cover

སྔ་འགྱུར་བཀའ་མའི་ཆོས་སྡེའི་གླེགས་བམ་སོ་ལྔ་པ།

གླེགས་བམ། ཅི༽

ལྕེ་བཙུན། སློབ་དཔོན་ཆེན་པོ་བྱི་མ་ལ་མུ་ཏྲ། སློབ་དཔོན་འཇམ་དཔལ་བཤེས་གཉེན།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

གཡུ་ཡིག་ཅན་པོ་ཏི་སྨུག་ཆུང་གི་སྐོར་རྣམས། ལྕེ་བཙུན།

༼གཡུ་ཡིག་ཅན༽༄༅༔ ༔གཡུ་ཡིག་ཅན་པོ་ཏི་སྨུག་ཆུང་གི་སྐོར་རྣམས་བཞུགས་སོ༔ ༔མ་ཡིག་བུ་ཡིག་བསྡོམས་པས་སྐབས་དོན་བཅུ་གཉིས་དང་ཐོར་བུའི་སྐོར་རྣམས༔ ཁཾ་ན།ག་ཤྭཏ་མ྄ཝཧ྅྅྅༔ སཾ་སྐྲྀ་ཏའི་སྐད་ཨེ་ཝཾ་མ་ཡ་ཤྲུ་ཏ་ཨེ་ཀ་སྨིན༔ ཨོ་རྒྱན་སྐད་བྷ་དུ་སར་དྷཾ་བྷེ་ལ་ཀི༔ རྒྱ་ནག་པོའི་སྐད་བཻ་རོ་བྷ་ཞ་ཏི་སཀ་ཏི་ཀོ༔ མཁའ་འགྲོ་མའི་སྐད་བྷེ་ཏི་བྷྱ་གུ་ལིར་ཏ༔ སིང་ག་ལའི་སྐད་པ་བྷྱ་ཞུ་ཏི་ད་རོས་ཏུ༔ སོག་པོའི་སྐད་ཕེ་ཏི་བྱེ་ལ་པོ་ཏང་ཀེ༔ བོད་སྐད་དུ༔ ལོ་རྒྱུས་རིན་པོ་ཆེའི་མདོ་བྱང༔ བཅོམ་ལྡན་འདས་བྱ་བྲལ་རྫོགས་པ་ཉིད་ལ་ཕྱག་འཚལ་ལོ༔ གང་ཞིག་རྨོངས་པ་གདུང་བ་སེལ་བའི་དོན་ཚིག་དང༔ གང་ཞིག་སེམས་ཉིད་རྣལ་དུ་འབེབས་པའི་དོན་ཚིག་དང༔ གང་ཞིག་རྒྱུད་ལུང་དོན་དུ་འགོད་པའི་དོན་ཚིག་དང༔ གང་ཞིག་ལྷ་རྣམས་མངོན་དུ་སྣང་བའི་དོན་ཚིག་དང༔ གང་ཞིག་སྐྱེ་མེད་གདིང་དུ་འཛུད་པའི་དོན་ཚིག་དང༔ གང་ཞིག་ཆོས་སྐུ་ཅོག་གིས་འཇོག་པའི་དོན་ཚིག་དང༔ གང་ཞིག་འཁྲུལ་པ་ཐུར་དུ་གཞུག་པའི་དོན་ཚིག་དང༔ གང་ཞིག་ཉོན་མོངས་སྦར་གྱིས་འཛིན་པའི་དོན་ཚིག་དང༔ གང་ཞིག་ལྷག་པའི་བསམ་གཏན་རྫོགས་པའི་དོན་ཚིག་དང༔ གང་ཞིག་ཁམས་གསུམ་གཡུལ་ངོ་བཟློག་པའི་དོན་ཚིག་དང༔ གང་ཞིག་བྱ་བྱེད་ལམ་དུ་སློང་བའི་དོན་ཚིག་དང༔ གང་ཞིག་བཀོད་པ་ཡོངས་སུ་རྫོགས་པའི་དོན་ཚིག་རྣམས༔ རྣམ་པར་ཕྱེ་སྟེ་གསལ་བ་འདིར་ནི་བསྟན་པར་བྱའོ༔ ཨཐྎ༔ གཁཾགརཀནཱ༔྅྅྅ དབཱཊ༔ རྨོངས་པ་གདུང་བ་དག་ནི་བསལ་བའི་ཕྱིར༔ པོ་ཏི་སྨུག་གུ་ལ་ཟངས་ཀྱི་ཁྱམས་བག་ཏུ་བཅུག་ནས་རྒྱས་གདབ་ནས་སྦས་པའི་མན་ངག་པོ་ཏི་སྨུག་ཆུང་ཞེས་བྱ་སྟེ༔ འདི་ལ་འདྲ་མིན་གཉིས་ཡོད་དེ༔ མིན་པ་ལ་ཡིན་པའི་སྐད་བྱས་པ་ཞིག་ཀྱང་ཡོད་དོ༔ འདི་ནི་བསེ་རིན་པོ་ཆེའི་བྱང་དམར་ལ་གཡུའི་ཡི་གེ་བྲིས་ནས༔ སོག་པོ་གཡུའི་སྨིན་མ་ཅན་གྱི་ཡུལ་ནས་བསྒྱུར་བའོ༔ བཀོད་པ་ལོ་རྒྱུས་རྒྱས་འབྲིང་གསུམ་ལས་འདི་ལེགས༔ ཆེན་པོའི་དོན་ནི་རྒྱ་ཆེ་ལས༔ རིན་ཆེན་ལོ་རྒྱུས་མིག་འབྲས་འདིར་སྤྲོའོ༔ དོན་ཉིད་གསང་བ་བསྡུས་པའི་ཡི་གེ་འདི༔ སྒྲ་དང་ཐ་སྙད་བཀོད་པ་ཆེན་པོ་ལས༔ སྙིང་པོ་འདི་ནི་ཡོངས་སུ་བསྡུས་པའོ༔ ཤིན་ཏུ་དཀོན་པས་སྔོན་པོའི་གཡུ་ཡིས་བྲིས༔ གསང་སྐོར་སོགས་གཞན་དང་ཐུན་མོང་དག་ཏུ་མ་བྱས་པ༔ འདི་ནི་མཆོག་ཏུ་གསང་བའི་ཡི་གེའོ༔ རྒྱ་རྒྱ་རྒྱ༔ རྒྱ་གར་སྐད་དུ༔ བྷ་དུ་བྷ་ཏྲི་ལ་བོད་སྐད་དུ༔ བརྒྱུད་པ་གསུམ་པ༔ སངས་རྒྱས་དགོངས་པས་རིག་འཛིན་བརྡ་བརྒྱུད་གང་ཟག་སྙན་བརྒྱུད༔ དཔལ་གཉིས་མེད་ཀྱི་རྒྱལ་པོ་སྐྱེ་བ་མེད་པའི་ལུས་ཅན་ལ་ཕྱག་འཚལ་ལོ༔ འཇིག་རྟེན་ཡིད་ཆེས་བསྐྱེད་པ༔ མུན་པའི་བློ་དང་ཡུལ་ཅན་གྱི༔ མ་རིག་མུན་པའི་དམག་དཔུང་གདམས་པ་ཉམས་ལེན་གྱི་གནད་བཟློག་བྱའི་ཕྱིར༔ གསང་བའི་སྐྱེས་བུ་རྣམས་ཡེ་ཤེས་འོད་ཀྱི་སྣང་བ་འདི་བསྟན་ཏོ༔ བྱ་རྒོད་ཕུང་པོའི་རི་ལ་དེ་ནས་དགེ་སློང་དད་དང་རིག་མཆོག་ལྡན༔ ཞུ་བ་པོ་ཤཱ་རིའི་བུ་སྟེ་སྐར་མ་འོད་བཟང་གིས༔ སྟོན་པ་འོད་སྲུང་ཉིད་ལ་དུ་སྐུ་སྤྲུལ་པ་འདི་སྐད་ཞུས༔ སྟོན་པའི་མཛད་སྤྱོད་ཇི་ལྟ་བུ་ཞུས་པ་ཀྱེ་ཀྱེ་འཇིག་རྟེན་མུན་པ་སྣང་བྱེད་པ༔ སངས་རྒྱས་ཆོས་རྫོགས་ཆེན་གྱི་དོན་འདི་དག་ཀྱི་བསྟན་པ་འོད་འབར་འདི༔ ལོ་རྒྱུས་རིན་པོ་ཆེའི་མཛོད་བྱང་གིས་འཇིག་རྟེན་རིགས་དྲུག་མུན་པ་སེལ་བའི་ཕྱིར༔ བསྟན་པའི་སྟོན་པ་དང་པོ་ཇི་ལྟར་བྱོན༔ བསྟན་པའི་སྒྲོན་མ་གསང་ཆེན་ངེས་པའི་རྒྱུད་འདི་རྣམས་ཇི་ལྟར་བསྟན་ཞིང་གསུངས༔ སྙིང་པོ་བསྡུས་པའི་བཀའ་གསང་ངེས་པ་འདི༔ ཚིག་དང་ཡི་གེ་ཤད་བར་དུ་ཡིས་བཅད༔ ལྗགས་ལ་བཀྲམ་པའི་ཐེག་རྒྱལ་ཨ་ཏི་ལ༔ སྡེ་དང་འབུམ་ཚོའི་གྲངས་ནི་ཇི་ཙམ་ཞིག༔ ཤིན་ཏུ་བསྡུས་པའི་ཐིག་ལེའི་སྐོར་ལ་བཞི་ཡོད་པ་ལས་གསང་བ་བླ་ན་མེད་པ་འདི་ལ༔ སྙིང་པོ་ཡང་གསང་ལ༔ གསལ་བའི་ཚིག་མཚོན་ཚེག་བར་དུ་དང་ལྡན༔ ན་བདུན་བདུན་བར་བཅད་པའོོ༔ ཤིན་ཏུ་ཐིག་ལེའི་སྐོར་དཀོན་པ་གསང་བའི་རྒྱུད་རྒྱལ་གྲགས༔ ཤིན་ཏུ་རྒྱ་ཆེ་རྣམ་པར་བཀོད་པ་ལས༔ བསྡུས་ཏེ་གསང་ཏིག་སྙིང་དང་འདྲ་བ་རུ༔ བླ་མེད་ཕྱི་རྒྱུད་བཅུ་བདུན་དེ་ལྟར་སྙིང་ཐིག་ཡང་གབ་སྦས་པ་ཡི༔ མར་གྱི་ཡང་ཞུན་ལྟ་བུའི་རྒྱུད་གསང་བ་ཡང་ནས་ཡང་དུ་བསྡུས་པར་སྙིང་པོ་འདི༔ ཕྱི་རབས་གང་དང་གང་གིས་འཛིན་པར་འགྱུར༔ མཐའ་མ་སྟོན་པའི་བསྟན་པ་མི་གནས་ཆོས་གང་གིས་བྱེད་ནུབ་པའི་ཚེ༔ བསྟན་པའི་བཙས་སུ་གང་གིས་མེ་རོ་བྱེད༔ ཐིག་ལེ་མཆོག་གསང་བླ་མེད་ཡོངས་རྫོགས་འདིའི༔ བསྟན་པ་ཉིད་ལ་འཕེལ་འགྲིབ་ཇི་ལྟར་འབྱུང༔ སྐལ་དང་ལྡན་པའི་སྐྱེས་བུ་ལུང་རབ་ཅན༔ འབྱུང་བ་རང་དེངས་བློ་ལྡན་དུ་ཞིག་འབྱུང༔ ཕུང་པོ་ལྷག་མེད་སྙིགས་མ་རྩོད་ལྡན་ལེ་ལོས་རབ་གཡེངས་པས༔ འདི་ཉིད་གོམས་པར་མ་གྱུར་གདིང་མེད་པ༔ བར་དོར་འཚར་རྒྱ་བ་རང་ངོ་བསྟན་པ་དུ་ཞིག་འབྱུང༔ སྐྱེ་མེད་རིག་པའི་སྣང་བ་མཆོག་དེ་གོམས་པར་མ་གྱུར་ཡང༔ འདི་ཉིད་མཐོང་བས་གར་སྐྱེ༔ ཡོན་ངལ་བསོའི་ས་གནས་གང༔ རྨོངས་པ་རྣམས་ཀྱི་གདུང་བ་བཅད་པའི་ཕྱིར༔ སྟོན་པ་ཐུགས་རྗེ་ཆེན་པོ་ཉིད་བཞེངས་ལ༔ བདག་ནི་དོན་ལ་ཡིད་ཆེས་འཇུག་ཕྱིར་གསུངས༔ དེ་ནས་སྟོན་དྲུག་པ་རྡོ་རྗེ་འཆད་པ་འོད་སྲུངས་ཉིད༔ སུ་སྤྲུལ་ན༔ སྣང་བ་རྣམ་པར་དག་པའི་ཏིང་ངེ་འཛིན་ལས་བཞེས་ནས་ནི༔ ཤཱ་རིའི་བུ་ལ་འདི་སྐད་གསུངས༔ ཀྱེ་མ་ཚེ་དང་ལྡན་པ་ཉོན༔ གདུང་བ་དག་ནི་སེལ་བའི་ཚིག༔ ཁྱོད་ཐེག་ཆེན་གྱི་རིགས་མིན་པ་ཁྱོད་ཀྱིས་འདི་དག་གཟུང་བར་དཀའ༔ ཐེག་པ་དམན་ལ་ཞུགས་པ་དང༔ དགེ་སྦྱོང་རྟོག་གེ་བ་དག་གི་གཟུགས་འཛིན་ལ༔ སྐྲག་པར་འགྱུར་བས་འདི་ནི་རབ་གསང་སྙིང་པོའི་དོན༔ བྱང་ཆུབ་སེམས་དཔའ་ཆེན་པོ་ཡི༔ སྤྱོད་ཡུལ་ཉིད་ལས་གཞན་གྱིས་མི༔ དེ་ཡི་ཕྱིར་ན་དོན་འདི་ཁྱོད་ཀྱིས་གཟུང་བ་དཀའོ༔ དེ་ནས་འོད་བཟང་ཤཱ་རིའི་བུ༔ བདག་སྐལ་བ་རེ་ཆུང་སྙམ་སྟེ། རབ་ཏུ་བརྒྱལ་ནས་འདྲེ་ལྡོག་ཅིང༔ ཀྱེ་མ་ཀྱི་ཧུད་ཨེ་ཤ་ཀ༔ བདག་ནི་འཇིག་རྟེན་འཁོར་བའི་ལས་མི་ཐར་སྙམ་ནས༔ རྒྱུ༔ དད་པས་རབ་ཏུ་མི་སྤོབས་པས༔ སྡུག་བསྔལ་འཆིང་བས་དམ་དུ་བཅིངས༔ ཐེག་ཆེན་གྱི་ཐར་པའི་ས་བོན་ཉིད་དང་བྲལ༔ ད་ནི་འཁོར་བར་ཡུན་རིང་གནས༔ སྟོན་པའི་ཐུགས་རྗེ་དཔྱངས་ཐག་མི་སྐྱོབ་པས༔ ཆད༔ ཡུན་གྱི་མགོན་སྐྱབས་ཉིད་དང་བྲལ༔ ཀྱེ་མ་འཇིག་རྟེན་ཡུལ་འདི་ན༔ མགོ་རྐང་ལུས་སོགས་ལྷ་ཀླུ་མི་སོགས་སུ་འདོད་པས༔ ཚུར་ཤོག་ཚུར་ཤོག་འདི་ལོངས་ཤིག༔ ཁྲག་དང་ཆུ་སེར་ནང་རོལ་ཡང༔ སུ་འདོད་སུ་འདོད་འདི་ལོངས་ཤིག༔ དེ་སྐད་བརྗོད་ཅིང་ལུས་སོགས་བཏང༔ དེ་ལྟར་སྡུག་བསྔལ་ཉིད་ལྡན་པས༔ སྒྲིབ་པ་ཟད་དེ༔ སྟོན་པས་ཐུགས་རྗེས་རབ་བཟུང་སྟེ༔ ཉིད་ཀྱི་མཛོད་སྤུའི་བུ་ག་ནས༔ བདུད་རྩི་སྣང་བར་བྱེད་ཅེས་པའི༔ འོད་ཟེར་རབ་ཏུ་སྤྲོས་ནས་ནི༔ ཉོན་ཤཱ་རིའི་བུའི་མོངས་བག་ཆགས་སྒྲིབ་སྦྱངས་ཏེ༔ འདི་སྐད་ཐུགས་རྗེ་ཆེན་པོས་གསུངས༔ ཨེ་མ་རིགས་ཀྱི་བུ་ཉིད་ནི༔ འཁོར་བའི་བག་ཆགས་སྦྱང་དཀའ་བ༔ འདི་ཉིད་དུ་ནི་རབ་སྦྱངས་པས༔ ད་ནི་བསྟན་པའི་སྙིང་པོ་བཟུང༔ འདི་ཁྱོད་ལ་སྣང་བར་འགྱུར་རོ༔ དེ་སྐད་རབ་ཏུ་གསུངས་པ་ཡིས༔ ཤཱ་རིའི་བུ་ནི་དྲན་རྙེད་ནས༔ མགོ་དང་ཡན་ལག་བྲལ་བ་ཡང༔ སྔོན་དུ་ཡོད་པ་ཇི་བཞིན་གྱུར༔ ཡང་ནི་ཐལ་མོ་རབ་སྦྱར་ནས༔ ཀྱེ་ཀྱེ་ཐུགས་རྗེའི་ལྕགས་ཀྱུས་ཟུངས༔ ཐར་པའི་ལམ་ལ་ཡང་དག་འཁོད༔ སྣང་མཛད་ཆེན་པོ་ཨ་ལ་ལ༔ སྤྲོས་མེད་བདེ་ཆེན་ཨ་ལ་ལ༔ ཉག་གཅིག་ཆེན་པོ་ཨ་ལ་ལ༔ ཁྱབ་བརྡལ་འུབ་ཆུབ་ཨ་ལ་ལ༔ ཉིད་ཀྱི་མཐུ་སྟོབས་འོད་ཟེར་གྱིས༔ བདག་གི་ཇི་ལྟར་གོང་ཞུས་པའི༔ བཅུ་གཅིག་པོ་ཚིག་རྣམས་རིས་མི་པར་ཕྱེ་སྟེ་གསུངས༔ དེ་ནས་ཉིད་ཀྱིས་འདི་སྐད་གསུངས༔ དགེ་སློང་རྡོ་རྗེ་འཛིན་པ་ཁྱོད༔ འདི་ཉིད་རབ་ཏུ་གཟུང་དཀའ་ཡང༔ ཁྱོད་ཀྱི་དད་པའི་སྟོབས་ཀྱིས་ཟུངས༔ ཞུས་དོན་དང་སྟོན་པའི་བྱོན་ལུགས་ང་ནི་མི་ཤིགས་རྡོ་རྗེ་གཞི་མི་འགྱུར་བས༔ ལས༔ ཕྱི་རོལ་ས་ཆུ་ལ་སོགས་དམིགས་པ་གཅིག་ཀྱང་མེད༔ ནང་དུ་ཡིད་གཡོས་རིག་རིག་མ་རིག་པ་ཆས༔ འབྱེད་མེད་རྒྱུད་ལས་ཀ་དག༔ ཡིད་ཀྱིས་རླུང་གིས་ཕུལ༔ མི་རིག་པ་རྟོག་རྩེ་གཅིག་ས་བོན་རྒྱུ་ལས༔ འཕེན་པའི་ཡེ་ཤེས་ཉིད་ཀྱིས་བསྐྱོད༔ མུན་འཁོར་དང་སྣང་འདས་མཚམས་ལྷུམས་སུ་ཞུགས༔ ཕ་ནི་མ་འགགས་པ་ཐབས་ཆ་ཤེས་རབ་སྟོང་པ་ཤེས་རབ་མ༔ ལྷུན་གྲུབ་སྟོང་པའི་ཡུལ་ལ་ཤར༔ དེའི་ཚེ་རྐྱེན་བཞིའི་འཁྲུལ་འཁོར་ལས༔ འཛིན་པའི་རྒྱ་དང་བཅས་པར་གྱུར ༔ རླུང་ཆུ་མེ་སའི་དངོས་པོ་ལས༔ རྟེན་དང་ཡུལ་གྱི་ཁྱད་པར་བྱུང༔ གཟུགས་མེད་རྣམས་དང་འདོད་པ་ཡི༔ གནས་བཅུ་དག་མཐོ་རིས་ནི་ཐོག་མར་བྱུང༔ གདུལ་བྱའི་དང་པོ་བསྐལ་པ་དགའ་ལྡན་བརྩེགས་པར་ལ༔ སྐྱེ་དགུའི་ཚེ་ལོ་དབག་མེད་དུས༔ སྐྱེ་བཞིའི་སེམས་ཅན་རིགས་རྣམས་ཀྱིས༔ ཤེས་པའི་རྟགས་འདི་འཛིན་བ་ལས༔ རྫུས་སྐྱེས་ཀྱི་ས་ཆུ་འབྱུང་བའི་དམིགས་རྟེན་ལས༔ འབྱུང་བ་རང་དྲོད་སྐྱེས་པས་བེམ་པོ་དག་ནི་འདོད་གཡོས་པས༔ ཆུ་ལ་མེ་ཡི་དྲོད་ཕེབས་པའི་དུས་བདེ་བ་སྐྱེས༔ མེ་ལ་ཆུ་སྟེ་རླན་གྱིས་ཞད་ས་ལ་རླུང༔ གཡོ་བའི་ཆ་དེ་བཞིན་རླུང་དལ་གྱི་ལས་ལས་བདེ་ཤར༔ དེའི་ཚེ་ལུས་རྫུ་ས་ཏེ་དང་པོ་བེམ་པོའི་གཟུགས་གཉིས་རྫུས་སྐྱེས་སོ༔ རྫུས་ནས་ཤེད་བུ་དང་ཤེད་གྲོགས་སྒོང་སྐྱེས་ཟེར་ཏེ་མ་ཡིན་པར་རིན་པོ་ཆེ་ནི་ཟིལ་པ་ལས་རྫུས་ཏེ་སྐྱེས་བུ་གདུལ་བྱ་ནི༔ མིའི་རྒྱུ་རྐྱེན་ཉི་མ་རབ་ཏུ་སྣང་བྱེད་དང༔ ཕའི་རྒྱུ་ཟླ་བ་དྲི་མེད་ཅེས་བྱའོ༔ ང་ནི་ལྟ་སྟངས་སྟོན་པ་ཡུལ་གསུམ་སྐྱེ་གནས་གདུལ་བྱ་ལ་གཟིགས་དང་བཅས༔ པདྨ་ཆུ་ཡི་སྙིང་པོ་ལས༔ སྐྱེས་དྲོད་ཕེབས་པ་མེ་ཡིས་བདེ་བ་བཟུང་ནས་འོངས༔ ཡུལ་དེ་ཤེས་པ་དྲོད་ཀྱིས་འདྲེན་པའི་སྟོབས་ཀྱི༔ དགའ་ལྡན་བརྩེགས་པར་གྲགས༔ ལོ་ས་བརྒྱད་ལ་དགོངས་བརྒྱད་མཛེས་པའི་ཟུར་ཕུད་ཅན༔ ལྔ་པ་རིགས་ལྔ་མཚོན་པ་ཁ་དོག་དྲི་མ་མེད་པའི་བརྡར་དཀར་བའི་ལུས་བླངས་སོ༔ འཁོར་བསྐལ་པ་བཟང་པོ་འདི་ལ་སངས་རྒྱས་སྟོང་བྱུང་བའི་བརྡའ་ནི་སངས་རྒྱས་སྟོང་ཕྲག་གཅིག༔ རང་རང་དེའི་བསྟན་པ་རེ་རེས་འདུལ་བའི་བརྡར༔ འདུལ་བའི་ཕྱག་རྒྱར་ལྡན༔ འདིས་འདུལ་བའི་གཉེན་པོ་གཉིས་སུ་འབྱུང་བའི་བརྡར༔ ཡིད་དང་སེམས་དང་འབྱུང་བའི་རྒྱུ༔ འབུམ་ཕྲག་དག་ནི་དྲུག་ཅུ་བཞི༔ འོད་ཐིག་ཡང་ཞུན་བཅུ་བདུན་ནི༔ རྒྱུད་བཅུ་བདུན་ནམ་མཁར་འོད་སྣང་ཡེ་ཤེས་འབར༔ བསྟན་པའི་བུ་གཅིག་དགྲ་དང་བྲལ༔ ཡང་ཏིག་སྙིང་པོའི་རྟགས་སུའོ༔ ཡུལ་གྱི་ཡོན་ཏན་མངོན་པར་བརྗོད༔ འདོད་འཇོ་དང་ནི་ཅང་ཤེས་རྟ༔ ཁྲུས་རྫིང་མ་བཏང་ལོ་ཐོག་དང༔ ལུས་ལ་གོས་མེད་གཅེར་བུ་ནི༔ རང་རང་འོད་དང་བཅས་པའོ༔ དེ་ལྟར་ཚེ་ལོ་དཔག་མེད་ནས༔ བརྒྱད་ཁྲི་དག་གི་བར་དག་ཏུ༔ སྟོང་སྟོང་གཉིས་ལས་ལོ་རེ་བྲི༔ དེ་ལྟར་བསོད་ནམས་རབ་ཟད་པས༔ ལུས་ཀྱི་འོད་སོགས་རིམ་གྱི་ཡལ༔ ཉོན་མོངས་དག་ཀྱང་བབས་ཀྱིས་སྐྱེ༔ དེ་ནས་ཚེ་ལོ་བྱེ་བ་ལ༔ འབྱུང་བཞིའི་སྒོང་ལས་སྐྱེས་གཟུགས་དག་འབྱུང༔ འགྲོ་ན་ནམ་མཁར་བྱ་ལྟར་འགྲོ༔ འབྱུང་བ་ལྔ་ལས་སྐྱེས་པའི་གཟུགས༔ ས་རྡོ་འདུས་པའི་ཤ་གཟུགས་ས་ཡི་སྒོ་ང་ལས༔ ཤ་སླ་མགོ་ཆེ་ཁ་དོག་སེར༔ ས་ལས་སྐྱ་པའི་མི་དྲོད་ཤས་མེ་ལས་སྐྱེས་པས་མེ་ལས་ཤ་སྐམ་ལྷུ་གཟུགས་ཕྱེད༔ དམར་པོ་ཡན་ལག་མཆེད་པར་འབྱུང༔ རླུང་ནི་མང་པོ་འདུལ་བ་མགོ་ཆུང་ཤ་མདངས་གནག༔ ཆུའི་རླངས་པ་འདུས་པའི་ཟིལ་བ་ལས་ནི་སྔོ་སངས་འཇིགས་པའི་གཟུགས༔ ནམ་མཁའ་ཡིད་འདུས་པའི་སྤྲིན་ལས་བྱུང་བ་མགོ་ཆུང་དཀར་པོའི་གཟུགས༔ འབྱུང་བ་ཀུན་ལ་ཡང་ལྔ་ལྔ་ཚང་བ་ལ་ཤས་ཆེ་ཆུང་ཡོད་པོའོ༔ ལྔ་ལས་བྱུང་བ་ཡི༔ སྒོ་ང་ལས་ནི་སྐྱེས་བ་སྟེ༔ དེ་ཚེ་ང་ནི་ལྟ་སྟངས་ཡུལ་གསུམ༔ གདུལ་བྱ་རྟེན་འབྱུང་ལྔ་འདུས་པའི་འོད་ལྔས་ཁྱབ་པ་སྒོ་ལྔ་ནི༔ ཡིད་དྭངས་མ་ཤིང་ཟིལ་ཚུལ་དུ་འོད་ཁ་དོག་ལྔ་ལྡན་པ༔ འབྱུང་ལྔ་རང་སྒྲ་མེའི་སྒྲ་བརླབ་པ་ཆུ་སྒྲ་གཤང་བ་ས་སྒྲ་ཏིག་པ་རླུང་སྒྲ་ཆག་པ་ནམ་མཁའ་སེང་བའོ༔ འདོད་གཡོས་པས༔ འབྱུང་བ་གྲང་བས་ཕ་ཡི་རྒྱུ༔ སྙིགས་མ་ཚ་བ་ལས་ནི་མ་ཡི་རྐྱེན༔ དྭངས་མ་རྒྱུ་རྐྱེན་དྭངས་མ་ཆ་ཡི་སྒོ་ངར་དྲིལ་འཛོམ་ནས་བདག་ལུས་རྫོགས༔ ལོ་བཅུ་དྲུག་གཟུགས་དང་ཁ་དོག་མཛེས་པའི་ཚུལ་དུ་འོངས༔ མདའ་གང་འོད་ཀྱིས་རང་ལུས་བརྒྱན༔ ཤེས་རབ་ཆགས་པ་ཆགས་པས་འདུལ་བར་བྱེད་པས༔ ཆ་ལས་སྐྱེས་པ་ཡི༔ སངས་རྒྱས་པ་དེ་ཙམ་འབྱུང་བའི་བརྡ༔ མཁའ་འགྲོའི་ཚོགས་ནི་འབུམ་ཚོ་གཉིས༔ ཡུལ་ནི་འཇིག་རྟེན་མི་མཇེད་ཅེས༔ འབྱུང་བ་བཞི་ཡི་དྭངས་མ་དག༔ སའི་དྭངས་མ་ཞག་སོགས་ཟས་སུ་ཟ་ཞིང་ཉོན་མོངས་ཆུང༔ ཤིང་ལོའི་གོས་ཅན་དབང་པོ་མེད༔ དེ་ནས་ལོ་ཡང་རིམ་གྱིས་བྲི༔ འོད་སོགས་ཉོན་མོངས་པའི་དབང་གིས་དག་ཀྱང་རིམ་གྱིས་ཉམས༔ བརྒྱ་བརྒྱའམ་བརྟག་བརྒྱད་བརྒྱ་ལོན་ཞིང་ཉིད་ལ་ལོ་རེ་བྲི༔ དེ་ནས་ཚེ་ལོ་འབུམ་པ་ལ༔ དེ་ལྟར་འབྱུང་ལྔའི་ལུས་འདི་དག་ལས་ཀྱི་རླུང་གིས་བཏེག་ནས་འདོམ་གང་གི་སྟེང་དུ་འགྲོ་ངག་ལས༔ འབྱུང་ལྔ་ནད་སོགས་ཚ་གྲང་མ་སྙོམས་པ་ཉོན་མོངས་ཀྱི་རྒྱུ༔ ལས་བྱུང༔ དྲོད་དང་གཤེར་ལས་ལུས་གཟུགས་གྲུབ༔ འབྱུང་ལྔའི་ས་བོན་ལངས་པ་ལས༔ མེ་དྲོད་བསྡུས་ཏེ་ཆུས་རླན་རླུང་གིས་བསྐྱོད་ནམ་མཁའ་འདྲེས༔ གཟུགས་ནི་ཐ་དད་དུ་མར་བྱུང༔ དེ་ཚེ་སྟོན་པ་བདག་ནི་དྲོད་བརླན་ལས༔ ལུས་བོངས་ལྡན་ཞིང་ཁ་དོག་ལྡན༔ སྡུད་པ་ས་རླན་ཕ་རྒྱུད་རླུང་དྲོད་སྨིན་པ་མ༔ དེ་ལྟར་རྒྱུ་རྐྱེན་ལས་སྐྱེད་དོ༔ ཐབས་ཀྱི་རྒྱུ་ལས་བསྐྱེད་པའི་ཕྱིར༔ ཆགས་མེད་ལེ་ལོ་ཅན་འདུལ༔ བྱང་ཆུབ་སེམས་དཔའ་འབུམ་ཕྲག་དྲུག༔ འདི་དག་ཕ་རྒྱུད་ཀྱི་ཚིམ་པར་བྱས རིགས་ལྡན་འཁོར་གྱི་ཚུལ་དུ་བྱུང༔ དེ་ཚེ་སེམས་ཅན་དེ་དག་ཀྱང༔ ལྗོན་ཤིང་དག་ནི་ཟས་སུའོ༔ ལུས་འོད་ཆགས་གང་མུན་ཚད་མཐོང༔ དེ་ནས་ཉོན་མོངས་བགས་སྐྱེས་ནས༔ དྲུག་བརྒྱ་དག་ལ་ལོ་རེ་བཞིན༔ ཚེ་ཡི་ལོ་ནི་ཁྲི་པ་དག༔ ལུས་ཀྱི་འོད་ཟད་ཉི་ཟླ་བྱུང༔ འདོད་ཆགས་དུག་གི་འདོད་གཡོས་པས༔ ཕོ་མོའི་དབང་པོའི་སྒོ་ཡང་འདོད༔ གོང་གི་དྲོད་བརླན་རྒྱུ་ལས་ནི༔ ཁུ་དང་ཁྲག་གི་རང་བཞིན་ནི༔ འབྱུང་བ་ལྔ་ཡི་གཟུགས་ཅན་ནོ༔ བལྟས་པས་ཚིམ་པ་ལོ་བརྒྱ་ལ༔ དགོད་པ་དག་ནི་དྲུག་ཅུའི་བར༔ བརྒྱ་ཕྱེད་ལ་ནི་ལག་བཅངས་སོ༔ དེ་ནས་གཉིས་གཉིས་འཁྱུད་པའོ༔ དེ་ལས་ཁྱེའུ་བུ་མོའི་གཟུགས༔ ཀུན་ནས་རས་སམ་ཤིང་ཤུན་གྱོན༔ ཟས་སུ་ས་ཡི་ཚིལ་ཞག་ཟ༔ སེར་སྣའི་གསོག་འཇོག་དག་གིས་ནི༔ ཞག་རིམ་བླངས་པས་དེ་ཡང་ནུབ༔ དེ་ནས་ས་ལུའི་འབྲས་ཀྱང་སྤྱད༔ དེ་ལ་ང་དང་བདག་བཟུང་བས༔ ང་རྒྱལ་དག་དང་ཞེ་སྡང་སྟེ༔ དེ་ཡིས་ཟས་ཀྱང་རིམ་གྱིས་ནུབ༔ སྟོང་ཕྱེད་དག་གིས་ལོ་རེ་བྲི༔ བརྒྱད་ཁྲི་དག་གི་དུས་ཀྱི་ཚེ༔ བདག་ནི་མངལ་སྐྱེས་གཟུགས་ཅན་ཏེ༔ ལྷ་དབང་མཆོག་རབ་གཙུག་ཕུད་དང༔ འདོད་ཡུམ་བརྩེ་ལྡན་རྒྱུ་རྐྱེན་ལས༔ བུས་པ་དག་གི་གཟུགས་སུ་འོང༔ དེ་ཚེ་སེམས་ཅན་དེ་དག་གི༔ འདོད་ཆགས་བཞི་ལས་བྱུང་བའི་གཟུགས༔ སྐྱེ་བ་བཞི་གཟུགས་ཐ་དད་དེ༔ བརྫུས་ནས་སྐྱེས་པ་ས་ཡི་གཟུགས༔ སྒོང་སྐྱེས་དྲོད་དེ་མེ་ཡི་གཟུགས༔ དྲོད་བརླན་སྡུད་པ་ཆུ་ཡི་གཟུགས༔ མངལ་སྐྱེས་རླུང་གི་གཟུགས་སུའོ༔ དེ་ལྟར་སྐྱེས་བཞིའི་ལུས་ལེན་ཡང༔ འབྱུང་བ་ཉིད་ལས་བསྐྱེད་པའོ༔ ཕལ་ཆེར་དྲོད་དང་གཤེར་ལས་སོ༔ ཐོག་མར་འབྱུང་བས་བསྐྱེད་པས་ན༔ ཐ་མ་འབྱུང་བས་འཇིག་པའོ༔ སུམ་ཅུ་རྩ་གསུམ་ཞེས་བྱ་བ༔ དགའ་དང་ལྡན་པའི་ཡུལ་དེ་རུ༔ གསོ་བར་བྱེད་པའི་སྨན་གྱི་མཆོག༔ སྐྱེས་པར་བྱད་པ་སྨན་གྱི་མཆོག༔ སྐྱེད་པར་བྱེད་པས་གཞོན་ནུ་ལ༔ ཁྱད་པར་ཡིད་འོང་ལྡུམ་ར་དེར༔ ང་ནི་དྲུག་པ་རྡོ་རྗེ་འཆང༔ བྱང་ཆུབ་སེམས་དཔའི་གཟུགས་སུ་འཁྲུངས༔ སངས་རྒྱས་འོད་སྲུང་ལ་སོགས་ཏེ༔ རབ་ནི་བདུན་པོ་འཁོར་དུའོ༔ འབྲས་བུ་གསུམ་གྱི་ཟས་ཟོས་སོ༔ ལྷ་དབང་བརྒྱ་བྱིན་ཁང་བཟང་ཀྱི༔ ལྷོ་ཡི་ཕྱོགས་སུ་དེ་ལྟར་རོ༔ ལྷ་དབང་བརྒྱ་བྱིན་བཙུན་མོ་དང༔ སུམ་ཅུ་རྩ་གཉིས་སྲས་བཅས་པས༔ ཉི་དང་དྲག་པོ་ཡིད་བཞིན་དང༔ ལྷ་མོར་བཅས་པ་དེ་དག་གི༔ ཉོན་མོངས་ཟད་པར་བྱ་ཕྱིར་འོངས༔ དེར་ནི་བདུན་ཅུ་རྩ་ལྔ་ལོན༔ དེ་ནས་དོན་མེད་སྟོང་ཕྲག་བདུན༔ ཡང་ནི་བརྩེ་བའི་སེམས་སྐྱེས་ནས༔ ཉོན་མོངས་གདུག་རྩུབ་མཁའ་འགྲོའི་གནས༔ གསང་ཆེན་རོལ་པའི་དུར་ཁྲོད་དུ༔ གནོད་སྦྱིན་རཀྴ་སེང་གདོང་དང༔ འདོད་པའི་དབང་མོའི་ལྷུམས་ནས་སྐྱེས༔ ཡིད་ཁྲོས་འཇིགས་པའི་གཟུགས་སུ་བྱས༔ གཞོན་ནུ་དཔའ་བོའི་སྟོབས་དང་ལྡན༔ འཁོར་ནི་བྱང་ཆུབ་སེམས་དཔའ་བདུན༔ མཁའ་འགྲོ་བུ་རྣ་ཉེར་ཞི་དང༔ ཚངས་པ་ཉིད་ནི་དུང་གི་མགྲིན༔ དྲང་སྲོང་ཟླ་འོད་གཞོན་ནུ་དང༔ སེང་གེའི་གདོང་ཅན་ལ་སོགས་ཏེ༔ འདི་དག་གདུལ་བའི་ཡུལ་དུ་བྱས༔ ཚེ་ལོ་དྲུག་ཁྲིའི་དུས་སུའོ༔ དེ་ནས་སྟོང་དུ་བསྟན་པ་བཙུགས༔ དེ་ནས་མྱ་ངན་འདས་ཚུལ་སྟོན༔ དེ་ལྟར་རིམ་པ་གཉིས་ལྡན་ནོ༔ དེ་འོག་ཏིང་འཛིན་འབུམ་ཕྲག་གཅིག༔ ཚེ་ལོ་སྟོང་གི་དུས་དག་དུ༔ སྲིན་པོ་བུ་རྣའི་ཡུལ་དུ་ཡང༔ སྲིན་པོ་རཀྴ་ཁྲོ་གདོང་དང༔ སྲིན་མོ་ཤམ་ཤམ་ནག་མོའི་བུར༔ ང་ནི་དྲང་སྲོང་ཁྲོས་པར་འོངས༔ འཁོར་ནི་སྲིན་པོ་བྱེ་བ་གཅིག༔ དེ་དག་ཞི་ལྡན་སེམས་ལ་བཀོད༔ དེ་དོན་སྟོང་ཕྲག་གཉིས་ཀྱི་བར༔ དེ་ནས་མྱ་ངན་འདའ་བའི་ཚུལ༔ སྟག་སྤྱང་ཁྲོས་པའི་རི་ལའོ༔ ཏིང་འཛིན་དག་ལ་འབུམ་ཕྲག་བྱེད༔ དེ་ནས་ལྷོ་ཕྱོགས་འཛམ་གླིང རྒྱན༔ ཉན་ཐོས་རྣམས་དང་ཡིད་འདྲེས་ཕྱིར༔ རྒྱལ་པོ་ཛ་རི་ཞེས་བྱ་བའི༔ ཁབ་ཀྱི་ལྷོ་ནས་རྒྱང་གྲགས་གཅིག༔ བྱ་རྒོད་སྤུངས་པ་ཞེས་བྱ་བའི༔ རི་འདིར་ང་ནི་ད་ལྟའོ༔ ཚེ་ལོ་དག་ནི་སྟོང་ཕྱེད་ལ༔ རིགས་ལྡན་རྒྱལ་རིགས་བདག་གི་བུ༔ རྒྱལ་པོ་སེང་གེ་བཟང་པོ་དང༔ མཛེས་མ་འོད་ལྡན་ཡུམ་གྱི་ལྷུམས༔ ང་སྐྱེས་སྐྱེས་བུ་ལུས་ཤེད་ཅན༔ འཕོངས་དང་སྒྱུ་རྩལ་ཀུན་ལ་མཁས༔ ཉི་ཤུ་རྩ་ལྔ་དག་ན་ནི༔ ནུབ་ཕྱོགས་བསགས་པའི་མཆོག་རྟེན་རྩར༔ རང་གིས་རང་བྱུང་རབ་ཏུ་བྱུང༔ ཁ་དོག་ངུར་སྨྲིག་གོས་གྱོན་ཏེ༔ ཉན་ཐོས་རྣམས་ཀྱི་གདུང་བ་བཅད༔ དེ་ནས་འདི་ནས་བྱང་གི་ཕྱོགས༔ འབྲས་བུ་ཡོངས་སུ་རྫོགས་པ་ཡི༔ བྱང་ཆུབ་སྙིང་པོའི་ཤིང་ཅན་དུ༔ ལོ་ནི་བརྒྱ་དང་ཉི་ཤུ་རུ༔ བྱང་ཆུབ་སེསམ་དཔའི་གདུང་བ་བཅད༔ དེ་འོག་ད་ལྟ་ཕུང་པོའི་རིས༔ བདུན་ཅུ་རྩ་གཉིས་བར་དུ་ནི༔ ཉན་ཐོས་བྱང་ཆུབ་སེམས་དཔའ་ཡི༔ གདུང་བ་བཅད་ཕྱིར་འདི་ལྟར་རོ༔ བྲམ་ཟེ་དག་ནི་མཚན་བཟང་དང༔ དགེ་སློང་མ་ནི་པདྨའི་སྤྱན༔ གདུལ་ཡུལ་ཡོན་བདག་འདི་དག་གོ༔ དགྲ་བཅོམ་བདུན་གྱི་འཁོར་སྣང་བ༔ ཐོག་མའི་སངས་རྒྱས་བདུན་ལ་སོགས༔ དཀྱིལ་འཁོར་གཅིག་བསྡུས་འཁོར་ཡིན་ནོ༔ ད་ལྟ་ཚེ་ལོ་སུམ་བརྒྱ་ལ༔ གདུལ་བྱ་ཉོན་མོངས་རྣམས་བཅད་ཕྱིར༔ འོད་སྲུང་བསྒྲེས་པོ་ཞེས་བྱ་བ༔ རྒས་པའི་སྡུག་བསྔལ་ཞི་བྱའི་ཕྱིར༔ དགེ་སློང་རྡོ་རྗེ་འཛིན་པའོ༔ ང་ནི་འདི་ནས་ནུབ་བྱང་མཚམས༔ རྡོ་རྗེ་གདན་དྲུང་བྱང་ཆུབ་གནས༔ བྱང་ཆུབ་ཤིང་ལ་རྒྱབ་གཏད་ནས༔ སྲོད་ལ་བདུད་ཀྱི་དབུས་རྣམས་བཏུལ༔ ནམ་ཕྱེད་ཏིང་འཛིན་མཉམ་བཞག་ནས༔ སྐྱ་རེངས་དག་ནི་ཤར་བ་ལ༔ ང་ནི་མྱ་ངན་འདའ་ཚུལ་སྟོན༔ ངས་ནི་ཐོག་མ་དེ་ལྟར་དུ༔ བརྫུས་དང་སྒོ་ང་དྲོད་དང་བརླན༔ མངལ་ལས་སྐྱེས་པའི་གཟུགས་དང་ནི༔ རིམ་པས་སེམས་ཅན་ཉིད་དང་བསྟུན༔ དེ་ལྟར་སྤྲུལ་ནས་དོན་བྱས་སོ༔ བཀོད་པ་ཆེན་པོ་འབུམ་ཚོ་དྲུག་གི་བདག་ཉིད་ལས༔ དུས་གསུམ་སངས་རྒྱས་དགོངས་པས་བརྒྱུད་པའི་དོན་ཚིག་ཅེས་བྱ་བ་རྫོགས་སོ༔ ཨཐྎ༔ རྒྱ་རྒྱ་རྒྱ༔ ༈ དེ་ནས་ཉིད་ཀྱི་སྐུ་དང་གསུང་དང་ཐུགས་ལས་བྱུང་བའི་ལོ་རྒྱུས་ཞེས་བྱ་བ་རྣམ་པར་སྤྲོས་སོ༔ ཚེ་དང་ལྡན་པ་ཁྱོད་ཉོན་ཅིག༔ ང་ནི་བརྫུས་ནས་སྐྱེས་པའི་ཚེ༔ ཁྱེའུ་གཞོན་ནུ་འཁྲུལ་མེད་ལ༔ འཇིག་རྟེན་ཉི་མས་རབ་དགའ་ཕྱིར༔ རྒྱུད་ཀྱི་རྒྱལ་པོ་ཐལ་འགྱུར་ཏེ༔ ནམ་མཁའི་མི་འབྱེད་བར་སྣང་ནས༔ ཀ་ལ་པིང་ཀའི་མཆུས་བསྒྱུར་ནས༔ འགྲོ་བ་གདུལ་ཕྱིར་འདི་དག་བསྟན༔ འདི་ནི་བསྟན་པ་འབྱུང་བའི་འགོ༔ ང་ནི་སྒོ་ང་ལས་སྐྱེས་ཚེ༔ སྐུ་དང་གསུང་དང་ཐུགས་ཀྱི་རྒྱུད༔ ཡོན་ཏན་ཕྲིན་ལས་རྒྱུས་ལྔ་ནི༔ འབྱུང་བ་འགྱུར་བའི་བར་དག་ནས༔ འབྱུང་བའི་རང་སྒྲ་དག་གིས་བསྒྱུར༔ དེས་ནི་སེམས་ཅན་ལུས་སོགས་གྲོལ༔ ང་ནི་དྲོད་བརླན་ལས་སྐྱེས་ཚེ༔ དོང་སྤྲུགས་རྨ་བྱ་མཇིང་བསྣོལ་དང༔ འབྱུང་བ་ཟད་པའི་རྒྱུད་རྣམས་ནི༔ བར་སྣང་གཟུང་དང་བྲལ་བ་ལས༔ རླུང་གི་སྒྲ་ལས་དྲངས་ཏེ་བསྒྱུར༔ འདིས་ནི་འདོད་པའི་ཞེས་ཆགས་གཅོད༔ དེ་ནས་སུམ་ཅུ་རྩ་གསུམ་གྱི༔ རྣམ་པར་རྒྱལ་བའི་ཁང་བཟངས་སུ༔ རིགས་དྲུག་ཉོན་མོངས་གདུང་བཅད་ཕྱིར༔ གདུང་བ་སེལ་བའི་དམ་ཆོས་དྲུག༔ བློ་རིམ་གཉིས་སུ་སྣང་བའི་ཕྱིར༔ རྩོལ་སྒྲུབ་འབད་པས་གྲོལ་བ་དང༔ འབད་མེད་རང་སར་གྲོལ་བ་གཉིས༔ འབད་བཅས་དག་ནི་ཚིག་གི་དོན༔ འབུམ་ཚོ་གཉིས་སུ་རྣམ་བཤད་དོ༔ དེ་ཡང་རྒྱས་པ་འབུམ་དང་གཅིག༔ བཞི་ཁྲོ་སྟོང་ཕྲག་བརྒྱད་དུ་བསྟན༔ འབད་མེད་ཡོངས་སུ་བཤད་པ་དང༔ ཀུན་གསལ་དང་ནི་རིགས་གསུམ་རྒྱུད༔ རྣམ་པར་ཕྱེ་སྟེ་བསྟན་པའོ༔ དེ་ནས་དུར་ཁྲོད་གསང་ཆེན་དུ༔ ཤེས་རབ་ཆགས་པ་ཅན་དག་ལ༔ འདོད་ཆགས་ཉིད་ཀྱིས་འདུལ་བའི་ཕྱིར༔ མི་ཡི་རྒྱུད་ནི་བྱེ་བ་གཉིས༔ ཆགས་པ་ཅན་གྱི་དོན་དུ་བསྟན༔ ཐབས་ཀྱིས་སྐྱེས་པ་འདུལ་བའི་ཕྱིར༔ ཕ་ཡི་རྒྱུད་ནི་བྱེ་བ་དགུ༔ སྐྱེས་པ་རྣམས་ཀྱི་དོན་དུ་གསུངས༔ མ་ཡི་རྒྱུད་ལས་རྣམ་བསྡུས་པ༔ འབུམ་ཚོ་ལྔ་ཡི་བདག་ཉིད་དོ༔ ཕ་ལས་ཁྱད་པར་རྣམ་བསྡུས་པ༔ གསང་མཆོག་བླ་ན་མེད་པ་ཡི༔ བཀོད་པ་གསང་བའི་རྒྱུད་རྣམས་བསྟན༔ དེ་ནས་སྲིད་པོའི་ཡུལ་དག་ཏུ༔ རགས་པ་འདུལ་བའི་རྒྱུད་བཅུ་བསྟན༔ སོག་པོའི་ཡུལ་དུ་ཕྲ་རྒྱུད་བདུན༔ འདིར་ནི་མདོ་སྡེ་འབུམ་ཕྲག་ནི༔ ཉི་ཤུ་རྩ་ལྔ་ཉིད་དུ་བསྟན༔ སྔགས་ནི་ཁྲི་ཕྲག་གཉིས་སུ་བསྟན༔ ལུང་ནི་ཁྲི་ཕྲག་ཕྱེད་དང་བརྒྱད༔ དེ་ལྟར་རྣམ་པར་ཕྱེ་བའོ༔ ཞེས་བཀོད་པ་ཆེན་པོ་འབུམ་ཚོ་དྲུག་གི་བདག་ཉིད་ལས༔ བསྟན་པའི་ཆོས་ཇི་ལྟར་གསུངས་པའི་དོན་ཚིག་བསྟན་པ་སྟེ་གཉིས་པའོ༔ རྫོགས་སོ༔ རྒྱ་རྒྱ་རྒྱ༔ དེ་ནས་རྡོ་རྗེའི་ཆེན་པོར་རྣམ་པར་རོལ་པ་ཞེས་བྱ་བའི་ཚིག་དག་རྣམ་པར་སྤྲོས་སོ༔ དེ་ལྟར་བསྟན་པའི་ཆོས་རྣམས་ལ༔ ཤད་ནི་བརྒྱད་ཀྱིས་གཅིག་བྱས་པའོ༔ བརྒྱད་འགྱུར་བཅུ་ཕྲག་འབུམ་ཕྲག་འགྱུར༔ དེ་རྫོགས་ཚིག་རྣམས་རྣམ་ཕྱེ་བས༔ གསལ་བྱེད་སྒྲོན་མའི་རིམ་པའོ༔ སྟོང་པ་ཉིད་ནི་མཚོན་པ་ཡི༔ རིམ་དང་རིམ་མིན་ཕྱེ་ནས་བསྟན༔ འདི་རྫོགས་ཆོས་ཀྱི་འཁོར་ལོའོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ གཅད་པར་བྱ་བ་འབྲས་བུའི་དོན་ཚིག་བསྟན་པ་སྟེ་གསུམ་པ་རྫོགས་སོ༔ ཨཐྎ༔ རྒྱ་རྒྱ་རྒྱ༔ དེ་ནས་ཉིད་ཀྱི་སྐུ་དང་གསུང་དང་ཐུགས་ལས་སྡེ་རྣམས་པར་འབྱེད་པ་ཞེས་བྱ་བའི་ཚིག་རྣམ་པར་ཕྱུང་ངོ༔ ཀྱེ་ཀྱེ་ཉོན་ཅིག་དགེ་སྦྱོང་ཁྱོད༔ རིགས་ལྡན་རིགས་བུ་ཤཱ་རིའི་བུ༔ རྫུ་འཕྲུལ་མཆོག་དང་ལྡན་པ་ཉོན༔ ངས་བསྟན་པ་ཡི་ཆོས་རྣམས་ནི༔ སེམས་ཅན་བློ་ཡི་རིམ་བ་ལས༔ ཆེ་དང་ཆུང་བའི་ཁྱད་པར་གྱིས༔ རིམ་པ་གཉིས་ཀྱི་ཚུལ་དུ་བསྟན༔ རང་རང་ལྟ་དང་སོར་བཞག་གོ༔ རང་རང་ཉིད་ནི་རིམ་པ་གཉིས༔ ཕྱིན་ཅི་ལོག་དང་ཡང་དག་ལྟ༔ ལོག་པར་རྟོགས་པས་འཁོར་ལ་གནས༔ ཡང་དག་པ་ནི་རིམ་གསུམ་སྟེ༔ ཆུང་བའི་བློ་དང་ཆེན་པོ་ལ༔ དེ་བཞིན་འབྲིང་པོའི་བློ་ཅན་ལའོ༔ རིམ་པ་གསུམ་གྱི་ཚུལ་དུ་བསྟན༔ ཆུང་བའི་རིམ་པ་རྣམ་གསུམ་སྟེ༔ དེ་ཡི་བློ་དང་མཐུན་པའི་ཆོས༔ རྟོག་པས་སྦགས་ལ་ཉན་ཐོས་ཏེ༔ འདུ་ཤེས་ཅན་ལ་རང་རྒྱལ་ཉིད༔ རྟོག་འཇུག་ཅན་ལ་བྱང་སེམས་སོ༔ འབྲིང་པོ་གསུམ་ལ་བསྟན་པ་ནི༔ རབ་ཏུ་དམན་ལ་བྱ་བ་སྟེ༔ དམན་པ་རྣམས་ལ་སྤྱོད་པའོ༔ རྣམ་ཤེས་ཅན་ལ་རྣལ་འབྱོར་ཉིད༔ ཆེན་པོ་རིམ་ལྡན་གསུམ་དག་ལ༔ སེམས་ཡས་པ་ལ་བསྐྱེད་པ་སྟེ༔ སེམས་བཅུད་ཅན་ལ་རྫོགས་པའོ༔ མཆོག་གསང་རབ་ལ་རྫོགས་པ་ཆེ༔ དེ་ཡི་རྣམ་པར་དབྱེ་བ་ནི༔ འོན་ཀྱང་དེ་འདས་འོག་དག་ཏུ༔ འདི་ལྟར་རྣམ་པར་སྣང་བར་འགྱུར༔ ཡིད་ཅན་རྣམས་ལ་སེམས་ཀྱི་སྡེ༔ ནམ་མཁའ་ཅན་ལ་ཀློང་གི་སྡེ༔ རིམ་རྩོལ་བྲལ་ལ་མན་ངག་གོ༔ དེ་ལྟར་རྫོགས་ཆེན་ཨ་ཏི་ལ༔ འབུམ་ཕྲག་དྲུག་ཅུ་རྩ་བཞི་ལས༔ སེམས་སྡེ་ཉི་ཤུ་རྩ་གཅིག་སྟེ༔ ཀློང་ནི་ཉི་ཤུ་གཉིས་ཡིན་ནོ༔ མན་ངག་ཉི་ཤུ་རྩ་གཅིག་པ༔ དེ་ལས་རྒྱུད་སྡེ་རིམ་གསུམ་ལ༔ ཕ་དང་མ་དང་མ་ནིང་ངོ༔ ཨ་ཏི་ཕ་རྒྱུད་ཆེན་པོ་ནི༔ བཀོད་པ་ཆེན་པོ་གསང་བའི་རྒྱུད༔ འབུམ་ཕྲག་དྲུག་པ་འདི་ཉིད་དོ༔ མ་རྒྱུད་འབུམ་ཕྲག་བཅུ་གསུམ་ལ༔ མ་ནིང་དག་ནི་རྣམ་པ་གཉིས༔ འདིར་ནི་ཕ་མ་མ་ནིང་གསུམ༔ རྣམ་པར་བསྡུས་ནས་གཅིག་ཏུ་སྟེ༔ དེ་ཡི་དོན་ཚིག་རྣམས་སྤྲོས་པས༔ སྤྲོས་བཅས་རྣམས་ལ་བཞི་ཉིད་དེ༔ སྤྲོས་མེད་རྣམ་གྲངས་བཅུ་བདུན་ནོ༔ ཤིན་ཏུ་སྤྲོས་པ་མེད་པ་ནི༔ རྡོ་རྗེ་བཀོད་པ་ཉིད་ཡིན་ནོ༔ རབ་ཏུ་སྤྲོས་དང་བྲལ་བ་ལ༔ འདས་རྗེས་གསུམ་གྱིས་གྲོལ་བ་ཡིན༔ གལ་ཏེ་ཚིག་ལ་རབ་འཛིན་ན༔ ཐིག་ལེའི་རྒྱུད་ནི་སུམ་ཅུ་དགུ༔ འདི་དག་རྣམས་ནི་ངས་བསྟན་པས༔ དེ་དག་རྣམས་ལ་ཡིད་ཆེས་བྱ༔ བཅོ་ལྔ་གསུམ་ཕྱེད་མིང་རྒྱུད་ལ༔ ཁྲི་ཕྲག་གཉིས་དང་སྟོང ཕྲག་ལྔ༔ ཐིག་ལེ་མཆོག་གི་རྒྱུད་རྣམས་སོ༔ ཁྱད་པར་མཆོག་ཏུ་གསང་བའི་རྒྱུད༔ བསྟན་པ་འཛིན་སྐྱོང་བསྲུང་བ་ཡི༔ རིམ་གསལ་སྙིང་དང་འདྲ་བའི་རྒྱུད༔ རྣམ་པ་བཅོ་བརྒྱད་དག་བསྟན་ལ༔ སྟོང་ཕྲག་དག་ནི་བཅུ་བདུན་ཡིན༔ བསྟན་པ་ཀུན་གྱི་བུ་གཅིག་པོ༔ བརྒྱ་ཕྲག་གཉིས་དང་ཕྱེད་དང་བརྒྱད༔ སྡེ་དང་ལུང་རབ་དེ་ལྟར་སྣང༔ འདི་ནི་མཆོག་ཏུ་གསང་བ་ལས༔ ཀུན་གྱི་སྤྱོད་ཡུལ་མ་ཡིན་པས༔ འབྱུང་བའི་དགྲ་བྲལ་སངས་རྒྱས་འཛིན༔ འདི་ལས་སྡེ་བཞི་དག་ཏུ་འཕྲོ༔ ནམ་མཁའ་ཉིད་ལ་འཕར་བ་དང༔ ས་རྣམས་ལ་ཡང་ཐོགས་མེད་འགྱུར༔ དེས་ནི་སངས་རྒྱས་གདུང་འཛིན་པའོ༔ དེ་ལྟར་ངས་བསྟན་རྒྱུད་ཆེན་རྣམས༔ བརྫུས་སྐྱེས་དུས་ཀྱི་བྱིན་བརླབས་ལ༔ སྒོང་སྐྱེས་ཐར་པའི་རྒྱུད་ཙམ་མཚོན༔ དྲོད་སྐྱེས་ལ་ནི་དྲང་བའི་དོན༔ མངལ་སྐྱེས་དགའ་ལྡན་ཡུལ་དག་ཏུ༔ འགའ་ཞིག་སྟོང་པར་གཏན་ལ་ཕབ༔ ཁ་ཅིག་དེ་བས་ཉེ་བར་བསྟན༔ དུར་ཁྲོད་ཉིད་དུ་རྣམ་བཤད་པ༔ པོ་མོ་མ་ནིང་རྣམས་ཀྱི་དོན༔ སྣ་ཚོགས་ཐབས་ཀྱིས་མཚོན་ནས་བསྟན༔ ཁྱད་པར་མཆོག་གསང་ཟབ་པར་བསྟན༔ འདིར་ནི་དྲང་ཞིང་འདུལ་བར་བསྟན༔ ངེས་པའི་སྙིང་པོ་འགའ་ཙམ་མོ༔ སྲིན་པོའི་ཡུལ་དུ་ཞི་རྒྱས་དབང༔ ཚར་གཅོད་དོན་དུ་མངོན་སྤྱོད་བསྟན༔ སོག་པོའི་ཡུལ་དུ་སེམས་རྒྱུད་བཅང ༔ དེ་ལྟར་རྒྱུད་རྣམས་རབ་ཕྱེ་བ༔ སེམས་ཅན་རྣམས་ཀྱི་དོན་དུ་སྟེ༔ དེ་ཡི་དོན་རྣམས་རྒྱ་ཆེ་བས༔ བསྟན་པའི་ལུགས་ནི་རྣམ་པ་གསུམ༔ ཇི་ལྟར་སྐས་ཀྱི་རིམ་པ་བཞིན༔ དབང་པོའི་དོན་དུ་བསྟན་པ་དང༔ འོ་མ་ལས་ནི་མར་བཞིན་དུ༔ བསྡུ་བའི་དོན་དུ་བསྟན་པ་དང༔ ཚ་བའི་ནད་ལ་ག་བུར་བཞིན༔ གཉེན་པོའི་དོན་དུ་བསྟན་པའོ༔ དབང་པོའི་དོན་དུ་བསྟན་པ་ནི༔ རིམ་དགུ་བློ་དང་བསྟུན་ནས་ནི༔ ཆེ་ལོངས་དང་ནི་ཞིབ་ཚེགས་སོ༔ བསྡུ་བ་བརྒྱད་ཁྲི་བཞི་སྟོང་ལས༔ སྡེ་བཞི་དག་ཏུ་རྣམ་པར་བསྡུས༔ གཉེན་པོ་སེམས་ཅན་རང་རྒྱུད་ལ༔ ཉོན་མོངས་བརྒྱད་ཁྲི་བཞི་སྟོང་སྟེ༔ དེ་ཡི་སྙིང་པོར་ཆོས་ཀྱང་ངོ༔ དེ་ལྟར་བཤད་པས་སེམས་ཅན་གྱི༔ རང་རྒྱུད་བཅིངས་པ་དག་ལས་གྲོལ༔ ཚིག་གིས་མཚོན་པའི་རྒྱུད་རྣམས་ནི༔ སྡེ་དང་འབུམ་ཚོ་གངས་སུ་བཅད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པའི་ཆོས་རྣམས་ཀྱི་སྡེ་དང་གྲངས་གཏན་ལ་ཕབ་པ་སྟེ་བཞི་པ་རྫོགས་སོ༔ ཨཐྎ༔ རྒྱ་རྒྱ་རྒྱ༔ དེ་ནས་དམ་ཚིག་རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ལས་ལངས་ཏེ༔ འདི་སྐད་ཅེས་ཆེད་དུ་བརྗོད་དོ༔ དེ་ལྟར་བསྟན་པའི་སྙིང་པོ་བཀོད་པའི་དོན༔ རྒྱ་ཆེ་རབ་ཏུ་སྤྲོས་ཏེ་བསྡུས་པ་དང༔ མཆོག་ཏུ་བསྡུས་དང་ཤིན་ཏུ་རབ་བསྡུས་པས༔ སེམས་ཅན་བློ་ཡི་གདུང་བ་ལས་གྲོལ་ཏེ༔ སྟོང་པ་ཆེན་པོའི་ངང་དུ་མཚོན་པའི་ཕྱིར༔ ཚེག་བར་བདུན་གྱིས་རྣམ་པར་བཅད་པ་འདི༔ ཤྭ་ལོ་འབུམ་ཚོའི་གྲངས་དང་ཚིག་དུ་བཅད༔ ཉི་ཤུ་བརྒྱད་ལ་ཤྭ་ལོ་གཅིག་ཏུ་བསྟན༔ དེ་ཉིད་གོང་ནས་གོང་དུ་བགྲངས་པ་ཡིས༔ འབུམ་དང་བྱེ་བ་ས་ཡ་རྒྱ་ཆེར་འགྱུར༔ སྙིགས་མ་དུས་ཀྱི་མཐའ་ལ་དགོས་སྲིད་པས༔ རབས་བདུན་བསྟན་པ་སྨིན་པར་བྱ་བའི་ཕྱིར༔ ཚིག་བར་བདུན་གྱིས་རྣམ་པར་བཅད་ནས་བསྟན༔ རྒྱུད་ཀྱི་གཟུང་ལ་ཕྲི་གཞུག་མི་བྱའི་ཕྱིར༔ འདི་ནི་སྙིང་པོའི་དོན་དུ་བཀོད་པའོ༔ ཞེས་བཀོད་པ་ཆེན་པོ་འབུམ་ཚོ་དྲུག་པ་ལས༔ ཚིགས་སུ་བཅད་པའི་དོན་བསྟན་པ་སྟེ་ལྔ་བ་རྫོགས་སོ༔ རྒྱ་རྒྱ་རྒྱ༔ དེ་ནས་ཉིད་ཀྱི་རྒྱུད་རྣམ་པར་འབྱེད་པ་ཞེས་བྱ་བའི་ཏིང་ངེ་འཛིན་ལས་བཞེངས་ནས༔ ཡང་ཆེད་དུ་བརྗོད་པ་འདི་བརྗོད་དོ༔ ཨེ་མ་ཧོ༔ བཀའ་གསང་ངེས་པའི་སྙིང་པོའི་དོན་རྣམས་ནི༔ ཤིན་ཏུ་རྒྱ་ཆེ་གྲངས་སུ་ཆོད་པ་ལས༔ འབུམ་ཕྲག་ཉིད་ནི་དྲུག་ཅུ་རྩ་བཞི་ལ༔ ལེའུ་འབུམ་ཕྲག་གསུམ་དང་ལྡན༔ ཡང་དག་ངེས་པའི་སར་བསྒྲལ་ཕྱིར༔ རྣམ་པར་བཀོད་ནས་ང་ཡིས་བསྟན༔ དེ་ནས་མཆོག་ཏུ་བསྡུས་པ་ནི༔ ཁྲི་ཕྲག་གཉིས་དང་སྟོང་ཕྲག་ལྔའོ༔ དེ་ཉིད་རྣམ་པར་བཤད་པའི་རྒྱུད༔ བསྐྱེད་དང་བསྡུས་དང་གནས་པ་དང༔ གསལ་དང་བྱམས་དང་ཉིད་དང་ནི༔ གསུམ་བཞི་དྲུག་དང་ཡང་གཉིས་དང༔ བཤད་དང་རྫོགས་དང་སྤུངས་པའོ༔ དེ་ཉིད་ལས་ནི་ཤིན་ཏུ་གསང༔ ཡང་གབ་མེད་པའི་གསང་ཚིག་ལ༔ སྟོང་ཕྲག་དག་ནི་བཅུ་བདུན་ནོ༔ དེ་དོན་རབ་ཏུ་གསང་བ་ནི༔ བབས་དང་རྟོགས་པར་བྱེད་པའོ༔ དེ་དོན་སྙིང་པོའི་རྒྱུད་རྣམས་ནི༔ གཉིས་དང་གཉིས་འབྲེལ་ཡང་གཉིས་དང༔ དེ་ཡི་ཡང་གསུམ་དོན་རྣམས་དང༔ དེ་ནི་བསྡུས་པ་གསུམ་ཡིན་ནོ༔ དེ་ལས་རྣམ་པར་རབ་སྤྲོས་པས༔ རྩ་བ་བརྒྱད་ཀྱི་ཚུལ་ལས་ནི༔ གོ་རིམ་འཇུག་ཕྱིར་རྣམ་བཤད་པ༔ བསྐྱེད་དང་བཤད་དང་ཡན་ལག་དང༔ ལུང་དང་མན་ངག་དགོངས་པ་དང༔ འཇུག་དང་མཁས་བ་ཆོ་ག་ཡིས༔ བསྟན་པ་འཛིན་དང་སྐྱོང་དང་བསྲུང༔ སྤྲོས་པ་བཅོ་བརྒྱད་ཚུལ་དུ་བྱུང༔ གུ་ཧྱ་བསྟན་པའི་བུ་གཅིག་པོ༔ སྙིང་པོ་ཡང་གསང་རབ་ཏུ་གསང༔ འདི་དག་ནམས་ནི་རབ་ཏུ་བསྡུས༔ དེ་ཡི་དོན་རྣམས་རྒྱ་ཆེར་བཀོད་པ་ལས༔ སྙིང་པོ་ངེས་པའི་ལུང་ནི་འདི་དག་གོ༔ འདི་དག་རྟག་ཏུ་གོམས་པར་གང་བྱེད་པ༔ དམ་པ་རྣམས་ཀྱི་གསང་ཆེན་འདི་ཡིས་ཐོབ༔ ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ གསང་བ་སྙིང་དང་འདྲ་བའི་རྒྱུད་རྣམས་བསྡུས་ཏེ་རྣམ་པར་བསྟན་པ་སྟེ་དྲུག་པ་རྫོགས་སོ༔ རྒྱ་རྒྱ་རྒྱ༔ ཨཐྎ༔ དེ་ནས་ལུང་བསྟན་རྗེས་སུ་འཛིན་པ་ཞེས་བྱ་བའི་ཏིང་ངེ་འཛིན་ལས་བཞེངས་ནས་སྐུ་གསུང་ཐུགས་རྡོ་རྗེ་བཀོད་པ་ཆེན་པོ་ལས༔ འདི་སྐད་ཆེད་དུ་བརྗོད་དོ༔ ཀྱེ་ཤཱ་རིའི་བུ་ཉིད་དང་ལྡན་པ༔ འདི་ཉོན་རིགས་ཀྱི་བུ་ཁྱོད་བཟུང༔ ང་ནི་འདི་ན་མི་གནས་ཚེ༔ ཕྱི་རབས་ང་ཡི་བསྟན་པ་འདི༔ སྙིང་པོ་ཡང་ནས་ཡང་བསྡུས་པ༔ ངེས་གསང་མཆོག་གི་སྙིང་པོའི་རྒྱུད༔ འདི་དག་རྣམས་ཀྱིས་འཛིན་པར་འགྱུར༔ ང་ནི་འདི་ནས་མི་གནས་ནས༔ སུམ་བརྒྱ་དང་ནི་དྲུག་ཅུ་ན༔ ནུབ་ཕྱོགས་ཨོ་རྒྱན་དག་གི་ཡུལ༔ དྷ་ན་ཀོ་ཤ་ཞེས་བྱ་བར༔ ཐབས་ཀྱི་ཆ་མེད་ཤེས་རབ་ལས༔ ཨུ་པ་རཱ་ཙ་ཞེས་པ་དང༔ སྣང་བ་གསལ་བའི་འོད་ལྡན་ཡུམ༔ གཉིས་ལས་བསྐྱེད་པ་ཆོས་ཀྱི་སྡེའི༔ ལྷུམས་སུ་ཕ་ཡི་རྒྱུ་མེད་ཞུགས༔ ཆོས་ཀྱི་སྡེ་ཡི་རྨི་ལམ་དུཿ ཤེལ་ལས་གྲུབ་པའི་མི་དཀར་ནི༔ གཟུགས་དང་ལང་ཚོ་ལྡན་པ་ཞིག༔ ཤེས་གྱི་བུམ་པ་འོད་འབར་བ༔ ཡི་གེ་ལྔ་དང་བཅས་པ་ཐོགས༔ སྤྱི་བོའི་སྟེང་དུ་བཞག་པ་རྨིས༔ དེ་ནས་དུས་ཚོད་རྫོགས་པ་ལ༔ ངེས་པའི་སྙིང་པོ་འདི་འཛིན་པའི༔ ཁྱེའུ་བདེ་བའི་བག་ལྡན་པ༔ སངས་རྒྱས་ཀུན་གྱི་ཐུགས་ཀྱི་སྲས༔ དེ་མིང་བཛྲ་པྲ་ཧེ་ཞེས༔ མི་ལུས་རྣམ་དག་སེམས་ཅན་འབྱུང༔ དེས་ནི་བསྟན་པ་འདུལ་བ་ཡི༔ ཐབས་ནི་རྣམ་པ་དུ་མ་ཡི༔ མཛད་པ་དག་ནི་སྤྲོས་བྱས་ནས༔ ལོ་ནི་སུམ་ཅུ་རྩ་གཉིས་ན༔ ང་ཡིས་བསྟན་པའི་ཆོས་རྣམས་ནི༔ མ་ལ་ཡ་ཡི་རྩེ་མོ་ལ༔ རྡོ་རྗེ་དབྱིངས་ཀྱི་མཁའ་འགྲོ་མ༔ འཇིག་རྟེན་བདེ་བའི་རོ་ཅན་དང༔ བདེ་བྱེད་སེར་མོ་ཞེས་བྱ་བ་བས༔ ཚིག་དང་ཡི་གེར་འགོད་པར་འགྱུར༔ རང་བྱུང་དག་གི་ཡི་གེ་ནི༔ བསྟན་པ་ཀུན་གྱི་བུ་གཅིག་པོ༔ དེ་ནས་རྗེས་འཇུག་སྤྲུལ་པ་དེ༔ བསིལ་བ་ཚལ་གྱི་དུར་ཁྲོད་དུ༔ ཤེས་རབ་ཀྱིས་ནི་གདུལ་བྱ་ལ༔ བསྟན་པ་དམ་པ་འདི་ཉིད་སྟོན༔ དེ་ཚེ་ནུབ་ཕྱོགས་རིམ་གཉིས་གྲོང༔ བྲམ་ཟེ་ལེགས་ལྡན་སྟོན་པ་དང ༔ སྣང་བའི་སྒྲོན་མའི་ཡུམ་ལྷུམས་སུ༔ ཞུགས་ཏེ་སྐལ་ལྡན་རྗེས་འཛིན་པ༔ དེ་མིང་མཉྫུ་ཤྲཱི་པྲ་ཏི༔ རིག་པའི་གནས་རྣམས་ཀུན་སྦྱངས་པ༔ སྐྱེས་བུ་ཉིད་ནི་མཆོག་དེ་ལ༔ འཇམ་དཔལ་གྱིས་ནི་ལུང་བསྟན་ནས༔ བསྟན་པ་དམ་པ་འདི་ལ་གཟུང༔ སྤྲུལ་པ་པོ་ནི་ལོ་བརྒྱ་དགུ༔ དེ་ཚེ་རྗེས་འཇུག་དེ་དང་འཕྲད༔ དེ་ཡང་ཤེས་པའི་རྒྱུད་དག་ནས༔ ཤེལ་ཀྱི་གོང་བུ་བཞིན་དུ་འགྱུར༔ འདི་ལྟར་འབུམ་ཚོའི་དབྱེ་བ་དང༔ བསྡུས་དང་རྒྱས་དང་རབ་རྒྱས་སུ༔ རྣམ་པར་ཕྱེ་ནས་སྟོན་པའོ༔ དེ་ནས་བདུན་ཅུ་རྩ་ལྔ་ན༔ དེ་ཡང་མྱ་ངན་འདའ་ཚུལ་སྟོན༔ ཆུ་བོ་དན་ཏིག་ཅེས་བྱའི་མགོར༔ ཟག་བཅས་ཕུང་པོ་ཉིད་དང་བྲལ༔ ནམ་མཁའ་འོད་ཕུང་གིས་བཀང་སྟེ༔ གདུང་བ་བཅད་ཕྱིར་ཞལ་ཆེམས་སོ༔ དེ་ནས་རྗེས་འཇུག་མཉྫུ་དེས༔ བསྟན་པ་ཀུན་གྱི་སྙིང་པོ་འདི༔ རྡོ་རྗེ་གདན་དུ་སྦེད་པར་འབྱུང༔ དེ་དུས་མན་ངག་སྡེ་གཉིས་སུ༔ དེ་ཉིད་ཀྱིས་ནི་རྣམ་པར་འབྱེད༔ སོ་ས་གླིང་གི་དུར་ཁྲོད་དུ༔ རྗེས་འཇུག་དེ་ཉིད་ཉམས་སུ་ལེན༔ བསྟན་པའི་སྙིང་པོ་འདི་སྟོན་འགྱུར༔ དེ་ལོ་བརྒྱ་དང་རྩ་དགུ་ན༔ རྒྱ་ནག་ཀོ་ཥའི་གླིང་ཞེས་པར༔ ཁྱིམ་བདག་དགེ་ལྡན་ཡིད་ཅན་དང ༔ སྣང་གསལ་མཁྱེན་མ་བྱ་བའི་ཡུམ༔ གཉིས་ཀྱི་རྒྱུ་རྐྱེན་ལས་འཁྲུངས་པའི༔ དེ་མིང་དཔལ་གྱི་སེང་གེ་ཞེས༔ མཁས་པ་སྦྱངས་པའི་དོན་ལྡན་པའི༔ སྐལ་ལྡན་སྐྱེས་བུ་དེ་ཉིད་ལ༔ སྤྱན་རས་གཟིགས་ཀྱིས་ལུང་བསྟན་ནས༔ བརྒྱ་དང་སུམ་ཅུ་རྩ་གཉིས་ན༔ མཉྫུ་ཉིད་དང་འཛོམ་པར་འགྱུར༔ དེ་ཡང་སྔོན་སྦྱངས་སྐལ་ལྡན་པས༔ ཤེལ་གྱི་གོང་བུ་བཞིན་དུ་འགྱུར༔ དེ་ནས་ཉི་ཤུ་རྩ་ལྔ་ན༔ མཉྫུ་མྱ་ངན་འདའ་ཚུལ་སྟོན༔ འབྱུང་བ་དག་ནི་རང་དེངས་སུ༔ ནམ་མཁའ་འོད་ཀྱི་ཕུང་པོར་གྱུར༔ གདུང་བ་བཅད་ཕྱིར་ཞལ་ཆེམས་སོ༔ སྒྲ་དང་བཅས་ཏེ་ལུང་བསྟན་ཐོབ༔ དེ་ནས་བསྟན་པའི་སྙིང་པོ་ནི༔ སྐལ་དང་ལྡན་པ་དེས་ཁྱེར་ནས༔ རྒྱ་ནག་ཡུལ་དུ་སྣང་བར་འགྱུར༔ བྱང་ཆུབ་འབྱུང་བའི་ཤིང་དྲུང་དུ༔ དགོངས་པ་རྩེ་གཅིག་དོན་ཆོད་ནས༔ རིགས་བཞི་དག་ཏུ་ངེས་འབྱེད་འགྱུར༔ སྡེ་གསུམ་དོན་རྣམས་གཏེར་སྤེད་འགྱུར༔ ཡང་གབ་གསང་བ་སྙིང་ཐིག་འདི༔ བཀྲ་ཤིས་ཁྲི་སྒོ་ཞེས་བྱར་སྦེད༔ དེས་ནི་ལོ་བརྒྱ་ཉི་ཤུ་ལོ ན༔ དགོངས་པ་དག་ལ་རབ་ཏུ་གནས༔ དེ་ཚེ་རྒྱ་གར་ནུབ་ཕྱོགས་ཡུལ༔ གླང་པོ་སྒང་ཞེས་རྒྱུད་རིངས་པར༔ ཁྱིམ་བ དག་དེ་ནི་དགེ་ལྡན་ལས༔ རབ་ཏུ་རྒྱུ་དང་རྐྱེན་ལས་འཁྲུངས༔ དེ་མིང་ཕྱག་རྒྱ་རྒྱ་ཆེན་དང༔ ཤར་ཕྱོགས་ཀ་མ་ཤཱི་ལའི་གྲོང༔ གདོལ་པ་ཤན་ཏིང་ལག་པ་དང༔ དགེ་བའི་སེམས་ཅན་ཡུམ་གྱི་ལྷུམས༔ རྒྱུ་དང་རྐྱེན་ལས་འཁྲུངས་པ་ཡི༔ དེ་མིང་ཛྙཱ་ན་སཱུ་ཏྲ་ཞེས༔ དེ་གཉིས་སྦྱངས་པའི་ཡོན་ཏན་རྫོགས༔ དེ་དུས་རྡོ་རྗེ་གདན་ཉིད་ན༔ པཎྜི་ཏ་ནི་ལྔ་བརྒྱ་བཞུགས༔ དེ་དག་རྣམས་ལས་མཆོག་ཏུ་མཁས༔ ཡེ་ཤེས་མདོ་དང་བྱེ་མ་ལར༔ ནུབ་ཕྱོགས་འདམ་བུའི་ཚལ་ཞེས་པར༔ རྡོ་རྗེ་སེམས་དཔའ་ལུང་སྟོན་འགྱུར༔ སིང་ཧ་ཉིད་དང་ཞལ་འཕྲད་དེ༔ དེས་ཀྱང་དམ་པའི་དོན་རྙེད་འགྱུར༔ ཡང་གསང་སྙིང་པོའི་བསྟན་པ་འདི༔ ཛྙཱ་ན་སཱུ་ཏྲ་སྐལ་ལྡན་པར༔ དེ་ཡི་སློབ་མར་དེ་འགྱུར་རོ༔ དེ་ནས་ལོ་ན་བཅུ་བདུན་ན༔ དེ་ཡང་མྱ་ངན་འདའ་ཚུལ་སྟོན༔ འབྱུང་བ་དག་ནི་རང་དེང་སུ༔ ནམ་མཁའ་འོད་ཀྱིས་བཀའ་སྟེ་འགྲོ༔ གདུང་བ་དག་ནི་བཅད་པའི་ཕྱིར༔ བསྟན་པའི་བཙས་སུ་ཞལ་ཆེམས་སོ༔ སྐལ་པ་ཉིད་དག་རབ་ལྡན་པའི༔ ཡེ་ཤེས་མདོ་ནི་བྷ་སེང་དུ༔ མཁའ་འགྲོའི་གདུང་བ་གཅོད་པར་འགྱུར༔ མཁའ་འགྲོ་མ་ཡིས་ལུང་བསྟན་ནས༔ མུ་དྲ་ཉིད་ཀྱང་སྐལ་ལྡན་འགྱུར༔ གཉིས་ཀྱིས་ལོ་ནི་བརྒྱ་དང་གསུམ༔ དེ་ནས་ལོ་ལྔའི་བར་དུ་གནས༔ སྐལ་ལྡན་མཆོག་དེ་རང་དེངས་སུ༔ ནམ་མཁའ་འོད་སྣང་དེ་བཞིན་ནོ༔ གདུང་བ་བཅད་ཕྱིར་ཞལ་ཆེམས་སོ༔ ཕྱག་རྒྱ་རྒྱ་ཆེན་ཞེས་བྱ་བའི༔ མཁས་པ་མཆོག་དེ་ཀཾ་རུར་གནས༔ དེ་ནས་དུར་ཁྲོད་རབ་སྣང་དུ༔ དགོངས་ལ་གནས་ཤིང་སྤྱོད་པ་སྐྱོང༔ དེ་དུས་བྷོ་ཊའི་རྒྱལ་ཁམས་སུ༔ རྒྱལ་པོ་བྱང་ཆུབ་སེམས་དཔའི་རིགས༔ སྤྲུལ་པ་ཕྱག་བརྙན་བཅས་པ་འབྱུང༔ དེ་ཡིས་བསྟན་པའི་སྙིང་པོ་འདི༔ བི་མ་ལ་དང་སྐལ་ལྡན་པར༔ གྱུར་ནས་སྙིང་པོའི་དོན་འདི་ནི༔ རབ་ཏུ་གསང་ཞིང་འཛིན་པར་གྱུར༔ མུ་དྲ་ཉིད་ནི་རྒྱ་ནག་ཡུལ༔ བྷེ་ལ་ཤ་ཀྲ་ཞེས་བྱ་བར༔ དེ་ནས་སྣང་སྟེ་སྐྱེ་ཤི་བྲལ༔ འདི་ཉིད་མྱ་ངན་འདའ་བ་མིན༔ དེ་ནས་ལྔ་བཅུ་རྩ་ལྔ་ན༔ དེ་ཡི་ཕྱག་བརྙན་དགེ་སློང་གཟུགས༔ རང་རྒྱུད་རྣམ་པར་དག་ནས་ནི༔ བྷི་ལ་ཀི་ཞེས་བྱ་བ་ཡི༔ གཙུགས་ལག་ཁང་དུ་སྤེད་པར་འགྱུར༔ ལོ་བརྒྱའི་བར་དུ་དེར་གནས་ཏེ༔ དེ་འོག་དགེ་སློང་དད་བརྩོན་ལྡན༔ དེ་དང་འཕྲད་ནས་བསྐལ་ལྡན་འགྱུར༔ དེ་ནས་ལོ་ནི་བཅོ་ལྔ་ན༔ ཡང་ནི་དགེ་སྦྱོང་གཟུགས་འཛིན་པ༔ སྐལ་ལྡན་དེ་ལ་སྣང་བར་འགྱུར༔ དེས་ནི་ཤིང་ལྡན་རི་རྒྱུད་ལས༔ བསྟན་པ་དམ་པ་འདི་སྦེད་འགྱུར༔ དེ་ནས་ལོ་ནི་སུམ་ཅུ་ན༔ པཎྜི་ཏ་ནི་གནས་དུམ་ཞེས༔ དེས་ནི་སྡེ་གཉིས་དག་ལ་སྤྲོད༔ དེ་ནས་ལོ་ནི་བརྒྱ་ཕྱེད་ན༔ བསྟན་པ་ཡང་གསང་ངེས་པ་ཡི༔ དོན་རྒྱུད་མན་ངག་གསང་ཏིག་འདི༔ ས་ལ་གནས་པ་གཅིག་གིས་སྤྱོད༔ དེ་ཡི་རྗེས་འཛིན་སློབ་མ་ནི༔ ལག་ན་རྡོ་རྗེའི་སྤྲུལ་པ་པོ༔ འདིས་ནི་བསྟན་པ་དར་བར་འགྱུར༔ དེ་ནས་དེ་དག་འདས་འོག་ཏུ༔ དགེ་སྦྱོང་དག་གིས་གཟུགས་འཛིན་པ༔ ལུས་ནག་ཡན་ལག་རགས་པ་ཡིས༔ བསྟན་པ་འདི་ནི་བཟུང་བའི་ཚེ༔ དམ་ཆོས་འདི་ནི་ལོ་བརྒྱ་རུ༔ འདི་དག་རྣམས་ནི་ནུབ་པར་འགྱུར༔ དེ་ནས་ཡང་ནི་བོད་ཡུལ་དུ༔ རྒྱལ་པོ་དགེ་བའི་སེམས་ལྡན་པ༔ ཁ་དོག་དམར་པོ་གསེར་གྱི་སོ༔ རིགས་ལྡན་འཁོར་གཡོག་ལྡན་པས་ནི༔ བསྟན་པའི་མེ་རོ་སློང་ནས་ནི༔ མཁས་པ་ལྕེ་ཡི་རྫུ་འཕྲུལ་ཅན༔ ཞིག་གིས་ཡི་གེའི་བརྡ་བསྒྱུར་ཏེ༔ འདི་ཉིད་མེ་ལྕེ་འབར་བ་བཞིན༔ བསྟན་པའི་སྙིང་པོ་ལོ་སྟོང་དུ༔ ཡོ་གི་ཡོ་གིའི་གཟུགས་དག་གིས༔ རིམ་ནས་རིམ་གྱིས་འཛིན་པར་འགྱུར༔ དེ་ནས་ལོ་ནི་ཉིས་བརྒྱ་ན༔ ཡང་ནི་རྒྱལ་པོ་བོངས་ཆུང་བ༔ མགོ་ལ་རལ་གྲིའི་ཆུན་པོ་འཛིན༔ འདི་དང་འཕྲད་ནས་མུན་པར་འགྱུར༔ དེ་ནས་དགེ་སློང་དཔལ་དང་ལྡན༔ བྲམ་ཟེ་དག་གི་རིགས་མཆོག་གིས༔ ཁ་ཆེའི་ཡུལ་ནས་འདི་རྙེད་ནས༔ དེ་ཉིད་ཡུལ་དུ་བསྟན་པ་འདི༔ སྤང་ལ་མེ་མཆེད་བཞིན་དུ་སྟེ༔ སྙིང་པོ་ལོ་བརྒྱའི་བར་དུ་གནས༔ དེ་ནས་ལོ་ནི་སུམ་ཅུ་རུ༔ ཡང་ནི་རྒྱལ་པོ་སྙིང་སྟོབས་ཅན༔ དེ་དང་འཕྲད་ནས་མུན་པར་འགྱུར༔ དེ་ནས་ནུབ་ཕྱོགས་ཨོ་རྒྱན་ཡུམ༔ གླིང་དང་ལྡན་པ་ཞེས་བྱ་བར༔ མཁའ་འགྲོ་དཔལ་འཛིན་ཞེས་བྱ་བས༔ རྒྱ་མཚོའི་གླིང་ནས་ཕྱུང་ནས་ནི༔ ཡང་ནི་བསྟན་པ་དར་བར་བྱེད༔ དེ་ནས་རིམ་དང་རིམ་གྱིས་ནི༔ སྐལ་དང་ལྡན་པའི་སྐྱེས་བུ་ནི༔ དོན་དམ་རིམ་པ་ཉིད་ལྡན་འགྱུར༔ ཚེ་ལོ་བཅུ་པའི་དུས་དག་ཏུ༔ འདིས་ནི་སྒྲོན་མ་འབར་བར་བྱེད༔ དེ་ནས་བསྟན་པའི་སྙིང་པོ་རྣམས༔ ནམ་མཁའ་དག་ལ་འཕར་བར་འགྱུར༔ བསྟན་པ་ཀུན་གྱི་བུ་གཅིག་པོ༔ འབྱུང་བའི་སྒྲ་དང་བྲལ་བའི་ཕྱིར༔ རྡོ་རྗེ་གདན་ནས་མེ་རོ་བྱེད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ ཕྱི་རབས་སྐལ་པ་དང་ལྡན་པའི་གང་ཟག་ཇི་ལྟ་བུ་འབྱུང་བ་ལུང་བསྟན་པ་སྟེ་བདུན་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཉིད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་མི་ཟད་པ་རྒྱན་གྱི་འཁོར་ལོ་ལས་འདི་དག་ཕྱུངས་ཏེ་རྣམ་པར་སྤྲོས་སོ༔ ཉོན་ཅིག༔ དགེ་སྦྱོང་རྡོ་རྗེ་ཡང་འཛིན་པ༔ འདི་ནི་སངས་རྒྱས་ཀུན་གྱི་གསང༔ རྡོ་རྗེ་ཐེག་པར་རབ་གྲགས་པ༔ ཁྱད་པར་ཆེན་པོའི་ཆོས་རྣམས་ནི༔ འཇིག་རྟེན་བཀོད་པའི་ཞིང་ཁམས་འདིར༔ བསྟན་པ་དག་ནི་གནས་མི་གནས༔ ཡེ་ཐོག་དང་པོའི་སངས་རྒྱས་དང༔ དམ་པ་སྟོང་གི་དཀྱིལ་འཁོར་འདུས༔ དེ་ནས་བསྟན་པ་གཉིས་པ་ལ༔ སྤྱི་ཕུད་འཇིག་རྟེན་མགོན་ཞེས་པས༔ དམ་པ་སྟོང་གིས་འདི་ཕྱག་མཛད༔ བསྟན་པ་དག་ནི་གསུམ་པ་ལ༔ ཚངས་པ་སྟོང་གི་སྤྱི་ཕུད་མགོན༔ སངས་རྒྱས་སྟོང་གི་ཐུགས་ཉིད་དྲིལ༔ དེ་ནས་བསྟན་པ་བཞི་པ་ལ༔ ཉི་མ་སྟོང་གི་རྒྱལ་པོ་དང༔ སངས་རྒྱས་སྟོང་གི་མངའ་དབང་བསྐུར༔ བསྟན་པ་ཉིད་ནི་ལྔ་པ་ལ༔ འཇིག་རྟེན་དྲ་བ་མགོན་ཞེས་པའི༔ དམ་པ་སྟོང གི་ཐུགས་ལ་སྦས༔ བསྟན་པ་དྲུག་གི་སངས་རྒྱས་ནི༔ འོད་ཟེར་སྟོང་གི་མུ་ཁྱུད་མགོན༔ རིགས་ཅན་སྟོང་གིས་འདི་ཉིད་སྦས༔ དེ་ནས་བསྟན་པ་བདུན་པ་ལ༔ ཡེ་ཁྱབ་འཁོར་འཇིག་ཚངས་པའི་མགོན༔ བདེ་ཆེན་སྟོང་གི་སྤྱི་བོར་བཟུང༔ དེ་ལྟ་དེ་ལྟར་བསྟན་པ་ནི༔ འབུམ་ཕྲག་དྲུག་ཅུ་རྩ་བཞི་རུ༔ སངས་རྒྱས་གྲགས་ནི་དེ་ཉིད་ཀྱིས༔ གསང་ཆེན་འདི་ནི་ཡོངས་བཟུང་བའོ༔ བསྟན་པའི་སངས་རྒྱས་ངེས་པ་ཡི༔ ས་ཡ་ཕྲག་ནི་བཅུ་དགུ་ཡིས༔ འདི་ཉིད་ཕྱག་མཛད་བཅུད་དྲིལ་བའོ༔ དེ་ཕྱིར་བསྟན་པའི་ས་བོན་ནི༔ ངེས་པའི་སྙིང་པོ་ཞེས་བྱ་བ༔ བསྟན་པ་ཀུན་གྱི་བུ་གཅིག་བུ༔ འབྱུང་བ་ལྔ་ཡི་དགྲ་དང་བྲལ༔ རང་བྱུང་དག་གི་ཡི་གེ་ནི༔ གང་གི་རྐྱེན་གྱིས་འཇིག་པ་མེད༔ ཉི་མ་སྤུངས་པའི་སྒྲོན་མ་འདིས༔ སངས་རྒྱས་ཀུན་གྱི་ས་བོན་འདེབས༔ སྟོན་པ་དག་ནི་རེ་རེའོ༔ བསྟན་པ་དག་ནི་ནུབ་པའི་ཚེ༔ འདི་ན་སྟོན་པ་གང་འབྱུང་བའི༔ སྔོན་དུ་ལོ་བརྒྱའི་དང་པོ་ལ༔ འབྱུང་སྟེ་སྐུ་གསུང་ཐུགས་ཀྱི་རྒྱུད༔ འདི་ཉིད་ལས་ནི་འཕྲོ་བར་འགྱུར༔ འདི་ཉིད་གང་གིས་བཟུང་བ་དེ༔ བཟོ་དང་སྒྱུ་རྩལ་ཐམས་ཅད་དང༔ བསྟན་བཅོས་ཀུན་དང་སྒྲ་རྣམས་ནི༔ ཇི་ལྟར་འདོད་བཞིན་ཤེས་པར་འགྱུར༔ གསང་མཆོག་བླ་ན་མེད་པ་དེ༔ མཆོད་དང་བསྟོད་དབང་བསྐུར་བྱས་ན༔ མཆོག་དང་ཐུན་མོང་དངོས་གྲུབ་རྣམས༔ ཇི་ལྟར་འདོད་པ་བཞིན་དུ་འབྱུང༔ འདི་ཉིད་བཅངས་པ་ཙམ་གྱིས་ནི༔ ལུང་དང་མན་ངག་འཛིན་པར་འགྱུར༔ འཇིག་རྟེན་མུན་སེལ་ནོར་བུའི་འོད༔ སྣང་བར་བྱེད་པའི་སྒྲོན་མ་འདི༔ གང་ལ་སྣང་བར་གྱུར་པ་དེ༔ དེ་ནི་འབྱུང་བ་ར་དེངས་སུ༔ སྐལ་ལྡན་འགྱུར་བར་ཐེ་ཚོམ་མེད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པའི་སྙིང་པོ་བྱུང་ཁུངས་བསྟན་པ་ཏེ་བརྒྱད་པ་རྫོགས་སོ༔ རྒྱརྒྱ་རྒྱ༔ དེ་ནས་ཡང་ཉིད་ཀྱི་སྐུ་གསུང་ཐུགས་ལས་འདི་དག་བྱུང་ངོ༔ ཀྱེ་ཀྱེ་ཉོན་ཅིག་རིག་ལྡན་ཤཱ་རིའི་བུ༔ བསྟན་པའི་དམ་པ་རྒྱ་ཆེ་རབ་བཀོད་ལས༔ མཆོག་ཏུ་སྙིང་པོ་ཡང་ནས་ཡང་བསྡུས་པ༔ གསེར་གྱི་སྙིང་པོ་ཉི་མ་སྣང་བྱ་འདི༔ ཐུན་མོང་འཆོལ་བར་དར་བ་མ་ཡིན་ཏེ༔ གསང་ཆེན་རིགས་དང་ལྡན་པ་འགལ་ལ་འབྱུང༔ སྙིགས་མ་རྩོད་ལྡན་ཉོན་མོངས་རགས་པའི་དུས༔ སྡེ་པ་ནང་འཐབ་དབེན་གནས་ཀུན་ཀྱང་འཇིག༔ རྒྱལ་ཁྲིམས་མི་གནས་རང་དགའ་འདོད་རྒྱལ་སྤྱོད༔ ཕ་དང་བུ་འཐབ་མཚོན་གྱིས་ལུས་རྣམས་བསྲུང༔ བསགས་པའི་ཚོགས་ཡལ་ས་ཡི་བཅུད་རྣམས་ཟད༔ མི་མཐུན་ལྟ་སྤྱོད་དག་ཀྱང་གྲངས་མང་འབྱུང༔ སྙིགས་མ་ལྔ་བརྒྱ་ཚེ་ལོ་རིམ་གྱིས་བྲི༔ བསོད་ནམས་སྐལ་ཆུང་ཚེ་ལོ་དྲུག་ཅུའོ་ཚེ༔ སྙིང་པོ་འདི་ནི་ལོ་ནི་དྲུག་ཅུར་གནས༔ དེ་ནས་འོག་ཏུ་ལོ་བརྒྱའི་བར་དུ་ནི༔ རྟོག་གེ་དཔྱོད་ཅིང་གསང་བ་འདི་མི་གནས༔ དེ་འདས་འོག་ཏུ་ལོ་སྟོང་ཉིད་དུ་ཡང༔ ཐོས་བསམ་བྲལ་བའི་གང་ཟག་ཡལ་ནས་ནི༔ གསང་བ་མཆོག་འདི་ཉི་མ་བཞིན་དུ་འགྱུར༔ དེ་འདས་འོག་ཏུ་ཉིས་བརྒྱ་མུན་པར་འགྱུར༔ དེ་ནས་ཚེ་ལོ་དག་ནི་བཞི་བཅུ་ན༔ སྙིང་པོ་འདི་ནི་ལོ་བརྒྱའི་བར་དུ་གནས༔ དེ་འདས་སུམ་ཅུའི་བར་དུ་མུན་པར་འགྱུར༔ དེ་འོག་ལོ་བརྒྱའི་བར་དུ་གནས་པ་ལ༔ དེ་འདས་ཚེ་ལོ་སུམ་ཅུའི་དུས་ན་འདི༔ ནུབ་ནས་རྒྱང་འཕེན་ལོ་བརྒྱའི་བར་དུ་དར༔ དེ་ནས་ཡང་ནི་ལོ་བཅུའི་བར་དུ་གནས༔ ཚེ་ལོ་ཉི་ཤུ་པ་ལ་འདི་མི་འབྱུང༔ བཅུ་པའི་དུས་སུ་སྙིང་པོ་འདི་འབྱུང་བས༔ འདི་དང་གང་འཕྲད་འབྱུང་བ་རང་གདེངས་འགྱུར༔ དེ་ནས་ཡལ་ཏེ་མི་སྣང་བསྟན་པའི་བཙས༔ ཡང་ནི་བསྟན་པའི་མེ་རོ་བཞིན་དུ་འགྱུར༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པ་དམ་པའི་འཕེལ་འགྲིབ་ཇི་ལྟར་འབྱུང་བ་སྟེ་ཞུས་དོན་དགུ་བ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་སྐུའི་འོད་ཟེར་རྣམ་པར་སྤྲོས་ཏེ་འདི་སྐད་ཅེས་རྔམས་པར་བསྒྲགས་སོ༔ ཉོན་ཅིག་རིགས་ལྡན་དགེ་སྤྱོད་དཔལ༔ ང་ནི་འདི་ནས་མི་གནས་ནས༔ ཚེ་ལོ་དྲུག་ཅུ་ཡན་ཆད་ལ༔ འབྲས་བུ་གྲོལ་བ་སྟོང་ཕྲག་གཅིག༔ འབྱུང་བ་རང་དེངས་དག་ཏུ་སྟེ༔ དགེ་སྦྱོང་གཟུགས་ནི་དེ་ཡི་ཕྱེད༔ ལྷག་མ་བྱང་ཆུབ་སེམས་དཔའོ༔ དེ་ནས་ལྔ་བཅུ་ལ་ཐུག་བར༔ འབྱུང་བར་རང་སར་དེངས་པ་ནི༔ འབུམ་ཕྲག་གཉིས་ཀྱིས་སྐྱེ་མེད་ཐོབ༔ ཕལ་ཆེར་བུད་མེད་དག་གི་གཟུགས༔ སྐྱེས་བ་དག་ནི་སྟོང་ཕྲ་གཉིས༔ དེ་ནས་ཚེ་ལོ་སུམ་ཅུའི་བར༔ འབུམ་ཕྲག་དག་ནི་དྲུག་པ་སྟེ༔ འདི་དག་ཕལ་ཆེར་སྐྱེས་པ༔ བུད་མེད་གཟུགས་ནི་འབུམ་གཅིག་ཡིན༔ འབྱུང་བ་དག་ནི་རང་དེངས་སོ༔ དེ་དག་སྔོན་བྱུང་ང་ཡི་འཁོར༔ སྙིགས་མའི་དུས་ན་སངས་རྒྱས་ཐོབ༔ ངེས་གསང་སྙིང་པོ་ཡང་བསྡུས་པའི༔ འབྲས་བུ་ཉིད་ནི་ཐོབ་པ་ལས༔ བསྟན་པ་གཞན་གྱི་འབྲས་བུ་མིན༔ གལ་ཏེ་བསྟན་པ་གཞན་དག་ལ༔ མངོན་པར་སངས་རྒྱས་འབྱུང་འདོད་ན༔ འདི་ཉིད་ཕྲད་དེ་དེ་བཞིན་ནོ༔ དེ་ཕྱིར་འབྲས་བུའི་དུས་ཀ་རུཿ འདི་ཉིད་དག་ཏུ་བསྟན་པའོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ ངེས་པའི་འབྲས་བུ་ཐོབ་པ་འབྱུང་བ་རང་དེངས་སུ་སོང་བའི་གྲངས་ལུང་བསྟན་པ་སྟེ་བཅུ་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་ཉིད་ཀྱི་ཐུགས་ཀྱི་དལ་ནས་མགུར་གྱི་བུམ་པར་དྲིལ་ལྗགས་ཀྱི་དབང་པོ་ལ་བཀྲམ་ནས་ཆེད་དུ་བརྗོད་པ་འདི་དག་བརྗོད་དོ༔ ཨེ་མ་གསང་བའི་གསང་མཆོག་ངེས་པའི་སྙིང་པོ་འདིས༔ འཁོར་བར་བརྒྱུད་པའི་བག་ཆགས་ཀུན་བཅད་ནས༔ ཡེ་ཤེས་མཛོད་ཀྱི་སྣང་བ་རབ་བསྟན་ཏེ༔ སྙིགས་མའི་ཡང་སྙིགས་ཚེ་ལོ་སུམ་ཅུ་ལ༔ ལེ་ལོས་གཡེངས་ནས་དེ་འདས་འོག་ཏུ་ནི༔ སྐྱེ་གཉིས་བར་དུ་མངོན་པར་སངས་རྒྱས་པ༔ ཚེ་ལོ་བཅུ་པའི་བར་ལ་འདི་རྣམས་འབྱུང༔ སྟོང་ཕྲག་བདུན་ནི་སྣང་བ་མ་དང་ཕྲད༔ སྐྱེས་པ་དག་ནི་སྟོང་ཕྲག་དྲུག་ཉིད་ལ༔ བུད་མེད་གཟུགས་ནི་སྟོང་ཕྲག་གཅིག་ཡིན་ནོ༔ དེ་ལྟར་སྐྱེས་དང་བུད་མེད་ཁྱི་དང་མོ༔ ཇི་ལྟར་གྱུར་པའི་གཟུགས་སུ་འདུག་ཀྱང་སླའི༔ འདི་དང་ཕྲག་པ་རྣམ་པར་གྲོ་བའོ༔ གཞན་གྱི་རིགས་ལས་བྱུང་ཡང་འདི་ཉིད་དུ༔ དེས་ན་གསང་མཆོག་ངེས་པའི་སྙིང་པོ་འདི༔ གཞན་གྱི་ཡུལ་མིན་སྐལ་ལྡན་ཤུགས་ཀྱིས་ཕྲད༔ བདེ་གསལ་སྙིང་པོའི་དོན་དུ་འདི་བཀོད་པའོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ སྐྱེ་གཉིས་མཚམས་སུ་སངས་རྒྱས་པ་འབྱུང་བར་ལུང་བསྟན་པ་སྟེ་བཅུ་གཅིག་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་ཏིང་ངེ་འཛིན་སེང་གེ་རྣམ་པར་རོལ་པ་ཞེས་བྱ་བ་ལས་བཞེངས་ནས༔ ཡང་ཆེད་དུ་བརྗོད་པ་འདི་དག་གསང་བའི་སྙིང་པོ་འདི་རྣམས་མི་ཡུལ་དུ་སྣང་བ་རྣམ་པར་བརྗོད་དོ༔ སྙིགས་མ་ལྔ་བརྒྱ་ཚེ་ལོ་དྲུག་ཅུ་པའི་དུས་ནས་དུས་ཀྱི་ཐ་མ་ལ༔ གསང་བའི་སྙིང་པོ་ཆོས་འདི་ནི་མི་ཡུལ་སྣང༔ དེ་རྗེས་འཛིན་པའི་གང་ཟག་སྐལ་བ་ཅན༔ སྙིང་པོ་འདི་ནི་སུ་ལ་སྣང་གྱུར་པ༔ དེ་དག་རྣམས་ནི་མི་འགྱུར་ས་ལ་འདའ༔ མྱ་ངན་ལས་གལ་ཏེ་སྙིགས་མར་ཚེ་ཐུང་ནད་མང་བས༔ སྙིང་པོའི་དོན་འདི་གོམས་པ་ཆུང་བས་གདིང་དུ་མ་གྱུར་ཀྱང༔ འདི་ཉིད༔ ཀྱི་ངོ་སྤྲོད་མཐོང་བས་འཁོར་བ་ལས་དབུགས་ཆེན་ཉིད་འབྱིན་པ༔ བཅུ་གཅིག་ཀུན་ཕ་རོལ་ཏུ་ཕྱིན་པ་ལྟར་ན་ཏུ་འོད་དེ་སྤྲུལ་པའི་ཞིང༔ རྫུ་སྐྱེས་དག་པ་མངའ་གྱི་རྒྱ་དང་བྲལ༔ ཤར་ཕྱོགས་མངོན་དགའ་མི་འགྱུར་རྡོ་རྗེའི་ཞིང༔ མི་བསྐྱོད་སྟོན་པས་འཁོར་གྱི་ཆོས་འདི་བསྟན་པས་རྒྱུ་གྲོལ༔ གདུལ་བྱ་རང་སྣང་ཡོན་ཏན་བསམ་མི་ཁྱབ༔ སྟེ་ས་བཅུ་གསུམ། ལྷོ་དཔལ་དང་ལྡན་དང་ནུབ་པདྨ་བརྩེགས་པ་དང༔ ལས་རབ་བྱང་ཉིད་ནི་ཡོངས་སུ་རྫོགས་པའི་ཞིང༔ རིན་ཆེན་འབྱུང་དང་པདྨ་གར་དབང་རྟ༔ སྟོན་པའི་བསྟན་པས་འཁོར་གྱི་ཤེས་བྱའི་སྒྲིབ་པ་སྦྱོང༔ ཤར་དཀར་ལྷོ་སེར་ནུབ་དམར་དང་བྱང་ལྗང་གུའི་ཁ་དོག་གསལ༔ མཐོ་དམན་མེད་པས་ཁོད་སྙོམས་ཡོད་འོང་རི་སྐེག་སོགས་བྱ་སྐད་སྣ་ཚོགས་སྒྲོགས༔ དྲི་བསུང་ངད་འཇམ་ལྟ་བས་ཆོག་མི་ཤེས༔ དབང་པོ་ཚིམ་བྱེད་ཡོན་ཏན་ཀུན་དང་ལྡན༔ ཁ་དོག་ལུས་རྫོགས་ཟས་གོས་དུས་གཅིག་རྫོགས༔ ལུས་ཀྱི་རྩོལ་བྲལ་ལས་ཀྱི་རླུང་གིས་བསྐྱོད་ནས་བར་སྣང་ལ༔ འགྲོ་དང་འདུག༔ འབྱུང་བས་མ་བསྐྱེད་པའི་གནད་ཀྱིས་རླུང་མཁྲིས་བད་ཀན་འདུས་པའི་ནད་རྣམས་མེད༔ ཡན་ལག་བརྒྱད་ལྡན་རོ་བརྒྱ་འདུས་པའི་ཆུ༔ འཐུངས་པས་ལུས་སེམས་ཚིམ་བྱེད་རེག་ན་ལུས་ཀྱང་འཇམ༔ ས་ཆུ་མེ་རླུང་འབྱུང་བས་ཕན་གནོད་བྲལ༔ བཀྲེས་ཡིད་ལ་འདོད་པའི་དང་སྐོམ་དང་ཚ་གྲང་སྡུག་བསྔལ་མེད༔ འདོད་ཆགས་ཞེ་སྡང་གཏི་མུག་ཉོན་མོངས་རྣམས༔ སྐྱེ་བའི་རྒྱུ་མེད་ཤེས་པ་བག་ཡངས་སོ༔ བལྟ་དགོད་ལག་བཅངས་གཉིས་འཁྱུད་འདོད་ཆགས་མེད༔ ཆོག་ཤེས་སྲེད་བྲལ་རྟག་ཏུ་ཆོས་ལ་ཉན༔ སྒྲིབ་གཉིས་བྲལ་ནས་སྐྱེ་བ་གཅིག་གིས་ཐོགས༔ མཆོད་པའི་ལྷ་མོས་ཡིད་འོང་བཀྲ་ཤིས་བརྗོད༔ གཞལ་ཡས་ཁང་མཛེས་སྒོ་བཞི་རྟ་བབས་ལྡན༔ ཤེལ་དཀར་དང་གསེར་སེར་དང་མར་དམར་ལྗང་གད་ཨནྡྲ་སྔོ་ནཱི་ལ༔ བཀྲ་ཕྱོགས་རྣམས་ཤིས་གདུགས་དང་འཁོར་ལོ་རྒྱལ་མཚན་མཛེས༔ དེ་ལྟར་ཕྱོགས་བཅུ་རང་བཞིན་སྤྲུལ་པའི་ཞིང༔ རང་རང་སྟོན་པས་རང་རང་འཁོར་རྒྱུན་འགྲོལ༔ མདུན་གྱི་ནམ་མཁའ་མི་འབྱེད་བརྩེགས་པ་ན༔ འཇིགས་པའི་ཁྲོ་གནས་དུར་ཁྲོད་མེ་རི་འབར༔ འཇིགས་པའི་སྒྲ་ཧཱུཾ་ཕཊ་སོགས་དང་ཁྲོ་གཟུགས་ཨ་ལ་ལ༔ འདི་ཉིད་མཐོང་བ་ཙམ་གྱིས་གང་ཟག་དེ་གྲོལ་འགྱུར༔ སྐལ་ལྡན་མ་གོམས་པས་སྟོབས་མེད་སྙིང་པོའི་འཛིན་པ༔ དེར་ནི་རང་བཞིན་སྤྲུལ་པའི་ཞིང་དབུགས་ཕྱུང་སྐྱེ་བ་གཅིག་བ་སྟེ༔ ལྔ་བརྒྱ་དག་ན་ངེས་པའི་སར་གྲོལ་ལོ༔ ཞེས་བཀོད་པ་ཆེན་པོ་འབུམ་ཚོ་དྲུག་གི་བདག་ཉིད་ལས་རྨོངས་པའི་གདུང་བ་རྣམ་པར་གསལ་བ་བརྒྱུད་པ་གསུམ་དུ་གཏན་ལ་ཕབ་པ་སྟེ༔ ཤཱ་རིའི་བུ་སྐར་མ་འོད་བཟང་གིས་སྟོན་པ་འོད་སྲུང་ཉིད་ལ་ཞུས་པའི་ལམ་གྱི་ལེའུ་སྟེ་བཅུ་གཉིས་པ་རྫོགས་སོ༔ རྡོ་རྗེ་ལེགས་པ་མགོན་པོ་གྲེས་ཐག་ཅན༔ བཀའ་འདི་གཏད་དོ་ཁྱོད་ཀྱིས་བྱ་ར་གྱིས༔ ས་མ་ཡ༔ རྒྱ་རྒྱ་རྒྱ༔ གཞན་ཡང༔ བཀོད་པ་ཆེན་པོ་འབུམ་ཚོ་དྲུག་པ་ལས༔ ལུས་དང་འདྲ་བའི་ལེའུ་སྟོང་ཕྲག་བཞི༔ བརྗོད་བྱ་མཆོག་ཏུ་ཟབ་ཅིང་རྒྱ་ཆེ་ཡང༔ སུམ་བརྒྱ་གསུང་བའི་ལེའུ་འདི་མེད་ན༔ གཟུགས་ཀྱི་ཕུང་པོ་སྙིང་མེད་རོ་དང་འདྲ༔ དེ་ནས་སྙིང་དང་འདྲ་བའི་ལེའུ་འདི༔ འཇམ་དཔལ་བཤེས་གཉེན་བདག་གིས་ཕྱུང༔ ནམ་ཞིག་སྙིགས་མ་ལྔ་བརྒྱའི་དུས༔ ཚེ་ལོ་ཉིད་ནི་དྲུག་ཅུ་ལ༔ བསྟན་པའི་བཙས་སུ་འདི་ཉིད་ནི༔ སྐལ་ལྡན་དེ་དང་འཕྲད་པར་ཤོག༔ རྒྱ་རྒྱ་རྒྱ༔ རྒྱ་གར་ནུབ་ཕྱོགས་གླང་པོ་སྒང་གི་གྲོང༔ འབུམ་ཚོའི་གྲངས་ལས་ཁྱད་པར་བདག་གི་བློ་ཉིད་སྦྱངས༔ སྐད་དང་ཡི་གེ་མི་མཐུན་གྲངས་མང་བདག་གི་བློ་ལ་སྣང༔ དེ་ཡི་ཕྱིར་ན་སྒྲ་དང་བསྟན་བཅོས་ཚད་མ་ཀུན་ལ་མཁས༔ རྒྱུད་ལུང་མན་ངག་མང་པོར་བློ་སྦྱངས་ཀྱང༔ སྙིང་པོ་ཡང་བསྡུས་གསང་མཆོག་འདི་མེད་ན༔ བདག་བློས་མཐོང་བའི་དོན་མེད་བྲག་ཅའི་སྒྲ་ལ་སྦྱོད༔ དམ་པའི་བརྒྱུད་པ་རྣམས་ཀྱིས་རྩ་བ་ངེས་ཤེས་ཅན༔ བྷ་སེང་ནགས་སུ་བདག་གི་བློ་ཡི་མུན་པ་ཀུན་བསལ་ནས༔ དེ་ནས་དུར་ཁྲོད་ཆེན་པོ་རབ་ཏུ་སྣང་བྱེད་དུ༔ ཐིག་ལེ་མཆོག་གི་རྒྱུད་ལུང་མན་ངག་རྣམས༔ དཔེ་གསུམ་ཉིད་དུ་བདག་གིས་བྲིས་པ་ལས༔ དཔེ་གཅིག་ཨོ་རྒྱན་ཡུལ་གྱི་རྒྱ་མཚོའི་གླིང་ལ་སྦས༔ དཔེ་གཅིག་ཁ་ཆེའི་ཡུལ་གྱི་མཐའ་འཁོབ་རིགས་ངན་དག་གི་ཡུལ༔ གསེར་གྱི་གླིང་ཞེས་མཁའ་འགྲོ་འདུ་བའི་གནས༔ ཕྱི་རབས་བསྟན་པའི་བཙས་སུ་དགོས་སྲིད་ནས༔ རང་རྒྱས་བཏབ་སྟེ་མཁའ་འགྲོ་རྣམས་ལ་གཏད༔ དཔེ་གཅིག་བོད་ཀྱི་རྒྱལ་པོའི་བཀའ་ནན་རབ་ཆེ་བས༔ བོད་ཡུལ་དབུས་ཀྱི་བསམ་ཡས་སྒྲ་བསྒྱུར་གླིང༔ མཚན་མོ་ཐོར་རངས་སྐལ་ལྡན་སྐ་ཅོག་གཉིས༔ སྨྲ་བྱེད་ལྕེ་ལ་དབང་ཐོབ་གཉིས་ཀྱིས་ཕལ་ཆེར་བསྒྱུར༔ རྩ་བའི་རྒྱུད་ལྔ་གཉགས་ཀྱིས་སྔོན་དུ་བསྒྱུར༔ དེ་དག་སྐལ་ལྡན་རྗེ་བློན་གཉིས་ལ་གཏད༔ དེ་ནས་མཆིམས་ཕུ་བྲག་དམར་དགེ་གོང་དུ༔ རྒྱ་ཡི་དཔེ་ལས་བོད་ཀྱི་ཡི་གེ་རུ༔ གསང་བའི་མན་ངག་འདི་ནི་བདག་གིས་བསྒྱུར༔ ར་གན་སྦྱངས་པའི་བྱང་བུ་ལྔ་བཅུ་ལ༔ དཀར་པོ་དུང་བཞུས་ཡི་གེར་བཏབ་སྟེ་བསྒྱུར༔ ཡང་ནི་ར་གན་སྦྱངས་པའི་བྱང་བུ་དྲུག་ཅུ་ལྔ༔ ཟངས་བཞུས་ཡི་གེར་བཏབ་སྟེ་བསྒྱུར་བའི་པུ་ཏིག་གཅིག༔ དམར་པོ་ཟངས་སྦྱངས་བྱང་བུ་བརྒྱ་དང་སུམ་ཅུ་ལ༔ སྔོན་པོ་གཡུ་སྦྱངས་ཡི་གེར་བཏབ་སྟེ་བསྒྱུར་བའི་བུ་ཏིག་ཅིག༔ ཆུ་དར་བསྒྲིགས་པའི་ལྡེབ་མ་ཉི་ཤུ་ལ༔ ཕྲ་མེན་ཡི་གེ་སྔོ་དམར་བཏབ་སྟེ་བསྒྱུར་བའི་པུ་ཏི་གཅིག༔ རྒྱ་ཡི་དཔེ་ལས་འདི་དག་བསྒྱུར་ནས་ནི༔ སུ་ལའང་མ་བསྟན་བསྟན་པའི་བཙལ་སུ་བཞག༔ རྒྱ་གར་ཡུལ་དུ་སླར་ལོག་བདག་མི་འགྲོ༔ རྒྱ་ནག་རི་བོའི་རྩེ་ལ་སྡོད་སྙམ་ནས༔ བདག་གིས་མ་ཁྱེར་ལམ་ལ་གདུག་རྩུབ་པས༔ བདག་གི་དོན་སྙིང་ཕྱུང་ནས་འདི་རུ་སྦས༔ དམ་པ་བསྟན་པའི་བདག་པོས་འདི་རྙེད་ཤོག༔ ཡི་གེ་མི་མཐུན་བརྒྱ་དང་དྲུག་ཅུ་ལས༔ གསང་བའི་རྒྱུད་ལུང་མན་ངག་ཡི་གེ་རྣམས༔ ནཱ་ག་ར་ཡི་ཡི་གེ་བཀོད་ནས་ནི༔ འདི་ནས་བྱང་ཤར་འདོམ་ཚད་ཉི་ཤུའི་བར༔ ཕ་བོང་དམར་པོ་སྟག་ཉལ་འདྲ་བའི་འོག༔ ཡི་གེ་ཨ་ཡི་མཚན་མ་བཏབ་ནས་ནི༔ ལྕགས་ཀྱི་སྒྲོམ་བུར་བཅུག་ནས་སྦས་ཏེ་ཡོད༔ སྙིགས་མའི་དུས་ན་གསང་བའི་རྒྱུད་ལུང་རྣམས༔ ཚོང་འདུས་འོ་མ་བཞིན་དུ་བསླད་ནས་ནི༔ བོད་ཀྱི་རྒྱལ་ཁམས་འདི་ཡིས་ཁེངས་པའི་ཚེ༔ འདི་ཉིད་ལོངས་ལ་རྒྱ་ལ་གོམས་པས་བསྒྱུར༔ ལྷག་དང་ཆད་པ་རྣམས་ནི་འདི་ཡིས་བསྐངས༔ འདི་ལས་ལྷག་པ་གཞན་ན་གཅིག་ཀྱང་མེད༔ དེས་ནི་བསྟན་པའི་སྒྲོན་མེ་བྱས་ནས་ནི༔ འདི་ཉིད་སྤྱོད་པའི་སྐལ་ལྡན་དུ་མ་འབྱུང༔ བསྟན་པའི་དམ་པ་ཡང་ནས་ཡང་བསྡུས་སྙིང་པོ་འདི༔ རང་གི་སྙིང་ལ་ཕུར་ལ་གཞན་ལ་བསྟན་པ་མིན༔ འཇིག་རྟེན་ཡིད་དགའ་ནོར་གྱི་ཕྱིར༔ ང་ཡི་དཔྲལ་མིག་ཁོང་སྙིང་འདི་བཏང་ན༔ སྙིང་ཁྲག་འཛག་ཅིང་མིག་འབྲས་ཐང་ལ་ལྷུང༔ དེ་བས་རང་གི་སྙིང་ལ་རྒྱས་གདབ་ལ༔ རིག་པ་གོམས་པས་གནད་དུ་འདི་ཕུར་ཞིག༔ མགོན་པོ་ནག་པོ་ཆོས་སྐྱོང་སྲུང་མ་ཁྱོད༔ བཀའ་འདི་གཏད་དོ་ཁྱོད་ཀྱིས་ཐུབ་པར་སྲུངས༔ སྐལ་ལྡན་མན་ངག་བདག་པོ་བྱུང་བའི་ཚེ༔ ཁྱོད་ཀྱིས་ཞེན་པ་ཐོང་ལ་འདི་བྱིན་ཅིག༔ བན་དགྲ་དམ་མེད་དག་གིས་འདི་ཁྱེར་ན༔ ཚེ་ལ་བར་ཆོད་ཀྱིས་ལ་འགྱུ་བའི་སྲོག་དབུགས་ཆོད༔ རྒྱ་རྒྱ་རྒྱ༔ བདག་གི་བློ་ལ་འཁྲུལ་པའི་སྣང་བ་རང་དག་ཀྱང༔ མན་ངག་འདི་ལ་བློ་ནི་བྲེང་ཆགས་ནས༔ རྒྱ་ནག་ཡུལ་དུ་ཁྱེད་ཏེ་འགྲོ་སྙམ་པས༔ ལམ་དུ་བསྟན་པའི་སྣོད་མེད་གདུག་ཅོར་མོན་པ་དང༔ ཚལ་དང་གདུག་པའི་གཅན་གཟན་ཆུ་ཆེན་དང༔ འཇིགས་པའི་རོག་ཁུང་དམིགས་པའི་ལམ་མ་བྱང༔ བྲག་དང་ཆུ་འཐབ་འཇིགས་པའི་ཤིང་ནགས་ཁྲོད༔ འདི་དག་རྣམས་སུ་འདི་ཉིད་བརླག་དོགས་ནས༔ རང་རྒྱས་བཏབ་སྟེ་བསྟན་པའི་བཙས་སུ་བཞག༔ དེ་ལྟར་ལམ་ན་གདུག་རྩུབ་གྲངས་མང་ཡང ༔ བདག་རང་གཅིག་པུར་རྫུ་འཕྲུལ་ཐབས་ཀྱིས་འགྲོ༔ སྐལ་ལྡན་སྙིང་གི་བུ་དང་འཕྲད་པར་སྨོན༔ རྒྱ་རྒྱ་རྒྱ༔ དད་ལྡན་རྣམས་ཀྱི་སྙིང་གི་དཀྱིལ་དུ་ཞོག༔ འདི་ལས་ལྷག་པའི་བཞག་ཐབས་གཞན་ན་ཡོད་རེ་ཀན༔ བདག་ནི་ཐོས་ཆུང་རྟོག་གེ་མ་ཡིན་པས༔ ཐེག་པ་སྤྱི་ཡི་དོན་རྣམས་བདག་གིས་ཤེས༔ དེ་ཡི་ཕྱིར་ན་ཐབས་འདི་སྙིང་གི་བུ༔ ཡང་མཛོད་དམར་པོའི་ནང་དུ་རྒྱས་ཐོབ་ལ༔ རང་གི་ཡིད་ལ་བརྣག་ཅིང་ཞེ་དགའི་ཡིད་ཀྱིས་འགྲོགས༔ འཕངས་པའི་ནོར་བཞིན་སེར་སྣས་དམ་དུ་ཟུངས༔ དེ་ལྟར་བྱས་ན་དངོས་གྲུབ་ཅིག་ཅར་ཐོབ༔ པཎྜི་ཏ་ཆེན་པོ་བི་མ་ལ་མི་ཏྲས་བསྒྱུར་བ་རྫོགས་སོ༔ ཨཐྎ༔ རྒྱ་རྒྱ་རྒྱ༔ མ་ཡིག་རིན་པོ་ཆེ་གདུག་བ་བཅད་པའོ༔ དགེའོ༔ བུ་ཡིག་རིན་པོ་ཆེ་གསེར་གྱི་སྒྲོམ་བུ༔ རྒྱ་གར་སྐད་དུ༔ ས་ཏྭ་ནཾ་ཀི་གུ་རུ༔ བོད་སྐད་དུ༔ སེམས་ཀྱི་གནད་བསྟན་པ༔ རང་སངས་རྫོགས་པ་བདེ་བ་ལ་ཕྱག་འཚལ་ལོ༔ གང་ཞིག་གླང་ཆེན་མྱོས་འདྲིའི་སེམས༔ མི་རྟོག་བདེ་བའི་ལྕགས་ཀྱུས་ནི༔ དེ་ཉིད་འཛིན་པར་སུ་འདོད་པ༔ མི་རྟོག་ཆེན་པོ་རྣལ་དུ་ཕེབས༔ གནས་པ་སེམས་ཉིད་ཀྱི་རྒྱན་དུ་བཀོད་པ་དང༔ བཞག་པ་སེམས་ཀྱི་ར་བར་གཞུག་པ་དང༔ འཕྲོ་བ་སེམས་ཀྱི་རོལ་བར་ཤར་བའོ༔ ཨཐྎ༔ གང་ཞིག་དུར་ཁྲོད་ཝ་ཡི་སེམས༔ རྟོག་སངས་ཆེན་པོའི་གལ་གྱིས་ནི༔ དེ་ཉིད་འཛིན་པར་སུ་འདོད་པ༔ རྒྱུ་མེད་འབྲས་མེད་རྣལ་དུ་ཕེབས༔ བྱུང་ཁུངས་འགགས་པ་སེམས་ཀྱི་གནས་བཙལ་བ་དང༔ གནད་གཟིར་བས་སེམས་ཀྱི་རྟ་བསད་པ༔ རྟག་བཅག་པས་སེམས་རོ་མཆོག་ཇི་ལྟར་འདུག་བསྟན་པའོ༔ གང་ཞིག་ཟོ་ཆུ་ལྟ་བུའི་སེམས༔ འཁྲུལ་པ་རང་དེངས་ཐོ་བ་ཡིས༔ འདི་ཉིད་འཇོམས་པར་སུ་འདོད་པ༔ འཁྲུལ་འཁོར་རང་ལྡན་རྣལ་དུ་ཕེབས༔ ལྟོས་བ་ཟད་པར་བྱས་པས་སེམས་ཀྱི་གྲངས་ཟད་པ་དང༔ འགྲོ་འོང་ལ་བརྟགས་པས་སེམས་ངོས་བཟུང་བ་དང༔ དེ་ཉིད་བཟློག་པས་སེམས་ལམ་དུ་བོར་བའོ༔ ཨཐྎ༔ གང་ཞིག་ནམ་མཁའ་ལྟ་བུའི་སེམས༔ ངོ་བོ་གཅིག་པའི་ཕྱགས་ཤིང་གིས༔ དེ་ཉིད་སྡུད་པར་སུ་འདོད་པ༔ ཆོས་སྐུ་གཅིག་པར་རྣལ་དུ་ཕེབས༔ སྒོ་འགགས་པས་སེམས་ཀྱི་བྱུང་ཚོར་སྟོངས་པ་དང༔ ཡུལ་ཕྱུག་པས་སེམས་ཀྱི་རྟེན་སྟོངས་པ་དང༔ རྒྱ་བསྐྱེད་པས་སེམས་ཉིད་དབུས་སུ་དྲིལ་བའོ༔ གང་ཞིག་སེམས་ལ་དགའ་བའི་གང་ཟག་སྤྲོས་པ་ཅན༔ འདི་ཉིད་གོམས་ནས་སྙིང་པོའི་དོན་ལ་འཇུག༔ དེ་ཡི་ཕྱིར་ན་འདི་ལ་འབད་པར་བྱ༔ འབད་དེ་གོམས་ན་རིག་པ་མཐོང་བར་འགྱུར༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས་སེམས་ཉིད་རྣལ་དུ་དབབ་པའི་དུམ་བུ་ཞེས་བྱ་བ་རྫོགས་སོ༔ རྒྱ་རྒྱ་རྒྱ༔ རྒྱ་གར་སྐད་དུ༔ ཏནྟྲ་བྷེ་ལ་ཀྲ༔ བོད་སྐད་དུ༔ རྒྱུད་ལུང་གསལ་བའི་མེ་ལོང་སྟོང་པ་མངོན་བྱུང་ཉིད་ལ་ཕྱག་འཚལ་ལོ༔ རོལ་པ་ཆེན་པོའི་ལྟ་སྟངས་ཀྱིས༔ གཅིག་པར་སྣང་བའི་ཡེ་ཤེས་ཐོབ༔ སྒྲ་དོན་ཤེས་པའི་རྣལ་འབྱོར་གྱིས༔ འབྱུང་བ་རྣམས་ལ་ཅི་དགར་རོལ༔ འཁྲུལ་པ་འཆོས་པའི་རྣལ་འབྱོར་གྱིས༔ ངོ་བོ་ཐམས་ཅད་རྣལ་དུ་འབེབས༔ ལྟ་སྒོམ་མཐོང་བའི་རྣལ་འབྱོར་གྱིས༔ ཡེ་ཤེས་ཉིད་ལ་ཅི་བདེར་སྦྱོད༔ དེ་རྒྱུད་འགྲོལ་བའི་རྣལ་འབྱོར་གྱིས། ཉོན་མོངས་འཆིང་བའི་མདུད་པ་འགྲོལ༔ དབྱིངས་རིག་ཤེས་པའི་རྣལ་འབྱོར་གྱིས༔ སངས་རྒྱས་རྣས་དང་རྒྱུན་དུ་གནས༔ བཞག་ཐབས་ཤེས་པའི་རྣལ་འབྱོར་གྱིས༔ རིག་པ་ཉིད་ནི་བཙོན་དུ་ཟིན༔ བཀོལ་དོན་ཤེས་པའི་རྣལ་འབྱོར་གྱིས༔ ཆོས་ཅན་དུམ་བུ་རྩེ་རུ་གྲོལ༔ གོལ་སྒྲིབ་ཤེས་པའི་རྣལ་འབྱོར་གྱིས༔ རང་གི་དེ་ཉིད་ཡིད་ཆེས་སྐྱེས༔ རྣལ་འབྱོར་ཤེས་པའི་རྣལ་འབྱོར་གྱིས༔ ལྟ་སྤྱོད་དོན་རྣམས་བདག་པོར་འགྱུར༔ གལ་མདོ་ཤེས་པའི་རྣལ་འབྱོར་གྱིས༔ རྒྱུད་ཚིག་རྣམས་ལ་ཅི་དགར་རོལ༔ དབྱིངས་དོན་ཤེས་པའི་རྣལ་འབྱོར་གྱིས༔ ཆོས་ཀྱི་དབྱིངས་རྣམས་དབང་དུ་འདུས༔ སྐྱེས་མཚམས་ཤེས་པའི་རྣལ་འབྱོར་གྱིས༔ སྐྱེ་གཉིས་བར་ལ་ཅི་བདེར་སྤྱོད༔ རང་སྣང་ཤེས་པའི་རྣལ་འབྱོར་གྱིས༔ ཡེ་ཤེས་རྟགས་ལ་ཐུགས་ཕྲད་གྲོལ༔ སྔ་ཕྱི་ཤེས་པའི་རྣལ་འབྱོར་གྱིས༔ གོམས་ཤུགས་བྱིན་རླབས་མངོན་དུ་འབྱིན༔ དཔེ་འབྱེད་ཤེས་པའི་རྣལ་འབྱོར་པས༔ ཡིད་ཅེས་འབྲས་བུ་གཏན་ལ་འབེབས༔ ཡོན་ཏན་ཤེས་པའི་རྣལ་འབྱོར་པས༔ མ་བཙལ་བཞག་པའི་དོན་རྣམས་ཤེས༔ གྲོལ་སྨིན་ཤེས་པའི་རྣལ་འབྱོར་གྱིས༔ སྤྱི་ཡི་དོན་རྣམས་རང་དབང་བསྒྱུར༔ དམོད་སྔགས་ཤེས་པའི་རྣལ་འབྱོར་གྱིས༔ གདུག་པ་རྣམས་ནི་ཚར་གཅོད་འགྱུར༔ ངེས་པའི་སྙིང་པོ་ཡོངས་བསྡུས་པའི༔ རྩ་བ་བརྒྱད་ལས་རྣམ་འཕྲོས་པ༔ ཡན་ལག་གྲངས་ནི་དེ་སྙེད་དོ༔ ཕ་དང་མ་དང་མ་ནིང་ལས༔ ཁྱད་པར་འདི་ནི་ངེས་བསྡུས་སོ༔ ངེས་གསང་སྙིང་པོའི་དོན་དུའོ༔ ཉོན་མོངས་བག་ཆགས་བྲལ་བར་ནི༔ འདི་དག་རྣམས་དང་འཕྲད་ན་འགྱུར༔ ཞེས་བཀོད་པ་ཆེན་པོ་ལས་རྒྱུད་ལུང་གསལ་བའི་མེ་ལོང་ཞེས་བྱ་བ་རྫོགས་སོ༔ ལས་ཅན་གཅིག་དང་འཕྲད་པར་ཤོག༔ རྒྱ་གར་སྐད་དུ༔ བྷ་ཀ་ལ་དེ་ཝ༔ བོད་སྐད་དུ༔ ལྷ་སྒོམ་པ་བདེ་བ་ཆེན་པོ་ཉིད་ལ་ཕྱག་འཚལ་ལོ༔ ཨེ་ཝཾ་མ་ཡ་ཞེས་བྱ་བ༔ མཚོན་དང་གཞི་དང་དངོས་པོར་བརྗོད༔ ཁྱབ་ཕྱིར་རྟོགས་དང་ལམ་དུའོ༔ ཕྱག་རྒྱའི་དཀྱིལ་འཁོར་བསྒོམ་འདོད་པས༔ ཐོག་མར་ལུས་སོགས་དངོས་པོ་ནི༔ རྣམ་པར་སྦྱང་བར་བྱ་བའི་ཕྱིར༔ སྔོན་འགྲོ་དངོས་གཞི་མཇུག་དང་རྗེས༔ ཆོ་ག་རྣམ་པ་བཞི་ལྡན་པས༔ ལྷ་ཡི་དཀྱིལ་འཁོར་ཉིད་ལ་འཇུག༔ སྔོན་དུ་རང་གི་ལུས་སྦྱོང་བ༔ ཡི་གེ་རཾ་གྱིས་འཇིགས་ཆགས་ནས༔ སྤྲོ་དང་བསྡུ་བ་མཁས་པས་བརྟག༔ ཕུང་པོ་ལྔ་པོ་རྒྱུད་སྦྱོང་བ༔ ༀ་དང་ཨཱཿ དང་ཧཱུཾ་སྭཱ་ཧཱ༔ འཇིག་དང་ཆགས་པ་ཉིད་དུ་བསྒོམ༔ དེ་ནས་དབང་པོའི་རྟེན་སྦྱོང་བ༔ ཛི་བྲུཾ་ཛྷ་ཛུ་བྷ་ཡིས་ནི༔ འཇིག་དང་ཆགས་པ་མཁས་པས་བསྒོམ༔ འབྱུང་བའི་ལུས་རྟེན་དབྲལ་བའི་ཕྱིར༔ རཾ་ཡཾ་ཁཾ་དང་ལཾ་གྱིས་ནི༔ འཇིག་དང་ཆགས་པ་ཉིད་ཀྱང་བསྒོམ༔ དབང་པོའི་ཡུལ་རྣམས་རྣམ་སྦྱོང་བ༔ ས་མ་ཏ་ཀེ་ར་ཡིས་ནི༔ འཇིག་དང་ཆགས་པ་སྔོན་བཞིན་ནོ༔ ཉོན་མོངས་ལྔ་ཡི་གཞི་སྦྱོང་བ༔ ཀ་གྷ་བྷ་ཛྙ་ཀྵ་ཡིག་གིས༔ ཡང་ནི་འཇིག་དང་ཆགས་པར་རོལ༔ སེམས་ཀྱི་རྟོག་པ་རྣམ་སྦྱོང་བ༔ ཨེ་ཞེས་རྔམ་པའི་སྒྲ་ཡིས་ནི༔ ཡོད་དང་མེད་པའི་དངོས་པོ་སྦྱོང༔ དེ་ལྟར་དངོས་པོ་ཉི་ཤུ་དྲུག༔ ཡི་གེ་དེ་ཡིས་གྲགས་ཀྱིས་སྦྱོང༔ དེ་ཀུན་རྣམ་གྲངས་རྒྱས་གདབ་པ༔ ཤུ་དང་ཛྙ་དང་ཏ་ཛྙ་དང༔ ཧཾ་ཞེས་ཡོད་མེད་དངོས་པོ་རྣམས༔ འཇིག་པ་ཉིད་དེ་ཆགས་པ་མེད༔ གལ་ཏེ་དངོས་པོ་མ་སྦྱངས་ན༔ སྟོང་པ་ཉིད་ནི་སྐྱེ་མི་འགྱུར༔ འོན་ཏེ་སྟོང་རྒྱས་མ་བཏབ་ན༔ ལྷ་རྣམས་ཇི་ལྟར་བསྒོམས་བྱས་ཀྱང༔ དངོས་གྲུབ་འབྱུང་བ་མ་ཡིན་ནོ༔ དེས་ན་སྔོན་འགྲོའི་མན་ངག་གཅེས༔ རཾ་ཨ྅྅྅བཱམ་རྒྒ་བུཀ་ཏ་ཋྲ་ཅཱ་གུ༔ ཨཐྎ༔ ནཾ་ཏྲཾ་ༀ་ཨཱཿཧཱུཾ་སྭཱ་ཧཱ་ཛི་བྲུཾ་ཛྙཱ་ཛུ་བྷེ་རཾ་ཡཾ་ཁཾ་ལཾ་ས་མ་ཏ་ཀེ་ར་ཀ་གྷ་བྷ་ཛྷ་ཀྵ་ཨེ་ཤུ་ཛྙ་ཏ་ཛྙཱ་ན་ཧཾ༔ དེ་ལྟར་དངོས་པོ་སྦྱངས་ནས་ནི༔ རང་ལུས་ལྷ་ཡི་རྣལ་འབྱོར་འཇུག༔ ཅིག་དང་རིམ་གྱིས་མཐར་ཆགས་དང༔ ཐོད་རྒལ་དག་གིས་སྐྱེ་བར་འདོད༔ ཅིག་ཆར་འོད་ཀྱི་གོང་བུ་ལས༔ ཆུ་ཡི་ལ་བ་ཇི་བཞིན་དུ༔ སྣང་གཟུགས་རེག་དང་བྲལ་བར་བསྒོམ༔ རིམ་གྱི་པ་ནི་ཡི་གེ་སྟེ༔ མི་འགྱུར་ཡི་གེ་དབུས་གནས་པར༔ སེམས་ཀྱི་དངོས་པོ་འོད་དཀར་པོ༔ སྣང་མེད་རེག་པའི་གཟུགས་སུ་སྟེ༔ རེག་སྟེ་སྡུད་པའི་ཡི་གེ་ཡིས༔ བསྡུས་ཏེ་འོད་ཀྱི་གོང་བུར་རོ༔ དེ་དཀྱིལ་སེམས་ཀྱི་ནམ་མཁའི་ཡིག༔ དེ་དབུས་མི་འགྱུར་ཡི་གེ་ལས༔ རིགས་ལྔའི་ཡི་གེ་དག་ལས་ནི༔ གང་མོས་ཞལ་ཕྱག་རྣམ་པར་བསྒོམ༔ ཡི་གེ་གཞན་གྱི་ཆོ་འཕྲུལ་གྱིས༔ ལྷ་རྣམས་བསྐྱེད་ན་འཇིག་པར་འགྱུར༔ དེ་ཕྱིར་འདི་ལྟར་ཤེས་པར་བསྒོམ༔ མཐར་ཆགས་ཉིད་ནི་བསླབ་བྱའི་དོན༔ དང་པོ་སྟོང་པ་ཉིད་དུ་སྟེ༔ གཉིས་པ་ཚངས་པའི་གནས་བཞིའོ༔ གསུམ་པས་མཆོད་དང་བསྟོད་པ་བརྩམ༔ བཞི་པས་སྡིག་བཤགས་གསོལ་བ་འདེབས༔ རྗེས་སུ་ཡི་རང་སྨོན་ལམ་གདབ༔ ལྔ་པ་དངོས་པོ་རྩ་དྲུག་སྦྱོང༔ དྲུག་པ་ཞལ་ཕྱག་རྣམ་པ་སྟེ༔ རང་སེམས་མི་འགྱུར་ཡིག་དབུས་སུ༔ འོད་ལྔའི་རང་བཞིན་དབུས་གནས་པར༔ ཁྲོ་བོ་ལ་ནི་ནམ་མཁའི་ཡིག༔ ཞི་བ་རྣམས་ནི་སྡུད་བྱེད་ཡིག༔ ཞལ་ཕྱག་ཇི་ལྟར་འདོད་པ་བསྒོམ༔ ཐོད་རྒལ་འོད་ལྔའི་གོང་བུ་ལས༔ རང་ལྷའི་ཁ་དོག་ཇི་ལྟ་བུའོ༔ འོད་ནི་ཐིག་ལེའི་ཚུལ་ཅན་ལས༔ སྐད་ཅིག་གིས་ནི་ཞལ་ཕྱག་ཏུ༔ ཇི་ལྟར་འདོད་པ་སེམས་ཀྱི་ཡུལ༔ རྣལ་འབྱོར་པས་ནི་གང་བསྒོམས་པ༔ མི་ཤིགས་རྡོ་རྗེ་གོ་དང་ལྡན༔ སྐྱེ་གཉིས་མཚམས་སུ་སྒྱུ་མའི་ལུས༔ ཇི་ལྟར་ལྷ་ཡི་སྐུ་ལ་འཇུག༔ འདི་ནི་དངོས་པོ་མེད་སྣང་བའོ༔ ཉི་ཤུ་དྲུག་ནི་མ་སྦྱངས་ན༔ གང་གིས་ལྷ་ཡི་སྐུ་བསྒོམས་ཀྱང༔ ཆུ་ཡི་རི་མོ་ཇི་བཞིན་དུ༔ འཇུག་ཅིང་ཆགས་པ་མ་ཡིན་ནོ༔ ཨཐྎ༔ དེ་ལྟར་ཞལ་ཕྱག་རྣམ་པ་ལས༔ སྟོང་པ་ཉིད་དུ་མ་ཡིན་ཏེ༔ རང་རང་ཁ་དོག་ཇི་འདྲའི་འོད༔ སེམས་ཀྱི་ཡུལ་དུ་གང་གྱུར་པ༔ རྒྱ་ཆེ་གཞན་སྣང་མེད་པར་བསྒོམ༔ དེ་བློ་བརྟན་པར་མ་འགྱུར་བར༔ ཡང་ནས་ཡང་དུ་རྣམ་བསྒོམས་ན༔ རང་གིས་གང་འདོད་ཡི་དམ་དེ༔ འོད་ཀྱི་ཞལ་ཕྱག་རྣམ་པར་ནི༔ ཇི་ལྟར་འདོད་པ་བཞིན་དུ་མཐོང༔ དེ་ཉིད་མཐོང་བའི་དུས་དག་ཏུ༔ ཁ་དོག་ལྔ་ཡིས་རྒྱས་བཏབ་པས༔ ཇི་ལྟར་འདུག་ཀྱང་དེ་མི་འབྲལ༔ རང་ལུས་འོད་ལྔའི་ཐི་ལེ་ལ༔ ཤེས་པ་ཇེ་ཕྲ་ཇེ་ཕྲར་བཞག༔ དེ་ཉིད་གོམས་པའི་རྣལ་འབྱོར་གྱིས༔ རྟག་ཏུ་རང་ལུས་ཕྱ་རྒྱར་མཐོང༔ འཇུག་ལ་དེ་ལྟར་སུ་གོམས་པ༔ འདི་ནི་ཡང་དག་དོན་ལ་ཉེ༔ ཨཐྎ༔ དེ་རྗེས་གོམས་པའི་ཡོ་གི་ནི༔ རྫོགས་ཆེན་ལྷ་ཡི་བསྐྱེད་རིམ་པས༔ ཕྱི་ནང་ལྷ་རུ་གསལ་བའི་ཕྱིར༔ གཞལ་བྱུང་བཟང་ངན་བླང་དོར་བྲལ༔ རང་ལུས་ཞལ་ཕྱག་རྣམས་གསལ་བས༔ མཆོད་དང་བསྟོད་པའི་གནས་གཞན་མེད༔ འོད་ཀྱིས་ཕྱི་ཡུལ་སྣང་གོམས་པས༔ ཇི་ལྟར་སྤྱད་ཀྱང་དགེ་སྡིག་བྲལ༔ ཐིག་ལེ་ཕྲ་ལ་ཤེས་པ་གཏད༔ ཤེས་པའི་རྒྱུ་ནི་ཕྲ་གྱུར་པས༔ ཉོན་མོངས་བདག་འཛིན་དངོས་པོ་སྟོངས༔ དེ་ལ་གོམས་ཏེ་ཚད་ཕྱིན་པས༔ ལྟ་དང་སྒོམ་དང་སྤྱོད་པའོ༔ ལུས་ངག་སྨྱོན་པའི་གདིང་ཐོབ་པས༔ བདེ་སྡུག་རྒྱུ་ལས་རྣམ་པར་གྲོལ༔ རེག་པའི་གཟུགས་མེད་རང་སྣང་བས༔ དགེ་སྡིག་སྐྱབས་དང་འཇིགས་པ་མེད༔ འདི་ལྟར་རྒྱུན་དུ་སུས་ཤེས་པའི༔ ཨ་ཏི་ཉིད་ཀྱི་རྣལ་འབྱོར་ཏེ༔ ཆུ་རྒྱུན་བཞིན་དུ་རྟག་ཏུ་སྤྱོད༔ དེ་ཕྱིར་ལྷ་ཡང་རང་ངོ་བས༔ རིག་པའི་སྐུ་ནི་མངོན་སུམ་མོ༔ དེ་ཕྱིར་ལྷ་ཡང་མངོན་དུ་སྣང༔ རྗེས་སུ་སྐྱེས་ན་བརྟན་པ་ཡིན༔ དངོས་པོ་མཐོང་ན་གོམས་པ་ཡིན༔ རང་བཞིན་མེད་ན་འབྲས་བུའོ། །བཀོད་པ་ཆེན་པོ་ལས་ལྷའི་སྒོམ་ལུགས་གནད་ཀྱི་མན་ངག་གི་ལྷ་མངོན་དུ་སྣང་བར་བསྟན་པ་སྟེ་བཞི་པ་རྫོགས་སོ༔ ས་མ་ཡ༔ ལས་ཅན་དེ་དང་འཕྲད་པར་ཤོག༔ རྒྱ་གར་སྐད་དུ༔ ཨ་དྷ་ན་ཡོ་གི༔ བོད་སྐད་དུ༔ སྐྱེ་བ་མེད་པའི་དོན༔ དཔལ་གཉིས་སུ་མེད་པ་ལ་ཕྱག་འཚལ་ལོ༔ རང་སྣང་རྟོགས་པའི་གདིང་ཅན་སུ་འདོད་པ༔ སྙིང་པོ་ཡང་བསྡུས་བསྟན་པ་འདི་ལ་འདུད༔ སྟོང་པ་ཉིད་ལ་མཚོན་པའི་ཚིག་མེད་ཀྱང༔ སྤྲོས་པའི་རིམ་པ་རྣམ་གྲངས་འདི་ཉིད་དོ༔ ཀྱེ་སེམས་དཔའ་ཆེན་པོ་ཉོན་ཅིག༔ མི་ཤིགས་པ་རྡོ་རྗེའི་མན་ངག་གི་དེ་ཉིད་བསྟན་པར་བྱ་བ་ལ་བདུན་ཏེ༔ རྐྱེན་གྱིས་མི་འཇིགས་པའི་རིག་པ་ཕུགས་རྡུགས་ལ་རྒྱབ་གཏད་པས་བསྙེན་པའི་ལྷ་སྐྱེ་མེད་དུ་གྲོལ་བའི་མན་ངག་དང ༔ ཀུན་ཏུ་ཟང་ཐལ་བའི་རིག་པ་སྣ་སེལ་མེད་པ་ལ་སྣ་གཏད་ན་མ་བསྒོམས་པར་རང་སར་དྭངས་པའི་མན་ངག་དང༔ གཞན་གྱིས་བསྐྱོད་པར་མི་ནུས་བ་ལྕི་བའི་རིག་པ་ལ་འཕང་གིས་བཏབ་ན་འདུས་བྱས་མ་སྤངས་བར་འགྱུར་མེད་དུ་གྲོལ་བའི་མན་ངག་དང༔ འཕྲང་བསལ་བས་དགྲ་དང་བྲལ་བ་འཇིགས་པ་མེད་པའི་རིག་པ་ལ་བརྟེན་བཅས་ན་རྐྱེན་རྣམས་རྐྱེན་གྱིས་གྲོལ་བའི་མན་ངག་དང ༔ ཁོད་སྙོམས་པ་མཐོ་དམན་མེད་པའི་རིག་པ་ལ་ལམ་གཏོད་ན་ཆོས་ཀྱི་དབྱིངས་ཐམས་ཅད་ལ་མངོན་དུ་སྤྱོད་པའི་མན་ངག་དང༔ སྲས་འཛུད་པ་འགྱུར་བ་མེད་པའི་རིག་པ་ལ་སྲབ་བཅུག་ན་ཉམས་གོང་ནས་གོང་དུ་འཕེལ་བའི་མན་ངག་དང༔ མཐའ་དཔྱད་པས་དབུས་ཟད་པའི་རིག་པ་ལ་ཕུགས་བརྟེན་ན་ཆོས་ཀྱི་སྐུ་ལ་ཚད་ཟིན་པའི་མན་ངག་གོ༔ ཀྱེ་སེམས་དཔའ་ཆེན་པོ༔ མི་འགྱུར་བ་རི་བོའི་གཞི་ལ་ལྔ་སྟེ༔ དྲན་པ་སད་པས་དྲན་མེད་རང་དག་པའི་གཞི་དང༔ བློ་ཡི་སྤྱོད་ཡུལ་རང་ཟད་པས་སྐྱེ་མེད་རང་དག་པའི་གཞི་དང༔ བློ་མ་བུ་ཕྲད་པས་སྐྱེས་པ་ཐམས་ཅད་རང་སྣང་དུ་གྲོལ་བའི་གཞི་དང ༔ སྐྱེ་མེད་རང་སར་གྲོལ་བས་འབྲས་བུ་རྒྱུན་ཆད་མེད་པའི་གཞི་དང༔ འབྲས་བུ་རྒྱུན་ཆད་པས་ཟད་པ་ཉིད་ཟད་པ་ལ་སྦྱོར་བའི་གཞིའོ༔ ཀྱེ་སེམས་དཔའ་ཆེན་པོ༔ སྣང་བ་ཆེན་པོ་རང་སར་སྣང་བ་ལ་བཞི་སྟེ༔ སྣང་སྲིད་ཐམས་ཅད་གཞི་ལ་བཞེངས་པས་སྤྲུལ་པའི་སྐུ་རྩོལ་སྒྲུབ་དང་བྲལ་བའི་ལམ་དང༔ སྣང་སྲིད་ཐམས་ཅད་གཞིར་བཞག་པས་ལོངས་སྤྱོད་རྫོགས་པའི་སྐུ་ཡི་གཟུགས་མཐོང་བའི་ལམ་དང༔ ཁམས་གསུམ་དུས་གཅིག་ལ་གྲོལ་བས་ཆོས་ཀྱི་སྐུ་ངོས་ཟིན་པའི་ལམ་དང༔ སྲིད་པ་གསུམ་ཀ་དག་པས་སྐུ་གསུམ་གཏན་སྤྲུགས་པའི་ལམ་མོ༔ ཀྱེ་སེམས་དཔའ་ཆེན་པོ༔ དག་པས་དག་པ་ཉིད་མཐོང་ནས་ཟང་ཐལ་བའི་འབྲས་བུ་ལ་གསུམ་སྟེ༔ རྒྱུ་ཐམས་ཅད་རང་སར་དེངས་པས་འབྱུང་བ་ལྔ་ལས་གྲོལ་བའི་འབྲས་བུ་དང༔ རྐྱེན་ཐམས་ཅད་རང་ཡུལ་དུ་ཆོད་པས་སྣང་བ་ཐུག་ཕྲད་དུ་གྲོལ་བའི་འབྲས་བུ་དང༔ གཅིག་ཚད་ཟིན་པས་སྣང་བ་ཐམས་ཅད་གཏན་ལ་ཕེབས་པའི་འབྲས་བུའོ༔ མན་ངག་ཀུན་གྱི་ལུས་དང་ཚད་མེད་ན༔ བསྒོམས་ཀྱང་དོན་མེད་རང་ལ་ཡི་རེ་ཆད༔ ཆོས་རྣམས་ཀུན་གྱི་ཟད་པའི་ཚད་མེ་ན༔ འབྲས་བུ་རྣམས་ནི་དངོས་དང་ཁྱད་མེ་འགྱུར༔ ཞེས་བཀོད་པ་ཆེན་པོ་ལས་སྐྱེ་མེད་ཀྱི་མན་ངག་གཏན་ལ་ཕབ་པ་སྟེ་ལྔ་པ་རྫོགས་སོ༔ རྒྱ་རྒྱ་རྒྱ༔ ལས་ཅན་གཅིག་དང་འཕྲད་པར་ཤོག༔ རྒྱ་གར་སྐད་དུ༔ དྷརྨཱ་ཀཱ་ཡེ་བྷེ་ལ༔ བོད་སྐད་དུ༔ ཆོས་ཀྱི་སྐུ་ཡི་དོན་བསྟན་པ༔ ཆོས་སྐུ་བདེ་སངས་འཛིན་ལ་ཕྱག་འཚལ་ལོ༔ འཇིག་རྟེན་མུན་པའི་དམག་དཔུང་བཟློག་པའི་ཕྱིར༔ ཡེ་ཤེས་འོད་ཀྱི་དཔའ་བོ་མཚོན་ཐོགས་པས༔ བདག་འཛིན་སྡུག་བསྔལ་རྒྱ་མཚོ་ལས་བརྒལ་ཏེ༔ དྲན་བསམ་འཆིང་བའི་དགྲ་རྣམས་གཤད་བར་བྱའོ༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ སྟོང་པས་སྟོང་པའི་གྲོང་ཁྱེར་བཅོམ་པའི་ཚེ༔ ང་ནི་དུས་གསུམ་འགྱུར་མེ་བདག་ཉིད་ཅན༔ ལྟ་སྒོམ་བཅིངས་པའི་གོལ་ས་གཅད་པའི་ཕྱིར༔ རྣོ་མཉེན་ངར་དང་ལྡན་པའི་རལ་གྲི་ནི༔ ཤེས་རབ་བརྟུལ་ཤུགས་ཆེན་པོས་རབ་བཟུང་ནས༔ ཐེ་ཚོམ་ལོག་རྟོག་མདུད་པ་གཅད་པར་བྱའོ༔ ཨེ་མ་ཧོཿ རྡོ་རྗེ་འཛིན་པ་ཉོན་ཅིག༔ གསལ་བའི་ཡེ་ཤེས་ཀྱི་སྣང་བ་འཕྲོགས་པའི་ཚེ༔ ང་ནི་ལུང་ཀུན་གྱི་བདག་ཉིད་དུ་བཞུགས་སོ༔ ཆོས་ཅན་གྲངས་ཀྱི་བ་ཐག་འཛིངས་པ་དག༔ འགྱུར་མེད་གསང་འཛིན་སྤུ་གྲི་སོ་རྒལ་གྱིས༔ དད་བརྩོན་དེ་ནི་གོམས་པས་བཟུང་ནས་ནི༔ ཆགས་བྲལ་འབྱུང་བ་རང་དེངས་དབྱིངས་སུ་གཅད༔ ཨེ་མ་རྡོ་རྗེ་འཛིན་པ་ཉོན་ཅིག༔ དག་པ་ཉིད་ཀྱིས་དག་པ་བཀྲུས་པའི་ཚེ༔ ང་ནི་སྣང་བ་ཐམས་ཅད་ཀྱི་བདག་པོར་ཡེ་ཐོག་མ་ཉིད་ནས་གནས་པ་ཡིན་ནོ༔ རྐྱེན་གྱིས་བཅོམ་པའི་འདུ་འཕྲོ་དུ་མ་རྣམས༔ འདུ་ཤེས་གཅིག་པའི་སྟོང་ཉིད་ར་བ་རུ༔ དྲན་པ་རང་སངས་རྒྱ་ཡིས་བཟུང་ནས་ནི༔ རྐྱེན་བཞི་རང་སར་གྲོལ་བའི་སྒོ་མོ་བཅད༔ ཨེ་མ་ཧོ༔ རྡོ་རྗེ་འཛིན་པ་ཉིད་ཅིག༔ འཛིན་པས་འཛིན་པ་རང་བཟུང་བའི་ཚེ༔ ང་ནི་འབྱེད་པ་མེད་པའི་ཆོས་ཅན་དུ་ཡེ་ཐོག་མ་ནས་གནས་སོ༔ དབྱིངས་དང་རིག་པའི་སྣང་བ་ཡུལ་ཤར་བ༔ དག་བྱེད་རྐྱེན་དང་བྲལ་བའི་ནམ་མཁར་ནི༔ རང་གནད་རྣལ་དུ་ཕབ་པའི་ལུས་གཅུན་ནས༔ བཅོམ་པ་མེད་པའི་མིག་གིས་བལྟ་བར་བྱའོ༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ རྡོ་རྗེ་ལུ་གུ་རྒྱུད་ཡུལ་ཀུན་ཏུ་ཤར་པའི་ཚེ༔ ང་ནི་སྣང་བ་ཐམས་ཅད་ཀྱི་ཕུང་པོར་བཞུགས་ནས་སོ༔ བྱ་བྱེད་རང་བྲ་སྣང་བ་ཡུལ་ཤར་བ༔ སྙིང་པོ་ངེས་པའི་ཐབས་དང་ལྡན་པ་ཡིས༔ སྟོང་པ་ཅིར་ཡང་སྣང་བའི་གཞི་བལྟས་ན༔ ཡེ་ཤེས་ཉིད་ནི་སྔར་མེད་ཡང་ཡང་མཐོང་ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ ནམ་མཁའ་གཅིག་ལ་གསལ་བའི་ཉི་ཟླ་དུས་ཅིག་ལ་ཤར་བའི་ཚེ༔ ང་ནི་ཡུལ་གང་གིས་ཀྱང་མ་བསྒྲིབས་པར་ཡེ་ཐོག་མ་ནས་དེ་ལྟར་གནས་སོ༔ ཀྱེ་རིགས་ཀྱི་བུ་དེ་ལས་འདས་པའི་འོག་ཏུ་ཅི་ཡང་མ་ཡིན་པའི་ཤེས་པ་ཉམས་སུ་མྱོང་བར་འགྱུར་རོ༔ ཞེས་བཀོད་པ་ཆེན་པོ་ལས་ཆོས་སྐུ་ཅོག་བཞག་ཏུ་གཏན་ལ་ཕབ་པ་སྟེ་དྲུག་པ་རྫོས་སོ༔ ཨཐྎ༔ རྒྱ་གར་སྐད་དུ༔ པྲ་བ་བྷེ་ལ༔ བོད་སྐད་དུ༔ འཁྲུལ་པ་གཅོད་པའི་གལ་མདོ༔ བདེ་ཆེན་ཉིད་ནི་རྒྱ་ཆེ་རབ་ཟབ་ལ༔ ཆོད་ན་ཟེར་བ་བརྟག་སྐུ་གསུམ་ཕྱག་རྒྱར་དྲན་པས་ཕྱག་འཚལ་ལོ༔ གཞི་དང་ལམ་ནི་མ་རིག་འཁྲུལ་སོགས་སུ༔ སྒྲ་དང་དྲི་རོ་རྣལ་འབྱོར་ཀུན་གྱི་རྒྱན༔ མ་སྐྱེས་མི་སྐྱེ་གདོད་ནས་སྐྱེ་དང་བྲལ༔ མི་སྐྱེ་མི་འགག་སྐྱེ་བའི་ཆོ་འཕྲུལ་ཅན༔ མ་སྐྱེས་གདོད་ནས་སྐྱེ་བའི་དོན་རྣམས་ཤེས༔ གང་གིས་སྐྱེ་བ་ཤེས་ན་སྐྱེ་མེད་ཐུར་དུ་འཇུག༔ གང་གིས་འགག་པ་ཤེས་ན་འགག་མེ་ཐུར་དུ་འཇུག༔ གང་གིས་འཁྲུལ་པ་ཤེས་ན་འཁྲུལ་མེད་ཟང་ཀ་མའོ༔ འཁྲུལ་པའི་ས་བོན་བསྲེགས་ན་མྱུ་གུ་ལོ་འདབ་རྒྱས༔ དྲན་པའི་ཕྲེང་ཐག་བཅད་ན་དྲན་མེད་ཆེན་པོ་འགྲུབ༔ མཐོ་དམན་དལ་ཁོད་སྙོམས་ན་དམའ་བའི་ལུང་མི་སྣང༔ རང་ཤར་རང་རྐྱེན་ཕྲད་ན་བླ་མའི་ལུང་ཡང་ཡིན༔ གོམས་ཤུགས་སྔོན་དུ་བྱས་ན་འཆི་བའི་འཇིགས་པ་བྲལ༔ བླ་མའི་ལུང་བཞིན་སྤྱད་ན་རྟགས་རྣམས་མྱུར་དུ་འབྱུང༔ གནས་སུ་དུར་ཁྲོད་བརྟེན་ན་མཁའ་འགྲོའི་བྱིན་རླབས་འཇུག༔ སྨྲ་བརྗོད་འཁྲུལ་གཏམ་བཀག་ན་ཞེ་སྡང་སྐྱེ་མི་སྲིད༔ གཅིག་པུར་དལ་བར་འདུག་ན་ཡི་དམ་མངོན་དུ་སྣང༔ རི་དྭགས་བཞིན་དུ་བྱས་ན་ཟས་དང་གོས་མི་དགོས༔ འཁོར་འདས་རུ་ཤན་ཕྱེད་ན་ཕྱིས་ཀྱི་བག་ཆགས་བྲལ༔ རྟག་ཏུ་རླུང་སེམས་གཅུན་ན་ནམ་མཁའི་བྱ་བཞིན་འགྱུར༔ རྟེན་འབྲེལ་ཉིད་ལ་གོམས་ན་དངོས་གྲུབ་སྣ་ཚོགས་འབྱུང༔ ཞེས་བཀོད་པ་ཆེན་བོ་ལས་འཁྲུལ་པའི་དོན་ཉམས་སུ་བླང་བ་དང་སྦྱར་བ་སྟེ་བདུན་པ་རྫོགས་སོ༔ རྒྱ་གར་སྐད་དུ༔ བྷ་ལ་ཀ་ཀ་བ༔ བོད་སྐད་དུ༔ རྟོག་ཚོགས་ཉོན་མོངས་གཞོམ་པ༔ རྡོ་རྗེ་ལུས་ཀུན་རྫོགས་ལ་ཕྱག་འཚལ་ལོ༔ དྲང་སྲོང་ལྟ་བུའི་འདུག་སྟངས་ཀྱིིས༔ འབྱུང་བ་ཚ་གྲང་འདུས་པ་མནན༔ སེང་གེ་ལྟ་བུའི་འདུག་སྟངས་ཀྱིས༔ དྲན་པ་རྣམས་ཀྱི་ཐག་པ་བཅད༔ གླང་པོ་ལྟ་བུའི་འདུག་སྟངས་ཀྱིས༔ འཁྲུལ་པ་དེ་ཉིད་དབང་དུ་བསྡུ༔ སྐྱེས་བུ་ལྟ་བུའི་འདུག་སྟངས་ཀྱིས༔ འབྱུང་བའི་དྲི་མ་ཆམ་ལ་དབབ༔ ཝ་མོ་ལྟ་བུའི་འདུག་སྟངས་ཀྱིས༔ ཕྱི་ཡི་ཡུལ་རྣམས་རྒྱ་ཡིས་གདབ༔ ལྕགས་སྡོང་ལྟ་བུའི་འདུག་སྟངས་ཀྱིས༔ སྒོ་ལྔའི་ཤེས་པ་གཅིག་ཏུ་དྲིལ༔ དེ་ལྟར་འདུག་སྟངས་རྣམ་པ་དྲུག༔ སྐྱེས་ཆེན་སྐལ་པ་རབ་ལྡན་པས༔ གོམས་ནས་གཞན་རྩོལ་བྱ་མི་དགོས༔ ཀྱེ་མ་ཉོན་ཅིག་རྡོ་རྗེ་འཛིན༔ སེང་གེ་ལྟ་བུའི་ལྟ་སྟངས་ཀྱིས༔ འཁྲུལ་པའི་ཡུལ་རྣམས་དུས་གཅིག་བལྟ༔ གླང་པོ་ལྟ་བུའི་ལྟ་སྟངས་ཀྱིས༔ རང་གི་དེ་ཉིད་རྒྱུན་དུ་བལྟ༔ རི་བོ་ལྟ་བུའི་ལྟ་སྟངས་ཀྱིས༔ རིག་པའི་སྣང་བ་མཆེད་པ་བལྟ༔ མདའ་སྲོང་ལྟ་བུའི་ལྟ་སྟངས་ཀྱིས༔ རིག་པ་མི་འགྱུར་བསྲོངས་སུ་གཞུག༔ ཐི་བྱ་ལྟ་བུའི་ལྟ་སྟངས་ཀྱིས༔ ཕྱི་ཡི་ཆོས་ཅན་དུམ་བུར་བལྟ༔ ལྕེ་སྤྱང་ལྟ་བུའི་ལྟ་སྟངས་ཀྱིས༔ ཉིན་དང་མཚན་མོ་མེད་པར་བལྟའོ༔ ཀྱེ་རྡོ་རྗེ་འཛིན་པ་ཡང་ཉོན་ཅིག༔ མདུད་པ་ལྟ་བུའི་ཤེས་པ་ཡིས༔ ལུས་དང་དབང་པོ་གཅིག་ཏུ་གསལ༔ མདའ་སྲོང་ལྟ་བུའི་ཤེས་པ་ཡིས༔ རླུང་དང་ཤེས་པ་ནང་དུ་དྲང༔ དུང་ཁྱིམ་ལྟ་བུའི་ཤེས་པ་ཡིས༔ དབང་པོའི་མདོ་ནི་གཅིག་ཏུ་གསལ༔ གཅུད་ཕུར་ལྟ་བུའི་ཤེས་པ་ཡིས༔ ལུས་དང་དབང་པོའི་གནད་རྣམས་གཅུན༔ རྒྱལ་མཚན་ལྟ་བུའི་ཤེས་པ་ཡིས༔ ལུ་གུ་རྒྱུད་ནི་ཡུལ་ལ་གཏད༔ མེ་ལོང་ལྟ་བུའི་ཤེས་པ་ཡིས༔ དེ་ཉིད་གོང་ནས་གོང་དུ་བལྟའོ༔ ཀྱེ་མ་རྡོ་རྗེ་འཛིན་པ་ཁྱོད་ཉོན་ཅིག༔ དེ་དག་རྣམས་ལ་སུ་གོམས་པ༔ ཉོན་མོངས་རྣམས་ནི་རང་དག་གོ༔ རྟོག་པ་ཉིད་ཀྱང་རྟོགས་མེད་དུ༔ རྣམ་པར་དག་པ་ལམ་ཡིན་ནོ༔ མ་རིག་ལ་སོགས་ཉོན་མོངས་དྲུག༔ འདུག་སྟངས་དྲུག་གི་གཅུན་ནས་ནི༔ ལྟ་སྟངས་དྲུག་གིས་རྩད་བཅད་ནས༔ ཤེས་པ་དྲུག་གིས་གཏན་མེད་དག༔ དེ་ཕྱིར་ཉོན་མོངས་རང་དག་པའོ༔ ཆུ་ཡིས་ཆུ་རྣམས་ཁྱེར་བ་དང༔ མེ་ཡིས་མེ་རྣམས་བསྲེགས་བ་དང༔ རླུང་གིས་རླུང་རྣམས་དེད་པ་དང༔ ས་ཡིས་ས་རྣམས་མནན་པ་བཞིན༔ རང་གི་གཉེན་པོ་རང་གིས་སོ༔ ཞེས་བཀོད་པ་ཆེན་པོ་ལས་ཉོན་མོངས་རང་དག་གི་གནད་གཏན་ལ་པབ་པ་སྟེ་བརྒྱད་པ་རྫོགས་སོ༔ རྒྱ་གར་སྐད་དུ༔ ས་མ་ཏི་པ་ཏཾ་ཀིཿ བོད་སྐད་དུ༔ ལྷག་པའི་བསམ་གཏན༔ དགོངས་པ་རང་སར་གནས་ལ་ཕྱག་འཚལ་ལོ༔ གཤིས་གནས་པ་ལ་དྲན་པ་མེད༔ མངོན་སྣང་རྟོགས་ལ་སྤང་བླང་མེད༔ སེམས་རྒྱུད་ཟད་ལ་འདུ་ཤེས་མེད ༔ ཅིག་ཅར་བ་ལ་བློ་དངོས་མེད༔ ཨེ་མ་ཧོ༔ དྲན་པ་རྒྱུན་ཟད་ཀྱི་མན་ངག་གིས་ཡིད་བསམ་གཏན་ལ་གནས་པར་བྱ་བ་དང༔ བསམ་པ་རྒྱུན་ཟད་ཀྱི་མན་ངག་གིས་ངག་བསམ་གཏན་ལ་གནས་པར་བྱ་བ་དང༔ དངོས་པོ་རྒྱུན་ཟད་ཀྱི་མན་ངག་གིས་ལུས་བསམ་གཏན་ལ་གནས་པར་བྱ་བ་དང༔ འབྱུང་བ་རྒྱུན་ཟད་ཀྱི་མན་ངག་གིས་ཉོན་མོངས་པ་རང་ཟད་དེ་དེ་དག་གི་རྟགས་མངོན་དུ་འབྱིན་པར་བསྟན་པའོ༔ ཕྱི་ཡུལ་ལ་བརྟེན་པའི་བསམ་གཏན་གྱིས་ཕྱིའི་ཞེན་པ་གཅད༔ ནང་སེམས་ལ་བརྟེན་པའི་བསམ་གཏན་གྱི་ནང་གི་ཞེན་པ་གཅད༔ བར་ལུས་ལ་བརྟེན་པའི་བསམ་གཏན་གྱིས་ཕྱི་ནང་གཉིས་ཀའི་ཞེན་པ་གཅད་པའོ༔ རྡོ་རྗེ་བཀོད་པ་ཆེན་པོ་ལས་ལྷག་པའི་བསམ་གཏན་གཏན་ལ་ཕབ་པ་སྟེ་དགུ་པ་རྫོགས་སོ༔ རྒྱ་རྒྱ་རྒྱ༔ རྒྱ་གར་སྐད་དུ༔ སརྦ་པ་གུ་ལི༔ བོད་སྐད་དུ༔ ཞིང་ཁམས་ཡུལ་གྱི་གནད༔ སྣང་བ་རང་སངས་ཆེ་ལ་ཕྱག་འཚལ་ལོ༔ དྲི་མ་རྣམས་ནི་རང་དག་པས༔ ཡེ་ནས་སྐུ་གསུམ་རྫོགས་པའི་ཞིང༔ རང་གི་ལྷ་རྣམས་མངོན་སྣང་བས༔ ཡི་དམ་ལྷ་ནི་མ་བསྐྱེད་རྫོགས༔ ཀྱེ་ཧོ་རྡོ་རྗེ་འཛིན་པ་ཆེ༔ སྣང་བ་གོམས་པར་གང་བྱེད་པ༔ འཁོར་འདས་གཏིང་ནས་བཟློག་པའི་ཕྱིར༔ རུ་ཤན་འབྱེད་པའི་སྤྱོད་པ་ཡིས༔ འཁོར་འདས་རུ་ཤན་མ་ཕྱེད་ན༔ རྟག་ཏུ་འཁོར་བ་ལ་གནས་འགྱུར༔ ལུས་ངག་རྣལ་དུ་མ་ཕབ་ན༔ རྟག་ཏུ་བྱ་བྱེད་གཡེང་བར་འགྱུར༔ ལུས་ཀྱི་གནད་རྣམས་མ་གཟིར་ན༔ ཡེ་ཤེས་མངོན་དུ་འབྱིན་མི་ནུས༔ ལུག་རྒྱུད་གོམས་པར་མ་བྱས་ན༔ ཐ་མལ་རྣམས་དང་ཁྱད་མེད་འགྱུར༔ སྣང་བ་གོང་དུ་མ་སྤེལ་ན༔ འབྱུང་བའི་སྒྲ་དང་བྲལ་མི་འགྱུར༔ རིག་པ་ཚད་ལ་མ་ཕབ་ན༔ ཡིད་དབྱོད་འབྲས་བུ་ཐུག་མེད་འགྱུར༔ ཆོས་རྣམས་ཟད་སར་མ་བསྐྱལ་ན༔ དངོས་པོ་རྣམས་དང་ཁྱད་ཅི་ཡོད༔ ཀྱེ་ཀྱེ་རྡོ་རྗེ་འཛིན་པ་ཉོན༔ དེ་ལྟར་གཏན་ལ་མ་ཕབ་ན༔ ཡིད་དབྱོད་འཛིན་པ་རྣམས་དང་ནི༔ ཁྱད་པར་ཅི་ཡང་མེད་པར་འགྱུར༔ དེ་ཕྱིར་ངེས་གསང་སྙིང་པོ་འདི༔ མུན་པ་ལས་ནི་མར་མེའམ༔ བ་གླང་རྣམས་ལས་གླང་ཆེན་ནམ༔ གཅན་གཟན་རྣམས་ལས་སེང་གེའམ༔ རྐང་ཐང་ལས་ནི་རྟ་པ་བཞིན༔ ཀུན་གྱི་ནང་ནས་ཁྱད་པར་རོ༔ ཞེས་བཀོད་པ་ཆེན་པོ་ལས་རང་བཞིན་ཞིང་ཁམས་ཀྱི་གནད་གཏན་ལ་དབབ་པ་སྟེ་བཅུ་པ་རྫོགས་སོ༔ རྒྱ་རྒྱ་རྒྱ༔ ལས་ཅན་གཅིག་དང་འཕྲད་པར་ཤོག༔ རྒྱ་གར་སྐད་དུ༔ པྲ་བྷ་ས་ར་ཡ༔ བོད་སྐད་དུ༔ བྱ་བྱེད་ལམ་སྣང༔ བཅོམ་ལྡན་འདས་རྡོ་རྗེ་བཀོད་པ་ཆེ་ལ་ཕྱག་འཚལ་ལོ༔ རྣལ་འབྱོར་འབྲས་བུ་གང་འདོད་པ༔ རྟག་ཏུ་ལག་གི་འདུ་བྱེད་བསྒོམ༔ བརྡའ་ལ་གོམས་པར་བྱེད་པ་ཡིས༔ སྣང་དང་མི་སྣང་ལ་སོགས་བསྒོམ༔ རྣམ་འབྱོར་དེ་ལྟར་གང་བསྒོམས་པ༔ ཡན་ལག་རྣམས་ནི་ཕྱག་རྒྱར་གྲོལ༔ སྒྲ་ཡི་འདུ་བྱེད་གང་བསྒོམས་པ༔ དབང་པོ་རྣམས་ནི་ཕྱག་རྒྱར་གྲོལ༔ ཁ་དོག་ཉིད་ལ་སུ་གོམས་པ༔ ལུས་ནི་ཕྱག་རྒྱ་ཆེན་པོར་གྲོལ༔ ངག་གི་སྒྲ་ལ་གང་གོམས་པ༔ ངག་ནི་ཕྱག་རྒྱ་ཆེན་པོར་གྲོལ༔ ཡི་གེའི་འཕྲོ་འདུ་གང་གོམས་པ༔ སེམས་ནི་ཕྱག་རྒྱ་ཆེན་པོར་གྲོལ༔ རླུང་ལ་གོམས་པར་གང་བྱེད་པ༔ བླ་མེད་གསང་བ་མཆོག་ལ་སྤྱོད༔ འདི་དག་རྣམས་ནི་སུ་གོམས་པ༔ ཕྱག་རྒྱ་ཆེན་པོ་ཉིད་ཐོབ་བོ༔ ཞེས་བཀོད་པ་ཆེན་པོ་ལས་ལུས་ངག་གི་བྱ་ཕྱེད་གཙོ་བོར་བྱེད་པ་གཏན་ལ་ཕབ་པ་སྟེ་བཅུ་གཅིག་པ་རྫོགས་སོ༔ ཨཐྎ༔ རྒྱ་གར་སྐད་དུ༔ པྲ་ཝ་ར་ས་ར་ས་ཏུ་ཏིང༔ བོད་སྐད་དུ༔ བཀོད་པ་ཡོངས་སུ་རྫོགས་པ༔ བཅོམ་ལྡན་འདས་སྐུ་གསུམ་གྱི་བདག་ཉིད་ལ་ཕྱག་འཚལ་ལོ༔ གང་འདིར་རྡོ་རྗེ་བཀོད་པའི་ལུང་བསྟན་པ༔ རྒྱུད་རྣམས་བཀོད་དང་ལུང་ཚིག་བཀོད༔ མན་ངག་བཀོད་དང་དོན་སྡེབས་བཀོད༔ འབྱུང་བ་རྣམས་དང་ཕུང་པོ་བཀོད༔ ཁམས་དང་སྐྱེ་མཆེད་ཡུལ་རྣམས་དང ༔ འཇིག་རྟེན་འདས་དང་མ་འདས་བཀོད༔ ཕ་རོལ་ཕྱིན་དང་ལྷ་རྣམས་བཀོད༔ ཐབས་རྣམས་ཡན་ལག་དུ་མ་བཀོད༔ དེ་སོགས་བཀོད་དོན་རྒྱ་ཆེ་ལས༔ སྙིང་པོ་ཡང་ནས་ཡང་བསྡུས་པ༔ ངེས་པ་བཀོད་པའི་དོན་འདི་དག༔ གང་གིས་གང་བཀོད་གང་ལས་བསྟན༔ གང་བྱུང་གང་གི་དོན་དུ་དང༔ ཁྱད་པར་གང་ཡིན་སྙིང་པོ་དང༔ སྣོད་དང་བཅུད་ཀྱི་རིམ་པ་ཡིས༔ གང་མོས་བློ་ལ་འདི་ཉིད་བསྟན༔ སྒྲ་དང་བརྡ་དང་རྟེན་འབྲེལ་དང༔ དམིགས་པའི་རྟེན་དང་དམིགས་མེད་པ༔ ཇི་ལྟར་གོམས་དང་དེ་བློ་དང༔ དེ་ཡི་ཐབས་དང་གནད་དང་ཡང༔ རླུང་དང་རྩ་དང་ཐིག་ལེ་དང༔ ཡི་གེ་དབྱིབས་དང་ཁ་དོག་དང༔ གནད་ནི་རྣམ་པ་དུ་མ་ཡིས༔ བློ་རིམ་ཇི་ལྟར་གནས་པ་བཞིན༔ སྐས་ཀྱི་རིམ་པ་ཇི་ལྟར་བར༔ གོང་འོག་རྣམ་པར་ཕྱེད་པ་ལྟར༔ གསལ་བ་དེ་ལྟར་བཀོད་པ་ལས༔ འདི་དག་རྣམས་ནི་ཡོངས་སུ་རྫོགས༔ རྣལ་འབྱོར་སྤྱོད་པ་རྣམས་བརྩོན་པས༔ འདི་ལྟར་རྒྱུད་དུ་གནས་པར་བྱ༔ རི་དྭགས་ལྟ་བུའི་སེམས་ཤུགས་ཀྱིས༔ རྟག་ཏུ་རི་ལས་གྲོང་ཡུལ་མིན༔ སྟག་སྤྱང་ལྟ་བུའི་སེམས་ཤུགས་ཀྱིས༔ རྒྱུད་དུ་དུར་ཁྲོད་གནས་སུ་རྒྱུ༔ སེང་གེ་ལྟ་བུའི་སེམས་ཤུགས་ཀྱིས༔ སྐབས་སུ་གངས་ཀྱི་སྟོངས་སུ་གནས༔ ཅེ་སྤྱང་ལྟ་བུའི་སེམས་ཤུགས་ཀྱིས༔ མཚན་དུས་དུར་ཁྲོད་རྣམས་སུ་ཉུལ༔ འབྱུང་པོ་ལྟ་བུའི་སེམས་ཤུགས་ཀྱིས༔ སྐབས་སུ་ཆུ་བྲག་འཛོམས་སར་བསྡད༔ དེ་ལྟར་གནས་ནི་རྣམ་པ་ལྔར༔ རྣལ་འབྱོར་སྤྱོད་པ་ལ་གནས་ཚེ༔ ལུས་ཀྱི་ལས་སུ་འདུག་སྟངས་གནས༔ ངག་ནི་ལྐུག་པ་བཞིན་དུ་སྡོམ༔ སེམས་ནི་ནམ་མཁའ་ཉིད་དང་ངོ༔ དེ་ལྟར་རྣལ་འབྱོར་གང་སྤྱོད་པ༔ དེས་ནི་བཀོད་པའི་དོན་ཚིག་ཤེས༔ རྣལ་འབྱོར་འབྲས་བུ་རང་སར་གྲོལ༔ འདི་ལྟར་བཀོད་པའི་དོན་འདི་ཡིས༔ སངས་རྒྱས་རྣམས་ཀྱི་ཨཱ་ལི་ཀ༔ གསང་བ་ཟབ་མོ་མངོན་དུའོ༔ ཞེས་བཀོད་པ་ཆེན་པོ་འབུམ་ཚོ་དྲུག་པ་ལེའུ་སྟོང་ཕྲག་བཞི་པ་ལས༔ རིམ་པ་མངོན་བསྟན་ལྡན་ཟེར་བརྟག་གསང་བ་སྙིང་གི་ལེའུ་ཞེས་བྱ་བ་ལེའུ་སུམ་བརྒྱ་པ་ལས༔ འདི་འཇམ་དཔལ་བཤེས་གཉེན་གྱིས་ཕྱུངས་པའོ༔ རྫོགས་སོ༔ བཀོད་པ་ཆེན་པོ་ནི་ཁ་ཆེའི་ཡུལ་རིགས་ལྡན་གྱི་མཐའ་འཁོར༔ མཁའ་འགྲོ་གསེར་གླིང་བྱ་བར་མཁའ་འགྲོ་མ་རྣམས་ལ་གཏད་ནས་དེ་ན་ཡོད་དོ༔ ནམ་ཞིག་དེ་ཡང་སྣང་བར་འགྱུར་རོ༔ ཨཐྎ༔ རྒྱ་རྒྱ་རྒྱ༔ རྒྱ་གར་སྐད་དུ༔ སརྦ་དྷརྨཱ་སཱུ་ཏྲ༔ བོད་སྐད་དུ༔ ཆོས་ཐམས་ཅད་ཀྱི་མདོ༔ བཅོམ་ལྡན་འདས་བྱམས་པ་ཆེན་པོ་མངོན་དུ་སློང་བ་ལ་ཕྱག་འཚལ་ལོ༔ ཆོས་ཉིད་དྲག་པོས་རང་གི་རྒྱུད་རྣམས་གཅོད༔ དད་པ་དྲག་པོས་སྡུག་བསྔལ་ལས་ཡིད་དབྱུང༔ བརྩོན་འགྲུས་དྲག་པོས་གང་འདོ་དོན་རྣམས་གྲུབ༔ བསྒྲུབ་པ་དྲག་པོས་དངོས་གྲུབ་མྱུར་དུ་ཐོབ༔ ཉམས་ལེན་དྲག་པོས་རྟགས་རྣམས་མྱུར་དུ་འབྱུང༔ སརྦ་ཏ་ཐཱ་ག་ཏ༔ ཨྸ་བྷཱེ་ཤ་གྷཥྚེ་ཤ་ཊ་ཎ་ཡྻེ༔ ཆོས་ཐམས་ཅད་ཀྱི་རང་སྒྲ་ཉེ་བར་བཅད་པ༔ བདེ་བ་ནས་བདེ་བར་རང་གི་ངོ་བོ་ལ་སྤྱད་པའི་ཐབས་ནི༔ འདི་ལྟ་སྟེ༔ ཐོག་མ་མཐོང་བ་མ་འགས་པར་རང་ཤར་ནས༔ ཡིད་བྱེད་པ་པོ་ཀུན་ཏུ་བཟང་པོ་དང༔ ཆོས་ཀུན་ཏུ་བཟང་མོའི་མཁའ་དབྱིངས་སུ་ཐམས་ཅད་སངས་རྒྱས་པའི་ཚེ༔ ཡིད་ཀྱི་ཁྱེའུ་སྣང་བ་རིག་བྱེད་དུ་རང་བྱུང་ནས༔ ཆོས་ཅན་དུ་མས་སྣ་དྲངས་ནས་འབྱུང་བ་ཀུན་གྱི་བདག་པོར་བྱུང་བས་རང་གི་ལུས་ངག་ལ་རང་གིས་རྒྱས་བཏབ་པ་དང ༔ དེ་ཡང་རྡོ་རྗེ་སེམས་དཔའ་མན་ངག་ཐམས་ཅད་ཀྱི་བདག་པོར་བྱུང་ནས་སྒྲ་དུ་མ་གཏན་ལ་ཕབ་སྟེ༔ ནམ་མཁའ་རྣམ་པར་དག་པ་དང་གཉིས་སུ་མེད་པར་ཁྱབ་གདལ་འུབ་ཆུབ་ཏིང་འཛིན་དབང་དུ་འདུས་པས་ཡུལ་དྲུག་ཆམ་ལ་ཕབ་པའོ༔ སྤྱད་པའི་ཡུལ་ལྔ་ལ༔ སངས་རྒྱས་ཐམས་ཅད་ཀྱི་དགོངས་པ་ཤར་ནས་ནུབ་པ་མེད་པའི་གཏེར་འཆང་བ་ཞེས་རྡོ་རྗེ་སྙིང་པོའི་ཚིག་ཏུའོ༔ ཡང་རྒྱུད་ལུང་ཀུན་གྱི་གོལ་ས་བཅད་པས་ཡིད་ཆེས་ཀྱི་སྤྲོས་པ་ཆོས་པ་དང༔ སྣང་བ་ཐམས་ཅད་ལྟབ་རང་བྱུང་གི་རྒྱལ་པོར་གཏན་ལ་ཕབ་པས་ཆོས་ཅན་གྲངས་ཀྱི་ཞེན་པ་ཆོད་པ་དང༔ རིག་པ་ཉིད་དྲི་མ་ཀུན་ལས་འདས་པར་རང་གྲོལ་བའི་ཚེ་ཉོན་མོངས་པ་ཐམས་ཅད་རང་ཐོག་ཏུ་གྲོལ་བའོ༔ འདོད་པའི་ཡོན་ཏན་རྣམས་རྒྱན་མ་བཀོད་པའི་ནང་དུ་ཐིམ་པའི་ཚེ་ཆོས་ཀྱི་དབྱིངས་ཐམས་ཅད་སྤྲོས་པ་དང་བྲལ་བའོ༔ འབྱེད་པ་མེད་པའི་ཤེས་རབ་ཀྱིས་སྣང་བའི་བློ་ལོག་པའི་ཚེ་རིང་བ་ཉིད་རྒྱུད་ལུང་གི་ཚིག་དང་བྲལ་བའོ༔ སངས་རྒྱས་ཀྱི་ཐུགས་རྗེ་ཀློང་གཅིག་ཏུ་དྲིལ་ནས་མི་སྣང་བའི་ཚེ་རིག་པ་ཉིད་འདུས་མ་བྱས་པར་བཞུགས་སོ༔ ཐབས་ལས་བྱུང་བའི་དྲན་པ་ཡུལ་ལ་འཇུག་ནས་པའི་ཚེ་སྐྱེ་བ་མེད་པའི་ཆོས་རྣམས་རྒྱུད་དག་པའོ༔ སྟོང་པ་ཉིད་ཀྱི་སྤྱོད་པ་མངོན་དུ་བྱུང་ན་འཁྲུལ་པ་རྒྱ་ཡིས་ཐེབས་པ་ཞེས་བྱའོ༔ འགྱུ་བྱེད་རང་སར་དག་པའི་ཚེ་འགྲོ་དྲུག་གི་གཡང་ས་ཆོད་པ་ཞེས་བྱའོ༔ བློ་ཡིན་མིན་གྱི་རྩིས་དང་བྲལ་ཙ་ན་སྒྲོ་འདོགས་ཐམས་ཅད་ནང་དུ་ཆོད་པ་ཞེས་བྱའོ༔ དབང་པོ་རྣམས་ཡུལ་གང་ལའང་མི་འཇུག་ན་རིག་པ་མ་དང་བུ་ཕྲད་པས་ཆོས་ཅན་དུམ་བུར་རྟོགས་པ་ཞེས་བྱའོ༔ སྟོང་པ་ཉིད་ལ་ཆོ་འཕྲུལ་ཆེན་པོའི་ཏིང་ངེ་འཛིན་བསྟན་པའི་ཚེ་སངས་རྒྱས་ཀྱི་མཛད་པ་ཆེན་པོ་སྟེ༔ འབྱེད་པ་མེད་པའི་ཤེས་རབ་ཀྱིས་དཔྱད་ན་ཆོས་ཐམས་ཅད་ངོ་བོ་ཉིད་དུ་མར་སྣང་བ་ཞེས་བྱ་སྟེ༔ ཡང་དག་པའི་ལམ་དང༔ ཡང་དག་པའི་ཤེས་རབ་དང༔ ཡང་དག་པའི་སྙིང་རྗེ་ལ་གོམས་པས་ཐེག་པ་ཆེན་པོ་ལ་བྱན་ཚུད་པའི་སྐྱེས་བུ་བློ་རབ་ཅན་དེ་ནི་མི་གནས་པའི་ཡོངས་སུ་མྱ་ངན་ལས་འདའ་བར་འགྱུར་རོ༔ དེ་ནི་མྱ་ངན་ལས་འདས་ནས་ཀྱང་ཕྱོགས་བཅུ་ཐམས་ཅད་དུ་རྡོ་རྗེ་རོལ་པའི་ལྟ་སྟངས་མཛད་དེ་ཆོས་ཐམས་ཅད་ཀྱི་སྒྲ་དེ་བཞིན་ཉིད་ལ་དབང་བསྒྱུར་ཏེ་ནམ་མཁའ་མི་ཕྱེད་ཀྱི་བདག་པོར་འགྱུར་རོ༔ རྡོ་རྗེ་ལྟ་བུའི་ཏིང་ངེ་འཛིན་སྟོང་ལ་དབང་བསྒྱུར་ནས༔ ལམ་དུ་མི་འཇིགས་པ་དང༔ རྫུ་འཕྲུལ་དང༔ སྟོབས་དང༔ སོ་སོ་ཡང་དག་པར་རིག་པ་རྣམས་མངོན་དུ་བྱས་ཏེ་སྐུ་གསུང་ཐུགས་ཀྱི་བདུད་རྩིར་གྱུར་ནས༔ ཡང་འཛིན་པ་ཐམས་ཅད་ཀྱི་བདག་པོར་གྱུར་ཏེ་དེ་ཡི་ཕྱིར་ནམ་མཁའ་སྟོང་ལས་ཆོ་འཕྲུལ་འབྱུང་བ་ཞེས་བྱའོ༔ གཅེས་པའི་སྙིང་པོ་ཞེས་བྱ་བ་མན་ངག་གི་རྒྱལ་པོ་སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་ཁ་ཆེའི་ཡུལ་དུ་མཛད་པ༔ མཁའ་འགྲོ་མ་ནམ་མོ་རལ་པ་ཅན་ལ་གདམས་པ་རྫོགས་སོ༔ རྒྱ་རྒྱ་རྒྱ༔ ལས་ཅན་དེ་དང་འཕྲད་པར་ཤོག༔ རྒྱ་གར་སྐད་དུ༔ བྲ་ཀཱ་ཚ་བཱ་བྷེ་ཀ་རཾ༔ བོད་སྐད་དུ༔ དཔེ་རྣམས་བསྡུས་པའི་སྒྲོན་མ༔ བཅོམ་ལྡན་འདས་བྱ་བྲལ་རང་དག་ངང་ལ་ཕྱག་འཚལ་ལོ༔ སརྦ་ཨ་པ་ཡ་པྲ་བྷ་ལོ་གྞི༔ ཆོས་ཉིད་སྤྲོས་དང་བྲལ་བའི་ཡེ་ཤེས་དེ༔ སྣ་ཚོགས་ཐབས་ཀྱིས་དེ་ཉིད་མཚོན་པའི་ཕྱིར༔ དཔེ་ཡི་སྒོ་ནས་གཏན་ལ་དབབ་པ་ནི༔ སྟོན་པའི་ལུང་བཞིན་བདག་གིས་བསྟན་པར་བྱའོ༔ ཕྱི་མའི་གང་ཟག་དཔེ་ལ་ཡིད་ཆེས་བྱེ་པའི་དུས་ན་འདི་དགོས་པས༔ འདི་ཉིད་རིགས་ཀྱི་བུ་རྣམས་ཀྱིས་གཟུང་བར་བྱའོ༔ བཀོད་པ་ཆེན་པོའི་རྒྱུད་ལས་ངོ་སྤྲད་པའི་ལེའུ་ཉི་ཤུ་རྩ་དགུ་གསུངས་པ་ཡང་མདོ་ཉི་ཤུ་རྩ་གཅིག་ཏུ་འདུས༔ དེ་ཡང་བདུན་དུ་འདུས༔ དེ་ཡང་ལེའུ་གསུམ་པ་དྲན་པ་གཞི་འཚོལ་གྱི་ལེའུར་བསྡུས་ནས་བསྟན་ཏེ༔ དེ་དག་གི་དོན་རྣམ་པར་བཤད་ན་གཉིས༔ ཕྱི་ཡུལ་ལ་ངོ་སྤད་པ་དང ༔ ནང་སེམས་ལ་ངོ་སྤྲད་པའོ༔ ཕྱི་ལ་གསུམ་སྟེ༔ སྣང་བ་འོད་ལ་ངོ་སྤྲད་པ་དང༔ དྲན་པ་ཤེས་པ་ལ་ངོ་སྤྲད་པ་དང༔ གཞི་རིག་པ་ལ་ངོ་སྤྲད་པའོ༔ སྣང་བ་འོད་ལ་ངོ་སྤྲད་པ་ནི༔ རིགས་ཀྱི་བུ་ལས་དང་སྐལ་བར་ལྡན་པ་རྣམས་ཀྱིས་གངས་སམ༔ མཚོ་ཆེན་པོའི་གླིང་ངམ༔ ས་ཡི་སྙིང་པོའམ༔ བྲག་སྔོན་པོའི་ཐེམ་བར་ནས་བྱུང་བའི་རིན་པོ་ཆེ་ཟུར་བརྒྱད་པའམ༔ བཅུ་དྲུག་པའམ༔ ཉི་ཤུ་རྩ་གཅིག་པའམ༔ ཉི་ཤུ་རྩ་བརྒྱད་པ་དག་ཤིན་ཏུ་མཆོག་ཡིན་ཏེ༔ དེ་ལྟ་བུ་ཤིན་ཏུ་གསལ་བ་ལ་མ་ཆགས་པ་དྲི་མའི་སྐྱོན་གྱིས་མ་གོས་པ༔ ཆེ་བ་ནི་ཁྱི་དཀར་པོའི་མགོ་བོ་ཙམ༔ བྱ་ངང་པའི་སྒོ་ང་ཙམ༔ སོར་བཞི་པའམ༔ གསུམ་པའམ༔ ཚོན་གང་བའམ༔ ཐ་མ་ཡང་སྐྱེས་བུའི་མིག་ཚད་ཙམ་བླངས་ཏེ༔ འདི་ནི་རྡོ་རྗེ་སེམས་དཔའ་གསལ་བྱེད་ཀྱི་མེ་ལོང་ཞེས་བྱ་སྟེ༔ དཔེ་ཐམས་ཅད་ཀྱི་སྔོན་དུ་འགྲོ་བ་ཡིན་ནོ༔ དེ་ལྟར་གསལ་བྱེད་ཀྱི་མེ་ལོང་དེ་ལ་མཆོད་པར་བྱ་སྟེ༔ དེ་ཉིད་སྟོན་པ་རྡོ་རྗེ་འཆང་གི་སྐུར་དྲི་མ་མེད་པར་སྐྱེ་བུའི་བློས་བྱས་ཏེ༔ ཙན་དན་དང༔ ག་བུར་དང༔ གླ་རྩིས་སོགས་དྲི་བཟང་པོའི་སྨན་གྱིས་བྲན་པའི་རྒྱ་མཚོའི་ཆུ་ལ་གཟུངས་སྔགས་མང་པོ་བཟླས་ཏེ་དེ་ཉིད་ཁྲུས་ནས་བཏོན་ལ༔ འཁར་གཞོང་ངམ༔ བསེ་ཕོར་ནང་དུ་དར་ཚོན་སྣ་ལྔས་དྲིལ་ལ་བཞུགས་སུ་གསོལ་ལ༔ ཕྱག་འཚལ་བ་དང༔ མཆོད་པ་འབུལ་བ་དང༔ སྡིག་པ་བཤགས་པ་ལ་སོགས་པ་ཚོགས་བསགས་པ་ཇི་ལྟར་རིགས་པ་བྱས་ལ༔ དེ་ནས་མཁའ་འགྲོ་དང་ཆོས་སྐྱོང་ལ་གཏོར་མ་རྒྱ་ཆེན་པོ་བྱིན་ལ༔ དེ་ཉིད་དར་ནས་ཕྱུང་ལ་ཟ་འོག་གི་གུར་ཁྱིམ་ཁར་བཞག་སྟེ༔ ཕྱོགས་ཀུན་ནས་སྐལ་བ་དང་ལྡན་པ་ཀུན་གྱིས་བལྟས་ན་དེ་ཉིད་ཁྲ་ལམ་གྱིས་འགྲོ་ཏེ༔ དེ་ཡང་ཕྱི་ནང་མེད་པར་ཟང་ཐལ་བའི་དཔེས་བར་དོའི་སྣང་བ་མཆེད་པ་ངོས་བཟུང་ངོ༔ དེ་ཡང་ཁ་དོག་དཀར་པོ་བཙལ་ན་དཀར༔ དམར་པོ་བཙལ་ན་དམར༔ དེ་བཞིན་དུ་སེར་པོ་དང་སྔོན་པོ་ལ་སོགས་པ་གང་བཙལ་བའི་མདོག་ཏུ་འགྲོ་ཞིང༔ དེ་དག་བྲལ་ན་རང་གི་ངོ་བོ་ཆུའི་སྙིང་པོ་ལྟ་བུར་རེག་གཟུགས་ཟང་ཐལ་དུ་འདུག་པ་བཞིན་དུ་རིག་པ་ཡང་འབྱུང་བ་ལྔའི་རྐྱེན་དང་བྲལ་ནས་ཉམས་སུ་བླངས་ན་དེ་བཞིན་ནོ༔ དེ་ལྟར་རིག་པ་ཆོས་ཀྱི་སྐུའི་སྙིང་པོ་དྲི་མ་མེད་པ་དེ་ལས་རང་འོད་ཕྱི་ཡི་ཡུལ་དུ་སྣང་བའི་དཔེ་ནི་ཡིད་མཐུན་པའི་སྐལ་ལྡན་གཉིས་ནས་གསུམ་ལས་མང་དུ་མི་རུང ༔ དེ་ཡང་གནས་ཁང་ཤར་ནུབ་ཕྱོགས་ཕྱེད་པ་ཞིག་ལ་ཤར་དུ་སྐར་ཁུང་གཏད་དེ་ལྷག་མ་རྣམས་བསྒྲིབས་ལ༔ རྗེས་སུ་འཇུག་པའི་སྐལ་ལྡན་གྱིས་ཉི་མའི་ཞུར་ལ་བཟུང་སྟེ་འཕྱར་བས་ཕྱིར་མན་ཤེས་ལས་འོད་ལྔའི་སྣང་བ་ཤར་ཏེ་ཡོང་བས༔ དེ་ནི་རང་གི་སྣང་བ་ཐམས་ཅད་དུ་ཡོད་པའི་རྟགས་ཀྱིས་མཚོན་པའི་དཔེའོ༔ དེ་ནས་རྗེས་སུ་འཇུག་པ་ཞིག་གི་མིག་གི་སྟེང་དུ་འོད་དེ་ཕོག་པར་བྱས་ལ་ལག་པ་གཅིག་གིས་མིག་ཡ་གཅིག་བཀབ་སྟེ་རྡོ་རྗེ་སེམས་དཔའི་གསལ་བྱེད་ལམ་འགུལ་བར་བལྟས་ན༔ གསལ་བྱེད་དང༔ བར་གྱི་འོད་ཀྱི་ཟེར་ཐག་དང ༔ ནམ་མཁའི་ཉི་མའི་སྙིང་པོ་གསུམ་དུས་གཅིག་ལ་མཐོང་བ་ནི་སྐུ་གསུམ་གྱི་འབྲེལ་བ་གཏན་ལ་འབེབས་པའི་དཔེར་ཤེས་པར་བྱའོ༔ ཡང་དེ་ལྟར་སྐྱེས་བུ་དེའི་མིག་གཅིག་གི་སྟེང་དུ་མན་ཤེལ་བཞག་སྟེ་གོང་ལྟར་བལྟས་ན་སྔར་བས་ལྷག་པའི་འོད་ཟེར་གྱི་ཐག་པ་མཐོང་སྟེ༔ དེ་ལས་འོད་ཟེར་ཕྲ་མོ་གྲངས་མེད་པ་འཕྲོ་བ་ཡང་འོང་སྟེ༔ དེ་ནི་སྐུ་ལས་སྐུའི་འོད་ཟེར་སྐུ་ཇི་ལྟར་འཕྲོ་བའི་དཔེ་ཡིན་ནོ༔ ཡང་ཤེལ་དེ་སྐྱེས་བུའི་མིག་གི་སྟེང་དུ་བཞག་ན༔ བལྟས་ཚད་འོད་ཀྱི་སྣང་བར་མཐོང་སྟེ་དེ་ནི་རིག་པ་ནང་གསལ་ཡིན་ནོ༔ ཡང་མཁས་པས་མིག་གི་སྟེང་དུ་བཞག་སྟེ་མར་མེའི་སྣང་བ་ལ་བལྟས་ན་དེ་བཞིན་ཏེ༔ ལོངས་སྐུའི་འོད་གཏན་ལ་ཕབ་ནས༔ ལོངས་སྐུའི་ངོ་བོ་ནི་མར་མེ་དང་འདྲ་བས༔ ཁྱིམ་དུ་དེ་ལྟར་མར་མེ་ལྔའམ་དྲུག་གམ་བརྒྱད་ནས་བཅུ་ལ་སོགས་པ་བསྟན་པ་དེ་བཞིན་ནོ༔ རྒྱལ་བའི་སྐུ་ཡང་དེ་ལྟར་རོ༔ དེ་ནི་སྣང་བ་འོད་ལ་ངོ་སྤྲོད་པ་ཞེས་བྱའོ༔ དྲན་པ་ཡེ་ཤེས་ལ་ངོ་སྤྲད་པ་ནི༔ ཤིན་ཏུ་གནམ་དྭངས་པའི་ཚེ་ཤར་ཕྱོགས་ཀྱི་ཐད་ལས་རས་དཀར་དམར་གྱི་སྣམ་བུའི་སྟེང་དུ་མེ་ལོང་བཞག་སྟེ༔ ཡང་མན་ཤེལ་གི་སྟེང་དུ་བཞག་སྟེ་མ་ཡེངས་པར་ཟུར་གྱིས་དེ་ཉིད་ལ་བལྟ་ཞེས་ཐབས་མཁས་པ་གྱེན་ལ་བཏེགས་ན་འོད་སྣང་དང་ཐིག་ལེ་འཆར་ཏེ་ཡེ་ཤེས་རང་གི་ངོ་བོ་གཏན་ལ་ཕབ་པའོ༔ ཡང་སྐལ་ལྡན་གྱིས་ནམ་དྭངས་པའི་ཚེ་འཁར་ཕོར་བརྩེགས་མ་ལྔའམ་དགུ་བཙོད་ཆུས་བཀང་སྟེ༔ ཡང་མན་ཤེལ་གྱིས་གོང་ལྟར་བ་ལྟས་ན་ཐིག་ལེའི་ངོ་བོ་ཡང་གཏན་ལ་ཕེབས་སོ༔ ཡང་སྐལ་ལྡན་གྱིས་ནམ་དྭངས་པའི་ཚེ་ཤར་ཕྱོགས་ཀྱི་རྫིང་ཆུས་བལྟམས་པ་ལ་ནུབ་ནས་གོང་ལྟར་བལྟས་ན་ཡེ་ཤེས་ཀྱི་འོད་གཏན་ལ་ཕེབས་སོ༔ ཡང་འཁར་ཕོར་ཆེ་ཆུང་རིམ་པ་ཅན་ལྔའམ་བདུན་བྱས་ཏེ་དབུས་ནས་སྲོག་ཤིང་གཅིག་ཞབས་ལ་ཆས་སྦྱར་ལ༔ དེ་ལྟར་བརྩེགས་ལ་ནང་ཚོན་ཆུ་མི་མཐུན་པས་བཀང་ལ༔ ཡང་གོང་ལྟར་བལྟས་ན་ཐིག་ལེ་རིགས་མི་མཐུན་བརྩེགས་མར་འཆར་ཏེ་རིགས་ལྔའི་ཐིག་ལེ་གཏན་ལ་ཕེབས་པ་ཡིན་ནོ༔ ཡང་ནམ་དྭངས་པའི་ཚེ་རང་གི་མདུན་དུ་འདོམ་གསུམ་ཙམ་ཚོད་དུ་བར་ཐག་ཀྱང་དེ་ཙམ་ལ་ཤིང་འདོམ་རེ་བ་རེ་ཕྱོགས་བཞིར་བཙུག་སྟེ་དེ་རྣམས་ཀྱི་བར་དུ་དུང་གི་ཕྲེང་བའམ་རུས་པའི་ཕྲེང་བ་བཀྲག་ཆེ་བས་དྲྭ་བའི་ཚུལ་དུ་སྤྲེལ་ཏེ༔ སྟེ་དུ་ཕྲེང་བའི་དྲྭ་བ་བྱས་ནས་དེའི་དབུས་སུ་རང་འདུག་སྟེ་ས་གཞི་རྣམས་ཀྱང་མེ་ལོང་དང་འཁར་གཞོར་གི་གཅལ་བཀྲམས་ལ༔ ཡང་མན་ཤེལ་གྱིས་གོང་ལྟར་ཡས་ན་དྲྭ་བ་དང་དྲྭ་བ་ཕྱེད་པ་མཐོང་བར་འགྱུར་རོ༔ དེ་ཡེ་ཤེས་ཀྱི་ཕོ་བྲང་གཏན་ལ་ཕབ་པའོ༔ ཡང་ནམ་དྭངས་པའི་ཚེ་རང་གི་མདུན་དུ་ཤིང་གཅིག་ལ་རྟ་རྔ་ལ་བྱའི་སྒོ་ང་མང་པོ་བརྒྱུས་ཏེ་བར་བར་དུ་དར་སྣའི་ཕུར་ལྕེ་ཡང་བཏགས་ལ་གོང་ལྟར་བལྟས་ཏེ༔ སྐལ་ལྡན་ཅིག་གིས་དེ་དག་སྐབས་སུ་བསྐྱོད་པར་བྱའོ༔ དེས་ནི་བར་དོ་ལ་ཡེ་ཤེས་རླུང་གི་ཐིག་ལེ་གཏན་ལ་ཕེབས་པ་ཡིན་ནོ༔ ཡང་ནམ་དྭངས་པའི་ཚེ་རང་གི་མདུན་དུ་ཟ་འོག་གི་གདིང་བ་བཞག་སྟེ་ཡང་གོང་ལྟར་བལྟས་ན་སྣང་བ་ཁྲ་བོར་མཐོང་སྟེ་དེས་ནི་ཡེ་ཤེས་ཀྱི་རྩལ་གཏན་ལ་ཕབ་པའོ༔ དེ་བཞིན་དུ་དར་གྱི་ཡུག་དམར་པོ་བཏིང་སྟེ་བལྟས་ན་སོ་སོར་རྟོགས་པའི་ཡེ་ཤེས་ཀྱི་འོད་གཏན་ལ་ཕེབས་སོ༔ དེ་བཞིན་དུ་སེར་པོས་མཉམ་པ་ཉིད༔ དཀར་པོས་མེ་ལོང་ལྟ་བུ༔ ལྗང་གུས་བྱ་བ་གྲུབ་པ༔ མཐིང་ཁས་ཆོས་ཀྱི་དབྱིངས་ཀྱི་ཡེ་ཤེས་གཏན་ལ་ཕབ་པ་སྟེ་ཉེ་བར་མཚོན་པའོ༔ ཡང་དར་དེ་དག་དབྱུག་པ་ལ་འཕྱར་ཏེ་བལྟས་ན་ཡེ་ཤེས་རླུང་དང་འདྲེས་པའི་ཚད་གཏན་ལ་ཕེབས་པ་ཡིན་ནོ༔ དེ་དག་གིས་དྲན་པའི་ཡེ་ཤེས་ངོ་སྤྲད་པའི་དཔེ་ཡིན་ནོ༔ རིག་པ་ལ་ངོ་སྤྲད་པ་ནི༔ ཡང་ནམ་དྭངས་པའི་ཚེ་ཁང་པ་ཕྱེད་ཕུབ་པ་ཁ་ལྷོར་ལྟ་བའི་ནང་དུ་སྐྱེས་བུ་ཞིག་ལ་གོས་ཁ་དོག་དཀར་དམར་གང་ཡང་རུང་བ་ཁ་དོག་གསལ་བ་གྱོན་ཏེ༔ དེ་ལ་རུས་པའི་རྒྱན་བཏབ་ལ་མེ་ལོང་ལ་སོགས་པས་བརྒྱན་ཏེ༔ ཡང་གོང་ལྟར་བལྟས་ན་ནམ་མཁར་སྐུ་འགྲོ་འོང་དང་བཅས་པར་སྣང་སྟེ་རིག་པ་གཞོན་ནུ་བུམ་པའི་སྐུ་གཏན་ལ་ཕེབས་པ་ཡིན་ནོ༔ ཡང་ཁྱིམ་མུན་པ་དང་ལྡན་པ་ཞིག་གི་སྒོ་ཡི་ཉི་མས་ཕོག་པ་ཞིག་ཏུ༔ སྐྱེས་བུ་གོས་ནག་པོ་གྱོན་པ་སྐྲ་སྤྱི་བོར་བཅིངས་པ་ཞིག་ལ་རྒྱན་གདབ་སྟེ༔ གོང་ལྟར་བལྟས་ན་རིག་པ་གཞོན་ནུ་དཔའ་བོ་སྟོབས་ལྡན་གྱི་སྐུ་གཏན་ལ་ཕེབས་སོ༔ ཡང་ཁྱིམ་ཕྱེད་སྣང་གི་སར་སྐྱེས་པའི་རྒྱན་གོང་ལྟར་བྱས་ཏེ་ལུས་ཕྱེད་གྲིབ་མ་ལ་འདུག་པ་ལ་ཕྱེད་སྣང་བ་ལ་བསྟན་ཏེ་འཕྱར་བ་དེ་གོང་ལྟར་བྱས་ན་སྐུ་ཕྱེད་འགྲོ་འོང་དང་བཅས་པ་མཐོང་སྟེ་རིག་པའི་ཕྱེ་སྐུ་གཏན་ལ་ཕེབས་པ་ཡིན་ནོ༔ ཡང་ཁྱིམ་སྣང་བ་དང་ལྡན་པ་དེར་སྐྱེས་བུ་རྒྱན་དང་ལྡན་པ་ཕྱེད་ཀྲུང་དུ་འདུག་སྟེ་ཡང་གོང་ལྟར་བལྟས་ན་རིག་པ་གཞུག་སྐུ་གཏན་ལ་ཕེབས་པ་ཡིན་ནོ༔ ཡང་སྐལ་བ་དང་ལྡན་པའི་སྐྱེས་བུ་ཐབས་ལ་མཁས་པ་དེས༔ རས་ལ་ཚོན་བཀྲག་དང་ལྡན་པས་རིགས་ལྔའི་སྐུ་ཡི་འདྲ་འབག་ལེགས་པར་བྲིས་ཏེ་ནམ་དྭངས་ཚེ༔ རང་གི་མདུན་དུ་སྐུ་བཀྲམ་སྟེ་ཡང་གོང་ལྟར་བལྟས་ན་རིག་པའི་གཟུགས་སྐུ་གཏན་ལ་ཕེབས་པ་ཡིན་ནོ༔ ཡང་དེ་ལྟར་བཀྲམ་པའི་སྟེང་དུ་མེ་ལོང་ཆུང་ངུ་དང་དྲིལ་བུ་གཡེར་ཁ་རྣམས་ཀྱིས་གཅལ་དུ་བཀྲམ་སྟེ་བལྟས་ན༔ སྐུ་ལ་ཐིག་ལེས་བརྒྱན་པ་གཏན་ལ་ཕེབས་པ་ཡིན་ནོ༔ ཡང་ཁྱིམ་གྱི་ཤར་གྱི་སྐར་ཁུང་གི་བུག་པ་ནས་མེ་ལོང་བརྒྱུས་པའི་ཕྲེང་བའི་ཐག་པ་འཐེན་ཏེ་བལྟས་ན་ཐིག་ལེའི་ཟེར་ཐག་གཏན་ལ་ཕེབས་པ་ཡིན་ནོ༔ ཡང་དེ་ལས་ཕྲེང་བ་དཀར་པོ་འཐེན་ཏེ་བལྟས་ན་རྣམ་པར་སྣང་མཛད་ཀྱི་ཐུགས་རྗེ་གཏན་ལ་ཕེབས་སོ༔ མཐིང་ཁས་མི་བསྐྱོད་པའོ༔ སེར་པོས་རིན་ཆེན་འབྱུང་ལྡན་ནོ༔ དམར་པོས་སྣང་བ་མཐའ་ཡས་སོ༔ ལྗང་གུས་དོན་ཡོད་གྲུབ་པའི་ཐུགས་རྗེ་གཏན་ལ་ཕེབས་སོ༔ ཡང་ཟངས་སམ་འཁར་གཞོན་ཆེན་པོ་འོ་མས་བཀང་སྟེ་དེ་ཡི་ནང་དུ་མེ་ཏོག་ཁ་དོག་མི་འདྲ་བའི་ཚོམ་བུ་ལྔ་བྱས་ཏེ༔ ཡང་གོང་ལྟར་བལྟས་ན་རྡོ་རྗེ་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་ཟངས་ས མ་འཁར་གཞོང་དུ་སྐྱེར་བའི་ཁུ་བས་བཀང་ནས་མེ་ཏོག་གི་ཚོམ་བུ་གོང་ལྟར་བཀོད་དེ་བལྟས་ན༔ རིན་པོ་ཆེའི་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་བཙོད་ཆུས་བཀང་ནས་བལྟས་ན་པདྨ་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་ཙན་དན་གྱི་ལོ་མ་གདུས་པའི་ཁུ་བས་བཀང་སྟེ་བལྟས་ན་ལས་ཀྱི་རིགས་ཀྱི་ཚོམ་བུའོ༔ དེ་བཞིན་དུ་རམ་གྱི་ཁུ་བས་བཀང་སྟེ་བལྟས་ན་དེ་བཞིན་རིགས་ཀྱིའོ༔ ཡང་ན་དྭངས་བའི་ཚེ་སྐལ་ལྡན་གྱིས་ལག་གཡས་པས་ཤེལ་གྱི་ལུགས་མའི་སྐུ་བཟུང་སྟེ་ལག་པ་གཡོན་པས་མིག་གཡོན་པའི་སྟེང་དུ་གསལ་བྱེད་བཞག་སྟེ་བལྟས་ན་རྡོ་རྗེ་སེམས་དཔའ་སྐུ་གཏན་ལ་ཕེབས་སོ༔ ཡང་གསེར་གྱི་སྐུ་ཚོན་གང་བ་ལ་བལྟས་ན་རིན་ཆེན་འབྱུང་ལྡན་རང་རྐྱ་བ་མཐོང་བར་འགྱུར་རོ༔ ཟངས་སམ་བྱི་རུའི་སྐུ་ལ་བྱས་ན་སྣང་བ་མཐའ་ཡས་ཀྱི་སྐུ་རང་རྐྱ་བ་མཐོང་བ་ཡིན་ནོ༔ མུ་མེན་གྱི་སྐུ་ལ་བྱས་ན་དོན་ཡོད་གྲུབ་པའི་སྐུ་མཐོང་བ་ཡིན་ནོ༔ ལྕགས་སམ་བཻཌཱུརྻ་ལས་བྱས་པའི་སྐུ་ལ་བལྟས་ན་རྣམ་སྣང་གི་སྐུ་མཐོང་བ་ཡིན་ནོ༔ ཡང་ཤེལ་གཅིག་ལས་གཅིག་བལྟས་ན་རིག་པ་དྲི་མ་དང་བྲལ་བའི་སྐུ་གཏན་ལ་ཕེབས་པའི་དཔེའོ༔ ཡང་རང་གི་མདུན་དུ་རྨ་བྱའི་མདོངས་གཅལ་དུ་བཀྲམ་སྟེ་བལྟས་ན་ཐིག་ཕྲན་རྣམས་གཏན་ལ་ཕེབས་སོ༔ ཡང་ཉི་གྲིབ་མཚམས་སུ་ནུབ་ཕྱོགས་ཀྱི་གྲིབ་མའི་ངོས་ནས་སྐྱེས་བུ་ཞིག་གིས་རྔ་ཡབ་ཆུར་བཅུག་པ་གཡབས་ནས༔ སྐལ་ལྡན་གྱིས་ཤར་ངོས་ནས་བལྟས་ན་འོད་ལྔའི་སྣང་བའི་རང་བཞིན་དུ་མཐོང་སྟེ༔ དེ་ཉིད་ཉམས་སུ་བླངས་ན་འབྱུང་བའི་རྩལ་ནུབ་པའི་ཚེ་དེ་ལྟར་དུ་སྣང་བའི་དཔེའོ༔ ཡང་ནམ་དྭངས་པའི་ཚེ་སྐལ་ལྡན་ཤིང་ཏ་ལའི་སྡོང་པོའི་རྩར་སོང་སྟེ་གཅིག་གི་དབྱུག་པས་ཏ་ལའི་ལོ་མ་རྣམས་ཕབ་སྟེ་སྐལ་ལྡན་གྱིས་ནུབ་ནས་ཤེལ་གྱིས་གོང་ལྟར་བལྟས་ན༔ འོད་ཀྱི་མེ་ལོང་ནམ་མཁའ་ལ་འབབ་པར་མཐོང་སྟེ༔ དེས་ནི་རིག་པའི་ཡོན་ཏན་གཏན་ལ་ཕེབས་སོ༔ ཡང་ནམ་དྭངས་པའི་ཚེ་ཤར་ཕྱོགས་སུ་བུམ་པ་ཆུ་ཡིས་བཀང་བ་བཟུང་སྟེ་བར་སྣང་ནས་ས་ལ་ཆུའི་རྒྱུན་སྤྲེང༔ སྐལ་ལྡན་གྱིས་ཁ་ཤར་དུ་བལྟས་ནས་བར་དོའི་དབང་གི་ཆུ་བོ་གཏན་ལ་ཕེབས་སོ༔ ཡང་སྐལ་ལྡན་ཞིག་གིས་མདུན་དུ་དར་སྣ་ཚོགས་ལས་བྱས་པའི་ཕྱེ་མ་ཕུར་མས་གཡབ་སྟེ༔ གཅིག་གིས་བལྟས་ན་བར་དོའི་མཆོད་པའི་ལྷ་མོ་རྣམས་གར་བྱེད་པ་གཏན་ལ་ཕེབས་སོ༔ ཡང་རང་གི་མདུན་དུ་སྐལ་ལྡན་རྒྱན་སྣ་ཚོགས་ཀྱིས་བརྒྱན་པ་ཞིག་འདུག་སྟེ་རང་ཡང་རྒྱན་གྱིས་བརྒྱན་ནས་དེ་གཉིས་ཀྱི་སྙིང་ཁར་དར་སྣ་ཚོགས་ཐག་པ་འཐེན་ཏེ་དེའི་མདོ་མདོར་མེ་ལོང་ཡང་བཏགས་ལ་སྐྱེས་བུ་གཉིས་ཀྱིས་ཤེལ་རེ་བཟུང་སྟེ་བལྟས་པས་གཅིག་ལ་གཅིག་འོད་ཀྱི་སྙེ་ཚན་དུ་མཐོང་སྟེ༔ བར་དོ་ལ་རིགས་ལྔ་ཡབ་ཡུམ་གྱི་བྱང་ཆུབ་ཀྱི་སེམས་རྒྱུན་གཏན་ལ་ཕེབས་སོ༔ ཡང་ནམ་དྭངས་པའི་ཚེ་སྐལ་ལྡན་དེ་གན་རྐྱལ་དུ་ཉལ་ཏེ༔ རང་གི་སྙིང་ཁར་གདུགས་གསེར་གྱི་ཡུ་བ་ཅན་གཅིག་བཟུང་སྟེ་མིག་གཡོན་པས་གསལ་བྱེད་ཀྱིས་བལྟས་ན་རིག་པ་མ་བུ་འབྲེལ་བ་དང་ལྷུན་གྲུབ་ཀྱི་སྣང་བ་གཏན་ལ་ཕེབས་སོ༔ ཡང་ནམ་དྭངས་པའི་ཚེ་གསེར་གྱི་དྲིལ་བུ་གཡེར་ཁའི་ཕྲེང་བ་སྐྱེས་བུ་གཅིག་གིས་སྤྱི་བོར་འཐེན་ཏེ༔ ཡང་སྐལ་ལྡན་གྱིས་བལྟས་ནས༔ དེ་ལ་ཡང་གཅིག་གིས་དབྱུག་པ་དལ་བུས་བརྒྱབ་ཅིང་གོང་ལྟར་བལྟས་ན་རིག་པ་འགྱུ་བ་རླུང་གི་སྒྲ་དང་བཅས་པ་གཏན་ལ་ཕེབས་སོ༔ དེ་རྣམས་ནི་གཞི་རིག་པ་ལ་ངོ་སྤྲད་པའོ༔ དོན་དེ་དག་གསུམ་གྱི་ཕྱི་ཡུལ་ལ་ངོ་སྤྲད་པས་བར་དོར་ལམ་ལ་བརྟན་པ་ཐོབ་པའི་དགོས་པ་ཡོད་དོ༔ གཉིས་པ་ནང་སེམས་རིག་ལ་ངོ་སྤྲད་པ་ལ་གཉིས་ཏེ༔ བྱ་བྱེད་སེམས་ལ་ངོ་སྤྲད་པས་སྣང་བའི་འདུ་བ་བཅད་པར་བསྟན་པ་དང༔ མི་འགྱུར་བའི་རིག་པ་ལ་ངོ་སྤྲད་པས་འདུག་ཚུལ་ཤེས་པར་བསྟན་པའོ༔ སེམས་ལ་ངོ་སྤྲད་པ་ནི་ཉེར་གཅིག་གཏན་ལ་ཕབ་པས་འདིར་མ་སྤྲོས་སོ༔ རིག་པ་ལ་གཉིས་ཏེ༔ རིག་པ་རང་གི་ངོ་བོ་ལ་སྤྲད་པ་དང༔ རྟགས་ལ་སྤྲད་པའོ༔ རྟགས་ནི་ཐིག་ལེའི་རྟགས་སུ་རང་གི་མིག་གི་ཕུགས་སུ་རང་གི་མཐེབ་མཛུབ་ཀྱིས་དེད་པས་ཐིག་ལེ་མཐེ་བ་གང་བ་ཞིག་འཆར་ཏེ༔ དབང་གི་བརྡར་དམར་པོ་ཤས་ཆེ་བའི་འོད་དུ་ཤར་བ་དེ་ལུས་ལ་ཐིག་ལེར་གནས་པའི་རྟགས༔ མཚན་མོ་སྤྲིད་པ་དྲག་པོ་བྱུང་བའི་ཚེ་མིག་ནས་མེ་སྟག་དམར་པོ་འཕྲོ་བའི་ཚུལ་འོད་དུ་འཆར་ཏེ་ཤེས་རབ་ཀྱི་རྟགས༔ དབྱིངས་ཀྱི་རྟགས་ཨ་ཐམ༔ ཡེ་ཤེས་ཀྱི་རླུང་གི་རང་སྒྲ་ནི༔ རྣ་བའི་མདུན་ངོས་མཐེབ་མོས་མནན་པས་སྒྲ་འོང་བ་དེ་ཡིན༔ ཡེ་ཤེས་ཀྱི་རྟགས་ནི༔ སྐྱེས་བུ་གཅིག་སྔ་དྲོ་ཤར་དུ་འདུག༔ བར་དུ་བཙོད་ཆུ་བཞག་སྟེ་དེ་ཡི་ནང་དུ་བལྟས་པས་ཆུའི་ནང་དུ་སྔོན་དམར་དུ་སོང་བ་དེ་ཡིན་ནོ༔ ཁའི་རླངས་པ་ཉི་ཟེར་ལ་སྔོན་དམར་དུ་ཡོད་པ་དེ་ཡེ་ཤེས་ཀྱི་རླུང་ཡིན་པའི་རྟགས༔ བ་སྤུ་རྣམས་ཉི་ཟེར་ལ་བསྟན་ན་འོད་འབྱུང་བ་ནི་སྐུའི་རྟགས༔ རིག་པའི་རྟགས་ནི་བཙོད་ཆུའི་ནང་དུ་ཁ་རླངས་འོད་དུ་འབྱུང་བ་དེ་ཡིན་ནོ༔ རིག་པའི་ངོ་བོ་ལ་གསུམ་སྟེ༔ རིག་པའི་སྐུ་ལ་ངོ་སྤྲད་པ་དང༔ རིག་པ་རང་གི་འདུག་ཚུལ་ལ་ངོ་སྤྲད་པ་དང༔ རིག་པའི་གོམས་ཚད་ལ་ངོ་སྤྲད་པའོ༔ སྐུ་ནི་གསུམ་སྟེ༔ སྤྲུལ་སྐུ་ངོ་སྤྲོད་ཀྱི་མན་ངག་གིས་སྣང་བ་འདི་གཏན་ལ་དབབ་པར་བསྟན་པས་འབྱུང་བའི་གནོད་པ་དང་བྲལ་བར་བསྟན་པ་དང༔ ལོངས་སྐུ་ངོ་སྤྲོད་ཀྱི་མན་ངག་གིས་བར་དོའི་སྣང་བ་གཏན་ལ་ཕབ་པ་སྟེ་སྐྱེ་གཉིས་མཚམ་སུ་མངོན་པར་རྫོགས་པར་བུདྡྷ་བར་བྱེད་དོ༔ ཆོས་སྐུ་ངོ་སྤྲོད་ཀྱི་གདམས་ངག་གིས་གཞི་གནས་ཆེན་པོ་གཏན་ལ་དབབ་པ་སྟེ་འཁོར་འདས་བསྲེག་ཏེ་མྱ་ངན་ལས་འདའ་བར་བྱེད་པའོ༔ རིག་པ་རང་གི་འདུག་ཚུལ་ནི༔ རིག་པ་ངོན་སུམ་གྱི་མན་ངག་ཅེས་བྱ་བ་སྟེ་དཔེ་དང་རྟགས་རྣམས་བྲལ་བར་རབ་ཏུ་གསང་བའི་དོན་དུའོ༔ རི་པ་གོམས་ཚད་ནི༔ འཁོར་འདས་རུ་ཤན་ཕྱེད་པ་ལ་སོགས་པའོ༔ དེ་ལྟར་དཔེ་དུ་མས་གཏན་ལ་ཕབ་པ་ནི་འདི་ཉིད་ལ་དབང་པོ་འབྲིང་པོ་རྣམས་ཡིད་ཆེས་པའི་དགོས་པ་དང ༔ བར་དོ་ངོ་ཤེས་པའི་དགོས་པ་ཡོད་དོ༔ མངོན་སུམ་དུ་གཏན་ལ་དབབ་པ་རྣམས་ནི་ཀུན་གྱི་སྤྱོད་ཡུལ་མ་ཡིན་པས་ཡང་མཛོད་དུ་ཨ་ཐམ༔ དེའི་ཕྱིར་ན་ངོ་སྤྲད་པ་དང་རྟོགས་པ་ཐོབ་པ་དུས་མཉམ༔ རྟོགས་པ་ཐོབ་པ་དང་ཆོས་གྲུབ་མཐའ་གཞན་ལ་བོར་དེ་ལ་བརྟགས་པ་གཅེས་བ་དུས་མཉམ༔ ཆོས་བོར་བ་དང་དབུགས་ཆད་པ་དུས་མཉམ༔ དབུགས་ཆད་པ་དང་སངས་རྒྱས་པ་དུས་མཉམ་པར་བསྟན་ནོ༔ ལྟ་བ་རང་བྱུང་གི་ཡེ་ཤེས་དཔངས་མཐོ་ཡང་དཔེ་དུ་མས་མ་བསྟན་ན་དབང་པོ་འབྲིང་པོ་རྣམས་བྷུད་མི་དྷའོ༔ ཨ་ཏི་ཡོ་ག་རྩོལ་སྒྲུབ་དང་བྲལ་ཡང་གསང་སྔགས་ཀྱི་དབང་དང་བྱིན་རླབས་མ་བྱས་ན་དབང་པོ་ཐ་མ་རྣམས་སྐྱེ་བ་གཅིག་གིས་ཐོགས་པར་མི་འགྱུར་ཏེ༔ སྐྱེ་བ་བརྒྱུད་པར་འགྱུར་རོ༔ ལྟ་བ་སྟོང་པ་ཉིད་རྒྱ་ཆེ་ཡང་རིག་པ་ཚད་ལ་མ་ཕབ་ན་སྤྱི་འབྱམས་ཏེ་དབང་པོ་རབ་ཀྱིས་འདི་ཉིད་ལ་ཡེ་ཤེས་ཀྱི་རྩལ་མི་རྫོགས་སོ༔ དེའི་ཕྱིར་ན་ཡང་མཛོད་ཀྱི་གདམས་པ་བསྟན་པའོ༔ རིག་པའི་ཡེ་ཤེས་དཔེ་དུ་མའི་སྒོ་ནས་གཏན་ལ་ཕབ་པ༔ ངོ་སྤྲོད་རིན་པོ་ཆེ་འཁོར་ལོ་ཞེས་བྱ་བ༔ སྤྲུལ་པ་པོ་དགའ་རབ་རྡོ་རྗེའི་མཛད་པ་རྫོགས་སོ༔ ས་མ་ཡ༔ ན་ར་ཀན༔ རྒྱ་རྒྱ་རྒྱ༔ རྒྱུད་མེད་རྣམ་པར་དག་པའི་སྟོན་པ་རྡོ་རྗེ་འཆང ༔ སེལ་མེད་དྲི་མ་དག་པར་ངེས་པའི་བཀའ༔ དེ་དོན་མ་ནོར་བསྡུས་པའི་ཡི་གེ་འདི༔ སངས་རྒྱས་མྱ་ངན་འདས་པའི་རྟེན་དུ་ཡི་གེར་བཏབ༔ བདག་ནི་སྐྱེ་བོའི་རིགས་མེད་ཨུ་རྒྱན་ཡུལ་དུ་ནི༔ དར་མ་སྡེ་ཡི་ལྷུམས་སུ་ཞུགས་པའི་ཚུལ་བསྟན་ནས༔ གསང་སྔགས་གསང་བའི་ཡི་གེ་འདི་དག་བཀོད༔ འཇིག་རྟེན་མུན་པ་རྣམས་ནི་འདི་ཡིས་འོད་དུ་འབར༔ རྒྱུད་དང་མན་ངག་རྣམས་སུ་རབ་ཕྱེ་ནས༔ འཇམ་དཔལ་བཤེས་གཉེན་ཉིད་ཀྱི་རྒྱུད་སྦྱང་ཕྱིར༔ མན་ངག་སྙིང་པོ་རྒྱུད་ཀྱི་གསང་དོན་བཀོད༔ བསྟན་པའི་རྒྱལ་པོ་འདི་ནི་གར་གནས་པར༔ མུན་པ་རང་དག་སྣང་བའི་འོད་དང་ལྡན༔ ཐེག་པའི་ནང་ནས་ཁྱད་འཕགས་ཨ་ཏི་གསང་བ་ཆེ༔ དེ་ཡི་ཚིག་དང་ཡི་གེ་རྒྱུད་དང་མན་ངག་ལུང༔ སྤྱི་ཡི་ལུས་བཞིན་ཕྱི་ཡི་ཡུལ་ཙམ་མཚོན༔ དེ་ལྟར་བཀོད་པའི་ཚིག་ཚོགས་གྲངས་མང་ལ༔ གསང་བའི་མན་ངག་སྙིང་ཏིག་འདི་མེད་ན༔ གཟུགས་ཀྱི་ཕུང་པོ་ཁོང་གི་སྙིང་མེད་འདྲ༔ དེ་ལྟར་ཨ་ཏི་རང་དོན་གཞུང་རྣམས་ལ༔ མཚན་པར་བྱེད་པའི་ཡི་གེ་འདི་མེད་ན༔ དབང་པོའི་དྭངས་མ་དཔྲལ་བའི་མིག་མེད་འདྲ༔ ཨ་ཏི་སྡེ་དང་གྲངས་བཀོད་ཆོས་རྣམས་ལ༔ བཤད་པར་བྱ་བའི་རྒྱུད་ཆེན་འདི་མེད་ན༔ སྒྱུར་བར་བྱེད་པ་ཁ་ཡི་ལྕེ་མེད་འདྲ༔ བསྟན་པ་འདི་ལས་ཁྱད་པར་ཆེ་བའི་ཐབས༔ གཞན་ནས་སྟོན་རེ་བདག་ནི་ན་ར་ཀན༔ དེ་ཡི་ཕྱིར་ན་ཕྱི་རབས་འཇུག་པ་རྣམས༔ འདི་ལ་གོམས་པར་གྱིས་ལ་མིག་ལྟར་འཚོལ༔ འཇམ་དཔལ་ཁྱོད་ཀྱིས་བསྟན་པའི་སྙིང་པོ་འདི༔ བསྟན་པའི་དོན་དུ་སྐལ་དང་ལྡན་ལ་བྱིན༔ སྐལ་བ་དག་དང་མི་ལྡན་བྱུང་སྲིད་ན༔ བསྟན་པའི་བཙས་སུ་རང་རྒྱ་ཐོབ་ལ་སྤོས༔ བདག་ནི་མྱ་ངན་འདའ་སྟེ་གསང་བའི་ཚིག་གསུམ་པོ༔ ཁྱོད་ཀྱིས་ཟུང་ལ་སྙིང་གི་དཀྱིལ་དུ་ཕུར༔ འདི་ནི་སྐལ་མེད་རྣམས་དང་ཐེག་དམན་ལ༔ རླུང་ཕྱོགས་ཙམ་དུ་བརྗོད་བར་མ་བྱེད་ཅིག༔ ཅི་ཕྱིར་སྐྲག་ཅིང་བརྒྱལ་ནས་གསང་སྔགས་ཉིད་སྤོང་བས༔ འདི་ཉིད་བསྐལ་བ་འཇིག་ཀྱང་སྙིང་ལ་རྒྱས་གདབ་བྱ༔ སྙིང་པོ་བྱང་ཆུབ་བར་དུ་ཁ་རུ་དབྱུང་མི་བྱ༔ ཞེས་པ་སྤྲུལ་པ་པོ་དགའ་རབ་རྡོ་རྗེས་གསུངས་པ་རྫོགས་སོ༔ ལས་ཅན་དེ་དང་འཕྲད་པར་ཤོག༔ རྒྱ་རྒྱ་རྒྱ༔ མ་རླསཱཅཏྲ༢༢གྭཐ྅྅྅༔ རྒྱ་གར་སྐད་དུ༔ པེ་ཏི་ཏ་ཀི་ལ་སྱ་མི་ཤ་ནཱ་མ༔ བོད་སྐད་དུ༔ འཆི་བ་བརྟག་པ་ཞེས་བྱ་བ༔ བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ༔ གཉིས་མེད་སྟོན་པས་འགྲོ་ལ་ཕན་གདགས་ཕྱིར༔ མཆོག་གསང་རྒྱུད་ལས་མདོར་བསྡུས་རྣམ་བཤད་པ༔ དེ་ཡི་དོན་རྣམས་རིམ་པ་ཇི་ལྟ་བར༔ རྣམ་པར་ཕྱེ་ནས་བདག་གིས་བསྟན་པར་བྱ༔ སེམས་ཅན་ལུས་རྣམས་སྡུག་བསྔལ་བཞིས་བཅིངས་པས༔ ཐུགས་རྗེ་ཆེ་མཆོག་རྡོ་རྗེ་འཆང་ཆེན་གྱིས༔ འཆི་བའི་སྡུག་བསྔལ་ཉིད་ཀྱི་དུས་ཚོད་དང༔ རྒྱུད་དུ་བཀོད་པའི་ཚིག་དོན་རྒྱ་ཆེ་ཡང༔ འཆི་བ་དང་ནི་གཉིས་ཡིན་ཏེ༔ གདོན་དང་ནད་ལ་སོགས་པ་དུས་མ་ཡིན་པར་འཆི་བ་དང༔ འབྱུང་བ་ཟད་དེ་འཆི་བའོ༔ ཇི་ལྟར་གྱུར་ཀྱང་རྟག་པ་འདིའོ༔ གང་གི་འཆི་བ་བརྟག་པའི་སྐྱེས་བུ་དེས༔ བླ་མ་དཀོན་མཆོག་ལ་ཚོགས་གསོག་པ་སྔོན་དུ་འགྲོ་བས་མཁའ་འགྲོ་དང་ཆོས་སྐྱོང་མཆོད་ལ༔ འཆི་བར་ངེས་པའི་དུས་བརྟག་པ་ལ་གསུམ་སྟེ༔ ཕྱི་ཕུང་པོ་ལ་བརྟག་པ་དང༔ ནང་རླུང་ལ་བརྟག་པ་དང༔ གསང་བ་རིག་པ་ལ་བརྟག་པའོ༔ དང་པོ་ལ་གཉིས་ཏེ༔ གཞན་གྱི་ཕུང་པོ་ལ་བརྟག་པ་དང༔ རང་གི་ཕུང་པོ་ལ་བརྟག་པའོ༔ དང་པོ་ལ་གཉིས་ཏེ༔ དབྱིབས་དང་ཁ་དོག་ལ་བརྟག་པ་དང༔ རྩ་དང་རླུང་ལ་བརྟག་པའོ༔ དང་པོ་ལ་གཉིས་ཏེ༔ ཚེ་ཡི་ཡན་ལག་ལ་བརྟག་པ་དང༔ དབང་པོ་ལ་བརྟག་པའོ༔ ཡན་ལག་ནི༔ སེན་མོའི་བཀྲག་ཤོར་ན་ཟླ་བ་དགུའི་ཉིན་ཕྱེད་ན་ནད་ཀྱིས་བཏབ་ན་འཆི་བའོ༔ མིག་གི་མཐའ་སྤྲིས་དཀར་པོ་ཡལ་ན་ཟླ་བ་ལྔ་ན་འཆིའོ༔ ལྟག་པའི་བདུད་སྒོ་ནས་སྐྲ་མཚོམ་གཅིག་གྱེན་ལ་ལངས་ན་ཞག་ཉི་ཤུ་རྩ་གཅིག་ནས་འཆིའོ༔ རྐང་པའི་ལོང་བུ་ཕྱིར་ལོག་ཏུ་འགྱུར་ན་ཟླ་བ་གཅིག་གི་འབྱུང་བ་ཟུག་པའི་དུས་སུ་འཆིའོ༔ སྐྱེས་བུ་ནད་ཀྱིས་བཏབ་པ་ལ་བརྟག་པ་ནི༔ སོ་རྣམས་ཀྱི་རྩ་བར་རྡུལ་དང་དྲེག་པ་ཆགས་ན་འབྱུང་བའི་བདུད་འདུས་པ་ཞེས་བྱ་སྟེ་ཞག་དགུ་ན་འཆིའོ༔ སྣ་ཞོམ་ན་རླུང་གི་སྒོ་འགག་པ་ཞེས་བྱ་སྟེ་ཞག་ལྔ་ན་འཆིའོ༔ རྟག་ཏུ་ཡན་ལག་བརྐྱངས་ན་འབྱུང་བའི་རི་སྙེག་པ་ཞེས་བྱ་སྟེ་ཞག་བདུན་ནའོ༔ འབྱེད་འཛུམ་མེད་པར་མིག་འབྲུ་ཚུགས་སུ་བལྟ་ན་རླུང་ཡུལ་ལ་ཤོར་བ་ཞེས་བྱ་སྟེ་ཞག་གསུམ་ནའོ༔ མིག་གི་ཚིགས་འཁྲུལ་ཞིག་ཡུད་གློག་གློག་ཙམ་གྱེན་ལ་བལྟ་ན་ཆུའི་རྦ་ལོག་པ་ཞེས་བྱ་སྟེ་ཞག་བཅོ་ལྔ་ནའོ༔ འགྲམ་པའི་ཤ་ཤོར་གཤོར་བུ་བྱུང་ན་སའི་སྒང་རལ་བ་ཞེས་བྱ་སྟེ་ཞག་བཅུ་དགུའི་འབྱུང་བ་ཟུག་པའི་དུས་ན་འཆིའོ༔ དབུགས་ཡང་ཡང་རྒོད་ན་རླུང་གི་གྲངས་འདེས་པ་ཞེས་བྱ་སྟེ་ཞག་དྲུག་ནའོ༔ སྣ་གཡས་གཡོན་དུ་ཡོ་ན་སྣའི་མན་ཇི་ཀ་ཆད་པ་ཞེས་བྱ་སྟེ་ཞག་བདུན་ནའོ༔ མིག་གི་མཆི་མ་མི་ཐུབ་པར་འཛག་ན་བར་ཆད་པ་ཞེས་བྱ་སྟེ་ཞག་ལྔ་ནའོ༔ འགྲམ་པ་གཡོན་གཤོང་བུར་སོང་ན་བར་ཤ་ཆད་པ་ཞེས་བྱ་སྟེ་ཞག་གཅིག་ནའོ༔ སོ་འཐམས་ན་འབྱུང་བའི་ལམ་ཆད་པ་ཞེས་བྱ་སྟེ་ཞག་གསུམ་གྱི་ཉི་མ་ཕྱེད་ནའོ༔ ལྕེ་ལ་སྔར་མེད་པའི་ཐིག་ལེ་ནག་པོ་བྱུང་ན་ཞག་གཉིས་ཀྱི་འབྱུང་བ་ཟུག་པའི་དུས་ནའོ༔ རྣ་བ་ལེབ་མོར་འབྱར་ན་རྣ་བའི་གནས་འཐེན་ཆད་པ་ཞེས་བྱ་སྟེ་ནམ་ཕྱེད་ནའོ༔ བྲང་གི་ལྷན་སྣ་ཞོམ་ན་ཆུའི་རྐ་ཆད་པ་ཞེས་བྱ་སྟེ་ཟླ་བ་ཕྱེད་ཀྱི་བྱེར་བའི་དུས་ནའོ༔ རྩ་གཉིས་ལོག་མེད་ན་མེའི་ས་བོན་སྟོང་པ་ཞེས་བྱ་སྟེ་ཟླ་བ་ཕྱེད་ཀྱི་མེའི་དུས་ནའོ༔ དེ་དག་ནི་གཞན་ལ་སྟེ་ནམ་ཕྱེད་ནའོ༔ རྣལ་འབྱོར་པ་རང་གི་དོན་དུ་བརྟག་པ་ནི། སྔོན་དུ་བླ་མ་ལ་སོགས་ལ་ཚོགས་བསགས་པ་ལ་བྱའོ། །དེ་ཡང་ནམ་མཁའི་ཁམས་སུ་ཚེའི་གཟུགས་བརྙན་ཡལ་ལམ་མ་ཡལ་བརྟག་པ། བར་སྣང་ཁམས་སུ་གནམ་ས་གཉིས་ཀྱི་འབྲེལ་ཐག་ཆད་དམ་མ་ཆད་བརྟག་པ༔ རི་རབ་ཀྱི་ལོགས་ལ་སེང་གེ་དཀར་མོའི་མི་བབས་སམ་མ་བབས་བརྟག་པ༔ རི་ཐང་མཚམས་སུ་ལྗོན་ཤིང་གི་སྐེད་པ་ཆག་གམ་མ་ཆག་བརྟག་པ༔ རྒྱ་མཚོའི་གཏིང་དུ་ཆུའི་སྤྲིས་མ་ཡལ་ལམ་མ་ཡལ་བརྟག་པ༔ སའི་གྲོང་ཁྱེར་དུ་དགེ་སྦྱོང་གི་དུད་པ་ཆད་དམ་མ་ཆད་བརྟག་པ༔ རི་རབ་ཀྱི་རྩེ་ལ་མི་འགྱུར་བའི་ཉི་མ་ནུབ་བམ་མ་ནུབ་བརྟག་པ༔ རི་རབ་ཀྱི་ཁོང་གསེང་ན་མཁའ་འགྲོ་མའི་རང་སྒྲ་ཆད་དམ་མ་ཆད་བརྟག་པ༔ དཔག་བསམ་གྱི་ཤིང་ལ་འཆི་བདག་གི་བདུད་ལངས་སམ་མ་ལངས་བརྟགས་པའོ༔ དང་པོ་ནི་ནམ་དྭངས་པའི་ཚེ་སྔ་དྲོའམ་ཕྱི་དྲོ་ལ་རང་གི་གྲིབ་མའི་སྙིང་ཁར་རྡོའམ་ཤིང་བཙུགས་ལ་མིག་གཏད་དེ་ལངས་ལ་དབྱུག་པའམ་ཕྲེང་བཟུང་ནས༔ ཡན་ལག་བརྐྱངས་པའི་གྲིབ་མ་ལ་བལྟས་ནས་ནམ་མཁར་བལྟས་པས་གཟུགས་བརྙན་འཆར་ཏེ་ཡན་ལག་ཚང་ཞིང་གོས་གྱོན་པའི་ཁ་དོག་ཤར་ན་སྐྱོན་མེད་དོ༔ བར་ཆད་ལ་གསུམ་སྟེ༔ ཆད་ལྷག་ལས་འཆི་བའི་དུས་བཟུང་བ༔ ཀ་དོག་ལས་གདོན་ངོས་བཟུང་བ༔ དབྱིབས་ལ་བསླུ་བས་བཟློག་གམ་མི་ལོག་ངོས་བཟུང་བའོ༔ དང་པོ་ནི་ལག་གི་ཕྱག་མཚན་མེད་ན་བརྟེན་པའི་ལྷ་དང་བྲལ་བས་ལོ་བདུན་ན་འཆིའོ༔ ལག་པ་གཡས་མེད་ན་ལོ་ལྔ་ནའོ༔ གཡོན་མེད་ན་གསུམ་ནའོ༔ རྐང་པ་གཡས་པའི་པུས་མོ་མན་ཆད་མེད་ན་ལོ་གཉིས་ནའོ༔ ཐམས་ཅད་མེད་ན་ཟླ་བ་བརྒྱད་ནའོ༔ རྐང་པ་གཡོན་མེད་ན་ལོ་གཅིག་ནའོ༔ མགོ་ཡི་གཡས་ཕྱེད་མེད་ན་ཟླ་བ་དགུ་ནའོ༔ གཡོན་མེད་ན་ཟླ་བ་བདུན་ནའོ༔ རྐེད་ཡན་ཆད་མེད་ན་ཟླ་བ་ལྔ་ནའོ༔ རྐེད་དང་བཅས་པ་མེད་ན་ཟླ་བ་གསུམ་ནའོ༔ རོ་སྟོད་མེད་ན་ཟླ་བ་གཉིས་ནའོ༔ སྨད་མེད་ན་ཟླ་བ་གཅིག་ནའོ༔ ལུས་ཕྱེད་ཚལ་གྱི་གཡས་མེད་ན་ཞག་ཉི་ཤུ་རྩ་དགུ་ནའོ༔ གཡོན་མེད་ན་ཞག་ཉི་ཤུ་རྩ་གཅིག་ནའོ༔ དབྱིབས་ལ་གྲུ་བཞིར་བྱུང་ན་བསླུ་བས་བཟློག་གོ༔ ཟླུམ་པོ་དང༔ ནར་མོ་དང༔ ཟླ་གམ་ཡང་དེ་བཞིན་ནོ༔ རོ་བསྟུམས་པ་ལྟ་བུ་དང༔ གྲུ་གསུམ་ནི་ཐུགས་རྗེ་ཆེན་པོས་ཀྱང་མི་བཟློག་གོ༔ ཁ་དོག་ནི་དཀར་པོ་ལས་དབུས་ནས་ཡལ་ན་ཀླུ་དང་རྒྱལ་པོས་ཟིན་པའོ༔ ནག་པོ་གཡས་ནས་ཡལ་ན་བདུད་དང་མ་མོའི༔ དམར་པོ་གཡོན་ནས་ཡལ་ན་ཀླུ་བཙན་དང་རྒྱལ་འགོང་ངོ༔ སྔོན་པོ་རྐང་པ་ནས་ཇེ་ཐུང་ཡལ་ན་ཀླུ་དང་མཚོ་སྨན་ནོ༔ ནག་བན་བུན་དུ་འདུག་ན་མ་མོ་དང་གཤིན་རྗེས་ཟིན་པའོ༔ སེར་བྲེང་བྲེང་ནི་ས་བདག་གོ༔ ཁྲ་ཁྱུག་ཁྱུག་ནི་ཤི་འདྲེའོ༔ གནམ་ས་གཉིས་ཀྱི་འབྲེལ་ཐག་ལ་བརྟག་པ་ནི༔ ཉིན་ཕྱེད་དུས་སུ་ཁ་ལྷོར་བལྟས་ལ་གྲུ་མོ་པུས་མོའི་སྟེང་དུ་བཞག་ནས་ལག་ངར་གྱེན་ལ་བསྒྲེངས་པས་ཁུ་ཚུར་སྨིན་ཕྲག་ཏུ་བཅངས་པ་ལ་མིག་ཟུར་མཉམ་པར་བལྟས་པས་ལག་ངར་ཤིན་ཏུ་ཕྲ་མོར་འོང་ངོ༔ དེ་ཉིད་ཆད་ན་ཞག་བཅུ་དགུ་ན་འཆིའོ༔ རི་རབ་ཀྱི་སེང་གེ་ཞོན་པའི་མི་ལ་བརྡག་པ་ནི༔ ཉི་ཤར་གྱི་ཤར་ཕྱོགས་སུ་ཆུའི་རྫིང་ལྟེང་ཀ་ཡོད་པའི་ནུབ་ངོས་ཀྱི་གྱང་ངམ་རྩིག་ངོས་ལ་རང་གི་གྲིབ་མ་ཉིས་བརྩེགས་སུ་འོང་བའི་སྟེང་མ་མེད་ན་ཆུའི་མི་སྟོར་བ་ཞེས་བྱ་སྟེ་ཞག་བཅུ་དྲུག་གི་ཉིན་ཕྱེད་ན་འཆིའོ༔ རི་ཐང་མཚམས་སུ་ལྗོན་ཤིང་གི་རྐེད་པ་ལ་བརྟག་པ་ནི༔ རྩ་རྣམས་ལ་བརྟག་པ་སྟེ་འདིར་མ་བྲིས་སོ༔ རྒྱ་མཚོའི་གཏིང་དུ་ཆུའི་སྤྲིས་མ་བརྟག་པ་ནི༔ མཚན་མོ་ཆང་མང་པོ་མ་འཐུངས༔ འཁྲིག་པ་མ་སྤྱད༔ གཏམ་མང་པོ་མ་སྨྲས་པའི་ནང་པར་ཉི་མ་རྩེ་ཤར་ལ་ཤར་དུ་བལྟས་ཏེ་འཁར་ཕོར་ལ་སོགས་པ་སྣོད་དཀར་ནག་རན་པར་རང་གི་ཆུ་ལ་བརྟག་པ་སྟེ་རླངས་པ་སྔོན་དམར་དུ་བྱུང་ན་ཟླ་བ་ཕྱེད་ན་འཆིའོ༔ ནག་པོ་ཧྲལ་ཧྲོལ་དུ་སོང་ན་ཞག་བཅུ་གཅིག་ནའོ༔ དམར་པོ་ཐིག་ལེ་ཅན་ནི་ཞག་དགུ་ནའོ༔ དེ་མ་ཡིན་པ་ནི་ཚེའི་དུས་མི་བྱེད་དོ༔ ཁ་དོག་ལས་གདོན་བརྟག་པ་ནི་སྔར་དང་འདྲའོ༔ སའི་གྲོང་ཁྱེར་དུ་དུ་བ་ལ་བརྟག་པ་ནི༔ ཉི་མ་རྩེ་ཤར་ན་དྲི་ཆེན་གྱི་རླངས་པ་མེད་ན་ཞག་དགུ་ནའོ༔ རི་རབ་ཀྱི་རྩེ་ནས་ཉི་མ་བརྟག་པ་ནི༔ མིག་གི་འོད་མེད་ན་ཞག་གསུམ་ནའོ༔ རི་རབ་ཀྱི་ཁོང་གསེང་གི་སྒྲ་ལ་བརྟག་པ་ནི༔ སེང་གེ་ཉལ་ཐབས་ལས་རྣ་བ་ས་ལ་སྦྱར་བས་སྒྲ་འབྱུང་བ་སེམས་ཅན་འགུལ་བ་སྐད་ཤག་ཤག་གྲགས་ན་སྐྱོན་མེད༔ རླུང་གི་སྒྲ་བྱུང་ན་ཞག་བདུན་ནམ་བཅུ་གཅིག་ནའོ༔ སྐད་མེད་ན་ཞག་བཅུ་གཅིག་ནའོ༔ དཔག་བསམ་གྱི་ཤིང་ལ་བརྟག་པ་ནི༔ ལྟག་པའི་བདུད་སྒོ་ན་སྐྲ་ཚོམ་གཅིག་གྱེན་ལ་ལངས་ན་ཞག་བདུན་ནའོ༔ འདི་དག་ཕལ་གྱི་དབང་དུ་བྱས་པ་སྟེ་རྒས་པ་ལུས་ཟུངས་ཟད་པ་རྣམས་ལ་ངེས་པ་མེད་དོ༔ རྣལ་འབྱོར་པས་མོ་དང་དཔྱད་པས་མོ་དང་དཔྱད་ལ་སོགས་པའི་རྟེན་འབྲེལ་ཐུན་མོང་བ་རྣམས་ཀྱི་སྤྲོས་པ་དང་བྲལ་བར་བྱ་བའི་ཕྱིར་རོ༔ འཆི་བ་བརྟག་པའི་གལ་མདོ་ཞེས་བྱ་བ་སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་མཛད་པ་རྫོགས་སོ༔ སངས་རྒྱས་ཀུན་གྱི་དགོངས་པ་ངེས་པའི་བཀའ༔ སྒྲ་ཚིག་རྟགས་སུ་བཀོད་པ་མ་ཡིན་པར༔ དོན་དམ་སྙིང་པོ་ངེས་པའི་བཀའ་གསང་འདི༔ འབྲས་བུ་ཡང དག་ངེས་པའི་སྙིང་པའོ༔ བདག་གི་བག་ཆགས་ཉིད་ཀྱི་ལུས་རྣམས་ནི༔ རི་རབ་ཉིད་ཀྱི་རྡུལ་གྱི་གྲངས་སྙེད་གཅིག་ནས་གཅིག་ཏུ་བླངས༔ ལུས་ཀྱི་ཐ་མ་དྭངས་སྙིགས་འབྱེད་པ་ནི༔ རྒྱ་གར་ནུབ་ཕྱོགས་རིམ་གཉིས་གྲོང་ཁྱེར་དུ༔ བྲམ་ཟེའི་རིགས་མཆོག་ལེགས་ལྡན་སྟོན་པ་དང༔ སྣང་བའི་སྒྲོན་མ་གཉིས་ཀྱི་བུར་སྐྱེས་ཏེ༔ ཤེས་རབ་དང་ལྡན་ཡི་གེའི་རིགས་རྣམས་དང༔ སྒྲ་ཚིག་ཀུན་མཁས་འཇམ་དཔལ་རྣོན་པོས་བཟུང༔ མཁས་པའི་བློ་ལྡན་སྙིང་ཐིག་དོན་རྙེད་ནས༔ གསང་ལུང་ཉིད་དུ་བརྟུལ་ཞུགས་སྤྱོད་པ་མཛད༔ འཇམ་དཔལ་ལུང་བསྟན་སྤྲུལ་པ་ཉིད་དང་མཇལ༔ ཡུན་གྱི་སྒྲིབ་པ་མ་སྦྱངས་གནས་སུ་དག༔ སངས་རྒྱས་སྤྲུལ་པས་དམ་པའི་དོན་དག་གི༔ བཀའ་གསང་སྙིང་པོ་ཐུགས་ཀྱི་དཀྱིལ་ནས་ཕྱུང ༔ བདུད་རྩིའི་ཆུ་རྒྱུན་བདག་གི་སྙིང་ལ་བབས༔ མ་རིག་རང་དག་ཡེ་ཤེས་འོད་ཀྱིས་སྦྱངས༔ དཔེར་ན་ཉི་ཤར་མུན་པ་སངས་པ་བཞིན༔ འབུམ་ཚོའི་གྲངས་ལས་རྒྱས་བསྡུས་ཕྱེ་ནས་བསྟན༔ བདག་ནི་སྔོན་ནས་སྦྱངས་པའི་ལས་སད་དེ༔ ཇི་ལྟར་གནས་བཞིན་གོ་བའི་སེམས་བྱུང་ནས༔ བསྟན་པ་དམ་པའི་བདག་པོར་བདག་ཉིད་གྱུར༔ བདག་དང་མཇལ་ནས་བདུན་ཅུ་རྩ་ལྔ་ན༔ སྤྲུལ་པ་པོ་ནི་མི་སྣང་དབྱིངས་སུ་གཤེགས༔ ཚིག་གསུམ་གཏན་གྱིས་འཁོར་བའི་ཞེན་ཐག་བཅད༔ དེ་ནས་བདག་གི་བློ་ལ་དགོངས་ཤར་བ༔ བསྟན་པ་དམ་པ་འདི་རྙེད་རབ་དྲིན་ཆེ༔ སྟོང་གསུམ་གང་བའི་རིན་ཆེན་རྙེད་གྱུར་ཀྱང༔ ཚེ་གཅིག་ཙམ་སྟེ་ཆུ་བོའི་རྒྱུན་འབབ་འདྲ༔ སྔ་མའི་སྤྱོད་ཡུལ་མིན་པར་ཕྱི་མའི་རྒྱུད་དང་ཕྲད༔ བསྟན་པ་ཉིད་ནི་ཡུན་གྱི་རྫས་དང་ནོར༔ དམ་པ་ཉིད་ཀྱི་དྲིན་ནི་གང་གིས་འཁོར་ཐབས་མེད༔ བདག་གི་ལུས་དང་ངག་དང་ཡན་ལག་ཐམས་ཅད་ནི༔ ལན་སྟོང་བར་དུ་ཉིད་ལ་མཆོག་ཕུལ་ཡང༔ དམ་པའི་བཀའ་དྲིན་རྡུལ་ཆ་ཙམ་མི་འཁོར༔ དེས་ན་དམ་པ་དྲི་མེད་མགོན་ལ་ལུས་སོགས་མཆོད༔ དེ་ལྟར་དམ་པའི་འོག་ཏུ་བདག་ལ་བསམ་ཤར་བ༔ སྐལ་ལྡན་སྙིང་གི་རིགས་མཆོག་གཅིག་མེད་པས༔ སུ་ལའང་མ་བསྟན་འཕངས་པའི་ཡིད་བཞིན་ནོར་མཆོག་འདི༔ སངས་རྒྱས་ཀུན་གྱི་བསྟན་པའི་བཙས་སུ་ནི༔ རྒྱ་ཡིས་བཏབ་སྟེ་སྦ་བར་བློར་ཤར་ནས༔ རྡོ་རྗེ་གདན་གྱི་འོག་ཏུ་སྦས་ནས་བཞག༔ ཕྱི་རབས་སྐལ་བ་ཅན་ལ་སྨོན་ལམ་བཏབ༔ དེ་ལྟར་སྦས་ནས་བདག་ནི་གང་དགར་སྤྱོད༔ འབྱུང་བའི་དྭངས་ཡལ་ཚེ་ཡི་ཐ་མ་ལ༔ རྒྱ་ནག་རིགས་མཆོག་སིང་ཧ་ཉིད་དང་ནི༔ དུར་ཁྲོད་ཆེན་པོ་བསིལ་བ་ཚལ་དུ་ཕྲད༔ སྔོན་གྱི་སྐལ་ལྡན་སྙིང་གི་བུ་གཅིག་པོ༔ བསྟན་པའི་ཡང་སྙིང་བུ་ཡི་བུ་ལ་གཏད༔ འདི་ཉིད་སྙིང་ལ་བརྣོགས་ཏེ་རྒྱས་ཐོབ་ལ༔ སྙིང་པོ་བྱང་ཆུབ་བར་དུ་ཁར་མི་དབྱུང༔ གལ་ཏེ་བསྟན་ཞིང་སྦྱིན་པའི་དུས་བྱུང་ན༔ སྙིང་དང་འདྲ་བ་གཅིག་ལས་མང་བ་ན༔ མ་ཧཱ་ཀཱ་ལ་ལེགས་ལྡན་ནག་པོ་ཡིས༔ ཚེ་ལ་བར་ཆད་གྱིས་ལ་སྙིང་ཁྲག་ཐར་ལ་སྐྱུགས༔ དེ་ཡི་ཕྱིར་ན་འདི་ཉིད་སྙིང་ལ་ཟུངས༔ ང་ནི་འདི་ནས་འབྱུང་བ་རང་དེངས་འོག༔ སུམ་བརྒྱ་ཉི་ཤུ་ལྔ་འདས་ལོ་ཡི་འོག༔ རྒྱ་གར་ནུབ་ཕྱོགས་གསེར་གྱི་མེ་ཏོག་གླིང༔ བརྫུས་ནས་སྐྱེ་ཞིང་སྤྲུལ་པ་དེ་ཉིད་ཀྱིས༔ པདྨ་འབྱུང་གནས་ཨུ་རྒྱན་རྒྱལ་པོའི་རིགས༔ དད་བརྩོན་ལྡན་པ་དེ་དང་ཕྲད་ནས་ནི༔ གསང་སྔགས་སྒྲུབ་སྡེའི་དོན་རྣམས་ངེས་ཤེས་འགྱུར༔ དེ་ནས་ཡང་དག་སྙིང་པོའི་བསྟན་པ་འདི༔ རྣལ་འབྱོར་སྒྲུབ་ལ་བརྩོན་པའི་ཨཱརྱ་དེ་ཝ་ལ༔ དེ་ཉིད་སྣང་བར་གྱུར་ནས་དེ་ཡང་རང་དེངས་སུ༔ དུར་ཁྲོད་འཇགས་མའི་གླིང་དུ་དེ་ཉིད་གྲོལ༔ དེ་ལྟར་བདག་གིས་འདི་ཉིད་ཉམས་བླངས་པས༔ སྣང་བ་ཐམས་ཅད་ཟད་དེ་དེ་ཉིད་བསྒྱུར༔ མིག་གི་སྤྱོད་ཡུལ་འགྱུར་ཏེ་འབྱུང་བ་རང་ཟད་འདིའོ༔ སྒྲ་དང་དྲི་རོ་ཉིད་དང་སྒོ་ལྔའི་ཁ་དོག་དེངས༔ མངོན་ཤེས་ལྡན་ཞིང་དབྱུང་བའི་དགྲ་རྣམས་ཟད༔ ལུས་ལ་སངས་རྒྱས་རྣམས་ཀྱི་སྐུ་ཡི་ཡོན་ཏན་ཤར༔ སྣང་བ་རྣམས་ནི་ཟད་པའི་སར་སྐྱེས་པས༔ དྲན་ཚོར་ཐམས་ཅད་མི་རྟོག་ཡེ་ཤེས་སོ༔ རྟོགས་པས་སངས་རྒྱས་དང་ནི་ཤེས་རབ་མཉམ༔ དེ་ཉིད་དཔེ་ཡི་ལུང་ལ་ཇི་ལྟར་སྣང་བ་བཞིན༔ བདག་གི་བློ་ལ་དེ་ཡི་སྤྱོད་ཡུལ་དུ༔ སྣང་བ་རྣམས་ནི་ཟབ་ཅིང་རྒྱ་ཆེའོ༔ དེ་ཡི་དོན་རྣམ་དྲིལ་བ་སིང་ཧ་ལ༔ གཏད་ཀྱིས་འབྱུང་བའི་དགྲ་དང་བྲལ་བར་གྱིས༔ སྙིང་ལ་ཕུར་ལ་ཡིད་ལ་རྣམ་པར་དཔྱོད༔ ཅེས་སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་གསུངས་སོ༔ གཏད་པའི་རྒྱ་དང་བཅས་པ་རྫོགས་སོ༔ ༔ཁ།བབླ།མཱརྦ།ཧ།རྒ།྅྅྅༔ རྒྱ་གར་སྐད་དུ༔ ཏྲོ་ཏ་ལ་མུ་གྷ་བྷེ་ལ༔ བོད་སྐད་དུ༔ འཆི་བ་བསླུ་བ༔ བཅོམ་ལྡན་འདས་གཞོན་ནུ་ཁྲོ་གཉེར་ཅན་ལ་ཕྱག་འཚལ་ལོ༔ འགྲོ་བ་སྡུག་བསྔལ་རྣམས་ལས་གྲོལ་བར་བྱ་བའི་ཕྱིར༔ འཆི་བའི་སྡུག་བསྔལ་ཤིན་ཏུ་མི་བཟད་དྲག་པོ་རྣམས༔ ཐུགས་རྗེ་ཆེན་པོས་དེ་དག་མ་ལུས་གཟུང་བྱའི་ཕྱིར༔ འཆི་བ་ལས་བཟློག་དུས་ལས་བཤོས་འདེབས་རྣམ་པར་བཤད་པར་བྱ༔ དེ་ལ་རིགས་ཀྱི་བུ་ཁ་ཅིག་ལ་གོང་གི་འཆི་བའི་རྟགས་བྱུང་བ་དེ་དག་ལས་ལོར་ནུར་བ་དང༔ ཟླ་བར་ནུར་བས་བཟློག་པའི་མན་ངག་ལ༔ སྤྱིར་དྲིལ་ནས་བཟློག་པ་དང༔ བྱེ་བྲག་ཏུ་བཟློག་པའོ༔ དང་པོ་ནི་བར་ཆད་ཀྱི་གདོན་འབྱུང་པོ་རྣམས་ཀྱིས་ཚེ་འདུ་བྱེད་པ་ཡིན་ཏེ༔ ལུས་འབྱུང་བ་ལྔའི་རྟེན་ཡན་ལག་ལྔ༔ དབང་པོ་ལྔ༔ དོན་སྙིང་ལྔ༔ སྣོད་ལྔ༔ རྩ་ཆེན་པོ་ལྔའི་རང་བཞིན་དུ་གནས་པར་རྐྱེན་ལོ་ཟླ་ཉིན་མཚན་གྱི་འཕོ་བས༔ གྱིས་བསླངས་ཏེ་འཆི་བ་དང༔ འབྱུང་བ་ལོ་གཅིག་ལ་ཟླ་བ་བཅུ་གཉིས་ཀྱི་དུས་སུ༔ འབྱུང་བ་རེས་ཟླ་བ་གཉིས་དབང་ངོ༔ གཉིས་སྤྱི་ཁྱབ་ཏུ་གནས༔ ཟླ་བ་གཅིག་ལ་རེ་རེས་ཞག་ལྔ་ལྔ་དབང༔ ལྔ་སྤྱི་ཁྱབ་ཏུ་གནས༔ ནང་འཁྲུགས་པས་འཆི་བ་དང༔ བར་ཆད་གདོན་གྱིས་འཆི་བའོ༔ དེའི་རྟགས་སུ་འཆི་ལྟས་འབྱུང་བ་རྣམས་རྟོགས་པའོ༔ དེ་ཡང་བྱུང་མ་ཐག་ཆོ་ག་དང་རིམ་གྲོ་དང་ལྟ་སྤྱོད་ལ་སོགས་པས་བཟློག་གོ༔ འབྱུང་བ་དང་གདོན་གྱིས་གནད་ལ་སླེབ་ནས་མི་བཟློག་གོ༔ དཔེར་ན་མཁར་གྱི་འོག་ཁང་དུ་མེ་སོད་སླ་ཞིང་ཡང་ཐོག་ཏུ་ཤོར་ན་མི་སོད་པ་དང་འདྲའོ༔ འཆི་ལྟས་བྱུང་ནས་སྔོན་དུ་བླ་མ་དཀོན་མཆོག་མཆོད་དེ་ཚོགས་བསགས་པའི་ལས་ཅི་འགྲུབ་བྱའོ༔ དེ་ནས་འབྱུང་བ་འཁྲུགས་པ་ལ་འཁོར་ལོ་དང་འབྱུང་བའི་ཡི་གེས་བཟློག་པ་ནི༔ རྒྱ་ཤོག་གམ་ཏ་ལའི་ལོ་མ་ལ་ཡི་གེ་བྲིའོ༔ དེའང་རླུང་གི་འཁོར་ལོ་རྩིབས་བཞི་པ་དང་ལྔའི་ལྟེ་བ་དང་རྩིབས་ལ་ཡཾ༔ མུ་ཁྱུད་ལ་ཨཱ་ལིའོ༔ དེ་བཞིན་དུ་མེ་ལ་རཾ༔ ས་ལ་ལཾ༔ ཆུ་ལ་ཁཾ༔ ནམ་མཁའ་ལ་ཨེ༔ མུ་ཁྱུད་ལ་ཨཱ་ལི༔ ཁ་དོག་འབྱུང་བ་དང་མཐུན་པར་བྱས་ལ་འབྱུང་བ་སོ་སོའི་ལྷར་བསྐྱེད་དེ༔ དེ་ལ་མཆོད་པ་ལྔ་འབུམ་ཞིང་སྡིག་པ་བཤགས་ལ་རང་གི་འདོད་པའི་དོན་ལ་གསོལ་བ་གདབ་ཅིང་སོ་སོའི་ཡི་གེ་ལོ་གྲངས་བརྗོད་ནས་ལྷ་ལ་བསྟིམ༔ ཁམ་ཕོར་ཁ་སྦྱར་དུ་བཅུག་པ་ཚོན་སྐུད་ལྔས་རྒྱ་གྲམ་དུ་བཅིང་བ་དང༔ ཤིང་སྣ་དང༔ ཆུ་སྣ་དང༔ མེ་སྣ་དང༔ ས་སྣ་དང༔ སེམས་ཅན་རིགས་མི་མཐུན་པའི་ཁའི་རླངས་པ་བསྒྲེས་པའི་ངར་ཟན་དང་བཅས་པ་ལ་མི་གཟུགས་ཁྲུ་གང་པ་བྱས་ཏེ་དབང་པོ་ལྔ་ལ་ཡི་གེ་ལྔ་བྲིས་ལ་གཞུག་གོ༔ གདོན་བསླུ་བའི་རྫས་ནི་ཁམས་སའམ་ངར་ཟན་ལ་བྱས་པའི་ངར་གླུད་ལོ་གྲངས་ཙམ་ལ་ཚོན་རྩིས་འབྱུང་བ་ལྔའི་མདོག་ཏུ་བསྒྱུར་བ་སྔོ་ནག་བདུད་དང༔ དམར་པོ་བཙན་དང༔ དཀར་བོ་རྒྱལ་པོ་དང༔ སེར་པོ་གཉན་དང༔ ལྗང་གུ་ཀླུ་དང༔ ཁྲ་བོ་ཤི་འདྲེ་དག་བྱས་ལ་རང་གི་དྲི་མ་དང་གོས་དུམ་དང་མཆིལ་མ་དང་སྐྲ་སེན་དང་དྲི་ཆུ་བསྲེ་ཞིང༔ བལ་ཚོན་དང༔ དར་སྣ་དང༔ ལྟས་ངན་གྱི་བྱ་སྒྲོ་འུག་པ་སྲིན་བྱ་སོགས་སྣ་ཚོགས་གླུད་ལ་བཙུག་པའི་མདུན་དུ་གཏོར་མ་ཁ་དོག་དང་མཐུན་པ་རེ་རེ་ངར་ཟན་གྱི་ཆང་བུ་ལོ་གྲངས་རེ་བཞག་ནས༔ དེ་ཐམས་ཅད་སྔགས་དྲུག་གིས་བྱིན་གྱིས་བརླབས་ལ༔ ཚིག་ཏུ༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང༔ དྲན་དང་གཟུང་དང་བསམ་དང་རེག༔ གློད་དང་ཞི་དང་གྲོལ་བར་མཛོད༔ ཅེས་བརྗོད་ནས་གླུད་འཁོར་ལོ་དང་བཅས་པ་ཆུ་ཆེན་པོའི་གཞུང་ལ་བསྐྱལ་ན་ལོ་གསུམ་གྱི་བར་དུ་འཆི་བ་ལས་བཟློག་པར་འགྱུར་རོ༔ འཆི་ལྟས་མ་བྱུང་གི་གོང་དུ་ལོ་གསུམ་གསུམ་ན་རེ་རེ་བྱས་ན་མཆོག་ཏུ་ལེགས་སོ༔ །ཐམཋཟ།ཐཾ།྅྅྅༔ བདེ་བ་ཆེན་པོ་སྐྱོབ་པའི་ལྷ༔ ཐུགས་རྗེ་ཆེ་ལ་ཕྱག་འཚལ་ལོ༔ བྱེ་བྲག་ཏུ་བཟློག་པའི་ཐབས་ལ༔ རང་གི་བླ་མ་ཡོད་ན་རབ༔ མེད་ནའང་གྲོགས་ཡིད་དང་མཐུན་པ་ཞིག་གིས་འབྱུང་བ་ལྔའི་ས་བོན་གྱིས་དབང་པོ་ལྔ་ལ་དབང་བསྐུར་བར་བྱས་ལ༔ དེ་ནས་སེན་མོའི་བཀྲག་མེད་ན་དགེ་སློང་བདུན་ལ་ཆོས་སྟོན་བྱ་ཞིང་ཡོན་དབུལ༔ སྡོམ་ལྡན་ཡིན་ན་བསྐྱར༔ མེད་ནའང་བླང༔ གོས་སེར་པོ་གྱོན་པས་བཟློག་གོ༔ མིག་གི་སྤྲིས་ཡལ་ན་ཚ་ཚ་དཀར་པོ་ལོ་གྲངས་བཏབ་ལ་བསྐོར་བ་བདུན་བྱས་ནས་ཆུ་ཆེན་པོར་དོར་ཞིང་གོམ་པ་ལོ་གྲངས་མ་སོང་བར་ཕྱིར་མིག་མི་བལྟ་བར་འོང་ངོ༔ ལྟག་པའི་སྐྲ་གྱེན་ལ་ལོག་པས་འབྲུ་ནག་པོ་ལ་ཟན་བྱས་ཏེ་ངར་གླུད་ཁྲུ་གང་བཅོས་པའི་སྙིང་ཁར་ལུང་བཏང་གི་རྡོག་པོ་ལོ་གྲངས་དང༔ རང་གི་མིང་བྲིས་པ་བཅུག་ནས་ནག་པོར་བྱས་པའི་སྐྲ་དང་གོས་རང་གི་གོས་རས་ཀྱིས་བྱས་ལ་རང་གི་གནས་ཁང་ནས་གོམ་པ་བརྒྱ་ཉི་ཤུ་རྩ་གཅིག་གིས་སར་དོང་ནག་པོ་གྲུ་གསུམ་བྲུས་ཏེ་རཾ་ལོ་གྲངས་བརྗོད་ནས་གླུད་དེ་བསྐྱུར་ལ༔ བདུད་ནག་པོ་ཁྱོད་འདི་ཁྱེད་ཅིག༔ ཁལ་ཆེའོ༔ ཁལ་ཆེའོ༔ ཞེས་ལན་གསུམ་བརྗོད་ནས་དྲིི་ཆེན་བཏང་ལ་སས་བྱི་བས་ནས་ཕྱི་མིག་མི་བལྟ་བར་འབྲོས་སོ༔ རྐང་པའི་ལོང་མོའི་རྟགས་ལ་ཉི་མ་གྲིབ་ཆུང་ཕེབས་ཙམ་ན་ནུབ་ཏུ་བལྟས་ཏེ་གཅེར་བུར་འདུག་པའི་འཕོངས་སུ་ཁྱི་མཇུག་བཙུགས༔ མདུན་དུ་དྲི་ཆེན་བཏང་ལ་ཁམ་རེ་ཟ་ཞིང་ཁྱི་སྐད་རེ་འདོན་པ་ལན་གསུམ་བྱའོ༔ སོའི་རྩ་བར་དྲེག་པ་བྱུང་ན་ར་ལྤགས་གྱོན་ནས་ཤར་དུ་བལྟས་ཏེ་རའི་སྐད་ལན་གསུམ་འདོན་ནོ༔ སྣ་ཞོམ་པས་སྣའི་རྩེ་མོར་ཨ་བསམས་ལ་ཨ་ཉི་ཤུ་རྩ་གཅིག་བརྗོད་ཅིང་ཆུ་སྣ་དགུའི་ཁྲུས་བྱའོ༔ ཡན་ལག་བརྐྱངས་པས་ཡན་ལག་ལ་འབྱུང་བ་ལྔའི་འཁོར་ལོ་སྔར་བཞིན་རྒྱ་སྐེགས་ཀྱིས་བྲིས་ནས་གཟུགས་ཆུས་སྔར་བཞིན་བཀྲུའོ༔ མིག་འབྲུ་ཚུགས་སུ་བལྟ་ན་དགེ་སློང་ལ་ཆོས་སྟོན་བྱ༔ བྱིས་པ་ལོ་གྲངས་བསགས་ལ་ཏོན་མོ་བྱ༔ གོས་དམར་པོ་གྱོན་ནོ༔ འགྲམ་པ་གཤོང་བུར་སོང་ན་སཱཙྪ་སེར་པོ་ལོ་གྲངས་གདབ༔ ཆུ་གཏོར་དང་སྦྱིན་སྲེག་དང་དར་ལྗང་ཁུའི་བ་དན་ལོ་གྲངས་བྱ་ཞིང་ཨེ་ལོ་གྲངས་བཟླས་སོ༔ དབུགས་རྒོད་ན་བུ་རམ་གྱི་ལྡེ་གུ་ལ་རླུང་གི་སྙིང་པོ་བཟླས་ནས་ཟའོ༔ སྣ་ཡོ་ན་སྣ་རྩེར་ཧཱུྃ་དཀར་པོ་བསམ་མོ༔ མཆི་མ་འཛག་ན་མིག་ཏུ་བྷྲཱུྃ་བསམ་ལ་བཟླས་སོ༔ འགྲམ་པ་གཤོང་གི་སོང་ན་ཀྵྃ་བཟླས་སོ༔ སོ་འཐམས་ན་ཤ྄གྲ་ཤ྄ཧྭཾ་྅྅྅བཟླས་སོ༔ ལྕེ་ལ་ཐིག་ལེ་ནག་པོ་བྱུང་ན་ཧཱུྃ་བསམ་མོ༔ རྣ་བ་འབྱར་ན་ཡུཾ་བསམ་མོ༔ བྲང་གི་ལྷེན་སྣ་ཞོམ་ན་ཡཾ྄མྨུ་྅྅྅བསམ་མོ༔ རྩ་གཉིས་ལོག་མེད་ན་ཧྨ྄ུྃ྅྅྅བསམ་མོ༔ ཡི་གེ་དེ་དག་ངག་ཏུའང་བཟླས་ཤིང་མཚལ་དང་དྲི་བཟང་པོས་བྲི་བ་ཡང་བྱའོ༔ ཚེ་གཟུགས་ཀྱི་ཕྱག་མཚན་མེད་ན་རང་གི་བླ་མ་ལ་ཚོགས་བརྒྱ་རྩ་བྱའོ༔ ལག་པ་གཡས་མེད་ན་འབྲུ་སྣ་བདུན་གྱི་ཕྱེ་ལ་གླུད་ཁྲུ་གང་པ་སེང་གེའི་མགོ་ཅན་ཁ་གདེངས་པ་བྱས་ཏེ༔ བྱང་བུ་ལོ་གྲངས་བཙུགས་ནས་བྱང་ཕྱོགས་ཀྱི་ལམ་སྲང་དུ་བསྐྱལ་ལོ༔ གཡོན་མེད་ན་སྲེ་མོའི་རླིད་བུར་སྟག་ནག་ཕག་ནག་ཁྱི་ནག་གསུམ་གྱི་མཆེ་བ་དང༔ དྲི་ཆུས་སྦྲུས་པའི་ངར་གླུད་བླུགས་ལ་ཆུ་ལ་དོར་རོ༔ རྐང་པ་གཡས་པའི་པུས་མོ་མན་ཆད་མེད་ན་ཉི་མ་ནུབ་ཏུ་ས་སྲོས་དུས་སེང་ལྡེང་ངམ་རྒྱ་ཤུག་གི་མེ་ལོ་གྲངས་བཏང་ངོ༔ གཡོན་མེད་ན་ས་དཀར་པོའི་གླུད་ཁྲུ་གང་གི་སྙིང་ཁང་སྟག་པའི་བྱང་བུ་ལ་ལོ་གྲངས་ཀྱི་ཉག་བྲིས་ལ་བཙུག་ནས་ལྷ་ཁང་འདྲེ་ཅན་དུ་ཐོ་རེངས་བསྐྱལ་ལོ༔ མགོའི་གཡས་མེད་ན་ཕུང་ཤུལ་གྱི་ས་སྣ་དགུ་དང་ཤིང་ནག་པོའི་འབྲས་བུ་སྦྱར་ཏེ་གའུ་ནག་པོ་ཀ་སྦྱར་བྱས་པའི་ནང་དུ་རང་གི་སྐྲ་དང་གོས་དུམ་བཅུག་པའི་གའུའི་རྒྱབ་ཏུ་ལོའི་རྒྱལ་པོ་རྟགས་འདི་ཁྱེར་སོགས༔ ལོ་བཅུ་གཉིས་ཀྱི་མིང་གླང་མའི་བྱང་བུ་ལ་བྲིས་པ་བཙུག་སྟེ་ཚེར་མ་སྣ་ཚོགས་ཀྱང་བཙུགས་ནས་ནམ་ཕྱེད་དུས་དུར་ཁྲོད་དུ་བསྐྱལ་ལོ༔ གཡོན་མེད་ན་འབྲུ་སྣ་ཉི་ཤུ་རྩ་ལྔའི་ངར་གླུད་ཀྱི་སྙིང་ཁར་མི་རྟ་ཁྱི་གསུམ་གྱི་རུས་པ་གོས་དུམ་གྱིས་དྲེལ་བ་བཅུག་ལ་ཚེས་བཅུ་གཅིག་གི་ནམ་སྲོས་དུས་གོམ་པ་བརྒྱད་ཅུའི་ཕྱིར་དོང་བྲུས་པར་བཅུག་ནས་རང་གི་མིང་ནས་བོས་ཏེ་ངུ་བའི་ཚུལ་ལན་གསུམ་བྱས་ལ་སྦའོ༔ སྐེད་མན་ཆད་མེད་ན་ཤར་ལྷོར་ཚེས་མའི་ཧོམ་ལོ་གྲངས་བྱས་ཏེ་རིམ་གྱིས་བསྲེག་ཅིང་རཾ་ལོ་གྲངས་བརྗོད་དོ༔ སྐེད་དང་བཅས་པ་མེད་ན་ལུས་རོ་སོལ་གྱིས་བྱུགས་ཏེ་སྐྲ་སྤྱི་བོར་བཅིངས་ལ་ཤོག་བུ་སོར་བཞི་ལ་རང་གི་ལོའི་མིང་དང༔ གནམ་ལོའི་མིང་བྲིས་པའི་ཕྱོགས་བཞིར་རཾ་ཡཾ་ལཾ་ཁཾ་བྲིས་པ་རང་གི་སྣ་ལ་བཏགས་ཏེ་གུ་གུལ་གྱིས་བདུག་ཅིང༔ ཚེས་དགུའི་ནམ་ཕྱེད་དུས་ཕྱོགས་བཞིར་རྒྱུག་ཅིང་ཁ་ལ་ཁྱོད་ཁྱེད་ཅེས་འབྲེལ་མེད་པ་མང་པོ་བརྗོད་ནས་ཤོག་བུ་དེ་དུར་ཁྲོད་དུ་སྦའོ༔ སྟོད་ཁོག་མེད་ན་མེ་བཏང་ནས་ལོ་བཅུ་གཉིས་ཀྱི་མིང་བྱང་བསྲེག་གོ༔ སྨད་མེད་ན་དུར་ཁྲོད་དུ་ཕྱིན་ནས་རུས་པ་སྣ་ཚོགས་ཀྱི་དུད་པ་བཏང་ངོ༔ ལུས་སྤྱིའི་གཡས་མེད་ན་གཙུག་ཏོར་འདོན་པ་ཚྭ་ཚྭ་ལོ་གྲངས་བྱའོ༔ གཡོན་མེད་ན་གོས་དམར་པོ་གྱོན་ཞིང་གཟུགས་གྲངས་མེད་འདོན་ནོ༔ གནམ་སའི་འབྲེལ་ཐག་ཆད་ན་དགེ་བ་གྲུབ་ཚད་དང་གསུང་རབ་མང་པོ་ཀློག་གོ༔ སེང་གེའི་མི་བབས་ན་དཀྱིལ་འཁོར་གྱི་ཆོ་ག་ལོ་གྲངས་ཞུའོ༔ རི་ཐང་མཚམས་སུ་ལྷོན་ཤིང་ཆག་ན་དོན་སྣོད་སོ་སོའི་སྨན་སྦྱོར་བྱའོ༔ ཆུའི་རླངས་པ་སྔོ་དམར་བྱུང་ན་ལོ་བཅུ་གཉིས་ཀྱི་གཟུགས་ཁམས་ལ་བྱས་ཏེ་ཁ་དོག་ལྔར་བསྒྱུར༔ སཱཙྪ་རེ༔ ངར་གླུད་རེ༔ སྟག་པའི་ཧོམ་རེ་བྱས་ཏེ་ཉི་མ་དམར་ཐག་ཆོད་དུས་བྱང་ཤར་གྱི་དུར་ཁྲོད་དུ་བསྐྱལ་ལོ༔ ནག་པོ་ཧྲལ་ཧྲོལ་ལ་འབྲུ་སྣ་ལྕགས་ཟངས་ཀྱི་ཕྱེ་དང་བཅས་པ་ཕྱོགས་བཞིར་གཏོར་རོ༔ དམར་པོ་ཐིག་ལེ་ཅན་ལ་རང་གི་དྲི་མ་འདྲེས་པའི་ངར་གླུད་ལོ་གྲངས་ལ་གཟི་མོ་བྱི་ཐུར་རེ་དང་དར་དམར་པོའི་བ་དན་རེ་བཙུག་སྟེ་རུས་པ་སྣ་ཚོགས་དང་ལྷན་ཅིག་ཤར་གྱི་ལམ་པོ་ཆེར་བསྐྱལ་ལོ༔ དྲི་ཆེན་གྱི་རླངས་མེད་ན་རྟ་ཐོད་ལ་འབྱུང་བའི་ས་བོན་བྲིས་ཏེ་ཉི་མ་མདུང་གང་དུས་ནུབ་ཏུ་བལྟས་ཏེ་རྟ་སྐད་གྲངས་མེད་གདོན་ནོ༔ རྣ་བའི་རླུང་སྒྲ་ལ་ཟས་སྣ་ཚོགས་ཚད་ཀྱི་གཏོར་མ་ལོ་བཅུ་གཉིས་ཀྱི་མིང་དང་བཅས་པ་ནུབ་ཕྱོགས་ཀྱི་སྡོང་པོའི་དྲུང་དུ་བསྐྱལ་ལོ༔ སྐད་མེད་ན་སྙིང་ནང་དུ་ཡཾ་བསམ་ལ་མིག་གྱེན་དུ་བསྒྲད་དེ་འདུག་པའི་སྤྱི་བོར་གཅིག་གིས་གཟུངས་ཆུས་བཀྲུའོ༔ ཤིང་ལོ་ལངས་ན་ཚོགས་དང་དགེ་སྦྱོར་ལ་འབད་དོ༔ ཆོ་ག་དེ་དག་བྱས་ལ་བརྟགས་པས་ལན་བདུན་ནས་ལོ་གྲངས་ཙམ་གྱིས་འཆི་བ་ཟློག་ངེས་སོ༔ འཆི་བ་བསླུ་བའི་མན་ངག༔ སློབ་དཔོན་ཆེན་པོ་ཤྲཱི་སིང་ཧས་མཛད་པ་རྫོགས་སོ༔ རྒྱ་རྒྱ་རྒྱ༔ ལས་ཅན་གཅིག་དང་འཕྲད་པར་ཤོག༔ སངས་རྒྱས་དགོངས་པ་མཐར་ཐུག་ངེས་པའི་ལུང༔ ཟབ་ཅིང་རྒྱ་ཆེ་བཀོད་པ་ཆེན་པོའི་དོན་རྣམས་ལས༔ ངེས་པའི་བཀའ་གསང་ཡོངས་བསྡུས་སྙིང་པོའི་དོན་འདི་ནི༔ དམ་པ་འཇིག་རྟེན་གཡུལ་ངོ་ཐམས་ཅད་བཟློག་མཛད་པའི༔ འཇམ་དཔལ་ཉིད་གྱི་སྤྲུལ་པ་དྲི་མེད་ཀུན་གྱི་མགོན༔ ངེས་པའི་སྙིང་པོ་གཅིག་ཏུ་དྲིལ་ནས་ནི༔ གཏི་མུག་འཐུག་པོས་བཅིངས་པ་ཡེ་ཤེས་འོད་དུ་ནི༔ རྣམ་པར་བཀྲོལ་ཏེ་རང་སྣང་ཉིད་སྟོན་བླ་མ་མགོན༔ དྲི་མེད་འཇམ་དཔལ་སྤྲུལ་པ་ཁྱོད་ལ་བདག་ནི་འདུད༔ བདག་གིས་གནས་སྐབས་བག་ཆགས་བསགས་པའི་ལུས་འདི་ནི༔ ཤོ་ཥ་རབ་ཏུ་བཀོད་པའི་གླིང་ཞེས་ཡུལ་དུ་ནི༔ རྒྱ་ནག་རིགས་ལ་ཁྱིམ་བདག་དགེ་བ་ལྡན་པའི་ཡིད༔ སྣང་བ་གསལ་བར་བྱེད་པའི་ལྷུམས་སུ་ནི༔ གྲོང་ཁྱེར་ཤོ་འཁྱམས་ནག་པོ་ཞེས་བྱར་བདག་ནི་སྐྱེས༔ དེ་ནས་ལོ་ནི་བཅོ་ལྔ་དག་ན་བྱང་ཆུབ་ཤིང་དྲུང་དུ༔ སློབ་དཔོན་མཁས་པ་ཧ་སྟི་བྷ་ལ་ལས༔ བདག་གིས་ཡི་གེ་རྩིས་དང་སྒྲ་དང་བསྟན་བཅོས་ཉན༔ ལོ་གསུམ་གྱིས་ནི་མཁས་པའི་སྙན་པ་ཐོབ༔ དེ་ནས་ནུབ་ཕྱོགས་གསེར་གླིང་དག་ཏུ་འགྲོ་སྙམ་ནས༔ རྔ་མོང་སྟོབས་ལྡན་དག་ལ་ཞོན་ནས་ནུབ་ཕྱོགས་ཕྱིན༔ བར་གྱི་ཐང་ཁོབ་སྙུག་ཚལ་འདམ་བུའི་ཁྲོད་དུ་ནི༔ སྒྲ་ཆེན་འཇིགས་པའི་ང་རོ་ནམ་མཁའ་དག་ནས་གྲགས༔ བདག་ནི་དད་པའི་ཤུགས་ཀྱིས་ནམ་མཁའ་ཅེར་བལྟས་བས༔ འོད་དཔུང་ཡིད་ལྡན་དཀྱིལ་ན་ཐུགས་རྗེ་ཆེན་པོ་ཉིད༔ འཛུམ་པའི་ཞལ་དང་བདེ་བའི་ཕྱག་རྒྱ་མཛད་ནས་ནི༔ ལུང་བསྟན་འབྲས་བུ་འདོད་ན་སོ་ས་གླིང་དུ་སོང༔ ཞེས་ཐོས་བདག་ཡིད་རབ་ཏུ་དགའ་བ་ལས༔ བདག་གི་བསམ་པ་ཕྱིར་ལ་འདི་ལྟར་སྐྱེས༔ བདག་ནི་ད་རུང་ན་གཞོན་ལོ་བརྒྱད་བར་དུ་ཡང༔ འབྲས་བུ་ངེས་པའི་གསང་སྔགས་གོ་བྱའི་ཕྱིར༔ གསང་སྔགས་མཐའ་དག་ལ་ནི་གོམས་པར་བྱ་སྙམ་ནས༔ སླར་ལོག་རྒྱ་ན ག་ཤར་གྱི་རི་བོ་རྩེ་ལྔ་ལ༔ གདོལ་པའི་སློབ་དཔོན་བྷེ་ལ་ཀིརྟི་ལས༔ གསང་བའི་སྔགས་སུ་གྲགས་པའི་རྒྱུད་སྡེ་དང༔ ལུང་དང་མན་ངག་སྒྲུབ་པའི་ཐབས་རྣམས་ཉན༔ ལོ་བདུན་གྱིས་ནི་བདག་གིས་མ་ལུས་ཤེས༔ སྔ་དྲོའི་གྲོ་ཐོན་རི་བོའི་ཤར་དུ་ཕྱིན༔ ཁྲུས་རྫིངས་དལ་འཇམ་ནང་ན་ཁྲུས་བྱེད་འདུག་པ་ལས༔ བདག་ནི་ཡིད་འགྱུར་སྐད་ཅིག་ཙམ་དུ་དྲན་པ་ཉམས༔ དེ་ནས་དྲན་པ་ཉིད་ནི་སངས་ནས་ཡར་ལངས་པས༔ ནམ་མཁར་འོད་དབུང་དཀྱིལ་ན་ཐུགས་རྗེ་ཆེན་པོ་ཉིད༔ སྣང་བར་གྱུར་ཏེ་བདག་ལ་ལུང་ཡང་བསྟན༔ དེ་ནས་བདག་གིས་བསམ་པ་ཡང་བཏང་བ༔ འདི་ནས་རྒྱ་གར་ཡུལ་དུ་བསྒྲོད་ཅིང་འགྲོ་བ་ལ༔ འཇིགས་པའི་གཅན་གཟན་ཁྱུང་དང་རིགས་མེད་མོན༔ གདུག་པ་རྣམས་ཀྱིས་ལམ་ནི་གཙེར་སྙམ་ནས༔ ལོ་གསུམ་བར་དུ་རྫུ་འཕྲུལ་སྣ་འགལ་བསྒྲུབས༔ དེ་ནས་རྫུ་འཕྲུལ་སྟོབས་ཀྱིས་ས་ལ་ཁྲུ་གང་དུ༔ རེག་པ་མེད་པར་རླུང་གིས་བསྐྱོད་དུ་ཕྱིན༔ ཉིན་ཞག་དགུ་ན་དུར་ཁྲོད་སོ་སོའི་གླིང༔ འཇམ་དཔལ་སྤྲུལ་པ་ཉིད་དང་བདག་མཇལ་ནས༔ ཡུན་གྱི་སྒྲིབ་པ་མ་སྦྱངས་གནས་སུ་དག༔ ཉི་ཤུ་རྩ་ལྔའི་བར་དུ་འབྲས་བུའི་ཡང་ཞུན་རྣམས༔ ཉམས་སུ་བླངས་ཤིང་ཡང་སྙིང་ཞུ་དག་བྱས༔ གསང་བའི་རྒྱུད་དང་མན་ངག་ཡི་གེ་རྣམས༔ དམ་པ་ཉིད་ཀྱིས་ལུང་བསྟན་རྡོ་རྗེ་གདན་ནས་ཕྱུང༔ ཁྱེར་ནས་སླར་ལོག་རྒྱ་ནག་དག་ཏུ་ཕྱིན༔ བྱང་ཆུབ་ཤིང་དྲུང་སངས་རྒྱས་འབྱུང་བའི་གནས༔ ཡང་སྟེང་དག་གི་བྲང་ཁང་སྤྲེལ་མ་རུ༔ གསང་བའི་རྒྱུད་དང་མན་ངག་ལུང་དང་ནི༔ དམ་པས་ལུང་བསྟན་བདག་གིས་སྡེ་བཞིར་ཕྱེས༔ སྡེ་གསུམ་སྤྲོས་བཅས་དོན་དུ་སྡེབས་ནས་ནི༔ ལྷ་ཁང་བྱ་འདབ་འོག་གི་ཀ་བ་བཞི་སྒྲིལ་ནང༔ ཟངས་ཀྱི་སྒྲོམ་བུར་དེ་དག་སྩལ་ནས་ནི༔ ཕྱི་རབས་དོན་དུ་རྒྱ་ཡིས་བཏབ་སྟེ་སྦས༔ ཡང་གབ་སྦས་པའི་སྙིང་ཏིག་སྒྲོན་མ་འདི༔ བདག་གི་སྙིང་དང་གཟུགས་ཀྱི་ཕུང་པོ་བཞིན༔ འབྲལ་བའི་སྐབས་མེད་ལུས་ལ་རྟག་ཏུ་བཅངས༔ དེ་ནས་ནམ་ཞིག་ཤིང་ནགས་འཐུག་པོ་རུ༔ བདག་གིས་གསང་བའི་ཉམས་བསྐྱངས་ལུས་ཀྱི་སྤྱོད་པ་བརྩམས༔ དེ་ནས་ནམ་ཕྱེད་དུས་ཀྱི་ཐུན་གཅིག་རྨི་ལམ་ན༔ བདག་གི་མ་རུ་བྱས་པའི་བུད་མེད་རྒྱན་ལྡན་ཞིག༔ བུ་གཅིག་ལོངས་དང་གསང་བ་ཡང་བསྡུ་སྙིང་པོ་རྣམས༔ བཀྲ་ཤིས་ཁྲི་སྒོའི་ཀ་བའི་འོག་ཏུ་སྦོས ༔ རང་རྒྱས་ཐོབ་ལ་བསྟན་པའི་བཙས་སུ་ཞོག༔ དེ་སྐད་ཟེར་བས་ཀ་བའི་དཀྱིལ་དུ་ནི༔ རང་རྒྱས་བཏབ་ནས་འདི་ནི་དེ་རུ་སྦས༔ སྨུག་ནག་འཇིགས་པའི་གཟུགས་ཅན་སྔགས་ཀྱིས་སྲུངས༔ ཨེ་ཀ་ཙ་ཏི་ཁྲོས་མ་རག་གདོང་མ༔ བསྟན་པའི་སྙིང་པོ་འདི་གཏད་བཀའ་འདི་སྲུངས༔ ལུང་དང་མི་ལྡན་བན་འདྲས་འདི་ཁྱེར་ན༔ ཁྱོད་ནི་སྨུག་ནག་སྲོག་ལ་རྔམ་པའི་འཁོར༔ རབ་ཏུ་མི་བསྲུན་ཤ་དང་ཁྲག་འདོད་རྣམས༔ དེ་ཡི་ཤ་དང་ཁྲག་ལ་ལོངས་སྤྱོད་གྱིས༔ སྐལ་ལྡན་སྙིང་གི་བུ་དང་འཕྲད་པའི་ཚེ༔ འདི་རྣམས་བྱིན་ལ་ཁྱོད་ཀྱིས་སྟོང་གྲོགས་གྱིས༔ རྩིས་དང་གཏོ་དང་ཁྲམ་ལ་དཔྱད་རྣམས་ནི༔ རི་བོ་རྩེ་ལྔའི་ཤར་གྱི་དཀྱིལ་ངོས་སྦོས༔ མཆོག་ཏུ་ཟབ་པའི་ཡང་ཟབ་སྙིང་པོའི་ཆོས༔ དཀོན་པའི་རིན་ཆེན་མིག་གི་འབྲས་བུ་འདི༔ ནམ་ཞིག་འབྱུང་བའི་དུས་ནི་བྱུང་བ་ན༔ དད་བརྩོན་ཤེས་རབ་ལྡན་པའི་སྤྱོད་ཡུལ་ལས༔ གཞན་ལ་བཤད་ཅིང་བསྟན་པའི་གནས་མེད་པས༔ རང་གི་སེམས་ལ་རྒྱ་ཡིས་ཐོབ་ལ་བརྣོགས༔ འཆི་བ་ཉིད་ལས་བཟློག་པའི་མན་ངག་འདི༔ བདག་གིས་ཉམས་བླངས་འཆི་དུས་ལན་གསུམ་བཟློག༔ དེ་ཡི་ཕྱིར་ན་ཉམས་སུ་ལེན་པའི་གྲོགས༔ གཞན་ལ་མི་ལྟོས་ཕྱིར་ན་འདི་དག་བྲིས༔ ཨ་ཏིའི་རང་ང་ོསྤྲོས་པ་ཀུན་བྲལ་ཡང༔ སེམས་ཅན་བློ་ཡི་དྲི་མ་མ་ཟད་བར༔ འདི་དག་རྣམས་ཀྱང་ཀུན་རྫོབ་བདེན་པའོ༔ དོན་དམ་ཉིད་ལ་སྐྱེ་ཤིའི་སྡུག་བསྔལ་བྲལ༔ ཞེས་ཤྲཱི་སིང་ཧས་གསུངས་སོ༔ རྒྱ་གར་གྱི་མཁན་པོ་བི་མ་ལ་མི་ཏྲས་སྒྲ་རང་འགྱུར་དུ་བསྒྱུར་བའོ༔ རྒྱ་རྒྱ་རྒྱ༔ ཐ།ང།ཐ།ཐ།དྠཐ།བ྄བ།༔྅྅྅ རྒྱ་གར་སྐད་དུ༔ གྲྀ་ཏྲི་པ་སཾ་ཧི་ནཱ་མ༔ བོད་སྐད་དུ༔ ལྟ་བའི་སྙིང་པོ་ཞེས་བྱ་བ༔ སྟོང་པ་ཆེན་པོ་ཡེ་ནས་ཐབས་ཀྱིས་གྲུབ་པ་ཉིད་ལ་ཕྱག་འཚལ་ལོ༔ སངས་རྒྱས་ཀུན་གྱི་བདེ་བ་ཆེན་པོ་དེ༔ མངོན་སུམ་ཉིད་དུ་གཏན་ལ་ཕབ་ན་ནི༔ སྣང་བ་ཅེར་མཐོང་གོམས་པའི་ཚད་རྣམས་ལ༔ ཉམས་བླངས་ཕྱོགས་ཤིང་དོན་ལ་མི་མོས་ན༔ འདི་ལྟར་ཡིད་ཀྱི་ཕྱོགས་ལ་གཏད་པར་གྱིས༔ དངོས་པོའི་འདུག་ཚུལ་དྲན་པ་རང་དག་པས༔ ཡོད་མེད་མཐའ་བྲལ་སྒྲ་ཚིག་མིང་ཡང་མེད༔ བྱ་དང་བྱེད་དང་བཅོས་པའི་མཐའ་མི་སྲིད༔ དེ་ཡི་དོན་རྣམས་ཕྱོགས་གཅིག་ཉིད་དུ་ཡང༔ བླ་མའི་ལུང་ལ་བརྟེན་ནས་བསྟན་པར་བྱ༔ ཀྱེ་མ་ཀྱེ་མ༔ རྗེས་སུ་འཛིན་པའི་མཁའ་འགྲོ་མ་ཁྱོད་ཉོན་ཅིག༔ གསང་བ་ཡང་ནས་ཡང་དུ་བསྡུས་པའི་མན་ངག་གི་སྙིང་པོ་འདི་མེད་པར་ཕྱི་དང་ནང་དང་གསང་བ་གསུམ་ལ་གདིང་འཆའ་བའི་སྐྱེས་བུ་ནི་རྣམ་ཤེས་ཀྱི་སྙིང་མེད་པའི་རོ་ལ་དོན་དུ་འཛིན་པའི་སྐྱེས་བུ་དང་འདྲའོ༔ དེའི་ཕྱིར་ན་ངོ་མཚར་གྱི་གད་མོ་བཅུ་གཉིས་རྒྱུད་རྣམས་ཀྱི་ཁོང་དོན་དུ་མཛད་པ་བདག་གིས་བསྟན་གྱིས་མ་ཡེངས་པར་ཉོན་ཅིག༔ ལྟ་བ་རང་བྱུང་ཡེ་ཤེས་ལ་ལྟོས་དང༔ དགེ་སྡིག་དང་ལྟ་སྒོམ་ལས་འདས་པ་ངོ་མཚར༔ གཞི་མ་བསྐྱོད་བར་ལུས་ངག་གི་བྱ་བ་ཅི་བྱས་ཀྱང་ཕན་གནོད་དང་བྲལ་བ་ཧ་ཧ༔ ཆོས་ཀྱི་སྐུ་སྟོང་བ་ཀུན་ཁྱབ་ཀྱི་ཡེ་ཤེས་ལ་ལྟོས་དང ༔ སྐྱེ་བ་མེད་པ་ཡེ་ནས་ལྷན་ཅིག་ཏུ་གནས་པ་ངོ་མཚར༔ སྐྱེས་བུས་མཚོན་ཐོགས་ནས་འགྲོ་བ་རྣམས་དུས་གཅིག་ལ་བསྒྲལ་ཡང་གང་ཟག་གི་རྒྱུད་ལ་ཕན་གནོད་དང་བྲལ་བ་ཧ་ཧ༔ ཤེས་པ་སྟོང་པ་ཀུན་སྣང་གི་ཡེ་ཤེས་ལ་ལྟོས་དང༔ གང་སྣང་ཐམས་ཅད་རང་གི་གྲོགས་སུ་ཤར་བ་ངོ་མཚར༔ ཅིར་སྣང་རང་གི་གཞི་ལས་གཡོས་བ་མེད་པ་ཧ་ཧ༔ རིག་པ་སྟོང་པ་ཀུན་གྲོལ་གྱི་སྣང་བ་ལ་ལྟོས་དང༔ རང་གི་གཉེན་པོར་རང་ཆེ་བ་ལ་ངོ་མཚར༔ ཉོན་མོངས་པ་རྣམས་རང་གིས་རང་གྲོལ་བ་ཧ་ཧ༔ རིག་པ་ཡེ་ནས་སྟོང་བ་ཀུན་དག་གི་ངོ་བོ་ལ་ལྟོས་དང༔ འབད་རྩོལ་མེ་པ་འབྲས་བུ་རྙེད་པ་ངོ་མཚར༔ གཅིག་ཟིན་པས་འཁོར་འདས་ཐམས་ཅད་གཉིས་མེད་དུ་དག་པ་ཧ་ཧ༔ ངོ་བོ་སྟོང་པ་ཆེན་པོ་ཀུན་བཞག་གི་ཚད་ལ་ལྟོས་དང༔ འགྲོ་དྲུག་སྐུ་གསུམ་དུ་སྣང་བ་ངོ་མཚར༔ འགྲོ་བ་རྣམས་ཀྱིས་སྒོམ་པ་རྡུལ་ཙམ་མ་བྱས་པར་དུས་གཅིག་ལ་སངས་རྒྱ་བ་ཧ་ཧ༔ སྐུ་གསུམ་སྟོང་པ་ཆེན་པོ་ཡེ་རྫོགས་ཀྱི་འབྲས་བུ་ལ་ལྟོས་དང ༔ དུས་གསུམ་འབྲལ་བ་མེད་པ་ངོ་མཚར༔ ཕོ་རོལ་ཏུ་ཕྱིན་པ་དྲུག་མ་སྤྱད་པར་ཚོགས་རྣམས་དུས་གཅིག་ལ་རྫོགས་པ་ཧ་ཧ༔ རིག་པ་ཅེར་བཞག་ཆེན་པོ་ཀུན་མཉམ་གྱི་ཡེ་ཤེས་ལ་ལྟོས་དང༔ བྱ་བྱེད་ཐམས་ཅད་རྒྱན་དུ་ཤར་བ་ངོ་མཚར༔ སྤོང་ལེན་ཐམས་ཅད་ལྟ་བས་གྲོལ་བ་ཧ་ཧ༔ སྟོང་པའི་སྟོང་པ་ཡེ་སྟོང་ཆེན་པོ་ལ་ལྟོས་དང༔ སངས་རྒྱས་ཐམས་ཅད་གཡང་སར་འདུག་པ་ངོ་མཚར༔ བྱ་བྱེད་སྒོམ་པས་ལྟུང་བར་འགྱུར་བ་ཧ་ཧ༔ མི་སྟོང་པའི་སྟོང་པ་དངོས་ཅན་ལ་ལྟོས་དང༔ མེད་པ་ལ་བདག་ཏུ་འཛིན་པའི་ཐེག་པ་ངོ་མཚར༔ སྐྱེས་པས་སྐྱེས་མེད་ཐོབ་པ་ཧ་ཧ༔ ལྟ་བའི་གཞི་འཛིན་པ་སྟོང་པའི་ཡུལ་དངོས་པོ་ལམ་དུ་བྱེད་པ་ངོ་མཚར་གྱི་གད་མོ་བཅུ་གཉིས་བ་རྫོགས་སོ༔ རྒྱ་རྒྱ་རྒྱ༔ ཨེ་མ་ཉོན་ཅིག༔ བླ་ན་མེད་པའི་གསང་ཆེན་ངེས་པ་འདི་མ་མཐོང་བར་ཕྱི་ནང་གསང་བ་གསུམ་ལ་གདིང་འཆའ་བའི་སྐྱེས་བུ་ནི་བལྟ་བར་འདོད་ཀྱང་དབྲལ་བའི་མིག་མེད་པ་དང་འདྲའོ༔ དེའི་ཕྱིར་ན་གཞིའི་ངོམ་ཚིག་དགུ་ལ་གོམས་པ་གཅེས་སོ༔ མི་འགྱུར་བ་གཞི་ལ་དྲན་པ་རང་དག་དྲན་མེད་ཀྱི་སྐྱེ་བ་བཀག་པས་བློ་འདས་སྐྱེ་རྒྱུན་མེད་པ་ངོམ་པའི་ཚིག་ཏུ་བྱུང་བའོ༔ ཆོས་སྐུ་རང་སྣང་གཞན་བྱུང་གི་སྣང་བ་རང་དག་པ་ནི༔ སྒྲ་དང་དྲི་རོ་མྱ་ངན་ལས་འདའ་བར་བྱེད་པས་ལུང་ཀུན་གྱི་བདག་ཉིད་དུ་བྱུང་བ་ནི་ངོམ་པའི་ཚིག་ཏུ་བྱུང་བའོ༔ ཉོན་མོངས་རང་རྒྱས་བཏབ་པའི་གཞི་ཆོས་ཀུན་གྱི་བདག་ཉིད་དུ་བྱུང་བས་འཁྲུལ་པ་རང་སར་དག་པ་ངོམ་པའི་ཚིག་ཏུ་བྱུང་བའོ༔ འཛིན་པ་ཡུལ་ཐམས་ཅད་གཅིག་ཏུ་མཐོང་བ་སྣང་བ་རང་རྒྱས་བཏབ་པ་ནི་ངོམ་པའི་ཚིག་ཏུ་བྱུང་བའོ༔ དེ་ཉིད་འགྱེད་པ་མེད་པར་སྣང་བ་ཀུན་གྱི་བདག་པོར་ཡེ་ནས་འདུག་པས༔ སྒོ་ལྔ་རང་སར་དག་པ་ངོམ་པའི་ཚིག་ཏུ་བྱུང་བའོ༔ འབྱེད་པ་མེད་པའི་ཤེས་རབ་ཀྱིས་བསྡུས་ཡིག་ལ་མཁས་པ་ནི་སྤྲོས་མེད་དུ་ལ་བཟླ་བས་ངོམ་པའི་ཚིག་ཏུ་བྱུང་བའོ༔ ཆོས་རྣམས་ཅོག་བཞག་གི་ལྟ་བ་དགོངས་པ་དང་འབྲེལ་བ་ནི༔ ལྟ་བ་ངོམ་པའི་ཚིག་ཏུ་བྱུང་བའོ༔ སྒྲོ་འདོགས་ཐམས་ཅད་དུས་གཅིག་ལ་ཆོད་པའི་ཚིག་གིས་རྣལ་འབྱོར་པ་གྲོལ་སར་བསྐྱལ་བ་ནི༔ ཐེག་པ་ཐམས་ཅད་ངོམ་པའི་ཚིག་ཏུ་བྱུང་བའོ༔ རང་སྣང་སྒྲོན་མ་གཉེན་པོ་ལ་མ་ལྟོས་པ་རང་སྣང་བ་ནི་རྟགས་ཐམས་ཅད་ཀྱི་ངོམ་པའི་ཚིག་ཏུ་བྱུང་བའོ༔ གཞི་སྣང་འཁྲུལ་པ་དག་པས་ཆོས་རྣམས་སྤར་གྱིས་ཟིན༔ ལམ་དུ་གོལ་ས་ཆོད་བས་རེ་དོགས་ཚིགས་མཐའ་ཆོད༔ བླ་མའི་གསུང་བཞིན་བསྒྲུབས་པས་དངོས་གྲུབ་མྱུར་དུ་ཐོབ༔ ཤེས་རབ་རྣོན་པོར་སྐྱེས་པས་ཆོས་ཅན་དུམ་བུར་བཤིག༔ ངོམ་པའི་ཚིག་དགུས་གཞིའི་བཅུད་ཕྱུང་བ་རྫོགས་སོ༔ རྒྱ་རྒྱ་རྒྱ༔ ཀྱེ་མ་རིགས་ཀྱི་བུ་གསང་བ་ཡང་ཞུན་ངེས་པའི་ལྟ་བ་རང་བྱུང་གི་རྒྱལ་པོ་མ་མཐོང་བར༔ ཕྱི་ནང་གསང་བའི་ལྟ་བ་མུན་རྡོ་ལྟ་བུ་ལ་ཡིད་འཆའ་བའི་གང་ཟག་ནི་འབེན་མེད་པར་སྐྱེས་བུས་མདའ་འཕེན་པ་དང་འདྲ་སྟེ་གང་དུ་བབས་ངོ་མི་ཤེས་སོ༔ དེའི་ཕྱིར་ཁྱད་པར་དུ་འཕགས་པའི་ཚིག་བཅུ་གཅིག་ལ་མཁས་པར་བྱའོ༔ སྲོག་མ་བཅད་ན་དགེ་བ་མི་འཕེལ་བས་སྤྱོད་པ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ སངས་རྒྱས་ཀྱི་བསྟན་པ་མ་ནུབ་ན་ཞིང་ཁམས་མི་འཕེལ་བས་ཡུལ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ དམྱལ་བ་རྣམས་ལ་མཆོད་པ་མ་ཕུལ་ན་དངོས་གྲུབ་མི་འབྱུང་བས་ཉམས་ལེན་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ སྡུག་བསྔལ་ཐམས་ཅད་དང་དུ་མ་བླངས་ན་བདེ་བ་ཉིད་གཏན་ལ་ཕེབས་མི་སྲིད་པས་སྒོམ་པ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ མ་སྐྱེས་པ་ཐམས་ཅད་སྐྱེས་པར་མ་བྱས་ན་སྐྱེ་མེད་རྙེད་མི་སྲིད་པས་འབྲས་བུ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ འབྱུང་བ་མ་འཕེལ་ན་ཉམས་མི་སྐྱོང་བས་དགོངས་པ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ སེམས་ཅན་མ་འཕེལ་ན་འཁོར་བ་ཉིད་དོང་མི་སྤྲུགས་པས་གཞི་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ སྙིང་རྗེའི་རྒྱུན་ཐག་མ་བཅད་ན་ཐུགས་རྗེ་མི་འབྱུང་བས་མཛད་པ་ཐམས་ཁྱད་པར་དུ་འཕགས་ཏེ་ཡ་མཚན༔ མ་རིག་པ་མ་བསྒོམས་ན་འཁྲུལ་པ་མི་འདག་པས་རྩ་བ་ཐམས་ཅད་ལས་ཁྱད་པར་དུ་འཕགས་ཏེ་ཡ་མཚན༔ མ་བཙལ་རང་ལས་རྙེད་པའི་ནོར་བུ་རིན་ཆེན་དེ༔ མ་བསྒོམས་གཞི་ལ་བཞག་པའི་མན་ངག་རིན་པོ་ཆེ༔ མ་བསྒྲུབས་ཅིག་ཅར་འབྱུང་བའི་རང་རིག་འོད་པོ་ཆེ༔ མ་སོང་གནས་སུ་ཕྱིན་པས་སྙིང་པོ་ཡེ་དག་ཉིད༔ རང་བཞིན་རྫོགས་པ་ཆེན་པོའི་དོན་ལ་ཐེ་ཚོམ་མི་ཟ་བར་བསྟན་པའི་ཕྱིིར༔ གཞི་ཐམས་ཅད་ཀྱི་བཅུད་ཕྱུང་ནས་ལུང་ཀུན་གྱི་རྒྱན་དུ་བཀོད་པ་ཁྱད་པར་འཕགས་པའི་ཚིག་དགུས་གཏན་ལ་ཕབ་པ་རྫོགས་སོ༔ རྒྱ་རྒྱ་རྒྱ༔ ཨེ་མ་ཧོ༔ གསང་བ་ཡང་གསང་སྙིང་ཏིག་གི་དོན་མ་མཐོང་བར་ཕྱི་ནང་གསང་བ་གསུམ་གྱི་ངོ་སྤྲོས་ལ་ཡིད་ཆེས་པར་བྱེད་པའི་གང་ཟག་ནི༔ རྒྱུ་ཁ་བའི་ས་བོན་ལས་འབྲས་བུ་མངར་བ་འདོད་པ་དང་འདྲའོ༔ དེའི་ཕྱིར་ན་རང་བྱུང་གི་ཆེ་བ་བཅུ་དྲུག་པ་འདི་གོམས་པར་བྱའོ༔ དངོས་པོ་གཤིས་ལ་ཚིག་དང་བརྗོད་བྱ་མ་གྲུབ་པའི་ཕྱིར་སངས་རྒྱས་རྣམས་ཀྱི་སློབ་དཔོན་དུ་དམྱལ་བ་རང་བྱུང་བའོ༔ རིག་པ་ཉིད་ལ་སྲོག་མེད་པའི་ཕྱིར་སྲོག་བཅད་པས་དགེ་བ་འཕེལ་བ་རང་བྱུང་བའོ༔ འདུག་ཚུལ་ལ་བཟང་ངན་མེད་པའི་ཕྱིར་སངས་རྒྱས་བས་སེམས་ཅན་སྔ་བར་རང་བྱུང་བའོ༔ རིག་པ་རྩོལ་སྒྲུབ་དང་བྲལ་བའི་ཕྱིར་མི་རྟོག་པ་བསྒོམ་པའི་སྒོམ་ཆེན་བས་ཤན་པ་སྔོན་དུ་སངས་རྒྱ་བར་རང་བྱུང་བའོ༔ ལམ་ཉེ་རིང་མེད་པའི་ཕྱིར་ས་བཅུའི་སེམས་དཔའ་བས་མཚམས་མེད་པ་ལྔ་བྱས་པའི་གང་ཟག་རྫུ་འཕྲུལ་ཆེ་བར་རང་བྱུང་བའོ༔ ལྟ་བ་ལ་མཐོ་དམན་མེད་པའི་ཕྱིར་ཉན་ཐོས་དགྲ་བཅོམ་པ་བས་མུ་སྟེགས་རྟག་ཆད་སྔོན་དུ་སངས་རྒྱ་བར་རང་བྱུང་བའོ༔ སྒོམ་པ་ལ་བར་མཚམས་མེད་པའི་ཕྱིར་བསམ་གཏན་རང་ལུགས་སུ་གནས་པའི་རང་སངས་རྒྱས་བས་གྲུབ་མཐའི་ཚིག་མེད་པའི་སྐྱེ་བོས་འབྲས་བུ་སྔོན་དུ་ཐོབ་པར་རང་བྱུང་བའོ༔ སྤྱོད་པ་ལ་ཟིན་པ་མེད་པའི་ཕྱིར་བརྟུལ་ཞུགས་ཆེན་པོ་དུར་ཁྲོད་དུ་རྒྱུ་བ་ལས་བྱིས་པ་གཤེད་མ་བྱེ་བ་སྣང་བ་ལ་དབང་དུ་བསྒྱུར་བར་རང་བྱུང་བའོ༔ འབྲས་བུ་ལ་སེམས་མེད་པའི་ཕྱིར་སྔོན་བྱུང་གི་ཀུན་ཏུ་བཟང་པོ་དང་ཤན་པ་རྣམས་ཁྱད་མེད་དུ་རང་བྱུང་བའོ༔ ཤེས་པས་བསྡུས་པ་ཐམས་ཅད་གཞི་གཅིག་པའི་ཕྱིར་སེམས་ཅན་གྱི་ཐུགས་རྗེས་སངས་རྒྱས་ལ་སྐྱོབ་པར་རང་བྱུང་བའོ༔ གཞི་བསླབ་བྱ་དང་བྲལ་བའི་ཕྱིར་རང་གི་མན་ངག་སྟོན་པའི་བླ་མ་བས་སྡེ་སྣོད་ལ་ལས་དང་པོ་པ་འབྱོངས་པར་རང་བྱུང་བའི༔ རིག་པ་ལ་གོལ་སྒྲིབ་མེད་པའི་ཕྱིར་སེམས་ཅན་འབུམ་གྱི་སྲོག་བཏོན་པའི་དགེ་སློང་དང༔ སེམས་ཅན་འབུམ་གྱི་སྲོག་བཅད་པའི་རྒྱལ་པོ་གཉིས་འཚང་རྒྱ་བ་ལ་ཁྱད་པར་མེད་པར་རང་བྱུང་ངོ༔ དངོས་པོ་ལ་ཚིག་མེད་པའི་ཕྱིར་སྡེ་སྣོད་ཤེས་པའི་པཎྜི་ཏ་བས་བ་གླང་རྫི་ཆོས་མཁས་པར་རང་བྱུང་ངོ༔ ངོ་བོ་ལ་སྡུག་བསྔལ་མེད་པས་དམྱལ་བའི་གྲོལ་ས་སངས་རྒྱས་ཡིན་པར་རང་བྱུང་ངོ༔ སྟོང་པ་ལ་གོ་མཚམས་མེད་པའི་ཕྱིར་སྟོང་པ་ཉིད་ལ་འབྱོངས་པའི་སྐྱེས་བུ་བས་མུ་སྟེགས་བས་མཐོང་བར་རང་བྱུང་ངོ༔ སྣང་བ་བསྒོམ་མི་དགོས་པའི་ཕྱིར་ཆོས་ཀྱི་དབྱིངས་ལས་འབྱུང་བར་རང་བྱུང་ངོ༔ མ་བལྟས་ཅིག་ཅར་མཐོང་བའི་སྒྲོན་མེ་འོད་པོ་ཆེ༔ མ་བརྟེན་རང་ལ་བཞག་པའི་ཡོན་ཏན་གཏེར་པོ་ཆེ༔ མ་བསྙགས་རང་ལ་གནས་པའི་བདེ་བ་སྐྱིད་པོ་ཆེ༔ ཆོས་རྣམས་ཡེ་ནས་དག་པས་རང་ལ་རང་དྲིན་ཆེ༔ འདུག་ཚུལ་རང་སྣང་དུ་བཀོད་པའི་མན་ངག༔ དྲན་པ་རང་ཡལ་གྱི་ཐབས ༔ གཞིའི་དོན་གཏན་ལ་ཕབ་པ་ཆེ་བ་བཅུ་དྲུག་པ་རྫོགས་སོ༔ རྒྱ་རྒྱ་རྒྱ༔ ཨེ་མ་ཧོ༔ རིགས་ཀྱི་བུ་ཡང་གབ་སྦས་པའི་སྙིང་ཏིག་འདི་ཡི་ཚད་མ་ཟིན་པར་ཕྱི་ནང་གསང་བའི་བར་དོ་གཞི་ལ་ཕུགས་གཏོད་པ་ནི་ནམ་མཁའི་སྤྲིན་ལ་འཛོལ་འཛུག་པའི་སེམས་ཅན་དང་འདྲའོ༔ དེའི་ཕྱིར་ན་ཁྱད་མེད་དུ་བསྟན་པའི་ཚིག་དོན་བདུན་ལ་བསླབ་པར་བྱའོ༔ རིག་པ་སྐྱེ་ཤི་དང་བྲལ་བའི་གནད་ཀྱིས་སེམས་ཅན་བྱེ་བའི་སྲོག་བཅད་པ་དང་ཕ་རོལ་ཏུ་ཕྱིན་པ་བཅུ་ལ་གནས་པའི་གང་ཟག་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ལ་བསྟན་ཏོ༔ ཆོས་ཉིད་ལ་སྤྲོས་པ་མེད་པའི་གནད་ཀྱིས་སྟོང་པ་ཉིད་སྒོམ་པའི་སྐྱེས་བུ་དང་སྐད་ཅིག་ཀྱང་མི་སྒོམ་པའི་གང་ཟག་གཉིས་འཚང་རྒྱ་བ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ རིག་པ་འདུས་མ་བྱས་པའི་གནད་ཀྱིས་འདུས་བྱས་ཀྱི་དགེ་བ་དཔག་ཏུ་མེད་པ་བྱས་པའི་དད་པ་ཅན་དང་སྡིག་ཅན་གཉིས་ལ་ཚོགས་རྫོགས་པའི་སྒོ་ནས་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ རིག་པའི་ཡེ་ཤེས་ལ་འགྲོ་འོང་མེད་པའི་གནད་ཀྱིས་ཆོས་ཉིད་ཀྱི་རྟགས་དུ་མ་དང་ལྡན་པའི་སྐྱེས་བུ་དང་ཐོས་བསམ་ལ་མ་སྦྱངས་པ་གཉིས་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ ཆོས་ཉིད་ལ་སྐྱེ་འགག་མེད་པའི་གནད་ཀྱིས་དམྱལ་བའི་སྡུག་བསྔལ་མྱོང་དགོས་པའི་སྡིག་ཅན་དང༔ བདེ་བའི་འབྲས་བུ་མྱོང་ངེས་པའི་སྐྱེས་བུ་གཉིས་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ རིག་པ་ལ་འགྱུར་བ་མེད་གནད་ཀྱིས་ཆོས་ཀྱི་སྤྲོས་པ་ཆོད་པའི་སྐྱེས་བུ་དང་བདག་ཏུ་ལྟ་བ་གཉིས་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ ཆོས་སྐུ་རང་ལ་ཡོད་པའི་གནད་ཀྱིས་ཕྱིར་མཆོད་བསྟོད་སྣ་ཚོགས་བྱས་པའི་སྐྱེས་བུ་དང་ཉལ་བ་གཉིས་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོས་བསྟན་ཏོ༔ རང་བཞིན་ཉག་གཅིག་མཐོང་བས་ལྟ་བའི་ལྟ་བར་གྱུར༔ མཉམ་བཞག་ཟུང་འཇུག་ཤེས་པས་སྒོམ་པའི་སྒོམ་པར་གྱུར༔ རྩལ་ཆེན་ཡོངས་རྫོགས་ཤེས་པས་སྤྱོད་པའི་སྤྱོད་པར་གྱུར༔ རང་དག་ཅེར་ཚད་ཟིན་པས་འབྲས་བུའི་འབྲས་བུར་གྱུར༔ འདི་ལྟར་རྒྱུད་ལ་འབྱོངས་ན་ཀུན་ཏུ་བཟང་པོའི་ལམ༔ གཞིའི་ངོམ་ཚིག༔ ལམ་གྱི་ཁྱད་མེད༔ འབྲས་བུའི་རང་མཉམ་དུ་གཏན་ལ་ཕབ་པ་ཁྱད་མེད་བདུན་པ་རྫོགས་སོ༔ རྒྱ་རྒྱ་རྒྱ༔ ཨེ་མ་ཧོ༔ འདིར་ནི་ཡང་གསང་དོན་བསྟན་པ༔ ཚོགས་དང་མཆོད་པའི་རིམ་པ་ཡི༔ དགེ་སྦྱོར་རྣམས་ནི་རྒྱུད་ཐག་གཅད༔ ཐོས་དང་བསམ་དང་སྒོམ་པ་ཡིས༔ ངན་སོང་གསུམ་གྱི་འདུན་ས་བྱེད༔ ལྟ་དང་སྒོམ་དང་སྤྱོད་པ་ཡིས༔ སྡུག་བསྔལ་རྣམས་ཀྱི་ཕུང་པོ་འཛིན༔ ལྷ་དང་གཏོར་མ་དཀྱིལ་འཁོར་གྱིས༔ འཁོར་བའི་བག་ཆགས་རྟེན་པར་བྱེད༔ སྔགས་དང་ཏིང་འཛིན་བསྟོད་གསོལ་གྱིས༔ འཇིག་རྟེན་དྲི་མ་སྣ་ཚོགས་སྡུད༔ ཐེག་པའི་རིས་དང་གྲུབ་མཐའ་ཡིས༔ རང་གི་དེ་ཉིད་འདམ་དུ་འཆིང༔ དད་དང་ཤེས་རབ་བརྩོན་འགྲུས་ཀྱིས༔ ཐར་པའི་ལམ་ཆེན་སྒྲིབ་པར་བྱེད༔ དབང་དང་དམ་ཚིག་སྡོམ་པ་ཡིས༔ བླ་མའི་བྱིན་རླབས་སྤོང་བར་བྱེད༔ གོམས་དང་དྲོད་ཚད་རྟགས་རྣམས་ཀྱིས༔ སྐུ་གསུམ་འབྲས་བུ་བསླུ་བར་བྱེད༔ བླ་མ་སངས་རྒྱས་ཡི་དམ་གྱིས༔ ངན་སོང་གསུམ་དུ་བྱིང་བར་བྱེད༔ སྒྲུབ་དང་སྒྲུབ་པ་ཆེན་པོ་ཡིས༔ ལྷ་ཡི་སྐུ་རྣམས་སྤོང་བར་བྱེད༔ སྦྱིན་དང་བཟོད་དང་བརྩོན་འགྲུས་ཀྱིས༔ འཁོར་བའི་སྒོ་ཉིད་སྤེལ་བར་བྱེད༔ དེ་ཕྱིར་ཡེ་ཤེས་ཡེ་ཤེས་ལས༔ ཡེ་ཤེས་ཉིད་ནི་ཁྱད་པར་ཆེ༔ སྲོག་བཅད་པས་ནི་བདེ་བ་ཐོབ༔ མ་བྱིན་ལེན་པ་ངེས་པའི་ལམ༔ མི་ཚངས་སྤྱོད་པས་བདེ་སྟོང་རྟོགས༔ མདོར་ན་ལུས་ངག་འདོད་ཡོན་རྣམས༔ ཇི་ལྟར་སྤྱད་ཀྱང་དེ་རང་ཉིད༔ ལྟ་བའི་སྙིང་པོ་ཞེས་བྱ་བ༔ སློབ་དཔོན་མཁས་པ་ཆེན་པོ་ཡེ་ཤེས་མདོས༔ རྒྱུད་ཀུན་གྱི་ཁོང་དོན་དུ་མཛད་པ་རྫོགས་སོ༔ རྒྱ་རྒྱ་རྒྱ༔ སངས་རྒྱས་རྣམས་ཀྱི་ཐུགས་ཀྱི་དགོངས་བརྒྱུད་པའི༔ ཐུགས་རྗེ་མཆོག་གི་སྤྲུལ་པ་མི་ལུས་ཅན༔ འཇིག་རྟེན་ལས་གཙོ་དམ་པ་དྲི་མེད་མགོན༔ སྐུ་གསུང་ཐུགས་ཀྱི་བྱིན་རླབས་རྨད་པོ་ཆེ༔ དམ་པ་ངེས་པའི་སྐལ་ལྡན་ཉིད་ལ་ནི༔ བདག་གིས་སྤྱི་བོས་ཞབས་ལ་རབ་བཏུད་ནས༔ མགོན་པོ་བདག་འཆིང་གཅོད་ལ་ཕྱག་འཚལ་ལོ༔ བཀང་གསང་ངེས་པའི་ལུང་རབ་སྣང་བ་འདི༔ བཀའ་ཡི་བྱིན་རླབས་རིམ་ནས་རིམ་བརྒྱུད་པ༔ བདག་གི་བློ་ལ་ངེས་པའི་འབྲས་བུ་འདི༔ ངེས་པའི་ཤེས་པ་རྟོགས་ཏེ་རྟགས་འདི་དག༔ འདི་ལ་གོམས་པའི་སྟོབས་ཀྱིས་ཤར་བ་ཡིན༔ དང་པོ་ཉིད་ནས་ཡོད་པ་མ་ཡིན་ཏེ༔ བདག་གི་ཡུལ་ནི་རྒྱ་གར་ཤར་ཕྱོགས་སུ༔ རིགས་ན ི་གདོལ་པ་རབ་ཏུ་དམན་པའི་རིགས༔ ཕ་ནི་ཤན་ཏིང་ལག་པ་ཞེས་བྱ་དང༔ མ་ནི་དགེ་སེམས་བྱམས་མ་ཤེས་བྱའི་བུར༔ བདག་ནི་སྐྱེ་བའི་ལུས་བླངས་ནས༔ ད་ལྟའི་ལུས་ལ་ཐུག་བར་རོ༔ དེ་དུས་ཕུང་པོ་བག་ཆགས་ལ༔ ད་ལྟའི་རྟགས་འདི་ག་ལ་སྲིད༔ དེ་ཕྱིར་འདི་ལ་རབ་གོམས་ནས༔ རྟགས་ནི་འདོད་པ་མེད་བཞིན་འབྱུང༔ སྔོན་གྱི་ཕུང་པོ་དར་བའི་དུས༔ སྡེ་སྣོད་རྣམས་ལ་བློ་སྦྱངས་ནས༔ ཐེག་པ་རྣམས་ཀྱི་སྤྲོས་པ་བཅད༔ དེ་ནས་རྡོ་རྗེ་གདན་དྲུང་ཡོད༔ ཕྱག་རྒྱ་ཡི་ནི་རྒྱ་ཆེན་དང༔ དུས་ཀྱི་འགྲོ་དོན་ཁམས་བསངས་པས༔ ནུབ་ཕྱོགས་འདམ་བུའི་ཚལ་གནས་ཚེ༔ ནམ་མཁའ་མི་མཇེད་བར་སྣང་ནས༔ རྡོ་རྗེ་སེམས་དཔའ་ཞེས་བྱའི་སྐུ༔ མིག་གི་ཡུལ་དུ་མངོན་པ་རུ༔ སྣང་བར་གྱུར་ཏེ་ལུང་ཡང་བསྟན༔ རྒྱ་ནག་རིགས་ནི་ཡིན་པར་གྲགས༔ དེ་ནས་གཉིས་ཀྱིས་སླར་ལོག་ནས༔ སོ་སོའི་གྲོང་ཁང་ནང་དུ་ཡོང༔ བདག་ནི་ལེ་ལོས་བཅིངས་ཏེ་གཡེངས༔ དེ་དུས་དམ་པའི་ལུས་མ་བླངས༔ ཕྱིས་ནི་བི་མ་ལ་དང་ཕྲད༔ བདག་ཀྱང་དད་དང་བརྩོན་འགྲུས་སྤྲུག༔ དམ་པའི་བྱིན་རླབས་སྙིང་ལ་ཞུགས༔ ལམ་ཡང་ནམ་མཁའ་དག་ལས་ཕྱུང༔ བྱང་ཆུབ་འབྱུང་བའི་ཤིང་དྲུང་དུ༔ བླ་མ་ལ་དམིགས་ལུས་ཀྱིས་བརྟོལ༔ དམ་པ་ཉིད་ནི་མི་སྣང་བར༔ བདག་ནི་ཤེས་པ་ཡིད་ཀྱང་འཁྲུགས༔ དེ་ནས་ཕྱོགས་ནི་ཀུན་ཏུ་བལྟས༔ གཞན་ནི་གང་ཡང་མ་མཐོང་བར༔ བུད་མེད་ལྡེམ་བག་ཆུ་བན་ཁུར༔ དུང་སོ་འཁོར་བ་སྨིན་མ་གཡུ༔ དཔྲལ་བའི་གཉེར་མ་གྱེན་ལ་ལངས༔ ཤིན་ཏུ་མཚན་ལྡན་གཅིག་ན་རེ༔ དམ་པ་ངེས་པའི་ལུང་འདོད་ན༔ བཀྲ་ཤིས་ཁྲི་སྒོར་སྣང་བར་འགྱུར༔ ཞེས་བསྟན་བདག་གིས་དེར་ཕྱིན་པས༔ ཐུགས་རྗེའི་མངའ་བདག་ཉིད་དང་ཕྲད༔ བྱིན་རླབས་རིམ་པ་དེ་རུ་ཞུས༔ ཡུན་རིང་སྒྲིབ་པ་མ་སྦྱངས་པར༔ རང་བཞིན་གྱིས་ནི་གནས་སུ་དག༔ སྐུ་གསུམ་རང་ངེས་ལུང་ཡང་ཐོབ༔ ལོ་ནི་བཅུ་བདུན་བར་དག་ཏུ༔ དམ་པའི་མཛད་སྤྱོད་རྟེན་འབྲེལ་བལྟས༔ བླ་མ་འབྱུང་བ་རང་དེངས་སུ༔ ནམ་མཁའ་འོད་ཀྱིས་བཀང་སྟེ་གཤེགས༔ བྱིན་རླབས་ཚིག་གི་སྤྲོས་པ་བཅད༔ བླ་མས་ལུང་ཉིད་རབ་བསྟན་པས༔ ཐིག་ལེ་མཆོག་གི་ཡི་གེ་རྣམས༔ ཁྱེར་ཏེ་བྷ་སིང་ནགས་སུ་ཕྱིན༔ མདོར་ན་མན་ངག་ངེས་པའི་དོན༔ མཁའ་འགྲོ་རྣམས་ཀྱི་གདུང་བ་བཅད༔ སྐལ་ལྡན་སྙིང་གི་བུ་གཅིག་པོ༔ བི་མ་མི་ཏྲ་ཁྱོད་ལ་གཏད༔ འདི་ལ་རབ་ཏུ་གོམས་པར་མཛོད༔ གལ་ཏེ་འདི་ལ་མ་གོམས་ན༔ མ་སྤྱད་བཞག་པའི་གཏེར་དང་འདྲ༔ དེ་བས་འདི་ལ་གོམས་པ་གཅེས༔ ནམ་ཞིག་སྐལ་ལྡ ན་གཉིས་ནས་གསུམ༔ བཞི་ལས་མང་ན་མཁའ་འགྲོས་འཚོད༔ སྙིང་དང་འདྲ་བའི་རིགས་ལ་གཏོད༔ རང་གར་བཏང་ན་རང་སྲོག་འཚིག༔ དེ་བས་སྙིང་ལ་རབ་ཏུ་བརྣོགས༔ ཞེས་ཡེ་ཤེས་མདོས་གསུངས་སོ༔ རྒྱ་རྒྱ་རྒྱ༔ ལས་ཅན་དེ་དང་འཕྲད་པར་ཤོག༔ རྒྱ་གར་གྱི་མཁས་པ་ཆེན་པོ་བི་མ་ལ་མི་ཏྲས་སྒྲ་རང་འགྱུར་དུ་བསྒྱུར་བའོ༔ སྨུག་ནག་ཁྲོས་མའི་རྒྱལ་མོ་ཨེ་ཀ་ཙ་ཏི་དང༔ དཔལ་མགོན་པོ་ནག་པོ་ལ་གཏད་དོ༔ སྲུངས་ཤིག༔ རྒྱ་རྒྱ་རྒྱ༔ རྒྱ་གར་སྐད་དུ༔ ས་མུན་ཏྲ་སརྦ་ནོ་པི་ཀ༔ ཀ་ཏ་པ་ཏ་ན་ཧ་ནཱ་མ༔ བོད་སྐད་དུ༔ སྣང་བ་འདུས་པའི་བཅུད་ཕུར་ཞེས་བྱ་བ༔ བཅོམ་ལྡན་འདས་མངོན་པར་བྱང་ཆུབ་པའི་སྐུ་ལ་ཕྱག་འཚལ་ལོ༔ འཇིག་རྟེན་ཁམས་ན་དཀོན་པའི་རིན་ཆེན་འདི༔ ཕྱི་རབས་རྣལ་འབྱོར་རྣམས་ཀྱི་དོན་ཉིད་དུ༔ བླ་མའི་ལུང་དང་མཐུན་པར་བདག་གིས་བཀོད༔ སྣང་བ་རྣམས་ཀྱིས་དངོས་ལ་གང་བསྒྲིབས་པ༔ དེ་ཡི་མདོ་རྣམས་གསལ་བར་བྱ་བའི་ཕྱིར༔ ཚིག་ཉུང་དོན་འདུས་གསལ་བར་གཏན་ལ་དབབ༔ འཁྲུལ་པའི་སྣང་བ་ཉིད་ཀྱི་གང་བཅིངས་པ༔ དེ་ཉིད་གྲོལ་བའི་ཐབས་འདི་མཆོག་ཏུ་བཟུང༔ སེམས་སོགས་ཉོན་མོངས་རྣམས་ཀྱིས་གང་བསྒྲིབས་པ༔ དེ་ཉིད་སེལ་བར་འདོད་པའི་སྐལ་ལྡན་རྣམས༔ ཡི་གེ་འདི་ལ་རྟག་ཏུ་གོམས་པར་མཛོད༔ སྣང་བ་ཐམས་ཅད་སྣང་བའི་བདག་པོར་བྱུང་བ་ནི་རྡོ་རྗེ་སེམས་དཔའི་རྡོ་རྗེ་སེམས་དཔའ་ཡིན༔ ཞེས་པ་ནི༔ འགྲོ་དྲུག་འཁྲུལ་པའི་སྣང་བ་མེད་ན་ནི་ཆོས་ཅན་གྱི་གཞི་མེད་པས་ལས་དང་པོ་བས་འགྲོ་དྲུག་འཁྲུལ་པའི་སྣང་བ་ཙམ་འབྱོངས་པ་ཤིན་ཏུ་གཅེས་སོ༔ ཡེ་ཤེས་སྒྱུ་མའི་སྣང་བ་མེད་ན་སེམས་ཅན་གྱི་ལམ་ཆད་པས་ལས་དང་པོ་བས་དཔེ་རྣམས་གོམས་པར་བྱ་སྟེ༔ ཡེ་ཤེས་སྒྱུ་མའི་སྣང་བ་ཙམ་ཤེས་པ་གལ་ཆེའོ༔ རིག་པ་མངོན་སུམ་གྱི་སྣང་བ་མེད་ན་སྐྱེས་བུ་རྣམས་ཀྱིས་འབད་རྩོལ་ཅི་བྱས་ཀྱང་རང་སངས་མི་རྒྱ་བས་རྣལ་འབྱོར་པ་རྣམས་ཀྱིས་རིག་པ་མངོན་སུམ་གྱི་སྣང་བ་ལ་གོམས་པ་གཅེས་སོ༔ བདེ་གཤེགས་གདུལ་བྱའི་སྣང་བ་མེད་ན་རྟེན་གྱི་གང་ཟག་རྣམས་སངས་རྒྱས་པའི་དུས་ན་སྤྲུལ་སྐུའི་ཞིང་མི་ཤེས་པས་བདེ་གཤེགས་གདུལ་བྱའི་སྣང་བ་ལ་རྩ་ལ་རྫོགས་པ་རབ་ཏུ་གཅེས་སོ༔ འཁྲུལ་པ་རང་དག་གི་སྣང་བ་མེད་ན་ཉམས་སུ་བླངས་ཀྱང་ཚེ་འདི་རུ་རྟགས་མི་ཕྱིན་པས་སྐལ་ལྡན་རྣམས་ཀྱི་འཁྲུལ་པ་རང་དག་གི་སྣང་བ་ལ་ཚད་དུ་ཟིན་པ་རབ་ཏུ་གཅེས་སོ༔ ཆོས་ཉིད་རང་ཟད་ཀྱི་སྣང་བ་མེད་ན་རྟགས་དང་རྫུ་འཕྲུལ་བསམ་གྱིས་མི་ཁྱབ་པ་ཡོད་ཀྱང་འབྲས་བུ་ལ་ཐུག་པ་མེད་པས་ན་ཆོས་ཉིད་རང་ཟད་ཀྱི་སྣང་བ་ཟད་སར་རབ་ཏུ་སྐྱོལ་བ་གཅེས་སོ༔ ངོ་བོ་ཀ་དག་གི་སྣང་བ་མེད་ན་སྐྱེས་བུ་རྣམས་ཀྱིས་འབྲས་བུ་ཟད་སར་བསྐྱལ་ཡང་རིག་པ་འབེམ་གྱི་གྲོལ་བ་ངོ་མི་ཤེས་པས༔ འབྱུང་བ་རང་དག་ཏུ་སོང་བའི་སྐྱེས་བུ་རྣམས་ཀྱིས་ངོ་བོ་ཀ་དག་གི་སྣང་བའི་ས་བཟུང་བ་རབ་ཏུ་གཅེས་སོ༔ རང་བཞིན་ལྷུན་གྲུབ་ཀྱི་སྣང་བ་མེད་ན་སྐྱེས་བུ་དེ་སངས་རྒྱས་ཀྱང་ཐུགས་རྗེས་སེམས་ཅན་གྱི་དོན་བྱེད་མི་ནུས་པས་རང་བཞིན་ལྷུན་གྲུབ་ཀྱི་སྣང་བ་ལ་གོམས་ཤིང་ངོ་ཤེས་པར་རབ་ཏུ་གཅེས་སོ༔ དེ་ལྟར་སྐྱེས་བུས་སྣང་བ་རྣམ་པ་བརྒྱད་ཀྱི་དོན་ཤེས་ནས༔ སྣང་བ་འདི་དག་རྣམ་པར་དག་པའི་རྟགས་དང་ལྡན་པའི་གང་ཟག་ཅེས་བྱའོ༔ འགྲོ་དྲུག་འཁྲུལ་པའི་སྣང་བའི་དུས་ན་སྐྱེས་བུ་རྣམས་ཀྱིས་འདི་ལྟར་ཤེས་པར་བྱའོ༔ སྣང་བ་མཆེད་པར་ཤེས་པ་རྣམས་ཀྱི་སྒོ་ལྔའི་རླུང་ཟད་དེ་རང་དག་པའོ༔ སྣང་བ་ཐོབ་པའི་དོན་ཤེས་པའི་སྐལ་ལྡན་རྣམས་ཀྱི་ཁ་དོག་དང་དབྱིབས་སུ་འཛིན་པའི་རླུང་ཟད་དེ་འཁྲུལ་པའི་དེ་ཉིད་དུ་ཤེས་པའོ༔ སྣང་བ་ཉེ་བར་ཐོབ་པའི་རྣལ་འབྱོར་པས་ནི་ཉེ་བར་ལེན་པའི་ཕུང་པོར་འཛིན་པའི་རླུང་ཟད་དེ་སྐུ་ཕྱག་རྒྱ་ཆེན་པོར་གྲོལ་ལོ༔ དེའི་ཕྱིར་ན༔ མཆེད་དང་ཐོབ་པ་ཉེར་ཐོབ་པ༔ འདི་དག་རླུང་ལ་བརྟེན་པའོ༔ མཆེད་པ་རྟོགས་ཕྱིར་གྲངས་རླུང་ཟད༔ ཕྱག་རྒྱ་ཆེན་པོར་རང་གྲོལ་བའོ༔ ཐོབ་པའི་ས་ནི་སྤྲུ་ཟེར༔ ཕྲ་རླུང་སྟོབས༔ ཉེར་ཐོབ་པས་ནི་བདག་འཛིན་གྲོལ༔ ཞེས་སོ༔ ཡེ་ཤེས་སྒྱུ་མར་སྣང་བའི་དུས་ནི༔ སྐུའི་སྣང་བ་ཚོམ་བུ་ལ་མཁས་པར་བྱ་བ་དང༔ ཐིག་ལེའི་སྣང་བ་ལ་མཁས་པར་བྱ་བ་དང ༔ ཡེ་ཤེས་ཀྱི་སྣང་བ་ཟེར་ཐག་ལ་མཁས་པར་བྱ་བ་དང༔ འོད་ཀྱི་སྣང་བ་དུམ་བུ་ལ་མཁས་པར་བྱ་བ་ནི་རྣལ་འབྱོར་པ་རྣམས་ཀྱིས་ལམ་མཐོང་བ་ལ་མཁས་པར་བྱ་བ་སྟེ༔ དེའི་ཕྱིར་ན༔ སྐུ་དང་ཐིག་ལེ་ཡེ་ཤེས་འོད༔ འདི་དག་རྣམས་ལ་སུ་གོམས་པ༔ ཡེ་ཤེས་དག་པའི་ལམ་ཟིན་པའོ༔ ཞེས་ཏེ༔ ལྔ་ལྔ་ཟུང་དུ་འབྲེལ་བའི་ཚེ༔ རང་ངོ་གནད་ལ་དྲིལ་བ་གཅེས༔ འཕྲོ་དང་འདུ་དང་འགྱུར་བའི་ཚེ༔ རང་གི་ཤེས་པ་བརྟན་པ་གཅེས༔ སྙིང་ཁར་ཟེར་ཐག་ཤར་བའི་ཚེ༔ གོང་གི་ཡིད་ཆེས་བཟུང་བ་གཅེས༔ སྣང་བ་དུམ་བུར་ཤར་བའི་ཚེ༔ མཁས་པས་སྣང་བ་མཆེད་པ་བཟུང༔ ཞེས་པའོ༔ རིག་པ་མངོན་སུམ་གྱི་སྣང་བ་ནི༔ ལུས་ངག་གི་སྣང་བ་བཟློག་ལ་སྔོན་དུ་འགྲོ་བའི་རིམ་བ་ལ་མཁས་པར་བྱའོ༔ ཉམས་གོང་ནས་གོང་དུ་འཕེལ་བ་ལ་སྣང་བའི་ཚད་ལ་མཁས་པར་བྱའོ༔ ཆོས་ཉིད་རང་ཟད་ཀྱི་རིག་པ་ངོ་བོ་ཀ་དག་གི་འདུག་ས་ཤེས་པར་བྱའོ༔ དེའི་ཕྱིར་ན༔ སྒོ་དང་ཡུལ་དང་གནད་དང་གསུམ༔ འདི་གསུམ་ལམ་དུ་གང་བྱེད་པ༔ འབྱུང་བ་རྣམས་ལས་རང་སར་གྲོལ༔ ཞེས་སོ༔ བདེ་གཤེགས་གདུལ་བྱའི་སྣང་བ་ནི༔ གང་གི་ཞིང་ཁམས་མཁས་པས་དབྱིངས་རྣམས་ལ་ཚད་ཟིན་པ་དང༔ གང་གིས་སྐུ་ཡི་སྣང་བ་ལ་མཁས་པས་བདག་མེད་རྟོགས་པ་དང༔ མཛད་པའི་སྣང་བ་ལ་མཁས་པ་དང༔ སེམས་ཅན་གྱི་དོན་ལ་ཐོགས་པ་མེད་པའོ༔ དེའི་ཕྱིར་ན༔ ཁམས་གསུམ་པ་དང་མཛད་པ་ལ༔ གང་གིས་འདི་གསུམ་མངོན་སྤྱོད་ན༔ སངས་རྒྱས་སྐུ་གསུམ་མངོན་དུ་ཤེས༔ ཞེས་པས་སོ༔ འཁྲུལ་པ་རང་དག་གི་སྣང་བ་ནི༔ དག་པའི་སའི་སྣང་བ་ལ་མཁས་པས་ཕུང་པོ་མྱ་ངན་ལས་འདས་པའི་དོན་རྟོགས་པ་དང ༔ དག་པ་དུས་ཀྱི་སྣང་བ་ལ་མཁས་པས་ཡུལ་རྣམས་མྱ་ངན་ལས་འདས་པའི་དོན་རྟོགས་པ་དང༔ དག་པའི་ཚད་ལ་མཁས་པས་ནི་འབྲས་བུ་མྱ་ངན་ལས་འདས་པའི་དོན་རྟོགས་པ་དང ༔ དེའི་ཕྱིར་ན༔ ས་དང་ཚད་དང་དུས་ཤེས་ན༔ སྣང་བ་རྣམས་ལ་ཅིད་དགར་རོལ༔ ཞེས་པའོ༔ ཆོས་ཉིད་རང་ཟད་ཀྱི་དགོངས་པ་ནི༔ ཟད་པའི་དུས་ལ་མཁས་པས་འབྱུང་བ་རྣམས་རང་སར་དག་པ་དང ༔ ཟད་པའི་ལུགས་ལ་མཁས་པས་སྐུ་དང་ཡེ་ཤེས་སྟོང་དང་མི་སྟོང་ལ་སོགས་པ་རྣམས་རང་སར་དག་པའོ༔ དེའི་ཕྱིར་ན༔ དུས་དང་ལུགས་དང་ཚད་རྣམས་ཀྱིས༔ བླ་མའི་མན་ངག་མཐར་ཕྱིན་པའོ༔ ཞེས་པའོ༔ ངོ་བོ་ཀ་དག་གི་སྣང་བ་ནི༔ ངོ་བོའི་སྣང་བ་ལ་མཁས་པས་སྐུའི་དེ་བཞིན་ཉིད་ཀ་ནས་དག་པ་དང༔ རང་བཞིན་གྱི་སྣང་བ་ལ་མཁས་པས་འོད་དང་ཐིག་ལེའི་དེ་བཞིན་ཉིད་རྣམ་པར་དག་པ་དང༔ ཐུགས་རྗེའི་སྣང་བ་ལ་མཁས་པས་གཟིས་སྣ་ཐམས་ཅད་མཁྱེན་པའི་ཡེ་ཤེས་སུ་ཀ་ནས་དག་པའོ༔ དེའི་ཕྱིར་ན༔ ངོ་བོ་རང་བཞིན་ཐུགས་རྗེ་ཡིས༔ བྱས་པའི་དོན་རྣམས་ཆུད་མི་གསོན༔ ཞེས་པའོ༔ རང་བཞིན་ལྷུན་གྲུབ་ཀྱི་སྣང་བ་ལ་མཁས་པ་ནི༔ འཆར་ལུགས་ཀྱི་སྣང་བ་ལ་མཁས་པས་མཐའ་གང་ལའང་མི་གནས་པར་མྱ་ངན་ལས་འདས་པའོ༔ དེའི་ཕྱིར་ན༔ འཆར་ལུགས་ཐིམ་ལུགས་གྲོལ་ལུགས་དང༔ རང་གི་གདིང་དུ་ཆུད་པའོ༔ འཁྲུལ་པ་རྣམས་ནི་རང་དག་པའོ༔ ཞེས་སོ༔ དེ་ལྟར་ན་སྣང་བ་རྣམ་པ་བརྒྱད་ཀྱི་དོན་སྐྱེས་བུས་ཉམས་སུ་མྱོང་ནས་སངས་རྒྱས་དང་མཉམ་པར་སྦྱོར་བ་ཞེས་བྱའོ༔ སྣང་བ་རིན་པོ་ཆེའི་པྲ་ཁྲིད་ཅེས་བྱ་བ༔ མཁས་པ་བི་མ་ལ་མུ་ཏྲས་དུར་ཁྲོད་ཆེན་པོ་རབ་ཏུ་སྣང་བྱེད་དུ་མཁའ་འགྲོ་བདེ་བའི་ཡིད་ཅན་གྱི་དོན་དུ་མཛད་པའོ༔ རྫོགས་སོ༔ རྒྱ་གར་གྱི་མཁས་པ་ཆེན་པོ་བི་མ་ལ་མི་ཏྲས་སྒྲ་རང་འགྱུར་དུ་བསྒྱུར་བའོ༔ གུ་རུ་ན་མོ་ཡོ་གི༔ དམ་པ་སངས་རྒྱས་ཀུན་གྱི་ཞལ་མཐོང་བདུད་རྩིའི་རོ་ལྡན་པའི༔ རོ་ལངས་བདེ་བ་བཅོམ་ལྡན་ལྷ་ཡི་ལྷ་མཆོག་ཉིད༔ སངས་རྒྱས་སྤྲུལ་པ་འགྲོ་བའི་གདུང་བ་སེལ་མཛད་པ༔ དམ་པ་བདུད་རྩི་བདེ་བ་ཉིད་ལ་ཕྱག་འཚལ་བསྟོད༔ དམ་པ་དེ་ཉིད་རྗེས་འཛིན་སྤྲུལ་པའི་སྐུ༔ ཉོན་མོངས་རང་དག་མཁྱེན་པའི་ཐུགས་དང་ལྡན༔ གསུང་གི་འོད་ཀྱིས་འགྲོ་བའི་སྡུག་བསྔལ་གཅོད༔ དམ་པ་ཡིད་བཞིན་མྱུ་གུ་དེ་ལ་ཕྱག་འཚལ་བསྟོད༔ དམ་པའི་གདུང་འཛིན་མཁས་པ་སྡེ་སྣོད་རྣམས་ཀྱི་བདག༔ ཐུགས་རྗེ་ཆེན་པོའི་སྤྲུལ་པ་འཛམ་གླིང་ཀུན་གྱི་རྒྱན༔ དྲི་མེད་གསུང་མངའ་འགྲོ་བ་ངལ་གསོའི་གནས༔ དམ་པ་ཤེས་རབ་མྱུ་གུ་དེ་ལ་ཕྱག་འཚལ་བསྟོད༔ དེ་རྗེས་འཛིན་པའི་མཁས་པ་འཇིག་རྟེན་གསུམ་གྱིས་མགོན༔ རྡོ་རྗེ་སེམས་དཔའི་སྤྲུལ་པ་བདག་བློའི་འཆིང་གཅོད་པ༔ ཚངས་པའི་གསུང་མངའ་མཁའ་འགྲོ་ཀུན་གྱི་ཡིད་རབ་འཕྲོག༔ དམ་པ་བདེ་བའི་མྱུ་གུ་མགོན་ལ་ཕྱག་འཚལ་བསྟོད༔ བདག་གིས་བླ་མ་རྣམས་ལ་བསྟོད་ཕུལ་བས༔ ཕྱི་རབས་རྗེས་སུ་འཇུག་པའི་རྣལ་འབྱོར་རྣམས༔ ཡིད་ཆེས་དད་པའི་མཆོག་ཏུ་འདི་ཟུང་ཞིག༔ གསང་བའི་མན་ངག་བདག་གི་ཁོག་སྙིང་འདི༔ རྒྱ་ཡིས་དཔེ་ལས་བོད་ཀྱི་ཡི་གེར་བསྒྱུར༔ བསྟན་ཞིང་བཤད་པའི་རྗེ་བློན་གཉིས་པོ་ཡང༔ དམ་ཚིག་གཞུང་དང་ལྡན་ཞིང་དད་ལྡན་ཡང༔ སྙིང་གི་མན་ངག་མཆོག་འདི་བློས་མ་ཐེངས༔ བསྟན་པའི་བཙས་སུ་ས་ཡི་གཏེར་དུ་སྦས༔ འདི་ཉིད་ནམ་ཞིག་འབྱུང་བའི་དུས་བྱུང་ན༔ སྐལ་ལྡན་སྙིང་གི་བུ་དང་འཕྲད་པར་ཤོག༔ མཆིམས་ཕུའི་བྲག་བཙན་རྡོ་རྗེ་དྲག་པོ་རྩལ༔ བཀའ་འདི་སྲུངས་ལ་བསྟན་པའི་བདག་པོ་གྱིས༔ ཆོས་སྐྱོང་མགོན་པོ་ལེགས་ལྡན་ནག་པོ་ཁྱོད༔ བཀའ་འདི་གཏད་དོ་ཁྱོད་ཀྱིས་ཐུབ་པར་སྲུངས༔ སྨུག་ནག་ཁྲོས་མའི་རྒྱལ་མོ་སྔགས་ཀྱི་བདག༔ བཀའ་འདི་བཅོལ་ལོ་ཁྱོད་ཀྱིས་དམ་དུ་ཟུང༔ གལ་ཏེ་དུས་མིན་སྨོན་ལམ་མཐའ་ཟད་ནས༔ བན་འདྲ་དམ་ཉམས་བདག་གིས་འདི་ཁྱེར་ན༔ ཚེ་ལ་བར་ཆོད་སྲོག་ལ་སྦར་གྱི་ཐོབ༔ སྙིང་ཁྲག་གཟོགས་ལ་མིག་འབྲས་ཐང་ལ་འབྲུལ༔ སྐལ་ལྡན་སྙིང་གི་བུ་དང་འཕྲད་པའི་ཚེ༔ ཞེན་པ་སྤོངས་ལ་དེ་ཡི་སྟོང་གྲོགས་གྱིས༔ དེས་ཀྱང་རང་རྒྱས་ཐོབ་ལ་སེམས་ལ་བརྣོགས༔ ས་མ་ཡ༔ རྒྱ་རྒྱ་རྒྱ༔ ༔ན།ཐཏྱ། ཨཨ༔ ྅྅྅དཔལ་བདེ་བ་ཆེན་པོ་ལ་ཕྱག་འཚལ་ལོ༔ གསང་བ་ཡང་ཞུན་པོ་ཏི་སྨུག་ཆུང་ལ༔ ཆོས་ཀྱི་སྡེ་དང་གྲངས་ནི་གསལ་བྱའི་ཕྱིར༔ གསང་བའི་དེ་བས་འདི་ལྷག་དང་ཆད་མེད་པར༔ ཡིད་ཆེས་འཇུག་ཕྱིར་ཡི་གེ་འདི་ལ་ལྟོས༔ བཀོད་པ་ཆེན་པོ་དུམ་བུའི་རྒྱུད་དག་ལས༔ སྐབས་ཀྱི་དོན་ནི་རྣམ་པ་བཅུ་གཉིས་ཡོད༔ རྨོངས་པ་གདུང་བ་སེལ་བ་ཡིད་ཆེས་ལོ་རྒྱུས་བསྟན༔ དེ་ཉིད་ལ་ནི་གཞུང་དོན་བཅུ་གཉིས་ལས༔ ཞུས་དོན་དང་པོས་སྟོན་པའི་བྱོན་ཚུལ་བསྟན༔ ཞུས་དོན་གཉིས་པས་འཇུག་སྒོ་གསལ་བར་བྱས༔ གསུམ་པས་བཤད་བྱ་འབྲས་བུའི་དོན་ཚིག་གིས༔ གཞུང་གི་དོན་ལ་དབྲི་གཞུག་མེད་པར་བསྟན༔ བཞི་པས་ཆོས་ཀྱི་སྡེ་དང་གྲངས་རྣམས་བསྟན༔ ལྔ་པས་དོན་གྱི་གཞུང་རྣམས་གསལ་བར་བཀོད༔ དྲུག་པས་སྙིང་གི་རྒྱུད་རྣམས་བསྡུས་ཏེ་བསྟན༔ བདུན་པས་སྐལ་ལྡན་ཕྱི་རབས་ལུང་ཡང་བསྟན༔ བརྒྱད་པས་བསྟན་པའི་སྙིང་པོའི་བྱུང་ཁུངས་བསྟན༔ དགུ་པས་བསྟན་པ་འབྱུང་བའི་ལུང་ཡང་བསྟན༔ བཅུ་པས་འབྲས་བུ་ཐོབ་པའི་གྲངས་ལུང་བསྟན༔ བཅུ་གཅིག་བ་དོར་སངས་རྒྱས་འབྱུང་ཚུལ་བསྟན༔ བཅུ་གཉིས་རང་བཞིན་སྤྲུལ་སྐུར་དབུགས་འབྱིན་བསྟན༔ དེ་དག་རྨོངས་པ་གདུང་བ་སེལ་བའི་སྐབས་དོན་ནོ༔ སྐབས་དོན་གཉིས་པས་སེམས་ཉིད་གཏན་ལ་ཕབ༔ གསུམ་པ་ཡིས་ནི་རྒྱུད་ལུང་གསལ་བར་བྱས༔ བཞི་པ་ཡིས་ནི་ལྷ་རྣམས་མངོན་དུ་བསྒོམས༔ ལྔ་པ་ཡིས་ནི་སྐྱེ་མེད་མན་ངག་བསྟན༔ དྲུག་པ་ཡིས་ནི་ཆོས་སྐུ་གཏན་ལ་ཕབ༔ བདུན་པ་ཡིས་ནི་འཁྲུལ་པའི་དོན་རྣམས་བསྟན༔ བརྒྱད་པ་ཡིས་ནི་ཉོན་མོངས་རང་དག་བསྟན༔ དགུ་པ་ཡིས་ནི་ལྷག་པའི་བསམ་གཏན་བསྟན༔ བཅུ་པ་ཡིས་ནི་ཞིང་ཁམས་རང་གནད་བསྟན༔ བཅུ་གཅིག་པས་ནི་བྱ་བྱེད་ལམ་དུ་བླངས༔ བཅུ་གཉིས་པས་ནི་བཀོད་པ་ཡོངས་རྫོགས་བསྟན༔ དེ་ལྟར་སྐབས་དོན་བཅུ་གཉིས་ཀྱིས༔ བཀོད་པ་ཆེན་པོའི་སྙིང་པོ་རྫོགས༔ གཅེས་པའི་སྙིང་པོ་འཇམ་དཔལ་བཤེས་གཉེན་མ་ཡིས་རང་དོན་གཏན་ལ་ཕབ༔ དཔེ་ཡིས་སྒྲོན་མ་དགའ་རབ་རྡོ་རྗེ་མ་ཡིས་གཞན་དོན་གཏན་ལ་ཕབ༔ འཆི་བ་བརྟག་པ་འཇམ་དཔལ་བཤེས་གཉེན་མས་ནི་རང་གཞན་གཉིས་ཀྱི་དོན༔ འཆི་བ་བསླུ་བ་ཤྲཱི་སིཾ་ཧ་མས་ནི་ཕལ་ཆེར་རང་གི་དོན༔ ཡེ་ཤེས་མདོ་ཡིས་ལྟ་བའི་སྙིང་པོས་འབད་མེད་གྲོལ་བ་བསྟན༔ བི་མ་ལ་ཡིས་རིན་ཆེན་པྲ་ཁྲིད་སྣང་བ་གཏན་ལ་ཕབ༔ དེ་དག་རྣམས་ཀྱིས་པོ་ཏི་སྨུག་ཆུང་རྫོགས༔ གལ་ཏེ་ཕྱི་མའི་དུས་ཀྱི་སྙིགས་མ་ལ༔ མན་ངག་དུམ་བུའི་དེ་བས་མཁས་པ་བི་མ་ལས་མཛད་པ་རྫོགས་སོ༔ ལས་ཅན་གཅིག་དང་འཕྲད་པར་ཤོག༔ དམ་པ་སངས་རྒྱས་ཀུན་གྱི་གདུང་འཛིན་པའི༔ རྒྱ་གར་མཁས་པ་ལྔ་ལ་བདག་ཕྱག་འཚལ༔ བདག་འདྲ་སྨྱོན་པ་ལྕེ་བཙུན་གྱིས༔ སངས་རྒྱས་རྣམས་ཀྱི་ཐུགས་རྗེའི་ཉི་མ་འདི༔ སྔོན་ནས་སྦྱངས་པའི་སྟོབས་ཀྱིས་བདག་ལ་གཏེར་རྣམས་བབས༔ གསང་བའི་རྒྱུད་ལུང་མན་ངག་ཕྱི་མོ་རྣམས༔ དམ་པའི་སྤྲུལ་པ་ལྡང་མས་བདག་ལ་གཏད༔ ཤིན་ཏུ་དཀོན་པའི་མན་ངག་པོ་ཏི་བཞི༔ མཆིམས་ཕུ་དགེ་གོང་ཤར་གྱི་ཕ་བོང་འོག༔ ལྕགས་ཀྱི་སྣོད་དུ་གདམས་པ་བདག་གིས་བཏོན༔ ཁུ་ལུང་གད་སྟེང་ཁྱི་རྟག་དབེན་རྩ་ནས༔ གནུབས་ཀྱི་ངན་སྔགས་བརྒྱ་དང་བརྒྱད་ཅུ་ཏེ༔ ཤངས་དང་རྟ་ནག་འདུས་པའི་རི་ཡི་ཟོམ༔ སྤོ་མཐོན་རྫ་ནས་པདྨའི་ཆོས་རྣམས་བཏོན༔ དེ་ལྟར་གཏེར་གྱི་མན་ངག་བཀའ་འདུས་པའི༔ མན་ངག་ཀུན་གྱི་བདག་པོར་བདག་གྱུར་ཏེ༔ ལུང་བསྟན་པ་བསྟན་པའི་གནས་མ་རྙེད༔ སླར་ལ་ས་ཡི་འོག་ཏུ་སྦ་སྙམ་ནས༔ ལུང་དང་མཐུན་པའི་གཏེར་ཁ་ལྔ་རུ་སྦས༔ འདི་དག་ནམ་ཞིག་འབྱུང་བའི་དུས་བྱུང་ན༔ སྐལ་ལྡན་ལུང་བསྟན་དེ་དང་འཕྲད་པར་ཤོག༔ ཞྭ་ཡི་མགོན་པོ་ཁྱོད་ཀྱིས་བཀའ་འདི་སྲུངས༔ རྩེ་ལ་བྱང་ཆུབ་རྒྱལ་བ་ཡུམ་གྱི་ལྷ༔ ཁྱོད་ལ་གཏད་དོ་བཀའ་འདི་དམ་དུ་ཟུང༔ ཞེས་གསུངས་ནས་གཏེར་དུ་སྦས་སོ༔ བདག་གིས་འདི་ནས་ཇི་ལྟར་འདུག་པ་བཞིན༔ ཉམས་སུ་བླངས་པས་གྲུབ་པ་ཡང་དེ་ཁོ་ན་བཞིན་ཐོབ་པ་ལགས་སོ༔ ས་མ་ཡ༔ ན་ར་ཀན༔ རྗེས་འཇུག་རྣམས་ཀྱིས་འདི་ལྟར་ཉམས་སུ་ལོངས་ཤིག༔ འདི་བཞིན་བྱས་ན་འཚང་རྒྱ་བ་ལ་ཐེ་ཚོམ་ཡོད་རེ་ཀན༔ ལྕེ་བཙུན་བདག་གི་མགོ་ཁོས༔ པོ་ཏི་འདི་ལ་འདྲ་མིན་གཉིས༔ མིན་པ་ལ་ཡིན་བྱས་པ་གཅིག་ཀྱང་ཡོད༔ འདི་ནི་ཡང་དག་པའོ༔ དགེ་བར་གྱུར་ཅིག་འགྲོ་བ་ཐམས་ཅད་ཀྱི་རྒྱུད་ལ་སྙིང་པོའི་བསྟན་པ་རྒྱས་པས་གྲོལ་བ་མྱུར་དུ་ཐོབ་པར་ཤོག༔ མདྒ་ལཾ་བྷ་ཝནྟུ༔ ༔

