རིག་འཛིན་ཆེན་པོ་ཀུ་མ་རཱ་ཛའི་རྣམ་ཐར་ལོ་རྒྱུས་དང་བཅས་པ། ཀུ་མ་རཱ་ཛ།
རིག་འཛིན་ཆེན་པོ་ཀུ་མ་རཱ་ཛའི་རྣམ་ཐར་ལོ་རྒྱུས་དང་བཅས་པ་བཞུགས་སོ། །ༀ་ཨཱཿཧཱུྃ། བཅོམ་ལྡན་ཀུན་བཟང་སངས་རྒྱས་ཀུན་གྱི་རྗེ། །རྒྱལ་བ་རིགས་གསུམ་རིག་འཛིན་ཆེན་པོ་དང་། །སྙན་ངག་བརྒྱུད་པའི་བླ་མ་དམ་པ་རྣམས། །བདག་སོགས་འགྲོ་བ་ཡོངས་ལ་བྱིན་གྱིས་རློབས། །ཁྱད་པར་བདག་བློའི་མུན་སེལ་རིན་པོ་ཆེ། །ཐུགས་དགོངས་ཀློང་ཡངས་ཀུན་ཏུ་བཟང་དང་མཉམ། །རྣམ་ཐར་མཛད་སྤྱོད་དམ་པ་རིན་ཆེན་ཉིད། །སྐུ་དྲིན་མི་འཁོར་དྲིན་ཅན་ཉིད་ལ་འདུད། །ཡི་དམ་ལྷ་ཚོགས་མ་དང་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །ཆོས་སྐྱོང་བཀའ་སྲུང་ཕོ་མོས་བར་ཆད་སོལ། །ཀྱེ་མ་བདག་འདྲའི་བན་ལྡོམ་གཞོན་རྒྱལ་གྱི། །ལོ་རྒྱུས་བྲི་བར་འོས་པ་མ་ཡིན་ཀྱང་། །གུས་ལྡན་སློབ་མས་ཡང་ཡང་བསྐུལ་བའི་ཕྱིར། །ཅལ་ཅོལ་འགའ་ཞིག་འབྲིའོ་བྱིན་གྱིས་རློབས། །དེ་ལ་སྤྱིར་མི་མཇེད་ཀྱི་འཇིག་རྟེན་གྱི་ཁམས། ཁྱད་པར་དུ་ལྷོ་འཛམ་བུ་གླིང་གསེར་གྱི་བྱེ་མ་བརྡལ་བ་ལྟ་བུ་འདིར་སྐུ་གསུང་ཐུགས་ཀྱི་བསྟན་པ་རིན་པོ་ཆེ་འདི་དར་བར་མཛད་པ་པོ་སྟོན་པ་ཉིད་དང་མཚུངས་པ་དཔག་ཏུ་མེད་པ་བྱོན་ཞིང་། ཁྱད་པར་དུ་བོད་ཁ་བ་ཅན་གྱི་རྒྱལ་ཁམས་མུན་པའི་སྨག་འཐིབས་པ་དང་འདྲ་བ་འདིར། ཆོས་ཀྱི་རྗེ་རིན་པོ་ཆེ་གསུམ་གྱི་སྐུ་དྲིན་ལས་བསྟན་པ་འཛིན་སྐྱོང་སྲུང་བར་མཛད་པ་སྤྲུལ་པའི་སྐུ་གྲངས་ལས་འདས་པ་བྱོན་ཞིང་། དེ་དག་གི་རྣམ་པར་ཐར་པ་ཤློ་ཀ་རེས་ཀྱང་ཡིད་ཚིམ་པ་དག་གི་མཛད་པ་ལ། ཡིད་ཕྲོགས་པ་བྲི་བར་མི་ནུས་ཏེ། སྟོན་པ་དང་བསྟན་པའི་རིམ་པ་རྣམས་ལ་མོས་གུས་ཅུང་ཟད་ཡོད་པ་ཡི་གེ་བཀོད་པ་ཡིན་ཀྱང་། དད་པ་ཅན་སྒྱིད་མི་ལུགས་པའི་ཕྱིར། དེ་ལ་བོད་ཀྱི་ཡུལ་དུ་རྡོ་རྗེ་གདན་ལྟ་བུ་དཔལ་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་བསམ་ཡས་དང་ཉེ་བའི་འོན་ཞེས་བྱ་བ་དགེ་བཅུ་ཚང་བའི་དབུས་མདའ་བར་གསར་ཞེས་བྱ་བ། ཨོ་རྒྱན་པདྨ་རིན་པོ་ཆེ་ནས་བརྒྱུད་པའི་སྔགས་པའི་རིགས་རྒྱུད་ངོམ་ཞེས་བྱ་བ། ཕ་ཇོ་སྲས་བསོད་ནམས་དཔལ་ཞེས་བྱ་བ་དང་། ཤཱཀྱ་ཁྲི་མགོན་ཞེས་བྱ་བ། ཨག་ཚར་ཅན་གྱི་བུ་མོ་ཁྱོར་ཚ་འབུམ་མེ་ཞེས་བྱ་བ་གཉིས་ལ་ངེད་བུ་ཚ་མིང་སྲིང་ལྔ་ལས། ཆེ་བ་ནི་ཨ་ལྕེ་ལྡན་ནེ། དེ་འོག་ཕུ་བོ་བསོད་ནམས་འབུམ་བྱ་བ་ཁྱིམ་འཛིན་དུ་བཅུག་པས། ཆོས་བྱས་ཏེ་བྱ་བྲལ་ཅིག་བྱུང་བ་ལ་ཏི་སེ་ལ་བྲོས་སོ། །དེ་འོག་བདག་ཐར་པ་རྒྱལ། དེ་འོག་ནུ་བོ་འཚོ་བྱེད། དེ་འོག་སྲིང་མོ་འབེར་མོ་བྱ་བ་ཡིན། བདག་ཆུང་བའི་སྐབས་སུ་གསོ་ཤིན་ཏུ་དཀའ་བ་བྱུང་ཟེར། ཨ་ཁུ་དགེ་བའི་བཤེས་གཉེན་མཁས་པ་བར་གསར་པའི་ཚ་བོ་ཡིན། ལོ་བཞི་ཙམ་ལོན་དུས་ལུག་གི་བལ་བྲེག་པ་ལ་ཁོང་གི་གོས་མ་བཤུ་ཞེས་སྨྲ་དད་པ་དང་སྙིང་རྗེ་ཅུང་ཟད་ཡོད། ལོ་དྲུག་བདུན་ལོན་ཙམ་ན། ཕས་ཞག་འགའ་ཡི་གེ་ཁྲིད་པས་འབྱོར་ཀློག་ཚུན་ཆད་བསླབ། རྗེས་ང་རང་གི་སྐྱོང་བས་ཤེས་སོ། །གཤར་མ་དཔེ་གོག་ཁྱེར་ནས་བལྟས་ཤིང་བྲིས་པ་དང་མཚུངས་པར་ཤེས་པར་བྱུང་། རྩམ་ཡིག་ངོ་ཡ་གཅིག་ཤེས་ཏེ། ཕྱིས་མཁས་པ་གཞན་ཅུང་ཟད་བསྟེན་ནས་བསླབ། ལས་ལ་དཔེ་གོག་འདྲ་བ་ཁྱེར་ན་ཡི་གེའི་རི་མོ་སྦྱངས། གཙུག་ཏོར་ལ་སོགས་པའི་མདོ་ཕྲན་ཅུང་ཟན་བཏོན། ཕོ་མཆིན་གྱི་ནད་བུ་ཅུང་ཟད་ཀྱི་རྐྱེན་གྱིས་ཞང་པོ་སློབ་དཔོན་ཅིག་ཡོད་པས། གཏུམ་མོ་ཅུང་ཟད་བསྒོམས་པ་དང་། བདེ་མཆོག་ཡིག་བདུན་གྱི་བསྙེན་པ་དུམ་རེ་བྱས་པས་རྟགས་ཕྲན་དེ་འདྲ་མཐོང་། དེར་མ་སྡུག་མ་ཤི་ནས་ཕས་ཀོང་པོ་ན་མར་ཁྲིད་དེ། འོ་ཤོད་ཀྱི་མཐོ་སྟེང་དགོན་པར་བླ་མ་དགྱེས་རྡོར་བྱ་བ་ལས་ཀྱེ་རྡོར་དང་བདེ་མཆོག་གི་དབང་ཐོབ། དེ་ནས་ཡར་ལ་ལོག་ནས་ཕ་བུ་གསུམ་གྱིས་གཡེ་དང་སྒོམ་པོར་འཁྱམས། ངས་གཡེར་སྔགས་པ་གཅིག་གི་འཕགས་པ་བརྒྱ་ཚར་གཅིག་བཏོན། བླ་མ་ནུབ་བྱ་བ་བགྲེས་པོ་གཅིག་ལ་རྟ་མགྲིན་ལྷ་བཞིའི་དབང་ཞུས། ཁོང་ཕ་བུ་གཉིས་ཀྱིས་གཡེར་མ་བསྡད་པར་སྒོམ་པོ་སྟོད་དུ་སོང་ཡོད་པས་རྗེས་སུ་སྙགས། ཕས་རྩིག་བཟོ་འདྲ་བྱེད་ཀྱིན་འདུག །ངས་ལོ་དགུ་ལོན་དུས་ནས་འོན་གྱི་དགོན་པར་མཁན་པོ་གཙང་པོ་བྱ་བ་འདུལ་བ་དང་། སྤྱོད་འཇུག །བརྟག་གཉིས་ལ་སོགས་པ་མཁྱེན་པ་གཅིག་ལ། ཡོངས་རྫོགས་ཀྱི་དགེ་བསྙེན་བྱས་བཙུན་པར་བསྲུངས། སློབ་དཔོན་དགེ་སློང་གཅིག་ལས་རྡེའུའི་དཀའ་ཐུབ་དང་། སྤྱན་རས་གཟིགས་གང་པར་ཕུག་མོ་ཆེ་ནས་ཐོན་པའི་ལུང་བག་ཙམ་ཞུས། རྡེའུའི་དཀའ་ཐུབ་བྱས་པས་ཤིག་ནད་ཚབས་ཆེ་ལ་དར་དྲག་པ་ཀོང་ནས་ཤིག་ཁ་ནས་ཡར་བྱུང་། གོས་རས་གླེགས་གཅིག་གི་ཤན་འགག་རན་པ་ཞིག་ལས་མེད་པས་ཅུང་ཟད་ཉེན་ན་ཡང་ཆོས་ཁོ་ན་ལ་མོས་པས་ལེགས་པར་བྱུང་། དེར་ཕར་འདས་པས་ལྟས་བཟང་པོ་བྱུང་། ང་ལོ་བཅུ་གཅིག་ལོན་པ་ཞིག་གིས་ནུ་བོ་ལོ་དྲུག་ལོན་པའི་ཞིག་སྐྱོང་དགོས་པ་བྱུང་། དེ་དུས་རྗེ་ཨོ་རྒྱན་པ་ཨེ་ན་ཕྱགས་ཕེབས་ཡོད་པ་ཐོས་པས། ང་རང་གཅིག་པུས་མཇལ་དུ་ཕྱིན་པས། གཉལ་སྟོད་ཀྱི་ལུང་ལག་གཅིག་གི་ཕུར་རྗེས་སླེབས། ཆོས་འབྲེལ་ཙམ་ཐོབ། ཞག་གཅིག་བསྡད་ནས་ནུ་བོ་ཁྲིད་ནས་ཞང་པོ་ཅན་དུ་བསྐྱལ། བདག་སློབ་དཔོན་ཚུལ་རྒྱལ་བྱ་བ་ཞིག་གིས་ཁྲིད་ནས་གདན་ས་ཕག་མོ་གྲུར་ཕྱིན། དེ་དུས་ལོ་བཅུ་གཉིས་ཙམ་ལོན། མཁན་པོ་ཡེར་པ་དང་སློབ་དཔོན་མངའ་རིས་པ་གཉིས་ལས་དགེ་ཚུལ་གྱིས་བསླབ་པ་བླངས། བླ་མ་ལྷ་ཁང་པ་བྱ་བས། ཕག་མོ་ཁམས་གསུམ་མའི་བརྡ་བཞིའི་བྱིན་རླབས་ཀྱི་ཆོས་སྒོ་ཕྱེ་རིན་པོ་ཆེ་གྲགས་ཡེ་བ་དཔལ་ཕག་མོ་གྲུ་པའ ི་སྤྲུལ་པ་དེ་ལས་རྗེ་ནཱ་རོ་པའི་ཆོས་དྲུག་རྙིང་མ་དང་། ཆོས་རྗེ་འབྲི་གུང་པའི་འཁྲུངས་ཆོས་ཟབ་ཆོས་དང་བཅས་པ་ལོ་ལྔའི་བར་ལ་ཞུས། དེའི་བར་སྐབས་སུ་བླ་མ་འཚེར་སྟོངས་པ་བྱ་བ་ཞིག་ལས་བརྟག་གཉིས་རྔོག་ལུགས་ཤེས་པ་ཙམ་དུ་སྦྱངས། བླ་མས་གསུངས་པ་ནི་མིན། ངའི་རྟོགས་པ་བསྐྱེད་རྫོགས་ལ་འབྱམས་པས། དེ་གཉིས་བསྡུར་ན་སྐད་ཅིག་མའི་རྟོགས་པ་བསྐྱེད་རིམ། དེའི་རང་བཞིན་མི་དམིགས་པ་དེ་རྫོགས་རིམ་དུ་འདུག་སྙམ་པ་ཞིག་བྱུང་སྟེ་རྟོགས་པ་མ་སྐྱེས་སོ། །དེའི་གོང་དུ་ཡུལ་ན་ཡོད་དུས་ཆུང་ངུས་ཨ་ནེ་སློབ་དཔོན་མ་ཞིག་ཡོད་པར་འདུག་པའི་བེའུ་བུམ་གཅིག །ཕས་ཁྱེར་བྱུང་བས་འཁོར་འདས་དབྱེར་མེད་བྱ་བ་གཅིག་འདུག་ནས་དེ་ལ་བསམ་པས་རྟོགས་པ་ཅིག་འཆར་ལ་ཁད་པ་ཞིག་བྱུང་བ་ལ། དེ་ནས་ཐེ་ཚོམ་གྱིས་སོང་། བྱིས་པ་རྣམས་རྩེ་བའི་སར་བསམ་གཏན་སྒོམ་པ་གང་བཟང་འགྲན་ནོ་བྱས། ལུང་པའི་ཕུར་ཤིང་ལེན་དུ་ཕྱིན་པས། བྲག་ཕུག་གམ་བྱ་སྐྱིབས་འདུག་པ་དེར་བསྡད་ན་རི་ཁྲོད་ཀྱི་བག་ཆགས་གཅིག་གདའ། གཞན་ཡང་བླ་མ་ལ་ཀྱཻ་རྡོར་གྱི་ཕྲན་བུ་འདྲ་བ་དང་། རྩ་ལྟུང་དང་། བླ་མ་ལྔ་བཅུ་པ་ལ་སོགས་འགའ་རེ་ཞུས། སྐབས་སུ་དཔོན་སངས་ཤེ་བྱ་བ་ལྷ་མཁས་ལ་དད་པ་ཆེ་བ་ཞིག་གི་སར་ལྷ་བསླབས་མ་ཎི་ཡིག་དྲུག་རེ་མང་དུ་བསྒྲངས་པས། ནམ་མཁའ་ནི་མིན་ས་གཞི་ལ་ཁང་བུ་ལེགས་པོའི་ནང་ན་སྤྱན་རས་གཟིགས་ཕྱག་བཞི་པ་ཞིག་བཞུགས་པའི་དྲུང་དུ་མཇལ་བ་ཡང་རྨིས། དེའི་བར་སྐབས་གཅིག་ཏུ་སློབ་དཔོན་བྱ་སྟོན་བྱ་བའི་ཕྱག་ཕྱི་ལ། གྲ་ཕྱིར་བླ་མ་ཁྱུད་ནག་ཤཱཀྱ་དར་ལས་ཕུར་པ་རྩར་ཐུང་ཇོ་མོ་ལུགས་དང་། གཤིན་རྗེ་གཤེད་དང་། དགྲ་ནག་ཚེ་བདག་ཀུན་གྱི་དབང་རྒྱུད་