སྔ་འགྱུར་བཀའ་མའི་ཆོས་སྡེའི་གླེགས་བམ་བཞི་བཅུ་པ།

གླེགས་བམ། ཐི༽

པདྨ་འབྱུང་གནས། ཀུ་སུ་ལུ་པུ་ཎྱེ་ལ་ཀྵ་ས། གཞན་ཕན་མཐར་ཕྱིན། པུ་ནེ་ཀླག་ཤ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

པཎྜི་ཏ་དོན་ཡོད་རྡོ་རྗེའི་གཅོད་གཞུང་ཟབ་དོན་ཐུགས་ཀྱི་སྙིང་ཁུའི་དགོངས་པ་ཀཿཐོག་པ་ཀུན་དགའ་འབུམ་གྱི་བཀའ་སྲོལ་སྐོར་གཞུང་ཁུངས་ལོ་རྒྱུས་ཉུང་བསྡུས། གཞན་ཕན་མཐར་ཕྱིན།

གཞུང་ཁུངས་ལོ་རྒྱུས་ཉུང་བསྡུས་བཞུགས། །ༀ་སྭ་སྟི། ཀ་དག་ལྷུན་གྲུབ་རྡོ་རྗེའི་གསེང་ལམ་ནས། །ངེས་གསང་སྣང་བཞིའི་འོད་གསལ་མཐར་ཕྱིན་ཀྱང་། །རྒྱལ་ཡུམ་དགོངས་པའི་གསང་མཛོད་འདོད་རྒུའི་དབྱིག །སྦྱིན་མཛད་མཁས་གྲུབ་ཀུན་དགའ་འབུམ་པར་འདུད། །གངས་ལྗོངས་ཡུམ་དོན་གཅོད་ཀྱི་ཤིང་རྟ་ཆེ། །མ་ཅིག་ལབ་སྒྲོན་དགོངས་པའི་ཟབ་དོན་ལ། །བཀའ་བརྒྱུད་དོན་བརྒྱུད་ཕ་བརྒྱུད་མ་བརྒྱུད་དང་། །བཀའ་མ་གཏེར་མ་གཞུང་དང་ཁ་འཐོར་སོགས། །གྲགས་ཚུལ་མང་ཡང་མདོ་སྔགས་ཟུང་འཇུག་གི། །སྙན་བརྒྱུད་བཀའ་བབ་ཁུ་སྒོམ་ཆོས་སེང་སྟེ། །གཞུང་དང་མན་ངག་ཀུན་གྱི་སྙིང་པོ་རྣམས། །ཁུ་སྒོམ་བརྒྱུད་སྲོལ་ཁོངས་སུ་འདུས་ཅེས་གྲགས། །དེ་ཡི་བརྒྱུད་འཛིན་སངས་རྒྱས་གཉན་སྟོན་ནམ། །པཎ་ཆེན་དོན་ཡོད་རྡོ་རྗེའི་གཅོད་ཀྱི་གཞུང་། །ཟབ་དོན་ཐུགས་ཀྱི་སྙིང་པོ་ཞེས་གྲགས་པའི། །བཀའ་བབ་ཀཿཐོག་ཀུན་དགའ་འབུམ་པ་སྟེ། །འདི་ལ་གཅོད་ཁྲིད་གསལ་བའི་སྒྲོན་མེ་དང་། །གཅོད་གཞུང་དམིགས་འབུམ་མུ་ཏིག་ཕྲེང་བ་དང་། །ལུས་སྦྱིན་གདན་ཐོག་གཅིག་མ་ཆོག་ཕྲིན་དབང་། །མན་ངག་ཕྲན་ཚེགས་དང་བཅས་ཁ་ཚང་བ། །འདི་འདྲ་གསར་རྙིང་གཉིས་ཀའི་ཕྱོགས་ལ་དཀོན། །མཁས་གྲུབ་ཀརྨ་ཆགས་མེད་ལ་སོགས་ཀྱི། །གཅོད་གཞུང་མན་ངག་ཁ་འཐོར་མང་བཞུགས་ཀྱང་། །འདི་ནི་འོ་མའི་སྙིང་པོ་མར་ཞུན་བཞིན། །ཀུན་གྱི་དོན་ཚང་ཀུན་ལས་ཁྱད་པར་འཕགས། །དེ་ཕྱིར་རྙིང་མའི་ཕྱོགས་ཀྱི་ཆོས་སྐད་ལ། །བཀའ་གཏེར་གཉིས་ཅེས་ཡོངས་སུ་གྲགས་པ་ལ། །རིང་བརྒྱུད་བཀའ་མའི་གཅོད་གཞུང་འདི་ཙམ་ལས། །སྔ་འགྱུར་ཕྱོགས་ལ་གཞན་དུ་མ་མཆིས་ཏེ། །སོ་ཟུར་གནུབས་སོགས་སྔ་འགྱུར་རིག་འཛིན་གྱི། །མན་ངག་ནང་རྒྱུད་སྡེ་གསུམ་དང་འབྲེལ་བའི། །གདམས་སྲོལ་སྐྱོ་སྟོན་བསོད་ནམས་བླ་མ་དང་། །ཀུན་མཁྱེན་དམ་པའི་སྙན་བརྒྱུད་གཞུང་འདིར་ཚང་། །ཆོས་རབ་འབྱེད་པའི་རྣམ་དཔྱོད་གྲུ་རྫིང་གིས། །གཅོད་གཞུང་བཀའ་གཏེར་རྒྱ་མཚོའི་འཇིང་བརྒལ་ཡང་། །སྙིང་པོའི་ཡང་ཟབ་འདོད་འབྱུང་ཡིད་བཞིན་དབང་། །འདི་ལས་ལྷག་པའི་གཞུང་བཟང་རྙེད་སྲིད་དམ། །དེས་ན་སྒྲུབ་བརྒྱུད་འདི་ལ་མོས་རྣམས་ཀྱིས། །ཟབ་ཡངས་ཆོས་མཛོད་ཀུན་གྱི་དབྱིག་ནོར་ལས། །ཁྱད་འཕགས་ཀླུ་དབང་གཙུག་གི་རྒྱན་མཆོག་བཞིན། །གཅེས་པར་འཛིན་ལ་འཆད་སྤེལ་བྱི་དོར་རེམ། །ལྷག་བསམ་འོ་མའི་ཆུ་གཏེར་ལས་ཐོན་པའི། །གདམས་ཟབ་ཁ་ཚང་བཅུད་དྲིལ་རི་བོང་ཅན། །འཆད་སྤེལ་ཡར་གྱི་ཚེས་ལ་ཅོ་འདྲི་བའི། །ཕྲིན་ལས་ཉ་རྒྱས་འོད་དཀར་ཀུན་ཁྱབ་ཤོག །ཅེས་གཞུང་ཁུངས་ལོ་བརྒྱུད་ཉུང་བསྡུས་འདིའང་གཞན་ཕན་མཐར་ཕྱིན་གྱིས་བྲིས་པ་དགེའོ།། །།

བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་གི་ཕྲེང་བ་སྟོད་ཆ། ཀུ་སུ་ལུ་པུ་ཎྱེ་ལ་ཀྵ་ས།

བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་གི་ཕྲེང་བ་ཞེས་བྱ་བ་བཞུགས་པ་ལགས་སོ། །

ན་མོ་པྲ་ཛྙཱ་པ་ར་མི་ཏ་ཡེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །ཡེ་ནས་གནས་ལུགས་ཕྱོགས་བྲལ་སྙིང་པོའི་དོན། །བཅིང་གྲོལ་མེད་ལས་རྐྱེན་གྱིས་འཁྲུལ་མ་མྱོང་། །དང་པོའི་སངས་རྒྱས་ཡུམ་ཆེན་ཕ་རོལ་ཕྱིན། །མཐའ་རྣམས་ཀུན་བྲལ་མ་ལ་གུས་ཕྱག་འཚལ། །མི་ཡི་ཁྱུ་མཆོག་འགྲོ་བའི་མགོན་པོ་རྗེ། །སྟོང་གསུམ་འཇིག་རྟེན་ཀུན་ལ་དབང་བསྒྱུར་ཞིང་། །སྐལ་བཟང་འདི་ལ་མཛད་པ་མཐར་ཕྱིན་པའི། །ཤཱཀྱ་སེངྒེའི་ཞབས་ལ་གུས་ཕྱག་འཚལ། །རྟོགས་པའི་ཉི་ཟླས་མ་རིག་ལོག་རྟོགས་བཅོམ། །ཐུགས་རྗེ་ཟེར་གྱིས་མུན་པ་སེལ་མཛད་རྟགས། །ཤེས་རབ་རལ་གྲི་ཀླད་ལ་བསྐོར་ཆེན་མཛད། །སྨྲ་བའི་སེངྒེའི་ཞབས་ལ་གུས་ཕྱག་འཚལ། །སྨྲ་བསམ་ལས་འདས་ཤེས་རབ་ཕ་རོལ་ཕྱིན། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །འཁོར་བ་ལས་སྒྲོལ་ཏུ་རེའི་བདག་ཉིད་མ། །རྗེ་བཙུན་སྒྲོལ་མའི་ཞབས་ལ་གུས་ཕྱག་འཚལ། །བསྐལ་མང་སྔོན་ནས་སྦྱང་པ་ཞིབ་པའི་རྟགས། །རྒྱ་བོད་རྟོགས་ལྡན་གྲུབ་ཐོབ་མི་གཟུགས་ཅན། །བདག་གཞན་གཉིས་ཀྱིས་དོན་རྣམས་སྨིན་མཛད་པའི། །གྲུབ་ཐོབ་གཅོད་བརྒྱུད་རྣམས་ལ་གུས་ཕྱག་འཚལ། །ལྷན་སྐྱེས་ཡེ་ཤེས་ངང་ལས་མ་གཡོས་ཀྱང་། །ས་སྟེང་འདི་ན་གདུལ་བྱ་སྨིན་གྲོལ་ཕྱིར། །སྤྲུལ་པའི་སྐུ་མཆོག་མ་ཅིག་ལབ་སྒྲོན་ཞེས། །ཡེ་ཤེས་མཁའ་འགྲོ་མ་ལ་གུས་ཕྱག་འཚལ། །གཅོད་གཞུང་ཁྲིག་ཆགས་ཁྲིགས་མེད་ཁ་འཐོར་དོན། །གཞན་ལ་ཕན་སེམས་ལྡན་པས་བརྗོད་མིན་ཀྱང་། །རང་གིས་རང་ཁའི་བརྗེད་པ་སྤང་བའི་ཕྱིར། །ཕྱོགས་ཙམ་གོ་ནས་ཟུར་ཙམ་སྡེབ་པ་ལ། །གཅོད་བརྒྱུད་རྟོགས་ལྡན་མཁས་རྣམས་མི་བཀྱོན་ཞུ། །དུས་གསུམ་སངས་རྒྱས་ཐམས་ཅད་བསྐྱེད་པར་བྱེད་པའི་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ། དམ་ཆོས་བདུད་ཀྱི་གཅོད་ཡུལ་འདི། སྤྱིར་ཆོས་པའི་ཤན་འབྱེད། རྟོགས་པའི་བོག་འདོན། ལྷ་འདྲེའི་དབང་བསྡུད། དངོས་གྲུབ་རྣམ་གཉིས་འབྱུང་བའི་ནོར་བུ་སྐམ་ཐག་ཆུ་ནང་ནས་ཆོད་པར་བྱེད་པའི་ཐབས་འདི་ལ་དོན་ལྔ་སྟེ། ཟུང་བཞི་ཡ་བརྒྱད་ཀྱིས་གཅོད་ཀྱི་ཁོག་དབུབ་པ། མཚོན་པ་དཔེ་དྲུག་གི་གཅོད་ཀྱི་ཆེ་བ་བསྐྱེད་པ། ཕྱི་ནང་གསང་གསུམ་གྱི་སྒོ་ནས་གཅོད་ཀྱི་ཆོས་ངོས་བཟུང་པ། བློ་ལྡོག་རྣམ་པ་བཞིའི་སྒོ་ནས་སེམས་ཅན་ཐམས་ཅད་ཀྱི་རྒྱུད་ཡོངས་སུ་སྦྱོང་བ། དངོས་གྲུབ་རྣམ་གཉིས་འབྱུང་བར་བྱེད་པ་ལ་གཅོད་ཀྱི་མན་ངག་ལག་ལེན་དུ་བསྟན་པ་དངོས་སོ། །དང་པོ་ལ་བཞི་སྟེ། རིགས་ཀྱི་སྒོ་ནས་ཕྱེ་ན། བཀའ་རྒྱུད་དང་དོན་རྒྱུད་གཉིས། ཞུ་བ་པོ་གང་ཟག་གི་སྒོ་ནས་ཕྱེ་ན། ཕ་རྒྱུད་དང་མ་རྒྱུད་གཉིས། ཡོངས་སུ་གྲགས་ཚུལ་གྱི་སྒོ་ནས་ཕྱེ་ན། བཀའ་མ་དང་གཏེར་མ་གཉིས། ངོ་བའི་སྒོ་ནས་དབྱེ་ན། གཞུང་ཁྲིགས་ཆགས་དང་ཁྲིགས་མེད་ཁ་འཐོར་གཉིས་སོ། །དང་པོ་བརྒྱུད་ངོས་བཟུང་བ་ལ་གཉིས་ཏེ། ཕྱི་མཚན་ཉིད་ལྟར་ངོས་བཟུང་ན། བཅོམ་ལྡན་འདས་ཀྱིས་བྱམས་པ་ལ་གསུངས། དེས་ཐོག་མེད། དེས་དབྱིག་གཉེན། དེས་ཨཱརྱ་དེ་བ། དེས་དམ་པ་རྒྱ་གར། དེས་སྐྱོ་སྟོན་བསོད་ནམས་བླ་མ། དེས་མ་ཅིག་ལབ་སྒྲོན། དེས་ཁུ་སྒོམ་ཆོས་སེང་། དེས་རིམ་པར་བརྒྱུད་པ་ནི། མཚན་ཉིད་ལྟར་གྱི་བཀའ་བརྒྱུད་ཡིན་ནོ། །གཉིས་པ་སྔགས་ལྟར་གྱི་བཀའ་བརྒྱུད་ངོས་བཟུང་ན། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མས། དྲུག་པ་རྡོ་རྗེ་འཆང་ཆེན་བརྒྱུད། དེས་ཤཱཀྱ་ཐུབ་པ་ལ། དེས་འཇམ་དཔལ་སྨྲ་སེང་ལ། དེས་ཨརྱ་དེ་བ་ལ། དེ་མན་གོང་དང་འདྲ། གཉིས་པ་དོན་བརྒྱུད་ལྟར་ངོས་བཟུང་ན། ཡེ་ཤེས་ཀྱི་མཁའ་འགྲོ་མ་དངོས་ལས་མ་ཅིག་གིས་གསན་པ་ཡིན་ཏེ། མདོ་རྒྱས་འབྲིང་བསྡུས་གསུམ་ཁ་འདོན་བགྱིས་དང་། གདམ་པ་ནང་ནས་འཆར་གྱིན་གསུང་། དེ་བཞིན་མཛད་ནས་གཅོད་ཀྱི་གདམ་པ་འདི་མ་ཅིག་གིས་ཐུགས་ལ་འཁྲུངས་པའི་མྱོང་ཆོས་ཡིན། ཡང་ན་དོན་གྱི་བརྒྱུད་པ་ནི། འཇམ་དཔལ་སྨྲ་བའི་སེངྒེ་ལ་གཏད། སྨྲ་བའི་སེངྒེ་རང་གི་ཐུགས་ཀ་ནས་རལ་གྲི་བཏོན་ནས་སངས་རྒྱས་ལ་གདེང་པ་ལ། ཤཱཀྱ་ཐུབ་པའི་ཞལ་ནས། ངས་བདག་མེད་པར་བསད་ཟིན་གྱིས། སེམས་ཅན་རྣམས་སྐྱེ་འགགས་དང་བྲལ་བར་གསོད་ཅིག་གསུངས་ནས་དོན་ཕར་ཕྱིན་གྱི་རྗེས་སུ་གནང་བར་མཛད་དོ། །གཉིས་པ་ཕ་བརྒྱུད་དང་མ་རྒྱུད་ངོས་བཟུང་བ་ལ་གཉིས་ཏེ། དང་པོ་ནི། ཆོས་དབྱིངས་རང་བཞིན་གྱི་རྣམ་པར་དག་པའི་ངང་ལས་སེམས་ཅན་གྱི་དོན་དུ་རྗེ་བཙུན་སྒྲོལ་མས་གསོལ་བ་བཏབ་པས། ཆོས་དབྱིངས་ནམ་མཁའ་ལྟ་བུ་དེ་ལ་འཇའ་ཚོན་ལྟ་བུའི་སྐུ་གཟུགས་ཞལ་གཅིག་ཕྱག་བཞི་མ་གསེར་བའི་མདོག་ལྟ་བུ། རཏྣ་སྣ་ཚོགས་ཀྱིས་བརྒྱན་པ་གཅིག་བྱོན་ནས། ཕ་རོལ་ཏུ་ཕྱིན་པའི་དོན་རྗེ་བཙུན་སྒྲོལ་མས་གསུངས། དེས་སུ་ཀ་སིདྡྷི་གསུངས། དེས་དམ་པ་རྒྱ་གར་ལ་གསུངས། དེ་ནས་རིམས་པར་བརྒྱུད་པ་ནི་མ་རྒྱུད་དོ། །ཕ་རྒྱུད་ནི་རབ་འབྱོར་གྱིས་ཞུས། སྟོན་པས་གསུང་ཀུན་དགའ་བོས་བསྡུས་ནས་བྱམས་མགོན་ལ་གསུངས། དེས་ཐོག་མེད། དེས་དབྱིགས་གཉེན། དེས་ཨཱརྱ་དེ་ཝ། དེས་དམ་པ་རྒྱ་གར་ལ་སོགས་རིམ་བཞིན་བརྒྱུད་ལུགས་ནི་བཀའ་རྒྱུད་དང་མཐུན་ནོ། །གསུམ་པ་བཀའ་གཏེར་གཉིས་ངོས་བཟུང་བ་ནི་གཉིས་ཀྱི་དང་པོ་ནི་མ་ཅིག་རང་གིས་གསུང་ཐམས་ཅད་བཀའ་ཟེར་སྟེ། ཅིའི་ཕྱིར་ན་མ་ཅིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཀློག་འདོན་བྱས་པའི་དུས་སུ། བདུད་ཀྱི་ལེའུའི་སྐབས་སུ་གཟུགས་ནས་རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་གང་ལ་ཆགས་ན་ཡང་བདུད་ཀྱི་ལས་སུ་རིག་པར་བྱའོ། །ཅེས་དང་། ཆོས་ཐམས་ཅད་མཉམ་པ་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཞེས་པ་སོགས་གཟིགས་ནས་བདུད་བཞི་རང་སར་གྲོལ་བའི་རྟོག་པ་ཁྱད་པར་ཅན་བཅོམ་ལྡན་འདས་ཀྱིས་གསུང་པའི་བཀའ་དང་ཁྱད་མེད་དུ་རྟོགས་པས། མ་ཅིག་གི་གསུང་པ་ལ་བཀའ་ཞེས་བརྗོད་པའི་དོན་དེ་ཡིན། ཡང་ན་ནི་མ་ཅིག་གིས་གསུང་པའི་གཅོད་འདི་ལུང་སྟོན་པའི་བཀའ་ཡང་ཡིན་ཏེ། འཇམ་དཔལ་རྩ་རྒྱུད་ལས། ངའི་བསྟན་པའི་སྙིགས་མ་ལ། །ཡུམ་ཆེན་ཕ་རོལ་ཕྱིན་མ་ཡིས། །སྤྲུལ་པ་ལབ་སྒྲོན་ཞེས་བྱ་འབྱུང་། །ཕྲིན་ལས་ཆོས་ཀྱི་དབྱིངས་ལ་སྤྱོད། །དེ་དང་འབྲེལ་པ་གང་ཡོད་པ། །བླ་མེད་བྱང་ཆུབ་ཐོབ་པར་འགྱུར། །ཅེས་དང་། མདོ་དྭང་སྙིགས་འབྱེད་པ་ལས། ལྔ་བརྒྱ་དུས་ཀྱི་ཐ་མ་ལ། །རྒྱལ་བའི་ཡུམ་གྱི་སྤྲུལ་པ་ནི། །བྱང་ཕྱོགས་ལབ་ཀྱི་གྲོང་ཁྱེར་དུ། །སྒྲོན་མེ་ཞེས་བྱའི་མིང་ཅན་འབྱུང་། །སྐྱེ་མེད་སྙིང་པོའི་དོན་ལ་མཁས། །གྲོང་དང་གྲོང་ཁྱེར་རི་སུལ་དང་། །དུར་ཁྲོད་བས་མཐའ་ཁྱབ་པར་ཉལ། །དེའི་ཆོས་ནི་རྒྱས་པར་འགྱུར། །ཅེས་སོ། །གཉིས་པ་གཏེར་མ་ནི། སྲས་མོ་བཞི་ལ་བྱིན་རླབས་ཀྱི་བཀའ་བབ་ཅིང་། སྲས་མོ་བཞིའི་ཆོས་ཐམས་ཅད་ལ་མ་རྒྱུད་གཏེར་མའི་ཆོས་སྐོར་བྱ་བ་གྲགས་སོ། །བཞི་པ་ཁྲིག་ཆག་ཁྲིག་མེད་ངོས་བཟུང་ལ་གཉིས་ཏེ། ཁྲིག་ཆག་ནི། མ་ཅིག་གིས་ཆོས་ལ་དད་ནས་བཟུང་སྟེ། སངས་མ་རྒྱས་ཀྱི་བར་དུ་གདུལ་བྱ་གཅིག་དྲངས་བའི་ཐབས་ཀྱིས། ཆོས་ཐམས་ཅད་ཕྱོགས་གཅིག་ཏུ་འགྲིག་ཆགས་པ་ལ་ཁྲིག་ཆགས་ཟེར་ལ། ཕྱོགས་གཅིག་ཏུ་མ་འགྲིག་ཅིང་མན་ངག་གཟེར་བུ་རྣམས་འཐོར་ནས་ཡོད་པ་ལ་ཁྲིག་མེད་ཁ་འཐོར་ཟེར་རོ། །ཡང་ན་བཀའ་བརྒྱུད་དོན་གྱི་ཆོས་ཐམས་ཅད་ལ་ཁྲིགས་ཆགས་ཟེར་ཞིང་། མ་ཅིག་རང་གི་གང་གསུང་ཐམས་ཅད་ལ་ཁྲིག་མེད་ཟེར་བ་ཡང་གདའོ། །ཡང་ན་ཁྲིག་ཆག་ནི། ཕྱི་བཀའ་ཚོམ་ཞིབ་རྒྱས་སུ་བཤད་པ། ནང་གདམ་ངག་ལག་ལེན་དུ་བསྟན་པ། སྒོམ་པ་ཞལ་གདམ་གནད་ཐེབས་སུ་བསྟན་པ། གསང་བ་བརྡའ་ཆོས་ལ་བཟླ་རུ་བསྟན་པའོ། །མ་ཅིག་གིས་སྲས་ཐམས་ཅད་ཀྱི་གསུངས་པ་རྣམས་ནི། ཁྲིག་མེད་ཁ་འཐོར་ཡིན་པར་གསུངས་སོ། །མདོར་ན་གཅོད་ཐམས་ཅད་ཀྱིས་གདམ་པ་གཅིག་ཏུ་དྲིལ་བ། གཅོད་མཁན་ཐམས་ཅད་ཀྱི་ཉམས་མྱོང་ལྷན་གཅིག་ཏུ་བསྡུས་པ། བླ་མ་ཐམས་ཅད་ཀྱི་གསུང་སྒྲོས་ཐབས་གཅིག་ཏུ་དྲིལ་བ། ཨ་མ་ཇོ་མོའི་གཅོད་སྐོར་ཅི་སྙེད་ཅིག་གསུང་ཡང་། བཀའ་བརྒྱུད་དང་དོན་བརྒྱུད་གཉིས་ལ་མ་འདུས་པ་མེད་དོ། །དེ་ཡང་ཨཱརྱ་དེ་བའི་ཞལ་སྔ་ནས། གསུངས་པའི་གཞུང་དང་། གདམ་ངག་ཐམས་ཅད་སངས་རྒྱས་བཅོམ་ལྡན་འདས་ཐུབ་པ་ཆེན་པོས་ད་ལྟའི་བར་དུ་བྱིན་རླབས་ཀྱི་བརྒྱུད་པ་མ་ཆད་པ་ཡོད་པའི་ཕྱིར། བཀའ་བརྒྱུད་དོན་གྱི་གདམས་པ་ཞེས་བྱའོ། །དེ་ལྟ་བུའི་དོན་ལ་ཡིད་ཆེས་ཞིང་ཁུང་བཙུན་པར་བྱ་བའི་ཕྱིར་དུ། བཀའ་བརྒྱུད་དང་དོན་བརྒྱུད་འདིའི་ལོ་རྒྱུས་ནི། ཉེ་བརྒྱུད་དང་ཤིན་ཏུ་ཉེ་བརྒྱུད་དང་། ཐུང་བརྒྱུད་དང་། རིང་བརྒྱུད་དང་བཞིའོ། །ཉེ་བརྒྱུད་ནི། རྩ་བའི་བླ་མ་ཡིན་ཏེ། ཅིའི་ཕྱིར་ཞེ་ན། བླ་མ་རང་ཆོས་སྐུ་ཉིད་ཡིན་པ་ནི། མདོ་དང་རྒྱུད་སྡེ་ཐམས་ཅད་ནས་གསུངས་པའི་ཕྱིར་རོ། །ཤིན་ཏུ་ཉེ་བརྒྱུད་ནི་རང་གི་སེམས་ཉིད་ཡིན་ནོ། །ཅིའི་ཕྱིར་ན། འདའ་ཀ་ཡེ་ཤེས་ཀྱི་མདོ་ལས། སེམས་རྟོགས་སངས་རྒྱས་ཡིན་པར་ངེས། །ཅེས་གསུངས་པའི་ཕྱིར་རོ། །ཐུང་བརྒྱུད་ནི། རྡོ་རྗེ་ཕག་མོ་མ་གཅིག་ལབ་ཀྱི་སྒྲོན་མ། སྐལ་ལྡན་སེངྒེ། རྒྱལ་བ་དོན་གྲུབ། འཇམ་དབྱངས་མགོན་པོ། གཞོན་ནུ་བཟང་པོ། བློ་གྲོས་གྲགས་པ། སངས་རྒྱས་རིན་ཆེན། སྤྲུལ་སྐུ་ཤཱཀྱ་གཞོན་ནུ། ཀུན་དགའ་ཡེ་ཤེས་ནས་རིམ་པར་བརྒྱུད་དོ། །རིང་བརྒྱུད་ནི། ཡུམ་ཆེན་མོ། དེས་ཤཱཀྱ་ཐུབ་པ། དེས་སྨྲ་བའི་སེངྒེ། དེས་རྗེ་བཙུན་སྒྲོལ་མ། དེས་མཁའ་འགྲོ་མ་སུ་ཀ་སི དྡྷི། དེས་ཨཱརྱ་དེ་བ། དེ་ཡང་སྐུ་འཁྲུངས་པའི་ཆེ་བའི་ཡོན་ཏན་ནི། འཕགས་པ་ཀླུ་སྒྲུབ་ཀྱི་སྐུ་ཁྲུས་མཛད་པའི་ཁྲུས་ཀྱི་རྫིང་བུའི་ནང་ན་མེ་ཏོག་པདྨ་ལེགས་པ་གཅིག་སྐྱེས་པའི་ཁ་ན། ཁྱེའུ་ལོ་བརྒྱད་ལོན་པ་ཙམ་གཅིག་ཆོས་གོས་གསུམ་དང་བཅས་པ་གཅིག་སྐུ་འཁྲུངས་པ་ཡིན་ནོ། །དེ་ལ་འཕགས་པ་ཀླུ་སྒྲུབ་ཀྱིས་ཚུར་ཤོག་གསུང་ནས་བསྙེན་རྫོགས་མཛད། དེ་ནས་སྡེ་སྣོད་གསུམ་དང་བརྒྱུད་སྡེ་བཞིའི་ཆོས་མ་ལུས་པ་བསྟན་པས་དེ་རྣམས་ཐུགས་སུ་ཆུད་ནས་ས་གསུམ་པའི་བྱང་ཆུབ་སེམས་དཔའ་འཕགས་པ་ལྷ་ཨཱརྱ་དེ་ཝ་ཞེས་བྱ་བར་གྱུར་ཏོ། །དེ་ལྟ་བུའི་སློབ་དཔོན་དེས་ཤེས་རབ་ཀྱི་ཕ་རོལ་ཏུ་ཕྱིན་པའི་བརྗོད་བྱ་དོན་གྱི་སྙིང་པོ་བསྡུས་པ་གཞུང་ཆེན་དང་གཞུང་ཆུང་རྣམས་མཛད་པ་ཡིན་ནོ། །སློབ་དཔོན་དེས་དམ་པ་རྒྱ་གར་ལ་གསུངས། དམ་པ་དེའི་ལོ་རྒྱུས་ནི་ཁྱད་པར་དྲུག་དང་ལྡན་ཏེ། སྐྱེས་པ་རབ་ཀྱི་ཆེ་བ། སྐྱེ་ས་ཡུལ་གྱི་ཆེ་བ། བསླབ་བྱ་ཁྲིམས་ཀྱི་ཆེ་བ། བྱིན་རླབས་ཐུགས་རྗེའི་ཆེ་བ། སྦྱང་པ་ཡོན་ཏན་གྱི་ཆེ་བ། འབྲས་བུ་དངོས་གྲུབ་གྱི་ཆེ་བའོ། །དང་པོ་ནི་སྐྱེ་བ་བདུན་དུ་སྐྱེ་བ་གཞན་གྱི་བར་མ་ཆོད་པ་མི་ལུས་གཙང་མ་ཉི་རྩེ་ཐོབ་པར། པཎྜི་ཏ་འབའ་ཞིག་ཏུ་གྱུར། སྐྱེ་བ་འདིར་རིགས་བཞི་ལས་ཁྱད་པར་འཕགས་པ་བྲམ་ཟེར་སྐྱེས་སོ། །སྐྱེ་ས་ཡུལ་གྱི་ཆེ་བ་ནི། ལྷོ་ཕྱོགས་བྷེ་ཏེའི་ཡུལ་ཚ་རི་སི་ང་བྱ་བ་ཐུགས་རྗེ་ཆེན་པོས་བྱིན་གྱིས་རླབས་པའི་ཡུལ་དེར་སྐུ་འཁྲུངས་ཏེ། ཡབ་བྲམ་ཟེ་བརྩོན་འགྲུས་གོ་ཆ། ཡུམ་བྲམ་ཟེ་མོ་ས་རལ་ཏ་བྱ་བ་ལ་སྲས་གསུམ་ཡོད་པའི་བར་མ་ཡིན་ནོ། །སླབ་བྱ་ཁྲིམས་ཀྱི་ཆེ་བ་ནི། ལོ་བཅུ་གསུམ་ནས་དཔལ་འབྲི་ཀ་མ་ཤྲི་ལའི་གཙུག་ལག་ཁང་དུ་རབ་ཏུ་བྱུང་ནས་དགེ་ཚུལ་མཛད། བླ་མ་གསེར་གླིང་པ་ལ་བྱང་ཆུབ་མཆོག་ཏུ་སེམས་བསྐྱེད་ནས་བྱང་ཆུབ་སེམས་དཔའི་སྡོམ་པ་ཞུས། རྣལ་འབྱོར་ཕོ་མོ་ལྔ་བཅུ་རྩ་བཞི་ལ་དབང་ཞུས་ཏེ། གསང་སྔགས་ཀྱི་དམ་ཚིག་བསྲུང་། ༈ བྱིན་རླབས་ཐུགས་རྗེའི་ཆེ་བ་ནི། རྣལ་འབྱོར་ཕོ་མོ་ལྔ་བཅུ་རྩ་བཞིའི་རྗེས་སུ་བཟུང་སྟེ། དབང་གདམས་པ་དང་བཅས་པ་རྫོགས་པར་གནང་། བྱིན་གྱིས་བརླབས་པས་མཐུ་དང་ནུས་པ་དཔག་ཏུ་མེད་པ་དང་ལྡན་པའོ། ༈ །སྦྱངས་པ་ཡོན་ཏན་གྱི་ཆེ་བ་ནི། ལོ་ལྔ་ནས་འབྲི་ཀློག་བསླབ་ནས་ལེགས་པར་མཁྱེན། ཕྱི་མཚན་ཉིད་ཀྱི་སྡེ་སྣོད། ནང་གསང་སྔགས་ཀྱི་རྒྱུད་སྡེ་མ་ལུས་པ་མཁྱེན་ཅིང་རིགས་པའི་གནས་ལྔ་ལ་མཁས་པའི་པཎྜི་ཏ་ཆེན་པོ་ཡིན་ནོ། ༈ །འབྲས་བུ་དངོས་གྲུབ་ཀྱི་ཆེ་བ་ནི། ཐུན་མོངས་གི་དངོས་གྲུབ་གྲུབ་ཆེན་བརྒྱད་ཐོབ། ས་འོག་རལ་གྲི་མིག་སྨན་དང་། རྐང་མགྱོགས་རིལ་བུ་མི་སྣང་བ། བཅུད་ཀྱིས་ལེན་དང་མཁའ་ལ་འགྲོ། མཆོག་གིས་དངོས་གྲུབ་ཕྱག་རྒྱ་ཆེན་པོ་མཆོག་གིས་རྟོགས་པ་མངོན་དུ་གྱུར་པ་ལགས་སོ། །དེ་ལྟ་བུའི་བླ་མ་དེས་བོད་དུ་འགྲོ་བའི་དུས་ལ་བབས་པར་དགོངས་ནས་བྱོན་པ་ལས་དུས་ལན་གཅིག་ན། དཔོན་གཡོག་གསུམ་རྒྱ་གར་ཐ་འཁོབ་གཅིག་ཏུ་ཚུར་ལ་བྱོན་ཙ་ན་དགེ་བཤེས་དངོས་གྲུབ་སྙིང་པོ་བྱ་བ་གྲའི་མདའ་ཐང་པ་གཅིག་ཡིན་པས། རྒྱ་གར་དུ་བྱོན་ནས་ལོ་ཙ་བའི་ཆོས་དྲུག་ལ་བསླབ་པ་ཡིན་ཟེར་ནས་ཆུ་ཤིང་གི་ཕུར་པ་ལ་སེམས་ཅན་གྱི་གཟུགས་སྣ་ཚོགས་བཀོད་པ་མཐོང་བ་དང་། བླ་མ་སྨ་ར་སེར་པོ་ཅན་བྱ་བ་བོད་ཀྱི་ཆོས་ལ་ཡིད་མ་ཆེས་པས་རྒྱ་གར་དུ་གདམ་པ་ཚོལ་དུ་བྱོན་པས་མ་རྙེད་པ་ཚུར་ལོག་ནས་བལ་ཡུལ་དུ་བླ་མ་ཧ་ངུ་ལ་ཕག་མོ་ཞུ་རུ་འགྲོ་ཟེར་བ་དང་། ཚོང་པ་མང་པོ་དང་འགྲོགས་བྱུང་སྟེ། བལ་ཡུལ་དུ་སླེབ་པ་དང་དེར་ཟླ་བ་གཅིག་འགོར་ཏེ་བོད་དུ་འོང་བའི་ལམ་དུ་ཞུགས་པའི་དུས་སུ་རྗེ་དམ་པ་རྒྱ་གར་དང་འགྲོག་ནས་འོངས་སོ། །དེར་ཁོང་གཉིས་ཀྱི་སེམས་ལ་རྗེ་དམ་པ་རྒྱ་གར་ནི་ངོ་མ་ཤེས་བླ་མ་ཨ་ཙ་ར་འདི་གྲུབ་ཐོབ་གཅིག་ཡིན་ངེས་པར་འདུག་སྟེ། ནང་པ་སངས་རྒྱས་པ་དང་ཕྱི་པ་མུ་སྟེགས་པ་གང་ཡིན་ངོ་མ་ཤེས་པས་གདམས་ངག་ཡང་མ་ཞུས་སོ། །དེ་ནས་མང་ཡུལ་དུ་སླེབས་པ་དང་། ཨ་ཙ་རའི་ཚང་པ.གདལ་ཅིག་འདུག་པས་དེ་ཀུན་ཨ་ཙ་ར་ལ་མོས་གུས་དྲག་པོ་བྱེད་མེ་ཏོག་མང་པོ་འབུལ་ཞིང་འདུག །བླ་མ་འདི་ཇི་སྐད་བྱ་བ་ཡིན་དྲིས་པས། རྒྱ་གར་པཎྜི་ཏ་ཀ་མ་ཤི་ལ་བྱ་ཡིན། བོད་ན་དམ་པ་རྒྱ་གར་བྱ་བ་གྲགས་ཟེར་རོ། །པཎྜི་ཏ་མཁས་པ་གྲུ་ཐོབ་ཆེན་པོ་གཅིག་ཡིན། སྔར་ཡང་བོད་དུ་ལན་མང་དུ་བྱོན་པ་ཡིན། ད་རེས་ཀྱང་བོད་དུ་བཞུད་པར་འདུག་ཟེར་རོ། །དེར་དགེ་བཤེས་ཀྱི་གདམ་ངག་གཅིག་ཞུ་བྱས་པས་ཁྱོད་ཀྱིས་མཁར་བ་འདི་ཐོང་དང་གསུངས། བཏང་བས་འདི་འདྲ་སེམས་བསྐྱེད་འཆོར་བའི་རྒྱུ་ཡིན། མུ་སྟེགས་ཀྱི་རྫུ་འཕྲུལ་བྱེད་པ་ལ་དགོས་པའི་ལག་ཆ་ཡིན། ངས་ཀྱང་ཤེས་ཏེ་མ་བྱས་པ་ཡིན། སེམས་ཅན་བསླུ་ན་འདི་དགོས་པ་ཡིན། ཆོག་ལ་ཐོངས་གསུངས་ནས་བཅག་གོ། །གདམས་པ་ཞུས་པས་ཁྱོད་རང་ཕྱི་ཡི་སྣང་བ་ནང་དུ་མ་ལེན། ནང་གི་སྣང་བ་ཕྱིར་མ་སྤྲོ། སེམས་ལུས་ལ་མ་ཆགས་ལུས་སེམས་ཁྲོལ་ལ་རང་སོར་ཞོག་གསུངས་པས། དེ་ལ་ངེས་ཤེས་བསྐྱེད་ནས་རྩ་བའི་བླ་མར་བཟུང་ངོ་། །བླ་མ་སྨ་ར་སེར་པོའི་བསམ་པ་ལ། ཆོས་ཀྱི་མི་ཚོལ་དུ་མ་བྱུང་ན། མིས་ཆོས་བཙལ་བས་རྙེད་པར་མི་འདུག །རྒྱ་གར་དུ་ཆོས་བཙལ་བས་མ་རྙེད་པས་བོད་དུ་ལོག་པས། བླ་མ་གྲུབ་ཐོབ་གཅིག་དང་མཇལ་འདུག་སྙམ་པ་བྱུང་། བླ་མ་ལ་གདམ་པ་གཅིག་ཞུ་བྱས་པས། ཁྱེད་ལ་གདམས་པ་སྟེར་ས་གཅིག་ད་གཟོད་འོང་བར་གདའི་གསུངས། དེ་ནས་དགེ་བཤེས་དང་ཚོང་པ་རྣམས་ལ་སྟོད་ལྷོ་ལ་སོང་། ཨ་ཙ་ར་དཔོན་གཡོག་ཚོ་ལ་སྟོད་བྱང་ལ་བཞུགས་པར་འདུག་ནས། བླ་མ་སྨ་ར་སེར་པོའི་བསམ་པ་ལ། བླ་མ་འདི་གང་དུ་བཞུགས་པའི་ཕྱག་ཕྱིར་འབྲང་ལ། གདམས་ངག་གཅིག་ཐོབ་པར་བྱ་དགོངས་ན་འགྲོགས་ནས་བྱོན་ནོ། །དེ་ནས་འདོག་སྟག་རིས་བྱ་བར་བྱོན། མགྲོན་ཁང་གཅིག་ཏུ་སླེབ་པ.དང་བཞུགས་པས་བྱིན་རླབས་ཞུ་བ་མང་པོ་བྱུང་སྟེ། མིག་ལོང་བ་ཕྱེད་པ་དང་། རྣ་བ་འོན་པ་ཕྱེད་པ་ལ་སོགས་པ་མང་པོ་བྱུང་བས་ཐམས་ཅད་ངོ་མཚར་སྐྱེས་སོ། །ཡུལ་དེར་དགེ་བཤེས་སྐྱོ་ཤཱཀྱ་ཡེ་ཤེས་བྱ་བ་མདོ་སྒྱུ་འཕྲུལ་ལ་མཁས་པ་གཅིག་གདན་དྲངས། ཚོགས་ཀྱི་འཁོར་ལོ་མཛད་ཅིང་བཞུགས་པ་ལ། ཁོང་གི་ཕྱག་ཕྱི་ནས་མྱང་སྟོན་གྲགས་ཆེན་གྲགས་ཆུང་བྱ་བ། ཕ་མེས་ཀུན་སྔགས་པ་མཐུ་ཆེན་དང་འགྲས་ནས་མཛེས་ཁྱེར་བའི་བྱིས་པ་གཉིས། ཕ་མཛེ་ཕོ་གཅིག་གིས་འབུམ་བཅུ་དྲུག་དུམ་པ་གཅིག་དང་བཅས་གདན་དྲངས་ནས་ཕུལ་ཏེ། གཉེར་གཏན་ནས་ཡོད་པ་དགེ་བཤེས་སྐུ་བསོད་ཆེ་བས་བྱིས་པ་གཉིས་ཉ་ར་མ་བྱུང་པར་སྨིན་མ་བྱི། གདོན་གྱིས་གནོད་པའི་རྟགས་ཚོ་ཤར་བས། དགེ་བཤེས་ཐུགས་ཁྲལ་དུ་སོང་ཞིང་ཡོད་པ་ལ། མགྲོན་ཁང་ན་ཨ་ཙ་ར་བྱིན་རླབས་ཅན་གཅིག་འདུག་ཟེར་བ་ཐོས་ནས། དེར་ཕྱིན་ནས་ཞུས་པས། སྤྱིར་ཁྱེད་རྒྱ་གར་བ་རིགས་པའི་འབྱུང་གནས་ཡིན་པ་དང་། ཁྱད་པར་དུ་བླ་མ་ཁྱེད་ངོ་མཚར་ཅན་གཅིག་མཆིས་ན་བདག་ལ་བྱིས་པ་ལྷ་འདྲེའི་ཟ་འཕྲོ་གཉིས་ཡོད་པས། དེ་གཉིས་ལ་བྱིན་རླབས་གཅིག་ཐུགས་ལ་གདག་པར་ཞུ་དང་བྱས་པས། དེ་ཙུག་བྱའི་གསུངས་ནས་དེའི་དུས་སྨ་ར་སེར་པོ་ཅན་ལ། ད་ནི་ཁྱོད་ཀྱིས་འདོད་པའི་གདམས་ངག་གཅིག་འོང་བར་གདའ་གསུངས་ནས། དེར་བསྙེན་བཀུར་བྱས་ཤིང་གདམས་པ་ཞུས་པས། བྱིས་པ་གཉིས་སྨ་ར་སེར་པོ་ཅན་དགེ་བཤེས་སྐྱོ་དང་བཞི་ལ་གདམ་པ་བཏབ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་གཞུང་བྲུལ་ཚོ་དྲུག་གནང་སྟེ། དེ་ཉིད་དུ་ཡི་གེ་རིས་སུ་བཏབ་ནས་ངོ་སྤྲོད་ཞལ་གདམས་དང་བཅས་པ་ཞུས་ཏེ། བྱིས་པ་གཉིས་པོས་ཉམས་སུ་བླངས་པས་ནད་སོས་ཏེ་གྲུབ་ཐོབ་བཟང་པ་རེ་བྱུང་ངོ་། །བཀའ་གདམ་པ་ཆིག་བརྒྱུད་ལས་མ་སྤེལ་ལོ། །དེ་ལ་ཡི་གེ་གཅིག་མའི་གདམ་པ་འདི་ཡིན་ཟེར་ནས་བག་རེ་འཕེལ་བ་འདི་ཡིན་གསུངས། ༈ སློབ་དཔོན་དེས་སྐྱོ་སྟོན་ལ་གསུངས་ཏེ། སྐྱོ་སྟོན་དེའི་ལོ་རྒྱུས་ནི། ཟུར་པོ་ཆེ་ཤག་འབྱུང་གི་དབོན་པོ་སྐྱོ་བྱུང་བསོད་ནམས་བླ་མ་སྐལ་ལྡན་དུ་གཟིགས་ནས། དམ་པས་བསོད་ནམས་བླ་མ་ཁྱེད་གསང་སྔགས་ཀྱི་རྒྱུད་སྡེ་ལ་མཁས་པ། རྟོགས་པ་ཕུལ་ཏུ་ཕྱིན་པ་སློབ་མ་དཔག་ཏུ་མེད་པ་བསྡུས་པ་ཡིན་ཀྱང་། དོན་ཁོང་དུ་མ་ཆུད་པས་འཁོར་བ་ལས་རྟ་རྔ་འགྲོས་གང་ཡང་མ་འཕགས་པས། ལོང་བས་ལོང་བ་ཁྲིད་ནས་འདུག་གསུངས་པས། འོ་ན་བདག་ལ་དོན་གྱི་ཕར་ཕྱིན་གནང་བར་ཞུ་གསུངས་ནས་རྟ་དང་གསེར་གཡུ་ལ་སོགས་པའི་ལོངས་སྤྱོད་ཆེན་པོ་ཕུལ་ནས། སེམས་བསྐྱེད་ནམ་མཁའ་གོ་འབྱེད་དང་གདམ་ངག་མ་ལུས་པ་གནང་ནས། གཉན་ཁྲོད་འགྲིམ་པས་གཉིས་སུ་མེད་པའི་དོན་ཁོང་དུ་ཆུད་གྲྭ་པ་མང་པོས་བསྐོར་བའི་མཁས་པ་ཆེན་པོ་ཡིན་ཀྱང་སྣང་བ་བདེན་འཛིན་ཐམས་ཅད་དང་བྲལ་དེ་ཆོས་བརྒྱད་ཞིག་ནས། ལ་བེར་ཆེན་པོ་གཅིག་གསོལ་ནས་རྒྱལ་ཁམས་ཕྱོགས་མེད་དུ་བྱོན་ནས། མ་ཅིག་ལབ་ཀྱི་སྒྲོན་མ་ལ་དོན་གྱི་གདམ་པ་འདི་གསུངས་སོ། ༈ །མ་ཅིག་དེའི་ལོ་རྒྱུས་ནི། ཡུམ་གྱི་ཐུགས་རྒྱུད་གླིང་བཞིའི་སྐུ་ཡི་བཀོད་པ། ཡུམ་གྱི་ཐུགས་སྤྲུལ་གྲངས་མེད་བྱུང་། གླིང་བཞི་ལས་སུམ་ཅུ་རྩ་གསུམ་དགའ་ལྡན་ལྷ་ཡི་ཡུལ་དང་གཅིག །འགྲོ་དོན་རྡོ་རྗེ་གདན་གྱི་ཡུལ་དང་གཉིས། འཛམ་གླིང་བོད་ཀྱི་ཡུལ་དང་གསུམ། ནུབ་ཕྱོགས་ཨུ་རྒྱན་གྱི་ཡུལ་དང་བཞི། གླིང་བཞི་ལ་འགྲོ་དོན་མཛད་ལུགས་ནི། ཡུམ་གྱི་ཐུགས་སྤྲུལ་དཔའ་བོའི་ཚོགས་དང་། དཔའ་མོའི་ཚོགས་དང་འགྲོ་བ་འདྲེན་པའི་སྤྲུལ་སྐུ་དཔག་མེད་འབྱུང་། སུམ་ཅུ་རྩ་གསུམ་ལྷ་གནས་འོག་མ་ན། ཡུམ་གྱི་ཐུགས་སྤྲུལ་རིགས་ལྡན་མང་དུ་འབྱུང་། ལྷ་རྣམས་ལོངས་སྤྱོད་ཚོགས་ཀྱི་འཁོར་ལོ་བསྐོར་ཞིང་འགྲོ་བ་ཐབས་ཀྱིས་འདུལ། སུམ་ཅུ་རྩ་གསུམ་ལྷ་གནས་ལ། གླིང་ཆེན་པོ་གདལ་སྐྱོབ་བྱ་བ་ཡིན། གླིང་དེ་ལ་བསྐོར་བཞི་ཡོད་དེ། དབུས་ཀྱི་གླིང་ནི་མཚོ་ཧ་ལ་གདལ་སྐྱོབ་ཀྱི་གླིང་། ལྷ་རྣམས་ཀྱི་ལོངས་སྤྱོད་དང་། རོལ་མོ་དང་མཆོད་པ་འབུལ་བའི་ས་དེར་ལྷའི་རྒྱལ་པོ་གཅིག་བཞུགས་སྟེ། ཡུམ་གྱི་སྐུའི་སྤྲུལ་པས་ལྷ་རྣམས་བདེ་བ་ལ་བཀོད་པ་ཡིན། བྱང་ཆུབ་མཆོག་ཏུ་སེམས་བསྐྱེད་ནས་བཞུགས་ཏེ། ལྷ་ལོངས་སྤྱོད་ལ་ཡེང་བར་སྣང་། གླིང་ཆེན་པོ་གདལ་སྐྱོབ་བྱ་བའི་ཤར་ཕྱོགས་ན་བཀྲ་ཤིས་སྒོ་མང་བྱ་བའི་གླིང་གཅིག་ཡོད་དེ། དེའི་གྲོང་ཁྱེར་ན་ཡུམ་གྱི་གསུང་གི་སྤྲུལ་པས་འདུལ་བའི་ཞིང་ཡོད། གདལ་སྐྱོབ་ཀྱི་ལྷོ་ཕྱོགས་ན། ནོར་བུ་ཕུན་ཚོགས་ཀྱི་གླིང་བྱ་བ་ཡོད། ཡུམ་གྱི་ཐུགས་ཀྱིས་སྤྲུལ་པས་འདུལ་བའི་ཞིང་ཡོད། གདལ་སྐྱོབ་ཀྱི་ནུབ་ཕྱོགས་ཀྱི་གླིང་ནི། སྐྱོ་ངལ་མེད་པ་བདལ་བའི་གླིང་བྱ་བ་ཡོད། ཡུམ་གྱིས་ཡོན་ཏན་གྱི་འདུལ་བའི་གླིང་ཡོད། གདལ་སྐྱོབ་ཀྱི་བྱང་ཕྱོགས་ཀྱི་གླིང་ནི། ཀུན་དྷ་ལི་དྷ་ནའི་གླིང་བྱ་བ་ཡིན། ཡུམ་གྱིས་ཕྲིན་ལས་ཀྱི་འདུལ་བའི་ཞིང་ཡོད། གླིང་ཆེན་པོ་གདལ་སྐྱོབ་བྱ་བ་ལ། གླིང་ཆེན་པོ་བཞིས་བསྐོར་བ་ནི། གླིང་རེ་རེ་ལ་ཡང་འཛམ་བུ་གླིང་ཙམ་བརྒྱ་བརྒྱ་ཡོད། དེ་ལ་སྒྲ་སྙན་གྱི་གླིང་། དྲི་མཆོག་གི་གླིང་། རོ་མཆོག་གི་གླིང་། ཀུན་དྷ་ར་ཕུན་ཚོགས་ཀྱི་གླིང་། ཀུན་དྷརྨའི་གླིང་རྣམས་ཡོད། དེ་ཡན་ཆད་ན་ལྷའི་གླིང་དང་གྲོང་ཁྱེར་བསམ་གྱིས་མི་ཁྱབ་བརྗོད་ཀྱི་མི་ལོང་བ་ཡོད། ལྷ་རྣམས་ཀྱང་སུམ་ཅུ་རྩ་གསུམ་གྱི་ལོངས་སྤྱོད་དང་རྒྱན་ལ་ཡེང་བ་མང་ངོ་། །ལྷ་འགའ་ཞིག་གི་རྒྱ་གར་གྱི་ཡུལ་དུ་འགྲོ་དོན་བྱེད་པ་ཡང་མང་ངོ་། །ལྷ་འགའ་ཞིག་བོད་ཡུམ་དུ་ལྟུང་བས་ཕོག་པ་ཡང་མང་ངོ་། །ལྷ་འགའ་ཞིག་བར་དོར་འཁྱམས་པ་ཡང་མང་ངོ་། །ལྷ་འགའ་ཞིག་ཕུན་ཚོགས་སངས་རྒྱས་ཀྱི་བརྒྱུད་པ་ཟམ་མ་ཆད་པ་ཡང་མང་ངོ་། །གདལ་སྐྱོབ་ཀྱི་ཤར་ཕྱོགས་ཀྱི་གླིང་བཀྲ་ཤིས་སྒོ་མང་གི་དབུས་སུ། ཕུན་ཚོགས་དཔལ་རིའི་གླིང་བྱ་བ་གཅིག་ཡོད། གླིང་ཆེན་པོ་དེའི་རྒྱུད་ལ་སྐྱེས་པ་ཡིན་ཏེ། གླིང་ཆེན་པོ་དེའི་དབུས་སུ་ལྷུན་གྲུབ་ཀྱི་མཆོད་རྟེན་གཅིག་བཞུགས་ཏེ། དེ་ལ་རང་བྱུང་གི་མཆོད་རྟེན་སྟོང་རྩ་གཉིས་བྱོན། ལྷའི་བུ་དང་བུ་མོས་མཆོད་པའི་ལོངས་སྤྱོད་ཀྱི་གཏེར་འབུལ། གླིང་དེ་ནི་ཡུམ་གྱི་གསུང་གིས་འདུལ་བའི་གླིང་ཡིན། ཡུམ་གྱི་གསུང་གི་རྣམ་སྤྲུལ་དཔའ་མོའི་ཚོགས། ཌཱ་ཀི་མ་གཅིག་ལ་འཁོར་ཡང་ཌཱ་ཀི་མ་དཔག་མེད་ཀྱིས་བསྐོར་བ་བཞུགས་སོ། །གླིང་ཆེན་པོ་གདལ་སྐྱོབ་ཀྱི་ལྷོ་ཕྱོགས་ཀྱི་གླིང་ན། ནོར་བུ་ཕུན་ཚོགས་ཀྱི་གླིང་དེ་ལ་རང་བྱུང་གི་ལོ་པན་ཤེལ་གྱི་མཆོད་རྟེན་གཅིག་ཡོད། ཕྱོགས་བཞི་ན་མེ་ཏོག་གི་གླིང་ཆེན་པོ་བཞི་ཡོད། མེ་ཏོག་གི་གླིང་དེ་ལ་ལྷའི་བུ་དང་བུ་མོའི་མཆོད་པ་འབུལ་ལོ། །དེ་ན་ཡུམ་གྱི་ཐུགས་སྤྲུལ་དཔའ་བོ་མཁའ་འགྲོའི་ཚོགས་མཁའ་འགྲོ་མ་སྐུ་མདོག་སེར་མོ་གཅིག་གིས་འདུལ་ཞིང་ཡོད་པའི་དུས་སུ། ཉི་མ་ཐང་གཅིག་ཙ་ལྷའི་བུ་དང་བུ་མོ་རྣམས་ཀྱིས་མཆོད་པ་རོལ་མོ་མང་པོ་བྱས་ནས་འོག་མིན་གྱིས་དབུས་སུ་ཡུམ་གྱི་དྲུང་དུ་སླེབ་དེ་བྱོན། ཡུམ་གྱིས་ཞལ་ནས། ནོར་བུ་ཕུན་ཚོགས་ཀྱིས་གླིང་དུ་འགྲོ་དོན་ལ་མི་བཞུགས་ནས། འདིར་བྱོན་པ་ཅི་ཡིན་གསུང་། མཁའ་འགྲོ་དེའི་ཞལ་ནས། ལྷ་ལོངས་སྤྱོད་ལ་ཡེང་བར་སྣང་། ངས་ཀྱང་ལོ་ཁྲི་ཚོ་གཅིག་འདུལ་ཡུམ་གྱི་ཐུགས་ཀྱི་སྤྲུལ་པ་གྲངས་མེད་གསུངས། ད་ནི་ནུབ་ཕྱོགས་ཨུ་རྒྱན་གྱི་ཡུལ་དུ་འགྲོ་དགོས་གསུང་ནས་འཇའ་དང་འོད་ཀྱི་ཚུལ་དུ་ཡལ་སྐད། ༈ དེ་ནས་ཡུམ་གྱི་ཐུགས་སྤྲུལ་འགྲོ་བ་འདུལ་བའི་ཌཱཀྐི་མ་དེ་ནོར་བུ་ཕུན་ཚོགས་ཀྱི་གླིང་དུ་བྱོན་ནས་ལྷའི་སྐུ་རུ་སྤྲུལ་ཏེ། འགྲོ་བ་འདུལ་བའི་གཞན་སྣང་མེད་རིག་པ་དྲི་མེད་ཡུམ་ལ་ཞུགས་ཏེ་ཡབ་ནི་ལྷ་བདེ་སྐྱོབ་བྱ་བ་ཡིན། ཡུམ་ནི་བལ་མོ་མཚོ་བྱ་བ་ཡིན། དེ་གཉིས་ལྷུམས་སུ་ཞུགས་པའི་ཌཱཀྐི་མ་དེ་ནོར་བུ་ཕུན་ཚོགས་ཀྱི་གླིང་དུ་བྱོན་ནས་མཁའ་འགྲོ་མ་དེ་ལྷའི་ལོ་གསུམ་རེད་ཙ་ནོར་བུ་ཕུན་ཚོགས་ཀྱི་གླིང་དུ་འགྲོ་དོན་བྱེད་ཅིང་བཞུགས་སོ། །ཁོང་གི་ལུས་ནི་ལྷའི་ལུས་ཡིན། སེམས་ནི་ཡུམ་གྱི་ཐུགས་ཡིན། ལྷ་རྣམས་ཐབས་ཀྱིས་འདུལ་ཞིང་མ་རྒྱུད་ཀྱི་ཚོགས་ཀྱི་འཁོར་ལོ་བསྐོར་ཞིང་ཡོད། ལོ་པན་ཤེལ་གྱི་མཆོད་རྟེན་ལ་ལྷ་རྣམས་ཀྱི་མཆོད་པ་འབུལ་ཞིང་སྨོན་ལམ་འདེབས་པ་ཡང་མང་འདུག །རོལ་མོ་དང་། ལྷ་ཆ་དང་། ནོར་བུ་ཕུན་ཚོགས་ཀྱི་གླིང་དེས་མཆོད་པ་འབུལ་ཞིང་ཕྱག་འཚལ་བ་དང་། བསྐོར་བ་བྱེད་པ་ཡང་མང་འདུག །ཡུམ་གྱི་ཐུགས་སྤྲུལ་མཁའ་འགྲོ་མ་དེས། ཡུམ་གྱི་ཐུགས་བཅུད་ཆོས་རྣམས་དང་། སྔ་མའི་ཆོས་ཀྱི་གླིང་སྡེ་དང་། གསང་སྔགས་ཨུ་དུམ་ཝ་རའི་རྒྱུད་དང་། ཐུགས་བཅུད་མ་རིག་མུན་སེལ་གྱི་རྒྱུད་དང་རྒྱུད་ཚན་ལྔ་འཆད་ཅིང་བཞུགས་སོ། །ནུབ་མོ་ཚོགས་ཀྱི་འཁོར་ལོ་བསྐོར་ཞིང་དཔའ་བོ་དང་མཁའ་འགྲོའི་ཚོགས་མཆོད་དེ། ཨུ་རྒྱན་གྱི་གནས་སུ་ཡང་ཚོགས་ཀྱི་ལོངས་སྤྱོད་དང་། གཏོར་ཆེན་ཡང་མཆོད་ནས་ལྷའི་ལོ་ཁྲི་ཚོ་ཕྱེད་གཉིས་བཞུགས་སོ། །དུས་ཀྱི་ཐ་མ་ཉིན་གཅིག་ཙ་མཁའ་འགྲོ་མ་སྐུ་མདོག་སྔོ་སང་ངེ་བ་གཅིག་མདུན་དུ་བྱོན་ནས། ལྷའི་ཡུལ་དུ་འགྲོ་དོན་མ་རྫོགས་སམ། ལོགས་སུ་འགྲོ་དོན་བྱེད་རྒྱུ་མེད་དམ་ཟེར། སྤྲོས་པ་ཉེར་བར་ཞི་བར་བགྱིས་གཅིག་ཟེར་སྐད། ཁོང་གིས་དགོངས་པ་ལ། ཕུན་ཚོགས་ཀྱི་གླིང་འདི་ལྟ་བུའི་ཡུལ་ལ་ཡོད། ཕ་མ་ནི་ལྷའི་དབང་པོ་སྡེ་ཚོགས་ཡོད། ཆོས་ལ་ནི་མཁའ་འགྲོ་མའི་གསང་སྤྱོད་ཀྱི་ཆོས་འདི་ལྟ་བུ་འགྲོ་བ་འདྲེན་པ་ལ། ལོགས་སུ་ཅི་འདྲ་བ་འདྲེན་དགོས་ཨང་བསམ་པ་བྱུང་། མདུན་གྱི་མཁའ་འགྲོ་མ་དེ་མེད་སྐད། དེའི་ཕྱིར་ཉིན་རྒྱ་གར་རྡོ་རྗེ་གདན་དུ་ཆོས་ཀྱི་མཆོད་པ་བྱེད་པའི་རྡོ་རྗེ་གདན་གྱི་དུང་དང་། ཆ་ལང་དང་། པི་ཝང་དང་། ཅོང་གི་སྒྲ་དང་། ལྷ་ཆའི་སྒྲ་བསམ་གྱིས་མི་ཁྱབ་པ་གྲགས་ནས། དེར་ལྷ་གནས་ཀྱི་ལྷ་རྣམས་ལྟད་མོ་ལ་བྱོན་ཏེ། ཕུན་ཚོགས་རིན་ཆེན་གྱི་གླིང་ནས་ཀྱང་། ཡུམ་གྱི་ཐུགས་སྤྲུལ་དེ་ཡང་འཁོར་ནི་ལྷའི་བུ་དང་བུ་མོ་ལྔ་བརྒྱ་དང་འགྲོགས་ནས་རྡོ་རྗེ་གདན་དུ་ལྟད་མོ་དང་ཤཱཀྱ་ཐུབ་པ་མཆོད་པ་ལ་བྱོན་ཏེ། རྒྱ་གར་གྱི་གྲོང་ཁྱེར་ཆེན་པོ་སེར་སྐྱ་བྱ་བ་ན། རྒྱ་གར་གྱི་ཤག་རིག་ཨའི་དབང་ཕྱུག་བྱ་བ་དང་། ཡུམ་ལྷ་ཟ་ཀླུ་སྒྲོན་གཉིས་ཀྱིས་མཆོད་པ་བྱེད་པའི་ཚོགས་མང་པོ་བཤམ། སེར་སྐྱའི་གྲོང་ཆེན་པོའི་དབུས་སུ་ཡུམ་ཆེན་མོ་མན་ཆད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གསོལ་བ་བཏབ་ཅིང་། ངེད་བཟའ་མི་འདི་གཉིས་བྲམ་ཟེའི་རིགས་རྒྱ་གར་ཤག་རིགས་ཀྱི་བརྒྱུད་པ་འདི་ལ། རྒྱུད་པ་ཆད་ལ་ཁད་པས་དེའི་མྱ་ངན་གྱི་གདུང་ཞིང་ཡོད་པས། དུས་གསུམ་སངས་རྒྱས་ཐམས་ཅད་ཀྱི་ཐུགས་རྗེ་དང་། སུམ་ཅུ་རྩ་གསུམ་གྱི་ལྷ་གནས་མན་ཆད་ཀྱི་ལྷ་རྣམས་དང་། ངེད་རྒྱ་གར་རྡོ་རྗེ་གདན་གྱི་ཤག་རིགས་ཨའི་དབང་ཕྱུག་འདི། སྔོན་ནས་སྨོན་ལམ་མཐུན་པ་ཡིན་པས་སྨོན་ལམ་བཏབ་དགོས་ཟེར་ནས་སྨོན་ལམ་རྒྱ་ཆེན་པོ་བཏབ། ཕུན་ཚོགས་ཀྱི་གླིང་ནས་བྱོན་པའི་མཁའ་འགྲོ་མ་དེ་ཡུམ་གྱི་ཐུགས་སྤྲུལ་ཡིན་གྱིས། སུམ་ཅུ་རྩ་སུམ་དགའ་ལྡན་ལྷ་གནས་སུ་འགྲོ་དོན་རྫོགས་པ་དང་། སེར་སྐྱའི་བཟའ་མི་གཉིས་ཀྱིས་སྨོན་ལམ་བཏབ་པ་དང་། དུས་མཚུངས་རེད་པ ས། སྔོན་གྱི་སྨོན་ལམ་གྱི་དབང་གིས་རྐྱེན་གྱིས་མཁའ་འགྲོ་མ་དེས་ལྟུང་བས་ཕོག་ནས། བྲམ་ཟེའི་བཟའ་མི་གཉིས་ཀྱི་སྨོན་ལམ་འགྲུབ་དེའི་ལྷུམས་སུ་ཞུགས་སོ། །དེ་ཡན་ཆད་དགའ་ལྡན་ལྷ་ཡུལ་སུམ་ཅུ་རྩ་གསུམ་ལྷ་གནས་སུ་སྐྱེས་པའི་ལེའུ་སྟེ་དང་པོའོ།། ༈ །།དེ་ནས་རྡོ་རྗེ་གདན་གྱི་ལྷོ་ཕྱོགས་ན་སེར་སྐྱ་བྱ་བའི་གླིང་གཅིག་ཡོད་དེ། གླིང་དེའི་གྲོང་ཁྱེར་ལ་འབུམ་ཚོ་གསུམ་ཡོད་སྐད། གྲོང་སྟོད་ན་ཆུ་མིག་འབབ་པ་དེ་གྲོང་དཀྱིལ་ན་རྟ་རབ་ཀྱི་མི་ཆོད་པ། གྲོང་སྨད་ན་གྲུ་རྫིང་དགོས་སྐད། གྲོང་ཁྱེར་དེ་ལ་རྒྱ་གར་ཤག་རིགས་ཀྱི་རྒྱལ་བརྒྱུད་གསུམ་ཡོད། རྒྱ་གར་གྱི་གྲོང་ཁྱེར་དེའི་དབུས་སུ་ཕོ་བྲང་ཆེན་པོ་ཤིང་རྟ་གཟིང་བྱ་བ་གཅིག་ཡོད། དེ་རྒྱ་གར་ཤག་རིགས་ཨའི་དབང་ཕྱུག་བྱ་བ་དང་། ལྷ་ཟ་ཀླུ་སྒྲོན་བྱ་བ་གཉིས་སུ་སྐུ་འཁྲུངས་པའི་སྲས་གཅིག་ཡོད་དེ། དེ་ནི་ཨོ་རྒྱན་གྱི་རིན་ཆེན་ཕུན་ཚོས་ཀྱི་གླིང་ཡུམ་ཆེན་མོ་ཐུགས་སྤྲུལ་མཁའ་འགྲོ་མ་དེ་ལྟུང་བས་ཕོག་པའི་དུས་ན་བྲམ་ཟེ་བཟའ་མི་གཉིས་ཀྱིས་སྨོན་ལམ་བཏབ་པ་དང་། རྒྱ་གར་ཤཱཀ་རིགས་སུ་སྐུ་འཁྲུངས་སྐད། རྒྱ་གར་གྱི་ཨ་ཙ་ར་པཎྜི་ཏ་གཅིག་གིས་མིང་བཏག་པས། ཡབ་རྒྱ་གར་གྱིས་ཨའི་དབང་ཕྱུག །ཡུམ་ལྷ་ཟ་ཀླུ་སྒྲོན་མ་གཉིས་ཀྱིས་སྨོན་ལམ་བཏབ་པའི་བུ་ཡིན་པས། སྨོན་ལམ་གྲུབ་ཐོག་གསུངས། ཁོང་ཡབ་ཡུམ་གཉིས་སྐྱིད་པ་དང་། དགའ་བ་དང་། དུས་གསུམ་གྱིས་སངས་རྒྱས་ལ་སྨོན་ལམ་བཏབ་ཅིང་མཆོད་པ་ཕུལ་བའི་ཡོན་ཏན་ཡིན་པས། ད་ཡང་མཆོད་པ་འབུལ་ཞིང་སྨོན་ལམ་བཏབ་ཟེར་ཞིང་། མཆོད་པ་རྒྱ་ཆེན་པོ་ཤུགས་ལྡན་གྱི་སྤྲིན་ཙམ་བཤམ། རྒྱལ་རྒྱུད་ཡ་ཏ་མ་ཐ་གཉིས་བོས། ཁོ་རང་གི་འཁོར་འབངས་རྣམས་བོས། སྲས་འཁྲུངས་པའི་ཕྱེ་མར་བྱས་ཐམས་ཅད་ཀྱིས་སྨོན་ལམ་གྲུབ་པ་ལགས་སོ་ཟེར་སྐད། ཁོང་རང་ལ་ཡང་སྐོར་ནོར་གླང་ཆེན་སྟོང་དང་། མ་ཧེ་ཡོད་པ་བརྒྱ་བརྒྱ་མིན་པ་ཀུན་བཀྱེས། དེ་ནས་ལོ་བཅུ་ལོ་ན་ཙ་མ་བསླབ་པས་ཡི་གེ་ཤེས། མ་བསྒྲུབ་པའི་བསྒོམ་དང་རྟོག་པ་འཆར། སློབ་དཔོན་བྷ་ར་སིདྡྷི་བྱ་བའི་དྲུང་དུ་སོང་། བསྒོམ་དང་རྟོགས་པ་ཕུལ། རྒྱུད་སྡེའི་དབྱེ་བསལ་བྱས། པཎྜི་ཏ་དེས་ཁྱོད་ཕའི་མིང་ཅི་ཡིན་གསུངས། ངའི་ཕའི་མིང་ནི་ཤཀ་རིགས་ཨའི་དབང་ཕྱུག་བྱ་བ་ཡིན། ཡུམ་ནི་ལྷ་ཟ་ཀླུ་སྒྲོན་བྱ་བ་ཡིན། དེ་གཉིས་ཀྱིས་སྨོན་ལམ་གྲུབ་པ་ཡིན་སྐད། ང་རང་ལ་ཡང་སྨོན་ལམ་གྲུབ་དུ་བརྟག་པ་ཡིན། དེ་ནས་སློབ་དཔོན་གྱིས་དེ་ཡང་ལས་དང་སྨོན་ལམ་ལ། རྟེན་འབྲེལ་འགྲིག་པའི་མིང་ཡིན། ད་ཡང་འདུལ་བའི་ཁྲིམས་བསྲུང་ན་དེས་ཆོག་གསུང་། དེ་ནས་ལོ་བཅུ་གསུམ་ལ་བླ་མའི་དྲུང་དུ་བསྡད། སྒྲ་ཚད་མ་དང་ཕ་རོལ་ཏུ་ཕྱིན་པ་རྒྱུད་ལ་ཤར། དེ་ནས་ཕྱི་རོལ་དུ་བྱོན་ནས་རྒྱ་གར་རྡོ་རྗེ་གདན་དུ་ཁ་བལྟས་ནས་སོང་། ཕྱི་པ་མུ་སྟེགས་པའི་གླིང་དང་། དུ་རུ་ཀའི་གླིང་ཆུང་རྣམས་ཀྱིས་ནང་ནས་སངས་རྒྱས་པ་ལ་ཆོས་བྱེད་པ་རྫུན་ཡིན་ཟེར་ནས། སྒྲོ་བཀུར་འདེབས་ནས་སྣང་། ཁོང་ལ་མུ་སྟེགས་ཀྱི་ཆས་ནི་མེད། སྔར་ནི་མུ་སྟེགས་པ་དང་བརྩོད་གླིང་ཅི་འདྲ་ཡོད་ནི་ཆ་མེད། དེ་ནས་ནང་པའི་སྡེ་ཨ་ཙ་ར་གཅིག་དེར་སྣང་བ་དང་འཕྲད། ཁྱོད་གང་ནས་འོང་ཟེར། ང་འདི་འདྲ་ཡིན་ཟེར་ཙ། ད་ཁྱོད་མུ་སྟེགས་ཀྱི་སྡེ་ལ་ཐེ་མདོག་གྱིས། དེ་མིན་ཁྱོད་བསད་པ་ཡིན་ཟེར། དེ་ནས་མུ་སྟེགས་ཀྱིས་བརྩོད་པ་བྱེད་དུ་བྱུང་པ་ལ། ད་ཡང་ཁྱེད་ཀྱི་སྡེ་ལ་འོང་བྱས་པ་ལས་ཁོང་རྣམས་དགའ་ནས་སང་ནང་པར་སྡོམ་པ་འབོག་གིས་ཟེར། དེ་ནུབ་ཞབས་ཏོག་གཟབ། མུ་སྟེགས་རྣམས་ཁོ་རང་ཆོས་སྤྱོད་ཚར་ནས། མཚན་ལ་རྡོ་རྗེ་གདན་ལ་འགྲོ་དགོས་བསམ་ཙ། སྒོ་རྣམས་འདན་པས་འགྲོ་ས་མ་རྙེད། སྒོ་བསྲུང་རྣམས་ལ་ཡུའུ་སྒོའི་ཕྱི་རོལ་ན། ཀ་ཀ་ལི་ལ་ཕྱག་དང་བསྐོར་བ་བྱེད་དུ་འགྲོ་བྱས་ཙ། སྒོ་བསྲུངས་དེས་དད་པ་ཆེ་བ་ཡིན་ནོ་སྙམས་ནས་སྒོ་ཕྱེས། ཁོ་རང་ཡང་ཕྱི་རོལ་དུ་ཀ་ཀ་ལི་ལ་ཕྱག་དང་བསྐོར་བ་བྱེད་ཅིང་བསྡད། དེ་ནས་རྡོ་རྗེ་གདན་དུ་ཁ་བལྟས་ནས་འོང་པ་ལ། ཉི་མ་དྲོས་ཙ་ན་རྡོ་རྗེ་གདན་དུ་ཕྱིན་ནས། ཁྱོད་གང་ནས་འོང་ཟེར་བས། སེར་སྐྱ་ཆེན་པོའི་གྲོང་ཁྱེར་དུ་སྐྱེས་པ་ཡིན། ངའི་ཕ་ལ་ཨའི་དབང་ཕྱུག་བྱ་བ་ཡིན། མ་ནི་ལྷ་ཟ་ཀླུ་སྒྲོན་བྱ་བ་ཡིན། སློབ་དཔོན་ནི་དྷརྨ་སིདྡྷི་བྱ་བ་ཡིན། རྡོ་རྗེ་གདན་དུ་རྩོད་པ་ལ་ཡོང་བ་ཡིན་བྱས་ཙ་དེར་ནང་པ་དང་རྩོད་པ་བྱས་ཙ། ཁོང་ལ་བརྟེན་པ་གཅིག་ཀྱང་མ་བྱུང་། ཕྱི་པ་མུ་སྟེགས་པའི་ཆས་བྱས་ནས་རྩོད་ཙ་ཁོང་རྒྱལ་དུ་སོང་། དེ་ནས་མུ་སྟེགས་ཀྱི་གླིང་དུ་རྐང་མགྱོགས་པ་བཏང་ནས། མུ་སྟེགས་ཀྱི་སྡེ་ཚན་རྩོད་པ་ལ་ཡར་ཤོག་བྱས་པས། ཞག་གསུམ་དུས་ཐོག་ལ་སླེབ་ནས་ཕྱིན། ནང་པའི་གྲལ་གཡས་སུ་བྱས། མུ་སྟེགས་ཀྱི་གྲལ་གཡོན་དུ་བྱས། ནང་པའི་སྡེ་ཚན་འབུམ་ཚོ་བཅུ་གསུམ་འདུས། ཕྱི་པ་ལ་འབུམ་ཚོ་བཅོ་བརྒྱད་འདུས། ཟླ་བ་གཅིག་དང་ཞག་བདུན་གྱིས་བར་དུ་རྩོད་པ་བྱས། མུ་སྟེགས་ཀྱི་སྡེ་ཚན་འབུམ་ཚོ་བཅུ་བདུན་དེ་ནང་པ་ལ་བཙུད། འབུམ་ཚོ་གཅིག་དེ་ཁོ་རང་གི་ཡུལ་ལ་སླར་ལྡོག །དེར་ཡང་འགྲོ་དོན་རྒྱ་ཆེན་པོར་འཕེལ་ལོ། །དེ་ནས་སེར་སྐྱའི་ཡུལ་དུ་བྱོན། ཡབ་གྲོང་པ་དང་དུས་གཅིག་ལ་སེར་སྐྱའི་པཎྜི་ཏ་འབུམ་ཚོ་གསུམ་བསྡུས་ནས། དེར་ཡང་འགྲོ་དོན་རྒྱ་ཆེན་པོ་འཕེལ་ལོ། །ཡབ་ཀྱི་དགེ་བ་གྲངས་མེད་པ་བྱས། དགེ་རྩ་དེ་ཚར་ནས་ཡུམ་ཡང་གྲོང་དེ་ལ་ཡང་དགེ་རྩ་གྲངས་མེད་བྱས། གླང་ཆེན་སྟོང་། མ་ཧེ་བཞོ་མ་སྟོང་། མི་བཞོ་བ་སྟོང་དང་སུམ་སྟོང་། རྒྱལ་པོའི་སྐོར་ཆ་ཐམས་ཅད་བླ་མ་དང་པཎྜི་ཏའི་ཕྱོགས་སུ་བཏང་། ཀུན་ལ་འགྱེད་དང་མཆོད་པ་བྱས། སྐོར་མཛོད་བྲན་གཡོག་དང་བཅས་པ་ཕས་སྤུན་ལ་གཏད། ནམ་གྱི་ཐོ་རང་ལ་གཅིག་པུར་ཟང་གླིང་གྱི་གྲོང་ཁྱེར་དུ་བྱོན། ཟངས་གླིང་དུ་གུ་རུ་རཏྣ་བྱ་བའི་དྲུང་དུ་རྒྱུད་ལ་ཤར་བའི་རྟོགས་པ་ཕུལ། ལོ་གསུམ་བསྡད་ནས་ཉམས་ལེན་ག་དར་མཛད། དེ་ནས་རྡོ་རྗེ་གདན་གྱི་བྱང་ཕྱོགས་སུ་པུརྣ་ཉེ་བའི་དུར་ཁྲོད་གཅིག་ཡོད། དུར་ཁྲོད་ཀྱི་གླིང་དེར་ཉལ་ནས་སྡད་ཙ། དུར་ཁྲོད་ཀྱི་མཁའ་འགྲོ་མ་གཅིག་རུས་པའི་རྒྱན་ཆ་དྲུག་ཐོག་ནས། རྒྱ་གར་གྱི་ཨ་ཙ་ར་ཁྱོད་ངའི་དུར་ཁྲོད་ཀྱི་གླིང་མིན་པ་ཉལ་ས་མ་རྙེད་པ་ཨེ་ཡིན་ཟེར་ནས། འཇིགས་པའི་སྐད་དུ་མ་སྟོན། དེ་ནས་ཁོང་གིས་གསོལ་བ་བཏབ་ཅིང་བསྒོམ། མཁའ་འགྲོ་མ་དེའི་ཞལ་ནས། ཨ་ཙ་ར་ཁྱོད་དུར་ཁྲོད་དུ་ཉལ་བའི་ཆོས་མི་ཤེས་པ་གཅིག་ཟེར། དེ་ནས་རྡོ་རྗེ་གདན་གྱི་བྱང་ཕྱོགས་སུ། པོ་ཏ་ལའི་རི་ལ་བྱོན་ཏེ་བྲག་ཕུག་པ་ཏྲ་བྱ་བ་སྣང་། དེར་རྒྱ་གར་གྱི་པཎྜི་ཏ་གཅིག་བསྒོམ་ཞིང་བཞུགས་ཟིན། དེའི་དྲུང་དུ་ཕྱིན་ནས་སེམས་ལ་ཕན་པའི་ཆོས་ཅིག་ཞུ་བྱས་པས། ཨ་ཙ་ར་དེའི་ཞལ་ནས། ལར་ལྟ་རྟོགས་སེམས་ལ་གྱིས་དང་། འོད་གསལ་ནང་ནས་འཆར་གསུང་། བོད་ཀྱི་ཡུལ་དུ་འགྲོ་དོན་བྱེད་དགོས་པས། དགེ་སྦྱོར་མྱུར་དུ་སྐྱོང་གཅིག་གསུངས། ཨ་ཙ་ར་དེ་སྐད་གསུང་ནས་མི་སྣང་སྐད། དེ་ནས་ཁོང་གིས་སེམས་བུན་ལོང་གིས་སོང་ནས། ཐུགས་ལ་མི་བདེ་བ་མང་དུ་བྱུང་། དབུ་གཏུམ་ནས་མལ་དུ་གཟིམ་ཙ། ནམ་གྱི་ཐོ་རང་ཁར་བྲག་གི་གློ་ནས་བུད་མེད་གཅིག་གིས་སྐད་ལྷང་གིས་འབོད་པ་གཅིག་བྱུང་ཙ། ཨ་ཙ་ར་ཁྱེད་མྱ་ངན་གྱི་མཚོ་ལ། བྱང་ཆུབ་ཀྱིས་སེམས་རྐྱལ་དུ་མ་བཅུག་ལ་ཡར་ལོང་དང་། ཁྱེད་ཀྱིས་སེམས་དེ་བོད་རིགས་ངན་གྱི་ཡུལ་དུ་འགྲོ་དགོས་ཟེར་བ་སྙམ་བྱུང་སྟེ། བོད་ཡུལ་དུ་འགྲོ་དོན་མཛད་ནས་ཕྱིར་མི་ལྡོག་པའི་ས་ཐོབ་སྐད། ཁོང་གིས་ཐུགས་ལ་དེ་བས་ཀྱང་སེམས་འཁྲུགས་ཏེ་གཟིམ་ནས། ནམ་ལངས་ཙ་ན་བུད་མེད་དམར་མོ་གཅིག་གིས་ང་བོད་ཡུལ་ནས་འོང་བ་ཡིན་ཟེར། རིགས་ལྡན་སྐྱེས་བུ་ཨ་ཙ་ར། ཁྱེད་དང་པོ་སྐུ་འཁྲུངས་པ་སུམ་ཅུ་རྩ་གསུམ་དགའ་ལྡན་ལྷའི་གནས་སུ་སྐུ་འཁྲུངས། དེ་ནས་རྒྱ་གར་སེར་སྐྱ་ཏུ་སྐུ་འཁྲུངས། འགྲོ་དོན་མང་དུ་མཛད། ད་བོད་ཡུལ་དུ་འགྲོ་དོན་མཛད་ནས་སུ། ཕྱིར་མི་ལྡོག་པའི་ས་ཐོབ་པ་ཡིན་གསུངས་སོ། །རྒྱ་གར་གྱི་ཆོས་ཐམས་ཅད་བོད་ཡུལ་དུ་དར་བ་ཡིན་གསུངས། མཁའ་འགྲོ་ལྔའི་སྒྲུབ་པ་གྱིས་ཤིག་གསུངས་ནས། ལུང་བསྟན་ནོ། །དེ་ནས་མལ་དུ་བཞུགས་ནས། མཁའ་འགྲོ་མ་ལྔའི་བསྒྲུབ་པ་མཛད་ཙ་ཞག་གསུམ་ནས་འཚོ་བ་འདྲེན་པ་བྱུང་། ཟླ་བ་གསུམ་ན་མཁའ་འགྲོ་མ་ལྔའི་ཞལ་མངོན་སུམ་དུ་མཐོང་སྟེ། མཁའ་འགྲོ་མ་ལྔས་ཨ་ཙ་ར་སྨོན་ལམ་འགྲུབ་གྱི་ཐུགས་བསྒྱུར་ཏེ། ད་ནི་བོད་ཡུལ་དུ་འགྲོ་དོན་ལ་ཡ་ང་སྤངས་དགོས་པ་གཅིག་བྱུང་། ཁོང་གིས་ཐུགས་བསྒྱུར་ནས་འགྲོ་དོན་རན་ཀྱང་རྒྱ་གར་གྱི་ཡུལ་དུ་ཆགས་པའི་སེམས་དང་མ་བྲལ་ནས། རྒྱ་གར་གྱིས་ཡུལ་ན་མཁའ་འགྲོ་མ་ལྔ་བསྒྲུབ་སྟེ་ཁོང་གིས་ཐུགས་བསྒྱུར་ཐུབ་སྟེ། དེ་ནས་ཉིན་གཅིག་ཙ་མཁའ་འགྲོ་མ་སྐུ་མདོག་དཀར་མོ་གཅིག་གིས། ཨ་ཙ་ར་སྨོན་ལམ་གྲུབ་ཁྱེད་རིགས་པ་དྲི་མེད་ངང་ལ་བསྟིམ་གཅིག་གསུངས། ཁོང་གིས་རྒྱབ་ཏུ་སིལ་ཟེར་བའི་སྣང་བ་ཅིག་བྱུང་བ་དང་། ཕྱི་མིག་གཅིག་བལྟས་ཙ་མཁའ་འགྲོ་མ་སྐུ་མདོག་མཐིང་ནག་གཅིག་སྐུ་ལ་རུས་པའི་བརྒྱན་གྱིས་བརྒྱན་པ་གཡས་ན་གྲི་གུག །གཡོན་ན་ཐོད་ཁྲག་བསྣམས་པ། ཁ་ཊྃ་ཁ་གྲུ་མོ་ཏུ་བཅུག་པ་གཅིག་སྣང་བས། ཨ་ཙ་ར་སྨོན་ལམ་གྲུབ་ཁྱོད་བོད་ཡུལ་དུ་འགྲོ་དོན་ལ་ཤོག་ཅིག་ཟེར་ནས། གྲི་གུག་སྐེ་ལ་རྒྱབ་སྟེ་མགོ་ལུས་ཕྱེས། བེམ་རིག་ཕྲལ་ནས་མཁའ་འགྲོ་མ་ལ་རིགས་པ་ཞུགས་ཏེ་བོད་ཡུལ་དུ་འོང་ངོ་། །དེ་ནས་བོད་ཀྱི་དབུས་ངམ་ཤོད་ཀྱི་ཡུལ་སྨད་གྲོང་ཚོ་མེར་རེ་བྱ་བ་ཡབ་ཁེར་གད་ཆོས་ལྷ་བྱ་བ་དང་། ཡུམ་ཕྱུག་མོ་འབུམ་ལྕམ་གཉིས་ཀྱི་ལྷུམས་སུ་ཞུགས་སོ། །དེ་ཡན་ཆད་རྒྱ་གར་རྡོ་རྗེ་གདན་དང་སེར་སྐྱའི་གྲོང་ཁྱེར་ཆེན་པོ་དང་། མུ་སྟེགས་པ་རྣམས་ནང་པའི་སྡེ་ལ་བཀོད་པ་དང་། བོད་ཡུལ་དུ་འགྲོ་དོན་ལ་བྱོན་པའི་ལུང་སྟོན་དང་གླེང་གཞིའི་ལེའུ་ལས། གླིང་གཉིས་སུ་འགྲོ་དོན་ཚར་བའི་ལེའུ་སྟེ་གཉིས་པའོ།། ༈ །།ངམ་ཤོད་སྨད་ཀྱི་ཡུལ་གྲོང་མཚོ་མེར་མེར་བྱ་བར་ཡབ་ཁེར་གད་ཆོས་ལྷ་བྱ་བ། ཡུམ་ཕྱུགས་མོ་འབུམ་ལྕམ་བྱ་བ་གཉིས་ཀྱི་ལྷུམས་སུ་ཞུགས་པའི་ལུས་པོ་གཅིག་ཡོད་དོ། །མའི་ལུས་ལ་ཡོད་པའི་དུས་སུ་ཟླ་བ་གསུམ་རེད་ཙ་ལུས་ལ་སྒྲོན་མེ་སྟེག་པ་རྨིས། ཟླ་བ་དྲུག་རེད་ཙ་ཁྱིམ་ཡང་སྒྲོན་མེས་གང་བ་རྨིས། ཟླ་བ་དགུ་རེད་ཙ་ངམ་ཤོད་ཀྱི་ཡུལ་སྨད་གྲོང་ཚོ་མེར་མེར་བྱ་བ་སྒྲོན་མེས་གང་བ་རྨིས། ཟླ་བ་བཅུ་ངོ་ལོན་ཙ་ག་ཏེའི་སྔགས་དང་ཧ་རི་ནི་སའི་སྔགས་བཟློ་བ་དང་། མ་བརྒྱུད་ཀྱི་སྔགས་བསྒྲང་བ་རྣམས་མས་ཐོས་ནས་ཡབ་ལ་དྲིས་ཏེ། ངའི་ལུས་ལ་ཡོད་པ་དེ་ནི་ལྷ་མི་གང་གིས་སྤྲུལ་པ་ཡིན་མི་ཤེས། བདུད་ཀྱི་སྤྲུལ་ཨེ་ཡིན། སྔོན་ནས་ཡོད་པ་དེ་དང་མི་འདྲ་བ་གཅིག་བྱུང་ཟེར། ཡབ་ཀྱི་ཅི་འདྲ་བ་གཅིག་བྱུང་ཟེར་ཙ། ངའི་ལུས་པོ་ནང་དུ་ག་ཏེའི་སྔགས་དང་། ཧ་རི་ནི་སའི་སྔགས་བཟློ་བ་དང་དེ་འདྲ་བ་གྲག་ཟེར། དེ་ནས་ཡབ་ཀྱིས་ཟེར་བ། ག་ཏའི་སྔགས་ནི་བཅོམ་ལྡན་འདས་ཀྱི་སྙིང་པོ་ཡིན། ཧ་རི་ནི་ས་ནི་མཁའ་འགྲོ་ཡོངས་རྫོགས་ཀྱི་སྙིང་པོ་ཡིན། བདུད་ཀྱི་སྤྲུལ་པ་ནི་ཨེ་བོ་ཡིན། མི་ལ་མ་བཟློ་གསུངས། དེ་ནས་ཟླ་བ་བཅུ་ལ་བཙས་སྟེ། མས་བལྟས་ཙ་ཤ་མདོག་དཀར་བ་གཅིག་སྣང་། དཔྲལ་བ་ན་སྤྱན་གསུམ་སྣང་། ཁ་ན་ཨ་བགྲང་འདུག །ལྕེ་ཐོག་ན་ཡི་གེ་ཧྲཱིཿདམར་པོ་གཅིག་གིས་འཁོར་ཞིང་སྣང་བ་མཐོང་། མས་བླང་བས་མཛོད་ཀྱིས་སྒོ་ཕགས་སུ་བྷ་ཏོ་ཧྲུལ་པོ་གཅིག་གིས་ནང་དུ་བསྟུམ་ནས་བཞག་ཕྱིར་ཉིན་ཉི་མ་ཤར་དྲོས་ཙ་ཡབ་ཙར་ཕྱིན་ཏེ། ང་ལ་ཁར་སོང་བཙས་པ་དེ་ནི་བུ་མོ་གཅིག་སྣང་། བཙས་མ་ཐག་ན་ཁ་ལ་ཨ་བགྲང་འདུག །དཔྲལ་བ་ན་མིག་གསུམ་སྣང་། ལྕེ་ཐོག་ན་ཡི་གེ་ཧྲཱིཿདམར་པོ་གཅིག་འཁོར་སྣང་། འདི་མི་མ་ཡིན་གྱི་སྤྲུལ་པ་ཨེ་ཡིན། འོ་ཅག་གཉིས་ཀྱི་ཉམས་ལེན་ལ་འོང་བ་ཨེ་ཡིན་གསུངས། དེ་ནས་ཡབ་ཀྱིས་ཁྱེར་ལ་ཤོག་གསུངས། ཡབ་ལ་བསྟན་ཏེ། ཡབ་ཀྱིས་ཟེར་ནས་འདི་གང་ཡིན་ཤན་མ་ཕྱེད་ཀྱི་བར་མི་ལ་གསང་ངོ་། །ཁྱེད་ཀྱང་སྒོར་མ་རྒྱུག་ཟེར། མ་ཡང་ཟླ་བ་གསུམ་ལ་ངོ་མ་སྤྲད་ནས་གསོས་ཙ་སྐྱེད་ཆེ་ལ་ཡིད་དུ་འོང་བ་གཅིག་བྱུང་། མས་ཡིད་དུ་འོང་བ་ཅིག་བཟླས་ཙ་ཡབ་ཡུམ་གཉིས་ཀྱི་མཚན་གསོལ་ནས། སྒྲོན་རྩེ་མ་མིང་བཏག །དེ་ནས་ལབ་ལུང་དེ་ན་འཁྲུགས་པ་དང་། ནད་ཡམ་རྣམས་ཀྱང་རྒྱུན་ཆད་དོ། །དེར་ལོ་བཞི་ལོན་ནས་ཕོ་མོ་གཉིས་དགེ་བཤེས་ཨན་སྟོན་གྱི་རྩར་ཡོད་པ་རབ་ཏུ་བྱུང་ནས། མིང་ཡང་འབུམ་ཙེར་བཏག །དེའི་ཙར་ཕྱིན་ཙ། དགེ་བཤེས་ཨན་སྟོན་གྱི་ཞལ་ནས། འབུམ་མེ་ཁྱོད་ཀྱི་བུ་མོ་འདི་ལ་མཁའ་འགྲོ་མའི་མཚན་རྟགས་རྣམས་ཚང་ནས་འདུག་པས། འདི་ལ་ཀློག་གཅིག་སློབ་དང་། ཆོས་སྐད་བཟང་པོ་གཅིག་འོང་བར་སྣང་གསུང་། དེ་ནས་ཡི་གེ་བསླབ་པས་ལོ་ངོ་བཅུ་ལོན་ནས་ཀློག་མཁས་པའི་གྲགས་ཐོག་ཆོད་པ་བྱུང་ངོ་། །དགེ་བཤེས་རྣམས་དང་ཐམས་ཅད་ཀྱི་ཡིད་དུ་འོང་བ་གཅིག་བྱུང་ངོ་། །དེ་ནས་དབྱེའི་ཕྱི་རོལ་ཏུ་རྒྱལ་གྱི་སྟོན་མོ་གཅིག་བྱུང་། དེའི་དབུས་སུ་ཐམས་ཅད་སྟོན་མོ་ལ་སོང་བས། དེར་འདུས་པའི་ཁྲོམ་པ་རྣམས་ཀྱི་བུ་མོ་འདི་གང་ནས་འོང་བ་ཡིན་ཟེར། འདི་ནི་ལབ་བྱ་བ་ནས་འོང་བ་ཡིན། མའི་ལུས་ལ་ཡོད་པའི་དུས་སུ་སྒྲོན་མེ་བཏེགས་པ་དང་། ཁྱིམ་སྒྲོན་མེས་གང་བ་དང་། ལབ་ལུང་པ་ཡང་སྒྲོན་མེས་གང་བ་རྨིས་སྐད། དེ་ནས་ཁྲོམ་པ་རྣམས་ཀྱིས་འདི་འོངས་ཡང་ལབ་ནས་འོང་། མིང་ཡང་སྒྲོན་ཙེ་མིང་། ད་ལབ་སྒྲོན་མིང་ཐོག་ཟེར། ཁྲོམ་པ་རྣམས་ཀྱིས་མིང་ལབ་སྒྲོན་དུ་གསོལ་ལོ། །དེ་ནས་གཡུ་རུ་གྲྭ་ཐང་དུ་བྱོན་གྲྭ་པ་མངོན་ཤེས་ཅན་གྱི་དྲུང་དུ་རབ་ཏུ་བྱུང་ནས་བཙུན་མ་བྱས། གྲྭ་པ་མངོན་ཤེས་ཅན་གྱི་ཙར་བཀའ་རྒྱས་འབྲིང་བསྡུས་གསུམ་ཀླག་ཅིང་བསྡད་ཙ། རྒྱ་ཕོ་བ་གྲོང་འཇུག་ཀྱི་འབུམ་ཆ་གཅིག་ཀླག །དེའི་ཉིན་པར་གྲྭ་པ་མངོན་ཤེས་ཅན་གྱི་གསུངས་པ། ཇོ་མོ་ཁྱོད་དར་ཞྭ་འདི་གྱོན་ལ་ཀློག་དང་། ཆོས་སྐད་བཟང་པོ་གཅིག་འདུག་སྐད། མིང་ཡང་ཇོ་མོ་ཞྭ་ཆུང་ཅན་དུ་བཏག །རྒྱ་ཕོ་བ་དྲོད་འཇུག་གི་ཀློག་སྐད་དང་། ཇོ་མོ་ཞྭ་ཆུང་ཀློག་སྐད་གཉིས་འགྱུར་གྱི་བཟང་ཟེར་ནས་ཐོག་ཆོད་པ་བྱུང་ངོ་། །དེ་ནས་གཡུ་རུ་གྲྭ་ཐང་དུ། གྲྭ་པ་མངོན་ཤེས་ཅན་གྱི་གཟིགས་ནས། བླ་མཆོད་བྱེད་ཅིང་འདུག་ཙ། རྒྱལ་གྱི་ལྷ་ཁང་དུ་རྒྱ་གར་གྱི་ཨ་ཙ་ར་གཅིག་ཕྱིན་ཟིན་ཟེར་བའི་སྐད་ཅིག་གྲགས། ཨ་ཙ་རས་མངོན་ཤེས་ཀྱིས་གཟིགས་ནས། རྒྱ་གར་གྱི་ཡུལ་སེར་སྐྱའི་གྲོང་ཁྱེར་དུ་སྐྱེས་པའི་པཎྜི་ཏ་ཨ་ཙ་ར་གཅིག་པོ་ཏ་ལའི་ཏ་ལའི་བྲག་ཕུག་ཏུ་སྒོམ་ཞིང་བཞུགས་ཙ། མཁའ་འགྲོ་མ་སྐུ་མདོག་དཀར་མོ་གཅིག་གིས་ལུང་བསྟན་བྱས། དེ་ནས་མཁའ་འགྲོ་མས་ལས་མཁན་བྱས་ནས་བསྒྲལ། དེའི་ཚེ་འཕོས་ནས་ལབ་ཀྱི་ལུང་པར་སྐུ་འཁྲུངས་ཏེ། དེང་སོང་གྲྭ་པ་མངོན་ཤེས་ཅན་གྱི་དྲུང་རབ་ཏུ་བྱུང་ནས། བླ་མཆོད་བྱེད་ཅིང་ཡོད་པར་གཟིགས། དེ་ལ་སང་ནང་པར་མཇལ་དུ་འགྲོ་དགོས་བསམ་པའི་ཐུགས་དགོངས་ཅིག་བྱུང་། དེ་ནུབ་ཇོ་མོའི་རྨི་ལམ་ན། མཁའ་འགྲོ་མ་སྐུ་མདོག་དཀར་མོ་ཅིག་བྱུང་བས། རྒྱ་གར་ནས་བྱུང་བའི་ཨ་ཙ་ར་གཅིག་བོད་ཡུལ་དུ་འགྲོ་དོན་ལ་བྱོན་པ་དེ་སང་ནང་པར་མཇལ་དུ་འོང་བར་ཡོད་གསུངས། ཁོང་གི་ཐུགས་ལ་ང་ལ་ཨ་ཙ་ར་མཇལ་དུ་འོང་བ་འདི་ཅི་ཡིན་ཨང་རྨི་ལམ་ལ་དགོངས་ནས། ཁྱོད་ལ་མཚན་ཇོ་མོ་བྱ་བ་ཡིན། ཨ་ཙ་ར་ནག་པོ་དེ་ལ་དམ་པ་རྒྱ་གར་བྱ་ཡིན་ཟེར། དེ་ནས་ཡར་སད་ཙ་ཅི་ཡང་མི་སྣང་སྐད། རྨི་ལམ་འཁྲུལ་པ་ཡིན་གྱིས་འཛིན་པ་མེད་དོ་གསུང་སྐད། དེ་ནས་ཕྱི་ནང་ཉི་མ་ཤར་ཙ་ན་གཡུ་རུ་གྲྭ་ཐང་གི་སྒོ་ཆེན་ལ་བཏུག་དེ་བྱོན་ཙ། དམ་པ་ཡང་རྒྱལ་གྱི་ལྷ་ཁང་གྲ་དྷེའི་འཕྲེང་ལ་ཉུག་སྟེ་བྱོན་ནས་འོང་བ་ཏུག་གིས་འཇལ་ལོ། །ཕྱག་བྱས་ཤིང་ཁ་ཁར་སོང་། དབུ་གཉིས་སྟུག་རེས་བྱས་སྐད། ཇོ་མོས་གསུངས་ནས་དམ་པ་བོད་ཡུལ་དུ་འགྲོ་དོན་ལ་བྱོན་པ་ངོ་མཚར་ཆེ་གསུངས། དམ་པའི་ཞལ་ནས་ཀྱང་། ཁྱེད་ཡེ་ཤེས་མཁའ་འགྲོ་མ་ཡིན་ཏེ། ལབ་ཏུ་སྐུ་འཁྲུངས་ནས། བོད་ཡུལ་དུ་འགྲོ་དོན་ལ་བྱོན་པ་ངོ་མཚར་ཆེ། ཁྱེད་ཀྱི་ཆོས་རྒྱུད་འདི་དུས་མཐར་མཁའ་ལ་ཉི་མ་ཤར་བ་ལྟར་འོང་བ་ཡིན་གསུངས། དེ་ན་ཨ་ཙ་ར་ནག་པོ་དམ་པ་རྒྱ་གར་བོད་ཡུལ་དུ་གྲགས་པ་ཡིན་གསུངས། དེ་ནས་ཨ་མ་ཇོ་མོ་ཡང་ནང་དུ་བྱོན་ནས། ཉི་ཁྲི་ཀློག་པའི་སྐབས་སུ་གཟིགས་རྟོགས་མཛད་ནས་བདུད་ཀྱི་ལེའུ་ལས་བློ་གཅིག་རྟོགས་ནས་གྲོལ་སྟེ། རྟོགས་པ་ཁྱད་པར་ཅན་རྒྱུད་ལ་སྐྱེས་སོ། །བཀའ་ཐོག་ནས་གྲོལ་བའི་གྲོལ་ལུགས་བཀའ་དང་མི་འགལ་བའི་ཕྱོགས་འགའ་ཞིག་འབྱུང་སྟེ། དང་པོ་ཟས་ལ་ཕྱོགས་རིས་མེད་པའི་རྟགས་སུ། སྔར་ཟས་དཀར་གསུམ་མངར་གསུམ་མིན་པར་ཟ་བ་ལ། དེ་ཕྱིན་ཆད་མཛེ་ཟས་དང་སྤྲང་ཟས་ཟ་བ་གཅིག་བྱུང་། གཉིས་པ་གོས་ཀྱི་ཕྱོགས་རིས་ཞིག་པའི་རྟགས་ལ། སྔར་ཆོས་གོས་དུར་སྨྲིག་མིན་པ་མི་གོན་པ་ལ། ཕྱིས་མཛེ་གོས་དང་སྤྲང་གོས་གྱོན་པ་གཅིག་བྱུང་ངོ་། །གསུམ་པ་གནས་ཀྱི་ཕྱོགས་རིས་ཞིག་པའི་རྟགས་སུ། སྔར་གནས་སྡེ་དགོན་མིན་པ་མི་འདུག་པ་ལ། ཕྱིས་མཛེ་གནས་དང་སྤྲང་གནས་ལམ་འཕྲང་སྲང་དུ་འདུག་པ་གཅིག་བྱུང་། བཞི་པ་གྲོགས་ཀྱིས་ཕྱོགས་རིས་ཞིག་པའི་རྟགས་ལ། སྔར་མཁན་སློབ་དང་མཚུངས་པའི་སྡེ་དང་འགྲོགས་པ་ལ། ཕྱིས་མཛེ་སྤྲང་དང་འགྲོགས་པ་གཅིག་བྱུང་། ལྔ་པ་ཡུལ་གྱི་ཕྱོགས་རིས་ཞིག་པའི་རྟགས་སུ། སྔར་མི་ཆོས་ཀྱི་ཡུལ་དབྱེའི་ལབ་དང་། ལྷ་ཆོས་ཀྱི་ཡུལ་གཡུ་རུ་གྲ་ཐང་དུ་འདུག་པ་ལ། དེ་ཕྱིན་ཆད་རྒྱལ་ཁམས་ཕྱོགས་མེད་དུ་གཤེགས་པ་གཅིག་བྱུང་། དེ་ལ་བཀའ་དངོས་དང་མི་འགལ་བ་ཉི་ཁྲིའི་ནང་ནས། གཟུགས་ནས་རྣམ་མཁྱེན་གྱི་བར་དུ་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ། །ཅེས་པས། གཟུགས་དང་གཟུགས་ཀྱི་དེ་བཞིན་ཉིད་ལ་གཉིས་སུ་མེད་དོ། །གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ། །ཅེས་སོ། །དེ་ནས་དགུང་ལོ་སུམ་ཅུ་རྩ་བདུན་ལོན་ཙ། བླ་མ་རིན་པོ་ཆེས་ངོ་སྤྲོད་ཀྱི་བརྒྱུད་པ་མ་ཆད་པ། བྱིན་རླབས་ཀྱི་བརྒྱུད་པ་མ་ཆད་པ། ན་བུན་མ་ཡལ་བ་ཡིན་སྐད། གཉིས་པ་ཉེ་བའི་བརྒྱུད་པ་ནི། ཨ་མ་ཇོ་མོ་ཡན་ཆད་དུ་ཆོས་སྤྱིའི་བརྒྱུད་པ་ནི་ཡོད། གཅོད་ཡུལ་དུ་གྲགས་པའི་བརྒྱུད་པ་ནི་མེད། ཨ་མ་ཇོ་མོ་ནི་གང་ཟག་རང་བརྒྱུད་པ་མ་ཡིན། ཡེ་ཤེས་ཀྱི་མཁའ་འགྲོ་མ་ཡིན། སྙིགས་མར་གདུལ་བྱར་དུས་ལ་བབ་པ་ཡིན་ནོ། །བཅོམ་ལྡན་འདས་རྒྱལ་བ་ཤཱཀྱ་ཐུབ་པའི་བཀའ་རྒྱས་འབྲིང་གཟིགས་རྟོགས་མང་དུ་མཛད། རྟོགས་པ་ཁྱད་པར་ཅན་བརྒྱུད་ལ་སྐྱེས། དེ་ནས་གྲྭ་པ་མངོན་ཤེས་ཅན་ལ་དབང་གཅིག་ཞུ་བྱས་ཙ་ངས་ཁྱོད་ལ་དབང་བསྐུར་མི་ནུས། དབང་སྐྱོ་སྟོན་བསོད་ནམས་བླ་མ་ལ་ཞུས་ཟེར་ནས་ལུང་བསྟན། དེ་ལ་བར་ཆད་མི་འོང་ངམ་བྱས་པས་མི་འོང་གསུང་། དེ་ལ་བརྟེན་ནས་སྐྱབས་འགྲོ་ཡན་ལག་བརྒྱད་པ་མཛད། ཕྱིས་སྐྱོ་སྟོན་བསོད་ནམས་བླ་དང་མཇལ་ནས་འབུལ་བ་ཆེན་པོ་བྱས་ཏེ་ང་ལ་དབང་བསྐུར་གཅིག་ཞུ་ཞུས་པས། གྲྭ་པ་མངོན་ཤེས་ཅན་གྱི་ལུང་བསྟན་ཡིན་ཞུས། དགེ་བཤེས་ཀྱི་སྣོད་ལྡན་དུ་གཟིགས་ནས་དབྱེའི་ལྷ་ཁང་དུ་དབང་བཞི་རྫོགས་པར་གནང་། དེའི་ནུབ་མོ་ཇོ་མོས་ལུས་ཁྲུ་གང་གི་ས་ལ་མ་རེག་པར་ཞི་བའི་གར་ཐབ་ཉི་ཤུ་རྩ་གཅིག་མཛད། གསུང་སཾ་ཏྲི་ཏའི་སྐད་མཛད། ཐུགས་ཐོག་པ་མེད་པ་ཏིང་ངེ་འཛིན་དུ་མ་མཛད། ཁང་པའི་གྱང་ལ་ཐོག་པ་མེད་པར་ཏལ་གྱི་བྱོན་ནས། སྡོང་པོ་གསེར་གླག་ཅན་དུ་ཀླུ་རྒྱལ་དྲག་པོ་ལག་སྐྱོངས་བྱ་བ་གནས་པར་ཐོག་པ་མེད་པའི་ཏིང་ངེ་འཛིན་མཛད། ཀླུ་དྲག་པོ་ལག་སྐྱོངས་ན་རེ། སྔར་འདི་འདྲ་བའི་ཆོས་བརྒྱུད་ཡོད་མ་མྱོང་། ཁྱོད་ཤ་ལ་དགའ་བའི་ཀླུ་རིགས་རྣམས་འདིར་འདུས་དང་ཟེར་ནས་ཀླུ་རྣམས་ཀྱི་ཆོ་འཕྲུལ་སྣ་ཚོགས་བསྟན། ཁོང་གི་ལུས་པོ་སྦྱིན་པར་བཏང་། སེམས་ཆོས་ཉིད་གཏེར་དུ་སྦས། ཀླུ་རྣམས་ཀྱིས་ཆོ་འཕྲུལ་ཇི་ལྟར་བསྟན་ཀྱང་མ་ཚུགས། ཀླུ་རྣམས་ཀྱིས་ཕྱག་འཚལ་བ་དང་། བསྐོར་བ་བྱེད་པ་བྱུང་ངོ་། །སྲོག་སྙིང་ཕུལ་བྱུང་ངོ་། །ཐོ་རས་སྐྱ་རིང་ཤར་བའི་དུས་སུ་ཐམས་ཅད་རྗེ་བཙུན་སྒྲོལ་མའི་ཞལ་གཟིགས། ལབ་ཀྱི་སྒྲོན་མ་ཁྱོད་ཆུ་མིག་གཉན་ཁྲོད་བརྒྱ་རྩ་བརྒྱད་ལ་བསྒྲུབ་པ་མཐར་སྐྱོལ་དང་། ཕྱིར་མི་ལྡོག་པའི་ས་ནོན་པ་ཡིན། གཞན་ཡང་ལུང་བསྟན་མང་དུ་མཛད། ཕྱིར་ནང་མཆེད་གྲོགས་རྣམས་ཚོལ་དུ་ཕྱིན་ཏེ་བླ་མའི་དྲུང་དུ་ཁྲིད་ནས། མདངས་ཇོ་མོས་དབང་མ་ཐོབ་བྱས་ཙ། བླ་མའི་ཞལ་ནས་མདངས་འདུས་བྱས་རྫས་ཀྱི་དབང་དེ་ཁྱེད་རྣམས་ཀྱི་ཐོབ། ཆོས་ཉིད་དོན་གྱི་དབང་དེ་ཇོ་མོ་འདིས་ཐོབ་གསུངས། དགེ་བཤེས་དབྱེན་སྟོན་ལས་ཡང་རྫོགས་ཆེན་གྱི་ཆོས་སྐོར་རྣམས་གསན་ནོ། །གྲྭ་ཕ་མངོན་ཤེས་ཅན་ལས་ཕར་ཕྱིན་གྱི་ཞལ་བཀའ་གདམ་གྱི་ཆོས་རྣམས་གསན་ནོ། །དགེ་བཤེས་ཤུད་བུ་ཞྭ་དམར་ཅན་ལ་དབང་སེམས་སྒོམ་གྱི་སྐོར་རྣམས་གསན་ནོ། །དགེ་བཤེས་ཡང་རྩེ་བ་ལས་ཕྱག་རྒྱ་ཆེན་པོའི་སྐོར་རྣམས་གསན་ནོ། །དེ་རྣམས་ཀྱི་ནང་ནས་དགེ་བཤེས་བསོད་ནམས་བླ་མ་དེ་རྩ་བའི་བླ་མ་ཡིན་ནོ། །ཐོས་བསམ་གྱི་སྒྲོ་འདོག་ཀྱང་དེ་ཙམ་གཅིག་བཅད། ལོ་སུམ་ཅུ་རྩ་གསུམ་ཚུན་ཆད་ལ་བཙུན་མའི་གྲ་ཐོག་ཆོད་པ་གཅིག་བྱས་སོ། །སུམ་ཅུ་རྩ་གསུམ་ལོན་པའི་དུས་དབྱེ་ཆུང་ན། ཡོན་བདག་ལྷ་མོ་སྒྲོན་བྱ་བ་གཅིག་དང་བཟའ་མི་གཉིས་རབ་ཆད་དུ་འདུག་པས་ཟས་ནོར་གང་ཡོད་ཆོས་ལ་བཏང་ཞིང་སྣང་། ཁོང་གིས་འབུམ་དང་ཉི་ཁྲི་ཀློག་ནས་ཡོད་ཙ་ཡུལ་ཕྱོགས་དེ་ན་ཐོད་པ་བྷ་རེ་བྱ་བ་གཅིག་སྣང་། དེ་ཡོན་བདག་གི་ཆོ་ག་ལ་སྙག །དེའི་ལོ་རྒྱུས་ཅུང་ཟད་ཙམ་བཤད་ན། རྒྱ་གར་ཡུལ་དུ་སྐྱེས་པའི་པཎྜི་ཏ་ཅིག་བོད་ཡུལ་དུ་བྱོན་པ་ཡིན་སྐད། དབྱེའི་རབ་ཁ་བྱ་བར་སྐུ་འཁྲུངས་ཡབ་ནི་རཏྣ་སིདྡྷི་བྱ་བ་ཡིན། ཡུམ་ནི་ས་མ་ཏི་བྱ་བ་ཡིན། མཚན་ནི་བྷ་རེ་བྱ་བར་གྲགས་ཡིན། ཡོན་བདག་དེའི་རྩར་ཇོ་མོས་ཀློག་བྱས། བྷ་རེ་ཆོ་ག་བྱས་ཙ་བྷ་ར་ཡང་ཆོ་ག་བྱེད་མི་འདོད་པ་ཧ་རེ་ལྟ་འདུག །ཡོན་བདག་མོ་ན་རེ། བརྟེན་པ་ཆོ་ག་མི་མཛད་ཅི་ཡིན་ཟེར། ངས་ཆོ་ག་བྱེད་སྙིང་མི་འདོད་པ་ཅིག་འདུག་ཟེར། བློ་བདེ་འབོལ་ལེ་སོང་སྐད་ཡོན་བདག་མོ་ན་རེ། ངེད་བཟའ་མི་གཉིས་ཀྱང་དེ་འདྲ་ཟེར། དེ་ཅི་ཡིན་ཨཾ་ཟེར། ཁོང་ན་རེ་ཅི་ཡང་མ་ཡིན་ཇོ་མོ་འདི་བྱིན་རླབས་ཅན་གཅིག་འདུག་པས། དེའི་བྱིན་རླབས་ཡིན་ནོ། །རང་ཅག་རྣམས་ལ་བྱིན་རླབས་ཀྱི་འོད་ཟེར་ཕོག་པ་ཡིན་སྐད། དེའི་ནུབ་མོ་མཁའ་འགྲོ་མ་སྐུ་མདོག་དམར་མོ་དཔྲལ་བ་ན་མིག་ཡོད་པ་གཅིག་གིས་ཇོ་མོ་ཁྱོད་ཆོ་ག་མཁན་པོ་འདི་དང་སྔོན་གྱི་སྨོན་ལམ་དང་། ད་ལྟར་གྱི་ལས་འཕྲོ་མཐུན་པས་ཐབས་ཤེས་རབ་མཛོད་ཅིག་གསུངས། ངས་བཙུན་མ་གྲག་ཐོག་ཆོད་པས་དེ་འདྲ་བ་བྱས་ན་མིས་མི་འབར་རམ་ཞུས་པས། སྐུ་མདོག་དམར་མོ་དེ་དཀར་མོ་གཅིག་ཏུ་གྱུར་ནས། འགྲོ་བའི་དོན་འབྱུང་བ་ཡིན་པས་ད་རེས་ཕྱིར་མི་ལྡོག་སྟེ། མཁའ་སྤྱོད་ཀྱི་གནས་སུ་ཕྱིན་པ་ཡིན་གསུངས། གཞན་ཡང་ལུང་བསྟན་མང་དུ་མཛད་ནས་འཇའ་དང་འོད་དུ་ཡལ་ནས་ཐལ། དེའི་ཕྱིར་ཉིན་འབའ་རེ་བྱུང་ནས་ཕྱག་དང་བསྐོར་བ་མང་དུ་བྱས། ནུབ་མོ་མུན་རུབ་ཙ་ཁོང་གི་རྩར་ཕྱིན་པ་དང་། ཁྱེད་ཀྱི་ཀློག་འདོན་མཛད་པའི་བྱིན་རླབས་དང་། གསུངས་དྲི་མ་མེད་པའི་བྱིན་རླབས་དང་། གསུང་སྙན་པ་དང་། སངས་རྒྱས་ཀྱི་ཐུགས་གི་བདེན་པ་རྣམས་ཀྱིས་བྱིན་རླབས་ང་ལ་ཞུ་ཟེར། ཇོ་མོས་ཉི་ཁྲི་དུམ་པ་གཅིག་མགོ་ལ་བཞག་ཅིང་། ཁོས་ལག་པ་ལ་འཇུས་ནས། ང་ལ་ཐོག་པ་མེད་པའི་བྱིན་རླབས་ཅིག་ཞུ་ཟེར། བྷ་རེ་ལ་ཤེད་ཀྱི་མ་ཐུབ་ནས་ཐོག་ཏུ་བསྡད་ཙ་ཡོན་བདག་མོ་ཆོས་ལ་མར་མེ་སྐྱེལ་དུ་བྱུང་ནས། ཨ་མ་ཇོ་མོ་ཡང་འདུལ་ཁྲིམས་གཙང་ཟེར་བ་བདུད་ཀྱིས་བསླུས་པ་མ་ལགས་སམ་ཟེར། ཁོང་ལ་རྐང་མཐིལ་ནས་སྦྲིད་ཅིག་བྱུང་བ་དེ་སྤྱི་གཙུག་ཏུ་སིང་གི་བུད་ནས་ཐལ་ཏེ། ཇོ་མོས་ཚིག་བཅད་བྱས་ནས་གསུངས་པ། ལུང་བསྟན་ཕལ་ཆེར་བདུད་ཀྱི་བསླུས་པ་ཡིན། །ཕོ་མོ་གཉིས་འགྲོགས་བདུད་ཀྱིས་ཁྱེར་བ་ཡིན། །ཡོན་བདག་མོ་ཡང་རྐྱེན་གྱིས་དེད་པ་ཡིན། །འགྲོ་བའི་དོན་ཡང་ཅི་ནུས་ངས་མི་ཤེས། །སྐད། ཡོན་བདག་མོས་ནི་མོ་རང་གི་མི་ལ་ཡང་མ་བཟླས་ཟིན། བྷ་རེ་ཡང་ཞག་བདུན་ལ་ཆོ་ག་བྱས། ཇོ་མོས་ཟླ་བ་གཅིག་ལ་འབུམ་ཚར་བཅུ་གསུམ་བཀླག །དེ་ནས་ཇོ་མོ་ལ་ཡོན་འགའ་རེ་རྫོང་ནས། གཡུ་རུ་གྲ་ཐང་དུ་གྲ་པ་མངོན་ཤེས་ཅན་ལ་འབུལ་བ་བྱས་ནས་ཞུས། གྲ་པ་མངོན་ཤེས་ཅན་གྱི་ཇོ་མོ་ཞྭ་ཆུང་ཅན་ཁྱོད་ངའི་དྲུང་དུ་བྱུང་ནས་འདུལ་ཁྲིམས་གཙང་། སྔོན་གྱི་ལས་ཀྱི་བྷ་རེ་ཟེར་བ་དང་སྔོན་གྱི་ལས་འཕྲོ་མཐུན་པས། ལས་ཀྱི་འབྲེལ་བ་ཡིན་པས་ཞུམ་པ་མ་བྱེད་ཅིག་གསུངས། དེ་ནས་སྐྱོ་སྟོན་བསོད་ནམས་བླ་མས་མཇལ་དུ་ཕྱིན། འབུལ་བ་ཕུལ་ནས་ཞུས་པས། ཐང་ཅིག་ང་ཕྱོགས་མེད་དུ་འགྲོ་ཟེར། བྷ་རེ་བྱ་བའི་ཆོ་ག་མཁན་པོ་གཅིག་གིས་ང་ལ་གནག་ནས་ཡོད་པས། དབུས་ཀྱི་ཁྲོམ་པ་ཚོས་འབར་ནས་སྣང་། གཏམ་ངན་རླུང་ཞོན་བྱ་བ་ཡིན་སྐད། མདང་གི་རྨི་ལམ་ལ་ཁྱེད་ཀྱིས་འགྲོ་དོན་ཕྱོགས་མེད་ལ་འབྱུང་བ་ཡིན་ཞུམ་པ་མ་བྱེད་གསུངས། དེ་ནས་ཇོ་མོས་རྩ་བའི་བླ་མ་གཉིས་ཀྱིས་དེ་གསུངས་བསམ་ནས་ཞུམ་པ་མ་བྱས་ཏེ། ཇོ་མོ་བཀའ་ལོག་མ་ཟེར་ཏེ་ཀུན་གྱི་འབར་ཤ་བྱེད་པ་བྱུང་ངོ་། །དུས་ཐང་ཅིག་དབུས་སུ་མི་འདུག་ནས། ཉང་དག་ཀོང་གསུམ་ལ་འགྲོ་དགོས་བསམ་པ་གཅིག་བྱུང་། དེ་ནས་ཀོང་ཡུལ་ལ་བྱོན། བུ་གསུམ་ཡོད་པའི་ཆེ་བ་ལ་གྲུབ་སེ། དེ་འོག་གྲུབ་ཆུང་། དེ་འོག་ཡང་གྲུབ་གསུམ་ཡོད། ཀོང་ཡུལ་དུ་ཇོ་མོས་ཀློག་བྱས། བྷ་རེས་ཆོ་ག་བྱས་དེར་ལོ་མང་དུ་བསྡད། དེར་ལོ་ལྔ་བཅུ་རེད་ནས་བྷ་རེ་ཕ་ཡུལ་དུ་འོངས་ནས་བུ་ནོར་ཐམས་ཅད་དེར་བཞག་གོ། །དེ་ནས་དབུས་གཙང་གིས་རྒྱལ་ཁམས་ཕྱོགས་མེད་དུ་བྱོན། ལ་སྟོད་དིང་རིར་བྱོན་ནས་དམ་པ་རྒྱ་གར་དང་མཇལ་དུ་བྱོན། དམ་པ་མངོན་ཤེས་ཅན་གྱིས་གཟིགས་ནས། ཡེ་ཤེས་མཁའ་འགྲོ་མ་ལབ་ཀྱི་སྒྲོན་མ་བྱོན་པར་གདའ་གསུངས། དིང་རི་བ་རྣམས་བསུ་བ་ལ་བྱོན། དེ་ནས་དིང་རིར་ཞག་གསུམ་བཞུགས། དམ་པ་དང་ཉམས་བསྡུར་མཛད། དམ་པ་ཡང་ཐུགས་མཉེས་ཏེ་མ་ཇོ་མོ་ཁྱོད་ཀྱི་བསྟན་པ་ནི་ཡུན་རིང་དུ་འབྱུང་གིས་གསུངས། དེ་ནས་ཟངས་རི་མཁར་དམར་དུ་བྱོན་ཏེ། ཡོན་བདག་མོ་ཆོས་མཚོ་བྱ་བ་གཅིག་གིས། ལུས་ནི་བཙུན་མར་འདུག་སྟེ་ཆོས་ནི་མི་ཤེས་པར་སྣང་། གཉའ་ན་རི་དམར་པོ་ཟངས་རི་འདྲ་བ་གཅིག་སྣང་། གཞི་བདག་དེའི་མིང་ལ་ཟངས་རི་འཁྱིལ་པ་བཏག །ཡོན་བདག་མོ་དེའི་ཙར་བཞུགས་ཅིང་ཡོད་ཙ་ན། སྲོད་ལ་གཞི་བདག་དེ་བྱུང་ནས་ཇོ་མོ་ཁྱོད་ཀྱི་མཚན་ལབ་སྒྲོན་དུ་སྣང་། སྟེང་ཡར་དེ་ལ་དུར་ཁྲོད་ཡོད་ས་དེ་ལ་དགོན་ས་ཐོབ་ལ་སྡོད་དང་། ངས་ཀྱང་ཡོན་བདག་བྱེད་པ་ཡིན་སྐད། མི་དམར་རྟ་དམར་ཅན་ཅིག་བྱུང་བ་དེ་ཟངས་རིའི་གཞི་བདག་ཡིན་པར་སྣང་། མཁར་འདི་ལ་མཁར་དམར་བྱ་བ་ཡིན། ཇོ་མོ་བཙུན་མ་འདིའི་བདག་པོ་ཡིན། རི་ཕ་རི་དེ་ལ་ང་འདུག་ས་ཡིན། འདི་གཉིས་ཀྱི་བར་ལ་བཞུགས་མཛོད་དང་ཟེར་ནས་ལུང་བསྟན་སྐད། ཁོང་གི་དགོངས་པ་ལ་བྷ་རེ་ངེད་གཉིས་ཀྱི་ལུང་བསྟན་དང་ཨེ་མི་འདྲ་དགོངས་ནས་འཁོར་བའི་སྡུག་བསྔལ་འགའ་ཞིག་ཀྱང་དྲན་པ་བྱུང་། ཁྲོམ་པའི་མི་རྣམས་ཀྱི་འབར་ཤ་བྱུང་ནས་སྙེམས་མཛད། དེའི་ཕྱིར་ནང་ཡོན་བདག་མོ་དེ་བྱུང་ནས་ངེད་གཉིས་ཀྱི་གཞི་བདག་ཕ་རི་དེ་ཁྱེད་ལ་བཟང་བ་གཅིག་འདྲ་ཟེར། ཅི་འདྲ་བྱས་པས་བཙུན་མས་གཞི་བདག་དེ་རྨིས་ན་བཟང་བ་གཅིག་ཡིན། མདང་གི་རྨི་ལམ་ལ་གཞི་བདག་དེ་བྱུང་ནས། ཐོག་ན་ཡོད་པའི་ཇོ་མོ་དེ་ལབ་སྒྲོལ་མ་བྱ་བ་ཡིན། ཁྱོད་ཀྱིས་ཡོན་བདག་གྱིས་ལ་ཞབས་ཏོག་གྱིས་དང་། ངས་ཀྱང་གདོངས་གྲོགས་བྱེད་སྐད། ཁོང་གིས་གཞི་བདག་དེ་ཅི་འདྲ་བ་ཡིན་བྱས་པས། མི་དམར་རྟ་དམར་གཅིག་ཡིན་ཟེར། དེ་ནས་ཁོང་བཞུགས་པས། ཐོག་ཁ་ཡ་ཏ་ན་བཞུགས་དང་བཙུན་མ་ངས་ཞབས་ཏོག་བྱེད་ཟེར་ནས་ཁས་བླངས། དེ་ནས་ཁོང་གི་དགོན་གནས་མཛད་ནས་བཞུགས་པས། ལོ་གསུམ་ཙ་ན་བསྟན་པ་ནམ་མཁའ་ལ་ཉི་མ་ཤར་འདྲ་གཅིག་བྱུང་། སྐུའི་སྙན་པ་འབྲུག་ལྟར་གྲགས། ཟངས་རི་མཁར་དམར་ལ་མ་ཅིག་ལབ་སྒྲོན་བཞུགས་ཟེར་ནས་བཟང་དགུའི་བཏུག་ས། ངན་དགུའི་རྟེན་ས་བྱུང་སྐད། དུས་དེ་ཙ་ན་རྒྱ་ཆོས་དང་། བོད་ཆོས་གཉིས་ཀྱི་ངོས་བཟུང་བ་དང་། གནམ་ཆོས་དང་ས་ཆོས་གཉིས་ཀྱི་ངོས་བཟུང་བ་དང་། བཀའ་མ་དང་གཏེར་མ་གཉིས་ཀྱི་ངོས་བཟུང་བ་དང་། ཕོ་གཅོད་དང་མོ་གཅོད་གཉིས་ཀྱི་ངོས་བཟུང་བ་དང་བཞིའོ། །དེ་ལ་ཆོས་འདིའི་བརྒྱུད་པ་བཤད་ན། རྒྱ་ཆོས་བོད་ཆོས་གཉིས་ཀྱི་ངོས་བཟུང་ནི། ཆོས་རྒྱ་གར་ནས་བོད་ལ་དར་བ་ཡིན་ཏེ། བོད་ཀྱི་ཆོས་རྒྱ་གར་ན་གྲགས་པ་ཡང་ཡོད་གསུངས། རྒྱ་གར་རྡོ་རྗེ་གདན་དུ་ཐམས་ཅད་འདུས་ནས་ཆོས་ཐམས་ཅད་རྒྱ་གར་ནས་བོད་དུ་གྲགས་པ་ཡིན། བོད་ལ་ཆོས་མེད་པ་ཅི་འདྲ་ཡིན་ཟེར་ནས། བདུད་ཀྱི་བསླུ་བ་ཨེ་ཡིན་ཟེར་ནས། མིང་ལ་ཕྱག་རྒྱ་ཆེན་པོ་གྲགས་པའི་གཅོད་ཟེར་བ་གཅིག་ཡོད་ཟེར་བ་ཅི་འདྲ་ཡིན། རྐང་མགྱོགས་པ་གསུམ་འགྲོ་དགོས་ཟེར་ནས་ཐམས་ཅད་གྲོས་བྱས། རྐང་མགྱོགས་པ་གསུམ་བཏང་། ཁྲ་ཧོར་པ་གོང་སང་འགྲིམ་པ་ཙམ་ཅིག་བྱུང་བ་ཞག་གཉིས་ཙ་ཟངས་རི་མཁར་དམར་དུ་མའི་དྲུང་དུ་ཕྱིན། རྒྱ་གར་གྱི་ཨ་ཙ་ར་གསུམ་བླ་དབྱེར་ཕྱིན་ཟེར་བ་དང་། མའི་ཞལ་ནས་ཨ་ཙ་ར་གསུམ་གཟུགས་ཅི་འདྲ་བ་གཅིག་སྣང་། གོས་ཅི་འདྲ་བ་གོན་ཟིན་གསུངས། ཉེ་གནས་ན་རེ་ཨ་ཙ་ར་གཞན་གྱི་གོས་མ་གོན་ཟིན། དར་གྱི་ལའུ་གསུམ་གོན་ཟིན། མའི་ཞལ་ནས། རྒྱ་གར་གྱི་རྐང་མགྱོགས་པ་གསུམ་བྱུང་ཟེར་ནས། ཨ་ཙ་རས་རྒྱ་གར་གྱི་སྐད་བྱེད་པ་ལོ་ཙྭ་མེད། མའི་ཙར་ཤོག་ཟེར་ནས་འཚོ་བ་དྲངས། བགྲོ་གླེང་བྱས་ཙ་མས་རྒྱ་གར་གྱི་སྐད་འགྱུར་ཐམས་ཅད་གསུངས། ཨ་ཙ་རས་ཁྱོད་བོད་ཀྱིས་རྒྱ་གར་གྱི་སྐད་འགྱུར་ཤེས་པ་ཅི་ཡིན་ཟེར། མའི་ཞལ་ནས་ཚེ་སྔོན་མ་རྒྱ་གར་ན་སྐྱེས་པ་ཡིན་ཟེར། ཨ་ཙ་རས་སྐྱེ་བ་དྲན་པ་ཡིན་ནམ་གསུངས། མས་སྐྱེ་བ་སྔ་ཕྱི་ད་གསུམ་དྲན་གསུངས། ཨ་ཙ་རས་ཁྱོད་ཤོག་ཟེར། མའི་ཐུགས་ཀྱི་དགོངས་པ་ལ། ཨ་ཙ་ར་འདི་གསུམ་གྱི་རྒྱ་སྐད་དུ་གཏམ་པས། ངའི་གྲྭ་སློབ་རྣམས་ཀྱི་མི་གོ། ཁོང་གསུམ་ལས་ཤག་ཁ་ང་རྒྱལ་ཡང་དགོས་བ་ཆུང་བསམ་པ་བྱུང་། ཨ་ཙ་ར་གསུམ་གྱི་རྒྱ་བྲང་ཁ་ཕྱེས་སྐད། ཞབས་ཐོག་བྱས་དབུས་གཙང་རུ་བཞིའི་མཁས་བཙུན་རྣམས་དང་། ཡུལ་མའི་རྣམས་དང་། ཕྱོགས་ཕྱོགས་ཀྱིས་གྲྭ་བསྐོར་བ་རྣམས་དང་། ཡོན་བདག་རྣམས་དང་། རྒྱ་གར་དང་བོད་ཀྱི་ལོ་ཙྭ་བ་རྣམས་དང་། ཀུན་ལ་ཕོ་ཉ་བཏང་ནས་བསྡུས། འབུམ་ཚོ་གཅིག་དང་བདུན་བརྒྱ་འཚོགས། དེ་ནས་མཆོད་པ་ཆེན་པོ་བཤམས། སྟོན་མོ་དང་སྤོང་ཐག་བྱས་ནས། འཚོགས་པ་དེའི་གོང་དུ་ཨ་ཙ་ར་གསུམ་དང་བགྲོ་གླེང་གིས་བཤད་པ་བཏང་སྟེ། དབུས་གཙང་གཉིས་ཀྱི་ས་ཆ་ལ་ལོ་ཙྭ་བ་བཞི་བྱུང་སྟེ། འཚོགས་པ་དེ་ལ་ལོ་ཙྭ་བས་བསྒྱུར་ནས། མའི་ཆོས་རྣམས་སྙེམ་ཐག་ཆོད་པར་འདུག་གསུངས། ཨ་ཙ་ར་གསུམ་གྱིས་གསུངས་ནས། ཆོས་ཐམས་ཅད་རྒྱ་གར་ནས་མ་བྱུང་བའི་བོད་ལ་ཆོས་མེད་ཟེར། མའི་ཞལ་ནས་རྒྱ་གར་བ་འདི་བོད་ལ་དྲིན་ཆེ། ཆོས་ཐམས་ཅད་རྒྱ་གར་གྱི་ཆོས་དར་ལུགས་དེ་ཁྱོད་གསུམ་གྱིས་ཤོད་དང་ཟེར། ཨ་ཙ་རས་དར་ལུགས་ངས་མི་ཤེས་ཟེར། ཁྱེད་ཀྱིས་ཤེས་པ་ཨི་ཡིན་ཟེར། མའི་ཞལ་ནས། ང་ནི་ཡུམ་གྱི་ཐུགས་སྤྲུལ་ཡིན་པས་ཤེས་གསུངས། རྒྱ་གར་ཆོས་ཀྱི་རྒྱལ་པོ་ཛ་ཞེས་བྱ་བ་བཞུགས་པའི་དུས་སུ་གདམ་ངག་དང་གསང་སྔགས་ཀྱི་རྒྱུད་ཐམས་ཅད་ཆར་བཞིན་དུ་འབབ་པ་ཡིན། དེ་ཡང་ཡུམ་གྱི་བྱིན་རླབས་ཡིན་གསུངས། དེ་ནས་ཨ་ཙ་ར་གསུམ་གྱིས་ཁྱོད་སྐྱེ་བ་སྔ་ཕྱི་དྲན་ཟེར་བ་ཡོང་ཤོད། ཆོས་འདིའི་བརྒྱུད་པ་ཡང་ཤོད་ཟེར་བ་ལོ་ཙྭ་བས་བསྒྱུར་སྐད། དེ་ནས་མའི་ཞལ་ནས། འོ་སྐོལ་འདིར་ཚོགས་པའི་ཁྲོམ་པ་རྣམས་གསོན་དང་། འཚོགས་གོང་འདི་ལ་སྐྱེ་བ་སྔ་ཕྱི་ད་གསུམ་གྱི་སྐྱེ་ལུགས་ཤོད་ཟེར་བས། སྐྱེས་པའི་ལུགས་མ་བཤད་ན། ངའི་བརྒྱུད་པ་འཛིན་པ་འདི་རྣམས་ཡིད་མི་ཆེས། ཕྱག་རྒྱ་ཆེན་པོ་བདུད་ཀྱི་གཅོད་ཡུལ་འདིའི་བརྒྱུད་པ་མ་བཤད་ན། གདམ་ངག་ལ་ཡིད་མི་ཆེས། རྒྱ་གར་རྡོ་རྗེ་གདན་ལ་ཐམས་ཅད་འདུས་ནས། ཆོས་ཐམས་ཅད་རྒྱ་གར་ལ་འོང་བ་ཡིན། ཕྱག་རྒྱ་ཆེན་པོ་བདུད་ཀྱི་གཅོད་ཡུལ་འདི་རྒྱ་གར་ལ་མི་གྲགས་བོད་དུ་གྲགས་པ་ནི། བོད་ལ་བདུད་དང་རྒྱལ་བསེན་སྡོང་ནས་བོད་བརླག་པ་ཡིན་པས། རྒྱ་གར་གྱིས་ཆོས་ཐམས་ཅད་བསྣུབ་ཆིས་ཨེ་ཡིན། འདི་ཅི་འདྲ་བ་ཡིན་ལྟ་རུ་འགྲོ། ཟེར་ནས་རྐང་མགྱོགས་པ་འདི་གསུམ་བཏང་ཟིན་པས། ཆོས་འདིའི་བརྒྱུད་པ་བཤད་པ་ཡིན་པས་ཉོན་ཅིག་གསུངས། དེའི་ཉིན་པར་བཀའ་ཚོམ་ཆེན་མོ་ཞིབ་རྒྱས་སུ་བཤད། ཡང་ལེའུ་ལག་ས་མ་ཏི་འགྲེལ་པ་སཾ་ཀྲྀ་ཏིའི་སྐད་དུ་གཅོད་ཡུལ་ཟླ་བ་གཅིག་བཤད། དབུས་གཙང་མདོ་ཁམས་རྣམས་དང་། དེར་ཚོགས་ཀྱི་ཁྲོམ་པ་རྣམས་ཡིད་ཆེས། ཚིག་གི་སྒྲོ་བཀུར་ཆོད་པ་བྱུང་། དེ་ནས་མའི་སྐྱེས་རབ་གསུངས་སྟེ། དང་པོ་ཡུམ་གྱི་ཐུགས་སྤྲུལ་ཡིན་ཏེ། སུམ་ཅུ་རྩ་གསུམ་དགའ་ལྡན་ལྷ་གནས་ནས། གླིང་ཆེན་པོ་གདལ་སྐྱོབ་བྱ་བའི་ལྷོ་ཕྱོགས་ནས། ནོར་བུ་ཕུན་ཚོགས་ཀྱི་གླིང་ཞེས་བྱ་བ་ཡོད་དེ། ཡུམ་གྱི་ཐུགས་ཀྱི་འདུལ་བའི་གླིང་ཡིན། དེ་རུ་སྐྱེས་པའི་ཡབ་ནི་རྒྱལ་པོ་བདེ་སྐྱོང་བྱ་བ་ཡིན། ཡུམ་བལ་མོ་མཚོ་བྱ་བ་ཡིན། དེ་གཉིས་ཀྱི་སྲས་སུ་སྐུ་འཁྲུངས་སྟེ། ལྷའི་ཡུལ་དུ་འགྲོ་དོན་ཡུན་རིང་དུ་བྱས། དེ་ནས་རྡོ་རྗེ་གདན་དུ་ལྷ་རྣམས་ལྟད་མོ་ལ་བྱོན་ཏེ། ལྷའི་ཡུལ་དུ་འགྲོ་དོན་རྫོགས་པ་དང་། རྡོ་རྗེ་གདན་དུ་འགྲོ་དོན་དགོས་པས་དེར་འཛོམས་ནས། འཇའ་དང་འོད་ཀྱི་ཚུལ་དུ་སྐྱེ་བ་བཞེས། དེ་ནས་རྡོ་རྗེ་གདན་གྱི་སེར་སྐྱའི་གྲོང་ཁྱེར་དུ་འགྲོ་དོན་བྱས་ཏེ། ཡབ་ནི་ཨ་ཡི་དབང་ཕྱུག །ཡུམ་ནི་ལྷ་ཟ་ཀླུ་སྒྲོན་མ་བྱ་བ་གཉིས་ཀྱིས་སྲས་སུ་སྐུ་འཁྲུངས། མཚན་ཡང་སྨོན་ལམ་གྲུབ་དུ་བཏགས། རྒྱ་གར་གྱི་མུ་སྟེགས་པ་ཐམས་ཅད་བཏུལ་ནས་ནང་པའི་སྡེ་ལ་བཀོད། ཡབ་ཡུམ་གྱིས་གཤེགས་རྫོང་བྱས། ཐོས་བསམ་གྱིས་སྒྲོ་འདོག་དེར་བཅད། པོ་ཏའི་རི་ལ་པ་ཏྲའི་བྲག་ཕུག་དུ་བསྒོམས་ཞིང་བཞུགས་ཙ་མཁའ་འགྲོ་མས་ལས་མཁན་བྱས་ནས། ངའི་བེམ་རིག་ཕྲལ་བས་ངའི་ལུས་དེ་བྲག་ཕུག་དེའི་ནང་དུ་ཡོད་པ་ལ། མགོ་ལ་རྣམ་པར་སྣང་མཛད་ཀྱི་དབུ་བྱས་པའི་རིགས་ལྔ་ལ་ཡེ་ཤེས་ཀྱིས་མཁའ་འགྲོ་ལྔས་འཁྲིལ་སྦྱོར་བྱས་པ་སྐུ་ཞི་བའི་ཚུལ་དུ་དོད་ནས་ཡོད། ངའི་སྙིང་དེ་ལ་ཤཱཀྱ་ཐུབ་པ་རང་བྱོན་དུ་བྱོན་ནས་ཡོད། ངའི་རུས་བུ་དེ་ལ་གདུང་ཤ་རི་རམ་སྲན་མ་ཙམ་འབུམ། དེ་མིན་རིང་སྲེལ་ཁ་དོག་སྣ་ལྔ་ཚངས་བ་རྒྱ་གར་རྡོ་རྗེ་གདན་གྱི་བྲེ་ཚད་མ་གང་བྱོན་ནས་ཡོད། འདིར་ཡང་བོད་ཀྱི་ཡུལ་དུ་འགྲོ་དོན་བྱེད་པ་འདི་ཀ་ཡིན། འགྲོ་དོན་ཕྱེད་ཚར་ཙམ་ལ་ཕྱིན་ནས་ཡོད། ལོ་ཡང་དྲུག་ཅུ་རྩ་གསུམ་རེད། དགུ་བཅུ་གོ་དགུ་ལ་ཕྱིན་ཙ་ནུབ་ཕྱོགས་ཨུ་རྒྱན་གྱི་གནས་སུ་འགྲོ་དོན་རྫོགས་ནས་ཐར་པ་ཐོབ། སྲིན་པོའི་གྲོང་ཁྱེར་ཁ་མི་བརྒྱུད་གསུངས། དེ་ནས་དེར་ཚོགས་པ་རྣམས་ཀྱི་གྲོས་བྱས་ནས། རྒྱ་གར་གྱི་རྐང་མགྱོགས་པ་གསུམ་པོ་དེ་རྡོ་རྗེ་གདན་དུ་སོང་ནས། རྒྱ་གར་ཆོས་ཀྱི་རྒྱལ་པོ་དང་། པིཎྜི་ཏ་དེ་རྣམས་འདུས་ནས་ཐམས་ཅད་ཀུན་ལ་མ་ཅིག་གིས་གདམས་པའི་བརྒྱུད་ལུགས་དང་། གདམས་ངག་གི་འདེབས་ལུགས་དང་། མ་ཡི་སྐྱེ་བའི་ལོ་རྒྱུས་དང་། པོ་ཏའི་རི་ལ་པ་ཏྲའི་བྲག་ཕུག་ནང་ཁང་གི་གདུང་རུས་ཀྱི་ལོ་རྒྱུས་འབྲི་བཀོལ་མེད་པར་ཞུས་སོ། །རྒྱ་གར་ཆོས་ཀྱི་རྒྱལ་པོ་དང་། པཎྜི་ཏ་རྣམས་ཀྱི་ཞལ་ནས་འདིའི་ཆོས་བརྒྱུད་དེས་ཡང་ན་ཡུམ་གྱི་ཐུགས་སྤྲུལ་ཡིན་ངེས། ཡང་ན་རྒྱལ་བསེན་གྱི་ཆོ་འཕྲུལ་ཨེ་ཡིན། འདི་གང་ཡིན་ཆ་མེད་གདམས་པ་རྣམས་གུད་དུ་མ་ལུས་པ་ལེན་དགོས། པ་ཏ་ལའི་རི་ལ་པ་ཏྲའི་བྲག་ཕུག་ཏུ་སོང་ལ་ཨེ་བདེན་ལྟོས་གསུངས། པཎྜི་ཏ་མང་དུ་ཚོགས་ནས་སོང་ནས་ལྟས་ཙ། ལབ་སྒྲོན་གྱིས་གསུང་པ་བཞིན་སྣང་སྐད། གདན་དྲངས་ནས་རྡོ་རྗེ་གདན་དུ་ཕྱིན་ཏེ། རྒྱ་གར་ཆོས་ཀྱིས་རྒྱལ་པོས་ཕྱོགས་ཕྱོགས་སུ་རྐང་མགྱོགས་པ་བཏང་ནས་ཐམས་ཅད་འདུས་སོ། །དེར་འདུས་པ་ཐམས་ཅད་ལ་རྟེན་རྣམས་བསྟན་པས་ཐམས་ཅད་ངོ་མཚར་སྐྱེས་སོ། །བདུད་དང་རྒྱལ་བསེན་མ་བྱུང་བས། འདིའི་ཆོས་བརྒྱུད་གདན་དྲོང་གསུངས་ནས་གྲོས་འཆམས་སོ། །གདུང་རུས་ཀྱི་རིང་བསྲེལ་ལ་མ་ག་དྷའི་བྲེ་ཚད་མ་གང་སྣང་། རྒྱ་གར་གྱི་རྒྱལ་པོ་དེའི་རེ་རེ་ལ་བདུན་ཆ་རེ་དད་པའི་རྟེན་ལ་བགོས་ཙ་རིང་སྲེལ་ཡང་ཟད། རྒྱ་གར་གྱི་རྒྱལ་པོ་ཐམས་ཅད་ཀྱང་ཚིམས་པ་གཅིག་བྱུང་ངོ་། །དབུ་ལ་རིགས་ལྔའི་སྐུ་བྱོན་པ་དེ་རྡོ་རྗེ་གདན་དུ་བཞུགས་སོ། །རྒྱ་གར་ཆོས་ཀྱི་རྒྱལ་པོའི་དད་པའི་རྟེན་མཛད་དོ། །ཐུགས་ལ་ཤཱཀྱ་ཐུབ་པ་བྱོན་པ་དེ་བོད་ཡུལ་བྱིན་རླབས་ཞུ་བའི་རྟེན་དང་། མདོ་ཁམས་དབུས་གསུམ་དུ་ཚིག་ཐ་སྙད་ཀྱི་སྒྲོ་འདོག་གཅོད་པ་དང་། སྐྱེ་བ་སྔ་ཕྱི་ད་གསུམ་གྱི་བདེན་པའི་ངོ་བོ་སྟོན་པའི་ཕྱིར། བོད་ཡུལ་དབུས་སུ་གདན་དྲངས་པ་ལགས་སོ། །དམ་པ་རྒྱ་གར་དང་རྐང་མགྱོགས་པ་གསུམ་དང་བཞི་པོ་དེ་ཟངས་རི་མཁར་དམར་དུ་མ་ཡི་དྲུང་དུ་ཕྱིན་ནས་ཕྱག་འཚལ། པུས་མོ་བཙུག་བསྐོར་བ་བྱས། མཆོད་པ་འབུལ་ནས། ཁྱོད་ཡུམ་ཆེན་ཐུགས་སྤྲུལ་ངོ་མཚར་ཆེ། ཞལ་ནས་ཅི་ལྟར་གསུངས་པའི་རྒྱུད་རྣམས་ལ་ཚིག་གཅིག་ཀྱང་ནོར་འཁྲུལ་མི་འདུག་སྐད། ཐུགས་ལ་བྱོན་པའི་ཤཱཀྱ་ཐུབ་པ་དེ་མདོ་དབུས་ཁམས་གསུམ་ཚོགས་པ་རྣམས་ལ་ཞལ་བསྟན་བྱིན་རླབས་མཛད་དམ་པའི་ཞལ་ནས། ངའི་ཐུགས་རྟེན་བྱེད་པ་ཡིན་གསུངས་ནས་གདན་དྲངས་སོ། །དེ་ནས་ཕྱོགས་ཐམས་ཅད་ཀྱི་ངོ་མཚར་ཆེ་ཟེར་ནས་ཀུན་དང་ས་ལ་བཙུད་དོ། །ཀུན་གྱི་སྒྲོ་བཀུར་དང་གཤེ་བ་མི་བྱེད་ནས་སྙེམ་ཐག་ཆོད་དོ། །འཛམ་བུའི་གླིང་དུ་དམ་ཆོས་བདུད་ཀྱི་གཅོད་ཡུལ་དར་རོ། །མ་ཇོ་མོའི་བསྟན་པ་ནི་ནམ་མཁའ་ལ་ཉི་མ་ཤར་བ་བཞིན་དུ་སོང་། དེ་ནས་རྒྱ་གར་རྡོ་རྗེ་གདན་ནི་འཛམ་བུའི་གླིང་གི་དབུས་ཡིན་པས། ཆོས་ཐམས་ཅད་རྒྱ་གར་ནས་འབྱུང་སྟེ། ལབ་སྒྲོན་ངའི་ཆོས་བརྒྱུད་འདི་བོད་ཡུལ་གྱི་དབུས་སུ་བཟང་རི་མཁར་དམར་ནས། རྒྱ་གར་ན་བོད་ཀྱི་ཆོས་འདི་དར་བ་གཅིག་བྱེད་དགོས་སྙམ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཉམས་སུ་ལེན་ན། དམ་ཆོས་བདུད་ཀྱི་གཅོད་ཡུལ་འདི་ལ་ཡིད་ཆེས་པར་བྱེད་པའི་ལོ་རྒྱུས་ཀྱི་དོན་ལ་བཞི་སྟེ། ཕ་བརྒྱུད་བརྡའི་བརྒྱུད་པ་དང་གཅིག །མ་བརྒྱུད་བྱིན་རླབས་ཀྱི་བརྒྱུད་པ་དང་གཉིས། སྙིང་པོ་དོན་གྱི་བརྒྱུད་པ་དང་གསུམ། བཀའ་ཐོག་ནས་གྲོལ་བ་ཉམས་ཀྱི་བརྒྱུད་པ་དང་བཞིའོ། །དེའང་ཕ་བརྒྱུད་ནི་ཐབ་གཙོ་ཆེར་སྟོན། མ་བརྒྱུད་ནི་ཤེས་རབ་གཙོ་ཆེར་སྟོན། སྙིང་པོ་དོན་གྱི་བརྒྱུད་པ་ནི་གཉིས་མེད་དོན་གྱི་བདེ་བ་ཆེན་པོ་གཙོ་ཆེར་སྟོན། བཀའ་ཐོག་ནས་གྲོལ་བ་ཉམས་ཀྱི་བརྒྱུད་པ་ནི། ཨ་མ་ཇོ་མོའི་ཉམས་མྱོང་བརྒྱུད་ལ་སྐྱེས་པའི་དོན་མངོན་དུ་གྱུར་སྟེ། བཀའ་དང་མི་འགའ་བའི་གྲོལ་ལུགས་སོ། །ཨ་མ་ཇོ་མོའི་བརྒྱུད་པ་འདི་ལ་ཡང་། རིང་བརྒྱུད་དང་ཉེ་བརྒྱུད་གཉིས་ལས། རིང་བརྒྱུད་ཀྱི་དབང་དུ་བྱས་ན། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མས་དྲུག་པ་རྡོ་རྗེ་འཆང་ཆེན་ལ་བརྒྱུད། དེས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ། དེས་འཇམ་དཔལ་སྨྲ་བའི་སེངྒེ་ལ། དེས་ཨརྱ་དེ་བ་ལ། དེས་དམ་པ་རྒྱ་གར་ལ། དེས་སྐྱོ་སྟོན་བསོད་ནམས་བླ་མ། དེས་སྐྱེ་མེད་ཟངས་ཐལ་ལ། ཉེ་བརྒྱུད་ནི། ཐུགས་དམ་རྗེ་བཙུན་སྒྲོལ་མ། དེས་མ་ཅིག་ལབ་སྒྲོན་ལ། དེས་སྲས་མིང་སྲིང་གསུམ་ལ་བརྒྱུད་པ་ལགས་སོ། །དེ་རྣམས་རྒྱ་ཆོས་བོད་ལ་བསྒྱུར་བའོ། །བོད་ཆོས་རྒྱ་ལ་བསྒྱུར་བ་ངོས་བཟུང་བ་ནི། དབུས་ནས་ཡར་ལ་བཀའ་བརྒྱུད་དོན་གྱི་བརྒྱུད་ལུགས་དང་། དབང་བཞིའི་བསྐུར་ལུགས་དང་། མཁའ་འགྲོ་ཉམས་ཀྱི་གདམས་ངག་དང་། གཞི་ལམ་སློང་བྱ་བ་དང་། ཕྱི་བཀའ་ཚོམ་ཞིབ་རྒྱས་བྱ་བ་དང་། ནང་མཁོ་དགུའི་ལེའུ་ལག་གནད་ཀྱི་ཐེམ་ཡིག་བྱ་བ་དང་། གསང་བ་བརྡ་ཆོས་ལ་བཟླའི་སྐོར་བྱ་བ་དང་། སྒོམ་པ་ཞལ་གདམ་གནད་ཐེབས་སུ་བསྟན་པ་དང་། ཡང་ཙོམ་སྐོར་དང་། ཉིང་ཙམ་སྐོར་དང་། ཆོས་ངོ་མཚར་ཅན་རྒྱུད་བཅུ་རྒྱ་གར་གྱི་རྐང་མགྱོགས་པ་གསུམ་ལ་རྒྱ་གར་རྡོ་རྗེ་གདན་དུ་བསྒྱུར། རྒྱ་གར་རྡོ་རྗེ་གདན་དུ་ཆོས་རྣམས་རྒྱུན་དུ་དར་ནས་ཡོད། བོད་ཆོས་རྒྱ་གར་དུ་གྲགས་པའི་གཏན་ཚིག་དེ་ལྟར་ལགས་སོ། །ས་ཆོས་གནམ་ཆོས་གཉིས་ཀྱི་ངོས་བཟུང་བ་ནི། ཆོས་ཀྱི་རྒྱུད་ཐམས་ཅད་རྒྱ་གར་དུ་ཆར་དུ་བབས། ཙ་རཀ་སྡེ་བཞི། གསང་སྔགས་ཀྱིས་ཆོས་བརྒྱུད་གནམ་ཆོས་ཡིན། ས་ཆོས་ནི་གཏེར་མ་ཐམས་ཅད་ཡིན་ཏེ། སེམས་དཔའ་རྣམས་ཀྱི་འགྲོ་བའི་དོན་དུ་སྦས་པ་ཡིན་ནོ། །བཀའ་མ་གཏེར་མ་གཉིས་ཀྱི་ཆོས་ངོས་བཟུང་བ་ནི། བཀའ་ཐོག་ནས་གྲོལ་བ་ཉམས་ཀྱི་བརྒྱུད་ཡིན། ཡང་དག་པར་རྫོགས་པའི་སངས་རྒྱས་ཀྱི་བཀའ་དང་མིའགལ་བ་གསུངས་པས། གཏེར་མའི་བརྒྱུད་ཡིན། ཕོ་གཅོད་མོ་གཅོད་གཉིས་ཀྱི་ངོས་བཟུང་བ་ནི། ཕོ་གཅོད་ནི་ཕ་བརྒྱུད་བརྡའ་ལས་བསྒྱུར་བ་ཙམ། མོ་གཅོད་ནི་ཡུམ་གྱི་ཐུགས་སྤྲུལ་ཏེ། མ་ཅིག་ལབ་སྒྲོན་ལ་མཁའ་འགྲོ་མ་ཐམས་ཅད་ཀྱི་ཞལ་མངོན་སུམ་དུ་བསྟན་ཅིང་། སྙན་དུ་བརྒྱུད་པ་ལགས་སོ། །དེ་ནས་ཡུམ་གྱི་སྲས་ལ་བརྒྱུད་པ་ལགས་སོ། །སྲས་ལ་གྲུབ་སེ། ཡང་གྲུབ། གྲུབ་ཆུང་གསུམ་ལ། གྲུབ་སེ་བྱ་བ་ནི་སྲས་ཐོད་པ་དོན་གྲུབ་བྱ་བ་འཛམ་བུའི་གླིང་དུ་གྲགས་པ་ཡིན་ནོ། །གྲུབ་ཆུང་བྱ་བ་ནི་ལོ་བཅུ་ལོན་ཚེ་གཟའ་ནད་ཕོག་སྟེ་སྨྱོ་རྒྱལ་དུ་སོང་། ཐོད་པ་བྷ་རེས་ཟངས་རི་མཁར་དམར་དུ་མའི་དྲུང་དུ་བསྐྱལ། མས་སྣོད་ལྡན་དུ་དགོངས་ནས་དེ་ནུབ་ཀྱི་རྨི་ལམ་ལ་མའི་ཕྱོགས་བཞིར་དུང་དཀར་བུས་ཙ་གླིང་བཞིར་ཐོས་པ་ཙམ་བྱུང་། དེའི་ཕྱིར་ཉིན་སྲས་སླེབ་ནས་ཕྱིན། བཀའ་བརྒྱུད་འཛིན་པའི་སྣོད་ལྡན་དུ་གཟིགས་ནས་མའི་གསུངས་པའི་དམིགས་པ་བརྒྱ་རྩ་བརྒྱད་བསྟན། དུར་ཁྲོད་དུ་ཞག་བདུན་ཉལ་བས་སྨྱོ་རྒྱལ་གྱི་ནད་ཀྱང་སོས་སྐད། དེ་ནས་དམ་པ་རྒྱ་གར་ཟངས་རི་མཁར་དམར་དུ་གདན་དྲངས། སྲས་རབ་ཏུ་བྱུང་། མས་མཚན་གསོལ་ཏེ། ཁོ་ཡི་ཕ་དེ་ཐོད་པ་བྷ་རེ་ཡིན། སྨྱོ་རྒྱལ་བྱས་ནས་འདི་རུ་ཁྲིད་ནས་ཕྱིན། དམ་པ་རྒྱ་གར་དང་མཇལ། ཁོའི་བསམ་པ་འགྲུབ། མིང་ཡང་ཐོད་སྨྱོན་བསམ་འགྲུབ་ཏུ་བཏགས། དེ་ནས་མའི་ཐུགས་ལ་གང་ཡོད་པའི་གདམ་པ་རྣམས་བསྟན། དབང་རིན་ཆེན་སྤུང་པའི་བརྒྱུད། ཚེ་ཡི་དབང་བསྐུར། མ་བརྒྱུད་མཁའ་འགྲོའི་གཏེར་མ་རིན་ཆེན་སྤུངས་པའི་དབང་། མའི་ཐུགས་ལ་གང་ཡོད་རྣམས་གནང་ནས་ལུང་བསྟན། ཤམ་པོའི་གང་ལ་ཕུག་མོའི་དབེན་གནས་སུ་སོང་། བསྒྲུབ་པ་སྐོར་འདི་རྣམས་ཉམས་སུ་ལོངས་ལ་བསྒྲུབ་པ་ལོ་བཅུ་གསུམ་ལ་འདག་ཆར་ལ་སྡོད་གསུངས། འཚོ་བ་དྲངས་པའི་ཡོན་བདག་ཞིག་ཀྱང་ངས་གཏོང་། ཟེར་ནས་ལུང་བསྟན། བ་མེན་གྱི་ལྷུང་ཟེད་གཅིག་ཀྱང་ཐོགས་སུ་བཅོལ། གདམས་ངག་སྙན་བརྒྱུད་བསྐོར་རྣམས་ཐུགས་སུ་ཆུད་པར་བྱས། གཞན་གདམ་ངག་གི་སྐོར་དཔུང་ཆུང་བ་རྣམས་ཐུགས་སུ་ཆུད་པར་བྱིན་ནས་གྲོགས་པོ་བཞི་དང་འགྲོགས་ནས་བཏང་། ཁྱེད་བཞིས་ཁོང་བྲག་ཕུག་ནང་དུ.ཆུག་ལ་སྒོ་ཕ་བོང་རྣམས་ཀྱིས་ཆོད་ལ་ཞོག་གསུང་ནས་ལྐོག་ཏུ་བགོས། ཁོང་ལྔ་འགྲོག་ནས་གཤེགས་སོ། །མ་ཅིག་གིས་སེངྒེ་དཀར་མོ་ལ་བཅིབས་ནས་མཁའ་འགྲོ་མ་གྲངས་མེད་པས་བསྐོར་ནས། ཤམ་པོའི་ཕུག་མོ་གང་ལ་བྱོན་ནས་བརྒྱུད་དབང་མཛད་ནས་ཡོད་ཙ། རྣལ་འབྱོར་པ་ལྔ་ཡང་སླེབ་ནས་ཕྱིན། ཤམ་པོའི་གངས་ལ་སུའང་མེད་གསུངས་ཙ་སྤོས་ངད་དང་། ལྷ་ཆའི་སྒྲ་དང་མི་མང་པོ་ཡང་སྣང་། འདིར་ཡང་སྒྲུབ་པ་མཐར་སྐྱོལ་བ་གཅིག་ཡོད་པ་ངོ་མཚར་ཆེ་བསམ་པ་བྱུང་། དེ་ཡང་སྒོར་ཕྱིན་ཙ་བུད་མེད་རྒྱན་ལྡན་གཅིག་བྱུང་ནས། རྣལ་འབྱོར་པ་ལ་ནང་དུ་བྱོན་གསུངས་ནས་ནང་དུ་ཕྱིན་ཙ་སེངྒེའི་ཁྲི་སྟེང་ན་མ་ཅིག་ལབ་སྒྲོན་དང་འཁོར་མཁའ་འགྲོའི་ཚོགས་དང་བཅས་པ་བཞུགས་ཟིན། མ་གཅིག་གི་ཞལ་ནས། བུ་ཐང་མ་ཆད་དམ། ལྟོ་མ་ལྟོག་གམ། བཀའ་བསྟན་བཅོས་ཀྱི་བརྒྱུད་དང་བཅས་པ་ཞུས་གཅིག་སྐད། དེ་ནས་ཐོད་སྨྱོན་བསམ་འགྲུབ་ལ་བརྒྱུད་པའི་དབང་དང་། ཚེ་སྒྲུབ་ཀྱི་དབང་དང་། མ་བརྒྱུད་མཁའ་འགྲོའི་ཚོགས་དབང་། སྙན་བརྒྱུད་ཀྱི་ལུང་ཐམས་ཅད་བཀྲོལ་ནས་དབང་མཛད། བཀའ་བརྒྱུད་ཀྱི་བྱིན་བརླབས་དང་བཅས་པའི་དབང་མཛད། བྱིན་ཕབ་ཤམ་པོའི་གཞི་བདག་དམ་ལ་བཏགས་ཏེ། བཀའ་སྒོ་མཛད། གཞི་བདག་གིས་ཀྱང་བར་ཆོད་མི་འབྱུང་ཞིང་སྡོང་གྲོགས་བྱེད་པར་ཞལ་གྱིས་བཞེས། དེ་ནས་ཡུམ་ནི་ཟངས་རི་མཁར་དུ་བྱོན། བྲག་ཕུག་གི་སྒོ་བྲག་གིས་བཅད། ཅི་ཡང་མི་མཐོང་བ་གཅིག་རེད། ཟླ་བ་གསུམ་རེད་ཙ་སྣང་བ་ལ་བཀྲེས་པ་དང་། སྐོམ་པ་འདྲ་བ་ཅིག་བྱུང་། གནས་འདིར་མས་བྱིན་གྱིས་བརླབས་པའི་གནས་ཡིན། མའི་ཞལ་ནས་ངའི་འཚོ་བ་སྦྱོར་བའི་ཡོན་བདག །གཅིག་བཏང་ཟེར་བ་ཅིག་ཡིད་ལ་ཤར། ལོ་གསུམ་རེད་ཙ་སྔར་གྱི་རྣལ་འབྱོར་རྒྱུས་ཡོད་གཅིག་བཏང་སྟེ། ཐོད་སྨྱོན་བསམ་འགྲུབ་ཟེར་ནས་བོས་ཙ་ཨ་ཟེར་གྲགས། ཁྱོད་ལྟོག་ནས་མ་ཤིའམ་བྱས་ཙ། ཏིང་འཛིན་ཟས་སུ་ཟ་བ་ལ་མུ་གེས་ལྟོག་ནས་ཅི་ལ་ཤི། ཟ་མའི་སྲེད་པ་མེད་དོ་ཟེར། གཏུམ་མོའི་མེ་དྲོད་བསྒོམ་པ་ལ། །གོས་ཀྱི་སྲེད་པ་མེད་ནས་ཐལ། །སྣང་བ་གྲོགས་སུ་འཆར་བ་ལ། །ཉོན་མོངས་ཟིལ་གྱིས་ནོན་ནས་ཐལ། །ཅིར་སྣང་གྲོགས་སུ་འཆར་བ་ལ། །གྲོགས་ཀྱིས་གདུང་སེམས་བྲལ་ནས་ཐལ། །བལྟས་པས་སྐུ་དང་ཡེ་ཤེས་ཀྱིས། །ཞིང་ཁམས་ཅི་ཡང་མཐོང་བ་ལ། །ཞིང་ཁམས་གཞན་གྱི་སྲེད་པ་བྲལ་ནས་ཐལ། །ངའི་ཨ་མ་སྐུ་ཁམས་བཟང་ལགས་སམ། །གསུངས་སྐད། དེ་ནས་ཡར་དྲི་རྨེད་ཅི་བྱས་ཀྱང་གསུང་གླེང་མེད་སྐད། ལོ་བདུན་རེད་ཙ་ཉི་མ་ཤར་ཁ་བྲག་ལ་ཉི་མ་སྲབ་མདའ་ཙམ་བྱུང་སྙམ་པ་ལ། མཁའ་འགྲོ་མ་སྐུ་མདོག་དཀར་མོ་གཅིག་གིས་ཕྱག་ན་བདུད་རྩི་ཞལ་བུ་གང་བཟུང་ནས། སྒྲུབ་པ་པོ་འདི་གསོལ་ལ་སྒྲུབ་པ་མཐའ་རུ་བསྐྱོལ་གསུངས། ཁོང་གིས་བླང་ནས་གསོལ་ཏེ། ཁོང་གིས་ཐུགས་དགོངས་ལ་འདི་མ་ཅིག་གིས་ཐུགས་སྤྲུལ་གཅིག་ཨེ་ཡིན། འདི་ལ་བསྒྲུབ་པའི་དྲོད་རྟགས་གཅིག་བཤད་བསམ་ཙ། བུད་མེད་ན་རེ། མ་ཅིག་ལབ་སྒྲོན་གྱི་ཞལ་ནས། ངས་ཁྱོད་ཀྱི་ཞབས་ཏོག་གྱིས་གསུངས་པས་འཚོ་བ་དྲོང་དུ་འོང་བ་ཡིན། ང་ལ་སྒྲུབ་པའི་དྲོད་ཚད་ཀྱི་རྟགས་མ་བཤད་ཆོས་ཉིད་གཏེར་དུ་སྦོས། ང་ནི་མི་མ་ཡིན་ཡིན། ཁྱོད་ཀྱང་ད་རུང་ཁོང་ཁྲིག་སྣང་བས། ལྟ་རྟོགས་སེམས་ལ་གྱིས། དམར་ཐག་དྲང་མལ་ཆོད། ལྟ་སྤྱོད་ཟུང་འཇུག་དང་། དུ་མ་རོ་གཅིག་ཏུ་བསྲེས་ཅིག་གསུངས། དེ་ནས་ལོ་གསུམ་ལོན་ཙ་བྲག་ཕུག་གི་སྒོ་དེ་ཧར་གྱིས་བྱེ་ནས་ཐལ་ཙ། ཨ་མ་ལབ་ཀྱི་སྒྲོན་མ་སེངྒེ་དཀར་མོ་ལ་བཅིབས་ནས་བྱོན་ཏེ། ཁོང་ཡར་བཞེངས་ཙ་བླ་དང་སྒྱིད་པ་འབྱར་ནས་བར་དུ་ཁག་ཁག་ཟེར་ནས་འགྱེལ་ནས་སྣང་ངོ་། །དེ་ནས་ལངས་ཏེ་བསྒྲུབས་པའི་དྲོད་ཚད་དང་རྟོགས་པ་མ་ལ་ཕུལ། མ་ཡང་ཐུགས་མཉེས་ཏེ། སྣོད་ལྡན་དུ་གཟིགས་ནས་མའི་ཐུགས་ཀ་གོང་ཡོད་པའི་གདམས་པ་གནང་ནས། ཟངས་རི་མཁར་དམར་ནས་ཤ་ཐུད་ཁལ་རྒྱབ་མང་པོ་བཀལ་ནས་ཚོགས་འཁོར་ཆེན་པོ་བསྐོར་ནས་རྒྱུད་རིན་ཆེན་སྤུང་པའི་དབང་བརྒྱ་རྩ་བརྒྱད་མཛད་ནས། མ་རྒྱུད་ཚེའི་དབང་བརྒྱ་རྩ་བརྒྱད་མཛད། བརྒྱུད་པ་འཛིན་པའི་དབང་བསྐུར་ལུགས་རྣམས་གང་པ་རྨུག་སངས་ལ་དབང་བརྒྱ་རྩ་བརྒྱད་མཛད་ནས། ཐོད་སྨྱོན་བསམ་འགྲུབ་གྱི་བསྒོམ་རོག་ལ་བཞུགས་ཙ། ཤམ་པོ་གངས་ལ་ཆོས་བརྒྱུད་འཛིན་པ་རིན་པོ་ཆེའི་བརྒྱུད་པ་མུ་ཏིག་ཙར་ལས་བརྒྱུས་པ་བཞིན་དུ་འོང་གསུངས། མིང་ཡང་གངས་པ་རྨུག་སང་དུ་བཏག །མ་ཅིག་ཀྱང་ལོ་དགུ་བཅུ་གོ་དགུ་ལོན། མའི་ཞལ་ནས་གསུངས། ང་ཡང་ལོ་དགུ་བཅུ་གོ་དགུ་ལོན་ཙ་ནུབ་ཕྱོགས་ཨུ་རྒྱན་ཡུལ་དུ་འགྲོ་དགོས། འདིར་ཡང་འགྲོ་དོན་རྫོགས་པས་སྲིན་པོའི་གྲོང་ཁྱེར་ཁ་མི་བརྒྱུད་གསུངས། གླིང་བཞིའི་ལེའུ་སྟེ་རྫོགས་སོ།། །།དེ་ནས་མ་ཅིག་ལོ་དགུ་བཅུ་གོ་དགུ་ལོན་པའི་དུས་སུ་སྲས་རྒྱལ་བ་དོན་འགྲུབ། ཐོད་སྨྱོན་བསམ་འགྲུབ་ལ་སོགས་དབུས་གཙང་རུ་བཞིའི་གྲྭ་སློབ་ཐམས་ཅད་བསྡུས་ནས། ཚོགས་བརྒྱ་མང་དུ་མཛད། དབང་དང་བྱིན་རླབས་མཛད། རྫས་རྣམས་འགྱེད་བྱས། འབྲུག་ལོའི་དགུན་ཟླ་ཐ་ཆུང་གི་བཅོ་ལྔའི་ནུབ་མོ་ཟངས་རི་མཁར་དམར་གྱི་ཐོག་ཏུ་ཡར་བྱོན་ནས་ཐོ་རས་སྐྱ་རིང་ཤར་ནས་སྐུ་གཤེགས་ཆིས་བྱེད་པའི་དུས་སྲས་གཉིས་ལ་ལག་པ་ཟེད་གསུངས་ནས། ཞལ་མཆིལ་རེ་གནང་ནས། རྒྱལ་བ་དོན་འགྲུབ་ཀྱི་ཕྱག་ཏུ་དུང་གཡས་སུ་འཁྱིལ་བ་གཅིག་བྱོན། ཐོད་སྨྱོན་བསམ་འགྲུབ་ཀྱི་ཕྱག་ཏུ་ཚིམ་གསུམ་བྱོན་པ་ལ། གཅིག་ལ་ཐུབ་པའི་སྐུ་བྱོན། བཀའ་བརྒྱུད་ཀྱི་དབང་དང་ལྡན་པར་གྱུར་ཅིག །གཅིག་ལ་རྗེ་བཙུན་སྒྲོལ་མའི་སྐུ་གཅིག་བྱོན། མ་བརྒྱུད་ཀྱི་དབང་དང་ལྡན་པར་གྱུར་ཅིག །གཅིག་ལ་དུང་གཡས་སུ་འཁྱིལ་བ་གཅིག་བྱོན། འགྲོ་བའི་དོན་ཡུན་རིང་དུ་གནས་པར་གྱུར་ཅིག་གསུངས། དེ་ནས་མ་གཅིག་སེངྒེ་ལ་བཅིབ་སྟེ། འཁོར་མཁའ་འགྲོ་མ་དཔག་མེད་ཀྱིས་བསྐོར་ནས་ལུས་ལྷག་མེད་དུ་གཤེགས་སོ། །ནུབ་ཕྱོགས་ཨོ་རྒྱན་གྱི་གནས་སུ་བྱོན། དེ་ནས་ཐོད་སྨྱོན་བསམ་འགྲུབ་ནི་ཤམ་པོ་གངས་ལ་མྱུར་བར་གཤེགས་སོ། །རྒྱལ་བ་དོན་འགྲུབ་དང་། ཟངས་རི་མཁར་དམར་འཚོགས་པའི་གྲྭ་བསྐོར་རྣམས་ཀྱིས། མའི་ན་བཟའ་འགའ་ཞིག་དེ་མེ་མཆོད་བྱས། དགེ་འདུན་པ་འགའ་ཞིག་གིས་ནང་རྟེན་བཞེངས། འགའ་ཞིག་གིས་ཀུན་རིགས་རྒྱས་པར་བྱས། ཐམས་ཅད་ཀྱིས་མཆོད་པ་རྒྱ་ཆེན་པོ་བཤམ་ནས། མ་ལ་ངོ་མཚར་གྱིས་གསོལ་བ་འདེབས་ཤིང་བཞུགས་སོ། །དེ་ནས་རྒྱལ་བ་དོན་འགྲུབ་གླང་ལུང་དུ་གཤེགས་སོ། །སྤྱིར་མ་ཅིག་ལ་སྲས་མང་དུ་ཡོད་ཀྱང་། བརྒྱུད་འཛིན་གྱིས་སྲས་བཅུ་དྲུག་ཏུ་གྲགས་སྟེ། དེ་ལ་སྲས་པོ་བཞི། སྲས་མོ་བཞི། རང་དང་མཉམ་པ་བརྒྱད་དེ། བཅུ་དྲུག་ཏུ་གྲགས་སོ། །སྲས་པོ་བཞི་ཡང་། འཁྲུངས་པའི་སྲས་རྒྱལ་བ་དོན་འགྲུབ། བརྒྱུད་འཛིན་གྱི་སྲས་སྟོང་སྡེ་ངག་གི་དབང་ཕྱུག །ཐུགས་འཛིན་གྱིས་སྲས་གྲོལ་སྡེ་རྒྱལ་བའི་འབྱུང་གནས། སྐལ་ལྡན་གྱི་སྲས་ཁུ་སྒོམ་ཆོས་སེང་དང་བཞིའོ། །སྲས་མོ་བཞི་ནི། ལབ་ལུང་གི་འགྲོ་བ་རྒྱན། གང་བར་ལྕེ་གྲོང་གི་ཞང་ལྕམ་དཔལ་རྒྱན། སྣོན་པའི་སྟོང་ཚ་འབུམ་རྒྱན། འཕན་ཡུལ་གྱི་ཉང་མོ་བསོད་རྒྱན་དང་བཞི་ཡིན། རང་མཉམ་གྱི་སློབ་མ་རྒྱན་བཞི་བྱ་བར་གྲགས་སོ། །དེ་ཚོའི་ལོ་རྒྱུས་ནི་གཅོད་གཏེར་མའི་དབུས་ན་བཞུགས་སོ། །རང་དང་མཉམ་པའི་སྲས་བརྒྱད་ལ། མཁྱེན་པ་རང་དང་འདྲ་བ་དག་པོ་སྲོང་ཁའི་སྐྱེ་མེད་དགའ་ཡན་དང་གཅིག །རྟོགས་པ་རང་དང་མཉམ་པ་ལ་སྟོད་ལྷ་དྲུག་གི་ཕོ་སྨྱོན་སེངྒེ་དང་གཉིས། བྱིན་རླབས་རང་དང་མཉམ་པ་བྱང་མི་ཏིའི་སྨྱོན་པ་རང་སང་དང་གསུམ། བརྟུལ་ཞུགས་རང་མང་མཉམ་པ་བསམ་ཡས་ཀྱིས་དོ་པ་ཟང་ཐལ་དང་བཞི། ནུས་པ་རང་དང་མཉམ་པ་ལྷོ་བྲག་གཏུམ་ཤུལ་གྱི་ཞིག་པོ་ཧུར་ཐོན། ཐུགས་རྗེ་རང་དང་མཉམ་པ་ཕན་ཡུལ་གྱི་སྐལ་ལྡན་སེངྒེ། ཙི་སྟོན་དར་མ་ཡང་ཟེར། མངོན་ཤེས་རྫུ་འཕྲུལ་རང་དང་མཉམ་པ་མལ་གྲོའི་རྒྱ་སྒོམ་ཧག་ཐོན། འགྲོ་དོན་རང་དང་མཉམ་པ་རྐང་པོའི་རྗེ་བཙུན་ཟིལ་གནོན་དང་བརྒྱད་འབྱུང་ངོ་། །སྲས་རྒྱལ་བ་དོན་འགྲུབ་ནས་བརྒྱུད་པ་ཚོ་དབུས་ན་དར་ཆ་ཆེ། སྟོང་སྡེ་ཚོ་ལྷོ་བྲག་ངོས་ནས་དར་ཆ་ཆེ། ཁུ་སྒོམ་གྱིས་ཚོ་གཙང་ན་དར་ཆ་ཆེ། རང་དང་མཉམ་པའི་སྲས་བརྒྱད་ནས་བརྒྱུད་པ་ཚོ་ཉང་པོ་རོང་ལ་སོགས་པ་ཕྱོགས་ཐམས་ཅད་ན་ཅོ་ལོ་ཁྱབ་ཡོད། སྲས་མོ་རྒྱན་བཞི་ལ་སོགས་པའི་ཚོ་ལ་བྱིན་རླབས་ཀྱི་བཀའ་བབས་པས་མ་བརྒྱུད་གཏེར་མའི་སྐོར་བྱ་བ་གྲགས་ཏེ། ཁམས་ན་དར་ཆ་ཆེའོ། །སྲས་དེ་ཚོའི་ལོ་རྒྱུས་དང་བརྒྱུད་ལུགས་ཞིབ་པར་ལོགས་སུ་ཤེས་སོ། །འདིར་ཡི་གེ་མང་པོས་འཇིགས་པའི་ཕྱིར་མ་བྲིས་སོ། །སྲས་དེ་རྣམས་ཀྱི་ནང་ནས་ཁྱད་པར་དུ་ཐུགས་ཀྱི་སྲས་ཁུ་སྒོམ་ཆོས་སེང་དང་། ནུབ་ལོ་ཉིལ་ཆུང་མ་ཡིན་གསུངས། དེ་ལ་ཡང་ཐུགས་ཟིན་པ་ནི་ཁུ་སྒོམ་ཡིན་སྐད། ཁུ་སྒོམ་གྱིས་མ་ཅིག་གིས་གཟིམ་གཡོག་འགའ་ཞིག་མཛད་པས། མ་ཅིག་ཤིན་ཏུ་མཉེས་པ་ཡིན་གསུངས། ཕྱིས་སྐུ་གཤེགས་ཁར་ཁུ་སྒོམ་གྱིས་མ་ཅིག་ལ་ཞུས་པ། མ་ཅིག་ཁྱེད་ཀྱིས་སྔར་གསུངས་པའི་ཆོས་འདི་རྣམས་མ་ཅིག་ཉིད་ཀྱིས་ཐུགས་བརྒྱུད་ལ་འཁྲུངས་པའི་མན་ངག་ཏུ་འདུག་པ་ལ། སངས་རྒྱས་ནས་བརྒྱུད་པའི་ཆོས་གཅིག་ཡོད་ཐང་བ་གཅིག །ཉིད་ཀྱིས་གང་ལ་གསང་ཞུ་ལགས་ཞུས་པས། མ་ཅིག་གིས་ཞལ་ནས་ཁྱེད་དེ་བདེན། ང་ལ་སངས་རྒྱས་ནས་བཀའ་བརྒྱུད་པའི་དགོངས་པ་ཡོད། སངས་རྒྱས་ནས་ད་ལྟའི་བར་དུ་བརྒྱུད་པ་ཟམ་མ་ཆད་པ། གདམ་ངག་གི་བཅུད་མ་ཉམས་པ། བྱིན་རླབས་ཀྱི་དྲོད་མ་ཡལ་བ། བཀའ་བརྒྱུད་དོན་གྱི་གདམ་པ་འདི་དབང་པོ་རབ་འབྲིང་ཐ་མ་གསུམ་གྱི་གཅོད་གསུམ་ནང་དྲོད་ཚད་དང་ལྡན་པས་ཆོ་འཕྲུལ་རང་ཞིར་གཏོང་བའི་ལས་ཚོགས་ཕྲིན་ལས་དང་བཅས་པ་ཡོད་དེ། དེ་སྔ་སུས་ཞུ་ཟེར་མི་ཡང་མ་བྱུང་། གདམ་པ་ཟབ་པ་དང་ཕར་ལ་ཡང་སུ་ལ་རང་དད་ཀྱིས་མ་བསྟན་པ་ཡིན། ད་ཁྱོད་ལ་བསྟན་པར་བྱ་གསུངས་ནས་གནང་བའོ། །ཁུ་སྒོམ་གྱིས་མ་ཅིག་གྲོང་ནས་སྲས་ཐོད་པ་དོན་འགྲུབ་ལ་སྨྲས་པ། མ་གཅིག་ལ་གདམས་ངག་འདི་ལྟ་བུ་གཅིག་འདུག་པ་ངས་ཞུས་ནས་ཡོད་པ་སློབ་དཔོན་ལ་ཞབས་ཐོགས་སུ་འབུལ། བཟླས་པས། སྲས་ན་རེ། མ་ལ་གདམས་ངག་ཡོད་ན་བུ་ལ་སྟེར་མཆིས། ང་ལ་མ་བསྟན་པའི་གདམ་ངག་ཁྱེད་ལ་མེད་དེ་མཆིས་གསུངས་ནས། མ་ཞུས་པས། སྲས་ལ་བཀའ་བརྒྱུད་དོན་གྱི་གདམ་པ་མེད་པའི་རྒྱུ་མཚན་དེ་ལགས། ཁུ་སྒོམ་ལ་དོལ་པ་ཟངས་ཐལ་གྱིས་ཞུས། དོལ་པ་ཟང་ཐལ་དེས་དང་པོ་གཙང་ན་མཚན་ཉིད་ཀྱི་ཆོས་བསླབ་ནས་འདུག་པ་ལ། ཆེ་འདོན་དཀར་ཡོལ་བའི་ཡུལ་མི་རྣམས་ཀྱིས་སྙད་ཚོལ་བས་བསྡད་དབང་མ་སྟེར་བས་སྐྱོ་བ་སྐྱེས་སྟེ། ཡར་གཙང་ན་བྱོན་པས་དེའི་ལམ་དུ་བུད་མེད་གཅིག་གིས་ཞོ་སྐྱོགས་གང་དྲངས། མར་གྲོགས་གཅིག་ཕུལ་ནས་གདམས་ངག་གཅིག་ཞུ་ཟེར་བ་ལ། ཁོང་གིས་མཚན་ཉིད་ཀྱི་ཆོས་ཤེས་ཀྱང་། གདམས་ངག་ཚིག་གསུམ་བསྟན་མ་ཤེས་པ་དང་། ཀྱེ་མ་མཚན་ཉིད་ཀྱི་ཆོས་ཀྱི་ཀྱང་ཅུང་ཞིག་མི་ཕན་པར་འདུག་སྙམ་ནས་སྐྱོ་བ་སྐྱེས་སྟེ། ཡུལ་དབུས་ནས་མར་བྱོན་ནས། བླ་མ་ཁུ་སྒོམ་ཆོས་སེང་དང་མཇལ་ནས་གདམ་ངག་འདི་ཞུས་ནས་ཉམས་ལེན་བྱས་པས། ལས་ཚོགས་ཀྱི་ནུས་པ་ཡང་སྟོན། ཡུལ་གྱི་དགྲ་ལ་མཐུ་སེར་བ་གཉིས་ཀ་བྱས་པས། དགྲ་ཐམས་ཅད་དབང་དུ་འདུས་པ་བྱུང་གསུངས། དེས་རྒྱ་ནག་གཅེར་བུ་ལ་གནང་བ་ཡིན་སྟེ། དེ་ནས་དོལ་པ་ཟངས་ཐལ་གྱི་སྔོན་མཐུ་སེར་ཚོ་བྱས་པས་ཤིན་ཏུ་འགྱོད་པ་སྐྱེས་ཏེ། ཇོ་མོ་གཅིག་ཡོད་པ་དང་གཉིས། རྒྱ་ནག་གཅེར་བུ་ལ་སྡུག་བསྔལ་ཞི་བྱེད་ཀྱི་ཆོས་ཞུ་རུ་ཕྱིན་པས། ཀུལ་ཕྱིང་རང་ལ་སློབ་དཔོན་བཞུགས་ནས་ཚོགས་མཛད་པའི་སར་མཇལ་ནས། སྡུག་བསྔལ་ཞི་བར་བྱེད་པའི་ཆོས་ཞུས་པ་ལ། ཁོང་གིས་ཅོག་ཆུང་གཅིག་ཀྱང་བྱས་ནས་ཆོས་ཉན་ཞིང་བཤད་ཅིང་འདུག་པ་ལ། ཆོས་ཐུན་གྱི་གཤམ་དུ་གཅོད་ཁ་འཐོར་ཉམས་ཀྱི་མན་ངག་བག་རེ་ཙམ་བཤད་ཅིང་འདུག །ཁྱོད་ཀྱི་གཅོད་ཁ་འཐོར་འདི་སུ་ལ་ཞུས་དྲིས་ཙ། སློབ་དཔོན་ཐོད་པ་གྲུབ་སེ་ལ་ཞུས་གསུངས། འོ་ན་བཀའ་བརྒྱུད་དོན་གྱི་གདམ་པ་ཞེས་བྱ་བ་སངས་རྒྱས་ནས་ད་ལྟའི་བར་དུ་བརྒྱུད་པ་ཟམ་མ་ཆད་པ། ནང་དྲོད་ཚད་དང་ལྡན་པས་ཆོ་འཕྲུལ་རང་ཞིར་འགྲོ་བ་ཡོད་པའི་གདམ་པ་མཁྱེན་ལགས་སམ། ཞུས་ནས། དེར་བླའོ་བྱས་པས་ཁྱོད་ཀྱི་ཀྱང་ཤེས་སམ་གསུངས་པས། ཤེས་ལགས་བཀའ་བརྒྱུད་དོན་གྱི་གདམ་པ་བྱ་བ་སངས་རྒྱས་བཅོམ་ལྡན་འདས་ནས་ད་ལྟའི་བར་བརྒྱུད་པ་ཟམ་མ་ཆད་པ། གེགས་སེལ་དྲོད་ཚད་ཞལ་ཤེས་ཀྱི་བྱ་བ་གཉིས་དང་བཅས་པ། ནང་མན་ངག་གིས་གདམས་པ་ཟབ་མོའི་གནད་ཀྱི་ཆོ་འཕྲུལ་རང་ཞིར་འགྲོ་བའི་མན་ངག་འདི་འདྲ་བ་ཤེས་བཟླས་པས། སློབ་དཔོན་དད་པ་སྐྱེས་ཏེ། ཞུ་དགོས་གསུང་པ་ལ། ཆོས་ཕར་བསླབ་ཚུར་བསླབ་མཛད་ནས། དོལ་པ་ཟངས་ཐལ་གྱི་རྒྱ་ནག་གཅེར་བུ་ལ་གཅོད་སྐོར་བཤད་པས། ཕྱིས་རྒྱ་ནག་གཅོད་མཁན་ཆེན་པོར་གྲགས་ནས་གཅོད་ཀྱི་སློབ་མ་མང་པོ་བྱུང་སྐད། དེས་བླ་མ་སངས་རྒྱས་རབ་སྟོན་ལ་གནང་སྟེ། མཁྱེན་པ་མཐོ་ཞིང་ཡོན་ཏན་དུ་མ་དང་ལྡན་ནས་གྲུབ་ཐོབ་ཆེན་པོར་གྱུར། ལོ་ཡང་བརྒྱ་དང་མང་པོ་ལོན་སྐད། དེས་ཟལ་མོ་པ་དད་པའི་ཤེས་རབ་ལ་གནང་སྟེ། དེ་ཡང་དང་པོ་ཨརྱ་དེ་བའི་གཞུང་ཆུང་གཟིགས་པས། དད་པ་སྐྱེས་ནས་འདི་སུས་ཤེས་དྲིས་པས། བླ་མ་སངས་རྒྱས་རབ་སྟོན་གྱིས་མཁྱེན་ཟེར་བས་དྲུང་དུ་ཕྱིན་ནས་ཞུས་པས་གནང་སྟེ། ཁོང་ཐུགས་རྗེ་ཤེས་རབ་ཤིན་ཏུ་ཆེ་བ་ཡོན་ཏན་ཕུན་སུམ་ཚོགས་པ་མངའ་བ། འཕགས་སྐོར་ཡོ་ག་དུས་འཁོར་ཀྱཻ་རྡོར་ལ་སོགས་པའི་སྔགས་རྣམས་མཁྱེན། བྱང་ཆུབ་ཀྱིས་སེམས་འབྱོངས་པས་ཆོས་བརྒྱད་མེད་པར་འགྲོ་དོན་མཛད་པའི་གྲུབ་ཐོབ་ཆེན་པོ་ཡིན་ནོ། །དེས་གདམས་ངག་གཅིག་བརྒྱུད་རྣམས་བླ་མ་སུམ་པ་རས་པ་ལ་གནང་ནས། གཉན་ཁྲོད་འགྲིམས་པས་མཛེ་ནད་ཐོན་པ་དང་། སྐྱེ་མེད་ཀྱི་དོན་ཁོང་དུ་ཆུད་ནས་སེམས་ཅན་མང་པོ་ལ་སྨིན་གྲོལ་མཛད་དོ། །དེས་སངས་རྒྱས་གཉན་སྟོན། དེས་རས་པ་ཆོས་སེང་། དེས་གཡུང་གཞེར་སྟོན་པ། དེས་ཀཿཐོག་པ་ཤེས་རབ་བླ་མ། དེས་རྗེ་བཙུན་དཔལ་འབར་བ། དེས་རྟོགས་ལྡན་ནམ་མཁའ་རྡོ་རྗེ། དེས་བླ་མ་ཡང་ཁྲོད་པ། དེས་མཁས་བཙུན་ཡེ་ཤེས་རྒྱན་པ། དེས་བདག་ལའོ། །དེ་ལྟ་བུའི་བརྒྱུད་པ་ངོ་མཚར་ལོ་རྒྱུས་ཀྱི་རིམས་པའི་དོན་དང་ལྡན་ནམ་མི་ལྡན་གྱིས་སློབ་དཔོན་བརྟགས་པ་དང་། སློབ་དཔོན་དེས་ཆོས་གསུངས་པའི་གནད་དུ་རུང་མི་རུང་གི་སློབ་མ་བརྟགས་པ་རྣམས་ནི་གཞན་དུ་ཤེས་སོ། །གོང་དུ་བཤད་པ་དེ་རྣམས་ནི་མ་གཅིག་གིས་རྣམ་ཐར་རྒྱས་པ་གླིང་བཞི་མ། རྣམ་ཐར་བསྡུས་པ་ཟབ་དོན་ཐུགས་སྙིང་གི་ལོ་རྒྱུས། བཀའ་བརྒྱུད་དོན་གྱི་ལོ་རྒྱུས་བསྡུས་པ། དེ་རྣམས་ཀྱི་ནང་ནས་བཏུས་སོ། །དེས་ཡིད་ཆེས་ཤིང་ཁུང་བཙུན་པར་བྱ་བའི་ཕྱིར་དུ་བརྒྱུད་པའི་ལོ་རྒྱུས་ཀྱི་རིམ་པ་ཟུང་བཞི་ཡ་བརྒྱད་ཀྱིས་ཁོག་ཕུབ་པ་དེ་སོང་ངོ་། ༈ །སྤྱི་དོན་གཉིས་པ་མཚོན་པ་དཔེ་དྲུག་གི་གཅོད་ཀྱི་ཆེ་བ་བསྐྱེད་པ་ནི། མའི་ཞལ་ནས་སྤྱིར་གཅོད་ཀྱི་ཆོས་འདི་གཡུའི་དུམ་བུ་དང་འདྲ། གསེར་གྱི་ཕྱེ་མ་དང་འདྲ་བས་གཞུང་དུ་ལོང་བ་མེད་ཅིང་། ཆ་ལག་ཚང་བ་མེད་ཀྱང་མན་ངག་སྣ་རེས་ཀྱང་ཕན་ཐོག་པ་ཡིན་གསུངས། གངས་རི་དང་འདྲ་སྟེ་ཁ་བ་བབ་ཀྱང་དཀར། མ་བབས་ཀྱང་དཀར། དེ་བཞིན་དུ་ཆོས་གཞན་གྱི་རྟེན་ཡོད་ཀྱང་ཆོག །མེད་ཀྱང་ཆོག །སེངྒེ་དང་འདྲ་སྟེ་སེངྒེ་ལ་ཁྱུ་ཆེ་ཡང་ཆོག །གཅིག་གིས་ཀྱང་ཁེར་རྐྱང་ཕེར་སྟེ། དེ་བཞིན་དུ་གཅོད་མཁན་ལ་ཆོས་གཞན་ཤེས་ཀྱང་ལེགས། གཅོད་རྐྱང་པ་ལས་མི་ཤེས་ཀྱང་འགྲོ་དོན་བྱར་བཏུབ། རྔ་བོ་ཆེའི་སྒྲ་དང་འདྲ་སྟེ། བརྡུང་བའི་དུས་སུ་དུང་དང་ཆ་ལང་ལ་སོགས་པའི་སྒྲ་ཇི་སྙེད་གཅིག་ཡོད་ཀྱང་། རྔ་བོ་ཆེའི་སྐད་ཀྱི་ཞོར་འདེགས་མིན་པ་རང་རང་གི་སྐད་ཀྱི་ངོ་བོ་མ་ཐོན་པ་བཞིན་དུ་ཆོས་ཇི་སྙེད་གཅིག་ཤེས་ཀྱང་། གཅོད་ཀྱི་ཞོར་འདེགས་ལས་མི་འོང་བ་ཡིན། དངོས་གྲུབ་ཀྱི་ཆུ་མིག་དང་འདྲ་སྟེ། མི་མང་ཡང་འཚོ། ཉུང་ཡང་འཚོ་དཔེ་དེ་བཞིན་དུ་གྲྭ་པ་དང་བུ་སློབ་དང་མི་མང་ཡང་སངས་རྒྱས། ཉུང་ཡང་སངས་རྒྱས་པ་ཡིན་ནོ། །རྟ་བཟང་པོའི་སྤུ་མདོག་དང་འདྲ་བ་ཡིན་ཏེ། སྔོ་ཡང་མཛེས། ནག་ཀྱང་མཛེས། དཔེ་དེ་བཞིན་དུ་གཅོད་ཉམས་སུ་ལེན་པའི་གང་ཟག་ལ། ཆོས་གང་དང་ཡང་བསྟུན་དུ་གཏུབ་པ་ཡིན། འོན་ཀྱང་སྤུ་རིས་སུ་ཕྱེ་ན་ཕྱི་ཕ་རོལ་ཏུ་ཕྱིན་པ་མཐུན་པ་ཡིན་པས་རྒྱས་འབྲིང་བསྡུས་གསུམ་མ་ཤེས་ཀྱང་། བསྡུས་པ་རེས་ཙམ་ལ་བཤད་པ་གྱིས། ནང་གསང་སྔགས་དང་མཐུན་པ་ཡིན་པས། རྒྱུད་སྡེ་ཆེན་པོ་མ་ཤེས་ཀྱང་རྡོ་རྗེ་ཕག་མོའི་སྒྲུབ་ཐབས་བསྐོར་རེ་ཙམ་སྐྱོང་དང་གསུངས། ཆོས་འདི་ལ་ཡོངས་སུ་བྱའམ། དོགས་སུ་བྱ་ཞུས་པས། ལར་གཅོད་འདི་བཀའ་ཕ་རོལ་ཏུ་ཕྱིན་པའི་དགོངས་པ་ཡིན། གསང་སྔགས་རྣལ་འབྱོར་བླ་ན་མེད་པའི་རྒྱུད་དང་ཡང་མཐུན་ཆ་ཆེ། ཆོས་གང་དང་བསྟུན་ཀྱང་མི་མཐུན་པ་མེད། ཁྱད་པར་མ་རྒྱུད་དང་མཐུན་ནོ། །འདི་ཡང་ཟབ་དོན་ཐུགས་སྙིང་གི་ལོ་རྒྱུས་ནས་བཏུས་སོ། །དེས་གཉིས་པ་མཚོན་པ་དཔེ་དྲུག་གི་ཆེ་བ་བསྐྱེད་པ་སོང་ངོ་། ༈ །སྤྱི་དོན་གསུམ་པ་ཕྱི་ནང་གསང་གསུམ་གྱི་སྒོ་ནས་གཅོད་ཀྱི་ཆོས་ངོས་བཟུང་བ་ནི། དང་པོ་ཕྱི་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་ལྟར་ངོས་བཟུང་ན། གཅོད་འདི་བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར་བའི་དགོངས་དོན་ཡིན། ཅིའི་ཕྱིར་ན། གཅོད་གཞུང་ཐམས་ཅད་ནས། ཕ་རོལ་ཏུ་ཡིན་པ་དྲུག་ལྡན་གྱི་དགོངས་པ། སྟོང་ཉིད་སྙིང་རྗེ་སྙིང་པོ་ཅན། མཐའ་བྲལ་དབུ་མའི་དགོངས་དོན་སྟོན་ནས་ཡོད་པ་དང་། ལས་མཁན་ཡུམ་ཆེན་མོས་བྱེད་པའི་ཕྱིར་རོ། །གཉིས་པ་གསང་སྔགས་ལྟར་ངོས་བཟུང་བ་ནི། ཐེག་པ་དགུའི་ཁྲིད་ལས། མཚན་ཉིད་གསང་སྔགས་ལྷའི་ཕྱེ། །ཅེས་གསུངས་པས། མཚན་ཉིད་ཀྱི་ལུགས་ལ་ཡི་དམ་ལྷའི་སྒྲུབ་ཐབས་མེད་ཀྱང་། གསང་སྔགས་ཀྱི་ལུགས་ལ་རྗེ་བཙུན་མའི་བསྒྲུབ་ཐབས་ཡོད་པ་ནི། སྒོ་འབྱེད་བཅུ་ཡི་སྒྲུབ་ཐབས་བྱིན་རླབས་སྒོ་འབྱེད་ཀྱི་ནང་དུ་སྟོན་པ་དང་། ལས་མཁན་རྗེ་བཙུན་མས་བྱེད་པའི་ཕྱིར་རོ། །ཕར་ཕྱིན་གྱི་ལུགས་ལ་དབང་བསྐུར་མེད་ཀྱང་། གཅོད་འདི་ལ་མ་ཅིག་གིས་གཅོད་དབང་རིན་ཆེན་སྤུངས་པ་དང་། ཚོགས་རིན་ཆེན་སྤུངས་པ། དབང་བསྐུར་ཆོས་ཀྱི་སྒོ་འབྱེད་རྣམས་གསུངས་པའི་ཕྱིར་རོ། །ཕར་ཕྱིན་གྱི་ལུགས་ལ་ཤ་ལྔ་བདུད་རྩི་ལྔ་རྟེན་པའི་བཤད་པ་མེད་ཀྱང་། གཅོད་འདིའི་ལུགས་ལ། མཛེ་ཤ་དམར་པོ། མཛེ་ཀླད་དྲོན་མོ། མཛེ་གོས་བཙོག་མོ་ལ་སོགས་ཤ་ལྔ་བདུད་རྩི་ལྔ་བརྟེན་པ་ཡིན་ཏེ། མ་ཅིག་གིས་ཞལ་ནས། བདུད་རྩི་དྲི་ཆེན་དྲི་ཆུ་དང་། མི་ཤ་ཁྱི་ཤ་ལ་སོགས་པ། གཙང་རྩོག་མེད་པར་ཉམས་སུ་བླངས། །ཅེས་གསུངས་སོ། ༈ །གསུམ་པ་གསང་བ་བླ་མེད་ཀྱི་དགོངས་དོན་ལྟར་ངོས་བཟུང་བ་ནི། ཕ་རོལ་དུ་ཕྱིན་པའི་ལུགས་ལ། ཀུན་རྫོབ་དོན་དམ་སྤང་གཉེན་རེས་མོས་སུ་འདོད་ཀྱང་། གཅོད་འདིའི་ལུགས་ལ་གང་ཤར་གྱི་ངོ་བོ་ལ་སྤང་བླང་དང་དགག་སྒྲུབ་ཀྱི་རྩོལ་བ་མེད་པར་འདོད་དེ། མ་ཅིག་གིས་ཞལ་ནས། སེམས་སྐྱེ་བ་མེད་པའི་མཎྜལ་ལ། །དོན་སྣང་བ་སྣ་ཚོགས་ཀྱི་ཚོམ་བུ་བཀོད། །སྣང་སྟོང་འཛིན་མེད་ཀྱི་ཆག་ཆག་གདབ། །རོ་མཉམ་བདེ་ཆེན་གྱི་ངང་དུ་འབུལ། །ཟུང་འཇུག་རྟོགས་པར་བྱིན་གྱིས་རློབས། །ཅེས་སོ། །ཕྱི་ནང་གསང་གསུམ་འདིའི་ལུགས་ནི། གཏེར་གཅོད་ལས། འདིར་ནི་གདུལ་བྱའི་ཁྱད་པར་ལས། །འདུལ་བྱེད་ཕྱི་ནང་མདོ་སྔགས་གཉིས། །སྔགས་ལྟར་ཆོས་སྒོ་དབང་གི་དབྱེ། །དེ་ནི་ཐབས་ཀྱི་ཁྱད་པར་ཡིན། །མདོ་ལྟར་ལྟ་སྒོམ་གཏན་ལ་དབབ། །སྤྱོད་པ་སྔགས་ཀྱི་སྲང་ལ་གཞུགས། །ཅེས་དང་། ཡང་དེ་ཉིད་ལས། གང་ཕྱིར་མ་འོངས་བསྐལ་པའི་མཐར། །གྲུབ་མཐའ་ཕྱོགས་རིས་འཐེན་བྱེད་ཅིང་། །ཆོས་སྤང་ལ་སོགས་འབྱུང་བའི་ཕྱིར། །མདོ་སྔགས་མཐའ་བྲལ་གཅོད་ཀྱིས་དོན། །གསེབ་ལམ་འདི་ལ་འཇུག་པ་གཅེས། །ཅེས་པ་དང་། འཕགས་པ་ཀླུ་སྒྲུབ་ཀྱིས། ལྟ་བ་ནི་དབུ་མ་མཐའ་བྲལ་གྱི་ལྟ་བ། སྒོམ་པ་ནི་ལམ་ཕྱག་རྒྱ་ཆེན་པོ་ཉམས་སུ་ལེན་པ། སྤྱོད་པ་ནི་སྣང་ཞེན་གྱི་འཁྲི་བ་བཙན་ཐབས་སུ་གཅོད་ཅིང་སྤང་གཉེན་རོ་མཉམ་ངོ་བོ་གཅིག་ཏུ་སྤྱོད་པ། འབྲས་བུ་ནི་སྐུ་ལྔ་ཡོངས་རྫོགས་ཐོབ་པར་བྱེད་དོ། །ཅེས་སོ། །དེས་གསུམ་པ་ཕྱི་ནང་གསང་གསུམ་གྱི་སྒོ་ནས་གཅོད་ཀྱི་ཆོས་ངོས་བཟུང་བ་སོང་། ༈ །སྤྱི་དོན་བཞི་པ་བློ་ལྡོག་རྣམ་པ་བཞིའི་སྒོ་ནས་སེམས་ཅན་ཐམས་ཅད་ཀྱི་རྒྱུད་ཡོངས་སུ་སྦྱོངས་བའི་ཐབས་ནི་གཞན་དུ་ཤེས་སོ། ༈ །སྤྱི་དོན་ལྔ་པ་དངོས་གྲུབ་རྣམ་པ་གཉིས་འབྱུང་བར་བྱེད་པའི་ཐབས་ལ། གཅོད་ཀྱི་གདམ་པ་ལག་ལེན་དུ་བསྟན་པ་དངོས་ལ་གཉིས་ཏེ། རྡོ་རྗེའི་ཚིག་རྐང་གིས་གཞུང་སྲང་བ། སྦྱོར་དངོས་རྗེས་གསུམ་གྱིས་ཉམས་སུ་ལེན་པའོ། །དང་པོ་ནི། མ་ཅིག་ལབ་ཀྱི་སྒྲོན་མས། ཚད་མེད་ཀྱི་སྙིང་རྗེ་བརྒྱུད་ལ་སྦྱངས། །གཏད་མེད་ཀྱི་རིག་པ་དབྱིངས་དང་བསྲེ། །བདག་མེད་ཀྱི་ལུས་པོ་གཟན་དུ་བསྐྱུར། །སྤྲོས་མེད་ཀྱིས་ངང་དུ་ལྷང་ངེར་བཞག །ཅེས་པ་ནི། འོག་གི་གཞུང་གི་སྐབས་སུ་རིམས་པར་གསལ་ལོ། ༈ །གཉིས་པ་སྦྱོར་དངོས་རྗེས་གསུམ་གྱིས་ཉམས་སུ་ལེན་པ་ལ་གསུམ་སྟེ། སྦྱོར་བ་དང་། དངོས་བཞི། རྗེས་སོ། །དང་པོ་ལ་གཉིས་ཏེ། ལམ་གྱི་བྱེད་ལས་དང་། གནས་ཀྱི་བྱེད་ལས་སོ། །དང་པོ་ལམ་གྱི་བྱེད་ལས་ལ། ཁྱིམ་ནས་གཉན་ཁྲོད་དུ་མ་ཕེབ་ཀྱི་བར་ལ་དོན་བཞི་སྟེ། དང་པོ་གཅེས་པ་རྣམ་པ་གསུམ་ནི། འགྲོ་བའི་གཉན་ས་གསང་བ་གཅེས། །ཉིལ་ཆུང་འཕར་མའི་དམིགས་པ་གཅེས། །ལམ་གྱི་ལྷ་འདྲེ་དབང་བསྡུད་གཅེས། །ཅེས་གསུངས་པས། དང་པོ་གར་འགྲོ་གསང་ཞིང་ཟིལ་གནོན་འཕེན་པ། གཉིས་པ་ཁྱིམ་ནས་སྒོར་མ་ཕེབས་ཀྱི་བར་དུ་སེམས་བསྐྱེད་པ། གསུམ་པ་སྒོར་ཕེབས་ནས་གཉན་མགོ་མ་མཐོང་གི་བར་དུ་གནས་ཚུལ་བཞིའི་དམིགས་པ་བྱེད་པ། བཞི་པ་གཉན་མགོ་མཐོང་ནས་གཉན་ཁྲོད་དུ་མ་ཕེབས་ཀྱི་བར་ལ་དམར་མོ་དབང་བསྡུད་བྱེད་པའོ། །དང་པོར་གར་འགྲོ་གསང་ཞིང་། གང་ལ་གང་འདུལ་ཡི་དམིགས་པ་ནང་སྔ་མོ་ནས་འཕེན་དགོས་ལ། ནག་མོས་ཟིལ་གྱིས་གནོན་ཅིང་དམར་མོས་དབང་དུ་བསྡུད། ཅེས་གསུངས་པས། རི་མཐོན་པོ་དང་། ཐང་ཆེན་པོ་དང་། རྒང་རིང་པོ་ལ། ཕཊ་བྱས་པ་ཙམ་གྱིས་རང་ཉིད་མ་ཅིག་ལབ་ཀྱི་སྒྲོན་མ་སྐུ་མདོག་ཟིལ་གནོན་གྱི་སྐབས་སུ་ཁྲོས་མ་ནག་མོ་ཡིན་གསུངས། མཐིང་ནག་གཅིག་ཏུ་བསྐྱེད་པའི་ཐུགས་ཀ་ནས། ཕཊ་གཅིག་བྱས་པ་ཙམ་གྱིས། གནམ་ལྕགས་ལས་གྲུབ་པའི་ཁྲོ་ཆུའི་ཕ་ཝོང་བློས་ཁྱབ་ཚད་གཅིག་ཏུ་སྤྲུལ་ནས་འཕང་སྟེ། རི་དང་སྒོང་གང་ཡིན་པའི་གཉན་ས་ལ་ཕོག་ནས་ཙམ་གཞོང་གསིག་ཟིན་པ་འདྲ་བ་བྱས་པས། ཕཊ་གཅིག་བྱས་པ་ཙམ་གྱིས། ཁྲོ་ཆུའི་ཕ་བོང་ཡོངས་སུ་གྱུར་པ་ལས། སེང་གེ་དགུར་གྱུར་ཏེ། ཕྱོགས་བཞི་མཚམས་བརྒྱད་དབུས་དང་དགུར་འདུག་ཅིང་། དེར་གནས་པའི་ལྷ་འདྲེ་སོ་པ་དང་བཅས་པ་ཐམས་ཅད་གར་ཡང་འགྲོ་དབང་མེད་པར་སྒོམ་པ་འདྲེས་སོ། །ཡང་མཚོ་དང་ཆུ་མིག་གང་ཡིན་པ་ལ་ཕོག་སྟེ། ཁྲོབ་ཁྲོབ་ཁོལ་ནས་ཕཊ་གཅིག་བྱས་པ་ཙམ་གྱིས་མེའི་བྱ་ཁྱུང་གྲངས་མེད་ཀྱི་གུར་ཁང་གཅིག་ཏུ་གྱུར་པའི་ནང་དུ། དེར་གནས་པའི་ལྷ་འདྲེ་སོ་པ་དང་བཅས་པ་ཐམས་ཅད་ཚུད་ནས་གར་ཡང་འགྲོ་དབང་མེད་པར་བསམ། ཡང་ལྷ་ཁང་མཆོད་རྟེན། ཁང་རལ། ས་ཕུག །གད་ཕུག །བྲག་ཕུག །ལམ་རྒྱ་གྲམ། དུར་ཁྲོད། ཚོང་འདུས། ལུང་མདོ། བྲག་མདོ་ལ་སོགས་པའི་གཉན་ས་ལ། གོང་བཞིན་མ་ཅིག་སྐུ་མདོག་མཐིང་ནག་ཏུ་བསྐྱེད་པའི་ཐུགས་ཀ་ནས། ཕཊ་གཅིག་བརྗོད་པ་ཙམ་གྱིས། རྡོ་རྗེ་རྩེ་དགུ་པ་གཅིག་སྤྲུལ་ནས་འཕངས་ཏེ། གཉེན་ས་གང་ཡིན་པ་དེ་ལ་ཕོག་པ་ནས། ཙམ་གཞོང་གསིག་པ་འདྲ་བ་གཅིག་བྱས་སྟེ། ཕཊ་གཅིག་བྱས་པ་ཙམ་གྱིས་རྡོ་རྗེ་ཡོངས་སུ་གྱུར་པ་ལས་མ་ཅིག་ལབ་སྒྲོན་ཟིལ་གནོན་གྱི་སྐབས་སུ་ཁྲོས་མ་ནག་མོ་ཡིན་ནོ། །མཆན། སྐུ་མདོག་མཐིང་ནག་དགུར་གྱུར་ཏེ། ཕྱོགས་བཞི་མཚམས་བརྒྱད་དབུས་སུ་དང་དགུར་བཞུགས་ནས། དེ་ལ་གནས་པའི་ལྷ་འདྲེ་ཐམས་ཅད་གར་ཡང་འགྲོ་དབང་མེད་པར་བསྒོམ། ཤིང་གཅིག་ཁེར་སྐྱེས་ཡིན་ན། མ་གཅིག་ལབ་སྒྲོན་གོང་བཞིན་བསྐྱེད་པའི་ཐུགས་ཀ་ནས། ཕཊ་གཅིག་བྱས་པ་ཙམ་གྱིས། གནམ་ལྕགས་ཀྱི་སྟྭ་རེ་ངར་མ་གཅིག་སྤྲུལ་ནས་འཕངས་ཏེ། ཤིང་དེ་ལ་ཕོག་པས་རྡུལ་ཕྲན་བཞིན་དུ་བཏང་པས། ཕཊ་གཅིག་བྱས་པ་ཙམ་གྱི་གནམ་ལྕགས་ཀྱིས་སྟྭ་རེ་ཡོངས་སུ་གྱུར་པ་ལས། མ་ཅིག་ལབ་སྒྲོན་སྐུ་མདོག་མཐིང་ནག་གཅིག་ཏུ་གྱུར་ནས། གོང་བཞིན་གར་ཡང་འགྲོ་དབང་མེད་པར་བསྒོམ། ཡང་ཤིང་ནགས་འཐུག་པོ་ཡིན་ན་མ་ཅིག་ལབ་སྒྲོན་སྐུ་མདོག་མཐིང་ནག་གོང་བཞིན་བསྐྱེད་པའི་ཐུགས་ཀ་ནས། ཕཊ་གཅིག་བརྗོད་པ་ཙམ་གྱིས་གནམ་ལྕགས་ཀྱི་རལ་གྲི་རྣོ་བའི་ངར་དང་ལྡན་པ་གཅིག་ཏུ་སྤྲུལ་ནས་འཕངས་སྟེ། ཤིང་ནགས་དེ་རྡུལ་ཕྲན་བཞིན་གོང་ལྟར་བཏང་ནས། ཕཊ་གཅིག་བྱས་པ་ཙམ་གྱིས་རལ་གྲི་ཡོངས་སུ་གྱུར་པ་ལས་མ་ཅིག་ལབ་སྒྲོན་གོང་བཞིན་དུ་གྱུར་ནས། གར་ཡང་འགྲོ་དབང་མེད་པར་སྒོམ། ཡང་གཅོད་པས། ས་རྒྱུས་མེད་པའི་ས་ན་ཟིལ་གནོན་འཕངས་པ་ནི། ཚད་མེད་མཛོད་ཆེན་ལས། རང་ཉིད་ཁྲོས་ནག་མོའི་ཐུགས་ཀ་ནས་ཕཊ་གཅིག་བྱས་པ་ཙམ་གྱིས། གནམ་ལྕགས་ཀྱི་རྡོ་རྗེ་རྩེ་དགུ་པ་འཕྲོས་པས་ས་ཕྱོགས་དེར་ཕོག་པ་ཙམ་གྱི་ཙམ་གཞོང་བསྲེག་པ་ལྟར་བྱས་ནས་ཕཊ་ཅིག་བྱས་པ་ཙམ་གྱིས་རྡོ་རྗེ་ཡོངས་སུ་གྱུར་པ་ལས། དཔའ་བོ་དམའ་མོའི་གུར་ཁང་། དེའི་རྒྱབ་ཏུ་རྡོ་རྗེའི་དྲྭ་གུར། དེའི་རྒྱབ་ཏུ་མི་ནག་གི་ལག་སྦྲེལ་གྱི་དེའི་རྒྱབ་མུན་ནག་གི་གུར་ཁང་བསྒོམ་ནས། དེར་གནས་པའི་ལྷ་འདྲེ་ཐམས་ཅད་གར་ཡང་འགྲོ་དབང་མེད་པར་བསྒོམ། དེ་ནས་གཉན་མགོ་མཐོང་བ་དང་། སྔ་མོའི་ཟིལ་གནོན་གང་དགོས་འཕངས་ཤིང་། སྔ་མ་ལྟར་བྱའོ། །ཡང་ན་གོང་གིས་ཟིལ་གནོན་དེ་རྣམས་གང་ཡང་མི་བྱེད་པར། རི་བྲག་ལ་སོགས་གཉན་ས་ཀུན་ལ་ཟིལ་གནོན་འདིས་ཆོག་པར་གསུངས་ཏེ། རང་ཉིད་ཁྲོས་མ་ནག་མོའི་ཐུགས་ཀ་ནས་གནམ་ལྕགས་ཀྱིས་རྡོ་རྗེ་འཕྲོས་པ་ལས་གཉན་ས་གང་ཡིན་པ་ཐམས་ཅད་གཞིག་ནས། ཁྲོས་མ་ནག་མོ་དགུར་སྒོམ་པ་ལ་སོགས་གོང་བཞིན་བྱའོ། །དཀར་སྦྱོར་ལས། སྔ་ཐེམ་སྔ་རུ་མི་ནོན་ན། །དགྲ་ངན་དག་ལ་བྱ་ཤོར་འདྲ། །དེ་ལ་ཟིལ་གནོན་གནད་བདུན་དགོས། །ཅེས་གསུངས་པའི་དོན་ནོ། །དེས་ཟིལ་གནོན་སོང་ནས། གཉིས་པ་ཁྱིམ་ནས་སྒོར་མ་ཕེབས་ཀྱི་བར་དུ། སེམས་བསྐྱེད་པ་ནི། ཞལ་གདམ་བཅོ་བརྒྱད་མ་ལས། ཕཊ་གཅིག་བརྗོད་པ་ཙམ་གྱིས། རང་གི་སྤྱི་བོར་པདྨ་དང་ཟླ་བའི་གདན་ལ། བླ་མ་ཡི་དམ་ཆོས་སྐྱོང་ཀུན་འདུས་གྱི་ངོ་བོ་མཚུངས་མེད་དཔལ་ལྡན་རྩ་བའི་བླ་མ་དང་གཉིས་སུ་མེད་པའི་མ་ཅིག་ལབ་ཀྱི་སྒྲོན་མ་སྐུ་དམོག་དཀར་མོ་བཞུགས་པར་བསྒོམ། ལུས་གདོན་གནས་གདོན་གཉིས་ཀྱིས་གཙོ་བྱས་ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་པར་བྱ། དེའི་ཆེད་དུ་གཉན་ས་རི་ཁྲོད་དུ་འགྲོ་སྙམ་དུ་སེམས་བསྐྱེད་ལ། ལུས་ལོངས་སྤྱོད་ཁ་རྗེ་དབང་ཐང་ཡོ་བྱད་དང་བཅས་པ་འབུལ་བར་སྒོམ་ཞིང་། གསོལ་བ་གདབ་པ་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། བདག་འཛིན་བློ་ཡིས་ཐོངས་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །རང་སེམས་སྐྱེ་མེད་གཅིག་ཆར་དུ་རྟོགས་པ་མཛད་དུ་གསོལ། །ཅེས་དེ་ལྟར་སྒོར་མ་ཕེབ་ཀྱི་བར་དུ་གསོལ་བ་གདབ་པར་བྱའོ། །དེས་གཉིས་པ་སེམས་བསྐྱེད་པ་སོང་ནས། གསུམ་པ་སྒོར་ཕེབ་ནས་འོག་ལ་ཡོད་པའི་ཐོག་སྲུང་འདི་ནས་བྱ་གསུངས། མཆན། གཉན་མགོ་མ་མཐོང་གི་བར་དུ། དཀར་སྦྱོར་ལས་གནས་ཚུལ་བཞིའི་དམིགས་པ་བྱེད་པ་ནི། ཕཊ་གཅིག་བྱས་པ་ཙམ་གྱིས། ལུས་ནི་རོ་ཡི་ཚུལ་དུ་འགྲོ། །རིག་པ་རོ་ཁུར་ཚུལ་དུ་དམིགས། །གཉན་ས་དུར་ཁྲོད་དུ་བསམ། །ལྷ་འདྲེ་གཅན་སྤྱང་ཚུལ་དུ་དམིགས། །ཅེས་དེ་ལྟར་གཉན་ས་མགོ་མ་མཐོང་གིས་བར་དུ། ལོགས་སུ་མ་ཡེངས་པར་འགྲོ་བ་ཡིན། དེ་གསུམ་པ་གནས་ཚུལ་བཞིའི་དམིགས་པ་སོང་ནས། བཞི་པ་གཉན་མགོ་མཐོང་ནས། གཉན་ཁྲོད་དུ་མ་ཕེབ་ཀྱི་བར་དུ། དམར་མོས་དབང་བསྡུད་བྱེད་པ་ནི། ཕཊ་གཅིག་བྱས་པ་ཙམ་གྱིས། རང་ཉིད་རྗེ་བཙུན་མ་སྐུ་མདོག་དམར་མོ་མི་རྐང་གི་གླིང་བུ་ཚག་ཚག་འབུད་པས། ཚད་མེད་དཔལ་འབྱོར་མཛོད་ཆེན་ལས། ལྷ་འདྲེ་ཐམས་ཅད་འདར་ཆོམ་ཆོམ་བྱེད་པར་སྒོམ་ལ། ཕཊ་གྲངས་མེད་བརྗོད་པ་ཙམ་གྱིས། ལམ་ལ་གནས་པའི་ལྷ་འདྲེ་ཐམས་ཅད་རང་དབང་མེད་པར་འུབ་འུབ་འདུས་ནས། རང་ཉིད་ལ་སྤུང་གིས་བསྐོར་ནས། གཉན་སར་མ་སླེབ་གྱི་བར་དུ་ལོགས་སུ་མ་ཡེངས་པར་ཕཊ་བརྗོད་ཅིང་འགྲོ་བ་ཡིན། གཉན་ཁྲོད་དུ་ཕྱིན་པ་དང་། སྔོན་དུ་ཟིལ་གནོན་འཕང་ཟིན་ལས་གྱུར་པའི་མ་ཅིག་ལབ་སྒྲོན་མཐིང་ནག་ལ་སོགས་དབུས་ཀྱི་གང་དང་གང་ཡིན་པ་དེ། ཕཊ་གཅིག་བྱས་པ.