མན་ངག་ངེས་པའི་ཁ་བྱང་མིང་རྣམ་པར་བཀོད་པ། སློབ་དཔོན་ཆེན་པོ་བྱི་མ་ལ་མུ་ཏྲ།

མན་ངག་ངེས་པའི་ཁ་བྱང་མིང་རྣམ་པར་བཀོད་པ་ཞེས་བྱ་བ་བཞུགས་སོ། །མན་ངག །ཐམས་ཅད་མཁྱེན་པ་ཉིད་ལ་ཕྱག་འཚལ་ལོ། །སྐུ་གསུམ་ཉིད་ནི་སྣང་བ་འདི་ཉིད་ལས། །མ་ནོར་དབང་པོའི་ཡུལ་དུ་གཏན་དབབ་ཕྱིར། །མན་ངག་ཡིད་ཆུང་གསལ་བ་སྙིང་ནོར་གྲགས། །མེ་ལོང་ཉིད་ལ་བཞིན་བསྟན་ཇི་བཞིན་དུ། །མ་ནོར་འགྱུར་བའི་ས་མེད་གསང་ཆེན་ཉིད། །སྙིགས་མའི་དུས་སུ་གང་ཟག་ལ་ལ་དག །སྙིང་པོའི་ནོར་ལ་རས་ཆོད་གཟུ་ལུམ་གྱིས། །བརྩམས་ཤིང་མུན་པའི་ནང་དུ་ཁབ་གཏོར་ལྟར། །མན་ངག་སྙིང་པོ་དཀྲུགས་ཤིང་ལྷག་ཆད་བྱེད། དེ་རྣམས་ཀྱིས་ནི་བསྣན་ཕྲི་བྱར་མེད་ཕྱིར། །མིང་ངེས་གསང་བའི་ཁ་བྱང་འདི་ཉིད་ནི། །དམ་པ་རྣམས་ལ་ལུས་ངག་ཡིད་ཀྱིས་ཀྱང་། །རབ་ཏུ་གུས་པས་གསོལ་བ་བཏབ་ནས་ཀྱང་། །མ་འོངས་སྙིགས་མའི་དུས་སུ་དགོས་སྲིད་པས། །འཁྲུལ་པ་མེད་པའི་བློ་ཡིས་འབྲི་བར་བྱ། །གསང་བའི་མན་ངག་ཡི་གེ་འདི་ཉིད་ནི། །གཅིག་ལ་གཅིག་དགོས་མ་བུ་མ་ཡིན་ཏེ། གནད་ཀྱི་མན་ངག་ངེས་པ་སོ་སོའི་ཐབས། །ངེས་པའི་སྙིང་པོ་མན་ངག་ངེས་པའི་གྲངས། །བླ་མེད་ཡོངས་སུ་རྫོགས་པའི་སྡེ་ཚན་ལ། །འདི་དག་ཡི་གེ་གསང་བའི་གནད་དུ་ཕབ། །འདི་ལྟར་མིག་གི་ཁ་བྱང་ངེས་པ་ལ། །གསང་བའི་མན་ངག་ཁ་བྱང་ཡི་གེ་ནི། །ངེས་པར་གྲངས་སུ་བཅད་ན་འདི་ལྟར་མཆིས། །རྒྱ་ཆེར་བཤད་པའི་ཡི་གེ་གྲངས་མང་ཡང་། །རྣམ་པར་བསྡུས་ན་སྙིང་པོའི་དོན་ཉིད་ནི། །བརྒྱ་དང་བཅུ་དགུ་ཉིད་དུ་བཀོད་པ་ལ། །རེ་རེས་ཀྱང་ནི་གྲོལ་བའི་སྙིང་པོའོ། །ལྟ་བའི་སྐོར་བཞིའི་རྩ་ངེས་དུམ་དུམ་ཁྲིགས་༡སུ་ལྟོས། །སྟོན་པའི་ལོ་རྒྱུས་ལ་སོགས་པོ་ཏི་སྨུག་ཆུང་༢ལྟོས། །འཁུལ་ཞིག་གསལ་བའི་མེ་ལོང་༣ཉིད་དང་འབྱུང་བཞི་གནད་ཡིག་༤དང་། །རིན་ཆེན་གསེར་༥ཐིག་ཉིད་དང་སྣང་བྱེད་སྒྲོན་མ་༦དང་། །འོད་གསལ་ལྡེ་མིག་༧ཉིད་དང་ཤེས་བྱ་སྐོར་གསུམ་༨དང་། །གསང་བའི་སྡོམ་༩བྱང་ཉིད་དང་སྒྲ་བརྟགས་འཁོར་༡༠ལོ་ཉིད། ༈ །སྐུ་གསུམ་ལག་༡༡ཁྲིད་དང་ནི་མཁའ་འགྲོ་པྲ་ཁྲིད་༡༢དང་། །བབས་ལུགས་གསུམ་༡༣སྐོར་དང་ནི་འཁྲུལ་པའི་སྡོམ་ཡིག་༡༤གཉིས། །གསང་ཐིག་༡༥ཆེན་པོ་དང་ནི་གསེར་༡ ༦བྱང་བཀོལ་བ་ཉིད། །ལམ་ཁྲིགས་ཆེན་པོ་༡༧དང་ནི་ཡེ་ཤེས་ལག་ཕྲད་༡༨གཉིས། །བཀའ་ཁྲོལ་ཆེན་པོ་༡༩དང་ནི་བསམ་གཏན་རང་༢༠གནས་གཉིས། ༈ །གསལ་བའི་མེ་ལོང་༢༡ཉིད་དང་གསང་བ་ཉིད་བཀོལ་༢༢གཉིས། །སྣང་བ་བསྡུས་༢༣པ་དང་ནི་གནས་པའི་བྱུང་ཁུངས་༢༤གཉིས། །ཁྲེགས་ཆོད་བདུན་༢༥པ་དང་ནི་ཐོད་རྒལ་དགུ་པ་༢༦གཉིས། །ལུང་བསྟན་ཆེན་མོ་༢༧དང་ནི་གླང་ཆེན་དྲུག་པ་༢༨གཉིས། །སྤྱོད་ལམ་བསྡུས་༢༩པ་དང་ནི་ལྟ་བའི་གསེར་༣༠བཀོད་གཉིས། ༈ །པདྨའི་ཀློང་ཡངས་༣༡དང་ནི་ལྷ་ཡི་ཕྱག་༣༢སོར་མ། །གསེར་གྱི་ཨུཏྤལ་༣༣ཉིད་དང་དྲན་པ་རྒྱུད་གཅོད་༣༤གཉིས། །རགས་པ་༣༥ཉམས་བླངས་ཉིད་དང་ཕྲ་རྒྱུན་དྲིལ་༣༦བ་གཉིས། །གསལ་བའི་སྒྲོན་མ་༣༧ཉིད་དང་སེང་༣༨གེ་རྩལ་སྤྲུག་གཉིས། །ཨ་ཏི་རྣལ་དགོངས་༣༩དང་ནི་དགོས་དོན་བཞི་པ་༤༠པ་གཉིས། ༈ །རྡོ་རྗེ་ལམ་༤༡བསྟན་དང་ནི་རིན་ཆེན་འོད་འབར་༤༢ཉིད། །ལྷག་པའི་འཁོར་༤༣ལོ་དང་ནི་ཁྱུང་ཆེན་མཁའ་༤༤ལྡིང་གཉིས། །ལྟ་བའི་མིག་སེལ་༤༥ཉིད་དང་བླ་མའི་རིམ་༤༦པ་གཉིས། །དྲང་བའི་ཚིག་༤༧རྒྱུད་དང་ནི་འཁྲུལ་གཞི་རྩད་ཆོད་༤༨གཉིས། །སེམས་ཀྱི་དམིགས་དྲུག་ཉིད་༤༩དང་སྒོམ་པའི་འཁོར་ལོ་༥༠གཉིས། ༈ །དབང་གི་ལྡེ་༥༡མིག་ཉིད་དང་དབང་གི་ལས་བྱང་༥༢གཉིས། །སྤྲོས་མེད་དབང་གི་མན་ངག་༥༣དག་དང་དབང་གི་རྩ་༥༤བ་གཉིས། །དབང་གི་རིགས་འབྱེད་༥༥ཉིད་དང་དབང་གི་ཕྲ་ཏིག་གཉིས༥༦། །འཁོར་ལོ་དྲུག་པའི་༥༧དབང་དང་དམ་ཚིག་རབ་༥༨འབྱེད་གཉིས། །དབང་བཀོད་ཆེན་པོ་༥༩ཉིད་དང་དབང་སྦྱོར་པྲ་ཁྲིད་༦༠གཉིས། ༈ །རིག་པའི་མེ་ཏོག་༦༡ཉིད་དང་གསེར་༦༢ལུང་ཆེན་པོ་དང་། །མན་ངག་རྩ་༦༣བ་ཉིད་དང་ལུང་ཏིག་བཅོ་༦༤བརྒྱད་པ། །རིག་པ་དྲུག་༦༥པ་དང་ནི་སེམས་ལུང་སྒོམ་ཁྲིགས་༦༦གཉིས། །ཡང་གསང་༦༧དྲིལ་བ་དང་ནི་སྤས་པའི་ཉི་མ་༦༨དང་། །འཕྲ་བཀོད་བཅུ་༦༩པ་དང་ནི་ལུང་ཡིག་༧༠བསྡུས་པ་གཉིས། ༈ །བདུད་རྩི་༧༡ཡང་ཞུན་དང་ནི་ལུག་གསུམ་༧༢འདུས་པ་ཉིད། །གསང་ཆེན་གཡུ་ཡིག་༧༣ཅན་དང་མན་ངག་ཕྲ་ཡིག་༧༤ཅན། །གསང་བ་གསེར་༧༥ཡིག་ཅན་དང་སྙིང་གཟེར་༧༦ཆེ་ཆུང་དང་། །བསམ་གཏན་ཉལ་བའི་འཁོར་༧༧ལོ་དང་ནི་འཕྲུལ་ཡིག་༧༨ཆེ་ཆུང་དང་། །མཁའ་འགྲོ་༧༩མཛོད་དང་འཕོ་བ་ཆེན་མོ་༨༠ཉིད། ༈ །གསང་བའི་གཟེར་༨༡བུ་དང་ནི་རྩ་གནས་འཁོར་༨༢ལོ་དག །བསམ་གཏན་བབས་༨༣ལུང་དང་ནི་རིག་༨༤པས་འབྱེད་གཉིས། །སྣང་བ་རྒྱས་༨༥འདེབས་ཉིད་དང་ཡེ་ཤེས་སྦུབས་འཇུག་༨༦གཉིས། །ལོ་རྒྱུས་ཆེན་༨༧མོ་ཉིད་དང་གསལ་བའི་ཞལ་༨༨ཆེམས་ཉིད། །ཐེག་པའི་བསྡུས་༨༩ཤན་དང་ནི་གསང་བའི་སྒྲ་ཡིག་༩༠གཉིས། ༈ །ཡི་གེའི་སྒྲ་བཤད་༩༡དང་ནི་སྒྲ་བཞི་མཚམས་༩༢སྦྱོར་གཉིས། །བསྟན་པའི་གོ་༩༣ཆ་མ་དང་འགྱུར་མེད་ཐིག་ལེ་༩༤གཉིས། །དང་པོའི་༩༥ཁ་བསྒྱུར་དང་ནི་འབྲས་བུ་༩༦མངོན་བྱེད་གཉིས། །སྟོང་པའི་མཐའ་༩༧འབྱེད་དང་ནི་ནམ་མཁའ་ལམ་༩༨ཁྱེར་གཉིས། །ཐི་བྱ་ཚང་འཇུག་༩༩དང་ནི་གསལ་བ་རིན་ཆེན་འོད༡༠༠། ༈ །ཀ་དག་ཆེན་པོའི་དག་ཡིག་༡༠༡ཡིག་དང་ནི་ལྷུན་གྲུབ་ཡི་གེ་༡༠༢གཉིས། །ཤེས་རབ་འཁོར་ལོ་༡༠༣དང་ནི་སྨྲ་བའི་མཚོན་༡༠༤ཆེན་གཉིས། །ཡེ་ཤེས་ལྔ་བསྐོར་༡༠༥དང་ནི་འོད་ཀྱི་ཚུལ་༡༠༦བཤད་གཉིས། །འབྱུང་བའི་གནས་༡༠༧འབྱེད་དང་ནི་སྒྲོན་མའི་ཁུངས་༡༠༨གཅོད་གཉིས། །ཕྱག་རྒྱས་༡༠༩དུས་པ་དང་ནི་བཀོད་པ་༡༡༠ལྔ་པ་གཉིས། ༈ །རྒྱ་མཚོ་ཨར་༡༡༡གཏད་དང་ནི་རླུང་ནི་སྡོམ་བྱང་༡༡༢གཉིས། །ངོ་སྤྲོད་གསུམ་༡༡༣པ་དང་ནི་བབས་ལུགས་༡༡༤བཅུ་གཅིག་པ། །རྩ་ཐིག་༡༡༥ཆེ་ཆུང་དང་ནི་རླུང་གི་སྟེམས་༡༡༦ཡིག་དང་། །རིགས་པའི་གནས་༡༡༧ས་དང་ནི་མིག་གི་བསམ་༡༡༨གཏན་ནོ། །དེ་ལྟར་མན་ངག་ཡིག་ཆུང་བརྒྱ་དང་བཅུ་དགུ་ནི། །གཅིག་ལ་གཅིག་བརྟེན་མ་ཡིན་འགལ་མེད་སོ་སོའི་གནད། །ངེས་པར་གང་ཟག་རེ་ལ་ཕན་པ་དང་། །དགོས་པའི་ཡིག་ཆུང་རྒྱུད་ལ་ཕན་པ་དང་། །སྙིང་པོ་རབ་ཏུ་བསྡུས་པ་ཉི་ཚེ་ལས། །གནད་མེད་ཡི་གེ་གཅིག་ཀྱང་མ་མཆིས་སོ། །གསང་ཆེན་དམ་པའི་ཡི་གེ་འདི་དག་ནི། །མཐར་ཐུག་མན་ངག་ངེས་པའི་གནད་ཡིན་པས། །སྐལ་ལྡན་སེམས་ཀྱི་བུ་ཡིས་ཡིད་ལ་ཆོངས། །སྐུ་གསུམ་ཡེ་ཤེས་ལྔ་ཉིད་ས་ལ་གོམས་པ་ཡི། །ཐབས་ཀྱི་ཡན་ལག་རྣམས་སུ་འདི་དག་འགྲོ། །ལྷག་པའི་ཡི་གེ་གསང་བའི་གནད་འདི་ཡིས། །གང་གི་དུག་གསུམ་ནད་རྣམས་འདོན་པར་བྱེད་པའོ། །གསང་བའི་མན་ངག་ཡིག་ཆུང་ངེས་པའི་གྲངས། །སྙིགས་མའི་དུས་སུ་འདི་ཉིད་དགོས་སྲིད་པས། །མ་འོངས་སྐལ་ལྡན་འདི་ལ་འཇུག་པ་རྣམས། །སྙིང་པོ་དོན་གྱི་ཡི་གེའི་གྲངས་ཉིད་ལས། །ཐེ་ཚོམ་བློ་ཡིས་སྤྲོས་པ་གཅོད་པའི་ཕྱིར། །མ་ནོར་དམིགས་བསྟན་མན་ངག་ངེས་པའི་གྲངས། །ཐེ་ཚོམ་བསལ་ཕྱིར་མན་ངག་ངེས་པ་ཡི། །མིང་རྣམས་ངེས་པའི་ཁ་བྱང་འདི་བྲིས་པས། །རང་བཞིན་རྫོགས་པ་ཆེན་པོའི་དོན་འདི་ལ། །མོས་འཇུག་དད་པའི་སྐལ་བ་ལྡན་པ་ལ། །མུན་པའི་ནང་དུ་སྒྲོན་མེ་བཏེགས་པ་ལྟར། །ཇི་ལྟར་སྣང་བའི་འོད་ཀྱིས་ཆོས་རྣམས་ཀུན། །རང་བཞིན་མཉམ་པ་ཉིད་དུ་ཤེས་པར་ཤོག །མན་ངག་ངེས་པའི་ཁ་བྱང་མིང་རྣམ་པར་བཀོད་པ། སློབ་དཔོན་ཆེན་པོ་བྱི་མ་ལ་མུ་ཏྲས་མཛད་པ་རྫོགས་སོ།། །།ཨཐྎ། རྒྱ་རྒྱ་རྒྱ། ས་མ་ཡ། དགེའོ།། །།