གདམས་ངག་ལས་ཀྱི་གཤིན་རྗེའི་ཞལ་གྱི་ངོ་སྤྲོད་ཚུན་ཆད་ཐོབ། ཕྱག་རྡོར་རས་ཆུང་པའི་ལུང་བག་ཙམ་ཡང་ཕག་མོ་གྲུར་ཞུས། ཡང་དེ་དུས་སེ་གསོ་པ་མཁན་པོ་རིན་པོ་ཆེ་དང་མཇལ། སློབ་དཔོན་རྗེ་ཚབ་བྱ་བ་ལས་མགོན་པོ་ཕྱག་བཞི་པ་རྒ་ལོའི་ལུགས་ཞུས། ཕག་མོ་གྲུར་ཡང་ཕག་མོ་གྲུ་པའི་ཞལ་མྱུར་ལྟ་དང་། དར་དམར་མ་ཟབ་ཆོས་སུ་སྒྲུབ་སྐོར་དང་དབང་འགའ་ཞུས། བླ་མ་རྡོག་པའི་ཀྱེ་རྡོར་གྱི་ཡུམ་བཀའ་དེ་དཀོན་པ་ཡིན་ཟེར། མཆེད་གྲོགས་མང་པོའི་ཟླ་ལ་ཞུས། མ་ཡཱ་རྡོག་ལུགས་ཆོས་དྲུག་དང་། མཁའ་སྤྱོད་མ་དཀར་མོ་ཞུས། ཆོས་རྗེ་རང་གིས་བསྐོས་པའི་གདན་ས་པ། བླ་མ་དར་མ་མགོན་ལས་རྒྱལ་བ་རྒྱ་མཚོ་དང་། སྐུ་གསུང་ངོ་སྤྲོད་ཞུས། སློབ་དཔོན་དཔོན་པོ་བསོད་ནམས་རྡོ་རྗེ་ལས་ཀུན་རིགས་ཆགས་ལོ་ལུགས་དང་། སྨན་བླའི་མདོ་ཆོག་དང་། དོན་ཞགས་དང་དངུལ་ཆུའི་གདམས་པ་དྲང་སྲོང་གཞུང་སྐྱེས་ཀྱིས་མཛད་པ་ཞུས། སློབ་དཔོན་རྒྱལ་སྟོན་ལས་ནཱ་རོ་པའི་འགྲེལ་ཆེན་གྱི་ལུང་ཞུས། བླ་མ་རས་པ་དང་སློབ་དཔོན་མཁས་པ་བསོད་ནམས་རྡོ་རྗེ་ལས་དྲག་སྒྲུབ་དང་རྩ་རླུང་གི་གདམས་པའི་གནད་གཅིག་ཞུས། ཆོས་རྗེ་བ་ལས་རྒྱུད་བླ་མའི་ལུང་དང་། རས་ཆུང་བསྙེན་སྒྲུབ་ལག་ལེན། དོ་ཧ་ལ་སོགས་ལུང་མང་དུ་ཞུས། དེའི་བར་སྐབས་གཅིག་ཏུ་འོན་དུ་ཡོང་བ་གཅིག་དང་ཕྱིས་དབྱར་གཅིག་གླང་པོ་སྒང་དུ་བསྡད་པ་གཅིག་སྟེ་གཉིས་ལ་སོགས་པས་ལོ་བདུན་བསྡད་ཀྱི་རིང་ལ་ལམ་འབྲས་ཞ་ལུགས་ཁྲིད་ཀྱི་ལུང་ནས་ཞི་བྱེད་སོ་ལུགས། ཕྱག་རྒྱ་ཆེན་པོ་གོ་ཆ་གཉིས་མ། ཞལ་གྱི་བདུད་རྩི་དམ་ལ་སོགས་མི་གཡོ་བ་སྐོར་གསུམ། འདུལ་བ་མིན་པ་མཁྱེན་ཚོ་མའི་བར་ཞུས། དེ་ནས་མཚུར་ཕུར་བསྡད་ཡོད་དུས་སུ་ཆོས་རྗེ་བ་འཁྲུངས་པའི་ཡ་མཚན་ཐེངས་གཅིག་གཉིས་ཐོས། དེ་ནས་གྲ་པའི་ཞི་བྱེད་པ་ཏི་སེ་ལ་ཕྱིན་པ་དཔོན་གཡོག་གཉིས་ཀྱིས་གླང་གོར་དུ་ཆོས་རྗེ་པ་ལོ་བདུན་ལོན་པ་ཞིག་དང་མཇལ་ནས། ཆོས་གསུངས་རྣམ་ཐར་རྒྱས་པ་གཅིག་འདུག་པ་དེ་ཁོང་ལ་བསྐུར་ནས་སྟོད་ལུང་མདོ་བོར་སོང་ཞིག་གསུངས་པ་འདུག་པ་ལས། ཁོང་གཉིས་བྱུང་རྣམ་ཐར་ལ། ལ་ལ་དད་ལོག་བྱས། བདག་སྔར་ནས་མོས་པའི་སྟོབས་ཀྱིས་ནམ་ལ་བྲིས། ཁོང་གཉིས་ཞག་གསུམ་ལས། བསྡད་དུ་མ་བཙུད་པར་ཕུད། ངེད་རྣམ་ཐར་ལ་བལྟས་ཤིང་མོས་པ་དྲག་པོ་སྐྱེས་པས། རྨི་ལམ་ངོ་མཚར་ཅན་བཏུད་མ་མང་པོ་བྱུང་ནས། ང་རང་གིས་དད་བླངས་བྱས་ཏེ་ལ་སྟོད་དུ་ཕྱིན་དིང་རི་གླང་འཁོར་བལྟས། བྷུ་ཏྲང་ཕྱིན་དགེ་ཚུལ་མཛད་མ་ཐག་དང་མཇལ། གྲུབ་ཆེན་པ་དང་། ཆོས་རྗེ་པ་གཉིས་ལ་བླ་མའི་ཞུ་ཡིག་དང་ཕྱག་རྟེན་ཡོད་པ་རྣམས་ཕུལ་ཐུགས་ལ་འདོག་པ་མཛད། དྲུང་སི་བ་བསྙུང་བའི་བསྙུང་གཡོག་པ་བདག་གིས་བྱས། ང་རང་ལའང་འགོས་ནས་མིག་དེ་ཤོར་བྱུང་། ད་རེས་ནམ་ཟླ་སོས་ཀ་ཡིན་པ་དང་། ན་བས་ཆོས་མ་ཐོབ། དེ་ནས་མཚུར་ཕུར་ཕྱིན་ལན་སྦྱར། བླ་མ་ཨོ་རྒྱན་པ་གོང་དུ་གདན་དྲངས་པའི་ཞར་ལ་མཚུར་ཕུར་ཚུར་བྱོན། གཉན་རས་ལ་དྲུང་གིས་སྙིང་ཏིག་ཞུས་པའི་ཞར་ལ་ཐོབ་སྟེ་མཁས། དྲུང་ནས་གཡོར་པོ་གུང་གསལ་དུ་གདན་དྲངས་པའི་ཕྱགས་ཕྱི་ལ་ཡོད་པ། བླ་མ་སྒོམ་པ་བྱ་བའི་བཟང་པོ་དེ་ལ་ངས་མདོ་སྡེ་རྒྱན་གྱི་ལུང་དང་། རྨི་ལམ་འབྲེལ་པ་གསུམ་ལྡན་ཞུས། མཚུར་ཕུར་སླེབས་པའི་དུས་སུ་དྲིན་ཅན་མེ་ལོང་པའི་ཐུགས་རྗེའི་ཐག་པས་བཟུང་སྟེ་ལྷོ་བྲག་མཁར་ཆུ་ནས་འབྲི་གུང་གཅུང་རིན་པོ་ཆེའི་སློབ་མ་སྒོམ་ཆེན་གསུམ་ལ། རི་མོ་དེ་ལ་ནན་ཆག་གཅིག་སློབས་ལ་ང་ཅན་དུ་ཤོག་གསུང་བྱུང་ཡང་། ཆོས་རྗེ་པ་སྐུ་ལུས་མ་རྒྱས། ཁོང་དྲག་ཤོས་འགའ་ཆགས་སྡང་བྱས་པས་ཁོང་བློས་མ་ཐེངས་པར་ལོ་གཅིག་ལྷག