བླ་མ་རྒྱལ་བ་ཞང་ཆེན་པོའི་རྣམ་པར་ཐར་པ།

བླ་མ་རྒྱལ་བ་ཞང་ཆེན་པོའི་རྣམ་པར་ཐར་པ་བཞུགས་སོ། །བརྗོད་བྲལ་སྟོང་པའི་ཀློང་དཀྱིལ་ནས། །འོད་འབར་རྒྱལ་བ་ལོངས་སྤྱོད་རྫོགས། །ཐུགས་རྗེས་སྤྲུལ་པའི་བརྒྱུད་འཛིན་པ། །བླ་མ་མཆོག་ལ་གུས་ཕྱག་འཚལ། །བླ་མ་རྒྱལ་བ་ཞང་ཆེན་པོ་འདི་ཉིད། །ཡུལ་ཡར་འབྲོག་སྒང་གི་སྒྲུབ་མཚོ་གླིང་དགུ་བླ་དོ་ཞེས་བྱ་བར་ཡབ་ཞང་སྲས་རྡོ་རྗེ་དངོས་གྲུབ་དང་། ཡུམ་ཞུ་མོ་ཉེ་རེ་ལྕམ་གཉིས་ཀྱི་སྲས་མཚན་བརྗོད་པར་དཀའ་བའི་བཀྲ་ཤིས་རྡོ་རྗེ་ཞེས་བྱ་བ་འཁྲུངས་ཏེ། དགུང་ལོ་བཅུ་གཅིག་ཕན་ཆད་ཡུམ་གྱི་རྩར་བཞུགས་ནས། དེ་ནས་ཡུམ་དེ་སྡང་བས་ཨ་ནེ་མ་ཇོ་ཞིག་གི་རྩར་རིང་དུ་ཁྲིད་ནས་ཕྱིན་པའི་དུས་སུ་བླ་མ་ལྕེ་སྒོམ་ནག་པོ་དང་མཇལ་བའི་དུས། བླ་མ་དགྱེས་ནས་འདི་ལ་སངས་རྒྱས་ཀྱི་སྤྲུལ་པ་གཅིག་འོངས་པ་ཡིན་པས་འདི་ང་ལ་ཕུལ་དང་གསུངས་ནས་ཁོང་གི་སྤྱན་སྔར་ལོ་གཅིག་བཞུགས། དེ་ནས་ཆོས་ཀྱི་རྒྱ་མཚོ་ཆེན་པོར་ཤེས་རབ་ཀྱི་པདྨ་རྒྱས་པར་འཁྲུངས་པས། འདུལ་བ་མདོ་སྡེ་དབུ་ཚད་གསན་པ་དང་སྔགས་གསར་རྙིང་གི་བླ་མ་མཁས་ཤིང་གྲུབ་པ་ཐོབ་པའི་ཁྱད་འཕགས་ཀྱི་བླ་མ་བཅུ་གསུམ་བསྟེན་ནས། མཁྱེན་པ་ཆེ་ཞིང་། དགུང་ལོ་ཉི་ཤུ་རྩ་གཅིག་གི་བར་ལ་ཐོོས་བསམ་མཛད་དོ། །དེ་ནས་ཉང་སྟོད་སྣ་ཁུ་ཡུལ་ན་བཞུགས་པའི་དུས། ཐོ་རེངས་སྒྲ་ཆེན་པོ་གཅིག་གྲགས་ཏེ། བཞེངས་ནས་གཟིགས་པས་ནམ་མཁའ་འཇའ་དང་འོད་དུ་འཁྲུགས་པའི་དཀྱིལ་ན། དཔའ་བོ་དང་དཔའ་མོ་དང་། ཐུགས་རྗེ་ཆེན་པོ་དང་། སྒྲོལ་མ་དང་། སྔོན་གྱི་བླ་མ་རྣམས་ཀྱིས་ལུང་བསྟན་པ། ཀྱཻ་ཨེ་མ་ཚེ་གཅིག་ལུས་གཅིག་གིས་སངས་རྒྱ་བའི་མན་ངག་རྫོགས་པ་ཆེན་པོ་གསང་བ་བླ་ན་མེད་པའི་སྐོར་བྲག་སེང་གེ་དང་འདྲ་བ་ལ་ཡོད་ཀྱི། དེ་ཐོན་ལ་སེམས་ཅན་གྱི་དོན་དཔག་ཏུ་མེད་པ་གྱིས་ཤིག །འཕྲད་ཆོག་གི་ཆོས་ནི་ངོ་མཚར་ཨེ་མ། །ཞེས་ལུང་བསྟན་ཏེ་མི་སྣང་བར་གྱུར་ཏོ། །དགུང་ལོ་བཅོ་བརྒྱད་ཀྱི་དུས་སུ་ལུང་བསྟན་ངོ་མ་ཤེས་གསུངས། དེའི་སྲོད་ལ་བསམ་མནོ་བཏང་བའི་རྗེས་ལ་མི་ཞྭ་དཀར་པོ་གྱོན་པ་ཞིག་ན་རེ། དངོས་གྲུབ་སྦྱིན་གྱིས་འདོངས་གསུངས། ནང་པར་ཐོ་རངས་ཀྱང་བྱུང་ནས་འདོངས་གསུངས་ནས་ཕྱིན་པས། ཉང་སྨད་པ་ཚབ་ཉེ་མ་མདར་སླེབས་པའི་ནུབ་མོ་བན་དྷེ་མང་པོ་ཚོགས་ནས་སེར་ལྷ་གསོལ་ཞིང་འདུག་ནས་བཟའ་བཅའ་མང་པོ་བྱིན་པས་དེའི་ལོ་མུ་གེ་ཆེན་པོ་ཡོད་པས་དངོས་གྲུབ་དེ་ལ་ཟེར་རམ་སྙམ་པའི་ནམ་ལངས་ཁར་འདོངས་ཟེར་བ་ལ། བན་དྷེ་དེ་རྣམས་ཀྱིས་ཆང་མང་པོ་དྲངས་ཆོས་གཏམ་ཡང་མང་དུ་བྱས་ཏེ་ཤེས་རབ་དང་ཐོས་བསམ་ལ་མགུ་བ་ཡིན་སྐད། དེ་ནས་ཉི་མ་དྲོས་པ་ལ་ཁར་ལ་བྱོན་ནས་ལམ་ངོ་མ་ཤེས་ཙམ་ན། ཡང་དགེ་བསྙེན་ཞྭ་དཀར་ཅན་གྱིས་སྣ་དྲངས་ནས་ཕྱིན་ཏེ། སྟགས་ཐབས་སུ་སླེབས་པའི་ནུབ་མོ་ཁང་སྟོ་ཞིག་ཏུ་ཉལ་ཙམ་ན། ཁོ་ན་རེ། འདིར་མ་བསྡད་ད་ལྟ་འདོངས་ཟེར་ཙ་ན་སྒོར་ཐོན་མ་ཐག་ཏུ་ཁང་སྟོང་དེ་འགྱེལ་ལོ། །དེའི་ནུབ་ཆར་ཆེན་པོ་བྱུང་ནས་བྲང་ཁུང་ཞིག་ཏུ་བསྡད་པའི་ནུབ་མོ་ཁོའི་སྤྲུལ་པས་བཟའ་བཏུང་མང་པོ་ཁྱེར་བྱུང་། དེ་ནས་ནངས་པར་ར་ལག་ཚུགས་བརྒལ་ནས་འོ་ཡུག་མདའ་ན་མར་འཁྲུག་པ་ཡོད་ཀྱང་ཁོའི་སྤྲུལ་པས་འཇིགས་པ་མེད་པར་འོ་ཡུག་བར་བརྟོལ་བའི་ཉིན་པར་ཤིན་ཏུ་བཀྲེས་པ་བྱུང་བ་ལ་ཤིང་ཐུན་མ་ཀུན་གྱིས་བཟའ་བཏུང་བྱིན་ནས་བྱིས་པས་བྲག་སེང་གེ་དང་འདྲ་བའི་རྩར་སླེབས་པ་དང་། ཁོ་སྟོར་ནས་མ་རྙེད། སྤྱན་གྱིས་ཀུན་ཏུ་གཟིགས་ཀྱང་མ་རྙེད། ཕྱིར་ལོག་ཏུ་མ་བཏུབ་གནས་པ་ལས། ཁ་བྱང་དུ་བལྟས་པས་རྩྭ་བཟང་པོ་སྐྱེས་པའི་སྒོ་གཅིག་འདུག་ནས། ལག་ན་མཚོན་རྣོན་ཅིག་ཡོད་པ་དེ་བརྒྱབ་པས་ནང་དུ་ཁྲོལ་གྱི་སོང་ནས། ནང་དུ་ཕྱིན་པས་བྲག་ཕུག་གི་དབུས་ན་དཀྱིལ་འཁོར་གཅིག་གི་དབུས་ན་ཉི་མ་ཤར་ནས་འདུག