མན་ངག་དུམ་དུམ་ཁྲིགས་དུམ་བུ་བདུན་ཅུ་རྩ་བཞི་པ། སློབ་དཔོན་འཇམ་དཔལ་བཤེས་གཉེན།

མན་ངག་དུམ་དུམ་ཁྲིགས་དུམ་བུ་བདུན་ཅུ་རྩ་བཞི་པ་བཞུགས་སོ། །མན་ངག་དང་པོ། བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ༔ ཡང་གསང་དུམ་དུམ་ཁྲིགས་ཁྲིད་གསང་བའི་ཐེམ་ཡིག་གནད་ཀྱི་གལ་མདོ༔ གབ་པ་རྣམས་མངོན་དུ་གཏན་ལ་འབེབས་པར་བྱེད་པ༔ དང་པོ་གཞི་གཏན་ལ་འབེབས་པར་བྱེད་པ༔ གཞི་ཀ་དག་ཆེན་པོ༔ ར་བཞིན་གར་ཡང་རྒྱ་མ་ཆད་པ༔ ཕྱོགས་གང་དུ་ཡང་མ་ལྷུང༔ རང་བཞིན་དུ་འོད་གསལ་རྒྱ་མ་ཆད་པ་བུམ་པའི་སྐུ་ལྟ་བུ་འོད་ལྔ་མ་འདྲེས་པར་གསལ་བ༔ ནམ་མཁའི་འཇའ་ལྟ་བུ༔ དེ་ཡང་གསལ་ལ་མ་འགགས་པ༔ གསལ་བྱེད་མ་གྲུབ་དེ་ལྟ་བུ་དེ་ལ་འཁོར་འདས་གཉིས་ཇི་ལྟར་བྱུང་ན༔ གཞི་དེ་ཡང་དངོས་སྐུ་དབྱིངས་འོད་རིག་ལུ་གུ་རྒྱུད་པ་གསུམ་དུ་ཡེ་ནས་གྲུབ་པས་ཏེ༔ དཔེར་ན་ཏིལ་ལ་མར་གྱི་གཞི་གྲུབ་བ་ལྟ་བུའོ༔ དེ་ལ་རང་བཞིན་གྱི་དབང་པོ་རྣོན་པོ་དང ༔ རང་བཞིན་གྱི་དབང་པོ་རྟུལ་པོ་གཉིས༔ རང་བཞིན་གྱི་དབང་པོ་རྟུལ་པོ་ནི༔ དཔེར་ན་མེ་ལོང་དུ་བྱད་ཤར་བ་རང་བྱད་དུ་མ་ཤེས་པའོ༔ དབང་པོ་རྣོན་པོ་ནི༔ མེ་ལོང་དུ་བྱད་ཤར་བ་རང་བྱད་དུ་ཤེས་པ་ལྟ་བུ༔ གཞི་དེ་ལ་ཡེ་ཤེས་ཀྱི་རང་རླུང་ཞེས་བྱ་བ་ཉི་ཚན་ལ་སྤུ་འགུལ་བ་ཙམ་ཞིག་ལས་རིག་པ་གཡོས་སོ༔ གདངས་ཕྱིར་ཤར་བས་རྐྱེན་བཞིས་ཡར་གྲོལ་ཏེ༔ རྒྱུའི་རྐྱེན་གཞི་ལས་འཕགས་གཞི་དངོས་པོའི་གནས་ལུགས༔ བདག་པོའི་རྐྱེན་རང་རིག་པའི་ལུ་གུ་རྒྱུད་ཡེ་ཤེས༔ དམིགས་པའི་རྐྱེན་རང་དུ་ཤེས་པ༔ ཆོས་ཉིད་ཀྱི་ཡུལ་ལ་ཤར་བ་སྣང་མཚུངས་པའི་རྐྱེན་སྐད་ཅིག་མ་ལ་ལོངས་ཚོམ་བུ་དང་བཅས་པ་སྐུ་བཞི་བཅུ་རྩ་གཉིས་སུ་སངས་རྒྱས་པའོ༔ དེ་ནས་བདུད་བཞི་རང་བཞིན་དུ་ཆོམས༔ རང་སྣང་དུ་ཤེས་པས་ལྷའི་བུའི་བདུད་ཆོམས༔ ཡེ་ཤེས་ཀྱིས་རང་ལུས་ཟིན་པས་ཕུང་པོའི་བདུད་ཆོམས༔ ཡེ་ཤེས་ཀྱི་ལུས་ལ་ཉོན་མོངས་པ་མེད་པས་ཉོན་མོངས་པའི་བདུད་ཆོམས༔ ཡེ་ཤེས་ཀྱི་ལུས་ལ་སྐྱེ་ཤི་མེད་པས༔ འཆི་བདག་གི་བདུད་ཆོམས་ནས་མྱ་ངན་ལས་འདས་པའོ༔ ལོངས་སྐུ་ནི་ལྷུན་གྲུབ་རིན་པོ་ཆེ་གསང་བའི་སྦུབས་སུ་གྲོལ་ཏེ༔ ལེགས་པར་མྱ་ངན་ལས་འདས་པའོ༔ དེས་ཡར་གྲོལ་ལུགས་བསྟན་པའོ༔ ཨཐྎ༔ རང་བཞིན་གྱི་དབང་པོ་རྟུལ་པོ་ལས༔ མེ་ལོང་དུ་བྱད་ཤར་བ་དེ་རང་སྣང་དུ་མ་ཤེས་པས༔ དཔེར་ན་གཞན་བྱད་དུ་ཤེས་པ་ལྟ་བུའོ༔ སྐུ་དབྱིངས་རིག་པ་གཞན་སྣང་དུ་མཐོང་བས༔ སྐུ་ལས་ལུས་སུ་འཁྲུལ༔ དབྱིངས་ལས་ཡུལ་དུ་འཁྲུལ༔ རིག་པ་སེམས་སུ་འཁྲུལ༔ མར་འཁྲུལ་བ་ལ་ཡང་རྐྱེན་བཞི་རང་སྣང་དུ་མ་ཤེས་པ་དེ་རྒྱུའི་རྐྱེན༔ གཞན་དུ་ཤེས་པ་བདག་པོའི་རྐྱེན༔ འཁྲུལ་སྣང་དུ་མར་ཤར་བ་དེ་དམིགས་པའི་རྐྱེན༔ དེ་རྣམས་དུས་མཚུངས་པས་མཚུངས་པ་དེ་མ་ཐག་པའི་རྐྱེན༔ རང་སྣང་དུ་མ་ཤེས་པས་ལྷའི་བུའི་བདུད༔ ཟག་བཅས་ཀྱི་ཕུང་པོ་བླངས་པས་ཕུང་པོའི་བདུད༔ ཟག་བཅས་ཀྱི་ཕུང་པོ་ལ་ཉོན་མོངས་པ་ཡོད་པས་ཉོན་མོངས་པའི་བདུད༔ ཟག་བཅས་ཀྱི་ཕུང་པོ་ལ་སྐྱེ་ཤི་ཡོད་པས་འཆི་བདག་གི་བདུད་བྱུང་བའོ༔ ཨཐྎ༔ དང་པོ་གཞི་དེ་ལས་འཁོར་འདས་བྱུང་ལུགས་བསྟན་ནས༔ ད་ཟག་བཅས་ལ༔ སྐུ་འོད་རིག་པ་གསུམ་གནས་ལུགས་སྟོན་པའོ༔ དང་པོ་གཞི་ལ་ཇི་ལྟར་གནས་པ་ལྟར་ཟག་བཅས་ལ་གནས་ཏེ༔ སྐུ་འོད་རིག་པ་གསུམ་ཡར་གྲོལ་བས་སྐུ་གསུང་ཐུགས༔ མར་འཁྲུལ་བས་ལུས་ངག་ཡིད་གསུམ༔ གནས་གང་ན་གནས་ན་ཀུན་ཏུ་བཟང་པོའི་གྭའུ་ཁ་སྦྱོར་ཞེས་བྱ་བ༔ ཙིཏྟ་འོད་ཀྱི་གྭའུ་ན་སྐུ་ཡུངས་འབྲུ་ཙམ༔ ཞི་བའི་སྐུ་ལ་ཁྲོ་བོའི་དབུ་རྒྱན་དུ་བཞུགས་སོ༔ ཡབ་ཡུམ་གྱི་ཚུལ་དུ་བཞུགས་སོ༔ དུང་ཁང་ན་ཁྲོ་བོའི་སྐུ་བཞུགས་སོ༔ ཞི་བའི་སྐུ་ལམ་དར་དཀར་གྱི་སྐུད་པ་ཙམ་ནས་ལམ་བྱུང་ངོ༔ སྒོ་མིག་གི་དབང་པོ་ནས་ཐོན་ནས་ཡུལ་ཆོས་ཉིད་ཀྱི་ནམ་མཁའ༔ རང་ལངས་པའི་མགོའི་ཁྲུ་གང་ན་གནས་ཏེ༔ ལུ་རྒྱུད་འཆར་ཏེ་ལུ་གུ་རྒྱུད་ཀྱི་ཚིགས་ལའང་སྐུའི་སྣང་བ་འཆར་ཏེ༔ རང་གི་ངོ་བོ་རྩ་ནས་ཐིག་ལེ་དང༔ ཐིག་ལེའི་ནང་དུ་ཞལ་རས་ཀྱི་སྣང་བ་འཆར་བ་སྟེ༔ རང་བཞིན་རྩ་ཕྲན་ནས་འོད་དང་ཐིག་ཕྲན་འཆར་བ་དེ་ཐུགས་རྗེ་ཀུན་ཁྱབ་སྣང་སྲིད་ཞིང་ཁམས་སུ་འཆར་བའོ༔ ཨཐྎ༔ མིག་ནས་སྐུ་འོད་རིག་པ་གསུམ་འཆར་ཏེ༔ གསལ་བ་ཟང་ཐལ་སྒྲིབ་གཡོགས་ཐམས་ཅད་དང་བྲལ་བས་རིན་པོ་ཆེ་མན་ཤེལ༔ སྐུ་འོད་རིག་པ་གསུམ་གཏན་ལ་འབེབས་པས༔ འཁོར་འདས་ཀྱི་འབྲེལ་ཐག༔ མྱང་འདས་ཀྱི་ལམ༔ དེ་ཉམས་སུ་ཇི་ལྟར་བླངས་ན༔ དབྱིངས་ཀྱི་ནང་ན་ལུ་གུ་རྒྱུད་འདུ་འབྲལ་མེད་པར་ཉམས་སུ་བླངས༔ དེ་ཉམས་སུ་ལོངས་པའི་ཚད་ལུས་ངག་གི་ཞེན་པ་རང་ཟད༔ སྐུ་གསུམ་གྱི་ཞེན་པ་ལས་འདས་པའོ༔ ཨཐྎ༔ དེ་ཡང་དབྱིངས་རྣམ་པར་དག་པའི་སྒྲོན་མ་ཨ་ཝ་དྷཱུ་ཏི་ན་གནས་སོ༔ དེ་ཡང་འོད་ལྔ་སྐུ་དང་བཅས་པ་གནས༔ ཐིག་ལེ་སྟོང་པའི་སྒྲོན་མ་ཆོས་ཉིད་དག་པའི་རྩ་ལ་གནས༔ དཔེར་ན་ཉའི་མིག་ལྟ་བུའོ༔ འོད་ཀྱི་ཐིག་ལེར་གནས༔ ཤེས་རབ་རང་བྱུང་གི་སྒྲོན་མ་སྐྱོན་ཡོན་འབྱེད་པའི་རྩ་ལ་གནས༔ དེ་ཡང་སྟོང་པ་འགྱུར་མེད་དང་བཅས་པར་གནས༔ དཔེར་ན་སྤུ་གྲི་ལྟ་བུའོ༔ རྒྱང་ཞགས་ཆུའི་སྒྲོན་མ་མིག་ལ་གནས༔ མཐོང་བ་མ་འགགས་པར་གསལ་ལོ༔ སྒྲོན་མ་དེ་རྣམས་ཐམས་ཅད་མིག་ནས་འཆར་ཏེ༔ དབྱིངས་རྣམ་པར་དག་པའི་སྒྲོན་མ་ནི༔ བར་སྣང་གི་འཇའ་གུག་པ་ལྟ་བུར་ནམ་མཁའ་ལ་འཆར་ལ༔ དེ་ཡང་གོམས་པ་ཚད་དུ་ཕྱིན་ན་ཡེ་ཤེས་སྐུ་དང་འོད་ལ་འགག་པ་མེད་པར་འཆར་རོ༔ ཐིག་ལེ་སྟོང་པའི་སྒྲོན་མ་ནི་རྨ་བྱའི་མདོངས་ལྟ་བུར་འཆར་ཏེ༔ དེ་ནི་དབྱིངས་ཀྱི་སྒྲོན་མ་ཉམས་སུ་བླངས་པའི་དུས་ན་གོམས་པ་མཐར་ཕྱིན་རྟགས་འོད་དང་ཐིག་ལེར་འཆར་བའི་རྟགས་སུ་བསྟན༔ ཤེས་རབ་རང་བྱུང་གི་སྒྲོན་མ་ནི༔ སྐྱོན་དང་ཡོན་ཏན་ཐམས་ཅད་སེལ་ལོ༔ རིག་པ་གཉིས་མེད་ཀྱི་སྐུ་ནི་ཚངས་པའི་བུ་ག་ནས་འབྱུང་བའོ༔ སྐུ་རུ་འཆར་རོ༔ དོན་རང་གི་ལུས་ལ་གནས༔ རྟགས་དངོས་སུ་འཆར་བའི་སྒྲོན་མ་གཉིས༔ དབྱིངས་ཀྱི་སྒྲོན་མ་དང་ཐིག་ལེ་སྟོང་པའི་སྒྲོན་མའོ༔ འབྲས་བུ་ཅིང་སྣང་འོད་ཀྱི་སྐུར་ཤར༔ རྟོགས་པ་ནི་རང་ལས་བྱུང་བར་རྟོགས༔ མཐར་ཕྱིན་པའི་ལམ་སྐྱེ་མེད་ཀྱི་སངས་རྒྱས་ཐོབ་པའོ༔ རང་ལ་ཡེ་ཤེས་ཕྱོགས་མེད་དུ་འཆར་བའོ༔ དེ་རང་ལ་གནས་པའོ༔ ཨཐྎ༔ དང་པོ་གཞི་ལས་འཕགས་གཞིའི་སྣང་བ་འགག༔ འཁྲུལ་བའི་སྣང་བ་མ་ཤར་བའི་དུས་ན་གཞོན་ནུ་བུམ་པའི་སྐུ་ཞེས་བྱ་བ་རྒྱ་མ་རལ་དེ་ལས༔ འཛིན་བྱེད་ཀྱི་ཤེས་པས་བློ་དང་བཅས་པས་རྟའི་རྔ་མ་ཙམ་ཞིག་བྱུང ༔ བར་དེར་སྣང་བ་སེང་མ་སང་མ༔ ཤག་མ་ཤིག་མ༔ ཁྲལ་མ་ཁྲོལ་མ༔ འགྱུ་འཕྲིག༔ འགུལ་འཕྲོ་ཡེད་ཡེད་སྡངས་ལམ་པ་སོགས་འབྱུང་ངོ༔ དེ་ནི་རྡོ་རྗེ་སེམས་དཔའ་ཡིད་རང་བྱུང་གི་ཡེ་ཤེས་བྱ་བའོ༔ དེ་ལས་འཁྲུལ་པ་དུ་མར་འཁྲུལ་པ་འབྱུང་ངོ༔ ཨཐྎ༔ ད་ནི་ཐི་ལེའི་གནས་ལུགས་བསྟན་ཏེ༔ རིན་པོ་ཆེ་ཤེལ་དཀར་རྒྱུས་པའི་རྩ་ནང་ན་དབྱིངས་རྣམ་པར་དག་པའི་ཐིག་ལེ་གནས་ཏེ༔ ཆེ་ཆུང་གི་ཚད་ནི་སྲན་མ་ཙམ་དུ་གནས་ཏེ༔ དེ་ཡང་ཁ་དོག་ལྔའོ༔ འོད་ཟེར་དུ་འཕྲོ༔ སྐུ་དང་བཅས་སོ༔ ཙིཏྟའི་རྩེ་མོ་ན་གནས་སོ༔ རིན་པོ་ཆེ་ཤེལ་གྱི་སྤུ་གུ་ཅན་ན་དབྱིངས་ཀྱི་ཐིག་ལེ་གནས་ཏེ༔ དེ་ཡང་ཆེ་ཆུང་གི་ཚད་སྲན་ཆུང་ཙམ་དུ་གནས་སོ༔ ཁ་དོག་དཀར་པོ་འོད་ཟེར་ཆ་ཙམ་དུ་གནས་སོ༔ ཙིཏྟའི་གཡས་ནས་འབྱུང་ངོ༔ རིན་པོ་ཆེ་དྲྭ་བ་འདུས་པའི་ནང་ན༔ ཀུན་ཏུ་བཟང་པོའི་ཐིག་ལེ་གནས་ཏེ༔ ཆེ་ཆུང་ནི་ཡུངས་འབྲུ་ཙམ་དུ་གནས་སོ༔ ཁ་དོག་དམར་པོར་གནས་སོ༔ འགྲོ་འོང་དང་བཅས་པའོ༔ ཙིཏྟའི་སྐེད་པ་ནས་འབྱུང་བའོ༔ ཐིག་ལེ་ལྔའི་ཚོམ་བུ་དང་བཅས་པའོ༔ རིན་པོ་ཆེ་སྟོང་བ་རང་སང་གི་ནང་ན་ཆོས་ཉིད་ཀྱི་ཐིག་ལེ་གནས་ཏེ༔ ཆེ་ཆུང་སྐྲའི་རྩེ་མོ་ཙམ༔ ཁ་དོག་སེར་པོ༔ སྤྲོ་བསྡུ་མེད་པ་ཙིཏྟའི་སྐེད་པ་ནས་འབྱུང༔ རིན་པོ་ཆེ་ལས་རབ་རྫོགས་པའི་རྩ་ན་ཡེ་ཤེས་ཀྱི་ཐིག་ལེ་གནས་ཏེ༔ ཆེ་ཆུང་ཏིལ་འབྲུ་ཙམ་དུ་ཁ་དོག་དམར་སེར༔ འགྲོ་འོང་མེད་ཅིང་ཙིཏྟའི་རྩ་བ་ནས་འབྱུང༔ རིན་པོ་ཆེ་དར་དཀར་སྣལ་མ་ལྟ་བུའི་རྩ་ལ༔ ཡེ་ཤེས་ཆེན་པོའི་ཐིག་ལེ་གནས་ཏེ༔ ཆེ་ཆུང་རྟ་རྔ་བཅུར་གཤགས་པ་ཙམ༔ ཁ་དོག་སྔོན་པོར་གནས༔ འགྲོ་འོང་ལྟར་སྣང་བའོ༔ ཙིཏྟའི་འདབས་ནས་འབྱུང་ངོ༔ དེ་རྣམས་ཀྱི་ལམ་མིག་ནས་འཆར་རོ༔ ཨཐྎ༔ ད་ནི་རིག་པའི་ཡེ་ཤེས་རང་ལ་ཡོད་ལུགས་བསྟན་ཏེ༔ དེ་ཡང་རིག་པའི་ཡེ་ཤེས་ཆེན་པོ་དེ༔ རང་གི་གཟུགས་ཀྱི་ཕུང་པོ་ལ་བརྟེན་ཏེ༔ གནས་ནི་སྙིང་གི་དཀྱིལ་ན་གནས༔ དེ་ཡང་འདི་ལྟ་སྟེ༔ ཀུན་ཏུ་བཟང་པོ་གྭའུ་ཁ་སྦྱོར་གྱི་དགོངས་པ་ཞེས་བྱ་སྟེ༔ སྙིང་པོ་རིན་པོ་ཆེ་ཟུར་བརྒྱད་པའི་ནང་ན༔ ཡེ་ཤེས་ཀྱི་འོད་ཚོན་གྱི་གྲུ་གུ་བསྡོམས་པ་ལྟ་བུའི་ནང་ན༔ ཞི་བའི་སྐུ་ཡུངས་འབྲུ་ཙམ་རང་རང་འོད་དང་བཅས་ནས་གནས་སོ༔ དེ་ཡང་ཡུམ་གྱི་ཚོམ་བུར་གནས་སོ༔ དེ་ཡང་སྐུ་དེ་རྣམས་འགུལ་བའི་དུས་སུ་ཨིག་གཟེར་ནས་ཨིག་གུའི་སྒྲ་འབྱུང་ངོ༔ དེ་ནི་འོད་དང་སྐུའི་གནས་ལུགས་སོ༔ ཨཐྎ༔ ལུ་གུ་རྒྱུད་ནི་གསལ་བ་རང་ཤེས་ཀྱི་དགོངས་པར་ཡེ་ཐོག་མ་ནས་བཞུགས་སོ༔ ཕྲ་བའི་ཚད་རྟ་རྔ་ལ་མདུད་པ་བྱས་པ་ལྟ་བུའོ༔ གཟུང་བར་དཀའ་ལ་འགྲོ་འོང་དང་བཅས་པར༔ མིག་གར་འགུལ་བའི་ཕྱོགས་སུ་འགྲོ་བའོ༔ དེ་བཟུང་བར་བྱས་ཏེ༔ ཆོས་སྐུའི་ལྟ་སྟངས་ཀྱིས་གྱེན་ལ་སྨིན་ཕྲག་ཏུ་མིག་དང་ཤེས་པ་རྩེ་གཅིག་ཏུ་དྲིལ་ལ་བཟུང་ངོ༔ ཟིན་པ་དང་དབྱིངས་ཀྱི་སྣང་བར་འཆར་ཏེ༔ དེ་གཉིས་འདུ་འབྲལ་མེད་པ་ལ་དགོངས་པ་གནས་པར་བྱའོ༔ ཨཐྎ༔ ནམ་མཁའ་སྟོང་པ་ལ་རིག་པ་སྟོང་པ་སྣང་བ་ཡིན་པས༔ འདི་ནི་ཡུལ་སྟོང་པ་ལ་ངོ་བོ་ཉིད་རང་དག་ཅིང་གནས་པ་ཞེས་བྱ༔ འདི་ནི་ཐོག་མ་ནས་སྟོང་པ་ཉིད་ཀྱི་སྣང་བ༔ སྟོང་པ་ཉིད་དུ་གྲོལ་བ་ཞེས་བྱ་སྟེ༔ ཡུལ་སྟོང་པ་ལ་རིག་པ་གསལ་བར་ཤར་བས༔ གསལ་སྟོང་དབྱེར་མེད་སྣང་བ་རང་དག་ཡིན་ཏེ༔ དག་པ་ཟུང་འཇུག་གི་དགོངས་པ་ཞེས་བྱ༔ རིག་པ་ལུ་གུ་རྒྱུད་ནི་གསལ་བ་རང་ཤེས་ཀྱི་རྒྱལ་པོ་ཞེས་བྱ་བ་ཡེ་ཐོག་མ་ནས་བཞུགས་པ་ཡིན་ཏེ༔ སངས་རྒྱས་པའི་སྣང་བ་དང་དབྱེར་མི་ཕྱེད་པར་བཞུགས་ཚུལ་ལ་ཁྱད་མེད༔ སྣང་ཚུལ་རྒྱུན་དུ་ཕྱེ་བའོ༔ དེའི་དབང་པོའི་མངོན་སུམ་རིག་པ་ཟང་ཐལ་ཞེས་བྱ་སྟེ༔ རིག་པ་ཉིད་ཉམས་སུ་མྱོང་དུ་ཡོད་པས་སོ༔ ཨཐྎ༔ རང་གི་ངོ་བོ་དང་སྦྱར་ན༔ ངོ་བོ་རིག་པས་ཏེ་རང་གིས་རང་རིག་པ་དང༔ རང་བཞིན་འཆར་ཚུལ་དུ་བཞུགས་པས༔ དེ་ལ་སྐུ་དང་ཡེ་ཤེས་དང༔ འོད་དང་ཐིག་ལེ་རྣམས་སུ་ཤར་བའོ༔ ཐུགས་རྗེ་འཆར་བྱེད་དུ་བཞུགས་པས༔ དབྱིངས་དང་རིག་པ་ཡུལ་དང་དབང་པོ་རྣམས་རང་སྣང་བའོ༔ ཨཐྎ༔ རང་ལ་གནས་ས་དང་སྦྱར་ན༔ ངོ་བོ་ཙིཏྟ་ན་ཞི་བའི་སྐུ་ལྔ༔ དུང་ཁང་ན་ཁྲོ་བོའི་སྐུ་ལྔ་ཡབ་ཡུམ་གྱི་ཚུལ་དུ་བཞུགས༔ རང་བཞིན་ནི་རྩ་གནས་ན་ཐིག་ལེ་དང་ཐིག་ཕྲན་དུ་གནས༔ ཐུགས་རྗེ་འོད་ལྔ་གསལ་བར་བཞུགས་སོ༔ ངོ་བོ་སྟོང་པ༔ རང་བཞིན་གསལ་བ༔ ཐུགས་རྗེ་མ་འགགས་པའོ༔ ཨཐྎ༔ མིག་དང་ནམ་མཁའ་སྤྲད་པས་ཡུལ་དང་གཟེར་ཐེབས་ཏེ༔ མི་འགྱུར་བའི་གནད་དང ༔ ནམ་མཁའ་དང་རིག་པ་ངོ་སྤྲོད་པས་རང་ངོ་ལ་གཟེར་ཐེབས་ཏེ༔ རིག་པ་ཉིད་ལྷག་མཐོང་དུ་ཤེས་པའི་གནད་དང ༔ དེ་ཉིད་འདུ་འབྲལ་མེད་པར་སྐུ་གསུམ་རང་ཟད་ཀྱི་ཉམས་སྐྱེའོ༔ ཨཐྎ༔ འདི་ལྟར་ཉམས་སུ་བླངས་པའི་སྐྱེས་བུ་གོམས་སྟོབས་ཀྱིས་གནད་བསྟན་མི་དགོས་པ་ནི༔ ཆོས་ཉིད་སྤྲོས་པ་དང་བྲལ་བའོ༔ ཨཐྎ༔ བརྗོད་པ་གང་གིས་ཀྱང་ཐོག་ཏུ་མི་ཕེབས་པའོ༔ རིག་པ་གནས་པ་ནི་རིག་པ་ལ་རྣམ་པར་རྟོག་པས་མ་བསླད་པ་སྟེ༔ དངོས་པོ་གང་དུའང་མ་ཆད་པའི་རིག་པ་ཡིན་པས་ན་སྣང་སྟོད་དུ་ཡོད་པའོ༔ ཨཐྎ༔ འདི་ལ་བརྩོན་པར་བྱས་པ་རིག་པའི་ལུ་གུ་རྒྱུད་ཉིད་ལ་རྣམ་པར་གནས་པ་ཁོ་ནའོ༔ དབྱིངས་ལ་བརྟན་པར་བྱ་བའི་ཕྱིར༔ སྣང་བ་ཀུན་ལ་རང་གཟེར་གདབ༔ རིག་པ་བརྟན་པར་བྱ་བའི་ཕྱིར༔ ངོ་བོ་ཉིད་ལ་རྣལ་དུ་དབབ༔ ལྟ་བ་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་གཟིར ༔ ཤེས་པ་བརྟན་པར་བྱ་བའི་ཕྱིར༔ རིག་པ་དབྱིངས་སུ་བཙོན་དུ་གཟུང༔ ལུས་ནི་བརྟན་པར་བྱ་བའི་ཕྱིར༔ འདུག་སྟངས་རྣམས་ལ་རབ་ཏུ་སྦྱང༔ ངག་ནི་བརྟན་པར་བྱ་བའི་ཕྱིར༔ རྟག་ཏུ་ལྐུགས་པ་ལྟ་བུར་གནས༔ སེམས་ནི་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་བལྟ༔ སྣང་བའི་འཁྲུལ་བ་ཀུན་གཅོད་ཕྱིར༔ སྟོང་པ་ཉིད་ལ་གོམས་པར་བྱ༔ འདི་ལྟར་ཉམས་སུ་ལེན་པའི་མི༔ སངས་རྒྱས་རྣམས་དང་ཉེ་བ་ཡིན༔ དེ་ཕྱིར་འདི་ལ་གོམས་བར་བྱ༔ ཨཐྎ༔ ལུ་གུ་རྒྱུད་ཀྱི་རྩེ་ལ་ཐིག་ལེ་འཁར་ཕོར་ལྟ་བུ་གསུམ་འབྲེལ་དུ་སྣང་བའི་དུས་ན༔ ཆོས་ཉིད་སུམ་ཆ་ལ་དབང་ཐོབ་པས༔ མངའ་དུ་མི་འཇུག་པའི་གནད་དང༔ ཐིག་ལེའི་ནང་དུ་སྐུ་རྐྱང་པ་རེ་རེ་སྣང་བའི་དུས་ན༔ རིག་པ་དབྱིངས་ཀྱི་གཟེར་ལ་ཐེབས༔ ཐིག་ལེ་རེ་རེའི་ནང་དུ་སྐུ་ལྔ་ལྔ་ཤར་བའི་དུས་ན༔ སྐུ་གསུམ་ཞེན་པ་ཆོད་དོ༔ སྐུ་གསུམ་ལམ་དུ་བྱས་པའི་གནད༔ རིག་པ་རྟོག་མེད་དངོས་པོ་འོད་དང་ཁྱིམ་དང་ཐིག་ལེའི་ནང་དུ་ཕྱེད་སྐུ་འཆར་རོ༔ ཨཐྎ༔ རང་གི་ལུས་མི་སྣང་སྟེ་སྐབས་སུ་འོད་ཀྱི་སོར་མོ་སྣང་བ འི་དུས་ན༔ ཆོས་སྐུའི་སྒྲོ་འདོགས་ལམ་དུ་འཆོད༔ ཐིག་ལེ་སྟོང་པའི་སྒྲོན་མ་ལ་སྐུ་ལྔ་ལྔར་ཤར་བའི་དུས་ན་ལོངས་སྐུའི་སྒྲོ་འདོགས་ལམ་དུ་ཆོད༔ ལུས་ངག་ཡིད་གསུམ་གྱི་གནད་གཏན་ནས་གཟིར་བས་སྤྲུལ་སྐུའི་སྒྲོ་འདོགས་ལམ་དུ་ཆོད༔ སྐུ་གསུམ་གྱི་སྒྲོ་འདོགས་ཆོད་པའོ༔ ཨཐྎ༔ འབྱུང་བ་དྭངས་སྙིགས་ཕྱེད་པའི་ཚད༔ ཕྱིའི་སྣང་བ་འགགས་ཏེ་འོང་དུ་སྣང་བ་ཡིན༔ ཆོས་ཅན་དང་ཆོས་ཉིད་ཕྱེད་པའི་ཚད༔ དབྱིངས་སྨིན་མཚམས་ལས་བྲལ་བའི་ཚེ་ཡིན༔ སེམས་དང་ཡེ་ཤེས་ཕྱེད་པ་ནི༔ རིག་པ་ལ་ཉིན་མཚན་མེད་པ་ཡིན༔ ཀུན་གཞི་དང་ཆོས་སྐུ་ཕྱེད་པ་ནི༔ གདོས་བཅས་མི་སྣང་བ་ཡིན༔ ཡིད་དང་ཤེས་རབ་ཕྱེད་པ་ནི་སྣང་བ་སྣ་ཚོགས་སུ་ཤར་བ་ཡིན་ནོ༔ ཨཐྎ༔ དབྱིངས་ཀྱི་སྒྲོན་མ་སྨིན་མཚམས་ལས་བྲལ་བའི་དུས་ན༔ འཁོར་འདས་གཉིས་ཀ་རྒྱབ་གྱེས་པ་ཡིན༔ མངའ་དུ་མི་འཇུག༔ དབྱིངས་དང་རིག་པ་ཉིད་མཚན་མེད་པའི་དུས་ན་འཁོར་འདས་གཉིས་སུ་མེད་པ་ཞེས་བྱ་སྟེ༔ འཁོར་བ་ཉིད་མྱང་འདས་སུ་གྲོལ་བ་ཡིན་ནོ༔ ཨཐྎ༔ ཆོས་ཉིད་མངོན་སུམ་གྱི་སྣང་བ་ནི༔ མིག་ནམ་མཁའ་རིག་པ་གསུམ་འབྲེལ་བ་ལ་བྱ༔ ཉམས་གོང་འཕེལ་གྱི་སྣང་བ་ནི༔ དང་པོ་སྨིན་ཕྲག་ནས་ཁྲུ་གང་ན་འཆར་རོ༔ སྲན་མ་ཙམ་རིལ་མ་ཙམ་འཆར་ཏེ༔ དེ་ལ་ཉམས་སུ་བླངས་པས་ཐིག་ལེ་ཁ་དོག་ལྔར་གྱུར་ཏེ༔ དེ་ལ་དབྱིངས་ཀྱི་སྣང་བ་འཆར་རོ༔ དེ་ཉམས་སུ་བླངས་པས་སྣང་བ་ཙམ་འོད་དུ་འཆར་རོ༔ རིག་པ་ཚད་ལ་ཕེབས་པ་ནི༔ དེ་ནས་འོད་དེ་རྣམས་ཀྱང་སྐུ་དང་ཐིག་ལེ་འཆར་ཏེ༔ དེ་ནས་སྐུ་དེ་རྣམས་ཀྱང་ལྔ་ལྔར་སྣང་བ་ནི་རིག་པ་ཚད་ཕེབས་ཀྱི་སྣང་བ འོ༔ ཆོས་ཉིད་ཟད་པའི་སྣང་བ་ནི༔ གང་གི་ངོ་བོར་ཡང་གྲུབ་པ་མེད་ཅིང༔ འདི་ལྟར་ཡིན་ནོ་བར་གྲུབ་པ་མེད་པའི་དུས་ན་ལུས་ངག་ཡིད་གསུམ་གྱི་ཞེན་པ་ཟད་དེ༔ རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཆེན་པོ་བཞུགས༔ འདིར་ནི་སྐུ་གསུམ་གྱི་ཞེན་པ་རང་ཟད་སྐུ་ལས་འདས་པའོ༔ ཨཐྎ༔ དང་པོ་མི་འགུལ་བ་གསུམ་གྱི་གཞི་བཅས༔ ལུས་འདུག་སྟངས་ལས་མ་འགུལ༔ རིག་པ་ནམ་མཁའ་ལས་མ་འགུལ༔ མིག་གཟིགས་སྟངས་ལས་མ་འགུལ་བའོ༔ སྡོད་པ་གསུམ་གྱི་ཚད་གཟུང་བ༔ ཕྱི་སྣང་བ་ལ་སྡོད་པ་ནི༔ རླུང་ཟད་པས་འོད་སྣང་བ་གར་གཏད་དུ་སྡོད༔ ནང་ཕུང་པོ་སྡོད་པ་ནི༔ འཇིག་རྟེན་གྱི་བྱ་བ་ལ་མི་འཇུག༔ གསང་བ་རླུང་སེམས་སྡོད་པ་ནི༔ རླུང་གར་གཏད་དུ་འདྲོངས་སོ༔ ཚད་རྨི་ལམ་གྱིས་གཟུང་བ༔ རབ་རྨི་ལམ་རྒྱུད་ཆད༔ འབྲིང་རྨི་ལམ་ལ་རྨི་ལམ་དུ་ཤེས༔ ཐ་མ་རྨི་ལམ་འགྱུར་ནས་འོང་ངོ༔ ཨཐྎ༔ དབང་པོ་གནད་སྡུད་ཉི་མ་དམར་ཐག་ཆད་པ་མ་ཤེས་ན༔ དགོངས་པ་རྩེ་གཅིག་གིས་བག་ཆགས་དང་མཚན་མ་སྡུད་མི་ནུས་སོ༔ ཤེས་བྱ་བུམ་སྲོད་འཁོར་ནས་ནམ་གུང་སུམ་ཆ་འཇུག་མ་ཤེས་ན༔ གཏི་མུག་གི་གཉིད་དོན་གྱི་ངོ་བོ་ལ་སྦྱོར་མི་ཤེས་སོ༔ ཡེ་ཤེས་རང་ཉིམ་རྩེ་ཤར་དག་མ་ཤེས་ན༔ འབྲས་བུ་ཚད་མི་ཟིན་ནོ༔ སྣང་བ་རྒྱ་ཡིས་མ་ཐེབས་ན༔ མཚན་མ་ཟིལ་གྱིས་མི་ནོན༔ དབང་པོ་གནས་སྡུད་ཀྱི་དུས་སུ༔ ངང་ཀུན་ཏུ་བཟང་མོ་མ་བཅོས་པའི་ངང་དུ་གཞག༔ ཤེས་བྱ་བུམ་འཇུག་གི་དུས་སུ༔ ཤེས་རབ་མ་ཐོབ་ན་གནས༔ རྒྱུ་ལ་རྒྱུ་ཐིམ་པའོ༔ རིག་པའི་རྩལ་མ་འགགས་པར་སྣང་ཡང༔ བྱེད་པ་པོ་མངོན་དུ་མི་སྣང་ངོ༔ འབྱེད་མེད་ཀྱི་ཤེས་རབ་ཆེན་པོ་ལ་གནས༔ སྐུ་གསུམ་ཇ་ལོག་གི་ཏིང་ངེ་འཛིན་ཚད་དུ་ཕྱིན་པའོ༔ ཡེ་ཤེས་རང་སྣང་གི་དུས་སུ༔ བདེ་གསལ་ཆེན་པོ་ལ་བཞག་གོ༔ སྣང་བ་རྒྱས་འདེབས་ཀྱི་དུས་སུ༔ རྣལ་འབྱོར་པ་ཡེངས་ན་མཚན་མའི་རྟོག་པ་ལ་སྤྱོད་པས༔ མ་ཡེངས་པར་དབྱིངས་རིག་གི་དགོངས་པ་ལ་གནས་བར་བྱ༔ དེས་མཚན་མ་ཟིལ་གྱིས་ནོན་ནོ༔ རིག་པ་ལ་ཡེ་ཤེས་ཀྱིས་བརྒྱན༔ ཡེ་ཤེས་ལ་ཐུགས་རྗེས་བརྒྱན༔ ཐུགས་རྗེས་སེམས་ཅན་གྱི་དོན་བྱེད་དོ༔ ཨཐྎ༔ ལུས་ངག་ཡིད་གསུམ་འཁོར་བ་ལ་ཞེན་ཆེ་བས༔ འཁོར་འདས་རུ་ཤན་དབྱེ་བའོ༔ ལུས་ཀྱིས་བྱ་བྱེད་ནུས་ཚད་དུ་ཞག་གཅིག་བྱས་པས༔ ལུས་ཀྱི་ཞེན་པ་བཟློག༔ དེས་ཚད་ནི་ལུས་རང་བཞིན་མེད་པའི་ཉམས་སྐྱེའོ༔ ངག་གིས་ཅ་ཅོ་ཁ་ནས་ཐོན་ཚད་བྱས་པས༔ ངག་གི་ཞེན་པ་ལོག་ནས༔ ངག་དེས་ཚད་ངག་རང་བཞིན་མེད་པའི་ཉམས་སྐྱེའོ༔ ཡིད་བསམ་པ་ཡིད་སྔར་དང་ཕྱིས་ད་ལྟ་ནུས་ཚད་བྱས་པས༔ ཡིད་ཀྱི་ཞེན་པ་ལོག༔ དེས་ཚད་ནི་ཡིད་རང་བཞིན་མེད་པའི་ཉམས་སྐྱེའོ༔ ལུས་ངག་ཡིད་གསུམ་ལ་ཞེན་ཆགས་མེད་པས་འཁོར་བ་ལུས་ངག་ཡིད་གསུམ་ལ་རང་བཞིན་མེད་པར་ཤེས་པས་འདས་པའོ༔ དེ་ལྟར་རུ་ཤན་ཕྱེ་ནས༔ དེ་རྣལ་དུ་འབེབས་པ་ཞེས་བྱ་བ་སྟེ་ཞག་གཅིག་གམ་ཐ་ན་ཉིན་གཅིག་ཏུ་ལུས་དལ་བ་ལུས་རང་བཞིན་མེད་པར་བྱ༔ ངག་ལྐུགས་པ་ལྟ་བུ་ལ་ངག་རང་བཞིན་མེད་པར་གསན་པར་བྱའོ༔ ཡིད་དལ་བ་ལ་འཕྲོ་འདུ་མེད་པ་སྤྲོས་དང་བྲལ་བ༔ འབོལ་ཤིག་གེ་གློད་པ་ཞོག༔ ལུས་དལ་བས་སྤྲུལ་པའི་སྐུ་ལ་རེག་པ་ཡིན་ནོ༔ ངག་དལ་བས་ལོངས་སྤྱོད་རྫོགས་པའི་སྐུ་ལ་རེག་པ་ཡིན་ནོ༔ ཡིད་དལ་བས་ཆོས་ཀྱི་སྐུ་ལ་རེག་པ་ཡིན་ནོ༔ དེ་ལྟར་ཤེས་པ་དང༔ སྐུ་གསུམ་ལམ་དུ་བསློང་བའོ༔ དེ་ནས་དུར་ཁྲོད་དམ་རིལ་སོང་ལ༔ མི་སྐད་ཁྱི་སྐད་མེད་སར་ཕྱིན་པས་ན༔ དེ་ནས་ཤིན་ཏུ་སྤྲོས་པ་མེད་པའི་དབང་བསྐུར་བརྡ་ལ་བརྟེན་ནས་བསྐུར་བའོ༔ ལ༔ ལས་འཕྲོ་ཅན་འགས་ནི་བརྡ་དེ་རྣམས་ཁྲོས་ལོ༔ མ་འཁོར་ན་རང་གིས་བཀྲོལ་ལ་ཉམས་སུ་ལེན་དུ་གཞུག༔ གདམས་ངག་དུས་གཅིག་ལ་མིན་པར་སློབ་མའི་ཉམས་དང་སྦྱར་དུམ་བུ་དུམ་བུར་བསྟན་ནོ༔ ཨཐྎ༔ སོར་བཞི་ཚད༔ ཡར་མཚམས་ལས་བྲལ་བའི་སྐྱེས་བུ་སྐལ་བ་བཟང༔ རང་གི་སྨིན་མཚམས་ལས་སོར་བཞི༔ དབྱིངས་རིག་ཐིག་ལེ་དང་བྲལ་བའི་སྐྱེས་བུ་འཁོར་བ་ལ་འཇུག་པར་གལ་སྲིད༔ ཨཐྎ༔ དེ་ཡང་ཉིད་མོ་མྱང་འདས་ཀྱི་ཆ༔ དབྱིངས་རིག་དབང་པོའི་མངོན་སུམ་དུ་གཏན་ལ་ཕེབས་པའོ༔ ནུབ་མོ་འཁོར་བའི་ཆ༔ དབྱིངས་རིག་དང་པོར་གཏན་ལ་མི་ཕེབས་པའོ༔ དེ་ལྟར་གཏན་ལ་མ་ཕེབས་ན༔ ནུབ་མོ་ཉམས་སུ་ཇི་ལྟར་བླང་ན༔ ནུབ་མོ་མར་མེ་ལ་ཉམས་སུ་བླང་སྟེ༔ མར་མེ་ལ་དབྱིངས་རིག་ཤར་བའི་དུས་ན་འཁོར་འདས་འདྲེན་པའོ༔ མར་མེ་མེད་པར་ཉམས་སུ་བླང་ན༔ ཉིན་མོ་དབྱིངས་ཀྱི་སྣང་བ་དང༔ རིག་པའི་སྣང་བ༔ ཐིག་ལེའི་སྣང་བ་ཇི་ལྟར་ཤར་བཞིན་དུ་ནུབ་མོ་ཡང་དམིགས་པས་ཉམས་སུ་བླང་ངོ༔ དེ་ནས་གོམས་སྟོབས་ཀྱིས་ཉིན་དང་མཚན་མོ་མེད་པས༔ དབྱིངས་རིག་བཀྲག་ཤིག་གེ་འཆར་རོ༔ དེ་ལྟར་ཤར་ཙམ་ན་འཁོར་འདས་གཉིས་མེད་མཉམ་པ་ཞེས་བྱའོ༔ ཨཐྎ༔ ཐིག་ལེ་སྟོང་པའི་སྒྲོན་མའི་ཡི་གེ༔ ཨ་ཧ་ཥ྄ར྅྅྅༔ སྒྲོན་མ་བལྟམས་པའི་དུས་སུ་ཐུན་མཚམས་སུ་འདི་བརྒྱ་ཕྲག་གསུམ་བརྗོད་པས་འཆར་བ་ཡིན་ནོ༔ དབྱིངས་རྣམ་པར་དག་པའི་སྒྲོན་མའི་ཡི་གེ༔ ཊ་ཕ་མ༔ སྣང་བ་ལ་གཏད་པའི་ཚེ་ན་སྔོན་དུ་བརྒྱ་ཕྲག་གསུམ་བཟླས་ན༔ ངག་ནི་ནུས་པ་རྫོགས་པར་བྱེད༔ ཤེས་རབ་རང་བྱུང་གི་ཡི་གེ༔ ཀྵ་ཧི་ཕ༔ འདི་དག་སྐྱེས་བུའི་ཐོ་རངས་སྐྱ་རེངས་ཤར་ཙམ་ན༔ བརྒྱ་ཕྲག་གསུམ་མ་ཆག་པར་བརྗོད་ཤེས་རབ་དང་བློ་དང་ལྡན་པར་འགྱུར༔ རྒྱང་ཞགས་ཆུའི་སྒྲོན་མའི་ཡི་གེ༔ པུ་ཛ་ཧཱུཾ༔ འདི་གསུམ་ཟླ་བ་མཐོང་རེས་ཀྱིས་བརྒྱ་ཕྲག་གསུམ་བརྗོད་ན༔ སྐལ་ལྡན་དེའི་མིག་འགྲིབ་པར་མི་འགྱུར་རོ༔ སྒྲོན་མ་བཞིའི་ཐེམས་ཡིག་གསང་བ༔ ཨཐྎ༔ ཟུག་པའི་དུས་སུ་ཤེས་པ་ནི༔ ཤིན་ཏུ་འཁྱིམ་པར་འགྱུར་བ་ཡིན༔ འདི་དུས་རྣལ་འབྱོར་གཡེང་བ་བྱ༔ ཡང་ན་ལག་པའི་འདུ་བྱེད་བསྒོམ༔ བྱེར་བའི་དུས་སུ་རྣལ་འབྱོར་པ༔ ཤེས་པ་ཡས་ཏེ་བསྡུ་བའི་མན་ངག་བྱ༔ བྱེར་དང་ཟུག་པ་ཉམས་པའི་ཚེ༔ དུས་བཞི་མཉམ་པར་སྦྱོར་ཞེས་བྱ༔ འདི་དུས་རྣལ་འབྱོར་ལྡན་པ་ཡིས༔ ཤེས་པ་རང་གི་སོར་གནས་ཏེ༔ རང་བཞིན་ཆེན་པོའི་བསམ་གཏན་དུ༔ ཡེ་ཉིད་ནས་ནི་མི་གནས་པས་ཏེ༔ འདི་དུས་རིག་པའི་ལྟ་སྟངས་ཀྱིས༔ ཆོས་སྐུ་མཉམ་པ་ཆེན་པོར་ལྟ༔ འདི་དང་བྲལ་བར་མ་བྱས་ན༔ རྟག་ཏུ་བྱེར་ཟུག་སྙོམས་པའོ༔ དེ་ཕྱིར་དུས་བཞི་མཉམ་སྦྱར་རོ༔ འཁྲུགས་པ་བྱུང་བའི་དུས་ཉིད་ན༔ རྣལ་འབྱོར་པ་ཡིས་ཀྱང༔ བྱེར་དང་ཟུག་པ་མཉམ་པ་ནི༔ འཁྲུགས་དང་ཆ་མི་ཕྱེད་པར་གནས༔ འདི་དུས་གནས་ཁང་ཡང་ཡང་སྤོ༔ རང་གི་ཉམས་ལ་ཅི་དགའ་བྱའོ༔ བླ་མའི་མན་ངག་ཐེབས་རེ་ཉིད༔ གང་ལ་བློ་ཞུགས་འདི་དུས་བསྒོམ༔ འདི་ལྟར་སུ་ཡིས་བྱས་པའི་མི༔ དུས་བཞི་མཉམ་པ་ཆེན་པོའོ༔ ཨཐྎ༔ ཕྱིས་སྙོམས་པར་བྱེད་པ་ལ༔ རྙིང་མའི་རྩ་སྐྱེད་པར་བྱེད་པའི་ཡི་གེ༔ ཨཾ་སྟོང་ཕྲག་དྲུག་དྲུག་ལན་རེ་ལ་བརྗོད་པས་ཉེ་བར་འགྲུབ་པ་ཡིན་ནོ༔ སྒྲོན་མ་རྩ་གནས་རང་བཞིན་གྱི་ཡི་གེ་ནི༔ དབྱིངས་རང་བཞིན་གྱིས་རྣམ་པར་དག་པའི་སྒྲོན་མའི་ཡི་གེ་ནི༔ ཨེ་ཡིན༔ ཐིག་ལེ་སྟོང་པའི་སྒྲོན་མ་ཨ་ཡིན༔ ཤེས་རབ་རང་བྱུང་གི་སྒྲོན་མའི་ས་ཡིན༔ རྒྱངས་ཞགས་ཆུའི་སྒྲོན་མའི་ཨེ་ཡིན༔ འདི་ཀུན་ནི་རླུང་དང་བཅས་ཏེ་སྐབས་སུ་སྤུར་བར་བྱའོ༔ ཡང་རང་གི་སྒྲོན་མ་གང་དུ་གཏོད་པའི་ས་ཉིད་དུ་གནས་པར་བྱས་ཏེ༔ ཤེས་པ་དེ་ལ་གཏད་པས་འགྲུབ་པ་ཡིན་ནོ༔ སྟེང་འོག་གཉིས་ཀའི་རླུང་བསྡམས་པ་མ་ཡིན་ནོ༔ འོག་རླུང་བསྡམས་ཤིང་གྱེན་ལ་དྲངས༔ སྟེང་རླུང་རབ་ཏུ་དལ་བས་སྤྲོ་བ་དང་བསྡུ་བ་བྱའོ༔ དེ་ལྟར་བྱས་པས་དུས་ནམ་ཞིག་ཙམ་ན༔ སྟེང་ནས་རླུང་འབྱུང་བའི་འཕྲོ་ཆད་པའོ༔ དེ་ཉིད་ཆོད་པའི་ཚེ་ཡོ་གི་ཡང་ཟད་ཀྱི་འདུ་ཤེས་བྲལ་ནས་འགྲོ་བར་ངེས་པ་ཡིན་ནོ༔ དེའི་ཕྱིར་ན་གསང་བའི་གནད༔ ཨཐྎ༔ བསམ་གཏན་ཉལ་བའི་འཁོར་ལོ་དང་སྒོ་བསྟུན་ནས་ཉམས་སུ་ལེན་ན༔ སྲོད་ལ་སྐྱེད་བྱེད་ཀྱི་ཙཀྲ་ལྟེ་བར་ཤེས་པ་བཅུག་ལ༔ དྲན་པའི་རྒྱུན་འགག་པར་བྱེད་པའི་གནད་དོ༔ ནམ་ཕྱེད་ན་སྙིང་གར་བཅུག་ཅིང་ཉལ་བས་ཤེས་རབ་ཀྱི་དྲན་པ་དང་མི་འབྲལ་བ་ཉིད་དོ༔ དེས་ནི་ཚིག་དོན་གཉིས་སུ་མེད་པར་བྱེད་པའི་གནད་ཡིན་ནོ༔ ཐོ་རངས་རོ་རྣམས་འདུས་པ་མགྲིན་པའི་གནས་སུ་བཅུག་པས་སྟོང་པ་ཉིད་ཀྱི་ཡེ་ཤེས་ཐམས་ཅད་ལ་ལོངས་སྤྱོད་པ་སྟེ༔ གཉིས་མེད་ཀྱི་ཉམས་རྒྱུད་ལ་འཆར་བར་བྱེད་པའི་གནས་ཡང་དག་པའོ༔ ཉིན་མོ་སྤྱི་བོ་རྩེ་མོའི་གནས་སུ་ཤེས་པ་བཅུག་ནས་དར་གཅིག་ཏུ་གནས་པར་བྱས་ན༔ དེ་ནས་མིག་ནས་ཤེས་པ་དྲངས་ནས༔ ཡུལ་ནམ་མཁའ་སྤྲིན་དང་བྲལ་བ་ལ་རིག་པ་གཏད་པས༔ སྣང་བ་རྒྱས་ཐེབས་ཏེ༔ འཁོར་འདས་རུ་བཟློག་པའི་བསམ་གཏན་གྱི་འཁོར་ལོ་ལ་བསྐོར་བ་ཞེས་བྱའོ༔ རྣམ་རྟོག་ཡེ་ཤེས་སུ་གྲོལ་བའི་གནད་ཡིག་གོ༔ ཨཐྎ༔ རིག་པ་རྒྱུད་རྐྱེན་གཉིས་ལ་མ་བརྟེན་པར༔ ཤེས་རབ་ཀྱི་སྤྱོད་ཡུལ་ཡིན་པའི་ཕྱིར༔ དབང་པོ་ཉིད་ལ་རྣོ་རྟུལ་མེད་པར་ཡང ༔ དེ་ཉིད་མཐོང་སྟེ་དེ་དོན་ཉམས་སུ་བླང་ན༔ གསང་སྔགས་རྣམས་ཀྱི་འབྲས་བུ་འདི་ཉིད་ལ༔ ཐོབ་པར་འགྱུར་བ་འདི་ལ་ཐེ་ཚོམ་མེད༔ དེ་ཡི་ཕྱིར་ན་གསང་བའི་གནད༔ བཤད་ཅིང་བསྟན་པ་མི་དགོས་ངོ་མཚར་ཆེ༔ ཡང་དག་ཡེ་ཤེས་ཚིག་གིས་མི་རྟོགས་ཏེ༔ མངོན་སུམ་རང་གནད་ཚད་འདི་ངོ་མཚར་ཆེ༔ རང་བཞིན་རྫོགས་པ་ཆེན་པོའི་དོན་དེ་ཉིད༔ དགེ་སྡིག་གཉིས་ཀྱིས་ཕན་གནོད་ལས་འདས་ཕྱིར༔ དབང་པོ་ཉིད་དང་འབྲེལ་བ་ངོ་མཚར་ཆེ༔ སྨྲ་བསམ་བརྗོད་དུ་མེད་པའི་དོན་དེ་ཉིད༔ གཞན་གྱིས་བཤད་པས་དོན་དེ་མི་རྙེད་ཕྱིར༔ རང་གི་གནས་ལས་འབྱུང་བ་ངོ་མཚར་ཆེ༔ གསང་བ་ཆེན་པོ་སུས་ཀྱང་མ་རྙེད་པ༔ ཐེག་པ་ཐུན་མོང་རྣམས་ལས་ཁྱད་འཕགས་ཕྱིར༔ ངེས་པའི་དོན་ཉིད་སྤུངས་པ་ངོ་མཚར་ཆེ༔ བླ་མའི་མན་ངག་རྐྱེན་ལ་རག་མ་ལུས༔ རང་སྣང་དབང་པོའི་གནད་དང་བསྟུན་ནས་ནི༔ སྔོན་ཆད་མཐོང་མ་མྱོངས་བའི་སྣང་བ་དེ༔ གོམས་ཤིང་སྦྱངས་པ་མི་དགོས་གཅིག་ཅར་དུ༔ སྟོང་པའི་ཡུལ་ལ་ལྷག་མཐོང་ཉིད་དུ་ཡང༔ ལས་ལ་དག་དང་མ་དག་མེད་པ་ཡི༔ མངོན་སུམ་ཉིད་དུ་མཐོང་བར་འགྱུར་བ་ལ༔ ཐེ་ཚོམ་ཡོད་པ་ཉིད་ནི་མ་ཡིན་ནོ༔ དེ་ཡི་ཕྱིར་ན་གསང་བའི་ཐེག་ཆེན་འདི༔ སངས་རྒྱས་རྣམས་ཀྱིས་རྡོ་རྗེ་འཆང་ལ་དབང་བཞི་རྫོགས་བྱས་ནས༔ གསང་བ་མཆོག་ལ་དབང་བར་མངའ་དབང་བསྐུར༔ ཉིད་ཀྱིས་གསང་དོན་འདི་ཉིད་བརྗོད་པ་ལས༔ གཞན་གྱིས་གསུངས་ཤིང་བསྟན་པར་ནུས་མི་སྲིད༔ དེ་ཡི་ཕྱིར་ན་གསང་ཆེན་ཐབས་གཅིག་སྙིང་གི་བཅུད༔ ཨཐྎ༔ རི་བོ་ཅོག་བཞག་གི་ལྟ་བ༔ མི་འགྱུར་བའི་རིག་པ༔ དཔེ་རི་བོ་ལྟར་དཔངས་མཐོ་བ༔ བྱ་བྱེད་མེད་པ་ནམ་མཁའི་ངང་ལས་མ་གཡོས་པར་བཞག་སྟེ༔ རང་གིས་མི་འབྲལ་བར་བྱའོ༔ རང་གསལ་ཙམ་དུ་གཞག་པར་བྱ་སྟེ༔ དེ་ཡང་སྒྲོན་མ་ཉིད་མིག་གིས་མ་ཡེངས་པར་བསྟན་ཏེ༔ དབྱིངས་ཀྱི་སྲོན་མ་དང་མ་བྲལ་བར་བྱའོ༔ ཨཐྎ༔ རྒྱ་མཚོ་ཅོག་གཞག་གི་དགོངས་པ༔ གཞན་གྱི་ཕྱོགས་སུ་མི་བ ལྟ་ཞིང ༔ དེའི་ངང་ལ་རླུང་གིས་མ་བསྐྱོད་པ་བཞིན་དུ༔ རྐྱེན་དབང་དུ་མི་འགྲོ་ཞིང ༔ གནས་པ་ཉིད་ལ་བྱ་ཞིང་དགོངས་པ་ལས་མི་འདའ་བར་གསལ་བ་མ་ཡེངས་པར་སྣང་བ་ལ་ཀུན་ཏུ་ཁྱབ་པ་ཆེན་པོ་ཡངས་པ་ལ་མཛེས་པར་སྣང་བ༔ སྒྲོན་མ་ལ་མིག་གི་ཟུར་གྱིས་བལྟ་བར་བྱ་སྟེ༔ དབྱིངས་ཀྱི་ངང་དུ་རིག་པ་ཉིད་དོ༔ ཨཐྎ༔ རིག་པ་ཅོག་གཞག་གི་མན་ངག༔ རྡོ་རྗེ་ལུ་གུ་རྒྱུད་ཀྱི་སྐུ་ལ་བྱ་སྟེ༔ སྐུ་དེ་ཡང་སྒྲོན་མའི་ནང་དུ་གཟུག་སྟེ༔ བྱ་བྱེད་དང་བྲལ་བར་བྱ༔ དབྱིངས་ཀྱི་སྒྲོན་མ་དེ་ཉིད་ཀྱི་ནང་དུ་ཐབས་ཀྱིས་གཟུང་བ་ལ་བྱ་བ་སྟེ༔ མིག་མི་འགུལ་བའོ༔ དེ་ཡང་སྡོད་པ་གསུམ་མི་འགུལ་བ་གསུམ་ལ་བྱའོ༔ ཨཐྎ༔ སྣང་བ་ཅེར་གཞག་གི་ཐབས་བསྟན་པ༔ ཐད་ཀའི་སྣང་བ་ཐམས་ཅད་ཡེ་ཤེས་ཀྱི་ངོ་བོ་སློང་བའོ༔ སྣང་བ་ཉིད་ཅེ་རེ་སྣང་ཡང་ཡིད་མ་ཤོར་ཞིང་དོན་ལ་མ་གྲུབ་པའོ༔ དེ་ཡང་སྣང་བའི་རང་བཞིན་ཇི་སྙེད་པ་ཐམས་ཅད་རྟོག་པ་མེད་ཅིང་རང་གི་སྒྲོན་མ་དེ་ཉིད་དང་མ་བྲལ་བར་གནས་ཏེ༔ ཕྱི་ནང་གི་བྱ་བ་བཏང་ཞིང༔ རྐྱེན་མེད་པའི་ཡུལ་ཤིན་ཏུ་དབེན་པར༔ ཅོག་བཞག་རྣམས་ལ་བལྟ་བར་བྱའོ༔ ཨཐྎ༔ དབྱིངས་ཀྱི་རྒྱུ་བསྟན་པ་ནི༔ ཕྱི་དབྱིངས་ནམ་མཁའ་སྟོང་པ༔ ནང་གི་དབྱིངས་འོད་དང་ཁ་དོག་གོ༔ གསང་བའི་དབྱིངས་སྒྲོན་མ༔ ཉོན་མོངས་པའི་དྲི་མ་རྣམ་པར་དག་པས་ན༔ ཡང་དག་པའི་སྒྲོན་མ་དེ་ཉིད་ཀྱང ༔ སེམས་ཅན་ལ་སྔར་ལུས་ལ་མ་བརྟེན་པའི་དུས་ན་སུས་ཀྱང་མ་བྱས་པའོ༔ ཨཐྎ༔ ཐིག་ལེའི་ཕྱེད་སྐུ་དང་བཅས༔ ཕྱེད་ནི་དོན་དམ་པའི་རྒྱུ་འབྱུང་བས་བསྐྱེད་པའི་སྒྲོན་མ་བཞི་ཡིན་ལ༔ རྐྱེན་ཉམས་སུ་ལེན་པ་རྒྱུན་མ་ཆད་པ་ལས༔ འབྲས་བུ་སྐུ་རྣམས་སུ་སྨིན་ལ༔ ཕྱེད་ཀུན་རྫོབ་ཀྱི་ཐིག་ལེའི་རྒྱུ་འབྱུང་བ་འདུས་པའི་མའི་ཐིག་ལེས་ལུས་བསྐྱེད་ལ༔ རྐྱེན་སྐྱེ་བ་བཞིས་འབྱུང་བ་ལ་གཟུགས་ཐ་དད་པར་སྨིན༔ ཕའི་རྒྱུ་བྱང་ཆུབ་ཀྱི་སེམས་ཀྱི་སྙིགས་མ་འདུས་པས་དྲན་བསམ་དུ་མ་བསྐྱེད་ལ༔ རྐྱེན་བཞིས་བསྡུས་པའི་སེམས་ཐ་དད་པར་སྨིན་པས་ན་ཕྱེད་སྐུ་སྟེ༔ དོན་དམ་གྱི་སྐུར་སྨིན༔ ཀུན་རྫོབ་ཀྱི་ལུས་སུ་སྨིན་པའོ༔ ཉམས་ལེན་གྱི་དུས་སུ་འོད་ཀྱི་ཐིག་ལེའི་དབུས་སུ༔ སྐུ་ལྟེ་བ་མན་ཆད་རེས་སྣང་བས་ན༔ ཐིག་ལེའི་ཕྱེད་སྐུ་ཞེས་བྱའོ༔ ཨཐྎ༔ ཆོས་ཉིད་ཟད་པའི་སྣང་བ་གང་དུའང་མ་གྲུབ་པ་ནི༔ ས་སྲ་བ་མེད་པའི་འོད་སེར་པོ ༔ ཆུ་གཤེར་བ་མེད་པའི་སྡུད་པ་དཀར་པོ༔ མེ་ཚ་བ་མེད་པའི་འོད་དམར་པོ་དང༔ རླུང་གཡོ་བ་མེད་པའི་འོད་ལྗང་གུ་དང༔ ནམ་མཁའ་ཁྱབ་པ་མེད་པའི་མདངས་ཅན་མཐིང་ག་ཆེན་པོ་དང་ལྔ༔ ཆོས་ཉིད་ཟད་པའི་དབྱིངས་སུ་རང་དག་པས་སྣང་བའི་ངོ་བོ་གང་དུ་ཡང་གྲུབ་པ་མེད་པས༔ དེ་ཉིད་ལ་འཇིགས་པ་མེད་པས༔ ཕྱིས་ཀྱང་མི་འཇིགས་པ༔ དེ་ལ་རྐྱེན་གྱིས་མི་ཤིགས་པས༔ ཡུལ་སྣང་མེད་པ་ལ༔ རྐྱེན་བླ་མའི་མན་ངག་ཆེན་པོ་ལ་བརྟེན་ནས་དེ་ལྟར་གྲོལ་བ་ཡིན་ནོ༔ ཨཐྎ༔ ཆོས་ཉིད་མ་བཀོད་པ་ནི་དངོས་པོའི་གནས་ལུགས་སོ༔ རིག་པ་རང་སྣང་ནི་དབྱིངས་སོ༔ ཡེ་ཤེས་ཇི་བཞིན་གྱི་སྣང་བ་ནི་ཆོས་ཉིད་ཟད་པའོ༔ ཡེ་ཤེས་ཕྱོགས་དག་གི་སྣང་བ་ནི༔ སྐུ་ཡེ་ཤེས་ཐིག་ལེའོ༔ རིག་པ་རང་གྲོལ་གྱི་སྣང་བ་ནི་ལུ་གུ་རྒྱུད་དོ༔ འགྲོ་དྲུག་འཁྲུལ་པའི་སྣང་བ་ནི༔ ཡུལ་གཅིག་ལ་ཐ་དད་པར་མཐོང་བའོ༔ ཨཐྎ༔ རིག་པའི་མཚན་ཉིད་གང་ཞེ་ན༔ མདོག་མེད་པའི་གནག་པ་ཆེན་པོ༔ དབུགས་མེད་པའི་འགྱུ་བ་ཆེན་པོ༔ གཤོག་པ་མེད་པའི་འཕུར་བ༔ རྐང་པ་མེད་པའི་འགྲོ་འོང་དང་བཅས་པ༔ རང་གིས་རང་རིག་པས་ན་རིག་པའོ༔ ཨཐྎ༔ ཐིག་ལེ་གང་ཞེ་ན་མ་བྲིས་པའི་མུ་ཁྱུད་འོད་ལྔ་དང་བཅས་པ་ཉམས་སུ་བླངས་ན་མུ་ཁྱུད་བཅུ་རུ་སྣང༔ དེ་ནས་འཁར་གཞོང་ཙམ༔ དེ་ནས་བསེ་ཕུབ་ཙམ་དུ་སྣང་བའོ༔ དེ་ནས་ཞལ་རས་སུ་སྣང༔ དེ་ནས་ཕྱེད་སྐུ་རུ་སྣང༔ ཐིག་ལེའི་ནང་དུ་སྐུ་ལྔ་ལྔ་སྣང་བ་ནི་ཐིག་ལེ་སྨིན་པའོ༔ ཨཐྎ༔ དེ་ནས་འོད་སྣང་གྱེན་འགྲེང་དང༔ རྩིབས་ཤར་དང༔ དྲྭ་བ་དང༔ དྲྭ་བ་ཕྱེད་པ་དང༔ མིག་མངས་རིས་དང༔ ཟ་འོག་གི་རྣམ་པ་དང༔ མདུང་རྩེ་དང༔ ཉ་མིག་དང༔ རེ་ལྡེ་ཙམ་དང༔ ཡུངས་འབྲུ་ཙམ་སྣང་བ་ཐམས་ཅད་གཞལ་ཡས་ཁང་དུ་སྣང་ངོ༔ དབྱིངས་ཚད་དུ་ཕྱིན་པའོ༔ ཨཐྎ༔ རིག་པའི་ངོ་བོ་ལ་རིགས་དྲུག་ཡེ་ནས་གྲུབ་པ་མེད་པའི་གནད་ཀྱིས༔ སྣང་ཚུལ་ལ་སྡུག་བསྔལ་རྣམ་པ་དྲུག་གི་ཞེས་པ་རང་ཆོད༔ རང་ངོ་མ་རིག་པ་ལ་གྲུབ་པ་མེད་པའི་གནད་ཀྱིས༔ སྣང་ཚུལ་ཉོན་མོངས་པ་དྲུག་གིས་འཆིང་བ་རང་ཆོད༔ རང་ངོ་ལ་ཡུལ་ཤེས་མ་གྲུབ་པའི་གནད་ཀྱིས༔ སྣང་ཚུལ་ལ་ལུས་ངག་ཡིད་ཀྱི་རྣམ་སྨིན་གྱི་ཞེན་པ་རང་ཆོད༔ དེ་ལྟར་དོན་གཉིས་མེད་དུ་ཤེས་ནས་རིག་པ་རང་སྣང་སྤྲོས་པ་མེད་པའི་རང་བཞིན་ཡེ་ནས་གནས་པ་ཡིན་ཏེ༔ དགེ་སྡིག་རྣམ་རྟོག་མེད་པའི་སྣང་བ་རང་རྐྱེན་དབྱིངས་སུ་དག་པའི་ཡེ་ཤེས༔ ཞེས་རང་གི་ངོ་བོར་གཏན་ལ་ཕེབ་པའོ༔ ཨཐྎ༔ ཆོས་སྐུ་ངོ་སྤྲོད་གདམས་ངག་གིས༔ རིག་པ་དེ་ཉིད་ཅེར་མཐོང་བསྟན༔ ལོངས་སྐུ་ངོ་སྤྲོད་གདམས་ངག་གིས༔ རིག་པ་དབྱིངས་ཀྱི་གོ་རར་གཞུག་པ་དང༔ སྤྲུལ་སྐུ་ངོ་སྤྲོད་གདམས་ངག་གིས༔ འཁྲུལ་སྣང་ཞིང་ཁམས་སུ་སྦྱར་བའོ༔ དེ་ཡང་ཆོས་སྐུ་རང་གི་རིག་པ་ཡིན་པར་ཡིད་ཆེས༔ ལོངས་སྐུ་དེ་ལས་བྱུང་བ་སྐུའི་སྣང་བ་དང་ཐིག་ལེ་རྣམས་ཡིན་པར་ཡིད་ཆེས༔ སྤྲུལ་སྐུ་དེ་ལས་ལྟ་བྱེད་མ་འགགས་པས་རང་སྣང་དུ་ཤེས་པ་དེ་ཡིན་པར་ཡིད་ཆེས་སོ༔ ཨཐྎ༔ ལུས་ཀྱི་གདན་སྙིང་གི་ནང་ན་སྐུ་དང་ཡེ་ཤེས་སུ་གནས༔ སྲོག་གི་གནད་རྩའི་ནང་ན་ཐིག་ལེར་གནས༔ དབང་པོའི་གནད་མིག་གི་ནང་ནས་སྒྲོན་མ་བཞི་དུས་མེད་དུ་འཆར་བའོ༔ ཨཐྎ༔ ཡེ་ཤེས་ལུས་ཀྱི་གནད་ལ་བརྟེན༔ འོད་ཡུལ་གྱི་གནད་ལ་བརྟེན༔ རིག་པ་ལྟ་བའི་གནད་ལ་བརྟེན་པའོ༔ ཨཐྎ༔ འགྱུར་མེད་རྩ་ཆེན་བཞི་ནས་རྒྱུ༔ རོ་མ་རྐྱང་མ་ཀུན་དྷརྨ༔ ཀ་ཏི་གསེར་གྱི་རྩ་ཆེན་ཞེས་ཀྱང་བྱ༔ ཤེལ་གྱི་སྤུ་གུ་ཅན་ཞེས་ཀྱང་ཟེར༔ ཨ་ཝ་དྷཱུ་ཏི་ནས་ཐིག་ལེ་སྲན་མའི་གྭའུ་སླེབས་པ་ཙམ་དུ་བྱུང ༔ རླུང་གི་སྟོབས་ཀྱིས་འགྱུ་བའོ༔ ཨཐྎ༔ སྣང་བ་ཐམས་ཅད་ཆོས་སྐུར་ངོར་སྤྲད༔ ཆོས་སྐུ་སྣང་སྟོང་དབྱེར་མེད་དུ་ངོ་སྤྲད༔ སྣང་སྟོང་རིག་སྟོང་དབྱེར་མེད་དུ་ངོ་སྤྲད༔ རིག་སྟོང་དྲན་པ་རང་ཡུལ་དུ་ངོ་སྤྲད༔ སྣང་བ་ཐོག་བབས་འཁྲུལ་པ་རང་དག་ཏུ་ངོ་སྤྲད༔ འོད་དྲན་པ་དང་དྲན་མེད་སྐྱེ་མེད་བློ་འདས་སུ་ངོ་སྤྲད༔ དེས་ཡུལ་སྣང་གི་ཞེན་པ་ལས་ལོག་པའི་དགོས་པའོ༔ ཨཐྎ༔ དྲན་པ་གཞི༔ དྲན་མེད་ལམ༔ སྐྱེ་མེད་ཐབས༔ བློ་འདས་སྤྲོས་བྲལ༔ གནད་སེམས་ཀྱི་ཞེན་པ་ལས་བློ་ལྡོག་པའི་དགོས་པ་ཡོད༔ ཨཐྎ༔ དྲན་པ་སྣང་བ༔ དྲན་མེད་སྟོང་པ༔ སྐྱེ་མེད་གཉིས་མེད༔ བློ་འདས་རང་སོ༔ ལྟ་སྒོམ་གྱི་ཞེན་པ་ལས་བློ་བཟློག་པའི་དགོས་པའོ༔ ཨཐྎ༔ དྲན་པ་གཉིད་སད་པའི་གདམས་ངག༔ དྲན་མེད་གཉིས་ཀྱི་གདམས་ངག༔ སྐྱེ་མེད་གཉིད་ལོག་པའི་གདམས་ངག༔ བློ་འདས་རྨི་ལམ་གྱི་གདམས་ངག༔ གྲུ་མཐའི་ཚིག་ལས་བློ་བཟློག་པའི་དགོས་པའོ༔ ཨཐྎ༔ ལུས་ལ་གཞི་བཅའ༔ ནམ་མཁའ་ལ་འབེན་བཅའ༔ རིག་པ་ལ་མིག་གཏད༔ ཨཐྎ༔ དང་པོ་འོད༔ གཉིས་པ་ཐིག་ལེ༔ གསུམ་པ་སྐུའི་སྣང་བ་སྟེ༔ མི་འདྲ་བ་ཡང་ཡང་སྐྱེས་ཏེ༔ དེ་ཡང་རིག་པའི་ཆོ་འཕྲུལ་ཅིང་ཡང་སྟོན་པའོ༔ ཨཐྎ༔ ཅི་ནས་ཀྱང་རིག་པ་དེ་བསྡུས་ཏེ༔ དབྱིངས་ཀྱི་ནང་དུ་ཚུད་པར་བྱས་ཏེ༔ རང་གི་སྡུན་སྨིན་མཚམས་སུ་གཏད་པའོ༔ དེ་ཡང་བྱེད་མཁན་སུ་ཡང་མེད༔ དེ་ཡང་བྱེད་པ་མེད་པར་གནས་པའོ༔ ཨཐྎ༔ ལུས་སྡོད་པས་རིག་པ་སྡོད་དེ༔ རིག་པ་སྡོད་པས་མི་རྟོག་པ་ལ་རྒྱུད་དུ་གནས་ཏེ༔ རྗེས་ཀྱི་ཤེས་པ་ཤེས་རབ་ཀྱིས་སྐྱེ་མེད་དུ་གྲོལ༔ ཨཐྎ༔ རིག་པ་ལས་དྲོད་སྐྱེས་པས༔ སྣང་བ་ལ་ཡིད་མི་འཇུག་པར་བརྟན་པ་ལ་རྒྱུད་དུ་གནས་ཏེ༔ རྗེས་ཀྱི་ཤེས་པ་ལ་ཡུལ་ཐམས་ཅད་རིག་ངོར་དག་པའོ༔ ཨཐྎ༔ རིག་པ་སྐུ་གསུམ་གཉིས་མེད་གནས་པ༔ གཞི་ཟད་པའི་ཏིང་ངེ་འཛིན་ལ་གནས་པ༔ རྗེས་ཀྱི་ཤེས་པ་འཁོར་འདས་གཉིས་མེད་དུ་འདྲེས་པའོ༔ ཨཐྎ༔ དབྱིངས་ནམ་མཁའ་རིག་པ་གསུམ་མི་འབྲལ་བས༔ རྗེས་ཀྱི་ཤེས་པ་ལ་རིག་པ་དབྱིངས་སུ་ཚུད་པའོ༔ ཨཐྎ༔ ཡུལ་རིག་པ་གཉིས་མེད་དུ་རྟོགས་པས༔ སྒོ་ལྔ་རང་གསལ་དུ་གནས་ཏེ༔ རྗེས་ཀྱི་ཤེས་པ་རྟོག་མེད་རང་གྲོལ་དུའོ༔ ཨཐྎ༔ རིག་པ་འབྱུང་བ་བཞི་ཟད་པས་འཁྲུལ་བ་གཏིང་དག་གི་དགོངས་པ་ལ་གནས་ཏེ༔ རྗེས་ཀྱི་ཤེས་པ་ལ་རིག་པ་ཉིད་ཡུལ་དུ་འགྲོལ་བའོ༔ ཨཐྎ༔ རིས་མེད་ཀྱི་སྣང་བ་ལ་ཕྱོགས་མེད་ཀྱི་རིག་པ་ཤར་བས༔ ཡུལ་མེད་ཀྱི་ཡུལ་དུ་སོང་སྟེ༔ བལྟར་མེད་པའི་སྐུ་ལ་བལྟས་པས༔ རྟོག་མེད་ཀྱི་རིག་པ་མཐོང་སྟེ༔ གཏད་མེད་ཀྱི་ཤེས་པ་སྤྱོད་པ་ཞེས་བྱའོ༔ ཨཐྎ༔ སྒྲོན་མ་བཞིའི་སྣང་བ་རང་གིས་མཐོང་བས་འབྱུང་བ་བཞི་ཟད་པར་བསྐྱལ་ལོ༔ ཨཐྎ༔ ཆོས་སྤྱིའི་ལྟ་བ་དང་ཆོས་ཉིད་རང་གི་ལྟ་བ་སྟེ༔ ལྟ་བ་བཞི་སྐོར་དུ་བསྟན༔ སྤྱི་ལ་བཞི་སྟེ༔ གང་ལ་བལྟ་ན་དངོས་པོའི་གཤིས་ལ་ལྟ༔ གང་གིས་བལྟ་ན་རྟེན་གྱི་གང་ཟག་གིས༔ གང་ལྟར་བལྟ་ན་ཕྱོགས་རིས་མེད་པར་ལྟའོ༔ བལྟས་པས་གང་ཐོབ་ན༔ ཆོས་སྐུ་ཕྱི་ནང་མེད་པ་ཐོབ་པའོ༔ ཨཐྎ༔ རང་གི་ལྟ་བ་བཞི་སྟེ༔ གང་ལ་བལྟ་ན་དབྱིངས་རིག་ལ་ལྟ༔ གང་གིས་བལྟ་ན་མིག་གིས་ལྟ༔ གང་ལྟར་བལྟ་ན་གླང་པོ་ཆེ་ལྟ་བུའི་མིག་གིས་ལྟ༔ བལྟས་པས་གང་ཐོབ་ན་སྐུ་གསུམ་ཐོབ་པའོ༔ ཨཐྎ༔ ཐོག་ལྟ་བུའི་མན་ངག་གིས་རིག་པ་ཐོགས་པ་མེད་པར་བསྟན་པས༔ སྣང་བ་ཡིད་ཆེས་པར་བསྟན་པ་དང༔ ཨཐྎ༔ རིག་པ་འགྱུར་བ་མེད་པའི་གཟེར་ལྟ་བུའི་མན་ངག་གིས༔ རིག་པའི་འཆར་སྒོ་ལ་ཡིད་ཆེས་པར་བསྟན་པ་དང༔ ཨཐྎ༔ རིག་པ་མཁའ་ལ་ལྡིང་བ་ནི༔ སྐར་མདའ་ལྟ་བུའི་མན་ངག་གིས་བརྟེན་པ་ལ་ཡིད་ཆེས་པར་བསྟན་པ་དང ༔ ཨཐྎ༔ རིག་པ་ཕྱིར་མི་ལྡོག་པ་ནི་གྱད་ཀྱི་མདའ་ལྟ་བུའི་མན་ངག་གིས་རིག་པ་རང་གི་ངོ་བོ་ལ་ཡིད་ཆེས་པར་བསྟན་པའོ༔ ཨཐྎ༔ དེའི་ཕྱིར་གཏད་སའི་འབེན་གཟུག་པའི་མན་ངག་ནི༔ དབྱིངས་རིག་གཉིས་ལ་གཏད༔ བརྡེག་པའི་དམིགས་བཙལ་བ་ནི༔ རང་གི་སྨིན་མཚམས་སུ༔ འཕེལ་བའི་ས་བོན་གདབ་པ་དང༔ དེ་ལ་གོམས་པ་རབ་ཏུ་གཅེས༔ རྒྱ་ཆེ་བའི་ནམ་མཁའ་སྤར་གྱིས་བཟུར་བའོ༔ ཨཐྎ༔ ཐིག་ལེ་ཉག་གཅིག་ཅེས་བྱ་བ་ནི༔ རང་གི་རིག་བ་ལུ་གུ་རྒྱུད་ཀྱི་སྐུ་ཡིན་པས༔ དེའི་དོན་ལ་མ་ཡེངས་པར་བྱ༔ ཐིག་ལེ་ནི་ཆོས་སྐུ༔ ཉག་ནི་ལོངས་སྐུ༔ གཅིག་ནི་སྤྲུལ་སྐུ༔ ཞེས་བྱ་བ་ནི་སྐུ་གསུམ་འདུ་འབྲལ་མེད་པའོ༔ ཨཐྎ༔ ཆོས་སྐུའི་གནད་སྙིང་དུ་བསྟན་པས༔ ལུས་ཡོངས་སུ་མྱ་ངན་ལས་འདས་པའི་མན་ངག༔ ལོངས་སྐུའི་གནད་རྩར་བསྟན་པས༔ ངག་ཡོངས་སུ་མྱ་ངན་ལས་འདས་བའི་མན་ངག༔ སྤྲུལ་སྐུའི་གནད་མིག་ཏུ་བསྟན་པས༔ སེམས་ཡོངས་སུ་མྱ་ངན་ལས་འདའ་བར་བསྟན་པའོ༔ ཨཐྎ༔ སེམས་ཀྱི་སྤྲོས་པ་ལྟ་བས་བཅད༔ ཚིག་གི་སྤྲོས་པ་ཉམས་ལེན་གྱིས་བཅད༔ མཚན་མའི་སྤྲོས་པ་རིག་བས་བཅད༔ བློའི་སྤྲོས་པ་གདམས་པས་བཅད༔ ཉམས་མྱོང་གི་སྤྲོས་པ་གོམས་པས་བཅད༔ གྲུབ་མཐའི་སྤྲོས་པ་ཤེས་རབ་ཀྱིས་བཅད་པའི་མན་ངག༔ ཨཐྎ༔ ཡིད་ཀྱི་རྣམ་པར་ཤེས་པ་དང༔ རིག་པའི་ཁྱེའུ་ཆུང་གཉིས་སྟོབས་བྱེད་པས་ཡིད་ཀྱི་རྣམ་པར་ཤེས་པ་སྲོག་གཅོད་པ་དང༔ མ་བྱིན་པར་ལེན་པ་དང༔ མི་ཚངས་པར་སྤྱོད་པ་དང༔ ངག་འཁྱལ་བ་དང༔ ཚིག་རྩུབ་པ་དང༔ རྔམ་སེམས་དང༔ རློམ་སེམས་དང ༔ ལོག་པར་ལྟ་བ་ལ་སོགས་པ་དེ་རྣམས་སྤངས་ནས༔ སྟོང་པ་ཉིད་དུ་བསྒོམས་པས༔ རིག་པའི་ཁྱེའུ་ཆུང་ན་རེ༔ ཁྱོད་ཀྱིས་བསྒོམ་པ་དེ་ནི་རྫ་བེའུ་དང་འདྲ་སྟེ་འཇིག་པའི་ཆོས་ཅན་ཡིན་ནོ༔ རིག་པའི་ཁྱེའུ་ཆུང་ཁྱོད་ཇུག་བསྒོམས་བྱས་པས༔ ཡིད་ཀྱི་རྣམ་པར་ཤེས་པ་ཁྱོད་ཉོན་ཅིག༔ ཁྱོད་ནང་དུ་ལྟོས་ལ་ཕྲ་མའི་སྐུ་དེ་ལུ་གུ་རྒྱུད། ངོ་ཤེས་ཕྱིར་བལྟས་པས༔ རང་སྣང་གི་ནམ་མཁའ་ལ་ཕྲ་མོའི་སྐུ་ཤར་བ་དེ་ངོ་ཤེས་ན༔ ལུ་གུ་རྒྱུད། ཁམས་གསུམ་གྱི་སྲོག་དུས་གཅིག་ལ་ཆད་དོ༔ སྐྱི་སེར་གྱི་རླུང་རྫུ་འཕྲུལ་གྱི་ལྷ་མོ་ལ་ཞོན་ནས༔ དྲང་སྲོང་གི་བུ་མོ་བདེ་བ་ཟག་པ་མེད་པའི་གནས་སུ་སྐྱེའོ༔ ཉི་མའི་འོད་ཟེར་སྟོང་གིས་བསྐོར་རོ༔ ཉིན་མོ་དང་མཚན་མོ་མེད་པར་བསྐོར་རོ༔ ཏི་མ་རའི་བུ་སེང་གེ་དཀར་མོ་ལྕགས་ཐག་ལ་འདོགས་སོ༔ རང་སྣང་གི་ནམ་མཁའ་ལ་ཕྲ་མོའི་སྐུ་དེ་ཤེས་ན༔ སེང་གེ་དཀར་མོ་ལྕགས་ཐག་ལ་ལུ་གུ་རྒྱུད། ཐོག་པ་ཡིན་ནོ༔ ཨཐྎ༔ དཔེར་ན་རིག་པའི་ཡེ་ཤེས་དེ་ནམ་མཁའི་གླིང་དང་འདྲ་སྟེ༔ མ་བྲིས་པའི་དཀྱིལ་འཁོར་ན༔ སྲོག་མེད་པའི་སྐུ་བཞུགས་སོ༔ ཤེས་བྱ་མ་རྨོངས་བ༔ དབུགས་མེད་པའི་འགྱུར་བ༔ ཤེས་བྱ་མ་རྨོངས་པ༔ ཨཐྎ༔ སྙིང་གི་ནང་དུ་མ་རིག་པ་དང ༔ རིག་པའི་ཁྱེའུ་ཆུང་གཉིས་རིག་པའི་ཁྱེའུ་ཆུང་གིས༔ མ་རིག་པ་ལ་ཁྱོད་ཉོན་ཅིག༔ ཁྱོད་འཁོར་བ་ལ་མ་དགའ༔ དུག་ལྔ་ལ་མ་དགའ་ཞིག༔ ངའི་ཟེར་དཀར་པོ་གཅིག་ཡར་ལ་འགྲོ་བ་ལས་ཞེ་སྡང་གི་ཆུ་འབབ་སྟེ་ཁྱོད་ཀྱིས་ཚོར་རམ༔ ངའི་ཐུར་ལ་རྒྱུག་པའི་ཟེར་དམར་པོ་ལས་འདོད་ཆགས་ཀྱི་ཆུ་ཆེན་པོ་ཞིག་རྒྱུག་སྟེ་ཁྱོད་ཀྱིས་ཚོར་རམ༔ ངའི་ཐུར་ལ་ཟེར་ནག་པོ་ལས༔ གཏི་མུག་གི་ཆུ་ཆེན་པོ་འབབ་སྟེ་ཁྱོད་ཀྱིས་ཚོར་རམ༔ ངའི་གཞོགས་གཡས་ནས་ཡར་ལ་ཟེར་ཁམ་སེར་གྱི༔ ང་རྒྱལ་གྱི་ཆུ་ཆེན་པོ་འབབ་པ་ཁྱོད་ཀྱིས་ཚོར་རམ༔ ངའི་གཞོགས་གཡས་ན་མར་ལ་རྩ་ཁ་ལྗང་གཅིག་ནང་ན་ཡར། ཕྲག་དོག་གི་ཆུ་འབབ་སྟེ་ཁྱོད་ཀྱིས་ཚོར་རམ༔ དེ་ཚོར་ན་ངས་མི་འགྱུར་རྡོ་རྗེ་ལུ་གུ་རྒྱུད་ཀྱི་སྐུ་ཤེས་པས༔ དེ་ཁྱོད་ཀྱིས་ཚོར་རམ༔ ངས་མི་འགྱུར་རྡོ་རྗེ་ལུ་གུ་རྒྱུད་ཀྱི་སྐུ་ཤེས་པས་ཞེ་སྡང་གི་གྲོང་ཁྱེར་ཞིག་སྟེ༔ མེ་ལོང་ལྟ་བུའི་ཡེ་ཤེས་ཤར༔ ང་རྒྱལ་གྱི་གྲོང་ཁྱེར་ཞིག་སྟེ༔ མཉམ་པ་ཉིད་ཀྱི་ཡེ་ཤེས་ཤར༔ འདོད་ཆགས་ཀྱི་གྲོང་ཁྱེར་ཞིག་སྟེ༔ སོ་སོར་རྟོག་པའི་ཡེ་ཤེས་ཤར༔ ཕྲག་དོག་གི་གྲོང་ཁྱེར་ཞིག་སྟེ༔ བྱ་བ་ནན་ཏན་གྱི་ཡེ་ཤེས་ཤར༔ གཏི་མུག་གི་གྲོང་ཁྱེར་ཞིག་ནས༔ ཆོས་ཀྱི་དབྱིངས་ཀྱི་ཡེ་ཤེས་ཤར༔ སངས་རྒྱས་ཀྱི་དགོངས་པ༔ ཨཐྎ༔ རང་སྣང་གི་ནམ་མཁའ་ལ་གསེར་གྱི་བྱ་ཁྱུང་རྒྱུའོ༔ དབང་པོ་སྒོ་ལྔ་ལ་རྒྱུའོ༔ གསེར་གྱི་བྱ་ཁྱུང་དེ་གཟུགས་སྟོང་པའོ༔ སྟོང་པ་ཉིད་གཟུགས་སོ༔ ལྷུན་པོའི་རྩེ་ལ་རིན་པོ་ཆེའི་འོད་ཟེར་སྟོང་འཆར་རོ༔ ཨཐྎ༔ ངོ་བོ་སྟོང་པ་རང་བཞིན་གསལ་བ༔ ཐུགས་རྗེ་མ་འགགས་པའོ༔ ངོ་བོ་སྟོང་པ་དེ་ངོ་བོ༔ གསལ་བ་དེ་རང་སྣང༔ རང་སྣང་དེ་གསལ་བ༔ གོ་མ་འགགས་པ་དེ་ཐུགས་རྗེའོ༔ ངོ་བོ་དེ་དབང་པོས་གཏན་ལ་མ་ཕེབས་ན༔ ཐེག་པ་ཐུན་མོང་པ་དང་ཁྱད་པར་མེད་པས༔ རང་གི་ངོ་བོ་རང་གིས་མི་ཤེས་པའོ༔ ངོ་བོ་དེ་དབང་པོའི་མངོན་སུམ་དུ་གསལ་བ་དང་རང་བཞིན་དེ་སྣང་བ་ཕྱོགས་མེད་ཇི་ལྟ་བུར་ཡང་འཆར་རོ༔ ཐུགས་རྗེ་ཀུན་ལ་ཁྱབ་བོ༔ ཨཐྎ༔ དཔལ་བེའུའི་ནང་ནས་ཡར་ལ༔ རྩ་གསེབ་ཀྱི་སྦུ་ཐག་ཙམ་ནི་ཡར་ལ་རྒྱུའོ༔ ཆུ་སྟོང་གི་ཉ་ཆུང་ལྟ་བུ༔ ཆུ་ལས་ཡར་མ་ཐོན༔ ས་ལས་མར་མ་རེག༔ དེ་བཞིན་དུ་མིག་ནས་ལམ་བྱུང་ནས་རང་སྣང་གི་ནམ་མཁའ་ལ༔ གནམ་ལ་མ་རེག་ས་ལ་མ་རེག་པར་སྣང་ལ་འགྱུ་བ་དང ༔ འཁྲིག་པ་དང༔ དེ་ལས་ཟེར་ཕྲ་མོ་རེ་ལ་ལྔ་ཚང་བའི་དུས་ན༔ རང་སྣང་ལྷུན་པར་ཤར་བས༔ བར་དོ་ལ་ཡང་དེ་ལས་ལྷག་པ་སྣང་བ་མེད་དོ༔ གསང་བ་ཡང་གསང་དུམ་དུམ་ཁྲིགས༔ དུམ་བུ་བདུན་ཅུ་རྩ་བཞི་པ་རྫོགས་སོ༔ དགེའོ༔ ༔

ཁྱུང་ཆེན་མཁའ་ལྡིང་།

༄༅༔ ༔ཁྱུང་ཆེན་མཁའ་ལྡིང་ཞེས་བྱ་བ་བཞུགས་སོ༔ ཁྲེགས་ཆོད་ཀྱི་ཡི་གེ་ཡིན༔ མན་ངག་ཞེ་བཞི་པ༔ རྒྱ་གར་སྐད་དུ༔ མ་ཧཱ་གྷ་རུ་བྷེ་ལ་ག་ཤ་ནཱ་མ༔ བོད་སྐད་དུ༔ ཁྱུང་ཆེན་མཁའ་ལྡིང་ཞེས་བྱ་བ༔ བཅོམ་ལྡན་འདས་ཆོས་ཉིད་འདུས་མ་བྱས་པའི་དཔལ་ལ་ཕྱག་འཚལ་ལོ༔ ཁམས་གསུམ་ཉིད་ལས་རྣམ་པར་རྒྱལ་བའི་དཔལ༔ འགྲོ་རྣམས་སྙིང་གི་མུན་པ་སེལ་བར་བྱེད་པ་ཡི༔ སྟོན་པའི་བཀའ་ཉིད་སྟོན་པར་ཞ་འཆེས་པ༔ དེ་རྗེས་འབྲང་བའི་བླ་མ་དཔའ་བོ་ཉིད་ལ་འདུད༔ བདག་གི་ནུས་པ་ཚིག་ལ་དབང་མིན་ཀྱང༔ གོང་མའི་གོང་མ་རྣམས་དང་དྲིན་ཆེན་བླ་མ་དང༔ རྒྱུད་ལུང་མན་ངག་དགོངས་དོན་ཚིག་ཉིད་ཀྱི༔ སོ་སོའི་འདོད་པའི་རིམ་པས་རྗེས་འབྲངས་ཏེ༔ ཚིག་ལ་བརྟེན་ནས་ཟབ་མོ་ཉིད་ཀྱི་དོན༔ གང་དང་མི་འགལ་ཀུན་གྱིས་མ་རྟོགས་པའི༔ སོ་སོའི་འདོད་གཞུང་རྣམས་ཀྱི་བཅུད་བསྡུས་ནས༔ འཁོར་བའི་ཡིད་དང་བྲལ་བ་རྣམས་ཀྱི་དོན་དུ་སྤྲོ༔ རང་བཞིན་གནས་པའི་ཐབས་ནི་ལྔ་ལས་ཀྱང༔ མ་བསྒོམས་ཡེ་ཤེས་ལྷུག་པ་བཅོས་པ་མེད་པའི་གནས༔ རྒྱུ་མེད་རྐྱེན་དང་བྲལ་བའི་རང་སྣང་སྒྲིབ་མེད་ཉིད༔ རྩོལ་བྲལ་ཉག་གཅིག་སུས་ཀྱང་མ་བྱས་པའི༔ ཡེ་རྫོགས་སྙིང་པོ་ལྷུན་གྲུབ་ཡུལ་ལ་རོལ༔ སྒྱུ་མའི་ཆུ་དེ་གཟུགས་ལས་བྱུང་བ་ཡི༔ སྙིང་པོ་བརྒྱ་དང་བརྟག་དཔྱད་ཡིད་ཟད་དེ༔ སྒྲིབ་བྲལ་ཅོག་བཞག་བསླད་པ་མེད་པའི་ལམ༔ མཐོང་མེད་མཚུངས་པ་མེད་ཅིང་ཡེ་ཤེས་ཀུན་གྱི་དངོས༔ འཁྲུལ་པའི་ཡུལ་ལ་བཟུང་བས་ལྟོས་བྲལ་ཉིད༔ རང་བཞིན་ཡུལ་ལ་འགག་མེད་སྙིང་པོའི་རྗེས༔ སྟོང་ཡུལ་མ་དཔྱད་རང་སར་བཞག་སྟེ་གྲོལ༔ མཐའ་བྲལ་དེ་ཉིད་གོང་མའི་སྐྱེ་གནས་དག༔ འཇུག་ནུས་གདིང་ནི་འོག་མས་མ་སླེབ་པར༔ གནས་ཤིང་མི་གཡོ་ཡེ་ནས་སྐྱོན་མིན་ཡུལ༔ ཐོབ་མཐོང་གྲོལ་གསུམ་གྱིས་ནི་རང་བཞིན་བདེན་གནས་པའོ༔ རང་བཞིན་སུ་ཡིན་གང་ལ་སུས་བསྟན་པ༔ མ་བསྒོམས་བཞག་པའི་ས་སྟེ་དེ་ཉིད་རང་རིག་པ༔ སྒྲ་དང་བློ་བྲལ་ཀུན་གྱི་ཕ་རོལ་ཞིང༔ དམིགས་བཅས་རང་བཟོ་ཉིད་དེ་བཅོས་མི་དགོས༔ གནས་པས་འགག་ལ་འགྱུས་པས་རང་སར་དག༔ མེད་མཐོང་མ་སྤངས་ངོ་ལ་སངས་མེད་པས༔ ས་མེད་འདི་ཉིད་གནས་ཏེ་གང་དགའི་ཡུལ༔ འཇུག་སྟེ་གང་གི་ཕ་རོལ་སོང་བ་མེད་པའོ༔ རང་བཞིན་ཡོད་མེད་བརྟག་དཀའི་སེམས་ལ་རེག་ནུས་ཤིང ༔ མ་བསམས་འཁྲུལ་པ་མེད་པའི་ཡེ་ཤེས་ཉིད༔ བྱ་བྲལ་གླེན་པའི་ཤུགས་འཆང་བློ་བདེ་བ༔ སྤྲོས་མེད་ནམ་མཁའི་ཡིད་ཅན་རྣམས་ཀྱིས་བྱོས༔ སྣང་མེད་སྟོང་དང་བྲལ་བའི་ཡེ་ཤེས་དེ༔ མ་བཟུང་མ་གཏད་མ་བསླད་རང་སོ་སྟེ༔ གཅིག་གིས་གསུམ་ལ་སུ་ཡིས་ཕོག་པ་ཉིད༔ རྫུན་མིན་བདེན་མིན་གནས་ཐབས་ལྷང་ངེ་བའོ༔ རང་བཞིན་གཅིག་སྟེ་རྣམ་པ་ཉིད་དང་བྲལ༔ དངོས་དེ་ཉིད་ལ་ཚིག་དང་བརྗོད་མེད་པ༔ ཡེ་དག་རང་སྟོང་མཚན་ཉིད་བྲལ་བའི་ངང་དུ་ལྟོས༔ གཞི་མེད་རྩ་བ་གང་ལ་ལྟོས་མེད་པ༔ མཐོ་དམའ་ཡོད་དང་མེད་སྣང་སྟོང་པ་ལ་འཇུག་ཁྱབ༔ དེ་ལས་རང་བཞིན་བློ་ཡི་མཐའ་འགག་ངང་གཅིག་པ༔ ཆོས་མིན་ལྷན་ཅིག་སྐྱེས་ཞེས་ཡེ་ཟླ་མེད༔ གང་ལས་དེ་བྱུང་སུ་ཡིས་མྱོང་སྟེ་རྒྱལ༔ རང་སྣང་དོན་དེ་གང་ལ་བཞིན་གསལ་བ༔ བསྒྱུར་བ་མེད་ཅིག་མ་རྙོག་སུས་མ་ཕྲོགས༔ ཡེ་ཤེས་གཉིས་ཏེ་གཅིག་དང་ཐ་མི་དད༔ གཞི་མེད་ལམ་ཟད་འབྲས་བུ་ཡོད་མ་མྱོང༔ མཐོང་ཐོས་བརྡར་སྣང་གཅིག་གིས་གང་གྲོལ་བ༔ མ་བཙལ་སུས་མི་རྙེད་པ་ཀུན་གྱི་སྙིང་ལ་གནས༔ ཡེ་ནས་ཡོད་ཅིང་བལྟས་ཤིང་མཐོང་ལས་འདས༔ དེ་ཉིད་རང་དེ་མ་བཅོས་ཐོག་མའི་ངང༔ རྒྱུ་སྟོང་རྐྱེན་གསལ་ངོ་བོ་འདུས་པས་གནས༔ བྱ་བྱེད་དཔྱོད་དང་འཛིན་པའི་མཐའ་གཉིས་རང༔ རིག་པས་བྱུང་དང་སོ་སོས་གང་བསྒྱུར་བ༔ གནས་ཐབས་དེ་ཉིད་དེ་ལ་སྨོས་ཅི་དགོས༔ རྩོལ་མེད་བཙལ་མི་དགོས་ཏེ་བྱུང་ཁུངས་ཀུན་གྱི་དངོས༔ རང་དག་དྲི་མའི་ཆོས་ཀྱི་བཅོས་ཤིང་བྱེད༔ འབད་འགགས་གྲོལ་བར་ངས་རིག་སྟེ༔ ལྷག་པར་གྲོལ་དང་གྲོལ་བ་འདུག་གམ་ཅི༔ གང་ལ་སྲིད་དེ་ཡི་ཤེས་ཁྱབ་བརྡལ་བའོ༔ སྟོང་པ་ཉིད་ལས་ལམ་བྱས་ཆོས་ཉིད་དངོས༔ སྟོང་པས་འབད་པ་མེད་པ་ལམ་གྱི་ཡང༔ རླུང་བཀག་མིག་བཙུམ་པས་ནི་རང་སེམས་འཆིང༔ བཅོས་མེད་ལྟོས་དང་བྲལ་བའི་གཞི་མེད་པར༔ ལུས་བཅོས་གསལ་བས་ངས་སོས་སྣང་བ་འཆིང ༔ ཕྱོགས་མེད་རིས་སུ་མ་བཅད་སེམས་མེད་པར༔ ཡིད་དཔྱོད་སྒྲོ་དང་བཅས་པས་གནས་ལུགས་འཆིང༔ ཡེ་གྲོལ་བྱ་བྲལ་སོར་བཞག་གདེང་མེད་པར༔ ཞེ་འདོད་ཉམས་དང་བཅས་པ་རྟོག་པས་འཆིང༔ མ་བཙལ་རང་སར་བཞག་པའི་གནས་མེད་པར༔ རྒྱུ་འབྲས་ལུང་ལ་ལྟོས་པས་རིག་པ་ཉིད༔ ཆོས་ཀུན་སྤྲོས་དང་བྲལ་ཞིང་རྙོག་མེད་པས༔ བྱས་མེད་རང་སར་གྲོལ་བའི་གནད་ནི་རབ་ཏུ་ཆེ༔ རྒྱུ་འགག་རྐྱེན་ཡལ་འབྲས་བུ་ཟད་པའི་གནད༔ གང་ལ་མ་བརྟེན་གཅིག་གིས་གྲོལ་བའི་ཀློང་ཉིད་དོ༔ སྤྱོད་བྲལ་སྒོམ་དག་ལྟ་རུ་མེད་པའི་དོན༔ སུ་ཡིས་མ་བཅོས་སྣང་བ་རང་སར་བཞག་པས་གྲོལ༔ འཇུག་ཤེས་བརྡའ་དང་ཐ་སྙད་ལས་འདས་དགོངས་པ་ནི༔ འདི་ཞེས་ཚིག་དང་བྲལ་ན་དེ་ཉིད་ཡིན་ཏེ་སུ་ཞིག་འཆོས༔ བཅོས་མི་གཟེབ་དང་བྲལ་བའི་ལམ་ལ་ཅི་ཞིག་བྱ༔ གང་གིས་མ་བསླད་རང་རིག་གྲོལ་བའི་གནས༔ ལུས་དང་སེམས་ལ་ཉོན་མོངས་རང་གི་ཆོས༔ མི་ཤེས་བྱིས་པ་རྣམས་ཀྱིས་རྒྱར་སྣང་ཡང༔ རང་བཞག་མ་བཅོས་རྣལ་མའི་རང་རིག་པ ༔ ཡེ་ནས་རང་གྲོལ་སུས་ཀྱང་བཤིག་པ་མེད༔ མ་བཀྲོལ་རང་སར་གྲོལ་བས་འབད་ཅི་དགོས༔ ཡེ་ནས་རང་གྲོལ་གྲོལ་བའི་རྒྱུ་མེད་ཉིད༔ སྡིག་སྤྱད་མི་དགེ་རྣམ་སྨིན་བདེ་བའི་གྲོགས་ཆེ་བ༔ རང་ཤུགས་མ་བཙལ་འབད་པ་མེད་པའི་གནད༔ འདི་ཉིད་རྟེན་འབྲེལ་དགེ་བས་སུ་ལ་ཕན༔ སངས་རྒྱས་མེད་ཅིང་སུ་ཡིས་བཅིངས་པའི་རྒྱ༔ འཁྲུལ་དང་མ་རིག་སེམས་ཅན་སུ་ལ་སྲིད་མིང་མེད༔ དེ་ཕྱིར་ཡེ་ནས་མ་བཀྲོལ་ཕྱིས་གྲོལ་མེད་སྣང་བའོ༔ གཞི་མེད་ལམ་ཞེས་འབྲས་བུ་སུ་འདོད་པ༔ འདོད་ཕྱིར་ཐར་པའི་གནས་ལ་འདི་ཡིས་བསྒྲིབས༔ སྟོང་མུ་གསལ་དང་ཡོད་དང་མེད་པ་གཉིས༔ རྟག་ཆད་རྒྱུ་འབྲས་བཞི་སྟེ་བརྒྱད་རྣམས་ལ༔ མཐའ་མེད་ནམ་མཁའི་མཐའ་དང་མཚུངས་པ་ཉིད༔ མུ་མཐའ་འཚོལ་བར་འདོད་པ་གང་ཡིན་པ༔ བྱ་ལོང་ནམ་མཁའི་མཐའ་ཚོལ་འདྲ་སྟེ་རྙེད་པ་མིན༔ མི་རྙེད་དོན་དེ་ཉིད་ལ་སུས་ཀྱང་བཅོས་མི་སྲིད༔ ཤེས་བྱ་སྤྲོས་མེད་འདི་ལ་མཐའ་མ་མི་སྲིད་དོ༔ གཞི་གནས་འདོད་པ་མི་སྲིད་སེམས་འདི་ལ༔ རྣམ་སྨིན་བག་ཆགས་གཞི་མེད་སུ་ལ་བརྟེན༔ ནམ་མཁར་མེ་ཏོག་སྐྱེ་བའི་གནས་མེད་རྟེན་འབྲེལ་ལྟར༔ ལུས་ལ་སེམས་ཀྱི་གནས་མེད་བག་ཆགས་རྟེན་མི་སྲིད༔ དེ་ཕྱིར་ཅི་བྱས་སེམས་ཀྱི་གྲོགས་ཏེ་གང་གིས་ཕན་གནོད་བྲལ༔ བར་སྣང་རྫས་སོགས་བརྟེན་པར་མི་ནུས་བཞིན༔ ཡེ་ནས་ཕྱོགས་སུ་ལྷུང་བ་མེད་པའི་སེམས༔ འཁོར་དང་ངན་སོང་སུ་ལ་གྲུབ་སྣང་བ༔ མི་བདེན་རྨི་ལམ་སྒྱུ་མ་དྲི་ཟའི་གྲོང་ཁྱེར་བཞིན༔ རྫུན་སྣང་བདེན་པའི་ནུས་པ་འདི་ལ་མི་སྲིད་དོ༔ སྐུ་དང་ཡེ་ཤེས་མེད་ཕྱིར་མ་རིག་ལ་སོགས་ཉོན་མོངས་སུ་ལ་སྲིད༔ དེ་ནས་ཉིད་ཀྱིས་ཉིད་གྲོལ་གཉེན་པོ་ཡོད་མ་མྱོང༔ འདོད་ཆགས་ལ་སོགས་ཉོན་མོངས་གྲངས་འདི་རྣམས༔ གཅིག་ཉིད་ཡིན་ཏེ་ཐ་དད་ག་ལ་སྲིད༔ གཅིག་གིས་གཅིག་གོལ་གཉིས་སོག་རང་མིན་པར༔ ལྷག་པར་གྲོལ་མོད་སྦྲུལ་གྱི་མདུད་པ་བཞིན༔ མ་བཅོས་ལྷུག་པ་གང་ལ་རྟེན་མེད་པའི༔ ཡེ་ནས་གྲོལ་ཕྱིར་ཕྱིས་ནས་གཉེན་པོས་མིན༔ སྡུད་ཅིང་ལྡན་མིན་ལྷག་མཐོང་འདི་ཉིད་དོ༔ འགྲོ་བ་དྲུག་ཅེས་མིང་ཙམ་ཡང་དག་བརྟགས་པས་སྟོང༔ སྟོང་པ་ཡེ་གྲོལ་གནས་ཀྱི་བྱར་མེད་དེ་ཉིད་རང༔ གར་ཕྱིན་ས་མེད་ཡེ་ནས་བཅོས་མེད་དང༔ ལྷུན་འབྱམས་སྙིང་པོ་ཡེ་ནས་ཡུལ་སྣང་བས༔ སྔགས་བཟླས་དཀའ་ཐུབ་བསམ་གཏན་ངོ་བོ་ཉིད་ལ་སྒྲིབ༔ ཡིག་འབྲུ་སྒྱུར་བྱེད་ལུས་ངག་དགེ་བ་རྣམས༔ ཡེ་གྲོལ་རང་དག་གནོད་པར་བྱེད་པའོ༔ ཅེར་གྲོལ་རང་དག་མཐའ་བྲལ་ཡོངས་སུ་རྫོགས༔ གང་གིས་མཐའ་བྲལ་གེགས་གཉིས་རང་བསལ་བས༔ བྱ་བྲལ་ཀློང་ཆེན་མ་བཙལ་ཆེན་པོ་འགག༔ ལུས་ངག་བྱ་བྲལ་སྣང་སྟོང་བར་དུ་གཏམས༔ མཚན་མ་ཡེ་དག་ཡོངས་སུ་གྲོལ་བའི་གཞི༔ འབད་མེད་བྱ་བྲལ་བློ་ཡི་གེགས་བསལ་ཏེ༔ ཐུག་ཕྲད་རྣམ་གསུམ་ཡུལ་ལ་རོལ་པའི་གེགས༔ གང་ཤར་མ་ཡེངས་ཡུལ་སེམས་བར་དུ་བསྡམས༔ རྒྱུ་མེད་རང་གྲོལ་རྐྱེན་ལ་མ་བརྟེན་འདི༔ ཕྱོགས་མེད་རང་དག་འདི་ཞེས་ལྟ་བ་མེད༔ ཞེ་འདོད་མཐའ་དང་བཅས་པ་གེགས་གསུམ་བསལ༔ སྣང་ཤེས་ཐོག་བབས་རང་བྱུང་ཆེན་པོའི་གེགས༔ རང་ཤར་སྤྲོས་བྲལ་རྒྱུ་རྐྱེན་བར་དུ་གཏམས༔ ལས་དང་དབང་པོ་ཚིག་དང་བློ་ཟད་པའི༔ བསླད་བཅོས་ཐབས་དང་ཤེས་རབ་གེགས་གཉིས་བསལ༔ ཆོས་མེད་དེ་ལ་བརྟེན་པའི་འབྲས་བུ་འདོད་པ་ཉིད༔ དགོས་པ་མེད་ཅིང་ལར་འདོད་འཆང་བ་ལས༔ ལྷུག་པ་སོ་གཉུག་རྣལ་མ་དྲོད་ཀྱི་འགག༔ རང་སོར་འགྱུས་ཏེ་འཁོར་འདས་བར་དུ་གཏམས༔ བདེ་འདོད་སེམས་ལ་གནོད་པའི་ཆོས་སྤངས་ཏེ༔ རང་བཞག་ལྟོས་དང་འཁོར་འདས་བྱ་བ་བྲལ༔ རང་མིན་གཞན་མིན་སྣང་ཤེས་ཆོ་འཕྲུལ་ཀྱང༔ འགྱུས་མཐོང་འཛིན་དང་ཞེན་པའི་གེགས་བསལ་བས༔ ཅོག་བཞག་ཚིག་ཏུ་སྤྲོས་པའི་མཐའ་འགག་སྟེ༔ ཡིད་དང་སེམས་ཀྱི་ཆོ་འཕྲུལ་ཅིར་ཡང་འགག༔ ཆོས་བྲལ་ཡིད་དང་བྱེད་པའི་བར་དུ་གཏམས༔ ར་གིས་མ་དཔྱད་སེམས་ཀྱི་བསྒྱུར་བ་མིན༔ བློ་ཡིས་དཔྱད་ཅིང་སེམས་ཀྱིས་གར་བསྒྱུར་བ༔ འཁྲུལ་པ་རང་མདུད་བཅིངས་པའི་འགྲོ་བ་ད ང༔ འདི་ཉིད་ཁྱད་པར་ཅུང་ཟད་ང་ཡིས་མ་མཐོང་ངོ༔ ལུས་བཅོས་ངག་བསྡམས་ཡིད་ལ་བྱེད་རྣམས་དང༔ དྲན་རྟོག་ཕུང་པོ་ཡུལ་ལ་ངན་ཤར་དང༔ འདི་ལ་ཁྱད་པར་མེད་དེ་སླར་འཆིང་བྱེད༔ སྟོང་པའི་ལམ་ལ་སེམས་ཀྱི་དཀྱིལ་འཕྱོ་བ༔ ཡུལ་དང་དབང་པོའི་བྱེད་སྤྱོད་མྱ་ངན་འདས༔ གང་ལ་ཐེག་པ་ཡོད་ཅིང་ཆོས་ཡོད་པས༔ ངན་སོང་ཉིད་དེ་ལོག་པ་ཡོད་དམ་ཅི༔ དེས་ནས་སངས་རྒྱས་མིང་དུ་འདོགས་པའི་སྟོན་པ་འཁྲུལ༔ མིང་མེད་འདོགས་པ་ཡིད་བློ་བདེན་པ་མེད༔ འགག་སྡོམ་བྱ་བཙལ་མེད་པའི་གདིང་ཉིད་ནི༔ འཕྱུགས་ཤིང་འགྲོ་དང་བྲལ་བའི་ས་མེད་པར༔ འདི་ཉིད་རང་སྟེ་སྔོན་མེད་ཕྱིས་ནས་མེད༔ རང་བྱུང་སྙིང་པོའི་དོན་ཞེས་འདོད་དང་བྲལ༔ འབྲལ་མེད་དོན་དེངས་སུ་ལ་གདམས་དང་བྲལ༔ སྣང་དང་ཤེས་རྐྱེན་ལྟར་ཤར་འདི་ཉིད་དོ༔ གདོད་ནས་བྱས་པ་མེད་པའི་སེམས་ཉིད་ལ༔ དྲན་རྟོག་བློ་ཡིས་དོན་དམ་སྙིང་པོའི་དོན༔ ཤེས་རབ་ཚིག་དང་བཅས་པས་རང་བདེན་བསྲུང༔ ཚིག་ལ་མཁས་ཤིང་རྒྱུ་འབྲས་གཙོར་ལེན་པ༔ མནར་མེད་དེ་ཉིད་དེ་ལས་གཞན་པ་སུ༔ ལུས་ངག་བཅོས་ཤིང་ཡིད་ཀྱི་གཏན་འཛིན་པ༔ ཆོས་ཉིད་བདེན་པ་སྒྲིབ་པ་མེད་པར་བྱེད་པ་ལ༔ འདི་ལས་ལྷག་པའི་གཉེན་པོ་གཞན་པ་ཅི༔ དེ་ཕྱིར་མ་བཅོས་འཁོར་འདས་བྱ་བྱེད་ནམ་བྲལ་ན༔ རྫོགས་ཆེན་ཉིད་དང་གཞན་པ་ཅི་ཞིག་ཡོད༔ སེམས་ལ་བལྟར་མེད་རྒྱུ་འབྲས་སུ་མཐོང་མེད༔ དེ་ཕྱིར་སྡིག་བྲལ་དགེ་བས་འདི་ལ་ཅི༔ རང་ལུགས་འབྱུང་ཁུངས་ཐོག་མ་ཉིད་དང་སྦྱར༔ སྒྲིན་པོའི་སེམས་ལ་གཟེག་སྐུར་ཁམས་གསུམ་ལས་མི་འདའ༔ མ་བཅོས་གླེན་སྣང་སུ་ལ་ལྷོད་ཡོད་པ༔ འདི་ནི་འཁོར་འདས་གཉིས་ལ་མི་གནས་སོ༔ རྫོགས་ཆེན་གསང་བའི་དངོས་པོའི་གནད་བསྡུས་ཏེ༔ མ་འོངས་ངེས་པའི་བློ་ཅན་དོན་ཆེད་དུ༔ འབད་མེད་རང་སར་གྲོལ་བའི་ཡི་གེ་འདིས༔ འདི་ལ་མོས་པའི་འགྲོ་རྣམས་རྩོལ་མེད་དོན་ལྡན་ཤོག༔ ཁྱུང་ཆེན་མཁའ་ལྡིང་ཞེས་བྱ་བ༔ རྒྱ་ནག་པོའི་སློབ་དཔོན་ཤྲཱི་སིདྷས་མཛད་པ་རྫོགས་སོ༔ ཟབ་རྒྱ༔ སྦས་རྒྱ༔ གཏེར་རྒྱ༔ སྔགས་སྲུང་རྒྱལ་མོས་སྲུངས་ཤིག༔ ཨཐྎ༔ དགེའོ༔ ༔