་ལུས། ལར་མཚུར་ཕུ་ལ་སྟོད་དང་། ས་སྐྱར་ཡུག་གཅིག་བསྡད་པ་བརྩིགས་པས་ལོ་བཅུ་གཅིག་ཙམ་ཐོས་བསམ་ལས་སྒོམ་པ་ཆེར་མ་བྱུང་། གྲུབ་ཆེན་པ་དང་ཆོས་རྗེ་པ་གཉིས་མཇལ་འདོད་པ་རྐྱེན་གཅིག་གིས་མ་མཇལ། དེ་ནས་ཤམ་པོ་གངས་སུ་དྲིན་ཅན་མེ་ལོང་བ་དང་མཇལ། ཡར་ཀླུང་དུ་སླེབས་ནས། གྲ་ཕྱིར་བླ་མ་དགེ་སློང་སྔར་ནས་ཟབ་ཆོས་ཞུས་པ་གཅིག་ཡོད་པས། དགོན་ཆུང་ཞིག་ཏུ་དགུན་ཐོག་གཅིག་བསྡད་དེ་ཆོས་ལྷག་མ་ཞུས། ཡར་ཀླུང་དུ་བླ་མ་ནམ་མཁའ་པ་ལས་གསང་སྐོར་གནད་ཀྱི་ངོ་སྤྲོད་ཞུས། སྐལ་ལྡན་དགོན་པར་བླ་མ་རིན་པོ་ཆེ་ཆོས་ཀྱི་སེང་གེ་ལས་ཀྱང་། སློབ་དཔོན་རིན་ཆེན་སེང་གེ་ནས་བརྒྱུད་པའི་གསང་བའི་གནད་ཀྱི་ངོ་སྤྲོད་དང་། མཁར་ཆུ་དམ་པའི་ཧཱུཾ་སྐོར་ལ་སོགས་པ་ཟབ་ཆོས་ཞུས། དེ་དུས་ཡང་དྲིན་ཅན་གྱི་ཐགས་རྗེས་བཟུང་སྟེ། གསུང་ཤོག་རྟེན་དང་བཅས་པ་བསྐུར་ནས་བླ་མ་སྐལ་ལྡན་པ་འབྱོན་པའི་ཟླ་ལ་ཅིས་ཀྱང་ཤོག་གསུངས་ནས་ཕྱིན། དེ་ནས་ཐུགས་རྗེས་བཟུང་ནས་ལྟོ་གོས་ཆོས་གསུམ་གྱིས་བསྐྱངས། རྫོགས་པ་ཆེན་པོ་སྙིང་ཐིག་གི་གཙོས་པའི་ཟབ་ཆོས་དང་ཕྱག་དཔེ་བཞུགས་སོ་ཅོག་གི་ལུང་མཛད་དེ། ཤིན་ཏུ་ཐུགས་རྗེས་བཟུང་། བླ་མ་མདོ་རས་པས་བཞེངས་པའི་འབུམ་ཆུང་གི་ཁང་པའི་ནང་ལ་དབྱར་རིལ་པོ་གཉིས་སུ་རི་མོ་བྱས་པས་མཁར་ཆུ་གནས་བཟང་པོར་འདུག་པས་ཁམས་འདུས་བག་ཙམ་ཡང་བྱུང་། ཁྱད་པར་དུ་ཤིག་ནད་དྲག་པོས་དགུན་ཐོག་གཅིག་བྱུང་། དེ་དུས་གོས་ཀྱང་རི་འགག་ཟད་པོ་གཅིག །ཟླ་གམ་ཞན་པ་གཅིག །རས་ཐང་ཐེད་པོ་ཞིག་དང་གསུམ་ལ་ཉིན་གོས་མཚན་གོས་ཡིན། རྟོགས་པའི་ཐ་ལ་གོ་ཡུལ་ཐེབས་གཅིག་ཀྱང་སྐྱེས། ཡི་གེ་དུམ་གཅིག་བྱས་ནས་གཟིགས་སུ་ཕུལ་པས། བླ་མ་ཀུན་དགའ་བས་ཁྱོད་ཞིབ་པར་འདུག་གསུངས་ནས་མཉེས། དེ་ནས་བདག་གིས་བླ་མེད་ཆེན་པོ་འདི་སྟེར་བར་མི་ཡོང་། སྒོམ་ཆེན་པ་ཆོས་ཀྱིས་ཕོངས་པ་རེ་རེ་ཙམ་བྱུང་ན། ཁྲེགས་གཅོད་འདི་བྱེད་པར་ཞུས་པས། ཁྱེད་འོང་བ་ཀུན་གྱིས་བྱས་པས་ཆོག་པ་ལ་མི་བྱེད་མི་འོང་བ་ཀུན་གྱིས་བྱེད་པར་འདུག་གསུངས་ནས་རྗེས་གནང་ཡང་ཐུགས་རྗེས་བཟུང་། དུས་སྐབས་གཅིག་ཏུ་ཆོས་ཞུ་ཚོ་གཅིག་འདུག་པའི་དབང་ཞར་ལ་མཚམས་ལ་ཡོད་པ་ལ་ཤོག་གསུང་ནས་དབང་ཚར་བས་ཚོགས་ཀྱི་རྗེས་ལ། ལ་ལ་གྱེས་སོང་བ་ཞིག་ལ། བླ་མ་རིན་པོ་ཆེའི་དབུའི་སྟེང་གི་ནམ་མཁའི་ཐད་སོར་ཟུར་ན་མགོན་པོ་ཕྱག་བཞི་པ་ཆུང་ངུ་ཞིག་བཞུགས་པ་མཐོང་། དེ་དང་དུས་མཚུངས་སུ་གཟིམ་ཁང་གི་སྒོའི་ཐད་ན་ཡར་གཟིགས་པས་བཞུགས་གདན་ལེགས་པོ་མ་དྲན། མ་སྔགས་ཀྱི་སྲུང་མ་དཔལ་ཨེ་ཀ་ཛ་ཊི་མཐིང་མོ་ཞིང་དབྱུག་དང་སྤྱང་མོ་བསྣམས་པ། སྐུ་ཐོག་གཉིས་བརྩེགས་དང་མཉམ་པ་གཅིག་བཞུགས་པ་མཐོང་། དེ་ནས་ཡུག་གཅིག་ན་སྒོའི་ཕྱི་རོལ་གྱི་སྒོ་ཕུག་གི་འོག་ན་ལས་མཁན་ཁྲག་རལ་ཅན་གཉིས་ཀ་མར་བལྟས་ནས་ཁྲག་གི་མཚོ་ཆུང་གཅིག་ནས་ལག་པ་གཉིས་ཀྱིས་བཅུས་ནས་འཐུང་བ་འཐོང་། དེ་ཀུན་ཞུས་པས་གོང་མ་གཉིས་ལ་ཅི་ཡང་མི་གསུང་། ཕྱི་མ་དེ་ལ་དམ་ཉམས་གཅིག་འཆི་བའི་རྟགས་ཡིན་གསུངས། གཞན་ལྷ་ཞལ་དང་ཉག་ཉོག་ར་རིམ་མཐོང་། ལྷ་ཆེ་ཤོས་དེ་བག་ཚམ་མཐོང་བ་ལགས། ད་རེས་ལོ་ལྔ་བླ་མ་འདུ་འབྲལ་མེད་པར་བསྟེན། སྔར་ལོ་གསུམ་དང་བརྒྱད་བསྟེན། དེ་དུས་མཁར་ཆུའི་ནུབ་ངོས་སྨད་ན་ཨོ་རྒྱན་གྱིས་བཞུགས་པའི་སྙུག་ཚལ་སྦུག་བྱ་བ་དཀྱིལ་འཁོར་ཟླ་གམ་ཡོད་པ་ཞིག་འདུག །དེ་ལམ་ལ་ཅུང་ཟད་དེ། དེའི་ཞོགས་གཅིག་ན་བར་ཆོད་བྱེད་པ་ཆུ་འཕྱར་ནས་འབབ་པ་ལ་རླུང་བརྒྱད་པས་སྐད་ཤིན་ཏུ་འཇིགས་པ་སྣ་ཚོགས་འོང་བ། ནགས་ཚལ་འཐུག་པོ་ཡོད་པ་མི་མ་ཡིན་གྱི་སྐད་ཉིན་མོ་ཡང་སྒྲ་སྒྲོག་པ་ཞིག་ཏུ་དགུན་ཐོག་གཅིག་ང་རང་གཅིག་པུས་དགེ་སྦྱོར་བྱས་པས་དགེ་སྦྱོར་ཡང་འཕེལ་བར་བྱུང་། བཅོམ་ལྡན་འདས་མའི་རྟགས་ཀྱང་འགའ་ཟུང་བྱུང་། ཤེས་རབ་ཀྱི་རྩ་ཁ་ཡང་སྐྱེས་ནས་མགུར་མའང་འགའ་བྱས། དེ་ནས་དྲིན་ཅན་བླ་མ་མ་གཤེགས་ཙམ་ལ་ཡར་ཀླུང་དུ་འོང་། ཚར་སྟེང་གི་དགོན་ཆུང་དེ་བཏབ། དེའི་དགུན་སྟོད་ལ་ལས་ཡུར་མ་ཐོན། ལ་ལས་མགོ་ལས་བྱེད་པ་དེ་ལ་སྐུ་གཤེགས་པ་སེམས་ཀྱིས་ཚོར་ཏེ། ང་རང་གཅིག་པུས་མཁར་ཆུར་སླེབས་ལ་ཁད་དུ་ཕྱིན། གྲོང་པའི་ལྷོ་བྲག་སྟོད་ལས་མ་ཐོས། མར་ལ་ཕྱིན་པས་ས་སྟེགས་ཀྱི་ཐད་ཁར་བླ་མའི་སྲས་པོས་མཁར་ཆུའི་བྱ་བ་ཚར་ནས་སྒྲགས་ངོས་སུ་བྱོན་པ་དང་མཇལ་ནས་གྲའི་ཕུ་ཚུན་ཆད་ཕྱགས་ཕྱིར་འོང་། སྙུང་ལུས་པུར་སྦྱངས་པས་རྟེན་བྱོན་པ། ཞལ་ཆེམས་ཚན་པ་གཉིས་ལ་སོགས་པ་གནང་། ཡར་ཀླུང་དུ་དགོན་ཆུང་དེར་ཟླ་མཆོད་གཅིག་བཙུགས་ཏེ་བསྡད། དེ་ནས་ཡུན་མི་རིང་བ་ལ་སྐྱོ་བ་བསངས་པ་ལ་གནས་གཏད་ལ་ཙཱ་རི་རྙིང་མར་གནས་ཆེན་དུ་བདག་རང་གཅིག་པུར་བསྒྲོད་དེ་ཕྱིན། ལར་གཡུ་མཚོ་བསྐོར་བར་ཁྲལ་དང་དད་འབུལ་བསྡུས། ལམ་སྣ་བ། འགྲོ་མགོན་དཀོན་གཉེར། གཏོར་གཉེར། མ་རྒན། གླིང་སྒྲུབ་ལ་སོགས་ཆུ་གདན་ཆུ་གོས་དུ་མ་དང་བཅས་པས་བསྐོར་བར་གདའ། བདག་རང་གཅིག་པུས་ཆུ་སྟན་ཆུ་ཞྭ་གཅིག་ཡོད། ཙཱ་རི་ཡུལ་ཆུང་ཚུན་ཆད་སྟོན་པ་གྲོགས་པོ་གཅིག་ཡོད། དེ་ནས་ལ་ཆུང་གཅིག་བརྒལ་བ་ན་ཀྲིག་མོ་ལྷའི་ནེ་རིང་བྱ་བའི་ལུང་པ་ན། རང་བྱུང་རྡོ་སྐུའི་མཆོད་རྟེན་ཆུང་ཆུང་གཅིག་གདའ་བ་ལ་འཇའ་ཚོན་ཟུག་པ་མཐོང་། འགྲོ་དོན་ནམ་དེ་ཡོང་ཟེར་བ་གདའ། དེ་ནས་ཀ་ལ་དུང་མཚོ་བྱ་བ་ནས་ལ་ཆུང་བརྒལ་བ་ན་ལྷ་མོ་ཁ་བྱ་བའི་གཤམ་ན། དཔལ་ལྷ་མོ་རང་རྒྱལ་མོ་རེ་མ་ཏི་ཆུའི་ཞལ་ཁེབས་ཡོད་པ་མཐོང་། དེ་ནས་དཔལ་ཤེལ་གྱི་རི་བྱ་བའི་གངས་འདབས་གཅིག་ལ་འཛེགས་ཕྱིན་པས་ལམ་ཅུང་ཟད་ནོར་ནས་ཆར་ལྷགས་ཀྱིས་ཅུང་ཟད་ཉེན། དེ་ནས་མ་མགོན་གྱི་བླ་མཚོ་དང་མཚོ་མོ་འོད་འབར་བ་བྱ་བ་འདུག །རྒྱུས་མེད་པས་བྲག་ཕུག་ཡོད་པ་མ་རྙེད་པར་ཞག་གཅིག་ལ་གནས་ཀྱིས་ཅུང་ཟད་ཉེན། དེ་ནས་ལ་ཆུང་གཅིག་བརྒལ་བའི་སར་གཡུ་མཚོ་ཟླུམ་པོ་བྱ་བ་གྲགས་པ་ཅན་དེར་སླེབས། དེར་ལས་དག་པ་ཀུན་གྱིས་མཐོང་སྣང་གཟིགས་སྣང་མང་པོ་འཆར་བར་ཡོད་པར་གདའ། བན་ལྡོམ་བདག་ལ་ནམ་མཁའ་རྣམ་དག་སྤྲིན་གྱིས་མ་བསྒྲིབས་པ་སྟོན་ཀའི་ནམ་མཁའ་ལྟ་བུ། འོག་ན་མཚོ་ན་ཤིན་ཏུ་དྭངས་པ་རྙོག་པ་དང་ཉ་ལྕིབས། སྔོ་ལྡུམ་འབག་འབོག་ལ་སོགས་པ་མེད་པར་ཤིན་ཏུ་དྭངས་པ་ལ་མེ་ལོང་གཡའ་དག་པའི་ནང་ལྟ་བུ། དེ་གཉིས་ཀྱི་བར་རམ་མཚོའི་ནམ་མཁའ་ལ་འཇའ་ཚོན་ཤིན་ཏུ་དྭངས་པ་རི་མོ་གཅིག་ཐུར་ལ་ཟུག་པ་དེ་གསུམ་དུས་གཅིག་ལ་དེར་སླེབས་མ་ཐག་གི་ཉི་མ་སྔ་དྲོ་དང་པོ་ལ་མིག་གི་ཡུལ་དུ་མངོན་སུམ་དུ་མཐོང་ངོ་། །དེར་ཕུག་པ་གཅིག་ཏུ་ཞག་གསུམ་བསྡད་ཅུང་ཟད་གཉན་པར་འདུག །བདུན་ལ་སོགས་པ་ཞག་འགའ་བསྡད་སྙམ་པ་ལ། རྒྱགས་ཕྱེ་མ་ཐེག་པས་ལམ་ནོར་ན་སྙམ་མ་བསྡད། དེ་ནས་གཡུ་མཚོ་སྐྱོག་མོ་དང་། སྟག་ཚང་རོང་བྱ་བ་ཤིན་ཏུ་གཉན་ཟེར་བ་ཞིག་ཏུ་བར་ཞག་གཅིག་བསྡད། ཡང་ལམ་དུམ་གཅིག་ནོར་བས་གངས་ཡོད་པའི་ལུང་ཆུང་གཅིག་ཏུ་ཉི་མ་འཕྱིས་པས་ཕུག་པ་མ་རྙེད་པར་མཚན་ཡལ་ལེ་ཆར་པས་ཉེན། དེ་ནས་དོམ་ཚང་རོང་བྱ་བ་ནས་དཀྲིག་མོ་ལྷའི་ནེ་རིང་དུ་ཞག་གཅིག་བསྡད། དེ་ནས་སྔར་གྱི་ཐམས་ཅད་དགུན་གཞུགས་བྱེད་པའི་གཞི་ཆེན་མོར་སླེབས། ཞག་བཅུ་ལྷག་ཙམ་བསྡད། དེ་ནས་བྱར་སྨད་དུ་ཕྱིན། བླ་མ་དྷརྨཱ་བྱ་བ་བདག་གི་བླ་མའི་མཆེད་གཅིག་འདུག་པ་དེས་ཐུགས་ལ་བཏགས། མཛོའམ་སྐྱེ་དམན་མི་བརྟེན་པ་གཅིག་བྱ་སྙམ་པ་ལགས་ཞུས་པས་མི་འཐད་པའི་ཆོས་ཀྱི་རྗེ་ཡབ་སྲས་དྲི་གསུང་པ་ཡན་ཆད་བྱོན། དེ་འདྲ་སོགས་ཀྱི་བསླབ་བྱ་མཛད། དེ་ནས་ཚར་སྟེང་དུ་གཞི་བྱས། མཚུར་ཕུ་དང་སེ་གསོབ་ཏུ་མཁན་པོ་རིན་པོ་ཆེའི་དྲུང་དུ་ཕྱིན། སྙིང་ཏིག་སྤྱོད་གཟེར་ལྔ་རྣམས་ལ་མཉེས་པའི་གསུང་བྱོན་པས་དཔེ་བྲིས་ལུང་དང་བ་ཅས་པ་ཕུལ། མཚུར་ཕུར་ཆོས་རྗེ་ལ་རྒྱུད་བཅུ་བདུན་ལ་སོགས་ཀྱི་ལུང་བྱས། སྐབས་ཅིག་ལ་སྟོད་དུ་གྲུབ་ཆེན་པ་དང་མཇལ་བ་ལ་ཕྱིན་པའི་ལམ་ཁ་ནས་ཆ་ཤངས་སུ་ཐེ་བའི་ལང་འགྲོ་བྱ་བའི་ཡུལ་ན། ལོ་བརྒྱད་ཅུ་ཙམ་བཞེས་པའི་ལྷ་ཆེན་འཁོར་བན་བྱ་བའི་སྔགས་པ་གཅིག་ལས། གཤིན་རྗེ་ཚེ་བདག་གི་སྐོར་དང་སྣ་འགའ་ཞུས། དེ་ནས་ཡར་ནུབ་ཕྱོགས་ལ་ཆུང་ཞིག་བརྒལ་བ་ན། ཚར་བྱ་བའི་ལུང་ཆུང་ཞིག་ཏུ་གསང་སྐོར་གྱི་བདག་པོ་ལྕེ་སྒོམ་ནག་པོར་གྲགས་པ་དེའི་ཡང་ཚ་ཡོད་པར་འདུག་པ་དང་། ལམ་འཛོལ་ནས། ཁང་ལྕེ་སྒོམ་གྱི་སྣག་ཚའི་བརྒྱུད་པའི་ཞལ་ངོ་སློབ་དཔོན་སྒོམ་པ་བྱ་བ་བསྒྲེས་པོ་ཞིག་ལས་གསང་སྐོར་སྙན་བརྒྱུད་ངོ་སྤྲོད། མཁས་པ་བི་མ་ལའི་བསམ་གཏན་མིག་གི་སྒྲོན་མེའི་ཁྲིད་རྫོགས་པ་དང་། རྩ་བའི་རྒྱུད་ལྔ་ནས་འཕྲོས་པའི་ལྷ་རྒྱུད་འདྲེ་རྒྱུད་ཡན་ཆད་ཀྱི་དཔེ་བྲིས་ལུང་ཐམས་ཅད་མ་ལུས་པར་ཞུས། དེ་ནས་ལ་སྟོད་དིང་རི་སྣ་མར་དུ་སླེབས། ལ་སྟོད་གཞོན་དགའི་གདུག་བརྒྱུད། དཔོན་པོ་དབང་སྒྲུབ་བྱ་བ་ལས། ཡང་དགོན་པའི་རི་ཆོས་དང་གསང་སྐོར་གྱི་མན་ངག་བསམ་གཏན་མིག་གི་སྒྲོན་མེ་ཐིག་ལེ་ཕྱི་ནང་ལ་སློབ་པ་ཡོད་པ་རྣམས་ཞུས་ཤིང་གནང་། ལ་སྟོད་དུ་ཐེངས་གཉིས་པོ་དེ་ལས་མ་ཕྱིན། མར་ལམ་གཙང་གྲམ་པས་སྐྱ་པའི་ཐད་ན་བླ་མ་བཀྲ་ལུང་པ་བྱ་བ་བཟང་པོ་གཅིག་ལ་ཕྱིན། ཡང་ལན་གཅིག་དེར་གཏད་ནས་ཕྱིན་པའི་ལན་གཉིས་ལ། ཆོས་བཅོམ་ལྡན་འདས་གཤིན་རྗེ་དགྲ་ནག་གི་དབང་རྫོགས་པ། རྒྱུད་གདམས་ངག་མ་ལུས་པ། རབ་ཏུ་གནས་པའི་ཆོ་ག་ཚེ་དཔག་མེད་མདོ་ལུགས་ཀྱི་ཆོ་ག །བླ་མ་གཉན་ཚོམ་བུའི་སྤྱན་རས་གཟིགས་ཀྱི་སྙན་བརྒྱུད། སྙན་བརྒྱུད་ཡི་གེ་བཞི་པ། ཐུགས་རྗེ་ཆེན་པོའི་གསང་སྒྲུབ་ཀྱི་ཏིང་ངེ་འཛིན་གྱི་དབང་ལ་སོགས་ཟབ་པ་འགའ་ཞིག་ཞུས། ཡང་གཙང་གི་རྒྱང་གྱིང་དཀར་བྱ་བ་ཡོད་པས་རྒྱང་དཀར་གྱི་དགོན་པར་གསང་སྐོར་སྙན་བརྒྱུད་ཀྱི་རྩ་བ་ཁོང་དུ་འདུག་པས། ཡང་སློབ་དཔོན་ཡེ་ཤེས་མགོན་ལ་བརྒྱུད་པ་གཏུགས་སོ། །སྙེ་མདོར་རྗེ་རིན་པོ་ཆེ་སྐུ་མཆེད་གསུམ་འཛོམ་པ་ལས་བརྒྱུད་པ་ཕྱི་མའི་དབང་གི་གདམས་པ། རྒོད་ཚང་པའི་ཁྲིད་ཆེན་བརྒྱད། བླ་མ་ཀུན་དགའ་བ་ལས་ཀུན་བྱེད་རྒྱུད་གསུམ་བརྒྱུད་པ་ལྡེ་མིག་ཆ་བཞི་ལ་སོགས་པ་ཞུས། དོལ་གྱི་སྤོང་རར། སློབ་དཔོན་གཞོན་ནུ་ལས་སྔགས་ཀྱི་གནད། མདོ་བྱེ་རུ་བླ་མ་སངས་རྒྱས་འབུམ་ལས་ཨ་རོའི་ཁྲིད་མོ་ཆེར་གྲགས་པའི་གདམས་ངག །འཁོར་བ་རྩད་གཅོད་མ་ལུས་ཞུས། རྒྱང་དུ་སློབ་དཔོན་བོན་སྟོན་ལས་སྔགས་སྲུང་སྔགས་གནད་བུ་རོན་བཅུ་གསུམ། རྫོགས་ཆེན་བོན་ལུགས་ལུང་དྲུག་རྣམས་ཞུས། དེ་ནས་གཞི་འཚལ་སྟེང་ནས་ཆོས་རྗེས་གསང་གིས་ང་ཡང་ཀོང་བོར་གདན་འདྲེན་ཡོད་ཁྱོད་ཀྱང་ཤོག་གསུངས་ནས་འཕྲལ་དུ་མཇལ་འཕྲད་བྱས། རྩ་རི་གསར་མར་ངེད་གཉིས་ཀྱིས་གནས་སྐོར་གཅིག་བྱས། གཡུ་མཚོ་ལ་དགུན་གཞུག་ལྟ་བུ་སྟོན་ཁ་ནས། ཟླ་བ་རིལ་པོ་བདུན་ངོ་གཅིག་དང་བརྒྱད་གདན་ཐོག་གཅིག་ཏུ་སྐད་ཐོས་ཀྱིས་བསྐོར་ནས་མི་གཅིག་མེད་པར་གཅིག་པུར་བསྡད། འདྲེ་རྟོག་གིས་ཆོ་འཕྲུལ་ཉམས་རྨི་ལམ་གསུམ་མང་བར་བྱུང་། ཛམ་བྷ་ལས་དངོས་གྲུབ་ལྟ་བུའི་ལྟས་ཕྱག་གཡས་པས་དེ་བྱིན། གཞི་བདག་འདྲ་བར་འདུག་པ་གཅིག་གི་རྒྱབ་ཕྱོགས་ངོས་སུ་བདག་ལ་རལ་གྲི་རྣོན་པོ་ཤུབས