གི་ཚེ། །གཞན་གྱིས་མི་འཕྲོག་ཁམས་གསུམ་ཀུན་ལས་རྒྱལ། །རང་གི་བྱང་སེམས་གདོད་ནས་སྐྱེ་ཤི་མེད། །མི་འགྱུར་ཚེ་ཡི་དབང་མཆོག་ཐོབ་པར་ཤོག །ༀ་སརྦ་ཏ་ཐཱ་ག་ཏ་མ་ཧཱ་གུ་ཧྱ་ཨཱ་ཡུ་རྫྙཱ་ན་བིནྡྷཱུ་བྷཱུཾ། བཛྲ་ཨཱ་ཡུ་ཥེ་ཛྙཱ་ན་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་ཚེ་རིལ་གཡས་དང་ཆང་གཡོན་བསྐོར་གྱིས་བྲིམ་ཞིང་ཚེ་མདུད་བྱས་པས་ཚེའི་དངོས་གྲུབ་ཐོབ་པར་མོས་ལ། ན་མོ། ཚེ་དབང་དུ་གྱུར་ཅིག །དབང་དངོས་གྲུབ་ཏུ་གྱུར་ཅིག །སྐྱེ་མེད་ཀྱི་ཡེ་ཤེས་སུ་གྱུར་ཅིག །འཆི་མེད་ཀྱི་བདུད་རྩིར་གྱུར་ཅིག །མི་འགྱུར་བ་གཡུང་དྲུང་དུ་གྱུར་ཅིག །མི་ཤིགས་པ་རྡོ་རྗེར་གྱུར་ཅིག །མི་ནུབ་པ་རྒྱལ་མཚན་དུ་གྱུར་ཅིག །ཚེ་དབང་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །ཅེས་སྨོན་ལམ་གདབ་བོ། །བཀྲ་ཤིས་ཀྱི་རྫས་གསལ་ཤིང་གི་ཟླ་གམ་དང་། དཔལ་བཤོས། དབང་བཤོས་རྣམས་བཏེག་ལ། ཧྲཱིཿ ཟླ་གམ་ཞལ་གྱི་དཀྱིལ་འཁོར་དུ། །རང་རིག་ཡེ་ཤེས་མངོན་སྣང་བའི། །འདོད་ཡོན་གསང་བའི་ལོངས་སྤྱོད་རྒྱན། །ཡོངས་སུ་རྫོགས་པའི་དངོས་གྲུབ་སྩོལ། །ཞེས་གཏད། གསོལ་བྱང་གི་ཐོད་པ་བླངས་ལ། ༀ་ལྟར་དཀར་ལ་འཚེར་བ་ཡབ་ཀྱི་དབང་། །ཨཱཿལྟར་དམར་ལ་དྭངས་པ་ཡུམ་གྱི་མཁའ། །ཧཱུཾ་ལྟར་སྨུག་ལ་འདྲིལ་བ་བྱང་ཆུབ་སེམས། །བླ་མེད་སྐུ་གསུང་ཐུགས་ཀྱི་དངོས་གྲུབ་སྩོལ། །ༀ་ཨཱཿཧཱུཾ་ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་གཏད། དེ་ནས་འདུས་པ་ཐམས་ཅད་ལ་དངོས་གྲུབ་ཀྱི་རྫས་གསལ་ཤིང་གི་འབྲང་རྒྱས་སོགས་བཟའ་བཅའ་རྣམས་གཡས་དང་། བཏུང་བའི་བྱེ་བྲག་རྣམས་གཡོན་བསྐོར་དུ་དྲང་ཞིང་། ཚོགས་ཀྱི་འཁོར་ལོའང་སྟོབ་ལ་རོལ་བར་བྱའོ། །མཇུག་ཏུ། ཧོཿ བདག་ཅག་དཔོན་སློབ་མཆེད་དང་ལྕམ་དྲལ་རྣམས་ཀྱི། རྡོ་རྗེའི་ཚེ་གསོལ་བས་ཚེ་དབང་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོ་ཐོབ་པར་གྱུར་ཅིག །ཛ་གད་དཔའ་བོ་གསོལ་བས་འགྲོ་བ་མང་པོ་དབང་དུ་འདུ་བར་གྱུར་ཅིག །ཟླ་རྒྱས་གསོལ་བས་ཚོགས་གཉིས་ཡོངས་སུ་རྫོགས་པར་གྱུར་ཅིག །གལ་ཕྱིས་གསོལ་བས་བསམ་པ་ཐམས་ཅད་ལྷུན་གྱིས་གྲུབ་པར་གྱུར་ཅིག །ཟླ་ཁྲོམ་གསོལ་བས་ཆོས་ཉིད་ཞི་བའི་ཏིང་ངེ་འཛིན་དང་ལྡན་པར་གྱུར་ཅིག །འཇམ་དེས་གསོལ་བས་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཞལ་ཟས་ཁ་བ་དང་མངར་བ་དང་སྐྱུར་བ་སོགས་རོ་རྣམ་པ་སྣ་ཚོགས་གསོལ་བས་ཞི་ཁྲོ་སྤྲུལ་པའི་ཚོགས་ལ་མངའ་བརྙེས་པར་གྱུར་ཅིག །ཅེས་བརྗོད་དོ། །དེ་ཡན་ཆད་རྫས་ལས་དངོས་གྲུབ་བླང་བའོ། །སྒྲུབ་ཆེན་གྱི་འགངས་ཆེ་ཤོས་དངོས་གྲུབ་ཆེན་པོ་ཡུམ་གྱི་མཁའ་ལས་བླང་བ་ནི་ཟབ་མོའི་མཆོག་དབང་དང་སྦྲེལ་ནས་མཛད་དོ། །ཆོ་གའི་མཇུག་སྡུད་ལ་གསུམ་ལས། ཤིས་པ་བརྗོད་པས་དངོས་གྲུབ་བརྟན་པར་བྱ་བ་ནི། སེམས་ཅན་དོན་ཕྱིར་ནན་ཏན་མཆོག་བསྐྱེད་དེ། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །མཆོག་དང་ཐུན་མོང་དངོས་གྲུབ་དམ་པ་རྣམས། །བདག་ལ་སྩལ་ཞིང་བརྟན་པར་བཞུགས་སུ་གསོལ། །ཀཱ་ཡ་ཝཱཀ་ཙིཏྟ་ཏིཥྛ་བཛྲ། ཞེས་རྟེན་འབྲེལ་སྙིང་པོས་བསྔགས་པའི་མེ་ཏོག་གི་ཆར་དབབ་ཅིང་རོལ་མོའི་སྒྲ་ཡང་བྱའོ། །དངོས་གྲུབ་ཀྱི་རྫས་ལྷག་ཆ་ལྔར་བགོ་བ་ནི། ཡི་དམ་ལྷའི་སྐལ་བ་བླ་མ། དཀྱིལ་འཁོར་ལྷའི་སྐལ་བ་རྒྱལ་ཐེབ། རིག་འཛིན་རྩལ་འཆང་གི་སྐལ་བ་ལས་ཅན་གྱི་སློབ་མ་གཅིག་ལ་དང་། དེ་ལྷག་ཆ་གཉིས་སུ་བྱས་པའི་གཅིག་མཆེད་གཞན་རྣམས་ལ་རིག་པས་སྤྱད་དེ་བྱིན་ཞིང་། ཆ་གཅིག་པོ་སྦྱིན་སྲེག་དང་གཏེར་གྱི་རྫས་སུ་བདོགས་ལ་བཞག་གོ། །རུ་ལུའི་ཛཔ྄་བྲོ་ནི། རུ་གླན་དབང་གི་རྗེས་ལ་མཛད། བླ་མ་རྩི་ལུང་པ་འདིར་མཛད། ཅེས་འགོས་ཀྱི་ལས་ཐོར་འབྱུང་བ་ལས། རྩ་བའི་ལས་ཐོའི་དགོངས་པ་ལྟར་ན་སྐབས་འདིར་བྱ་བ་འཐད་པར་སེམས་སོ། །དེ་དག་ནི་སྒྲུབ་པ་ཆེན་པོའི་ཡན་ལག་སྟེ། བསྙེན་སྒྲུབ་བཞིས་གཞུང་བསྲང་བ་ཚར་རོ། ༈ །ད་ནི་རྗེས་ཀྱི་ཆོ་ག་ལ་དོན་བརྒྱད་ལས། དང་པོ་མར་མེ་སྨོན་ལམ་ནི། དཔོན་སློབ་ཐམས་ཅད་ལག་བསྣོལ་བས་སྲིན་ལག་སྦྲེལ་ཏེ། གཡོན་པས་མར་མེ་བཟུང་ལ། ༀ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །སྙིང་པོ་བྱང་ཆུབ་ལམ་ལ་ཞུགས་པ་ཡིས། །འཁོར་བའི་གཡང་ས་ཆེན་པོར་མི་ལྟུང་ཞིང་། །ཆགས་སྡང་གཅོང་རོང་གནས་སུ་མི་སྐྱེ་དང་། །ལོག་ལྟ་དམྱལ་བའི་ཟངས་ཁར་རྦབ་མི་འདྲིལ། །འཁོན་འཛིན་གཅན་གཟན་གདུག་པའི་སྐད་མི་ཐོས། །ཉོན་མོངས་མཚོན་རྩེ་གདུང་པའི་ཟེར་མི་ཕོག །དགེ་བའི་བཤེས་གཉེན་བཀའ་དྲིན་ཆེ་བ་དང་། །སྲོག་གིས་སྦྲེལ་བའི་མཆེད་དང་ལྕམ་དྲལ་དང་། །གསུམ་པའི་དབང་གིས་སྦྲེལ་བའི་རིག་མ་གསུམ། །སྐྱེ་བ་འདི་དང་ཚེ་རབས་ཐམས་ཅད་དུ། །མི་འབྲལ་རྩེ་གཅིག་འགྲོགས་པའི་ཏིང་འཛིན་གྱིས། །ས་བཅུ་ཁྱད་པར་རིམ་གྱིས་བགྲོད་པར་ཤོག །ནམ་ཞིག་ཚེ་འཕོས་ལུས་བརྗེའི་དུས་བྱུང་ནས། །འཁོར་བའི་གཡང་སར་ལན་གཅིག་ལྷུངས་སྲིད་ཀྱང་། །སྣང་བའི་གོ་འབྱེད་ཞུན་མར་མདངས་གསལ་འདིས། །རིག་འཛིན་སྒྲུབ་པ་པོ་ཡི་ཤུལ་མཚོན་ཅིང་། །ཀུན་ཏུ་འོད་ཀྱི་ས་ལ་རྒྱུད་སྦྱངས་ནས། །པདྨ་ཆེན་པོའི་ས་ལ་ལྷུན་གྱིས་གྲུབ། །འཁོར་ལོ་ཚོགས་ཆེན་ས་ལ་གཤེགས་པའི་ཚེ། །སྔོན་གྱི་རྒྱལ་བ་རྣམས་ཀྱིས་མདུན་བསུས་ཤིག །ཡི་དམ་ལྷ་ཡིས་རྒྱབ་ནས་སྲོག་བརྟེན་ཅིག །བྱང་ཆུབ་སེམས་དཔའ་རྣམས་ཀྱིས་མཐའ་སྐྱོར་ཅིག །མཆོད་པའི་ལྷ་མོ་རྣམས་ཀྱིས་སྣ་དྲོངས་ཤིག །མ་ཚོགས་དབང་མོ་རྣམས་ཀྱིས་རྗེས་སྐྱོངས་ཤིག །ལྕང་ལོ་ཅན་གྱི་ས་ལ་ཕྱིན་པའི་ཚེ། །མི་ལྡོག་པ་ཡི་ས་ལ་གནས་ནས་ཀྱང་། །རྡོ་རྗེ་ཁྲོ་རྒྱལ་ཁྱོད་ཀྱི་ཞལ་མཐོང་ནས། །རིག་འཛིན་རྣམས་དང་དབྱེར་མེད་གྱུར་ནས་ཀྱང་། །བླ་མེད་སྐུ་གསུང་ཐུགས་སུ་གྲུབ་པར་ཤོག །གཉིས་པ་ཡོན་སྟོབ་ཅིང་གཉེར་བླང་བ་ནི། བཀའ་དྲིན་བསབ་ཕྱིར་སློབ་བུ་རྣམས་ཀྱིས་རང་གི་ཡིད་དུ་སྡུག་ཅིང་གཅེས་པའི་དངོས་པོ་ཅི་འབྱོར་གྱི་ཡོན་དབུལ་ཞིང་། མ་འབྱོར་ན་ཡིད་ཀྱི་ལུས་ལོངས་སྤྱོད་ཐམས་ཅད་ཕུལ་བར་མོས་ལ་མཎྜལ་དབུལ་དུ་གཞུག །དེ་ནས་རུའི་ཞབས་བུའི་སྤྱི་བོར་བཞག་ལ། དེ་རིང་ཕན་ཆད་བུ་ཁྱོད་ཀྱི། །རྡོ་རྗེ་སེམས་དཔའ་ང་ཡིན་གྱིས། །ང་ཡིས་ཇི་ལྟར་བསྒོ་བ་བཞིན། །བུ་ཁྱོད་ཀྱིས་ནི་བྱ་དགོས་སོ། །ཞེས་པའི་ལན་དུ་བུས། བླ་མ་རྡོ་རྗེ་རྒྱལ་པོ་ལ། །དད་མོས་གུས་པའི་སེམས་ལྡན་པས། །བཀའ་ཡི་ཇི་ལྟར་བསྒོ་བ་བཞིན། །ལུས་ངག་ཡིད་གསུམ་གཉེར་གྱིས་བླང་། །ཞེས་བཀའི་གཉེར་བླང་ངོ་། །གསུམ་པ་གཏོན་མ་བགོ་ཞིང་སྦྱིན་སྲེག་བྱ་བ་ནི། རྩ་རྒྱུད་ལས། གཏོར་མ་ལ་སོགས་རྫས་རྣམས་ནི། །ཆ་གསུམ་དག་ཏུ་བགོས་ནས་ཀྱང་། །གཅིག་གིས་སྦྱིན་སྲེག་ལས་ཆོག་བྱ། །གཅིག་ནི་རྣལ་འབྱོར་ལོངས་སྤྱོད་གཏེར། །གཅིག་གིས་མཁའ་འགྲོའི་འཁོར་ཚོགས་བསྐྱང་། །ཞེས་པས་འདས་གཏོར་རྣམས་དཀྱིལ་འཁོར་ནས་ཕྱིར་བསྣུར་ལ་ཆ་གསུམ་དུ་བགོས་པའི་དང་པོ་དེ་དངོས་གྲུབ་ཀྱི་རྫས་ལྷག་ཅུང་ཟད་དང་བསྲེས་ནས་སྦྱིན་སྲེག་གི་སྲེག་རྫས་སུ་དབུལ། དེའང་ཡང་དག་གསང་འགྲེལ་དུ། ལས་བཞི་གང་མོས་བྱ་བར་གསུངས་ཀྱང་། འདིར་བསྙེན་སྒྲུབ་ཀྱི་ཁ་བསྐང་བའི་དོན་དུ་ཞི་བའི་སྦྱིན་སྲེག་མཛད་པ་ཕྱག་ལེན་ནོ། །བཞི་པ་གཏེར་སྦ་བ་ནི། གཏོར་མ་ཆ་བར་པ་དེ་དངོས་གྲུབ་ཀྱི་རྫས་ལྷག་དང་མཉམ་དུ་བུམ་པར་བླུགས། དཀྱིལ་འཁོར་ཁང་པའི་འོག་ཏུ་དོང་ཟླ་གམ་དམར་པོས་སྒྱུར་བ་སྨན་རཀ་གིས་ཆག་ཆག་བཏབ་པའི་ནང་དུ་སྦ་ཞིང་། དེ་ཉིད་བྷྲཱུཾ་ལས་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པའི་གཏེར་དུ་གྱུར་པར་མོས་ལ། ཧཱུཾ། ས་ཡི་ལྷ་མོའི་མཁའ་དབྱིངས་སུ། །ཁྲག་འཐུང་རིགས་ལྔའི་གཏེར་སྦེད་དོ། །བདུད་རྩི་ལྔ་ཡི་གཏེར་སྦས་པས། །ཧེ་རུ་ཀ་ཡིས་མདུན་བསུས་ནས། །ཡེ་ཤེས་ལྔ་ཡི་དོན་རྟོགས་ཤོག །ཡེ་ཤེས་ལྔ་ཡིས་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །དབྱིངས་ཕྱུག་ལྔ་ཡིས་གཏེར་སྦེད་དོ། །ཤ་ཁྲག་རུས་པའི་གཏེར་སྦས་པས། །ཡུམ་ཆེན་ལྔ་ཡིས་མདུན་བསུས་ནས། །གསང་བའི་མཛོད་དང་འཕྲད་པར་ཤོག །སྐྱེ་མེད་དབྱིངས་ཀྱི་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །ཁྲོ་མོ་བརྒྱད་ཀྱིས་གཏེར་སྦེད་དོ། །རྣམ་ཤེས་བརྒྱད་ཀྱི་གཏེར་སྦས་པས། །མ་མོ་བརྒྱད་ཀྱིས་མདུན་བསུས་ནས། །གསང་བའི་རྫས་དང་འཕྲད་པར་ཤོག །རིག་པ་ཡེ་ཤེས་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །ཕྲ་མེན་བརྒྱད་ཀྱིས་གཏེར་སྦེད་དོ། །གསང་བའི་དམ་རྫས་གཏེར་སྦས་པས། །མགོ་བརྙན་རྣམས་ཀྱིས་མདུན་བསུས་ནས། །འདོད་ཡོན་ལྔ་དང་འཕྲད་པར་ཤོག །རིག་པ་ཡེ་ཤེས་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །སྒོ་མ་བཞི་ཡིས་གཏེར་སྦེད་དོ། །རྣམ་ཐར་བཞི་ཡི་གཏེར་སྦས་པས། །ཁྲོ་མོ་བཞི་ཡིས་མདུན་བསུས་ནས། །བདུད་བཞིའི་འཇིགས་ལས་ཐར་བར་ཤོག །རིག་པ་ཡེ་ཤེས་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །དབང་ཕྱུག་མ་ཡིས་གཏེར་སྦེད་དོ། །དམ་རྫས་བདུད་རྩིའི་གཏེར་སྦས་པས། །དམ་ཅན་རྣམས་ཀྱིས་མདུན་བསུས་ནས། །བདུད་རྩིའི་ཟས་དང་འཕྲད་པར་ཤོག །རིག་པ་ཡེ་ཤེས་རྒྱས་གདབ་བོ། །ས་ཡི་ལྷ་མོའི་མཁའ་དབྱིངས་སུ། །ཁྲོ་བོ་བཅུ་ཡིས་གཏེར་སྦེད་དོ། །དམ་རྫས་རུས་པའི་གཏེར་སྦས་པས། །ཁྲག་འཐུང་རྣམས་ཀྱིས་མདུན་བསུས་ནས། །རྡོ་རྗེའི་གྲལ་དང་འཕྲད་པར་ཤོག །རིག་པ་ཡེ་ཤེས་རྒྱས་གདབ་བོ། །རྡོ་རྗེ་སློབ་དཔོན་མཆེད་ལྕམ་གྱིས། །དམ་རྫས་གཏོར་མའི་གཏེར་སྦས་པས། །ཟག་མེད་གཏེར་ལ་ལོངས་སྤྱོད་ཅིང་། །གསང་བའི་དཀྱིལ་འཁོར་དངོས་གྲུབ་རྣམས། །འདོད་ཡོན་ལྔ་ཡི་ལོངས་སྤྱོད་ཀྱིས། །འགྲོ་བའི་རེ་འདོད་སྐོང་བར་ཤོག །ཅེས་སྦའོ། །ལྔ་པ་གཏོར་མ་བཏང་ཞིང་བྲོ་བྱ་བ་ནི། གཏོར་མ་ཆ་ཐ་མ་དེ་ཆོས་སྐྱོང་རྣམས་ཀྱི་གཏོར་མ་དང་མཉམ་དུ་གཏོར་སྐྱོང་གི་ཆོ་གས་དབུལ་ལ། ལྷག་མ་བསྡུས་ཏེ། མཆོད་པའི་རས་མ་དང་། ཕྱགས་དར་བཅས་སྣོད་དུ་བླུགས་ཅིང་། སྒྲུབ་པའི་དུས་ཀྱི་ལྷག་གཏོར་སྐེ་ཚང་དུ་བསགས་པ་རྣམས་དང་ལྷན་ཅིག་ཏུ་ཁྱེར་ལ། ལས་མཁན་གྱིས་དཀྱིལ་འཁོར་ཁང་པ་ནས་གོམ་པ་བདུན་ཅུའི་སར་ལྷག་མའི་དཀྱིལ་འཁོར་གཏོར་མ་དང་བཅས་པ་བཤམས་ལ་ལྷག་གཏོར་ཆོ་ག་རྒྱས་པར་བྱ་ཞིང་། བཤལ་ཆུས་བརྟན་མ་བསྐྱངས་ནས། སླར་ནང་དུ་འོང་བའི་ཚེ་སྲུང་འཁོར་གསལ་བཏབ་པའི་ནང་དུ་རྣལ་འབྱོར་པ་འཁོར་བཅས་ཀྱི་གནས་ལུས་ལོངས་སྤྱོད་ཐམས་ཅད་ཚུད་ནས། མེའི་ར་བའི་འོད་ཟེར་གྱིས་རྐྱེན་ངན་བར་ཆད་ཐམས་ཅད་ཀྱི་བསྲུང་བ་ཆེན་པོར་བསམ་མོ། །དེ་ནས་སྒྲུབ་ཁང་གི་ཐེམ་པའི་ཕྱི་རོལ་སྔར་དམ་སྲིའི་མནན་པ་བྱས་པའི་སྟེང་དུ་གཏོར་གཞོང་ཐམས་ཅད་ཁ་སྦུབ་པའི་མཐར་བྲོར་བཅས་ནས་ལས་བཞིའི་བྲོ་བྱ་སྟེ། དེ་ལ་སྒྲུབ་པ་པོ་ཐམས་ཅད་བྲོ་ར་ཟླུམ་པོར་བཅའ་ཞིང་ལག་གཡས་སྟེང་དུ་བསྣོལ་བའི་ལུ་གུ་རྒྱུད་ཀྱིས་མཛུབ་མོ་སྦྲེལ་ལ། ཡ་བྷྲཱུཾ། ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་ཀྱི་འཇིག་རྟེན་ཞི་བའི་དཀྱིལ་འཁོར་ཆུ་ཤེལ་གྱི་རང་བཞིན་ཅན་དཀར་ཞིང་ཟླུམ་པ་འོད་ཟེར་འཕྲོ་བའི་དབུས་སུ། ནང་བཅུད་ཀྱི་སེམས་ཅན་ཐམས་ཅད་བུདྡྷ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་སྤྲུལ་པའི་འོད་ཟེར་དཀར་པོ་འཕྲོ་བས་ཞི་བའི་ཕྲིན་ལས་མཛད་པར་གྱུར། ཧཱུཾ། གཏི་མུག་རྡོ་རྗེ་འཁོར་བཅས་ཀྱི། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་གྱིས་ནི་ཞི་མཛད་པས། །ཞི་བའི་ལས་རྣམས་སྒྲུབ་པར་མཛོད། །ༀ་སུམྦྷ་ནི་སུམྦྷ་སོགས་ཧཱུཾ་བཞི་པའི་སྔགས་ཀྱི་མཐར། བདག་ཅག་དཔོན་སློབ་འཁོར་དང་བཅས་པའི་ནད་གདོན་དགྲ་བགེགས་སྡིག་སྒྲིབ་ཉེས་ལྟུང་སོགས་ཉེས་ཚོགས་ཐམས་ཅད་ཤཱིནྟཾ་ཀུ་རུ་སྭཱ་ཧཱ། ཞེས་བྲོ་བརྡུང་ཞིང་ཕྱག་རྒྱ་སྤྲུགས་ཏེ་བཤིག་གོ། །ཡང་བྲོ་ར་གྲུ་བཞིར་བཅའ་ཞིང་ལག་བསྣོལ་བ་ལས་གུང་མོ་སྦྲེལ་ལ། མ་བྷྲཱུཾ། ༀ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་ཀྱི་འཇིག་རྟེན་རྒྱས་པའི་དཀྱིལ་འཁོར་སེར་པོ་གྲུ་བཞི་པ་འོད་ཟེར་འཕྲོ་བའི་དབུས་སུ། ནང་བཅུད་ཀྱི་སེམས་ཅན་ཐམས་ཅད་རིན་ཆེན་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་ལྷ་ཚོགས་སྤྲུལ་པའི་འོད་ཟེར་སེར་པོ་འཕྲོ་བས་རྒྱས་པའི་ཕྲིན་ལས་མཛད་པར་གྱུར། ཧཱུཾ། ང་རྒྱལ་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །དཔལ་དང་གཟི་བརྗིད་ཆེན་པོ་རྣམས། །ཡུད་ཙམ་གྱིས་ནི་རྒྱས་པར་མཛོད། །སུམྦྷའི་མཐར། བདག་ཅག་དཔོན་སློབ་འཁོར་དང་བཅས་པའི་ཚེ་དཔལ་ལོངས་སྤྱོད་འཕྲུལ་དང་གཟི་བརྗིད་སོགས་ལེགས་ཚོགས་ཡོན་ཏན་ཐམས་ཅད་པུཥྚིཾ་ཀུ་རུ་ༀ། ཡང་བྲོ་ར་ཟླ་གམ་བཅའ་ཞིང་ལག་བསྣོལ་བ་ལས་སྲིན་ལག་སྦྲེལ་ལ། ཝཾ་བྷྲཱུཾ། ༀ་པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་ཀྱི་འཇིག་རྟེན་དབང་གི་དཀྱིལ་འཁོར་དམར་པོ་ཟླ་གམ་འོད་ཟེར་འཕྲོ་བའི་དབུས་སུ། ནང་བཅུད་ཀྱི་སེམས་ཅན་ཐམས་ཅད་པདྨ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་ལྷ་ཚོགས་སྤྲུལ་པའི་འོད་ཟེར་དམར་པོ་འཕྲོ་བས་དབང་གི་ཕྲིན་ལས་མཛད་པར་གྱུར། ཧཱུཾ། འདོད་ཆགས་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཐམས་ཅད་དབང་དུ་བསྡུས་ནས་ཀྱང་། །དབང་དུ་མ་གྱུར་གང་ཡང་མེད། །སུམྦྷའི་མཐར། བདག་ཅག་དཔོན་སློབ་འཁོར་དང་བཅས་པས་ཁམས་གསུམ་གྱི་ཆེ་བཙན་དྲེགས་པ་ཅན་ཐམས་ཅད་ཝཱ་ཤཾ་ཀུ་རུ་ཧོཿ ཡང་བྲོ་ར་གྲུ་གསུམ་དུ་བཅའ་ཞིང་ལག་བསྣོལ་བ་ལས་མཐེའུ་ཆུང་སྦྲེལ་ལ། ཨེ་བྷྲཱུཾ། ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་ཀྱི་འཇིག་རྟེན་དྲག་པོའི་དཀྱིལ་འཁོར་གྲུ་གསུམ་མཐིང་ནག་འབར་བའི་མེ་འོད་འཕྲོ་བའི་དབུས་སུ། ནང་བཅུད་ཀྱི་སེམས་ཅན་ཐམས་ཅད་རྡོ་རྗེ་རིགས་ཀྱིས་གཙོ་བྱས་པའི་ཁྲག་འཐུང་རྔམས་པའི་ལྷ་ཚོགས་སྤྲུལ་པའི་འོད་ཟེར་མཐིང་ནག་འཕྲོ་བས་དྲག་པོའི་ཕྲིན་ལས་མཛད་པར་གྱུར། ཧཱུཾ། ཞེ་སྡང་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི༴ ཐལ་བའི་རྡུལ་དུ་རླག་ནས་ཀྱང་། །དྲག་པོའི་ལས་རྣམས་སྒྲུབ་པར་མཛོད། །སུམྦྷའི་མཐར། བདག་ཅག་དཔོན་སློབ་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་གདུག་པ་ཅན་ཐམས་ཅད་མཱ་ར་ཡ་ཧཱུཾ་ཕཊ། ཅེས་བྲོ་བརྡུང་ཞིང་ཕྱག་རྒྱ་སྤྲུགས་པས་ལས་དེ་དང་དེ་གྲུབ་པར་བསམ་མོ། །དྲུག་པ་དཀྱིལ་འཁོར་བསྡུ་ཞིང་མཚམས་དགྲོལ་བ་ནི། དཀྱིལ་ཆོག་ལྟར་རྡུལ་ཚོན་གྱི་ཉིན་སྔ་མ་རྣམས་དང་རས་བྲིས་ལ་རྣམ་པ་ཐམས་ཅད་དུ་མཆོད་བསྟོད་བཟོད་པར་གསོལ་ནས་ཡེ་ཤེས་པ་བརྟན་བཞུགས་བྱ། རྡུལ་ཚོན་གྱི་ཉིན་ཐ་མའི་ཚེ་ཡེ་ཤེས་པ་བཏེག་ནས་མཆོད་བསྟོད་བཟོད་གསོལ་བྱས་ནས་གཤེགས་སུ་གསོལ། གར་ལྟར་ཡང་སྒྲུབ་ཐབས་ལྟར་ཏིང་འཛིན་དམ་ཚིག་གི་འཁོར་ལོ་འོད་གསལ་དུ་བསྡུ་ཞིང་། དེ་ལས་ལངས་ནས་གོ་བགོ་ལུས་བསྲུང་རྣམས་བྱས་ཏེ། ཕྱི་རོལ་དུ་སོང་ལ། ཕྱོགས་ཐོ། རྒྱལ་ཐོ། སྒོ་བྱང་ཕྱི་ནང་རྣམས་ཀྱི་དྲུང་དུ་གཏང་རག་གི་མཆོད་གཏོར་བཤམས་པ། སྔར་བཞིན་བྱིན་གྱིས་བརླབས་ནས་ཕུལ་ལ། ཕྱིན་ཆད་ཀྱང་བར་ཆད་མི་འབྱུང་བ་གསོལ་བ་གདབ་ཅིང་། ཡ་ཧི་གཙྪས་གཤེགས་སུ་གསོལ། དེ་ནས་ནང་དུ་ཞུགས་ནས་དཀྱིལ་ཆོག་ལྟར་ཕུར་བུ་དབྱུང་བ་དང་མཚན་མའི་དཀྱིལ་འཁོར་བསྡུ་བ་རྣམས་བྱས་ལ་རྡུལ་ཚོན་ཆུ་བོར་གཤེགས་གསོལ་བྱའོ། །བདུན་པ་བསྔོ་ཤིས་བྱ་བ་ནི། རྩ་རྒྱུད་ལས། གནས་སུ་བཀྲ་ཤིས་ལ་སོགས་ཀྱི། །སྒྲུབ་པ་རྫོགས་པར་མཐར་དབྱུང་ངོ་། །ཞེས་པས་དགེ་བ་བསྔོ་ཞིང་སྨོན་ལམ་བཏབ་ལ་བཀྲ་ཤིས་དང་དགའ་སྟོན་གྱིས་མཐའ་རྒྱས་པར་བྱའོ། །བརྒྱད་པ་གནས་བསྲུང་བ་ནི། སྒྲུབ་པ་པོ་རྣམས་ཞག་གཅིག་ཕྱི་རོལ་དུ་མི་འགྲོ། དེ་ནས་ཀྱང་ཞག་གསུམ་ཙམ་གྱི་བར་དུ་ཐག་རིང་དུ་མི་འགྲོ་ཞིང་བླ་མ་མིན་པ་གཞན་ལ་ཕྱག་མི་འཚལ། ལས་གཞུང་ཚར་རེ་བསྲངས་ཏེ་གཏོར་མ་བཏང་ཞིང་མཚམས་ཁད་ཀྱིས་དགྲོལ། དུས་རྟག་ཏུ་སྤྱོད་ལམ་རྒྱུན་གྱི་རྣལ་འབྱོར་ལས་མི་འབྲལ་བར་བྱ་ཞིང་། བླ་མ་དམ་པ་ལ་སངས་རྒྱས་ཀུན་འདུས་ཀྱི་འདུ་ཤེས་བཞག་ནས་བསྙེན་བཀུར་གྱིས་མཉེས་པ་སྒྲུབ་པ་ལ་འབད་པར་བྱའོ། །རྒྱུད་ལུང་མན་ངག་ཟབ་བརླིང་དཔག་དཀའ་བ། །ཤེས་རབ་དབང་པོས་ལེགས་པར་དཔྱད་པ་ལས། །འདུས་པའི་བསྙེན་སྒྲུབ་ཆོས་དོན་གསལ་བྱེད་པ། །རིན་ཆེན་འོད་ཀྱི་སྣང་བའི་དཔལ་འདི་ཤར། །དགེ་འདིས་གསང་ཆེན་རྡོ་རྗེ་ཐེག་པ་ཡི། །བསྟན་པ་ཕྱོགས་དུས་ཀུན་ཏུ་རྒྱས་པ་དང་། །ཧེ་རུ་ཀ་དཔལ་འཁོར་ལོ་ཚོགས་ཆེན་གྱི། །དཀྱིལ་འཁོར་གཅིག་ཏུ་འགྲོ་ཀུན་འགྲུབ་གྱུར་ཅིག །འདུས་པ་མདོའི་དབང་རྒྱུད་དང་མན་ངག་གི་ལུགས་གཅིག་ཏུ་དྲིལ་ནས་བསྙེན་སྒྲུབ་ཡན་ལག་བཞི་དང་འབྲེལ་བར་བསྐུར་བའི་སྒྲུབ་ཁོག་གི་ཆིངས་རིན་ཆེན་འོད་ཀྱི་སྣང་བ་ཞེས་བྱ་བ་འདི་ཡང་སྐྱེས་བུ་དམ་པ་དུ་མའི་གསུང་གིས་བསྐུལ་བའི་ངོར། རྒྱལ་ཀུན་སྤྱི་གཟུགས་གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་གྱིས་འཚོ་བའི་གཉོས་བཙུན་རྨོངས་པ་དྷརྨ་ཤྲཱིས་རང་ལོ་ང་གཉིས་པ་ཤིང་མོ་བྱ་ལོ་ཆུ་སྟོད་ཟླ་བའི་དཀར་ཕྱོགས་ཀྱི་རྒྱལ་བ་དང་པོའི་ཚེས་ལ་གངས་རིའི་ཁྲོད་ཀྱི་པདྨ་འོད་ཨོ་རྒྱན་སྨིན་གྲོལ་གླིང་གི་ཆོས་གྲྭར་གྲུབ་པར་སྦྱར་བ་དགེ་ལེགས་སུ་གྱུར་ཅིག། །།

འདུས་མདོའི་རྒྱུན་ཁྱེར་ཉེར་བསྡུས། འཇིགས་མེད་གླིང་པ།

འདུས་མདོའི་རྒྱུན་ཁྱེར་ཉེར་བསྡུས་བཞུགས། ཚོགས་ཆེན་འདུས་པའི་ལྷ་ལ་ཕྱག་འཚལ་ལོ། །འདུས་མདོའི་རྒྱུན་ཁྱེར་ནི། རྡོ་རྗེ་སློབ་དཔོན་སངས་རྒྱས་དཔལ། །སོགས་ནས། བསྡུས་ཏེ་བྱང་ཆུབ་ཆེན་པོར་བསྔོ། །ལན་གསུམ་གྱིས་རྒྱུད་དག་པར་བྱས་ནས། བསྐྱེད་པའི་རིམ་པ་ནི། ཤཱུ་ནྱ་ཏས་ཆོས་ཉིད་དོན་ལ་མཉམ་པར་བཞག་སྟེ། ཧཱུཾ། སྟོང་ཉིད་དབྱིངས་ཆོས་དེ་ལྟར་མ་རྟོགས་པའི། །འགྲོ་ལ་སྙིང་རྗེའི་རང་མདངས་ལྷག་མཐོང་རྩལ། །རྒྱུ་རྐྱེན་ལས་འདས་སྤྲུལ་པའི་གཞལ་མེད་ཁང་། །འོག་མིན་ཚོགས་ཆེན་འདུས་པའི་ཕོ་བྲང་ནི། །འབར་བའི་གཞལ་ཡས་ཕྱི་ནང་རིམ་པ་དགུ །སྒོ་ཁྱམས་དགུ་པའི་ཕྱི་མར་རྒྱུ་འབྲས་ཀྱི། །རྟ་བབ་གཉིས་ལྡན་ཕོ་བྲང་དབུས་མའི་ནང་། །རྡོ་རྗེ་བྲག་ཆེན་པདྨ་སྟོང་བརྡལ་ལ། །ཐབས་ཤེས་ཉི་ཟླ་དབང་ཕྱུག་ཁྱོ་ཤུག་ནི། །ཉི་ཤུ་རྩ་གཅིག་སྟེང་དུ་དཔའ་གཏུམ་སྟག །འཇིགས་བྱེད་སེངྒེ་གདུག་པ་གཟིག་དང་ནི། །གཏུམ་པ་དོམ་དང་སྟོབས་ཆེན་གླང་པོ་དང་། །བརྗིད་པ་མ་ཧེ་འཛིན་པ་ཆུ་སྲིན་དང་། །ཞེ་སྡང་ལྟོ་འགྲོས་བྱོལ་སོང་གཙོ་བརྒྱད་རེས། །དྲེགས་པ་ཕོ་མོ་ཟུང་བཞི་བརྫིས་པའི་སྟེང་། །འཁོར་འདས་ཀུན་གྱི་སྤྱི་དཔལ་བཅོམ་ལྡན་འདས། །ཆེ་བའི་ཆེ་མཆོག་ཨིནྡྲ་ནི་ལའི་མདངས། །ཉི་མ་བྱེ་བའི་འོད་ལྡན་བདུན་གསུམ་ཞལ། །ཞབས་བརྒྱད་ཕྱག་ནི་བཞི་བཅུ་རྩ་གཉིས་ནི། །ཞི་བའི་ལྷ་ཚོགས་བཞི་བཅུ་རྩ་གཉིས་བསྣམས། །གནམ་ཞལ་ཡུམ་མཆོག་དབུ་དགུ་ཕྱག་བཅོ་བརྒྱད། །རྩ་བའི་ཕྱག་གཉིས་རྡོ་རྗེ་དུང་ཁྲག་འཛིན། །ལྷག་མས་གནས་ཡུལ་མ་མོ་ཕྲ་མེན་བསྣམས། །ཡབ་ཡུམ་ཁྲོ་མཁར་ཚུལ་ལམ་མཉམ་པར་སྦྱོར། །སྲིད་དང་ཞི་བའི་ཆོས་ཁམས་མ་ལུས་པ། །བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས། །དབུ་རྒྱན་འཁོར་ལོའི་བར་ལ་རང་བཞིན་རྫོགས། །དབང་མཆོག་དང་ནི་ཧེ་རུ་ཀ་དཔལ་དགུ། །གློ་འབུར་བཞི་དང་གྲུ་ཆད་རྣམ་བཞི་ལ། །རྣམ་ཤེས་ཚོགས་བརྒྱད་ག་རཱི་ལ་སོགས་བརྒྱད། །དཀྱིལ་འཁོར་དང་པོའི་ཁྱམས་ལ་ཕྲ་མེན་བརྒྱད། །གཉིས་པའི་ཁྱམས་ལ་སྤོར་མ་རྣམ་པ་བརྒྱད། །གསུམ་པའི་ཁྱམས་ལ་དབང་མོ་ཉི་ཤུ་བརྒྱད། །ཀུན་ལ་རང་རང་སྒོ་མ་བཞི་བཞིར་ལྡན། །འབར་བའི་རྣམ་རོལ་གར་དགུའི་ཉམས་ཀྱིས་བརྗིད། །འདི་དག་རང་སྣང་ལོངས་སྐུའི་དཀྱིལ་འཁོར་ཏེ། །གཞི་སྣང་ལྷུན་གྲུབ་དོན་གྱི་འོག་མིན་ཡིན། །བཞི་པའི་ཁྱམས་ལ་མཁའ་འགྲོ་སུམ་ཅུ་གཉིས། །ལྔ་པའི་ཁྱམས་ལ་མ་བདུན་སྲིང་མོ་བཞི། །དྲུག་པའི་ཁྱམས་ལ་གིང་ཆེན་དྲུག་ཚན་གསུམ། །བདུན་པར་ཁྲོ་བོ་ཡབ་ཡུམ་བཅུ་ཕྲག་དྲུག ། བརྒྱད་པར་ཕོ་ཉ་ཉིས་བརྒྱ་བཞི་བཅུ་སྟེ། །དགུ་པའི་ཁྱམས་ལ་མ་མོ་དྲུག་ཅུ་རྣམས། །ལོག་འདྲེན་འདུལ་ཕྱིར་སྤྲུལ་པས་བསྡུས་པའི་ཕྱིར། །བགེགས་སོགས་གདུལ་བྱ་སོ་སོའི་རང་ངོར་སྣང་། །སྟེང་ཁང་ཞི་བ་བྱང་ཆུབ་སྙིང་པོའི་གནས། །དབང་མཛད་ཞི་བ་བཞི་བཅུ་རྩ་གཉིས་ལས། །དམ་པའི་སྟངས་དཔྱལ་གཉིས་ནི་སྤྲུལ་གཞི་སྟེ། །ཀུན་ལ་ཁྱབ་པར་གདལ་བས་ཆོས་ཀྱི་སྐུ། །འགྲོ་དྲུག་སོ་སོའི་གནས་སུ་དོན་མཛད་པའི། །རིག་པའི་སྐྱེས་བུ་དྲུག་ནི་སྤྲུལ་པར་ཤར། །རང་སྣང་ལོངས་སྐུའི་ཞིང་ན་སུམ་ཅུ་གཉིས། །གཙོ་བོ་བཅུ་ལ་ཉེར་བཞི་འཁོར་གྱི་ཚུལ། །ཕུང་ཁམས་སྐྱེ་མཆེད་གནས་སུ་དག་པའི་ལྷ། །གདན་གསུམ་ཚང་བའི་དཀྱིལ་འཁོར་ཆེན་པོ་ནི། །དམ་ཡེ་གཉིས་མེད་ལྷུན་གྲུབ་ཆེན་པོར་གསལ། །ཞེས་སྟོང་ཉིད་གསལ་ཁྱབ་ཅན་གྱི་རྣམ་པར་ངེས་ཤེས་བསྐྱེད་ལ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་དྷཱི་ཤྭ་རཱི་ཧཱུཾ་ཕཊ། ཅེས་གཙོ་བོའི་སྙིང་པོ་དང་། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་སྟེང་ཁང་ཞི་བ་ཡོངས་རྫོགས་གྱི་སྙིང་པོ་ཅི་ནུས་སུ་བཟླའོ། །དེ་དག་གི་དམིགས་རིམ་ནི། གཙོ་འཁོར་རྣམས་ལས་འོད་ཟེར་འཕྲོས་པས་མ་དག་པའི་སྣོད་བཅུད་ཐམས་ཅད་དག་པའི་སྣོད་བཅུད་དུ་སྦྱང་ཞིང་མཐར། དག་པའི་སྣོད་བཅུད་ཀྱང་རིམ་པས་གཙོ་བོའི་ཐུགས་སྲོག་གི་ནཱ་དའི་བར་བསྡུས་ནས་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་མཉམ་པར་འཇོག་ཅིང་། རྗེས་ཐོབ་ལ་དགེ་བ་བསྔོ་བ་སྤྱི་དང་མཐུན་ནོ། །ཅེས་པའང་རྡོ་རྗེའི་སློབ་བུ་འཇིགས་མེད་དགའ་བའི་ངོར་རིག་འཛིན་འཇིགས་མེད་གླིང་པས་སོ།། །།

འདུས་པ་མདོའི་རྒྱུན་ཁྱེར་ཉེར་བསྡུས་དཔག་བསམ་སྙེ་མ་དཔལ་ཆེན་འདུས་པ།