སེམས་ཀྱི་དམིགས་དྲུག་གི་རྣམ་པར་བཤད་པ།

སེམས་ཀྱི་དམིགས་དྲུག་གི་རྣམ་པར་བཤད་པ་ཞེས་བྱ་བ་བཞུགས་སོ། །མན་ངག་ཞེ་དགུ་པ། རྦ།མརྒན།྅྅྅྅མ། རྒྱ་གར་སྐད་དུ། ཨ་བ་ལོ་ཤ་ནཱ་མ། བོད་སྐད་དུ། རྣམ་པར་བཤད་པ་ཞེས་བྱ་བ། བཅོམ་ལྡན་འདས་དཔལ་གཉིས་མེད་རང་གྲོལ་བ་ཉིད་ལ་ཕྱག་འཚལ་ལོ། །ཁམས་གསུམ་རང་རྒྱུད་བཅིངས་ལས་བརྒལ་བའི་དཔལ། །འགྲོ་བའི་བླ་མ་རྡོ་རྗེ་འཆང་བ་ཉིད། །དེ་ལས་ཁྱད་གྱུར་སངས་རྒྱས་གཉིས་པའི་ལུང་། །དགའ་རབ་རྡོ་རྗེ་གཉིས་མེད་བདེ་ལྡན་པས། །རྫོགས་ཆེན་གནད་བཏུས་ངེས་པའི་སྙིང་པོ་ཉིད། །གཞན་དུ་བསྟན་པ་མེད་པའི་སེམས་ཉིད་གནད། །དམིགས་ཆེན་དྲུག་བསྟན་ཁམས་གསུམ་དོག་སྤྲུགས་པའི། །གསང་བ་ཁྱད་པར་གནད་ཀྱི་ཡི་གེ་ཉིད། །སྙིང་གི་ཏི་ཀ་ཀུན་དང་མི་མཉམ་པ། །དེ་དོན་གསལ་བར་བདག་གི་བླ་མ་ལ། །གསོལ་བ་བཏབ་ནས་བདག་གིས་ལེགས་བཤད་བྱ། །དེ་ལ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཐམས་ཅད་མཁས་ལ་ཐུགས་རྗེ་ཆེ་བ་ཉིད་ཀྱིས། སེམས་ཅན་རྣམས་ཀྱི་མོས་པའམ་དབང་པོའི་བྱེ་བྲག་ལ་དགོངས་ནས། དམ་པའི་ཆོས་ཀྱི་སྒོ་དཔག་ཏུ་མེད་པར་གསུངས་པ་ལས། དེ་དག་གི་སྙིང་པོའི་དོན་བཅུད་དུ་དྲིལ་ནས། སློབ་དཔོན་ཆེན་པོ་དགའ་རབ་རྡོ་རྗེས། མ་བསྒོམས་པར་སངས་རྒྱས་བར་བྱེད་པའི་སེམས་ཀྱི་དམིགས་དྲུག་པ་ལ་བརྟེན་ནས། འགྲོ་བ་རྣམས་ཆོས་ཉིད་གནད་ཤེས་པ་ཙམ་གྱིས་གྲོལ་བར་བསྟན་པ་འདི། གང་ཟག་གཅིག་གི་ཆ་རྐྱེན་དུ་སློང་བའི་གནད་ལ། འདིའི་དོན་དྲིལ་ནས་བཤད་ན། ཆེ་བ་ལྔས་ཐེག་པ་ཐུན་མོང་བ་ལས་ཁྱད་པར་དུ་བསྟན་ཏེ། སློབ་དཔོན་ལོ་རྒྱུས་ཀྱི་ཆེ་བས་མཛད་པའི་སློབ་དཔོན་གྱི་ཡོན་ཏན་བསྟན་པ་དང་། འཇུག་སྒོ་ཐེག་པའི་ཆེ་བས་རྒྱུད་གང་ལ་བརྟེན་ཅིང་མན་ངག་གི་ཁུངས་གསལ་བར་བསྟན་པ་དང་། དགོས་ཆེད་གང་ཟག་གི་ཆེ་བས་དོན་ཆེད་གང་ཡིན་པ་གསང་སྔགས་སྣོད་ཀྱི་ཁྱད་པར་བསྟན་པ་དང་། བསྡུས་དོན་མན་ངག་གི་ཆེ་བས་ས་བཅད་ཀྱི་དམིགས་གསལ་བར་བསྟན་པ་དང་། ཟབ་པ་མཚན་གྱི་ཆེ་བས་མན་ངག་གི་གཞུང་བདེ་བླག་ཏུ་རྟོགས་པར་བསྟན་པ་དང་ལྔས་བསྟན་ཏོ། །དེ་དག་ཀྱང་། འདུལ་གཞི་གང་ཟག་གཅིག་གི་རྒྱུད་ལ་ཉོན་མོངས་པ་ལྔ་གནས་པ་ལ་དགོངས་པའོ། །དེ་དག་ཀྱང་གཙོ་ཆེ་ཆུང་གི་དབང་དུ་བྱས་ན། ཉོན་མོངས་པ་གཏི་མུག་ཅན་འཇུག་ཅིང་། དམིགས་གཏད་མེད་པའི་དགོངས་པ་གཙོ་ཆེ་བ་ལ་དགོངས་པ་དང་། ཞེ་སྡང་ཅན་འཇུག་ཅིང་གཟའ་གཏད་མེད་པའི་ལྟ་བ་གཙོ་ཆེ་བ་ལ་དགོངས་པ་དང་། འདོད་ཆགས་ཅན་འཇུག་ཅིང་ཕྱོགས་གཏད་མེད་པའི་སྤྱོད་པ་གཙོ་ཆེ་བ་ལ་དགོངས་པ་དང་། ང་རྒྱལ་ཅན་འཇུག་ཅིང་སྨྲ་གཏད་མེད་པའི་གཞི་ལམ་གཙོ་ཆེ་བ་ལ་དགོངས་པ་དང་། ཕྲག་དོག་ཅན་འཇུག་ཅིང་འདོད་གཏད་མེད་པའི་འབྲས་བུ་གཙོ་ཆེ་བ་ལ་དགོངས་པའི་འདུལ་བྱེད་དུ་བྱུང་བའོ། །དེ་ལ་དང་པོ་སློབ་དཔོན་ལོ་རྒྱུས་ཀྱི་ཆེ་བ་ནི། སློབ་དཔོན་ཆེན་པོ་དགའ་རབ་རྡོ་རྗེས་མཛད་དེ། དེའི་སྐུ་ཆེ་བའི་ཡོན་ཏན་ནི། སྟོན་པ་ཉིད་ལས་སྤྲུལ་པ་སྟོན་པ་སངས་རྒྱས་བཅོམ་ལྡན་འདས་སྐྱེ་བ་བཞིས་བསྡུས་པའི་འགྲོ་བ་རྣམས་འདུལ་བའི་གཟུགས་སུ་བྱོན་པའི་དུས་སུ་འཁོར་འདུས་པ་དང་པོར་བཞུགས་པ་དང་། སྟོན་པས་མཛད་པ་སུམ་ཅུ་སོ་དྲུག་མཛད་པའི་དུས་ཐམས་ཅད་དུའང་བཞུགས་པ་དང་། དེ་དག་གི་ལོ་རྒྱུས་ནི་རྒྱུད་ཀྱི་སྐབས་སུ་ཞིབ་པར་སྟོན་པས་འདིར་མ་སྤྲོས་སོ། །སློབ་དཔོན་དགའ་རབ་རྡོ་རྗེའི་ལོ་རྒྱུས་བཤད་དོ། །དེ་ཡང་གསང་བ་ཉེ་བརྒྱུད་ཀྱི་དབང་དུ་བྱས་ན་སྟོན་པས་དགའ་རབ་རྡོ་རྗེ་དངོས་ལ་བསྟན། སློབ་དཔོན་དགའ་རབ་རྡོ་རྗེས་བྱེ་མ་ལ་ལ་བསྟན། བྱེ་མ་ལས་ལྷ་རྗེ་ལྕེ་བཙུན་སེང་གེ་དབང་ཕྱུག་ལ་ལོ་བདུན་གྱི་བར་ལ་རེས་མཇལ་རེས་མི་མཇལ་བར་དེ་དག་གི་བར་ལ་གདམས་པ་རྣམས་གནང་ངོ་། །འཇུག་སྒོ་ཐེག་པའི་ཆེ་བ་ནི། སྤྱིར་སངས་རྒྱས་ཀྱིས་ཆོས་བསམ་གྱིས་མི་ཁྱབ་པ་ཞིག་གསུངས་ཀྱ ང་བཀའ་སྩལ་ལུགས་གསུམ་ལས་མི་འདའ་སྟེ། དབང་པོ་ལ་དགོངས་ཏེ་སྩལ་བ་དང་། བསྡུ་བ་ལ་དགོངས་ཏེ་སྩལ་བ་དང་། གཉེན་པོ་ལ་དགོངས་ཏེ་བཀའ་སྩལ་ཏོ། །དེ་ཡང་དབང་པོ་རབ་འབྲིང་ཐ་མ་གསུམ་ལ་དགོངས་པའོ། །རབ་རྣམས་ལ་འོ་མ་ལས་མར་ལྟར་བསྡུས་པས་དགོངས་ཏེ་གསུངས་པ་ནི། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་རྣམས་རྩ་བ་བྱང་ཆུབ་ཀྱི་སེམས་ལ་བསྡུས་ཏེ་བསྟན་པའོ། །འབྲིང་པོ་རྣམས་གཉེན་པོ་ལ་དགོངས་ཏེ་བཀའ་སྩལ་བ་སྟེ། ཉོན་མོངས་པ་བརྒྱད་ཁྲི་དང་བཞི་སྟོང་སྟེ། འདོད་ཆགས་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར། ཆོས་ཀྱི་སྒོ་འདུལ་བ་ལས་གྱུར་པ་ཉི་ཁྲི་དང་ཆིག་སྟོང་། ཞེ་སྡང་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར། མངོན་པ་ལས་གྱུར་བ་ཉི་ཁྲི་དང་ཆིག་སྟོང་། གཏི་མུག་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར། མདོ་སྡེ་ལས་གྱུར་བ་ཉི་ཁྲི་དང་ཆིག་སྟོང་། དུག་གསུམ་ཆ་མཉམ་ལས་གྱུར་བ་ཉི་ཁྲིད་དང་ཆིག་སྟོང་གི་གཉེན་པོར། སྡེ་སྣོད་གསུམ་ཆ་མཉམ་པ་ལས་གྱུར་བ་ཉི་ཁྲི་དང་ཆིག་སྟོང་སྟེ། བརྒྱད་ཁྲི་བཞི་སྟོང་གསུངས་པ་ཡང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །ཞེས་པའོ། །ཐ་མ་རྣམས་ལ་དབང་པོ་ཆེ་ལོངས་ལ་དགོངས་ཏེ་བཀའ་སྩལ་པ་ལ། བློ་ཅིག་ཅར་བ་དང་རིམ་གྱིས་བ་གཉིས་སུ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་ཐེག་པ་གཉིས་སུ་བསྡུས་ཏེ། དེ་ལ་འཇིག་རྟེན་པ་ལ་གཉིས་ཏེ། སོར་བཞག་གི་ཐེག་པ་ལྷ་དང་མི་ལུང་དུ་མ་བསྟན་པ་རྣམས་སོ། །ཕྱིན་ཅི་ལོག་ལ་ལྟ་ངན་སུམ་བརྒྱ་དང་དྲུག་ཅུ་ལ་ཡང་རྟག་ཆད་གཉིས་སུ་བསྡུས་སོ། །དེ་ལྟར་ཡང་ཕ་རོལ་ཏུ་ཕྱིན་པ་ལས། འཇིག་ཚོགས་ལྟ་བར་ལྟ་བ་དྲུག་ཅུ་གཉིས་འདུས་ལྟར། ཞེས་པས་སོ། །དབང་པོ་ཞིབ་རྩེགས་ལ་དགོངས་པ་ལ་རབ་ཀྱི་རབ་དང་། འབྲིང་དང་། ཐ་མ་ལ་སོགས་པ་དགུ་ལ་འཇིག་རྟེན་ལས་འདས་པའི་ཐེག་པ་སྟེ། འདི་དག་གི་ཁྱད་ལ་སོགས་པ་རྒྱུད་ཀྱི་སྐབས་སུ་སྟོན་ནོ། །འདས་པ་ལ། རྒྱུ་ལ་ལམ་དུ་བྱེད་པ་དང་། རྒྱུའི་ཐེག་པ་གསུམ་ན ི་དབང་པོ་ཐ་མ་གསུམ་ལ་དགོངས་ཏེ། ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའོ། །འདི་དག་ལ་བྱེ་བྲག་ཏུ་བཤད་པ་མང་ཡང་འདིར་མ་སྤྲོས་སོ། །འབྲས་བུ་ལ་ལམ་དུ་བྱེད་པ་ལ་ཡང་གཉིས་ཏེ། ཕྱི་ཐུབ་པ་རྒྱུད་ཀྱི་ཐེག་པ་དང་། ནང་པ་ཐབས་ཀྱི་རྒྱུད་ཀྱི་ཐེག་པའོ། །ཕྱི་པ་གསུམ་ནི། དབང་པོ་འབྲིང་པོ་གསུམ་ལ་དགོངས་པ་སྟེ། ཀྲི་ཡ་དང་། ཨུ་པ་ཡ་དང་། རྣལ་འབྱོར་ཡོ་གའི་ཐེག་པ་དང་གསུམ་མོ། །ནང་པ་གསུམ་ནི་རབ་གསུམ་ཏེ། མ་ཧཱ་ཨ་ནུ་ཨ་ཏི་ཡོ་གའོ། །དེ་དག་གི་ཁྱད་པར་ལ་སོགས་པ་འདིར་མ་སྤྲོས་སོ། །དེ་ལ་འདིར་འཇིག་རྟེན་པ་མ་ཡིན་ཏེ་འདས་པའོ། །འདས་པ་ལ་གཉིས་ལས་རྒྱུ་མ་ཡིན་ཏེ་འབྲས་བུ་ལ་ལམ་དུ་བྱེད་པའོ། །དེ་ཡང་རྡོ་རྗེ་སེམས་དཔའ་སྒྱུ་འཕྲུལ་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པའོ། །ཞེས་པས་སོ། །དེ་ལ་གཉིས་ལས། ཕྱི་པ་མ་ཡིན་ཏེ་ནང་པའོ། །ནང་པ་ལ་མ་ཧཱ། ཨ་ནུ། ཨ་ཏི་གསུམ་ལས་རྫོགས་པ་ཆེན་པོ་ཨ་ཏི་ཡོ་གའོ། །རྫོགས་པ་ཆེན་པོས། ཡང་དག་དོན་གྱི་རྫོགས་པ་ཆེན་པོ་དང་། མཚན་མ་ཚིག་གི་རྫོགས་པ་ཆེན་པོའོ། །ཡང་དག་དོན་ལ་གཉིས་ཏེ། སྨྲ་བྱེད་གཞི་ལམ་འབྲས་བུའི་དང་། གནས་པ་རང་སྣང་གི་རྫོགས་པའོ། །སྨྲ་བྱེད་གཞི་ལམ་གྱི་རྫོགས་པ་ཆེན་པོ་ལ་གསུམ་སྟེ། གཞི་མ་དུང་གྱུར་སྨྲ་བའི་རྫོགས་པ་ཆེན་པོ་དང་། ལམ་དྲང་ཐད་དུ་སྨྲ་བའི་རྫོགས་པ་ཆེན་པོ་དང་། འབྲས་བུ་ཡེ་གྲོལ་དུ་སྨྲ་བའི་རྫོགས་པ་ཆེན་པོའོ། །གཞི་ལ་གསུམ་སྟེ། སྣང་བ་གཞི་གནས་རང་ཤར་དུ་སྨྲ་བའི་དང་། འཁྲུལ་པ་གཞི་ལྡོག་ཏུ་སྨྲ་བའི་དང་། ངོ་བོ་གཞི་ཁྱབ་ཏུ་སྨྲ་བའི་རྫོགས་པ་ཆེན་པོའོ། །ལམ་ལ་གསུམ་སྟེ། གནས་ལ་བརྟེན་པར་སྨྲ་བའི་དང་། གོམས་སྟོབས་ལ་བརྟེན་པར་སྨྲ་བའི་རྫོགས་པ་ཆེན་པོ་དང་། འགྱུ་བ་གཏད་ཡལ་དུ་སྨྲ་བའི་རྫོགས་པ་ཆེན་པོའོ། །དེ་ལས་ནི་འགྱུ་བ་གཏད་ཡལ་དུ་སྨྲ་བའི་རྫོགས་པ་ཆེན་པོའོ། །དེ་དག་ལའང་ཞིབ་པར་གཞན་དུ་བསྟན་པས་འདིར་མ་སྨྲོས་སོ། །གནས་པ་རང་སྣང་གི་རྫོགས་པ་ཆེན་པོ་ལ་གསུམ་སྟེ། ལུས་གནས་རྩ་ཡི་རྫོགས་ཆེན་དང་། སེམས་གནས་རླུང་གི་རྫོགས་ཆེན་དང་། ཡུལ་གནས་གཞི་བཞག་གི་རྫོགས་པ་ཆེན་པོའོ། །མཚན་མ་ཚིག་གི་རྫོགས་པ་ཆེན་པོ་ནི་ཤློ་ཀ་འབུམ་ཕྲག་དྲུག་ཅུ་རྩ་བཞི། བམ་པོ་ཉི་ཁྲི་དང་ཆིག་སྟོང་། དེ་དག་ཀྱང་ཀློང་ནི་དགུར་བསྡུས། ལེའུ་ནི་ནི་ཁྲི་ཕྲག་གསུམ་དང་། སྟོང་ཕྲག་ལྔ། བརྗོད་པ་ནི་ནམ་མཁའི་མཐའ་དང་མཉམ་པ་ཞིག་གསུངས་པ་ཡང་སྡེ་གསུམ་དུ་བསྡུས་ཏེ། སེམས་ཀྱི་སྡེ་དང་། ཀློང་གི་སྡེ་དང་། མན་ངག་གི་སྡེ་དང་གསུམ་དུ་བསྡུས་པ་ནི་འགྲོ་བ་རྣམས་ལ་ལུས་ངག་ཡིད་གསུམ་དུ་གནས་ཏེ། དེ་རྣམས་དག་པར་བྱེད་པའི་དག་བྱེད་ལ་དགོངས་པའོ། །སེམས་ཀྱི་སྡེ་ལ་ལུགས་གཉིས་ཏེ། གཞི་གནས་རང་གྲོལ་གྱི་རྫོགས་ཆེན་དང་། འདོད་པ་རང་ཤར་གཉིས་སོ། །ཀློང་སྡེ་ལ་གསུམ་ཏེ། ཀློང་དཀར་པོ་མུ་བཞི་ལམ་ཁྱེར་དུ་སྨྲ་བ་དང་། ཁྲ་བོ་རབ་འབྱམས་སུ་སྨྲ་བ་དང་། ནག་པོ་རང་གྲོལ་དུ་སྨྲ་བའོ། །དེ་ལ་འདི་ནི་མན་ངག་གི་སྡེ་སྟེ། འདི་ལ་ཡང་གསུམ་ཏེ། སྟོན་པས་ཁ་འཐོར་བའི་ཚུལ་དུ་གསུངས་པ་དང་། ཁ་གཏམ་གྱི་ཚུལ་དུ་བཀའ་སྩལ་པ་དང་། རྒྱུད་རང་གཞུང་གི་ཚུལ་དུ་བཀའ་སྩལ་པའོ། །དེ་ལ་འདི་རྒྱུད་རང་གཞུང་ངོ་། །དེ་ལ་ཡང་བཞི་སྟེ། གཏར་ཀ་གེགས་སེལ་གྱི་ཚུལ་དུ་བཀའ་སྩལ་པ་དང་། གབ་པ་མངོན་བྱུང་གི་ཚུལ་དུ་བཀའ་སྩལ་པ་དང་། ལྟ་བ་སྒང་དྲིལ་ཏེ་བཀའ་སྩལ་པ་དང་། བཤད་པ་རང་གསལ་གྱི་ཚུལ་དུ་བཀའ་སྩལ་པ་བཞི་ལས། འདི་ནི་བཤད་པ་རང་གསལ་ལོ། །འདི་ལ་ཡང་ལུགས་གསུམ་སྟེ། འཁྲུལ་གཞི་གཞི་ལ་ལྡོག་པའི་ཚུལ་དུ་བཀའ་སྩལ་པ་དང་། འཁྲུལ་པ་བ་འདེད་ཀྱི་ཚུལ་དང་། ཐིག་ལེ་རང་གནད་ལ་ཕབ་སྟེ་བཀའ་སྩལ་པའོ། །དེ་ལ་འདི་ཐིག་ལེ་རང་གནད་ལ་ཕབ་སྟེ་བཀའ་སྩལ་པའོ། །འདི་ལ་གཉིས་ཏེ། སྙན་ནས་སྙན་དུ་བརྒྱུད་པ་སྙན་བརྒྱུད་དང་། རྒྱུད་ལུང་དཀྱུས་ལ་བརྟེན་ནས་བཤད་པའི་བརྒྱུད་པ་གཉིས་སོ། །འདི་བཤད་རྒྱུད་དོ། །དེ་ལ་བཞི་ཡོད་པ་ལས། ཕྱི་སྐོར་ལུས་དང་འདྲ་བ་དང་། ནང་སྐོར་མིག་དང་འདྲ་བ་དང་། གསང་སྐོར་སྙིང་དང་འདྲ་བ་དང་། གསང་བ་བླ་ན་མེད་པ་ཡོངས་སུ་རྫོགས་པ་ལུས་དང་དབང་པོ་ཡན་ལག་རྫོགས་པའི་སྐྱེས་བུ་དང་འདྲ་བ་སྟེ། འདི་ནི་གསང་བ་བླ་ན་མེད་པའོ། །ཆོས་དེ་དག་ཀྱང་སྡེ་སྣོད་གསུམ་དུ་འདུས་པ་ལས། མདོ་སྡེ་དང་། འདུལ་བ་དང་། མངོན་པ་གསུམ་སྡེ་དང་སྣོད་ཀྱི་དབྱེ་བའོ། །མདོ་སྡེ་ལ་དྲང་བ་དང་། ངེས་པའི་མདོའི་སྡེའོ། །འདུལ་བ་ལ་རྩ་བའི་སྡེ་པ་བཞི་སྟེ། ཕལ་ཆེན་སྡེ་པ་སྡུག་བསྔལ་གྱི་བདེན་པའི་གཉེན་པོ་གཙོར་བྱེད། མང་པོས་བཀུར་བའི་སྡེ་པ་ཀུན་འབྱུང་གི་བདེན་པའི་གཉེན་པོས་སྤོང་བ་ལ་གཙོར་བྱེད་པ་དང་། གནས་བརྟན་པའི་སྡེ་པས་འགོག་པའི་བདེན་པ་ལ་གཙོར་བྱེད་པ་དང་། ཐམས་ཅད་ཡོད་པར་སྨྲ་བའི་སྡེ་པ་ལམ་གྱི་བདེན་པ་ཡན་ལག་དང་བཅས་པ་ལ་གཙོར་བྱེད་པའོ། །མངོན་པ་ལ་གཉིས་ཏེ། ལུང་གི་ཆོས་དང་། རྟོགས་པའི་བདག་ཉིད་ཀྱི་ཆོས་གཉིས་ལས། འདི་མངོན་པ། དེ་ལས་ཀྱང་ལུང་གི་ཆོས་སོ། །ལུང་ལ་གཉིས་ཏེ། བསྟན་པའི་ལུང་དང་། ངེས་པ་བརྗོད་པའི་ལུང་ལས། འདི་ནི་ངེས་པར་བརྗོད་པའོ། །དེ་དག་ཀྱང་བསྡུ་ན། བཀའ་དང་བསྟན་བཅོས་གཉིས་ཏེ། བཀའ་ལ་གཉིས་ཏེ། རྒྱུད་སྡེ་དང་། མདོ་སྡེའོ། །དེ་དག་རེ་རེ་ལ་བཀའ་དངོས་དང་། བྱིན་གྱིས་བརླབས་པ་དང་། རྗེས་སུ་གནང་བ་དང་གསུམ་མོ། །དེ་ལ་འདི་བསྟན་བཅོས་ཏེ། བསྟན་བཅོས་ལ་མང་ཡང་། རྫོགས་པ་ཆེན་པོ་མན་ངག་གི་བསྟན་བཅོས་སོ། །དེ་ཡང་ཤན་འབྱེད་བྲམ་ཟེའི་སྨྲེང་འདོན་པ་ལྟ་བུའི་བསྟན་བཅོས་དང་། ལ་བཟླ་བའི་བསྟན་བཅོས་རྒྱལ་པོའི་བཀའ་བབས་ལྟ་བུའི་བསྟན་བཅོས་གཉིས་ལས། འདི་ལ་བཟླ་བའི་བསྟན་བཅོས་སོ། །འདི་ལའང་མང་ན་ཡང་སྣང་བ་ཡུལ་གྱི་ལ་བཟླ་བའི་མན་ངག་གི་བསྟན་བཅོས་སོ། །གསང་བ་བླ་ན་མེད་པ་ལ། གསང་ཆེན་ངེས་པའི་རྒྱུད་བཅུ་བདུན། མན་ངག་གི་ཡི་གེ་བརྒྱ་དང་བཅུ་དགུ་བཞུགས་པ་ལས། མན་ངག་གི་ཡི་གེ་ཡང་སྐོར་བདུན་དུ་བཞུགས་པ་ལས། འདི་ནི་མངོན་སུམ་སྙིང་ཐིག་སྟེ། འདི་ལ་གཉིས་ཏེ། སྒོམ་པ་མངོན་སུམ་མཐོང་བ་གནད་ཀྱིས་གྲོལ་བའི་བསྟན་བཅོས་དང་། ཡལ་དུས་གནད་ཀྱིས་གྲོལ་བའི་མན་ངག་གཉིས་ལས། འདི་ཡལ་དུས་སོ། །འདི་ལ་ཡང་སེམས་ཀྱི་དམིགས་དྲུག་ལ་བརྟེན་ནས་ཆོས་ཉིད་ཀྱི་གནད་ཤེས་པས་གྲོལ་བའོ། །གསུམ་པ་དགོས་ཆེད་གང་ཟག་གི་ཆེ་བ་ནི། དེ་ཡང་གནད་ཀྱིས་གྲོལ་བའི་མན་ངག་འདི་བླ་མ་མཚན་ཉིད་དང་ལྡན་པ་གཅིག་ལ། སློབ་མ་དད་པ་དང་ལྡན་པས་དུས་གཅིག་ལ་གྲོལ་བ་སྟེ། སློབ་མ་ནི་རང་བཞིན་རྫོགས་པ་ཆེན་པོའི་སྣོད་དུ་རུང་བ་དང་། སྔོན་སྦྱངས་པས་ལས་འཕྲོས་རུང་བའོ། །རང་བཞིན་ནི་རྣམ་རྟོག་བགས་ཀྱིས་ཆུང་བ་དང་། འཛིན་པ་ཆུང་བ་དང་། གཏོང་ཕོད་ཆེ་བའོ། །སྦྱངས་པའི་ཡོན་ཏན་བཅུ་གཅིག་སྟེ། དད་ལྡན་འཁོར་བའི་ཡིད་བྲལ་བ། བརྩོན་འགྲུས་ལྡན་ཞིང་གཏོང་བར་ནུས། །བླ་མར་གུས་ཤིང་དམ་ཚིག་ལྡན། །ཁ་གསག་གཡོ་སྒྱུ་རྣམ་པར་སྤངས། །དྲིན་གཙོ་ང་རྒྱལ་དྲེགས་མེད་ཅིང་། །ཆོས་མིན་བྱ་བ་སྤངས་པ་ནི། །སྦྱངས་པས་སློབ་མའི་མཚན་ཉིད་དེ། །བཅུ་གཅིག་པོས་ནི་བྱང་ཆུབ་ཀྱི། །ས་བོན་ངེས་པར་འབྱིན་པའོ། །ཞེས་བཀོད་པ་ཆེན་པོ་ལས་གསུངས་སོ། །དེ་ལྟ་བུའི་སྦྱངས་པའི་མཚན་ཉིད་བཅུ་གཅིག་གམ། རང་བཞིན་གྱི་མཚན་ཉིད་དང་ལྡན་པ་ལ། གནད་ཀྱིས་གྲོལ་བའི་མན་ངག་འདི་བསྟན་པར་བྱའོ། །ཟབ་མོ་མཚན་ཆེ་བ་ནི་མཚན་སྐབས་སུ་བསྟན་ཏེ། སེམས་ཀྱི་ངོ་བོ་ངེས་ཚིགས་ཡལ་ས་དང་། ཡལ་དུས་ལ་སོགས་པ་བསྟན་པའོ། །བསྡུས་དོན་མན་ངག་གི་ཆེ་བས་ས་བཅད་ཀྱི་དམིགས་བསྟན་པ་ནི། སློབ་དཔོན་ཆེན་པོ་དགའ་རབ་རྡོ་རྗེ་སངས་རྒྱས་དངོས་དང་འདྲ་བས་མཛད་པའི་སེམས་ཀྱི་དམིགས་དྲུག་ཏུ་བསྟན་པའི་མན་ངག་འདི་ལ་གཉིས་ཏེ། དབང་པོ་ཅི་ཆར་བ་རྣམས་ཀྱིས་ཅིག་ཅར་དུ་རྟོགས་པར་བསྟན་པའི་ཕྱིར་ན། མཚན་བསྟན་པ་དང་། དབང་པོ་རིམ་གྱིས་པ་རྣམས་ཀྱིས་རིམ་གྱིས་རྟོགས་པར་བསྟན་པའི་ཕྱིར་མན་ངག་གི་གཞུང་སྟེ། གཞུང་ལ་དུམ་བུ་དྲུག་ཏུ་བསྟན་པ་སྟེ། དང་པོ་བསྡུས་པའི་ཚིག་དྲུག་གིས་བསམ་པ་ངོས་བཟུང་བར་བསྟན་པ་དང་། གཉིས་པ་རྣམ་རྟོག་གཅོད་པའི་སྤུ་གྲིས་བྱུང་ཚོར་གྱི་སྒོ་དགག་པར་བསྟན་པ་དང་། གསུམ་པ་ཤེས་པའི་གཏད་པ་བཅུ་པས་སེམས་དང་ཡེ་ཤེས་ཀྱི་དབྱེ་བ་བསྟན་པ་དང་། བཞི་པ་འགྱུ་བྱེད་རང་ལ་གནས་པའི་འཁོར་ལོས་འཁོར་བའི་བྱུང་ཚུལ་བསྟན་པ་དང་། ལྔ་པ་རིམ་པ་རྣམ་པ་དྲུག་གིས་སེམས་ཀྱི་རང་སྐྱོན་དབྱེ་བར་བསྟན་པ་དང་། དྲུག་པ་རྒྱུན་དུ་འཁོར་ལུགས་དྲུག་གིས་སེམས་ཀྱི་རང་བཞིན་བསྟན་པའོ། །དེ་ལ་མཚན་བསྟན་པ་ནི། གང་ཟག་གི་བློའི་རིམ་པ་གསུམ་ལ་དགོངས་པ་གསུམ་སྟེ། སྒྲ་དོན་ཚིག་ཙམ་ལ་བརྟེན་ནས་དབང་པོ་རབ་རྣམས་ཀྱིས་རྟོགས་པར་བསྟན་པར་བྱ་བའི་ཕྱིར། མཚན་སྒྲ་འགྱུར་གནས་ལུགས་དང་བཅས་པར་བསྟན་པ་དང་། འཁོར་འདས་བརྡའ་ཙམ་ལ་བརྟེན་ནས་དབང་པོ་འབྲིང་པོས་རྟོགས་པར་བྱ་བའི་ཕྱིར། མཚན་བརྡའ་འགྱུར་དུ་བསྟན་པ་དང་། དོན་རང་ངོ་ལ་བརྟེན་ནས་དབང་པོ་ཐ་མ་རྣམས་ཀྱིས་རྟོགས་པར་བྱ་བའི་ཕྱིར། མཚན་དོན་འགྱུར་མན་ངག་དང་སྦྱར་བར་བསྟན་པའོ། །དེ་ལ་དངོས་པོ་གཤིས་ཀྱི་སེམས་ཉིད་དེ་ལམ་རིག་པ་མེད་པས་སྔར་སྐྱེ་མ་མྱོང་བའི་གནད་ཀྱིས་འཁྲུལ་པའི་མིང་མེད་ལ། ད་ལྟ་འཁྲུལ་པ་མི་བདེན་པའི་གནད་ཀྱི་ད་ལྟ་སྐྱེ་བ་ལ་མི་གནས་པས། རྣམ་རྟོག་ཐ་དད་པ་ཉིད་རང་སར་ཡལ་ལ། ཕྱིས་སྐྱེ་མི་སྲིད་པའི་གནད་ཀྱིས་འཁོར་བ་ཉིད་ཡེ་ནས་གྲོལ་བའི་ཕྱིར་ནི་ཡི་གེ་སྭ་ཞེས་བྱའོ། །དེའི་ཕྱིར་ན་འགྱུ་བ་རང་སར་ཡལ་བས། ཆོས་རྣམས་ཟད་སར་ཟད་པ་ཞེས་བྱའོ། །དེ་ལྟ་བུའི་གནས་ལུགས་དངོས་པོའི་འདུག་ཚུལ། ལྟ་བ་གཏུགས་ཐུབ་པ་ལ་རག་ལུས་པ་སྟེ། ལྟ་བ་སྟོང་པས་ཟད་པའི་ལུགས་ལ་མཁས་པ་དང་། ལྟ་བ་གྲོལ་བས་ཟད་པའི་དུས་ལ་མཁས་པ་དང་། ལྟ་བ་དང་བྲལ་བས་ཟད་པའི་ཚད་ལ་མཁས་པས་ན་རྟོག་པ་རང་ལོག་པས་དེ་དུས་གསུམ་ཡང་ཆོས་ཀྱི་དབྱིངས་སྟོང་ཉིད་གཅིག་གི་འཁོར་ལོ་ལས་མ་འདས་པའི་ཕྱིར་ན། ཚ་ཞེས་རང་ཟད་དུ་བྱུང་བའོ། །དེ་ཉིད་མ་རིག་པ་རང་གནས་རང་ཤར་རང་གྲོལ་བས་དུ་ཞེས་འདས་པའོ། །མ་རིག་པ་ལ་སོགས་པའི་ཉོན་མོངས་པ་ཐམས་ཅད་རང་གྲོལ་གཅིག་གི་འཁོར་ལོ་ལས་མ་འདས་པའོ། །དེ་ཡང་གཞི་གནས་རང་ལས་བྱུང་བའི་ཤེས་རབ་ལ་བརྟེན་ནས་རྟོགས་པའི་ཕྱིར་ན་ཡི་གེ་པེ་སྟེ། ཤེས་རབ་སྟོང་པས་མཚན་མའི་རྟོག་པ་རྣམས་རང་ཟད། ཤེས་རབ་ཉིད་གསལ་བའི་ཆ་ནས་སྣང་གྲགས་ཀྱི་ཆོས་རྣམས་ཐམས་ཅད་རང་གྲོལ། ཤེས་རབ་གནས་པའི་ཆ་ནས་རང་བྱུང་རང་ཤར་དུ་རྟོགས་པའོ། །དེ་ཡང་སྟོང་ཉིད་ཟད་པའི་ངང་དུ་ལ་བཟླས་པས་ན་ལ་ཞེས་མི་གནས་པས་དངོས་མིན་ལ། ཐམས་ཅད་དུ་ཤར་བས་ཚད་ཡིན་པའོ། །དེ་ལྟ་བུའི་དོན་དེ་འགྲོ་བ་རྣམས་ཀྱི་ལུས་ལ་བརྟེན་ནས་རྟོགས་པའི་ཕྱིར་ན་ཡི་གེ་ན་ཞེས་བྱའོ། །དེ་ཡང་སེམས་ཉིད་གཉུག་མ་ལ་ལས་དང་བག་ཆགས་ཀྱིས་གོས་པ་མེད་པའི་གནད་ཀྱིས་རྣམ་རྟོག་བག་ཆགས་ཀྱི་ལུས་ཀྱི་གདར་ཤ་ཆོད། སེམས་ཉིད་སྟོང་པ་ལ་མཚན་མ་རིམ་ཅན་གྱི་ཁ་དོག་ཏུ་གྲུབ་པ་མེད་པས། ཡེ་ཤེས་སྒྱུ་མའི་ལུས་ཀྱི་གདར་ཤ་ཆོད། །སེམས་ཉིད་ལྷུག་པ་སྐྱོན་དང་ཡོན་ཏན་ལས་འདས་པས། རིན་པོ་ཆེ་གསང་བའི་ལུས་ཀྱི་གདར་ཤ་ཆོད་པས་ན། ཐ་མ་ལུས་ལ་མི་གནས་པའི་ཕྱིར། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །དེ་ཡང་སེམས་ཉིད་མ་བཅོས་པའི་གཞི་ཡིན་པས་བྱ་བྱེད་དང་འབད་རྩོལ་ལས་འདས། མ་བསྒྱུར་བའི་ལམ་ཡིན་པས་བསྒྲོད་ཅིང་སྦྱངས་པ་ལས་འདས། མ་བསླད་པའི་འབྲས་བུ་ཡིན་པས་རེ་དོགས་དང་དགག་སྒྲུབ་ལས་འདས་པས་ན། མ་ཞེས་ཐོག་མའི་གཞི་ལ་སེམས་ཉིད་ཐིམ་པས་འཁོར་འདས་དུས་གཅིག་ལ་འགགས་པས་ཁམས་གསུམ་མིག་མེད་པའོ། །མཚན་བརྡའ་འགྱུར་དུ་བསྟན་པ་ནི། སྤྱིར་ཡང་ཆོས་ཐམས་ཅད་བརྡས་བརྟགས་པ་ལས་མ་རྟོགས་པའི་ཆོས་ལ་སོགས་པ་ཡོད་མི་སྲིད་པས། རང་བཞིན་གྱི་བརྡས་འཁོར་བ་དུས་གཅིག་ལ་ཆོས་ཉིད་དུ་འཆར་བ་དང་། བརྗོད་པའི་བརྡས་ཆོས་རྣམས་ཀྱི་མིང་དོན་གཏན་ལ་ཕེབས་པའོ། །བྱས་ཤིང་བསྟན་པའི་བརྡས་རྟོགས་པ་རྒྱུད་ལ་བསྐྱེད་པའོ། །དེའི་ཕྱིར་ན་སྣང་གྲགས་ཀྱི་ཆོས་ཐམས་ཅད་ཀྱང་བརྡས་བརྟགས་ལ། བོད་སྐད་དུ་ཞེས་བྱ་བ་ཡང་བརྡས་བརྟགས་པས་ན། ཐམས་ཅད་བརྡའ་དོན་གྱི་མན་ངག་ཏུ་གྲོལ་བའོ། །དོན་འགྱུར་མན་ངག་སྦྱར་བ་ནི། སེམས་ཀྱི་ཞེས་བྱ་བ་ནི། ངོ་བོ་དང་། ངེས་ཚིག་དང་། དབྱེ་བ་དང་། ཡལ་ལུགས་དང་། ཡལ་དུས་དང་། ཡལ་ས་དང་། ཟད་པའི་མཚན་ཉིད་བདུན་དུ་ཤེས་པར་བྱའོ། །དེ་ལ་སེམས་ཀྱི་ངོ་བོ་ནི་གནས་པ་ལས་འཇུག་ལ་འཇུག་པས་ཁྱབ་ལ། ཁྱབ་པས་ཟད་པའོ། །ངེས་ཚིག་ནི་གང་ལ་སེམས་ན་འཁོར་འདས་ལ་སེམས་པས་ན་སེམས་ཞེས་བྱ་ལ། གང་སེམས་ན་འགྱུ་བ་ཐ་དད་པ་དང་། རྟོག་པ་སྣ་ཚོགས་ལ་སེམས་པས་སོ། །གང་གི་ཕྱིར་སེམས་ན་འཁོར་འདས་ཀྱི་འཇུག་པའི་ཕྱིར་སེམས་སོ། །དཔེ་ཇི་ལྟར་སེམས་ན་བརྒྱ་བྱིན་གྱི་བུ་ལག་བཟང་ནོར་ལ་སེམས་པ་ལྟར་སེམས་པས་ན་སེམས་སོ། །དབྱེ་བ་ནི་འོག་ཏུ་བསྟན་པར་བྱའོ། །ཡལ་ལུགས་ནི་རྟོག་པ་ཐ་དད་པ་གློ་བུར་ཡིན་པས། དེ་གློ་བུར་དུ་ཡལ་བས་ལས་དང་བག་ཆགས་ཀྱིས་མི་གོས་ཏེ། སེམས་ཉིད་སྟོང་པ་ངོ་བོ་ཉིད་ངོས་བཟུང་ལས་འདས་པའི་ཕྱིར་རོ། །དེ་ཡང་ནམ་མཁའ་ལས་སྤྲིན་ལ་སོགས་པ་གློ་བུར་དུ་བྱུང་ཞིང་གློ་བུར་དུ་ཡལ་བས། ཕྱོགས་དང་རིས་མེད་ཅིང་རྗེས་མེད་པས་གོས་པ་མེད་པ་དང་འདྲའོ། །ཡལ་དུས་ནི་བློ་སྔ་ཕྱིའི་བར་དུ་ངོ་སྤྲད་པའི་དུས་ན་ཡལ་བས། སྔར་ཞེན་པའི་བག་ཆགས་ལ་མི་གནས་པས། ལུས་སེམས་ལ་འབྲེལ་བ་མེད་པའི་གནད་དང་། ད་ལྟའི་བག་ཆགས་རང་སར་ཡལ་བས་ལས་དང་རྣམ་སྨིན་དང་བྲལ་བའི་གནད་དང་། ཕྱིས་འབྱུང་བའི་བག་ཆགས་ཟད་སར་ཟད་པས་ཁམས་གསུམ་དུ་མི་ལྡོག་པའི་གནད་དོ། །དཔེར་ན་རྒྱ་མཚོའི་རླངས་ཡལ་བའི་རྣམ་པ་དང་འདྲ་བར་ཡལ་ལོ། །ཡལ་ས་ནི་སྣང་བ་སྔ་ཕྱིའི་བར་དུ་ཡལ་བས་སེམས་རིག་གི་ཤན་ཕྱེད། ཤེས་པ་སྔ་ཕྱིའི་བར་དུ་ཡལ་བས་བློ་མ་བུའི་འབྲེལ་ཟད། བློའི་འགྱུ་བ་སྔ་ཕྱིའི་བར་དུ་ཡལ་བས་ལས་དང་རྣམ་སྨིན་གྱིས་གོས་མི་སྲིད། ཆོས་ཉིད་སྔ་ཕྱིའི་བར་དུ་ཡལ་བས། སྔ་ཕྱི་ལུས་སེམས་ཉིང་མཚམས་སྦྱོར་བ་ཡང་མི་སྲིད་དེ། སྔ་མའི་སེམས་ཀྱི་འགྱུ་བ་གཞི་ལ་ཡལ་བས་སྣང་སར་སྣང་བས་སྟོང་སར་སྟོང་པའོ། །ད་ལྟའི་དྲན་རྟོག་ནམ་མཁའ་ལ་ཡལ་བས། ཉོན་མོངས་པ་ཆོས་ཉིད་དུ་གྲོལ་ལ། མ་འོངས་པའི་སེམས་ཀྱི་དྲན་རྟོག་ཆོས་ཀྱི་དབྱིངས་སུ་ཡལ་བས། སྐྱེ་བ་སྔ་ཕྱི་ལ་མི་གནས་པའོ། །ཆོས་ཉིད་རང་ངམ་སེམས་ཉིད་རང་གི་ཟད་པའི་མཚན་ཉིད་ནི། སྣང་རྟགས་སྔ་ཕྱིའི་འཁོར་ལོ་ལ་མི་གནས་པས་ཆོས་ཟད་པས་རང་གི་གྲུབ་མཐའ་ཞིག །བློ་སྔ་ཕྱིའི་འཁོར་ལོ་ལ་མི་གནས་པས་དྲན་རྟོག་ཟད་པས་རྒྱུ་མཚན་གོང་འོག་སྡེབས་ཞིག་གོ། །སྐྱེ་བ་སྔ་ཕྱིའི་འཁོར་ལོ་ལ་མི་གནས་པ་ལུས་སེམས་ཀྱི་འབྲེལ་བ་ཞིག་པའོ། །དེ་ཡང་འཁོར་འདས་ཟད་པས་ཅིར་སྣང་ཆོས་ཉིད་དྲན་གསལ་གྱི་འཁོར་ལོ་ཟད་པས་འགྱུ་བ་རང་སར་གྲོལ། ལྟ་སྒོམ་ཟད་པས་ཡིད་ལ་བྱེད་པ་མ་འདས་པའོ། །རྒྱུ་ཟད་པས་རྟོག་པ་སྔ་ཕྱིའི་འཕེལ་བ་མེད་ལ། ཆོས་ཟད་པས་སྒོམ་སྒྲུབ་ལས་འདས་པ་དང་། ཉམས་ཟད་པས་རྟོག་པ་སྔ་ཕྱིའི་སྡེབས་མེད་པ་དང་། སེམས་མེད་པས་འཇུག་པ་སྔ་ཕྱིའི་ཡུལ་སྟོང་པ་དང་། སེམས་ཅན་ཟད་པས་འཁོར་བ་སྤྱིར་ཕྱིན་པ་དང་། སངས་རྒྱས་ཟད་པས་རེ་དོགས་ཕྱོགས་ལྷུང་མེད་པ་དང་། འཁོར་བ་ཟད་པས་ཆོས་ཉིད་སྔ་ཕྱིའི་ལྟོས་པ་མེད་པ་དང་། དེའི་ཕྱིར་ན་ཟད་པས་སྟོངས་པ་དང་། སྟོངས་པས་ལྡོག་པ་མེད་པའོ། །དམིགས་ཞེས་པ་ནི། དེ་ཡང་སེལ་བའི་གནད་ཀྱིས་འཁོར་འདས་ཀྱི་དམིགས་བསལ་བ་ནི། མེད་པའི་དམིགས་བསལ་བས་ཟད་པའི་དུས་ཚོད་ལ་མཁས་ཏེ། བློ་ཟད་པས་ཡལ་བའི་ཚོད་ཟིན་པས་རྟོག་པ་ཐ་དད་པ་ཆོས་ཉིད་གཅིག་གི་འཁོར་ལོ་ལས་མ་འདས་པའོ། །ཡོད་པའི་དམིགས་བསལ་བས་སྣང་ཤེས་ཆོས་ཉིད་ལས་འགྲོ་ས་མེད་པའོ། །གཉིས་ཀའིི་དམིགས་བསལ་བས། སེམས་ཉིད་མཐའ་གཉིས་ལ་མི་གནས་ཏེ། སྔ་མཐའ་ལས་མི་གནས་པས་སྐྱེ་བ་རང་རྒྱུད་དུ་འཛིན་པ་ལས་འདས། ཕྱི་མཐའ་ལ་མི་གནས་པས་ལྡོག་རྒྱུ་དག་ལྡོག་རྐྱེན་གང་ལའང་མི་གནས་པའོ། །དམིགས་དེ་གནས་པའི་དབང་དུ་བྱས་ན། གཞི་ལ་གནས་པས་སེམས་ལ་བཅོས་མི་དགོས། ལམ་ལ་གནས་པས་སེམས་ལ་བསྒྱུར་མི་དགོས། འབྲས་བུ་ལ་གནས་པས་དུས་གསུམ་ཐ་དད་པ་ལས་འདས་པའོ། །དམིགས་དེ་གཏད་པའི་དབང་དུ་བྱས་ན། ཕྱི་ཡུལ་ལ་དམིགས་པ་གཏད་པས་སྣང་རྐྱེན་ཆོས་ཉིད་དུ་གྲོལ་བའི་གནད་དང་། ནང་ཕུང་པོ་ལ་གཏད་པས་སྡུག་བསྔལ་ཐམས་ཅད་ཆོས་ཉིད་དུ་གྲོལ་བའི་གནད་དང་། གསང་བ་སེམས་ལ་གཏད་པས་སེམས་ཉིད་དེ་སྐྱེ་བ་མེད་པའི་གནད་དང་གསུམ་གྱི། ཆོས་སྐུ་སྟོང་པའི་ངང་དུ་གྲོལ་བས་སེམས་ལ་རྒྱུ་མེད། ལོངས་སྐུ་གསལ་བའི་ངང་དུ་གྲོལ་བས་སེམས་ལ་རྐྱེན་མེད། སྤྲུལ་སྐུ་བདག་འཛིན་མེད་པའི་ངང་དུ་གྲོལ་བས་སེམས་ལ་འབྲས་བུ་མེད་པ་སྟེ། རྒྱུ་མེད་པས་བཟློག་པའི་གཞི་སྟོང་ལ། རྐྱེན་མེད་པས་ལུས་སེམས་ལ་འབྲེལ་བ་མེད་པའི་གནད་དང་། འབྲས་བུ་མེད་པས་སེམས་རང་ཡལ་བའི་གནད་ཀྱིས་གང་གིས་ཀྱང་གོས་པ་མེད་པའོ། །དྲུག་ཅེས་པ་དུམ་བུ་ངེས་པའི་གྲངས་ཏེ། དང་པོ་བསྡུས་པའི་ཚིག་གིས་བསམ་པ་ངོས་བཟུང་བས་ཡལ་བའི་དུས་ཚོད་ངོ་ཤེས་པའི་དགོས་པ་ཡོད། གཉིས་པ་རྣམ་རྟོག་གཅོད་པའི་སྤུ་གྲིས་བྱུང་ཚོར་སྒོ་བཀག་པས་རྣམ་རྟོག་གློ་བུར་བ་རྣམས་རང་སར་གྲོལ་བའི་དགོས་པ་ཡོད། གསུམ་པ་ཤེས་པའི་གཏད་ས་གཅུན་པས་སེམས་དང་ཡེ་ཤེས་དབྱེ་བས་རང་ངོ་ཆོས་ཉིད་དུ་གྲོལ་བའི་དགོས་པ་ཡོད། བཞི་པ་འགྱུ་བྱེད་རང་ལ་གནས་པའི་འཁོར་ལོས་འཁོར་བའི་བྱུང་ཁུངས་བཙལ་བས་འཁོར་འདས་མིང་མེད་པའི་དགོས་པ་ཡོད། ལྔ་པ་རིམ་འབྱེད་དྲུག་གིས་སེམས་ཀྱི་དབྱེ་བ་བསྟན་པས་རང་སེམས་ལ་བྱན་ཚུད་པའི་དགོས་པ་ཡོད། དྲུག་པ་རྒྱུན་དུ་འཁོར་ལུགས་དྲུག་གིས་སེམས་རང་སྐྱོན་བསྟན་པས། སེམས་སྟོང་པའི་མཚན་ཉིད་ཤེས་པའི་དགོས་པ་ཡོད་པས་དེ་ལྟར་དྲུག་ཏུ་ངེས་པས་འགྲོ་བ་དྲུག་རང་སར་གྲོལ་བར་བྱེད་པའི་གནད་ལ། དེ་ལས་མང་ན་དགོས་པ་མེད་པ། ཉུང་ན་དགོས་པའི་དོན་མ་ཚང་བས་དྲུག་ཁོ་ནར་ངེས་པའོ། །དེ་ཡང་དམིགས་དང་པོས་བསྡུས་པའི་དོན་དྲུག་ཏུ་བསྟན་པ་ནི། རིགས་དྲུག་གི་རྟོག་པ་གཅོད་པ་ལ་དགོངས་ལ། གཉིས་པ་བསྡུས་པའི་དོན་ལྔས་བསྟན་པ་ནི་དུག་ལྔར་རང་གྲོལ་ལ་དགོངས་པའོ། །གསུམ་པ་ལ་གཉིས་ཀྱིས་བསྟན་པ་ནི་ཐབས་ཤེས་རབ་འདུ་འབྲལ་མེད་པ་ལ་དགོངས་པའོ། །བཞི་པ་ལ་བཞིས་བསྟན་པ་ནི། སྐྱེ་གནས་བཞི་དག་པར་བྱེད་པ་ལ་དགོངས་པའོ། །ལྔ་པ་ལ་ལྔས་བསྟན་པས་ཡེ་ཤེས་ལྔ་མངོན་དུ་གསལ་བར་བྱེད་པ་ལ་དགོངས་པའོ། །དྲུག་པ་ལ་གསུམ་གྱིས་བསྟན་པ་ནི། ལུས་ངག་ཡིད་གསུམ་ཁམས་གསུམ་དུ་མི་ལྡོག་པ་ལ་དགོངས་པའོ། །ཞེས་པ་ནི་གཞུང་དུམ་བུ་དྲུག་ལ་བསྡུས་པའི་དོན་ཉེར་ལྔར་བསྟན་པར་བྱ་བཤད་པར་བྱ་ཞེས་པའོ། །ད་ནི་གཞུང་གི་དོན་བསྟན་པ་ལ་གཉིས་ཏེ། ཕྱག་བཙལ་བ་མདོར་བསྟན་པ་དང་། དུམ་བུ་ངེས་པས་རྒྱས་པར་བཤད་པའོ། །དེ་ལ་ཕྱག་འཚལ་བ་བསྟན་པ་ནི། བཅོམ་ཞེས་པ་རྟོག་པ་ཡལ་བའི་རྒྱུ་ངོ་ཤེས་པས་ཆོས་ཉིད་སྤང་བླང་དང་བྲལ་བར་ངོ་སྤྲད་པས། འགྱུ་བ་ཐ་དད་པ་བཅོམ་ལ། ཡུལ་དུས་ངོ་ཤེས་པས་ཆོས་ཉིད་ལ་འཕོ་འགྱུར་མེད་པར་ངོ་སྤྲད་པས་རྟོག་པ་བདག་ཏུ་བཅིངས་པ་བཅོམ་ལ། ཡལ་ས་ངོ་ཤེས་པས་ཆོས་ཉིད་རྒྱུ་རྐྱེན་ལས་འདས་པར་ངོ་སྤྲད་པས། དྲན་བསམ་གྱི་འཁོར་ལོ་ཐམས་ཅད་ཆོས་ཉིད་ཀྱི་ངང་དུ་ནུབ་པས་ན་བཅོམ་ཞེས་བྱའོ། །དེ་ལྟར་བཅོམ་པས་གནད་ཤེས་པ་ཙམ་གྱིས་ཆོས་ཉིད་མ་ཐོག་ཏུ་གྲོལ་བས། ལུས་ངག་ཡིད་གསུམ་ངང་གདངས་རང་བཞིན་བདག་ཉིད་ཆེན་པོ་གསུམ་དང་ལྡན་པས་ན་ལྡན་ཞེས་བྱའོ། །དེ་ལྟར་ལྡན་པའི་འགྲོ་བའི་ལུས་ངག་ཡིད་གསུམ་ལས་འདས་པས་ན་འདས་ཞེས་བྱའོ། །རང་ནི་གཞན་གྱི་སྤྲོས་པ་བཅད་པས་ཆོས་ཉིད་རང་ཐོག་ནས་གྲོལ་བས་ཡིད་ཆེས་པའོ། །གྲོལ་ཞེས་པ་གནད་ཤེས་པས་གྲོལ་བ་ནི། ཏི་པ་རིའི་བུ་ལག་བཟང་གི་ལས་ཀྱི་མཐའ་ལས་གྲོལ་བ་ལྟར་གྲོལ་བ་དང་། གནད་དེ་མཐོང་བ་ཙམ་གྱིས་གྲོལ་བ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ངོ་ཤེས་པས་ཐག་ཆོད་པ་ལྟ་བུའོ། །གནད་དེ་རང་ཐོག་ཏུ་གྲོལ་བ་ནི་སྦྲུལ་གྱི་མདུད་པ་མ་བཤིགས་པར་རང་གྲོལ་བ་ལྟ་བུའོ། །དེ་ལྟ་བུའི་དོན་དེའི་གོང་ན་གཞན་གང་གིས་ཐབས་གདའ་བ་མེད་པས་ཆེན་པོ་ཞེས་བྱའོ། །བདེ་བ་ནི་ཕྱི་སྣང་བའི་བདེ་བས་རྐྱེན་ངན་ཐམས་ཅད་གྲོགས་སུ་ཤར་ལ། ནང་ལུས་ཀྱི་བདེ་བས་སྡུག་བསྔལ་ཐམས་ཅད་ཆོས་ཉིད་དུ་ཤེས་པའོ། །གསང་བ་སེམས་ཀྱི་བདེ་བས་སེམས་རང་དག་རང་གྲོལ་བས་འགྱུ་བ་རང་སར་གྲོལ་བས་རྣམ་རྟོག་ཡེ་ཤེས་སུ་སྡང་པའོ། །དཔལ་ནི་སྟོང་པ་ཆོས་དབྱིངས་སུ་ཤར་བས་དྲན་བསམ་སེམས་ཀྱི་དཔལ་དུ་བྱུང་བ་དང་། སྣང་ཤེས་རྒྱན་དང་ཁ་དོག་ཏུ་ཤར་བས་སྣང་རྟགས་སེམས་ཀྱི་དཔལ་དུ་བྱུང་བའོ། །དེ་ལྟ་བུའི་ངང་ལས་མ་གཡོས་པས། ཕྱག་སྐྱེ་མེད་རང་གྲོལ་བ་ཉིད་ལ་ཉིད་བཙལ་བས། སྣང་ཤེས་ཀྱི་བདག་ཏུ་འཛིན་པ་ལས་གྲོལ་བ་དེའི་ཕྱིར་ན་ཕྱག་འཚལ་ལོ། །ཞེས་ཆོས་ཉིད་དོན་ལ་བྱས་པའོ། །ད་ནི་གཞུང་དངོས་ལ་དུམ་བུ་དྲུག་ལས། དུམ་བུ་དང་པོ་བསྡུས་པའི་ཚིག་དྲུག་ལ་བརྟེན་ནས་བསམ་པ་ངོས་བཟུང་བར་བསྟན་པ་ལ་བསྡུས་པའི་དོན་དྲུག་སྟེ། ཀླད་དུ་མཆོད་པར་བརྗོད་ཅིང་བཤད་པར་དམ་བཅའ་བ་བསྟན་པ་དང་། གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་དང་། གསུམ་པ་ལུས་སེམས་ཀྱི་འབྲེལ་བ་བརྟགས་པས་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་དང་། བཞི་པ་ཡེ་ཤེས་ལ་སོགས་པ་གཏད་པའི་མཚན་ཉིད་ལ་བརྟེན་ནས་འཁོར་འདས་འགོག་པའི་ལུགས་བསྟན་པ་དང་། ལྔ་པ་ཐབས་ཀྱི་འཇུག་པ་ཁྱད་པར་ཅན་བླ་མ་དྲིན་ལྡན་ལ་བརྟེན་ནས་བསྡུ་བར་བསྟན་པ་དང་། དྲུག་པ་ཡལ་ས་དུས་ཀྱི་གནད་ལ་བརྟེན་ནས་ཆོས་ཉིད་ལྟ་སྒོམ་ཡིད་ལ་བྱེད་པ་ལས་འདས་པར་བསྟན་པའོ། །དེ་ཡང་ཀླད་དོན་མཆོད་པར་བརྗོད་ཅིང་བཤད་པར་དམ་བཅའ་བར་བསྟན་པ་ལ་ནང་དོན་གཉིས་ཏེ། མི་འགལ་བའི་ཁུངས་གསལ་བར་བསྟན་པས་སྟོན་པ་ལ་ཁྱད་པར་གྱིས་མཆོད་བརྗོད་པ་བསྟན་པ་ནི། འགྲོ་རྣམས་མ་རིག་ཚོགས་བཅོམ་རང་བྱུང་དཔལ། །ཅེས་པ་ལ་སོགས་པས་བསྟན་ཏེ། དེ་ཡང་འགྲོ་བ་ནི། དང་པོ་ཁམས་གསུམ་དུ་འཇུག་པ་ཕེན་པ་ལས་ཀྱི་རླུང་མ་དག་པ་ལས་བྱུང་བས་ནི། ད་ལྟ་ལུས་ཇི་སྲིད་གནས་ཀྱི་བར་ལ་ཡང་རླུང་གིས་བཏེགས་ནས་འགྲོ་ལ། ཕྱིས་ཀྱང་རླུང་སེམས་ཀྱི་འབྲེལ་གྱིས་འགྲོ་བས་ནི། འགྲོ་ཞེས་བྱ་ལ། རྣམས་ནི་ལྷ་ལ་སོགས་པའོ། །དེ་ཡང་ལྷ་རྣམས་མ་རིག་པ་ང་རྒྱལ་དང་བཅས་པས་འཁྲུལ་ལ། ལྷ་མིན་མ་རིག་པ་ཕྲག་དོག་དང་བཅས་པས་འཁྲུལ་ལ། མི་རྣམས་ཁོང་ཁྲོ་རྒྱུ་རྐྱེན་དང་བཅས་པས་འཁྲུལ་ལོ། །བྱོལ་སོང་རྣམས་གཏི་མུག་གིས་མ་རིག་པའི་རྐྱེན་བྱས་ནས་འཁྲུལ། ཡི་དྭགས་རྣམས་འདོད་ཆགས་ཀྱིས་མ་རིག་པའི་རྐྱེན་བྱས་ནས་འཁྲུལ་ལ། དམྱལ་བ་ཞེས་སྡང་གིས་རྐྱེན་བྱས་ནས་འཁྲུལ་ལོ། །དེ་ལྟར་ན་འགྲོ་བ་དྲུག་གི་མ་རིག་པ་རྐྱེན་དང་བཅས་པའི་ཚོགས། ཕྱི་གདུལ་བྱ་ལ་དགོངས་ནས་བཅོམ་པས་རང་བྱུང་གི་ཡེ་ཤེས་རང་ཤར་དུ་ཤར་བས། ཕྱི་ནང་འཁོར་འདས་ཡོངས་ལ་མི་གནས་པས་དཔལ་ལོ། །རྒྱུད་ནི་གསང་བ་ཆེན་པོའི་རྒྱུད་བཅུ་བདུན་གྱི་སྟོན་པ་དྲུག་པ་རྡོ་རྗེ་འཆང་ཆེན་པོ་དེས། འགྲོ་བ་གོང་མ་རྣམས་ཀྱི་བླ་མ་ཡིན་ལ། ཁྱད་པར་དུ་སློབ་དཔོན་དགའ་རབ་རྡོ་རྗེ་ཉིད་ཀྱི་བླ་མ་ཡིན་པས་ན། སྐྱེ་བ་བཞིའི་ལུས་སུ་བླངས་ཏེ། རྗེས་སུ་འབྲངས་པའི་དགོངས་པའི་དོན་བསྡུས་པ་དང་། དུས་གསུམ་གྱི་སངས་རྒྱས་རྣམས་ཀྱི་བཀའ་སྡེ་སྣོད་རིན་པོ་ཆེ་གསུམ་དང་ཡང་མི་འགལ་བར་དོན་གནད་ཤེས་པའམ་མ་ཐོང་བ་ཙམ་གྱིས་གྲོལ་བ་ཉིད་ཀྱི་དེབས། རྟོག་པ་རང་གྲོལ་བའི་ཆོས་ཉིད་ཀྱི་གཞི། སེམས་ནི་ཡོད་པ་དང་། མེད་པ་དང་། སྣང་བ་དང་། མི་སྣང་བ་དང་། སྟོང་པ་དང་། ཟད་པ་དང་། ཡལ་བའི་གནད་ཤེས་པས་གྲོལ་བ་ནི། གོམས་མི་དགོས་པ་རང་ཐོག་ཏུ་གྲོལ་བ་དང་། བསླབ་མི་དགོས་པས་བསྟན་པ་ཙམ་གྱིས་གྲོལ། རང་གི་གནད་ནི། ཆོས་ཉིད་སྔ་མ་ལ་གཞི་བཅས་པ་དང་། ཕྱི་མ་ལ་འབེན་བྱས་པ་དང་། ད་ལྟ་ཡུལ་བཙལ་བས་ཤེས་པའོ། །ཞེས་དང་པོ་མི་འགལ་བའི་ཁུངས་གསལ་བར་བྱས་ནས་སྟོན་པ་ལ་ཁྱད་པར་གྱིས་མཆོད་པར་བརྗོད་པ་བསྟན་ནས། ད་ནི་གཉིས་པ་བཤད་པར་དམ་བཅའ་བ་དངོས་མན་ངག་དང་བཅས་པར་བསྟན་པ་ནི། ཁམས་གསུམ་དོང་ནས་སྤྲུག་སྟེ་ལ་སོགས་པས་བསྟན་ཏེ། དེ་ཡང་མན་ངག་གི་སྐབས་སུ་དང་པོ་ལུས་ངག་ཡིད་ཀྱི་རྒྱུ་རྐྱེན་བརྟགས་པས། ཁམས་གསུམ་གྱི་རྩ་བ་སྟོངས་པར་བྱེད་པ་སྟེ། དེ་ཡང་ལུས་ཀྱི་འཕེན་པ་མ་དག་པ་ལས་གཟུགས་ཁམས་སུ་འཁྲིད་པ་དང་། ངག་གིས་འདོད་ཁམས་དང་། སེམས་ཀྱིས་གཟུགས་མེད་ཁམས་སུ་འཁྲིད་པར་བྱེད་པ་ནི། ཐོག་མར་ལུས་སེམས་ཀྱི་རྒྱུ་རྐྱེན་ལ་བརྟགས་པས་མེད་པར་ཤེས་པས་དོང་སྤྲུག་སྟེ་མི་ལྡོག་པའི་གནད་དོ། །དེ་ལྟར་ལུས་སེམས་ཀྱི་འབྲེལ་བ་མེད་པར་ཤེས་པས། ད་འགྱུ་བ་དང་རྟོག་པ་ཐ་དད་པ་རྣམས་གློ་བུར་གྱི་རྟོག་པ་ཡིན་པས། དེ་ཉིད་ཡལ་བའི་གནད། རྒྱུད་ཀྱི་སྟོན་པའི་གསུང་ཚིག་དང་ཡི་གེར་བཀོད་པ་ལ་བརྟེན་ནས་འཁོར་བའི་ཆོས་ལ་མི་གནས་པའི་སྐྱེས་བུ་ལ་བཤད་པར་བྱའོ། །ཞེས་ཞལ་གྱིས་བཞེས་པའོ། །དེ་ཡང་མཚོན་པ་ཙམ་ལས་ཡང་དག་པའི་ཚིག་གི་སྤོས་པ་ལ་མ་བརྟེན་པར་ཁམས་གསུམ་དུ་ཕྱིས་ལོག་པ་མེད་པའི་རང་སྟོབས་ཀྱིས་སངས་རྒྱ་བར་བྱེད་པའོ། །ཐེག་པ་ཐུན་མོང་བ་ཀུན་གྱིས་གནད་དེ་མ་རྟོགས་པས་ཡིད་དཔྱོད་ཀྱི་ལྟ་བ་ནི། གནད་དེ་མཐོང་བ་ཉིད་ཀྱི་དོན་འདིར། དཔེར་ན་མུན་པའི་ནང་དུ་སྒྲོན་མེ་བཏེག་པས་དངོས་པོ་ཇི་ལྟར་ཡོད་པ་མཐོང་བ་བཞིན་དུ། གནད་དེ་ཤེས་པའམ། མཐོང་བ་ཙམ་གྱིས་གྲོལ་བའི་གནད་འདི་ནི། སེམས་ཀྱི་དམིགས་དྲུག་ལ་བརྟེན་ནས་བདག་གིས་བཤད་པར་བྱའོ། །ཞེས་དམ་བཅས་པའོ། །ཞེས་དེ་དག་གི་སྤྱི་དོན་དང་པོ་ཀླད་དོན་མཆོད་པར་བརྗོད་ཅིང་བཤད་པར་དམ་བཅའ་བ་གཉིས་སུ་བྱས་ནས་བསྟན་ཏོ། །ད་ནི་བསྡུས་པའི་དོན་གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ་དངོས་པོ་ལུས་ཀྱི་འབྲེལ་བ་བཅད་པས་གཟུགས་ཀྱི་ཁམས་ལས་གྲོལ་བར་བསྟན་པ་ནི་ལུས་ངག་ཡིད་ཀྱི་གཞི་བཅས་པས། །ཞེས་པ་ལ་སོགས་པས་བསྟན་ཏེ། ལུས་ཞེས་པ་འབྱུང་བ་ཕྲ་བ། རྡུལ་ཕྲ་རབ་ལས་གྲུབ་པས་རགས་པ་གཟུགས་ཀྱི་ཕུང་པོ། འབྲུའི་ཕུང་པོ་སྤུངས་པ་ལྟ་བུ་སྣ་ཚོགས་པར་འགྲུབ་པས། དེའི་མཚན་ཉིད་སྟོངས་པར་བྱེད་པ་ལ་ལུས་དང་སེམས་ཀྱི་འབྲེལ་བཤིག་པའི་ཆོ་ག་ལ་བརྟེན་ནས་ཆོས་ཉིད་ཀྱི་བྱུང་ས་བཙལ་ལོ། །ངག་ནི་སྒྲའི་འཇུག་པ་ལ་བརྟེན་ནས་ཨཱ་ལི་ཀཱ་ལིའི་འགྲེལ་སྣ་ཚོགས་པར་བསྒྱུར་བས། ཚིག་གི་སྤྲོོས་པ་ཐ་དད་པ་ལ་འཇུག་པས། དེ་ཉིད་རྟོགས་པས་འགྲེལ་བར་སྦྱོར་བ་སྟེ། དེ་ཉིད་སྟོང་པར་བྱེད་པ་ལ་སྨྲ་བ་བཅད་པས་བརྗོད་པའི་འཁྲུལ་འཁོར་གྱི་ཁང་བུ་གཞིག་པའི་ཆོ་ག་ལ་བརྟེན་ནས། བརྗོད་མེད་ཀྱི་དོན་རྒྱུད་ལ་སྐྱེ་བའི་ཐབས་དང་། ཡིད་ཀྱིས་ནི་རྣམ་པ་མེད་པ་ལ་འཇུག་པ་ཀུན་ལ་འཇུག་པ་ལ། རྒྱུ་མཚན་བརྟགས་ན་མ་རྙེད་པ། འགྱུ་བ་དྲན་བསམ་གྱི་འཁོར་ལོ་གློ་བུར་གྱི་རྟོག་པ་བྱེ་བྲག་པ་རྣམས་སུ་བྱུང་བ་སྟེ། དེའི་མཚན་ཉིད་སྟོངས་པར་བྱེད་པ་ལ། ཡལ་ས་ཆོས་ཉིད་ཀྱི་གནས་ས་འགྱུས་ས་ཐ་དད་པ་གློ་བུར་གྱི་ཁང་བུ་གཞིག་པའི་ཆོ་ག་ལ་བརྟེན་ནས་རྣམ་རྟོག་གི་གཞི་སྟོངས་པར་བྱེད་པའོ། །གཞི་བཅས་པས་ཞེས་པ་ནི། དེ་དག་གི་ཁང་བུ་གཞིག་པའི་ཆོ་ག་ལ་བརྟེན་པས་ཁམས་གསུམ་གྱི་ཁུངས་སྟོར་བར་བྱེད་པའོ། །ཁམས་ནི་འདུས་ཤིང་ཚོགས་པ་ཐ་དད་པ་ལ། གསུམ་ནི་གྲངས་ཏེ། འདོད་པ་འདོད་ཆགས་རང་རྒྱུད་པ་ལས་བྱུང་བ་དང་། གཟུགས་ནི་ཞེ་སྡང་རང་རྒྱུད་དུ་འཛིན་པ་ལས་བྱུང་བ་དང་། གཟུགས་མེད་ནི་གཏི་མུག་རང་རྒྱུད་དུ་འཛིན་པ་གསུམ་ནི། ལུས་ངག་ཡིད་ཀྱིས་ཁྲིད་པས་སོ། །གཏིང་ནི་ལས་དང་བག་ཆགས་ལས་གྲུབ་པ། ཟློག་པར་འདོད་པའི་གང་ཟག་དད་པ་ཅན། རང་བཞིན་རྫོགས་པ་ཆེན་པོའི་སྐལ་བ་ཡོད་པ། བརྩོན་འགྲུས་དང་ལྡན་པ་ཞིག་གིས། ལུས་འབྱུང་བའི་ཟག་པ་སྟོངས་པར་འདོད་པ་ཡིས། རང་བཞིན་དུ་གནས་པའི་སེམས་མ་བཅོས་པ་ལས་འབྱུང་བ་ལུས་ཀྱི་ལྟོས་གཞི་རྡུལ་ཕྲ་རབ་ལ་རང་རྒྱུད་དུ་འཛིན་པ་དང་བྲལ་བས། འབྲེལ་བ་རྐྱེན་གྱི་དངོས་པོ་སྟོངས་པས། དེ་ཡང་དང་པོ་རྒྱུ་ཡིས་བསྐྱེད་པའི་གནད་རིག་པས་ཐ་མལ་རྐྱེན་གྱིས་མི་ཤིགས་ཏེ། དེ་ཉིད་སྟོང་པའི་རང་བཞིན་དུ་གོ་བས། དང་པོ་རྒྱུ་ལས་མ་བྱུང་བས་འབྲས་བུ་ལ་ལྡོག་པ་མེད། ཐ་མ་རྐྱེན་གྱིས་མི་ཤིགས་པས་ཆོས་ཉིད་ལ་སྐྱེ་བ་མེད་པའི་གནད། དེ་ལྟར་རྒྱུ་རྐྱེན་མེད་པའི་ལུས་སུ་བརྟགས་པས་དེ་ཉིད་དུ་ཤེས་པའི། དེའི་འདུ་བ་རྟོག་པ་ནི་ཁང་བུ་བཤིག་པས། གཟུགས་ཁ་དོག་གི་བྱེ་བྲག་དང་། དབྱིབས་སྣ་ཚོགས་པ་དང་། ལུས་ཀྱི་བྱེ་བྲག་གི་རྣམ་པ་མང་པོ་འདུས་པ་ལས་ཁམས་ཏེ། དེ་ཉིད་དུ་སུ་ཞིག་འགྲོ་བར་མི་འདོད་པས། ལུས་ཀྱི་རྒྱུ་རྐྱེན་ལ་བརྟགས་པས་འཇུག་པ་ཡིན་ནོ། །དེ་ཅིའི་ཕྱིར་ན། གཞི་མེད་པས་ལྡོག་པ་མེད་ལ། རྩ་བ་མེད་པའི་གནད་ཀྱིས་འཁོར་མི་སྲིད་པས་ན། མ་སྤངས་རང་བྱུང་གི་ཡེ་ཤེས་ཀྱི་རོལ་པ་ཕྱོགས་མེད་དུ་ཤར་བ་ཞེས་བྱའོ། །ཞེས་ཡན་ལག་གི་དོན་དང་པོ་དངོས་པོ་ལུས་ཀྱི་འབྲེལ་པ་བཅད་པས་གཟུགས་ཀྱི་ཁམས་ལས་གྲོལ་བར་བསྟན་ནས། ད་ནི་གཉིས་པ་གྲགས་པ་ངག་གི་འབྲེལ་པ་བཅད་པའི་གནད་ལ་བརྟེན་ནས་འདོད་པའི་ཁམས་ལས་གྲོལ་བར་བསྟན་པ་ནི། ངག་ནི་དང་པོ་བརྗོད་པའི་རྒྱུ་མེད་པས་ཚིག་གི་གཞི་སྟོངས་པས། བརྗོད་པ་སྒོས་འབྲེལ་གྱི་བརྟེན་པ་རང་འགགས། ཞེ་འདོད་ཚིག་གི་ཞེན་པ་ལས་གྲོལ་བར་འདོད་པས། རང་རྒྱུད་ལ་མི་གནས་པའི་ཆོས་ཉིད་ཀྱི་བཞིན་སྣང་རྐྱེན་སྣ་ཚོགས་ལ་ཤར་བས། བརྗོད་བྱ་སེམས་ཀྱི་གཞི་ལ་ཐིམ་པས། ལས་དང་བག་ཆགས་ཀྱི་སྡེབས་ཟད་པས་སོ། །དེ་ལྟར་ན་ངག་མེད་པའི་མཚན་རྟོགས་པས་བརྗོད་པ་ཚིག་ཙམ་དུ་མི་རྟོགས་ལ། དེའི་རང་བཞིན་ལ་རྒྱུ་མེད་པས་ལྡོག་པའི་རྟེན་ཉམས། རྐྱེན་ཟློག་བྱེད་བློའི་འགྱུ་བ་ཡལ་བའོ། །དེའི་ཕྱིར་ན་ངག་བརྗོད་པའི་འབྲས་བུ་ཚིག་གི་མཚན་ཉིད་བརྗོད་བྱ་དང་རྗོད་བྱེད་གང་གིས་ཀྱང་མི་ཤེས་པས་ན་སྐྱེས་བུ་འདིས་ནི་འདོད་པའི་ཚིག་གི་སྒྲོ་འདོགས་རྟོག་དཔྱོད་བློ་དང་བཅས་པ། ཁམས་ཚོགས་པ་རྣམས་ཡེ་ནས་སྟོངས་པས། ལྡོག་པ་མེད་པ་ནམ་མཁའ་ལ་རྫས་དོར་བ་ལྟ་བུ་དང་། དེ་ལྟ་བུའི་ཡེ་ཤེས་ཀྱི་ངང་མ་བཅོས་པ་ལས་གནས་པ་ནི། དཔེར་ན་ཆུ་བོའི་རྒྱུན་སྔ་མའི་སར་ཕྱི་མ་མི་ལྡོག་པ་དང་འདྲའོ། །དེ་གང་ལས་བྱུང་ན་ངག་གི་རྒྱུ་རྐྱེན་ཡེ་ནས་མེད་པའི་མཚན་ཉིད་ཤེས་པ་ལས་བྱུང་བའོ། །ཞེས་གཉིས་པ་གྲགས་པ་ངག་གི་འབྲེལ་པ་བཅས་པའི་གནད་ལ་བརྟེན་ནས་འདོད་པའི་ཁམས་ལས་གྲོལ་བར་བསྟན་ནས། ད་ནི་གསུམ་པ་ཡིད་ཀྱི་འགྱུ་བ་དྲན་བསམ་གྱི་འཁོར་ལོ་སྣ་ཚོགས་པའི་འབྲེལ་པ་བཅད་པའི་གནད་ལ་བརྟེན་ནས་གཟུགས་མེད་པའི་ཁམས་ལས་གྲོལ་བར་བསྟན་པ་ནི། ཡིད་སྟོང་པར་བྱེད་པའི་གནས་སྐབས་ཞེས་པ་ལ་སོགས་པས་བསྟན་ཏེ། ཡིད་ནི་འཇུག་པ་ཡན་ལག་དང་བཅས་པས། མེད་པ་ལ་འཇུག་ཅིང་ཡོད་པའི་མཚན་ཉིད་གཏན་ལ་མི་ཕེབས་པས་ཏེ། དེ་སྟོངས་པར་འདོད་པའི་དད་པ་ཅན་གྱིས་ནི། རབ་ཏུ་དབེན་པའི་ས་ཕྱོགས་སུ་ཕྱིན་ལ། གནས་སྐབས་ཀྱི་སེམས་ལས་མ་རྟོགས་པའི་དྲན་རིག་ཡོད་མི་སྲིད་པས། དེ་ཡང་འགྱུ་བ་སྔ་མ་ཕྱི་མ་ལྡོག་པ་དང་། ཕྱི་མ་སྔ་མ་ལ་ལྡོག་པའི་དུས་སུ་རྒྱུ་འགག་རྐྱེན་རང་ཡལ་བའི་མཚམས་སུ་ཤེས་པར་བྱའོ། །དེ་ལ་འབྲས་བུ་རྟོག་པ་གློ་བུར་བ་བྱུང་བའི་ས་མ་རྙེད་པས། དེ་ལ་བརྟགས་པས་གནས་པའི་ས་སྟོར་བ་ནི་ཆོས་ཉིད་རྙེད་པའོ། །དེ་ལས་རླུང་ཕྱི་ནང་དུ་འགྲོ་བའི་རང་བཞིན་མེད་པར་ཤེས་པས། གཟུགས་མེད་པའི་ཁམས་ཀྱི་གཞི་རྣམ་པར་ཤེས་ཙམ་ལ་ཡང་བདག་ཏུ་འཛིན་པ་སྟོངས་པས་རྒྱུ་རྐྱེན་གང་ལ་ཡང་ལྡོག་པ་མེད་པའི་ཡེ་ཤེས་ནི། རྒྱུ་དང་མཚན་ཉིད་འདི་འདྲ་ཞེས་བྲལ་བས་མེད་པའི་སྣང་བ་ཉིད་ལས་གཞན་མེད་དོ། །དེ་ཡང་གནད་ཤེས་པ་ཙམ་ལས་བྱུང་བའོ། །དེ་ལྟར་ལུས་ངག་ཡིད་ཀྱི་གཞི་མ་རྙེད་པས། ཁམས་གསུམ་ལ་རྒྱུན་དུ་གཞི་འཛིན་པ་ལ་རྩལ་མེད་པའི་ཕྱིར་གནད་ཁྱད་པར་དང་ལྡན་པའི་འགྲོ་བ་དེ་ཉིད། རྟོགས་པ་ཡིན་པས་ན་ཁམས་གསུམ་དུ་སྣང་བའི་གཞི་སྟོངས་པས་འགྲོ་བ་དྲུག་གི་གཟུགས་བརྙན་རྒྱུན་ཆད་པའོ། །དེ་ཡང་གང་བྱུང་ཞེ་ན། དེ་ཡང་དང་པོ་ལུས་ངག་བཅོས་པའི་བསླབ་བྱ་ལ་བརྟེན་ནས་སེམས་ཉིད་དུ་གཞུག་པའི་དཔེ་སྲིན་མོ་བུ་སྟོར་བ་ལྟ་བུའི་བསླབ་བྱ་སྟེ། དེ་ལ་སྲིན་མོ་གཡོ་བར་བྱེད་པ་ཞེས་བྱ་བའི་བུ་ཕས་བསད་པས། ཕ་སྲིན་པོ་ལངྐ་ཁ་དགུ་ཞེས་བྱ་བས། བུ་སྟོར་བ་ཡིན་བྱས་པས། མས་སྟོར་བར་ཚོར་ནས། གླིང་བཞི་རི་རབ་དང་བཅས་པ་ལན་གསུམ་དུ་བསྐོར་ཞིང་བཙལ་བས་མ་རྙེད་པས་ཁོ་ཐག་ཆོད་ཅིང་བློ་བདེ་བ་དང་འདྲ་བར། ལུས་ངག་ཡིད་རྒྱུ་རྐྱེན་ལས་འདས་པར་ངོ་ཤེས་པས། ཁམས་གསུམ་དུ་མི་ལྡོག་པར་ཁོ་ཐག་ཆོད་པས་བློ་བདེ་བའོ། །དཔེ་དང་བཅས་པས་ལུས་ངག་ཡིད་ཀྱི་རྒྱུ་རང་འགགས་པས་རྐྱེན་རང་ཡལ་བས་ཁམས་གསུམ་འགག་པར་ཤེས་པ་ནི། སེམས་ཉིད་མེད་པའི་དོན་རང་ལ་སྣང་བ་ཟད་པས་རྟོག་པ་ལས་འདས་པ་གོ་བ་ལས་བྱུང་བའོ། །ཞེས་བསྡུས་པའི་དོན་གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་ལ་ནང་དོན་གསུམ་དུ་བཅས་ནས་བསྟན་ནོ། །ད་ནི་བསྡུས་པའི་དོན་གསུམ་པ་ལུས་སེམས་ཀྱི་འབྲེལ་པ་བརྟགས་པས་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་ལ་ཡན་ལག་གི་དོན་གསུམ་གྱི་བསྟན་པའི་དང་པོ་ལུས་ངག་ཡིད་རང་གྲོལ་དུ་འགྲོ་བའི་གནད་ཆོས་ཉིད་ལ་ཕྱུགས་པ་མེད་པར་བསྟན་པ་ནི། དེ་ཉིད་ལས་འགག་པ་དང་ཞེས་པ་ལ་སོགས་པས་བསྟན་ནོ། །དེ་ཉིད་ནི་ལུས་ངག་ཡིད་ཀྱི་གཞི་མ་རྙེད་པ་ལ། འགག་པ་དང་ཞེས་དབུགས་ཕྱི་ནང་དུ་འགྱུ་བའི་ལམ་ཟད་པའོ། །གནས་པ་དང་ཞེས་པ་དེ་ཟད་པས་སེམས་རང་བཞིན་གྱི་གནས་པའོ། །དེ་གནས་པས་འགྱུ་བ་རྣམས་རང་སར་ཡལ་བ་དང་། དེ་ཡལ་བས་དྲན་པའི་ཁུངས་འགགས་པ་དང་། དེ་འགགས་པར་བྱུང་ཚོར་གྱི་རྟོག་པ་བསད་པ་དང་། དེ་བསད་པས་དྲན་བསམ་གྱི་འཁོར་ལོ་དུས་གཅིག་ལ་སོད་པའོ། །དེ་སོད་པས་ཆོས་ཉིད་རང་ལ་སྐྱེ་བ་དང་། དེ་སྐྱེས་པས་འཁོར་འདས་དུས་གཅིག་ལ་སྟོངས་པ་དང་། དེ་གཉིས་སྟོངས་པ་སྣང་བ་འཆར་བའི་དུས་ངོ་ཤེས་པ་དང་། དེ་ཤེས་པ་དང་འཁྲུལ་པ་འགགས་པ་དུས་མཉམ་མོ། །དེ་ཡང་རྒྱུ་འགགས་པ་དང་རྐྱེན་ཡལ་བ་ལ་མཁས་པ་ནི། དྲན་བསམ་གྱི་འགྱུ་བ་གློ་བུར་བར་ཤེས་པ་ལས། ནང་བདེ་བས་བདག་ཏུ་མ་བཅིངས། ཕྱི་སྡུག་པས་ཉམས་སུ་མ་མྱངས་བར་ཆ་རང་ངོ་སྟོང་བར་སྙོམས་པས། ལུས་ཀྱི་རྩ་བ་རྡུལ་ཕྲ་རབ་ཀྱི་རྩ་བ་ཆད། ངག་གི་རྩ་བ་གྲགས་པ་སྒྲ་ཙམ་དུ་འཛིན་པ་རང་ཟད། ཡིད་ཀྱི་རྩ་བ་འགྱུ་བ་ཐོད་རྒལ་བ་རྣམས་རང་ཡལ་བས་ན། ཕྲ་སར་ཕྲ་ལ། ཟད་སར་ཟད་ལ། ཡལ་སར་ཡལ་བས། དེ་ལས་གྲོལ་བའི་རྣལ་འབྱོར་པ་ཞེས་བྱའོ། །ཞེས་ནང་དོན་དང་པོ་ལུས་ངག་ཡིད་རང་གྲོལ་ལ་འགྲོ་བའི་གནད་ཆོས་ཉིད་ལ་འཕྱུགས་པ་མེད་པར་བསྟན་ནས། ད་ནི་ནང་དོན་གཉིས་པ་རླུང་གི་འཕེན་པ་ལ་བརྟེན་ནས་དྲན་རིག་གི་ཡལ་ས་ངོས་བཟུང་བར་བསྟན་པ་ནི། དེ་ཡང་ལུས་སེམས་ལ་བརྟགས་པས་དེ་ལ་དཔྱད་པར་བྱ་བའི་གཞི་མ་རྙེད་པའི་རྒྱུ་སྟོང་པ། རྐྱེན་ཡལ་བ། བརྗོད་པ་མིང་གི་རྣམ་གྲངས་ལས་མ་རྟོགས་པའི་རྣམ་པ་མི་རྙེད་པ་ན། བཏགས་པ་མིང་ཡིན་གྱི་གཏན་ཚིགས་ཀྱིས་གཞིག་པས། གང་དུ་ཡང་མ་གྲུབ་པས་སོ། །དེ་ཡང་ལུས་བདེ་ལུགས་སུ་བཞག་ནས། རླུང་དལ་བའི་འཕེན་པ་ཕྱིར་ལ་དལ་གྱིས་ཕུལ་བ་ལས་ཤེས་པ་རང་སར་ཡལ་བ་དེ་ཀ་ནི་ཆོས་ཉིད་དོ། །དེ་ཡང་ཡལ་བའི་དུས་ནི་ཕྱིར་འཕངས་པ་ཙམ་གྱི་ཡལ་བའོ། །དེ་ཡང་དཔེར་ན་རྒྱ་མཚོ་ཆེན་པོའི་རླང་ཡལ་བ་ལྟ་བུ་ལ་ཤེས་པ་བཞག་པས། རྣམ་རྟོག་རྣམས་ལས་གྲོལ་བ་ནི། དཔལ་རྡོ་རྗེ་འཆང་ཐུགས་རྗེ་ཆེན་པོ་དང་ལྡན་པ་དགའ་རབ་རྡོ་རྗེའི་མགོན་པོ་ཡིན་པས་ན་གང་གིས་ཀྱང་མ་བསླད་པའི་ཆོས་ཉིད་མཁྱེན་པ་ཡེ་ཤེས་སུ་ཤར་བའི་དོན་དེ་ལས་ཀྱང་ཁྱད་པར་དུ་སོང་སར་སོང་བས་ཡལ་སར་ཡལ་བ་ཞེས་པའི་དོན། ངས་དགའ་རབ་རྡོ་རྗེས་རིག་གོ་ཞེས་འགྲོ་བ་སྣོད་དང་ལྡན་པ་ལ་གདམས་པའོ། །ཞེས་ནང་དོན་གཉིས་པ་རླུང་གི་འཕེན་པ་ལ་བརྟེན་ནས། དྲན་རིག་ཡལ་ས་ངོས་བཟུང་བར་བསྟན་ནས། ད་ནི་སེམས་ཀྱི་དམིགས་དང་པོའི་བསྡུས་དོན་གསུམ་པའི་ནང་དོན་གསུམ་པ་གཞི་ལ་མ་སྟོངས་པས་འཁོར་འདས་ལ་བཟླ་བར་བསྟན་པ་ནི། འདས་པའི་འགྱུ་བ་དང་ཞེས་པ་ལ་སོགས་པས་བསྟན་ཏེ། འདས་པའི་ཞེས་པ་ནི་དུས་འདས་པ་མ་ཡིན་གྱི་གེགས་བསལ་བ་ལ། འདིར་གང་ཟག་གཅིག་གི་རླུང་སྔ་མའི་འགྱུ་བ་ལ་ཆོས་ཉིད་ཀྱི་རྗེས་བཅད་པས་བསམ་པའི་ཁོག་སྟོངས་པར་ཤེས་པས། སྔ་མ་སྐྱེས་མ་མྱོང་བའི་གནད་དང་། འགྱུ་བ་དང་ཞེས་པ་ནི་རླུང་ཟད་པས་རྟོག་པའི་ཁུངས་འགགས་ལ། དེ་ཉིད་ཝལ་པོ་རྗེས་མེད་དུ་ཤེས་པ་ཆུ་ལ་རི་མོ་བྲིས་པ་ལྟ་བུའོ། །མ་འོངས་པ་ཞེས་པ་ནི་དེ་ལྟ་བུའི་ཆོས་ཉིད་དེ་གང་ནས་ཀྱང་མ་འོངས་ལ། གར་ཡང་གནས་པ་ལས་འགྱུར་བ་མེད་དོ། །དེ་ཡང་རླུང་འོག་མའི་སྣ་སྟེབས་པས། དྲན་པ་རྒྱུན་ཆད། ཡེ་ཤེས་མཁའ་ལ་གསལ་བའོ། །ད་ལྟ་ཞེས་པ་རང་ངོ་རང་ཐོག་ཏུ་སྤྲད་པ་སྟེ། རླུང་དལ་བུས་བདས་པས་འགྱུས་པའི་ལྟོས་ཟད་ནས། རྟོག་པ་གློ་བུར་བ་སྟོངས་ཏེ། དེ་ཉིད་སྟོངས་པས་ལྡོག་པའི་རྒྱུ་རང་འགགས། ལྡོག་བྱེད་ཀྱི་རྐྱེན་དྲན་པ་རང་ཡལ་བའོ། །དེའི་ཕྱིར་ན་གཞི་སྟོངས་པས་ད་བཟློགས་མེད་པ་དང་། ལམ་ཟད་པས་འགྲོ་ས་མེད་པ་དང་། འབྲས་བུ་རྡུགས་པས་འཁོར་ས་མེད་པའི་ཕྱིར་ན། འཁོར་བ་སྣང་ཤེས་དང་། འདས་པ་སྐུ་དང་ཡེ་ཤེས་ཀྱི་མིང་མེད་པས། རང་གནས་ཅོག་བཞག་ཡིན་པས་བློ་བདེ་བའོ། །གཏན་ཚིགས་དེའི་ཕྱིར་རྒྱུ་མེད་པས་ལྡོག་ས་འཁོར་བ་ལ། སེམས་མེད་པར་ལ་བཟླ་བས། སེམས་ཀྱི་བྱུང་སའི་ཁུངས་ཡལ་བར་སྟོར་བས། ཡིད་ཀྱི་འགྲོ་སའི་གཏད་ཡལ་བ་ལ་ཆོས་ཉིད་ཅེས་བྱའོ། །ཞེས་དེ་དག་གིས་ནི་བསྡུས་དོན་གསུམ་པ་ལས་ཀྱི་འབྲེལ་པ་བརྟག་པ་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ།། །།ད་ནི་སེམས་ཀྱི་དམིགས་དང་པོའི་བསྡུས་པའི་དོན་བཞི་པ་ཡེ་ཤེས་ལོག་པའི་མཚན་ཉིད་ལ་བརྟེན་ནས་འཁོར་འདས་ལ་སོགས་པའི་ལོག་ལུགས་བསྟན་པ་ལ། མན་ངག་གི་དོན་གཉིས་ཀྱིས་བསྟན་པའི་དང་པོ་ཆོས་ཉིད་ཀྱི་ཡལ་ས་མེད་པའི་མཚན་ཉིད་འབྲེལ་པ་མེད་པ་དཔེ་དང་བཅས་པ་བསྟན་པ་ནི། ལོག་པའི་བར་ལས་ཡེ་ཤེས་ལམ་ཞེས་པ་ལ་སོགས་པས་བསྟན་ཏེ། ལོག་པའི་ཞེས་པས་འགྱུ་བ་ལོག་པས་དྲན་རིག་འགག་པ་དང་ལས་རླུང་ལོག་པས་གཟུང་འཛིན་འགགས་པའོ། །དེ་གཉིས་བར་ལས་ཡེ་ཤེས་ཀྱི་ལམ་རྩ་ནས་འབྱུང་བའི་དུས་དང་། ཚད་ཤེས་པར་བྱའོ། །ཞེས་པའོ། །དེ་ཡང་རླུང་ཕར་སོང་བ་དང་དེ་ལས་གཏད་མེད་པ་དང་། རླུང་ནང་དུ་གནས་པ་དང་འགྱུ་བ་བག་ལ་ཉལ་བ་དང་། རླུང་ཕྱིར་འབྱུང་བ་ལས་གློ་བུར་གྱི་འགྲོ་ས་ངོ་ཤེས་པའོ། །འདིའི་དུས་ན་བདག་ཏུ་འཛིན་པའི་སྟོང་པ་དང་། འགྱུ་བ་གཞན་ལ་འཇུག་པའི་འཁོར་ལོ་རྒྱུན་ཆད་པ་དང་། དེ་གཉིས་ཀ་ཆོས་ཉིད་དུ་གྲོལ་བར་ངོ་ཤེས་པ་ནི། ལུས་སེམས་བྲལ་བའི་དུས་ལ་མཁས་པས་ཏེ། དེ་ཤེས་པ་ཙམ་གྱིས་ཁམས་གསུམ་དུ་མི་ལྡོག་པའོ། །དེ་ལྟར་ན་སེམས་ཀྱི་དམིགས་དྲུག་ལ་བརྟེན་པའི་གནད་འདི་ཤེས་པའི་ཆོས་ཉིད་རྣལ་མ་ལ། རང་རིག་གནད་ཐོག་ཏུ་འབྱོར་བ་ནི། ལུས་ཀྱི་འཛིན་པ་དང་བྲལ་བས་རྡོས་བཅས་རང་དག་པ་དང་། ནང་ངག་གི་འཛིན་པ་དང་བྲལ་བས་འཁྲུལ་གཏམ་ཟུངས་ཟད་པ་དང་། གསང་བ་སེམས་ཀྱི་ཡིད་ཀྱི་འཛིན་པ་དང་བྲལ་བས་འགྱུ་བ་རང་སར་ཡལ་བས། ད་ལུས་སེམས་ཀྱི་འབྲེལ་ཆད་པ་ནི། དཔེར་ན་ཨརྫ་ཀའི་དོག་པ་ལྟར། ཕྱིས་གཅིག་ཏུ་མི་གནས་ཏེ། འབྲས་བུ་རྒྱུ་མེད་པས་རྐྱེན་གཅིག་ཏུ་མི་གནས་ཏེ་ལུས་སེམས་གཉིས་མཚན་ཉིད་མི་གཅིག་པའི་ཕྱིར་རོ། །ཞེས་དང་པོ་ཆོས་ཉིད་ཀྱི་ཡལ་ས་མེད་པའི་མཚན་ཉིད་འབྲེལ་པ་མེད་པ་དཔེ་དང་བཅས་པ་བསྟན་ནས། ད་ནི་ནང་དོན་གཉིས་པ་རྒྱུ་རྐྱེན་ལ་མི་གནས་པའི་སེམས་ཉིད་འཁོར་འདས་གང་དུ་ཡང་མ་གྲུབ་པར་བསྟན་པ་ནི། སྟོང་པ་རྒྱུ་ལ་ཡལ་བས་རྐྱེན་ཞེས་པ་ལ་སོགས་པས་བསྟན་ཏེ། དེ་ཡང་སེམས་ཀྱི་མཚན་ཉིད་སྟོང་པས། རྒྱུ་མེད་པར་ངོ་ཤེས་པ་ནི་ཐག་སྣང་བ་ལ་ཆོད་པའོ། །དེའི་དྲན་རྟོག་ཡལ་བས་སྣང་རྐྱེན་ཐམས་ཅད་ཆོས་ཉིད་དུ་ཤར་བའོ། །དེ་ལྟར་རྒྱུ་རྐྱེན་གཉིས་ཀ་དང་བྲལ་བ་ནི་སེམས་ཉིད་ལྡོག་པ་མེད་པའི་འབྲས་བུ་ཞེས་མིང་དུ་གདགས་སུ་བཏུབ་པའོ། །དེ་འཁྲུལ་པས་བཅིངས་པ་ལས་ཐར་བ་ནི། དཔེར་ན་གྱི་ལིང་སྒྲོག་གྲོལ་བ་ལྟ་བུའོ། །དེས་སྣང་རྟགས་ཀྱི་ཆོས་འགོག་པ་ནི། དཔེར་ན་ཀ་ལིའི་རྒྱལ་པོ་སིདྷའི་ཡུལ་འགོག་པ་ལྟ་བུའོ། གོགས་པ་དང་ཞེས་པ་ནི་སེམས་ཀྱི་ཟླ་ལུས་གོགས་པས། འཁོར་འདས་འབྲེལ་ཆོད་པ་ནི། དཔེར་ན་གོང་མལ་གཅིག་པའི་མགྲོན་པོ་ནངས་པར་སོ་སོར་གྱེས་པ་ལྟ་བུའོ། །ལུས་སེམས་ཀྱི་འབྲེལ་རང་སར་དག་པའོ། །དེ་ལྟར་ལུས་སེམས་ཀྱི་འབྲེལ་པ་བྲལ་བ་ནི། ནམ་མཁའ་ལ་འཕུལ་བའི་བྱ་ལ་རྗེས་མེད་པ་ལྟ་བུའོ། །གཞི་སེམས་སྟོང་པ་བདག་ཏུ་མེད་པས། ལམ་དམིགས་པ་རྒྱུད་ལ་བརྟེན་པ་རྣམས་དྲན་པ་ཡལ་སར་སད་པས། སྣང་བ་མ་བུ་འཕྲད་པའོ། །དཔེར་ན་བུ་གཅིག་པའི་མ་ལྟ་བུའོ། །ལམ་ནི་གོམས་པ་གནད་ཀྱི་མན་ངག་གིས་འབྲས་བུ་ཅིག་ཅར་དུ་སྐྱེ་བ་ཆོས་ཉིད་བཟུང་བས། རྒྱུ་འབྲས་གོ་ལྡོག་ལས་རང་གཤིས་ཕེབས་པས་སོ། །རྒྱུ་ཡོད་པ་ནི་བཏགས་པ་མིང་ཡིན་གྱི་གཞིག་པས། འབྲས་བུ་རང་རྐྱེན་གནས་པ་དང་བྲལ་བ་ནི། གང་ལ་ཡོད་པ་བྱེད་པ་མི་གནས་སོ། །དེ་ཡང་རྒྱུ་བདག་དང་། རྐྱེན་བླ་མའི་གདམས་ངག་སྟོངས་པས་འབྱེད་པ་མེད་པའི་བར་དུ་ཡལ་བ། རང་གྲོལ་དུ་སེམས་འཛིན་མེད་རང་གསལ་དུ་སྟོར་བས། འཁོར་འདས་ཀྱི་འབྲས་བུ་རང་དྲོད་ལ་ཕེབས་པ་ནི། འཁོར་རྐྱེན་ཆོས་ཉིད་ལས་འགྲོ་ས་མེད་པ་དང་། འདས་པ་ལམ་དུ་གསལ་བས། སྤང་བླང་དགག་སྒྲུབ་མེད་པ་དང་། དེ་གཉིས་ལ་འབྲལ་མེད་པས་འཁོར་འདས་གཉིས་སུ་འཛིན་པ་དུས་གཅིག་ལ་འགགས་པ་ཞེས་བྱའོ། །ཞེས་དེ་དག་གིས་ནི་སེམས་ཀྱི་དམིགས་དང་པོའི་བསྡུས་པའི་དོན་བཞི་པ་ཡེ་ཤེས་ལོག་པའི་མཚན་ཉིད་ལ་བརྟེན་ནས་འཁོར་འདས་འགག་པའི་ལུགས་བསྟན་པ་ལ་གཉིས་སུ་བྱས་ནས་བསྟན་ཏོ།། །།ད་ནི་བསྡུས་པའི་དོན་ལྔ་པ་ཐབས་ཀྱི་འཇུག་པ་ཁྱད་པར་ཅན་བླ་མ་དྲིན་ཅན་ལ་བརྟེན་ནས་འབྱུང་བར་བསྟན་པ་ལ། ནང་དོན་གསུམ་གྱིས་བསྟན་པའི་དང་པོ་ཐབས་ཀྱི་གནད་བླ་མའི་ཞལ་འབྱུང་བར་བསྟན་པ་ནི། ཐབས་ནི་གང་ལ་འགགས་པ་མེད་ཅེས་ལ་སོགས་པས་བསྟན་ཏེ། ཐབས་ཞེས་པ་ཐོག་མ་མིན་པ་ལས་བསྐོར་ནས་ཐ་མ་གང་ཡིན་གྱི་སྟེང་དུ་ཕེབས་པས་ན། ཐབས་ཆེ་བ་ཞེས་བྱའོ། །ཕྱོགས་སྣ་ཚོགས་ནས་གང་ལ་ཡང་འགགས་པ་མེད་པ་ནས་མཚོན་ནས། ཐ་མ་ཆོས་ཉིད་ཀྱི་བབས་ཐོག་ཏུ་འབེབས་པར་བྱེད་པའོ། །དེ་ལྟར་བསྟན་པ་དེའི་རྗེས་སུ་དད་པ་ཅན་གང་འཛིན་པ་ནི། སངས་རྒྱས་ཐམས་ཅད་དང་གཉིས་སུ་མེད་པའི་རྡོ་རྗེ་ཞེས་བྱ་བར་བཤད་པ་ནི། དུས་གསུམ་གྱིས་སངས་རྒྱས་ཀྱིས་དགའ་རབ་རྡོ་རྗེ་ལ་བསྟན་པས་སོ། །དེ་ཡང་དཔལ་ལྡན་ནི་རྒྱུད་ཀྱི་སྟོན་པ་རྡོ་རྗེ་འཆང་ལ། སྔོན་བྱུང་གི་དུས་ན་སློབ་དཔོན་དགའ་རབ་རྡོ་རྗེའི་བླ་མ་ཡིན་པས་ཉིད་ལ་གདམས་པའི་དོན་འདིར་བསྟན་པར་བྱའོ། །ཞེས་པས་སོ། །ཞེས་དང་པོའི་བསྡུས་པའི་དོན་ལྔ་པའི་ནང་དོན་དང་པོ་ཐབས་ཀྱི་གནད་བླ་མའི་ཞལ་ལས་བྱུང་བར་བསྟན་ནས། ད་ནི་ནང་དོན་གཉིས་པ་བླ་མ་མཚན་ཉིད་དང་ལྡན་པ་བརྟེན་པས་འགྲོ་བ་དེ་ཁམས་གསུམ་དུ་མི་ལྡོག་པར་བསྟན་པ་ནི། མཚན་ཉིད་རྫོགས་པའི་བླ་མ་ཡིས། །ཞེས་པ་ལ་སོགས་པས་བསྟན་ཏེ། དེ་ཡང་མཚན་ཉིད་ཅེས་པས་མ་འོངས་པའི་དུས་ཀྱི་རྗེས་སུ་འཇུག་པས་བླ་མ་རྒྱུད་ལ་མཁས་པས་ཚིག་ལྷད་མེད་པ་དང་། དོན་ལ་འགྲུས་མེད་པར་སྟོན་ཤེས་པ་དང་། དོན་ལ་མཁས་པས་ཡལ་བའི་ཚད་ལ་མཁས་པ་དང་། བརྡའ་དོན་དབྱེར་མེད་ལ་མཁས་པས་དོན་རང་ཐོག་ཏུ་ཕེབས་པའོ། །དེ་ཡང་འདི་ནས་ཡངས་ཤིང་རྒྱུད་ལ་མཁས་པ་དང་། གོམས་ཤིང་སྒྲུབ་ཐབས་ལ་མཁས་པ་དང་། རྟོགས་ཤིང་ལྟ་བ་ལ་མཁས་པ་དང་། ཉམས་སུ་བླང་ཞིང་ཉམས་མྱོང་ལ་མཁས་པའོ། །དེ་བཞིན་ལྡན་པ་ལ་བླ་མའི་མཚན་ཉིད་རྫོགས་པ་ཞེས་བྱའོ། །བླ་མ་ནི་རྩ་བ་དང་། ཡན་ལག་གཉིས་སོ། །གནད་ལ་ནི་དད་པ་དང་ལྡན་པའི་སྐལ་ལྡན་བརྟེན་ནས་གྲོལ་བ་ལ་གསུམ་སྟེ། དབང་པོ་རབ་བླ་མས་བསྟན་པའི་ཚེ་མཐོང་བ་ཙམ་གྱིས་སྐད་ཅིག་མ་དང་པོ་ལ་གྲོལ་ལ། འབྲིང་པོས་བསྟན་པ་དེ་ཤེས་ཏེ་ཤེས་པ་ཙམ་གྱིས་སྐད་ཅིག་མ་གཉིས་པ་ལ་གྲོལ་ལོ། །ཐ་མས་བསྟན་པ་གོ་བ་ལ་བརྟེན་ནས། གོ་བ་ཙམ་གྱིས་སྐད་ཅིག་མ་གསུམ་པ་ལ་གྲོལ་བའོ། །དེ་ལྟར་ཀྱང་འཇམ་དཔལ་སྒྱུ་འཕྲུལ་དྲྭ་བ་ལས། སྐད་ཅིག་གཅིག་གིས་བྱེ་བྲག་ཕྱེད། །ཅེས་པ་དང་། སྐད་ཅིག་གཅིག་གིས་རྫོགས་སངས་རྒྱས། །ཞེས་པས་སོ། །དེ་ཡང་དབང་པོའི་འགྱུར་དག་གིས་གང་ཟག་སུ་ཡང་རུང་བའི་སྙིང་ལ་བླ་མས་གནད་འདི་བཅུག་ནས་བསྟན་པ་ཙམ་གྱིས་མཐོང་ལ་མཐོང་བས་ཤེས་ལ། ཤེས་པས་གོ་བས་ན། གང་ཟག་དེ་གསུམ་ཀ་ཡང་དག་པར་ངེས་པ་རྙེད་ལ། དཔེར་ན་བརྒྱལ་ནད་ཅན་གྱི་ནད་ལངས་པས་སྐད་ཅིག་མར་དྲན་མེད་འགྱུར་བ་ལྟར་དབང་པོ་རབ་གྲོལ། ཡང་དཔེར་ན་དྷ་སེང་གི་ཁུ་བ་འཐུང་བས་སྐད་ཅིག་མ་གཉིས་པ་ལ་དྲན་པ་མེད་པར་འགྱུར་བ་ལྟར། འབྲིང་པོ་རྣམས་སྐད་ཅིག་མ་གཉིས་པ་ལ་གྲོལ་ལ། དཔེར་ན་སྨྱོ་བའི་དུག་འཐུངས་པས་སྐད་ཅིག་མ་གསུམ་པ་ལ་དྲན་པ་མེད་པར་འགྱུར་བ་ལྟར། ཐ་མ་རྣམས་སྐད་ཅིག་མ་གསུམ་པ་ལ་གྲོལ་བར་ངེས་སོ། །དེས་ནི་གནད་བསྟན་པ་ཙམ་ལ་བརྟེན་ནས་གོམས་མ་དགོས་པར་གྲོལ་བས་ན། ཁམས་གསུམ་དུ་མི་ལྡོག་པ་ནི། དཔེར་ན་འཆི་བར་ངེས་པ་སླར་ལྡོོག་པ་མེད་པ་ལ་བཞག་པའོ། །ཞེས་ནང་དོན་གཉིས་པ་བླ་མ་མཚན་ཉིད་དང་ལྡན་པ་བརྟེན་པས་འགྲོ་བ་དེ་ཁམ་གསུམ་དུ་མི་ལྡོག་པར་བསྟན་ནས། ད་ནི་ནང་དོན་གསུམ་པ་ཡང་དག་པའི་གནད་ཀྱིས་གྲོལ་ཞེས་ཐ་སྙད་དུ་བསྟན་པ་ནི། གང་མ་ཤེས་པ་ན་ཤེས་པ་ལ་སོགས་པས་བསྟན་ཏེ། གང་ཞེས་སྣང་བ་རང་སར་བཞག་ནས་མ་ཤེས་པ་སྟེ་བློས་མ་བསྒྱུར་བ་ཉིད། དེ་ཉིད་དབང་པས་ཚུར་མ་བཅད་པར་རང་སར་བཞག་པ་དང་དེ་ལས་འགྲོ་ས་གཞན་མེད་དོ། །ཐ་མལ་ལྟ་བུ་འགྲོ་བའི་རྟོག་པ་ལ་མ་གྲོལ་བ་ལྟར་སྣང་ཡང་སེམས་མེད་པ་ལྟར་ཞེས་པས་སོ། །མ་བལྟས་པ་ནི་ཞེས་པ་དེ་ཉིད་ལ་ཕྱོགས་དང་གཏད་མེད་པས་ནི། བླ་མའི་གདམས་པའི་མཆོག་སྟེ། དེ་ལ་མིང་དུ་བཏགས་ལ་གཏད་མེད་ཀྱི་སེམས་ཉིད་གཏད་མེད་དུ་གྲོལ་བ་ཞེས་བྱའོ། །དེ་ལྟ་བུའི་གནད་དེ་ལ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ཤེས་པ་དང་འདྲ་སྟེ། ད་བསྐྱར་ནས་འདྲིས་པ་ཅི་ཞིག་བྱ་སྟེ། ཡེ་གྲོལ་ལ་བསྐྱར་གཞི་མེད་པའི་གནད་དེ། དེ་ལ་མིང་དུ་བཏགས་ན། རྟེན་མེད་ཀྱི་རིག་པ་ཙེན་མིན་དུ་གྲོལ་བ་ཞེས་བྱའོ། །དེ་ཤེས་པ་ཙམ་ལས་དེ་གྲོལ་མི་དགོས་པའི་གནད་ཡིན་པས་ན། དེ་ཉིད་ལ་གོམས་པས་ནི་མཐོང་བས་བདེ་ལ་ཤེས་པས་སྟོང་པས་སྟོང་པ་ན། དེ་ཉིད་ལ་མིང་དུ་བཏགས་ན་གདིང་དང་ལྡན་ཞིང་ཁམས་གསུམ་དུ་མི་ལྡོག་པའི་རྣལ་འབྱོར་པ་ཞེས་བྱའོ། །དེ་ལ་གོམས་མི་དགོས་པས་སེམས་ཉིད་མེད་པས་མཐོང་བ་ཙམ་གྱིས་རང་གི་རིག་པ་ལས་གྲོལ་ས་མེད་དོ། །ཞེས་དེ་དག་གིས་བསྡུས་པའི་དོན་ལྔ་པ་ཐབས་ཀྱི་འཇུག་པ་ཁྱད་པར་ཅན་བླ་མ་དྲིན་ཅན་ལ་བརྟེན་ནས་འབྱུང་བར་བསྟན་པ་ལ་ནང་དོན་གསུམ་དུ་བྱས་ནས་བསྟན་ནས། ད་ནི་སེམས་ཀྱི་དམིགས་དང་པོའི་སྤྱི་དོན་དྲུག་པ་ཡལ་ས། དུས་གནད་ལ་བརྟེན་ནས་ལྟ་སྒོམ་ཡིད་ལ་བྱེད་པ་ལས་འདས་པར་བསྟན་པ་ལ་ནང་དོན་གཉིས་ཀྱིས་བསྟན་པའི་དང་པོ་གནད་མཐོང་བའི་འགྲོ་བ་རྣམས་སླར་ཁམས་གསུམ་དུ་མི་ལྡོག་པའི་དཔེ་དང་བཅས་པ་ནི། གང་ལས་བྱུང་བ་གང་བྱུང་ནུབ། །ཅེས་པ་ལ་སོགས་པས་བསྟན་ཏེ། གང་ལས་བྱུང་ན་གནད་ཤེས་པ་ལས་བྱུང་བས། རྣམ་པར་རྟོག་པ་གློ་བུར་བ་གང་བྱུང་བ་ཆོས་ཉིད་ཀྱི་ཀློང་དུ་ནུབ་པའོ། །དེ་ཡང་ཆོས་ཉིད་དེ་གང་ལས་སྐྱེས་པ་རྟོག་པ་ཐ་དད་པ་འགགས་པས་མི་ཤེས་སོ། །དེ་ཅིས་མི་ཤེས་ཞེ་ན། དུས་ཕྱིས་རྟོག་པ་གློ་བུར་བ་རྣམས་འགགས་པ་ནི་རྒྱུ་རང་དག །ཡལ་རྐྱེན་རང་འགགས། ཡལ་ས་ལ་ལྟོས་ཟད་པ་དམིགས་མེད་གཞི་མེད་པའི་སེམས་དེས་རིག་པ་ནི་རྩ་མེད་རིས་མེད་པའི་སེམས་རྣམས་པར་དག་གོ། །དེ་ལྟར་ཤེས་པས་ཁམས་གསུམ་དུ་ལྡོག་པ་མེད་ཅིང་དམིགས་གཏད་རྗེས་མེད་པའི་སེམས་ཉིད་རང་སར་ཡལ་བ་ནི། དཔེར་ན་སྐྱེས་བུ་སྒྱུ་རྩལ་མཆོག་དང་ལྡན་པ་ཞིག་གིས་གནམ་དུ་མདའ་འཕངས་པས་སླར་ལྡོག་པ་མེད་ཅིང་། དམིགས་པའི་འབེན་མེད་ལ། རྗེས་དང་གཏད་ས་མེད་པ་དང་། ཡུལ་མེད་པར་ཟང་ཐལ་བ་བཞིན་དུ་རིག་པ་ཉིད་གཞི་ལ་ཐིམ་པས་འཕྲལ་རྐྱེན་གློ་བུར་གྱི་རྟོག་པ་རྣམས་འདིར་སོང་གི་གཏད་མེད་ལས། སེམས་ཉིད་ཕྱོགས་དང་རིས་མེད་པར་ཡལ་བའོ། །དེ་ཡང་དངོས་པོ་ལ་ལྡོག་པ་མེད་པས་སྟོང་པ་རིས་མེད། དེ་ཉིད་གནས་སྐབས་སུ་ནམ་མཁའ་ལས་གར་ཡང་སོང་བ་མེད་པས་དངོས་མེད་ཟང་ཐལ། དེ་ཉིད་ནམ་མཁའ་ལ་ཡང་གནས་པ་མེད་ལ་ས་ལ་ཡང་ལྟུང་བ་མེད། སིདྒ་ལའི་མདའ་བར་སྣང་ལ་ལུང་གིས་བཏེག་ནས་འབབ་པ་མེད་པ་བཞིན་ནོ། །གྲོལ་བ་ཡལ་བའི་ཚད་ཤེས་པའི་སེམས་འདི་དེ་ལའང་ནི་སྐྱེས་བུ་སྒྱུ་རྩལ་དང་ལྡན་པས་སིངྒ་མདའ་གནམ་དུ་འཕངས་པ་དེ་དག་མཚུངས་སོ། །ཞེས་ནང་དོན་དང་པོ་གནད་མཐོང་བའི་འགྲོ་བ་རྣམས་ཁམས་གསུམ་དུ་མི་ལྡོག་པའི་དཔེ་དང་བཅས་པ་བསྟན་ནས། ད་ནི་ནང་དོན་གཉིས་པ་དེ་ལྟར་གནད་མཐོང་ཞིང་ཤེས་པ་ཙམ་གྱིས་ལྟ་སྒོམ་འབད་པ་ལ་མ་བརྟེན་པར་རང་གྲོལ་བར་བསྟན་པ་ནི། དེ་ཡང་སེམས་ཀྱི་རྒྱུ་ཡེ་ནས་སྟོང་པར་གནས་པས་གང་ཤར་ཅིར་སྣང་ཡང་རང་གནས་བདེ་བ་ཆེན་པོ་ལས་མ་འདས་པའོ། །སེམས་ཀྱི་རྒྱུ་མེད་པའི་ཕྱིར། ཕྱི་སྣང་རྐྱེན་ཐ་དད་པ་དེ་ཉིད་ལ་གཏད་པ་ཙམ་གྱི་རང་སར་ཡལ་བས། འགག་པའི་ཆོས་ཉིད་ལ་ཡིད་ཆེས་པའོ། །དེའི་ཕྱིར་ན་སེམས་ཀྱི་འབྲས་བུ་འཁོར་འདས་གཉིས་རང་སར་གྲོལ་བས་མཐོང་སྣང་དུས་གཅིག་ལ་འགག་པའོ། །དེ་ལ་མིང་དུ་བཏགས་ན་འཁོར་འདས་གཉིས་དུས་གཅིག་ལ་ཁྱེར་བས་འཁྲུལ་པའི་སྣང་བ་དུས་གཅིག་ལ་ཆོད་པའི་ལྟ་བ་ཞེས་བྱའོ། །དེ་ལ་གོམས་པ་མི་དགོས་པས། གནད་དེ་མཐོང་བ་ཙམ་གྱིས་ཤེས་ལ། ཤེས་པ་ཙམ་གྱིས་གྲོལ་བས་ན། སྒོམ་པ་བཞག་སར་གནས་ལ། གནས་སར་སྟོངས་པ་ཞེས་བྱའོ། །དེ་གང་ལས་བྱུང་ན་ཐོག་མ་ལུས་ངག་ཡིད་ཀྱི་རྒྱུ་རྐྱེན་ལ་བརྟགས་པས། སེམས་ཀྱི་འཇུག་པ་ཁྱད་པར་ཅན་སྐྱེ་བས་ན། དེ་ལ་རྒྱུན་དུ་སྤྱོད་པས་ན་སྤྱོད་པའོ། །དེ་དག་གིས་ནི་སྤྱི་དོན་ཐ་མ་ལ་གཉིས་སུ་བྱས་ནས་བསྟན་ཏོ། །སེམས་ཀྱི་ངོ་བོ་ངེས་ཚིག་དབྱེ་བ་གོང་དུ་བསྟན་ཏོ། །དམིགས་ནི་བསལ་བར་བྱེད་པའོ། །དང་པོ་ནི་གྲངས་ཀྱི་གནས་ཏེ་ཐོག་མའོ། །བསྡུས་པ་ནི་སྤྱི་དོན་དྲུག་གིས་བསྟན་པའོ། །བསམ་པ་ནི་འདས་མ་འོངས་ད་ལྟའི་འོ། །གང་ནས་བྱུང་རྒྱུ་མེད་པས་སྟོང་དག །འབྲས་བུ་མེད་པས་བསྐྱར་མེད་ཡེ་གྲོལ་ལོ། །དེ་ཡང་སྣང་ཤེས་སྔ་ཕྱིའི་བར་དུ་ངོས་བཟུང་བས་བློ་མ་བུའི་སྟོབས་མེད་ལ། རྟོག་པ་སྔ་ཕྱིའི་བར་དུ་ངོས་བཟུང་བས་ལས་དང་བག་ཆགས་ཀྱི་གཞི་སྟོངས། ཆོས་ཉིད་སྔ་ཕྱིའི་བར་དུ་ངོས་བཟུང་བས། འཁོར་འདས་གཉིས་ཀྱི་ལྟོས་ཟད། རྒྱུ་རྐྱེན་གཉིས་ཀྱི་བར་དུ་ངོས་བཟུང་བས། ལྟ་སྒོམ་སྤྱོད་པ་འབྲས་བུ་ལ་རག་མ་ལུས། བློ་སྔ་ཕྱིའི་བར་དུ་ངོས་བཟུང་བས་བྱ་བྲལ་སོ་མའི་ལམ་བསལ། འཁྲུལ་པ་སྔ་ཕྱིའི་བར་དུ་ངོས་བཟུང་བས་སྣང་རྐྱེན་ཐ་དད་པ་ཆོས་ཉིད་ལས་འགྲོ་ས་མེད་པའོ། །དེ་ལྟར་རང་བཞིན་སྟོང་པ་ལ་བལྟས་པས་འཁོར་འདས་གཉིས་དུས་གཅིག་ལ་མཐོང་ལ་སྣང་བ་སྟོང་པ་ལ་བལྟས་པས་ཆོས་དང་ཆོས་མིན་གྱི་རྩ་བ་མཐོང་ལ། ངོ་བོ་སྟོང་པ་ལ་བལྟས་པས་ལྟ་སྒོམ་རྣམས་ཀྱི་སྲོག་དུས་གཅིག་ལ་ཆོད་པའོ། །བསྟན་པ་སྟེ་ཞེས་པ་ནི། སེམས་ཀྱི་དམིགས་པ་དང་པོ་ལ་བསྡུས་པའི་དོན་དྲུག་བསྟན་པ་ནི་འགྲོ་བ་དྲུག་གི་ལམ་བསམ་པ་ནས། ཡེ་ཤེས་དྲུག་རང་ལུགས་སུ་འཆར་བ་ལ་དགོངས་པའོ། །དེ་ཡང་དེ་དག་རིམ་གྱིས་བསྒོམས་པས་བསླབ་བྱ་དང་པོ་སྲིན་མོ་བུ་སྟོར་བ་ལྟ་བུའི་བསླབ་བྱས། ལུས་ངག་ཡིད་ཀྱི་གཞི་སྦྱངས་ནས་ཆོས་ཉིད་ཀྱི་བྱུང་ཁུངས་བཙལ་བ་སྟེ། དོན་གྱི་ལུགས་གཉིས་སུ་བསྟན་ཏེ། བསླབ་བྱ་ལམ་དུ་འཁྱེར་བས་ཤེས་པ་རྒྱུད་ལ་འཆར་གནད་ཤེས་པས་ཁམས་གསུམ་གྱི་གཞི་སྟོངས་པས། འཁོར་འདས་གཉིས་དུས་གཅིག་ལ་འགགས་པའི་ལུགས་དང་གཉིས་སུ་བྱས་པས་ནི། འདི་ནས་གང་ཟག་གཉིས་དུས་གཅིག་ལ་གྲོལ་བར་བསྟན་པའོ། །དེ་ལ་དགའ་བ་ནི་ལུས་ངག་ཡིད་ལ་བདེ་བ་ཁྱད་པར་ཅན་སྐྱེས་པས་རྟོགས་པས་བདག་བསྒྲལ། དེ་ཉིད་ལ་ཤེས་རབ་ཁྱད་པར་ཅན་གྱི་སྤྱི་དང་རང་གི་མཚན་ཉིདལ་དབང་ཐོབ་པས། ཐུགས་རྗེས་གཞན་བསྒྲལ་བའོ། །རྡོ་རྗེ་ནི་དེ་ལྟར་རྟོགས་པས་དུས་གསུམ་སྐྱེ་ཤི་མེད་པའི་དོན་ལས་མི་འདའ་བའོ། །དགོངས་པ་ནི་ཐུགས་ཀྱི་བཞག་པ་དང་། རྟོགས་པ་དམ་པ་ཉིད་འདིར་ངེས་པར་གནད་དུ་ཕབ་པའོ། །རྣམ་པར་བཤད་པ་སློབ་དཔོན་དགའ་རབ་རྡོ་རྗེེའི་དགོངས་པ་ཉིད་ཀྱི་དོན་བྱི་མ་ལ་མུ་ཏྲས་རྣམ་པར་བཤད་པ་སྟེ། སེམས་ཀྱི་དམིགས་དང་པོ་བསྟན་པའོ། །ཨཐྎ༔ རྒྱ་རྒྱ་རྒྱ། ས་མ་ཡ། གཏེར་ནས་གཏེར་དམ་པ་ཉིད་དུ་བཙས་པའོ། །དཔལ་སྔགས་སྲུང་གི་རྒྱལ་མོ་ལ་གཏད་དོ།། །།ད་ནི་སེམས་ཀྱི་དམིགས་གཉིས་པ་རྣམ་པར་བཤད་པར་བྱའོ། །དུམ་བུ་གཉིས་པ་རྣམ་རྟོག་གཅོད་པའི་སྤུ་གྲི་ལ་དོན་དྲུག་སྟེ། སྤྱི་དོན་དང་པོ་མེད་སྣང་རང་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་དང་། སྤྱི་དོན་གཉིས་པ་སེམས་ཀྱི་བྱུང་ས་བཙལ་བ་འཁོར་བའི་གཞི་སྟོངས་པར་བསྟན་པ་དང་། གསུམ་པ་ལུས་སེམས་ཀྱི་འབྲེལ་བ་བརྟག་པ་ཁྱད་པར་ཆོས་ཉིད་ཀྱི་སྐྱོན་ཡོན་རིག་པས་གྲུབ་པར་བསྟན་པ་དང་། བཞི་པ་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པར་བསྟན་པ་དང་། སྤྱི་དོན་ལྔ་ལ་ལུས་ངག་ཡིད་གློད་པ་ལས་སེམས་ཀྱི་ཡལ་ས་ངོ་ཤེས་པར་བསྟན་པ་དང་། དྲུག་པ་གློད་པའི་གནད་དམ་ཚད་བསྟན་པའོ། །དེ་ལ་སྤྱི་དོན་དང་པོ་མེད་སྣང་རང་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ། ལུས་སེམས་ཀྱི་འབྲེལ་པ་བརྟག་པ་གཏན་ཚིགས་ཀྱིས་གྲུབ་པར་བསྟན་པ་ནི། གང་གི་ལུས་ཀྱི་དངོས་པོ་དག །ཅེས་པ་ལ་སོགས་པས་བསྟན་ཏེ། དངོས་པོ་གང་གིས་ན་སེམས་དང་འབྲེལ་པ་ཡོད་ཅེ་ན། ལུས་ཀྱི་ངོ་བོ་ཕུང་པོ་ཁམས་དང་སྐྱེ་མཆེད་དུ་མ་ཚོགས་པའོ། །ངེས་ཚིག་ནི་འཁོར་བའམ། འཇོག་པའམ། ལས་པའམ། གཅིག་ཏུ་མི་གནས་པའི་ཕྱིར་ན་ལུས་ཞེས་བྱའོ། །དེ་གང་ལུས་ལ་སྔར་གྱི་ལུས་ལ་འབྱུང་བ་བཞི་རྡུལ་ཕྲ་རབ་དང་བཅས་པ་ལ་ལུས་ནས་ད་ལྟའི་ལུས་འདི་སྔར་གྱི་ལུས་མིན་པར་ངོ་ཤེས་པ་དང་། ཕྱིས་ཀྱང་གནད་མ་ཤེས་ན་ལུས་འདི་མིན་པ་ལེན་པས། ད་ལྟའི་འདི་ལུས་ནས་འགྲོ་བས་ན་ལུས་ཞེས་བྱའོ། །དབྱེ་བ་ནི་བཞི་སྟེ། རིན་པོ་ཆེ་གསང་བའི་ལུས་ཆོས་སྐུ་ལོངས་སྐུ་སྤྲུལ་སྐུ་འདུས་པ། ཡེ་ཤེས་སྒྱུ་མའི་ལུས་ལོངས་སྐུ་ལ་ཡོད་ལ། ཡང་ན་རིན་པོ་ཆེ་ཆོས་སྐུ་ཡིན་ཏེ། ཡེ་ཤེས་སྒྱུ་མ་གཟུགས་སྐུ་ཉིད་དོ། །རྣམ་རྟོག་བག་ཆགས་ཀྱི་ལུས་ནི་འགྲོ་བ་རྣམས་ལ་ཡོད་པའོ། །རྣམ་པར་རིག་ཙམ་གྱི་ལུས་ནི་འགོག་པ་དང་། གཟུགས་མེད་པ་ཁ་གཅིག་ལ་ཡོད་དོ། །རྣམ་རྟོག་བག་ཆགས་ལ། རིག་བྱེད་འོད་ཀྱི་ལུས་འོད་གསལ་གྱི་ལྷ་རྣམས་ལ་ཡོད། ཤ་ཁྲག་རང་ག་མ་རྡོས་བཅས་ཀྱི་ལུས་འགྲོ་བ་མི་དང་བྱོལ་སོང་རྣམས་ལ་ཡོད་ལ། དྲན་པ་རྗེས་འབྲང་གི་ལུས་ཡི་དྭགས་ཕལ་པ་རྣམས་ལ་ཡོད། རྣམ་པར་ཤེས་པ་ཙམ་གྱི་ལུས་གཟུགས་མེད་པའི་ལྷ་རྣམས་ལ་ཡོད་དོ། །སྡུག་བསྔལ་ཉེར་ལེན་གྱི་ལུས་དམྱལ་བ་རྣམས་ལ་ཡོད། འགྱུ་བ་ཡིད་ཀྱི་ལུས་སྲིད་པ་བར་མ་དོའི་འགྲོ་བ་མཁའ་ལ་རྒྱུ་བའི་ཡི་དྭགས་ཕལ་པ་ལའང་ཡོད། དེ་དག་གི་མཚན་ཉིད་དང་ཚད་ལ་སོགས་པ་ནི་འདིར་མ་སྤྲོས་སོ། །དེ་དག་གི་དངོས་པོ་ནི་སོ་སོ་ལ་རེ་གནས་ཏེ་འདིར་མ་སྤྲོས་ལ། འདིར་ཤ་ཁྲག་རང་ག་མའི་ལུས་འབྱུང་བ་ཕྲ་རགས་ཀྱི་དངོས་པོ་རྡུལ་ཕྲ་རབ་ཡན་ལག་དང་བཅས་པ་རྣམས་ཏེ། ས་ཆུ་མེ་རླུང་གིས་བསྡུས་པ་དག་ཡིན་པས་ན། དེའི་རྒྱུ་ཕ་མའི་བྱང་སེམས་ཏེ། ཕས་རྒྱུ་བྱས་པས་སྲིད་པའི་གཞིར་སོང་ལ། མས་རྐྱེན་བྱས་པས་འབྱུང་བ་བཞི་གཅིག་ཏུ་འདུས་སོ། །དེ་ཡང་འགྲོ་བའི་ལུས་མི་འདྲ་བ་ཐ་དད་པ་ནི་རྒྱུ་མི་གཅིག་སྟེ། ཕ་མི་འདྲ་བས་བསྐྱེད་པ་དང་། རྐྱེན་མི་འདྲ་བས་གཅིག་པ་མེད་པ་ནི། ཁ་དོག་དང་དབྱིབས་ལ་སོགས་པ་མི་འདྲ་བའི་ཕྱིར་རོ། །ལུས་མི་གཅིག་པ་བཞིན་སེམས་མི་གཅིག་པ་ནི་མ་ཡིན་ཏེ། དཔེར་ན་རྫ་མཁན་གྱི་འཁོར་ལོས་རྫའི་བྱེ་བྲག་དཔག་ཏུ་མེད་པ་བྱས་པས་རྫ་ཙམ་དུ་གཅིག་ཀྱང་དབྱིབས་དང་ཁ་དོག་མི་གཅིག་པ་བཞིན་དུ། ལུས་ཀྱང་ལུས་ཙམ་དུ་གཅིག་ཀྱང་ཡང་དག་པར་བརྟགས་ན་མི་འདྲའོ། །རྫ་མི་འདྲ་ཡང་ནང་གི་ནམ་མཁའ་ནི་མཚན་ཉིད་གཅིག་ཅིང་ཁྱད་པར་མེད་པས་ན། སེམས་གཅིག་ངོ་བོ་ལས་འདས་པ་མེད་པས་ན། ལུས་སེམས་ཉིད་རྒྱུ་མི་གཅིག་པས་རྒྱུ་བདག་ཉིད་གཅིག་པའི་འབྲེལ་བ་ཡང་མེད་དོ། །འོ་ན་སེམས་ཅན་ལ་བསམ་པ་ཐ་དད་པར་འོང་བ་ཅི་ཞེ་ན། རྫའི་དབྱིངས་དང་ཆེ་ཆུང་གིས་ཕྱེ་བ་དང་འདྲ་ལ། དེ་ཡང་སྣོད་ཀྱིས་བཅུད་ལ་སྐྱབས་པས་དེ་ལྟར་བྱུང་བ་ཡིན་ལ། དེའི་གནད་ཀྱིས་དྲན་བསམ་གྱི་འཁོར་ལོ་གློ་བུར་གྱི་རྟོག་པ་ཡིན་པས་སོ། །དེའི་ཕྱིར་ན་སེམས་ལས་ལུས་མ་བྱུང་སྟེ། ལུས་དངོས་པོ་ཡོད་པས་སོ། །སེམས་སྟོང་པའི་མཚན་ཉིད་གང་དུ་ཡང་མ་གྲུབ་པས་སོ། །དེ་བཞིན་དུ་སེམས་སྟོང་པ་གཞི་མེད་པས་སྔ་བར་ལྡོག་པའི་རྟེན་མེད་ལ། རྩ་བ་མེད་པས་འབྱུང་བས་བཅིངས་པའི་ལུས་ལ་ཆགས་པའི་རྟེན་མེད་པའི་ཕྱིར་ན། ལུས་ལས་སེམས་མ་བྱུང་ལ། སེམས་ལས་ལུས་བྱུང་བ་མིན་ཏེ། དེ་ལྟར་ལུས་སེམས་ཀྱི་འབྲེལ་བ་མེད་པ་དེའི་ཕྱིར་དེ་སྔ་བར་མི་ལྡོག་ལ། ཕྱི་མ་རང་ཡལ་བ་དང་། ད་ལྟ་སྟོང་སར་སྟོང་པས། འགག་སར་འགག་པའོ། །གཏན་ཚིགས་དེའི་ཕྱིར་ན་ལུས་ལས་ཀྱང་སེམས་དེ་ཉིད་ཅི་སྟེ་འབྱུང་། སེམས་རྒྱུ་མེད། སྟོང་པ་ཡེ་ནས་དག་པའི་ཕྱིར་ན། བསྒྲུབ་བྱ་འདི་ཡིན་ཞེས་པ་དང་། སྤང་བྱ་འདི་ཡིན་ཞེས་པ་གྲུབ་མཐས་བཅིངས་པ་ལས་མ་རྟོགས་པ་གང་ཡང་མེད་པར། དེས་ན་ལུས་སེམས་འབྲེལ་པ་མེད་པར་དེ་ནི་ཆོས་ཉིད་ཞེ་འདོད་དང་བྲལ་བར་ངས་རིག་པས། འཁོར་བའི་གཞི་སྟོངས་བས་མྱ་ངན་འདས་པའི་ཁུངས་འགགས་པའོ། །ཞེས་དམིགས་གཉིས་པའི་བསྡུས་དོན་དང་པོའི་ནང་དོན་དང་པོ་ལུས་སེམས་ཀྱི་འབྲེལ་པ་བརྟག་པ་གཏན་ཚིགས་དང་བཅས་ཏེ་བསྟན་ནས། ད་ནི་ནང་དོན་གཉིས་པ་བསླབ་བྱ་དཔེ་དང་བཅས་པ་ལ་བརྟེན་ནས་ལམ་ལ་ཟད་པས་བགྲོད་སྦྱང་གི་གཞི་སྟོངས་པར་བསྟན་པ་ནི། བསླབ་བྱ་དཔེ་དང་བཅས་པ་ཡང་། །ཞེས་པ་ལ་སོགས་པས་བསྟན་ཏེ། བསླབ་བྱ་ཞེས་པ་ནི་གཉིས་པ་དྲན་པ་ཁུངས་གཅོད་ཀྱི་བསླབ་བྱ་ལ་བརྟེན་ནས་ཆོས་ཉིད་ཀྱི་བབས་བལྟས་པས། དོན་རང་ངོ་ལ་འབེབས་པ་ནི། དཔེར་ན་ཁྱུང་གཤོག་པ་རྫོགས་པ་ལྟ་བུའི་བསླབ་བྱས་བྱ་བྱེད་འབད་རྩོལ་མེད་པར་བསྟན་ཏེ། དེ་ཡང་གྲོལ་བའི་དཔེ་ནི་རྒྱལ་པོའི་གཉའ་ལས་གྲོལ་བ་ལྟ་བུའོ། །དེ་ཉིད་དང་བཅས་པས་སེམས་ཀྱི་བབས་བལྟས་པས། ངོ་བོ་གཅེར་མཐོང་བས་གནད་དང་བྲལ་བའི་རྣལ་འབྱོར་བ་ཞེས་བྱའོ། །འདིའི་དུས་ན་སྐྱོན་ཐམས་ཅད་ཆོས་ཉིད་ཀློང་དུ་ཐིམ་ལ་ཡོན་ཏན་ཐམས་ཅད་གཞི་རྫོགས་སུ་ཤར་བས། ལུས་རང་གྲོལ་བས། རྡུལ་དང་། རྡུལ་ཕྲན་གྱིས་ལྟོས་ཟད་པ་དང་། ངག་རང་གྲོལ་བས་བརྗོད་ཚིག་གི་གཞི་སྟོང་པ་དང་། སེམས་རང་གྲོལ་བས་མཚན་ཉིད་རྩ་མེད་གཞི་མེད་དུ་རིག་པས། སྐུ་གསུམ་བཅིངས་པ་ལས་གྲོལ་བ་སྟེ། འདི་ལྟ་བུའི་གནད་ཤེས་པས་ནི་ལུས་དང་སེམས་ཀྱི་ལྡོག་མཚམས་འབྲེལ་བ་མ་བརྟགས་པ་སྟེ། དེ་ཉིད་སྔོན་དུ་འབྲེལ་བརྟགས་པའི་གནད་ཀྱིས་དྲན་པའི་ཁུངས་རང་འགགས་པས་སྟོར་བས། ཕྱིས་རྙེད་པའི་གནས་མེད་དོ། །དེས་ན་དམིགས་པ་རང་ཆོད་པས་འགྲོ་བའི་ལམ་རྡུགས་སླར་ལྡོག་པའི་གཞི་མ་རྙེད་དེ། ཕྱིས་སེམས་འགྲོ་བའི་ལམ་ཟད་པས། འགྲོ་བྱ་དང་འགྲོ་བྱེད་མེད་པ་ལྟ་བུ་སྟེ། དེས་ན་གང་ཤར་ཆོས་ཉིད་ལས་མ་གཏོགས་པ་གཞན་མེད་པས་སོ། །དེའི་ཕྱིར་ན་འགྲོ་བའི་ལམ་མེད་པས་གྲོང་ཁྱེར་གྱི་མཐའ་ཡང་དག་པར་སུས་ཀྱང་མི་ཤེས་པ་ལྟར། རྟོགས་པས་བདག་བསྒྲལ་བས་འདས་པ་ཡང་དག་ཏུ་འཛིན་པ་ལས་བློ་ལོག་པའོ། །གཏན་ཚིགས་དེའི་ཕྱིར་ན་བསྒྲོད་པ་བློ་རིམ་གྱི་ལམ་མེད་པའི་ཕྱིར། སྦྱང་བྱ་བློའི་གེགས་བསལ་བས་ཡེ་ཤེས་ཙམ་དུ་འཛིན་པ་ཡང་མེད་དོ། །ཞེས་ནང་དོན་གཉིས་པ་བསླབ་བྱ་དཔེ་དང་བཅས་པ་ལ་བརྟེན་ནས་ལམ་ཟད་པས་བསྒྲོད་སྦྱང་གི་གཞི་སྟོངས་པར་བསྟན་ནས། ད་ནི་གསུམ་པ་སེམས་མེད་པའི་མཚན་ཉིད་ཤེས་པས་འཁོར་འདས་དུས་གཅིག་ལ་འགག་པར་བསྟན་པ་ནི། རྣལ་འབྱོར་པ་གང་གི་སེམས་མེད་པའི་དོན་ལ་གནས་ན། འཁྲུལ་པའི་ཡུལ་དུས་གཅིག་ལ་འགགས་པས་ན། དེའི་ཕྱིར་སེམས་མེད་པའི་གནད་ཀྱིས་སངས་རྒྱས་དང་སེམས་ཅན་མེད་པའི་ཕྱིར་སྣང་བ་ཡང་མེད་པར་མཁས་པ་སྟེ་བརྡ་ལ་མཁས་པས་ཚིག་གི་རྟོག་དཔྱོད་ལས་འདས། དོན་ལ་མཁས་པས་གཞི་དང་རྩ་བ་རང་གྲོལ་བར་གང་ཟག་སུས་ཤེས་པ་ནི། འདི་ལྟར་སྣང་གྲགས་ཀྱི་ཆོས་ཡོད་པར་རྟོགས་པའི་མཐའ་ལྟ་བ་དང་སྒོམ་པ་ལ་སོགས་པ་རང་རྒྱུད་དུ་འཛིན་པ་འགགས་པས། དེ་འཁོར་བ་ཡོད་མེད་དུ་རྟོག་པ་དང་། འདས་པ་ལ་ཡོད་མེད་དུ་རྣམ་པར་རྟོག་པར་འཛིན་པ་ཙམ་ཡང་མེད་པའི་ཕྱིར་ན། དེ་གཉིས་མེད་པའི་ཕྱིར་ན། དག་བྱ་དག་བྱེད་ཀྱི་གཞི་སྟོངས་པའི་གནད། སྐུ་དང་ཡེ་ཤེས་ཙམ་དུ་འཛིན་པ་མེད་པས་སངས་རྒྱ་བར་བྱ་བའི་རྟེན་ནམ་གཞི་མེད་ཅིང་། དེ་ལ་ལྟོས་པའི་སེམས་འགྱུ་བ་སྣ་ཚོགས་པ་ལ་རྐྱེན་ལུས་ཀྱི་བསླད་པ་ཡང་མེད་པས་ན། ད་ལྡོག་ས་དང་། འགྲོ་ས་མེད་པའི་གནད་དོ། །དེའི་ཕྱིར་ན་སེམས་ཉིད་སྟོང་པ་ངོས་གཟུང་ལས་འདས་པ་ཉིད་ལ། ལས་བཟང་པོས་ཕན་མ་བཏགས་ལ། ངན་པས་གནོད་པ་སྐྱེལ་བ་མེད་པའི་ཕྱིར། རྣམ་པར་སྨིན་པ་ཡང་ཡོད་མི་སྲིད་དོ། །དེ་ལྟ་བུའི་སེམས་ཉིད་དེ་ལ་བག་སྣོད་དང་འདྲ་བ་ལ་ཆགས་པ་རྡུལ་དང་འདྲ་བའི་རྟེན་མེད་པས། སྔ་མཐའ་ལྡོག་པའི་གཞི་མེད་པ་དང་། ཕྱི་མཐར་འགྲོ་བའི་ལམ་འདས་པའི་ཕྱིར། ཅི་བྱ་ཐམས་ཅད་ཆོས་ཉིད་ལས་འགྲོ་ས་མེད་དོ། །དེའི་ཕྱིར་ན་གང་ཟག་འདིས་ནི་རྣམ་པར་རྟོག་པ་གློ་བུར་དུ་ཐམས་ཅད་དུས་གཅིག་ལ་གཅོད་པ་ཡིན་པས་ན། དེ་ཡང་ལུས་སེམས་སོ་སོའི་དམིགས་བཙལ་བས། རྟོག་པ་ཐ་དད་པའི་ཡུལ་ལས་འདས་པ་ནི། མེད་པའི་དོན་མེད་པར་ཤེས་པ་ཙམ་ལས་བྱུང་བའོ། །ཞེས་དེ་དག་གིས་ནི་སེམས་ཀྱི་དམིགས་གཉིས་པའི་སྤྱི་དོན་དང་པོ་མེད་པའི་སྣང་བ་རང་སར་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་སེམས་ཀྱི་བྱུང་ས་བཙལ་བས་འཁོར་བས་གཞི་སྟོངས་པར་བསྟན་པས་ནང་དོན་བཞིས་བསྟན་པའི་དང་པོ། རྟོགས་པ་ཡལ་བའི་དུས་ལ་བརྟེན་ནས་ཆོས་ཉིད་ངོས་བཟུང་བར་བསྟན་པ་ནི། གསང་བ་རང་གཞུང་གི་སྤུ་གྲི་ནི་ཞེས་པ་ལ་སོགས་པས་བསྟན་ཏེ། གསང་བ་ནི་སོ་སོའི་སྐྱེ་བོ་ལ་རང་བཞིན་གསང་བ། ཉན་ཐོས་ལ་སོགས་པའི་ཐེག་པ་དམན་པ་རྣམས་ལ་གབ་པའི་ཚུལ་གྱིས་གསང་ལ། སྣོད་མེད་པའི་འགྲོ་བ་རྣམས་ལ་འདི་ཉིད་སྦས་པའི་ཚུལ་གྱིས་གསང་ངོ་། །རང་གཞུང་གི་ཡལ་ས་དང་། ཡལ་དུས་དང་། ཡལ་རྐྱེན་ངོས་ཟིན་པས། རྣམ་པར་རྟོག་པ་ཐམས་ཅད་དུས་གཅིག་ལ་གཅོད་པས་ན་སྤུ་གྲི་ཞེས་བྱའོ། །སེམས་དེ་ཕྱིར་རོལ་གྱི་ཡུལ་ཐམས་ཅད་ལ་འཇུག་ཅིང་ཁྱབ་པ་ནི། ཐ་དད་པ་ཡང་མ་ཡིན་ཡུལ་དེ་དག་ལས་སེམས་མ་བྱུང་། སེམས་ཀྱི་སྣ་ཚོགས་པའི་འགྱུར་སུས་ཀྱང་མི་ཤེས་པའི་ཕྱིར་ན། སེམས་ལས་ཀྱང་ཡུལ་མ་བྱུང་བས། ཡུལ་སེམས་གཉིས་རྒྱུ་མི་གཅིག་པའི་གནད་ཀྱིས། ཡུལ་ལ་སེམས་ཀྱི་རྟོག་པ་ཐ་དད་པ་ལྟར་སྣང་ཡང་འགྱུ་བ་གློ་བུར་གྱི་རྟོག་པ་ཡིན་པས་དེ་ཉིད་རང་སར་ཡལ་བས་སྔར་གྱི་སྟེང་ན་མི་གནས་ལ། ཕྱིས་ཀྱང་དེའི་དབང་དུ་མི་འགྱུར་བའི་ཕྱིར་རོ། །དེས་ན་ཡུལ་སེམས་གཉིས་སུ་མེད་པས་ན། འགྱུ་བའི་རྟ་རླུང་རང་སོ་ནམ་མཁའ་ལ་ཐིམ་པས། རྟོག་པ་ཕྲ་རགས་ལ་གནས་མི་སྲིད་པ་ནི། རླུང་སེམས་ཀྱི་འགྱུ་བ་སྟོང་པར་ཤེས་པས། རྟོག་པ་ཐམས་ཅད་དུས་གཅིག་ལ་དག་གོ། །དེ་དག་ཀྱང་སེམས་ཀྱི་གནས་ས་རང་བཞིན་གྱིས་བྱུང་བས། རྟོག་པ་ཐ་དད་པ་རྣམས་རང་གིས་རང་སྟོངས་པས་ན་གཉེན་པོས་བཅོས་པ་མ་ཡིན་ནོ། །དེའི་ཕྱིར་རླུང་ཕྱིར་འགྲོ་བའི་ཡུལ་མེད་པས། འགྱུ་བ་རང་གྲོལ་བ་ཞེས་བྱའོ། །རླུང་ནང་དུ་ཕྱིན་པས་ཆགས་པའི་གནས་པ་ནི། རླུང་སེམས་ཀྱི་གཞི་སྟོངས་པས་སོ། །ཞེས་སྤྱི་དོན་ལ་གཉིས་པའི་ནང་དོན་དང་པོ་རྟོག་པ་ཡལ་བའི་དུས་ལ་བརྟེན་ནས་ཆོས་ཉིད་ངོས་བཟུང་བར་བསྟན་ནས། ད་ནི་གཉིས་པ་ཡུལ་སེམས་བྲལ་བའི་གནད་ཀྱིས་སེམས་ཀྱི་བབས་བྱུང་ས་ལ་ལྟ་བར་བསྟན་པ་ནི། བསླབ་བྱ་དཔེ་དང་བཅས་པ་ཡིས། །ཞེས་པ་ལ་སོགས་པ་གོང་དུ་བསྟན་པ་ལ་བརྟེན་ནས། ཁམས་གསུམ་འཁོར་བ་དོང་ནས་སྤྲུགས་ཏེ། སྲིད་པ་གསུམ་རང་གྲོལ་བའི་གནད་བསྟན་པའོ། །དེའི་ཕྱིར་ན་སེམས་རང་བཞིན་གྱིས་མ་བཅོས་ན་གསལ་ལ། ཆུ་མ་རྙོག་ན་དྭངས་བས་སོ། །དེ་ལྟར་ན་གློད་པ་ཙམ་གྱིས་གྲོལ་བ་ལས། རང་སོར་བཞག་པས་གནས་པས་ཏེ། རང་ལུགས་སུ་བཞག་པ་ཙམ་གྱི་གྲོལ་བ་ལས་མ་གཏོགས་གཞན་མེད་དོ། །དེ་ལྟར་གློད་པ་དེ་ཡང་སྔར་ལུས་དང་སེམས་བྲལ་གྱིན་བསླབ་པའི་གནད་ལས་བྱུང་བའོ། །དེའི་ཕྱིར་གནད་རྟོགས་པའི་གང་ཟག་ལ་ལུས་ཀྱི་གཞི་སྟོངས་པ་དེ་ལ་སེམས་མི་གནས་པ་ནི། ལུས་སེམས་གློད་པ་ཙམ་གྱིས་གནད་ལས་བྱུང་བའོ། །ཞེས་ནང་དོན་གཉིས་པ་ལུས་སེམས་གཉིས་དབྲལ་བའི་གནད་ཀྱིས་སེམས་ཀྱི་བབས་བྱུང་ས་ལ་བཟླ་བར་བསྟན་ནས། ད་ནི་ནང་དོན་གསུམ་པ་སྐྱེ་བ་སྔ་ཕྱི་ལ་མི་གནས་པའི་གནད་ཀྱིས་སེམས་ཀྱི་གོམས་སྟོབས་ལ་མི་གནས་པར་བསྟན་པ་ནི། ལུས་རྗེས་སུ་སྤྱོད་པས་སེམས་སྟོང་པའི་རྟེན་བྱེད་ལ། དེ་གཉིས་ཀྱི་འབྲེལ་པ་རླུང་གི་འགྲོ་འོང་གཞི་ཟད་ནས་མེད་པའི་གནད་ནི་སྔར་རླུང་མཁས་ལ་སྤུར་བ་ལས་བྱུང་བའོ། །དེས་ན་སྐྱེ་བ་སྔ་མ་རང་འགགས་ལ། དེ་ཉིད་ཐོག་ན་ད་ལྟ་མི་གནས། སྐྱེ་བ་ཕྱི་མའི་ལས་སུ་རྟོག་པ་ལ་མི་གནས་པས་ལྡོག་པའི་ས་དང་ཁུངས་འཛོལ་བས། གཞི་མེད་རྩ་བ་ཆད་པ་ཞེས་བྱའོ། །དེས་ན་རྟོག་པ་ཐ་དད་པ་འདི་བདེན་པ་མིན་པ་ཐམས་ཅད་མེད་པར་ཤེས་པས་རྫུན་གྱི་སྣང་བ་ཡིན་པར་གང་ཟག་གང་གིས་ཤེས་པ་ནི། ཁམས་གསུམ་ལ་མི་གནས་པ་ཞེས་བྱའོ། །དེས་ན་གནད་འདི་ཤེས་པ་ཙམ་གྱིས་གྲོལ་བ་ལས། གོམས་པ་རྒྱུད་ལ་བརྟེན་མི་དགོས་ཏེ། དེ་ཡང་གཞན་སྟོབས་མ་ཡིན་པ། རང་སྟོབས་ལ་བརྟེན་ནས་སྐད་ཅིག་མ་ལ་ཅིག་ཅར་དུ་ཁམས་གསུམ་ལས་གྲོལ་བར་འགྱུར་རོ། །ཞེས་ནང་དོན་གསུམ་པ་སྐྱེ་བ་སྔ་ཕྱི་ལ་མི་གནས་པའི་གནད་ཀྱིས་སེམས་ཀྱི་གོམས་སྟོབས་ལ་མ་བརྟེན་པར་གྲོལ་བར་བསྟན་ནས། ད་ནི་ཡན་ལག་གི་དོན་བཞི་པ་ཁམས་གསུམ་དུ་ལྡོག་པའི་གཞི་སྟོངས་པར་བྱེད་པ་རླུང་གི་གནད་ཀྱི་ཡལ་བའི་དུས་བསྟན་པ་ནི། དེ་ཡང་གཞི་ཟད་པས་འཁོར་བའི་རྟེན་སྟོངས་ལ་རྟོག་པ་གློ་བུར་བ་རང་ཡལ་བས་འགྱུ་བ་རྣམ་པར་དག་པས། འགྱུ་ཤེས་དྲན་པ་གཅོད་པས་ན་སྤུ་གྲིའོ། །དེ་ཡང་འགྱུ་བ་སྔ་ཕྱི་བར་རླུང་ཁ་ནས་ཕུལ་ཏེ་དེད་པས། སྟོང་སར་སྟོངས་ལ། ཡལ་སར་ཡལ་བས་རྟོག་པ་དང་བྲལ་བ་གང་གིས་འཁོར་འདས་ཀྱི་མཚམས་ངོ་མི་ཤེས་པ་ནི། དྲན་པ་ཁུངས་སུ་ཡལ་བས་སྐྱེ་མེད་ཀྱི་གདིང་འཆོས་པའི་རྣལ་འབྱོར་པ་ཞེས་བྱའོ། །དེ་ཡང་ངོ་གར་སྤྲད་ན་སྣང་ཤེས་སྔ་ཕྱིའི་བུར་དུ་ངོ་སྤྲད་པས། དེ་གཉིས་ཀྱི་བར་དུ་སེམས་ཉིད་མེད་པ་དང་བཅས་པའི་ཆོས་ཉིད་མཐོང་བས། རྒྱུ་ཁམས་གསུམ་དུ་ལྡོག་བྱའི་ལས་དང་ཉོན་མོངས་པ་སྟོངས་ལ། དེ་ཉིད་སྟོངས་པས་འཁོར་བའི་རྒྱུ་ལས་དང་བག་ཆགས་འབྲས་བུ་སྡུག་བསྔལ་སྣ་ཚོགས་པའི་འབྲེལ་ཡེ་གྲོལ་མཐའ་ལ་མི་གནས་པར་ཆད་པས། གཞི་སྣང་འཁྲུལ་པ་ཡོད་ཅེས་པ་དང་། མེད་ཅེས་པའི་ལམ་རྒྱུ་རྐྱེན་རང་འགག་པའི་བར་དུ་སྟོང་བས་འཁོར་འདས་ཀྱི་འབྲེལ་ཆད་པའོ། །ཞེས་དེ་དག་གིས་ནི་སེམས་ཀྱི་དམིགས་གཉིས་པའི་སྤྱི་དོན་གཉིས་པ་སེམས་ཀྱི་བྱུང་ས་བཙལ་བས་འཁོར་བའི་གཞི་སྟོངས་པར་བསྟན་པ་ལ་ནང་དོན་བཞིར་བྱས་ནས་བསྟན་ཏོ། །ད་ནི་སྤྱི་དོན་གསུམ་པ་ལུས་སེམས་ཀྱི་འབྲེལ་པ་བརྟག་པ་ཁྱད་པར་དུ་ཆོས་ཀྱི་སྐྱོན་ཡོན་རིག་པས་གྲུབ་པར་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ་ས་ལམ་གྱི་གོལ་ས་བཅད་པ་སེམས་ཀྱི་གཞི་རྩ་གཏན་ལ་དབབ་པར་བསྟན་པ་ནི། གལ་ཏེ་ཕྱིན་པར་འདོད་པ་ཡིས། །ཞེས་པ་ལ་སོགས་པས་བསྟན་ཏེ། གལ་ཏེ་ས་ལམ་ལ་བརྟེན་ནས་ཕ་རོལ་ཏུ་ཕྱིན་པར་འདོད་པའི་ཐེག་པ་ནི་སླར་དེ་ཉིད་ཀྱིས་བཅིངས་ན། སླ་འཁོར་ཏེ་སྔ་མའི་ས་འཁོར་བའི་ལས་རྒྱུ་འབྲས་ཀྱི་ལས་ཀྱི་འབྲེལ་གྱི་ཡང་དང་ཡང་དུ་དེ་ཉིད་འཁོར་བ་ལས་མ་གཏོགས་པ་མེད་པས་ས་དང་ལམ་གཙོ་བོར་བྱེད་པའི་ཐེག་པས་དགོས་པ་ཅི་ཡང་མེད་པས་ན། དེ་ཡང་སྔ་མའི་ས་ལ་གནས་པས་གཞན་ལ་འཇུག་པ་མེད་པའི་ཕྱིར་རོ། །དེའི་ཕྱིར་ན་ཞེ་འདོད་དང་བཅས་པའི་ཆོས་ཀྱི་སེམས་རྟོག་པ་སྣ་ཚོགས་སུ་ཁྲིད་ནས་ལུས་དང་། ངག་དང་། ཡིད་ཀྱི་གནས་ངན་ལེན་དུ་བྱེད་པའི་འགྲོ་བ་མ་དག་པ་ནི། ཁམས་གསུམ་འཁོར་བའི་གཞི་འཛིན་པ་ལས་འགྲོ་ས་གཞན་མེད་དོ། །དེ་གཏན་ཚིགས་གང་གིས་འཛིན་ན། རང་གི་སེམས་ཡོད་པ་དང་མེད་པ་དང་། སྣང་བ་དང་། སྟོང་པ་ལ་རྟོག་པ་ཉིད་ཀྱིས་བཅིངས་པའི་ཕྱིར་ན། ཐེག་པ་ཐུན་མོང་པའི་འགྲུབ་པའི་མཐའ་འཛིན་པའི་འགྲོ་བ་རྣམས་ཁམས་གསུམ་གྱི་སར་ཡང་ནས་ཡང་དུ་འཁོར་བ་ལས་འགྲོ་ས་གཞན་མེད་བས་སོ། །དེའི་ཕྱིར་ན་སེམས་ནི་དྲན་བས་རྟོག་པ་སྣ་ཚོགས་འདུས་པའི་ཕྱིར། འགྲོ་བ་ཐ་དད་པའི་གཟུགས་ཅན་དུ་འཁོར་བ་ལས་མེད་པའི་ཕྱིར་རོ། །དེ་ལྟར་ཁམས་གསུམ་གྱི་ཁ་ཡང་ནས་ཡང་དུ་འཁོར་བ་ལས་མེད་པའི་ཕྱིར་ན། འཁོར་བ་ཁམས་གསུམ་པའི་སྤྱོད་ཡུལ་ལམ་མ་རྟོགས་པ། འདས་པ་རྣམ་པ་ཐམས་ཅད་མཁྱེན་པའི་རང་བཞིན་ཅན་གཉིས་སུ་ཅིས་ཏེ་འབྱུང་བར་རིགས་ཏེ། གལ་ཏེ་རིགས་ན་འཁོར་བའི་མཚན་ཉིད་སྟོང་པས། འདས་པའི་མཚན་ཉིད་ཀྱང་མཐོང་བར་རིགས་ལ། འདས་པའི་མཚན་ཉིད་མཐོང་ན་འཁོར་བ་གྲུབ་པ་ཅིས་རིགས་ཏེ། གཉིས་ཕན་ཚུན་འགལ་བར་ཚ་རེག་དང་གྲང་རེག་བཞིན་ནོ། །གལ་ཏེ་སེམས་ལ་ལྟོས་པས་འགྲོ་བ་དྲུག་གི་གཟུགས་ཐ་དད་པ་ལ་མི་གནས་ན་རང་གི་འདོད་པའི་ལས་དང་བག་ཆགས་མི་བདེན་པའི་སྐྱོན་སྤང་བར་མི་ནུས་ཏེ། བག་ཆགས་ཀྱི་འབྲེལ་མཆོད་པར་འདུག་པར་ལུང་རིག་གིས་ཤེས་སོ། །ས་ལམ་ལ་སོགས་པས་ཡང་བག་ཆགས་ཀྱི་སྡེབས་བསོག་པ་ལ་བརྟེན་པས་སོ། །རིག་པ་ནི་རྒྱུ་འབྲས་རྗེས་མེད་ཀྱི་རིག་པས་འགྲུབ་སྟེ། རྒྱུས་ལམ་ལ་སོགས་པ་སྦྱོར་བ་ཡོད་དོ་རེ་ཤེ་ཡང་། འབྲས་བུ་དེའི་ཐོག་ཏུ་མི་གནས་ཏེ་རྗེས་མེད་པའི་ཕྱིར། དཔེར་ན་ཆུ་ལ་བྲིས་པ་བཞིན་ནོ། །དེ་ཡང་སེམས་སྟོང་པ་དང་། ལུས་དངོས་པོ་གཉིས་ལ་འབྲེལ་པ་མེད་པར་མ་ཤེས་ན། ཁམས་གསུམ་གྱི་གཞི་སྟོངས་མི་སྲིད་པ་ནི། འབྲེལ་པ་རང་གཅོད་གཞི་མེད་ཀྱི་གཏན་ཚིགས་ཀྱིས་འགྲུབ་སྟེ། ལུས་དངོས་པོ་རྫས་སུ་གྲུབ་པ་གཅིག་དང་སེམས། སྟོང་པ་དང་རྩ་བ་གཉིས་དང་པོ་རྒྱུ་མི་གཅིག་པས་རྒྱུ་བདག་ཉིད་གཅིག་པའི་འབྲེལ་པ་ཡང་མེད་ལ། རྒྱུ་གཅིག་ན་ལུས་སེམས་བྲལ་བའི་ཚེ་ལུས་དངོས་པོ་འདི་བོར་ནས་རོ་འོང་བ་བཞིན་དུ། སེམས་ལ་ཡང་དངོས་པོ་ཡོད་ན་རོ་འོང་བར་འགྱུར་ཏེ། སེམས་ལ་དངོས་པོའི་རོ་མེད་པས་སོ། །དེ་ལས་བྱུང་བའི་འབྲེལ་པ་ཡང་མེད་དེ། ལུས་ལས་སེམས་མ་བྱུང་བས་སེམས་དངོས་སུ་མི་སྣང་ལ། སེམས་ལས་ལུས་མ་བྱུང་བས་ན་ལུས་དངོས་པོར་གསལ་བའོ། །དེ་ཡང་གལ་ཏེ་ལུས་ལས་སེམས་བྱུང་ན་སེམས་དངོས་པོར་ཐལ་བའི་སྐྱོན་སྤང་བར་མི་ནུས། སེམས་ལས་ལུས་བྱུང་ན་སེམས་སྟོང་པ་རྒྱུ་མཚན་དང་བཅས་བ་སུས་ཀྱང་མཐོང་བ་མེད་པ་བཞིན་དུ། ལུས་ཀྱང་རྒྱུ་མཚན་སུས་ཀྱང་མཐོང་བ་མེད་པར་རིགས་ཏེ། མངོན་སུམ་གྱིས་གསལ་ལོ། །དོན་དམ་པ་ལ་གྲུབ་པ་མེད་དོ་ཞེ་ན། དོན་དམ་པར་ཆོས་དང་གང་ཟག་ལ་སོགས་པ་གང་ལ་ཡང་གྲུབ་པ་མེད་པ་འདོད་རྟོག་གོ། །དེས་ན་ལུས་འབྱུང་བ་ཕྲ་རགས་ལས་གྲུབ་པ་དང་། སེམས་སྟོང་པ་ངོ་བོ། ངོས་བཟུང་ལས་འདས་པ་གཉིས་ལ་འབྲེལ་པ་ཡོད་ན་གཏན་ཚིགས་གང་གི་ཕྱིར་འབྲེལ་པ་ཡོད་དེ། དེ་རིག་པས་ཀྱང་མི་འཐད་དོ། །དངོས་པོ་དང་དངོས་པོ་མ་ཡིན་པ་ཁྱད་པར་མི་རྙེད་དོ། །ནམ་མཁའ་ཡང་རྫས་སུ་ཐལ་བའི་སྐྱོན་སྤང་བར་མི་ནུས་སོ། །དེའི་ཕྱིར་ན་སེམས་ཀྱང་བརྡའ་ཙམ། ལུས་ཀྱང་བརྡའ་ཙམ་ལས་དོན་གཉིས་སུ་འབྲེལ་བ་ཤེས་བྱ་མི་སྣང་བའི་ཕྱིར། དཔེར་ན་ནམ་མཁའ་དང་གཟུགས་བརྙན་བཞིན་ནོ། །དེའི་ཕྱིར་ན་རྟོག་པའི་མཐའ་ཉེ་བར་དྲན་པ་དང་ལྡན་པ་ལ་འཁྲུལ་པ་དང་། མ་འཁྲུལ་པར་འཛིན་པ་ཅི་ཞེས་བློའི་རིམ་པས་རྟོགས་པས་སོ། །ཞེས་ནང་དོན་དང་པོས་ལམ་གྱི་གོལ་ས་བཅད་པ་སེམས་ཀྱི་གཞི་རྩ་གཏན་ལ་དབབ་པ་བསྟན་ནས། ད་ནི་ནང་དོན་གཉིས་པ་ལྟ་སྒོམ་ལ་མ་བ རྟེན་པར་གྲོལ་བའི་མཚན་ཉིད་གཏན་ལ་དབབ་པ་བསྟན་པ་ནི། བཀོད་ཅིང་དབྱེ་བ་རྟོགས་པ་ལ། །ཞེས་པ་ལ་སོགས་བས་བསྟན་ཏེ། ཕྱི་སྣང་བའི་བཀོད་པས་གཟུགས་ཆོས་ཉིད་དུ་འཆར་བ་དང་ནང་གཟུགས་ཀྱི་བཀོད་པས་ཕུང་པོ་ཡེ་སངས་རྒྱས་པ་དང་། གསང་བ་སེམས་ཀྱི་བཀོད་པས་སྟོང་པ་ཉིད་རྒྱུ་རྐྱེན་དང་བྲལ་བར་རྟོགས་པ་དང་། དེ་ཁོ་ན་ཉིད་ཚིག་གི་བཀོད་པ་ལ་བརྟེན་ནས་བརྗོད་དུ་མེད་པའི་དོན་རྟོགས་པའོ། །དེ་ལྟར་བཀོད་པའི་དབྱེ་བ་བཞིས་མངོན་སུམ་དུ་རྟོགས་པ་ལ། ཐ་སྙད་བཏགས་པ་རྣམ་གྲངས་ཀྱི་ཆོས་དགོངས་པས་ཅི་ཞིག་བྱ་སྟེ། ཕྱི་སྣང་བ་ལ་སོགས་པའི་མ་རྟོགས་པའི་ཆོས་ལ་སོགས་པ་མེད་དོ། །སེམས་ལས་བྱུང་བ་དང་། དེའི་དྲན་པས་ཚོར་བ་རང་སར་ཡལ་ལ། སེམས་འཛིན་དང་ཞེ་འདོད་ཀྱི་ལྟ་བ་དང་། དམིགས་གཏད་དང་བཅས་པའི་སྒོམ་པ་ཅི་ལ་དགོས་ཏེ། གནད་ཤེས་པའམ་མཐོང་བ་ཙམ་གྱིས་གྲོལ་བས་སོ། །བརྟགས་པ་རྣམ་གྲངས་ཀྱི་ཆོས་ཀྱིས་རང་གི་སེམས་བཅིངས་པ་ལས་ཕན་པ་གང་དུ་མ་གྲུབ་སྟེ། དེ་ཅིའི་ཕྱིར་ཞེ་ན། བྱ་བ་དང་བྱེད་པ་ལ་ཡིད་བརྟགས་པས་སླར་དེ་ཉིད་ཀྱི་ཁམས་གསུམ་དུ་འཆིང་བར་བྱེད་དེ། དཔེར་ན་ཐག་པའི་སྒྲོག་གིས་འཆིང་བ་དང་། གསེར་གྱི་སྒྲོག་གིས་འཆིང་བ་ལས་འཆིང་བྱེད་ལ་ཁྱད་མེད་པ་དང་འདྲའོ། །ཆོས་ཀྱིས་སེམས་འཆིང་བས་ན་དེ་ལས་མ་གཏོགས་པའི་གྲོལ་བར་བྱེད་པ་སུ་ཞིག་ཡིན་ཞེ་ན། ལུས་དང་སེམས་འབྲེལ་བ་མེད་པར་རྟོགས་པས་ན། རྣལ་འབྱོར་པ་ལ་དམིགས་གཏད་བློ་དང་བཅས་པའི་བསྒོམས་པས་ཆོས་ཉིད་གནད་གྲོལ་བར་འདོད་པ་ཅི་ཞིག་ཡོད་དེ། མ་བསྒོམས་ལྷུག་པར་གནས་པའི་ཆོས་ཉིད་ལ་བསྐྱར་མི་དགོས་སོ། །ཞེས་ནང་དོན་གཉིས་པ་ལྟ་སྒོམ་ལ་མ་བརྟེན་པར་གྲོལ་བའི་མཚན་ཉིད་གཏན་ལ་དབབ་པ་བསྟན་ནས། ད་ནི་ནང་དོན་གསུམ་པ་ཆོས་ལས་གྲོལ་བ་རང་ཡལ་བའི་མཚན་ཉིད་དཔེ་ལ་བརྟེན་ནས་རྟོགས་པར་བསྟན་པ་ནི། རང་ཡལ་དཔེ་དང་བཅས་པ་ལ། །ཞེས་པ་ལ་སོགས་པས་བསྟན་ཏེ། གཞན་རྣམ་པར་བཅས་པས་རང་ལས་མ་རྟོགས་པའི་ལོགས་པའི་ཆོས་མེད། དེ་ཡང་གཞན་གྱི་བྱས་པའམ། བཅོས་པ་མ་ཡིན་པར་དེ་ཉིད་སྟོང་སར་སྟོང་པས་ཡལ་བ་ནི་དཔེ་ཞེས་པ། དཔེར་ན་ནམ་མཁའ་ལ་སྤྲིན་ཡལ་བས་སྒྲིབ་བྱེད་གང་གིས་ཀྱང་ཕན་གནོད་མེད་ལ། རྒྱ་མཚོའི་རླང་རང་ཡལ་བས་འདིར་སོང་གི་གཏན་མེད་ལ། སྨྱོན་པའི་ཤེས་པ་རང་ཡལ་བས་དྲན་པའི་སྟོབས་ཉམས་ལ། སེམས་ལ་རྣམ་རྟོག་གློ་བུར་བ་རང་ཡལ་བས་དྲན་བསམ་གྱི་ཁུངས་འགག་པའོ། །དེ་ཡང་གནད་དེ་མཐོང་བས་གྲོལ་ལ། གང་མཐོང་གི་དམིགས་གང་སྔས་རྟོག་པ་ཆོད་པ་ལྟ་བུ་དང་། ཤེས་པས་གྲོལ་བ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ངོ་ཤེས་པ་ལྟ་བུ་དང་། གནད་དེ་གོམས་པས་གྲོལ་བ་བྲམ་ཟེའི་ཕྲུག་གུ་རིག་བྱེད་ཀྱི་རྨིང་འབྱོངས་པ་ལྟ་བུའོ། །དེ་ཡང་དཔེ་ངོ་སྤྲོད་དང་བཅས་པས་གྲོལ་བའོ། །དེའི་ཕྱིར་ན་བསྟན་པས་མཐོང་ལ་མཐོང་བས་ཤེས་ལ། ཤེས་པས་གྲོ་བས་ན་དེ་ཉིད་དུ་རྟོགས་པས་བྱ་བ་ཅུང་ཟད་ཙམ་ཡང་མེད་པའི་ཕྱིར། དེ་གང་གིས་ཤེས་ན་དང་པོ་དྲན་བསམ་བྱུང་བའི་ལམ་རླུང་གི་འགྱུ་བ་ཐ་དད་པ་དྲན་མེད་ཀྱི་ངང་དུ་གཏོང་བས། མཐོང་བ་དང་ཚོར་བའི་རྐྱེན་འགྱུ་བྱེད་སྣ་ཚོགས་པ་རྐྱེན་མེད་ཀྱི་ཀློང་དུ་འགགས་པས། གང་ཟག་འདི་ནི་བརྟགས་པ་རྣམས་གྲངས་ཀྱི་ཆོས་ཞེ་འདོད་དང་བཅས་པ་ལས་གྲོལ་བའོ། །ཞེས་དེ་དག་གིས་ནི་སྤྱི་དོན་གསུམ་པ་ལུས་སེམས་ཀྱི་འབྲེལ་པ་རྟག་པ་ཁྱད་པར་དུ་ཆོས་ཉིད་ཀྱི་སྐྱོན་ཡོན་རིག་པས་འགྲུབ་པར་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏེ། ད་ནི་སྤྱི་དོན་བཞི་པ་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པར་བསྟན་པ་ལ། ཡན་ལག་གི་དོན་གཉིས་ཀྱིས་བསྟན་པའི་དང་པོ་ཆོས་དང་རྟགས་ངེས་པར་རྟོགས་པར་བསྟན་པ་ནི། དེ་ལ་ཕྱི་སྣང་བ་ལ་རྟོག་པ་ནི་ཀུན་བརྟགས་འགེགས་པའི་གཞི། ནང་དབང་པོ་ལ་རྟོག་པ་དངོས་པོ་འགེགས་པའི་ལམ། གསང་བ་འགྱུ་བ་རྟོག་པ་དང་དྲན་རིག་འགེགས་པའི་འབྲས་བུའོ། །དེ་ཡང་ཕྱི་ཡུལ་ལ་གནས་པས་འབྱུང་རྐྱེན་རང་གྲོལ། ནང་སེམས་ལ་གནས་པས་བྱུང་ཚོར་རང་ཡལ་བ་དང་། དྲན་རིག་སེམས་སུ་ཆོད་པས་འཁྲུལ་པ་རང་དག །སེམས་ཉིད་རྩ་མེད་ཆོད་པ་ནི་འཁོར་བ་གཏིང་ནས་བཟློག་པའོ། །དེ་ཡང་ཡུལ་དམིགས་པ་དྲན་པ་གློ་བུར་བ་དང་། དེ་ལུས་ལས་སྐྱེས་བའི་ཕྱིར་ན། ལུས་བོར་བ་དང་། དྲན་པ་ཁུངས་སུ་ཡལ་བའི་གནད་དོ། །དེ་ཉིད་སྟོང་ཉིད་བརྗོད་གཞི་དང་བྲལ་བའི་ངང་དུ་འགག་པ་ནི་འདུས་མ་བྱས་པའི་ཆོས་སོ། །ཕྲ་བ་ཤེས་པ་དང་། ཡང་བ་རླུང་དང་། འགྱུ་བ་བློ་སྟེ། ཤེས་པ་རང་ཡལ་བས་བྱུང་ཚོར་གྱི་སྒོ་འགགས། རླུང་གི་ལས་རྫོགས་པས་རྣམ་རྟོག་གི་གཞི་སྟོངས་ལ། བློ་ཆོས་ཉིད་དུ་འགྱུར་བ་ནི་སྐྱེ་མེད་དྲོད་ལ་ཕེབས་པའི་རྟགས་སོ། །ཞེས་ནང་དོན་དང་པོ་ཆོས་དང་རྟགས་ངེས་པར་རྟོགས་པ་བསྟན་ནས། ད་ནི་ནང་དོན་གཉིས་པ་སེམས་ཀྱི་རྒྱུ་རྐྱེན་འབྲས་བུ་མེད་པའི་གནད་བསྟན་པ་ནི། དེ་ཡང་དང་པོ་སེམས་ལ་རྒྱུ་མེད་པས་ཁམས་གསུམ་འཁོར་བའི་འཕེལ་བ་མེད་པ་ནི་གཞི་མེད་རྩ་མེད་དུ་རྟོགས་པ་ལས་བྱུང་ལ། སེམས་ལ་རྐྱེན་མེད་པས་སྣང་བ་ཀུན་སྤངས་པ་ནི་ཅིར་སྣང་ཆོས་ཉིད་དུ་ཤེས་པ་ལས་བྱུང་བའོ། །སེམས་ལ་འབྲས་བུ་འཁོར་འདས་སུ་གྲུབ་པ་མེད་པར་སྣང་བ་དང་། ཤེས་པ་དང་། སྐུ་དང་ཡེ་ཤེས་ཀྱི་ས་བོན་འཁོར་འདས་གོ་ལྡོག་པའི་བར་དུ་སྟོན་པ་ནི། ཆོས་ཉིད་ཀྱི་འགྱུར་བ་ཤེས་པ་ལས་བྱུང་བའོ། །ཞེས་དེ་དག་གིས་ནི་སྤྱི་དོན་བཞི་པའི་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པ་བསྟན་པ་ལ་ནང་དོན་གཉིས་སུ་བྱས་ནས་བསྟན་ཏོ།། །།ད་ནི་དམིགས་གཉིས་པའི་སྤྱི་དོན་ལྔ་པ་ལུས་ངག་ཡིད་གསུམ་གློད་པས་སེམས་ཀྱི་ཡལ་ས་ངོ་ཤེས་པར་བསྟན་པ་ལ། ཡན་ལག་གི་དོན་བཞིས་བསྟན་པའི་དང་པོ་བསྒྲུབ་བྱ་ཁྱད་པར་གྱི་མཚན་ཉིད་གཏན་ཚིགས་དང་བཅས་ཏེ་བསྟན་པ་ནི། སྟོང་པ་སྤྱོད་པ་མེད་པའི་ཡེ་ཤེས་གང་། །ཞེས་པ་ལ་སོགས་པས་བསྟན་ཏེ། སྟོང་པ་སེམས་ལས་མ་བྱུང་བའི་ཡིད་དཔྱོད་བློའི་འགྱུ་བ་མེད་པའི་ཕྱིར་ད་ལྟའི་ཡིད་ཀྱི་རྟོག་པ་གློ་བུར་བར་ཤེས་པ་ཐ་དད་པ་འདི་གང་ལས་བྱུང་ཞེ་ན། ཐོག་མ་འཕེན་པ་ལས་ཀྱི་རླུང་མ་དག་པ་ལས་བྱུང་སྟེ། དེའི་གནད་དུ་རླུང་གི་འགྱུ་བ་ཕྱིར་འཕང་བ་གནད་ཡིན་ནོ། །འགྲོ་ཀུན་སེམས་ཀྱི་ཁང་བུ་བཤིག་པས་གྲོལ་བའི་གནད་ནི་རླུང་ལ་བརྟེན་པས་འགྱུ་བ་མེད་པའི་འགྲོ་འོང་ཞེས་བྱ་སྟེ། དེ་ནི་དྲན་རིག་སྣ་ཚོགས་སུ་སྣང་བའི་སེམས་དེ་གང་ཡིན་ཞེ་ན། ཐོག་མ་གཞི་མེད་རྩ་མེད་དུ་ཤེས་པ་ལས་བྱུང་སྟེ། དེའི་གནད་དུ་རླུང་ཡིད་ཙམ་ནང་དུ་རྔུབ་པའོ། །སེམས་ལ་རྒྱུ་རྐྱེན་གང་དུ་ཡང་མ་གྲུབ་པས་ལས་མེད་པས། ཉོན་མོངས་བདག་ཏུ་རྟོག་པའི་སྒྲིབ་པ་ཟད་པའི་ཕྱིར། ལུང་ལས་མ་བྱུང་བའི་གྲུབ་མཐའ་ཞེས་བྱ་སྟེ། གཞི་དངོས་པོའི་གཤིས་ཞེས་བྱ་བ་དེ་ཅི་ཡིན་ཞེ་ན། སེམས་ཉིད་དྲན་བསམ་གློ་བུར་བ་འདུས་པའི་འཁོར་ལོར་མ་ཤེས་པ་ལས་བྱུང་བའོ། །དེའི་གནད་དུ་གློ་བུར་གྱི་ཤེས་པ་ནམ་མཁའ་ལ་འཕངས་པ་གནད་ཡིན་ནོ། །སེམས་ནི་ཐོག་མ་གང་ནས་ཀྱང་མ་འོངས་ད་འགྲོ་བའི་ས་མེད་པའི་ཕྱིར། སེམས་རྟོག་པ་སྣ་ཚོགས་སུ་འཇུག་པའི་ཡུལ་དེ་སུ་ཡིན་ཞེ་ན། སྣང་རྟགས་རང་གྲོལ་བའི་ཆོས་ཉིད་དུ་མ་ཤེས་པ་ལས་བྱུང་བ་སྟེ། དེའི་གནད་དུ་གང་སྣང་གི་སྟེང་དུ་གང་འགྱུས་བཞག་པ་ཡིན་ནོ། །དེའི་ཕྱིར་ན་ཀུན་གཞི་ལས་མ་བྱུང་བའི་ཆོས་སྐུ་ཞེས་བྱའོ། །སེམས་ཀྱི་རྟོག་པ་རྣམས་རང་ཡལ་བས་གང་དུ་ཡང་འཁོར་ས་མེད་པའི་ཕྱིར། གདམས་ངག་ལས་མ་བྱུང་བའི་ལྟ་སྒོམ་ཞེས་བྱ་སྟེ། དེའི་ཕྱིར་ན་འགྲོ་བ་དྲུག་གི་གནས་སྟོངས་པས་རླུང་གི་འགྲོ་བའི་ལམ་ཟད་པའི་ཕྱིར། དོན་དམ་པ་དང་ཀུན་རྫོབ་ཀྱི་བདེན་པ་ཅི་ཡིན་ཞེ་ན། གཉིས་མེད་གཞི་གྲོལ་དུ་ཤེས་པ་ལས་བྱུང་སྟེ། དེའི་གནད་དུ་སྒྱུ་མ་དང་རྨི་ལམ་གྱི་རྗེས་ལྟ་བ་གནད་ཡིན་ནོ། །དེའི་ཕྱིར་ན་གོམས་པ་ལས་མ་བྱུང་བའི་ཉམས་མྱོང་ཞེས་བྱའོ། །ཞེས་ནང་དོན་དང་པོ་བསྒྲུབ་པ་ཁྱད་པར་གྱི་མཚན་ཉིད་གཏན་ཚིགས་དང་བཅས་ཏེ་བསྟན་ནས། ད་ནི་དམིགས་གཉིས་པའི་བསྡུས་དོན་བཞི་པའི་ནང་དོན་གཉིས་པ་སྐྱེ་ཤི་ལ་བཟླ་བ་འཁྲུལ་གཞི་རང་སྟོངས་པར་བསྟན་པ་ནི། སྐྱེ་བས་ནི་དྲན་པ་གློ་བུར་བ། ཤི་བས་ནི་དེ་ཉིད་ཡལ་སར་ཡལ་བ་རྗེས་མེད་པའོ། །ཤི་བས་ནི་དེའི་རྗེས་མ་བཅད་པར་རང་སོར་བཞག་ནས་ཤེས་བཞིན་གྱི་རྩིས་ཐེབས་པའོ། །ཤི་བས་ནི་དྲན་རྟོག་ཟད་སར་ཟད་པས་ལས་དང་ཉོན་མོངས་པ་ཡལ་བའོ། །ཡལ་བས་དྲན་པ་དབྱིངས་སུ་ཐིམ་པས་མཐའི་རྟོག་པ་འགགས་ལ། དངོས་པོ་རང་རྒྱུད་དུ་འཛིན་པ་སྟོངས་ལ། རྟོག་པ་རགས་པ་རྣམས་མཐར་གྱིས་སྟོངས་པས་འཁྲུལ་པ་ལོག་པའི་ཤེས་པ་སྣང་བ་མེད་པའོ། །ཞེས་ནང་དོན་གཉིས་པ་སྐྱེ་ཤི་ལ་ལྟ་བས་འཁྲུལ་གཞི་རང་སྟོངས་པར་བསྟན་ནས། ད་ནི་ནང་དོན་གསུམ་པ་རླུང་གི་གནད་ལ་བརྟེན་ནས་རྟོག་པ་ཡལ་བར་བྱེད་པའི་ཐབས་བསྟན་པ་ནི། རླུང་ཤེས་ནམ་མཁའ་ལ་འཕངས་པས་འཁྲུལ་པ་ལོག་པར་ཤེས་པའི་སྣང་བ། སྣང་བ་ཕྱི་རོལ་གྱི་ཡུལ་ལ་སྣང་བ་ནི། ཆོས་ཉིད་མངོན་སུམ་དུ་སྣང་བ་སྟེ། དེ་ལས་མ་འདས་པས་སྒྲོ་འདོགས་པའི་ཚིག་གི་མཐའ་ཆོད་པའོ། །ཡེ་ཤེས་ཀྱི་སྣང་བས་རང་བྱུང་གི་ཡེ་ཤེས་ཉིད་གཉེན་པོ་ལས་འདས་པའོ། །ལུས་ངག་སོ་གློད་པས་རླུང་ཕྱེད་ལ་དབང་ཐོབ་བའོ། །སེམས་སོ་གློད་པས་རླུང་གི་དལ་བརྙེད་པས། འཁྲུལ་པ་དུས་གཅིག་ལ་འགགས་པས། ཆོས་ཉིད་ཀྱི་གཞི་ཡངས་ལ། དེའི་ཕྱིར་ན་སེམས་མ་བཅོས་ན་གསལ་བ་སྟེ། དཔེ་ན་ཆུ་མ་རྙོག་ན་རང་དྭངས་པ་ལྟ་བུའོ། །ཆོས་ཉིད་ཇི་ལྟར་ཚད་དུ་ཤར་བས་ཡངས་པ་སྟེ་གང་ལ་བརྟེན་ནས་ཀྱང་གྲོལ་བས་ན། རྟོག་པ་རགས་པ་རྣམས་འཆིང་བ་ནི་ལུང་སེམས་ཕྱིར་ཁ་ནས་བཏོན་ནས་འཕངས་པ་ལས་བྱུང་བའོ། །དེ་ཡང་ཕྱི་རོལ་གྱི་ཡུལ་ལ་ཆོས་ཉིད་གསལ་བས་རྣམ་པར་རྟོག་པ་ཐམས་ཅད་དུས་གཅིག་ལ་ནུབ་པ་ནི། ཆོས་ཉིད་རང་ངོ་ལ་ཐིམ་པ་ཞེས་བྱའོ། །དེ་ལྟར་རྣམ་རྟོག་ནུབ་པས་དྲན་པ་རང་ཡལ་བ་ནི་ཆོས་ཉིད་མ་ཐོག་ཏུ་ཐིམ་པ་སྟེ། དྲན་པ་རླུང་གི་འགྲོ་འོང་གིས་བཅད་པ་ཞེས་བྱའོ། །ཞེས་ནང་དོན་གསུམ་པ་རླུང་གི་གནད་ལ་བརྟེན་ནས་རྟོག་པ་ཡལ་བའི་ཐབས་བསྟན་ནས། ད་ནི་ནང་དོན་བཞི་པ་སེམས་ལ་གནོད་པ་གྲུབ་མཐའི་བློས་བཏགས་ཀྱིས་ཆོས་ཀྱི་གོལ་ས་རྣམ་པར་བཅད་པ་བསྟན་པ་ནི། ལུས་སེམས་བདེ་བར་འདོད་པའི་སེམས་ཀྱི་འགྲོ་འོང་ལ་རྟོག་པའི་ཆོས་ཀྱི་འཆིང་བ་ལས། ཆོས་ཉིད་རྟོགས་པ་ལ་ཕན་པ་ཅི་ཡང་མེད་པས་ན། དེ་ནི་རྟོག་པ་འདུས་པ་འབའ་ཞིག་ཡིན་པས་ན། བྱ་བ་དང་བྲལ་བའི་ཆོས་མ་ཡིན་ནོ། །ཚིག་གིས་རང་གི་ཚིག་སྐྱོབ་པ་ལ་གཞན་གྱི་ཆོས་ཚིག་ལ་གནོད་པའི་རིག་པ་སྟོང་པའི་གྲུབ་མཐས་བློ་སྤྲོས་པ་དང་བཅས་པས་གཞན་པ་ལས་ཕན་པ་ཅི་ཡང་མེད་པའོ། །དེའི་ཕྱིར་ན་ཆོས་ཉིད་གནད་ཐོག་དུ་གྲོལ་བའི་མན་ངག་ནི་ཤེས་པ་ཙམ་གྱིས་གྲོལ་བས་སོ། །ཡང་ཁ་ཅིག་བློ་དང་བཅས་པའི་སྒོམ་པས་སེམས་མ་ཤེས་པ་གཟེངས་བསྟོད་ནས། ལུས་ཀྱང་བཅོས་ནས། ཤེས་པ་ལ་སྒྲིན་བསྐུར་ནས། སེམས་རང་གསལ་ཙམ་ལ་ངལ་སོས་ནས། རང་རིག་གསལ་བ་མྱོང་བ་ལ་བདེ་བར་འདོད་པས་ནི། སླར་འཁོར་བའི་ནང་གནས་ཀྱི་གཟུགས་མེད་པ་རྣམ་ཤེས་མཐའ་ཡས་ཀྱི་སྐྱེ་མཆེད་དུ་འཇུག་པར་བྱེད་པ་ལས། ཁམས་གསུམ་ལས་འཆོས་པའི་ཆོས་མ་ཡིན་ནོ། །དེའི་ཕྱིར་ན་མ་བཅོས་རང་བཞག་ཆེན་པོའི་གནད་གཟིར་བས་འཁྲུལ་སྣང་འཁོར་བ་རྒྱུད་ཆད་པའོ། །ཡང་རྩོལ་བས་ཡུལ་འཚོལ་བའི་སྒོམ་པ་ལུས་སྐྱིལ་ཀྲུང་དུ་བཅས་ནས། རླུང་ཕྱིར་འགྲོ་བ་བཀག་ནས་ལུས་ཀྱི་ནང་དུ་སྡིགས་ནས་བསྒོམས་ལ། སེམས་ཀྱི་འགྱུ་བ་ལ་རྟོག་པས་རང་གི་སེམས་ཀྱི་མཚན་ཉིད་སྟོང་པ་ངོས་བཟུང་དང་བྲལ་བ་མི་ཤེས་ཏེ། དེའི་ཕྱིར་ན་སེམས་ཀྱིས་སེམས་ལ་བལྟས་པས་རྗེས་མེད། སྣང་བ་སྣང་ཐོག་ནས་གྲོལ་བས་འཁོར་རྐྱེན་ཆོས་ཉིད་དུ་ཤར་བ་དང་། ཤེས་པ་དང་། ཤེས་པ་འགྱུ་ཐོག་ནས་གྲོལ་བས། དྲན་བསམ་རང་ངོ་ལ་ཡལ་བའི་གནད་སེམས་ཀྱིས་ཟད་ས་མི་ཤེས་པས། དེ་དག་གིས་སླར་ཁམས་གསུམ་དུ་འཆིང་བ་ལས་མ་གཏོགས་པ་གཞན་ཅི་ཡང་མེད་དོ། །ཡང་ལུས་ཀྱི་བྱ་བ་རྒྱན་ཆ་སྣ་ཚོགས་པས་བརྒྱན་ནས། དུར་ཁྲོད་ལ་སོགས་པར་ཡན་ལག་གི་བྱེད་པ་སྣ་ཚོགས་བས་ལམ་དུ་སློང་བར་བྱེད་པའི་སྤྱོད་པས་བཅིངས་པ་ནི་ཐར་པ་ཐམས་ཅད་མཁྱེན་པའི་གེགས་སུ་བྱེད་པ་ལས་མ་གཏོགས་པ། ཆོས་ཉིད་རང་ཐོག་ཏུ་ཕེབས་པ་མ་ཡིན་ནོ། །དེའི་ཕྱིར་སྣང་བས་རྟོག་པ་དུ་མའི་ཞེན་པ་གཅོད་པའི་གནད་མེད་པར། དྲན་བསམ་ཡུལ་གྱི་རྟོག་པ་སྡུད་པས་ཁམས་གསུམ་དུ་འཁྲིད་པར་བྱེད་པའོ། །ཡང་དཀྱིལ་འཁོར་དང་རྫས་ལ་བརྟེན་ནས། ལུས་ལ་དབང་བསྐུར་བ་ལ་བརྟེན་ནས། སེམས་ལ་བྱིན་རླབས་འཆར་བར་འདོད་པས་ནི། སླར་ཡང་ཁམས་གསུམ་དུ་འཆིང་བར་བྱེད་པའོ། །དེའི་ཕྱིར་རང་བཞིན་མ་བཅོས་རྣལ་མའི་རྒྱ་མེད་པར། ཀུན་བརྟགས་ཡུལ་ལ་གཙོར་བྱེད་པས་རང་རིག་གི་གནད་མི་མཐོང་བའོ། །དེ་དག་གིས་བསྡུས་པའི་དོན་ལྔ་པ་ལུས་ངག་ཡིད་ཀློད་པ་ཙམ་གྱིས་སེམས་ཀྱི་ཡལ་ས་ངོ་ཤེས་པར་བསྟན་པ་ལ་ཡན་ལག་གི་དོན་བཞིར་བྱས་ནས་བསྟན་ཏོ།། །།ད་ནི་སྤྱི་དོན་དྲུག་པ་ཆོས་ཉིད་དེ་གློད་པ་རང་གི་གནད་དང་ཚད་བསྟན་པ་ལ་ཡན་ལག་གི་དོན་དྲུག་གིས་བསྟན་པའི་དང་པོ། སེམས་གློད་པའི་གནད་ཀྱིས་འཆོས་པས་གོལ་བར་བསྟན་པ་ནི། གང་ག ིས་མ་བཅིངས་སེམས་འདི་ཉིད། །ཅེས་པ་ལ་སོགས་པས་བསྟན་ཏེ། དྲན་པ་དང་རྟོག་པ་གང་གིས་ཀྱང་མ་བཅིངས་པར་རང་སོ་ན་གནས་པའི་སེམས་འདི་ཉིད་ནི། གང་སྣང་གི་སྟེང་དུ་བཞག་པ་ཤེས་པ་གཅོད་བྱེད་ཕྱིར་མ་བལྟས། ཡིན་པ་ལ་བདག་ཏུ་མེད་པ་ཞེས་བྱའོ། །དེ་ཡང་རང་སྣང་གི་སྟེང་དུ་གློད་པ་ཙམ་གྱིས་གྲོལ་བ་ལ། སེམས་ལ་གསལ་བའམ་སྟོང་པར་གཟེག་བསྐུར་ནས་བསྒོམ་པ་ནི། སླར་འཆིང་སྟེ། གཏན་ཚིགས་ཅིའི་ཕྱིར་ན། ངོ་བོ་སྟོང་པས་མཚན་ཉིད་ལ་བཅོས་སུ་མེད་པས། བཅོས་ན་སླར་འཆིང་བའི་ཕྱིར་རོ། །ཞེས་ནང་དོན་དང་པོའོ། །ད་ནི་ནང་དོན་གཉིས་པ་དྲན་རྟོག་རང་ཡལ་བས་ཆོས་ཉིད་ལས་འཁྱེར་ས་མེད་པར་བསྟན་པ་ནི། འཇུག་ནས་ཞེས་པ་ལ་སོགས་པས་བསྟན་ཏེ། དེ་ཡང་ཡུལ་ཀུན་ལ་འཇུག་པར་ནུས་ཤིང་རང་གི་སེམས་གཞི་རྩ་མེད་པ་ལ་འཆིང་བའི་དྲན་པ་ཆོས་ཉིད་ཀྱི་ཀློང་དུ་ཐིམ་བ་ནི། དྲན་བསམ་གྱི་འཁོར་ལོ་ལ་མི་གནས་པ་ཉིད་དོ། །དེ་ཡང་དྲན་པ་གང་ལ་སྣང་བ་སྣང་ཐོག་སོ་སོའི་རང་སར་ཡལ་བ་ལ། སྔ་ཕྱི་སྡེབས་དང་འགྲོ་ས་མེད་པས། རྟོག་མེད་ཀྱི་བསམ་གཏན་སེམས་བཟུང་ནས་བསྒོམས་པས་སླར་དྲན་པ་རྒྱུད་ལ་བརྟེན་པར་འགྲོ་བས། དེ་ཡང་ཅིའི་ཕྱིར་དྲན་པ་བརྟེན་ཞེ་ན། རྟོག་དཔྱོད་ཡུལ་གྱི་ཤེས་པ་ནང་དུ་བཟུང་བས། སྣང་བ་ཕྲ་བའི་ཞེན་པ་རང་རྒྱུད་དུ་བཟུང་བས་དྲན་པ་སླར་རགས་སུ་སོང་བའོ། །ཞེས་ནང་དོན་གཉིས་པ་དྲན་རྟོག་རང་སར་ཡལ་བའི་ཆོས་ཉིད་ལས་འཁྱེར་ས་མེད་པར་བསྟན་ནས། ད་ནི་ནང་དོན་གསུམ་པ་དྲན་པ་རང་ཡལ་བའི་གནད་ལ་བརྟེན་ནས་གཏན་ཚིགས་དང་བཅས་པ་བསྟན་པ་ནི། དེ་ཡང་རང་ལུས་དངོས་པོ་རང་རྒྱུད་པ་འབྱུང་བ་བཞིའི་བྱེད་པོ་དང་བཅས་པ་དང་། སེམས་དངོས་མེད་སྟོང་པ་རྒྱུ་རྐྱེན་དུ་མ་གྲུབ་པ་གཉིས་འདྲེས་ཤིང་དུས་མཚུངས་པ་ལ། གནད་དུ་ལུས་སེམས་ཀྱི་འབྲེལ་བ་བཅད་པའི་མན་ངག་རླུང་སེམས་ཡ་ཕྲལ་ནས་བསླབ་པ་ཙམ་གྱིས་དྲན་པ་སྟོངས་པ་ལ་ཆོས་ཉིད་ཡིན་ལ། ཨ་དང་ཧཱུཾ་ལས་སོགས་པ་ལུས་ཁྲོ་བོའི་སྐུར་བདག་ཏུ་གཟུགས་སུ་སློང་བ་ཅིའི་ཕྱིར་ཏེ། དངོས་པོ་གཅིག་ལ་གཟུགས་བརྙན་ཐ་དད་པ་མི་རུང་ངོ་། །ཞེས་ནང་དོན་གསུམ་པ་དྲན་པ་རང་ཡལ་བའི་གནད་ལ་བརྟེན་གཏན་ཚིགས་དང་བཅས་པ་བསྟན་ནས། ད་ནི་ནང་དོན་བཞི་པ་གཅིག་ཤེས་ཀུན་གྲོལ་བའི་གནད་ཀྱིས་ཐ་སྙད་རྣམས་རང་འགགས་པར་བསྟན་པ་ནི། གཅིག་ཆོས་ཉིད་དུ་ཤེས་པས་ཐ་སྙད་ཀུན་ལས་གྲོལ་བའི་རང་བཞིན་ལ་བྱ་བ་བྱེད་པས་གནོད་པ་ནི། ལུས་ངག་གི་བྱ་བ་དང་བྲལ་བ་ལ་ཤེས་པ་གླེན་ལྷོད་ཀྱིས་སོང་ན་སྤྱོད་པ་ཤུགས་ཀྱི་ཡངས་པས་རྟོག་པ་ལས་གྲུབ་མཐའི་ཐ་སྙད་བརྗོད་པའི་ཚིག་གི་མཐའ་ལ་འཇལ་བ་ཅིའི་ཕྱིར་ཞེས་ནང་དོན་བཞི་པའོ། །ད་ནི་ནང་དོན་ལྔ་པ་དེ་ཡང་རང་གྲོལ་གཅིག་གི་འཁོར་ལོ་ལས་མ་འདས་པར་བསྟན་པ་ནི། ཉོན་མོངས་པ་ལྔ་པོ་བྱང་ཆུབ་ཐོབ་པར་བྱེད་པའི་ས་བོན་ཡིན་པ་ལ། རང་གྲོལ་གཉེན་པོ་གཞན་ལ་མ་ལྟོས་པར་བཞག་པ་ཙམ་གྱི་གྲོལ་བ་ལས། ལམ་ལྔ་འདོད་པ་དང་སའི་གྲངས་དང་གཉེན་པོ་འདོད་པ་ཅིའི་ཕྱིར་ཞེས་ནང་དོན་ལྔ་པའོ། །ད་ནི་ནང་དོན་དྲུག་པ་དེ་གཉིས་ཀྱི་གྲོལ་ས་བསྟན་པ་ནི། གང་ལས་ཀྱང་མ་བྱུང་བས་བྱ་བ་ལས་གྲོལ་བ་ནི། གང་དུ་ཡང་མ་སོང་བས་སྤང་བླང་དུ་ཡང་མེད་པས་སོ། །དེས་གར་ཡང་གནས་ཤིང་འགྱུར་བ་མེད་པ་ཉིད་དོ། །དེ་ཡང་རང་ངོ་སྤྲད་པ་ཙམ་ལས་ཅི་ཞིག་བྱ་སྟེ་འབད་པ་བྱ་མི་དགོས་སོ། །ཞེས་རྣམ་པ་ཡུལ་རྟོག་པ་དྲན་པ་གཅོད་པའི་གནད་སྤུ་གྲི་ལྟ་བུ་ལ་སེམས་ཀྱི་ཡུལ་བསྟན། དམིགས་བསླབ་བྱ་གཉིས་པ་ལ་བསྡུས་པའི་དོན་དྲུག་ཏུ་བྱས་ནས་བསྟན་ཏོ། །མཁས་པ་བྱེ་མ་ལས་རྣམ་པར་བཤད་པའོ།། །།ཨཐྎ༔ རྒྱ་རྒྱ་རྒྱ། ས་མ་ཡཱ།། ༈ །།སེམས་ཀྱི་དམིགས་གསུམ་པའི་རྣམ་པར་བཤད་པ་ནི། འདི་ལ་བསྡུས་པའི་དོན་གཉིས་ཏེ། དེ་ལ་སྤྱི་དོན་དང་པོ་གནད་ལ་བརྟེན་ནས་ཁྱད་པར་ཡེ་ཤེས་ཀྱི་བབས་ལྟ་བ་དང་། སྤྱི་དོན་གཉིས་པ་སེམས་དང་ཡེ་ཤེས་ཀྱི་དབྱེ་བ་གཏན་ཚིགས་དང་བཅས་ཏེ་བསྟན་པའོ། །དེ་ལ་སྤྱི་དོན་དང་པོ་གནས་ལ་བརྟེན་ནས་ཁྱད་པར་ཡེ་ཤེས་ཀྱི་སྣང་བ་བསྟན་པ་ལ། ཡན་ལག་གི་དོན་དགུས་བསྟན་པའི་དང་པོ་རླུང་གནད་རིན་པོ་ཆེ་ལ་བརྟེན་ནས་སངས་རྒྱས་ཀྱི་ཞིང་ཁམས་རང་ལ་རྫོགས་པར་བསྟན་པ་ནི། གང་གིས་རླུང་ལ་གོམས་པ་ཡིས། །ཞེས་པ་ལ་སོགས་པས་བསྟན་ཏེ། གང་གིས་ཞེས་འགྲོ་བ་གང་ཟག་སྨོས་པ་སྟེ། རླུང་ཕར་འཕེན་པ་ལ་གོམས་པར་བྱས་པ་ཡིས། བཏགས་པ་རྣམ་གྲངས་ཀྱི་ཆོས་རྣམས་ཐམས་ཅད་འཇིག་པར་བྱེད་པ་ནི། ཚད་རང་ལ་ཟིན་པས་སོ། །སེམས་ཀྱི་དམིགས་ནི་བསླབ་བྱའི་རིམ་པ་དྲུག་དཔེ་དང་བཅས་པ་ལ་མཁས་པ་ནི། ལག་ལེན་ཁྲིག་ཆགས་སུ་སྟོན་ཤེས་པས་འགྲོ་བ་ལྷ་ལ་སོགས་པ་དྲུག་གིས་འཕྲོས་པའི་ཁུངས་སྲིད་པའི་བར་དོ་ལ་མ་བྱུང་ནས་སོ་སོའི་མངལ་གྱི་སྒོར་འཛུད་པ་ནི། རླུང་གི་བྱེད་པའི་ལས་བྱེད་པ་སྟེ། དེ་གཅོད་པར་བྱེད་ལ་སེམས་ཀྱི་ཁང་བུ་གཞིག་པར་བྱེད་པ་སྔོན་འགྲོ་དང་། དངོས་གཞིའི་ལག་ལེན་ནོ། །དེ་ཡང་སློབ་པའི་གང་ཟག་གིས་སྔར་འགྱུ་བ་ཡལ་ལ། ཕྱི་མའི་འགྱུ་བ་སྣ་སྟེབས་པའི་བར་དུ་ཡལ་བའི་མཚམས་དྲན་རིག་གང་གིས་ཀྱང་མ་བཟུང་བའི་དུས་སུ་ཤེས་པ་གཏད་པས། དྲན་རིག་དབྱིངས་ལ་ཐིམ་ནས། འགྱུ་བ་ཁོག་སངས་པ་ཞེས་བྱ་བའི་ཉམས་སུ་མྱོང་བ་རྒྱུད་ལ་འཆར་རོ། །དེ་ལྟར་ན་ཡུལ་གྱི་རྐྱེན་གང་སྣང་གི་སྟེང་དུ་བཞག་པས་རྣམ་ཤེས་གཅིག་ཏུ་སྡུད་པའི་ཐབས་ནི་རླུང་འགྲོ་བ་ལ་བརྟེན་ནས། ནང་དུ་མེར་གྱིས་གང་བའ ི་ཚེ། རྣམ་པར་རྟོག་པ་རང་སར་སངས་ནས། ཡེ་ཤེས་རང་ངོ་ལ་རྒྱས་ཏེ། ཆོས་ཉིད་ཀྱི་ཞིང་ཁམས་སུ་མི་ལྡོག་པས་རང་རྫོགས་པའོ། །ཞེས་ནང་དོན་དང་པོ་རླུང་གནད་རིན་པོ་ཆེ་ལ་བརྟེན་ནས་སྐྱེ་བ་ཐ་མའི་ཞིང་ཁམས་རྫོགས་པར་བསྟན་ནས། ད་ནི་ནང་དོན་གཉིས་པ་ཡལ་བའི་དུས་ངེས་པ་ཁྱད་པར་གྱི་མཆོད་བྱ་ལས་བྱུང་བར་བསྟན་པ་ནི། དེ་ཡང་མཆོད་པ་ཞེས་པ་གཏོང་བ་ཁྱད་པར་གྱི་བྱེ་བྲག་སྟེ། དེ་མཆོད་པར་བྱེད་པའི་གནད་དུ་མ་ཆགས་མི་གཡོ་བའི་རླུང་ལ་གཏད་པས་ཁམས་གསུམ་དུས་གཅིག་ལ་གྲོལ་བའོ། །དེ་ལྟར་སེམས་སྡེ་ལས། བླ་མ་མཆོད་དང་གཏོང་བ་དང་། དེ་བཞིན་བསོད་ནམས་ཐམས་ཅད་ལ། །མ་ཆགས་མི་གཡོའི་སྟོབས་མེད་ན། །བྱས་ན་འཆིང་བ་ཆེན་པོར་འགྱུར། །ཞེས་པས་སོ། །དེ་ལ་འགྲོ་བ་ནི་རླུང་རྣམས་ཀྱིས་ནི་ཕྱིར་འགྲོ་ནང་དུ་འགེངས་པའོ། །དམིགས་ནི་ཉམས་དང་རྟོགས་པ་གསལ་བར་བྱེད་པའོ། །སེམས་ཀྱི་ཡལ་དུས་ནི་སྣང་སྟོང་གང་དུའང་མ་ཕྱེ་བའི་དུས་སོ། །དེ་རང་གི་ལུང་ལ་མངོན་པར་འགྲོ་འོང་མེད་པ་ཉིད་དུ་རྟོགས་པ་ནི། རླུང་སྔ་མ་འདས་པ་དང་ཕྱི་མ་མ་འོངས་པའི་མཚམས་དྲན་རྟོག་རང་ཡལ་ལ་མཁས་པའི་ཞེས་པ་ནང་དོན་གཉིས་པའོ། །ད་ནི་ནང་དོན་གསུམ་པ་བསླབ་པར་བྱ་བ་ཐུན་མོང་མ་ཡིན་པའི་གནད་བསྟན་པ་ནི། རིག་པའི་ངོ་བོས་སྟོང་ལ་རང་བཞིན་གྱིས་གསལ་བའོ། །ཡེ་ཤེས་ནི་ཀ་དག་ལྷུན་གྲུབ་ཐུགས་རྗེ་ཀུན་ཁྱབ་ཀྱི་ཡེ་ཤེས་སོ། །གཞི་གནས་དང་། མཚན་ཉིད་འཛིན་པ་ཡེ་ཤེས་རྣམ་པ་ལྔའོ། །དང་། ཤེས་བྱས་བསྡུས་པའི་ཡེ་ཤེས་སོ། །ཇི་ལྟ་བ་དང་ཇི་སྙེད་པའི་ཡེ་ཤེས་སོ། །ལོགས་པ་ནི་སློབ་པའི་གང་ཟག་གིས་གྱང་ངམ་རྩིག་ལོགས་ལ་རང་གི་སྙིང་ཁར་ཤིང་གཏད་ནས། དེ་ལ་རླུང་ཤེས་བཅུག་ནས་ཡུན་རིང་བསླབས་པས་གང་ལ་ཡང་ཟང་ཐལ་བར་རྒྱུ་ནུས་པ་དག་ཏུ་འགྱུར་ལ། མི་སློབ་པས་དེ་ཉིད་གཏད་པ་ཙམ་གྱིས་གནད་དེ་ཤེས་པ་ཙམ་གྱིས། གྲོལ་བའོ། །དེ་ནི་སློབ་པ་དང་མི་སློབ་པ་གཉིས་ཀས་ལུས་འབྱུང་བ་ས་ཆུ་མེ་རླུང་བཞིས་སེམས་བཅིངས་པ་ལས་གྲོོལ་ནས། ལུས་འབྱུང་བ་བཞི་འཆར་བ་ལ་ཐོགས་པ་མེད་པར་རྒྱུ་བར་ནུས་པ་དག་འབྱུང་ངོ་། །དེ་ལ་ལུས་འབྱུང་བ་རྡུལ་ཕྲ་རབ་ཀྱི་རྟོག་པ་སངས་པས་ལུས་ཀྱང་སང་སེང་དུ་མཐོང་ལ། ནང་སེམས་ཉིད་ཟད་པའི་མཐར་གྲོལ་བས། རང་ངོ་ཡེ་ཤེས་སུ་རྒྱས་པའི་དྲི་མ་འབྱུང་བ་ཕྲ་རགས་ལ་བདག་ཏུ་བཅིངས་པ་ངོ་ཤེས་པའི་རྣལ་འབྱོར་དེས་ནི་རི་བྲག་རྣམས་ལ་ཟང་ཐལ་བར་རྒྱུ་བར་ནུས་སོ། །ཞེས་ནང་དོན་གསུམ་པ་བསྟན་ནས། ད་ནི་ནང་དོན་བཞི་པ་གནས་པ་རྩའི་གནད་ལ་བརྟེན་ནས་བཙན་ཐབས་སུ་སངས་རྒྱ་བར་བསྟན་པ་ནི། ད་རེས་རིག་པ་ནི་འགྱུ་བའི་ཆ་ནས་བཞག་ལ། ཡེ་ཤེས་ནི་གསལ་ཙམ་ལ་བཞག་ལ། སྤུར་བ་ནི་སློབ་པ་རང་གི་ལུས་དཀྱིལ་ན་རྩ་ཕྱི་དཀར་བ། ནང་དམར་བ། ཁ་ཆེ་ལ་རྩ་བ་ཕྲ་བ་སྙིང་གི་དཀྱིལ་ནས་ལམ་བྱུང་སྟེ་མིག་ལ་ཟུག་ནས་ཡོད་དེ། དེའི་ནང་ནས་རླུང་དང་སེམས་དྲངས་ལ་མཁའ་ལ་བཏོན་པས་རླུང་སེམས་ཆོས་ཉིད་དུ་འགྱུར་བའོ། །གཉིད་དང་རྨི་ལམ་གྱི་རྣལ་འབྱོར་བྱེད་པ་དྲན་པ་རྩ་ནང་དུ་བསྟིམས་ལ། ཁ་ལ་ཡི་གེའི་ཨ་དཀར་པོས། རྒྱས་བཏབ་ནས་གཉིད་ཀྱི་རྣལ་འབྱོར་དུ་བྱས་ན། གཉིད་འོད་གསལ་གྱི་གནད་ཀྱིས་གཉིད་འོད་གསལ་རྟོག་པ་མེད་པ་དང་རྨི་ལམ་ཆོས་ཉིད་དུ་འགྱུར་བའི་རྣལ་འབྱོར་དམ་པའོ། །ཞེས་ནང་དོན་བཞི་པའོ། །ད་ནི་ནང་དོན་ལྔ་པ་རླུང་སྤུར་བའི་གནད་ཀྱིས་ལུས་སེམས་ཀྱི་འབྲེལ་བ་བཅད་པར་བསྟན་པ་ནི། རིག་པའི་འཕེན་པ། ཡེ་ཤེས་ནི་ཕྱིར་གསལ་བ། མཁའ་ནི་སློབ་པས་ལུས་ཀྱི་གནད་ལ་བརྟེན་ནས། ཕྱིར་འཕངས་པས། རང་བཞིན་གྱི་འབྲེལ་པ་དག །འབྱུང་བའི་གནད་ཀྱིས་རླུང་ཕྱིར་ཕུལ་བས་རིག་པ་རང་སར་དྭངས་ཏེ། ཡུལ་དམིགས་ལ་སོགས་པ་གཟུགས་ལ་རྟོག་པ། སེམས་ཀྱིས་དེའི་རྒྱུད་བཟུང་བ་དང་འཛིན་པར་བྱེད་པའོ། །དེ་གཉིས་ཀྱི་འབྲེལ་རླུང་། དེ་མ་སྐྱེས་མི་སྐྱེ་བའི་དགོངས་པ་ལ་དཔྱད་ན། འཁྲུལ་རྐྱེན་དུ་མ་ཆོས་ཉིད་དུ་འཆར་བའོ། །ཞེས་ནང་དོན་ལྔ་པའོ།། །།ད་ནི་ནང་དོན་དྲུག་པ་ཁྱད་པར་ཆེན་པོ་མཆོག་གིས་རང་ངོ་ཅེར་མཐོང་དུ་བསྟན་པ་ནི། ངོ་གཞན་མ་ཡིན་པའི་ཆོས་ཉིད། སྤྲད་པ་གཉིས་འདུས་པ་གནད་དེ་དེ་ཉིད་ངོ་ཤེས་པས་རིག་པ་རང་ཐོག་ཏུ་གྲོལ་ཡེ་ཤེས་ཀྱི་རང་ངོ་བློ་ཡིས་དཔྱད་པས། སྣང་བས་མ་བསྒྱུར་བའོ། །དེ་བསྟན་པ་ཙམ་གྱིས་ཤེས་པས་གྲོལ་བའོ། །རྫོགས་པས་བཅོས་སུ་མེད་ལ། ཆེན་པོ་ཡིན་པས་དེ་ལས་འདས་པ་མེད་པའོ། །བྱ་བ་དང་བྲལ་བས་འབད་མི་དགོས། ཀློང་ནི་དེ་ལས་འཕྱུགས་པ་མེད་པ། ལྟ་བ་ནི་མཐོང་བ་རྣམ་པར་དག་པ། ངོས་རླུང་སེམས་ཀྱི་བར་དུ་བཟུང་བའོ། །ཞེས་ནང་དོན་དྲུག་པའོ།། །།ད་ནི་ནང་དོན་བདུན་པ་བྱ་བ་དང་བྲལ་བའི་གནད་ཀྱིས་མ་བྱས་པའི་ཆོས་ཉིད་གཏན་ལ་དབབ་པ་བསྟན་པ་ནི། ཐག་སེམས་ཉིད་མ་བཅོས་པ་རྣལ་མ་ལ། འཁོར་འདས་དུས་གཅིག་བཅས་པའི་གནད་ལ་བརྟེན་ནས་ནི། དྲན་རིག་གི་ཡལ་ས་ཤེས་པས་སོ། །རྫོགས་པ་ནི་སྤང་བར་དགག་སྒྲུབ་ལས་འདས་ཤིང་། བྱ་བཙལ་དང་བྲལ་བའི་དོན་ནོ། །ཆེན་པོ་ནི་ཐབས་ཀྱི་ཁྱད་པར་ལ་དགོངས་པའོ། །བྱ་བྲལ་ཞེས་པས་རྣལ་འབྱོར་བས་ཕྱི་ལུས་ཀྱི་དལ་བ་བརྟེན་པ་དང་། ནང་ངག་གི་དལ་བ་བརྟེན་པ་དང་། གསང་བ་སེམས་ཀྱི་དལ་བ་བརྟེན་པའོ། །དེ་ལྟར་བྱས་པས་ལུས་དལ་བས་རྩ་དལ་ལ། རྩ་དལ་བས་རླུང་དལ། རླུང་དལ་བས་རྣམ་རྟོག་རྒྱུན་ཆད་པས་གནད་ཆེའོ། །དེ་ལྟར་བྱས་པས་ལུས་ཆོས་ཉིད་ཀྱི་ཀློང་དུ་ཚུད་པས་ལུས་ཀྱི་དངོས་པོ་རང་ཞིག་ནས་ལུས་ཀྱི་བདེ་བ་རྙེད། ངག་ཆོས་ཉིད་ཀྱི་ཀློང་དུ་ཚུད་པས་ངག་གི་དངོས་པོ་ཞིག་པས། ངག་བརྗོད་དུ་མེད་པ་ལ་ལོངས་སྤྱོད་དོ། །སེམས་ཆོས་ཉིད་ཀྱི་ཀློང་དུ་ཚུད་པས་སེམས་ཀྱི་ཁང་བུ་ཞིག་ནས། སེམས་ཀྱི་ཡལ་ས་ངོ་ཤེས་པའོ། །དེ་ལྟར་ཆེན་པོ་ཉིད་ཀྱི་ལྟ་བ་དངོས་བསྟན་པ་ནི། ཡལ་ངོ་ཤེས་པས་ལུས་ཀྱི་ཞེན་པ་སེམས་དང་འབྲེལ་བས་ལུས་ཀྱི་བརྡའ་ཐབས་ལ་གནས་པས། ལྡོག་པའི་གཞི་སྟོངས་པ་དང་། ཡལ་རྐྱེན་ངོ་ཤེས་པས་ངག་གི་ཞེན་པ་ཚིག་གི་རྟོག་དཔྱོད་དང་འབྲེལ་བ་ཆོད་དེ་དག་གྱི་ན་བརྡའི་ཐབས་གཙོ་བས། ལྡོག་པའི་ལམ་མ་རྙེད་པའོ། །ཡང་ཡལ་བའི་དུས་ངོ་ཤེས་པས་སེམས་ཀྱི་ཞེན་པ་ཡུལ་ཐ་དད་པ་ལ་རྟོག་པའི་འབྲེལ་བ་ཆོད་པས་སེམས་ཀྱི་ན་བརྡར་གནས་པ་བསྟན་པས་ལྡོག་པའི་འབྲས་བུ་ཟད་པའོ། །ཞེས་ནང་དོན་བདུན་པ་བསྟན་ཏོ།། །།ད་ནི་ནང་དོན་བརྒྱད་པ་ཉམས་དང་རྟོགས་པ་ལ་བརྟེན་ནས་ཁམས་གསུམ་གྱི་གཞི་སྟོངས་པར་བསྟན་པ་ནི། དེ་ཡང་གདིང་གྲོལ་བ་བཞིའི་སྟེང་དུ་བཅའ་བའི་གནད་ཡེ་གྲོལ་བསྐྱར་གཞི་མེད་ལ། རང་གྲོལ་ལ་གཉེན་པོ་མེད་པ་དང་། ཡོངས་སུ་གྲོལ་བ་ལ་རྣམས་སྨིན་མེད་པ་དང་། ཅེར་གྲོལ་མཐོང་བ་ཙམ་གྱི་ཡལ་བའི་གནད་ལ་བརྟེན་པས་ནི་འཁོར་བ་སྣང་ཤེས་ཐ་དད་པ་དང་། འདས་པ་སྐུ་དང་ཡེ་ཤེས་ཀྱི་འབྱུང་གནས་དང་། དེ་གཉིས་ཀྱི་འབྲེལ་པ་ཆོས་ལ་བདག་ཏུ་ལྟ་བ་རྣམས་བཅད་ནས། སེམས་ཅན་གྱི་ཁམས་གསུམ་གྱི་དོང་ཐར་བར་དཀའ་བའི་ཡལ་བའི་མཚན་ཉིད་ཤེས་པ་ལ་བརྟེན་ནས་དུས་གཅིག་ལ་སྤྲུག་ནས། དེ་ནས་ཕྱི་ལུས་དང་། ནང་ངག་དང་། གསང་བ་སེམས་ཀྱི་སྲིད་པ་དང་གསུམ་གྱི་གདར་ཤ་རྟོག་པ་རྣམས་རང་འགགས་པས་གཅོད་པའོ། །ཞེས་ནང་དོན་བརྒྱད་པ་བསྟན་ནས། ད་ནི་ཡན་ལག་གི་དོན་དགུ་པ་གནད་གསུམ་གྱི་ཁྱད་པར་གྱི་ཆོས་བསྟན་པ་ནི། དེ་ཡང་ཞེས་པ་བསྐྱར་བའམ་བསྣན་པའི་ཚིག་གོ། །ངོ་ནི་རང་ངོ་རིག་པ། གཞན་ངོ་སྣང་བ། རང་ནི་རང་གི་རིག་པས་རྒྱུ་མེད་གཞན་ལ་མ་ལྟོས། རང་སྣང་བས་རྐྱེན་མེད་ཡུལ་ལ་མི་གནས་པའོ། །ཐོག་ཏུ་ནི་འགྲོ་ས་མེད་པས་འཆར་བ་དང་འཆུག་པ་མེད་པའོ། །དེ་ལྟར་སྣང་བ་དང་རིག་པ་གཉིས་སྤྲད་པས་ཕྱི་སྣང་བ་ལ་བརྟེན་ནས་འཁོར་བའི་སྤྱི་བས་ལྡོག་པའི་ཁུངས་འགགས་པས་ཕྱིན་ལ། ནང་རིག་པ་ལ་བརྟེན་ནས་འདས་པའི་སྤྱི་བས་འོང་མེད་འགྲོ་ས་མེད་པས་ཕྱིན་པའོ། །ཐག་གཉིས་སྣང་མེད་པར་རིག་པ་གཅིག་པའི་ཐོག་ཏུ་འཁོར་འདས་གཉིས་མེད་དུ་བཅད་པས། སེམས་འགྱུ་བ་སྣ་ཚོགས་ལ་རྟོག་པའི་འཁོར་ཏེ། སེམས་འགྱུ་བ་རང་དག་པ། སྟོང་པ་ངོ་བོ་རང་ཐོག་ན་གསལ་བ་གཉིས་གཞི་མི་གཅིག་པས་སོ་སོར་ཕྱེ་བས། གཅིག་ཡལ་གཅིག་སྣང་བས་རང་ངོ་འབྲེལ་མེད་ཕྱེད་པའོ། །དེ་ལྟར་ཕྱེད་པས་གདིང་གྲོལ་བ་བཞིའི་ཐོག་ཏུ་བཅད་ཅིང་བཙལ་དུ་མེད་པར་བཅས་པས། ད་འཁོར་བ་རང་ཐོག་ཏུ་ལྡོག་པ་མེད་པའི་རྩད་རང་སེམས་ཡལ་བའི་དུས་སུ་ཆོད་པས། ད་ཁམས་གསུམ་དུ་ལྡོག་པའི་རྟེན་མེད་པའོ། །ཞེས་དེ་དག་གིས་སེམས་ཀྱི་དམིགས་གསུམ་པའི་བསྡུས་པའི་དོན་དང་པོ་གནད་ལ་བརྟེན་ནས་ཁྱད་པར་ཡེ་ཤེས་ཀྱི་སྣང་བ་བསྟན་པ་ལ་ཡན་ལག་གི་དོན་དགུར་བྱས་ནས་བསྟན་ཏོ།། །།ད་ནི་སྤྱི་དོན་ཐ་མ་སེམས་དང་ཡེ་ཤེས་ཀྱི་དབྱེ་བ་ཚིག་དང་བཅས་ཏེ་བསྟན་པ་ལ། ཡན་ལག་གི་དོན་གཉིས་ཀྱིས་བསྟན་པའི་དང་པོ་དབྱེ་བ་ལ་བརྟེན་ན་ཡེ་ཤེས་རང་གི་མཚན་ཉིད་བསྟན་པ་ནི། ཨེ་མ་ཧོ་ཞེས་ངོ་མཚར་ཆེ་བའི་ཚིག་ཁྱད་པར་ཡེ་ཤེས་དངོས་བསྟན་ཞེས་པའི། དེ་ཡང་སེམས་ཞེས་ངོ་བོ་མེད་པས་མཚན་ཉིད་གང་དུ་ཡང་མ་གྲུབ། དེ་ལྟར་མ་གྲུབ་ཀྱང་འགྱུ་བ་སྣ་ཚོགས་པ་ལ་རྟོག་པས། དེ་ཡང་ཡལ་སར་ཡལ་བས་རྒྱུ་རྐྱེན་གང་གིས་ཀྱང་མ་བསྐྱེད། ཟད་སར་ཟད་པས་འབྲས་བུ་ངེས་པ་ངག་དུ་ཡང་གྲུབ་པ་མེད་པས་ན། སྟོང་པ་རྒྱུ་རྐྱེན་གྱིས་མ་བསྐྱེད་པ་དང་། ངོ་བོ་དེ་རྒྱུ་དང་མཚན་ཉིད་གང་ནས་ཀྱང་བཙལ་དུ་མི་རྙེད་པ་དང་། ངོ་བོ་དེ་ལ་གཞི་མེད་པས་རྟོག་པའི་ཁུངས་སྒོ་འགགས་པ་དང་། རྩ་བ་མེད་པས་ལྡོག་པའི་རྐྱེན་ངག་ལ་ཡང་རག་མ་ལུས་པའོ། །དེ་རྣམས་ལ་མཁས་པས་ནི། ཐོག་མ་བྱུང་ས་མེད་པས་དངོས་པོ་སྟོང་པར་ཤེས་པ་དང་། བར་དུ་གནས་ས་མེད་པས་ཡལ་བའི་དུས་ཚོད་ཟིན་པ་དང་། ཐ་མ་འགྲོ་ས་མེད་པས་ལྡོག་པའི་གཞི་སྟོངས་པ་ནི། ཡེ་ཤེས་ཀྱི་འགྱུར་རྟོག་པ་གློ་བུར་བ་ཆད་ཟིན་པས། ཅིར་སྣང་ཤེས་བཞིན་གྱི་བྱ་རས་ངོ་ཤེས་པས། རྟོག་པ་ཅི་བྱུང་ཡེ་ཤེས་སུ་གྲོལ་བས། སེམས་ཀྱི་རྟོག་ཚོགས་ཀྱི་མིང་མེད་པའོ། །དེ་ལྟར་ཡང་། ནམ་མཁའ་རྟོག་པ་སྐྱེ་མེད་ཅིང་། །རྟོག་པ་དེ་ཉིད་ནམ་མཁའ་འདྲ། །ཞེས་པས་སོ། །སེམས་ཀྱི་རང་བཞིན་ནི་དྲན་པ་སྣ་ཚོགས་པས་ཡུལ་ཐམས་ཅད་ལ་འཇུག་པར་བྱེད་པ་སྟེ། དེ་ཡང་གནས་པས་སྟོང་ལ། སྟོང་པས་ཡལ་བ་ནི་མཁས་པས་ཏེ། དེ་ལྟར་ན་འགྱུ་བ་སྟོང་དག །དྲན་པ་རང་ཡལ། འགྱུ་བའི་རྗེས་མེད་པ་ནི་ཡེ་ཤེས་ཀྱི་ཡུལ་སྟེ། དེའི་ཚད་ནི་དྲན་རྟོག་སྣ་ཚོགས་སུ་ཤར་བ། ཤར་སར་ནུབ་པ། ནུབ་ས་ནས་སྟོངས་པའོ། །དེ་བྱར་མེད་རང་དག་ཏུ་ཟིན་པ་ནི། སྐྱེ་བ་སྔ་ཕྱི་ལ་མི་གནས་པས། ལུས་སེམས་ལ་འབྲེལ་མེད་པར་ངོ་ཤེས་པའོ། །ཡང་སེམས་ཀྱི་འགྱུ་དུས་ནི་རྟོག་པ་ཕྲ་རགས་བར་པ་ལས། འཇུག་པ་ལས་ཀྱི་རླུང་གིས་བྱས། དྲན་པ་ཡུལ་ཐ་དད་པས་བླང་། ཤར་བ་གཏད་མེད་རང་གྲོལ་བར་ཤར། གནས་པ་བསམ་ངོ་རང་དག་པར་གནས་པ་ལ་མཁས་པས་ཡེ་ཤེས་ཀྱི་རྐྱེན་ནི། དྲན་བསམ་ཡལ་བའི་ཚད་བྲིན་པས་རླུང་སེམས་ལ་དབང་ཐོབ་པས། འཁོར་འདས་འབྲེལ་ཆད་པས། སྣང་རྟོགས་ཀྱི་ཆོས་ཐམས་ཅད་རང་གྲོལ་བར་གཏན་ལ་ཕེབས་པ་ནི། ཕྱི་སྣང་བའི་དམིགས་པ་དག་པས་རྐྱེན་མེད་ན་ཡེ་ཤེས་འཆར་བའི་ཡུལ་སྟོངས་ལ། ལས་དང་ཉོན་མོངས་པ་མེད་ན་ཡེ་ཤེས་རང་ཡིན་པར་གཏན་ལ་མི་ཕེབས་པས་སོ། །ཡང་སེམས་ཀྱི་ཡལ་ས་ནི་བློ་སྔ་ཕྱིའི་བར་ཡལ་བས། རྒྱུ་མཚན་གོང་འོག་གི་སྡེབས་མེད་ལ། དྲན་པ་སྔ་ཕྱིའི་བར་དུ་ཡལ་བས། བློ་མ་བུའི་འཆུག་མེད། སྣང་ཤེས་སྔ་ཕྱིའི་བར་དུ་ཡལ་བས་འཇུག་པ་ཐ་དད་པ་ལ་ལྟོས་མི་འཆའོ། །དེ་དག་འགྱུ་མེད་རང་དག་ལ་མཁས་པས་ཡེ་ཤེས་ཀྱི་རང་ངོ་སྟོང་པ་མཚན་ཉིད་གང་དུ་ཡང་མ་གྲུབ་པས་གནས་པ་ལ་མི་འཕྲོ་བས་རང་སར་བརྟན་པར་བྱས་པའོ། །སེམས་ཀྱི་མེད་པ་ནི། ཐོག་མ་རྒྱུ་ཡིས་མ་བསྐྱེད་པས་རང་ངོ་ལ་མ་རིག་པ་མེད། ཐ་མ་རྐྱེན་གྱིས་མ་བཤིགས་པས་དྲན་བསམ་ལ་སྐྱེ་བ་མེད་པའི་ས་ནི་ཕྱི་སྣང་བ་ཡིན་པས། རྐྱེན་ཆོས་ཉིད་དུ་གྲོལ། ནང་འགྱུ་བ་ཡིན་པས་རྣམ་རྟོག་ཉིད་ལས་ཡེ་ཤེས་སོ། །ཡེ་ཤེས་རྣམས་ཀྱི་ཚད་ནི། དྲན་པ་བློས་མ་དཔྱད། དྲན་མེད་དུ་ཡིད་ཀྱིས་མ་བརྟག །སྐྱེ་མེད་དུ་ཤེས་བྱས་མ་ཕྱེ། བློ་འདས་སུ་ལུང་གིས་མ་བསལ་བ་ནི་རང་གསལ་དངོས་མེད་ལ་མཁས་པའི་རྣལ་འབྱོར་པ་ཞེས་བྱའོ། །ཞེས་ནང་དོན་དང་པོ་དབྱེ་བ་ལ་བརྟེན་ནས་ཡེ་ཤེས་རང་གི་མཚན་ཉིད་བསྟན་ནས་ད་ནི་ནང་དོན་གཉིས་པ་དེ་ལྟ་བུའི་གནད་དེ་ཡང་ལུང་རིག་གིས་འབད་པས་གྲུབ་པར་བསྟན་པ་ནི། སྟོང་པའི་སེམས་ནི་མི་སྣང་ཕྱིར། །ཞེས་པ་ལ་སོགས་པས་བསྟན་ཏེ། དེ་ཡང་སེམས་ངོ་བོས་སྟོང་པས་རྒྱུ་མཚན་དུ་མ་གྲུབ་པས། སེམས་ནི་དངོས་པོ་གཟུགས་ཅན་དུ་མི་སྣང་བས། སྐྱེ་བ་སྔ་ཕྱི་མི་བདེན་ཏེ། སེམས་ཀྱི་ལས་ཀྱིས་ཉེ་བར་ལེན་ན། ལུས་མཐོང་བ་བཞིན་དུ་སེམས་མིག་གིས་མཐོང་བར་འགྱུར་ཏེ། ལུས་ལས་དང་འབྲེལ་བ་ཡོད་པའི་ཕྱིར་རོ། །ལུས་ཀྱི་ཉེ་བར་ལེན་ན། ལུས་བོར་ནས་འགྲོ་བས་སེམས་ལ་ལྟོས་པ་མེད་དོ། །དེའི་ཕྱིར་ན་གང་ཟག་སུ་ཡིས་སྐྱེ་བ་སྔ་ཕྱི་ཡོད་པར་འཛིན་ན། སྔ་མ་འགགས་ནས་ད་ལྟའི་ལུས་མེད་པར་ཡིད་ཆེས་ཏེ། ཡིན་ནོ་རེ་ཤེ་ན་ལུས་གཞན་སྐྱེ་བ་བཞིན་དུ་ལུས་གཞན་པ་ལས་སེམས་ཀྱང་གཞན་སྐྱེ་བར་འགྱུར་ཏེ། སྔ་མ་ལ་སྐྱེ་བ་ཡོད་མི་སྲིད་ལ། གལ་ཏེ་ཡོད་ན་སྔ་མའི་ལུས་འདི་ཡིན་པར་ཅིས་ཤེས། སེམས་གཅིག་གིས་ལུས་ཐ་དད་པ་གཞན་ལེན་ནོ་ཞེ་ན། ཤེས་བྱེད་དུ་གང་སྟོང་སྟེ་ཤེས་མི་སྲིད་དོ། །ལུས་ཐ་དད་པ་བཞིན་དུ་སེམས་ཀྱང་ཐ་དད་པ་གཞན་ཡིན་ནོ་ཞེ་ན། གཞན་ལས་གཞན་སྐྱེ་བ་མི་འཐད་དེ། མེ་ལས་ཀྱང་ཆུ་སྐྱེ་བར་འགྱུར། སྐྱེ་མི་སྲིད་པར་མངོན་སུམ་གྱིས་གསལ་ལོ། །སྔ་མའི་ལུས་སེམས་གཉིས་གཅིག་པ་ཡིན་ན། ལས་དང་རྣམ་པར་སྨིན་པ་མི་བདེན་ཏེ། དགེ་བ་ལ་སོགས་པ་འབད་པ་བྱས་པ་ལ་དགོས་པ་མེད་དོ། །དེས་ན་སྐྱེ་བ་སྔ་མའི་ལུས་འདི་མིན་པར་ལུང་རིག་གིས་ཤེས་ཏེ། གསེར་གྱི་སྙིང་པོ་ལས། ལུས་ལ་མི་གནས་སེམས་ནི་ཀུན་ལ་འཇུག །སྔ་ཕྱི་འདྲེས་པའི་གནས་མེད་སེམས་ལ་རྟེན་མེད་ཕྱིར། ཞེས་དང་། ཡང་བཀོད་པ་ཆེན་པོ་ལས། སེམས་ཀྱི་འཇུག་པའི་གནད་ཀྱིས་མ་གྲོལ་ན། །སྔ་མ་མི་བདེན་ལུས་འདི་ད་ལྟ་མིན། །ཞེས་པས་སོ། །རིག་པ་སྐྱེ་བའི་མིང་མེད་པས་ད་ལྟའི་ལུས་སྔ་མ་མིན་པར་ཡིད་ཆེས་ལ། ཕྱི་མ་མི་བདེན་པས་གནད་ཤེས་པ་ཙམ་གྱིས་གྲོལ་བའི་ཕྱིར་རོ། །གལ་ཏེ་སྐྱེ་བ་སྔ་མའི་ལུས་ད་ལྟ་ཡིན་པས་སྔ་ཕྱི་ཡོད་ན་སྐྱེ་བ་གཅིག་པར་འགྱུར་ཏེ། མ་འོངས་པའི་དུས་སུ་ཡང་ལུས་སེམས་ད་ལྟའི་འདི་ཡིན་པས་སོ། །དེ་ཡང་སེམས་མི་འཆི་བ་བཞིན་དུ་ལུས་ཀྱང་མི་འཆི་བར་འགྲོགས་ནས་འགྲོ་བར་འགྱུར་ཏེ། དེ་མི་འཐད་དེ། ལུས་སེམས་བྲལ་ནས་ལུས་དངོས་པོར་འཇོག་པའི་ཕྱིར་ཤེས་སོ། །དེས་ན་ཡལ་བའི་གནད་ཤེས་པས་ཕྱི་མ་ལུས་ལ་འཇུག་མི་སྲིད་པས། ཕྱི་མ་མི་བདེན་ནོ། །དེའི་ཕྱིར་ན་སྣང་བ་སྣང་ཐོག་ཏུ་གྲོལ་བས། རང་སྣང་ལ་བཅོས་མི་དགོས་ལ། ཤེས་པ་འགྱུས་ཐོག་ནས་གྲོལ་བས། དྲན་བསམ་འགྱུ་བ་གློ་བུར་བ་གཉེན་པོ་མི་དགོས་པ་རྣམས་ནི་རྩ་བ་ལུས་སེམས་གཉིས་ཡང་ནས་ཡང་དུ་འབྲེལ་ན་འཁོར་བའི་རྩ་བ་སྟོངས་པར་ལུས་ཀྱང་ཤེས་པ་མིན་པའི་ཕྱིར། ལྟ་སྒོམ་འབད་བས་དགོས་པ་མེད་དོ། །དེས་ན་འདི་ཉིད་ལས་མ་གཏོགས་པ་ལུས་སེམས་གཅིག་ཏུ་འཁོར་བས་མྱ་ངན་ལས་འདའ་བར་མི་རིགས་སོ། །གཏན་ཚིགས་དེའི་ཕྱིར་སེམས་དྲན་བསམ་གྱི་འཁོར་ལོ་གློ་བུར་བ་ཡིན་པས་དེ་ཡལ་བའི་མཚན་ཉིད་ཤེས་པས། འགྱུ་བ་གཞན་ལ་འཇུག་མི་སྲིད་པས་ན་དེ་རང་ཡེ་ཤེས་ཏེ། དེའི་དབྱེ་བ་སྐྱེ་བ་སྔ་ཕྱིའི་ལུས་མི་བདེན་པས་ཤེས་སོ། །དེའི་གནད་ནི་བླ་མ་མཚན་ཉིད་དང་ལྡན་པས་སྔ་མའི་ལུས་འདི་མིན་པས་ལུས་སེམས་འབྲེལ་མེད་ལ། ད་ལྟའི་དྲན་རིག་གློ་བུར་བ་ཡིན་པས་དེ་ཉིད་ཀྱིས་གྲོལ་བ་ནི། བྱུང་ཡང་རང་བྱུང་དུ་བྱུང་བས་ད་དེ་ལ་བྱས་ཤིང་བཅོས་པས་མི་གྲོལ་ལོ། །ཞེས་བློའི་འགྱུར་ལས་ཤེས་པའི་ཕྱིར་རོ། །དེས་ན་ལུས་ལས་ཀྱང་། རྡོ་རྗེ་ཉི་མ་སྲ་བ་འབྱུང་བ་ལས། །དྲན་རྟོག་གློ་བུར་རང་ཡལ་གྲོལ་བ་ལས། །རང་བྱུང་ཡེ་ཤེས་བཅོས་པས་གྲོལ་བ་མིན། །ཞེས་པ་དང་། གསེར་གྱི་སྙིང་པོ་ལས་ཀྱང་། བླ་མ་ལས་བྱུང་འབྲེལ་བ་མེད། །ལུས་སེམས་གཅིག་མི་གནས་པའི་ཕྱིར། །འདི་ལ་དྲན་རྟོག་རང་འགགས་ན། །དེ་ལས་བྱས་པ་ག་ལ་ཡོད། །ཅེས་པས་སོ། །བསླབ་པའི་ཐབས་ནི་སེདྒེའི་ཡན་ལག་རྫོགས་པའི་བསླབ་བྱས་རྩལ་རང་རྫོགས་སུ་བསྟན་པ་ནི། དེ་ཡང་ཁྱད་པར་དུ་ཡུལ་དང་ཡུལ་མ་ཡིན་པ་བསླབ་པས། འགྱུ་བ་དུས་གཅིག་ལ་ཆད་པ་དག་འབྱུང་སྟེ། དེ་ཡང་གནད་བསྟུན་པ་གནས་ལུགས་ཚད་ལ་འབེབས་པའི་བསླབ་བྱ་ལ་བསླབས་པས། ཐ་སྙད་བཏགས་པ་རྣམ་གྲངས་ཀྱི་ཆོས་ལས་གྲོལ་བ་ནི། དཔེ་ཇི་ལྟར་གྲོལ་ན་ལི་གར་ཏའི་རྒྱལ་པོ་བྲམ་ཟེའི་དམོད་པ་ལས་གྲོལ་བ་ལྟར་གྲོལ་བས། འཇིགས་ཤིང་ཡ་ང་བ་དང་བག་ཚ་བ་མེད་པས་བློ་བདེ་བའོ། །དེ་ལྟར་གནད་དང་བཅས་པ་ཡིས། ལུས་སེམས་ལ་འབྲེལ་བ་མེད་པའི་གནད་ཀྱིས་སྐྱེ་བ་སྔ་ཕྱིའི་ལུས་མི་བདེན་པའི་གནད། དེའི་རྩ་བ་འདིར་དྲན་རྟོག་རང་ཡལ་བའི་མཚམས་སུ་རིག་པར་བྱའོ། །དེ་ཡང་ང་ལས་བྱུང་ཞེ་ན། སེམས་ཀྱི་ཁང་བུ་གཞིག་པའི་ཐབས་ཀྱིས་རྒྱུ་རྐྱེན་ཁོག་སྟོངས་པས་སྐྱེ་ཤི་གཉིས་ཀྱི་མཐའ་ལ་མི་གནས་པ་ནི། ཤེས་བྱ་ལ་མཐའ་མེད་པའི་གནད་དེ། དེ་ཡང་གཞིག་པས་མེད་ལ་མེད་པས་སྣང་བ་ནི་ཡལ་ས་ངོ་ཤེས་པ་མེད་ན། སངས་རྒྱས་པ་ཀུན་སྡུག་བསྔལ་གྱི་ལམ་དུ་ཞུགས་པ་ལས་མ་གཏོགས་པ་མེད་པས་ན། གསེར་གྱི་མཁའ་ལྡིང་ལས། སྡུག་བསྔལ་ལམ་དུ་ཁྱེར་ན་བདེ་བ་ཤུགས་ལས་འབྱུང་། །ཞེས་པས་སོ། །དེས་ན་སེམས་ཀྱི་བྱུང་ས་ལ་མཁས་པས་འཁོར་བའི་སྤྱི་བས་ཕྱི་ལ། གནས་ས་ལ་མཁས་པས་དྲན་བསམ་གྱི་རྒྱུ་སྟོངས་ལ། འགྲོ་ས་ལ་མཁས་པས་འཁོར་འདས་ཀྱི་འབྲེལ་ཆོད་པའོ། །དེའི་གནད་སེམས་མེད་པར་ཤེས་པས་འཁོར་འདས་ཀྱི་རྩ་བ་སྟོངས། ཡལ་ས་ཤེས་པས་རྐྱེན་གང་གིས་ཀྱང་ཕན་གནོད་དང་བྲལ། སྟོངས་པར་ཤེས་པས་འཁོར་འདས་གཉིས་དུས་གཅིག་ལ་འགགས་པའོ། །ཤེས་པའི་ཡལ་རྒྱུ་གློ་བུར་དུ་བྱུང་ལ། གློ་བུར་དུ་ཡལ་བས་གང་གིས་ཀྱང་གོས་པ་མེད། ཡལ་རྐྱེན་རང་དག་པས་ཡུལ་བདག་ཏུ་འཛིན་པ་ལས་གྲོལ། ཡལ་བའི་དུས་ལ་མི་གནས་པས་ངེས་མེད་ཕྱོགས་དག་ལ། ཡལ་བ་ཉིད་རང་གྲོལ་བས་གཉེན་པོ་གཞན་ལ་རག་མ་ལུས་པའོ། །གཏད་ས་ནི་གནད་དྲུག་དང་། གྲོལ་ལུགས་བཞི་སྟེ་བཅུས་གང་ཟག་གཅིག་ཡོངས་སུ་སྨིན་ཅིང་གྲོལ་བར་བྱས་པས་ནི། སེམས་འགྱུ་བ་ཐ་དད་པ་དང་། ཡེ་ཤེས་སྟོང་ཉིད་སྨྲ་བསམ་ལས་འདས་པ་གཉིས་ཀྱི་དབྱེ་བ་བསྟན་པའི་དམིགས་ཏེ་གསུམ་པ་ལས་བསྡུས་པའི་དོན་གཉིས་སུ་བྱས་ནས་བསྟན་པའོ། །མཁས་པ་བྱེ་མ་ལ་མུ་ཏྲས་རྣམ་པར་བཤད་པ་སྟེ་གསུམ་པའོ།། །།ཨཐྎ། རྒྱ་རྒྱ་རྒྱ། ས་མ་ཡཱ།། ༈ །།ད་ནི་སེམས་ཀྱི་དམིགས་བཞི་པའི་རྣམ་པར་བཤད་པ་ནི། འདི་ལ་སྤྱི་དོན་བཞི་སྟེ། དང་པོ་རླུང་གི་ནང་དུ་ཡལ་བའི་ལས་ཀྱི་རྒྱུ་མ་ཤེས་པ་ལས། འཁྲུལ་ཅིང་ལས་ཀྱི་འཇུག་པ་བསྟན་པ་དང་། གཉིས་པ་ལྟོས་པ་རང་ཟད་པའི་ཆོས་ཉིད་ལ་འབད་རྩོལ་མེད་པར་བསྟན་པ་དང་། གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕགས་ལུགས་བསྟན་པ་དང་། བཞི་པ་ལྟ་སྒོམ་རང་ཤེས་ཀྱི་རྟོག་པ་ལས་གྲོལ་ནས་བསྒོམ་དུ་མེད་པའི་དོན་བསྟན་པའོ། །དེ་ལ་སྤྱི་དོན་དང་པོ་རླུང་གི་གནད་ཡལ་བའི་རྒྱུ་མ་ཤེས་པ་ལས་འཁྲུལ་ཅིང་ལས་ཀྱི་འཇུག་པ་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ་འགྱུ་བ་རླུང་གི་ཆ་ལས་འཁྲུལ་པའི་གཞི་བསྟན་པ་ནི། རླུང་གི་ལས་ནི་སོ་སོ་ལས། །ཞེས་པ་ལ་སོགས་པས་བསྟན་ཏེ། རླུང་གི་ངོ་བོ་དང་། ངེས་ཚིགས་དང་། དབྱེ་བ་དང་། འགྱུ་ཚད་དང་། བྱེད་པའི་ལས་དང་ལྔར་ཤེས་པར་བྱའོ། །ངོ་བོ་ཡང་ཞིང་སྣ་ཚོགས་སྟོན་པར་བྱེད་ལ། ངེས་ཚིགས་འགྲོ་བས་ན་རླུང་། བསྐྱོད་ཅིང་གཅིག་ཏུ་མི་གནས་པས་ན་རླུང་ལ། དབྱེ་ན་ལས་ཀྱི་རླུང་དང་། ཡེ་ཤེས་ཀྱི་རླུང་གཉིས་སོ། །ལས་ཀྱི་རླུང་ལ་འབྱུང་བའི་རླུང་དང་། གནས་འབྱེད་ཀྱིའོ། །འབྱུང་བ་ནི་ས་ཆུ་མེ་རླུང་བཞི་ལ། སའི་ཆུ་དང་། མེ་དང་། རླུང་དང་། སའི་རླུང་དང་བཞི་སྟེ། ལྷག་མ་གསུམ་ལ་ཡང་བཞི་བཞི་སྟེ་བཅུ་དྲུག་གོ། །གནས་འབྱེད་ནི་ཕོ་རླུང་མོ་རླུང་མ་ནིང་གི་རླུང་དང་གསུམ་མོ། །ཡེ་ཤེས་ལ་དངོས་དང་། བྱེ་བྲག་པ་གཉིས་སོ། །འགྱུ་ཚད་ནི་སྐྱེས་བུ་ན་ཚོད་དར་ལ་བབས་པ། ལུས་ལ་འབྱུང་བའི་ནད་དམ་པོས་མ་ཟིན་པ་རྣམས་ལ་ཉིན་ཞག་ཕྲུགས་གཅིག་ལ། རླུང་ཕར་འགྲོ་ཚུར་འོང་བ་ཉི་ཁྲི་དང་ཆིག་སྟོང་དྲུག་བརྒྱ་རྒྱུ་བའོ། །བྱེད་པ་ལས་ནི་ལས་ཀྱི་རླུང་གིས་གྱེན་ལ་རྒྱུ་པ་དང་། ཐུར་དུ་སེལ་བར་བྱེད་ལ། ཡེ་ཤེས་ཀྱིས་ནི་རིག་པ་སྟོན་པ་དང་། དབྱིངས་ཀྱི་སྣང་བ་སྟོན་པར་བྱེད་པས་ན་ལས་སོ་སོ་ལས་ཞེས་པས་སོ། །དེ་ཡང་གྱེན་ལ་རྒྱུ་བས་ནི་འཕེན་པ་དང་སྤེལ་བའི་ལས་བྱེད་ལ། ཐུར་དུ་སེལ་བས་ནི་དྭངས་སྙིགས་འབྱེད་པའི་ལས་བྱེད་པ་སྟེ། སྙིགས་མ་དྲི་ཆེན་དང་། དྲི་ཆུ་ཕྱིར་འདོར་བར་བྱེད། དྭངས་མས་ལུས་བསྐྱེད་ཅིང་བཀྲག་དང་གཟི་མདངས་རྣམས་སྐྱེས་པར་བྱེད་པའོ། །ཡེ་ཤེས་ནི་རིག་པ་ལུ་གུ་རྒྱུད་མངོན་སུམ་བསྟན་ནས། ཡིད་དཔྱོད་ཚིག་གི་གཞི་ཉམས་པར་བྱེད་ལ། དབྱིངས་ཀྱི་སྣང་བ་བསྟན་པས་ནི། སྣང་བ་བཞི་མཐར་ཕྱུང་ནས། ཁམས་གསུམ་གྱི་མངལ་གྱི་གྲོང་ཁྱེར་རྒྱུན་གཅོད་པར་བྱེད་པའོ། །དེ་ཡང་ཐོག་མ་འཕེན་པ་ལས་ཀྱི་རླུང་མ་དག་པ་ལས། ཡུལ་བདག་ཏུ་འཛིན་པའི་ཆ་ཡིན་སྙམ་པ་དང་། མིན་སྙམ་པ་ལ་སོགས་པ་ཤར་བས། དེའི་ཕྱིར་འཕེན་པའི་ལས་མ་དག་པ་ལས། མ་རིག་པའི་ངོ་བོ་སྒྲིབ་པར་བྱེད་པ། ངེས་ཚིགས་ལ་གཞི་ལ་མ་རིག་པར་སོང་བས་ནི། འཆོར་བའི་གཞི་མ་སྡུད་པའོ། །རླུང་དེའི་ནང་དུ་འགྱུ་བ་མ་དག་པ་འགེངས་པའི་ལས། རྣམ་པར་རྟོག་པ་ཚོགས་དགའ་བ་དང་། མི་དགའ་བ་དང་། བདེ་བ་དང་། སྡུག་བསྔལ་བ་རྣམས་ཀྱི་གཞི་མར་སེམས་མེད་པ་ལ་འཇུག་པ་ཐ་དད་པ་དང་། འབྱུང་བ་ཤར་བའི་ཡུལ་ཐ་དད་པར་འགྱུ་བ་ན། ཐོག་མ་ཕྱིར་འཕེན་པའི་རླུང་སྣང་བ་སྣ་ཚོགས་པར་ཤར་བས་ལས་ཀྱི་རླུང་གི་འཁོར་རྒྱུ་དང་། འཁོར་རྐྱེན་དུ་མ་ལ་བརྟེན་ནས་འཁོར་བའི་འབྲས་བུ་འགྲོ་བ་དྲུག་གི་གཟུགས་སུ་བྱུང་བ་ནི། དེ་དག་ཀྱང་འགྲོ་བར་བྱེད་པ་རླུང་གི་སྟོབས་ལ་བརྟེན་ནས་འགྲོ་བར་བྱེད་པའོ། །དེ་དག་ནི་མ་སྨིན་པ་ལས་འཁོར་བའི་རླུང་ཞེས་བྱའོ། །ཞེས་ནང་དོན་དང་པོ་འགྱུ་བ་རླུང་གི་ཆ་ལས་འཁྲུལ་པའི་གཞི་བསྟན་ནས། ད་ནི་ནང་དོན་གཉིས་པ་རླུང་གི་འགྱུ་བ་བླ་མའི་ཞལ་རང་ལུས་པས། གནད་ཤེས་ན་འགྲོ་བ་ཀུན་གྲོལ་བར་བསྟན་པ་ནི། འགྱུ་བ་ནི་ཕྱིར་འགྱུས་པས་དྲན་རྟོག་ཐ་དད་པ། ནང་དུ་འགྱུས་པས་སེམས་ཉིད་མེད་པ་ལས་གཟུགས་བརྙན་སྣ་ཚོགས་པར་གསལ་བ། དེ་ལྟར་ལས་གཉིས་ནི་ཁྱད་པར་དུ་ཐབས་ལ་བརྟེན་པས། འགྱུ་བ་རང་སོར་གྲོལ་བའི་གནད་ནི། དཔལ་ལྡན་རྡོ་རྗེ་འཆང་ལས་ལྷག་པའི་རང་གི་རྩ་བའི་བླ་མའི་ཞལ་ལས་ཤེས་པར་བྱའོ། །དེ་ཡང་ཤེས་ལུགས་ནི། རླུང་བཟུང་བས་རྟོག་པ་བཙོན་དུ་ཟིན་པས། འགྱུ་བ་རྣམ་པར་དག་པ་ནི། སྐྱེས་པ་ཡིན་ན་སྣ་བུག་གཡས་པ་ནས་བཟུང་། བུད་མེད་ཡིན་ན་གཡོན་པ་ནས་ནར་གྱིས་དྲངས་ལ། ནང་དུ་བཟུང་བས་ཕོ་ཁ་ཚ་མེར་གྱིས་བྱུང་བ་ན་ཕྱིར་བག་རེ་འཕངས། སྐབས་སུ་སྤྱི་བོ་ནས་ཕུལ་ལོ། །རླུང་གནན་པ་ནི་སྐྱེས་པའི་ཕོ་ཁ་གཡས་སུ་མནན་ལ་བུད་མེད་ཀྱིས་གཡོན་དུ་མནན་པས། ལྗིད་ཏིག་གི་བྱུང་ཙ་ན་ཁ་བསྡམས་ཏེ་སྣ་བུག་ནང་ནས་བསང་ངོ་། །དེ་ཡང་གཞན་གྱི་ཐབས་ནི་རླུང་འགྱུར་ན། ཡི་གེ་གང་མོས་པ་དང་། ཁ་དོག་དཀར་དམར་སེར་པོ་ལྗང་མཐིང་ལ་སོགས་པར་བསྒྱུར་བ་དང་། དབྱིབས་ཆོས་འབྱུང་དང་། རྒྱ་གྲམ་དང་། ཟླ་གམ་ལ་སོགས་པ་གང་མོས་པར་བསྒྱུར་བས་ལས་ཀྱི་རླུང་སྤྱི་བོར་བསྡུས་པས་ལུས་དྲོད་ཕེབས། མགྲིན་པར་བསྡུས་པས་ངག་ལ་ནུས་པ་འབྱུང་། སྙིང་གར་བསྡུས་པས་སེམས་ལ་དྲོད་ཕེབས། ལྟེ་བར་ཁ་དོག་གང་མོས་དང་བཅས་པ་བསྡུས་པས་གཉིད་དང་རྨི་ལམ་ལ་རྒྱས་ཐེབས་པའོ། །ཡང་ཡེ་ཤེས་ཀྱི་རླུང་མིག་ནས་འཐེན་པའི་ཚུལ་དུ་དྲངས་པས། རྟོག་པ་དུམ་བུ་བ་འགག །སྣ་ནས་འཐེན་པས་སྣང་བ་དྲོད་རྙེད། ཁ་ནས་འཐེན་པ་དང་འགྱུ་བ་རྣམས་ཀྱི་ཁོག་ཟད་པའོ། །དེ་ཡང་ཧཱུྃ་སྒྲས་འཐེན་པ་དང་། ཕཊ་དང་། ཨ་དང་། ཧས་འཐེན་པའོ། །འཇུག་པ་ཞེས་པ་ལུག་ཡུལ་ལས་བཅུག་པས་སྣང་རྐྱེན་ཆོས་ཉིད་དུ་འཆར་ལ། ནང་ཕུང་པོ་ལ་བཅུག་པས་ལུས་ཀྱི་ནད་དང་སྡུག་བསྔལ་ཞི། གསང་བ་སེམས་ལ་བཅུག་པས་སེམས་ཀྱི་རྟོག་པ་ལས་རང་གྲོལ་བའོ། །དེ་ལྟར་རླུང་ཕར་འགྲོ་བའི་དུས་ན་ལུས་སེམས་དལ་བའི་ཆོ་ག་བྱ། ཚུར་འགེངས་པའི་དུས་ན་ཕུང་པོ་སྦྱང་བའི་རྟེན་བྱའོ། །དེ་ལྟར་གཉིས་ཀྱི་ཆ་ལས་འཁོར་འདས་གཉིས་སུ་ངེས་པ་ནི། རླུང་ཕྱིར་འཕངས་པས་འདས་པའི་ལམ་སྣ་འདྲེན་ལ། ནང་དུ་རྔུབས་པས་འཁོར་བའི་ལས་གསོག་པས་སོ། །དེ་ཡང་འཁོར་བའི་ས་བོན་ལས་ཀྱི་རླུང་གིས་འཕེན་པ་ལས་ལྷ། འཐེན་པ་ལས་ལྷ་མིན། འཇུག་པ་ལས་མི། འགྱུར་བ་ལས་བྱོལ་སོང་། ཁྲོས་པ་ལས་ཡི་དྭགས། རྣམ་པར་རྒོད་པ་ལས་དམྱལ་བ་དང་དྲུག་ཏུ་འགྱུར་བ་ནི། དང་པོ་འཕེན་པའི་རྒྱུ་མ་དག་པ་ལས་བྱུང་བའོ། །དེ་ལྟར་ལུང་འདི་ནི་སྣ་བུག་གཡས་ཀྱི་རླུང་དལ་བ་དང་། འཇིལ་བ་དང་། ཡང་བ་དང་། བསྐྱོད་པ་དང་། ཞར་བ་དང་། སྟོང་པའི་ལམ་ལས་བརྟག་པ་དང་། ཡང་རྣ་བའི་བུ་ག་གཡས་གཡོན་གྱི་མདུན་གྱི་གཤོང་བུའི་རྩ་མཐེབ་མཛུབ་ཀྱིས་གཏེམས་པས་སྒྲ་འཚེགས་པ་དང་། བཤང་བ་དང་། སིང་བ་དང་། ཕྲ་བ་དང་། རིང་བ་ལ་ངེས་པར་བརྟགས་ཏེ། དེའི་ལས་ཀྱི་འགྱུར་གྱིས་ཕྱེ་ན། རང་གི་སྐྱེ་བ་སྔ་ཕྱིའི་ལས་ཀྱི་བྱེ་བྲག་རྣམས་ཤེས་པར་འགྱུར་ཏེ། མཆོག་དང་ཐུན་མོང་གིས་དངོས་གྲུབ་ཀྱི་བྱེ་བྲག་རྣམས་ཀྱང་ཤེས་སོ། །ཡེ་ཤེས་ཀྱི་རླུང་གི་འབྲས་བུའི་འགྱུར་ཡེ་ཤེས་འཆར་བའི་ཚད་དང་། སེམས་གནས་པའི་དུས་དང་། རྣམ་རྟོག་འགགས་པའི་དུས་དང་། ཚད་དང་གྲངས་རྣམས་ཤེས་པའོ། །དེ་ལྟར་ན་ལས་དང་ཡེ་ཤེས་ཀྱི་རླུང་གི་དེ་ཁོ་ན་ཉིད་ཤེས་ན་འཁོར་འདས་གཉིས་ཀྱི་མཚན་ཉིད་རྟོགས་པའོ། །ཞེས་ནང་དོན་གཉིས་པ་རླུང་གིས་འགྱུ་བ་བླ་མའི་ཞལ་ལ་རག་ལུས་པས་གནད་ཤེས་ན་འགྲོ་བ་ཀུན་གྲོལ་བར་བསྟན་ནས། ད་ནི་ནང་དོན་གསུམ་པ་རླུང་སེམས་ཀྱི་འཇུག་པ་ཁྱད་པར་གྱི་ཐབས་བསྟན་པ་ནི། ཟུང་དུ་ནི་ལས་ཀྱི་རླུང་དང་ཡེ་ཤེས་གཉིས་ཏེ། ལས་ཀྱི་འཁོར་བ་ལས་འཇུག་པས་ལས་གཉིས་བྱེད་དེ། འཁོར་བའི་རྒྱུ་ཀུན་རྫོབ་བདག་ཏུ་འཛིན་པའི་ཡུལ་ལ་ཞུགས་ནས་འབྲས་བུ་ཁམས་གསུམ་དུ་སྨིན་པར་བྱེད་དོ། །ཡེ་ཤེས་ཀྱིས་བཟླས་པ་ལ་འཇུག་པའི་ལས་གཉིས་ལས་ནི། དོན་དམ་པ་ཆོས་ཉིད་ལ་ཞུགས་ནས། འབྲས་བུ་མྱ་ངན་ལས་འདས་པའི་སྐུ་དང་། ཡེ་ཤེས་སུ་སྨིན་པར་བྱེད་པའོ། །དེ་ལྟར་རླུང་དེ་གཉིས་ཀྱི་ཟླ་ནི་ལུས་ངག་ཡིད་གསུམ་ལས། ལུས་ཀྱི་དངོས་པོ་རླུང་གི་གནད་ཀྱིས་རྡུལ་ཕྲ་རབ་ཀྱི་གཞི་སྟོངས་པས་རྡོས་བཅས་མེད་ལ། སེམས་ཀྱི་དྲན་རྟོག་ཡལ་སར་ཡལ་བས་སེམས་ཀྱིས་ཕྱེད་པས། དེའི་ལས་དག་ལ་སྣང་བ་ནི། གནས་པས་སྟོན་ལ། བརྗོད་པས་གསལ་ལ། གསལ་བས་ཟད་ཅིང་མེད་པར་ཤེས་པའོ། །དེ་ཡང་སྐྱེད་བྱེད་དང་པོའི་འཁོར་ལོ་ན་སའི་རླུང་ཤས་ཆེར་གནས་པས་ལུས་ཤས་མདངས་སྟོན་ལ། ཡེ་ཤེས་ཀྱི་ས་བོན་དུ་བྱེད། སྙིང་སྟེ་དྲན་པ་འདུས་པའི་འཁོར་ལོ་ན་ཆུའི་རླུང་གནས་ཏེ། ལུས་ཀྱི་ཁྲག་གི་མདངས་སྟོན་ཅིང་། ཡེ་ཤེས་ཀྱི་རྩལ་འཆར་བར་བྱེད། རོ་རྣམས་འདུས་པའི་འཁོར་ལོ་ན་མེའི་རླུང་ཤས་ཆེར་གནས་ཤིང་ལུས་ཀྱི་དྲོད་ཀྱི་འཕེལ་སྟོན་ལ། ཡེ་ཤེས་ཀྱི་སྣང་བ་རྫོགས་པར་བྱེད། རྩེ་མོ་རྣམ་པར་བཀོད་པའི་འཁོར་ལོ་ན་རླུང་གི་རླུང་ཤས་ཆེར་གནས་ཤིང་ལུས་ཀྱི་དབུགས་ཀྱི་བསྐྱོད་བྱེད་ལ་ཡེ་ཤེས་དངོས་སུ་འཆར་བའི་སྒོ་འདོད་པར་བྱེད་པ་ཅན་ཏེ། རླུང་གཉིས་ལ་ལས་ཀྱི་རླུང་ལ་འབྱོངས་ན། ཐུན་མོང་གི་རྟགས་སྣ་ཚོགས་སྟོན་པར་ནུས་ཤིང་། ལས་དང་ལས་ཀྱི་བྱེ་བྲག་ལ་མཁས་སོ། །ཡེ་ཤེས་ཀྱི་རླུང་ལ་འབྱོངས་ན། མཆོག་གི་ཡོན་ཏན་སྟོན་ཅིང་ཕྱི་རོལ་གྱི་སྣང་བ་རྣམས་ཟད་པར་བྱེད་པའོ། །དེ་ཡང་སློབ་པར་འདོད་པའི་གང་ཟག་གིས་དྲན་བསམ་གྱི་འགྱུ་བའི་ཞེན་པ་ཡལ་བར་བྱ་བའི་གནད་དུ། རླུང་ཅི་ནས་ཀྱང་དལ་བར་མཁའ་ལ་འཕང་ཞིང་། ཁ་ནས་ཕྱིར་སྤུར་ལ་ལུས་ལ་མི་གནས་རྟག་ཏུ་བྱས་ན་གོང་གི་ཡོན་ཏན་དེ་དག་ཤེས་པར་ངེས་སོ། །དེ་ཡང་རླུང་གི་འཕེན་པས་རང་གི་ཁ་ནས་ཕྱི་དབུལ་བ་ནི་གནད་ཡིན་ལ། འདིའི་དུས་ན་སྣ་བུག་གཉིས་དར་གྱི་མདོས་དགག་པར་བྱའོ། །དེ་ལྟར་ཡུན་རིང་དུ་བསླབས་པས་རིམ་གྱིས་ལུས་ཀྱི་བདེ་བ་ཐོབ་ལ། དེ་ནས་ངག་གི། དེ་ནས་སེམས་ཀྱི་བདེ་བ་འབྱུང་བ་ནི་བཞགས་སར་སྡོད་པ་དང་། གཏང་སར་འགྲོ་བ་དང་། ངོ་ཤེས་པ་རྣམས་འབྱུང་ངོ་། །འདིའི་དུས་ན་འཁོར་བའི་མཚན་ཉིད་ཤེས་པ་དང་། འདས་པའི་མཚན་ཉིད་ཤེས་པ་གཉིས་ལས། རང་གི་དེ་གཉིས་ཀྱི་རྒྱུ་རྐྱེན་འབྲས་བུ་ལ་བརྟགས་པས་སོ་ན་གནས་པའི་ཡེ་ཤེས་ཀྱི་རྩ་འབྱོངས་པ་ལ་ཐེ་ཚོམ་མེད་དོ། །ཞེས་དེ་དག་གིས་ནི་སྤྱི་དོན་དང་པོ་རླུང་གི་གནད་ཡལ་བའི་རྒྱུ་མ་ཤེས་པ་འཁྲུལ་ཅིང་ལས་ཀྱི་འཇུག་པ་བསྟན་པའི་ནང་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་བསྟན་པ་ལ་ཡན་ལག་གི་དོན་གཉིས་ཀྱིས་བསྟན་པའི་དང་པོ་མེད་པའི་ཆོས་ཉིད་ལ་རྩལ་སྦྱངས་པས་འགྱུ་བའི་ཁོག་སྟོངས་པར་བསྟན་པ་ནི། གང་གི་ལམ་མེད་ན་འགྲོ་བའི་ཕུགས་གཏིབས་ཞེས་པ་ལ་སོགས་པས་བསྟན་ཏེ། གང་གི་ནི་གནད་ཤེས་པའི་འགྲོ་བ་ཡི། །དེ་ཡང་སེམས་འགྲོ་བར་བྱེད་པའི་ལམ་དྲན་བསམ་གློ་བུར་བ། དེས་གློ་བུར་བར་ཤེས་པ་ཙམ་གྱིས་དྲན་པ་ལ་སྐྱེ་བའི་སྟོབས་མེད་པ་ནི། སེམས་ཀྱིས་ཕྱི་རོལ་ཡུལ་དང་། ནང་ལུས་ལ་འགྲོ་བའི་ཕུགས་འཁྲུལ་པའི་ཡུལ་ཐ་དད་པ་རྣམས་གཏིབས་པས། འཁོར་བའི་གཞི་སྟོངས་པས་ལྡོག་པའི་ས་མེད་པས། ལུས་སེམས་ཀྱི་འབྲེལ་ཆོད་པའོ། །དེ་ལྟར་ཤེས་པ་ད་ལྟ་སྒོམ་གྱི་གཏད་པའི་ས་དང་ཤེས་པ་གུད་དུ་བཅད་པ་མེད་པ་ནི་བྱ་བ་དང་རྩོལ་སྒྲུབ་ཀྱི་གཞི་བློའི་དམིགས་པ་ཡུལ་དང་བཅས་པས་སྟོངས་པས་འབད་མི་དགོས་པར་རང་ངོ་ན་གསལ་བའོ། །དེ་ཉིད་ལ་བློའི་འགྱུ་བ་སྣ་ཚོགས་སུ་འཕོ་བ་མེད་ན་འཁྲུལ་པའི་རྩལ་ལོག་པའི་ཤེས་པ་རྣམས་ཟད་དེ། སེམས་ཉིད་མེད་པའི་དོན་མངོན་དུ་སྣང་བའོ། །དེ་ལ་བར་མཚམས་མེད་པར་གནས་ན་སངས་རྒྱས་ཀྱི་དགོངས་པའི་གཞི་འབྲེལ་མེད་ཡེངས་ས་མེད་པའི་གདེང་རྙེད་པ་ཡིན་ནོ། །དེ་ལ་བཅོས་མའི་ཆོས་དམིགས་གཏད་དང་བཅས་པ་མེད་ན་བློ་བདེ་ན་སེམས་ཉིད་བདེ་གསལ་ཁོང་དུ་ཆུད་པའོ། །ཞེས་དང་པོ་མེད་པའི་ཆོས་ཉིད་ལ་རྩལ་སྦྱངས་པས་འགྱུ་བ་ཁོག་སྟོང་པར་བསྟན་ནས། ད་ནི་ནང་དོན་གཉིས་པ་བདེ་འདོད་ལྟོས་པའི་ཆོས་ཀྱི་བར་ཆད་བསལ་བར་བསྟན་པ་ནི། དེ་ལྟར་རྟོགས་པ་དེ་ཡང་གང་ལས་བྱུང་ཞེ་ན། ལྟོས་པ་རྣམས་རང་ཟད་ལས་བྱུང་སྟེ། སངས་རྒྱས་ཞེས་བྱ་བར་བཏགས་པ་མེད་པའི་སྔོན་རོལ་ན། སེམས་ཅན་ཞེས་པ་ཡང་དེ་ལས་ལྟོས་པས་ག་ལ་སྲིད་མིང་མེད་དོ། །དེའི་ཕྱིར་ན་བཏགས་པ་མིང་ཡིན་གྱི་གཏན་ཚིགས་ཀྱིས་གཞིགས་པས་གང་ཡང་མ་གྲུབ་པར་གཏན་ལ་ཕེབས་སོ། །གྲུབ་པའི་མཐས་བདེ་བར་བརྟགས་པ་སེམས་ལ་མི་སྣང་ན། ཕྱི་ལུས་དང་ནང་སེམས་ཀྱི་སྡུག་བསྔལ་བཙལ་བས་རྙེད་པར་སུ་ལ་ཡང་མི་སྲིད་དོ། །དེའི་ཕྱིར་ན་བདེ་སྡུག་རོ་སྙོམས་ཀྱི་གཏན་ཚིགས་ལས་བྱུང་བ་ལས་མ་གཏོགས་པ། བླ་མས་མིང་དུ་བཏགས་པའི་འདི་ལྟར་བསྒོམས་དང་ཞེས་སེམས་བདེ་བར་འདོད་པའི་ཆོས་ནི། བསྒོམ་དུ་མེད་པའི་ཆོས་ཉིད་འཁྲུལ་པ་རྩ་བ་ཉིད་ལས་བྱུང་སྟེ། དེ་ཡང་གོང་མའི་འགྱུར་རམ་ལྟོས་པ་ལས་འོག་མ་སྣང་བ་ནི་ལྟོས་པ་ལས་བྱུང་བ་སྟེ། ཆོས་ཉིད་ལ་རྒྱུ་མཚན་གོང་འོག་གི་ལྟོས་མེད་པའོ། །ཞེས་སྤྱི་དོན་གཉིས་པ་བདེ་འདོད་ལྟོས་པའི་ཆོས་ཀྱི་བར་ཆད་བསལ་བར་བསྟན་ནས། དེ་གཉིས་ཀྱི་སྤྲོས་པ་རང་ཟད་པ་ཆོས་ཉིད་ལ་འབད་རྩོལ་མེད་པར་བསྟན་པ་ལ་ཡན་ལག་གི་དོན་གཉིས་སུ་བྱས་ནས་བསྟན་ཏོ།། །།ད་ནི་སྤྱི་དོན་གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕགས་ལུགས་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ། ཁྱད་པར་གྱི་ཚིག་བདུན་གྱིས་ཐེག་པ་གཞན་ལ་གཡང་ས་བསྐུར་བར་བསྟན་པ་ནི། དེ་ཡང་ཁྱད་པར་ཆེན་པོ་མཆོག་གི་ལྟ་བས་ཕྱེ་ན། ཞེས་པ་ལ་སོགས་པས་བསྟན་ཏེ། དེ་ཡང་དག་པར་གཞན་ལས་ཁྱད་པར་འཕགས་པ་རྫོགས་པ་ཆེན་པོ་མཆོག་གི་ཁམས་གསུམ་དུ་མི་བརྒྱུད་པའི་ལྟ་བ་ལྡོག་མེད་ཡོངས་སུ་གྲོལ་བས་ཕྱེ་ན། དབུ་མ་དང་སེམས་ཙམ་ལ་སོགས་པའི་གྲུབ་མཐའ་མཁན་པོ་རྣམས་ཀྱི་ཚིག་གིས་སངས་རྒྱ་བ་ལ་ཕན་མ་བཏགས་པ་ནི་ཁ་ཚིག་ཏུ་སོང་བས་ཞེན་པ་མ་གྲོལ་བས་ཕན་པ་མེད། དེ་ལ་གནོད་པ་བསྐྱལ་བ་ཡང་མེད་དེ། ཚིག་དེ་མིང་ཙམ་ལས་ཡང་དག་ཏུ་མ་གྲུབཔས་སོ། །དེ་ཡང་ཚིག་དེ་ཤེས་བས་གྲོལ་བ་ཡིན་ན་བྱིས་པ་བརྡའ་སྨྲ་ཤེས་ལ་བསླབ་ན་གྲོལ་ཏེ། མི་གྲོལ་ལ། བཅངས་པས་གྲོལ་ན་བྱོལ་སོང་ལ་སོགས་པའི་མགུལ་དུ་བཏགས་ན་ཡང་གྲོལ་བར་རིགས་ཏེ། མི་གྲོལ་ངེས་པ་དང་། བདག་ཉིད་ཀྱིས་བདག་ཉིད་གྲོལ་ན། པུ་ཏི་གྲོལ་བ་སྟེ་གང་ཟག་ལ་ཕན་པ་མེད་དོ། །བརྗོད་པས་གྲོལ་ན་སྨན་དཔྱད་ཀྱི་པུ་ཏི་ནད་པའི་དྲུང་དུ་བཀླག་པ་ཙམ་གྱིས་གྲོལ་བར་འགྱུར་ཏེ། ནད་པ་ལ་ཕན་པ་མེད་དོ། །དེ་ཡང་དཔེར་ན་མིག་སེར་གྱི་ནད་ཀྱིས་ཟིན་པའི་མི་ལ། དུང་དཀར་པོ་ལ་སེར་པོར་མཐོང་བ་དེ་ལ་ཁྱོད་ཀྱི་མིག་འཁྲུལ་ནས་འདུག་གོ། །དུང་དཀར་པོ་ལ་སེར་པོར་མཐོང་བས་སོ་བྱས་ཀྱང་། འཁྲུལ་ནས་འདུག་སྙམ་པ་ཙམ་ལས་སེར་པོར་མཐོང་བའི་བདེན་པའི་མངོན་ཞེན་ནི་ལྡོག་པ་མ་ཡིན་ནོ། །དེ་ལྟར་གྲུབ་མཐས་གཏན་ཚིགས་དང་རིག་པས་བཤིགས་ཀྱང་འཁྲུལ་པ་ལས་ལྡོག་མི་སྲིད་དོ། །དཔེར་ན་མིག་སེར་ཅན་སྨན་པ་མཁས་པས་ཚིག་གིས་བརྗོད་མི་དགོས་པར། མིག་ཐུར་གྱིས་ཕྱེ་ནས་མིག་སྨན་བཏབ་པས། དུང་དཀར་ལམ་གྱིས་མཐོང་བ་དང་འདྲ་བར། བླ་མ་མཚན་ཉིད་དང་ལྡན་པ་གཅིག་གིས་ཚིག་སྤྲོ་མི་དགོས་པར་གནད་བསྟན་པ་ཙམ་གྱིས་དབང་པོ་རབ་སྐད་ཅིག་མ་དང་པོ་ལ་གྲོལ་ལ། འབྲིང་པོ་གནད་དེ་བསྟན་པས་ཤེས་པ་ལ་བརྟེན་ནས་སྐད་ཅིག་མ་གཉིས་པ་ལ་གྲོལ་ལ། ཐ་མས་ཀྱང་དེ་ཤེས་པ་སྟེ་གོ་བ་ལ་བརྟེན་ནས་སྐད་ཅིག་མ་གསུམ་པ་ལ་གྲོལ་བར་ངེས་པས་ན། ཁམས་གསུམ་དུ་མི་བརྒྱུད་པའོ། །ཡང་དེ་ལྟ་བུའི་གནད་དེ་ལ་དབང་པོ་རྣོ་བ་ཤེས་རབ་ཅན་ལ་ཡང་ཚིག་གིས་ཐ་སྙད་མང་པོ་མེད་པས་ཤེས་མི་དགོས་པས་ཕན་པ་མེད་ལ། དབང་པོ་རྟུལ་པོས་ཀྱང་གནད་དེ་བསྟན་ན་མི་ཤེས་མི་སྲིད་པས། དེ་ཡང་ཚིག་གི་རྟོག་དཔྱོད་མེད་པའི་གནད་ཀྱིས། ཐོས་པ་བྱས་ནས་དེ་ཉིད་རང་རྒྱུད་ལ་མ་སྐྱེས་པའམ། དེ་ལྟར་མི་བྱེད་པས། དེ་བཞིན་དུ་བསམ་པས་དོན་དང་མ་སྦྱར་བ་དང་། བསྒོམས་པས་ཆོས་ཉིད་ཀྱི་ཉམས་མྱོང་རྒྱུད་ལ་མ་སྐྱེས་པས་ཏེ། དེ་དག་ཤེས་བཞིན་དུ་དེ་རྣམས་དང་མ་འབྱར་བར་འཇིག་རྟེན་གྱི་ཆོས་ལ་སྤྱོད་པས་སླར་ངན་སོང་དུ་ལྟུང་བའི་གྲོགས་བྱེད་པས་ཕན་པ་མེད་དོ། །ཡང་གནད་འདི་བསྟན་ན་མཚམས་མེད་ལྔ་སྤྱད་པ་ཞིག་ཀྱང་མི་གྲོལ་མི་སྲིད་ལ། མ་བསྟན་ན་ཕ་རོལ་ཏུ་ཕྱིན་པ་དྲུག་ལ་རྒྱུད་དུ་སྤྱོད་པ་ཞིག་ཀྱང་ཁམས་གསུམ་ལས་མི་གྲོལ་བས། ལས་བཟང་པོ་བསགས་པས་ཕན་པ་མེད་ལ། བླ་མས་འདི་ཉིད་བསྟན་ནས་དེ་ལས་མི་གྲོལ་མི་སྲིད་པས། ངན་པས་གནོད་པ་མེད་པའི་གནད་ཀྱིས། དགེ་བའི་སྦྱོར་བ་ཅི་བྱས་ཀྱང་རང་གི་སེམས་འཆིང་བ་ལས་མ་གཏོགས་པ་ཅི་ཡང་མེད་དོ། །ཡང་ཐེག་པ་རིམ་པ་དགུའི་ཆོས་རྣམས་ཀྱིས་སངས་རྒྱ་བ་ལ་ཕན་གནོད་གང་ཡང་མེད་དོ། །དེ་དག་ནི་གནད་མེད་པས་ཡིད་ཀྱིས་དཔྱོད་ཅིང་དེའི་རྗེས་འཛིན་པའི་ལྟ་བ་དང་སྒོམ་པ་ཡིན་པའི་གནད་ཀྱིས། ཕན་པ་མེད་པའི་སྟེང་དུ་སླར་སངས་རྒྱས་རྣམས་ཀྱི་ཡོན་ཏན་དང་ཐབས་དང་ཤེས་རབ་ལ་སྒྲིབ་པར་བྱེད་པ་དང་། འོ་ན་གཞུང་པུ་ཏི་དང་གླེགས་བམ་འདི་དག་ལ་དགོས་པ་མེད་དོ་ཞེ་ན། འདི་ཉིད་ཀྱི་དཀྱིལ་འཁོར་དུ་འཇུག་པར་བྱེད་པ་ལམ་གྱི་སྟེགས་ཡིན་ཙམ་ལས་གཞན་དུ་ཕན་པ་མེད་དོ། །ཡང་རིག་པའི་ཡེ་ཤེས་ཉིད་ཤེས་རབ་ཀྱི་སྤྱོད་ཡུལ་མ་ཡིན་ན། ཡིད་རྟོག་པ་ཐ་དད་པ་དང་འདྲེས་པའི་ཕྱིར་རོ། །དེ་ལྟར་ན་ལུས་ལས་ཀྱང་། ཤེས་རབ་ཀྱིས་ནི་བརྟགས་ན་ཕུང་པོའི་གཏིང་མི་རྙེད། །ཅེས་པས་སོ། །གནད་དེ་དབང་པོ་མིག་གིས་མཐོང་བ་ཙམ་གྱིས་གཏན་ལ་ཕེབས་པའི་གནད་ནི། དཔེར་ན་སྔར་འདྲིས་པའི་མི་ཕྱིས་མཐོང་བ་ཙམ་གྱིས་ངོ་ཤེས་ཏེ། མཚན་ཉིད་གཏན་ལ་དབབ་མི་དགོས་པ་དང་འདྲའོ། །དེས་ན་གྲུབ་མཐའ་འདོད་རྒྱལ་དུ་སྨྲ་བའི་ཆོས་ཡིད་ཀྱིས་དཔྱོད་པ་ན། སླར་ཁམས་གསུམ་དུ་འཆིང་བར་བྱེད་པ་མ་གཏོགས་པ་ལས་ཕན་པ་མེད་དོ། །དེ་ཡང་གནད་དེ་མ་བསྟན་ན་ཁམས་གསུམ་ལས་གྲོལ་བར་བྱེད་པ་ལ་དགེ་བས་ཕན་མ་བཏགས་པ། གནད་དེ་ཤེས་པ་ལ་སྡིག་པས་གནོད་པ་གང་དུ་ཡང་མ་གྲུབ་པའི་གནད་ཀྱིས། ལུས་ངག་ཡིད་ཀྱིས་རྩོལ་བ་ཅི་བྱས་པ་ཐམས་ཅད་སྡུག་བསྔལ་དུ་འགྱུར་བ་ལས་ཁམས་གསུམ་ནས་གྲོལ་བ་ལ་ཕན་པ་གང་ཡང་མེད་དོ། །ཡང་སྔགས་ཀྱི་སྐུ་གསུམ་ཡེ་ཤེས་ལྔ་པོ་འདི་འབྲས་བུར་འདོད་པ་ལ་འདི་ལམ་དུ་ཉམས་གོང་འཕེལ་གྱི་སྣང་བ་ཡིན་པའི་གནད་ཀྱིས། དེ་ཡང་ཆོས་སྐུ་ལོངས་སྐུ་སྤྲུལ་སྐུ་གསུམ་ཐོབ་ཏུ་རེ་བའི་རང་རྒྱུད་ཀྱིས་བཅིངས་པས་ཁམས་གསུམ་ལས་མི་འདའ་བ་ཉིད་དོ། །ཞེས་ཡན་ལག་གི་དོན་དང་པོ་ཁྱད་པར་གྱི་ཚིག་བདུན་ལ་བརྟེན་ནས་ཐེག་པ་གཞན་ལ་གཡང་ས་བསྐུར་བར་བསྟན་ནས། ད་ནི་ནང་དོན་གཉིས་པ་རྫོགས་པ་ཆེན་པོའི་བྱ་བ་དང་བྲལ་བའི་གནད་ཀྱི་ཅི་ཡང་སྤང་དུ་མེད་པར་བསྟན་པ་ནི། བདེ་བ་དང་སྡུག་བསྔལ་གཉིས་རང་ངོ་མཉམ་པའི་ངོས་ནས་རྒྱུ་དབྱེར་མེད་པར་མཐུན་པས། བདེ་བ་བསྒྲུབ་ཏུ་མེད་ལ་སྡུག་བསྔལ་སྤང་དུ་མེད་པར་རྒྱུད་ཀྱི་སྟོན་པ་དཔལ་ལྡན་རྡོ་རྗེ་འཆར་བས་གསུངས། ཞེས་སློབ་དཔོན་ཉིད་སྟོན་པའི་ངག་གསུང་ལ་བརྟེན་པའོ། །འདོད་ཆགས་ལ་སོགས་པའི་ཚིག་དྲུག་གཞུང་གསལ་ལོ། །དེ་ལྟ་བུའི་ལྟ་བ་འདིས་ནི་དགེ་བས་ལུས་ངག་ཚི་ཆད་པའི་སྡུག་བསྔལ་བསལ་བས་སྡིག་པ་རྣམ་སྨིན་གྱི་རྒྱུ་གཉིས་ཀ་སེལ་ཏེ། སེལ་ལུགས་ཇི་ལྟར་སེལ་ན། དགེ་བྱ་བློ་ཡི་ཞེ་འདོད་མེད་པས། སྡིག་པ་ཡང་ཤུགས་ལས་སེལ་བས་སོ། །འཁོར་འདས་གཉིས་ཀ་ཟད་པར་བྱེད་པའི་རྒྱུ། རང་སེམས་གཞི་ཐོག་ཏུ་གློད་པ་དེའི་རང་བཞིན་མ་བཅོས་པ་རྣལ་མི་རྒྱས་ཐེབས་པ་རྐྱེན་གང་སྣང་གི་སྟེང་དུ་བཞག་པས། ཡུལ་ལ་ཡུལ་གྱི་རྟོག་པ་བཅོམ་དེས་སྣང་ཤེས་ཆོས་ཉིད་དུ་ལྡན། དེ་ལ་ལྟ་སྒོམ་བདག་དང་བཅས་པ་སངས་པས། སྣང་བ་སྣང་ཐོག་ཏུ་ཆོས་ཉིད་རྒྱས་ཏེ། ཤེས་པའམ་འགྱུ་བའམ་འགྱུས་ཐོག་ཏུ་འཇིག་པའི་གྲོགས་སུ་འདི་ལས་ལྷག་པ་མེད་དོ། །དེ་ཉིད་ཀྱིས་སེམས་ཀྱི་རྩ་བ་དྲན་བསམ་གློ་བུར་བར་ཤེས་པར་བརྟུལ་བར་ནི་ཕྱིས་མི་སྐྱེ་བར་བྱེད་པའོ། །དེ་ལྟར་ཤེས་པས་ཡིད་ལ་བྱེད་པའི་ཆོས་རྣམས་བསྣུབས་པས་སྲོག་ཡལ་ས་ངོ་ཤེས་ལ། དེ་ཉིད་རྟོགས་ཤིང་ངོ་ཤེས་པས་ཁམས་གསུམ་དུ་སླར་ལྡོག་པ་མེད་པའོ། །ཞེས་ནང་དོན་གཉིས་པ་རྫོགས་པ་ཆེན་པོ་བྱ་བ་དང་བྲལ་བ་ལ་སྤང་བླང་གང་ཡང་མེད་པར་བསྟན་ནས། ད་ནི་ནང་དོན་གསུམ་པ་སེམས་ཀྱི་རྟོག་པ་གདར་ཤ་བཅད་པ་གཏན་ཚིགས་རིགས་པས་གྲུབ་པ་སུན་དབྱུང་བར་བསྟན་པ་ནི། གྲུབ་པས་ནི་དྲན་རིག་སྣ་ཚོགས་པར་སྣང་བའི་ཕྱིར་ན། དྲན་རིག་ནི་འཁྲུལ་པའི་སེམས་སུ་འདུག་པས་བརྟགས་པ་རྣམས་གྲངས་ཀྱི་ཆོས་ཀྱིས་དེ་ལས་བདེ་བར་འབྱུང་བར་འདོད་པ་ཅིའི་ཕྱིར་ཏེ། སེམས་ནི་དྲན་རྟོག་འཁྲུལ་པར་བྱུང་བས་གལ་ཏེ་དྲན་རྟོག་གློ་བུར་བ་བཞིན་དུ་སེམས་ཀྱང་ཡོད་ན་དྲན་རྟོག་ཀྱང་ཆོས་ཉིད་དམ་བདེ་བར་འདོད་པར་རིགས་ཏེ། དེ་མི་འཐད་དེ། དྲན་རྟོག་གི་འགྱུ་བ་རང་ཡལ་བ་བཞིན་དུ་སེམས་ཡལ་ན། སེམས་ལས་བྱུང་བའི་བདེ་བ་ཡང་ཡལ་ནས་འགྲོ་ལ་དྲན་རྟོག་གི་མི་ཡལ་ན་སེམས་ལས་བདེ་བ་འབྱུང་བར་མི་རིགས་སོ། །དྲན་རྟོགས་མ་ཡིན་པའི་སེམས་ལོག་ནས་མི་རྙེད་ལ། རྙེད་ན་སེམས་དངོས་པོར་ཐལ་པའི་སྐྱོན་སྤང་བར་མི་ནུས་སོ། །སེམས་ལ་སྐྱེ་བ་མེད་དོ་ཞེ་ན། སྐྱེ་བ་མེད་པ་ལས་བདེ་བ་སྐྱེ་བ་མི་འཐད་ལ་སེམས་རང་ཆོས་ཉིད་ཡིན་ནོ་ཞེ་ན། དྲན་རིག་ཡལ་བས་སེམས་ཀྱི་མཚན་ཉིད་སྟོངས་པས་སེམས་ཀྱི་མིང་ཙམ་དུ་ཡང་ཤེས་བྱ་ལ་གྲུབ་པ་མེད་པས། སེམས་ཆོས་ཉིད་ཡིན་ཞེས་ཅི་ལ་བྱ། དེ་ལྟར་ན་ཐེག་པ་སོ་སོའི་འདོད་པ་སེམས་ཆོས་ཉིད་ཡིན་ན། སེམས་ཡུལ་ཐ་དད་པ་ལ་འཇུག་པ་བཞིན་དུ་ཆོས་ཉིད་ཀྱང་འཇུག་པར་འགྱུར་ཏེ། འཇུག་ན་ཆོས་ཉིད་ཡིན་པ་ལ་ཁོང་མེད་དེ། མི་འཇུག་ན་སེམས་ཆོས་ཉིད་ཡིན་ཞེས་རང་གི་ཚིག་གི་དམ་བཅའ་ཉམས་སོ། །གལ་ཏེ་སེམས་ལ་སྐྱེ་བ་མེད་པས་ཆོས་ཉིད་དུ་འགྲོ་ཞེ་ན། སེམས་ཡུལ་ཐ་དད་པ་ལ་འཕྲོ་ཞིང་སྒོ་ལྔ་ལ་སོགས་པའི་ཡུལ་ཀུན་ལ་མཆེད་པ་བཞིན་དུ་ཆོས་ཉིད་ཀྱང་མཆེད་པར་འགྱུར་ཏེ། ཡུལ་དེ་རང་ཆོས་ཉིད་ཡིན་ཞེ་ན་ཅིའི་ཕྱིར། ཡུལ་ལ་རང་བཞིན་མེད་པས་ཞེ་ན། མངོན་སུམ་དུ་གསལ་བས་སོ། །དེ་ལྟར་ན་ཆོས་ཉིད་དང་ཡུལ་གང་དུ་སེམས་དང་ཆོས་ཉིད་གཉིས་སུ་འདུ་བར་འོས་པ་མིན་ཏེ། དེ་ལྟར་གཉིས་སུ་བྱུང་ན་རང་གི་སེམས་ཀྱང་གཞན་ལས་འབྱུང་བར་འགྱུར་ཏེ། གཞན་ལས་གཞན་འབྱུང་བ་ཐུག་མེད་དུ་འགྱུར་བའི་ཕྱིར་རོ། །དེ་ལྟར་མིན་ཏེ་རླུང་ལས་སེམས་བྱུང་ལ་སེམས་ལས་རྟོག་པ་བྱུང་། རྟོག་པས་འཁོར་བའི་འབྲས་བུ་དང་བཅས་པར་བྱུང་བ་ཅིས་ཏེ་མི་རིགས་ཏེ། ཐོག་མའི་ཡང་རླུང་གི་འཕེན་པའི་ལས་མ་དག་པ་ལས་ཁམས་གསུམ་དུ་འཕངས་ལ། ད་ལྟ་ཡང་ལུས་སེམས་ཀྱི་འབྲེལ་རླུང་གིས་བྱེད་ལ་ཐ་མ་ཡང་ངན་སོང་ལ་སོགས་པར་རླུང་ལ་རྟོག་པ་ཞོན་ནས་འགྱུས་པས་འཁོར་བའི་ལས་སྣ་ཚོགས་བྱེད་ལ། རླུང་ཟད་པས་འདས་པའི་ལས་གང་ཡིན་ཡང་ཆོས་ཉིད་དུ་བྱེད་པའོ། །དྲན་པ་རང་དག་པར་ཤེས་པ་དེ་ནས་རླུང་ནི་འགྱུ་བ་ཙམ་ལ་མ་གཏོགས་པ་ཆོས་ཉིད་དུ་གྲོལ་བའོ། །དེ་ཉིད་འགྱུ་བ་རང་ཡལ་དུ་མ་ཤེས་པ་ལས། གནད་མེད་པའི་ཕྱིར་འཁྲུལ་པའི་བདག་ཉིད་ལས་མ་གཏོགས་པ་མེད་དོ་ཞེས་སྤྱི་དོན་གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕག་ལུགས་བསྟན་པ་ལ་ནང་དོན་གསུམ་དུ་བྱས་ནས་བསྟན་ཏོ།། །།ད་ནི་སྤྱི་དོན་བཞི་བ་ལྟ་སྒོམ་གྱིས་བདག་ཏུ་བཅིངས་པ་ལས་གྲོལ་བར་བསྟན་པ་ལ་ཡན་ལག་གི་དོན་བཞིས་བསྟན་པའི་དང་པོ་ལྟ་སྒོམ་འབད་པ་མེད་པའི་ཚད་བསྟན་པ་ནི། བལྟས་པས་ཕྱི་ནང་གང་ལ་ཁྱད་གནད་མཐོང་བའི་གཞི་རང་གི་སེམས་ཀྱིས་རྙེད་པ་ནི། ལྟ་བ་ལས་འདས་པའི་ཆོས་ཉིད་དོ། །འཁོར་བ་རིང་དུ་ལ་སོགས་པ་གཞུང་ན་གསལ་སོ། །ནང་དོན་དང་པོའོ། །ད་ནི་ནང་དོན་གཉིས་པ་བསྒོམ་དུ་མེད་པའི་སེམས་ཉིད་གློད་པས་གྲོལ་བར་བསྟན་པ་ནི། བློའི་བྱ་བ་དང་བྱེད་པས་བློས་བརྟགས་སུ་མ་བསྒོམས་པར་བཞག་ན་དེ་ཉིད་གྲོལ་བ་སེམས་ཡིན་ལ། རང་གི་ལྟ་སྒོམ་གྱི་འདོད་པས་སེམས་དེ་འཆིང་བ་ཅིའི་ཕྱིར་ཞེ་ན། ཆོས་ཀྱི་བྱ་བས་ཀྱང་ཁམས་གསུམ་དུ་འཁྲིད་པར་བྱེད་ལ། འཁོར་བའི་བྱ་བས་ཀྱང་ཁམས་གསུམ་དུ་འཁྲིད་པ་ལས་མི་བྱེད་དེ། དཔེར་ན་ཐག་སྒྲོག་དང་གསེར་སྒྲོག་གཉིས་འཆིང་བྱེད་དུ་ངོ་མཉམ་པ་དང་འདྲ་བས་སོ། །དེས་ན་སེམས་ལ་བྱ་བ་དང་བྱེད་པའི་མཐའ་དང་བྲལ་བས་བྱས་བཅོས་གང་བྱུང་ཡང་འཆིང་བས་ན། ཉག་གཅིག་དུ་མའི་སྤྲོས་པ་དང་བྲལ་བའི་སེམས་ཉིད་ནི། གློད་ན་ལ་སོགས་པ་གཞུང་ན་གསལ་ལོ། །ནང་དོན་གཉིས་པའོ།། །།ད་ནི་ནང་དོན་གསུམ་པ་གཅིག་ཤེས་པས་ཐམས་ཅད་གྲོལ་བར་ལྡོག་པ་དང་བཅས་པར་བསྟན་པ་ནི། གཅིག་དྲན་བསམ་གློ་བུར་དུ་ཡལ་བར་ཤེས་པས་འཁོར་འདས་ཀུན་ཆོས་ཉིད་དུ་གྲོལ་བ་ནི། བླ་མ་དམ་པའི་གསུང་གི་གནད་ཆ་བྱད་བཟང་པོས་གྲོལ་བའོ། །དེ་ཡང་ཐེག་པ་ཐུན་མོང་བས་འཁོར་འདས་ཀུན་དེས་པས་གཅིག་དྲན་པ་གློ་བུར་དུ་ཡལ་ས་ངོ་མ་ཤེས་པས་འཁོར་འདས་གང་ཡང་མ་ཟིན་པའོ། །སེམས་ཀྱིས་གང་མཐོང་འགག་པ་ལ་སོགས་པ་ཚིག་བཞི་གཞུང་ན་གསལ་ལོ། །ནང་དོན་གསུམ་པའོ། །ད་ནི་ནང་དོན་བཞི་པ་མེད་པའི་ཆོས་ཉིད་ལ་བཟླ་བ་དང་བཅས་པར་བསྟན་པ་ནི། ལྟ་བ་མེད་ཅིང་ཞེས་པའི་ཚིག་བཞི་གཞུང་གསལ་ཡིད་རང་ནི། ཁམས་གསུམ་དུ་འཇུག་པའི་གཞི། དེའི་འདུ་བ་དྲན་པ་དང་། སེམས་དང་། བསམ་པ་དང་། རྟོག་པ་ཡིད་ཀྱི་ཁོངས་སུ་འདུས་པ་ལས་ཉོན་མོངས་པ་སྟེ། དེའི་ཡལ་ས་ངོ་ཤེས་པས་ཟད་པ་ནི། སྟོངས་པ་རང་སྟོངས་ནས་གྲོལ་སར་གྲོལ་བའོ། །དེས་ན་འཁོར་འདས་ཀྱི་ཆོས་ཐམས་ཅད་རང་ལས་མ་བྱུང་བ་མེད་པས་གཞན་ལ་བརྟེན་པ་སུའི་རིག་པ་ཡིན་ཏེ། དེ་ལྟར་རང་བྱུང་ཆེན་པོ་བཅོམ་ལྡན་འདས་ཞེས་པས་སོ། །དེའི་ཕྱིར་ང་རང་བྱུང་གི་ཡེ་ཤེས་ལས་མ་བྱུང་བའི་ཁྱོད་ཅི་ཡིན་ཏེ། དེ་ལྟར་ན་ཕྱི་རོལ་སྣང་རྟོག་ཀུན་ཀྱང་རང་གྲོལ་བས་སོ། །དེས་ན་གཞན་ལ་བྱུང་བ་མེད་པའི་ཆོས་ནི་མངོན་སུམ་མཐོང་བ་རང་གི་གནད་དོ། །ངོ་མཚར་རྨད་དུ་བྱུང་བ་བྱང་བ་སེམས། ཆུབ་པ་སྣང་བ། དེ་གཉིས་ས་བོན་འགྱུ་བ་སྣ་ཚོགས་པ་ཉིད་ཡིན་པས། དེ་ཡལ་བ་གློ་བུར་གྱི་རྩིས་ཐེབས་པ་ནི་གཏན་ནས་བཅད་པ་སྟེ། དེ་ཡང་ཁ་ནས་རླུང་ཕྱིར་ཕུལ་བས་བྱུང་ཚོར་གྱི་རྣམ་རྟོག་གི་སྒོ་འགག་པའོ། །ཡིད་ལས་རླུང་བྱུང་བ་དང་། རླུང་ལས་རྟོག་པ། རྟོག་པ་ལས་ཕྱི་ཡུལ་གྱི་སྣང་བ་རྣམས་སུ་བྱུང་བ་གསུམ་པོ་ཡང་དག་པ་ནི། ཡང་སྣང་བ་དང་བཅས་པ་དྲན་རྟོག་ཅི་བྱུང་བ་ཕྱི་ནས་ནང་དུ་རླུང་གིས་དྲངས་ཏེ། མགྲིན་པའི་འོག་ཏུ་སྦས་པ་ནི། དེ་དག་སྣུབ་པས་ཕྱི་ཡུལ་གྱི་སྣང་བའི་འབྲེལ་བ་ཆོད། དེ་ཁ་ནས་རང་གིས་ཟོས་ན་འཆིང་སྟེ། ཁམས་གསུམ་ལས་མི་ལྡོག་པར་ངེས་སོ། །དེ་ལྟར་ཡང་རང་ཤར་ལས། སྣང་སྲིད་ལྟོ་རུ་མིད་ཀྱང་ང་མ་བཤོས། །ཞེས་སོ། །ཕྱི་ནང་གི་རྟོག་པ་མིན་པ་ནི། དཔེར་ན་བརྒྱལ་ནད་ཅན་ནད་ལངས་པས་དྲན་མེད་དུ་སོང་བས་བདེ་བ་རྙེད་དེ་ཅིའི་ངོ་བོར་ཡང་མ་གྲུབ་པ་ལྟར། རྣམ་རྟོག་གློ་བུར་བ་ཡིན་པར་ཤེས་པས་དྲན་པ་ནམ་མཁའ་ལ་ཡལ་བ་ལ་རྗེས་མེད་པས་ཆོས་སྐུ་སྟོང་པ་ཉིད་ཐོབ་པ་ནི། ཡལ་ས་ངོ་ཤེས་པ་ལས་བྱུང་བའོ། །དེས་ན་སེམས་སམ་རིག་པ་ལ་རྩ་བ་མེད་པ་སྔོན་ཆད་སུས་ཀྱང་མ་མཐོང་བས་སེམས་འགྱུ་བ་སྣ་ཚོགས་པའི་ཕྱིར་འབྲེངས་པས། ལུས་སེམས་ཀྱི་འབྲེལ་བྱས་པས་ནི། སེམས་ཀྱི་རྩ་བ་མེད་པར་ཤེས་པས་དྲན་རྟོག་རང་འགགས་པ་དང་། ཕྱི་སྣང་བ་འགགས་པ་དང་། ནང་བྱ་བ་འགགས་པ་དང་། གསང་བ་རླུང་སེམས་འགགས་པ་རྣམས་ཀྱིས་འགྲོ་བ་དྲུག་གི་སོ་སོའི་སྐྱེ་གནས་རང་དག་པས། ད་དེར་སྐྱེ་མི་སྲིད་པའི་གནད་དོ། །དེ་ཡང་དངོས་པོ་རགས་པ་རྣམས་སྟོང་པ་ལ་ལྟོས་ནས་བརྟགས་པས་དངོས་པོར་སོང་བས། དེ་ཉིད་རང་ཡང་སྟོངས་པས་སོ། །ཕྱི་ནང་རང་བཞིན་གྱི་ཆོས་ཉིད་ལས་མ་གཏོགས་པ་མེད་པས། ཇི་ལྟར་སྣང་བ་བདེ་བའི་ལུས་སུ་བླུགས་པ་ཡིན་པས་འཁོར་བའི་ཆོས་ལ་སོགས་པ་ཅི་ཡང་མེད་དོ། །དཔེ་ལས་བྱུང་བའི་ནི་གཞི་རྒྱལ་མཚན་གྱི་རྩེ་ལ་བཏགས་པའི་ནོར་བུ་རིན་པོ་ཆེ་ལྟ་བུའི་བསླབ་བྱ་ལ་བརྟེན་ནས་བསླབས་པས། སེམས་ཉིད་ཚིག་དང་ཐ་སྙད་ལས་གྲོལ་བའི་དགོས་པ་ཡོད་དོ། །དེ་ཡང་འཁོར་བའི་རྟོག་པ་བདག་ཏུ་འཛིན་པ་ལས་གྲོལ་བ་ནི། མཁའ་ལྡིང་གི་བུ་གསེར་འགྱུར་གྱི་ལས་ལས་གྲོལ་བ་ལྟར་གྲོལ་བས། འཁོར་འདས་ཀྱི་བྱ་བ་རང་ལོག་པའོ། །དེ་ལྟར་འཁོར་བ་སྣང་ཤེས་ཀྱིས་བསྡུས་པའི་ཆོས། སྣང་བ་སྣང་ཐོག་ཏུ་གྲོལ་བས་བཤིག་ལ་ཤེས་པ་འགྱུ་ཐོག་ཏུ་གྲོལ་བས་འགྱུ་བ་གློ་བུར་དུ་བཤིག་ལ། ཡེ་ཤེས་གཞི་གནས་རང་བཞག་ཏུ་ཤེས་པས་གསལ་སྟོང་གཉིས་དུས་གཅིག་འཇིག་པའི་ལས་ཀྱི་མཐའ་འཁོར་འདས་གང་དུ་ཡང་མ་དམིགས་པའོ། །སེམས་ཀྱི་མཚན་དུ་བསྟན་པ། དམིགས་ནི་བསླབ་བྱ་དང་ཤེས་བྱའོ། །དྲུག་པ་གྲངས་སོ། །འགྱུ་བ་རླུང་བྱེད་པ་ཡིད། རང་ལ་བཅང་བ། གནས་པ་སེམས། འཁོར་ལོ་གཅོད་པ། འཁོར་བའི་བྱུང་ཁུངས་རླུང་ལ་བཙལ་བས་འགྱུ་བ་ལས་ཀྱི་དམིགས་འགགས་ཏེ། འགྲོ་ས་མེད་པའོ། །ཞེས་བཞི་པ་ནི་གནད་དོ། །སེམས་ཀྱི་དམིགས་བཞི་པའི་རྣམ་པར་བཤད་པའོ། །ཨཐྎ། རྒྱ་རྒྱ་རྒྱ། ས་མ་ཡཱ།། ༈ །།སེམས་ཀྱི་དམིགས་པ་ལྔ་པ་རྣམ་པར་བཤད་པ། དེ་ལ་སེམས་ཀྱི་དམིགས་ལྔ་པ་རིམ་འབྱེད་དྲུག་གིས་སེམས་ཀྱི་དབྱེ་བ་བསྟན་ཏོ། །འདི་ལ་སྤྱི་དོན་ལྔས་བསྟན་ཏེ། ཁྱད་པར་ལྟ་སྒོམ་གྱིས་གཟེར་གྱི་བསྟན་པ་དང་། གཉིས་པ་ཁྱབ་པ་བརྡའ་དོན་གྱི་མན་ངག་ལ་བརྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་དང་། གསུམ་པ་རང་གྲོལ་གྱི་གནད་བྱས་བཅོས་ཅི་བྱས་ཀྱང་ཆོས་ཉིད་ལས་འདའ་ས་མེད་པར་བསྟན་པ་དང་། བཞི་པ་མི་རིགས་རིགས་པར་སྦྱར་བ་ལ་འཁོར་འདས་ལྟོ་བཟློག་པར་བསྟན་པ་དང་། ལྔ་པ་ཁྱད་པར་སྟོབས་ཀྱིས་འཁོར་འདས་དུས་གཅིག་ལ་བསྒྲལ་བར་བསྟན་པའོ། །དེ་ཡང་བསྡུས་པའི་དོན་དང་པོ་ཁྱད་པར་ལྟ་སྒོམ་གྱི་གཟེར་བསྟན་པ་ཡན་ལག་གི་དོན་གསུམ་གྱིས་བསྟན་པའི་དང་པོ་འཁྲུལ་པ་རང་བཞིན་གྱི་གཞི་བསྟན་པ་ནི། དེ་ཡང་ཐོག་མ་ཆོས་ཉིད་སྟོང་པ་ཉིད་ཀྱི་ཁྱབ་བྱེད་ཀྱི་སྣང་བ་རང་ཤར་བ་ལས། ཁ་དོག་རྣམ་པར་མཛེས་པ་ཞེས་བྱ་བའི་རླུང་གི་འཕེན་པ་ཁ་ཕྱིར་འཁྱལ་བ་ལས། སྣ་ཚོགས་སྡུད་པ་དྲན་རྟོག་གི་རླུང་ཞེས་བྱ་བར་འགྱུས་པ་ལས། གཟུགས་མེད་པའི་ཁམས་ཀྱི་སེམས་ཅན་ཐམས་ཅད་རླུང་དེ་ལས་སྐྱེས་པ་ནི། དྲན་རྟོག་གི་ལས་བློ་ནང་དུ་བསགས་པ་ལས་བྱུང་བའོ། །དེ་ཡང་དང་པོ་གཟུགས་འབྱུང་བ་ཕྲ་རགས་ལས་བྱུང་བ་མེད་པའི་ལུས་ནི། རྣམ་ཤེས་ཡལ་པ་ལས་ལུས་སུ་སོང་བའོ། །དེ་ལས་གཟུགས་སུ་བྱུང་བ་འདི་ཡང་དང་པོ་མེད་པ་སྟོང་པ་ལས་གཟུགས་མེད་པའི་ལུས་སུ་བྱུང་བའི་གནད་ཀྱིས། ད་ལྟའི་ལུས་འབྱུང་བ་ཕྲ་རགས་ལས་གྲུབ་པ་འདི་ལ་ཡང་དང་པོ་རྒྱུ་མེད་པས་རྟོག་པའི་རྟེན་ལ། བར་དུ་རྐྱེན་མེད་པས་སེམས་ཆགས་པའི་གནས་མེད་པའི་ཕྱིར་རང་བཞིན་གྱི་རྣམ་པར་དག་གོ། །དེའི་ཕྱིར་ན་ཕུང་པོ་ལྔ་འབྱུང་བ་གཅུད་པའི་གནད་ལ་བོར་ལ་ཁམས་བཅོ་བརྒྱད་མ་བྱུང་མ་སྐྱེས་པའི་ངང་ལ་བཞག །སྐྱེས་མཆེད་བཅུ་གཉིས་གཅིག་སྐྱེ་གཅིག་འགག་པ་ཡིན་པ་མེད་པའི་ངང་ལས་བཞག་པས་གྲོལ་བ་སྟེ། དེ་ཡང་ཁྱད་པར་དུ་ལུས་ངག་ཡིད་མ་བཅོས་སེམས་རྣལ་མའི་ངང་རྒྱུན་རིང་བ་ལ་ཞོག་ཅེས་མངོན་འབྱུང་དུ་སློབ་དཔོན་གྱིས་གདམས་ལ། དེ་ཡང་སུ་ལ་གདམས་ན། འཇམ་དཔལ་བཤེས་གཉེན་ལ་གདམས་སོ། །རྗེས་འཇུག་ཏུ་བླ་མས་སློབ་མ་ལ་གདམས་པའོ། །དེ་ཡང་བཞག་ལུགས་ཇི་ལྟར་བཞག་ཅེ་ན། ལུས་ངག་ཡིད་ཀྱི་བྱ་བ་དང་བྲལ་བ་ལ་བརྟེན་པས་སེམས་གཞི་ལ་བཞག་པས་གྲོལ་བའོ། །ཞེས་ནང་དོན་དང་པོ་བསྟན་ཏོ། །ད་ནི་ནང་དོན་གཉིས་པ་སྤྱོད་པའི་མཚན་ཉིད་ཉེ་བར་བསྡུས་པ་དཔེ་དང་བཅས་པར་བསྟན་པ་ནི། སྤྱོད་པས་ཞེས་པ་འཇིག་རྟེན་གྱི་བྱ་བ་ལ་སོགས་པ་མ་ཡིན་པར། ཆོས་ཀྱི་སྤྱོད་པས་བསྡུས་པས་མཚོན་པའི་ཚིག་ནི། གང་ཟག་དམ་པ་གོང་གིས་གྲོལ་བར་ནི་འཁོར་བ་ལས་གྲོལ་བ་འདོད་པའི་རྫོགས་པ་ཆེན་པོའི་སྣོད་ཡོད་པའི་རིགས་ཀྱི་སྣང་བ་ལ་མ་ཆགས་པ་དང་། ཞེན་པ་མེད་པར་སྤྱད་དེ། དཔེར་ན་སྨྱོན་པས་འབྲེལ་བ་མེད་པའི་སྤྱོད་པ་སྣ་ཚོགས་བྱེད་པ་ལྟར། འགྲོ་བ་དང་འདུག་པ་ལ་ཐོགས་པ་མེད་ཅིང་དངོས་པོ་རྫས་ལ་སོགས་པ་ལ་ཞེན་པ་སྤུ་ཙམ་མེད་པར་རྣལ་འབྱོར་པ་རྣམས་ཀྱིས་ཀྱང་བྱ་སྟེ། འགྲོའམ་སྙམ་ཙ་ན་འགྲོ་ལ། འདུག་གམ་སྙམ་ཙ་ན་འདུག་སྟེ། འགྲོ་འདུག་སུས་ཀྱང་ངོ་མི་ཤེས་པར་བྱའོ། །ཤུགས་ལས་འབྱུང་སྟེ། གལ་ཏེ་མ་བྱུང་ཡང་ཆེད་དུ་བྱའོ། །དེ་ལྟར་བྱས་པས་རྣལ་འབྱོར་པའི་ལུས་ནི་གྱི་ན་བརྡའ་རྩོལ་བ་དང་བྲལ་བར་འགྱུར་རོ། །དེ་ལྟར་སོང་བས་རྣལ་འབྱོར་པ་དེའི་དབང་པོ་ལྔ་རང་ཡན་དུ་འགྲོ་བས་ཚོགས་དྲུག་དགག་ཏུ་མེད་པ་ཡིན་ནོ། །ཞེས་ནང་དོན་གཉིས་པ་བསྟན་ཏོ། །ད་ནི་ནང་དོན་གསུམ་པ་དཔེ་བརྡའ་ཐབས་དང་གསུམ་གྱིས་གྲོལ་བར་བསྟན་པ་ནི། གང་ཞིག་ཚིག་ལ་གདེང་འཆའ་ན། །ཞེས་པ་ལ་སོགས་པ་ཚིག་རྐང་བརྒྱད་ཀྱིས་བསྟན་པ་གཞུང་ན་གསལ་ལོ། །དེ་དག་གིས་བསྡུས་པའི་དོན་དང་པོ་ཁྱད་པར་ལྟ་སྒོམ་གྱི་གཟེར་ལ་གསུམ་དུ་བྱས་ནས་བསྟན་ཏོ། །ད་ནི་བསྡུས་པའི་དོན་གཉིས་པ་ཁྱབ་པ་བརྡའ་དོན་གྱི་མན་ངག་ལ་བརྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་ལ། ཡན་ལག་གི་དོན་གསུམ་བསྟན་པའི་དང་པོ་དཔེ་ལ་བརྟེན་ནས་དངོས་པོ་གཤིས་ཏེ་གཏན་ལ་དབབ་པར་བསྟན་པ་ནི། བྱ་བ་དང་བྲལ་བ་ཞེས་པ་ལ་སོགས་པས་བསྟན་ཏེ། བྱ་བ་ནི་ལས་དང་། རྟོག་པ་དང་། ལུས་ངག་གི་སྟེ། དེ་དག་དང་བྲལ་བ་ནི། དཔེར་ན་འོག་མིན་གྱི་ལྷའི་བུ་བདུད་རྩི་མ་གིང་གིས་མྱོས་ཙམ་ན། ལུས་ངག་གི་བྱ་བ་དང་བྲལ་ནས་འདུག་ས་གཅིག་ནས་མི་འགུལ་པ་སྟེ། དེ་ལྟར་རྣལ་འབྱོར་པས་ཀྱང་བྱ་བ་བཏང་ནས། རི་ཁྲོད་བརྟེན་ན་ལུས་སེམས་གཡེང་བ་དང་བྲལ་ནས་འཁོར་འདས་གང་དུའང་རྟོག་པ་གང་དུ་ཡང་མི་སྐྱེའོ། །སེམས་ཅན་ལ་མཉམ་པར་ཤེས་པ་གནོད་སྦྱིན་ལག་ན་བེ་ཅོན་ཞེས་བྱ་བར་བུ་རབ་ཏུ་ཡིད་སྦྱིན་ཞེས་བྱ་བ་ཡོད་དེ། དེས་ལྷའི་ཡིད་བཞིན་གྱི་ནོར་བུ་ལྷུང་བ་རྙེད་པས་སེམས་རབ་ཏུ་རངས་པས། སེམས་ཅན་ཐམས་ཅད་ལ་བདག་གིས་ཕན་པ་སྙམ་སྙོམས་སུ་བྱའོ་སྙམ་པའི་བློ་སྐྱེས་ནས། དགྲ་གཉེན་དང་ཉེ་རིང་མེད་པར་ཀུན་ལ་ཕན་པར་བྱས་པས། དེའི་སྟོབས་ཀྱིས་ལུས་ངག་ཡིད་ལ་བདེ་བ་ཁྱད་པར་ཅན་སྐྱེས་བ་ལྟ་བུར། རྣལ་འབྱོར་པས་ཀྱང་སྙིང་རྗེ་ཆེན་པོས་ཀུན་ནས་བསླངས་ནས་སེམས་ཅན་ཐམས་ཅད་ལ། དགྲ་དང་བུ་ངོ་མཉམ་སྟེ་ཉེ་རིང་མེད་པར་བྱམས་པ་དང་སྙིང་རྗེས་ཀུན་ནས་བསླངས་ནས། སྦྱིན་པ་ལ་སོགས་པ་བཏང་ནས། སེམས་ཀྱི་གནད་གཏེམས་ན་ལུས་ངག་ཡིད་ལ་བདེ་བ་ཁྱད་པར་ཅན་སྐྱེ་བར་ངེས་སོ། །དེ་ལྟར་བྱས་པས་བློ་ལས་གྲོལ་བར་གནས་པ་ནི། དཔེར་ན་ཚངས་པའི་རྒྱལ་པོས་ཤར་ཕྱོགས་ཀྱི་ནམ་མཁའ་ཟད་པའི་མཐའ་མ་རྙེད་པས་ད་འགྲོ་བའི་ལམ་སྟོར་བ་ལྟ་བུར། རྣལ་འབྱོར་པ་གློ་བུར་གྱིས་རྣམ་རྟོག་ལས་གྲོལ་བ་ཡང་ཆོས་ཉིད་སྟོང་པ་ཉིད་མཐའ་རྟོག་པས་ད་བགྲོད་པར་བྱ་བ་འཁོར་འདས་ཀྱི་གཞི་སྟོངས་པའོ། །སེམས་ཀྱི་ཁྱད་པར་ནི་ཀླུ་དགའ་བོའི་བུ་མོ་འབྲས་ལྡན་ཞེས་བྱ་བ། ནམ་མཁའ་ལྡིང་གིས་འཇིགས་པའི་ལམ་ལ་རྟོག་པའི་གཞི་སྐྱེས་ནས། ནམ་མཁའ་རིན་པོ་ཆེའི་གུར་ཕུབ་པར་བློས་བསམ་ཞིང་དམིགས་པས། ནམ་མཁའ་ལ་རིན་པོ་ཆེ་སྣ་ཚོགས་པའི་ཁང་བ་ཡིད་དུ་འོང་བ་སྟེང་གི་ཕྱོགས་རྡོ་རྗེ་འབར་བའི་གུར་གྱིས་གཏམས་པ་ཀུན་གྱི་ཡིད་དུ་འོང་བ་ཞིག་བྱུང་ངོ་། །དེ་བྱུང་བས་ནམ་མཁའ་ལྡིང་གིས་ཀླུ་ཀུན་ལ་འཇིགས་པ་དང་བྲལ་བ་ལྟ་བུར། རྣལ་འབྱོར་པས་རླུང་སྦྱངས་པའི་ཏིང་ངེ་འཛིན་ལ་བརྟེན་ནས་ལུས་ཀྱི་ལས་ཀྱིས་ཉེ་བར་བསྒྲུབས་པས། འགྲོ་བའི་མོས་པ་བསྒྱུར་བའི་སྟོབས་ཀྱིས་འགྲོ་བ་རྣམས་འཁོར་བའི་འཇིགས་པ་ལས་སྒྲོལ་བའོ། །ཡང་རྣལ་འབྱོར་པས་དངོས་པོ་གཤིས་མཐོང་བས་འཁོར་འདས་གང་ལ་ཡང་ཐོགས་པ་མེད་དོ། །རྣལ་འབྱོར་པ་གྲུབ་ཚུལ་ལ་སེམས་ཀྱི་གནས་པ་སྐྱེས་པས་རང་སེམས་ལ་བྱན་ཚུད་པ། དཔེར་ན་དྲང་སྲོང་གི་དམོད་པ་དོར་བས་ཀུན་བརླག་པར་བྱས། ལྷག་མ་རང་དབང་དུ་འདུས་པ་ལྟ་བུར། གྲུབ་མཐའ་རང་རྒྱུད་དུ་འཛིན་པ་ལས་བློ་ལོག་པའོ། །སེམས་ཀྱི་དམིགས་ལྔ་པའི་བསྡུས་དོན་གཉིས་པའི་ནང་དོན་དང་པོ་བསྟན་ཏོ། །ད་ནི་ནང་དོན་གཉིས་པ་སེམས་ཀྱི་བསླབ་བྱ་ཤེས་པའི་འགྱུར་རྩིས་པའི་གནད་བསྟན་པ་ནི། དེ་ལ་རྣལ་འབྱོར་པ་དད་པ་ལྡན་པ་ཞིག་གིས་སེམས་བཅོས་པའི་ཐབས་ལ་སློབ་ན། དཔའ་ན་ཞེས་སེམས་དྲན་ཅིང་འཕོ་ན་གོ་ཆ་བགོ་གོས་ཀྱིས་ཕུར་ལ་རླུང་ནང་དུ་ཡིད་ཙམ་བཟུང་། མཚོན་ནི་བླ་མའི་མན་ངག་དྲན་པར་བྱས་ལ། དེ་དང་ལྡན་པར་བྱས། དེ་དང་མི་འབྲལ་བ་གཅེས་སོ། །མགྱོགས་ན་རླུང་གི་འགྲོ་འོང་འུར་ཞིང་སེམས་གཅིག་ཏུ་མི་ཕེབས་ན། གཅིག་སེམས་སྙིང་གི་ནང་དུ་བཅུག་ལ། མགོའི་མཚོགས་མར་ཆུ་ལྕག་གིས་བྲབ་པ་གཅེས་སོ། ཡང་མནོན་ནི་ཤེས་པ་དྲན་པ་སྣ་ཚོགས་སུ་འགྱུ་ན་དང་གར་འགྲོ་བར་བཏང་། སླར་དེ་ཉིད་ཀྱི་སྟེང་དུ་སེམས་ཡང་དང་ཡང་དུ་ཕབ་ཅིང་བཞག་ལ་རྟེན་འབྲེལ་དུ་སྐུ་ལ་མུ་ཏིག་མིག་མ་ཕུག་པ་གདགས་པ་གཅེས་སོ། །ཡང་གུལ་ན་ནི་སེམས་རབ་ཏུ་རྨུགས་ན། གཏོད་པ་རང་གི་སྨིན་མཚམས་སུ་རླུང་སེམས་ཀྱི་ཐིག་ལེའི་ནང་དུ་སེམས་བཅུག་ལ། རླུང་ཡིད་ཙམ་བཟུང་ལ་ཕོ་ཁར་རླུང་དེ་མནན་པ་གཅེས་སོ། །མཐོ་ན་ཞེས་པ་སེམས་ཕེབས་སུ་མ་བཏུབ་ན། འོབས་ནི་སེམས་གར་སོང་གི་རྗེས་བཅད་པས། ཐ་མ་རང་ལ་བསྐོར་གྱིས་ལོག་ནས་དེ་ལ་རང་ངོ་ཤེས་པ་གཅེས་སོ། །ལོ་ན་ཞེས་པ་སེམས་རབ་ཏུ་རྨུགས་ན། མིག་འབྲས་ནི་ཐིག་ལེ་སྟོང་པའི་སྒྲོན་མ་རང་མཐེབ་མཛུབ་ཀྱིས་གཏེམ་ཞིང་དེ་ལས་ཕྱིར་ནམ་མཁའ་ལ་འདོན་པ་གཅེས་སོ། །ཡང་རྟོག་ན་ནི་སེམས་རྟོག་པ་མང་པོས་ཀུན་ནས་སློང་སྒོམ་མ་ཕེབས་ན། དྲན་པ་གང་བྱུང་བའི་ཕྱི་ན་ཕར་དེད་པས་ཤེས་པ་ཅི་མི་སྙོམ་པའི་ཉམས་རྒྱུད་ལ་འཆར་ཏེ། དེ་ལ་ཡུན་རིང་བ་གཅེས་སོ། །ལྐུགས་ན་ཞེས་པ་སེམས་གང་དུ་ཡང་མི་འཕྲོ་ན་རང་བཞིན་རྟོག་མཐའ་ཕྱོགས་གཅིག་ཏུ་གོལ་བ་ཡིན་པས། བརྗོད་བྱ་ངག་སྨྲ་བཅད། སྣ་བུག་གཡས་པ་དར་གྱི་ལྟོས་དགག་པ་གཅེས་སོ། །སྨྲ་ན་ཞེས་པ་འདིའི་ལུས་སེམས་ཀྱི་རྗེས་སུ་འབྲངས་པ་ཡིན་ཏེ། ངག་ཏུ་སྨྲ་སྙིང་འདོད་ན་སྒྲའི་གནས་སུ་ཏྲིད་ཞེས་པ་དང་། ས་ཨེ་ལི་ཞེས་པ་དང་། དྷ་ཀ་ཨུརྣ་ཞེས་པ་བསྒྱུར་བ་གཅེས་སོ། །ཡེངས་ན་ཞེས་ཤེས་བཞིན་གྱི་མ་ཟིན་ན་བག་ལ་ལུས་ཀྱི་ནང་དུ་སེམས་བཞག་པ་གཅེས་སོ། །འཁོར་ན་གཅིག་ལས་བསྐྱེས་པས་ན་རྒྱ་ཡིས་བཟུང་བ་ནི། རླུང་ནང་དུ་བཟུང་ལ་རིག་པ་མིག་ནས་ཕྱི་ཕུལ་བ་གཅེས་སོ། །ལོག་ན་ཞེས་སེམས་ལ་ཆགས་ཤིང་ཕྱིར་འགྲོར་མ་བཏུབ་ན་རང་སར་བཏང་བ་ནི། རླུང་སེམས་ནམ་མཁར་རྒྱང་རིང་པོར་འཕང་པ་གཅེས་སོ། །འགྲོ་ན་ཞེས་སེམས་མ་ཟིན་ན་ཉལ་བའི་མལ་འཚོལ་བ་ནི་དམིགས་པའི་རྟེན་ལ་གཏད་ཅིང་བསླབ་པ་གཅེས་སོ། །འདུག་ན་ཞེས་གང་གཏད་པས་ལས་ཕོགས་མེད་ན་ཡན་ལག་བསྐྱོད་པ་ནི་དམིགས་རྟེན་ཡང་ནས་ཡང་དུ་སྤོ་བ་གཅེས་སོ། །ཞེས་ནང་དོན་གཉིས་པ་སེམས་ཀྱི་བསླབ་བྱ་ཤེས་པའི་འགྱུར་རྩིས་པའི་གནད་བསྟན་ནས། ད་ནི་ནང་དོན་གསུམ་པ་ལྟ་སྒོམ་གྱི་གཅེས་པའི་གཟེར་བསྟན་པ་ནི། གལ་ཏེ་ནི་རང་བཞིན་ཆོས་ཉིད་ལ་གནས་པར་འདོད་པས་རང་གི་སེམས་དལ་བ་འཚོལ་བའི་མིས་ནི། སྤྱོད་པ་བྱེད་པའི་ཚེ་ན་སེམས་ཡེངས་ལ་བོར་བ་གཅེས་སོ། །བསྒོམ་ན་ལ་སོགས་པ་ཚིག་རྐང་གསུམ་གཞུང་ན་གསལ་ལོ། །དེ་ད་གིས་བསྡུས་པའི་དོན་གཉིས་པ་ཁྱབ་པ་བརྡའ་དོན་གྱི་མན་ངག་ལ་བརྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་ལ་ནང་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གསུམ་པ་རང་གྲོལ་བརྡའི་གནད་བྱ་སྤྱོད་ཅི་བྱས་ཀྱང་ཆོས་ཉིད་འདས་པ་མེད་པར་བསྟན་པ་ལ་ཡན་ལག་གི་དོན་ལྔས་བསྟན་པའི་དང་པོ་སེམས་ཀྱི་དབྱེ་བ་ལ་བརྟེན་ནས་ཆོས་ཉིད་རྟོགས་པར་བསྟན་པ་ནི། བྱུང་ས་མེད་པའི་སེམས་ནི་ཞེས་པ་ལ་སོགས་པས་བསྟན། བྱུང་ས་མེད་པའི་སེམས་ནི། དབྱེ་བ་ནི། བྱུང་ས་ལ་བརྟགས་པས་བྱུང་ས་མ་རྙེད་པ་དང་། དེ་ཉིད་བྱས་པ་ཡིན་ནམ་བྱས་པ་མིན་པས་སེམས་ཕན་ཚུན་འདུས་མ་བྱས་པ་དང་། དེ་སུས་ཀྱང་མཐོང་བ་མེད་པས་བལྟར་མེད་པ་དང་། ཕན་ཚུན་ལྟོས་པ་གང་ཡང་མེད་པས་གཅིག་ཡིན་པ་དང་། དེ་ལྟར་ན་སྣ་ཚོགས་སུ་རྟོགས་པས་སྤང་བླང་མེད་པའོ། །དེ་ལྟར་སེམས་ལྔ་པོ་དེ་ཡང་ཉོན་མོངས་པ་ལྔ་རང་སར་དག་པར་བྱེད་པ་དགོངས་པའོ། །གཞི་ཇི་ལྟར་བཟུང་ཞེ་ན། གནད་ཤེས་པར་བྱེད་པ་ནི་སེམས་ལ། དེ་ཤེས་པས་འདས་པའི་གཞི་ལྡོག་མེད་སོ་མར་ཟིན་པ་དང་། དེ་བསླབས་པས་སེམས་དེ་འགྲོ་མེད་དུ་ཟིན་པས་ན་རླུང་གི་འགྱུ་བ་རྒྱུན་ཆད་དོ། །ལམ་ཇི་ལྟར་གསལ་ཞེ་ན། སེམས་མཁའ་ལ་ཕྱུང་བ་ལུས་ཀྱི་འབྲེལ་པ་བཅད་པས་སྣང་བ་དུས་གཅིག་ལ་འགགས་པས་ཆོས་ཉིད་མངོན་སུམ་དུ་མཐོང་ལ། ཡེ་ཤེས་རྩ་ནང་ནས་དྲངས་པས་ལས་ཀྱི་རླུང་གི་ལམ་བསལ་བས་ཡེ་ཤེས་རང་ངོ་ལ་མཐོང་བས་སོ། །ཕུག་ཇི་ལྟར་བཀྲུ་ན་དྲན་བསམ་གྱི་འཁོར་ལོ་ཡང་དག་པར་བཏགས་པས། དྲན་བསམ་ཐུན་མོང་བ་རྣམས་གློ་བུར་དུ་ཡལ་ལ་སེམས་ཀྱི་མཚན་ཉིད་ཡེ་ནས་མ་གྲུབ་པས། སེམས་བྱ་བ་ཡང་ཐ་སྙད་བཏགས་པ་ཙམ་ལས་གྲུབ་པ་གང་ཡང་མེད་པར་རྟོགས་པས་དེ་ལ་འགྲོ་ས་གཞན་མེད་པའོ། །རླུང་གི་འཕེན་སྡུད་པ་ཇི་ལྟར་གཏད་ཅེ་ན། རླུང་ཕྱིར་འཕེན་པས་ལུས་སེམས་ཀྱི་འབྲེལ་བཅད་ནས། སེམས་ཀྱི་དངོས་པོ་སྟོངས་པར་བྱ། ནང་དུ་བསྡུས་པས་ཆོས་ཉིད་ཀྱི་གཞི་བཙལ་ལུས་ཀྱི་དངོས་པོ་བཤིག་པས་སོ། །གནད་ཇི་ལྟར་སྒེར་ཞེ་ན། རླུང་གནད་ལ་སྒེར་བས་རྣམ་རྟོག་ཁོག་སྟོངས། ལུས་གནད་ལ་སྒེར་བས་ཡེ་ཤེས་ངོས་སུ་སྣང་། ངག་གནད་ལ་སྒེར་བས་བརྗོད་དུ་མེད་པའི་དོན་རྟོགས། སེམས་གནད་ལ་སྒེར་བས་སེམས་ཀྱི་ཁང་བུ་གཞིག་སྟེ་མེད་པའི་དོན་མེད་པར་ཤེས་པའོ། །དེས་ནང་དོན་དང་པོ་བསྟན་ཏོ། །ད་ནི་སྤྱི་དོན་གསུམ་པའི་ནང་དོན་གཉིས་པ་བརྗོད་པ་བརྡའི་གནད་ལ་བརྟེན་ནས་བརྗོད་དུ་མེད་པའི་ཆོས་ཉིད་རྟོགས་པར་བསྟན་པ་ནི། ཡང་པ་ནི་རླུང་སྟེ་རླུང་གཅུད་པས་དབང་པོ་རང་དྭངས་པ་སྟེ། ལྕིད་ནི་དྲོད་སྐྱེ་བར་འདོད་ན་ཕོ་ཁར་ཚ་མེར་གྱི་མནན་ནོ། །ཁམས་གསུམ་དུ་མི་ལྡོག་པར་འདོད་ཕྱིར་ཅི་ནས་ཀྱང་འཕང་། ཟས་ཀྱི་རྣལ་འབྱོར་བྱེད་པར་འདོད་ན་ལྕེའི་སྟེང་དུ་བཞག །རྐང་མགྱོགས་ཐོབ་པར་འདོད་ན་རྐང་མཐིལ་དུ་བོར་བས་འགྲུབ་ལ། ལུས་བདེ་བར་འདོད་ན་ཤམ་ཐང་བར་དུ་གཞུག །ངག་ལ་ནུས་པ་རྫོགས་པར་འདོད་ན་སྟོང་མགོའི་ཨིག་སྐད་དང་བཅས་ཏེ་མགྲིན་པར་སྦས། སེམས་འོད་གསལ་དུ་གྲོལ་བར་འདོད་ན་ལུང་འདོད་ཀྱི་དྲྭ་བའི་སྙིང་ནང་དུ་གཞུག་གོ། །དེ་ལྟར་བྱས་པས་གོས་ལ་ཞེན་པའི་མཐའ་དང་། ཁམས་གསུམ་གྱིས་བཅིངས་པའི་དང་། ལས་ལ་ཞེན་པའི་དང་། གནས་གཅིག་ལ་ཞེན་པའི་དང་། ལུས་ལ་མངོན་པར་ཞེན་པ་དང་། ངག་དང་། སེམས་ཀྱིས་བཅིངས་པའི་མཐའ་དག་བདུད་རང་བཞིན་གྱི་སངས་སོ། །ལྕི་བ་ནི་སའི་རླུང་སྟེ། ཉི་མ་གཡོན་ནས་རྒྱུ་བ། ཟླ་བ་གཡས་ན་རྒྱུ་བ། བར་ཁ་ནས་བཅུག་པས་དུས་རླུང་གི་འགྱུ་ཚད་ཤེས། དྲོད་ཕྱི་ལུས་ལ་ཕེབས་པའི་རྟགས་སུ་ལུས་ཡང་ཞིང་འབུ་སྲིན་ལ་སོགས་པ་མེད། ནང་སེམས་ལ་ཕེབས་པའི་རྟགས་སུ་གང་དུ་བཞག་སར་སྡོད། གསང་བ་ཆོས་ཉིད་ལ་ཕེབས་པའི་རྟགས་སུ་ཅི་བསམ་ཆོས་ལས་འགྲོ་ས་མེད་པའོ། །དེ་ལྟར་བྱས་པ་ལ་གལ་ཏེ་ལུས་ངག་ལ་བདེ་བ་ཐུན་མོང་མ་ཡིན་པ་སྐྱེས་ན། ཐུན་ཡང་ནས་ཡང་དུ་སྤོ་བ་ནི། སྡུག་པའི་དོང་སྟེ། དེ་ཡང་བློ་ཆོས་ལ་བོར་བས་འཁོར་འདས་ཀྱི་ཚད་དུས་འདི་ཙམ་ན་ལུས་སེམས་འབྲལ་བར་ངོས་ཟིན་པར་ངེས་སོ། །སྟོང་ཉིད་ནི་སེམས་དངོས་པོ་ནི་སྣང་བ་གང་བ། ར་བར་བཅུག་བས་ནི་གང་གི་སྟེང་དུ་བཞག་པ། ཕ་ནི་འཁོར་བ། འཆི་བ་ནི་དེ་ཉིད་དུ་མི་ལྡོག་པ། དངོས་པོ་སྒོ་ལྔའི་ཞེན་པ་འཕྲ་བའི་ནི་གདམས་ངག་ཟབ་མོ། །རླུང་གི་ཉམས་དང་དྲོད་ཚད་བསྐུར་བས་ནི་ཡང་ན་གནད་ཤེས་པས་ཡལ་སར་ཐིམ་ལ། ཐིམ་སར་ཡལ་བའོ། །ཡུལ་ནི་སྣང་བ་ཙམ་ཆོས་ཉིད་དུ་ཤེས་པ། རྙེད་པ་རྟོགས་པའི་གདིང་ངོ་། །བདེ་འདོད་ནི་ཡིད་ལ་བྱེད་པའི་ཆོས། སེམས་ཀྱི་གནོད་པ་ནི་རང་ལུགས་སུ་འཇོག་པ་ལ་གནོད། བཤིག་པས་ནི་ཡིད་ལ་མི་བྱེད་པ། མ་ནི་ཆོས་ཉིད། བསད་པ་ནི་ཆོས་ཉིད་ལ་རང་རྒྱུད་དུ་འཛིན་པ་ལས་གྲོལ་བའོ། །བྱར་མེད་པ་གནས་ལུགས། བྱ་བའི་ནི་བསླབ་བྱ། སྲབ་ཀྱིས་བཅུག་པའི་ནི་ཤེས་བཞིན་གྱིས་ཟིན་པ། བུ་ནི་རིག་པ་སྐྱེ་བ་ནི་ཆོས་ཉིད་མཐོང་བ་རྣམ་པར་དག་པས་མངོན་སུམ་དུ་རིག་པ་མཐོང་བའོ། །ཆོས་རྣམས་ནི་གྲུབ་མཐའ་འདོད་རྒྱལ་དུ་འཛིན་པ། རྒྱ་མཚོ་ནི་མཉམ་བཞག་གཏིང་དུ་ནི་ཆོས་ཉིད་མ་བཅོས་པ་སྦས་པས་ནི་དེ་དང་བྲལ་བ་མེད་པ། དགྲ་ནི་ཉོན་མོངས་པ། སོད་པ་ནི་ཉོན་མོངས་ཉིད་ཡེ་ཤེས་སུ་ཤར་བ། རང་ནི་ཤེས་པ་ལྟ་སྒོམ་ནི་གྲུབ་མཐའི་ཞེ་འདོད། རླུང་ལ་ནི་ཤེས་རབ་བསྐུར་བས་ནི་བྱར་མེད་ཆེན་པོའི་དོན། གདིང་ཆེ་བ་ནི། ཁམས་གསུམ་དུ་མི་ལྡོག་པར་ངོ་ཤེས་པའོ། །ཞེས་ནང་དོན་གཉིས་པ་བརྗོད་པ་བརྡ་གནད་ལ་བརྟེན་ནས་བརྗོད་དུ་མེད་པའི་ཆོས་ཉིད་རྟོགས་པར་བསྟན་ནས། ད་ནི་ནང་དོན་གསུམ་པ་རང་གྲོལ་ལ་གཉེན་པོ་མེད་པའི་གནད་ལ་བརྟེན་ནས་རིགས་མཐུན་ནང་གི་གྲོལ་བར་བསྟན་པ་ནི། དཔེར་ན་དུག་ལ་སོགས་པ་ཚིག་རྐང་པ་བདུན་གཞུང་ན་གསལ་ལོ། །ད་ནི་ནང་དོན་བཞི་པ་རང་བཞིན་དག་པའི་ཆོས་ཉིད་ཀྱི་ལམ་ལས་འཁྱེར་ས་མེད་པར་བསྟན་པ་ནི། བྱར་མེད་ཅེས་པ་དངོས་པོའི་གཤིས། ཆོས་ནི་དེ་ལ་སྤྱོད་པ་བྱ་བ་ནི་ཡིད་ལ་བྱེད་པ། འཆིང་བ་ནི་མངོན་སུམ་དུ་སྣང་བ་ལ་སྒྲིབ་ལ། བྱང་བར་འདོད་པས་ནི་ཚོགས་བསགས་པའི་བྱེ་བྲག་དཔག་ཏུ་མེད་པ་བྱས་པའི་མཐའ་ཁོང་ཁྲོ་སྐྱེས་པས་སླར་དྲི་མར་གྱུར་བ་ནི། ལུས་ངག་གི་སྡིག་པ་འཕེལ་བའོ། །དཔེར་ན་ཆུའི་རྙོག་མ་སངས་པར་འདོད་པས་བསལ་ན་སླར་རྙོག་མར་འགྱུར་བ་ལྟར། ལྟ་སྒོམ་ཡིད་ལ་བྱས་པས་སླར་སེམས་ཀྱི་རྟོག་པར་འགྱུར་བ་ནི། ཆུ་མ་རྙོགས་ན་དྭངས་ལ། སེམས་མ་བཅོས་ན་གསལ་བ་ཞེས་བྱའོ། །ཤེས་རབ་ལྡན་པ་ནི་ཆོས་ཀྱི་རློམ་པ་སྐྱེས་པས་དྲེགས་སེམས་དང་ལྡན་པ་ངའོ་སྙམ་པའི་ང་རྒྱལ་སྐྱེས་པས་སླར་ངན་སོང་གསུམ་དུ་སྐྱེ་བའི་རྒྱུ་བྱེད་པས། ཆོས་སེམས་ཐོག་ཏུ་བཞག་པ་གནད་དོ། །ཆོས་ཀྱི་ནི་མངོན་སུམ་གནད་ཀྱིས་ཆོས་ཀྱི་བཏགས་པ་རྣམ་གྲངས་ཀྱི་ཆོས་རྣམས་ཐ་དད་དུ་ཤེས་པས་ན་ཕྱགས་མས་འདེབས་ཏེ། ཐ་སྙད་ལ་བློ་མི་གནས་པའོ། །ལྟ་དང་སྒོམ་པས་ནི་ཡང་དག་པའི་གནད་ཀྱི་ལྟ་སྒོམ་གྱིས་རང་གི་སེམས་སྟོང་པ་ངོས་བཟུང་དང་བྲལ་བས། མཚན་ཉིད་ངག་དུ་ཡང་མ་གྲུབ་པར་ཤེས་པས་བསད་པ་སྟེ་སླར་མི་ལྡོག་པར་བྱེད་པའོ། །ཡང་རང་གི་མན་ངག་ལྡན་པས་ནི། དེ་ཉིད་ལ་མངོན་པར་ཞེན་པས་སླར་འཁོར་བར་འཆིང་བར་བྱེད་དོ། །གཏན་ཚིགས་དེའི་ཕྱིར་ན་ལམ་བདག་ཏུ་བཟུང་བ་མེད་པར་ཆོས་ཉིད་རྫོགས་པའོ། །ཞེས་དེ་དག་གི་སྤྱི་དོན་གསུམ་པ་རང་གྲོལ་བརྡའི་གནད་ཀྱིས་ཆོས་ཉིད་ལ་ཅི་བྱས་ཀྱང་ཆོས་ཉིད་ལས་འདའ་ས་མེད་པར་བསྟན་པ་ལ་ཡན་ལག་གི་དོན་བཞིར་བྱས་ནས་བསྟན་ཏོ།། །།ད་ནི་སྤྱི་དོན་བཞི་པ་མ་རིག་རིག་པར་སྦྱར་བས་འཁོར་འདས་ལྟོ་ལྡོག་པར་བསྟན་པ་ལ། ཡན་ལག་གི་དོན་བཅུ་གཉིས་ཀྱིས་བསྟན་པའི་དང་པོ། ཆོས་ཉིད་ལྟོས་གཞི་དང་བྲལ་བའི་བརྡས། སྣང་རྐྱེན་རང་འགགས་པར་བསྟན་པ་ནི། ཡང་བརྗོད་པའི་ཚིག་ཙམ་ལ་བརྟེན་ནས་ཞེས་པ་ལ་སོགས་པས་བསྟན་ཏེ། ཡང་བྱ་བ་གནན་པའི་ཚིག་ཡིན་ཏེ། བརྡལ་ལ་རང་བཞིན་གྱི་བརྡ་དང་། བྱས་ཤིང་བསྟན་པ་དང་། བརྗོད་པའི་བརྡ་དང་གསུ མ་ལས་མི་འདའོ། །དེ་ལ་འདིར་བརྗོད་པ་ཚིག་ཙམ་ལ་བརྟེན་ནས། འཁོར་འདས་ཀྱི་ཆོས་ཐམས་ཅད་བརྗོད་དུ་མེད་པར་ལ་བཟླ་བ་ནི། ཨེ་མ་ནི་ངོ་མཚར་ཤིན་ཏུ་ཆེ་བའོ། །ཡིད་ནི་རླུང་། བུ་ནི་དེ་ལ་རྟོག་པ་སྣ་ཚོགས་པ་ཞོན་ནས་འགྱུ་བ། སེམས་ཀྱིས་ནི་རླུང་ཕྱིར་ལ་འཕས་པས་དྲན་བསམ་རང་ཡལ་བ། བཙོན་དུ་བཟུང་བས་ནི་དྲན་བསམ་ལས་འཕྲོས་པའི་ཡུལ་མེད་པའོ། །སྐྱེ་བ་ནི་ཡུལ་རྐྱེན་ལས་བྱུང་བའི་དྲན་རྟོག་རྒྱུན་ཆད་པ་ཡིན་ན། དེ་ཉིད་ནམ་མཁའ་ལ་ཡལ་བ། ཚ་ནི་ཡལ་བའི་དུས་རྟོག་པ་ལྔ་རང་དེངས་པས། ང་བདག་གི་སྣང་བ་རྣམས་དུས་གཅིག་འགག་གོ། །ཞེས་ནང་དོན་དང་པོའོ། །ད་ནི་ནང་དོན་གཉིས་པ་དྲན་རྟོག་སྤུར་བའི་ཐབས་བསྟན་པ་ནི། སེམས་ཀྱིས་མ་བཅོས་པའི་ཆོས་ཉིད། རྟོག་པ་ནི་དེ་ལ་རྟོག་དཔྱོད་བློ་དང་བཅས་པ། དེ་ཡང་རླུང་དང་བཅས་ཏེ་ཧ་ཞེས་བར་སྣང་ལ་འཕང་བས། ནམ་མཁའ་རྒྱང་རིང་པོར་འཕངས་པས་འགྱུ་བ་ལྔའི་ལྟོས་ཟད་པའི་ཚེ། ཕྲོགས་པ་ནི་གསལ་བའོ། །དྲན་པ་ནི་འགྱུ་བ་སྣ་ཚོགས་པ། ཁུངས་ནི་དང་པོ་འདི་ནས་འོངས་ཀྱིས་མེད་པ། འགགས་པ་ནི་དྲན་བསམ་གློ་བུར་བ་ཡིན་པར་ཤེས་པ་སྔར་མ་ཤེས་པ་ཡ་ཆ། ཞེས་ནང་དོན་གཉིས་པའོ། །ད་ནི་ནང་དོན་གསུམ་པ་ཆོས་ཉིད་བདེ་བ་ཆེན་པོ་ཤར་ལུགས་བསྟན་པ་ནི། སེམས་ཀྱི་རང་བཞིན་མ་བཅོས་པ། བུ་ནི་ཡུལ་ལ་ཤར་བའི་ཆོས་ཉིད། ཡིད་ཀྱི་རྟོག་པ་གློ་བུར་བའི་དབང་དུ་སོང་བ། བསད་པ་ནི་ཆོས་ཉིད་དམ། རྟོག་པ་འཆར་བ་ལ་གནོད་པ། ཕ་ནི་ཐབས། མ་ནི་ཤེས་རབ། དུས་གཅིག་ནི་དེ་ལྟར་ཐབས་ཤེས་རབ་གཉིས་ལ་ཞེན་པའི་མཐའ་མེད་པའོ། །ཤི་བ་ནི་སླར་མི་ལྡོག་པ་སྟེ། ད་ཐབས་ཤེས་རབ་ལ་མི་ལྟོས་པའོ། །ཡ་དང་མི་སྐྱེ་བ་ལ་འདས་པ། ལ་མི་ལྡོག་པའི་རྒྱས་ཐེབས་པའོ། །ཞེས་ནང་དོན་གསུམ་པའོ། །ད་ནི་ནང་དོན་བཞི་པ་བློ་ལས་འདས་པའི་ཆོས་ཉིད་གཏན་ལ་དབབ་པ་བསྟན་པ་ནི། སྐྱེ་བའི་ནི་དྲན་བསམ་གྱི་ཁུངས་དེད་པ། བུ་ནི་དྲན་པ་སྐྱེ་བའི་རྐྱེན་ཤི་བས་ནི་དྲན་བསམ་རྐྱེན་ཐོག་རང་དུ་ཡལ་བས། བློ་དང་བཅས་པས་རླུང་དང་བཅས་ཏེ་ནམ་མཁའ་ལ་འཕངས་པའི་གཞི་མེད་པ་ནི། རབས་ཆད་པ་ནི་དྲན་རྟོག་སྐྱེ་བའི་རྒྱུན་འགགས་པའོ། །དེ་བློ་ཐོག་ཏུ་ལྡོག་པ་ལ་གཞི་ལུས་སེམས་སྟོངས་པ་ནི་དེ་གཉིས་ཀྱི་འབྲེལ་བ་ཆད་པའོ། །དེ་ད་ལྟ་ཤེས་པ་ངོ་མཚར་ཆེ་བའོ། །ཞེས་ནང་དོན་བཞི་པའོ། །ད་ནི་ནང་དོན་ལྔ་པ་ཡིད་ཚར་བཅད་པས་སེམས་ཉིད་རང་དོན་གསལ་བར་བསྟན་པ་ནི། མགྱོགས་པ་ནི་ཡིད་གང་ལ་ཡང་ཐོགས་པ་མེད་པ། ལྕག་གིས་ནི་གར་སོང་གི་རྗེས་བཅད་པ། བྲབས་པས་ནི་ཡང་ནས་ཡང་དུ་ཡིད་ཀྱི་འགྱུ་བ་ལ་བརྟགས་པས་འཆི་བ་ཡལ་རྒྱུ། རྒྱུན་ཆད་པ་ནི་དེ་ཉིད་མ་རྙེད་པའོ། །དོན་དེ་ཆོས་ཉིད་ཡིན་པ་ཧ་ཅང་ཆེས་སོ། །ཞེས་ནང་དོན་ལྔ་པའོ། །ད་ནི་དྲུག་པ་རླུང་གནད་ཐབས་ཀྱི་མན་ངག་གིས་བཟུང་འཛིན་གྱི་ཡུལ་གདོན་པར་བསྟན་པ་ནི། གུལ་པོ་རླུང་དལ་བ་བརྟེན་པ། གཏོད་པ་ནི་ཡིད་ཙམ་ནང་དུ་འཐེན་པ། མནན་པ་ནི་ཕོ་ཁ་གཡས་སུ་མནན་པའོ། །གཉིས་ནི་གཟུང་བ་ཡུལ་དང་འཛིན་པ་སེམས་བཙོན་དུ་བཟུང་བ་གོང་མ་གཉིས་ཀྱི་གཞི་འགྱུ་བ་མེད་པ་ནི། མན་ངག་ཟབ་པའི་གནད་ཆེན་པོ་ལས་བྱུང་བའོ། །ནང་དོན་དྲུག་པའོ། །ད་ནི་ནང་དོན་བདུན་པ་འཁྲུལ་པ་གཞི་ལ་ལྡོག་པའི་ཐབས་བསྟན་པ་ནི། གཅིག་ནི་མ་རིག་པ། མཐར་སྔར་འཁྲུལ་མ་མྱོང་བའི་གནད། སྤྲུགས་པ་ནི། ད་ལྟ་འཁྲུལ་པ་ལ་མི་གནས་པའི་རྩིས་ཐེབས་པ། བརྒྱ་ནི་འཁོར་བའི་འཇུག་སྒོ་བརྒྱ་དང་བཞི། ཡུལ་ཟིན་པ་ནི་ད་འཁྲུལ་མི་སྲིད་པར་ཐག་ཆོད་པས། དེ་ཡང་མ་རིག་པ་རིག་པར་ཤེས་པ་ཁྱབ་ཆེ་བའོ། །ནང་དོན་བདུན་པའོ། །ད་ནི་ནང་དོན་བརྒྱད་པ་སྐུ་གསུམ་གྱིས་བཅིངས་པ་ལས་གྲོལ་བའི་གནད་བསྟན་པ་ནི། སྟོང་ནི་འགྱུ་བ་ཐ་དད་པ། ལྕགས་སུ་བཅུག་པས་ནི་རླུང་གིས་བཟུང་ནས་མཁའ་ལ་སྤུར་བ། གསུམ་ནི་སྐུ་གསུམ་ལ་རང་རྒྱུད་དུ་བཟུང་བ། བཙོན་ལས་ཐར་པ་ནི་ལུས་ངག་ཡིད་ཀྱིས་བཅིངས་པ་ལས་ཐར་སྐུ་གསུམ་རང་ཆས་པ་ལྟོས་པ་ཆེ་བའོ། །ནང་དོན་བརྒྱད་པའོ། །ད་ནི་ནང་དོན་དགུ་པ་འཁོར་འདས་ལ་བཟླ་བ་ཆོས་ཉིད་ལ་གང་ཡང་མེད་པར་བསྟན་པ་ནི། རྒྱབ་པ་ནི་གནད་ཤེས་པ། གཅིག་ནི་འཁོར་བ། རྒྱབ་པས་ནི་ནད་དེ་ཡལ་བར་ཤེས་པས། བོག་ཀུན་ལ་ཕོག་པ་ནི་འཁོར་འདས་གཉིས་མེད་འདྲེས་བས་གཉིས་སྣང་གི་ཤེས་པ་རང་ཡལ་བ་རྒོད་རང་སེམས་ལ་བྲོ་བའོ། །ནང་དོན་དགུ་པའོ། །ད་ནི་ནང་དོན་བཅུ་པ་ཐུན་མོང་གི་གོལ་ས་རྣམ་པར་བཅད་པ་བསྟན་པ་ནི། རྒྱབ་ཀུན་ལ་ནི་ཐེག་པ་ཐུན་མོང་བའི་ཚིག་གིས་སྤྲོས་པས་རྒྱབ་པས་ནི་ཀུན་རིག་པ་དང་གཏན་ཚིགས་ཀྱིས་བཤིགས་ཀྱང་། ཕོག་པ་ནི་གནད། གཅིག་ནི་ཆོས་ཅན་གཅིག་ལ་ཡང་གནད་དུ་མ་སོང་བས་ཁམས་གསུམ་དུ་འཁྲིད་པར་བྱེད་པ་ནི་ཨེ་ཤ་ཞེས་བྱ་བ་ལ་གོད་པ་མེད་པའོ། །ཞེས་བཅུ་པའོ། །ད་ནི་བཅུ་གཅིག་པ་སེམས་ཉིད་གཉུག་མ་ལ་ལས་དང་བག་ཆགས་ཀྱིས་མི་གོས་བར་བསྟན་པ་ནི། ཅིག་ནི་མ་བཅོས་པའི་སེམས། དོང་ནས་ནི་ཁམས་གསུམ་འཁོར་བ་བཏོན་པས་མ་བཅོས་རང་སོར་བཞག་པ། མི་བརྒྱ་ནི་འཁོར་བའི་རྟོག་པ་སྣ་ཚོགས་པ། བཙོན་ནས་ཐར་བ་ནི་འཁོར་བ་ཉིད་དུ་གྲོལ་བས། ལས་དང་ཉོན་མོངས་པ་ཐམས་ཅད་རང་དག་པ་ཧ་ཧ་ཞེས་པ་བཅུ་གཅིག་པའོ། །ད་ནི་ནང་དོན་བཅུ་གཉིས་པ་སེམས་ཉིད་ལ་ཐེག་པའི་ཆོས་འདུས་པར་བསྟན་པ་ནི། སྡོང་པོ་ནི་སེམས་ཉིད་ལ་འཁོར་འདས་གཉིས་གཅིག་ཏུ་བསྡོམས་པ་བཅད་པས་ནི་སེམས་ཀྱི་རྩ་བ་མེད་པར་ཆོད་པས་རྩ་བ་དགུ་ཆོད་པ་ནི་ཐེག་པ་རིམ་པ་དགུའོ། །ཞེ་འདོད་དང་བཅས་པའི་ལྟ་བ་དུས་གཅིག་ལ་ཤེས་པས། ཆོས་ལས་འདས་པ་ཨེ་ཆོས་ཨ་སྐྱེ་མེད་དུ་ལ་བཟླ་བའོ། །ཞེས་བསྡུས་པའི་དོན་བཞི་པ་མ་རིག་རིག་པར་སྦྱར་བས་འཁོར་འདས་ལྟོ་བཟློག་པར་བསྟན་པ་ལ་ཡན་ལག་གི་དོན་བཅུ་གཉིས་སུ་བྱས་ནས་བསྟན་ཏོ།། །།ད་ནི་སྤྱི་དོན་ལྔ་པ་ཁྱད་པར་སྟོབས་ཚིག་གིས་འཁོར་འདས་དུས་གཅིག་ལ་བསྒྲལ་བར་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ། མངོན་སུམ་རང་གནད་ཀྱིས་འཁོར་འདས་ལྟོ་སྦྱར་བར་བསྟན་པ་ནི། གཅིག་རྒྱབ་ཀུན་ཤི་བས་རང་ཡལ་ཞེས་པ་ལ་སོགས་པས་བསྟན་ཏེ། གཅིག་རྒྱབ་འཁྲུལ་བའི་རྩ་བ་མ་རིག་པ་ངོ་ཤེས་པས་ཀུན་ཤི་བ་ནི་འཁྲུལ་པ་རང་ངོས་སངས་པས། དྲན་བསམ་རང་ཡལ་བའོ། །དེ་ལྟར་འཁྲུལ་པ་ཀུན་ཤི་བ་ནི་སླར་ལྡོག་པའི་ས་སྟོངས་པ། གཅིག་མ་སོད་པ་ནི་སེམས་ཉིད་ལ་སྐྱེ་ཤི་མེད་པ་འཕེལ་བ་ཆོས་ཀྱི་དབྱིངས་སོ། །ལས་ནི་བསླབ་བྱ་དང་མ་བྲལ་བ། སྲོག་ནི་འཁོར་བའི་བདག་ཏུ་ལྟ་བ། བདག་མེད་དུ་བཅད་པས་འདས་པའི་བདེ་བ་རང་གི་སེམས་ལ་རྙེད་པའོ། །བསྟན་པ་ལ་གནོད་པ་ལ་སོགས་པ་སྲོག་ཆགས་མ་རུངས་པ་རྣམས་ལ་དངོས་སུ་སྡིག་པ་སྤྱད་པར་བྱས་ན་ཕ་རོལ་ཕྱིན་པ་དྲུག་གི་དགེ་བ་བས་འདི་རྣལ་འབྱོར་བའི་གྲོགས་སུ་ཆེའོ། །གཞན་ནི་སྣང་བ་བསད་པ་ནི་སྣང་ཐོག་ཏུ་བཞག་པའི་དང་པོའི་རོ་ཤི་བས་བསད་ལ། རང་ནི་ཤེས་པ་གང་སྣང་གི་སྟེང་དུ་བཞག་པས་ཤི་བ་ནི་ཡལ་ས་ངོ་ཤེས་པ་འཁོར་བར་ལྡོག་པའི་རྐྱེན་ལས་རྣམ་སྨིན་ཟད་པའོ། །རང་ང་བདག །ཤི་བ་བདག་མེད་ཀྱི་དོན་རྟོགས་པ། གཞན་སྣང་བ་ཡེ་ཤེས་སུ་འཕེལ་བས་ཤེས་རབ་ཀྱི་སྟོབས་ཆེ་བའོ། །ཞེས་ནང་དོན་དང་པོའོ། །ད་ནི་གཉིས་པ་ཡི་གེ་བརྡ་སྦྱོར་གྱི་སྣང་བ་རང་ལུས་སུ་བསླབ་པ་བསྟན་པ་ནི། རི་བོ་ནི་ཕྱི་རོལ་གྱི་སྣང་བ་དངོས་པོ་རགས་པ་རྣམས། ཏིལ་འབྲུའི་མིག་ཏུ་དྲངས་པའི་གནད་བཙུན་པས་ན་རླུང་གིས་ལྟོ་འདི་སེམས་སྟོངས་པ་མ་ཁེངས་པ་ནི་དང་པོ་ཧ་ཧ་ཞེས་ཁར་མིད་དོ། །རི་རབ་ནི་ལུས། སྲང་ལ་གཞལ་བ་ནི་ལུས་ཀྱི་རྡུལ་ཕྲ་རབ་ཀྱི་ཚད་ཤེས་པས། ཕྱེད་ནི་འཁོར་འདས་ཀྱི་མཚམས་ཤེས་པའོ། །མེད་པ་ནི་སྟོང་པར། ངོས་ཟིན་པ་ནི། ཐེག་པ་ཧོ་ཧ་ཞེས་དྲག་ཏུ་བརྗོད་པ་ལས་བྱུང་བས་སོ། །དེ་ཡང་རང་གི་ལུས་བདེ་ལུགས་སུ་འདུག་ནས་ཨྸཱ་ཞེས་དབང་པོ་སྤྱོད་ཡུལ་སྟོང་གསུམ་ཙམ་སྣང་ཡང་རང་རང་ལྟོང་འོག་ཁུགས་ལ་མིད་པས་སྐྲེས་མ་ཡལ་བ་ནི་སྟོང་པ་ལ་སྟོང་པ་ཐིམ་པའི་འོག་ཏུ་ཧྲཱིཿཞེས་པ་ལས་བྱུང་བའོ། །ནང་དོན་གཉིས་པའོ། །ད་ནི་གསུམ་པ་སྤྱོད་པའི་ཁྱབ་བྱེད་བསྟན་པ་ནི། རྣལ་འབྱོར་པ་ལམ་དུ་འགྲོ་བའི་དུས་ན་རྐང་པ་གཡས་པ་ལ་ཟླ་བ་བསྒོམ། གཡོན་པར་ཉི་མ་བསྒོམ་འགྲོ་བ་ནི་གདན་དུ་བཏིང་བའོ། །དེ་ལྟར་ཕྱིན་པས་འགྲོ་བ་གཞན་གྱི་མུན་སྲོས་པ་ནི་མཐོང་བའི་ནུས་པ་མི་འབྱུང་ངོ་། །སྤྱོད་པ་བྱེད་པའི་ཚེ་ལག་ཏུ་ཁ་ཊྭཱཾ་ཀ་རྩེ་གསུམ་པ་ཐོགས་པས་རང་ང་བདག་བསད་པའི་སྤྱོད་པའི་ཚད། ཡང་སྤྱོད་པའི་ཚེ་ན་ལུས་ལ་གོས་ནག་པོ་མུན་པ་དང་འདྲ་བའི་གོས་གྱོན་ལ་མཐོང་མིག་གསུམ་ཧུར་ཐོན་ལ་འབྲུ་ཚུགས་སུ་བལྟས་པས་ནི་ནང་དུ་རིག་པ་གསལ་བར་འགྱུར་རོ། །ལྟེ་བར་རཾ་བསྒོམ་སྟེ་རང་གི་ལུས་གཅེས་བུར་ཕྱུང་བས་དམ་པའི་དོན་ལ་དམིགས་ལ་གཞན་གྱི་ལུས་ལ་ཧས་བཏབ་ན་གྲང་བའི་རེག་པ་ཉམས་སུ་མྱོང་བ་ནི། དེ་ལ་བརྟེན་ནས་བྱིན་རླབས་ཀྱི་རྐྱེན་དུ་འགྱུར་རོ། །གཅིག་ནི་སེམས་གངས་ནི་ཆོས་ཉིད། བསྐྱལ་བས་ནི་སྤྱོད་པའི་དུས་སུ་ལམ་དུ་ཁྱེར་བ། རང་ལུས་ལ་དྲོད་ཕེབས་པ་ནི་དེ་ལྟར་སྤྱོད་པས་བླང་པས་ནང་དུ་རྟོགས་པ་འཆར་ལ། ཕྱིར་ལུས་ཀྱི་འཇིགས་པ་དང་བྲལ་བ་དག་འབྱུང་ངོ་། །བསླབ་ཐབས་ནི་བྱ་ཚང་འཇུག་གི་བསླབ་བྱས་རང་སེམས་ཁུངས་སུ་བཅུག་པས། དཔེ་ཡིས་སྦྱར་བས་ནི། ཀླུའི་བུ་ནི་མཁའ་ལྡིང་གི་འཇིགས་པ་ལས་གྲོལ་བ་ལྟར་གྲོལ་པས། ཡང་བ་དང་བག་ཚ་བ་མེད་པའོ། །དེ་ལྟར་ཡལ་བའི་གནས་སུ་ཡིས་ཤེས་པ་དེ་ཉིད་ལ་བཅོས་སུ་མེད་ཉིད་དོ། །ཞེས་གདམས་པ་ནི་སྤྱི་དོན་ལྔས་སེམས་ཀྱི་དམིགས་ནི་བསླབ་བྱ། དྲུག་ནི་གྲངས་ཏེ། དེ་ལས་ལྔ་པ། དེ་ཡང་རིམ་གྱིས་འབྱེད་པའི་གནད་གོང་དུ་སེམས་ཀྱི་དབྱེ་བ་དྲུག་ལ་བརྟེན་ནས། སེམས་ཀྱི་དབྱེ་བ་ཡང་ལྔར་བསྡུ་ནས་བསྟན་པའོ། །རྣམ་པར་བཤད་པ་ཞེས་བྱ་བ། མཁས་པ་བྱེ་མ་ལ་མུ་ཏྲས་མཛད་པ་རྫོགས་སོ།། །།རྒྱ་རྒྱ་རྒྱ། ཨཐྎ། ས་མ་ཡཱ།། ༈ །།ད་ནི་སེམས་ཀྱི་དམིགས་དྲུག་པ་རྒྱུན་དུ་འཁོར་ལུགས་དྲུག་གི་རྣམ་པར་བཤད་པ་ནི། འདི་མ་བསྡུས་པའི་དོན་གསུམ་སྟེ། དང་པོ་ཆོས་ཉིད་གནད་ཐོག་ཏུ་གྲོལ་བ་རང་གི་ཁྱད་པར་གྱི་གཞི་བསྟན་པ་དང་། གཉིས་པ་ཆོས་ཉིད་ཡལ་བའི་ཁྱད་པར་གྱིས་མ་གྲོལ་བ་གང་ཡང་མེད་པར་བསྟན་པ་དང་། གསུམ་པ་བསླབ་བྱ་རང་གི་མཚན་ཉིད་དཔེ་དང་བཅས་པས་གཞི་ལྡོག་མེད་དུ་བསྟན་པའོ། །དེ་ལ་སྤྱི་དོན་དང་པོ་ཆོས་ཉིད་གནད་ཐོག་ཏུ་གྲོལ་བ་ཁྱད་པར་རང་གི་གཞི་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ་མན་ངག་ཁྱད་པར་ཆེ་བ་གདམས་པ་དང་བཅས་པ་བསྟན་པ་ནི། དེ་ལྟར་བབས་ལུགས་བསྟན་པ་ནི་ཞེས་པ་ལ་སོགས་པས་བསྟན་ཏེ། དེ་ལྟར་བླ་མས་ཆོས་ཀྱི་བབས་ལུགས་རྟོགས་པར་བྱས་ལ་དེ་ངོ་སྤྲད་པར་བྱ་སྟེ། ངོ་སྤྲད་པ་ལུགས་མང་ན་ཡང་། འདིར་ནི་བསྒོམ་དུ་མེད་པའི་དོན་དྲན་རྟོག་ཡལ་མཚམ ས་ཀྱི་གནད་ལ་བརྟེན་ནས་ངོ་སྤྲད་པ་བསྟན་པར་བྱ་སྟེ། དེ་ཡང་འདིར་ལག་ལེན་དུ་སྒྲིབ་ན་སྣང་བའི་སྒྲོན་མ་རྒྱབ་ཡིག་དང་སྦྱོར་རོ། །ད་ནི་དམ་པའི་དོན་ལ་འཇུག་པ་ཞེས་པ་ཚིག་རྐང་བཅུ་གཞུང་གིས་ཤེས་སོ། །ད་ནི་གཉིས་པ་སེམས་གློད་པས་གྲོལ་བ་བཞག་ཐབས་དང་བཅས་ཏེ་བསྟན་པ་ནི། དེ་ལ་དུས་གསུམ་སངས་རྒྱས་ཀྱི་རིགས་སྐལ་པ་ཡོད་པའོ། །ཀྱི་འབྲེལ་བ་མཚོན་པ་སྟེ། བླ་མ་དང་འབྲེལ་བས་སྐལ་ལྡན་སེམས་ཀྱི་བུ་ཞེས་བྱའོ། །ལུས་ཀྱི་ཆས་ལ་ཕབ་ནས་ཇི་ལྟར་བདེ་ལུགས་སུ་བཅོས་ནས་གློད་པ་དང་། ཤེས་པ་ཡེངས་ལ་བོར་བའི་གནད་ཡང་དག་པ་ཡིན་པས། རང་སོ་ཞེས། རང་སོ་ཞེས་སེམས་བཅོས་པ་མེད་པར་ཡེངས་ལ་བོར་ནས་བཞག་པས་དྲན་བསམ་གྱི་སྒོ་རྟོག་པ་སྣ་ཚོགས་སུ་འགྱུ་བ་བླ་མའི་བྱིན་རླབས་ཀྱིས་འགག་གོ། །གཉིས་པའོ། །ད་ནི་གསུམ་པ་བླ་མའི་མན་ངག་གནད་ལ་བོར་བ་བླ་མའི་གསུང་བརྗོད་པ་དང་བཅས་པར་བསྟན་པ་ནི། སེམས་རྟོག་པ་སྣ་ཚོགས་སུ་ཤོར་ན་གཤིས་གང་སྣང་བཅོས་པ་མེད་པའི་སྟེང་དུ་དབང་པོ་རང་ཡན་དུ་བཞག་པས་ནི། དྲན་པས་ཟུངས། རིག་པ་གཅོད་གཉིས་ལས་བྱུང་བའི་ཡིད་དང་། བློ་དང་། བསམ་པ་ལ་སོགས་པ་ཐམས་ཅད་ཡལ་བས་དུས་གཅིག་ལ་འགག་གོ། །ཞེས་བརྡས་བསྐུལ་བས། ཆོས་ཉིད་བསམ་པ་ལས་འདས་པའི་གཞི་རྙེད་པ་ནི། ངག་ཏུ་ཨ་ཞེས་བརྗོད་པས་དྲག་པ་བླ་མ་བྱིན་རླབས་དང་ལྡན་པའི་ངག་ཏུ་གསལ་བས་གདབ་བོ། །དེ་ལ་བརྟེན་ནས་སྐལ་ལྡན་ལ་ངེས་པར་དེ་ཁོ་ན་ཡིན་ནོ་བའི་ཤེས་པ་སྐྱེ་བ་ནི་སེམས་ཉིད་མེད་པའི་དོན་རང་ཡོལ་དུ་མཚོན་པ་ལས། དྲན་མེད་དང་སྨྲ་བ་དང་། འཕར་བ་ལ་སོགས་པ་འབྱུང་བ་ནི། གཤིས་ཀྱི་རྩལ་ཡིན་པས། སྐལ་ལྡན་གྱི་སེམས་གནས་པའི་སྟེང་ནས་ཤེས་པ་ཧད་པོ་དྲན་པ་ཡལ་བ་ལ་གནས་པ་ནི་བརྡ་དོན་གཉིས་མེད་དུ་འདྲེས་པའོ། །དེ་ལ་བླ་མས་དེ་ནི་གློ་བུར་བའི་དྲན་པ་དང་རིག་པའི་འགྱུ་བ་ཟད་པ་ལས་བྱུང་བ་ཡིན་པས། ཕྱིས་ཀྱང་དེའི་སྟེང་ལས་མ་འདའ་ཞིག །ཅེས་མཚོན་པའོ། །ཤེས་པ་དེ་ལྟར་སོང་ན། འདི་ནི་དུས་ཀྱི་ཡལ་ས་ནམ་མཁར་སྦྱིན་པར་གྱིས་ཞེས་པས་སོ། །སེམས་མེད་པ་ལ་དྲན་རིག་མེད་པར་མཚོན་པའི། དེས་ན་སེམས་ཀྱི་རྩ་བ་རང་ལས་རྟོགས་པ་ཁྱད་པར་ཅན་སྐྱེས་པས་བཟུང་ངོ་། །དེའི་ཕྱིར་ན་སེམས་མེད་པ་ལས་འདི་ལྟར་འཁྲུལ་པ་འོང་བར་ཅིལ་རིགས་ཏེ། འཁྲུལ་པ་ཉིད་འཁྲུལ་ཐོག་ཏུ་གྲོལ་བས་ན། དེས་ན་འདི་སེམས། དེ་ཡུལ། དེ་ལྟར་ཡུལ་སེམས་གཉིས་རང་གྲོལ་བ་ལས་གཏོགས་པ་གཞན་མེད་དོ། །ཞེས་དེ་དག་གིས་ནི་སྤྱི་དོན་དང་པོ་ཆོས་ཉིད་གནད་ཐོག་ཏུ་གྲོལ་བ་ཁྱད་པར་རང་གི་གཞི་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་ཆོས་ཉིད་ཡལ་བའི་ཁྱད་པར་གྱིས་མ་གྲོལ་བ་གང་ཡང་མེད་པར་བསྟན་པ་ལ་ཡན་ལག་གི་དོན་བདུན་གྱི་བསྟན་པའི་དང་པོ། བློ་རིམ་གྱིས་པ་རྣམས་ཀྱིས་བསླབ་པ་ཐུན་མོང་མ་ཡིན་པ་ལ་བརྟེན་ནས་ཆོས་ཉིད་ལས་འཁྱེར་ས་མེད་པར་བསྟན་པ་ནི། གལ་ཏེ་སློབ་པར་འདོད་པའི་མིས་ཞེས་པ་ལ་སོགས་པས་བསྟན་ཏེ། གལ་ཏེ་བློ་རིམ་གྱིས་པ་རྣམས་ཀྱིས་ཆོས་ཉིད་ཀྱི་དོན་དེ་སློབ་པར་འདོད་པའི་མིས། རླུང་ཁ་ནས་ནམ་མཁའ་ལ་ཕྱིར་འཕངས་པས་དྲན་པ་ཡལ་བའི་མཚམས་ཤེས་བཞིན་དུ་གནས་པ་ནས་ངོས་བཟུང་བས་རྟོག་པ་གློ་བུར་བ་ཐམས་ཅད་རྒྱུན་ཆད་དོ། །དེ་ལ་དུས་ཐམས་ཅད་དུ་བཞག་པས་རང་གི་ཤེས་པ་ཅི་མི་སྙམ་པའི་ཉམས་འདི་ཡིན་འདི་མིན་གྱི་ཚད་བཟུང་བ་མེད་པ་རང་གི་རྒྱུད་ལ་འཆར་རོ། །དེ་ལ་རྒྱུན་དུ་གནས་པས་སེམས་ཀྱི་འཇུག་པ་ཐ་དད་པའི་རྒྱུན་རླུང་དང་བཅས་འགག་པ་ནི། དེ་ཚོ་གང་ལས་འབྱུང་ཞེ་ན། དེ་ནི་དང་པོ་ལུས་ཀྱི་གནད་ལུས་སྐྱིལ་ཀྲུང་ངམ་དང་བདེ་བར་བྱའམ། སེང་གེ་ལྟར་བྱས་པ་ལས་བྱུང་བའོ། །དེ་ལྟར་བྱས་པས་སེམས་ཀྱི་གནད་དུ་དྲན་རྟོག་རང་ཡལ་བས་བདག་གཞན་གྱི་འབྲེལ་པ་ཆོད་པ་ནི། རང་ལས་བྱུང་བས་སོ། །དེའི་ཕྱིར་ན་ཐ་མ་གང་དུ་ཡང་འགྲོ་བའི་ས་མེད་པས་ལྡོག་པའི་ཉེན་མེད་པའོ། །དང་པོའོ། །ད་ནི་གཉིས་པ་དྲན་རྟོག་གློ་བུར་དུ་ངོས་བཟུང་བ་དཔེ་དང་བཅས་ཏེ་བསྟན་པ་ན ི། དཔེར་ན་ནམ་མཁའ་ལ་སྤྲིན་དེ་བྱུང་ཡང་གློ་བུར་དུ་བྱུང་ལ་ཡལ་ཡང་གློ་བུར་དུ་ཡལ་བ་བཞིན་དུ། དྲན་རྟོག་སྣ་ཚོགས་པ་གློ་བུར་རྐྱེན་གྱི་སུ་ལ་ཡང་གནོད་པ་མེད་དོ། །ནམ་མཁའ་ལ་སྤྲིན་གྱིས་གོས་པ་མེད་པ་དང་འདྲ། སེམས་རྟོག་པ་སྣ་ཚོགས་སུ་འགྱུ་བ་འདི་ཡང་དཔེར་ན་སྣོད་ལ་དྲི་མའམ་རྡུལ་ཆགས་པ་དང་འདྲ་སྟེ། སྣོད་ལ་དྲི་མ་དེས་གནོད་པ་དང་ཕན་པ་མེད་པ་ལྟར། ཆོས་ཉིད་ལ་ཕན་གནོད་དུ་མ་གྲུབ་པའོ། །དེ་ཡང་གློ་བུར་བར་ཤེས་པ་ལས་བྱུང་བའོ། །དེ་བཞིན་དུ་དྲན་པ་དང་རིག་པ་རྣམས་ནི་གློ་བུར་དུ་ལུས་ལ་ཆགས་པས་ཕན་གནོད་མེད་དོ། །སྣོད་ལ་དྲི་མས་གནོད་པར་ནུས་པ་མེད་པ་ལྟར་ཆོས་ཉིད་ལ་གནོད་པ་མེད་པ་དྲན་རིག་སེམས་ཀྱང་དེ་བཞིན་ནོ། །ཞེས་ནང་དོན་གཉིས་པའོ། །ད་ནི་ནང་དོན་གསུམ་པ་ཡལ་བའི་མཚན་ཉིད་ལུས་སེམས་ཀྱི་འབྲེལ་བ་བཅད་པར་བསྟན་པ་ནི། རྣམ་རྟོག་རང་ཡལ་བ་ནི། དཔེར་ན་འཇའ་ཚོན་བར་སྣང་ལ་བཀྲ་ལམ་མེ་ཡོད་པ་དེ་གར་སོང་ཆ་མེད་པར་ནམ་མཁའ་རང་ཡལ་གྱིས་སོང་བ་ལྟར། དྲན་རྟོག་སྣང་བ་གློ་བུར་བ་ཡིན་པས་གར་སོང་ཆ་མེད་པར་ཡལ་ལ། དེ་ཉིད་གློ་བུར་བར་ཤེས་པ་ཙམ་གྱིས་རྒྱ་མཚོ་ཆེན་པོ་ལས་རླངས་པ་བུན་གྱི་བྱུང་ནས། ཐ་མ་ཡལ་གྱིས་སོང་ནས་དངོས་པོ་མེད་པ་ལྟར་དྲན་པ་སྣ་ཚོགས་སུ་ཤར་བ་ཟིང་གིས་བྱུང་ཡང་། དེ་ཉིད་བུན་གྱིས་རང་ཡལ་བས་དང་པོ་གང་ནས་བྱུང་གི་རྒྱུ་མེད། ཐ་མ་གང་དུ་འགྲོ་བའི་ལམ་མེད། བར་དུ་གང་དུ་གནས་པའི་རྟེན་མེད་པས་སོ། །དེའི་ཕྱིར་ན་རེས་ཡོད་པ་ལྟར་སྣང་ལ་རེས་མེད་པ་ལྟར་སྣང་བའི་སེམས་ཀྱང་དེ་དང་མཚུངས་ཏེ། དང་པོ་བྱུང་ས་མེད་པས་གཞི་དང་། རྩ་བ་མེད་པ་དང་། ད་ལྟ་གནས་ས་མེད་པས་རྒྱུ་དང་མཚན་ཉིད་གང་དུ་ཡང་མ་གྲུབ་པ་དང་། ཐ་མ་འགྲོ་ས་མེད་པས་སྐྱེ་མེད་ངོས་བཟུང་དུ་མེད་པའི་སེམས་ཞེས་བྱའོ། །དེ་ཡང་ཕྱི་རོལ་རིག་པ་ཅན་ལྟར་དུས་ཀྱི་ཡལ་བ་ཡིན་ཏེ། སེམས་ཀྱི་རྩ་བ་མེད་པར་ཤེས་པ་ཙམ་ལས་རྫུ་འཕྲུལ་ལམ། རྨི་ལམ་ལྟ་བུ་མ་ཡིན་པར་ངེས་པར་ཡལ་བས། རྟོག་པས་ཕན་གནོད་དུ་གྲུབ་པ་གང་ཡང་མེད་དོ། །དེའི་ཕྱིར་ལུས་འབྱུང་བའི་བྱེད་ལས་རྐྱེན་ལས་སེམས་མ་བྱུང་བས་སེམས་ལ་ལྟར་མེད་ཅིང་བལྟས་པས་ཀྱང་མཐོང་བ་མེད་ལ། སེམས་སྟོང་པ་ངོས་བཟུང་དང་བྲལ་བ་ལས་ལུས་མ་བྱུང་བས། འབྲེལ་བ་མེད་དེ་ལུས་བཞག་ནས་འགྲོ་བའི་ཕྱིར་རོ། །དེ་ལྟར་མེད་པའི་དོན་སྣང་བས་སྒྱུ་མའི་སེམས་ཏེ། མེད་པའི་འཇུག་པ་ཅན་ལས་སྒྱུ་མ་ལྟ་བུའི་ལུས་ཀྱང་མི་རྟག་པས། སྒྱུ་མ་ལྟ་བུའོ། །དེས་ན་སྒྱུ་མས་སྒྱུ་མ་བསླུས་པ་ལྟར། སེམས་མེད་པས་ཡུལ་མེད་པ་བཟུང་པའོ། །ཞེས་ནང་དོན་གསུམ་པ་ཡལ་བའི་མཚན་ཉིད་ལུས་སེམས་ཀྱི་འབྲེལ་པ་བསྟན་ནས། ད་ནི་བཞི་པ་སྟོང་བའི་ཆོས་རང་ཤེས་པ་དཔེ་དང་བཅས་པ་བསྟན་པ་ནི། དཔེར་ན་ནམ་མ་རིག་པ་མཁའ་ཡེ་ཤེས་ལས་ནི་སྤྲིན་ཉོན་མོངས་པ་གློ་བུར་བ་བཞིན་དུ། སྣང་ཡང་དེ་ཉིད་ལ་གོས་པ་མེད་པ་སྟེ། རྣམ་རྟོག་ཅི་བྱུང་ཡང་འདི་ནི་རྣལ་འབྱོར་དག་པའི་ལམ་ཡིན་ཏེ། དཔེར་ན་ནམ་མཁའ་ལ་རྟོག་པ་སྐྱེ་བའི་གནས་མེད་ཅིང་མི་གནས། དེ་བཞིན་དུ་ཆོས་ཉིད་སྟོང་པ་ཉིད་ལ་དྲན་བསམ་བློའི་རྟོག་པ་སྐྱེ་བའི་གནས་མེད་དོ། །གལ་ཏེ་དྲན་བསམ་གྱི་རྟོག་པ་དེ་ཉིད་ནམ་མཁའ་འདྲ་སྟེ། སྐྱེ་བྱ་སྐྱེད་བྱེད་གང་དུ་ཡང་མ་གྲུབ་བོ། །དཔེར་ན་ཡོད་པ་ལྟར་སྣང་བ་དང་མེད་པ་ལྟར་སྣང་བའི་ནམ་མཁའ་ལ་སྤྲིན་དང་། ཆར་དང་། ཁུ་རླུངས་དང་། གཟའ་དང་། སྐར་མ་ལ་སོགས་པ་ཆོ་འཕྲུལ་ཆེན་པོའི་དཀའ་བ་མིན་པ་ལྟར། སེམས་ལས་ཀྱང་དྲན་པ་དང་། རྟོག་པ་དང་། འགྱུ་བ་སྣ་ཚོགས་པར་ཤར་བ་ནི། བཟང་བ་དང་ངན་པར་སུ་ལ་ཡང་དམིགས་ཏེ། ཕན་གནོད་གང་དུ་ཡང་མ་གྲུབ་བོ། །དེའི་ཕྱིར་ན་མ་རིག་པ་ལས་རྟོགས་པའི་ཡེ་ཤེས་ལོག་ན་མེད་པས། མེད་པར་མགོ་མཉམ་ལ། སེམས་ཅན་ལས་མ་གཏོགས་སངས་རྒྱས་ཞེས་བྱ་བར་མེད་དོ། །དེ་བཞིན་དུ་འཁོར་བ་དང་མྱ་ངན་ལས་འདས་པའི་འབྲེལ་གྱིས་དེ་ལྟར་སྣང་ངོ་། །ཞེས་ནང་དོན་བཞི་པའོ། །ད་ནི་ལྔ་པ་སྤང་བླང་མེད་པའི་དོན་ངོ་སྤྲོད་པ་དང་བཅས་པ་བསྟན་པ་ནི། ཡལ་བའི་གནད་ནི་དང་པོ་མེད་པ་ལས་བྱུང་ལ། ཐ་མ་མེད་པར་མ་ཤེས་ནམ་མཁས་པ་སྟེ། རྟོག་ཚོགས་གང་གིས་ཀྱང་སྤངས་པས་མི་སྤོང་བས། མེད་པའི་དོན་ཤེས་པས། སྤང་རྒྱུ་གང་ཡང་མེད་ལ་བླང་རྒྱུ་གང་ཡང་མེད་པའི་རྫོགས་པ་ཆེན་པོའི་དོན་ཞེས་བྱའོ། །གལ་ཏེ་གང་ཟག་ཆོས་ཉིད་བབས་ལས་ཤེས་པ་ཡོད་པ་ལ། སྣང་བ་སྔ་ཕྱིའི་བར་དང་། ཤེས་པ་སྔ་ཕྱིའི་བར་དུ་བཅས་པའི་ཞེས་པའི་ཆོས་ཉིད་སྔ་ཕྱི་དང་། རྟོག་པ་སྔ་ཕྱི་ལ་སོགས་པའི་བར་དུ་རང་སེམས་ལ་ངོ་སྤྲད་ན། དེར་ངོས་ཟིན་ནས་དྲན་རྟོག་རང་ཡལ་བས་བབས་ལས་ཡལ་བའི་མི་དེའང་ནི་དེ་བཞིན་དུ་སངས་རྒྱའོ། །ཞེས་ན་དོན་ལྔའོ།། །།ད་ནི་དྲུག་པ་ཁམས་གསུམ་དུ་མི་ལྡོག་པ་དཔེ་དང་བཅས་པར་བསྟན་པ་ནི། ལུས་དང་སེམས་འབྲེལ་བའི་ཆོས་ལ་མི་ལྟོས་པས། རྟོག་པ་སྔ་ཕྱི་མ་འདྲེས་པ་དཔེར་ན་ནམ་མཁའི་སྤྲིན་དང་མཚུངས་པ་ནི། ནམ་མཁའ་དང་སྤྲིན་སྔ་མ་དང་ཕྱི་ནས་འབྲེལ་པ་ཡོད་མི་སྲིད་པ་ལྟར། སྤྲིན་རང་ཡལ་ནས་ཕྱིས་ལྡོག་པ་མིན་ལ། དེ་བཞིན་དུ་ཡལ་བའི་གནད་ཡོད་མེད་གང་དུ་ཡང་མ་གྲུབ་ལ་མཁས་པ་ཡིས། ད་ཁམས་གསུམ་དུ་ལྡོག་པའི་རྒྱུ་མེད་པས་རྐྱེན་རང་སར་ཡལ། ལུས་སེམས་ཀྱི་འབྲེལ་མེད་པས་ལོག་པ་ཟད་པས་འཁོར་འདས་འབྲེལ་མེད་པར་རྟོགས་པའོ། །གལ་ཏེ་ལྡོག་པ་ཡོད་ན་དངོས་པོ་འདི་ལྟར་སྣང་བས་གསལ་ཏེ། སྔ་མའི་ད་ལྟ་འདི་མིན་པར་ཡིད་ཆེས་སོ། །དེ་ཡང་གང་ལས་བྱུང་ཞེ་ན། སེམས་ཉིད་ཐོག་མ་སྐྱེ་མ་མྱོང་བའི་གནད་ཀྱིས། ད་ལྟའི་དྲན་བསམ་གློ་བུར་བ་ཡིན་པས་དེང་པ་ཙམ་གྱིས་རང་སར་ཡལ་བའོ། །ཕྱིས་ན་སྔར་ཡལ་བའི་གནད་ཀྱིས་ཡང་གློ་བུར་བ་མ་ཡིན་པ་མེད་པས། གང་ཡལ་བ་ལ་རྗེས་མེད་པས་ན་ཕན་གནོད་གང་དུ་ཡང་མ་གྲུབ་པའོ། །དེ་ལྟར་ཤེས་པས་ཁམས་གསུམ་དུས་གཅིག་ལས་འདའ་འོ། །ཞེས་ནག་དོན་དྲུག་པའོ།། །།ད་ནི་ནང་དོན་བདུན་པ་གཞི་རྩ་མེད་པའི་སེམས་ཉིད་བྱས་པ་ལས་འདས་པར་བསྟན་པ་ནི། དེ་ཡང་སེམས་ལ་གཞི་མེད་པས་ལྡོག་བྱ་བློའི་རྟེན་ཉམས་ལ། རྩ་བ་མེད་པའི་སེམས་ལ་སྐྱེ་བའི་གནས་མེད་པ་འདི་ནི། དེ་ཡང་དྲན་པ་དང་བསམ་པ་གཞི་ལ་ཡལ་བས་ད་བསྐྱར་ནས་གཞི་ལ་ལྡོག་པ་མེད་དོ། །སེམས་ཉིད་ཐིག་ལེ་ཉག་གཅིག་ཡིན་པས་རྩ་བ་ཆད་པས་འཕེལ་མེད་པའོ། །གཏན་ཚིགས་དེས་ན་གཞི་དང་ལམ་དུ་འདོད་པའི་ཐེག་པ་འཁྲུལ་ལོ་ས་ལམ་ལ་སོགས་པའི་ཚིག་རྐང་བཅུ་བཞི་གཞུང་གིས་ཤེས་སོ། །དེ་དག་གིས་ནི་བསྡུས་པའི་དོན་གཉིས་པ་ལ་ཡན་ལག་དོན་བདུན་དུ་བྱས་ནས་བསྟན་ཏོ། །ད་ནི་བསྡུས་པའི་དོན་གསུམ་པ་ལ་ཡན་ལག་གི་དོན་བཞིས་བསྟན་པའི་དང་པོ། ཆོས་ཉིད་ཀྱི་དོན་ཏེ་བསླབ་བྱ་དཔེ་དང་བཅས་པ་ལ་བརྟེན་ནས་ཡིད་ཆེས་པར་བསྟན་པ་ནི། དེ་ཡང་དཔེར་ན་སྲིན་མོ་གཡོ་བར་བྱེད་པ་ཞེས་པའི། བུ་རབ་ཏུ་བརྟན་པ་བྱ་་ཡིད་དུ་འོང་བ་ཞིག་ཕ་སྲིན་པོ་གསོད་དགའ་ཞེས་བྱ་བས་བསད་པས། མས་པའི་བུ་གར་སོང་བྱས་པས། ཕ་ན་རེ་སྟོར་ཟེར་ནས་མོས་གླིང་བཞི་རི་རབ་དང་བཅས་པ་ལན་གསུམ་དུ་བསྐོར་ནས་བཙལ་བས་མ་རྙེད་པས། ཁོ་ཐག་ཆོད་ནས་ཞེན་པ་དང་བྲལ་བའོ། །དེ་ལྟར་དྲན་པས་རིག་པ་བསད་པས་དྲན་རིག་གི་ཁུངས་བཅད་པས་མཆོད་པས། རྟོག་པའང་ཡལ་བའི་ཚད་མེད་སྣང་དངོས་དག་པ་ལ་མཁས་པར་འགྱུར་རོ། །གཉིས་པ་ཁྱུང་ཆེན་གཤོག་པ་རྫོགས་པ་ལྟ་བུའི་བསླབ་བྱ་ནི། ཁྱུང་སྒོ་ང་ནས་ཐོན་པ་དང་གཤོག་པ་རྫོགས་ཏེ། ནམ་མཁའ་ལ་ཐོགས་པ་མེད་པར་འགྲོ་བ་དང་འདྲ་བར། དྲན་ཤེས་པའི་རྟོག་པ་ཐ་དད་པ་གཞི་དངོས་པོའི་འདུག་ཚུལ་མ་བཅོས་པ་ལ། རང་ཐིམ་པའི་ཚུལ་གྱིས་སྦས་པ་ནི། རླུང་དང་བཅས་ཏེ་མགྲིན་པའི་འོག་ཏུ་སྦས་པས་འཁོར་བའི་རྟོག་པ་ཐོགས་པ་མེད་པར་གཅོད་པའོ། །དེ་ལྟར་བྱས་པ་འདི་ནི་རང་གི་ཚད་ཡེ་ཤེས་སུ་འགྱུར་བ་ཤེས་པར་འགྱུར་རོ། །གསུམ་པ་སེང་གེ་ཡན་ལག་རྫོགས་པ་ལྟ་བུའི་བསླབ་བྱ་ནི། དཔེར་ན་སེང་ཕྲུག་མའི་མངལ་ནས་ཐོན་ནས་ཞག་དྲུག་ལ་ཡན་ལག་རྣམས་རྫོགས་ཏེ་གང་ལ་ཡ་ཐོགས་པ་མེད་པ་ལྟ་བུས། སེམས་སྔ་ཕྱི་ཟད་པས་རྟོག་པ་ཡལ་བའི་མཚམས་བཙལ་ནས། སྣང་བ་ལ་ཐོགས་པ་མེད་པར་སྤྱད་པས་སྣང་བ་དང་། ཤེས་པའི་གནད་ཟད་པ་དང་། ཡལ་ས་ལ་མཁས་པར་འགྱུར་རོ། །བཞི་པ་དཔག་བསམ་ཤིང་གི་རྩེ་མོ་ལ་ནོར་བུ་བཏགས་པ་ལྟ་བུའི་བསླབ་བྱ་ནི། དཔེར་ན་མི་དབུལ་པོ་ཞིག་གིས་ཉི་མ་དང་ཟླ་བ་གཟས་ཟིན་པའི་དུས་སུ་ཡིད་བཞིན་གྱི་ནོར་བུ་དཔག་བསམ་ཤིང་གི་རྩེ་མོ་ལ་བཏགས་ནས་མཆོད་པ་བྱས་ན་དགོས་འདོད་ཇི་ལྟར་བསམ་པ་འོང་བ་ལྟར། ཐབས་ཀྱི་རང་གནད་ཟིན་པ་ཡིས་ཅི་བྱས་ཐམས་ཅད་ཆོས་སུ་འགྲོ་བའོ། །དེ་ལྟར་ཐབས་ཀྱི་སེམས་ཀྱི་ཁྱད་ཡོད་མེད་མཐའི་བྱེ་བྲག་ཕྱེད་པ་ལ་མཁས་པར་འགྱུར་རོ། །ལྔ་པ་ཐི་བྱ་ཚང་དུ་འཇུག་པ་ལྟ་བུའི་བསླབ་བྱ་ནི། ཐོག་མར་རྒྱ་བཅད་ནས་དེ་ནས་གང་ལ་ཡང་མི་འཛེམ་པར་འོང་བ་ལྟར། བརྡའ་བརྗོད་པའི་ཚིག་ཙམ་ལ་བརྟེན་ནས་ནི། ཆོས་ཉིད་བརྗོད་དུ་མེད་པ་ལ་མཁས་པར་འགྱུར་རོ། །དྲུག་པ་སྟག་མོ་ཚང་ན་ཉལ་བ་ལྟ་བུའི་བསླབ་བྱ་ནི། སྟག་གྲུས་མ་ཚང་ན་ཉལ་བའི་དྲུང་ན་གང་གིས་ཀྱང་རྒྱུ་བར་དཀའ་འོ། །གནད་ཤེས་པས་རང་ངོ་མཚང་ལ་ཕབས་ནས་དོན་རང་ཐོག་ཏུ་བཞག་པས་ཉོན་མོས་པའི་དབང་དུ་མི་འགྲོ། དེ་ཡང་ལུས་སེམས་འབྲེལ་མེད་པར་ཤེས་པས། སེམས་ཉིད་ཡལ་བའི་རྗེས་ཆོད་པར་འགྱུར་རོ། །ཞེས་ནང་དོན་དང་པོའོ། །ད་ནི་ནང་དོན་གཉིས་པ་མ་བསླབས་པའི་སྐྱོན་ངོ་ཤེས་པས་མཐོ་བ་ཙམ་གྱིས་གྲོལ་བར་བསྟན་པ་ནི། མ་བསླབས་པའི་སྐྱོན་ནི། དེ་ཡང་དང་པོ་ལུས་ངག་བཅོས་པའི་བསླབ་བྱ་མ་བསླབས་ན། ཁམས་གསུམ་གྱི་གཞི་མི་སྟོངས་ཏེ། དེ་ལ་བསླབས་པས་ཁམས་གསུམ་ལས་གྲོལ་བའི་དགོས་པ་ཡོད། དཔེར་ན་བརྩོན་ལྕགས་ལས་གྲོལ་བ་ལྟར་གྲོལ། གཉིས་པ་ལམ་བསླབས་ན། རྣམ་རྟོག་ཆོས་ཉིད་དུ་མི་འགྱུར་བས། བསླབ་པས་ཉོན་མོངས་པ་ལས་གྲོལ་བའི་དགོས་པ་ཡོད། འདི་རྒྱལ་པོའི་གཉའ་ལས་གྲོལ་བ་ལྟར་གྲོལ། གསུམ་པ་གནད་བཏུབ་པ་གནས་ལུགས་ཚད་ལ་འབེབས་པའི་བསླབ་བྱ་མ་བསླབས་ན། སེམས་ཀྱི་གཞི་རྩ་མི་སྟོངས་པས། དེའི་ཕྱིར་ན་སེམས་ཀྱི་འཇུག་པ་རྒྱུ་རྐྱེན་ལས་གྲོལ་བའི་དགོས་པ་ཡོད། དཔེར་ན་ལི་གར་ཏའི་རྒྱལ་པོ་བྲམ་ཟེའི་དམོད་པ་ལས་གྲོལ་བ་ལྟར་གྲོལ་ལོ། །བཞི་པ་མ་བསླབས་ན་ཐེག་པ་ཐུན་མོང་བ་དང་ཁྱད་པར་མི་རྙེད་པས། སེམས་ཉིད་ཚིག་དང་ཐ་སྙད་ལས་གྲོལ་བའི་དགོས་པ་ཡོད། དཔེར་ན་མཁའ་ལྡིང་གི་བུ་གསེར་འགྱུར་གྱི་ལས་ལས་གྲོལ་བ་ལྟར་གྲོལ། ལྔ་པ་མ་བསླབས་ན་སྣང་རྟགས་ཀྱི་ཆོས་ཡིད་སྣང་དུ་འཆོར་བས། དྲན་བསམ་འགྱུ་བ་ཐ་སྙད་པ་ལས་གྲོལ་བའི་དགོས་པ་ཡོད། དཔེར་ན་ཀླུའི་བུ་མཁའ་ལྡིང་གི་འཇིགས་པ་ལས་གྲོལ་བ་ལྟར་གྲོལ། དྲུག་པ་ལུས་སེམས་འབྲེལ་པ་བཅད་པའི་བསླབ་བྱ་མ་བསླབས་ན་སྐྱོན་ནི་རྟོག་པ་ཐ་དད་པའི་དབང་དུ་འགྱུར་བས། དེའི་དགོས་པ་ནི་ལྟ་སྒོམ་ཡོད་ལ་བྱེད་པ་ལས་གྲོལ་བའི་དགོས་པ་ཡོད་དོ། །དེའི་དཔེས་ཀྱང་ནི་ནམ་མཁའ་དང་འཕྲད་བས་རིས་མེད་མེད་སྣང་དུ་རོལ་བས་རང་ཐོག་ཏུ་ཕེབས་པ་སྟེ། དེ་ཡང་དཔེར་ན་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ངོ་ཤེས་པ་བཞིན་ནོ། །དེ་ལྟར་ཆོས་དྲུག་གསུམ་པོ་ངོ་ཤེས་པས་ཐེ་ཚོམ་དང་ཡིད་གཉིས་མེད་བར་སངས་རྒྱས་པ་ཁོ་ནའོ། །གལ་ཏེ་གནད་དེ་མཐོང་བ་ཙམ་གྱིས་གྲོལ་བར་འདོད་ན་ཡང་། འདི་ལྟར་སྣང་བ་མངོན་སུམ་གྱི་གནད་དུ་བསྟན་པ་ཡིས། དབང་པོ་ལྔའོ་ཡུལ་དུ་མཐོང་ཚད་དག་པའི་སྣང་བར་གྲོལ་ལོ། །ཞེས་ནང་དོན་གཉིས་པའོ། །ད་ནི་ནང་དོན་གསུམ་པ་དབང་པོ་ཡུལ་གྱི་གནད་ལ་གཏན་ཚིགས་ཀྱི་གཟེར་བཏབ་པས་རང་དབང་མེད་པར་གྲོལ་བར་བསྟན་པ་ནི། དེས་ན་དབང་པོ་ནི་ལྔ། ཡུལ་ནི་གཟུགས་ལ་སོགས་པ་ལྔ། གནད་ནི་དེ་ཉིད་ཤེས་བཞིན་གྱིས་ཟིན་པ་བསྟན་པའི་ཚིག་ནི་བླ་མའི་གསུང་གཟེར་བཏབ་པས་ནི། བསྟན་པ་ཙམ་གྱིས་མཐོང་ལ་མཐོང་བ་ཙམ་གྱིས་རྟོགས། རྟོགས་པ་ཙམ་གྱིས་འབྲས་བུ་ཐོབ་པ་གསུམ་དུས་མཉམ་པས་ན། གནད་ལ་ཕེབས་པ་ཞེས་བྱའོ། །དེ་ཡང་ཤེས་པའི་དུས་ནི་མཐོང་བ་བཙམ་ལས་ངེས་པ་ཅིག་ཅར་དུ་སྐྱེ་བའོ། །དེ་ལྟར་སྐྱེས་པས་རང་གི་གཞི་དང་ཕྲད་པར་ངེས་སོ། །དེ་ལྟར་ཆོས་ནི་ཡོད་པ་ཙམ་ལས་ནི། རང་ངོ་ཤེས་པ་ལ་བརྟེན་ནས་ཡིད་ཆེས། དེ་ལ་བརྟེན་ནས་ཐག་ཆོད་པ་དང་། གསུམ་ལ་བརྟེན་ནས་བློ་བདེ་བའོ། །དེའི་གནད་བླ་མའི་ཞལ་ལས་ཕྱུང་པའོ། །ཞེས་ནང་དོན་གསུམ་པའོ། །ད་ནི་ནང་དོན་བཞི་པ་འབྲས་བུ་ངེས་པས་གྲོལ་བའི་མཚན་ཉིད་བསྟན་པ་ནི། སེམས་ཀྱིས་བསླད་པ་མེད་པའི་ལུས་ཀྱི་མཐའ། གནད་མཐོང་བས་ད་ནི་ཟད་པས་ལྡོག་པ་མེད་པའོ། །སེམས་ལ་རྒྱུ་མེད་པས་གློ་བུར་གྱི་རྐྱེན་ཅིས་ཏེ་ཡོད་པས་ན། དེའི་ཕྱིར་ན་སེམས་ལ་རྒྱུ་མེད་པའི་སྐད་ཅིག་ལས་གྲོལ་བ་ནི་དབང་པོའི་ཁྱད་དོ། །རང་གི་སེམས་ཉིད་ཡལ་བས་ཟད་པ་ནི་ཅིའི་ངོ་བོར་ཡང་མ་གྲུབ་པའོ། །དེ་ལྟར་ན་ཆོས་ཉིད་ཟད་པ་འདི་ལ་རྣལ་འབྱོར་པ་གང་སྤྱོད་པ། ཁམས་གསུམ་དུ་ལྡོག་པ་མ་ཡིན་ནོ། །སེམས་ཀྱི་ལ་སོགས་པ་མཚན་སྐབས་སུ་བསྟན་ལ། དེ་ལ་དགོས་པ་ཅི་ཡོད་ན། སེམས་ཀྱི་དམིགས་དྲུག་ལ་བརྟེན་ན། འགྲོ་བ་རིགས་ལྷ་ལ་སོགས་པ་དྲུག་གི་སྐྱེ་བའི་གནས་སུ་མི་སྐྱེ་བས་སྟོངས་པར་བྱེད་པའི་གནད་ནི་བསླབ་བྱ་དྲུག་ལ་བརྟེན་པས་སོ། །སློབ་དཔོན་ཡོན་ཏན་རྫོགས་པ་ཆེན་པོ་དེ་ལས་ལྷག་པ་མེད། སངས་རྒྱས་གཉིས་པ་ནི། ལུས་མིའི་ལུས་སུ་ཡོད་ཀྱང་དགོངས་པ་སངས་རྒྱས་དང་མཉམ་པའོ། །སངས་རྒྱས་ཀྱི་སྤྲུལ་པ་དགའ་རབ་རྡོ་རྗེ་ནི་མཚན་ནོ། །མཛད་པ་ནི་གང་ཟག་བློ་ཅིག་ཅར་བ་རྣམས་མ་བསྒོམས་པར་སངས་རྒྱ་བའི་དོན་དུ་མཛད་པའོ། །རྫོགས་སོ་ཞེས་དམིགས་དྲུག་ཏུ་གཏན་ལ་ཕབ་པ་རྫོགས་པ་ལ། ཡལ་བའི་དུས་ངོས་ཟིན་པའི་གནད་དང་བཅས་པའོ། །རྫོགས་པས་སོ། །སེམས་ཀྱི་དམིགས་དྲུག་གི་རྣམ་པར་བཤད་པ་ཞེས་བྱ་བ། རྒྱ་གར་གྱི་མཁས་པ་བི་མ་ལ་མི་ཏྲས་མཛད་པ་རྫོགས་སོ། །ལེགས་པའི་དཔེ། ཨཐྎ། རྒྱ་རྒྱ་རྒྱ། སྔགས་ཀྱི་སྲུང་མས་སྲུངས་ཤིག །ས་མ་ཡཱ། རྒྱ་རྒྱ་རྒྱ། ལས་ཅན་ཅིག་དང་འཕྲད་པར་ཤོག། །།