་དང་བཅས་པ་རྐུ་ཐབས་སུ་བྱིན་ནས་ཆོས་ཀློད་དེ་གྱིས་བྱ་བ་ཞིག་བྱུང་། དགོང་མོ་སྦྱིན་བསྲེག་ཅུང་ཟད་བྱས་པའི་ནུབ་མོ་གཞི་བདག་གྷ་ཡ་དྷ་རས་ཁོང་རང་གིས་ཁུལ་དང་། ཕོ་བྲང་གཅིག་འདུག་པར་ངེད་གསུམ་ལ་བསྙེན་བཀུར་བྱས། ཁོ་རང་གི་རྟས་ཚུན་ཆད་བསྟན་དེའི་ཀླུ་བསེན་མོ་གཅིག་ཕོ་རིགས་གཅིག་གིས་དངོས་སུ་བར་ཆད་དྲག་པོ་བརྩམས། མཚོ་ལྔ་ཡོད་པའི་ལྷོ་ཕྱོགས་ཀྱི་མཚོ་ཆེ་བ་ཞིག་གི་སྟེང་དུ་འོད་ལྔའི་ལྦུ་བ་སེར་པོ་ཕུབ་ཙམ་པ་གཅིག་ཡར་དེད་མར་དེད་ཕར་དེད་ཚུར་དེད་གཅིག་ལ་གཅིག་ཐིམ། ཡང་ཐུགས་རྗེ་དེ་དང་འབྲེལ་བ་འགའ་མཐོང་། དེ་ནས་མཚམས་ཕྱིར་ཐོན་ནས་གླང་པོ་སྒང་དང་། གནས་པའི་རི་ཁྲོད་རྣམས་སུ་བླ་མ་དབོན་པོས་དབུ་མཛད་རི་པ་ཕལ་མོ་ཆེ་རྣམས་ལ་གསང་བ་སྙིང་ཏིག་གིས་མགོ་བྱས་པ་མང་དུ་བཤད་ནས་ཡར་དྭགས་པོར་འོངས། སྔར་ལམ་རྒྱ་བཏང་ན་ཡང་འཐད་ཟེར་བ་བྱུང་ཡང་མ་བརྟག་པའི་ལས་གཉེན་མི་འཐད་པར་འདུག་པས་མ་བྱས། ད་རེས་མཐོང་ཟེར་ནས་བདག་རྐྱེན་ཅུང་ཟད་བྱེད་མི་འདྲ་བྱུང་བས། ཐོག་མར་ཡུབ་ཐང་ལ་བྱ་བའི་མི་ངན་གྱི་གདུག་རྩུབ་ཀྱིས་བགྲོད་དཀའ་བས། དེ་ལ་ལམ་རྒྱ་བཏང་། དེ་ནས་རིམ་གྱིས་དྭགས་པོའི་ལུང་པ་དང་། ཨེ་རོང་ཚུན་ཆད་ལ་ལོ་གསུམ་དང་ཟླ་བ་བཞི་བཏང་། གཙོ་བོ་བླ་མའི་བྱིན་བརླབས་དང་རང་གི་སྨོན་ལམ་དང་དམ་ཅན་མཐུ་ཆེན་རྣམས་ཀྱི་བྱིན་རླབས་ལས་ལེགས་པར་བྱུང་། དེ་དག་གི་གོང་དུ་ཡོན་བདག་གི་སྐྱེ་མཆེད་ལ་བརྟེན་ནས། དགོན་པར་གཞིས་ཁ་པས་དམག་བརྒྱབ་ནས་བཅོམ་ཡང་། སློབ་གྲོགས་བསྡུས་ནས་མཐུ་གཏད་ཀྱང་ཆེར་མ་བྱས། ཤམ་པོ་གངས་ལ་བསྡད་དགེ་སྦྱོར་འཕེལ་སྐྱིད་ནས་ཡོད་ཙམ་ན། རྩེ་ཞིང་པའི་སྲས་མོ་ཨ་འབུམ་གྱིས་རྩེ་ཞིང་དུ་བོས། རམ་གྱི་ཕུ་དང་བྲག་ལོག་སྙུག་ལོག་གཅིག་ལ་ཞག་ཉི་ཤུ་ཙམ་སྡོད་དགོས་པ་བྱུང་། དཔོན་མོ་ཕག་མོ་དེ་དྲིན་ཅན་རིན་པོ་ཆེའི་སློབ་མའམ་ཡོན་བདག་གི་རྩ་བ་ཡིན་པས། སློབ་དཔོན་ར་པ་གཅིག་དང་གཉིས་ཀྱིས་བོས་ཞག་གཅིག་གཙང་ཁང་དུ་བསྙེན་བཀུར་བྱས་གསེར་ཞོ་གང་བྱིན་ནས་རྒྱངས་པ་གཅིག་ཏུ་བྱོན་དང་ཟེར་ནས་རིག་པ་ཅན་མ་ཡིན་ཡང་། ཡར་ནུབ་ཕྱོགས་སུ་སྤྱན་གཡས་པའི་མ་ཧཱ་རི་གཡར་ནས་ལོག་ཤས་སྡོད་གཞི་བྱས། ཁོང་ཡོན་མཆོད་གཉིས་ཀྱིས་ཐུགས་ལ་བཏགས་པས་ད་དུང་འབྲེལ་ཟབ་པ་དེ་ལགས་སོ། །ནུབ་ཕྱོགས་སུ་ཡང་རི་ཁྲོད་འགའ་བཏབ་པ་ལ། བྱང་ས་བའི་བདེ་ཆེན་སྟེང་ལ་སོགས་བར་ཡུན་དུ་སྡོད་ས་མ་བྱུང་ཡང་རི་ཁྲོད་འགའ་ཟུང་བཏབ། ཀོང་པོ་ན་ཡང་གྲུབ་སྨད་ཀྱི་མཐོང་སྨོན་ལ་སོག་པ་འགའ་བཏབ་པ་དང་། དྭགས་པོ་སྟོད་ན་ཡང་བསམ་གྲུབ་གླིང་ལྷུན་གྲུབ་རྫོགས་ལ་སོགས་པ་བཏབ། སེམས་ཅན་ལ་ཕན་ཅི་ཐོགས་ཁོ་ན་བྱས་པ་ལགས་མོད། །ཡང་མ་ཧཱ་རི་ན་སྡོད་དུས་དཔོན་གཡོག་བདུན་ཙམ་གྱིས་འབྲི་གུང་གི་རྒྱབ། ཏི་སྒྲོའི་ཨོ་རྒྱན་རིན་པོ་ཆེའི་བཞུགས་གནས་ཀྱིས་གཙོ་བྱས་པའི་རི་ཁྲོད་ལུང་སྟོང་འགའ་བསྐོར་ཏེ། ཇོ་མོ་གང་དང་ཇོ་མོ་ཁ་རག་དང་། ཤངས་ཀྱི་ཟབ་བུའི་གཏེར་ཁུང་མན་ཆད་བསྐོར་བས་དེ་ལོ་ཁམས་ཤིན་ཏུ་བཟང་བ་གཅིག་བྱུང་། དེ་ཡན་ཆད་ནི་ཆོས་ཕྱོགས་སུ་དད་པའི་ངལ་དུབ་ཀྱིས་ཅུང་ཟད་དཀའ་བར་བྱུང་ཡང་། དལ་འབྱོར་གྱི་ལུས་ཆུད་མི་ཟ་བར་བྱ་བ་དང་། ཐེག་པ་ཆེན་པོའི་ཚུལ་མི་འདོར་བར་མོས་པར་བྱས་པའི་རྣམ་གཞག་ཡིན་མོད། འདི་ལྟར་བཀོད་པའི་དངོས་དོན་སློབ་མ་རྣམས་ཀུན་ལ་ཚེ་འདིའི་འབྲེལ་ཐག་འཁྲི་བ་བཅད། བླ་མ་དཀོན་མཆོག་གི་ཕྱོགས་སུ་བློ་སྣ་ཀྱུར་གྱིས་བསྒྱུར་བས་ཆོས་ལས་མ་བྲལ་བར། གོང་མའི་རྣམ་ཐར་ལ་ཡིད་སྨོན་པས་སྡོད་ས་རི་ཁྲོད་དང་། ལུང་སྟོངས་སུ་བྱེད་པ། ཚེ་འདིའི་དྲི་མ་ངན