མན་ངག་མདོ་བྱང་བསྡུས་པའི་སྒྲོན་མ།
༄༅༔ ༔མན་ངག་མདོ་བྱང་བསྡུས་པའི་སྒྲོན་མ་བཞུགས་སོ༔ མཉམ་ཉིད་ཡེ་ཤེས་རྫོགས་ལ་ཕྱག་འཚལ་ལོ༔ དག་པའི་སྣང་བ་ཆེན་པོ་ནི༔ རྣལ་འབྱོར་དོན་ཆེན་ཉེར་མཚོན་ཏེ༔ འདི་ནི་ལུང་ཆེན་རྣམས་ཀྱི་དམ་པའོ༔ བདག་ཉིད་གཅིག་པུར་གནས་པའི་ཚེ༔ རི་དྭགས་ལྟ་བུར་ཤེས་པར་བྱ༔ དུར་ཁྲོད་དག་ཏུ་རྒྱུ་བའི་ཚེ༔ གླང་པོ་ལྟ་བུར་ཤེས་པར་བྱ༔ སྣང་བ་ཉམས་དང་ལྡན་པའི་ཚེ༔ རྒྱ་མཚོ་ལྟ་བུར་ཤེས་པར་བྱ༔ རིག་པ་ཚད་དུ་སྨིན་པའི་ཚེ༔ སྨྱོན་པ་ལྟ་བུར་ཤེས་པར་བྱ༔ རྣལ་འབྱོར་ཕུང་པོ་བོར་བའི་ཚེ༔ དུར་ཁྲོད་ལྟ་བུར་ཤེས་པར་བྱ༔ ཡེ་ཤེས་མ་བུ་ཕྲད་པའི་ཚེ༔ ཉི་ཟླ་ལྟ་བུར་ཤེས་པར་བྱ༔ ཤེས་པ་དྲན་མེད་ཡལ་བའི་ཚེ༔ ནམ་མཁའ་ལྟ་བུར་ཤེས་པར་བྱ༔ འདི་དག་ཤེས་པའི་རྣལ་འབྱོར་ནི༔ སྐྱེ་མེད་གདིང་ཆེན་ཁོང་དུ་ཚུད༔ སྣང་བ་རྣམས་ལ་ཕ་རོལ་ལོ༔ རྒྱུད་ཀྱི་ཁོང་སྙིང་བཅུ་བདུན་པོ༔ སྒོམ་ཁྲིགས་གཅིག་ཏུ་བསྡེབས་པ་ནི༔ ལོ་འདབ་རྒྱས་པའི་སྡོང་པོ་འདྲ༔ ཉམས་ལེན་ལག་ཁྲིད་བཅུ་དྲུག་ནི༔ རིག་པ་གཅིག་ལ་བསྡུས་པ་ནི༔ མུ་ཏིག་རྩར་ལ་བརྒྱུས་པ་འདྲ༔ དེབས་ཀྱི་མན་ངག་རྣམས་གཉིས་ཀྱིས༔ གཏད་པ་གཉིས་སུ་བསྟན་པ་ནི༔ བང་མཛོད་རྒྱས་པའི་ལྡེ་མིག་འདྲ༔ ངོ་མཚར་མན་ངག་རྣམ་བཞི་ནི༔ རྣལ་འབྱོར་གཅིག་ལ་ཚང་བ་ནི༔ མིག་གི་སྟེང་དུ་མཛུབ་བཞག་འདྲ༔ ཡ་མཚན་ཅན་གྱི་ཚིག་བཞི་ཡིས༔ སྐལ་ལྡན་སྙན་དུ་བསྩལ་བ་ནི༔ ལུག་རིད་རྣ་བར་ཁུ་བྱུག་འདྲ༔ མཐར་ཐུག་གསང་བའི་དོན་བཞི་ཡིས༔ འབྲས་བུ་གནད་དུ་ཕབ་པ་ནི༔ གནད་ནས་ཟིན་པའི་སྲོག་སྙིང་འདྲ༔ གསང་བའི་རྒྱུད་ཆེན་བཅུ་བདུན་པོ༔ རྣལ་འབྱོར་གཅིག་གིས་ཤེས་པ་ནི༔ ཕྱུག་པོའི་བང་མཛོད་སྒོ་ཕྱེ་འདྲ༔ དེ་རྣམས་དོན་ཏིག་བཅུ་བདུན་པོ༔ རྒྱུད་ཆེན་གཞུང་དང་སྦྱར་བ་ནི༔ གླང་ཆེན་སྣ་ནས་དཀྱུས་ཟིན་འདྲ༔ བཤད་པའི་མན་ངག་རྣམ་བཞི་ནི༔ སྐྱེས་བུའི་བློ་ལ་འདེབས་པ་ནི༔ རི་རྒྱལ་ཁ་ནས་རྦབ་གཏོང་འདྲ༔ ཁྱད་པར་མན་ངག་བཅུ་བདུན་གྱིས༔ གང་ཟག་གཅིག་གི་དབང་བྱས་པ༔ མུན་ཁུང་ནང་གི་སྒྲོན་མེ་འདྲ༔ ཡི་གེ་འཕྲུལ་གྱི་སྒྲོ་ཡིག་གིས༔ ཨཱ་ལི་ཀཱ་ལིའི་དོན་བསྡེབས་པ༔ ཀ་ལ་པིང་ཀའི་སྒྲ་བསྒྱུར་འདྲ༔ ཀ་དག་ལྷུན་གྲུབ་རྣམ་པ་གཉིས༔ གྲུབ་མཐའི་སྡེབས་སུ་བྱས་པ་ནི༔ བཙན་པོ་མཁར་དུ་ཞུགས་པ་འདྲ༔ སྨྲ་བྱེད་མཚོན་ཆ་རྣམས་པ་དྲུག༔ ཕ་རོལ་རྣམས་དང་སྨྲ་བ་ནི༔ ཏིལ་མར་ངར་བཏགས་རལ་གྲི་འདྲ༔ ཐིག་ལེ་ཕྱི་ནང་པྲ་ཁྲིད་གཉིས༔ གང་གིས་གོམས་པར་བྱས་པ་དེ༔ རྒྱལ་པོས་དམངས་ལ་དབང་བསྒྱུར་འདྲ༔ ཐུན་བཞི་དག་གི་མན་ངག་གིས༔ དེ་ཉིད་ལམ་དུ་སློང་བ་ནི༔ བྱ་བ་བཏང་བའི་སྐྱེས་བུ་འདྲ༔ བཞག་ཐབས་བཞི་ཡི་གདམས་པ་ཡིས༔ རྣལ་འབྱོར་རིག་པའི་གནས་བཙལ་བ༔ མཐོན་པོའི་རི་རྩེར་ཕྱིན་པ་འདྲ༔ ཞལ་ཆེམས་རྣམ་པ་ལྔ་རྣམས་ལ༔ འཆི་ཁར་ལམ་དུ་བྱེད་པ་ནི༔ ཐོག་ཆེན་ས་ལ་ལྟུང་བ་འདྲ༔ དེ་དག་འཛོམ་པའི་སྐྱེས་བུ་ཡིས༔ བྱ་བ་སྤངས་ནས་བལྟ་བ་ནི༔ མི་ཟད་གཏེར་དང་ཕྲད་པ་འདྲ༔ དེ་ཕྱིར་ཡི་གེ་འདི་དག་ནི༔ རྣལ་འབྱོར་པ་ཡིས་གསང་ཞིང་སྤྱད༔ རབ་ཏུ་དབེན་པའི་ས་ཕྱོགས་སུ༔ རི་དྭགས་དམན་པའི་ཚུལ་གྱིས་འདུག༔ འདུ་འཛི་སྤངས་པའི་ས་ཕྱོགས་སུ༔ ཐ་མལ་པ་ནི་ཚུལ་གྱིས་འདུག༔ དགྲ་གཉེན་མེད་པའི་ས་ཕྱོགས་སུ༔ སྤྲང་པོ་ལྟ་བུའི་ཚུལ་གྱིས་འདུག༔ ཡུལ་དམིགས་མེད་པའི་ས་ཕྱོགས་སུ༔ ཅི་དགར་སྤྱོད་པའི་ཚུལ་གྱིས་འདུག༔ ཨེ་མ་ཧོ༔ གཞི་མཐོང་བ་ལ་རྩ་བ་མེད༔ ཆོས་ཉིད་མཐོང་ལ་སྒོམ་པ་མེད༔ རིག་པ་མཐོང་ལ་མན་ངག་མེད༔ སྣང་བ་མཐོང་བ་ལྟ་བ་མེད༔ དོན་མཐོང་བ་ལ་སྙིང་རྗེ་མེད༔ སེམས་མཐོང་བ་ལ་སྤྱོད་པ་མེད༔ སྐྱེ་ཤི་མཐོང་ལ་དགེ་སྡིག་མེད༔ དངོས་པོ་མཐོང་ལ་སངས་རྒྱས་མེད༔ འཁྲུལ་པ་མཐོང་ལ་དམྱལ་བ་མེད༔ ང་རང་མཐོང་ལ་ཐམས་ཅད་མེད༔ ཉམས་སུ་ལེན་པ་གསང་བའི་དེབས༔ མན་ངག་ཀུན་གྱི་མདོ་བྱང་དུ༔ ཤྲཱི་སིང་ཧ་བདག་གིས་བཀོད༔ མན་ངག་གི་མདོ་བྱང་བསྡུས་པའི་སྒྲོན་མ་ཞེས་བྱ་བ་ཐམས་ཅད་ཀྱི་དོན་འགྲེལ་ཆེན་པོ་ཨི་ཏི༔ རྒྱ་རྒྱ་རྒྱ༔ སྔགས་ཀྱི་སྲུང་མ་ཨེ་ཀ་ཛ་ཏཱི་དང༔ ཞྭའི་མགོན་པོ་དམ་ཚིག་གི་བདག་པོས་སྲུངས་ཤིག་གཏད་དོ༔ ལས་ཅན་གཅིག་དང་འཕྲད་པར་ཤོག༔ བདག་འདྲ་སྨྱོན་པ་ལྕེ་བཙུན་གྱིས༔ གཅིག་པུར་རི་ཁྲོད་བྱས་པས་ཉག་གཅིག་རྩ་བ་ཆོད༔ འདུ་འཛི་གཡོག་འཁོར་སྤངས་པས་སྣང་བ་གྲོགས་སུ་ཤར༔ མན་ངག་ནོར་ཕྱིར་མ་བཙོངས་བྱིན་རླབས་འོད་པོ་ཆེ༔ ཆོས་རྣམས་ཟད་སར་བསྐྱལ་བས་ལྟ་སྒོམ་གཉིས་དང་བྲལ༔ སྒྲ་བཞི་ཉམས་སུ་བླངས་པས་འབྱུང་བ་དགྲས་མི་ཚུགས༔ མན་ངག་གཞུང་བཞིན་སྤྱད་པས་རྫུ་འཕྲུལ་སྣ་ཚོགས་གྲུབ༔ ད་ནི་གྲོལ་དང་མ་གྲོལ་གཉིས་སུ་མེད་དོ༔ ཨེ་མ་ཧོཿ