སྤྲོས་མེད་དབང་གི་ཏི་ཀ

སྤྲོས་མེད་དབང་གི་ཏི་ཀ་བཞུགས་སོ། །གུ་ཧྱ་ཁ་ཐཾ། ང་བཞི་པ། བཅོམ་ལྡན་འདས་དཔལ་རྡོ་རྗེ་འཆང་ལ་ཕྱག་འཚལ་ལོ༔ དེ་ལ་འདིར་སྤྲོས་པ་མེད་པའི་དབང་གསལ་བར་བྱེད་པའི་ཏི་ཀ་སྟོན་ཏེ༔ དེ་ཡང་བླ་མ་དང་སློབ་མའི་མ་ཚན་ཉིད་ངེས་པར་བསྟན་པ་ནི༔ བླ་མ་ནི་ཤེས་པ་ཁོང་ཁྲོལ་བ༔ འཁོར་བའི་ཆོས་རྒྱབ་ཏུ་དོར་བ༔ འདོད་པ་ཆུང་ཞིང་ཆོག་ཤེས་པ༔ ལག་ལེན་མཁས་ཤིང་ཉམས་མྱོང་ཡོད་པ༔ རྒྱུད་དོན་ལ་མཁས་ཤིང་སྒྲུབ་པ་ལ་བརྩོན་པ༔ ལྟ་སྒོམ་གྱི་དོན་ལ་མཁས་ཤིང་ནུས་པ་རྫོགས་པ༔ སྙིང་རྗེ་ཆེ་ཞིང་གཏོང་བ་ལ་དགའ་བས༔ སློབ་མ་ལ་སྤྲོས་མེད་ཀྱི་དབང་བསྐུར་བ་ནི༔ སློབ་མ་དད་པ་དང་ལྡན་པ༔ སངས་རྒྱས་ཐོབ་པར་འདོད་པ༔ བློ་ཉུང་ཞིང་བརྟན་པ༔ དབང་པོ་དུལ་ཤེས་རབ་དག་པ༔ དབང་པོ་གསལ་བ༔ ཚིག་དོན་ཕྱེད་པ༔ དམ་ཚིག་ཕོག་པ་ལས་མི་འདའ་བ༔ སྡོམ་པ་གསུམ་ལ་གནས་པ༔ སྙིང་རྗེ་ཆེ་བ་བླ་མ་ལ་གུས་པ༔ གཙང་སྤྲ་ཆུང་བ་བརྟུལ་ཞུགས་ཆེ་བ༔ འབྱོར་པ་ཐམས་ཅད་གཏོང་བར་ནུས་པ་ནི༔ སྔ་མ་ལ་སྔགས་ལ་སྦྱངས་བའི་རྟགས་ཡིན་པས༔ དེ་ལ་བླ་མས་གཟེངས་བསྟོད་པ་དང་གནང་བ་སྦྱིན་པར་བྱའོ༔ དེ་ནས་སློབ་མས་བླ་མ་ལ་གུས་པ་དང་ལྡན་པའི་སེམས་ཀྱིས་བརྟེན༔ འཁོར་བའི་ཆོས་ཀྱི་རྣམ་གྲངས་ཐམས་ཅད་སྤངས་ལ༔ དམ་པའི་གོ་འཕང་ལ་དམིགས་པར་བྱའོ༔ དེ་ཡང་དབང་གི་གནས་ནི༔ ཆུའི་ལུས་ཀྱིས་ཆུ་གླིང་ལ་སོགས་པར་སོ་སོའི་ལོ་དང་ཟླ་བ་དང ༔ ཚེས་དང་ལོ་དུས་དང་ངེས་པ་ལ་ཞུགས་ན༔ སྨིན་པ་དབང་གིས་འབྲས་བུ་ངེས་པར་འབྱིན་ནོ༔ མེའི་ལུས་ཀྱིས་ནགས་དང་རྩྭ་དང་རི་དྭགས་སྣ་ཚོགས་ཡོད་པ་ལ་སོགས་པར༔ མེའི་མི་གསུམ་གསུམ་གྱིས་སོ་སོའི་ལོ་དང་ཟླ་བ་དང་ཞག་དུས་ངེས་པར་འགྲུབ་བོ༔ སའི་ལུས་ཐང་ཆེ་བ་སྔ་མ་དང་འདྲའོ༔ རླུང་གི་ལུས་གྲང་ཞིང་རླུང་འཚུབས་སོགས་སྔ་མ་དང་འདྲའོ༔ དེ་ལྟར་ལུས་དང་ཡུལ་ངེས་པ་ལ་སྦྱར་བས་འབྲས་བུ་ངེས་པར་འབྱིན་པའོ༔ དེ་ལ་འདིར་བསྙེན་པ་དང ༔ སྒྲུབ་པ་དང༔ འཇུག་པ་ཁྱད་པར་ཅན་གྱི་སྦྱོར་བ་དང༔ བསྙེན་རྫས་ཀྱི་བསྔགས་པ་དང༔ བསམ་བྱ་སེམས་ཀྱི་གདུལ་བྱའོ། །བསྙེན་པ་ནི་སྐུའི་འགྱུར་བྱེད་ཀྱི་ཡི་གེ་ལ་སྟོང་ཕྲག་བདུན༔ གསུང་ལ་འབུམ་ཕྲག་གཅིག༔ ཐུགས་ལ་ཁྲི་ཕྲག་གཅིག་བསྐྱལ༔ བྱིན་རླབས་ཀྱིས་འཕོ་བའི་རྒྱུད་ངེས་པར་འབྱེད་བའོ༔ དེ་ནས་སྒྲུབ་པ་ལ༔ སྐྱེ་མཆེད་རང་བྱུང་གི་ཡི་གེ་ལ་འབུམ་ཕྲག་བདུན་བྱས་པས༔ ངག་དང་སེམས་ཀྱི་སྐྱེ་བ་རྣམ་པར་དག་པར་བསམ་གཏན་ཐོབ་པའོ༔ དེ་ནས་འཇུག་པ་ཁྱད་པར་གྱི་སྦྱོར་བ་ནི༔ དུས་ཀྱི་འཇུག་པ་ནི༔ ས་བོན་གྱི་དུས་སུ་ཞུགས་པས༔ འདི་དང་ཕ་རོལ་གྱི་དོན་རྫོགས་པར་བྱེད་པའོ༔ འབྲས་བུའི་དུས་སུ་ཞུགས་པས༔ སྙིང་པོའི་དོན་བཅུད་དུ་དྲིལ་བར་བྱེད་དོ༔ དད་པས་ཞུགས་པས༔ སྦྱོར་བ་ཁྱད་པར་ཅན་ངེས་པར་འགྲུབ་བོ༔ མཁའ་འགྲོ་མ་བཞིས་འཁོར་ལོ་བསྐོར་བའི་དུས་སུ་ཞུགས་པས་དངོས་གྲུབ་ཉེ་ཞིང་མཐུ་རྩལ་འབྱུང་བ་ཡིན༔ རྟེན་འབྲེལ་རྫས་ཀྱི་བསྔགས་པ་ནི༔ ཕྱི་ནང་གི་མཆོད་པའི་བྱེ་བྲག་ནི་ཚོགས་བསགས་པ་ལ་དམ་ཅན་གྱིས་གྲོགས་བྱེད༔ ཚོགས་དང་གཏོར་མའི་ཡོ་བྱད་དཔག་ཏུ་མེད་པས་འཁོར་དུ་ལོངས་སྤྱོད་འཕེལ་བར་བྱེད་དོ༔ དམ་རྫས་དུ་མ་བསགས་པས་དམ་ཅན་འདུ༔ འཇིག་རྟེན་གྱི་དབང་ཕྱུག་ཕུན་སུམ་ཚོགས་པ་ཐོབ་བོ༔ མཎྜལ་དང༔ བུམ་པ་དང༔ མེ་ལོང་དང༔ རྨ་བྱ་ལ་སོགས་པ་དབང་བསྐུར་བའི་རྫས་བསགས་པས་བྱིན་རླབས་འབྱུང་ཞིང་རང་གི་རྒྱུད་སྨིན་པར་བྱེད་དོ༔ བསམ་བྱ་སེམས་ཀྱི་འདུལ་བ་ནི༔ དཔོན་སློབ་གཉིས་བསམ་པ་མཐུན་པས་ཅི་ནས་འཁོར་བ་ལས་ཐར་བར་བྱ་བའི་བློས་མོས་པར་བྱ་བ་དང་། སེམས་ཅན་ཐམས་ཅད་འཁོར་བ་ལས་བསྒྲལ་བར་བྱ་བའི་བསམ་པ་ཐག་པས་བྱའོ༔ དེ་དག་ནི་སྔོན་དུ་འགྲོ་བའོ༔ དེ་ལ་སྐུའི་ཡི་གེ་ༀ་གྱི་བསྙེན་པ་བསྐྱལ་བས༔ སངས་རྒྱས་ཀྱི་སྐུ་སྐལ་ལྡན་གྱི་ལུས་ཀྱིས་ཐོབ་ནས༔ སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད༔ གསུང་ཨཱཿལ་བསྙེན་པ་བསྐྱལ་བས༔ སངས་རྒྱས་ཀྱི་གསུང་དྲི་མ་མེད་པ་དང༔ བརྗོད་དུ་མེད་པ་དང༔ སྒྲ་ཚིག་དང་བྲལ་ནས༔ སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད་དོ༔ ཐུགས་ཀྱི་བསྙེན་པ་ཧཱུྃ་ལ་བསྐྱལ་བས༔ སྐལ་ལྡན་གྱི་ཡིད་སངས་རྒྱས་ཐམས་ཅད་ཀྱི་ཐུགས་མི་སྐྱེ་བ་དང་མི་འགག་པ་དང༔ ཅི་ཡང་ས་ལེར་མཁྱེན་པ་དང་གསུམ་ཐོབ་ནས༔ དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད་དོ༔ དེ་ལྟ་བུའི་བསྙེན་པས་བྱིན་རླབས་འོང་བ་ནི་ཚོགས་གཏོར་དང༔ དབང་གི་ཆོ་ག་ཞིབ་མོས་སློབ་མའི་ལུས་ངག་ཡིད་གསུམ་སྦྱང་བར་བྱའོ། །དེ་ནས་བླ་མའི་བྱ་བ་ནི༔ ས་བོན་གྱི་དོན་དུ་སློབ་མ་ལ་ཐིག་ལེ་གདབ་པ་དང༔ བུམ་པའི་བྱེ་བྲག་རྣམ་དབང་བསྐུར་བའི་ཐུན་མོང་གི་ཆོ་ག་ནས་བཤད་པ་དང་བསྟུན་པར་བྱའོ༔ དེ་ནས་བླ་མའི་བྱ་བ་ནི༔ ས་བོན་གྱི་དོན་དུ་སློབ་མ་ལ་ཐིག་ལེ་གདབ་པ་དང༔ བུམ་པའི་བྱེ་བྲག་རྣམ་དབང་བསྐུར་བའི་ཐུན་མོང་གི་ཆོ་ག་ནས་བཤད་པ་དང་བསྟུན་པར་བྱའོ༔ དེ་ལ་ཁྱད་པར་དུ་བོགས་འདོན་པ་སློབ་མ་ལྷག་པར་གནས་པའི་ཆོ་ག་ནི༔ གནས་གསུམ་དུ་དྲིའི་ཐིག་ལེ་གསུམ་གདབ༔ བུམ་པ་རིན་པོ་ཆེ་ལ་སོགས་པའི་ཚད་དང་ལྡན་པ༔ ཕྱི་ནང་ལེགས་པར་བཀྲུས་པ༔ ནང་དུ་རྫས་རྣམ་བླུགས་ལ་ཕྱོགས་བཞིར་རྡོ་རྒྱུས་པས་ཨཱཿདཀར་པོ་བཞི་བྲིས་ལ༔ ཁ་རག་དམར་པོ་ཁ་ཚར་མ་ཉམས་པ་མགུལ་དུ་བཅིངས་ལ༔ ཤིང་དྲི་ཞིམ་པོའི་མེ་ཏོག་དང་འབྲས་བུ་དང་བཅས་པས་ཁ་རྒྱན་དང་བཅས་ལ་ཨཱཿབརྒྱ་རྩ་བརྒྱད་ཀྱི་རྒྱས་བཏབ་ལ་བཞག་གོ༔ དེ་ལ་ཡེ་ཤེས་མཚོན་པའི་མེ་ལོང་ལ་ཐིག་ལེ་གདབ་པ་དང༔ འོད་དང་ཐིག་ལེ་མཚོན་པའི་རྨ་བྱ་ལ་གསེར་གྱི་ཐུར་མས་མཐོངས་གསལ་བ་དང༔ དེ་ནས་མཎྜལ་ཟླུམ་པོ་ཁྱད་པར་དུ་ཡིད་དུ་འོང་བ་ནི༔ བླ་མའི་ལུང་གི་ཕྱེ་ལ་བྱའོ༔ བུམ་པ་བྲི་བ་དང་དགྲམ་པ་ནི༔ ཆོས་ཉིད་སྟོང་པ་ཉིད་མཚོན་ནས་གཞན་དོན་དུ་བུམ་པའི་སྐུ་རུ་སངས་རྒྱ་བར་བྱེད་པའོ༔ འོད་ལྔ་རང་ལུས་སྐུ་གསུམ་མོ༔ ཡེ་ཤེས་ལྔ་རུ་སངས་རྒྱ་བར་བྱེད་པའོ༔ མེ་ལོང་གི་ཆོས་སྤྱི་དང་རང་གི་མཚན་ཉིད་གཟུགས་ཅན་དུ་གསལ་བར་བྱེད་ལ༔ ཨཱཿབརྒྱ་རྩ་བརྒྱད་རླུང་གཅིག་གི་ཁོངས་སུ་བརྗོད་པར་བྱའོ༔ དེ་ནས་ཐེ་ཚོམ་སྤངས་ལ༔ བྱ་བ་ལ་མཁས་པའི་བླ་མས༔ སྔར་ཆོས་ཉིད་མངོན་སུམ་གྱི་གནད་ལ་གོམས་པར་བྱས་ལ༔ འདིའི་དུས་སུ་སློབ་མ་ལ་སེམས་རང་ཐོག་ཏུ་ངོ་སྤྲད་པར་བྱས་པས༔ དཔོན་སློབ་དུས་གཅིག་ཏུ་སངས་རྒྱ་བར་བྱེད་དོ༔ དེ་ཡང་བླ་མས་མི་ཤེས་པ༔ ནང་གི་ལག་ལེན་མ་མཐོང་བར་ཡིད་ལ་བྱུང་བ་ཙམ་གྱིས་བྱ་བ་ནི་མ་ཡིན་ནོ༔ འདིར་གོམས་ཤིང་མཁས་པར་བྱའོ༔ དེ་ནས་དབང་བསྐུར་བའི་མཎྜལ་ཟླུམ་པོ་ཞེས་པ་ནི༔ དབང་གི་གནས་པ་ཡོད་པ་དེས་ཐོབ་ལ༔ བསྐུར་བ་ནི་ཐོབ་པར་འོས་པའོ༔ མཎ་ནི་གཞི་ཡིད་ལ་ཌལ་ནི་སྙིང་པོ་བཅུད་དུ་ལེན་པར་བྱེད་པའོ༔ ཟླུམ་པོ་ནི་ཟུག་རྔུ་མེད་པ་ཆོས་ཉིད་ཐམས་ཅད་ལ་ཁྱབ་པའོ༔ མཉམ་ཞིང་ཟླུམ་པའི་མཎྜལ་ནང་དུ་སློབ་མ་བཅུག་པས་ཁམས་གསུམ་དུ་མི་འཁོར་བའོ༔ དེ་ལ་མེ་ཏོག་ཁ་དོག་མང་པོ་བཀྲམ་པ་ནི༔ སློབ་མའི་ཕུང་པོ་དང་ཁམས་རྒྱས་པར་བྱེད་པའོ༔ འདིའི་དུས་ན་བླ་མ་ལ་འབུལ་བའི་མཎྜལ་རང་གི་མདུན་དུ་བཞག་ལ༔ ཅི་འབྱོར་པའི་ཡོན་དང་བཅས་པས་ཕུལ་ན་རྡོ་རྗེ་འཆང་གི་ཡོན་ཏན་ཐོབ་པའོ༔ འདིའི་དུས་སུ་མཆོད་པའི་ཡོ་བྱད་དཔག་ཏུ་མེད་པ་བཤམས་པས༔ འདི་དང་ཕ་རོལ་གྱི་འདོད་པའི་དོན་རབ་ཏུ་ཉེ་བར་ཐོབ་པའོ༔ ལས་དང་ཡེ་ཤེས་ཀྱི་མཁའ་འགྲོ་མ་རྣམས་མཆོད་པའི་ཕྱིར་གཏོར་མ་དང་ཚོགས་བྱས་པས་འདི་ལ་བདེ་སྐྱིད་དང༔ མ་འོངས་པའི་དུས་སུ་ཐར་པའི་འབྲས་བུ་ཐོབ་པའོ༔ ངན་པ་བཟང་པོར་འགྱུར་ཞིང་ཕྲིན་ལས་བཞི་ཇི་ལྟར་འདོད་པ་འགྲུབ་པའོ༔ ལས་ཀྱི་བྱེ་བྲག་གང་ལ་འཇུག་ཀྱང༔ ཁྱད་པར་གྱི་མཆོད་པ་བདུད་རྩི་ལྔ་དང༔ ཤ་ལྔ་དང༔ རྨད་དུ་བྱུང་བའི་གཏོར་མ་ལ་བརྟེན་ནས་ལས་གང་ཡང་འགྲུབ་པར་འགྱུར་རོ༔ དབང་བསྐུར་བའི་སྦྱོར་བ་ཁྱད་པར་ཅན་ཐོབ༔ འབྲུ་སྣ་ཚོགས་དང་ཤིང་ཐོག་དང༔ སྤྱན་གཟིགས་ཁུར་བ་ལ་སོགས་པ་དང༔ བཏུང་བ་དང༔ དཀར་གསུམ་དང༔ དྲི་ཆུ་དང༔ བཟའ་བཏུང་སྣ་ཚོགས་དང་། ཁྲོ་བོ་ཁྲོ་མོ་མ་མོ་མཁའ་འགྲོ་དང༔ ལྷ་དང་ཀླུ་དཔའ་བོ་དཔའ་མོ་དང་འགྲོ་བ་ཐམས་ཅད་མཆོད་ན༔ འདི་དང་ཕ་རོལ་གྱི་འདོད་པའི་བྱེ་བྲག་སྣ་ཚོགས་པ་ལ་ལོངས་སྤྱོད་པར་ངེས་སོ༔ འདིའི་དུས་ན་རང་གི་བླ་མ་དང ༔ སློབ་མ་ལ་སོགས་པ་ལ་བཟའ་བཏུང་བྱིན་གྱིས་བརླབས་ནས་བྱིན་ན་འདི་དང་ཕ་རོལ་གྱི་སྐྱེ་བ་རྣམས་སུ་མུ་གེའི་འཇིགས་པ་དང་བྲལ་བར་འགྱུར་རོ༔ དེ་ལྟར་འགྲོ་བ་དེ་དམིགས་པ་རྣམ་པར་དག་པར་སྟོན་མོའི་ཚུལ་གྱིས་ལོངས་སྤྱོད་བྱའོ༔ དེ་ཡང་རང་གི་སེམས་སྐྱེ་མེད་དུ་རྟོགས་པར་བྱ་བའི་ཕྱིར་ཀུན་གྱིས་ཡང་ནས་ཡང་དུ་ཨཱཿདཀར་པོའི་འཕྲེང་བར་དཀར་ཀྲིག་གེ་འཁོར་བ་ལ་སེམས་བཞག་ལ་བཟླས་པ་ཨཱཿབརྗོད་དོ༔ དེ་ཡང་སེམས་འདོད་པའི་ཡོན་ཏན་ལ་མ་ཤོར་བར་བྱ་བ་ནི་གནད་ཡིན་ནོ༔ ཕྱིར་ཨཱ༔ལ་བཟླས་པ་གཙོ་ལ་བར་བར་དུ་རང་གི་གསང་མཚན་བརྗོད་དེ༔ སྐྱེ་མེད་དུ་སྦ་བར་གསོལ་ཞེས་ལེགས་པར་སྦྱར་ལ་བཟླའོ། །དེ་རང་གི་མགྲིན་པ་ནས་དབྱངས་དང་བཅས་པས༔ རླུང་ལས་དྲངས་པ་དང་གོང་མའི་མིང་དང་སྦྱར་ཏེ༔ འཕྲོ་གཅོད་པའི་དུས་སུ༔ རང་གི་ལུས་ཀྱི་འཁོར་ལོ་བཞིའི་མདུད་པར་ཡི་གེ་དང་བཅས་པར་གཞུག་པ་ནི་གནད་ཡིན་ནོ༔ དེ་ནས་འོད་གསལ་དུ་བཅུག་སྟེ་དེ་ཉིད་དུ་གནས་པར་བྱའོ༔ དེ་ཉིད་འོད་གསལ་དུ་ཤེས་ན་ཀཱ་ལིའི་སྦྱོར་བ་ཐུགས་ཀྱི་དགོངས་པ་དང་སྦྱར་བ་བསྒྱུར་ཞིང་ངག་ཏུ་བརྗོད་པ་མཉམ་པ་སློབ་མས་བྱའོ༔ དེ་ཡང་ངག་ཏུ་བརྗོད་པ་ལས་ཨཱཿསྐྱེ་མེད་གཟུང་ཞེན་ལས་བཟླས་པས་སྙིང་པོ་ལེན་པར་བྱེད་པའོ༔ རིག་པའི་མེ་ཏོག་བརྗོད་དུ་མེད་པའི་དོན་རིག་པའི་མེ་ཏོག་བླ་མའི་ཐུགས་ཀྱི་དཀྱིལ་ལ་གཏོར་བས་གཉིས་སུ་མེད་པར་འདྲེས་པ་ལས༔ བླ་མའི་བྱིན་རླབས་དངོས་སུ་འབྱུང་བའོ༔ དེའི་རྟགས་སུ་སྙིང་བདེ་སངས་པ་ཞིག་ཁྱད་པར་དུ་བྱུང་བ་ནི་བྱིན་རླབས་བྱུང་བའོ༔ དེ་ནས་ཤར་ཕྱོགས་སུ་སྐུའི་དམ་ཚིག་སྲུང་བར་བྱེད་པའི་གནང་བ་སྦྱིན༔ ལྷོར་གསུང་གི་དམ་ཚིག་སྲུང་བར་བྱེད་པའི་གནང་བ་སྦྱིན༔ ནུབ་ཏུ་ཐུགས་ཀྱི་དམ་ཚིག་སྲུང་བར་བྱེད་པའི་གནང་བ་སྦྱིན༔ བྱང་ཕྱོགས་སུ་སྐུ་གསུང་ཐུགས་དབྱེར་མེད་མི་ཕྱེད་པའི་དམ་ཚིག་གི་གནང་བ་སྦྱིན་ནོ༔ དམ་ཉམས་ན་འཆིང་བར་བྱེད་ལ༔ མ་ཉམ་པར་ལེགས་པར་བསྲུངས་ཤིང་ཐུབ་པས་དམ་པའི་དོན་ངེས་པར་སྟེར་བར་བྱེད་དོ༔ ཡང་དྲིའི་རྣམ་པ་ལྔ་རྣམས་བྱེ་བྲག་འོ་མ་དང་བསྲེས་ཏེ༔ མེ་ལོང་གི་ནང་དུ་ཐིག་ལེ་ལེགས་པར་སྦྱར་བ་དཔྲལ་བ་དང༔ མགྲིན་པ་དང༔ སྙིང་ག་གསུམ་དུ་ཐིག་ལེ་བྱས་པ་ནི༔ ཉི་མ་ཟླ་བར་དམིགས་ལ༔ བདེ་བར་གཤེགས་པའི་སྐུ་གསུང་ཐུགས་ལྷའི་གཟུགས་བརྙན་དུ་བསྐྱེད་ལ་ལུས་ངག་ཡིད་གསུམ་སྦྱང་བར་བྱའོ༔ དེ་ནས་འོད་ཀྱི་གོང་བུ་ཞུ་ནས་སློབ་མའི་སྙིང་ལ་བཅུག་ལ༔ དེ་འོད་དུ་ཞུ་བ་ལས་རང་སེམས་བདེ་བར་བཟུང་བས་ལུས་ངག་ཡིད་གསུམ་ལ་གཡོ་བའི་ཉམས་ཤར་བ་ནི་ཐབས་ཀྱི་ཁྱད་པར་ལས་བྱུང་བའོ༔ དེ་ལས་དང་པོ་མི་རྟག་པ་བསྒོམ་པ་ལ༔ སློབ་མའི་སེམས་སྦྱང་བ་ནི༔ འཁོར་བ་ལས་བློ་ལྡོག་པའོ༔ དེ་ལྟར་འཁོར་བའི་ཉེས་དམིགས་བཤད་པས༔ དམ་པའི་ཆོས་ལ་གཟུད་པའི་དགོས་པ་ཡོད་དོ༔ བླ་མ་ལ་གསོལ་བ་བཏབ་པས་བྱིན་རླབས་འཇུག་པ་དང༔ སངས་རྒྱས་ཀྱི་ཆེ་བའི་ཡོན་ཏན་ཕུན་སུམ་ཚོགས་པ་དང༔ ཞིང་ཁམས་དང་ཡོན་ཏན་ལ་སོགས་པས་དཀོན་ཅོག་ལ་ཡིད་ཆེས་པའི་དགོས་པ་ཡོད༔ དེ་ནས་གནས་ཡིད་དུ་འོང་བར་འབྲས་བུ་མེ་ཏོག་ལ་སོགས་པས་བརྒྱན་པས་ཉམས་སྐྱེ་བའི་གནས༔ མི་མེད་པའི་ལུང་སྟོང་ངམ༔ དུར་ཁྲོད་ལ་སོགས་པར་ཁྲུས་བྱ་བ་ནི༔ ལུས་ངག་གི་དག་བྱེད་དོ༔ གནས་དེར་མཎྜལ་ཟླུམ་པོ་བྱ་བ་ནི་ཆོས་ཀྱི་དབྱིངས་ཀྱི་རང་བཞིན་མཚོན་པའོ༔ ཁྲུ་དོ་བ་ནི་ཐབས་དང་ཤེས་རབ་ཀྱི་ཁྱད་པར་འཇུག་པའོ༔ རབ་ཏུ་མཉམ་པ་ནི་མུ་མཐའ་དང་བྲལ་བའི་རྟགས་སོ༔ དེར་འབྲས་བུ་དང་མེ་ཏོག་སྣ་ཚོགས་དང༔ རྡུལ་ཚོན་ལྔ་ཡིས་ལེགས་པར་བསྐོར་བ་ནི༔ ཡེ་ཤེས་ལྔའི་མདངས་སྟོན་པའོ༔ དྲི་ལྔའི་ཚོམ་བུ་ནི༔ ཉམས་ཁྱད་པར་ཅན་སྟོན་པའི་བྱེ་བྲག་གོ༔ བུམ་པ་དམར་པོ་ཁ་རྒྱན་མགུལ་ཆིངས་དང་བཅས་པ་ནི་དབྱིངས་ཡེ་ཤེས་གཉིས་སུ་མེད་པར་དུས་རྟག་ཏུ་མི་འབྲལ་བར་སྐུ་གསུམ་གྱི་རྒྱན་འཆར་བའོ༔ རིན་པོ་ཆེའི་བུམ་པ་ཚད་དང་ལྡན་པ་ནི་སྟོང་པ་ཉིད་དབྱིངས་དང་གཅིག་པའོ༔ ནང་དི་དྲི་ལྔ་དང་འབྲུ་ལྔ་རིན་ཆེན་ལྔ་དང་སྙིང་པོ་ལྔས་གསུམ་གཉིས་བཀང༔ འདོད་པའི་དོན་ཐམས་ཅད་རབ་ཏུ་སྐོང་བར་བྱེད་པའོ༔ གྲངས་གསུམ་ནི་ལུས་ངག་ཡིད་གསུམ་གྱི་སྒྲིབ་པ་སྦྱོང་བའོ༔ བུམ་པ་ལ་མེ་ལོང་བཏག་པ་ནི༔ ཡེ་ཤེས་རྣམ་པར་དག་པའི་ཐིག་ལེ་ལ་ལོངས་སྤྱོད་པའོ༔ རྨ་བྱས་བརྒྱན་པ་ནི། ཐིག་ལེའི་སྒྲོན་མེ་གདངས་སུ་འཆར་བར་བྱེད་དོ། །མན་ཤེས་བཏག་པ་ནི་མཁས་པའི་ཡོན་ཏན་དྲི་མ་མེད་པའི་ཆོས་ཉིད་དོ༔ དེ་ནས་སློབ་མས་ཁྲུས་བྱས་ལ་གོས་གསར་བ་དྲི་མ་མེད་པ་གྱོན་པ་ནི༔ མཚན་མའི་དྲི་མ་དང་བྲལ་བར་བྱེད་དོ། །བླ་མ་ལ་གསོལ་བ་བཏབ་པས་བྱིན་རླབས་འཇུག་པའི་དགོས་པ་ཡོད་པའོ༔ དེ་ནས་མཎྜལ་ཕུལ་བས༔ འདོད་པའི་དོན་ཕུན་སུམ་ཚོགས་པར་བྱེད་པའོ༔ ཡིད་ཀྱིས་སྟོང་གསུམ་རིན་པོ་ཆེ་དང་འདོད་ཡོན་ལྔར་སྤྲུལ་ནས་འབུལ་བ་ནི་སངས་རྒྱས་ཀྱི་ཡོན་ཏན་ངེས་པར་སྟེར་བའོ༔ སློབ་མས་ཐལ་མོ་སྙིང་ཁར་སྦྱར་ནས་འགྲེངས་ཚུགས་སུ་འདུག་པ་ནི༔ ཆོས་ཀྱི་ས་བོན་འདེབས་པར་བྱེད་པའོ༔ བླ་མའི་ཐུགས་ཀྱི་དལ་དུ་འཇུག་པའི་ཕྱིར༔ མདུན་ནས་ཚིགས་སུ་བཅད་པས༔ བླ་མའི་ནུས་པ་བདག་ལ་འཇོག་པར་བྱེད་པའོ༔ ཨེ་མ་ཞེས་པ་ཁྱད་པར་གྱི་གསུང་གིས་སྙིང་ལས་སྐྱེས་པའི་བུ་ཞེས་འབོད་པའོ༔ རྫོགས་པ་ཆེན་པོའི་སྐལ་པ་བཟང་པོའི་རིགས་སུ་ངེས་པར་བྱའོ་ཞེས་སོ༔ གསང་སྔགས་ཀྱི་སྐལ་པ་བཟང་པོར་བཅུག་པས་ལུས་ངག་ཡིད་གསུམ་སྡིག་པ་བྱང་ནས་སྐུ་གསུང་ཐུགས་ཡོན་ཏན་ཕྲིན་ལས་སུ་ཆུབ་པར་བྱ་སྟེ་བདག་གཞན་གྱི་དོན་སེམས་དཔའ་ཆེན་པོ་ཞེས་བྱ་བར་འགྱུར་རོ་ཞེས་པ་ལ་སོགས་པའོ༔ དེ་ལྟར་ལུས་དངོས་པོའི་བདེ་བ་དང ༔ ངག་གསལ་བའི་བདེ་བ་དང༔ སེམས་སྟོང་པའི་བདེ་བ་ནི་རྟེན་བྱང་ཆུབ་སེམས་དཔའ་ཡིན་པས༔ འདི་ནས་བརྩམས་ཏེ་ཁྱོད་སླར་མ་ལྡོག་ཅིག་པར་གནང་བ་སྦྱིན་ནོ༔ ད་ནི་བསྲེ་མནན་བྱ་བ་ནི༔ བླ་མའི་ཐུགས་ལ་གཏད་པ་དང༔ སེམས་ཨཱ་ལི་དང་ཀཱ་ལིའི་ཕྲེང་བས་ཡོངས་སུ་བསྐོར་བ་བསྒོམ་དུ་གཞུག་གོ༔ འདིའི་དུས་སུ་བླ་མས་ཀྱང༔ ཨཱ་ལི་དང་ཀཱ་ལི་བརྗོད་པར་བྱའོ༔ བླ་མས་མིག་ཕུགས་ཀྱི་རྩ་གཏེམས་པ་དང༔ རྣ་བ་གཡས་པའི་མདུན་གྱི་ཤོང་བུ་མཐེབ་མོས་མནན་པས༔ རྣ་བའི་རླུང་གི་རང་སྒྲ་འགགས་པ་ནི༔ བདེ་བའི་སྣ་འདྲེན་པར་བྱེད་པའོ༔ དེའི་དུས་སུ་སེམས་དགའ་བའི་གླུ་དང་གར་ཡང་བྱའོ༔ དེ་ནས་དབང་བསྐུར་བ་དངོས་གཞི་ནི༔ སྔོན་དུ་སློབ་དཔོན་གྱི་བྱ་བ་རྫོགས་ནས༔ གཉིས་པ་སེམས་དབང་བསྐུར་བ་ནི༔ ལུས་ངག་ཡིད་གསུམ་ལས་ཀྱང་ཁྱད་པར་དུ་ངག་ལ་བསྐུར་བར་བྱའོ༔ ཆས་ནི་གོས་དང་བྲལ་བར༔ གཅེར་བུ་ནི་རིག་པའི་མཚན་མ་དང་བྲལ་བའི་རྟགས་སོ༔ ཁ་ནུབ་ཏུ་གཏད་པ་ནི་ཉོན་མོངས་པ་ཟད་པའི་རྟགས་སོ༔ བླ་མས་ཙན་དན་དང་ག་བུར་དང་བྱང་སེམས་བསྲེས་པའི་ཐིག་ལེ་སྤྱི་གཙུག་ཏུ་བཏབ་པས་སྐུ་རྡོ་རྗེར་སངས་རྒྱས་སུ་བྱས་པའོ༔ ངག་ཏུ་ༀ་དྲག་ཤུལ་དང་བཅས་པ་བཟླས་པས༔ ལུས་ལ་ནུས་པ་འཇོག་པའོ༔ ངག་ལ་དེ་ཉིད་ཀྱི་ཐིག་ལེ་བཏབ་པ་ནི༔ གསུང་རྡོ་རྗེར་སངས་རྒྱས་སུ་བྱས་པའོ༔ གསུང་གི་ཡི་གེ་ཨཱཿབཟླས་པས༔ གསུང་གི་ནུས་པ་འཇོག་པའོ༔ སྙིང་གར་ཐིག་ལེ་བྱས་པས༔ ཐུགས་རྡོ་རྗེ་སངས་རྒྱས་སུ་བྱས་པའོ༔ ཐུགས་ཀྱི་ཡི་གེ་ཧཱུཾ་བཟླས་པས་སེམས་ལ་ནུས་པ་འཇོག་པའི་གནད་དོ༔ བླ་མ་དང་སློབ་མས་གསུམ་པོ་དྲག་ཏུ་བཟླས་ལ་སློབ་མའི་གཉིད་ལོག་རྩ་གཏེམས་པ་ནི༔ མཉམ་པའི་དོན་ལ་གནས་པར་བྱེད་པའོ༔ འདིའི་དུས་སློབ་མའི་ལུས་འཕར་བ་དང༔ གཡོ་བ་དང་སེམས་གསལ་བའི་རྟགས་ཀྱིས་དབྱེའོ༔ དེ་ནས་ནུ་མའི་རྩ་གཏེམས་པས༔ བདེ་བའི་ཉམས་རང་བཞིན་དུ་གནས་པའོ༔ འདིའི་དུས་སུ་སྟོང་པའི་རྒྱས་གདབ་ལ་བསྒོམ་མོ༔ དེ་ནས་བུམ་པ་ལ་བརྟེན་ནས་སྟོང་ཉིད་བསམ་ངོ་དང་བྲལ་བའི་དབང་བསྟན་པ་ནི༔ བུམ་པ་ནི་སྟོང་པ་ཉིད་ཀྱི་དབྱིངས་ཡིན་ཏེ༔ སློབ་མའི་ལུས་སྟོང་པ་ཉིད་དུ་དམིགས་པའོ༔ དེ་ནི་ཐུན་མོང་དང་ཁྱད་པར་གྱི་འདོད་པ་བསྐང་བའོ༔ བླ་མས་ཆོས་ཐམས་ཅད་དུ་བརྗོད་དུ་མེད་པའོ༔ ཞེས་ཚིགས་སུ་བཅད་པས་བསྟིམ་ཞིང་བརྗོད་སློབ་མའི་སེམས་ཀྱི་གསལ་གདབ་བོ༔ སློབ་མའི་ངག་ལ་ནུས་པ་བཞག་པའི་ཕྱིར༔ བླ་མས་རྡོ་རྗེའི་གླུ་ལན་གསུམ་བླངས་པས༔ ཁམས་གསུམ་འཁོར་བའི་ཞེན་པ་གཅོད་པའོ༔ གཞན་ཡང་རྔ་དང༔ དུང་དང༔ ཆ་ལང་དང༔ དྲིལ་བུ་དང་སྒྲ་དང་སྒྲའི་ཁྱད་པར་ཅི་ཡོད་པ་རྣམས་ཀྱིས་ལས་མ་དག་པ་རྣམས་སྦྱོང་བའི་རྣ་བའི་བུ་གར་སྒྲ་བསྒྲག་པར་བྱའོ༔ དེས་ནི་སངས་རྒྱས་ཀྱི་དབྱངས་སུ་ངེས་པར་འགྱུར་བའོ༔ དེ་ནས་དབང་ཐོབ་པར་བྱེད་པའི་རྐྱེན་ཚིགས་སུ་བཅད་པས་བསྐུར་བར་བསྟན་པ་ནི༔ ངེས་པ་ཁོ་ན་བརྗོད་པའི་ཚིག་འདི་དག་གི་དོན་སྐད་ཅིག་ལ་སྐྱེ་བའི་ཕྱིར་བརྗོད་པར་བྱའོ༔ ཨེ་ཞེས་པ་ནི་དག་པ་སྐུ་གསུམ་རྫོགས་པའི་གཞི༔ མ་ཞེས་བཅོས་མ་ལས་གྲོལ་བའི་དོན༔ ཧོ་ནི་དག་པ་དབྱིངས་གཅིག་ཏུ་སྡུད་པའི་དོན་ནོ༔ ཚིག་འདི་རྣམས་ཀྱིས་ཡོད་མེད་རྟག་ཆད་སྣང་སྟོང་ཀུན་མཉམ་ཉིད་དུ་གཅིག་པས༔ སྤང་བླང་ལས་འདས་པའི་ཚིག་དང་ཡི་གེ་སྤྲོས་པ་མེད་པའི་དོན་ཆོས་ཉིད་མངོན་སུམ་ལ་བརྟེན་ནས༔ ལུས་ངག་ཡིད་གསུམ་གྱི་བདེ་བ་ཁྱད་པར་ཅན་སྐྱེ་བར་བྱེད་པས༔ ཡིད་དཔྱོད་ཚིག་གིས་ལྟར་མེད་པས༔ ཀུན་གྱི་རྟོགས་པར་དཀའ་ཞིང་བསམ་ཡུལ་མ་རྙེད་པས་དྲན་བསམ་ལས་འདས་པ་དེ་ཉིད་རྟོག་པ་ཐ་དད་པ་ལས་འདས་པས་བརྗོད་དུ་མེད་པའི་ཆོས་དེ་ངོ་མཚར་བས་ན༔ རང་གི་ཆེ་བ་ཅན་ཅེས་བྱའོ༔ དེ་ལྟར་ངོ་མཚར་གྱི་ཚིག་བརྒྱད་ཀྱིས་རྣམ་པར་ཤེས་པའི་ཚོགས་བརྒྱད་ཀྱི་རྟེན་དང་སྒོ་དག་པར་བྱ་སྟེ༔ ཆོས་ཉིད་བརྒྱད་སྦྱོར་བའོ༔ དེ་ལ་ངེས་ཤེས་སྐྱེས་ན་ཆོས་རྣམས་ལ་སྤྲོས་པ་མེད་པའི་དབང་ཐོབ་པར་འགྱུར་རོ༔ དེ་ནས་འཁོར་བའི་གཡང་ས་བཀུར་བས༔ འཇུག་པར་བྱེད་པའི་ཚིག་གི་བརྡའ་ངེས་པར་བསྟན་པ་ནི༔ གོང་གི་ངོ་མཚར་བརྒྱད་ཀྱི་ཚིག་གིས༔ སེམས་ཀྱི་སྤྲོས་པ་མེད་པའི་དབང༔ བླ་མའི་གསུང་གསལ་ཞིང་སྙན་པས་སྨིན་པར་བྱས་པས་སློབ་མ་ལ་ངེས་ཤེས་འཇོག་པར་བྱེད་པའོ༔ དེ་ལ་ཤེས་པ་རྙེད་ན་དཔེ་ཡིས་ངོ་སྤྲད་པས་མཚོན་ཏེ༔ ངོ་སྤྲད་པའི་ཆོས་ཀྱང་དེ་བཞིན་དུ་བསྟན་ནོ༔ འཇིག་རྟེན་གྱི་འདོད་པ་ལས་བློ་ལྡོག་པའི་ཕྱིར་ནང་འཁོར་བ་མི་རྟག་པ་དང༔ སྡུག་བསྔལ་བ་དང༔ རྐྱེན་སྣ་ཚོགས་པ་འཁོར་བའི་ལས་དང༔ འབྲས་བུར་གྱུར་པའི་དཔེ་ནམ་ཟླ་དུས་ཚོད་དང༔ སྣང་བ་འགྱུར་བ་དང་འཆི་བ་མི་རྟག་པ་བསམ་པ་དང ༔ ཕྱིའི་རྩི་ཤིང་ནགས་ཚལ་གྱིས་ཀྱང་མཚོན་པར་བྱེད་པའོ༔ དེ་ལྟར་དཔེ་དུ་མས་མཚོན་ལ་འཇིགས་པའི་གཡང་ས་བཀུར་ཏེ༔ དེ་ནས་ཆོས་ཉིད་ཀྱི་ཚིག་དང་ཡི་གེས་སྒྲོ་མ་བཏགས་མིང་གི་རྣམ་གྲངས་སུ་མ་སོང་བར༔ བློ་ཡིས་འགྱུར་བས་མ་སྤྲོས་པས༔ བརྗོད་པའི་སྒྲ་ལ་མ་བརྟེན་པས༔ ཐམས་ཅད་ཡིན་ཐོག་ཏུ་གནས་པའི་དོན་ལ༔ སེམས་སྐྱེ་བ་མེད་པ་ལས་འགགས་པ་མེད་པས་འགག་མེད་དུ་གྲོལ་བའི་གནད་ལ་མཁས་པས་སློབ་མ་གཞུག་པ་ནི་ཐབས་ཀྱི་འཇུག་པ་ཁྱད་པར་ན་ཉིད་དོ༔ དེས་ན་དོན་གཅིག་ཅར་འཇུག་པ་ནི༔ གནད་ལུས་དང་བསྟུན་པས༔ འཁོར་བ་ལས་གྲོལ་བའི་བརྡ་ཡིས༔ ལུས་ངག་ཡིད་གསུམ་གྱི་བདེ་བ་བཙན་ཐབས་བསྐྱེད་པ་སེམས་བསྐུལ་བ་ནི༔ ཀྱེ་བུ་གཅིག་ཆོས་འཁོར་བ་དང་འདས་པའི་སྤྱི་དང་རང་གི་དང་གཉིས་རྣམས་སྟོང་པ་ཉིད་ཡིན་པས་འདི་ལ་སྒྲོས་གདགས་སུ་མེད་དོ༔ དེ་ལ་རང་གནས་ཤིང་གཞན་ཡང་བརྟེན་པ་ཡིན་ནོ༔ སངས་རྒྱས་གཞན་ནས་མ་འཚོལ་ཅིག་བུ༔ དེ་ལ་གང་ཟག་དང་ཆོས་ཀྱི་བདག་མེད་ཤེས་ནས༔ ལས་དང་བག་ཆགས་ཅི་རུང་ཡང་དག་པར་འགྱུར་རོ༔ ཕྱི་ས་ཆུ་མེ་རླུང་གི་དངོས་པོ་དང ༔ ནང་ཕུང་ཁམས་དང༔ སྐྱེ་མཆེད་ཀྱི་དངོས་པོ་རང་རྒྱུད་དུ་བཟུང་ནས༔ འཁོར་བའི་ཁ་བརྒྱུད་པས༔ དངོས་པོ་ཡེ་ཤེས་ཟང་ཐལ་དུ་ཤེས་པར་གྱིས་ཤིག༔ དེ་ལྟར་མ་ཤེས་ན་ཚིག་དང་མཚན་མར་འཛིན་པ་ནི་འཁྲུལ་པ་ཡིན་ཞེས་པ་ལ་སོགས་པས་བསྟན་པར་བྱའོ༔ ཡང་རྣལ་འབྱོར་པས་ཡེ་ནས་ལས་དང་ཉོན་མོངས་པ་སངས་ནས་མཁྱེན་པའི་ཡེ་ཤེས་སུ་རྒྱས་པ་ཡིན་ལ༔ ངན་སོང་ལ་སོགས་པ་འཇིགས་པའི་བློ་བྱུང་བ་ནོར་བ་ཁྱོད་རེ་འཁྲུལ༔ དོན་གྱི་མ་འཁྲུལ་པའི་ཡེ་ཤེས་ངོས་ཟིན་པར་གྱི་ཤིག་པའོ༔ དེ་ནས་གཞན་ལས་གྲོལ་ཆོས་འདི་ལ་ལོངས་སྤྱོད་ཅིག་པ་ལ་སོགས་པའོ༔ ཡང་ཐེག་པ་རིམ་པ་དགུ་ཡང ༔ རང་ལས་ཤར་ཅིང་རང་སྣང་བར་འདོད་པའི་བྱེ་བྲག་ལ་ཡང་དག་པར་ཆོས་ཉིད་ལ་འདུས་པ་ལས༔ ཉ ན་ཐོས་ལ་སོགས་པ་སོ་སོའི་ལྟ་བ་འདོད་པའི་གཞུང་འཛིན་པ་ཡོངས་རེ་འཁྲུལ ༔ ཞེས་ངེས་པ་ཁྱད་པར་དུ་འཇུག་པའི་ཐབས་སོ༔ དེ་ལྟར་ཚིག་གིས་སློབ་མའི་སྤྲོ་བ་བསྐྱེད་པར་བྱའོ༔ དེ་ནས་བར་ཆད་ཞི་བ་དང༔ སློབ་མའི་ཚོགས་བསྐྱེད་པར་བྱ་བའི་ཕྱིར༔ མཁའ་འགྲོ་མ་རྣམས་ལ་ཚོགས་དང་གཏོར་མས་མཉེས་པར་བྱ་བ་ནི༔ དེ་ཡང་མཁའ་དབྱིངས༔ འགྲོ་བ་ཡེ་ཤེས༔ མ་ཆོས་ཉིད་རྣམས་ནི་རིགས་བཞི་དང༔ འཇིག་རྟེན་པ་དང༔ འདས་པ་དང༔ དབང་བསྐུར་བའི་མཁའ་འགྲོ་མ་རྣམས་མཉེས་པར་བྱས་ན༔ ཐམས་ཅད་མཁྱེན་པ་ཐོབ་པ་དང ༔ བསམ་པ་རྫོགས་པ་དང༔ ཕྱི་མ་ལ་སངས་རྒྱས་ཀྱི་ཞིང་ཡོངས་སུ་དག་པར་འཇུག་པར་འགྱུར་རོ༔ དེ་ནས་བླ་མ་ལ་ཡོན་དབུས་བ་ནི༔ ཟང་ཟིང་གིས་མཉེས་ན་ལོངས་སྤྱོད་ཕུན་སུམ་ཚོགས་པ་ཐོབ༔ རིན་པོ་ཆེ་ཕུལ་ན་འདི་ཉིད་ལ་ལོངས་སྤྱོད་དང་བྱང་ཆུབ་ཀྱི་ལམ་ཉེ༔ བུ་དང་ཆུང་མ་དང་རང་གི་ལུས་ཕུལ་ན་ཆོས་ལ་མཁས་པ་དང༔ མཁའ་འགྲོ་འདུ་ཞིང་མཐུ་རྩལ་ལྡན་ནོ༔ དབང་རྫོགས་པ་དང་དགའ་སྟོན་བྱས་ན༔ ཕ་རོལ་ཏུ་བསྙེན་པ་དང༔ བསོད་ནམས་ནམ་མཁའ་དང་མཉམ་མོ༔ སྤྲོས་མེད་དབང་གི་ཏི་ཀ༔ མཁས་པ་བི་མ་ལས་མཛད་པ་རྫོགས་སོ༔ རྒྱ་རྒྱ་རྒྱ༔

དབང་བསྐུར་རིམ་པར་འཇུག་པའི་དུས་བཤད་པ།

༄༅༔ དབང་བསྐུར་རིམ་པར་འཇུག་པའི་དུས་བཤད་པ་བཞུགས་སོ༔ ཁ་ཐཾཿམན་ངག་ང་དྲུག་པ༔ ད་ནི་དབང་བསྐུར་འཇུག་དུས་བཤད༔ སྤྲོས་བཅས་དག་གི་དབང་བསྐུར་ནི༔ བྱི་བ་འབྲུག་དང་རྟ་དང་ཕག༔ ཁྱད་པར་ལོ་ནི་བཞི་དག་ལ༔ དབང་བསྐུར་ཆོ་ག་འགྲུབ་པ་ཡིན༔ ཟླ་བ་ར་བ་བཞི་དག་ལ༔ དུས་རྫོགས་འབྲས་བུ་བྱིན་ཕྱིར་འགྲུབ༔ ཚེས་གྲངས་ཡར་གྱི་གཅིག་ནས་ནི༔ ཟླ་བ་ཟད་པའི་མཚམས་སུ་གདོན༔ བསྐུར་དུས་ཉིན་ཕྱེད་ནམ་གུང་ངོ༔ རྣལ་འབྱོར་ལུས་ཀྱི་བྱེ་བྲག་གིས༔ སོ་སོའི་འབྱུང་བའི་ལོ་ལ་སྦྱར༔ དབང་བསྐུར་ཆོ་ག་ཤིས་པར་འགྱུར༔ འདི་དུས་སློབ་མ་དམ་ཚིག་ཅན༔ འབྱུང་བའི་ལུས་རྣམས་མཐུན་པ་ནི༔ གྲངས་ལ་ཚད་དུ་གཟུང་དུ་མེད༔ བརྒྱའམ་ལྔ་བཅུ་ལ་སོགས་པའི༔ འབྱུང་ལས་མཐུན་ན་འགལ་བ་མེད༔ གལ་ཏེ་ཆོ་ག་ལ་ཞུགས་ཚེ༔ མར་མེ་མདངས་དང་མིན་ལྡན་ན༔ དམ་ཚིག་བསྐང་བའི་ཆོ་ག་བྱ༔ སྨེ་བ་མེད་ན་དངོས་གྲུབ་ནི༔ ཡང་ནས་ཡང་དུ་བླང་བར་བྱའོ༔ དོན་མེད་ཤི་ན་བར་ཆད་འབྱུང༔ དབང་ཆོག་ཛཔ྄་ལ་དྲག་ཏུ་འབད༔ དེ་ཚེ་འདུས་པའི་མཆེད་ལྕམ་ལ༔ ལུས་ལ་ནད་ནི་བྱུང་བ་ན༔ ཕྱག་དང་སྐོར་བ་དག་བྱའོ༔ ངག་ལ་བསླབ་བཅོལ་སུ་ལ་བྱུང༔ བསམ་སྟེ་ཡི་གེ་བརྒྱ་པ་འདོན༔ སེམས་ནི་རྟོག་གམ་དྲན་ཉམས་ན༔ བསྐྱེད་དང་རྫོགས་པའི་རིམ་ལ་འཇུག༔ གལ་ཏེ་བྱང་བའི་རྟགས་བྱུང་ན༔ གདོད་ཀྱིས་དབང་བསྐུར་ཆོ་ག་འབད༔ གལ་ཏེ་སྒྲུབ་པའི་རྫས་འཕེལ་ན༔ དངོས་གྲུབ་རབ་མཆོག་ཐོབ་པས་ན༔ མཉམ་པའི་དོན་ལ་མོས་པར་བྱ༔ དབང་བསྐུར་ཆོ་ག་ལ་ཞུགས་ནས༔ རྟག་ཏུ་མཚན་མ་བཟང་མཐོང་ན༔ ཐུན་མོང་དངོས་གྲུབ་དེ་ཡིས་འགྲུབ༔ ཉམས་དང་ཤེས་པར་ལྡན་ན་ཡང ༔ འདིས་ཀྱང་དགའ་བདེ་ཉིད་ལ་སྤྱོད༔ བླ་མ་ཉིད་ལ་མཆོག་ཏུ་ཡང༔ མོས་པ་བཟང་པོ་སུས་སྐྱེས་པ༔ འདིས་ཀྱང་ཕྱག་རྒྱ་མཆོག་ལ་སྦྱོར༔ བདག་ཉིད་ལུས་ངག་བདེ་མཐོང་ན༔ འདིས་ནི་སངས་རྒྱས་ཞིང་དག་གོ༔ སྤྲོས་བཅས་དབང་གི་དུས་དང་ཡང༔ མཚན་མ་དག་ནི་ལེགས་བཤད་དོ༔ ད་ནི་སྤྲོས་པ་མེད་པ་ཡི༔ དུས་དང་མཚན་མ་ཉེར་བསྟན་བྱ༔ འདི་ལ་ལོ་ཡི་བྱེ་བྲག་མེད༔ གང་ལ་ཡང་ནི་ཤེས་པའོ༔ ཕྱི་དུས་དབྱར་དང་དགུན་ལ་བཟང༔ ཚེས་གྲངས་ཡར་གྱི་ངོ་ལའོ༔ བསྐུར་དུས་ཐོ་རངས་སྒྲ་སྤངས་པའོ༔ འདི་ལ་དང་ལྡན་ལྔ་དང་དྲུག༔ བདུད་ལས་མང་ན་དོན་མི་འགྲུབ༔ དེ་ལྟར་དད་དང་ལྡན་པའི་བུ༔ སེམས་ཀྱི་ལས་སུ་དགེ་ལྡན་ལ༔ ངག་གི་བླ་མའི་བསྟོད་ལྡན་པ༔ དེ་ལྟ་བུ་ལ་དབང་བསྐུར་ཚེ༔ ལུས་ནི་བདེ་བ་མ་ཡིན་ན༔ ལུས་སྡིག་ཕྱི་ནས་བཤགས་པ་བྱ༔ དེ་བཞིན་གང་དང་སེམས་ལ་ཡང༔ སྡིག་པ་བཤགས་པའི་ལས་བརྩམས་མོ༔ སྤྲོས་པ་མེད་པའི་དབང་བསྐུར་གྱི༔ དུས་དང་མཚམ་མ་བཤད་པའོ༔ ད་ནི་ཤིན་ཏུ་སྤྲོས་པ་མེད༔ མཆོག་ཏུ་གསང་བའི་དབང་བསྐུར་གྱི༔ དུས་དང་མཚན་མ་བཤད་པར་བྱའོ༔ དེང་སང་ལོ་ཡི་བྱེ་བྲག་མིན༔ རང་འབད་ཉིད་དུ་བྱས་པས་འགྲུབ༔ ཕྱིས་དུས་ས་བོན་འཇུག་པའི་དུས༔ བྱང་ཆུབ་ས་བོན་བརྟན་པའི་ཕྱིར༔ འདི་ཡི་དུས་སུ་དབང་བསྐུར་ན༔ རང་བྱུང་ས་བོན་འཕེལ་བར་བཤད༔ འབྲུ་དང་འབྲས་བུ་སྡུད་དུས་སུ༔ ཤིན་ཏུ་སྤྲོས་མེད་དབང་བསྐུར་ན༔ ཡེ་ཤེས་འབྲས་བུ་རྫོགས་པའི་ཕྱིར༔ སྐུ་གསུམ་ས་ལ་ངེས་པར་འགྲོ༔ ནང་དུས་ཡར་ངོའི་འཕེལ་དུས་ན༔ ཚེས་གྲངས་མར་འགྲིབ་སྤངས་པ་ཡིས༔ ཉམས་མྱོང་བརྟན་པར་བྱ་བའི་ཕྱིར༔ ཉམས་དང་བྱིན་རླབས་གོང་དུ་འཕེལ༔ བསྐུར་དུས་ཉི་མ་རྩེ་ཤར་ལ༔ རང་བྱུང་ཡེ་ཤེས་ཤར་དོན་དུའོ༔ ཡང་ན་དམར་གྱི་ཟད་མཚམས་སུ༔ རྟོག་པ་བཟད་པའི་དོན་དུ་བྱའོ༔ སྐལ་ལྡན་གཅིག་གམ་ཡང་ན་གཉིས༔ གསུམ་ལས་མང་ན་དོན་མི་འགྲུབ༔ འདི་དུས་སོ་སོའི་ཕྱོགས་བཟུང་སྟེ༔ ལུས་ཀྱི་དུས་ན་ནམ་མཁའ་ལ༔ སྤྲིན་དང་ཁུ་རླངས་ཁ་ཆར་དང༔ རླུང་ལ་སོགས་པའི་སྒྲ་དག་དང༔ གཡུལ་ཉེས་དགྲ་དང་ཆོམ་རྐུན་དང༔ མི་སྡུག་པ་ཡི་གཟུགས་བྱུང་ན༔ ལུས་ཀྱི་རྟོག་པ་ཆེ་བས་ན༔ ཕྱི་ནང་དབང་བསྐུར་བྱས་ན་ནི༔ བླ་མའི་གདམས་པ་མ་བསྟན་པར༔ བདེ་བར་གཤེགས་པའི་སྐུ་གཟུགས་སམ༔ རང་གི་བླ་མའི་གཟིམས་ཁང་ལ༔ བསྐོར་བ་འབུམ་ཕྲག་དྲུག་དག་གམ༔ ཕྱག་ཀྱང་འབུམ་ཕྲག་གཅིག་ཏུ་བྱ༔ དེ་དུས་མཚན་མའི་ཁྱད་པར་ནི༔ ཐོག་མར་ཡོང་ལ་ཐ་མ་བར༔ ངེས་པའི་མཚན་མའི་གཟུགས་དག་ནས༔ ལུས་ཀྱི་སྤྱོད་པ་འབྱོངས་པས་ན༔ ཕྱིས་ན་འབད་པ་བྱ་མི་དགོས༔ གལ་ཏེ་ཐ་མ་དག་བྱུང་ན༔ ལུས་ཀྱི་ཡོངས་སུ་ཚར་མ་གཅོད༔ ཕྱི་ནས་བསྐྱར་ལ་སྤྱོད་པ་བརྩམ༔ བསྐྱར་ཀྱང་སྡིག་པ་མ་དག་ན༔ ལྷ་ཡི་སྐུ་ནི་སྟོང་ཕྲག་བསྒོམ༔ དེ་ནས་བླ་མའི་མན་ངག་ནི༔ རིམ་པ་དག་ལ་བསླབ་བར་བྱའོ༔ ངག་གི་དུས་ནའང་དེ་བཞིན་དུ༔ རྣལ་འབྱོར་ལྡན་པས་ཤེས་པར་བྱའོ༔ འདི་དག་ཐོག་མ་མེད་ལ་རབ་བྱུང་ནས༔ བཤགས་པའི་ལས་ནི་ཡིག་བརྒྱ་འབུམ་ཕྲག་གཅིག༔ འབད་དང་བཅས་ཏེ་བཟླས་པར་བྱའོ༔ གལ་ཏེ་ཐ་མར་བྱུང་བ་ན༔ གསང་སྔགས་རྒྱུད་ནི་རང་ལོའི་གྲངས༔ བརྒྱ་ནི་རྩ་བརྒྱད་བརྗོད་པར་བྱའོ༔ ཐོག་མཐའ་བར་མེད་དུས་རྣམས་སུ༔ གལ་ཏེ་མཚན་མའི་རྟགས་ངན་ན༔ རྒྱུད་ཀློག་པ་དང་སྔགས་བཟླས་དང༔ བླ་མ་ཡི་དམ་ལྷ་དག་གི༔ བསྟོད་ཚིག་སྣ་ཚོགས་བརྗོད་པ་དང ༔ ཨ་ལི་ཀཱ་ལིའི་ཡི་གེའི་སྒྲ༔ སོ་སོའི་རྐྱང་པར་བརྗོད་པ་དང༔ ཧཱུྃ་དང་ཕཊཿདང་ཨཱོཾ་དང་ནི༔ སྦྲེལ་བ་སྣ་ཚོགས་བརྗོད་པ་ལ༔ ཟླ་བ་བདུན་དུ་འབད་པར་བྱའོ༔ དེ་ནས་གདམས་པའི་གནས་སུ་བྱའོ༔ སེམས་ལ་ཐོག་མར་གང་བྱུང་ན༔ ཡི་དམ་ལྷ་ཡི་ཏིང་ངེ་འཛིན༔ ཉི་མ་གསུམ་དུ་བསྒོམ་པར་བྱའོ༔ གལ་ཏེ་བར་དུ་བྱུང་བ་ན༔ སྔགས་ཀྱི་འོད་ཟེར་འཕྲོ་འདུ་ལ༔ ཉི་མ་བདུན་དུ་འབད་པར་བྱའོ༔ ཐ་མར་བྱུང་ན་ཡི་གེ་ཡི༔ འཕྲོ་འདུ་དག་ནི་བསྒོམ་པ་ལ༔ ཉི་མ་བཅུ་ཡི་བར་དུ་འབད༔ ཐོག་མ་བར་མཐའ་ཀུན་བྱུང་ན༔ རྫོགས་པའི་རིམ་པ་བསྒོམ་པའམ༔ ངག་ལས་བྱུང་བའི་བསམ་གཏན་ལ༔ བསྒོམ་པ་ཟླ་བ་དྲུག་ཏུ་འབད་པར་བྱའོ༔ གལ་ཏེ་ལུས་ངག་སེམས་ཀྱི་ཀྱང ༔ སྤྱོད་པ་སོ་སོའི་དུས་རྣམས་སུའང༔ ནམ་མཁའ་སྔོ་སངས་སྤྲིན་དང་བྲལ༔ རླུང་དང་སེར་བུའི་སྒྲ་མེད་པ༔ འཇམ་ཞིང་འཇམ་པ་དག་བྱུང་ན༔ སྡིག་པ་དག་ནི་སྦྱང་མི་དགོས༔ གལ་ཏེ་ཐོག་མ་ཡོད་པ་ལ༔ སོ་སོའི་ཐ་མར་དག་ན་ཡང༔ འདིར་ནི་སྡིག་པ་སྦྱངས་པས་ན༔ བཤགས་པའི་ཆོ་ག་མི་དགོས་སོ༔ དེ་བཞིན་ལུས་ངག་སེམས་དག་གི༔ སོ་སོའི་ངོས་བཟུང་མཁས་པས་བརྟག༔ དེས་ནི་ཤིན་ཏུ་སྤྲོས་པ་མེད༔ དབང་བསྐུར་བ་ཡི་དུས་དང་ཡང༔ མཚན་མ་བརྟག་པ་བཤད་པའོ༔ རེ་ཞིག་དབང་ཐོབ་མཚན་མ་ནི༔ རིག་པའི་མེ་ཏོག་གཏོར་དུས་སུ༔ ལུས་ནི་གཡོ་དང་དྲག་ཏུ་འཕར༔ ལུས་ལ་བྱུང་ན་ལུས་ཀྱི་ཐོབ༔ ངག་གི་སྒྲ་སྐད་སྣ་ཚོགས་པར༔ འབྱིན་ཅིང་ཆོས་རྣམས་སྨྲ་བ་དང༔ ངོ་མཚར་ཚིག་རྣམས་བརྗོད་པ་ནི༔ དེ་བཞིན་དུའང་ངག་གིས་ཐོབ༔ སེམས་ལ་ཏིང་འཛིན་འབབ་པ་དང ༔ ཡེངས་ཤིང་དྲན་པ་ཉམས་པ་ན༔ སེམས་ཀྱིས་དབང་པོ་ཐོབ་པའོ༔ གལ་ཏེ་ལུས་ཀྱིས་ཐོབ་ན་ནི༔ སྤྲུལ་པའི་སྐུ་ཉིད་འདི་ཡིས་ཐོབ༔ དེ་བཞིན་ངག་ལ་ལོངས་སྐུའོ༔ སེམས་ནི་ཆོས་སྐུའི་ཞིང་དུ་འགྲོ༔ ཤིན་ཏུ་སྤྲོས་མེད་དུས་མཚན་བཤད༔ རབ་ཏུ་སྤྲོས་པ་མེད་པ་ཡིས༔ དུས་དང་མཚན་མ་ངེས་བསྟན་བྱའོ༔ ཕྱི་དུས་འབྲས་བུ་སྨིན་པའམ༔ འབྲུ་རྣམས་བསྡུ་བའི་དུས་ལ་གཏད༔ རང་སྣང་འབྲས་བུ་གྲོལ་ཕྱིར་རོ༔ ནང་དུས་ཡར་ངོའི་ཚེས་གཅིག་གམ༔ ཡང་ན་ཟད་པའི་ཚེས་ལ་གཏད༔ ཐིག་ལེ་ཉག་གཅིག་རྟོགས་ནས་ནི༔ ལས་དང་བག་ཆགས་ཟད་ཕྱིར་རོ༔ སྐལ་ལྡན་གཅིག་ལས་མང་ན་ཡང༔ རྣལ་འབྱོར་པ་ཡིས་དོན་མི་འགྲུབ༔ དང་ལྡན་ཡིད་དུ་འོང་བའི་བུ༔ སྐལ་བ་ཡོད་པ་གཅིག་ལ་བསྐུར༔ གཉིས་ཀ་རྫོགས་པའི་སངས་རྒྱས་ལ༔ གདོན་མི་ཟ་བར་འགྱུར་བར་ངེས༔ བསྐུར་དུས་ཉི་མ་རྩེ་ཤར་ལ༔ སོ་སོའི་ཚིག་གིས་ངེས་གསལ་བས༔ རང་བཞིན་དག་པའི་གཞི་མཐོང་བའོ༔ འདི་ལ་མཚན་མ་ཅི་བྱུང་ཡང༔ སྡིག་པ་སྦྱོར་པའི་ཆོ་ག་མེད༔ གོང་དུ་ཐད་ཀར་སྦྱང་བའི་ཕྱིར༔ གལ་ཏེ་སྤྲིན་མེད་ནམ་དངས་ན༔ ཆོས་ཀྱི་སྐུ་ཡི་ཞིང་ལ་སྤྱོད༔ སྣ་ཚོགས་འོད་ཀྱི་གདངས་ཤར་ན༔ འདི་ནི་ལོངས་སྐུའི་ཞིང་དུའོ༔ སྣ་ཚོགས་སྒྲ་རྣམས་གྲགས་པ་ན༔ སྤྲུལ་སྐུའི་ཞིང་དུ་དབུགས་འབྱིན་ནོ༔ གལ་ཏེ་སྐལ་དང་ལྡན་པ་ཞིག༔ འདི་དུས་ལུས་གནད་མཁས་པ་དང ༔ དེ་ལས་གཡོ་བ་མེད་པ་ན༔ ལོ་བདུན་གྱིས་ནི་ཟད་སར་ཕྱིན༔ ངག་གི་བརྗོད་པ་སྟོར་གྱུར་ན༔ འདིས་ནི་ཟླ་བ་ཉེར་གཅིག་ནས༔ ཆོས་ཉིད་ཟད་པའི་ས་ལ་ཕྱིན༔ སེམས་ལ་མཁས་ཤིང་ལུང་སྟོང་ན༔ ཟླ་བ་བདུན་ན་སྐལ་ལྡན་འདི༔ སྣང་བ་ཐམས་ཅད་ཟད་པར་འགྱུར༔ གལ་ཏེ་བློ་རྩལ་རབ་རྣམས་ལ༔ དང་པོ་སྤྲོས་བཅས་བརྩམས་ནས་ནི༔ བར་མ་ཆད་པར་རིམ་གྱིས་ཀྱང༔ དབང་དག་རྫོགས་པར་བྱེད་པའི་ལུགས༔ མཆོག་ཏུ་གྱུར་པ་རྣམས་ལ་སྟེ༔ འདི་ནི་རབ་ཏུ་དཀོན་པས་ན༔ ཞག་དང་ཟླ་བ་ལོ་ཡི་བར༔ རང་གི་ཉམས་དང་སྦྱར་ལ་ནི༔ དབང་བཞི་དག་ནི་རྫོགས་པར་བསྐུར༔ གལ་ཏེ་དབང་བཞི་མ་རྫོགས་ན༔ ཤིན་ཏུ་སྤྲོས་པ་མེད་པའི་དབང༔ ཟབ་མོའི་ཆ་ཤས་རྟོགས་ཡུལ་ཉིད༔ འདི་ཉིད་བསྐུར་བས་དབང་ཐོབ་བོ༔ སློབ་མའི་མཚན་ཉིད་རབ་བརྟགས་ལ༔ གཉིས་དང་གསུམ་ལ་སོགས་པ་ནི༔ སློབ་མའི་འབྱོར་བའི་ཚོད་དང་སྦྱར༔ བླ་མ་རང་གི་ཉམས་མྱོང་གིས༔ ཁྱད་པར་དུས་ན་མཆོག་ངེས་བཤད༔ བུ་ལ་ནུས་པ་འཇུག་དོན་དུའོ༔ ཞེས་དབང་རྣམ་པར་བཀོད་པའི་ཕྲ་ཏིག༔ དབང་གི་རིམ་པ་རྣམ་པར་ཕྱེ་བ་ལས༔ རྣམ་པར་དག་པ་གསལ་བའི་དུམ་བུ་རིམ་པར་འཇུག་པའི་ཐབས་བསྟན་པ་སྟེ་གཉིས་པ་རྫོགས་སོ༔

ཤིན་ཏུ་སྤྲོས་མེད་ཀྱི་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད།

༄༅ཿ ཿཤིན་ཏུ་སྤྲོས་མེད་ཀྱི་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད་བཞུགས་སོ༔ མན་ངག་ང་དྲུག་པ། ༈ བླ་མ་དམ་པ་རྣམས་ལ་ཕྱག་འཚལ་ལོ༔ ཤིན་ཏུ་སྤྲོས་པ་མེད་པའི་དབང་འཁོར་འདས་རུ་ཤན་འབྱེད་པའི་སྤྱོད་པའི་ལག་ལེན་བསྟན་པར་བྱའོ༔ སློབ་མ་དེ་དུར་ཁྲོད་དུ་སྤྱོད་པ་ལ་འགྲོ་བའི་དུས་སུ༔ སློབ་མ་ལུས་གཅེར་བུར་འགྲེང་ཚུགས་སུ་ལངས༔ ཐལ་མོ་སྙིང་ཁར་སྦྱར་ལ༔ བླ་མས་ཡི་གེ་བརྒྱད་ཀྱི་གོ་བགོ་བ་ནི༔ བླ་མས་བརྡ་སྤྲོད་ལ་སློབ་མའི་ལུས་ལ་འདི་ཚོ་བསྒོམ་དུ་གཞུག་གོ༔ དང་པོ་སྙིང་ཁར་ཧཱུྃ་སྔོ་སྐྱ་གཅིག་བསྒོམ་དུ་གཞུག་གོ༔ སྤྱི་བོར་ལཾ་སེར་པོ༔ རྐང་མཐིལ་དུ་ཡཾ་ལྗང་གུ༔ ལྟེ་བར་རཾ་དམར་པོ༔ མགྲིན་པར་ཁཾ་དུད་ཁ༔ དཔྲལ་བར་ཨེ་མཐིང་ག༔ ལྐོག་མར་སུ་སེར་པོ༔ ནུ་མ་གཉིས་ལ་ཧ་དཀར་པོ༔ སྙིང་ཀར་ཕཊ་ནག་པོ་རྣམས་བསྒོམས༔ དེ་ནས་གཏོར་མ་གཅིག་ཁྱེར་ལ་ངག་ཏུ་ཕཊ་དྲག་པོ་བརྗོད་ཅིང༔ རང་གི་གནས་དེར་དེ་ན་གནས་པའི་ལྷ་དང་ཀླུ་དང་གནོད་སྦྱིན་དང་མཁའ་འགྲོ་མ་དང་ཆོས་སྐྱོང་ལ་གཏོར་མ་བྱིན་ལ༔ བདག་ལུང་བ་འདི་རུ་འཁོར་འདས་རུ་ཤན་འབྱེད་པའི་སྤྱོད་པ་ཞག་གསུམ་བྱེད་པས། དེ་མ་ཐོན་གྱི་བར་དུ་བར་དུ་གཅོད་པ་མ་བཏང་ཞིག །ཅེས་མཁའ་འགྲོ་ཆོས་སྐྱོང་ལ་བཀའ་བསྒོ་བར་བྱའོཿ དེ་ནས་ལུས་ཀྱི་སྤྱོད་པ་བརྩམ་པར་བྱའོ། །དེའི་དུས་སུ་རྟག་ཏུ་བླ་མ་ལ་གུས་པར་བྱའོ༔ འགྲོ་བ་དང༔ རྒྱུག་པ་དང༔ ཉལ་བ་དང༔ བསྒྱུར་ནས་འགྲོ་བ་དང༔ མཆོངས་པ་དང༔ ལུས་བསིག་པ་དང༔ བྲོ་འཁྲབ་པ་དང༔ རྐང་པ་གཅིག་དང་ལག་པ་གཅིག་ས་ལ་བཙུགས་ཏེ་འགྲོ་བ་དང༔ འབུ་སྲིན་གྱི་འགྲོས་སུ་བྱ་བ་དང༔ སྤྱི་འགྲེང་བྱ་བ་དང༔ ལུས་ཀྱི་རྒྱ་འདྲེས་བྱ་བ་དང༔ ལྷ་ཕྱག་མང་པོ་བྱ་བ་ལ་སོགས་པ་ལས་ཀྱི་སྤྱོད་པ་དྲན་ཚད་ཉིན་ཞག་གཅིག་ཏུ་བྱའོ༔ དེ་ནས་ལུས་ཀྱི་སྤྱོད་པ་ཚར་ནས་ངག་གི་སྤྱོད་པ་བརྩམ་པར་བྱ་སྟེ༔ འདིའི་དུས་སུ་ཡང་བླ་མ་ལ་གདུང་བ་བསྐྱེད་པ་གལ་ཆེའོ༔ ངག་ནི་སྐད་རྣམ་པ་སྣ་ཚོགས་བརྗོད་དོ༔ ཁྱིའི་སྐད་དུ་སྨྲ་བ་དང༔ བོང་བུའི་སྐད་འདོན་པ་དང༔ ཝའི་སྐད་དང༔ རྟའི་སྐད་དང༔ ཕྱུགས་ཀྱི་སྐད་འདོན་པ་དང༔ སྤྱང་ཀིའི་སྐད་འདོན་པ་དང༔ ཕོ་རོག་གི་སྐད་འདོན་པ་དང༔ སྐྱ་ཀའི་སྐད་འདོན་པ་དང༔ ཕཊ་མང་པོ་བརྗོད་པ་དང༔ ཧུ་མང་པོ་བརྗོད་པ་དང ༔ ཨ་མང་པོ་བརྗོད་པ་དང༔ ངུ་བའི་སྐད་འདོན་པ་དང༔ དགོད་པའི་སྐད་འདོན་པ་དང༔ ཧ་མང་པོ་འདོན་པ་དང༔ ཧུས་མང་པོ་གདབ་པ་དང༔ སྲིན་བྱའི་སྐད་འདོན་པ་དང༔ འུག་པའི་སྐད་འདོན་པ་དང༔ ར་ལུག་གི་སྐད་འདོན་པ་དང༔ དེ་ལ་སོགས་པ་རྣམས་པ་སྣ་ཚོགས་པའི་སྐད་འདོན་པ་ཉིན་ཞག་གཉིས་བྱའོ༔ དེ་ལྟར་ངག་གི་སྤྱོད་པ་ཚར་ནས་སུ༔ སེམས་ཀྱི་དྲན་བསམ་འཁོར་ལོ་སྣ་ཚོགས་པ་བྱ་སྟེ༔ ཡི་དམ་ལྷ་སྒོམ་པ་དང ༔ སེམས་ནམ་མཁའི་དཀྱིལ་དུ་འཕངས་པ་དང ༔ རྒྱ་མཚོའི་གཏིང་དུ་འཕངས་པ་དང ༔ རི་བྲག་རྣམས་ལ་ཟང་ཐལ་དུ་བྱ་བ་དང ༔ བཀྲེས་པའི་སྡུག་བསྔལ་མང་པོ་ཡིད་ལ་བྱ་བ་དང༔ སྐོམ་པའི་སྡུག་བསྔལ་མང་པོ་ཡིད་ལ་བྱ་བ་དང༔ ན་བའི་སྡུག་བསྔལ་མང་པོ་ཡིད་ལ་བྱ་བ་དང༔ ཕྱིན་མ་མྱོང་བའི་ཡུལ་དུ་སེམས་འགྲོ་བར་གཞུག་པ་དང༔ སེམས་ནམ་མཁའ་ལ་འཕུར་དུ་བཞུག་པ་དང༔ རི་ཐམས་ཅད་ཀྱི་ལམ་ལ་སེམས་འགྲིམ་དུ་གཞུག་པ་དང༔ སྟོང་གསུམ་ཐམས་ཅད་བླ་མར་བསྒོམ་པ་དང༔ སྟོང་གསུམ་ཐམས་ཅད་ཡི་དམ་དུ་བསྒོམ་པ་དང༔ དུད་འགྲོའི་ཚོགས་མང་པོ་བསྒོམ་པ་དང༔ སྐྱེས་པའི་ཚོགས་མང་པོ་བསྒོམ་པ་དང༔ རང་གི་ལུས་སྟོང་ཁྲི་འབུམ་ལ་སོགས་མང་པོར་བསྒོམ་པ་དང༔ དེ་ལ་སོགས་ཏེ་སེམས་དར་ཅིག་ཀྱང་མི་བཞག་པར་ཞག་གཉིས་སུ་དྲག་པར་བྱའོ༔ ཉིན་ཞག་དྲུག་ཏུ་གཉིད་རྣམ་པ་ཐམས་ཅད་དུ་སྤང་བར་བྱའོ༔ དེ་ལྟར་ལུས་ངག་ཡིད་གསུམ་གྱི་སྤྱོད་པ་ཚར་ནས༔ བླ་མའི་མདུན་དུ་མཎྜལ་དང༔ ཚོགས་ཀྱི་ཡོ་བྱད་ལ་སོགས་པ་ཚགས་བྱས་ལ་བླ་མས་དབང་བསྐུར་བར་བྱ་སྟེ༔ སློབ་མས་བླ་མ་ལ་མཎྜལ་དབུལ་བར་བྱ་སྟེ། གསེར་ལ་སོགས་པ་རིན་པོ་ཆེ་སྣ་ཚོགས་པའི་མཎྜལ་ཡིད་ཀྱིས་སྟོང་གསུམ་ཁེངས་པར་དབུལ༔ དེ་ནས་ཙནྡན་ལ་སོགས་པ་དྲི་རྣམ་པ་སྣ་ཚོགས་པའི་མཎྜལ་དབུལ༔ དེ་ནས་སྨན་རྣམ་པ་སྣ་ཚོགས་པའི་མཎྜལ་ཡིད་ཀྱིས་དབུལ༔ དེ་ནས་མེ་ཏོག་གི་རིགས་མི་འདྲ་བ་རྣམ་པ་སྣ་ཚོགས་བར་འདིར་གསོལ་བ་གདབ་བོ། །ཡིད་ཀྱིས་དབུལ་བར་བྱའོ༔ ནས་ལ་སོགས་པ་འབྲུ་རྣམ་པ་སྣ་ཚོགས་པ་ཡིད་ཀྱིས་བསམས་ལ་དབུལ༔ དངོས་སུ་འབྱོར་ན་ཡང་གསེར་དངུལ་དང༔ མེ་ཏོག་དང༔ དྲི་དང༔ སྨན་དང༔ འབྲུ་དང༔ དེ་ལ་སོགས་པ་རྟེན་འབྲེལ་འཛོམ་པར་བྱ་བའི་ཕྱིར་ཅི་འབྱོར་པ་དབུལ་བར་བྱའོ༔ དེ་ལྟར་མཎྜལ་ཕུལ་ནས༔ ད་ནི་བླ་མས་སློབ་མ་ལ་ཡེ་ཤེས་བཙན་ཐབས་སུ་བསྐྱེད་པའི་ཕྱིར་སྣ་ཚོགས་བརྗོད་པའི་བརྡས་སློབ་མ་རྗེས་སུ་གཟུང་བར་བྱ་སྟེ་བླ་མའི་མདུན་དུ་འདུག་ལ༔ བླ་མས་བུ་ཁྱོད་སུ་ཡིན་ཞེས་ལན་གསུམ་བརྗོད་དོ༔ སློབ་མས་སྐལ་ལྡན་སེམས་ཀྱི་བུ་གཅིག་པུ་ལགས་བྱ་བའི་ལན་བརྗོད༔ བླ་མས་དེ་ལྟར་ཡིན་ཕན་ཆོད་རང་བཞིན་རྫོགས་པ་ཆེན་པོའི་དལ་འདིར་འདུག་ཅིག་ཅེས་བརྗོད་དོ༔ དེ་ནས་སློབ་མའི་ལུས་གཅེར་བུར་ཕྱུང་བ་ཐལ་མོ་སྙིང་ཁར་སྦྱར་ཏེ༔ རྐང་བའི་ལོང་བུ་བཤིབས་ལ་སེམས་བླ་མའི་ཐུགས་ཀར་མ་ཡེངས་པར་བྱའོ༔ དེའི་དུས་སུ་བླ་མས་ཨཱཿཞེས་དྲག་ལ་ཆེ་ཞིང་ཐུང་བར་བརྗོད༔ དེའི་དུས་ན་ལུས་འཕར་བ་དང༔ ངག་སྨྲ་བ་དང༔ སེམས་གཡོ་བའི་རྟགས་བྱུང་ན་ནི་ལུས་དང་ངག་དང་སེམས་ལ་བྱིན་རླབས་རང་གི་ཉམས་དང་སྦྱར་བས་ཤེས་པར་བྱའོ༔ དེ་ནས་བླ་མས་སློབ་མ་དེ་ཁ་ཤར་དུ་བལྟར་བཅུག་ལ༔ ཨེ་མ་སྐལ་ལྡན་ཤར་གྱི་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང༔ ཞེས་ལན་གསུམ་བརྗོད་པའི་རྗེས་ལ་འགྲོ་ན་འགྲོ་ས་འདུག་གམ༔ འགྲོ་བའི་མཁན་པོ་འདུག་གམ་ཞེས་ཕྱོགས་བཞི་ཀར་བྱའོ༔ དེ་ནས་སློབ་མ་དེ་ཁ་ལྷོར་བལྟར་བཅུག་ལ༔ ཨེ་མ་སྐལ་ལྡན་ལྷོ་ཕྱོགས་ཀྱི་ནམ་མཁའ་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད༔ དེ་ནས་ནུབ་ཏུ་བལྟར་བཅུག་ལ༔ ཨེ་མ་སྐལ་ལྡན་ནུབ་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད་དོ༔ དེ་ནས་བྱང་དུ་ཁ་བལྟར་བཅུག་ལ༔ ཨེ་མ་སྐལ་ལྡན་བྱང་གི་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད་དོ༔ དེ་ནས་ལྷ་ངོ་བསྟན་པར་བྱ་བའི་ཕྱིར་སློབ་མ་སྐྱིལ་ཀྲུང་དུ་འདུག་ཏུ་བཅུག་ལ༔ ཨེ་མ་སྐལ་ལྡན་ནམ་མཁའི་དཀྱིལ་ཡ་གི་ན་ཉི་མའི་དཀྱིལ་འཁོར་འོད་འཕྲོ་བ་ལྔ་པོ་ཡ་གི་ལ་ཤེས་པ་གཏོད་ལ་ཤེས་པ་ཇེ་མཐོ་ཇེ་མཐོ་སོང་ཞིག་ཅེས་ལན་གསུམ་བརྗོད་དོ༔ བླ་མས་སླར་མ་ལྡོག་ཅིག་ཅེས་ལན་གསུམ་བརྗོད་དོ༔ བླ་མའི་ཕྱག་གིས་ནམ་མཁའ་ལ་ཡུག་ཡུག་ལན་གསུམ་ལ་བྱའོ༔ དེ་ནས་བླ་མས་ལངས་ཏེ་ཞབས་གཡོན་བསྐུམ་གཡས་བརྐྱང་བར་བྱ༔ དེ་ནས་མིག་གཉིས་ལ་མཛུབ་མོ་བཙུགས་ལ་ངག་ཏུ་ཨ་ཞེས་བརྗོད་དེ༔ དེ་ནས་མཛུབ་མོ་ནམ་མཁའ་ལ་བསྒྲེང༔ དེ་ནས་མིག་ནམ་མཁའ་ལ་གཏད་ལ་ཧུར་འདོན༔ ནམ་མཁའ་ནི་ཤིན་ཏུ་རྒྱ་ཆེའོ་ཞེས་ལན་གསུམ་བརྗོད་པར་བྱའོ༔ དེ་ནས་དབང་བསྐུར་ཟིན་ནས༔ ཚོགས་ཕུད་བཅད་ལ་ཚོགས་ལ་རོལ་པར་བྱའོ༔ ལུས་ངག་ཡིད་གསུམ་སྤྱོད་པ་བྱེད་པའི་དུས་ན་སྡིག་པ་ཤས་ཆེ་ཆུང་བླ་མས་ཤེས་པར་བྱས་ལ༔ སྡིག་པ་ཤས་ཆེ་ན་སླར་བསྐྱར་ལ་བྱེད་དུ་གཞུག༔ དེ་ལྟར་ལུས་ངག་ཡིད་ཀྱི་སྒྲིབ་པ་དག་ནས༔ དངོས་གཞི་ཟག་པ་མེད་པའི་རྣལ་འབྱོར་པ་རྣམས་ལ་གདབ་པར་བྱའོ༔ ཤིན་ཏུ་སྤྲོས་པ་མེད་པའི་འཁོར་འདས་རུ་ཤན་འབྱེད་པའི་སྤྱོད་པ་ལག་ལེན་པྲ་ཁྲིད་ཅེས་བྱ་བ༔ བྱེ་མ་ལ་མུ་ཏྲས་མཛད་པ་རྫོགས་སོ༔ ཀུན་ལ་མེད་དེ་སྔགས་ཀྱི་སྲུང་མས་སྲུངས་ཤིག༔ ས་མ་ཡཱ༔ རྒྱ་རྒྱ་རྒྱ༔ ལས་ཀྱི་མཐའ་རབ་ཏུ་ཟབ༔ དེ་བས་རབ་ཏུ་གསང་ངོ༔ དགེའོ༔

ཤིན་ཏུ་སྤྲོས་པ་མེད་པའི་དབང་གི་ཕྲ་ཏིག

༄༅༔ ཤིན་ཏུ་སྤྲོས་པ་མེད་པའི་དབང་གི་ཕྲ་ཏིག་བཞུགས་སོ། །འདིར་སྣང་བྱེད་དུམ་བུ་གསུམ་པ། བཞི་པ། མཇུག་ཏུ་རབ་ཏུ་སྤྲོས་མེད་ཀྱི་དབང་འགྲེ་ཡང་ཡོད། མན་ངག་ང་དྲུག་པ། ༈ ཏྱ།ཏྲགྷབ྄ཉགཱདྷཏྲཊཱཏྱ༔྅྅྅ རྒྱ་གར་སྐད་དུ༔ སརྦ་དུ་ན་ཡོ་གི་ཨབྷི་ཥེ་ཀེ་ཨ་ལོ་ཀ་ཡ་མི༔ བོད་སྐད་དུ༔ ཤིན་ཏུ་སྤྲོས་པ་མེད་པའི་རྣལ་འབྱོར་གྱི་དབང་བསྐུར་བའི་སྒྲོན་མ་སྣང་བྱེད། བཅོམ་ལྡན་འདས་དབང་ལྡན་ཐབས་ཀྱི་ཡབ། བྱ་བྲལ་ཀ་ནས་དག་པའི་ཆོས། །འདུས་མ་བྱས་ལ་ཕྱག་འཚལ་ལོ། །བྱ་རྩོལ་འདས་པ་དབང་གི་ལུགས། །གང་འདིར་འབྲས་བུ་སྨིན་བྱེད་པའོ། །རང་བཞིན་མཆོག་གི་གནས་ལུགས་ཉིད། །མཚོན་པར་བྱ་ཕྱིར་རིག་པ་ཡི། །ཡེ་ཤེས་རྩོལ་སྒྲུབ་བྲལ་བའི་དོན། །སྙིང་པོ་བླ་མེད་སངས་རྒྱས་སར། །ད་ལྟ་ཉིད་དུ་ཐོབ་བྱའི་ཕྱིར། །གསང་སྔགས་ཐབས་ཀྱིས་མཚོན་ཚུལ་ལས། །སྣ་ཚོགས་དཔག་མེད་གསུང་པ་ལས། །གསང་བ་མཆོག་གི་དབང་བསྐུར་བཤད། །ལས་ཅན་རྩོལ་དང་སྒྲུབ་མེད་པའི། །མ་བསྐུར་ཡེ་ནས་རྫོགས་པའི་དོན། །མ་བྱས་བཞག་པའི་རང་བཞིན་ལས། །གསང་ཐོབ་འབྲས་བུ་སྐྱེ་བའི་གནས། །གཞི་ལ་བབས་ཀྱིས་གྲུབ་པའི་ཕྱིར། །རང་བཞིན་རྣམ་པར་དག་པ་ལས། །སྲིད་གསུམ་ཡོངས་སུ་གྲོལ་བའི་གཏེར། །སྟོང་གསུམ་ཡེ་རྒྱས་གདབ་པའི་དབང་། །རིམ་མིན་ཅིག་ཅར་འཇུག་པའི་ཚུལ། །རང་གནས་བབས་ལུགས་ཆེན་པོའི་དབང་། །དབང་པོ་རབ་ཀྱི་ཡང་རབས་ཀྱི། །དོན་དུ་ཡི་གེ་འདི་ཉིད་བཀོད། །ཐོག་མ་དངོས་པོ་གཤིས་ཀྱི་ཡང་། །གཞི་ནས་བབས་ཀྱིས་གྲུབ་པའི་ཕྱིར། །གློ་བུར་བཙན་ཐབས་མ་ཡིན་པར། །རང་ལ་གནས་ལ་རང་རིག་ཉིད། །དབང་པོའི་སྔོན་དུ་ལྟ་དོན་དུ། །གསང་བ་ངེས་པའི་དབང་དོན་འདིས། །ཅིག་ཆར་ཡེ་ཤེས་འཇུག་དོན་དུ། །ལྷ་སྔགས་དལ་དང་རྫས་མེད་པར། །རང་བཞིན་གནས་ལུགས་ཉིད་ཀྱི་ཚིག །དངོས་པོའི་འདུག་ཚུལ་མཚོན་པ་ཡི། །རིག་པ་རྩལ་དབང་བསྐུར་བའི་ཕྱིར། །དང་ལྡན་ཤེས་རབ་བརྩོན་འགྲུས་ལྡན། །སྐལ་ལྡན་ཡིད་ཀྱི་བུ་གཅིག་པོ། །རང་བཞིན་མ་བཅོས་ད་ལ་ལ། །བརྟེན་ནས་ཉམས་སུ་མྱོང་བའི་གནད། །ཤིན་ཏུ་སྤྲོས་མེད་ལ་བརྟེན་ནས། །སྐུ་གསུམ་ཅིག་ཆར་ཐོབ་དོན་དུ། །ཤིན་ཏུ་སྤྲོས་མེད་སྤྱོད་ཅིག་ས་མ་ཡཱ། །འདི་ཉིད་གསང་སྔགས་རྣམས་ཀྱི་བཅུད། །མ་བཙལ་ཡེ་ནས་གནས་པའི་དོན། །རང་ལ་ཡོད་པའི་དོན་ཉིད་ནི། །བརྡ་ལ་བརྟེན་ནས་མིག་ལ་བསྐུར། །ཤེས་རབ་ཀྱིས་ནི་བརྟག་དཔྱད་མིན། །དབང་པོའི་སྒོ་ལ་མངོན་སུམ་དུ། །སྣང་བའི་ཡེ་ཤེས་གཏན་དབབ་ཕྱིར། །འདི་ཉིད་ད་ལ་ནང་དུ་གཞུག །ད་ལ་འཇུག་འདོད་ཡིད་ཀྱི་བུ། །བླ་མ་ལུང་དང་ལྡན་པ་གཅེས། །སྣང་སྣང་བྱས་ན་དངོས་གྲུབ་མེད། །གལ་ཏེ་བླ་མ་ལུང་མི་ལྡན། །དམ་ཚིག་མེད་ཅིང་སྡོམ་པ་མེད། །འཇིག་རྟེན་ནོར་ལ་སེམས་པ་དང་། །གསང་སྔགས་ལུགས་བཞིན་མི་འཛིན་དང་། །རྒྱུད་ལ་དགོངས་པ་མི་གནས་དང་། །རིག་པ་མངོན་སུམ་མ་མཐོང་དང་། །ཚུལ་ཁྲིམས་ཉམས་ཤིང་ངང་ཚུལ་མེད། །རྣམ་སྨིན་བྲལ་བའི་བླ་མ་ཡིས། །སྤྲོས་མེད་དབང་འདི་བསྐུར་བྱས་ན། །ན་རག་ཐུར་ལྟས་དམྱལ་བར་འགྲོ། །ལོག་པར་འདྲེན་པ་ཞེས་བྱའོ། །དེ་ན་ལུང་ལྡན་བླ་མ་གཅེས། །སློབ་མའི་མཚན་ཉིད་སྔར་བཤད་ཀྱང་། །རེ་ཞིག་འདིར་ནི་མདོ་ཙམ་ཞིག །ནན་ཏན་དུ་ནི་འདི་བཤད་བྱའོ། །འཁོར་ལས་ཡིད་དབྱུང་དད་པ་བརྟན། །སྐྱོ་ངལ་མེད་པར་གྱུར་པ་དང་། །འཇིག་རྟེན་བདོག་པ་གཏོང་བར་ནུས། །ཤེས་རབ་བློ་ཆེན་རྒྱས་པ་དང་། །གསང་སྔགས་སྲི་ཞུ་ཁྱད་པར་ཅན། །བླ་མར་གུས་ཤིང་དམ་ཚིག་ལྡན། །ང་རྒྱལ་བྲལ་ཞིང་ཆོག་ཤེས་པ། །སྐྱེ་ཤི་གཉིས་ལ་འཇིགས་པ་དང་། །རྣམ་སྨིན་འཛེམ་ཞིང་ཁྲེལ་ཡོད་པ། །འདི་རྣམས་མི་ལྡན་སློབ་མ་ལ། །གལ་ཏེ་ཟང་ཟིང་བལྟས་ནས་ནི། །དབང་བསྐུར་འདི་ནི་སུས་བྱས་པ། །གཉིས་ཀ་ས་སྤྱོད་མེ་ཡིས་བསྲེག །གདོད་ནས་མ་བཙལ་ཉེས་མེད་དགེ། །གཞི་རྣམས་སྨིན་པར་བྱེད་པ་ལ། །བླ་མ་སློབ་མའི་སྣོད་བཅུད་གཅེས། །དེས་ན་ཐོག་མར་མཁས་པས་བྱའོ། །འདི་གཉིས་སྣོད་དུ་བཅུད་འཛོམ་ན། །གདོན་མི་ཟ་བར་སངས་རྒྱས་འཐོབ། །གལ་ཏེ་བླ་མ་ལུང་ལྡན་ལ། །ཤིན་ཏུ་སྤྲོས་མེད་དབང་ཞུས་ན། །རང་གི་བླ་མ་སྔར་ཡོད་ན། །ཐུན་མོང་དབང་བསྐུར་བསྐྱར་ལ་ཞུ། །བླ་མ་མཉེས་པའི་ཐབས་དག་ནི། །ཇི་ལྟར་བཞེད་པས་མཉེས་བསྙེན་པ་བར་བྱའོ། །སྔ་མའི་བླ་མ་མེད་ན་ཡང་། །དབང་བསྐུར་ཞུ་བའི་བླ་མ་ཡི། །སྐུ་གསུང་ཐུགས་ལ་ཤེས་པ་གཏད། །ཞག་ནི་བདུན་ནམ་བཅུ་གཅིག་ཏུ། །སྤྱི་བོའི་གཙུག་ཏུ་བསྒོམ་པར་བྱ། །རྨི་ལམ་བླ་མ་བྱོན་ནས་ནི། །ཆོས་རྣམས་སྟོན་པ་དག་དང་ནི། །གཞན་གྱིས་སྟོན་པའི་གཟུགས་དག་གིས། །ཆོས་ཉིད་སྟོན་པར་གྱུར་ན་ཡང་། །རབ་ཏུ་དངོས་གྲུབ་འབྱུང་བར་བཤད། །དེ་ནས་བླ་མར་ཉེ་བསྙེན་དབང་བསྐུར་ཞུ། །གལ་ཏེ་དབང་བསྐུར་བླ་མ་ཉིད། །འདི་ལ་ཉམས་སུ་མི་ལེན་ན། །སློབ་མས་དབང་བསྐུར་ཞུ་ཕུལ་ནས། །དུས་ལ་ཕེབས་པའི་སྔོན་དུ་ཡང་། །རང་ལུས་ཁྲུས་ནས་བཏོན་ནས་ནི། །བླ་མ་ལ་ཡང་དབང་བསྐྱར་ཞུ། །འོན་ཏེ་བླ་མ་མི་བཞུགས་ན། །སློབ་མའི་བྱ་བ་ཇི་བཞིན་ནི། །དེ་ནས་སྒྲུབ་པ་དུར་ཁྲོད་དག་སོང་ནས། །སྤྱོད་པ་ཞག་གསུམ་དག་ཏུ་བརྩམ། །དེ་ནས་ལོག་སྒྲུབ་པ་ཆེན་པོ་སྟེ་རི་ཕུག་ཏུ། །ཆོས་ཉིད་མངོན་སུམ་རང་གནད་ལ། །ཞག་ནི་བདུན་ནམ་བཅུ་གཅིག་གམ། །ཉེར་གཅིག་དག་ཏུ་ཉམས་སུ་བླང་། །ཉམས་སུ་བླངས་སམ་ལེན་པ་ན། །སྦྱོར་བ་དེ་ཉིད་དགོས་པ་མིན། །དེ་ནས་རང་དབང་བསྐུར་གི་གནས་ཁང་ངམ། །རི་ཕུག་དབེན་པའི་གནས་དག་ཏུ། །སློབ་མ་གཉིས་དང་གསུམ་ལ་ཡང་། །འབྱུང་བའི་ཁྲུས་ནས་བཏོན་ནས་ནི། །གོས་ནི་གསར་བ་བརྗེས་བྱས་ལ། །དེ་ནས་སློབ་མས་བླ་མ་ཡི། །མདུན་དུ་འདུག་སྟེ་འགྲེང་ཚུགས་ལངས། །ཐལ་མོ་སྙིང་ཁར་སྦྱར་ལ་བྱའོ། །བླ་མས་སློབ་མའི་བགེགས་བསྐྲད་ཕྱིར། །སྟོད་གཡོགས་ད་ནི་ཕུད་ནས་ནི། །ཤར་དུ་ཁ་བལྟས་སྟངས་སྟབས་བྱ། །རྣམ་ཤེས་བརྒྱད་ཀྱི་སྒོ་བསྲུང་ཕྱིར། །ཡི་གེ་བརྒྱད་ཀྱིས་རྒྱས་གདབ་བྱའོ། །སློབ་མའི་སྤྱི་བོའི་གཙུག་ཏུ་ཡང་། །བྷཱུྃ་གཅིག་སྒོམ་ཞེས་ཚིག་བརྗོད་ལ། །བླ་མས་ཏིང་འཛིན་གསལ་བ་ཡིས། །སློབ་མའི་སྙིང་གི་རྩེ་མོ་ན། །དྲ་བ་ཅན་གྱི་རྩ་ནང་དུ། །ཧཱུྃ་དང་ཤེས་པ་བཅས་པ་བཞུག །བུ་ལུས་སྔོ་སྐྱའི་ཧཱུྃ་དང་བསྒོམ། །རྐང་མཐིལ་ཡཾ་ལས་ལྗང་ཁུ་ཆེ། །བུ་ལུས་ཡེ་ཤེས་ཆེན་པོར་བསྒོམ། །ལྟེ་བར་རཾ་དམར་སྔར་དང་མཚུངས། །མགྲིན་པར་ཁཾ་ནི་དུད་ཁའོ། །དཔྲལ་བར་ཨེ་ནི་མཐིང་ཁ་བསྒོམ། །ལྐོག་མར་སུ་ཉིད་སེར་པོའོ། །ཧ་དཀར་པོ་ཞེས་པུས་མོ་ཟེར་ཀྱང་ནུ་མ་གཉིས། གཡས་གཡོན་ལ། །རང་ལུས་གཅེར་བུ་དག་ཏུ་ཕྱུང་། །ཧ་ཧ་ཞེས་ནི་དྲག་ཏུ་བརྗོད། །ཡང་ནི་རྐང་མཐིལ་ཟེར་ཀྱང་སྙིང་ཁ་ཕཊ་ཡིག་ནི། །སྔོ་ནག་འཇིགས་པའི་གཟུགས་སུ་བསྒོམ། །དེ་ནས་སློབ་མ་དེ་དག་ཀུན། །ཟས་དང་སྦྱོར་བ་ཁྱེར་ནས་ནི། །དུར་ཁྲོད་རེ་རེར་བཏང་བའི་ཕྱིར། །རུ་ཤན་འབྱེད་པའི་སྤྱོད་པ་ཡིས། །བསླབ་བྱ་དག་ནི་ལེགས་པར་བྱའོ། །ལུས་དང་ངག་དང་ཡིད་དང་ནི། །སྤྱོད་པའི་རིམ་པ་བསླབ་ནས་ནི། །སོ་སོའི་གནས་སུ་མ་ཕྱིན་པར། །ཕཊ་ཅེས་བཟླས་ཤིང་གཏོར་མ་ཁྱེར། །དེ་ནས་སོ་སོའི་དུར་ཁྲོད་དུ། །ཕྱིན་ནས་གཏོར་མ་རེ་གཏང་སྟེ། །མཁའ་འགྲོ་མ་ལ་གསོལ་བ་གདབ། །བར་ཆད་ཞི་ཞིང་དངོས་གྲུབ་གསོལ། །ཞེས་ནི་གསོལ་བཏབ་ལུས་སྤྱོད་བརྩམ། །སྤྱོད་པ་དེ་ཉིད་ཚར་དུས་སུ། །བག་ཆགས་ཕལ་བ་བཞག་པའི་ཕྱིར། །ཕྱག་དང་བསྐོར་བ་ཕྱག་རྒྱ་དང་། །ཆོས་སུ་འགྲོ་བའི་ལུས་སྤྱོད་བྱའོ། །འདི་དུས་གཉིད་ནི་སྤང་བར་བྱའོ། །དེ་བཞིན་སེམས་སུའང་སྒོམ་སྣ་ཚོགས། །བག་ཆགས་ཕལ་པ་ལ་དགོངས་པའོ། །བླ་མས་ཀྱང་ནི་རི་ཕུག་ཏུ། །ཆོས་ཉིད་མངོན་སུམ་དོན་ལ་བཞག །འདི་ཡི་དུས་སུ་འགྲོ་བ་གཞན། །སུས་ཀྱང་མཐོང་བར་མི་བྱ་ལ། །ངག་ཀྱང་རབ་ཏུ་གཅད་པར་བྱའོ། །དེ་ལྟར་ཞག་གསུམ་རྫོགས་པ་ཡི། །ཉི་མ་རི་བོའི་རྩེར་ཤར་ཚེ། །རང་རང་དག་ཀྱང་མི་འདྲེ་བར། །བླ་མས་ཚོགས་དང་གཏོར་མ་དང་། །མཆོད་པའི་བྱེ་བྲག་སྣ་ཚོགས་བཤམ། །རྟེན་གྱི་མཎྜལ་ཆེན་པོ་ནི། །གྲུ་བཞིའམ་ནི་ཟླུམ་པོ་ལ། །སྣ་ཚོགས་དྲི་ཡིས་ལེགས་བྱུགས་ནས། །མེ་ཏོག་རྣམ་ལྔའི་ཚོམ་བུ་དགྲམ། །མཎྜལ་ལེགས་པར་བཤམས་ནས་སུ། །བླ་མའི་མདུན་དུ་ཕྱག་བྱས་ནས། །ལེགས་པར་ཐལ་སྦྱར་མདུན་དུ་འདུག །བླ་མས་ཚིག་ནི་འདི་སྐད་བརྗོད། །བུ་ཁྱོད་སུ་ཡིན་ཞེས་པ་ནི། །ལན་གསུམ་བར་དུ་བརྗོད་པར་བྱའོ། །སློབ་མས་ཀྱང་ནི་འདི་སྐད་དུ། །ལན་གསུམ་བར་དུ་ལན་ཡང་གདབ། །བདག་སྐལ་ལྡན་སེམས་ཀྱི་བུ་གཅིག་པོ་ལགས། །ཞེས་ནི་ཚིག་གིས་གསལ་ཡང་གདབ། །དེ་ནས་བླ་མས་ལན་འདིའོ། །དེ་ལྟར་ཡིན་ཕན་ཆད་རང་བཞིན་རྫོགས་པ་ཆེན་པོའི་དལ་བཟང་ཞིང་ཉམས་དགའ་བ་འདིར་ཞུགས་ཤིག །ཅེས་བརྗོད་དོ། །དེ་ནས་སློབ་དཔོན་བདག་ཉིད་ཀྱིས། །རང་གི་བླ་མར་གསལ་གདབ་དང་། །རྒྱུད་པའི་བླ་མ་ལ་ཡང་གདབ། །སློབ་མ་དད་པ་སྐྱེད་པ་ལ། །འཁོར་བའི་ཉེས་དམིགས་ཆེར་བཤད་ཅིང་། །སྐུ་གསུམ་འབྲས་བུ་མ་ཐོབ་པར། །གཞན་གྱིས་དགོས་པ་མེད་པར་ནི། །སློབ་མའི་རྒྱུ་ལ་བརྟེན་དུ་གཞུག །དེ་ནས་བླ་མའི་རྗེས་བརྗོད་དེ། །བླ་མའི་རིམ་པ་ལས་གསུངས་པའི། །བླ་མས་གསོལ་བ་གདབ་པར་བྱ། །དེ་ནས་སློབ་མས་མཎྜལ་དབུལ། །སྟོང་གསུམ་འཇིག་རྟེན་ཐམས་ཅད་ཀུན། །གསེར་ལ་སོགས་ཏེ་རིན་ཆེན་ལྔས། །ཡོངས་སུ་གང་བར་དམིགས་ནས་ནི། །བླ་མ་རྡོ་རྗེ་ཅན་ལ་དབུལ། །དེ་ནས་འབྲུ་རྣམས་དེ་བཞིན་ནོ། །དེ་ནས་དྲི་ནི་སྣ་ཚོགས་པ། །དེ་ནས་སྨན་རྣམས་སྣ་ཚོགས་དབུལ། །དེ་ནས་སྟོང་གསུམ་འཇིག་རྟེན་ཀུན། །མེ་ཏོག་སྣ་ཚོགས་དག་ཏུ་དམིགས། །བླ་མ་མཆོད་ཕྱིར་དབུལ་བར་བྱའོ། །དེ་ནས་ནོར་ལ་སོགས་པ་ཡིས། །དབང་བསྐུར་འདོད་ཕྱིར་ཡོན་དབུལ་ལོ། །དེ་ནས་ཡིད་ཀྱི་བུ་གཅིག་པོ། །ལུས་ཀྱི་ཆས་རབ་ཕྱུང་ནས་ནི། །མདུན་དུ་ལངས་ཏེ་འགྲེང་ཚུགས་བགྲང་། །ཐལ་མོ་སྙིང་ཁར་སྦྱར་བྱས་ནས། །ཤེས་པ་ཡེངས་ལ་བོར་ནས་ནི། །བླ་མའི་ཐུགས་དཀྱིལ་སེམས་གཏད་ལ། །གཞན་དུ་ཡེངས་པ་མེད་པར་ནི། །གནད་ཀྱི་མན་ངག་དམ་པའོ། །རིག་པའི་མེ་ཏོག་དབུལ་བར་བྱའོ། །བླ་མས་བུ་སེམས་བཟུང་བའི་ཕྱིར། །ཨ་ཨཱ་ཞེས་ནི་དྲུག་བརྩེགས་སུ། །རབ་ཏུ་དྲག་པོར་བརྗོད་པར་བྱའོ། །ཡེངས་ལ་བོར་བའི་མཚམས་སུ་བརྗོད། །དེ་ནས་ཡིད་ཀྱི་བུ་གཅིག་པོའོ། །ལུས་ནི་གཡོ་འཕར་ཉ་བ་དང་། །ངག་ནི་སྨྲ་ཞིང་འཕར་བ་དང་། །སེམས་ནི་བདེ་བས་མྱོང་ན་ནི། །རིག་པ་ཚུད་པའི་རྟགས་སུ་བཤད། །དེ་ནས་སྟོང་ཉིད་ད་ལ་རུ། །སློབ་མ་དག་ནི་གཞུག་པར་བྱའོ། །ཤར་གྱི་ཕྱོགས་སུ་ཁ་བལྟས་ཏེ། །ནམ་མཁའ་འགྲོ་བར་བསྒོམ་དུ་གཞུག །ངག་ཏུ་ཚིག་ཀྱང་འདི་སྐད་དུ། །དྲག་ཏུ་རྒྱུན་རིང་དྲག་ཏུ་བརྗོད། །ཨེ་མ་སྐལ་ལྡན་ཤར་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་། ཞེས་ནི་བརྗོད་པའི་མཚམས་དག་ཏུ། །འགྲོ་ན་འགྲོ་ས་འདུག་གམ། སླར་ལྡོགས་འདུག་གམ། ཞེས་ནི་ལན་གྲངས་གསུམ་གསུམ་བརྗོད། །དེ་བཞིན་ལྷོ་དང་ནུབ་དང་བྱང་། །ཀུན་ཏུ་བརྗོད་ཅིང་དཀྱིལ་འཁོར་གཞུག །དེ་ནས་བླ་མ་ལ་ཕྱག་བྱ། །བླ་མའི་ལག་པས་ནམ་མཁའ་ལ། །ལམ་གསུམ་དག་ཏུ་གཡུག་པར་བྱ། །དེ་ནས་སྐལ་དང་ལྡན་པ་ལ། །ལྷ་ཡི་ངོ་བོ་བསྟན་པའི་ཕྱིར། །གོས་གྱོན་སྐྱིལ་ཀྲུང་འདུག་པ་ལ། །ནམ་མཁའི་དཀྱིལ་ན་ཉི་མ་ལྔ། །རང་བཞིན་འོད་ནི་སྣ་ཚོགས་འཕྲོ། །འདུག་པ་ཉིད་ལ་སེམས་གཏད་གཞུག །བླ་མས་ཀྱང་ནི་ཚིག་འདི་བརྗོད། །ཨེ་མ་བུ་ཁྱོད་སྐལ་དང་ལྡན། །ནམ་མཁའི་སྟེང་དུ་ཡར་ལྟོས་དང་། །ཉི་མའི་དཀྱིལ་འཁོར་འོད་འཕྲོ་བདེ་ལ་ཤེས་པ་གཏོད་ལ་ཇེ་མཐོ་ཇེ་མཐོར་སོང་ཞིག །ཅེས་ནི་ལན་གསུམ་བརྗོད། འོག་ཏུ་སླར་མ་ལྡོག་ཅིག་ལར་མ་ལྡོག་ཅིག །ཅེས་ནི་བླ་མས་བརྗོད་བྱས་ལ། །ལངས་ཏེ་གྱད་ཀྱི་དོར་སྟབས་འདུག །མཛུབ་མོ་བསྒྲེང་སྟེ་མིག་བཙུགས་ལ། །ཨ་ཨཱ་ཞེས་བརྗོད་ཕྱོགས་བཞིར་བལྟ། །ཡང་ནི་མཛུབ་མོ་ནམ་མཁར་བསྒྲེང་། །མིག་ནི་ཧར་པོ་དག་ཏུ་ལྟ། །ནམ་མཁའ་འདི་ནི་རྒྱ་ཆེ་ཞེས། །ལན་གསུམ་བར་དུ་བརྗོད་པར་བྱ། །དེ་ལྟར་བརྡ་དབང་བསྐུར་དུས་སུ། །ཉམས་སུ་མྱོང་བ་རྟག་ཏུ་སྐྱེ། །གལ་ཏེ་མ་སྐྱེས་སྲིད་ན་ཡང་། །དེ་དག་བརྡ་ནི་བླ་མས་བཀྲོལ། །སོ་སོའི་ཉམས་དང་མཐུན་པར་བཤད། །འདི་དུས་བསོད་ནམས་ཚོགས་བསགས་ཕྱིར། །རྡོ་རྗེ་སྤུན་ནམ་སྲིང་མོའམ། །བླ་མའི་གཟུངས་མ་གྲོགས་མོ་དང་། །འཁོར་དང་ཉེ་འཁོར་སྲས་རྣམས་དང་། །གཞན་ཡང་རྣལ་འབྱོར་ཕ་དང་མ། །དགེ་སློང་དགེ་ཚུལ་དགེ་བསྙེན་ལ། །དགའ་སྟོན་ཆེན་པོ་དེ་བཞིན་ལ། །འབྱོར་པ་ཡོད་ན་ཡོན་དང་བཅས། །འདི་ལྟར་བྱས་པའི་སྐལ་ལྡན་དེ། །མངོན་སུམ་ལམ་ལ་རབ་གོམས་པས། །དགའ་བ་མེད་པར་འདིས་འགྱུར་རོ། །བླ་མ་ལ་ཡོན་མ་ཕུལ་ཞིང་། །སྙིང་རྗེ་དགའ་སྟོན་མ་བྱས་ན། །དབང་རྣམས་ཐོབ་པར་མ་བཤད་དོ། །དེས་ན་དགའ་བའི་སྟོན་མོ་ཡིས། །ལྷག་མ་སྙིང་རྗེའི་མགྲོན་ལ་དམིགས། །བྱ་དང་བྱོལ་སོང་སྣ་ཚོགས་དང་། །དུད་འགྲོའི་སྐྱེ་གནས་རྣམས་ལ་ཡང་། །ཇི་ལྟར་དམིགས་པ་མ་ལོག་པས། །དགའ་སྟོན་ཆེན་པོའམ་དེ་བཞིན་བྱའོ། །དེ་ནས་རྣལ་དུ་འབབས་པ་ཡི། །ཆོ་ག་མཁས་པས་ཞག་གསུམ་བྱའོ། །དེ་ནས་སེམས་ཀྱི་སྣ་ཁྲིད་པའི། །སྔོན་འགྲོ་རྣམས་ལའང་སྦྱང་བར་བྱའོ། །འདིས་ནི་ཤིན་ཏུ་སྤྲོས་པ་མེད། །དབང་བསྐུར་ཆོ་ག་རྣམས་ཕྱེ་བའོ། །ཞེས་དབང་བཀོད་རིན་པོ་ཆེ་ཕྲ་ཏིག །དབང་རྣམ་པར་ཕྱེ་བའི་རིམ་པ་ལས། ཤིན་ཏུ་སྤྲོས་མེད་པ་རྣལ་འབྱོར་གྱི་དབང་བསྐུར་བའི་ཆོ་ག་བསྟན་པའི་དུམ་བུ་ཏེ་གསུམ་པ་རྫོགསསོ། །རྒྱ་རྒྱ་རྒྱ ། སྟོན་པ་སངས་རྒྱས་བཅོམ་ལྡན་འདས། །སྤྲོས་དང་བྲལ་བའི་བདག་ཉིད་ལ། །ལུས་ངག་ཡིད་ཀྱིས་ཕྱག་འཚལ་ལོ། །སངས་རྒྱས་མེད་པའི་སངས་རྒྱས་ཀྱིས། །འཇིག་རྟེན་སྣང་བའི་ཕྱོགས་དག་ནས། །མཚོན་པའི་ཚིག་ནི་མཐའ་ཡས་སུ། །གསུངས་པའི་དོན་ནི་འདི་དོན་དུ། །རྣམ་པར་བསྡུས་ནས་གང་ཟག་ནི། །དབང་པོ་རབ་ཀྱི་ཡང་རབ་ལ། །འདི་ལྟར་རྣམ་པར་གསལ་བ་ནི། །གསང་སྔགས་ཐབས་ཀྱི་རང་བཞིན་ལ། །ཇི་ལྟར་གཞི་ལ་གནས་པའི་ཚིག །འདི་ལྟར་རྣལ་འབྱོར་རང་རྒྱུད་ལ། །རྣམ་པར་མཚོན་པའི་ཚིག་ཏུ་ཡང་། །རིམ་པ་ཇི་ལྟར་གསལ་བར་བྱེད། །སྣང་དང་མུན་པའི་སྒྲ་ཉིད་ནི། །འདི་ལྟར་དབང་གི་རྣམ་པར་སྤོང་། །རྗེས་སུ་གཟུང་བར་བྱ་བའི་ཕྱིར། །རིགས་ལྡན་དད་མཆོག་ལྡན་པའི་བུ། །སྐལ་བ་མཆོག་དང་ལྡན་པ་ཡི། །སྙིང་དང་འདྲ་བ་གཅིག་དང་གཉིས། །གསུམ་ལས་མང་ན་མཁའ་འགྲོ་མས། །ལུས་ངག་ཡིད་ལ་འཚེ་བར་འགྱུར། །གཉིས་སམ་གསུམ་གྱི་དོན་དུ་ནི། །འདི་ཉིད་རྣམ་པར་བཀོད་བའོ། །འདིར་ནི་ཤིན་ཏུ་སྤྲོས་པ་མེད་པའི་རྣལ་འབྱོར་པ་རྣམས་ཀྱི་དབང་གི་དོན་རྣམ་པར་བཤད་པར་བྱའོ། །དེའང་སློབ་དཔོན་དང་སློབ་མའི་མཚན་ཉིད་ནི་གཞུང་ནས་བཤད། ལུང་དང་མི་ལྡན་པ་གང་རུང་གིས་ནི་བྱ་བ་མ་ཡིན་ནོ། །དེའི་ཕྱིར་ན་སློབ་མ་དད་པ་དང་ལྡན་པ་དེས་ཀྱང་རབ་ཏུ་བརྟགས་ཤིང་དབང་ལ་འཇུག་པར་བྱའོ། །འདི་ནི་ཐེག་པ་ཐུན་མོང་པ་རྣམས་ཀྱི་དབང་དང་མི་འདྲ་སྟེ། ཐེག་པ་ཐུན་མོང་བ་རྣམས་ནི་སྣང་བ་འདི་ཉིད་ཀྱི་དོན་དུ་ཡིན་གྱི། རིག་པ་ཡེ་ཤེས་མངོན་སུམ་དུ་ག་ལ་སྲིད་དེ། ཤེས་རབ་ཀྱི་ནི་སྤྱོད་ཡུལ་དུ་ཡང་གཏན་ལ་མི་ཕེབས་པའི་ཕྱིར་རོ། །འདིའི་སློབ་དཔོན་སླའི་དེ་ཅིའི་ཕྱིར་ཞེ་ན་འཇིག་རྟེན་འདིའི་དོན་ལས་སྟོན་མི་ནུས་པས་འཇིག་རྟེན་འདིའི་བློ་ཅན་རྣམས་ཀྱིས་བྱས་ཀྱང་ཉེས་དམིགས་ཆུང་། འདི་ཉིད་རང་གི་སྤྲོས་བཅས་ཀྱི་དབང་ཡང་ཉེས་དམིགས་ཆུང་ངོ་། །འདིས་ཀྱང་རིག་པ་མངོན་སུམ་དུ་གཏན་ལ་ཕེབས་པ་མ་ཡིན་པས་སོ། །དེས་ན་བླ་མ་མཚན་ཉིད་དང་ལྡན་པ་རབ་ཏུ་གཅེས་སོ། །དེ་ནི་སྔོན་དུ་སློབ་མའི་བློའི་འཕེན་པ་ཉིད་རིག་པར་བྱའོ། །དེ་ལྟར་མཚན་ཉིད་དང་ལྡན་པའི་སློབ་དཔོན་གྱིས། །གཉིས་པ་སློབ་མའི་མཚན་ཉིད་བརྟག་པའི་ཕྱིར། །དབང་བསྐུར་བའི་ཞུ་བ་ཕུལ་ནས་ལོ་གསུམ་གྱི་བར་དུ་མཚན་ཉིད་བརྟག་ཅིང་དད་པ་སྐྱེ་བའི་ཚིག་དང་། འཁོར་བ་ལས་བློ་ལྡོག་པའི་ཆོས་ཀྱི་ཚིག་དུམ་རེ་བཤད་ཅིང་བརྟག་གོ། །དེ་ཉིད་སྣོད་དང་མི་ལྡན་ན་སྤྲོས་མེད་མན་ཆད་ཀྱི་དབང་ལས་རྣམ་པ་ཐམས་ཅད་དུ་མི་བསྐུར་རོ། །འདི་ནི་ཟག་པ་རྣམས་ཟད་པར་བྱེད་པའི་དོན་ཡིན་པས་གང་ཞིག་ཟག་པ་ལ་མངོན་པར་དགའ་བ་རྣམས་ཀྱི་སྤྱོད་ཡུལ་ནི་མ་ཡིན་ནོ། །དེ་ལས་ལོག་གསུམ་གྱིས་སློབ་མའི་མཚན་ཉིད་བརྟགས་ནས། ད་ནི་དམ་ཚིག་དང་ལྡན་པའི་སྐལ་ལྡན་ལ་དབང་བསྐུར་སྔོན་དུ་བླ་མའི་བྱ་བ་བསྟན་པ་ནི། དོན་གསུམ་པ་རྩོལ་བ་དང་བྲལ་བའི་བསྙེན་པའི་མན་ངག་ནི། རང་གི་བླ་མ་མཉེས་པར་བྱ་ཞིང་། དེ་ཉིད་ཀྱི་རྟགས་ལ་ཕེབས་པར་བྱེད་པ་བསྙེན་པ་བསྐྱལ་བའི་མན་ངག་ཏུ་གསུངས་པ་ཡིན། འདི་ལ་ལྷ་དང་སྔགས་མེད་ཅིང་སྤྲོས་པ་མེད་ཀྱིས། ཐུན་མོང་པ་འདི་ཀུན་གྱི་བསྙེན་པ་ནི་བྱ་བྱེད་བཅས་པ་སྟེ། བྱས་པ་གང་ཡིན་པ་འཇིགས་པས་ན། བྱར་མེད་འཇིགས་བྲལ་གྱི་བསྙེན་པས་སྟོང་གསུམ་ཐམས་ཅད་གཞི་བཞེངས་སུ་བྱས་ནས་རང་གི་ངག་དག་པར་བྱེད་པའི་ཡན་ལག་ཏུ་བསྟན་པ་ཡིན་པས་ངག་མ་དག་ན། སེམས་ཅན་གྱི་དོན་བྱ་བར་ནུས་པ་མ་ཡིན་ནོ། །འདིས་ངག་དག་པར་བྱེད་པའོ། །དེ་ལྟར་ངག་དག་པར་བྱས་ནས་ནི་སེམས་འཇུག་པར་བྱེད་པའི་ཡན་ལག་ཏུ་བསྟན་པ་ཡིན་གྱི་ད་ནི་སེམས་ཅན་དེ་དག་ཞུགས་ནས། ལུས་ངག་ཡིད་གསུམ་གྱི་སྤྱོད་པས་ལུས་ངག་ཡིད་གསུམ་གྱི་ཞེན་པ་བཟློག་པར་བྱས་ནས། སློབ་མའི་ནུས་པ་བསྐྱེད་པའི་རྩོལ་བ་དང་བྲལ་བའི་ཉེ་བར་བསྙེན་པ་སྟེ། དོན་བཞི་པ་སྒྲུབ་པ་ནི་གསང་བ་ཡི་གེ་མ་རུའི་སྤྱོད་པ་རྣམས་སྤྲོས་པ་ཉེ་བར་ཞི་བའི་དོན་དུ་བསྟན་པའོ། །འདི་ནི་ཚིག་ལ་སོགས་པའི་སྤྲོས་པ་དང་རབ་ཏུ་བྲལ་བས་ན་ལུས་ངག་ཐ་དད་དུ་འཛིན་པའི་ཞེན་པ་རང་ལོག་ནས། ཕྱིས་སྐྱེ་བའི་ལུས་ངག་ཡིད་ཀྱི་རྒྱུ་རྐྱེན་འགག་པར་བྱེད་པའི་མན་ངག་ཏུ་བསྟན་པའོ། །འདིར་ནི་དེ་ལྟར་ལུས་ངག་ངོ་བོར་ཡོད་པས་དངོས་པོ་ནི་དངོས་པོ་ཉིད་ཀྱི་དག་པས་ན་སྟོང་པས་ནི་མ་ཡིན་ནོ། །དངོས་པོའི་སྤྱོད་པ་འདི་དག་ནི་ལུས་ངག་རྣམས་རང་ཟད་ལ་བཏང་བའི་ཕྱིར་ལུས་ངག་ཡིད་ཀྱི་དྲི་མ་དག་པར་བྱས་པའི་སློབ་མ་ལ་ནུས་པ་འཇུག་པར་བྱེད་པའོ། །དྲི་མ་རྣམས་དག་པར་བྱེད་པའི་དག་བྱེད་ནི་སློབ་དཔོན་གྱིས་གོང་དུ་བསྟན་ཟིན་ཏོ། །དེ་ལྟར་རྟགས་བྱུང་ནས་སློབ་མ་ངེས་པའི་དོན་ལ་འཇུག་པའི་དགོས་པ་ཡོད་དོ། །དེ་ནས་དོན་ལྔ་པ་སྒྲུབ་པ་ཆེན་པོ་སྤྲོས་པ་མེད་པའི་མན་ངག་དུ་བསྟན་པ་ནི། ཡང་སྤྱོད་པའི་གནས་ལས་འཕོས་ནས། གསང་བ་ཡི་གེ་མ་རུའི་དངོས་གཞིའི་མན་ངག་རྣམས་ལ་ཉམས་སུ་བླང་བ་ནི། དབང་པོ་རབ་འབྲིང་རྣམས་ཞག་གི་གྲངས་ཞག་བདུན་ནམ། བཅུ་གཅིག་གམ། ཉེར་གཅིག་གིས་རང་གི་རིག་པ་མངོན་སུམ་ལ་གོམས་པར་བྱེད་པ་ནི། སློབ་མའི་རིག་པ་ཉིད་བརྟན་པར་བྱ་བའི་དོན་ཡིན་ཏེ། འདི་ལྟར་དགོངས་པ་དང་མི་ལྡན་ན། སྐལ་ལྡན་ལ་ངེས་ཤེས་མི་སྐྱེ་བའི་ཕྱིར་རང་གི་རིག་པ་ཉིད་དགོངས་པ་ལ་གནས་ནས། སློབ་མའི་རིག་པ་ཉིད་ཟིན་དུ་སྟོན་པའི་ཕྱིར་ན་ཤིན་ཏུ་སྤྲོས་པ་མེད་པའི་གྲུབ་པ་ཆེན་པོ་ཞེས་བྱ་སྟེ། འདི་ཉིད་ལ་བསྐྱེད་པའི་རིམ་མེད། ལྷའི་སྐུ་ཡང་གསལ་བར་བྱར་མེད། དེ་ཉིད་ལ་མཆོད་པ་འབུལ་དུ་མེད། དེ་ཉིད་ལ་བརྟེན་པའི་སྔགས་དང་། བསྒྲུབ་པའི་སྔགས། རྩ་བའི་སྔགས་དང་། དལ་མེད་པས་དལ་གྱི་ལྷ་ལས་དབང་བསྐུར་བླང་དུ་མེད་པ་དང་། བུམ་པའི་རྫས་མེད་པའི་ཕྱིར་རྫོགས་པ་ཆེན་པོ་རང་བཞིན་གྱི་དབང་བསྐུར་བ་ཤིན་ཏུ་སྤྲོས་པ་དང་བྲལ་བའི་གནད་ཡིན་པས་ན། སྒྲུབ་པ་ཆེན་པོ་དེ་དག་ཀུན། བླ་མའི་བྱ་བར་བསྟན་པའོ། །ད་ནི་དྲུག་པ་དབང་བསྐུར་དངོས་གཞི་ལ་འཇུག་པའི་ཕྱིར་ན་སློབ་མའི་བྱ་བའི་མན་ངག་བསྟན་པར་བྱའོ། །དེ་ཡང་འདི་ལྟ་སྟེ། སློབ་མ་ཀུན་དྲི་སྣ་ཚོགས་དང་། མེ་ཏོག་སྣ་ཚོགས་པའི་སིལ་མ་དང་། ཆུ་དང་། འོ་མ་དང་། མར་དཀར་པོ་བསྲེས་པའི་ཆུའི་ཁྲུས་ནས་ཨ་ཨ་ཞེས་བརྗོད་ཅིང་བཏོན་ལ། ཆུ་དེ་ལ་ཡང་དབུགས་རེ་ལ་ཨ་ཉེར་ཅིག་གིས་རྒྱས་བཏབ་ལ་འཕྲལ་བྱུང་གི་དྲི་མ་དག་པར་བྱེད་པའོ། །དེ་ནས་གོས་གསར་བ་བརྗེད་ཏེ་གྱོན་ལ། འཇིག་རྟེན་གྱི་བར་ཆད་བསྲུང་བའི་འཁོར་ལོ་གདགས་པ་ནི། ཡི་གེ་བརྒྱད་ཀྱིས་རྣམ་ཤེས་བརྒྱད་ཀྱི་གནས་བརྒྱད་དུ་རྒྱས་གདབ་པ་ནི། འདི་ནི་འཇིག་རྟེན་གྱི་བགེགས་ཀྱི་ནུས་པ་མི་སྐྱེ་བར་བྱ་བའི་ཕྱིར་དང་། སློབ་མ་རང་གི་རྣམ་པར་ཤེས་པ་ཚོགས་བརྒྱད་ཀྱི་ཡུལ་ལ་མི་སྐྱེ་བར་བྱ་བའི་དོན་ཡིན་ནོ། །དེ་ནས་ཡི་གེ་བརྒྱད་ཀྱི་ཐ་མ་ཕཊ་ཡིག་ངག་ཏུ་ཡང་བཟླས་སུ་གཞུག་གོ། །དབུགས་རེ་ལ་ཉེར་གཅིག་རེ་བཟླས་ཤིང་དུར་ཁྲོད་དུ་བཏང་ངོ་། །དེ་ནས་སློབ་མས་དུར་ཁྲོད་དུ་ཕྱིན་པ་དང་། ཤ་སྣ་ཚོགས་པའི་གཏོར་མ་དང་། མེ་ཏོག་སྣ་ཚོགས་པའི་གཏོར་མ་གཉིས་ཀྱིས་མཁའ་འགྲོ་མ་ལ་མཆོད་ལ། བདག་གི་བར་ཆད་ཉེ་བར་ཞི་བར་གྱིས་ཤིག་པར་གསོལ་བ་བཏབ་ལ། ལུས་རུ་ཤན་འབྱེད་པའི་སྤྱོད་པ་ལ་ཞག་གཅིག་ཏུ་བྱ། འཇོག་པའི་མཚམས་སུ་ལུས་ཀྱི་དགེ་སྦྱོར་དུ་འགྲོ་བའི་སྤྱོད་པ་བྱའོ། །དེ་ནི་བག་ཆགས་འཇོག་པའམ་ལས་ཀྱི་འཕྲོ་མཐུད་པའོ། །དེ་ལ་ནི་དགོས་པ་གཉིས་ཡོད་དེ་ཐུན་མོང་དང་མཆོག་གི་དགོས་པའོ། །ཐུན་མོང་གི་ལས་གསུམ་སྟེ། ལུས་ཀྱི་བར་ཆད་ཉེ་བར་ཞི་བས་ལུས་ཀྱི་ལས་ཐམས་ཅད་འགྲུབ་པའི་དགོས་པ་དང་། དེ་ལྟར་བྱས་པས་ལུས་ཀྱི་ཞེན་པ་ལྡོག་པའི་དགོས་པ་དང་། དེ་གཉིས་ཀྱི་ཐུན་མོང་དུ་གསང་སྔགས་ཀྱི་ཐབས་ཁྱད་པར་ཅན་ལ བ་རྟེན་ནས་ལུས་ཀྱི་སྡིག་པ་མ་ལུས་པར་འདག་པའི་དགོས་པ་ཡོད་དོ། །མཆོག་གི་དགོས་པ་ནི། དེ་ལྟར་ལུས་ཀྱི་ཞེན་པ་ལ་བརྟེན་ནས་ལུས་འཁོར་བའི་ལུས་རུ་ཤན་བྱེད་པས་ལུས་ཁམས་གསུམ་གྱི་ལུས་ལ་མི་འཇུག་པའི་དགོས་པ་དང་། དེ་ཉིད་ཁམས་གསུམ་དུ་མ་ཞུགས་ནས་གང་དུ་སོང་ཞེ་ན། ལུས་སྤྲུལ་པའི་སྐུར་འགྲོ་བའི་དགོས་པ་དང་། དེ་གཉིས་ཀྱི་ཐུན་མོང་དུ་སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་ཡོངས་སུ་མྱ་ངན་ལས་འདའ་བར་འགྱུར་བའི་དགོས་པ་ཡོད་དོ། །དེ་ནས་ངག་ཏུ་ཤན་འབྱེད་པའི་སྤྱོད་པ་ཞག་གཅིག་ཏུ་བྱ། ཐ་མ་ལ་ངག་གི་དགེ་སྦྱོར་དུ་འགྲོ་བའི་སྤྱོད་པའོ། །དེ་ལ་དགོས་པ་དྲུག་པོ་རྩིའོ། །དེ་ནས་སེམས་རུ་ཤན་འབྱེད་པའི་སྤྱོད་པ་ལ་ཞག་གཅིག་བྱ། ཐ་མ་སེམས་ཀྱི་དགེ་སྦྱོར་དུ་འགྲོ་བའི་སྤྱོད་པ་བྱའོ། །འདི་ལ་དགོས་པ་དྲུག་སྟེ། དེས་ལུས་ངག་ཡིད་གསུམ་སྐུ་གསུམ་དུ་གྲོལ་བས་ན་རབ་ཏུ་ཟབ་བོ། །དེ་ནི་ཕྱིས་སློབ་མའི་ལུས་ངག་ཡིད་གསུམ་འཁོར་བར་ལྡོག་མི་སྲིད་པའི་དོན་དུ་བསྟན་པའོ། །དེ་ནི་ཐུན་མོང་དང་སྦྱར་ན་སློབ་མ་སྟ་གོན་ལ་གནས་པའི་ཆོ་ག་ཞེས་བྱའོ། །དེ་ཉིད་ཀྱང་ཕྱིས་གཞན་ལ་རག་ལས་པའི་འབད་བཅས་མ་ཡིན་པར་རྣལ་འབྱོར་པའི་རང་གི་སྤྱོད་ཡུལ་དུ་བསྟན་པ་ཡིན་གྱི་གཟན་གྱི་རྩོལ་སྒྲུབ་ཏུ་མ་ཡིན་ནོ། །དེ་ནས་སློབ་མ་རང་གི་བྱ་བ་རྫོགས་པར་བྱས་ནས། བླ་མ་ལ་ཤིན་ཏུ་སྤྲོས་པ་མེད་པ་རང་བཞིན་རྫོགས་པ་ཆེན་པོའི་དབང་ཞུ་བའི་དོན་དུ་འཕངས་པའི་ནོར་གྱིས་གཅེས་པའི་མན་ངག་ཐོབ་པར་བྱ་བའི་ཕྱིར་རང་གི་ཡིད་དུ་འོང་བ་བླ་མ་ལ་བཞེད་པ་མེད་ཀྱང་དབུལ་བར་བྱ་བ་ནི། འཇིག་རྟེན་ལས་འདས་པའི་དངོས་གྲུབ་ཐུན་མོང་མ་ཡིན་པ་ཐོབ་པར་བྱ་བའི་དགོས་པ་ཡོད་པ་ཡིན་ནོ། །གསེར་ལ་སོགས་པ་རིན་པོ་ཆེའི་མཎྜལ་ཕུལ་བས་ནི་ཡེ་ཤེས་ལྔའི་ངོ་བོ་ལ་ལོངས་སྤྱད་པར་བྱ་བའི་དགོས་པའམ་བརྡའ་ཡིན་ནོ། །འབྲུ་རྣམ་པ་ལྔའི་མཎྜལ་ནི་དེ་ལྟར་ཡེ་ཤེས་ལྔ་ལ་ལོངས་སྤྱད་པས་འབྲས་བུ་ལྔར་དོན་གཅིག་པའི་བརྡའ་ཡིན་ནོ། །དྲི་ལྔའི་མཎྜལ་ཕུལ་པས་ནི་ཆོས་ཉིད་སྟོང་པ་ཉིད་ཀྱི་ཡེ་ཤེས་ལྔའི་དྲིས་ལུས་སེམས་ཚིམས་པར་མཛོད་ཅིག་པའི་བརྡའ་ཡིན་ནོ། །སྨན་སྣ་ཚོགས་པའི་མཎྜལ་ཕུལ་བས་ནི་བདག་གི་ལུས་ལ་ཕྱི་ནང་གི་སྡུག་བསྔལ་རྣམས་དང་བྲལ་བར་མཛོད་ཅིག་པའི་བརྡའ་ཡིན་ནོ། །མེ་ཏོག་སྣ་ཚོགས་པའི་མཎྜལ་ཕུལ་བས་ནི་སྣང་བ་ཐམས་ཅད་འོད་ལྔའི་མེ་ཏོག་གིས་གང་ཞིང་རྒྱས་པར་མཛོད་ཅིག་པའི་བརྡའ་ཡིན་ནོ། །དེ་ནས་སློབ་མ་ལ་བླ་མས་བརྡའ་བསྟན་ནས། བླ་མས་ཀྱང་བརྡའ་དེ་རྣམས་ཀྱི་དོན་བཤད་པར་བྱའོ། །དེ་ནི་མཆོག་གི་དངོས་གྲུབ་ཐོབ་པའི་དོན་དུ་ཡིན་གྱི། ཐུན་མོང་གི་དངོས་གྲུབ་ཚེ་གཅིག་ལ་རང་གི་ནོར་འཕེལ་བའི་དོན་དུ་ནོར་དང་། དེ་ཉིད་ཟད་མི་ཤེས་པའི་ཕྱིར་ན་རིན་པོ་ཆེ་དང་། མུ་གེའི་རིགས་དང་བྲལ་བའི་ཕྱིར་ན་འབྲུ་དང་། དབང་པོ་གསལ་བའི་ཕྱིར་ན་དྲི་དང་། ནད་ཀྱི་སྡུག་བསྔལ་ལས་གྲོལ་པའི་ཕྱིར་ན་སྨན་དང་། ཤེས་རབ་དང་དད་པ་ཕུན་སུམ་ཚོགས་པའི་ཕྱིར་ན་མེ་ཏོག་དང་། དེ་དག་གི་ཐུན་མོང་དུ་ཐོབ་པར་བྱ་བའི་ཕྱིར་བླ་མ་ལ་དབུལ་ལོ། །དེ་ནས་བླ་མའི་མན་ངག་གིས་སློབ་མ་ལ་ངེས་ཤེས་བཙན་ཐབས་སུ་བསྐྱེད་པའི་ཕྱིར་བླ་མས་སློབ་མ་རྗེས་སུ་བཟུང་བ་ནི་འཁོར་བ་ལས་བཟུང་ནས་མྱ་ངན་ལས་འདས་པའི་སར་སྒྲོལ་བའི་ཕྱིར་དབང་བསྐུར་དངོས་གཞིའི་གདམས་ངག་བསྟན་པ་ནི། རྗེས་སུ་འཇུག་པའི་སློབ་མ་ལ་ལུས་ངག་ཐ་དད་དུ་འཛིན་པའི་ཉོན་མོངས་པ་ཡོད་པའི་ཕྱིར་རེ་ཞིག་བསྟན་པའི་ཚུལ་ཙམ་ཞིག་དགོས་ཏེ། གནས་པའི་རྟེན་གཞི་མཚོན་པར་བྱེད་པའི་ཕྱིར། དྲི་སྣ་ཚོགས་པའི་མཎྜལ་ཟླུམ་པོ་ཤིན་ཏུ་ཡིད་དུ་འོང་བ་ཞིག་བྱ། དེ་ལ་མེ་ཏོག་ལྔའི་ཚོམ་བུ་ཁ་དོག་རེས་གཙོ་བྱས་པའི་ལྔ་ཚན་ལྔ་བཀྲམ་པ་ནི། སྣང་བ་འདི་ལ་རིགས་ལྔའི་དལ་དང་དབྱེར་མེད་པར་གྱུར་ཅིག་པའི་བརྡ་ཡིན་ནོ། །དེ་ལྟར་སྣང་བ་འདི་ཉིད་ལ་ལོངས་སྤྱོད་པའི་སྐུ་ཐོབ་པར་འདུག་པ་ལ་བདུད་སྡིག་ཅན་འཁོར་བ་ལ་ཞེན་ཅིང་དགའ་བ་རྣམས་ཀྱིས་བར་དུ་གཅོད་པ་ཉེ་བར་ཞི་བར་བྱ་བའི་ཕྱིར་འཕགས་པ་རྣམས་ལ་མཆོད་པའི་བྱེ་བྲག་རྣམས་དང་། མཁའ་འགྲོ་མ་རྣམས་དང་ཆོས་སྐྱོང་རྣམས་ལ་གཏོར་ཚོགས་ཀྱང་ཤིན་ཏུ་བཟང་བར་བཤམས་པ་ནི་རྣལ་འབྱོར་པའི་བར་ཆད་ཞི་བར་བྱ་བའི་དོན་དུའོ། །དེ་ལྟར་བྱས་ལ་རང་བླ་མའི་ལུས་ངག་ཡིད་ལ་གསལ་གདབ་པ་ནི། འདི་ནི་བླ་མའི་ནུས་པ་བསྡུ་བར་བྱ་བའི་དོན་ཡིན་ནོ། །དེ་ཡང་། བླ་མ་རྡོ་རྗེ་འཛིན་པ་རྣམས་དགོངས་སུ་གསོལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ་རྡོ་རྗེ་དང་རིན་པོ་ཆེ་དང་པདྨ་དང་ལས་དང་བདེ་བར་གཤེགས་པའི་རིགས་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ། བླ་མ་རྡོ་རྗེ་འཛིན་པ་ཆེན་པོས་བདག་གི་ལུས་བྱིན་གྱིས་བརླབ་ཏུ་གསོལ། བདག་གི་ངག་བྱིན་གྱིས་བརླབ་ཏུ་གསོལ། བདག་གི་ཡིད་བྱིན་གྱིས་བརླབ་ཏུ་གསོལ། བདག་གི་སྣང་བ་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་རྒྱས་པར་ཆེར་འཕེལ་བར་མཛད་དུ་གསོལ། ཞེས་གསོལ་བ་གདབ། བརྒྱུད་པའི་བླ་མ་ལ་གསོལ་བ་གདབ་པ་ནི། ཀྱཻ་སངས་རྒྱས་ཀུན་གྱི་སྐུ་གསུང་ཐུགས་ལྡན་པ། །ཟག་པ་རང་ཟད་དབྱིངས་ནས་སྐུ་གཤེགས་པའི། །དྲི་མ་རང་དག་དབྱིངས་ནས་སྤྱན་གཟིགས་ནས། །ཐུགས་རྗེ་རང་ཤུགས་ཆེན་པོས་འགྲོ་བའི་དོན་མཛད་པའི། །བདེ་གཤེགས་འཇིག་རྟེན་མཁྱེན་པའི་ཐུགས་མངའ་བ། །དགོངས་པ་ཉག་གཅིག་མི་གཡོ་དབྱེར་མེད་ཀྱང་། །སྔོན་བཞུགས་དུར་ཁྲོད་གནས་ནས་རྗེས་དགོངས་ལ། །རང་བཞིན་མཛད་པ་གང་ཡང་མི་མངའ་ཡང་། །བདག་བློ་མོས་པའི་དོན་ཕྱིར་འདིར་གཤེགས་ཤིག །ཨེ་མ་ཧོ། བྱིན་རླབས་བརྒྱུད་པའི་རྩ་བ་བླ་མ་བརྒྱུད་པ་ཡི། །རིམ་པ་གཉིས་ཀྱི་རིམ་ནས་རིམ་ཞུགས་པའི། །བདག་ཉིད་ཆེན་པོ་རོ་ལངས་བདེ་བ་དང་། །མཁྱེན་པའི་ཐུགས་ནི་རབ་ཏུ་སྦྱངས་དང་ལྡན། །མཁྱེན་རབ་སྤྲུལ་པ་མཉྫུ་ཤྲཱི་མི་ཏྲ་དང་། །ཐུགས་རྗེ་ཆེན་པོས་འགྲོ་བའི་སྡུག་བསྔལ་གཅོད། །རྗེ་བཙུན་ཐུགས་རྗེ་མཆོག་ལྡན་ཤྲཱི་སིདྷ་དང་། །མཁས་པ་ཐེག་པ་ཡོངས་ཀྱི་སྒྲོ་འདོགས་རབ་ཆོད་པ། །འཇིག་རྟེན་མུན་པ་སེལ་མཛད་ཛྙཱ་ན་སཱུ་ཏྲ་དང་། །སྐྱེ་ཤི་ཀུན་བྲལ་ཚེ་ལ་དབང་ཐོབ་པའི། །མཁས་པ་ཆེན་པོ་བི་མ་མི་ཏྲ་དང་། །མཉམ་བཞག་རྗེས་ལ་དབྱེར་མེད་པའི། །སེམས་ལ་དབང་ཐོབ་ཏིང་འཛིན་བཟང་པོ་དང་། །རང་རྒྱུད་འཁྲུལ་པ་བློ་ལ་མི་གནས་པའི། །བདུད་རྩིའི་བཅུད་སྟོན་ལྡང་མ་ལྷུན་རྒྱལ་དང་། །མཁའ་འགྲོས་ལུང་བསྟན་རྗེས་སུ་བཟུང་བ་ཡི། །གྲུབ་ཐོབ་འཁྲུལ་བ་ཞིག་པའི་ལྕེ་བཙུན་སེང་དབང་དང་། །བྱང་ཆུབ་སེམས་དཔའི་སྤྲུལ་བས་འགྲོ་བ་འདྲེན་མཛད་པའོ། །བླ་མ་རྗེ་བཙུན་སྤྲུལ་སྐུ་ཞང་ཉིད་དང་། །རང་རྒྱུད་བཅིགས་པ་ཉིད་ལས་བརྒལ་མཛད་པའོ། །བླ་མ་མཁས་པ་ཉི་འབུམ་དང་། །ཐེག་ཆེན་རྫོགས་ཆེན་སྙིང་པོ་དར་མཛད་པའི། །སངས་རྒྱས་བརྒྱུད་འཛིན་གུ་རུ་ཇོ་འབེར་དང་། །བྱང་ཆུབ་སེམས་འབྱོངས་འགྲོ་བའི་དཔལ་གྱུར་བའོ། །འཁྲུལ་ཞིག་ཆེན་པོ་དྲིན་ཅན་བླ་མ་དང་། །གསལ་སྟོང་དབྱེར་མེད་བདེ་བའི་དོན་རྟོགས་པའི། །ཟླ་བ་མུན་སེལ་མཁས་པའི་རྣལ་འབྱོར་དང་། །སྐུ་གསུམ་ཀློང་དུ་འཁྲུལ་པ་རང་ཞིག་པའི། །ཀུ་མ་རཱ་ཛ་མགོན་པོ་ཐུགས་རྗེ་ཅན། །མཁས་པ་དགོངས་པ་མི་འགྱུར་ཐུགས་ལ་གཡོ་མེད་རྣམས། །འབྱུང་བ་རང་དེངས་ཟག་མེད་དབྱིངས་བཞུགས་ཀྱང་། །སྔོན་གྱི་ཐུགས་རྗེ་ཆེན་པོ་ཉིད་གཡོས་ལ། །ཐུགས་རྗེ་མཆོག་གིས་བདག་ལ་དགོངས་ཤིག་བྱིན་གྱིས་རློབས། །ཨཱོཾ་ཨཱ་ཧཱུྃ་གུ་རུ་སིདྡྷི་ཧཱུྃཿ ཨཐྎ༔ ཨཱོཾ་ཨཱཿཧཱུྃཿདམ་པ་སངས་རྒྱས་ཀུན་གྱི་ཞལ་མཐོང་བདུད་རྩིའི་རོ་ལྡན་པའི། །རོ་ལངས་བདེ་བ་ལྷ་ཡི་ལྷ་མཆོག་ཉིད། །སངས་རྒྱས་སྤྲུལ་པ་འགྲོ་བའི་གདུང་བ་སེམས་མཛད་པ། །དམ་པ་བདུད་རྩི་ཉེ་བ་ཉིད་ལ་ཕྱག་འཚལ་བསྟོད། །དམ་པ་དེ་ཡི་རྗེས་འཛིན་འཇམ་དཔལ་སྐུར་སྤྲུལ་པའི། །ཉོན་མོངས་རང་དག་མཁྱེན་པའི་ཐུགས་དང་ལྡན། །གསུང་གི་འོད་ལྡན་འགྲོ་བའི་སྡུག་བསྔལ་གཅོད། །དམ་པ་ཡིད་བཞིན་མྱུ་གུ་དེ་ལ་ཕྱག་འཚལ་བསྟོད། །སྤྲུལ་པ་དེ་ཡི་གདུང་འཛིན་མཁས་པ་སྡེ་སྣོད་རྣམས་ཀྱི་བདག །ཐུགས་རྗེ་ཆེན་པོའི་སྤྲུལ་པ་འཛམ་གླིང་ཀུན་གྱི་རྒྱན། །དྲི་མེད་གསུང་མངའ་འགྲོ་བ་ངལ་གསོའི་གནས། །དམ་པ་ཤེས་རབ་མྱུ་གུ་དེ་ལ་ཕྱག་འཚལ་བསྟོད། །དེ་རྗེས་འཛིན་པ་མཁས་པ་འཇིག་རྟེན་གསུམ་གྱི་མགོན། །རྡོ་རྗེ་སེམས་དཔའི་སྤྲུལ་པས་བདག་བློའི་འཆིང་གཅོད་པ། །ཚངས་པའི་གསུངས་མངའ་འགྲོ་བ་ཀུན་ཡིད་འཕྲོག །དམ་པ་བདེ་བའི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་གདུང་འཛིན་མཁས་བློ་སྐྱེ་བ་གྲངས་མང་སྦྱངས། །མཁྱེན་པ་རབ་ལྡན་སྡེ་སྣོད་ཀུན་ལ་རྨོངས་པ་མེད། །སྐྱེ་ཤི་གཉིས་མེད་སྤྲུལ་བས་འགྲོ་དོན་མཛད། །དམ་པ་བདེ་གསལ་མྱུ་གུ་ཉི་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་གསང་སྔགས་ཤེ་ཡི་སྤྱན་མངའ་བ། །མི་རྟོག་བཟང་པོས་ཐུགས་ཀྱི་གནོད་སྤྲོས་ནས། །འཛམ་གླིང་འགྲོ་རྣམས་བསམ་པའི་རྒྱུད་མཁྱེན་པའི། །དམ་པ་རྟོག་མེད་མྱུ་གུ་མགོན་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་སྐལ་ལྡན་ཆོས་ཀྱི་མཛོད་མངའ་བ། །བསྟན་པའི་སྲོག་འཛིན་འགྲོ་བའི་མུན་པ་སེལ། །བདེ་གཤེགས་བཀའ་དང་བླ་མའི་སྙིང་བཅུད་དྲིལ། །དམ་པ་པདྨའི་མྱུ་གུ་མགོན་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་གསང་སྔགས་གདམས་ངག་ཀུན་གྱི་མཛོད་མངའ་བ། །གྲུབ་པ་མཐར་ཕྱིན་གྲུབ་ཐོབ་ཀུན་གྱི་རྗེ། །དམ་པ་བདེ་གཤེགས་ལམ་དུ་སློང་ལ་ཕྱག་འཚལ་བསྟོད ། །དམ་པ་དེ་ཡིས་རྗེས་འཛིན་རྗེ་བཙུན་འགྲོ་བ་རྣམས་ཀྱི་མགོན། །གསང་སྔགས་རྣམས་ལ་དབང་བསྒྱུར་ལུང་བསྟན་རྗེས་སུ་འཛིན། །མངོན་སུམ་དོན་སྟོན་མ་རིག་མུན་པ་སེལ། །ཞེ་སྡང་རྡོ་རྗེ་ཉིད་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་འཁོར་བའི་སྐྱབས་གནས་དཔའ་བོ་ཉིད། །འགྲོ་བ་རྣམས་ཀྱི་མགོན་པོ་དྲི་མ་མེད་པ་ཡི། །རྫོགས་ཆེན་གནད་བསྡུས་ངེས་པའི་སྙིང་པོ་སྟོན། །དམ་པ་སྐུ་གསུམ་ལམ་དུ་སློང་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་འཁོར་བའི་ཉེས་སྐྱོན་རང་སར་དག །མན་ངག་སྙིང་པོའི་བཅུད་ཕྱུང་མངོན་སུམ་དོན་སྟོན་པ། །འགྲོ་རྣམས་བླ་མེད་སངས་རྒྱས་མཆོག་ལ་འགོད་མཛད་པའི། །དམ་པ་ངེས་དོན་བརྒྱུད་འཛིན་རྣམས་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་བྱང་སེམས་སྒྲུབ་པའི་རྒྱལ་པོ་ཉིད། །ཡེ་ཤེས་ཉིད་མའི་འོད་ཀྱིས་ཕྱོགས་བཅུ་ཀུན་ཏུ་ཁྱབ། །མ་རིག་མུན་སེལ་རྟོག་བྲལ་དྲིན་ཅན་བླ་མ་རྗེ། །དམ་པ་ཐུགས་མངའ་བདག་ཉིད་དེ་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་ཐེག་པའི་བློ་གྲོས་ཅན། །འཕྱུགས་མེད་གདམས་པའི་གནད་ཀྱིས་འཁྲུལ་མེད་བཙན་ས་ཟིན། །ཟང་ཐལ་དོན་རིག་ལྔ་ལྡན་འོད་དུ་འབར། །དམ་པ་སྐྱེ་བ་རང་སར་དག་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་གདམས་པ་མ་ལུས་མཁྱེན། །ཆོས་ཉིད་ཡངས་པའི་ངང་ནས་རང་གྲོལ་ལམ་དུ་སློང་། །ཐུགས་རྗེའི་འོད་མངའ་དྲིན་ཆེན་ཆོས་ཀྱི་རྗེ། །དམ་པ་རིག་སྟོང་རང་སར་གྲོལ་ལ་ཕྱག་འཚལ་བསྟོད། །གུས་པས་གསོལ་འདེབས་ཐུགས་རྗེས་བྱིན་གྱིས་བརླབ་ཏུ་གསོལ། །ཨཐྎ༔ ཨཱོཾ་ཨཱཿཧཱུྃ༔ གུ་རུ་ན་མོ། དྷ་རྨཱ་ཀཱ་ཡ་ས་མནྟ་བྷ་དྲ༔ བཛྲ་བྷ་གི་ཤུ་ན་མོ། སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ སཾ་བྷོ་ཀཱ་ཡ་བཛྲ་དྷ་རི་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ནིརྨཱ་ཀཱ་ཡ་བཛྲ་ས་ཏྭ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ བཛྲ་པཱ་ཎི་ན་མོཿ སརྨཱ་ར་ཐ་མ་སིང་མ་ཧཱ་སིད་ཏི་ས་མ་ཡཱཿ སྲ་ཛྙཱ་བྷ་བཱ་གུ་རུ་ན་མོཿ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཿ བཛྲ་ཤྲཱི་ཤྲཱི་མི་ཏྲ་གུ་རུ་ན་མོཿ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ ཤྲཱི་སིང་ཧ་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ཛྙཱ་ན་སཱུ་ཏྲ་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ བཱི་མ་ལ་མི་ཏྲ་གུ་རུ་ན་མོ༔ སརྨཱ་ཱར་ཐ་ཡ་སེང་མ་ཧཱ་སིད་ཏི་ས་མ་ཡཱ༔ ས་མ་ཏི་བྷ་དྲ་གུ་རུ་ན་མོ༔ སརྨཱ་ཱར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ བྷ་ཧྲཱིཿརེ་ཧེ་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ སྭ་ཏི་བཛྲ་གུ་རུ་ན་མོ༔ སརྨཱ་ཱར་ཐ་ཡ་སིང་མ་ཧཱ་སིང་ཏི་ས་མ་ཡཱ༔ སིང་ཧཱ་ཤྭ་ར་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིང་ཏི་ས་མ་ཡཱ༔ སཱུརྱ་ལཀྵ་གུ་རུ་ན་མོ༔ སརྨཱ་ཱར་ཐ་ཡ་སིང་མ་ཧཱ་སིད་ཏི་ས་མ་ཡཱཿ གུ་རུ་ཇོ་འབེར་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ཡོ་གི་ཛྙཱ་ན་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ དྷེ་ཀེ་བཛྲ་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིང་ཏི་ས་མ་ཡཱ༔ ཀུ་མ་རཱ་ཛ་གུ་རུ་ན་མོ༔ སརྨཱ་ར་ཐ་ཡ་སིང་མ་ཧཱ་སིང་ཏི་ས་མ་ཡཱ༔ ཨཱོཾ་ཨཱཿཧཱུྃ༔ ཨེ་མཿ དམ་པ་སངས་རྒྱས་ཐམས་ཅད་སྐྱེས་མཛད་ངོ་བོ་ཉིད་ཀྱི་རྗེ། །སངས་རྒྱས་སྟོང་གི་དཀྱིལ་འཁོར་ཉིད་ལ་དབང་སྒྱུར་བླ་མ་ཉིད། །བཛྲ་བྷ་བྷ་ལྷ་རྗེ་དཔའ་བོ་ཉིད་ཀྱི་ཞལ། །བདག་བློའི་གཏི་མུག་འཇོམས་ཕྱིར་བསྟན་དུ་གསོལ། །འཇིག་རྟེན་དྲི་མའི་སྐྱོན་མེད་ཉེས་པ་ཀུན་ལས་གྲོལ། །རང་གི་རྒྱུད་དག་སངས་རྒྱས་སུམ་སྟོང་གི། །ཐུགས་ལ་མངའ་མཛད་མཉྫུ་ཤྲཱི་མི་ཏྲའི་ཞལ། །བདག་བློའི་ཞེ་སྡང་འཇོམས་ཕྱིར་བསྟན་དུ་གསོལ། །སངས་རྒྱས་ཐུགས་རྗེ་ཆེན་པོའི་གསུང་གི་འོད་ཟེར་ཅན། །འཇིག་རྟེན་ཚངས་པའི་གསུང་གིས་འགྲོ་བ་འདམས་ནས་འདྲེན། །ཤྲཱི་སིང་ཧ་རྡོ་རྗེ་མི་འགྱུར་མཉམ་པ་ཉིད་ཀྱི་ཞལ། །བདག་བློའི་ང་རྒྱལ་ཟད་མཛད་བསྟན་དུ་གསོལ། །ཐེག་པའི་དོན་རྣམས་ཉིད་ཀྱི་ཐུགས་ལ་ཇི་བཞིན་སྣང་སྟོན་པ། །མི་བསྐྱོད་ཡེ་ཤེས་འགྲོ་བའི་དོན་ལ་བརྩོན་པ་དམ་པ་རྗེ་ཡི་སྐུ། །ཛྙཱ་ན་སཱུ་ཏྲ་འཇིག་རྟེན་རྨོངས་པ་མེད་པའི་ཞལ། །བདག་བློའི་འདོད་ཆགས་ཟད་མཛད་བསྟན་དུ་གསོལ། །ཐུགས་རྗེ་མི་མཐུན་སྒྲ་ཚིག་མང་པོ་ཡིས། །འགྲོ་མགོན་ཡེ་ཤེས་ཉི་མའི་འོད་ཀྱིས་འཛམ་གླིང་ཀུན་ཏུ་སྣང་། །བི་མ་མི་ཏྲ་སྐྱེ་ཤི་ཀུན་བྲལ་ཞལ། །བདག་བློའི་ཕྲག་དོག་ཟད་མཛད་བསྟན་དུ་གསོལ། །དགོངས་པ་བར་མཚམས་མེད་པས་རླུང་གི་འགྲོ་འོང་ཟད། །གཉིས་མེད་དག་པས་གང་ཡང་གྲོགས་སུ་སྣང་། །ཏིང་འཛིན་བཟང་པོ་གཟུང་འཛིན་བྲལ་བའི་ཞལ། །བདག་བློའི་ཁོང་ཁྲོ་ཟད་མཛད་བསྟན་དུ་གསོལ། །ཆོས་ཀུན་མཉམ་པ་ཉིད་དུ་རབ་རྟོགས་པའི། །བདག་གཞན་གཉིས་ཀྱི་ཞེན་པ་རྒྱུན་གཅོད་པའི། །ལྷུན་གྱི་རྒྱལ་མཚན་གཟི་བརྗིད་ཆེན་པོའི་ཞལ། །བདག་བློའི་དུག་ལྔ་ཞི་མཛད་བསྟན་དུ་གསོལ། །ལུས་ངག་ཡིད་ཀྱི་ཞེན་པ་རང་ལོག་སྟེ། །ཉམས་ལེན་མཐར་ཕྱིན་སྣང་བ་ཟད་སར་སྐྱོལ། །སེང་གེ་དབང་ཕྱུག་འཁྲུལ་སྣང་དག་པའི་ཞལ། །བདག་བློའི་འཁྲུལ་སྣང་འཇོམས་ཕྱིར་བསྟན་དུ་གསོལ། །རྡོ་རྗེ་ཐེག་པའི་སྙིང་པོ་གསང་སྔགས་སྡོང་པོར་གྲགས། །སྐྱེ་མེད་དོན་རྟོགས་སྣང་བ་ལམ་དུ་སློང་། །བཀྲ་ཤིས་མི་འགྱུར་རྡོ་རྗེ་འཆང་གི་ཞལ། །བདག་བློའི་ཉོན་མོངས་བར་ཆད་བཟློག་ཏུ་གསོལ། །རྫོགས་ཆེན་འདོད་པ་བློ་ཡིས་ངེས་རྟོགས་པའི། །འཁོར་བའི་ཉེས་སྐྱོན་མ་ལུས་ཀུན་བསལ་བའི། །རྗེ་བཙུན་སྤྲུལ་སྐུ་དོན་ཡོད་རྡོ་རྗེའི་ཞལ། །བདག་བློའི་འཁོར་བའི་ཉེས་སྐྱོན་བསལ་དུ་གསོལ། །འཁོར་བ་མུ་མཐའ་མེད་པའི་ཀློང་དཀྱིལ་ནས། །ཆོས་ཉིད་དག་པས་ཀུན་གསལ་གཅིག་ཏུ་རྟོགས། །བྱར་མེད་རྩོལ་སྒྲུབ་ལྷུག་པར་སྟོན་པའི་ཞལ། །བསྒོམ་བློའི་བཟང་རྟོགས་ཟད་མཛད་བསྟན་དུ་གསོལ། །རྫོགས་ཆེན་དོན་སྒོམ་མཛད་པས་ཞིང་ཁམས་མཐའ་རུ་རྒྱས། །སྐུ་ལྔ་རང་ལ་རྫོགས་པས་སངས་རྒྱས་འདོད་པ་སྟོར། གཞི་མེད་རྩ་བྲལ་ཀུན་ཏུ་བཟང་པོའི་ཞལ། །འཛིན་རྟོག་ཟད་སར་སྐྱོལ་མཛད་བསྟན་དུ་གསོལ། །མྱུར་ཟབ་གདམས་པ་ཀུན་ཐོབ་སངས་རྒྱས་རང་ལས་རྙེད། །བྱར་མེད་ལྷུག་པར་བཞག་པས་སྤང་བྱ་ཀུན་དང་བྲལ། །ཚོགས་བསགས་རྒྱལ་པོ་རང་རིག་དྲི་མེད་ཞལ། །སྙིང་པོ་འོད་འབར་གསལ་མཛད་བསྟན་དུ་གསོལ། །ཀུན་བཟང་ཀློང་ལས་རྟོགས་པའི་འོད་འབར་ཞིང་། །འཛིན་མེད་རང་གྲོལ་ཟང་ཐལ་ཆོས་ཀྱི་རྗེ། །ཀུ་མ་རཱ་ཛ་འགྲོ་བའི་མགོན་པོ་པདྨའི་ཞལ། །བདག་བློའི་སྒྲིབ་གཉིས་མུན་པ་བསལ་ཕྱི་བསྟན་དུ་གསོལ། །ཨཱོཾ་ཨཱཿཧཱུྃ་སྭཱ་ཧཱ། དེ་ལྟར་ཚིག་གིས་ཀྱང་གསོལ་བ་བཏབ་ནས། དོན་གྱི་ཀྱང་ལུས་ངག་ཡིད་གསུམ་ཤིན་ཏུ་གདུང་པའི་སྒོ་ནས་གསོལ་བ་གདབ་པ་ནི། བླ་མ་བརྒྱུད་པའི་རང་ཤུགས་ཀྱིས་བྱིན་རླབས་འཇུག་པའི་སྒོ་ནས་བསྟན་པ་ཡིན་ནོ། །སྐབས་འདིར་རྡོ་རྗེའི་གླུ་བླངས་ཀྱང་ལེགས་པ་ཡིན་ནོ། །དེ་ལྟར་བརྒྱུད་པའི་གསོལ་ཚིག་སློབ་མ་ལ་ལན་གསུམ་བརྗོད་དུ་གཞུག །དེ་ལྟར་གསོལ་བ་ལན་གསུམ་གདབ་པ་ནི། དེ་ལ་སྤྲོས་པ་མེད་པའི་ནང་དུ་གཞུག་པའི་ཚིག་ཏུ་བསྟན་པ་ཡིན་གྱིས། དེ་ནས་བླ་མས་སློབ་མ་ལ་ཆོས་སྐུའི་ངོ་བོ་མ་མཐོང་བར་དུ་གཞན་ཅིས་ཀྱང་དགོས་པ་མེད་སྙམ་པ་རྒྱུད་ལ་བརྟན་དུ་གཞུག་པ་ནི་འཁོར་བའི་བྱ་བ་ལས་བློ་ལྡོག་པའི་དགོས་པའོ། །དེ་ནས་བླ་མས་སློབ་མ་རེ་རེ་ལ་དབང་བསྐུར་བ་ནི། གཅིག་པུར་བསྡད་ན་ཡེ་ཤེས་འཕེལ་བའི་གྲོགས་ཡིན་ནོ་བའི་བརྡའོ། །བུ་ཁྱོད་སུ་ཡིན་ཞེས་པ་ནི་འཁོར་བ་རང་རྒྱུད་དུ་འཛིན་པའི་མིང་སྤོངས་ཞེས་པའི་བརྡའ་ཡིན། སློབ་མས་བླ་མ་ལ་མཎྜལ་ཕུལ་བ་ནི་གུས་པའི་ཚུལ་ཡིན། རིག་པའི་མེ་ཏོག་ཕུལ་བ་ནི། ཁྱད་པར་གྱི་དོན་ཏེ་བླ་མའི་རིག་པ་དང་གཉིས་མི་ཕྱེད་པར་མཉམ་པའི་དོན་ཡིན་ནོ། །གཅེར་བུར་ཕྱུང་བ་ནི་རིག་པ་ལ་འཁོར་བའི་ཉེས་པ་མེད་དོ་བའི་བརྡའ་ཡིན་ནོ། །ལུས་འགྲེང་ཚུགས་སུ་འདུག་པ་ནི། རྟག་ཏུ་ནམ་མཁའ་དང་འབྲལ་བར་མ་བྱེད་པའི་བརྡའ་ཡིན། རྐང་པ་གཉིས་གཤིབས་པ་ནི་ལུས་ཐབས་ཤེས་རབ་མིག་ཡིན་པས་མིག་ལ་ཤེས་པ་མ་འགྱུར་བར་ལྟོས་ཤིག་པའི་བརྡའ་ཡིན་ནོ། །ཐལ་མོ་སྙིང་ཁར་སྦྱར་བ་ནི་རིག་པ་ཡེ་ཤེས་སྙིང་ན་གནས་པའི་བརྡའ་ཡིན། བླ་མའི་སྙིང་གི་དཀྱིལ་དུ་ཤེས་པ་གཏོད་པ་ནི་བླ་མའི་ཐུགས་དང་གཉིས་སུ་མེད་པའི་བརྡའ་ཡིན། སེམས་གཞན་དུ་མ་ཡེངས་པར་གྱིས་ཤིག་ཅེས་པ་ནི་རིག་པ་རྡོ་རྗེ་ལུ་གུ་རྒྱུད་ལ་མ་ཡེངས་པར་ལྟོས་ཤིག་ཅེས་པའི་བརྡའ་ཡིན་ནོ། །བླ་མ ས་བུའི་ཤེས་པ་མི་བཏང་བའི་ཕྱིར། ཨ་ཨ་ཞེས་རླུང་དང་བཅས་ཏེ་བཅུག་པས་མ་བྱས་པའི་ཡེ་ཤེས་རང་བབས་སུ་སྐྱེ་བའི་བརྡའ་ཡིན་ནོ། །སློབ་མའི་ལུས་ངག་ལ་རྟགས་གཡོ་བ་འབར་བ་ནི་ཡེ་ཤེས་རང་ལུགས་སུ་འབབ་པའི་རྟགས་ཡིན་ནོ། །དེ་ནས་བླ་མས་རང་བཞིན་རྫོགས་པ་ཆེན་པོའི་དབང་གིས་བུའི་ངེས་ཤེས་བསྐྱེད་པའི་དོན་དུ་དབང་བསྐུར་བ་ནི། རང་གི་མདུན་དྲང་པོར་ལུས་གོང་ལྟར་བྱེད་དུ་བཅུག་སྟེ་འདུག་པ་ནི། ལུས་ཀྱི་གནད་མ་གཏན་ན་ཡེ་ཤེས་མངོན་དུ་མི་སྣང་ངོ་ཞེས་པའི་བརྡའོ། །བླ་མའི་ཁ་ཤར་དུ་སློབ་མའི་ཁ་ནུབ་ཏུ་བལྟས་ཏེ་ཨེ་མ་ལ་སོགས་པའི་ཚིག་ང་རོ་དང་ལྡན་པར་བརྗོད་ནས་ཤར་དུ་སོང་དང་ཞེས་པས་སློབ་མ་ཉིད་དལ་དུ་འཇུག་པའི་བརྡའ་ཡིན་ནོ། །དེའི་རྗེས་ལ་འགྲོ་ན་འགྲོ་ས་འདུག་གམ་ཞེས་པའི་བརྡས་བསྟན་པ་ཡིན། དེ་ལྟར་ཕྱོགས་བཞིར་བྱེད་པ་ནི་དལ་གྱི་སྒོ་བཞི་ནས་འཇུག་པའོ། །བླ་མའི་ཕྱག་ནམ་མཁའ་ལ་ལན་གསུམ་གཡུགས་པ་ནི་རང་བཞིན་གྱི་དལ་སྐུ་གསུམ་སྟོང་པར་གཅིག་པའི་བརྡའ་ཡིན་ནོ། །ཚིག་ཏུ་ནམ་མཁའ་ལ་ལྟོས་དང་ཞེས་པ་ནི་མ་བྱས་པའི་རིག་པ་ཡེ་ཤེས་ཀྱི་ལྷ་ངོ་བསྟན་པ་ཡིན་ནོ། །ཡང་ནམ་མཁའ་ལ་ཡར་ཉི་མ་དེ་ལ་ཤེས་པ་གཏོད་ཅེས་པའི་ཚིག་དེ་ཉིད་ཡེ་ཤེས་ལྔའི་སྣང་བ་ཡིན་པས་དེ་ལས་ཕྱིར་མ་ལྡོག་ཅིག་ཅེས་པའི་བརྡའ་ཡིན་ནོ། །བླ་མས་གཡས་བརྐྱང་བ་ནི་འཁོར་བའི་སྤྲོས་པའོ། །གཡོན་བསྐུམས་པ་ནི་འདས་པའི་སྣང་བ་ལ་བག་ཡངས་སུ་སྤྱོད་ཅིག་པའི་བརྡའོ། །མིག་ལ་མཛུབ་མོ་བཙུགས་པ་ནི་ཡེ་ཤེས་མིག་ནས་འཆར་བའི་བརྡའོ། །ངག་ཏུ་ཨ་བརྗོད་པ་ནི་འདི་ལ་ཉམས་སུ་བླངས་ན་སྐྱེ་མེད་མྱུར་དུ་ཐོབ་པའི་བརྡའོ། །ཁ་ཕྱོགས་བཞིར་བལྟ་བ་ནི་སྣང་བཞིའི་རིམ་པར་འཆར་བའི་བརྡའོ། །མཛུབ་མོ་ནམ་མཁའ་ལ་བསྒྲེང་བ་ནི་ལུ་གུ་རྒྱུད་ནམ་མཁའ་ལ་སྣང་བའི་བརྡའོ། །མིག་ཧར་པོར་བལྟ་བ་ནི་འདི་ལྟར་ཡིན་ནོ་བའི་བརྡའོ། །ངག་ཏུ་ནམ་མཁའ་རྒྱ་ཆེའོ་ཞེས་པ་ནི་འདི་ལྟར་བྱས་ན་སྣང་བ་འདི་རང་ཟད་ལ་འགགས་ནས་ཡེ་ཤེས་ཀྱི་སྣང་བ་སྐྱེ་བའི་བརྡའོ། །དེ་ལྟར་དབང་བསྐུར་བའི་དུས་ནི་གོང་དུ་བླ་མས་བསྟན། དེ་ལྟར་དབང་བསྐུར་ནས་རིག་པ་མངོན་སུམ་གྱི་གདམས་པ་ཉམས་སུ་ལེན་དུ་གཞུག་གོ། །འདི་ལྟར་བྱས་ན་བླ་མ་དང་། སློབ་མ་གཉིས་ཀ་སངས་རྒྱ་བ་ལ་ཐེ་ཚོམ་མེད་དོ། །ཞེས་དབང་རྣམ་པར་ཕྱེ་བ་དབང་གི་འཕྲ་ཏིག་རྣམ་པར་བཀོད་པ་ལས། སྣང་བྱེད་སྒྲོན་མ་ཞེས་བྱ་བའི་དུམ་བུ། སློབ་དཔོན་བྱེ་མ་ལས་མཛད་པ་སྟེ། དུམ་བུ་བཞི་པ་རྫོགས་སོ། །྅྅྅ དཔལ་མཆོག་དྲི་མེད་སྟོན་པ་རྡོ་རྗེ་འཆང་། །སྐྱེ་བ་བཞི་ཡིས་བསྡུས་པའི་སེམས་ཅན་ཀུན། །མ་སྨིན་སྨིན་བྱས་ཐར་ལམ་མཆོག་ལ་བཀོད། །དབང་མཛད་ཐུགས་རྗེ་ཅན་ལ་ཕྱག་འཚལ་ལོ། །དེ་ལ་གང་ཟག་དད་པ་ཅན་ཆོས་ཉིད་སྟོང་ཉིད་དང་དབྱེར་མི་ཕྱེད་པར་བྱ་བའི་ཕྱིར། དབང་བཞི་པོ་འདི་དག་ཀྱང་སོ་སོའི་དུམ་བུ་གོ་རིམ་གྱི་ཞག་དང་ཟླ་བ་དང་ལོ་ལ་སོགས་པ་རྣམས་ཀྱིས་བར་བཅད་ལ། སོ་སོའི་ཆོ་ག་རྫོགས་པར་བྱས་ལ་དབང་བསྐུར་བར་བྱའོ། །འདིར་ནི་རབ་ཏུ་སྤྲོས་པ་མེད་པའི་རིགས་འབྱེད་སྣང་བ་ཐམས་ཅད་ཁ་བསྒྱུར་ནས་ཡེ་ཤེས་དག་པའི་ལམ་དུ་སློང་བའི་ཆོས་ཉིད་ཀྱི་ཚད་འཁྲུལ་པ་ཡེ་ཤེས་འཆར་བའི་གནད་ནི། དེ་ཡང་། བྱ་བྲལ་ལྷུན་རྫོགས་ངང་ལ་ཕྱག་འཚལ་ལོ། །ལ་སོགས་པ་ནི། རྫོགས་པ་ཆེན་པོའི་གནད་རྫོགས་པས་རང་སྣང་ལ་ཐོབ་པས་གཞན་གྲོལ་བའི་གནད་དོ། །དེ་ཡང་ལུས་ཀྱི་འདུག་སྟངས་ལ་བརྟེན་ལ་ལུས་ཕྱིའི་བྱ་བ་དང་བྲལ་བས་ཕྱིའི་ཡུལ་ལ་མི་ལྟ། སེམས་སྐྱེ་མེད་ཀྱི་གནད་ལ་གཏད་དེ་སེམས་རྟོག་པ་ཐ་དད་དང་བྲལ་བས་ཕྱིའི་སེམས་ལ་མི་ལྟའོ། །འདིའི་དུས་ན་ཚོགས་དང་གཏོར་མ་ལ་སོགས་པའི་སྤྱོད་པ་ནི་ཁྱད་པར་གྱི་འདུ་བ་ཞེས་བྱ་བ་སྟེ། རང་ལ་འབྱོར་པ་ཅི་ཡོད་པས་བླ་མ་དང་འཕགས་པ་མཁའ་འགྲོ་མ་དང་རྣལ་འབྱོར་ཕ་དང་མའི་ཚོགས་རྣམས་མཆོད་ན་འདས་པ་དང་མ་འོངས་པ་དང་ད་ལྟའི་ཉེས་པ་རྣམས་སྐོང་ཞིང་ལེགས་པ་རྣམས་ཐོབ་ཅིང་བསོད་ནམས་དང་། ཡེ་ཤེས་ཀྱི་ཚོགས་གཉིས་འཕེལ་ལ། ཐུན་མོང་གི་དགེ་བ་ལ་བརྟེན་ནས་ཁྱད་པར་ཀྱི་འབྲས་བུ་ཉིད་དུ་རྫོགས་པར་ངེས་པས་ན་མཆོག་ཏུ་བཟང་ངོ་། །གཞན་ཡང་འགྲོ་བ་ཕལ་བ་རྣམས་ལ་བཟའ་བ་དང་བཏུང་བ་རྣམས་ཀྱིས་མགུ་བར་བྱས་པ་ནི་དུས་མ་ཡིན་པར་གཞན་དུ་གསེར་དངུལ་ལ་སོགས་པ་རིན་པོ་ཆེའི་ཕུང་པོ་དཔག་ཏུ་མེད་པ་སྦྱིན་པ་བྱིན་པ་བས་འདིའི་དུས་ན་འབྲས་ཀྱི་ཟེག་བདུན་བདུན་བྱིན་པ་ཚོགས་རྫོགས་པར་འགྱུར་རོ། །སོ་སོའི་སྐྱེ་བོ་ལ་སོགས་པ་མི་མེད་པའི་རི་བོའི་སུལ་ལ་སོགས་པར་དབང་བསྐུར་བ་ནི་གསང་སྔགས་ཀྱི་དོན་གསང་བས་འགྲུབ་པ་ཉིད་དོ་མཆོག་གི་དངོས་གྲུབ་ལ་དགོས་པའོ། །གཏོར་མ་ཆེན་པོ་ལ་སོགས་པས་མཁའ་འགྲོ་མ་ལ་སོགས་མགུ་བར་བྱེད་པ་ནི་ཐུན་མོང་གི་དངོས་གྲུབ་འབྱུང་ཞིང་ལུང་སྟོན་པར་འགྱུ་བ་ལ་དགོངས་པའོ། །བླ་མ་ལ་གསེར་གྱི་མཎྜལ་འབུལ་བ་ནི་བསྟན་པའི་བདག་པོའི་ཁ་དོག་ཅི་འདྲ་བའི་སངས་རྒྱས་ཀྱི་ཚོགས་རྣམས་དང་ལྷན་ཅིག་ཏུ་སྤྱོད་པའི་དོན་ནོ། །བླ་མས་ཁ་ཤར་དུ་ལྟ་བ་ནི་ཉམས་ཀྱི་སྣང་བ་འཆར་བར་བྱེད་པའོ། །སློབ་མ་ཁ་ནུབ་ཏུ་ལྟ་བ་ནི་ཉོན་མོངས་པ་འགག་ཅིང་ནུབ་པའི་ལྟས་སོ། །སློབ་མ་བདེ་ལུགས་སུ་འདུག་པ་ལ་སོགས་པ་ནི་ལུས་ངག་བདེ་བའི་འཁོར་ལོར་འཇུག་པར་བྱེད་པའི་གནད་དོ། །བུ་ཁྱོད་སུ་ཡིན་ཞེས་པ་ནི་སྟོང་པ་ཆེན་པོའི་སྣང་བས་མཚོན་པར་བྱེད་པའོ། །སྐལ་ལྡན་སེམས་ཀྱི་བུ་ལགས་ཞེས་པ་ནི། སྤྲོས་བཅས་ཀྱི་དུས་ན་ལུས་ལས་བསྐྱེད་ལ། སྤྲོས་མེད་ཀྱི་དུས་ན་བླ་མའི་ངག་ལས་བསྐྱེད་ལ། ཤིན་ཏུ་སྤྲོས་པ་མེད་པའི་དུས་ན་ཡིད་ལས་བསྐྱེད་ལ། འདིར་སེམས་ཉིད་སྟོང་པ་ངོས་གཟུང་བྲལ་བ་ལས་བསྐྱེད་ནས། སེམས་ཉིད་མཚན་ཉིད་ཇི་ལྟར་རྟོགས་ཏེ་སངས་རྒྱ་བའི་གནད་དོ། །དེ་ཡང་འདུག་སྟངས་ཤེས་པས་ལྟ་སྟངས་ཤེས། དེ་ཤེས་པས་ཆོས་ཉིད་མངོན་དུ་མཐོང་བས་སོ། །བླ་མས་རྗེས་གནང་བྱིན་པ་ནི་སེམས་ཀྱི་མཚན་ཉིད་ཀྱི་གོ་ཕྱེ་བའོ། །བླ་མ་ལ་སེམས་ཀྱི་དལ་དུ་འཇུག་པར་གསོལ་བ་འདེབས་ལ་སོགས་པ་ནི། བླ་མ་དམ་པ་སྐུ་དྲིན་ཅན་གྱི་སྤྲོས་བཅས་ཀྱི་དུས་ན་བདག་ལ་རྡུལ་ཚོན་གྱི་དལ་བསྟན། སྤྲོས་མེད་ཀྱི་དུས་ན་ལུས་ཀྱི་དལ་བསྟན། ཤིན་ཏུ་སྤྲོས་པ་མེད་པའི་དུས་ན་བདག་རང་གི་ངག་གི་དལ་བསྟན། འདིར་བདག་རང་གི་སེམས་ཀྱི་དལ་སྟོན་ཅིག་ཅེས་པའི་དོན་ཏོ། །བླ་མས་རྗེས་གནང་གི་སྐབས་སུ་བུའི་ཤེས་པ་ཡེངས་ལ་བོར་ནས་སྐད་ཅིག་ལ། སེམས་གང་ཡིན་ཞེས་པའི་དུས་སུ་སེམས་ཀྱི་མཚན་ཉིད་ཅེར་མཐོང་དུ་མཐོང་བའི་ཉམས་མྱོང་བསྐྱེད་པའོ། །སེང་གེ་ལྟ་བུའི་འདུག་སྟངས་ནི་རྐང་པའི་མཐིལ་གཉིས་ས་ལ་ཕབ་པས་གཡོ་བར་བྱེད་པའི་རླུང་ནོན། ལུས་ཀྱི་ཆ་བསྲངས་པས་རླུང་བདེ་ལུགས་སུ་འབྱུང་བའི་དགོས་པ་ཡོད། མགོའི་རྩལ་མཇིང་པ་ལ་བསྐུར་བས་རྩའི་ནང་ནས་རྒྱུ་བའི་རྣམ་པར་རྟོག་པ་འགག །ལག་པ་ཁྱི་ཚུགས་སུ་འདུག་པས་བར་གཅོད་འཇིགས་པ་མི་འབྱུང་ངོ་། །གླང་པོ་ཆེའི་ལྟ་སྟངས་ལ་སོགས་པའི་བརྡས་མཚོན་པའོ། །དེ་ཡང་སེམས་ཀྱི་དལ་སྒོ་བཞི་ནས་བཅུག་པས་འདི་ལ་ཉམས་སུ་བླངས་པའི་ལོང་མ་བྱུང་ཡང་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་འབྱིན་པར་འགྱུར་བའི་དགོས་པ་ཡོད་དོ། །འདི་ནི་ཁམས་ཀྱི་མངལ་གྱི་གྲོང་ཁྱེར་དུ་མི་འཇུག་པའི་གནད་དམ་པའོ། །ཨ་གསུམ་ནི་སྤྲུལ་པའི་སྐུའི་སྐྱེ་བ་མེད་པས་འདུག་པ་ལ་ལོངས་སྤྱོད་ཅིག་ཅེས་པ་དང་། ལོངས་སྐུ་སྐྱེ་བ་མེད་པས་སྣང་བ་དང་། ཆོས་སྐུ་སྐྱེ་བ་མེད་པས་རང་རིག་ལ་ལོངས་སྤྱོད་ཅིག་ཅེས་པའོ། །ཡང་གླང་ཆེན་གྱི་ཉལ་སྟངས་ནི། ཁ་སྦུབ་ཏུ་ཉལ་བས་སྲིད་པ་དྲུངས་ནས་འབྱིན། པུས་བྲང་སྦྱར་བས་ཉོན་རླུང་ཡེ་ཤེས་སུ་ལྡང་། མཐེ་བོང་ཕྱིར་ཕུལ་བས་འགྱུ་བྱེད་ཀྱི་རླུང་འཛིན། ལག་པའི་གྲུ་མོ་གཉིས་ས་ལ་བརྟེན་པས་ཕོ་མོའི་རླུང་སྙོམས། མཇིང་པ་ཡིད་ཙམ་བཏེགས་པས་རྩའི་ལས་སྟོངས་པར་བྱེད། ལྐོག་མ་ལ་ལག་མཐིལ་གཉིས་ཀྱིས་བཏེག་པས་ལུས་ཀྱི་འབྱུང་བ་ཆ་སྙོམས་པར་བྱེད་པའོ། །ལྷག་མ་སྔར་དང་འདྲའོ། །ཡང་དྲང་སྲོང་གི་འདུག་སྟངས་ནི་ལུས་ཙོག་བུར་འདུག་པས་འབྱུང་བ་མེའི་དྲོད་འབེབས་པར་བྱེད། རྐང་པའི་མཐིལ་ས་ལ་བཅར་བས་འབྱུང་བ་ཆུའི་རྩལ་གནོན་པར་བྱེད། ལུས་སྤྱི་དྲང་པོར་བསྲངས་བས་རླུང་བདེ་ལུགས་སུ་འབྱུང་བར་བྱེད། པུས་མོ་གཉིས་བྲང་ལ་སྦྱར་བས་ལུས་ཀྱི་མེ་རླུང་རྩལ་འཇོམས་པར་བྱེད། རྒྱུ་མ་ཡིད་ཙམ་གྱེན་ལ་འཐེན་ནས་རྒལ་པ་ལ་བཅར་བ་ནི་ལུས་ལ་རྣམ་པར་རྟོག་པ་མི་གནས་པར་བྱེད། ལག་པ་གཉིས་བསྣོལ་ནས་པུས་མོ་གཉིས་ཀྱི་སྟེང་དུ་བཞག་ན་ཚ་བའི་ནད་ཀྱི་དབལ་སོད་པར་བྱེད། གལ་ཏེ་བསྣོལ་ནས་མཆན་ཁུང་གཉིས་སུ་རེག་ན་གྲང་བའི་ནད་ཀྱི་སྟོབས་ཉམས་པར་བྱེད། གལ་ཏེ་གྲུ་མོ་གཉིས་པུས་མོའི་སྟེང་དུ་བཞག་སྟེ་ལྐོག་མ་ནས་བཏེགས་ན་འབྱུང་བ་ཚ་གྲང་སྙོམས་པའི་གསོས་བྱེད་དོ། །དེ་ཡང་གོང་གི་སེང་གེ་ནི་འཇིགས་པ་ཐམས་ཅད་ཟིལ་གྱིས་གནོན་པ་ལ་དགོངས་ལ། གླང་པོས་ནི་ཁམས་གསུམ་གྱི་དྲི་མ་ལྡོག་པ་ལ་དགོངས་ལ། འདིས་ནི་དྲི་མ་ལས་ཀྱི་འགྱུར་དག་པར་བྱེད་པ་ལ་དགོངས་པའོ། །བྱ་རྒོད་ཀྱི་འདུག་སྟངས་ནི་ལུས་ཀྱི་དགོངས་པས་གཟུགས་ཀྱི་ཕུང་པོའི་སྡུག་བསྔལ་སྡུད་ལ། རྐང་མཐིལ་གཉིས་ས་ལ་བཅར་བས་འཕྲོ་བ་ལས་ཀྱི་རླུང་གནོན། བཙོས་པོ་ཆེ་ས་ལ་མ་རེག་པས་བག་ཆགས་ལས་ཀྱི་མཐའ་སྟོངས་པར་བྱེད། སྟོང་མདུན་དུ་བཅུམ་པས་རྩ་ནང་གི་ཡེ་ཤེས་འཆར་བར་བྱེད་དོ། །ལག་པ་གཉིས་ཟུར་དུ་བཏང་སྟེ་སྨད་བསྡམས་པ་ནི་འབྱུང་བ་བཞིའི་ལས་ཀྱི་རླུང་ལྡོག་པར་བྱེད་དོ། །འདིས་ནི་རིག་པའི་རྩལ་སྦྱོང་བ་ལ་དགོངས་པའོ། །ལུས་རྡོ་རྗེ་སྐྱིལ་ཀྲུང་དུ་འདུག་པ་ལ་རྐང་པའི་མཐིལ་གཉིས་སྦྱར་བ་ནི། རླུང་ཕོ་མོ་ཁ་སྦྱར་བས་ལས་དང་ཡེ་ཤེས་འདྲིས་ཏེ་ཆོས་ཉིད་ཀྱི་གཞི་ཟིན་པར་བྱེད། རྟིང་པ་གཉིས་གསང་བ་ལ་གཏད་པ་ནི་འདོད་ཆགས་ལས་ཀྱི་གཞི་སྟོངས་པར་བྱེད། ལུས་སྤྱི་དྲང་པོར་བསྲངས་བ་ནི་འགྱུ་བྱེད་སྣ་ཚོགས་པའི་རླུང་སྟོངས་པར་བྱེད། སྤྱི་བོར་ཐལ་མོ་སྦྱར་བ་ནི་ལུས་ཀྱི་གནད་སྦྱོང་བར་བྱེད་པའོ། །དེ་དག་ཐམས་ཅད་འདས་པའི་ཕ་རོལ་ནི་ཆོས་སྐུ་དང་། ལོངས་སྐུ་དང་། རྒྱན་ནི་སྐུ་དང་། སངས་རྒྱས་ཀྱི་ཞིང་གི་རྣམ་དག་སྟུག་པོ་བཀོད་པ། ཡེ་ཤེས་ལྔ་ནི་ལོངས་སྐུའི་གཞི། རབ་ཏུ་མཉམ་ལ་མི་གཡོ་བ་ནི་ཆོས་སྐུའི་གཞི། བདེ་བར་གཤེགས་པ་རིགས་ལྔ། འཇིག་རྟེན་མཁྱེན་པ་མངོན་པར་ཤེས་པ་དྲུག་མངའ་བ། སྐྱེས་བུ་འདུལ་བ་ཉན་ཐོས་ལ་དགོངས་པ། ཁ་ལོ་བསྒྱུར་བ་ནི་ཕྱི་རོལ་རྣམས་ལ་དགོངས་པ། ལྷ་དང་མི་རྣམས་ཀྱི་སྟོན་པ་ནི་གཟུགས་སྐུ་གཉིས། དགྲ་བཅོམ་པ་ནི་རང་རྒྱལ་ལ་དགོངས་པ། ཟག་པ་ཟད་པ་ནི་བྱང་སེམས་ལ་དགོངས་པ། རིག་པ་དང་ཞབས་ནི་མཁྱེན་པ་ཡེ་ཤེས་ཀྱི་ཆ་ཡིས་གདུལ་བྱ་མོས་འགྱུར་དུ་རྩི་བའོ། །ཡང་དག་པ་ལ་སོགས་ཆོས་ཀྱི་སྐུའི་སྐབས་འདི་ནི་སྣང་བའི་ཆ། དཔག་ཏུ་མེད་པ་ནི་སྤྲུལ་པ། འཁོར་བ་ལ་སོགས་པ་ནི་སྐལ་ལྡན་གྱི་ཡིད་ཆེས་པར་གྱིས་ཤིག་ཅེས་པའི་དོན་ནོ། །གླང་པོ་ཆེའི་ལྟ་སྟངས་ནི་ཟླུམ་པོར་བལྟས་པས་དབྱིངས་མཐོང་། སེང་གེའི་མཆོངས་སྟངས་ནི་ཐད་ཀར་བལྟས་པས་རིག་པ་མཐོང་། ཁྱུང་ནི་གྱེན་ལ་བལྟས་པས་སྐུ་མཐོང་། དྲང་སྲོང་ནི་མདུན་དུ་བལྟས་པས་འོད་མཐོང་། གླང་ཆེན་ནི་ཐུར་ལ་བལྟས་པས་ཐིག་ལེ་མཐོང་། ལྕགས་སྒྲོག་ནི་གཉིས་མཉམ་པོར་རིལ་ནས་བལྟས་པས་མུ་ཁྱུད་མཐོང་། སྐྱེས་བུ་ནི་གྱེན་དུ་བལྟས་པས་ཡི་དམ་མཐོང་། ཝ་ནི་ཟུར་ལ་བལྟས་པས་དབྱིངས་རིག་མཐོང་། བྱ་རྒོད་ནི་ཟུར་ལ་བལྟས་པས་ཞིང་ཁམས་མཐོང་། གྱད་ནི་གཡོན་དུ་བལྟས་པས་ཉན་ཐོས་མཐོང་། འབུ་སྲིན་ནི་གཡས་སུ་བལྟས་པས་རང་རྒྱལ་འཐོང་། སྟག་མོ་ནི་འཕྲེད་ལ་བལྟས་པས་བྱང་སེམས་མཐོང་། དེ་ལྟར་མཐོང་བས་གནས་པས་གཞི་ཟུང་ཞིག་ལ་སོགས་པ་ནི་དེ་དག་གིས་ཉམས་སུ་མྱོང་བ་སྐྱེ་བའི་རིམ་པ་ལ་དགོངས་པའོ། །སླར་མ་ལྡོག་པ་དང་པོས་ཆོས་སྐུ་ལ་གདམས་པས་རང་སེམས་སྐྱེ་བ་མེད་པ་ལ་དབང་ཐོབ། གཉིས་པ་ལོངས་སྐུ་ལ་གདམས་པས་རང་སེམས་འགག་པ་མེད་པ་ལ་དབང་ཐོབ། གསུམ་པས་སྤྲུལ་སྐུ་ལ་གདམས་པས་རང་སེམས་འགྲོ་འོང་མེད་པ་ལ་དབང་ཐོབ་པ་དེ་ལྟར་གསུམ་ལ་དབང་ཐོབ་པས་ལུས་འདོད་པའི་ཁམས་ལས་གྲོལ་བས་འདོད་མེད་ཡོངས་སུ་དག་པའི་གཞི་ཚུགས། ངག་གཟུགས་ཀྱི་ཁམས་ལས་གྲོལ་བས་གཟུགས་མེད་ཡོངས་སུ་གྲོལ་བའི་ལམ་རྙེད། སེམས་གཟུགས་མེད་པའི་ཁམས་ལས་གྲོལ་བས་འགྱུར་མེད་རྣམ་པར་དག་པའི་སར་ཕྱིན་པའོ། །དེ་ལྟར་གསུམ་ལས་གྲོལ་བས་བརྟན་པ་སྐུའི་རྡོ་རྗེ་རྙེད། སྣང་བས་གསུང་གི་རྡོ་རྗེ་རྙེད། གནས་པས་ཐུགས་ཀྱིས་རྡོ་རྗེ་རྙེད་དོ། །དེ་རྙེད་པས་རྡོ་རྗེ་ལྟ་བུའི་སྐུ་ལས་སྐུའི་ཞིང་སྣ་ཚོགས་སུ་ཤར། པདྨ་ལྟ་བུའི་གསུང་ལས་གསུང་ཡིག་འབྲུ་སྣ་ཚོགས་སུ་བྱུང་། འཁོར་ལོ་ལྟ་བུའི་ཐུགས་ལས་ཏིང་ངེ་འཛིན་དཔག་ཏུ་མེད་པ་རྣམས་སུ་བྱུང་ངོ་། །དེས་སྐུ་གསུམ་ནི་རྫོགས་པས་སངས་རྒྱས་ཞེས་བྱ་ལ། གསུང་གསུམ་ནི་འབར་བས་རྟོག་ཚོགས་ཞེས་བྱ་ལ། ཐུགས་གསུམ་ནི་མཛད་པས་དགོངས་པ་ཞེས་བྱའོ། །དེ་ཡང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡོངས་སུ་དག་པའི་གཞི་ཞེས་བྱའོ། །གནས་དང་ཁྱད་པར་འཇུག་པ་དང་། །ལམ་དང་དེ་ཡི་འཁྲུལ་པ་གཅོད། །དེ་ལྟར་སྣང་བ་ཁ་བསྒྱུར་ཏེ། །དགའ་སྟོན་ཆེན་པོའི་མཆེད་པ་ཡིས། །བླ་མ་དང་ནི་བླ་མའི་འཁོར། །ཡུམ་དང་བཅས་པ་ཐམས་ཅད་ལ། །སུ་ཡིས་སྟོན་མོ་བྱས་ན་ནི། །བསྐལ་པ་འབུམ་ཕྲག་བསམ་ཡས་སུ། །སངས་རྒྱས་ཐམས་ཅད་མཉེས་བྱས་ཀྱང་། བསོད་ནམས་འདི་ཡི་ཆར་མི་ཕོད། །གལ་ཏེ་བླ་མའི་བ་སྤུའི་ཁུང་། །ཙན་དན་གྱི་ནི་རེག་སྤྱོད་ན། །འདི་ལ་བསོད་ནམས་ཕ་མཐའ་ཡས། །དེ་བཞིན་རང་གི་རྡོ་རྗེའི་སྤུན། །གཅིག་དང་གཉིས་དང་གསུམ་ཡང་རུང་། །ཡང་ན་བརྒྱ་སྟོང་གྲངས་མེད་ལ། །ཚོགས་ཀྱི་དགའ་སྟོན་སུས་བྱས་པ། །གལ་ཏེ་དབང་བསྐུར་དུས་མིན་པས། །རང་གི་བླ་མ་མཆོད་པ་ནི། །བརྒྱ་ཕྲག་གྲངས་མེད་བྱས་པ་བས། །འདི་ལ་གཅིག་བྱས་བསོད་ནམས་ནི། །བློ་ཡིས་དཔག་པར་ནུས་པ་མིན། །འབྲས་ཆེན་བཟའ་བཏུང་སྟོན་མོ་ཡིས། །རྣལ་འབྱོར་བ་རྣམས་མགུ་བྱས་ན། །ལེགས་པ་ཐམས་ཅད་འགྲུབ་པ་དང་། །ཉེས་པ་ཀུན་ལ་གྲོལ་བར་འགྱུར། །གལ་ཏེ་རྡོ་རྗེའི་སྲིད་མོའམ། །འོན་ཏེ་བླ་མའི་སློབ་མ་ནི། །རྣལ་འབྱོར་མ་ཡི་ཚོགས་རྣམས་ལ། །ཚོགས་ཀྱི་སྟོན་མོས་མགུ་བྱས་ན། །མ་མོ་བརྒྱད་དམ་ཕག་མོ་ལ། །ཚོགས་ཀྱི་མཆོད་པ་བརྒྱ་ཕྲག་དགུ །དུས་མ་ཡིན་པར་བྱས་པས་ནི། །འདི་དུས་རྣལ་འབྱོར་མ་གཅིག་ལ། །བཟའ་བ་ཡང་ན་བཏུང་བའམ། །གལ་ཏེ་སྐོམ་ཡང་ཉུང་བྱིན་ན། །བསོད་ནམས་འདི་ནི་མཉམ་པ་མིན། །དེས་ན་མ་མོའི་གྲོང་ཁྱེར་དུ། །ཕྱིན་ཏེ་རྣལ་འབྱོར་མ་མཉེས་བྱའོ། །རྣལ་འབྱོར་ཕ་དང་མ་གཉིས་ནི། །མཉམ་ཉིད་འདྲེས་པ་མཆོད་བྱས་ན། །འདི་ལ་དངོས་གྲུབ་འདི་ལྟ་བུ། །ཡ་མཚན་མཆོག་དང་ལྡན་པ་འབྱུང་། །འཇིག་རྟེན་འདི་ལ་འདོད་དོན་དང་། །ཕྱི་མ་ཡེ་ཤེས་དབྱིངས་སྤྱོད་ཕྱིར། །མཁའ་སྤྱོད་དག་གི་དངོས་གྲུབ་ནི། །སྣ་ཚོགས་བདག་པོ་སུས་བྱས་པ། །འཁོར་དང་བཅས་ཏེ་ནམ་མཁའ་ལ། །སྤྱོད་པ་དག་ཏུ་ནུས་པ་ཡིན། །ཨཐྎ།

