དབང་བསྐུར་རིམ་པར་འཇུག་པའི་དུས་བཤད་པ།
༄༅༔ དབང་བསྐུར་རིམ་པར་འཇུག་པའི་དུས་བཤད་པ་བཞུགས་སོ༔ ཁ་ཐཾཿམན་ངག་ང་དྲུག་པ༔ ད་ནི་དབང་བསྐུར་འཇུག་དུས་བཤད༔ སྤྲོས་བཅས་དག་གི་དབང་བསྐུར་ནི༔ བྱི་བ་འབྲུག་དང་རྟ་དང་ཕག༔ ཁྱད་པར་ལོ་ནི་བཞི་དག་ལ༔ དབང་བསྐུར་ཆོ་ག་འགྲུབ་པ་ཡིན༔ ཟླ་བ་ར་བ་བཞི་དག་ལ༔ དུས་རྫོགས་འབྲས་བུ་བྱིན་ཕྱིར་འགྲུབ༔ ཚེས་གྲངས་ཡར་གྱི་གཅིག་ནས་ནི༔ ཟླ་བ་ཟད་པའི་མཚམས་སུ་གདོན༔ བསྐུར་དུས་ཉིན་ཕྱེད་ནམ་གུང་ངོ༔ རྣལ་འབྱོར་ལུས་ཀྱི་བྱེ་བྲག་གིས༔ སོ་སོའི་འབྱུང་བའི་ལོ་ལ་སྦྱར༔ དབང་བསྐུར་ཆོ་ག་ཤིས་པར་འགྱུར༔ འདི་དུས་སློབ་མ་དམ་ཚིག་ཅན༔ འབྱུང་བའི་ལུས་རྣམས་མཐུན་པ་ནི༔ གྲངས་ལ་ཚད་དུ་གཟུང་དུ་མེད༔ བརྒྱའམ་ལྔ་བཅུ་ལ་སོགས་པའི༔ འབྱུང་ལས་མཐུན་ན་འགལ་བ་མེད༔ གལ་ཏེ་ཆོ་ག་ལ་ཞུགས་ཚེ༔ མར་མེ་མདངས་དང་མིན་ལྡན་ན༔ དམ་ཚིག་བསྐང་བའི་ཆོ་ག་བྱ༔ སྨེ་བ་མེད་ན་དངོས་གྲུབ་ནི༔ ཡང་ནས་ཡང་དུ་བླང་བར་བྱའོ༔ དོན་མེད་ཤི་ན་བར་ཆད་འབྱུང༔ དབང་ཆོག་ཛཔ྄་ལ་དྲག་ཏུ་འབད༔ དེ་ཚེ་འདུས་པའི་མཆེད་ལྕམ་ལ༔ ལུས་ལ་ནད་ནི་བྱུང་བ་ན༔ ཕྱག་དང་སྐོར་བ་དག་བྱའོ༔ ངག་ལ་བསླབ་བཅོལ་སུ་ལ་བྱུང༔ བསམ་སྟེ་ཡི་གེ་བརྒྱ་པ་འདོན༔ སེམས་ནི་རྟོག་གམ་དྲན་ཉམས་ན༔ བསྐྱེད་དང་རྫོགས་པའི་རིམ་ལ་འཇུག༔ གལ་ཏེ་བྱང་བའི་རྟགས་བྱུང་ན༔ གདོད་ཀྱིས་དབང་བསྐུར་ཆོ་ག་འབད༔ གལ་ཏེ་སྒྲུབ་པའི་རྫས་འཕེལ་ན༔ དངོས་གྲུབ་རབ་མཆོག་ཐོབ་པས་ན༔ མཉམ་པའི་དོན་ལ་མོས་པར་བྱ༔ དབང་བསྐུར་ཆོ་ག་ལ་ཞུགས་ནས༔ རྟག་ཏུ་མཚན་མ་བཟང་མཐོང་ན༔ ཐུན་མོང་དངོས་གྲུབ་དེ་ཡིས་འགྲུབ༔ ཉམས་དང་ཤེས་པར་ལྡན་ན་ཡང ༔ འདིས་ཀྱང་དགའ་བདེ་ཉིད་ལ་སྤྱོད༔ བླ་མ་ཉིད་ལ་མཆོག་ཏུ་ཡང༔ མོས་པ་བཟང་པོ་སུས་སྐྱེས་པ༔ འདིས་ཀྱང་ཕྱག་རྒྱ་མཆོག་ལ་སྦྱོར༔ བདག་ཉིད་ལུས་ངག་བདེ་མཐོང་ན༔ འདིས་ནི་སངས་རྒྱས་ཞིང་དག་གོ༔ སྤྲོས་བཅས་དབང་གི་དུས་དང་ཡང༔ མཚན་མ་དག་ནི་ལེགས་བཤད་དོ༔ ད་ནི་སྤྲོས་པ་མེད་པ་ཡི༔ དུས་དང་མཚན་མ་ཉེར་བསྟན་བྱ༔ འདི་ལ་ལོ་ཡི་བྱེ་བྲག་མེད༔ གང་ལ་ཡང་ནི་ཤེས་པའོ༔ ཕྱི་དུས་དབྱར་དང་དགུན་ལ་བཟང༔ ཚེས་གྲངས་ཡར་གྱི་ངོ་ལའོ༔ བསྐུར་དུས་ཐོ་རངས་སྒྲ་སྤངས་པའོ༔ འདི་ལ་དང་ལྡན་ལྔ་དང་དྲུག༔ བདུད་ལས་མང་ན་དོན་མི་འགྲུབ༔ དེ་ལྟར་དད་དང་ལྡན་པའི་བུ༔ སེམས་ཀྱི་ལས་སུ་དགེ་ལྡན་ལ༔ ངག་གི་བླ་མའི་བསྟོད་ལྡན་པ༔ དེ་ལྟ་བུ་ལ་དབང་བསྐུར་ཚེ༔ ལུས་ནི་བདེ་བ་མ་ཡིན་ན༔ ལུས་སྡིག་ཕྱི་ནས་བཤགས་པ་བྱ༔ དེ་བཞིན་གང་དང་སེམས་ལ་ཡང༔ སྡིག་པ་བཤགས་པའི་ལས་བརྩམས་མོ༔ སྤྲོས་པ་མེད་པའི་དབང་བསྐུར་གྱི༔ དུས་དང་མཚམ་མ་བཤད་པའོ༔ ད་ནི་ཤིན་ཏུ་སྤྲོས་པ་མེད༔ མཆོག་ཏུ་གསང་བའི་དབང་བསྐུར་གྱི༔ དུས་དང་མཚན་མ་བཤད་པར་བྱའོ༔ དེང་སང་ལོ་ཡི་བྱེ་བྲག་མིན༔ རང་འབད་ཉིད་དུ་བྱས་པས་འགྲུབ༔ ཕྱིས་དུས་ས་བོན་འཇུག་པའི་དུས༔ བྱང་ཆུབ་ས་བོན་བརྟན་པའི་ཕྱིར༔ འདི་ཡི་དུས་སུ་དབང་བསྐུར་ན༔ རང་བྱུང་ས་བོན་འཕེལ་བར་བཤད༔ འབྲུ་དང་འབྲས་བུ་སྡུད་དུས་སུ༔ ཤིན་ཏུ་སྤྲོས་མེད་དབང་བསྐུར་ན༔ ཡེ་ཤེས་འབྲས་བུ་རྫོགས་པའི་ཕྱིར༔ སྐུ་གསུམ་ས་ལ་ངེས་པར་འགྲོ༔ ནང་དུས་ཡར་ངོའི་འཕེལ་དུས་ན༔ ཚེས་གྲངས་མར་འགྲིབ་སྤངས་པ་ཡིས༔ ཉམས་མྱོང་བརྟན་པར་བྱ་བའི་ཕྱིར༔ ཉམས་དང་བྱིན་རླབས་གོང་དུ་འཕེལ༔ བསྐུར་དུས་ཉི་མ་རྩེ་ཤར་ལ༔ རང་བྱུང་ཡེ་ཤེས་ཤར་དོན་དུའོ༔ ཡང་ན་དམར་གྱི་ཟད་མཚམས་སུ༔ རྟོག་པ་བཟད་པའི་དོན་དུ་བྱའོ༔ སྐལ་ལྡན་གཅིག་གམ་ཡང་ན་གཉིས༔ གསུམ་ལས་མང་ན་དོན་མི་འགྲུབ༔ འདི་དུས་སོ་སོའི་ཕྱོགས་བཟུང་སྟེ༔ ལུས་ཀྱི་དུས་ན་ནམ་མཁའ་ལ༔ སྤྲིན་དང་ཁུ་རླངས་ཁ་ཆར་དང༔ རླུང་ལ་སོགས་པའི་སྒྲ་དག་དང༔ གཡུལ་ཉེས་དགྲ་དང་ཆོམ་རྐུན་དང༔ མི་སྡུག་པ་ཡི་གཟུགས་བྱུང་ན༔ ལུས་ཀྱི་རྟོག་པ་ཆེ་བས་ན༔ ཕྱི་ནང་དབང་བསྐུར་བྱས་ན་ནི༔ བླ་མའི་གདམས་པ་མ་བསྟན་པར༔ བདེ་བར་གཤེགས་པའི་སྐུ་གཟུགས་སམ༔ རང་གི་བླ་མའི་གཟིམས་ཁང་ལ༔ བསྐོར་བ་འབུམ་ཕྲག་དྲུག་དག་གམ༔ ཕྱག་ཀྱང་འབུམ་ཕྲག་གཅིག་ཏུ་བྱ༔ དེ་དུས་མཚན་མའི་ཁྱད་པར་ནི༔ ཐོག་མར་ཡོང་ལ་ཐ་མ་བར༔ ངེས་པའི་མཚན་མའི་གཟུགས་དག་ནས༔ ལུས་ཀྱི་སྤྱོད་པ་འབྱོངས་པས་ན༔ ཕྱིས་ན་འབད་པ་བྱ་མི་དགོས༔ གལ་ཏེ་ཐ་མ་དག་བྱུང་ན༔ ལུས་ཀྱི་ཡོངས་སུ་ཚར་མ་གཅོད༔ ཕྱི་ནས་བསྐྱར་ལ་སྤྱོད་པ་བརྩམ༔ བསྐྱར་ཀྱང་སྡིག་པ་མ་དག་ན༔ ལྷ་ཡི་སྐུ་ནི་སྟོང་ཕྲག་བསྒོམ༔ དེ་ནས་བླ་མའི་མན་ངག་ནི༔ རིམ་པ་དག་ལ་བསླབ་བར་བྱའོ༔ ངག་གི་དུས་ནའང་དེ་བཞིན་དུ༔ རྣལ་འབྱོར་ལྡན་པས་ཤེས་པར་བྱའོ༔ འདི་དག་ཐོག་མ་མེད་ལ་རབ་བྱུང་ནས༔ བཤགས་པའི་ལས་ནི་ཡིག་བརྒྱ་འབུམ་ཕྲག་གཅིག༔ འབད་དང་བཅས་ཏེ་བཟླས་པར་བྱའོ༔ གལ་ཏེ་ཐ་མར་བྱུང་བ་ན༔ གསང་སྔགས་རྒྱུད་ནི་རང་ལོའི་གྲངས༔ བརྒྱ་ནི་རྩ་བརྒྱད་བརྗོད་པར་བྱའོ༔ ཐོག་མཐའ་བར་མེད་དུས་རྣམས་སུ༔ གལ་ཏེ་མཚན་མའི་རྟགས་ངན་ན༔ རྒྱུད་ཀློག་པ་དང་སྔགས་བཟླས་དང༔ བླ་མ་ཡི་དམ་ལྷ་དག་གི༔ བསྟོད་ཚིག་སྣ་ཚོགས་བརྗོད་པ་དང ༔ ཨ་ལི་ཀཱ་ལིའི་ཡི་གེའི་སྒྲ༔ སོ་སོའི་རྐྱང་པར་བརྗོད་པ་དང༔ ཧཱུྃ་དང་ཕཊཿདང་ཨཱོཾ་དང་ནི༔ སྦྲེལ་བ་སྣ་ཚོགས་བརྗོད་པ་ལ༔ ཟླ་བ་བདུན་དུ་འབད་པར་བྱའོ༔ དེ་ནས་གདམས་པའི་གནས་སུ་བྱའོ༔ སེམས་ལ་ཐོག་མར་གང་བྱུང་ན༔ ཡི་དམ་ལྷ་ཡི་ཏིང་ངེ་འཛིན༔ ཉི་མ་གསུམ་དུ་བསྒོམ་པར་བྱའོ༔ གལ་ཏེ་བར་དུ་བྱུང་བ་ན༔ སྔགས་ཀྱི་འོད་ཟེར་འཕྲོ་འདུ་ལ༔ ཉི་མ་བདུན་དུ་འབད་པར་བྱའོ༔ ཐ་མར་བྱུང་ན་ཡི་གེ་ཡི༔ འཕྲོ་འདུ་དག་ནི་བསྒོམ་པ་ལ༔ ཉི་མ་བཅུ་ཡི་བར་དུ་འབད༔ ཐོག་མ་བར་མཐའ་ཀུན་བྱུང་ན༔ རྫོགས་པའི་རིམ་པ་བསྒོམ་པའམ༔ ངག་ལས་བྱུང་བའི་བསམ་གཏན་ལ༔ བསྒོམ་པ་ཟླ་བ་དྲུག་ཏུ་འབད་པར་བྱའོ༔ གལ་ཏེ་ལུས་ངག་སེམས་ཀྱི་ཀྱང ༔ སྤྱོད་པ་སོ་སོའི་དུས་རྣམས་སུའང༔ ནམ་མཁའ་སྔོ་སངས་སྤྲིན་དང་བྲལ༔ རླུང་དང་སེར་བུའི་སྒྲ་མེད་པ༔ འཇམ་ཞིང་འཇམ་པ་དག་བྱུང་ན༔ སྡིག་པ་དག་ནི་སྦྱང་མི་དགོས༔ གལ་ཏེ་ཐོག་མ་ཡོད་པ་ལ༔ སོ་སོའི་ཐ་མར་དག་ན་ཡང༔ འདིར་ནི་སྡིག་པ་སྦྱངས་པས་ན༔ བཤགས་པའི་ཆོ་ག་མི་དགོས་སོ༔ དེ་བཞིན་ལུས་ངག་སེམས་དག་གི༔ སོ་སོའི་ངོས་བཟུང་མཁས་པས་བརྟག༔ དེས་ནི་ཤིན་ཏུ་སྤྲོས་པ་མེད༔ དབང་བསྐུར་བ་ཡི་དུས་དང་ཡང༔ མཚན་མ་བརྟག་པ་བཤད་པའོ༔ རེ་ཞིག་དབང་ཐོབ་མཚན་མ་ནི༔ རིག་པའི་མེ་ཏོག་གཏོར་དུས་སུ༔ ལུས་ནི་གཡོ་དང་དྲག་ཏུ་འཕར༔ ལུས་ལ་བྱུང་ན་ལུས་ཀྱི་ཐོབ༔ ངག་གི་སྒྲ་སྐད་སྣ་ཚོགས་པར༔ འབྱིན་ཅིང་ཆོས་རྣམས་སྨྲ་བ་དང༔ ངོ་མཚར་ཚིག་རྣམས་བརྗོད་པ་ནི༔ དེ་བཞིན་དུའང་ངག་གིས་ཐོབ༔ སེམས་ལ་ཏིང་འཛིན་འབབ་པ་དང ༔ ཡེངས་ཤིང་དྲན་པ་ཉམས་པ་ན༔ སེམས་ཀྱིས་དབང་པོ་ཐོབ་པའོ༔ གལ་ཏེ་ལུས་ཀྱིས་ཐོབ་ན་ནི༔ སྤྲུལ་པའི་སྐུ་ཉིད་འདི་ཡིས་ཐོབ༔ དེ་བཞིན་ངག་ལ་ལོངས་སྐུའོ༔ སེམས་ནི་ཆོས་སྐུའི་ཞིང་དུ་འགྲོ༔ ཤིན་ཏུ་སྤྲོས་མེད་དུས་མཚན་བཤད༔ རབ་ཏུ་སྤྲོས་པ་མེད་པ་ཡིས༔ དུས་དང་མཚན་མ་ངེས་བསྟན་བྱའོ༔ ཕྱི་དུས་འབྲས་བུ་སྨིན་པའམ༔ འབྲུ་རྣམས་བསྡུ་བའི་དུས་ལ་གཏད༔ རང་སྣང་འབྲས་བུ་གྲོལ་ཕྱིར་རོ༔ ནང་དུས་ཡར་ངོའི་ཚེས་གཅིག་གམ༔ ཡང་ན་ཟད་པའི་ཚེས་ལ་གཏད༔ ཐིག་ལེ་ཉག་གཅིག་རྟོགས་ནས་ནི༔ ལས་དང་བག་ཆགས་ཟད་ཕྱིར་རོ༔ སྐལ་ལྡན་གཅིག་ལས་མང་ན་ཡང༔ རྣལ་འབྱོར་པ་ཡིས་དོན་མི་འགྲུབ༔ དང་ལྡན་ཡིད་དུ་འོང་བའི་བུ༔ སྐལ་བ་ཡོད་པ་གཅིག་ལ་བསྐུར༔ གཉིས་ཀ་རྫོགས་པའི་སངས་རྒྱས་ལ༔ གདོན་མི་ཟ་བར་འགྱུར་བར་ངེས༔ བསྐུར་དུས་ཉི་མ་རྩེ་ཤར་ལ༔ སོ་སོའི་ཚིག་གིས་ངེས་གསལ་བས༔ རང་བཞིན་དག་པའི་གཞི་མཐོང་བའོ༔ འདི་ལ་མཚན་མ་ཅི་བྱུང་ཡང༔ སྡིག་པ་སྦྱོར་པའི་ཆོ་ག་མེད༔ གོང་དུ་ཐད་ཀར་སྦྱང་བའི་ཕྱིར༔ གལ་ཏེ་སྤྲིན་མེད་ནམ་དངས་ན༔ ཆོས་ཀྱི་སྐུ་ཡི་ཞིང་ལ་སྤྱོད༔ སྣ་ཚོགས་འོད་ཀྱི་གདངས་ཤར་ན༔ འདི་ནི་ལོངས་སྐུའི་ཞིང་དུའོ༔ སྣ་ཚོགས་སྒྲ་རྣམས་གྲགས་པ་ན༔ སྤྲུལ་སྐུའི་ཞིང་དུ་དབུགས་འབྱིན་ནོ༔ གལ་ཏེ་སྐལ་དང་ལྡན་པ་ཞིག༔ འདི་དུས་ལུས་གནད་མཁས་པ་དང ༔ དེ་ལས་གཡོ་བ་མེད་པ་ན༔ ལོ་བདུན་གྱིས་ནི་ཟད་སར་ཕྱིན༔ ངག་གི་བརྗོད་པ་སྟོར་གྱུར་ན༔ འདིས་ནི་ཟླ་བ་ཉེར་གཅིག་ནས༔ ཆོས་ཉིད་ཟད་པའི་ས་ལ་ཕྱིན༔ སེམས་ལ་མཁས་ཤིང་ལུང་སྟོང་ན༔ ཟླ་བ་བདུན་ན་སྐལ་ལྡན་འདི༔ སྣང་བ་ཐམས་ཅད་ཟད་པར་འགྱུར༔ གལ་ཏེ་བློ་རྩལ་རབ་རྣམས་ལ༔ དང་པོ་སྤྲོས་བཅས་བརྩམས་ནས་ནི༔ བར་མ་ཆད་པར་རིམ་གྱིས་ཀྱང༔ དབང་དག་རྫོགས་པར་བྱེད་པའི་ལུགས༔ མཆོག་ཏུ་གྱུར་པ་རྣམས་ལ་སྟེ༔ འདི་ནི་རབ་ཏུ་དཀོན་པས་ན༔ ཞག་དང་ཟླ་བ་ལོ་ཡི་བར༔ རང་གི་ཉམས་དང་སྦྱར་ལ་ནི༔ དབང་བཞི་དག་ནི་རྫོགས་པར་བསྐུར༔ གལ་ཏེ་དབང་བཞི་མ་རྫོགས་ན༔ ཤིན་ཏུ་སྤྲོས་པ་མེད་པའི་དབང༔ ཟབ་མོའི་ཆ་ཤས་རྟོགས་ཡུལ་ཉིད༔ འདི་ཉིད་བསྐུར་བས་དབང་ཐོབ་བོ༔ སློབ་མའི་མཚན་ཉིད་རབ་བརྟགས་ལ༔ གཉིས་དང་གསུམ་ལ་སོགས་པ་ནི༔ སློབ་མའི་འབྱོར་བའི་ཚོད་དང་སྦྱར༔ བླ་མ་རང་གི་ཉམས་མྱོང་གིས༔ ཁྱད་པར་དུས་ན་མཆོག་ངེས་བཤད༔ བུ་ལ་ནུས་པ་འཇུག་དོན་དུའོ༔ ཞེས་དབང་རྣམ་པར་བཀོད་པའི་ཕྲ་ཏིག༔ དབང་གི་རིམ་པ་རྣམ་པར་ཕྱེ་བ་ལས༔ རྣམ་པར་དག་པ་གསལ་བའི་དུམ་བུ་རིམ་པར་འཇུག་པའི་ཐབས་བསྟན་པ་སྟེ་གཉིས་པ་རྫོགས་སོ༔