ཙམ་གྱིས་རང་ལ་ཐིམ་པར་བསྒོམ་པ་དང་། ཕྱོགས་བཞི་མཚམས་བརྒྱད་ཀྱི་ལབ་སྒྲོན་མཐིང་ནག་ལ་སོགས་གང་དང་གང་ཡིན་པ་རྣམས། མལ་དུ་ཡོད་པ་དང་བཅས་པ་དེས་ལམ་ནས་བཀུག་པའི་ལྷ་འདྲེ་ཐམས་ཅད་གཉན་ས་དེ་བས་གར་ཡང་འགྲོ་དབང་མེད་པར་བསྒོམ་ལ། རང་གི་རྐང་དུང་འབུད་ལ་ཕཊ་དྲག་པོ་བརྗོད་པ་གལ་ཆེ་བ་ཡིན་གསུངས། དེས་བཞི་པ་ལམ་གྱི་དབང་བསྡུད་རྫོགས་པ་ཡིན། སྤྱི་དོན་གཉིས་པ་གནས་ཀྱི་བྱེད་ལས་ནི། ཕེབ་ནས་སྔ་བ་རྣམས་བཞི་ནི། གཉན་སའི་དམིགས་དུ་ཕེབས་པ་སྔ། །མལ་བཅའ་དབང་བསྡུད་ཟིལ་ནོན་སྔ། །སྙིང་རྗེའི་ཀུན་སློང་དམིགས་པ་སྔ། །གཉན་དམིགས་ཐབ་ཁ་བཅའ་བ་སྔ། །ཅེས་གསུངས་པས། གཉེར་སར་ཕེབས་ནས་ཐབ་ཀ་བཙུག་ཤིང་འཚོ་བ་མ་རྫོགས་ཀྱི་བར་དུ་དོན་ལྔ་སྟེ། དང་པོ་གཉན་དམིགས་བཙལ་བ། གཉིས་པ་ཁྲ་ཐེར་ཕུབ་པ། གསུམ་པ་དབང་བསྡུད་ཟིལ་གནོན། བཞི་པ་དམ་ཚིག་བསྲེ་བ། ལྔ་པ་ཐབས་ཁ་བཙུག་པའོ། །དང་པོ་གཉན་དམིགས་བཙལ་བ་ནི། དཔེར་ན་མེ་བཙའ་ཨན་ཚུགས་སུ་བསྲེག་ན་ནད་ལ་ཕན་པ་ལྟར། འདིར་ཡང་གནས་ཀྱི་མཚན་ཉིད་ལ་གཉིས་ཏེ། རིག་པས་བཙལ་ཞིང་རྒྱས་པ་དང་། བརྟུལ་ཤུགས་སྤྱོད་ཅིང་གནས་མིག་བཙལ་བའོ། །དང་པོ་རིག་པ་དཔྱད་པ་ལ་གསུམ་སྟེ། རྫས་དང་། གཟུགས་དང་། མ་ངེས་པའོ། །དེ་ལ་དང་པོ་རྫས་ནི། རིན་ཆེན་འདྲ་བའི་སྟེང་ན་བསྡད། གདུག་དང་རྒྱལ་མཚན་འདྲ་བའི་ཏོག །དུང་དང་བུམ་པ་འདྲ་བའི་ལྟོ་བ། པདྨ་འདྲ་བའི་ལྟེ་བར། དཔལ་བེའུ་འདྲ་བའི་དཀྱིལ་དུ་བསྡད། མཆོད་རྟེན་གྱེན་ལྟའི་བུམ་པ། མཐུར་ལྟའི་ཏོག །ཐང་ཕུབ་འདྲའི་དཀྱིལ་དང་འབུར་ས། ལུང་གསུམ་དང་སྒང་གསུམ་གྱིས་འདུས་མདོ། ཆུ་སྐོར་འདྲ་བའི་དཀྱིལ། མདུང་འདྲ་བའི་བ་དན། གྲི་འདྲ་བའི་བྲང་བའོ། །རལ་གྲི་འདྲ་བའི་ཕའང་། ཞགས་པ་འདྲ་བའི་ཨ་ལུང་། ཆུ་མིག་མགོ་གཅིག་པའི་མགོ་ཡིན་ཏེ། མགོ་གཉིས་པའི་བར། མགོ་གསུམ་མགོ་ལྔ་མན་ཆད་ཀྱི་འདུས་མདོ། མགོ་དགུ་ལ་སོགས་གྲངས་མང་གི་དཀྱིལ། མཚོའི་ཕོ་བྲང་འབུར་ས་སྟེ། ཀུན་ནས་སྤུང་འདྲ་དག་གི་དཀྱིལ། ཁྲི་བརྩེག་རྒྱབ་ཡོལ་བྲེས་འདྲ་དང་། གྲོང་དང་ཕོ་བྲང་བརྩེག་པ་འདྲ་བའི་སྟེང་། མཚོ་ཡི་ཕུག་ཡིན་ཏེ། གཞན་ཡང་དུར་གླིང་གང་ཡིན་གྱི་དཀྱིལ་གཅིག་པའི་སྟེང་། ཁྱད་པར་རྒྱ་མཚོའི་ཟངས་ཁ་ཡོད་སར་བསྡད། རི་བོའི་རྩེ་དང་སུལ། ཕུག་པའི་ནང་གྲེ་བ་དང་པོ་བར་དག་ཏུ་བསྡད། མཆོད་རྟེན་རྩ་བ། མཆོད་རྟེན་ཞིག་རལ་གྱི་དཀྱིལ། ལྷ་ཁང་གི་སྒོ་ཐེམ་འམ་བསྐོར་ཁང་། མགྲིན་ཁང་གི་སྒོ་ཐེམ། གསལ་མཁར་མང་པོའི་དཀྱིལ། ཁ་ཡར་གྱི་ཐོག །གངས་རི་རི་རབ་ཀྱི་རྩེ། དེ་ནས་སྙིང་དང་ལྟེ་བ། ཤ་རལ་ཤལ་གྱི་ནང་། ཆུ་ཕྱར་སྣ་དང་རྩ་བ། བྲག་ནག་དག་གི་རྩ་བ། བྲག་དཀར་རྩེ་དང་། བྲག་དམར་སྲང་ལ་བསྡད། དིལ་མགོ་ནུ་མ་འདྲ་བའི་ཏོག །གོང་བུ་ཨ་འདྲ་བའི་བར། སོག་པ་འདྲ་བའི་ཚུན་རྐང་སྟེང་། སྨན་ལམ་དཀྱིལ། ནག་མེད་ཤིང་གཅིག་གང་ཡིན་ཡང་། གླང་ཕུང་རྐང་གཅིག་རྩ་བ་སྟེ། ཤུག་པ་འབོ་ལོ་ལྕང་མའི་ཀ་བྲག་ལྟག་པ་དག་ཏུ་འདུག །ཁང་རལ་དག་གི་མཛོད་སྒོ། མཁར་གྱི་ར་ཞོལ། ཆུ་གཙང་ཁུག །འདུས་སྣ། མཚོ་འཁྱིལ་སྣ། སྒང་རིང་པོའི་སྣ། ཐང་ཆེན་པོ་དང་། ལམ་རྒྱ་གྲམ་དང་། ཚོང་འདུས་ཀྱི་དཀྱིལ་དུ་བསྡད། གཉིས་པ་གཟུགས་ནི། སེངྒེ་འདྲ་བའི་དྭངས་ཁ། དོམ་དང་སྤྱང་ཀུ་འདྲ་བའི་སྡེར་མོ། སྟག་འདྲ་བའི་ཁ་འཛུམ། བྱ་དང་མི་འདྲ་བའི་སྙིང་ཁ། གླང་ཆེན་འགྱིང་འདྲའི་སྣ་ལྗགས་དང་། སེངྒེ་འདྲ་བའི་གཡུ་རལ། ཁ་དང་སྙིང་ཁ། སྟག་འདྲ་བའི་སྡེར་མོའི་ཁ་དང་སྣའི་བར། སྒང་འདྲ་བའི་ཟེ་བ། སྤལ་པ་གྱེན་རྒྱུ་འདྲ་བའི་སྙིང་ཁ། མཐུར་རྒྱུད་འདྲ་བའི་སྣ། རྟ་གྱེན་རྒྱུ་འདྲ་བའི་མགོ། མཐུར་རྒྱུ་འདྲ་བའི་སྣ། གླང་ཆེན་རྒྱུ་འདྲ་བའི་རྐེ། མཐུར་རྒྱུ་འདྲ་བའི་སྣ། གཡག་དང་སྡིག་པའི་རྭ་བར། སྦྲུལ་འཁྱིལ་འདྲ་བའི་ཁ་དང་དཀྱིལ། ཉ་འཕྲེད་ཉལ་འདྲ་བའི་གཤོག་པ། བུད་མེད་འདྲ་བའི་སྐྲ་སྟེང་། བྱོལ་སོང་འདྲ་བའི་རྭ་བར། བྱ་འདྲ་བའི་ཁ་དང་བྱེ་བ། སྐྱིལ་ཀྲུང་བཅས་འདྲ་དང་གན་རྐྱལ་དང་། བཙུན་མོའི་བྲང་རྒྱན་ཐོག་འདྲ་དང་། རྒྱལ་བློན་གདན་ལ་བཞུགས་འདྲའི་སྙིང་ཁ་དང་ལྟེ་བ། འཐབ་འཛིང་འདྲ་བའི་བར་དང་འགྱེད་ས་ཡིན། ཕ་རི་ལེན་གྱི་རྒྱང་བཅད་ཀྱང་། བྱ་ཕག་སྦལ་སྦྲུལ་ལྕང་མོ་ལ་སོགས་སྣ་ལ་འདུག་གོ། །གསུམ་པ་མ་ངེས་པ་ནི། ནགས་འཐུག་པོའི་སྲབ་ས། སྲབ་པའི་མཐུག་ས། ས་འཇམ་པོའི་རྩུབ་ས། རྩུབ་པའི་འཇམ་ས། མདོར་ན་རང་གི་ཡང་འདི་ན་གཉན་བསམ་སར་བསྡད་པར་བྱའོ། །གཉིས་པ་བརྟུལ་ཤུགས་སྤྱོད་ཅིང་གནས། དམིགས་བཙལ་བ་ནི། ཐང་ཆེན་པོ་ལ་སོགས་ལ་གཉན་སའི་དམིགས་མ་རྙེད་ན། རང་ཉིད་ཁྲོས་མ་ནག་མོའི་རང་བཞིན་ཅན་མི་ལྤགས་གིས་གཡང་གཞི་སྐུ་ལ་གསོལ་བ། ཞབས་གར་ཐབས་སུ་མཛད་པ། ཕྱག་ན་ཐོད་རྔ་དཀྲོལ་བར་བསྒོམ་ལ། ཕཊ་བརྗོད་ཅིང་གཉན་ས་ལ་བསྐོར་བ་བྱེད་ཅིང་། སྐྲག་འུབ་ཀྱིས་བྱུང་བའམ། སྦྲིད་ཟིང་གྱིས་བྱུང་པའམ། སྐྱི་ཤ་ཟ་བའམ། བག་དྲོ་བ་ཉམས་དགའ་བ་དེ་ལྟ་བུ་བྱུང་སར་བསྡད་དོ། །ཅེས་མན་ངག་གསེར་ཐུར་ལས་གསུངས་སོ། །སྤྱིར་གཉན་ས་ཆེན་པོ་ཡིན་ན་གཅོད་དཔོན་གང་གཉན་སར་བསྡད། དེ་མཆན་གཉན་ས་གཅིག་ལ་ནད་པ་དེ་ནས་གཉན་ས་ལ་ཐབས་ཁ་བཅའོ། །ནད་པ་དང་གཅོད་དཔོན་ཐག་ཉེ་བ་གལ་ཆེའོ། །གཉན་ས་ཆུང་ན་གར་གཉན་སར་ནད་པ། དེ་ནས་གཉན་ས་གང་དང་འདྲ། དེས་གཉན་དམིགས་བཙལ་བ་རྫོགས་ནས། གཉིས་པ་ཁྲ་ཐེར་ཐུབ་པ་ནི། གསེར་ཞུན་མ་ལས། གཉན་དམིགས་གང་ཡིན་པའི་ཐོག་ཏུ། ཁྲ་ཐེར་ཕུབ་མ་ཐག་ཏུ་ཕཊ་བཞི་བརྗོད་ལ། དང་པོ་ཁྲ་ཐེར་མ་ཅིག་ལབ་ཀྱི་སྒྲོན་མ་སྐུ་མདོག་དཀར་མོར་བསྒོམ། གཉིས་པ་ཆོན་ཐག་རྣམས་འཇའ་ཚོན་གྱི་དྲྭ་བར་བསྒོམ། གསུམ་པ་ཕུར་པ་རྣམས་མཁའ་མགྲོ་མ་སྡེ་བཞིར་བསྒོམ། ཁྲ་ཐེར་མ་ཅིག་དང་མཁའ་འགྲོ་སྡེ་ལྔར་རེད་པ་ཡིན། བཞི་པ་རྔོག་རྐེ་རྣམས་རིགས་ལྔའི་ཕྱོགས་བཙུག་དུས་ཤར་ནས་གཡས་བསྐོར་དུ་རིམ་པར་བཙུག་ཤིང་། བུདྡྷ་ཌཱཀྐི་ནི་ཧཱུྃ། ཅེས་སོགས་བརྗོད་ཅིང་། མཆན། ཀྱི་མཁའ་འགྲོ་མ་གྲངས་མེད་པ་བསྒོམ་པ་ཡིན་ནོ། །དེ་ལྟར་བྱིན་རླབས་ཐོན་ནས་དམ་ཚིག་ལ་མི་འགོམ་པ་གལ་ཆེ་བ་ཡིན། ཁྲ་ཐེར་གྱི་ནང་དུ་ཉལ་ས་བདེ་མོ་ཐོན་མ་ཐག་ཏུ། ཕཊ་གཅིག་བརྗོད་པ་ཙམ་གྱིས། ཞབས་དེ་ལྕགས་མཁར་ནག་པོ་གྲུ་གསུམ་གཏིང་ཟབ་པ། ཕྱི་ན་གས་མེད་པ། ནང་ན་སྲུབ་མེད་པ་གཅིག་རེད་པར་སྒོམ། དེས་གཉིས་པ་ཁྲ་ཐེར་ཕུབ་པ་སོང་ནས། གསུམ་པ་དབང་བསྡུད་ཟིལ་ནོན་བྱེད་པ་ལ། དང་པོ་དབང་བསྡུད་ནི། རང་ཉིད་ཁྲ་ཐེར་གྱིས་སྒོར་ལངས་ཏེ། སྟན་མཆན་ཁུང་དུ་བཅུག་ཅིང་ཞལ་ཕྱིར་གྱུ་ནས། ཕཊ་གཅིག་བྱས་པ་ཙམ་གྱིས། རང་ཉིད་རྗེ་བཙུན་མ་སྐུ་མདོག་དམར་མོ་ཞལ་གཅིག་ཕྱག་གཉིས་པ། གཡས་ན་མི་ལྤགས་ཀྱིས་གཡང་གཞི་དབྱུག་ཏོར་གཟད་ནས་བསྣམས་པ། གཡོན་ན་མི་རྐང་གི་གླིང་བུ་ཚག་ཚག་འབུད་པར་སྒོམ་ལ། རྐང་དུང་འབུད་ཅིང་ཕཊ་སྒྲ་དྲག་ཏུ་བརྗོད་ལ་འདི་སྐད་དོ། །འོ་གཙོ་བོ་ཡིས་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཐོ་སྲིད་པའི་རྩེ་མོ་མན་ཆད། དམའ་ན་རག་གིས་དམྱལ་ཁམས་ཡན་ཆད། མཐོ་ནམ་མཁའི་ལྷ་ཕྲན་མན་ཆད། དམའ་བ་ས་འོག་གི་ལྟོ་འཕྱེ་ཡན་ཆད། དཔེ་དཀར་རྒྱལ་པོ་མན་ཆད། ཡུལ་འདྲེ་ས་སྲིན་ཡན་ཆད། སྣང་སྲིད་པའི་ལྷ་འདྲེ་ཐམས་ཅད་ཚུར་འདུས། འཻ་ཁྱད་པར་དུ་གཉན་ཁྲོད་འདི་ན་གནས་པའི་དཀར་པོ་ལྷ་ཡི་སྡེ་ཚན། ནག་པོ་བདུད་ཀྱི་སྡེ་ཚན། དམར་པོ་བཙན་གྱི་སྡེ་ཚན། ཁྲ་བོ་གཟའ་ཡི་སྡེ་ཚན། འཕན་པོ་གཉན་གྱི་སྡེ་ཚན། ཕྱུག་པོ་ཀླུའི་སྡེ་ཚན། རཀྵ་སྲིན་པོའི་སྡེ་ཚན། ཕོ་མོ་མ་ནིང་གི་སྡེ་ཚན་དུ་གཏོགས་པའི་ལྷ་འདྲེ་ཐམས་ཅད་ཚུར་འདུས། འཻ་ཁྱད་པར་དུ་ཡང་ཆྒཻ་མོའི་ནད་པ་མེད་ན་མི་དགོས། ཕུང་པོ་ཁམས་དང་སྐྱེ་མཆེད་ལ། དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པའི་ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཚེལ་འདྲེ་མི་ལ། བསྭེ་རག །འགོང་པོ། ཐེའུ་རང་། གྲིའོ་གྲི་མོ། གནའ་འདྲེ་རྙིང་པ། ད་འདྲེ་སོ་མ། ཡུལ་འདྲེ་འཁྱམས་པོ། ཟ་འདྲེ་ཤི་གཤེད། ཁའི་དབུགས་འཕྲོག་པ། ཁོང་པའི་སྲོག་གཅོད་པར་བྱེད་པའི་བདུད་དང་ལོག་པར་འདྲེན་པ་ཐམས་ཅད་ཚུར་འདུས། དེ་ལྟར་ཁྲ་ཐེར་གྱི་ཕྱོགས་བཞི་དབུས་དང་ལྔ་ནས་འབོད་པ་ཡིན། དེ་ལྟར་བྱས་པས་སྣང་སྲིད་ཀྱི་བཀའི་ལྷ་མ་སྲིན་སྡེ་བརྒྱད་རྣམས་རང་གི་ཕྱི་རོལ་མ་ཅིག་ལབ་སྒྲོན་བརྒྱད་ཀྱི་ནང་དུ་ཚུད་པར་བསྒོམ། གནས་གདོན་ལུས་གདོན་ཉིས་རང་གི་ཞབས་ལྕགས་མཁར་ནང་དུ་ཚུད་པར་བསྒོམ། ནང་ནུབ་ཀྱི་གཏོར་བསྔོས་བྱེད་དུས་སུ། བསྲུང་འཁོར་དེ་ལྕགས་མཁར་གྱི་ཁ་ཡན་ཆད་ལ་དབུགས་པ་ཡིན། ཡང་དབང་བསྡུད་ཀྱི་དམིགས་པ་བྱས་ལ། འཻ་ཁྱད་པར་དུ་ཡང་གཉན་ཁྲོད་འདི་ན་གནས་པའི་སྣང་ཞིང་སྲིད་པའི་ལྷ་འདྲེ་ཐམས་ཅད་ཉོན་ཅིག །ཁྱེད་རྣམས་ལས་དང་ཉོན་མོངས་པའི་དབང་དུ་གྱུར་པ་ཡིན་པས། བདག་གིས་ཁྱེད་རྣམས་ལ་ཟབ་མོ་ཆོས་ཀྱི་འབྲེལ་པ་བྱེད། དམ་པ་ཆོས་ཀྱི་འཁོར་ལོ་བསྐོར་བྱང་ཆུབ་མཆོག་ཏུ་སེམས་བསྐྱེད་ནས། རྣམ་མཁྱེན་སངས་རྒྱས་ཀྱི་ས་ལ་དགོད་པའི་ཕྱིར་འདིར་འོང་བ་ཡིན་པས། བདག་གིས་ཕྲིན་ལས་མྱུར་དུ་བསྒྲུབ་ཅིག །གལ་ཏེ་ཕྲིན་ལས་མྱུར་དུ་མི་གྲུབ་ན། ཡུལ་ཁམས་འདིར་མཛེ་ཤའི་ཐང་མལ་གདལ། མཛེ་ཁྲག་གི་རྒྱ་མཚོ་བསྐྱིལ། མཛེ་རྐང་གིས་ཀ་བ་བཙུག །མཛེ་རུས་ཀྱིས་གདུག་ཕུབ། མཛེ་ལྤགས་གིས་བླ་རེ་བྲེས་ནས། ཕོ་བྲང་བཅའ་བ་ཡིན་ཏེ། འཁོར་བ་མ་སྟོང་གི་བར་དུ་ལྷ་འདྲེ་ཁྱེད་རྣམས་དང་འབྲལ་མེད་དུ་གནས་འདི་བས་སྐད་ཅིག་ཀྱང་གཡོ་བར་མི་བྱེད་དོ། །ཅེས་ངག་ཏུ་བརྗོད། ཡིད་ལ་རྒྱུན་དུ་བསམ་ན། གདོན་མི་བྲོས་པ་དང་། མྱུར་བའི་གནད་ཡོད་དོ། །དེ་བས་ད་ལྟ་ཉིད་དུ་བདག་གི་ཕྲིན་ལས་མྱུར་དུ་སྒྲུབས་ཤིག །ཕཊ། ཅེས་ལན་གསུམ་བརྗོད་པས་དམིགས་མེད་སྒོམ། གལ་ཏེ་གདོན་བྲོས་པའི་རྟགས་རྨི་ལམ་ལ་སོགས་བྱུང་ན། འདི་ལྟར་བྱ་སྟེ། དཀར་སྦྱོར་ལས། གདོན་རྣམས་གཞན་དུ་བྲོས་པ་ན། །དེ་ལ་ཕོ་ཉ་དངུལ་དཀར་བཏང་། །ཅེས་གསུངས་ཕྱིར་ན་ཞི་བ་ལྟར། །རང་ཉིད་མ་ཅིག་ཐུགས་ཀ་ནས། །འོད་ཟེར་ལྕགས་ཀྱུ་ལྟ་བུ་འཕྲོས། །སྣང་སྲིད་བཀུག་ལ་རང་འོག་བསྡུ། །ལན་གསུམ་བྱས་ནས་ལུས་སྦྱིན་བྱ། །སྙིང་རྗེའི་སེམས་ལྡན་སྟོང་ཉིད་སྒོམ། །དེས་ཀྱང་འོངས་པར་མ་འདོད་ན། །དམར་ནག་ལྕགས་ཀྱུའི་དམིགས་པ་དགོས། །ཅེས་གསུངས་ཕྱིར་ན་དྲག་པོ་ལྟར། །རང་ཉིད་ཁྲོས་མའི་ཐུགས་ཀ་ནས། །འོད་ཟེར་རྡོ་རྗེའི་ཚྭ་ཚྭ་ཅན། །ལྕགས་ཀྱུ་ནག་པོའི་རྣམ་པ་འཕྲོས། །འཇིག་རྟེན་ཁམས་ཀྱི་ལྷ་འདྲེ་རྣམས། །གནས་དང་བཅས་པ་བཀུག་པར་བསམ། །རང་དབང་མེད་པར་འོག་ཏུ་འདུས། །ཕ་མར་དམིགས་ལ་ལུས་སྦྱིན་བྱ། །གསུམ་ལས་མི་མང་སྐྱེ་མེད་སྒོམ། །ཡང་ན་ནད་པ་གལ་ཆེན་ཡོད་པའམ། །ཡང་ན་རང་ཉིད་ན་བ་ཡིན་ན། འདི་སྐད་འབོད་དོ། །འཻ་གཉན་ཁྲོད་འདི་ན་གནས་པ་ཐམས་ཅད་གསོན་ཅིག །ཁྱེད་རྣམས་ཀྱི་ཆྒཻའི་འདི་རབ་མནར་མེད་པའི་དམྱལ་བར་བསྐྱུར་ལ་གཏན་དུ་ཐར་དུས་མེད་པར་གྱིས་ཤིག །འབྲིང་ད་ལྟ་ཉིད་དུ་ཟོལ། མལ་དུ་ཏིལ་འབྲུ་མ་ཙམ་ཡང་མ་ལུས་པ་གྱིས་ཤིག །ཐ་མ་ཡང་ན་མི་ཐུབ་པ། ཤི་མི་ཐུབ་པ། དབུགས་ཕྱི་ནང་རྒྱུ་མི་ཐུབ་པ། འདི་བས་ཀྱང་ཐུ་བའི་ནད་རིགས་བཞི་བརྒྱ་རྩ་བཞི། བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། བློ་བུར་གཉིས་ཁྲི་གཅིག་སྟོང་། ཡེ་འབྲོག་སུམ་བརྒྱ་དྲུག་ཅུ་ཐམས་ཅད་ཐོངས་ཤིག །དེ་ལྟར་མ་བྱེད་པ་ན་ར་ཀན། ཚར་ནས་གདན་བཏིང་བ་དང་སྤྲད་ལ། ཕཊ། གཅིག་བྱས་པ་ཙམ་གྱིས། ལྕགས་མཁར་གྱི་ཁ་དེ་མི་ལྤགས་ཀྱི་གཡང་གཞི་ཅིག་གིས་བཀབ་པར་བསྒོམ་ལ། གཉིས་པ་ཟིལ་གནོན་ནི། སྟན་ཐོག་དུ་འདུག་ས་དང་སྤྲད་ལ། ཕཊ་བྱས་པ་ཙམ་གྱིས་རང་ཉིད་དཔའ་བོ་གོ་རྗེ་བའི་ཚུལ་གྱིས། མ་ཅིག་ལབ་སྒྲོན་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་ན་ཐོ་བ། གཡོན་ལྕགས་ཀྱུ་བསྣམས་པ་གཅིག་རེད་པར་བསྒོམ། ངག་ཏུ་ཧཱུྃ་ཧཱུྃ་ཧཱུྃ་ལན་བདུན་བརྗོད་པ་ཙམ་གྱིས་རང་གི་ཐུགས་ཀ་དང་། སྨིན་མཚམས་དང་། བ་སྤུའི་གསེབ་ནས་ཁྲོ་ཆུང་རང་འདྲ་བ་གྲངས་མེད་པ་སྤྲོས་པས། ལྷ་འདྲེ་ཐམས་ཅད་གར་ཡང་འགྲོ་དབང་མེད་དེ། རང་ལ་ཕྱག་རྒྱ་བཅའ་ཞིང་། བཀའ་ཉན་གསུང་སྡོད་པར་བསྒོམ། ཁྲོ་ཆུང་རྣམས་ཀྱང་སྔ་མོའི་ལབ་སྒྲོན་དང་འཆབ་པའི་གུར་གཅིག་སྒོམས། དེས་གསུམ་པ་དབང་བསྡུད་ཟིལ་ནོན་སོང་ནས། བཞི་པ་དམ་ཚིག་བསྲེ་བ་ནི། ཕཊ་གཅིག་བྱས་པ་ཙམ་གྱིས་མ་ཅིག་གིས་མདུན་གྱི་ནམ་མཁར་སྐྱབས་ཡུལ་བསྒོམ། གཉིས་པས་རང་ཉིད་ཐ་མལ་པ་རེད་ནས་སྐྱབས་འགྲོ་སེམས་བསྐྱེད་དབྱིངས་རིག་བསྲེ་བ། དཀར་འགྱེད་ཡན་ཆད་ཀྱི་བྱེད་ལས་རྣམས་འོག་ཏུ་ཞིབ་པས་འདིར་ལན་མཛོད། ཡང་ན་མ་སྐབས་ན་ལྷ་འདྲེའི་དོན་དུ་སྐྱབས་འགྲོ་སེམས་བསྐྱེད་ཁོ་ན་བྱས་ཀྱང་ཆོག་གསུངས། དེས་བཞི་པ་དམ་ཚིག་བསྲེ་བ་སོང་ནས། ལྔ་པ་ཐབཁ་བཙུག་ཤིང་ཅི་སྲིད་སངས་མ་རྒྱས་བྱང་མ་ཆུབ། བྱམས་མགོན་གྱི་བསྟན་པ་མ་དར་གྱི་བར་དུ་ལྷ་འདྲེ་ཁྱེད་རྣམས་དང་འབྲལ་མེད་དུ་གནས་འདིར་ཕོ་བྲང་བཅའ་བ་ཡིན་བརྗོད། དེ་ནས་བཟའ་བཏུང་གི་རིམ་པ་གང་ཡིན་སྐབས་འདིར་བྱེད་པ་ཡིན་གསུངས། གལ་ཏེ་སྔོ་ཐབ་ཤོར་ན། རི་པ་ཀུན་གྱི་རང་རང་ལབ་སྒྲོན་སྐུ་མདོག་དམར་མོར་བསྒོམ་ལ། ཀུན་གྱི་ཐབས་འདུལ་ཟེར་ཞིང་ཕཊ་གྲངས་མེད་བརྗོད་པ་ཙམ་གྱིས། རང་གི་ཐུགས་ཀ་ནས་གསེར་གྱི་རྡོ་རྗེ་དང་གནམ་ལྕགས་གིས་རྡོ་རྗེ་གཉིས་འཕྲོས་བྱས་པས། ཁོའི་གནས་ཁང་བཤིག་ནས། ཁོ་རང་ལ་རྒྱབ་སྡིག་བྱས་པས་གར་ཡང་འགྲོ་དབང་མེད་པར་བསྒོམས། དེ་མ་བྱས་ན་ཤུ་ཐོར་ལ་སོགས་པ་འོང་བ་ཡིན་པས། ཧུབ་ནི་ཕྱུར་ཙ་རི་པ་ཀུན་གྱིས་ཐུགས་དམ་མཛད་པ་གལ་ཆེ། དེའི་རྗེས་སུ་ཕཊ་གཅིག་གིས་མི་དམིགས་པའི་ངང་ལ་བཞག་གོ། །ཡང་ན་ཐབ་འདུལ་འདི་ལྟར་བྱ་སྟེ། རང་གིས་ཤ་ཁྲག་ཉིལ་གྱིས་སོང་བ་དེ། སྣང་སྲིད་ལ་སོགས་ཐབས་བདག་ཐམས་ཅད་ཀྱིས་ཟོས། འཐུང་ཚིམ་ནས་དགྱེས་པར་བསམ། ཐབ་བདག་དེའི་ནད་དང་ཐབས་ཀྱི་རླངས་པ་མ་ལུས་པ་ཐམས་ཅད་བདག་ལ་ཐིམ་པར་བསམ་ཞིང་ངག་ཏུ་ཡང་བརྗོད་དོ། །ཅེས་ཚད་མེད་དཔལ་འབྱོར་ལས་གསུངས་སོ། །དེས་གནས་ཀྱི་བྱེད་ལས་རྫོགས་ནས། དེ་རྣམས་ཀྱིས་སྦྱོར་བ་སྔོན་འགྲོའི་ཆོས་སོང་ནས།། །།སྤྱི་དོན་གཉིས་པ་དངོས་གཞི་ལག་ལེན་གྱི་རིམ་པ་ཟུར་དུ་གསལ།

བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་གི་ཕྲེང་བ་སྨད་ཆ། ཀུ་སུ་ལུ་པུ་ཎྱེ་ལ་ཀྵ་ས།

བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་གི་ཕྲེང་བ་ཞེས་བྱ་བ་བཞུགས་སོ། །སྤྱི་དོན་གཉིས་པ་ནད་གདོན་གཟེར་བུ་ལ་གསུམ་སྟེ། ནད་གཅོད་པར་བྱེད་པའི་རིམས་པ་དང་། གདོན་གཅོད་པར་བྱེད་པ་དང་། ལོག་ནོན་གཟེར་བུའི་གདམས་པ་དང་གསུམ་མོ། །དང་པོ་ནད་གཅོད་ནི། འགོ་བའི་ནད་དྲག་པོ་ཡོད་པའི་སར་འགྲོ་བའི་ཚེ། སྙེམ་མ་ཞུགས་པར་ཉམས་ང་དང་བག་ཚ་མེད་པར་ལྷན་གྱིས་ཕྱིན་ལ། རང་གིས་ལུས་སེམས་ཕྲལ་ལ། ནད་དེ་ལ་ཡང་དྲག་ཏུ་སྣོམ་ཅིང་། སྣ་བུག་གིས་ནང་དུ་རྔུབ་ཅིག་ཁོང་དུ་མིད་པས་ནད་ཐམས་ཅད་རྩ་དབུ་མའི་ནང་ལ་ཡར་སོང་བས། ཐམས་ཅད་རང་བཞིན་མེད་པར་སྟོང་སང་སང་སོང་བར་བསམ་ཞིང་། ཉམས་ང་མེད་པར་བྱའོ། །ཞལ་གདམ་བཅུ་གསུམ་མ་ལས། ཁྱད་པར་ཚ་བའི་ནད་རྟགས་ལ། །རོ་སྟོད་ཡན་ཆད་གང་ཡང་རུང་། །གཟེར་གྱི་རིགས་བྱེད་མདའ་རྒྱབ་འདྲ། །དབུགས་རྒོད་ལུད་པ་ཁམས་ནག་འོངས། །དེ་ལ་དམིགས་པ་འདི་ལྟར་བྱ། །སེམས་བསྐྱེད་སྐྱབས་འགྲོ་ལུས་མཆོད་ནི། །གྲངས་མེད་བརྒྱའམ་ལོ་གྲངས་གཅིག །ཡང་ན་ཉི་ཤུ་རྩི་གཅིག་བྱ། །དེ་རྗེས་གཟེར་རམ་གང་ན་སར། །འཇིག་རྟེན་ལྷ་འདྲེ་མ་རུང་ནི། །ལག་ན་གནམ་ལྕགས་འབུག་ཆུང་གིས། །གཏམ་གྱིས་ཕུག་ནས་ཁྲག་གིས་ནད། །ཁོང་ཁྲག་ནད་དང་བཅས་པ་དེ། །འཇིགས་པའི་འདྲེ་དེས་འཇིབ་པར་བསམ། །དེ་ལ་ཅི་ནུས་གྲངས་མང་བྱ། །གཞན་ཡང་རང་གིས་མདུན་ཉིད་དུ། །མཚན་མོ་རྫས་ལ་རིག་པ་གཏད། །རིག་པ་ནང་དུ་མི་བསྐྱིལ་ན། །ཕྱིར་ཕྱུང་གླིང་བཞི་བསྐོར་བར་དམིགས། །བར་བར་སྟོང་ཉིད་སྤྲོས་བྲལ་ལ། །མ་ཡེང་རིག་པ་ཧྲིག་གེར་བཞག །ཅི་ལྟར་གཟེར་ཐུང་གར་བཅས་ཀྱང་། །དམིགས་པ་འདི་ཡིས་སོས་པར་འགྱུར། །ཚ་ནད་བཅོས་པའི་གདམ་པ་ཡིན། །བར་བར་ཆུ་ཡི་འཁོར་ལོ་ཡིས། །རོ་སྟོད་ཡན་ཆད་གང་ནས་ནི། །འཁྱག་ཅིང་འདར་བའི་སེམས་གཏད་ལ། །དམིགས་པ་གཏད་ཅིང་སྦྱང་གྱུར་ན། །ཁ་ཟས་ཤ་ཆང་དྲོད་ཅན་རྟེན། །ཚ་བའི་རིགས་བྱེད་འཇོམས་པར་འགྱུར། །གྲང་བའི་ནད་སེལ་གསུང་སྒྲོས་ནི། །སྨད་དུ་ན་བ་གྲང་བ་ཡིན། །རྒྱུ་ལོང་འཁྲོག་ཅིང་མཁལ་རྐེད་ན། །སྦོས་ཞིང་འཁྲོག་ཞིང་སྦྲང་ལ་སོགས། །དེ་ལ་དམིགས་པ་འདི་བཞིན་བྱ། །སེམས་བསྐྱེད་སྐྱབས་འགྲོ་ལུས་མཆོད་སོགས། །བརྒྱའམ་ལོ་གྲངས་ཉེར་གཅིག་བྱ། །འཇིག་རྟེན་འདྲེ་ནི་གཏུམ་པོ་གཅིག །ལུས་པོ་ལྕགས་བསྲེག་འབར་བ་ཡིས། །གྲང་བའི་རིགས་བྱེད་ཐམས་ཅད་རྣམས། །རྩྭ་སྦུར་མེ་ལ་སྲེག་པ་བཞིན། །བསྲེག་ནས་ནད་ཀྱང་མ་ལུས་ཏེ། །རུས་པ་སྔོན་པོར་གྱུར་པར་བསམ། །མ་ཡེང་རིག་པ་དེ་ལ་གཏད། །རླུང་གཉིས་ཁ་སྦྱོར་དྲག་ཏུ་བཟུང་། །གཞན་ཡང་མེ་ཡི་དཀྱིལ་འཁོར་དུ། །རང་ཉིད་ཚུད་པར་བསམ་བྱས་ལ། །རིག་པ་ནང་དུ་གཅུན་པར་བྱ། །རིག་པ་ཕྱི་རུ་མི་ཕྱུང་ནས། །དམིགས་པའི་རང་བཞིན་གསལ་གྱུར་ན། །ཅི་ལྟར་གྲང་བའི་རིགས་བྱེད་རྣམས། །མ་ལུས་སེལ་བ་བྱེད་པ་ཡིན། །རླུང་གི་ནད་སེལ་གསུང་གི་སྒྲོན་མ་ནི། །མགོ་དང་ཡན་ལག་ན་བ་དང་། །ལུས་པོ་འདར་ཞིང་འཕྱོ་སང་བྱེད། །བར་དུ་སྤྱི་ཁྱབ་ལུས་ཀུན་ཡང་། །གཡོ་ཞིང་སྐིག་པ་ལ་སོགས་ཏེ། །འགྲོ་འདོད་ཟས་ལ་ཡིད་མི་དགའ། །ད་ནི་རླུང་ནད་བཅོས་པའི་ཐབས། །རང་གི་ལུས་དང་ལོངས་སྤྱོད་ལ། །ཆགས་སེམས་འཛིན་པ་མི་བྱ་ལ། །སེམས་བསྐྱེད་སྐྱབས་འགྲོ་ལུས་མཆོད་ནི། །སྔ་མ་བཞིན་དུ་གྲངས་མེད་བྱ། །རིག་པ་རང་སར་ཀློད་ལ་བཞག །མ་རུང་གདུག་པའི་གཟུགས་ཅན་གྱིས། །ཕུང་པོ་ཁམས་དང་སྐྱེ་མཆེད་རྣམས། །སའི་འོག་ཏུ་ཁྱེར་ནས་ནི། །ཕག་ནག་འཇིགས་པ་བརྒྱའམ་སྟོང་། །གྲངས་མེད་བསམ་གྱིས་མི་ཁྱབ་པས། །ཤ་ཟོས་ཁྲག་འཐུང་བཏེད་པར་སྒོམས། །ཤེས་པ་ཀུན་ཏུ་མི་འཕྲོ་ཞིང་། །དབང་པོ་ཞི་དམད་ཞི་གནས་ལ། །སེམས་ཉིད་མ་བཅོས་ཀློད་ལ་བཞག །དཀར་སྦྱོར་ལས། མགོ་བོ་ན་ཞིང་མ་བདེ་ན། །མགོ་བོ་པདྨ་སྟོང་དུ་གས། །ཁ་ཁར་གྱེས་ལ་ཤེས་པ་གཏད། །ཀླད་པ་བྱ་ཁྱུང་གྲངས་མེད་ཀྱིས། །ཟོས་ནས་དམིགས་མེད་ངང་ལ་བཞག །མིག་ནད་ལིང་ཏོག་ལ་སོགས་ལ། །འཇིགས་པའི་སེང་ཞོན་མགོ་མང་གིས། །མིག་གཉིས་བྲུས་ནས་བྱ་ལ་བྱིན། །ཤུལ་དུ་ཕུས་བཏབ་ལྡག་པ་ཡིས། །བདུད་སྒོ་བར་དུ་ཧ་རེ་དམིགས། །བེམ་པོ་བྱིན་ནས་སྐྱེ་མེད་སྒོམས། །ཆམ་པ་ཡ་མ་སྣ་བསུབ་ན། །སྦྲུལ་ནག་བདུག་པས་སྣ་གཉིས་ནས། །འཛུལ་ནས་སྣ་མཚུལ་ནད་རྣམས་ཟོས། །འཇིབ་ནས་རང་སར་ཡལ་བར་བསམ། །རྣ་བ་འོན་དང་གཟེར་ལ་སོགས། །འཇིགས་པའི་སེང་ཞོན་རྒྱབ་ནས་བྱུང་། །སྡིག་འཛུབ་ལྕགས་སྲེག་འབར་བ་ཡིས། །རྣ་བ་གཉིས་ནས་རྒྱབ་པ་ཡིས། །ཕར་རལ་ཚུར་རལ་སྲེག་པ་བསམ། །ལུས་པོར་བྱིན་ནས་སྤྲོས་མེད་བཞག །གང་ཞིག་ལྕེ་ནི་ན་དང་ལྐུག །སྟག་ཞོན་མགོ་མང་མདུན་ནས་བྱུང་། །ལྕེ་ནི་ཤར་མོ་བཅུ་གཅིག་བྱས། །བཅུ་གཅིག་ཁ་རུ་བཅུག་ནས་འཇིབ། །ལུས་སྦྱིན་བྱས་ནས་སྐྱེ་མེད་བསྒོམས། །སོ་ལ་སྲིན་བུ་ན་བ་ལ། །སེང་ཞོམ་མགོ་བྱས་འཇིགས་པ་བརྒྱས། །སོ་ལ་དོ་ཤལ་ཕྲེང་བ་བྱས། །ལྷག་མ་ལྷ་འདྲེ་ཡོངས་ལ་བཀྱེ། །གག་པའི་དམིགས་པ་འདི་བཞིན་བྱ། །བྱ་ཁྱུང་མེ་ཡི་གཤོག་པ་ཅན། །སྤྱང་ཀུ་སྔོན་མོ་ལྕགས་མགོ་ཅན། །ཕོ་རོག་ནག་པོ་སེར་མིག་ཅན། །དུག་སྦྲུལ་གདུག་པའི་ལྕེ་དུག་ཅན། །དེ་བཞིས་འགོས་བྱས་གྲངས་མེད་པས། །ནད་དང་ཤ་ཁྲག་བཅས་པ་ཟོས། །ཤུལ་ཡང་མ་ལུས་སྐྱེ་མེད་སྒོམས། །མིག་ཅུས་མིད་ཁུག་ན་བ་ལ། །མི་ནད་ཞེ་སྡང་སྦྲུལ་མགོ་ཅན། །ཁ་ནས་འཛུལ་ནས་ཕོ་བར་སླེབ། །ཕོ་བ་མིག་ཐག་བཅས་པ་ཟོས། །ཐོ་ལུམ་འབར་བས་ཤུལ་ཡང་སྲེག །ལྷག་མ་ཁྱུང་གིས་མ་ལུས་ཟོས། །མིག་བཅུས་ཕན་པ་ཐེ་ཚོམ་མེད། །གློ་བ་རྣག་གིས་ཁེངས་ན་ནི། །མི་ནག་དྲེད་དང་སྟག་ཞོན་གྱིས། །ཨོལ་ཁུང་ནས་འཇིབ་རྣག་ཁྲག་འཐུང་། །ཁོ་དགའ་ཡ་ལེ་ཤེས་པ་གཏད། །བར་བར་སྟོད་ཀྱི་གཟེར་ས་རུ། །དཔེར་ན་ཇ་ཚག་འདྲ་བ་ཡིས། །བུག་པ་བྱས་ནས་ནད་རླང་རྣམས། །སྔོ་དམར་དག་ཏུ་ཐོན་པར་དམིགས། །བར་བར་ཤེས་པ་གླིང་བཞི་བསྐོར། །སྐྱེ་མེད་སྤྲོས་བྲལ་ངང་ལ་བཞག །མཆིན་པར་ནམ་མཁའ་རླུང་སྐྱེས་ན། །གནམ་ལྕགས་རྡོ་རྗེ་རྒྱ་གྲམ་གྱིས། །མཆིན་པའི་དཀྱིལ་རྒྱབ་བསྐོར་བ་ཡིས། །མར་ལ་ལྕགས་བསྲེགས་རྒྱབ་པ་བཞིན། །མེལ་དུ་ཞུ་ནས་ཁྲག་ཏུ་སོང་། །མཁའ་ལ་སེང་ཞོན་སྟག་ཞོན་གྱིས། །ཟངས་ཀྱི་སྦུ་གུ་སྦྱར་ནས་འབྱོངས། །རེས་འགའ་ཁྱི་ནག་གསུམ་གྱིས་ཟོས། །རྐང་ལག་ལྷུ་ཚིག་ན་བ་ལ། །སྦྲུལ་ནག་འདོམ་དགུ་པ་གཅིག་གིས། །གང་ནའི་རྐང་ལག་བཅིངས་པར་བསམ། །བར་བར་ལུས་སྦྱིན་སྙིང་རྗེ་སྒོམས། །རྐང་དང་རུས་པ་ཁོལ་བ་ལ། །འཇིགས་པའི་མགོ་མང་ཀླུ་རིགས་ཀྱིས། །གནམ་ལྕགས་སྟྭ་སྟིལ་རྒྱབ་ནས་གཏུབ། །རྐང་དང་རུས་པ་དང་བཅས་རྣམས། །སྣང་སྲིད་ལྷ་འདྲེ་ཡོངས་ལ་བཀྱེ། །རྗེས་མེད་སྤྲོས་མེད་ངང་ལ་བཞག །རྐང་ལག་ཞ་ན་འཇུག་གཅོད་ཀྱིས། །དམིགས་པ་སྦྲུལ་གྱིས་བསྡམ་པ་དེས། །བྱ་ཁྱུང་དམར་ནག་གྲངས་མེད་ཀྱིས། །སྦྲུལ་དང་རྐང་ལག་ལྷན་དུ་ཟོས། །ལྷག་མ་མ་ལུས་སྒྱུ་ལུས་སྦྱངས། །གང་ཞིག་མོ་ནད་ན་བ་ལ། །བུ་སྣོད་ནང་དུ་ཟླ་བ་བསམ། །ཟླ་བ་ཞུ་ནས་བདུད་རྩིར་བསམ། །རྩ་སྦུག་འགྲིམ་ནས་ལུས་ཀུན་ཁྱབ། །སྦྱིན་པ་ལུས་མཆོད་ཡང་ཡང་བྱ། །གཞུང་པར་ཆུ་སེར་ཞུགས་ནས་རེང་། །གཞུང་ཚིག་ནང་དུ་ཉི་མ་འབུམ། །ཆུ་སེར་ཉི་མའི་འོད་ལ་ཐིམ། །ལུས་སྦྱིན་སྐྱེ་མེད་ངང་ལ་བཞག །མཁྲིས་ནད་མཁྲིས་པ་མིག་སེར་ལ། །མི་ནག་ལྕགས་མགོ་ལྕགས་མཆུ་ཅན། །མཆིན་ཁ་བརྡུང་ནས་མཁྲིས་པ་འཇོངས། །ལྷག་མ་བྱ་ནག་ཡོངས་ཀྱིས་ཟོས། །སྐྱེ་མེད་སྒོམ་པ་མན་ངག་ཡིན། །བད་ཀུན་སྤྱི་ཁྱབ་ན་བ་ལ། །ཨ་དཀར་དག་གིས་ལུས་ཀུན་ཁེང་། །ལུས་སྦྱིན་དཀར་ཚོགས་མཆོག་ཏུ་གཅེས། །ལྷོག་རྒོད་བྱུང་ན་འདི་ལྟར་བྱེད། །རང་ལུས་ལྕགས་ཀྱི་རྡོ་རྗེ་སྒོམ། །ལྷ་འདྲེ་རང་དང་གཉིས་མེད་སྒོམས། །འོ་དོད་འབོད་ཅིང་དྲེགས་པ་འདུལ། །སྣ་ཁྲག་བྱུང་ནས་མ་ཆོད་ན། །སྣ་ཁྲག་བྱུང་ཚད་གཏོར་མར་བསྔོ། །ལུས་དང་བཅས་པ་གཏོར་མར་བསྔོ། །རྒྱབ་ལག་བྱས་ལ་མཆོང་ཁྲབ་བྱ། །སྐྱུག་ནས་ཟས་མི་ལན་པ་ལ། །མིད་ནང་ཤ་ཡིས་བཅད་པར་བསམ། །འཕོ་བར་ཤ་སྦྲང་རྣམས་ཀྱིས་ཟོས། །ལུས་སྦྱིན་བྱ་ཞིང་ནད་ལ་ལྟ། །བཤལ་རྗེས་མ་ཆོད་ལོག་ནོན་ནི། །རྒྱུ་ཞབས་རྒྱུ་མས་བཅིངས་པར་བསམ། །དེས་ནི་མཐའ་གཏད་ལོག་ནོན་ནོ། །གསེར་ཞུན་ལས། འབྲུམ་པ་ལ་སོགས་འགོ་བའི་ནད་ལ་དམིགས་པ་འདི་ལྟར་བྱེད་པ་ཡིན། རང་གི་ལྟག་པའི་སྡུད་སྒོ་ནས། ལྷན་ཅིག་སྐྱེས་པའི་བདུད་བྱ་བ་མི་ནག་རེ་བའི་བ་དན་ཅན་གཅིག་གིས། བ་དན་གཡབ་པས་ནད་བདག་བོས་ནས། ལྟག་པའི་སྡུད་སྒོར་ཞུགས་པས། ལུས་པོ་ཀུན་ནད་བདག་གིས་གང་བར་བསམ། ཤ་ཟོས་ཁྲག་འཐུང་རུས་པ་མུར་སྟེ། ཐམས་ཅད་མཉེས་ཞིང་ཚིམས་ནས་དགའ་བར་བསམ། དེ་མ་ཐག་ཏུ་སྡེབ་ནས་ཀྱང་། ཐམས་ཅད་ཉོག་གིས་བཏང་བར་བསམ། དེའི་ངང་ནས་ཕཊ་ཅེས་བརྗོད་པས། ཐམས་ཅད་ལྕགས་རིའི་རྒྱབ་ཏུ་དོར་བར་བསམ། འབྲུམ་བུའི་རྩེ་མོ་ཏོག་ནས་ཁ་རུ་བཅུག །ཁ་ཟས་མི་འཛེམ་ཆུ་རུ་ཉལ། །དེ་རྗེས་སྐྱེ་མེད་ངང་ལ་བཞག །འདུ་བ་ཉལ་ཉིལ་གྱི་ནད་གསོ་བའི་ཞལ་ཤེས་ནི། ལུས་ཀྱི་ལྟོ་རྒྱབ་ཐམས་ཅད་ནས། གྲ་བའམ་ཁྲོས་མ་ལྟ་བུ་ཁྲེང་ཤུག་པར་བསམ། ནད་ཀྱི་ཁ་རླང་སྔོ་ན་ཁོག་སྟོད་དམར་དུ་ནས། ནམ་མཁའི་འཇའ་བཞིན་ཡལ་བར་དམིགས་པ་ཡང་ཡང་བྱེད། འདུ་བའི་ནད་སེལ་བའོ། །ཁྱད་པར་སྐྲག་མིག་གར་བྱུང་སར་བྱ་ཁྱུང་ནག་པོ་ཟངས་མེའི་མཆུ་ཅན་གྱིས། །སྐྲང་ཐོག་མཆུ་ཏོ་རྒྱབ་ནས་ཁུལ་དུ་བྲུས་ཤིང་ཟོས་པར་བསམ། སྐྲན་ལ་མི་ནག་མགོ་མང་གིས། །ཐོ་ལུམ་འབར་བས་རྒྱབ་ནས་བཤུས། །སེང་ཞོན་མི་ཁྱིས་བཟའ་བཏུང་དང་། །ཁྱུང་དང་སྦྲུལ་ལ་ཟ་རེས་དབབ། །སྙིང་ནད་སྙིང་རླུང་སྙིང་འདྲེ་ཞུགས། །སྨྱོ་འདར་ཤེས་པ་དྲན་སྟོར་ན། །སྙིང་ནི་ཚོན་རྐུད་སྣ་ལྔས་དཀྲིས། །སེམས་ནི་མར་མེ་ལྟ་བུར་བསམ། །དེ་ལ་མ་ཡེངས་གཏད་ན་སེལ། །ཡང་གཅིག་འཇའ་ཚོན་སྣ་ལྔའི་གུར། །དེ་ནང་མ་ཅིག་ཚོན་གང་བསྐྱེད། །མ་ཅིག་ཐུགས་ཀར་གསེར་གྱི་ནི། །རྡོ་རྗེ་ལངས་ནས་ཡོད་པ་ལ། །རིག་པ་གཏད་ལ་སྙིང་རྗེ་སྒོམས། །སྙིང་ནད་འཇོམ་པར་ཐེ་ཚོམ་མེད། །ཕོ་ནད་ཟས་མི་འཇུ.བ་ལ། །མི་ནག་མགོ་མང་འཇིགས་པ་ཡིས། །ཕོ་ཁར་བཏུག་ནས་འཇིབ་ཟོས་ནས། །བར་བར་ཤ་སྦྲང་དག་གིས་ཕོ་བ་ཁེངས། །ཕོ་ནད་བཅས་པར་ཟོས་པར་དམིགས། །རླུང་གཉིས་བཟུང་ལ་སྐྱེ་མེད་སྒོམ། མཆེར་ནད་དམིགས་པ་འདི་བཞིན་བྱ། མཆེར་པ་ལ་ལྕགས་སྲེག་འཁོར་ལོ་བསྐོར། །ཞུ་ནས་དོམ་ཞོན་སྦུ་གུས་འཇོངས། །དེ་ཡང་མང་བྱས་སྟོང་ཉིད་སྒོམ། །ལོང་སྲིན་ལོང་དུག་ན་བ་ལ། །ལྕགས་ཀྱི་འཁོར་ལོ་རྩིབ་བརྒྱད་པ། །རྣོ་ངར་ལྡན་པས་ལོང་ཕུག་འཁོར། །ནད་དང་ལོང་ཁ་བཅས་པ་བཞུས། །ལྕགས་སྤྱང་འབུམ་གྱིས་འཐུང་ནས་དགྱེས། །མཁལ་ནད་མཁལ་མ་གྲང་མཁལ་ལ། །བྱ་ཁྱུང་མེའི་གཤོགས་པ་ཅན། །མཁལ་མ་ཚིལ་དང་བཅས་པ་བྲོས། །གཤོག་པ་བརྡབ་པས་ཤུལ་ཡང་བསྲེགས། །རྩ་རྒྱུད་ནང་དུ་མེ་དམིགས་བཏང་། །དེས་ནི་ཞི་བར་ཐེ་ཚོམ་མེད། །རྡེལ་ནད་རླིག་རླུག་ལང་པ་ལ། །སེང་ཞོན་འཇིགས་པའི་བྱ་ནག་གི། །སྒང་པ་གཉིས་ཕྱུང་ཁྱི་ལ་བྱིན། །ཤུལ་དུ་ལྕགས་སྒང་འབར་གཉིས་བཙུད། །ཁོག་སྨད་ལྕགས་སྲེག་དམར་རྔམ་ལ། །ཤེས་གཏད་རླུང་བཟུང་ཐེ་ཚོམ་མེད། །རྩ་ཆུ་འགག་པའི་ནད་བྱུང་ན། །འདུས་མདོར་ཁྱུང་ལྔའི་མཁར་གཅིག་བརྩིགས། །བད་ཀ་ནོར་བུས་བརྒྱན་པ་གཅེས། །གཏན་དུ་བཞུགས་ཅེས་གསོལ་བ་གདབ། །འདི་ཡིས་སེལ་བ་ཐེ་ཚོམ་མེད། །བསེན་མོས་ཐིག་ལེ་འཕྲོག་པ་ལ། །ནོར་བུའི་འཇིག་རྟེན་གང་བར་བསམ། །བསེན་མོ་ནོར་བུའི་རྩེ་ལ་སྐྱོན། །ནོར་བུ་ལངས་པའི་རྩེ་ལ་ཁྱེར། །ནམ་མཁའི་དབྱིངས་ལ་གཞོན་མཛེས་འཕང་། །རྒྱ་མཚོའི་གཏིང་དུ་དངོས་མེད་སོང་། །ཡང་གཅིག་གང་རྨིས་འཛའ་མོར་བསྐྱེད། །རྟག་ཏུ་འཛའ་མོར་བྱེད་པར་བསམ། །རྟག་ཏུ་ལྷན་ཉམས་ལུས་སྦྱིན་བྱ། །ཡིད་ལ་ཆགས་མེད་སྐྱེ་མེད་སྒོམས། །བར་བར་རྡོ་རྗེའི་དམིགས་པ་བྱ། །དེས་ནི་མི་འཕྲོག་ཉམས་མྱོང་འཕེལ། །གཞང་འབྲུམ་གཉའ་མ་ཟ་བ་ལ། །རྐུབ་ནང་སྲིན་བུ་སེར་པོ་ནི། །མགོ་མང་གྲངས་མེད་བསམ་བྱས་ལ། །གཉའ་མ་སྲིན་བུ་བཅས་པ་རྣམས། །ཁྱུང་གིས་བཏུས་ཏེ་ཟོས་པར་བསམ། །སྲོག་རླུང་སྲོག་རྩ་འཆུག་པ་ལ། །དྲེད་ཞོན་ལག་རིང་བྱུང་ནས་སུ། །གཤང་ལམ་དག་ཏུ་ལག་པ་རྒྱུས། །སྲོག་རྩ་བཅད་ནས་ས་འོག་ཁྱེར། །གསེར་གྱི་ས་གཞིའི་སྟེང་དུ་ཟོས། །ས་འོག་ལྷ་འདྲེས་སྣ་དྲངས་པས། །ལུས་ཀུན་ཟོས་ནས་ས་འོག་སོང་། །སྲོག་རླུང་འཇོམས་པར་ཐེ་ཚོམ་མེད། །གྲིབ་སེལ་བའི་དམིགས་པ་ནི། རང་གི་སྙིང་ཁར་སྒོ་གཅིག་ཡོད་པར་བསམ་ལ། མཁའ་འགྲོ་དམར་མོ་ཕྱག་ན་འགུགས་བྱེད་ལྕགས་ཀྱུ་ཡིས། གྲིབ་དང་གྲིབ་བདག་ལ་སོགས་པ། སྒོ་ནས་འགྲིམ་སྟེ་ལུས་པོའི་ནང་ཐམས་ཅད་གྲིབ་དང་། གདོན་གྱིས་གང་བར་བསམ། དེ་ཡང་ཕོ་གདོན་སྙིང་ཁ། མོ་གདོན་ལྟེ་བར་འདུག་ནས། ཤ་ཁྲག་རུས་གསུམ་ཟོས་པས་མཉེས་ཞིང་ཚིམ་ནས་དགའ་བར་བསམ། དེ་ནས་རྐང་ཞབས་སུ་ཡི་གེ་ཡྃ་ལྗང་ཁུ། རྐང་བོལ་གཉིས་སུ་རྃ། ཡྃ་ལས་རླུང་བྱུང་། རྃ་ལས་མེ་སྦར་བས། ཕོ་གདོན་མོ་གདོན་རག་རག་སུ་ཚིག་ཞིང་བསྲེག་པར་བསམ། གྲིབ་སེལ་གྲིབ་སྲུང་གང་ལ་ཡང་། །མང་དུ་བྱེད་པ་མན་ངག་ཡིན། །གང་ཞིག་རྒྱུ་མ་ན་གྱུར་ཅིང་། །ཁྲག་གམ་སྐྱ་བཤལ་འཁྲོག་ལ་སོགས། །ཅི་ལྟར་བཟོད་རླག་མེད་གྱུར་ན། །རང་ཉིད་སྤྲོས་བྲལ་ངང་ལ་བཞག །རྒྱུ་མ་གཉའ་མ་ལ་སོགས་པ། །རང་གིས་མདུན་ནམ་གང་རུང་དུ། །ཁྱི་སྤྱང་བྱ་རོག་ལ་སོགས་ཀྱིས། །ཕར་འཐེན་ཚུར་འཐེན་བྱེད་པ་ལ། །ཤེས་པ་གཏད་ཅིང་དམིགས་པ་སྒོམས། །གཞན་ཡང་རང་གི་རྒྱུ་མ་ནི། །རྩི་ཤིང་བྲག་ཟུར་ལ་སོགས་པ། །དཀྲིས་ཤིང་མནར་ནས་ཁྱེར་བར་བསམ། །རླུང་གཉིས་ཁ་སྦྱོར་མཆོང་ཁྲབ་བྱ། །བཤལ་དང་སྦོས་ཞིབ་མྱུར་དུ་དབྱུང་། །ཤེས་པ་གསལ་ལ་རིག་པ་གཏད། །ཅི་ལྟར་གཟེར་ཡང་ཁྲག་ནད་སོགས། །ཆད་འགྱུར་བརྟན་པ་ཐོབ་པར་འགྱུར། །མ་ཅིག་ཞལ་གདམ་བདུད་རྩི་ཡིན། །སྲིའུ་གསོ་ན། གསེར་ཀླག་ལ། མ་ཡི་ལུས་ལ་ཡོད་དུས་ནས། དབང་བཀའ་བྱེད། ཡེ་ཤེས་ལྔ་ཡི་དབང་བསྐུར་དང་། ཡུམ་ཆེན་མོའི་དབང་བསྐུར་དང་། མ་ཅིག་གིས་ཡེ་ཤེས་དབབ་པས། སྲིའུ་ཁོང་པའི་ནང་དུ་དམིགས་ལ་དབང་བསྐུར། བཙས་པ་དང་ག་ཏེ་ཕར་ཕྱིན་རྟེན་འབྲེལ་སྙིང་པོ་གསེར་ལ་སོགས་པས་བྲིས་ལ། རབ་གནས་བྱས་ལ་བཏག །གཅོད་དབང་བྱེད། རང་གི་རིག་པ་དང་སྲིའུའི་རིག་པ་བསྲེས་ལ་ནམ་མཁའ་གོ་འབྱེད་བྱ། རང་ཉིད་མཁའ་འགྲོ་མ་སྐུ་མདོག་དམར་མོ་གཅིག་ཏུ་བསམ་ལ། རང་གི་ཕྱོགས་བཞིར་རིགས་བཞིའི་མཁའ་འགྲོ་མ་བཞི་སྒོམས། ཕཊ་བྱས་པས་མཁའ་འགྲོ་མ་དཔག་མེད་འཕྲོས་ནས། ཆུང་སྲི་ཆུང་འདྲེ་སྲིའུ་ལ་གནོད་པ་བྱེད་པ་གར་གནས་ཀྱང་། སྐད་ཅིག་ཉིད་ལ་འདིར་བཀུག་ནས། ཕཊ་ཀྱིས་རང་དང་སྲིའུ་གཉིས་ཀའི་ཤ་ཁྲག་གཏོར། ཆུང་སྲི་བཀུག་ཅིང་ཁ་རུ་བརྫོང་། དམ་ལ་མ་ཐོག་བར་དུ་བཀུག །ནང་ནུབ་གཉན་སར་གཅོད་ལ་ཁྲིད། མཛེ་ཕོ་མཛེ་མོའི་མཆིལ་སྣབ་བླུད། དེས་ནི་འཚོ་བར་ཐེ་ཚོམ་མེད། ལྐོག་མ་ན་ན། ཕཊ་གཉིས་བྱས་པ་ཙམ་གྱིས། གཅིག་གིས་རྗེ་བཙུན་མ་གྲི་གུག་ཅན་གྱིས་ལྐོག་མ་ཤ་ཁྲག་དང་བཅས་པ་བཏུབ་ཅིང་བཅད་པར་སྒོམས། གཅིག་གིས་རྗེ་བཙུན་མ་རྣམས་ཀྱིས་ཟོས་པར་སྒོམས། ཕཊ་དེ་ལ་དུས་རེ་བརྒྱ་རེ་བྱེད། དེའི་རྗེས་སུ་ལུས་སེམས་ཕྲལ་ལ་སྐྱེ་མེད་དུ་བཞག །འབྲས་ལ་ན་སར་རྡོ་རྗེ་རྒྱ་གྲམ་དམིགས། །རྒྱ་གྲམ་སྟེང་དུ་སྦུད་མཆུ་དོད། །ཁྲག་རུལ་ཆུ་སེར་རྣག་ཁྲག་རྣམས། །འགུལ་སྐྱོད་བྱས་པས་འབབ་པར་བསམས། །རྡོ་རྗེ་རྒྱ་གྲམ་འཁོར་བར་དམིགས། །སྙིང་རྗེ་ལུས་སྦྱིན་སེམས་བསྐྱེད་སྒོམས། །ངག་མནན་བཟློག་པའི་བཟློག་ཐབས་ལ། །རང་གིས་ལྕེ་རྐྱང་བའི་སྟེང་དུ། །ངག་ལ་གནོད་པར་བྱེད་པའི་རྦོད་གཏོང་སྣང་སྲིད་དང་བཅས་པ་འདུས་ནས། ཁ་བཙུམ་ཞིང་མིད་པས་ལུས་ཀུན་མེར་གྱིས་ཁེང་ནས་བདེ་སྐྱིད་ལྡན་པའོ། ༈ །ཁྲོས་མས་རྐང་པ་ནས་བཟུང་ནས་དབང་མེད་ས་ལ་བརྡབ་པས། རྡུལ་ཕྲན་བཞིན་དུ་གྱུར། རང་གི་ནད་གནས་སུ་སེམས་ཅན་ཀུན་གྱི་ནད་བསྡུ་ལ། བྱང་ཆུབ་མ་ཐོབ་ཀྱི་བར་དུ་སེམས་ཅན་ཐམས་ཅད་ཀྱི་ནད་མེད་པར་བསམ། བདག་གིས་ནད་འདི་ནམ་ཡང་མི་བཏང་པར་བསམ་ཞིང་། རླུང་ལ་སྐྱོན་ཅིང་སེམས་ཅན་ཐམས་ཅད་ཀྱིས་ནད་གཏན་ནས་མེད་ནད་རྣམས་སྡུད་སྒོ་ནས་བསྡུ་ཞིང་སྙིང་ཁར་ཐིམ། འཐུན་པའི་ལྕགས་རྒྱབ་པས་སྣང་སྲིད་ལྷ་འདྲེ་དེར་དངོས་མེད་བཏང་། དེར་གནས་སྣང་སྲིད་ལྷ་འདྲེ་རོ་བཅས་སྲིད་རྩེར་ཡར་བཏེག་ནས། དབང་ཆེན་ལ་བརྡབ། ཤ་ཁྲག་དང་བཅས་རྡུལ་དུ་སོང་། གནག་སྡོང་པོ་གསེར་ཀླག་ལས་ནད་ལུག་ནད་བཅས་པ་ལ། །ལྷན་དུ་བསྡུས་ལ་དབང་བསྐུར་བྱ། །བདག་དང་གཉིས་མེད་དབྱིངས་རིག་བསྲེ། །ཕཊ་ཀྱིས་ཤ་ཁྲག་གཏོར་ལ་བཞག །སྐབས་སུ་ཆུ་སྦྱིན་ལན་ཆགས་གཏོར། །གཉན་སར་དེ་ལ་གོད་འདྲེ་བཀུག །བདག་དང་གཉིས་མེད་ཤ་ཁྲག་དང་། །རིག་པ་གཅེར་གྲོལ་ཕུར་སྙམ་གྱིས། །གོད་འདྲེའི་ཁ་རུ་ཤ་ཁྲག་བརྫོང་། །དམ་ཐོག་ཚར་ཚད་མ་བྱུང་ཚེ། །ནན་ཏན་བསྐྱེད་ལ་རིག་པ་གཏད། །འོ་དོད་འབོད་པ་མན་ངག་ཡིན། །སྤྱིར་ན་ཚ་སྡུག་བསྔལ་གཟེར་ཟུག་ཅི་བྱུང་ཡང་། །སྔོན་གྱི་ལས་འབྲས་སྒྱུ་མ་ལྟ་བུ་ཡི། །གཞན་གྱི་སྡུག་བསྔལ་ཞི་བར་སྨོན་ལམ་འདེབས། །སྐྱོན་དག་ཡོན་ཏན་དག་དང་འཇལ་བར་ངེས། །མ་ཅིག་ལབ་སྒྲོན་ཞབས་ལ་འདུད། ལྷོག་པ་བཤའ་བའི་མན་ངག་ལ། རང་ཉིད་ལབ་སྒྲོན་ནག་མོར་བསྐྱེད་ལ། ལྷོག་རོ་ས་གཞི་དང་བཅས་པ་བླང་ནས། དགུང་རིམ་པ་བཅུ་གསུམ་གྱི་སྟེང་དུ་ཡར་ཁྱེར་ལ། མལ་དུ་ལྕགས་སྲེག་གི་ས་གཞི་དམར་ངམ་མེ་བ། ཚྭ་ཚྭ་སི་ལི་ལི་ཁོལ་བར་བྱེད་པ། ཕྱོགས་བཞི་མཚམས་བརྒྱད་དུ་མེའི་བྱ་ཁྱུང་གྲངས་མེད་པས་བསྐོར་བས་གཤོག་པ་རྡེབ་པ་ཙམ་གྱིས་མེ་རི་མེ་དཔུང་འུ་རུ་རུ་འབར་བས། དེའི་དཀྱིལ་དུ་མར་རྒྱབ་པས་ལྷོག་རོ་ནད་འདྲེ་དང་བཅས་པ་དེ་ཐར་གྱི་གཏོར་ནས་བྱ་ཁྱུང་རྣམས་ཀྱིས་ཟོས། ལྷག་མ་ནད་འདྲེ་དང་བཅས་པ་བྱ་སྒྲོ་སྲེག་པ་ལྟར་ཚིག་པར་བསམ། ཁྲོ་ཆུ་ཁོལ་མའི་མཚོ་ནང་དུ་རྒྱབ་པར་བསམ། དེ་ནས་རང་ཉིད་གཅེར་བུ་ཕུད། ཕར་འགོང་ཚུར་འགོང་ལན་གསུམ་བྱེད། རང་གི་རྐང་པ་གནམ་ལྕགས་ཀྱིས་ཕུར་པ་ཟུར་གསུམ་ཆུ་སྲིན་གྱི་དབལ་སོ་དང་ལྡན་པས། ལྷོག་རོ་ལྷོག་པ་ལྷོག་བདག་དང་བཅས་པ། ལྕགས་སྲེག་མར་ལ་རྒྱབ་པ་བཞིན་དུ་སོང་བར་བསམ། དེ་ནས་མགོ་བཅད་ནས་ཡར་ལ་འཕང་། རྔ་མ་བཅད་ལ་ཕྱིར་འཕངས། དེ་ནས་ཁྲག་ལུས་ལ་བཀུ། ཡང་ཁྱོར་བ་གང་དོ་འཐུང་། སྙེམ་མི་བྱེད་པ་ཕྱག་རྒྱ་ཆེན་པོའི་ངང་ལ་བཞག །དེ་དྲག་པོ་ཐོག་རྫིས་ཀྱི་བཤའ་ལུགས་ཡིན། ཞི་བ་ལྟར་ཡིན་ན། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་གསོལ་འདེབས་བྱ་ཞིང་། ལུས་སེམས་ཕྲལ་ལ་རང་གི་ཤ་ཁྲག་དང་ལྷོག་པ་གཉིས་བདུད་རྩིར་བསྲེས་ལ། རྡོ་རྗེ་འཆང་མན་ཆད་ཀུན་ལ་བཀྱེ། ཞི་མ་དྲག་ལ་དམར་འགྱེད་བྱ། ཕལ་ཆེར་ལ་ཐོག་རྫིས་བྱེད་པ་ཡིན། འདི་བྱེད་དུས་སྙེམས་དང་བྲལ་བ་གལ་ཆེ། དམིགས་པ་འདི་ཡི་གེའི་རིས་མེད་པས་སྙན་བརྒྱུད་བྱེད་པ་ཡིན། བདག་གི་བརྗེད་དོགས་སུ་བྲིས་པ་ཡིན་ནོ། །ཡང་རང་ལ་ལྷོག་པའི་ནད་ཕོག་ན་འདི་ལྟར་བྱ། རང་ལུས་ལྕགས་ཀྱིས་རྡོ་རྗེར་སྒོམ། །ལྷ་འདྲེ་རང་དང་གཉིས་མེད་བསྐྱེད། །འོ་དོད་འབོད་ཅིང་དྲག་པོར་འདུལ། །ཁོག་སྟོད་ན་ན། ཕཊ་གཅིག་བྱས་པས་ཁོག་སྟོད་གར་ན་ས་དེར་ཚག་མ་བཞིན་དུ་སྒོམས། རླུང་འབུད་པ་དང་སྤྲད་ནས། ནད་རྣམས་དུ་བ་སྔོ་དམར་གྱི་ཚུལ་དུ་ཕྱུ་རུ་རུ་སོང་ནས་ན་བུན་ཡལ་བ་བཞིན་སོང་བར་སྒོམས། དེ་ནི་ནང་པར་ཡར་ལངས་ཙ་གྲངས་མེད་བཅུན་པ་ཡིན། དེའི་རྗེས་སུ་གོང་དང་འདྲ། དེས་མ་ཐུབ་མཐའ་གཏད་བྱེད་པ་ནི། ཕཊ་ཀྱིས་རང་དང་གཞི་བདག་གཉིས་ཀྱི་རྣམ་ཤེས་ཀྱི་ངོ་བོ་མི་ནག་འཇིགས་སུ་རུང་བ། གཡས་ན་གནམ་ལྕགས་ཀྱིས་ཕུར་པ་དང་། གཡོན་ན་ཟངས་ཀྱི་སྦུ་གུ་དམར་ཙེ་རེ་བ་འཛིན་པ་གཅིག་ཏུ་སྒོམས། ཕཊ། གཅིག་གིས་ཕུར་པ་དེས་ཁོག་སྟོད་གར་ན་ས་དེར་རྒྱབ་ནས་ཡར་བལ་ཏེ་མལ་དུ་ཁྲག་ནད་དང་བཅས་པ་ཕྱུ་རུ་རུ་བྱུང་བར་སྒོམས། དེ་ལ་ཟངས་མའི་སྦུ་གུ་རྒྱབ་ནས་འཇོང་ཞིང་ཁོ་དགའ་ཡལ་ལེ་སོང་སྟེ། ནད་རྣམས་རྗེ་བཙུན་མར་སངས་རྒྱས་པར་སྒོམ་ཞིང་། ཕཊ་གྲངས་མེད་བརྗོད། ཁྲག་ད་ཟད་བསམ་ཙ། ན་ས་ལོག་ན་དམིགས་པ་སྤོ་བ་ཡིན། དེའི་རྗེས་སུ་གོང་དང་འདྲ། དེས་ནད་གཅོད་སོང་། གཉིས་པ་གདོན་གཅོད་པ་ལ་གཉིས་ཏེ། སྤྱིའི་གདོན་གཅོད་དང་། བྱེ་བྲག་སོ་སོའི་གདོན་གཅོད་གཉིས། སྤྱིའི་གདོན་གཅོད་ལ་གསུམ་སྟེ། རྗེ་དམ་པ་རྒྱ་གར་གྱི་ཞལ་ནས། གདོན་ཆེན་ལུས་ལ་སྦྲུལ་ལྟར་འཁྲིལ་ན། དམིགས་པ་གར་མཁན་གྱི་ལག་པ་ལྟར་བསྒྱུར་བ་དང་གཅིག །རྦོད་གཏོང་སྤྲིན་ལྟར་གཏིབ་ན། དམིགས་པ་རླུང་ལྟར་སྦུད་པ་དང་གཉིས། གདོན་བཙན་ཐབས་སུ་གནོད་ན། དམིགས་པ་མདུང་ལྟར་བསྐོར་བ་དང་གསུམ་མོ། །དེ་ལ་རྐྱེན་ངན་གྲོགས་སུ་འཁྱེར་དགོས་པ་ཡིན་གསུངས། དེ་ལ་དང་པོ་གདོན་ཆེན་ལུས་ལ་སྦྲུལ་ལྟར་འཁྲིལ་ན། དམིགས་པ་གར་མཁན་གྱི་ལག་པ་ལྟར་བསྒྱུར་བ་ལ་གསུམ། གདོན་སྐྱེངས་སུ་བཅུག་པ་དང་། གདོན་བཙོན་དུ་བཟུང་བ་དང་། གདོན་མགོ་བསྐོར་བའོ། །དེ་ལ་དང་པོ་གདོན་སྐྱེང་དུ་བཅུག་པ་ལ་གསུམ་སྟེ། ལུས་ཚོགས་སུ་འབུལ་བ་དང་། ལུས་འབྲུམ་བཙིར་བ་དང་། ཁོང་པར་ཕོ་བྲང་བཅའ་བའོ། །དེ་ལ་ལུས་ཚོགས་སུ་འབུལ་བ་ནི། གནོད་བྱེད་དེ་ཡིད་ཀྱིས་བཀུག་ནས་སྤྱན་འདྲེན་ལ། ལུས་ལིང་ཀྱིས་བོར། སེམས་ནམ་མཁར་འཕངས་སྟེ། མ་བཅོས་པའི་ངང་ལ་ལྷོད་ཀྱིས་བཞག་གོ། །ལུས་ཤ་ཁུག །དབང་པོ་དོན་སྙིང་། སོ་དང་སེན་མོ། ཐམས་ཅད་ཕངས་པ་མེད་པ་ཁོ་ལ་ཅི་འདོད་དུ་འབུལ་ལོ། །གཉིས་པ་ལུས་འབྲུམ་བཙིར་བ་ནི། བདག་གིས་ཤ་རུས་ཕྱི་ནང་གི་བར་ཐམས་ཅད་དུ། སྦལ་སྦྲུལ་ཉ་ལྕོང་སྡོམ་སྡིག་ལ་སོགས་ལྷ་འདྲེའི་རང་གཟུགས་ཀྱིས་ཁེངས་པར་བསམ་ལ། ལུས་ལ་གཅེས་འཛིན་མེད་པར་ཁྱེད་རང་རྣམས་ཀྱིས་ཟོ་ཞིག །ཁྱེར་ཅིག་ཅི་འདོད་ཀྱིས་བསམ་ལ། སེམས་ནམ་མཁར་འཕང་སྟེ། སྐྱེ་མེད་ཀྱི་ངང་དུ་ཁྲོལ་གྱིས་བཞག་གོ། །གསུམ་པ་ཕོ་བྲང་བཅའ་བ་ནི། རང་གི་ཁོང་པར་གདོན་གྱི་ཕོ་བྲང་ཁྲི་སྟན་དང་བཅས་པ་བསྐྱེད་ལ། གདོན་བྱེད་དེ་སྤྱན་འདྲེན་ནས། རང་གི་ཁོང་པར་བཞུགས་སུ་གསོལ་ལ། རང་གི་ཤ་ཁྲག་ནང་རོལ་རྣམས་འཕང་པ་མེད་པ་ཁོ་ལ་སྦྱིན། ཁྱེད་རྣམས་གར་མ་འགྲོ་ལ་འདིར་བཞུགས་ཅིག །བསམ་ལ་ངག་ཏུ་བརྗོད། ཅི་འདོད་བྱེད་དུ་བཅུག །སེམས་ནམ་མཁར་འཕངས་སྟེ། སྤྲོས་བྲལ་གྱི་ངང་ལ་སེང་ངེ་ཞོག །དེ་ནས་གདོན་སྐྱེངས་སུ་བཅུག་པ་ཡིན་ནོ། །གཉིས་པ་གདོན་བཙོན་དུ་བཟུང་བ་ནི། དེ་ལ་གསུམ་སྟེ། གདོན་བྲིད་པ་དང་གཅིག །འཛའ་བཤེས་བྱ་བ་དང་གཉིས། བརྩོན་ཁོང་དུ་བཞུགས་པ་དང་གསུམ་མོ། །དེ་ལ་དང་པོ་གདོན་བྲིད་པ་ནི། ལུས་འདི་དཔེར་ན་བདག་པོ་མེད་པའི་ཁོང་སྟོང་སྒོ་མེད་དུ། དགྲ་རྐུན་ལ་སོགས་སེམས་ཅན་སུ་ཡང་འགྲོ་བ་བཞིན། ལུས་ཀྱི་བུ་ག་དགུ་སྟེ་ཧ་རེ་ཡོད་པའི་ནང་དུ། ལྷ་འདྲེ་རྣམས་ཞུགས་ནས། གློ་སྙིང་ནང་རོལ་རྣམས་ཧབ་ཐོབ་བྱས་ནས་ཟོས་པར་བསམ་ལ། སེམས་ནམ་མཁར་འཕངས་ཏེ། སྐྱེ་མེད་ཀྱི་ངང་དུ་ལྷན་གྱིས་བཞག་གོ། །གཉིས་པ་འཛའ་བཤེས་བྱ་བ་ནི། རང་ཉིད་སྙིང་དེ་གདོན་གྱི་ཕོ་བྲང་དུ་བསམ། ནད་པའམ་གཞན་སེམས་ཅན་གྱི་གདོན་ཀྱང་སྤྱན་དྲངས་ལ་དེ་ལ་ཚུར་སྟིམ། ལུས་པོ་ཤ་ཁྲག་དབང་པོ་ནང་རོལ་ཐམས་ཅད། ཕོངས་པ་མེད་པར་ཁོང་རྣམས་ལ་ཁྱེར་བཅུག་པས། ཁྱེད་རྣམས་བདག་གིས་བྱང་ཆུབ་བསྐུལ་བའི་དྲིན་ཅན་ཡིན་པས་ལུས་འདིའི་ཤ་ཁྲག་ནང་རོལ་འདི་རྣམས་དྲིན་ལེན་དུ་འབུལ་ལོ། །ཁྱེད་རྣམས་གར་མ་འགྲོ་ལ་དུས་རྟག་ཏུ་འདིར་འདུག་ཅིག་བསམ་ལ། ངག་ཏུ་ཡང་བརྗོད། གདོན་དེ་རྣམས་ཡིད་ལ་གཅེས་པར་བསམ་ལ། རིག་པ་ནམ་མ ཁར་འཕངས་ཏེ་སྤྲོས་བྲལ་ངང་དུ་ལྷོད་ཀྱི་ཀློད། གསུམ་པ་གདོན་བརྩོན་ཁང་དུ་གཞུག་པ་ནི། རང་གི་ལུས་འདི་ཁང་པ་བཞིན་བསམ་ལ། སྒོ་དེ་ལྟག་ཁུང་དུ་དོད་པར་བསམ་ལ། སྒོ་དེ་མཉམ་པོར་འོང་བའི་བདུད་གནས་པའི་ལྟག་པའི་སྡུད་སྒོ་ཞེས་བྱའོ། །སྒོ་དེ་ཧ་རེ་བྱེ་བའི་ནང་ནས་མཉམ་པོར་འོང་བའི་བདུད་དེས་གདོན་བགེགས་རྣམས་བོས་པས་གདོན་དང་ལྷ་འདྲེ་རྣམས་སྟོན་མོ་མགྲོན་འདུས་པ་ལྟར་འོངས་ནས་སྒོ་དེར་འོངས་ནས་ལུས་མེར་གྱིས་གང་བར་བསམ། དེ་ནས་ལྟག་པའི་སྡུད་སྒོ་དེ་ཐག་གིས་ཆོད་ནས་ལྷ་འདྲེ་ཐམས་ཅད་འགྲོ་ས་མེད་དེ། དཔེར་ན་ནས་སྒྲོ་ཁ་བཅིངས་བ་ལྟ་བུར་བསམ། ཕཊ་ཅེས་བརྗོད། ལུས་སེམས་ཁྲལ་ཏེ། ལུས་ཁང་པ་རྡིབས་པ་ལྟར་ཆོམ་གྱིས་རྡིབ་ནས་ལུས་དང་ལྷ་འདྲེ་གདོན་བགེགས་དང་བཅས་པ་ཐལ་བ་རླུང་གིས་ཁྱེར་བ་ལྟར་མེད་པར་བསམ། སེམས་ནམ་མཁར་འཕང་སྟེ། སྐྱེ་མེད་དུ་ཁྲོལ་གྱིས་བཞག་གོ། །དེ་ནི་གདོན་བརྩོན་དུ་བཟུང་བ་ཡིན། གསུམ་པ་གདོན་མགོ་བསྐོར་བ་ལ་གསུམ་སྟེ། རི་དྭགས་སྨིག་སྒྱུ་དེད་པ་ལྟར་མགོ་བསྐོར་བ་དང་གཅིག །འཇའ་མཚོན་ནམ་མཁར་ཡལ་བ་ལྟར་མགོ་བསྐོར་བ་དང་གཉིས། ནམ་མཁའ་ཐུགས་ཕྲད་དུ་མགོ་བསྐོར་བ་དང་གསུམ་མོ། །དེ་ལ་རི་དྭགས་སྨིག་སྒྱུ་དེད་པ་ལྟར་མགོ་བསྐོར་བ་ནི། གདོན་ཐམས་ཅད་ཡིད་ཀྱིས་བཀུག་ལ། རང་གི་ལུས་ཀྱི་བུ་ག་དགུར་ཞུགས་ནས། དཔེར་ན་ན་བུམ་གྱི་ནང་ན་འགྲོ་བ་ལྟར། གདོན་བགེགས་རྣམས་ཀྱི་ཤ་ཁྲག་ལ་སོགས་གཟུང་འཛིན་རྒྱུ་མེད་པར་བསམ་ལ། ལུས་སེམས་ཕྲལ་ཏེ། རིག་པ་སྐྱེ་མེད་ངང་དུ་ལྷོད་ཀྱི་བཞག་གོ། །གཉིས་པ་གཞན་འཇའ་ཚོན་ནམ་མཁའ་ལ་ཡལ་བ་ལྟར་མགོ་བསྐོར་བ་ནི། གདོན་བགེགས་ཐམས་ཅད་ཡིད་ཀྱིས་བཀུག་ལ། ལུས་སེམས་ཕྲལ་ཏེ། ལུས་བརྩིག་མཁར་ཞིག་པ་ལྟར་ཁྲོལ་གྱིས་ཐལ་ནས། ལུས་འབྱུང་བཞིའི་གཡར་པོ་ཡིན་པས་འབྱུང་བཞི་སོ་སོ་ལ་ཐིམ། ཤ་ས་ལ་ཐིམ། རུས་པ་རྡོ་ལ་ཐིམ། ཁྲག་ཆུ་ལ་ཐིམ། དབུགས་རླུང་ལ་ཐིམ། དྲོད་མེ་ལ་ཐིམ། སྐྲ་དང་བ་སྤུ་རྩི་ཤིང་ལ་ཐིམ། དེ་ལྟར་འབྱུང་བཞིའི་ལུས་འདི་སྐད་ཅིག་གིས་སོ་སོར་ཐིམ་ནས། གདོན་བགེགས་བྱེད་ཀྱི་རྒྱུ་མ་རྙེད་པར་བསམ་ལ། སེམས་ནམ་མཁར་འཕང་སྟེ་སྤྲོས་བྲལ་དུ་སངས་ཀྱི་བཞག་གོ། །གསུམ་པ་ནམ་མཁའ་ཐུགས་ཕྲད་དུ་མགོ་བསྐོར་བ་ནི། བདག་ཀྱང་ཡེ་ནས་དངོས་པོར་མ་གྲུབ་སྟེ་སྟོང་པར་སྣང་། དེ་ནས་རང་དང་གདོན་བགེགས་གང་ཡང་ཡེ་ནས་དངོས་པོར་མ་གྲུབ་པར་སྟོང་པར་སྣང་བ་ཡིན་ནོ། །དེ་ཡང་དམ་པའི་ཞལ་ནས། ཐམས་ཅད་སྟོང་པར་སྣང་བ། ནམ་མཁའ་ནང་འཕྲད་ལ་ཕྱོགས་རིས་མེད། སྟོང་པ་ནང་འཕྲད་ལ་ཕན་གནོད་མེད། ཐམས་ཅད་གང་ཡང་མ་གྲུབ་པ། སྟོང་ཞིང་སྣང་བ་ལ། གདོན་དང་གནོད་བྱེད་སུས་མི་མཐོང་། །ཅེས་གསུངས་སོ། །དེ་ནི་གདོན་མགོ་བསྐོར་བའོ། །དེ་ལྟར་དམིགས་པ་དགུར་བསྟན་པ་དེ་ནི། གདོན་ཆེན་ལུས་ལ་སྦྲུལ་ལྟར་འཁྲིལ་ནས་དམིགས་པ་གར་མཁན་གྱི་ལག་པ་ལྟར་བསྒྱུར་བ་གཅེས་སོ། །ན་མོ་གུ་རུ། རྦོད་གཏོང་སྤྲིན་ལྟར་བཏིབ་ན། དམིགས་པ་རླུང་ལྟར་སྦུད་པ་ལ་གསུམ་སྟེ། གནོད་བྱེད་ལྷ་རུ་འབོད་པ་དང་། ལྟས་ངན་གཡང་ལེན་དང་། རང་གཤེད་རང་ལ་དབབ་པའོ། །དེ་ལ་གནོད་བྱེད་ལྷ་རུ་འབོད་པ་ནི། རྦོད་གཏོང་གང་ནས་བྱུང་བའི་ཕྱོགས་དེ་ན། གནོད་བྱེད་སྤྱན་དྲངས་རང་གི་འདུག་སའི་གནས་ཁང་དེ། ཁོའི་ཕོ་བྲང་དུ་འབུལ་བས། ལུས་སེམས་ཕྲལ་ཏེ། ལུས་ཤ་ཁྲག་ནང་རོལ་དང་བཅས་པ་དེ་ཁོང་རྣམས་ལ་འབུལ། ཕོངས་སེམས་མེད་པར་སིལ་གྱིས་འབུལ་ལ། ཅི་བྱེད་བྱེད་དུ་བཅོལ། ཁྱེད་རྣམས་བདག་ལ་བྱང་ཆུབ་བསྐུལ་བའི་སློབ་དཔོན་ཡིན་པས། དུས་རྟག་པར་གནས་འདིར་བཞུགས་ཅིག །བདག་གིས་ཆེ་བའི་ལུས། ཆུང་བའི་ནོར་རྫས་རྣམས་ཅི་འབྱོར་ཁྱེད་ལ་འབུལ་བསམ། ངག་ཏུ་ཡང་བརྗོད་ལ། སེམས་ནམ་མཁར་འཕངས་ལ་སྤྲོས་བྲལ་དུ་སིང་གི་བཞག་གོ། །དེས་ཁོའི་གནོད་སེམས་ཞི་ནས། མ་མགོན་ལྷ་དང་ཆོས་སྐྱོང་དུ་གྱུར་པ་ཡིན་ནོ། །གཉིས་པ་ལྟས་ངན་གཡང་དུ་ལེན་པ་ནི། རྨི་ལམ་དུ་རྦོད་གཏོང་གི་མཚན་མ་དྲག་པོ་བྱུང་ན། སེམས་རྣམ་རྟོག་མི་བྱ་ལ། ངས་དགེ་སྦྱོར་ལེ་ལོ་ཤོར་བ་ལ། བསྐུལ་མ་འདེབས་པ་ཡིན་བསམ་ལ། ཡིད་ཀྱིས་རྨི་ལམ་ཆོ་འཕྲུལ་གང་བྱུང་བ་དེ་རང་གཟུགས་སུ་བཀུག་ལ། ལུས་ལིང་གིས་བོར་ནས་ཕང་སེམས་མེད་པར་སིལ་གིས་བཤིགས་ལ། གནོད་བྱེད་རྣམས་ལ་ཅི་དགའ་བྱེད་དུ་བཅོལ། སེམས་ནམ་མཁའ་ལ་འཕང་སྟེ་སྤྲོས་བྲལ་དུ་བཞག་གོ། །དེ་ནས་བྱད་མ་དེས་མ་ཚོར་བར་འགྲོ་ལ། རབ་ཁོའི་གཏོར་ཁྲིའམ་ཧོམ་ཁུང་གི་རྩར། འབྲིང་ཁོ་འདུག་པའི་ས་ཕྱོགས་གམ། ཐ་མ་ཡང་ཁོའི་ཕྱོགས་སུ་ཁ་བསྟན་ལ། དགའ་བ་བསྒོམ་པས། ཁོའི་རྦོད་གཏོང་དེ་ཁོ་རང་ལ་ལྡོག་གོ། །གསུམ་པ་བདེན་པའི་སྟོབས་ཀྱིས་རང་གཤེད་རང་ལ་དབབ་པ་ནི། རྦོད་གཏོང་དེ་ཡིད་ཀྱིས་བཀུག་ལ། ལུས་ལིང་གིས་བོར་ལ། སྙིང་དེ་ཤཱཀྱ་ཐུབ་པ། སེངྒེའི་ཁྲི་ལ་བཞུགས་པ། བྱང་ཆུབ་ལྗོན་ཤིང་ལ་རྒྱབ་གཏད་པ་གཅིག་བསམ། ཕུང་པོ་ལྷག་མ་རྣམས། འཕགས་པ་ཉན་ཐོས་དང་། དགྲ་བཅོམ་པའི་ཚོགས་ཀྱིས་བསྐོར་ནས་སངས་རྒྱས་ཀྱིས་ཆོས་གསུངས་པར་བསམ། དེ་ལ་རྦོད་གཏོང་རྣམས་གནོད་སེམས་ཀྱིས་འོངས་ནས། དེ་ལ་གནོང་ཞིང་འགྱོད་སེམས་སྐྱེས་ནས། སངས་རྒྱས་ཀྱི་ཞབས་དྲུང་དུ་ཆོས་ཉན་པར་བསམ་ལ། སེམས་ནམ་མཁར་འཕང་སྟེ། སྤྲོས་བྲལ་དུ་སེང་ངེ་བཞག་གོ། །དེས་རྦོད་གཏོང་དེ་ཁོ་རང་ལ་ཕར་ལོག་སྟེ། ཁོ་རང་གི་བདུད་དུ་འབེབས་པར་འགྱུར་རོ། །དམིགས་པ་གསུམ་པ་དེ་དག་རྦོད་གཏོང་སྤྲིན་ལྟར་གཏིབ་ན་དམིགས་པ་རླུང་ལྟར་སྦུད་པའི་གདམ་ངག་གོ། །གསུམ་པ་གནོད་བྱེད་བཙན་ཐབས་སུ་གནོད་ན། དམིགས་པ་མདུང་ལྟར་བསྐོར་བ་ནི། གློ་བུར་ཉམས་མི་དགའ་བ། བག་ཚ་བ། སྐྱི་ཟིང་པ། རྨི་ལམ་འཁྲུག་པ། བདུད་དང་རྟོག་པ་རྣམས་སྐྱེ་བའི་དུས་སུ་ཕཊ་བརྗོད་ལ་གཅིག་གིས་ལུས་སེམས་ཕྲན། བདག་མེད་ཀྱི་ཕུང་པོ་དེ་གནོད་བྱེད་ལ་གཟན་དུ་སྐྱུར། བརྟེན་མེད་ཀྱི་རིགས་པ་དེ་ནམ་མཁར་འཕང་། མ་བཅོས་པའི་ངང་ལ་ལྷོད་ཀྱིས་བཞག །གོང་གིས་དམིགས་པ་དེ་ལ་གང་ཟིན་གོང་འོག་མེད། དེས་ཡིད་ལ་གང་བྱུང་སྒོམ་མོ། །དེས་གནོད་བྱེད་དང་རིག་པ་ཐུགས་ཕྲད་ཞི་ནས། བར་ཆོད་ཐམས་ཅད་ཆོས་ཉིད་དུ་སློང་བར་བྱེད་དོ། །དེས་དམིགས་པ་གདོན་ཐོག་དབབ་པ། དྲག་སྔགས་ཀྱི་ནུས་པ་ཁྱད་དུ་གསོད་པའི་གདམ་ངག་གོ། །དེའི་སྤྱིའི་གདོན་གཅོད་སོང་། གཉིས་པ་བྱེ་བྲག་སོ་སོའི་གདོན་གཅོད་ནི། རྒྱལ་འགོང་དག་གིས་གདུག་པའི་མིའི། །ཉེར་ཞི་རིན་ཆེན་སྒྲོན་མ་ལས། །ལྷ་སྐུ་རྟེན་གསུམ་འབབ་ལ་སོགས། །གསེར་གཡུ་རིན་ཆེན་གནས་དང་འཁོར། །ལི་ལི་སྤྲེའུ་རི་བོང་དང་། །གཅན་གཟན་རིགས་དང་བན་བོན་རིགས། །བཙུན་པ་བུ་ཆུང་ཆོ་འཕྲུལ་སོགས། །ཆུ་དང་ཤྭ་རྦུད་ཤལ་རོང་དང་། །གནག་ཁྱུ་བྱ་དཀར་ཁྱི་ལ་སོགས། །བསམ་གྱིས་མི་ཁྱབ་པ་དམིགས་ཤིང་། །མགོ་དང་ཡན་ལག་དོང་ཀ་སོགས། །སྐམ་ཁོལ་བྱེད་ཅིང་ལྷུ་ཚིག་ན། །ལུས་སྡུག་ཡིད་ཀྱང་མི་དགའ་ཞིང་། །ཁྲོ་གཏུམ་བྱེད་ཅིང་ཚིག་པ་ཟ། །རྒྱལ་འགོང་ནད་དུ་ཤེས་པར་བྱ། །དེའི་གཅུན་ཐབས་འདི་ལྟར་བྱ། །རང་གདོན་འདྲེ་ཡི་གཙོ་བྱས་པའི། །ནམ་མཁས་ཁྱབ་ཚད་སེམས་ཅན་རྣམས། །སྔོན་འགྲོ་སྐྱབས་སེམས་ལུས་མཆོད་བྱ། །དེ་ནས་རང་ལུས་ལྷ་ཁང་གྱོ་འདབ་གསུམ་པ་གཅིག་ཏུ་བསམ། ནང་དུ་འབག་རིགས་དང་རྒྱལ་དཀོར་ཁྲ་གཅོ་གེར་ཡོད་པར་བསམ་ལ། དེའི་ནང་དུ་གསེར་ཁྲིའི་སྟེང་དུ། གཡས་སུ་རྒྱལ་པོ་གསེར་ཐུལ་ཅན། བན་ཆེན་དང་། བོན་ཆེན། སྐྱེ་བོ་ཤན་པ་གྲི་ཐོག །རྟ་གླང་པོ། ཁྱི་སྤྲེལ། ར་ཕག་བྱ་གསུམ། ཤ་མར་ཐུད་གསུམ། འབྲུ་རིགས། གསེར་བྲེ། དངུལ་བྲེ། རེ་རེ་ལ་ཡང་བརྒྱ་བརྒྱ་ཡོད་པ་བསམ། གཡོན་དུ་རྒྱལ་མོ་ལ་བསེན་མོའི་ཚོགས་ཀྱིས་བསྐོར་བར་བསམ། ཕཊ་བྱས་པས་སྒོ་འདེན་པར་བསམ། དེ་རྣམས་ནང་ནས་ཟོས། སྔོན་རྒྱབ་གཉིས་ནས་སྟག་གཉིས། གཡས་གཡོན་གཉིས་ནས་གཟིག་གཉིས། དེ་ནས་སྔུན་རྒྱབ་གཡས་གཡོན་གཉིས་ནས་ཟོས་པར་བསམ། ཕཊ་བྱས་པས་ཁོང་རྣམས་དགའ་ཡལ་ཡལ་སོང་བར་བསམ། ཕྱི་ནང་གི་ཤ་ཁྲག་ཀུན་ཟོས་ནས་མེད་པར་བསམ། དེའི་གནས་ཀྱི་ལྷ་ཁང་འདྲེ་ཅན་དུར་ཁྲོད་དེར། ཀླུ་གནས་རི་གཉན་མ་ཡིན་ཏེ། །འདི་ཡང་རྟོག་པ་ཆོད་མི་ནུས། །དེ་ཕྱིར་གཉན་ཐོག་འགྲོ་བ་གཅེས། །དེ་ལྟར་བྱས་ཀྱང་མ་ཆོད་ཅིང་། །རྒྱལ་པོའི་མགོ་བསྐོར་བྱུང་བ་ན། །ཐོད་པ་གྲི་གུག་གིས་བཅད་ནས། །གདོན་དང་ལུས་པོ་འཐས་པ་ཡང་། །རྦད་ཀྱིས་བཅད་ནས་ཐོད་པར་བླུགས། །རྨི་ལམ་གང་བྱུང་ཐོད་པར་སྦྱངས། །བྱིན་གྱིས་རླབས་ནས་སྔར་ལྟར་གསོལ། །གང་ཞིག་དམུའི་ནད་རྣམས་ན་གྱུར་ན། །ལུས་ལྗི་སྐྱུག་དང་སྨྲ་མི་གྲོལ། །གཉའ་དང་འོན་དང་འཐིབ་ལ་སོགས། །ཤེས་པ་ལྗི་ཞིང་འཐིབ་པ་དང་། །གང་ཞིག་ནད་པའི་རྨི་ལམ་དུ། །རྟ་ཕྱུགས་ལུག་ཁྱུ་ཕུག་རོན་དང་། །སྐྱ་མི་མང་དང་མུན་རུབ་དང་། །ཤེས་པ་མི་གསལ་འཐིབ་པར་འགྱུར། །དེ་འདྲ་བྱུང་ན་དམུའི་གདུབ་པའོ། །བདུད་ཀྱི་རྟགས་ཀྱང་འདི་ལྟ་སྟེ། །མགོ་ལུས་མེད་པར་ཁོལ་ཤིང་ན། །ཕ་མ་ལ་སོགས་ཉེ་དུར་སྤྲུལ་ཞིང་འོངས། །ཤེས་པ་འཕྱོ་ཞིང་གཉིད་མི་ཉན། །ནུབ་མོ་གཉིད་པའི་རྨི་ལམ་དུ། །མུན་པས་གཡོག་དང་རྟ་ནག་ཞོན། །གོས་ནག་གྱོན་དང་གཡག་ནག་གིས་བརྡུང་། །སྐྱ་མི་མང་པོས་ཁྲིད་པ་རྨིས། །དེ་འདྲ་བྱུང་ན་བདུད་ཀྱི་གདུབ་པ་ཡིན། །བཙན་གྱིས་ནད་རྣམས་འདི་ལྟར་སྟོན་ཏེ། །ལུས་པོ་ཁོར་བུར་གཟེར་བ་དང་། །སྙད་མེད་ཆུ་བུར་བྱུང་བ་དང་། །མི་དམར་སྐྱ་དམར་མང་པོ་ཡིས། །ཁྲིད་ནས་རྒྱལ་ཁམས་བསྐོར་བ་རྨིས། །དེ་ནི་བཙན་གྱི་ཆོ་འཕྲུལ་ཡིན། །དེ་གསུམ་གཅོད་ལུགས་འདི་ལྟར་བྱ། །རང་གདོན་འདྲེ་ཡིས་གཙོར་བྱས་པའི། །ནམ་མཁའ་མཐའ་ཁྱབ་སེམས་ཅན་ལ། །སྔོན་འགྲོ་སྐྱབས་སེམས་ལུས་མཆོད་བྱ། །དེ་ནས་གསུམ་སྦྱོར་འདི་ལྟ་སྟེ། །རང་གི་ལུས་ཀྱི་བདག་པོ་ནི། །ལྐུག་པར་སྨྲ་བར་མི་འགྱུར་བའི། །གྲི་ཐོག་ཤན་པ་དཔག་མེད་དང་། །གཡག་ནག་རྭ་ལ་མེ་འབར་འཕྲོས། །བརྡུང་ཞིང་ཤ་རུས་མེད་པར་བཏང་། །དེ་རྒྱབ་མི་དམར་གྲི་ཐོག་ནི། །སྣང་སྲིད་ཁེང་པ་ཙམ་བྱུང་ནས། །ཤ་རུས་ཁྱེར་ནས་དགའ་མགུར་ལྡན། །རང་སར་སུན་སུན་སོང་བར་བསམ། །རྣལ་འབྱོར་བདག་གིས་ཏིང་འཛིན་ནི། །ནད་པའི་སེམས་དང་རང་སེམས་གཉིས། །གཅིག་ཏུ་བསྲེ་ལ་མཁའ་ལ་བསྲེ། །ལུས་པོ་ལྷ་འདྲེ་མ་ལུས་ལ། །མཆོད་པར་འབུལ་བ་མན་ངག་ཡིན། །བཙན་གནས་བྲག་དང་ཆུ་གནས་སོགས། །གོང་གསུམ་མདའ་སྟོང་འདྲ་བའམ། །ཆུ་བོ་ཆེན་པོའི་འགྲམ་དུ་གཅོད། །གཞན་མ་རྒྱ་ཡ་ཆོད་མི་ནུས། །དེ་ལྟར་བྱས་ཀྱང་མ་ཆོད་ཅིང་། །བཙན་གྱི་མགོ་བསྐོར་བྱུང་བ་ན། །བེམ་རིག་མི་ཕྲལ་རིར་སྐྱུར་བྱ། །ཁོ་རང་འདོད་པ་ཚིམ་པར་བསམ། །གྲང་མང་བྱས་པས་མྱུར་དུ་སེལ། །ཀླུ་བདུད་ལ་སོགས་ཀླུ་རིགས་ཀྱི། །ནད་ཀྱིས་ཟིན་པའི་ལས་ངན་དེ། །མཚོ་དང་ཆུ་མིག་ནེའུ་སེང་ངམ། །སྦྲུལ་དང་ལྕང་མོ་ངང་དུར་དང་། །ཀླུའི་ཆོ་འཕྲུལ་བསམ་མི་ཁྱབ། །ལུས་པོ་ཟ་ཞིང་འགུལ་འཁྲིག་མང་། །ཤ་བཀྲ་བས་ལྡག་གླང་ཤུ་དང་། །ཤ་རོ་རྨའམ་སེར་ཁ་འབྱུང་། །གཉིད་མེད་སེམས་ཡང་མི་དགའ་ཞིང་། །འགྲོ་སྙིང་འདོད་ཅིང་རྟགས་མཚན་རྣམས། །རོག་ལ་གསང་ཞིང་ཡིད་མི་ཆེས། །དེ་ནི་ཀླུ་ཡི་དུག་གི་ཟིན་པའོ། །གཉན་གྱི་ཟིན་ནམ་གནོད་པ་ནི། །སྦལ་དང་ཆུ་རྟ་བ་གླང་དང་། །གཅན་གཟན་རྣམ་པ་སྣ་ཚོགས་རྨིས། །རང་གི་ལུས་ཀྱི་ཚིག་རྣམས་ཁོལ། །རོ་སྟོད་གཟེར་ཞིང་ཤེས་པ་འཕྱོ། །འཐབ་དང་འདོད་ཅིང་ཚིག་པ་ཟ། །རྨི་ལམ་ལ་སོགས་རྟགས་རྣམས་ཏེ། །བྱུང་ན་གཉན་གྱི་ཆོ་འཕྲུལ་ཡིན། །ས་བདག་གདུག་པའི་ཆོ་འཕྲུལ་ནི། །སྦལ་པ་བྱི་བ་ལུག་ལ་སོགས། །སྡོམ་སྡིག་རི་དྭགས་ལ་སོགས་རྣམས། །གཉན་དང་ས་བདག་ཆོ་འཕྲུལ་སྟེ། །ཁྱད་པར་ས་བདག་ཆོ་འཕྲུལ་ཡིན། །རྐང་ལག་རུས་པ་ཀུན་ན་ཞིང་། །ཁྱད་པར་ལུས་ལྗི་ཤེས་པ་འཐིབ། །བྱིང་བ་ལ་སོགས་ས་བདག་ནད། །དེའི་གཅོད་ཐབས་འདི་ལྟར་བྱ། །རང་གདོན་འདྲེ་ཡིས་གཙོ་བྱས་པའི། །ནམ་མཁའི་ཁྱབ་ཚད་སེམས་ཅན་ལ། །སྔོན་འགྲོ་སྐྱབས་སེམས་ལུས་མཆོད་བྱ། །རང་གི་གདོས་བཅས་ལུས་པོ་འདི། །སྦྲུལ་ནག་མགོ་དགུ་ཟེ་བ་ཅན། །གླང་དམར་མེ་སྟག་འཕྲོ་བ་གཅིག །སྦལ་པ་ཁྲ་བོ་ཆེན་པོ་གཅིག །གཞན་ཡང་སྦལ་སྦྲུལ་འབུམ་ཕྲག་གིས། །སྒྱུ་ལུས་གདོས་བཅས་ལུས་པོ་ལ། །མལ་ཀྱང་མ་བཞག་སུན་གྱིས་ཟོས། །མ་ཡེངས་རིག་པ་དྲག་ཏུ་བཅུན། །རྣལ་འབྱོར་བདག་གིས་ཏིང་འཛིན་ནི། །ནད་པའི་སེམས་དང་རང་སེམས་གཉིས། །སྤྲོས་བྲལ་ནམ་མཁའི་དཀྱིལ་དུ་བཞག །དམིགས་པས་དྲག་ཏུ་གཅུན་ཕཊ་ཀྱིས་གདབ། །རྨ་ཤུ་ལ་སོགས་གར་ན་སར། །ཆུ་ཡིས་བཀྲུས་ནས་གཉན་སར་གཏོར། །ནད་པའི་ཤ་ཁྲག་མ་ལུས་པ། །གཉན་སའི་གཞི་བདག་དེ་ལ་ནི། །གུས་པའི་ཚུལ་གྱིས་འབུལ་བར་བསྒོམ། །ཀླུ་གཉན་སའམ་མཛེ་ཅན་ནམ། །གཉན་གནས་ལྷ་ཁང་ལ་སོགས་པའི། །གཉན་སར་ཉམས་ལེན་བྱེད་པ་གཅེས། །དེ་ལྟར་བྱས་ཀྱང་མ་ཆོད་ཅིང་། །ས་བདག་མགོ་བསྐོར་བྱུང་བ་ན། །རིག་པ་ཌཱ་ཀིའི་བེམ་པོ་བཤག །ཤ་རུས་ལྤགས་པ་བརྡལ་བའི་སྟེང་། །གཏིང་ནས་འགུལ་སྐྱོད་མེད་པར་བསམ། །བདུན་ལས་མང་བ་མི་བྱའོ། །གང་ཞིག་མཛེ་ནད་གཅོད་པ་ལ། །རི་གཉན་གདུག་པར་ཕྱིན་པ་དང་། །སྔོན་འགྲོ་ལུས་མཆོད་སྦྱིན་པ་བྱ། །དེ་ནས་ནད་གཅོད་དམིགས་པ་ནི། །རང་གིས་རིག་པ་དབྱིངས་སུ་འཕངས། །ལུས་པོ་ཤ་ཁྲག་དཔག་མེད་ལ། །ཕྱི་ནས་སྦྲུལ་དང་སྦལ་བས་ཟོས། །ཞབས་ནས་ཉ་དང་ལྕང་མོས་ཟོས། །ལྷག་མ་རྗེས་མེད་སྟོང་པར་བསམ། །གཞན་ཡང་ཚ་ཚ ག་ཤ་མགུལ་ལ། །དུག་སྦྲུལ་འཇིགས་པས་ཟོས་པར་བསམ། །ཤ་རོ་སྦྲིད་བམ་གར་བྱུང་སར། །གླང་དམར་དུག་གི་ཁ་རླང་ཅན། །ཕས་ཕས་བརྡུང་ནས་ཟོས་པར་བསམ། །རྨ་དང་ཤུ་ཐོར་གར་བྱུང་སར། །ཟངས་ལྕགས་སྦྲང་བུ་འབུམ་གྱིས་འཇིབ་པར་བསམ། །བལ་ལྡག་ཤུ་བུར་གར་བྱུང་སར། །ཕོ་རོག་འབུམ་གྱིས་གཏོར་བར་བསམ། །སྣ་ཁྲག་ཆུ་རྣག་གར་བྱུང་སར། །ཁྱི་ནག་འབུམ་གྱིས་ལྡག་པར་བསམ། །ཞ་ཁུམ་རེང་བ་གར་བྱུང་སར། །མཁའ་འགྲོ་འབུམ་གྱིས་གཏུབ་པར་བསམ། །ཚ་ཚག་ཚ་བེར་གར་བྱུང་སར། །ལྕགས་སྲེག་ཕུག་པས་བསུར་བར་བསམ། །ཡང་ཡང་གནད་དུ་དྲིལ་ལ་སྒོམས། །སྟོང་ཉིད་དགོངས་པས་ཟིལ་གྱིས་མནན། །ལུས་སྦྱིན་མཆོད་པ་ལན་ཆགས་བརྔན། །གཟེར་འདེབས་དམིགས་པས་ནད་གདོན་གཅོད། །དེ་ཡང་དང་པོ་གདོན་གྱི་གནོད་པ་དེ། །མཚོ་དང་ཆུ་མིག་ལ་མི་ཁྱེར་ནས། །ཡུན་རིང་དག་ལ་སྐམ་གཅོད་བྱེད། །དེ་ནས་གཤེར་གཅོད་བྱེད། ཅེས་ཉེར་ཞི་སྒྲོན་མ་ལས་གསུངས་སོ། །ཙི་ཏི་ཛྭ་ལའི་ནད་ལས་གྲོལ་བར་ཤོག །གཟའ་བདུད་ལ་སོགས་གཟའ་བརྒྱད་དང་། །རྒྱུ་སྐར་ཉི་ཤུ་རྩ་བརྒྱད་དང་། །ཀླུ་གཉན་སྡེ་བརྒྱད་ཀུན་སྡང་བས། །དེ་ལ་དྲོད་ཚད་འདི་ལྟར་འབྱུང་། །ཐོག་དང་མདའ་རྡོ་རལ་གྲི་སོགས། །འདབ་ཆགས་རིགས་དང་སྐར་མདའ་དང་། །ཀ་བ་བུ་ཡུག་འཚུབ་ལ་སོགས། །རང་ཉིད་གཡོག་གམ་ཁྱེར་བ་ལ། །སེར་བ་འབབ་དང་སྤྲིན་གཏིབ་པ་དང་། །སྤྱང་ཀི་རྨི་དང་འོད་ལ་སོགས། །ཐིབ་པའི་རྟགས་ནི་འདི་ལྟ་སྟེ། །ཁ་ཡོ་མིག་སླེ་མེ་རིས་དང་། །ཆུ་བུར་ལ་སོགས་ཞ་དང་རེངས། །གཏམ་འཆལ་ཁ་ཆུ་མིག་ཆུ་འཛག །རྒྱལ་དང་སྐྱུག་ལ་སོགས་པ་རྣམས། །བཟའ་བདུད་གདུག་པས་ཟིན་པའི་རྟགས། །དེའི་བཅོས་ཐབས་འདི་ལྟར་བྱ། །རང་གདོན་འདྲེ་ཡིས་གཙོས་བྱས་པའི། །ནམ་མཁའ་ཁྱབ་ཚད་སེམས་ཅན་ལ། །སྔོན་འགྲོ་སྐྱབས་སེམས་ལུས་སྦྱིན་བྱ། །རང་གི་སྒྱུ་ལུས་ཕུང་པོ་ལ། །གཟའ་བདུད་འཇིགས་པའི་མགོ་དགུ་དང་། །ཉི་མ་ལ་སོགས་གཟའ་བརྒྱད་དང་། །རྒྱུ་སྐར་ཉི་ཤུ་རྩ་བརྒྱད་དང་། །གདོང་མོ་བཞི་ལ་སོགས་པ་ཡིས། །སྡོང་ཡའི་ལྷ་སྲིན་སྡེ་བརྒྱད་ལ། །ཤིན་ཏུ་ཡིད་མཛེས་སྐྱེས་བུ་ཡིས། །ཕུང་པོ་གདུང་ནས་ཡང་ཡང་འབུལ། །བར་བར་སྤྲོས་བྲལ་ངང་ལ་བཞག །རྣལ་འབྱོར་གཅོད་མཁན་ཏིང་འཛིན་གྱིས། །ནད་པའི་སེམས་དང་རང་སེམས་གཉིས། །གཅིག་ཏུ་བསྲེ་ལ་ནམ་མཁར་འཕང་། །ནད་པའི་སྒྱུ་ལུས་ཕུང་པོ་ནི། །གཟའ་བདུད་ལ་སོགས་ལྷ་འདྲེ་ཡིས། །མ་བཞག་ཟོས་ཁྱེར་ལྷག་མ་མེད་པར་དམིགས། །གཞན་ཡང་ལྷ་འདྲེ་མ་ལུས་པའི། །ཟོས་ཞིང་རང་སར་བུན་སོང་ནས། །དགའ་ཡལ་འདོད་པ་འགྲུབ་པར་བསམ། །ཀླུ་གཉན་ལྷ་ཁང་དུར་ཁྲོད་མཛེ་ཅན་རྣམས་སུ་གཅོད་པའོ། །ཨེ་ཀ་ཙ་ཏི་ལ་སོགས་པ། །མ་མོ་མཁའ་འགྲོ་ཤ་ཟ་དང་། །བསེན་མོ་ཐེལ་རང་གྲོང་རྒྱུག་གིས། །ལྟས་དང་ཆོ་འཕྲུལ་འདི་ལྟ་སྟེ། །མོ་རིགས་མཛོའམ་དྲེལ་ལ་ཞོན། །སྦྲ་ནག་ཕུབ་ཞིང་ཤ་ཁྲག་གཅོད། །བདག་ལ་བརྩེ་ཞིང་ཤ་ཁྲག་སྟོབས། །གཞན་ཡང་བུད་མེད་མང་འདུས་སྟེ། །མི་སྡུག་ཆོ་འཕྲུལ་ཆགས་པ་སྤྱོད། །རྨིས་པ་མ་མོའི་ཆོ་འཕྲུལ་ཡིན། །རང་ཉིད་སྐྱུག་དང་ཁྲག་རྣག་འཛག །ཁྲག་བཤལ་ཁྲག་ནི་སྐྱུག་དང་རིམས། །སྒོ་ཡི་ནོར་ལ་གོད་ཡམ་འོང་། །དེ་རྣམས་མ་མོའི་ཆོ་འཕྲུལ་ཡིན། །མ་མོ་མཚོ་སྨན་ལ་སོགས་དང་། །དམ་སྲི་བསེན་མོའི་ཚོགས་རྣམས་ཀྱིས། །གདུག་རྩུབ་ཉོན་མོངས་གཅོད་པ་ནི། །རང་གདོན་འདྲེ་ཡི་གཙོར་བྱས་པའི། །མཁའ་མཉམ་སེམས་ཅན་ཐམས་ཅད་ལ། །སྔོན་འགྲོ་སྐྱབས་སེམས་ལུས་མཆོད་བྱ། །འཁྲུལ་པའི་བདག་བཟུང་ཕུང་པོ་འདི། །ཨེ་ཀ་ཙ་ཏི་ལ་སོགས་པའི། །མ་མོ་མཁའ་འགྲོ་སྨན་བཙུན་དང་། །གནོད་བྱེད་སྲིན་པོ་བདུད་མོ་དང་། །དམ་སྲི་སྲིན་མོ་ཕུང་འདྲེ་མོ། །མ་ལུས་ཐམས་ཅད་འདུས་པ་ལ། །ཤ་ཁྲག་དམར་གྱིས་ཚིམ་བྱས་ནས། །རང་དགའ་ཀུན་ཀྱང་གནས་སུ་གཤེགས། །ནད་པ་ལ་དམིགས་པ་ཡང་ཡང་བྱ། །སློབ་དཔོན་རྣལ་འབྱོར་ཏིང་འཛིན་གྱིས། །ནད་པའི་སེམས་དང་རང་སེམས་གཉིས། །གཅིག་ཏུ་བསྲེ་ལ་མཁའ་ལ་འཕངས། །སྣང་སྲིད་ལྷ་འདྲེ་མ་ལུས་དང་། །གཅན་སྤྱང་སྟག་གཟིག་དོམ་དྲེད་དང་། །གནས་པའི་ལྷ་འདྲེ་ལ་སོགས་ཀྱིས། །དགྱེས་ནས་སོ་སོར་སོང་བ་ནི། །རང་དང་ནད་པ་གཉིས་ཀས་དམིགས། །མ་མོ་མཁའ་འགྲོ་འདུས་པ་ནི། །མཚོའམ་དུར་ཁྲོད་དག་ལ་གནས། །དབེན་གནས་སྙིང་པ་ལ་སོགས་པ། །ཁྱད་པར་མི་གཙང་མཛེ་ཡུག་དང་། །དམེ་པོ་སྡིག་ཅན་དམ་མེད་ལ། །འདི་ཡི་གཅོད་གནས་ཆོད་མི་འགྱུར། །ཅེས་སོ། །ཐོག་གི་རྟགས་ནི། མགར་གྱི་ཚྭ་ཚྭ་འཕྲོ་བ་དང་། མགར་བྱས་པ་དང་། ལྕགས་སྲེག་པ་དང་། སྦྲང་བུའི་སྐད་ལྟར་གཟིར་སྒྲ་གྲགས་པ་དང་། ཙིར་སྒྲ་རྣ་བར་གྲགས་ན་ད་ལྟ་ཉིད་དུ་འོངས། དེ་ལ་ཐོག་སྲུང་བཟློག་གཅོད་གསུམ་གྱི་ཤན་འགྱེད་ནི། དང་པོ་བསྲུང་འཁོར་ལ། ཕཊ་གཉིས་བྱས་པ་ཙམ་གྱིས། གཅིག་གིས་རང་ཉིད་རྗེ་བཙུན་མ་སྐུ་མདོག་དམར་མོ། རང་འདྲ་བའི་མཁའ་འགྲོ་མ་བཞིས་བསྐོར་ཏེ། དབུ་ལ་རྡོ་རྗེ་རྩ་ལྔ་པ། ལྔ་ལྔ་རེའི་ནང་དུ་རིགས་ལྔ་བསྐྱེད་ལ། སྟེང་གི་ནམ་མཁའ་ལ་ཤཱཀྱ་ཐུབ་པ་ལ་བསྐལ་བཟང་གི་སངས་རྒྱས་སྟོང་རྩ་གཉིས་ཀྱིས་བསྐོར་ནས་བཞུགས་པར་སྒོམས། ཕཊ་གཅིག་གིས་རང་གི་ཐུགས་ཀར་གསེར་གྱི་གའུ་ཁ་སྦྱོར་གྱི་ནང་དུ། སྲུང་བྱ་འཁོར་ཁལ་རྟ་དང་བཅས་པ་ཚུད་པའི་སྟེང་དུ། མེའི་འཁོར་ལོ་རྩིབས་སྟོང་དང་ལྡན་པ་གཡོན་དུ་འཁོར་བ་ལས། ཡེ་ཤེས་ཀྱི་མེ་ཆེན་པོ་འབར་བས། ཐོག་བདག་ཐོག་དང་ཐོག་བྱེད། སྤྲིན་འབྲུག་དང་བཅས་པ་ཧྲག་གིས་སྲེག་པར་བསམ། ཡང་ན་མཐའི་ལྕགས་རིའི་རྒྱབ་ཏུ་དེད་ནས་སོང་བར་བསྒོམ། དེ་ནི་ཐོག་སྲུང་གི་ཤན་འབྱེད་དོ། །གཉིས་པ་བཟློག་པའི་ཤན་འབྱེད་ནི། རང་གི་རིགས་པའི་ངོ་བོ་དེ། །གསེར་གྱི་རྡོ་རྗེ་རྩེ་དགུ་པ། །ཕཊ་ཀྱིས་ནམ་མཁའི་དབྱིངས་སུ་འཕང་། །ཐོག་བདག་ཐོག་དང་ཐོག་བྱེད་རྣམས། །ཕར་རྫུར་ཚུར་རྫུར་དྲྭ་བར་བཏང་། །རྡོ་རྗེའི་འོད་ལ་མ་ལུས་ཐིམ། །རྗེ་བཙུན་དམར་མོར་གྱུར་པར་བསམ། །ངག་ཏུ་ཕཊ་གཅིག་བརྗོད་པ་ཙམ་གྱིས་ཡལ་ནས་སྟོང་པའི་ངང་ལ་བཞག །དེ་ནི་བཟློག་པའི་ཤན་འབྱེད་དོ། །ད་ནི་ཐོག་གཅོད་ངོ་བོ་ནི། ཐུགས་ཀར་གསེར་གྱི་རྡོ་རྗེ་ནི། །རྩེ་དགུ་ཕཊ་ཀྱི་མཁའ་ལ་འཕང་། །ཐོག་བདག་ཐོག་དང་ཐོག་བྱེད་རྣམས། །རྡོ་རྗེའི་འོད་ལ་ཐིམ་པར་བསམ། །ངག་ཏུ་ཕཊ། རྡིག་ཆོམ་བྱེད་ཅིང་མར་བྱུང་ནས། །རང་དང་ནད་གདོན་ལ་སོགས་པ། །ཤ་ཁྲག་བཅས་པ་གཉན་སལ་བརྡལ། །སྣང་སྲིད་ལྷ་འདྲེ་བསྟོད་པར་བསམ། །མ་ཞི་བར་དུ་ཕཊ་ལ་གྲངས་མེད་བརྗོད་པ་མན་ངག་ཡིན། །རྗེས་སུ་ཕཊ་ཀྱིས་སྐྱེ་མེད་སྒོམ། །དེས་ཐོག་གི་སྲུང་བཟློག་གཅོད་གསུམ་གྱི་ཤན་འབྱེད་སོང་། ཡང་ན་ཐོག་གི་དམིགས་པ་ནི། མ་ཅིག་གཟེར་བུའི་གདམ་པ་ལས། ཐོག་ཉིད་སྐད་ཅིག་དྲན་རྫོགས་ཀྱིས། །གནམ་ལྕགས་ཐོ་ལུམ་འབར་བ་ཡིས། །རང་དང་གཉན་སར་ལྷན་དུ་གདལ། །སྟོང་པ་ཉིད་ལ་མ་བཅོས་བཞག །དཀར་སྦྱོར་ལས་ཐོག་སེར་སྦྲག་མའི་དམིགས་པ་ནི། །འོག་ཏུ་ཉི་མ་སྟེང་ཟླ་བ། །ཉི་ཟླ་གའུ་ཁ་སྦྱོར་ནང་། །རང་དང་ཡུལ་ཞིང་འཁོར་བཅས་རྣམས། །ལྷ་འདྲེ་དང་བཅས་གང་བར་དམིགས། །ཟླ་བའི་སྟེང་དུ་མ་གཅིག་དང་། །ཡི་དམ་སངས་རྒྱས་མཁའ་འགྲོའི་ཚོགས། །སྤྲིན་ལྟར་གཏིབ་ལ་ཤེས་པ་གཏད། །དཀར་ཚོགས་དམིགས་པ་གོང་དང་འདྲ། །གློག་འབྲུག་ཐོག་འོག་སྟོང་པར་བསམ། །དེས་ནི་འོང་བར་མི་སྲིད་དོ། །ཡང་མ་ཅིག་གི་དམིགས་པ་ཕྲན་ཚིག་ལས། སེར་བ་ལ་རང་ཡུམ་ཆེན་མོ། རྩི་ཤིང་ནགས་ཚལ་ཐམས་ཅད་རྗེ་བཙུན་མ་ལ་མེ་རི་མེ་དཔུང་འབར་བས་གང་ནས། སེར་བདག་ཐམས་ཅད་བསྲེག་པར་བསམ། སྙེ་མ་དང་ཡུང་མ་ཐམས་ཅད་ལབ་སྒྲོན་དཀར་དམར་ནག་པོ་གསུམ་སྒོམ་སྟེ། ཕཊ་རྐང་དུང་ལ་སོགས་འབུད་ནས་བཤད་པ་དྲག་པོ་བཏོན་ཕཊ་བྱའོ། །གཅོད་སྒར་པ་བྱིན་པོའི་ཚར་ཚད་རྫོགས་ལ། རེ་རེ་ལ་ཚར་ཚད་མ་བྱུང་ནས་ཆག་ན། གཞི་བདག་བཀུག་ལ་རང་དང་ལྷན་ཅིག་ཏུ་སྦྲུལ་ནག་གིས་དཀྲིས། ཕོ་བྲང་ཕཊ་སྒྲས་གདབས་མགོ་བཏུམ། གོས་ཀྱི་ཐ་མ་རྡོས་མནན་ལ་ཉལ། ངག་ཏུ་མི་རྣམས་ལ་ཚར་ཚད་བྱུང་ནས་ཐལ། ཁྱེད་རང་རེ་གཉིས་འཁོར་བ་མ་སྟོང་གི་བར་དུ་ལྷན་ཅིག་སྡོད་པ་ཡིན་བྱ། ཡིད་ལ་ཡང་བསམ། དེས་ཚར་ཚད་འོང་བ་ཡིན། དེས་གདོན་གཅོད་སོང་། གསུམ་པ་ལོག་གནོན་གཟེར་བུའི་གདམས་པ་ནི། གཉན་སར་གློ་བུར་ན་བའམ། ལུས་ལ་རྨ་དང་ཆགས་གྲུག་བྱུང་ཞིང་། སྔར་གྱི་ནད་ལྡོག་ན། ལོག་པའི་རྟགས་ཡིན་པས། ནད་པའི་སྔུན་དུ་མེ་ཆེན་པོ་བྱས་ལ། ཁྱི་ལུད་མི་ལུད་མཛེ་གོས་དོར་རྟ་ལ་སོགས་པའི་རྫས་ངན་བསྲེག་ལ། ནད་པའི་ཁྲུས་ཆུ་བླུགས་ནས་ཐབས་བསུར་ཆེན་པོ་བྱ། ནད་པའམ་རོག་གི་འོ་དོད་འབོད་ཅིང་འདི་ཤི་ན་རོ་འདིར་སྲེག །ནང་རོལ་འདིར་མནར། སྣང་སྲིད་ལྷ་འདྲེ་རྣམས་ཉོན་ཅིག་འདིར་འདུས། འདིའི་ཤ་ཁྱེར་ཁྲག་འཐུང་། མགོ་ཆོད། སྙིང་ཕྱུང་། ཅེས་བརྗོད། སེམས་ནམ་མཁའ་ལ་འཕང་། ལུས་དེ་མེ་ལ་སྲེག་ནས་ཐལ་བ་བུན་གྱིས་སོང་བར་བསམ། ནུབ་མོ་ཉལ་བའི་དུས་སུ། གཉན་ས་གོ་ཟློག་བྱ་བ་ཡིན་པས། གོས་མགོ་བཞུག་བསྒྱུར་ནས་གྱོན། མགོ་ཕྱིར་རྗེས་སུ་བསྟན་ལ་ཉལ་ལོ། །དེ་ནི་ཁྲུས་འདོན་ཁྲ་བོ་ཡིན་ནོ། །ནད་པའི་ཁྲག་གཏར་ལ་མེ་ནང་དུ་བླུག་ཅིང་། བྱེད་ལས་གོང་ལྟར་བྱེད་པ་ནི་ཁྲུས་འདོན་ནག་པོའོ། །ནད་པའི་ཁྲུས་ཆུ་རི་བྲག་ཐམས་ཅད་ལ་གཏོར་ཞིང་གོང་ལྟར་བྱེད་པ་ནི། ཁྲུས་འདོན་དཀར་པོའོ། །གཉན་སར་ཡུན་རིང་བསྡད་ཀྱང་ཆོ་འཕྲུལ་མ་བྱུང་ན། གསོལ་བ་དྲག་ཏུ་འདེབས་པ་དང་། ཁྲོ་བོའི་དྲག་སྔགས་བཟླ་རི་བསྙིལ། རྦབ་བསྒྲིལ། མཚོ་དཀྲུག །མཚོ་དཀྲུག་པའི་དམིགས་པ་ནི། མ་ཅིག་གིས་ཕྱག་ན་གསེར་གྱིས་རྡོ་རྗེ་རྩེ་ལྔ་པ་བསྣམས་ནས། ཀླུའི་གནས་ཁང་ཐམས་ཅད་དཀྲུག་པར་བསམ་མོ། །ཤིང་བཅད་དེའི་དམིགས་པ་ནི། མ་ཅིག་གིས་ཕྱག་ནས་གསེར་གྱིས་ཟོར་བ་བསྣམ་ནས་དེར་གནས་པའི་བ་སྤུ་དང་། ཅོ་དོ་བྲེད་པར་བསམ་མོ། །ན་བ་བརྐོ་དེའི་དམིགས་པ་ནི། མ་ཅིག་གིས་ཕྱག་ན་གནམ་ལྕགས་ཀྱིས་འཇོར་བསྣམ་ནས། ཁོའི་ཡུལ་ཁམས་མིང་ནས་བཤིགས་པར་བསམ། བྲག་བརྡུང་པ་ལ་སོགས་པ་བྱེད། དེའི་དམིགས་པ་ནི། མ་ཅིག་གིས་ཕྱག་ནས་གནམ་ལྕགས་ཀྱིས་རྡོ་རྗེ་བསྣམས་ནས། ཁོའི་གནས་ཁང་ལ་རྒྱབ་ནས་ཤིག་ཤིག་བྱེད་པར་བསམ། དེ་ནི་ཕྱི་ཡི་མཐའ་གཏོད་དོ། །ཕྱིའི་མཐའ་གཏད་དེ་རྣམས་ནི། བཤན་པ་ལག་དམར་དང་འདྲ་བས་མི་བྱེད་པ་གལ་ཆེ། དེ་ན་གང་བྱེད་ན་གསང་བའི་མཐའ་གཏད་བྱེད་པ་ཡིན་ཏེ། བྲག་དང་ཕ་འོང་མ་སློང་ན། ངག་ཏུ་ཕཊ་གཅིག་བརྗོད་པ་ཡིས། རིག་པ་གསེར་གྱི་རྡོ་རྗེ་རྒྱ་གྲམ་གྱིས། བྲག་རི་རྨིང་ནས་བཤིག་པར་བསམ། ངག་ཏུ་ཕཊ་གཅིག་བརྗོད་པ་ཙམ་གྱིས། གནས་པའི་ལྷ་འདྲེ་ཐམས་ཅད་ཀུན། རང་དབང་མེད་པར་ཞབས་སུ་བཙུད། །བཀའ་ཉན་གསུང་སྡོད་བྱེད་པར་བསམ། །ཕཊ་དེ་གཉིས་ལ་བརྒྱ་རེ་བརྗོད། །སྙིང་རྗེ་ལུས་སྦྱིན་ཀུན་ལ་འགྲེས། །རི་བོ་ཆེ་དང་ལ་བཙས་མ་སློང་ན། །ངག་ཏུ་ཕཊ་བརྗོད་པ་ཙམ་གྱིས། །སེངྒེ་སྟོབས་ལྡན་འགྱིང་བ་ཡིས། །རི་རྒྱལ་རྨིང་ནས་བཤིག་པར་སྒོམ། །ངག་ཏུ་ཕཊ་གཅིག་བརྗོད་པ་ཙམ་གྱིས། །གནས་པའི་ལྷ་འདྲེ་གོང་ལྟར་རོ། །མཚོ་དང་ན་འཁོར་ཆེན་པོ་མ་སློང་ན། །ཁྲོས་པའི་བྱ་ཁྱུང་དཔག་མེད་ཀྱིས། །གཤོག་པ་སྡེར་མོ་མེ་རུ་འབར། །མཚོ་ལ་ཧུབ་བཏང་དྲངས་བར་སྒོམ། །ངག་ཏུ་ཕཊ་གཅིག་བརྗོད་པ་ཙམ་གྱིས། །གནས་པའི་ཀླུ་སྲིན་གོང་ལྟར་རོ། །ཤིང་གཅིག་གཉན་པོ་མ་སློང་ན། །ངག་ཏུ་ཕཊ། རིག་པ་རྒྱ་སྟྭ་ངར་མས་ནི། །ཤིང་ཕུང་རྩད་ནས་བཅད་པར་བསམ། །ངག་ཏུ་ཕག་གཅིག་བརྗོད་པ་ཙམ་གྱིས། །གནས་པའི་ལྷ་འདྲེ་གོང་ལྟར་རོ། །ཤིང་ནགས་འཐུག་པོ་མ་སློང་ན། །ངག་ཏུ་ཕཊ་གཅིག་བརྗོད་པ་ཙམ་གྱིས། །རིག་པ་རལ་གྲི་ངར་ལྡན་གྱིས། །འཕྲ་བཅད་སྦོམ་བཅད་བྱེད་པར་བསམ། །ངག་ཏུ་ཕཊ་གཅིག་བརྗོད་པ་ཙམ་གྱིས། །གནས་པའི་ལྷ་འདྲེ་གང་ལྟར་རོ། །ཆུ་མིག་མ་སློང་མཐའ་གཏད་ནི། །ངག་ཏུ་ཕཊ་གཅིག་གིས། །རིག་པ་རྗེ་བཙུན་དམར་མོ་ཡིས། །ཆུ་མིག་དཀྲུག་ནས་ཧུབ་ཀྱིས་བཏབ། །ཡུལ་མི་གཅིག་པར་འཕོས་ནས་ནི། །ཤུལ་དུ་གྲམ་པ་སྐམ་པོར་བསམ། །ངག་ཏུ་ཕཊ་གཅིག༴ གནས་པའི་ཀླུ་སྲིན་གོང་ལྟར་རོ། །ས་ཕུག་བྲག་ཕུག་མ་སློང་ན། །ངག་ཏུ་ཕཊ། རིག་པ་ཐོ་ལུམ་འབར་བ་ཡིས། །རྨིང་ནས་བཤིག་ཏེ་བརླག་པར་བསམ། །ངག་ཏུ་ཕཊ༴ གནས་པའི་ལྷ་འདྲེ་གོང་ལྟར་རོ། །ལམ་སྲང་རྒྱ་གྲམ་བྲག་སྲང་དང་། །གོང་བུ་མདའ་སྟོང་འདྲ་བ་རྣམས། །མ་སློང་མཐའ་གཏད་བྱེད་པ་ནི། །ངག་ཏུ་ཕཊ༴ རིག་པ་རྡོ་རྗེའི་བྲག་རིར་གྱུར། །བྲག་གསང་རྒྱུ་ལམ་བཅད་པར་བསམ། །ངག་ཏུ་ཕཊ༴ རྒྱུག་པའི་ལྷ་འདྲེ་གོང་ལྟར་རོ། །ལུང་པ་སུམ་མདོ་མ་སློང་ན། །ངག་ཏུ་ཕཊ༴ རིག་པ་ཁྲོ་བོ་སྟོབས་ཆེན་གྱུར། །རྫུ་འཕྲུལ་སྤྲུལ་པ་དཔག་མེད་ཀྱིས། །རི་རྒྱལ་རྩེ་མོ་མན་ཆད་དང་། །གནམ་ས་རི་བྲག་ཡན་ཆད་ཀྱིས། །ལྷ་འདྲེ་འགྲོ་དབང་མེད་པར་བསམ། །ངག་ཏུ་ཕཊ༴ ལྷ་སྲིན་སྡེ་བརྒྱད་གོང་ལྟར་རོ། །ལྷ་ཁང་མཆོད་རྟེན་ཁང་རལ་མ་སློང་ན། །གནམ་ལྕགས་རྡོ་རྗེ་རྩེ་དགུ་ཡིས། །ཁྲོལ་གྱིས་བཤིག་ནས་དཔུང་གིས་བཏང་། །གནས་པའི་ལྷ་འདྲེ་གོང་ལྟར་རོ། །དུར་ཁྲོད་ཚོང་འདུས་མ་སློང་ན། །ངག་ཏུ་ཕཊ་གཅིག༴ རིག་པ་རྡོ་རྗེ་རྩེ་དགུ་ཡིས། །ཕར་རྫུར་ཚུར་རྫུར་བྱེད་པར་བསམ། །ངག་ཏུ་ཕཊ༴ གནས་པའི་ལྷ་འདྲེ་གོང་ལྟར་རོ། །སྒོང་རྒྱུད་རི་སུལ་ཟམ་པ་མ་སློང་ན། རང་ཉིད་གླང་པོ་ཆེ་གཟི་བརྗིད་དང་ལྡན་པས། གཞོག་གཡས་ཀྱི་ཉིན་མོ། གཡོན་གྱི་སྲིབ་མོ། མགོའི་རི་རབ་རྩེ། འཇུག་མས་ལུང་མདོ་ཁེབ་པར་བསམ། ཐང་ཆེན་སྒང་ལེབ་མ་སློང་ན། གསེར་གྱི་མཆོད་རྟེན་ཆེན་པོ་གཅིག་གིས་ཁེབ་པར་བསྒོམ། རི་རྒྱུད་མ་སློང་མ་ཐུལ་ན། རིགས་ལྔ་འདོམ་བསྐོར་དམིགས་པ་ནི། དབུས་སུ་རྣམ་སྣང་རིགས་བཞི་ཕྱོགས་བཞི། སྐུ་སྨད་གནམ་ལྕགས་ཕུར་པ་ཡིས། །རིའི་ཁུག་པར་ཟུག་པར་བསམ། །རིགས་ལྔ་གཡས་བསྐོར་བྲོ་འཁྲབ་པས། །འདམ་ལ་ཕུར་པས་བསྐོར་བ་ལྟར། །གནས་པའི་ལྷ་འདྲེ་ཐམས་ཅད་ཀུན། །བཀའ་ཉན་གསུང་སྡོད་བྱེད་པར་བསམ། །གཉན་ས་གཉན་ཆེན་མ་སློང་ན། །རང་ཉིད་ལྕགས་ཀྱི་སྡིག་པ་མགོ་དགུ་པ། །སྤྱན་ནས་ཚྭ་ཚྭ་མེ་སྟག་འཕྲོ་བ། ཁ་ནས་མེ་འབར་བ། ཤང་ནས་དུད་པ་འཐུལ་བ། ལག་པ་བཅོ་བརྒྱད་གཡས་གཡོན་གདེང་པ། གཉན་ས་དེར་གནས་པའི་ལྷ་འདྲེ་རྣམས་དང་། ས་རྡོ་ཕར་འཕེན་ཚུར་འཕེན་བྱས་ནས། རི་བྲག་རྩི་ཤིང་ལ་གནས་པའི་ལྷ་འདྲེ་ཐམས་ཅད་ཕར་དཀྲུག་ཚུར་དཀྲུག་བྱས་པར་བསམ། ཁས་བླངས་དམ་བཅས་བཀའ་ཉན་གསུང་སྡོད་བྱས་པར་བསམ། དེས་མ་སློང་ན་ནང་གི་མཐའ་གཏད་བྱས་པ་ནི། ཕཊ་བྱས་པ་ཙམ་གྱིས། ཕཊ་གཅིག་གིས་ཁྲ་ཐེར་དེ་ལབ་སྒྲོན་མཐིང་ནག་གཅིག་ཏུ་བསྐྱེད་ལ། གཅིག་གི་ཆོན་ཐག་དེ་ལྕགས་ཀྱི་དྲྭ་བར་བསྐྱེད། གཅིག་གིས་ཆོན་ཕུར་བཞི་དེ་རྗེ་བཙུན་མ་མེ་འབར་བ་བཞི་བསྐྱེད། གཅིག་གིས་རྔ་སྒེ་རྣམས་རྗེ་བཙུན་མར་བསྐྱེདནས། ཁྲོ་བོའི་སྔགས་བརྗོད་པ་ཙམ་གྱིས། རང་ཉིད་ཁྲོ་བོ་འཇིགས་སུ་རུང་བ་གཅིག་ཏུ་བསྒོམ་པའི་ཐུགས་ཀ་ནས་ཁྲོ་ཆུང་ཞིང་ལྤགས་འཛིན་པ་རང་འདྲ་བ་གྲངས་མེད་པ་འཕྲོས་པས་ས་གཞི་སིང་གི་གང་བར་བསྒོམ་ལ། གཅེར་བུ་ལངས་ཏེ། གོས་ནང་མ་ནི་མགོ་མཇུག་བསྒྱུར་ཏེ་ས་ལ་བརྡབ་པ་དང་སྤྲད་ལ། ཕཊ་བརྗོད་ཅིང་ཁྲ་ཐེར་ལ་གཡོན་བསྐོར་བདུན་རེ་བྱེད་པ་ཡིན། དེའི་དམིགས་པ་ནི། ཁྲོ་བོ་ཀུན་གྱིས་གནས་གདན་གྱི་མགོར་ཞིང་ལྤགས་བརྡབ་པ་ཙམ་གྱིས། ས་གཞི་དང་བཅས་པ་འདར་ཆུམ་ཆུམ་བྱེད་སྟེ། གནས་གདོན་ཀུན་གྱིས་ཕྱག་རྒྱ་བཅའ་ཞིང་། བཀའ་ཉན་གསུང་སྡོད་བྱེད་པར་བསམ། དེ་ནི་ནང་གི་མཐའ་གཏད་དོ། །ཡང་ན་མཐའ་གཏད་དམིགས་པ་ནི། རིག་པ་ཕུད་ནས་ཌཱ་ཱཀིར་བསྐྱེད། ཕཊ་བརྗོད་ཌཱ་ཱཀིའི་ཐུགས་ཀ་ནས། མཁའ་འགྲོ་དམར་མོ་ཐོ་བ་ཅན། ལྕགས་ཀྱུ་འཛིན་པ་གྲངས་མེད་སྤྲོས། སྡེ་བརྒྱད་མ་ལུས་བཀུག་ནས་བཅོམ་སྒོ་དགུ་གདངས་པའི་ནང་བཙུད་ནས། སྒོ་དགུ་རྃ་དང་མེ་ཡིས་བཅད། །ལུས་དང་དབྱེར་མེད་འདྲེས་པར་བསམ། །རྩ་རྣམས་རཾ་གྱིས་ཕྲེང་བ་བྱ། །བོལ་གོང་གཉིས་ལ་རཾ་གཉིས་བྱ། །རཾ་ཡཾ་བརྗོད་པས་ཌཱ་ཀི་ཡིས། །ཐུགས་ཀ་ནས་ཀྱང་ཡཾ་རཾ་འཕྲོས། །ཡྃ་དང་རྃ་ལ་ཐིམ་པ་ཡིས། །མེ་རླུང་སྦྱོར་བས་ཐལ་བར་བཏང་། །ཐུན་རྟིང་ཌཱ་ཀིའི་ཐུགས་ཀ་ནས། །ཡཾ་བྱུང་རླུང་གིས་གཏོར་ནས་སུ། །བྃ་བྱུང་ཆུས་བཀྲུས་སྐྱེ་མེད་བསྒོམ། །སྲོག་ལ་ཐུག་ན་མིན་པ་མི་བྱའོ། །མཐའ་གཏད་བྱེད་པའི་ལག་ལེན་ནི། །དང་པོ་གསང་བའི་མཐའ་གཏད་བྱེད། །དེས་མ་ཉན་ན་ནང་གི་མཐའ་གཏད་བྱེད། །དེས་མ་ཉན་ན་ཕྱི་ཡི་མཐའ་གཏད་བྱེད་དོ། །ཡང་ན་མཐའ་གཏད་འབྱུང་བཞིའི་གཟེར་ནི། མཐའ་གཏད་མེའི་གཟེར་བུ་ལ་དམིགས་པ་འདི་ལྟར་བྱ། སུར་ནག་སྤེན་མ་ལ་སོགས་པའི་ཤིང་གང་ཡིན་ལ། མེ་ཐོ་དགུ་བཅིང་། དེ་ནས་བསྲེག་གཞི་ས་སྟེག་སྟེང་རྡུལ་ཚོན་ནམ་སོལ་བས་གྲུ་གསུམ་དབུས་སུ་ཡི་གེ་ཧཱུྃ་བྲིས། དེ་སྟེང་ཤིང་སྣ་ཚོགས་གྲུ་གསུམ་བརྩེགས། བརྩིག་མར་དང་འབྲུའི་ཕྱེ་མ་བསྲེས་ལ་ལུས་བཀྲུ་བའི་ཆུ་དང་རྩའི་ཆུས་སྦྲུས་ལ། ལུས་ལ་དྲུག་ཡག་བྱེད་ལ་རོ་འདྲ་བ་གཅིག་བྱེད་ལ་གོས་ཀྱིས་གཏུམ་ལ་བཞག །ཁྲུས་ཆུས་ལན་ཆགས་བརྒྱ་དང་རྩ་བརྒྱད། ཤ་དུམ་བུ་བརྒྱ་དང་རྩ་བརྒྱད། སྐྲ་སེན་དྲི་མ་རྣམས་ཀྱང་བླུགས། སྐྲ་སེན་རྣམས་མགོ་རྐང་ལག་སོ་སོར་བཙུག །དེ་ནས་གཞིའི་སྟེང་དུ་རྩི་ཤིང་སྣ་ཚོགས་བརྩིགས། དྲི་ཆུ་མཐའ་གཏད་མགོ་ལྟར་བྱ་སྟེ། རང་ཁྲོས་མར་བསྐྱེད། ནད་པའི་རྣམ་ཤེས་སྤར། འགུགས་བཞུགས་བྱས། བེམ་པོ་དང་དབྱེར་མེད་ལིངྒ་ངར་མི་ཆང་བུ་ཤ་དུམ་འདི་ལ་སོགས་མེ་སྤར་མེ་དེ་ཉིད་སྡིག་པ་ནག་པོ་ངོ་བོ་ཁྲོས་མ་བསྒོམ་ཁ་གདངས་པས། ཡ་འགལ་གནམ། མ་འགལ་ས་ཁ་ནས་མེ་དམར་པོ་ལྷབ་ལྷབ་འབར་བ། ལུས་གཉེར་མས་གང་བའི་གསེབ་ན། མེའི་ཚྭ་ཚྭ་འཕྲོ་བ་གཅིག་ཏུ་བསམ། ༀ། གྲུ་གསུམ༴ སྡིག་བསྐུལ་འདོན། དེ་ནས་ངར་མི་དེ་ལག་ཏུ་བཟུང་ལ། རང་ཉིད་རྗེ་བཙུན་ཁྲོས་མ་ནག་མོར་བསྒོམ་ལ། ནད་པ་དེའི་ལུས་ལ་གནོད་པའི་རྒྱལ་བསེན་ཀླུ་ལ་སོགས་པ་ཕོ་གདོན་རྒྱལ་འགོང་དམ་སྲི། མོ་གདོན་འདྲེ་མོ་བསེན་མོ། ཀླུ་གདོན་ཐེའུ་རང་འབྱུང་པོ། ནད་འདྲེ་ཅོང་སྲི། ལུས་གདོན་རྒྱབ་བརྟེན་དང་བཅས་པ། ནད་ནད་བདག་དང་བཅས་པ་གདོན་སྣ་འདྲེན་དང་བཅས་པ་གནམ་ལྕགས་སྡིག་གི་རྒོད་འབར་བའི་ཞལ་དུ་བཏབ་བོ་བཞེས་ཤིག །ཕཊ། སྡིག་པ་ཆེན་པོ་དེའི་ཞལ་དུ་འཕངས་པར་བསམ། ངར་མི་དེ་མེ་ནང་དུ་འཕངས། ཧཱུྃ། ལུས་གདོན་ནད་འདྲེ་གཅོང་སྲི་རྣམས། །གནམ་ལྕགས་སྡིག་པའི་ཞལ་དུ་བསྟབ། །བཞེས་ཤིག་རོལ་ཅིག་ཁ་རཾ་ཁ་ཧི། །རྣམ་ཤེས་ཆོས་ཀྱི་དབྱིངས་སུ་དྲོངས། །ཅེས་བརྒྱ་རྩ་བརྗོད་ལ། ལན་ཆག་རེ་དང་ཤ་དུམ་རེ་སྤྲད་ལ་མེ་ནང་དུ་འཕང་པའི་དུས་སུ། ནམ་མཁའ་གོ་འབྱེད་བྱེད་ཅིང་ཤ་ཁྱེར་ཁྲག་ཁྱེར་བྱེད་དོ། །སྡིག་པ་དེའི་ཁར་ལུས་ལྟོས་པ་མེད་པར་འཕང་པར་འདོད། དེ་ནས་ནད་པ་གང་ཡོད་དེ་མེ་ལ་མཆོང་བཅོལ་ལ། རང་ཉིད་རྗེ་བཙུན་མ་ཁྲོས་མ་ནག་མོ། ཞལ་གཅིག་ཕྱག་གཉིས་སྤྱན་གསུམ་བསྒྲད་པ་མཆེ་བ་བཞི་གཙིག་པ། རབ་ཏུ་ཁྲོས་པ་ཆ་བྱད་ཅན། ཕྱག་ན་མེའི་ཧོམ་གཟར་བསྣམས་པ། མེ་ཐོ་དགུ་དེ་གཅིག་སྤར་ལ། དེ་ནས་འདོན་ལྟར། ཧཱུྃ། ཤར་ཕྱོགས༴ ལྷོ༴ ནུབ༴ བྱང་༴ དབུས༴ འོག༴ མཚམས་བཞིར། བྱང་ཕྱོགས་སོགས་མཐའ་ནས་ནར་འདེད་ཡིན་གསུང་། མཆན། རྒྱབ་དུས་འོ་དོད་ཆེན་པོ་གཅིག་བྱ། དེ་ནས་ནད་པ་གང་ཡོད་ཀྱི་ཚུལ་དང་བསྟུན་ནས་མེ་ཐོ་རྣམས་སྤར་ལ། མུས་མུས་ཚུར་བླང་ལ་རྒྱབ། མེ་ཐོ་རེ་རེ་དེ་རྗེ་བཙུན་མའི་ཕྱག་གིས་ཧོམ་གཟར་དུ་དམིགས་ལ་རྒྱབ་པས། ནད་པ་དེའི་ལུས་གདོན་གང་ཡིན་པ་དེ་ནག་ཐུལ་ཐུལ་སོང་བར་བསམ། དེ་ནས་མི་བཞིའི་ནད་པའི་གཟུགས་བཞི་ལ་བཟུང་ལ་མེའི་ཁ་ལ་མཆོང་འཁྲབ་བྱ། ཡང་ན་ནད་པ་ཕྱར་བའི་ནང་དུ་སྐྱོག་བྱས་ལ་མེའི་ཁར་སྟབ་པར་བྱ། ནད་པ་ཉམས་ཆུང་ན། དེ་ནས་ཐང་ལ་ནར་གྱིས་བཞག །མེ་ཧོམ་གྱི་སྡིག་རྒོད་འོད་དུ་ཞུ་ནས་ཧཱུྃ་གྱུར་པ་དེ་དབྱིངས་སུ་གཤེགས་པར་གྱུར། དེ་ནས་དེ་ནུབ་བདག་གཞན་གང་གིས་ཀྱང་། ཕཊ་དང་དམིགས་པ་གང་ཡང་མི་བྱ་བར་མགོ་མཇུག་བཟློག་ལ་གནམ་ས་གོ་བཟློག་བྱ། ལུས་གཅེས་འཛིན་ཕྲལ་ལ་ཉལ་ལ་བསྡད། ཕྱིར་ནང་ཕཊཿ རང་གི་ཐུགས་ཀ་ནས་ནད་པའི་རྣམ་ཤེས་དེ་ཐིག་ལེ་འོད་དང་བཅས་ཕར་འཕྲོས་ནས། སྤྱི་བོ་ནས་ཞུགས་སྙིང་ཁར་ཐིམ་པར་གྱུར། །དམིགས་པ་འདི་ལྟར་བྱས་གྱུར་ན། །ལུས་གདོན་ཇི་ལྟར་དབྱིངས་ཆེ་ཡང་། །སློང་ཚད་ནད་ཀྱི་ཆོད་ཚུལ་མྱུར་དུ་འབྱུང་ངོ་། །མཐའ་གཏད་མེའི་གཟེར་བུ་མ་ཅིག་གིས་ཐུགས་བཅུད་གཅིག་བརྒྱུད་མིན་པ་བཀའ་རྒྱ་ཡོད། ཨཐྎ། ༈ མཐའ་གཏད་ཆུའི་གཟེར་བུ་ལ། དམིགས་པ་འདི་ལྟར་རོ། །རང་གི་རྣམ་ཤེས་དེ་དབང་པོ་སྒོ་ལྔར་བུད། རང་གི་ལུས་པོ་དེ་རྒྱ་མཚོ་ཆེན་པོ་ལྔ་རུ་བསྐྱེད་ལ། རང་གི་རིག་པ་འདི་གནམ་ལྕགས་ཀྱིིས་རྡོ་རྗེ་རྩེ་དགུ་པ་གཅིག་གིས་ཐང་རེ་རྒྱ་མཚོའི་ཞབས་སུ་ཕར་འཛུལ་ཚུར་འཛུལ་བྱས་པས། རྒྱ་མཚོ་ཡང་ཧྲག་ཧྲག་བཏང་བར་བསམ། ཐང་རེ་རྒྱ་མཚོའི་ཁ་ནས་ཡར་བུད་པས་རྒྱ་མཚོ་ཡང་ཕྱུ་རུ་རུ་བྱུང་བར་བསམ། རང་དང་ནད་པ་གང་ཡང་གཅེར་བུར་བུད་ལ། མཚོ་ཆུ་མིག་གང་ཡིན་ཡང་། རང་གི་ལུས་པོ་དཀྲུས་ལ་ཕྱོགས་མེད་ཀུན་ཏུ་གཏོར་ལ་སྣང་སྲིད་ལྷ་འདྲེ་ལ་འོ་དོད་འབོད། གཉན་ས་འདི་ན་གནས་པའི་ལྷ་འདྲེ་སྡེ་བརྒྱད་རྣམས་དང་། ཀླུ་གཉན་ས་བདག་གི་རིགས་སུ་གྱུར་པ་རྣམས་དང་། མཚོ་ཆུ་མིག་འདི་ལ་གནས་པའི་ཀླུ་རྒྱལ་རིགས་རྡོ་རྗེ་རིགས། དམང་རིགས། བྲམ་ཟེའི་རིགས། གདོལ་པའི་རིགས། ཐམས་ཅད་ངའི་ལུས་པོ་འདི་ཤ་ཁྲག་གི་ལོངས་སྤྱོད་རྒྱ་ཆེན་པོ་འདི་ཚོགས་གསོགས། བདུད་རྩིའི་ལོངས་སྤྱོད་དུ་འབུལ་ལོ། །ཁྱེད་རྣམས་ཀྱང་ཟག་མེད་ཀྱི་བདུད་རྩི་ལ་ལུས་ལོངས་སྤྱོད་པའི་སྐལ་བ་དང་ལྡན་པར་གྱུར་ཅིག །དམིགས་པ་འདི་ནི་གཉན་དང་ཀླུ་གཉན་ས་བདག་གནོད་པ་ཐམས་ཅད་འཕྲལ་གྱིས་ཆོད་པར་འགྱུར་རོ། །མ་ཅིག་གི་ཐུགས་བཅུད་ཆུའི་མཐའ་གཏད་གཟེར་བུ་གཅིག་བརྒྱུད་མིན་པ་བཀའ་རྒྱ་ཡོད། ཨཐྎ། ༈ ད་ནི་མཐའ་གཏད་འབྱུང་བཞིའི་གཟེར་བུ་ལས། ཕཊ་ཀྱིས་རིགས་པ་དབྱིངས་སུ་འཕང་། ལུས་ནི་འབྱུང་བཞི་ཁ་ཁར་ཕྱེས། ངར་མི་དཀར་སེར་དམར་ལྗང་བཞི། དཀར་པོ་ཤར་དུ་བཞག །སེར་པོ་ལྷོ། དམར་པོ་ནུབ་ཏུ། ལྗང་ཁུ་བྱང་དུ་བཞག །འབྱུང་བཞི་ཡང་དེའི་ཁ་དོག་བསྟིམ། ནུབ་མོ་བཞི་ལ་ངར་མི་ལ་མགོ་བསྟན་རེས་བྱས་ལ་ཉལ། དཀར་པོ་ལ་མགོ་བསྟན་དུས་སུ། ལྷའི་བུའི་བདུད་དཀར་པོ་དཔག་ཏུ་མེད་པས་ཤ་ཁྱེར་ཁྲག་ཁྱེར་བྱ། དེ་བཞིན་དུ། སེར་པོ་ལ་ཉོན་མོངས་པའི་བདུད་སེར་པོ། དམར་པོ་ལ་ཕུང་པོའི་བདུད་དམར་པོ། ལྗང་གུ་ལ་འཆི་བདག་གི་བདུད་ནག་པོ་དཔག་ཏུ་མེད་པ་ལ་ཤ་ཁྱེར་ཁྲག་ཁྱེར་བྱ། ལུས་འདར་བ་དང་། གཡེང་བ་དང་། དེའི་དུས་སྒོ་ཕྱི་ནང་གི་མཚམས་སུ་མཆོང་ཁྲབ་བྱེད་ལ། ཧ་ཧ་ཕཊ་ཕཊ་ཀྱི་སྒྲ་འདེབས་ལ། གཞོག་གཡས་གཡོན་ཐམས་ཅད་ཐལ་ལྕགས་རྒྱབ་ཅིང་འོ་དོད་ཆེན་པོ་བཏབ། རིག་པ་དབྱེར་མེད་ནམ་མཁའ་ལ་བསྟིམ། བེམ་པོ་འབྱུང་བཞི་སོ་སོར་བསྟིམ། སྣང་སྲིད་ལྷ་འདྲེ་ཁྱེད་རྣམས་ལ། བེམ་རིག་གཉིས་གཅེས་འཛིན་ཡོད་དམ་མེད། ཡོད་ན་ལུས་ཤ་ཁྲག་གིས་གཏོར་མ་རྒྱ་ཆེན་པོ་འདི་ཁྱེད་རྣམས་གང་འདོད་ལ་ཚོགས་སུ་འབུལ། གཟའ་ཁྱི་གོ་འདུས་ལ་ནུབ་མོ་བཞི་མཆོང་ཁྲབ་དང་ཧ་ཕཊ་བྱེད། ངར་མི་འབྱུང་བཞི་སོ་སོར་བསྟིམ། དམར་པོ་བསྲེག །སེར་པོ་ས་ལ་བསྟིམ། དཀར་པོ་ཆུ་ལ་བསྟིམ། སྔོན་པོ་ནམ་མཁའ། རིག་པ་རྣམ་ཤེས་འབྱུང་བཞི་ལ་གཏད། སོ་སོར་དེ་ལྟར་བྱའོ། །ལུས་སེམས་ཕྲལ་དབྱིངས་རིགས་བསྲེ། དེ་ནི་འབྱུང་བཞིའི་མཐའ་གཏད་ཀྱི་གཟེར་བུ། མ་ཅིག་གི་གསང་སྒྲུབ་འདི། གཅིག་བརྒྱུད་མིན་པ་བཀའ་རྒྱ་མཛད། རྣལ་འབྱོར་པ་དད་པ་ཆེ་ཞིང་ཆོས་ལ་བརྩོན་པ་དང་། ཕྱི་མའི་དོན་ལ་བརྩོན་ནས། རི་ཁྲོད་བྱེད་པ་དེ་རྣམས་ལ་གཅིག་རྒྱུད་གྱིས་ལ་དམིགས་པ་རེ་རེ་སྟོན། ལར་ནན་ལྟར་མ་འཆུན་མིན་པ། འདི་རྣམས་སྡིག་ཆེ་བས་གསང་ནས་གཅིག་བརྒྱུད་གྱིས། མཁའ་འགྲོའི་སྙིང་ཁྲག་ཨ་མ་རང་གི་ཐུགས་བཅུད་དམ་པ་ཡིན་ནོ། །གོང་གི་མཐའ་གཏད་དེ་རྣམས་གང་བྱེད་ཀྱང་། ནུབ་མོ་ཉལ་བའི་དུས་སུ་གཉན་ས་གོ་བཟློག་བྱ་བ་ཡིན་པས། གོས་མགོ་མཇུག་བསྒྱུར་ནས་གྱོན། མགོ་ཕྱི་རྗེས་སུ་བསྟན་ནས་ཉལ། ཁྲ་ཐེར་གྱི་མཁའ་འགྲོ་སྡེ་ལྔ་ཁྲོས་མ་ནག་མོ་ལྔ་རུ་བསྒོམ། ཆོན་ཐག་དེ་ལྕག་གི་དྲྭ་གུར་དུ་སྒོམས། སྟེང་གི་ནམ་མཁའ་གདན་དུ་གཏིང་། ཉི་ཟླ་ཞབས་ཀྱི་འོག་ནས་ཤར། ས་གཞི་རིན་ཆེན་གདུག་ལྟར་ཕུབ། རྩི་ཤིང་བྲག་རི་མཐུར་དུ་སྐྱེས། ལྷ་འདྲེ་རྣམས་ལ་གནས་མེད་པས་བདག་ལ་ཤིན་ཏུ་ཁྲོས་པར་བསམ། གོང་གི་མཐད་གཏད་དེ་རྣམས་བྱེད་པའི་དུས་ན། མའི་བདུད་བཞི་ལམ་ཁྱེར་ལས། ལྔ་བདུན་དགུ་གསུམ་ལྷ་འདྲེའི་ལ་ཚིག་ཡིན། །ཅེས་པས། ཞག་ལྔའམ་བདུན་ཚུན་ཆད་ལ་མ་སློང་ན། གོང་བཞིན་མཐའ་གཏད་བྱ་སྟེ། དེ་མ་སློང་བ་སློང་བའི་གནད་དོ། །ཆོ་འཕྲུལ་རེ་རེ་ཙམ་བྱུང་ནས་ཚར་ཚད་མ་བྱུང་ན། གོང་བཞིན་དུ་སྟེ་དེ་ནི་མ་སྙོལ་སྙོལ་པའི་གནད་དོ། །དཀར་སྦྱོར་ལས། ཆོ་འཕྲུལ་ཚར་ཚད་འདྲེས་ནས་མགོ་སྐོར་ན། དེ་ལ་གསེར་གྱི་ལྡེའུ་མིག་དགོས། རིག་པ་ཕུད་ནས་ཌཱ་ཀིར་བསྐྱེད། །བེམ་པོའི་རྐང་ལག་གསུམ་བཅད་ནས། །སྒྱེད་པོར་བཅུག་ནས་ཡུལ་ཆེན་བཀལ། །གཉན་སའི་རི་བྲག་གྲི་རྩེས་གཏུབ། །ཆུ་མཚོ་ཀ་པཱ་ལ་ཡིས་བཅུས། །བེམ་པོ་དང་བཅས་སྤེལ་ནས་སུ། །མགྲོན་རྣམས་ཐམས་ཅད་ཌཱ་ཀིར་དམིགས། །མཆོད་སྦྱིན་གང་ལྟར་དགྱེས་པ་ཡིས། །འདྲེས་པ་འབྱེད་པར་ཐེ་ཚོམ་མེད། །མ་ཆོད་ཆོད་པའི་མཆོག་ཡིན་ནོ། །དེ་ནི་མ་འབྱེད་འབྱེད་པའི་གནད་དོ། །སློང་ནས་སྙེལ་མ་ཐུབ་ན་ནི་རྒྱུན་དུ་ཆོ་འཕྲུལ་འོང་བ་སྟེ། དེ་ལ་མནན་པའི་གནམ་ས་ཆ་ལང་བརྡེབ་དཀྲུག་བྱེད་པ་ནི། མ་ཅིག་གི་ཞལ་གདམས་སྙན་རྒྱུད་ལས། རང་ཉིད་མཁའ་འགྲོ་མ་ཁམ་ནག་གཟི་བརྗིད་ལྡན་པ་གཅིག་ཏུ་བསམ། ཕྱག་གཡས་པས་གནམ་བཟུང་། གཡོན་པས་ས་བཟུང་ལ་གནམ་ས་ཆ་ལང་བརྡེབ་བརྡེབ་བྱས་པས་དེའི་བར་ན་གནས་པའི་ལྷ་འདྲེ་རྣམས་བསྲུབ་ཅིང་འཕུར་བ་དང་། བཅར་བ་དང་། རྙོག་པས་སྐད་ངན་འདོན་ཞིང་ཁས་བླངས་དམ་བཅས་པའི་ཚད་ཚད་མ་བྱུང་བར་དུ་གཟིར། དེ་ལྟར་བྱུང་བ་དང་ལྷོད་པའོ། །འདི་ནི་སློང་ནས་སྙོལ་མ་ཐུབ་ན་མིན་པ་མི་བྱེད་དོ། །དེས་ནི་མ་སྙོལ་སྙོལ་བའི་གནད་དོ། །མཐའ་གཏད་བྱེད་པ་ལ་ཡང་། དམ་པ་རྒྱ་གར་གྱི་ཞལ་ནས། མ་རན་མཐའ་ལ་གཏད་པ་དང་། །མི་དགོས་མཐའ་གཏད་བྱེད་པ་ནི། །ལྷ་འདྲེའི་ཚིག་པ་ཧུར་ལོག་ནས། །གཉིས་ཕུང་ཡ་ངའི་ལམ་ལ་འགྲོ་ཉན་གདའ། །ཅེས་གསུངས་པས། དུས་མ་རན་པ་དང་། མི་དགོས་པའི་མཐའ་གཏད་བྱས་ན། བཤན་པ་ལག་དམར་དང་འདྲ་ཞིང་། ལྷ་སྲིན་རྣམས་ཚིག་པ་ཟ་ནས་ཚེ་འདིར་ཚེ་ཐུང་ནད་མང་། མ་ཉེས་པའི་ཁ་ཡོག་ཆེན་པོ་འབྱུང་། མི་དགེ་བ་སྣ་ཚོགས་ཆར་པ་འབབས་པ་ལྟར་འོངས་ཞིང་། ཕྱི་མ་མནར་མེད་ཀྱི་གནས་སུ་འགྲོ་བས། གང་རུང་རུང་དུ་མཐའ་གཏད་མ་བྱེད་ཅིག །གང་རུང་དུ་མཐའ་གཏད་མི་བྱེད་པ་ཤིན་ཏུ་གལ་ཆེའོ། །མི་དགོས་ཁ་མེད་བྱུང་ན་གོང་གི་མཐའ་གཏད་གང་རུང་རེ་ཙམ་བྱེད་པས་ཆོག །ཡང་ནད་གཅོད་པ་བྱེད་པ་ལ། ཞི་བའི་གར་ཉི་ཤུ་རྩ་བཞིའི་དམིགས་པ་ལ། སྐུའི་དམིགས་པ་ནི། རང་ཉིད་མཁའ་འགྲོ་སྐུ་མདོག་དཀར་མོ་རིགས་ལྔའི་དབུ་རྒྱན་པ། སངས་རྒྱས་དང་བྱང་ཆུབ་སེམས་དཔའ་དེའི་ཐུགས་ཀར་འོད་ཟེར་གྱི་ཆུ་རྒྱུན་བྱུང་བས་ནད་པའི་ལུས་ངག་ཡིད་གསུམ་གྱི་སྡིག་སྒྲིབ་དག་པར་བསམ། བླ་མ་བརྒྱུད་པ་ལ་གསོལ་བ་བཏབ་པ་ལ་རྟེན་པ་ཞི་བའི་གར་སྟབས་སོ། །དབང་ལ་རང་ཉིད་མཁའ་འགྲོ་མ་དམར་མོ་གཅིག་བསྐྱེད། དེ་ལ་མཁའ་འགྲོ་མ་དམར་མོའི་ཚོགས་ཀྱིས་བསྐོར་བར་བསྒོམས་ལ། ནད་པའི་རིག་པ་རང་ལ་བསྟིམ། ནད་པ་བེམ་པོ་དང་བཅས་པ། གྲི་གུག་གི་བཙག་ལ་ཐོད་པར་བླུགས། འཕགས་པའི་ཚོགས་ལ་འབུལ་ལོ། །དྲག་པོ་ནི་ནད་པ་ལ་ཨར་གཏད་བྱ། རང་ཉིད་མཁའ་མ་སྐུ་མདོག་མཐིང་ནག་བྱ། གཡས་གྲི་གུག །གཡོན་ཐོད་ཁྲག །སྐུ་ལ་རུས་རྒྱན་ཅན། འཁོར་དེ་འདྲ་བའི་ཚོགས་ཀྱིས་བསྐོར་བར་བསྐྱེད་ལ། ཕཊ་དྲག་བྱ་བའི་སྐད་བྱུང་། ནད་པ་ཡང་སྔང་ཞིང་འདར་བར་བསྐྱེད། དེ་སྐུ་ཡི་དམིགས་པ་གསུམ་མོ། །གསུང་གི་དམིགས་པ་ལ། རང་ཉིད་མཁའ་འགྲོ་མ་སེར་མོ་ཞལ་གཅིག་ཕྱག་གཉིས་པ་གཡས་དྲྭ་བ་མ། གཡོན་དྲིལ་བུ། ཕཊ་བྱས་པས་འཁོར་མཁའ་འགྲོ་མ་མང་པོའི་བསྐོར་བ། ཕཊ་ཧ་དྲག་པོ་བྱས་ལ། ནད་པའི་ལུས་ཀྱི་གདོན་དེ་མཐའི་མུན་པ་གསིབ་ཀྱིས་སོང་བར་བསམ། ནད་པ་ལ་བྱིན་རླབས་བྱ། གར་ན་སར་ཕུས་གཏབ། གསུང་གི་གཅིག །རྒྱས་པ་ལ་རང་ཉིད་མཁའ་འགྲོ་མ་དམར་མོ་ཞལ་གཅིག་ཕྱག་གཉིས་གྲི་གུག་ཐོད་ཁྲག་ཅན་གཅིག་བསྒོམ། ནད་པའི་རིག་པ་རང་ལ་བསྟིམ། ཤ་ཁྲག་ཐོད་ཞལ་ནང་དུ་བླུགས་ལ། མཁའ་འགྲོ་མ་རྣམས་ཀྱིས་གསོལ་བར་བསམ། གསུང་གི་གཉིས། དྲག་པོ་ལ། རང་ཉིད་མཁའ་འགྲོ་མ་སྐུ་མདོག་མཐིང་ནག །ཞལ་གཅིག་ཕྱག་གཉིས་མཚོན་ཆ་སྣ་ཚོགས་ཐོག་སྟེ། ཧ་ཕཊ་དྲག་པོ་བསྒྲགས་པས། བེམ་པོ་དེ་མཁའ་འགྲོ་མས་བཙག་ནས་གསོལ་བར་བསམ། གསུམ་པའོ། །ཐུགས་ཀྱི་འདུལ་བ་ལ་རང་ཉིད་མཁའ་འགྲོ་མ་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ། དབུ་ལ་རིགས་ལྔས་བརྒྱན་པ། ཕཊ་བྱས་པས་ཐུགས་ལས་མཁའ་འགྲོ་མ་གྲངས་མེད་བསྐྱེད། ནད་པ་ལ་བྱིན་རླབས་བྱས་པས་སྡུག་བསྔལ་ཞི་བར་བསམ། རྒྱས་པ་ལ་རང་ཉིད་མཁའ་འགྲོ་མ་དམར་མོ་ཞལ་གཅིག་ཕྱག་གཉིས། སྟག་ལྤགས་རློན་པ་གོན་པ་གཅིག་གིས། ནད་པའི་རིག་པ་རང་ལ་བསྟིམ། མཁའ་འགྲོས་ནད་པའི་རྐེ་ལ་འཇུས་ནས་ལྕགས་བསྲེག་གིས་ས་གཞི་ལ་རྒྱབ་པས། གཞོབ་ཧྲག་གིས་བཏང་བར་བསམ། གཉིས། དྲག་པོ་ལ། རང་ཉིད་མཁའ་འགྲོ་མ་མཐིང་ནག་ཞལ་གཅིག་ཕྱག་གཉིས། སྐུ་སྟོད་སེངྒེའི་གཡང་གཞི་གྱོན་པ། སྐུ་སྨད་ཆུ་སྲིན་གཡང་གཞི་བརྒྱན་པ་གཅིག་བསྒོམ། ནད་པའི་རྣམ་ཤེས་རང་ལ་བསྟིམ། མཁའ་འགྲོ་མའི་འོད་ཀྱི་བེམ་པོ་ལ་མེ་འབར་བས་ཚིག་པར་བསམ། གསུམ་པ། ཡོན་ཏན་གྱིས་འདུལ་བ་ནི། རང་ཉིད་མཁའ་འགྲོ་མ་སྐུ་མདོག་དམར་ལྗང་ཞལ་གཅིག་ཕྱག་གཉིས། སྐུ་ལ་རིན་པོ་ཆེས་བརྒྱན་པ། ཕྱག་གི་སོར་མོ་རྣམས་མཁའ་འགྲོ་ལྔར་བསྐྱེད། བྱིན་གྱི་རླབས་པས་ནད་པ་སོས་པར་བསམ། གཅིག །རྒྱས་པ་ལ་མཁའ་འགྲོ་མ་དམར་མོ་ཞལ་གཅིག་ཕྱག་གཉིས། ཕྱག་སོར་ལྔ་གཅན་གཟན་ལྔར་གྱུར་ནས། ལུས་ནད་འདྲེ་དང་བཅས་པ་ཟོས་པར་བསམ་མོ། །གཉིས་པ། དྲག་པོ་ལ་རང་ཉིད་མཁའ་འགྲོ་མ་སྐུ་མདོག་མཐིང་ནག །ཞལ་གཅིག་ཕྱག་གཉིས། གཡས་པས་མེ་དཔུང་བསྣམ་པ། ནད་པའི་རིག་པ་རང་ལ་བསྟིམ། ནད་པའི་ལུས་ལ་མེ་དཔུང་རྒྱབ་པས། ནད་འདྲེ་དང་བཅས་བསྲེག་པར་བསམ། གསུམ། ཕྲིན་ལས་དམིགས་པ་ལ། བདག་ཉིད་མཁའ་འགྲོ་མ་ལྗང་མོ་ཞལ་གཅིག་ཕྱག་གཉིས། ཕྱག་ན་བདུད་རྩིའི་བུམ་པ་བསྣམ་པ། ནད་པའི་མགོ་ཐོག་ཏུ་བཞག་ལ་ནད་སེལ་ལུས་འདྲེ་དང་བཅས་པ་དག་པར་བསམ། གཅིག་རྒྱས་པ་ལ་རང་ཉིད་མཁའ་འགྲོ་མ་དམར་མོ་ཞལ་གཅིག་ཕྱག་གཉིས། ཕྱག་གཡས་ན་རྡོ་རྗེ་རྩེ་ལྔ་བསྣམ་པ། ནད་པ་ལ་རྒྱབ་པས། ལུས་ནད་འདྲེ་དང་བཅས་པ་གཞོབ་ཏུ་བཏང་བར་བསམ། གཉིས། དྲག་པོ་ལ། རང་ཉིད་མཁའ་འགྲོ་མ་སྐུ་མདོག་མཐིང་ནག་ཞལ་གཅིག་ཕྱག་གཉིས། ཕྱག་ན་གནམ་ལྕགས་ཀྱིས་འཁོར་ལོ་རྩིབ་སྟོང་དང་ལྡན་པ་བསྣམས་པ། ནད་པའི་རིག་པ་རང་ལ་བསྟིམ། འཁོར་ལོ་ནད་པ་ལ་རྒྱབ་པས། ནད་པ་འདྲེ་དང་བཅས་པ་ཧྲག་གིས་བཏང་བར་བསམ། གསུམ། ཞི་བའི་གར་སྟབ་ཉི་ཤུ་རྩ་བཞིའི་དམིགས་པ་ལས། བཅོ་ལྔ་སོང་བས་མཁའ་འགྲོས་འདུལ་བའི་རྒྱུད་རྫོགས་སོ།། །།ད་ཕོ་རྒྱུད་ཀྱིས་འདུལ་བའི་དམིགས་པ་ལ། བདག་ཉིད་ཡེ་ཤེས་ཀྱི་ཁྲོ་བོ་དཀར་པོ་ཞལ་གཅིག་ཕྱག་གཉིས། སྤྱན་གསུམ་པ། ཕྱག་གཡས་རྡོ་རྗེ་རྩེ་ལྔ་བསྣམ་པ། ནད་པའི་མགོ་ཐོག་ཏུ་བཞག་ལ། རྡོ་རྗེའི་ལུས་ལ་སྐུ་གསུང་ཐུགས་ཀྱི་བྱིན་རླབས་བྱུང་བས་ནད་ཞི་བར་བསམ། གཅིག །ཡང་སྐུའི་བྱིན་རླབས་ལ། རང་ཉིད་ཁྲོ་བོ་དཀར་པོ་སྦྲུལ་ཞགས་བསྣམ་པ། ནད་པའི་རིག་པ་རང་ལ་བསྟིམ། སྦྲུལ་ཞགས་ནད་པའི་སྐེ་ལ་བཏག་ནས། རི་རབ་ལ་རྒྱབ་པས། ཤ་ཁྲག་རུས་པ་ཐར་གྱིས་སོང་བས། སྡེ་བརྒྱད་རྣམས་ཀྱིས་ཟོས་པར་བསམ། གཉིས། ཡང་ཞི་བ་ལ། རང་ཉིད་ཁྲོ་བོ་ཆེན་པོ་སྐུ་དམོག་སྔོ་སྐྱ་བ་གཅིག་ཏུ་བསྐྱེད། སྐུ་ལ་མེ་རི་འབར་བ་ལས། ནད་པའི་རིག་པ་རང་ལ་བསྟིམ། ནང་དང་འདྲེ་དང་བཅས་པ་བསྲེག་པར་བསམ། གསུམ། རྒྱས་པ་ལས། བདག་ཉིད་ཁྲོ་བོ་ཆེན་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། སྡང་མིག་འཇིག་ཚུལ་དུ་གཟིགས་པ། ལྗགས་ལས་ཡེ་ཤེས་ཀྱི་མེ་འབར་བས་གདོན་བགེགས་རྣམས་ཚིག་པར་བསམ། གཅིག །ཡང་རྒྱས་པ་ལས། བདག་ཉིད་ཁྲོ་བོ་དམར་ནག་པ། ནད་པའི་རིག་པ་རང་ལ་བསྟིམ། ཕཊ་བྱས་པས་རང་གི་ཐུགས་ཀ་ནས། ལྗགས་རྡོ་རྗེ་རྩེ་ལྔ་ལས་མེ་སྟག་འཕྲོས་པས། ནད་པ་དང་བཅས་པ་གཞོབ་རག་ཀྱིས་སོང་བར་བསམ། གཉིས། ཡང་རྒྱས་པ་ལས། བདག་ཉིད་ཡེ་ཤེས་ཀྱི་ཁྲོ་བོ་སྔོ་སྐྱ་བ། ཞལ་གཅིག་ཕྱག་གཉིས་སྤྱན་གསུམ་པ། ཡེ་ཤེས་ཀྱི་རལ་གྲི་ནམ་མཁའ་ལ་ཕྱར་བ། ནད་འདྲེ་དང་བཅས་པའི་མགོ་ལུས་གསེས་པར་བསམ་མོ། །རྒྱས་པ་ལ་གསུམ་མོ། །ད་ནི་དྲག་པོ་ལ། བདག་ཉིད་ཁྲོ་བོ་དཀར་པོ་ཞལ་གཅིག་ཕྱག་གཉིས། རྡོ་རྗེ་དང་ལྕགས་ཀྱུ་བསྣམས་པ། ནད་པའི་རིག་པ་རང་ལ་བསྟིམ། ནད་པའི་སྙིང་ནས་རྡོ་རྗེ་དང་ལྕགས་ཀྱུས་བཟུང་ནས། ཐལ་བར་བརླག་པར་བསམ་མོ། །གཅིག །ཡང་དྲག་པོ་ལ། བདག་ཉིད་ཁྲོ་བོ་མཐིང་ནག་སོར་མོ་རྣམས་ཡེ་ཤེས་ཀྱི་བྱ་ཁྱུང་དུ་གྱུར་ནས། ནད་པའི་རིག་པ་རང་ལ་བསྟིམ། ཐུགས་ལས་མེ་འཕྲོས་ནད་པའི་འདྲེ་དང་བཅས་པ་ཧྲག་གིས་བཏང་བར་བསམ། གཉིས། ཡང་དྲག་པོ་ལ། བདག་ཉིད་ཡེ་ཤེས་ཀྱི་ཁྲོ་བོ་མཐིང་ནག་ཞལ་གཅིག་ཕྱག་གཉིས། ཐུགས་ལས་ཡེ་ཤེས་ཀྱི་ཁྲོ་བོས་སྟེང་འོག་ཕྱོགས་མཚམས་ཐམས་ཅད་གང་བ། ནད་པའི་རིག་པ་རང་ལ་བསྟིམ། ནད་པ་འདྲེ་དང་བཅས་པ་དེ། ཡེ་ཤེས་ཀྱི་ཁྲོ་བོ་གྲངས་མེད་ཀྱིས་གསོལ་བར་བསྐྱེད། གསུམ། མ་ཅིག་གིས་གར་སྟབས་ཉི་ཤུ་རྩ་བཞིའི་དམིགས་པ་འདི། ནད་པ་ལ་འདེབས་དུས་དང་པོ་ཚོགས་བྱ། བླ་མ་ཡི་དམ་མཁའ་འགྲོ་ལ་གསོལ་བ་གདབ། དང་པོ་ཞི་བའི་དམིགས་པ་བྱ། དེ་ནས་རྒྱས་པ། དེས་མ་ཐུབ་ན་དྲག་པོའི་དམིགས་པ་སྤོ་ཞིང་བྱ། ནད་འདུལ་དམིགས་པ་ཁ་བསྒྱུར་བྱ་བ་རྫོགས་སོ།། ༈ །།ཕ་དམ་པ་རྒྱ་གར་ལ་ཕྱག་འཚལ་ལོ། །གཅོད་ཀྱི་ཡང་གཅོད་ཀྱི་མན་ངག་འདི་ལ་གཉིས་སྟེ། མི་ལ་གཅོད་པ་དང་། མི་མ་ཡིན་ལ་གཅོད་པ་གཉིས་ལས། དང་པོ་ནི་བྱད་མ་དང་ཐུག་ན། གཏི་མུག་གི་རྒྱ་མཚོ་མེ་རེ་རེ་ཁོལ་བའི་དབུས་སུ། ཞེ་སྡང་གི་རི་རབ་ཟུར་གསུམ་པ་ཤིན་ཏུ་རྣོ་བ། གནམ་ལྕགས་ཀྱི་ཕུར་པ་མེ་ནང་ནས་བཏོན་པ་འདྲ་བ་ལྟ་བུ་གཅིག་བསྒོམ་ལ། དེའི་རྩེ་མོ་ལ་བྱད་མའི་ང་རྒྱལ་གྱི་དབེན་ཁང་ཁྲ་ལྟེམ་མེ་བ་གཅིག་བསྒོམ་པའི་དབུས་སུ་བྱད་མ་གང་ཡིན་པ་དེ་ལ་བསྒོམ་ལ། དེའི་སྤྱི་བོའི་སྟེང་ན་བྱད་མའི་བླ་མ་དེ་སྒོམ། བྱད་མའི་མདུན་ན་ཁོ་རང་གི་ཡི་དམ་ཆོས་སྐྱོངས་བསྒོམ། གཡས་སུ་ཕ་བུ་སྤུན་ཟླ། གཡོན་དུ་མ་དང་སྲིང་མོ་ཆུང་མ། ཉེ་དུ་ཉེ་འབྲེལ་རྣམས་བསྒོམ། རྒྱབ་ཏུ་ཟས་ནོར་རྣམས་བསྒོམ། ཤིན་ཏུ་ཟབ་པའི་གདམ་ངག་འདིའི་གནད་ཀྱིས་རང་གི་ཤ་ཁྲག་གི་ཁོའི་དབེན་ཁང་དེ་དམར་ལྟེམ་གྱིས་གང་བར་བསམ། དེ་ནས་ཕྲག་དོག་གི་བསུབ་མ་ནི། རླུང་ནག་གིས་འཚུབ་མ་ལྟར་འུར་སྒྲ་དང་། ཆོམ་སྒྲ་དང་། ཚག་སྒྲ་དང་བཅས་པ་ཀྱི་ལི་ལི་སྒ་ར་ར་གཡོན་དུ་འཁོར་བ་གདམ་ངག་འདིའི་གནད་ཀྱིས། ཁོའི་མགོ་ཐོག་གི་བླ་མ་ཡར་བཀྱག་ནས། བླ་མ་དེ་ཡང་ཁྲག་གི་སུབ་མས་ཁ་ཕྱིར་ལོག་ཏུ་བསྐོར་ནས། དེ་རྣམས་ཁོ་ལ་ཞེ་ལོག་ནས་ཁོ་དང་བྱེ་བར་བསམ། དེ་བཞིན་དུ་ཁོའི་བསམ་སྦྱོར་ངན་པའི་ལས་ངན་སྟོབས་དང་། རང་གི་གདམ་ངག་གིས་གནད་ཀྱིས། ཁོ་རང་གི་བསྒོམ་པའི་ལྷ་དང་ལྷ་མ་སྲིན་སྡེ་བརྒྱད་དང་བཅས་པའི་བགེགས་རིགས་སྟོང་ཕྲག་བརྒྱད་ཅུ་དང་བཅས་པ་ཐམས་ཅད་ཀྱང་། ཁྲག་གི་སུབ་མས་ཁ་ཕྱིར་ལོག་ཏུ་ཀྱི་ལི་ལི་སྒ་ར་ར་འཁོར་བར་བསམ། ཡིད་འཁྲུག་སྟེ་བྱད་མ་ལ་ལེ་ལན་བདས་ནས། བྱད་མའི་མགོ་བཅད། སྙིང་དྲངས་ནས་ཟོས། ཁྲག་འཐུང་རུས་པ་འཆོམ་པར་བསམ། དེ་ནས་རང་གི་ལག་པ་གཡས་པས་སྔར་བསྒོམ་པའི་རི་རབ་རྒྱ་མཚོ་དང་བཅས་པ་དེ་ཡར་བླངས་ནས་མར་རྒྱབ་པས། བྱད་མའི་དབེན་ཁང་ཆོས་སྐྱོང་དང་བཅས་པ་དེ་རི་རབ་ཕུར་པའི་དབལ་སོ་དང་འདྲ་བ་དེས་དབང་ཆེན་གསེར་གྱི་ས་གཞི་ལ་ཐམ་གྱིས་འཛེར་ནས་ཤ་ཁྲག་ཐམས་ཅད་ཆལ་གྱིས་འཐོར་བར་བསམ། ཁོའི་ཆོས་སྐྱོངས་ལྷ་སྲིན་སྡེ་བརྒྱད་བགེགས་རིགས་སྟོང་ཕྲག་བརྒྱད་ཅུ་པོ་ཐམས་ཅད་ཀྱིས་ཁོའི་ཤ་ཟོས་ཁྲག་འཐུང་རུས་པ་འཆོམ་པར་བསམ། ལུས་ཀྱི་ལྷག་མ་མ་ལུས་བར་བསམ། ཁོ་རང་གི་རྣམ་པར་ཤེས་པ་ཆོས་ཉིད་དུ་བསྟིམ་པར་བྱའོ། །དེ་ནས་རང་ཉིད་ཀྱིས་ཀྱང་སྟོང་པ་ཉིད་དང་སྙིང་རྗེའི་ངང་ལ་མ་ཡེང་བར་གནས་པར་བྱའོ། །དེ་ཡང་རང་ཤུག་གི་སྙིང་རྗེ་གཅིག་སྐྱེས་ཚར་ཚད་ཡིན་ནོ། །ཆོ་འཕྲུལ་ཆེ་ན་བཟང་ཚར་ཚད་གཞུང་དང་འདྲ་བ་ཡིན་གསུངས། བྱད་མ་ངོས་ཟིན་ན་ཪྣྲིའམ་ཏྲི་ལས་སྔ་མ་བཞིན་བསྒོམ་པར་བྱའོ། །སྤྱིར་བྱད་མའམ་ལྷ་འདྲེ་གང་ལ་ཡང་རུང་སྟེ། རང་གི་ཤ་ཁྲག་སུབ་བསྐོར་གྱིས་བསྐོར་བ་དང་། ཁོ་རང་གིས་བསམ་སྦྱོར་ངན་པའི་སྟོབས་ཀྱིས། རང་གཤེད་རང་ལ་བསྐོར་བས། ཁོའི་ཡི་དམ་ཆོས་སྐྱོངས་ཉེ་དུ་ཡོན་བདག་རྣམས་ཀྱིས། སྤང་ནས་བྱེར་བར་བསམ། སྡེ་བརྒྱད་རྣམས་ཀྱི་ལེ་ལན་བརྡས་ནས། ཁོའི་ཤ་ཟོས་ཁྲག་འཐུང་བ་མན་ངག་ཡིན། མི་མ་ཡིན་ལྷ་འདྲེ་ལ་བྱེད་ན། སྔར་གྱི་དབེན་ཁང་མལ་དུ། ལྷ་ཁང་བསྒོམ་པའི་ནང་དུ་མི་མ་ཡིན་གྱི་རྒྱལ་པོ་ལ། སྤྲེའུ་བུ་ཆུང་བནྡྷེ་དང་། བསེན་མོས་བསྐོར་བར་བསམ། བསེན་མོ་ལ་བུད་མེད། བཙན་ལ་སྐྱ་མི་མི་རྟ་དམར་པོ་བསྒོམ། བདུད་ལ་མི་ནག་རྟ་ནག་ཅན། ཀླུ་ལ་མཚོ་ཀྱི་ལི་ལི་དང་། ཆུ་མིག་མགོ་དགུ་པའི་ནང་ན་མི་ལུས་སྦྲུལ་མགོའི་གདེང་ཀ་བདུན་དང་ལྡན་པ། སྨད་སྦྲུལ་དུ་འཁྱིལ་བ་ལ། འཁོར་སྦྲུལ་དང་སྦལ་པ་ཉ་དང་ལྕོང་མོ་དུད་འགྲོ་སྣ་ཚོགས་ཀྱིས་བསྐོར་བར་བསམ་ལ། སྤྱིར་ལྷ་འདྲེའི་ཆོ་འཕྲུལ་མངོན་ཡང་རུང་། རྨི་ལམ་དུ་བྱུང་ཡང་རུང་སྟེ། གང་ཡིན་པ་དེ་ཤ་ཁྲག་མཚོ་དཀྱིལ་གྱི་རི་རབ་ཟུར་གསུམ་དུ་བསྒོམ། རང་གིས་ཤ་ཁྲག་ཐམས་ཅད་ཀྱི་རྒྱ་མཚོ་ཀྱི་ལི་ལི་འཁོར་བས། ལྷ་འདྲེ་རྣམས་མགོ་འཁོར་ནས་ཡིད་འཁྲུག་སྟེ། ཁྲག་ལྷད་ལྷད་སྐྱུགས་པར་བསམ་མོ། །ཡང་རི་རབ་རྒྱ་མཚོ་དང་བཅས་པར་ཡར་བླང་ནས་མར་རྒྱབ་པས་ལྷ་འདྲེ་རྣམས་ཤ་ཁྲག་དམར་ཐ་ར་ར་ཐོར་བར་བསམ། སྟོང་ཉིད་བསྒོམ་པར་བྱའོ། །གདོན་ངོས་མ་ཟིན་ན་ཪྣྲིའམ་ཏྲི་ལས་གོང་ལྟར་བསྐྱེད། བསྙོན་པ་ལ་བྱེད་ན་ལུས་ལྷ་ཁང་དུ་བསྒོམས། གང་ལ་ཡང་ཆོ་འཕྲུལ་བྱུང་ན་འདོད་ཐོག་ཡིན། དེ་དུས་བརྩོན་འགྲུས་ཤིན་ཏུ་བསྐྱེད། ནུབ་གཅིག་གཉིས་ལ་ཆོ་འཕྲུལ་ལྷུང་གི་འགྲོ། བྱམས་དང་སྙིང་རྗེ་གནད་དུ་བསྣུན། གཅོད་ཀྱིས་རྒྱལ་ཁམས་གང་ལག་ཀྱང་། །ཡང་རིགས་འདི་འདྲའི་གདམ་པ་མ་བཀོད་ཕྱིར། །གྲུ་གསུམ་སྙིང་གི་དབུས་སུ་བཞག་ནས་ནི། །བཀའ་རྒྱ་དམ་དུ་གནས་པར་བྱ། །བདག་འདྲ་མཁའ་འགྲོ་ལབ་སྒྲོན་གྱིས། །གཅོད་ཀྱི་ནང་གི་ཡང་གཅོད་འདི། །སུ་ལའང་མ་སྤེལ་ཐུགས་ཀྱི་ནང་དུ་བཅུག །གཅེས་པས་བུའི་ལག་ཏུ་བཞག །གཅིག་རྒྱུད་མ་གཏོགས་གཉིས་ལ་སྤེལ་བ་ན། །སྟོང་གསུམ་མཁའ་འགྲོས་ཆད་པ་ཆོད། །ཟབ་བརྒྱུད་གཡོག་མོ་ལ་བྱིན་ཏེ། །འདི་བཞག་སྐད། ༈ ཡང་ན་བྱད་བཟློག་བསྡུས་པ་འདི་མ་ཅིག་གི་དམིགས་པ་ཕྲན་ཚེག་ལས། ལྟར་བྱ་སྟེ། རང་གི་སྤྱི་བོར་མདའ་གང་གི་སར་ལབ་སྒྲོན་མཐིང་ནག་གཅིག་བསྒོམ། རང་གི་རྣམ་པར་ཤེས་པ་དེ་ཡར་སྤར། ལུས་པོ་དེ་མ་ཅིག་ལབ་སྒྲོན་གྱིས་བཤུས་ནས། ཕྱལ་གྱིས་བཏིང་པའི་སྟེང་དུ། རང་གི་ཤ་རུས་ཁྲག་གསུམ་སྤུང་པ་དང་། རང་གི་མཉམ་པོར་འོང་བའི་བདུད་བོས་ནས། བྱད་མ་རྦོད་གཏོང་དང་བཅས་པ། བྱད་མ་ལྷ་སྲུང་དང་བཅས་པ། བྱད་མ་སྡེ་ཚན་དང་བཅས་པ་འདིར་ཤོག་ཅིག །ཅེས་བོས་པས་དེར་འདུས་པར་བསམ། ལབ་སྒྲོན་གྱིས་ལྤགས་པའི་ཁ་བསྡུས་ནས། རྒྱུ་མས་བཅིངས་ཏེ་ཡང་ཡང་རྒྱབ་པས་བྱད་མ་གནོད་བྱེད་ཀྱི་ཤ་ཁྲག་དམར་ཐར་ཐར་སོང་བར་བསམ། དམིགས་པ་ལྕགས་སྲེག་གི་ས་གཞི་ལ་བརྡབ་པས། གཞོབ་རག་རག་བཏང་བར་བསམ། ཕཊ་བརྒྱ་སྟོང་ཅི་མང་བྱ། ༈ དུར་གཅོད་རྒྱས་པ་ལ། བླ་མ་ཌཱ་ཀིའི་ཚོགས་ལ་ཕྱག་འཚལ་ལོ། །དྲག་སྔགས་རིང་མོའི་ཁུང་ཕྱུང་བ་ལ་འདི་ལ་གསུམ་སྟེ། སྟྲི་དུར། རས་དུར། ཆུང་དུར། གསུམ་དུ་གཅོད་པ་ཟེར་གསུངས། དེ་གསུམ་ཆུན་གཅིག་ཏུ་གཅོད་པ་ལ། སྐྱབས་འགྲོ་སེམས་བསྐྱེད་སྤྱི་དང་མཐུན། དངོས་གཞི་ཉམས་སུ་ལེན་པ་ནི། གང་ཤི་བ་དེའི་རོའམ་རོ་གོས་ལ་གྲི་སྲི་ཤ་བའི་མགོ་ཅན་བྲི། གཟུགས་སྐྱེ་མཆེད་ཚང་བ་བྱ། རང་གི་ཕྱོགས་བཞི་ཐོ་བཞི་བརྩེགས། ཐོ་བཞིའི་རྩ་རུ་དུག་ཤིང་གི་ལིང་ག་བཞི་བཅིངས་ལ། དོག་པ་སྔོ་དམར་གྱི་རྒྱ་གྲམ་དུ་བྲེས་པས་བསྒྲིལ། དེ་ནས་རང་ཉིད་ཀྱི་ཕཊ་བརྗོད་པས་ཕ་དམ་པ་རྒྱ་གར་སྐུ་མདོག་མཐིང་ནག་བཞེངས་པའི་ཚུ། སྤྱན། གསུམ་མཆེ་བ་རབ་ཏུ་གཙིགས་པ། སྐུ་ལ་དུར་ཁྲོད་ཀྱི་ཆས་བརྒྱད་ཀྱི་བརྒྱན་པ། གཡས་པས་ཐོད་པའི་ཌཱ་མ་རུ་དཀྲོལ་བ། གཡོན་པས་མི་རྐང་གིས་གླིང་བུ་ཚག་ཚག་འབུད་པ་གཅིག་བསྒོམ། དེའི་དབུ་ཐོག་དུ་བྃ་གསར་སྙིང་བསྣོལ་མའི་ཁྲི་སྟེང་དུ། རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་ཟངས་ཀྱི་མདོག་ལྟ་བུ། དབུ་སྐྲ་ཐོར་ལྕོགས་གྱེན་དུ་བཅིང་བ། སྤྱན་གསུམ་མི་མངོན་པའི་དབྱིངས་སུ་གཟིགས་པ། ཐོད་སྐམ་གྱི་དབུ་བརྒྱན་དང་། ཐོད་རློན་གྱི་དོ་ཤལ་བྱས་པ། སྐུ.