རབ་ཏུ་སྤྲོས་པ་མེད་པའི་དབང་།

རབ་ཏུ་སྤྲོས་པ་མེད་པའི་དབང་བཞུགས་སོ། །མན་ངག་ང་དྲུག་པ། བྱ་བྲལ་ལྷུན་རྫོགས་ངང་ལ་ཕྱག་འཚལ་ལོ༔ རབ་ཏུ་སྤྲོས་པ་མེད་པའི་དབང་བསྐུར་བར་འདོད་པ་ཡིས༔ རི་བོའི་སུལ་དབེན་པ་རུ་ཚོགས་ཡོ་བྱད་ལ་སོགས་པ་བཤམས༔ བྱེ་བྲག་ཏུ་མཎྜལ་ལྔ་བཤམས་ལ༔ སྔོན་དུ་འབྲུ་སྣ་ཚོགས་པའི་མཎྜལ་ཕུལ་བས༔ བསོད་ནམས་དང་བདེ་བ་རྒྱས་པར་བྱེད༔ དེ་ནས་མེ་ཏོག་སྣ་ཚོགས་པའི་མཎྜལ་ཕུལ་བས་མཁྱེན་པའི་ཤེས་རབ་ལྔ་ལ་ལོངས་སྤྱོད༔ རིན་པོ་ཆེའི་མཎྜལ་ཕུལ་བས༔ ཡོན་ཏན་གྱི་ཆོས་མི་ཤེས་པ་ལ་ལོངས་སྤྱོད༔ དྲི་སྣ་ཚོགས་པའི་མཎྜལ་ཕུལ་བས་ཆོས་ཉིད་རྣམ་པར་དག་པའི་གསུང་དབྱངས་དང་ལྡན་པར་འགྱུར༔ སྨན་སྣ་ཚོགས་པའི་མཎྜལ་ཕུལ་བས་ཕྱི་ནང་གི་སྡུག་བསྔལ་ལས་གྲོལ་བར་ངེས་སོ༔ དེ་ནས་བླ་མས་ཁ་ཤར་དུ་བལྟ༔ སློབ་མས་ཁ་ནུབ་ཏུ་བལྟས་ལ༔ སློབ་མ་ལ་དབང་བསྐུར་བར་བྱ་སྟེ༔ བླ་མའི་མདུན་དུ་སློབ་བུ་དེ་ལུས་བདེ་ལུགས་སུ་འདུག་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གདུང་བའི་སེམས་ཀྱི་འདུག་ལ༔ བླ་མས་བུ་ཁྱོད་སུ་ཡིན་ཞེས་དྲིས་པས༔ སློབ་མས༔ བདག་སྐལ་ལྡན་སེམས་ཀྱི་བུ་གཅིག་ལགས༔ ཞེས་ལན་གསུམ་བརྗོད་པར་བྱའོ༔ དེ་ནས་བླ་མས་དེའི་ལན་དུ༔ དེ་ལྟར་ཡིན་ཕན་ཆད་སེམས་ཉིད་གདོད་མ་ནས་སྐྱེ་མ་མྱོང་བའི་དལ་འདི་ཉིད་དུ་ཞུགས་ཤིག༔ ཅེས་བརྗོད་པར་བྱའོ༔ དེ་ནས་བླ་མ་ལ་རབ་ཏུ་སྤྲོས་པ་མེད་པའི་དབང་ཞུ་བའི་གསོལ་བ་འདི་ལྟར་གདབ་པར་བྱའོ༔ ཀྱེ་བླ་མ་རྡོ་རྗེ་འཛིན་པ་ཉིད༔ བདག་ལ་རབ་ཏུ་དགོངས་སུ་གསོལ༔ བདག་ནི་ཁམས་གསུམ་འཁོར་གནས་སུ༔ ཡུན་རིང་གནས་པས་དྲན་ཉམས་ཏེ༔ འཁོར་བ་ཉིད་ལས་བརྒལ་དོན་དུ༔ བླ་མ་ལ་ཡང་ཞུ་བར་བགྱིད༔ བསྐལ་པ་བརྒྱ་ཕྲག་དུ་མར་ནི༔ བདག་ནི་ཡང་ནས་ཡང་འཁོར་བས༔ རྡོ་རྗེ་སེམས་དཔའི་ཡེ་ཤེས་རང་བྱུང་ཉིད༔ སྨད་དང་རྩ་བ་བཅད་པས་སངས་རྒྱས་སེམས་ལས་བྱུང༔ སེམས་ཀྱི་དམ་པ་བདག་ལ་བསྟན་དུ་གསོལ༔ ཞེས་ལན་གསུམ་བརྗོད་དོ༔ དེ་ནས་ལུས་ཀྱི་ཆ་བསྲངས་ལ་ཐལ་མོ་སྦྱར་ལ་ཤེས་པ་མ་ཡེངས་པར་བླ་མའི་ཐུགས་ཀར་སེམས་གཏད༔ དེ་ནས་གློ་བུར་དུ་དྲག་ཤུལ་དང་བཅས་པས་སེམས་གང་ཡིན༔ ཞེས་ལན་གསུམ་བརྗོད་པས་སློབ་མའི་རྒྱུད་ལ་ཤེས་པའི་ཉམས་འདི་ཡིན་ཁས་ལེན་དང་བྲལ་བ་ཆད་མེད་པ་སྐྱེ་བར་འགྱུར་རོ༔ དེ་ནས་སྤྲུལ་པ་སྐུའི་དལ་དུ་ཞུགས་ཏེ༔ སློབ་མས་སེང་གེ་ལྟ་བུའི་འདུག་སྟངས་བྱ་སྟེ༔ ཤར་གྱི་ཕྱོགས་སུ་ཁ་བལྟས་ཏེ་ཡིད་ལ་ཆོས་ཉིད་སྐྱེ་བ་མེད་པ་བསམ་ཞིང ༔ བླ་མས་འདི་སྐད་བརྗོད༔ ཨེ་མ་སྐལ་ལྡན་སེམས་ཀྱི་བུ་ཁྱོད༔ ཤར་ཕྱོགས་མངོན་པར་དགའ་བའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་བ་ཡིད་དུ་འོང་བ་ན༔ ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་མི་འཁྲུགས་པ་ཞེས་བྱ་བ་སྐུ་མདོག་མཐོང་ཁ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ༔ བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ་སེང་གེའི་མཆོངས་སྟབས་ཀྱིས་མཆོངས་ཤིག༔ ཨ་ཨ་ཨ་ཞེས་རྒྱས་བཏབ་བོ༔ ཡང་ཁ་ལྷོར་བལྟས་ལ་གླང་ཆེན་གྱི་འདུག་སྟངས་དང་བསྟུན་ལ་བླ་མས་འདི་སྐད་བརྗོད་དོ༔ ཨེ་མ་སྐལ་ལྡན་སེམས་ཀྱི་བུ་ཁྱོད༔ ལྷོ་ཕྱོགས་ན་དཔལ་དང་ལྡན་པ་ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ན༔ ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རིན་ཆེན་འབྱུང་ལྡན་ཞེས་བྱ་བ་སྐུ་མདོག་སེར་པོ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་གསང་སྔགས་ཀྱི་དེ་ཁོ་ན་ཉིད་སྟོན་ཏོ༔ བུ་ཁྱོད་དེར་སེང་གེའི་སྟངས་སྟབས་ཀྱིས་ལྟོས་ལ་སྟག་མོའི་མཆོངས་སྟབས་ཀྱིས་མཆོངས་ཤིག༔ ཨ་ཨ་ཨ་ཞེས་བརྗོད་པར་བྱའོ༔ ཡང་ནུབ་ཏུ་བལྟས་ལ་དྲང་སྲོང་གི་འདུག་སྟངས་དང་བསྟུན་ནས་བླ་མས་འདི་སྐད་བརྗོད་དོ༔ ཨེ་མ་སྐལ་ལྡན་སེམས་ཀྱི་བུ་ཁྱོད་ནུབ་ཕྱོགས་པདྨ་བརྩེགས་པ་ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ཉམས་དགའ་བ་ན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་སྣང་བ་མཐའ་ཡས་ཞེས་བྱ་བ་སྐུ་མདོག་དམར་པོ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ༔ བུ་ཁྱོད་དཔལ་ཆེན་གྱི་རྔམ་སྟབས་ཀྱིས་ལྟོས་ལ་ཁྱུང་ནམ་མཁའ་ལ་ལྡིང་བའི་འགྲོས་ཀྱི་སོང་ཞིག༔ ཨ་ཨ་ཨ་ཞེས་བརྗོད་དོ༔ ཡང་བྱང་དུ་ཁ་བལྟས་ལ་བྱ་རྒོད་ཀྱི་དཔུངས་སྟངས་ཀྱིས་བསྟུན་ལ༔ བླ་མས་འདི་སྐད་བརྗོད་དོ༔ ཨེ་མ་སྐལ་ལྡན་སེམས་ཀྱི་བུ་གཅིག་ཁྱོད་འདི་ནས་བྱང་ཕྱོགས་ན་ལས་རབ་ཡོངས་སུ་རྫོགས་པ་ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ན་ཡང་དག་པར་རྫོགས་པའི་སངས་རྒྱས་གདོན་མི་ཟ་བའི་རྒྱལ་པོ་ཞེས་བྱ་བ་སྐུ་མདོག་ལྗང་ཁུ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་ག ཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ༔ བུ་ཁྱོད་དེར་རྡོ་རྗེ་འཆང་གི་ལྟ་སྟངས་ཀྱིས་ལྟོས་ལ་གློག་དམར་གྱི་འགྱུ་སྟངས་ཀྱིས་སོང་ཞིག༔ ཨ་ཨ་ཨ་ཞེས་བརྗོད་པར་བྱའོ༔ སྤྲུལ་སྐུའི་དལ་དུ་འཇུག་པའོ༔ ཡང་སློམ་མ་རྡོ་རྗེ་སྐྱིལ་ཀྲུང་དུ་འདུག་ལ༔ ལོངས་སྐུའི་དལ་དུ་ཞུགས་པ་སྟེ༔ བླ་མས་འདི་ལྟར་བརྗོད་པར་བྱའོ༔ ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག༔ དེ་དག་ཐམས་ཅད་ལས་འདས་པའི་ཕ་རོལ་ན་རྒྱན་ཡོངས་སུ་བཀོད་པ་ཞེས་བྱ་བའི་ཞིང་ཁམས་ཡེ་ཤེས་ལྔས་ཁྱབ་ཅིང་གསལ་བར་རབ་ཏུ་མཉམ་ཞིང་མི་གཡོ་བ་ཉིད་ན༔ དེ་བཞིན་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བ༔ ཡེ་ཤེས་སྣང་བའི་ཁ་ལོ་བསྒྱུར་བ་ལྷ་དང་མི་རྣམས་ཀྱི་སྟོན་པ༔ དགྲ་བཅོམ་པ་ཟག་པ་ཟད་པ་རིག་པ་དང་ཞབས་སུ་ལྡན་པ༔ ཡང་དག་པའི་སངས་རྒྱས་འོད་དཔག་ཏུ་མེད་པ་ཞེས་བྱ་བ༔ འཁོར་ཡང་དག་པར་རྫོགས་པའི་སངས་རྒྱས་བརྒྱ་སྟོང་བྱེ་བ་དཔག་ཏུ་མེད་པས་བསྐོར་བ༔ སེམས་ཉིད་མངོན་པར་འདུས་མ་བྱས་པ་མངོན་པར་རོལ་བ་ཞིག་ཡོད་ཀྱིས༔ བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ་སེང་གེའི་མཆོངས་སྟངས་ཀྱིས་སོང་ཞིག༔ ཨ་ཨ་ཨ་ཞེས་བརྗོད༔ ལོངས་སྐུའི་དལ་དུ་འཇུག་པའོ༔ དེ་ནས་ཡང་ཆོས་སྐུའི་དལ་དུ་འཇུག་སྟེ༔ སེང་གེའི་གནད་བསྟུན་དུ་བཅུག་ལ༔ བླ་མས་འདི་སྐད་བརྗོད་པར་བྱའོ༔ ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག༔ དེ་ལས་འདས་པའི་ཕ་རོལ་ན་རང་གི་སེམས་ཉིད་བསམ་ངོ་དང་བྲལ་ཞིང་ཚད་མེད་དཔག་ཏུ་མེད་པ༔ དམིགས་སུ་མེད་པ་སྟོང་པ་ཉིད་གང་དུ་ཡང་མ་ཕྱེ་བའི་ཆོས་ཉིད་བྱ་བ་བཞུགས་པས༔ དེར་བུ་ཁྱོད་རིག་པ་ཁྱུང་ནམ་མཁའ་ལ་ལྡིང་བའི་འགྲོས་ཀྱིས་མཐོ་ས་རུ་སྡོད་ཅིག༔ དྲང་སྲོང་གི་འདུག་སྟངས་ཀྱིས་དྲང་པོར་གནས་པར་གྱིས་ཤིག༔ གླང་ཆེན་གྱི་ཉལ་ཐབས་ཀྱི་སྙོམས་པར་ཉོལ་ཅིག༔ ལྕགས་སྡོང་གི་འདྲིལ་སྟངས་ཀྱིས་ཁ་བུབ་ལ་མཐའ་དྲིལ་ཅིག༔ སྐྱེས་བུའི་རྒྱངས་ཐབས་ཀྱིས་གན་རྒྱལ་དུ་རྐྱོངས་ཤིག༔ ཝ་མོའི་ཟུར་འགྲོས་ཀྱིས་སློག་ལ་སོང་ཞིག༔ བྱ་རྒོད་ཀྱི་དཔུངས་སྟངས་ཀྱིས་སྒུར་ཟློག་གིས་སྤུངས་ཤིག༔ གྱད་ཀྱི་དོར་སྟབས་ཀྱིས་ངག་གསོས་ལ་ས་ནོན་ཅིག༔ འབུ་སྲིན་གྱི་ནུར་འགྲོས་ཀྱི་དབྱིངས་རིག་ལ་ཆགས་པར་གྱིས་ཤིག༔ སྟག་མོའི་མཆོངས་སྟངས་ཀྱིས་ཉམས་སྣང་ལ་རྩལ་སྦྱོངས་ཤིག༔ གཡང་མོའི་སྤྲུག་སྟངས་ཀྱིས་གཟུང་འཛིན་བག་ཆགས་ཐམས་ཅད་དུས་གཅིག་ལ་ངོ་བོ་རུ་སྤྲུགས་ཤིག༔ སེང་གེའི་འགྲེངས་ཚུགས་ཀྱིས་དབྱིངས་རིག་ལ་ས་ཟུངས་ཤིག༔ སེམས་ཀྱི་བུ་སེམས་ཉིད་སྟོང་པར་གནས་པས་གཞི་ཟུངས་ཤིག༔ སེམས་ཉིད་རིག་སྟོང་དུ་བསྟན་པས་གནད་ཚུགས་ཤིག༔ སེམས་ཉིད་མ་འགགས་པར་འགྱུ་བ་རྩལ་སྦྱོངས་ཤིག༔ སེམས་ཉིད་ཡེ་ཤེས་སུ་གསལ་བས་ལམ་སྦྱོངས་ཤིག༔ སེམས་ཉིད་ཀུན་ལ་ཁྱབ་པས་རྟོགས་པ་ཚོལ་ཅིག༔ སེམས་ཉིད་ཅིག་ཅར་དུ་མྱུར་བས་ལ་ཟློས་ཤིག༔ སེམས་ཉིད་སྣ་ཚོགས་མ་འདྲེས་པས་ཤན་ཕྱེས་ཤིག༔ སེམས་ཉིད་སྣ་ཚོགས་པར་འཕེལ་བས་ཡེ་ཤེས་ལས་སླར་མ་ལྡོག་ཅིག༔ ཐིག་ལེ་ལས་སླར་མ་ལྡོག་ཅིག༔ སྐུ་ལས་སླར་མ་ལྡོག་ཅིག༔ དེ་དག་གིས་ཆོས་སྐུའི་དལ་དུ་འཇུག་པའོ༔ དལ་གསུམ་དུ་བཅུག་ནས༔ ད་གསེར་གྱི་མཎྜལ་ཕུལ་ལ༔ སེམས་ཉིད་ཀྱི་ངོ་བོར་ལྷ་ངོ་བསྟན་པའི་སེམས་སྟོང་པ་དང ༔ རིག་པ་ལུ་གུ་རྒྱུད་དུ་ངོ་སྤྲོད་པ་ནི༔ སྐུ་གསུམ་གྱི་བཞུགས་སྟངས་གཟིགས་སྟངས་རིམ་པས་བསྟུན་དུ་བཅུག་ལ༔ བླ་མས་འདི་སྐད་བརྗོད་པར་བྱའོ༔ ཨེ་མ་སྐལ་ལྡན་སེམས་དགེ་བའི་ཀྱི་བུ་གཅིག་པོ༔ སེམས་ཉིད་འགྱུ་བ་ངོ་བོ་སྟོང་ལ་རང་བཞིན་ཡེ་ཤེས་ལྷག་མཐོང་གི་དོན་ཉོན་ཅིག༔ སེམས་ཉིད་བདེ་སྟོང་ལ་འགྱུར་བ་ཟུང་འཇུག་ཕྱག་རྒྱ་སྟོང་པ་ཆེན་པོའི་གཞི་རིག་པ་ཡེ་ཤེས་ལྔར་བསྒྱུར་ཅིག༔ སེམས་ཉིད་སྟོང་པ་ཡེ་ཤེས་མ་འདྲེས་ཟང་ཐལ་གྱིས་མ་རིག་པ་སྣོད་བཅུད་སོལ་ཅིག༔ སེམས་ཉིད་ཡིད་དཔྱོད་བློ་རིམ་དང་འཇུག་པ༔ ཐེག་པ་ཐ་དད་ཀྱི་མཐའ་ཉག་གཅིག་ཐིག་ལེ་ཏུ་སྡུས་ཤིག༔ སེམས་ཉིད་སྟོང་པ་མཐའ་དང་བྲལ་བ་ཐིག་ལེ་ཡོངས་སུ་རྫོགས་ལ་ཕུགས་གཏོད་ཅིག༔ སེམས་ཉིད་ཟུང་འཇུག་དབྱེར་མེད་རང་སྣང་ལྷུག་པས་དོན་གྱི་གནད་ཁྲོལ་ཅིག༔ སེམས་ཉིད་དབྱིངས་རིག་རྣམ་དག་སྨིན་མཚམས་འོད་གསལ་ལ་རླུང་རིག་བཅུད་ལ་བོར་ཅིག༔ གང་ཞེ་ན་མགྲིན་པ་ཨེན་ཙམ་དགུག༔ མིག་གྱེན་ལ་བཟློག༔ རླུང་རང་སོར་བཅད༔ ཡང་ལག་པ་གཡས་པས་མིག་མནན་ལ༔ མིག་གཡོན་པ་ནམ་མཁའ་ལ་བལྟས་པས་ཡེ་ཤེས་ཀྱི་སྣང་བ་འཕེལ་ལོ༔ སེམས་ཉིད་ཆོས་སྐུ་མ་བཅོས་རང་བྱུང་རྣལ་མ་ལ་ཕྱི་ནང་གཅིག་ཏུ་གཞི་ཕོབ་ཅིག༔ སེམས་ཉིད་མ་འདྲེས་ཡོངས་རྫོགས་ཉག་གཅིག་ཕྱོགས་བྲལ་གཅིག་པ་ལས་སླར་མ་ལྡོག་ཅིག༔ ཡང་སྤྲུལ་སྐུར་སོང་ཞིག༔ ལོངས་སྐུར་སོང་ཞིག༔ ཆོས་སྐུར་སོང་ཞིག༔ སླར་མ་ལྡོག་ཅིག༔ ཆོས་སྐུ་ལ་མ་འཛིན་ཅིག༔ སླར་མ་ལྡོག་ཅིག༔ ལོངས་སྐུ་ལ་མ་ཞེན་ཅིག༔ སླར་མ་ལྡོག་ཅིག༔ ཅེས་ངོ་སྤྲོད་དོ༔ ཨཐྎ༔ རྒྱ་རྒྱ་རྒྱ༔ སྐུ་གསུམ་དལ་འཇུག་བླ་མས་གནང༔ དེ་ནས་གཏོར་མ་གཏང༔ ཚོགས་ལ་ལོངས་སྤྱོད་དོ༔ དཔལ་སྔགས་སྲུང་གི་རྒྱལ་མོས་སྲུངས་ཤིག༔ སོ་ཕག་ཤི་ཐཾ། ཁ་ཐཾ། ས་མ་ཡཱ༔ རྒྱ་རྒྱ་རྒྱ༔ ཁི༽ དབང་གི་ཕྲ་ཏིག་དཔེ་མ་ཚང་བ་སླར་མངོན་ན་འདིར་འཇུག །

ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད་རྣམས།

༄༅༔ ༔ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད་རྣམས་བཞུགས་སོ༔ ལུང་མེད། ༈ བཐེ།ཐདྭིཊཀྭན༔྅྅྅ བཅོམ་ལྡན་འདས་བདེ་བ་མངོན་དུ་འབྱིན་པ་ལ་ཕྱག་འཚལ་ལོ༔ སྐལ་དང་ལྡན་པ་འཇུག་དོན་དུ༔ བཅོམ་ལྡན་རྡོ་རྗེ་སེམས་དཔའ་དང༔ དགའ་རབ་ལ་སོགས་སྤྲུལ་པ་པོས༔ དབང་གི་རིམ་པ་བསྟན་པའོ༔ དེ་ལ་དང་པོ་སྐལ་བ་དང་ལྡན་པའི་སློབ་མས་བླ་མ་མཉེས་པར་བྱ་ལ༔ དེ་ནས་ལོ་གསུམ་གྱི་གོང་ནས་རིན་པོ་ཆེ་ལ་སོགས་པའི་མཎྜལ་འབུལ་བ་ཕུག་ལ་བདག་ལོ་གསུམ་ནས་དབང་ཞུ་བས་གནང་བར་ཞུ་ཞེས་ཞུ༔ དེར་ལོ་ཐེམ་པ་དང་དབང་རྫས་ཚོགས་པར་བྱས་ལ་ཞུ་སྟེ། དེའང་དང་པོ་སྤྲོས་བཅས་ཀྱི་དབང་ཞུ་བ་ལ་ཉན་ཐོས་ནས་ཨ་ཏི་མན་ཆད་ཀྱི་ཐེག་པ་རིམ་པ་དགུ་ཡི་དབང་ཞག་བཅོ་བརྒྱད་དུ་བསྐུར་ཏེ་རྒྱུད་རྫོགས་པ་རང་བྱུང་ལས་ཤེས་པར་བྱའོ༔ དེ་ནས་སྤྲོས་མེད་ཀྱི་དབང་ཅི་ལྟར་བསྐུར་བའི་རིམ་པ་བསྟན་པ་ནི༔ སྤྲོས་མེད་ནི་རབ་ཏུ་ཡིད་འབྱུང་བའི་བློ་ཅན་ཞེས་བྱའོ༔ ངེས་པར་འབྱུང་བའི་དད་པ་དང་ལྡན་པའི་སློབ་མ་རྣམས་འཇུག་ཅིང་ལུས་ངག་ཡིད་གསུམ་སྨིན་པར་བྱ་བའི་ཕྱིར་བསྟན་པའོ༔ དེ་ལ་བློ་སྤྲོས་པ་མེད་པའི་དོན་དུ་དབང་གནང་བས་མཆོག་གི་དངོས་གྲུབ་ཐོབ་པས༔ དང་པོ་གནས་རབ་ཏུ་དབེན་པར་སོང་སྟེ༔ ཁྲུ་དོ་དཔངས་སོར་དྲུག་ལ་མཎྜལ་རབ་ཏུ་སྙོམས་ཤིང་མཛེས་པ་ལ་བ་བྱུང་རྣམ་ལྔ་དང་ཙནྡན་ལ་སོགས་པས་ལེགས་པར་བྱུགས་ལ༔ བུམ་པ་བསྣོལ་མ་དམར་པོས་མཐའ་མ་བསྐོར༔ མེ་ཏོག་སྣ་ཚོགས་པའི་ཚོམ་བུ་དགྲམ༔ མཎྜལ་གྱི་དབུས་སུ་བུམ་པ་མཚན་ཉིད་དང་ལྡན་པ་གསུམ་དུ་བུམ་རྫས་ཉི་ཤུ་རྩ་ལྔ་ཚང་བར་བླུག་འབྲས་བུ་ཅན་གྱི་ཤིང་གི་ཁ་རྒྱན་གྱི་གསེབ་ཏུ་རྨ་བྱའི་མདོངས་དང་མེ་ལོང་ལ་སོགས་གཟུགས༔ དེ་ནས་ཞག་གསུམ་དུ༔ ཨཱོཾ་ཨཱཿཧཱུྃ་ཞེས་པ་དཔག་ཏུ་མེད་པ་སྟེ་ཛབ་དབྱངས་དང་བཅས་པ་བརྗོད་པར་བྱའོ༔ དེ་ནས་ཞག་གསུམ་གྱི་ཐོ་རངས་དབང་བསྐུར་རོ༔ དེ་ཡང་འོག་ནས་འབྱུང་བའི་ཚིགས་སུ་བཅད་པས་དེ་དག་གིས་སྐལ་ལྡན་སྨིན་པར་བྱའོ༔ སྤྲོས་པ་མེད་པའི་དབང་བསྐུར་བའོ༔ ད་ནི་ཤིན་ཏུ་སྤྲོས་པ་མེད་པའི་དབང་བསྐུར་བ་ནི༔ དེ་ལ་ནི་ཤིན་ཏུ་ཟབ་ཅིང་གནད་དུ་འགྲོ་བ་ཡིན་ལ༔ སྤྲོས་མེད་བློ་བྱ་བ་དང་བཅས་པ་ལ་མི་དགའ་བའི་དོན་དུའོ༔ དེ་ཡང་དབང་བསྐུར་རྒྱུ་ཐུན་མོང་པ་རྣམས་ལ་སྔོན་དུ་བསྙེན་པ་བྱེད་པ་ལ་དགོངས་པའོ༔ དེ་ཡང་འཁོར་བ་སྣང་བ་དང་ཤེས་པས་བསྡུས་པས༔ འདས་པ་སྐུ་དང་ཡེ་ཤེས་ཀྱིས་བསྡུས་པ་རུ་ཤན་འབྱེད་པའི་སྤྱོད་པ་ནི༔ དུར་ཁྲོད་ལ་སོགས་པར་སོང་སྟེ་ལུས་ལ་ཞག་གཅིག༔ ངག་ལ་ཞག་གཅིག༔ སེམས་ལ་ཞག་གཅིག་ཏུ་བྱའོ༔ དེ་ཡང་སློབ་མ་གསུམ་ལ་དབང་བསྐུར་ཏེ་དུར་ཁྲོད་དུ་ཁྲིད་ལ་ལུས་ལ་ཧཱུྃ་གིས་རྒྱས་གདབ་ལ་ཟང་གསུམ་དུ་ཧཱུྃ་དང་ནམ་མཁའ་རླུང་དང་གསུམ་འདྲེས་ལ ༔ ཧཱུྃ་ཧཱུྃ༔ ཁོང་གློད་པ་ནི་གནད་ཡིན་པས་དབུགས་བསྲིང་བར་བྱའོ༔ དེ་ནས་ངག་སྦྱོང་བ་ལ་ཕཊ་ཅེས་ཞག་གསུམ་དུ་བྱའོ༔ ཡིད་སྦྱོང་བ་ལ་གསལ་བྱེད་དབྱངས་ཡིག་ཞག་གསུམ་དུ་བརྗོད༔ དེ་ནས་རང་གར་མོས་པར་མཁའ་འགྲོ་མ་ལ་གཏོར་མ་རེ་རེ་ཕྱོགས་སུ་གཏང ༔ དེ་ལྟར་ཞག་གསུམ་དུ་མཁའ་འགྲོ་མ་ལ་གསོ་བ་བཏབ་ནས་སྤྱོད་པ་བྱེད་དུ་འཇུག་པའི་དུས་སུ་ལུས་ངག་ཡིད་གསུམ་སོ་སོ་ཡིད་ཕྱོགས་སུ་བཟུང་སྟེ༔ དེའི་ནམ་མཁའི་མཚན་ཉིད་ནི༔ སྤྲིན་ནག་པོ་འཇིགས་སུ་རུང་བ་དང་རླུང་ནག༔ ཁ་ཆར་བུ་ཡུག་སྒྲ་ལ་སོགས་པ་འབྱུང་བ་ལ༔ ལུས་རུ་ཤན་འབྱེད་པའི་དུས་སུ་བྱུང་ན༔ ལུས་ལ་སྒྲིབ་པ་ཡོད་པའི་རྟགས་ཡིན༔ ངག་གི་དུས་སུ་བྱུང་ན་ངག་ལ་སྒྲིབ་པ་ཡོད་པའི་རྟགས༔ སེམས་རུ་ཤན་འབྱེད་པའི་དུས་སུ་བྱུང་ན་སེམས་ལ་སྒྲིབ་པ་ཡོད་པའི་རྟགས༔ གང་ཟག་གསུམ་པོའི་ཕྱོགས་ཕྱོགས་ཀྱང་གཟུང་ངོ༔ ཕྱོགས་ལ་ལར་བྱུང་ལ་ལར་མ་བྱུང་ན༔ གང་ཟག་གཅིག་གནམ་གཉིས་ལ་ཡོད་པའི་རྟགས་དེ་ཞིབ་པར་བརྟག་གོ༔ ལུས་ངག་ཡིད་གསུམ་གྱི་སྒྲིབ་པ་ཡང་མཚན་ཉིད་ཀྱིས་ངེས་པར་འདག་པར་འགྱུར་ཏེ༔ དེ་ཡང་སྔོན་དུ་བྱུང་ལ་ཕྱིས་ནམ་མཁའ་སྟོང་པ་སྤྲིན་དང་བྲལ་བ་བྱུང་ན་སྤྱོད་པ་དག་པའི་རྟགས་སོ༔ གལ་ཏེ་སྔར་མེད་པ་ཞབས་སུ་བྱུང་ན་སྤྱོད་པ་མ་དག་པས་ན་རང་དང་མཐུན་པའི་དགེ་བས་ནི༔ ལུས་རུ་ཤན་འབྱེད་པའི་དུས་སུ་བྱུང་ན་ཚྭ་ཚྭ་འབུམ་ཕྲག་གཅིག་གདབ་པ་དང ༔ ངག་གི་དུས་སུ་བྱུང་ན་ཡི་གེ་བརྒྱ་པ་འབུམ་ཕྲག་གཅིག་བཟླས་པ་དང ༔ སེམས་ཀྱི་དུས་སུ་བྱུང་ན་ཨཱ་ལི་ཀཱ་ལི་འབུམ་ཕྲག་གཅིག་བཟླ་བར་བྱ་བ་ནི་ཤིན་ཏུ་སྡིག་པ་ཚན་ཆེ་བ་ལ་བྱའོ༔ འབྲིང་ལ་དེ་ཡི་ཕྱེད་ཀྱིས་འགྲུབ་བོ༔ དེ་བས་ཆུང་བ་ལ་དེའི་སུམ་ཆས་འདག་ངེས་སོ༔ སྒྲིབ་པ་ཡེ་མེད་ན་སོ་སོའི་ཕྱོགས་སུ་ནམ་མཁའ་སྔོ་སངས་སུ་འོང་ངོ༔ སྤྱོད་པ་དག་ནས་ཕྱིས་དེ་ལྟར་འགྲོའོ༔ ལུས་ངག་སེམས་སོ་སོའི་དག་པ་དང་མ་དག་པ་ཡང་རྩིའོ༔ གང་མ་དག་པ་ལ་ནི་དགེ་སྦྱོར་སྔ་མ་དང་འདྲ་བར་བྱའོ༔ གལ་ཏེ་ལུས་ཀྱི་ལས་དག་ནས་ཕྱིས་ཁམས་གསུམ་དུ་མི་འཇུག་པ་ནི་ལུས་ཀྱི་དུས་ན་ཁྱད་པར་གཟུགས་བརྙན་ནམ་མཁའི་འཇའ་ཚོན་དང་མཆོག་ཏུ་གྱུར་པའི་གཟུགས་བརྙན་མཐོང་བའོ༔ ངག་གི་དུས་ན་ཁྱད་པར་གྱི་སྒྲ་རྣམས་ཐོས་པ་དང ༔ སེམས་ཀྱི་དུས་ན་ལྷག་པའི་བསམ་པ་དང་ངོ་མཚར་བའི་བྱ་བ་རྣམས་དྲན་པ་ནི་བུའི་སྡིག་པ་རྣམས་བྱང་བའི་རྟགས་སོ༔ དེ་ལྟར་སྐལ་ལྡན་ཡིད་ཀྱི་རུ་ཤན་འབྱེད་པའི་དུས་སུ་བླ་མས་ངག་བཅད་དེ་རིག་པ་མངོན་སུམ་གྱི་སྣང་བ་ལ་གནས་པར་བྱའོ༔ དེ་ནས་ཞག་གསུམ་རྫོགས་པའི་ནང་པར་དུར་ཁྲོད་དུ༔ བླ་མས་མཎྜལ་ལྔ་བཤམས་ཏེ༔ དང་པོ་འབྲུ་སྣ་ཚོགས་གཉིས་པ་མེ་ཏོག་སྣ་ཚོགས༔ གསུམ་པ་དྲི༔ བཞི་པ་སྨན༔ ལྔ་པ་གསེར་ལ་སོགས་པ་རིན་པོ་ཆེ་སྣ་ཚོགས་པ་སློབ་མ་འབྱོར་བའི་ཚོད་དང་སྦྱར་ལ་བཤམ་མོ༔ དེང་མཁའ་འགྲོ་མ་རྣམས་ཇི་ལྟར་མགུ་བའི་ཚོགས་ཀྱི་མཆོད་པ་ཅི་ལྟར་འབྱོར་བ་དང ༔ ཕྱི་ནང་གསང་བའི་མཆོད་པའི་བྱེ་བྲག་རྣམས་ཇི་ལྟར་འབྱོར་པ་བཤམ་ལ་དེ་ནས་སློབ་མ་གཅིག་ལ་བརྡའ་བྱས་ཤིང་བོས་ལ༔ སློབ་མ་དབང་ཞུ་མ་རྫོགས་ཀྱི་བར་ལ་བླ་མའང་ངག་མི་གཏང་ངོ༔ དེ་ནས་སློབ་མས་ཕྱག་བྱས་ཏེ༔ བླ་མས་བུ་ཁྱོད་སུ་ཡིན་དྲིས་པས༔ སློབ་མས་བདག་སྐལ་ལྡན་སེམས་ཀྱི་བུ་གཅིག་ལགས་ཞེས་ལན་གསུམ་བརྗོད་པར་བྱའོ། །དེ་ནས་བླ་མས་དེ་ལྟར་ཡིན་ཕན་ཆད་རང་བཞིན་རྫོགས་པ་ཆེན་པོ་ཤིན་ཏུ་སྤྲོས་པ་མེད་པར་འདི་ལ་ཞུགས་ཤིག་ཅེས་བརྗོད་ལ༔ སློབ་མས་མཎྜལ་རྣམས་བླ་མ་ལ་རིམ་པ་བཞིན་དུ་འབུལ་ལོ༔ དེ་ནས་སློབ་མས་ལུས་ལངས་ལ་འགྲེང་ཚུགས་སུ་བསྡད་དེ༔ ཐལ་མོ་སྙིང་གར་སྦྱར་གཅེར་བུར་ཐོན་ལ་བླ་མའི་ཐུགས་ཀྱི་དཀྱིལ་དུ་རིག་པ་འཕངས་ཏེ་མ་ཡེངས་པ་གནད་དོ༔ བླ་མས་ངག་ཏུ་ཨ་ཨ་ཞེས་དྲག་ཤུལ་དང་བཅས་པ་བརྗོད་པས༔ ལུས་འཕར་ཞིང་གཡོ་བ་དང ༔ ངག་སྨྲ་ཞིང་དངངས་པ་དང ༔ སེམས་སྤྲོ་ཞིང་ཕྱད་པ་ལ་སོགས་འབྱུང་བ་ནི་ཡེ་ཤེས་ཀྱི་བདེ་བ་ཕེབས་པའི་རྟགས་སོ༔ དེ་ནས་བླ་མའི་ཞལ་ནས་ཤར་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང ༔ ཞེས་སླར་མ་ལྡོག་ཅེས་དྲག་ཏུ་བྱའོ༔ འགྲོ་ན་འགྲོ་ས་འདུག་གམ༔ སྡོད་ན་སྡོད་ས་འདུག་གམ༔ དེ་བཞིན་དུ༔ ལྷོ་དང༔ ནུབ་དང༔ བྱང་དང༔ སྟེང་འོག་རྣམས་སུ་གོམ་པ་གམ་གམ་སོང་དང་བྱས་ལ༔ སླར་མ་ལྡོག་ཅེས་ལན་གསུམ་ཤུགས་དྲག་དང་དྲག་ཤུལ་དང་བཅས་པས་བྱའོ༔ དེ་ནི་བླ་མས་བརྡ་བསྐུལ་ཏེ་དལ་དུ་གཞུག་པའོ༔ དེ་བཞིན་རིག་པའི་ལྷ་ངོ་བསྟན་པ་དང༔ ནམ་མཁའ་རྒྱ་ཆེ་ལ་སོགས་པ་ནི་བརྡས་བསྟན་པ་ཡིན་ཏེ་སྔོན་ཆད་མཐོང་མ་མྱོང་བའི་རང་སྣང་གི་རིག་པ་ངོ་སྤྲད་པ་ཡིན་ནོ༔ དེ་ནས་གོང་དུ་བརྗོད་པའི་བརྡའ་དེ་དག་འགྲོལ་བ༔ བླ་མ་མཁས་པ་དགོས་སོ༔ དེ་ལྟར་དབང་བསྐུར་ནས་རང་གི་གནས་ཁང་དུ་ཕྱིན་ཏེ་འབྱོར་པ་དང་སྦྱར་ལ་དགའ་བའི་སྟོན་མོ་བྱའོ༔ དཔའ་བོ་དང་དབའ་མོ་ལ་སྟོན་མོ་རྒྱས་པར་བྱ༔ བླ་མ་ལ་ཡོན་གྲུབ་ན་གསེར་རང་ལུས་ཙམ་འབུལ་ལོ༔ དེས་ནི་ཚོགས་ལྷག་མ་ལུས་པར་རྫོགས་པའི་དགོས་པ་ཡོད་དོ༔ དེ་ནི་ཤིན་ཏུ་སྤྲོས་པ་མེད་པའི་དབང་བསྟན་པའོ༔ གུ་ཧྱ༔ ད་ནི་རབ་ཏུ་སྤྲོས་པ་མེད་པའི་དབང་བསྐུར་བ་ནི༔ དེ་ནི་རབ་ཏུ་མཆོག་ཏུ་ཟབ་པ་ལ་དགོངས་པའོ༔ སྤྲོས་པ་མེད་ཅེས་པ་ནི་བྱ་བ་དང་འཁྲུལ་པ་ལས་བློ་ལོག་པ་སེམས་ཀྱི་རང་བཞིན་ལ་སྔོན་དུ་སྦྱངས་པའོ༔ དེ་ཡང་འདི་ནི་སྐད་ཅིག་གམ་ཐུན་གཅིག་གི་ཁོངས་སུ་དབང་རྫོགས་པར་བྱ་སྟེ༔ དེ་ཡང་ཚོགས་བསགས་པའི་བྱེ་བྲག་དཔག་ཏུ་མེད་པ་བསགས་པ་དང༔ ཕྱི་ནང་གི་མཆོད་པའི་བྱེ་བྲག་དཔག་ཏུ་མེད་པ་བཤམས་པ་དང༔ བླ་མ་ལ་ཡོན་འབུལ་བ་ལ་སོགས་པ་འབྱོར་ཚད་བྱས་ལ༔ བླ་མས ༔ སློབ་བུ་ལ༔ བུ་ཁྱོད་སུ་ཡིན་ཞེས་དྲིས་པ་དང༔ བདག་སྐལ་ལྡན་སེམས་ཀྱི་བུ་གཅིག་པུ་ལགས༔ ཞེས་ལན་གསུམ་དུ་བརྗོད་པར་བྱའོ༔ དེ་ནས་བླ་མས༔ དེ་ལྟར་ཡིན་ཕན་ཆད་དུ་རང་བཞིན་རྫོགས་པ་ཆེན་པོ་སེམས་ཉིད་མ་བཅོས་པའི་དལ་དུ་ཞུགས་ཤིག༔ ཅེས་པ་གནང་བ་བྱིན་ཏེ། དེ་ནས་སློབ་མས་རིན་པོ་ཆེ་ལ་སོགས་པའི་མཎྜལ་འབུལ་ཏེ་གསོལ་བ་གདབ༔ འདི་སྐད་དུ་སེམས་ཀྱི་དལ་བརྟག་པ་ནི༔ ཨེ་མ་དཔལ་ལྡན་རྡོ་རྗེ་འཛིན༔ དཔལ་ལྡན་དེ་ལ་ཉི་མ་སྟོང་གི་འོད་ཟེར་ནི༔ རྨང་དང་རྩ་བ་བཅད་པས་སངས་རྒྱས་སེམས་ལས་བྱུང༔ སེམས་ཀྱི་དམ་པ་བདག་ལ་གསལ་བར་བསྟན་དུ་གསོལ༔ ཞེས་ལན་གསུམ་དུ་གདབ༔ དེ་ནས་བླ་མས༔ སློབ་མ་ལ༔ ལུས་ཀྱི་འདུག་སྟངས་སུ་སྤྲུལ་པ་སྐུའི་འདུག་སྟངས་དང༔ ལོངས་སྐུ་དང་ཆོས་སྐུ་ལ་སོགས་པའི་འདུག་སྟངས་ཐ་དད་བསླབས་ལ་བྱེད་དུ་གཞུག་གོ༔ ཆོས་སྐུ་ལོངས་སྐུ་སྤྲུལ་སྐུ་ལ་སོགས་པའི་གཟིགས་སྟངས་བསླབ་བོ༔ དེ་ནས་སྤྲུལ་སྐུ༔ ལོངས་སྐུ༔ ཆོས་སྐུའི་ཞིང་ཁམས་སུ་ལུང་བསྟན་པ་ནི་འདི་སྐད་དུ༔ ཨེ་མ་སྐལ་ལྡན་ཤར་ཕྱོགས་མངོན་པར་དགའ་བའི་ཞིང་ཁམས་ཡོད་ཀྱི༔ དེར་གླང་པོ་ཆེའི་ལྟ་སྟངས་ཀྱིས་ལྟོས་ལ༔ སེང་གེའི་མཆོངས་སྟབས་ཀྱིས་མཆོངས་ལ༔ ཁྱུང་ནམ་མཁའ་ལ་ལྡིང་བའི་འགྲོས་ཀྱིས་སོང་ཞིག༔ ཅེས་པ་ལ་སོགས་པ་ཡང་ལུང་བསྟན་ལ༔ དེ་ནས་གོང་དུ་བསྟན་པའི་དབང་བཞི་རྫོགས་པ་དང་གདམས་པ་ཡང་རྫོགས་པར་གདབ་སྤྱོད་པ་ཡང་རྫོགས་པར་བྱ་སྟེ༔ སྔོན་འགྲོ་ལ་ལུས་ངག་ཡིད་གསུམ་སྦྱོང་བ་ལ་ཞག་དགུ༔ དངོས་གཞི་ལུས་ངག་ཡིད་ཀྱི་སྤྱོད་པ་འདས་རྗེས་ལྟར་བྱའོ༔ དེ་ནས་རྣལ་དུ་དབབ་སྟེ༔ སྒོ་གསུམ་ལ་མིག་དལ་བ་དང༔ ཡུལ་ནམ་མཁའ་སྟོང་པ་སྤྲིན་དང་བྲལ་བ་དང༔ རིག་པ་དེ་དང་མི་འབྲལ་བ་གསུམ་ལུང་གིས་བརྡའ་སྤྲད་དོ༔ སྒྲ་ཐལ་འགྱུར་ལས༔ གནད་གསུམ་མན་ངག་འབྲལ་མི་བྱ༔ ཞེས་པས་ན༔ དེ་ལ་ཡེ་ཤེས་འཆར་བར་བྱེད་པའི་སྒོ་མིག་ཡིན་པས་མིག་གི་ཡུལ་དུ་གཟིགས་སྟངས་གསུམ་དང་མི་འབྲལ་བར་བྱ༔ རིག་པ་འཆར་བར་བྱེད་པའི་ཡུལ་ནམ་མཁའ་སྟོང་པ་སྤྲིན་དང་བྲལ་བ་གནད་ཡིན༔ རླུང་རིག་གི་གནད་དུ་དལ་བ་བརྟེན་པ་གནད་ཡིན་པས་ལུས་དལ་བར་བསྡད ༔ ངག་ལྐུགས་པ་བཞིན་དུ་བསྡད༔ སེམས་སྤྲོས་པ་དང་བྲལ་བའམ་ཆུ་ཆད་པའི་རང་ཐག་བཞིན་དུ་བསྡད༔ དེ་ལྟར་གསུམ་ལས་དུས་ཐམས་ཅད་དུ་མ་བྲལ་བ་ནི་ཆོས་ཉིད་མངོན་སུམ་གྱི་གནད་ཅེས་བྱའོ༔ དེ་ལྟར་ཉམས་སུ་བླངས་པས་སྣང་བ་བཞི་ཇི་ལྟར་འཆར་བ་ནི༔ དེ་ལྟར་ངོ་སྤྲོད་བསྟན་པ་ནི་རིག་པ་མངོན་སུམ་གྱི་སྣང་བ་ཞེས་བྱའོ༔ ཉམས་སུ་བླངས་པ་དེ་ལས་མ་འདས་པས་ཉམས་གོང་འཕེལ་གྱི་སྣང་བ་ཐིག་ལེ་ལ་སོགས་པ་འཆར་རོ༔ དེ་ལས་རིག་པ་ཚད་ཕེབས་ཀྱི་སྣང་བ༔ ཐིག་ལེ་ལ་སོགས་པ་སྐུར་འགྱུར་རོ༔ དེ་ལས་ཆོས་ཉིད་ཟད་པའི་སྣང་བ་ཅིའི་ངོ་བོར་ཡང་མ་གྲུབ་པས་གྲུབ་མཐའ་ཐམས་ཅད་དང་བྲལ་བའོ༔ དེ་ནས་གོང་དུ་འཕེལ་བའི་ཆོས་ཉིད་མངོན་སུམ་ཞེས་པ་སྒོ་དང་ཡུལ་དང་རིག་གསུམ་མི་འབྲལ་བའི་གནད་ལ་རྟག་ཏུ་དབྱིངས་རིག་གེར་རོ༔ དེ་ལྟར་སྐལ་ལྡན་ཅིག་གིས་འཇིག་རྟེན་གྱི་བྱ་བ་རྣམས་སྤངས་ནས་ཉམས་སུ་བླངས་ན་སྣང་བ་བཞི་རྫོགས་ནས་འདི་ཉིད་དུ་ཟག་བཅས་མི་སྣང་བར་སངས་རྒྱའོ༔ འབྲིང་པོ་གཅིག་གིས་བག་རེ་ཉམས་སུ་བླངས་པས་ཐ་ཆད་ནས་བླང་ལོངས་མ་བྱུང་ཀྱང་ཆོས་ཉིད་ཀྱི་བར་དོ་ལ་རང་གི་ཆོས་ཉིད་སྟོབས་སུ་གྱུར་ནས་སངས་རྒྱའོ༔ ཐ་མ་གཅིག་གིས་བླ་མ་མཚན་ཉིད་དང་ལྡན་པ་ཞིག་ལས་དབང་བཞི་རྫོགས་པར་བྱས་ནས་མངོན་སུམ་གནད་ཀྱི་མན་ངག་གི་ཞུས༔ ཉམས་སུ་མ་བླངས་ཀྱང་ཆོས་ཉིད་ཟབ་མོའི་སྒོ་མཐོར་ཞིང་ཞུགས་པའི་བདེན་པའི་བྱིན་རླབས་ལ་བརྟེན་ནས་རང་བཞིན་སྤྲུལ་པ་སྐུའི་ཞིང་ཁམས་སུ་ཞུགས་ནས་མངལ་གྱི་གྲོང་ཁྱེར་དུ་མི་འཇུག་སྟེ༔ འདོད་ཁམས་དང༔ གཟུགས་ཁམས་དང༔ གཟུགས་མེད་པའི་ཁམས་སུ་འཇུག་པ་མིན་ནོ༔ དེའི་ཕྱིར་ན་སོ་སོའི་སྐྱེ་བོ་དང་ཉན་ཐོས་ལ་སོགས་པ་ལ་རབ་ཏུ་གསང་སྟེ་ཆོས་ཉིད་མངོན་སུམ་གྱི་གནད་དུས་ཐམས་ཅད་དུ་སྟེམས་པར་བྱའོ༔ ཞེས་འཁོར་འདས་རུ་ཤན་འབྱེད་པའི་སྤྱོད་པ་ཡང་སྔར་བྱས་ནས་ལུས་དོན་རྒྱས་པར་བསྟན་ནོ༔ དེ་ལ་དང་པོའི་ལུས་ཀྱི་འདུག་སྟངས་ཀྱི་གནད་ལ་བརྟེན་ནས་རང་སེམས་རྣམ་དུ་གཞུག་པ་ནི༔ ལུས་དང་ཤེས་པ་ཀློད་པ་དང ༔ རླུང་སོར་བཞག་པ་གནད་ཡིན་ནོ༔ དེ་ནས་གཉིས་པ་སེམས་ཀྱི་གནས་ལུགས་ལ་བརྟེན་ནས་རྣལ་འབྱོར་ལུས་སེམས་དང་དབྲལ་བ་ནི༔ སེམས་སོ་སོའི་གཏད་ལུགས་དང་སྦྱར་ཏེ་རླུང་སེམས་ཅི་ནས་ཀྱང་རྒྱང་རིང་པོར་འཕངས་པ་གནད་ཡིན་ནོ༔ དེ་ལ་ཆོས་ཉིད་ནི་མ་བཅོས་པ༔ མངོན་པ་ནི་དབང་པོའི་ཡུལ་དུ༔ གསུམ་ནི་གྲངས་ཏེ༔ སྒོ་དང༔ ཡུལ་དང་རིག་པ་གསུམ་དུས་གཅིག་ལ་ཚོགས་པའོ༔ གནད་ནི་སྙིང་ལ་མདའ་འམ་མཚོན་གྱིས་ཟིན་པའམ་ནད་ཞུགས་ནས་འཆི་ངེས་པ་དང་འདྲའོ༔ གནད་གཟིར་བའི་དུས་ན་རླུང་ཕྱིར་འཕང༔ རྒོད་ན་རླུང་ནང་དུ་དགུག་པ་དང་རིག་པ་སྒྲོན་མ་ལ་གཏད་དེ༔ ཕུང་པོ་དང་ཁམས་བྱེར་ནས་རྩིག་ཁུང་སོང་སྣམ་པའམ་ཐམས་ཅད་ལ་འཇུག་སྙམ་ན༔ རིག་པ་སྟེང་དུ་འཕང༔ རླུང་ནང་དུ་བཟུང ༔ རིག་པ་ཡལ་ནས་ནང་དུ་མ་ཕེབས་ན་རིག་པ་སྨིན་མཚམས་སུ་གཏད༔ རླུང་དལ་བ་བསྟེན༔ དབྱིངས་དང་རིག་པ་གཉིས་སྦྱར་རོ༔ ད་ནི་རིག་པའི་སྒྲོན་མེའི་གནད་བསྟན་པ་ནི༔ ཐིག་གཞི་ཡིན་པས་འགྱུར་བ་མེད༔ ལེ་སྣང་བ་ཡིན་པས་ཀུན་ལ་ཁྱབ༔ སྒྲོན་མས་འོད་ཀྱི་སྣང་བ་སྟོན་པར་བྱེད་དོ༔ འདི་ཡི་དུས་ན་སྒྲོན་མ་གཏིམས་པ་གནད་དོ༔ དེ་ཡང་དད་པ་དང་ལྡན་པ་ཞིག་གིས་བླ་མ་མཉེས་པར་བྱས་ལ་མི་མི་རྒྱུ་བའི་གནས་སུ་སོང་སྟེ༔ མིག་གི་ཕུགས་ཀྱི་རྩ་རང་གི་མཐེབ་མོ་དང་མཛུབ་མོ་གཉིས་མ་བྲལ་བར་རྟག་ཏུ་གཏིམས་ན་ཡེ་ཤེས་ཀྱི་སྣང་བ་གོང་དུ་འཕེལ་ལོ༔ ཞེས་ཐིག་ལེའི་སྒྲོན་མའི་གནད་བསྟན་པ་ཡིན་ནོ༔ ད་ནི་དབང་པོའི་མངོན་སུམ་གནད་ལ་བརྟེན་ནས་ཅིག་ཆར་གྲོལ་བའི་དགོངས་པ་བསྟན་པ་ནི༔ དེ་ལ་དམ་པ་ནི་སངས་རྒྱས་ཀྱི་དགོངས་པ་སྟེ༔ དེའི་དོན་ཆོས་ཉིད་མངོན་སུམ་དུ་སྐྱེ་བ་ཉིད་ལས་ཡིད་དཔྱོད་ཚིག་གི་བློ་དང་བྲལ་ནས་གང་ཟག་དབང་པོ་ཅིག་ཅར་བ་རྣམས་བླ་མའི་གདམས་ངག་དེ་བསྟན་པ་ཙམ་གྱིས་རང་གྲོལ་དུ་འགྲོ་བས་ན༔ དེ་ཡང་གང་ལས་བྱུང་ཞེ་ན་ཆོས་ཉིད་མངོན་པར་དབང་པོ་ལ་སྣང་བའོ༔ དེ་ཡང་སྒོའི་གནད་གཟིགས་སྟངས་གསུམ་ལས་མི་འབྲལ་བ་དང༔ ཡུལ་གྱི་གནད་ནམ་མཁའ་སྤྲིན་དང་བྲལ་བ་ལ་རིག་པ་བཞག་པ་དང༔ རླུང་རིག་གི་གནད་རིག་པ་ནམ་མཁའ་ལ་འཕང་བ་སྟེ༔ རླུང་དལ་བ་བརྟེན་པས་རིག་པ་རང་ངོ་ལ་གསལ་བ་དང་གསུམ་དབང་པོའི་ཡུལ་དུ་མཐོང་བའི་གནད་ཀྱིས་ནི༔ ཚིག་ཏུ་འཛིན་པའི་རང་གི་གྲུབ་པའི་མཐའ་ཡིད་དཔྱོད་དུ་འཛིན་པ་ཉིད་ཞིག་ནས་ཚིག་ཏུ་འཛིན་པ་ལས་བློ་ལོག་པའོ༔ དེ་ལྟར་ཆོས་ཉིད་མངོན་སུམ་གྱི་དོན་ལ་གནས་པས༔ དངོས་སྟོང་གང་དུའང་འཛིན་པའི་ཤེས་པ་དང་བྲལ་ནས་སྣང་བ་དང་ཤེས་པ་གང་དུ་ཡང་ཞེན་པ་དང་འཛིན་པ་མེད་པར་རང་རིག་རང་སར་ཤེས་པས་གྲོལ་བར་བསྟན་པ་ནི༔ བྱ་བ་མེད་པས་གྲོལ་བ་གྲོལ༔ ཞེས་སོ༔ དེ་ཡང་མངོན་སུམ་གནད་ཀྱི་མན་ངག་གིས་ཡང་དག་པའི་དོན་ཆོས་ཉིད་བདེ་བ་ཆེན་པོའི་རོ་མངོན་སུམ་བྱེད་དང་བྲལ་བར་མྱོང་ནས༔ ཁམས་ནི་ཚོགས་ཤིང་འདུས་ལ༔ འདུས་ཤིང་འཛིན་པ་ལས༔ འདོད་ཆགས་ལས་འདོད་ཁམས་སུ་ཆགས་པ་དང༔ ཞེ་སྡང་ལས་གཟུགས་ཁམས་སུ་ཆགས་པ་དང ༔ གཏི་མུག་ལས་གཟུགས་མེད་དུ་ཆགས་པ་གསུམ་དུ་བཟློག་པའི་རྟེན་དང ༔ འདོད་ཆགས་མ་བྱུང་མ་སྐྱེས་རང་བྱུང་གི་ཡེ་ཤེས༔ དེ་བཞིན་དུ༔ ཞེ་སྡང་མ་བྱུང་མ་སྐྱེས་རང་བྱུང་གི་ཡེ་ཤེས་ཉིད་ལ༔ དེ་བཞིན་དུ༔ གཏི་མུག་རང་བྱུང་གི་ཡེ་ཤེས་སུ་སོང་བས༔ དེ་ཉིད་མེད་པར་རང་སྣང་རང་གྲོལ་དུ་སོང་བ་ནི༔ གྲོལ་བ་རང་བྱུང་གཞན་ལས་མིན༔ ཞེས་པའོ༔ དཔེར་ན་ནམ་མཁའ་ལ་ནམ་མཁའ་ཐིམ་པ་ལྟར་རིས་མེད་མཉམ་ཉིད་ཆེན་པོའི་དོན་ལས་མ་གཡོས་པར་ཟག་བཅས་མི་སྣང་བར་སངས་རྒྱ་བ་ནི་རྣལ་འབྱོར་མཆོག་ཅེས་བྱ་སྟེ་འབྱུང་བའི་ཟག་པ་ཟད་ནས་དེ་ཉིད་ཀྱང་དེ་བཞིན་དུ་ཟག་པ་མི་སྣང་བ་ཡིན་ནོ༔ ཞེས་གྲུབ་མཐའི་དགོངས་པ་བསྟན་པའོ༔ ད་ནི་གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་གཏན་ལ་དབབ་པར་བསྟན་པ་ནི༔ གནད་གསུམ་མན་ངག་འབྲལ་མི་བྱའོ༔ ཞེས་པས་ན༔ དེ་ཡང་ཡེ་ཤེས་འཆར་བར་བྱེད་པའི་སྒོ་མིག་ཡིན་པས་མིག་གི་གནད་དུ་གཟིགས་སྟངས་གསུམ་ལས་མི་འབྲལ་བར་བྱ༔ རིག་པ་འཆར་བར་བྱེད་པའི་ཡུལ་ནམ་མཁའ་སྟོང་པ་སྤྲིན་དང་བྲལ་བ་གནད་ཡིན༔ རླུང་རིག་གི་གནད་དུ་རླུང་དལ་བ་བསྟེན་པ་གནད་ཡིན་ནོ༔ དེ་ལྟར་གསུམ་ལས་དུས་ཐམས་ཅད་དུ་མི་འབྲལ་བ་ནི་ཆོས་ཉིད་མངོན་སུམ་གྱི་གནད་ཅེས་བྱའོ༔ དེ་ཡང་མི་འགུལ་བ་གསུམ་ལ་གཞི་བཅའ་བ་ནི༔ ལུས་མ་འགུལ་བས་རྩ་མི་འགུལ༔ མིག་མ་འགུལ་བས་དབྱིངས་མི་འགུལ༔ རླུང་མ་འགུལ་བས་རིག་པ་མི་འགུལ་བར་ངེས་སོ༔ སྡོད་པ་གསུམ་གྱི་ཚད་བཟུང་བ་བ་ནི༔ ཕྱི་སྣང་བ་སྡོད་པས་འོད་སྣང་ལ་བྱན་ཚུད༔ ནང་ཕུང་པོ་སྡོད་པས་བྱ་རྩོལ་དང་བྲལ༔ གསང་བ་རླུང་སེམས་སྡོད་པས་ཁམས་གསུམ་དུ་སྡོག་པ་མ་ཡིན་ནོ༔ དུས་རྟག་ཏུ་ངག་བཅད་པས་ཆོས་བརྗོད་པ་མེད་པའི་དོན་རྟོགས་པའོ༔ སྨུག་ནག་ཁྲོས་མ་ནག་མོ་མཐུ་མོ་ཆེས་བཀའ་འདི་སྲུངས༔ ཡི་གེ་མ་རུལ་མངོན་སུམ་སྙིང་ཐིག་གི་སྐོར༔ བི་མ་ལ་མི་ཏྲས་སྒྲ་རང་འགྱུར་དུ་མཛད་པའོ༔ ཨྀཏི༔྅྅྅ ད་ནི་གང་ཟག་འཇུག་དོན་དང ༔ འཁོར་བའི་འདམ་ནས་བརྒལ་དོན་དང༔ སྐལ་ལྡན་སྣང་བ་སྤེལ་དོན་དུ༔ ཡི་གེ་མ་རུའི་སྐོར་དག་ལས༔ རབ་ཏུ་ཟབ་པས་འདིར་དགོད་བྱ༔ ཕྱི་སྐོར་ནང་སྐོར་གསང་སྐོར་དང༔ གསང་བ་བླ་ན་མེད་པའི་སྐོར༔ དེ་ལས་མངོན་སུམ་སྙིང་ཐིག་གི༔ བླ་ན་མེད་པའི་སྤྱོད་པའི་སྐོར༔ དེ་ལ་སྐལ་བ་དང་ལྡན་པ་འཁོར་བ་བློས་དོར་བ་དེས༔ བླ་མ་མཁས་པ་ལ་གདམས་པ་དང་བྱིན་རླབས་དབང་དང་བཅས་པ་ཞུས་ལ༔ མཁའ་འགྲོ་ལ་ཚོགས་ཀྱི་འཁོར་ལོ་དང་དཔའ་བོ་དང་དཔའ་མོ་ལ་དགའ་སྟོན་ཆེན་པོ་བྱས་ལ༔ དེ་ནས་གོང་དུ་བསྟན་པའི་དབང་གི་རིམ་པ་རྫོགས་པ་དང་སྤྱོད་པ་བྱ་སྟེ༔ ལུས་ནི་རྒྱུ་དང་ཉལ་བ་དང ༔ ཞེས་པ་གསེར་ཡིག་ཅན་ལས་ཤེས་པར་བྱའོ༔ སྔགས་དང་ཁ་ཏོན་ཆོས་ཀྱི་སྒྲ༔ ཞེས་པ་དག་གི་སྤྱོད་པའང་གསེར་ཡིག་ཅན་ལས་འབྱུང་བ་བཞིན་བྱའོ༔ དགའ་དང་མི་དགའ་བདེ་སྡུག་ཅེས་པ་ཡིད་རུ་ཤན་འབྱེད་པ་ཡང་གསེར་ཡིག་ཅན་ལས་ཤེས་པར་བྱའོ༔ དེ་ལྟར་ལུས་བྱ་བྱེད༔ སེམས་དྲན་བསམ༔ དེའི་རིམ་པ་འདས་རྗེས་སྟར་བྱས་ལ༔ དེ་ལ་དགོས་པ་ཅི་ཡོད་ཅེ་ན༔ ལུས་རུ་ཤན་ཕྱེ་བས་ཕྱིས་འཁོར་བར་འཇུག་མི་སྲིད་དོ༔ ངག་ཡང་དེ་ལྟར་རོ༔ དེ་ནས་སེམས་རུ་ཤན་ཕྱེ་བས་སེམས་ཕྱིས་འཁོར་བར་འཇུག་མི་སྲིད་པས་ན་རུ་ཤན་འབྱེད་པའི་སྤྱོད་པ་མཆོག་ཏུ་ཟབ་པས་འདི་ལ་ཡིད་ཆེས་རྒྱབ་བརྟེན་བྱའོ༔ དེ་ནས་བླ་མས་རྣལ་དུ་འབེབས་པའི་མན་ངག་བསྟན་པར་བྱ་སྟེ༔ ཁྱོད་འཁྲུལ་པ་སྤངས་པའི་ཡིད་ཀྱིས་ཉོན༔ ཞེས་བཀའ་སྩལ་ནས༔ དེ་ཡང་དད་པ་དང་ལྡན་པ་དེས་ཡུལ་ནམ་མཁའ་སྟོང་པ་སྤྲིན་དང་བྲལ་བ་དང༔ རིག་པ་རྡོ་རྗེ་ལུ་གུ་རྒྱུ་བཙོན་དུ་བཟུང་བ་དང༔ རླུང་དྲག་ཏུ་དལ་བ་བསྟན་པ་དང༔ གསུམ་པོ་དེ་ལས་མ་བྲལ་བར་ཉམས་སུ་བླངས་ན་དེ་དག་གིས་ནི་ཆོས་ཉིད་ཀྱི་ལམ་མངོན་སུམ་དུ་འཇུག་པའི་ཕྱིར༔ རྣལ་འབྱོར་པས་བྱ་བ་གཞན་སྤངས་ལ་ཉིན་མཚན་དུ་མི་འབྲལ་བར་ཉམས་སུ་བླངས་པས་ཡེ་ཤེས་ལྔ་རྫོགས་པའི་ཐིག་ལེའི་ནང་དུ་སྐུའི་ཆོས་ཉིད་དག་པ་མཐོང་བ་ལ་ཐེ་ཚོམ་བྱར་མེད་དོ༔ འདི་ཡང་དབྱིངས་རྣམ་པར་དག་པའི་སྒྲོན་མའི་གནད་ཡིན་ནོ༔ ཨཐྎ༔ སྐྱེས་བུ་རྡོ་རྗེ་ལེགས་པ་ཆོས་སྐྱོང་མཐུ་བོ་ཅེས་བཀའ་འདི་སྲུངས་ཤིག༔ ས་མ་ཡཱ༔ ན་ར་ཀན་ཕག་གི་སོ་ཐཾ༔ གསང་ངོ༔ རྒྱ་རྒྱ་རྒྱ༔

སྤྲོས་མེད་ཀྱི་དབང་ཆོག

༄༅༔ སྤྲོས་མེད་ཀྱི་དབང་ཆོག་བཞུགས་སོ༔ རིན་ཆེན་བཀོད་པ༔ ༈ བཅོམ་ལྡན་འདས་སྤྲོས་པ་ཐམས་ཅད་ཉེ་བར་ཞི་བའི་དཔལ་རྡོ་རྗེ་འཆང་ལ་ཕྱག་འཚལ་ལོ༔ དད་དང་ལྡན་པའི་སྐལ་ལྡན་ལུས་ཅན་གྱིས༔ རང་བཞིན་རྫོགས་པ་ཆེན་པོའི་དོན་ལ་ཡང༔ རྨོངས་པ་མེད་ཕྱིར་འཇུག་སྒོ་གསལ་བྱའི་ཕྱིར༔ འཕྲ་ཐིག་རིན་ཆེན་དབྱིབས་ཀྱི་རྒྱན་སྤྲས་པའི༔ དབང་བཞི་རྫོགས་པར་བྱེད་པའི་དོན་ཉིད་དུ༔ སྤྲོས་ལ་དགའ་བའི་དོན་དུ་དེ་བསྟན་ནས༔ ད་ནི་སྤྲོས་དང་བྲལ་བའི་དོན་དུ་ཡང༔ སྤྲོས་མེད་དབང་གི་བསྐུར་བའི་གནས་ཉིད་ནི༔ འདི་ལྟར་དམ་ཚིག་ལྡན་པས་ངེས་པར་ཟུང༔ གལ་ཏེ་སྐལ་བ་དང་ལྡན་པ་དབང་བཞི་རྫོགས་པར་བྱེད་པའམ༔ ཡང་ན་སྤྲོས་པ་ལ་མི་དགའ་བ་རྣམས་ལ༔ འདི་ལྟར་སྤྲོས་པ་མེད་པའི་དབང་རང་བཞིན་རྫོགས་པ་ཆེན་པོའི་དབང་བསྐུར་འདི་ནི་སྣོད་དང་ལྡན་པའི་སྐལ་ལྡན་གཉིས་སམ་གསུམ་ཚུན་ཆད་ལས༔ དེ་ལས་མང་ན་དམ་ཚིག་གི་ཆད་པ་འབབ་པས༔ འདི་ལྟ་བུའི་དད་པ་ཅན་འཁོར་བ་ལ་བློ་ལོག་པ་རང་ཤུགས་ཀྱི་ངང་ཚུལ་བཟང་ཞིང་སོས་དལ་བ༔ རྣམ་པར་རྟོག་པ་བག་ཀྱིས་ཆུང་བ༔ འདོད་པ་ཆུང་ཞིང་ཆོག་ཤེས་པ་ནི་རང་བཞིན་རྫོགས་པ་ཆེན་པོའི་སྣོད་ཡིན་པས༔ དེ་ལྟ་བུའི་སློབ་མ་གཅིག་ནས་གཉིས་གསུམ་ཚུན་ཆད་ལ་དབང་བསྐུར་རོ༔ དེ་ལ་སློབ་དཔོན་གྱིས་སྔོན་དུ་བྱ་བའི་རིམ་པ་དང༔ སློབ་མས་སྔོན་དུ་བྱ་བའི་རིམ་པའོ༔ དེ་ལ་བླ་མ་ཉིད་ལ་སློབ་མས་དབང་གི་ཞུ་བ་ཕུལ་ནས་དེ་ལ་ནུས་པ་འཇུག་པའི་དོན་དུ་རང་གི་བླ་མ་ལས་དབང་བསྐྱར་མ་ཞུ༔ གལ་ཏེ་མི་བཞུགས་ན་རང་གི་བླ་མ་ཉིད་ནམ་མཁར་བཞུགས་པ་ལས་སྤྲོས་པ་མེད་པའི་དབང་རྣམས་བླང་བ་དང ༔ བརྒྱུད་པའི་བླ་མ་རྣམས་ལ་གསོལ་བ་གདབ་པར་བྱ་བ་དང༔ དྲི་མ་དག་པར་བྱ་བའི་ཕྱིར་ཡི་གེ་གསུམ་ལ་རྩལ་འབྱོངས་པར་བྱ་བ་དང༔ གཉིས་སུ་མེད་པའི་དོན་བློ་ལ་བསྐྱེད་པའི་ཕྱིར་ཡེ་ཤེས་ལྔའི་དམ་ཚིག་བསྒོམ་པ་དང༔ འཁོར་བ་ལས་ཡིད་དབྱུང་བར་བྱ་བའི་ཕྱིར་མི་རྟག་རྒྱུད་ལ་བསྒོམ་པ་དང༔ སྤྱོད་ལམ་གྱི་རྗེས་སུ་བཟུང་བའི་ཕྱིར་བྱ་བྱེད་ཀྱི་སྤྱོད་པ་ཉི་ཤུ་རྩ་གཅིག་བརྩམ་པར་བྱ་བ་དང༔ ལྟ་བའི་དོན་དྲན་པར་བྱ་བའི་ཕྱིར་སྟོང་པ་ཉིད་ཀྱི་རྒྱས་བཏབ་པ་ལ་སོགས་ནི་སློབ་དཔོན་གྱི་སྔོན་དུ་འགྲོ་བའི་ལས་སོ༔ དེ་ལྟར་སློབ་དཔོན་གྱིས་སྔོན་དུ་འགྲོ་བའི་རིམ་པ་བསྙེན་པ་རྫོགས་པར་བྱས་ལ༔ སློབ་མ་དད་པ་དང་ལྡན་པ་དེ་ཡང་འཁོར་བ་ལས་དབྱུང་བར་བྱ་བའི་ཕྱིར་གནས་དབེན་པར་མི་རྟག་པ་བསྒོམ་པའི་མན་ངག་རྣམས་བསླབས་ལ་སྒོམ་དུ་བཅུག་སྟེ་ཞག་ལྔའམ༔ བདུན་ནམ་བཅུ་གཅིག་གི་བར་ལ་སྒོམ་དུ་གཞུག་གོ༔ དེ་ལྟར་བསྒོམ་པས་དད་པ་དྲག་པོ་སྐྱེ་བ་དང་འཁོར་བ་ལས་ཡིད་དབྱུང་སྒྱིད་ལུག་པ་དག་འབྱུང་བར་ངེས་སོ༔ དེ་ནས་རྡོ་རྗེ་སློབ་དཔོན་གྱིས་འཁོར་བའི་ཉེས་དམིགས་སངས་རྒྱས་ཀྱི་ཡོན་ཏན་རྣམས་བཤད་ལ་སྤྲོས་པ་མེད་པའི་དབང་བསྐུར་བའི་གནས་རབ་ཏུ་དབེན་པར་དཔོན་སློབ་རྣམས་ཕྱིན་ཏེ༔ གནས་ཁང་གི་ནང་ཐམས་ཅད་དུ་དྲི་ཞིམ་པོ་སྣ་ཚོགས་པས་ཆག་ཆག་བཏབ་པ་དང་མཎྜལ་ཟླུམ་པོ་མེ་ལོང་གི་ངོས་ལྟར་མཉམ་པར་བྱས་ལ༔ དེ་ཉིད་ཀྱི་དབུས་སུ་རྡུལ་ཚོན་གྱིས་བུམ་པ་བསྣོལ་མ་རབ་ཏུ་ལེགས་པ་དམར་པོ་ཁ་རྒྱན་དང་མགུལ་ཆིངས་དང་བཅས་པ་བྲིས་ལ༔ ཟླུམ་པོའི་ཐ་མ་ཚོན་སྣ་ལྔའི་ར་བས་བསྐོར༔ དེའི་སར་ཕྱོགས་སུ་ཤིང་གི་ཁྲིའི་སྟེང་དུ་རིན་པོ་ཆེའི་བུམ་པ་གས་པ་དང་ཆག་པ་དང་ཞོམ་པ་མེད་པ་གསུམ་གྱི་ནང་དུ་སྨན་སྣ་ཚོགས་པ་དང ༔ འབྲུ་སྣ་ཚོགས་པ་དང༔ རིན་པོ་ཆེ་སྣ་ཚོགས་པ་དང༔ འོ་མ་དང༔ མར་ལ་སོགས་པས་ལེགས་པར་བཀང་ལ༔ མེ་ཏོག་དང་འབྲས་བུ་ཅན་གྱི་ཤིང་གིས་ཁ་རྒྱན་བྱས་པ་རས་དཀར་པོ་དྲི་མ་མེད་ཅིང་ཁ་ཚར་མ་ཉམས་པ་གསུམ་གྱིས་མགུལ་བ་བཅིང་ངོ༔ དེ་ལྟར་བུམ་པ་རེ་རེའི་སྟེང་དུ༔ མེ་ལོང་གསུམ་དང༔ རྨ་བྱའི་མདོངས་གསུམ་དང༔ མན་ཤེལ་གསུམ་བཞག་པར་བྱའོ༔ དེ་ནས་སློབ་མ་དེ་ཀུན་ཕྱི་རོལ་དུ་ཁྲུས་ཆུ་ནས་བཏོན་ལ་གོས་གསར་པ་གྱོན་པ་ལ་སོགས་པའི་རྒྱན་དག་གིས་བརྒྱན་པ་ཐལ་མོ་སྦྱར་ནས་གྲལ་ལ་ལེགས་པར་འཁོད་དེ༔ བགེགས་ཀྱི་བར་ཆད་ཞི་བར་བྱ་བའི་ཕྱིར་ལས་ཀྱི་སློབ་དཔོན་གྱི་གུ་གུལ་གྱི་དུད་པས་བདུག༔ དེ་ནས་སྤྲོས་པ་མེད་པའི་དབང་བསྐུར་བའི་ཆེད་དུ་ནོར་བུ་གསེར་གྱི་མཎྜལ་དབུལ་ཞིང་ཐལ་མོ་སྦྱར་ནས་གུས་པས་འདུག་པར་བྱའོ༔ འཁོར་བའི་མཚན་ཉིད་རྣམས་བསྟན་པར་བྱའོ༔ དེ་ལ་སློབ་དཔོན་གྱིས་གླིང་ལ་ཁྱད་པར་དུ་འཕགས་པ་འཛམ་བུ་གླིང་དུ་སྐྱེས༔ ཐོབ་པར་དཀའ་བའི་མི་ལུས་རིན་པོ་ཆེ་ཐོབ༔ ཚང་བར་དཀའ་བའི་དབང་པོ་ལྔ་ཚངས༔ འདུག་པར་དཀའ་བའི་ཤཱཀྱ་ཐུབ་པའི་བསྟན་པ་ལ་གནས༔ འཕྲད་པར་དཀའ་པའི་དམ་པའི་ཆོས་རིན་པོ་ཆེ་དང་འཕྲད་ནས༔ ཆོས་མ་བྱས་ན་མི་ཚེ་སྟོང་ལོག་ཡིན་པས༔ ད་རེས་ཚེ་འདི་ལ་རྫོགས་པའི་སངས་རྒྱས་རིན་པོ་ཆེ་ཐོབ་པར་བྱས་ལ་སེམས་ཅན་ཐམས་ཅད་ཐུགས་རྗེའི་སྒོ་ནས་འདྲེན་དགོས་པས༔ ད་རེས་ཚེ་འདི་ལ་ཐོབ་པར་བྱའོ་སྙམ་པའི་བློ་བསྐྱེད་ནས་སྨིན་པའི་ལམ་ལ་འཇུག་དགོས༔ དེ་གྲོལ་བར་བྱེད་པའི་ཐབས་ལ་གནས་པར་བྱས་ནས་མཐར་སངས་རྒྱས་བསྒྲུབ་པར་འདོད་པས་ན༔ དང་པོ་སྨིན་པར་བྱེད་པ་ལ་དབང་བཞི་རྫོགས་པར་ཐོབ་དགོས་པས་འདི་ཞུའོ༔ དེས་མ་འགྲུབ་ན་སྤྲོས་མེད་མན་ཆད་ཐོབ་པར་བྱས་ནས་ཉམས་སུ་ལེན་དགོས༔ དེ་ནས་འཁོར་བའི་མཚན་ཉིད་ཡིད་ལ་དྲན་པར་བྱས་ནས་བཟླས་པ་ལ་ཞུགས་ཏེ༔ དེ་ཡང་འཁོར་བའི་མཚན་ཉིད་དེ་ལས་བཟློག་པར་བྱ་བའི་ཕྱིར་དུ་འཁོར་བའི་ཞེན་པ་དང་བྲལ་བར་བྱས་ཏེ༔ ཆོས་ཐམས་ཅད་རྨི་ལམ་ལྟ་བུ༔ སྒྱུ་མ་ལྟ་བུ༔ སྤྲུལ་པ་ལྟ་བུ༔ དྲི་ཟའི་གྲོང་ཁྱེར་ལྟ་བུ༔ བར་སྣང་གི་གློག་ལྟ་བུ༔ མྱུར་བྱེད་ཀྱི་འཁོར་ལོ་ལྟ་བུ༔ དཔེ་དུ་མས་མཚོན་པར་བྱའོ༔ དེ་ཉིད་ཀྱི་དོན་གྱི་འཁོར་བའི་ཞེན་པ་དང་བྲལ་བས་གོང་མའི་དོན་ལ་གནས་པའི་དགོས་པ་ཡོད་དོ༔ ཡང་འཁོར་བ་ལ་སྐྱོ་བ་བསྐྱེད་པ་ལས༔ འཁོར་བའི་མཚན་ཉིད་ནི་འདོད་པ་དང་བྲལ་བའི་ཕྱིར་འཁོར་བ་ལ་ཞེན་པའི་སྐྱོན་དེ་སྤང་བར་བྱའོ༔ འཁོར་བ་ནི་དཔེ་ཟོ་ཆུའི་འཁྱུད་མོའི་རྣམ་པ་དང་མཚུངས༔ མེ་ཆེན་པོ་འབར་བའི་ནང་དུ་སྦྲང་བུ་ཚུད་པ་ལྟ་བུ་དང༔ འདབ་ཆགས་རྙི་ལ་ཚུད་པ་ལྟ་བུ་དང༔ རི་དྭགས་རྒྱལ་ཚུད་པ་ལྟ་བུ་དང༔ ཕྱིའི་རྒྱ་མཚོར་གཟིངས་ཐག་ཆད་པ་ལྟ་བུ་དང༔ རབ་ཏུ་བརྒལ་དཀའ་བའི་འདམ་རྫབ་ཆེན་པོར་ཚུད་པ་ལྟ་བུ་དང༔ འཇིགས་པ་དང་བཅས་པའི་འཕྲང་ལ་ལམ་ནོར་་ལྟ་བུ་དང༔ གསོད་པའི་གཤེད་མའི་དཀྱིལ་དུ་ཚུད་པ་བལྟ་བུ་དེ་ལ་སོགས་པས་བསྟན་ནོ༔ ཡང་འདོད་ཡོན་ལ་སྐྱོ་བ་བསྐྱེད་པའི་ཕྱིར་འདོད་ཡོན་ནི་སྐོམ་གྱིས་གདུངས་པ་ལ་ཚྭ་ཆུ་བླུད་པ་ལྟ་བུ་དང༔ དུག་གི་ལོ་མ་ལྟ་བུ༔ དུག་སྤྲུལ་གྱིས་ཟིན་པ་ལྟ་བུ༔ སྤུ་གྲིའི་སོ་ལྟ་བུ༔ བུད་མེད་ཀྱི་འདོད་ཆགས་ལྟ་བུ་ལ་སོགས་པ་འཁོར་བའི་མཚན་ཉིད་བསྟན་ནོ༔ འདི་རྣམས་ལས་དང་པོ་བ་དབང་ལ་འཇུག་པའི་སྔོན་དུ་བསྟན་པར་བྱའོ༔ འཁོར་བའི་མཚན་ཉིད་སངས་རྒྱས་ཀྱི་ཡོན་ཏན་ལ་སོགས་པ་སྔོན་དུ་བཤད་དོ༔ སྤྲོས་པ་མེད་པའི་དབང་བསྐུར་བ་ལ་སྔོན་དུ་འཇུག་པའི་ཆོ་ག་དང་དངོས་གཞི་གཉིས་ཡིན་ཏེ༔ ཐུན་མོང་གི་འཇུག་པ་དང༔ ཐུན་མོང་མ་ཡིན་པའི་འཇུག་པ་དང་གཉིས་ལས༔ ཐུན་མོང་གི་འཇུག་པ་ལ་སྔོན་དུ་བླ་མ་ལ་གསོལ་གདབ་པ་ནི༔ བླ་མ་རྡོ་རྗེ་འཛིན་པ་རྣམས་པ་བདག་ལ་དགོངས་སུ་གསོལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ༔ རྡོ་རྗེ་དང༔ རིན་ཆེན་དང༔ པདྨ་དང༔ ལས་དང༔ བདེ་བར་གཤེགས་པའི་རིགས་ཐམས་ཅད་བདག་ལ་དགོས་སུ་གསོལ༔ བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་བླ་མ་རྡོ་རྗེ་འཛིན་པ་ཆེན་པོས་བདག་གི་ལུས་བྱིན་གྱིས་བརླབ་ཏུ་གསོལ༔ ངག་བྱིན་གྱི་བརླབ་ཏུ་གསོལ༔ ཡིད་བྱིན་གྱིས་བརླབ་ཏུ་གསོལ༔ སྨིན་པར་བྱིན་གྱིས་བརླབ་ཏུ་གསོལ༔ གང་བར་མཛད་དུ་གསོལ༔ རྒྱས་པར་བྱིན་གྱིས་བརླབ་ཏུ་གསོལ༔ ཆེར་འཕེལ་བར་མཛད་དུ་གསོལ༔ ཞེས་གསོལ་བ་གདབ་བོ༔ ཡང་བླ་མ་ལ་གསོལ་བ་བཏབ་ལ༔ དམ་བཅའ་བའི་ཚིག་རྣམས་ཁས་བླང་བར་བྱའོ༔ བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ༔ ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ་རྡོ་རྗེ་དང༔ རིན་པོ་ཆེ་དང༔ པདྨ་དང༔ ལས་དང༔ དེ་བཞིན་གཤེགས་པའི་རིགས་རྣམས་དགོངས་སུ་གསོལ༔ དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པའི་དཀོན་མཆོག་གསུམ༔ བླ་མ་ལ་ཡང་ཕྱག་འཚལ་ལོ༔ བླ་མ་རྡོ་རྗེ་འཛིན་པ་དང༔ དཀོན་མཆོག་གསུམ་ལ་སྐྱབས་སུ་མཆི༔ སྡིག་པ་ཐམས་ཅད་སོ་སོར་བཤགས༔ བྱང་ཆུབ་སེམས་ནི་བླ་ན་མེད༔ དམ་པ་བདག་གིས་བསྐྱེད་པར་བགྱི༔ རིགས་ལྔའི་དམ་ཚིག་རྗེས་བཟུང་སྟེ༔ རྡོ་རྗེ་དྲིལ་བུ་ལ་སོགས་པ༔ དམ་ཚིག་རྫས་རྣམས་གཟུང་བར་བགྱི༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པའི་དཀོན་མཆོག་གསུམ༔ ནམ་དུ་ཡང་ནི་མི་གཏོང་ངོ༔ རྡོ་རྗེ་སློབ་དཔོན་མི་གཏོང་ངོ༔ རྡོ་རྗེ་སྤུན་སྲིང་རྣམས་ལ་ཡང༔ ནམ་ཡང་སྨད་པར་མི་བྱའོ༔ སེམས་ཅན་རྣམས་ལ་འཚེ་བ་སྤང༔ འཕགས་པ་རྣམས་ལ་སྨད་མི་བགྱི༔ ཉན་ཐོས་རང་སངས་རྒྱས་རྣམས་ལ༔ ཅུང་ཟད་བརྙས་པར་མི་བྱ་ཞིང ༔ གསང་སྔགས་སྤངས་བར་མི་བྱ་ཞིང༔ བསྙེན་སྒྲུབ་ལས་ཀྱི་མཐའ་རྣམས་ཀྱང༔ དུས་འདི་ཉིད་ནས་གཟུང་བར་བྱ༔ དམ་ཚིག་སྡོམ་པ་ལ་གནས་ཤིང༔ སྐུ་གསུང་ཐུགས་ལས་མི་འདའ་འོ༔ སྲོག་ཆགས་གསད་པར་མི་བྱ་ཞིང༔ དམ་ཆོས་ནམ་ཡང་མི་གཏང་ངོ༔ བླ་མའི་བྱ་བ་མི་གཏང་ཞིང༔ འཁྲུལ་པའི་བྱ་བ་མི་བགྱིའོ༔ སེམས་ཅན་སྨིན་པ་ཉིད་དུ་བགྱི༔ མ་གྲོལ་མ་རྣམས་དགྲོལ་བ་དང༔ མ་བསྒྲལ་མ་རྣམས་བསྒྲལ་བ་དང ༔ དབུགས་མ་དབྱུང་རྣམས་དབུགས་དབྱུང་སྟེ༔ སེམས་ཅན་མྱ་ངན་འདས་ལ་འགོད༔ བསྟན་པ་སྨད་པར་མི་བྱ་ཞིང༔ བླ་མ་ལ་ཡང་ཡོན་དབུལ་ལོ༔ འཁོར་བ་རིང་དུ་སྤང་བྱ་ཞིང༔ མྱང་འདས་དང་དུ་བླང་བར་བགྱི༔ དགེ་སློང་སེམས་སུན་མི་དབྱུང་ཞིང༔ བསམ་གཏན་སྒོམ་པ་དཀྲུག་མི་བྱ༔ ཆོས་དང་གང་ཟག་ལ་མི་སྨད༔ ཁྱད་པར་དཀྱིལ་འཁོར་བསྒོམ་པར་བགྱི༔ རྫོགས་རིམ་སྒོམ་ལས་མི་འདའོ༔ ཇི་ལྟར་བླ་མས་གསུངས་པ་ལ༔ བདག་ནི་ནམ་ཡང་མི་འདའ་འོ༔ ཞེས་པས་བླ་མའི་མདུན་དག་ཏུ༔ དམ་བཅའི་ཚིག་དང་གསོལ་གདབ་སོངས༔ དེ་ནས་སློབ་དཔོན་བདག་ཉིད་ཀྱིས༔ ཐོད་པ་ཚལ་བུའི་ནང་དག་ཏུ༔ བདུད་རྩི་ལྔ་ཡི་ཆུ་བླུས་ལ༔ ལག་ཏུ་བཟུང་སྟེ་འདི་སྐད་བརྗོད༔ ཧཱུྃ་འདི་ནི་དམ་ཚིག་དམྱལ་བའི་ཆུ༔ དམ་ཚིག་འདས་ན་ཚིག་པར་འགྱུར ༔ དེ་བས་དམ་ཚིག་སྲོག་གི་ཆུ༔ སྙིང་ལ་བཞག་པས་ཐུབ་བར་གྱིས༔ གལ་ཏེ་ཉམས་པར་མ་གྱུར་ན༔ འདི་ནི་དམ་ཚིག་དངོས་གྲུབ་ཆུ༔ མཆོག་དང་ཐུན་མོང་ལོངས་སྤྱོད་ཅིང༔ རྫོགས་པའི་སངས་རྒྱས་འབྲས་བུ་ཐོབ༔ དེ་བས་འདི་ཉིད་ཐུབ་པར་གྱིས༔ ཞེས་བརྗོད་དམ་ཚིག་མནའ་ཆུ་བླུད༔ རྡོ་རྗེ་ཆེན་པོའི་དམ་ཚིག་ནི༔ སློབ་མས་འདི་སྐད་བརྗོད་པར་བྱ༔ བདག་ནི་འདི་ནས་བཟུང་ནས་སུ༔ བྱང་ཆུབ་མ་ཐོབ་པར་དག་ཏུ༔ འཁྲུལ་པའི་བྱ་བ་བྱེད་རེ་ཀན༔ དམ་ཚིག་བླ་མ་སྤོང་རེ་ཀན༔ ཆོས་མིན་བྱ་བ་བྱེད་རེ་ཀན༔ བླ་མས་ཅི་གསུང་མི་ཉན་རེ༔ སེམས་ཅན་ཀུན་ལ་འཚེ་རེ་ཀན༔ བདེ་ཆེན་ལམ་དུ་མི་སློང་རེ༔ འཇིག་རྟེན་འདོད་ཕྱིར་འབྲངས་རེ་ཀན༔ ལྟ་དང་སྒོམ་དང་སྤྱོད་པ་ནི༔ སྲོག་གི་ཕྱིར་ཡང་གཏོང་རེ་ཀན༔ དུར་ཁྲོད་ལ་སོགས་དབེན་པའི་གནས༔ འདི་ནས་བཟུང་སྟེ་མི་བསྟེན་རེ༔ མདོར་ན་འཇིག་རྟེན་བྱ་བ་གཏོང ༔ འདས་པའི་བྱ་བ་གཏོར་རེ་ཀན༔ ཞེས་ནི་སློབ་མས་རིམ་པ་བཞིན༔ རྡོ་རྗེའི་དམ་ཚིག་མནའ་བསྐྱལ་ལོ༔ བླ་མ་དཔལ་ལྡན་རྡོ་རྗེ་འཆང༔ མནའ་ཡི་ཉེས་དམིགས་ལེགས་པར་བཤད༔ ཐུབ་པའི་ཡོན་ཏན་ལེགས་བཤད་དོ༔ དེ་ནས་བླ་མས་གདམས་པ་འབོག་ཅིང་དམ་བཅའ་བའི་ཚིག་རྣམས་བརྗོད་པར་བྱའོ༔ ཀྱཻ་སྐལ་ལྡན་སེམས་ཀྱི་བུ་གཅིག་པོ༔ ཕྱི་ནང་གསང་བའི་ཐེག་པ་དང༔ དམ་ཆོས་བསྒྲུབ་བར་དམ་ཆོས་ཤིག༔ སེམས་ཅན་ཀུན་ལ་བྱམས་པའི་སེམས༔ དུས་འདི་ཉིད་ནས་མ་སྤང་ཞིག༔ དཀྱིལ་འཁོར་འཁོར་ལོ་སྒོམ་པ་དང༔ བླ་མ་ནམ་ཡང་མ་བཏང་ཞིག༔ རྡོ་རྗེ་མཆེད་ལ་མི་ཁྲོ་ཞིང༔ སངས་རྒྱས་ཆོས་དང་དགེ་འདུན་ཏེ༔ དཀོན་མཆོག་གསུམ་པོ་བཀུར་བ་དང༔ ཇི་ལྟར་སྔགས་ཀྱི་དམ་ཚིག་དང ༔ སྡོམ་པ་ཐམས་ཅད་གཟུང་བར་བགྱི༔ བསྟན་པ་ཀུན་ལ་གནོད་པ་སྤང༔ ཐར་བའི་ལམ་དུ་འགྲོ་བར་བགྱི༔ ཀྱཻ་སྐལ་ལྡན་རྫོགས་པའི་རང་བཞིན་ཅན༔ དབང་བསྐུར་ཆོ་ག་ཇི་ལྟ་བ༔ གཞན་ལ་བརྗོད་པར་མ་བྱེད་ཅིག༔ དབང་རྫས་རྣམས་དང་སྔགས་ཀྱི་ཚིག༔ དབང་བསྐུར་མ་ཐོབ་མི་རྣམས་ལ༔ ནམ་ཡང་བཤད་པར་མ་བྱེད་ཀྭའི༔ འཁོར་བ་རིང་དུ་སྤང་བར་གྱིས༔ གང་གི་རྡོ་རྗེ་འཛིན་པ་ཡི༔ དངོས་གྲུབ་རྣམས་ནི་མ་གཏོང་ཞིག༔ ཅེས་བརྗོད་ལ་སྡོམ་པ་འབོག་པར་བྱའོ༔ མི་དགེ་བའི་ལས་སོགས་སྤང་བའི་ཆོས་ནི་བྱ་བའི་རིམ་པ་བཤད༔ དེ་ཡན་ཆད་ཀྱི་ཐུན་མོང་གི་འཇུག་པ་རྫོགས་ནས༔ ད་ཐུན་མོང་མ་ཡིན་པའི་འཇུག་པ་ནི༔ རས་སམ་དར་གྱིས་གདོང་གཡོགས་ཤིང་། སྤྲོས་པ་ལ་དགའ་ན་རིགས་ལྔའི་སྡོམ་པ་འབོག༔ དེ་ནས་བླ་མ་ལ་གསོལ་བ་གདབ་པར་བྱ་སྟེ༔ བླ་མ་རྡོ་རྗེ་འཛིན་པ་ལ༔ བདག་ནི་སྐལ་ལྡན་སྙིང་གི་བུ༔ དད་པས་རབ་ཏུ་ཉན་བར་འཚལ༔ རང་བཞིན་རྫོགས་པ་ཆེན་པོ་ཡི༔ དབང་བསྐུར་ནང་དུ་འཇུག་ལགས་པས༔ དཔའ་བོ་རྡོ་རྗེ་བླ་མ་ཡིས༔ རང་གི་སེམས་ཀྱི་གནས་ལུགས་ཀྱི༔ ཨ་ཏིའི་དཀྱིལ་འཁོར་བསྟན་དུ་གསོལ༔ བདག་ནི་ཡང་དག་འདིར་ཞུགས་ནས༔ སླར་ཡང་ལྡོག་པར་མི་བགྱིད་དོ༔ ཞེས་གསོལ་བ་གདབ༔ དེ་ནས་བླ་མས་རྗེས་སུ་གནང་བ་སྦྱིན་ཏེ༔ ཨེ་མ་བུ་ཁྱོད་སྐལ་བ་བཟང༔ སྐལ་ལྡན་བྱང་ཆུབ་སེམས་ཆེན་པོ༔ སྔོན་ཆད་རང་བཞིན་རྫོགས་ཆེན་གྱི༔ དབང་བསྐུར་ནང་དུ་མ་ཞུགས་པས༔ དོ་ནུབ་སྐལ་ལྡན་བུ་ཁྱོད་ལ༔ རྫོགས་ཆེན་དཀྱིལ་འཁོར་བསྟན་པར་བྱ༔ སེམས་ཀྱི་རྟོགས་པ་ཀུན་སོལ་ལ༔ འཇིག་རྟེན་བཅིངས་པ་ཀུན་གྲོལ་གྱིས༔ འདི་ལ་སྤང་བླང་ཐ་སྙད་བྲལ༔ རིགས་དང་རྒྱུད་རྣམས་སྤྱོད་པ་ཡི༔ ལུས་ངག་བདེ་བའི་རྟེན་ཡིན་པས༔ དེང་ནས་བརྩམས་ཏེ་སླར་མ་ལྡོག༔ ཅེས་རྗེས་སུ་གནང་བ་བྱིན་ནས༔ མཎྜལ་གྱི་ཤར་ཕྱོགས་སུ་ལུས་གནད་ཙོག་པུ་ཐལ་མོ་སྦྱར་ནས་སེམས་མ་ཡེངས་བར་བླ་མ་ལ་གཏད་ནས་བྱིན་དབབ་ཅིང་གདོང་གཡོགས་བཀྲོལ༔ སྒོམ་དུ་གཞུག༔ དེ་ནི་བསྲེ་བ་ཐུན་མོང་མ་ཡིན་པ་རྫོགས་པ་ཆེན་པོ་མཉམ་པའི་རྒྱས་གདབ་པ་ཞེས་བྱའོ༔ དེ་ནས་མཎྜལ་དེའི་ཐོ་ཕྱི་རྣམས་སུ་ལྷ་བཤོས་དང་མར་མེ་དང ༔ སྤོས་ལ་སོགས་པའི་མཆོད་པ་ཅི་འབྱོར་བའི་ཡོ་བྱད༔ མཁའ་འགྲོ་མ་རྣམས་མཉེས་པར་བྱ་བ་དང༔ བར་ཆད་བསལ་བར་བྱ་བའི་ཕྱིར་ཚོགས་དང་གཏོར་མ་རབ་ཏུ་བཟང་བ་བཤམ་པར་བྱའོ༔ དེ་ནས་སྤྲོས་པ་མེད་པའི་དབང་བསྐུར་བ་ནི༔ ངག་གི་ནུས་པ་གཞུག་པ་དང ༔ ངག་རང་དག་ལ་འགྲོ་བའི་དོན་ཡིན་ཏེ་དཔོན་སློབ་ཀུན་སོ་སོའི་ལུས་བདེ་བར་བཅོས་ལ༔ ངག་ཏུ་སྒྲ་ཆེ་བ་ཡང་མ་ཡིན༔ ཆུང་བ་ཡང་མ་ཡིན་པར༔ ཨ་ཨ་ཨཱ་ཞེས་བརྗོད་ཅིང་ཡིད་ཨ་ལ་གཏད་པ་ཞག་གཅིག་བརྗོད་པར་བྱ༔ དེ་ནས་ནུབ་གཉིས་པ་ལ་ཨཱ་ལིའི་ཚོགས་ཚང་བར་བརྗོད་དོ༔ ཨ་ཨཱ༔ ཨི་ཨཱིཿ ཨུ་ཨཱུཿ རྀ་རཱྀ༔ ལྀ་ལཱྀ༔ ཨཻ་ཨཻ༔ ཨོ་ཨཱ༔ ཨཾ་ཨཱ༔ དེ་ནས་ནུབ་གསུམ་པ་ལ་ཀཱ་ལིའི་ཚོགས་ཚང་བར་བརྗོད་པར་བྱ༔ ཀ་ཁ་ག་གྷ་ང༔ ཙ་ཚ་ཛ་ཛྷ་ཉ༔ ཊ་ཋ་ཌ་ཌྷ་ཎ༔ ཏ་ཐ་ད་དྷ་ན༔ པ་ཕ་བ་བྷ་མ༔ ཡ་ར་ལ་ཝ་ཤ་ཥ་ས་ཧ་ཀྵཿ འདིའི་དུས་ན་སློབ་དཔོན་གྱིས་ཨ་རྐྱང་བའི་དུས་ན་བུ་ཡིས་ཨ་བརྗོད་པས་རྩ་རྣམས་ཁ་བྱེ་སྟེ་ཨ་ཐོལ་ཐོལ་རང་འབྱུང་ངོ༔ དེ་ལས་འོད་ཀྱི་གོང་བུ་རྣམས་ལས་འོད་འཕྲོས་པས་རང་བཞིན་ཀུན་ཏུ་བཟང་པོ་ཡབ་ཡུམ་སྦྱོར་མཚམས་ནས་བྱང་ཆུབ་ཀྱི་སེམས་འོད་ལྔའི་གོང་བུས་རང་གི་མགོ་མཇུག་ཁྱབ་པ་ལ་བློ་བཞག༔ འདིའི་དུས་ན་རྣ་བའི་སྒྲ་འབྱུང་བའི་རྩ་བཙིར་རོ༔ དེ་ལྟར་སློབ་མ་ཡང་ཡང་སྒོམ་དུ་གཞུག་གོ༔ བཅུག་པས་ཉམས་སུ་མྱོང་བ་ཁྱད་པར་ཅན་སྐྱེ་བར་ངེས་སོ༔ དེ་ནས་ཨཱ་ལིའི་ཚོགས་བརྗོད་པའི་རྗེས་སུ་ཨ་དེ་ཉིད་བརྗོད་པ་ཙམ་གྱིས་རྩ་རྣམས་ཀྱི་ནང་ནས་རང་བཞིན་རྫོགས་པའི་ཡི་གེ་རྣམས་རང་བྱུང་བས༔ རང་གི་ངག་ནས་ཀྱང་ཆོས་ཐམས་ཅད་ཀྱི་སྒྲ་སི་ལི་ལི་བྱུང་བ་ལ་བློ་བཞག༔ ཀཱ་ལིའི་དུས་སུ་བརྗོད་པའི་ཚེ་ཡི་གེ་དེ་དག་ཕྱིར་མངོན་པར་རང་གི་ཁོག་པའི་ནང་ཡི་གེས་མེར་གྱིས་ཁེངས་པ་ལ་བློ་གཞག་པར་བྱའོ༔ དེ་ནས་སྐལ་ལྡན་ལ་དབང་བསྐུར་བར་བྱ་སྟེ༔ ལུས་ངག་ཡིད་གསུམ་ཅིག་ཅར་བྱིན་གྱིས་བརླབས་པའི་དོན་དུ་དབང་བསྐུར་བ་ནི༔ ལུས་གཅེར་བུར་ཕྱུངས་ལ་བུམ་པའི་ཆུ་དང་སིནྡྷུ་ར་ཡི་ཐེག་ལེ་ཞིག་སྤྱི་བོའི་གཙུག་ཏུ་བྱས་ལ་ངག་ཏུ་ཨཱོཾ་ཨཱོཾ་ཞེས་དྲག་ཏུ་བརྗོད་དུ་གཞུག༔ སློབ་དཔོན་གྱི་བུའི་མགྲིན་པའི་རྩ་གཉིད་ལོག་གཏེམས༔ འདིའི་དུས་སུ་ལུས་འདར་ཞིང་གཡོ་བ་དང༔ ངག་རང་རྡོལ་བ་དང༔ སེམས་བག་ཡངས་སུ༔ འགྱུར་བ་ཉིད་འབྱུང༔ སློབ་དཔོན་གྱིས་སློབ་མའི་ལུས་ཐམས་ཅད་ཨཱོཾ་དཀར་པོ་ཞིག་ཏུ་དམིགས་ལ་དེ་འོད་དུ་ཞུ་བ་ལས་ཆོས་ཉིད་སྟོང་པའི་རྒྱས་གདབ༔ སློབ་དཔོན་གྱིས་བུམ་པའི་ཆུ་ཐིགས་པ་གཅིག་དང་སིནྡྷུ་ར་ཡི་ཐིག་ལེ་གཅིག་མགྲིན་པར་བྱས་ལ༔ སློབ་མའི་ངག་ཏུ་དྲག་ཤུལ་དང་བཅས་པས་ཨ་ཨཱ་བརྗོད་དོ༔ སློབ་དཔོན་གྱིས་སློབ་མའི་མཆན་ཁུང་གི་རྩ་གཏེམས༔ སློབ་མའི་ཤེས་པ་ནམས་མཁར་གཏོད་དུ་གཞུག༔ འདིའི་དུས་སུ་ལུས་རབ་ཏུ་འདར་བ་དང༔ ངག་རབ་ཏུ་འདར་བ་དང༔ སེམས་རབ་ཏུ་གསལ་བ་དག་འོང་ངོ༔ སློབ་མའི་ལུས་ཨཱ་དམར་པོ་ཆེན་པོ་ཞིག་ཏུ་དམིགས་ལ་ཆོས་ཉིད་སྟོང་པ་ཉིད་ཀྱི་རྒྱས་གདབ་བོ༔ ཡང་སློབ་དཔོན་གྱི་བུམ་པའི་ཆུ་ཐིགས་པ་གཅིག་དང་སིནྡྷུ་ར་ཡི་ཐིག་ལེ་སྙིང་ཁར་བྱས་ལ་ངག་ཏུ་ཧཱུྃ་ཧཱུྃ་ཞེས་དྲག་ཏུ་བརྗོད་དུ་གཞུག༔ བླ་མས་བུའི་མིག་གི་རྩ་གཏེམས༔ ཤེས་པ་འབྱུང་བཞི་ལ་གཏད༔ སློབ་མའི་ལུས་ཧཱུཾ་མཐིང་ནག་གཅིག་ཏུ་དམིགས་ལ་ཆོས་ཉིད་སྟོང་པ་ཉིད་ཀྱི་རྒྱས་གདབ་བོ༔ གཞན་དེའང་རྩ་གཏེམས་པ་གསུམ་ཇི་ལྟ་བ་བཞིན་དུ་བྱའོ༔ དེ་ནས་ཙན་དན་དཀར་པོའི་ཐིག་ལེ་གཅིག་སྨིན་མཚམས་སུ་བྱུག༔ དེའི་སྟེང་དུ་དམར་པོའི་ཐེག་ལེ་བྱ༔ དེའི་རྗེས་སྟོང་ཉིད་དར་ཅིག་བསྒོམ༔ དེ་ནས་བུམ་པ་ཡི་གེའི་རང་བཞིན་དུ་དམིགས་པ་ལ་སློབ་མའི་མགྲིན་པའི་གནས་སུ་ངག་ལ་བསྟིམ༔ ཆུ་དང་སྨན་ལ་སོགས་པ་རྣམས་རང་བཞིན་རྫོགས་པ་ཆེན་པོའི་མཚན་ཉིད་ཀྱི་སྒྲ་རང་བྱུང་སྟེ༔ བུམ་པ་མགོ་ཐོག་ཏུ་བཞག་ལ༔ ཆོས་ཐམས་ཅད་བརྗོད་དུ་མེད་པའོ༔ བསམ་དུ་མེད་པའོ༔ བལྟར་མེད་པའོ༔ གཉིས་སུ་མེད་པའོ༔ མཚན་མ་མེད་པའོ༔ སྨོན་པ་མེད་པའོ༔ སྤྲོས་པ་མེད་པའོ༔ སྤྲོས་པའི་མཐའ་བརྒྱད་དང་བྲལ་བའོ༔ ཞེས་པའི་སྒྲ་རང་བྱུང་བས་སློབ་མ་ཡང་དེ་ཉིད་ཀྱི་རང་བཞིན་དུ་གྱུར་པར་དམིགས་ལ༔ དེ་ནས་སློབ་དཔོན་གྱིས་བུམ་པ་སློབ་མའི་སྤྱི་བོར་བཞག་ལ་དམིགས་པ་དང་ཚིག་རྣམས་ངག་ཏུ་བརྗོད་ཅིང་བྱའོ༔ དེ་ནས་ངག་གི་ལས་སྒྲིབ་རྫོགས་པར་བྱ་བའི་ཕྱིར་ཉི་ཟླ་ཁ་སྦྱོར་རམ་གཞན་གྱིས་ཤེས་ཀྱང་བཏུབ༔ རྡོ་རྗེའི་གླུ་ལན་གསུམ་བརྗོད༔ གཞན་ཡང་དུང་དང་ཆ་ལང་དང་འཁར་རྔ་དང༔ ཤིང་རྔ་དང་དྲིལ་བུ་དང༔ ཌཱ་མ་རུ་སོགས་དུས་གཅིག་ལ་བསྒྲག་ཅིང་ཡི་གེ་བརྒྱ་པ་བཟླའོ༔ དེ་ནས་ཚིག་བརྒྱད་ཀྱི་དོན་བཤད་དོ༔ དེ་ནས་སློབ་མའི་ངག་དང་སེམས་ལ་ཚིགས་སུ་བཅད་པའི་དབང་བསྐུར་བར་བྱ་སྟེ༔ རང་བཞིན་རྫོགས་པ་ཆེན་པོ་དང་མཉམ་པའི་རྒྱས་གདབ་པའི་ཕྱིར༔ ཚིག་གི་རྒྱལ་པོ་འདི་དག་ངར་བསྐྱེད་ལ་བརྗོད་པར་བྱའོ༔ ཨེ་མ་ཧོ༔ ཆོས་ཉིད་སྤྲོས་དང་བྲལ་བའི་བདེ་ཆེན་འདི༔ བལྟར་མེད་བསམ་ཡུལ་ཀུན་ལས་འདས་པ་ངོ་མཚར་ཆེ༔ གཉིས་མེད་རང་སྣང་ཀུན་ཁྱབ་ཡེ་ཤེས་ནི༔ རང་རི་མངོན་དུ་སྣང་བ་ངོ་མཚར་ཆེ༔ བྱ་བྲལ་རང་བཞིན་རྫོགས་ཆེན་གནས་ལུགས་ཉིད༔ མ་བཙལ་རང་ལས་བྱུང་བ་ངོ་མཚར་ཆེ༔ ངོ་བོ་སྤྲོས་བྲལ་རང་བཞིན་རྣམ་དག་ལ༔ དགེ་སྡིག་མཐའ་ལས་འདས་པ་ངོ་མཚར་ཆེ༔ རང་སྣང་སྤྲོས་པ་མེད་པའི་རིག་པ་འདི༔ ལྷ་སྒོམ་སྤྱོད་པ་མཐོང་བ་ངོ་མཚར་ཆེ༔ རང་ལས་བྱུང་བའི་འོད་ཀྱི་སྒྲོན་མ་འདི༔ མངོན་སུམ་ཡུལ་དུ་སྣང་བ་ངོ་མཚར་ཆེ༔ ངོ་བོ་རང་བཞིན་ཐུགས་རྗེ་ཕྱོགས་མེད་པའི༔ ཆོས་སྐུ་ལོངས་སྐུ་སྤྲུལ་སྐུར་ཤར་བ་ངོ་མཚར་ཆེ༔ བརྗོད་མེད་རྣམ་པར་དག་པའི་ཡེ་ཤེས་ཉིད༔ སྟོང་པ་རང་སར་དག་པའི་ཡུལ་ལ་སྣང་བ་ངོ་མཚར་ཆེ༔ མ་རིག་མུན་སེལ་ཐིག་ལེ་སྟོང་པ་ཉིད༔ དབང་པོའི་ཡུལ་ལ་སྣང་བ་ངོ་མཚར་ཆེ༔ ཞེས་བརྗོད་ལ་དེ་དག་གི་དོན་ཡང་བཤད་དོ༔ དེ་ནས་རྫོགས་པ་ཆེན་པོ་བརྗོད་པ་ལས་འདས་པའི་དོན་དེ་སྐལ་ལྡན་གྱི་བློ་ལ་གནས་པར་བྱ་བའི་ཕྱིར་འདི་སྐད་དོ༔ དངོས་པོ་གང་ལ་ཡང་རང་བཞིན་མེད་པ་ཡིན་ནོ༔ བལྟར་མེད་པ་དང༔ སྲོག་མེད་པ་དང༔ སྙིང་པོ་མེད་པ་དང༔ ཡ་མ་བརླ་ཡིན་པ་དང༔ ཚིག་མེད་པ་དང༔ ཡི་གེ་མེད་པ་དང༔ སྒྲ་མེད་པ་དང༔ ཐ་སྙད་མེད་པ་དང༔ བརྗོད་དུ་མེད་པའོ༔ ཞེས་དངོས་པོའི་འདུག་ཚུལ་བརྗོད་མེད་དུ་གཏན་ལ་ཕེབས་པའོ༔ དེ་ནས་ལུས་ངག་ཡིད་གསུམ་རྫོགས་པ་ཆེན་པོའི་དོན་སྟོང་ཉིད་ཀྱི་གོ་རར་གཞུག་པའི་ཕྱིར༔ སྟོང་པ་ཉིད་བདེ་བ་ཆེན་པོའི་ངང་དུ་དར་གཅིག་བསྒོམ༔ དེ་ཉིད་ཀྱི་དོན་བརྡས་བསྐུལ་བའི་ཕྱིར་ཚིག་ཏུ་འདི་སྐད་བརྗོད་པར་བྱའོ༔ ཆོས་རྣམས་ཐམས་ཅད་སྟོང་ཞིང་བདག་མེད་ལ༔ དངོས་པོ་མཚན་མར་འཛིན་པ་ཡང་རེ་འཁྲུལ༔ རང་རིག་ཡེ་ཤེས་དེ་ཉིད་ཆགས་མེད་ལ༔ འདོད་ཅིང་ཞེན་པའི་བློ་ནི་ཡང་རེ་འཁྲུལ༔ ཆོས་ཀྱི་དབྱིངས་ཉིད་སྤྲོས་དང་བྲལ་བ་ལ༔ མཚན་མ་ཚིག་ཕྱིར་འབྲེལ་བ་ཡང་རེ་འཁྲུལ༔ སྙིང་པོའི་དོན་གྱི་ཡེ་ཤེས་རང་ཤར་ལ༔ གཞན་བྱུང་རྩོལ་སྒྲུབ་བྱེད་པ་ཡང་རེ་འཁྲུལ༔ སེམས་ཉིད་སྐྱེ་ཤི་གཉིས་ལས་འདས་པ་ལ༔ སྐྱེ་འགག་གཉིས་སུ་འཛིན་པ་ཉོན་རེ་མོངས༔ འབྲས་བུ་རང་རྫོགས་སྨོན་ལམ་བྲལ་བ་ལ༔ རྣམ་དཔྱོད་དུས་ལ་ལྟོས་པ་ཡང་རེ་འཁྲུལ༔ བདེ་སྡུག་ཐམས་ཅད་རིག་པའི་ཆོ་འཕྲུལ་ལ༔ བདེ་སྡུག་གཉིས་སུ་འཛིན་པ་ཉོན་རེ་མོངས༔ ཀུན་ཏུ་བཟང་པོ་རང་ལ་གནས་པ་ལ༔ ཡི་དམ་གཞན་ནས་འཚོལ་བ་ཡང་རེ་འཁྲུལ༔ བདག་ཉིད་ཡེ་སངས་རྒྱས་པ་ཡིན་པ༔ ངན་སོང་གསུམ་དུ་འཛིན་པ་ཡང་རེ་འཁྲུལ༔ འཁོར་བ་ངན་སོང་རོལ་པར་ཡེ་ཤར་ལ༔ ཡང་དག་སངས་རྒྱས་འདོད་པ་ཡང་རེ་འཁྲུལ༔ དུག་ལྔ་མ་སྤངས་ཡེ་ཤེས་ལྔ་པོ་ལ༔ ཉོན་མོངས་ལྔ་རུ་འཛིན་པ་ཡང་རེ་འཁྲུལ༔ འཁྲུལ་པའི་སྣང་བ་ཆོས་སྐུར་རང་སྣང་ལ༔ དངོས་པོ་བདག་ཏུ་འཛིན་པ་ཡང་རེ་འཁྲུལ༔ ཐེག་པ་རིམ་དགུ་རང་སར་ཤར་བ་ལ༔ སོ་སོའི་འདོད་གཞུང་འཛིན་པ་ཡང་རེ་འཁྲུལ༔ ཞེས་ཚིག་གི་སྤྲོ་བ་བསྐྱེད་ཅིང་དོན་བསྟན་བར་བྱའོ༔ དེའི་རྗེས་ལ་ལུང་བསྟན་པའི་དབང་ནི༔ སྤྲོས་པ་མེད་པའི་དབང་ལ་ཞུགས་པས་ངག་གི་སྒྲིབ་པ་ཡོངས་སུ་དག་ནས༔ མ་འོངས་པའི་དུས་ན་ལོངས་སྤྱོད་རྫོགས་པའི་ཞིང་ཁམས་སུ་སྐྱེ་བར་འགྱུར་རོ༔ ཞེས་བརྗོད་དོ༔ ཞེས་ལུང་བསྟན་ནོ༔ རྗེས་གནང་ནི་སྤྲོས་པ་མེད་པའི་དབང་བསྐུར་ནས་སྔགས་བཟླས་པ་དང་རྫོགས་རིམ་དང་རྩ་རླུང་ཐིག་ལེ་རྣམས་སྒོམ་དུ་རུང་བ་དང༔ ཐིག་ལེ་སྟོང་པའི་སྒྲོན་མ་ཉིད་སྒོམ་དུ་རུང་བའི་རྗེས་གནང་ཐོབ་བོ༔ དབུགས་དབྱུང་བ་ནི་ཁམས་གསུམ་འཁོར་བར་མི་འཇུག་པར་བྱེད་དོ༔ གཟེངས་བསྟོད་པ་ནི༔ དེ་ལྟར་གྱུར་པས་སེམས་ལ་སྤོབས་པ་བསྐྱེད་པའོ༔ འཇུག་ཅིང་དབང་བསྐུར་བའི་རིམ་པའོ༔ ལས་ཀྱིས་མཐའ་བསྡུ་བ་ནི་རོལ་མོའི་སྒྲ་དང་བཅས་པས་གཏོར་མ་འབུལ་ཞིང་ཆོས་སྐྱོང་རྣམས་ལ་གཏང་རག་གཏོང ༔ ཕྱི་མའི་ཁས་ལེན་དུ་བྱས་ལ་རྦད་བསྐུལ་བྱ༔ དཀོན་མཆོག་གི་གཏོར་མ་དང༔ ཡིད་དམ་གྱི་གཏོར་མ་དང༔ མཁའ་འགྲོ་ཆོས་སྐྱོང་གི་གཏོར་མ་དང༔ འབྱུང་པོའི་གཏོར་མ་རྣམས་རིམ་པ་བཞིན་དུ་འབུལ་དེ་ནས་རོལ་མོའི་སྒྲ་གོང་མ་རྣམས་དང་ལྡན་པས་གཏོར་མ་གཤེགས་སུ་གསོལ༔ དེ་ནས་བདག་ཉིད་བསྐྱེད་རིམ་སྔར་བཞིན་དུ་བསྒོམ་པ་དེའི་དཀྱིལ་འཁོར་བསྡུ་བ་དང༔ རྡོ་རྗེའི་གླུ་བླང་བ་དང༔ བཀྲ་ཤིས་བརྗོད་པ་དང༔ སྨོན་ལམ་བཏབ་སྟེ་རྡོ་རྗེ་སློབ་དཔོན་དང་རྣལ་འབྱོར་དབང་ཕྱུག་ཕོ་མོ་རྣམས་ཀྱིས་སྨོན་ལམ་འདི་ལྟར་བྱ་སྟེ༔ འདས་དང་མ་འོངས་ད་ལྟར་གྱི༔ རྫོགས་སངས་རྒྱས་པའི་ལེགས་པ་ཡིས༔ བཅོམ་ལྡན་རྡོ་རྗེ་འཆང་ཆེན་དང༔ སྐལ་བ་མཉམ་པར་འགྱུར་བར་ཤོག༔ ངན་སོང་ཐམས་ཅད་རྒྱུན་ཆད་ཤོག༔ སངས་རྒྱས་བསྟན་པ་འཕེལ་བ་དང༔ རྫོགས་སངས་རྒྱས་པའི་ཡོན་ཏན་རྣམས༔ བདག་ལ་དེང་འདིར་གསལ་བ་དང༔ ཞིང་ཁམས་བཟང་ཞིང་ཉམས་དགའ་བར༔ བདག་ཀྱང་སྐྱེ་འགྱུར་སྐྱེ་བར་ཤོག༔ སྐྱེས་པས་སེམས་ཅན་དོན་བྱེད་དེ༔ འཁོར་བ་དོ་ནས་སྤྲུག་པར་ཤོག༔ དོང་སྤྲུག་སངས་རྒྱས་ཆེན་པོ་ཉིད༔ རྒྱས་པར་བདག་ལ་སེམས་སྦྱངས་ཤིང༔ བདེ་བར་མགོན་པོ་རྣམས་མཉམ་ཤོག༔ ཇི་ལྟར་དམ་ཚིག་སྡོམ་པ་ཉིད༔ འདི་ཉིད་དུའང་རྫོགས་པར་ཤོག༔ ཅེས་སྨོན་ལམ་དྲིལ་བུའི་སྒྲ་དང་བཅས་པས་གདབ༔ ཆོ་ག་ལྷག་ཆད་བསྐང་བའི་ཡི་གེ་བརྒྱ་པ་བཟླས༔ བུམ་ཆུས་ཁྲུས་བྱེད་ན་བྱ༔ མི་བྱེད་ན་རིའམ་ས་གཙང་སར་བསྐྱལ༔ མཎྜལ་ཕྱགས་ལ་དྲི་བཟང་པོའི་ཆུས་བྱུགས་ལ་མེ་ཏོག་ཅིག་ཙམ་བཞག༔ ནང་མཆོད་བྱས་པའི་སྣོད་རྫས་བཀྲུས་ལ་སོ་སོའི་གནས་སུ་བཞག༔ དབང་བསྐུར་བའི་ཁང་པ་དེ་ལྷ་ཁང་ངམ་མཆོད་ཁང་ཡིན་ན་མཆོད་པ་བཤམས་ལ་བཞག༔ གསར་དུ་བརྒྱན་པ་ཡིན་ན་རྒྱན་རྣམས་བསྡུ༔ རྟེན་རྣམས་བསྡུས་ལ་གནས་ཁང་ཕྱགས་ལ་མེ་ཏོག་གཏོར་ལ་བཞག༔ སྣོད་མ་ཡིན་པ་ལ་གསང་བའི་དོན་དུ་དབང་བསྐུར་བའི་རྗེས་མི་མངོན་པར་བྱའོ༔ དེ་ནས་ཡོན་དབུལ་ཞིང་དགའ་སྟོན་བྱ་བའི་རིམ་པ་ནི༔ སློབ་དཔོན་ལ་ཅི་འབྱོར་པའི་ཡོན་དབུལ༔ མཆེ་ལྕམ་རྣལ་འབྱོར་ཕོ་མོ་རྣམས་ལ་དགའ་སྟོན་ཅི་རིགས་པ་བྱ༔ གཞན་དགེ་འདུན་པ་དང་མགྲོན་རྣམས་ལ་འབྱོར་པ་དང་སྦྱར་ལ་སྤྱན་དྲངས༔ དེ་ལྟར་བྱས་པས་ཡོན་ཏན་ནི་རྒྱས་པར་འཁོར་ལོ་དྲུག་པ་དང་ཕྲ་ཏིག་ནས་བསྟན་པར་བྱའོ༔ བཀྲ་ཤིས་པའི་ཡན་ལག་ཡིན་པས་སློབ་དཔོན་གྱིས་དབུ་བཟུང་ནས་མཆེད་ལྕམ་རྣལ་འབྱོར་ཕོ་མོ་རྣམས་ཀྱིས་གླུ་གར་ལ་སོགས་པ་བྱ༔ དགེ་འདུན་གཞན་ནས་བཀྲ་ཤིས་བྱེད་དུ་གཞུག༔ གཞན་ཡང་ཁྱེའུ་དང་བུ་མོ་ལ་སོགས་པས་ཀྱང་གླུ་གར་དང་རོལ་མོ་ལ་སོགས་པ་ཤེས་ཚད་བྱེད་དུ་གཞུག༔ འཐབ་པ་དང་རྩོད་པ་དང༔ ཁེ་གྲགས་ཀྱི་གཏམ་རྣམས་སྤང་བར་བྱ༔ ཆོས་གཏམ་ཡང་ཚོགས་ཀྱི་འཁོར་ལོ་རྩོད་པར་འགྲོ་བས་མི་བྱ༔ གཞན་ཅི་དགའ་བྱའོ༔ རིན་པོ་ཆེ་དབང་གི་ཕྱག་ལེན་ཇི་ལྟ་བ་བཞིན་བཀོད་པ་རྫོགས་སོ༔ རྦ།༔྅྅྅ བླ་མ་རྡོ་རྗེ་འཆང་བའི་ལྷ༔ ལྷ་ཡི་ལྷ་ཁྱོད་ཕྱག་འཚལ་བསྟོད༔ བདག་ནི་བསྐལ་པ་ཐོག་མེད་ནས༔ འབྱུང་བཞིའི་ལུས་ཀྱི་བཅིངས་པ་བདག༔ འབྱུང་བཞིའི་གདོན་དང་བྲལ་གྱུར་ནས༔ དྲི་མེད་འོད་གསལ་ལུས་ལྡན་ཤོག༔ སྨྲ་མང་ངག་གིས་བཅིངས་པ་བདག༔ འཁྲུལ་པའི་གཏམ་རྒྱུད་ཟུངས་ཟད་ནས༔ བརྗོད་དུ་མེད་པའི་དོན་ལྡན་ཤོག༔ འགྱུར་མེད་རྟོག་པས་བཅིངས་པ་བདག༔ མི་རྟོག་གསལ་བའི་སྣང་མཐོང་ནས༔ བསམ་པའི་འཕྲོ་འདུ་ཆད་པར་ཤོག༔ དེ་ལྟར་ལུས་ངག་ཡིད་གསུམ་ལ༔ སྐུ་གསུང་ཐུགས་ཀྱིས་བྱིན་བརླབས་པའི༔ འབྲས་བུ་སྐུ་གསུམ་ཚད་ཕེབས་ཤོག༔ ཅེས་ལན་གསུམ་བརྗོད་དོ༔ ཨཱོྂ་ཨཱཿཧཱུྃ༔ མདྒ་ལཾ༔ ༔

དམ་ཚིག་རབ་འབྱེད།

དམ་ཚིག་རབ་འབྱེད་ཅེས་བྱ་བ་བཞུགས་སོ། །མན་ངག་ང་བརྒྱད་པ། ༈ བཱཏྱ།ཐཏྱར།ཏྱ།྅ཧཱ༔྅྅྅ རྒྱ་གར་སྐད་དུ། ས་མ་ཡཱ་པྲ་ཀ་རི་ནཱ་མ། བོད་སྐད་དུ། དམ་ཚིག་རབ་ཏུ་འབྱེད་པ་ཞེས་བྱ་བ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །གསང་སྔགས་རྣམས་ཀྱི་རྒྱུད་ལས་ངེས་ཕྱེ་བའོ། །དེ་ཡི་སྒྲ་དོན་འཁྲུལ་པ་མེད་པའི་བློས། །ངེས་པ་བརྟགས་ཏེ་འགལ་བ་མེད་པར་ཡང་། །སྔགས་ལ་དད་པའི་འགྲོ་ལ་ཕན་གདགས་ཕྱིར། །བླ་མ་མཆོག་ལ་གསོལ་བཏབ་ལེགས་སྤྱད་པའི། །དབང་མཆོག་བརྟན་ཕྱིར་དམ་ཚིག་དམ་པ་བཤད། །དབང་བསྐུར་སྔོན་དུ་སོང་བའི་སྔགས་པས། གསང་བ་སྔགས་གཞུང་ལས་བྱུང་བའོ། །དམ་ཚིག་དང་སྡོམ་པ་ལ་གསན་པར་བྱ་སྟེ། དེ་ཡང་དམ་ཚིག་རྣམ་པར་བཀོད་པ་སྡོམ་པ་འཇུག་པའི་འཁོར་ལོ་ལས། འགྲོ་བའི་སྨིན་སོ་གསུམ་དག་ལས། །སྔགས་ཀྱི་དམ་ཚིག་གསུམ་དུ་བཤད། །དེ་ལ་ཁྱད་པར་ངེས་ཕྱེ་བ། །རེ་རེ་ལ་ཡང་བཞི་བཞི་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་པ་དང་། བརྟན་པའི་ཁྱད་པར་ལ་བརྟེན་ནས། །དམ་ཚིག་གནས་པ་སྐྱེད་བཞིན་ཏེ། །ཞེས་གསུངས་པས། དེ་ཡང་འགྲོ་བའི་ལུས་ཀྱི་ཚོགས་པ་ལ་བརྟེན་ནས་སངས་རྒྱས་ཐམས་ཅད་ཀྱི་སྐུའི་དམ་ཚིག་ལ་གནས་པ་དང་། བརྟེན་པ་དང་། ཐོབ་པའི་རྒྱུད་དང་། ཉམས་པའི་སྐྱོན་ལ་སོགས་པ་རྣམས་སུ་ཤེས་པར་བྱའོ། །ཁྱད་པར་དུ་ལུས་དམ་ཚིག་ལ་གནས་པས་ན། སངས་རྒྱས་ཐམས་ཅད་ཀྱི་སྐུ་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་དང་། དེ་བཞིན་དུ་ངག་གི་དམ་ཚིག་ལ་གནས་པས་སངས་རྒྱས་ཐམས་ཅད་ཀྱི་གསུང་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་དང་། སེམས་དམ་ཚིག་ལ་གནས་པས། སངས་རྒྱས་ཐམས་ཅད་ཀྱི་ཐུགས་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་སྟེ། དེ་ལ་འདིར་ལུས་ཀྱི་རྟེན་མེད་ན་སྐུའི་དམ་ཚིག་གི་རྟེན་མེད་པས། ཁྱད་པར་དུ་ལུས་སྔགས་ཀྱི་ལམ་དུ་འགྲོ་བར་བྱེད་པ་ནི་གནད་དོ། །དེ་གནས་པར་བྱེད་པའི་ཡན་ལག་ཏུ། ལུས་འཇིག་རྟེན་གྱི་བྱ་བ་ལ་འཇུག་པ་རྣམས་སྤངས་ལ་ལུས་ཀྱི་དམ་ཚིག་བསྟན་པ་ནི། དལ་བར་གནས་ཤིང་རང་གཅིག་པུར་འདུག་པ་གནད་ཡིན་ནོ། །དེ་ཐོབ་པའི་ཉེ་བརྒྱུད་ནི། ལུས་ཀྱི་སྡིག་པ་རྣམས་སྤངས་ཏེ། ལུས་ཀྱིས་དགེ་སྦྱོར་ལས་མི་འདའ་བར་བྱེད་པའོ། །དེ་ཉམས་པའི་སྐྱོན་ནི། ལུས་འཇིག་རྟེན་གྱི་བྱ་བ་ལ་ཞུགས་པས་རང་བཞིན་གྱི་མི་དགེ་བ་དང་། ལུང་དུ་མ་བསྟན་པའི་མི་དགེ་བ་སྣ་ཚོགས་པས་རྐྱེན་སློང་བྱས་ནས་སངས་རྒྱས་ཐམས་ཅད་ཀྱི་སྐུའི་ཕྱིའི་དམ་ཚིག་ཉམས་ཏེ། ཁྱད་པར་དུ་སེམས་ཅན་དམྱལ་བའི་གནས་སུ་ལུས་ཀྱི་གཤགས་གཏུབས་ལ་སོགས་པའི་སྡུག་བསྔལ་རྣམས་མྱོང་བར་འགྱུར་ཏེ། དེ་ཡང་ལུས་ཀྱི་གཡང་བའི་འཁྲུལ་འཁོར་མཆོད་པ་ལས་བྱུང་བའོ། །དེ་ལྟར་ཡང་གསེར་གྱི་སྙིང་པོ་རྣམ་པར་བརྩེགས་པའི་རྒྱུད་ལས། ངག་གི་སྐྱེས་བུ་རྩོལ་བ་ཅན། །ལུས་ཀྱི་གཡེངས་ས་མ་སྤངས་པས། །སྐུ་ལས་གྱུར་པའི་དམ་ཚིག་ནི། །འདི་ཡིས་ཉམས་ནས་མནར་མེད་འགྱུར། །དེ་བས་དལ་རྟེན་གཡེངས་ས་རབ་སྤངས་ལ། །སྔགས་པས་དགོན་པ་བསྟེན་པར་བྱ། །ཞེས་པས། དེ་ཡང་སྐུའི་དམ་ཚིག་གི་རྟེན་དུ། སྤྱིར་ལུས་ཀྱི་ལས་སུ་མ་བྱིན་པར་བླང་བ་དང་། མི་ཚངས་པར་སྤྱོད་པ་དང་། སྲོག་གཅོད་པ་རྣམས་སྤང་ངོ་། །དེ་ཡང་རྡོ་རྗེ་ནམ་མཁའ་དང་མཉམ་པའི་རྒྱུད་ལས། མ་བྱིན་བླངས་པའི་སྡུག་བསྔལ་ནི། །སངས་རྒྱས་ན་བཟའ་ཆོས་གོས་དག །བརྒྱ་ཕྲག་ཕྱེད་དང་བདུན་བརྒྱ་ཉིད། །བསྲེགས་ཤིང་ཆུ་ལ་བོར་བ་དང་། །སྡིག་པ་འདི་ནི་མཉམ་པའི་ཕྱིར། །འདི་ནས་སྐྱེ་བ་མི་འདྲ་བ། །ལྔ་བརྒྱ་དག་གི་འོག་ཏུ་ཡང་། །ཡི་དྭགས་དྲག་པོའི་གནས་སུ་སྐྱེ། །དེ་ནས་ཡི་དྭགས་ཕལ་པའི་ལུས། །སྟོང་ཕྲག་དྲུག་ཅུ་བླངས་ནས་ནི། །སེམས་ཅན་དམྱལ་བའི་ལུས་སུའོ། །ཞེས་པ་དང་། ཡང་རྡོ་རྗེ་སྙིང་པོ་ཁང་བུ་བརྩེགས་པ་ལས། གལ་ཏེ་མི་ཚངས་སྤྱད་པ་ཡིས། །སངས་རྒྱས་ཞིང་ཁམས་སྟོང་ཕྲག་ལྔར། །དུག་གི་སྐྱུགས་པས་བཀང་བ་དང་། །སྡིག་པ་འདི་ནི་མཉམ་པའི་ཕྱིར། །ཤུ་བ་ཅན་གྱི་ལུས་ངན་བརྒྱ། །དེ་འོག་འཁྲིག་པའི་ལུས་ནི་སྟོང་། །དེ་ལས་ཚ་བའི་དམྱལ་བར་འགྱུར། །ཞེས་དང་། ཡང་རིན་པོ་ཆེ་རྣམ་པར་སྤངས་པ་ལས། སྲོག་བཅད་པ་ཡི་སྡིག་པ་ནི། །སངས་རྒྱས་དཀྱིལ་འཁོར་འབུམ་ཕྲག་བདུན། །སྨད་ཅིང་གཏན་པ་སྤངས་པ་དང་། །འདི་ཡི་སྡིག་པའི་དམ་ཚིག་མཉམ། །དེ་ནས་ཤི་འཕོས་འོག་རྣམས་སུ། །སྨེ་ཤ་ཅན་གྱི་ལུས་ཉིས་བརྒྱ། །དེ་ནས་གྲང་བའི་དམྱལ་བར་འགྱུར། །ཞེས་པ་དང་། ཡང་དེ་ཉིད་ལས། སྐུ་ཡི་ཕྱི་ཡི་དམ་ཚིག་ལ། །རྣམ་པ་གསུམ་དུ་ཕྱེ་བ་སྟེ། །མ་བྱིན་བླངས་པས་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །དེ་ཡི་རྟགས་སུ་ཡན་ལག་ནད། །མི་ཟད་སྣ་ཚོགས་ལུས་ལ་འབྱུང་། །མི་ཚངས་སྤྱད་པ་ནང་ཡིན་ཏེ། །རྟགས་སུ་དབང་པོའི་ནད་རྣམས་སོ། །སྲོག་བཅད་པ་ནི་གསང་བ་སྟེ། །དེ་ཡི་རྟགས་སུ་དོན་སྣོད་དང་། །རྣལ་འབྱོར་བ་ཡི་མྱོང་བས་སོ། །ཞེས་པས་སོ། །དེ་དག་ལས་སྐོང་བར་བྱེད་པའི་ཆོ་ག་ནི། །དམ་ཚིག་མཆོག་གི་རྒྱུད་ལས། རྟགས་དང་སྦྱར་བའི་རྣལ་འབྱོར་པས། །ཕྱི་ཡི་ཕྱི་ལ་ལྡེར་ཚོ་དང་། །རི་མོའི་ལས་ནི་ལན་བདུན་གྱིས། །དེ་ཡིས་སྔགས་ལས་གྲོལ་བའོ། །ཞེས་པས་སྔགས་ཕྱིའི་ལྷ་རྣམས་ཀྱི་ལྡེར་ཚོ་རང་གི་ལོ་གྲངས་ཙམ་མོ། །ཡང་ཕྱིའི་ལྷ་རྣམས་ཀྱི་བྲིས་སྐུ་བདུན་ནམ་བཅུ་གཅིག་བྱས་པས་བསྐངས་སོ། །ཡང་དེ་ཉིད་ལས། ཕྱི་ཡི་ནང་ལ་ལུགས་སྐུ་བདུན། །རབ་ཏུ་གནས་པ་རྩོལ་བས་བཞེངས། །བླ་མ་མཆོག་ལ་དབུལ་བར་བྱ། །ཞེས་པ་ནི། སྔགས་ནང་གི་ལྷ་ཚོགས་ཀྱི་ལུགས་མ་བདུན་བཞེངས་ནས་རང་གི་བླ་མ་ལ་ཕུལ་ན་ངེས་པར་བསྐངས་སོ། །ཡང་དེ་ཉིད་ལས། ཕྱི་ཡི་གསང་བའི་རྟགས་བྱུང་ན། །རྡོ་རྗེ་དང་ནི་དྲིལ་བུ་ཉིད། །དགུའམ་བཅུ་གཅིག་བླ་མ་ལའོ། །དེས་ནི་ནད་ལས་གྲོལ་བ་དང་། །དད་པ་ཕུན་སུམ་ཚོགས་པ་དང་། །དེ་དག་ཞི་བས་འགྲུབ་པ་དང་། །འགྲོ་བ་རྣམས་ནི་བྱམས་པར་འགྱུར། །ཞེས་པས་སོ། །དེ་ལྟར་སྐུའི་ཕྱིའི་དམ་ཚིག་ཏུ་སྡིག་པ་མི་དགེ་བའི་ལས་རྣམས་བསྲུང་ངོ་། །དེ་ཡང་རང་བཞིན་གྱི་ལུས་ཐམས་ཅད་ལྷའི་སྐུར་དམིགས་པ་མ་ལོག་ན། སྐུའི་དམ་ཚིག་ལས་འདའ་མི་སྲིད་དོ། །དེ་ལྟར་ཡང་རྡོ་རྗེ་ནམ་མཁའ་ལྡིང་འཇིགས་པའི་རྒྱུད་ལས། ཡི་དམ་ལྷར་གསང་སྔགས་པ་ཡིས། །གཟུགས་རྣམས་བཟློག་པར་མི་སྤངས་ཕྱིར། །སྐུ་གསལ་བས་ནི་མི་འདའོ། །ཞེས་པའོ། །སྐུའི་ནང་གི་དམ་ཚིག་ནི་གསུམ་སྟེ། ཕྱི་ནང་གསང་བ་གསུམ་མོ། །དེ་ཡང་གསེར་གྱི་ཁང་བུ་བརྩེགས་པ་ལས། ནང་གི་ཕྱི་ནི་སྤུན་དང་ཡང་། །གང་གི་ཕ་དང་མ་ཉིད་དང་། །རང་གི་ལུས་ལ་མི་དམོད་དེ། །ནང་གི་ནང་ཉིད་སྤྱིར་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །སྨད་ཅིང་མཐོ་བརྩམས་རྒྱན་སྨད་ན། །སངས་རྒྱས་སྐུ་ནི་བརྒྱ་ཕྲག་བསླུས། །ནང་གི་གསང་བ་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨན་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱིས་བཏབ་ན་ཡང་། །ཟག་པའི་ལམ་མེད་ལུས་བརྒྱ་བླངས། །དེ་འོག་ཚ་བའི་དམྱལ་བ་མྱོང་། །དེ་བས་ཙམ་མེད་མདོག་བས་ལེགས། །ཞེས་པས་ལུས་ཀྱི་བྱེད་པའི་ལས་རྣམས་ཐམས་ཅད་ཉེ་བར་སྤང་བར་བྱའོ། །སྐུའི་གསང་བའི་གསུམ་ནི། རྡོ་རྗེའི་སྤུན་ནམ་སྲིད་མོ་ཡི། །ལུས་ཀྱི་རྒྱན་ལ་དཔྱས་པ་དང་། །འཐོ་བཙམས་ལ་སོགས་བརྡེག་པའི་ཚུལ། །གལ་ཏེ་གཞན་གྱིས་བྱེད་བཅུག་ན། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲེས་པའི་མཆེད། །ཀུ་རེ་རྩེད་མོའི་ཚུལ་དུ་ཡང་། །བརྡེག་གམ་བརྡེག་པར་བརྩམས་པའམ། །རྨི་ལམ་ན་ཡང་ཡུམ་ལ་གཙེས། །དེ་མ་ཐག་ཏུ་མ་བཤགས་ན། །འདི་ཡང་སྔར་དང་སྡིག་པ་མཉམ། །གསང་བའི་གསང་བ་བླ་མ་ཡི། །སྐུ་ཡི་གྲིབ་མ་མི་འགོམ་ལ། །བླ་མའི་སྤྱན་ལམ་དག་ཏུ་ཡང་། །མཚོན་ཆ་བཟུང་བར་མི་བྱའོ། །རྐང་ལག་བརྐྱངས་དང་ཉལ་མི་བྱ། །སྐྱིལ་ཀྲུང་འདུག་དང་རྒྱབ་མི་བསྟན། །ལྷྭམ་དང་སྟན་དང་བཞོན་པ་དང་། །གདུགས་ལ་སོགས་པའི་རྒྱན་རྣམས་སྤངས། །བླ་མའི་གཟིམས་ཁང་དག་ལ་ཡང་། །ལག་པས་མཚོན་དང་རྡོ་མི་རྡེག །བརྩམ་པར་བྱ་བ་མ་ཡིན་ནོ། །དེ་དག་ལས་ནི་འབུམ་འགྱུར་དུ། །བླ་མའི་གནས་ཁང་བཤིག་པ་དང་། །སྐུ་ལ་བརྩམས་ཤིང་སྡིག་བྱས་པས། །འདི་ཡི་སྡིག་པ་ཕ་མཐའ་ཡས། །གལ་ཏེ་བླ་མ་བག་མེད་པས། །མ་དཔྱད་སྡང་ནའང་ཕ་མཐའ་ཡས། །མཆེད་སྤུན་སྐུ་ལ་བརྙས་བྱས་ན། །འདི་ཡི་རྣམ་སྨིན་བརྗོད་མི་ནུས། །ཞེས་གསུངས་པས། བླ་མའི་སྐུའི་གྲིབ་མ་ལ་འགོམ་ན་རབ་གནས་དང་ལྡན་པའི་མཆོད་རྟེན་བཤིག་པ་དང་མཉམ་མོ། །མི་སྡུག་པའི་མཚོན་ཆ་བཟུང་ན་རབ་གནས་དང་ལྡན་པའི་ལྷ་ཁང་བཤིག་པ་དང་མཉམ་མོ། །རྐང་ལག་བརྐྱངས་ནས་བླ་མའི་སྤྱན་སྔར་ཉལ་ན་དུད་འགྲོ་བརྒྱའི་སྲོག་བཅད་པ་དང་མཉམ་མོ། །བླ་མའི་སྤྱན་སྔར་སྐྱིལ་ཀྲུང་འདུག་པ་དང་རྒྱབ་བསྟན་ན་གསུང་རབ་མེ་ཡིས་བསྲེགས་པ་དང་མཉམ་མོ། །བླ་མ་ལ་བྱིན་རླབས་ཞུ་བའི་དུས་སུ་ལྷྭམ་སྔོན་ལ་གྱོན་པ་དང་། སྟན་བཏིང་བ་དང་། རྟ་དང་གླང་པོ་ལ་སོགས་པ་ཞོན་ན་གྲོང་ཁྱེར་ཆེན་པོ་སུམ་ཅུ་རྩ་གཉིས་བཅོམ་པ་དང་མཉམ་མོ། །གདུགས་དང་རྒྱན་ཆ་བླ་མ་གཤེགས་པའི་ཚེ་བཟུང་ན་རྔ་མོ་ལྔ་བརྒྱའི་སྲོག་བཅད་པ་དང་མཉམ་མོ། །དེ་དག་ནི་ཐུན་མོང་ཙམ་དུ་བསྟན་པའོ། །གལ་ཏེ་བླ་མའི་གཟིམས་ཁང་ལ་ལག་པས་རྡེག་པའམ་རྡོ་འཕངས་པའམ་མཚོན་གྱིས་བསྣུན་པའི་ཚུལ་བསྟན་ན་ཡང་། དེ་མ་ཐག་ཏུ་མ་བཤགས་ན་ཉེས་པ་གོང་མ་རྣམས་དང་མཉམ་མོ། །འདི་མན་ཆད་རྣམས་ནི་གོང་མ་རྣམས་དྲིལ་བ་ལས་འབུམ་འགྱུར་གྱི་སྡིག་པ་ཆེ་བར་རིག་པར་བྱའོ། །དེ་ལས་ལྡོག་པའི་ལུས་ཀྱི་བྱ་བ་བརྟེན་ན་དངོས་གྲུབ་ཀྱི་རྒྱུ་དང་རྐྱེན་དུ་འགྲོ་བ་ཡང་དེ་སྙེད་དུ་འགྱུར་རོ། །གོང་གི་སྤྱོད་པ་དེ་དག་རྨི་ལམ་དུ་ཡང་སྤངས་ན་མཆོག་དང་ཐུན་མོང་གི་དངོས་གྲུབ་ཐོབ་པ་ལ་དཀའ་བ་མེད་དོ། །དེ་ཡང་རྡོ་རྗེ་སྙིང་པོ་སྲ་བ་འབྱུང་གནས་ཀྱི་རྒྱུད་ལས། མཆོད་པའི་རྟེན་དང་གཟུགས་བརྙན་དག །སུ་ཡིས་བཤིག་པའི་རྣམ་སྨིན་ནི། །མཛེ་འབྲས་ཕོལ་གྱིས་ཟིན་ནས་ནི། །གླིང་བར་མུན་པའི་སྲོག་ཆགས་ལུས། །བརྒྱ་ཕྲག་ཕྱེད་དང་གཉིས་བླངས་ནས། །ཡི་དྭས་དྲག་པོའི་སྐྱེ་གནས་སོ། །ལྷ་ཁང་གང་གིས་སྐྱེལ་ན་ཡང་། །སྲིན་མོའི་ལུས་ཀྱི་སྐྱེ་གནས་ནི། །བྱོལ་སོང་ཕལ་པའི་ལུས་ནི་སྟོང་། །རྟག་ཏུ་མཚོན་གྱིས་འདེབས་པར་འགྱུར། །དེ་ནས་ཁ་འཐོར་དམྱལ་བའོ། །ཞེས་གསུངས་སོ། །གཞན་དག་གི་རྣམ་སྨིན་ནི་མདོ་དང་རྒྱུད་ལས་རབ་ཏུ་མང་བར་བཤད་དོ། །སྐུའི་རྣམ་གྲངས་ཀྱི་དམ་ཚིག་ལས། ལན་བདུན་ལས་འདས་ན་བཤགས་པའི་རྟེན་ཉམས་མཚོག་རྣམས་ལ་གཉིས་ལས་འདས་ན་བཤགས་པའི་རྟེན་ཉམས་སོ། །དམ་ཚིག་རབ་ཏུ་འབྱེད་པ་ལས། གནས་པ་དྲུག་པ་ཞེས་བྱ་བ། སྐུའི་དམ་ཚིག་བསྟན་པའི་དུམ་བུ་སྟེ་དང་པོ་རྫོགས་སོ།། །།ཐ།ཐརྒྱ།བཱ༔྅྅྅ མཆོག་ཏུ་གསང་བའི་དཔལ་ལ་ཕྱག་འཚལ་ལོ། །གསང་སྔགས་དབང་གི་རྒྱུད་ལས་གསུང་པ་ཡི། །ཁྱད་པར་མཆོག་གི་དམ་ཚིག་རབ་བཤད་པ། །གཉིས་མེད་ཐབས་ལས་ཁྱད་པར་ཉེས་པའི་སྐྱོན། །འགལ་བ་མེད་པར་མཆོག་གི་འབུང་བར་བྱའོ། །རྣལ་འབྱོར་གྱི་ལམ་དུ་འགྲོ་བ་རྣམས་ཀྱིས་འདི་ལྟར་ཡིད་ཆེས་པར་བྱས་ལ་དང་དུ་བླང་བར་བྱའོ། །བཀྲ་ཤིས་ཉི་མ་འབུམ་གྱིས་བརྒྱན་པའི་རྒྱུད་ལས། གསུང་གི་དམ་ཚིག་ཁྱད་པར་ངེས་ཕྱེ་ནས། །སྐྱོབ་པ་ལྔ་ཡི་རྣལ་འབྱོར་ལམ་བཟུང་ཕྱིར། །རྣམ་གྲངས་ཕྱེ་ནས་བཀོད་པ་བསམ་ཡས་ཀྱང་། །ངེས་པར་བསྡུས་ན་བསྲུང་མཚམས་བཅུ་གཉིས་སོ། །ཕྱི་དང་ནང་དང་གསང་བ་གསུམ་དག་ལས། །གསུམ་གསུམ་དག་ལས་དབྱེ་ན་དགུར་འགྱུར་རོ། །རྩ་བ་གསུམ་སྟེ་བཅུ་གཉིས་ཁོ་ནའོ། །ཞེས་པས་གནས་བརྟེན་པ་དང་། ཐོབ་པ་དང་། ཉམས་པའི་སྐྱོན་རྣམས་ཀྱིས་སྐུའི་སྐབས་ཀྱིས་ཤེས་པར་བྱའོ། །གསུང་གི་དམ་ཚིག་ཏུ། ངག་གི་སྡིག་པ་མི་དགེ་བ་རྣམས་སྤངས་བར་བྱའོ། །དེ་ལ་ངག་གི་ཕྱིའི་དམ་ཚིག་ཏུ་རྫུན་མི་སྨྲ་སྟེ། དེ་ལྟར་ཡང་འཁོར་ལོ་རྣམ་དག་བརྩེགས་པ་ལས། སྔགས་ལ་མོས་པའི་སྤྱོད་པ་ཡིས། །འགྲོ་བ་ཕལ་བ་དག་ལ་ཡང་། །རྫུན་པའི་ཚིག་ནི་རང་འདོད་ཀྱིས། །སྨྲ་ལ་རྟག་ཏུ་དགའ་བ་ལ། །སྔགས་བཟླས་ནུས་པ་མི་འབྱུང་ཞིང་། །གཞན་ལ་སྨྲས་པ་བཙུན་པ་མིན། །རང་གི་རང་ཉིད་ཉམས་པ་ཡིས། །འགྲོ་བ་གཞན་གྱིས་ལྕེ་འབབ་འགྱུར། །མ་འོངས་དུས་ནི་སྨེ་ཤའི་ལུས། །བྱང་གི་ཕྱོགས་སུ་མྱོང་བར་འགྱུར། །དེ་འོག་ངན་སོང་སྡུག་བསྔལ་ཡང་། །རྣམ་པ་སྣ་ཚོགས་མྱོང་བར་འགྱུར། །ཞེས་པའོ། །དེའི་ནང་གི་དམ་ཚིག་ཏུ་ཕྲ་མ་མི་སྨྲ་བ་སྟེ། ཡང་དེ་ཉིད་ལས། སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེན་འཇུག་ཕྲ་མ་སྨྲ། །ཆོས་སྨྲས་འཁོར་རྣམས་མི་འདུ་དང་། །ཅི་བྱས་ལོག་པར་འགྱུར་བ་དང་། །མ་དཔྱད་པ་རྣམས་དགྲར་འགྱུར་དང་། །ལུས་ལ་མཚོན་གྱིས་འདེབས་པ་དང་། །ཤི་འཕོས་ནས་ནི་སྡེར་ཅན་ལུས། །དེ་ནས་ངན་སོང་རིམ་གྱིས་མྱོང་། །ཞེས་པ་དང་། དེ་ཡང་འདིའི་གསང་བའི་དམ་ཚིག་ཏུ་གཞན་གྱི་ཞེ་གཅོད་པའི་ཚིག་རྣམས་སྨྲ་བར་མི་བྱའོ། །ཡང་དེ་ཉིད་ལས། རྟག་ཏུ་ཞེ་གཅོད་ཚིག་སྨྲ་བ། །སྔ་མའི་ལས་དང་ཕྱི་མའི་རྟགས། །འགྲོ་བ་བྱམས་བྲལ་བཤེས་ཀྱང་སྡང་། །ཆོས་ཀྱི་ཚིག་ཀྱང་འཆོལ་བར་འགྱུར། །ཤི་འཕོས་རབ་ཏུ་གྲགས་པའི་ལུས། །དེ་ནས་ངན་སོང་གསུམ་དུ་འཁོར། །ཞེས་པས། དེ་ལྟར་ཡང་དག་གི་སྡིག་པ་དེ་དག་ཆོས་འདྲེས་པའི་སྒོ་ནས་སྨྲས་ན་རྣམ་པར་སྨིན་པ་བདུན་འགྱུར་འགྲོ། རང་ཉིད་འདོད་པ་རླབས་པོ་ཆེས་སྨྲས་ན་གོང་མ་རྣམས་ལས་ཉིས་འགྱུར་རོ། །རང་བཞིན་གྱི་བསྲུངས་ཀྱང་སྨྲ་འདོད་ཅིང་། ཤེས་བཞིན་གྱིས་མ་ཟིན་ན་ནི་སྔ་མ་བྱས་པའི་རྣམ་པར་སྨིན་པར་ཤེས་པར་བྱའོ། །དེ་ཡང་སྔགས་ཀྱི་སྒོར་ཞུགས་པ་རྣམས་ལ་རང་བཞིན་ཙམ། དབང་བསྐུར་བ་རྣམས་ཀྱིས་སྨྲས་ན་ནི་ཉིས་འགྱུར། ལྟ་སྒོམ་ལ་ཞུགས་པ་རྣམས་ཀྱིས་ནི་ལྔ་འགྱུར་རོ། །ཆོས་སྨྲ་བའི་གང་ཟག་གིས་སྨྲས་ན་ནི་བདུན་འགྱུར་རོ། །གསུང་གི་ནང་གི་དམ་ཚིག་གསུམ་ནི་དམ་ཚིག་རྣམ་པར་བཀོད་པའི་རྒྱུད་ལས། སྔགས་པ་སྡོམ་པ་གནས་པ་ཡིས། །ཆོས་སྨྲས་རྣམས་དང་ཆོས་བསྒྲུབས་དང་། །ཆོས་ནི་བསྒོམས་པའི་གང་ཟག་ལ། །སྒྲོ་ཞིང་སྐུར་པ་བཏབ་པ་དང་། །གཤེ་ཞིང་སྨད་པའི་ཚིག་སྨྲས་ན། །གཞན་པའི་མོས་པ་ཉམས་པ་དང་། །རང་གི་སྡོམ་པ་ཉམས་པ་དང་། །རང་གི་ཆོས་རྣམས་བརྗེད་ངས་ཆེ། །ཡིད་དཔྱོད་འདྲ་མིན་འཆོལ་བར་འགྱུར། །ཡང་དེ་ཉིད་ལས། ས་ཞེས་བྱ་བ་བསྐྱེད་པ་ལ། །མ་ཞེས་བྱ་བ་མ་ཉམས་ན། །དངོས་གྲུབ་ཐམས་ཅད་སྟེར་བ་ཉིད། །ཡ་ཞེས་ཉམས་ན་ཡས་པར་འགྱུར། །ཞེས་པ་དང་། ཡང་དེ་ཉིད་ལས། དམ་ཞེས་བྱ་བ་བཅིངས་པ་སྟེ། །དེ་ཉིད་གྲོལ་ན་ཉམས་པ་སྟེ། །དེ་ལས་འདས་ན་གསོར་མི་རུང་། །ཚིག་ཅེས་བྱ་བ་དེ་འདས་ན། །མེ་ཡི་སྡུག་བསྔལ་མྱོང་བའོ། །ཡང་ན་དམ་པ་བསྲུང་བ་ཉིད། །སྐུ་དང་གསུང་དང་ཐུགས་དག་ལས། །སུ་ཡིས་འདས་པས་འཚིག་པར་བྱེད། །བསྐལ་པ་བརྒྱ་ཕྲག་དག་ཏུའོ། །ཞེས་པས་ཤེས་སོ། །གསང་བའི་གསུམ་ནི། གསུང་གི་གསང་བའི་ཕྱི་ནི། རྡོ་རྗེ་སྤུན་དང་སྲིང་མོ་ལ་ཚིག་གིས་སྨད་པ་དང་། གཤེ་སྐུར་མི་བྱ། ཇི་སྐད་གསུངས་པའི་ཚིག་ཉན་པར་བྱའོ། །གསང་བའི་ནང་གི་ལ། བླ་མའི་ཕྱག་རྒྱ་མ་དང་ཉེ་འཁོར། གསང་བའི་གསང་བ་བླ་མའོ། །དེ་ལྟར་ཡང་ཕྱག་རྒྱ་གཉིས་སྦྱོར་གྱི་རྒྱུད་ལས། རྡོ་རྗེའི་མཆེད་དང་ལྕམ་དྲལ་ལ། །ཚིག་གིས་སྨྲས་དང་ངག་བཅག་ན། །བསྐལ་པ་བརྒྱ་ཕྲག་བྱེ་བ་ནི། །ཁྱད་པར་ངན་སོང་གསུམ་པོ་ཡི། །སྡུག་བསྔལ་མི་བཟད་དྲག་པོ་ཉིད། །གང་ཟག་དེ་ཡིས་མྱོང་བ་དང་། །སྔར་དང་ཕྱི་མ་ད་ལྟའི་བར། །རིམ་པར་མྱོང་བར་འགྱུར་བ་ནི། །སྔ་མ་བྱས་པས་ཚེ་འདི་ལ། །བར་ནས་ཐ་མར་མྱོང་འགྱུར་ལ། །ཡང་སྔ་ཚེའི་སྟོད་ལ་བྱ་སྟེ། །སྐྱེས་མ་ཐག་ཏུ་མྱོང་བར་འགྱུར། །འདི་ལ་བྱས་པའི་ལམ་མཐའ་ནི། །ཚེ་ཡི་ཞབས་ལ་ངག་གི་ལས། །འཁོར་དང་གཞན་གྱི་ལྕེ་འབབ་དང་། །གློ་བུར་དག་ཏུ་སྨ་རྒྱུད་འགག །བླ་མའི་བུ་དང་ཆུང་མ་དང་། །གང་དག་ཉེ་གནས་དག་ཀྱང་རུང་། །བཀའ་ལས་འདས་ཤིང་ངག་འདས་ན། །སྔ་མ་ལས་ནི་ཉིས་འགྱུར་རོ། །ཡང་ན་བླ་མའི་བྱེ་བྲག་གི། །རྩ་བ་དང་ནི་ཡན་ལག་གི། །ངག་བཟླས་ངག་ཏུ་སྨྲས་པ་དང་། །སྒྲོ་སྐུར་འདོད་ཚིག་སྨྲས་བྱས་ན། །སྔ་མ་ལས་ནི་སྟོང་ཕྲག་དགུ། །རྣམ་པར་སྨིན་པ་མི་ཟད་པ། །རིམ་པས་བླ་མའི་ཁྱད་ཀྱིས་སྤང་། །དེ་མ་ཐག་ཏུ་མྱོང་བར་འགྱུར། །ཞེས་པས། རྡོ་རྗེའི་མཆེད་དང་ལྕམ་སྲིང་ལ་ཚིག་གིས་སྨད་པར་མི་བྱ་བ་དང་། གཞན་ཡང་ཆོས་དང་གང་ཟག་ལ་སྨད་པར་བྱ་བ་མ་ཡིན་ནོ། །བླ་མའི་ཉེ་འཁོར་རྣམས་དང་ཡང་སྔར་དང་འདྲའོ། །བླ་མའི་བཀའ་བཅག་ན་སངས་རྒྱས་ཀྱི་གསུང་རྣམས་རྒྱབ་ཀྱིས་ཕྱོགས་པ་དང་མཉམ། བླ་མའི་བཀའ་ཉམས་པར་བྱས་ན་དེའི་ཆ་གཉིས་སོ། །གསུང་ལས་འདས་ན་སྟོང་ཕྲག་གཉིས་འགྱུར་གྱི་རྣམ་པར་སྨིན་པ་འོང་ངོ་། །དེ་ལྟར་ཡང་རྡོ་རྗེ་ཉི་མ་དམ་ཚིག་ལས་བཀོད་པའི་རྒྱུད་ལས། སྤྱིར་ན་དམ་ཚིག་ཁྱད་པར་ལས། །དུས་ལ་ཁྱད་པར་ངེས་ཕྱེ་བ། །དམ་ལས་འདས་ཤིང་ཉེས་བྱས་གང་། །ཞག་གིས་བར་མ་ཆོད་པར་ནི། །དམིགས་པའི་ཡུལ་ལ་བཤགས་བྱས་ན། །དེས་ནི་སོར་ཡང་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པས་སོ། །དམ་ལས་འདས་ན་ལོ་དག་གི། །བར་དུ་མ་ཆོད་བཤགས་པས་སོ། །ལོ་ནི་གཉིས་དང་གསུམ་དག་ལས། །དམ་ཚིག་རལ་པ་ཞེས་བྱ་བ། །མཆོག་ཏུ་དྲག་ན་གསོ་རུ་རུང་། །ལོ་གསུམ་དག་ལས་འདས་པ་ནི། །དེ་ནི་གསོར་ཡང་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལོ། །རྒྱུན་དུ་སྤྱོད་པ་ཁོ་ནའོ། །འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་ན་བུ་དང་ཆུ་མ་དང་། །ཉེ་འཁོར་ལུས་དང་ངག་དང་ནི། །ཡིད་དང་བདོག་པར་བཅས་པར་བསྐང་། །རལ་པ་རང་གི་སྲོག་གིས་བསྐང་། །དེ་ལས་ཕྱིར་ཡང་གྱུར་པ་ན། །དམ་ཚིག་ཉམས་པ་ཞེས་བྱ་སྟེ། །གསོ་བར་རུང་བ་མ་ཡིན་ནོ། །ཞེས་པས་སོ། །རྣམ་གྲངས་ཀྱི་དམ་ཚིག་ལ་བསམ་གྱི་མི་ཁྱབ་བོ། །དེ་ཡང་བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲས་ཚིག་གི་ཟུང་ཙམ་ཡང་། །བརྡའམ་དངོས་པོར་བརྗོད་མི་བྱ། །གལ་ཏེ་རྨི་ལམ་ངག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་པས་སོ། །དེ་དག་ལ་སོགས་ཏེ་གཞན་གྱི་ཟླ་དང་ཞོར་དང་སྡེབས་པ་དང་། གཞན་ལ་བརྟེན་ནས་ཀྱང་བྱ་བ་མ་ཡིན་ནོ། །ཡང་འཁོར་ལོ་རིན་པོ་ཆེ་རྣམ་པར་བརྩེགས་པའི་རྒྱུད་ལས། སྐུ་ཡི་དམ་ཚིག་ལས་འདས་ན། །སངས་རྒྱས་སྐུ་ཞེས་ཚིག་དང་བྲལ། །འདི་ལྟར་ཁམས་གསུམ་སེམས་ཅན་རྣམས། །སྲོག་ནི་དུས་གཅིག་བཅད་པ་བས། །ཕས་ཕམ་པ་ནི་སྡིག་མཐའ་ཡས། །དེ་བཞིན་གསུང་གི་ཞིག་པ་ན། །སངས་རྒྱས་གསུང་གི་ཚིག་མི་གནས། །ཁམས་གསུམ་སེམས་ཅན་ཐམས་ཅད་ཀྱི། །ལྕེ་ཡི་དབང་པོ་དུས་གཅིག་ལ། །བཅད་པའི་སྡིག་པས་འདི་མཐའ་ཡས། །གལ་ཏེ་ཐུགས་ཉམས་གྱུར་པ་ཡང་། །ཁམས་གསུམ་གང་བའི་བསམ་གཏན་པའི། །དགེ་ལ་གནས་པའི་དགེ་སློང་རྣམས། །དུས་གཅིག་སེམས་དཀྲུགས་སེམས་སུན་ཕྱུང་། །འདི་རྣམས་སྡིག་པ་ཆེར་འཕེལ་འགྱུར། །སྡིག་པ་འདི་ཀུན་རྣམ་གྲངས་ནི། །བརྗོད་པར་ནུས་པ་མ་ཡིན་ནོ། །ཞེས་པས། གལ་ཏེ་བག་མེད་པ་དང་། དྲན་པས་མ་ཟིན་པ་དང་། ནད་ཀྱིས་དཀྲུགས་པ་དང་། གདོན་གྱི་དབང་དུ་གྱུར་པ་དང་། རྨི་ལམ་ན་ཡང་བླ་མ་ལ་སྐུ་གསུང་ཐུགས་ཀྱི་ཉེས་པ་བྱས་པ་བྱུང་ན། དེ་ཉིད་ཀྱི་རྗེས་ལ་མ་བཤགས་ན། ཉེས་པ་ཆེན་པོར་འགྱུར་རོ། །དེ་ལྟར་ཡང་དཔལ་ནམ་མཁའ་ཟད་པའི་རྒྱུད་ལས། གལ་ཏེ་ངན་པའི་སེམས་མེད་པར། །དྲན་པ་ཉམས་པའི་རྨི་ལམ་མམ། །བག་མེད་གྱུར་པའི་མི་དགེ་རྣམས། །བླ་མ་ལ་དམིགས་བཤགས་པ་བྱ། །ལུས་ཀྱི་ཉེས་པ་ལུས་ཀྱིས་ཏེ། །དེ་ཉིད་ངག་དང་སེམས་ཀྱང་ངོ་། །འདིས་ཀྱང་མནར་མེད་སྡུག་བསྔལ་མྱོང་། །ཞེས་པས་སོ། །དམ་ཚིག་རབ་འབྱེད་ལས། སྦྱོར་བ་ལྔར་གཏན་ལ་ཕབ་པ་སྟེ། གསུང་གི་དམ་ཚིག་རྣམ་པར་བཞག་པ་གཉིས་པ་རྫོགས་སོ།། །།རབ་ཏུ་གནས་པའི་མགོན་ལ་ཕྱག་འཚལ་ལོ། །ཇི་ལྟར་སྔགས་ཀྱི་རྒྱུད་རྣམས་ལས། །དམ་ཚིག་རྣམ་པ་མང་བཤད་ཀྱང་། །རྣམ་པར་བསྡུས་ཏེ་འབྱེད་ངེས་པའི། །མདོ་དོན་རྣམ་པར་བཤད་པར་བྱའོ། །གང་ཞུགས་དུས་ལ་ཞུགས་པ་ཡི། །དངོས་གྲུབ་མཆོག་ཏུ་འདོད་པའི་མིས། །འདི་ལྟར་ཉེས་པའི་སྐྱོན་སྤངས་ཏེ། །ལེགས་པའི་ཡོན་ཏན་བསྒྲུབ་པར་བྱའོ། །བླ་མ་མཆོག་གིས་བཀའ་སྩལ་པ། །གལ་ཏེ་ཉེས་པའི་སྐྱོན་རིག་ཀྱང་། །ཇི་སྐད་སྨྲས་པ་དེ་བཞིན་བྱ། །དེ་བཞིན་བླ་མའི་བྱ་བ་ལ། །ལུས་ཀྱི་སྡུག་བསྔལ་མཆོག་གྱུར་ཀྱང། །རང་གི་ནུས་པས་འབད་དེ་བྱ། །བླ་མའི་ཐུགས་ནི་སྐད་ཅིག་ཀྱང་། །དཀྲུག་པར་བྱ་བ་མ་ཡིན་ནོ། །བླ་མའི་ཟས་དང་ནོར་རྣམས་ལ། །རང་གི་སྲོག་བས་འཕངས་པ་བཞིན། །རྣལ་འབྱོར་པས་ནི་རྟག་ཏུ་བྱའོ། །གལ་ཏེ་བླ་མའི་ཞིང་ཁམས་སུ། །ཆོས་བཤད་དབང་བསྐུར་རབ་གནས་དང་། །བསམ་གཏན་བསྒོམ་པར་བྱ་བ་རྣམས། །རྗེས་མ་གནང་བར་མི་བྱའོ། །མདོར་ན་ལུས་ངག་ཡིད་གསུམ་གྱི་བྱ་བའི་རྣམ་པ་གང་བྱེད་ཀྱང་། །བླ་མ་ལ་ཞུས་མ་གནང་བར། །ཅུང་ཟད་ཙམ་ཡང་མི་བྱའོ། །གཞན་ཡང་དགེ་བའི་ལས་གང་ཡང་། །བླ་མ་ལ་ཞུས་བརྩམས་པར་བྱ། །རྣལ་འབྱོར་སྤྱོད་ལམ་ཐམས་ཅད་དུ། །བླ་མ་མཆོག་དང་འབྲལ་མི་བྱ། །དུས་གསུམ་ཟས་ནི་ནམ་ཟ་ཡང་། །སུམ་ཆ་བཅད་པའི་ཕུད་རྣམས་ཀྱིས། །བླ་མ་མཆོག་ལ་དབུལ་བར་བྱ། །ནོར་དང་དཀོན་པའི་རིན་པོ་ཆེས། །བླ་མ་རྡོ་རྗེ་འཛིན་པ་ལ། །འདོད་པ་མེད་ཀྱང་ཕྱོགས་སུ་དབུལ། །ཅི་དང་ཅི་ཡི་ཕུད་རྣམས་ཀྱིས། །བླ་མ་མཆོག་ལ་བསྔོས་ཏེ་དབུལ། །མདོར་ན་བདག་གིས་བསམ་པ་ཡིས། །རྣམ་པར་དག་པས་ཟོལ་ཆུང་བར། །བླ་མའི་ཕྱོགས་སུ་དམིགས་པར་བྱའོ། །རྣམ་དག་མཆོག་དང་དགེ་བས་ནི། །ལེགས་པའི་ཡོན་ཏན་ཐོབ་པར་ངེས། །དེས་ནི་འདི་ལ་འབད་པར་བྱ། །དེ་ལྟར་ཐུགས་ཀྱི་དམ་ཚིག་རྣམ་པར་ཕྱེ་སྟེ། ངེས་པར་བསྡུས་ན་ནི་ཕྱི་ནང་གསང་བ་གསུམ་མོ། །དང་པོ་ཕྱིའི་གསུམ་ནི། སེམས་ཀྱི་ལས་སུ་བདག་དང་གཞན་ལ་གནོད་པའི་སེམས་རྣམས་སྤང་བར་བྱའོ། །དེ་ལྟར་ཡང་སྙིང་པོའི་དོན་རྣམ་པར་ལེན་པའི་རྒྱུད་ལས། གང་དག་སྔགས་པ་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །གནོད་པར་བྱེད་པའི་ལས་འཆད་ན། །འདི་ནི་ཤུ་བ་ཅན་གྱི་ལུས། །གྲང་བའི་རེག་པར་ལྡན་པ་ཡི། །ལུས་ནི་སྟོང་ཕྲག་ལྔ་བླངས་ནས། །གྲང་བའི་དམྱལ་བར་ངེས་པར་འགྱུར། །ཞེས་པ་དང་། ཡང་དེ་ཉིད་ལས། མཆོག་ཏུ་སྔགས་ལ་ཞུགས་པ་ལ། །གནོད་པ་བྱ་བའི་སེམས་བྱས་ན། །གོང་མའི་སྡུག་བསྔལ་མྱོང་བར་འགྱུར། །འགྲོ་བ་གཞན་ལ་ངེས་པ་མེད། །ཅེས་སོ། །ཕྱིའི་ནང་དུ། ལུས་དང་བྱས་པའི་གནོད་པའི་སེམས་སྤང་བར་བྱའོ། །འདིར་འགྲོ་བ་ཕལ་བ་དང་། ཆོས་ཀྱི་སྒོར་ཞུགས་སོ་ཅོག་དང་། །མཆོག་ཏུ་སྔགས་ཀྱི་སྒོར་ཞུགས་པ་རྣམས། ཤིན་ཏུ་རྡོ་རྗེའི་སྤུན་སྲིང་དང་། བརྒྱུད་པའི་བླ་མ་དང་རབ་ཏུ་རང་གི་བླ་མ་ལ་སྐྱེས་ན་རྣམ་པར་མིན་པ་བརྒྱད་འགྱུར་རོ། །དེ་ལྟར་ཡང་གནམ་ལྕགས་མེ་འབར་བའི་རྒྱུད་ལས། གལ་ཏེ་སེམས་ཅན་ཕལ་པ་ལ། །ཡུལ་འགྱུར་གནོད་པའི་སེམས་སྐྱེས་ན། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་བཅད་པས། །འདི་ཡི་སྡིག་པའི་ཆ་དང་མཉམ། །གལ་ཏེ་བསྟན་པའི་རྟགས་འཛིན་པའོ། །ཤུགས་ཅན་རྣམས་ལ་ལོག་འགྱུར་རོ། །སྔགས་ལ་ཞུགས་པ་ཕྲག་འགྱུར་རོ། །རྡོ་རྗེ་སྤུན་སྲིང་བདུན་འགྱུར་རོ། །བརྒྱུད་པའི་བླ་མ་བརྒྱ་ཕྲག་གོ། །རང་གི་བླ་མ་དེ་བས་བརྒྱད། །སྔགས་ཀྱི་སྒོར་ཞུགས་དབང་ཐོབ་པས། །མཆོག་ཏུ་རྣམ་སྨིན་དེ་ལྟར་རོ། །དེ་བས་ཐོབ་པ་ཐོབ་པའི་ཆོས། །རབ་ཏུ་ཉེས་པ་སྤངས་ནས་ནི། །ཉེས་པ་མེད་པའི་ཆོས་སྤྱོད་བྱ། །ཞེས་སོ། །ཕྱིའི་གསང་བ་གསུམ་ནི། སྔགས་པས་རང་ངམ་གཞན་གྱི་གྲུབ་པའི་མཐའ་ལ་ལོག་ལྟ་སྐྱེས་པ་ནི། འདི་ནས་ཤི་འཕོས་མ་ཐག་ཏུ་སེམས་ཅན་དམྱལ་བའི་སྡུག་བསྔལ་ཉམས་སུ་མྱོང་བར་འགྱུར་རོ། །དེ་ཡང་གཞན་གྱི་གྲུབ་པའི་མཐའ་ལ་ཞེ་ཡིས་སྨད་ན་སེམས་ལ་སྡུག་བསྔལ་ཉམས་སུ་མྱོང་། ལུས་ཀྱིས་སྨད་ན་ལུས་ལ་མྱོང་། ངག་གིས་བརྗོད་ཅིང་སྨད་ན་ངག་ཉམས་སུ་སྨིན་པ་དང་བཅས་པའི་སྡུག་བསྔལ་ཆེན་པོ་སྨིན་པའོ། །རང་གི་གྲུབ་པའི་མཐའ་ལ་ལོག་ལྟ་སྐྱེས་ན་ཚ་བའི་དམྱལ་བ་ནས་དམྱལ་བ་ཉེར་གཅིག་གནས་རྣམས་སུ་རིམ་པར་གྱུར་ནས། སྡུག་བསྔལ་མི་བཟོད་པ་སྨིན་པ་ངེས་སོ། །དེ་ལྟར་ཡང་བཀོད་པ་ཆེན་པོ་ལས། རང་ངམ་གཞན་གྱི་གྲུབ་པ་ཡི། །ཆོས་ལ་སྨོད་པ་ལོག་པའི་ལམ། །རྩ་བའི་དམ་ཚིག་ལ་འདུས་ན། །ས་སྤྱོད་མེ་ཡི་སྡུག་བསྔལ་ལ། །ཡུན་རིང་བར་དུ་གནས་པའོ། །རང་གི་གྲུབ་མཐའ་ལོག་པ་ཡི། །དམྱལ་བ་ཉིད་ལས་ཐར་སྐབས་མེད། །སྔར་དང་ད་ལྟའི་ཁྱད་པར་མེད། །དེ་མ་ཐག་ཏུ་སྡུག་བསྔལ་ལོ། །ཞེས་སོ། །ཐུགས་ཀྱི་ནང་གི་གསུམ་ལས་དང་པོ་ཕྱིའི་ནི། སྤྱོད་པ་ལོག་པ་ལྷ་མིན་ལས། དམྱལ་བའི་སྡུག་བསྔལ་ལ་སྤྱོད་དོ། །སྒོམ་པ་ལོག་པ་ལན་གཅིག་དང་གཟུགས་མེད་པ་ལས་སེམས་ཅན་དམྱལ་བའི་སྡུག་བསྔལ་མྱོང་། ལྟ་བ་ལོག་པ་ལས་དེ་མ་ཐག་ཏུ་རྡོ་རྗེའི་དམྱལ་བར་འགྱུར་རོ། །དེ་ལྟར་ཡང་ཤེལ་གྱི་ཁང་བུ་བརྩེགས་པའི་རྒྱུད་ལས། ལྷ་སྒོམ་དང་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །འདི་ཡི་སེམས་ལ་སྨིན་པར་ངེས། །ཞེས་སོ། །གསང་བའི་གསང་བ་གསུམ་ནི། ལྟ་དང་སྒོམ་དང་སྤྱོད་པ་དང་དུ་མ་བླངས་ཤིང་། །སྙོམས་ལས་སུ་ལུས་ཤིང་ཡིད་ལ་མ་བྱས་པ་དང་། ཡི་དམ་གྱི་ལྷ་ཡིད་ལ་མ་བྱས་པ་དང་། བླ་མ་རྡོ་རྗེ་སྤུན་སྲིང་ཡིད་ལ་མ་བྱས་པ་རྣམས་སོ། །དེ་ལྟར་ཡང་པདྨ་ཀློང་ཡངས་ལས། སུ་ཡི་ཡིད་ཀྱི་ལས་འཆལ་ཏེ། །ཡིད་ལ་བྱ་ཡི་ཆོས་རྣམས་ལ། །ཡིད་ལ་བྱས་པ་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །མནར་མེད་སྡུག་བསྔལ་མྱོང་བར་འགྱུར། །ཞེས་པའོ། །ཡང་སྙིང་པོ་ལྷན་ཅིག་སྐྱེས་པ་ཉེ་བར་ལེན་པའི་རྒྱུད་ལས། དངོས་གྲུབ་མཆོག་ནི་འདོད་པ་ཡི། །ཡི་དམ་སྤང་བར་མི་བྱ་ཞིང་། །བླ་མ་སྤངས་ན་དངོས་གྲུབ་བརླག །གཞན་དུ་བསྒྲུབས་ཀྱང་མི་རྙེད་དོ། །དེ་བཞིན་ཆོས་ཕྱིར་ཁས་བླངས་དང་། །བླ་མའི་མདུན་དུ་དམ་བཅས་པ། །ཡིད་ལ་བསམ་པའི་དགེ་བ་ཡི། །དེ་ཉིད་སྤངས་ན་དངོས་གྲུབ་ཉམས། །ཞེས་པ་དང་། ཡང་དམ་ཚིག་རྣམ་པར་བཀོད་པ་མཆོག་སྟོང་པའི་རྒྱུད་ལས། དམ་བཅའ་འདའ་བར་མི་བྱ་ཞིང་། །བླ་མའི་ཁས་བླངས་མ་བཅག་ཅིང་། །བླ་མའི་བྱ་བ་མ་ལོག་དང་། །རང་གི་ལུས་ངག་སེམས་རྣམས་ཀུན། །ཆོས་ལས་གཞན་པ་མི་བྱའོ། །སེམས་ཅན་ཀུན་གྱི་དོན་བྱ་ཞིང་། །རྟག་ཏུ་བླ་མ་ལ་གུས་དང་། །དམ་ཚིག་མཆོག་ལས་འདའ་མི་བྱ། །རྡོ་རྗེ་དྲིལ་བུ་བཟུང་བ་དང་། །སྔགས་ལས་འོས་པའི་རྫས་རྣམས་བཟུང་། །སྤྱིར་ཡང་རྩ་བའི་དམ་ཚིག་ལས། །གསང་བར་འོས་དང་གཉེན་གཏད་དང་། །ནང་པར་ཁས་བླངས་བསྟན་པ་དང་། །སྨྲས་དང་ཡིད་ཀྱིས་ལོག་སྤྱད་ན། །འདི་ཡང་མནར་མེད་རྒྱུར་འགྱུར་རོ། །དབང་ལས་བྱུང་བའི་ཁྱད་པར་ཆོས། །གཞན་ལ་མི་བསྒྲགས་སེམས་ལ་སྦྱར། །བླ་མའི་ཐུགས་ལ་གནོད་པ་ཡི། །ལུས་སམ་ངག་གམ་ཡིད་ངག་གིས། །བྱ་བ་ལོག་པར་མི་བྱའོ། །དེ་བཞིན་རྡོ་རྗེའི་སྤུན་ཟླ་ལ། །གཞན་ལས་ཁྱད་པར་མན་ངག་རྣམས། །གཞན་ལ་གསང་ལ་སེམས་བཞག་ན། །ཁྱད་པར་དངོས་གྲུབ་མཆོག་ཏུ་འགྱུར། །དེས་ན་དམ་ལས་མི་འདའོ། །ཞེས་པས་སོ། །དེ་ལྟར་བླ་མའི་བྱ་བ་ལ་མཁས་པར་བྱ་ཞིང་། སྔགས་ཀྱི་དམ་ཚིག་ལ་འཛེམ་པར་བྱས་ན་དངོས་གྲུབ་གང་འདོད་པ་ལ་ཐོགས་པ་མེད་པར་འབྱུང་བར་འགྱུར་རོ། །གང་ཡང་ཡི་དམ་དུ་བྱས་པ་ལས་མ་འགལ་བར་རྗེས་སུ་བཟུང་ན། འདི་དང་ཕ་རོལ་འདོད་པའི་དོན་རྣམས་ངེས་པར་འགྲུབ་བོ། །གང་གིས་དམ་བཅས་པ་ལ་མ་འདས་ན། བླ་མ་དང་མཁའ་འགྲོའི་བྱིན་རླབས་འཇུག་ཅིང་། གང་ལ་ཡང་ཐོགས་པ་མེད་པར་འགྱུར་རོ། །བླ་མ་ལ་དུས་རྟག་ཏུ་མོས་པ་དང་གུས་པ་མ་ལོག་ཅིང་དུས་གསུམ་དུ་གསོལ་བ་བཏབ་ན་ལུས་ངག་ལ་བདེ་བ་ཁྱད་པར་ཅན་སྐྱེ་བར་ངེས་སོ། །གལ་ཏེ་ལུས་ངག་ཡིད་ཀྱིས་བླ་མ་ལ་མོས་གུས་ལོག་པ་དག་སྐད་ཅིག་ཙམ་མམ་ཐང་གཅིག་གམ་ཉིན་གཅིག་གམ་རྨི་ལམ་དུ་བྱུང་ན་ཡང་དྲན་པའི་རྗེས་ལ་བླ་མ་དངོས་མེད་ན་ཡང་ཡིད་ཀྱི་ཡུལ་དུ་བྱས་ལ་དེ་མ་ཐག་ཏུ་བཤགས་ན་སངས་རྒྱས་ཀྱི་ཡོན་ཏན་མང་པོ་མངོན་པར་མཐོང་བར་འགྱུར་རོ། །དེའི་ཕྱིར་དངོས་གྲུབ་ཀྱི་རྩ་བ་བླ་མ་ཡིན་པར་ཤེས་པར་བྱའོ། །དམ་ཚིག་གི་རྩ་བ་རྡོ་རྗེའི་སྤུན་སྲིང་ཡིན་པར་ཤེས་པར་བྱའོ། །སྒྲུབ་པའི་རྩ་བ་བཟླས་པ་ཡིན་པར་ཤེས་པར་བྱའོ། །ལོངས་སྤྱོད་ཀྱི་རྩ་བ་བླ་མ་མཆོད་པ། འཁོར་འདུ་བའི་རྩ་བ་རང་གཅིག་པུར་འདུག་པ་ཡིན། མན་ངག་གི་རྩ་བ་དྲག་ལ་ཡུན་རིང་བ་ཡིན། སངས་རྒྱས་ཀྱི་རྩ་བ་རང་སེམས་ཡིན། ཉམས་ལེན་གྱི་རྩ་བ་འདུག་ཐུབ་པ་ཡིན། ཆོས་སྤྱོད་ཀྱི་རྩ་བ་ངག་བཅད་པ་ཡིན། བཟང་པོའི་རྩ་བ་རང་གི་ཡུལ་སྤངས་པ། ཆོས་ཀྱི་རྩ་བ་རྟག་ཏུ་གྲོགས་སྤངས་ཏེ་རྟག་ཏུ་དགོན་པ་བརྟེན་པ། སྤྱོད་པའི་རྩ་བ་གང་ལ་ཡང་ཞེན་ཅིང་ཆགས་པ་མེད་པ། སྒོམ་པའི་རྩ་བ་ཉོན་མོངས་པ་རང་སར་གྲོལ་བ། ལྟ་བའི་རྩ་བ་འཁོར་བའི་འབྲེལ་པ་ཆོད་པ། གྲུབ་པའི་རྩ་བ་སྣང་བ་ཐམས་ཅད་དབང་དུ་འདུས་པ། ཏིང་ངེ་འཛིན་གྱི་རྩ་བ་འགྱུ་བའི་རླུང་ཟད་པ་ཡིན་པར་ཤེས་པར་བྱའོ། །སྙིང་པོའི་དོན་རྒྱུད་ལས་སྐྱེ་བར་འདོད་ན་བླ་མ་དང་རྡོ་རྗེའི་སྤུན་ལ་བརྩེ་གདུང་རྒྱུན་མི་གཅད། མཁའ་འགྲོ་འདུ་བར་འདོད་ན་ཚོགས་དང་གཏོར་མ་ལ་འབད་པར་བྱའོ། །སྐྱེ་བོའི་ཚོག་འདུ་ཞིང་བྱམས་པར་འདོད་ན་རྣལ་འབྱོར་མའི་ཚོགས་ལ་རྟག་ཏུ་མཆོད་པར་བྱའོ། །བླ་མ་མཉེས་པར་འདོད་ན་རང་སེམས་ལ་ཟོལ་ཟོག་མེད་ཅིང་། བླ་མའི་ཡོན་ཏན་ལ་ནན་ཏན་དུ་བྱ། ལུས་ཀྱི་ནད་དབྱུང་བར་འདོད་ན་ལུས་ངག་གི་གནད་དང་། དུས་ལ་བབས་པའི་རྩ་གནས་ཀྱི་ཡི་གེ་བརྗོད་པར་བྱ། འཁྲུལ་པའི་སྣང་བ་ནུབ་པར་འདོད་ན། རིག་པ་མངོན་སུམ་གྱི་སྣང་བ་ལ་འདྲིས་པར་བྱ། རང་གི་རྒྱུད་ཕྱིན་ཅི་མ་ལོག་ཅིང་སྨིན་པར་འདོད་ན་ཡང་ནས་ཡང་དུ་བསྐུར་བར་བྱའོ། །དེ་ཉིད་སེམས་དང་མི་འབྲལ་བར་འདོད་ན་སྔགས་ཕྱི་ནང་སོ་སོའི་དམ་ཚིག་ལས་མི་འདའ་བར་བྱ། ལུས་ངག་ལ་རྟགས་འབྱུང་བར་འདོད་ན། རྟག་ཏུ་སྒྲུབ་པ་ལ་བརྩོན་པར་བྱ། སེམས་ཀྱི་རྟོག་པ་ཟད་པར་འདོད་ན་རླུང་འགྲོ་འོང་དུས་ཤེས་པར་བྱའོ། །ཡང་དམ་ཚིག་ཆེན་པོ་མཆོག་གི་རྒྱུད་ལས། སྤྱིར་ན་དམ་ཚིག་ཅེས་བྱ་བ། །རང་སེམས་ཚིག་པ་མེད་པ་ལས། །གཡོ་སྒྱུ་དག་དང་བྲལ་བའོ། །ཞེས་པ་དང་། ས་མ་ཡ་དམ་ཚིག་གི་རྒྱུད་ལས། སྔགས་ཀྱི་དམ་ཚིག་རྣམ་ཕྱེ་བ། །རྣམ་གྲངས་དམ་ཚིག་དཔག་ཏུ་མེད། །ཀྲི་ཡ་རྣམས་ལ་ཁྱད་པར་དུ། །ལུང་གཅིག་ཆུ་ལ་མི་བཏུང་དང་། །སྔགས་དང་ལྷ་ཡི་ངེས་ཕྱེ་པའོ། །ཡོ་ག་རྣམས་ཀྱི་དམ་ཚིག་ཏུ། །ཡིད་ཀྱི་འགྱུ་བས་ལྡོག་པ་དང་། །དྲན་པའི་སེམས་ཀྱིས་མཁྱེན་པར་བྱ། །མ་ཡཱ་རྣམས་ནི་ཉམས་པ་དང་། །སྐད་ཅིག་ཙམ་ཡང་འཕྲད་མི་བྱ། །ཨ་ནུ་རྣམས་ནི་ཉམས་པ་དང་། །སེམས་ཀྱི་དྲན་པས་མི་བསླང་དང་། །འགྱུར་ཤེས་པ་ཡིས་དགག་པར་བྱ། །ཨ་ཏི་རྣམས་ནི་ཉམས་པ་དང་། །ཚིག་བརྗོད་རིམ་པ་སྤང་བར་བྱ། །སེམས་ཀྱི་སྤྱོད་པ་མི་འགྱུར་བའོ། །དེ་དག་རྣམས་ལས་བསྡུས་པ་ནི། །ཡན་ལག་དང་ནི་རྩ་བའོ། །ཡན་ལག་ནང་པའི་ལུང་གི་ནི། །ཤེས་པར་བྱ་དང་མི་སྤང་དང་། །སྤྱད་པར་བྱ་དང་དང་དུ་བླངས། །བསྒྲུབ་པར་བྱ་བ་རྟོགས་པ་ལས། །རྣམ་གྲངས་བརྗོད་ཀྱིས་མི་ལང་བའོ། །རྩ་བ་གསུམ་ལས་ངེས་ཕྱེ་བ། །དགུ་ཡི་རྣམ་པར་ཕྱེ་བ་ལས། །ཉི་ཤུ་རྩ་བདུན་དབྱེ་བ་ཡིས། །སྔགས་ལས་ཁྱད་པར་ནང་པ་ཡི། །དམ་ཚིག་རྣམ་པར་བསྡུས་ཏེ་ཕྱེ། །འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །དེ་ནས་སྔགས་པས་འབད་པར་བྱ། །ཤེས་བཞིན་གྱིས་ནི་ཟིན་པར་བྱ། །མཆོག་ཏུ་དངོས་གྲུབ་འདོད་པས་ནི། །བླ་མ་བསླུ་བར་མི་བྱ་ཞིང་། །མཆེད་ལ་བརྩེ་གདུང་རྒྱུན་མི་གཅོད། །ཅེས་པས་སོ། །འཁོར་བའི་ཉེས་དམིགས་མ་དྲན་ན་ཐར་པ་དང་ཐམས་ཅད་མཁྱེན་པའི་རྩ་བ་ཉམས། ངན་སོང་གསུམ་གྱི་སྡུག་བསྔལ་ཡིད་ལ་མ་བྱས་ན་བྱང་ཆུབ་ཀྱི་ས་བོན་ཉམས། ལས་རྒྱུ་འབྲས་ཀྱི་འབྲེལ་པ་ལ་མ་བརྟགས་ན་སྙིང་རྗེའི་རླན་དང་བྲལ། འཇིག་རྟེན་གྱི་བྱ་བ་མ་བཏང་ན་ཡེ་ཤེས་ཀྱི་འཕེལ་སྒོ་ཉམས། ཚོགས་གཉིས་དང་དུ་མ་བླངས་ན་ལོངས་སྤྱོད་དང་ཐར་པའི་འབྲས་བུ་ཉམས། རྟག་ཏུ་རང་སེམས་ལ་མ་བསྒོམས་ན་ཚོམས་གཉིས་ཀྱི་རྩ་བ་ཉམས། རི་ཁྲོད་དགོན་པ་མ་བརྟེན་ན་སེམས་ཀྱི་མཐོང་བ་ཉམས་སོ། །ལྟ་བས་མ་ཟིན་པའི་སྒོམ་པ་རྣམ་རྟོག་གི་གྲོགས་ཡིན་པར་ཤེས་པར་བྱའོ། །སྒོམ་པས་མ་ཟིན་པའི་སྤྱོད་པ་བཅོས་མ་ཡིན་པར་ཤེས་པར་བྱའོ། །སྤྱོད་པས་མ་ཟིན་པའི་དགེ་སྦྱོར་ཚུལ་འཆོས་ཡིན་པར་ཤེས་པར་བྱའོ། །དད་པས་མ་ཟིན་པའི་དམ་ཚིག་ཁ་ཚོང་ཡིན་པར་ཤེས་བྱའོ། །སྙིང་རྗེས་མ་ཟིན་པའི་སྤྱིན་པ་ཁེ་གྲགས་སུ་ཤེས་པར་བྱའོ། །དམ་ཚིག་གིས་མ་ཟིན་པའི་དབང་བསྐུར་གོལ་སར་ཤེས་པར་བྱའོ། །དྲན་པས་མ་ཟིན་པའི་བྱ་བ་དོན་མེད་དུ་ཤེས་པར་བྱའོ། །བླ་མས་མ་ཟིན་པའི་ལྟ་བ་ཡིད་དཔྱོད་དུ་ཤེས་པར་བྱའོ། །བླ་མ་ལ་མ་གུས་པའི་བྱིན་རླབས་བར་ཆོད་དུ་ཤེས་པར་བྱའོ། །དམ་ཚིག་མི་བསྲུང་བའི་སྒྲུབ་པ་ཚི་ཆད་པ་ལ་དོན་མེད་དུ་ཤེས་པར་བྱའོ། །གདམས་ངག་མེད་པའི་ཉམས་ལེན་ཏོམ་ཏོམ་དུ་ཤེས་པར་བྱའོ། །བླ་མ་ལས་མ་བྱུང་བའི་བཤད་པ་ངག་འཁྱལ་དུ་ཤེས་པར་བྱའོ། །ཆོས་ལས་མ་བྱུང་བའི་འབྲས་བུ་ཡི་ཆད་པར་ཤེས་པར་བྱའོ། །རྒྱུད་ལས། དམ་ཚིག་སྡོམ་པ་རྣམས་བཤད་པ། །ཀུན་ཀྱང་རང་གི་སེམས་ལས་སོ། །དེ་ཡི་ཕན་པ་བླ་མས་ཤེས། །དེ་ཕྱིར་སེམས་ལ་འདྲེས་པའི་མིས། །སངས་རྒྱས་ཞིང་ཁམས་མཐོང་བ་དང་། །སྐུ་གསུམ་ཚད་དུ་འབྱོངས་པ་དང་། །སངས་རྒྱས་ཡོན་ཏན་མངོན་པར་གྲུབ། །བླ་མ་རྟག་ཏུ་བརྟེན་པའི་མིས། །མཁའ་འགྲོའི་གཟུགས་རྣམས་མཐོང་བ་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་ལ་དབང་ཐོབ་འགྱུར། །གྲོགས་ལ་བརྩེ་གདུང་ལྡན་པའི་མིས། །འགྲོ་བ་ཐམས་ཅད་འདུལ་བ་དང་། །ཀུན་གྱིས་སྙན་པར་གྲགས་པ་དང་། །གཟུགས་ཅན་ཀུན་ཀྱང་བྱམས་པ་དང་། །རྟག་ཏུ་དམ་ཚིག་ལ་གནས་དང་། །མཁའ་འགྲོ་མ་རྣམས་འདུ་བ་དང་། །མ་བསྒྲུབ་དངོས་གྲུབ་འབྱུང་བ་དང་། །ངག་གི་ནུས་པ་འབར་བ་དང་། །དེ་བཞིན་མཆོག་དང་ཐུན་མོང་གི། །བྱ་བ་ཐམས་ཅད་རྫོགས་པར་འགྱུར། །རྟག་ཏུ་དགོན་པར་གནས་པ་ཡིས། །རླུང་སེམས་ཚད་རྣམས་ཟིན་པ་དང་། །སྣང་བ་གྲོགས་སུ་འཆར་བ་དང་། །རང་གི་སེམས་ལ་དབང་ཐོབ་འགྱུར། །བླ་མ་རབ་བསྙེན་བསྐུར་བྱས་མིའི། །ལོངས་སྤྱོད་མཆོག་ཏུ་ལྡན་པ་དང་། །འཁོར་འདབ་རྒྱས་ཤིང་བསོད་ནམས་ལྡན། །འགྲོ་བ་ཡོངས་ལས་རྒྱལ་བར་འགྱུར། །རྟག་ཏུ་དབང་རྫོགས་བྱས་པའི་མི། །འགྲོ་བའི་གཙོ་བོར་འགྱུར་བ་དང་། །ཀུན་གྱིས་མཐོང་ན་དགའ་བ་དང་། །ཡེ་ཤེས་མངོན་དུ་འབྱོངས་པ་དང་། །སངས་རྒྱས་རྣམས་ཀྱིས་བྱིན་བརླབས་འགྱུར། །རྟག་ཏུ་གཏོར་མའི་ལས་བྱེད་པས། །བསོད་ནམས་ཚོགས་རྣམས་རྫོགས་པ་དང་། །བར་ཆོད་མེད་ཅིང་ལས་རྣམས་འགྲུབ། །འདོད་པ་ཕུན་སུམ་ཚོགས་པ་དང་། །མཁའ་འགྲོ་བྲན་བཞིན་འཁོལ་བར་འགྱུར། །ཞེས་གསུངས། དམ་ཚིག་རབ་ཏུ་འབྱེད་པ་ལས། བཀོད་པ་གསུམ་དུ་གཏན་ལ་ཕབ་པའོ། །བྲམ་ཟེའི་སློབ་དཔོན་འཇམ་དཔལ་བཤེས་གཉེན་གྱིས་མཛད་པ། དམ་ཚིག་ཏུ་འབྱེད་པ་ཞེས་བྱ་བ་རྫོགས་སོ། །ས་མ་ཡཱ། གཏད་རྒྱ། སྤས་རྒྱ། ྅྅྅ཐ།ཧ།ཧཱརྨཱཅ།༔ སམཱཧྱ།ཙ།ཐ྄ཐཾ༔ སམཧྱ།མཧྱ།ཁ྄།༔ རྒྱ་རྒྱ་རྒྱ༔ རྒྱ་རྒྱ་རྒྱ༔ ༔