་པ་ལ། མཚོན་རྣོན་གྱིས་སྔོགས་པས། སྦྲུལ་དང་སྦལ་པ་ཤིག་ཤིག་འདུག་ནས་རིམ་པ་བཞིན་དུ་བསམ་ནས་སྟེང་དུ་བཏོན་ཏེ་བལྟས་པས་ཐུགས་ལ་ཆོས་ནི་ང་རང་མཁས། ནོར་ཞིག་བྱུང་ན་དགའ་བ་ལ་སྙམ་བལྟས་པས། དེ་ནས་ཁ་བྱང་བརྒྱ་རྩ་བརྒྱད་བྱུང་ནས་རབ་ཏུ་དགའ་ནས་བྲོ་འཁྲབས་སོ། །དེ་ནས་འབྲེང་ཞགས་ཅིག་གིས་གྲིལ་ནས་ལུང་གི་ཕུག་གཅིག་ཏུ་བལྟས་པས། ས་རུབ་ནས་མ་མཐོང་བར་ཡོད་ཙ་ན། ཡང་དགེ་བསྙེན་ཅིག་གིས་མར་མེ་དང་བཟའ་བཏུང་ཁྱེར་ནས་དཔེ་ལ་བལྟ་ཡིན་ཡོད་ཙ་ན། སྐད་གདངས་ཤིན་ཏུ་འཇིགས་སུ་རུང་བ་ཞིག་སྒོ་དྲུང་དུ་བྱུང་བ་དང་། ཁོས་འ དི་ལུང་བསྟན་པའི་སྤྲུལ་པ་དེ་ཡིན་པར་ཨ་ལྕེས་མ་རིག །ཅེས་སྨྲས་པ་དང་། ངས་ཨ་ལྕེ་ཁྲིད་ནས་འོང་གི་ཟེར་བ་དང་། དེ་ནས་ཅི་ཞིག་ཙམ་ན་སྐད་ཤིན་ཏུ་འཇིགས་པ། ཕུག་པ་རྡིབ་པ་སྙམ་བྱེད་ནས། སྤྱན་བཏེག་བྱས་པས་སྒོ་དྲུང་ན་མིག་སླ་ང་ཙམ་ཡོད་པ་ཁ་ཁྲག་ཏུ་ཁོལ་བ་གཅིག་མཆེ་བ་གཙིགས་ཤིང་འཇིགས་སུ་རུང་བ་ཞིག་འདུག་པ་དང་བྲེད་དེ། འདི་དག་འཕྲད་པ་ཅི་ཆེན་སྙམ་པ་དང་། ཡང་གོང་དུ་ལུང་བསྟན་པ་ཨ་ལྕེས་མ་རིག་བྱས་པས། དེའི་ཞལ་ནས། ང་ནི་ཨེ་ཀ་ཛཱ་ཏི་ཡིན། །ཚོགས་འཁོར་བརྒྱ་དང་རྩ་བརྒྱད་ཐོང་། །ལོ་གསུམ་བར་དུ་མ་བཤད་ཅིག །ཅེས་གསུངས་ནས་བཞུད། དགེ་བསྙེན་ཞྭ་དཀར་ཅན་དེ་ནི་དགེ་བསྙེན་རྡོ་རྗེ་ལེགས་པའོ། །དེ་ནས་ཕུག་པའི་སྒོ་བཀག་ནས། གཡུ་ཆུང་ཞིག་ཡོད་པས་མི་གཅིག་གིས། བའི་ཤ་དང་ནས་ཁལ་གསུམ་ལ་ཚོགས་བརྒྱ་རྩ་བརྒྱད་བཏང་ངོ་། །དེ་ནས་ཉང་སྟོད་ཁུ་ཡུལ་ནས་ཤོག་བུ་དང་ཡོ་བྱད་བསྣམས་ནས་བྱོན། ཉང་རྟག་རྗེད་དུ་ཤག་མོ་དཀར་མཚོ་བྱ་བ་ཡོན་བདག་མོ་དད་པ་ཅན་ཞིག་གིས་ཞབས་ཏོག་ཆེར་མཛད་ནས་དཔེ་རྣམས་ཚང་པར་བྲིས། ལོ་གསུམ་གསང་བ་མ་ཐུབ་གསུངས་དེ་ནས་དགུང་ལོ་ཉི་ཤུ་རྩ་ལྔ་ལ་དབུས་སུ་བྱོན་ནས། སྐྱི་སྒང་དུ་གནས་ཆུང་གཅིག་བརྩིགས། དེ་ནས་གཙང་དུ་བྱོན་ནས་ཤག་མོ་དཀར་མཚོ་དང་འགྲོགས་ནས་ཤགས་དང་རྟ་ནག་ནས་ཡར་ལ་བྱོན་པས་དེར་ཟམ་ཁ་གཅིག་ཏུ་གྲུབ་ཐོབ་སེང་གེ་དབང་ཕྱུག་དང་མཇལ་ནས། དོན་སྐུ་གསུམ་དབྱེར་མེད་དུ་གཏན་ལ་ཕབ། ཆོས་རྣམས་ཀྱི་རྗེས་གནང་བྱིན་ནས་མི་སྣང་བར་གཤེགས་སོ། །དེ་ནས་དབུས་སུ་བྱོན་བླ་མ་ལ་སྟོད་པ་ལ་སོགས་ཏེ་གྲུབ་ཐོབ་མང་པོ་དང་མཇལ་ནས་གདམས་པ་མ་ལུས་པའི་ཞུན་མཐར་ཆོད་པར་མཛད་དོ། །ཆགས་ཞེན་འཁྲི་བ་བཅད་པ་ལ་དགོངས་ཏེ་ཡོད་བྱད་སྤང་དག་མཛད་ཅིང་ཆོས་ཀྱི་རྒྱ་མཚོའི་ནང་ནས་ཡིད་བཞིན་ནོར་བུ་གསང་བ་བླ་ན་མེད་པ་སྤྱན་སྔར་འཚོགས་ཤིང་འདུས་པ་རྣམ་སྨིན་ཅིང་གྲོལ་ཏེ་སངས་རྒྱས་པར་མཛད་དེ། དེ་ནས་དུས་སྐབས་ཤིག་ཏུ་སློབ་དཔོན་གཉེར་སྒོམ་གྱིས་མཚུར་ཁུངས་སུ་གདན་དྲངས་པའི་དུས་སུ་ཚོགས་འཁོར་མཛད་པའི་ཐོ་རངས་ཁ་བི་མ་ལ་དང་མཇལ་ནས་བྱིན་རླབས་དང་རྗེས་གནང་མཛད་དེ། མཁའ་ལ་གཤེགས་ཏེ་མི་སྣང་བར་གྱུར་ཏོ། །དེའི་ཚེ་དགུང་ལོ་དྲུག་ཅུ་རྩ་གཅིག་བཞེས་པ་ཡིན་ནོ། །དེའི་ལོ་ལ་བདག་ཅག་གི་མ་ཡུམ་དང་རྟེན་འབྲེལ་མཛད་ནས་སྒོམ་ཁང་དུ་བཞུགས། ཚོགས་པ་ཡང་རྒྱ་ཆེར་འདུས། ཆོས་འཁོར་མང་པོ་མཛད། བདག་ཅག་ལྕམ་སྲིང་གསུམ་འཁྲུངས་ནས་སྒོམ་ཁང་དུ་ཞིང་དང་མཁར་ལས་ལ་སོགས་པ་ཅི་རིགས་པ་མཛད། དེའི་དུས་སུ་བླ་མའི་ཞལ་ནས་བདག་གིས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་ཏེ་གསུངས། སྐུ་ལུས་ལ་གྲིབ་མ་མེད་པ་དང་། སྐབས་སུ་རིགས་ལྔར་གསལ་བ་དང་། རྫོགས་པ་ཆེན་པོའི་ཆོས་གསུངས་པའི་དུས་སུ་འཇའི་གུར་ཕུབ་པ་ཀུན་གྱིས་མཐོང་། དེའི་ཚེ་རང་གི་བུ་ཆེན་རྣམས་བསྡུས་ནས། བླ་མ་གཞུང་པས་དབུ་མཛད་པའི་དགེ་བའི་བཤེས་གཉེན་རྣམས་ལ་ཅི་བདོག་པ་ཐམས་ཅད་འཁོར་གསུམ་ཡོངས་སུ་དག་པར་མཛད་དོ། །དེ་ནས་དགུང་ལོ་བདུན་ཅུ་དོན་གཅིག་ཕག་གི་ལོའི་ལུག་གི་ཟླ་བའི་ཉི་ཤུ་གཉིས་ཀྱི་ནམ་ཕྱེད་ན་སྐུ་གཤེགས་པའི་ཚུལ་བསྟན་ཏེ། ཤར་ཕྱོགས་སུ་སྒྲ་ཆེན་པོ་བདུན་བསྒྲགས་སོ། །ས་ཆེན་པོ་གསུམ་བཏུད་དུ་གཡོས་སོ། །ནམ་མཁའ་ལ་སིལ་སྙན་དང་དྲི་ཞིམ་གྱི་ངད་དུ་གྱུར། འཇའ་ཚོན་སྣ་ལྔའི་གདུགས་ཕུབ། འོད་ཕུབ་ཆུང་ཙམ་ནི་ནམ་མཁའ་ལ་གཅལ་དུ་བཀྲམ་སྟེ། ཞང་ཆེན་པོ་མྱ་ངན་ལས་འདས་སོ། །དེའི་ཕྱིར་ནུབ་པུར་ཁང་བརྩིགས་ཏེ་པུར་སྦྱངས་པས་སྐུ་ལྔའི་ཚབ་ཏུ་རིང་བསྲེལ་ལྔ་བྱོན། ས་བཅུ་དྲུག་ནོན་པའི་རྟགས་སུ་གདུང་ཤ་རཱི་རམ་བཅུ་དྲུག་བྱོན། མེ་ཏོག་གི་ཆར་བབས། དེར་འདུས་པའི་མི་རྣམས་ལ་མི་རྟོག་པའི་ཏིང་ངེ་འཛིན་སྐྱེས་སོ། །ས་ཆེན་པོ་ལ་འཁོད་པར་བྱས་སོ། །ཀྱེ་མ་ཀྱི་ཧུད་རྒྱལ་བ་ཞང་། །འཛམ་གླིང་ཆོས་ཀྱི་འོད་ནུབ་ན། །རྗེས་འཇུག་མུན་པ་གང་གིས་སེལ། །བླ་མ་ཁྱེད་ཀྱི་ཐུགས་རྗེ་ཡིས། །ཆུ་བུར་མིག་གི་སྒོ་སོལ་ལ། །ཡེ་ཤེས་སྒྲོན་མ་བསྟན་དུ་གསོལ། །རྫོགས་སོ།། །། ༈ ཞང་ཉི་འབུམ་གྱི་རྣམ་ཐར་བཞུགས། དྲི་མེད་མཆོག་གི་བརྒྱུད་པ་བླ་མའི་སྐུ། །སྡེ་སྣོད་ཀུན་གྱི་མངའ་བདག་རྒྱལ་བའི་སྲས། །ཡེ་ཤེས་ཉི་འོད་འགྲོ་ཀུན་ཁྱབ་མཛད་པའི། །རྩོད་མེད་བླ་མ་ཉིད་ལ་གུས་པས་འདུད། །རྩ་བའི་རྒྱུད་སྒྲ་ཐལ་འགྱུར་ལས་ལུང་བསྟན་པའི་ལག་ན་རྡོ་རྗེའི་སྤྲུལ་པ་ཞང་ཉི་མ་འབུམ་ཞེས་བྱ་བའི་ལོ་རྒྱུས་ཟུར་ཙམ་ནི། ཡབ་མཚན་བརྗོད་པར་དཀའ་བ་རྒྱལ་བ་ཞང་སྟོན་དང་། རྒྱལ་མོ་ཡུམ་གྱི་ལྷུམས་སུ་ཞུགས་པའི་དུས་སུ་ཡུམ་གྱི་རྨི་ལམ་ན་ཉི་མ་མང་པོ་ཤར་བ་རྨིས་ནས་ཡབ་ལ་ཞུས་པས་གསང་བ་བླ་ན་མེད་པ་འདིས་སེམས་ཅན་མང་པོའི་དོན་བྱེད་པ་འོངས་པའི་རྟགས་ཡིན་ཁྱོད་ཐེ་ཚོམ་ཟ་མི་འཚལ་གསུངས། གཡང་དེ་གཉིས་ཀྱི་སྲས་སུ་འཁྲུངས་ཏེ་དེའི་དུས་སུ་ཡབ་ཀྱིས་མཚན་གསོལ་བ་སེམས་ཅན་ཀུན་གྱི་མ་རིག་པའི་མུན་པ་སེལ་བའི་ཉི་འོད་དུ་འགྱུར་བར་འདུག་པས་ཉི་མ་འབུམ་ཞེས་བྱ་བར་ཐོགས་ཤིག །གསུངས་ནས་མཚན་གསོལ་སྐད། དེ་ནས་དགུང་ལོ་གསུམ་སོང་ཙ་ན་ཁོང་རང་གིས་སོ་ཕོ་རྒྱ་སྟོན་ལུང་གྲོ་བའི་ཕུར་པ་དང་། ཡང་དག་གི་སྒྲུབ་པ་མང་དུ་མཛད་དེ། བྱིན་གྱིས་བརླབས་ཤིང་བར་ཆད་བསལ་ལོ། །དགུང་ལོ་ལྔ་ནས་བདུན་བརྒྱད་ཀྱི་བར་ལ་ཡབ་ཉིད་ཀྱི་གསང་བ་བླ་ན་མེད་པའི་དབང་གདམས་ངག་དང་བཅས་པ་དང་། རྒྱུད་བཅུ་བདུན་གྱི་ལུང་རྫོགས་པར་མཛད་དོ། །དགུང་ལོ་དགུ་ལ་བླ་མ་ཉིད་སྐུ་འདས། དེའི་དུས་སུ་འགྲོ་མགོན་ཞང་གཡུ་གྲགས་པ་གདན་དྲངས་ནས། བཀའ་རྒྱས་འབྲིང་རྣམ་གསུམ་ཕྱག་ཏུ་བཏང་སྟེ་ཚིག་གིས་ཕུལ་ཞིང་ས་བདེ་འཇམ་ལ་བཀོད་དོ། །དགུང་ལོ་བཅུ་ནས་བཅོ་ལྔ་མན་ཆད་ལ་རྩ་བའི་རྒྱུད་སྒྲ་ཐལ་འགྱུར་དང་། རྒྱུད་བཅུ་བདུན་གྱི་བཤད་པ་ཚར་བར་མཛད་དོ། །ཆེ་སར་སྟོན་དུས་སུ་བུ་སློབ་རྣམས་ལེགས་པར་བསྡུས་ཏེ། རྒྱུད་གདམས་ངག་དང་བཅས་པ་བཤད་པས་བུ་སློབ་ཀུན་ངོ་མཚར་སྐྱེས་ཤིང་དད་པར་གྱུར། བཅོ་བརྒྱད་ལ་སློབ་དཔོན་གྱི་སྤྱན་སྔར་དབང་གོང་མ་ཞུས། དགུང་ལོ་ཉི་ཤུ་ཐམ་པ་ལ་བླ་མ་རྔོག་རྒྱལ་ཚ་རྡོར་སེང་གི་སྤྱན་སྔར་བྱོན་ཏེ། སྔགས་གསར་མའི་རྒྱུད་གདམས་ངག་དང་བཅས་པ་ཞུས། དགུང་ལོ་ཉི་ཤུ་རྩ་གཉིས་ལ་ཇོ་མོ་རྒྱ་གར་ཁབ་ཏུ་བཞེས། དགུང་ལོ་ཉི་ཤུ་རྩ་བདུན་ལ་ས་སྐྱའི་འཁོན་གྲགས་པ་རྒྱལ་མཚན་དང་། བླ་མ་སྟག་སོ་བའི་སྤྱན་སྔར་བྱོན་ཏེ། རྒྱུད་གསུམ་མན་ངག་དང་བཅས་པ་དང་། བདེ་མཆོག་མལ་གྱི་ལུགས་ཞུས། ཉི་ཤུ་རྩ་དགུ་ལ་ཇོ་མོ་སེར་རྒྱན་ཁབ་ཏུ་བཞེས། དགུང་ལོ་སུམ་ཅུ་ལ་ཁ་རག་བོན་དྲུག་གི་བླ་མ་སྐྱི་སྟོན་གྲགས་པའི་སྤྱན་སྔར་བྱོན། བདེ་མཆོག་ལྷན་སྐྱེས་ཨ་ཕྱིའི་ལུགས་དང་། རྗེ་བཙུན་མ་རྭ་ལུགས་དང་། མགོན་པོ་བྱ་རོག་མ་དང་ཚལ་བའི་ཆོས་སྐོར་ཞུས། ལར་ནི་མཁས་ཤིང་གྲུབ་པ་ཐོབ་པའི་བླ་མ་མང་དུ་བསྟེན་ཅིང་གདམས་ངག་མང་དུ་ཞུས་ཏེ་ཐུགས་དགོངས་ལོན་པར་མཛད་དོ། །རྒྱུད་ཀྱི་བཤད་པ་དང་གདམས་ངག་གི་ཁྲིད་ལ་སོགས་པའང་མང་དུ་མཛད་དེ་ཐམས་ཅད་སྨིན་ཅིང་གྲོལ་བ་ལ་བཀོད་དོ། །དེ་ནས་དགུང་ལོ་ལྔ་བཅུ་ང་དྲུག་ལ་ཆོ་འཕྲུལ་ཆེན་པོའི་ཟླ་བའི་ཚེས་བརྒྱད་ལ་སྐུ་འདས་པའི་ཚུལ་བསྟན་ཏེ་པུར་ལ་བཀོད་དེ། གདུང་ཤ་རཱི་རམ་དང་ཆུ་རཱི་རམ་དང་། པཉྩ་རམ་ལ་སོགས་པ་ཁ་དོག་མ་འདྲེས་པ་ལྔ་བྱོན་ཏེ་བླ་མ་ཉི་འབུམ་ཆེན་པོ་དབྱིངས་སུ་ཡལ་ལོ། །ཀྱེ་མ་ཀྱི་ཧུད་ཉི་མའི་མཚན་ཅན་རིན་པོ་ཆེ། །རིགས་དྲུག་འཁོར་བའི་མུན་པའི་སྨག་རུམ་དུ། །གསལ་དག་ཡེ་ཤེས་སྤྱན་གྱིས་གཟིགས་པ་ལས། །ལྔ་ལྡན་འོད་ཀྱི་སྒྲོན་མེ་ཡིས། །སྟོངས་ཞིང་འཐིབས་པའི་མུན་པ་འདི། །སྐད་ཅིག་ཉིད་ལ་གསལ་བར་མཛད། །རྫོགས་སོ། ༈ །ཆོས་བདག་གུ་རུ་ཇོ་འབེར་གྱི་རྣམ་ཐར་བཞུགས། སྤྲིན་བྲལ་ནམ་མཁའི་ཀློང་ནས་ཐུགས་རྗེའི་ཉི་མ་ཤར། །མ་རིག་རྨོངས་པའི་ལིང་ཐོག་ཀུན་བསལ་ནས། །རྟགས་ཆད་གཉིས་མེད་ངང་ནས་རིག་པ་འོད་དུ་འབར། །སྐལ་ལྡན་སངས་རྒྱས་ས་ལ་ཚེ་འདི་ཉིད་ལ་བཀོད། །ཆོས་བདག་གུ་རུ་ཉིད་ལ་གུས་པས་བསྟོད། །དེ་ལ་ཆོས་བདག་གུ་རུ་ཇོ་འབེར་གྱི་རྣམ་ཐར་མདོ་ཙམ་འདིའོ། །དེ་ལ་ཡབ་ནི་བླ་མ་མཁས་པ་ཉི་འབུམ་གྱི་གཅུང་པོ་ཟླ་བ་འབུམ་དང་། ཡུམ་རྒྱལ་མོ་ཨ་ལུ་གཉིས་ཀྱི་སྲས་སུ་འཁྲུངས་ཏེ། དགུང་ལོ་བདུན་མན་ཆོད་ལྐུགས་པ་དང་འདྲ་བ་ཞིག་ཡོད། བདུན་ནས་ཤེས་རབ་ཐོགས་མེད་དུ་རལ་ཏེ་ཅི་ལ་ཡང་ཐོགས་རྡུག་མེད་པ་ཞིག་བྱུང་། དགུང་ལོ་བརྒྱད་ནས་བཅོ་བརྒྱད་ཀྱི་བར་ལ་ཨ་ཁུ་དྲིན་ཆེན་ཞང་ཉི་འབུམ་ལས་གསང་བ་བླ་མེད་ཀྱི་དབང་གདམས་ངག་དང་བཅས་པ་དང་། རྒྱུད་རྣམས་མ་ལུས་པ་ཚར་བར་གསན་ནས་སྒྲ་ཐལ་འགྱུར་གྱི་བཤད་པ་བྱས། དགུང་ལོ་བཅུ་དགུ་ནས་ཉི་ཤུའི་བར་ལ་ཆོས་རྗེ་ས་སྐྱ་ལོ་ཙྪ་བ་ལ་རྒྱུད་གསུམ་གདམས་ངག་དང་བཅས་པ་དང་། བདེ་མཆོག་མལ་གྱོ་ལུགས་གསན། དེ་ནས་དགེ་བཤེས་ཆུ་མིག་པ་ལས་ཚད་མ་བཏུས་པ་གསན། དགུང་ལོ་ཉི་ཤུ་རྩ་གཉིས་ལ་བླ་མ་ཁྲོ་ཕུ་པ་ལས་གྲུབ་ཐོབ་མི་ཏྲ་ཛྭ་ཀིའི་གདམས་པ་རྣམས་གསན། བལ་པོ་གྲགས་པ་འབུམ་མེ་ལས་ཕྱག་རྒྱ་ཆེན་པོ་ཁ་འཐོར་གྱི་གདམས་པ་གསན། ལར་ནི་ཐོས་བསམ་གྱི་ལས་ཚར་ཞིང་ཐུགས་ཐག་ཆོད་པ་དགུང་ལོ་སུམ་ཅུ་སོ་དྲུག་གི་བར་ལ་མཛད་དོ། །ཆོས་འབྲེལ་ཙམ་གྱི་བླ་མ་ཇོ་བོ་བཟང་ཞིང་ཆོས་ལ་མཁས་པ་མང་པོ་བརྟེན་པ་ལགས་སོ། །ལྷའི་ཞལ་གྱི་རྣམ་པ་ལ་ལྷའི་ཐང་སྐུ་འདི་ཀུན་དང་ལྡེར་ཚོ་དང་རག་སྐུ་མང་པོ་མཐོང་གསུངས་ནས་ཞལ་དུ་གསུངས། འོན་ཀྱང་གསལ་བར་གསུངས་པ་ལ། ལྷ་ས་རུ་ཇོ་བོ་ལ་མར་མེ་འབུལ་དུ་ཕྱིན་ནས་གསོལ་བ་བཏབ་པས། ཇོ་བོའི་ཞལ་ནས་འཇའ་ཚོན་སྣ་ལྔས་བསྐོར་ནས་འདུག་པ་དེའི་གསེབ་ནས་ཕར་ལ་ཐིག་ལེ་བཞི་ལྔ་ཙམ་གྱི་ནང་ན་ཕྱག་ན་རྡོ་རྗེ་ཡབ་ཡུམ་དང་ཐུགས་རྗེ་ཆེན་པོའི་ཞལ་མཐོང་། ཡང་ལན་གཅིག་ཐོ་རངས་ཁ་ལ་མགོན་པོ་ཚེ་དཔག་ཏུ་མེད་པ་ཞིག་འཇའ་ཚོན་དང་ཐིག་ལེ་ཤིག་ཤིག་པ་ཞིག་ཞལ་མཐོང་། དེའི་ཡོ ན་ཏན་ཡིན་པ་འདྲ། ངེད་ཀྱང་ཚེ་རིང་རྒྱུད་ཁོ་ནའང་མིན་ཏེ། ང་རང་ལེགས་པར་བྱུང་། དེ་མིན་རང་བྱུང་སྒྲོན་མ་འོད་གསལ་གྱི་དང་ཡིན་མོད། ངེད་རང་ཕ་སྤད་ཚོས་འདི་འདྲ་བ་ཡོད་པས་འཚེ་བ་མེད་གསུངས་ནས། སྐུ་འགྱུར་མེད་བདེ་ཆེན་གྱི་ངང་ལ་བཞུགས། གསུང་འགགས་མེད་ངེས་དོན་གྱི་ཆོས་གསུངས། ཐུགས་གསལ་སྟོང་མཐའ་བྲལ་དུ་བློ་བདེའོ། །ཡོས་ལོ་སྟོན་ཟླ་ར་བའི་ཉ་ལ་སྐུ་གཤེགས་ཏེ། ཞག་བདུན་དུ་འཇའི་དྲྭ་བར་འབྲེལ། རིང་བསྲེལ་དང་ཨཱཿཧཱུྃ་ལ་སོགས་པ་བྱོན་ནོ། །ཨེ་མ་ངོ་མཚར་རྨད་དུ་ཆེ་ཞིང་དར་རྒྱས་ཆོས། །རིགས་དྲུག་དག་ཏུ་སྐྱེ་བར་རྒྱུན་བཅད་མི་ཚེ་འདིར། །འཁོར་འདས་གཉིས་ཀྱི་རེ་དོགས་བྲལ་བར་སྐད་ཅིག་མས། །ངེས་དོན་མཆོག་གི་བརྒྱུད་འཛིན་གུ་རུ་རིན་པོ་ཆེ། །མངའ་བདག་ཆེན་པོའི་ཁྱོད་ཀྱིས་ཡེ་ཤེས་སྣང་བ་སྟོན། །རྫོགས་སོ།། །།