འདུས་པ་མདོའི་རྒྱུན་ཁྱེར་ཉེར་བསྡུས་དཔག་བསམ་སྙེ་མ་བཞུགས། ཚོགས་ཆེན་འདུས་པའི་ལྷ་ལ་ཕྱག་འཚལ་ལོ། །འདུས་པ་མདོའི་རྒྱུན་ཁྱེར་ནི། གནས་དབེན་པར་རྟེན་དང་མཆོད་གཏོར་སོགས་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས་ནས། རྡོ་རྗེ་སློབ་དཔོན་སངས་རྒྱས་དཔལ། །སོགས་ནས། བསྡུས་ཏེ་བྱང་ཆུབ་ཆེན་པོར་བསྔོ། །ལན་གསུམ་གྱིས་རྒྱུད་དག་པར་བྱས་ལ། ཆོས་ཐམས་ཅད་སྟོང་ཞིང་བདག་མེད་པ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་རང་རྩལ་ལས། བཛྲ་མ་ཧཱ་ཤྲཱི་ཧེ་རུ་ཀ །ཞེས་བརྗོད་པས། བདག་ཉ ིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་ཡུམ་ཀྲོ་དྷི་ཤྭ་རི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ་ཧ་ལ་ཧ་ལ། ཞེས་བརྗོད་པས་ཐུགས་ཀའི་ཧཱུྃ་ལས་ཁྲོ་བོའི་སྤྲིན་སྤྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་པ་ལས་སྟེང་འོག་ཕྱོགས་མཚམས་བཅུར་ཉི་མ་ལ་གནས་པའི་ཕྱོགས་སྐྱོང་བཅུའི་སྙིང་གར། ༀ་བཛྲ་ཀྲོ་དྷ་ཀཱི་ལ་ཡ་ཕཊ་ཛཿ ཞེས་ཕུར་བུའི་ཚུལ་དུ་བཏབ་པ་རྣམས་ཁྲོ་བོ་བཅུར་གྱུར་པ་ནི། ༀ་ཧཱུྃ་ཀཱ་ར་བཛྲ་མ་ཧཱ་ཀྲོ་དྷ་ཧཱུྃ་ཧཱུྃ་ཕཊ། དེ་བཞིན་དུ་ཧཱུྃ་ཀཱ་ཱ རའི་ཚབ་ཏུ། བི་ཛ་ཡ། ནཱི་ལ་དཎྜ། ཡ་མཱནྟ་ཀ །ཨརྻ་ཨ་ཙ་ལ་ཧ་ཡ་གྲཱི་བ་ཨ་བ་རཱ་ཛི་ཏ། ཨ་མྲི་ཏ་ཀུཎྜ་ལི། ཏཻ་ལོ་ཀྱ་ཤི་ཛ་ཡ། མ་ཧ་བ་ལ། རྣམས་བཅུག་སྟེ། ཞེས་བརྗོད་པའི་རྐྱེན་གྱིས་རིམ་པ་བཞིན། སྟེང་དུ་ཧཱུྃ་མཛད། ཤར་དུ་རྣམ་རྒྱལ། མེར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། རླུང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་པ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ལ་སྨད་ཕུར་བུ་འབར་བའི་རྣམ་པས་བགེགས་ལ་གཟིར་བ། དབྱིངས་ཀྱི་ཡུམ་ཅན། སྤྲུལ་པའི་ཕྲ་མེན་ཉི་ཤུ་དང་ཡང་སྤྲུལ་བྱེ་བ་ས་ཡའི་ཚོགས་ཀྱི་སྤྲིན་འཕྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་གྱུར། ཧཱུྃ། སྟེང་འོག་ཕྱོགས་མཚམས་དངོས་པོ་ཅིར་སྣང་ཡང་། །ཁྲོ་བཅུ་ཡབ་ཡུམ་བསྒོམས་པའི་བྱིན་རླབས་ཀྱིས། །ཕྱོགས་བཅུར་གནས་པའི་བགེགས་རྣམས་ཀུན་བསལ་ནས། །སྒྲུབ་པའི་བར་ཆད་མིང་ཡང་མེད་པར་ཤོག །ན་མོ་ཧཱུྃ ། ཞེས་མཚམས་བཅད། དེ་ནས་བཛྲ་ས་མཱ་ཛཿས། བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མཁའ་ཁྱབ་ཏུ་སད་པར་མོས་ལ། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་ཡིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བཤགས། ཧཱུྃ། སྒྲིབ་པ་རྣམ་གཉིས་དངོས་པོ་ཅིང་སྣང་ཡང་། །ཡིད་ཀྱིས་མངོན་དུ་བཤགས་པའི་བྱིན་རླབས་ཀྱིས། །སྒྲིབས་པ་ཡེ་ནས་དག་བའི་དོན་རྟོགས་ནས། །ཡེ་ཤེས་རྣམ་གཉིས་མངོན་དུ་གསལ་བར་ཤོག །ན་མོ་ཧཱུྃ། དེ་ནས་མཆོད་རྫས་རྣམས། རཾ་ཡཾ་ཁཾ། གིས་བསྲེག་གཏོར་བཀྲུས་ཏེ་སྟོང་པར་སྦྱངས། སྟོང་པའི་ངང་ལས་སྣོད་དབྱིངས་ཀྱི་བྷཉྫར་བཅུད་དམ་རྫས་ཡེ་ཤེས་ལྔའི་ངོ་བོ་གནས་པའི་དབུས་སུ་ཆེ་མཆོག་ཧེ་རུ་ཀ །བདག་བདུད་རྩི་འཁྱིལ་པར་གསལ་བའི་གཡོན་པའི་མཐེ བ་སྲིན་ལ་རྟ་མགྲིན་ཡབ་ཡུམ། བཛྲ་ཨ་མྲྀ་ཏ་ༀ་ཨཱཿཧཱུྃ་ཧྲཱི་ཋ། ཞེས་བཟླས་པས། བདག་གིས་འོད་ཀྱིས་འཁོར་འདས་ཀྱི་བདུད་རྩི་བསྡུས་ནས་ཐིམ་པས་ཞུ་ཞིང་། རྟ་མགྲིན་ཡབ་ཡུམ་རོལ་པའི་བྱང་སེམས་དང་རོ་གཅིག་ཏུ་འདྲེས་ནས་ཡེ་ཤེས་ཀྱིས་བདུད་རྩིར་གྱུར་སྟོང་པའི་ངང་ལས་གཏོར་གཞོང་ཡུམ་ལྔའི་མཁའ་ཀློང་དུ། ༀ་མ་ཧཱ་བ་ལི་ཏཾ་ཏེ་ཛྭ་བ་ལིཾ་ཏ་བ་ལ་བྷ་ཏཻ་གུ་ཧྱ་ས་མ་ཧཱུྃ་ཕཊ། ཞེས་བཟླས་པས། གཏོར་མ་ཡེ་ཤེས་ལྔའི་རོལ་པ་འདོད་ཡོན་ལོངས་སྤྱོད་ཀྱི་གཏེར་དུ་གྱུར། སྟོང་པའི་ངང་ལས་སྣོད་པདྨ་འབར་བའི་དབྱིངས་སུ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋ། ཞེས་བཟླས་པས། བཅུད་རཀྟ་ཡེ་ཤེས་ཀྱི་རྦ་ཀློང་འཁྲུག་པ་ལ་ཁམས་གསུམ་གྱི་རཀྟ་ཐམས་ཅད་ཞུགས་ཤིང་འདྲེས་པར་གྱུར། སྟོང་པའི་ངང་ལས་མཆོད་སྣོད་དབྱིངས་ཀྱི་ཞིང་ཁམས་སུ་མཆོད་རྫས་ཡེ་ཤེས་ལྔའི་རྣམ་རོལ་འདོད་ཡོན་གྱི་སྤྲིན་འཕྲོ་བར་གྱུར། ན་མསྶ་མནྟ་བུདྡྷཱ་ནཱཾ་ག་ག་ན་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷུ་པེ་དྷུ། པུཥྤེ་པུ། ཨ་ལོ་ཀེ་ཧྲཱིཿ གནྡྷེ་གན། ཞེས་བརྗོད་པས་བྱིན་གྱིས་བརླབ་ལ ། ཧཱུྃ། ཐུན་མོངས་རྫས་ཀྱི་དངོས་པོ་ཅིར་སྣང་ཡང་། །མཆོད་པ་བྱིན་གྱིས་བརླབས་པའི་ནུས་མཐུ་ཡིས། །འདོད་པའི་ཡོན་ཏན་ཡོངས་སུ་རྫོགས་གྱུར་ནས། །དུས་གསུམ་བདེ་གཤེགས་མ་ལུས་མཆོད་པར་ཤོག །ན་མོ་ཧཱུྃ། ཞེས་བརྗོད་དོ། །དངོས་གཞི་བསྐྱེད་པའི་རིམ་པ་ནི། ཤུ་ནྱ་ཏྱས་ཆོས་ཉིད་ཀྱི་དོན་ལ་མཉམ་པར་བཞག་སྟེ། ཧཱུྃ། སྟོང་ཉིད་དབྱིངས་ལས་དེ་ལྟར་མ་རྟོགས་པའི། །འགྲོ་ལ་སྙིང་རྗེའི་རང་མདངས་ལྷག་མཐོང་རྩལ། །རྒྱུ་རྐྱེན་ལས་འདས་སྤྲུལ་པའི་གཞལ་མེད་ཁང་། །འོག་མིན་ཚོགས་ཆེན་འདུས་པའི་ཕོ་བྲང་ནི། །འབར་བའི་གཞལ་ཡས་ཕྱི་ནང་རིམ་པ་དགུ། །སྒོ་ཁྱམས་དགུ་པའི་ཕྱི་མར་རྒྱུ་འབྲས་ཀྱི། །རྟ་བབས་གཉིས་ལྡན་ཕོ་བྲང་དབུས་མའི་ནང་། །རྡོ་རྗེའི་བྲག་ཆེན་པདྨ་སྟོང་བརྡལ་བ། །ཐབས་ཤེས་ཉི་ཟླར་དབང་ཕྱུག་ཁྱོ་ཤུག་ནི། །ཉི་ཤུ་རྩ་བཞིའི་སྟེང་དུ་དཔའ་གཏུམ་སྟག །འཇིགས་བྱེད་སེང་གེ་གདུག་པ་གཟིག་དང་ནི། །གཏུམ་པ་དོམ་དང་སྟོབས་ཆེན་གླང་པོ་དང་། །བརྗིད་པ་མ་ཧེ་འཛིན་པ་ཆུ་སྲིན་དང་། །ཞེ་སྡང་ལྟོ་འགྲོ་བྱོལ་སོང་གཙོ་བརྒྱད་རེས། །དྲེགས་པ་ཕོ་མོ་ཟུང་བཞི་བརྫེས་པའི་སྟེང་། །འཁོར་འདས་ཀུན་གྱི་སྤྱི་དཔལ་བཅོམ་ལྡན་འདས། །ཆེ་བའི་ཆེ་མཆོག་ཨིནྡྲ་ནཱི་ལའི་མདངས། །ཉི་མ་བྱེ་བའི་འོད་ལྡན་བདུན་གསུམ་ཞལ། །ཞབས་བརྒྱད་ཕྱག་ནི་བཞི་བཅུ་རྩ་གཉིས་ན། །ཞི་བའི་ལྷ་ཚོགས་བཞི་བཅུ་རྩ་གཉིས་རྣམས། །གནམ་ཞལ་ཡུམ་མཆོག་དབུ་དགུ་ཕྱག་བཅོ་བརྒྱད། །རྩ་བའི་ཕྱག་གཉིས་རྡོ་རྗེ་དུང་ཁྲག་འཛིན། །ལྷག་མས་གནས་ཡུལ་མ་མོ་ཕྲ་མེན་བསྣམས། །ཡབ་ཡུམ་ཁྲོ་མཁར་ཚུལ་དུ་མཉམ་པར་སྦྱོར། །སྲིད་དང་ཞི་བའི་ཆོས་ཁམས་མ་ལུས་པ། །བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས། །དབུ་རྒྱན་འཁོར་ལོའི་བར་ལ་རང་བཞིན་རྫོགས། །དབང་མཆོག་དང་ནི་ཧེ་རུ་ཀ་དཔལ་དགུ། །གློ་འབུར་བཞི་དང་གྲུ་ཆད་རྣམ་བཞི་ལ། །རྣམ་ཤེས་ཚོགས་དག་ག་རི་ལ་སོགས་བརྒྱད། །དཀྱིལ་འཁོར་དང་པོའི་ཁྱམས་ལ་ཕྲ་མེན་བརྒྱད། །གཉིས་པའི་ཁྱམས་ལ་སྤོར་མ་རྣམ་པ་བརྒྱད། །གསུམ་པའི་ཁྱམས་ལ་དབང་མོ་ཉི་ཤུ་བརྒྱད། །ཀུན་ལ་རང་རང་སྒོ་མ་བཞི་བཞིར་ལྡན། །འབར་བའི་རྣམ་རོལ་གར་དགུའི་ཉམས་ཀྱིས་བརྗིད། །འདི་དག་རང་སྣང་ལོངས་སྐུའི་དཀྱིལ་འཁོར་ཏེ། །གཞི་སྣང་ལྷུན་གྲུབ་དོན་གྱི་འོག་མིན་ཡིན། །བཞི་པའི་ཁྱམས་ལ་མཁའ་འགྲོ་སུམ་བཅུ་གཉིས། །ལྔ་པའི་ཁྱམས་ལ་མ་བདུན་སྲིང་མོ་བཞི། །དྲུག་པའི་ཁྱམས་ལ་གིང་ཆེན་དྲུག་ཚན་གསུམ། །བདུན་པར་ཁྲོ་བོ་ཡབ་ཡུམ་བཅུ་ཕྲག་དྲུག །བརྒྱད་པར་ཕོ་ཉ་ཉིས་བརྒྱ་བཞི་བཅུ་སྟེ། །དགུ་པའི་ཁྱམས་ལ་མ་མོ་དྲུག་ཅུ་རྣམས། །ལོག་འདྲེན་འདུལ་ཕྱིར་སྤྲུལ་པས་བསྡུས་པའི་ཕྱིར། །བགེགས་སོགས་གདུལ་བྱ་སོ་སོའི་རང་ངོར་སྣང་། །སྟེང་ཁང་ཞི་བ་བྱང་ཆུབ་སྙིང་པོའི་གནས། །དབང་མཛད་ཞི་བ་བཞི་བཅུ་རྩ་གཉིས་ལས ། །དམ་པའི་སྟང་དཔྱལ་གཉིས་ནི་སྤྲུལ་གཞི་སྟེ། །ཀུན་ལ་ཁྱབ་པས་བརྡལ་བས་ཆོས་ཀྱི་སྐུ། །འགྲོ་དྲུག་སོ་སོའི་གནས་སུ་དོན་མཛད་པའི། །རིག་པའི་སྐྱེས་བུ་དྲུག་ནི་སྤྲུལ་པར་ཤར། །རང་སྣང་ལོངས་སྐུའི་ཞིང་ན་སུམ་ཅུ་བཞི། །གཙོ་བོ་བཅུ་ལ་ཉེར་བཞི་འཁོར་གྱི་ཚུལ། །ཕུང་ཁམས་སྐྱེ་མཆེད་གནས་སུ་དག་པའི་ལྷ། །གདན་གསུམ་ཚང་བའི་དཀྱིལ་འཁོར་ཆེན་པོ་ནི། །དམ་ཡེ་གཉིས་མེད་ལྷུན་གྲུབ་ཆེན་པོར་གསལ། །ཞེས་སྟོང་ཉིད་གསལ་ཁྱབ་ཅན་ཀྱི་རྣམ་པར་ངེས་ཤེས་བསྐྱེད་ལ། ཧཱུྃ། ཕྱི་ནང་སྣོད་བཅུད་དངོས་པོ་ཅིར་སྣང་ཡང་། །གཞལ་ཡས་ལྷ་རུ་བསྒོམ་པའི་བྱིན་རླབས་ཀྱིས། །ཕུང་ཁམས་སྐྱེ་མཆེད་རྟོག་པ་རྣམ་དག་ནས། །འོག་མིན་དཀྱིལ་འཁོར་ལྷུན་གྱིས་གྲུབ་པར་ཤོག །ན་མོ་ཧཱུྃ། དེ་ནས་དབང་བསྐུར་བ་ནི། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་། ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅་ཧཾ། ཨཱ་ཱདཪྴ། ས་མ་ཏཱ། པྲ་ཏྱ་བེཀྵ་ན། ཀྲྀ་ཏྱཱ་ནུཥྛ། ཞེས་བརྗོད་པས། སྤྱི་བོའི་གནས་ལྔར་དེ་བཞིན་གཤེགས་པ་རིགས་ལྔ་ཡབ་ཡུམ་རྗེས་ཆགས་ཀྱིས་ཞུ་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བས། དེ་བཞིན་གཤེགས་པ་རིགས་ལྔས་དབུ་བརྒྱན་པར་གྱུར། བྱིན་རླབས་ནི། རྡོ་རྗེའི་ཕྱག་རྒྱ་གནས་གསུམ་དུ་གཏུག་ཅིང་། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱདྨ་ཀོ྅་ཧཾ། ཝཱཀ྄༴ ཙིཏྟ༴ གནས་གསུམ་དུ་ཟླ་བ་པདྨ་ཉི་མ་ལ་གནས་པའི་ༀ་ཨཱཿཧཱུྃ། འོད་ཟེར་འཕྲོས་འདུས་ཡོངས་སུ་གྱུར་པ་ལས་རྣམ་སྣང་། འོད་དཔག་མེད་མི་བསྐྱོད་པ་རྣམས་ཀྱིས་རྒྱས་བཏབ་པར་གྱུར། ཧཱུྃ། ལུས་ངག་ཡིད་གསུམ་དངོས་པོ་ཅིར་སྣང་ཡང་། །དབང་བསྐུར་བྱིན་གྱིས་རླབས་པའི་ནུས་མཐུ་ཡིས། །ཉོན་མོངས་དངོས་པོ་མ་ལུས་ཀུན་བྱང་ནས། །སྐུ་དང་ཡེ་ཤེས་ལྷུན་གྱིས་གྲུབ་པར་ཤོག །ན་མོ་ཧཱུྃ། དེ་ནས་ཡེ་ཤེས་ཀྱི་འཁོར་ལོ་སྤྱན་དྲངས་པ་ནི། བཛྲ་ས་མཱ་ཛཿ རུ་ལུ་རུ་ལུ་ཧཱུྃ། གིས་སྙན་གསན་ཕབ་ལ། ༀ་ཐུགས་རྗེ་ལྕགས་ཀྱུས་ཐུགས་དམ་རྒྱུད་སྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་ལ། །བདེ་གཤེགས་བཞུགས་ཅིང་རྣམ་གྲོལ་དགྱེས་པ་བསྐྱེད། །ༀ་ཧྱ་ཧི་ཤྲཱི་ཧེ་རུ་ཀ་ཨ་ར་ལི་དྲྀ་ཤ་ཧོཿ ས་མ་ཡ་ཧོ༔ ས་མ་ཡ་སྟྭཾ། ཛཿཧཱུྃ་བཾ་ཧོཿ ཨེ་ཨ་ར་ལི་ཧྲིཾ་ཧྲིཾ། གིས་སྤྱན་དྲངས། ཛཿཧཱུྃ་བཾ་ཧོཿ ས་བསྟིམ་ལ། ཏིཥྛ་བཛྲ་གྱིས་བརྟན་པར་བྱས་ཏེ། དམ་ཚིག་གི་འཁོར་ལོ་དང་དབྱེར་མེད་དུ་བཞུགས་པར་གྱུར། །ཧཱུྃ། སངས་རྒྱས་སེམས་ཅན་དངོས་པོ་ཅིར་སྣང་ཡང་། །བདེ་གཤེགས་སྤྱན་དྲངས་བསྟིམ་པའི་བྱིན་རླབས་ཀྱིས། །ཡེ་ནས་སངས་རྒྱས་ཡིན་པའི་དོན་རྟོགས་ནས ། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུྃ། དེ་ནས་དབྱིངས་ལ་ཡེ་ཤེས་སམ་ལྷ་ལ་ལྷ་རོལ་པའི་ཚུལ་གྱིས་ཕྱག་མཆོད་བྱས་པར་མོས་ལ། ༀ་སརྦ་ཏ་ཐཱ་ག་ཏ་སཏྭ་བྷནྡྷ་ནཱཾ་ཀ་རོ་མི། ཨ་ཏི་པུ་ཧོ༔ པྲ་ཏི་ཛ་ཧོཿ ཞེས་ཕྱག་བྱས་ལ། ཧཱུྃ། བཟང་ངན་ཆེ་ཆུང་ཁྱད་པར་ཅིར་སྣང་ཡང་། །དཀྱིལ་འཁོར་ལྷ་ལ་ཕྱག་བཙལ་བྱིན་རླབས་ཀྱིས། །ཡེ་ནས་འདྲེས་པ་ཆེན་པོའི་དོན་རྟོགས་ནས། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུྃ། མཆོད་པ་ནི། ཧཱུྃ། འབྱུང་བ་ཆེན་པོ་ནམ་མཁའ་ནི། འབྱུང་བ་ཆེན་པོ་ལྔ་ཡི་མཛོད། །ནམ་མཁའ་ལས་ནི་འདོད་པ་འབྱུང་། །འདོད་པའི་མཆོད་པ་འབྱུང་གྱུར་ཅིག །ༀ་ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏ་ངྑཾ་ཨུདྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧས་ཀུན་བཟང་། ༀ་ཨཱ་ཧ་ར་ཨཱ་ཧ་ར་སརྦ་བི་དྱ་དྷ་ར་པཱུ་ཛི་ཏེ་ན་མཿ སམནྟ་བུདྡྷ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱས་ཞབས་བསིལ། ༀ་ཤྲཱི་བཛྲ་རཱ་ག་དྷུ་པེ་དྷུ། པུཥྤེ་པུ། ཨཱ་ལོ་ཀེ་ཧྲཱིཿ གེནྡྷེ་གན། ཞེས་བཞི་བསྣོལ་ཕུལ་ནས། ཧཱུྃ། བདག་དང་གཞན་གྱི་དངོས་པོ་ཅིར་སྣང་ཡང་། །དཀྱིལ་འཁོར་ལྷ་ལ་མཆོད་པའི་བྱིན་རླབས་ཀྱིས། །འཁོར་གསུམ་ཡོངས་སུ་དག་པའི་དོན་རྟོགས་ནས། །དངོས་གྲུབ་རྣམ་གསུམ་ལྷུན་གྱིས་གྲུབ་པར་ཤོག །ན་མོ་ཧཱུྃ། སྨན་མཆོད་ནི། མ་ཧཱ་པཉྩ་ཨ་མྲྀ་ཏ་ཁཱ་ཧིས་ཕུལ། ཀཱ་ཡ་སིདྡྷི་ༀཿཝཱཀྐ་སིདྡྷི་ཨཿ ཙིཏྟ་སིདྡྷི་ཧཱུྃ། ཞེས་སྨན་གྱི་དངོས་གྲུབ་བླངས་ལ། ཧཱུྃ། བཞི་བརྒྱ་རྩ་བཞིའི་ནད་རྣམས་ཅིར་སྣང་ཡང་། །བདུད་རྩི་སྨན་མཆོག་མཆོད་པའི་བྱིན་རླབས་ཀྱིས། །ཡུན་དུ་གནོད་པའི་ནད་རྣམས་ཀུན་བྲལ་ནས། །སྐྱེ་ཤི་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུྃ། གཏོར་མ་ནི། མ་ཧཱ་བ་ལིང་ཏ་པྲ་ཏཱི་ཙྪ་ཁཱ་ཧིས་ཕུལ་ལ། ཧཱུྃ། སྟོང་ཕྲག་བརྒྱད་ཅུའི་བགེགས་རྣམས་ཅིར་སྣང་ཡང་། །དམ་རྫས་གཏོར་མས་མཆོད་པའི་བྱིན་རླབས་ཀྱིས། །འཕྲལ་དུ་སྐབས་འཚོལ་གནོད་པ་ཀུན་བསལ་ནས། །འགྱུར་བ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུྃ། རཀྟ་ནི། མ་ཧཱ་རཀྟ་པྲ་ཏཱིཙྪ་ཁཱ་ཧིས་ཕུལ་བ། ཧཱུྃ། ཞེན་ཅིང་ཆགས་པའི་དངོས་པོ་ཅིང་སྣང་ཡང་། །ཁམས་གསུམ་ཁྲག་གི་རྒྱ་མཚོ་ཕུལ་བའི་མཐུས། །དུག་ལྔ་མ་ལུས་རྩད་ནས་དག་གྱུར་ཏེ། །གཉིས་མེད་མཆོད་པ་ལྷུན་གྱིས་གྲུབ་པར་ཤོག །ན་མོ་ཧཱུྃ། སྦྱོར་མཆོད་ནི། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་ཎ་བཛྲ་སྭ་བྷ་ཝ་ཨདྨ་ཀོ྅་ཧཾ། ཞེས་ལྷ་ཐམས་ཅད་སྙོམས་འཇུག་གི་བདེ་བས་མཉེས་པར་བསམ་པ་དང་། བསྒྲལ་མཆོད་ནི། བོ་དྷི་ཙིཏྟ་སྥ་ར་ཎ་ཕཊ། ཅེས་བྱང་ཆུབ་སེམས་ཀྱི་འོད་ཟེར་གྱི་སྤྲིན་སྤྲོས་པས་འཁོར་བའི་འཁྲུལ་རྟོག་འོད་གསལ་གྱི་དབྱིངས་སུ་བསྒྲལ་བར་བྱས་ལ། ཧཱུྃ། ཆགས་སྡང་རྣམ་གཉིས་དངོས་པོ་ཅིར་སྣང་ཡང་། །ཏན་གན་རྣམ་གཉིས་ཕུལ་བའི་བྱིན་རླབས་ཀྱིས། །ཉོན་མོངས་དུག་གསུམ་རྩད་ནས་དག་གྱུར་ཏེ། །བདག་གཞན་དོན་གཉིས་ལྷུན་གྱིས་གྲུབ་པར་ཤོག །ན་མོ་ཧཱུྃ། འདོད་ཡོན་ནི། མ་ཧཱ་པཱུ་ཛ་ཧོ། ཞེས་པས་སྣང་བ་ཐམས་ཅད་འདོད་ཡོན་གྱི་རོལ་མོར་འཆར་ཞིང་དེ་ཉིད་དབྱིངས་རིག་དབྱེར་མེད་བདེ་བ་ཆེན་པོར་རོ་མཉམ་པར་བལྟས་ལ། ཧཱུྃ། ཡུལ་དང་དབང་པོའི་དངོས་པོ་ཅིར་སྣང་ཡང་། །འདོད་ཡོན་རྣམ་ལྔས་མཆོད་པའི་བྱིན་རླབས་ཀྱིས། །ཡུལ་སེམས་གཉིས་སུ་མེད་པའི་དོན་རྟོགས་ནས། །སྤྱོད་ཡུལ་མ་ལུས་ཡོངས་སུ་དག་པར་ཤོག །ན་མོ་ཧཱུྃ་བསྟོད་པ་ནི། དབྱིངས་ཀུན་རང་བཞིན་རྣམ་དག་པས། །ཐུགས་རྗེའི་དབང་གིས་སྐུར་བཞེངས་པ། །རྡོ་རྗེ་དབྱིངས་ཀྱི་ལྷ་ཚོགས་དག །རང་སྣང་ལྷ་ལ་ཕྱག་འཚལ་བསྟོད། །བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཁྲོ་བོའི་ཚོགས་ལ་ཕྱག་འཚལ་བསྟོད། །ཅེས་བསྟོད་ལ། ཧཱུྃ། ཉོན་མོངས་སྡུག་བསྔལ་དངོས་པོ་ཅིར་སྣང་ཡང་། །གླུ་དང་སྒྲ་སྙན་རོལ་མོས་བསྟོད་པའི་མཐུས། །ཐམས་ཅད་ཐེག་པ་ཆེན་པོའི་སྒྲར་གྱུར་ནས། །གསང་སྔགས་དོན་ཉིད་ཀུན་གྱིས་རྟོགས་པར་ཤོག །ན་མོ་ཧཱུྃ། སྨོན་ལམ་དང་འདོད་གསོལ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱིི་བདག་ཉིད་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རིགས་ལྔ་རྒྱལ་བ་རྒྱ་མཚོའི་འཁོར་བསམ་གྱིས་མི་ཁྱབ་པ་དང་བཅས་པ་ཐམས་ཅད་དང་། བཅོམ་ལྡན་འདས་ཆེ་མཆོག་ཧེ་རུ་ཀ་ལ་སོགས་ཏེ་ཧེ་རུ་ཀ་དགུ་ཀློང་འབར་བ་ཁྲོ་བོ་དང་ཁྲོ་མོ་བསམ་གྱིས་མི་ཁྱབ་པ་ཐམས་ཅད་གསན་ཅིང་དགོངས་སུ་གསོལ། བདག་ཅག་རྣལ་འབྱོར་གྱི་མཆོད་པ་དམ་པ་རིག་པའི་ཁྱད་པར་ལས་བྱུང་བ་ཕྱི་ནང་གསང་བ་གསུམ་གྱི་ཚུལ་དུ་ཕུལ་བས་སྐུ་གསུང་ཐུགས་ཀྱི་རྒྱུད་མཉེས་པ་ཆེན་པོས་ཁྱབ་པར་གྱུར་ཅིག །དེའི་བྱིན་རླབས་ཀྱིས་མཐའ་ཡས་པའི་སེམས་ཅན་ཐམས་ཅད་རྡོ་རྗེ་འཆང་གི་གྲལ་ཐོབ་པར་གྱུར་ཅིག །བདག་ཅག་གི་དམ་ཚིག་ཉམས་པ་ཐམས་ཅད་སྐོངས་ཏེ་དངོས་གྲུབ་ཀྱི་སྣོད་དུ་གྱུར་ནས་ཡི་གེ་འཁོར་ལོ་ཚོགས་ཆེན་གྱི་སར་སངས་རྒྱས་ཏེ་འཁོར་བ་ཀ་དག་པར་གྱུར་ཅིག །ཨ་ལ་ལ་ཧོ། ཞེས་དང་། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། བཅད་གཏུབས་སྡུག་བསྔལ་ལུས་ལ་འབྱུང་བར་མི་འགྱུར་ཡང་། གྲི་མ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། ཞེས་བརྗོད་ལ། ཧཱུྃ། ཡིད་ལ་བསམ་པའི་དངོས་པོ་ཅིར་སྣང་ཡང་། སྨོན་ལམ་མངོན་དུ་བཏབ་པའི་བྱིན་རླབས་ཀྱིས། ཡིད་ལ་ཅི་བསམ་ལྷུན་གྱིས་གྲུབ་ནས་ཀྱང་། འགྲོ་དོན་མ་ལུས་ལྷུན་གྱིས་གྲུབ་པར་ཤོག །ན་མོ་ཧཱུྃ། དེ་ནས་ཛཔ྄་ཀྱི་དམིགས་པ་ནི། བྷྲཱུཾ་བི་ཤྭ་བི་ཤུདྡྷེ་ཀ་པཱ་ལ་བྷྲཱུཾ་ཕཊ་ཛཿ ཧཱུྃ་ༀ་སྭཱ་ཨཱཾ་ཧཱ་ཕཊ་ཛཿ ཧཱུྃ་ཧ་ཧེ་ཕཊ་བྷྱོ་རཾ་ཕཊ་ཛཿ ཏིང་ངེ་འཛིན་གྱི་དཀྱིལ་འཁོར་ལས་རང་བཞིན་གྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབ་འབྱོར་གྱི་ཚུལ་དུ་བཞུགས་པར་གྱུར། བདག་མདུན་གྱི་ལྷ་རྣམས་ཀྱི་ཡེ་ཤེས་སེམས་དཔའི་ཐུགས་ཀར་རང་རང་གི་ཕྱག་མཚན་ས་བོན་གྱིས་མཚན་པ་བཟླ་བྱའི་སྔགས་ཀྱིས་བསྐོར་བར་གྱུར། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་བརྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་ཟེར་གྱི་རྣམ་པར་བདག་ལ་སྩལ་ཞིང་ཐིམ་པ་དང་། གཙོ་འཁོར་རྣམས་ལས་འོད་ཟེར་འཕྲོས་པས་མ་དག་པའི་སྣོད་བཅུད་དག་པའི་སྣོད་བཅུད་དུ་སྦྱང་བར་གྱུར་པར་བསམ་ཞིང་། ལུས་ཀྱི་སྒུལ་བསྐྱོད་ཅི་བྱས་དམ་ཚིག་གི་ཕྱག་རྒྱ། ངག་གི་བཟླས་བརྗོད་ཆོས་ཉིད་ཀྱི་སྒྲ་གདངས། སེམས་ཀྱི་དྲན་རྟོག་དབྱིངས་རིག་དབྱེར་མེད་རྩ་བ་བྱང་ཆུབ་ཀྱི་སེམས་སུ་རྟོགས་པར་བྱས་ཏེ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུྃ། ཀ་ཏ་མ་ཧཱ་ཀྲོ་དྷི་ཤྭ་རི་ཧཱུྃ་ཕཊ། ཞེས་གཙོ་བོའི་སྙིང་པོ་དང་། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུྃ། ཞེས་སྟེང་ཁང་ཞི་བ་ཡོངས་རྫོགས་ཀྱི་སྙིང་པོ་དང་། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཁྲོ་བོ་སྤྱི་དྲིལ་རྣམས་བཟླ་བའམ། སྤྲོ་ན་སྒྲུབ་ཐབས་ལྟར་བསྐྱེད་སྔགས་རྣམས་ཀྱང་ཅི་ནུས་སུ་བཟླའོ། །བཟླས་པའི་ཚད་རབ་མཚན་མའི་བསྙེན་པ་རྟགས་མཐོང་། འབྲིང་དུས་བསྙེན་ཟླ་དྲུག་སོགས་དང་། ཐ་མ་གྲངས་བསྙེན་ལ་རྒྱས་པ་ནི། ཀུན་བཟང་ཆེ་མཆོག་འབུམ། ཞི་བ་རིགས་ལྔ་ཁྲོ་བོ་དགུ་ཁྲི། ཞི་ཁྲོའི་འཁོར་དབང་མོ་མན་ལྔ་སྟོང་། བཀའ་ཉན་སྟོང་རེ། སྤྱི་ཛཔ྄་སུམ་འབུམ་རེ། འབྲིང་པོ་ཞི་བ་རིགས་དྲུག་ཁྲོ་བོ་བཅུ། སྦྱི་ཛཔ྄་བཅས་སྔར་ལྟར། བསྡུས་པ། གཙོ་བསྙེན་འབུམ། སྤྱི་ཛཔ྄་ཞི་བ་འབུམ་གསུམ། ཁྲོ་བོ་འབུམ་བཞི། ཧཱུྃ། རྒྱུ་འབྲས་རྩོལ་བའི་སྡུག་བསྔལ་ཅིར་སྣང་ཡང་། །བསྙེན་སྒྲུབ་རྣམ་བཞི་འཛབ་བསྙེན་བྱས་པའི་མཐུས། །ཐམས་ཅད་ཀུན་ཏུ་བཟང་པོའི་དོན་རྟོགས་ནས། །དངོས་གྲུབ་རྣམ་གསུམ་ལྷུན་གྱིས་གྲུབ་པར་ཤོག །ན་མོ་ཧཱུྃ། ཛཔ྄་ཁང་བསྡུས་བ་ནི། བསྟོད་བཤགས་གོང་ལྟར་རྗེས། ཧཱུྃ། ཞེས་བརྗོད་པས། ཡེ་ཤེས་ཀྱི་དཀྱིལ་འཁོར་དམ་ཚིག་གི་དཀྱིལ་འཁོར་ལ་གཉིས་མེད་དུ་ཐིམ་པར་གྱུར། ཡིག་བརྒྱ་བརྗོད། རྗེས་ཀྱི་ཆོ་ག་ལ། ཚོགས་ཀྱི་ཡོ་བྱད་རྣམས། ༀ་ཀྲོ་དྷཱི་ཤྭ་རི་སརྦ་དྲྭ་བྱ་མ་ཤྭ་དྷ་ནི་ཧཱུྃ་ཕཊ། ཀྱིས་བསངས། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྦྱངས། སྟོང་པའི་ལས་ཚོགས་གཞོང་པདྨ་འབར་བའི་སྣོད་དུ་ཚོགས་རྫས་ཡེ་ཤེས་ཀྱི་བདུད་རྩི་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པའི་སྤྲིན་འཕྲོ་བའི་ལོངས་སྤྱོད་ཀྱི་གཏེར་དུ་གྱུར། ༀ་ཨཱཿཧཱུྃ་ལན་གསུམ་བརྗོད་པས་བྱིན་གྱིས་རླབས། སྤྱན་དྲངས་པ་ནི། ༀ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ཛཿཧཱུཾ་བཾ་ཧོ༔ ཨེ་ཧྱ་ཧི་རུ་ལུ་རུ་ལུ་ཧཱུཾ་བྷྱོ་ཛཿཛཿསྤྱིར་མཆོད་པ་ནི། ༀ་ཨཱཿཧཱུྃ། སུ་ར་ཏོ་མ་ཧཱ་རཱ་ག་པ་ན་པེེཾ་པེ་ནུ་སུ་ར་ཏོ༔སོགས། སིདྡྷི་ཕ་ལ་ༀ་ཨཱཿ ཧཱུྃ། བྱེ་བྲག་ཏུ་མཆོད་པ་ནི། ༀ་ཤྲཱི་བཛྲ་རཱ་གདྷུ་པེ་དྷུ། པུཥྤེ་པུ། ཨཱ་ལོ་ཀེ་ཧྲཱིཿགནྡྷེ་གན། ལཱ་སྱ་ཧཱུྃ། མཱ་ལེ་ཏྲཾ། གཱིརྟི་ཧྲཱི། ནིརྟི་ཨཱཿ ཁྱད་པར་མཆོད་པའི་དང་པོ་ནི། ཛཿཧཱུཾ་བཾ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ་དྷུ་པ་པུཥྤ་དཱི་པཾ་གནྡྷཾ་བ་ལིཾ་ཏེ་པྲ་ཏཱི་ཙྪ་ཧོཿ ཤྲཱི་མཾ་ཁ་ཁ་ཁཱ་ཧི་ཁཱ་ཧི། ཞེས་འདོད་ཡོན་དྲུག་གི་མཆོད་པས་དགྱེས་ཤིང་ཚིམ་པར་བསམ་མོ། །བར་པ་ནི། ཡི་གེ་བརྒྱ་པ་བརྗོད་པས་མཁོན་བཅུགས་ཐམས་ཅད་དག་པར་བསམ། ཐ་མ་ལ། ཪྣྲི་ཡཾ་ཛཿཪྣྲི་བཛྲ་ཨངྐུ་ཤ་ཛཿ ཏྲི་ཡཾ་ཛཿཏྲི་བཛྲ་ཨངྐུ་ཤ་ཛཿཛཿཧཱུྃ་བྃ་ཧོས་བཀུགས་ལ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ་སརྦ་དུ ཥྚཾ་མཱ་ར་ཡ་ཧཱུྃ་ཕཊ་ཀྱིས་བསྒྲལ། མ་ཧཱ་མཾ་ས་རཀྟ་ཀི་ནི་རི་ཏི་ཁ་རཾ་ཁཱ་ཧིས་སྟོབས་ཕྲིན་ལས་ཀྱི་སྦྱོར་བ་མཐར་ཕྱིན་པར་བསམ་མོ། །ཚོགས་ལ་རོལ་བ་ནི། དཀྱིལ་འཁོར་བ་ཐམས་ཅད་ཀྱང་རང་གི་ཕུང་ཁམས་སྐྱེ་མཆེད་དུ་སྣང་བ་ལས་གཞན་དུ་མ་གྱུར་པ་ཤེས་པས། བདག་མཆོད་ཀུན་མཉེས་ཐམས་ཅད་ཚིམ། །ཀུན་ལ་ཕན་པའི་སྨན་ཡིན་ཏེ། །རྣལ་འབྱོར་བདག་ཉིད་ཆེན་པོ་ཡིས། །ཐམས་ཅད་བཟའ་ཞིང་བརྒྱན་པར་བྱ། །ཨ་ལ་ལ་ཧོཿ བཟའ་དང་བཅའ་དང་བཏུང་དང་བགོ། །འདོད་པའི་ཡོན་ཏན་ལྔ་ལྡན་པ། །ནམ་མཁའི་སྤྲིན་ལྟར་གཏིབས་སྤུངས་ནས། །དཀྱིལ་འཁོར་ཉིད་ལ་དཀྱིལ་འཁོར་ཐིམ། །ཨ་ལ་ལ་ཧོ། ཞེས་ནང་གི་སྲེགས་བླུགས་ཀྱིས་ཚིམ་པར་རོལ་ལ། ཧཱུྃ། ལོངས་སྤྱོད་ཚོགས་ཀྱི་དངོས་པོ་ཅིར་སྣང་ཡང་། །ཚོགས་ཀྱི་མཆོད་པ་འབུལ་བའི་བྱིན་རླབས་ཀྱིས། །མཐའ་ལ་ཞེན་པའི་གདུང་བ་ཀུན་བྲལ་ནས། །བདེ་བ་ཆེན་པོའི་ལོངས་སྤྱོད་རྫོགས་པར་ཤོག །ན་མོ་ཧཱུྃ། ལྷག་མ་ནི། ༀ་ཨཱཿཧཱུྃ་ཧོཿས་བརླབ། ཕེེཾ་ཕེེཾ་གྱིས་མགྲོན་དགུག །ༀ་བཛྲ་བུདྡྷ་རཏྣ་པདྨ་ཀརྨ་ཌཱ་ཀི་ནི་པྲ་ཏཱི་ཙྪ་མཾ་བ་ལིཾ་ཏ་ཧཱུཾ་ༀ་ཏྲཾ་ཧྲཱིཿཨཱ་ཱཕཊ། ༀ་ཨུཥྩི་ཊ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཧཱུྃ། ལོ་ཟུར་ཟླ་སྒེག་གནོད་བ་ཅིར་སྣང་ཡང་། མཁའ་འགྲོ་དབང་ཕྱུག་ལྷག་སྡུད་མཆོད་བའི་མཐུས། མོ་ངན་རྨི་ངན་གནོད་པ་ཀུན་བསལ་ནས། བར་ཆད་རྐྱེན་གྱིས་སྡུག་བསྔལ་མེད་པར་ཤོག །ན་མོ་ཧཱུྃ། ཞེས་པས་བསྔོ། ཡཱ་ཧི་གཙྪས་གཤེགས། བརྟན་མ་སྐྱོང་བ་ནི། ཏྲཾ་རཏྣ་ཏྲེ་ལོ་ཀྱ་ཕཊ། ༀ་ཨཱཿཧཱུྃ། ༀ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རག་མ། མ་མ་སྲིང་འགྲོ་མ་ཧཱུཾ་བྷྱོ་ཧཱུཾ་ཧཱུཾ། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིཾ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཧཱུཾ། འཇིག་རྟེན་སྲིན་མོ་འགྲོ་དྲུག་ཅིར་སྣང་ཡང་། །གཏོར་མ་དབྲི་བཀོལ་མེད་པར་བསྔོས་པའི་མཐུས། །འཇིག་རྟེན་སྲིན་མོ་འགྲོ་དྲུག་ཀུན་ཚིམ་ནས། །ཞིང་བཅུ་སྒྲོལ་བའི་འགྲོ་དོན་རྫོགས་པར་ཤོག །ན་མོ་ཧཱུྃ། ཞེས་བརྗོད་ནས། ཡཱ་ཱཧི་གཙྪས་གཤེགས། ཉེར་བསྡུ་ནི། མཆོད་བསྟོད་བཤགས་པ་རྟེན་བཞུགས་རྗེས། ཧཱུཾ། ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་ཀྱང་རིམ་པས་གཙོ་བོའི་ཐུགས་སྲོག་གི་ནཱ་དའི་བར་དུ་བསྡུས་ནས་དབྱིངས་དང་ཡེ་ཤེས་གཉིས་སུ་མེད་པའི་ངང་ལ་མཉམ་པར་འཇོག་ཅིང་། ཧཱུཾ། གཟུང་རྣམ་ན་རྣམ་གཉིས་དངོས་པོ་ཅིང་སྣང་ཡང་། ལྷ་དང་གཞལ་ཡས་བསྡུས་པའི་བྱིན་རླབས་ཀྱིས། རྟག་ཆད་གཉིས་སུ་སྣང་བའི་མཐའ་བསལ་ནས། སྣང་སྲིད་ཆོས་ཀྱི་སྐུ་རུ་རྫོགས་པར་ཤོག །ན་མོ་ཧཱུཾ། རྗེས་ཐོབ་ལ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ། ཧེ་རུ་ཀ་ཕྱག་གཉིས་པའི་སྐུར་གྱུར། ཧཱུཾ། རྣམ་རྟོག་ལུས་ཀྱི་དངོས་པོ་ཅིར་སྣང་ཡང་། སྤྱོད་ཡུལ་རྒྱུན་གྱི་ཏིང་འཛིན་བྱིན་རླབས་ཀྱིས། བདག་ཉིད་ཡི་དམ་ལྷ་རུ་གྱུར་ནས་ཀྱང་། འགྲོ་དོན་མ་ལུས་རྫོགས་པར་བྱེད་པར་ཤོག །ན་མོ་ཧཱུཾ། གོ་བ གོ་ལུས་སྲུང་ནི། རང་གི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུཾ་ཡིག་རྣམས་ཀྱིས་མཚན་པར་བསམ་ལ། བཛྲ་ཀ་ཝ་ཙི་རཀྵ་ཧཾ། ཞེས་ལུས་རྡོ་རྗེ་གོ་ཆས་བཞུ་ལུགས་སུ་བཅིངས་པས་སྒོ་གསུམ་རྡོ་རྗེ་གསུམ་དང་དབྱེར་མི་ཕྱེད་པར་གྱུར་པར་བསམ་ཞིང་བསྔོ་སྨོན་དང་ཤིས་པ་བརྗོད་པས་མཐའ་བརྒྱན་པ་སྤྱི་དང་མཐུན་ནོ། །སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རང་བཞིན་དུ་ཤེས་པས་སྤྱོད་ལམ་ཐམས་ཅད་དོན་ཡོད་པར་སྤྱད་དོ། །ཞེས་པའང་རྡོ་རྗེའི་སློབ་བུ་འཇིགས་མེད་དགའ་བའི་ངོར་རིག་འཛིན་འཇིགས་མེད་གླིང་པས་སོ། །སླར་ཡང་ཆོ་གའི་ཡན་ལག་རྣམས་གཏེར་ཆེན་འགྱུར་མེད་རྡོ་རྗེ་དང་། ལོ་ཆེན་དྷརྨ་ཤྲཱིའི་གསུང་རབ་ལས་བཏུས་ཏེ་བསྡེབ་པ་པོ་དཔལ་ཆེན་འདུས་པས་སོ། །ཚུལ་འདི་སྔ་འགྱུར་རྙིང་མའི་ཐུགས་དམ་མཐིལ། །མེད་དུ་མི་རུང་ཤེས་ནས་སྨར་ཤོད་པ། །ཚེ་དབང་རིག་འཛིན་མགོན་པོ་བསམ་དོན་གྲུབ། །བཙུན་མ་ཨ་ཡག་བཅས་ནས་སྤར་དུ་བསྒྲུབ། །དགེའོ།། །།