རྫོགས་པ་ཆེན་པོ་སྙིང་ཐིག་གི་ལོ་རྒྱུས་ཆེན་མོ།

༄༅༔ ༔རྫོགས་པ་ཆེན་པོ་སྙིང་ཐིག་གི་ལོ་རྒྱུས་ཆེན་མོ་བཞུགས་སོ༔ ༔མན་ངག་བརྒྱ་བཅུ་དགུའི་ནང་ན་དགུ་བཅུ་པ། གཐཱ།མ྄རྣ།རྒཏྱཏྱ།༔྅྅྅ རྒྱ་གར་སྐད་དུ༔ བྷ་པ་མི་ཕེབས་དྷ་ནཱ་མ༔ བོད་སྐད་དུ༔ ལོ་རྒྱུས་རིན་པོ་ཆེ་ཞེས་བྱ་བ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ གང་གི་རྒྱུད་རྒྱལ་ངེས་པའི་ཚིག༔ རྨོངས་པ་མེད་པར་གཏན་ལ་དབབ༔ ཕྱི་ལྟར་བཤད་པ་སྤྲོས་པ་ལ༔ ནང་ལྟར་དེ་བཞིན་སྤྲོས་པ་མེད༔ གསང་བ་ཤིན་ཏུ་སྤྲོས་མེད་དོ༔ བླ་ན་མེད་པ་རབ་སྤྲོས་མེད༔ འདིར་ནི་ནང་ལྟར་བཤད་པ་ལས༔ གང་ཟག་ཉོན་མོངས་ལྔས་གཟིར་བས༔ གཏི་མུག་ཅན་རྣམས་འཇུག་པའི་ཕྱིར༔ དམིགས་གཏད་མེད་པའི་སྒོམ་པ་ཉིད༔ ལམ་དུ་སློང་བར་འདོད་པ་ལ༔ ལོ་རྒྱུས་དོན་གྱིས་བཤད་པར་བྱ༔ འདོད་ཆགས་ཅན་རྣམས་འཇུག་དོན་དུ༔ བླང་དོར་མེད་པའི་སྤྱོད་པ་ཉིད༔ ལམ་དུ་སློང་བར་འདོད་པ་ལ༔ རྩ་བའི་དོན་ཉིད་བཤད་པར་བྱ༔ ཞེ་སྡང་ཅན་རྣམས་འཇུག་དོན་དུ༔ གཟའ་གཏད་མེད་པའི་ལྟ་བ་ཉིད༔ ལམ་དུ་སློང་བར་འདོད་པ་ལ༔ ཡོ་གའི་དོན་རྣམས་བཤད་པར་བྱ༔ ང་རྒྱལ་ཅན་རྣམས་འཇུག་དོན་དུ༔ བླང་དོར་མེད་པའི་འབྲས་བུ་ཉིད༔ ལམ་དུ་སློང་བར་འདོད་པ་ལ༔ དགོས་ཆེད་དོན་ཉིད་བཤད་པར་བྱ༔ ཕྲག་དོག་ཅན་རྣམས་འཇུག་དོན་དུ༔ གོལ་སྒྲིབ་མེད་པའི་གཞི་བསྟན་ཕྱིར༔ ཚིག་གི་དོན་ཉིད་བཤད་པར་བྱའོ༔ དེ་ལ་ལོ་རྒྱུས་དོན་གྱིས་བཤད༔ འདི་ལ་རྣམ་པ་གཉིས་ཡིན་ཏེ༔ སངས་རྒྱས་ཉིད་ཀྱི་ལོ་རྒྱུས་ནི༔ ཚིག་དོན་བཅུ་གཅིག་གོང་དུ་བསྟན༔ དེ་ལ་གཅེས་པའི་ལོ་རྒྱུས་བཤད༔ དུས་གསུམ་འདུལ་ཕྱིར་བྱས་པའི་ཕྱིར༔ བརྒྱུད་པ་གསུམ་དུ་གཏན་ལ་དབབ༔ དེ་ལས་བབས་ལུགས་ཆེན་པོ་བཤད༔ དེ་ལ་ཡང་དག་པར་རྫོགས་པའི་སངས་རྒྱས་སྟོན་པ་ཐུགས་རྗེ་ཆེ་ལ་ཐབས་མཁས་པ་ཉིད་ཀྱིས༔ དང་པོ་བསྐལ་པ་དཔག་ཏུ་མང་པའི་སྔོན་རོལ་དུ༔ ཞིང་ཁམས་རང་བཞིན་རྣམ་པར་བཀོད་པ་ཞེས་བྱ་བར༔ སངས་རྒྱས་མེ་ཏོག་མཛེས་པ་ཆེན་པོ་ལ༔ གསེར་གྱི་རྡོ་རྗེ་གཅིག་ཕུལ་ནས་ཐུགས་བྱང་ཆུབ་མཆོག་ཏུ་སེམས་བསྐྱེད་དོ༔ དེ་ནས་སྐྱེ་བ་གཉིས་ན༔ བྱང་ཕྱོགས་རླུང་གི་གཡོ་བ་བཀོད་པ་ཞེས་བྱ་བ་རུ༔ ཁྱིམ་བདག་ལེགས་སྦྱིན་ཞེས་བྱ་བའི་སྲས་སུ་སྐྱེས་ཏེ༔ དེའི་ཚེ་ཕ་ནི་ལེགས་སྦྱིན་ཞེས་བྱའོ༔ མ་ནི་དགེ་བའི་མཆོག་སྦྱིན་ཞེས་བྱའོ༔ གྲོང་ཁྱེར་ནི་རྔ་ཡབ་ཅན་ཞེས་བྱའོ༔ དེ་ཉིད་ནོར་བུའི་ཕྲེང་བ་ཞེས་བྱའོ༔ དེ་ནས་ཉེར་ལྔ་ན༔ གླིང་དེའི་ཤར་ཕྱོགས་ན་མཁའ་འགྲོ་མ་རྣམས་འདུས་པའི་ཕུག་ཅེས་བྱ་བ་ན༔ ཡང་དག་པར་རྫོགས་པའི་སངས་རྒྱས་འཁོར་ལོ་ལེགས་པར་སྤྱོད་པ་ཞེས་པའི་དྲུང་དུ་འཁོད་དེ༔ མདུན་དུ་བདར་ཞིང་ཕྱག་བྱས་ནས་རབ་ཏུ་ཆོས་ཉན་ཏོ༔ དེ་ནས་ཤི་འཕོས་ཏེ༔ ཡང་བདེ་བས་མྱོས་པའི་གླིང་ཞེས་བྱ་བར་ཕ་ནི་གློག་གི་འོད་ཅེས་བྱའོ༔ མ་ནི་རྣམ་པར་མཛེས་ཞེས་བྱའོ༔ གྲོང་ཁྱེར་ནི་ནམ་མཁའ་འཛིན་ཞེས་བྱའོ༔ ཉིད་ནི་ལག་སྦྱིན་ཞེས་བྱའོ༔ དེའི་ཚེ་ན་དཔལ་དགེ་བའི་བློ་གྲོས་ཞེས་བྱ་བ་ལས༔ ལོ་ལྔའི་བར་ལ་ཆོས་ཉན༔ དེ་ནས་བདུན་གྱི་བར་ལ་ཏིང་ངེ་འཛིན་མཉམ་པར་བཞག་གོ༔ སྤྱིར་དགུང་ལོ་ཉི་ཤུ་རྩ་ལྔ་ན༔ ནོར་བུ་རིན་པོ་ཆེའི་ཕུང་པོ་རྣམ་པར་བཀོད་པ་ཞེས་བྱ་བའི་རིའི་རྩེ་ལ་མངོན་པར་རྫོགས་པར་སངས་རྒྱས་སོ༔ དེ་ནས་བསྐལ་པ་གཅིག་ན༔ ཆོས་ཀྱི་སྤྲོས་གཞི་མཐའ་གང་དུའང་མ་ལྷུང་པ་ལས་ཐུགས་རང་བྱུང་གི་ཡེ་ཤེས་ཆེན་པོ་ཉིད་རྣམ་པར་གཡོས་པ་ལས༔ ལོངས་སྤྱོད་རྫོགས་པ་སྐུའི་རྒྱན་དང༔ ཁ་དོག་གི་འཁོར་ལོ་རང་བྱུང་དུ་བྱོན༔ འདིའི་དུས་ན་ཡིད་རང་བྱུང་གི་ཡེ་ཤེས་རང་བྱུང་བས༔ འོད་ཟེར་འཕྲོ་འདུ་ལས༔ མཛད་པ་སུམ་ཅུ་རྩ་དྲུག་གི་བརྒྱུད་པ་མཛད༔ གནས་པ་འོད་ཀྱི་ཐིག་ལེ་ལས། གནས་ཕུན་སུམ་ཚོགས་པ་དྲུག་ཅུ་ཐམ་པར་གནས་པར་བྱས༔ དེ་ཉིད་ཀྱི་རང་བཞིན་བྱིན་གྱིས་བརླབས་ལས༔ སངས་རྒྱས་ཀྱི་སྐུ་འབུམ་ཕྲག་ཁྲིག་དཔག་ཏུ་མེད་པ་བརྗོད་ཀྱིས་མི་ལང་བ་རྣམས་མཐོང་བ་རྣམ་པར་དག་པའི་སྤྱན་གྱི་དཀྱིལ་འཁོར་ལ་མངོན་པར་སྣང༔ དེ་དག་ཐམས་ཅད་ཀྱང ༔ ཉིད་ཀྱི་འོད་ཀྱི་ཁ་དོག་ལས༔ རིགས་ལྔའི་སངས་རྒྱས་སུ་འདུས་ཤིང༔ རིགས་ལས་མངོན་པར་འབྱུང་ངོ༔ དེའི་ཚེ་ཉིད་ཀྱི་ལྔགས་ཀྱི་དབང་པོ་ལས༔ འོད་ཟེར་དཔག་ཏུ་མེད་པ་འཕྲོས་པ་ལས༔ རང་བྱུང་གི་ཡི་གེ་དྲུག་གི་སྒྲ་རང་བྱུང་སྟེ༔ སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་དོ༔ ཞེས་བྱ་བ་ལན་གསུམ་བྱུང་བས༔ ཉིད་ཀྱི་ཐུགས་ཡེ་ཤེས་རྣམ་པར་དག་པ་ལས༔ རང་བྱུང་གི་ཡེ་ཤེས་རང་ཤེས་རིག་གི་རྒྱལ་པོ༔ ཆོས་ཉིད་ཀུན་ཏུ་བཟང་པོ་ཉིད་དུ་རང་བྱུང་ནས༔ རང་བཞིན་མཛད་པ་མེད་པའི་ཐུགས་རྗེ་ཕྱོགས་བཅུར་འཕྲོས་སོ༔ དེ་ཉིད་ཀྱི་ངང་ལས་སངས་རྒྱས་རྣམ་པར་སྣང་མཛད་ཆེན་པོ་སྐུ་གཙོ་འཁོར་དང་བཅས་པ་གྲངས་མེད་པ༔ ཉིད་ཀྱི་ལོངས་སྤྱོད་དུ་འདུས་པ་དང༔ རྫོགས་པ་ཆེན་པོ་སྐུའི་འོད་འབར་རོ༔ དེ་བཞིན་དུ་མི་བསྐྱོད་པ་དང༔ རིན་ཆེན་འབྱུང་ལྡན་དང༔ སྣང བ་མཐའ་ཡས་དང༔ དོན་ཡོད་གྲུབ་པ་ལ་སོགས་པའི་སངས་རྒྱས་གྲངས་མེད་པ༔ སོ་སོའི་དལ་དང་བཅས་པ༔ ཉིད་ཀྱི་ལོངས་སྤྱོད་དུ་འདུན་ཅིང༔ རྫོགས་པ་ཆེན་པོའི་སྐུར་འབར་རོ༔ དེ་ལྟར་ཡན་ལག་བཅུ་གཉིས་སུ་བྱུང་བས༔ ཆོས་ཐམས་ཅད་ཀྱི་ལོངས་སྤྱོད་རྣམ་པར་དག་པ་ཉིད་ལ་རྣམ་པར་སྤྱོད་ཅིང་རྣམ་པར་རྫོགས་སོ༔ འདིའི་ཚེ་ན་ཆོས་ཐམས་ཅད་ཀྱི་མིག་དྲི་མ་མེད་ཅིང་རྡུལ་དང་བྲལ་བརྙེད་དོ༔ དེ་ནས་ཐུགས་ཡིད་དུ་རང་བྱུང་བས་ཐུགས་ཡིད་ཅེས་བྱ་སྟེ༔ ཡུལ་གཅིག་དང་དུ་མ་ལ་དགོངས་པ་རང་བྱུང་རང་ཤར་དུ་བྱུང་ངོ༔ དེའི་ཚེ་ན་འོད་ཁྱིམ་རྣམ་པར་དག་པ་ཤིན་ཏུ་བཀོད་པ་ལེགས་པའི་གནས༔ རྣམ་པར་ལེགས་པའི་ཁང་བུ་བརྩེགས་པ་ན༔ སྟོན་པ་རྣམ་པ་རང་ཤེས་རིག་གི་རྒྱལ་པོ༔ རྣམ་པར་སྣང་མཛད་གངས་ཆེན་མཚོ་ཞེས་བྱ་བ༔ དལ་ཐམས་ཅད་ཀྱི་མངའ་བདག་ཏུ་རང་བྱུང་སྟེ༔ འདིའི་དུས་ན་སྐུ་གསུང་ཐུགས་རང་བྱུང༔ བྱས་པ་མེད་པའི་བསྟན་པ་རིན་པོ་ཆེའི་ངང་ལས༔ མི་གཡོ་མི་འབྱུང༔ མི་གནས་མི་ལེན་མི་འདོར༔ མི་བསྐྱོད་པ་ཆེན་པོ་གཅིག་ཏུ་འབྱུང་ངོ༔ དེའི་ཚེ་གདུལ་བྱ་མ་ཡིན༔ འདུལ་བྱེད་རིན་པོ་ཆེ་མཛེས་པའི་འཁོར༔ ཚོམ་བུ་འབུམ་ཕྲག་གྲངས་མེད་པ༔ ཉིད་ཀྱི་སྐུ་གསུང་ཐུགས་དང་ཡོན་ཏན་ཕྲིན་ལས་ཉིད་ལས་རྣམ་པར་འཕྲོས་ཤིང་འདུས་སོ༔ དེ་ལྟར་སྟེང་དང་འོག་དང་ཕྱོགས་བཅུའི་འཇིག་རྟེན་མ་ཡིན་ཅིང༔ བདེ་བའི་ཞིང་ཐམས་ཅད་ཀྱང༔ རྣམ་པར་སྟུག་པོ་བཀོད་པ༔ སངས་རྒྱས་དཔག་ཏུ་མེད་པ༔ བརྗོད་ཀྱིས་མི་ལངས་བ་དག་ཏུ༔ རང་བྱུང་གི་ཡེ་ཤེས་ཀྱི་ངང་ལས་རང་རིག་རང་གསལ་དུ་བཞུགས་སོ༔ དེ་ལྟར་ཀྱང་སྐུའི་འོད་ལ་བཞུགས་ཤིང༔ གསུང་གི་ཟེར་ལ་རོལ་བ་ཉིད༔ ཐུགས་ཀྱི་དགོངས་པ་ལ་བཞུགས་སོ༔ དེ་ནས་རང་བྱུང་ཡེ་ཤེས་འབྱེད་པ་མེད་པ་ཉིད༔ རང་གཡོས་པ་ལས་སྤྲུལ་པའི་སྐུ་ཉིད་དུ་རྣམ་པར་སྤྲུལ་ཏེ༔ འདི་ནས་བསྐལ་བ་ཆེན་པོ་བདུན་གྱི་འོག་ཏུ༔ མ་རིག་པ་དག་ཏུ་འཁྲུལ་འཛིན་གྱི་ཤེས་པ་ལས༔ རྒྱུ་འཁོར་བའི་ཡིད་ཀྱིས༔ ཆོས་འདི་མ་དག་པའི་རྐྱེན་བྱས༔ ཆ་མེད་པའི་ཉོན་མོངས་གཞི་བྱས༔ ཡུལ་འདི་དང་འདིའི་རྣམ་རྟོག་གི་ཆ་ཕྲ་མོ་ཁ་ཕྱིར་བལྟས་པ་ལས༔ བདག་པོའི་རྐྱེན་ཞེན་དུས་དེར་གཡོ་བས་རྐྱེན་བྱས༔ ཡུན་ལྷུན་གྲུབ་ཀྱི་སྐྱོན་ཡོན་ཏན་དུ་མ་ཤེས་ཏེ༔ ཡོན་ཏན་སྐྱོན་དུ་སོང་བ་ལས༔ དམིགས་པའི་རང་བཞིན་སྐུ་དང་ཡེ་ཤེས་ལ༔ བདག་ཏུ་གཅོད་པའི་རྒྱུའི་ཆ་ཙམ་ལས༔ དམིགས་པ་སོ་སོའི་ཁ་དོག་གིས་རྐྱེན་བྱས་སོ༔ དེ་ལྟར་ཆོས་དང་སྤྲུལ་སྐུ་གཉིས༔ ལོངས་སྐུ་ལ་དུས་མཚུངས་པས༔ ཆོས་སྐུ་སྤྲོས་པ་མེད་པའི་གནས་སུ༔ རང་ལས་རང་བྱུང་གི་ཡེ་ཤེས་ཁ་ཕྱིར་བསྐྱལ་བ་ལས༔ དེ་ཉིད་ལས་མ་དག་པ་ལས༔ མཚུངས་པ་དེ་མ་ཐག་པའི་རྐྱེན་ཞེས་བྱའོ༔ འདི་དག་དུས་སུ་གཞི་མེད་པས༔ རང་གིས་རང་དུ་རྐྱེན་དུ་འཇུག་པ ༔ ཉིད་ལས་རྐྱེན་ཞེས་བྱའོ༔ འདིའི་དུས་ན་རྣམ་པ་ཐམས་ཅད་མཁྱེན་པའི་ཡེ་ཤེས་ཉིད་ཡོན་ཏན་གྱི་རྩ་དུ་མར་སྣང་བ་ལས༔ ཐབས་ཞེས་རྟོགས་པ་རང་ཤར་དུ་ཤར་བའི༔ ཕའི་རྒྱུ་ཟླས་མཚན་ཉིད་འཛིན་པའི་ཡེ་ཤེས་ལྔའི་རྩལ་ཡོན་ཏན་སྐྱོན་དུ་སོང་བ་ལས༔ ཤེས་རབ་ཅེས་ཤེས་རིག་ཕྱོགས་མེད་དུ་གསལ་བ་ཉིད་ལས༔ མའི་རྐྱེན་བྱས་སོ༔ རྒྱུ་རྐྱེན་འཛོམ་པ་ལས་ཆོས་ཉིད་ཀུན་ཏུ་བཟང་པོ་ཆོས་ཐམས་ཅད་ཀྱི་གཞི་མ༔ སྟོན་པ་སངས་རྒྱས་བཅོམ་ལྡན་འདས་ཀྱི་སྐུ་ཡོན་ཏན་སྣ་ཚོགས་པ་ཉིད་དུ་ཤར་རོ༔ དེ་ལྟར་ཀྱང་སྟོན་པ་སངས་རྒྱས་བཅོམ་ལྡན་འདས་ཡོན་ཏན་རྫོགས་པའི་སྐུས་ཐུགས་གཡོས་པ་ནི༔ སྔོན་བྱང་ཆུབ་མཆོག་ཏུ་སེམས་བསྐྱེད་པ་ཉིད་ལས༔ སྔོན་གྱི་སྨོན་ལམ་གྱི་མཐུས༔ སྐུ་མཚན་ཉིད་རྫོགས་པ་རྡོ་རྗེ་འཆང་གི་སྐུར་མངོན་པར་གསལ་བ་ནི༔ སེམས་བསྐྱེད་པའི་ཚེ་གསེར་གྱི་རྡོ་རྗེ་ཕྲ་མོ་སེམས་བསྐྱེད་པའི་རྟེན་དུ་ཕུལ་བ་ལས་བྱུང་བའོ། །དེ་ཉིད་ཀྱི་སྣང་ཆ་ལས་དཔེ་བྱད་ཕུན་སུམ་ཚོགས་པ་རྡོ་རྗེ་འཆང་ཡོན་ཏན་རྫོགས་པའི་ཁྱད་པར་དུ་བྱུང་བའོ༔ འདུ་བ་ཁྱད་པར་ཅན་གྱི་རྟེན་མངོན་པར་སྒྲུབ་པ་ལས་བྱུང་བ་སྟེ༔ འདི་དག་བསོད་ནམས་རྣམ་པར་དག་པས༔ སྐུ་སྣང་ལ་རང་བཞིན་མེད་པ༔ ལས་ཀྱི་མ་རིག་པ་རྣམ་པར་དག་པས༔ ཐུགས་ཀྱི་ཤེས་རབ་ཆེན་པོ་ཀློང་རྡོལ་ནས་རྣམ་པ་ཐམས་ཅད་མཁྱེན་པ་ལ་ལོངས་སྤྱོད་པའི༔ དེ་ལྟར་སྣང་མཛད་རྡོ་རྗེ་འཆང་ཆེན་པོ་རང་བཞིན་ཡོན་ཏན་རྫོགས་པའི་སྐུར་བྱུང་བ་ནི༔ འགྲོ་དང་འགྲོ་བའི་མཐུ་དང༔ འཇུག་པ་རྣམ་པར་དག་པ་ལས་བྱུང་བའོ༔ དེ་ཡང་ཆོས་སྐུའི་དུས་ན༔ གནས་ཆོས་ཀྱི་དབྱིངས་རྣམ་པར་དག་པ་དཔག་ཏུ་མེད་པ། དམིགས་སུ་མི་ཚུད་དག་ཏུ་གནས་པ་ནི༔ སྟོན་པ་ཀུན་ཏུ་བཟང་པོ་རང་བཞིན་གྱི་མཛད་པ་མ་ལུས་པར་རྫོགས་པར་མཛད་ཅིང ༔ ཁྱད་པར་ཆེན་པོ་ཉིད་དུ་བཞུགས་སོ༔ འཁོར་རྡུལ་གཅིག་གི་སྟེང་ན་རྡུལ་རྙེད་ཀྱི་སངས་རྒྱས་དཔག་ཏུ་མེད་པ་རྣམས་དང་ལྷན་ཅིག་ཏུ་བསྟན་པ་རང་བཞིན་ཆོས་ཉིད་ཀྱི་རྡོ་རྗེ་སུས་ཀྱང་འདུས་མ་བྱས་པ་ཉིད་དོ༔ དུས་ནི་ཆོས་ཉིད་མཐོང་བ་རྣམ་པར་དག་པ་ཉིད་དོ༔ འདིའི་དུས་ན་སྐུའི་ཕྱིའི་མཛད་པ་བཞི་ནི༔ མི་འགྱུར་བ་དང༔ མི་འགྲོ་བ་དང༔ མི་འོང་བ་དང༔ མི་གནས་པ་ཉིད་དོ༔ ནང་གི་བཞི་ནི༔ མི་སྣང་བ་དང༔ མི་མཛད་པ་དང༔ མི་འཕྲོ་བ་དང༔ མི་འདུ་བའོ༔ གསང་བའི་བཞི་ནི༔ ལྷང་ངེ་བ་དང༔ ལྷན་ནེ་བ་དང༔ ལྷག་གེ་བ་དང༔ ཐལ་ལེ་བའོ༔ གསུང་གི་ཕྱིའི་མཛད་པ་བཞི་ནི༔ བརྗོད་དུ་མེད་པ་དང༔ བསྟན་དུ་མེད་པ་དང༔ བལྟར་མེད་པ་དང༔ ཅུང་ཟད་མེད་པའོ༔ ནང་གི་བཞི་ནི༔ རང་བཞིན་དུ་དང༔ གྱིན་འདར་ར་དང༔ ཡུལ་ཅན་ཡིན་པ་དང༔ དུ་མ་མེད་པའོ༔ གསང་བའི་བཞི་ནི༔ སོ་མ་དང༔ གཉུག་མ་དང༔ རྣལ་མ་དང༔ མ་བཅོས་པའོ༔ ཐུགས་ཀྱི་ཕྱིའི་མཛད་པ་བཞི་ནི༔ དྲི་མ་མེད་པའི་ཏིང་ངེ་འཛིན་དང༔ སེང་གེ་རྣམ་པར་བསྒྱིངས་པའི་ཏིང་ངེ་འཛིན་དང༔ དཔའ་བར་འགྲོ་བའི་ཏིང་ངེ་འཛིན་དང༔ ཡིད་བཞིན་ནོར་བུའི་ཏོག་གི་ཏིང་ངེ་འཛིན་ཏོ༔ ནང་གི་བཞི་ནི༔ རྒྱལ་མཚན་རྩེ་མོ་རྣམ་པར་རོལ་པ་དང༔ གློག་གི་འཕྲེང་བ་དང༔ འཁོར་ལོ་ཆེན་པོ་དང༔ འོད་འབར་བའི་ཏིང་ངེ་འཛིན་ཏོ༔ གསང་བའི་བཞི་ནི༔ ཕྱག་རྒྱ་ཟིལ་གྱིས་གནོན་པ་ཞེས་བྱ་བའི་ཏིང་ངེ་འཛིན་དང༔ འབར་ཆེན་སྙམ་པའི་ཏིང་ངེ་འཛིན་ཞེས་བྱ་བ་དང༔ ཆོས་ཉིད་སྣ་ཚོགས་ཞེས་བྱ་བའི་ཏིང་ངེ་འཛིན་དང༔ རྣམ་པར་བཀོད་པ་རང་སྣང་རོལ་པ་ཞེས་བྱ་བའི་ཏིང་ངེ་འཛིན་ཏོ༔ དེ་དག་རྣམས་ཀྱང་མཛད་པར་ཅི་འགྲོ་ཞེ་ན༔ ངོ་བོའི་གནས་པ་ཙམ་ལས༔ སྐུའི་མཛད་པ་བཅུ་གཉིས་སུ་བྱུང་བས༔ ཆོས་ཀྱི་སྐུ་ཙམ་གྱིས་མཛད་པ་མ་ལུས་པར་མཛད་དོ༔ རང་བཞིན་གྱི་ཆ་ལ་གནས་པ་ཙམ་ལ༔ གསུང་གི་མཛད་པ་བཅུ་གཉིས་སུ་བྱུང་བས་ལོངས་སྐུ་འགག་པ་མེད་པའི་ཆ་ཙམ་དུ་བྱུང་བའོ༔ དེ་ལྟར་བཅུ་གཉིས་ཀྱིས་ལོངས་སྤྱོད་རྫོགས་པའི་མཚན་ཉིད་རྫོགས་པར་མཛད་དོ༔ ཐུགས་རྗེའི་རྩལ་འགག་མེད་དུ་གནས་པ་ལས༔ ཐུགས་ཀྱི་མཛད་པ་ཏིང་ངེ་འཛིན་བཅུ་གཉིས༔ མཉམ་བཞག་གི་དུས་ན་མ་ཕྱེ་བའི་མི་འབྱེད་པའོ༔ རྗེས་ལ་སྣང་བ་རང་སྣང་དང༔ གསལ་ལ་རྟོག་པ་མེད་པ་དང༔ ཡིན་པ་ལ་བདག་ཏུ་མེད་པར་མཛད་དོ༔ དེ་ནས་ལོངས་སྐུར་བྱོན་ཏེ༔ གནས་རྣམ་དག་སྟུག་པོ་བཀོད་པར༔ སྟོན་པ་རྣམ་པར་སྣང་མཛད་གངས་ཆེན་མཚོའི་མཉམ་པར་བཞག་པའི་ཕྱག་གི་མཐིལ་ན༔ སངས་རྒྱས་ཀྱི་ཞིང་ཁམས་ཉི་ཤུ་རྩ་གཅིག༔ ཡས་མན་དུ་རྒྱ་ཐབ་བརྩིགས་པ་ལྟ་བུ་དང༔ ཕན་ཚུན་དུ་ནི་ཟ་འོག་གི་གུར་ཁྱིམ་བཀྲམ་པ་ལྟ་བུ་དང༔ དེ་རེ་རེ་ལ་སྟོན་པ་ལ་སོགས་པ་ལྔ་ལྔའི་ཁྱད་པར་དུ་གནས་སོ༔ ཞབས་སྐྱིལ་ཀྲུང་དུ་བཞུགས་པ་མན་ཆད་ལ་ཞིང་ཁམས་བཅུ་དྲུག་གནས་སོ༔ དེ་ཡང་ཡན་ལག་རིན་པོ་ཆེའི་གདུགས་རྣམ་པར་བརྩེགས་པ་ལྟ་བུ་དང༔ ཕན་ཚུན་དུ་འབྲུའི་ཕུང་པོ་དཔག་ཏུ་མེད་པ་བཀྲམ་པ་ལྟ་བུའོ༔ འཁོར་ནི་རིགས་ལྔའི་སངས་རྒྱས་དཔག་ཏུ་མེད་པ་རྣམས་སོ༔ བསྟན་པ་ནི་གསུང་གི་ཡི་གེ་སུས་ཀྱང་བྱས་པ་མེད་པ༔ བསྟན་པ་ཐམས་ཅད་ཀྱི་བུ་དང་ལྷན་ཅིག་ཏུ་གནས་སོ༔ དུས་ནི་ཆོས་ཉིད་ལས་འགྱུར་བ་མེད་པའོ༔ དེའང་ལོངས་སྐུའི་དུས་ན༔ སྐུའི་ཕྱིའི་མཛད་པ་བཞི་ནི༔ སྐུ་སྣང་ལ་རང་བཞིན་མེད་པས་རྡོས་བཅས་རྣམ་པར་དག་པར་མཛད༔ ཡེ་ཤེས་ཀྱི་ཞལ་ཕྱག་ཏུ་རྫོགས་པས་སྐུ་རང་གི་ངོ་བོའི་མཛད་པ་མ་ལུས་པར་རྫོགས་པར་མཛད༔ འོད་ཀྱི་ཞལ་ཕྱག་ཏུ་གསལ་བས་རང་སྣང་རང་གྲོལ་བར་མཛད་དོ༔ ཤེས་རབ་ཀྱི་ཞལ་གྱི་ཕྱག་གི་རྣམ་པར་སྣང་བས༔ མཁྱེན་པ་ཡོངས་སུ་རྫོགས་པའི་མཛད་པ་མ་ལུས་པར་མཛད་དོ༔ ནང་གི་བཞི་ནི༔ མཚན་བཟང་པོ་སུམ་ཅུ་རྩ་གཉིས་འོད་ཟེར་གྱི་རྣམ་པར་བྱུང་བས༔ སྐུའི་ཡོན་ཏན་མ་ལུས་པར་རྫོགས་པར་མཛད༔ དཔེ་བྱད་བཟང་པོ་བརྒྱད་ཅུས་བརྒྱན་པས༔ རྣམ་པར་དག་པ་ཆོས་ཀྱི་མཛད་པ་མ་ལུས་པ་རྫོགས་པར་མཛད་དོ༔ སྐུ་ལས་འོད་ཟེར་གྱི་ཚོགས་དཔག་ཏུ་མེད་པ་བྱུང་བས༔ སངས་རྒྱས་ཀྱི་ཁྱད་པར་གྱི་ཡོན་ཏན་མ་ལུས་པ་རྫོགས་པར་མཛད༔ ཞལ་ཀུན་ཏུ་ཐལ་ལེར་བཞུགས་པས༔ ལོངས་སྤྱོད་རྫོགས་པའི་མཛད་པ་ཉིད་མ་ལུས་པར་རྫོགས་པར་མཛད་དོ༔ སྐུའི་གསང་བའི་བཞི་ནི༔ མདུན་དང་རྒྱབ་ཏུ་མེད་པར་བཞུགས་པས༔ ཕྱོགས་གང་དུའང་མི་དམིགས་པར་མཛད༔ ཕྱི་ནས་བལྟས་པས་ནང་གསལ་བར་བཞུགས་པས་སྣང་ཆ་མ་ལུས་པ་རྫོགས་པར་མཛད་དོ༔ སྟོང་ཆའི་འཛིན་པར་མཛད་དེ༔ རྩེ་མོ་ཕྱོགས་ཀུན་ཏུ་ཟང་ཐ་ལེར་བཞུགས་པས་མི་གནས་འགག་པ་མེད་པའི་མཛད་པ་རྫོགས་པར་མཛད་དོ༔ ལོངས་སྐུའི་དུས་ན༔ གསུང་གི་ཕྱིའི་མཛད་པ་བཞི་རང་བྱུང་གི་ཡི་གེ་དྲུག་ལྗགས་ཀྱི་དབང་པོ་ལ་འཕྲོས་ནས༔ བདག་ཏུ་མེད་པའི་ཆོས་ཉིད་ཀྱི་མཛད་པ་མ་ལུས་པ་རྫོགས་པར་མཛད༔ དེ་ཡབ་ཀྱི་ཞལ་དུ་ཞུགས་པས་མཚན་མ་མེད་པའི་ཆོས་ལ་ལོངས་སྤྱོད༔ དེ་ཉིད་ཡུམ་གྱི་མཁའ་ལ་ཐོན་པས༔ གཉིས་སུ་མེད་པའི་ཆོས་ཉིད་ལ་ལོངས་སྤྱོད༔ དེ་རབ་ཏུ་འཕྲོས་ཤིང་འདུས་པ་ལས༔ ཆོས་ཐམས་ཅད་རང་བཞིན་མེད་པའི་མཛད་པ་རྫོགས་པར་མཛད་དོ༔ ནང་གི་བཞི་ནི༔ རང་གི་ངོ་བོས་བཤད་བས༔ ཆོས་ཐམས་ཅད་བརྗོད་དུ་མེད་པའི་རང་སྒྲ་ལ་རང་དབང་བསྒྱུར༔ ཚིག་ཙམ་པ་ཡིན་པ་གོ་བས༔ སྨྲ་བསམ་ལས་འདས་པའི་ཆོས་ཉིད་ལ་ལོངས་སྤྱོད༔ སྒྲ་ཐམས་ཅད་རང་དག་པས་ན་མངོན་པར་འདུ་མི་བྱེད་པའི་ཆོས་ཉིད་ལ་ལོངས་སྤྱོད་དོ༔ ཁ་དོག་དཔག་ཏུ་མེད་པའི་འོད༔ ཞལ་གྱི་དལ་ལས་འཕྲོས་པས༔ གདུལ་བྱ་འདུལ་བྱེད་ཀྱི་ཆོས་ཉིད་ལ་ལོངས་སྤྱོད་དོ༔ གསང་བའི་བཞི་ནི༔ སྐུའི་སྦྱོར་བ་རྣམ་པར་དག་པས་རང་བྱུང་གི་ཆོས་ལ་ལོངས་སྤྱོད༔ གསུང་གི་རྣམ་པར་དག་པས་ཟག་པ་མེད་པའི་ཆོས་ལ་ལོངས་སྤྱོད༔ ཐུགས་ཀྱི་རྣམ་པར་དག་པས་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ལ་ལོངས་སྤྱོད༔ ཞལ་གྱི་སྦྱོར་བ་རྣམ་པར་དག་པས་ཐམས་ཅད་མཁྱེན་པའི་ཡེ་ཤེས་ལ་ལོངས་སྤྱོད༔ དེས་ནི་ཆོས་ཉིད་སྐྱེ་མེད་ཀྱི་རང་བྱུང་བའོ༔ ལོངས་སྐུའི་དུས་ཀྱི་ཐུགས་ཀྱི་བཞི་ནི༔ མངོན་པར་འདུ་མི་བྱེད་པའི་ཏིང་ངེ་འཛིན་ལ་མཉམ་པར་བཞག་པས༔ མཁྱེན་པ་ཡོངས་སུ་རྫོགས་པའི་མཛད་པ་རྫོགས་པར་བྱའོ༔ ཆོས་ཉིད་མངོན་པར་སྣང་བའི་ཏིང་ངེ་འཛིན་ལ་མཉམ་པར་བཞག་པས༔ ཆོས་ཉིད་རང་གི་གཞི་ཉིད་དུ་མཛད༔ ཟག་པ་ཟད་པའི་ཏིང་ངེ་འཛིན་ལ་མཉམ་པར་བཞག་པས༔ རྣམ་པར་དག་པའི་རོལ་པ་མ་ལུས་པར་རྫོགས་པར་མཛད་དོ༔ དེ་ནི་གནས་པའི་ཆ་ལ་བྱུང་བའི༔ ནང་གི་བཞི་ནི༔ མེ་ལོང་ལྟ་བུའི་ཡེ་ཤེས་ཀྱི་མཁྱེན་པ་ནང་དུ་གསལ་བས་དེས་ཐམས་ཅད་ལ་ལོངས་སྤྱོད༔ མཉམ་ཉིད་ཀྱི་ཡེ་ཤེས་ཀྱི་མཁྱེན་པ་ནང་དུ་གསལ་བས་དོན་ཐམས་ཅད་ལ་ལོངས་སྤྱོད༔ སོ་སོར་རྟོགས་པའི་ཡེ་ཤེས་ཀྱི་མཁྱེན་པ་ནང་དུ་གསང་བས་དབང་པོ་རྣམས་ལ་ལོངས་སྤྱོད༔ བྱ་བ་གྲུབ་པའི་ཡེ་ཤེས་ཀྱི་མཁྱེན་པ་ནང་དུ་གསལ་བས་ཆོས་ཐམས་ཅད་ལ་བྱ་རྩོལ་དང་བྲལ་བ་ལ་ལོངས་སྤྱོད༔ དེ་དག་ནི་གསལ་བའི་ཁ་དོག་ལས་བྱུང་བའོ༔ གསང་བའི་བཞི་ནི༔ གསལ་སྟོང་དབྱེར་མེད་དུ་བཞུགས་པས་འཁོར་འདས་གཉིས་མེད་དུ་གསལ༔ སྣང་སྟོང་དབྱེར་མེད་པས་ཡུལ་སེམས་གཉིས་མེད་དུ་གསལ༔ རིག་སྟོང་དབྱེར་མེད་དུ་བཞུགས་པས་གཟུང་འཛིན་རང་སྣང་དུ་གསལ༔ ཡུལ་སེམས་དབྱེར་མེད་དུ་བཞུགས་པས༔ འཛིན་པའི་སེམས་ཡུལ་དང་སྣང་བའི་ཡུལ་གྱི་རྟོག་མཐའ་ཆོད་པའོ༔ དེ་ལྟར་བཅུ་གཉིས་ཀྱི་དྲན་གསལ་རང་རྒྱུད་དུ་འཛིན་པའི་ཞེན་པ་ལས་གྲོལ་བའི༔ འདི་དག་ཀྱང་གཟུང་ཡུལ་ནི་མ་ཡིན༔ མཁྱེན་པའི་ཡེ་ཤེས་ཀྱི་ཆ་ཙམ་ལ་དགོངས་པའོ༔ དེ་ལྟར་ལོངས་སྐུ་ལས་རྒྱལ་བ་སྤྲུལ་པའི་སྐུར་བྱོན་པ་ནི༔ ཡིད་རང་བྱུང་གི་ཡེ་ཤེས་སྤྱོད་བྱེད་ཁ་ཕྱིར་བལྟས་པ་ལས༔ སངས་རྒྱས་ཐམས་ཅད་ཀྱི་བསྟན་པའི་མངའ་བདག་ཏུ་བྱུང་བ་སྟེ༔ བསྟན་པ་ནི་དངོས་དང༔ གཟུགས་བརྙན་གྱི་བསྟན་པའོ༔ དངོས་ནི་ཆོས་ཀྱི་སྐུའི་བསྟན་པ་དངོས་རང་བཞིན་ཆོས་ཀྱི་རྡོ་རྗེ་ནི༔ ཆོས་སྐུའི་དུས་ན་བསྟན་པ་བཞུགས་པས༔ སུས་ཀྱང་བྱས་པ་མེད་པར་བྱུང་ཡང་རང་བྱུང་བས༔ འདི་དང་འདི་ཙམ་ན་བྱུང་གི་དུས་མེད༔ དེ་ཡང་རིན་པོ་ཆེ་སྣང་མི་འདྲ་བ་སྟོང་ཕྲག་བརྒྱད་ཅུ་རྩ་ལྔ་ལས་གྲུབ་པ་ནི༔ ཡང་དག་པར་རྫོགས་པའི་སངས་རྒྱས་སྟོང་ཕྲག་བརྒྱད་ཅུ་རྩ་ལྔ་ཕྱག་མཛད་ཅིང་དེ་ཉིད་ཀྱི་བསྟན་པ་འཕེལ་བར་མཛད་པའོ༔ དེ་ཡང་སངས་རྒྱས་ཐམས་ཅད་ཀྱི་ཐུགས་ཀྱི་བསྟན་པ་དངོས་ཡིན་ནོ༔ དེ་ཉིད་ནི་འཇིག་རྟེན་གྱི་ཁམས་སུ་སངས་རྒྱས་ཀྱི་སྤྲུལ་པ་རྣམས་ནམ་བྱུང་བའི་དུས་ན༔ འདི་ཉིད་དང་འཕྲད་ནས་བསྟན་པ་རྣམས་འཕེལ་བ་ཡིན་ནོ༔ ཡང་ལོངས་སྐུའི་དུས་ན་ལོངས་སྤྱོད་རྫོགས་པའི་སྐུ་དངོས་ནི༔ རང་བྱུང་གི་ཡི་གེ་ཆེན་པོ་དུས་མེད་པས་བྱས་པ་མེད༔ འཇིག་རྟེན་པ་མ་ཡིན་པས་ངག་གིས་ཀྱང་འཇིགས་པ་མེད༔ འདུས་བྱས་མ་ཡིན་པས༔ རྐྱེན་གྱིས་འཇིགས་པ་མེད་པའོ༔ རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་བྱུང་བ་ནི༔ བསྐལ་པ་རེ་རེ་ལ་སྤྲུལ་པའི་སྐུ་བརྒྱ་ཕྲག་གཅིག་གིས་ཕྱག་མཛད་ཅིང༔ དེ་ཉིད་བསྟན་པ་འཕེལ་བར་བྱེད་པའོ༔ འདི་ཡང་དུས་གསུམ་གྱི་སངས་རྒྱས་ཐམས་ཅད་ཀྱི་གསུང་གི་སྤྲུལ་པ༔ སྐད་རིགས་མི་མཐུན་པ་གང་གིས་བལྟས་ཀྱང༔ རང་རང་གི་ཡི་གེ་དང་མཐུན་པར་སྣང་བའོ༔ གསུང་གི་བསྟན་པ་རྣམས་འཕེལ་བར་བྱེད་པའི་རྟགས་སོ༔ འདི་ནི་ལོངས་སྐུའི་དུས་ན༔ བསྟན་པ་རང་གི་ངོ་བོར་བཞུགས་པས༔ ལོངས་སྐུ་དངོས་སོ༔ ཡང་སྤྲུལ་པའི་སྐུའི་དུས་ན་སངས་རྒྱས་ཀྱི་སྐུ་དངོས༔ དུས་མེད་པས་བྱུང་ས་མི་ཤེས༔ སུས་ཀྱང་བྱས་པས་རྐྱེན་གྱིས་མི་ཤིགས་ཏེ༔ རིན་པོ་ཆེ་སྣ་མི་འདྲ་བ་དགུ་བརྒྱ་དགུ་བཅུ་རྩ་ལྔའི་རྒྱུ་ལས་རང་བྱུང་བ་ནི༔ སངས་རྒྱས་ཀྱི་བསྟན་པ་བསྐལ་པ་རེ་རེ་ལ་འཕེལ་བར་བྱེད་པའི་རྟགས་སོ༔ དེའང་སྤྲུལ་སྐུའི་ཡོན་ཏན་འཕེལ་བར་བྱེད་པའོ༔ འདི་གསུམ་མེད་ན་ནི་སྤྲུལ་པ་སྐུའི་སྐུ་གསུང་ཐུགས་ཀྱི་ཡོན་ཏན་འཕེལ་མི་སྲིད་དོ༔ དེའི་ཕྱིར་ན་བསྟན་པ་དངོས་སོ༔ དེ་ཡང་ཐུགས་ཀྱི་རྡོ་རྗེ་དེ་ཉིད་ནི༔ ཡོན་ཏན་གྱི་ཚོགས་བརྗོད་ཀྱིས་མི་ལང་སྟེ༔ གང་དག་ནད་ཞི་བར་འདོད་པ་རྣམས་ཀྱི་ནད་ཞི་བ་ལ་སོགས་ཏེ་འཇིག་རྟེན་གྱི་འདོད་པ་རྣམས་ཡོངས་སུ་སྐོང་བ་དང༔ དེ་བཞིན་དུ་ཐར་པ་དང་ཐམས་ཅད་མཁྱེན་པ་ལ་སོགས་པ་ཡིད་ལ་ཅི་བསམས་པ་ཐམས་ཅད་ངེས་པར་འགྲུབ་པར་ངེས་སོ༔ དེ་ཡང་འདི་གསུམ་སུ་ལ་བབས་པ་ནི༔ མཆོད་ཅིང་བསྟོད་པ་ཙམ་ལ་བརྟེན་ནས་འབད་པ་མེད་པར་དོན་གཉིས་འབྱུང་བར་ངེས་སོ༔ ཆེ་ཆུང་གི་ཚད་སྐྱེས་བུ་གང་ཕྲད་པ་རྣམས་ཀྱི་ཕྱག་གང་དུ་འབྱུང༔ དེ་ཉིད་བབས་པའི་མི་དེ་སངས་རྒྱས་པར་ངེས་སོ༔ རྟགས་སོ༔ སྐུའི་སྐུ་དེ་ཡང་ཡོན་ཏན་གོང་འདྲའོ༔ བསྟན་པ་གང་འདུལ་བའི་སྐྱེས་བུའོ༔ ལུས་པོ་དང་མཉམ་པ་ནི་ཟག་པ་རྣམས་རང་ཟད་ལ་འགྲོ་བའི་རྟགས་སོ༔ རང་བྱུང་བྱིན་རླབས་ཀྱི་ཡི་གེ་དེ་ཡང༔ ཡོན་ཏན་དཔག་ཏུ་མེད་པ་སྟེ༔ འདི་ཉིད་ལན་གཅིག་བཀླགས་པ་ཙམ་གྱིས་ཀྱང་སྐྱེ་བ་བརྒྱུད་པའི་བག་ཆགས་ཐམས་ཅད་ཟད་པར་འགྱུར་རོ༔ གཞུང་ཚིགས་སུ་བཅད་པ་བརྒྱ་ཕྲག་གཉིས་དང་ཕྱེད་དང་བརྒྱད་དུ་བྱུང་བ་ནི༔ གང་གི་མགུལ་ལམ་སྤྱི་གཙུག་ཏུ་རས་དྲི་མ་མེད་པ་ལ་གྲིལ་ནས་བཟུང་བའི་ཡོན་ཏན་གྱིས༔ བྱོལ་སོང་ལ་སོགས་པ་དབུགས་དང་མ་བྲལ་བའི་འདིའི་ཡི་གེ་གཅིག་གིས་དེ་ཙམ་ཞིག་གྲོལ་བར་ངེས་སོ༔ ཁྱད་པར་འདི་ཉིད་དང་འཕྲད་པའི་སྐལ་ལྡན་ནི༔ རང་བཞིན་བྱས་པ་མེད་པར་སངས་རྒྱ་བའོ༔ དེ་དག་བྱ་བ་བསྟན་པ་ཙམ་དང་ལྷན་ཅིག་གནས་པ་མ་ཡིན་ནོ༔ ཆོས་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པའི་གསང་ཆེན་ངེས་པའི་བཀའ་བཅུ་བདུན་དང་ལྷན་ཅིག་ཕྱེད་པ་ཡིན་ནོ༔ དེས་ན་འདི་དག་བསྟན་པའི་སྙིང་པོ་ཡིན་པར་ངེས་པའི་རྟགས་སོ༔ འདི་རང་གི་གླེགས་བམ་ནི་སྐུའི་བསྟན་པ་རྒྱས་པའི་དུས་ན༔ རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མ་རྣམས་ཀྱིས་བཟུང་ནས་གནས་པས༔ གསུང་གི་དུས་ན་འདི་ཉིད་དང་ལྷན་ཅིག་ཏུ་གནས་སོ༔ ཐུགས་ཀྱི་དུས་ན་རབ་ཏུ་འཕྲོས་པ་དྲག་སྲོང་གི་ཕུག་བྱ་བར་འགྱུར་རོ༔ རྡོ་རྗེ་དེ་ཉིད་ནི་སྐུའི་དུས་ན་ཨོ་རྒྱན་གྱི་ཡུལ་དུ་རྒྱ་མཚོ་ལན་ཚའི་རོ་དང་ལྡན་པའི་གླིང་བྱ་བར་བཞུགས་ཤིང༔ དེ་ཉིད་ལས་སྐབས་སུ་འོད་དང༔ སྒྲ་དང༔ དགེ་སློང་རྫུ་འཕྲུལ་དང་ལྡན་པའི་སྤྲུལ་པ་གྲངས་མེད་པར་བྱེད་དོ༔ གསུང་གི་དུས་ན་རི་མ་ལ་ཡ་ལག་ན་རྡོ་རྗེའི་གནས་ན་གནོད་སྦྱིན་གྱི་རྒྱལ་པོ་ཆེན་པོ་རྣམས་ཀྱིས་ཕྱག་བྱེད་དོ༔ དེ་ལས་ཀྱང་ཁྱད་པར་དུ་ཆོ་འཕྲུལ་གྱི་ཟླ་བ་ལ༔ སྤྲུལ་པའི་ཚོགས་དཔག་ཏུ་མེད་པ་མངོན་པར་སྣང་བར་བྱེད༔ ཐུགས་རང་གི་དུས་ན་ནི་འདི་ཉིད་དང་ལྷན་ཅིག་གོ༔ སངས་རྒྱས་ཀུན་གྱི་སྐུ་དེ་ཉིད༔ གསུང་གིས་འདུལ་བར་བསྟན་པའི་དུས་ན༔ འདི་དང་འདི་ཡོད་ཀྱི་ངེས་པ་མེད་དེ༔ འཛམ་བུའི་གླིང་ཀུན་ཏུ་འཁོར་བར་གནས་ཏེ༔ འདི་ཉིད་ལ་ལྷ་དང་མིའི་འདུ་བ་ཁྱད་པར་ཅན་རྣམས༔ ཀུན་གྱིས་མཆོད་པའི་ཞིང་དུ་འགྱུར་ཞིང་སྐབས་སུ་བསྟན་པ་ལ་གནོད་པ་དག་བྱུང་བའི་ཚེ་སྐུ་ལས་འོད་བྱུང༔ ཞལ་ནས་ཧཱུྃ་བྱུང༔ སྤྱན་ནས་ཡེ་ཤེས་ཀྱི་མེ་བྱུང་ངོ༔ ཆུ་བྱུང་ཟེར་བའང་ཡོད་དོ། །ཐུགས་ཀྱིས་འདུལ་བར་བསྟན་པའི་དུས་ན་ནི༔ སུམ་ཅུ་རྩ་གསུམ་པའི་ལྷ་རྣམས་ཀྱིས་གཞལ་མེད་ཁང་ལག་ན་རྡོ་རྗེའི་ཁང་པ་བརྩེགས་པ་ཞེས་བྱ་བའི་ཡང་སྟེང་ཁང་པ་ན༔ མཉམ་པའི་རང་བཞིན་དཔལ་ཆེན་པོ་བྱ་བས་ཕྱག་མཛད་ཅིང་མདུན་གྱིས་བལྟས་ཏེ་དམ་པར་མཛད་དོ༔ མཉམ་དུས་ཀྱི་ཟླ་བའི་ཡར་ངོའམ༔ མཉམ་པར་རང་གིས་དུས་ངེས་པའི་དུས་ན་རབ་ཏུ་སྣང་བ་དང༔ མཆོག་ཏུ་ངོ་མཚར་བའི་གཏམ་རྒྱུད་འབྱུང་བར་བྱེད་པ་དང༔ ཟླ་བ་ཉ་གང་བ་དང༔ ཟད་པའི་དུས་ནི༔ ཉི་མ་དང་ཟླ་བ་གཟས་ཟིན་པར་བྱེད་པའམ༔ ས་གཡོ་བ་ལ་སོགས་པའི་ཆོ་འཕྲུལ་རྣམ་པར་སྤྲུལ་པར་བྱེད་དོ༔ སྐུའི་བསྟན་པའི་དུས་ན་འདི་ཉིད་དང་ལྷན་ཅིག་གོ༔ དེ་ཡང་སྐུས་འདུལ་བའི་བསྟན་པ་ལ་གནས་པའི་ཚེ་ན༔ འདི་ཉིད་ཀྱིས་བྱིན་གྱིས་རླབས་ཀྱིས་སངས་རྒྱས་ཀྱི་སྐུ་དངོས་དང༔ དེ་ཉིད་ཀྱི་སྤྲུལ་པ་དང༔ ཡང་སྤྲུལ་རྣམས་དང་ལྷན་ཅིག་ཏུ་གནས་ཤིང༔ དེ་དག་གིས་ཞལ་གྱི་དལ་དངོས་སུ་སྤྱོད་པའོ༔ འདིའི་དུས་འགྲོ་བ་རྣམས་ཀྱིས་ལུས་ཀྱི་སྡིག་པ་རང་བཞིན་གྱིས་འདགས་པས་ན་འབད་པ་ཆེར་བྱ་དགོས་པ་མ་ཡིན་ནོ༔ གསུང་གིས་འདུལ་བར་བསྟན་པའི་དུས་ནི༔ འདི་ཉིད་ཀྱི་བསྟན་པའི་རྩ་གསུང་གི་ཡི་གེའི་བྱིན་གྱིས་རླབས་ཀྱི་བཀའ་བརྒྱུད་དང་ལུང་བརྒྱུད་མན་ངག་གིས་ཡིད་ཆེས་ཤིང༔ འདི་དག་ཉན་འཆད་ལ་གཏན་ཚིགས་སུ་བྱེད་པའོ༔ འདིའི་དུས་སུ་ན་འགྲོ་བའི་ངག་སྡིག་པ་རང་བཞིན་གྱིས་དག་པར་བྱེད་དོ༔ ཐུགས་ཀྱི་དུས་ན་རྡོ་རྗེ་དེ་ཉིད་བྱིན་གྱིས་བརླབས་ལས༔ རང་གི་སེམས་ཉིད་མཐོང་བ་དང༔ ཏིང་ངེ་འཛིན་གྱིས་གསད་གསོ་བ་ལ་སོགས་པ་གང་ཡང་འགྲུབ་པའོ༔ དེ་ཡང་སྐུའི་དུས་ན་བྲིས་སྐུ་བྲིས་པ་དང་ལུགས་སུ་བླུགས་པ་རྣམས་ལ་བསྙེན་བསྐུར་བ་དང༔ མཆོད་པ་དང༔ བསྟོད་པ་ལ་སོགས་པས་མངོན་པར་སངས་རྒྱའོ༔ འདིའི་དུས་ན་སྤྱོད་པའི་གནས་མཆོག་ཏུ་གཅེས་སོ༔ གསུང་གི་དུས་ན་བཟླས་བརྗོད་ལ་སོགས་པ་ལ་བརྟེན་པའོ༔ འདིའི་དུས་ན་ལྟ་བའི་མན་ངག་གཅེས་སོ༔ ཐུགས་ཀྱི་དུས་ན་ཏིང་ངེ་འཛིན་མཆོག་ཏུ་གཙོའོ༔ སྒོམ་པ་གཅེས་པའོ༔ དེ་ཡང་སྐུ་ཡིས་འདུལ་བའི་བསྟན་པ་ནི་ཚེ་ལོ་དཔག་ཏུ་མེད་པ་ནས༔ སྟོངས་པའི་དུས་ཚུན་ཆོད་ལ༔ ལོ་ལྔ་སྟོང་ལྔ་བརྒྱ་ཕྲག་གསུམ་དུ་གནས་སོ༔ དེ་ནས་སངས་རྒྱས་ཀྱི་སྐུ་ཞེས་དངོས་སུ་བྱོན་པའི་མིང་མེད་དོ༔ དེ་ནས་ཚེ་ལོ་བདུན་ཅུ་པ་ལ་ཐུག་པ་ལ༔ གསུང་གི་བསྟན་པ་ལོ་ལྔ་བརྒྱ་ལྔ་སྟོང་ཕྲག་གཉིས་སུ་གནས་པའོ༔ དེ་ནས་ཚེ་ལོ་བཅུ་པ་ལ་ཐུག་པ་ལ༔ ཐུགས་ཀྱི་དགོངས་པ་བརྒྱ་ཕྲག་གཅིག་ཏུ་གནས་པའོ༔ སྔགས་བཟླས་ནུས་པ་མི་འབྱུང་བྲག་ཆ་འདྲའོ༔ དེ་ཡང་སྐུའི་དུས་ན་ཏིང་ངེ་འཛིན་བསྒོམས་ཀྱང་སེམས་འགས་སྡུག་བསྔལ་འགྱུར༔ གསུང་གི་དུས་ན་ཏིང་ངེ་འཛིན་ཡིད་སྨོན་ཉིད་ལ༔ སྐུ་ལ་དམིགས་པ་ཙམ༔ ཐུགས་ཀྱི་དུས་ན་སྔགས་བཟླས་ནུས་པ་མི་འབྱུང་བྲག་ཆ་འདྲའོ༔ དེ་དག་ནི་བསྟན་པ་དངོས་ཏེ་གླིང་གཞན་ན་ཡོད་པ་མ་ཡིན་ནོ༔ འཛམ་བུའི་གླིང་ན་གནས་པས༔ འདི་ནི་གླིང་ཀུན་ལས་ཁྱད་པར་དུ་འཕགས་ཏེ་ལས་ཁྱད་པར་ཅན་བསགས་པའི་ས་ཞེས་བྱའོ༔ དེ་དག་ནི་འོག་ཏུ་བསྟན་པའི་ཙབས་བཙས་སུ་ཟེར་བའང་འདུག །གསུམ་པོ་དེ༔ འགྲོ་བ་གཅིག་གི་ལག་ཏུ་འདུས་ནས༔ དེ་ཡང་ཟག་བཅས་མི་སྣང་བར་མ ངོན་པར་རྫོགས་པར་སངས་རྒྱའོ༔ དེ་ནས་ལོ་ཉེར་ལྔ་ན་གསུམ་པོ་དེ་དག་གཞན་དུ་འཕར་ནས༔ བསྟན་པ་གཞན་གྱིས་རྩབས་བྱེད་པར་འགྱུར་རོ༔ གཟུགས་བརྙན་གྱི་བསྟན་པ་ནི༔ སངས་རྒྱས་ཀྱི་སྐུ་ཞི་བ་དང་ཁྲོ་བོ་རུ་སྣང་བ་དང༔ གང་ལ་མོས་སུ་བྱུང་བའོ༔ གསུང་གིས་མདོ་སྡེ་འདུལ་བ་མངོན་པ་གསུམ༔ གང་གིས་གང་གྲོལ་དུ་བྱུང་བའོ༔ ཐུགས་ཀྱིས་ཏིང་ངེ་འཛིན་དང་སྒོམ་པ་དང་བསམ་གཏན་གསུམ་ལ་གང་ལ་གང་མོས་སུ་བྱུང་བའོ༔ དེ་དག་ཀྱང་སངས་རྒྱས་དགོངས་པས་བརྒྱུད་པ་ནི༔ འདས་མ་འོངས་ད་ལྟའི་སྐུ་གསུང་ཐུགས་ཀྱི་བྱེ་བྲག་དང༔ ཡོན་ཏན་དང་འཕྲིན་ལས་རྣམ་པར་སྣང་བ་ཡིན་ནོ༔ འདི་དག་དོན་གྱིས་བྱིན་རླབས་ཀྱི་བརྒྱུད་པའོ༔ དེ་ཡང་སངས་རྒྱས་ཀྱི་སྐུའི་དགོངས་པ་མི་གཡོ་བ་དང༔ གསུང་གི་དགོངས་པ་སྒྲ་ཚིག་དང་བྲལ་བ་དང༔ ཐུགས་ཀྱི་དགོངས་པ་དམིགས་པ་མི་མངའ་བ་དང༔ དེ་ཡང་སྔོན་བྱུང་གི་དུས་ན༔ སངས་རྒྱས་ཐམས་ཅད་སྐུ་མི་ཟད་པ་རྒྱན་གྱི་འཁོར་ལོ་དུས་གསུམ་དུ་གསལ་འགྲིབ་མེད་པས༔ འགྲོ་བ་རྣམས་ཀྱིས་ཆོས་ཐམས་ཅད་རང་བཞིན་འོད་གསལ་དུ་རྟོགས་པ་དང༔ གསུང་མི་ཟད་པ་དུས་གསུམ་དུ་བར་མཚམས་མེད་པས༔ ཆོས་ཐམས་ཅད་མངོན་པར་འདུ་མི་བྱེད་པར་རྟོགས༔ ཐུགས་མི་ཟད་པ་རྒྱན་གྱི་འཁོར་ལོ་དུས་གསུམ་རྒྱུན་ཆད་མེད་པས༔ འགྲོ་བ་རྣམས་ཀྱིས་ཆོས་ཐམས་ཅད་ཐུན་མཚམས་མེད་པར་རྟོགས་པ་ནི་སྟོན་པ་དང༔ འཁོར་གྱི་རང་བཞིན་རྣམ་དག་གི་གོ་བ་ཡིན་ནོ༔ དེ་ཡང་སྤྲུལ་པའི་སྐུ་དགོངས་པ་མི་མཛད་པ་སྣ་ཚོགས་སུ་སྣང་བས་ཚིག་ལ་མཁའ་པར་འགྱུར་རོ༔ ལོངས་སྐུའི་དགོངས་པ་སྣ་ཚོགས་སུ་མི་དམིགས་པར་གོ་བས༔ འགྲོ་བས་སངས་རྒྱས་ཀྱི་མན་ངག་རྣམས་ལ་མཁས་པར་འགྱུར་བ་དང༔ ཆོས་སྐུའི་དགོངས་པ་མ་སྤངས་ཡོངས་རྫོགས་སུ་གོ་བས༔ བླ་མའི་མན་ངག་གི་བརྒྱུད་པ་ལ་མཁས་པར་འགྱུར་རོ༔ རྗེས་འཇུག་གི་དུས་ན༔ སངས་རྒྱས་ཀྱི་སྐུའི་དགོངས་པའི་བརྒྱུད་པ་མེད་ན༔ ཐ་མལ་བའི་ལུས་འཁོར་བ་ལས་མི་གྲོལ་ལོ༔ གསུང་གི་དགོངས་པའི་བརྒྱུད་པ་མེད་ན་ངག་འཁོར་བ་ལས་མི་གྲོལ༔ ཐུགས་ཀྱི་དགོངས་པའི་བརྒྱུད་པ་མེད་ན་ཡིད་འཁོར་བ་ལས་མི་གྲོལ་ལོ༔ དེ་ཡང་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བརྒྱུད་པ༔ སྐུ་དངོས་སུ་བརྒྱུད་པ་དེ་སུ་ལ་བརྒྱུད་ཅིང་བབས་ན༔ གོང་གི་ཆོས་སྐུ་ལས་ལོངས་སྐུ་བྱོན་ཏེ༔ དེ་ཉིད་ལས་སྤྲུལ་པའི་སྐུ་རྡོ་རྗེ་འཆང་ཞེས་བྱ་བ་དེ༔ ལོངས་སྐུའི་སྣང་ཆ་ལས༔ རང་བཞིན་ཤུགས་ཀྱི་ཐུགས་རྗེ་རང་གཡོས་པས༔ འཛད་པ་མེད་པ་ཉིད་བཞུགས་པ་ལས་ཡེ་ཤེས་ཀྱི་རླུང་གིས་འབྱུང་བ་ཉིད་དུ་ཕུལ་བས༔ དེ་ལས་འཕན་པའི་ཡེ་ཤེས་སུ་སློངས་པའི་རླུང་གིས་བསྐྱོད་ནས་འཁོར་འདས་གཉིས་སུ་བྱུང་སྟེ༔ དེ་ལ་འཁོར་བ་དེ་གདུལ་བའི་འདུལ་བྱེད་དུ་ཐབས་ཕའི་རང་བཞིན་དུ་དམིགས༔ འཁོར་བ་དེ་སྒྲོལ་བའི་ཤེས་རབ་མར་དམིགས་ནས༔ དེ་གཉིས་འདུས་པ་ལས་རྒྱུའི་རྐྱེན་གྱིས་འཁོར་བ་ཉེ་བར་མཚོན་ནོ༔ དམིགས་པ་ཡུལ་བཅད་པས༔ བདག་པོའི་རྐྱེན་གྱིས་མཐའ་བསྡུས༔ དེ་མ་ཐག་པའི་རྐྱེན་གྱིས་འཁོར་བ་སྨིན་པར་བྱས་པ་ལས༔ འབྱུང་བ་བཞིའི་སྣོད་དངོས་འཛིན་ཞེས་བྱ་བ་གཅིག་ཤར་བ་ཙམ་ལས༔ གདུལ་བྱའི་སེམས་ཅན་འབྱུང་བ་དངོས་པོར་མེད་པ་ལས༔ འབྱུང་བ་ས་བོན་གྱི་ཆ་ལས༔ ཐོག་མ་གཟུགས་མེད་པའི་ཁམས་ཞེས་བྱ་བ་ལས༔ སེམས་སྟོང་ཉིད་ཀྱི་བག་ལ་ཉལ་ལངས༔ ནམ་མཁའ་མཐའ་ཡས་སྐྱེ་མཆེད་དུ་བྱུང༔ དེ་ཉིད་ཙམ་དུའང་མ་དམིགས་པ་ལས་ཅི་ཡང་མེད་པའི་སྐྱེ་མཆེད་དུ་བྱུང་སྟེ༔ ཡིད་མཆེད་པའི་རྣམ་པ་ལས་དབང་པོའི་ཡིད་ཙམ་དུ་བྱུང་བའོ༔ དེ་ཡང་ཅུང་ཟད་ཙམ་རྣམ་པར་མི་རྟོག་པ་ལས༔ ཅུང་ཟད་ཙམ་དུའང་མི་འཛད་མི་འཛིན་པ་ལས༔ ཅུང་ཟད་མེད་པའི་སྐྱེ་མཆེད་འབྱུང་བའོ༔ དེ་དག་རྣམས་ཀྱང་རྣམ་པར་ཤེས་པ་ཙམ་ལས་མ་གཏོགས་པ་གཞན་ཕྱི་རོལ་གྱི་ཡུལ་མེད་པ་ལས༔ རྣམ་ཤེས་མཐའ་ཡས་པའི་སྐྱེ་མཆེད་དུ་བྱུང་བས༔ ཡིད་དང་ཡིད་ཀྱི་དབང་པོ་རྟག་ཏུ་བྱུང་བའོ༔ དེ་ཡང་ནམ་མཁའ་ལྟར་སྟོང་པ་ཁ་དོག་གིས་རྒྱ་ཙམ་དུ་བཟུང་བ་ལས༔ དབང་པོ་ཡིད་ཅན་དུ་སྨིན་པར་བྱས༔ དེས་གསལ་བ་རིགས་ལ་ཆེད་དུ་བྱེད་པ་ལས༔ གཟུགས་ཀྱི་ཁམས་ཀྱི་བྱེ་བྲག་ཏུ་བྱུང་སྟེ༔ འབྱུང་བ་རྡོས་བཅས་ཀྱི་ལུས་སུ་ནི་མེད་ལ༔ སྣང་བྱེད་འོད་ཀྱི་ལུས་སུ་ཆུའི་ཟླ་བ་ལྟར་དུ་དག་ཏུའང་འདུག །བྱུང་ངོ༔ དེ་ལས་ཁྱད་པར་གྱི་ལུས་མངོན་པར་འདུ་བྱེད་པ་ལས༔ འདོད་པ་ཡིད་ཀྱི་སྦྱོར་བ་དང༔ རྣམ་པ་གཟུགས་ཀྱི་སྦྱོར་བ་གཉིས་སུ་འདུས་པ་ལས༔ འདོད་པའི་ཁམས་སུ་སྨིན་པ་ནི༔ འདིའི་དུས་ན་ལྷ་དང་མིའི་བྱེ་བྲག་ཏུ་དབྱེར་མི་ཕྱེད་པར་བྱུང་སྟེ༔ སྤྲུལ་པའི་སྐུ་གདུལ་བྱའི་བསྐལ་པ་དང་པོ༔ དགའ་ལྡན་བརྩེགས་པ་ཞེས་བྱ་བ༔ དེར་སྐྱེ་བའི་འགྲོ་བ་དེ་དག་ཀྱང་ཚེ་ལོ་དཔག་ཏུ་མེད་པ་ཐུབ་པའི་དུས་ན༔ འབྱུང་བ་བཞི་དངོས་སུ་ནི་མེད༔ དེ་ཉིད་དམིགས་པའི་རྟེན་ལས༔ གདུལ་བྱའི་སེམས་ནི་བེམས་པོ་ནི་འབྱུང་བ་ལས༔ རང་བཞིན་གྱི་འདོད་པ་གཡོས་པས༔ འབྱུང་བ་བག་ལ་ཉལ་བ་ལངས༔ མེ་བག་ལ་ཉལ་བའི་བདེ་བ་སྐྱེས༔ རླུང་བག་ལ་ཉལ་བ་ལངས་པའི་བདེ་བ་འདོད་པ་གཡོས་པས༔ འབྱུང་བ་བག་ལ་ཉལ་གྱི་རང་དྲོད་དང༔ གཤེར་བ་གཉིས་སུ་འཛོམ་པ་ལས༔ འབྱུང་བའི་དྭངས་མ་འོད་ཀྱི་རང་བཞིན་རིན་པོ་ཆེའི་ཤིང་གི་ཟིལ་བ་ལྟ་བུ་ལས༔ ལྷའི་བུ་ཉི་མ་རབ་ཏུ་སྣང་བྱེད་དང༔ ཟླ་བ་དྲི་མ་མེད་པ་གཉིས་སུ་རྫུས་ནས་སྐྱེས་ཏེ༔ གཟུགས་དང་དབང་པོ་དང་བཅས་པ་ལ་འབྱུང་བ་དངོས་སུ་ནི་མེད་དོ༔ གདུལ་བྱའི་སེམས་ཅན་དེ་དག་འདུལ་བའི་འདུལ་བྱེད་དུ༔ སྤྲུལ་པའི་སྐུ་དེ་གཟིས་སྟངས་གསུམ་དང་བཅས་པ་ནི༔ ཡུལ་དགའ་ལྡན་བརྩེགས་པ་ལ༔ སྣང་བ་འདུལ་བྱེད་ཀྱི་སྤྱན་གྱིས་གཟིགས་པས༔ སྔོན་གྱི་སེམས་བསྐྱེད་པའི་སྨོན་ལམ་རྗེས་སུ་དྲན༔ སྐྱེ་གནས་མེ་ཏོག་པདྨ་སྟོང་དང་ལྡན་པ་ལ༔ རྣམ་པ་ཐམས་ཅད་མཁྱེན་པའི་སྤྱན་གྱིས་གཟིགས་པས༔ སྔོན་གྱི་ཕ་དང་མའི་འདུན་པ་རྣམ་པར་དག་པའི་སྨོན་ལམ་གྱི་མཐུ་རྗེས་སུ་དྲན་ནོ༔ གདུལ་བྱ་ལྷའི་བུ་གཉིས་ལ༔ འགྲོ་བ་འདུལ་བའི་སྤྱན་གྱིས་གཟིགས་པས༔ སྔོན་གྱི་གནས་དང་རང་གི་སྟོན་པའི་སྨོན་ལམ་གྱི་མཐུ་རྗེས་སུ་དྲན་ནོ༔ པདྨ་ཆུའི་སྙིང་པོའི་གཤེར་ལ༔ འབྱུང་བ་མེའི་དྲོད་ཀྱིས་བཟུང་ནས༔ སྟོན་པ་རྡོ་རྗེ་འཆང་ཉིད་མེ་ཏོག་པདྨ་ཁ་སྟོང་དང་ལྡན་པའི་སྦུབས་ན་ཡར་ལ༔ བྱིས་པ་ལོ་བརྒྱད་པ་རབ་ཏུ་མཛེས་པ༔ ཁ་དོག་དཀར་བ༔ རང་བཞིན་འོད་འབར་བ༔ ཉོན་མོངས་པའི་དྲི་མེད་པའི་རྟགས་སུ་ཁ་དོག་དཀར་ཞིང་འོད་དང་ལྡན་པར་སྤྲུལ་ནས་བྱོན་ནོ༔ དེའི་ཚེ་འཁོར་ནི་པདྨ་འདབ་མ་རེ་རེའི་སྟེང་ན༔ སངས་རྒྱས་ཉིད་ཀྱི་རྒྱུད་དག་དང་མཐུན་པ་རེ་རེ་བྱོན་ཏེ༔ སྟོང་ཕྲག་གཅིག་དང་སྟོང་པ་ཉིད་དང་སྟོང་རྩ་གཅིག་བྱོན་པ་ནི༔ བསྐལ་པ་འདི་ཉིད་ལ་སངས་རྒྱས་སྟོང་རྩ་གཅིག༔ ཁྱད་པར་ལས་ཀྱི་སྟོན་པ་དང་སྟོང་རྩ་གཉིས་འབྱུང་བའི་སྔ་ལྟས་སོ༔ དེའི་བསྟན་པ་ནི་ཡིད་དམ་སེམས་ཀྱི་གདུང་བ་བཅད་པའི་ཕྱིར༔ རང་བཞིན་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་འབྱུང་བའི་ལྔ་ལྟས་སོ༔ ནམ་མཁའ་ལ་འོད་ཀྱི་སྐར་མ་འབུམ་ཕྲག་དྲུག་ཅུ་རྩ་བཞི་རུ་བྱུང༔ དེའི་ཚེ་བསྟན་པ་ཐམས་ཅད་ཀྱི་ཡང་བཅུད་འདུས་པ༔ སྙིང་པོ་གསང་བའི་རྒྱུད་རྣམས་དེ་དག་ལས་བསྡུས་པའི་རྟགས་སུ་སྐར་མའི་ཚོགས་དེ་དག་གི་ནང་ནས༔ འོད་ལྔའི་ཐིགས་པ་རབ་ཏུ་གསལ་བ་ཡང་ཞུན་བཅུ་བདུན་དུ་བྱུང་ངོ༔ སངས་རྒྱས་ཐམས་ཅད་ཀྱི་གསུང་གི་སྤྲུལ་པ་བསྟན་པའི་འཕེལ་དང་བཅས་པ་འབྱུང་བ་ནི༔ ཆོས་ཐམས་ཅད་ཀྱི་ཡང་སྙིང་བསྡུས་པའི་རྟགས་སུ་བྱུང་བས་སོ༔ དེ་ལྟ་བུའི་ཡོན་ཏན་ཐམས་ཅད་མངོན་པར་འབྱུང་བའི་གནས་ཁྱད་པར་ཅན་དེ་ན༔ བསོད་ནམས་ལས་ཀྱི་ཁྱད་པར་ལས་བྱུང་བའི༔ རང་བཞིན་གྱི་ཡོན་ཏན་ནམ་འདོད་པ་ཙམ༔ ནང་བཅུད་སྣ་ཚོགས་འབྱུང་བའི་འདོད་འཇོའི་བ་དང༔ བཞོན་པ་འབྱུང་བའི་ཡོན་ཏན་གྱི་ཅང་ཤེས་ཀྱི་རྟ་གང་མནོ་བར༔ མ་འོངས་པར་ཡིད་ཀྱིས་ཕྱིན་པར་བྱེད་པ་དང༔ ཟས་སུ་ནི་དགའ་བ་དང་བདེ་བ་ཟའོ༔ སྣང་བ་འོད་ཀྱི་ཁྲུས་ཀྱི་རྫིང་བུ༔ བསམས་པ་ཙམ་གྱིས་ལུས་ཀྱི་དྲི་མ་དག་པར་བྱེད་པ་དང༔ འདིའི་དུས་ན་ཉི་མ་དང་ཟླ་བའི་སྣང་བ་མེད་ཅིང༔ ལུས་ལ་རང་འོད་དང་བཅས་པའོ༔ འདིའི་དུས་ན་ཚེ་ལོ་དཔག་ཏུ་མེད་པར་ཐུབ༔ དེ་ཡང་ལོ་སྟོང་སྟོང་རེ་རེ་བྲི་ནས་ཚེ་ལོ་ཡང་ཐུང་ངུ་སོང༔ བསོད་ནམས་ཀྱང་རིམ་གྱིས་བྲི་ནས་ཉོན་མོངས་པའི་བག་ཆགས་ཀྱིས་སྐྱེས་ཏེ༔ འདིའི་དུས་ན་སྟོན་པ་སངས་རྒྱས་བཅོམ་ལྡན་འདས༔ ཁྱད་པར་ཡོན་ཏན་སུམ་ཅུ་རྩ་གཉིས་དང་ལྡན་པ༔ གཉིས་མེད་རྫོགས་པའི་སྐུར་བྱུང་བའོ༔ དེ་ནས་གོང་མའི་ཡུལ་གྱི་ཡོན་ཏན་ལ་སོགས་པ་ཡང་ནུབ་ཏེ༔ འགྲོ་བ་དེ་དག་མང་དུ་འཕེལ་ནས༔ གདུལ་བྱའི་སེམས་ཅན་དཔག་ཏུ་མེད་པར་བྱུང་སྟེ༔ ཚེ་ལོ་ཡང་བྱེ་བ་གཅིག་ཐུབ་པར་བྲིའོ༔ འགྲོ་བ་དང་སྟོན་པ་ཉིད་ཀྱང་སྒོ་ང་ལས་སྐྱེས་པའི་གཟུགས་ཅན༔ དེ་ཡང་འབྱུང་བ་ལྔ་སྒོ་ང་ཁ་དོག་ལྔ་དང་ལྡན་པ༔ རབ་ཏུ་ཡིད་དུ་འོང་བ་ཉིད་ལ༔ སྟོན་པ་རྣམ་པ་ཐམས་ཅད་མཁྱེན་པའི་ཡོན་ཏན་ཡེ་ཤེས་ཀྱི་སྤྱན་དང་ལྡན་པ་དེས༔ ལྟ་སྟངས་གསུམ་མཛད་དོ༔ ཉིད་ལས་འབྱུང་བའི་རང་སྒྲ་འདོད་པ་གཡོས་ཏེ༔ མེ་སྒྲ་བརླབ་པ་དང་ཆུ་སྒྲ་གཤེར་བ་དང༔ ས་སྒྲ་སྡིག་པ་དང༔ རླུང་སྒྲ་འཚེགས་པ་དང༔ ནམ་མཁའི་སྒྲ་གསེང་བ་དང༔ འབྱུང་བ་ལྔའི་སྙིགས་མ་འདུས་པ་ལས༔ འབྱུང་བ་གྲང་བར་གྱུར་ཏེ༔ ཕའི་རྒྱུ་ལྟ་བུ་བྱས་པས་ནི༔ ལུས་ལ་བདེ་བ་བསྐྱེད༔ འབྱུང་བ་ལྔའི་དྭངས་མ་འདུས་པས༔ ཚ་བར་སོང་ནས་མའི་རྐྱེན་བྱས་པས༔ སྒོ་ལྔ་ལས་ལུས་འཐོན་པའི་ཚུལ་དུ་བྱས༔ དེ་ལྟར་འབྱུང་བ་ཚ་གྲང་གི་རྒྱུ་རྐྱེན་འཛོམ་པ་ལས༔ འགྲོ་བ་རྣམས་ཀྱི་ལུས་དང༔ སྟོན་པའི་སྐུ་དབང་པོ་རང་གསལ་བ་དང༔ སྣང་བའི་ཡན་ལག་རྣམས་སུ་རྫོགས་པར་བྱས་སོ༔ ཀུན་ཀྱང་ལོ་བཅུ་དྲུག་ལོན་པ་ཙམ༔ དབང་པོ་གསལ་ཞིང་རབ་ཏུ་གཞོན་ཤ་ཆགས་པ༔ འོད་འདོམ་གང་གིས་སོ་སོའི་ལུས་བརྒྱན་པ༔ ལུས་ནི་མར་མེའི་གྲིབ་མ་ལྟར་ཟང་ཐལ་དུ་སྣང་བ༔ ཁྱད་པར་མཆོག་གི་ཡོན་ཏན་དཔག་ཏུ་མེད་པའི་འགྲོ་བ་རྣམས་ཀྱི་འདུལ་བྱེད་ནི༔ དྲུག་པ་རྡོ་རྗེ་འཆང་ཆེན་པོ་ཉིད་བྱོན་ནོ༔ འདིའི་དུས་ན་ཁྱད་པར་དུ་ཤེས་རབ་ཀྱི་བསྟན་པ་འདུལ་བ༔ མཁའ་འགྲོ་མ་ཡིད་བཟུང་རྡོ་རྗེ་མ་ལ་སོགས་པའི་འཁོར་རྡོ་རྗེ་རིགས་ཀྱི་མཁའ་འགྲོ་མ་སྐུ་མདོག་དཀར་མོ་འབའ་ཞིག་ལ་ཁྲི་ཕྲག་གསུམ༔ སེར་མོ་རིན་པོ་ཆེའི་རིགས་ཀྱི་ཡོན་ཏན་གྱི་རྣལ་འབྱོར་མ་ལ་ཁྲི་ཕྲག་གསུམ་དང༔ དམར་མོ་པདྨའི་རིགས་ཀྱི་གསུང་གི་རྣལ་འབྱོར་མ་ཁྲི་ཕྲག་བཞི༔ ལྗང་ཁུ་ལས་ཀྱི་རིགས་ཀྱི་འཕྲིན་ལས་ཀྱི་རྣལ་འབྱོར་མ་ལ་ཁྲི་ཕྲག་ལྔ་དང༔ མཐིང་ཁ་ནག་མོ་བདེ་གཤེགས་རིགས་ཀྱི་ཐུགས་ཀྱི་རྣལ་འབྱོར་མ་ལ་ཁྲི་ཕྲག་ལྔ་དང༔ འབུམ་ཕྲག་གཉིས་འདུས་པ་ནི༔ བསྟན་པ་འདི་ཉིད་ལ་དལ་དམ་པའི་ཆོས་འདི་ལ་བརྟེན་ནས༔ བུད་མེད་ཀྱི་གཟུགས་བསྟན་པ་ལ་དབང་བ༔ སངས་རྒྱ་བ་དེ་ཙམ་ཞིག་འབྱུང་བའི་སྔ་ལྟས་སོ༔ ནམ་མཁའ་ཆེ་ལས་ཀྱང༔ དེའི་ཕྱིར་ན་དེ་ལ་སྐྱེས་པ་བུད་མེད་ཅེས་བྱའོ༔ ཡུལ་ནི་འཇིག་རྟེན་མི་མཇེད་ཅེས་བྱ་སྟེ༔ འདིའི་དུས་ན་གླིང་བཞིའི་མི་རྒྱལ་ཆེན་རིགས་བཞིའི་ལྷ་ལས་མཆེད་ནས༔ གཟུགས་དང་ལོངས་སྤྱོད་ལྡན་པ་ལ༔ འབྱུང་བའི་ལུས་རྡོས་པ་ལས་གྲུབ་པར་བྱུང་ངོ༔ འདོད་པའི་ཁམས་ཀྱི་བྱེ་བྲག་ཡིན་པའི་ཕྱིར༔ ཟས་དང་སྐོམ་ཡང་དངོས་སུ་འདོད་པ་དག་བྱུང་ངོ༔ འདིའི་དུས་ན་ཟས་སུ་འབྱུང་བའི་དྭངས་མ་ས་ཟ་བ་དང་འབྱུང་སྟེ༔ སའི་དྭངས་མས་ཞག་སྤྲིས་མ་ལྟ་བུ་ཆགས༔ བདུན་རྩིའི་རོ་ལྟ་བུ་ཟ་ཞིང་འདུག་གོ༔ ལ་ལ་ཆུའི་དྭངས་མ་པདྨའི་འབྲས་བུ༔ རྒྱ་མཚོའི་མེ་ཏོག་ལྟ་བུ་ལ་ཟ་ཞིང་འདུག༔ ལ་ལ་མེའི་དྭངས་མ་སྐྱེ་ཤིང་གི་འབྲས་བུ་ལྟ་བུ་ལ་ཟ་ཞིང་འདུག༔ ལ་ལ་རླུང་གི་དྭངས་མ་ག་བུར་གྱི་སྙིང་པོ་ལྟ་བུ་ལ་ཟ་ཞིང་འདུག༔ གོས་ནི་འདིའི་དུས་ན་འབྱུང་བ་སོ་སོའི་སྟོབས་དངོས་སུ་གྲུབ་པ་ལས༔ ཐམས་ཅད་ཤིང་གི་ནགས་ལོ་འབྲས་དང་ལྡན་པར་གྱུར་ཏེ༔ རླུང་གིས་ལུས་ལ་གྲང་བས༔ གོས་ཤིང་ལོ་ལྡེབ་མོ་གྱོན༔ ཕོ་མོའི་དབང་པོའི་སྒོ་ནི་མ་དོད༔ ལས་ཀྱི་དབང་གིས་བསགས་པ་གྲངས་ཉུང་བའི་ཕྱིར༔ ཆ་མ་དོད་པར་གནས་པ་ལས༔ དེ་ནས་ཉོན་མོངས་པ་བག་ལ་ཉལ་རིམ་གྱིས་ལངས་པ་ནི༔ བསགས་པ་ལས་ཀྱི་རྣམ་སྨིན་གྲངས་མངས་པ་ལས༔ ལོ་ཡང་བརྒྱ་བརྒྱ་ལོན་ཅིང་ལོ་རེ་རེ་བྲི་ནས༔ བསོད་ནམས་ཀྱང་རིམ་གྱིས་བྲི༔ ལུས་ཀྱི་ཁ་དོག་དང་གཟི་མདངས་ཀྱང་བྲི་ནས༔ ཚེ་ལོ་ཡང་འབུམ་ལ་ཐུག༔ འགྲོ་བ་ལས་ཀྱི་རླུང་གིས་བཏེག་ནས་འདོམ་གང་གིས་ས་ལ་མ་རེག་པར་འགྲོ་ཞིང༔ ནམ་མཁའ་ལ་འཁོད་ཅིང་འདུག་གོ༔ འདིའི་དུས་ན་ཉོན་མོངས་ཉེ་བ་དང་རིང་བའི་བསགས་པ་ལས༔ འབྱུང་བ་ལྔའི་ས་བོན་ལངས་ཏེ༔ མེས་དྲོད་གཡོག་པས་བཟུང༔ ཆུས་བསྡུས༔ རླུང་གིས་བསྐྱོད༔ ནམ་མཁའ་འདྲེས་པས༔ འབྱུང་བའི་དྲོད་དང་གཤེར་ལས་ལུས་སུ་གྲུབ་སྟེ༔ འགྲོ་བ་ཐམས་ཅད་ཀྱང་དྲོད་གཤེར་ལས་སྐྱེས་པ་དེ་དག་ནི༔ ཁྲུ་བཅུ་དྲུག་ཐ་དད་པར་བྱུང་ངོ༔ དེ་ཡང་སའི་ལན་གྱི་ཕའི་རྒྱུ་བྱས༔ རླུང་གིས་དྲོད་སྐྱེས་པས་མའི་རྐྱེན་བྱས་ནས༔ དེ་ལྟར་དྲོད་གཤེར་གྱི་རྒྱུ་རྐྱེན་འཛོམ་པ་ལས༔ འགྲོ་བའི་ལུས་དང་སྟོན་པའི་སྐུ་བྱུང་བའོ༔ དེའི་ཚེ་གདུལ་བྱའི་འཁོར་ནི༔ ཐབས་ཀྱི་རྒྱུ་ལས་བསྐྱེད་ལ༔ རང་བཞིན་གྱི་བྱང་ཆུབ་སེམས་དཔའ་འབུམ་ཕྲག་གཅིག༔ ལམ་ལ་གནས་པ་ལ་འབུམ་ཕྲག་གཅིག་དང༔ སེམས་རྣམ་པར་སྦྱོང་བའི་རིགས་ལ་འབུམ་ཕྲག་གཅིག་དང༔ སེམས་འདུལ་བ་ལ་འབུམ་ཕྲག་གཅིག་དང༔ ས་ལ་གནས་པ་རྣམས་ལ་འབུམ་ཕྲག་གཅིག་དང༔ ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་འབུམ་ཕྲག་གཅིག་སྟེ༔ འབུམ་ཕྲག་དྲུག་གི་གྲངས་བྱུང་བ་ནི༔ འདི་ལ་དམ་པའི་ཆོས་འདིས་སྐྱེས་སངས་རྒྱས་ཐོབ་པ༔ བསྟན་པ་འདི་ལ་དབང་བ་ཙམ་ཞིག་འབྱུང་བའི་སྔ་ལྟས་སོ༔ དྲོད་གཤེར་ལས་བྱུང་བའི་སེམས་ཅན་དེ་དག་ནི༔ ལྗོན་ཤིང་ཟས་སུ་ཟ་སྟེ༔ མི་རེ་སྐྱེས་པ་དང་ཤིང་རེ་སྐྱེ་བ་ཡིན་ནོ༔ དེའི་འབྲས་བུ་ཟས་སུ་ཟ༔ པགས་པ་གོས་སུ་གྱོན༔ མི་དེ་ཤི་བ་དང་ཤིང་དེ་ཡང་སྐམ་པ་ཡིན་ནོ༔ འདིའི་དུས་ན་འགྲོ་བ་འདི་དག་ལ་འོད་ཆག་གང་བ་མི་བདུན་བདུན་གསལ་བ་ཡོད༔ དེ་ནས་ཀྱང་ཉོན་མོངས་པ་བགས་ཀྱིས་སྐྱེས༔ བསོད་ནམས་བགས་ཀྱིས་བྲི་ནས༔ ལོ་ཡང་དྲུག་བརྒྱ་ལ་རེ་རེ་བྲི་ནས༔ ཚེ་ལོ་ཡང་བརྒྱད་ཁྲི་ལ་ཐུག་སྟེ༔ སོ་སོའི་ལུས་ཀྱི་འོད་རྣམས་ཀྱང་ཡལ༔ མུན་པར་མ་སོང་བར་རང་བཞིན་གྱི་བསོད་ནམས་ཀྱིས་ཉི་མ་བྱུང་བས་ཉིན་མོ་ཞེས་བྱ༔ དེའི་ཟླ་ལས་ཟླ་བའི་སྣང་བ་ཡང་ཡང་བྱུང་བས་མཚན་མོ་ཞེས་ཉིན་མཚན་དུ་བྱུང་བའོ༔ ཉོན་མོངས་བག་ལ་ཉལ་བ་ལངས་ནས༔ སྔོན་དུ་རྒྱུ་ལངས་པའི་སྟོབས་ཀྱིས༔ ཕྱི་ས་ཆུ་མེ་རླུང་གི་འབྱུང་བ་རྣམས་ཀྱང་མཚན་ཉིད་གསལ་བར་བྱུང༔ འདོད་ཁམས་སུ་འདོད་ཆགས་ཀྱི་རང་བཞིན་གྱི་རྒྱུ་ལས༔ ཐོག་མར་བལྟས་པས་ཚིམ་པའི་འདོད་ཆགས་སྔོན་དུ་བྱུང་བས༔ གཅིག་ལ་གཅིག་བལྟས་པ་དང ༔ དེ་ལ་དགའ་བ་དང་བདེ་བ་སྐྱེ་བ་བྱུང༔ དེ་ནས་བགད་པས་ཚིམ་པའི་འདོད་ཆགས་བྱུང་བས༔ སྐད་ཆེ་བའི་གད་མོ་གཅིག་ལ་གཅིག་བལྟས་ཤིང་བགད་པས༔ དགའ་བ་བདེ་བ་ཉམས་སུ་མྱོང་བ་བྱུང༔ དེ་ནས་ལག་བརྐྱངས་ཀྱི་འདོད་ཆགས་བྱུང་སྟེ༔ གཅིག་ལ་གཅིག་ལག་པས་འཁྱུད་ཅིང་སྦར་འཛིངས་དང༔ འཆངས་པ་ལ་སོགས་པས༔ ལག་པ་འཇུས་པ་ཙམ་གྱིས་ཚིམ་པ་ལ་སོགས་པ་བྱུང༔ དེ་ནས་རྩ་དང་ཆུ་རྒྱུས་ཐམས་ཅད་གཡོས་པས༔ ཕོ་མོའི་དབང་པོའི་སྒོ་རྣམས་ཀྱང་དོད་ནས༔ འཁྱུད་ཅིང་དབང་པོའི་སྒོ་སྦྱོར་བའི་འདོད་ཆགས་བྱུང་བས༔ འདོད་ཆགས་དངོས་སུ་སྤྱོད་པ་བྱུང་ངོ༔ དེའི་གྲོགས་ཕྲག་དོག་སྐྱེས་པས༔ གཅིག་ལ་གཅིག་འདོད་ཆགས་སྤྱོད་པ་ལ་བལྟས་པས༔ ངོ་ཚ་བའི་སེམས་སྐྱེས་ནས༔ ཕས་སྐྱོར་ཚུལ་སྐྱོར་བས་ངོ་ཚའི་ཁང་བ་ཞེས་བྱ་བ་བྱུང་ངོ༔ དེ་ནས་ནམ་མཁའ་ནས་བདུད་རྩིའི་ཆར་བབ་པས༔ དེ་ལ་འཇགས་མ་རྒལ་བས་ཁྱིམ་པ་སྔ་བ་འཇགས་ཁྱིམ་སྤྱིལ་བུ་ཞེས་བྱ་བ་བྱུང་ངོ༔ གོང་གི་འབྱུང་བའི་དྲོད་དང་རླན་གྱི་རྒྱུ་ལས༔ ཁུ་བ་དང་ཁྲག་ཏུ་སྨིན་ཏེ༔ དེ་ལྟར་ཕའི་རྒྱུ་རྐྱེན་གྱིས་རང་བཞིན་འབྱུང་བ་བཞི་འདུས་པ་ནི༔ འདོད་ཆགས་བཞི་ལས་འབྱུང་བ་བཞི་འདུས་པ་ནི༔ བལྟས་པ་ལས་འབྱུང་བ་ཆུའི་ནང་དུ་གཟུགས་བརྙན་གསལ་བས་ཆུ༔ སེམས་བརླན་པས་ཆུ་རྫུས་སྐྱེས་ཆུར་སྨིན༔ རྒོད་པ་ལས་སྒྲ་གྲགས་པ་རླུང༔ བྱང་སེམས་འཕེན་པའི་སྟོབས་ཀྱང་རླུང༔ གཉིས་ཀྱིས་བསྐྱོད་པའི་སྦྱོར་བ་མངའ་སྐྱེས༔ ལག་བཅངས་འཛིན་པས༔ བྱང་སེམས་ཀྱི་གཟུགས་འཛིན་པས་སའི་གཟུགས་སྒོ་ང་ལས་སྐྱེས༔ གཉིས་གཉིས་འཁྱུད་པས་དྲོད་ལས་སྐྱེས་པས་འབྱུང་བ་མེ༔ བྱང་སེམས་བསྐྱོད་པས་དྲོད་རླན་ལས་འདུས་པས་ཆུ༔ དེ་ལྟར་དྲོད་ཀྱིས་ལུས་བསྐྱེད༔ རླན་གྱིས་སེམས་བཟུང་བས་ན༔ དྲོད་རླན་ལས་སྐྱེས་པའོ༔ དེ་ཡང་འདོད་ཆགས་བཞི་ནི༔ བལྟས་པས་ཚིམ་པ་ལོ་བརྒྱའི་བར་ལ་བྱུང༔ བགད་པ་ལོ་དྲུག་ཅུའི་བར་ལ་བྱུང༔ ལག་བཅངས་ལྔ་བཅུའི་བར་ལ་བྱུང༔ དེ་དག་གི་འོག་ཏུ་གཉིས་གཉིས་འཁྱུད་པ་བྱུང་སྟེ༔ དེ་ཡང་འཁྱུད་པ་ལ་འདོད་ཆགས་བཞི་ཆར་ཚང་སྟེ༔ ཐོག་མར་འདོད་ཆགས་གཡོ་བས་བལྟས་པས་ན་བལྟས་པ། དེ་རྒོད་ཅིང་འཛུམ་པས་ལན་གདབ་པ༔ དེ་ནས་ལག་པ་འཇུ་བས་ན་ལག་བཅངས༔ དེ་ལྟར་འཛོམ་པ་ལས་དབང་པོའི་སྒོ་སྦྱོར་བས༔ འདོད་ཆགས་ཞེས་བྱའོ༔ དེ་ལྟར་འཁྱུད་པས་ཁྱེའུ་དང་བུ་མོའི་གཟུགས་སུ་བཙས་པའོ༔ དེ་ནས་ངན་སོང་གི་གནས་གསུམ་པོ་ཡང་བྱུང་ངོ༔ འདིའི་དུ་ན་འགྲོ་བ་ཡང་གོས་སུ་རས་བལ་དང་ཤིང་ཤུན་གྱོན་པ༔ ཟས་སུ་ནི་སའི་ཞག་ཟའོ༔ སྦྲང་རྩའི་རོ་འདྲ་བ་ཞིག་བྱུང་སྟེ༔ དེ་ཟ་ཞིང་འདུག་པ་ལས༔ སྐྱེས་བུ་ལེ་ལོ་ཅན་གཅིག་གིས་ནང་མ་འགའ་ཙམ་གྱིས་བླངས་ཏེ༔ ནམ་འདོད་པ་ན་ཁུང་བུ་དེར་ཟ་བ་དེ་མེད་པར༔ དེ་ཞག་དང༔ ཟླ་བ་དང༔ ལོ་ཙམ་གྱིས་བླངས་ནས་བྱས་པས༔ གཞན་རྣམས་ཀྱིས་ཀྱང༔ ཁོའི་དེ་འཐད་པར་འདུག་ཟེར་ནས་བླངས་པས༔ དེ་ཡང་ལེ་ལོ་གསོག་འཇོག་གི་དབང་གིས༔ ལོ་ལྔ་ཙམ་ལོན་ནས་ནུབ་བོ༔ དེ་ནས་བར་དེར་མུ་གེའི་བསྐལ་བ་ཟས་ཀྱིས་གདུངས་པ་བྱུང་ངོ༔ དེ་ནས་ཡང་བསོད་ནམས་དང་ལས་ཀྱི་སྟོབས་ཀྱིས༔ འབྲས་ས་ལུ་བཟང་པོ་གཅིག་སྐྱེས་ཏེ༔ དེ་ཡང་ནང་རྔས་ན་ནང་སྐྱེས༔ ནུབ་རྔམ་ན་ནུབ་སྐྱེ་བ་གཅིག་བྱུང ༔ དེ་ཟ་ཞིང་འདུག་པ་ལས༔ ཡང་འདོད་པ་ཅན་གཅིག་གིས་འདི་ཚུན་ཆད་དབང་བྱས་ཏེ༔ དེ་ནས་ཀུན་གྱིས་སོ་སོར་བགོས་བྱས་ཏེ་ང་བདག་ཏུ་བཟུང་བས༔ དེ་ནས་ལོ་བཅུ་ན་སྔོན་གྱི་ལས་བཟང་བ་རྣམས་ཀྱི་བཟང་དུ་སྐྱེས༔ ངན་པ་རྣམས་ཀྱི་ངན་དུ་སྐྱེས་ནས༔ ངན་པའི་བདག་པོ་མ་འཚོ་ནས༔ བཟང་པོ་ལས་བརྐུས་པས༔ དེ་ཡང་ཕྲག་དོག་དང་ང་རྒྱལ་གྱི་དབང་གིས་ནུབ་བོ༔ དེ་ལྟར་ན་སྟོན་པ་དང༔ འགྲོ་བའི་ལུས་ཐམས་ཅད་མངལ་ནས་སྐྱེས་པར་བྱུང་བའོ༔ དེ་ནས་ཉོན་མོངས་པ་སྔོན་དུ་རྒྱུ་ལངས་པས༔ གཏི་མུག་གིས་ལས་དགེ་སྡིག་ངོ་མ་ཤེས་པར་བྱས༔ མི་དགེ་བ་བཅུ་ཡང་མངོན་དུ་སྤྱད་དོ༔ འདོད་ཆགས་ཀྱིས་རང་བཞིན་ལ་ཞེན་པར་བྱས༔ ཞེ་སྡང་གིས་སྲོག་གཅོད་པའི་རགས་པའི་ལས་སྣ་ཚོགས་བྱས༔ དེ་ལྟར་གསུམ་ལས༔ ལུས་དང་ངག་དང་ཡིད་ཀྱིས་མི་དགེ་སྣ་ཚོགས་སྤྱད་པའི་དབང་གིས༔ ངོན་སོང་གསུམ་གྱི་གནས་སུ་སྐྱེ་བའི་རྒྱུ་དང༔ རྐྱེན་ཉེ་བར་ལེན་པ་བྱས་སོ༔ འདིའི་དུས་ན་ཡུལ་གྱི་མིང་ནི་དགའ་ལྡན་བརྩེགས་པ་ཞེས་བྱའོ༔ རི་ལ་རྨོ་བ་དང་རྐོ་བའི་ལས༔ མཐུན་གཉིས་ཟུང་དུ་བསྡེབས་ནས༔ ས་ཐང་ཞིང་དུ་རློག་པ་དག་བྱུང༔ རི་ལ་ཁྱིམ་བྱས་ནས་འདུག་པ་དག་བྱུང་། ནས་ལ་སོགས་འབྲུ་སྣ་ཚོགས་ལ་ལོངས་སྤྱོད་དོ༔ དེའི་ཚེ་ལྷའི་དབང་པོ་མཆོག་དགའ་གཙུག་ཕུད་ཅེས་བྱ་བ་དང ༔ ཡུམ་རབ་ཏུ་བརྩེ་བ་དང་ལྡན་མ་ཞེས་བྱ་བའི་ལྷུམས་སུ་ཞུགས་པའི་ཚུལ་བསྟན་ཏེ༔ སྟོན་པ་ཉིད་ཡུམ་དེའི་མངལ་ནས་བསྐྱེད་དེ༔ བྱིས་པ་ལོ་བཅུ་པའི་ཚུལ་དུ་བྱོན་ནོ༔ གདུལ་བྱའི་སེམས་ཅན་སྐྱེ་བ་བཞི་ཀ་རོ་གཅིག་ཏུ་གྱུར་པའི་མངལ་ནས་སྐྱེས་པའི་ལུས་སུ་བྱུང་བའོ༔ སྟོན་པའི་མཚན་ནི་གཞོན་ནུ་རོལ་པ་རྣམ་པར་རྩེ་བ་ཞེས་བྱ་བར་གྲགས་སོ༔ ཉོན་མོངས་པའི་དབང་གིས་ཚེ་ལོ་ཡང་བྲི་ནས༔ ལྔ་བརྒྱ་ལོན་ཞིང་རེ་རེ་བྲི་བས༔ ཚེ་ལོ་ཡང་བདུན་ཁྲི་ལ་ཐུག་སྟེ༔ ཟས་དང་གོས་ལ་སོགས་པ་དངོས་སུ་སྤྱོད༔ རང་རྒྱུད་དུ་འཛིན་པ་དག་བྱུང་ངོ ༔ དུས་དེའི་ཚེ་ལྷའི་ཡུལ་འདོད་པ་ཁམས་ཀྱི་བྱེ་བྲག ༔ སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟངས་ཞེས་བྱ་བ་ན༔ འགྲོ་བ་ལྷའི་དབང་པོ་བརྒྱ་བྱིན་ལ་སོགས་པའི་འདོད་པ་ན་སྤྱོད་པ་ལྷའི་བུ་རྣམས་འདུལ་བའི་འདུལ་བྱེད་དུ༔ ཁང་བཟངས་དེའི་ལྷོ་ཕྱོགས་རྒྱང་གྲགས་གཅིག་ན༔ ཁྱད་པར་དུ་ཡིད་དུ་འོང་བ་སྨད་འཚོ་བྱེད་གཞོན་ནུའི་ལྡུམ་ར་ཞེས་བྱ་བར༔ སྨན་སྣ་ཚོགས་འཁྲུངས་པ་དེར༔ པདྨའི་སྡོང་པོ་ལ་སྟོན་པ་ཉིད་བྱང་ཆུབ་སེམས་དཔའི་ལུས་སུ་སྤྲུལ་ནས༔ དྲུག་པ་རྡོ་རྗེ་འཆང་ཆེན་པོ་ཞེས་བྱ་བར་བྱོན་ཏེ༔ དེའང་ཕྱི་འགྲོ་བ་རིགས་དྲུག་ལ་གཟིགས༔ ནང་ཐུབ་པ་དྲུག་ལ་གཟིགས༔ གསང་བ་ཕ་རོལ་ཏུ་ཕྱིན་པ་དྲུག་ལ་གཟིགས་པས་ན༔ དྲུག་པ་རྡོ་རྗེ་འཆང་ཆེན་པོ་ཞེས་བྱའོ༔ ཡོན་བདག་ནི་ལྷའི་དབང་པོ་བརྒྱ་བྱིན་གྱིས་མཛད་དོ༔ བརྒྱ་བྱིན་ལ་བཙུན་མོ་བཞི་ཡོད་དེ༔ ཤ་མཚམས་མ་ཞེས་བྱ་བ༔ ཤའི་མཚམས་ཐམས་ཅད་ནས་འོད་འབྱུང་བ་ཞིག་ལ༔ ཡིད་བཞིན་གྱི་ནོར་བུའི་བུ་བཅུ་གཉིས་ཡོད་དོ༔ ཟླ་མཚམས་མ་ཞེས་བྱ་བ་ཅིག་ལ༔ སྨིན་མཚམས་ནས་ཉི་མ་དང་ཟླ་བའི་འོད་འབྱུང་བ་ཞིག་ལ༔ ཉི་ཟླའི་བུ་བདུན་ཡོད་པས༔ དེ་རྣམས་ཀྱིས་ལྷ་རྣམས་ཀྱི་སྣང་བ་སྟོན་པར་བྱེད་དོ༔ ཤ་ཙིཀ་བྱ་བ་གཅིག་ལ༔ ནང་ལྷའི་རོལ་མོ་ལྔ་བརྒྱ་སྤྲུལ་པ་དང༔ དེ་བཞིན་དུ་ནུབ་ཀྱང་དེ་ཙམ་ཞིག་ཏུ་སྤྲུལ་པ་ཞིག་ལ༔ དྲག་པོའི་བུ་བདུན་ཡོད་པ་ནི༔ ལྷའི་གཡུལ་རྣམས་རྒྱལ་བར་བྱེད་དོ༔ བཙུན་མོ་ཡ་སྲིང་མ་བྱ་བ་གཅིག་ལ ༔ ལྷའི་སིལ་སྙན་མི་འདྲ་བ་ལྔ་སྟོང་ལྔ་སྟོང་གི་ཆར་པ་འབེབས་པ་ཞིག་ལ༔ སྟོབས་ལྡན་གྱི་བུ་དྲུག་ཡོད་པས༔ གླིང་བཞི་རི་རབ་རྣམས་སྲང་ལ་འཇལ་བའི་སྟོབས་བྱེད་དོ༔ དེ་ལྟར་ན་སྲས་སུམ་ཅུ་རྩ་གཉིས་གླང་པོ་ཆེ་རབ་ཏུ་བརྟན་པ་ཞེས་བྱ་བ༔ མགོ་བོ་སུམ་ཅུ་རྩ་གཉིས་གསེར་ལས་བྱུང་བ༔ གཡུའི་མགོ་དང་སུམ་ཅུ་རྩ་གསུམ་ཡོད་པ་ལ༔ སྲས་རྣམས་དང་བརྒྱ་བྱིན་དུ་བཅས་པ་གནས་ཏེ༔ མགོ་རེ་རེའི་སྟེང་ན་ལྷའི་གཞལ་མེད་ཁང་རེ་རེ་ཡོད་པའི་ནང་ནས༔ ལྷའི་བུ་ལྔ་བརྒྱ་ལྔ་སྟོང་འདུན་པར་བྱེད་དོ༔ དེ་ལ་ཞོན་ནས་འདོད་པ་ཁམས་ཀྱི་ལྷ་རྣམས་གནས་སུ་བསྐོར་ཞིང་ཆོས་ཉན་པ་དག་ཡོད་དོ༔ འདི་རྣམས་ཀྱིས་ཡོན་བདག་མཛད་དོ༔ དཔེ་ལ་ལར༔ སྟོན་པ་ཉིད་ལས་མི་གཞན་པའི་འཁོར་འོད་སྲུངས་དང༔ གསེར་ཐུབ་དང༔ ལོག་པར་དད་སེལ་དང༔ མར་མེ་མཛད༔ ཐམས་ཅད་སྐྱོབ༔ འཁོར་བ་འཇིག༔ ཤཱཀ་ཐུབ༔ བྱམས་པ་ཞེས་བྱ་བ་ལ་སོགས་པ་དང ༔ ཞེས་པའང་ཡོད༔ འཁོར་ནི་སངས་རྒྱས་རབས་བདུན་པ་ཞེས་བྱ་བ་དང༔ ཐུབ་པ་དྲུག་དང༔ ལྷའི་དབང་པོ་སྲེད་མཐོང་དགའ་རབ་རྡོ་རྗེ་ཞེས་བྱ་བའི་བུ་ནོར་བཟང་ཞེས་བྱ་བ་དང་བདུན་གྱིས་བསྐོར་ཞིང་ཆོས་ཉན་ཏོ༔ སྡུད་པ་པོ་ནི་ལྷའི་བུ་བེ་ཅོན་འཛིན་ཞེས་བྱ་བས་མཛད་དོ༔ ཆོས་གདུང་བ་སེལ་བར་བྱེད་པའི་ཆོས་དྲུག་ཅེས་བྱ་སྟེ༔ ཕ་རོལ་ཏུ་ཕྱིན་པ་དྲུག་ལ་འབད་པ་དང་བཅས་པ་དང༔ འབད་པ་མེད་པ་གཉིས་ལ༔ སྦྱིན་པ་ལ་སོགས་ཏེ༔ ཕྱི་ཕ་རོལ་ཏུ་ཕྱིན་པ་བཅོ་བརྒྱད༔ ནང་དུ་ལུང་སྦགས་མ་བཅོ་བརྒྱད་ཀྱི་ཆོས་ཀྱི་འཁོར་ལོ་བསྐོར༔ འབད་པ་མེད་པ་ལ༔ ཕྱི་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་གཟིགས་པས༔ ཕྱག་ན་རྡོ་རྗེ་མེ་ལྕེ་ཕྲེང་བའི་རྒྱུད་ལེའུ་དགུ་པ་དང ༔ ནང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་གཟིགས་པས༔ སྤྱན་རས་གཟིགས་སེང་གེ་སྒྲའི་རྒྱུད་ལེའུ་བཅུ་གསུམ་པ་དང༔ གསང་བ་འཇམ་དཔལ་ལ་གཟིགས་པས༔ འཇམ་དཔལ་ཡེ་ཤེས་རྒྱན་གྱི་རྒྱུད་ལེའུ་བདུན་པ་དང༔ ཁྱད་པར་གྱི་འཁོར་སངས་རྒྱས་རབ་བདུན་ལ་གཟིགས་པས༔ ཡོངས་སུ་བཤད་པའི་རྒྱུད་ཆོས་ལེའུ་ལྔ་བཅུ་པ་དང༔ ཐིག་ལེ་མཆོག་གི་རྒྱུད་ཡེ་ཤེས་ཀུན་ཏུ་གསལ་བའི་རྒྱུད་ལེའུ་བཅུ་བདུན་པ་ལ་སོགས་པ་རྫོགས་པ་ཆེན་པོ་བྱ་བ་དང་བྲལ་བའི་རྒྱུད་རྣམས་གསུངས་སོ༔ དུས་ཕུན་སུམ་ཚོགས་པ་ཚེ་ལོ་བདུན་ཁྲིའི་དུས་སོ༔ འབྲས་བུ་སྐུ་གསུམ་དུ་གྲོལ་བའི་རྟགས་སུ༔ འབྲས་བུ་གསུམ་གྱི་སྨན་གསོལ་ལོ༔ དེར་དགུང་ལོ་བདུན་ཅུ་རྩ་ལྔ་བཞུགས་ནས༔ སྐྱ་རེངས་དང་པོ་ཤར་བའི་དུས་སུ་ཡོངས་སུ་མྱ་ངན་ལས་འདའ་བའི་ཚུལ་བསྟན་ཏེ༔ ཉེ་བའི་འཁོར་ལྷའི་བུ་སྲེད་མཐོང་ཞེས་བྱ་བའི་ཕྱག་གི་མཐིལ་དུ་འདས་རྗེས་དང་པོ་བབས་སོ༔ དེ་ནས་དེ་དག་གི་འོག་ཏུ་སེང་གེ་རྣམ་པར་རྩེ་བ་ཞེས་བྱ་བའི་ཏིང་ངེ་འཛིན་ལ་ལོ་སྟོང་ཕྲག་བདུན་དུ་མི་གཡོ་བར་བཞུགས་སོ༔ དེ་ནས་ཡང་སེམས་ཅན་ལ་སླར་བརྩེ་བའི་ཐུགས་གཡོས་ནས༔ ཉོན་མོངས་པ་དྲག་ཅིང་རྩུབ་པའི་གནས༔ རི་རབ་ཀྱི་བྱང་ཤར་གྱི་བང་རིམ་གྱི་སྟེང་ན་ལག་ན་རྡོ་རྗེ་གསང་བ་ཆེན་པོ་རོལ་པ༔ སྤྲུལ་པའི་དུར་ཁྲོད་དཔག་ཏུ་མེད་པ༔ མཚན་མོ་མེ་རི་སྣ་ཚོགས་པ་འབར་བ༔ ཉིན་བཞིན་རླུང་ནག་ལ་སོགས་པ་དཔག་ཏུ་མེད་པ་འཚུབ་པ༔ དེའི་བྱང་ཕྱོགས་ན་གནོད་སྦྱིན་གྱི་རྫོང་ཡོད་པ༔ ལྷོ་ན་ཡིད་བཞིན་གྱི་སྡོང་པོ་ཞེས་བྱ་བ༔ ཤིང་ལོ་མ་འདབ་མ་སྣ་ཚོགས་སུ་རྒྱས་པ་ལ༔ ཀླུའི་བུ་མོ་དཔག་ཏུ་མེད་པ་གནས་པ༔ ཤར་ན་རླུང་ལྡན་གྱི་རྒྱ་མཚོ་བྱ་བ་ཡོད་པ༔ དེ་ན་ཀླུའི་རྒྱལ་པོ་རྣམས་ཁྲུས་བྱེད༔ དེའི་དབུས་ན་གསང་ཆེན་རོལ་པའི་དུར་ཁྲོད་མེ་རི་འབར་བ་ཞེས་བྱ་བ༔ གནོད་བྱིན་གྱི་ཁང་པ་བརྩེགས་པ་འཁོར་ལོ་ཅན་ཞེས་བྱ་བ་ན༔ གནོད་སྦྱིན་གྱི་རྒྱལ་པོ་རག་ཤ་སེང་གདོང་ཞེས་བྱ་བ༔ ཉིང་ལག་རྣམས་ལྕགས་ཀྱུས་རྣམ་པར་བསྡམས་པས༔ མིག་ཉི་ཟླ་དང་འདྲ་བ༔ གདོང་སེང་གེའི་འགྲམ་པ་ལྟ་བུ་ལ༔ སྤུ་གྲི་ངར་མ་ལྟ་བུའི་མཆེ་བས་གཏམས་པ་གཅིག་དང༔ དེའི་ཡུམ་འདོད་པའི་དབང་པོ་ཆེ་ཞེས་བྱ་བ༔ མཁའ་འགྲོ་མའི་གཟུགས་ལ༔ གནོད་སྦྱིན་གྱི་འཁོར་འབུམ་ཕྲག་དུ་མས་བསྐོར་བ༔ དེ་གཉིས་འདུས་པའི་ལྷུམས་སུ་ཞུགས་པའི་ཚུལ་བསྟན་ཏེ༔ དེ་ནས་ལྷུམས་ནས་འཐོན་པའི་དུས་ན་ཟླ་བ་བཅུ་གཅིག་དུས་གཅིག་ལ་ཤར༔ ས་ལན་བདུན་དུ་གཡོས༔ ཕྱོགས་བཅུ་ནས་ཆོས་ཀྱི་རྔ་ཆེན་པོ་དང༔ དུང་གི་སྒྲ་གྲགས་སོ༔ སྟོན་པ་ཉིད་གཞོན་ནུ་དཔའ་བོ་སྟོབས་དང་ལྡན་པ་ཞེས་བྱ་བ༔ མིའུ་ཐུང་བྱིས་པའི་ལུས་དང་འདྲ་བ༔ ཞལ་གསུམ་ནས་ཆོས་སྡེ་སྣོད་གསུམ་སྒྲོག་པ༔ ཕྱག་དྲུག་གི་མཐིལ་ན་འགྲོ་བ་དྲུག་གི་གྲོང་ཁྱེར་གསལ་བར་འཛིན་པ༔ ཞབས་བཞིས་བདུད་བཞི་མནན་པ་གཅིག་གི་ཆ་ལུགས་སུ་སྤྲུལ་ནས་བྱོན་ཏོ༔ གནས་དེ་ན་ཁྱད་པར་དུ་མཁའ་འགྲོ་མ་འབུམ་ཕྲག་གྲངས་མེད་པ་གནས་པའོ༔ དེའི་ཚེ་འཁོར་ནི་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་ཞེས་བྱ་བ༔ གོང་གི་ཐུབ་པ་དྲུག་དང༔ གོང་གི་ལྷའི་བུ་ནོར་བུ་བཟང་པོ་ཞེས་བྱ་བ་དང༔ མཁའ་འགྲོ་མ་མགོན་འབྱིན་པ་ཞེས་བྱ་བའི་ལྷུམས་ནས་འཐོན་པའི༔ གནོད་སྦྱིན་གྱི་བུ་ལེགས་སྤྱོད་བྱ་བ་དང་བདུན་ནོ༔ མདུན་གྱི་ནམ་མཁའ་ལ་རང་བཞིན་གྱིས་འགྲོ་བའི་སྤྲིན་གྱི་ཕུང་པོ་འཁྲིགས་པའི་དབུས་ན༔ ལྟེ་བ་ཡན་ཆད་འཐོན་ཞིང ༔ ཐལ་མོ་སྦྱར་ནས་ཆོས་ཉན་ཏོ༔ སྡུད་པ་པོ་ནི་ཉིད་ཀྱི་ཤངས་ཀྱི་རླུང་སྒྲོམ་ནས་ལག་ན་རྡོ་རྗེ་བཏོན་ནས་མཛད་དོ༔ ཡོན་བདག་ནི་མཁའ་འགྲོ་མ་ཁ་ནས་མེ་འབར་ཞིང༔ མིག་ནས་མེ་འཕྲོས་པས་སྲིན་པོ་པུརྣའི་གཡུལ་ཟློག་པར་བྱེད་པ༔ པུརྣ་ཉེ་བར་ཞི་བ་ཞེས་བྱ་བ་དང༔ མཁའ་འགྲོ་མ་ལྷ་ཚངས་པའི་བུ་མགྲིན་པ་དུང་གཡས་སུ་འཁྱིལ་བ་ལས་བྱུང་བ༔ གདོང་མ་ཧེ་རུ་ཡོད་པ༔ ལུས་ལ་རྨ་བྱའི་ཐུལ་པ་གྱོན་པ༔ ཚངས་པ་དུང་མགྲིན་ཅན་ཞེས་བྱ་བ་དང༔ ཡང་ཚོགས་བདག་གི་བུ་མོ་ལུས་མི་ལ་གདོང་སེང་གེར་ཡོད་པ༔ རལ་པ་འབར་བ་རབ་ཏུ་བསྙིལ་བ༔ སེང་གེའི་གདོང་པ་ཅན་ཞེས་བྱ་བ་དང༔ སྲེད་མེད་ཀྱི་བུའི་བུ་མོ་ལུས་སེང་གེ་འགྱིང་པ་ལྟ་བུ་ལ༔ མགྲིན་པ་དང་གདོང་རྨ་བྱར་བྱུང་བ༔ ལུས་ལ་ཆུ་སྲིན་གྱི་སློག་པ་གྱོན་པ༔ རྨ་བྱའི་མགྲིན་པ་ཅན་ཞེས་བྱ་བ་དང༔ ལག་བཟང་གི་བུ་མོ་ལུས་མི་ལ་གདོང་པ་མེ་ལོང་དུ་འདུག་པ༔ ལག་ན་སྟག་གི་རྒྱལ་མཚན་གཉིས་བཟུང་བ༔ མེ་ལོང་གདོང་ཞེས་བྱ་བ་དང༔ དྲང་སྲོག་འཕགས་འཛིན་གྱི་བུ༔ དྲང་སྲོང་ཟླ་འོད་གཞོན་ནུ་ཞེས་བྱ་བ༔ རྐང་ལག་གི་སྦར་མོ་རངས་པ་ལ་ཁྱུང་གི་སྡེར་མོ་ཡོད་པ༔ གདོང་པ་དྲེད་དུ་ཡོད་པ༔ རྣ་བ་ལ་ཟླ་བའི་འོད་འབྱུང་བ༔ ལུས་ལ་སྟག་ལྤགས་གྱོན་པ༔ ལག་ན་གདུགས་འཛིན་པ་དང༔ དེ་རྣམས་ཀྱིས་ཡོན་བདག་མཛད་དོ༔ ཆོས་ནི་ཕྱི་བྱང་ཆུབ་སེམས་དཔའ་བྱམས་པ་འཇམ་དཔལ། ལ་གཟིགས་ནས་ཕའི་གསང་སྔགས། རྒྱུད་རྣམས་གསུངས༔ ནང་ལག་ན་རྡོ་རྗེ་ལ་གཟིགས་ནས་མའི་གསང་སྔགས། རྒྱུད་རྣམས་གསུངས༔ གསང་བ་ཁྲོ་བོ་བདུད་རྩི་འཁྱིལ་བ་ལ་གཟིགས་ནས༔ རིག་པར་རང་ཤར་གྱི་རྒྱུད་ལེའུ་བརྒྱད་ཅུ་རྩ་དྲུག་པ་ལ་སོགས་རྣམས་གསུངས་སོ༔ དེར་ལོ་སྟོང་བཞུགས་ནས་མཁའ་འགྲོ་མ་རྣམས་ལ་ཆོས་སྟོན་ཏོ༔ བསོད་ནམས་ལས་ཀྱི་སྟོབས་ཉམས་པས་ལོ་བཞི་བརྒྱ་ལ་རེ་རེ་བྲི་བས༔ ཚེ་ལོ་ཡང་དྲུག་ཁྲི་ལ་ཐུག་གོ༔ དེར་ཡང་ཉི་མ་རི་རྩེ་ལ་ཤར་བའི་དུས་ན༔ སྟག་དང་སེང་གེ་རྣམ་པར་རོལ་པ་ཞེས་བྱ་བའི་རི་ལ་མྱ་ངན་ལས་འདའ་ཚུལ་བསྟན་ཏོ༔ འདས་རྗེས་གཉིས་པ་གནོད་སྦྱིན་གྱི་བུ་ལེགས་སྤྱོད་ཀྱི་ཕྱག་གཡས་པའི་མཐིལ་དུ་བབས་སོ༔ དེ་ནས་སེང་གེ་རྣམ་པར་འགྱིང་བ་ཞེས་བྱ་བའི་ཏིང་ངེ་འཛིན་ལ༔ ལོ་འབུམ་ཕྲག་གཅིག་ཏུ་སྙོམས་པར་བཞུགས་སོ༔ སློབ་དཔོན་དགའ་རབ་རྡོ་རྗེའི་སྙིང་པོ་གསང་བའི་རྒྱུད་ངེས་པ་རྣམས་ས་བརྒྱད་པའི་བྱང་ཆུབ་སེམས་དཔའ་རྣམས་ལ་བསྟན་ནས༔ ལྷོ་ཕྱོགས་ཀྱི་ཤིང་དྲུང་གི་ཀླུའི་བུ་མོ་རྣམས་ཀྱི་མདུན་དུ་བྱས་ཏེ༔ ཁྱུང་ནམ་མཁའ་ལ་ལྡིང་བའི་འགྲོས་ཀྱིས་མྱ་ངན་ལས་འདས་པའི་ཚུལ་བསྟན་ཏེ༔ སེང་གེ་རིན་པོ་ཆེ་འབར་བའི་ཁྲི་རྐང་དང་བཅས་ནས་རྣམ་པར་དག་གོ༔ འདི་ཡན་ཆད་ཀྱིས་ལྷའི་ཡུལ་དུ་སྟོན་པ་བྱོན་ཚུལ་བསྟན་ནས༔ ད་ནི་མིའི་ཡུལ་དུ་ཇི་ལྟར་བྱོན་ལུགས་ནི༔ སྟོན་པ་ཉིད་དེ་ནས་སེམས་ཅན་རྣམས་ལ་གཡོ་བ་བྱང་ཆུབ་ཀྱི་སེམས་བསྐྱེད་ནས༔ ཏིང་ངེ་འཛིན་ལས་བཞེངས་ཏེ༔ ཚེ་ལོ་ཁྲི་པའི་དུས་ན༔ འཛམ་བུ་གླིང་གི་ནུབ་ཕྱོགས་རྒྱ་མཚོའི་གླིང་ན༔ སྲིན་པོ་པུརྣ་ཞེས་བྱ་བའི་ཡུལ་མཐའ་མ་རྣམས་གསེར་གྱི་འཁོར་ལོ་བརྩེགས་པའི་བྲག་གིས་བསྐོར་བ༔ དེ་དག་གི་རྩེ་ལ་གསེར་བྱ་ལྡིང་ཞིང་འབབ་མཁས་པ་རྣམས་ཀྱིས་བསྐྱོར་ཞིང་འཕུངས་པ༔ རིན་པོ་ཆེ་ལས་གྲུབ་པའི་སྲོག་ཆགས་རིགས་མི་འདྲ་བ་རྣམས་ཀྱིས་རབ་ཏུ་རྩེ་བ་དང་ལྡན་པ༔ ཤར་ན་སྤྱན་རས་གཟིགས་འཁོར་དགྲ་བཅོམ་པ་སྟོང་ཕྲག་མང་པོས་བསྐོར་བ༔ ལྷོ་ན་ལྷ་མོ་སྒྲོལ་མ་ལྷ་མོ་རབ་ཏུ་ལྡེམ་བག་དང་ལྡན་པ་དཔག་ཏུ་མེད་པས་བསྐོར་བ༔ ནུབ་ཀྱིས་བྲག་གསེབ་ན་ལག་ན་རྡོ་རྗེ་གྲོགས་ལྔ་བརྒྱ་དང་བཅས་པ༔ བྱང་ན་འཕགས་པ་འཇམ་དཔལ་ལ་སོགས་པ་འཁོར་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ༔ དེ་དག་གི་དབུས་ན་སྲིན་པོ་རུ་ལའི་སྒྲ་དང་ལྡན་པ་ཞེས་བྱ་བ༔ ཕྱོགས་བཞིན་གདུགས་དང་རྒྱལ་མཚན་རབ་ཏུ་བསྒྲེང་བ་ན༔ སྲིན་པོ་རཀྴ་སེང་གདོང་ཞེས་བྱ་བ༔ པགས་པ་ལ་སྤུ་གྲིའི་ཚལ་འཕྲོ་བ༔ ལག་པ་ལྕགས་ཀྱུ་དྲིལ་བའི་རྣམ་པ་དང་འདྲ་བ༔ གདོང་སེང་གེ་ལ་མཆེ་བ་རལ་གྲིས་གཏམས་པ༔ ཡུམ་སྲིན་མོ་ཤམ་ཤམ་ནག་མོ་ཞེས་བྱ་བ་ལ༔ སྟོན་པ་ཉིད་ལྷུམས་སུ་ཞུགས་ཏེ༔ དེ་ནས་འཐོན་པའི་ཚེ༔ བཅོམ་ལྡན་འདས་ཁྲོས་པའི་རྒྱལ་པོ་ཞེས་བྱ་བ༔ སྤྱན་གསུམ་སྐལ་ལྡན་ལ་གཟིགས་པ༔ ཕྱག་གཉིས་འདབ་བཟང་གི་བུ་འཛིན་པ༔ ཞབས་ཚོགས་བདག་གི་གདན་ལ་བཞུགས་པ་ཞིག་ཏུ་འཁྲུངས་པའི་ཚེ༔ ནམ་མཁའ་ལས་འོད་ལྔའི་སྣང་བ་ཤར་བ་དང༔ ལྷའི་དབང་པོ་རྣམས་ཀྱིས་གདུགས་གསེར་གྱི་འཁོར་ལོས་སྤྲས་པའི་ཆར་ཕབ་ཅིང ༔ ལྷ་མོ་མཆོད་པའི་སྤྲིན་ཐོགས་པ་རྣམས་ཀྱིས་རབ་ཏུ་མཆོད་དེ༔ འཁོར་ནི་སྲིན་པོ་བྱེ་བ་གཅིག་དང་གོང་མའི་འདུས་པ་རྣམས་སོ༔ འདིའི་དུས་སུ་སྡུད་པ་པོ་ནི་སྲིན་པོ་ལདྒའི་བདག་པོ་མགྲིན་བཅུ་ཞེས་བྱ་བ༔ ལུས་གཅིག་ལ་མགྲིན་པ་བཅུ་པ༔ མགོ་བོ་རྒོད་དང༔ ཀང་ཀ་དང༔ ལིང་དུ་དང༔ བྱ་རོག་དང༔ སེང་གེ་དང༔ གླང་པོ་དང༔ མ་ཧེ་དང༔ ལྕེ་སྤྱང་དང༔ སྟག་དང༔ ཆུ་སྲིན་གྱི་མགོ་ཡོད་པ༔ ལག་པ་ཉི་ཤུ་ན་གསེར་གྱི་མེ་ཏོག་འཐོར་བས་སྡུད་པ་པོ་བྱས་སོ༔ ཡོན་བདག་ནི་སྲིན་པོའི་བུ་མོ་ལག་ན་གནོད་སྦྱིན་གྱི་བུམ་པ་ནོར་གྱིས་བཀང་བ་ཐོགས་པ་གཉིས་དང༔ ལང་ཀའི་བདག་པོ་གསེར་གྱི་གདུགས་འཛིན་པ་བཞི་དང ༔ སྲིན་མོ་རལ་པ་སྙིགས་པ༔ སྟག་དང་སེང་གེ་ལ་ཞོན་པ༔ ལག་ན་བ་དན་འཕྱར་བ་བཞིས་ཡོན་བདག་བྱས་སོ༔ ཆོས་ཕུར་བུ་རྡོ་རྗེ་རྩེ་མོ་རྣམ་པར་བཀོད་པ་ལེའུ་དྲུག་ཅུ་པ་དང༔ ཕུར་བུ་ཕུན་སུམ་ཚོགས་པ་ལེའུ་བཅོ་ལྔ་པ་དང༔ གཤིན་རྗེ་ལས་བརྒྱད་ཅུ་པའི་ལེའུ་བརྒྱད་ཅུ་པ་དང༔ འཁྲུལ་འཁོར་ཉི་མ་གསང་བའི་ལེའུ་དྲུག་ཅུ་པ་དང༔ གཤིན་རྗེ་ལས་ཀྱི་སྐྱེ་བ་རྒྱུན་གཅོད་པའི་ལེའུ་སུམ་ཅུ་རྩ་བརྒྱད་བ་དང༔ མ་མོ་ཀུན་ཏུ་བཟང་མོ་པ་ལ་པ་ཏྲ་ལེའུ་ཉེར་ལྔ་པ་དང༔ ནག་མོ་ཐུགས་གསང་བ་སྲིད་པའི་བེམས་ལེའུ་བཞི་བཅུ་རྩ་བརྒྱད་པ་དང༔ སྲིན་མོ་གསོད་བྱེད་ཀྱི་རྒྱུད་ལེའུ་ཉིས་བརྒྱ་སུམ་ཅུ་སོ་གཉིས་པ་དང་བཅུ་ནི༔ རགས་པ་འདུལ་བ་ལ་དགོངས་པའོ༔ ལྷག་མ་ཤོ་ལོ་ཀ་སྟོང་ཕྲག་གཉིས་གསུང་པ་ནི༔ ཞིང་ཚུལ་མཉམ་པ་ལ་དགོངས་པའོ༔ དེ་དག་གི་དོན་ལོ་སྟོང་ཕྲག་གཉིས་ཀྱི་བར་ལ་བྱས་ནས༔ དེ་ནས་དེའི་བྱང་ཤར་ན་སྟག་དང་སེང་གེ་རྣམ་པར་རོལ་པ་ཞེས་བྱ་བའི་རི་ལ༔ གླང་པོ་ཆེ་སེར་པོ་རིན་པོ་ཆེས་སྤྲས་པ་ལ་ཞོན་ཏེ༔ རྐང་ལག་རྣམས་ནས་ནམ་མཁའ་ལྡིང་གི་བུ་སྟོབས་དང་ལྡན་པ་བཞིས་བཏེག་ནས་མྱ་ངན་ལས་འདའ་བའི་ཚུལ་བསྟན་ཏོ༔ འདས་རྗེས་ནི་མ་གནང་ངོ༔ དེའི་འོག་ཏུ་སེང་གེ་རྣམ་པ་ཞེས་བྱ་བའི་ཏིང་ངེ་འཛིན་ལ་ལོ་ལྔ་སྟོང་དུ་གནས་པའོ༔ དེ་ནས་བསོད་ནམས་ཀྱི་སྟོབས་བགས་ཀྱིས་བྲི་ནས་ཚེ་ལོ་ལྔ་སྟོང་ཐུབ་པའི་དུས་ན༔ དབུས་ཕྱོགས་འཛམ་བུའི་གླིང་གི་རྒྱན༔ བྱ་རྒོད་སྤུངས་པའི་རི་ཟླུམ་ཞིང་འཕང་དང་སྲིད་དུ་མཉམ་པ༔ འཕགས་པ་ཉན་ཐོས་དང༔ རང་སངས་རྒྱས་དང༔ དགྲ་བཅོམ་པ་དང༔ ཡང་དག་པར་རྫོགས་པའི་སངས་རྒྱས་འབྱུང་བའི་གནས༔ རང་བཞིན་གྱི་ཡོན་ཏན་དཔག་ཏུ་མེད་པ༔ ཕྱོགས་ཀུན་ནས་ཤིང་ལྗོན་པ་མང་པོས་བསྐོར་བ༔ དེ་ནས་བྱང་ན་རྒྱང་གྲགས་གཅིག་ན༔ རྒྱལ་པོ་ཛ་བ་རི་ཞེས་བྱ་བའི་ཁབ༔ ལྷའི་ཁང་པ་རྣམ་པར་བརྩེགས་པ༔ ཕྱོགས་བཞི་ན་མཆོད་རྟེན་ཆེན་པོ་རེ་ལ༔ ཤིང་ལྗོན་པ་ལོ་འདབ་རྣམས་ཀྱིས་སྤྲས་པ་རེ་རེ་ལ༔ བྱ་ཡིད་དུ་འོང་བས་སྐད་སྙན་པོ་མང་པོ་སྐད་སྒྲོག་པ༔ སངས་རྒྱས་ཀྱི་རྟེན་ཁྱད་པར་ཅན་མང་པོ་བཞུས་པ་ན༔ རྒྱལ་པོ་སེང་གེ་བཟང་པོ་ཞེས་བྱ་བ༔ རྒྱལ་པོའི་རིགས་ལ་སེམས་རྣམ་པར་དུལ་བ༔ ཡུམ་མཛེས་མ་འོད་ལྡན་མ་ཞེས་བྱ་བ༔ སོ་དུང་སོ་འཁོར་མར་ཡོད་པ༔ སྨིན་མཚམས་ནས་འོད་འཕྲོ་བ༔ མཛེས་ཤིང་མཚན་རྫོགས་པའི་ལྷུམས་སུ༔ སྟོན་པ་སངས་རྒྱས་བཅོམ་ལྡན་འདས་ཞུགས་ཏེ༔ ལྷུམས་ནས་ཐོན་པའི་ཚེ༔ ནམ་མཁའ་ནས་མཁའ་འགྲོ་མས་བདུད་རྩི་དང་མེ་ཏོག་སིལ་མའི་ཆར་ཕབ་བོ༔ ལྷ་རྣམས་ཀྱིས་བཀྲ་ཤིས་ཚིགས་སུ་བཅད་པ་མང་པོ་བརྗོད་པ་དང༔ སངས་རྒྱས་ཀྱི་བསྟན་པ་ལ་དད་པའི་ལྷ་དང༔ ཀླུ་དང༔ གནོད་སྦྱིན་དང༔ ནམ་མཁའ་ལྡིང་ལ་སོགས་པས་ཤིང་ལྗོན་པ་ལོ་འདབ་རྒྱས་ཤིང་འབྲས་བུ་སྨིན་པའི་ཆར་ཕབ་བོ༔ ཀླུའི་རྒྱལ་པོ་རྣམས་ཀྱིས་གསེར་གྱི་མེ་ཏོག་རྣམ་པར་མཛེས་པའི་གདུགས་སྤྲིན་ཕུང་འཐིབས་པ་ལྟ་བུ་རྣམ་པར་གཏིབས་སོ༔ དེ་ནས་ལོ་གསུམ་ལོན་པའི་ཚེ༔ ལུས་ཤེད་རྫོགས་ཤིང་བཟོ་དང་སྒྱུ་རྩལ་ཀུན་ལ་མཁས་པ་གཅིག་བྱུང་ངོ༔ དེར་ལོ་ཉེར་ལྔ་ལོན་ཙ་ན༔ ཁབ་དེའི་ནུབ་ཕྱོགས་ན༔ བསོད་ནམས་བསགས་པ་ལས་ཀྱི་མཆོད་རྟེན་ཞེས་བྱ་བའི་རྩར་སོང་སྟེ༔ ཉིད་ཀྱིས་ཉིད་རབ་ཏུ་བྱུང་སྟེ༔ དབུ་སྐྲ་རང་གི་རལ་གྲིས་བཞར་ནས༔ ཁ་དོག་ངུར་སྨྲིག་གི་སྟོད་གཡོགས་དང་སྨད་གཡོགས་གྱོན་ནོ༔ སྟོན་པའི་མཚན་དགྲ་བཅོམ་པ་གསེར་འོད་དམ་པ་ཞེས་བྱ་བར་གྲགས་སོ༔ འཁོར་ནི་ཉན་ཐོས་རྫུ་འཕྲུལ་དང་ལྡན་པ་རྣམས་ཀྱིས་བསྐོར༔ སྡུད་པ་པོ་ནི་འཕགས་པ་ཀུན་དགའ་བོས་བྱས་སོ༔ ཡོན་བདག་ནི་རྒྱལ་པོ་ཛ་བ་རི་དང༔ བྲམ་ཟེ་མོ་དཔུང་བཟང་ཞེས་བྱ་བས་བྱས་སོ༔ ཆོས་ནི་དམ་པའི་ཆོས་འདུལ་བའི་ལུང་བམ་པོ་ལྔ་བརྒྱ་པ་དང༔ དམ་ཆོས་ཤོ་ལོ་ཀ་སྟོང་ཕྲག་བདུན་བརྒྱ་པ་རྣམས་གསུངས་སོ༔ དེར་ལོ་བདུན་དུ་གདུལ་བྱ་ཉན་ཐོས་རྣམས་ཀྱི་གདུང་བ་བཅད་དོ༔ དེ་ནས་སྐྱེས་བུའི་ཚེ་ལོ་སྟོང་གི་དུས་ན༔ དེ་ནས་བྱང་གི་ཕྱོགས་ན༔ སོག་པོ་གཡུའི་སྨིན་མ་ཅན་གྱི་ཡུལ༔ ཆུའི་འོབས་ཀྱིས་བསྐོར་བ་དེ་དག་གི་ཁ་ཁྱེར་ན་ཤིང་ལྗོན་པས་བསྐོར་བ༔ ཕྱོགས་བཞི་ན་ཆོས་ཀྱི་རྒྱལ་པོ་ཆེན་པོ་བཞི་བསླང་བ༔ དེའི་དབུས་ན་རང་བྱུང་མཆོག་གི་མཆོད་རྟེན་བདེ་བྱེད་བརྩེགས་པ་ཞེས་བྱ་བ༔ དེའི་གཡས་ན་བྱང་ཆུབ་ཀྱི་ཤིང་ལོ་མ་དང་འབྲས་བུར་བཅས་པའི་འགྲམ་དུ༔ སྟོན་པའི་མཚན་རྩེ་བས་རོལ་པའི་བློ་གྲོས་ཞེས་བྱ་བར་གྲགས་སོ༔ འཁོར་ནི་ས་བརྒྱད་པའི་བྱང་ཆུབ་སེམས་དཔའ་གློག་གི་འོད་ཟེར་འབྱུང་བ་དང༔ བློ་གྲོས་བཟང་པོ་ལ་སོགས་པས་བསྐོར༔ སྡུད་པ་པོ་ནི་བྱང་ཆུབ་སེམས་དཔའ་ནམ་མཁའི་སྙིང་པོས་མཛད་དོ༔ ཡོན་བདག་ནི་སོག་པོ་སེང་གེའི་གདོང་ཞེས་བྱ་བ་གདོང་སེང་གེ་ལ་སྨིན་མ་གཡུའི་སྨིན་མ་ཡོད་པ༔ ལག་ན་རྨ་བྱའི་རྒྱལ་མཚན་ཐོགས་པ་དང༔ ལྷའི་བུ་མོ་སྣང་བྱེད་མས་བྱས་སོ༔ ཆོས་ནི་ཀུན་བྱེད་རྒྱལ་པོ་ལེའུ་བདུན་ཅུ་རྩ་ལྔ་པ་དང༔ དུར་ཁྲོད་ཁུ་བྱུག་རོལ་པ་ལེའུ་ལྔ་བཅུ་པ་དང༔ སེམས་ལུང་ཆེན་མོ་ལེའུ་བཞི་བཅུ་རྩ་བརྒྱད་པ་དང༔ ཀུན་ཏུ་བཟང་པོ་ཆེ་བ་རང་ལ་གནས་པ་ལེའུ་བཅོ་ལྔ་པ་དང༔ ནམ་མཁའ་ཆེ་ཁ་ས་མུན་ཏནྟྲ་ལེའུ་ཉིས་བརྒྱ་ལྔ་བཅུ་རྩ་དགུ་པ་དང༔ ཆུབ་པ་རོལ་པ་ལེའུ་བརྒྱ་རྩ་བརྒྱད་པ་དང༔ ཡེ་ཤེས་མཆོག་གི་རྒྱུད་ལེའུ་དྲུག་པ་ནི༔ བྱང་ཆུབ་སེམས་དཔའ་སའི་སྙིང་པོ་ལ་དགོངས་པའོ༔ འཁོར་ལོ་གཅོད་པ་དང༔ ཐིག་ལེ་ཕྲ་རྒྱུད་དང༔ འབར་བ་ཆེན་པོ་དང༔ ནོར་བུ་བཀོད་པ་ལ་སོགས་པ་ནི་བྱང་ཆུབ་སེམས་དཔའ་བྱམས་པ་ལ་དགོངས་པའོ༔ དེར་ལོ་བརྒྱ་དང་ཉི་ཤུའི་བར་ལ་བཞུགས་སོ༔ དེ་ནས་སླར་ཚེ་ལོ་ལྔ་བརྒྱའི་དུས་ན༔ ལྷོ་ཕྱོགས་བདེ་ལྡན་ཡིད་འདྲེས་པའི་ཚལ་བྱ་རྒོད་སྤུངས་པའི་རི་ལ་སུམ་ཅུ་རྩ་གསུམ་གྱི་གནས་ནས༔ སངས་རྒྱས་མི་ཕམ་མགོན་པོ་ལ༔ སྐུ་གསུང་ཐུགས་ཀྱི་བརྒྱུད་པ་དངོས་ཀྱིས་དབང་བསྐུར་ནས༔ ནམ་མཁའ་ལ་གླང་པོ་ཆེ་ཐལ་ཀར་གསེར་གྱི་མཆེ་བ་དྲུག་དང་ལྡན་པ་ཞིག་ཏུ་སྤྲུལ་ནས༔ དེ་ཉིད་བྱ་རྒོད་སྤུངས་པའི་རིའི་རྩེ་མོ་ལ་འོད་ཀྱི་ཕུང་པོ་ཞིག་ཏུ་གྱུར༔ དེ་ནས་རྒས་པའི་སྡུག་བསྔལ་ལ་དགོངས་ནས༔ འོད་སྲུངས་བསྒྲེས་པོ་ཞེས་བྱ་བ་ཞིག་ཏུ་སྤྲུལ་ལོ༔ འཁོར་ནི་གོང་གི་ཐུབ་པ་དྲུག་དང ༔ བྲམ་ཟེའི་བུ་མགོན་སེམས་བྱམས་པ་དང་བདུན༔ དགྲ་བཅོམ་པའི་གཟུགས་སུ་སྤྲུལ་ཞིང་ཆོས་ཉན་ཏོ༔ སྡུད་པ་པོ་ནི་ཤཱ་རིའི་བུ་སྐར་མ་འོད་བཟང་པོས་མཛད་དོ༔ ཡོན་བདག་ནི་བྲམ་ཟེ་མཚན་བཟང་པོ་བྱ་བ༔ ལུས་ལ་དར་དཀར་པོའི་ལའུ་གྱོན་པ༔ ལག་ན་ཁྱུང་དང་ཁྲ་ཐོགས་པ་དང༔ དགེ་སློང་མ་པདྨའི་སྤྱན་ཞེས་བྱ་བ༔ མིག་པདྨ་རྒྱས་པ་འདྲ་བས་ཡོན་བདག་བྱས་སོ༔ ཆོས་ནི་འཕགས་པ་འོད་སྲུངས་པ་ལ་དགོངས་ཏེ༔ མདོ་སྡེ་ཤོ་ལོ་ཀ་འབུམ་ཕྲག་ཉེར་ལྔ་གསུངས༔ ཤཱ་རིའི་བུ་ལ་དགོངས་ཏེ༔ ཨ་ཏི་བཀོད་པ་ཆེན་པོ་འབུམ་ཕྲག་དྲུག་ཅུ་པ་གསུངས་ཏེ༔ དེར་ལོ་བདུན་ཅུ་རྩ་ལྔ་བཞུགས་ནས༔ ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་ལོ་བདུན་མཛད༔ དེ་ནས་བྱ་རྒོད་སྤུངས་པའི་བྱང་ཤར་གྱི་མཚམས་ན༔ རྡོ་རྗེ་གདན་དྲུང་བྱང་ཆུབ་ཀྱི་ཤིང་གནས་པ་ཞེས་བྱ་བ༔ བྱང་ཆུབ་ཀྱི་ཤིང་ལོ་མ་དང་འདབ་མ་དང་འབྲས་བུར་བཅས་པ་ལ་སྐུའི་རྒྱབ་གཏད༔ རྡོ་རྗེ་སྐྱིལ་ཀྲུང་དུ་བཞུགས༔ ཕྱག་མཉམ་པར་བཞག༔ སྤྱན་ཤངས་ཀྱི་རྩེ་མོ་ལ་གཏད༔ ཞལ་ཤར་དུ་གཟིགས༔ སྲོད་ལ་དཔའ་བར་འགྲོ་བའི་ཏིང་ངེ་འཛིན་ལ་མཉམ་པར་བཞག་ནས༔ བདུད་དཔུང་དང་བཅས་པ་བཏུལ༔ ནམ་ཕྱེད་ན་རྡོ་རྗེ་ལྟ་བུའི་ཏིང་ལ་མཉམ་པར་བཞག༔ ཐོ་རངས་སྐྱ་རེངས་དང་པོ་ཤར་བ་ལ༔ སྟོན་པ་ཉིད་མྱ་ངན་ལས་འདའ་བའི་ཚུལ་བསྟན་ཏེ༔ ནམ་ལངས་པ་ལ་ཟག་བཅས་མི་སྣང་བར་ནམ་མཁའ་འོད་ཕུང་ལ་ལམ་ཕྱུང་སྟེ་གཤེགས་སོ༔ དེ་ནས་བྲམ་ཟེ་བརྒྱལ་ཞིང་ས་ལ་འགྱེལ་ཏེ་བརྒྱལ་སངས་པ་ན་གདུང་བའི་སྨྲེ་སྔགས་ཕྱུང་བ༔ ཀྱེ་མ་ཀྱི་ཧུད་ཀྱེ་མ༔ སྟོན་པ་རྡོ་རྗེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་ལན་གསུམ་བརྗོད་པས༔ ནམ་མཁའ་འོད་ཕུང་གི་དཀྱིལ་ནས༔ ཕྱག་གཡས་པ་གསེར་གྱི་མདོག་ཅན་བརྐྱང་སྟེ༔ སྒྲ་ཆེན་པོ་རབ་ཏུ་འུར་འུར་དང༔ ཆེམ་ཆེམ་དང༔ ཐུག་ཐུག་དང༔ རབ་ཏུ་གསེང་བ་རྣམས་བྱུང་བ་དང༔ ས་གཡོ་བ་ལ་སོགས་པ་རྣམས་ཀྱང་བྱུང་ངོ༔ དེ་ནས་ལག་པའི་མཐིལ་དུ༔ བདེ་བར་གཤེགས་པའི་གསུང་གི་སྤྲུལ་པ་བསྟན་པའི་བཙས་སམ་ས་བོན་བྱིན་བརླབས་ལས་བྱུང་བའི་ཡི་གེ་དང༔ འདས་རྗེས་ཐ་མ་བབས་པས༔ དེ་ཉིད་ཀྱང་དགའ་རབ་རྡོ་རྗེ་ཞེས་བྱ་སྟེ༔ བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟར་གྱུར་ཏེ༔ སྟོན་པ་སངས་རྒྱས་བཅོམ་ལྡན་འདས་ཉིད་དང་དབྱེར་མི་ཕྱེད་པར་གྱུར་ཏོ༔ དེ་ནས་ཚེ་ལོ་སུམ་བརྒྱ་པའི་དུས་ན༔ སླར་འཛམ་བུའི་གླིང་གི་དབུས་ན༔ རྡོ་རྗེ་གདན་ཞེས་བྱ་བ༔ ཕྱོགས་ཀུན་ནས་རིན་པོ་ཆེའི་ལྗོན་ཤིང་མཛེས་པས་བསྐོར་བ༔ རང་བྱུང་གི་མཆོད་རྟེན་ཆེན་པོ༔ ནམ་མཁའི་སྤྲིན་འཁྲིགས་པ་ལྟ་བུས་རྣམ་པར་གཏིབས་པ༔ ཟུར་རྣམས་ན་ཤིང་ལྗོན་པ་ཡོངས་སུ་རྒྱས་པ༔ སྒོ་བཞིར་རིན་པོ་ཆེའི་ཁྲི་རྐང་བཞིས་བརྒྱན་པ་ན༔ མཁས་བཙུན་རྣམས་འབྱུང་བའི་གནས་དེ་ན༔ རིག་བྱེད་མཐའ་དག་ལ་མཁས་པ་བྲམ་ཟེ་དགེ་བའི་ལེགས་ལྡན་ཞེས་བྱ་བ་དང༔ མཁའ་འགྲོ་མ་དཔལ་བྱིན་ཞེས་བྱ་བའི་བུར་སྐྱེས་ནས༔ སྟོན་པ་ཡབ་མངོན་རྫོགས་ཀྱི་རྒྱལ་པོ་ཞེས་བྱ་བར་སྤྲུལ་ནས་བྱོན༔ འཁོར་ནི་རིགས་གསུམ་གྱི་མགོན་པོས་བསྐོར༔ སྡུད་པ་པོ་ནི་ལྷ་སྦྱིན་ལག་བཟང་གིས་བྱས༔ ཡོན་བདག་ནི་ཚོང་དཔོན་གྱི་བུ་ནོར་བཟང་གིས་བྱས༔ ཆོས་ནི་ངེས་དོན་གྱི་བཀའ་ཤོ་ལོ་ཀ་སྟོང་ཕྲག་ལྔ་གསུངས༔ དེར་ལོ་ཉེར་ལྔ་བཞུགས་ནས༔ གདུལ་བྱ་ལས་མ་དག་པ་རྣམས་ལ་དགོངས་པའི་ཕྱིར༔ སྐྱེ་རྒ་ན་འཆིའི་ཆུ་བོ་བཞིའི་ཚུལ་བསྟན་ནོ༔ དེ་ནས་ཚེ་ལོ་བརྒྱ་པའི་དུས་ན༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན༔ མགོན་མེད་ཟས་སྦྱིན་གྱི་ཀུན་དགའ་ར་བ་ཞེས་བྱ་བ༔ ཟས་ཀྱི་ལོངས་སྤྱོད་རབ་ཏུ་ཆེ་བ༔ འོད་ཀྱི་བྱིན་བརླབས་འབྱུང་བ༔ སྨད་འཚོང་མའི་བུར་སྐུ་འཁྲུངས་ཏེ༔ ང་ནི་བསྟན་པའི་གཙོ་བོ་ཤཱཀྱ་ཐུབ་པའོ་ཞེས་བརྗོད་པས༔ ཤཱཀྱ་ཐུབ་པ་ཞེས་མཚན༔ འཁོར་ནི་དགེ་སློང་པ་མ་དང༔ དགེ་བསྙེན་ཕ་མ་གཉིས་རྣམས་ཀྱིས་བསྐོར༔ ཆོས་ནི་བདེན་པ་བཞིའི་ཆོས་ཀྱི་འཁོར་ལོ་ལན་བཅུ་གཉིས་སུ་བསྐོར་རོ༔ དེ་ནས་གདུལ་བྱ་སེམས་ཅན་རྣམས་ལ་སྐུ་མི་སྣང་བར་མཛད་དེ༔ སངས་རྒྱས་ཀྱི་སྐུའི་བསྟན་པ་ཡོངས་སུ་རྫོགས་པར་མཛད་དོ༔ དེ་ལྟར་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་འཆང་ཆེན་པོ་དེས༔ གདུལ་བྱ་བསམ་གྱིས་མི་ཁྱབ་པའི་དོན་དུ༔ འདུལ་བྱེད་ཀྱི་སྐུ་ཡང་དེ་སྙེད་དུ་སྤྲུལ་པ་ནི༔ འཁོར་རྣམས་ཀྱི་ཕུང་པོ་ལྔ་དག་པར་བྱེད་པའི་དོན་དུ༔ ཕུན་སུམ་ཚོགས་པ་ལྔ་དང་ལྡན་པ་ཉིད་ཡིན་ན༔ དེ་ཡང་སྟོན་པ་ཕུན་སུམ་ཚོགས་པ་རྡོ་རྗེ་འཆང་ཆེན་པོ་དེས༔ ཡུལ་དགའ་ལྡན་བརྩེགས་པར༔ གནས་ཕུན་ཚོགས་པ་མེ་ཏོག་པདྨའི་སྟེང་དུ༔ སྟོན་པ་ཁྱེའུ་སྣང་བ་བསམ་གྱིས་མི་ཁྱབ་པས༔ འཁོར་སངས་རྒྱས་སྟོང་རྩ་གཉིས་ལ༔ བསྟན་པ་རྒྱུད་ཐམས་ཅད་སྔ་བ༔ བསྟན་པ་ཀུན་གྱི་རྩ་བ་སྒྲ་ཐལ་འགྱུར་གསུངས༔ རྒྱུད་ཀྱི་སྡུད་པ་པོ་ནི་ལྷའི་བུ་དགའ་བྱེད་དབང་ཕྱུག་གིས་མཛད༔ གྲོགས་ནི་ལྷའི་བུ་ཉི་མ་རབ་ཏུ་སྣང་བྱེད་ལ་སོགས་པ༔ དུས་ཚེ་ལོ་དཔག་ཏུ་མེད་པའི་དུས་ནའོ༔ གཉིས་པ་གནས་མི་མཇེད་འཇིག་རྟེན་དུ༔ སྟོན་པ་ཁྱེའུ་འོད་མི་འཁྲུགས་པ་འཁོར་མཁའ་འགྲོ་མ་འབུམ་ཕྲག་གཉིས༔ བསྟན་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ༔ ཚུལ་ལམ་ཐབས་འབྱུང་བ་ཚ་གྲང་གི་རང་སྒྲ་ལས༔ ཁྱབ་འཇུག་ཟུར་ཕུད་ལྔ་པའི་སྐད་ཀྱིས་གསུངས༔ དུས་ཚེ་ལོ་བྱེ་བ་གཅིག་ཐུབ་པའི་དུས་ནའོ༔ ཡང་གསུམ་པ་གནས་དྲོད་གཤེར་འདུས་པ་འོད་ཀྱི་ཕུང་པོར༔ སྟོན་པ་འཇམ་དཔལ་འཇིགས་པ་སྐྱོབ་པ༔ འཁོར་བྱང་ཆུབ་སེམས་དཔའ་འབུམ་ཕྲག་དྲུག༔ བསྟན་པ་འཁོར་བ་དོང་སྤྲུག་དང༔ རྨ་བྱ་མཇིང་བསྣོལ་དང༔ དཔལ་འབྱུང་བཞི་ཟད་པའི་རྒྱུད༔ བར་སྣང་གི་ཁམས་སུ་བབས་ནས༔ རླུང་གི་སྒྲ་མར་ཤ་ཤུ་ལས་དྲངས་ཏེ༔ མཁའ་ལྡིང་ཟུར་ཕུད་གསུམ་པའི་སྐད་ལ་བསྒྱུར་ཏེ་གསུངས་སོ༔ དུས་ཚེ་ལོ་འབུམ་པའི་དུས་ནའོ༔ ཡང་བཞི་པ་གནས་འདོད་ཆགས་འབྱུང་བ་མངལ་དུ་སྣང་བར༔ སྟོན་པ་གཞོན་ནུ་རོལ་པ་རྣམ་པར་རྩེ་བ༔ འཁོར་གནོད་སྦྱིན་དང༔ བྲག་སྲིན་སྟོང་ཕྲག་ལྔ་ལ༔ བསྟན་པ་སེམས་སྡེའི་རྒྱུད་ལྔ་དང༔ ཡན་ལག་གི་རྒྱུད་དྲུག་སྟེ་བཅུ་གཅིག་གསུང༔ དུས་ཚེ་ལོ་བརྒྱད་ཁྲིའི་དུས་ནའོ༔ ཡང་ལྔ་པ་གནས་སྨན་འཚོ་བྱེད་གཞོན་ནུའི་ལྡུམ་རར༔ སྟོན་པ་དྲུག་པ་རྡོ་རྗེ་འཆང་གིས༔ འཁོར་སངས་རྒྱས་རབས་བདུན་ལ༔ བསྟན་པ་ཕ་རོལ་ཏུ་ཕྱིན་པ་དྲུག་ལ་སོགས་པ་དཔག་ཏུ་མེད་པ་གསུངས༔ དུས་ཚེ་ལོ་བདུན་ཁྲིའི་དུས་ནའོ༔ ཡང་དྲུག་པ་གནས་གསང་ཆེན་རོལ་པའི་དུར་ཁྲོད་མེ་རི་འབར་བར༔ སྟོན་པ་གཞོན་ནུ་དཔའ་བོ་སྟོབས་ལྡན་ཆེན་པོས་འཁོར་བྱང་ཆུབ་སེམས་དཔའི་སྤྲིན་གྱི་ཤུགས་ཅན་བདུན་པ༔ ཆོས་ཕའི་རྒྱུད་དང་མའི་རྒྱུད་ལ་སོགས་པའི་རྒྱུད་སྡེ་དུ་མ་གསུངས་སོ༔ དུས་ཚེ་ལོ་དྲུག་ཁྲིའི་དུས་ནའོ༔ ཡང་བདུན་པ་གནས་སྲིན་པོ་རུ་ལུའི་སྒྲ་དང་ལྡན་པར༔ སྟོན་པ་དྲང་སྲོང་ཁྲོས་པའི་རྒྱལ་པོས༔ འཁོར་སྲིན་པོ་བྱེ་བ་གཅིག་ལ༔ ཆོས་རགས་པ་འདུལ་བའི་རྒྱུད་བཅུ་ལ་སོགས་པ་བསྟན་ཏེ༔ དུས་ཚེ་ལོ་ཁྲི་པའི་དུས་ནའོ༔ ཡང་བརྒྱད་པ་གནས་བྱ་རྒོད་ཕུང་པོའི་རྒྱལ་པོའི་ཁབ་ཏུ༔ སྟོན་པ་དགྲ་བཅོམ་པ་གསེར་འོད་དམ་པས༔ འཁོར་འཕགས་པ་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་ལ༔ ཆོས་དམ་པའི་ཆོས་འདུལ་བ་ཁྲི་ཕྲག་དཔག་ཏུ་མེད་པར་གསུངས་སོ༔ དུས་ཚེ་ལོ་ལྔ་སྟོང་པའི་དུས་ནའོ༔ ཡང་དགུ་པ་གནས་སོག་པོ་གཡུའི་སྨིན་མ་ཅན་བྱང་ཆུབ་ཀྱི་ཤིང་རྣམ་པར་རྒྱལ་བའི་ཁང་པར༔ སྟོན་པ་རྩེ་བས་རོལ་པའི་བློ་གྲོས་ཀྱིས༔ འཁོར་ས་བརྒྱད་པའི་བྱང་ཆུབ་སེམས་དཔའ་རྣམས་ལ༔ ཆོས་འཕྲ་རྒྱུད་བདུན་ལ་སོགས་པ་གསུངས་སོ༔ དུས་ཚེ་ལོ་སྟོང་པའི་དུས་ནའོ༔ ཡང་བཅུ་པ་གནས་སླར་བྱ་རྒོད་སྤུངས་པར༔ སྟོན་པ་འོད་སྲུངས་བསྒྲེས་པོས༔ འཁོར་ཚེ་དང་ལྡན་པ་དགྲ་བཅོམ་པ་བདུན་ལ༔ དམ་པའི་ཆོས་མདོ་སྡེ་དང༔ སྔགས་ཀྲི་ཡ་དང༔ ལུང་ཨ་ནུ་ཡོ་གའི་ཆོས་ཁྲི་ཕྲག་ཕྱེད་དང་བརྒྱད་ལ་སོགས་པ་གསུངས་སོ༔ དུས་ཚེ་ལོ་ལྔ་བརྒྱའི་དུས་ནའོ༔ ཡང་བཅུ་གཅིག་པ་གནས་གདན་བྱང་ཆུབ་འབྱུང་བར༔ སྟོན་པ་ཡབ་མངོན་རྫོགས་རྒྱལ་པོས༔ འཁོར་རིགས་གསུམ་མགོན་པོ་ལ༔ ཆོས་ངེས་པའི་དོན་འབའ་ཞིག་ཏུ་གསུངས་སོ༔ དུས་ཚེ་ལོ་སུམ་བརྒྱ་པའི་དུས་ནའོ༔ ཡང་བཅུ་གཉིས་པ་གནས་ཕུན་སུམ་ཚོགས་པ་མགོན་མེད་ཟས་སྦྱིན་གྱི་ཀུན་དགའ་ར་བར༔ སྟོན་པ་ཕུན་སུམ་ཚོགས་པ་ཤཱཀྱ་ཐུབ་པས༔ འཁོར་རྣམ་པ་བཞི་ལ༔ ཆོས་ཕུན་སུམ་ཚོགས་པ་བདེན་པ་བཞིའི་ཆོས་ཀྱི་འཁོར་ལོ་ལན་བཅུ་གཉིས་སུ་བསྐོར་ཏེ༔ དེ་ཡང་མི་རྟག་པ་དང༔ སྡུག་བསྔལ་བ་དང༔ སྟོང་པ་དང༔ བདག་མེད་པ་དང༔ ཀུན་འབྱུང་དང༔ རྒྱུ་རྐྱེན་གྱི་རྣམ་པ༔ ལམ༔ རིག་པ༔ འགོག་པ༔ ཞི་བ༔ གྱ་ནོམ་པ་སྟེ༔ བཅུ་གཉིས་སུ་བསྐོར་རོ༔ དུས་ཚེ་ལོ་བརྒྱ་པའི་དུས་ནའོ༔ དེ་ལྟར་གནས་བཅུ་གཉིས་སུ་བྱོན་པས་ན༔ ཕུན་སུམ་ཚོགས་པ་ཆ་ལྔར་བསྟན་པས༔ བགྲངས་ན་ཆོས་ཀྱི་རྣམ་གྲངས་དྲུག་ཅུ་ཐམ་པར་ཡོད་པ་ནི༔ བསྐལ་པའི་ཡར་འཕེལ༔ མར་འགྲིབ་དྲུག་ཅུ་དག་པར་བྱ་ལ་དགོངས་པའོ༔ དེ་ཡང་བསྟན་པའི་གཙོ་བོའམ༔ བསྟན་པ་ངེས་པར་སྤྲུལ་པའི་སྐུ་གཅིག་ལ༔ ཆོས་ཀྱི་རྣམ་པ་དགུ་བཅུ་རྩ་དྲུག་ཚོགས་དགོས་སོ༔ དེ་དག་དང་ལྡན་པ་ནི་བདག་ཅེས་བྱའོ༔ གལ་ཏེ་མི་ལྡན་པའི༔ སངས་རྒྱས་འཇིག་རྟེན་དུ་བྱུང་ན་ཁོལ་བུའི་བསྟན་པ་ཞེས་བྱའོ༔ དེ་དག་ཀྱང་སྔོན་དུ་སེམས་བསྐྱེད་རྫོགས་པར་བྱས་པ་ལས་བྱུང་བའོ༔ མཛད་པའི་འཕྲིན་ལས་ཀྱི་སྒོ་ནས་སངས་རྒྱས་པ་ནི༔ སྐུའི་མཛད་པ་བཅུ་གཉིས་ནི༔ གནས་མི་འདྲ་བ་བཅུ་གཉིས་སུ༔ སྟོན་པ་ཉིད་ཀྱི་སྐུ་མདོག་དང་ཕྱག་མཚན་མི་འདྲ་བར་སྤྲུལ་ནས་བྱོན་ཏེ༔ གདུལ་བྱའི་རིགས་མི་འདྲ་བ་བཅུ་གཉིས་ཀྱི་ཚོགས་རྣམས་ཀྱི་དོན་མཛད་པས་ན༔ མཛད་པ་ཞེས་སྐུའི་གཟི་མདངས་ལ་བརྟེན་ནས༔ ཉིད་ཀྱི་སྐུའི་བསྟན་པ་འཕེལ་བའི་དོན་དུ་བྱུང་བའོ༔ ཡང་སྐུ་དེ་དག་གི་དུས་སུ་གསུང་ཆོས་ཀྱི་འཁོར་ལོ་མི་འདྲ་བ་བཅུ་གཉིས་སུ་གསུངས་པས༔ འགྲོ་བའི་ངག་གི་བཅིངས་པ་མི་འདྲ་བ་བཅུ་གཉིས་གྲོལ་བར་བྱེད་པས་ན༔ མཛད་པ་ཞེས་གསུང་གི་བསྟན་པ་འཕེལ་བར་བྱེད་པའི་དོན་དུ་བྱུང་བའོ༔ གསུང་དེ་ཙམ་ཞིག་གི་ཚེ་ན་ཐུགས་ཀྱི་དགོངས་པ་མི་འདྲ་བ་བཅུ་གཉིས་ཀྱིས༔ འགྲོ་བའི་རིགས་མི་འདྲ་བ་རྣམས་ཀྱི་སེམས་ཀྱི་རྟོག་པ་བཅུ་གཉིས་ལས་གྲོལ་བར་མཛད་པས་ན༔ མཛད་པ་ཞེས་ཐུགས་ཀྱི་བསྟན་པ་འཕེལ་བའི་དོན་དུ་བྱུང་བའོ༔ དེ་ལྟར་བྱུང་བས་འགྲོ་བའི་ལུས་ངག་ཡིད་གསུམ་གྱི་སྡིག་པ་དག་བྱེད་དུ་ཡང་བྱུང་བའོ༔ དེ་ཡང་སྐུའི་མཛད་པ་མཛད་ན༔ སངས་རྒྱས་ཀྱི་སྐུ་གདུལ་བྱ་ལ་མི་སྣང་ལ༔ གསུང་མདོ་སྡེ་ཡན་ལག་ཏུ་བསྟན་པ་ལ་ཡིད་ཆེས་པ་མི་འབྱུང༔ གསུང་གི་མཛད་པ་མ་མཛད་པ་ལ་སྒོམ་སྒྲུབ་བཟླས་པ འི་ཡོན་ཏན་མཐར་མི་ཕྱིན༔ ཐུགས་ཀྱི་མཛད་པ་མཛད་ན༔ ཏིང་ངེ་འཛིན་བསྒོམས་པས་འབྲས་བུ་འགྲུབ་པར་མི་འགྱུར་རོ༔ དེ་ལྟར་མཛད་པ་དངོས་སྐུའི་མཛད་པ་བཅུ་གཉིས་ནི༔ ཐུན་མོང་མི་ཕམ་མགོན་ལ་རྒྱལ་སྲས་དམ་པར་དབང་བསྐུར་ནས༔ ཐ་མ་མངོན་པར་རྫོགས་པར་སངས་རྒྱས་པའི་ཚུལ་བསྟན་པ་ཡན་ཆད་གཞན་དང་མཐུན༔ གསུང་གི་གནས་བཅུ་གཉིས་སུ་བྱུང་བའོ༔ ཐུགས་ནི་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བཅུ་གཉིས་སུ་བྱུང་བའོ༔ དེའི་ཕྱིར་ན་ངོ་བོ་སྐུར་རྒྱས་པ་ནི་སྐུའི་མཛད་པར་བྱུང༔ མཁྱེན་པའི་ཡེ་ཤེས་སུ་རྒྱས་པ་ནི་གསུང་གི་མཛད་པར་བྱུང༔ གནས་པ་ཏིང་ངེ་འཛིན་དུ་རྒྱས་པས་ཐུགས་ཀྱི་མཛད་པར་བྱུང་ངོ༔ དེ་ཡང་བཀོད་པ་ཆེན་པོ་ལས༔ ཕྱི་ལ་སོགས་པ་དགུ་ཡིས་ནི༔ མཛད་པའི་བྱེ་བྲག་དགོངས་པར་འགྱུར་རོ༔ ཞེས་པ་ནས༔ མཛད་པའི་དགོངས་པ་ནི༔ སྐུའི་ཕྱི་ནང་གསང་བ་གསུམ༔ གསུང་ལ་ཕྱི་ནང་གསང་བ་གསུམ༔ ཐུགས་ལ་ཕྱི་ནང་གསང་བ་གསུམ་སྟེ་དགུར་བྱས་པས༔ སྐུའི་ཕྱིའི་མཛད་པ་བཞི་ནི༔ སྐྱེ་རྒ་ན་འཆིའི་སྡུག་བསྔལ་མཐོང་བ་ལ་བརྟེན་ནས༔ ཁྱིམ་ནས་ཁྱིམ་མེད་པར་རབ་ཏུ་བྱུང༔ ཟས་བསོད་སྙོམས་གསོལ་བ་དང༔ འཕོང་དང་སྒྱུ་རྩལ་འགྲན་པ་རྣམས་སོ༔ ནང་གི་འཁོར་དང་ལོངས་སྤྱོད་ལ་དགོངས་ནས༔ བདུད་བཞི་ཕམ་པར་མཛད་པ་དང༔ ཉིད་ཀྱི་སྐུ་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དྲུག་ཅུ་བྱུང་བ་དང༔ བདུད་ཀྱིས་མཚོན་ཆའི་ཆར་ཕབ་པས་མེ་ཏོག་གི་གདུགས་སུ་གྱུར་པ་དང༔ རྟ་མཆོག་ཤིང་རྟ་ལ་སོགས་སླར་དོར་བ་རྣམས་སོ༔ གསང་བའི་བཞི་ནི༔ བྱ་བའི་ཏིང་ངེ་འཛིན་གྲོལ་བ་ལ་དགོངས་ནས༔ ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་ལོ་བདུན་མཛད་པ་དང ༔ རི་བོ་ཆེན་པོ་གསེར་ལྡན་དུ་ཏིང་ངེ་འཛིན་འབུམ་ཕྲག་བརྒྱ་ཉི་ཤུ་སྐད་ཅིག་ལ་སྐྱེས་པ་དང༔ ཁྱད་པར་དུ་རིན་པོ་ཆེ་ཟ་མ་ཏོག་ཅེས་བྱ་བའི་ཏིང་ངེ་འཛིན་ལ་དུས་ཐམས་ཅད་དུ་སྙོམས་པར་བཞུགས་པ་དང༔ སྐུ་མངོན་པར་མི་སྣང་བའི་དུས་ན༔ ནམ་ཕྱེད་ན་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་སོ༔ དེ་དག་ནི་སངས་རྒྱས་ཀྱི་སྐུའི་ཡོན་ཏན་ནོ༔ གསུང་གི་ཕྱིའི་མཛད་པ་བཞི་ནི༔ ལུང་དུ་བསྟན་པ་ལ་སོགས་པ་བཞི༔ ནང་གི་བཞི་ནི༔ སྐྱེས་རབས་ཀྱིས་ལ་སོགས་པ་བཞི༔ གསང་བའི་བཞི་ནི༔ ཆེད་དུ་བརྗོད་པ་ལ་སོགས་པ་བཞིའོ༔ དེ་དག་ནི་གསུང་གི་ཁྱད་པར་གྱི་འདུས་པའི་ཁྱད་པར་ལས་བྱུང་བའོ༔ ཐུགས་ཀྱི་ཕྱིའི་བཞི་ནི༔ དཔའ་བར་འགྲོ་བའི་དང༔ རིན་པོ་ཆེ་རྒྱལ་མཚན་ཏོག་གི་དང༔ རྣམ་པར་རོལ་པའི་སྙོམས་པར་ཞུགས་པ་དང༔ སངས་རྒྱས་ཟ་མ་ཏོག་གི་ཏིང་ངེ་འཛིན་ཏོ༔ ནང་གི་བཞི་ནི༔ ཡུལ་ཀུན་ལ་འཇུག་པའི་དང༔ ཁྱད་པར་མངོན་པར་སྣང་བའི་དང༔ གཙུག་གི་ནོར་བུའི་དང༔ རྒྱལ་མཚན་རྩེ་མོ་ཡོངས་སུ་བཀོད་པའི་ཏིང་ངེ་འཛིན་ཏོ༔ གསང་བའི་བཞི་ནི༔ འགྱུ་བ་རྣམ་པར་དག་པའི་དང༔ ཟབ་མོ་སྣང་བའི་དང༔ རིན་པོ་ཆེ་སྒྲོན་མའི་དང༔ མཆོག་ཏུ་ལེགས་པ་བརྗོད་པའི་ཏིང་ངེ་འཛིན་ཏོ༔ དེ་དག་གི་དགོས་པ་ནི༔ སྐུའི་མཛད་པ་བཅུ་གཉིས་མེད་ན༔ སྐུ་མཚན་བཟང་པོ་སུམ་ཅུ་རྩ་གཉིས་དང༔ དཔེ་བྱད་བཟང་པོ་བརྒྱད་ཅུར་མི་སྨིན་ལ༔ གསུང་གི་མེད་ན༔ མཚན་མ་མེད་པའི་ཆོས་ལ་ལོངས་སྤྱོད་མི་ནུས༔ ཐུགས་ཀྱི་མེད་ན༔ ཏིང་ངེ་འཛིན་རྣམས་ལ་དབང་མི་ཐོབ་བོ༔ དེ་ཡང་གནས་པའི་ཏིང་ངེ་འཛིན་མེད་ན་ནམ་ཡང་མཁྱེན་པའི་ཡེ་ཤེས་སུ་རྒྱས་མི་སྲིད་དོ༔ དེ་ལྟར་བཅུ་གཉིས་སུ་ངེས་པ་ནི༔ ཕྱིའི་སྐུའི་དགོས་པ་ནི༔ འབྱུང་བ་སས་བཅིངས་ནུས་པ་རང་རྒྱུད་དུ་འཛིན་པ་ལས་མི་གྲོལ་བས་ནའོ༔ དེ་བཞིན་དུ་ཆུས་དང༔ མེས་དང༔ རླུང་གིས་བཅིངས་པ་དབུགས་རང་རྒྱུད་དུ་འཛིན་པ་ལས་མི་གྲོལ་བས་ནའོ༔ ནང་གི་བཞི་ནི༔ འབྱུང་བ་སའི་བསྟན་པ་འཇིག་པ་དང༔ སའི་བྱེར་བ་ཁུངས་སུ་འཇུག་པ་དང༔ སའི་སྙོམས་པས་འགྲོ་བ་བསྐྱེད་པའོ༔ དེ་བཞིན་དུ་ལྷག་མ་གསུམ་ཡང་ཤེས་སོ༔ གསང་བའི་བཞི་ནི༔ ལུས་ཀྱི་རྡོས་པ་ཟད་པ་དང༔ ངག་གི་བརྗོད་པ་དག་པ་དང༔ ཡིད་ཀྱི་འགྱུ་བ་དག་པ་དང༔ སེམས་ཀྱི་རྟོག་པ་དག་པའོ༔ གསུང་གི་ཕྱིའི་བཞི་ནི༔ ཕུང་པོའི་བདུད་གཟུགས་ཅན་མ་ཡིན་པས་དག་པ་དང༔ ཉོན་མོངས་པའི་བདུད་འདོད་པ་དང་ངར་འཛིན་མེད་པས་དག་པ་དང༔ ལྷའི་བུའི་བདུད་ཞེན་ཆགས་མེད་པས་དག་པ་དང༔ འཆི་བདག་གི་བདུད་ཆོས་ཉིད་སྐྱེ་བ་མེད་པས་དག་པའོ༔ ནང་གི་བཞི་ནི༔ ལུས་ངག་ཡིད་མ་བཅོས་པས་འདུལ་བ་རྣམ་པར་དག་པ་བརྗོད་མེད་པས་མདོ་སྡེ་རྣམ་པར་དག་པ༔ སེམས་རང་ས་ན་གསལ་བས་མངོན་པར་དག་པ༔ ཕྱོགས་ཀུན་ཏུ་ཤར་བས་རིགས་འཛིན་གྱི་སྡེ་སྣོད་རྣམ་པར་དག་པའོ༔ གསང་བའི་བཞི་ནི༔ མུར་ཐུག་པ་རྣམ་པར་དག་པས་འཇིག་རྟེན་ལས་གྲོལ༔ མུ་སྟེགས་རྣམ་པར་དག་པས་བདག་མེད་ཀྱི་དོན་ལ་གནས༔ ཕྱལ་བ་རྣམ་པར་དག་པས་འབྲས་བུ་མངོན་པར་འབྱིན༔ རྒྱང་འཕེན་པ་རྣམ་པར་དག་པས་ལས་རྒྱུ་འབྲས་ལ་ཡིད་ཆེས༔ གསང་བའི་ནི༔ ལྟ་བ་ལོག་པ་དག་པས་སྐུ་གསུམ་ཚད་དུ་ཕྱིན༔ སྒོམ་པ་ལོག་པ་དག་པས་མཉམ་རྗེས་ཟུང་དུ་འབྲེལ༔ སྤྱོད་པ་ལོག་པ་དག་པས་ལམ་ཡང་དག་པ་དང་ལྡན༔ འབྲས་བུ་ལོག་པ་དག་པས་སྐུ་གསུམ་ལམ་དུ་སྣང་བའོ༔ ཐུགས་ཀྱི་ཕྱིའི་བཞི་ནི༔ གཞི་ལ་ཕྱིན་ཅི་ལོག་ཏུ་འཛིན་པའི་གཅེར་བུ་བ་རྣམ་པར་དག་པས༔ གཞི་ནས་ཡེ་གྲོལ༔ ལམ་ལ་ཕྱིན་ཅི་ལོག་ཏུ་ལྟ་བའི་རྒྱང་འཕེན་པ་རྣམ་པར་དག་པས༔ མ་བཅོས་རང་གྲོལ༔ སྣང་བ་ལ་ཕྱིན་ཅི་ལོག་ཏུ་ལྟ་བའི་སེར་སྐྱ་བ་རྣམ་པར་དག་པས༔ གཅེར་བཞག་གཅེར་གྲོལ༔ འབྲས་བུ་ལ་ཕྱིན་ཅི་ལོག་ཏུ་ལྟ་བའི་རིགས་བྱེད་གསང་བ་དག་པས༔ རང་སྣང་ཡོངས་གྲོལ་ལོ༔ ནང་གི་ནི༔ ཟས་ལ་ཞེན་པ་ཆོད་པས༔ ཁམ་གྱི་ཟས་བདག་ཏུ་མེད༔ གོས་ཀྱི་ཞེན་པ་ཆོད་པས༔ གཅེར་བུ་བསམ་གཏན་གྱི་ཐུན་ལ་སྤྱོད༔ རྨི་ལམ་གྱི་ཞེན་པ་ཆོད་པས༔ བག་ཆགས་ཀྱི་མཐའ་སྟོངས་པའི་ཐུན་ལ་སྤྱོད༔ བག་ཆགས་ཀྱི་ཞེན་པ་ཆོད་པས༔ ལས་དང་རྣམ་པར་སྨིན་པའི་མཐའ་སྟོངས་སོ༔ གསང་བའི་ནི༔ སྣང་བ་རང་སྣང་རང་གྲོལ་དུ་ཤེས་པས༔ སྤྲུལ་པ་སྐུའི་འབྲས་བུ་ཐོབ༔ འགྱུ་བ་རང་སྣང་རང་གྲོལ་བས༔ ལོངས་སྐུའི་མཁྱེན་པ་ཡེ་ཤེས་རྫོགས༔ གནས་པ་རང་ཐོག་ཏུ་གྲོལ་བས༔ ཆོས་སྐུའི་མཁྱེན་པ་མ་ལུས་པར་རྫོགས༔ སྣང་སྟོང་གཉིས་མེད་དུ་གྲོལ་བས༔ ངོ་བོ་ཉིད་ཀྱི་སྐུའི་མཁྱེན་པ་ཡོངས་སུ་རྫོགས་པ་སྟེ༔ དེས་ན་ཕྱི་རོལ་པ་དང༔ ནང་པའི་སྟོན་པའི་ཁྱད་པར་རོ༔ དེ་ལྟར་དུས་གསུམ་སངས་རྒྱས་དགོངས་པས་བརྒྱུད་པ་ནི༔ བྱིན་གྱིས་བརླབས་ཀྱིས་བརྒྱུད་པ་ཞེས་བྱ་སྟེ༔ འདས་པ་དང༔ མ་འོས་པ་དང༔ ད་ལྟར་བཞུགས་པའི་སངས་རྒྱས་ཐམས་ཅད་ཀྱི་རང་བཞིན་རྣམ་དག་གི་བྱིན་བརླབས་སོ༔ དེ་ཡང་བརྗོད་བྱའི་ཚིག་ལ་མ་བརྟེན་པར༔ ཆོས་ཉིད་ཀྱི་རང་སྒྲ་ལ་བརྟེན་ནས་རྟོགས་ཤིང་ཁོང་དུ་ཆུད་པའོ༔ དེ་ཡང་དུས་ནི་མི་འགྱུར་བ་ལ་བྱ༔ གསུམ་ནི་གྲངས༔ སངས་པ་ནི་ལས་དང་ཉོན་མོངས་པ་དང ༔ ཤེས་བྱའི་སྒྲིབ་པ་མེད་པ་ལ༔ རྒྱས་པ་ནི་ངོ་བོ་སྐུར་རྒྱས་པས་སྐུ་གསུམ་འདུ་འབྲལ་མེད༔ མཁྱེན་པ་ཡེ་ཤེས་གསུམ་ལས་མི་འདའ༔ གནས་པ་ཏིང་ངེ་འཛིན་དུ་རྒྱས་པས༔ དུས་ཐམས་ཅད་རྡོ་རྗེ་ལྟ་བུའི་ཏིང་ངེ་འཛིན་ལས་མི་ཕྱེད༔ མཛད་པ་ཕྲིན་ལས་སུ་རྒྱས་པས༔ མཛད་པ་སུམ་ཅུ་རྩ་དྲུག་མཐར་ཕྱུང༔ དགོངས་པ་ནི༔ ཆོས་ཀྱི་སྐུ་ལ་དགོངས་པ་དམིགས་པ་མི་མངའ་བས་ཡེ་ནས་ཡེ་གྲོལ་དུ་གནས༔ ལོངས་སྐུ་ལ་གསལ་ལ་རྟོག་པ་མེད་པས་རང་སྣང་རང་གྲོལ་ལ་གནས༔ སྤྲུལ་པའི་སྐུ་ལ་ཞེན་ཆགས་དང་བྲལ་བས༔ གཅིག་སྐྱེ་གཅིག་འགག་ལ་གནས་པའོ༔ བརྒྱུད་པ་ནི་ལྷག་པ་དང་ཆད་པ་མེད་པའི་དོན་ཏེ༔ བསྐལ་པ་ཐོག་མ་མེད་པ་ནས༔ ད་ལྟའི་རྣལ་འབྱོར་པ་ཡན་ཆད་ལ༔ ཚིག་ལ་ལྷག་ཆད་མེད་ཅིང་དོན་ལ་འཁྲུལ་པ་མེད་པ་སྟེ༔ དཔེར་ན་རིན་པོ་ཆེའི་སྣོད་ལ་རྒྱས་བཏབ་པ་ལྟ་བུ་དང ༔ རྒྱལ་པོའི་བཀའ་རྟགས་ལྟ་བུའོ༔ ལོ་དུ་མ་ལོན་ཀྱང་རྒྱུས་ད་ལྟའི་མི་ལྟར་ཡོད་པ་ལ་ལོ་རྒྱུས་ཞེས་བྱའོ༔ དེའི་ཕྱིན་ན༔ ལོ་རྒྱུད་དོན་གྱིས་མ་བཤད་ན༔ གསང་ཆེན་རྒྱལ་བའི་བཀའ་འདི་ལ༔ ཡིད་མི་ཆེས་པའི་སྐྱོན་དུ་འགྱུར༔ ཞེས་པའོ༔ བླ་མ་གོང་མའི་གསུང་བགྲོས་ལས༔ ལྷག་པ་དང་ཆད་པ་མེད་པར་བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟ་བུར་སོང་བ་མི་བརྒྱུད་པ་ཞེས་བྱའོ༔ དེ་ཡང་འདི་དག་རྣམས་ཤེས་ཤིང་ཁོང་དུ་ཆུད་པ་རྣམས་ལ༔ སངས་རྒྱས་ཀྱི་བྱིན་བརླབས་ངེས་པར་འབྱུང་བར་འགྱུར་རོ༔ དེ་ན་བརྒྱུད་པའི་མན་ངག་གཙོ་བའོ༔ དེ་དག་ནི་རྒྱལ་བ་དགོངས་པའི་བརྒྱུད་པའོ༔ ཨི་ཐི༔

