རིག་པའི་གནད་དོན་ལྟ་བ། འཇམ་དཔལ་བཤེས་གཉེན།
རིག་པའི་གནད་དོན་ལྟ་བ་ཞེས་བྱ་བ་ཞུགས་སོ། །མན་ངག་བརྒྱ་བཅུ་བཞིའི་ནང་ཚན། ༈ བཅོམ་ལྡན་འདས་རང་སྣང་ཡེ་ཤེས་རྫོགས་ལ་ཕྱག་འཚལ་ལོ། །འཇིག་རྟེན་རྣམས་ཀྱིས་བཅིངས་པའི་ཆོས་ལས་གྲོལ། །གང་ལའང་ཆགས་པ་ཞེན་པ་རབ་གཅད་པའི། །སྙིང་པོ་ངེས་པའི་གསང་ཆེན་བཅུད་དུ་དྲིལ། །ཐོགས་མེད་ལམ་དུ་འཇུག་པའི་གནད་བསྡུས་པ། །ཡང་དག་སྙིང་པོ་དཔལ་ལྡན་བླ་མའི་གསུང་། །ཆགས་བྲལ་དྲི་མ་དག་པའི་ནམ་མཁའ་ལ། །སྣ་ཚོགས་མ་ཕྱེ་སོ་སོར་གསལ་བ་ཡི། །ཡེ་ཤེས་ལྔ་ལ་བརྟེན་པའི་སྣང་བ་ཉིད། །གང་ཞིག་སྐལ་ལྡན་སྙིང་པོའི་དོན་རྙེད་པའི། །དབང་པོ་ལྔ་ཡི་ཞེན་པ་རང་ལོག་པའི། །ཞེན་པ་བཞི་བྲལ་ཚད་དང་ལྡན་པའི་དབང་པོ་ཡིས། །རང་དག་སྣ་ཚོགས་སྣང་བའི་སྒོ་ཕྱེ་ལ། །ཆགས་དང་ཞེན་པ་མེད་པའི་གནད་གཅུན་ལ། །འདི་ལྟར་ངེས་པའི་དོན་ལ་བལྟ་བར་བྱ། །འདི་ལྟར་ཉམས་སུ་ལེན་པའི་སྐལ་ལྡན་རང་བཞིན་རྫོགས་པ་ཆེན་པོའི་དོན་ལ་ཐེ་ཚོམ་མེད་པས་ཐི་བྱ་ཚང་དུ་འཇུག་པ་དང་འདྲ་བའི་བློ་གྲོས་ཅན་རྣམས་ཀྱིས། ཐོག་མར་ཐབས་སྣ་ཚོགས་ཀྱིས་བླ་མ་མཉེས་པར་བྱས་ལ། འཇིག་རྟེན་འཁྲུལ་བའི་བྱ་བ་ཐམས་ཅད་སྤངས་ལ། ཡུལ་རྐྱེན་དང་བྲལ་བའི་དགོན་པར། བླ་མའི་མན་ངག་རྩོལ་བས་འདི་ཉིད་ལ་ཡང་ནས་ཡང་དུ་ནན་ཏན་དུ་བསྒྲུབ་པར་བྱའོ། །དེ་ལྟ་བུ་ལ་ནི་རང་བཞིན་དག་པའི་སྣང་བ་སྣ་ཚོགས་པར་རང་སྣང་ངེས་པ་ཡིན་ཏེ། དེའི་དུས་ན་འདི་དག་སྐྱེས་བུ་ཆེན་པོ་དེས་ངོ་ཤེས་པར་རབ་ཏུ་གལ་ཆེའོ། །ཡེ་ཤེས་ཕྱོགས་དག་གི་སྣང་བ་ནི། སྔོན་དུ་སྒྲོན་མ་ཨར་ལ་གཏད་པའི་སྟོབས་ཀྱིས་འོད་སྣ་ཚོགས་པའི་སྣང་བ་ནི། དཀར་པོ་དང་། དམར་པོ་དང་། སེར་པོ་དང་། ལྗང་གུ་དང་། མཐིང་ག་དག་གི་སྣང་བ་དང་། དེ་ལྟར་ཡང་ཁ་དོག་མི་འདྲ་བ་ཉི་ཤུ་རྩ་ལྔ་དག་ཏུ་ཡང་སྣང་བར་བྱེད་དོ། །དབྱིབས་ནི་བདུད་རྩིའི་རྣམ་པ་དང་། མཆོད་རྟེན་དང་། པདྨ་དང་། མིག་མང་རིས་དང་། མིག་ཚགས་དང་། ཟ་འོག་གུར་ཁྱིམ་དང་། རྒྱ་དང་། ཁྲ་བོའི་རྣམ་པ་དང་། དྲྭ་བ་དང་དྲྭ་བ་ཕྱེད་པའི་དབྱིངས་ལྟ་བུའོ། །སྣང་ལུགས་ནི་གྱེན་འགྲེང་དང་། ཐུར་ཚུགས་དང་། དུམ་བུ་དང་། གྲུ་ཆད་དང་། རྩིབས་ཤར་དང་། མུ་ཁྱུད་ཀྱི་རང་བཞིན་དུའོ། །ཐིག་ལེའི་སྣང་བ་ནི། ཕྲ་བའི་ཐིག་ལེ་ཡུངས་འབྲུ་ལ་བཅུར་གཤགས་པའི་ཆ་ཙམ་དང་། ཟླུམ་པ་དང་། རབ་ཏུ་ཟླུམ་པ་དང་། འཁྲིལ་བ་དང་། རབ་ཏུ་འཁྲིལ་བ་དང་། མུ་ཁྱུད་དང་། མུ་ཁྱུད་ཀྱི་ར་བའི་དབྱིངས་སུ་སྣང་བའོ། །གྲངས་ནི་ཉིས་སྦྲེལ་དང་། གསུམ་སྦྲེལ་དང་། བརྒྱ་སྟོང་དང་། བགྲང་དུ་མི་ལངས་པ་དག་ཏུའོ། །སྣང་ལུགས་ནི། ཁྲིགས་ཆགས་སུ་སྣང་བའོ། །ཁ་འཐོར་དུ་སྣང་བ་དང་། ཕན་ཚུན་དུ་སྣང་བ་དང་། ཡན་ལག་ཏུ་སྣང་བ་དང་། རེ་རེའི་དབུས་སུ་ཐིག་ལེ་ལྔ་ལྔ་ཆུད་པར་སྣང་བའོ། །སྐུ་སྣ་ཚོགས་པའི་སྣང་བ་ནི། རེ་རེ་རྐྱང་པ་དང་། ཡབ་ཡུམ་གྱི་ཆ་དང་། ལྔ་ལྔས་ཁྱབ་པ་དང་། ཆུང་བ་དང་། རགས་པ་དང་། ཤིན་ཏུ་ཆུང་བ་དང་། ཤིན་ཏུ་རགས་པའོ། །ཞི་བའི་སྐུ་དང་ཁྲོ་བོའི་སྐུ་སྣ་ཚོགས་སོ། །སྣང་བ་དེ་བསྡུས་ན་དག་པའི་སྣང་བ་དང་། མ་དག་པའི་སྣང་བ་ཡིན་ཏེ། དག་པའི་གནས་ལུགས་མཐོང་བའི་ཚེ། དངོས་པོའི་འདུག་ཚུལ་གྱིས་རྟོགས་པ་ཐམས་ཅད་རང་ཆོད་ནས། འབྲས་བུ་གཉིས་མེད་དུ་མཐོང་བ་ཡིན་ལ། མ་དག་པའི་རྣམ་པ་མཐོང་བས་ཕྱིན་ཅི་ལོག་དང་། མ་ལོག་པའི་མཚན་ཉིད་ཐམས་ཅད་རང་ཤེས་ནས། རང་གཞན་གྱི་འགྲུབ་པའི་མཐའ་ཐམས་ཅད་ཇི་ལྟ་བ་བཞིན་དུ། མ་འཁྲུལ་བར་རྟོགས་ཤིང་ཁོང་དུ་ཆུད་པའོ། །དེ་ལྟར་སྣང་བ་གཉིས་ལ་མཁས་པས་ཆོས་ཐམས་ཅད་ཚིག་དང་ཡི་གེ་ལ་མཁས་པ་ཡིན་ནོ། །དེ་ལྟར་ན་རང་གཞན་ཐམས་ཅད་ལ་མཁས་པས་གྲུབ་མཐའ་འཛིན་པའི་དཔའ་བོ་ཞེས་བྱ་བར་འགྱུར་རོ། །རིག་པའི་གནད་དོན་ལྟ་བ་ཞེས་བྱ་བ་སློབ་དཔོན་བྲམ་ཟེ་འཇམ་དཔལ་བཤེས་གཉེན་གྱིས་མཛད་པ། རྒྱ་གར་གྱི་མཁས་པ་བི་མ་ལའི་ཞལ་སྔ་ནས། བོད་ཀྱི་ལོ་ཙཱ་བ་དགེ་སློང་སྐ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཨཐྎ།། །།