དཔལ་ལྡན་འདུས་པ་ཆེན་པོ་མདོ་ཡི་ཆུ་བོ་བཞི་རྫོགས་ཀྱི་དབང་བསྐུར་ཇི་ལྟར་བྱ་བའི་ལས་ཐོ་དེ་ཉིད་ལ་ཀུན་ཏུ་རབ་ཏུ་འཇུག་པ། འགྱུར་མེད་ཚེ་དབང་མཆོག་གྲུབ།

དཔལ་ལྡན་འདུས་པ་ཆེན་པོ་མདོ་ཡི་ཆུ་བོ་བཞི་རྫོགས་ཀྱི་དབང་བསྐུར་ཇི་ལྟར་བྱ་བའི་ལས་ཐོ་དེ་ཉིད་ལ་ཀུན་ཏུ་རབ་ཏུ་འཇུག་པ་བཞུགས་སོ། །བླ་མ་དང་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ཞིང་སྐྱབས་སུ་ཉེ་བར་མཆིའོ། །དྲི་བྲལ་དབྱིངས་རིག་གཉིས་མེད་ཟུང་འཇུག་གཤིས། །བདེ་ཆེན་ཞིང་ཁམས་སྐྱོང་བར་ཡོངས་ཤར་གཟུགས། །རབ་འབྱམས་སྒྱུ་འཕྲུལ་དྲྭ་བའི་མགོན་པོ་དང་། །དབྱེར་མེད་དཀྱིལ་འཁོར་རྒྱ་མཚོར་གུས་བཏུད་དེ། །མཆོག་གི་རྒྱལ་ཐབས་རྗེས་སུ་རྣལ་འབྱོར་གྱི། །རིམ་གཉིས་གྲུབ་པའི་ཁང་བཟང་འདུས་པ་མདོར། །འཇུག་པའི་སྒོ་འཕར་སྨིན་བྱེད་ཆུ་བོ་བཞིའི། །ལག་ལེན་ཉུང་དུ་རྣམ་གསལ་འདིར་དགོད་བྱ། །དེ་ལ་སློབ་དཔོན་ཕྱི་ནང་གི་དེ་ཉིད་བཅུ་ཤེས་ཤིང་གསང་བ་སྤྱིའི་དོན་ལ་མཁས་པ་དང་བྱེ་བྲག་ཏུ་འདུས་པ་ཆེན་པོའི་དཀྱིིལ་འཁོར་དུ་སྨིན་ཅིང་ཁྱད་པར་གྱི་དམ་ཚིག་ལ་གནས་པས་རང་དང་གཞན་གྱི་དོན་དུ་ལམ་སྲོལ་ཆེན་པོ་འདི་ཉིད་ལ་བརྟེན་པའི་ཚུལ་རྣམ་པ་གཉིས་ཀྱིས་ཏེ། ངེས་རྫོགས་སྨིན་སློབ་དང་མོས་སློབ་བོ། །དང་པོ་ནི། ཚོམ་བུ་ཚོགས་ཀྱི་སྒྲུབ་པ་དངོས་ཏེ་ཏིང་ངེ་འཛིན་ལ་བརྟན་པ་མཆོག་ཏུ་ཐོབ་པ་དག་གི་སྤྱོད་ཡུལ་ལོ། །གཉིས་པ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་མོས་པ་ཁོ་ནས་སྤྱིའི་རྣམ་པ་ཙམ་ལམ་དུ་བྱེད་པའི་བསྙེན་སྒྲུབ་ཡན་ལག་བཞི་དང་འབྲེལ་བའི་ཚུལ་སྟོན་པ་ཀུན་མཁྱེན་དྷརྨྨ་ཤྲཱིའི་སྒྲུབ་ཁོག་ཏུ་གསལ་བ་ལྟར་དང་། འདིར་ནི་མོས་སློབ་ཀྱིའང་འདྲའི་བག་གི་སྒྲུབ་ཆེན་དང་འབྲེལ་བ་དང་། དབང་རྐྱང་གི་ལུགས་གཉིས་པོ་གང་རུང་ལག་ཏུ་ལེན་པའི་རིམ་པ་ལ་ཐོག་མར་སློབ་དཔོན་གྱིས་གཞིའི་བསྙེན་པ་སྔོན་དུ་འགྲོ་བ་ཅི་ནས་གལ་ཆེ་བས་ཟུར་འདེབས་ཀྱི་ཨ་ནུ་ལུས་དཀྱིལ་ལ་བརྟེན་པའི་ཞི་ཐུང་ཁྲོ་ཐུང་གི་ལས་བྱང་ལ་བརྟེན་དགོས་པས་དབེན་པའི་གནས་སུ་རྟེན་དང་མཆོད་གཏོར་སོགས་འདུ་བྱས་ལ་ཆ་གསུམ་བསྔོ་ཞིང་མཚམས་གཅོད་རང་གི་སྙིང་གའི་ཧཱུྃ་སོགས། རྡོ་རྗེ་སློབ་དཔོན་སོགས་ལན་གསུམ་གྱིས་རྒྱུད་སྦྱངས་ནས་ཆོས་ཐམས་ཅད་སྟོང་ཞིང་བདག་མེད་པ་སོགས་ནས་ཁམས་གསུམ་ལྷའི་དཀྱིལ་འཁོར་དུ་སད་པར་གྱུར་བར་ཞི་ཐུང་དཀྱུས་ལྟར་བཏང་ལ་བཟླས་པ་དང་། ཞི་བའི་བསྙེན་པ་རྫོགས་ནས་ཁྲོ་བོ་ལ་འཇུག་སྟེ། དེ་ཡང་མངོན་རྟོགས་བར་སྔོན་འགྲོ་རྣམས་ཞི་བ་ལྟར་སོང་རྗེས་འོག་གི་མངོན་རྟོགས་དབྱིངས་དང་ཡེ་ཤེས་གཉིས་སུ་མེད་པ་སོགས་བཟླས་པའི་བར་གྱི་བསྒྱུར་ཁ་རྣམས་ཞི་བའི་སྐབས་ལྟར་བྱ་ཞིང་། ཞི་ཁྲོ་གཉི་གའི་བཟླས་པ་སོ་སོའི་བསྐྱེད་སྔགས་རྣམས་དང་མ་ལྕོགས་ན་སྤྱི་ཛཔ྄་གུ་ཧྱ་ཛྙཱ་ན་ཁོ་ན་སྟེ་ཐུན་བཞིར་བཅད་པའི་ཐུན་མཐར་ཚོགས་གཏོང་བས་ཐུན་འཇོག་སྐབས་ཉེར་བསྡུ་ཧཱུྃ་ཞེས་སོགས་ནས་རྡོ་རྗེ་གསུམ་དང་དབྱེར་མི་ཕྱེད་པར་གྱུར། བར་རོ། །དེ་ཡང་གྲངས་ཀྱི་བསྙེན་པ་ཆིངས་སུ་བསྟན་པ་ལྟར་རྗོགས་པར་བྱ་ཞིང་མཐར་ཁ་སྐོང་གི་སྦྱིན་སྲེག་ཀྱང་བྱ། དེ་ལྟར་གཞིའི་བསྙེན་པ་ཐེམས་པའི་སློབ་དཔོན་གྱིས་སྒྲུབ་པ་དང་དབང་ལ་འཇུག་པ་ན་ཐོག་མར་སློབ་དཔོན་རང་ཉིད་ལྷ་ལ་གནང་བ་ཞུ་བའི་དོན་དུ་སླར་ཡང་སྔར་ལྟར་ཞི་ཁྲོའི་ཡུན་ཐུང་དག་ལ་བརྟེན་ནས་བསྙེན་པ་ཁ་གསོ་བ་གྲུབ་རྗེས་གཟོད་བསྙེན་སྒྲུབ་ལ་འཇུག་པར་བྱ་སྟེ། དེ་ཡང་ལོ་ཟླ་ཤིས་པའི་ཡར་ངོ་ཚེས་དང་གཟའ་སྐར་སྦྱོར་བྱེད་དགེ་བར་རྒྱལ་བས་བྱིན་གྱིས་བརླབས་པའི་གནས་སུ་སྟོན་འཁོར་ཡོ་བྱད་ཕུན་སུམ་ཚོགས་པར་བྱས་ཏེ། ལམ་མཆོག་འདི་ཉིད་ཀྱི་ཆུ་བོ་ཆེན་པོ་བཞིའི་དབང་ཡོངས་རྫོགས་དེང་གི་དུས་སུ་རྒྱུད་དང་མན་ངག་གི་ལུགས་གཅིག་ཏུ་དྲིལ་ནས་བསྐུར་བའི་ཕྱག་བཞེས་ལ་ཐོག་མར་ཡན་ལག་གི་དཀྱིལ་འཁོར་རྣམས་སུ་སྒོ་འབྱེད་ཕྱག་རྡོར་དང་ཕྱི་དབང་རྒྱུད་ཀྱི་ཆུ་བོ་རྣམས་བསྐུར་བའི་རིམ་པ་ལ། ཉིན་དང་པོའི་ནངས་སྔ་བར་ས་ཆོག་གི་བདག་བསྐྱེད་སྒྲུབ་ཐབས་ལྟར་རྒྱས་བསྡུས་གང་འོས་བཏང་ལ་ས་ལྷའི་ཆོ་ག་དཀྱིལ་ཆོག་ལས་རཾ་ཡཾ་ཁཾ། ༀ་ཨཿཧཱུྃ། སྠཱ་ན་ཏི་ཀྵེ་ཏྲ་པཱ་ལ་སོགས་ཀྱིས་བསླང་ཞིང་། སྦྱང་པའི་ཚེ་སྟེགས་བུ་ལ་ཆག་ཆག་བ་བྱུང་ལྔ་དང་སྤོས་ལྔ་ཁོ་ནས་འདེབས་པ་ལས་འདིར་བདུད་རྩི་ལྔ་མི་བསྲེ་གསུངས། སྤོས་ལྔ་ཡང་། ག་བུར། ཙནྡན། ལི་ཤི། རྒྱ་སྤོས། ཛཱ་ཏི་ལྔའོ། །དཀྱིལ་ཆོག་གི། རང་ཉིད་ཁྲོ་བོ་བདུད་རྩི་འཁྱིལ་པ་སོགས་ནས་ཁྲོ་བཅུའི་ཕུར་གདབ་སྨོན་ལམ། ན་མོ་ཧཱུྃ། བར་རོ། །དེས་ས་ཆོག་ཚར་ནས་དགེ་བའི་དཔུང་བསྐྱེད་པའི་ཕྱིར། རྟེན་གསུམ་ལ་མཆོད་པ། གསུང་སྒྲོགས། །དགེ་འདུན་ལ་བསྙེན་བཀུར། སཱཙྪ། ཆུ་གཏོར། སྲོག་བླུ། ལམ་འཕྲང་བསལ་བ་སོགས་རྣམ་དཀར་ཅི་འགྲུབ་སྔོན་དུ་བྱེད་པ་དང་། ཁྱད་པར་འདུས་པ་རྣམས་ཀྱིས་འབུམ་སྡེ་ལྔ་ཀློག་པའམ་མི་ནུས་ན་ལྟུང་བཤགས། འདའ་ཀ་ཡེ་ཤེས། ཤེར་སྙིང་། བཟང་སྤྱོད། རྣམ་འཇོམས་ལྔ་པོ་བཀླག །དཔང་སྐོང་འདོན་པ་དང་། འགའ་ཞིག་གིས་ཕྱི་ལྟར་སྤྱིའི་མགྲོན་བཞི་ལ་ཆ་གསུམ་གྱི་གཏོར་མ་དང་། ནང་ལྟར་མ་མོ་བཞི་བསྐང་སྟེ་སྲིད་པ་སྤྱི་མདོས་སམ་གླིང་གི་བསྐང་བ་བྱ་བར་གསུངས་པས་འདིར་བཀའ་བརྒྱད་ཀྱི་གླིང་བཞི་སྤྱི་མདོས་བྱས་ན་དོན་འགྲུབ་བོ། །དེ་ནས་སྟེགས་བུར་རྔུལ་ཚོན་གྱིས་བྲི་བའམ་མི་ནུས་ན་རས་ཀྱི་དཀྱིལ་འཁོར་བཀྲམ། བཤམས་བཀོད་སོགས་ཡན་ལག་གི་སྒྲུབ་ཐབས་དངོས་གྲུབ་འདོད་འཇོའི་ཕྱག་རྡོར་སྒྲུབ་ཐབས་ལྟར་བྱས་ནས་བླ་མ་དང་དཔལ་ཕྱག་ན་རྡོ་རྗེ་སོགས། བདག་མདུན་བུམ་པ་གཉིས་དུང་ཞལ་སྒྲུབ་པ་བཅས་སོང་ནས་འདས་གཏོར་དང་ཆ་གསུམ་རྒྱས་བསྡུས་གང་འོས་བཏང་ལ་དབང་ཆོག་རྡོ་རྗེའི་ཐེམ་སྐས་ལྟར་སློབ་མ་རྣམས་ལ་ཇི་ལྟར་བསྟམས་པ་སོགས་ཀྱིས་ཁྲུས་བྱ། བགེགས་གཏོར་ལ་དྲི་ཆབ་དང་ལས་བུམ་གྱི་ཆུ་འཐོར་ནས་བིགྷཱཾ་ཏ་ཀྲྀཏྲ་ཧཱུྃ་ཕཊ་དང་ཨ་མྲྀ་ཏས་བསངས། རཾ་ཡཾ་ཁཾ་གིས་སྦྱངས། སྟོང་པའི་ངང་ལས་སོགས། སོང་ཞིང་། །སུམྦྷ་ནི་བརྗོད་བཞིན་སྤོས་རོལ་བྱས་ལ་བཛྲ་པཉྩ་སོགས། མི་ཤིགས་པར་བསམ་མོ། །ཆོས་བཤད་ནམ་མཁའ་དང་མཉམ་པའི་སོགས་ནས་བཀའ་སྲོལ་བཟང་པོ་འདིར་འཇུག་པའི་སྒོར་ལས་མཎྜལ་འབུལ་བ་དང་། གསོལ་བ་གདབ། རྒྱུན་བཤགས། གནས་འདྲེན་གྱི་སྒྲིབ་སྦྱོང་རིགས་དྲུག་གི་སྡིག་པ་དྲལ་བ་ཐུན་བྲབས་པ་སོགས་དང་ཕྱག་རྒྱའི་དབང་ནས་བརྩམས་མཆོག་དབང་བཅུ་དྲུག་པོ་གཞུང་ལྟར་བསྐུར་ནས། དེ་ལྟར། འདི་མན་གྱི་དབང་རྣམས་ལ་ཆོས་བཤད་འདི་ཡན་ཆད་ཙམ་སྔོན་དུ་བཏང་བའམ་སྐབས་ཐོབ་སྦྱར། མཆན། མཆོག་དབང་སོགས་དང་། བསོད་ནམས་འདི་ཡིས་དགེ་བ་བསྔོ་བའི་བར་རོ། །དེ་དག་ནི་སྒོ་འབྱེད་ཀྱི་དབང་སྟེ་ཐོག་མའི་ཆོས་ཀྱི་སྒོ་འབྱེད་པར་བྱེད་དོ། །དེ་ནས་སློབ་མ་རྣམས་རང་གནས་སུ་བཏང་ལ། རྗེས་ཆོག་མཆོད་པ་རྣམས་ཁ་གསོས་ༀ་བཛྲ་ཨརྒྷཾ་སོགས་ནས་གོ་ཆས་གཏམས་པར་བསམ། བར་གྱིས་མཆོད་བསྟོད་ནོངས་བཤགས་ཉེར་བསྡུ་དང་། བསྔོ་ཤིས་དེ་ནས་བྱ་བ་སྟེ་ནུབ་དང་པོའོ། །དེ་ནས་ཡན་ལག་གི་དཀྱིལ་འཁོར་དྲུག་ལ་བརྟེན་ནས་ཕྱི་དབང་རྣམས་རིམ་བཞིན་བསྐུར་བ་ལ་དང་པོ་སྒོ་འབྱེད་ཀྱི་དབང་ཚར་འཕྲལ་སྟེགས་བུ་ཐིག་གིས་གྲུ་བཞིར་བཅད་པའི་ཤར་ལྷོར་ལྷ་མི། ལྷོ་ནུབ་ཏུ་ཉན་ཐོས། ནུབ་བྱང་དུ་རང་རྒྱལ། བྱང་ཤར་དུ་བྱང་སེམས་ཀྱི་དཀྱིལ་འཁོར་རྣམས་རྡུལ་ཚོན་རས་བྲིས་གང་རུང་དང་ལྷ་གནས་རྣམས་སུ་རང་རང་གི་སྐུ་གསུང་ཐུགས་རྟེན་དངོས་སམ་ཙ་ཀ་ལི་བཀོད་པས་མཚོན་ཉེར་མ ཁོའི་དབང་རྫས་མཆོད་པ་རྣམས་སོ་སོའི་སྒྲུབ་ཐབས་ལྟར་ཚང་ལ་འཁྲུས་བར་བཤམས་བཀོད་གྲུབ་པར་བྱ། གཏོར་ཆོག་གཅིག་ཏུ་བསྡུ་ཕྱིར་མདུན་ངོས་སུ་འདས་གཏོར་དང་ཆ་གསུམ་ཚར་གཅིག་བཤམས་པ་རྣམས་དེ་ནུབ་ནས་གྲུབ་པར་བྱ། དེ་ནས་ནང་བར་དང་པོ་ལྷ་མིའི་སྒྲུབ་ཐབས་སུ་ཐོག་མར་ཁྲུས་བྱས་ནས་སྟན་ལ་འདུག་སྟེ། སྐྱབས་སེམས་སངས་རྒྱས་ཆོས་ཚོགས་སོགས་ནས་བུམ་ཆུ་ལའང་ཁྱབ་པས་ནུས་པ་ཅན་དུ་གྱུར། བར་རོ། །འདིར་དཔང་སྐོང་ཡང་བཀླག་གོ། །གཉིས་པ་ཉན་ཐོས་སྒྲུབ་ཐབས་ཐུབ་པ་མཆོག་དང་། སོགས་ནས། བྱིན་གྱིས་རློབ་པར་གྱུར་ཅིག །བཟླས་པ་མུ་ནི་བཟླ་བའི་བར་རོ། །གསུམ་པ་རང་རྒྱལ་སྒྲུབ་ཐབས་ལས། ན་མོ་རྟེན་ཅིང་འབྲེལ་འབྱུང་སོགས་ནས། བཟླས་པ་དང་། ཆོས་ལ་སྤྱོད་པར་ཤོག །ༀ་ཡེདྷརྨཱའི་བར་རོ། །བཞི་པ་བྱང་ཆུབ་སེམས་དཔའི་སྒྲུབ་ཐབས་ལས། །མཁྱེན་བརྩེ་ནུས་པའི་བདག་ཉིད་སོགས་ནས། བཟླས་པ་དང་། བྱིན་གྱིས་བརླབས་པར་གྱུར། བར་རོ། །འདི་རྣམས་ལ་ཁྲུས་དང་མཆོད་པ་སོགས་དམིགས་བསལ་གྱི་སྒོས་ཆོས་རྣམས་སྒྲུབ་ཐབས་རང་རང་ལས་ཇི་ལྟར་འབྱུང་བ་བཞིན་ཚང་ལ་མ་ནོར་བར་བྱ་བ་གལ་ཆེ། དེ་ནས་བཞི་ཀའི་གཏོར་ཆོག་གཅིག་ཏུ་བསྡུས་ལ་འདས་གཏོར་དང་ཆ་གསུམ་ཚར་གཅིག་བསྔོས་ལ། སློབ་མ་རྣམས་ལ་དབང་བསྐུར་བའི་དང་པོ་བདག་ཉིད་འཇུག་པ་ལ་ལྷ་མིའི་དབང་གི་འགོ་ནས་སློབ་དཔོན་བདག་ཉིད་ཤཱཀྱ་ཐུབ་པ་སོགས་ནས་བྱིན་གྱིས་བརླབས་པར་བསམ་བར། ཉན་ཐོས་ལ་སློབ་དཔོན་བདག་ཉིད་ཤཱཀྱ་ཐུབ་སོགས། རྒྱུད་ལ་སྐྱེས་པར་བསམ་པར། རང་རྒྱལ་ལ་སློབ་དཔོན་བདག་ཉིད་སྟོན་པ་སོགས། སྐྱེས་པར་བསམ་པར། བྱང་སེམས་ལ། སློབ་དཔོན་བདག་ཉིད་སྟོན་པ་སོགས། རང་རྒྱུད་ལ་ཐོབ་པར་བསམ་པར་རོ། །དེ་ནས་སློབ་མ་རྣམས་ལ་ཁྲུས་དང་བགེགས་བསལ་བ་སྲུང་འཁོར་བཅིང་བ། ཆོས་བཤད་རྒྱས་བསྡུས་གང་རིགས་སྒོ་འབྱེད་ཀྱི་སྐབས་ལྟར་བྱས་ལ། ལྷ་མིའི་དབང་གི་འགོའི་འདིར་གང་གསན་པར་བྱ་བའི་ཆོས་སོགས་ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་དང་པོ་སོགས་ནས་གཏན་ཁྲིམས་དང་དུས་ཁྲིམས་འབོགས་པ་ཆོས་བཤད་ལྷ་མིའི་ཆས་འཇུག་གི་དབང་བཅུ་གཅིག་རྒྱ་ཡིག་བོད་ཡིག་དབང་ལྷ་དབང་རྣམས་དང་། ལམ་ཁྱེར་བཞི། འགག་དྲུག །གདམས་ངག །སྒོམ་ཁྲིད་བཅས་ནས་བསྒྲུབ་པར་བགྱིའོ་སྙམ་པས། གཙོ་བོས་ཇི་ལྟར་སོགས། གཏང་རག་མཎྜལ། དེང་ནས་བརྩམས་ཏེ་སོགས། གཉིས་པ་ཉན་ཐོས་ཀྱི་དབང་། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་གཉིས་པ་སོགས་ནས། ཚིགས་གསུམ་གྱི་སྡོམ་པ་འབོགས་པ། གཙོ་བོའི་དབང་། ཉན་ཐོས་བཅུ་དྲུག །གནས་བརྟན་བཅུ་དྲུག་རྫས་དབང་བཅུ་རྣམས་དང་། ལམ་ཁྱེར་སོགས་གོང་མཚུངས་ལྟར་དང་སྒྲུབ་པར་བྱའོ། །བར་དང་། །ཁས་ལེན་སོགས་ལྔར་ལྟར་རོ། །གསུམ་པ་རང་རྒྱལ་དབང་ལ། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་གསུམ་པ་ཞེས་པ་ནས། རྫས་དབང་དྲུག །ལྷ་དབང་བཅུ་བཞི་པོ་བསྐུར། ལམ་ཁྱེར་སོགས་སྔར་བཞིན་དང་། བསྒྲུབ་པར་བྱ་སྙམ་དུ་ཞེས་པའི་བར་དང་། དམ་ཚིག་ཁས་ལེན་སོགས་སྔར་ལྟར་རོ། །བཞི་པ་བྱང་སེམས་ཀྱི་དབང་ལ། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་བཞི་པ་སོགས། སེམས་བསྐྱེད་ཀྱི་སྡོམ་པ། རྩ་བའི་ལྷ་དབང་བཅོ་ལྔ། མགྲོན་ཐབས་བརྒྱ་ཉེར་གཉིས། རྫས་དབང་ཉི་ཤུ་རྣམས་བསྐུར་ལ། ལམ་ཁྱེར་སོགས་སྔར་བཞིན་དང་། ཚུལ་བཞིན་དུ་བསྒྲུབ་སྙམ་པའི་བར་དམ་ཚིག་ཁས་ལེན་སོགས་སྔར་ལྟར་ལ། འདིར་བསོད་ནམས་འདི་ཡིས། སོགས་ཀྱིས་དགེ་བ་བསྔོས་ནས་སློབ་མ་རྣམས་རང་གནས་སུ་བཏང་ངོ་། །དེ་རྗེས་རྗེས་ཆོག་རྣམས་བྱ་བ་ནི། ལྷ་མིའི་རྗེས་ཆོག་སྒྲུབ་ཐབས་མཐར ། །མཆོད་པ་དྲི་མེད་སོགས། རས་བྲིས་ལ་བརྟན་བཞུགས། རྡུལ་ཚོན་ལ་གཤེགས་གསོལ། བདེ་ལེགས་ཤོག །བར་རོ། །ཉན་ཐོས་ལ། མཆོད་པ་དྲི་མེད་སོགས། བདེ་ལེགས་ཤོག །བར་རོ། །རང་རྒྱལ་ལ། རྟེན་ཅིང་འབྲེལ་འབྱུང་སོགས་ནས། བདེ་ལེགས་ཤོག །བར་རོ། །བྱངས་སེམས་ལ། ཇི་ལྟར་འཇམ་དབྱངས་སོགས་ནས། དེང་འདིར་བདེ་ལེགས་ཤོག །བར་རོ། །དེའི་དགོང་མོར་ཡན་ལག་གི་དཀྱིལ་འཁོར་ལྔ་པ་བྱ་སྤྱོད་ཐུན་མོང་བའི་དཀྱིལ་འཁོར་གྱི་སྟ་གོན་འགྲོ་དགོས་པས་དང་པོ་བདག་བསྐྱེད་ལ་ཁྲུས་སོགས་གཙང་སྦྲ་དང་ལྡན་པས་ཆོ་ག་ལ་འཇུག་པ་ནི་སངས་རྒྱས་ཆོས་ཚོགས་སོགས། སྐྱབས་སེམས་དང་ཕྱོགས་བཅུ་ན་བཞུགས་པའི་སངས་རྒྱས་དང་སོགས། ཁྲུས་དང་ཉེ་རེག་ཕྱག་རྣམས་བྱས་ལ་སྟོང་གསུམ་ཀུན་ཏུ་སོགས་ནས་བཟླས་པ་དང་བཅས་པ་བྱ། སྩལ་དུ་གསོལ། བར་རོ། །མདུན་གྱི་ཡེ་ཤེས་པ་ལ། ཨཱ་ཧ་ར་ཨ་ཧ་རའི་སྔགས་དེ་ཁོ་ནས་དྲི་དང་མེ་ཏོག་བདུག་སྤོས་བཤོས་བུ་རྣམས་དབུལ། ཨཱ་ལོ་ཀཱེ་ཡིས་མར་མེ་དབུལ། གཞོན་ནུའི་སྐུ་ལུས་སོགས་ཚིག་བཞིས་བསྟོད། མ་རྙེད་ཡོངས་སུ་སོགས་ཀྱིས་ནོངས་པ་བཤགས་ལ། །ༀ་ཝཱ་གཱི་ཤྭ་ར་གཙྪ། སྤྱན་དྲངས་པའི་ལྷ་སོགས་གཤེགས་པར་གྱུར། བར་རོ་། །དེ་ནས་དཀྱིལ་འཁོར་གྱི་གཞིར་སྐྱ་ཐིག་བཏབ་ནས་གཙོ་སྔགས་ཀྱིས་དྲིའི་ཐིག་ལེ་བཀོད་པ་དང་ཚོམ་བུ་རྣམས་མདུན་བསྐྱེད་ཀྱི་ལྷ་གྲངས་སོ་སོའི་བསྐྱེད་སྔགས་ལྟར་བཀོད་ནས། དབུས་ཀྱི་སྟན་ལ་སོགས་ནས། གསལ་བར་གྱུར་ཅེས་གསལ་གདབ་བདག་བསྐྱེད་ཀྱི་སྤྱན་དྲང་བ་བྷྲཱུཾ། ཛི་ན་ཛི་ཀ྄་བདུན་སོགས། ཤཾ་ཀ་རེ་ས་མ་ཡེ་སྭཱ་ཧཱའི་བར་དང་མཆོད་པ་བྱིན་རླབས་ཏྲེ་ལོ་ཀྱ་སོགས་ནས་ཨཱ་ཧ་ར་ཨཱ་ཧ་ར་སོགས་ཀྱི་སྔགས་དེ་ཁོ་ནས་དྲི་སོགས་བཞི་དང་ཨ་ལོ་ཀཱེ་ཡིས་མར་མེ་གཞོན་ནུའི་སྐུ་ལུས་སོགས་ཕྱག་འཚལ་ལོ་བར་དང་། གང་གི་གསོལ་གདབ་སྤོས་ཐོགས་པུས་བཙུགས་ཀྱིས་དཀྱིལ་འཁོར་བསྐོར་ནས་རིགས་གསུམ་མགོན་པོ་སོགས་མཛད་པའི་རིགས་བར་ལན་གསུམ། བསྟོད་པར་འོས་པ་སོགས་ཀྱིས་བསྟོད། མ་རྙེད་ཡོངས་སུ་སོགས། ཡིག་བ རྒྱ། གཤེགས་གསོལ། ཐིམ་པར་བསམ་བར་རོ། །དེ་ནས་སློབ་མ་སྟ་གོན། རིགས་གསུམ་གཙོ་བོ་སོགས་ནས་སྐྱབས་སེམས་སྡོམ་འབོག་དང་བྱིན་རློབ་རྫས་བཞི་བཅས་བསྐུར་ནས་ལེགས་པར་སྨྲོས་བར་རོ། །བུམ་པ་སྟ་གོན། རཾ་ཡཾ་ཁཾ། སྭ་བྷཱ་བ་སོགས་དང་། ལས་བུམ་བཅས་སོ་སོའི་བཟླས་པ་རྣམས་ཚར་བདུན་རེ་བཟླས་ནས་ཛི་ན་ཛིཀ྄་གིས་མེ་ཏོག་དཀར་པོ་རྣམ་བུམ་པ་ལ་འཐོར། བྷྲཱུཾ་ཞེས་མཆོད་ཡོན་དབུལ། ཨ་མྲི་ཏས་གུ་གུལ་བདུག་གོ། །འདིར་གྲུབ་ན་ཆ་གསུམ་གཏོར་མ་བཏང་ཞིང་བདག་གི་ལྷའི་སོགས་ཐིམ་པར་གྱུར། བར་རོ། །དེ་དག་ནི་ནུབ་གཉིས་པའི་བྱ་བའོ། །གསུམ་པའི་ནངས་པར་དཀྱིལ་འཁོར་རྡུལ་ཚོན་རས་བྲིས་གང་ཡིན་ཀྱང་བཤམས་བཀོད་གཞུང་ལྟར་གྲུབ་པར་བྱས་ནས་བདག་བསྐྱེད་ཀྱི་ཆོ་ག་སངས་རྒྱས་ཆོས་ཚོགས་སོགས་ནས་བདག་བསྐྱེད་ཀྱི་ལྷ་ལ་བདག་བསྐྱེད་ཀྱི་བཟླས་པ་དང་གཏང་རག་མཆོད་བསྟོད་བཟོད་གསོལ་ནས་བཅས་པ་གཤེགས་པར་གྱུར་བར་རོ། །དེ་ནས་མདུན་བསྐྱེད་ཏྲཻ་ལོ་ཀྱ་སོགས་ནས་མཆོད་པའི་སྐབས་བྱིན་རློབ་ཏྲཻ་ལོ་ཀྱ་སོགས་ཛི་ན་ཛིཀ྄་བར་གོང་ནས་དྲངས་ལ་ཇི་ལྟར་བསྟམས་པ་སོགས་དཀྱུས་ལྟར་བཟླས་པ་ༀ་བིཥྞ་བེ་སྭཱ་ཧཱའི་བར་དང་བུམ་པ་གཉིས་ཀྱི་བཟླས་པའང་སྔར་སྟ་གོན་སྐབས་ལྟར་བྱས་ནས་བཛྲ་དྷྲྀཀ྄་བར་རོ། །དེ་ནས་ཤེས་སྙིང་བཀླག །དེ་ནས་འདས་གཏོར་དང་ཆ་གསུམ་བཏང་ལ་བདག་ཉིད་འཇུག་པ་ནི་སྒྲུབ་ཐབས་ཀྱི་ༀ་བཛྲ་སྥོ་ཊ་ག་ཏ་ཡེ་སྭཱ་ཧཱ། རྡོ་རྗེ་ནང་བསྡམས་དབྱེ་རྒྱས་སྒོ་ཕྱེ་ལ་དབང་ཆོག་ལས་དཀྱིལ་འཁོར་གྱི་གཙོ་བོ་སོགས་དང་། ༀ་ཡེ་ཤེས་རྒྱལ་པོ་སོགས་ཟུར་ནས་བླངས་པས་རིག་པའི་མེ་ཏོག་དབུལ། དཀྱིལ་འཁོར་བའི་སོགས་གཉིས་མེད་དུ་གྱུར་བར། དེ་ནས་སློབ་མ་རྣམས་ལ་ཁྲུས་སོགས་སྔར་ལྟར་དང་ཆོས་བཤད་ཇི་ལྟར་རིགས་པས་མཚམས་སྦྱར་ཞིང་འདིར་གསན་པར་བྱ་བའི་ཆོས་ནི་ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་ལྔ་པ་སོགས། མཎྜལ། གསོལ་གདབ། མིག་དར། མེ་ཏོག །སྡོམ་བཟུང་སོགས་ནས། བུམ་དབང་དང་ཅོད་པན། རིགས་གསུམ། སྦྱོང་བ་སོགས་ལྷ་དྲུག །སྒེག་སོགས་བཅུ་གཉིས། མགྲོན་ཐབས་ཀྱི་ལྷ་ཞེ་ལྔ། རྫས་དབང་ཉེར་དྲུག །སྔགས་ཀྱི་རྗེས་གནང་རྣམས་དང་། ལམ་ཁྱེར་སོགས་སྔོན་ལྟར། ཚུལ་བཞིན་དུ་བསྒྲུབ་པར་བྱའོ་སྙམ་པའི་བར་རོ། །དམ་ཚིག་ཁས་ལེན་དགེ་བ་བསྔོ་བ་སོགས་དཀྱུས་བཞིན་གྲུབ་པར་བྱས་ལ་རང་གནས་སུ་བཏང་ངོ་། །རྗེས་ཆོག་ནི་མཆོད་པ་ཁ་གསོས་ལ་ཏྲཻ་ལོ་ཀྱ་དང་ཨ་མྲྀ་ཏེ་ཛི་ན་ཛིཀ྄ །སྭཱ་བྷཱ་ཝས་བསངས་སྦྱངས་ནས། བྱིན་རློབས་དང་། ཨ་ཧ་ར་སོགས། སྔགས་དེ་ཁོ་ནས་དྲི་སོགས་བཞི་དང་ཨཱ་ལོ་ཀཱེ་ཡིས་མར་མེ་བླ་མ་དང་དཀྱིལ་འཁོར་གྱི་སོགས། འཇོག་པར་མཛད་དུ་གསོལ། ཡིག་བརྒྱ་བཟླ་བ་སོགས་ནས། བདེ་ལེགས་ཤོག་བར་དུའོ། །དེ་ནས་མཆོད་པ་སོགས་བསལ་བའི་དེ་མ་ཐག་པར་ཡོ་གའི་སྟ་གོན་བྱ་དགོས་པས་ཐོག་མར་སྟེགས་བུའི་ཁར་རྣམ་ལྔའི་མཆོད་པ་སྔོན་གཏོར་སོགས་བཤམས་ལ་སྒྲུབ་ཐབས་ཀྱི་དབུ་ནས་བཛྲ་ཡཀྵ་དང་བཛྲ་ཛྭ་ལ་ཨ་ན་ལ་སོགས་ནས། ཤཔྡའི་བར་དང་། དེ་ནས་འོག་གི་ཆོ་ག་ལས་བཛྲ་ཡཀྵ་ཧཱུྃ་སོགས་དང་། སྐྱབས་འགྲོ་བདག་དང་འགྲོ་བ་སོགས་ནས། བཟླས་པའི་མཐར་རྡོ་རྗེ་སེམས་དཔའ་ལ་ཕྱག་འཚལ། ཞེས་པའི་བར་བདག་གི་རྣལ་འབྱོར་ཚང་བར་བཏང་ལ་གོང་གི་སྟ་གོན་ལས་དཀྱིལ་འཁོར་གཞི་བཛྲ་ཡཀྵས་བསངས། ཤཱུནྱ་ཏཱ་སོགས་ནས་གསལ་བར་གྱུར། བར་རོ། །དེ་ནས་མདུན་བསྐྱེད་ཀྱི་བཟླས་པར་འབྱུང་བའི་ༀ་བུད་དྷ་བཻ་རོ་ཙཱ་ན་སོགས་རང་སྔགས་ཚར་བདུན་རེས་དྲིའི་ཐིག་ལེ་དང་ཚོམ་བུ་བྱང་སེམས་བཅུ་དྲུག་གི་སྙིང་པོ་ༀ་སརྦ་སཾ་སྐ་ར་ཁོ་ན་འོ། །མཆན། བཀོད་ལ་དབུས་ཀྱི་གདན་ལ་སོགས་ནས་གསལ་བར་གྱུར་བར། མདུན་བསྐྱེད་ཀྱི་སྤྱན་འདྲེན་མ་ལུས་པ་སེམས་ཅན་སོགས་ནས། ཛཿཧཱུྃ་བཾ་ཧོཿའི་བར། ༀ་སརྦ་ཏ་ཐཱ་ག་ཏ་པུཥྤེ་སོགས་ནས། ཤཔྡའི་བར་སྔགས་རྒྱ་ཁོ་ནས་དབུལ ། བུམ་པ་སྟ་གོན་ནི། བུམ་པ་གཉིས་ཡཀྵ་དང་ཤཱུ་ནྱ་ཏཱ་སོགས་ཀྱིས་བསངས་སྦྱངས། སྟོང་པའི་ངང་ལས་སོགས་ནས། མེ་ཏོག་སོགས། མཆོད་པ་གོང་མཚུངས་སྔགས་རྒྱས་དབུལ། བཟླས་པ་བུདྡྷ་བཻ་རོ་ཙཱ་ན་སོགས་མདུན་བསྐྱེད་ལྟར་བྱས་ལ་སླར་ཡང་རྣམ་ལྔས་མཆོད་པ་དང་བུམ་ཆུར་གྱུར། ཡིག་བརྒྱས་བརྟན་པར་བྱ་བའི་བར་རོ། །འགྲུབ་ན་ཆ་གསུམ་གཏོར་མ་བཏང་ཞིང་། སློབ་མ་སྟ་གོན་ནི་ཁྲུས་དང་མཎྜལ། སྔོན་དུ་འགྲོ་བས་རྡོ་རྗེ་དབྱིངས་གཙོ་སོགས། རྒྱུན་བཤགས་དཀོན་མཆོག་གསུམ་སོགས། སྐྱབས་སེམས་སྡོམ་བསྲུང་། བསང་གཏོར་དང་དྲི་ཆབ་སོགས་བཞི་པོ་རང་སྔགས་ཀྱིས་བྱིན་ནས་རྫས་བཞི་པོའང་གཏད་ནས་ཆོས་བཤད་ལེགས་པར་སྨྲོས་བར་རོ། །དེ་ནས་སྙན་གསན་དབབ་པ། རྣམ་པར་སྣང་མཛད་སོགས། བཛྲོ་ཏྟི ཥྛ་བཛྲ་པུཥྤེ་སོགས་ལྔ་དང་བསྟོད་པར་འོས་པས་བསྟོད། དེ་དག་ནི་ནུབ་གསུམ་པའི་བྱ་བའོ། །བཞི་པའི་ནངས་པར་རྡུལ་ཚོན་གྱི་ཕྱོགས་ཡིན་ན་ༀ་ཧཱུྃ་ཧྲཱི་སོགས་ཀྱིས་ཐིག་ཚོན་བྱིན་བརླབ་ནས་བཟུང་ཐིག་གདབ་པ། ཚོན་བཀྱེ་བ། རྣམ་པ་འགོད་པ། སྒོ་དབྱེ་བ་རྣམས་དཀྱུས་ལྟར་དང་། རྡུལ་ཚོན་མིན་ན་སྐབས་དེར་རས་བྲིས་དགྲམ་ལ་མཆོད་པ་རྣམས་ༀ་བཛྲ་ཡཀྵ་སོགས་བསངས་གཏོར་བྱས་ལ་རང་རང་གི་སྔགས་རྒྱས་བརླབས་ནས་མགོན་པོ་བདག་གི་སོགས་ནས་གནས་གྱུར་ཅིག །བར་དང་། བུམ་པ་གཉིས་བཟླས་པ་ཅུང་ཟད་རེ་བཅས་རང་གི་གནས་སུ་བཀོད་ཙ་ཀ་ལི་སོགས་ཉེ་བར་མཁོ་བ་དང་འདས་གཏོར་སོགས་མཆོད་པ་རྣམས་གཞུང་ལྟར་བསྒྲིགས་ལ་ཆོ་ག་དངོས་ལ་འཇུག་པ་ནི། ༀ་བཛྲ་ཡཀྵ་སོགས་ནས་ལ་ཕྱག་འཚལ་གྱི་བར་བདག་བསྐྱེད་དང་། བུམ་པ་བསངས་སྦྱངས་ནས། ཡིག་བརྒྱས་བརྟན་པར་བྱ་བའི་བར་གྱི་བུམ་བསྐྱེད་དང་། དཀྱིལ་འཁོར་ཡཀྵས་བསངས་ཤཱུ་ནྱ་ཏཱ་སོགས་ནས་བཟླས་པའི་འཇུག་གི། མ་ཧཱ་ཡོ་གཱི་ཤྭ་ར་ཧཱུྃ་ཞེས་པའི་བར་གྱི་མདུན་བསྐྱེད་ཀྱི་ཆོ་ག་རྣམས་དཀྱུས་ལྟར་བཏང་ལ་འདས་གཏོར་དང་ཆ་གསུམ་གཏོར་མའང་བཏང་ངོ་། །འདིར་གྲུབ་ན་ཟུར་འདེབས་ལས་འབྱུང་བའི་ཡོ་ག་ཞི་བའི་སྦྱིན་སྲེག་ཀྱང་བྱ། མ་གྲུབ་ན་ཡང་ཆད་སྐྱོན་མེད་མོད། དེ་ནས་བདག་ཉིད་འཇུག་པ་སྟ་གོན་ལས་ༀ་བཛྲཱོངྒཏ྅྅྅ཊ་ས་མ་ཡ་པྲ་བེ་ཤ་ཡ་ཧཱུྃ་ཞེས་སྔགས་རྒྱས་སྒོ་ཕྱེ་ལ། དབང་ཆོག་ལས་དཀྱིལ་འཁོར་གྱི་འཁོར་ལོ་སྒྱུར་བ་སོགས་ནས་མོས་ལ། ༀ་ཡེ་ཤེས་རྒྱལ་པོ་སོགས་ཀྱིས་རིག་པའི་མེ་ཏོག་དབུལ་ལ་བདག་དང་སོགས་གྱུར་བར་དང་། དེ་ནས་སློབ་མ་རྣམས་ལ་ཁྲུས་སོགས་སྔར་བཞིན་བྱས་ལ་ཆོས་བཤད་ཀྱི་མཚམས་སྦྱོར་འདིར་གང་གསན་པར་བྱ་བའི་ཆོས་ནི། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་དྲུག་པ་སོགས་ནས་གསོལ་གདབ། སྡོམ་བཟུང་། ཡེ་ཤེས་དབབ་པ། མེ་ཏོག་དོར་ཞིང་མིག་དབྱེ་བ། མཐོང་བ་བསྟན་པ་སོགས་དང་། བུམ་པ་སོགས་དང་། ཡོ་གའི་ལྷ་སོ་བདུན་དང་། དབང་དྲུག་ཅུ་རྩ་གཉིས་རྣམས་དཀྱུས་ལྟར་དང་། ལམ་ཁྱེར་བཞི། འགག་དྲུག་སོགས་དང་། བསྒྲུབ་པར་བྱ་སྙམ་པས་གཙོ་བོས་ཇི་ལྟར་སོགས་དང་། བསོད་ནམས་འདི་ཡིས་དགེ་བ་བསྔོ་བ་དང་སྒྲུབ་ཐབས་ཀྱི་མཇུག་གི་བཀྲ་ཤིས་ཚང་བར་བརྗོད་ལ་རོལ་མོའི་སྒྲ་དང་བཅས་པས་མེ་ཏོག་འཐོར་ལ་རང་གནས་སུ་བཏང་ངོ་། །རྗེས་ཆོག་ལ་མཆོད་པ་ཁ་གསོས་ལ་མདུན་བསྐྱེད་ཀྱི་མཆོད་པ་ཁ་གསོས་ལ་མདུན་བསྐྱེད་ཀྱི་མཆོད་པ་བྱིན་རློབ་ཡཀྵ་སོགས་ནས་ༀ་བཛྲ་པུཥྤེ་ནས་ཤཔྡའི་བར་དང་། ༀ་སརྦ་ཏ་ཐཱ་ག་ཏ་པུཥྤེ་པཱུ་ཛ་སོགས། ཤཔྡའི་བར་དང་། ༀ་བཛྲ་ལཱ་སྱ་སོགས་ནས་གནྡྷེ་ཨཱཿས་མཆོད་ཅིང་། བསྟོད་པར་འོས་པས་བསྟོད། བླ་མ་དཀྱིལ་འཁོར་སོགས་ནས། ལྷ་རང་རང་གི་སྔགས་མཐར་བཛྲ་མུཿསོགས་ནས་ཏུཥྚྱ་ཧོཿ རས་བྲིས་ལ། འདིར་ནི་གཟུགས་དང་ཡིག་བརྒྱ། མ་རྙེད་ཡོངས་སུ་སོགས། ས་ཏྭ་མུཾ། ཛཿཧཱུྃ་བྃ་ཧོཿ ཡིག་བརྒྱ། ༀ་བཛྲ་ཀརྨ་སོགས་ལན་གསུམ་རེ། རང་རྡོར་སེམས་སོགས་བཅུག་པར་གྱུར། རྡུལ་ཚོན་ལ་ཨ་ཀཱ་རོས་ཕྱགས། བསྔོ་བ་དང་ཤིས་བརྗོད་ནི་དགེ་བའི་རྩ་བ་སོགས་ནས། བདེ་ལེགས་ཤོག །བར་རོ། །དེ་དག་ནི་ཡན་ལག་གི་དཀྱིལ་འཁོར་དྲུག་ཏུ་མན་ངག་ལུགས་ཀྱི་ཕྱི་དབང་རྒྱུད་ཀྱི་ཆུ་བོ་བསྐུར་བའི་ཚུལ་ཏེ། འདི་ཡན་ཆད་ཀྱིས་བསྙེན་པའི་ཡན་ལག་ནུབ་བཞི་པ་ཚུན་ཆད་ཀྱི་བྱ་བའི་རིམ་པ་བསྟན་ཟིན་ཏོ།། ༈ །།ད་ནི་ཡན་ལག་ཅན་རྩ་བའི་དཀྱིལ་འཁོར་ལ་བརྟེན་ནས་རྒྱུད་ལུགས་ཀྱི་ཕྱི་དབང་། རྒྱུད་མན་ངག་ཐུན་མོང་གི་ནང་དབང་འབྱུང་བའི་ཆུ་བོ། རྒྱུད་ལུགས་གཙོ་ཆེ་བའི་སྒྲུབ་དབང་གྲགས་པའི་ཆུ་བོ་དང་། དེའི་མཇུག་ཏུ་གསང་དབང་རྫོགས་པའི་ཆུ་བོ་གཉིས་བསྡུས་པ་རེ་བསྐུར་བར་བྱ་བའི་རིམ་པ་ལ། དེ་ཡང་ཡོ་གའི་རྗེས་ཆོག་གྲུབ་མ་ཐག་པར་གང་དུ་བྱ་བའི་དཀྱིལ་འཁོར་གྱི་གཞིར་གཙོ་བོའི་བུམ་པ་དང་མཆོད་པ་སོགས་ལྷ་སྟ་གོན་གྱི་ཆས་རྣམས་དང་། བདག་བསྐྱེད་ཀྱི་མཆོད་གཏོར་རྣམས་དང་། ལས་བུམ་སོགས་ཡན་ལག་རབ་གནས་ཀྱི་རྫས་རྣམས་དང་། བདུད་རྩི་ལྔ་ཡི་གོ་མ་ཡེ་སོགས་ཉེ་བར་མཁོ་བ་རྣམས་འདུ་བྱས་ལ། ཉིན་ལྔ་པའི་ནངས་སྔ་བར་སྒྲུབ་ཐབས་དངོས་གྲུབ་ཆར་འབེབས་ལྟར་སྟ་གོན་གྱི་བདག་གི་རྣལ་འབྱོར་རྒྱས་བསྡུས་ཕྱག་བཞེས་བཞིན་བཏང་། དེ་ནས་ཡན་ལག་གི་རབ་གནས་དཀྱིལ་ཆོག་ལས། རཾ་ཡཾ་ཁཾ། སྭ་བྷཱ་ཝ། སྟོང་པའི་ངང་ལས་སོགས། ལས་བུམ། ཐིག་ཚོན། རྡོང་དྲིལ། ཐོད་ཆུ་རྣམས་སོ་སོའི་རབ་གནས་དཀྱུས་ལྟར་འཁྱིལ་བར་གྱུར། བར་རོ། །ཧཱུྃ་རང་བྱུང་སོགས་ཀྱིས་བདུད་རྩི་ལྔ་ཡིས་གོ་མ་ཡེ་བྱུགས། སྟོང་གསུམ་གསང་བ་སོགས་ཀྱིས་ཡེ་ཐིག་ངང་ལས་ཐིག་རྣམས་ཚང་བར་བཏབ་གྲུབ་ནས་ཐིག་སྐུད་ལ་ཀུན་བཟང་སོགས་ཀྱིས་མཆོད་ནས་བཛྲ་མུཿས་གཤེགས་གསོལ་བྱ། ཡེ་ཤེས་ཀྱི་ཐིག་བཏེག་ནས་སྒོའི་རྩ་ཐིག་དབྱེ་བ་སོགས་ཀྱང་དཀྱིལ་ཆོག་ལྟར་བྱ། དེ་ནས་ལྷ་སོ་སོའི་བསྐྱེད་སྔགས་ཀྱིས་སློབ་དཔོན་གྱིས་དྲིའི་ཐིག་ལེ་དང་ལས་རྡོར་གྱིས་ཚོམ་བུ་བཀོད་དེ་ཞི་བ་མཎྜལ་གྱི་སྟེང་དུ་དགོད་ཅིང་དཀྱིལ་འཁོར་གྱི་དབུས་སུ་མཉྫིའི་ཁར་བཀོད། དེའི་དབུས་སུ་གཙོ་བུམ་སོགས་ཀྱང་བཤམས་མཐའ་མཆོད་པ་རྣམས་ཀྱིས་བསྐོར་ནས་བིགྷྣན་སོགས་ཀྱིས་བྱིན་རློབས། སྔོན་འགྲོ་དཀྱིལ་ཆོག་གི། བདག་ཉིད་དཀྱིལ་འཁོར་བདག་པོ་སོགས་ནས། སྒྲུབ་ཐབས་ཀྱི་བསྟོད་པའི་མཐར། ན་མོ་ཧཱུྃ་ཞེས་པའི་བར་དང་། དབང་གི་དུས་སྙན་གསན་དབབ་པ་འདིར་མི་མཛད། བུམ་པ་སྟ་གོན་ཧཱུྃ་བིགྣཱ་ན་ཏ་ཀྲྀ་ཏེ་ཤཱུ་ནྱ་ཏཱ་སོགས་ནས་རོ་གཅིག་ཏུ་གྱུར་ཅེས་པ་དང་། སྤོས་ཀྱིས་བདུག་པའི་བར་རོ། །དེ་ནས་དཀྱིལ་འཁོར་ཡོལ་བས་བསྒྲིབས་ལ་སློབ་མ་སྟ་གོན་བྱ་བ་ནི། སློབ་མ་རྣམས་ལ་ཁྲུས་དང་། སྔོན་གཏོར་སོགས་སྔར་བཞིན་དང་། བདེན་སྟོབས་ཀྱི་ཚེ། དབང་ཆོག་གི་སྟ་གོན། འགོ་ནས་དེང་འདིར་རྡོ་རྗེ་སློབ་མ་སོགས་དང་། མཚམས་བཅིངས་ལ་ཆོས་བཤད་རྒྱས་བསྡུས་སྡར་ལྟར་གྱི་མཚམས་སྦྱོར་འདིར་གང་གསན་པར་བྱ་བའི་ཆོས་ནི་སོགས་ནས་མཎྜལ། གསོལ་གདབ། སེམས་བསྐྱེད་སོགས་ནས། ཚེ་སྦ་བ། སྒྲིབ་པ་སྦྱོང་བ། གནས་གསུམ་བྱིན་རློབ། སོ་ཤིང་སོགས་རྫས་རྣམས་བྱིན། དབང་གི་གླེང་གཞི་བཤད་པ་སོགས་ནས་དངོས་གཞི་དབང་བསྐུར་བའི་ཆོ་ག་སླད་ནས་འབྱུང་བ་ཡིན་ནོ། །ཞེས་དང་། བསོད་ནམས་འདི་ཡིས་སོགས་ཀྱིས་དགེ་བ་བསྔོ་བའི་བར་དཀྱུས་ལྟར་རོ། །དེ་ནས་ལྷ་སྟ་གོན་གྱི་འཕྲོ་ནས་སྙན་གསན་དབབ་པ་མགོན་པོ་ཀུན་མཁྱེན་སོགས། ལན་གསུམ། རང་བཞིན་དུ་གསལ་བར་གྱུར། བར་རོ། །དེ་ནས་ཞག་གཅིག་མཛད་སྲོལ་ཡོད་ཀྱང་དཀྱིལ་ཆོག་ལྟར་བེ་གཱ་ཀྲ་མ་ཡཾ་གིས་སྟ་གོན་གྱི་ལྷ་ནམ་མཁར་བཏེག །ཚོམ་བུ་སོགས་བསལ་ལ། སློབ་དཔོན་གྱིས་ཚོན་སྣ་ལྔ་པོ་ༀ་ཨཱཿ སརྦ་སོགས་ཀྱིས་དཀྱིལ་འཁོར་གྱི་ལྟེ་བར་བླུགས་ལ་བྱང་ཤར་ནས་རྩིག་པའི་རེ་ཁཱ་འཐེན་པ་སོགས་བྱས་ལ། སློབ་མ་རྣམས་ཀྱིས་འདིར་སྒྲུབ་ཆེན་དང་འབྲེལ་ཚེ་གཞན་རྣམས་ཀྱིས་ཆ་གསུམ་གཏོར་མ་བཏང་སྟེ། ཆ་གསུམ་པ་ཕྱིར་གཏོང་བ་དང་མཉམ་དྲག་སྔགས་དང་ཐུན་གྱིས་བྲབ་ཅིང་རོལ་མོ་བཅས་ཕྱི་རོལ་དུ་འགྲོ་ནས་ཕྱིར་མཚམས་རྒྱལ་ཆེན་དང་ཕྱོགས་སྐྱོང་བཅུའི་ཐོ་སྡོམ་སོགས་སྒྲུབ་ཁོག་ཏུ་འབྱུང་བ་ལྟར་ༀ་ཨཱཿཧཱུྃ་སོགས་ནས། རྒྱལ་ཐབས་ཀྱི་གུར་ཕུབ་པར་གྱུར། བར་དང་། བར་མཚམས་དམ་སྲིད་མནན་པ་ལ། གསེར་སྐྱེམས། རཾ་ཁཾ་ཡཾ། འདོད་ཡོན་བདུད་རྩིའི་རྒྱ་མཚོར་གྱུར། རིག་འཛིན་རྩ་བརྒྱུད། སོགས། ཨེ་ཡཾ་ཛྭ་ལ་རཾ། སོགས་ནས། མཱ་ར་ཡ་ཕཊཿ བར་རོ། །སྒོ་བྱང་གདགས་པ། ༀ་ཨཱཿཧཱུྃ། སྟོང་པའི་ངང་ལས། ས་མ་ཡ་སྟཾ། བར་རོ། །དེ་རྣམས་སྒྲུབ་མཆོད་ཙམ་དང་དབང་རྐྱང་ལ་ནི་མི་དགོས་སོ། །སྒྲུབ་ཆེན་དང་འབྲེལ་ཚེ་ཉིན་ལྔ་པའི་ལས་རིམ་འདི་ཡན་རྩ་དཀྱིལ་ལ་བརྟེན་པའི་བསྙེན་པའི་ཡན་ལག་ཡིན་ཞིང་། དེ་ནས་ཉེ་བར་བསྙེན་པའི་ཡན་ལག་ནི་གང་གི་ཚེ་རྡུལ་ཚོན་གྱིས་དཀྱིལ་འཁོར་བྲིས་གྲུབ་པ་ན་ཚོན་ལྷག་རྣམས་ཀུན་བཟང་སོགས་མཆོད་པས་མཆོད། བཛྲ་མུཿསོགས་ཀྱིས་གཤེགས་སུ་གསོལ་ལོ། །དེ་ནས་རྣམ་པ་འགོད་པ་ནི། སྒྲུབ་དབང་གི་རྫས་ཙཀ་ལི་ལ་སོགས་པ་དང་། དངོས་གྲུབ་ཀྱི་རྫས་རྣམས་དང་། མཆོད་པ་རྣམས་དང་དཀྱིལ་འཁོར་གྱི་རྒྱན་རྣམས་སློབ་དཔོན་གྱི་མདུན་དུ་བསགས་ལ་དཀྱིལ་ཆོག་ལྟར། བགེགས་བསྐྲད་པ་བདག་ཉིད་ཞེ་སྡང་རྡོ་རྗེ་སོགས་ནས། ན་མོ་ཧཱུྃ་བར་དང་། རཾ་ཡཾ་ཁཾ་སོགས། སོ་སོ་ལ་ཐིམ་པར་གྱུར་བར་རོ། །དེ་ནས་རྫས་རྣམས་དང་སྟ་གོན་བྱས་པའི་བུམ་པ་རྣམས་བཅས་ཐོགས་ཏེ་སྤོས་རོལ་གྱིས་སྣ་དྲངས་པས་དཀྱིལ་འཁོར་ལ་སྐོར་བ་ལན་གསུམ་བྱས་ནས་སྒྲུབ་ཁོག་ལྟར། ཧཱུྃ་དབྱིངས་དང་ཡེ་ཤེས་སོགས། བཞུགས་སུ་གསོལ། ཞེས་དང་སྤྱི་ཛཔ྄་ཀྱིས་སྒྲུབ་རྫས་སྒྲུབ་ཁོག་ལྟར་གོ་རིམ་མ་ནོར་བར་ཐམས་ཅད་བཀོད་ལ། མདུན་ངོས་སུ་ཞི་བ་དང་ཁྲོ་བོའི་མཆོད་གཏོར་སོགས་ཕྱག་ལེན་ལྟར་བཤམས་ལ། སྒོ་དབྱེ་བ་དཀྱིལ་ཆོག་ལས་བཛྲ་ཙཀྲ་མཎྜ ལ། སོགས་ཀྱི་སྔགས་རྒྱས་ཕྱོགས་བཞི་ནས་སྒོ་དབྱེ། ཨ་ལ་ལ་ཧོས་ཕྱག་བྱ། དེ་ནས་སྒྲུབ་ཆེན་དང་འབྲེལ་ན་གསང་མཚམས་མ་ཏྲཱཾ་མནན་པ་སྒྲུབ་ཁོག་ལྟར་བཛྲ་ཧེ་རུ་ཀོ ྅་ཧཾ། གཉིས་མེད་དུ་གྱུར་བར་རོ། །སྐབས་འདིར་རབ་གནས་སྔོན་སོང་བའི་རས་བྲིས་ལ་བརྟེན་པ་ཡིན་ན་མི་དགོས་ཤིང་རས་བྲིས་གསར་པ་དང་རྡུལ་ཚོན་གྱི་ཕྱོགས་སུ་ངེས་པར་དགོས་པ་དཀྱིལ་འཁོར་རབ་གནས་ཟུར་འདེབས་ལས་འབྱུང་བ་འབྲིང་པོ་ལྟར་བྱ་བའི་ཁྲིགས་ནི། དེ་ཡང་སྔོན་དུ་ཞི་ཐུང་ཙམ་ལ་བརྟེན་པའི་བདག་གི་རྣལ་འབྱོར་དང་གཙོ་བུམ་བསངས་སྦྱངས་སྟོང་པའི་ངང་ལས་སོགས། བཛྲ་ཨ་མྲྀ་ཏ་སོགས་ཀྱིས་ཁྲུས་བུམ་བསྒྲུབ། ཧཱུྃ་ཞེས་བརྗོད་པས་དཀྱིལ་འཁོར་གྱི་གཙོ་བོའི་ཐུགས་ཀ་ནས་བདག་ཉིད་ཞེ་སྡང་རྡོ་རྗེ་སོགས་ཀྱིས་བགེགས་བསྐྲད་ནས་བཟུང་། ཇི་ལྟར་བལྟམས་པ་སོགས། ཨཱ་བྷི་ཥེ་ཀས་ཁྲུས། ཀཱ་ཡ་བི་ཤོ་དྷ་ནས་སྐུ་ཕྱི། རྟེན་བསྐྱེད་པ། ཧཱུྃ་བིགྷྣནྟ་ཀྲིཏ་སོགས། ཡེ་ཤེས་པ་སྤྱན་དྲང་ཞིང་བསྟིམ་པ། དབྱེར་མེད་དུ་ཐིམ་པར་གྱུར། བར་དང་། སྤྱན་དབྱེ་བ། ཁྱད་པར་རྒྱུ་ལས་སོགས། ཤོ་དྷ་ནི་སྭཱ་ཧཱ། དབང་བསྐུར་བ། ནམ་མཁའ་གང་བའི་སོགས་དབུ་བརྒྱན་པར་གྱུར། བར་དང་། མཆོད་པ། ཀུན་བཟང་། ཞབས་བསིལ་བཞི་བསྣོལ། སྨན་གཏོར་རཀྟ་རྣམས་སྔགས་རྒྱས་དབུལ། བརྗོད་མེད་ཤེས་རབ་ཀྱིས་བསྟོད། བརྟན་བཞུགས། ན་མོ་དཀོན་མཆོག་གསུམ་ལ་སོགས། ཏིཥྛ་བཛྲ། བཀྲ་ཤིས་བརྗོད་པ་དང་། ཡེ་དྷརྨཱ་བཟླ་བཞིན་མེ་ཏོག་འཐོར་ཞིང་རོལ་མོའི་སྒྲ་སྦྱར་རོ། །དེ་ཡན་ཆད་ཉེ་བསྙེན་གྱི་ཡན་ལག་སྟེ་ཞག་དྲུག་པའི་བྱ་བའི་རིམ་པའོ། །དེ་ནས་སྒྲུབ་ཆེན་དང་འབྲེལ་ཚེ་སྒྲུབ་པའི་ཡན་ལག་ལ་སྒྲུབ་ཞག་དུ་བྱེད་ཀྱི་ཆོ་གའི་ཁྲིགས་རིམ་ལ། དེ་ཡང་ཉིན་བདུན་པའི་ནང་སྔ་བར་སྒྲུབ་ཐབས་དངོས་གྲུབ་ཆར་འབེབས་ལྟར་གྲལ་ཕྱག་དང་ཚུལ་ཕྱག་སྔོན་དུ་འགྲོ་བས་ལས་ཀྱི་དབུ་དྲང་བ་ནས་བཟུང་བཟླས་པའི་མཇུག་གི་ཡེ་ཤེས་འདིར་བཀོད་པ་ནི་སྒྲུབ་ཁོག་ཏུ་མདོ་དབང་ཞག་བཅུ་གཅིག་པའི་རྩིས་མཛད་འདུག་པ་དེའི་ལུགས་ཡིན། མཆན། ཀྱི་དཀྱིལ་འཁོར་དམ་ཚིག་གི་དཀྱིལ་འཁོར་ལ་གཉིས་མེད་དུ་ཐིམ་པར་གྱུར་པའི་བར་དང་། སླར་ཡང་ཏིང་འཛིན་རྣམ་གསུམ་ནས་བཟུང་བཟླས་པའི་མཐར་ཐུག་བར་གོང་བཞིན་ཚར་གཅིག་བཏང་། སྒྲུབ་མཆོད་དང་དབང་རྐྱང་ལ་ཆོ་ག་གཉིས་པོ་དེ་ལས་མི་དགོས་ཀྱང་། སྒྲུབ་ཆེན་དང་འབྲེལ་ཚེ་ཐུན་བཞིར་བཅད་པའི་སྔ་མ་གཉིས་ལ་ཆོ་ག་དེ་དག་སོར་གནས་དང་། ཉིན་གུང་ཚོགས་དང་སྐོང་ཆེན་ལྔ་དག་འགྱུར་བཅས་ལན་རེ་བཏང་། དགོང་ཐུན་གྱི་ཚེ་སྔགས་ལ་བརྟེན་པའི་ལས་བྱང་དང་སྤྱི་ཛཔ྄་བཟླ་ལ་མརྗོད་མེད་ཤེས་རབ་ཀྱིས་བསྟོད། དེའི་མཇུག་ཏུ། བཀའ་སྲུང་གི་བསྐང་གསོ་དང་། འདས་གཏོར་ཆ་གསུམ་གཏོར་བཏང་ལ། བརྟན་མ་བསྐྱངས་ནས། དེའི་མཇུག་ཏུ་ཉུལ་ལེ་བསྐྲད་པ་སྒྲུབ་ཁོག་ལྟར། ཨེ་ཡཾ་ཛྭ་ལ་རཾ་སོགས་ནས། ཛྭ་ལ་རཾ་རཾ་ཧཱུྃ་ཕཊ་བར་རོ། །དེ་ནས་མཆོད་པ་ཁ་གསོས་ལ་བྱིན་རློབ་ནས་ཉེར་བསྡུའི་བར་དང་། དེ་ནས་ཕྱི་ཆོག་གི་བྱིན་དབབ་ནམ་མཁའི་མཐའ་དང་མཉམ་པ་སོགས། ཨཱ་བེ་ཤ་ཡ་ཨ་ཨའི་བར་རོ། །དེ་ནས་སྲོད་ཐུན་ལ་སླར་ཡང་སྔགས་ལ་བརྟེན་པའི་ལས་བྱང་གོང་ལྟར་བཏང་ནས་སྤྱི་ཛཔ྄་བཟླ་ཞིང་། བསྟོད་པའི་བར་སྔར་ལྟར་རོ། །ཐུན་བཞིར་བཟླས་པ་གང་འགྲུབ་ལ་འབད་ཅིང་། དེའི་ཚེ་ཐུན་བར་རྣམས་སུའང་སྤྱི་ཛཔ྄་ཀྱི་སྔགས་རྒྱུན་ཀྱང་ཆོག་རོགས་གཞན་ལ་གསུང་བཅོལ་བའི་མ་ཆད་པ་གྲུབ་ན་ལེགས། དེ་ཡན་ཆད་ཞག་གྲངས་ཇི་ཙམ་བྱེད་པའི་ཡན་ལག་གོ། །དེ་ཡང་སྒྲུབ་མཆོད་དབང་རྐྱང་ལ་ནི་ཆོ་ག་རྗེས་མ་གཉིས་པོ་དང་ཉུལ་ལེ་བསྐྲད་པ་ཕྱི་ཆོ་ག་བྱིན་དབབ་རྣམས་མི་དགོས་སོ། །དེ་ནས་སྒྲུབ་པ་ཆེན་པོའི་ཡན་ལག་ནི། ཞག་དགུའི་ཉིན་གུང་རྒྱས་པའི་སྦྱིན་སྲེག་ཟུར་འདེབས་ལྟར་རམ་ཡང་ན་སྒྲུབ་མཆོད་ཀྱི་ལུང་གི་སྦྱིན་ལྟར་གྲུབ་པར་བྱ། ཞག་བཅུ་པའི་ནངས་པར་ཐོ་རངས་ཀྱི་ཆོ་ག་རྒྱས་པ་དང་མཇུག་ཏུ་ཚོགས་བཏང་ལ། ཚོགས་རོལ་གྱི་མགོར་བཞགས། ཉི་མ་ཤར་ཁར་སློབ་དཔོན་བདག་ཉིད་ཁྲུས་བྱས་ལ་སྔགས་ཀྱི་འཁོར་ལོས་སྒྱུར་བའི་ཆས་སུ་ཞུགས་ལ་དཀྱིལ་འཁོར་གྱི་ཤར་སྒོར་དབང་སྟེགས་ལ་འཁོད་པས་དབང་ཆོག་ཏུ་འབྱུང་བ་ལྟར་ༀ་བཛྲ་ས་མ་ཡ་ༀ་སོགས་ཀྱིས་རིག་པའི་མེ་ཏོག་འཐོར་བ་གནང་བ་ཞུ་བ། དགོངས་པ་བསྐུལ་བའི་གླུ་བླང་བ་རྣམས་ས་མ་ཡ་སྟཾ། བར་རོ། །དེ་ནས་སློབ་མ་རྣམས་དཀྱིལ་འཁོར་ཁང་པའི་སྒོར་ཁྲུས་བྱས་ལ་ནང་དུ་གྲལ་བྱེད། བགེགས་གཏོར་བཏང་ཞིང་། མཚམས་བཅད་པ་སྔར་ལྟར་དང་། ཆོས་བཤད་སྔར་བཞིན་རྒྱས་བསྡུས་ཇི་ལྟར་རིགས་པའི་མཚམས་སྦྱོར་དུ། འདིར་གང་གསན་པར་བྱ་བའི་ཆོས་ནི། འདིར་མདོ་རྩ་བའི་དཀྱིལ་འཁོར་དུ་རྒྱུད་ལུགས་ཀྱི་ཆུ་བོ་བཞིའི་དབང་། སོགས། མིག་དར་དང་མེ་ཏོག་བྱིན། སེམས་བསྐྱེད། ཚེ་སྤ་ཞིང་བསྲུང་བ། བགེགས་བསྐྲད་པ། སྡིག་པ་སྦྱང་བ། བྱིན་གྱིས་བརླབ་པ། ཡེ་ཤེས་དབབ་པ། མིག་དབྱེ་ཞིང་མཐོང་བ་བསྟན་པ་སོགས་ནས་ཕྱི་དབང་རྒྱུད་ཀྱི་ཆུ་བོའམ་ཕན་པའི་དབང་བཅུ། ནང་དབང་འབྱུང་བའི་ཆུ་བོའམ་ནུས་པའི་དབང་བཅུ་གཅིག་ལ་ཉན་དབང་སོགས་དང་། དེའི་བདུན་ལྷ་དབང་ལ་ཞི་བ་དང་། ཁྲོ་བོའི་ལྷ་བརྒྱ་སོགས་ནས་མིང་གི་དབང་བསྐུར་བ་ཡན་ཆད་སྐལ་པ་ཅན་དུ་བྱས་པའོ། །ཞེས་པའི་བར་རོ། །དེ་ནས་གསང་དབང་གཉིས་པོ་བསྡུས་པ་ནི། རྩ་རྒྱུད་ལས། སྒྲུབ་པའི་དབང་མཆོག་སོགས། ཡེ་ཤེས་རྡོ་རྗེ་མངོན་དུ་བྱེད་པའི་སྐལ་བ་ཅན་དུ་བྱས་སོ། །བར་དང་། ལམ་ཁྱེར་བཞི། འགག་དྲུག །གདམས་ངག །སྒོམ་ཁྲིད་གདམས་པ་སོགས། ཚུལ་བཞིན་དུ་བསྒྲུབ་པར་བགྱིའོ་སྙམ་པས། གཙོ་བོས་ཇི་ལྟར་སོགས་ནས། དགེ་བསྔོ་བ་དང་བཀྲ་ཤིས་བསྡུས་པ་ཙམ་བྱས་ལ་བཏང་ངོ་། །དེ་ནས་ཚོགས་ལ་རོལ་ཞིང་ལྷག་མ་བཏང་། བཀའ་སྲུང་གསོལ་ཀ་བཅས་བཏང་ངོ་། །དེའི་ནུབ་མོར་གྲུབ་ན་ཡན་ལག་གི་དཀྱིལ་འཁོར་དུ་གསང་དབང་རྫོགས་པའི་ཆུ་བོ་ཟབ་མོའི་དབང་ཀུན་རྫོབ་དང་དོན་དམ་བྱང་སེམས་ཀྱི་དཀྱིལ་འཁོར་གཉིས་པོ་བཤམས་བཀོད་སོ་སོའི་སྒྲུབས་ཐབས་ལྟར་ལ་རྡུལ་ཚོན་རས་བྲིས་གང་རུང་ལ་བརྟེན་པའི་དབང་རྫས་མཆོད་པ་ཚོགས་ཀྱི་ཡོ་བྱད་བཅས་ཚང་བར་བསགས་ལ་ཀུན་རྫོབ་ཀྱི་དབང་གི་སྒྲུབ་ཐབས་ལས་འདི་ལྟར་ཆོས་ཐམས་ཅད་སོགས་ནས། བཟླས་པ་ཡན་གྲུབ་པར་བྱ། དོན་དམ་བྱང་སེམས་ཀྱི་སྒྲུབ་ཐབས་ལས། ཧཱུྃ་མི་རྟོག་ཡེ་ཤེས་སོགས་ནས། བཟླས་པ་འབྲུ་འབུམ་དང་། ཚོགས་འཁོར་དབུལ་བ། བུདྡྷ་བ་ཌ་ཁཱ་ཧི་བར་རོ། །དེ་ནས་དབང་ཆོག་ལྟར་སློབ་མ་རྣམས་ལ་ཁྲུས་དང་བགེགས་བསྐྲད། སྲུང་འཁོར་བཅིངས། ཆོས་བཤད་བསྡུས་ཙམ་ལ་མཚམས་སྦྱོར་འདིར་གང་གསན་པར་བྱ་བའི་ཆོས། སོགས་ནས། བདུད་རྩི་སྦྱིན་པ་དང་། ཤེས་རབ་ཡེ་ཤེས། དེས་བླ་མ་སོགས། རིག་མ་གཏད་པ་སོགས། བསྒྲུབ་པར་བྱའོ་སྙམ་པས། གཙོ་བོས་ཇི་ལྟར་སོགས། མཎྜལ་ཤར། དེ་ནས་དོན་དམ་གྱི་དབང་ཆོག་ལྟར་འདིར་མདོ་ཡོངས་རྫོགས་ཀྱི་དབང་དུ་བྱས་པའི་སོགས། བུམ་དབང་། བརྒྱུད་རིམ་བླ་མའི་ལྷ་ཙཀ་རྣམས་སྦམས་ཏེ་བསྐུར་བ་དང་། ལམ་ཁྱེར་བཞི། འགག་དྲུག་སོགས། དཀྱུས་བཞིན་དང་། ཚུལ་བཞིན་བསྒྲུབ་པར་བགྱིའོ་སྙམ་བས། གཙོ་བོས་ཇི་ལྟར་སོགས། དགེ་བ་བསྔོ་བའི་བར་རོ། །རྗེས་ཆོག་གཉིས་ལས། དང་པོ་མཚན་མའི་དཀྱིལ་འཁོར་སོགས་ནས་ཡོངས་རྫོགས་བཀྲ་ཤིས་ཤོག །བར་རོ། །གཉིས་པ་ནི། ཚོགས་ལ་རོལ་ཞིང་ལྷག་མ་རོལ་ཞིང་ལྷག་མ་བཏང་བ། ལྷག་མེད་བར་སོགས་ནས། རྫོགས་པའི་བཀྲ་ཤིས་ཤོག །བར་རོ། །དེས་ནས། ཞག་བཅུ་པའི་བྱ་བའི་རིམ་པའོ། །དེ་ནས་བཅུ་གཅིག་ནངས་པར་ཐོ་རངས་ཆོ་ག་རྒྱས་པ་ཚོགས་ལ་རོལ་བའི་འགོ་བར་བཏང་། གསང་དབང་གཉིས་སྔར་ནུབ་མ་སོང་ན་འདིར་བསྒྲུབས་ནས་བསྐུར། ཚར་ན་འདིར་མཐའ་རྟེན་ཚེ་དབང་གི་དཀྱིལ་འཁོར་སྒྲུབ་ཐབས་ལྟར་རྡུལ་ཚོན་རས་བྲིས་གང་རུང་ལ་དབང་རྫས་མཆོད་པ་རྣམས་ཚང་བར་བཀོད་ཅིང་སྒྲུབ་ཐབས་ལྟར་རྡོ་རྗེ་སློབ་དཔོན་སོགས་ནས། འདའ་བར་མི་ནུས་སོ། །གྲུབ་ན་འདས་གཏོར་དང་ཆ་གསུམ་བཏང་། སྐབས་འདིར་གཞན་དོན་ནུས་པའི་སློབ་མ་ཡོད་ན་དབང་གི་གཏད་རྒྱ་བྱ་དགོས་པས་ཞི་དཀྱིལ་སྟེང་ཁང་གི་དེ་བླང་བཏུབ་ན་དང་དེ་མིན་ན་ལོགས་སུ་བྲིས་ལ་དཀྱིལ་འཁོར་གྱི་མདུན་དུ་སྟེགས་ཀྱི་ཁར་བཀོད་པ་ལ་བཞི་བསྣོལ་སོགས་མཆོད་པས་བསྐོར། མདོའི་གླེགས་བམ་ཀྱང་བཀོད་གདན་དང་དབང་རྫས་སོགས་འོག་ཏུ་འབྱུང་བ་ལྟར་གོ་འཕང་དང་མཚམས་པར་དངོས་སམ་རི་མོར་བྲིས་པ་འདུ་བྱས་ལ། ཐོག་མར་སློབ་མ་རྣམས་གནས་ཕྱོགས་ནས་རས་སོགས་དཀར་པོའི་གདན་ལ་ཚོག་བུ་བཅུ་གསུམ་བྲེང་ཚར་དུ་བཀོད་པ་སོགས་བྱས་ལ། སློབ་མ་རྣམས་ལ་ཁྲུས་དང་། བགེགས་བསྐྲད་མཚམས་གཅད་སྔར་བཞིན་བྱས་ནས་གཏད་རྒྱའི་དབང་གི་འགོའི། ནམ་མཁའ་དང་མཉམ་པ་སོགས་ནས། ཞི་གཞུང་བ་སྤང་བ། ཞི་དཀྱིལ་དང་། པུ་སྟི། རྡོར་དྲིལ་སོགས་ཀྱི་དབང་བསྐུར། མངའ་གསོལ་བ་དང་། སྨོན་ལམ་གདབ་པར་གྱིས་ཤིག་བར་དང་། དམ་ཚིག་ཁས་བླངས་སོང་ནས་མཐའ་རྟེན་ཚེ་དབང་བྱ་བ་དབང་ཆོག་ལྟར་ནམ་མཁའ་དང་མཉམ་པ་སོགས་ནས། ཚེ་འགུགས། བུམ་པ། ཚེ་འབྲང་། ཚེ་རིལ། ཚེ་ཆང་བྱིན། སྤ་ཞིང་རྒྱས་གདབ་པ། གདམས་ངག་ཚེ་ཁྲིད་གདབ་པ་སོགས་དཀྱུས་བཞིན་ལ་བསྒྲུབ་པར་བྱའོ་སྙམ་པས་གཙོ་བོས་ཇི་ལྟར། གཏང་རག་མཎྜལ་དེང་ནས་བརྩམས་ཏེ་སོགས། བསོད་ནམས་འདི་ཡིས་སོགས་བསྔོ་བ་དང་། ཕུན་སུམ་ཚོགས་པ་མངའ་བ་སོགས་བཀྲ་ཤིས་རྒྱས་པར་བརྗོད་ཅིང་རོལ་མོའི་སྒྲ་དང་བཅས་པས་མེ་ཏོག་འཐོར་བར་བྱའོ། །དེ་ཡན་ཆད་ཀྱིས་ཆུ་བོ་བཞིའི་དབང་ཡོངས་སུ་རྫོགས་པའོ། །དེ་ནས་ཚེ་དབང་གི་རྗེས་ཆོག་མཆོད་པ་ཁ་གསོས་ལ་སྒྲུབ་ཐབས་ཉིད་ཀྱི་བྱིན་རློབ་རཾ་ཡཾ་ཁཾ་སོགས་དང་། ༀ་ན་མཿསརྦ་ཏ་ཐཱ་ག་ཏེ་བྷྱོ་སོགས་མཆོད་བསྟོད་དང་བཀྲ་ཤིས་ཤོག་བར་དཀྱུས་ལྟར་རོ། །དེ་ནས་དངོས་གྲུབ་བླང་བ་དཀྱིལ་འཁོར་གྱི་མདུན་ངོས་སུ་སྟེགས་ཀྱི་ཁར་འབྲུ་དཀར་གྱིས་རྡོ་རྗེ་རྒྱ་གྲམ་བྲིས་པའི་སྟེང་དུ་མཉྫིའི་ཁར་གསལ་ཤིང་བཅུ་གསུམ་པའི་འབྲང་རྒྱས་གཡོན་དུ་སྨན་ཐོད། དེའི་ཕྱོགས་བཞིར། དཔལ་བཤོས་ཉི་ཟླ་ཁ་སྦྱོར། ཚེ་རིལ། དབང་བཤོས། ཛ་གད་ཀྱི་སྣོད་རྣམས་བཤམ། མཐའ་སྐོར་དུ་བཟའ་བཏུང་རིགས་གང་འབྱོར་བཤམ། དཀྱིལ་འཁོར་དབུས་ཀྱི་མར་མེ་རྣམས་ཀྱང་སྤར་ལ་དངོས་གྲུབ་ལེན་པའི་འདོན་ཚིག་བགེགས་བསྐྲད་ནས་བཟུང་སྒྲུབ་མཆོད་དུས་ཀྱི་ཕྱག་བཞེས་ལྟར་བཏང་མཐར་སྔར་གྱི་ཚོགས་ལ་རོལ་བ་དང་དངོས་གྲུབ་ལ་རོལ་སྟབས་གཅིག་བྱེད། དེ་ནས་དངོས་གྲུབ་བརྟེན་པའི་ཆེད་སེམས་ཅན་དོན་ཕྱིར་སོགས་དང་མར་མེ་སྨོན་ལམ། ༀ་དུར་ཁྲོད་གསང་བ་མཆོག་གི་སོགས་དབྱངས་ཀྱི་རྗེས་ཟློས་བྱེད། འགྲུབ་པར་ཤོག །བར་དང་། དེ་ནས་ལྷག་མ་དང་བརྟན་མ་སོགས་སྒྲུབ་ཐབས་ལྟར་བཏང་ལ་ཉེར་བསྡུའི་ཚེ་གཏང་རག་མཆོད་བསྟོད་ལ་དཀྱིལ་ཆོག་ལས། བེ་གཱ་ཀྲ་མ་ཡཾ། ཡེ་ཤེས་ཀྱི་འཁོར་ལོ་བཏེག་ལ་གཏང་རག་མཆོད་བསྟོད་ཡིག་བརྒྱ་གསུམ། ནོངས་བཤགས། །རས་བྲིས་ལ་བརྟན་བཞུགས་དང་རྡུལ་ཚོན་ལ་གཤེགས་གསོལ་དམ་ཚིག་གི་འཁོར་ལོ་ཉེར་བསྡུ། ལྷར་ལྡང་། གོ་བགོ་ལུས་སྲུང་གི་བར་སྒྲུབ་ཐབས་ལྟར་བྱས་ལ་སློབ་དཔོན་གྱི་རྡོ་རྗེ་དང་བཅས་པའི་ལག་གིས་དཀྱིལ་འཁོར་ལྷ་གནས་རྣམས་ནས་ཅུང་ཟད་རེ་སྤྱི་བོར་བཀོད་ལ་ལྷག་མ་རྣམས་རོལ་མོའི་སྒྲ་བཅས་ཨ་ཀཱ་རོའི་སྔགས་ཀྱིས་གཙོ་བོའི་གནས་ཀྱི་བར་དུ་ཕྱགས་པ་བུམ་པར་བླུགས་ལ་མཆོད་པ་དང་བཅས་སྟེགས་བུའི་དབུས་སུ་བཀོད། ཕུར་བུ་རྣམས་རྡོ་རྗེ་སྐམ་པའི་རྒྱས་བཛྲ་ཀཱི་ལ་ཨུརྒཱི་སོགས་ཀྱིས་ཕྱུང་། རུ་རུ་སྥུ་རུ་ཚར་བདུན་གྱིས་ཕུར་རྩེ་འོ་མས་བཀྲུ་ཞིང་ཕུར་ཁུང་དུའང་གཏོར། སྒྲུབ་ཆེན་དང་འབྲེལ་ཚེ་ཕྱི་རོལ་དུ་སོང་ནས་རྒྱལ་ཆེན་སོགས་ཀྱི་ཐོ་རྣམས་ལ་གཏང་རག་གི་མཆོད་གཏོར་བཤམས་ལ་ༀ་ཨཱཿཧཱུྃ་སོགས་ཀྱིས་སྔར་བཞིན་བརླབས་ལ་སོ་སོའི་སྔགས་ལ་བཏགས་པའི་ས་པ་རི་བཱ་ར་པུཥྤེ་ནས། ཤཔྡའི་བར་དང་། སྔགས་དེ་ལ་སརྦ་ཏ་ཐཱ་ག་ཏེ་བྷྱོ་བི་ཤྭ་སོགས་བཏགས་པས་གཏོར་མ་དབུལ། རེ་རེའི་མཐར། ཡ་ཧི་གཙྪས་གཤེགས་སུ་གསོལ་ཞིང་བཀྲོལ། དེ་ནས་རྡུལ་ཚོན་ཆུ་བོར་གཤེགས་ཤིང་བསྔོ་བ་དང་ཤིས་བརྗོད་ཀྱིས་མཐའི་རྒྱས་པར་བྱའོ། །དེ་ལྟར་འདུས་པ་ཆེན་པོ་མདོ་ཡི་དབང་འདི་ལ་སྔོན་གྱི་དུས་སུ་རྩ་བའི་དཀྱིལ་འཁོར་ཐུན་མོང་དང་ཐུན་མོང་མ་ཡིན་པ་གང་རུང་གི་སྟེང་ནས་ཆུ་བོ་བཞི་རྫོགས་ཀྱི་དབང་བསྐུར་བརྒྱུད་ལུགས་ལྟར་དང་། རྩ་བ་དང་ཡན་ལག་གི་དཀྱིལ་འཁོར་སོ་སོར་དབྱེ། རྩ་བ་ལའང་ནང་དབང་སྒྲུབ་དབང་གཉིས་དཀྱིལ་འཁོར་ཐ་དད་པ་མཛད་པ་མན་ངག་གི་ལུགས་གཉིས་བྱུང་བ་ལས། རྗེ་སྒྲོ་ཕུག་པ་ནས་བཟུང་མཁས་གྲུབ་འགའ་ཞིག་གིས་ལུགས་དེ་གཉིས་གཅིག་ཏུ་དྲིལ་ནས་ལྷ་མི་ནས་ཡོ་ག་མན་ཆད་ཡན་ལག་གི་དཀྱིལ་འཁོར་དྲུག་སོ་སོར་མཛད། ནང་དབང་སྒྲུབ་དབང་གཉིས་རྩ་བའི་དཀྱིལ་འཁོར་གཅིག་ཏུ་བསྐུར་ཞིང་དེ་ལ་ཕྱི་དབང་རྩ་བ་དང་གསང་དབང་བསྡུས་པ་རེ་འབྲེལ་བ་དང་། སླར་ཡང་ཐུན་མོང་མ་ཡིན་པའི་ཟབ་དབང་གསུམ་པོ་ཡན་ལག་གི་དཀྱིལ་འཁོར་དུ་མཛད་པའི་སྲོལ་འདི་དེང་གི་བར་དུ་བྱུང་བ་རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་ཕྱག་བཞེས་ཚད་མར་གྱུར་པ་ཡིན་མོད། འོན་ཀྱང་དེའི་ཚུལ་གཙང་སིང་ངེ་བ་ཞིག་རྟོགས་མཁན་ཉུང་བར་བྱུང་ཚོད་ཀྱིས་ཕྱིས་སུ་གསང་བདག་སྒྲོ་ཕུག་པ་ཆེན་པོ་སླར་ཡང་སྙིང་པོའི་བསྟན་པ་ཉམས་པ་གསོ་ཕྱིར་བྱོན་པ་རིག་འཛིན་འགྱུར་མེད་རྡོ་རྗེ་དང་། ཀུན་མཁྱེན་དྷརྨ་ཤྲཱི་གཉིས་ཀྱིས་སྔ་འགྱུར་རྒྱུད་སྡེ་སྤྱི་དང་བྱེ་བྲག་ཆོས་ཚུལ་འདི་ཉིད་ཆོ་ག་སྒྲུབ་དཀྱིལ་སྒྲུབ་ཁོག་ཟུར་འདེབས་སྤྱི་དོན་ཏེ། ཇི་སྲིད་པར་གསལ་བར་བྱེད་པ་ཉི་མ་ལྟ་བུའི་ཡིག་སྣ་བདུན་མཛད་ཅིང་ཕྱིན་ཆད་ཡི་གེ་འདིའི་མཐུ་ལས་ཀུན་གྱིས་རྟོགས་པར་ཤོག་ཅེས་གསུངས་པ་ལྟར་ཡིག་ཆ་འདི་རྣམས་ལ་ཞིབ་ཏུ་དཔྱད་པས་གོང་གི་ཕྱག་བཞེས་དེ་རྣམས་ཀྱི་གནད་ཅུང་ཟད་ཤེས་པར་གྱུར་ཏོ། །འདེའི་ཕྱིར་འདིར་བཀོད་པའི་ལག་ལེན་ཐོ་བྱང་གི་རིམ་པ་འདི་ནི། དེ་ཡང་སྔར་སྨོས་པ་ལྟར་ངེས་རྫོགས་སྨིན་སློབ་ཀྱི་བསྙེན་སྒྲུབ་ཡན་ལག་བཞི་དང་འབྲེལ་བ་ནི་ས་ཐོབ་པ་དག་གི་སྤྱོད་ཡུལ་དང་། མོས་སློབ་ཀྱི་བསྙེན་སྒྲུབ་ཡན་ལག་བཞི་དང་འབྲེལ་བའི་ཚུལ་ནི་ཐམས་ཅད་མཁྱེན་པ་དྷརྨྨ་ཤྲཱིས་མཛད་པའི་སྒྲུབ་ཁོག་ཏུ་གསལ་བ་ལྟར་ཡིན་ཀྱང་དེང་སང་སྙིགས་མའི་དུས་འདིར་བྱ་བ་ཐམས་ཅད་ནང་ནས་གལ་ཆུང་ཆོས་ལ་བྱེད་པའི་སྐབས་འདིར་ཇི་བཞིན་པ་ལག་ཏུ་ལོན་དཀའ་བས་ཆོས་ཚུལ་འདིར་མི་ནུབ་པའི་ཆེད་ཁོ་ན་གཙོ་བོར་བྱས་པས་རེ་ཞིག་འདིར་མོས་སློབ་ཀྱིའང་འདྲ་འབག་ཙམ་གྱི་སྒྲུབ་ཆེན་དང་འབྲེལ་བ་དང་། ཡང་སྒྲུབ་མཆོད་ཙམ་ལ་བརྟེན་པའི་དབང་རྐྱང་གཉིས་པོ་འདོར་ལེན་བྱས་ཆོག་པའི་དམིགས་རྣམ་ཕྱེད་པ་འདི་གཙོ་བོར་མདོ་ཡི་སྤྱི་དོན་གསལ་བྱེད་སྒྲོན་མེ་དང་སྒྲུབ་ཁོག་གི་ས་བཅད་ལྟར་མ་ནོར་བ་དང་། སྒྲུབ་ཆེན་དང་འབྲེལ་བའི་ལུགས་སུ་སྒྲུབ་ཁོག་ལྟར་དང་། དེ་ལབ་འདོན་གྱིས་གནད་ཚང་བ་དང་ཆད་སྐྱོན་མེད་པ་རྣམས་བསྡུས། ཚིག་མང་ཉུང་ལས་དོན་གཅིག་པ་རྣམས་དཀྱིལ་ཆོག་ལྟར་སྦྱོར་རྒྱུ་དང་། སྒྲུབ་ཐབས་དངོས་གཞི་ནི་སྒྲུབ་མཆོད་སྐབས་ལྟར་བྱ་བ་ལས་འདིར་ཚིག་འགོ་ཕུད་མ་དགོས་ཤིང་། དེའི་ཚུལ་ནི་ལོགས་སུ་གསལ། དེ་དག་རྣམས་ལའང་སྨིན་གླིང་རང་གི་ཕྱག་བཞེས་དང་སྒྲུབ་ཁོག་གི་བབ་ཅུང་ཟད་འདྲ་མིན་རྣམས་ཀྱང་དོན་འགལ་ཡོད་པར་མ་མཐོང་བས་འཇུག་བདེ་ཁྱད་ཀྱིས་ཕྱག་བཞེས་ཉིད་སོར་བཞག་བགྱིས་པ་སོགས་མདོར་ན་ཟོར་ཡང་བ་དང་མཆོག་དམན་ཐམས་ཅད་འཇུག་པ་བདེ་བ་ཁོ་ན་སྙིང་པོར་བྱས་ནས་བྲིས་པ་ལགས་སོ། །དེ་ཡང་འདྲེན་མཆོག་དམ་པ་ཉིད་ལྟ་བུས་ནི་སྔོན་གྱི་རྗེ་བཙུན་བཀའ་དྲིན་ཅན་དེ་རྣམས་ཀྱིས་ཆོ་ག་དེ་དང་དེ་ཁྲིགས་སུ་མཛད་ཟིན་པ་ལ་གཟིགས་པས་མཁྱེན་པར་སླ་མོད་ཀྱིས་འདི་ལྟ་བུས་དགོངས་པ་ག་ལ་ཡོད། འོན་ཀྱང་ཆོས་ཚུལ་འདི་ཉིད་ཕྱི་རབས་ཀྱི་མཁྱེན་རབ་མི་གསལ་བའི་ཚུལ་བཞེས་པ་རྣམས་ཀྱིས་ཇི་བཞིན་པར་འཆད་ཉན་དཀའ་བ་ལ་དགོངས་ནས་འདི་ལྟ་བུ་ཞིག་གྱིས་ཞེས་སྔ་འགྱུར་བསྟན་པ་རིན་པོ་ཆེ་འཛིན་སྤེལ་གྱི་ཐུགས་སྨོན་མཐུ་གྲུབ་པ་མཁྱེན་བརྩེ་ནུས་གསུམ་གྱི་དབང་ཕྱུག་དམ་པ་རྗེ་བཙུན་བླ་མ་འགྱུར་མེད་ཀུན་བཟང་ངེས་དོན་དབང་པོའི་ཞལ་སྔ་ནས་ཀྱི་བཀའ་སྩལ་མཆོག་ཏུ་ལྕི་བ་ཡང་ཡང་ཕེབས་པ་གཙུག་ཏུ་བཅིངས་ནས་ཆོས་ཀྱི་རྗེ་ཀཿཐོག་པའི་འབངས་ཀྱི་ཐ་ཤལ་དུ་གྱུར་བའི་རྒྱལ་ཁམས་པ་འགྱུར་མེད་ཚེ་དབང་མཆོག་གྲུབ་ངེས་དོན་བསྟན་འཕེལ་གྱིས་སུག་ལས་སུ་བགྱིས་པ་འདིས་ཀྱང་འདུས་པ་ཆེ་པོ་མདོ་ཡི་བསྟན་པ་ཕྱོགས་དུས་ཀུན་ཏུ་ཉི་མ་དང་ཟླ་བ་བཞིན་རབ་ཏུ་གསལ་བའི་རྒྱུར་གྱུར་ཅིག། །།སྨྲས་པ། སྔོན་དུ་གྲུབ་མཆོག་བྱེ་བས་གཤེགས་པའི་ལམ། །རྒྱ་བོད་ཡོངས་ལ་ཉི་ཟླ་ལྟར་གྲགས་མོད། །དེང་དུས་མཚན་ཙམ་ཐོས་པའང་དཀོན་གྱུར་ན། །མ་བཟོད་ཚུལ་འདིར་འཇུག་ལ་རིངས་པར་གྱུར། །འགའ་ཞིག་ཟས་ནོར་ཕྲན་བུའི་ཆེད་དུ་ཡང་། །ལུས་སྲོག་ཇི་མི་སྙམ་པར་བརྩོན་བྱེད་ན། །ཐོས་པ་དོན་ཆེན་པོ་དང་ལྡན་གྱུར་བའི། །འདི་འདྲ་ཡལ་བར་འདོར་རྣམས་འདུད་ཀྱིས་ཟིན། །སོ་ཟུར་གནུབས་གསུམ་དམ་གཙང་བྱམས་གསུམ་སོགས། །སྔ་འགྱུར་མཁས་གྲུབ་ནམ་ལངས་སྐར་མ་བཞིན། །ཡལ་བས་རིང་ལུགས་དྲི་མེད་བཤད་སྒྲུབ་བསྟན། །སྣུམ་ཟད་མར་མེ་ལས་ཀྱང་ཉམ་ཐག་དུས། །སླར་ཡང་སྨོན་ལམ་དུས་སྨིན་གཏེར་ཆེན་དང་། །ཀུན་མཁྱེན་དྷརྨ་ཤྲཱིའི་ཐུགས་བསྐྱེད་ཀྱིས། །བསྟན་པའི་མེ་རོ་གསོས་པའི་བཀའ་དྲིན་ལ། །བསམས་ཀྱིན་བཟོད་ཐབས་མེད་པའི་དད་གདུང་འབར། །བདག་ཀྱང་སྐྱེ་ཀུན་ལམ་མཆོག་མདོ་སྒྱུ་སེམས། །འདི་ཉིད་བསྟན་པའི་སྙིང་པོར་ཡོངས་ཤེས་པས། །བཤད་དང་སྒྲུབ་པའི་བསྟན་པ་སྤེལ་བ་ལ། །སྙིང་སྟོབས་རྗེ་བཙུན་རྣམས་དང་མཉམ་གྱུར་ཅིག །ཅེས་ཀྱང་སྨྲས་སོ།། །།སརྦ་དཱ་མངྒ་ལཾ་བྷ་བ་ཏུ།། །།