ལོ་རྒྱུ་ཆེན་མོའི་སྨད་ཆ།

༄༅༔ ལོ་རྒྱུ་ཆེན་མོའི་སྨད་ཆ༔ གནས་འབྱེད་བདུན་པ་བཞུགས་སོ༔ རྒྱ་གར་སྐད་དུ༔ བྷ་དུ་བ་ཏྲི་ས་ཀ་རི་ནཱ་མ༔ བོད་སྐད་དུ༔ གནས་འབྱེད་བདུན་པ་ཞེས་བྱ་བ༔ ལོ་རྒྱུས་ཆེན་མོ་གཏན་ལ་དབབ་པའོ༔ རྡོ་རྗེ་འཆང་ཆེན་འགྲོ་བ་ཡོངས་ཀྱི་བླ༔ བླ་མ་སངས་རྒྱས་རྣམས་ཀྱི་དགོངས་པ་འཆང་བ་དང༔ ཡེ་ཤེས་ལས་ལ་གྲུབ་པའི་མཁའ་འགྲོ་མ༔ སྐྱབས་མཛད་མཆོད་འོས་རྣམས་ལ་ཕྱག་འཚལ་ལོ༔ གང་ཞིག་ལོ་རྒྱུས་དོན་ཉིད་ཚད་མ་བློར་བཞག་ནས༔ མ་འོངས་དུས་ཀྱི་གང་ཟག་ཐེ་ཚོམ་ཅན༔ ངེས་ཤེས་འཇུག་པར་བྱ་ཕྱིར་མིག་གི་རྒྱན་སོགས་སྤྲོ༔ བླ་མ་གྲུབ་ཐོབ་ཕུང་པོ་མི་སྣང་བར༔ ཟག་པ་རང་ཟད་དབྱིངས་སུ་སྐུ་གཤེགས་པའི༔ རིག་འཛིན་གོང་མ་རྣམས་ཀྱི་ལོ་རྒྱུས་ཉིད༔ གསང་བ་སྒྲ་ཡི་རྒྱུད་དང་བཀོད་པ་ཆེན་པོ་ལས༔ ཇི་ལྟར་གསུངས་པ་ཉིད་ལས་ལྷག་དང་ཆད་པ་མེད༔ མ་ནོར་ངེས་པ་ཚིག་སྡེབས་ཡི་གེ་ཡང༔ འདི་ལ་འཇུག་འདོད་སྐལ་ལྡན་སྙིང་གི་བུ༔ མངོན་སུམ་གནད་ལ་འབེབས་པའི་དོན་ཆེད་དུ༔ ལོ་རྒྱུས་དོན་ཉིད་ཚིག་གིས་རྒྱས་བཤད་དོ༔ དེ་ལ་རིགས་ནི་རྡོ་རྗེ་འཆང་ཆེན་པོ་ཁྱད་པར་གྱི་ཡོན་ཏན་དགུ་བཅུ་རྩ་དྲུག་དང་ལྡན་པ་འདིའོ༔ འཛིན་པ་ནི་གནད་ལ་བརྟེན་ནས་ཉམས་བླངས་པས༔ དེ་ཉིད་ཅི་འདྲ་བར་བྱེད་པའོ༔ དེ་ཡང་སུས་འཛིན་ན༔ སློབ་དཔོན་ཆེན་པོ་དགའ་རབ་རྡོ་རྗེ་ལ་སོགས་པ༔ སྤྲུལ་པའི་སྐུ་དེ་དག་རྣམས་ལ་བྱའོ༔ བརྡའ་ནི་ངོ་བོ་དང༔ ངེས་ཚིག་དང༔ དབྱེ་བའོ༔ ངོ་བོ་ནི་གནད་ཐོག་ཏུ་ཕེབས་པར་བྱེད་པའོ༔ གནད་ཐོག་ནི་མེ་བཙའ་ལྟ་བུའོ༔ ངེས་ཚིག་ནི་ཚིག་ཙམ་མོ༔ སྒྲ་ཙམ་གྱི་ན་བརྡའ་ཙམ་ལ་བརྟེན་ནས་ཆོས་ཉིད་གཏན་ལ་འབེབས་པར་བྱེད་པས་ན་བརྡ་ཞེས་བྱའོ༔ དབྱེ་ན་བརྡའི་གནད་གཞན་དཔག་ཏུ་མེད་པ་ཅིག་ཡོད་ཀྱང༔ རང་བཞིན་གྱི་བརྡ་དང༔ བྱ་ཤིང་བསྟན་པའི་བརྡ་དང༔ བརྗོད་པའི་བརྡ་ལས་མི་འདའོ༔ རང་བཞིན་གནས་པ་དང༔ རྟགས་སུ་བཀོད་པ་གཉིས་སོ༔ གནས་པ་ནི་ཕྱི་ཡུལ་གྱི་སྣང་བ་ལ་བརྟེན་ནས་བརྡ་དོན་གྱི་མན་ངག་ཏུ་འགྱུར་བས༔ ཕྱི་ཡི་སྣང་བ་མ་སྤངས་པར་སངས་རྒྱ་བ་དང༔ ནང་སེམས་ཀྱི་རྟོག་པ་མ་ལུས་པར་བརྡ་དོན་གྱི་མན་ངག་ཏུ་འགྱུར་བའོ༔ རྟགས་སུ་བཀོད་པ་ནི༔ དེ་བཞིན་གཤེགས་པའི་སྐུའི་རྟེན་དང༔ གསུང་དང་ཐུགས་ཀྱི་རྟེན་ལ་སོགས་པའོ༔ དེ་དག་ལ་བརྟེན་ནས༔ བརྡ་དོན་གྱི་མན་ངག་ལ་བརྟེན་ནས་སངས་རྒྱའོ༔ བྱས་ཤིང་བརྟེན་པའི་བརྡ་ལ་གཉིས་ཏེ༔ ལུས་ཀྱི་བརྡ་དང༔ ཡིད་ཀྱི་བརྡའོ༔ ལུས་ལ་གསུམ་སྟེ༔ ལག་གི་འདུ་བྱེད་ཀྱི་བརྡ་དང༔ བྲིས་པ་ཡི་གེའི་བརྡ་དང༔ བྱས་པ་གཟུགས་བརྙན་གྱི་བརྡའོ༔ ལག་གི་འདུ་བྱེད་ནི་རང་གི་སྡེ་པས་གོ་ལ༔ གཞན་གྱིས་མི་གོ་བས༔ དངོས་གྲུབ་ཀྱི་རྒྱུར་འགྲོ་བ་ནི༔ སྔགས་ཀྱི་རྒྱུད་སོ་སོའི་སྐབས་ན༔ ཇི་ལྟར་བྱས་པའི་རིམ་པ་རྣམས་བཤད་པ་དེ་རྣམས་སོ༔ བྲིས་པ་ཡི་གེའི་བརྡ་ནི་འགྱུ་བྱེད་ཀྱི་ཡི་གེ་ལ་བརྟེན་ནས་སྣང་སྲིད་རང་གྲོལ་དུ་གྲོལ་བའི་གནད་དང༔ དག་བྱེད་ཀྱི་ཡི་གེ་ལ་བརྟེན་ནས་སྲིད་གསུམ་རང་དག་ལ་གྲོལ་བའི་གནད་དོ༔ སྒྱུར་བྱེད་ཡི་གེ་ལ་བརྟེན་ནས༔ གསང་བའི་དོན་ཀུན་མངོན་དུ་བསྟན་པ་ཡང༔ ཀུན་གྱིས་མི་གོ་བར་བསྟན་པ་ནི༔ ལྷའི་ཡི་གེ་དང༔ མཁའ་འགྲོ་མ་སྨྲ་བྱེད་ཀྱི་ཡི་གེ་དང༔ ཀླུའི་ཡི་གེ་དང༔ ཚངས་པ་དང་ནམ་མཁའ་ལྡིང་གི་ཡི་གེ་ལ་སོགས་པ་རྣམས་ལ་སྦྱངས་པས༔ བདག་ཉིད་ཀྱིས་ཤེས་ཤིང་གོ་བས་གཞན་གྱིས་མི་གོ་བའི་གནད་དོ༔ སྤྲོས་པ་ཡི་གེའི་སྦྲེལ་བ་ལ་བརྟེན་ནས༔ གསང་སྔགས་ཀྱི་བཟླས་པའི་གནད་ལ་མཁས་པར་འགྱུར་བའོ༔ བྱས་པ་གཟུགས་བརྙན་གྱི་བརྡ་ནི༔ ཁམ་སའི་མི་མོ་དང༔ མར་མེའི་ཀོང་བུ་ལ་སོགས་པ་བྱས་པའི་རྣམ་པ་ལ་བརྟེན་ནས་ཁྱད་པར་དུ་ངེས་ཤེས་སྐྱེས་པར་བྱེད་པའོ༔ ཡིད་ཀྱི་བརྡ་ནི་བྱིན་གྱིས་བརླབས༔ ཚོགས་དང་གཏོར་མ་ལ་བརྟེན་ནས་བླ་མའི་དགོངས་པ་ཚད་དང་ལྡན་པར་གྱུར་པ་དང༔ ཡིད་ཀྱི་དད་པས་རིག་པ་གཉིས་མེད་དུ་གྲོལ་བ་དང༔ ཡིད་སེམས་འདྲེས་པར་བྱེད་པའི་གནད་དོ༔ འདི་དག་ནི་བླ་མའི་དགོངས་པའི་གནད་ལས་བྱུང་བའོ༔ མི་སྣང་བ་ལ་སོགས་པ་ཡིད་ཀྱི་བརྡ་ཞེས་པའི་དོན་དོ༔ བརྗོད་པའི་བརྡ་ལ་གསུམ་སྟེ༔ ལུང་ལས་བྱུང་བའི་བརྡ༔ རྣལ་འབྱོར་ཤེས་པས་ཉམས་ལས་བྱུང་བའི་བརྡ༔ དུས་ངེས་པ་ལ་ཆེད་དུ་བརྗོད་པའི་བརྡའོ༔ ལུང་ལས་བྱུང་བ་ནི༔ རང་གི་དམ་ཚིག་ཉེ་བར་མཚོན་པ༔ གསང་སྔགས་རྒྱུད་སོ་སོ་ལས་བྱུང་བ་རྣམས་ཏེ་འགྲོ་བ་གཞན་གྱི་མི་གོ་བ༔ དཔེར་ན་ཀླ་ཀློའི་སྐད་ལྟ་བུའོ༔ རྣལ་འབྱོར་ཤེས་པའི་ཉམས་ལས་བྱུང་བའི་བརྡ༔ འགྲོ་བ་གཞན་གྱི་སྡུག་བསྔལ་ལས་གྲོལ་བར་བྱེད་པ༔ རྟེན་ཅིང་འབྲེལ་བར་འབྱུང་བ་དང༔ སེམས་ཆོས་དང་འདྲེས་པར་བྱེད་པ་ལ་སོགས་པ་ཉམས་དང་སྦྱར་ཞིང་སྤྱོད་པ་ཉིད༔ གྲུབ་པ་ཐོབ་པ་རྣམས་ཀྱི་སྤྱོད་ཡུལ་ལོ༔ དུས་ངེས་པ་ལ་ཆེད་དུ་བརྗོད་པ་ནི༔ ཚོགས་ཀྱི་འཁོར་ལོའི་དུས་དང༔ དབང་བསྐུར་བའི་དུས་སམ༔ དཔའ་བོ་དཔའ་མོའི་སྟོན་མོ་བྱེད་པའི་དུས་སུ་བརྗོད་པ་སྟེ༔ དེ་དག་ལ་བརྟེན་ནས་ཕྱིའི་སྤྲོས་པ་གཅོད་པ་དང༔ ནང་དུ་ཆོས་ཉིད་ཀྱི་དོན་མངོན་སུམ་དུ་སྐྱེའོ༔ བརྡ་དེ་དག་ལ་བརྟེན་ནས་ཉམས་སུ་མྱོང་བ་ཐོད་རྒལ་དུ་སྐྱེ་བར་བྱེད་པའི་གནད་ཡིན་ནོ༔ དེ་ལྟར་བརྡའི་རང་བཞིན་ཁོང་དུ་ཆུད་པར་བྱེད་དོ༔ དེ་ཉིད་ཆུད་པས་ཚིག་དང་ཡི་གེའི་སྤྲོས་པ་གཅོད་པའོ༔ དེ་ལྟ་བུའི་དོན་དེ་སུ་ལ་བརྒྱུད་ན༔ སྤྲུལ་པ་པོ་དགའ་རབ་རྡོ་རྗེ་ལ་བརྒྱུད༔ སུས་བརྒྱུད་ན་དཔལ་རྡོ་རྗེ་འཆང་གིས་བརྒྱུད༔ བརྒྱུད་ཚུལ་ལམ་ཐབས་ཇི་ལྟར་བརྒྱུད་ན༔ གསང་སྔགས་ཐམས་ཅད་བརྡ་དུ་མ་ལ་བརྟེན་ནས་བརྒྱུད་དེ་དཔེ་ཇི་ལྟར་བརྒྱུད་ན༔ བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟར༔ ལྷག་པ་མེད་ཅིང་མ་གང་བ་མེད་པར་ལྟར་བརྒྱུད་དོ༔ ཅིའི་ཕྱིར་བརྒྱུད་ན༔ མ་འོངས་པའི་དུས་ཀྱི་སྐལ་ལྡན་རྣམས་ལ་ངེས་པའི་དོན་ཅིག་ཅར་དུ་བསྐྱེད་པའི་ཕྱིར་བརྒྱུད༔ དེ་ལྟར་བརྒྱུད་པ༔ དགོས་པ་ཅི་ཡོད་ན༔ འབྲས་བུ་སངས་རྒྱས་པའི་དགོས་པ་མ་འཁྲུལ་པ་དང༔ རྣམ་པར་རྟོག་པ་མཐའ་དག་པའི་བློས་སྒྲོས་གདགས་སུ་མེད་པའོ༔ དེ་ལ་སངས་རྒྱས་མྱ་ངན་ལས་འདས་ནས་ལོ་སུམ་བརྒྱ་དང་དྲུག་ཅུ་ཐམ་པ་ན༔ རྒྱ་གར་རྡོ་རྗེ་གདན་གྱི་ནུབ་ཕྱོགས་ཨོ་རྒྱན་ཐོར་ཅོག་ཅན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བ་ན༔ ཙནྡན་གྱི་ཤིང་ལྗོན་པ་རྣམས་ཀྱིས་བསྐོར་བ༔ ཀོ་ཤ་ན་ཞེས་བྱ་བའི་སྲོག་ཆགས༔ ལུས་མི་ལ་གདོང་དྲེད༔ སྡེར་མོ་རྣམས་ལྕགས་ཀྱི་སྦར་ཤད་ཀྱིས་གཏམས་པ༔ རྒྱུ་རྣམས་རིན་པོ་ཆེ་ཕྲ་མོས་གཏམས་པ་དཔག་ཏུ་མེད་པས་གང་བ༔ དྷ་ན་ཀོ་ཤའི་གླིང་ཞེས་བྱའོ༔ དྷ་ནི་ཙནྡན་གྱི་གླིང་རྣམས་ལ་བྱའོ༔ དེ་ནས་བཀྲ་ཤིས་བདེ་བྱེད་བརྩེགས་པ་ཞེས་བྱ་བའི་གཙུག་ལག་ཁང་ཆེན་པོ་ཞིག་ན༔ གཙུག་ལག་ཁང་ཕྲ་མོ་སྟོང་དྲུག་བརྒྱ་དང་བརྒྱད་ཀྱིས་ཕྱོགས་མཚམས་རྣམས་ཡོངས་སུ་བསྐོར་བ་དེ་དག་གི་བར་གསེར་གྱི་དྲིལ་བུ་གཡེར་ཁའི་དྲྭ་བའི་ཐག་པས་རབ་ཏུ་སྦྲེལ་བ༔ ཤིན་ཏུ་མཛེས་ཤིང་ཉམས་དགའ་བ་དང་ལྡན་པ་ན༔ མི་རྣམས་ཀྱང་གཟུགས་བཟང་ཞིང་ཡན་ལག་རགས་པ་ལ༔ སྤྱི་བོར་རལ་པའི་ཐོར་ཚུགས་བཅིངས་པ༔ གསེར་དང༔ དངུལ་དང༔ མུ་མེན་ལ་སོགས་པས་བརྒྱན་པ༔ རས་དཀར་དམར་སྣ་ཚོགས་གོན་པ་ཤ་སྟག་གོ༔ བུད་མེད་རྣམས་སྐྲའི་མདུད་པ་མདུན་རྒྱབ་གཉིས་སུ་འཆིང་བའོ༔ དེ་དག་ལ་དུང་དང་རུས་པའི་རྒྱན་སྣ་ཚོགས་པས་བརྒྱན་པའོ༔ ཡུལ་དེ་ན་ཡབ་རྒྱལ་པོ་ཨུ་པ་རཱ་ཛ་ཞེས་བྱ་བ་ལ༔ ཡུམ་སྣང་བ་གསལ་བའི་འོད་ལྡན་མ་ཞེས་བྱ་བ་ཞིག་ཡོད་དེ༔ དེ་གཉིས་ལ་སྲས་མོ་སུ་དྷ་ར་མ་ཞེས་བྱ་བ༔ རབ་ཏུ་བྱུང་ནས་ཡུན་རིང་པོ་མ་ལོན་པ༔ བསྙེན་པར་རྫོགས་ནས་ཡུན་རིང་པོ་མ་ལོན་པའི་དགེ་སློང་མ་གཅིག༔ དེ་ནས་དཔག་ཚད་གཅིག་འདས་པའི་ནུབ་ན༔ གསེར་གྱི་བྱེ་མ་བརྡལ་བའི་རྒྱ་མཚོའི་གླིང་ན་འཇག་མའི་སྤྱིལ་པོ་ཕུབ་ནས༔ གཡོག་མོ་བདེ་བའི་སྙིང་རྗེ་ལྡན་ཞེས་བྱ་བ་མཁའ་འགྲོ་མ་གཅིག་གིས་བྱེད་ཅིང༔ དགེ་སྦྱོར་སྐྱོང་གིན་བཞུགས་པའི་ལྷ་ལྕམ་གྱི་མཚན་མོ་རྨི་ལམ་ན༔ མི་དཀར་པོ་རིན་པོ་ཆེ་ཤེལ་ལས་གྲུབ་པ་རིང་བ་མདུང་ཙམ་པ་གཅིག་གིས་སྤྱི་བོར་གཙུག་ཏུ་རིན་པོ་ཆེ་ཤེལ་གྱི་བུམ་པ་ལ་ཡི་གེ་ཨཱོཾ་ཨཱཿཧཱུྃ་སྭཱ་ཧཱ༔ ཞེས་རིགས་ལྔའི་དབང་བསྐུར་བའི་རྟགས་སུ༔ དེ་དག་གིས་རྒྱས་བཏབ་པ་གཅིག་སྤྱི་བོའི་སྟེང་དུ་ལན་གསུམ་བཞག་པས༔ བུམ་པ་དེ་ལས་འོད་འཕྲོས་པས་ཁམས་གསུམ་དུས་ཅིག་གསལ་བར་མཐོང་བ་ཞིག་རྨིས༔ དེ་ནས་ནང་པར་རྨི་ལམ་དེ་ལ་ངོ་མཚར་ཆེ་ནས༔ ཚ་བའི་དུས་སུ་གཡོག་མོ་ལ་བཤད་པས༔ གཡོག་མོ་དེས་ན་རེ༔ ལྷ་ལྕམ་ཉིད་ལ་སྤྲུལ་པའི་སྐུ་གཅིག་འཁྲུངས་པའི་ལྟས་ཡིན་ཟེར་རོ༔ གཡོག་མོ་དེ་ནི་མཁའ་འགྲོ་མ་པུར་རྣ་ཉེ་བར་ཞི་བ་ཞེས་བྱ་བ་ཡིན་ནོ༔ ལྷ་ལྕམ་གྱི་བསམ་པ་ལ༔ དེ་ཅི་ལ་ཟེར་སྙམ་པ་ཅིག་བྱུང་ངོ༔ དེ་ནས་ལྷ་ལྕམ་དེ་ལུས་མ་བདེ་ནས་རབ་ཏུ་སྡུག་བསྔལ་དང་ལྡན་པར་གྱུར་ཏོ༔ དེ་ནས་ཟླ་བ་དགུ་ངོ་བཅུ་ལོན་པ་ན་ལྷ་ལྕམ་དེ་ལ་ཕ་མེད་པའི་བུ་གཅིག་རྩིབས་ལོག་གཡས་པའི་གོ་བར་ནས་འཁྲུངས་སོ༔ དེ་འཁྲུངས་པ་དང་དགེ་སློང་མ་དེ་ཉིད་རབ་ཏུ་བྲེད་དོ༔ ཁ་ནས༔ ཕ་མེད་བུ་འདི་འཇིག་རྟེན་འདྲེ་ལས་མིན་པ་སུ༔ འཇིག་རྟེན་བདུད་དམ་ཚངས་པ་ལ་སོགས་སམ༔ རྒྱལ་པོ་བཙན་དང་དམུ་ལ་སོགས་པའི་རིགས༔ ཁམས་གསུམ་དག་ན་འདོད་ལྡན་སུ་ཞིག་ཡིན༔ གལ་ཏེ་ལྷ་འམ་ལྷ་མིན་སྣ་ཚོགས་གཟུགས༔ འདི་ལྟར་བྱུང་བའི་དཔེ་ནི་སུ་ཡང་མཐོང་བ་མེད༔ རྒྱལ་ཁམས་ཆོས་མེད་འདི་ནི་སུ་ལ་སྲིད༔ ཀྱེ་མ༔ བདག་ནི་རབ་ཏུ་ཁྲིམས་གཙང་འགྲོ་ལས་རྒྱལ་འདོད་པས༔ འདི་ནི་ལོག་སྲེད་འགྲོ་བས་དཔྱས་གྱུར་སྡིག་རེ་ཆེ༔ ཞེས་ཚིགས་བཅད་མང་པོ་བརྗོད་ཅིང་རབ་ཏུ་སྡུག་བསྔལ་བས༔ གཡོག་མོ་དེས་ནི༔ འདི་སངས་རྒྱས་ཀྱི་སྲས་གཅིག་ཡིན་བྱས་ཀྱང་མ་ཉན་ནས༔ འདི་ཐལ་བའི་དོང་དུ་སྦོས་ཏེ་བསྲུབས་ལ་ཞོག་ཅེས་ཐལ་བའི་དོང་དུ་བོར་ནས༔ འོད་དང་སྒྲ་ལ་སོགས་པ་བྱུང་ངོ༔ དེ་ནས་ཞག་གསུམ་ལོན་ནས་བལྟས་པས་སྐད་ལྷག་ལྷག་བྱས་ནས་ཅི་ཡང་མ་ཉེས་བར་འདུག་ནས༔ སླར་དར་དཀར་པོ་དྲི་མ་མེད་པ་ཞིག་གིས་སླེ་ལ་བླངས་ཏེ་སྤོས་ཆུ་དང་འོ་མ་ལ་སོགས་པའི་ཁྲུས་ཆབ་ནས་བཏོན་ཏེ༔ འདི་མི་འཆི་བའི་ལུགས་སམ༔ སྤྲུལ་པར་འདུག་སྙམ་ནས་བླངས་པས༔ བར་སྣང་ནས་ལྷ་རྣམས་ཀྱིས་བཀྲ་ཤིས་ཀྱི་ཚིགས་སུ་བཅད་པ༔ མགོན་པོ་སྟོན་པ་བཅོམ་ལྡན་འདས༔ རང་བཞིན་སྣང་མཛད་འཇིག་རྟེན་མགོན༔ བདག་ཀྱང་རབ་ཏུ་བསྐྱབ་པ་དང༔ ནམ་མཁའི་རྡོ་རྗེ་བདག་ལ་གསོལ༔ ཞེས་བརྗོད་དོ༔ མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས་པ་དང༔ ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་གུར་གུམ་གྱི་ཆར་ཕབ་པ་དང༔ ཕྱོགས་ཀུན་ནས་འཇིག་རྟེན་གྱི་ཁམས་སྐྱོང་བ་རྣམས་ཀྱི༔ ཆོས་ཀྱི་རྔ་ཆེན་པོ་བརྡུང་བ་དང༔ དུང་འབུད་པ་དང༔ རྒྱལ་མཚན་འཇུགས་པ་དང༔ བ་དན་སློང་བ་སོགས་པ་དང༔ དྲང་སྲོང་གི་རྒྱལ་པོ་ཆེན་པོ་རྣམས་ཀྱིས་ཀྱང་སྨན་གྱི་ཚོགས་དཔག་ཏུ་མེད་པའི་སྤྲིན་གྱིས་གཏིབས་སོ༔ དེ་ནས་བྱིས་པ་དེ་གསོལ་བས༔ གཞན་གྱི་ཞག་གསོས་པ་བས་དེའི་ཟ་མ་གསོལ་པ་སྐྱེད་ཆེ་བ་གཅིག་བྱུང་ངོ༔ གཞན་གྱི་ལོ་དང་དེའི་ཟླ་བ་གཉིས་དེའི་ཟླ་བ་སྐྱེད་ཆེ་བ་གཅིག་བྱུང་ངོ༔ དེ་ནས་ལོ་བདུན་ལོན་ཙ་ན༔ ཁྱེའུ་དེའི་ཞལ་ནས་ཡུམ་ལ༔ ཀྱེ་མ་གཅིག་ལགས༔ པཎྜི་ཏ་མཁས་པ་རྣམས་ལ་ཞེ་ས་ན་མ་གཅིག་ཙམ་ཡང་འབུལ༔ ཆོས་གཏམ་མ་བདེ་བ་འགའ་ཙམ་ཡང་ཞུ་བས༔ ཡུམ་གྱིས་བདག་ལ་གནང་བར་ཞུ༔ ཞེས་ཞུ་བ་ཕུལ་བས༔ ཡུམ་དེ་ཡི་ཞལ་ནས༔ བུ་ཁ་ནས་སོའུ་མ་བརྗེས་པར་ཆོས་གཏམ་ཅི་ལ་འོང་ཟེར་བས༔ ཁྱེའུ་དེའི་ཞལ་ནས་ཅི་ནས་ཀྱང་གནང་བར་ཞུ་ཟེར་ཏེ་ཞུ་བ་དྲག་ཏུ་ཕུལ་བས༔ ཡུལ་གྱི་ཞལ་ནས་འདི་ནས་ཤར་གྱི་ཕྱོགས་ན་དཔག་ཚད་གཅིག་འདས་པ་ན༔ དྷ་ན་ཀོ་ཤ་རབ་ཏུ་སྣང་བའི་གླིང་ཞེས་བྱ་བ་ན༔ བུ་རང་གི་མེས་པོ་རྒྱལ་པོ་ཨུ་པ་རཱ་ཛ་ཞེས་བྱ་བ༔ མཆོད་གནས་པཎྜི་ཏ་ལྔ་བརྒྱ་ཡོད་པས་དེར་སོང་ལ་ཞུས་ཤིག་ཟེར་ནས་ཡུམ་གྱིས་གནང་ངོ༔ དེ་ནས་ཁྱེའུ་རབ་ཏུ་དགའ་ནས་ཡུལ་དེ་ཉིད་དུ་ཕྱིན་ཏེ༔ རྒྱལ་པོ་དང་མཇལ་ཏེ་རྒྱལ་པོ་ལ་ཕྱག་བྱས་ནས༔ བདག་ནི་ཁྱེད་ཀྱི་དབོན་པོ་ལགས་ཏེ༔ རྒྱལ་པོ་ཆེན་པོ་ལགས༔ ཁྱེད་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས༔ བདག་པཎྜི་ཏ་དེ་རྣམས་ལ་ཞེ་ས་ན་མ་གཅིག་ཙམ་ཡང་འབུལ༔ ཆོས་གཏམ་ཞིག་མ་བདེ་བ་འགའ་ཙམ་ཡང་ཞུ་བས༔ རྒྱལ་པོ་ཆེན་པོ་ལགས་བདག་ལ་གནང་བར་ཞུ་བ་ཕུལ་བས༔ རྒྱལ་པོ་དེས་སྤྱན་གྱིས་བལྟས་ཏེ༔ བྱིས་པ་ཁ་ནས་སོའུ་མ་བརྗེས་པ་གཅིག་གིས་ཆོས་གཏམ་དང་ཅི་ལ་ཡོང་སྟེ༔ ཞེ་ས་ཡང་ཅི་ལ་ཡོང་ཟེར་ཏེ༔ དེ་ནས་ཁྱེའུ་དེའི་ཞལ་ནས༔ རྒྱལ་པོ་ལགས་བདག་ལ་ཅི་ནས་ཀྱང་གནང་བར་ཞུ་ཞེས་གླེངས་སོ༔ རྒྱལ་པོའི་ཞལ་ནས་ཁྱོད་ལོ་ནི་བྱིས་པར་འདུག་སྟེ༔ སངས་རྒྱས་ཀྱི་མཚན་རྟགས་མང་པོས་ལུས་ལ་སྤྲས་འདུག་པས༔ གལ་ཏེ་སྤྲུལ་པ་གཅིག་ཡིན་སྲིད་པས་པཎྜི་ཏ་རྣམས་དང་མཇལ་དུ་གཞུག་གི་གསུངས་ནས་ནང་དུ་གཤེགས་སོ༔ དེ་ནས་པཎྜི་ཏ་རྣམས་གྲོ་གསོལ་བའི་དུས་སུ༔ རྒྱལ་པོས་གོང་གི་ཁྱེའུ་དེའི་གཏམ་དེ་དག་པཎྜི་ཏ་རྣམས་ལ་བསྙད་དོ༔ པཎྜི་ཏའི་ལ་ལའི་ཟེར་ཞལ་ནས་སྨྱོན་ཚིག་དགའ་དགའ་བྱེད་པ་མིན་ནམ་ནང་དུ་མ་གཏང་གསུངས༔ ལ་ལ་ཅི་ཟེར༔ དེ་དག་གི་ནང་ནས་མཁྱེན་པ་ཆེ་བ་གཅིག་གི་ཞལ་ནས༔ དེ་ཡར་ཐོང་དང་གལ་ཏེ་སྤྲུལ་པ་འདྲ་ཡོང་བ་ཡང་མ་ངེས༔ མདངས་སུམ་གྱི་རྨི་ལམ་ན་ལྟས་བཟང་བ་གཅིག་ཀྱང་བྱུང་གསུངས་ནས༔ ནང་དུ་ཐོང་དང་གསུངས་ནས་ནང་དུ་བཏང་བས༔ ཁྱེའུ་དེས་ཕྱག་མཛད་ནས༔ དེ་རྣམས་ལ་ཁྱེའུ་དེས་རིམ་པ་བཞིན་ཁ་ནས་བགྲོ་གླེང་བཏང་བས༔ གང་གིས་ཀྱང་མ་ཐུབ་ཚུར་ཆོས་གང་དྲིས་ཀྱང་ཐོགས་པ་དང་རྡུགས་པ་མེད་པར་བྱུང་ནས༔ པཎྜི་ཏ་རྣམས་ཀྱིས་ཚུར་ལ་ཕྱག་མཛད་ནས༔ ཞབས་སྤྱི་གཙུགས་ཏུ་བླངས་ནས་རབ་ཏུ་བསྟོད་དེ༔ མཚན་ཡང་ཤེས་རབ་རྒྱ་ཆེ་བ་ལ་དགོངས་ནས་པྲ་ཛྙཱ་བྷ་ཝ་ཞེས་བྱ་བར་བཏགས་སོ༔ རྒྱལ་པོ་དགྱེས་ནས་སློབ་དཔོན་དགའ་རབ་རྡོ་རྗེ་བྱ་བར་བཏགས་སོ༔ ཡུམ་གྱིས་ཐལ་བའི་ཁུང་བུར་སྦས་ནས་མ་ཤི་བས་སློབ་དཔོན་ཆེན་པོ་རོ་ལངས་ཐལ་མདོག་ཅེས་བྱ་བར་བཏགས་སོ༔ ཡུལ་དེའི་མི་ཀུན་གྱི་གཞོན་ནུ་ཤིན་ཏུ་ཡིད་དུ་འོང་བ་གཅིག་རབ་ཏུ་བདེ་བར་འདུག་ནས༔ སློབ་དཔོན་རོ་ལངས་བདེ་བ་ཅེས་བྱ་བར་ཐོགས་ཤིག་ཅེས་གྲགས་སོ༔ དེ་ལྟར་མཚན་བཞིར་གྲགས་པ་ནི་སྐྱེ་བ་བཞིའི་སེམས་ཅན་རྣམས་ཀྱི་ལུས་སུ་ཉིད་ཀྱིས་སངས་རྒྱས་བཅོམ་ལྡན་འདས་ཀྱི་གསུང་ཉན་ཅིང་ཉེ་འཁོར་དུ་འཁོར་བས༔ དེ་ཉིད་ཀྱི་བསོད་ནམས་ཀྱི་སྟོབས་ལས་གྲུབ་པའོ༔ དེ་ནས་བྱང་གི་ཕྱོགས་ན་རི་བོ་ཉི་མ་རབ་ཏུ་སྣང་བར་བྱེད་པ་ཞེས་བྱ་བར༔ བྲག་རབ་ཏུ་འཇིགས་པའི་ཚོགས་ལ༔ ཡི་དྭགས་དྲག་པོ་གནས་པའི་སྟེང་དུ་འཇག་མའི་སྤྱིལ་པོ་ཕུབ་སྟེ༔ ལོ་སུམ་ཅུ་རྩ་གཉིས་ཀྱི་བར་ལ་ཏིང་ངེ་འཛིན་ལ་སྙོམས་པར་བཞུགས་པའི་ཚུལ་བསྟན་པས༔ ས་གཡོ་བ་ལན་བདུན་བྱུང༔ ནམ་མཁའ་ལས་ཀྱང་སྒྲའི་བྱེ་བྲག་དཔག་ཏུ་མེད་པ་བྱུང༔ མེ་ཏོག་སྣ་ཚོགས་པའི་ཆར་ཡང་བབས༔ མུ་སྟེགས་ཀྱི་བསྟན་པ་ཡང་ཉམས་པར་བྱས་སོ་ཞེས་བྱ་བའི་སྒྲ་ཡང་སྐབས་སུ་བྱུང་བས༔ ཡུལ་དེའི་མདའ་ན་མུ་སྟེགས་སྡིག་སྐྱོང་བའི་རྒྱལ་པོ་གཅིག་ཡོད་པས་དེའི་ཕྱུགས་འཚོ་བའི་བྱིས་པ་རྣམས་ཀྱིས་མཐོང་སྟེ༔ རྣ་བ་ལ་ར་དུང་བུས་ཀྱང་མ་ལངས༔ སྨྱུག་མའི་ཨུ་བྷི་བཙུགས་པས་ཀྱང་མ་ལངས༔ ཅི་ཡང་མི་སྙེམ་པ་གཅིག་འདུག་པ་མཐོང་སྟེ༔ རྒྱལ་པོ་ལ་བསྙད་པས་རྒྱལ་པོ་ན་རེ༔ འདི་ནི་སངས་རྒྱས་ཀྱིས་བསྟན་པ་འཕེལ་བ༔ མུ་སྟེགས་ཀྱི་བསྟན་པ་ཉམས་སྨད་པར་བྱེད་པ་ཡིན་པས་གཤེད་མ་གཉིས་ཀྱིས་སོང་ལ་གསོད་ཅིག༔ ཅེས་དེ་གཉིས་ལ་གྲི་གུ་གཉིས་གཏད་ནས་བཏང་ངོ༔ གཤེད་མས་གསོད་པར་བྱས་པས་ཅི་བྱས་ཀྱང་གླགས་མ་རྙེད་དོ༔ སློབ་དཔོན་ནམ་མཁའ་ལ་སྤྲིན་གྱི་གསེབ་ནས་ལམ་ཕྱུངས་ཏེ་གཤེགས་པས༔ མུ་སྟེགས་རྒྱལ་པོ་འཁོར་དང་བཅས་པ་ངོ་མཚར་སྐྱེས་ཏེ་ཕྱག་བྱས་ནས་རབ་ཏུ་བསྟོད་དོ༔ སངས་རྒྱས་ཀྱི་བསྟན་པ་ལ་ཞུགས་སོ༔ དེ་ལྟར་དགུང་ལོ་སུམ་ཅུ་རྩ་གཉིས་ལོན་ནས༔ སྔར་གྱི་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པའི་སྡེ་སྣོད་རིན་པོ་ཆེ་མ་ལུས་པ་དང༔ ཁྱད་པར་དུ་རང་བཞིན་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི༔ ཐུགས་ལ་གསུངས་པ་རྣམས་རི་མ་ལ་ཡའི་རིན་པོ་ཆེ་རྣམས་སྤུངས་པ་བསྟན་པའི་ལས་རྒྱས་པའི་རྩེ་མོ་ལ༔ རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་ཞེས་བྱ་བ༔ གདོང་གསུམ་པ་སྟག་གི་ཕགས་པ་གྱོན་པ༔ ཕྱག་བཞི་རྨ་བྱའི་གདུགས་འཛིན་པ༔ ལས་སུ་སྟག་དང་སེང་གེ་ལ་ཞོན་པ༔ བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་ཞེས་བྱ་བ༔ འབྲུག་ལ་ཞོན་ཅིང་གློག་གི་ག་ཤ་ཐོགས་པ་རབ་ཏུ་ཁྲོས་པ་ཡིད་བདེ་བ་དང༔ སློབ་དཔོན་ཉིད་དང་སངས་རྒྱས་ཀྱིས་གསུངས་པ༔ ལོ་གསུམ་གྱི་བར་དུ་ཚིག་དང་ཡི་གེ་དཀར་ཆག་ལ་མནན༔ རང་བྱུང་རང་བབས་ཀྱི་ཡི་གེ་སྤྲུལ་པའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་ཡི་གེ་ལ་བཀོད་དོ༔ དེ་ལྟར་བཀོད་ནས་མཁའ་འགྲོ་མ་མངོན་པར་བྱུང་བའི་བྲག་ཕུག་ཏུ་མཁའ་འགྲོ་མ་སེམས་དང་ལྡན་པ་ལ༔ མཆོད་པ་གྱིས་ཤིག་ཅེས་རྗེས་གནང་སྦྱིན་ནས་དེ་ཉིད་དུ་བཞུགས་སུ་གསོལ་ལོ༔ དེ་དག་ནི་སྤྲུལ་པ་འབྱུང་དངོས་ཀྱིས་བསྟན་པ་གནས་པར་བྱེད་པ༔ བསྟན་པ་ཡུན་རིང་བར་གནས་པར་བྱེད་པའི་ཉེ་བརྒྱུད་བསྟན་པའོ༔ དེ་ནས་ཁྱད་པར་འབྱུང་བའི་གནས༔ སངས་རྒྱས་རྣམས་ཀྱི་འབྱུང་བྱེད་གནས༔ འདི་ཉིད་དུའང་བསྟན་པ༔ ཕན་པ་ཉིད་ཀྱི་དོན་དུ་ནི༔ བདག་གིས་རེ་ཞིག་བཤད་པར་བྱ༔ དེ་ནས་རྡོ་རྗེ་གདན་ནས་བྱང་ཤར་མཚམས་སུ་དཔག་ཚད་ལྔ་འདས་པ་ན༔ དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་མཐའ་བསྐོར་དཔག་ཚད་ཕྱེད་དང་གཉིས་ཡོད་པ༔ རི་སའི་ལྟེ་བ་ལྟ་བུ་ལ་ཁོད་སྙོམས་ཤིང༔ ལག་མཐིལ་ལྟ་བུ་ལ༔ མཐའ་དང་དབུས་དང་མཐོ་དམའ་མེད་པ་དེ་ཉིད་ཀྱི་དབུས་དྲང་པོ་ན༔ དཔལ་ལྷ་ལས་བབས་པའི་མཆོད་རྟེན་ཟངས་ལས་བྱས་ཤིང་གསེར་གྱིས་བྱུགས་པའི་འཁོར་ལོ་གདུགས་དང་བཅས་པ༔ དྲིལ་བུ་གཡེར་ཁའི་སྒྲ་སྣ་ཚོགས་འབྱུང་བ༔ ཕྱོགས་བཞི་ནས་སྟོན་པའི་སྐུའི་མཆོད་རྟེན་རེ་རེ་ལ་རིན་པོ་ཆེ་སྣ་ཚོགས་ཀྱི་རྒྱུ་ལས་བྱུང་བའོ༔ དུར་ཁྲོད་དེའི་བྱང་ཤར་མཚམས་ན་འཇིག་རྟེན་པའི་ལྷ་རྟེན་དཔག་བསམ་གྱི་ཤིང་བྷི་ས་ལ་ཞེས་བྱ་བ་ལ༔ དུར་བྱའི་ཚོགས་དཔག་ཏུ་མེད་པ་འབབ་ཅིང་གནས་པ༔ འཇིག་རྟེན་གྱི་ལྷ་ནི་དགའ་བྱེད་དབང་ཕྱུག་ཅེས་བྱ་བ༔ སེང་གེ་ནག་པོ་ལ་ཞོན་པ༔ ལག་ན་མདུང་རྩེ་གསུམ་ཐོགས་པ༔ དར་དམར་པོའི་འཇོལ་བེར་གྱོན་པ༔ འགྲོ་བའི་སྲོག་ལེན་པ་ལ་ཐོགས་པ་མེད་པ༔ འཁོར་བྱེ་བ་དང་བཅས་བ་གནས་སོ༔ དེ་ན་མཁའ་འགྲོ་མ་དཔག་ཏུ་མེད་པ་གནས་ཏེ༔ ལ་ལ་ནི་མིག་ནས་ཉི་མའི་འོད་ཟེར་འབྱུང་བ༔ ལ་ལ་ནི་ཁ་ནས་འབྲུག་སྒྲ་སྒྲོག་ཅིང་མ་ཧེ་ལ་ཞོན་པ༔ ལ་ལ་ནི་ལག་ན་གྲི་ཐོགས་ཤིང་མིག་འབྲུ་ཚུགས་སུ་ལྟ་བ༔ ལ་ལ་ནི་ལག་ན་ཐོད་པ་བརྩེགས་པ་ཐོགས་ཤིང་སྟག་ལ་ཞོན་པ༔ ལ་ལ་ནི་ལག་ན་མི་རོ་ཐོགས་ཤིང་སེང་གེ་ལ་ཞོན་པ༔ ལ་ལ་ནི་རྒྱུ་མ་ཟ་ཞིང་ཁྱུང་ལ་ཞོན་པ༔ ལ་ལ་ནི་མདུང་རྩེ་ལ་མི་རོ་བཀལ་ཞིང་ལྕེ་སྤྱང་ལ་ཞོན་པ༔ ལ་ལ་ནི་ཁྲག་གི་རྒྱ་མཚོ་བརླབས་ཤིང་གདོང་བཅུའམ་ལྔ་ལ་སོགས་པ་ཡོད་པ༔ ལ་ལ་ནི་ལག་པ་དཔག་ཏུ་མེད་པ་ན་སེམས་ཅན་གྱི་རྣམ་པ་མང་པོ་ཐོགས་པ་དང༔ དེ་བཞིན་དུ་ལ་ལ་ནི་རང་རང་གི་མགོ་བོ་བཅད་ནས་ལག་ཏུ་ཐོགས་པ་ཡོད་པ༔ ལ་ལ་ནི་རང་གི་སྙིང་བཏོན་ནས་ལག་ཏུ་བཟུང་བ་དང ༔ ལ་ལ་ནི་རང་གི་ཁོག་པ་ཕྱེ་ནས་རྒྱུ་མ་བཟུང་ཞིང་ཟ་བ་དང༔ ལ་ལ་ནི་རྟ་དང༔ གླང་པོ་ཆེ་དང༔ བ་གླང་ལ་ཞོན་པ་དཔག་ཏུ་མེད་པ་གནས་པའི་དབུས་ན་དགའ་བྱེད་ཀྱི་མཚོ་ཡོད་པ༔ དུར་ཁྲོད་ན་གནས་པའི་སྲོག་ཆགས་དཔག་ཏུ་མེད་པ་གནས་ཤིང༔ འགྲོ་བ་རྣམས་ཀྱིས་སྐད་ཅིག་འགྱུ་བར་མི་ནུས་པ༔ སྲོག་དངོས་སུ་ལེན་ཅིང་ཟ་བར་བྱེད་པའི་གནས་སུ༔ ཤེས་རབ་ཀྱི་གདུལ་བྱ་ལ་ཕྱིན་ཅི་ལོག་པར་བྱེད་པ་ལ་དགོངས་ནས༔ སློབ་དཔོན་དགའ་རབ་རྡོ་རྗེ་ཉིད་ཀྱིས་དེར་བྱོན་ཏེ༔ ཁྱབ་འཇུག་གི་བུ་མོ་སྐྲ་གྲོལ་བ་གཅེར་བུར་ཕྱུང་པ་ལ་ཞོན་ནས་བྱོན་ནོ༔ དེ་ནས་དུར་ཁྲོད་དེ་ན་གནས་པའི་སྲོག་ཆགས་རབ་ཏུ་འཇིགས་པ་དེ་དག་གིས་ཀྱང༔ ཤིང་ཐོག་ངོ་མཚར་ཅན་མང་པོ་ལྷགས་ཤིང་ཕུལ་རབ་ཏུ་འདུད་དོ༔ དེ་ནས་དབུས་ཀྱི་མཆོད་རྟེན་ལ་སྐུའི་རྒྱབ་གཏད་ནས༔ མཁའ་འགྲོ་མ་ཉི་མའི་འོད་ཟེར་ལ་སོགས་པ་དཔག་ཏུ་མེད་པ་ལ་ཆོས་སྟོན་ཏོ༔ དུས་དེ་ཙ་ན་རྡོ་རྗེ་གདན་གྱི་ནུབ་ཕྱོགས་ན༔ རིམ་པ་གཉིས་པ་ཞེས་བྱ་བའི་གྲོང་ཁྱེར་ན་བྲམ་ཟེ་ལེགས་ལྡན་སྟོན་པ་ཞེས་བྱ་བ་དང༔ ཡུམ་སྣང་བའི་སྒྲོན་མེ་ཞེས་བྱ་བའི་བུ༔ བསྟན་པ་དམ་པ་འཛིན་པའི་བདག་པོ༔ འཇམ་དཔལ་བཤེས་གཉེན་བྱ་བ་རིག་པའི་གནས་ལྔ་ལ་ཁྱད་པར་དུ་སྦྱངས་པ་གཅིག་ཡོད་དེ༔ དེ་ལ་ནམ་མཁའ་ནས་འཇམ་དཔལ་རྣོན་པོས་ལུང་བསྟན་པ༔ དུར་ཁྲོད་ཆེན་པོ་བཟང་ལུང་དུ་ལུང་བསྟན་པ༔ ཀྱེ་རིགས་ཀྱི་བུ༔ འབྲས་བུ་ཚེ་གཅིག་ལུས་གཅིག་ལ་སངས་རྒྱ་བར་འདོད་ན༔ དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག༔ ཅེས་ལུང་བསྟན་ནོ༔ དེ་ནས་འཇམ་དཔལ་བཤེས་གཉེན་གྱིས་དུར་ཁྲོད་བསིལ་བའི་ཚལ་དུ་བྱོན་ནས་དགའ་རབ་རྡོ་རྗེ་དང་ཞལ་མཇལ་བའི་ཞུ་བ་ཕུལ་བས༔ ལོ་བདུན་ཅུ་རྩ་ལྔའི་བར་དུ་སྤྲུལ་པའི་སྐུ་དང་ལྷན་ཅིག་ཏུ་ཆོས་ཉན་ཏོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་ལྔ་བརྒྱ་དང་བཞི་བཅུ་རྩ་བཞི་ལོན་པའི་དུས་ན༔ དེའི་བྱང་ཤར་ན་ཆུ་བོ་དན་ཏིག་བྱ་བའི་མགོར༔ དགའ་རབ་རྡོ་རྗེ་ཉིད་ཟག་པ་དང་བཅས་པའི་ཕུང་པོ་མི་སྣང་བར་བྱས་ནས་ཡོངས་སུ་མྱ་ངན་ལས་འདའ་བའི་ཚུལ་བསྟན་ནས༔ དེའི་ཚེ་ས་རྣམ་པ་དྲུག་ཏུ་གཡོས་པ་དང༔ འོད་ཟེར་གྱི་ཕུང་པོ་དཔག་ཏུ་མེད་པ་དང ༔ སྒྲ་ཆེན་པོ་བྱུང་བས་འཇམ་དཔལ་བཤེས་གཉེན་བརྒྱལ་ཞིང་ས་ལ་འགྱེལ་ལོ༔ བརྒྱལ་སངས་ནས་བལྟས་པས་ནམ་མཁའ་ལ་འོད་ཕུང་གི་དཀྱིལ་ན་བླ་མ་བཞུགས་པ་མཐོང་ནས༔ འཇམ་དཔལ་བཤེས་གཉེན་གྱིས་སྨྲེ་སྔགས་མང་པོ་ཕྱུང་བ༔ ཀྱེ་མ་ཀྱི་ཧུད་ཀྱེ་མ་ཀློང༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་ལན་གསུམ་གྱི་བར་དུ་བརྗོད་པ་དང༔ ནམ་མཁའ་འོད་ཕུང་གི་དཀྱིལ་འཁོར་ནས་ཕྱག་གཡས་པའི་གྲུ་མོ་མན་ཆད་ཕྱུང་སྟེ༔ རིན་པོ་ཆེ་གསར་གྱི་ཟ་མ་ཏོགས་སེན་གང་བ་ཅིག་རབ་ཏུ་འཇིགས་པའི་སྒྲ་དང་བཅས་ཏེ༔ འཇམ་དཔལ་བཤེས་གཉེན་ལ་བསྐོར་བ་ལན་གསུམ་དུ་བྱས་ཏེ༔ ཕྱག་གཡས་པའི་མཐིལ་དུ་བབས་སོ༔ དེ་ཁ་ཕྱེ་ནས་ལྟས་པས་དགའ་རབ་རྡོ་རྗེའི་ཚིག་གསུམ་གནད་དུ་བརྡེག་པ་རིན་པོ་ཆེ་ལྔའི་གཞི་ལ༔ བཻཌཱུ་རྱ་ཞུན་མའི་ཡི་གེ་རང་ནན་གྱི་རྒྱ་དང་བཅས་པ་ཅིག་འདུག་གོ༔ དེ་བལྟས་པ་ཙམ་གྱིས་འཇམ་དཔལ་བཤེས་གཉེན་བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟ་བུར་གྱུར་ཏོ༔ དེ་ཡང་དགའ་རབ་རྡོ་རྗེ་ཆོས་ཟད་པའི་དུས་དང ༔ འཇམ་དཔལ་བཤེས་གཉེན་ཉམས་འཕེལ་བའི་དུས་ཉིད་འཛོམ་པའོ༔ སྤྲུལ་པ་པོ་རང་གྲོལ་བའི་རང་སྣང་སྟེ༔ བསྟན་པ་ཡུན་རིང་དུ་གནས་པར་བྱེད་པ༔ སྤྲུལ་པ་རང་བཞིན་གྱིས་གནས་འབྱེད་དོ༔ ཨཐྎ༔ འཁོར་ལོ་ལྟ་བུ་སྤྲུལ་པའི་སྐུ་ལ་འདུད༔ དེ་ནས་སློབ་དཔོན་འཇམ་དཔལ་བཤེས་གཉེན་གྱིས་འབུམ་ཚོ་དཔག་ཏུ་མེད་པའི་གྲངས་ལས༔ རང་བཞིན་རྫོགས་པ་ཆེན་པོ་རྣམས་ལ་སྡེ་གསུམ་དུ་ཕྱེ་སྟེ༔ སེམས་གནས་པ་རྣམས་ལ་སེམས་ཀྱི་སྡེ༔ བྱ་བྲལ་རྣམས་ལ་ཀློང་གི་སྡེ༔ གནད་གཙོ་བོ་རྣམས་ལ་མན་ངག་གི་སྡེ༔ དེ་ལས་ཀྱང་ཁྱད་པར་དུ་བསྡུས་པ༔ ཐིག་ལེ་རང་གནས་དུ་ཕབ་པ་འདི་ལ༔ སྙན་རྒྱུད་དང་བཤད་རྒྱུད་གཉིས་སུ་ཕྱེ་ནས༔ སྙན་རྒྱུད་གཉིས་མཆན་དུ་བཏབ་ནས༔ བཤད་རྒྱུད་སྙིང་གི་ཏི་ཀ་རྣམས༔ གཏད་པའི་གནས་མ་རྙེད་ནས༔ རྡོ་རྗེ་གདན་གྱི་བྱང་ཤར་མཚམས་ན༔ ཕ་བོང་རྡོ་རྗེ་རྒྱ་གྲམ་གྱིས་བཏབ་པའི་འོག་ཏུ་སྦས་ཏེ༔ མཁའ་འགྲོ་མའི་རྒྱ་དང་བཅས་ཆོས་བདག་གིས་རྒྱས་བཏབ་སྟེ་མི་སྣང་བར་བྱས་སོ༔ དེ་ནས་རྡོ་རྗེ་གདན་ནས༔ ནུབ་ནས་རྒྱང་གྲགས་གཅིག་ན༔ དུར་ཁྲོད་ཆེན་པོ་སོ་སོའི་གླིང་ཞེས་བྱ་བ་ན༔ མཐའ་བསྐོར་དུ་དཔག་ཚད་གཅིག་ཡོད་དེ༔ དེའི་དབུས་ན་རང་བྱུང་གི་མཆོད་རྟེན་རྒྱ་ཆེ་ལ་སྲིད་དུ་རིང་བ༔ འཁོར་ལོ་གདུགས་དང་བྱ་རུར་བཅས་པ་རིན་པོ་ཆེ་དངུལ་ལས་བྱས་པ༔ དྲིལ་བུ་གཡེར་ཁའི་དྲྭ་བས་རབ་ཏུ་མཛེས་པར་སྤྲས་པ༔ ཉི་མ་དང་ཟླ་བའི་རྒྱན་ཡོད་པ༔ དེའི་ལོག་རྣམས་ལ་ཀེའུ་རི་མ་མོ་བརྒྱད་ཀྱི་གཟུགས་རང་བྱུང་དུ་ཡོད་པའོ༔ དེའི་བྱང་ཤར་ན་སྤུ་གྲི་མུན་ཞེས་བྱ་བའི་མཚོ་ཡོད་པ༔ དེའི་ནང་ན་ཆུ་སྲིན་ལ་སོགས་པའི་གདུག་པ་ཅན་སྣ་ཚོགས་གནས་པ༔ མཐའ་མ་ན་སྣ་ཚོགས་འདུལ་པའི་བྲག་གིས་ཀུན་བསྐོར་བ༔ དེའི་ལྷོ་ནུབ་མཚམས་ན་འཇིག་རྟེན་ལྷ་འདྲེ་ངོ་མཚར་ཅན་ནི༔ ཤིང་ལྷ་ནག་པོ་ནྱ་གྲོ་ཏ་ཆེན་པོ་ཞིག་ལ༔ རྩེ་ལ་དུར་བྱའི་ཚང་ཡོད་པ༔ སྐེད་པ་ན་དུག་སྦྲུལ་ནག་པོའི་ཚང་ཡོད་པ༔ རྩ་བ་ན་དུར་ཕག་ནག་པོའི་ཚང་ཡོད་པ༔ འཇིག་རྟེན་གྱི་ལྷ་རྟེན་ནི༔ ཀུན་དགའ་གཞོན་ནུ་ཞེས་བྱ་བ༔ གདོང་པ་སེང་གེ་ལ་ལག་པ་བཞི་ན་རལ་གྲི་དང༔ མི་མགོ་དང༔ མདུང་ཤིང་དང༔ མདུང་རྩེ་གསུམ་པ་ལ་མི་རོ་བཀལ་བ་འཛིན་པ༔ ཐོད་པའི་ཕྲེང་བས་ལུས་ཀུན་ཏུ་བརྒྱན་པ་དང༔ ལུས་ལ་དར་ནག་པོའི་བེར་གྱོན་པ་དང༔ འཁོར་གསོད་བྱེད་མ་མོ་འབུམ་གྱིས་བསྐོར་བ་གླང་པོ་ལ་ཞོན་པ་རབ་ཏུ་ཤ་དང་ཁྲག་ལ་དད་པ་ཞིག་ཡོད་དོ༔ དེར་མཁའ་འགྲོ་མའི་ཚོགས་དཔག་ཏུ་མེད་པ་ཡོད་དེ༔ ལ་ལ་ནི་སེ་གེ་ལ་ཞོན་ཅིང་སྐྲ་གྲོལ་བ༔ ཐོད་པ་དགུ་བརྩེགས་ཀྱི་རྒྱལ་མཚན་འཕྱར་བ༔ ལ་ལ་ནི་བྱའི་ཚོགས་ལ་ཞོན་ཅིང་སེང་གེའི་རྒྱལ་མཚན་འཕྱར་བ༔ ལ་ལ་ནི་ལུས་ཅིག་ལ་གདོང་བཅུ་ཅིག་ཡོད་ཅིང་རྒྱུ་མ་དང་སྙིང་ལ་སོགས་པ་ཟ་བ་དང༔ ལ་ལ་ནི་བུད་མེད་ནག་མོ་རལ་པ་གསིག་ཅིང་ཁ་ནས་སྤྱང་ཁྱི་འབྱུང་བར་བྱེད་པ་དང༔ ལ་ལ་ནི་མིའི་ལུས་ལ་གཤོག་པ་ནམ་མཁའི་མཐའ་དང་མཉམ་པའི་གསེབ་ནས་གནམ་ལྕགས་ཀྱི་ཐོག་ཆར་འབེབས་པར་བྱེད་པའོ༔ ལག་ན་སྟག་གི་རྒྱལ་མཚན་ཐོགས་པ༔ ལ་ལ་ནི་རང་གི་ལུས་སྟོད་སྨད་འབྲལ་ཞིང་གློ་སྙིང་འདོན་པ་དང ༔ ལ་ལ་ནི་རང་གི་ཡན་ལག་བཅད་ནས་ཕྱོགས་ཐམས་ཅད་དུ་དོར་བ་དག་ཡོད་དོ༔ དེ་ལྟར་རྫུ་འཕྲུལ་སྣ་ཚོགས་སྟོན་པར་བྱེད་པ་དཔག་ཏུ་མེད་པ་དག་ཡོད་དོ༔ དེ་ན་དུར་བྱ་དང༔ དུར་ཕག་དང༔ དུག་སྤྲུལ་དང༔ ཅེ་སྤྱང་མདོག་མི་འདྲ་བ་མང་པོ་དང༔ སྤྱང་ཀི་དང༔ ཀི་ལི་ཀ་དང་ལ་སོགས་པའོ༔ རབ་ཏུ་འཇིགས་པའི་བུང་བ་དང༔ རོ་གསར་རྙིང་གི་ཚོགས་དཔག་ཏུ་མེད་པ་མང་པོ་དང༔ རུས་པ་དང༔ ཁྲག་གི་རྒྱ་མཚོ་དང༔ མི་མགོའི་ཁང་པ་དང༔ ཐོད་པ་སྐམ་པོའི་ཁང་བུ་རྣམ་པར་བརྩེགས་པ་ན༔ ལ་ལ་འབྲད༔ ལ་ལ་ཟ༔ ལ་ལ་རྒྱུག༔ ལ་ལ་ངུ༔ ལ་ལ་མིག་འབྱིན༔ ལ་ལ་རྐང་འཆའ་རུས་པ་མུར༔ རྒྱུ་མ་ལ་སོགས་ཟ་བའི་དབུས་དེ་ན༔ རྣལ་འབྱོར་གྱི་དབང་ཕྱུག་རྣམས་གནས་ཏེ༔ རྣལ་འབྱོར་པ་བརྟུལ་ཞུགས་ཀྱི་སྤྱོད་པ་སྣ་ཚོགས་བྱེད་པའི་རྣལ་འབྱོར་ཕོ་མོ་ཡང་མང་དུ་རྒྱུ་བ་ན༔ སློབ་དཔོན་ཆེན་པོ་འཇམ་དཔལ་བཤེས་གཉེན་སེང་གེ་བསྣོལ་བའི་ཁྲི་སྟེང་ན་རྡོ་རྗེ་སྐྱིལ་མོ་ཀྲུང་དུ་བཞུགས་ཏེ༔ གསེར་དང༔ དངུལ་དང༔ རྨ་བྱ་ལ་སོགས་པའི་གདུགས་ཕུབ་པའི་རྒྱལ་མཚན་སྣ་ཚོགས་བསྲང་ཞིང༔ དུར་ཁྲོད་ཁང་བུ་བརྩེགས་པ་ན་བཞུགས་ཤིང་མཁའ་འགྲོ་མའི་ཚོགས་ཀྱིས་ཡོངས་སུ་བསྐོར་ནས་ཏིང་ངེ་འཛིན་སྐྱོང་བ་ལ་ལོ་བརྒྱ་དང་རྩ་དགུའི་བར་དུ་སྙོམས་པར་བཞུགས་སོ༔ དུས་དེ་ཙ་ན་རྒྱ་ནག་པོའི་ཡུལ་སོ་ཤའི་གླིང་ཞེས་བྱ་བ་ན༔ ཡབ་ཁྱིམ་བདག་དགེ་བ་ལྡན་པའི་མིང་ཅན་ཅེས་བྱ་དང ༔ ཡུམ་སྣང་བ་གསལ་བ་རབ་ཏུ་མཁྱེན་པ་ཞེས་བྱ་བའི་བུ༔ ཤྲཱི་སིང་ཧ་ཞེས་བྱ་བ་སྦྱངས་པའི་ཡོན་ཏན་དང་ལྡན་པ་ཞིག་ཡོད་དེ༔ གྲོང་ཁྱེར་ཤོའང་འཇོམས་ནག་པོ་ཞེས་བྱ་བར་སྐྱེས་ནས༔ ལོ་བཅོ་ལྔ་ལོན་པའི་ཚེ་ན༔ རྒྱ་ནག་པོའི་བྱང་ཆུབ་ཤིང་དྲུང་རྒྱ་ནག་པོའི་སློབ་དཔོན་ཧ་ཏི་བྷ་ལ་ཞེས་བྱ་བ་ལས་ཡི་གེའི་འགྱུར་དང༔ རྩིས་དང༔ སྒྲ་དང༔ ཚད་མ་དང༔ བསྟན་བཅོས་དང༔ རིག་པའི་གནས་རྣམ་པ་ལྔ་རྣམས་ལོ་གསུམ་བསླབས་མཁས་པ་རྩོད་པ་མེད་པ་ཅིག་བྱུང༔ དེ་ནས་བྱང་ཆུབ་ཤིང་དྲུང་གི་ནུབ་ཕྱོགས༔ གྲོང་ཁྱེར་གསེར་གླིང་བྱ་བར་འགྲོ་སྙམ་ནས་རྔ་མོང་ནག་མོ་ཤིན་ཏུ་སྟོབས་ཆེ་བ་གཅིག་ལ་ཞོན་ནས་ཁ་ནུབ་ཏུ་བལྟས་ཏེ་ཕྱིན་པས༔ དེ་ཉིད་ཀྱི་བར་གྱི་མཐའ་ཁོབ་ཀྱི་ནམ་མཁའ་ལ༔ ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་མངོན་སུམ་དུ་ཞལ་འཛུམ་པ་མཛད་ནས་བདེན་པ་བྱིན་པའི་ཕྱག་རྒྱ་དང་ལྡན་པས་ཉིད་ལ་ལུང་བསྟན་པ༔ ཀྱཻ་སྐལ་ལྡན་རིགས་ཀྱི་བུ༔ འབྲས་བུ་ངེས་པར་འདོད་ན་ནི༔ རྒྱ་གར་གྱི་ཡུལ་གྲོང་ཁྱེར་སོ་སའི་གླིང་ཞེས་བྱ་བ་ཡོད་པས༔ རིགས་ཀྱི་བུ་དེར་སོང་ཞིག་ཅེས་བྱ་བར་ལུང་བསྟན་པས༔ ཤྲཱི་སིང་ཧ་ཉིད་རབ་ཏུ་ཚིམ་ནས་བསམ་པ་ཅིག་སྐྱེས་ཏེ༔ བདག་ནི་ད་རུང་ན་སོ་གཞོན་པས༔ འབྲས་བུ་གསང་སྔགས་དེ་ཉིད་རབ་ཏུ་གོ་སླ་བར་བྱ་བའི་ཕྱིར༔ ལོ་བདུན་གྱི་བར་དུ་གསང་སྔགས་ཕྱི་ནང་མཐའ་དག་ལ་གོམས་པར་བྱ་སྙམ་ནས༔ དེ་ནས་སླར་རྒྱ་ནག་ཤར་ཕྱོགས་རི་བོ་རྩེ་ལྔར་ཕྱིན་ནས་གདོལ་བའི་སློབ་དཔོན་བི་ལེ་ཀི་ཏི་ཞེས་བྱ་བ་ལ༔ གསང་སྔགས་ཕྱི་ནང་དུ་གྲགས་པའི་རྒྱུད་དང༔ ལུང་དང༔ མན་ངག་དང༔ སྒྲུབ་ཐབས་སུ་གྲགས་པ་རྣམས་ལོ་བདུན་གྱི་བར་དུ་ཤེས་པས་བསླབས་སོ༔ དེ་ནས་ལོ་བདུན་ཅུ་རྩ་གཉིས་བར་ལ༔ དོན་མེད་སྟོང་པར་འདུག༔ དེ་ནས་རྒྱ་ནག་པོ་སོ་ཡར་ཐ་ཞེས་བྱ་བར་རབ་ཏུ་བྱུང་ནས་ལོ་སུམ་ཅུར་ཁྲིམས་སྲུང༔ དེ་ནས་ཡང་སྔ་དྲོའི་དུས་སུ་རི་བོ་རྩེ་ལྔའི་ཤར་ན་ཁྲུས་ཀྱི་རྫིང་བུ་དལ་ཞིང་འཇམ་པའི་ནང་ན་ཁྲུས་བྱེད་ཀྱིན་འདུག་པ་ལ༔ ཤྲཱི་སིང་ཧ་ཉིད་རབ་ཏུ་འགྱུར་སྐད་ཅིག་ཙམ་དྲན་པའམ་ཤེས་པའི་ཉམས་འགགས༔ དེ་ནས་དྲན་པ་སད་ནས་ཡར་ལངས་པས༔ ནམ་མཁའ་ལ་འོད་ཀྱི་ཕུང་པོའི་དཀྱིལ་ན་ཐུགས་རྗེ་ཆེན་པོ་ཉིད་སྣང་བར་གྱུར་ཏེ་ཡང་ལུང་བསྟན་ཏོ༔ དེ་ནས་ཤྲཱི་སིང་ཧའི་བསམ་པ་ལ༔ འདི་ནས་རྒྱ་གར་ཡུལ་དུ་འགྲོ་བ་ལ༔ ལམ་ལ་བར་ཆད་ཀྱི་ས་མང་པོ་ཡོད་སྙམ་ནས༔ རྫུ་འཕྲུལ་གཅིག་སྒྲུབ་ནས་འགྲོ་དགོས་སྙམ་པས༔ བར་དེར་ལེ་ལོ་གཡེང་པས་ལོ་བཅུ་ཙམ་འགྱངས༔ དེ་ནས་ལོ་གསུམ་གྱི་བར་ལ་བསྒྲུབས་པས་གྲུབ་པ་ཐོབ་སྟེ༔ ཁྱད་པར་དུ་ཚེ་ལ་དབང་པོའི་རིག་འཛིན་གྲུབ་བོ༔ དེ་ནས་རིགས་འཛིན་གྱི་རྟེན་ཚོགས་པ་ལ་ལོ་བཅུ་དགུ་ལོན༔ དེ་ནས་རྒྱ་གར་གྱི་ཡུལ་ན་ལོ་བཅུ་དགུ་ཙ་ན༔ སོ་ས་གླིང་དུ་རྫུ་འཕྲུལ་ལ་བརྟེན་ནས་ས་ལ་ཁྲུ་གང་གིས་མ་རེག་པར་རླུང་གིས་བསྐྱོད་པ་བཞིན་དུ་ཕྱིན་ནས་འཇམ་དཔལ་བཤེས་གཉེན་དང་མཇལ་ཏེ་ཕྱག་དང༔ བསྐོར་བ་དང༔ མཎྜལ་འབུལ་བ་དང༔ བླ་མའི་བྱ་བ་རྣམས་བྱས་ཤིང༔ བདག་རྗེས་སུ་གཟུང་བར་ཞུ་བ་ཕུལ་བས་གནང་ངོ༔ དེ་ནས་ལོ་ཉི་ཤུ་རྩ་ལྔའི་བར་ལ་གདམས་པ་རྣམས་ཞུས་ཤིང་དེ་ཉིད་ཉམས་སུ་བླངས་སོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་བརྒྱད་བརྒྱ་དང་སུམ་ཅུ་ལོན་པའོ༔ དེ་དག་ཀྱང་དུར་ཁྲོད་དེ་ཉིད་ཀྱི་དབུས་ཀྱི་མཆོད་རྟེན་གྱི་རྩེ་ལ་འཇམ་དཔལ་བཤེས་གཉེན་ཀྱང་ཟག་པ་དང་བཅས་པའི་ཕུང་པོ་མི་སྣང་བར་ནམ་མཁའ་འོད་དང་སྒྲས་གང་བར་སྣང༔ ས་གཞི་སིལ་སྙན་གྱིས་གང་ཞིང་མྱ་ངན་ལས་འདའ་བའི་ཚུལ་བསྟན་ཏེ༔ དེར་ཤྲཱི་སིཾ་ཧ་ཉིད་བརྒྱལ་ཞིང་ས་ལ་འགྱེད་བར་གྱུར་ཏོ༔ བརྒྱལ་སངས་ནས་བལྟས་པས་དམ་པ་ཉིད་འོད་ཕུང་གི་དཀྱིལ་ན་བཞུགས་པ་མཐོང་ནས་གདུང་བའི་སྨྲེ་སྔགས་བཏོན་པ༔ ཀྱེ་མ་ཀྱི་ཧུད་ཀྱེ་མ་ཀློང༔ སྟོན་པ་རྡོ་རྗེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པས༔ ཕྱག་གཡས་པ་བརྐྱང་སྟེ༔ ཤྲཱི་སིཾ་ཧ་ཉིད་ཀྱི་ཕྱག་གཡས་པའི་མཐིལ་དུ༔ འཇམ་དཔལ་བཤེས་གཉེན་གྱི་སྒོམ་ཉམས་དྲུག་གི་ཞལ་ཆེམས་རིན་པོ་ཆེའི་ཟ་མ་ཏོག་སེན་གང་བ་ཅིག་བབས་སོ༔ དེ་ཞལ་ཕྱེ་ནས་བལྟས་པས༔ རིན་པོ་ཆེ་སྣ་ལྔའི་ཤོག་བུ་ལ༔ རིན་པོ་ཆེ་བརྒྱ་རྩ་གཅིག་གིས་ཡི་གེ་བྲིས་པ་ཅིག་འདུག་སྟེ༔ དེ་བབས་པ་ཙམ་གྱིས་ཤྲཱི་སིཾ་ཧ་ཉིད་རྟོགས་པ་གདིང་དང་ལྡན་པར་གྱུར་ཏེ༔ བུམ་པ་ཚད་ལྡན་ནས་ཚད་ལྡན་དུ་བྱོ་བ་བཞིན་དུ༔ ཚིག་ལྷག་པ་དང་ཆད་པ་མེད་ཅིང༔ དོན་ལ་འཁྲུལ་པ་མེད་པར་གྱུར་ཏོ༔ དེའི་འོག་ཏུ་འཇམ་དཔལ་བཤེས་གཉེན་ཉིད་དེ་ནས་ལོ་སུམ་བརྒྱ་ཉེར་ལྔ་ན༔ རྒྱ་གར་གྱི་ནུབ་ཕྱོགས་གསེར་གྱི་མེ་ཏོག་གིས་བརྒྱན་པའི་གླིང་ཞེས་བྱ་བར་བརྫུས་ནས་སྐྱེས་ཏེ༔ འཇམ་དཔལ་བཤེས་གཉེན་ཕྱི་མ་ཞེས་བྱ་བར་གྲགས་སོ༔ དེ་ནས་ཨོ་རྒྱན་གྱི་སློབ་དཔོན་པདྨ་འབྱུང་གནས་ལ་གསང་སྔགས་སྒྲུབ་སྡེ་མཐའ་དག་གནང་བ་བསྟན་ནོ༔ དེའི་འོག་ཏུ་བསྟན་པ་གསེར་གྱི་སྙིང་པོ་རབ་ཏུ་སྣང་བྱེད་འདི༔ རྣལ་འབྱོར་སྒྲུབ་པ་ལ་བརྩོན་པའི་ཨཱརྱ་དེ་བ་ལ་བསྟན་ནོ༔ དེ་ཉིད་ཀྱང་དུར་ཁྲོད་འཇག་མའི་གླིང་ཞེས་བྱ་བར༔ སྦ་མོ་སྤུངས་པའི་རི་ལ་ཟག་བཅས་མི་སྣང་བར་ཡང་དག་པར་རྫོགས་པར་སངས་རྒྱས་སོ༔ མཆོག་ཏུ་བདེ་བ་འཕེལ་བར་བྱེད་པ་དུར་ཁྲོད་ཀྱི་གནས་འབྱེད་དོ༔ ཨཐྎ༔ དཔལ་ལྡན་ཡེ་ཤེས་རྫོགས་པའི་འཁོར་ལོ་ཅན༔ འཇིག་རྟེན་དྲུག་གི་ཕྱོགས་བཅུ་གང་ནས་ཀྱང ༔ རྙེད་པར་དཀའ་བའི་དམ་པ་རྗེ་ལ་འདུད༔ དེ་ལྟར་འཇམ་དཔལ་བཤེས་གཉེན་འདས་ནས༔ ཤྲཱི་སིང་ཧས་རྡོ་རྗེ་གདན་གྱི་འོག་ནས༔ གསང་བའི་གནད་བསྡུས་པའི་གསང་སྔགས་རྣམས་ཕྱུང་ནས༔ རྒྱ་ནག་པོའི་བྱང་ཆུབ་ཤིང་དྲུང་དུ་སངས་རྒྱས་འབྱུང་བའི་གནས་སུ་ཁྱེར་ནས་ཕྱིན་ཏེ༔ བསྟན་པ་འབྱུང་བ་ཡང་དག་པའི་ཡི་གེ་རྣམས༔ བྱང་ཆུབ་ཤིང་དྲུང་དུ་ལྷ་ཁང་གི་ཡང་སྟེང་བྲང་ཁང་སྦྲེལ་མར༔ ཤྲཱི་སིང་ཧ་ཉིད་ཀྱིས་རྫོགས་པ་ཆེན་པོ་ཐིག་ལེའི་སྐོར་ལ༔ ཕྱི་སྐོར་དང༔ ནང་སྐོར་དང༔ གསང་བའི་སྐོར་དང༔ གསང་བ་བླ་ན་མེད་པའི་སྐོར་དང་བཞིར་ཕྱེ་ནས༔ སྐོར་གསུམ་ནི་སྤྲོས་བཅས་ཀྱི་དོན་དུ་བསྡེབས་ནས༔ ལྷ་ཁང་གི་བྱ་འདབ་ཀྱི་འོག་ཀ་བ་བཞི་སྒྲིལ་གྱི་བར་དུ་ཟངས་ཀྱི་སྒྲོམ་བུའི་ནང་དུ་བཅུག་སྟེ་ཕྱི་རབས་ཀྱི་དོན་དུ་སྦས་ཏེ་མཁའ་འགྲོ་མའི་རྒྱ་དང༔ ཆོས་བདག་གི་རྒྱས་བཏབ་ནས་བར་དེར་མི་སྣང་བར་བྱས་སོ༔ དེ་ནས་ཁྱད་པར་ཟབ་མོའི་གནད༔ གསང་བ་བླ་ན་མེད་པ་ཡོངས་སུ་རྫོགས་པ་ཆེན་པོའི་སྐོར་ནི༔ ཤྲཱི་སིང་ཧ་ཉིད་སྙིང་དང་གཟུགས་ཀྱི་ཕུང་པོ་གཉིས་འབྲལ་བ་མེད་པ་དེ་བཞིན་དུ༔ ཉིད་ཀྱི་ལུས་ལ་རྟག་ཏུ་བཅངས་ཤིང་ཡོད་པ་ལས༔ ནམ་མཁའི་གནས་ལ་འཐུག་པོ་ཞིག་ཏུ་གུ་རུ་ཤྲཱི་སིང་ཧ་ཉིད་ཀྱིས་གསང་བའི་ཉམས་སྐྱོང་ཞིང་ལུས་ཀྱི་སྤྱོད་པ་སྐྱོང་ཞིང་ཡོད་པའི་མཚན་མོའི་རྨི་ལམ་ན་ཤྲཱི་སིང་ཧའི་མ་རུ་བྱས་པ༔ བུད་མེད་རྒྱན་ཀུན་གྱིས་བརྒྱན་པ་གཅིག་ན་རེ༔ ཨེ་མ་བུ་གཅིག་ལོངས་དང་ཨེ་ཤ་ཀྱེ༔ གསང་བ་ཡང་གསང་བསྡུས་པ་སྙིང་ཐིག་སྙིང་པོ་རྣམས༔ བཀྲ་ཤིས་ཁྲི་སྒོའི་ལྷ་ཁང་གི་དཀྱིལ་དུ་སྦོས་ལ་རང་རྒྱས་ཐོབ༔ ཕྱི་རབས་བསྟན་པའི་བཙས་སུ་འགྱུར་རོ༔ ཞེས་ཟེར་བ་ནི་མཁའ་འགྲོ་མ་རྣམ་པར་རོལ་པའི་རྒྱན་ཅེས་བྱ་བས་ལུང་བསྟན་པས༔ དེ་ནས་ཞག་གསུམ་ན༔ རྒྱ་ནག་པོ་བཀྲ་ཤིས་ཁྲི་སྒོའི་ལྷ་ཁང་གི་ཀ་བའི་གསེང་དུ་སྦས་ཏེ༔ མཁའ་འགྲོ་མ་དང་ཆོས་བདག་གིས་རྒྱ་རིམ་པ་གཉིས་ཀྱིས་བཏབ་ཅིང་བར་དེར་མི་སྣང་བར་བྱས་སོ༔ དེ་ཡང་ཁྱད་པར་དུ་སྔགས་ཀྱི་སྲུང་མ་ཨེ་ཀ་ཙ་ཏི་ལ་གཏད་དེ་སྐལ་ལྡན་སྙིང་གི་བུ་དང་འཕྲད་པར་ཤོག༔ ཅེས་སྨོན་ལམ་བཏབ་ནས་མི་སྣང་བ་ཉིད་དུ་མཛད་དོ༔ ཡང་རྩིས་ཀྱི་ཡི་གེ་གཏོ་སྦྱོར་གནད་ཀྱི་རྒྱ་ཆེན་པོ་དང༔ དངོས་པོ་སྒྱུར་བྱེད་གཏོའི་ཡི་གེ་དང༔ ལྷ་ཁང་དུ་སྦས་ནས་མི་སྣང་བར་བྱས་སོ༔ དེ་ནས་ཤཱི་སིང་ཧ་ཉིད་རྒྱ་ནག་པོ་བསིལ་བྱེད་བྱ་བའི་དུར་ཁྲོད་ཤིང་ལྗོན་པ་མང་པོས་ཡོངས་སུ་བསྐོར་བ༔ དེའི་ནང་རིམ་ན་ཤིང་ཀ་ར་བཱི་རས་བསྐོར་བ༔ དེའི་ནང་ན་སྨྱུག་མ་དང་འདམ་བུའི་ཚལ་ཡོད་པ༔ དེའི་དབུས་ན་རོ་གས ར་རྙིང་གི་ཚོགས་དཔག་ཏུ་མེད་པ་ཡོད་པ་ན་མཁའ་འགྲོ་མ་དངོས་སུ་སྒྲ་མང་པོ་འདོན་པ་དང༔ ཤ་ཟ་ཞིང་ཁྲག་འཐུང་བ་རུས་པའི་ཚོགས་མང་པོ་འཆའ་ཞིང་ལྡིང་བ་དང༔ གཟུགས་མི་འདྲ་བ་རྣམ་པ་སྣ་ཚོགས་དང༔ ཁ་དོག་མི་འདྲ་བ་རྣམ་པ་སྣ་ཚོགས་པ་དང༔ དེ་བཞིན་དུ་དུང་འབུད་པ་ལ་སོགས་པའི་སྒྲ་རྣམ་པ་སྣ་ཚོགས་འབྱིན་པའི་དབུས་ན༔ ཐོད་པའི་ཁང་བུ་བརྩེགས་པ་རྩེ་ལ་མེ་འབར་ཞིང་དུ་བ་སྣ་ཚོགས་འཐུལ་བ༔ སྐེད་པ་ན་ཞག་འཛིན་ཅིང་རྩ་བ་ན་ཀླུའི་བུ་མོ་དག་ཁྲུས་བྱེད་ཅིང་ཡོད་པ་ན༔ ཤྲཱི་སིང་ཧ་ཉིད་དགོངས་པ་ལ་གནས་ཏེ༔ གླང་པོ་ཆེ་རབ་ཏུ་བསྣོལ་བའི་ཁྲི་སྟེང་ན༔ ཁྱབ་འཇུག་གཅེར་བུ་བསྒྱུར་བའི་སྟེང་ན་རྡོ་རྗེ་སྐྱིལ་ཀྲུང་དུ་བཞུགས་ཏེ༔ དེའི་ཚེ་ལྷ་དང༔ ལྷ་མིན་ལ་སོགས་པས་གདུགས་དང༔ རྒྱལ་མཚན་དང༔ བ་དན་དང༔ དར་གྱི་ལྡ་ལྡི་ལ་སོགས་པ་བླངས་ཤིང་རབ་ཏུ་འདུད་དོ༔ དུས་དེའི་ཚེ་ན་རྒྱ་གར་གྱི་ནུབ་ཕྱོགས་གླང་པོའི་ཚལ་ཞེས་བྱ་བ༔ གྲོང་ཁྱེར་འབུམ་ཚོ་རྩ་དགུ་ཡོད་པ་ན༔ ཡབ་ཁྱིམ་བདག་བདེ་ལྡན་འཁོར་ལོ་ཞེས་བྱ་བ་དང༔ ཡུམ་བདག་ཉིད་གསལ་མ་ཞེས་བྱ་བའི་བུ་བི་མ་ལ་མི་ཏྲ་ཞེས་བྱ་བ་དང༔ ཡང་རྒྱ་གར་གྱི་ཤར་ཕྱོགས་ཀ་མ་ལ་ཤཱི་ལའི་ཤར་གྱི་གྲོང་ཁྱེར་ན༔ ཡབ་གདོལ་པ་ཤན་ཏི་ལག་པ་ཞེས་བྱ་བ་དང༔ ཡུམ་དགེ་བའི་སེམས་མ་ཞེས་བྱ་བའི་བུ་ཡེ་ཤེས་མདོ་བྱ་བ་དང་གཉིས་བཞུགས་སོ༔ དེའི་དུས་ན་རྒྱ་གར་རྡོ་རྗེ་གདན་ན་པཎྜི་ཏ་ལྔ་བརྒྱ་བཞུགས་ཏེ༔ དེ་རྣམས་ཀྱི་ནང་ནས་དེ་གཉིས་མཁས་པ་ཐུགས་ཤེས་རབ་ལེགས་པར་སྦྱངས་པ༔ སྐྱེ་བ་སྔོན་མ་ལ་བྲལ་ཟེ་སྭ་ཏ་ཞེས་བྱ་བའི་སྲས་སུ་སྐུ་འཁྲུངས་པ༔ དེའི་ཚེ་ཡང་སྐྱེ་བ་སྔ་མའི་ལས་ཀྱི་འབྲེལ་བ་ཡོད་པས་རབ་ཏུ་མཐུན་པ་གཉིས་བཞུགས་ཏེ༔ དེའི་ཚེ་རྡོ་རྗེ་གདན་ནས་ནུབ་ཀྱི་རྒྱང་གྲགས་ན་འདམ་བུའི་ཚལ་རབ་ཏུ་འཐུག་ཅིང༔ མེ་ཏོག་རབ་ཏུ་དྲི་ཞིམ་པ་རྣམས་ཀྱིས་སྤྲས་པ་ཡོད་པར༔ དྲོ་ཐོན་ནས་སྐྱོ་ཤས་སྐྱེས་ཏེ་ས་འཆག་ཏུ་བྱོན་པས་ནམ་མཁའ་ལ་སྒྲ་གཅིག་གྲགས་ཏེ༔ སྟེང་དུ་དུས་གཅིག་ལ་བལྟས་པས་དཔལ་རྡོ་རྗེ་སེམས་དཔའ་དངོས་སུ་འཇའ་ཚོན་ལྟ་བུ་སྐུ་བཞུགས་ཏེ་ལུང་བསྟན་པ༔ ཀྱེ་རིགས་ཀྱི་བུ་གཉིས་ཁྱེད་གཉིས་ཀྱིས་སྐྱེ་བ་ལྔ་བརྒྱའི་བར་དུ་པཎྜི་ཏའི་ལུས་བླངས་ནས་དམ་པའི་ཆོས་སྤྱད་ཀྱང་འབྲས་བུ་གསང་སྔགས་ཡང་མ་ཐོབ་པས༔ སངས་རྒྱས་ཀྱི་འབྲས་བུ་ཐོབ་པར་འདོད་ཅིང ༔ ཚེ་འདི་ཉིད་ལ་ཟག་པ་དང་བཅས་པའི་ཕུང་པོ་མི་སྣང་བར་འདོད་ན༔ རྒྱ་ནག་པོའི་ཡུལ་བྱང་ཆུབ་ཤིང་དྲུང་གི་ལྷ་ཁང་དུ་སོང་དང ༔ ཞེས་ལུང་བསྟན་ནོ༔ དེ་ལྟར་ལུང་བསྟན་པ་ཙམ་གྱིས་བི་མ་ལ་མི་ཏྲ་བརྩོན་འགྲུས་ཆེ་བས༔ དེ་ཀ་ལྟར་ལོག་ནས་གྲོང་ཁང་ནས་ལྷུང་བཟེད་བླངས་ནས་གཤེགས་སོ༔ དེ་ནས་རྒྱ་ནག་པོའི་ཡུལ་བྱང་ཆུབ་ཤིང་དྲུང་དུ་བྱོན་པས་མཁས་པ་ཤྲཱི་སིང་ཧ་དང་མཇལ་ལོ༔ རྗེ་དམ་པ་རབ་ཏུ་མཉེས་ཏེ༔ ལོ་ཉི་ཤུའི་བར་ལ་སྙན་བརྒྱུད་ཀྱི་མན་ངག་དང༔ རྒྱུད་ཕྱི་ནང་གསང་གསུམ་གྱི་གདམས་པ་ནི་གནང་སྟེ༔ དཔེ་ནི་མ་གནང་ངོ༔ དེ་ནས་བི་མ་ལ་ཐུགས་ཚིམ་ནས་སླར་རྒྱ་གར་དུ་བྱོན༔ དེའི་དུས་ན་རྒྱ་གར་གྱི་ཡུལ༔ དགའ་བྱེད་ཀྱི་ཚལ་ཞེས་བྱ་བའི་གྲོང་ཁྱེར་གྱི་མཐར་མཁས་པ་ཡེ་ཤེས་མདོ་དང་མཇལ་བས༔ ཡེ་ཤེས་མདོ་དྲན་པ་རྙེད་ནས༔ བི་མ་ལ་དེ་བཞིན་གཤེགས་པའི་སྤྲུལ་པ་བཞུགས་ཀྱིན་གདའ་འམ་ཞེས་བསྙད་པས༔ བི་མ་ལའི་ཞལ་ནས་བཞུགས་ཀྱིན་གདའ་འོ་ཞེས་གསུངས་སོ༔ ཡེ་ཤེས་མདོའི་ཐུགས་ལ་བདག་ནི་བརྩོན་འགྲུས་རེ་ཆུང་སྙམ་ནས༔ དེ་ཉིད་རང་རྒྱ་ནག་པོའི་ཡུལ་དུ་བྱོན་ནས༔ རང་བཞིན་གྱི་བྱིན་བརླབས་ཀྱིས་ཟླ་བ་དགུའི་ལམ་ལ་ཉིན་གཅིག་གིས་ཆོད་པར་ཕྱིན་ཏེ༔ བྱང་ཆུབ་ཤིང་དྲུང་གི་མདུན་དུ་བྱོན་ནས༔ བླ་མ་མི་བཞུགས་པས་ཡེ་ཤེས་མདོ་ཡིད་འཁྲུགས་ཏེ༔ ཕྱོགས་ཀུན་ཏུ་བལྟས་ཀྱང་གང་ནའང་མི་འདུག་པས་ཐུགས་དགོངས་ལ༔ སྔར་བི་མ་ལར་གང་ན་བཞུས་མ་དྲིས་སྙམ་ནས་བཞུགས་པ་ལས༔ གཞན་གང་ཡང་མ་མཐོང་བར་བུད་མེད་ནག་མོ་ཤིན་ཏུ་ལྡེམ་བག་ཆགས་པ༔ ཆུའི་བན་རྒྱབ་ན་ཁུར་བ༔ སོ་དུང་སོ་འཁོར་མར་འདུག་པ༔ སྨིན་མ་གཡུའི་སྨིན་མ་བར་མ་ཆད་པར་འདུག་པ༔ དཔྲལ་བའི་དཀྱིལ་ན་གཉེར་མ་རྡོ་རྗེ་གྱེན་ལ་ལངས་པ་གཅིག་ཡོད་པ༔ ཤིན་ཏུ་མདངས་དང་ལྡན་པ༔ ལག་ན་གཡུའི་ནེ་ཚོ་ཐོགས་པ་གཅིག་ན་རེ༔ ཀྱཻ༔ སྐལ་བ་དང་ལྡན་པ༔ དམ་པ་ངེས་པའི་ལུང་འདོད་ན༔ བཀྲ་ཤིས་ཁྲི་སྒོར་ཁྱོད་རང་ལ་སྣང་བར་འགྱུར་རོ༔ ཞེས་མཁའ་འགྲོ་མ་མགོན་སེམས་བྱམས་མ་ཞེས་བྱ་བས་ལུང་བསྟན་ནོ༔ དེ་ནས་ཡེ་ཤེས་མདོ་ཉིད་ཀྱིས་རྒྱ་ནག་པོའི་དབུས༔ བཀྲ་ཤིས་ཁྲི་སྒོ་ཞེས་བྱ་བའི་གྲོང་ཁྱེར་ཆེན་པོ་གཅིག་ལ༔ སྒོ་ཤར་སྒོ་རུ་བལྟས་པས་སྟོང་ཕྲག་ཕྱེད་དང་གསུམ༔ ལྷོ་སྒོར་བལྟས་པས་ཕྱེད་དང་གསུམ༔ ནུབ་དང༔ བྱང་དུ་བལྟས་པས་དེ་ཙམ་རེ་རེ༔ ཁྲི་ཕྲག་གཅིག་ཡོད་པའི་དབུས་ན་ལྷ་ཁང་གཅིག་ཡོད་པ༔ ལྷ་ཁང་དེ་ལ་ཡང་ལྷའི་ཁང་པ་བརྩེགས་པ༔ ལྷའི་གཙོ་འཁོར་མི་འདྲ་བ་ཁྲི་ཕྲག་གཅིག་ཡོད་པ༔ དེ་ན་དགེ་སློང་གི་དགེ་འདུན་ཁྲི་ཕྲག་རེ་རེ་ཡོད་པ༔ རྟ་དང་གླང་པོ་ལ་སོགས་པའི་ཁྲི་ཕྲག་རེ་རེ་ཡོད་པ༔ བྱ་དང་རོལ་མོ་བ་རྣམས་ཀྱང་དེ་སྙེད་ཅི་ཡོད་པ་ཁྲི་སྒོ་ཞེས་བྱ་བ་དེར་བྱོན་ནས༔ ཡང་བླ་མ་དང་མ་མཇལ་ཏེ༔ ཐུགས་རབ་ཏུ་འགྱུར་ཏེ༔ བདག་ནི་བསོད་ནམས་རེ་ཆུང་སྐལ་པ་རང་མེད་པ་ཅིག་ཡིན་སྙམ་སྟེ༔ ཡང་བླ་མ་དང་མ་མཇལ་སྙམ་པ་ལ༔ ལྷ་ཁང་དེའི་བྱང་ཤར་གྱི་མཚམས་ཀྱི་བྱ་འདབ་ཀྱི་སྟེང་ན་ལུས་སེང་གེ་ལ་མགྲིན་པ་རྨ་བྱ་རུ་འདུག་པ༔ གདོང་སྡིག་གདོང་དུ་ཡོད་པ༔ ལུས་ལ་ཐིག་ལེ་སྣ་ཚོགས་པས་བརྒྱན་པ༔ ལག་ན་ཐོད་པ་སུམ་བརྩེགས་ཀྱི་དབྱུག་པ་ཐོགས་པ་གཅིག་ན་རེ༔ ཨེ་མ་བུ་ཁྱོད་སྐལ་ལྡན་པས༔ བླ་མ་ད་ཅིའི་བར་ལ་དན་ཏིའི་ཡུལ་དུ་གཤེགས༔ ཁྱོད་ནི་རབ་ལྡན་སྐལ་ཆེ་བས༔ ད་ནི་བྱང་ཕྱོགས་དྲང་པོ་ན༔ བསིལ་བྱེད་ཅེས་བྱའི་དུར་ཁྲོད་ཡོད༔ དེ་ནས་མཁའ་འགྲོ་བརྩེ་བར་ལྡན༔ ལས་ཅན་འདུ་བའི་ཁྱད་པར་ཡོད༔ བུ་ཁྱོད་སོང་ཞིག་དེར་སོང་ལ༔ ཅི་བདེ་བར་ནི་གསང་སྔགས་མནོས༔ ཞེས་གསུངས་སོ༔ དེ་ནི་མཁའ་འགྲོ་མ་སྤྱོད་མ་ཞེས་བྱ་བས་ལུང་བསྟན་ནས༔ དེ་ཉིད་དུ་བྱོན་པས༔ ཤྲཱི་སིང་ཧ་དང་ཞལ་མཇལ་ནས་རིན་པོ་ཆེའི་མཎྜལ་ཕུལ་ནས་ཕྱག་དང་བསྐོར་བ་བྱས་ནས་བདག་རྗེས་སུ་གཟུང་དུ་གསོལ་ཞེས་ཞུས་པས༔ ཐོད་པའི་ཁང་བུ་བརྩེགས་པའི་ནང་ནས་ཁྱབ་འཇུག་གཅེར་བུའི་གདན་ལས་བཞེངས་ཏེ༔ ཅིའང་མི་གསུང་བར་ཕྱག་གི་སོར་མི་གསུམ་གྱེན་ལ་བསླངས་ནས་སྤྱན་ནམ་མཁའ་ལ་གཟིགས་སོ༔ དེའི་ཚེ་ཡེ་ཤེས་མདོའི་ཐུགས་དགོངས་ལ་ལོ་གསུམ་ནས་གནང་བ་ཡིན་ནམ་སྙམ་པས༔ ཤྲཱི་སིང་ཧ་ཉིད་ཀྱིས་མཁྱེན་ནས༔ དབུ་གུག་པ་ལན་གསུམ་མཛད་ནས༔ དེ་ནས་ཡེ་ཤེས་མདོས་ལོ་གསུམ་བར་ལ་མཎྜལ་ཕུལ་བ་དང༔ བཀུ་མཉེ་དང ༔ དྲིལ་ཕྱིས་དང༔ ཕྱག་རྟེན་ལ་སོགས་པ་བླ་མའི་བྱ་བ་ཅི་རིགས་པ་བྱེད་ཀྱིན་བཞུགས་སོ༔ དེ་ནས་ལོ་གསུམ་ལོན་པའི་ཚེ་ན༔ ཡང་ཡེ་ཤེས་མདོས་ཤྲཱི་སིང་ཧ་ལ་ཕྱག་དང་བསྐོར་བ་བྱེད་ཅིང༔ གསེར་ཕྱེ་མ་སྲང་སུམ་ཅུ་སོ་བརྒྱད་ཕུལ་ནས༔ བླ་མས་བདག་རྗེས་སུ་གཟུང་བར་ཞུ་ཞེས་ཞུས་པས་གནང་ངོ༔ ལོ་དགུའི་བར་ལ་སྙན་བརྒྱུད་ལས་མ་གནང་ངོ༔ དེའི་ཚེ་ཡེ་ཤེས་མདོ་བསམ་པ་གཅིག་སྐྱེས་ཏེ༔ གདམས་ངག་འདིའི་འགྲོ་སོ་འདི་ལ་དཔེ་གཅིག་ཡོད་དུ་ཐང་སྙམ་པ་ལ༔ ཡང་ཞུས་པས༔ བྱང་ཆུབ་ཤིང་དྲུང་ནས་དཔེ་རྣམས་བཏོན་ནས་གནང་ངོ༔ བཤད་རྒྱུད་དེ་དག་གི་གདམས་པ་ཡང་ལོ་བཅུ་གཅིག་གི་བར་ལ་གཅོད༔ དེ་ནས་ཡེ་ཤེས་མདོ་ཉིད་ཐུགས་ཚིམ་སྟེ་ཡིད་རངས་པར་གྱུར་པའི་ཚེ༔ ཤྲཱི་སིང་ཧའི་ཞལ་ནས༔ ཁྱོད་ཡིད་རབ་ཏུ་ཚིམ་མམ་གསུངས་པས༔ ཡེ་ཤེས་མདོས་བདག་ནི་ཡིད་རབ་ཏུ་ཚིམ་ཞེས་ཞུས་པས༔ བླ་མའི་ཞལ་ནས༔ གཏད་པ་མེད་གསུངས་པས༔ ཡེ་ཤེས་མདོ་རྟོག་པ་གཅིག་སྐྱེས་ཏེ༔ ད་གདམས་ངག་འདི་ལ་ལམ་ཁྱེར་རབ་ཏུ་ཟབ་པའི་གདམས་ངག་ཅིག་ཡོད་འདུག་ཨང་སྙམ་ནས་ཡང་ཞུས་པས༔ བླ་མའི་ཞལ་ནས་འདི་ལ་དབང་བསྐུར་ཅིག་ཐོབ་དགོས་གསུངས་ནས༔ བཀྲ་ཤིས་ཁྲི་སྒོའི་ལྷ་ཁང་གི་ནང་དུ་ཕྱི་སྤྲོས་བཅས་ཀྱི་དབང་རྫོགས་པར་གནང་ནས༔ དེ་ནས་གསང་བ་བླ་ན་མེད་པའི་མན་ངག་རྣམས་ལོ་གསུམ་གྱི་བར་ལ་གནང་ངོ༔ བླ་མའི་ཞལ་ནས༔ འདི་རྣམས་ལ་དཔེ་ཚན་གཅིག་ཡོད་དེ༔ ཁྱོད་རང་དུས་ལ་བབས་ཙ་ན་གནང་བར་འགྱུར་གྱི་གསུངས་ནས་གདམས་པའི་སྣ་ཁ་ཕལ་ཆེར་རྫོགས་པར་མཛད་དོ༔ དེ་ནས་ཡེ་ཤེས་མདོའི་ཐུགས་དགོངས་ལ་གདམས་ངག་ནི་ཞུས་ཐག་ཆོད༔ རྒྱ་གར་དུ་འགྲོའམ་སྙམ་པ་ལ༔ བསམ་པ་ཕྱིས་སྐྱེས་ཏེ༔ ཡུལ་དུ་འགྲོ་བས་དོན་མེད་སངས་རྒྱ་བའི་གདམས་ངག་ནི་ཡོད༔ འདི་རང་དུ་ཉམས་སུ་ལེན་ཅིང༔ བླ་མའི་ཞབས་ཏོག་བྱ་སྙམ་སྟེ་བླ་མ་ལ་ཞུ་ཕུལ་བས༔ བདག་ནི་ཉམས་སུ་ལེན་པར་ཞུ་ཞེས་ཞུས་པས༔ བླ་མའི་ཞལ་ནས་ཁྱོད་ཉམས་སུ་ལེན་པ་ལ་དབང་རྫོགས་པར་བྱེད་དགོས་པས༔ འདི་དུམ་བུའི་ལུགས་བྱ་བ་ཡིན་གསུངས་ནས༔ གྲོང་ཁྱེར་སྟོང་པ་ཞིག་ཏུ་སྤྲོས་མེད་ཀྱི་དབང་རྫོགས་པར་གནང༔ དེ་ནས་ལོ་གཅིག་ན་རི་བོ་ཆེན་པོ་ཀོ་ས་ལི་ཞེས་བྱ་བའི་རྩེ་མོ་ལ་འཁོར་འདས་རུ་ཤན་འབྱེད་པའི་སྤྱོད་པ་ཚར་བར་བྱས་ཏེ༔ ཤིན་ཏུ་སྤྲོས་པ་མེད་པའི་དབང་རྫོགས་པར་མཛད་ནས༔ ཡང་ངེས་ཤེས་ཐུན་མོང་མ་ཡིན་པ་སྐྱེས་སོ༔ དེ་ནས་ཟླ་བ་གཅིག་ལོན་པའི་དུས་ན་རབ་ཏུ་སྤྲོས་པ་མེད་པའི་དབང་རྫོགས་པར་མཛད་ནས་རང་སེམས་ལ་དབང་ཐོབ་བོ༔ དེ་ནས་ལོ་བཅུ་དྲུག་ཏུ་བླ་མའི་མཛད་སྤྱོད་ལྟ་ཞིང་ཉམས་སུ་བླངས་སོ༔ དེ་དག་གི་དུས་སུ་ཤྲཱི་སིང་ཧ་ཉིད་སྐབས་སུ་བརྟུལ་ཞུགས་རླུང་འཛིན་གྱི་སྤྱོད་པ་མཛད༔ སྐབས་སུ་ཁྱད་པར་གྱི་སྤྱོད་པ་སྟག་དང་མ་ཧེ་ལ་ཞོན་ཅིང ༔ སྐུ་ལུས་གཅེར་བུ་ལ་ཁྲག་དང་ཞག་གིས་བྱུགས་པ༔ དབུ་ལ་རལ་པའི་ཐོར་ཚུགས་ཆེན་པོ་ལ་སྒྲོ་སྣ་ཚོགས་པ་བཙུགས་ཏེ༔ ཕྱག་གཡས་པ་ན་རལ་གྲི་བཟུང ༔ གཡོན་པ་ན་ཐོད་པ་ཁྲག་གིས་བཀང་བ་ཞལ་དུ་གསོལ་ཞིང་དུར་ཁྲོད་རྣམས་སུ་རྒྱུ་བ་དང༔ རེས་གླང་པོ་ཆེ་ལ་ཞོན་ནས་ལུས་ལ་སྟག་གི་པགས་པ་གྱོན་པ་དང༔ ཕྱག་ན་ཌཱ་མ་རུ་དཀྲོལ་ཞིང་སྲིད་པ་སྤྱི་ལུགས་ཀྱི་ཞྭ་གྱོན་པ༔ དུར་ཁྲོད་དུ་རྒྱུ་བ་ལ་སོགས་པའི་སྤྱོད་པ་སྣ་ཚོགས་པ་མཛད་དོ༔ རེས་འགའ་ས་ཆུ་མེ་རླུང་གི་རྟེན་འབྲེལ་དུ་མ་ཡང་འགྲོ་བ་རྣམས་ལ་ཕན་པའི་དོན་དུ་མཛད་དོ༔ དེ་ནས་དུས་དེའི་ཚེ་ཤྲཱི་སིང་ཧ་ཉིད་ལིའི་རྒྱལ་པོ་དཔལ་སྤྱིན་ཅེས་བྱ་བས་སྤྱན་དྲངས་ཏེ༔ སེང་གེ་དཀར་མོ་ཡན་ལག་དྲུག་དང་ལྡན་པ་ལ༔ དར་གྱི་ཁང་བུ་ཕུབ་སྟེ་དེའི་སྟེང་དུ་དར་གྱི་གདུགས་སུམ་བརྩེགས་ཕུབ་སྟེ༔ གནོད་སྦྱིན་གྱི་བུ་སྟོབས་དང་ལྡན་པ་དྲུག་གིས་རྐང་པ་བཏེག་སྟེ་གཤེགས་སོ༔ དེ་ལྟར་གཤེགས་ནས་ཞག་བདུན་ལོན་པའི་ནང་པར་སྒྲ་ཆེན་པོ་ཞིག་གྲགས་ཏེ༔ ཡེ་ཤེས་མདོས་བལྟས་པས༔ ནམ་མཁའ་འོད་ཕུང་གི་དཀྱིལ་ན་དམ་པ་ཉིད་བཞུགས་པ་མཐོང་སྟེ་བརྒྱལ་ཞིང་ས་ལ་འགྱེལ་ལོ༔ བརྒྱལ་སངས་ཙ་ན་ནམ་མཁའ་འོད་ཕུང་གི་དཀྱིལ་སྣང་བར་གྱུར་པ ༔ བར་སྣང་ཐམས་ཅད་ལ་སྒྲའི་ཚོགས་སྙན་པར་དཀའ་བ་དཔག་ཏུ་མེད་པ་གྲགས་པ་དང༔ ས་གཞི་ཐམས་ཅད་རབ་ཏུ་ལྡེག་པ་དང༔ འགུལ་བ་དང༔ འཁྱོམ་པའི་སྟེངས་ན་གསེར་དང་དངུལ་ལ་སོགས་པའི་མེ་ཏོག་སིལ་མ་དཔག་ཏུ་མེད་པ་སྤུངས་པ་དག་མཐོང་སྟེ༔ བདག་གི་བླ་མ་མྱ་ངན་ལས་འདའ་བའི་ཚུལ་བསྟན་སྙམ་ནས་གདུང་བའི་སྨྲེ་སྔགས་ཕྱུང་བ༔ ཀྱེ་མ་ཀྱི་ཧུད་ཀྱེ་མ་ཀློང༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པ་དང༔ ཤྲཱི་སིང་ཧ་ཉིད་ཀྱི་ཞལ་ཆེམས་གཟེར་བུ་བདུན་པ་ཕྱག་གི་མཐིལ་དུ་བབས་པ་དང༔ སྒྲ་ཡང༔ སྙིང་ཐིག་གསང་བའི་མན་ངག་རྣམས༔ བཀྲ་ཤིས་ཁྲི་སྒོར་ཀ་བའི་བསམ་ལེའུ་ནང་ན་ཡོད་ཀྱི་ལོངས་ལ༔ དུར་ཁྲོད་བྷ་སིང་གི་གནས་ལ་སོང་ཞིག་ཅེས་ལུང་བསྟན་ནོ༔ འདིའི་དུས་སུ་སངས་རྒྱས་མྱ་ངན་ལས་འདས་ནས་ལོ་དགུ་བརྒྱ་དང་བརྒྱད་ཅུ་རྩ་བཞི་ལོན༔ མཆོག་ཏུ་སེམས་བ སྐྱེད་པར་བྱེད་པ་དུར་ཁྲོད་ཀྱི་གནས་འབྱེད་དོ༔ སྐུ་གསུམ་ཡེ་ཤེས་ལྔ་ལྡན་པའི༔ མཁྱེན་བདག་ཡེ་ཤེས་ཅན་ལ་འདུད༔ དེ་ནས་ཡེ་ཤེས་མདོའི་དགོངས་པ་ལ༔ བླ་མའི་ལུང་བཞིན་བྱའོ་སྙམ་ནས་གསང་བའི་དཔེ་རྣམས་བཏོན་ནས༔ དཔེ་རྣམས་ཐམས་ཅད་ཆུ་དར་གྱི་ལྡེབ་ལ་དྲིལ་ནས༔ རྒྱ་ནག་པོའི་མི་༤༡ལེ་སྨིན་ཚོགས་བདག་བྱ་བ་དང༔ སེམས་བཟང་དཔལ་གྲོས་བྱ་བ་གཉིས་ལ་བསྐུར་ཏེ་རྒྱ་གར་གྱི་ཡུལ་དུར་ཁྲོད་བྷ་སིང་ཞེས་བྱ་བར་བྱོན་ནོ༔ དུར་ཁྲོད་དེ་ནི་རྡོ་རྗེ་གདན་ནས་ཤར་ཕྱོགས་ཐག་ཤིན་ཏུ་རིང་བ་ན་ཡོད་དེ༔ དེའི་བྱང་གི་ཕྱོགས་ན་རི་ནག་པོ་གླང་པོ་ཆེ་ཉལ་བ་ལྟ་བུའི་ཁ་ནས་ཆུ་འབབ་པ་དང༔ ལྷོ་ནས་སྟག་སེར་པོ་ལངས་པ་ལྟ་བུའི་རི་ལས་ཙནྡན་གོར་ཤི་ཤའི་དྲི་འཐུལ་བ་དང༔ ནུབ་ནས་སེང་གེ་གནམ་ལ་མཆོངས་བ་ལྟ་བུའི་རི་བྲག་ལ་བྱ་ཁྱུང་གི་ཚང་ཡོད་པ༔ ཤར་ན་ཚངས་པ་ལྷའི་ཞལ་ལྟ་བུའི་ལི་ཤིང་ལ༔ དགོས་འདོད་གང་ཡང་འབྱུང་བའི་དབུས་ན༔ བསོད་ནམས་རྫོགས་པའི་མཆོད་རྟེན་ཅེས་བྱ་བ༔ རྒྱུ་རིན་པོ་ཆེ་ཟངས་དང་ལྕགས་ལས་བྱས་པ༔ སྲོག་ཤིང་ཙནྡན་སྦྲུལ་གྱི་སྙིང་པོ་ཅན་ལ༔ རྩེ་མོ་ཤིང་འདབ་སྣ་ཚོགས་པདྨ་བཀྲམ་པ་ལྟ་བུའི་གདུགས་སུ་གྱུར་པ༔ སྐེད་པར་རིན་པོ་ཆེ་མཐོན་མཐིང་གི་འཁོར་ལོ་བརྩེགས་པ་ལྟ་བུའི་འཁོར་ལོ་བྲིས་པ༔ རྩ་བར་པདྨའི་སྙིང་པོ་ཁ་སྦྱར་བ་ལྟ་བུའི་བར་རིམ་གྱི་ངོས་ལ་ཡོད་པ༔ བང་རིམ་ཐ་མའི་སྟེང་ན་ཤིང་གི་རྒྱལ་པོ་སེང་དྷ་ཞེས་བྱ་བ་ཕྱོགས་ཀུན་ནས་ཡོད་དེ༔ ཤིང་དེའི་ཡལ་ག་ཐམས་ཅད་གཅིག་ལ་གཅིག་འབྲེལ་ཏེ་གཡུ་ཐག་འབྲེལ་བ་ལྟ་བུའི་དྲྭ་བ་དང༔ དྲྭ་བ་ཕྱེད་པ་ལྟ་བུར་གྱུར་པ༔ བང་རིམ་འོག་མ་རྣམས་ན་དུར་ཁྲོད་ན་གནས་པའི་སྲོག་ཆགས་དུ་མ་ཡོད་པ༔ དེའི་སྟེངས་ན་ལྷའི་བུ་མོ་མང་པོས་བསྐོར་བར་བྱེད་པ༔ དེའི་སྟེང་མ་ན་བསིལ་བྱེད་ཐོགས་པའི་དགེ་བསྙེན་མ་མང་པོས་བསྐོར་བ་བྱེད་པ༔ དེའི་སྟེང་ན་སྤྲུལ་པའི་བྱ་རིགས་མང་བསྐོར་བ་བྱེད་པའོ༔ དེ་ཉིད་ནས་ལྷོ་དྲང་པོའི་རྒྱང་གྲགས་ཕྱེད་ན་འཇིག་རྟེན་པའི་ལྷ་རྟེན་ཤེལ་གྱི་ཁང་པ་སྒོ་ཡོད་པའི་ནང་ན༔ གཤིན་རྗེ་དུས་མཚམས་བྱ་བ་མདོག་ནག་ལ་སྐྲ་གཡེངས་ཤིང་མཆེ་བ་གཙིགས་པ༔ གསུས་པ་ཆེ་ལ་མིག་གྱེན་དུ་ལྡོག་པ༔ འཇིག་རྟེན་གྱི་མ་མོ་སྟོང་གིས་བསྐོར་བ་གནས་སོ༔ དེའི་སྟེང་དུ་འཛམ་བུའི་གླིང་བསྐྱོད་པར་བྱེད་པའི་ལྷ་བཙུན་དྷ་རི་ཞེས་བྱ་གནས་ཏེ༔ དེ་ཡང་མདོག་དམར་པོ་གཅེར་བུ་བོང་བུ་ཞོན་པ༔ ཁྲག་གི་རལ་པས་ས་གཞི་ཁེངས་པ༔ མིག་ནས་དུ་བ་འཐུལ་བ༔ ཁ་ནས་མེ་འབར་བ༔ ལག་པ་གཡས་པ་ན་མདུང་རྩེ་གསུམ་པ་ལ་མི་རོ་རྒྱང་ཐབས་སུ་བཀལ་བ༔ ལག་པ་གཡོན་པ་ན་བུམ་པ་འཛིན་པ༔ དེ་ལ་བདུད་ཀྱི་འཁོར་བརྒྱད་བརྒྱས་བསྐོར་བ༔ ལས་སུ་གསོན་ཁྲག་འཇིགས་པ༔ དམ་ཚིག་ཉམས་པའི་གཤེད་མ་ཞིག་ཡོད་དེ༔ དུར་ཁྲོད་དེ་ན་རོ་གསར་རྙིང་གི་ཚོགས་དཔག་ཏུ་མེད་པ་གཅིག་གི་སྟེང་ན་གཅིག་ཆགས་པ་དཔག་ཏུ་མེད་པ་ཡོད་པ༔ དུར་ཁྲོད་དེ་ན་གནས་པའི་སྲོག་ཆགས་དེ་དག་ནི༔ ཤིང་གི་འབྲས་བུ་སྣ་ཚོགས་དཔག་ཏུ་མེད་པ་ལ་ལོངས་སྤྱོད་པ་ཤ་ཁྲག་ལ་མི་དད་པའོ༔ དེའི་ཕྱོགས་མཚམས་ན་མི་མགོ་རློན་པའི་ཁང་པ་ན༔ ཤར་ན་མཁས་པ་དཔལ་གྱི་བློ་གྲོས་ཞེས་བྱ་བ་ཁྱུང་ལ་ཞོན་ཅིང་ཁམས་གསུམ་ཀུན་ཏུ་འགྲོ་བར་བྱེད་པ༔ མདོག་སྨུག་ནག་ལ་གདོང་ལྔ་པ༔ རལ་པའི་ཐོར་ཚུགས་གྱེན་དུ་འཁྱིལ་བའི་གསེབ་ན༔ ཐོད་པའི་ཕྲེང་བས་ཡོངས་སུ་བསྐོར་བ༔ ཕྱག་བཅུ་ན་འཁོར་ལོ་དང༔ པདྨ་དང༔ མདུང་ཤིང༔ ཞིང་ཆུང༔ མདའ་གཞུ་ཐོགས་པའོ༔ གཡོན་ན་དགེ་སློང་དང༔ སེང་གེ་དང༔ སྤྱང་ཁྱི་དང༔ བ་དན་དང༔ གཞུ་ལ་སོགས་པའི་ལས་ལ་དུར་ཁྲོད་ཀྱིས་བརྒྱན་པ༔ འཁོར་ཞི་བའི་རིགས་ཀྱི་མཁའ་འགྲོ་མ་སྟོང་གནས་སོ༔ ལྷོ་ན་མཁའ་འགྲོ་མ་མགོན་སེམས་མ་མདོག་སེར་མོ་ཞལ་གཅིག་ཕྱག་གཉིས་པ་ཚོགས་བདག་ལ་ཞོན་པ༔ གཅེར་བུ་འཇིགས་པའི་གཟུགས་ཅན༔ གཡུ་དང་མུ་མེན་གྱི་གཤོག་པ་ཡོད་པ༔ གཡས་ན་ཐོད་པའི་ནང་ན་ཕག་མོའི་ཆང་གིས་བཀང་བ༔ གཡོན་དངོས་གྲུབ་ཀྱི་གཟུགས་བསྣམས་པ༔ མིག་འབྲུ་ཚུགས་སུ་ལྟ་ཞིང་ཞལ་བགྲད་པ༔ རྒྱས་པའི་མཁའ་འགྲོ་མ་སྟོང་གིས་བསྐོར་བ་ཡོད་དོ༔ ཡང་ནུབ་ན་འབར་མ་ཆེན་མོ་མདོག་དམར་མོ་སྐྲ་བརྫེས་པ་གཅེར་བུ་ལ༔ གཡས་རྡོ་རྗེ༔ གཡོན་ཞགས་པ་རྐྱང་བ་རི་དྭགས་ལ་ཞོན་པ༔ འཁོར་དབང་གི་རིགས་ཀྱི་མཁའ་གྲོ་མ་སྟོང་གིས་བསྐོར་བ་ཡོད་དོ༔ བྱང་ན་ཀུན་ཏུ་བཟང་མོ་མདོག་ལྗང་གུ༔ གཅེར་བུ་སྐྲ་གྲོལ་བ༔ གཡས་འུག་པ༔ གཡོན་ཁྲ་ཐོགས་པ༔ སྤྱང་ཀི་ལ་ཞོན་པ༔ འཁོར་ལས་ཀྱི་མཁའ་འགྲོ་མ་སྟོང་གིས་བསྐོར་བའོ༔ བྱང་ཤར་ན་མེ་ཁྱེར་གློག་གི་འཕྲེང་བ་འཛིན་པ་ཞེས་བྱ་བ༔ སྐུ་མདོག་ལྗང་བ༔ གཅེར་བུ་སྐྲ་བརྫེས་པ༔ གཡས་པ་ན་རལ་གྲིའི་ཕྲེང་བ༔ གཡོན་ན་སྡིགས་མཛུབ༔ མ་ཧེ་ལ་ཞོན་པ་ལ་གསོད་པའི་མ་མོ་བདུན་གྱིས་བསྐོར་བ༔ ཤར་ལྷོ་ན་ཤ་བ་རི་སྔོ་སངས་གཅེར་བུ་སྐྲ་གྲོལ་བ༔ ལག་པ་གཉིས་ཀྱིས་བམ་ཆེན་བཟུང་སྟེ༔ ཟ་བར་བྱེད་པ་གླང་པོ་ལ་ཞོན་པ༔ སྒྲོལ་བར་བྱེད་པའི་གིང་མོ་བདུན་གྱིས་བསྐོར་བ༔ ལྷོ་ནུབ་ན་གྲགས་སྦྱིན་མོ་སྔོ་སྐྱ་གཅེར་བུ་སྐྲའི་མདུད་པ་རྒྱབ་ཏུ་བཅིངས་པ༔ ལག་པ་ན་སེང་གེའི་རྒྱལ་མཚན་འཛིན་པ༔ ཁ་ནས་ཧཱུཾ་ཞེས་སྒྲོག་པ༔ རོ་ལ་ཞོན་པ་ཟླ་བའི་འོད་ཡོད་པ༔ ཤ་ཟ་མ་མོ་བདུན་གྱིས་བསྐོར་བའོ༔ ནུབ་བྱང་ན་ཆགས་མེད་མ་མདོག་སྨུག་ནག་སྐྲ་གཅིག་གཡས་ནས་གཡོན་དུ་འཁྱིལ་བ༔ མིག་གཅིག་གིས་སྟོང་གསུམ་དུས་གཅིག་ལ་མཐོང་བ༔ སོ་གཅིག་གིས་དམ་ཉམས་ཀྱི་སྲོག་རྩ་གཅོད་པ༔ ལག་པ་གཅིག་གིས་ནད་ཀྱི་རྐྱལ་པ་དུས་གཅིག་ལ་འཛིན་པ༔ ནུ་མ་གཅིག་གིས་འགྲོ་བ་རྣམས་དུས་གཅིག་ལ་གསོས་པ༔ རྐང་པ་གཅིག་གིས་འཁོར་འདས་རྣམས་དུས་གཅིག་ལ་འཁོར་བ་དང༔ ཤ་དང་ཁྲག་ལ་དད་པ་དང༔ འཆི་བདག་གི་མ་མོ་བདུན་གྱིས་བསྐོར་བ་གནས་སོ༔ དེ་ལ་བྱོལ་སོང་གི་རིགས་དཔག་ཏུ་མེད་པ་དང༔ སྤྲུལ་པའི་མ་མོ་དཔག་ཏུ་མེད་པ་གནས་སོ༔ དེ་དག་གི་ལྷོ་ན་ལྟེ་བ་རིན་པོ་ཆེ༔ ཁྲི་རྐང་བརྩེགས་པའི་སྟེང་ན་སྟག་གྲུས་མ་ལ་ཆིབས་ནས༔ དེ་ཡང་དེ་ཉིད་ཀྱི་སྟེང་ན་སྐྱིལ་ཀྲུང་དུ་བཞུགས་ནས་ཕྱག་མཆོག་སྦྱིན་མཛད་པ༔ རྨ་བྱའི་གདུགས་ཕུབ་ནས༔ ཕྱོགས་ཀུན་ནས་བ་དན་དང༔ བསིལ་གཡབ་ལ་སོགས་པ་བསླངས་པའི་དབུས་ན་ཡེ་ཤེས་མདོ་ཉིད་བཞུགས་ཏེ༔ མཁའ་འགྲོ་མ་རྣམས་ལ་གསང་བ་སྙིང་ཐིག་བཀའ་གསང་ངེས་པ་རྣམས་སྟོན་ཏོ༔ དེའི་ཚེ་ན་བི་མ་ལ་མི་ཏྲ་ཉིད་དུར་ཁྲོད་ཐ་ཆུང་ཞེས་བྱ་བར་གླང་སྔོན་པོ་ཞིག་ལ་ནི་ཞོན༔ ལག་ཏུ་བསིལ་གཡབ་ཀྱི་གདུགས་གཅིག་བཟུང༔ བླ་གོས་ཕྲག་པ་ཡས་ལ་གཟར་ནས་སྤྱོད་པ་ལ་བྱོན་པའི་ཚེ༔ ནམ་མཁའ་ལས་མཁའ་འགྲོ་མ་དཔལ་གྱི་བློ་གྲོས་ཞེས་བྱ་བས་ལུང་བསྟན་པ༔ ཀྱེ་སྐལ་ལྡན་སྔ་མ་བས་ཟབ་པའི་སྙིང་ཐིག་གི་གདམས་པ་བཞེད་ན༔ དུར་ཁྲོད་ཆེན་པོ་བྷ་སིང་གི་ནགས་ལ་སོང་ཞིག་ཅེས་བྱ་བ་ལུང་བསྟན་པས༔ བི་མ་ལ་རབ་ཏུ་བརྩོན་འགྲུས་ཆེ་བས༔ དེ་ཉིད་རང་དུ་དུར་ཁྲོད་བྷ་སིང་དུ་བྱོན་པས་སྔར་གྱི་མཁས་པ་ཡེ་ཤེས་མདོ་བཞུགས་ཀྱིན་འདུག་པས༔ མོས་པ་ཐུན་མོང་མ་ཡིན་པ་སྐྱེས་ཏེ༔ སྔར་གྱི་མཉམ་པོ་ལ༔ བླ་མའི་སློབ་མ་སྔོན་ཡིན་ཀྱང་ཆེ་ཆུང་མ་བརྩིས་པར་ཕྱག་དང་བསྐོར་བ་བྱས་ནས༔ ཀྱེ་དམ་པ་ལགས༔ སྔོན་ཆད་དང་མི་འདྲ་བའི་གདམས་པ་མངའ་བར་གདའ་བས་བདག་རྗེས་སུ་གཟུང་དུ་གསོལ༔ ཞེས་ཞུ་བ་ཕུལ་བས༔ དབུ་གུག་མཛད་པས་མཛོད་སྤུའི་བུ་ག་ནས་འོད་ཟེར་འདོམ་དགུ་བརྒྱ་དང་དགུ་བཅུ་རྩ་ལྔ་སྤྲོས་སོ༔ དེ་ཡང་ངོ་མཚར་སྐྱེས་སོ༔ དམ་པའི་ཞལ་ནས་དེ་ལྟ་བུ་ལ་ངོ་མཚར་རྒྱུ་མེད་གསུངས་ནས་སྤྱན་ནམ་མཁའ་ལ་ལྡོག་པས༔ ལོངས་སྤྱོད་རྫོགས་པ་སྐུའི་ཞིང་ཁམས་ཀྱིས་ནམ་མཁའ་ཁེངས་པ་ཙམ་སྤྲུལ་ནས༔ དམ་པ་སངས་རྒྱས་སྤྲུལ་པ་དེ་ལ་ནི༔ གདམས་པའི་རིགས་མི་འདྲ་བ་དཔག་ཏུ་མེད་པ་བཞུགས་ཀྱིན་འདུག༔ ཁོང་ཟག་བཅས་ཀྱི་ཕུང་པོ་མི་སྣང་བར་ཡོངས་སུ་མྱ་ངན་ལས་འདས༔ སྔོན་ཆད་མ་ཡིན་པའི་མན་ངག་ངོ་མཚར་ཅན་འབའ་ཞིག་ཡོད་པས༔ རིགས་ཀྱི་བུ་དང་བས་རབ་ཏུ་འདུན་པའི་སྒོ་ནས་དབང་བཞི་རབ་ཏུ་རྫོགས་པར་གྱིས་ཤིག་གསུངས་ནས༔ དེ་ཉིད་དུ་སྤྲོས་བཅས་ཀྱི་དབང་རྫོགས་པར་མཛད༔ དེ་ཉིད་ཐོབ་པའི་རྟགས་སུ་མཛོད་སྤུའི་བུ་ག་རབ་ཏུ་གསལ་བར་གྱུར་ཏོ༔ དེ་ནས་ལོ་གཅིག་ལྷའི་ཁང་པ་ཞིག་ཏུ་སྤྲོས་མེད་ཀྱི་དབང་བསྐུར༔ དེ་ཉིད་ཐོབ་པའི་རྟགས་སུ་བ་སྤུའི་བུ་ག་རྣམས་རླངས་བ་དུ་བ་ལྟ་བུར་བྱུང༔ དེ་ནས་ཟླ་བ་དྲུག་གི་བར་ལ་རི་བོ་སྲོད་བྱེད་ཀྱི་རྩེ་མོ་ལ་འཁོར་འདས་རུ་ཤན་འབྱེད་པའི་སྤྱོད་པ་ཚར་བར་སྤྱད་དོ༔ ཤིན་ཏུ་སྤྲོས་མེད་ཀྱི་དབང་རྫོགས་པར་བསྐུར༔ དེ་ཉིད་དུ་ཉམས་སུ་མྱོང་བ་ཐུན་མོང་མ་ཡིན་པ་བསྐྱེད་དོ༔ དེ་ཉིད་ཐོབ་པའི་རྟགས་སུ་ཤངས་ཀྱི་རྩེ་མོ་ལ་ཡི་གེ་ཨ་དཀར་པོ་ཐིགས་ལ་ཁྱད་པ་ཅིག་བྱུང༔ དེ་ནས་ཟླ་བ་དྲུག་ན་རབ་ཏུ་སྤྲོས་མེད་ཀྱི་དབང་རྫོགས་པར་བསྐུར་བས༔ སེམས་ཉིད་ངོ་བོ་ཟང་ཐལ་དུ་མཐོང་ངོ༔ དེའི་དུས་ན་མཁས་པ་ཆེན་པོ་དེ་གཉིས་ཀྱིས་ལོ་བརྒྱ་བརྒྱ་དང་གསུམ་གསུམ་ལོན་ཏེ༔ དབང་དང་པོ་བསྐུར་བའི་དུས་སྐོར་གསུམ་གྱི་གདམས་ངག་དཔེ་དང་བཅས་པ་གནང་ངོ༔ གཉིས་པ་གསང་བ་བླ་ན་མེད་པའི་དཔེ་རྒྱུད་གནང༔ གསུམ་པ་དེ་དག་གི་ཞལ་གདམས་རྣམས་གནང༔ བཞི་པ་སྙིང་ཏིག་གསུངས་པའི་གནད་བསྡུས་པ་མཐའ་དག་མ་ལུས་པར་གནང་ངོ༔ ལོ་བཅུ་བཞིའི་བར་ལ་གདམས་པ་ཞུན་ཐག་བཅད་དོ༔ དེའི་དུས་སུ་སངས་རྒྱས་མྱ་ངན་ལས་འདས་ནས་ལོ་དགུ་བརྒྱ་དང་དགུ་བཅུ་རྩ་བཞི་ལོན་ནོ༔ དེའི་དུས་སུ་ཡེ་ཤེས་མདོ་ཉིད་ཀྱང་ཟག་བཅས་མི་སྣང་བར་ཡོངས་སུ་མྱ་ངན་ལས་འདའ་བའི་ཚུལ་བསྟན་ཏེ༔ ལྷག་མ་མེད་པར་ནམ་མཁའ་འོད་ཀྱིས་བཀང་སྟེ་གཤེགས་པས༔ བི་མ་ལ་མི་ཏྲ་བརྒྱལ་ཞིང་ས་ལ་འགྱེལ་ལོ༔ བརྒྱལ་སངས་ནས་བལྟས་པས་ནམ་མཁའ་འོད་ཕུང་གི་དཀྱིལ་ན་བླ་མ་བཞུགས་ནས༔ བར་སྣང་ཐམས་ཅད་ལྷ་རྫས་ཀྱི་གདུགས་དང༔ རྒྱལ་མཚན་དང༔ བ་དན་ལ་སོགས་པས་གང་བ༔ ས་གཞི་ཐམས་ཅད་ལྷ་དང་མིའི་བྱེ་བྲག་གིས་ཁེངས་པ་དག་མཐོང་སྟེ༔ གདུང་བའི་སྨྲེ་སྔགས་ཕྱུང་བ༔ ཀྱེ་མ་ཀྱི་ཧུད་ཀྱེ་མ་ཀློང༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པས༔ ཕྱག་གཡས་པའི་གྲུ་མོ་མན་ཆད་ཕྱུང་སྟེ༔ བི་མ་ལའི་ཕྱག་གཡས་པའི་མཐིལ་དུ་རིན་པོ་ཆེའི་ཟ་མ་ཏོག་གི་ནང་དུ༔ རིན་པོ་ཆེ་སྣ་ལྔས་རྒྱས་བཏབ་སྟེ༔ དེ་བབས་པ་ཙམ་གྱིས་ཀྱང་བི་མ་ལ་ཉིད་ཀྱང༔ བུམ་པ་ཚད་ལྡན་ནས་ཚད་ལྡན་དུ་བྱོ་བ་ལྟར་ཚིག་ལ་ལྷག་ཆད་མེད༔ དོན་ལ་འཁྲུལ་པ་མེད་པར་གྱུར་ཏོ༔ མ་སྨིན་པ་སྨིན་པར་བྱེད་པ་དུར་ཁྲོད་ཀྱི་གནས་འབྱེད་དོ༔ ཨཐྎ༔ སྱ་མྱ་སྱ་སཾ༔ ༔མཁའ་འགྲོ་མའི་ཚོགས་ཀྱིས་བསྐོར༔ ཡང་དག་ལམ་དུ་འགྲོ་འཛུད་པ༔ འཇིགས་པ་རྣམས་ལས་རྒྱ་ཆེར་སྒྲོལ༔ དམ་པ་སངས་རྒྱས་གཤེགས་ལ་འདུད༔ དེ་ནས་མཁས་པ་བི་མ་མི་ཏྲས་རྒྱ་གར་ཤར་ཕྱོགས་ཀ་མ་རུའི་གྲོང་ཁྱེར་ན༔ རྒྱལ་པོ་སེང་གེ་བཟང་པོ་ཞེས་བྱ་བའི་མཆོད་གནས་ལོ་ཉི་ཤུ་མཛད་དོ༔ དེའི་དུས་ན་སྨྱུག་མའི་བསིལ་ཁང་དུ་བཞུགས་ཤིང༔ ཟས་གོས་དང་བྲལ་ཡང་རྒྱལ་པོ་དེའི་ཚོགས་སོགས་པའི་ཕྱིར་བཞུགས་སོ༔ རྒྱལ་པོ་དེ་ཡང་སློབ་དཔོན་མཁས་པ་དེའི་བྱིན་རླབས་ཀྱིས༔ རང་བཞིན་གྱིས་བསམ་གཏན་ཕེབས་པའམ༔ འཁོར་དང་ལོངས་སྤྱོད་ཕུན་སུམ་ཚོགས་པའམ༔ ཡུལ་ཁམས་ཙམ་དུ་ཡང་བཀྲ་ཤིས་པའི་ཡན་ལག་དང་ལྡན་པར་གྱུར་ཏེ༔ དེ་ནས་རྒྱ་གར་གྱི་ནུབ་ཕྱོགས་གྲོང་ཁྱེར་བི་རྒྱ་ལ་ཞེས་བྱ་བར་རྒྱལ་པོ་དྷརྨཱ་པ་ལ་ཞེས་བྱ་བའི་ཆོས་སྟོན་གསོལ་ཞིང ༔ ནང་ནུབ་རྒྱལ་པོའི་ཚོགས་གསོག་པའི་ཕྱིར་ཆོས་སྟོན་ལ་སྙག་གོ༔ དེ་ནས་དཔག་ཚད་ལྔ་བརྒྱ་ཡོད་པ་འདས་པའི་བྱང་ཕྱོགས་ན༔ དུར་ཁྲོད་རབ་ཏུ་སྣང་བྱེད་ཅེས་བྱ་བ་ཡོད་དེ༔ ཤིན་ཏུ་ནགས་འཐུག་པ་ཞིག་གི་དཀྱིལ་ན་སྤང་གཤོངས་དཔག་ཚད་གཅིག་ཡོད་དེ༔ དེའི་དབུས་ན་རྣམ་པར་རྒྱལ་བ་འཁོར་བ་འཇིག་ཅེས་བྱ་བའི་མཆོད་རྟེན་ཁྲི་ལྕགས་ལས་བྱས་པ༔ བང་རིམ་ནི་ཟངས་དང༔ མུ་མེན་དང༔ གསེར་ལས་བྱས་པ༔ པདྨ་རིན་པོ་ཆེའི་ཟེ་ལ་སྨྱུག་ལས་བྱས་པ༔ བུམ་པ་རིན་པོ་ཆེ་མཐོན་མཐིང་ལས་བྱས་པ༔ བྲེ་རིན་པོ་ཆེ་ཕྲ་མེན་ལས་བྱས་པ༔ འཁོར་ལོ་རྣམས་རིན་པོ་ཆེ་སྣ་མི་འདྲ་བ་བཅུ་གསུམ་ལས་བྱས་པ༔ གདུགས་རིན་པོ་ཆེ་སྣ་ཚོགས་འདུས་པའི་འཁྲིགས་པ་ལས་གྱུར་པ༔ ཉི་ཟླ་དང་བྱ་རུ་ལ་སོགས་པ་རང་བཞིན་གྱི་རྣམ་དག་ཆེན་པོ་ལས་རབ་ཏུ་བྱུང་བའོ༔ དེའི་ཐ་མ་ན་ཆུའི་འོབས་ཡོད་པ༔ ཆུ་དེ་དག་གི་ནང་ན་ཀླུའི་ཕྲུག་གུ་རྣམས་དག་བྱེད་ཀྱི་ཁྲུས་བྱེད་པ༔ དེའི་ལྷོ་ནུབ་ན་འཇིག་རྟེན་པའི་ལྷ་རྟེན་ནི༔ སྨྱུག་མའི་ཕུང་པོ་འདྲ་བའི་རྣམ་པ་དང༔ དྲྭ་བས་ཡོངས་སུ་བསྐོར་བའི་ནང་མ་མཚེའུ་གཡུའི་མཎྜལ་ལྟ་བུའི་སྟེང་ན༔ གསེར་གྱི་བྱེ་མ་བརྡལ་བ་ལྟ་བུའི་ཁ་དོག་སེར་པོ་སྤྲིན་གྱི་ཐོག་ན་མཐིང་ཤུན་གྱི་གུར་ཕུབ་པའི་ནང་ན༔ ཀླུའི་རྒྱལ་པོ་ས་སྲུང་ཞེས་བྱ་མདོག་སེར་པོ༔ མགོ་ལ་སྦྲུལ་མགོ་བདུན་པ་གདེངས་ཀའི་དབུས་ན་ཡིད་བཞིན་གྱི་ནོར་བུ་རིན་པོ་ཆེ་ཡོད་པ༔ ལག་པ་གཉིས་ན་བུམ་པ་དང་སྦྲུལ་ཞགས་ཐོགས་པ༔ ཆུ་སྲིན་སྔོན་པོ་ལ་ཞོན་པ༔ འཁོར་ཀླུའི་རིགས་བརྒྱད་ཀྱིས་བསྐོར་བ༔ རྟག་ཏུ་སེམས་ཅན་ལ་རྣམ་པར་འཚེ་བར་བྱེད་པ་ཞིག་ཡོད་དེ༔ དུར་ཁྲོད་དེ་ན་ནི་མཁའ་འགྲོ་མ་ལ་ལ་དམར་མོ་ཁྲག་གི་རལ་པ་གསིག་ཅིང་རྭ་དུང་འབུད་པ༔ ལ་ལ་ནི་ལི་དུང་ཞོན་ནས་སྔོན་མོ་གཡུའི་གོ་ཅོག་གྱོན་ཅིང༔ ལག་ན་མི་རོ་འཛིན་པ༔ ལ་ལ་ནི་སྟག་ལ་ཞོན་ཅིང་གདོང་དཀར་མོ་ལ་ཁྱུང་གི་གཤོག་པ་ཡོད་ཅིང༔ ལག་ན་རིན་པོ་ཆེའི་བུམ་པ་ནོར་གྱིས་བཀང་བ་ཐོགས་པ༔ ལ་ལ་ནི་སྲིན་མོ་རལ་པ་སྙིགས་པ༔ གཅེར་བུ་མོ་མཚན་ནས་བུ་སྐྱེས་པ་ལ་ཞོན་པ༔ མདོག་དམར་སྐྱ་དུང་གི་གདུགས་འཛིན་ཅིང་ཁ་ནས་ཀུས་འདེབས་པ་ལ་སོགས་པའི་མཁའ་འགྲོ་མ་དངོས་སུ་དཔག་ཏུ་མེད་དོ༔ འདིར་ཡང་མཁའ་འགྲོ་མ་རང་བཞིན་གྱི་སྟོབས་ཀྱི་གླིང་གཞན་གྱི་རོ་རྣམས་ཀྱང་རང་བཞིན་གྱིས་འདིར་འདུ་བའི༔ ཤ་ཟ་བ་དང༔ ཁྲག་འཐུང་བ་དང༔ རུས་པ་མུར་བ་དང༔ གློ་སྙིང་དང་ནང་ཁྲོལ་ཟ་བ་ལ་སོགས་པ་དཔག་ཏུ་མེད་པའོ༔ སྟག་དང་སེང་གེ་ལ་སོགས་པའི་གཅན་གཟན་དཔག་ཏུ་མེད་པ་རྣམས་དང ༔ ཀཾ་ཀ་དང་ལིཾ་དུ་ལ་སོགས་པ་འདབ་ཆགས་དཔག་ཏུ་མེད་པ་རྣམས་ཀྱང་ཤ་དང་ཁྲག་ལ་དད་ཅིང་འདུན་པ་ཤ་སྟག་གོ༔ དུར་ཁྲོད་དེར་ཉིན་མོ་དང་མཚན་མོ་བརྟུལ་ཞུགས་ལམ་དུ་སློང་བའི་སྤྱོད་པ་རྩེ་གཅིག་ཏུ་མཛད་དོ༔ སྟག་ལ་ཞོན་ནས་མདུང་རྩེ་གསུམ་པ་བསྣམས་ནས་སྤྱོད་པ་མཛད་དོ༔ རེས་མ་ཧེ་ལ་ཞོན་ནས་རོའི་རྒྱལ་མཚན་འཕྱར་བ་དང༔ རེས་གླང་པོ་ཆེ་ལ་ཞོན་ནས་བ་དན་དམར་པོ་འཕྱར་བ་དང༔ རེས་ཅེ་སྦྱང་ལ་ཞོན་ནས་ཕྱག་གཉིས་ན་རལ་གྲི་འཛིན་པ་དང༔ རེས་ལིང་དུ་དང་འུག་པའི་ཚོགས་ལ་ཞོན་ནས་ཕྱག་གཉིས་ན་གདུགས་གཉིས་བཟུང་ནས་སྤྱོད་པ་མཛད་པའོ༔ དེ་དག་གི་དུས་ན་སྐུ་མདོག་དང་ཆ་ལུགས་བསྒྱུར་བ་ནི༔ མཁའ་འགྲོ་མ་དབང་དུ་སྡུད་པ་ལ་དགོངས་པའོ༔ སྐབས་སུ་དེ་ལྟ་བུའི་སྤྱོད་པ་མཛད་ཅིང་སྙིང་ཐིག་གདམས་པ་འདི་ལ་ལོ་བདུན་ཉམས་སུ་བླངས་པས་རིག་པ་ཉིད་ཚད་ལ་ཕེབས་ཏེ༔ སླར་འཕོ་བ་ཆེན་པོའི་སྐུར་བཞེངས་ནས༔ གང་ཟག་སུམ་སྟོང་རིམ་གྱིས་སངས་རྒྱ་བའི་ཐབས་ལ་གཙོ་བོར་མཛད་དོ༔ དེའི་འོག་ཏུ་རྒྱལ་པོ་དེའི་དོན་ཆོས་སྟོན་ཅིང་དུར་ཁྲོད་དེར་སེང་གེ་ལ་ཞོན་ནས་དབུ་དྲུག་ལ་ཕྱག་བཅུ་གཉིས་སུ་སྤྲུལ་ནས་ཕྱག་རྣམས་ན་གདུགས་བཟུང་བ་དང༔ ཁྱུང་ལ་ཞོན་ཅིང་ལུས་སེང་གེར་སྤྲུལ་པའི་སྤྱོད་པ་ཡང་ལོ་བཅུ་གསུམ་དུ་མཛད་དོ༔ དེ་དག་གི་འོག་ཏུ་དུར་ཁྲོད་སྣང་བྱེད་དུ་གསང་བ་མཆོག་གི་དཔེ་འདི་རྣམས་ཚར་གསུམ་དུ་བྲིས་ནས༔ དཔེ་ཚར་གཅིག་ནུབ་ཕྱོགས་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་ཀླུའི་རྒྱལ་པོ་རྣམས་ལ་གཏད་ནས༔ ཕྱི་རབས་ཀྱི་སྐལ་ལྡན་རྣམས་ཀྱི་དོན་དུ་སྨོན་ལམ་བཏབ་ནས་སྦས་ཏེ་བར་དེར་མི་སྣང་བར་བྱས་སོ༔ དཔེ་ཚར་གཅིག་ཁ་ཆེའི་ཡུལ་གྱི་མཐའ་འཁོབ་རིག་ལྔན་ཅེས་བྱ་བར༔ གྲོང་ཁྱེར་གྱི་མཐའ་མ་ན་གསེར་གྱི་གླིང་ཞེས་བྱ་བའི་བྲག་གི་སྐྱིབས་ལ་མཁའ་འགྲོ་མ་འདུ་བའི་གནས་སུ༔ ཕྱི་རབས་ཀྱི་སྐལ་ལྡན་རྣམས་ཀྱི་དོན་དུ་མཁའ་འགྲོ་མ་རྣམས་ལ་གཏད་ནས་ཆོས་བདག་གི་རྒྱ་དང༔ བཀའ་རྟགས་དང་གཉིས་བཏབ་ནས་བར་དེར་མི་སྣང་བར་བྱས་སོ༔ དཔེ་ཚར་གཅིག་དུར་ཁྲོད་དེ་ཉིད་ན་སྨྱུག་མའི་བསིལ་ཁང་ན་བཞུགས་ཤིང་བཤགས་པའི་རྟེན་མཛད་པ་དང༔ དུར་ཁྲོད་དེ་ན་གནས་པའི་མཁའ་འགྲོ་མ་རྣམས་ཀྱི་སྒྲིབ་པ་དག་པར་བྱེད་པའི་དོན་དུ་བཞུགས་ཏེ༔ དེ་ཉིད་དུ་བཞུགས་པས་དུས་དུས་སུ་ལྷའི་བུ་རྣམས་ཀྱིས་མཆོད་པའི་སྤྲིན་གཏིབས་པ་དང༔ སིལ་སྙན་གྱི་སྒྲ་སྒྲོག་པ་དང༔ མེ་ཏོག་གི་རིགས་མི་འདྲ་བའི་ཆར་འབེབས་པ་དང༔ བར་སྣང་ལ་བཀྲ་ཤིས་ཀྱི་ཚིགས་སུ་བཅད་པ་མི་འདྲ་བ་མང་པོ་སྒྲོག་པ་དང༔ དེ་བཞིན་དུ་ཀླུའི་རྒྱལ་པོ་དང་གནོད་སྦྱིན་དང་ནམ་མཁའ་ལྡིང་ལ་སོགས་པས༔ མེ་ཏོག་དང༔ འབྲས་བུ་དང༔ འདབ་མ་ཡིས་བརྒྱན་པའི་ཤིང་རྣམས་དང༔ རིན་པོ་ཆེ་སྣ་ཚོགས་ཆར་འབེབས་པར་བྱེད༔ དེ་ལྟར་ཡང་དག་པའི་བཀའ་ཕྱིན་ཅི་མ་ལོག་པ་དེའི་རང་བཞིན་གྱི་བྱིན་གྱི་རླབས་ཀྱིས་ཡུལ་ཕྱོགས་དེ་ཙམ་དུའང་ནད་དང་མུ་གེ་ལ་སོགས་པ་མི་མཐུན་པའི་ཕྱོགས་ཐམས་ཅད་རྒྱུན་ཆད་དོ༔ འདོད་ཅིང་འདུན་པ་དུར་ཁྲོད་ཀྱི་གནས་འབྱེད་དོ༔ ཨཐྎ༔ ས་མ་ཡཱ༔ རྒྱ་རྒྱ་རྒྱ༔ ༔མཁའ་འགྲོ་མི་ཟད་འབར་བའི་སྤྲིན་འཕྲོ་ཞིང༔ དཔའ་བོ་བརྟུལ་ཞུགས་སྤྱོད་པའི་ཐབས་ལ་མཁས༔ གདུལ་བྱའི་རྒྱུད་སྦྱོང་མཁའ་འགྲོ་ཀུན་འདུལ་བ༔ དཔལ་ལྡན་སྤྱོད་པ་མཛད་པའི་སྐུ་ལ་འདུད༔ དེ་ལྟར་ཡང་སྤྱིར་འཛམ་བུའི་གླིང་ན་མཁའ་འགྲོ་མ་འདུ་བར་ངེས་པའི་དུར་ཁྲོད་ཆེན་པོ་བརྒྱ་དང་བཅུ་གསུམ་ཡོད་པ་ལ༔ རྒྱ་གར་ཡུལ་ན་སུམ་ཅུ་རྩ་གཉིས་ཡོད་པ་ལ་བྱེད་པའི་གནས་དྲུག་དང༔ ཉམས་སྐྱོང་བའི་གནས་བཅུ་བཞི་དང༔ དམ་ཚིག་སྐྱོང་བའི་གནས་བརྒྱད་དང༔ འདོད་ཅིང་འདུན་པ་དྲག་པོ་བསྐྱེད་པའི་གནས་བཞི་སྟེ༔ སུམ་ཅུ་རྩ་གཉིས་ཡོད་པ་ལ༔ རང་བཞིན་གྱི་མཁའ་འགྲོ་མའི་གཙོ་མོ་གནས་པའི་གནས་བརྒྱད་ལས་མེད་དོ༔ དེ་ལྟར་བརྒྱད་ན་མཆོད་རྟེན་རེ༔ ཆུ་རེ༔ འཇིག་རྟེན་པའི་ལྷ་དྲག་པོ་རེ༔ སློབ་དཔོན་རེ༔ འདོད་པའི་རི་རེ་ཡོད༔ འཇིག་རྟེན་པའི་ལྷ་དེ་དག་ལ་སྒྲུབ་ཐབས་རེ་ཡོད་པ་དང༔ མ་མོ་རེ་ལ་སྒྲུབ་ཐབས་རེ་ཡོད་པ་ནི་ཤིན་ཏུ་ཟབ་པ་ཡིན་ནོ༔ ཨོ་རྒྱན་གྱི་ཡུལ་ན་བརྒྱད་ཡོད་དོ༔ ཁ་ཆེའི་ཡུལ་ན་བཅུ་ཡོད་དོ༔ ལི་དང་ཧོར་ན་ལྔ༔ ཚ་བ་དམར་ཐག་དང་དུང་གི་ཡུལ་ན་ལྔ༔ མི་ཉག་དང་ཟ་ཧོར་གྱི་ཡུལ་ན་བཅུ༔ འཐོན་མི་དང་གར་བསམ་གྱི་ཡུལ་ན་བཅུ༔ རྒྱ་གར་གྱི་ཡུལ་ན་སུམ་ཅུ་རྩ་གཉིས་ཡོད་དོ༔ བོད་ན་མཁའ་འགྲོ་མ་འདུ་བར་ངེས་པའི་གནས་གཉིས་ལས་མེད་དེ༔ དབུ་རུ་གཞོའི་ཏི་སྒྲོའི་བྲག་དཀར་པོ་ལ་ལས་ཀྱི་མཁའ་འགྲོ་མ་རེས་འདུ་རེས་མི་འདུ་བའི་མ་མོ་བདུན་གནས་སོ༔ ཀོང་པོའི་ལྷོ་ནུབ་མཚམས་ན་གློ་དང་རྡོའི་བར་ན༔ བྱར་པོ་ནས་ཉི་མ་བདུན་ན་ཙཱ་རི་ཙཱ་གོང་ཞེས་བྱ་བ་ཡེ་ཤེས་ཀྱི་མཁའ་འགྲོ་མ་འདུ་བར་ངེས་པ༔ ལ་བཅུ་གཅིག་བརྒལ་བའི་མགོ་ན་མཁའ་འགྲོ་མ་ཁྲུས་བྱེད་པའི་མཚོ་ཞེས་བྱ་བ༔ འོ་མའི་རྣམ་པ་ལྟ་བུ་དཀར་བ་སྔོ་དམར་གྱི་རི་མོ་ཡོད་བ༔ དེའི་དབུས་ན་རིན་པོ་ཆེ་ལས་བྱས་པའི་མཆོད་རྟེན་བཀྲ་ཤིས་སྒོ་མང་གི་སྒོ་བདུན་ཅུ་རྩ་བདུན་ན་དཔལ་མགོན་བདུན་ཅུ་རྩ་བདུན་གྱི་སྐུ་ཤེལ་ལས་གྲུབ་པ་ཡོད༔ པདྨའི་ཕྲེང་བ་ལ་ཞི་བའི་ལྷ་བཞི་བཅུ་རྩ་གཉིས་ཡོད་པ༔ བང་རིམ་འོག་མ་ལ་དཔལ་ཁྲག་འཐུང་ལྷ་དགུའི་དལ་ཡོད་པ༔ སྟེང་མ་ལ་འཕགས་པ་འཇམ་དཔལ་གྱི་ལྷ་སུམ་བརྒྱའི་དཀྱིལ་འཁོར་ཡོད་པ༔ དེའི་སྟེང་མ་ན་མ་རྒྱུད་ཀྱི་ལྷ་རྣམས་ཡོད་པ༔ བང་རིམ་དགུ་ལ་དོན་གྱི་གསང་སྔགས་ཀྱི་ནང་དུ་གྲགས་པའི་ལྷ་རྣམས་ཡོད་པ༔ བུམ་པ་ན་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཡོད་པ༔ བྲེ་ལ་གསང་འདུས་ཀྱི་ལྷ་རྣམས་ཡོད་པ༔ འཁོར་ལོ་དང་གདུགས་དང་བྱ་རུ་ལ་སོགས་པས་རབ་ཏུ་བརྒྱན་པའོ༔ དེར་ནི་དུས་གཉན་གྱི་དུས་སུ༔ མཁའ་འགྲོ་མ་རྣམས་ཀྱིས་ཙནྡན་དཀར་པོའི་ཆར་འབེབས་པ་དག་ཡིན་ནོ༔ དེ་མ་ཡིན་པ་མཁའ་འགྲོ་མའི་གཟུགས་དང༔ གནས་ས་དང༔ བྱ་བའི་རིམ་པ་དང༔ དངོས་གྲུབ་ཇི་ལྟར་ཐོབ་པའི་བཤད་པ༔ སའི་ལམ་ཡིག་གི་རིམ་པ་ནི་ཡོད་དོ༔ ལ་རེ་བརྒལ་བའི་བརྩོན་ཡང་མཁའ་འགྲོ་མའི་གནས་ཕྲ་མོ་རེ་ཡོད་དོ༔ དེ་དག་ལ་གཟུགས་སྟོན་པ་དང་། སྒྲ་སྒྲོགས་དང༔ ཧཱུྃ་ཧཱུྃ་ཞེས་ཟེར་བ་ཡོད་དོ༔ འདིར་ནི་དད་པ་ཅན་ལུས་དང་སྲོག་མི་ལྟ་བའི་ཚེ་ཕྱི་མ་དང་དུ་ལེན་པའི་གང་ཟག་སྐྱེས་བུ་ཞིག་གིས་ཕྱིན་ནས༔ མཚོའི་ཟམ་པ་ལེགས་པར་རྙེད་པར་བྱས་ནས༔ བསྐོར་བ་ལན་གསུམ་བྱས་པ་ཙམ་གྱིས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ལ་ཐེ་ཚོམ་མེད་དོ༔ རྒྱ་གར་གྱི་དུར་ཁྲོད་དངོས་དེ་རྣམས་རྙེད་ན་ཡང་དེ་བཞིན་ནོ༔ རྒྱ་གར་གྱི་དུར་ཁྲོད་ན་མི་མ་ཡིན་མང་པོ་ཡོད་དོ༔ དུར་ཁྲོད་དངོས་དེ་རྣམས་ནི་ཤིན་ཏུ་རྙེད་པར་དཀའ་བས་ལམ་གྱི་ཡི་གེ་དམ་པས་ཤེས་སོ༔ མིང་མི་འདྲ་བ་ནི་དཔག་ཏུ་མེད་པ་ཡོད༔ དུར་ཁྲོད་དངོས་དེ་དག་ཏུ་རོའི་ཚོགས་སུ་ཀྱང་མ་བསྐྱལ་བར་འདུའོ༔ རོ་སྐྱེལ་བའི་དུར་ཁྲོད་དེ་རྣམས་ན་མི་མ་ཡིན་དྲག་པོ་ཚོགས་ཏེ་ཕལ་ཆེར་བར་ཆོད་འབྱུང་ངོ༔ དངོས་ཀྱི་དུར་ཁྲོད་དེ་རྣམས་སུ་ཕྱིན་པ་ཙམ་གྱིས་མཆོག་གི་དངོས་གྲུབ་ཐོབ་པར་ངེས་སོ༔ དེ་དག་ནི་སློབ་དཔོན་གྲུབ་པ་ཐོབ་པ་རྒྱུན་མ་ཆད་པར་བཞུགས་ངེས་སོ༔ དུར་ཁྲོད་ཀྱི་གྲངས་ངེས་ཀྱི་གནས་འབྱེད་དོ༔ པཎྜི་ཏ་ཆེན་པོ་བི་མ་ལའི་ཞལ་སྔ་ནས་དང༔ ལོ་ཙཱ་བ་སྐ་ཅོག་གཉིས་ཀྱིས་བསམ་ཡས་དབུ་རྩེ་རིས་གསུམ་གྱི་བར་ཁང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ༔ ཨཐྎ༔ ཞེས་ལོ་རྒྱུས་དང་པོ་ལས་གནས་འབྱེད་བདུན་པ་རིག་འཛིན་བརྡའི་བརྒྱུད་པ་གཏན་ལ་ཕབ་པའོ༔ གང་ཟག་སྙན་བརྒྱུད་པ་ལ་འགྱུར་བ་མེད་དོ༔ རྫོགས་སོ༔ ཚིག་བརྒྱུད་སྤྲོས་པ་གཅོད་པའི་ལྷ་ལ་ཕྱག་འཚལ་ལོ༔ ད་ནི་གང་ཟག་སྙན་ཁུང་བརྒྱུད་པའི་གཏམ་རྒྱུད་ངོ་མཚར་ཅན་སྟོན་ཏེ༔ དེ་ལ་གང་ཟག་ནི་གསུམ་སྟེ༔ སྤྲུལ་པའི་གང་ཟག་དང༔ ལམ་ལ་དབང་བའི་གང་ཟག་དང༔ མོས་པས་གཅོད་པའི་གང་ཟག་གོ༔ སྤྲུལ་པའི་གང་ཟག་ནི༔ རྗེ་བློན་རིན་པོ་ཆེ་ལ་སོགས་པའོ༔ གང་ཟག་གི་ལུས་ལྟར་སེམས་ཅན་གྱི་ལུས་སུ་སྤྲུལ་པ་ཙམ་དུ་ཟད་པ་ལས་ཡང་དག་པར་སངས་རྒྱས་པ་ཡིན་པའོ༔ ལམ་ལ་དབང་བའི་གང་ཟག་ནི༔ གྲུབ་པ་ཐོབ་ཟིན་པ་རྣམས་སོ༔ མོས་པས་གཅོད་པ་ནི་སྒྲུབ་པར་འདོད་པ་རྣམས་སོ༔ གང་ཟག་ཅེས་བྱ་བ་ནི་ཟག་པ་དང་བཅས་པའི་ཕུང་པོ་ལ་རྣམ་པར་དག་པའི་ཡེ་ཤེས་གང་ཞིག་རྒྱས་ནས་ཡོད་པ་སྟེ༔ དེ་ཉིད་ཚིག་རྒྱུད་འཁྲུལ་པ་མེད་པ་ལ་བརྟེན་ནས་འདི་ཉིད་ལ་ཟག་པ་མི་སྣང་བར་སངས་རྒྱ་བར་བྱེད་དོ༔ དེ་ལྟར་བྱས་པས་ཉོན་མོངས་པའི་ཟག་པ་ལ་སོགས་པ་རྣམས་ཟད་པར་བྱེད་པའོ༔ སྙན་ནི་རྣ་བའི་དབང་པོ་ཕྱིན་ཅི་མ་ལོག་པས་ཚིག་གི་སྒྲོས་ལྷག་པ་དང་ཆད་པ་མེད་པར་ཚིག་ཏུ་ཤེས་པ་དང༔ དོན་རང་གི་རྒྱུད་ལ་བརྟེན་ནས་ཐ་མ་ཚིག་གི་སྒྲོ་འདོགས་ཆོད་པར་བྱེད་པའོ༔ བརྒྱུད་པའི་དགོངས་པ་ལ་ཡང་དག་པར་རྫོགས་པའི་སངས་རྒྱས༔ སྟོན་པ་ཆོས་ཀྱི་སྐུ་ནས་ད་ལྟར་གྱི་རྣལ་འབྱོར་པ་བདག་ཡན་ཆད་དུ༔ ཚིག་ལ་ལྷག་ཆད་མེད་ཅིང་སྒྲོས་མ་ནོར་བ་དང༔ གང་ཟག་མིའི་ཚིག་གིས་བསྣན་ཕྲི་མ་བྱས་པར་ཐོག་མ་ལས༔ མང་ཉུང་མེད་པར་གཅིག་ནས་གཅིག་ཏུ་བརྒྱུད་པ་ནི༔ དཔེར་ན༔ མི་མང་པོའི་ལག་ཏུ་གསེར་གྱི་པ་ཏྲ་ཤིན་ཏུ་ལེགས་པ་གཅིག་བརྒྱུས་ཀྱང ༔ དེ་ཉིད་བསྣན་ཕྲི་མེད་པར་ཐ་མ་གཅིག་གི་ལག་ཏུ་རྡོལ་བ་དང་འདྲ་བར་ཚིག་རྒྱུད་ལ་ལྷད་མ་ཞུགས་པས༔ བུམ་པ་ཚད་ལྡན་ནས་ཚད་ལྡན་དུ་བྱོ་བ་ལྟར་ལྷག་ཆད་མེད་པར་ཁེངས་པ་དང་འདྲ་བར་བྷུདྡྷ་ནས་རིག་འཛིན་དང་ད་ལྟའི་ཡོ་གི་ཡན་ཆོད་དགོངས་པ་མཉམ་ཞིང༔ ལྷག་ཆད་མེད་པར་བསྡུར་ཐུབ་པས་ན༔ མན་ངག་རབ་ཏུ་ཟབ་པའི་རྟགས་ཡོན་ནོ༔ དེ་ལྟ་བུའི་མན་ངག་གསང་ཆེན་ངེས་པ་དེ་སུ་ལ་བརྒྱུད་ན༔ དུས་དེ་ཙམ་ན་རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་དྷི་ཆུང་བ་ཅེས་བྱ་བ་ཆོས་སྐྱོང་མགོན་པོ་བྱམས་པའི་སྤྲུལ་པ་གཅིག་ལ་མཆོད་གནས་པཎྜི་ཏ་ལྔ་བརྒྱ་བཞུགས་ཏེ༔ དེ་དག་གི་ནང་ནས་མཁས་ཤིང་གྲུབ་པ་ཐོབ་པ། བི་མ་ལ་མི་ཏྲ་འཕོ་བའི་སྐུར་བཞེངས་པ་གཅིག་ཁྱད་པར་དུ་མཆོད་གནས་ལོ་དྲུག་ཅུའི་བར་ལ་མཛད་པ་ཞིག་བཞུགས་སོ༔ དེ་ཙམ་ན་བོད་ཀྱི་ཡུལ་ན་རྒྱལ་པོ་བྱང་ཆུབ་སེམས་དཔའ་འཇམ་དཔལ་དབྱངས་ཀྱི་སྤྲུལ་པ་ཁྲི་སྲོང་ལྡེའུ་བཙན་ཞེས་བྱ་བས་དཔལ་བསམ་ཡས་ལྷུན་གྱིས་གྲུབ་པའི་གཞལ་ཡས་ཁང་བཞེངས་ཤིང་དམ་པའི་ཆོས་དར་ཞིང་རྒྱས་པར་མཛད་པ་ཞིག་དང༔ དེའི་མཆོད་གནས་མྱང་ཏིང་འཛིན་བཟང་པོ་ཞེས་བྱ་བ་ལོ་བདུན་དང་ཟླ་བ་བདུན་གྱི་བར་ལ་ཞི་གནས་རྩེ་གཅིག་ཏུ་གནས་པ༔ ཤའི་སྤྱན་རྣམ་པར་དག་པས་གླིང་བཞི་དུས་གཅིག་ལ་གཟིགས་པ་ཞིག་བཞུགས་ཏེ༔ མྱང་བན་ཆེན་པོ་དེའི་ཞལ་ནས་རྗེ་ལ་འདི་སྐད་བགྲོས་ཏེ༔ ཀྱེ་རྒྱལ་པོ་ལགས༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས༔ དེ་དག་གི་ནང་ནས་འབྲས་བུ་གསང་སྔགས་ལ་མཁས་པ་གཅིག་སྤྱན་དྲངས་ནས་བོད་ཀྱི་རྒྱལ་ཁམས་སུ་གསང་སྔགས་ཀྱི་བསྟན་པ་དར་ཞིང་རྒྱས་པར་བགྱིའོ་ཞེས་བསྙད་པས༔ རྒྱལ་པོ་ཡང་རབ་ཏུ་མཉེས་ནས་དེ་ལྟར་བགྱི་གསུངས་ནས༔ དེ་ཙམ་ན་བོད་ཀྱི་རྒྱལ་ཁམས་ན་བློ་རྣོ་བ་དབུ་རུ་འཕན་ཡུལ་གྱི་སྐ་བ་པ་ན༔ སྐ་བ་བློ་བརྟན་དང༔ འགྲོ་བཟང་རྡོ་རྗེ་ལྕམ་གྱི་བུ་སྐ་བ་དཔལ་བརྩེགས་ཞེས་བྱ་བ་དང༔ རུ་ལག་ཤབ་ཀྱི་དར་སྒོང་ནས་ཅོག་རོ་རྒྱལ་འབྱུང་དང༔ འབྲོ་གཟའ་མཛེས་མའི་བུ་ཅོག་རོ་ཀླུའི་རྒྱལ་མཚན་ཞེས་བྱ་བ་གཉིས་གཅིག་ཏུ་བསགས་ནས་ལི་གར་དའི་སྐྱེམས་དྲངས༔ དབུ་ལ་རིན་པོ་ཆེའི་པྲོག་ཞུ་བཀོན་ནས་རྒྱལ་པོས་བཀའ་བསྒོ་བ༔ ཀྱེ་རིགས་ཀྱི་བུ་རྫུ་འཕྲུལ་ལྕེ་ལ་དབང་ཐོབ་པ་གཉིས་འོ་སྐོལ་བོད་ཀྱི་རྒྱལ་ཁམས་སུ་འབྲས་བུ་གསང་སྔགས་རབ་ཏུ་ཟབ་བའི་བསྟན་པ་དར་བར་བྱ་བའི་ཕྱིར༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ༔ མཆོད་གནས་པཎྜི་ཏ་ལྔ་བརྒྱ་བཞུགས་པར་འདུག་པས༔ དེའི་སྤྱན་སྔར་སོང་ལ་གསེར་གྱི་པ་ཏྲ་བདུན་པོ་འདི་ཕུལ༔ གསེར་ཕྱེ་བྲེ་དགུ་པོ་འདི་ཕུལ་ལ༔ འདི་བོད་ཀྱི་རྒྱལ་པོས་སྐྱེས་སུ་བསྐུར་བས༔ སྐྱེས་ལན་དུ་པཎྜི་ཏ་མཁས་པ་མཆོག་ཏུ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་བརྫོང་བར་ཞུ་ཞེས་བརྗོད་ལ༔ སོང་ཞིག་ཅེས་རྒྱལ་པོས་བཀའ་བསྒོ་བས༔ ལོ་ཙཱ་བ་གཉིས་པོས་རྒྱལ་པོའི་བཀའ་བྱུང་བས༔ རྒྱ་གར་ཡུལ་དུ་ཕྱིན་ཏེ༔ རྒྱལ་པོ་ཨིནྡྲ་བྷུ་ཏི་ལ་ཕྱག་མཛད་ནས༔ སྔར་རྒྱལ་པོའི་གསེར་གྱི་པ་ཏྲ་དང་གསེར་ཕྱེ་རྣམས་ཕུལ་ཏེ་སྔར་གྱི་འཕྲིན་བྱས་པས༔ རྒྱལ་པོ་རབ་ཏུ་དགྱེས་ནས་བོད་བྱང་ཆུབ་སེམས་དཔའ་གཉིས་བསིལ་ཁང་འདིར་བཞུགས་ཤིག་ཟེར་ནས༔ པཎྜི་ཏ་རྣམས་གྲོ་ལ་བྱོན་པའི་དུས་སུ་གྲོ་གསོལ་བའི་གྲལ་ལ༔ རྒྱལ་པོ་དེས་ཀྱེ་མཁས་པ་ཆེན་པོ་རྣམས་བདག་ལ་བོད་ཀྱི་རྒྱལ་པོས་སྐྱེས་ཤིན་ཏུ་བཟང་བ་གཅིག་བསྐུར་བྱུང་བས༔ དེའི་སྐྱེས་ལན་དུ་པཎྜི་ཏ་མཁས་པ་མཆོག་ཏུ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་ཐོང་ཟེར་གཏང་འཚལ་ཞེས་བསྒོ་བས༔ སློབ་དཔོན་བྷུདྡྷ་གུ་ཧྱའི་ཞལ་ནས༔ དེ་སྐད་ཟེར་བའི་སྐྱེས་སྐྱེལ་བ་དེ་གང་ན་གདའ༔ འདིར་ཁྲིད་ལ་ཤོག་དང་གསུངས་ནས༔ རྒྱལ་པོས་ཁྲིད་ནས་འོངས་པས༔ ལོ་ཙཱ་བ་གཉིས་ཀྱིས་བི་མ་ལའི་སྐུའི་མཚན་རྟགས་རྣམས་མཐོང་བས་མོས་པ་རབ་ཏུ་སྐྱེས་ཏེ༔ ཡར་གྱི་ཚོ་ཡང་སྤྱན་དུས་ཅིག་ལ་བི་མ་ལ་གཟིགས༔ མར་གྱི་ཚོ་ཡང་ཡར་གཟིགས་པ་བྱེ་མ་ལས་མཁྱེན་ནས་བཞེངས་པས༔ གྷ་གྷ་པ་རི་ཞེས་པའི་སྒྲ་བརྗོད་པས༔ ལོ་ཙཱ་བ་གཉིས་ལ་ཚིག་གོ་ལུགས་གཉིས་བྱུང་སྟེ༔ ཅོག་རོས༔ གཞུ་མོ་དག་ལ་བརྟེན་པའི་མདའ༔ སྐྱེས་བུའི་མཐེ་མོས་རྩོལ་ཕོད་ན༔ མདའ་ཡིས་ཕ་རོལ་སྐྱེས་བར་འགྱུར༔ ཞེས་བྱ་བར་གོ༔ སྐ་བས༔ གྲུ་བོ་དག་ལ་བརྟེན་པའི་མིས༔ མཉེས་པའི་སྐྱ་བས་རྩོལ་ཕོད་ན༔ མི་ཡིས་རྒྱ་མཚོའི་ཕ་རོལ་སྒྲོལ༔ ཞེས་ཚིག་ཐ་དད་ལ་དོན་གཅིག་ཏུ་གོ་ནས༔ བི་མ་ལ་ལ་ཞུས་པས༔ བྱེ་མ་ལ་ལ་བསྟེན་པ་ཡི༔ རྒྱལ་པོ་ཁྱོད་ཀྱིས་གཏོང་ཕོད་ན༔ ངས་བོད་ལ་ཕན་ཐོགས་ཏེ་འོང་གསུངས་ནས༔ རབ་ཏུ་ཟབ་པ་གསང་བ་སྙིང་ཐིག་གི་དཔེ་ཚར་གཅིག་དང་བཅས་ཏེ༔ ཨཱ་ཙརྱ་སའི་སྙིང་པོ་བྱ་བ་གཡོག་པོར་ཁྲིད་ནས་བྱོན་པས་དེའི་མཚན་མོ་རྨི་ལམ་ཐམས་ཅད་ཀྱང་འཁྲུགས༔ རྒྱ་གར་ཡུལ་ཙམ་གྱི་མེ་ཏོག་དང་འབྲས་བུ་དང་ཤིང་དང་ལོ་ཏོག་ཐམས་ཅད་བོད་དུ་སོང་བ་རྨི་བ་དང༔ ཉི་ཟླ་བོད་ཀྱི་ཕྱོགས་སུ་སོང་བ་རྨི་བ་དང༔ དེའི་ཚེ་དུར་ཁྲོད་བསིལ་བ་ཚལ་གྱི་མཁའ་འགྲོ་མ་རྣམས་ཆོ་ངེ་འདེབས་པ་འདུག་པ་དང༔ རྒྱལ་པོའི་ཆུ་ཚོད་དང་དབྱུག་གུའི་རྩིས་ཐམས་ཅད་འཁྲུགས་ཏེ༔ ནང་པར་གྱི་དུས་སུ་རྒྱལ་པོའི་ཕོ་བྲང་གི་སྒོ་མདུན་དུ་རྒྱ་གར་གྱི་མི་ཐམས་ཅད་འདུས་ནས་རྨི་ལམ་བསྡུར་བར་ཀུན་མཐུན་ཏེ་འདི་ཅིས་ལན་གྱེས་པས༔ ལ་ལ་ན་རེ་ཅི་ཟེར༔ ལ་ལ་ན་རེ་ཅི་ཟེར་བས༔ བུད་མེད་གཅིག་ན་རེ༔ རྒྱལ་པོ་མདུན་དུ་སྤྱན་དྲོངས་དང༔ རྒྱལ་པོའི་མཆོད་གནས་བོད་ལ་ཤོར་རམ༔ སྔ་ལྟས་ནི་པཎྜི་ཏ་མཁས་པ་གཅིག་གིས་འབྲས་བུ་གསང་སྔགས་ཀྱི་ཆོས་བརྩམས་ནས་དཔེ་ཙམ་མེད་པ་ཡིན་པས༔ རྒྱལ་པོ་ལ་དྲིས་པས་ཁ་རྩང་བྱེ་མ་ལ་བོད་དུ་ཤོར་ཟེར་བས༔ རྒྱ་གར་གྱི་མི་རྣམས་ཀྱིས་རྐང་མགྱོགས་བརྫངས་ནས། བོད་ཀྱི་ལུང་མདོ་དང་སྲང་མདོ་ཐམས་ཅད་དུ་མདོ་བྱང་བཏགས་ཏེ༔ བོད་ཀྱི་བནྡེ་གཉིས་ཀྱིས་མཐའི་མོན་བུ་ཕྲ་མེན་གྱི་ངན་སྔགས་ཁྱེར་ནས་སོང་བས་བོད་ཀྱི་རྒྱལ་ཁམས་རྣམས་ཕུང་ངོ་ཞེས་མདོ་བྱང་མང་པོ་བཏགས་པས༔ དུས་དེ་ཙམ་ན་བི་མ་ལ་མུ་ཏྲ་སྤྱན་དྲངས་ནས༔ དཔལ་བསམ་ཡས་སུ་བྱོན་ཏེ༔ ལོ་ཙཱ་བ་གཉིས་ཀྱིས་ངོ་སོ་བཅས་པས་རྒྱལ་པོ་ལ༔ པཎྜི་ཏ་ནི་གྲུབ་པ་ཐོབ་ཅིང་འཕོ་བའི་སྐུར་སླར་སེམས་ཅན་དོན་དུ་བཞེངས་པ་སྤྱིར་སྡེ་སྣོད་མ་ལུས་པ་མཁྱེན་ཅིང༔ མཆོག་ཏུ་འབྲས་བུ་གསང་སྔགས་ལ་ཐུགས་ཀྱིས་དགོངས་རྒྱལ་པོ༔ རྒྱ་གར་དུ་དཔེ་ཙམ་ཡང་མ་བཞག་པར་བོད་དུ་བསྣམས་ནས་བྱོན་ནས་མཆིས་སོ་ཞེས་བསྙད་པས༔ རྒྱལ་པོའི་ཞལ་ནས་དོ་ནུབ་བུ་ཚལ་གསེར་ཁང་དུ་བཞུགས་དང༔ ནང་པར་གྲོ་གང་དུ་མོས་པ་དང་སྤྲོ་བ་བྱའོ་གསུངས་ནས༔ བུ་ཚལ་དུ་བཞུགས་སོ༔ དུས་དེ་ཙམ་ན་བོད་ཀྱི་བློན་པོ་གདུག་པ་ཅན་རྣམས་ཀྱིས་མདོ་བྱང་བཀླག་པ་དང༔ བསམ་ཡས་སུ་པཎྜི་ཏ་བྱོན་ནོ་ཞེས་ཐོས་ནས༔ བློན་པོ་རྣམས་ཀྱིས་སྤྱན་སྔར་འདུག་ནས་འོ་སྐོལ་གྱི་འདི་ན་མཐའི་མོན་བུ་ཕྲ་མེན་གྱི་ངན་སྔགས་སྣ་ཚོགས་པ་ཁྱེར་བ་ཡོད་གདའ༔ རྒྱལ་པོས་བཀའ་ཆད་གསོལ་ལ་འདིར་མ་བཞག་པར་ཞུ་བ་ཕུལ་ཏེ༔ ནང་པར་ལོ་ཙཱ་བ་གཉིས་ཀྱིས་རྒྱལ་པོའི་སྐུ་མདུན་ཕྱིན་ཏེ༔ ཞལ་མཇལ་བར་ཞུ་ཞེས་བསྙད་པས༔ རྒྱལ་པོའི་ཞལ་ནས་ཁྱེད་གཉིས་ཀྱི་དེ་པཎྜི་ཏ་གཤའ་མ་མིན་པར་འདུག༔ ཕྲ་མེན་གྱི་ངན་ཐབས་སྣ་ཚོགས་ཁྱེར་བ་ཡིན་པར་འདུག་པས་ཞག་འགའ་མཚན་བརྟག་གོ་གསུངས་ནས་མ་གནང་ངོ༔ དེ་ནས་ལོ་ཙཱ་བ་གཉིས་རབ་ཏུ་སྡུག་བསྔལ་ཞིང༔ ཞག་གསུམ་བུ་ཚལ་དུ་ཉལ་བའི་ནང་མ་གཅིག་བི་མ་ལ་བཞེངས་ནས༔ རྣམ་པར་སྣང་མཛད་གཟུགས་ཀྱི་ལྷ༔ གཟུགས་ཀྱི་ལྷ་ལ་ཡེ་ཤེས་ལྷ་ཡིས་ཕྱག་བགྱིའོ༔ ཞེས་ཕྱག་མཛད་པས༔ དེར་ལྡེར་བཟོ་རྣམས་ཐལ་བར་ཕུང་གིས་སོང་བས་ལོ་ཙཱ་བ་གཉིས་ངོ་མཚར་སྐྱེས་ནས་རྒྱལ་པོ་ལ་བསྙད་པས༔ འོ་དེ་ཀུན་ཕྲ་མེན་གྱི་ངན་ཐབས་ཡིན་གསུངས་ནས༔ ཡང་ལོ་ཙཱ་གཉིས་སེམས་རབ་ཏུ་མ་བདེ་སྟེ༔ བདག་ཅག་གཉིས་ཀྱིས་རྒྱ་གར་ཙམ་ནས་དཀའ་ལས་སྤྱད་ནས༔ མཁས་པ་ངོ་མཚར་འདི་ལྟ་བུ་སྤྱན་དྲངས་པ་ལ༔ རྒྱལ་པོ་འདི་ཅི་ཡིན་སྙམ་ནས་ཐུགས་མུག་གོ༔ དེ་ནས་ཡང་ཞག་གསུམ་གྱི་ནང་པར་བཞེངས་ནས༔ རྣམ་པར་སྣང་མཛད་གཟུགས་ཀྱི་ལྷ༔ གཟུགས་ཀྱི་ལྷ་ལ་ཡེ་ཤེས་ལྷ་ཡིས་དབང་བསྐུར་རོ༔ ས་ཕུང་ལ་དབུ་ཞྭ་ཕུད་ནས་བསྐོན་པས༔ སྐུ་གཟུགས་སྔོན་མ་བས་རབ་ཏུ་ལེགས་པ༔ རྒྱ་གར་གྱི་ལུགས་སུ་བྱུང་སྟེ༔ གཟིམ་དངས་དང་ལྡན་པར་གྱུར་ནས་ཡང་ལོ་ཙཱ་བ་གཉིས་ཀྱི་རྒྱལ་པོ་བསྙད་པས༔ དེ་ནས་རྒྱལ་པོ་ཐུགས་ཆེས་ཏེ༔ འོ་ན་བོད་ཀྱི་རྒྱལ་ཁམས་སུ་རྐང་མགྱོགས་བརྫངས་ནས་ཟླ་བ་གཅིག་གི་ཚེས་གསུམ་གྱི་ཉིན་པར་འདུས་ཤིག་པར་བཏང་ནས༔ དེ་ནས་ཟླ་གཅིག་གི་ནང་པར་དབུ་རྩེ་རིགས་གསུམ་སྒོ་མདུན་དུ་གཡས་སུ་རྒྱལ་པོ་ལ་གཡུ་ཁྲི་རབ་ཏུ་འཕང་མཐོ་བ་བརྩིགས༔ གཡོན་དུ་གསེར་སྤྲམ་གྱི་ཁྲི་རབ་ཏུ་འཕངས་མཐོ་བ་བརྩིགས་བོད་ཀུན་འདུས་ནས་རྒྱལ་པོས་པཎྜི་ཏ་ལ་ཕྱག་མཛད་པས༔ རྒྱལ་པོའི་ཐུགས་ཀར་དར་མེན་གྱི་དཀྱིལ་ན་རིགས་གསུམ་མགོན་པོའི་ལྷ་བཀྲ་ཡལ་ལེ་འདུག་པ་ཀུན་གྱིས་མཐོང་སྟེ་དེ་ལྟར་འདུག་པས༔ བི་མ་ལས་དབུའི་རིན་པོ་ཆེ་པྲོག་ཞུ་ལ་ༀ་ཨཱཿཧཱུྃ་ཞེས་སེ་གོལ་བརྡབས་པས་རིགས་ལྔའི་སངས་རྒྱས་སུ་ཀུན་གྱིས་བཀྲ་ཡལ་ལེ་མཐོང་བས་བོད་ཀྱི་རྒྱལ་ཁམས་ཀྱི་མི་ཙམ་གྱིས་བསྟོད་པ་ལེགས་སོ༔ འདིའི་དུས་ན་བི་མ་ལས་ལོ་སུམ་བརྒྱ་བཞེས་པ་ལགས༔ རྗེ་བློན་རིན་པོ་ཆེ་ལ་དེ་ལྟར་མི་མངའ་ཡང་གདུལ་བྱ་ལ་དགོངས་པའོ༔ དེ་ལྟར་བི་མ་ལ་དང་སྤྲུལ་པའི་རྗེ་བློན་གཉིས་མཇལ་བའི་ཚེ༔ སངས་རྒྱས་མྱ་ངན་ལས་འདས་ནས་ལོ་སྟོང་དང་བརྒྱད་ཅུ་ཐམ་པ་ལོན་པ་ལགས་སོ༔ དུས་དེ་ཙམ་ན་བི་མ་ལ་མཆོད་གནས་དམ་པར་ནི་བཟུང༔ ཕ་རོལ་ཏུ་ཕྱིན་པ་དང་དབུ་མའི་ཆོས་གསུང་ཞིང་བཞུགས་ཏེ་བི་མ་ལ་གྲོ་ལ་བཞུད་པའི་བར་དུ༔ སྡུད་པ་གསུང་བའི་ཁྲིའི་རྩར་སྤྲང་པོ་གཅིག་བྱུང་སྟེ༔ དེས་གཞན་གྱིས་མ་ཚོར་བར་ཡི་གེ༔ ཉན་ཐོས་བྱིས་པའི་ཆོས་ཀྱི་སངས་མི་རྒྱ༔ ཕོ་རོག་རྡོ་རྗེ་འགྲོས་ཀྱི་ས་གཞིའི་དལ་མི་སྙོམས༔ བྱ་བའི་ཚིག་གཉིས་པ་གཅིག་བྲིས་པ་འདུག་ནས༔ དེ་ནས་བི་མ་ལས་ཁྲི་ཁར་བྱོན་ནས་ཀ་བ་ལི་ཞལ་ཕྱེ་བས་ཡི་གེ་མཐོང་བས༔ བི་མ་ལའི་ཞལ་ནས་འདིར་སུ་འོངས་གསུངས་སོ༔ ཆོས་ཉན་པའི་གྲྭ་པ་དེ་དག་རྣམས་ན་རེ་སུ་ཡང་མ་བྱུང་ཟེར་རོ༔ ཁྱེའུ་གཅིག་ན་རེ༔ ད་ཅི་རྩ་ན་སྤྲང་པོ་རྒད་པོ་གཅིག་ཀོར་ཀོར་འདུག་པ་ཡིན་ཟེར་བས༔ བི་མ་ལའི་ཞལ་ནས་སྤྲང་པོ་དེ་ཚོལ་དང་གསུངས་ནས་འཁོར་རྣམས་ཀྱིས་བཙལ་བས་གླིང་གསེབ་ཀྱི་ཉོས་ཆང་མ་གཅིག་གི་ཁྱིམ་ན་འདུག་ནས་ཁྲིད་ནས་འོངས་ཏེ༔ བི་མ་ལས་དྲིས་པས༔ བདག་ནི་པ་གོར་བཻ་རོ་ཙ་ནའི་སློབ་མ་གཡུ་སྒྲ་སྙིང་པོ་བྱ་བ་ལགས་སོ་ཟེར་ནས་སེམས་སྨད་ལྔ་ལ་མཁས་པ་གཅིག་འདུག་གོ༔ དེའི་ཚེ་བི་མ་ལས་ཁོང་ལ་དྲན་པ་སེམས་སྡེ་བཅུ་གསུམ་བསྟན་པ་དང༔ གཡུའི་སྒྲ་དང་ལྟ་བ་མཉམ་སྒོམ་པ་མཉམ་སྤྱོད་པ་མཉམ་སྟེ་བྱ་མ་བུ་མཉམ་པ་ལྟ་བུར་གྱུར་ནས༔ སྔ་འགྱུར་དང་ཕྱི་འགྱུར་ཞེས་བྱ་བ་ཡང་དེ་ཙམ་ན་ཐོས་པ་ལགས་སོ༔ དེ་ནས་རྗེ་བློན་གྱིས་ཞུས་ཏེ༔ ལི་གར་ཏིའི་སྐྱེམས་ཕྲ་མེན་གྱི་ཡོལ་གོ་གང་དང༔ རྟ་སྔོན་པོ་གཡུ་བྱ་བྱ་བ་ལ་གསེར་གྱི་སྒ་སྲབ་དང་ཟབ་ཆེན་གྱི་སྟན་དང༔ གཡུའི་ཐུར་དང་ཁ་གསེར་ཁ་གཡུ་དང་བཅས་ཕུལ་ནས་ཆོས་འགའ་བསྒྱུར་བར་ཞུ་བ་ཕུལ་བས༔ བི་མ་ལའི་ཞལ་ནས་རྟ་དང་གསེར་གྱིས་དགོས་པ་མེད༔ ཆོས་ནི་སེམས་ཅན་གྱི་དོན་དུ་བསྒྱུར་ན་བདག་གིས་ཅི་རིགས་པར་བསྒྱུར་བར་བྱའོ༔ གསུངས་ནས༔ དབུ་རྩེ་རིགས་གསུམ་གྱི་ལྷོ་ནུབ་ཀྱི་མཚམས༔ སྒྲ་བསྒྱུར་རྒྱ་གར་གྱི་གླིང་དུ་ཕ་རོལ་ཕྱིན་པ་དང༔ རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང༔ དཔལ་ཡང་དག་དང༔ ཕུར་པ་དང༔ མ་མོ་དང༔ གཤིན་རྗེ་རྣམས་ནི་ཕལ་ཆེར་གཉགས་ཛྙཱ་ན་ཀུ་མཱ་རས་བསྒྱུར་རོ༔ སེམས་སྡེ་དང་ཀློང་གི་མན་ངག་འགའ་ཙམ་ཡང་བསྒྱུར་རོ༔ སྐོར་གསུམ་གྱི་རྩ་བའི་རྒྱུད་ལྔ་ཡང་གཉགས་ཀྱིས་བསྒྱུར་རོ༔ གསང་བ་བླ་ན་མེད་པའི་རྒྱུད་ལུང་རྣམས་ནི༔ གཞན་སུ་ལ་ཡང་ཆ་མེད་པར་རྗེ་བློན་གསུམ་གྱི་ཐུགས་དམ་གྱི་མནོགས་ཆོས་སུ་མཛད་ནས་རིགས་གསུམ་བར་ཁང་དུ་སྲོད་དང་ཐོ་རངས་བསྒྱུར་རོ༔ སྐོར་གསུམ་གྱི་རྒྱུད་ལྷག་མན་ངག་རྣམས་ཀྱང་བསྒྱུར་རོ༔ དེ་ལྟར་ལོ་བཅུའི་བར་ལ་འབྲས་བུ་གསང་སྔགས་ཀྱི་རྒྱུད་མང་པོ་བསྒྱུར་ཅིང་བཞུགས་སོ༔ དེ་ནས་རྗེ་བློན་གྱིས་བཀའ་བསྒྲོས་ནས་ཆོས་འདི་ལྟར་ཟབ་པ་ནི་སྔོན་ཆད་ཀྱང་མ་བྱུང༔ ཕྱིས་ཀྱང་བོད་ཡུལ་དུ་མི་འབྱུང་བས༔ འདི་ལ་ཚུལ་བཞིན་དུ་སྤྱོད་པ་མི་འབྱུང་བས་ཕྱི་རབས་ཀྱི་དོན་དུ་སྦ་བར་བཀས་བཅད་དོ༔ དེ་ནས་བི་མ་ལས་མཆིམས་ཕུའི་བྲག་དམར་དགེ་གོང་དུ་གསང་བ་བླ་ན་མེད་པའི་གསང་བ་སྙིང་ཐིག་གི་པོ་ཏི་རྣམས་རྒྱའི་དཔེ་ལས་བོད་ཀྱི་ཡི་གེར་བསྒྱུར་ནས༔ རྒྱ་ནག་པོའི་ཡུལ་དུ་འགྲོ་བར་ཐུགས་ཀྱིས་དགོངས་ནས༔ རྗེ་བློན་གཉིས་ལ་ཡང་མ་གནང་བར་ཕྱི་རབས་ཀྱི་བསྟན་པའི་བཙལ་སུ་སྦས་སོ༔ ཐིག་སྐོར་གསུམ་གྱི་རྒྱུད་མན་ངག་ལྷག་ཆད་མེད་པར་རྒྱའི་དཔེ་རྣམས་ནི་ཕྱི་མའི་དུས་སུ་ཆོས་འདིའི་སྐོར་གྱི་ཡི་གེ་རྣམས་ཚོང་འདུས་ཀྱི་འོ་མ་བཞིན་བསླད་པའི་གང་ཟག་འགའ་འབྱུང་བས༔ དེ་དག་གི་གཞུང་དང་མན་ངག་རྣམས་མི་ཉམས་པར་བྱ་བ་ལ་དགོངས་ནས༔ རྒྱ་དཔེ་རྣམས་སྦས་ནས་བཞུགས་སོ༔ དེར་ཡང་རྗེ་བློན་གྱི་ཐུགས་ཀྱི་རྟོག་པ་ལོ་གསུམ་གྱི་བར་ལ་བཅད་ནས་རྒྱ་ནག་པོའི་ཡུལ༔ ལྕི་བ་ཐུབ་པའི་རི་ཞེས་བྱ་བ་ལ་གཤེགས་ཏེ༔ འདིའི་དུས་ན་བི་མ་ལས་ལོ་སུམ་བརྒྱ་དང་བཅུ་གསུམ་བཞེས་པ་ལགས་སོ༔ མཁས་པ་དེ་ནི་སངས་རྒྱས་ཀྱི་བསྟན་པ་ཇི་སྲིད་གནས་པའི་བར་ལ་འགྲོ་བ་མིའི་ལུས་སུ་བཞུགས་པ་ལགས་སོ༔ ལོ་བརྒྱ་བརྒྱ་ལ་སྤྲུལ་པ་རེ་རེ་བོད་དུ་སྣང་བར་བྱེད་དོ༔ མཁས་པ་དེ་ནི་སྤྲུལ་པའི་སྐུ་དགའ་རབ་རྡོ་རྗེ་དང་ཞལ་ལན་བདུན་མཇལ་ཞིང་མན་ངག་རྣམས་ཀྱི་ཞུ་ཏིག་མཛད་དོ༔ དེ་ཡང་རྒྱ་གར་གྱི་ཡུལ་ཝཱ་རཱ་ཎ་སཱིའི་ལྷོ་ནུབ་ན་རི་བྱ་རྐང་ཞེས་བྱ་བ་ལ་ལན་ལྔ་མཇལ་ལོ༔ རྡོ་རྗེ་གདན་དུ་གཉིས་ཏེ་ལན་བདུན་མཇལ་བས་ཐིག་ལེ་མཆོག་གི་རྒྱུད་ལུང་མན་ངག་རྣམས་ལ་ཡིད་ཆེས་སོ༔ མཁས་པ་དེ་ནི་བསྟན་པ་མི་གནས་པའི་དུས་ན་རྡོ་རྗེ་གདན་དུ་ལྷག་མ་མི་སྣང་བར་འགྱུར་བ་ཡིན་ནོ༔ ཨཱ་ཙརྱ་སའི་སྙིང་པོ་ནི་མཆིམས་ཕུར་གྲོངས་པས་ལྟས་བཟང་པོ་བྱུང་སྟེ༔ བི་མ་ལ་གྲོངས་བྱ་བའི་ཐ་སྙད་བྱུང་བ་ཡང་དེ་ལས་བྱུང་བ་ལགས་སོ༔ དེས་གང་ལ་བརྒྱུད་ན་ཉང་ཏིང་འཛིན་བཟང་པོ་ལ་བརྒྱུད༔ བི་མ་ལ་རྒྱ་ནག་ཏུ་བཞུད་ནས་ལོ་ལྔ་བཅུ་རྩ་ལྔ་ནས་ཉང་ཏིང་འཛིན་བཟང་པོ་དེ་ཡང་རང་རྒྱུད་རྣམ་པར་དག་ནས༔ རྡོ་རྗེ་ལེགས་པས་ཁམས་སུ་སེར་བ་ཕབ་ནས་རྔ་མོའི་ཁ་ལྔ་བརྒྱ་བྱུང་བ་ལ༔ ཉང་ཏིང་འཛིན་བཟང་པོས༔ གསེར་གྱི་རྡོ་རྗེ་རྩེ་དགུ་པ་གཅིག་བར་སྣང་ལ་འཕངས་ནས་སྔོན་གྱི་དམ་ཚིག་གིས་རྗེས་སུ་བསྐུལ་ཏེ་ཉང་ལ་ཕུལ་ནས༔ དེའི་རྫས་ཀྱི་ཞྭའི་ལྷ་ཁང་ཞེས་བྱ་བ་བཞེངས་སུ་གསོལ་ནས་ཆོས་སྐྱོང་ལ་གཉེར་དུ་གཏད་དོ༔ དེ་ལྟ་བུའི་མི་མ་ཡིན་གྱི་རྫས་དང་ལོངས་སྤྱོད་ལས་བཞེངས་པའི་ལྷ་ཁང་དེའི་ནང་ན༔ བཤད་རྒྱུད་སྙིང་ཐིག་གི་བཀའ་རྒྱུད་དག་ནི་སྐོར་གསུམ་ཀེའུ་ཚང་རིམ་གསུམ་དུ་སྦས་སོ༔ སྙན་བརྒྱུད་ཡི་གེ་རིགས་ཀྱི་དཔེ་རྣམས་ནི་སྒོ་ཁང་གི་སྟེང་དུ་ཤོག་དྲིལ་རྫ་མ་གང་སྦས་སོ༔ གསང་བ་བླ་ན་མེད་པའི་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པ་ཀ་བའི་བསམ་ལེའུ་གསུམ་གྱི་ཁོང་སེང་ལ་སྦས་ཏེ༔ ཕྱི་རབས་ཀྱི་སྐལ་ལྡན་གྱི་དོན་དུ་རྒྱས་བཏབ་ནས་བར་དེར་མི་སྣང་བར་མཛད་དོ༔ སྙན་བརྒྱུད་ཚིག་གི་རིམ་པ་མཆན་དུ་བཏབ་པ་ནི་འབྲོམ་རིན་ཆེན་འབར་བ་ལ་བརྒྱུད་པ་ནི་བཀའ་སྲོལ་མི་ཉམས་པར་བྱ་བའི་ཕྱིར་བརྒྱུད་པའོ། །བཤད་རྒྱུད་གསང་བ འི་མན་ངག་རྣམས་གཙུག་ལག་ཁང་དེར་ལོ་བརྒྱར་གནས་པའི་རྟིང་ལ་འབྲོམ་རིན་ཆེན་འབར་བའི་སློབ་མ་སྦས་བློ་གྲོས་དབང་ཕྱུག༔ དེའི་སློབ་མ་དབུ་རུ་ཞྭའི་ལྡང་མ་དགེ་མཆོག་གི་བུ་གནས་བརྟན་ལྡང་མ་ལྷུན་གྱི་རྒྱལ་མཚན་ཞེས་བྱ་བ༔ ཞྭའི་མགོན་པོ་ཉིད་ཀྱིས་ལུང་བསྟན་ནས་གསང་བའི་རྒྱུད་ལུང་མན་ངག་འདི་ཡོད་པར་ཤེས་ནས༔ གཙུག་ལག་ཁང་དེའི་གཉེར་ཉང་དྷ རྨཱ་རཱ་ཛ་ཞེས་བྱ་བས་བྱེད་པ་ལ༔ གསེར་གྱི་ཆགས་པ་མང་པོར་འོང་བའི་དོད་པོར་གཏེར་རྣམས་འབྱིན་དུ་བཅུག་ནས་ལྔང་མས་ཕྱུང་ངོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་སྟོང་སུམ་བརྒྱ་ལྔ་བཅུ་རྩ་བརྒྱད་ལོན་ལ་ལགས་སོ༔ ལྡང་མ་ལྷུན་གྱི་རྒྱལ་མཚན་གྱིས་གཏེར་འདི་བཏོན་ནས་ལོ་བཅོ་ལྔ་ལོན་པའི་དུས་ན༔ མྱང་རོའི་ཡུལ་མྱང་མཚོ་བྱ་བ་ན༔ ལྕེ་ཐུབ་པའི་དབང་པོ་དང་ཁྱུང་མོ་བཟའ་ལགས་པའི་བུ་ལྕེ་བཙུན་སེང་གེ་དབང་ཕྱུག་བྱ་བ་གཅིག་ཡོད་དེ༔ འདིའི་དུས་ན་སྣང་ཁུ་ཡུལ་སྙན་བརྒྱུད་ཀྱི་གདམས་ངག་རིགས་མི་འདྲ་བ་བདུན་སྣང་ངོ༔ དེ་ནས་ལོ་གསུམ་ལོན་ཙམ་ན་ལྔང་མ་ལྷུན་གྱི་རྒྱལ་མཚན་གྱིས་བཤད་རྒྱུད་ཡང་དག་པ་སྙིང་ཐིག་མན་ངག་འདི་བསྟན་ཅིང་བཞག་པའི་གནས་མ་རྙེད་དེ༔ ལྕེ་བཙུན་མང་ཡུལ་དུ་བཞུད་པ་དང༔ ལྡང་མ་མན་ངག་གི་སྣོད་འཚོལ་གཉིས་གཙང་གི་རི་གཟར་རྒོད་པོ་ལུང་དུ་མཇལ་ནས༔ སྔར་ནས་སློབ་མ་ཡིན་པས་གཅིག་ལ་གཅིག་རབ་ཏུ་དགྱེས་ནས་ལྔང་མས་ཀྱང་མན་ངག་བཞག་པའི་སྣོད་ལྕེ་བཙུན་བཟང་བར་གཟིགས་ནས༔ ལྡང་མའི་ཞལ་ནས་སྔ་མ་དང་མི་འདྲ་བའི་སྙིང་ཐིག་གསང་བའི་མན་ངག་རྣམས་ཁྱོད་ལ་སྦྱིན་གྱིས་འོ་སྐོལ་གཉིས་འགྲོགས་ལ་འདོངས་ཟེར་བས༔ ལྕེ་བཙུན་གྱི་ཞལ་ནས་བདག་བླ་མ་གཅིག་གི་ཚོང་ལ་མཆིས་པས་དེ་ནས་ལོག་པ་དང་ཞུ་འཚལ་གསུངས་པ་དང༔ ལྡང་མའི་ཞལ་ནས་འོ་ན་དུས་ནམ་ཙམ་བྱ་གསུངས་པས༔ ལྕེ་བཙུན་གྱི་ཞལ་ནས་ཉ་དྲུག་གི་ཟླ་བའི་ཉའི་ཉི་མ་ལ་ཁ་རག་རྩར་བལ་པོ་སྒོམ་ཆུང་བྱ་བ་སྒོམ་ཆེན་ཤིན་ཏུ་བཟང་བ་གཅིག་ཡོད་པར་འདུག་པས་དེའི་སར་དུས་བགྱིའོ་གསུངས་པས༔ གཉིས་མཐུན་ནས་དུས་བྱས་སོ༔ དེ་ནས་ལྕེ་བཙུན་གྱིས་མང་ཡུལ་ནས་ལོག་ནས་འགྲོ་བར་བརྩམས་ཏེ༔ ལྡང་མས་ཉའི་ཉི་མ་རང་ལ་བྱོན༔ བལ་པོ་སྒོམ་ཆུང་ན་སོ་གཞོན་པ་གཅིག་གིས་སྒོམ་གྱིན་འདུག་པས༔ ལྡང་མས་ཇོ་བོ་དེ་ལྟར་བྱས་པས་སངས་མི་རྒྱ་བྱས་པས༔ བལ་པོ་ན་རེ་ཇོ་བོ་ཐབས་ཇི་ལྟ་བུ་ཡོད་གསུངས་སོ༔ ལྡང་མའི་ཞལ་ནས་དཔེ་འདི་ལ་གཟིགས་དང་ཞེས༔ ལྕེ་བཙུན་ཞག་གསུམ་དུ་མ་བྱུང་བས་ལྟ་རྟོགས་བྱས་པས་བལ་པོ་ཡང་དེ་གས་གྲོལ་བ་ལགས་སོ༔ དེ་ནས་ཚེས་བཅོ་བརྒྱད་ཀྱི་ཉིན་མོ་ལྕེ་བཙུན་སླེབས་ནས་བྱུང་བས་ལྡང་མའི་ཞལ་ནས་ངའི་དཔེ་འདི་དག་ལེགས་པར་བྲིས་ལ་ཆ་བསྐྱེད་མ་བུའི་ཡི་གེ་རྣམས་ལྷག་མ་མ་ལུས་པར་བྲིས་ལ་བཤུས་ནས་ཁྲའི་ཟླ་བ་ལ་སྐྱོལ་ཅིག༔ མན་ངག་འདི་རང་གིས་ཤེས་པ་ལ་གཞན་ལ་མེད་གསུངས་ནས་དེ་ལྟར་བྱས་སོ༔ དེ་ནས་ལྡང་མ་དབུ་རུར་བཞུད༔ ལྡང་མ་དང་ལྕེ་བཙུན་མཇལ་བའི་ཚེ༔ སངས་རྒྱས་མྱ་ངན་ལས་འདས་ནས་ལོ་སྟོང་སུམ་བརྒྱ་དང་བརྒྱད་ཅུ་རྩ་བརྒྱད་ལོན་ཏོ༔ ལྕེ་བཙུན་གྱིས་གནུབས་ཡུལ་རོང་གི་ལང་གྲོ་ཤུག་པ་ཅན་དུ༔ ལང་གྲོ་སྨ་ར་ཅན་གྱིས་དཔེ་རྣམས་བྲིས་སོ༔ གསང་བ་བླ་ན་མེད་པའི་རྒྱུད་ལུང་མན་ངག་གི་ཡི་གེ་རྣམས་གཡས་བན་སྐྱབས་སེས་བྲིས༔ ལྷག་མ་འོ་ཡུག་ལུ་མར་དབྱར་ཆོས་ཀྱི་ཤེས་རབ་ཀྱིས་བྲིས༔ སྐོར་གསུམ་གྱི་ལྷག་མ་རྣམས་མཚུར་ལེག་པ་དང ༔ སོ་དཔའ་ལེགས་ཀྱིས་བྲིས་སོ༔ དེ་ནས་དཔེ་རྣམས་ཚར་ནས་ཞུ་ཏིག་ལན་དྲུག་ཏུ་ཉང་དཔལ་གྱི་འབྱུང་གནས་དང་གཉིས་ཀྱིས་མཛད་ནས༔ ཁྲའི་ཟླ་བའི་དུས་སུ་བུམ་བཅུ་གཉིས་གདུམ་ཅིག་དང༔ ལྟར་ཚེ་སུམ་ཅུ་རྩ་ལྔ༔ རྟ་གསུམ༔ ཁྲབ་དགུ་ཁྱེར་ནས་དཔེ་རྣམས་སྐྱེལ་དུ་བྱོན་པས༔ དབུ་རུ་སྙེ་ཐང་དུ་སླེབ་ཙ་ན༔ བཙུན་པ་ལྡོམ་བུ་བ་ཅིག་ན་རེ༔ ཇོ་བོ་རྫས་ཆེ་གར་འགྲོ་ཟེར༔ ལྕེ་བཙུན་གྱིས་བདག་ལྡང་མ་ལྷུན་གྱི་རྒྱལ་མཚན་བྱ་བ་སྐུ་དྲིན་ཅན་ཅིག་ལ་ཞབས་ཏོག་སྐྱེལ་བ་ལགས་བྱས་པས༔ བཙུན་པ་དེ་ན་རེ༔ ལྡང་མ་ཁ་སང་བར་གྱི་ཟླ་བ་སྔ་མ་དེའི་ཉ་ལ་སྐུ་གཤེགས་ནས༔ གཞན་རྣམས་ཆོས་པ་བཟང་པོ་ཙམ་དུ་མི་བྱེད་པར་འདུག༔ གནས་བརྟན་ཡིན་ཟེར་བ་ལ༔ རྟགས་བཟང་པོ་ངོ་མཚར་ཅན་མང་པོ་ཡང་བྱོན༔ འཆི་བའི་དུས་ཀྱང་ཟིན་པར་གདའ་ཁྱེད་ལ་ཁོང་གི་གདམས་ངག་བདོག་གམ་ཟེར་རོ༔ ལྕེ་བཙུན་སྙམ་པ་བླ་མ་གྲོངས་ཀྱང་རྫས་འདི་རྣམས་འདིར་གནས་གཞི་ཡང་འདུག་པས་འདིར་ཚོགས་གསོག་བྱ་དགོས་བླ་མ་བསྔོས་པ་ཡིན་པས༔ བླ་མའི་དོན་དུ་གཏང་བར་བྱ་སྙམ་ནས་དེར་གཞི་ཕབ་བོ༔ དེར་བཙུན་པ་དེ་ན་རེ་བདག་མལ་གྲོ་བའི་མྱང་བཀའ་གདམས་བྱ་བ་ཡིན་པས༔ ལྡང་མ་དེ་གདམས་པ་ཆེ་བའི་རྟགས་སུ་འདུག་པས༔ ཁྱེད་ལ་ཁོང་གི་གདམས་པ་ཚང་བར་བཞུགས་ཀྱིན་གདའ་བས༔ བདག་ཐུགས་ལ་གདགས་པར་ཞུ་ཞེས་བྱ་བ་ཕུལ་བས༔ ལྕེ་བཙུན་གྱིས་ཀྱང་མན་ངག་བསྟན་དུ་རུང་བའི་སྣོད་དུ་གཟིགས་ནས༔ གསང་བའི་མན་ངག་སེམས་ལུང་སྒོམ་ཁྲིད་གནང་ངོ༔ དེ་རྣམས་ཀྱི་རྫས་དང་ཡོ་བྱད་རྣམས་དགེ་འདུན་སྙེ་ཐང་བ་དང༔ དུས་དེ་ཙམ་ན་ཐོད་པ་ལོ་ཙཱ་བ་དང༔ ཇོ་བོ་འབྲོག་མི་ལོ་ཙཱ་བ་གཉིས་བཞུགས་པ་ལ་ཞབས་ཏོག་མཛད་དོ༔ དེ་ནས་ལྕེ་བཙུན་གྱིས་གནུབས་ཡུལ་རོང་དུ་བྱོན༔ མྱང་བཀའ་གདམས་པ་བྱ་བ་དེ་ཏི་སྒྲོའི་བྲག་དཀར་པོ་བྱ་བ་ལ་སྒོམ་པར་དམ་བཅས་ནས་སྒོམ་དུ་སོང་ངོ༔ དཔོན་སློབ་གཉིས་ཀྱིས་སངས་རྒྱས་ཀྱི་འབྲས་བུ་སྔོན་ལ་སུས་ཐོབ་འགྲན་པར་བྱས་ནས་གྱེས་སོ༔ དེ་ནས་ལྕེ་བཙུན་གྱིས་དཔའ་གོར་རྩ་ང་ལུང་དབེན་རྩར་བྱོན་ནོ༔ ལྕེ་བཙུན་གྱིས་མན་ངག་གསང་བའི་སྐོར་བཞི་པོ་འདི་དག་བཞུགས་པའི་གནས་འཚོལ་བ་ལ༔ ལོ་བཅུ་ལོན་པའི་བར་དུ་བཙལ་བས་མ་རྙེད་དེ༔ དེ་ནས་སྐོར་གསུམ་གྱི་མན་ངག་རྒྱུད་དང་བཅས་པ༔ ལང་གྲོ་མཆད་པ་སྟག་འདྲའི་མཆད་པའི་གོང་ཆུ་མིག་འོག་ཏུ་སྦས་ནས༔ ཀླུ་བཙན་རྡོ་རྗེ་བདེ་འབར་ལ་གཏད་ནས་ཕྱི་རབས་ཀྱི་སྐལ་ལྡན་རྣམས་ཀྱིས་རྙེད་པར་ཤོག་ཅེས་སྨོན་ལམ་བཏབ་ནས༔ བྱི་བ་ལོའི་དཔྱིད་ཟླར་བའི་ཉའི་ཉིན་མོ་སྦས་ཏེ་མི་སྣང་བར་བྱས་སོ༔ དེ་ནས་གསང་བ་བླ་ན་མེད་པ་སྙིང་ཐིག་གི་མན་ངག་རྣམས་ལུས་ལ་བཅངས་ནས་ཡོད་དེ༔ འུ་ཡུག་གི་ནུབ་མའི་ཤུག་གསེབ་ན་ཡོད་པའི་ཚེ༔ མཚན་མོའི་རྨི་ལམ་ན་རྒྱ་གར་བ་སྔོ་སངས་ཤིན་ཏུ་འཇིགས་པ་གཅིག་བྱུང་སྟེ༔ བདག་ནི་བི་མ་ལ་མི་ཏྲ་མཁས་པ་སྟེ༔ སྐལ་ལྡན་སྙིང་པོའི་ཡང་བཅུད་དོན་འདོད་ན༔ མཆིམས་ཕུ་བྲག་དམར་དགེ་གོང་ཡང་ལྡེབས་ལ༔ གསང་བ་སྙིང་ཐིག་སྙིང་དང་འདྲ་བ་ཡོད་ཀྱི་ལོངས༔ དེ་དག་ཁྱེར་ལ་འུ་ཡུག་ཕྱི་གོང་རྫ་ཡི་ར་བ་རུ༔ སུས་ཀྱང་མཐོང་བ་མེད་པར་ལོ་བདུན་སྒོམས༔ དེས་ནི་ཟག་བཅས་ཕུང་པོ་མི་སྣང་བ་ཡིན་ནོ༔ ཞེས་ལུང་བསྟན་ནས་བདག་མཆིམས་ཕུར་འགྲོ་བའི་བདོགས་བྱས་ནས་ཞག་གསུམ་ལོན་པའི་ཉི་མ་འཆར་ཀར༔ འུ་ཡུག་ཕུག་སྟེང་གི་གྲོག་པོར་མཇལ་ནས༔ ཕྱག་དང་བསྐོར་བ་བྱས་ནས་འུ་ཡུག་ལུང་བའི་ནགས་ཀྱི་དཀྱིལ་དུ་ཟླ་བ་ཕྱེད་རྗེ་ལ་གདམས་པ་ཞུས་ནས་ཞུན་ཐར་བཅད་དོ༔ དམ་པའི་ཞལ་ནས་ང་ཧོར་གྱི་ཡུལ་དུ་འགྲོ་བས་ཧོར་གྱི་རྒྱལ་པོ་ལྡེ་མི་ཙན་ཏྲ་བྱ་བ་གཅིག་སེམས་ཅན་དམྱལ་བའི་གནས་སུ་འགྲོ་བ་ཞིག་ཡོད་པས༔ དེ་འཁོར་བ་ལས་སྒྲོལ་བར་བྱེད་པས་དེའི་བར་བྱེད་པས་དེའི་བར་ཁྱོད་ནུབ་ཀྱི་རི་ལ་སྡོད་ལ་མཆིམས་ཕུར་མ་འགྲོ་གསུངས་ནས་རྗེ་བཙུན་རྫུ་འཕྲུལ་གྱིས་གཤེགས་སོ༔ དེ་ནས་བདག་གིས་ནུབ་ཏུ་ལོ་གསུམ་འདུག་པའི་དུས་སུ་ཡང་རྗེ་བྱོན་ནས༔ ཡང་མན་ངག་རྣམས་ལ་ཞུ་ཏིག་བྱས་ནས་ལྷག་མ་མ་ལུས་པར་གནང་ངོ༔ དེ་ལྟར་རེས་མཇལ་རེས་མི་མཇལ་བར་ལོ་བདུན་དུ་ལྷན་ཅིག་མོས་གུས་བྱས་སོ༔ དེ་ནས་དམ་པ་དེ་ལིའི་ཡུལ་དུ་མཁའ་འགྲོ་མ་བརྩེ་བའི་རོལ་པ་ཞེས་བྱ་བས་སྤྱན་དྲངས་ནས་གཤེགས་སོ༔ དེ་ནས་ལྕེ་བཙུན་གྱིས་མཆིམས་ཕུར་བྱོན་ནས་སྙིང་ཏིག་མན་ངག་བཙལ་བས་མ་རྙེད་དེ༔ དེ་ནས་ཞག་གསུམ་གྱི་ཉི་མ་ཕྱེད་ཙམ་ན་བུད་མེད་སོ་དུང་སོ་འཁོར་མ་ཡོད་པ་སྨིན་མ་ཟངས་སུ་འདུག་པ༔ དཔྲལ་བའི་དཀྱིལ་ན་གསེར་གྱི་ཟླ་ཕྱེད་རྡོ་རྗེས་མཚན་པ༔ ལག་པ་དང་རྐང་པ་རྣམས་བྱ་ཆུ་བྱའི་སྡེར་མི་ལྟར་འབྲེལ་བ༔ ནུ་མ་ལས་སེང་གེའི་ཕྲུ་གུ་འཕྱང་བ་ཞིག་བྱུང་ནས༔ འོ་སྔོན་གྱི་སྐལ་ལྡན་མན་ངག་གི་བདག་པོ་བྱུང་ཟེར་ནས༔ བྲག་མེ་ལོང་འདྲ་བའི་དཀྱིལ་ནས་པོ་ཏི་སྨུག་ཆུང་བཏོན་ནས་བདག་ལ་གཏད་ནས་འོ་ཡུག་ཕྱི་གོང་རྫའི་ར་བར་སོང་ཞེས་གསུངས་ནས་གཏད་དོ༔ དེ་ནས་ལོག་ནས་གནུབས་ཀྱི་གསེག་མ་ལུང་དུ་འོངས་ནས་ལྕེ་བཙུན་གྱི་དགོངས་པ་ལ་བཀའ་བརྒྱུད་ཟབ་མོ་འདི་ཀུན་ལ་བཞག་པའི་གནས་མི་འདུག་པས༔ འོ་ཡུག་ནུབ་མའི་བྲག་སེང་གེ་དང་འདྲ་བ་ལ་སྦའོ་སྙམ་ནས༔ འབྲུག་ལོའི་དགུན་ཟླ་ར་བའི་དུས་ཚོད་སྟོན་སེར་ཁ་ཉི་མ་བྱི་བའི་ཉི་མ་སྐར་མ་རྒྱལ་གྱི་དུས་ཚོད་ཉི་མ་ཤར་བའི་ཚེ༔ གནམ་སྟོང་གི་ཉིན་པར་རྡོ་རྗེ་ལེགས་པ་དང༔ དཔལ་སྔགས་སྲུང་གི་བདག་མོ་ནག་མོ་ཁྲོས་མ་སྨུག་ནག་རག་གདོང་མ་རྣམས་ལ་གཏད་ནས༔ ཕྱི་རབས་ཀྱི་དོན་དུ་སྨོན་ལམ་བཏབ་ནས་མི་སྣང་བར་མཛད་དོ༔ དེ་ནས་འུ་ཡུག་གི་ཕྱི་གོང་དུ་སྙིང་ཐིག་གསང་བའི་མན་ངག་གི་པོ་ཏི་ཆུང་བ་རྣམས་ཁྱེར་ནས་སུས་ཀྱང་མཐོང་བ་མེད་པར་ལོ་བདུན་ཉམས་སུ་བླངས་པས་རིག་པ་ཚད་ལ་ཕེབས་ནས་ཆོས་ཉིད་ཟད་པའི་སྣང་བ་མཐོང་ངོ༔ དེ་ནས་སྙིང་ཐིག་གསང་བའི་པོ་ཏི་རྣམས་བྱར་གྱི་ཕུའི་བྲག་དཀར་པོ་ཐེག་པ་དང་འདྲ་བར་སྦས་སོ༔ སྔོན་གྱི་སྐོར་གསུམ་གྱི་ཕྱི་མོ་རྣམས་སླེ་ཚན་གསུམ་གྱི་རི་ལ་སྦས་སོ༔ ཡང་དམ་པ་དང་བྱར་གྱི་ཕུར་ལན་ཅིག་མཇལ་ནས་རྒྱ་ནག་པོའི་ཡུལ་དུ་གཤེགས་པས་བདག་གིས༔ མཆིམས་ཕུར་བསྐྱལ་ནས་དམ་པ་རྫུ་འཕྲུལ་གྱིས་གཤེགས་སོ༔ དེ་ནས་ལྕེ་བཙུན་གྱིས་ལོག་ནས་རང་བཞིན་དུ་མི་ཡུལ་དུ་ལོ་མང་བཞུགས་ནས༔ ཤངས་དང་རྟ་ནག་གི་བར་གྱི་སྤོ་མཐོན་རི་ནས༔ སློབ་དཔོན་པདྨའི་ཆོས་དང་སྒྲུབ་ཡིག་བཏོན་ནས་གཙང་ལུང་དབེན་རྩར་སྦས་སོ༔ ཆ་ལུང་གི་ཁྱི་རྟགས་དབེན་རྩ་ནས་སངས་རྒྱས་ཡེ་ཤེས་རིན་པོ་ཆེས་སྦས་མ་ཐག་པའི་གནུབས་ཀྱི་ངན་སྔགས་བརྒྱ་དང་བཅུ་བཏོན་ནས་གནུབས་ཀྱི་ཕུང་པོ་རི་བོ་ཆེ་ལ་སླར་སྦས་སོ༔ དེ་ལྟར་དམ་པ་དང་ལན་གསུམ་མཇལ་སྙན་བརྒྱུད་མན་ངག་རིགས་མི་འདྲ་བ་བདུན་མཆན་དུ་བཏབ་བོ༔ བཀའི་སྲོལ་མི་ཉམས་པའི་ཕྱིར་རོ༔ དེ་ལྟར་གྲུབ་པ་ཐོབ་ནས་ཀྱང་ལོ་ལྔ་བཅུ་ཐམ་པ་རོང་དང་བྱང་ཕྱི་གོང་དུ་བཞུགས་སོ༔ གྲུབ་པ་མ་ཐོབ་པའི་གོང་དུ་ལོ་བདུན་ཅུ་རྩ་ལྔ་སྟེ་བརྒྱ་དང་ཉེར་ལྔ་ན་ཟག་བཅས་མི་སྣང་བར་སྐུ་གཤེགས་སོ༔ ཞལ་ཆེམས་གསང་བའི་གནད་གསུམ་བྱ་བ་བབས་ཏེ༔ དེ་ནི་མཁའ་འགྲོ་མ་རྣམས་ཀྱིས་ཨོ་རྒྱན་གྱི་ཡུལ་དུ་སྤྱན་དྲངས་ཏེ་བསྣམས་སོ༔ གོང་གི་ཏི་སྒྲོ་ལ་བསྒོམས་པའི་མྱང་བཀའ་གདམས་པ་བྱ་བ་དེ་ཡང་བསྒོམས་ནས་ལོ་བཅོ་ལྔ་ན་རང་རྒྱུད་རྣམ་པར་དག་ནས་ཟག་པ་ཟད་པ་དང་མངོན་པར་ཤེས་པ་ལ་སོགས་ཏེ་ཡོན་ཏན་མང་པོ་བྱུང་ནས༔ དེ་ནས་ལོ་སུམ་ཅུ་རྩ་གཉིས་ན་གྲོངས་ནས༔ ནམ་མཁའི་འོད་དང་སྒྲ་དང་སིལ་སྙན་མང་པོ་གྲགས་པ་ལ་སོགས་པ་དང༔ ཡུལ་མི་དེ་ཀུན་གྱི་སྣང་བ་འགྱུར་ནས་རང་བཞིན་གྱིས་བསམ་གཏན་ལ་གནས་པ་ཡང་བྱུང་ངོ༔ རང་གི་སྙན་བརྒྱུད་ཀྱི་གདམས་པ་གནང་བའི་སྒོམ་ཆེན་པ་འགའ་ཡང་བསྒོམས་པས་མཛེ་གསོས་པ་ལ་སོགས་པའི་རྟགས་བཟང་པོ་བྱུང་ངོ༔ དེ་ལྟར་ལྕེ་བཙུན་མི་སྣང་བའི་སར་གཤེགས་ནས་ལོ་སུམ་ཅུ་ན་རོང་གི་མནར་མདའི་ལྕེ་སྒོམ་ནག་པོས་ཕྱི་ནང་གསང་བ་གསུམ་གྱི་བཀའ་བརྒྱུད་རྣམས་བཏོན་ནས་རང་ལས་གཞན་ལ་མ་སྤེལ་བར་གདམས་པའོ༔ དབུས་གཙང་དུ་དར་ཞིང་རྒྱས་པར་མཛད་དོ༔ ལྕེ་སྒོམ་གྱིས་ཐོན་ནས་ལོ་ལྔ་བཅུ་ན་བདག་གིས་གསང་བ་བླ་ན་མེད་པའི་སྐོར་འདི་རྣམས་བཏོན་ནས་རང་ལས་གཞན་ལ་མ་སྤེལ་བར་གདམས་པའོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་སྟོང་ལྔ་བརྒྱ་དང་དྲུག་ཅུ་རྩ་བརྒྱད་ལོན་པ་ལགས་སོ༔ དེ་ལྟར་བསྟན་པ་སོ་སོའི་དར་ནུབ་དང་འཕེལ་འགྲིབ་ཇི་ལྟར་འབྱུང་བ༔ བདག་པོ་གང་གིས་བྱེད་པར་འགྱུར་བ་ལ་སོགས་པ་ཚེ་ལོ་བཅུ་པ་ཡན་ཆད་ཀྱི་བབས་སོ་རྣམས་ཡོད་དེ་འདིར་ཡི་གེ་མང་གིས་དོགས་ནས་མ་བྲིས་སོ༔ ལོ་རྒྱུས་ཞེས་བྱ་བ་ལོ་དུ་མ་ལོན་པའི་རྒྱུས༔ ད་ལྟ་མཐོང་བ་དང་འདྲ་བར་གཏན་ལ་ཕེབས་པས་ན་ལོ་རྒྱུས་ཞེས་བྱའོ༔ དེ་ཡང་ཡང་དག་པར་རྫོགས་པའི་སངས་རྒྱས་བསྡུས་ནས་སྐྱེས་པ་ནས་ལོ་དཔག་ཏུ་མེད་པས་ན༔ དེ་ལྟར་གྱི་ཡོ་གའི་ལོ་རྒྱུས་ཡོད་པས་ན་ལོ་རྒྱུས་ཀྱི་དོན་ནོ༔ བརྒྱུད་པའི་དགོངས་པ་ནི་རས་ཆོད་དང༔ གཟུ་ལུམ་དང༔ བསྣན་འཕྲི་མེད་པ་དང༔ མན་ངག་ཁ་མི་གཅིག་གི་སྒྲོ་བཏགས་ཀྱིས་བསླད་དུ་མི་བཏུབ་པས་ན་ཡིད་ཆེས་པའི་དགོས་པ་ཡོད་དོ༔ ཡང་དག་པར་རྫོགས་པའི་སངས་རྒྱས་ནས༔ ད་ལྟ་ཡན་ཆོད་དུ་ཚིག་གིས་མ་བསླད་ཅིང་གཅིག་ཐོད་ཏུ་གཅིག་བབས་པས་ན་བརྒྱུད་པའོ༔ དཔེར་ན་དངོས་པོའི་རྫས་ལག་ཏུ་བརྒྱུད་པའམ༔ རྒྱལ་པོའི་བཀའ་རྟགས་ལྟ་བུའམ༔ རྒྱས་བཏབ་པའི་རིན་པོ་ཆེ་ལ་སྐྱེ་འབྲི་མི་བཏུབ་པ་ལྟ་བུའོ༔ དེ་ཡང་འདི་ལ་བྱིན་རླབས་ཀྱི་བརྒྱུད་པ་འདས་རྗེས་རྒྱུད་མ་ཆད་པ་དང༔ ཚིག་གི་བརྒྱུད་པ་ལ་བཀའ་བརྒྱུད་ཟམ་མ་ཆད་པ་དང༔ དོན་གྱི་བརྒྱུད་པ་ལ་མངོན་སུམ་གྱི་གནད་ལ་ཡིད་དཔྱོད་ཀྱིས་དཔྱད་དུ་མི་རྙེད་པས་འགྱུར་མེད་གསང་ཆེན་གྱི་བབས་མ་ཆད་པ་དང༔ བསོད་ནམས་བསགས་པའི་བརྒྱུད་པ་གཏེར་ལ་ལོངས་སྤྱོད་པའི་གང་ཟག་བར་མ་ཆད་པ་མི་ཡུལ་དུ་སྣང་བར་བྱས་པའོ༔ དེའི་ཕྱིར་དུ་རབ་ན་ཡིད་ཆེས་པའི་གནད་དོ༔ ལོ་རྒྱུས་ཆེན་པོ་ཞེས་བྱ་བ་སྐལ་ལྡན་གྱི་ཡིད་ཆེས་པའི་གནད་བསྟན་པ་རྫོགས་སོ༔ ༔