་པས་མ་གོས་པས་ཆོས་བརྒྱད་དང་བྲལ་བ། སྙིང་པོ་དོན་གྱི་དགོངས་པའི་དྲན་འཛིན་ལས་མ་ཡེངས་པར། ཆོས་སྤྱོད་ཁྱད་དུ་མི་གསོད་པར་སེམས་བསྐྱེད་ཀྱི་རྗེས་མཐུན་སེམས་ཅན་ཉེ་རིང་མེད་པ་ལ་ཕན་ཅི་ཐོགས་བྱེད་པ་དང་། དོན་ཆེན་པོ་ཡལ་བར་མི་འདོར་བར་བརྩོན་པ། གོང་མའི་གདུང་གསོབ་པ། ཚེ་འདིའི་མཐུན་འཇུག་སྤོང་བ་ལ་སོགས་པའི་ཆོས་ཕྱོགས་སུ་གཞོལ་བ་རེ་ཙམ་འང་སྲིད་མཐའ་མ་བཀག་པས་དེ་ལྟ་བུའི་རྐྱེན་བསྐུར་དུ་སོང་ན་ལེགས། ལོག་སྲེད་ཅན་གྱི་ལག་ཏུ་འགྲིམས་ནས་ལོག་པར་བལྟས་པས་སྐྱབས་གནས་འདོར་བའི་ཉེས་པ་སྤང་བའི་ཕྱིར་སྦ་བར་རིགས་སོ། །དཔལ་ཀུན་ཏུ་བཟང་པོ་ནས་དངོས་ཅག་བདག་ཡོན་མཆོད་དམ་ཉམས་ཀྱི་དྲི་མས་གོས་པ་མེད་ཅིང་། བརྒྱུད་པ་སྐྱོན་ལྔའི་སེལ་མེད་པས་དམ་ཚིག་འདི་ལ་བརྩོན་པས་སྒྲིམས་མཛོད། ཚེ་འདིའི་ཆོས་ལྟར་བཅོས་པའི་བྱ་བ་རྩོལ་བ་ཆེན་པོས་ལྡེར་སོ་ལ་སོགས་སྐུ་གཟུགས། གསུང་རབ་ལ་སོགས་བཞེངས། བསོད་ནམས་མང་པོ་བས གས་ན། རང་ཉིད་ལྷུན་གྲུབ་ཆོས་སྐུར་སོན་ནས། སྤྲུལ་པ་དུ་མས་འགྲོ་དོན་རྒྱུན་མི་ཆད་པས། སྨིན་གྲོལ་མཛད་པར་གདའ་བས། དབེན་པའི་གནས་སུ་སྐབས་དོན་གལ་ཆེན་དེ་ལ་དོན་དུ་གཉེར་ན། རང་གཞན་གྱི་དོན་ལྷུན་གྲུབ་ཏུ་གཟིགས་གདའ་བས་དེ་རྣམས་ཀྱིས་ཐུགས་དགྱེས་པར་མཛད་འཚལ། བདག་འདྲའི་བན་ལྡོམ་ཀུ་མ་རཱ་ཛ་ལ། ཀུན་དགས་ཡང་དང་ཡང་དུ་བསྐུལ་བ་དང་། གཞན་ཡང་རེ་རེ་གཉིས་གཉིས་དེ་སྐད་ཟེར་བ་དང་། ད་ལོའི་སྐབས་སུ་རྩར་སྡོད་ཅིང་གཡོག་པོ་གུས་པར་བྱེད་པ་རིན་རྒྱལ་གྱིས་ཡང་ཡང་བསྐུལ་ནས་བྲིས་པའོ། །འདི་འདྲའི་ཡི་གེ་འཁྱམས་པ་ན། །མོས་གུས་མི་བྱེད་སྡིག་པ་སོགས། །དད་ཅན་སུན་འབྱིན་སྐྱོན་བསལ་ཡིན། །འདི་བྲིས་དགེ་བ་ཅི་ཡོད་པས། །སེམས་ཅན་སངས་རྒྱས་ཉིད་དུ་ཤོག །ཅལ་ཅོལ་རིང་མོ་ཞེས་བྱ་བ་མོས་གུས་ཅན་གྱིས་གཙོ་བོར་བསྐུལ་བའི་ཕྱིར། སྟག་ལོ་དབྱར་ཟླ་ར་བའི་ཡར་ཚེས་བརྒྱད་ཀྱི་ཉིན་མོར་བྲིས་པ་འདི་ཡོངས་སུ་རྫོགས་སོ། །དགེའོ།། །།༅། །བླ་མ་དམ་པ་ཀུ་མ་རཱ་ཛ་དེ་ཉིད། དྭགས་པོ་དང་ལུང་གི་ཕུར་སྐུ་འདས་པའི་ཚུལ་བསྟན་པའི་ཚེ། ཕྱི་རབས་ཀྱི་དོན་དུ་འདས་རྗེས་གསུངས་པ། ཡི་གེར་བཏབ་པ་ནི། ༀ་ཨཱཿཧཱུཾ༔ སྤྲང་པོ་བྱ་བྲལ་གཞོན་ནུ་རྒྱལ་པོས་གདམས་པ་ནི། །ཨེ་མ་ངས་ནི་ངོ་བོ་སྐྱོང་འདེད་རང་རིག་རྩ་གདར་བཅད། །དམིགས་མེད་སྤྲོས་བྲལ་མཐའ་དང་བྲལ་བར་རྟོགས། །ཆོས་སྐུའི་ངང་དུ་ཀུ་མ་རཱ་ཛ་འཆི། །རང་བཞིན་དབྱིངས་ལ་ལྟ་སྟངས་རིག་པ་གཅུན། །ཞི་ཁྲོའི་དཀྱིལ་འཁོར་ཐིག་ལེ་ཉག་གཅིག་རྟོགས། །ལོངས་སྐུའི་ངང་དུ་ཀུ་མ་རཱ་ཛ་འཆི། །ཐུགས་རྗེས་སེམས་ཅན་གཞན་ཕན་གཙོ་བོར་བྱས། །ཤར་གྲོལ་རིག་པ་ཆོས་ཉིད་མ་དང་འཕྲད། །སྤྲུལ་སྐུའི་ངང་དུ་ཀུ་མ་རཱ་ཛ་འཆི། །ཡེ་ཐོག་དང་པོའི་སངས་རྒྱས་དྲི་མ་མེད། །གཞིར་སྣང་རང་གདངས་དང་པོའི་བྱུང་སར་ཐིམ། །ལྷུན་གྲུབ་སྦུབས་སུ་ཀུ་མ་རཱ་ཛ་འཆི། །ང་ཡི་ཟབ་དོན་སྙིང་པོའི་གདམས་པ་རྣམས། །བཅུད་དུ་དྲིལ་ནས་ཉམས་ལེན་སྙིང་པོར་བསྟན། །བདག་གི་རྗེེས་འཇུག་སྐལ་ལྡན་སྙིང་གི་བུ། །ཇི་ལྟར་བསྒྲུབས་ཀྱང་ཆོས་དང་མཐུན་པར་མཛོད། །ང་ཡི་གཏམ་བཞུགས་འགྲོ་ཁའི་ཚིག་འདི་རྣམས། །ཕྱི་རབས་དོན་དུ་སྙིང་ནས་མོས་ལ་སྟོན། །ཏིག་ཏིག་གང་ལ་ཡང་མི་འདུག །ལར་སྣང་བ་འདི་གཏད་པ་མེད་པ་གཅིག་ཡིན། །སྐྱག་པ་ངས་དྲིན་ཆེན་རིན་པོ་ཆེ། །ཕཊ་ཕཊ། ཧ་ཧ་ཕཊ། ཅེས་གསུངས་ནས་ཐུགས་འཕོ་བའི་ཚུལ་བསྟན་ཏེ། ས་ཆེན་པོ་འདི་རབ་ཏུ་གཡོས། ནམ་མཁའ་ལ་སིལ་སྙན་གྱི་སྒྲ་རང་གྲགས། འཇའ་ཚོན་གྱི་གུར་ཕུབ་སྟེ་འགྲོ་བ་རྣམས་ངོ་མཚར་གྱི་ས་ལ་བཀོད། །ཨཐྎ།