ལ་ཞིང་ཆེན་གཡང་གཞི་ཁྲག་འཛག་པ། གཡས་པས་ཟངས་ཀྱི་གྲི་གུག་རྡོ་རྗེའི་ཡུ་བ་བྱས་པ་ནམ་མཁར་འཕྱར་བ། གཡོན་པས་ཟངས་མའི་ཞགས་པ་དམར་ཝེང་ངེ་བ་གྲུ་མོར་བཀོན་ཞིང་ཐོད་ཞལ་ཐུགས་ཀར་འཛིན་པ། ཁ་ཊྭྃ་ག་ལ་འཁྱུད་པ། བཀྱག་ན་རི་ཡང་འཁྱོག་པ་མནན་ན་ས་གཞི་ནོན་པ། སྐུ་གཟི་བརྗིད་དང་ལྡན་པ་གཅིག་བསམ། དེའི་གཡས་ཕྱོགས་སུ། དུར་ཁྲོད་ཀྱི་མཁའ་འགྲོ་སྐུ་མདོག་ནག་མོ། གཡས་ལྕགས་ཀྱུ། གཡོན་ཐོད་ཞལ། སྐུ་ལ་དུར་ཁྲོད་ཀྱི་རྒྱན་པ། འཁོར་དུ་ནག་མོ་འབུམ་གྱིས་བསྐོར་བ་བསྒོམ། གཡོན་ཕྱོགས་སུ་ལས་ཀྱི་མཁའ་འགྲོ་སྐུ་མདོག་ལྗང་ནག །གཡས་རལ་གྲི་གཡོན་ཐོད་ཁྲག །སྐུ་གར་སྟབས་ཀྱི་འགྱིང་བག་ཅན་ལ་མཁའ་འབུམ་གྱིས་བསྐོར་བར་བསྒོམས། དེ་ལ་སོགས་པའི་མཁའ་འགྲོ་མ་གྲངས་མེད་པས་བསྐོར་བར་བསམ། དེ་ནས་རང་གིས་ཕཊ་བརྗོད་པས། ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནས། གྲི་སྲི་ལ་སོགས་གང་ཡིན་པ། དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མར་ཁའི་དབུག་འཕྲོག་པ། ཁོང་གི་སྲོག་གཅོད་པ་དེའི་གཙོ་བྱས་པའི་སྣང་ཞིང་སྲིད་པའི་ལྷ་འདྲེ་རྣམས་འོད་ཟེར་ལྕགས་ཀྱུ་ལྟ་བུའི་སྙིང་དཀར་ནག་མཚམས་ནས་བཟུང་ཞིང་བཀུག་པས། ཁ་རླུང་གིས་དེད་པ་བཞིན་དུ་འཚུབ་ཉི་ལི་ལི་བསྡུས་ནས་རོ་རས་དང་ཐོ་བཞི་ཤིང་གཟུགས་ལ་བསྟིམ། གཞན་ཡང་གནས་གདོན་ལུས་གདོན་གཉིས་ཀྱི་གཙོ་བྱས་པ་རྣམས་མདུན་དུ་བསྒོམ། དེའི་རྒྱབ་ཏུ་རང་འདྲ་བ་གྲངས་མེད་ཀྱིས་ཧ་དང་ཕཊ་ཀྱི་སྒྲ་དི་རི་རི་བྱེད་པས་བསྐོར་བར་བསྒོམ་ནས། སྙིང་རྗེ་ཚད་མེད་པ་དང་། ཤ་ཁྱེར་ཁྲག་ཁྱེར་ལ་སོགས་སྤྱི་དང་མཐུན། རྗེས་སུ་བསྔོ་བ་སྨོན་ལམ་བཏབ་ནས། མི་དམིགས་པས་རྒྱས་གདབ། དེ་ནས་སྐད་ཅིག་གིས་ངང་ལ། རང་གིས་ཐུགས་ཀ་ནས་ཧཱུྃ་མཐིང་ནག་གྲངས་མེད་པ་འཕྲོས་ནས། གནམ་ས་བར་སྣང་ས་རྡོ་བྲག་རྩི་ཤིང་ནགས་ཚལ་ཀུན་ལ་ཕོགས་པས། དེ་རྣམས་ཀྱང་མཁའ་འགྲོ་མ་གྲངས་མེད་པར་གྱུར་ནས། ཐམས་ཅད་ཀྱང་སྐུ་མདོག་དམར་མོ་གཡས་ལྕགས་ཀྱུ། གཡོན་པས་ཐོད་པའི་ཞལ་བུ་འཛིན་པ། སྟོང་གསུམ་འཇིག་རྟེན་གྱི་ཁམས་ཐམས་ཅད་ཀྱིས་ཚེ་བཀྲག་མདངས་གཟི་བརྗིད་ཐམས་ཅད་འབྱུང་བའི་བཅུད་མདངས་ཀུན་བསྡུས་ནས་ཐོད་པའི་ཞལ་བུ་རྣམས་ལྟེབས་ཀྱིས་བཀང་ནས། མཁའ་འགྲོ་མ་རྣམས་ཀྱིས་གསོལ་ནས་མཉེས་པར་བསམ་ལ། དེ་ནས་མཁའ་འགྲོ་མ་ཐམས་ཅད་གཅིག་ལ་གཅིག་ཐིམ་ནས་མཁའ་འགྲོ་མ་དེ་ཡང་རང་གི་ཐུགས་ཀར་ཐིམ། རང་བཀྲག་མདངས་དང་གཟི་བརྗིད་ལྡན་པར་བསམ། དེ་མ་ཐག་ཏུ་ཕཊ་བརྗོད་པས། རང་གི་ཐུགས་ཀ་ནས་མཁའ་འགྲོ་མ་སྐུ་དམོག་དམར་མོ་གཡས་གྲི་གུག །གཡོན་ལྕགས་ཀྱུ་འཛིན་པ་དཔག་ཏུ་མེད་པ་འཕྲོས་ནས། གྲི་སྲི་ལ་སོགས་གང་ཡིན་དེའི་རྐེ་གྲི་གུག་གིས་རྦད་རྦད་བཅད་པར་བསམ། དེ་ནས་རང་ཉིད་མཁའ་འགྲོ་མ་དེས་ཁོའི་ལུས་ཤག་གིས་བཤས་ནས་ལྤགས་པ་དེ་ཕྱལ་གྱིས་བཏིང་བ་དེར། བདག་ལུས་ཐ་མལ་པའི་ཤ་ཁྲག་དང་། ཁོའི་ཤ་ཁྲག་རྣམ་ཤེས་བཅས་པ་ཉིལ་གྱིས་སྤུང་པར་བསམ། དེ་རྣམས་ཐམས་ཅད་མཁའ་འགྲོ་མ་རྣམས་ཀྱིས། གཙོ་འཁོར་དང་བཅས་པ་ཀུན་གྱིས་གསོལ་ནས་རྗེས་ཀྱང་མེད་པར་བསམ། དེ་ནས་ཕྱི་ཐུན་གཅིག་ལ་རང་གི་ཕཊ་གཅིག་བརྗོད་པས། ཐུགས་ཀ་ནས་མཁའ་འགྲོ་མ་སྐུ་མདོག་དམར་མོ་གཅིག་གིས་གཡས་པས་ཟངས་མའི་གྲི་གུག །གཡོན་པ་ཟངས་མའི་ཞག་པ་དམར་པོ་བསྣམ་ནས། གྲི་སྲིའི་མགུལ་དུ་འཕངས་པས་ཧྲིག་གིས་བཟུང་ནས། ཕར་འཕེན་ཚུར་འཕེན་བྱས་པས། སྐད་ངན་ཙེ་རེ་རེ་འདོན་ཅིང་བདག་ལ་སྲོག་སྙིང་ཕུལ་བའི་སྒྲ་འདོན་པར་བསམ། བར་བར་གྲི་གུག་གིས་ལུས་དུམ་བུར་གཏུབ་ནས། གཟུགས་ཕུང་ཤ་ཁྲག་ཉིལ་གྱི་བཏང་བ་དེ། རང་དང་གཙོ་འཁོར་ཀུན་གྱིས་ཟོས་པས་ལྷག་མ་མེད་པར་བསམ། བརྒྱ་བསྐོར་དག་ཏུ་བཟུང་བའོ། །དེ་ནས་ཤིང་མིའི་མགུལ་གྱི་སྣལ་མ་སྔོ་དམར་ལ་འཐེན་ཅིང་། ཆོས་ཚད་མ་བྱུང་བར་དུ་གཅུན་པའོ། །ཆོད་ཚད་བྱུང་བ་དང་། ཡོན་བདག་ཕོ་མོའི་ངར་མི་དང་། རོ་རས་ཤིང་གིས་མེ་རྣམས་དྲག་པོའི་མེ་ལ་སྲེག་པའོ། །དམིགས་པ་ནི་རང་གི་མདུན་དུ་རྗེ་བཙུན་མ་མེ་ཞལ་གནམ་དུ་གདངས་པའི་ནང་དུ་བསྐྱེད་པའི་གཟུགས་དང་རང་གི་ཤ་ཁྲག་དང་བཅས་པ་ཉི་ལི་ལི་སྤུང་སྤུང་སོང་བར་བསམ་ཞིང་མེ་སྦར་ལ་ཚིག་འདི་ལྟར་བརྗོད། ཧཱུྃ། རྒྱལ་བའི་ཡུམ་ཆེན་རྣལ་འབྱོར་མ། །སྐུ་མདོག་དམར་མོ་དྲག་པོའི་ཚུལ། །ཞབས་གཉིས་གར་ཐབས་བདུད་བཞི་འདུལ། །དྲག་པོའི་མཆེ་བ་རབ་ཏུ་གཙིགས། །རལ་པ་དམར་སེར་གྱེན་དུ་བརྗིད། །གཡས་པས་གྲི་གུག་འཕྱར་བ་ཡིས། །དུར་ཁྲོད་གནས་བརྒྱད་ཚོགས་སུ་བསྒྲོལ། །གཡོན་པས་ཐོད་ཁྲག་འཛིན་པ་ཡིས། །གྲི་སྲི་གྲི་ནག་ཕུག་སྲི་དང་། །ཆུང་སྲི་གནོད་བྱེད་ཞལ་དུ་གསོལ། །དྲག་བྱེད་མཁའ་འགྲོ་འབུམ་གྱིས་བསྐོར། །དྲག་པོའི་གནས་སུ་སྐུ་བསྐྱོད་ལ། །ཆོས་ཉིད་བདེན་པའི་མེ་ཆེན་སྤར་དུ་གསོལ། །རྣམ་རྟོག་དུག་ལྔའི་ཕུང་པོ་བསྲེག་ཏུ་གསོལ། །བགས་ཆགས་འཁྲུལ་པའི་རྐྱེན་སྣང་གཞོམ་དུ་གསོལ། །དྲག་བྱེད་མཁའ་འགྲོ་འབུམ་གྱིས་བསྐོར། །དྲག་པོའི་གནས་ནས་སྐུ་བསྐྱོད་ལ། །ཆོས་ཉིད་བདེན་པའི་མེ་ཆེན་སྤར་དུ་གསོལ། །རྣམ་རྟོག་དུག་ལྔའི་ཕུང་པོ་བསྲེག་ཏུ་གསོལ། །བག་ཆགས་འཁྲུལ་པའི་རྐྱེན་སྣང་གཞོམ་དུ་གསོལ། །རང་བྱུང་གསལ་བའི་མེ་ཆེན་སྦར་དུ་གསོལ། །བག་ཆགས་འཁྲུལ་བའི་གནོད་བྱེད་བསྲེག་ཏུ་གསོལ། །འཁྲུལ་པ་གཉིས་འཛིན་གྱི་བདུད་ཆེན་གཞོམ་དུ་གསོལ། །ཅེས་བརྗོད། དེ་ནས་སྔགས་བརྗོད་པ་ནི། བཾ་ཧ་རི་ཎི་ས་ཛྭ་ལ་རཾ། གནོད་བྱེད་གྲི་སྲི་ཤ་ཏྲུམ་མ་ར་རྦད་ནན། ཅེས་བརྗོད་ལ་སྦྱིན་སྲེག་བླུག་གོ། །ཡོན་བདག་ཕོ་མོ་ཀུན་ལག་པ་སྦྲེལ་ལ་བསྐོར། ངར་མི་ཤ་དུམ་ཁྲག་དུམ་སྲེག །བར་བར་དུ་བདག་གཞན་ཀུན་གྱི་རིག་པ་སྤར་ཞིང་། མི་དམིགས་པའི་ངང་ལ་བཞག་གོ། །རྗེས་སུ་མཁའ་འགྲོ་བཞིའི་བརྡུང་བ་ནི། ཧཱུྃ། བྲོ་འདི་གང་དང་གང་གི་བྲོ། །བྲོ་འདི་ཕ་བརྒྱུད་དཔའ་བོ་བྲོ། །ཕ་བརྒྱུད་དཔའ་བོའི་བྲོ་བརྡུང་པས། །ཕྱི་སྟོང་ཉིད་ངང་དུ་སངས་སེ་སང་། །བར་མཉམ་ཉིད་ངང་དུ་པྲི་ལི་ལི། །ནང་ཡེ་ཤེས་ངང་དུ་ཡ་ལ་ལ། །གདོན་འདྲེ་བགེགས་མགོ་ལ་ཆེམ་སེ་ཆེམ། །ཧཱུྃ། བྲོ་འདི་གང་དང་༴ བྲོ་འདི་མ་བརྒྱུད་མཁའ༴ མ་བརྒྱུད་མཁའ༴ ཕྱི་སྟོང་ཉིད༴ བར་མཉམ༴ ནང་ཡེ་ཤེས༴ གདོན་འདྲེ་བགེགས་མགོ༴ ཧཱུྃ། བྲོ་འདི༴ བྲོ་འདི་སངས་རྒྱས་མཁའ༴ སངས་རྒྱས་མཁའ༴ ཕྱི་སྟོང་༴ བར་མཉམ༴ ནང་ཡེ་ཤེས༴ གདོན་འདྲེ་བགེགས་མགོ་ལ༴ ཧཱུྃ། བྲོ་འདི༴ བྲོ་འདི་མཁའ་འགྲོ་སྡེ་ལྔའི་བྲོ། །མཁའ་འགྲོ་སྡེ་ལྔའི༴ ཕྱི་སྟོང་༴ བར་མཉམ༴ ནང་ཡེ་ཤེས༴ གདོན་འདྲེ་བགེགས༴ བསྔོ་བ་སྨོན་ལམ་གདབ། ཚོགས་མཆོད་ལ་འབད་པ་གལ་ཆེ། འདི་རྣམས་གཅིག་བརྒྱུད་ཡིན་པས་ཀུན་ལ་གསང་། མ་ཅིག་གིས་སྲས་ལ་གདམས་པའོ། །གཅིག་བརྒྱུད་མིན་པ་ཀུན་ལ་མི་སྤེལ་བའི་བཀའ་རྒྱ་དམ་པ་ཡོད། བཀྲ་ཤིས་བདེ་ལེགས་བྱང་ཆུབ་དོན་དུ་བསྔོ། ཤིང་མི་བཞིའི་ཁོང་པར་ཤ་མགོ་ཅན་བཞི། ཞབས་སུ་གཅིག །གཉན་ས་སྤོ་དུས་ཁྱེར་རྒྱུ་གཅིག །ཉིན་ཛ་སྟག་ལིང་གང་བདེས་བྲིས་ལ་སྒྲོ་བར་བསོགས། ཁུག་རྟག་མ་བྱུང་བར་དུ་དགུག་གཞུག་ཅི་ཚར་བྱ། ཁུག་རྟགས་བྱུང་ནས་བསད་ལས་བྱ། གསོད་རྟགས་ཚར་ཚད་ལ་སོགས་མ་ཐོན་བར་དུ་ནན་ཏན་བྱས་ལ་གཏད། ཚར་ནས་སྦྱིན་བསྲེག་བླུག་ལ་སྤོ་བ་ཡིན། རང་གི་ཞབས་སུ་ལྕགས་ཀྱིས་ཁོང་སྒྲོམ་སྒོ་མེད་ཀྱི་ནང་དུ་ལས་ཀྱི་གཤིན་རྗེ་ཁ་གདངས་བའི་ནང་དུ་རང་ཉིད་ཁྲོས་མ་ནག་མོ་ཞབས་གཉིས་གནམ་ལྕགས་ཀྱི་ཕུར་པ་དམར་ཟང་ངེ་བས་འདོར་རེས་བྱས་པས། གཤིན་རྗེའི་ཁ་ནང་དུ་བཅུག་ལ་བསད་པ་ཡིན། གྲི་སྲིའི་རྣམ་ཤེས་མི་སྤང་། ཡང་དུར་གཅོད་བསྡུས་པ་བྱེད་ན། དུར་དེ་གཞལ་ཡས་ཁང་པ་གྲུ་བཞི་སྒོ་བཞི་པ་གཅིག་ཏུ་བསྒོམ། དེའི་ནང་དུ་པྃ་ལས་པདྨ་རཾ་ལས་ཉི་མའི་དཀྱིལ་འཁོར་གཅིག་ཏུ་བསྒོམ། དེའི་ཡིད་དུ་མ་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་མོ། ཁ་ནས་ཡེ་ཤེས་ཀྱི་མེ་འབར་བ་གཅིག་ཏུ་བསམ། གཞལ་ཡས་ཁང་པའི་སྟེང་དུ་བདག་ཉིད་ཡུམ་ཆེན་མོ་ཁྲོས་མ་ནག་མོ་གཟི་བརྗིད་དང་ལྡན་པ་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་བཞི་གཙིག་པ་གཡས་གྲི་གུག་གཡོན་ཐོད་ཁྲག་བསྣམ་པ་གཅིག་བསྒོམ། དེའི་ཐུགས་ཁ་ནས་མཁའ་འགྲོ་མ་ལག་ན་གྲི་གུག་ཅན། ལྕགས་ཀྱུ། ལྕགས་སྒྲོག །ཞགས་པ་ཐོགས་པ་གྲངས་མེད་པ་ཁྲི་ཕྲག་སྟོང་ཕྲག་སྤྲོས་པས། ཟ་འདྲེ་ཤིག་ཤེད་དྲི་ཟ་དང་བཅས་པ་ཕྱོགས་བཞི་མཚམས་བརྒྱད་དང་བཅས་སྟེང་འོག་ཐམས་ཅད་ནས་དགུག་གཞུག་བྱས་པས། ཡེ་ཤེས་ཀྱི་མཁའ་འགྲོ་མ་ཁ་ནས་མེ་འབར་བ། དེའི་མེ་ལྕེ་ཁ་ནས་སྦྲང་བུ་སོང་བ་བཞིན་བསྒོམ། ཡུམ་ཆེན་མོའི་ཕྱག་གཡས་ན་མི་ལྤགས་ཀྱི་གཡང་གཞི་དམར་ཐིང་ངེ་བ་གཅིག་བསྒོམ་ལ། དེ་གཡུག་པས་བདག་དང་ཡོན་བདག་གི་ཚེ་ལ་བརྐུ་བ་སྲོག་ལ་འཇབ་པ། གདོན་བགེགས་ཀྱི་རིགས་སུ་གྱུར་པ། ཟ་འདྲེ་ཤི་གཤེད་དང་བཅས་་བྱད་མ་ལྷ་སྲུང་དང་བཅས་པ་བཏུམ་ནས་ཡར་སུམ་ཅུ་རྩ་གསུམ་ལྷ་གནས་སུ་ཁྱེར་ནས། མར་དབང་ཆེན་གསེར་གྱི་ས་གཞི་ལ་གཅར་གྱིས་བརྟབ་ནས་སང་བས། ཐལ་བ་རྡུལ་ཕྲན་བཞིན་དུ་བརླག་པར་བསམ། གཡོན་ན་གནམ་ལྕགས་ཀྱི་རྡོ་རྗེ་རྩེ་དགུ་པ་གཅིག་བསྣམ་ནས། གདོན་བགེགས་ཀྱི་རིགས་སུ་གྱུར་པ་ཐམས་ཅད་མདུན་དུ་བཀུག་ལ། རྡོ་རྗེ་རྒྱབ་པས་ཐལ་བ་རྡུལ་ཕྲན་བཞིན་དུ་བརླག་ཅིང་སྒྲོ་མེ་ལ་བསྲེག་པ་བཞིན་བསམ་མོ། །སྟོང་པ་ཉིད་ཀྱི་ངང་ལ་བཞག །དམིགས་པ་དེ་གསུམ་ལ་ཡང་གྲངས་མེད་བྱེད། ནད་པ་རྒྱབ་འདྲེ་ཅན་དང་། སྨྱོན་པ་དང་། སྲི་བསད་པ་དང་། ཤི་ཁ་བཅད་པ་དང་། གྲི་འདུལ་བའི་གདམ་པ་ཡིན་ནོ། །དུར་གཅོད་རྒྱས་བསྡུས་སོང་། ༈ །ཆར་སློང་བཞུགས་སོ། །གང་ཞིག་འགྲོ་བའི་དོན་བྱེད་ཅིང་། །སེམས་ཅན་རྣམས་ལ་ཕན་བདག་ཕྱིར། །ཆར་དབབ་གདམས་པ་འདི་ལྟར་བྱ། །མཚོའམ་ཆུ་མིག་མཉན་ས་རུ། །གསང་ནས་རང་ཉིད་འགྲོ་བར་བྱ། །ཕྱོགས་ཀྱི་ཕྱེ་ཕུད་འོ་ཕུད་བསོག །གང་འཚོགས་ཆུ་གཏོར་རྒྱ་ཆེན་བྱ། །སེམས་བསྐྱེད་སྐྱབས་འགྲོ་འདི་བཞིན་བྱ། །སྤྱིར་ཡང་ཁམས་གསུམ་སེམས་ཅན་དང་། །སྒོས་ཡུལ་ཕྱོགས་འདི་ཡི་སེམས་ཅན་རྣམས། །མུ་གེས་གདུང་བས་སྙིང་རེ་རྗེ། །བདག་གི་ལུས་སྲོག་འདི་དག་ནི། །ལྷ་ཀླུ་རྣམས་ལ་སྦྱིན་པར་བཏང་། །དེའི་དངོས་གྲུབ་བདག་ལ་ནི། །ཡུལ་ཕྱོགས་འདི་རུ་ཆར་ཕབ་ནས། །བདུད་རྩི་ཆར་ཆེན་ཕབ་པར་བསམ། །ལུས་མཆོད་བརྒྱ་སྟོང་གྲངས་མེད་ཕུལ། །བར་བར་སྤྲོས་བྲལ་ངང་ལ་བཞག །ཆར་པ་འབེབས་གྱུར་ཐེ་ཚོམ་མེད། །གལ་ཏེ་ཞག་གསུམ་ལྔ་ལ་སོགས། །བསྡད་ཀྱང་ཆར་པ་མེད་གྱུར་ན། །གནད་ཀྱི་གདམས་པ་འདི་ལྟར་བྱ། །རང་ཉིད་གཅེར་བུ་ཕཊ་ཀྱི་གདབ། །རིག་པ་ངར་བསྐྱེད་བརྟུལ་བཤུག་བྱ། །གདེང་ཐོབ་རྣལ་འབྱོར་གང་ཞིག་གིས། །ཁྱུང་གི་ཏིང་འཛིན་བཟུང་བྱས་ལ། །ཀླུ་དང་ས་བདག་ཐམས་ཅད་ནི། །འདར་ཞིང་ཆར་པ་ཕབ་པར་བསམ། །རིག་པ་ངར་བསྐྱེད་ཕཊ་ཀྱི་གདབ། །ཡང་ན་རྫས་སྦྱོར་ཨར་ལ་གཏད། །ཆར་ཕོབ་རྗོད་ཅིང་མཆོང་ཁྲབ་བྱ། །དེས་ནི་མི་ཕེབ་མི་སྲིད་དོ། །ཕེབ་ནས་ཀླུ་གཉན་ཡུལ་བདག་ལ། །མཆོད་པ་བྱ་ཞིང་ལུས་མཆོད་དོ། །བྱམས་པའི་སེམས་ནི་བསྒོམ་པར་བྱ། །ཆར་འབེབ་ཞལ་གདམ་བདུད་རྩི་ཡིན། ༈ རང་ན་བའམ། ནད་པ་ཚབ་ཆེན་དང་གཉན་ཐོག་ཏུ་འགྲོ་མ་བདེ་བ་ཡིན་ན། རྒྱལ་པོ་གནད་གཅོད་ལྟར་བྱེད་པ་ནི། གྲོགས་མཆེད་གཅིག་རྗེ་བཙུན་མ་དམར་མོའི་ང་རྒྱལ་དང་ལྡན་ནས། གཉན་སའི་ས་རྡོ་བུམ་གཏེར་གྱི་ཚུལ་དུ་བཟུང་ལ། ས་ཕྱོགས་དེའི་ལྷ་འདྲེ་བསྟིམ་ནས། འདུག་སར་སླེབ་པ་དང་། དབང་སྡུད་ཟིལ་ནོན་ཚོགས་འགྱེད་རྗེས་ཆོག་ལ་སོགས་ཉམས་ལེན་གཞུང་ལྟར་བྱ། ཆོད་པ་དང་རྡོ་གཏེར་ཕལ་འཕངས། བསྔོ་བ་སྨོན་ལམ་བྱེད། དེ་ལྟར་བརྒྱ་རྩ་བརྒྱད་བཅད་པས་ཆོག ༈ །ཁྱིམ་གཅོད་ནི། ཟིལ་ནོན་ལ་སོགས་ལམ་གྱི་བྱེད་ལས་སྤྱི་དང་མཐུན་པ་རྫོགས་ནས། ཁྱད་པར་དུ་གནས་ཀྱི་བྱེད་ལས་ཀྱི་སྐབས་སུ། འབོད་པ་ཐམས་ཅད་བྱེད་ནས། ཞབས་སུ་ལྕགས་མཁར་བསྒོམ་པའི་སྐབས་སུ་ཕཊ་ཀྱིས་རང་ཉིད་ཁྲོས་མ་ནག་མོའི་ཐུགས་ཀ་ནས། གནམ་ལྕགས་ཀྱིས་ཐོ་ལུམ་ཆེན་པོ་གཅིག་གིས་ཁྱིམ་དེ་ན་གནས་པའི་ལྷ་འདྲེ་གནས་ཁང་ཐམས་ཅད་བཅོམ་བརྡུང་བྱས་ནས། ལྷ་འདྲེ་ཁོ་རང་གིས་གནས་ཁང་འདྲེ་དང་བཅས་པ་རང་གི་ཞབས་ཀྱི་ལྕགས་ཁང་གི་ནང་དུ་ཚུད་པར་བསྒོམ། དེ་ནས་གཏན་བཏིང་བ་ལ་སོགས་ཉམས་ལེན་བཅུན་ལུགས་སྤྱི་དང་མཐུན། མཐར་གཉན་ས་ཆོད་པ་དང་། རུ་བ་ཡིན་ན་སྐྱ་བ་དང་སྤྲད་ལ། རྗེས་ཆོག་བྱེད་ལུགས་སྤྱི་དང་མཐུན། ཁང་པ་ཡིན་ན་རྗེས་ཆོག་ཚར་ནས། ཕཊ་བརྗོད་ཅིང་ལྷ་འདྲེ་ཐམས་ཅད་སོ་སོར་གཤེགས་པར་བསྒོམ། ཁང་པ་གཞལ་ཡས་ཁང་བྱིན་གྱིས་བརླབ་ལ་རབ་གནས་བྱའོ། །དེས་ཁྱིམ་གཅོད་སོང་། ༈ །རོ་གཅོད་དམིགས་པ་དྲིལ་བ་ནི། རང་ཉིད་ཁྲོས་མས་རོ་ནི་རྡོ་རྗེ་ཡིས། །ཕར་འཕང་ཚུར་འཕང་ཕཊ་ཀྱི་གཟིར། །དེ་ནི་རོ་འདུལ་དམིགས་པའོ། །དེ་ནས་རུམ་ལ་ཉམས་ལེན་སྐྱོངས། །མོ་རི་རང་རོ་གཅིག་ཏུ་བསྲེ། །ཕཊ་ཀྱི་རིག་པ་གཏེར་དུ་སྦ། །ལྷ་འདྲེ་ཡོང་ལ་ཚིམས་པར་སྦྱིན། །འཇིགས་ན་རང་གི་རོ་ཡང་འཇིགས། །འཇིགས་ཡུལ་འཇིགས་མཁན་རྩ་གདར་བཅད། །འཁྲུལ་པ་བདེན་འཛིན་སྒྱུ་མར་བསྒོམ། །སྟོང་ཉིད་རིག་པའི་རྩལ་སྦྱངས་བྱ། ༈ །བེམ་རོ་མ་བཞུགས་སོ། །བེམ་རོ་མའི་ཉམས་ལེན་ནི། སྤྱི་བོར་མ་ཅིག་ལབ་སྒྲོན་བསྒོམ་ལ། རང་གི་རྣམ་པར་ཤེས་པ་དེ་ཐིག་ལེ་དཀར་ལ་དམར་བ་བྱ་མ་གསར་གྱི་སྒོ་ང་ཙམ་གཅིག་བསམ་པ་དེ། ཕཊ་བྱས་པ་དང་སྙིང་ཁ་ནས་སྤྱི་བོར་བུད་སྡེ། མ་ཅིག་གི་ཐུགས་ཀར་ཐིམ་ནས་མ་ཅིག་དང་བཅས་པ་ནམ་མཁར་འཇའ་འོད་དུ་ཡལ་བར་བསམ། ལུས་པོ་འགྱེལ་བ་ལས་རང་གདོན་དང་གཉན་སའི་གདོན་གྱི་གཙོ་བྱས་སྣང་སྲིད་ཀྱི་ལྷ་འདྲེ་རྣམས་ཀྱིས་གཏོར་མ་བྱ་ཁྱིས་བཏོག་པ་ལྟར་ཁྱེར་བར་བསམ་ཞིང་། ངག་ཏུ་གཞན་འཕྲུལ་དབང་བྱེད་མན་ཆད་ས་འོག་ས་སྟེང་ཡན་ཆད་བགེགས་རིགས་སྟོང་ཕྲག་བརྒྱད་ཅུ་མ་ལུས་པ་རྣམས་ཀྱིས། བདག་གིས་ལུས་ཕྱི་ཤ་གཟུགས་དྲུག །ནང་ཆ་བུ་དགུ། སོ་སེན་མོ། སྐྲ་བ་སྤུ། ཤ་དང་ལྤགས་པ། རྐང་དང་ཚིལ་བུ། ཁྲག་དང་རྒྱུ་མ། དབང་པོ་རྣམ་པ་ལྔ་དང་དོན་སྙིང་། བཀྲ་གཟི་མདངས། སོ་སོར་གང་འདོད་ཁྱེར་གཅིག །ཁྱེད་རྣམས་ལ་བདག་གི་ལན་ཆགས་འཁོར། བུ་ལོན་སོད། ཤ་འཁོན་བྱང་། ཁྱེད་རྣམས་སྡུག་བསྔལ་བྲལ། བདེ་བ་དང་ལྡན་པའི་རྒྱུར་གྱུར་ཅིག །ཅེས་བརྗོད། དེ་ལྟར་བརྒྱ་འམ་སྟོང་ལ་སོགས་གྲངས་ཅི་མང་དུ་བྱའོ། ༈ །ཐུགས་རྗེ་ཆེན་པོའི་ཞི་གཅོད་ཉམས་སུ་ལེན་པར་འདོད་པས། སྐྱབས་སུ་འགྲོ་བ་དང་། བྱང་ཆུབ་མཆོག་ཏུ་སེམས་བསྐྱེད་པ་སོང་ནས། སྐད་ཅིག་གིས་གདན་དྲང་ཐ་དད་མེད་པར། པཾ་ལས་པདྨ། ཨ་ལས་ཟླ་བའི་དཀྱིལ་འཁོར་གྱིས་སྟེང་དུ། རང་གིས་སེམས་གྱི་ངོ་བོ་ཡི་གེ་ཧྲཱིཿདཀར་པོ་ཚེག་དྲག་དང་བཅས་པ། དེ་ལས་འོད་འཕྲོས་སེམས་ཅན་གྱི་དོན་བྱས་ནས། འོད་ཟེར་ཚུར་འདུས་ཧྲཱིཿལ་ཐིམ། དེ་ཡོངས་སུ་གྱུར་པ་ལས། རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་པས་བདག་ལ་གནོད་པར་བྱེད་པའི་བགེགས་དང་། གཉན་ས་ལ་གནས་པའི་གཞི་བདག་གིས་གཙོ་བྱས་པའི་སེམས་ཅན་ཐམས་ཅད་མཆོད་སྦྱིན་འདེག་པའི་ཕྱག་རྒྱ་མཛད་པ། གཡོན་པས་ཕྲེང་བ་དམར་པོ་བསྣམ་པ། རལ་པའི་ཐོར་ཚུག་གྱེན་དུ་བཅིང་པ་ལ། དར་དང་རིན་ཆེན་སྣ་ཚོགས་ཀྱིས་བརྒྱན་པ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿདཀར་པོ་དེའི་མཐར་ཡི་གེ་དྲུག་པས་གཡས་བསྐོར་དུ་འཁོར་བར་བསམ། དེ་ལས་འོད་ཟེར་འཕྲོས་པས། བདག་ལ་གནོད་པར་བྱེད་པའི་གདོན་བགེགས་འབྱུང་པོ་དང་། གཉན་ས་ལ་གནས་པའི་གཞི་བདག་གིས་གཙོ་བྱས་པའི་སྣང་སྲིད་ལྷ་འདྲེ་རིགས་དྲུག་གི་སེམས་ཅན་ཐམས་ཅད་འོད་ཟེར་གྱིས་བསྡུས་ནས། རང་གིས་ཕྱོགས་བཞི་དང་ཉེ་འཁོར་དུ་ཡོད་པར་བསམ། དེ་ནས་ཡི་གེ་དྲུག་པ་བསྒྲང་པ་ཙམ་གྱིས་ཐུགས་ཀའི་ཧྲཱིཿདང་སྔགས་ཕྲེང་ལས། ཡེ་ཤེས་ཀྱི་བདུད་རྩི་ཁ་དོག་དཀར་པོ་བྱུང་ནས། ཕྱག་གཡས་པའི་འཛུབ་མོ་ལྔའི་ཁ་ནས་དཀར་ཀྱི་ལི་ལི་བབས་ནས། བདག་ལ་གནོད་བྱེད་འབྱུང་པོ་གདོན་བགེགས་དང་། གཉན་ས་ལ་གནས་པའི་གཞི་བདག་དང་། སེམས་ཅན་ཐམས་ཅད་ཀྱིས་མཐོང་བས། སྡང་སེམས་དང་སྡུག་སེམས་ཞི་ནས། ཐུགས་རྗེ་ཆེན་པོའི་སྐུར་གྱུར་པར་བསམ། མ་ཐོབ་པ་ཐམས་ཅད་ཀྱི་བདུད་རྩི་ལྷག་མ་ལ་ལོངས་སྤྱོད་ནས། ཐམས་ཅད་ཡི་གེ་དྲུག་པ་མགྲིན་གཅིག་ཏུ་འདོན་པར་བསམ། དེ་ནས་རང་ཉིད་ལ་སྐུ་དྲིན་ཆེ་ཟེར་བསྟོད་ནས། སྡང་སེམས་ཞི་ནས་ཕྱག་འཚལ། ལ་ལས་བསྐོར་བ་བྱེད་པར་བསྒོམ། ཐུན་འཇོག་པའི་དུས་སུ་འདས་མ་འོངས་ད་ལྟར་ནས་བ་ཡིད་ལ་མི་བྱར། གནས་ལུགས་ཕྱག་རྒྱ་ཆེན་པོའི་ངང་ལ་འཇོག་གོ། །དེའི་རྗེས་སུ་བདག་གི་ལུས་སྦྱིན་དུ་བཏང་བའི་དགེ་བའི་རྩ་བ་འདིས། འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་སྤྱན་རས་གཟིགས་དབང་ཕྱུག་དང་སྐུ་མཉམ་པར་གྱུར་ཅིག །གསུངས་མཉམ་པར་གྱུར་ཅིག །ཐུགས་མཉམ་པར་གྱུར་ཅིག །ཡོན་ཏན་ཕྲིན་ལས་དང་མཉམ་པར་གྱུར་ཅིག །མཛད་པ་མཉམ་པར་གྱུར་ཅིག །ཨཐྎ། དམ་ཆོས་བདུད་ཀྱི་གཅོད་ཡུལ་འདི། མ་ཅིག་ལབ་ཀྱི་སྒྲོན་མས་ཟངས་རི་མཁར་དམར་དུ་ཐོད་སྨྱོན་བསམ་འགྲུབ་ལ་རྒྱུད་དོ། །དེ་ནས་རིམ་པར་བརྒྱུད་ནས་བདག་ལའོ། ༈ །གཉན་སར་ཇག་རྐུན་དོག་ན། ཇག་གཅོད་མགོ་འཕྱང་མ་བྱེད་པ་ནི། གོང་གིས་གནས་ཀྱི་བྱེ་བྲག་ལྕགས་ཁང་བསྒོམ་པའི་དུས་སུ། ཕཊ་བརྗོད་པ་ཙམ་གྱིས་ལྕགས་ཁང་གིས་ཁ་ན་ལྕགས་སྲེག་གི་དྲ་བ་ས་བཀབ་པའི་དྲྭ་མིག་ཏུ་ཪྣྲི་མགོ་ཐུར་དུ་བསྟན་པ་གྲངས་མེད་བསམ། ཪྣྲི་ཡོངས་གྱུར་པ་ལས་ཇག་རྐུན་གང་ཡིན་པ་མགོ་ཐུར་དུ་བསྟན་ནས་དྲྭ་མིག་ཏུ་རྐང་བོལ་འཐོག་ནས་ལུས་གདོན་དང་གནས་གདོན་གཉིས་ཀྱི་རྩ་ན་མགོ་འཕྱང་བ། དེ་ལ་ཇག་རྐུན་བསྟིམ་ཞིང་སྐབས་སྐབས་སུ་འགུགས་འདྲེན་ཅི་ནུས་བྱའོ། །དེ་ཡན་ཆད་ཀྱི་གཟེར་བུའི་གདམས་པ་སོང་། ༈ སྤྱི་དོན་གསུམ་པ་སྤྱི་ཆིང་གལ་མདོའི་རིམས་པ་ལ་བཅོ་ལྔ་སྟེ། སྤྲ་བཏགས་ལེགས་ཉེས་ཀྱི་ཆིང་། སྤྱོད་ལམ་རྣམ་བཞིའི་ཆིང་། སློང་ཚད་ཚར་ཚད་ཀྱི་ཆིང་། འདྲ་མིན་ཤན་འབྱེད་ཀྱི་ཆིང་། ལོག་རྒྱུག་འཇམ་གསུམ་གྱི་ཆིང་། བུག་རལ་འཁྱམ་གསུམ་གྱི་ཆིང་། བདུད་བཞི་གེགས་སེལ་གྱི་ཆིང་། གོལ་ཤོར་ཤན་འབྱེད་ཀྱི་ཆིང་། མཁའ་འགྲོ་སྡེ་ལྔའི་མངོན་རྟོགས་ཀྱི་ཆིང་། ལས་བཞིའི་སྦྱིན་སྲེག་གིས་ཆིང་། དབང་བསྐུར་ཆོས་སྒོོ་འབྱེད་པའི་ཆིང་། ངོ་སྤྲོད་ནམ་མཁའ་སྒོ་འབྱེད་ཀྱི་ཆིང་། ལྷན་ཐབས་གནད་ཀྱི་ཕྲེང་པའི་ཆིང་། དམ་པའི་འཕྲུལ་གཅོད་ཀྱི་ཆིང་། གཅོད་ཁྲིད་གསལ་སྒྲོན་གྱི་ཆིང་ངོ་། །དང་པོ་སྤྲ་རྟགས་ལེགས་ཉེས་ཀྱི་ཆིང་ནི། མའི་སྦ་ཡིག་ལས། སྟོབས་དང་ལྡན་པའི་སྐྱེས་བུ་ཡིས། །གཞན་ཕན་དམིགས་པ་སྐྱོང་བ་ནི། །ཕན་དང་མི་ཕན་བརྟག་པ་དང་། །ནད་གཞི་ཆེ་ཆུང་ལེགས་ཉེས་དང་། །གདོན་རིགས་གང་ཡིན་དབྱེ་བ་ནི། །སྤྲ་ལྟས་བརྟག་ཅིང་སྤང་ལེན་བྱེད། །འདི་ལ་མན་ངག་གསུམ་ཡིན་ཏེ། །མཁའ་འགྲོ་གསང་བའི་ཏིང་འཛིན་གྱིས། །ལས་དང་ལེགས་ཉེས་རྟགས་ཐབས་དང་། །སྤང་ལེན་ཐབས་དང་བཤན་འབྱེད་ཐབས། །ནད་པ་དག་གིས་དྲོད་ཚད་རྟགས། །སྐྱབས་འགྲོ་གསོལ་བ་རིམ་བཞིན་བཏབ། །རང་རིག་ཧྲཱིཿལས་རྡོ་རྗེ་རྣལ་འབྱོར་མ། །དམར་མོ་གྲི་གུག་ཐོད་ཁྲག་འཛིན། །གང་ཡིན་ནད་པ་ཚོགས་སུ་བསྒྲལ། །རིག་པ་རང་གི་ཐུགས་ཀར་བསྟིམ། །ཤ་ཁྲག་ལོངས་སྤྱོད་བསམ་མི་ཁྱབ། །མགྲོན་ལ་ཡང་ཡང་བཀྱེ་བ་ཡིས། །འཁོར་འདས་དགོངས་པ་རྫོགས་པར་བསམ། །དམ་ལ་བཏག་ཅིང་གཉིས་མེད་སྒོམ། །དེ་ནས་རང་རིགས་མཁའ་འགྲོ་མས། །གཡས་པས་ལྕགས་ཀྱུ་ཁ་བརྒྱད་ཀྱིས། །གནོད་བྱེད་གང་ཡིན་སྙིང་ནས་བཟུང་། །རང་དབང་མེད་པར་སྲོག་ནས་དྲངས། །སྐད་ངན་ཙེ་རེ་འདོན་ནས་ནི། །སྐྲགས་སྔངས་འདར་ཞིང་སྲོག་སྙིང་ཕུལ། །དེ་ནས་ཐུན་དུ་བཅད་ཅིང་མདུན་དུ་སྒོམ། །དེ་ནས་སེང་གེའི་ཉལ་སྟབས་ཀྱིས། །ཏིང་འཛིན་འདི་དང་ལྡན་པར་བྱ། །བདག་གིས་རིག་པ་ཡི་གེ་ཨཱཿ ནད་པའི་ནང་དུ་ཡོད་པར་བསམ། །དེ་ལ་རིག་ཤེས་གཏད་ལ་ཉལ། །གཉིས་པ་རྨི་ལམ་ཡུལ་ཡིན་པས། །གདོན་རྣམས་ཕན་དང་མི་ཕན་གཉིས། །དང་པོ་གདོན་ངོས་བཟུང་བ་ནི། །ཞང་བློན་མི་དཔོན་བནྡེ་དང་། །སྤྲེལ་དང་ཆུ་ཆེན་མེ་འབར་དང་། །རྟ་ཁྱི་ལྷ་ཁང་བུ་ཆུང་རྣམས། །གནོད་སྐྱེལ་འཛིང་དང་རྒོལ་ལ་སོགས། །ཕོ་གདོན་རྒྱལ་འགོང་འབྱུང་པོ་ཡིན། །གྲོང་རལ་ར་ཁྱི་ཕག་བུད་མེད། །བྱ་ནག་རླུང་ནག་ཁྱི་མོ་ནག །མཛོ་མོ་རྟོལ་མོ་གང་རལ་དང་། །སྦྲ་གུར་ནིལ་སེང་མོ་གདོན་སྨན། །སྦལ་སྦྲུལ་ཉ་ལྕོང་བསྐྱེད་ཤིང་ཆུ། །གཞོན་ནུ་བླུ་བྲིད་བ་གླང་ལུག །མཛེ་སྤྲང་རིགས་ནི་ཀླུ་ཡིན་ནོ། །གཡག་དང་མི་ནག་ཁྱི་ནག་དང་། །རྟ་དང་མུན་ནག་ས་སུབ་འཐིབ། །དེ་རྣམས་བདུད་དུ་ཤེས་པར་བྱ། །ཐོག་སེར་རླུང་སུབ་སྔགས་པ་དང་། །མགར་དང་ཚྭ་ཚྭ་གཟའ་གདོན་ཡིན། །ཕུག་རོན་མི་ནག་ལྐུག་པ་དང་། །མུན་རུབ་ལུག་ཁྱུ་བཙུད་རྨིས་ན། །དམུའི་རིགས་སུ་ཤེས་པ་བྱ། །རྟ་པ་རླུང་འཚུབ་མི་དམར་དང་། །སྤྱང་ཁུ་ཁྱི་དམར་རྨིས་ན་བཙན། །བན་བོན་ཞུབ་ཅན་ཆས་བརྒྱན་ཅན། །གཞི་མ་གཉན་གྱི་ཆོ་འཕྲུལ་ཡིན། །མི་རྒན་ར་ཐོད་བྱ་ཕོ་དང་། །བུ་ཙ་ར་རླག་ཐེའུ་རང་ཡིན། ༈ །གསུམ་པ་ཕན་དང་མི་ཕན་ནི། །གོང་དུ་རྨིས་པ་དེ་རྣམས་ཀྱིས། །གུས་པ་ཕུལ་དང་དགའ་ཚིག་བཟློ། །དབང་དུ་འདུས་པས་སོས་པར་ངེས། །ཁ་ཟས་སྟེར་དང་ལས་གྲོགས་བྱེད། །དམ་ལ་ཐོག་པས་སོས་པར་ངེས། །ལྷུང་དང་བྲོས་དང་བརྡུང་བཏག་དང་། །བསད་བཅད་བརྡུལ་དུ་བརླག་པ་དང་། །བསྐྱེད་ཤིང་བཅད་དང་ཆུ་སྐམ་དང་། །ལྷ་ཁང་འདེར་སོ་ཞིག་དང་བསྒྱེལ། །ཁྱི་ནག་བསྐོར་དང་བུད་མེད་དུ། །མི་དམ་ཤི་དང་ནོར་རྫས་བོར། །གདོན་རྣམས་ཐུབ་པར་ཐེ་ཚོམ་མེད། །གྱེན་ལ་འཛེགས་དང་མེ་ཏོག་འཐུ། །གྱོད་དང་ཁ་མཆུ་ཤག་ལས་རྒྱལ། །མཁར་ལེན་སོ་མ་སྐས་ལ་འཛེག །གོས་གྱོན་ཁ་ཟས་ཡིད་འོངས་སྟེར། །བོར་རྙེད་ཡི་གེ་བྲི་ཀློག་བྱེད། །དར་ཕྱར་དུང་འབུད་ལྷ་ཆ་བསྐྲོལ། །དེ་རྨིས་བཟང་རྟགས་ནད་པ་སོས། །སེམས་བསྐྱེད་དག་པས་ཕན་བདག་བྱ། །ཅེས་གསུངས་སོ། ༈ །གཉིས་པ་དེ་ལས་བཟློག་པ་ནི། །ཟིལ་གྱི་ནོན་དང་འཇིགས་གཟུགས་སྟོན། །ཡིག་ཆ་ལྷ་སྐོར་སྟོར་དང་རུལ། །རྩ་བའི་སློབ་དཔོན་ཁྲོས་ནས་བཀྱོན། །མ་སྲིང་འདུན་བྱས་ཆས་ངན་སྟོན། །བྷ་ག་སྟོན་དང་ཁྲོས་འཐབ་བྱེད། །རང་ཉིད་བཅིང་རྟགས་རྨིས་པ་དང་། །གོས་ངན་གོ་དང་ཐུར་དུ་སོང་། །ཚ་རྒོད་བྱིན་དང་བུ་རམ་དང་། །དེ་རྣམས་ཤིན་ཏུ་སྤང་བར་རིགས། །གཅན་སྤྱང་རྒོལ་དང་འཐབ་པ་དང་། །ཆོ་འཕྲུལ་འགའ་རེ་བསྟན་ཡང་བཟོད། །འདམ་དང་མི་གཙང་གོས་ངན་རྣམས། །ནད་གཞི་ཆེ་སྟེ་ཐུབ་པར་འོངས། །གཞན་ཡང་རྨི་ལམ་བཟང་བ་འདྲ། །ལྷ་ཆ་བོར་དང་ཡིག་ཆ་སྟོར། །ཤིན་ཏུ་ངན་པས་སྤངས་བར་བྱ། །རང་ཉིད་བཅིང་རྟགས་རྨིས་པ་ནི། །ངན་པ་ཡང་དག་ཡིན་པ་དེས། །ནད་པ་མི་སོས་རང་ཡང་བརླག །གཞན་ཡང་རྨི་ལམ་ཅི་ངན་ཡང་། །ལྷ་ཆ་དཀྲོལ་དང་སྟོར་རྙེད་དང་། །ཡིད་དགའ་མ་སྲིང་ཆས་བཟང་ན། །དངོས་གྲུབ་ཡིན་ཏེ་བཟང་པོར་འོང་། །རྨི་ལམ་བཟང་ངན་བསྲེ་བ་ནི། །ཉམས་ཚད་ཡིན་པས་དམིགས་པས་གཟིར། །དེ་ལྟར་ལེགས་རྟགས་སྤང་བླང་བྱ། །ཅེས་གསུངས་སོ། །དེས་ཕྲ་བརྟགས་སོང་། ༈ གཉིས་པ་སྤྱོད་ལམ་རྣམ་བཞི་ལ་གཉིས་ཀྱི་དང་པོ། ཉལ་བའི་རྣལ་འབྱོར་ནི། ཉལ་བ་དང་སྤྲད་ནས། ཕཊ་གཉིས་བྱས་པ་ཙམ་གྱིས། གཅིག་གིས་མ་ཅིག་ལབ་སྒྲོན་གྱིས་སྐྱིལ་ཀྲུང་ཐོག་ཏུ་རང་གིས་མགོ་སྔས་པར་བསམ། གཅིག་གིས་རང་གིས་རྣམ་པར་ཤེས་པ་མ་ལབ་སྒྲོན་གྱི་ཐུགས་ཀར་ཐིམ་པར་བསྒོམ། དེ་ནི་འཕོ་བའི་ཆིང་ངོ་། །ཡང་ཕཊ་གསུམ་བྱས་པ་ཙམ་གྱིས་གཅིག་གིས་མ་ཅིག་གིས་སྟེང་ན། གསེར་གྱི་ཁྲི་ཐོག་ན་ཤཱཀྱ་ཐུབ་པ་ལ་བསྐལ་བཟང་གིས་སངས་རྒྱས་སྟོང་རྩ་གཉིས་ཀྱིས་བསྐོར་ནས་བཞུགས་པ་དེས། གནས་གདོན་ལུས་གདོན་ལ་སོགས་བཀའི་ལྷ་མ་སྲིན་སྡེ་བརྒྱད་ལ་ཆོས་བཤད་པར་སྒོམས། དེ་ནི་སྟེང་ལྷ་ཚོགས་ཀྱི་ཆིང་། ཡང་ཕཊ་གཅིག་གིས་རང་གིས་བེམ་པོ་དེ། བློས་ཁྱབ་ཚད་གཅིག་ཏུ་གྱུར་པར་བསྒོམ། དེ་ནས་བར་ལུས་ཀྱི་ཆིང་། གཅིག་གིས་ཞབས་ལྕགས་མཁར་ནང་གིས་གནས་གདོན་ལུས་གདོན་གཉིས་དང་། ས་ཕྱོགས་དེར་གནས་པའི་ལྷ་འདྲེ་ཐམས་ཅད་ཁེབ་ནས་གར་ཡང་འགྲོ་དབང་མེད་པར་བསམ། དེས་ནི་མགོ་བསྐོར་མི་འོངས་བའི་གནད་དོ། །ཉིལ་ཆུང་འཕར་ནོན་གྱི་དམིགས་པ་ཞེས་ཀྱང་བྱའོ། །དེ་ནི་འོག་གདོན་ཚོགས་ཀྱིས་ཆིངས། དེས་ཉལ་བའི་རྣལ་འབྱོར་གྱི་ཆིང་བཞི་སོང་ནས། ༈ གཉིས་པ་འགྲོ་འདུག་གི་རྣལ་འབྱོར་ལ། བེམས་རོ་མ་བྱེད་པ་ཡིན་ཏེ། ཕཊ་གཉིས་བྱས་པ་ཙམ་གྱིས། གཅིག་གིས་རྣམ་ཤེས་སྤྱི་གཙུག་ཏུ་ལབ་སྒྲོན་གྱི་ཐུགས་ཀར་ཐིམ་པར་བསྒོམ། གཅིག་གིས་རང་གི་བེམ་པོ་འགྱེལ་བ་དེ། ལྷ་འདྲེ་རྣམས་ཀྱིས་ཧབ་ཐོབ་བྱེད་པར་བསྒོམ། སྤྱོད་ལམ་རྣམ་བཞི་གང་བྱེད་ཀྱང་དེ་ལྟར་བསྒོམས། སྤྱི་གཙུག་ཏུ་མ་གཅིག་དང་འདུ་འབྲལ་མེད་པར་པར་བསྒོམ་མཛོད་དང་། གཅོད་པ་ཅི་ལྟར་ངན་ཡང་འཕོ་བ་མི་དགོས་གསུངས། ཡང་ལངས་ནས་འགྲོ་དུས་གོམ་པ་སྤོ་བ་དང་སྤྲད་ལ། ཕཊ་གཅིག་བྱས་པ་ཙམ་གྱིས། མལ་དུ་ཤཱཀྱ་ཐུབ་པ་གོང་བཞིན་བཞུགས་ནས་ཆོས་གསུངས་བར་བསྒོམ། ཚུར་ཕེབ་ཙ་ཛཿཧཱུྃ་བཾ་ཧོཿབྱས་པ་ཙམ་གྱིས། ཤཱཀྱ་ཐུབ་པ་གཙོ་འཁོར་རང་གི་ཐུགས་ཀར་ཐིམ་པར་བསྒོམས། དེ་ནི་རྣལ་འབྱོར་པ་རང་གི་གནས་སྲུང་གིས་དམིགས་པ་ཡིན། ནད་པའི་གནས་སྲུང་གིས་དམིགས་པ་ནི། ནད་པ་རང་ལངས་ནས་འགྲོ་བའི་མལ་དུ་རོ་ཆེ་ལ་བཾ་པ་རུལ་བ་གཅིག་གིས་གཉན་ས་དེ་ནོན་པར་བསམ་མོ། །དེ་ནི་ནད་པ་རང་གིས་བྱེད་ལས་སོ། །དེས་གཉིས་པ་སྤྱོད་ལམ་རྣམ་བཞི་སོང་། ༈ གསུམ་པ་སློང་ཚད་ཚར་ཚད་ཀྱི་ཆིང་ལ་ལྔ་སྟེ། མའི་སྦ་ཡིག་ལས། སློང་ཚད་ཆོ་འཕྲུལ་འོངས་དང་གཅིག །ཆོད་ཚད་ནད་གདོན་སེལ་ཐབས་གཉིས། །ཚར་ཚད་དངོས་གྲུབ་འབྱུང་དང་གསུམ། །ནད་ཅན་དང་ནི་ནད་མེད་ལ། །སོ་སོར་འོང་བ་སྟན་དང་བཞི། །འདྲ་མིན་མགོ་བསྐོར་འོངས་དོག་པས། །སོ་སོར་ཤན་འབྱེད་ཤེས་དང་ལྔ། །དང་པོ་སློང་ཚད་ཆོ་འཕྲུལ་ལ། །ཕྱི་ནི་ལྷ་འདྲེའི་སློང་ཚད་དང་། །ནང་དུ་ན་ཚའི་སློང་ཚད་དང་། །གསང་བ་ཉོན་མོངས་སློང་ཚད་དང་། །ནད་པ་བྱིན་ཆེན་སློང་ཚད་དང་། །ནད་མེད་རྣལ་འབྱོར་སློང་ཚད་དང་། །དང་པོ་ལྷ་འདྲེའི་སློང་ཚད་ལ། །མངོན་སུམ་གཟི་བྱིན་རྨི་ལམ་སུམ། །དང་པོ་མངོན་སུམ་སློང་ཚད་ནི། །གཉན་ས་དེ་རུ་ཕྱིན་པའི་ཚེ། །མ་ཉེས་ཁ་ཡོག་ཕོག་པ་དང་། །འབར་ཞིང་བསྐུར་པ་འདེབས་པ་དང་། །ཕ་རོལ་གཞན་གྱི་རང་ཉིད་ལ། །བརྡུང་དང་བཀྱིག་དང་ཤ་བྲེག་དང་། །མི་བསྙེན་སྒྲོག་ཅིང་གསོད་གྲབ་བྱེད། །དུག་བྱིན་པ་དང་འཕྲོག་འཐེན་དང་། །སྔར་མཐུན་པའི་སློབ་དཔོན་དང་། །མཆེད་གྲོགས་ཡོན་མཆོད་གཉེན་འབྲེལ་རྣམས། །བྱེ་དང་བྲལ་དང་འགྲས་པ་དང་། །གློག་འབྲུག་ཐོག་སེར་རླུང་འཚུབ་དང་། །ས་གཡོས་ཆོམ་ཆག་འུར་སྒྲ་དང་། །མིང་ནས་བཟུང་ཞིང་འབོད་པ་དང་། །མི་སྡུག་གཟུགས་སྟོན་རྣ་ལྕགས་འདེབས། །གཞན་ཡང་རྫ་འཁྲོག་རྦབ་འདྲིལ་དང་། །རི་འཕེན་ཉི་ཟླ་བརྡེག་པ་དང་། །ཉ་སྦལ་འཁྲུག་དང་འབུ་སྤྲང་འཐིབ། །ཉིན་པར་མུན་རུག་ཟླ་བ་ཤར། །མགོ་བཅད་སྙིང་ཕྱུང་ཁྱེར་ལ་སོགས། །མདོར་ན་སྐྲག་ཅིང་འཇིགས་པ་འབྱུང་། །གཉིས་པ་གཟི་བྱིན་སློང་ཚད་ནི། །གཉན་སར་ཕྱིན་ནས་བ་སྤུ་གཡོ། །ལུས་འདར་རྡུལ་དང་འཕུར་ལ་ཁད། །སྔང་བ་ལ་སོགས་ཅིར་ཡང་འབྱུང་། །གསུམ་པ་རྨི་ལམ་སློང་ཚད་ནི། །མེས་ཚིག་ཆུས་ཁྱེར་རྦབ་འདྲིལ་དང་། །རི་དྭགས་གཙོ་བོ་ཞང་བློན་དང་། །སྐྱ་འཁལ་སྐྱ་མི་ངོ་མི་ཤེས། །ཁྲབ་ཅན་ར་ལུག་བ་གླང་དང་། །བྱ་དང་གཅན་གཟན་ལ་སོགས་དང་། །གོང་དུ་བཤད་པའི་ཆོ་འཕྲུལ་རྣམས། །རྨི་ལམ་དག་ཏུ་འབྱུང་བར་འགྱུར། །དེ་གསུམ་ཕྱི་ཡི་སློང་ཚད་ཡིན། །གཉིས་པ་ནང་གི་སློང་ཚད་ནི། །སྤྱི་བོའི་གཙུག་ནས་རྐང་མཐིལ་བར། །སྐྲང་འབུར་ཤུ་བ་ཐར་ཐོར་དང་། །གཉན་སློག་གག་པ་འབྲས་རིམ་དང་། །གླང་ཤུ་བལ་ལྡག་འབྲུམ་བུ་དང་། །འཁྲུ་དང་སྐྱུག་པ་ལ་སོགས་དང་། །གཞན་ཡང་ན་ཚ་ཟུག་གཟེར་ཆེ། །རྐྱེན་བག་ཙམ་ལ་སྐྲག་སྔང་འབྱུང་། །དེ་རྣམས་ནང་གི་སློང་ཚད་དོ། །གསུམ་པ་གསང་བའི་སློང་ཚད་ནི། །ཡིད་ནི་འཕྱོ་གསང་འཁྱེར་བ་དང་། །མི་དགའ་ཀུན་ལ་ཚིག་པ་ཟ། །བསྒོམ་མི་འདོད་དང་བློ་ནོར་དང་། །དོན་མེད་ཁྲོ་ཚིག་ཟ་བ་དང་། །ང་ནི་ཆོས་ལོག་འདི་དང་འཕྲད། །བསྐྱུར་ནས་གཞན་དུ་འགྲོ་སྙིང་འདོད། །ལྕིབ་སྙིང་འདོད་དང་ས་ཕྱོགས་དང་། །མཆེད་གྲོགས་ཡིད་དུ་མི་འོང་འབྱུང་། །རྒོད་འཕྲོ་བྱིང་དང་རྨུག་པ་དང་། །བཀྲེས་སྐོམས་འཇིགས་སྐྲག་འདར་སྔང་དང་། །བཟའ་བཏུང་ཡིད་མི་འོང་པ་དང་། །ཐེ་ཚོམ་ཟ་དང་གཅོད་ལ་འགྱོད། །ཉིན་མཚན་ཕུལ་དུས་མེད་པ་དང་། །གྲིབ་སོ་འགུགས་ནས་འཇིག་སྐྲག་ཆེ། །སྐད་འདོན་མི་ནུས་མལ་མི་བདེ། །མདོར་ན་ཡིད་ཀྱི་ཁོང་འཁྲིག་མང་། །རྣམ་རྟོག་སློང་བའི་ཚད་ཡིན་ནོ། །བཞི་པ་ནད་པའི་སློང་ཚད་ནི། །གོང་གི་ཆོ་འཕྲུལ་དེ་རྣམས་དང་། །ཁྱད་པར་ནད་པའི་རྨི་ལམ་སྔར་བས་འཁྲུག །གཅོད་པས་ཁྱིམ་དང་རིམ་གྲོ་སྨན་དཔྱད་དགའ། །བསམ་པའི་འདུན་པ་སྐྱོ་བ་དང་། །གཉན་ས་དེ་རུ་ཕྱིན་པ་དང་། །ན་ཚ་ཆེ་ཞིང་ཕྱིར་ཐུ་བསམ། །གཞན་ཡང་རྨི་ལམ་ཉམས་སྣང་དུ། །ཡིད་དུ་མི་འོང་སྣ་ཚོགས་འབྱུང་། །སློང་ཆེན་ཡིན་པས་ངོ་མཚར་ཆེ། །གདེངས་དང་ལྡན་པས་ཉམས་སུ་བླངས། །བླ་མའི་གདམ་ངག་གཅུན་པ་གཅེས། ༈ །ལྔ་པ་རྣལ་འབྱོར་སློང་ཚད་ནི། །གང་གི་དེ་རྣམས་འོང་སྟེང་དུ། །ཁྱད་པར་བུད་མེད་ཁྱེའུ་ཆུང་གིས། །བསླུ་ཞིང་དངོས་སུ་བརྡེག་པ་དང་། །ཡུལ་དུ་མ་འདུག་ཟེར་བ་དང་། །འདྲེ་དངོས་ཆོ་འཕྲུལ་མང་སྟོན་འོང་། །དེ་ནི་སློང་བའི་ཚད་ཡིན་ཏེ། །དགའ་དང་མི་དགའ་ཞེ་འདོད་བྲལ། །ཉམས་ལེན་ལ་ནི་འབད་པར་བྱ། །གཉིས་པ་ཆོད་ཚད་ལ་ཡང་གསུམ། །ནད་ཅན་དང་ནི་ནད་མེད་གཉིས། །དེ་ལ་ཕྱི་ནང་གསང་བ་གསུམ། །དང་པོ་ནད་ཅན་དེ་ལ་ནི། །རུ་བ་སྐྱས་པ་བཅག་པ་དང་། །དམག་གཟིང་འོང་དང་བྲོས་ཞོག་དང་། །སྐེད་ཤིང་ཆགས་དང་ཆུ་མིག་སྐམས། །བཅིང་ཐག་བཅད་དང་དངོས་སུ་ཐར། །བུད་མེད་ངུ་དང་ཤི་དང་བསྲེག །སེམས་ཅན་བཏག་ཟིན་གྲོལ་བ་དང་། །ཟས་ནོར་མི་ལ་ཤོར་བ་དང་། །གོས་ཕུད་གཅེར་བུ་ཁྲུས་བྱེད་རྣམས། །ནད་པ་དག་གིས་ཆོད་ཚུལ་ཡིན། །གཉིས་པ་ནད་མེད་ཆོད་ཚུལ་ནི། །འཐབ་པ་རྡུམ་བྱས་ཕོ་བྲང་བརྟན་པ་དང་། །བསྙེན་བཀུར་ཞབས་རྟོགས་བྱེད་པ་དང་། །རྟ་ནོར་བ་གླང་འབུལ་བ་དང་། །ཤིང་ཐོག་ཇ་ཆང་ལོ་ཡག་རྣམས། །རྣལ་འབྱོར་པ་ཡིས་ཆོད་ཚད་ཡིན། །དང་པོ་ཕྱི་ཡི་ཆོད་ཚད་ནི། །ཆོ་འཕྲུལ་སླར་ལ་འཇམ་པ་དང་། །འཐབ་པ་རྡུམ་པ་བྱེད་པ་དང་། །གློ་སྙིང་འཕྲོག་ཐལ་གཏད་པ་དང་། །ཤ་སྒོ་རི་ལ་གྲམ་པ་དང་། །ངོ་མི་ཤེས་པའི་བུད་མེད་དང་། །ཞང་བློན་སྟག་ཤར་གང་འཚོགས་ཀྱིས། །ཕྱག་དང་ཞབས་གཏོག་བྱེད་པ་དང་། །དངོས་གྲུབ་ཡིན། མཆན། དར་ཟབ་གསེར་དངུལ་རྟ་ལུག་འབྲུ། །དངོས་གྲུབ་ཡིན། སྲོག་སྙིང་ཕུལ་དང་ཆོས་ཞུས་དང་། །བྱིན་རླབས་སྐྱབས་འགྲོ་སེམས་བསྐྱེད་ཞུ། །དེ་རྣམས་གཉན་སའི་ཆོད་ཚད་ཡིན། །གཉིས་པ་ནང་གི་ཆོས་ཚད་ནི། །ནང་ན་ན་ནད་པ་སོས་པའི་ཆོད་ཚད་ཚ་སྔར་བས་ཆུང་བ་དང་། །ལུས་པོ་ཡང་དང་ཟ་མ་འདོད། །རྣག་ཁྲག་ཆུ་སེར་འཛག་པ་དང་། །སྐྱུག་སྦྱོང་ལ་སོགས་བྱེད་པ་དང་། །ཁང་གསར་བརྡུང་དང་བང་གསར་བརྩིགས། །ནག་པོའི་ཁུང་དུ་འཛུལ་ནས་ཐར། །ཤོ་གྲུ་རྩོད་པ་རྒྱལ་བ་དང་། །ཁྲལ་དང་བུ་ལོན་མཇལ་བ་དང་། །ལུས་ཀྱི་སྲོ་ཤིག་འཕྱག་པ་དང་། །གོས་ཧྲུལ་ཕུད་དང་སྙི་ཕུད་ཕྱག །མདའ་མདུང་རྣོ་མཚོན་བཟུང་བ་དང་། །གདོན་ཕུད་རྟགས། དམག་མི་ཚོང་པ་བན་བོན་སོང་བ་དང་། །ལྷ་ཁང་འགྱེལ་དང་སྡེར་སོ་ཞིག །དྲི་ཆེན་དྲི་ཆུ་འདོར་བ་རྨིས། །ཡིད་ནི་སྟོང་ཞིང་དགའ་ལ་བདེ། །ལུས་ལས་སྦལ་སྦྲུལ་ལྕོང་མོ་དང་། །སྡོམ་སྡིག་གྲོག་སྦུར་འབུ་སྲིན་དང་། །བུ་ཆུང་སྤྲེའུ་ལི་ལི་བུད་པ་རྨིས། །ངོ་ཤེས་སེམས་ཅན་ཤི་སྲེག་དང་། །ཤ་ཉེ་ཤི་དང་ནོར་ཤོར་དང་། །ཆུ་སྐམ་ཤིང་སྐམ་རིར་མེ་ཤོར། །ཉི་ཟླ་ཤར་དང་སྐས་ལ་འཛེགས། །གངས་དཀར་རྩེར་ཕྱིན་ནམ་མཁའ་གཡའ་དག་དང་། །ཤེལ་དང་ནོར་བུ་བུམ་གཏེར་རྙེད། །གོས་གསར་གོན་དང་མཁར་ལན་ཚར། །ནམ་ལངས་ཁྲུས་བྱས་གྱེན་ལ་འགྲོ། །མཆོད་རྟེན་བསྐོར་བྱེད་མཁའ་ལ་འཕུར། །ངོ་ཚ་མེད་པར་གཅེར་བུར་རྒྱུག །མེ་ཏོག་དཀར་སེར་ཐུ་བ་དང་། །དར་ཕྱར་ལྷ་ཆ་དཀྲོལ་བརྡུང་རྨིས། །ནད་གདོན་དག་གིས་ཆོད་ཚད་ཡིན། །གསུམ་པ་གསང་བའི་ཆོད་ཚད་ནི། །ཡིད་དགའ་བདེ་ཞིང་སྤྲོ་བ་དང་། །དད་པ་སྐྱེ་ཞིང་ཏིང་འཛིན་གསལ། །ན་ཚ་ཆུང་ཞིང་ངེས་ཤེས་སྐྱེ། །དེ་ནི་གསང་བའི་ཆོད་ཚད་དོ། ༈ །སྤྱི་དོན་གསུམ་པ་ཚར་ཚད་བསྟན་པ་ལ་གསུམ་སྟེ། ཕྱི་དང་ནང་དང་གསང་བ་སྟེ། །དང་པོ་ཕྱི་ཡི་ཚར་ཚད་བསྟན་པ་ནི། །རྨི་ལམ་ཟང་ཟིང་འཇམ་པ་དང་། །དབང་ཞུ་ཕྱག་དང་བསྐོར་བྱེད་དང་། །ཆོས་ཞུ་སྡོམ་ལེན་ཞབས་ཏོག་རྣམས། །ཕྱི་ཡི་ལྷ་འདྲེའི་ཚར་ཚད་ཡིན། །ནད་ཞི་ལུས་བདེ་སེམས་གསལ་ལ། །ཤ་ཉེ་ཤི་སྲེག་ཐལ་བ་རླུང་ཁྱེར་དང་། །སྦལ་སྦྲུལ་འབུ་སྲིན་ཚིག་སྐམ་དང་། །གྲོང་ཞིག་གཟའ་བསྲེག་ནོར་ཤོར་དང་། །རུ་སྐྱས་ཟག་འདོར་ཁྲུས་བྱས་ཁོང་ཁྲག་བཤད། །ནད་གདོན་ནང་གི་ཚར་ཚད་དོ། །གསང་བ་དག་གི་ཚར་ཚད་ནི། །སྲོག་སྙིང་ཕུལ་ལ་དམ་བཅའ་དང་། །དགོངས་པ་གདེངས་ལྡན་ཉམས་ང་མེད། །ལྷ་འདྲེ་ཉེ་རིང་མི་རྩི་བར། །མཉམ་པའི་ངང་དུ་གནས་པ་དང་། །རྣམ་པར་རྟོག་པ་མི་སྐྱེ་ཞིང་། །སྟོང་གསལ་དགོངས་པ་རྩིས་ཟིན་དང་། །འདྲེ་ཡང་རང་གི་སེམས་སུ་ཤེས། །ན་ཚ་ཆོས་ཉིད་ངང་དུ་དག །རྣམས་རྟོགས་ཁྲུལ་འགྲིབ་མི་འབྱུང་བར། །རིགས་པར་ངར་ལྡན་གསལ་ལེ་བ། །བདེ་གསལ་ངང་དུ་ཧྲིག་གེ་བ། །མཉམ་བཞག་ངང་དུ་སྐད་དེ་བ། །མཚན་བཅས་ཀྱི་དམིགས་པ་མི་འཛིན་པ། །མཚན་མེད་ངང་དུ་མཉམ་གནས་ན། །གསང་བ་དག་གིས་ཚར་ཚད་དོ། །སྤྱིར་ཕྱི་ཡི་ཚར་ཚད་སྙད་ཅན་ནི། །རྫས་དང་བཟའ་བཏུང་ཐམས་ཅད་ལ། །སྙད་ཅན་བྱུང་ན་མ་ཆོད་དོ། །སྙད་མེད་བྱུང་ན་ཆོད་པའོ། །ནང་གི་ཚར་ཚད་སྙད་ཅན་ནི། །ཚར་ཚད་བྱུང་ཡང་ཡིད་མ་བདེ་ན་མ་ཆོད། །ཚར་ཚད་བརྡའ་ཙམ་བྱུང་ནས་ཡིད་བདེ་ན་ཆོད། །མཆོག་དང་ཐུན་མོང་གི་དངོས་གྲུབ་དེ་རུ་རྫོགས། །གདེངས་ལྡན་གྱི་རྣལ་འབྱོར་ཡིན་པར་གསུངས། །དེ་ལྟར་དྲོད་ཚད་དང་ལྡན་པར་བྱེད་ལ། །དང་པོ་ཕྱི་ནང་གསང་གསུམ་དང་མ་ལྡན་ན། །གཉན་སར་བསྡད་པའི་དོན་མི་འབྱུང་། །དེ་ཕྱིར་དང་པོ་སློང་བའི་ཚད་གསུམ་དང་ལྡན་པའི་དུས། །གདེངས་ལྡན་མཐར་སྐྱོལ་ཉམས་སུ་བླང་། །གཉིས་པ་ཆོད་པའི་ཚད་དང་མ་ལྡན་ན། །དགྲ་ཟིན་འདྲེས་པའི་འཐབ་མོ་འདྲ། །ཆོད་ཚད་གསུམ་དང་ལྡན་པས་ཉམས་སུ་བླངས། །དེ་ནི་ཚར་ཚད་གསུམ་དང་མ་ལྡན་ན། །མེ་ཐོག་སྐྱེ་འཕྲོ་ལུས་པ་དང་། །སྐུ་མཁར་བརྩིག་འཕྲོ་ལུས་དང་འདྲ། །མཆོག་ཐུན་དངོས་གྲུབ་མི་འབྱུང་བས། །ཚད་དང་ལྡན་པས་ཉམས་སུ་ལང་། །ཡང་གཉན་སའི་འདྲེ་ཆེ་ཆུང་གི་ཆ་ཤས། ཏིང་ངེ་འཛིན་ཁུལ་མ་ཁུལ་དང་། དགོངས་པ་ཟིལ་གྱི་གནོན་མ་ནོན་དང་། སྔར་གྱིས་འཁྲེབ་མ་འཁྲེབ་ཀྱིས་ཁྱད་པར་དང་། རང་གི་ནད་གདོན་གྱི་སྒྲིབ་པ་ཆེ་ཆུང་གི་ཆ་ཤས་དང་། དྲོད་ཚད་ཀྱང་སྔ་ཕྱི་དང་དངོས་གྲུབ་ཆེ་ཆུང་དང་། ནད་གདོན་ཆེ་ཆུང་གི་ཁྱད་པར་འབྱུང་སྟེ། ལ་ལས་ནུབ་གཅིག་ལ་སློང་ཚད། ཆོད་ཚད། ཚར་ཚད་ཀུན་རྫོགས་པ་ཡོང་ཡོད། ནུབ་མོ་གསུམ་ལ་རྫོགས་པ་ཡང་ཡོད། ཉི་ཤུ་ཚུན་ཆད་ནས་རྫོགས་པ་ཡང་ཡོད། དེ་ལྟར་འདྲ་མིན་དུ་འབྱུང་བས། ཆོ་འཕྲུལ་དང་ཚར་ཚད་གང་བྱུང་ཡང་། ནང་ནུབ་ཀྱི་ཡིད་ལ་བཟུང་བ་གལ་ཆེ། དེ་ལྟར་ལག་ལེན་དང་། དམར་ཁྲིད་དང་། བླ་མའི་ཞལ་གྱི་གདམས་པ་རྣམས། ཉམས་སུ་ཚུད་པ་གནད་དུ་ཆེའོ། །མཆོད་པར་འོང་ན་རྗེས་སྙོག་ཡང་ཡོད། ཆོད་ནས་སྡོད་ན་ནད་བསྣོན་པ་ཡང་ཡོད། དེ་ཕྱིར་དྲོད་ཚད་གལ་ཆེ། སློང་ཚད་གསུམ་དང་མ་ལྡན་ན། ནད་པ་ལ་ནད་གདོན་བག་ལ་ཉལ། རྣལ་འབྱོར་པ་ལ་ཉོན་མོངས་བག་ལ་ཉལ། དེ་ཕྱིར་སློང་ཚད་གལ་ཆེ། ཆོད་པའི་ཚད་དང་མ་ལྡན་ན། ནད་པའི་ནད་མི་ཆོད་ཅིང་། རྣལ་འབྱོར་པའི་ཉོན་མོངས་རྣམ་རྟོག་མི་ཆོད། ཚར་བའི་ཚད་དང་མ་ལྡན་ན། ནད་པའི་ནད་མི་ཕན་རྐྱེན་དངོས་གྲུབ་ཏུ་མི་འཆར། རྣལ་འབྱོར་ཉམས་རྟོགས་ཡེ་ཤེས་སུ་མི་སློང་། མཆོག་དང་ཐུན་མོང་གི་དངོས་གྲུབ་མི་འབྱུང་། ཅེས་གསུངས་སོ། །ཆོད་ཚད་དང་ཚར་ཚད་ལ་ཡང་ཆོ་འཕྲུལ་འདྲ་བའི་ཚར་ཚད་དང་། ཚར་ཚད་འདྲ་བའི་ཆོ་འཕྲུལ་གཉིས་འདྲ་མིན་འབྱུང་བས་ངོས་བཟུང་བ་གལ་ཆེ། བླ་མའི་གདམ་ངག་ལ་བསླབ་པར་བྱ། གཉན་ས་གཅིག་ཏུ་རྫོགས་པ་དང་། གཉན་སའི་ནུས་པ་ལ་རག་ལས་པས་བཏང་བཞག་ལ་མཁས་པ་གལ་ཆེ་སྟེ། གདམ་ངག་བསླབ་ཅིང་ནན་ཏན་བྱའོ། །དང་པོ་སློང་ཚད་རྨི་ལམ་ངན་པ་ལ་སོགས་ཡིད་ལ་མི་འོང་བ་སྣ་ཚོགས་འབྱུང་། བར་དུ་ནོན་ཚད་ཅི་ཡང་མི་འབྱུང་། ཐ་མ་ཆོད་ཚད་བཟང་པོ་འབྱུང་། དེ་ནི་ཚད་གསུམ་གྱི་ཞབས་བསྡུའོ། །དེ་ལྟར་ཚར་ཚད་ཅི་བྱུང་ཡང་ཆགས་ཞེན་དང་དགའ་བྲོད་རློམ་སེམས་གང་ཡང་མི་བྱེད་ཅིང་རྨི་ལམ་བཞིན་དུ་ཤེས་པར་བྱ། ༈ བཞི་པ་འདྲ་མིན་ཤན་འབྱེད་ཀྱིས་ཆིང་ལ་དྲུག་སྟེ། དང་པོ་གནས་གདོན་ལུས་གདོན་གཉིས་ཀྱིས་ཤན་འབྱེད་ཅིང་ངོ་ཤེས་པ་ནི་ལུས་གདོན། ངོ་མ་ཤེས་ན་ནི་གནས་གདོན་ཡིན། དང་པོ་ངོ་ཤེས་དེ་ནས་ངོ་མ་ཤེས་པར་གྱུར་ན། གནས་གདོན་ལུས་གདོན་དུ་བརྫུས་པ་ཡིན། དང་པོ་ངོ་མ་ཤེས། དེ་ནས་ཤེས་ན་ལུས་གདོན་གནས་གདོན་དུ་བརྫུས་པ་ཡིན། ངོ་སྦས་འགྱུར་ལྡོག་བྱས་ན་གནས་གདོན་ཡིན། སྔར་རྨི་ལམ་དུ་ཁྱི་རྟ་འདེར་སོ་ལ་སོགས་རྨིས་ནས་གནོད་པ་རྣམས་ད་བྱུང་ན་ལུས་གདོན་ཡིན། དང་པོ་ལུས་གདོན་གྱི་ཆོ་འཕྲུལ་བྱུང་ནས། རྗེས་སུ་གནས་གདོན་གྱི་ཆོ་འཕྲུལ་བྱུང་ན་གནས་གདོན་ཞན་པ་ཡིན། སྔོན་དུ་གཉན་སའི་ཆོ་འཕྲུལ་བྱུང་ན། རྗེས་སུ་ལུས་གདོན་གྱི་ཆོ་འཕྲུལ་བྱུང་ན་འབྲིང་བ་ཡིན། གཉན་སའི་ཆོ་འཕྲུལ་རྟག་པར་བྱུང་ནས། ལུས་གདོན་གྱི་ཆོ་འཕྲུལ་འོང་མ་ནུས་ན་གཉན་ས་དྲག་པ་ཡིན། ཚར་ཚད་ཆོ་འཕྲུལ་དུས་གཅིག་འོང་བའི་རིགས་ཀྱང་ཡོད། དེས་གནས་གདོན་ལུས་གདོན་གཉིས་ཀྱི་ཤན་འབྱེད་ཀྱང་སོང་། ༈ གཉིས་པ་ཆོ་འཕྲུལ་དང་ཚར་ཚད་གཉིས་ཀྱི་ཤན་འབྱེད་ལ། ཆོ་འཕྲུལ་འདྲ་བའི་ཚར་ཚད་ནི། མདའ་མདུང་ལ་སོགས་མཚོན་རྒྱབ་པའམ། མཛོ་གཡག་ལ་སོགས་རྭ་ཅན་གྱིས་བརྡུང་ནས་ལུས་ལ་རྣག་ཁྲག་བཤད་པ། ཁྱི་སྤྱང་གིས་རྨུག་པ། མི་ནག་གི་བཤས་པ། རང་དང་ཉེ་དུ་གང་དམར་ཤི་བ། རང་གི་ཁང་པ་འགྱེལ་བ་དང་། མེ་ལ་ཤོར་བ་དང་། ཟོག་གང་དམར་སྟོར་བ། དགྲ་ལ་ཤོར་བ་རྨིས་པ། དུག་ལ་རྗེན་ཟས་བྱས་པ་དང་། སྟོང་གསུམ་མེས་ཚིག་རླུང་གིས་གཏོར་བ། རང་གི་རང་ཟོས་པ་དང་། ལུས་ཁྱུང་སྦྲུལ་ཉ་ཆེན་པོས་མིད་ལ་ལུས་རྡུལ་ཕྲན་བཞིན་དུ་གཏོར། རང་གི་རང་གིས་ཟོས་པ་དང་། གཞན་ལ་བྱིན་པ་གཞན་གྱིས་གློ་སྙིང་རང་ལ་བྱིན་ནས་ཟོས་པ་རྨིས་ན། ཆོ་འཕྲུལ་འདྲ་བའི་ཚར་ཚད་དོ། །ཚར་ཚད་འདྲ་བའི་ཆོ་འཕྲུལ་ནི། གོས་ནག །བལ་ནག །གོས་སྔོན་ཁྲབ། སྔོ་ཚོད་འཐུང་དང་སྒོག་སྔོན་ཟ། སྦང་མ་ཚ་གཡེར་སྒོག་གསུམ་དང་། ཐུར་དུ་སོང་དང་ལུད་གསེབ་ཕྱིན། ཁུང་དུ་འཛུལ་དང་མུན་པས་གཏིབ། ཤ་བཙོས་རླངས་ཅན་ཤ་ཁྲག་རློན་པ་དང་། གྲོ་མོན་རམ་པ་མར་ནག་ལྕགས་སྤྱད། བུ་རམ་ནག་འདུར་སྟེར་བ་དང་། གཤིན་པོ་ཚོ་འདུས་ནས་བསྐྱེལ་བསུ་བཀུར་སྟི་བྱེད་པ། མེ་ཏོག་དམར་པོའི་གླིང་དུ་ཕྱིན་པ། ལུས་ལ་གོས་དམར་སར་པ་གོན་པ། མགོ་ལ་ཞྭ་ནག་ཞྭ་སྔོན་གོན་པ། གདན་སྔོ་ནག །བུད་མེད་རིགས་མི་འདྲ་བ་མང་པོས་བཀུར་བསྟི་བྱེད་པ་རྣམས་ནི། མགོ་བསྐོར་བའི་ཚར་ཡིན་པས། ད་རུང་མལ་དུ་བསྡད་པར་བྱའོ། །དེས་ཆོ་འཕྲུལ་ཚར་ཚད་གཉིས་ཀྱིས་ཤན་འབྱེད་སོང་། སྤྱིར་ཆོད་དཀའ་སླ་གཉིས་ལ། རོ་དང་དུར་ཁྲོད། ལྷ་ཁང་གོག་པོ། མི་མང་པོ་ཤི་བའི་ཕུང་ཤུལ་རྣམས་འཕྲལ་འཇིག་ཏེ་འདྲིས་སླ་གཏིང་ཐུང་བ་ཡིན། གད་ཕུག་དང་། བྲག་ཕུག་དང་གྲོག་ཕུག་རྣམས་འཕྲལ་ཕུག་གཉིས་ཀར་འཇིགས་པ་ཡིན། ཤིང་གཅིག་ཆུ་མིག་རྒྱ་མཚོ་ཕ་འོང་རྣམས། སླར་མི་འཇིགས་ཀྱང་གཏིང་ཆེ་བྱིང་ཆེ། འདྲིས་དཀའ་བ་ཡིན། པེ་ཀར་རྒྱལ་པོ་དཀོར་བདག་རྣམས་ནི་ཤེས་པ་རྩུབ་རིགས་པ་མཐོ་དམན་ཆེ། འཕྲལ་ཆོ་འཕྲུལ་འང་གདུག་རྩུབ་ཆེ་ཡང་སློང་བ་སླ། བྱིང་ཆུང་ནོན་པ་བསླའོ། །དམ་སྲི་དང་སྲིན་མོ་མ་མོ་རྣམས་ནི། སེམས་ལ་ཆགས་པ་ཆེ། ཐིག་ལེ་འཕྲོག །རིག་པ་འཕྲོག །རིག་པ་འགྲོ་སྙིང་འདོད། སེམས་མི་བདེ་སློང་བ་སླ། ནོན་པ་སླ་ཕྱི་འབྲང་བྱེད་དུ་འོང་བ་ཡིན། ཀླུ་བདུད་ཀླུ་གཉན་ས་བདག་ས་སྲིན་རྣམས་གཉིད་ཆེ་ཤེས་པ་འཐིབ། རིག་པ་མི་གསལ། བྱིང་རྨུག་བྱེད་པ་ཡིན། འཕྲལ་མི་འཇིགས་སློང་བ་དཀའ། བྱིང་ཆེ་ནོན་དཀའ། འཕྲལ་ཆོ་འཕྲུལ་ཆུང་། གདུབ་རྩུབ་མི་བསྟན། གཏིང་ཆེ་ཞེ་གནག་པ་ཡིན། བཙན་དང་ཐེལ་རང་ཡུལ་ལྷ་མ་སངས་རྣམས་ཟང་ཟིང་མང་། རྨི་ལམ་གཏད་མེད་མང་པོ་སྟོན། མིང་ནས་འབོད། བཤུས་པས་འདེབས། འོ་དོད་འབོད། རྒྱུད་འགྲོལ་མང་། གནོད་པ་ཆུང་། བྱིང་ཆུང་། ཚན་ཆུང་། སློང་བ་སླ། ནོན་པ་སླ་བ་ཡིན། མ་སློང་བ་དང་མ་ནོན་པ་ཐམས་ཅད་ལ། རྒྱུན་སྲིང་བ་གལ་ཆེ་བ་ཡིན། རོ་དང་འདྲེ་ལ་གཅོད་པ་སླ། ན་ཚ་དང་སྡུག་བསྔལ་ལ་གཅོད་པ་དཀའ། དེ་བས་ཆགས་སྡང་ཆོས་བརྒྱད་ལ་གཅོད་པ་དཀའ། ཕྱི་གཅོད་པ་བས་ནང་གཅོད་པ་དཀའ་བགོ་ཆེ། དངོས་གྲུབ་མྱུར་བ་ཡིན་ནོ། །ཕན་དགའ་ཕན་འདོད་ཞན་པ་སྤོང་། ན་ཚ་ཆོ་འཕྲུལ་ཅི་བྱུང་ཡང་། ཐེ་ཚོམ་ཡིད་གཉིས་སྤང་བར་བྱ། གསུམ་པ་མོ་རྩིས་སྨན་གསུམ་གྱི་ཤན་འབྱེད་ནི། དང་པོ་མོ་དང་རྩིས་ལ་བརྟེན་ནས་གཅོད་པ་སློང་བའི་ཚེ། ཁྱིམ་ན་ཁྲིད་དེ་ལྟོ་དགེ་བཤེས་པ་རིམ་གྲོ་བྱས་ན། བཤའ་ལུག་ཐག་བཤལ་དང་འདྲ་བས་མྱུར་ཏུ་ཤི་བ་ཡིན་ཏེ། གསུང་སྒྲོལ་ལས། གཅོད་པ་ནད་སློང་བའི་ཚེ། མོ་རྩིས་གཉིས་ལ་རྟེན་ནས་སུ། ཁྱིམ་དུ་ཁྲིད་དེ་ལྟོ་དགེ་དང་། །ཤེས་པ་རིམ་གྲོ་བྱས་པ་བཞིན། །ནད་པ་མྱུར་དུ་འགྲོ་བ་ཡིན། །ཅེས་སོ། །དེས་མོ་རྩིས་ཀྱི་ཤན་འབྱེད་སོང་། གཉིས་པ་སྨན་པས་རྩ་ཆུ་ལ་བརྟག་སྟེ། ཚ་གྲངས་ལ་སོགས་ནད་རྣམས་ངོ་ཤེས་པར་བྱས་ནས། ནད་གང་ཡིན་སོ་སོར་དམིགས་པས་གཅུན་ཏེ། དེས་ཀྱང་མ་ཐུབ་ན་མཐའ་གཏད་བྱེད་ཅིང་རྒྱབ་འདྲེ་སྣང་སྲིད་ཡོངས་ལ་གཏད་ཅིང་། ནད་བཅུད་སོ་སོའི་རྩི་དགུ་སྨན་བཅུ་བྱེད་པ་ཡིན་ཏེ། གསུང་སྒྲོས་ལས། སྨན་པས་རྩ་ཆུ་གཉིས་ལ་བརྟག །ཚ་གྲངས་ལ་སོགས་ཤན་འབྱེད་ནས། །སོ་སོར་བཅུན་ཏེ་རྒྱབ་འདྲེ་རྣམས། །སྣང་སྲིད་ཀུན་ལ་གཏད་ནས་སུ། །ནང་བཅུད་རྩི་སྨན་གང་འགྲོ་བྱེད། །ཅེས་སོ། །དེས་མོ་རྩིས་སྨན་གསུམ་གྱི་ཤན་འབྱེད་སོང་། བཞི་བ་ཆོ་འཕྲུལ་དང་། སེམས་ཅན་རང་རྒྱུད་པ་གཉིས་ཤན་འབྱེད་ནི། དང་པོ་ཆོ་འཕྲུལ་ནི། རང་གི་ཉལ་མལ་ན། སྦལ་ལྕོང་སྦྲུལ་གསུམ་ལ་སོགས་པའི་སེམས་ཅན་སྣང་ན། ཕཊ་ཅིག་བྱས་པ་ཙམ་གྱིས་རང་ཉིད་མ་ཅིག་ལབ་སྒྲོན་སྐུ་མདོག་མཐིང་ནག་ཏུ་གྱུར་པར་སྒོམས། ཡང་ཕཊ་ཉི་ཤུ་རྩ་གཅིག་བྱས་པ་ཙམ་གྱིས་རང་གི་ཐུགས་ཁ་ནས་མདའ་རྒོད་སྒྲོ་མ་ཉི་ཤུ་རྩ་གཅིག །གནམ་ལྕགས་གྱིས་མདེའུ་ཚྭ་ཚྭ་སི་ལི་ལི་འཕྲོ་བ་ཉི་ཤུ་རྩ་གཅིག་འཕྲོས་བས། སེམས་ཅན་གང་ཡིན་པའི་སྙིང་དཀར་ནག་མཚམས་སུ་རྒྱབ་པས་ཐལ་བ་བུན་གྱིས་སོང་བར་བསྒོམས། དེས་སེམས་ཅན་གང་ཡིན་པ་དེ་རང་གི་ཐོག་ཚུར་འཆོང་བའམ། ཡང་ན་སྐྱེས་པའམ། ཕིར་ཕྱུང་བས་ཐལ་ན། ཆོ་འཕྲུལ་ཡིན་པས། ཕཊ་དྲག་ཏུ་བརྗོད་ཅིང་། སེམས་ཅན་གང་ཡིན་པ་དེ། འཇིགས་སུ་རུང་བ་གཅིག་རེད་པར་བསམ་ཞིང་། ཁོའི་ཁ་དེར་རང་རང་ཕེབ་པར་བསམ་ཞིང་། ཁོས་ཟོས་པར་བསྒོམ་ལ། སྨད་ཀྱིས་བརྫིས་ནས་ཁོ་ཡི་ཐོག་ཏུ་འདུག་པ་ཡིན། དེ་ནི་ཆོ་འཕྲུལ་གྱི་ཤན་འབྱེད་དོ། ༈ །ད་ནི་སེམས་ཅན་རང་རྒྱུད་པའི་ཤན་འབྱེད་ནི། སེམས་ཅན་དེ་བྲོས་པས་ཐར་ན་གར་འགྲོར་ཐོང་ལ། དེའི་རྗེས་སུ་ཐེ་ཚོམ་མི་བྱེད་པ་གལ་ཆེའོ། །དེ་མན་རང་བཞིན་ཐོག་ཏུ་སྡད་ན། སེམས་ཅན་གང་ཡིན་པ་དེ་བསད་དོགས་པ་དང་། ཐེ་ཚོམ་བྱས་ན་རང་ཉིད་ན.བའམ། ཤི་དོག་པའི་ཕྱིར་ཤན་འབྱེད་པ་ཡིན། དེ་ཆོ་འཕྲུལ་དང་སེམས་ཅན་རང་རྒྱུད་གཉིས་ཀྱི་ཤན་འབྱེད་པ་སོང་། ༈ ལྔ་པ་མི་དང་མི་མ་ཡིན་པའི་ཤན་འབྱེད་པ་ནི། ནུབ་མོའམ་རང་ཁེར་གཅོད་བྱེད་པའི་ཚེ། མངོན་སུམ་དུ་སྣང་སྲིད་པ་མཐོང་ན། ཕཊ་ཅིག་བྱས་པ་ཙམ་གྱིས་རང་ཉིད་ཁོ་ཡི་ཁར་ཕབ་སྟེ། ཁོས་ཟོས་པར་བསྒོམ་ལ། ཕཊ་མང་དུ་བརྗོད། དེས་རང་ཞིར་འགྲོ་བ་ཡིན་སྟེ། དེའི་རྗེས་སུ་རང་ཉིད་ཀྱང་། སྐྱེ་མེད་ངང་དུ་འདུག་པ་ཡིན་ནོ། །མིའི་ནང་ནས་དགྲ་བྱུང་བས་ཁྲ་ཐེར་ལ་སོགས་ཅ་ཅོ་ཤོར་ན། བྱམས་སྙིང་རྗེ་བསྔོ་བ་སྨོན་ལམ་གྱིས་གདབ་བོ། །དེས་མ་ནུས་ན་ཁོའི་རྗེས་ལ་བཟུང་ལ། གཉན་ཁྲོད་འདི་ཉིད་ཡིན་ནམ་ལོག་གི་གཉན་ཆེན་ལ་གཏད་ནས། ཚར་ཚད་མ་བྱུང་གིས་བར་དུ་མཐའ་གཏད་བྱེད་པ་ཡིན། ཚར་ཚད་བྱུང་ནས་མཐུ་དང་མནན་པ་ལ་སོགས་བླ་མའི་ཞལ་ལས་ཤེས། དེས་མི་དང་མི་མ་ཡིན་པའི་ཤན་འབྱེད་པ་སོང་། དྲུག་པ་སྐྱོན་དང་ཡོན་ཏན་གཉིས་ཤན་འབྱེད་པ་ལ། དང་པོ་སྐྱོན་ནི། གཅོད་དབང་མ་ཐོབ་པར་སློབ་དཔོན་གྱི་ཕྱིར་འཆད་ཅིང་རང་གིས་ཉམས་སུ་ལེན་པ་དང་། སློབ་མས་ཀྱང་དབང་མ་ཐོབ་པར་ཉམས་སུ་ལེན་ཅིང་། མན་ངག་བཅུན་པས་ནད་པ་ལ་སོགས་དངོས་གྲུབ་སྐབས་རེ་བྱུང་ཡང་། དཔོན་སློབ་གཉིས་ཀ་ཚེའི་དུས་བསྟུང་ནས། ན་ཚ་དྲག་པོས་ཤི་བར་བྱེད་ཅིང་དམྱལ་བ་འགྲོ་བ་ཡིན་ཏེ། དཔལ་དུས་ཀྱི་འཁོར་ལོ་ལས། དབང་མེད་པ་ལ་དངོས་གྲུབ་མེད། །བྱེ་མ་བཙིར་བའི་མར་དང་འདྲ། །དེ་བས་དབང་བསྐུར་དམ་པ་ནི། །རབ་ཏུ་འབད་དེ་བླང་བྱར་བྱ། །ཅེས་པ་དང་། སྤྱི་རྒྱུད་ལས་ཀྱང་། གང་གིས་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་ཅིང་ཉན། །ཉམས་སུ་ལེན་ཅིང་མན་ངག་གིས། །དངོས་གྲུབ་སྐབས་རེ་ཐོབ་ན་ཡང་། །སློབ་དཔོན་སློབ་མ་གཉིས་ཀ་ནི། །ཚེ་ལ་བསྟུང་ནས་ཤི་མ་ཐག །དངོས་གྲུབ་མི་ཐོབ་དམྱལ་བར་འགྲོ། །ཅེས་སོ། །དེས་སྐྱོན་སོང་ནས། ཡོན་ཏན་ནི། དབང་ཐོབ་ཅིང་སློབ་དཔོན་གྱི་ཕྱིར་འཆད་ནས་དཔོན་སློབ་གཉིས་ཀས་ཉམས་སུ་ལེན་ཅིང་མན་ངག་གིས་གཅུན་ན། ནད་ཕན་པ་ལ་སོགས་དངོས་གྲུབ་གང་ཡང་ཐོབ་ཅིང་། ཕྱི་མར་ཕྱག་རྒྱ་ཆེན་པོ་མཆོག་གི་དངོས་གྲུབ་གང་ཡང་ཐོབ་པ་ཡིན་ཏེ། དཔལ་དུས་ཀྱི་འཁོར་ལས། ཡོངས་སུ་རྫོགས་པའི་དབང་ཐོབ་ནས། །སངས་རྒྱས་གོ་འཕང་རྒྱང་མི་རིང་། །ལག་ན་རིན་ཆེན་ཐོག་པའི་མིས། །ལོངས་སྤྱོད་རྒྱང་མི་རིང་བ་བཞིན། །དངོས་གྲུབ་མྱུར་ཏེ་ཐེ་ཚོམ་མེད། །དེས་སྐྱོན་དང་ཡོན་ཏན་གཉིས་ཀྱི་ཆིངས་སོ། ༈ །ལྔ་པ་ལོག་རྒྱུག་འབྱམ་གསུམ་གྱི་ཆིང་ལ་གསུམ་སྟེ། གཅོད་ལོག་པ་དང་། རྒྱུག་པ་དང་། འབྱམས་པའོ། །དང་པོ་ལོག་པ་ལ་གཉིས་སྟེ། ལོག་པའི་རྒྱུ་དང་། ལོག་ནོན་རང་གི་ངོ་བོ་གཉིས་སོ། །དང་པོ་ལ་བཞི་སྟེ། གཞུང་ཆུང་ལས་གཞི་རང་གི་འདྲེས་བསྒྱུར་ནས་ལོག་པ་དང་། གཉན་སའི་ལྷ་འདྲེས་བསྒྱུར་ནས་ལོག་པ་དང་། སྤྱོད་པ་མ་ལེགས་པ་དང་། གཏན་ལོག་ཆེན་པོ་དང་བཞིའོ། །དང་པོ་གཉན་ཁྲོད་དུ་འགྲོ་ཁར་སྐྲག་ཤུམ་ཤུམ་བྱེད་ནས་འགྲོ་མ་སྤོབ་པ་དང་། སྐྱོན་མང་པོ་བྱུང་ནས་འགྲོ་བཤོལ་བའོ། །གཉིས་པ་ནི་གཉན་སར་ལྷ་འདྲེའི་ཆོ་འཕྲུལ་འཇིགས་པ་བྱུང་ནས་བྲོས་པ་དང་། ངན་པ་ལ་ངན་པར་འཛིན་པ་དང་། བཟང་པོ་ལ་དགའ་བྲོད་དུ་འཛིན་ན་ལོག །གསུམ་པ་ནི་བྱང་ཆུབ་སེམས་དཔའི་བསླབ་བྱ་འགལ་བའི་སྤྱོད་པ་བྱེད་པའོ། །བཞི་པ་སྤྱིར་ཆོས་ཐམས་ཅད་དང་འགལ་བའི་སྤྱོད་པ་ངན་པ་རྣམས་བྱེད་པའོ། །གཉིས་པ.གཅོད་ལོག་ན་སྟག་མོས་ཝ་ཤ་ལེན། ཅེས་གསུངས་པས། གཉན་སར་ཕྱིན་ནས་ལྷ་འདྲེའི་ཆོ་འཕྲུལ་འཇིགས་པ་བྱུང་ནས་བྲོས་ན། རིག་པ་ངར་བསྐྱེད། ལྟ་བ་གཟེང་བསྟོད། མན་ངག་གནད་དུ་བསྣུན། མི་ཕོད་པ་ལ་ཐོག་རྫིས་བྱེད་ནས། བྲོས་ས་གང་ཡིན་པའི་གཉན་ས་དེར་ཕྱི་རྗེས་སུ་འོང་ནས་བསྡད་ཅིང་། མངོན་རྟོགས་ཀྱི་རིམ་པ་གོང་ལྟར་ཉམས་སུ་ལེན་ཅིང་། ཁྱད་པར་དུ་གང་ན་ཡོད་པའི་གནམ་ས་ཆ་ལང་རྡེབ་དཀྲུག་གིས་མཐའ་གཏད་བྱེད་ཅིང་། ཚར་ཚད་མ་བྱུང་གིས་བར་དུ་བསྡད་དོ། །དེ་ནི་སློང་ཆེན་སྙེམ་ཞུགས་ལོག་ནོན་གྱི་གནད་དོ། །གཉིས་པ་སྡུག་པ་ནི། གནད་གཅོད་སྡུག་ན་ལྷ་འདྲེ་གནད་ཀྱིས་བསྐུལ། ཅེས་གསུངས་པས། ཆོ་འཕྲུལ་ཚར་ཚད་གང་ཡང་མ་བྱུང་ན་སློང་མ་ཐུབ་པ་ཡིན་ཏེ། དེ་ལ་གོང་དུ་བསྟན་པའི་ཕྱི་ནང་གསང་གསུམ་གྱི་མཐའ་གཏད་གང་དགོས་སྐབས་དང་བསྟུན་ལ་བྱའོ། །གསུམ་པ་འབྱམས་པ་ནི། བུ་ལོན་སོད་རྟིང་བདས། ཁ་མཆུ་དུམ་རྟིང་བཟློག་ཟེར་བ་ཡིན་པས། ཆོ་འཕྲུལ་ཚར་ཚད་ཚུལ་བཞིན་དུ་བྱུང་ཡང་། ད་དུང་མལ་དུ་བསྡད་ན་འབྱམས་པ་ཡིན་ཏེ། དེའི་རྟགས་ལ། གོས་ནག་པོ་བསྐོན་ཆིས་སམ། མི་རྣམས་ངོ་འཛུམ་ནག་པ་དང་། གྱེན་ལ་འགྲོ་ཆིས་བྱེད། རྡོ་འཕྲོ་ཐུར་ལ་འགྲོ་ཆིས་བྱས་པའམ། གོས་ཕུད་ནས་གྱོན་ཆིས་བྱས་པ་དང་། ཞལ་ལྕེ་མདུན་མ་བྱས་རྒྱབ་བཟློག་པའམ། སྤྱད་པ་ཁྱེར་རྒྱབ་ཚུར་ལ་གཏད་པའམ། ཁྲལ་བུ་ལོན་སོད་རྒྱབ་བདས་པ་རྨིས་པ་དང་། གཞན་ཡང་སྦྲུལ་བྱུང་ནས་བསྐོར་བ་དང་། སྐྱས་པ་ལང་ལོང་ཚུར་ལ་བྱུང་བ་དང་། སེམས་ཅན་གྲོལ་ཟིན་བཏག་ཆིས་བྱས་པའམ། ཞིང་རྨོ་ཆིས་བྱས་པ་རྨིས་ན། ཆོད་རྒྱབ་བསྡད་ཡུན་རིང་ན་ནད་བསྣོན་ཆིས་ཡིན་ཏེ་འབྱམས་པའོ། །དེ་ལ་གཅོད་འབྱམས་ན་རྣལ་འབྱོར་ཐལ་བ་སྟོར་ཅེས་གསུངས་པས། མྱུར་དུ་སྤོང་བར་བྱའོ། །དེས་ལོག་རྒྱུག་འབྱམས་གསུམ་གྱི་ཆིངས་སོ། །དྲུག་པ་བུག་རལ་འཁྱམས་གསུམ་གྱི་ཆིང་ལ་གསུམ་སྟེ། བུག་པ་དང་། རལ་བ་དང་། འཁྱམས་པའོ། །དང་པོ་གཅོད་བུག་པ་ནི། གཉན་ས་ནས་ལོགས་སུ་ཉིན་བསྐོར་ལ་སོང་ཀྱང་མ་ཕེབས་ནས། ཞག་ལ་ཐོག་ན་བུག་པ་ཡིན་ཏེ། གཅོད་བུག་ན་དམིགས་པ་རྒྱང་ཞག་གཅེས། ཅེས་གསུངས་པས་ཞག་ལ་ཐོག་ན་སྔར་གྱི་གཉན་ས་དེར་རང་ཉིད་འདུག་པར་བསྒོམ་ཞིང་སྔར་ལྟར་ཉམས་ལེན་ལ་གཅུན་པར་བྱའོ། །གཉིས་པ་རལ་བ་ནི། གཉན་སར་ཆོད་མ་ཚུད་པར་འགྲོ་དགོས་བྱུང་ན་རལ་བ་ཡིན་ཏེ། འགྲོ་མི་དེས་རྡོ་གཏེལ་བཟུང་བ་ནི། རང་གི་ཞབས་ནས་རྡོ་བླང་ནས། ཧཱུྃ་བྲིས། རང་ཉིད་རྗེ་བཙུན་མར་བསྐྱེད། འོད་ཟེར་ལྕགས་ཀྱུ་ལྟར་འཕྲོས་པས། ལྷ་འདྲེ་ཐམས་ཅད་བསྡུས་ནས་རྡོ་ལ་བསྟིམ། རང་གིས་མཛུ་གུ་ལྔ་མཁའ་འགྲོ་མ་ལྔར་བསྒོམས་ནས། གནས་པོ་དེ་ཙིར་གྱིས་བཟུང་བར་བསྒོམ། སྣོད་དུ་བཅུག་ལ། སྣོད་དེ་ལྕགས་ཀྱི་སྤར་བུར་བསམ་པའི་ཁ་སྦྲུལ་ནག་གི་བསྡོམ་པར་བསྒོམ། དེ་ལུས་ལ་འཆང་ཞིང་ཁྱེར་ནས་རང་གི་ཞབས་སུ་བཅུག་ལ། གར་འདུག་ས་དེར་སྔར་གྱི་གཉན་ས་དེར་ཡིན་པར་བསྒོམ་ལ། ཚར་ཚད་མ་བྱུང་བར་དུ་སྔར་ལྟར་ཉམས་ལེན་བྱའོ། །གཅོད་རལ་ན་རྡོ་རྗེའི་གོ་ར་གཅེས། ཅེས་གསུངས་པས། འགྲོ་མི་དེ་ཐལ་བ་དང་། མལ་དུ་འདུག་མིའི་གཅོད་པ་རྣམས་ཀྱིས་དཔོན་དེས། རང་ཉིད་ཁྲོས་མ་ནག་མོར་བསྒོམ་ལ་ཐུགས་ཀ་ནས་གནམ་ལྕགས་ཀྱིས་རྡོ་རྗེ་དཔག་ཏུ་མེད་པ་འཕྲོས། རྡོ་རྗེའི་གུར་ཁང་ཆེན་པོ་གཅིག་ཏུ་གཅོད་སྒར་བ་ཀུན་ཚུད་པར་བསྒོམ། གཅོད་པ་གཅིག་པུ་ཡིན་ཞིང་མལ་དུ་འདུག་མི་མེད་ན། རྡོ་གཏེལ་བཟུང་དགོས། རྡོ་རྗེའི་གོ་ར་ནི་མི་དགོས་གསུངས། གསུམ་པ་འཁྱམ་བ་ནི། གཉན་མིག་མ་ནོན་པ་ཡིན་ཏེ། གཅོད་འཁྱམས་ན་ལྷ་འདྲེའི་བརླ་བཟུང་གཅེས། ཅེས་གསུངས་པས། གཉན་ས་དེའི་གཉན་མིག་མ་ནོན་ན། གཉན་མིག་ལོགས་སུ་སྣང་ན། དེའི་ས་རྡོ་ཤིང་གསུམ་བླངས་ལ་རང་གི་ཞབས་སུ་བཅུག་གོ། །དེས་བུག་རལ་འཁྱམས་གསུམ་སོང་། ༈ བདུན་པ་བདུད་བཞི་གེགས་སེལ་གྱི་ཆིང་ལ། གཉིས་སྟེ། བདུད་ཀྱི་ངོ་བོ་ངོས་བཟུང་བ་དང་། དེ་ཉིད་བསལ་བའི་ཐབས་སོ། །དང་པོ་ལ་གསུམ་སྟེ། དང་པོ་བདུད་ཀྱི་ངོ་བོ་ནི་གཉིས་འཛིན་གྱི་ཤེས་པ་རང་རྒྱུད་པ་ཡིན་ནོ། །གཉིས་པ་ངེས་ཚིག་ནི། གང་ཞིག་དགེ་བ་ལ་བར་དུ་གཅོད་པར་བྱེད་པས་ན་བདུད་ཞེས་བྱའོ། །གསུམ་པ་དབྱེ་བ་ལ་བཞི་སྟེ། བཀའ་ཚོམ་ལས། ཐོག་བཅས་བདུད་དང་ཐོག་མེད་བདུད། །དགའ་བྲོད་བདུད་དང་སྙེམ་བྱེད་བཞི། །ཅེས་གསུངས་པས། དང་པོ་ཐོག་བཅས་ཀྱི་བདུད་ནི། ཕྱི་སྣང་བ་མངོན་པར་ཞེན་ཅིང་། གཟུགས་སྒྲ་དྲི་རོ་རེག་བྱའི་ཆོས་ལ་སོགས། བཟང་པོ་ལ་ཆགས་ཤིང་། ངན་པ་ལ་སྡང་བ་ཡིན་ལ། བར་པ་ལ་གཏི་མུག་ཡིན། ལག་ལེན་དུ་མི་དང་གཅན་གཟན་ལ་སོགས། དངོས་སུ་བྱུང་བ་ལ་སྐྲག་ཅིང་བྲོས་པས། སྣང་བ་དགྲར་ལང་པ་ལ་ཟེར་རོ། ༈ །གཉིས་པ་ཐོག་མེད་ཀྱི་བདུད་ནི། སྤྱིར་ཉོན་མོངས་པ་དུག་ལྔ་དང་། གཟུང་འཛིན་ལ་སོགས་རྣམ་རྟོག་གི་ཀུན་ཏུ་བཏག་པ་རྣམས་ཡིན་ལ། ལག་ལེན་དུ་མི་དང་གཅན་གཟན་ལ་སོགས་པ་དངོས་སུ་བྱུང་བ་ལ་སྐྲག་ཅིང་བྲོས་པས། སྙང་བ་དགྲར་ལངས་ལ་ཟེར་རོ། ༈ །གཉིས་པ་ཐོག་མེད་ཀྱི་བདུད་ནི། སྤྱིར་ཉོན་མོངས་པ་དུག་ལྔ་དང་གཟུང་འཛིན་ལ་སོགས་རྣམ་རྟོག་གི་ཀུན་ཏུ་བཏགས་པ་རྣམས་ཡིན་ལ་ལག་ལེན་དུ་གཉན་སར་རྨི་ལམ་ངན་པ་ལ་སོགས་འདྲེ་གདོན་ལ་སྐྲག་ཅིང་བྲོས་པས་གདོན་གྱི་སྣ་འདྲེན་རེད་ནས་ན་ཚ་སྡུག་བསྔལ་སླར་ཡང་འཕེལ་བ་ཟེར། ༈ གསུམ་དགའ་བྲོད་ཀྱི་བདུད་ནི། སྤྱིར་ཉམས་དང་ཏིང་འཛིན་ལ་སོགས་འཇིག་རྟེན་གྱི་བསྙེན་བཀུར་ལོངས་སྤྱོད་ལ་དགའ་ཞིང་བྲོད་པ་ཡིན་ལ། ལག་ལེན་དུ་གཉན་སར་ན་ཚ་སྡུག་བསྔལ་ཞི་བ་དང་། རྨི་ལམ་བཟང་པོ་དང་། དགྲ་གདོན་གྱི་མི་ཚུགས་པ་ལ་སོགས་པའི་བྱིན་རླབས་ཕྲ་མོ་ལ་དགའ་ཞིང་བྲོད་པ་ལ་ཟེར། ༈ བཞི་པ་སྙེམས་བྱེད་ཀྱི་བདུད་ནི། སྤྱིར་འཁོར་འདས། ལྷ་འདྲེ། ཕན་གནོད་བདེ་སྡུག་ལ་སོགས་པའི་གཉིས་འཛིན་རྣམས་ཡིན་ལ། ལག་ལེན་དུ་གཅོད་པ་བྱིན་རླབས་ཡོད་དམ་མེད། ན་ཚ་ཕན་ནམ་མི་ཕན། གཉན་ཁྲོད་འགྲིམ་ཕོད་དམ་མི་ཕོད། སྐྱོན་ཡོད་མེད་ལ་སོགས་ལ་མོ་བཏབ་སྟེ། གཏོ་དགེ་བྱེད་ནས། ན་ཚ་ཨེ་དྲག་བསམ་པ་ལྟ་བུ། དུར་ཁྲོད་དང་ལུང་སྟོང་དང་། འབྲོག་དགོན་པ་ལ་སོགས་པའི་ས། གཉན་ཁྲོད་རྣམས་སུ་ཕྱིན་ཡང་། བདག་ལ་བར་ཆད་དང་གནོད་པ་མི་འབྱུང་སྟེ། ཅིའི་ཕྱིར་ཞེ་ན། བདག་ལྟ་བུ་ལ་ལྷ་དང་བླ་མས་སྤྱན་གྱིས་གཟིགས། དཀོན་མཆོག་གསུམ་གྱིས་ཐུགས་རྗེས་སྐྱོབས། དཔའ་བོ་མཁའ་འགྲོས་སྲུང་སྐྱོབ་བྱེད་པའི་སྙེམས་འཆང་བ་དང་། གཅོད་ཀྱི་གདམས་པ་ཟབ་མོ་ཡོད་སྙམས་པའི་གདེང་འཆང་བ་དང་། ནང་དུ་ལྷ་མེད་འདྲེ་མེད་ཀྱི་སྟོང་ཉིད་རྟོགས་པའི་ཉམས་ལེན་ཡོད་བསམ་པའི་ངོམ་པ་དང་། ལྷ་འདྲེའི་ཆོ་འཕྲུལ་ཅི་བྱུང་ཡང་ལུས་སྦྱིན་པས་ཆོག་སྟེར་ནུས་ན་འདྲེ་འོང་མི་ནུས། ཁྱེར་མི་ནུས། བཟའ་མི་ནུས། ཁོ་རང་ལོག་ནས་འགྲོ་བས། དེ་ལྟར་བྱས་པས་ཆོག་སྙམ་ནས་གཅོད་བྱེད་པ་ལ་ཟེར། གོང་དུ་བསྟན་པའི་ཐོག་བཅས་ཀྱི་བདུད་དེ་ལ་ནམ་ཡང་མི་ཕོད་པའི་ཡུལ་དྲུག་ཡོད་དེ། མེ་དང་། ཆུ་དང་། དུག་དང་། མཚོན་དང་། ཁྱི་དང་། གཡང་ཟ་རྣམས་ཀྱི་སྲོག་ལ་བརྒོལ་བས་མི་ཕོད་དོ། །གཞན་ཡང་རྡོ་ཚེ་ཟད། ས་ཚེ་ཟད། ཤིང་ཚེ་ཟད། དེ་རྣམས་ཀྱིས་སྲོག་ལ་རྒོལ་བས་མི་ཕོད་སྟེ། མ་ཅིག་གིས། ཤལ་རོང་སྒྱེད་པོ་མི་བཙུགས་འཚལ། །བྲག་ཟུར་ཕྱམས་རྩེ་མི་བརྫི་འཚལ། །ཅེས་གསུངས་སོ། །དེས་བདུད་བཞིའི་ངོས་བཟུང་བ་སོང་། ༈ གཉིས་པ་བདུད་དེ་ཉིད་བསལ་བའི་ཐབས་ལ་གསུམ་སྟེ། བློ་རབ་འབྲིང་ཐ་མ་གསུམ་གྱི་བསལ་བ་དང་། དམ་ཚིག་གི་སྒོ་ནས་བསལ་བ་དང་། ཡོན་ཏན་གྱི་སྒོ་ནས་ཞབས་བསྡུ་བའོ། །དང་པོ་ལ་གསུམ་སྟེ། དང་པོ་བློ་རབ་ཀྱི་འདྲེ་བདུད་དང་རང་སྣང་དུ་གཅོད་པའི་ཐབས་ནི། མ་ཅིག་ལབ་སྒྲོན་མས། རེ་བ་མེད་པ་སངས་རྒྱས་གཅོད། །དོག་པ་མེད་པས་འཁོར་བ་གཅོད། །ཉམ་ང་མེད་པ་འདྲེ་བདུད་གཅོད། །འགོས་འཛེམས་མེད་པས་ནད་རིམས་གཅོད། །གཅོད་བྱ་མེད་པས་ཆོས་ཀུན་གཅོད། །ཅེས་གསུངས་པས། དེ་ལྟ་བུའི་དོན་ནི་གཅོད་གསང་སྤྱོད་རྣལ་ལམ་མའི་ནང་དུ་གསལ་བས་དེར་ཤེས་སོ། །གཉིས་པ་བློ་འབྲིང་གིས་འདྲེ་བདུད་གཅོད་པའི་ས་བཙལ་བ་ནི། འདྲེ་བདུད་ཁྱོད་ལུས་ལ་གནོད་དམ་སེམས་ལ་གནོད། ལུས་ནི་བེམ་པོ་རྡོ་དང་ཁྱད་མེད་པས་རྡོ་ལ་འདྲེ་བདུད་གནོད་དམ། སེམས་ནི་དངོས་མེད་ནམ་མཁའ་དང་ཁྱད་མེད་པས། ནམ་མཁའ་ལ་འདྲེ་བདུད་གནོད་དམ། སེམས་ངས་མ་མཐོང་བ་ལ། འདྲེ་བདུད་ཀྱིས་གང་ནས་མཐོང་སྙམ་པའོ། །སེམས་ལྷོད་ཀྱིས་ཀློད་ལ་བཞག་གོ། ༈ །གསུམ་པ་དབང་པོ་ཐ་མས་འདྲེ་བདུད་ཉིད་ལ་གཏད་པ་ནི། ཟབ་དོན་ཐུགས་སྙིང་ལས། གནས་པོ་བདུད་ལ་གཡར་བས་གཞི་འབྲས་གཅིག་ཏུ་འདྲེས། སྐྱེལ་མ་དགྲ་ལ་བཅོལ་བས་འཇིགས་མེད་བཙན་སར་ཐར། ནད་པ་འདྲེ་ལ་བཅོལ་བས་ནད་མེད་བདེ་བར་འཚོ། ལམ་ཁྱེར་རྐྱེན་ལ་བྱས་པས་མི་མཐུན་འགལ་རྐྱེན་བྲལ། ཞེས་པ་ནི། གཉན་ས་དེ་རུ་སླེབ་ནས་ཉམས་ལེན་འདི་ལྟར་བྱ་སྟེ། འཁོར་བ་ཐོག་མ་མེད་པ་ནས་ལུས་ངག་ཡིད་གསུམ་བདག་ཏུ་བཟུང་ནས། གཅེས་འཛིན་བྱས་པས་གནས་སྐབས་སུ་འདྲེ་དང་གདོན་བགེགས་གནོད། ན་ཚ་དང་སྡུག་བསྔལ་བྱུང་། མཐར་ཐུག་ཁམས་གསུམ་དུ་འཁོར། རིགས་དྲུག་ཏུ་འཁྱམ། དེ་བདག་འཛིན་གྱི་ལན་པ་ཡིན་པས། ད་ནི་ངའི་ལུས་འདིས་རྒྱུ་སྔོན་གྱིས་ལས་ལ་གྲུབ། རྐྱེན་ཕ་མའི་འདོད་ཆགས་གིས་བསྐྱེད། འབྲས་བུ་དལ་འབྱོར་གྱི་མི་ལུས་ཐོབ། དབང་པོ་སྐྱེ་མཆེད་ཐམས་ཅད་ཚང་བའི་ལུས་པོ་འདི་མཛེས་ཤིང་གཙང་བ་ཡིད་དུ་འོང་བ་གཅེས་ཤིང་ཕོངས་པ། དགོས་ཤིང་མཁོ་བའི་ལུས་འདི། སྤྱིར་འགྲོ་དྲུག་སེམས་ཅན་གྱི་བླུད་དུ་འབུལ། དགོས་དྲིན་ཅན་ཕ་མའི་དོན་དུ་བསྔོ། ཡང་དགོས་ལྷ་འདྲེ་ཁྱེད་ཚོའི་དོན་དུ་གཏོང་བས། རིང་ན་གྲང་མོར་ཟོ། མི་རིང་ན་ཆོས་ལ་ཟོ། ཞེན་པ་ཏིལ་འབྲུ་ཙམ་ཡང་མི་བྱེད་དོ། །སུ་འདོད་པས་ཁྱེར་གཅིག་བྱས་པས། ལུས་ལ་ཆགས་ཞེན་མི་བྱེད་པར་མཆིལ་སྣབ་བཞིན་དུ་བོར་ལ་བཞག །མཛེ་རོ་བཞིན་དུ་བསྐྱུར་ལ་ཐོང་། ཕྱི་ས་བཞིན་དུ་སྤང་ལ་བཏང་། ས་རྡོ་བཞིན་དུ་བདག་འཛིན་མེད་པར་བཞག །འདྲེ་དང་གདོན་བགེགས་རྣམས་ལུས་པོ་ཀྱི་མ་ལུས་པར་ཟོས་པར་བསྒོམ་ལ་ལུས་དངོས་འཛིན་ཅན་དེ་ནི་ཁྱོད་ཆོས་ཟོས། སེམས་སྟོང་པ་ཉིད་ནི་ངོ་བོ་མི་འདུག །དེ་ལ་བདག་འཛིན་དང་གཅེས་འཛིན་གྱི་དགོས་པ་མི་འདུག །ཉ་ར་བྱ་རྒྱུ་དང་སྲུང་རྒྱུ་མི་འདུག །ལུས་ཀྱི་དུཿཁ་དང་གཉེར་ཁ་མི་དགོས་པར་འདུག །སྙམ་ལ་ལྷོད་དེ་འཇོག་པ་ཡིན། གཅོད་མཁན་ཕལ་ཆེར་ལུས་མི་གཙང་བའི་ཕུང་པོ་རྣག་ཁྲག་གི་རྐྱལ་པ། ངར་སྣབ་ཀྱི་ཕུང་པོ་འདི་བདག་ལ་དགོས་པ་མི་གདའོ། །སུ་འདོད་པས་ཁྱེར་ཅིག་ཟེར་ཏེ། དེ་ལ་སྐྱོན་བཞི་ཡོད་པས་མི་འཐད་དོ། །གཅིག་ཏུ་ཞེན་ནས་སྦྱིན་པར་གཏོང་ན་མ་དག་པའི་སྦྱིན་པར་འགྲོ་ནས་ཚོགས་མི་རྫོགས། གཉིས་པ་ལ་བདག་ལ་མི་མཁོ་བ་གཅིག་འདྲེ་ལ་སྦྱིན་ཡང་མི་ཕན་ཏེ་ཁོ་ལ་མི་མཁོ། གསུམ་པ་འདྲེས་ཁྱེར་དུ་བྱུང་དོགས་པའི་སྣ་བཀབ་ཏུ་འགྲོ། བཞི་པ་ལུས་མི་གཙང་བའི་ཐུམ་པོ་ཡིན་པས། འདྲེ་ཞེན་པ་ལོག་ནས་མི་འདོད་ལ་རེ་བའི་ཕྱིར་ཡིན་པས་མི་འཐད་དོ། །འོ་ན་ཅི་ལྟར་བྱེད་ན་ལས་མཐའ་གསུམ་ལ་གོ་བ་ལེན་དགོས་ཏེ། ལས་མཐའ་གསུམ་ནི་ང་ན་ང་ཐོག་བཏང་། སྐྱུག་ནི་བྲོ་ན་བྲོ་ཐོག་ཏུ་བཏང་། འཇིགས་པ་འཇིགས་པའི་ཐོག་ཏུ་བཏང་། ཅེས་གསུངས་པས། ཡང་ན་ང་ཐོག་ཏུ་བཏང་བ་ནི། སེམས་ཅན་འདི་ཙམ་གཅིག་འཁོར་བར་འཁྱམ་པ་ལ། ང་གཅིག་པུ་འཁོར་བར་འཁྱམས་ན་ཅི་ཡིན། འདི་རྣམས་སྡུག་བསྔལ་གྱི་མནར་ན། ང་གཅིག་པོ་སྡུག་བསྔལ་བ་ཅི་ཉེས། སེམས་ཅན་འདི་རྣམས་ཐམས་ཅད་ཀྱི་དོན་དུ། བདག་གིས་ལུས་ངག་ཡིད་གསུམ་གླུད་དུ་བསྔོ་བ་ལ་འགྲོ་སྙམ་པའི་འདུན་པ་དང་ལྡན་པས། ཡ་ང་བ་བག་ཚ་བ་གང་བྱུང་བ་ལ་མི་བྲོས་པར་སླར་དེ་ཀ་བརྒྱུད་དེ་ཕཊ། ཅེས་བརྗོད་དོ། །ལུས་ངག་ཡིད་གསུམ་ཤིང་བཅད་ནས་འགྱེལ་བའི་སྡོང་པོ་ལྟར་ཁྲེས་སེ་བསྐྱུར་བར་བྱའོ། །སྐྱུག་བྲོ་ན་བྲོ་ཐོག་ཏུ་བཏང་བ་ནི། གང་སྐྱུག་བྲོ་བའི་མི་གཙང་བའམ། ཤ་རུལ་ལ་སོགས་པའམ། གོས་རུལ་ལ་སོགས་ཡིད་ཡུལ་དུ་གང་སྐྱུག་བྲོ་བའི་སྟེང་དུ་སྙེམ་ཞུགས་པ་དེ་ཀ་ཆེད་དུ་གཉེར་ལ། གཟའ་བཏུང་གོས་སོགས་ལོངས་སྤྱོད་དེ་སྐྱུག་བྲོ་ན་སྐྱུག་པ་སླར་འཐུང་ཞིང་། རྗེས་སུ་ཅི་ཡང་མི་དམིགས་པའི་ངང་ལ་བསྐྱུར་བར་བྱའོ། །མི་ཕོད་པ་ལ་ཐོག་བརྫིས་བཏང་བ་ནི། ལུས་ངག་ཡིད་གསུམ་གྱིས་ལ་སྤྱོད་པ་རྦུད་ཆོད་ལ་བཏང་ལ། ལྷ་འདྲེ་མི་གསུམ་ལ་སོགས་གང་མི་ཕོད་ཅིང་། ཐེ་ཚོམ་དང་སྙེམ་ཞུགས་པ་དེ་ཉིད་ཀྱི་དུས་སུ་རྟོགས་པ་སྣ་མ་བསྐྱིལ་བར་ཉམས་བྱུང་རྒྱལ་དུ་བཏང་། གང་ལ་ཆགས་པ་དེ་སྤང་། སྡང་བ་དེ་དང་དུ་བླངས་མདོར་ན་གཉིས་འཛིན་གྱི་མདུད་པ་བཤིག་ལ། སྣང་བ་ཐམས་ཅད་ཐད་ཀར་བཅད་ལ་བཞག །དེ་རྣམས་བྱས་པས་བདུད་ལམ་དུ་སློང་ཉོན་མོངས་པ་གྲོགས་སུ་འཆར། ལྷ་འདྲེ་སྲིད་དུ་ཆོད། བདག་ཏུ་འཛིན་པའི་འཁྲི་བ་ཆོད། འཁྲུལ་སྣང་ཞིག །ལྷ་འདྲེ་མི་གསུམ་དབང་དུ་འདུ། ཅི་བྱས་ལམ་དུ་འགྲོ། བྱང་ཆུབ་ཀྱི་གོ་འཕང་བརྙེས་པར་འགྱུར་རོ། །དེ་ནི་གཙང་ཙོག་རོ་སྙོམ་འཇིགས་པ་ཐོག་བརྫིས་ཀྱི་གནད་དོ། །དེས་ནི་བློ་རབ་འབྲིང་ཐ་མའི་སྒོ་ནས་བདུད་བས ལ་བ་སོང་། ༈ པདྨའི་གཏེར་གཅོད་ལས། གཉིས་པ་དམ་ཚིག་གི་སྒོ་ནས། བདུད་བསལ་བ་ལ་གསུམ་སྟེ། ལྟ་བའི་དམ་ཚིག །བསྒོམ་པའི་དམ་ཚིག །སྤྱོད་པའི་དམ་ཚིག་གོ། །ལྟ་བའི་དམ་ཚིག་ནི། ཡར་སངས་རྒྱས་ལ་རེ་བ་མི་བཅའ། མར་ངན་སོང་ལ་ཉམས་མི་ང་། འཆི་བདག་གི་གཤིན་རྗེའི་བཀའ་ཆད་དང་། བསུན་མ་བྱུང་ཡང་སྐྲག་འཇིགས་མི་བྱ། དབང་ཕྱུག་ཆེན་པོ་བྱུང་ཡང་གྲུབ་མཐའ་མི་སྤང་། བདུད་བྱེ་བ་དུང་ཕྱུར་གྱི་དམག་དཔུང་བྱུང་ཡང་གཡོ་འགུལ་མི་བྱ། རང་གི་སྙིང་ཁར་མདའ་བཙུག་ཀྱང་ཁོང་ཁྲོ་མི་བྱ། འགྲོ་བ་ཁྲི་ཕྲག་དུས་གཅིག་ལ་རྒྱལ་ནད་ཀྱིས་འཆི་བར་མཐོང་ཡང་། སེམས་བསྐྱེད་མི་དོར། རང་ད་ལྟ་ཉིད་དུ་སངས་རྒྱས་ཀྱང་། རང་དོན་དུ་གཞན་སུ་ལ་ཡང་གནོད་འཚེ་མི་བྱེད། གནམ་ས་ཐམས་ཅད་དུས་གཅིག་ལ་འཁྲུགས་ཀྱང་དགོངས་པ་ལ་གཡོ་བ་མེད། ལྟ་བ་ཀློང་གྱུར་གྱི་ངང་དུ་ཐག་ཆོད་ལ་བཞག་གོ། །བསྒོམ་པའི་དམ་ཚིག་ནི། སྔོན་འགྲོའི་ཏིང་ངེ་འཛིན་ལ་གནས་པའི་ཚེ། རང་འདོད་ཀྱི་འཁྲི་བ་ཅུང་ཟད་ཀྱང་མི་བསམ། དངོས་གཞིའི་ཏིང་ངེ་འཛིན་ལ་གནས་པའི་ཚེ། གཞན་དོན་གྱི་བློ་རྒྱ་མི་བསྐུམ་ཞིང་ཇེ་ཆེར་བསྐྱེད་ལ། མི་དང་མི་མ་ཡིན་པའི་བསྐུལ་སྤྱོད་ཟེར་ཏེ། སློང་གི་ཆོ་འཕྲུལ་ལ་སོགས་ཅི་བྱུང་ཡང་རི་བོ་ལྟར་གཡོ་འགུལ་མེད་པ། རྒྱ་མཚོའི་འཇིངས་ལྟར་ཁ་གཏིང་མེད་པ། ཉི་ཟླ་ལྟར་གསལ་འགྲིབ་མེད་པ་དང་། རྒྱུན་འབབས་ཀྱི་ཆུ་བོ་ལྟར་རྒྱུན་ཆད་མེད་པ། ནམ་མཁའ་ལྟར་ཡང་དོག་མེད་པ། ས་གཞི་ལྟར་འཕོ་འགྱུར་མེད་པར་བྱ། དེ་ཡང་ལུས་དུར་ཁྲོད་ཀྱི་རོ་བཞིན་དུ་བསྐྱུར། ངག་པི་ཝང་གི་གསང་ཐག་བཅད་པ་ལྟར་བསྐྱུར། སེམས་རན་འཐག་ཆུ་བཅད་པ་ལྟར་བསྐྱུར། ལུས་ངག་ཡིད་གསུམ་གྱི་འདུ་ཤེས་ཐམས་ཅད་སོག་ཕོན་ཐག་པ་བཅད་པ་ལྟར་ཤིག་སེ་བསྐྱུར་ལ་བཞག་ཅིང་། གཡོ་འགུལ་བསམ་སེམས་སྲག་སྲིག་གང་ཡང་མི་བྱའོ། །སྤྱོད་པའི་དམ་ཚིག་ནི། ཉན་ཐོས་ཀྱི་འདུལ་ཁྲིམས། བྱང་ཆུབ་སེམས་དཔའི་བསླབ་པ། གསང་སྔགས་ཀྱིས་དམ་ཚིག་རྣམས་མ་ཉམས་པར་བསྲུང་ཞིང་། དེ་རྣམས་དང་མི་འགལ་བར་བྱེད་པ་ནི། སྤྱོད་པའི་དམ་ཚིག་ཡིན་ལ། བྱེ་བྲག་ཏུ་ལྷ་ལ་སོགས་པ་རང་ལ་ཕན་པར་བྱེད་པ་རྣམས་ལ་དགའ་བའི་འདུན་པས་གསོལ་མཆོད་མི་བྱ། འདྲེ་བདུད་ལ་སོགས་པས་རང་ལ་གནོད་བྱ་བ་ཅི་བྱས་ཤིང་འཁོན་དུ་ཅི་བཙལ་ཀྱང་། དེ་རྣམས་གང་ལ་ཡང་ངན་ལན་ཁྲོ་གཏུམ་རྣམ་འགྱུར་ངན་པ་གནོད་སེམས་ངན་སྤྱོད་གང་ཡང་མེད་པར་བྱེད་པ། བཟང་བྱས་ངན་བྱས་གང་ཡང་ཁྱད་མེད་པ། དུག་དང་བདུད་རྩི་རོ་མཉམ་པ། གཅོད་བྱེད་པའི་དུས་སུ་གཞུང་ལུགས་ཀྱིིས་ཆོས་ཉམས་སུ་ལེན་ལུགས་ཚུལ་བཞིན་མ་གཏོག་པ་གཞན་གང་ཡང་མི་བྱེད། ཁྱད་པར་དུ་རིགས་བྱེད་མཐའ་དག་སྤང་སྟེ། རྒྱ་ཀོང་ཙེ་འཕྲུལ་གྱི་རྒྱལ་པོ་བྱུང་ཡང་རྩིས་མི་བྱ། བྲམ་ཟེ་པྲ་སེ་ན་བྱུང་ཡང་མོ་མི་བཏབ། གཤིན་རབ་མི་བོ་བྱུང་ཡང་བོན་མི་བྱེད། ཕྱག་ན་རྡོ་རྗེ་བྱུང་ཡང་སྲུང་སྐྱོབ་མི་ཞུ། གལ་ཏེ་རང་ལ་གཞན་གྱི་བསྐུར་བའི་སླད་དུ་བྱས་ཀྱང་མི་དགག་པར་དེ་ལ་སྤྲོ་བ་མི་བསྐྱེད་དོ། །ཐམས་ཅད་གཞན་དོན་དུ་བསྔོ། འཇིག་རྟེན་གྱི་བྱ་བ་ལ་མི་འཇུག །གཞན་འདྲེ་འདུལ་ལ་སོགས་པའི་རིམ་གྲོ་ལ་མི་འགྲོ། གཅོད་ལ་འགྲོ་བའི་དུས་གསང་། གནས་མི་བསྟན། ཚར་ཚད་སློང་ཚད་མི་བསྒྲག་གོ། །དངོས་གྲུབ་ཅི་བྱུང་ཡང་སྤྲོ་བ་མི་བྱ། ལེགས་ཉེས་ཀྱི་ལྟས་ཅི་བྱུང་ཡང་དགག་སྒྲུབ་མི་བྱ། ལྷ་འདྲེས་ཆོ་འཕྲུལ་ཅི་བསྟན་ཅིང་སྣང་སྲིད་ཐམས་ཅད་གཡོ་བའི་སློང་ལ་སོགས་ཕྱི་ནང་གསང་གསུམ་ཅི་བྱུང་ཡང་། ཁྱད་མེད་གལ་མ་མཆིས་སུ་བོར། གང་ལ་ཡང་སྙམ་སྙེམ་མེད་པར་ཐག་ཆོད་རྦུད་ཆོད་དུ་བཏང་། སྨྱོ་སྤྱོད་ཀྱིས་དབང་གིས་གཉན་སར་ཐབ་གཞོབ་དང་། ས་རྐོ་རྡོ་ཟློག་ཤིང་བཅད་ཆུ་མིག་དཀྲུག་མཚོ་བརྡུང་། བྲག་བཤག་པ་ལ་སོགས་པ་ལྷ་འདྲེའི་གནས་ལ་སོགས་ལ་ཐུབ་ཐུབ་རུང་རུང་གང་ཡང་ཆེད་དུ་གཉེར་ནས་མི་བྱ། སྟབ་ཀྱིས་དེ་འདྲ་རང་ངམ་གཞན་གྱིས་བྱེད་པ་བྱུང་ན་ཡང་། དེ་རྣམས་ལ་རྣམ་རྟོག་ཁོང་འཁྲིག་སྙམ་སྙེམ་གང་ཡང་མི་བྱ། རྫས་ངན་གྱི་དུད་པ་མི་བཏང་། དུས་མ་ཡིན་པར་ཕཊ་སྐད་མི་གདབ། གཅོད་ཀྱི་སྒྲ་མི་སྒྲོག །གཅོད་ཀྱི་གདམ་པ་འདི་གཉན་གཉན་འདྲ་ཡང་མི་གཉན་པ། སླ་སླ་འདྲ་ཡང་དཀའ་བ། ལྷོད་ལྷོད་འདྲ་ལ་དམ་པ། དམ་དམ་འདྲ་ལ་ལྷོད་པའི་ཆོས་ཡིན་པས། དམ་ཚིག་དང་ལྡན་པས་འཚོ་ཤེས་པ་གལ་ཆེའོ། །ཡང་གཅོད་ལ་འགྲོ་ཚུལ་ནི། ཞེ་སྡང་དང་འགྲན་སེམས་ཀྱིས་མི་འགྲོ། རྒོ་ཉོ་དང་ཕོ་ཚོད་ཀྱིས་མི་འགྲོ། ཕོ་རུས་དང་ཁེ་དྲག་ཀྱིས་མི་འགྲོ། ང་རྒྱལ་དང་ཆེ་ཚུལ་གྱིས་མི་འགྲོ། དྲེགས་པ་དང་རང་འདོད་ཀྱིས་མི་འགྲོ། རྙེད་པ་དང་བཀུར་བསྟིས་མི་འགྲོ། ངེས་འབྱུང་གིས་དད་པ་ཆེན་པོས་འགྲོའོ། །དེས་དམ་ཚིག་སྒོ་ནས་བདུད་བསལ་བ་སོང་། པདྨའི་གཏེར་གཅོད་ལས། གསུམ་པ་ཡོན་ཏན་གྱི་སྒོ་ནས་ཞབས་བསྡུ་བ་ནི། ལར་སྤྲོས་བཅས་ཟང་ཟིང་དུ་མ་བས། སྤྲོས་མེད་ཕ་རོལ་ཕྱིན་པའི་དོན་ལ། ཐུན་གཅིག་མཉམ་པར་བཞག་པ་གནད་ཆེ། གཉན་ཁྲོད་བརྒྱ་སྟོང་བསྐོར་བབས་སྐད་ཅིག་མའི་སྙེམ་ཐག་ཆོད་པ་གལ་ཆེ། འདུས་བྱས་ཀྱི་ཟས་ནོར་དཔག་ཏུ་མེད་པ་དངོས་སུ་གཏོང་བ་བས། ཞེན་འཛིན་དང་བྲལ་བའི་དམིགས་པས་ལུས་སྦྱིན་པར་བཏང་ཞིང་དགེ་སྦྱོར་ཐུན་རེ་བསོད་ནམས་ཆེ། ཕལ་པའི་གནས་སུ་ལོ་གཅིག་བསྒོམ་པ་ལས། གཉན་ས་རི་ཁྲོད་དུ་ཞག་གཅིག་གི་ཉམས་ལེན་བྱེད་པ་འགྱུར་ཆེ། ཆོས་སྤྱིའི་ཉམས་ལེན་རྒྱུག་དེད་ཟླ་བ་གཅིག་བྱས་པ་བས། བདུད་ཆོད་པའི་གདམས་པ་ཐུན་གཅིག་ཉམས་སུ་བླངས་པས་ལམ་རྟགས་མྱུར། ཚེ་འདིའི་འདུ་འཛི་བསོད་ནམས་ཀྱིས་ལོངས་སྤྱོད་དཔག་ཏུ་མེད་པ་བྱས་པ་བས། འདོད་ཡོན་གྱི་འཁྲི་པ་ཆོད་དེ་ཆོག་ཤེས་ཀྱིས་འདུན་པ་སྐད་ཅིག་མ་རེ་སྐྱེས་པ་དཔལ་འབྱོར་ཆེ་བ་ཡིན། ཐུན་མོང་གི་བསམ་པ་བཟང་པོ་མང་པོ་བས། མཆོག་གིས་སེམས་བསྐྱེད་གཅིག་གི་ནང་དུ་འདུས་པས་དགའ་བ་ཡིན། གཉེན་པོ་སྟོབས་དང་བཅས་པས་བསྒོམས་བདེ་གསལ་མི་རྟོགས་པ་ཤར་བ་བས། གཉེན་པོ་དང་བྲལ་བའི་སྒོམ་རང་བབས་གཞི་ཐོག་ཏུ་ཕེབས་སྟོབས་ཆེ་བ་ཡིན། ཤེས་བྱའི་གནས་མང་པོ་ལ་མཁས་པ་བས། དོན་གྱི་ཤེས་བྱ་གཅིག་ཤེས་པ་གལ་ཆེ་བ་ཡིན། ལར་ཆོ་འཕྲུལ་དང་བར་ཆད་ཅི་བྱུང་ཡང་། བདག་ལ་སྲུང་དུ་གསོལ་བརྒྱ་ཐམ་པ་བས། གསོད་ཅིག་ཟོ་གཅིག་ཁྱེར་གཅིག་ཅེས་པའི་ཚིག་གཅིག་གིས་དགའ་བ་ཡིན། ལྷ་སྲུང་བརྒྱ་ལ་ར་མདར་བཟློག་པ་བས། ལྷ་འདྲེ་སྟོང་ལ་ཟ་རུ་བཅོལ་བས་དགའ་བ་ཡིན། ལུས་ལ་སྲུང་བ་བརྒྱ་བཏག་པ་བས། ན་དགའ་ཤི་སྐྱིད་ལན་གཅིག་གིས་དགའ་བ་ཡིན། དེས་ཡོན་ཏན་གྱི་སྒོ་ནས་ཞབས་བསྡུ་བ་ན་སོང་། ༈ བརྒྱད་པ་གོལ་ཤོར་གྱི་ཆིང་བསྟན་པ་ལ་གཉིས་སྟེ། དང་པོ་གོལ་ཤོར་ས་ལ་ནི། ལྷ་འདྲེ་ལ་ཐུབ་ཆོད་དང་། ཐོ་ཅོ་དྲག་ལས་སུ་བྱས་ན་གོལ། ཚེ་འདིའི་སྙན་གྲགས་དང་། སྙོམ་ལས་སུ་བྱས་ན་གོལ། ནད་ཆོད་དང་འཇིགས་སྐྱོབས་ཀྱི་དབང་དུ་བྱས་ན་གོལ། གཉིས་པ་ཤོར་ས་ནི། གཅོད་ཤ་སྦྱོར་དུ་ཤོར་བ་ནི། གཉན་སར་བུད་མེད་བརྟེན་པའོ། །གཅོད་དྲག་སྔགས་སུ་ཤོར་བ་ནི། གཉན་སར་འདྲེ་གདོན་འོང་དོག་ནས། ཁྲོ་བོའི་བསྐྱེད་རིམ་དང་དྲག་སྔགས་བཟླ་བའོ། །གཅོད་ཐ་མལ་དུ་ཤོར་བ་ནི། ལོང་གཏམ་དང་གཉིད་དང་། ཐ་མལ་རང་ཁར་འགྲོ་བའོ། །དེས་གོལ་ཤོར་གཉིས་སོང་། སྤྱིར་གཅོད་འདི་ལ། མ་ཅིག་གིས་ཞལ་ནས། ཆེ་བ་གསུམ་གྱི་ངར་བསྐྱེད། ཅེས་གསུངས་པས་ལྟ་བའི་རྦད་ཁམས་ཆེ་བ། གདམ་ངག་གི་ལོ་རྒྱུས་ཆེ་བ། ལུས་སྲོག་གི་གཏོང་ཕོད་ཆེ་བའོ། །ཡང་གཅོད་འདི་ལ་ལྟ་བསྒོམ་སྤྱོད་འབྲས་ཀྱིས་གཏན་ལ་ཕབ་དགོས་སྟེ། མལ་ས་གཉན་ས་རི་ཁྲོད། ལྟ་བ་ལྷ་མེད་འདྲེ་མེད། བསྒོམ་པ་ལྗེན་ཉལ་འཕྲིག་མེད། སྤྱོད་པ་རོ་སྙོམ་ཐོག་རྫིས། རིམ་གྲོ་ཤ་ཁྱེར་ཁྲག་ཁྱེར། ཉམས་ལེན་ན་དགའ་ཤི་སྐྱིད། ལམ་ཁྱེར་ཕུང་པོ་གཟན་བསྐྱུར། དམ་ཚིག་དགེ་མེད་སྡིག་མེད། འབྲས་བུ་གཉིས་མེད་ལྷུན་གྲུབ་འདི་ཉམས་སུ་བླངས་པར་བྱའོ། །ཅེས་ཟབ་དོན་ལས་གསུངས་སོ། ༈ །ཡང་གཅོད་འདི་ལ་ཕྱི་ནང་གསང་གསུམ་གྱིས་སྒོ་ནས་གཏན་ལ་ཕབ་དགོས་སྟེ། མ་ཅིག་གིས་ཞལ་ནས། གཉན་ས་རི་ཁྲོད་འགྲིམ་པ་ཕྱི་ཡི་གཅོད། །ཕུང་པོ་གཟན་དུ་སྐྱུར་བ་ནང་གི་གཅོད། །བདག་འཛིན་རྩད་ནས་གཅོད་པ་གསང་བའི་གཅོད། །ཅེས་གསུངས་པའི་དོན་ནོ། །ཡང་གཅོད་འདི་ལ་ཐེག་པ་ཆེན་པོའི་ལམ་གལ་ཆེ་སྟེ། མ་ཅིག་གིས། བྱམས་དང་སྙིང་རྗེ་སེམས་བསྐྱེད་གསུམ། །གཅོད་ཀྱི་གཞུང་ལམ་འགྲོ་ས་ཡིན། །ཅེས་གསུངས་སོ། །ཡང་གཅོད་འདི་ལ་ཐེམ་པ་གསུམ་གྱི་སོ་བཙུག་པ་ནི། དཀར་སྦྱོར་ལས། སྔ་ཐེམ་སྔ་རུ་མ་ནོན་ན། །དགྲ་ངན་དག་ལ་བྱ་ཤོར་འདྲ། །དེ་ལ་ཟིལ་ནོན་གནད་བདུན་དགོས། །ཅེས་པའི་དོན་ནི། གོང་དུ་ཟིལ་ནོན་གྱི་སྐབས་སུ་སོང་། །བར་ཐེམ་བར་དུ་མ་ནོན་ན། །དཔའ་བོའི་ལག་གིས་མཚོན་ཤོར་འདྲ། །དེ་ལ་རྡོ་རྗེའི་སྦྲུལ་ཞགས་དགོས། །ཅེས་གསུངས་པའི་དོན་ནི། གཞུང་གིས་འགྲོས་དང་མན་ངག་གི་གཅུན་ཐབས་དང་། འགྲོ་ན་རྡོ་གཏེས་བཟུང་བ་རྣམས་ཡིན་ནོ། །ཕྱི་ཐེམ་ཕྱི་རུ་མ་ནོན་ན། །ནོར་ལེན་ཕྱི་རྗེས་བསྙག་པ་འདྲ། །དེ་ལ་དམག་དཔོན་ཁྱུང་ནག་བཞག །ཅེས་གསུངས་པའི་དོན་ནི། རྗེས་ཆོག་གི་སྐབས་སུ་གསལ་ལོ། །ཡང་གཅོད་འདི་ལ། ཚད་རྣམ་པ་གསུམ་དང་ལྡན་དགོས་ཏེ། དེ་ཡང་རྣལ་འབྱོར་པའི་ཚད་གསུམ་དང་། ལྷ་འདྲེའི་ཚད་གསུམ་མོ། །དང་པོ་རྣལ་འབྱོར་པའི་ཚད་གསུམ་ལ། དང་པོ་འཐེན་ཚད་ནི། ཆོ་འཕྲུལ་དང་ཚར་ཚད་མ་བྱུང་གི་བར་དུ་གཅུན་པའོ། །གཉིས་པ་ལྷོད་ཚད་ནི། ཚར་ཚད་བྱུང་ཡང་ད་དུང་ཞག་རེ་མལ་དུ་བསྡད་ལ། མགོ་སྐོར་རྗེས་སྙོག་ཨེ་འོང་བརྟག་གོ། །གསུམ་པ་དཀྲོལ་ཚད་ནི། ཚར་ཚད་ལེགས་པོ་ཐོན་ནས་རྗེས་ཆོག་བྱེད་ནས་སྤོ་བར་བྱའོ། །གསུམ་པ་ལྷ་འདྲེའི་ཚར་ཚད་གསུམ་ནི། ཆོ་འཕྲུལ་དང་ཚར་ཚད་གསུམ་མོ། །ཡང་གཅོད་འདི་ལ་གནད་དགུ་དག་གིས་འཛེར་བསྡོམ་དགོས་ཏེ། དེ་ཡང་འདོན་མི་འབྲོས་པར་མྱུར་བའི་གནད། རོ་བསྲེས་དབྱིངས་བསྲེས་བསྡེབ་ན་ཆུན་གཅིག་ཏུ་ཆོད་པའི་གནད། མ་སློང་སློང་བའི་གནད། མ་འབྱེད་པ་འབྱེད་པའི་གནད། མ་བསྙོལ་ན་བསྙོལ་བའི་གནད། མགོ་སྐོར་མི་འོང་བའི་གནད། སློང་ཆེན་སྙེམས་ཞུགས་ལོག་ནོན་གྱི་གནད། གཙང་རྩོག་རོ་སྙོམ་འཇིགས་པ་ཐོག་རྫིས་ཀྱིས་གནད། དཀར་ནག་ཤན་འབྱེད་ལྷ་འདྲེ་རོལ་ཁྲིད་དང་དགུའོ། །འདི་རྣམས་གཞུང་གི་སྟོད་སྨད་བར་གསུམ་དུ་གསལ་ལོ། །ཡང་གཅོད་འདི་ལ་ཕཊ་བརྗོད་དགོས་པའི་དོན་ནི། དམ་པ་རྒྱ་གར་གྱིས། ཕཊ་ཀྱིས་གདམས་པ་འདི་ལ་བཅུ་གཉིས་སྟོན་པར་བྱེད་པ་འདི་ལ། ཕཊ་བསྐྱེད་པར་བྱེད་པའི་ཡུལ་གསུམ་དང་གཅིག །ཕཊ་འཕེལ་བར་བྱེད་པའི་གྲོགས་གསུམ་དང་གཉིས། ཕཊ་གཟེང་བསྟོད་པའི་དུས་གསུམ་དང་གསུམ། ཕཊ་ལྟ་བའི་གདེང་གསུམ་དང་བཞི། ཕཊ་བསྒོམ་པའི་ཉམས་གསུམ་དང་ལྔ། ཕཊ་སྤྱོད་པའི་ངེས་མེད་གསུམ་དང་དྲུག །ཕཊ་ཐོབ་པའི་འབྲས་བུ་གསུམ་དང་བདུན། ཕཊ་དྲན་པ་གསུམ་དང་བརྒྱད། ཕཊ་གསེང་བ་གསུམ་དང་དགུ། ཕཊ་བསྒྱུར་བ་གསུམ་དང་བཅུ། ཕཊ་རྒྱུན་ཆད་མེད་པ་གསུམ་དང་བཅུ་གཅིག །ཕཊ་ལ་བཟླ་བ་གསུམ་དང་བཅུ་གཉིས་སོ། །དེ་ལ་དང་པོ་ཕཊ་སྐྱེ་བར་བྱེད་པའི་ཡུལ་གསུམ་ནི། ཕྱི་སྣང་བའི་ཡུལ་ལ་ཆགས་ཞེན་སྐྱེས་ན་ཕཊ་བྱ། ནང་འཛིན་པའི་སེམས་ལ་ཉོན་མོངས་སྐྱེས་ན་ཕཊ་བྱ། བསྒོམ་པའི་དུས་བྱིང་རྨུག་སྐྱེས་ན་ཕཊ་བྱ། ཕཊ་སྐྱེ་བའི་ཡུལ་ནི་གསུམ་མོ། །ཕཊ་འཕེལ་བར་བྱེད་པའི་གྲོགས་གསུམ་ནི། རྒྱུད་པའི་བླ་མ་དང་མཇལ་དུས་སུ། བྱིན་རླབས་འཕེལ་བའི་གྲོགས་སུ་འགྲོ་བས་ཕཊ་བྱ། རི་ཁྲོད་འགྲིམས་པའི་དུས་སུ། དགེ་སྦྱོར་འཕེལ་བའི་གྲོགས་འགྲོ་བས་ཕཊ་བྱ། གཅིག་པུར་འགྲོག་པའི་དུས་སུ་ཉམས་མྱོང་འཕེལ་བའི་གྲོགས་སུ་འགྲོ་བས་ཕཊ་བྱ། ཕཊ་འཕེལ་བར་བྱེད་པའི་གྲོགས་གསུམ་མོ། །ཕཊ་གཟེང་བསྟོད་པ་གསུམ་ནི། མི་མང་པོའི་གསེབ་ནས་རིག་པ་ངར་ཅན་གཟེང་བསྟོད་དེ་ཕཊ་བྱ། རང་གཅིག་པོའི་དུས་སུ་དྲན་པས་གཟེང་བསྟོད་དེ་ཕཊ་བྱ། སྒོམ་པའི་དུས་སུ་གསལ་བ་ལ་གཟེང་བསྟོད་དེ་ཕཊ་བྱ། ཕཊ་གཟེང་སྟོད་པ་ལ་གསུམ་མོ། །ཕཊ་ལྟ་བའི་གདེང་གསུམ་ནི། དུས་གསུམ་མཐའ་བྲལ་རྟོགས་པས་ལྟ་བའི་གདེངས་ཏེ་ཕཊ་བྱ། ལྷུག་པར་རྟོགས་པས་ལྟ་བའི་གདེངས་ཏེ་ཕཊ་བྱ། གཉིས་མེད་བདེ་ཆེན་རྟོགས་པས་ལྟ་བའི་གདེངས་ཏེ་ཕཊ་བྱ། ཕཊ་ལྟ་བའི་གདེངས་གསུམ་མོ། །ཕཊ་བསྒོམ་པའི་ལམ་གསུམ་ནི། ཁྲོམ་གསེབ་ཏུ་བླ་མ་བསྒོམ་ཏེ་ཕཊ། རང་གཅིག་པུའི་དུས་སུ་དཔའ་བོར་བསྒོམ་སྟེ་ཕཊ་བྱ། ལས་བྱེད་ཀྱི་དུས་སུ་དུམ་བུར་བསྒོམ་སྟེ་ཕཊ་བྱ། ཕཊ་བསྒོམ་པའི་ལམ་གསུམ་མོ། །ཕཊ་སྤྱོད་པའི་ངེས་པ་མེད་པ་གསུམ་ནི། དུས་ལ་ངེས་པ་མེད་དེ་ཕཊ་བྱ། གནས་ལ་ངེས་པ་མེད་དེ་ཕཊ་བྱ། གྲོགས་ལ་ངེས་པ་མེད་དེ་ཕཊ་བྱ། ཕཊ་སྤྱོད་པ་ངེས་མེད་གསུམ་མོ། ཕཊཿཀྱི་འབྲས་བུ་གསུམ་ནི། སེམས་ལ་རྟོགས་པ་མེད་པས་རྟོགས་པའི་འབྲས་བུ་ཆོས་སྐུ་ཐོབ་དེ་ཕཊ་བྱ། ངག་སྒྲ་ལ་རང་བཞིན་མེད་པར་རྟོགས་པས་འབྲས་བུ་ལོངས་སྐུ་ཐོབ་སྟེ་ཕཊ་བྱ། ལུས་ཀྱིས་སེམས་ཅན་གྱི་དོན་བྱེད་ནུས་པས་འབྲས་བུ་སྤྲུལ་སྐུ་ཐོབ་སྟེ་ཕཊ་བྱ། ཕཊ་ཐོབ་པར་བྱེད་པའི་འབྲས་བུ་གསུམ་མོ། །ཕཊ་དྲན་པ་གསུམ་ནི། གསོལ་འདེབས་ཀྱི་དུས་བླ་མ་དྲན་པར་བྱ་སྟེ་ཕཊ་བྱ། བསྐྱེད་རིམས་ཀྱི་དུས་སུ་ཡི་དམ་དྲན་པར་བྱས་ཏེ་ཕཊ་བྱ། འཇིགས་པར་འགྲོ་བའི་དུས་སུ་ཌཱ་ཀི་དྲན་པར་བྱ་སྟེ་ཕཊ་བྱ། ཕཊ་དྲན་པ་གསུམ་མོ། །ཕཊ་གསེང་བ་གསུམ་ནི། ལུས་བྱིང་ན་ཕྱག་དང་བསྐོར་བས་གསེང་དེ་ཕཊ་བྱ། ངག་བྱིང་ན་མདོ་དང་སྙིང་པོས་གསེང་དེ་ཕཊ་བྱ། སེམས་བྱིང་ན་ཏིང་ངེ་འཛིན་གྱིས་བསིང་དེ་ཕཊ་བྱ། ཕཊ་གསེང་བ་གསུམ་མོ། །ཕཊ་བསྒྱུར་བ་གསུམ་ནི། ལུས་ཀྱི་བྱ་བ་བསྒྱུར་དེ་ཕཊ་བྱ། ངག་གི་ཅལ་ཅོལ་བསྒྱུར་ཏེ་ཕཊ་བྱ། སེམས་ཀྱི་དྲན་རྟོགས་བསྒྱུར་ཏེ་ཕཊ་བྱ། ཕཊ་བསྒྱུར་བ་གསུམ་མོ། །ཕཊ་རྒྱུན་ཆད་མེད་པ་གསུམ་ནི། ལུས་ཟག་བཅས་ཀྱི་དགེ་བ་རྒྱུན་ཆད་མེད་དེ་ཕཊ་བྱའོ། །ངག་བཟླས་བརྗོད་རྒྱུན་ཆད་མེད་དེ་ཕཊ་བྱའོ། །སེམས་ཏིང་ངེ་འཛིན་ལ་རྒྱུན་ཆད་མེད་དེ་ཕཊ་བྱའོ། །ཕཊ་རྒྱུན་ཆད་མེད་པ་གསུམ་མོ། །ཕཊ་ལ་བཟླ་བ་གསུམ་ནི། གཞི་གཉིས་མེད་ཤེས་པ་ལ་ལྟ་བ་མེད་དེ་ཕཊ་བྱ། རྩ་བ་མཐོང་བ་ལ་བསྒོམ་པ་མེད་དེ་ཕཊ་བྱ། དོན་རྟོགས་པ་ལ་རྣམ་སྨིན་མེད་དེ་ཕཊ་བྱ། ཕཊ་ལ་བཟླ་བ་གསུམ་མོ། །དམ་པ་རིན་པོ་ཆེས་མཛད་པའི་ཕཊ་ཆོས་སུམ་ཅུ་སོ་དྲུག་གོ། ༈ །དགུ་པ་མཁའ་འགྲོ་སྡེ་ལྔའི་མངོན་རྟོགས་ཀྱི་ཆིང་ནི། མཁའ་འགྲོ་སྡེ་ལྔའི་ཚོགས་ལས་ཟུར་དུ་ཡོད་པས་དེར་གསལ་ལོ། །བཅུ་པ་དབང་བསྐུར་ཆོས་སྒོ་འབྱེད་པའི་ཆིང་ནི། མཁའ་འགྲོ་སྡེ་ལྔའི་དབང་ཆོག་ཟུར་དུ་ཡོད་པས་དེར་གསལ་ལོ། །བཅུ་གཅིག་པ་ངོ་སྤྲོད་ནམ་མཁའ་གོ་འབྱེད་ཀྱི་ཆིང་ནི། ངོ་སྤྲོད་ནམ་མཁའ་སྒོ་འབྱེད་ཟུར་དུ་ཡོད་པས་དེར་གསལ་ལོ། །བཅུ་གཉིས་པ་ལས་བཞི་སྦྱིན་བསྲེགས་ཀྱིས་ཆིང་ནི་ལོགས་སུ་ཡོད་པ་ལ་གསལ། བཅུ་གསུམ་པ་ལྷན་ཐབས་གནད་ཀྱིས་ཕྲེང་བས་ཆིང་། བཅུ་བཞི་དམ་པའི་འཕྲུལ་གཅོད་ཀྱི་ཆིང་། བཅོ་ལྔ་པ་གཅོད་ཁྲིད་གསལ་སྒྲོན་གྱི་ཆིང་དང་གསུམ་ནི་ཟུར་དུ་གསལ་ལོ། །ཡང་ལུས་ལ་ནད་མེད་དང་ཞིང་གཅོད་ཡིན་ན་ཐོག་མའི་ཟིལ་ནོན་འཕེན་ས་དབང་སྡུད། དམར་འགྱེད་ལ་སོགས་པའི་ནད་གཅོད་ཐབས་དང་བཅས་པ་གཅིག་ཀྱང་མི་དགོས། དེ་ན་ཅི་བྱེད་ན་ཐོག་མ་སེམས་བསྐྱེད་དང་། གནས་ཚུལ་བཞི་དང་། བར་དུ་སྐྱབས་འགྲོ་སེམས་བསྐྱེད་གསོལ་འདེབས་བདུད་རྩི་དཀར་འབྱེད། དམར་འགྱེད་འདོད་ཡོན་ལྔ་ལ་དམིགས་པ་དུས་རེ་ལ་ཉི་ཤུ་རྩ་གཅིག་དང་། གཏོར་གཞོང་མས་བསྔོ་བ་སྨོན་ལམ་དང་། གཏོར་ལེན་གོང་དུ་ཡོད་པ་ལྟར་སྤྱི་སྐབས་བྱའོ། །ནད་ཅན་གཉན་མིག་བཙལ་བ་དང་། ནད་མེད་དགེ་སྦྱོར་སྐྱོང་བ་གཉིས། ཞི་དྲག་གཅུན་ཐབས་སོ་སོར་གཅེས། ཞེས་གསུངས་པའི་དོན་ནོ། །དེ་རྣམས་ཀྱིས་དངོས་གཞི་ཉམས་ལེན་གྱིས་རིམས་པ་སོང་། ༈ སྤྱི་དོན་གསུམ་པ་རྗེས་ཀྱི་ཆོ་ག་ནི། ནང་པར་སྔ་མོ་ནས་དཔོན་སློབ་ཀུན་གྱིས་གཉན་སར་གར་འགྲོ་སར་ཟིལ་གནོན་གོང་བཞིན་འཕངས། དེ་ནས་དཔོན་སློབ་ཀུན་གྱི་གཅོད་ཐུན་སྐོར་གཅིག་རྫོགས་པ་དང་། དེམ་བྱེད་དེ་ནི་ཁྲ་ཐེར་བྱེད་ཅིང་། ཟིལ་ནོན་ནང་མ་བསྡུ་བ་ནི། ཤར་ནས་རྔ་རྐེ་རིམས་པར་གཡས་བསྐོར་དུ་བསྡུ་ཞིང་། ཤར་དུ་བུདྡྷ་ཌཱ་ཀི་ནི་ཧཱུྃ། ཅེས་བརྗོད་ཅིང་། སངས་རྒྱས་མཁའ་འགྲོ་བདག་གིས་ཐུགས་ཀར་བསྡུ། དེ་བཞིན་དུ་ལྷོར་རཏྣ་ཌཱ་ཀི་ནི་ཧཱུྃ། རིན་ཆེན་མཁའ་འགྲོ་བདག་གི་ཐུགས་ཀར་བསྡུ། ནུབ་དུ་པདྨ་ཌཱ་ཀི་ནི་ཧཱུྃ། པདྨ་མཁའ་འགྲོ་བདག་གི་ཐུགས་ཀར་བསྡུ། བྱང་དུ་ཀརྨ་ཌཱ་ཀི་ནི་ཧཱུྃ། ལས་ཀྱི་མཁའ་འགྲོ་བདག་གི་ཐུགས་ཀར་བསྡུ། ཁྲ་ཐེར་བཟོ་བའི་དུས་སུ་བཛྲ་ཌཱ་ཀི་ནི་ཧཱུྃ་བརྗོད་ཅིང་། རྡོ་རྗེ་མཁའ་འགྲོ་བདག་གི་ཐུགས་ཀར་བསྡུ། དེ་ནས་ཕཊ་བརྗོད་ཅིང་། སྟན་བཀྱག་ནས་སྔར་རྡོ་གཏེལ་ཁྲིད་ཟིན་ཡོད་ན། ལེན་ནས་སྐུད་པ་དཀྲོལ་ཞིང་ཟུར་དུ་བཞག །ལྕགས་ཁང་ནང་གི་གནས་གདོན་ལུས་གདོན་རྣམས། རྒྱ་གྲོག་ཚང་ལ་རྡོག་རྟོ་ཕོག་པ་བཞིན་དུ། ལྕགས་ཁང་གི་ཁར་ཟིངས་ཀྱི་བུད་ནས་ཕྱིའི་ལྷ་འདྲེ་རྣམས་དང་ལྷན་ཅིག་ཏུ་ཡོད་པར་བསྒོམ། དེ་ཡང་དཀར་ནག་ཤན་འབྱེད་ལྷ་འདྲེ་རོལ་ཁྲིད་ཀྱིས་གནད་ཅེས་གསུང་པས། ཕཊ་བརྗོད་པ། རང་ཉིད་ཁྲོས་མ་ནག་མོར་བསྒོམ་པའི་མདུན་དུ་རྡེའུ་གཅིག་བཞག་ལ། ངག་ཏུ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་བདེན་པ་དང་། ཅེས་སོགས་ཀྱི་མཐར། ལྷ་འདྲེ་ཁྱེད་རྣམས་ཀྱིས་ནང་ནས་བདག་ཅག་རྣལ་འབྱོར་པའི་བཀའ་ལ་མི་ཉན་པ་གསུང་ལ་མི་བསྟོད་པ། དངོས་གྲུབ་མི་སྟེར་བ། ཕྲིན་ལས་མི་སྒྲུབ་པ། མགོ་བསྐོར་རྗེས་སྙོག་ཕྱིར་འབྲང་བྱེད་པ་ཡི་ལྷ་འདྲེ་གང་ཡིན་པ་ཐམས་ཅད་རྡེའུ་འདི་ལ་ཁུག་ཅིག །ཨངྐུ་ཤ་ཛ། ཅེས་འགུག་འདྲེན་མང་དུ་བྱའོ། །སྐུད་པས་དཀྲིའོ། །དེ་ནས་བླང་ནས་གཅོད་རལ་བའི་སྐབས་ཀྱི་རྡོ་གཏེལ་བཟུང་ནས་ཁྱེར་ལུག་དང་མཐུན་ནོ། །དེ་ནས་ཁྲེས་སེ་བསྒྲིག་པ་ཡིན་ཏེ། གལ་ཏེ་ཆར་པ་བབས་ན་ཀུན་གྱི་མལ་སྟན་ཕུད་ཅིང་ཕཊ་བརྗོད་པ་ཙམ་གྱིས། རང་ཉིད་རྗེ་བཙུན་མ་སྐུ་མདོག་དམར་མོ་རེ་རེ་བསྒོམ་ལ། ཀུན་གྱི་ཤིང་ཕྲ་མའི་ལྕགས་མཚན་གྱིས་གོ་ཁ་བཤད་ཅིང་ཕཊ་བརྒྱ་བརྗོད། ངེད་འདི་ནས་ཚེར་སྤོ་བ་ཡིན་པས། གནས་སུ་མ་ཕེབ་ཀྱི་བར་དུ་ཁ་ཆར་མ་བཏང་ཅིག །ཅེས་བརྗོད། དེའི་དམིགས་པ་ནི། དེར་གནས་པའི་ས་བདག་ཀླུ་གཉན་རྣམས་བྲ་མའི་ལྕགས་ཚན་གྱིས་བཤད་ནས་ཁ་ཆར་མི་བཏང་བར་ཁས་བླངས་ཏེ། དེ་རྣམས་ཀྱི་དབང་པོ་སྒོ་ལྔ་ནས་མེ་དམར་ཕྱུ་རུ་རུ་འབར་ནས། སྣང་སྲིད་ལྷ་ཀླུ་ས་བདག་རྣམས་ཚིག་ལ་ཁད་དེ་ཆར་བཅད་པས། ནམ་མཁའ་དྭངས་ཞིང་ཉི་མ་ཚ་བར་བསྒོམ། ཀུན་གྱིས་དེ་ལྟར་ཉམས་སུ་ལེན་པ་གལ་ཆེ་བ་ཡིན། དེ་ནས་ཁལ་རྟ་ཡོད་ན་བཀལ་ཐོན་པ་དང་། དེ་ཡང་། རྗེས་ལ་དག་པ་རྣམ་གསུམ་ནི། རྗེས་ཆོག་བྱས་པས་སྣང་སྲིད་དག །ཅེས་གསུངས་པས། ཕཊ་བརྗོད་པ་ཙམ་གྱིས་སྔར་གྱི་ལྕགས་ཁང་དེ་ཉིད་ཡོངས་སུ་འགྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་ས་གཞི་འདོད་ཡོན་སྣ་ཚོགས་འབྱུང་བ་བཞི་རུ་བསྐྱེད་ལ། དེའི་སྟེང་དུ་རང་དང་ལྷ་འདྲེ་ཐམས་ཅད་སློབ་དཔོན་སློབ་བུའི་ཚུལ་དུ་བསྒོམ། དེ་ནས་རང་ཉིད་མལ་གྱི་ཉལ་སར་སྐྱིལ་ཀྲུང་བཅས་ནས་བསྡད་ལ། སེམས་ཅན་ཐམས་ཅད་ཀྱི་དོན་དུ་སྐྱབས་འགྲོ་དང་སེམས་བསྐྱེད་དེ། སྭ་བྷ་ཝས་སྟོང་པར་གྱུར་པའི་ངང་ལས། བྷྲཱུཾ་ལས་རིན་པོ་ཆེ་སྣ་ཚོགས་གྲུབ་པའི་ས་གཞི་རྣམ་པར་དག་པའི་དབུས་སུ། པཾ་ལས་པདྨ་ཨ་ལས་ཟླ་བའི་སྟེང་དུ་ཧྲཱིཿདཀར་པོ་འོད་ཟེར་ཀུན་ཏུ་འཕྲོ་བ་ལས་འོད་ཟེར་ཕྱོགས་བཅུར་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད། སེམས་ཅན་ཐམས་ཅད་སྨིན་འོད་ཟེར་ཚུར་འདུས་ཡོངས་སུ་གྱུར་པ་ལས་བདག་ཉིད་ཐུགས་རྗེ་ཆེན་པོ་ཁ་སར་པ་ནི་སྐུ་མདོག་དཀར་པོ་ཞལ་ཅིག་ཕྱག་གཉིས་པ། གཡས་མཆོད་སྦྱིན། གཡོན་པདྨ། དར་དང་རིན་པོ་ཆེའི་རྒྱན་དུ་མས་བརྒྱན་པ། ཞབས་སེམས་དཔའི་སྐྱིལ་ཀྲུང་དུ་བཞུགས་པའི་དབུ་ལ། ཟླ་བའི་གདན་ལ་བླ་མ་འོད་དཔག་མེད་བཞུགས་པ། དེ་གཉིས་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཟླ་བའི་སྟེང་ཧྲཱིཿ ཧྲཱིཿལས་འོད་འཕྲོས་པས་སངས་རྒྱས་དང་བྱང་ཆུབ་སེམས་དཔའ་སྤྱན་དྲངས་བཛྲ་ས་མ་ཡ་ཛ་ཛཿ ཛཿཧཱུྃ་བཾ་ཧོཿ ཡེ་ཤེས་པ་དང་དམ་ཚིག་པ་གཉིས་སུ་མེད་པ་ལས་མཆོད་པ་ནི། ༀ་བཛྲ་ཨརྒྷཾ་པྲ་ཏིཙྪ་ཡེ་སྭཱ་ཧཱ། ཅེས་སོགས་ཀྱིས་མཆོད་ནས། སྐྱོན་གྱི་མ་གོས་སྐུ་མདོག་དཀར། ཅེས་སོགས་ཀྱིས་བསྟོད་ནས། རང་གི་ཐུགས་ཀའི་ཧྲཱིཿའི་མཐའ་བསྐོར་དུ། ཡི་གེ་དྲུག་པས་གཡས་སུ་འཁོར་བར་བསམ། དེ་ནས་ངག་ཏུ་ༀ་མ་ཎི་པདྨེ་ཧཱུྃ། ཅེས་བརྒྱ་རྩ་བརྒྱད་བགྲང་ཞིང་། ཡིད་ཀྱི་ཐུགས་ཀའི་ཡི་གེ་དྲུག་པ་ལས་འོད་ཟེར་བདུད་རྩིའི་འདོད་ཡོན་ཕུན་སུམ་ཚོགས་པར་སྤྲོས་པས་གནས་གདོན་ལུས་གདོན་སྣང་སྲིད་ཀུན་དེར་གནས་པའི། ལྷ་འདྲེ་རྣམས་ཀྱི་སྡིག་སྡུག་ནད་དང་བསྣད་ཡར་རྨས་འགྲམ། གནས་ཁང་ཞིག་རལ། ནོར་གྱི་ཤོར་གོད་ལ་སོགས་སོས་ནས། ལུས་ཀྱི་ལང་ཚོ་བཀྲག་མདངས་དང་ལྡན་ཞིང་ལྷ་འདྲེ་རང་དང་གནས་ཁང་དང་ལོངས་སྤྱོད་ཀྱིས་ལྷ་འདྲེ་གཞན་གྱིས་ལུས་དང་གནས་ཁང་ལོངས་སྤྱོད་ཐམས་ཅད་ཟིལ་གྱིས་མནན་པར་བསམ་མོ། །དེ་ནས་ཡུམ་ཆེན་གྱིས་རྗེས་ཆོག་ནི། ཕཊ་རང་ཉིད་མ་ཅིག་དཀར་མོ། ཕཊ་མདུན་དུ་ཡུམ་ཆེན་སེར་མོ། ཕཊ་བར་དུ་སྣང་སྲིད་ལྷ་འདྲེ་རྣམས་བསམ་མོ། །མ་ཅིག་ཡུམ་ཆེན་གཉིས་ཀྱི་ཐུགས་ཀའི་ཨ་དཀར་སེར་ལས་འོད་ཟེར་ལ་སོགས་སྔར་ལྟར་བབས་པས། སྣང་སྲིད་ཀྱི་དོན་སྔར་ལྟར་བསམ་ཞིང་། ཕཊ་ཅེས་སོགས་དང་། དམིགས་པ་བརྒྱ་རྩ་བརྒྱད་དང་། ༀ་ག་ཏེ་གང་སྐབས་བཟླའོ། །ཡུམ་ཆེན་རྗེས་ཆོག་གོ། །དེ་ནས་ཕཊ་གཉིས་བཟླས་པ་ཙམ་གྱིས་གཅིག་གིས་སྣང་སྲིད་ལྷ་འདྲེ་ཐམས་ཅད་མཉེས་ནས། ལྷ་འདྲེ་རྣམས་ཀྱིས་བྱིས་པ་དཀར་མཛེས་ཡིད་དུ་འོང་བའི་རོ་གཅིག་རང་ལ་འཆི་བ་མེད་པ་ཚེའི་དངོས་གྲུབ་ཏུ་ཕུལ་བར་བསམ། གཅིག་གིས་ཡུམ་ཆེན་རང་ལ་ཐིམ་ནས། རང་ཉིད་རྗེ་བཙུན་མ་དམར་པོ་གཅིག་ཏུ་གྱུར་པའི་གྲི་གུག་གིས་རྩེ་མོས་རོ་དེ་བླངས་ནས་གཡོན་གྱི་ཀ་པཱ་ལའི་ནང་དུ་བཅུག་སྟེ། གྲི་གུག་གིས་རྒྱབ་པ་དམར་ཉོབ་ཀྱིས་སོང་བར་བསམ། ངག་ཏུ་རཾ་ཡཾ་ཁཾ་གསུམ་བརྗོད་པ་ཙམ་གྱིས་ཐུགས་ཀ་ནས་མེ་ཆུ་རླུང་གསུམ་སྤྲོས་པས། ཤ་ཁྲག་གི་དངོས་པོ་སྲེག་སྦྱོང་བཀྲུས་ནས་དྭངས་མ་ལ་ༀ་ཨཱཿཧཱུྃ། གཉིས་བརྗོད་པ་ཙམ་གྱིས་གཅིག་གིས་ཟག་མེད་ཡེ་ཤེས་ཀྱི་བདུད་རྩི་གྱུར་པར་བསྒོམ། གཅིག་གིས་རང་གི་འཐུང་བ་ཙམ་གྱིས་གཟི་བརྗིད་ལོངས་སྤྱོད་ཕུན་སུམ་ཚོགས་ཏེ། ཚེའི་དངོས་གྲུབ་ཏུ་གྱུར་པར་བསྒོམས། ཞེས་དངོས་གྲུབ་བླང་ངོ་། །དེ་ནས་ཡིག་བརྒྱ་བསྔོ་བས་དགེ་རྩ་དག །ཅེས་གསུང་པས། མ་འབྱོར་པ་དང་ཉམས་པ་དང་། གང་ཡང་བདག་བློ་གཏི་མུག་པས། །ལེགས་སྤྱོད་འདི་ལ་ཉེས་བྱས་གང་། །གང་ཕྱིར་ལུས་ཅན་སྐྱབས་གྱུར་པ། །དེ་ཀུན་གནས་བདག་རྣམས་ཀྱིས་བཟོད་པར་གསོལ། །གང་ཡང་བདག་ཅག་ལས་དང་པོ་པའི་སེམས་ཅན་དུ་གྱུར་པས། གཅོད་ཡུལ་ཉམས་སུ་བླང་བ་ལ། ཆད་པ་དང་ལྷག་པ་གོང་འོག་འཁྲུག་པ་ཏིང་ངེ་འཛིན་མི་གསལ་བ། མཆོད་པའི་དངོས་པོ་ཆུང་ཞིང་ངན་པ་གཙང་སྦྲས་ལ་ཕྱེད་པ། མདོར་ན་ཉེས་པའི་ཚོགས་ཅི་མཆིས་པ་ཐམས་ཅད་བཟོད་པར་མཛད་དུ་གསོལ། ༀ་བཛྲ་ས་ཏྭ་ས་མ་ཡ་ཅེས་སོགས་ཡི་གེ་བརྒྱ་པ་ལྷག་ཆད་ཁ་བསྐང་བར་བྱའོ། །དེ་ནས་བསྔོ་བ་ནི། ཟབ་དོན་ཐུགས་སྙིང་ལས་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ། གྲུབ་ཐོབ་གཅོད་ཀྱི་བརྒྱུད་པའི་བླ་མ་ཐམས་ཅད་བདག་དང་སྣང་ཞིང་སྲིད་པའི་ལྷ་འདྲེ་ཐམས་ཅད་ལ་དགོངས་སུ་གསོལ། ལྷ་འདྲེ་ཁྱེད་རྣམས་ཀྱིས་དང་པོ་བདག་ལ་ཆོ་འཕྲུལ་གདུག་རྩུབ་བསྟན་ཞིང་གནོད་པ་བསྐྱལ་བ་དང་། ཕྱི་ནས་གུས་པར་འདུད་ཅིང་ཕན་བཏག་པ་དང་། བདག་གིས་ཀྱང་ཁྱེད་རྣམས་ལ་སྤྱོད་ལམ་འཇམ་པོས་ལུས་སྦྱིན་པར་བཏང་བ་དང་། སྤྱོད་ལམ་རྩུབ་མོས་གནོད་པ་བསྐྱལ་བ་ལ་སོགས་པ་ཐབས་སྣ་ཚོགས་ཀྱིས་སྒོ་ནས་ལྷ་འདྲེ་བྱང་ཆུབ་ཀྱི་ལམ་ལ་བཀོད་པའི་དགེ་བའི་རྩ་བ་ལ་བརྟེན་ནས་ལྷ་འདྲེ་ཁྱེད་རྣམས་ཀྱི་རྒྱུད་ལ་ཡོད་པའི་བསམ་སྦྱོར་ཉོན་མོངས་པའི་གདུག་རྩུབ་ཐམས་ཅད་ཞི་ནས། བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཁྱེད་རྣམས་ཀྱིས་བདག་ལ་མཐོ་མཚམ་ཞིང་གནོད་པ་བསྐྱལ་བ་དང་། ཕྱིས་ནས་ཆོས་བྱས་ཅིང་གུས་པར་བཏུད་པའི་དགེ་བའི་རྩ་བ་ལ་བརྟེན་ནས། རྒྱལ་པོ་བྱམས་པའི་སྟོབས་དང་། གནོད་སྦྱིན་ཤ་ཟ་སྤུན་ལྔ་བཞིན་དུ། བདག་གིས་འཁོར་གྱི་འདུས་པ་དང་པོར་གྱུར་ཅིག །ཁྱེད་རྣམས་ཀྱིས་ལས་ངན་གྱི་སྒྲིབས་པ་བག་ཆགས་དང་བཅས་པ་སྐད་ཅིག་ཉིད་ལ་བྱང་ཞིང་དག་ནས་ཀུན་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །རྣལ་འབྱོར་པ་བདག་གིས་ཀྱང་ལྷ་འདྲེ་ཁྱེད་རྣམས་ལ་ལུས་སྦྱིན་པ་བཏང་བ་དང་། བྱམས་པའི་སེམས་ཀྱིས་ཁྱེད་རྣམས་རྗེས་སུ་བཟུང་བའི་དགེ་བའི་རྩ་བ་ལ་བརྟེན་ནས། རྒྱལ་པོ་ཟླ་འོད་དང་། རྒྱལ་བུ་དགེ་དོན་བཞིན་དུ་ཕ་རོལ་ཏུ་ཕྱིན་པ་ཐམས་ཅད་མྱུར་དུ་རྫོགས་ནས་རང་གཞན་ཐམས་ཅད་དོན་གཉིས་ལྡན་པའི་སངས་རྒྱས་རིན་པོ་ཆེ་མྱུར་དུ་ཐོབ་པར་གྱུར་ཅིག །ཅེས་བསྔོ་བ་བྱའོ། །སྤྱིར་རྗེས་ཆོག་འདི་རྣམས་གཟབ་ན་གཅོད་ལམ་དུ་འགྲོ་བ་ཡིན་པས། ཤིན་ཏུ་གལ་ཆེའོ། །དེ་ནས་བཀྲ་ཤིས་ནི། བཅོམ་ལྡན་ཤཱཀྱ་ཐུབ་པ་ཡིས། ཅེས་སོགས་གོང་དུ་གཏོར་གཞོང་མའི་འགབ་ཏུ་ཡོད་པའི་བཀྲ་ཤིས་དེ་ལྟར་བྱའོ། །དེ་ནས་སྔར་རྡོ་གཏེལ་ཁྲིད་ནས་ཡོད་ན། རང་གི་ཡིག་དྲུག་བཟླ་ཞིང་རྡོ་གཏེལ་ལ་ཕུ་བྱེད་ཅིང་། རྡོ་གཏེལ་དེ་ཐུགས་རྗེ་ཆེན་པོར་བྱིན་གྱིས་རླབས་ལ་དཀར་ཐ་ར་ར་རང་རང་གི་གནས་སུ་ཐལ་བར་བསྒོམ་ལ། སྔར་གྱི་གཉན་ས་དེ་ལ་རང་གི་རྒྱབ་བསྟན་ནས་རྡོ་གཏེལ་རྒྱབ་ཏུ་འཕང་ངོ་། །དེ་ནས་ཐབ་ཁ་མལ་བསྡུད་གཉན་མིག་དག །ཅེས་གསུངས་པས། ཀཾ་ཀ་ནི་དང་ཡིག་བརྒྱ་བརྗོད་ཅིང་། ཉལ་ས་དང་ཐབ་ཁ་བཤིག་གོ། །དེ་ནས་ལྷ་འདྲེ་རྣམས་ལ་རྟེན་གྱི་སྐྱེལ་དར་བཞག་པ་ནི། རྡོ་ལ་ཡིག་དྲུག་བརྐོ་ལ་ཐུགས་རྗེ་ཆེན་པོར་བསྒོམ། ཡེ་ཤེས་པ་སྤྱན་དྲངས་ལ་བསྟིམ། གཉན་ས་འདིར་གནས་པའི་སྣང་སྲིད་ཀྱི་ལྷ་འདྲེ་བཀའི་ལྷ་མ་སྲིན་སྡེ་བརྒྱད་རྣམས་ཀྱིས་ཡི་གེ་འདི་ཕྱག་འཚལ་བའི་རྟེན། མཆོད་པ་འབུལ་བའི་གནས། གསོལ་བ་བཏབ་པའི་ཡུལ་དུ་འབྱུང་བར་གྱུར་ཅིག །ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཕཊ། འཇུག་བསྡུད་ཕྱིར་བཞག་རྣམ་གསུམ་ནི། །ཤ་སོགས་སྣང་སྲིད་བཞག་པ་གཅེས། །ཅེས་གསུངས་པས། ཕཊ་གཅིག་བྱས་པ་ཙམ་གྱིས་རང་གི་ཤ་ཁྲག་ཉིལ་གྱིས་སོང་སྟེ། གཉན་ས་སྟིམ་གྱིས་གང་ནས་མལ་དུ་ལྷ་འདྲེ་རྣམས་ཀྱིས་བསྒོ་བཤའ་བྱེད་པར་བསམ་ལ། ངག་ཏུ་བདག་གིས་གནས་པོ་ཆེན་པོ་གནས་བདག་ཆེན་པོ་འདི་རྣམས་ལ། ཁྱོད་སྣང་ཞིང་སྲིད་པའི་ལྷ་འདྲེ་ཐམས་ཅད་ཀྱིས་གནོད་དང་འཚེ་བ་མ་བྱེད་གཅིག །གལ་ཏེ་བདག་གིས་གནས་པོ་འདི་ལ་གནོད་པ་བྱས་ན། ཡེ་ཤེས་ལྷའི་དམག་ཚོགས་འདྲེན། གནམ་ལྕགས་རྡོ་རྗེའི་སྒྱོག་རྒྱབ། ཡུང་དཀར་དྲག་པོའི་ཐུན་བརྡེག །འཁོར་ལོ་འབར་བས་རྩིབ་ལ་སྐྱོན། དེ་བས་ལོངས་སྤྱོད་ཆེན་པོ་འདིས་ཚིམ་པར་གྱིས་ལ། སྤྱིའི་ལྷ་འདྲེ་ཐམས་ཅད་ཀྱིས་གནས་བདག་འདི་རྣམས་ལ་གནོད་འཚེ་མ་བྱེད་ལ། དགའ་མགུར་བྱང་ཆུབ་ཀྱི་སེམས་དང་ལྡན་ནས། སོ་སོ་རང་རང་གི་གནས་སུ་གྱེས་ཤིག །ཅེས་བརྗོད། ཤེས་པ་ཀེང་རུས་གར་བྱེད་གཅེས། བཞད་པའི་གད་རྒྱང་བཅུ་གཉིས་གཅེས། ཅེས་གསུངས་པས། ཕཊ་ཅེས་བརྗོད་པས་ཁྲོས་མ་དགུ་ལ་སོགས་པའི་ཕྱི་ཡི་ཟིལ་ནོན་ཐམས་ཅད་བདག་གིས་ཐུགས་ཀར་བསྡུ། དེ་ནས་འགྲོ་བ་དང་སྤྲད་ལ་ཕཊ་གཅིག་བརྗོད་པས་རང་གི་རུས་པ་ཕྱི་ན་ཤ་དང་ཆུ་རྒྱུས་མེད་པ། ནང་ན་རྐང་དང་ལྷ་བ་མེད་པའི་རུས་པ་དཀར་སི་ལི་བ། རྐང་དང་ལྷ་བ་ལྷུ་ཚིག་གི་བར་ན་མེ་ལྷབ་ལྷབ། དུ.བ་ཐུལ་ཐུལ་བྱེད་པ་གར་ཁྱུག་ཁྱུག་བྱེད་ནས་ངག་ཏུ། ཧ་ཧ། ཧི་ཧི། ཧུ་ཧུ། ཧེ་ཧེ། ཧོ་ཧོ། ཧཾ་ཧ། ཅེས་པ་བཞད་པའི་གད་རྒྱང་བཅུ་གཉིས་སྒྲོག་ཅིང་། ཕྱི་བལྟས་མི་བྱེད་ཅིང་གཉན་ས་མ་བུད་ཀྱི་བར་དུ་འགྲོ་བ་ཡིན། དེ་ནས་ཕ་ལྟའི་གཉན་མགོ་མཐོང་བ་དང་། དབང་བསྡུད་ལ་སོགས་གོང་དང་འདྲ་བ་ཡིན། གཅོད་འཕྲོ་མི་བཅད་ན་གོང་གི་དེ་ལྟར་བྱེད་པ་ཡིན་ལ། གཅོད་འཕྲོ་བཅད་ནས་ཁྱིམ་དུ་འགྲོ་ན། གོང་ལྟར་རྡོ་གཏེལ་བཟུང་མི་དགོས། གད་རྒྱང་བཅུ་གཉིས་སྒྲོག་ཅིང་། ཡར་མར་མི་མཐོང་བའི་ས་མཚམས་སུ་ཁྱུང་ནག་བཞག་དགོས་ཏེ། དཀར་སྦྱོར་ལས། ཕྱི་ཐེམ་ཕྱི་རུ་མ་ནོན་ན། ནོར་ལེན་ཕྱི་རྗེས་སྙག་པ་འདྲ། དེ་ལ་དམག་དཔོན་ཁྱུང་ནག་བཞག །ཅེས་གསུངས་པས་ཡར་གཉན་ས་མི་མཐོང་། མར་ཁང་པ་མི་མཐོང་བའི་མཚམས་སུ། ཐོ་གཅིག་བརྩིག་ལ་བྱ་ཁྱུང་གི་སྐུའམ། ཁྲོཾ་བྲིས་ལ་ཁ་ཕྱི་རྗེས་སུ་བསྟན་ནས་བཞག་ལ། ངག་ཏུ་ཁྲོཾ་ཁྲོཾ་ཞེས་བརྗོད་པས་བྱ་ཁྱུང་ནག་པོ་མེའི་གཤོག་པ་ཅན་གསུམ་གྱིས་ལག་སྦྲེལ་ནས་ཁ་ཕྱི་རྗེས་སུ་གྱུ་ནས་ཡོད་པར་བསྒོམ། དེ་ནས་ཕཊ་བརྗོད་པས་རང་དང་གནས་ཁང་གི་བར་ལ་འོད་སྣམ་ཤར་ཙམ་གྱིས་འབྲེལ་པའི་ལམ་ལ། ཕཊ་བརྗོད་པས། རང་གི་རྣམ་པར་ཤེས་པའི་ངོ་བོ་གསེར་གྱི་རྡོ་རྗེ་རྩེ་ལྔ་པར་གྱུར་ནས་ཧྲི་ལི་ལི་འོད་ཀྱི་ལི་ལི་སོང་ནས་ཁྱིམ་དུ་ཕྱིན་པར་བསྒོམ་མོ། །ནད་པ་མི་སྐྱ་ཕོ་མོ་དང་། གཅོད་དམིགས་བཟུང་མི་ཤེས་པ་ཡིན་ན། རྗེས་ཆོག་གི་བྱེད་ལས་ཐམས་ཅད་གཅོད་དཔོན་གྱི་རོག་བྱེད་དགོས་སོ། །སྤྱིར་གཅོད་བྱེད་པ་ལ་གཅོད་མགོ་དང་། གཅོད་འཕྲོ་གཟབ་པ་རྣལ་འབྱོར་དམ་ཚིག་ཡིན། ཅེས་གསུངས་པས། གཅོད་འཕྲོ་གཅོད་ནས་ཁྱིམ་དུ་འགྲོ་བསམ་པའི་གཉན་ས་དེ་ལ་སློང་ཚད་དང་ཆོད་ཚད་ཚུལ་བཞིན་དུ་ཐོན་པ་གལ་ཆེའོ། །དེས་རྗེས་ཀྱི་བྱ་བ་སོང་། དེ་ལྟར་སྦྱོར་དངོས་རྗེས་གསུམ་གཅིག་ཏུ་དྲིལ་བའི་སྒོ་ནས། བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་གི་ཕྲེང་བ་ཞེས་བྱ་བ་སོང་ངོ་། །ཀྱེ་མ་འདི་ལ་མི་བརྩོན་སུ་ཞིག་ཡོད། །རྒྱལ་བའི་རྒྱལ་ཚབ་དགོངས་རྒྱུད་དམ་ཆོས་འདི། །ཐར་པའི་ལམ་སྟོན་འདྲེན་མཆོག་དམ་པ་ཡིན། །ཟབ་རྒྱས་ཀུན་ཁྱབ་ཀུན་ཕན་ནོར་བུ་འདི། །ཕྱོགས་འཛིན་གྲུབ་མཐའ་སྤང་བའི་ཐོ་བ་ཡིན། །རིན་ཆེན་རིན་ཐང་མེད་པའི་གཅོད་གཞུང་འདི། །གདུལ་བྱ་དང་བ་འདྲེན་པའི་ལྕགས་ཀྱུ་ཡིན། །ཆོས་པའི་ཤན་འབྱེད་ཆོས་ཀྱི་གསེར་གླིང་ཡིན། །ལྷ་འདྲེ་དབང་སྡུད་གསང་བའི་ལྕགས་ཀྱུ་ཡིན། །ཉོན་མོངས་ལམ་སློང་ཡེ་ཤེས་མེ་དཔུང་ཡིན། །བར་ཆད་ལམ་སློང་བཀྲ་ཤིས་དཔལ་འབར་ཡིན། །འཆི་བདག་བདུད་དཔུང་སྲུང་བའི་འཁོར་ལོ་ཡིན། །ནད་རྣམས་ཀུན་འཇོམས་སྨན་གྱི་རྒྱལ་པོ་ཡིན། །དྲག་སྔགས་ཀུན་བཟློག་བྱད་མ་འབུམ་སྡུག་ཡིན། །བྱང་ཆུབ་ལམ་སྒྲོན་ཐར་པའི་ཐེམ་སྐས་ཡིན། །འཆི་བ་ལམ་སློང་ཆོས་སྐུའི་ཞིང་ཁམས་ཡིན། །ཀྱེ་མ་འདི་ལ་མི་འཇུག་སུ་ཞིག་ཡོད། །གཅོད་གཞུང་ཟབ་རྒྱས་རྒྱ་མཚོ་རྒྱ་ཆེན་ལས། །ཉུང་འདུས་ཟབ་དོན་དོན་འདི་བཀོད་པ་ནི། །ཚད་མ་གསུམ་ལྡན་མན་ངག་དམ་པ་ཡིན། །རང་བཟོ་ཕོ་ཚོད་འདི་ལ་མ་མཆིས་སྙམ། །འོན་ཀྱང་མ་ཤེས་ལོག་ཤེས་འགལ་འཁྲུལ་ཚོགས། །གཅོད་བརྒྱུད་མཁས་གྲུབ་རྣམས་ལ་གཟོད་པར་གསོལ། །ལེགས་པའི་ལམ་སྟོན་དགེ་བའི་ཚོགས་མཆིས་ན། །འགྲོ་ཀུན་བདུད་བཞིའི་མཐའ་ལས་རྒྱལ་བར་ཤོག །གཅོད་གཞུང་འདི་རང་བཟོ་དང་ཕོ་ཚོད་མ་ཡིན་པའི་དོན་ནི། མ་ཅིག་གིས་གསུངས་པའི་ཞལ་གདམ་བཅུ་གསུམ་མ། བཅུ་བཞི་མ། ཉེར་ཞི་རིན་ཆེན་སྒྲོན་མ། དྲག་སྔགས་རིང་མོ། སྡོང་པོ་གསེར་ཀླག །སྤ་ཡིག་ལ་སོགས་རྣམས་དང་། ཨཱརྱ་དེ་བས་མཛད་པའི་གཞུང་ཆུང་། དམ་པ་མཛད་པའི་དམིགས་པ་སྐོར་གསུམ། པཎྜི་ཏ་དོན་ཡོད་རྡོ་རྗེས་མཛད་པའི་ཟབ་དོན་ཐུགས་སྙིང་། ཀུན་དགས་མཛད་པའི་གཅེས་པ་ཉེར་གཅིག །རྒྱ་མཚོ་ཆུ་གཏེར། ཚད་མེད་དཔའ་འབྱོར་མཛོད་ཆེན། མ་ཅིག་མ་ཅིག་གི་ཞལ་གདམ་གསེར་ཞུན་མ། མ་ཅིག་གིས་གསེར་ཐུར་མ། ཡེ་བློས་མཛད་པའི་དཀར་སྦྱོར། ཨོ་རྒྱན་པདྨས་མཛད་པའི་གཏེར་གཅོད། གཞན་ཡང་བླ་མ་གོང་མ་རྣམས་ཀྱིས་མཛད་པའི་ཡིག་སྣ་ལ་སོགས་མན་ངག་རྣམས་ལ་བརྟེན་ནས། བདུད་ཀྱི་གཅོད་ཡུལ་དགོས་འདོད་ཀུན་འབྱུང་རིན་པོ་ཆེ་མུ་ཏིག་ཕྲེང་བ་ཞེས་བྱ་བ་འདི། ཀཿཐོག་པའི་འབངས་ཀྱི་ཐ་མར་གྱུར་པའི་ཀུ་སུ་ལུ་པུ་ཎྱེ་ལ་ཀྵ་ས་སྦྱར་བ་རེ་ཞིག་རྫོགས་སོ།། །།དཔེ་འདི་ཕྱོགས་དུས་གནས་སྐབས་ཐམས་ཅད་དར་ཞིང་རྒྱས་པར་གྱུར་ཅིག །མངྒ་ལཾ། ཤུ་བྷཾ།

གཅོད་ཁྲིད་གསལ་བའི་སྒྲོན་མེ། པུ་ནེ་ཀླག་ཤ།

གཅོད་ཁྲིད་གསལ་བའི་སྒྲོན་མེ་ཞེས་བྱ་བ་བཞུགས་སོ། །ན་མོ་རཏྣ་གུ་རུ་ཡེ། ཡེ་ནས་གནས་ལུགས་ཕྱོགས་བྲལ་སྙིང་པོའི་དོན། །མི་འགྱུར་མི་ཤིག་སྤྲོས་དང་བྲལ་བ་ཡིས། །འདུས་བྱས་མ་ཡིན་རང་བཞིན་ལྷུན་གྱིས་གྲུབ། །འཁོར་འདས་ཡོངས་ལ་ཁྱབ་པའི་རྒྱ་མཚོ་ཆེ། །བསམ་བརྗོད་ཡུལ་འདས་ཡུམ་ཆེན་ཞབས་ལ་འདུད། །དེའི་ཉམས་ལེན་ཁྲིད་ཀྱི་རིམས་པ་འདི། །མ་ཅིག་ཇོ་མོའི་ཐུགས་ཀྱི་དགོངས་པ་དང་། །མཁས་གྲུབ་བླ་མས་གསུངས་བཞིན་འཁྲུལ་མེད་པ། །ལས་ཅན་འགའི་བསྐུལ་ཕྱིར་བྲི་བར་བྱ། །འདིར་ཐེག་པ་ཐམས་ཅད་ཀྱི་ནང་ནས་ཟབ་ཅིང་རྨད་དུ་བྱུང་བ། དེ་ཉིད་ཉམས་སུ་ལེན་པའི་ཁྱད་པར་དུ་འཕགས་པ་ཐམས་ཅད་དོན་གཅིག་ཏུ་དྲིལ་ནས་སྟོན་པ་གཅོད་ཁྲིད་རིམ་འདི་ལ། སྔོན་འགྲོ། དངོས་གཞི། རྗེས་གསུམ་གྱི་སྟོན་པའི། དང་པོ་སྔོན་དུ་འགྲོ་བ་གཉིས་སྟེ། བློ་ལྡོག་རྣམ་པ་གསུམ་གྱིས་བློ་སྦྱངས། སྔོན་འགྲོ་སྦྱོར་བའི་ཆོས་ཀྱི་རྒྱུད་སྦྱངས་བའོ། །དང་པོ་ལ་གསུམ་སྟེ། དལ་འབྱོར་རྙེད་དཀའ་བ། འཆི་བ་མི་རྟག་བསྒོམ་པ། འཁོར་བའི་ཉེས་དམིགས་བསམ་པའོ། །དང་པོ་ལ་ཡང་གསུམ་ལས། རྒྱུ་ལ་བསམ་ནས་རྙེད་པར་དཀའ་བ། ངོ་བོའི་རྣམ་གྲངས་ལ་བསམ་ཡང་རྙེད་པར་དཀའ་བ། དཔེ་ལ་བསམ་ཀྱང་རྙེད་པར་དཀའ་བའོ། །དང་པོ་རྒྱུ་ལ་བསམ་ཀྱང་རྙེད་པར་དཀའ་བ་སྒོམ་པ་ནི། ཆོས་སྒྲུབ་པའི་རྟེན་དལ་འབྱོར་གྱི་མི་ལུས་འདི་འགྲུབ་པ་ལ། རྒྱུ་དགེ་བ་རྣམ་དག་རེ་བྱེད་དགོས་ལ། སེམས་ཅན་གྱི་ནང་ན་རྒྱུ་དགེ་བ་རྣམ་དག་བྱེད་པ་ཉུང་བས་འབྲས་བུ་དལ་འབྱོར་ཐོབ་པ་དཀའ་བ། བདག་གིས་དལ་འབྱོར་ཐོབ་པ་འདི། སྟོང་ཟད་དུ་མི་སྟོང་བར་ཆོས་རྣམ་དག་གཅིག་བྱེད་དགོས་སྙམ་དུ་ཡང་ཡང་བསྒོམ། དེའི་ལག་ལེན་དུ་བརྒྱུད་པ་རྣམས་ལ། ཡན་ལག་བདུན་པ་འབུལ་ཞིང་གསོལ་བ་དྲག་ཏུ་བཏབ་ལ། སྒོ་གསུམ་དགེ་བ་ལ་འབད་པར་བྱའོ། །དམིགས་ཐུན་གཅིག །ཐུན་མཚམས་སུ་སྨོན་ལམ་ཚིག་ཉུང་ལ་དོན་ཆེ་པ་འདི་བཏབ་པ་བྱའོ། །སྒོ་འབྱེད་ཚེ། སེམས་ཅན་ཐམས་ཅད་ཀྱི་ཐར་པའི་སྒོ་འབྱེད་པར་གྱུར་ཅིག །སྒོ་གཅོད་པའི་ཚེ། སེམས་ཅན་ཐམས་ཅད་ཀྱི་ངན་སོང་གི་སྒོ་གཅོད་པར་གྱུར་ཅིག །ནང་དུ་མཇུག་པའི་ཚེ། སེམས་ཅན་ཐམས་ཅད་ཐར་པའི་ཁང་བཟང་དུ་འཇུག་པར་གྱུར་ཅིག །ཕྱིར་འགྲོ་བའི་ཚེ། སེམས་ཅན་ཐམས་ཅད་འཁོར་བའི་བཙོན་ར་ལས་ཐར་བར་གྱུར་ཅིག །དབེན་པར་ཕྱིན་པའི་ཚེ། སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་དབེན་པ་བརྟེན་པར་གྱུར་ཅིག །སྟན་ལ་འདུག་པའི་ཚེ། སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར་གྱུར་ཅིག །གཉིད་ལོག་པའི་ཚེ། སེམས་ཅན་ཐམས་ཅད་རྣམ་པར་མི་རྟོག་པའི་ཆོས་སྐུ་ཐོབ་པར་གྱུར་ཅིག །སད་པའི་ཚེ་སེམས་ཅན་ཐམས་ཅད་མ་རིག་པའི་གཉིད་ལས་སད་པར་གྱུར་ཅིག །གོས་གྱོན་པའི་ཚེ། སེམས་ཅན་ཐམས་ཅད་ངོ་ཚ་ཁྲེལ་ཡོད་ཀྱི་གོས་གྱོན་པར་གྱུར་ཅིག །སྐ་རག་བཅིང་བའི་ཚེ། སེམས་ཅན་ཐམས་ཅད་དགེ་བའི་རྩ་བ་ཟུང་དུ་འཇུག་པར་གྱུར་ཅིག །ཁྲུས་བྱེད་པའི་ཚེ། སེམས་ཅན་ཐམས་ཅད་སྒྲིབ་གཉིས་དྲི་མ་དག་པར༴ རྒྱན་འདོག་པའི་ཚེ། སེམས་ཅན་ཐམས་ཅད་དེ་བཞིན་གཤེགས་པའི་ཡོན་ཏན་གྱི་རྒྱན་མཛེས་པར༴ ལམ་དུ་ཞུགས་པའི་ཚེ། སེམས་ཅན་ཐམས་ཅད་བྱང་ཆུབ་ཀྱི་ལམ་དུ་འཇུག་པར༴ ཆུ་ལ་བརྒལ་བའི་ཚེ། སེམས་ཅན་ཐམས་ཅད་སྡུག་བསྔལ་གྱི་ཆུ་བོ་ལས་བསྒལ་བར༴ མི་དང་འཕྲད་པའི་ཚེ། སེམས་ཅན་ཐམས་ཅད་འཕགས་པའི་གདམ་ངག་དང་འཕྲད་པར༴ སྣོད་སྟོང་པ་མཐོང་བའི་ཚེ། སྐྱོན་སྟོང་པར༴ གོང་བ་མཐོང་བའི་ཚེ། ཡོན་ཏན་གྱི་གོང་བར༴ ཆོས་འཆད་པ་མཐོང་བའི་ཚེ། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བ་མཐོང་བ་དང་ཐོས་པར༴ སྐྱེ་བོ་གདུག་པ་ཅན་བྱེ་བ་དང་ཚར་གཅོད་པའི་ཚེ། བདུད་དང་ཕྱི་ནས་བརྒོལ་བ་འཇོམས་པར༴ ཕན་ཚུན་གཏམ་བརྗོད་པ་ཉན་པའི་ཚེ། ཆོས་ཀྱི་གཏམ་གྱིས་བདག་གཞན་གྱི་ཡིད་བདེ་བར༴ ཅེས་སོགས་རིགས་པས་སྤྱོད། ཡང་ན་གནོད་བྱེད་འདིས་བདག་གིས་བྱང་ཆུབ་ཀྱི་སེམས་སྦྱང་བའི་གྲོགས་བྱས་པས་བླ་མ་ལྟར་བཀའ་དྲིན་ཆེ་སྙམ་དུ་བསམ། ཡང་གཞན་སྡུག་བསྔལ་བ་མཐོང་ན་ཡང་། དེ་མ་ཐག་ཏུ་བདག་ལ་བླང་ཞིང་། རང་ངམ་གཞན་ལ་ཉོན་མོངས་དྲག་པོ་སྐྱེས་ནའང་། གཞན་གྱི་ཉོན་མོངས་པ་ཐམས་ཅད་བདག་ལ་འདུས་པར་གྱུར་ཅིག་སྙམ་དུ་ཞེ་ཐག་པ་ནས་བསམ་མོ། །རྐྱེན་ངན་ལམ་དུ་བྱ་ཐབས་འདི། ཐམས་ཅད་ཀྱི་རེ་དོག་ཉིད་འགོག་པ་ཡིན། མཐར་ཐུག་རེ་དོག་གཉིས་དང་བྲལ་བའི་ལམ་ལ་སྐྱོལ་བ་ཡང་། ད་ལྟའི་དུས་སུ་དགྲ་ཟན་གཉིས་སུ་བྱས་ནས་སྦྱོང་བ་ཡིན། ཤིང་འཁྱོག་པོ་བསྲང་བ་དང་འདྲའོ། །ཅེས་གླང་རི་ཐང་བས་གསུངས་སོ། །དགེ་བ་དག་ཀྱང་མ་བྱས་ཤིང་། །སྡིག་པ་དག་ཀྱང་ཉེར་བསག་ན། །བསྐལ་པ་བྱེ་བ་བརྒྱ་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །ཅེས་སོ། །འདིར་ལུང་ཁོང་མ་སྨོས་པ་རྣམས་ནི། བྱང་ཆུབ་སེམས་དཔའི་སྤྱོད་པ་ལ་འཇུག་པར་འབྱུང་བ་ཡིན་པར་ཤེས་པར་བྱའོ། །གཉིས་པ་ངོ་བོའི་གྲངས་ལ་བསམ་ཀྱང་རྙེད་དཀའ་བ་ནི། དལ་བ་བརྒྱད་དང་འབྱོར་པ་བཅུ་ཚང་བའི་ལུས་འདི་རྙེད་པར་དཀའ་སྟེ། མདོ་ལས། ངན་སོང་ནི་སའི་རྡུལ་དང་། མཐོ་རིས་ནི་སེན་མོའི་རྡུལ་ཙམ་མོ་ཞེས་གསུངས་པ་དང་། བྱང་ཆུབ་སེམས་དཔའི་སྡེ་སྣོད་ལས། ཤིང་རྟའི་འཕང་ལོ་ཙམ་གཅིག་གི་སོ་ན་ཐམས་ཅད་མཁྱེན་པས་གཟིགས་ལ། གཞན་གྱི་མི་མཐོང་བའི་སེམས་ཅན་ནི་སྟོང་གསུམ་གྱི་ལྷ་དང་མི་བྱིང་ལ་ཡང་དེ་ཙམ་མེད། ཅེས་གསུང་པ་དང་། མན་ངག་ཏུ། དུད་འགྲོ་ནི་ཆང་དར་མོའི་སྦང་མ་ཙམ། ཡི་དྭགས་ནི་ཁ་བ་བུ་ཡུག་འཚུབ་པ་ཙམ། དམྱལ་བ་ནི་སའི་རྡུལ་ཙམ་ཡོད་པར་གསུངས་ན། འགྲོ་བ་གཞན་ལ་ལྟོས་ན་མི་ལུས་ཐོབ་པ་མེད་པའི་ཚོད་ཙམ་ཡིན་ལ། ཁ་འཐོར་དུད་འགྲོ་ཙམ་ལ་ལྟོས་ཀྱང་མི་ལུས་ཐོབ་པ་སྲིད་མི་སྲིད་ཀྱི་ཚོད་ཙམ་ཡིན་གསུང་། དེས་ན་དལ་འབྱོར་ཆུད་ཟོས་སུ་མི་གཏོང་བར་ཆོས་རྣམ་དག་ཅིག་བྱེད་དགོས་སྙམ་དུ་ཡང་ཡང་བསྒོམ་སོགས་སྔར་བཞིན་ནོ། །དམིགས་ཐུན་གཉིས་པའོ། །དལ་འབྱོར་འདི་ནི་ཤིན་ཏུ་རྙེད་པ་དཀའ། ཞེས་སོགས། དེ་ལ་དལ་བ་ནི་མི་ཁོམ་པའི་གནས་བརྒྱད་སྤང་བ་སྟེ། མི་ཁོམ་པའི་གནས་བརྒྱད་ནི། ངན་སོང་གསུམ་དང་། ལྷ་ཚེ་རིང་པོ་དང་། མི་ལུས་ཐོབ་ཀྱང་སངས་རྒྱས་མེད་པའི་མུན་སྐལ་དུ་སྐྱེས་པ་དང་། སངས་རྒྱས་བྱོན་ཀྱང་བསྟན་པའི་འོད་ཀྱིས་མ་ཁྱབ་པ་མཐའ་འཁོབ་དུ་སྐྱེས་པ་དང་། ཡུལ་དབུས་སུ་སྐྱེས་ཀྱང་ལྐུག་པ་དང་། དབང་པོ་ཚང་ཡང་བསྟན་པ་ལ་རྒྱབ་ཀྱི་ཕྱོགས་པའི་ལོག་ལྟ་ཅན་རྣམས་སོ། །འབྱོར་པ་བཅུ་ལས་རང་འབྱོར་ལྔ་ནི། ཆོས་དར་བའི་ཡུལ་དབུས་སྐྱེས་པ་དང་། ཡུལ་དབུས་སུ་དུད་འགྲོ་ཡང་ཡོད་པས་མི་ལུས་ཐོབ་པ་དང་། མི་ལུས་ལྐུག་ལོང་ཡང་ཡོད་པས། དབང་པོ་ཚང་བ་དང་། དབང་པོ་ཚང་ཡང་ལོག་ལྟ་ཅན་ཡང་ཡོད་པས་བསྟན་ལ་དད་པ་དང་། དང་པ་ཙམ་འཚམ་མེད་བྱད་པ་ལ་ཡང་ཡོད་པས་ལས་མཐའ་མ་ལོག་པ་སྟེ། མཚམས་མེད་མ་བྱས་པའོ། །གཞན་འབྱོར་ལྔ་ནི། སངས་རྒྱས་འཇིག་རྟེན་དུ་བྱོན་པ་དང་། དེས་ཆོས་གསུང་པ་དང་། དེའི་བསྟན་པ་གནས་པ་དང་། དེའི་རྗེས་སུ་འཇུག་པའི་དགེ་བའི་བཤེས་གཉེན་གྱིས་ཟིན་པ་དང་། སྙིང་བརྩེ་བའི་ཡོན་བདག་གིས་འཚོ་བ་སྦྱར་བ་སྟེ། དེ་རྣམས་སོ། །དལ་བ་ནི། འགལ་རྐྱེན་སྤང་བ་དང་། འབྱོར་པ་ནི་མཐུན་རྐྱེན་ཚང་བ་ཡིན་ལ། རང་འབྱོར་ནི་རང་གི་རྒྱུད་ལ་ཚང་བ་དང་། གཞན་འབྱོར་ནི་ཕྱིའི་རྐྱེན་ཚང་བའི་ཆ་ནས་འཆད་དོ། །གསུངས་སོ། །གསུམ་པ་དཔེ་ལ་བསམ་ཀྱང་རྙེད་པར་དཀའ་བ་བསྒོམ་པ་ནི། དཔེར་ན་འཇིག་རྟེན་གྱི་ཁམས་ཐམས་ཅད་རྒྱ་མཚོ་ཆེན་པོ་གཅིག་ཏུ་གྱུར་པ། དེའི་ཁ་ནས་གཉའ་ཤིང་བུ་ག་གཅིག་ཡོད་པ་ཕྱོགས་ཐམས་ཅད་དུ་འགྲོ་བ་གཅིག་ཡོད་ཅིང་། རྒྱ་མཚོའི་ནང་ན་སྦལ་པ་ལོང་བ་ལོ་བརྒྱ་བརྒྱ་ནས་སྟེང་དུ་འོང་བ་གཅིག་ཡོད་པ་དེའི་མགྲིན་པར་གཉའ་ཤིང་གི་བུ་གར་ཆུད་པ་ཤིན་ཏུ་དཀའ་སྟེ། ཅིའི་ཕྱིར་ན་སྦལ་པ་ལོང་བ་ཡིན་པ་དང་། གཉའ་ཤིང་བུ་ག་གཅིག་པ་དང་། རྒྱ་མཚོ་རྒྱ་ཆེ་བ་དང་། གཉའ་ཤིང་རླུང་གི་གང་དུ་ཁྱེར་ངེས་པ་མེད་པ་དང་། ལོ་བརྒྱ་ལོན་རེ་ལས་མི་འབྱུང་བའི་ཕྱིར་རོ། །དོན་དེ་ནི་དེ་བས་ཀྱང་ངན་སོང་ནས་མི་ལུས་ཐོབ་པར་དཀའ་ལ། ཞེས་སྔར་བཞིན་ནོ། །དམིགས་ཐུན་གསུམ། མགྱོགས་ཁྲིད་དུ་ཕྱེད་ན་འདི་གསུམ་གཅིག་ཏུ་བྱའོ། །བཅོམ་ལྡན་འདས་ཀྱི། རྒྱ་མཚོ་ཆེར་གཡེང་གཉའ་ཤིང་གིས། །བུ་གར་རུས་སྦལ་མགྲིན་ཚུད་ལྟར། །མི་ཉིད་ཤིན་ཏུ་རྙེད་དཀའ་གསུང་། །ཅེས་སོ། །ད་ནི་འཕྲོས་པ་བཤད་པར་བྱ་སྟེ། དེ་ལྟར་རྙེད་དཀའ་བའི་དུས་འདིར་ཆོས་རྣམ་དག་གཅིག་བྱེད་དགོས་ལ། འདིར་མ་བྱས་ན་ཕྱིས་དལ་འབྱོར་རྙེད་པའི་ངེས་པ་མེད་དེ། གལ་ཏེ་འདི་ལ་ཕན་པ་མ་སྒྲུབ་ན། །ཕྱིས་ནི་ཡང་དག་འབྱོར་པ་ག་ལ་འགྱུར། །ཅེས་དང་། དེ་བཞིན་གཤེགས་པ་འབྱུང་བ་དང་། །དད་དང་མི་ལུས་ཐོབ་པ་དང་། །དགེ་གོམ་རུང་བ་འདི་ལྟ་བུ། །དཀོན་པ་ནམ་ཞིག་ཐོབ་པར་འགྱུར། །ཅེས་སོ། །ཚེ་འདིའི་མདུན་མ་འགྲུབ་ཀྱང་ཁེབ་ཆུང་ལ་སླར་དོན་མེད་དུ་སོང་ཞིང་ཚེ་འདིའི་འདོད་པ་སྒྲུབ་ཀྱང་འགྲུབ་པའི་ངེས་པའང་མེད་དོ། །ཆོས་རྣམ་དག་བྱེད་ན་ཚེའི་དོན་ཡང་འགྲུབ་སྟེ། ཚེ་འདི་བློས་བཏང་ན་རྩེ་གཅིག་ཏུ་ཉམས་སུ་ལེན་པ་རྣམས་ལ་བདེ་སྐྱིད་སྙན་གྲགས་འབད་མེད་དུ་འབྱུང་གམ་གདའོ། །འདིར་ཆོས་རྣམ་དག་མ་གྲུབ་ཀྱང་སྡིག་པ་མ་བྱས་པས་ངན་འགྲོ་མི་སྐྱེས་ཞིང་། དགེ་བའང་ཅུང་ཟད་བྱས་པས་མི་ལུས་ཐོབ་སྟེ་འོང་དེ་དུས་ཆོས་བྱའོ་སྙམ་ན། འདིར་སྡིག་པ་མ་བྱས་ཀྱང་ཐོག་མེད་ནས་བྱས་པའི་ལས་ད་གཟོད་དམྱལ་བར་སྐྱེས། ངེས་པར་རང་ཡང་སྡིག་པ་གྲངས་མེད་པ་གཅིག་བསག་ཡོད་ན། ངན་སོང་དུ་མི་སྐྱེ་བའི་གདེང་ཅི་ལྟར་ཡོད་དེ། སྐད་ཅིག་གཅིག་བྱས་སྡིག་པས་ཀྱང་། བསྐལ་པ་མནར་མེད་གནས་འགྱུར་ན། །ཐོག་མེད་འཁོར་བར་བསག་སྡིག་གིས། །བདེ་འགྲོ་མི་འགྲོ་སྨོས་ཅི་དགོས། །ཅེས་དང་། ཆོས་རྣམ་དག་མ་བྱས་ན། ཚེ་འདིའི་སྙིང་ཁུང་སུ་བཅུག་པའི་ཁ་ཆོས་ཙམ་གྱིས་མི་ལུས་ཐོབ་པའི་ངེས་པ་མེད་དེ། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་ཐོབ་མི་འགྱུར། །ཅེས་སོ། །གལ་ཏེ་ངན་སོང་དུ་སྐྱེ་ན་ཆོས་བྱེད་པའི་སྐབས་མེད་དོ། །གང་ཚེ་དགེ་སྤྱོད་སྐལ་ལྡན་ཀྱང་། །དགེ་བ་བདག་གི་མ་བྱས་ན། །ངན་སོང་སྡུག་བསྔལ་ཀུན་རྨོངས་པ། །དེ་ཚེ་བདག་གིས་ཅིར་བྱར་ཡོད། །ཅེས་སོ། །དེ་ནས་ཐར་པ་ཡང་དཀའ་སྟེ། །དེ་ཚེ་ཁོ་ན་མྱོང་བར་འགྱུར། །དེ་ནི་རྣམ་ཐར་མིང་འགྱུར་ཏེ། །འདི་ལྟར་དེ་ནི་མྱོང་བཞིན་དུ། །སྡིག་པ་གཞན་དག་རབ་ཏུ་བྱུང་། །ཅེས་སོ། །མི་ཁམས་པ་གྱུར་བ་ཉིད་ཀྱང་། སངས་རྒྱས་ཀྱི་ཐུགས་རྗེས་འཛིན་པས་མྱུར་དུ་ཐར་རོ་སྙམ་ན། རང་གིས་ལས་ངན་གྱིས་སྔར་ཡང་ཐུགས་རྗེས་བཟུང་བའི་ཡུལ་དུ་མ་གྱུར་ཅིང་། ད་རུང་ཡང་ལས་ངན་བར་མ་ཆད་དུ་སོག་ན་ཡུལ་དུ་མི་འགྱུར་སྟེ། སེམས་ཅན་ཐམས་ཅད་ཕན་མཛད་པས། །སངས་རྒྱས་གྲངས་མེད་འདས་གྱུར་ཀྱང་། །བདག་ནི་རང་གི་ཉེས་པ་ཡིས། །གསོ་བའི་སྤྱོད་ཡུལ་མ་གྱུར་ཏེ། །ད་རུང་དེ་བཞིན་བདག་བྱེད་ན། །ཡང་དང་ཡང་དུ་དེ་བཞིན་སྟེ། །ངན་འགྲོ་ནད་དང་འཆི་བ་དང་། །བཅད་དང་བཤིག་སོགས་མྱོང་བར་འགྱུར། །ཅེས་སོ། །དེ་ནས་དལ་འབྱོར་དོན་མེད་དུ་བཏང་བ་རྣམས་ནི་བླུན་པ་དང་བསླུས་པའི་ཚབ་ཆེ་སྟེ། འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམ་མ་བྱས་ན། །འདི་ལས་བསླུས་པ་གཞན་མེད་ཅིང་། །འདི་ལས་རྨོངས་པ་གཞན་མེད་དོ། །ཅེས་པ་དང་། དེས་ན་དལ་འབྱོར་འདི་ལེ་ལོ་དང་། །རྣམ་གཡེང་གི་དབང་དུ་མི་བཏང་བར། །ཉིན་མཚན་མེད་པར་ཆོས་ལ་འབད་དགོས་ཏེ། །ཉིན་མཚན་མེད་པར་མ་འབད་ན། །བདག་གི་སྡུག་བསྔལ་ནམ་མཐར་ཕྱིན། །ཅེས་དང་། རང་གི་ཆོས་ལ་མ་འབད་ན། །ཐར་པ་ཐོབ་པའི་ཐབ་གཞན་མེད། །ཅེས་སོ། །འོ་ན་དལ་འབྱོར་རྙེད་དཀའ་བའི་བསྒོམ་སྐྱེས་པའི་ཚད་རང་ཅི་ཙམ་ཡིན་ན། དགེ་བའི་བཤེས་གཉེན་སྤྱན་སྔ་བ་ལྟ་བུ་ཡིན་ཏེ། ཁོང་གཉིད་ཡེ་མ་ལོག་པར་ཐུགས་དམ་མཛད་པས། དགེ་བཤེས་རྣལ་འབྱོར་པས་བུ་སྐབས་སུ་ཁམས་བག་རེ་ལ་མ་གཟིམས་ན་ཁམས་ལོག་འོང་ཉེན་ཡོད་གསུང་པས། དེ་རང་ལག་སྟེ། དལ་འབྱོར་རྙེད་དཀའ་འདི་བསམ་ཙ་ན། གཉིད་ལོག་རང་མི་ཁོམ་ཟེར། དེ་ལ་རྒྱལ་སྲས་ཐོག་མེད་པས། དེ་ཤིན་ཏུ་འཐད་པར་གདའ། དེ་འདྲ་རེ་མེད་ཁ་མེད་དེ། རང་རེ་ནི་དེའི་ཆ་ཙམ་ཡང་མི་ནུས་པར་འདུག །ཁོང་གིས་མི་གཡོ་བའི་བསྙེན་པ་དུང་ཕྱུར་དགུ་སོང་ཟེར་ཏེ། མི་ཚེ་ལ་གཉིད་ཡེ་མ་ལོག་པའི་ཚོད་དུ་འདུག་གསུངས་སོ། །དལ་འབྱོར་རྙེད་དཀའ་མ་ཐོབ་པས་ཆོག་གོ་སྙམ་ན། གཉིས་པ་འཆི་བ་མི་རྟགས་པ་བསྒོམ་པ་ལ་གཉིས་ཏེ། སྤྱིར་འཆི་བ་བསྒོམ་པ་དང་། བྱེ་བྲག་དུ་ནམ་འཆི་ཆ་མེད་བསྒོམ་པའོ། །སྤྱིར་འཆི་བ་བསྒོམ་པ་ལ་གསུམ་ལས། དང་པོ་གཞན་འཆི་བས་བདག་ཀྱང་འཆི་བར་བསྒོམ་པ་ནི། ས་སྟེང་འདིར་སྔར་སྐྱེས་ཟིན་པ་མང་པོ་འཆི། ཕྱིས་མི་འཆི་བ་གཅིག་ཀྱང་མ་སྐྱེས། ད་ལྟར་ཡང་མ་ཤི་ཚེ་ཐར་དུ་སྡོད་པ་དང་གཅིག་ཕྱོགས་གང་དུ་བརྩལ་དུ་མེད་པས། བདག་ཀྱང་མཐར་འཆི་བ་ཡིན་པས། ད་ལྟ་ཉིད་དུ་དམ་པའི་ཆོས་ལ་འབད་དགོས་སྙམ་དུ་བསྒོམ་པ་ལ་སོགས་སྔར་བཞིན་ནོ། །དམིགས་ཐུན་གཅིག་གོ། །དབུ་མ་བཞི་བརྒྱ་པ་ལས། གཞན་དག་འཆི་བ་མཐོང་བཞིན་དུ། །ཁྱོད་རང་འཆི་བ་ཅིས་མི་འགྱུར། །ཅེས་སོ། །གཉིས་པ་འདུས་བྱས་ཀྱི་མཚན་ཉིད་མི་རྟག་པ་རང་འཆི་བར་བསྒོམ་པ་ནི། སྤྱིར་སྟོང་གསུམ་གྱི་འཇིག་རྟེན་གླིང་བཞི་གླིང་ཕྲན། རི་རབ་རི་བྲན་རྣམས་ཀྱང་འཇིག་རྟེན་འཇིག་པའི་ཚེ། ཐལ་བ་ཙམ་ཡང་མི་ལུས་པ་དང་། ནམ་སླ་དགུན་གྱི་འགྱུར་ལྡོག་དང་། ཉི་ཟླ་སྐར་གསུམ་གྱི་འགྲོ་འོང་དང་། ནང་བཅུད་སེམས་ཅན་གྱི་དར་རྒུད་ལ་སོགས་པ་ལ་བསམ་ཀྱང་། བདག་འཆི་བ་ཡིན་པས་ད་ལྟ་ཉིད་དུ་དམ་པའི་ཆོས་ལ་འབད་དགོས་སྙམ་དུ་བསྒོམ་པ་ལ་སོགས་སྔར་བཞིན་ནོ། །དམིགས་ཐུན་གཉིས། མི་རྟག་པ་བསྟན་པའི་མདོ་ལས། ནད་མེད་མི་རྟག་ལང་ཚོ་མི་རྟག་སྟེ། །ཚེ་འང་མི་རྟག་འབྱོར་པ་ཡང་རྟག་མ་ཡིན། །སྐྱེ་བ་མི་རྟག་ཉིད་ཀྱི་ཉན་གྱུར་ན། །འདོད་པའི་ཡོན་ཏན་དགའ་བ་སུ་ཞིག་བྱེད། །ཅེས་སོ། །གསུམ་པ་ཚེ་ལ་སྣོན་པ་མེད་ཅིང་འཕྲི་བ་དང་བཅས་པ་འཆི་བར་བསྒོམ་པ་ནི། བྱི་བ་དཀར་ནག་གི་དཔེ་བཞིན་དུ། བདག་གི་ཚེ་འདི་ཉིན་མཚན་རེ་མོས་འཕྲིས་ཅིང་བསྣན་པ་ཅུང་ཟད་ཀྱང་མེད་པར་མཐར་འཆི་བ་ཡིན་ལ། འོ་སྐོལ་རྣམས་ཀྱིས་ཚེ་ལ་ལའི་སུམ་ཆ། ལ་ལའི་ཕྱེད། ལ་ལའི་སུམ་གཉིས། ལ་ལའི་ཚེ་ལྷག་མ་ལ་སྤྱོད་པ་ཡིན་པས། ད་ལྟ་ཉིད་དུ་དམ་པའི་ཆོས་ལ་འབད་དགོས་སྙམ་དུ་བསྒོམ་པར་བཞིན་ནོ། །དམིགས་ཐུན་གསུམ། མགྱོགས་ཁྲིད་དུ་བྱེད་ན་འདི་གསུམ་གཅིག་ཏུ་བྱའོ། །སྐྱེས་རབ་ལས། དང་པོ་མངལ་དུ་ཞུགས་པའི་ནུབ་མོ་ནས། དེང་ནས་བཟུང་སྟེ་འཇིག་རྟེན་འདི་དག་ནི། ལམ་དུ་ཞུགས་ཏེ་ལམ་གཞན་མ་གོལ་བར། འཆི་བདག་དྲུང་དུ་དེ་ཉིད་ཉེ་བར་འགྲོ། །ཅེས་སོ། །ད་དུང་ལོང་ཡོད་པས་རྒས་ན་བྱ་སྙམ་དུ་བསམ་ན། གཉིས་པ་བྱེ་བྲག་ནི་ནམ་འཆི་ཆ་མེད། བསྒོམ་པ་ལ་གསུམ་ལས། དང་པོ་ཚེ་ལ་ངེས་པ་མེད་པས་ནམ་འཆི་ཆ་མེད་བསྒོམ་པ་ནི། ལ་ལ་མངལ་དུ་འཆི་བ་དང་། ལ་ལ་བཙས་པའི་ཚེ་འཆི་བ་དང་། ལ་ལ་གོག་ཚེ་འཆི་བ་དང་། ལ་ལ་ནི་གཞོན་ནུ་ཚེ་འཆི་བ་དང་། ལ་ལ་དར་ལ་བབ་ཚེ་འཆི་བ་དང་། ལ་ལ་རྒས་པའི་ཚེ་ལ་འཆི་བ་ལ་སོགས་པ་ངེས་པ་དངོས་སུ་མཐོང་རྒྱུ་ཡོད་པས། བདག་ཀྱང་ནམ་འཆི་ཆ་མེད་དོ་སྙམ་དུ་བསྒོམ་པ་སྔར་བཞིན་ནོ། །ཐུན་གཅིག །ཆེད་དུ་བརྗོད་པའི་ཚོམ་ལས། །ཁ་གཅིག་མངལ་དུ་འཆི་བ་མཐོང་། །དེ་བཞིན་ཁ་ཅིག་བཙས་པའི་སར། །དེ་བཞིན་ཁ་ཅིག་གོག་ཙམ་ན། །ལ་ལ་རྒས་དང་ལ་ལ་གཞོན། །ལ་ལ་དར་ལ་བབས་པའི་མི། །དེ་དག་རིམ་གྱི་འཆི་འགྱུར་ཏེ། །འབྲས་བུ་སྨིན་པ་ལྷུང་བ་བཞིན། །ཅེས་སོ། །གཉིས་པ་རྐྱེན་མང་བས་ནམ་འཆི་ཆ་མེད་བསྒོམ་པ་ནི། ཚེ་ལ་ཕན་པའི་རྐྱེན་ནི་ཉུང་། གནོད་པའི་རྐྱེན་ནི་མང་། ཕན་པའི་རྐྱེན་དུ་གྱུར་པའང་འགའ་ཞིག་གིས་ཀྱང་། འཆི་རྐྱེན་བྱེད་པ་ཡོད་དེ། ནང་དུ་ཟས་ཟ་མ་ལེགས་པ་དང་། ཕྱི་རུ་ཁང་པ་སྡིབ་པ་ལ་སོགས་པས་འཆི་བར་མཐོང་བས་བདག་ཀྱང་ནམ་འཆི་ཆ་མེད་དོ་སྙམ་དུ་བསྒོམ་པ་སོགས་སྔར་བཞིན་ནོ། །དམིགས་ཐུན་གཉིས། ཀླུ་སྒྲུབ་ཀྱིས། འཆི་བའི་རྐྱེན་ནི་མང་བ་སྟེ། །གསོན་པའི་རྐྱེན་ནི་ཅུང་ཟད་ཅིག །དེ་དག་ཉིད་ཀྱང་འཆི་བ་རྐྱེན། །དེ་བས་རྟག་ཏུ་ཆོས་མཛོད་ཅིག །ཞེས་དང་ཇོ་བོ་རྗེའི་ཞལ་ནས། གཞན་ཤི་བ་རྣམས་མཐོང་ཐོས་ན། །རང་ལ་བྱ་བཏང་ཡིན་པས་དགེ་སྦྱོར་ལ་འབད། །ཅེས་དང་། གླང་རི་ཐང་པས། ཆོས་ཐུན་གྱི་རྗེས་སུ། དོ་ནུབ་མ་ཤིན་སོང་འཕྲོ་བཤད་པར་བགྱི་གསུངས་སོ། །གསུམ་པ་ནང་གི་ལུས་ནི་མི་བརྟེན་བས་ནམ་འཆི་ཆ་མེད་དུ་བསྒོམ་པ་ནི། ལུས་འདི་རྩ་ཁའི་ཟིལ་པའི་ཆུའི་སྦུ་བ་ལྟར་མི་བརྟེན་ཏེ། ན་ནིང་ཡོད་པ་ད་ལོ་ཤི་བ་དང་། ད་ལོ་ཡོད་པ་སོང་ཕོད་ཤི་བ་དང་། ཁར་སང་ཡོད་པ་དེ་རིང་འཆི་བ་དང་། དེ་རིང་ཡོད་པ་སོང་ཉིད་འཆི་བ་དང་དངོས་སུ་མཐོང་བས། བདག་ཀྱང་ནམ་མཆི་ཆ་མེད་དོ། །སྙམ་དུ་བསྒོམ་པ་སོགས་སྔར་བཞིན་ནོ། །དམིགས་ཐུན་གསུམ། མགྱོགས་ཁྲིད་དུ་བྱེད་ན་འདི་གསུམ་གཅིག་ཏུ་བྱའོ། །བཤེས་སྤྲིང་ལས། ཚེ་འདི་གནོད་མང་རླུང་གིས་བཏབ་པ་བཞིན། །ཆུ་ཡི་ཆུ་བུར་ལས་ཀྱང་མི་རྟག་ན། །དབུག་དབྱུང་དབུག་རྔུབ་གཉིད་ཀྱི་ལོག་པ་ལས། །སད་ཁོམ་གང་ལག་དེ་ནི་ངོ་མཚར་ཆེ། །ཅེས་དང་། གལ་ཏེ་རྒས་ཁམས་ཀྱང་ད་ལྟ་ལུས་སེམས་དར་ལ་བབ་ཅིང་འགལ་རྐྱེན་མེད་དུས་མ་བྱས་ན། རྒས་ནས་ཆོས་མི་འོང་སྟེ། ཁྲོ་ཕུ་ལོ་ཙ་བས། ད་ལྟ་འབུང་གསུམ་མ་སྟོན་ན། །རྒས་ཤི་ཐུག་ནས་ཆོས་བྱས་ཀྱང་། །ཐུགས་ཀར་སྨས་ནས་གོ་གོན་པའི། །བྲང་ལག་གི་འཐབ་མོ་ཨ་ཙ་མ། །ཅེས་སོ། །འཆི་བ་བྱུང་ན་ཚེ་འདིའི་ཕུན་སུམ་ཚོགས་པ་གང་གིས་ཀྱང་མི་ཕན་ཏེ། མདོ་ལས། རྒྱལ་པོ་ཆེན་པོ་དཔེར་ན་ཕྱོགས་བཞིན་བྲག་རི་སྲ་བ། བརྟན་པ། དཔང་མཐོ་བ་བཞི་འགྱིལ་ན། ཤིང་གེལ་པ་དང་རྩ་དང་སྲོག་ཆག་ཐམས་ཅད་ཕྱེ་མར་འཐག་ཅིང་རུབ་རུབ་བྱུང་ན་དེ་ལ་མགྱོགས་པས་བྲོས་པ་འམ། སྟོབས་ཀྱིས་བཟློག་པའམ། ནོར་གྱིས་བསླུས་པའམ། རྫས་དང་། སྔགས་དང་། སྨན་གྱིས་བཟློག་པ་སླ་བ་མ་ཡིན་ནོ། །དེ་བཞིན་དུ་སེམས་ཅན་ཐམས་ཅད་ན་བ་དང་། རྒས་པ་དང་། རྒུད་པ་དང་། འཆི་བ་ལ་སོགས་པའི་འཇིག་པ་ཆེན་པོ་བཞི་བྱུང་སྟེ། དེ་ལ་མགྱོགས་པ་སོགས་སྔ་མ་ལྟར་ཡིན་ནོ། །ཅེས་དང་། གཤིན་རྗེའི་ཕ་ཉས་ཟིན་པའི་ཚེ། །གཉེན་གྱི་ཅི་ཕན་བཤེས་ཅི་ཕན། །ཅེས་དང་། འོ་ན་དེ་ལ་གང་གིས་ཕན་ན་ཆོས་ཀྱི་ཕན་སྟེ། རྒྱལ་པོ་ཆེན་པོ་དེའི་ཚེ་དེའི་དུས་ན། དམ་པའི་ཆོས་མ་གཏོགས་པ་སྐྱབས་དང་མགོན་མེད་དོ། །ཅེས་སོ། །ཆོས་བྱས་ཀྱང་འཆིའོ་སྙམ་ན། འཆི་ལུགས་མི་གཅིག་སྟེ། ཆོས་པ་རབ་གཅིག་འཆི་བ་ལ་བྲོད་སྟེ། མ་ཅིག་ཞ་མའི་གསུང་གིས། མ་གཅིག་འཆི་བ་ལ་ང་ལས་ཉམས་དགའ་བ་མེད། ང་ཤི་བ་དེ་ཀུན་དཔེར་ན་རི་ཆེན་པོའི་འོག་ནས་ཐར་པའི་ཚོད་ཡིན་གསུངས། དེ་བཞིན་དུ་ཉམས་དགའ་ཡ་ལེ། ཤེས་པ་སྤྲོ་སིང་ངེ་། བློ་བདེ་འབོལ་ལེ་ཤི་བ་ཡིན། དེ་འདྲ་དེ་སྡུག་བསྔལ་འདོད་ཀྱང་མི་མྱོང་སྟེ། གླང་ཐང་བ་ཆེན་པོ་སྐུ་འདས་རུ་ཆས་ཙ་ན། ང་དམྱལ་བར་སྐྱེ་བར་འདོད་པའི་སྙིང་ཐག་པ་ནས་སྨོན་ལམ་མང་པོ་བཏབ་པ་ཡིན་ཏེ་ངའི་སྨོན་ལམ་དེ་མི་འགྲུབ་པ་འདྲ། ད་ལྟ་ང་ལ་དག་པའི་སྣང་བ་འབའ་ཞིག་ལས། ཐ་མལ་གྱི་སྣང་བ་ཙམ་ཡང་མི་འདུག་གསུང་། འབྲིང་མི་འཇིགས་ཤིང་མི་འགྱོད་དོ། །མདོ་སྡེ་རྒྱན་ལས། དེའི་ཆོས་ཀུན་སྒྱུ་མ་ལྟ་བུ་དང་། སྐྱེ་བ་བསྐྱེད་མོས་ཚལ་འགྲོ་ལྟར་རྟོག་ནས། འབྱོར་པའི་དུས་དང་རྒུད་པའི་དུས་ན་ཡང་། །ཉོན་མོངས་སྡུག་བསྔལ་དག་གིས་འཇིག་པ་མེད། །ཅེས་སོ། །ཐ་ན་ཆོས་མེད་དུ་འཆི་ན། འཆི་བ་བར་དོ། ཕྱི་མ་རྣམས་སུ་འཇིགས་སོགས་སྡུག་བསྔལ་མང་པོ་འབྱུང་བས་འཇིག་པ་བསྐྱེད་པ་རིགས་ཏེ། སྐྱེས་རབ་ལས། ལམ་རྣམས་ཐམས་ཅད་འཆི་བདག་ཉིད་ཀྱི་བགག །དོག་པ་མེད་པར་རབ་ཏུ་དགའ་ཞིང་སྤྱོད། །འགྲོ་བ་འདི་ལྟར་དེ་ནི་གནས་པ་ལ། །སྐྱེ་བོ་འཇིགས་པ་མེད་པ་ངོ་མཚར་སྐྱེ། །ཅེས་སོ། །དེས་ན་མི་རྟག་པ་བསྒོམ་ན་ཚེ་འདི་བློས་བཏང་བ་འདི་ཤིན་ཏུ་ཟབ་སྟེ། པུ་ཏོ་བའི་ཞལ་ནས་ཀྱང་། བྱང་སེར་ཁ་མི་གཅིག་ན་བ་ལ། ཕན་དུ་རེ་ནས་བཤོས་བུ་བཏང་བ་ལ། མི་གཅིག་གིས་བླང་བ་ལ། གཞན་གྱིས་འཕྱས་པས་ཁོ་ན་རེ། ངན་ན་ཡང་ངན་བྱང་སེར་ཁའི་བཤོས་བུ་རྙེད་པ་རང་གྱིས་དང་ཟེར་རོ། །དེ་བཞིན་དུ་མི་རྟག་པ་བསྒོམ་པའི་ཆོས་འདི་ཐམས་ཅད་ཀྱིས་ངན་ངན་པོར་བྱེད་ཅིང་འདུག་སྟེ། ངན་ན་ཡང་ངན་འདི་རང་རྒྱུད་ལ་སྐྱེས་པ་གཅིག་མཛོད་དང་དེས་ཆོག་གི་གསུངས། མི་རྟག་པ་སྒོམ་པའི་དུས་སུ་དམིགས་པ་སྤོས་པར་ཞུས་ཙ་ན། དམིགས་པ་སྤོ་རྒྱུ་རང་མེད། འདི་ཁོ་ན་བསྒོམ། འདི་ལས་ཟབ་པ་མེད། ཆོས་ནན་ཏན་བྱེད་ན། ཧུར་ཆེན་པོ་འབྱིན་དགོས། ངོ་མི་སྲུང་ཞིང་མི་ཟེར་ལ་མི་ཉན་པ་གཅིག་དགོས་གསུང་། རྗེ་དམ་པའི་ཞལ་ནས། མི་རྟག་པ་དེ་དང་པོ་གོ་དགོས། དང་པོ་ཆོས་ལ་འཇུག་པའི་རྒྱུ་བྱེད། བར་དུ་གོ་དགོས། བརྩོན་འགྲུས་ཀྱི་ལྕགས་བྱེད། ཐ་མར་གོ་དགོས། འོད་གསལ་ཆོས་སྐུ་ཐོབ་པར་བྱེད་དོ། །འཆི་བ་མི་རྟག་པ་མི་དྲན་པའི་མེ་ལ། ཆོས་བྱས་ཀྱང་གནད་དུ་མི་འགྲོ་གསུང་། རྗེ་དག་པོ་རིན་པོ་ཆེ་བསྒོམ་པོར་སྒྲུབ་པར་བྱོན་དུས། བླ་མ་བྱ་ཡུལ་བས། སྙིང་ཕྱུང་ཡང་ཤ་དུམ་ཅིག་ཡིན། འཆི་བ་མི་རྟག་པ་བསྒོམ་པ་གལ་ཆེ། དེ་མ་སྒོམ་ན་ཆོས་གནད་དུ་མི་འགྲོ་བ་ཡིན་གསུང་། སྒམ་པོ་བས་ཀྱང་དེ་ལ་ཐུགས་ཆེས་ནས། ཐུགས་དམ་གྱི་མཐིལ་མཛད། དེའི་སློབ་མ་ཡང་སློབ་དང་བཅས་པ་ཡང་། མི་རྟག་པ་བསྒོམ་པ་འདི་ལ་ཐུགས་རྩིས་ཆེར་མཛད་དོ། །ཆོས་རྗེ་སངས་རྒྱས་བསྟན་པའི་ཞལ་ནས། འཆི་བ་མི་རྟག་པ་འདི་བཤད་པ་པོའི་བཤད་རིང་མ་ཆོག །ཉན་པ་པོས་ཉན་རིང་མ་ཆོག །སྒོམ་པ་པོའི་སྒོམ་རིང་མ་ཆོག་པར་བྱས་ནས་ཆོས་ཟབ་མོ་ཅིག་ཀོག་དུ་ལུས་པ་འདུག་གསུང་། སྒ་ལོ་སྤྱན་སྔ་བའི་དྲུང་དུ་ཆོས་ལ་བྱོན་ནས། ཆོས་ཟབ་མོ་ཞིག་ཐུགས་ལ་འདོག་པར་ཞུ་ཞུ་པས། འཆི་བ་མི་རྟག་པ་སྒོམ་ཅིག་གསུང་། དེས་རྒྱུད་ལ་སྐྱེས་བ་དོག་པས། དེ་བས་ཟབ་པ་ཅིག་གསུང་བར་ཞུ་བྱས་པས། དགེ་བའི་བཤེས་གཉེན་འབྲོམ་སྟོན་གྱིས་སློབ་མ་བྱང་ཆུབ་སེམས་དཔའ་སྟོང་དང་ལྔ་བརྒྱ་བཞུགས་པ་རྣམས་ཀྱང་ཆོས་ཟབ་ཤོས་འདི་ལ་བྱེད་པ་ཡིན། འདི་ལས་ཟབ་པའི་ཆོས་ང་ལ་མེད་གསུངས། སངས་རྒྱས་དབོན་གྱིས། འཆི་བ་རྒྱུད་ལ་མ་དྲན་ན། ཆོས་གསང་བ་འདུས་པ་ཟབ་རྒྱུ་མེད། འཆི་བ་རྒྱུད་ལ་དྲན་པ་ན། ལམ་སྐྱབས་སུ་འགྲོ་བས་ཀྱང་ཟབ་པ་མེད། ཅེས་སོ། །ཆོས་རྗེ་འཇག་པའི་ཞལ་ནས། འཆི་བ་མི་དྲན་པའི་ཆོས་ནི། དཔྱིད་ཁའི་ཆག་རོམ་གྱི་སྟེང་དུ་མཁར་དགུ་ཐོག་བརྩིག་པ་དང་འདྲ་གསུང་། རྟོག་ལྡན་སངས་རྒྱས་སྒོམ་པོའི་ཞལ་ནས། དམ་པའི་ཆོས་བྱེད་པ་ལ་འཆི་བ་མི་རྟག་འདི་གོ་དགོས་པར་འདུག །འཆི་བ་མི་རྟག་པ་རབ་གཅིག་དྲན་ན། ཆོས་པ་རབ་གཅིག་འོང་། འབྲིང་ཅིག་དྲན་ན་ཆོས་པ་འབྲིང་ཞིག་འོང་། ཐ་མ་གཅིག་དྲན་ན་ཆོས་པ་ཐ་མ་ཞིག་འོང་། འཆི་བ་གཏན་ནས་མ་དྲན་ན། ཆོས་པ་གཏན་ནས་མི་འོང་གསུང་། ཇོ་བོ་རྗེ་སྐུ་འདས་ཁར། རྣལ་འབྱོར་པས། ཇོ་བོ་གཤེགས་པའི་འོག་ཏུ་བདག་གིས་བསྒོམ་བྱེད་པར་ཞུ་ཞུས་པས་བསྒོམ་ཀྱང་ཆོས་སུ་འགྲོ་ཡེ་གསུངས། འོ་ན་འཆད་པར་ཞུ་ཞུས་པས་ཀྱང་། སྔར་བཞིན་ནོ་གསུངས། འོ་ན་ཅི་ལྟར་བགྱིས་ཞུས་པས། ཁྱེད་ཐམས་ཅད་དགེ་བཤེས་སྟོན་པ་ལ་བསྟེན་ལ་ཚེ་འདི་བློས་ཐོང་གསུངས་སོ། །བཙུན་པ་གཅིག་རྭ་སྒྲེང་ལ་ཕྱི་བསྐོར་བྱེད་པ་དང་། དགེ་བཤེས་འབྲོམ་སྟོན་དང་མཇལ་ནས། འབྲོམ་སྟོན་གྱིས། ཇོ་བོ་ལ་བསྐོར་བ་བྱེད་པ་ཡང་དགའ་སྟེ། དེ་བས་ཆོས་རང་གཅིག་བྱེད་པ་མི་འཐད་དམ་གསུངས། ཁོང་གིས་བསམ་པ་ལ་དེ་བས་ཕྱག་བྱས་པ་ལ་དོན་ཆེ་བ་ཡིན་སྙམ་ནས་ཕྱག་བྱས་པས་ཀྱང་སྔར་བཞིན་གསུངས། དེ་བཞིན་ཆོས་བཤད་པ་དང་། བསྒོམ་བྱས་པས་ཀྱང་། སྔར་བཞིན་གསུངས། འོ་ན་ཆོས་ཅི་ལྟར་བགྱི་ཞུས་པས། ཚེ་འདི་བློས་ཐང་བྱ་བ་ལན་གསུམ་གསུངས། ཅེས་པ་དང་། ཚེ་འདིའི་བདེ་བས་དགོས་པ་མེད། བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །ཅེས་སོ། །སྡུག་བསྔལ་ཡོད་ན་ཤིན་ཏུ་ལེགས་སྟེ། གཞན་ཡང་སྡུག་བསྔལ་ཡོན་ཏན་ནི། །སྐྱོ་བས་དྲེག་པ་སེལ་བར་བྱེད། །འཁོར་བ་ལ་ཡང་སྙིང་རྗེ་སྐྱེས། །སྡིག་ལ་འཛེམ་ཞིང་དགེ་ལ་དགའ། །ཅེས་དང་། བསྟོད་དྲག་གིས་དགོས་པ་མེད་དེ། །བསྟོད་སོགས་དག་གིས་གཡེང་བར་བྱེད། །སྐྱེ་བའི་སེམས་ཀྱང་འཇིགས་པར་བྱེད། །ཡོན་ཏན་ལྡན་ལ་ཕྲག་དོག་དང་། །ཕུན་སུམ་ཚོགས་པ་ཡང་འཇིག་པར་བྱེད། །ཅེས་སོ། །བླ་མ་པུ་ཏོ་བའི་ཞལ་ནས། འཆི་བ་འདི་མ་གོ་ན། ཚེ་ཐུང་པོ་དེ་ཉིད་ལ་སྤྱོད་པ་མི་འདྲ་བ་སྣ་ཚོགས་སྟོན་པ་ཡིན་གསུང་། རྒྱལ་པོ་ལ་གདམས་པའི་མདོ་ལ་སོགས་པ་འཆི་བ་མི་རྟག་པ་སྟོན་པའི་མདོ་དང་། བསྟན་ཆོས་མང་དུ་བལྟས་ཤིང་བསམ་ན། ཆོས་ཐམས་ཅད་ཀྱི་རྩ་བ་འདི་ཡིན་གསུངས། མི་རྟག་པ་མ་སྐྱེས་ན། ཆོས་བྱེད་ལོ་བྱས་ཀྱང་ཕལ་ཆེར་ཚེ་འདི་རྩམ་སྟེ། ཞང་གཡེར་པའི་ཞལ་ནས། སྔ་དྲོ་མི་རྟག་པ་མ་སྐྱེས་ན། །ཉི་མ་ཕྱེད་ན་ཚེ་འདི་པ་ཆ། །ཉི་མ་ཕྱེད་ནས་མ་སྐྱེས་ན། །དགོང་མོ་ཚེ་འདི་བར་ཆ། ཚེ་འདི་བར་སོང་ན། ཅི་བྱས་ཆོས་སུ་མི་འགྲོ་གསུངས། ཆོས་རྗེ་མཁའ་སྐྱོང་གྲགས་པའི་ཞལ་ནས། ཚེ་འདི་བློས་མ་ཐོང་ན་ཅི་བྱས་འཇིག་རྟེན་གྱི་རྒྱན་དུ་འགྲོ་བས། ཚེ་འདིའི་བདེ་སྐྱིད་སྙན་གསུམ་འདོད་པས། ཀུན་ནས་སློང་བར་སོང་བའི་ཅི་བྱས་ཆོས་སུ་མི་འགྲོ། ཆོས་མིན་དུ་འགྲོ། ཆོས་ཀྱི་བྱ་བ་མི་བྱེད། མཁས་ཡང་ཚེ་འདིའི་མཁས་པ་ཙམ། བཙུན་ཀྱང་ཚེ་འདིའི་བཙུན་པ་ཙམ། བཟང་ཡང་ཚེ་འདིའི་བཟང་བ་ཙམ། རྟོགས་པ་མཐོ་ཡང་ཚེ་འདིའི་རྟོག་པ་ཙམ། བསྒྲུབ་པར་བཙོན་ཡང་ཚེ་འདིའི་སྒྲུབ་པའོ། །གཞན་དོན་ལ་བརྩོན་ཡང་ཚེ་འདིའི་བྱང་ཆུབ་སེམས་དཔའ་ཙམ་ལས་ཕྱི་མ་གར་འགྲོ་ངེས་པ་མེད་དེ། དེ་ཙམ་ན་ཆོས་ལ་རྟེན་ནས་སླར་ངན་འགྲོ་ལས་མེད། དེ་བས་ཚེ་འདི་བློས་མ་མཐོང་ན། ཆོས་པ་ཅི་བྱས་ཀྱང་མི་ཕན། མཚམས་བཅད་ནས་སྒོ་བཅད་ཀྱང་མི་ཕན། འདག་སྦྱར་བས་རྡོར་སྦྱོར་བྱས་ཀྱང་མི་ཕན། སྨྲ་བཅད་པ་བས་ལྕེ་བཅད་ཀྱང་མི་ཕན། རས་གོས་བས་གཅེར་བུར་ཕུད་ཀྱང་མི་ཕན། ཆུ་འཐུང་བས་ལྟོག་པར་འདུག་ཀྱང་མི་ཕན། དེ་ཅི་ན་ཚེ་འདི་ལ་ཕྱི་མིག་གིས་མ་བལྟས་པའི་ཆོས་ཅིག་དགོས། དེ་ལྟར་ཚེ་འདི་རྩ་བ་ནས་བློས་ཐོང་ན་ཆོས་ཕྱེད་ཡིན་གསུང་། ཚེ་འདི་བློས་ཐོང་བའི་བློ་སྐྱེས་པ་ཙམ་གྱིས་ལས་ངན་མང་པོ་དག་པར་མཛད། རྗེ་བཙུན་གྲགས་རྒྱལ་གྱིས་སློབ་མ་དགེ་བཤེས་ཁ་རག་པ་བྱ་བའི་ཡོན་ཏན་དང་སྐུ་བསོད་ནམས་ཆེན་པོ་གཅིག་ལ། མཛེ་བྱུང་ནས་ཐབས་སྣ་ཚོགས་བྱས་ཀྱང་མ་ཕན། སྡུག་བསྔལ་མང་པོ་བྱུང་། ནུབ་གཅིག་བློ་ལ་ནད་འདིས་མི་ཁྱུར་མི་ཚུད་འདུག་པས། མི་ཁྱུ་ནས་བུད་ངོ་ཤེས་པ་གཅིག་བྱ། ལོངས་སྤྱོད་གང་ཡོད་དགེ་ཕྱོགས་སུ་བཏང་ལ། ང་རང་སྡོད་ཀྱི་མོ་རྫ་འཕྲང་གིས་རྫ་འོག་ཏུ་བྱ་སྟེ། ལྟོ་བ་ལམ་ཟན་ལ་བྱས་ལ་མ་ཎི་བགྲང་སྙམ་པ་ཅིག་བྱུང་བས། དེའི་ནུབ་མོར་རྨི་ལམ་ལ་ཁོང་གཙང་པོས་ཁྱེར་བ་ལ། མི་དཀར་པོ་གཅིག་བྱུང་ནས་ཆུ་ནང་ནས་བཏོན་ཏེ། ཉལ་ས་བྱ་སྙམ་པའི་བྲག་ཐོག་དེར་བཞག་སོང་བས་ལུས་ལ་ཆུ་མང་པོ་ཟག་པ་རྨིས། སད་ཙ་མལ་ཐམས་ཅད་ཆུས་ཁེང་འདུག །མཛེ་ཡང་སང་གི་དྲག་འདུག་ཟེར། མི་རྟག་པ་བཅོས་མིན་ཅིག་སྐྱེས་ནས། ཆོས་མིན་ཅི་ཡང་མི་བྱེད་པ་ཅིག་འོང་བར་འདུག་སྟེ། འདིའི་ཉམས་མྱོང་རྣམ་དག་སྐྱེས་པའི་ཆོས་པའང་རེ་རེ་ཙམ་དུ་འདུག །པུ་ཏོ་བའི་ཞལ་ནས། ད་ལྟ་མི་རྟག་པ་གཤའ་མར་སྐྱེས་པ། ངེད་ཀྱི་སློབ་དཔོན་གཡེར་བའི་ཞོང་བཙུན་ཡིན། དེ་ནས་བྲག་རྒྱབ་ཀྱི་གཉེན་སྟོན་ཤག་འབྱུང་ཡིན། དེ་ནས་ཁ་རག་བསྒོམ་ཆུང་ཡིན་གསུངས། ཞང་བཙུན་ལ་སྙུང་བ་བག་རེ་ཙམ་བྱུང་ནས་སྙད་འདོད་ཡི། ད་རེས་རང་ཆ་ཆ་གསུང་ནས་ཀ་ཆ་ཕྲ་མོ་ཚུན་གཞན་ལ་བསྔོས་ནས་ང་མ་ཤི་བར་དུ་གཡར་ཐོང་ཞིག །ཤི་ནས་ཁྱེད་ཀྱི་བསྣོམ་ཞིག་གསུང་ནས་ཞག་རེ་ཡང་མི་བཞུགས་པ་ལྟ་བུའི་སྤྱོད་པས་དུས་རྒྱུན་དུ་མཛད་གསུང་། བྲག་རྒྱབ་པ་ལ་ཉེར་གནས་ཀྱི་དབྱར་ཤིང་གྲབ་བྱེད་རན་གདའ་ཞུས་པས། དབྱར་སྟོད་མི་སྡོད་ཆ་མེད་པས་ཤིང་བུའི་གྲབ་ཅི་བྱེད་གསུང་ནས། གཞན་རྩིས་ཡེ་མི་མཛད་གསུངས། ཁ་རག་སྒོམ་ཆུང་ཁ་རག་ཕུག་ནག་གིས་བྲག་ཕུག་ཏུ་བཞུགས་ཙ་ན། བྲག་ཕུག་གི་སྒོ་ན་ཚེར་ཕུང་ཞིག་ཡོད་པ་ལ་ཡར་འགྲོ་མར་འགྲོ་ནམ་བྱེད་དུས་ན་བཟའ་འཐོག་པས་བཅད་དགོས་སྙམས་ཙ་ན། དེ་མ་ཐག་མི་རྟག་པ་ཏུ་རེ་དྲན་ཏེ་འདི་བཅད་ནས་ཅི་བྱེད་ནང་དུ་འགྲོ་འོང་བྱེད་པའི་ངེས་པ་མེད་སྙམས་ནས་མ་བཅད་ཟེར། དེ་བཞིན་དུ་རང་རེ་རྣམས་ཀྱང་མི་རྟག་པ་ཡང་ཡང་སྒོམ་ལ་དབེན་པ་རེར་བསྡད་དེ། འཆི་ཆིས་ཁོ་ན་བྱེད་དགོས་གསུངས། མི་རྟག་པ་སྒོམ་པ་ལ་གཞན་ཡང་ཕན་ཡོན་མང་པོ་ཡོད་དེ། མདོ་ལས། མི་རྟག་པ་མང་པོ་བསྒོམ་ན། སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ། །སངས་རྒྱས་ཐམས་ཅད་ཀྱི་བྱིན་གྱིས་རླབས་པ་ཡིན་ནོ། །རྗེས་རྣམས་ཀྱི་ནང་ནས་གླང་པོ་ཆེའི་རྗེས་མཆོག་ཡིན་པ་བཞིན་དུ། བསྒོམ་པའི་འདུ་ཤེས་རྣམས་ཀྱི་མཆོག་གི་མི་རྟག་པ་ཡིན་ནོ། །ཅེས་སོ། །གསུམ་པ་འཁོར་བའི་ཉེས་དམིགས་བསྒོམ་པ་ནི། འཁོར་བ་འདི་སྤྱིར་སྐྱེ་རྒ་ན་འཆིའི་སྡུག་བསྔལ་དང་། བྱེ་བྲག་རིགས་དྲུག་སོ་སོའི་སྡུག་བསྔལ་འོག་ནས་འབྱུང་བ་ལྟར་ཡང་སྔར་ཡང་དང་ཡང་དུ་མྱོང་། ད་བཟོད་ཡང་ཡང་མྱོང་བར་འགྱུར་བས་ན། རྒྱུ་མི་དགེ་བ་སྤངས། དེའི་རྒྱུ་ཉོན་མོངས་པ་སྤང་ཞིང་དགེ་བ་ཅི་ནུས་སུ་བསྒྲུབ་པར་བྱའོ། །སྙམ་དུ་བསྒོམ་པ་སྔར་བཞིན་ནོ། །དམིགས་ཐུན་གཅིག །དེ་ལས་སྐྱེས་པའི་སྡུག་བསྔལ་ནི། ཆོས་རྗེ་རང་བྱུང་རྡོ་རྗེའི་ཞལ་ནས། མི་གཙང་མུན་ཁང་མངལ་གནས་ནག་པར་ཞུགས་གྱུར་སྟེ། །ཁུ་ཁྲག་གཤང་ལྕི་སྲིན་བུའི་ལྕིག་ལྕིག་འདུག་པའི་ས། །དྲི་ངན་ཤིན་ཏུ་མནམ་པའི་ནང་དུ་འགྲེ་ལོག་ཅིང་། །རླུང་འབྱིན་མི་གཙང་ཟ་བར་ཙམ་ཡང་ནུས་པ་མེད། །འཁྲུལ་འཁོར་བརྩིར་བཞིན་ཤ་རུས་མྱག་ཤིང་སྐྱེས་པ་དང་། །སར་ལྷུང་ལྤགས་པ་བཤུས་འདྲ་ཉི་ཟེར་འབར་བ་དང་། །རླུང་གིས་རེག་པས་ཁོང་ནས་གདོང་པས་སྐད་འདོན་ཀྱང་། །ཤིན་ཏུ་སྟོབས་ཆུང་དྲན་པ་སྟོར་བ་བཞིན་དུ་འགྱུར། །གནས་འདིར་མཐོང་ནས་སྐྲག་པར་མི་འགྱུར་ཀྱེ་མ་མཚར། །ཅེས་གསུང་པ་ལྟར་ཡིན་ལ། རྒས་ནད་འཆི་བའི་སྡུག་བསྔལ་ནི་གཞན་ལ་ལྟོས་པས་ཆོག །ཚ་དམྱལ་བརྒྱད་དང་ཉེ་འཁོར་བཅུ་དྲུག་དང་བཅས་པ་ནི། ཅེས་པས། དེ་ལ་ཚ་དམྱལ་བརྒྱད་ཀྱི་དང་པོ་ཡང་སོས་ནི། དེ་འགྲོ་བ་རིགས་དྲུག་གིས་ཚིག་ལེའུ་བྱས་པ་ལས། ཆགས་དང་གཏི་མུག་འཇིགས་པ་ཁྲོ། །མི་གང་མི་ནི་གསོད་པ་གང་། །གཞན་ཡང་སྐྱེ་བས་གསོད་པ་ནི། །དེ་དག་དམྱལ་བ་ཡང་སོས་འགྲོ། །གོང་གིས་ཕྱིར་ན་ལོ་སྟོང་ཕྲག །མང་པོ་ཡང་ནི་འདི་དག་ཏུ། །བཏགས་ཤིང་བཏགས་ཤིང་ཡང་སོས་པས། །དེ་ཕྱིར་ཡང་སོས་ཡིན་པར་བཤད། །ཐིག་ནག་ནི། དེ་ཉིད་ལས། ཕ་དང་མ་དང་གྲོགས་དང་བཤེས། །གཤིན་རྗེ་ལ་ནི་ཁུ་བྱེད་ཅིང་། །ཕྲ་མ་རྫུན་ནི་སྨྲ་བའི་མི། །ཐིག་ནག་དུ་ནི་འགྲོ་བར་འགྱུར། །གང་ཕྱིར་དེ་ནི་ཤིང་བཞིན་དུ། །ཐིག་ནག་བཏབ་ཅིང་སོག་ལེ་དག །འབར་བའི་སོས་ནི་བཤག་བྱེད་དེ། །དེ་ཕྱིར་ཐིག་ནག་ཡིན་པར་བཤད། །ཅེས་སོ། །བསྡུས་འཇོམ་ནི། དེ་ཉིད་ལས། རང་དང་ལུག་ཀྱང་ཝ་དག་ཀྱང་། །རི་བོང་བྱི་ལ་རི་དྭགས་ཕག །གཞན་ཡང་བསྐྱེད་ནས་གསོད་བྱས་ནས། །ལུས་ཅན་བསྡུས་འཇོམ་འགྲོ་བར་འགྱུར། །གང་ཕྱིར་བསྡུས་ནས་དེར་དོར་ནས། །ཡང་དག་སྲེག་པར་བྱེད་པ་ན། །དེ་ཡི་ཕྱིར་ན་བསྡུས་འཇོམ་སྟེ། །དེ་ལྟར་མིང་ནི་དོན་མཐུན་གྲགས། །ཅེས་སོ། །ངུ་འབོད་ནི། དེ་ཉིད་ལས། འདིར་ནི་ལུས་ཅན་རྣམ་དག་གིས། །ལུས་ངག་ཡིད་གསུམ་ཉོན་མོངས་བྱེད། །གང་དག་ལྷད་འཇུག་གཞལ་གཡོ་བྱེད། །མི་དེ་དག་ནི་ངུ་འབོད་འགྲོ། །དེར་ནི་དྲག་པོའི་མེ་དག་གིས། །རྒྱུན་མི་ཆད་པར་སྲེག་པར་བྱེད། །གང་ཕྱིར་སྐད་ངན་གྲགས་འབྱིན་པ། །དེ་ཕྱིར་དེ་ནི་ངུ་འབོད་ཡིན། །ཅེས་སོ། །ངུ་འབོད་ཆེན་པོ་ནི། དེ་ཉིད་ལས། གང་གི་ལྷ་དང་བྲམ་ཟེ་དང་། །བླ་མའི་རྫས་འཕྲོག་སྡུག་བསྔལ་བྱས། །གང་དག་གཏམ་པོ་འཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །མེར་བསྲེག་ལ་ནི་དྲག་ཕྱིར་དང་། །ངུ་འབོད་པ་ཡང་ཆེ་ཕྱིར་དང་། །ལྕེ་ཞིང་ཆིི་བ་ཉིད་ཀྱི་ཕྱིར། །དེ་ནི་ངུ་འབོད་ཆེན་པོ་ཡིན། །ཅེས་སོ། །ཚ་བ་ནི། དེ་ཉིད་ལས། ནགས་ལོག་ལ་སོགས་མེ་བཏང་དང་། །ལས་དེ་དག་ལ་འཇུག་བྱེད་གང་། །སྐྱེས་དགུ་དག་ལ་མེ་འབར་བས། །རབ་ཏུ་ཚ་ཞིང་བསྲེག་པར་སྣང་། །གང་ཕྱིར་རྟག་ཏུ་མེས་གདུང་བས། །དྲག་པོ་སྐྱེ་བ་དེའི་ཕྱིར། །འཇིག་རྟེན་དུ་ནི་ཚ་བའི་མེས། །དོན་དང་མཐུན་པར་གྲགས་པ་ཡིན། །ཅེས་སོ། །རབ་ཏུ་ཚ་བ་ནི། དེ་ཉིད་ལས། མེད་པར་ལྟ་བ་གང་ཞིག་གིས། །ཆོས་དང་ཆོས་མིན་ལོག་སྟོན་ཅིང་། །གཞན་དག་ལ་ནི་ཉོན་མོངས་བྱེད། །དེ་ནི་རབ་ཏུ་ཚ་བར་བསྲེགས། །མེ་ནི་རབ་ཏུ་དྲག་པོ་ཡིས། །དེར་འཁོར་སེམས་ཅན་རབ་ཚ་བྱེད། །ཚ་བ་ཕུལ་དུ་ཕྱིན་པ་སྟེ། །དེ་ཕྱིར་རབ་ཏུ་ཚ་བས་གདུང་། །ཅེས་སོ། །མནར་མེད་པ་ནི། དེ་ཉིད་ལས། ཡོན་ཏན་དག་གི་ཆེ་བ་ལས། །གནོད་པ་དྲག་པོ་བྱས་པའམ། །ཕ་མ་བླ་མ་བསད་བྱས་ནས། །ངེས་པར་བསྐལ་པར་མནར་མེད་ཚེ། །གང་ཕྱིར་བདེ་བའི་སྐབས་མེད་པས། །དེ་ཕྱིར་མནར་མེད་ཡིན་པར་བཤད། །ཅེས་སོ། །མདོ་དྲན་པ་ཉེར་བཞག་ལས། ལུས་ཀྱི་ལས་གསུམ་རིན་བཞིན་རྒྱུ། ཡང་སོས་སོགས་ལ་གསུམ་དུ་སྐྱེས། ཆང་གི་ངུ་འབོད་དང་། རྫུན་གྱི་ངུ་འབོད་ཆེན་པོ། ལོག་ལྟས་ཚ་བ། དགེ་སློང་མ་སུན་ཕྱུང་བས་རབ་ཏུ་ཚ་བ། མཚམས་མེད་ཀྱིས་མནར་མེད་དུ་སྐྱེ་བར་བཤད་དོ། །ཉེ་འཁོར་བཅུ་དྲུག་ནི། མེ་མ་མུར་གྱི་འོབ་དང་། རོ་མྱག་གིས་འདམ་དང་། མཚོན་ཆའི་ཆར་པ་དང་། ཐལ་ཚན་གྱི་ཆུ་བོ་རབ་མེད་བཞིས་ཕྱོགས་ཀུན་ཏུ་བསྐོར་བས་ཕྱོགས་བཞིའི་དབང་གིས་བཅུ་དྲུག་གོ། །དེར་སྐྱེས་པའི་རྒྱུ་ནི། དེ་ཉིད་ལས། གང་ཞིག་བརྟུལ་ཞུགས་བཟང་མནོས་ན། །ལེགས་པར་འཛིན་པ་མི་བྱེད་པ། །དེ་ནི་ངེས་པ་ཤ་དང་རུས། །འཇིགས་པའི་མེ་མ་མུར་སོགས་སྲེག །ཅེས་སོ། །ཉེ་ཚེ་བ་ནི། ཟས་དང་གོས་དང་གནས་ཁང་མེ་འབར་བ་ལ་སོགས་པ་སྡུག་བསྔལ་དུ་མ་ལ་ལོངས་སྤྱོད་པ་ཡོད་དོ། །གྲང་དམྱལ་བརྒྱད་དུ་སྐྱེས་པའི་རྒྱུ་ནི། དེ་ཉིད་ལས། རྒྱལ་བ་ལ་ཕུལ་བའི་མར་དང་། དགེ་འདུན་གྱིས་ནི་སྒྲོན་མེ་འམ། །ཤིན་བརྐུས་གནས་ཁང་བཤིག་པ་དང་། །ཆོས་འཆད་པ་ཡི་གནས་ཁང་བཤིག །གྲང་པའི་དུས་སུ་གོས་འཕྲོག་དང་། །ཆུ་བླུག་པ་ཡི་གྲང་དམྱལ་སྐྱེས། །ཅེས་སོ། །སྡུག་བསྔལ་ནི་གངས་ཀྱིས་ནང་དུ་གཅེར་བུ་གནས་ལ་སྟེང་ན་ཆུའི་བུམ་པ་ཤིན་ཏུ་གྲང་བ་མང་པོ་བླུག་པས་ལུས་ལ་ཆུ་བུར་འབྱུང་བ་དང་། ཆུ་བུར་རྡོལ་བ་ལས་ཁྲག་རྣག་འཛག་པ་དང་། ཁ་ནས་ཨ་ཆུ་ཟེར་བ་དང་། ཀྱི་ཧུད་ཟེར་བ་དང་། སོ་ཏམ་ཏམ་འདེབ་པ་དང་། ལུས་ཚ་ལ་པ་བརྒྱད་དུ་གས་པ་དང་། བཅུ་དྲུག་ཏུ་གས་པ་དང་། སུམ་ཅུ་རྩ་གཉིས་ལ་སོགས་པར་གས་ཀྱང་འཆི་མི་ཉེན་པའོ། །བཤེས་སྤྲིང་པས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེ་ནི་དམྱལ་བའི་སྡུག་བསྔལ་ཆུང་ངུ་ཡིས། །འོར་ཡང་མི་ཕོད་ཆར་ཡང་མི་ཕོད་དོ། །ཅེས་སོ། །ཡི་དྭགས་སུ་སྐྱེ་བའི་རྒྱུ་ནི། དེ་ཉིད་ལ། འཕྲོག་པ་སེར་སྣ་ཤས་ཆེ་ཞིང་། །ཟང་ཟིང་མི་འཇིགས་ཆོས་མི་སྦྱིན། །ཚུལ་ཁྲིམས་སྲུང་བར་མི་བྱེད་པས། །ཡི་དྭགས་གནས་སུ་བཀྲེས་སྐོམ་འགྱུར། །ཅེས་སོ། །སྡུག་བསྔལ་ནི། བཤེས་སྤྲིང་ལས། ཡི་དྭགས་རྣམས་ཀྱང་སོས་ཁའི་དུས་སུ་ནི། །ཟླ་བའང་ཚ་ལ་དགུན་ནི་ཉི་མའང་གྲང་། །ལྗོན་ཤིང་འབྲས་བུ་མེད་འགྱུར་དེ་དག་གིས། །བལྟས་པ་ཙམ་གྱི་ཆུ་ཀླུང་ཡང་སྐམ་པར་འགྱུར། །ཁ་ཅིག་ཁ་ནི་ཁབ་མིག་ཙམ་པ་ལ། །ལྟོ་བ་རིའི་ལྟོ་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཙམ། །འཚལ་བའི་མཐུ་དང་ལྡན་པ་མ་ལགས་སོ། །དུད་འགྲོ་སྐྱེས་པའི་རྒྱུ་ནི། དེ་ཉིད་ལས། ལུས་ངག་ཡིད་གསུམ་གྱིས་འབྲིང་དུ་སྤྱད། །དུག་གསུམ་གཡེལ་བའི་ལས་བྱས་དང་། །མི་རིག་སྟེར་དང་བྱོལ་སོང་ཁྲོ། །དུད་འགྲོར་བདག་ཉིད་སྨོན་པ་དང་། །ཕྱུག་འདྲ་སོང་ངོ་ངག་ཏུ་སྨྲས། །འདི་བཅུས་དུད་འགྲོ་སྐྱེ་བར་འགྱུར། །ཅེས་སོ། །སྡུག་བསྔལ་ནི། བཤེས་སྤྲིང་ལས། དུད་འགྲོའི་སྐྱེ་གནས་སུ་ཡང་གསོད་པ་དང་། འཆིང་དུ་རྟེན་ལོག་སྣ་ཚོགས་པ། །ཞི་འགྱུར་དགེ་བ་སྤོང་བ་རྣམས་ལ་ནི། །གཅིག་གིས་གཅིག་ཟ་ཤིན་ཏུ་མི་བཟོད་འབྱུང་། །ཁ་ཅིག་མུ་སྟེག་བལ་དང་རུས་པ་དང་། །ཤ་དང་ལྤགས་པའི་ཆེད་དུ་འཆི་བར་འགྱུར། །དབང་མེད་གཞན་དག་མཚོན་ཆ་རྣོན་པོ་དང་། །ལྕགས་དང་ལྕགས་ཀྱུས་བཏབ་སྟེ་བྲན་དུ་བཀོལ། །ཅེས་སོ། །མིར་སྐྱེ་བའི་རྒྱུ་ནི། དེ་ཉིད་ལས། འཆི་ཁར་བདེ་བའི་ཆོས་བསྟན་ནས། །དགའ་ཤིང་དཀོན་མཆོག་མཐོང་བ་དང་། །ཆོས་ཐོས་ཆོས་རྟོག་གྱུར་ཅིག་ཅེས། །སྨོན་ལམ་འདེབས་པས་མིར་སྐྱེའོ། །ཅེས་སོ། །སྡུག་བསྔལ་ནི། དགྲ་དང་འཕྲད་པ་དང་། གཉེན་དང་བྲལ་བ་ལ་སོགས་དཔག་ཏུ་མེད་དོ། །ལྷ་མིན་དུ་སྐྱེ་བའི་རྒྱུ་ནི། དེ་ཉིད་ལས། རྟག་པར་གཡོ་རྒྱུ་སྤྱོད་བྱེད་ཅིང་། །སྡིག་པ་ཆེན་པོ་མ་བྱས་པས། །འཐབ་ལ་དགའ་ཞིང་དབྱེན་བྱེད་པ། །དེ་ནི་ལྷ་མིན་གནས་སུ་སྐྱེས། །ཅེས་སོ། །ལྷ་མིན་ལ་ཡང་ལྷ་ཡི་དཔལ་འབྱོར་ལ། ཕྲག་པ་དོག་པས་ཡིད་ཀྱིས་སྡུག་བསྔལ་དང་། འཐབ་པ་དང་ལུས་བཅད་ཅིང་འདྲལ་བ་ལ་སོགས་སྡུག་བསྔལ་མང་སྟེ། བཤེས་སྤྲིང་ལས། ལྷ་མིན་དག་ལའང་རང་བཞིན་གྱི་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ཡང་འགྲོ་བའི་ཡིིད། ། སྒྲིབ་པས་བདེན་པ་མཐོང་བ་མ་མཆིས་སོ། །ཅེས་པ་དང་། ལྷར་སྐྱེ་བའི་རྒྱུ་ནི། དེ་ཉིད་ལས། སྦྱིན་དང་ཚུལ་ཁྲིམས་རྣམ་པར་དག་པ་དང་། །ཆོས་ཉན་ལ་སྤྲོ་དགེ་བཅུ་སྤྱོད། །འཆི་ཁར་སྐུ་གཟུགས་མཐོང་བ་ནི། །ལྷ་ཡི་གནས་སུ་སྐྱེ་བར་འགྱུར། །ཅེས་སོ། །སྡུག་བསྔལ་ནི་འདོད་ལྷ་རྣམས་ལའང་འཆི་ལྟས་ཀྱི་ཟིན་པ་ན། དམྱལ་བའི་ལུས་ཀྱི་སྡུག་བསྔལ་ཆེ་བ་ཡོད་པར་གསུང་སྟེ། བཤེས་སྤྲིང་ལས། མཐོ་རིས་ནའང་བདེ་ཆེན་དེ་དག་གིས། །འཆི་འཕོ་སྡུག་བསྔལ་ཉིད་ནི་དེ་བས་ཆེ། །ཅེས་སོ། ཁམས་གོང་མ་གཉིས་ལ་རེ་ཞིག་སྡུག་བསྔལ་མེད་ཀྱང་། བྱ་ནམ་མཁར་འཕུར་བ་ངེས་པར་ས་ལ་བབ་པ་བཞིན་དུ། སླར་འོག་ཏུ་ལྷུང་ནས་སྡུག་བསྔལ་མྱོང་བར་འགྱུར་སྟེ། བཤེས་སྤྲིང་ལས། ཚངས་ཉིད་ཆགས་བྲལ་བདེ་བ་ཐོབ་ནས་ལྷར། །མནར་མེད་མེ་ཡི་བུད་ཤིང་འགྱུར་བ་ཡིས། །སྡུག་བསྔལ་རྒྱུན་མི་ཆད་པ་བརྟེན་འཚལ་ལོ། །ཅེས་གསུངས་སོ། །དེ་ལས་སྡུག་བསྔལ་འབྱུང་ཚུལ་ཇི་ལྟར་སྙམས་ན། རང་བཞིན་གྱི་ཁ་ན་མ་ཐོ་བ་མི་དགེ་བ་བཅུ་པོ་རེ་རེ་ཡང་། རྣམ་སྨིན་གྱི་འབྲས་བུ་ངན་སོང་གསུམ་དུ་འཕེན་པར་བྱེད་ཅིང་། བདག་པོའི་དབང་གིས་འབྲས་བུ་ནི་ཕྱི་རོལ་ཁོ་ན་ལ་སྨིན་ཏེ། རིན་ཆེན་ཕྲེང་བ་ལས། གསོད་པས་གཟི་བརྗིད་ཆུང་བ་བརྐུས་པ་ཡིས། སེར་བ་དང་བཙའ་ཆར་འདོད་ལོག་གིས། །རྡུལ་འཁྲིགས་ཅན་དུ་འགྱུར་བ་སྟེ་སད་ཀྱིས་ཁྱེར་བའོ། །གྱུར་རྫུན་གྱིས་ནི། དྲི་བཟང་ངན་ཕྲ་མས་མཐོ་དམན་འབྲས་བུ་ཅན་དུ་འགྱུར་བའོ། །རྩུབ་པོས་ཚ་རྒོད་ཅན་ནི། རོ་མི་ཞིམ་པའོ། །དགོན་སྡོང་ཐ་ཆད་སྡིག་པ་ཅན། ངག་འཁྱལ་བས་དུས་ལོག །བརྣབ་སེམས་ཀྱིས། འབྲས་བུ་ཁ་དང་ལོག་ལྟ་ནི། འབྲས་བུ་ཆུང་བ་མེད་པར་འགྱུར། ཅེས་སོ། །རྒྱུ་མཐུན་ནི། དབུ་མ་རིན་ཆེན་ཕྲེང་བ་ལས། སྲོག་གཅོད་པ་ནི་ཚེ་ཐུང་འགྱུར། །མ་བྱིན་ལེན་པས་ནོར་དང་བྲལ། །བྱི་ཕོ་བྱས་པས་དགྲ་དང་བཅས། །རྫུན་དུ་སྨྲས་པས་བཀུར་པ་མང་། །ཕྲ་མའི་ས་ནི་བཤེས་དང་འབྱེད། །འཁྱལ་པའི་ས་ནི་ངག་མི་བཙུན། །ཚིག་རྩུབ་པོས་ནི་མི་སྙན་ཐོས། །བརྣབ་སེམས་ཡིད་ལ་རེ་བ་འཇོམ། །གནོད་སེམས་འཇིག་པ་སྦྱིན་པར་མཛད། །ལོག་པར་བལྟ་བ་ལྟས་ངན་ཉིད། །ཅེས་སོ། །རྒྱ་ཆེར་ནི། མདོ་དྲན་པ་ཉེར་བཞག་དུ་བལྟ་བའོ། །བཅས་པའི་ཁ་ནས་མ་ཐོ་བ་རེ་རེས་ཀྱང་། སྡུག་བསྔལ་བསྐྱེད་པའི་ཚུལ་དང་། རྒྱུ་འབྲས་ཞིབ་པ་ནི། ལྟུང་བ་སྡེ་ལྔའི་དགེ་བ་དང་། མི་དགེ་བའི་འབྲས་བུ་བརྟག་པའི་མདོ་དང་། འཕགས་པ་ཚུལ་ཁྲིམས་ཉམས་པའི་རྣམ་པར་སྨིན་པ་ཅི་ཡང་བསྟན་པའི་མདོ་དང་། འདུལ་བ་ལུང་དང་། མདོ་སྡེ་ལས་ཀྱི་མེ་ལོང་དང་། མདོ་སྡེ་མཛངས་བླུན་དང་། ཐེག་པ་ཆེན་པོའི་མདོ་རྣམས་སུ་རྒྱ་ཆེར་གསུང་པས། དེར་ལྟ་བར་བྱའོ། །བཀའ་གདམ་གྱི་བླ་མ་དག་གི་ཞལ་ནས། ཕན་ཡོན་ཆེ་བ་བག་རེ་ཐོས་ནས། བློ་བདེ་བ་འོང་བའི་ཕྱིར། རྒྱས་པར་དྲན་པ་ཉེར་བཞག་ལ་བལྟ་དགོས། ཞེས་གསུངས་སོ། །སྤྱིར་རྒྱུ་དགེ་བ་ལ་འབྲས་བུ་བདེ་བར་འབྱུང་ལ། རྒྱུ་དགེ་སྡིག་འདྲེས་མ་ལས་འབྲས་བུ་བདེ་སྡུག་འདྲེས་མ་བྱུང་བ་ནི། རྣ་བ་བྱེ་བ་རིས། ཉི་ཚེ་བའི་དམྱལ་བའི་གནས་སུ་ཕྱིན་པས། མཁར་བཟང་པོ་གཅིག་གི་ནང་ན་བུད་མེད་རིན་ཆེན་མང་པོའི་རྒྱན་པ་གཅིག་འདུག་པ། དེ་ལ་ཟས་སློང་པས་ནང་དུ་བོས་ཏེ། ཟས་བཟང་པོ་མང་པོ་བྱིན། དེ་ནས་ཁྲི་གཅིག་གི་ཟུར་བཞི་ན་ཡི་དྭགས་བཞི་བཏག་འདུག །འདི་པ་ལ་ཅི་ཡང་མ་སྟེར་ཟེར་ནས་སྒོར་སོང་། སྙིང་རྗེ་ནས་ཅུང་ཟད་བྱིན་པས་ཁོང་ཚོ་སྡུག་བསྔལ་མང་པོ་བྱུང་། མོ་ན་རེ། འདི་ཚོ་ཟོས་པས་ཆོག་ན་ངས་ཅི་མི་སྟེར་ཟེར། ཁྱེད་རྣམས་ལ་ཁྱད་པར་འདི་ཙམ་འབྱུང་བ་ཅི་ཡིན་དྲིས་པས། སྐྱེ་བ་སྔ་མ་ངེད་རྣམས་བཟའ་མི་ཡིན། ཁོང་ཚོ་ཞིང་ལས་ལ་སོང་བའི་དྲོ་ཆས་ཟིན་པ་དང་། དགེ་སློང་ཞིག་སྒོར་བྱུང་ནས་དེ་ལ་ཐམས་ཅད་དྲོང་སྟེ། དྲོ་བ་སྐྱར་ནས་གཡོས་པས་ཉི་མ་ཕྱི་མོར་སོང་བས། ཁོང་ཚོ་ཁྲོས་པས། སྔར་གྱི་ལོ་རྒྱུས་བརྗོད་པས། ཁོང་ཚོས་དགེ་སློང་ལ་ཚིག་ངན་སྨྲས། དེས་ཁོང་ཚོའི་ཚིག་ངན་གྱི་རྣམ་སྨིན་མཐོང་ཞིང་སྐྱེ་བར་གྱུར་ཅིག །ཅེས་སྨོན་ལམ་བཏབ་པས་ངེད་ཚོ་འདིར་སྐྱེས་པ་ཡིན། དེ་མིན་ན་ང་ལྷར་སྐྱེ་བར་འདུག་ཟེར་རོ། །ཡང་ཁང་པ་གཉིས་སུ་ཕྱིན་པས། གཅིག་ན་ཁྱེའུ་གཅིག་བུད་མེད་མཛེས་མ་བཞིའི་ཉིན་མོ་ལྷས་མཆོད་ཅིང་། ནུབ་མོ་དེ་བཞི་སྤྱང་མོ་བཞིར་གྱུར་ནས་དེ་ཟ་ཞིང་འདུག་པས་གཅིག་ན་དེ་ལས་བཟློག་པ་གཅིག་འདུག །དེའི་རྒྱུ་དྲིས་པས། སྔ་མ་སྨད་འཚོང་མ་ཡིན་པས་ཉིན་མོ་བསྡམ་པ་སྲུང་། ནུབ་མོ་མ་སྲུང་བས་དེ་ལྟར་གྱུར། གཅིག་ཤན་པ་ཡིན་པས་ཉིན་མོ་མ་སྲུང་མཚན་མོ་སྲུང་བས་འདི་ལྟར་འགྱུར་ཟེར། འོ་ན་དགེ་སྡིག་ལས་བདེ་སྡུག་འང་འབྱུང་ན། ད་ལྟ་སྡིག་ཅན་བདེ་བ་དང་། དགེ་བ་ཅན་ལ་སྡུག་བསྔལ་འབྱུང་བ་སྣང་བ་དེ་རྣམས་ནི། ད་ལྟའི་སྡུག་བསྔལ་སྔོན་གྱི་རྣམ་སྨིན་ཏེ། སྔ་མ་ཅི་བྱས་རང་གི་ལུས་ལ་ལྟོས། ཅེས་སོ། །ད་ལྟ་དགེ་སྡིག་བྱས་པས་སྟོབས་ཆེན་རེ་ཙམ་མ་གཏོག་ཕྱི་མ་ཕན་དུ་བྱུང་སྟེ། ཕྱི་མ་གར་འགྲོ་རང་གི་ལས་ལ་དྲིས། ཅེས་སོ། །འཕགས་པ་ཀ་ཏ་ཡ་ན་ལ། རྒན་མོ་གཅིག་གིས་ཆུ་ལྷུང་བཟེད་གང་ཕུལ་བས་ལྷར་སྐྱེས་པར་བཤད། པདྨ་དཀར་པོ་ལས། སངས་རྒྱས་ལ་དམིགས་ནས་ཐང་ནས་མེ་ཏོག་གཅིག་ནམ་མཁར་གཏོར་ནའང་། སྔོན་གྱི་མཐའ་མི་མངོན་པ་དེ་ཙམ་གྱིས། བསྐལ་པར་འཁོར་བའི་ཚེ། བརྒྱ་བྱིན་དང་འཁོར་ལོ་བསྒྱུར་རྒྱལ་ཐོབ་པའི་མཐའ་མི་རྙེད། ཅེས་སོ། །འདུལ་བ་ལུང་ལས། དགེ་བ་ཆུང་ངུ་དག་ལ་ཡང་། མི་ཕན་སྙམ་དུ་བརྙས་མི་བྱ། །ཆུའི་ཐིག་པ་བསོག་པ་ཡི། །སྣོད་ཆེན་རིམ་གྱི་གང་བར་འགྱུར། །ཅེས་སོ། །མི་དགེ་བ་ལ་ཡང་། ངག་གིས་ཉེས་བྱས་ཕྲ་མོ་རེ་རེས་ཀྱང་། སྐྱེ་བ་མང་པོར་སྡུག་བསྔལ་མྱོང་བར་གསུང་སྟེ། དགེ་སློང་མ་ཞིག་གིས་གྲོགས་རྣམས་ལ། ཁྱི་མོ་ཁྱོད་ཚོས་བྱས་པས། སྐྱེ་བ་ལྔ་བརྒྱར་ཁྱི་མོར་སྐྱེས་པ་དང་། དགེ་སློང་མ་བཞུད་པའི་རྩིག་ངོས་དང་། །ཀ་བ་ལ་ངར་སྣབས་བསྐུས་པས། རྩིག་པ་ལྟ་བུ་དང་། ཀ་བ་ལྟ་བུའི་དམྱལ་བར་སྐྱེས་པར་གསུང་སྟེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང་། མི་གནོད་སྙམ་དུ་བརྙས་མི་བྱ། །མེ་སྟག་ཆུང་ངུ་དག་གིས་ཀྱང་། །རྩྭ་ཕུང་རི་ཙམ་བསྲེག་པར་བྱེད། །ཅེས་སོ། །དགེ་སྡིག་ཆེ་ཆུང་གི་ཁྱད་པར་གང་ཡིན་སྙམ་ན་སྦྱོར་དངོས་རྗེས་གསུམ་ཚང་ན་ཆེ། གཉིས་ཀྱིས་འབྲིང་། གཅིག་གིས་ཆུང་བའོ། །ཞེས་བདག་གི་བླ་མ་ཆོས་ཀྱི་སྤྱན་ཅན་གྱིས་གསུངས་སོ། །དེ་ལྟར་སྔོན་འགྲོ་ལ་འབད་པས་གནད་དུ་སོང་བའི་རྟགས་འབྱུང་སྟེ། དལ་འབྱོར་རྙེད་དཀའ་བསྒོམ་པའི་ཉིན་མཚན་ཆོས་ལ་བརྩོན་པ་འབྱུང་། འཆི་བ་མི་རྟག་པ་སྒོམ་པས་ཚེ་འདི་བློའི་ཐོང་སྙམ་པ་འབྱུང་། འཁོར་བའི་ཉེས་དམིགས་སྒོམ་པས་འཁོར་བ་ལ་ཞེན་པ་ལོག་པ་འབྱུང་། ལས་རྒྱུ་འབྲས་སྒོམ་པས་བླང་དོར་ལ་སྤྲོ་བ་འབྱུང་བའོ། །ཞེས་གསུངས་སོ། །སྤྱི་དོན་གཉིས་པ་སྔོན་འགྲོ་སྦྱོར་བའི་ཆོས་ཀྱི་རྒྱུད་ཡོངས་སུ་སྦྱོང་བ་ལ་བདུན་སྟེ། ཕྱི་པ་མུ་སྟེགས་པ་ནང་པ་སངས་རྒྱས་གཉིས་ཤན་འབྱེད་ཅིང་དཀོན་མཆོག་གསུམ་གྱི་སྐྱབས་འོག་ཏུ་ཚུད་ངེས་པའི་སྐྱབས་འགྲོའི་ཁྲིད། ཐེག་པ་ཆེ་ཆུང་ཤན་འབྱེད་ཅིང་། གནས་སྐབས་དང་མཐར་ཐུག་གཞན་དོན་ཕུན་སུམ་ཚོགས་པའི་ཆེད་དུ་སེམས་བསྐྱེད་ཀྱི་ཁྲིད། སྒྲིབ་པ་དག་པར་བྱེད་པ་ལ་ཡི་གེ་བརྒྱ་བའི་སྒོམ་བཟླས་ཀྱི་ཁྲིད། ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད། བྱིན་རླབས་འཇུག་པར་བྱེད་པ་ལ་བླ་མའི་རྣལ་འབྱོར་གྱིས་ཁྲིད། བར་ཆད་བསལ་ཕྱིར་ཧཱུྃ་རིང་བགྲང་བའི་ཁྲིད། རླུང་སེམས་བཙན་ཐབས་སུ་སྦྱང་བ་ལ་མ་སྒོམ་འཕོ་བའི་ཁྲིད་དང་བདུན་ནོ། །དང་པོ་ཕྱི་པ་མུ་སྟེགས་པ་དང་ནང་པ་སངས་རྒྱས་གཉིས་ཤན་འབྱེད་ཅིང་དཀོན་མཆོག་གསུམ་གྱི་སྐྱབས་འོག་ཏུ་ཚུད་ངེས་པའི་དོན་དུ་སྐྱབས་སུ་འགྲོ་བའི་ཁྲིད་ནི། མདུན་གྱི་ནམ་མཁའི་གནས་སུ་པདྨ་དང་ཟླ་བའི་གདན་ལ། མ་ཅིག་ལབ་ཀྱི་སྒྲོན་མ་ལ། གྲུབ་ཐོབ་གཅོད་ཀྱི་བརྒྱུད་པ་རྣམས་དང་། བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བཀྲ་དཔུང་ངེ་འོད་ཐིབས་སེ་བསྐོར་ནས་རང་ལ་ཞལ་གྱིས་ཕྱོགས། སྤྱན་གྱིས་གཟིགས་ཐུགས་ཀྱིས་དགོངས་ནས་བཞུགས་པར་བསྒོམ་ཞིང་འདི་སྐད་བརྗོད། བདག་ཅག་རྣམས་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ཐར་པ་དང་ཐམས་ཅད་མཁྱེན་པ་སྒྲུབ་པ་ལ་བར་ཆད་བྱེད་པའི་གདོན་བགེགས་རྣམས་ཀྱི་ཐོག་དྲངས། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ༴ ཆོས་ལ༴ དགེ་འདུན༴ མ་ཅིག་ལབ་ཀྱི་སྒྲོན་མ་ལ༴ གྲུབ་ཐོབ་གཅོད་ཀྱི་བརྒྱུད་པ་རྣམས་ལ༴ རྟོག་ལྡན་ཉམས་ཀྱི་བརྒྱུད་པ་ལ༴ མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ལ༴ དེ་ལྟར་བྱེད་པ་ཚར་ནས་ཐུན་མོང་མ་ཡིན་པའི་སྐྱབས་འགྲོ་དང་། ཡན་ལག་བརྒྱད་པ་ཚར་ཅིག་བྱེད་པ་ནི་འདི་སྐད་དོ། །ན་མོ། གཉན་ས་འདིར་གནས་ཀྱི་ལྷ་འདྲེ་དང་། །བདག་ལ་ཆོ་འཕྲུལ་བསྟན་པའི་ནད་གདོན་རྣམས། །མ་མི་མིན་ཡེ་ཤེས་ཀྱི་མཁའ་འགྲོ་མ། །མ་ལབ་སྒྲོན་ཁྱེད་ལ་སྐྱབས་སུ་མཆིའོ། །རང་རིག་ཡེ་ཤེས་སྟོན་མཛད་པའི། །བླ་མ་རྣམས་ལ་སྐྱབས་སུ༴ དངོས་གྲུབ་ངེས་པར་སྟེར་མཛད་པའི། །ཡི་དམ་རྣམས་ལ༴ བརྩེ་གདུང་དམ་ཚིག་ལྡན་མཛད་པ། །མཁའ་འགྲོ་རྣམས་ལ༴ བགེགས་དང་བར་ཆད་ཞི་མཛད་པའི། །ཆོས་སྐྱོང་རྣམས་ལ༴ སྤང་རྟོག་ཕུན་སུམ་ཚོགས་པ་ཡི། །སངས་རྒྱས་རྣམས་ལ༴ ཞི་གྱུར་འདོད་ཆགས་བྲལ་བ་ཡི། །དམ་ཆོས་རྣམས་ལ༴ གང་ལ་ཕུལ་བའི་དོན་ཆེ་བའི། །དགེ་འདུན་རྣམས་ལ༴ གཞོན་ནུའི་མཛེས་ཚུལ་ཡོན་ཏན་ལྡན། །འཇམ་པའི་དབྱངས་ལ༴ ངེས་པར་སྙིང་རྗེ་བསྐྱེད་པ་ཡི། །སྤྱན་རས་གཟིགས་ལ༴ མཐུ་སྟོབས་ཆེན་པོ་གདུག་པ་འདུལ། །རྡོ་རྗེ་བསྣམས་ལ༴ ཅི་སྲིད་སྙིང་པོ་བྱང་ཆུབ་བར། །ཁྱེད་རྣམས་ལ་ནི་སྐྱབས་སུ་མཆིའོ། །ཁྱེད་རྣམས་ལ་ནི་གསོལ་བ་འདེབས། །ཁྱེད་རྣམས་ལ་ནི་རྟེན་བཅའོ། །འདོད་ཡོན་ལྔ་ཡི་མཆོད་པ་འབུལ། །ཕུང་པོ་ལྔ་པོར་མཆོད་པར་བཞེས། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་གསོལ་བ་འདེབས། །དགེ་དེས་སེམས་ཅན་བདེ་གྱུར་ཅིག །རྫོགས་སངས་རྒྱས་པར་སེམས་བསྐྱེད་དོ། །ཅེས་པས། མ་ཅིག་གིས་མཛད་པའི་སྐྱབས་འགྲོ་ཡན་ལག་བརྒྱད་པ་བྱ་བ་ཡིན་ནོ། །གཉིས་པ་ཐེག་པ་ཆེ་ཆུང་ཤན་འབྱེད་ཅིང་། གནས་སྐབས་དང་མཐར་ཐུག་གཞན་དོན་ཕུན་སུམ་ཚོགས་པའི་ཆེད་དུ་སེམས་བསྐྱེད་ཀྱི་ཁྲིད་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་གཅོད་ཉམས་སུ་ལེན་པར་བྱ་སྙམ་དུ་བསམ་ལ། ངག་ལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་པའི་བཏང་སྙོམས་ལ་གནས་པར་གྱུར་ཅིག །བྱས་པ་ཙམ་གྱིས་སྐྱབས་ཡུལ་གྱི་ལྷ་ཚོགས་རྣམས་དགྱེས་ཤིང་འཛུམ་པའི་ཚུལ་གྱིས། གདན་ཁྲི་དང་བཅས་པ་འོད་དུ་ཞུ་ནས། རང་གིས་ཚང་བུག་ཏུ་ཐིམ་པ་ཙམ་གྱིས་ལུས་ཕྱི་ནང་གིས་སྡིག་སྒྲིབ་དམ་ཚིག་ཆགས་ཉམས་ཐམས་ཅད་སངས་ཀྱིས་དག་པར་བསམ་ཞིང་། བདག་གི་དགེ་བའི་རྩ་བ་འདིའི་མཐུ་དང་ནུས་པ་ལ་བརྟེན་ནས། བདག་དང་བདག་གིས་ཕ་མ་ཉེ་དུ་གཉེན་འབྲེལ། ཟས་ནོར་ཆོས་གསུམ་གྱི་འབྲེལ་པ་ཡོད་ཚད་ཀྱི་ཐོག་དྲངས། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་ལས་དང་ཉོན་མོངས་པ་ཤེས་བྱའི་སྒྲིབ་པ་ཐམས་ཅད་བྱང་ནས་རྣམ་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཅེས་སོ། །གསུམ་པ་སྒྲིབ་པ་དག་པར་བྱེད་པ་ལ། ཡི་གེ་བརྒྱ་བའི་བསྒོམ་བཟླས་ཀྱི་ཁྲིད་ནི། རང་གིས་སྤྱི་བོར་པདྨ་ཟླ་བའི་སྟེང་དུ། ཧཱུྃ་ལས་བླ་མ་དམ་པ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་པས་རྡོ་རྗེ་གཡོན་པས་དྲིལ་བུ་འཛིན་པས་ཡུམ་ལ་འཁྱུད་པ་ཞབས་རྡོ་རྗེའི་དཀྱིལ་ཀྲུང་གི་བཞུགས་པའི་པང་ན། ཡུམ་རྡོ་རྗེ་སྙེམས་མ་དཀར་མོ་གྲི་གུག་དང་ཐོད་ཁྲག་འཛིན་པ་ཡབ་ལ་འཁྱུད་ཅིང་། པདྨའི་དཀྱིལ་ཀྲུང་གིས་འཁྲིལ་བ། གཉིས་ཀ་རུས་པ་དང་རིན་པོ་ཆེའི་བརྒྱན་པའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ༀ་བཛྲ་ས་མ་ཡ་ཛ་ཛཿ ཛ་ཧཱུྃ་བཾ་ཧོཿ གཉིས་སུ་མེད་པར་བསྟིམ། ལུས་ལོངས་སྤྱོད་ཐམས་ཅད་འབུལ་ལ། བླ་མས་བདག་གི་ལུས་ངག་ཡིད་གསུམ་གྱི་སྡིག་སྒྲིབ་རྩ་བ་དང་ཡན་ལག་གི་དམ་ཚིག་ཆགས་ཉམས་ཐམས་ཅད་དག་པར་མཛད་དུ་གསོལ། ༀ་ཤྲཱི་བཛྲ་ཧེ་རུ་ཀ་ས་ཏྭ་ས་མ་ཡ། མ་ནུ་པ་ལ་ཡ། ཤྲཱི་བཛྲ་ཧེ་རུ་ཀ་ཏེ་ནོ་པ་ཏིཥྛ། ཌི་དྲོ་མེ་བྷ་ཝ། སུ་ཏོ ཥྱོ་མེ་བྷ་ཝ། ཨ་ནུ་རཀ་ཏོ་མེ་བྷ་ཝ། སུ་པུཥྱོ་མེ་བྷ་ཝ། སརྦ་སིདྡྷི་མ་མེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡ་ཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་ཝ་ན། སརྦ་ཏ་ཐཱ་ག་ཏ་ཤྲཱི་བཛྲ་ཧེ་རུ་ཀ །བཛྲ་ས་ཏྭ་བྷ་ཝ། མ་ཧཱ་ས་མ་ཡ། ཤྲཱི་བཛྲ་ཧེ་རུ་ཀ་ས་ཏྭ་ཨཱཿ ཅེས་བརྗོད་པས། ཡབ་ཡུམ་གྱི་སྦྱོར་མཚམས་ནས་བདུད་རྩི་བབ་པས་ལུས་ཕྱི་ནང་གིས་སྡིག་སྒྲིབ་སྒོ་གསུམ་གྱི་ཉེས་ལྟུང་ཐམས་ཅད་དག་ནས་ཚང་བུག་ནས་ལུས་སེམས་དཀར་མེར་གྱིས་གང་བར་བསམ་ཞིང་ཅི་ནུས་བཟླས་སོ། །བདག་གི་མི་ཤེས་རྨོངས་པ་ཡི། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ༀ་ཨཱཿཧཱུྃ། ཅེས་བརྗོད་པས། རྡོ་རྗེ་སེམས་དཔའ་ཡབ་ཡུམ་ཞུ་ནས་རང་ལ་ཐིམ་པར་བསྒོམ་མོ། །བཞི་པ་ཚོགས་གཉིས་རྫོགས་པར་བྱེད་པ་ལ་མཎྜལ་གྱིས་ཁྲིད་ནི། མདུན་གྱིས་ནམ་མཁའི་ནས་སུ་པདྨ་ཟླ་བའི་གདན་ལ། རྩ་བའི་བླ་མ་དང་གཉིས་སུ་མེད་པ་མ་ཅིག་ལབ་ཀྱི་སྒྲོན་མ་ལ། གྲུབ་ཐོབ་གཅོད་ཀྱི་བརྒྱུད་པ་རྣམས་དང་། བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བཀྲ་དཔུང་ངེ་འོད་ཐིབས་སེ་བསྐོར་ནས་བཞུགས་པར་བསྒོམ་ལ། དེ་དག་གིས་མདུན་དུ་མཎྜལ་འབུལ་བ་ནི། ལྤགས་པ་ཕྱལ་གྱིས་བཏིང་པས། དབང་ཆེན་གསེར་གྱི་ས་གཞིར་གྱུར། ཁྲག་ཆིལ་གྱི་བྱུང་བས་དྲི་བཟང་གི་ཆུར་གྱུར། ཤ་ཉིལ་གྱི་བྱུང་བས་མེ་ཏོག་གིས་ཆུར་གྱུར། ཟོ་ཁོག་རི་རབ་ཏུ་གྱུར། ཡན་ལག་གླིང་བཞིར་གྱུར། ཉིང་ལག་ཐམས་ཅད་གླིང་ཕྲན་བརྒྱད་དུ་གྱུར། མགོ་རྣམ་པར་རྒྱལ་བའི་ཁང་བཟང་། མིག་གཉིས་ཉི་མ་ཟླ་བ། སྙིང་ལ་སོགས་པའི་ནང་རོལ་རྣམས་ཡིད་བཞིན་གྱི་ནོར་བུ་ལ་སོགས་པའི་ལྷ་མིའི་ལོངས་སྤྱོད་ཕུན་སུམ་ཚོགས་པ་དཔག་ཏུ་མེད་པས་གང་བར་འགྱུར། ཨེ་མ་ཧོ། བརྡལ་ཁྱབ་ལྤགས་པའི་ཞིང་ཁམས་ཡོངས་གསལ་ལ། །གློ་སྙིང་ཤ་རུས་ཁྲག་ཞག་ལ་སོགས་པ། །རྩ་རླུང་ཐིག་ལེའི་ཚོམ་བུར་ལེགས་པར་བཀོད། །ཁ་རྗེ་དབང་ཐང་དཔལ་འབྱོར་ཆུས་སྲིད་དང་། །བསྙེན་གྲགས་ལོངས་སྤྱོད་སྣ་ཚོགས་རྒྱན་གྱིས་སྤྲས། །རླུང་སེམས་དག་པས་རྒྱ་ཆེན་ཡོངས་སྤེལ་ནས། །རང་སྣང་རྣམ་དག་བཤམ་པའི་མཎྜལ་འདི། །སྐྱབས་གནས་དཀོན་མཆོག་ཐུགས་རྗེ་ཅན་ལ་འབུལ། །དགྱེས་པར་དགོངས་ཤིང་མཆོད་པར་བཞེས་སུ་གསོལ། །བཞེས་ནས་བདག་ལ་འགྲོ་བ་མ་ལུས་པའི། །ལུས་ངག་ཡིད་གསུམ་སྨིན་ཅིང་གྲོལ་ནས་ཀྱང་། །བླ་མེད་དོན་མཆོག་འབྲས་བུ་ཐོབ་པར་ཤོག །ལྷག་བསམ་རྣམ་དག་ལུས་ངག་ཡིད་གསུམ་གྱིས། །མཎྜལ་བཀོད་མཛེས་རྒྱན་ལྡན་འདི་འབུལ་བས། །འཕགས་པ་ཐུགས་རྗེ་ཅན་རྣམས་རབ་དགྱེས་ནས། །འཁོར་བ་དོང་སྤྲུག་འགྲོ་དོན་མཛད་པར་ཤོག །ༀ་ཨཱཿཧཱུྃ་གུ་རུ་དྷེ་བ་ཌཱཀྐི་ནི་ཧཱུྃ། སརྦ་བུདྡྷ་བོ་དྷི་ས་ཏྭ་མ་མ་ཀཱ་ཡ་ཝཀྐ་ཙིཏྟ་མཎྜ་ལ་པཱུ་ཙ་མེ་གྷ་ས་མ་ཡ་ས་མུ་ཏྲ་སྥ་ར་ན་ས་མ་ཡ་ཧཱུྃ་སྭཱ་ཧཱ། ཅེས་པས་མདུན་གྱི་ལྷ་ཚོགས་རང་ལ་བསྟིམ་མོ། །ལྔ་པ་བྱིན་རླབས་འཇུག་པར་བྱེད་པ་ལ། བླ་མའི་རྣལ་འབྱོར་གྱི་ཁྲིད་ནི། རང་གི་སྤྱི་བོར་མདའ་གང་ཙམ་གྱིས་སྟེང་དུ། པདྨ་ཉི་མ་ཟླ་བའི་གདན་ལ་དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བའི་བླ་མ་དང་གཉིས་སུ་མེད་པའི་མ་ཅིག་ལབ་ཀྱི་སྒྲོན་མ་སྐུ་མདོག་གངས་རི་ལ་ཉི་མ་ཤར་བ་ལྟར་དཀར་བ། ཞལ་གཅིག་ཕྱག་གཉིས་གཡས་གསེར་གྱི་ཌཱ་མ་རུ། གཡོན་དངུལ་དཀར་གྱི་དྲིལ་བུ་གཡེར་ཀ་དཀྲོལ་བ། སྐུ་ལ་རས་ཕྲུག་དཀར་པོའི་རལ་ག་མནབ་པ། དབུ་སྐྲ་སིལ་མས་སྐུ་རྒྱབ་ནོན་པ། ཞབས་རྡོ་རྗེའི་དཀྱིལ་ཀྲུང་གིས་བཞུགས་པ། མཚན་དང་དཔེ་བྱད་འོད་ཟེར་དང་ལྡན་པ་བསམ། མ་ཅིག་གི་སྤྱི་བོར་པདྨ་ཉི་ཟླའི་སྟེང་དུ་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་གསེར་གྱི་མདོག་འདྲ་བ། ཞལ་གཅིག་ཕྱག་བཞི་མ། གཡས་ཀྱི་དང་པོ་ན་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་བསྣམ་པ། འོག་མ་ན་ཤེས་རབ་ཀྱི་རལ་གྲི། གཡོན་དང་པོ་མཉམ་བཞག །འོག་མ་ན་ཤེས་རབ་ཀྱི་པོ་ཏི་བསྣམས་པ། ཞབས་རྡོ་རྗེའི་དཀྱིལ་ཀྲུང་། རལ་པ་ཐོར་ཚུགས་ལྷག་མ་གྲོལ་བ། རིན་པོ་ཆེ་སྣ་ཚོགས་དང་། དར་སྣ་ཚོགས་ཀྱིས་སྤྲས་པ། མཚན་དང་དཔེ་བྱེད་འབར་བ་གཅིག་བསམ། མ་ཅིག་གིས་གཡས་སུ་པདྨ་ཉི་ཟླའི་སྟེང་དུ། སངས་རྒྱས་བསྟན་པའི་གཙོ་བོ་ཤཱཀྱ་ཐུབ་པ་གསེར་གྱི་མདོག་འདྲ་བ། ཞལ་གཅིག་ཕྱག་གཉིས་པ། གཡས་ས་ནོན། གཡོན་མཉམ་བཞག །ཆོས་གོས་ངུར་སྨྲིག་གསོལ་བ། མཚན་དང་དཔེ་བྱད་འོད་ཟེར་མདོམ་གང་དང་བཅས་པ་བསྒོམ། མ་ཅིག་གི་གཡོན་དུ་འཇམ་དཔལ་སྨྲ་བའི་སེང་གེ་ཞལ་གཅིག་ཕྱག་གཉིས་གཡས་རལ་གྲི། གཡོན་ཨུཏྤ་ལའི་ཁར་ཤེས་རབ་ཀྱི་པོ་ཏི་བསྣམས་པ། གསེར་མདོག་ཅན་རལ་པ་སྤྱི་བོར་བཅིང་བ། ལྷག་མ་ཐུར་དུ་གྲོལ་བ། རིན་པོ་ཆེ་སྣ་ཚོགས་ཀྱིས་བརྒྱན་ཅིང་དར་སྣ་ལྔའི་ཤམ་ཐབས་ཅན། སེམས་དཔའི་དཀྱིལ་ཀྲུང་གིས་བཞུགས་པ། ཡུམ་སྲས་དེ་བཞི་ལ་མདུན་ནས་གཡས་བསྐོར་དུ། པད་ཟླའི་གདན་ལ་རྗེ་བཙུན་སྒྲོལ་མ། མཁའ་འགྲོ་སུ་ཀ་སིདྡྷི། རྗེ་ཨཱརྱ་དེ་བ། དམ་པ་རྒྱ་གར། སྐྱོ་སྟོན་བསོད་ནམས་བླ་མ། མ་ཅིག་ལབ་ཀྱི་སྒྲོན་མ། ཁུ་སྒོམ་ཆོས་ཀྱི་སེངྒེ་ཕ་དོལ་པ་ཟང་ཐལ། རྒྱ་ནག་གཅེར་བུ། སངས་རྒྱས་རབ་སྟོན། སངས་རྒྱས་དགེ་སློང་། སངས་རྒྱས་རས་པ། སངས་རྒྱས་གཉེན་སྟོན། རས་པ་ཆོས་སེང་། གཡུ་བཞེས་སྟོན་པ། སློབ་དཔོན་ཤེས་རབ་བླ་མ། རྗེ་བཙུན་དཔལ་འབར་བ། རྟོག་ལྡན་ནམ་མཁའ་རྡོ་རྗེ། སྐྱེས་མཆོག་ཚུལ་ཁྲིམས་རྒྱལ་མཚན། མཁས་བཙུན་ཛྙཱ་ན་ཀེ་ཏུ། རྩ་བའི་བླ་མ་ལ་སོགས་གྲུབ་ཐོབ་གཅོད་ཀྱི་བརྒྱུད་པའི་བླ་མ་ཐམས་ཅད། སངས་རྒྱས་བྱང་ཆུབ་སེམས་དཔའ། བླ་མ་ཡི་དམ་མཁའ་འགྲོ་ཐམས་ཅད་སྤྲིན་གཏིབ་པ་ལྟར་བསྐོར་ནས་བཞུགས་པར་སྒོམ། དེ་ནས། བཛྲ་ས་མ་ཡ་ཧཱུྃ་ཛ་ཛཿ ཅེས་ལན་གསུམ་གྱིས་ཡེ་ཤེས་པ་སྤྱན་དྲངས་སོ། །ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ་ཞིང་། ཕྱོགས་དུས་སངས་རྒྱས་ཐམས་ཅད་ཀྱི་ངོ་བོ་རྩ་བའི་བླ་མ་ཉིད་ཡིན་པར་ངེས་པས། རང་གིས་ཁ་ཚིག་ཙམ་མ་ཡིན་པར་ཤའི་ཏིང་། རྐང་གི་ཁུང་། སྙིང་གི་དཀྱིལ་ནས་མོས་གུས་བྱེད་ལ། ཁམས་གསུམ་གྱི་སེམས་ཅན་ཐམས་ཅད་ཀྱང་རང་གི་འཁོར་དུ་གྱུར་པར་བསམ་ཞིང་། མགྲིན་གཅིག་ཏུ་གསོལ་བ་གདབ་པ་ནི། ཡུམ་ཆེན་ཤེས་རབ་ཕར་ཕྱིན་ལ་སོགས་པའི། །སྐྱེ་མེད་ཆོས་ཀྱི་སྐུ་ལ་གསོལ་བ་འདེབས། །རྒྱལ་བ་ཤཱཀྱའི་རྒྱལ་པོ་ལ་སོགས་པའི། །ཕྱོགས་བཅུའི་སངས་རྒྱས་རྣམས་ལ༴ འཇམ་དཔལ་སྨྲ་བའི་སེངྒེ་ལ་སོགས་པའི། །རྒྱལ་སྲས་འཕགས་པ་རྣམས་ལ༴ རྗེ་བཙུན་ཨཱརྱ་དེ་བ་ལ༴ འཛམ་གླིང་སྐྱེས་མཆོག་རྣམས་ལ༴ ཕ་ཅིག་དམ་པ་རྒྱ་གར་ལ་སོགས༴ རྒྱ་གར་གྲུབ་ཐོབ་རྣམས་ལ༴ སྐྱོ་སྟོན་བསོད་ནམས་བླ་མ་ལ་སོགས༴ བོད་ཡུལ་སྐྱེས་མཆོག་རྣམས་ལ༴ མ་ཅིག་ལབ་ཀྱི་སྒྲོན་མ་ལ་སོགས་པའི། །ཡེ་ཤེས་མཁའ་འགྲོ་རྣམ་ལྔ་ལ༴ ཁུ་སྒོམ་ཆོས་ཀྱི་སེངྒེ་ལ་སོགས༴ སྐྱེ་མེད་དོན་རྟོགས་རྣམས་ལ༴ ཕ་ཅིག་དོལ་པ་ཟང་ཐལ༴ སྐྱེས་མཆོག་དོན་འགྲུབ་རྣམས་ལ༴ རྗེ་བཙུན་རྒྱ་ནག་གཅེར་བུ་ལ་སོགས༴ རྣལ་འབྱོར་འཁྲུལ་ཞིག་རྣམས༴ སངས་རྒྱས་རབ་སྟོན་ལ་སོགས༴ མཁས་གྲུབ་ཆེན་པོ་རྣམས་ལ༴ སངས་རྒྱས་དགེ་སློང་ལ་སོགས༴ ཚུལ་ཁྲིམས་མཐར་ཕྱིན་རྣམས་ལ༴ སངས་རྒྱས་སུམ་པ་རས་ཆེན་ལ༴ བརྟུལ་ཞུགས་གྲུབ་རྣམས་ལ༴ སངས་རྒྱས་གཉེན་སྟོན་ལ་སོགས༴ ཆོས་ཀྱི་སྤྱན་ལྡན་རྣམས་ལ༴ རས་པ་ཆོས་ཀྱི་སེངྒེ་ལ༴ རྣལ་འབྱོར་དབང་ཕྱུག་རྣམས༴ རྗེ་བཙུན་བཛྲ་སེང་ཧ་ལ༴ དམ་ཆོས་སྨྲ་བ་རྣམས༴ སློབ་དཔོན་པྲ་ཛྙཱ་གུ་རུ་ལ༴ རྟོག་ལྡན་དམ་པ་རྣམས༴ རྗེ་བཙུན་བཛྲ་ཤྲཱི་ལ༴ འགྲོ་བའི་མགོན་པོ་རྣམས་ལ༴ རྟོག་ལྡན་ནམ་མཁའ་རྡོ་རྗེ་ལ༴ དོན་གཉིས་གྲུབ་པ་རྣམས༴ སྐྱེས་མཆོག་ཚུལ་ཁྲིམས་རྒྱལ་མཚན་ལ༴ བསྐྱེད་རྫོགས་བརྟེན་ཐོབ་རྣམས༴ མཚུངས་མེད་ཆོས་ཀྱི་རྡོ་རྗེ་ལ༴ སྡོམ་གསུམ་མཐར་ཕྱིན་རྣམས་ལ༴ མཁས་གྲུབ་ཛྙཱ་ན་ཀེ་ཏུ་ལ༴ མཁས་བཙུན་དམ་པ་རྣམས༴ དྲིན་ཆེན་རྩ་བའི་བླ་མ་ལ༴ གྲུབ་ཐོབ་གཅོད་བརྒྱུད༴ ཐར་པའི་ལམ་སྟོན་རྣམས་ལ༴ ཕན་བདེའི་འབྱུང་གནས་རྣམས་ལ༴ འཕགས་པའི་དགེ་འདུན་རྣམས་ལ༴ བདག་སོགས་མཁའ་མཉམ་འགྲོ་བའི་སེམས་ཅན་རྣམས། །མ་རིགས་མུན་པ་སང་བར་བྱིན་གྱིས་རློབས། །གཟུང་འཛིན་མདུད་པ་གྲོལ་བར་བྱིན་གྱིས་རློབས། །སྒྲིབ་གཉིས་བག་ཆགས་མེད་པར་བྱིན་གྱིས་རློབས། །སྨོན་འཇུག་སེམས་མཆོག་བསྐྱེད་པར༴ ཕ་རོལ་ཕྱིན་དྲུག་རྫོགས་པར༴ རྐྱེན་ངན་གྲོགས་སུ་འཆར་བ༴ སྣང་སྲིད་ཆོས་སྐུར་འཆར་བར༴ སྟོང་ཉིད་སྙིང་རྗེ་འབྱུང་བ༴ བདག་དོན་ཆོས་སྐུ་རྟོགས་པར་བྱིན༴ གཞན་དོན་གཟུགས་སྐུ་འབྱུང་བར༴ དོན་གཉིས་ཕུན་སུམ་ཚོགས་པར་བྱིན་གྱིས་རློབས༴ ཅེས་པས་གསོལ་བ་བཏབ་ནས་དབང་བཞི་ལེན་པ་ནི། ལྷ་ཚོགས་ཀུན་གྱི་སྤྱི་བོ་ནས་ༀ་དཀར་པོ་འོད་དང་བཅས་པ་བྱུང་། བདག་གིས་སྤྱི་བོར་ཐིམ། དག་བྱ་ནི་ལུས་ཀྱི་སྒྲིབ་པ་དག །ཐོབ་བྱ་ནི་སྐུ་བུམ་པའི་དབང་ཐོབ། ཡང་ལྷ་ཚོགས་རྣམས་ཀྱི་མགྲིན་པ་ནས་ཨཱཿདམར་པོ་འོད་ཟེར་དང་བཅས་པ་བྱུང་། བདག་གིས་མགྲིན་པར་ཐིམ་པས། དག་བྱ་ནི་ངག་གི་སྒྲིབ་པ་དག །ཐོབ་བྱ་ནི་གསང་བའི་དབང་ཐོབ། ཡང་ལྷ་ཚོགས་རྣམས་ཀྱི་ཐུགས་ཀ་ནས་ཧཱུྃ་མཐིང་ཀ་འོད་ཟེར་དང་བཅས་པ་བྱུང་། བདག་གིས་ཐུགས་ཀར་ཐིམ་པས། དག་བྱ་ནི་ཡིད་ཀྱི་སྒྲིབ་པ་དག །ཐོབ་བྱ་ནི་ཤེས་རབ་ཡེ་ཤེས་ཀྱི་དབང་ཐོབ། ཡང་ལྷ་ཚོགས་རྣམས་ཀྱིས་གནས་གསུམ་ནས། ༀ་ཨཱཿཧཱུྃ་གསུམ་དུས་ཅིག་ཏུ་བྱུང་བས། བདག་གིས་གནས་གསུམ་དུ་དུས་གཅིག་ཐིམ་ནས། དག་བྱ་ནི་ལུས་ངག་ཡིད་གསུམ་ཐ་དད་དུ་འཛིན་པའི་སྒྲིབ་པ་དག །ཐོབ་བྱ་ནི་ཚིག་དབང་རིན་པོ་ཆེ་ཐོབ་པར་བསམ་ཞིང་། ངག་ཏུ་ༀ་ཨཱཿཧཱུྃ་གང་ཐོན་བྱའོ། །དེ་ནས་ལྷ་ཚོགས་རྣམས་ཀྱང་རྩ་བའི་བླ་མ་ལ་བསྟིམ་ཞིང་། རྩ་བའི་བླ་མ་སྤྱི་གཙུག་ཚང་བུག་ནས་མར་བྱུང་། སྙིང་པདྨ་འདབ་བརྒྱད་ཀྱི་སྟེང་དུ་སྐུ་ཚོན་གང་བ་ཙམ་ལ་སྤྱན་ཁྲ་ཟིམ་མེ་ཐུགས་དགའ་ཡ་ལེ། ཞལ་འཛུམ་མུ་ལེ་བ་དེ་ལ་ཤེས་པ་གཏད་ཅིང་སྙིང་དབུས་ཨ་ཝ་དྷུ་ཏིའི་གཞལ་ཡས་སུ། མཚན་ལྡན་རྩ་བའི་བླ་མ་ལ་གསོལ་བ་འདེབས། སྐུ་ལྔ་ལྷུན་གྱིས་གྲུབ་པར་བྱིན་གྱིས་རློབས། །ཅེས་ལན་གསུམ་བརྗོད། དེ་ནས་བླ་མ་དེ་ཡང་འོད་དུ་ཞུ་ནས། རང་གི་ལུས་ངག་ཡིད་གསུམ་དང་། བླ་མའི་སྐུ་གསུང་ཐུགས་དང་དབྱེར་མེད་དུ་གྱུར་པའི་ངང་ནས། འདས་མ་འོངས་ད་ལྟའི་རྟོག་པ་གང་གིས་ཡང་མ་སླད་པའི་ངང་དུ་རང་སར་བཞག་གོ། །རྗེས་དགེ་བའི་རྩ་བ་བླ་མེད་དུ་བསྔོ་བ་ནི། སྨོན་ལམ་རྒྱས་འབྲིང་བསྡུས་གསུམ་གང་རུང་བ་བྱའོ། །དྲུག་པ་བར་ཆད་བསལ་ཕྱིར་ཧཱུྃ་རིང་བསྒྲང་བའི་ཁྲིད་ཀྱི་ཐང་ཀ་ནི། འོག་གི་དངོས་གཞིའི་སྐབས་སུ་ཞི་བ་དང་དྲག་པོའི་གཅོད་ཁྲིད་སྟོན་པ་དེ་ཉིད་དུ་གསལ་ལོ། ༈ །བདུན་པ་རླུང་སེམས་བཙན་ཐབས་སུ་སྦྱོང་བ་ལ། མ་བསྒོམ་ཕོ་བའི་ཁྲིད་ཀྱི་ཐང་ཀ་ནི། སྐབས་སྐབས་ན་དབྱིངས་རིགས་བསྲེ་བའི་དུས་སུ་གསལ་ལོ། །དེ་ཡན་ཆད་ཀྱི་སྦྱོར་བ་སྔོན་འགྲོའི་ཆོས་དེ་སོང་། ༈ སྤྱི་དོན་གཉིས་པ་དངོས་གཞིའི་ཉམས་ལེན་གྱི་རིམ་པ་ལ་གསུམ་སྟེ། བློ་ཐ་མལ་རྣམ་རྟོག་གི་སྤྲོས་པ་གཅོད་པ་ཕྱིའི་གཅོད། བློ་འབྲིང་རིག་པ་ལ་དབང་བསྒྱུར་བ་དྲན་པ་ནང་གི་གཅོད། བློ་རབ་ཆོས་ཉིད་ཀྱི་ལྟ་བ་རྟོག་པ་གསང་བའི་གཅོད་དོ། །དང་པོ་ལ་བཞི་སྟེ། ཞི་བའི་གཅོད། ཞི་དྲག་སྤེལ་མའི་གཅོད། དྲག་པོའི་གཅོད། རྩ་རླུང་ཐིག་ལེའི་གཅོད། དང་པོ་ཞི་བའི་གཅོད་ནི། རང་གིས་སྤྱི་གཙུག་དུ་མ་ཅིག་ལབ་ཀྱི་སྒྲོན་མ་སྐུ་མདོག་དཀར་མོ། དབུ་སྐྲ་སིལ་མས་སྐུ་རྒྱབ་ནོན་པ། ཕྱག་གཡས་པས་ཌཱ་མ་རུ་དང་གཡོན་པས་དྲིལ་བུ་སྐུར་བསྟན་པ། འོད་ཀྱིས་རང་བཞིན་དུ་བཞུགས་པ། དེ་ལ་བརྒྱུད་པའི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བར་བསམ། མ་ཅིག་གི་ཐུགས་ཀ་ནས་འོད་ཟེར་འཕྲོས་པས། གནོད་བྱེད་གཞི་བདག་གིས་གཙོས་བྱས་པའི་བགེགས་རིགས་སྟོང་ཕྲག་བརྒྱད་ཅུ་ལ་སོགས་ནམ་མཁའ་དང་མཉམ་པའི་སེམས་ཅན་ཐམས་ཅད་དད་ཅིང་མོས་པའི་ཚུལ་དུ་གྱུར་པར་བསམ། རང་གི་གསོལ་བ་ཅི་ཙམ་བཏབ་པ་ཙམ་གྱིས། དེ་རྣམས་ཀྱིས་ཀྱང་གསོལ་བ་བཏབ་པར་བསམ། དེ་ནས་ཕཊ་བྱས་པས། རང་གིས་ཐུགས་ཀར་རྣམ་པར་ཤེས་པའི་ངོ་བོ་ཐིག་ལེ་དཀར་པོ་བྱ་མ་སར་གྱི་སྒོང་ང་ཙམ་ཅིག །ཚངས་པའི་བུ་ག་ནས་ཏལ་གྱི་བུད་ནས་མ་ཅིག་གི་ཐུགས་ཀར་ཐིམ་པར་བསམ་ཞིང་། མ་ཅིག་ནམ་མཁའ་ལ་འཇའ་ཡལ་བ་དང་དུ་མཉམ་ལ། རང་གི་ལུས་ཀྱི་ལྤགས་པ་དེ་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཤ་རུས་ཁྲག་གསུམ་ལྟེམ་གྱི་ཞུ་ནས། བདུད་རྩིའི་རྒྱ་མཚོ་དཀར་ཆིལ་གྱིས་གང་བར་བསམ། དེའི་ཕུད་བླ་མ་དཀོན་མཆོག །སངས་རྒྱས་བྱང་སེམས། མ་ཅིག་ལབ་སྒྲོན་ལ་སོགས་གྲུབ་ཐོབ་གཅོད་ཀྱི་རྒྱུད་པ་མཁའ་འགྲོ་ཆོས་སྐྱོང་སྲུང་མ་རྣམས་ལ་འབུལ། དེ་ནས་ཡོན་ཏན་རིགས་དྲུག་གནོད་བྱེད་ལན་ཆགས་རྣམས་ལ་རིམ་གྱིས་ཕུལ་བས། མཉེས་ཤིང་ཚིམ་ནས་བླ་མེད་སངས་རྒྱས་ཐོབ་པར་བསམ། ཕཊ་དམིགས་མེད་ངང་ལ་བཞག །བསྔོ་བ་བྱའོ། ༈ །དེའི་རྗེས་ལ་ཞི་དྲག་སྤེལ་མའི་གཅོད་སྟོན་པ་ནི། དེ་ཡང་རང་གི་སྤྱི་བོར་པད་ཟླའི་སྟེང་དུ། མ་ཅིག་ལབ་སྒྲོན་སྐུ་མདོག་དཀར་ལ་དམར་བའི་མདངས་ཅན། སྤྱན་ཙ་ཅུང་ཟད་དམར་བ། དབུ་སྐྲ་སིལ་མས་སྐུ་རྒྱབ་ནོན་པ། གཡས་པས་ཌཱ་མ་རུ། གཡོན་པས་དྲིལ་བུ་སྐུ་ལ་བརྟེན་ནས་གར་ཐབས་སུ་བཞུགས་པ། དེ་ལ་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསམ། དེ་ནས་མ་ཅིག་གིས་ཐུགས་ཀ་ནས་འོད་ཟེར་སྣ་ཚོགས་ཕྱོགས་བཅུར་འཕྲོས་པས། སྣང་སྲིད་ཀྱི་ལྷ་འདྲེ་རྣམས་འོད་ཟེར་གྱི་སྣ་ལ་རང་དབང་མེད་པར་འདུས་པར་བསམ། དེ་རྣམས་ཀྱི་སྲོག་གི་སྙིང་པོ་ཕྱག་རྒྱའི་བར་དུ་བཅུག་ནས། དད་མོས་ཀྱི་ཚུལ་དུ་གསོལ་བ་བཏབ་པར་བསམ། སྲོག་གི་སྙིང་པོ་ལ་འོད་ཟེར་གནད་དུ་ཟུག་པས་བཀའ་ལ་ཉན་ཅིང་ཆོས་དགེ་བའི་མཐུན་འགྱུར་བྱེད་པར་ཁས་བླང་བར་བསམ། དེ་ནས་ཕཊ་བྱས་པས་རང་གིས་རྣམ་པར་ཤེས་པ་སྤྱི་བོ་ཏལ་གྱི་བུད་ནས་མ་ཅིག་གི་ཐུགས་ཀར་ཐིམ། མ་ཅིག་ནམ་མཁར་ཡལ་བ་དང་དུས་མཉམ་ལ། རང་གིས་ལུས་པོ་དེ་ཐར་གྱི་སོང་ནས། ཤ་ཁྲག་བདུད་རྩིའི་འོ་མ། འདོད་པའི་ཡོན་ཏན་དཔག་ཏུ་མེད་པར་གྱུར་ནས། སོ་སོ་རང་རང་གི་གང་འདོད་པས་ཚིམ་ནས་བླ་མེད་སངས་རྒྱས་ཐོབ་པར་བསམ། དེ་ནས་ཕཊ་བརྗོད་པས་མཉམ་པར་བཞག་པར་བྱའོ། །བསྔོ་བ་དང་སྨོན་ལམ་བཏབ། དེ་ནས་དྲག་པོའི་གཅོད་བྱེད་པར་འདོད་པས། སྤྱི་བོར་མ་ཅིག་སྐུ་མདོག་དམར་སྨུག་གཡས་ཌཱ་མ་རུ། གཡོན་དྲིལ་བུ་སྐུར་བརྟེན་པ། དབུ་སྐྲ་སིལ་བུར་གྲོལ་བ། ཅུང་ཟད་ཁྲོས་པ་ཞིག་བསམ། དེའི་ཐུགས་ཀ་ནས་འོད་ཟེར་སྔོན་པོ་ལྕགས་ཀྱུའི་དབྱིབས་ཅན་འཕྲོས་པས། རང་གདོན་དང་གཉན་སའི་གདོན་གྱིས་གཙོ་བྱས་པའི་བགེགས་རིགས་སྟོང་ཕྲག་བརྒྱད་ཅུ། སྣང་སྲིད་ཀྱི་ལྷ་འདྲེ་རྣམས་ཀྱི་སྙིང་དཀར་ནག་མཚམས་སུ་ཟུག་ནས་རང་དབང་མེད་པར་འདུས་པར་བསམ། གསོལ་བ་དྲག་ཏུ་བཏབ། དེ་ནས་ཕཊ་བྱས་པས། རྣམ་ཤེས་མ་ཅིག་ལ་ཐིམ་པས། མ་ཅིག་ནམ་མཁའ་ལ་འཇའ་ཡལ་བ་དང་དུས་མཉམ་དུ། རང་གི་ལུས་པོ་སྒང་རློན་བྲག་ལ་བརྒྱབ་པ་བཞིན་དུ། ཤ་ཁྲག་དམར་ཉིལ་གྱི་སོང་ནས་ཐམས་ཅད་མཉེས་ཤིང་ཚིམ་པར་བསམ། དེ་ནི་མཐའ་གཏད་དང་བྲོས་བཀུག་ཀྱང་ཡིན་ནོ། ༈ །བཞི་པ་རྩ་རླུང་ཐིག་ལེའི་གཅོད་ནི། སྟོང་པ་ཉིད་ཀྱི་ངང་ལས་པདྨ་དང་ཟླ་བའི་སྟེང་དུ་རང་ཉིད་མ་ཅིག་ལབ་ཀྱི་སྒྲོན་མ་སྐུ་མདོག་དམར་མོ། དབུ་སྐྲ་སིལ་མས་སྐུ་རྒྱབ་ནོན་པ། གཡས་ཌཱ་མ་རུ། གཡོན་དྲིལ་བུ་གཡེར་ཁ་འཛིན་པ། འོད་ཀྱི་རང་བཞིན་དུ་བཞུགས་པར་བསམ། དེའི་ནང་དུ་རྩ་གསུམ་ཤེལ་གྱི་སྦུ་གུ་ལྟ་བུ། གསལ་ལ་སྟོང་པ་དྲང་ཤད་དེ་ཡོད་པར་བསམ། མར་སྣེ་གསང་གནས་སུ་ཟུག་ནས། ཡར་སྣེ་ཚང་བུག་ཏུ་ཟུག་པ་ར་ལ་ར་ས་ནི་སྣ་བུག་གཉིས་ནས་ཟུག་པ་གང་གིས་ཀྱང་མ་སྒྲིབ་པ་དྭངས་སང་ངེ་བ་གཅིག་བསམ། རྩ་གསུམ་འདུས་མདོར་ཉི་མའི་དཀྱིལ་འཁོར་གྱི་སྟེང་དུ། ཐིག་ལེ་དམར་པོ་ལུང་ཐང་གི་རྡོག་མ་ཙམ་གཅིག་བསམ། ཐིག་ལེ་དེ་ཡང་ཁ་དོག་དམར་བ། རེག་བྱ་ཚ་བ། ངོ་བོ་བདེ་བ། རྣམ་པ་གསལ་ལམ་མེ་བ་གཅིག་ཏུ་བསམ། ཐུགས་ཀར་ཟླ་བའི་དཀྱིལ་འཁོར་ཉ་གང་བ་ནག་པོའི་ར་རི་མེད་པ། འོད་ཀྱི་རང་བཞིན་དཀར་ལམ་མེ་བ་གཅིག་བསམ། དེའི་སྟེང་དུ་ཐིག་ལེ་དཀར་པོ་ལང་ཏོང་གི་རྣམ་པ་ཙམ་གཅིག་བསམ། ཐིག་ལེ་དེ་ཡང་ཁ་དོག་དཀར་པོ་རེག་བྱ་འཇམ་པ། ངོ་བོ་བདེ་བ། རྣམ་པ་གསལ་བ་ཧྲི་ལེ་བ་གཅིག་བསམ། དེ་ནས་རླུང་ལན་གསུམ་འབུད་པའི་དུས་སུ་རང་གིས་བདེ་བ་དང་བྱིན་རླབས་དཔག་ཏུ་མེད་པ། ཁམས་གསུམ་སེམས་ཅན་ཐམས་ཅད་ལ་ཕོག་པས། དེ་རྣམས་ཀྱི་ལས་དང་ཉོན་མོངས་པའི་སྡིག་སྒྲིབ་ཐམས་ཅད་སོང་གི་དག་ནས། བླ་ན་མེད་པའི་སངས་རྒྱས་ཐོབ་པར་བསམ། དེ་ནས་རླུང་ཚུར་འཐེན་པའི་དུས་སུ་སེམས་ཅན་ཐམས་ཅད་ཀྱིས་ལས་དང་ཉོན་མོངས་པའི་སྡིག་སྒྲིབ་ཐམས་ཅད་རླུང་དང་འགྲོགས་ནས་རང་གིས་སྣ་བུག་གཉིས་ནས་ཞུགས་པས་རྩ་རོ་རྐྱང་གཉིས་ཀྱི་ནང་དུ་ཤར་གྱི་བྱུང་ནས། གསང་གནས་ཀྱི་ཐིག་ལེ་དམར་པོ་ལ་ཐིམ་པར་བསམ། དེ་ནས་ཕཊ་བྱས་པས། ཐིག་ལེ་དམར་པོ་ཡེ་ཤེས་ཀྱི་མེ་འབར་བས། ལྟེ་བ་སྙིང་ཁ་མགྲིན་པ་སྤྱི་བོར་འུ་རུ་རུ་འབར་བས། བདག་དང་སེམས་ཅན་གྱི་ཉོན་མོངས་པའི་རྣམ་པར་རྟོག་པ། སྡིག་པ་དང་སྒྲིབ་པ་ཐམས་ཅད་སེང་གི་ཚིག་ནས་བླ་ན་མེད་པའི་སངས་རྒྱས་ཐོབ་པར་བསམ། དེ་ནས་ཕཊ་བྱས་པས། གསང་གནས་ཀྱི་ཐིག་ལེ་ཉི་མའི་དཀྱིལ་འཁོར་དང་བཅས་པ་སྙིང་ཁ་ནས་ཡར་བྱུང་བས་ཉི་ཟླ་གའུ་ཁ་སྦྱོར་གྱི་ཚུལ་དུ་ཡོད་པར་བསམ། དེའི་ནང་དུ་ཐིག་ལེ་དཀར་དམར་གཉིས་གཡས་གཡོན་དུ་གཅིག་གི་གཅིག་ལ་རེག་ཙམ་བྱེད་པ་ལ་བརྟེན་ནས་རང་གི་ལུས་ངག་ཡིད་གསུམ་བདེ་ལྡེམ་ལྡེམ་བྱེད་པར་བསམ། དེ་ནས་འཇོག་པའི་དུས་སུ་ཐིག་ལེ་དཀར་དམར་ཉི་ཟླ་དང་བཅས་པ་དཀྲུག་གི་འདྲེས་པས་ལུས་ལ་ཐིམ། ལུས་ཀྱང་འཇའ་ཚོན་སྣ་ལྔའི་ཚུལ་དུ་ནམ་མཁའ་ལ་ཡལ་ནས་སྟོང་སངས་ཀྱིས་སོང་བར་བསམ། དེ་ནས་མཉམ་པར་བཞག་གོ། །དེ་ལྟར་ཞི་བ་དང་། དྲག་པོ། ཞི་དྲག་སྤེལ་མ། རྩ་རླུང་ཐིག་ལེའི་གཅོད་བཞིས་ཕྱིའི་གཅོད་སོང་བ་དེས། ཐ་མ་རྣམས་རྟོག་སྤྲོས་པའི་གཅོད་བྱ་བ་ཡིན་ནོ། །གཉིས་པ་བློ་འབྲིང་པོས་རིག་པ་ལ་དབང་བསྐུར་བ་ནང་གི་གཅོད་ཁྲིད་ལ་གཉིས་སྟེ། སེམས་མི་གནས་པ་གནས་པའི་ཐབས། གནས་པ་བོག་འདོན་པར་བྱེད་པའི་ཐབས་ཀྱི་སེམས་ཚོལ་ངོ་སྤྲོད་བྱེད་པའོ། །དང་པོ་ལ་གཉིས་ཏེ། མཚན་བཅས་ཀྱི་གནས་ཐབས་དང་། མཚན་མེད་ཀྱིས་གནས་ཐབས་སོ། །དང་པོ་ལ་མཚན་བཅས་ནི། མཐིང་ཐོག་ལ་དངུལ་གྱི་ཨ་གཟབ་དུ་བྲིས་ལ་ཤིང་ལ་སྐྱོན། མདུན་དུ་འདམ་གང་གི་སར་གཟུགས་ལ། ལུས་རྣམ་སྣང་གི་ཆོས་བདུན་ནི། རྐང་པ་དཀྱིལ་ཀྲུང་། ལག་པ་མཉམ་བཞག །སྒལ་ཚིག་དྲང་པོར་སྲང་། མགྲིན་པ་ཅུང་ཟད་འགུག །མཆུ་དང་སོ་རང་སར་བཞག །མིག་སྣ་རྩེར་ཕབ། ལྕེ་རྐན་དང་སོ་ལ་རེག་ཙམ་བྱའོ། །དེ་ནས་མིག་གཉིས་ཨཱ་ལ་གཏད། རིམ་གྱིས་མི་བལྟ་གཅིག་ཆར་དུ་བལྟ། བྱེ་བྲག་ཏུ་མི་ལྟ་སྤྱི་ལ་བལྟ། ཁབ་མིག་ཏུ་རྐུད་པ་འཛུད་པ་བཞིན་བྱེད། སྔ་རབ་འདས་པའི་རྗེས་མི་སྔར་བྱས་བག་ཆགས་ཉག་རིང་བས་བཅད། ཕྱི་རབ་འོངས་བའི་མདུན་མི་བསུ། །ད་ལྟ་ལས་མི་བཅོལ། ད་ལྟའི་འཁྲུལ་བ་འགྲིས་སླ་བས། ལུས་པོ་མི་བརྒུལ། མིག་ཚམ་ཚུམ་མི་བྱེད། མཆིལ་མ་མི་མིད། ཁ་མི་གསུམ། ཆུ་གསུམ་འབྲུག་ཀྱང་རང་བབ་ལ་བཞག །དེ་ནས་རིག་པ་ཟིན་རྟགས་འབྱུང་། ལུས་འདར་བ་དང་། སྔང་བ་དང་། ཐོད་རྒལ་དུ་ངུ་བ་དང་། དྲན་མེད་དུ་རྣམ་རྟོག་རྒྱུན་ཆད་པ་དང་། གཡོ་མེད་དུ་རི་དང་ནམ་མཁའ་མེད་པ་ལྟ་བུ་དང་། བྱིས་ཕྲུག་ལ་སེར་བུ་ཕོག་པ་ལྟ་བུ་དང་། རུ་སྦལ་མཁར་གཞོང་དུ་བཞག་པ་ལྟ་བུ་འབྱུང་། དེ་རྣམས་བྱུང་ན། ཟིན་པའི་རྟགས་ཡིན་པས། དལ་ཙམ་ཀློད་ནས་ངལ་བསོ་ཞིང་། ཆུ་གསུམ་ཕྱིས། རྐང་ལག་འཕུད། རོ་སྟོད་བསིང་ཞིང་ཧ་ཕཊ་བྱ། གང་ལ་གཏད་པའི་དམིགས་པ་ལ། གཞན་དུ་མི་འཕྲོ་བར་རྩེན་ནེ་གནས་ན། མཚན་བཅས་ཀྱི་སེམས་འཛིན་མི་འཕྲོ་བའི་ཚད་ཡིན་ནོ། །གཉིས་པ་མཚན་མེད་ཀྱིས་གནས་ཐབས་ནི། མ་ཅིག་གིས། གནས་ལུགས་བསྒོམ་པའི་བཞག་ཐབས་ནི། ལྷ་ཁང་ནང་གིས་འདེར་སོ་བཞིན། འདུག་ཚུལ་བཅས་ཞལ་འཛུམ་ཡང་། །མི་སྒོམ་མི་སེམས་མི་ཡེང་ལྟར། །རང་ལུས་གར་བདེ་འདུག་ནས་ནི། །མི་བསམ་མ་བསམ་མ་ཡེང་པར། །མ་བཅོས་ལྷུན་གྱིས་གྲུབ་པར་ཞོག །ཅེས་གསུངས་པས། ལུས་གནད་བཅའ་གཞི་གོང་དང་འདྲ། །མིག་ནི་བར་སྣང་དུ་གཏད་ལ། །མི་མཐོ་མི་དམའ་རྒྱང་མི་རིང་། །མདུང་གང་གི་སོ་ལ་རིག་པ་གཏད། །གཡོ་འགུལ་མེད་པར་མེ་རེ་བཞག །རྟག་དཔྱད་མི་བཏང་ཧད་དེ་བཞག །ལུས་ནི་རོའི་ཚུལ་དུ་བཞག །བདག་པོ་མེད་པའི་ཚུལ་དུ་བཞག །སེམས་ནི་ནམ་མཁའི་ཚུལ་དུ་བཞག །བར་སྣང་སྟོང་པའི་གོང་བཞིན་དུ། །སེམས་ལ་རྟོག་དཔྱོད་ཀྱི་བྱ་བ་གང་ཡང་མི་བྱེད་པར། །རིག་པ་ཧད་དེ་ཕྱད་དེ་བཞག་གོ། །མཁས་པས་ནོར་ལུག་སྐྱོངས་བ་བཞིན་དུ། །ཤེས་པ་སྡུག་བཙིར་མི་བྱེད་པར། །ལྷོད་དེ་འབོལ་ལེ་ཤིག་སེ་བཞག་གོ། །རླུང་གིས་མ་སྤྱོད་པའི་མར་མེ་ལྟ་བུ། རྩེ་གཅིག་གིས་ངང་ལས་སེང་ངེ་ཡེ་རེ་བཞག་གོ། །དྲན་པའི་རྣམ་རྟོག་ཅི་སྐྱེས་ཞིང་མཚན་མའི་ལོང་ལོང་ཅི་ཤར་ཡང་། དེ་ཀ་མ་བཅོས་རང་སར་ཀློད་ལ་བཞག་གོ། །མདོར་ན་གང་ཤར་བའི་ངོ་བོ་དེ་ཉིད་མ་སྤང་མི་དགག་ལ་དེ་ཀ་རང་དེ་རྒྱང་འཚོ་དང་བབ་འཚོ་བྱེད་ལ་བཞག་གོ། །དེ་ལ་ཐུན་དང་གྲངས་སུ་བཅད། ཐུན་ཡུན་མི་རིང་ངལ་དུབ་ཀྱི་རྒྱུ་ཡིན། མཉམ་བཞག་བདེ་བའི་ཚེ་ན་འཕྲོ་བཅད་ནས་བཞག །ཐུན་ཐུང་ཞིང་གྲངས་མང་བ་ལ་བསླབ་བོ། །རྗེས་ཀྱི་དུས་སུ་མོས་གུས་བསྒོམ། འགྲོ་བ་རྣམས་ལ་སྙིང་རྗེ་བསྐྱེད། འགྲོ་བའི་སྡུག་བསྔལ་ཉེས་དམིགས་ཐམས་ཅད་བསྒོམ། འཁྲུལ་པའི་ལས་ལ་ཞན་པ་ལོག་པར་བྱེད། མི་རྟག་འཆི་བའི་བསྐུལ་མས་འདེབས། སྣང་བ་བདེན་མེད་སྒྱུ་མ་རུ་བསྒོམ། མཉམ་བཞག་དུས་སུ་ངང་ལ་བཞག་མ་ཡེང་པར་རྩེ་གཅིག་ཏུ་དྲན་པས་བཟུང་བ་གཅེས་སོ། །དེས་གསལ་ལ་རྟོག་པ་མེད་པའི་ངོ་བོ་ཤར་བ་ཡིན་ནོ། །དེ་ལ་ཡོན་ཏན་ཅི་བྱུང་ན། རྣམ་རྟོག་གཉུག་མའི་སེམས་སུ་དངས་ཞིང་སྙིག་མའི་དྲན་རྟོག་རང་སར་དག་ནས། ཞི་གནས་ཀྱི་ངང་ལ་མཉམ་པར་བཞག་ནས། ལྷག་མཐོང་གི་འོད་གསལ་ངང་གི་འཆར་བ་ཡིན་ནོ། །དེ་ལ་བྱིང་རྒོད་ཀྱི་གེག་བྱུང་ན། དེ་བསལ་བའི་ཐབས་ལ། ལམ་གྱི་གེག་སེལ་རྣམ་གསུམ་ནི། བྱིང་རྒོད་ལྡིང་གསུམ་འཕྲང་དང་གཅིག །ཡང་དོག་ཤོར་བའི་འཕྲང་དང་གཉིས། བཏང་སྙོམས་ཤོར་བའི་འཕྲང་དང་གསུམ། བྱིང་ན་ལུས་ཀྱི་སྤྱོད་ལམ་ནི། མཐོ་གསལ་སྣང་ཡས་ཆེ་བར་བསྒོམ། ངག་གི་ཧ་ཕཊ་གླུ་དབྱངས་ལེན། །དྲག་པོ་ཁྲོ་བོའི་ལྟ་སྟངས་བྱ། །ཤེས་པ་གསལ་གསལ་ཧྲིག་ཧྲིག་གི། །རྒྱལ་མཚན་མཐོན་པོའི་ཏིང་འཛིན་བྱ། །རྒོད་ན་ལུས་ཀྱི་སྤྱོད་ལམ་བསྒོམ། །བྱ་བས་མིག་ཡེང་གོལ་ས་རུ། །དབང་པོ་ཤད་སྨད་ཞིག་ནས་བསྒོམ། །བྱང་ཆུབ་སེམས་དཔའི་ལྟ་སྟངས་བྱ། །གཏིང་ནས་ངོ་མ་ཤེས་པའི་སྐྱོན། །གླན་བསྒོམ་ཧད་པོར་སྒོམ་སྐྱེ་མེད། །དེ་ལ་བླ་མའི་མན་ངག་གིས། །རང་ལ་ཡོད་པའི་སེམས་ཉིད་དེ། །ལག་མཐིལ་ཤེལ་སྒོང་བཞིན་དུ་བསྟེན། །དེ་ངོ་ཤེས་པས་གྲོལ་བར་འགྱུར། །གཞན་ཡང་འཐོར་བུའི་གེག་སེལ་རྣམས། །མང་གི་དོག་པས་འདིར་མ་བྲིས། །གཉིས་པ་ཡང་དོག་ཤོར་བའི་འཕྲང་བསལ་བ། །ཡང་ནས་ཕྱལ་བར་ཤོར་བ་ལ། །ཡང་བ་མེད་པའི་མན་ངག་བརྟེན། །དྲན་པ་རྒྱུན་ཆགས་རྩིའི་བཟུང་། །ཕྱལ་བར་མི་བཏང་ཉམས་སུ་བླང་། །དོག་ནས་སྡུག་བརྩིར་ཤོག་བ་ལ། །སྣང་བ་རྒྱ་ཡན་མན་ངག་བརྟེན། །དྲན་པ་མི་དགག་ཕྱར་བར་བཏང་། །དྲན་ཤར་རྗེས་འཛིན་མེད་པར་བཞག །ཤེས་པ་མི་བཟུང་ཡན་སར་བཞག །རིག་པ་ཁྱབ་གདལ་ཆེན་པོར་ཞག་གོང་། །གསུམ་པ་བཏང་སྙོམས་ལུས་པའི་འཕྲང་བསལ་བ། །ཐིག་ཆེན་ཚིག་ཐོག་ལུས་པ་ལ། །མི་ཡེངས་རྩེ་གཅིག་ཉམས་སུ་བླང་། །རང་རྒྱུད་ཕྱལ་བར་མི་བཏང་བར། །ངེས་པར་ཉམས་མྱོང་རྒྱུད་ལ་བསྐྱེད། །ཐེག་ཆེན་ཉམ་ཐོག་ལུས་པ་ལས། །བདེ་གསལ་ཉམས་མྱོང་ཅི་ཤར་ཡང་། །རྟོག་པའི་ཡེ་ཤེས་མ་ཤར་ན། །འཁོར་བའི་སྒྲོག་ལས་གྲོལ་མི་འགྱུར། །ཉམས་མྱོང་མཐོ་ཡང་འཆིང་བར་འགྱུར། །དེ་ཕྱིར་ཉམས་ལ་མ་ཞན་པར། །རྒྱུན་ཆད་མེད་པའི་ཉམས་ལེན་གྱིས། །ཉམས་རྟོག་གཅིག་ཏུ་འདྲེས་ཆུ་ཆུག །ཉམས་མྱོང་བློའི་སྤྲིན་ཚོགས་རྣམས། །རྟོག་པའི་ནམ་མཁར་དྭངས་སུ་ཆུག །ཉམས་མྱོང་བློའི་རྦ་རླབ་རྣམས། །རྟོགས་པའི་རྒྱ་མཚོར་ཞི་རུ་ཆུག །ཉམས་མྱོང་བློ་ཡི་དྲི་མ་རྣམས། །རྟོགས་པའི་ངང་དུ་དྭངས་སུ་ཆུག །ཉམས་མྱོང་བློ་ཡི་བཅིང་བ་རྣམས། །རྟོག་པའི་བློ་ཀློང་དུ་གྲོལ་དུ་ཆུག །སྤྲིན་དང་བྲལ་བའི་ཉི་མ་བཞིན། །རྟོག་པ་མངོན་དུ་གྱུར་པ་དགོས། །ཅེས་སངས་རྒྱས་མཉེན་སྟོན་གྱི་ཁྲིད་ལས་གསུངས་སོ། །དེས་སེམས་མི་གནས་པ་གནས་པའི་ཐབས་དེ་སོང་ནས། གཉིས་པ་གནས་པ་བོག་འདོན་པར་བྱེད་པའི་ཐབས་སེམས་ཚོལ་ངོ་སྤྲོད་བྱེད་པ་ནི། རིག་པ་རྐྱང་འདེད་ལ་བརྟེན་ནས་སེམས་བཙལ་བ་གལ་ཆེ་བ་སྟེ། སེམས་ཀྱི་ཕུ་ཐག་མ་ཆོད་པར་བསྒོམ་རྒྱུའི་དམིགས་མི་ཤེས། ཡིད་ཀྱང་མི་ཆེས་ཏེ། དཔེར་ན་ནད་པའི་ཙ་ལ་བལྟས་པར་སྨན་བཏང་བའམ། འབེན་མ་མཐོང་བ་མདའ་འཕང་བ་དང་འདྲ་བའམ། བསྒོམ་བྱེད་དགོས་པ་ལ་བསྒོམ་རྒྱུ་རང་དེ་ངོས་ཟིན་དགོས་པ་ཡིན་ཏེ། རྣམ་སྣང་མངོན་བྱང་ལས། རྣམས་པ་ཐམས་ཅད་མཁྱེན་པ་ཉིད་ནི། སེམས་ལས་བཙལ་བར་བྱའོ། །ཅེས་གསུངས་པས། སེམས་ཚོལ་ལུགས་ལ་གསུམ་སྟེ། ཕྱི་སྣང་ཐོག་ཏུ་ཚོལ་བ། བར་ལུས་ཐོག་ན་ཚོལ་བ། ནང་སེམས་ཐོག་ནས་ཚོལ་བའོ། །དང་པོ་ཕྱི་སྣང་ཐོག་ནས་ཚོལ་བ་ནི། དེ་ཡང་ཚོགས་དྲུག་གིས་ཤེས་པ་ལ་རྐྱང་དེད་བྱེད་ནས། མིག་གིས་མཐོང་བའི་གཟུགས་ཡུལ་སྣང་དུ་ཤར་བའི་དུས་སུ་སེམས་ཀྱི་ཡུལ་ལ་ཕར་འཇུག །ཡུལ་གྱིས་ཚུར་ལ་བཀག་བསམ་ཡང་། ཡུལ་སེམས་སྐད་ཅིག་མའི་བསམ་གཟུགས་ཡིན། དེ་རྣམས་གང་ཡིན་ཡུལ་སེམས་སྐད་ཅིག་མའི་སྟེང་དུ་མཉམ་པོར་འཛོམ་ཡོད་པ་ཐག་ཆོད་པར་གྱིས་ལ་ལེན་ཁྱེར་ཤོག །ཅེས་བྱའོ། །དེའི་ལེན་ནི། སེམས་ཀྱི་ཕར་བཟུང་བ་ཡང་མ་བྱུང་། ཡུལ་ཚུར་འོང་ནས་སེམས་བཀབ་པ་ཡང་མ་རེད། དེ་གཉིས་ཐ་དད་དུ་ཡོད་པ་ཡང་མ་བྱུང་། ཐ་དད་དུ་མཐོང་བ་འདི་འཁྲུལ་སྣང་བྱུང་ཛ། དངོས་པོར་མཐོང་བ་སེམས་འཁྲུལ་གཟུགས་བྱུང་། ཁོང་གཉིས་ངོ་བོ་དབྱེར་མེད་ལ་བྱེད་པས་གཉིས་སུ་སྣང་བས། ད་ལྟ་ཡུལ་དྲུག་གི་སྣང་བ་གང་བྱུང་ཡང་ཁོ་རང་གི་རང་གཟུགས་རང་རྩལ་རང་རང་རླབ་བྱུང་ཟེར་ན་གོ་བ་ཡིན། གཉིས་པ་བར་ལུས་ཐོག་ན་སེམས་བཙལ་བ་ནི། སེམས་དེ་ལུས་ཕྱི་ནང་སྟོད་སྨད་གར་སྣང་ལེགས་པར་ལྟོས་བྱས་པས། གར་ཚོལ་བས་ཡང་མ་རྙེད་ཟེར་ན། སེམས་ཀྱི་ཕྱོགས་འགྲོས་གོ་བ་ཡིན་ནོ། །གསུམ་པ་ནང་སེམས་ཐོག་ན་བཙལ་བ་ནི། ཁྱོད་རང་གིས་སེམས་མི་དྲན་དགུ་དྲན། སྣ་ཚོགས་དྲན་པའི་རྟོགས་པ་དེ་ལ། དྲན་དུས་ཀུན་དུས་ཅིག་དྲན་འདུག་གམ། རེ་རེར་ཁ་ལ་རིམས་པས་དྲན་འདུག །ཡུལ་སྣང་སྣ་ཚོགས་པ་འཛིན་དུས་དུས་གཅིག་འཛིན་འདུག་གམ། སྐད་ཅིག་སྔ་ཕྱི་རིམ་པར་འཛིན་འདུག་ལྟོས་ཤིག །ནང་དུ་འགྱུ་དུས་རིག་པ་སྐད་ཅིག་མ་ལ་རྟོག་པ་མི་འདྲ་བ་དུས་གཅིག་ལ་ཡོངས་འདུག་གམ། སྐད་ཅིག་མ་སྔ་མ་འགགས་ཤིང་ཕྱི་མ་རིམ་པར་སྐྱེ་འདུག་ལྟོས་ཤིག །བྱས་ལ་ལེགས་པར་བལྟ་བཅོལ། སྣ་ཚོགས་ཤར་ཡང་རིག་པ་སྐད་ཅིག་མའི་འགྲོས་མིན་པ་རྟོག་པ་གཉིས་སུ་དུས་གཅིག་འོང་ཐབ་མི་སྣང་ཟེར་ན། དེས་སེམས་ངོས་ཟིན་པ་ཡིན་པས་སེམས་རིག་པ་སྐད་ཅིག་ལ། དེའི་དངོས་པོ་ཡོད་པ་གཅིག་འདུག་གམ། མེད་པ་གཅིག་འདུག་གམ། ཡོད་པ་གཅིག་འདུག་ན། དབྱིབས་དང་ཁ་དོག་ཅི་ལྟ་བུ། མེད་པ་གཅིག་འདུག་ན་མེད་པ་གང་གིས་ཤེས། ལེགས་པར་བརྟག །དངོས་པོ་མེད་པ་ཤེས་མཁན་དེ་ཡིན་ཟེར་ན། ཤེས་མཁན་གྱི་སྐད་ཅིག་མ་དེའི་ངོ་བོ་དེ་ཐོག་མ་གང་ནས་བྱུང་། དེ་ཡང་ཁོ་རང་གང་ཡང་མ་སྲིད་པའི་ཐོག་མ་ཁོ་ལ་བྱུང་ས་ཨེ་སྣང་ལྟོས། བར་དུ་གནས་ས་ཨེ་སྣང་ལྟོས། གནས་རྒྱུ་གཅིག་ཡོད་ན་ཁོ་ལ་དངོས་པོ་གཅིག་ཡོད་དགོས། དེ་ཡོད་ན་དབྱིབས་ཟླ་གམ་མམ་གྲུ་བཞི་ལ་སོགས་པ་ཡོད། དེ་ཡོད་ན་ཁ་དོག་དཀར་དམར་ལེགས་པར་ཡོད། དེ་ལ་ཡོད་མེད་ལེགས་པར་ལྟོས། ཐ་མ་འདིར་འགག་བྱ་བའི་འགག་ས་ཨེ་སྣང་ལྟོས། མི་སྣང་ན་མེད་པར་ཤེས་མཁན་རང་དེ་གང་ཡིན་ལྟོས། ལར་ཕོ་ཚོད་དང་གོ་ཡུལ་མིན་པར་ཐག་ཆོད་ངེས་གྱིས་ལ་ཤོག །དེའི་ལེན་ནི། རིག་པ་སྐད་ཅིག་མའི་ངོ་བོ་ལ། ཐོག་མ་བྱུང་ས་མེད་པས་རང་བྱུང་གི་ཡེ་ཤེས། བར་དུ་གནས་ས་མེད་པས་ཡུལ་ཡུལ་ཅན་ལས་འདས་ནས་དངོས་པོ་མེད་ཅིང་དབྱིབ་ཁ་དོག་མ་གྲུབ་པའོ། །ཐ་མ་འདིར་འགགས་བྱ་བ་མེད་པས། རྣམ་པར་མི་རྟོག་པའི་ཡེ་ཤེས་ཡིན་ཏེ། མཚན་བརྗོད་ལས། རྣམ་པར་མི་རྟོག་དབྱིངས་མི་ཟད། །ཅེས་སོ། །ཡང་སེམས་ཚོལ་བོག་འདོན་གྱི་སྐོར་ལ་བརྒྱད་སྟེ། དང་པོ་གནས་འགྱུ་གཉིས་ཀྱི་བོག་འདོན་པ་ནི། སེམས་ལྷན་ནེ་གནས་སུ་ཆུག་ལ། དེ་ལ་ཡོན་ཏན་ཅི་འདུག་ལྟ། ཆེད་དུ་འགྱུ་རུ་བཅུག་ལ། དེ་ལ་སྐྱོན་ཅི་འདུག་ལྟ། གཉིས་པ་ངོ་བོ་གཅིག་གམ་ཐ་དད་དྲིའོ། །ཁྱད་པར་མི་འདུག་ཟེར་ན། གནས་པ་ནི་རྟོག་མེད་ཡིན། འགྱུ་བ་ནི་རྟོགས་པ་ཡིན་པས་དེ་གཉིས་ག་ལ་གཅིག །ཅེས་འགོ་བསྐོར་རོ། །ཐ་དད་དུ་འདུག་ཟེར་ན། གནས་པའི་དུས་ན་འགྱུ་བ་གང་དུ་སོང་། དེ་གཉིས་ལ་ཁྱད་པར་རེ་ངོས་བཟུང་ཅི་འདུག་སྙམས་ལྟོས། ཅེས་བརྗོད་དོ། །མ་རྙེད་ན། གནས་ན་ཡང་གནས་པའི་ངོས་བཟུང་མེད་ཅིང་། འགྱུ་ནའང་འགྱུ་བའི་ངོས་བཟུང་མེད་པ་ལ། གནས་འགྱུ་ཐ་དད་དུ་འཛིན་པ་ལོག་རྟོགས་ཀྱིས་མཁས་ཁྱད་ཡིན་ནོ། །ཞེས་ངོ་སྤྲོད་དོ། །དེ་ནས་གནས་པ་ཆེད་དུ་མི་སྒྲུབ། འགྱུ་བ་ཆེད་དུ་མི་སྤང་། འགྱུ་བས་གནས་པའི་གོ་ཆོད་པའི་གནད་རིག་པར་བྱའོ། །གཉིས་པ་རིག་སྟོང་ཐ་དད་ལ་བོག་འདོན་པ་ནི། རྟོག་པ་ཐོལ་སྐྱེས་ཀྱི་ངོ་བོ་ལ་བལྟས་པས། སྟོང་པར་ཡལ་ལམ། སྐྱེ་མེད་དམ། ངོས་བཟུང་མེད་པ་ཅིག་འོང་ན་རྟོག་པ་ཏོལ་སྐྱེས་པ་དེ་དང་། སྟོང་ཉིད་དམ། སྐྱེ་མེད་དམ། ངོས་བཟུང་མེད་པ་དེ་དང་ཁྱད་ཅི་འདུག་དྲིའོ། །ཁྱད་མེད་ན། རྟོགས་པ་ནི་འཁྲུལ་པ་ཡིན། སྟོང་པ་ལ་སོགས་པ་ནི་མ་འཁྲུལ་བ་ཡིན་པས་ག་ལ་གཅིག །ཐ་དད་དུ་འདུག་ཟེར་ན། རྟོགས་པའི་དུས་སུ་སྟོང་པ་གང་དུ་སོང་། རྟོགས་པ་ལ་སྟོང་པ་མིན་པའི་ངོས་བཟུང་ཅི་འདུག །ཐ་དད་དུ་འཛིན་པ་ནི་དངོས་འཛིན་གྱི་ལོག་རྟོགས་སོ། །དེ་ནས་སྟོང་པ་ཉིད་མ་རྟོགས་པའི་རྟོགས་པ་སྐད་ཅིག་ཀྱང་ཡོད་པ་མ་ཡིན་པས། རྟོགས་པས་སྟོང་པ་ཉིད་ཀྱི་གོ་ཆོད་པའི་གནད་རིག་པར་བྱའོ། །གསུམ་པ་དྲན་སྟོང་ཐ་དད་ལ་བོག་འདོན་པ་ནི། གང་ཤར་ལ་ལྟ་བ་དྲན་པ་ཙམ་གྱི་སྟོང་ཉིད་དུ་འགྲོ་ན། དྲན་པ་དང་སྟོང་པ་གཅིག་གམ་མི་གཅིག་དྲིའོ། །གཅིག་ན་དྲན་པ་ནི་མ་བརྗེད་པ་ཡིན་ལ། སྟོང་པ་ལ་རྗེད་མ་བརྗེད་ཀྱི་དབྱེ་བའམ། ངོ་བོ་མེད་པས་དེ་གཉིས་ག་ལ་གཅིག་ཅེས་འགོ་བསྐོར་མི་གཅིག་ན་དྲན་པ་ལ་སྟོང་པ་མིན་པའི་ངོ་བོ་གཅིག་འདུག་གམ། དྲན་པའི་དུས་ན་སྟོང་པ་གོང་དུ་སོང་། སྟོང་པའི་དུས་ན་དྲན་པ་གང་དུ་སོང་། དེས་ན་དྲན་པས་སྟོང་པའི་གོ་ཆོད་པའི་གནད་རིགས་པར་བྱའོ། །བཞི་པ་གནས་པ་བརྟན་པ་ལ་བོག་འདོན་པ་ནི། གང་ཤར་བ་ལ་བལྟས་པས། དགེ་སྦྱོར་སྔར་གནས་པ་ལྟ་བུ་བསྒོམ་བྱུང་ན། དེ་ལ་ཡོན་ཏན་ཅི་འདུག་གནས་པ་ག་ལ་གནས། དེ་ཡན་པར་བཏང་བ་ལ་སྐྱོན་ཅི་འདུག །དེ་རྣམས་མི་འདུག་ན། ཁོ་དགེ་སྦྱོར་གྱི་དངོས་པོ་ཡིན་པ་ལ། དེ་འདྲ་ག་ལ་སྲིད། ཅེས་འགོ་བསྐོར་རོ། །འདུག་ན་ག་ན་འདུག་ཅི་འདྲ་ཞིག་འདུག །བློ་ཐག་ལེགས་པར་ཆོད་ལ་སྟོན་ཞེས་བརྗོད་དོ། །དེ་ནས་ཉམས་ཀྱི་རོ་ལ་མ་ཞེན་པར་གང་ཤར་ཁ་ཡན་གྱི་དག་སྦྱོར་གོ་ཆོད་པའི་གནད་རིག་པར་བྱའོ། །ལྔ་པ་བདེ་བ་དང་ལྡན་པ་ལ་བོག་འདོན་པ་ནི། དགེ་སྦྱོར་དང་མ་བྲལ་བའི་དུས་ན། བདེ་བ་རྒྱུན་ཆགས་སུ་བྱུང་ན། བདེ་བ་ལ་ངོས་བཟུང་ཅི་འདུག་དྲིའོ། །མི་འདུག་ན་བདེ་བ་ཡིད་དང་མཐུན་པ་ཡིན་པས། དེ་ལ་ངོས་བཟུང་མེད་པ་ག་ལ་སྲིད་ཅེས་འགོ་བསྐོར་རོ། །འདུག་ན་ག་ན་འདུག །ཅི་འདྲ་གཅིག་འདུག་ང་ལ་སྟོན་དང་། ཞེས་བརྗོད་དོ། །དེས་ན་བདེ་བའི་རོ་ལ་མ་ཞེན་པར། བདེ་བས་སྟོང་པའི་གོ་ཆོད་པའི་གནད་རིག་པར་བྱའོ། །དྲུག་པ་གསལ་བ་ལ་བོག་འདོན་པ་ནི། དགེ་སྦྱོར་རྣལ་དུ་ཕབ་པའི་དུས་སུ་གསལ་སྣང་ཆེན་པོ་བྱུང་ན། གསལ་བ་དེ་དང་མི་གསལ་བ་དེ་ལ་ཁྱད་ཅི་འདུག །མི་འདུག་ན། གསལ་བ་ནི་སེམས་དྭངས་བའི་ཡོན་ཏན་ཡིན། མི་གསལ་བ་ནི་སེམས་འཐིབ་པའི་དྲི་མ་ཡིན་པས། དེ་གཉིས་ག་ལ་གཅིག །ཅེས་འགོ་བསྐོར་རོ། །མི་གཅིག་ན། གསལ་བ་ལ་ཡོན་ཏན་ངོས་བཟུང་ཅི་འདུག །མི་གསལ་བ་ལ་སྐྱོན་ནམ། ངོས་བཟུང་ཅི་འདུག་དྲིའོ། །དེས་ན་གསལ་བ་ལ་མ་ཞེན་ཅིང་། དྭངས་ཆ་ལ་མི་ལྟོས་པར་གསལ་རུང་མི་གསལ་རུང་གང་ཤར་གྱི་ང་གོ་རྗེན་པས་ཆོག་པའི་གནད་རིག་པར་བྱའོ། །བདུན་པ་རྟོགས་མེད་བསྟན་པ་ལ་བོག་འདོན་པ་ནི། རྟོགས་པ་རང་འགགས་སམ། མི་རྟོགས་པ་རྒྱུན་དུ་བྱུང་ན། རྣམ་རྟོག་ཁྱད་དུ་སྤྲོས་ནས་དེ་ལ་སྐྱོན་ཅི་འདུག །མི་རྟོགས་པ་ལ་ཡོན་ཏན་ཅི་འདུག །ངོས་བཟུང་ཅི་འདྲ་འདུག །ཅེས་དྲིའོ། །སྐྱོན་སྐྱོན་མེད་ན་འཁོར་བ་འཁྱམས་མཁན་མི་སྲིད་པས། དེ་འདྲ་ག་ལ་སྲིད། ཅེས་འགོ་བསྐོར་རོ། །སྐྱོན་ཡོད་ན་ཅི་འདྲ་གཅིག་འདུག །ངོས་བཟུང་ཅི་འདུག །རྟོགས་པ་མི་རྟོག་པ་གཉིས་ལ་བཟང་ངན་གྱི་ཁྱད་པར་ཅི་འདུག་ང་ལ་སྟོན་ཞེས་བརྗོད་དོ། །དེས་ན་མི་རྟོག་པའི་རྫོང་ལ་མ་ཞེན་པར། རྟོག་པས་མི་རྟོགས་པའི་གོ་ཆོད་པའི་གནད་རིག་པར་བྱའོ། །བརྒྱད་པ་སྟོང་ཉིད་བརྟེན་པ་ལ་བོག་འདོན་པ་ནི། དགེ་སྦྱོར་འཕེལ་བའི་སྐབས་སུ། ངོས་བཟུང་དང་སྤུ་རིས་གང་ཡང་མེད་པའི་སྟོང་པ་ཞིག་རྒྱུན་དུ་བྱུང་ན། རི་དང་རྩིག་པ་ལ་སོགས་པ་འདི་རྣམས་སྟོང་པ་དེ་ལ་ཁྱད་ཅི་འདུག །ཅེས་དྲིའོ། །མི་འདུག་ན་སྟོང་པ་ནི་རྡུལ་གྱི་ཆོས་ལས་འདས་པ་ཡིན་ལ། རི་ལ་སོགས་པ་ནི་རྡོས་ཆགས་སུ་གྲུབ་པ་ཡིན་པས། དེ་གཉིས་ག་ལ་གཅིག་ཅེས་འགོ་བསྐོར་རོ། །མི་གཅིག་ན་རི་ལ་སོགས་པ་འདི་རྣམས་མེས་སྲེག་པའམ་ཕྱེ་མར་བཏང་ནས་རླུང་གིས་མཁའ་ལ་གཏོར་ནས་ཅི་འདྲ་ཞིག་འདུག །རི་ལ་སོགས་པ་ལ་སྟོང་པ་ཉིད་མིན་པའི་ངོ་བོ་ཅི་འདུག །དེས་ན་སྟོང་པའི་མཁའ་ལ་མ་ཞན་པར་སྣང་བ་སྣ་ཚོགས་ཀྱི་རང་སྒོ་རྗེན་པས་སྐྱེ་མེད་ཟབ་མོའི་གོ་ཆོད་པའི་གནད་རིག་པར་བྱའོ། །དེས་སེམས་ཚོགས་བོག་འདོན་བརྒྱད་མ་དེ་སོང་ངོ་། །དེ་རྣམས་ཀུན་གྱི་བློ་འབྲིང་པོ་རིགས་ལ་དབང་བསྒྱུར་བ་དྲན་པ་ནང་གི་གཅོད་ཁྲིད་དེ་སོང་ངོ་། །སྤྱི་དོན་གསུམ་པ་བློ་རབ་ཆོས་ཉིད་ཀྱི་ལྟ་བ་རྟོགས་པ་གསང་བའི་ཆོས་ལ་ལྔ་སྟེ། དང་པོ་སྣང་བས་གནོད་པར་རྟོགས་པའི་དུས། གཉིས་པ་ཕན་གནོད་འདྲེས་པར་རྟོགས་པའི་དུས། གསུམ་པ་སྣང་བས་ཕན་པར་རྟོགས་པའི་དུས། བཞི་པ་དེའི་བཞག་ཐབ་བསྟན་པ། ལྔ་པ་འབྲས་བུ་ངོ་བོ་བསྟན་པའོ། །དང་པོ་སྣང་བས་གནོད་པར་རྟོགས་པའི་དུས་ནི། གང་གི་སྣང་བ་སྣ་ཚོགས་སྤང་བྱར་ལོང་ཞིང་། འོག་མའི་གནས་པ་ལ་སོགས་སེམས་ཚོལ་གྱི་དོན་ལ་ངེས་ཤེས་ཅུང་ཟད་སྐྱེས་པ་ལ། ང་རྒྱལ་དང་རློམ་སེམས་ཅུང་ཟད་སྐྱེས་ཤིང་། ཕྱོགས་གཞན་ལ་ཤོར་བ་ཡིན་པས། དེ་ཉིད་བསལ་བའི་ཐབས་ནི། བསྒོམ་གང་བཟུང་བའི་ཆ་ཐམས་ཅད་སྔོན་ནས་ཤར་བ་ལ་མི་ཞེན། མི་ཆག །མི་འཛིན་ཅིང་ཚུར་མི་བླང་། འགྱུ་བ་ལ་སོགས་གང་ངན་པའི་ཆ་ཐམས་ཅད་ལ་མཉམ་བཞག་གི་མཐིལ་པོ་བྱེད་ཅིང་། ཕར་མི་སྤང་། མི་འགགས། མི་འདོར་ཞིང་། གང་ཤར་རྒྱན་དུ་ཆེ་བའི་ཐབས་ལ་འབད་ཅིང་བརྩོན་པར་བྱེད་སྟེ། རྗེ་དམ་པ་རྒྱ་གར་གྱིས། གཡའ་ཆུ་སིལ་མ་བརྡབ་ཅིང་དྭངས། །དངུལ་དཀར་གྱི་མེ་ལོང་ཕྱིས་བཞིན་གསལ། །རྣལ་འབྱོར་གྱི་སྒོམ་པ་བཤིགས་ཤིང་བཟང་། །ཅེས་གསུང་པས། དེ་ཉིད་ཀྱི་དུས་སུ་སྤྲོས་པ་ཐམས་ཅད་སྤང་ཞིང་སྤྲོས་མེད་ཀྱི་ངང་ལ་བཞག །གཡེང་བ་ཐམས་ཅད་སྤང་ལ་ཡེང་མེད་ཀྱི་ངང་ལ་བཞག་གོ། །འདུ་འཛིན་ཐམས་ཅད་སྤང་ཞིང་གཅིག་པུར་བསྡད། གྲོང་ཡུལ་སྤང་ཞིང་རི་ཁྲོད་བརྟན་པར་བྱའོ། །གཉིས་པ་ཕན་གནོད་འདྲེས་པར་རྟོག་པའི་དུས་ནི། ཉོན་མོངས་དང་ཡེ་ཤེས་དུམ་བུར་འཆར་བ་ཡིན། དེའི་དུས་སུ་རོ་སྙོམ་པའི་གསང་སྤྱོད་བྱ། འགྲིས་པ་མེད་པའི་ཡུལ་དུ་ཕྱོགས་མེད་དུ་འགྲོ། ཟས་ལ་འདི་ཟ་དང་འདི་མི་ཟ་མེད་ཅིང་གཙང་ཙོག་མེད་པར་ཀུན་ཀྱང་ཟ། གོས་ལ་འདི་གྱོན་འདི་མི་གྱོན་མེད་ཅིང་བཟང་ངན་མེད་པར་ཀུན་ཀྱང་གོན། གྲོགས་ལ་འདི་འགྲོག་དང་འདི་མི་འགྲོག་མེད་ཅིང་། བཟང་ངན་མེད་པར་ཀུན་དང་འགྲོག །གནས་ལ་འདི་བསྡད་དང་མི་བསྡད་མེད་ཅིང་། ཀུན་ཏུ་འགྲིམ་ཞིང་ཉམས་རྩལ་སྦྱངས། གདོན་དང་ན་ཚ་སྡུག་བསྔལ་དང་། འགལ་རྐྱེན་གྱི་སྣང་བ་ཐམས་ཅད་ལ། ཐོགས་སུ་བཀལ་ལ་ལམ་རྩལ་སྦྱངས། བསྟོད་སྨད་ལ་ཆགས་སྡང་མི་བྱེད། དགའ་དང་མི་དགའ་གཉིས་སུ་མི་འཛིན། རོ་སྙོམ་གསང་སྤྱོད་ཀྱི་ངོ་བོ་མཐར་ཕྱིན་པར་བྱེད་དོ། །གསུམ་པ་སྣང་བས་ཕན་པར་རྟོགས་པའི་དུས་ནི། སྣང་བ་སྣ་ཚོགས་གྲོགས་སུ་འཆར་བ། འཁོར་འདས་གཉིས་མ་འདྲེས་ལ་ཡོངས་སུ་རྫོགས་པ། སངས་རྒྱས་དང་སེམས་ཅན་ལ་བཟང་ངན་མེད་པས། ལྷ་དང་འདྲེ་ལ་ཉེ་རིང་མེད་པ། ཐམས་ཅད་སེམས་སུ་གཅོད་པ་ལ། གཅོད་རྒྱུ་གཅོད་མཁན་གཉིས་སུ་མ་གྲུབ་ན་གཅོད་པའི་མཆོག །དེ་ཡང་གཤིས་འགྲོས་ཡིན་ལུགས་ཀྱི་ངོ་བོ་ལ་བཅོས་མ་ཕོག་ན་གཞིའི་མཆོག །གཤིས་འགྲོས་རང་དེ་གཞི་རྣལ་མ་ཡིན་བཞིན་དུ། ཡིན་ཐོག་ན་རྟོག་ན་ལྟ་བའི་མཆོག །དེ་ལ་ཕྱོགས་འཛིན་གྱི་བསྒོམ་རྒྱུ་མེད་པར་གང་ཤར་གྱི་ངོ་བོ་ལ་གོམ་འདྲིས་སུ་འཇུག་པ་བསྒོམ་པའི་ལམ་གྱི་མཆོག །འདྲིས་གོམ་བརྟེན་གསུམ་བྱེད་པ་དེའི་ངོ་བོ་ལ། འདི་ཡིན་འདི་མིན་གྱི་བླང་དོར་མེད་ཅིང་རེ་དོག་གམ་མཐའ་དང་བྲལ་བ་སྤྱོད་པའམ་འབྲས་བུ་ཡང་དེ་ཡིན་ཏེ། སྲས་རྒྱལ་བ་དོན་འགྲུབ་ཀྱིས། ཁྱེད་ཀྱི་འཁོར་འདས་ཤན་ནི་བདག་གིས་དབྱེ། །འཁོར་འདས་གཉིས་ནི་མ་འདྲེས་རང་སར་འདྲེས། །གཅིག་ལ་གཉིས་སུ་དབྱེ་བ་འཁོར་བ་ཡིན། །སངས་རྒྱས་སེམས་ཅན་གཉིས་སུ་མེད་པ་ལ། །ཕྱེ་ནས་སངས་རྒྱས་བསྒྲུབ་པ་འཁོར་བ་ཡིན། །ལྷ་འདྲེ་གཉིས་ལ་ཉེ་རིང་མེད་པ་ལ། །དངོས་གྲུབ་ལྷ་ལ་རེ་བ་འཁོར་བ་ཡིན། །ཐམས་ཅད་སེམས་སུ་གཅོད་པ་ཡིན་པ་ལ། །གཅོད་རྒྱུ་གཅོད་མཁན་བྱུང་ན་འཁོར་བ་ཡིན། །མ་བཅོས་པ་དེ་གཞིའི་མཆོག་ཡིན་བཞིན། །གཞི་ལ་བཅས་བཅོས་བྱེད་པ་འཁོར་བ་ཡིན། །བསྒོམ་པ་དེ་ལམ་གྱི་མཆོག་ཡིན་ཏེ། །ལམ་ལ་བགྲོད་རྒྱུ་བྱུང་ན་འཁོར་བ་ཡིན། །མ་གྲུབ་པ་དེ་འབྲས་བུའི་མཆོག་ཡིན་ཏེ། །ཆེད་ཀྱི་སྒྲུབ་རྒྱུ་བྱུང་ན་འཁོར་བ་ཡིན། །ལྟ་བ་འགྱུར་བ་མེད་པ་ཡིན་པ་ལ། །རྟག་ཆད་གཉིས་སུ་བྱུང་ན་འཁོར་བ་ཡིན། །བསྒོམ་པ་གསལ་སྟོང་འཛིན་མེད་ཡིན་པ་ལ། །བྱིང་རྒོད་གཉིས་སུ་བྱུང་ན་འཁོར་བ་ཡིན། །སྤྱོད་པ་ཁྱབ་གདལ་ཆེན་པོ་ཡིན་པ་ལ། །དགག་སྒྲུབ་གཉིས་སུ་བྱུང་ན་འཁོར་བ་ཡིན། །འབྲས་བུ་རྣམ་པར་དག་པ་ཡིན་ལ། །རེ་དོག་གཉིས་སུ་བྱུང་ན་འཁོར་བ་ཡིན། །འཁོར་འདས་གཉིས་འཛིན་བར་ན་སངས་རྒྱས་ག་ལ་ཡོད། །ཅེས་སོ། །དེ་ལ་ཉམས་སུ་བླང་བར་དང་། ས་ལམ་བགྲོད་མི་དགོས་ཟེར་བ་ནི་མ་ཡིན་ནོ། །ཡང་དེ་ཉིད་ལས། མ་རིག་པ་ཡེ་ཤེས། རིག་པ་འཁྲུལ་པ། མ་བྱས་པ་གཞི། བྱེད་པ་ལམ། མ་གྲུབ་པ་འབྲས་བུ། ཅེས་དང་། ཡང་དེ་ཉིད་དུ། གཞི་ཐོག་འཇོག་པས་ས་ལམ་རྫོགས། །མན་ངག་གཞན་ལས་ཁྱད་པར་འཕགས། །ཅེས་སོ། །གཞི་ལམ་འབྲས་བུའི་ངོ་བོ་ངོས་བཟུང་བ་ནི། དེ་ཉིད་དུ། སྐྱེ་བ་མེད་པ་སངས་རྒྱས་ཀྱི་དགོངས་པ། ངོ་བོ་ཀ་དག་དེ་རང་ལ་རང་ཆས་སུ་བཞུགས་ནས་ཡོད་པ་དེ་གཞི། དེའི་ངང་ལ་མ་བཅོས་པར་སིང་ངེ་འདུག་པ་དེ་ལམ། དེ་ལ་འགྱུར་བ་མེད་པ་རྟེན་པ་ཐོབ་པ་དེ་འབྲས་བུ་ཡིན་ནོ། །མདོར་ན། གང་སྣང་གང་ཤར་གང་བྱུང་ཁོ་རང་མིན་པའི་བཟོ་བཅོས་མི་བྱེད། རྐྱེན་བཟང་ངན་ཅི་བྱུང་ཡང་དེ་ཀ་མིན་པ་མི་བསྒོམ། ཁོ་རང་གང་ཡིན་པ་དེ་ལ་དགེ་སྦྱོར་གྱི་དངོས་པོ་བྱེད་པའོ། །རྒྱལ་བ་དོན་འགྲུབ་གྱིས། གང་བྱུང་དེ་ཀ་མིན་པ་མི་ལྟ། དེ་ཀ་མིན་པ་མི་བསྒོམ། དེ་ཀ་མིན་པ་ཅི་ཡང་ཡིད་ལ་མི་བྱེད་དོ། །ཅེས་ཟེར་བ་དང་། གང་ཤར་གྱིས་ཆོག་ཟེར་བ་གཉིས་འགལ་བས་དེའི་གནད་རིག་པར་བྱའོ། །ཅེས་དང་། མ་གཅིག་གིས་ཀ་ཚོམ་ལས། གང་ཡང་ཡིད་ལ་མ་བྱས་ནས། །གོལ་སར་ལྷུང་བ་ཅི་ལས་བྱུང་། །བསམ་མེད་བསྒོམ་པས་མ་ནོར་ན། །ཆོས་སྐུ་བྱང་ཆུབ་ཐེ་ཚོམ་མེད། །བསྒོམ་གྱི་ནང་ནས་དེ་ཉིད་མཆོག །འདུ་ཤེས་རྣམ་པར་བཤིག་ལ་ཞོག །ཅེས་གསུངས་སོ། །ཡང་བལྟ་བ་ལ་ཕྱོགས་རིས་མེད་པ། བསྒོམ་པ་ལ་ཞེན་པ་མེད་པ། སྤྱོད་པ་ཞི་ཞིང་དུལ་བའོ། །ཡང་ན་བལྟ་བ་མཐའ་དང་བྲལ་བ། བསྒོམ་པ་བློ་ལས་འདས་པ། སྤྱོད་པ་གཤིས་འགྲོས་རང་ལ་བཏང་བའོ། །ཡང་ན་རང་ངོ་ཤེས་པ་ལྟ་བ། དེའི་ངང་ལ་འཇོག་པ་བསྒོམ་པ། གང་ལ་ཡང་ཉམ་ང་མེད་པ་སྤྱོད་པ་ཡིན། རེ་དོག་མེད་ཅིང་བསྟན་པ་ཐོབ་པ་འབྲས་བུ་ཡིན། བཞི་པ་བཞག་ཐབ་བསྟན་པ་ལ་གསུམ་གྱིས། དང་པོ་མཉམ་བཞག་དུས་བསྒོམ་སྐྱོང་བ་ནི། སྔར་ངོ་སྤྲོད་པའི་གོ་བ་ཙམ། རིག་པ་ཙམ། ཤེས་པ་ཙམ། དེས་མི་ཆོག་པས་བྱང་ཆུབ་མ་ཐོབ་ཀྱིས་བར་དུ་ཉམས་སུ་བླངས་སོ། །གོམ་འདྲིས་བརྟེན་པ་ཐོབ་པ་བྱེད་དགོས་པས། ཉམས་ལེན་ཡང་མེད། གཉེན་པོ་བརྗེད་མེད་ཀྱི་ངང་ལ་མཉམ་པར་བཞག་གོ། །དེ་ཡང་ཆོས་ཐམས་ཅད་སེམས། སེམས་ནམ་མཁའ་ལྟར་མཐའ་དབུས་མེད་པར། ཡུལ་ཅིར་ཡང་མི་དམིགས་པ་ལས། བློས་གང་དུ་ཡང་མི་འཛིན་པར་བཞག་གོ། །གཉིས་པ་རྗེས་ཐོབ་སྒོམ་སྐྱོང་བར་བྱ་བ་ནི། དེ་ལྟར་བསྒོམ་པས་མཉམ་བཞག་དུ་སྒོམ་བཟང་པོ་ཡོད་ཀྱང་། རྗེས་ཐོབ་ཏུ་མེད་ན། བསྒོམ་ཀོར་ལེར་ལུས་པ་བྱ་བ་དེ་ཡིན་པས་ས་ལམ་མི་ཆོད་དོ། །དམ་པ་རིན་པོ་ཆེས། མཉམ་བཞག་ལ་མོར་བསྒོམ་པ་བས། རྗེས་ཐོབ་ཀྱི་ཤེས་པ་དུམ་པར་བསྒོམ་པས་དགའ། ཅེས་གསུངས་པས། མཉམ་བཞག་གི་བསྒོམ་དེ་ཉིད་རྗེས་ཐོབ་ཀྱིས་ཤེས་པ་གཟུགས་སྒྲ་དྲི་རོ་རེག་བྱ་ལ་འཇུག་པའི་ཚེ། འགྲོ་ཆག་ཉལ་འདུག་བྱ་བྱེད་སྣ་ཚོགས་སུ་བསྲེ་ཞིང་བསྒོམ་པར་བྱ་སྟེ། འཕགས་པ་སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་རྟེན། །ཅེས་གསུངས་སོ། །དེ་ལྟར་བསྒོམ་པར་མཉམ་བཞག་བཟང་པོ་དེ་རྗེས་ཐོབ་ཏུ་སྐྱོང་རྒྱུ་འོང་བ་ཡིན། གསུམ་པ་ཟུང་འཇུག་ཏུ་བསྒོམ་སྐྱོང་བར་བྱ་བ་ནི། སྙིང་རྗེ་དང་སྟོང་ཉིད་མཉམ་བཞག་དང་རྗེས་ཐོབ་འདྲེས་ཐུབ་ན། ཟུང་འཇུག་གི་ངང་ནས་དགེ་བའི་རྩ་བ་ཐམས་ཅད་ཀྱི་དོན་དུ་བསྔོ་བ་དང་། སྨོན་ལམ་རྣམ་པར་དག་པར་བྱ་སྟེ། མ་ཅིག་ལབ་སྒྲོན་མས། སེམས་སྣང་བ་དངོས་པོ་མ་འཛིན། བདག་ཏུ་མ་བཟུང་། ཅི་སྣང་ལ་ཕྱོགས་མ་བྱེད། གང་ཤར་ལ་དགག་སྒྲུབ་མ་བྱེད། རེ་དོག་གིས་ཐག་པས་མ་བཅིང་། གཉིས་འཛིན་གྱི་བསྟོད་ཕུར་མ་འཇུག །རང་ལུགས་ལ་བཅས་བཅོས་མ་བྱེད། རང་ཆས་ལ་གཞན་དུ་མ་ཚོལ། ད་ལྟར་གྱི་རིག་པ་སོ་མ་བཅོས་སླད་མེད་པ་དྭངས་སང་ངེ་བ་འདི་ཀ་ཆོས་ཉིད་ཡིན་པ་ལ། ཐེ་ཚོམ་མེད་པ་མའི་ཞལ་ནས་གསུངས་སོ། །ལྔ་པ་འབྲས་བུའི་ངོ་བོ་བསྟན་པ་ནི། མཉམ་བཞག་དང་རྗེས་ཤེས་མེད་པར་ཉིན་མཚན་ཆོས་སྐུའི་འཁོར་ཡུག་ཡེང་དང་མ་ཡེང་མེད་པར་མཉམ་བཞག་མཐའ་བྲལ་གྱི་འཁོར་ཡུག །ཕྱི་དང་ནང་མེད་པར་རིག་པ་ཟང་ཐལ་གྱི་འཁོར་ཡུག་བཟང་བ་དང་ངན་པ་མེད་པར་ཐམས་ཅད་སྐུ་གསུམ་གྱི་འཁོར་ཡུག །སྒྲིབ་གཡོག་ལས་གྲོལ་བས་ཡེ་ཤེས་ལྔའི་འཁོར་ཡུག་སྟེ། སངས་རྒྱས་གཉན་སྟོན་པས། མཐར་ཐུག་རང་སར་ཟིན་པའི་དུས་ནི། རྣལ་འབྱོར་ལྟ་བའི་སྒྲོག་ལས་གྲོལ། །རྟོག་དཔྱོད་བློའི་སྤྲོས་པ་ཞི། །རྣལ་འབྱོར་བསྒོམ་པའི་སྒྲོག་ལས་གྲོལ། །ཉམས་ལེན་བློའི་སྤྲོས་པ་ཞི། །རྣལ་འབྱོར་སྤྱོད་པའི་སྒྲོག་ལས་གྲོལ། །བྱ་བརྩལ་བློའི་སྤྲོས་པ་ཞི། །རྣལ་འབྱོར་གྲུབ་མཐའི་སྒྲོག་ལས་གྲོལ། །ཕྱོགས་འཛིན་བློའི་སྤྲོས་པ་ཞི། །རྣལ་འབྱོར་དཔེའི་སྒྲོག་ལས་གྲོལ། །མཚོན་བྱེད་བློའི་སྤྲོས་པ་ཞི། །རྣལ་འབྱོར་ཚིག་གི་སྒྲོག་ལས་གྲོལ། །ཐ་སྙད་བློའི་སྤྲོས་པ་ཞི། །རྟོག་པ་ཡེ་ཤེས་མངོན་དུ་གྱུར། །སྒྲིབ་གཡོག་བློའི་མུན་པ་སོང་། །སྒྲིབ་མེད་ཡེ་ཤེས་གཅེར་བུར་ཤར། །དྲི་མེད་རིག་པ་གཅེར་བུར་བུད། །ཁྱབ་གདལ་ཡེ་ཤེས་ཕྱོགས་རིས་མེད། །རང་ཤར་ཡེ་ཤེས་གསལ་འགྲིབ་མེད། །འོད་གསལ་ལ་ཡེ་ཤེས་ཉིན་མཚན་མེད། །རང་རིག་ཡེ་ཤེས་རྒྱུན་ཆད་མེད། །རྐྱེན་གྱི་མི་སྤྱོད་གཡོ་བ་མེད། །ཉམས་ང་རེ་དོགས་འཇིག་སྐྲག་མེད། །འཁོར་བའི་མཐའ་ལས་རྟེན་དུ་རྒྱལ། །རྣལ་འབྱོར་མཐའ་རུ་ཕྱིན་ཞེས་བྱ། །རྟོག་པ་མངོན་དུ་གྱུར་ཅེས་བྱ། །མཐར་ཐུག་རང་ས་ཟིན་ཞེས་བྱ། །ཕྱིར་མི་ལྡོག་པའི་ས་ནོན་བྱ། །ཅེས་སོ། །དེ་ལྟར་མཐར་ཕྱིན་པས། ཐ་མལ་ལུས་ངག་ཡིད་གསུམ་དག་ནས་རྒྱལ་བའི་སྐུ་གསུང་ཐུགས་སུ་འཆར། འཁོར་འདས་ཀྱི་རྟོགས་པ་ཐམས་ཅད་གྲོལ་ནས། མཉམ་པ་ཉིད་འཆར་བ་ནི། མྱ་ངན་འདས་པ་ཞེས་བྱ་བ་ཡིན་ཏེ། བཀའ་ཚོམ་ལས། ལུས་ངག་ཡིད་གསུམ་དག་པ་ཡང་། །སྐུ་གསུམ་འབྲས་བུ་བཏག་པ་ཡིན། །འཁོར་བ་རང་སར་གྲོལ་བ་ལས། །མྱང་འདས་ལོགས་སུ་བསྒྲུབ་རྒྱུ་མེད། །ཅེས་གསུངས་སོ། །མ་ཅིག་ལབ་ཀྱི་སྒྲོན་མ་དེ་ཉིད། མཐར་ཐུག་སྐུ་བཞིའི་རང་ཆས་ཡིན་པར་གསུངས་སྟེ། སྲས་རྒྱལ་བ་དོན་འགྲུབ་ཀྱིས། །ཆོས་སྐུ་ཡུམ་ཆེན་ཕ་རོལ་ཕྱིན་མའི་སྐུ། །ལོངས་སྐུ་རྡོ་རྗེ་རྣལ་འབྱོར་མ་ཡི་སྐུ། །སྤྲུལ་སྐུ་མ་ཅིག་ལབ་ཀྱི་སྒྲོན་མའི་སྐུ། །སྐུ་གསུམ་དབྱེར་མེད་ངོ་བོ་ཉིད་ཀྱི་སྐུ། །སྐུ་བཞིའི་སངས་རྒྱས་མ་ཅིག་ལབ་སྒྲོན་མ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཅེས་སོ། །འདི་ཉིད་ཉམས་སུ་ལེན་པའི་དུས་སུ། རྣམ་པར་རྟོག་པའི་ཚོགས་ཐམས་ཅད་སྐད་ཅིག་གི་རང་ས་ནས་ཞི་བར་བྱེད་པས་ན་ཞི་བྱེད་ཅེས་བྱའོ། །འདི་ཉམས་སུ་བླངས་ན། ས་ལམ་བསྒྲོད་མི་དགོས་ཡུམ་གྱི་ཀློང་དུ་ཕྱིན་པ་ལ་ཐེ་ཚོམ་མེད་པས་ན་ཕར་ཕྱིན་ཅེས་བྱའོ། །འདི་ཉམས་སུ་བླངས་བའི་དུས་སུ། ལུས་འདུལ་བའི་ཆེད་དུ་གཉན་ས་འགྲིམ། ངག་འདུལ་བའི་ཆེད་དུ་གསོལ་བ་བཏབ། སེམས་འདུལ་བའི་ཆེད་དུ་མཉམ་པར་བཞག་པས་ན་འདུལ་བ་ཞེས་བྱའོ། །ཐམས་ཅད་སེམས་སུ་རྫོགས་པས་ན་རྫོགས་ཆེན་བྱའོ། །སེམས་བཞི་མེད་རྩ་བྲལ་དུ་གཅོད་པའི་ཕྱིར། ཕྱག་རྒྱ་ཆེན་པོ་གཅོད་ཅེས་བྱའོ། །དེས་དངོས་གཞི་ཉམས་ལེན་གྱི་རིམ་པ་དེ་སོང་ངོ་། །སྤྱི་དོན་གསུམ་པ་རྗེས་ཀྱི་བྱ་བ་ལ་གཉིས་སྟེ། གཅོད་ལོག་པའི་རྒྱུ་ངོས་བཟུང་བ་དང་། ལོག་ནོན་རང་གི་ངོ་བོའོ། །དང་པོ་ནི། བླ་མས་གདམ་ངག་གནད་འཇུག་གམ། རང་གི་ཉམས་ལེན་གྱི་འཇུག་སྒོ་ལོག་པའམ། ལྷ་འདྲེ་རིང་ནས་སྔར་གྱི་གཅོད་པ་རྣམས་ཀྱི་ཁ་རྒྱལ་དུ་ཤོར་བ་དང་འཕྲད་དམ། ཧ་ཅང་ལྷ་འདྲེ་རྒོད་ཅིང་ཐུ་དྲག་པའམ། རང་ལ་གནོད་ཅིང་གཞིར་བཞག་ཏུ་ཡོད་པའི་ལྷ་འདྲེ་དང་། གཉན་ཁྲོད་ཀྱི་ལྷ་འདྲེ་གསར་པ་གཉིས་འཐབ་པའི་ཤུགས་རང་ལ་ཕོག་པའམ། རང་གིས་གཞན་ཕ་རོལ་ལ་གཅོད་གཏད་ལོག་པ་བྱས་པ་ཚུར་ལོག་པའམ། གཉན་ཁྲོད་འགྲིམ་པའི་དུས་ཚར་ཚད་མ་རྫོགས་པར་གཞན་གཅིག་ནས་གཅིག་ཏུ་འཕོས་ཤིང་གནད་ཀྱི་གདམ་པས་མ་ཟིན་པར་ལྷ་འདྲེ་སྣ་མང་གི་འགྱུར་ལྡོག་འདུག་གམ། ཡང་ན་དུར་ཁྲོད་ལ་སོགས་པར་འདྲེ་རིགས་མི་འདྲ་བ་མང་པོ་འདུ་འཚོགས་བྱེད་པའི་སར། གཅོད་ལ་ཕྱིན་པས་ལ་ལ་ཆོད་ཀྱང་། ལ་ལ་མ་ཆོད་པར་ལུས་པའི་གཟེར་ཐེབ་པའམ། དང་པོ་ཏབ་ཏོབ་ལ་གཅོད་ཀྱི་ཆོས་ཞུས། དེ་ཞུས་ཀྱང་རྟིང་མ་རྫོགས་པར་དགའ་ལ་རེ་བའི་ཤུགས་དང་། རོག་གིས་སྟབས་ཀ་ལ་སོགས་པས་གཅོད་བྱས་ནས་གཉན་ཁྲོད་འགྲིམ་ཡང་། གདམ་པ་ཕུ་ཐག་མ་ཆོད་པ་དང་། ཆོ་འཕྲུལ་མ་བྱུང་བ་ལ། བྲེད་ཅིང་བྲོས་པ་དང་། ལྷ་འདྲེ་མ་སློང་ནས་གཉན་ས་བསྐྱུར་ནས་ལོག་གམ། གནས་སྐབས་ཐུན་མོང་གི་ཚར་ཚད་འཕྲལ་ལ་དགའ་བྲོད་སྐྱེས་སམ། བདུད་དང་ལྷ་འདྲེའི་ཆོ་འཕྲུལ་གྱིས་ལུང་བསྟན་པ་ལ། མཆོག་ཏུ་བཟུང་ནས་ལུང་བསྟན་དེའི་རྗེས་སུ་འབྲང་བྱས་སམ། སྙིང་རུས་ཞེ་བཅད་ཆུང་ངམ། ལྷ་འདྲེ་དྲག་པོའི་ཆོ་འཕྲུལ་གྱིས་འཁྱམས་ནས་སྙེམ་མ་ཐུབ་པའམ། གཉན་ཁྲོད་བརྟེན་གོ་ལ་དབང་མེད་གཞན་དུ་འགྲོ་དགོས་པའམ། བྱང་ཆུབ་བསྒྲུབ་པའི་ལམ་མཁན་བླ་མ་ཡིན་པ་ལ། དད་པ་མ་སྐྱེས་པར་ལོག་ལྟ་སྐྱེས་ན་ལོག །ལྷ་འདྲེ་ལ་སོགས་སེམས་ཅན་ཐམས་ཅད་རང་གི་ཕ་མར་མ་གྱུར་པ་མེད་པ་ལ། ཕན་ཐོག་གང་ནུས་མ་བྱས་པར་རང་འདོད་ཀྱིས་གནོད་ཅིང་འཚེ་བའི་བསམ་སྦྱོར་བྱས་ན་ལོག །དལ་འབྱོར་བཅྭ་བརྒྱད་ཀྱི་མི་ལུས་ཐོབ་པ་ནི་དེར་བརྩོན་འགྲུས་དང་ལྡན་པས་བྱང་ཆུབ་བསྒྲུབ་ཅིང་སྙིང་པོ་ལེན་པ་ལ་འབད་པ་གལ་ཆེ་ཡང་། ལེ་ལོ་ཤོར་ནས་བཏང་སྙོམ་དུ་ལུས་པའམ། ཡང་ན་བརྩོན་འགྲུས་བྱས་ཀྱང་། ཚེ་འདིའི་བྱ་བ་བྱས་ན་ལོག །འཁོར་འདས་གཉིས་ཀྱི་བར་དུ་སྙེམ་ཐེ་ཚོམ་ངར་འཛིན་ལས་བདུད་ཆེ་བ་མེད་པ་ལ་སྙེམས་ཐེ་ཚོམ་གཉིས་འཛིན་གྱི་འཁྲི་བ་མ་ཆོད་ན་ལོག །ཁྱད་པར་དུ་གཅོད་ཀྱི་ལུགས་ཀྱི་གདམ་པ་ཉམས་སུ་ལེན་པའི་ཐོག་མར་བྱམས་སྙིང་རྗེ་བྱང་ཆུབ་ཀྱི་སེམས་མ་བསྒོམ་ན། ལྷ་འདྲེའི་ཆོ་འཕྲུལ་ལ་ཁྲོ་གཏུམ་བྱེད་ཅིང་། རང་གི་ལུས་ངག་ཡིད་གསུམ་མ་སློང་བའི་རྣམ་པ་མི་བདེ་བ་བྱུང་བ་ལ། དེ་ལ་ལོག་ནོན་དུ་མིང་བཏང་ཅིང་། ལྷ་འདྲེ་ལ་ཅི་གནོད་ཀྱིས་དམིགས་པ་དང་། ས་རྐོ་རྡོ་བརློག་བྲག་གཤིག་ཆུ་དཀྲུག་ལ་སོགས་ཅི་ཐུབ་ཆོད་ཀྱི་སྤྱོད་པ་བྱས་ན་ལོག །རེ་དོག་གི་མདུན་མ་ཁོང་དུ་བཅུག་ན་ལོག །གདམ་པ་ལ་ཁུ་འཁྲིག་དང་ཐེ་ཚོམ་ཞུགས་ན་ལོག །མདོར་ན་སེམས་ལ་རྟོག་པ་ཁུ་འཁྲིག་གཉིས་འཛིན་ཞུགས་ཅིང་སྙེམ་མ་ཆོད་པ་ལ་བརྟེན་ནས་གཅོད་ལོག་གོ། །ལུས་ངག་ཡིད་གཉིས་ཀྱི་རྒྱུད་ལ་ན་ཚ་ཟུག་གཟེར་བརྡ་བསྣོལ་སོགས་མི་བདེ་བ་མང་པོ་དང་། རྐྱེན་ཕྱི་ནང་བར་ཆད་སྣ་ཚོགས་འབྱུང་ཞིང་ཆེ་སྟེ། དམྱལ་བར་གཉིས་འཛིན་གྱིས་ལྟུང་། འབྲིང་སྟེ་སྲོག་གཅོད། ཐ་མ་ཡང་ཚེ་འདིར་མི་བདེ་བ་སྣ་ཚོགས་འབྱུང་། གནས་སྐབས་སུ་ཡང་ཅི་བསམ་མི་འགྲུབ་པར་ལོག་འགྱུ་དུ་མ་བསྐྱེད་པ་ལ་སོགས་གཅོད་ལོག་པའི་སྐྱོན་མང་པོ་འདུས་པར་འགྱུར་བས། དེའི་ལོག་གནོན་གྱི་མན་ངག་ལ་གཉིས་སྟེ། དང་པོ་སྔ་ཚགས་སུ་ཚུད་པར་བྱ་བའི་ཕྱིར་ཐབ་སྒོ་གཏན་འགེགས་པ་ལྟ་བུ་དང་། གཉིས་པ་སྔ་ཚགས་སུ་མ་ཚུད་པར་བྱུང་ངམ། ཚུད་ཀྱང་མ་ཐུབ་པར་བྱུང་ན། ལོག་ནོན་གནམ་ལྕགས་ཀྱི་གཟེར་མདའ་བརྡེག་པ་ལྟ་བུའི་གནད་ཀྱི་མན་ངག་གོ། །དང་པོ་སྔ་ཚགས་སུ་འཛུག་པ་སྒོ་ཐེམ་བརྡེག་པ་ལྟ་བུ་ནི། དཔེར་ན་དགྲ་རྐུན་འབྱུང་གི་དོག་པ་ནི། མ་བྱུང་བའི་གོང་ན་སྒོའི་འདེན་བུ་རྒྱང་འདེན་གྱི་མནན་པ་དང་། སྐར་ཁུང་བགག་པ་དང་། འགག་སྡོམ་པ་ལ་སོགས་པ་ཟོན་བྱས་པ་དང་། དགྲ་རྐུན་གྱིས་ཀྱང་དེ་རིག་ནས་དེའི་ཕྱོགས་སུ་མི་འོང་ཞིང་། གལ་ཏེ་མི་འོང་ཡང་གླག་མི་རྙེད་པ་དང་མཚུངས་པར། འདིར་ཡང་ཐོག་མར་ཉམས་ལེན་ལ་སྔ་ཐོག་ནས་འཇུག་པའི་སྔོན་དུ། ལྟ་བ་ཐག་ཆོད་སྤྱི་ཆབས་ཀྱི་མན་ངག་དང་ལྡན་པར་བྱས་པས་སྟོང་པ་ཉིད་ཀྱིས་སྟོང་པ་ཉིད་ལ་གླག་མི་རྙེད་དོ། །རྒྱལ་བའི་ཡུམ་ལས་སྟོང་པ་ཉིད་ཀྱིས་སྟོང་པ་ཉིད་ལ་གླག་མི་རྙེད་དོ། །མཚན་མ་མེད་པས་མཚན་མ་མེད་པ་ལ་གླག་མི་རྙེད་དོ། །སྨོན་པ་མེད་པས་སྨོན་པ་མེད་པ་ལ་གླག་མི་རྙེད་དོ། །ཅེས་དང་། སྔ་ཚགས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་གོ་ཆ་དང་ལྡན་པར་བྱེད་པའོ། །དེ་ཡང་འདི་ལྟར་བདག་ཉིད་ཉམས་སུ་ལེན་མཁན་གྱི་རྣལ་འབྱོར་མི་དམིགས། ཉམས་སུ་བླང་བར་བྱ་བའི་ཆོས་མི་དམིགས། ཉམས་སུ་ལེན་པའི་ས་ཕྱོགས་གཉན་ཁྲོད་མི་དམིགས། ཡུལ་རིས་ས་ཕྱོགས་དེར་གནས་པའི་ལྷ་འདྲེ་གཞི་བདག་ལ་སོགས་མི་དམིགས། ཆོ་འཕྲུལ་མི་དམིགས། ཐམས་ཅད་མི་དམིགས་པ་དང་བྲལ་བས། གང་ལའང་བདེན་པར་གྲུབ་པ་མེད་པ་སྟེ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་བདག་མེད་པའོ། །གཉིས་པ་སྔ་ཚགས་སུ་མ་ཚུད་པའམ་ཚུད་ཀྱང་ལོག་པ་ལ་སོགས་པ་གཅོད་ལོག་བྱུང་ན། ལོག་ནོན་གནམ་ལྕགས་ཀྱིས་གཟེར་མདའ་བརྡེག་པའི་མན་ངག་ནི། སྣང་སྲིད་ལྷ་འདྲེ་མ་རུང་བའི་ཆོ་འཕྲུལ་རྩུབ་འགྱུར་གྱི་ལྟས་དངོས་སམ་རྨི་ལམ་ལ་སོགས་པར་ཆེ་འབྲིང་ཆུང་གསུམ་བརྗོད་ལས་འདས་པ་འབྱུང་བར་འགྱུར་སྟེ། དེ་ལྟར་ཅི་བྱུང་ཡང་རྣལ་འབྱོར་པ་རབ་ཀྱིས་རབ་སྣང་སྲིད་འཁོར་འདས་ཀྱི་ཆོས་ཐམས་ཅད། ཡིད་ལ་བྱར་མེད་ཅིང་སྙམ་པའི་ངང་ལ་ལྷན་ནེ་བཞག་པས། བདག་གཞན་ཆོ་འཕྲུལ་ལ་སོགས་ཐམས་ཅད་སྡུག་བསྔལ་དང་བྲལ་བའི་ནམ་མཁའ་དྭངས་བ་ལྟར་རྟོག་པར་འགྱུར། རབ་ཀྱིས་འབྲིང་པོས་བདག་དང་ལྷ་འདྲེའི་ཆོ་འཕྲུལ་ཐམས་ཅད་གྲུབ་པ་མེད་པའི་དབྱིངས་སུ་བསྐྱལ་བར་བྱ་སྟེ། བདག་གཅེས་པས་སེམས་ཅན་ཐམས་ཅད་ཀྱི་རྟོག་པས་སེམས་ཀྱི་ངོ་བོ་སྟོང་པ་ནམ་མཁའ་ལྟ་བུ་རང་བཞིན་གསལ་ལ་ཆུ་ཟླ་ལྟ་བུ། མཚན་འཛིན་ལས་འདས་པ་བར་སྣང་དུ་རླུང་འཕྱོ་བ་ལྟ་བུ། དེ་དག་ཐམས་ཅད་ཀྱང་སེམས་ཉིད་སྟོང་པའི་རང་རྩལ་དུ་ཤེས་པ་རང་སར་གྲོལ་ན་བདག་མ་གྲུབ་པའོ། །ལྷ་འདྲེ་ཞེས་པ་ཕྱི་རོལ་ག་གེ་མོ་ཞིག་ནས་བྱུང་བ་མ་ཡིན་ཞིང་། རང་གིས་སེམས་ཀྱི་རྣམ་རོལ་གྱི་གདང་ཕྱིར་འཆར་བ་ནི། དཔེར་ན་ཁང་པའི་ནང་དུ་མེ་འབར་བའི་འོད་ཕྱིར་གསལ་བ་དང་མཚུངས་པས་ལྷ་འདྲེ་མ་གྲུབ་པའོ། །ཆོ་འཕྲུལ་ཟང་ཟིང་ནི་རང་སར་འཁྲུལ་པ་སྟེ། གཞན་ནས་འབྱུང་ཕྱིར་འཆར་བ་མ་ཡིན། དཔེར་ན་སྣང་བ་འགྱུར་བྱེད་ཀྱི་རྫས་ཁོང་དུ་སོང་བས། མེད་པ་ལ་ཡོད་པར་འཛིན་པའི་སྣང་བ་འཁྲུལ་པ་དང་མཚུངས་པའི་ཕྱིར་ཆོ་འཕྲུལ་མ་གྲུབ། དེ་ལྟར་གང་ཡང་གྲུབ་པ་མེད་པའི་ཕྱིར། ཡོད་འཛིན་གྱི་བློ་དང་བྲལ་བའི་སྟོང་ཉིད་ཀྱི་ངོ་བོ་ལ་ལྟའོ། །དེ་ནས་བདག་དང་ལྷ་འདྲེ་ཆོ་འཕྲུལ་གསུམ་དབྱེར་མེད་གཅིག་ཏུ་རྟོག་ཅིང་བློ་ཐག་ཆོད་པར་འགྱུར་རོ། །རབ་ཀྱི་ཐ་མས་ཕཊ་ཅེས། དེས་ཆོ་འཕྲུལ་ཐམས་ཅད་ནམ་མཁའི་སྐར་ཚོགས་མི་སྣང་བ་ལྟར་དུ་གྱུར་ནས། ལུས་ངག་ཡིད་གསུམ་བདེ་ལྷན་གྱི་སོང་ནས། རྟོག་པ་ཁྱད་པར་ཅན་རྒྱུད་ལ་སྐྱེའོ། །རྣལ་འབྱོར་པ་འབྲིང་གིས་རབ་ཀྱི་དབང་པོ་ལུས་ཀྱི་མངོན་ཞན་མིག་གིས་ཡུལ་དུ་གཟུགས་བཟང་བ་ལ་སོགས་པ་ལ་ཆགས་པ་དང་། མ་ལེགས་པ་ལ་སྡང་བ་དང་། དེས་འདྲེས་པར་ལེགས་ཉེས་ཆགས་སྡང་ལྷ་འདྲེ་ལ་ཡང་དེ་བཞིན་ཆོ་འཕྲུལ་བཟང་པོ་སྟོན་པ་ལ་ཡང་ཆག་ངན་པ་སྟོན་པ་ལ་ཡང་སྡང་། ཆོ་འཕྲུལ་མ་བྱུང་ན་བྱུང་ན་སྙམ་པ་དང་། བྱུང་ན་སྐྲག་ཅིང་འདི་ལྟ་བུ་བྱུང་ན་དགའ་བ་ལ་སྙམ་པ་ལ་སོགས། རེ་དོག་ཉིན་མཚན་འཇིག་སྣང་ཐམས་ཅད་ཀྱི་ངོ་བོ་རང་བཞིན་ཤེས་པར་བྱ་སྟེ། ཆུ་ནང་གིས་གཟུགས་སྐར་བཀྲ་བ་ལ། ངོས་བཟུང་དང་བྲལ་བ་ལྟར་ཅི་མི་སྙམས་དུ་བཞག །དེས་ཆོ་འཕྲུལ་ཚར་དུ་སློང་ནས། མཆོག་གི་དངོས་གྲུབ་དང་ཐུན་མོང་གི་དངོས་གྲུབ་གཉིས་ཀ་འབྱུང་། འབྲིང་གིས་འབྲིང་པོས་ཆོ་འཕྲུལ་ལ་སོགས་ཐམས་ཅད་ཕུག་ལེགས་པར་བཏག །ང་ལ་ཁོ་བྱུང་ངམ། ཁོ་ལ་ང་བྱུང་འོན་ཏེ་གཉིས་ཀ་དུས་གཅིག་ལ་བྱུང་ན་བྱུང་མཁན་དང་། བྱུང་བ་དེའི་རང་བཞིན་དང་། བྱུང་བ་དེའི་རྒྱུ་ལས་གྲུབ། རྐྱེན་ཅིས་བསྐྱེད། ཁོའི་འབྲས་བུ་དེ་ཅི་འདྲ། དེ་དག་གིས་མཚན་ཉིད་དེ་ལེགས་པར་བརྟག་པ་བཞིན། ཐམས་ཅད་རང་བཞིན་མེད་པར་དཔེར་ན་ནམ་མཁའི་རི་མོ་བཞིན། ཕྱད་ཀྱིས་སོང་ནས་གང་ལ་ཡང་སྙིང་པོ་མི་འདུག་སྙམ་པའི་ཐག་ཆོད་ཀྱི་ཉམས་འཆར་བར་འགྱུར། དེས་ཐུན་མོང་གིས་དངོས་གྲུབ་ཆར་ལྟར་འབེབས། མཆོག་གི་དངོས་གྲུབ་རྙེད་པའི་ལྟས་འབྱུང་། དེ་ལྟར་ལམ་རྟག་གི་ཡོན་ཏན་གང་བྱུང་ཡང་། དེ་ལ་བརློམ་པ་དང་དགའ་བྲོད་གང་ཡང་མི་བསྐྱེད། གལ་ཏེ་བསྐྱེད་ན་སྔ་མའི་རྒྱུ་མཚན་མེད་པར་བསྐྱུར་དེ་ལྟར་མ་བསྐྱུར་ན་ནད་ལ་ཕན་དུ་རེ་བས་སྨན་བཏང་བས། སྨན་དེ་ཉིད་ཀྱང་སྨན་ལོག་དུ་སོང་ནས་ནད་མ་དྲག་པའི་སྟེང་དུ་འཆི་བར་འགྱུར་བ་བཞིན་ནོ། །འབྲིང་གི་ཐ་མས་འདི་སྙམ་དུ་ག་རེ་ང་འདིར་ཕྱིན་ཆོས་འདི་སྙམ་དུ་བླང་ན། འདི་འདྲ་བའི་ཆོ་འཕྲུལ་ལ་སོགས་མི་བདེ་བའི་ཟང་ཟིང་འོང་དོན་མེད། འདི་བྱུང་བའི་རྒྱུ་ང་རང་གིས་བྱས། རྐྱེན་ཕྱི་ནང་གིས་ཡུལ་ཡུལ་ཅན་དུ་འཕྲོ། དཔེར་ན་འབྱུང་བ་ཚ་གྲང་འཐབ་པ་ལ་སྒྲ་འབྱུང་བ་དང་འདྲ། རྒྱུ་རྐྱེན་ཐམས་ཅད་རང་ལ་ཐུགས་པར་འདུག་བསམ་དུ་ཞིབ་མོ་བསམ་པས། ཐམས་ཅད་རང་ལ་བྱུང་བས་ངོ་ཤེས། འོ་ན་རང་གི་མཚན་ཉིད་ཅི་འདྲ་སེམས་ཀྱི་བརྩད་གདར་བཅད་པས་སེམས་ཀྱི་མཚན་ཉིད་རྟོག་ནས་བདུད་རང་ཆོད་ཆོ་འཕྲུལ་རང་ཞིར་འགྲོ་ཞིང་ལྷ་འདྲེ་ཐམས་ཅད་ཀྱང་བྲན་འཁོར་དུ་འགྱུར་ནས་གནོད་མི་བསྐྱལ་བ་ནི་ལྟ་ཅི་སྨོས། ཅི་སྨྲ་བའི་བཀའ་ལ་ཉན་ཞིང་ཆོས་སྐྱོང་དུ་འགྱུར་རོ། །རྣལ་འབྱོར་པ་ཐ་མའི་རབ་ཀྱིས། སྔར་གྱི་གཉན་ས་ལ་སོགས་ཉེས་པ་བྱུང་བའི་ལེ་ལེན་གྱི་ས་གནས་དེ་ཉིད་དུ་ཕྱིན་པའམ། གལ་ཏེ་དེར་མ་སླེབ་ན་དེ་དང་ཆ་མཐུན་གྱི་གནས་གང་འཐད་དུ་ཕྱིན་ལ། དང་པོ་གཞུང་ལྟར་ཉམས་སུ་བླང་ཅིང་། ཁྱད་པར་གནོད་བྱེད་དེས་ཐོག་དྲངས་བའི་སེམས་ཅན་ཐམས་ཅད་ལ་བྱམས་སྙིང་རྗེ་ཤས་མི་བཟོད་པ་སྒོམ་ལ་བྱ། སྙིང་རྗེར་འགྱུར་བའི་གནོད་བྱེད་ཐོག་དྲངས་བའི་སེམས་ཅན་ཐམས་ཅད་ལ་བདག་གི་ལུས་ངག་ཡིད་གསུམ་གང་ལ་ཅི་འདོད་དུ་སྦྱིན་པ་བཟང་བས་སོ་སོར་ཅི་འདོད་དུ་ཁྱེར་ལ་ལོངས་སྤྱོད་ཅིག་སྙམ་དུ་སྙིང་ཐག་པ་ནས་བསམ་ངག་ཏུ་ཡང་བརྗོད། རྗེས་ལ་ཕྱི་ནང་སྣོད་བཅུད་ཐམས་ཅད་སྟོང་པ་ཉིད་དུ་རྒྱས་གདབ། དེ་ལྟར་ཐུན་གྲངས་སྟོང་རྩ་ལ་སོགས་སློང་དང་བྱ། དེས་ཆོ་འཕྲུལ་ཉལ་གྱི་ཞི་ནས་བདེ་ཕྱམ་གྱིས་འགྲོ། དགེ་སྦྱོར་ངང་གིས་འཕེལ་ཞིང་བཟོད་པའི་གོ་ཆ་ཐོབ་པར་འགྱུར་རོ། །ཐ་མའི་འབྲིང་གིས། ནད་ལ་བཅོས་ལོག་བྱ། གདོན་ལ་ཐོག་འགེལ་བྱ། ཡ་ང་ན་ཡ་ཐོག་ཏུ་བཏང་། སྐྱུག་བྲོ་ན་བྲོ་ཐོག་ཏུ་བཏང་། གང་མི་ཕོད་པ་ལ་ཐོག་བརྗིས་སུ་བཏང་ཞིང་། མེ་བཙའ་ཨན་ཚུགས་སུ་བརྡེག་པར་བྱ་སྟེ། དེ་ཡང་དཔེར་ན་ནད་ཀྱིས་གཟེར་དམིགས་གར་ཡོད་དུ་སྨན་པ་མཁས་པས་ནད་ཆེ་ཞིང་མ་ཆོག་པས། སླར་མེ་བཙའ་བརྡེག་པ་བཞིན་དུ། ནད་ཚ་བ་ལ་བཅོས་ཐབས་ཚ་བ་ཉིད་བརྟེན་ནད་གྲང་བ་ལ་བཅོས་ཐབས་གྲང་བ་ཉིད་བརྟེན། སྤྱོད་ལམ་ཡང་དེའི་མཚོན་པར་བྱ་ཞིང་། ཁྱོད་ན་བ་བས་ཀྱང་ཐུ་བ་འཆི་བར་ཆུག །མེད་དུ་ཆུག །བརླག་ཏུ་ཆུག །སྙམ་པའི་ངང་ལ་བློ་སྙམ་སྙམ་མེད་པར་ལུས་བདག་པོ་མེད་པ་ཁོང་སྟོང་ལྟར་བོར། སེམས་སྟོང་པའི་ངང་ནས་དབྱིངས་རིག་བསྲེ། གདོན་ལ་ཐོག་འགེལ་བྱེད་པ་ནི། གདོན་འདི་རྣམས་བདག་གི་དྲིན་ཆེན་གྱི་ཕ་མ་ཡིན། ཆོ་འཕྲུལ་ལ་སོགས་པ་མི་བདེ་བ་འདི་རྣམས་ནི། བདག་ཉེས་ཀྱི་དོག་འཁོར་བར་འཁྱམས་ཀྱི་དོག་པའི་སློང་ཡིན་སྙམ་པའི་ངང་ནས་མ་དྲིན་ཆེན་གྱི་བརྡའ་ལ་ཉན། མ་པང་བུ་འགྲོའོ་སྙམ་པའི་ངང་ནས། གདོན་གང་ཡིན་པ་དེའི་པང་དུ་འཆང་། དེའི་ཁ་ནས་ཞུགས་ནས་ཁོ་ཡི་ཁོག་པར་ཡང་ཡོད་སྙམ་པར་བྱ། ཡང་དྲིན་ལེན་བསབ་པའི་ཆེད་དུ། རང་ལུས་བདུད་རྩིར་བྱིན་གྱིས་བརླབ་ལ། གང་ལ་ཅི་འདོད་དུ་སྦྱིན་པ་བཏང་། དེ་དང་མཐུན་པ་སྤྱོད་ལམ་ཡང་ལྷ་འདྲེའི་དོན་དུ་བྱ། ལུས་ཀྱི་ཅི་ནུས་ཀྱི་ཕྱག་འཚལ་བ་དང་། བསྐོར་བ་བསྐོར་བ་དང་། གཏོར་མ་བཏང་བ་དང་། གསུང་རབ་བཀླག་པ་དང་། སཙྪ་བཏབ་པ་ལ་སོགས་པའི་ཆོས་སྤྱོད་ལ་འབད། རང་གི་ལུས་ཀྱི་མ་ནུས་ན། གྲོགས་པོ་ལ་སོགས་ལ་བྱེད་བཅུག །རང་གི་དོན་དུ་རིམ་གྲོ་བྱེད་པའི་དོད་པོ་དེ་ལྷ་འདྲེ་ལ་བསྔོ། དེའི་རྗེས་ལ་དམིགས་མེད་ཀྱི་རྒྱས་གདབ། ཡ་ང་ན་ང་ཐོག་ཏུ་བཏང་བ་ནི། སེམས་འདི་ཉིད་འཁོར་བར་འཁྱམས་པ་ལ། ང་གཅིག་པུར་འཁོར་བར་འཁྱམས་ན་ཅི་ཡིན། འདི་རྣམས་སྡུག་བསྔལ་གྱི་མནར་ན། ང་གཅིག་པུར་སྡུག་བསྔལ་ཅི་ཉེས། སེམས་ཅན་འདི་རྣམས་ཐམས་ཅད་ཀྱི་དོན་དུ། བདག་གི་ལུས་ངག་ཡིད་གསུམ་གླུད་དུ་བསྔོ་བ་ལ་འགྲོ་སྙམ་པའི་འདུན་པ་དང་ལྡན་པས། ཡང་ང་བ་དང་བག་ཚ་བ་དང་གང་བྱུང་བ་ལ་མི་བྲོས་པར་སླར་དེ་ཀ་ལ་འདུག་དེ་ཕཊ་བྱ། ཅེས་གསོབ་དང་ལམ་བླར་ཤེས་པར་བྱས་ལ། ལུས་ངག་ཡིད་གསུམ་ཤིང་བཅད་པའི་སྡོང་པོ་འགྱེལ་བ་ལྟར་ཁྲམ་བསྐྱུར་བར་བྱའོ། །སྐྱུག་བྲོ་ན་བྲོ་ཐོག་ཏུ་བཏང་བ་ནི། གང་སྐྱུག་བྲོ་བས་མི་གཙང་བའམ། ཤ་རུས་ལ་སོགས་པའམ། གོས་རོལ་ལ་སོགས་ཡིད་ཡུལ་དུ་གང་སྐྱུག་བྲོ་བའི་སྟེང་དུ་སྙེམ་ཞུགས་པ་དེ་ཀ་ཆེད་དུ་གཉེར་ལ། བཟའ་བཏུང་གོས་སོགས་ལོངས་སྤྱོད་དེ་སྐྱུག་བྲོ་ན་སྐྱུག་པ་སླར་འཐུང་ཞིང་རྗེས་སུ་ཅི་ཡང་མི་དམིགས་པའི་ངང་དུ་བསྐྱུར་བར་བྱའོ། །མི་ཕོད་པ་ལ་ཐོག་རྫིས་བཏང་བ་ནི། ལུས་ངག་ཡིད་གསུམ་གྱིས་སྤྱོད་པ་རྦད་ཆོད་རྦུད་ཆོད་ལ་བཏང་། ལྷ་འདྲེ་མི་གསུམ་ལ་སོགས་གང་མི་ཕོད་ཅིང་། ཐེ་ཚོམ་དང་སྙེམ་ཞུགས་པ་དེ་ཉིད་ཀྱིས་དུས་རྟོག་པ་སྣ་མི་བསྐྱིལ་བར། ཉམས་བྱུང་རྒྱལ་དུ་བཏང་ལ་གང་ལ་ཆགས་པ་དེ་སྤང་སྡང་བ་དེ་དང་དུ་བླང་། མདོར་ན་གཉིས་འཛིན་གྱི་མདུད་པ་བཤིག་ལ། སྣང་བ་ཐམས་ཅད་ཐད་ཀར་བཅད་ལ་བཞག །དེ་རྣམས་བྱས་པས་བདུད་ལམ་དུ་སློང་། ཉོན་མོངས་པ་གྲོགས་སུ་འཆར། ལྷ་འདྲེ་སྲིད་དུ་ཆོད། བདག་དུ་འཛིན་པའི་འཁྲི་བ་ཆོད། འཁྲུལ་སྣང་ཞིག །ལྷ་འདྲེ་མི་གསུམ་དབང་དུ་འདུས། ཅི་བྱས་ལམ་དུ་འགྲོ། བྱང་ཆུབ་ཀྱིས་གོ་འཕང་རྙེད་པར་འགྱུར་རོ། །ཐ་མའི་ཐ་མས། དང་པོ་ལྷ་འདྲེ་ཐམས་ཅད་དྲིན་ཆེན་གྱི་ཕ་མར་བསྒོམ་ལ། བྱམས་སྙིང་རྗེ་ཐུན་མོང་མ་ཡིན་པར་བསྒོམ་ཞིང་། ལུས་སྦྱིན་པར་གཏོང་། བར་དུ་ལྷ་འདྲེ་དང་བླ་མ་དབྱེར་མེད་དུ་སྤྱི་བོར་བསྒོམ་ཞིང་། ལུས་མཎྜལ་དུ་ཕུལ་ལ། དད་པ་མོས་གུས་ཀྱི་གདུང་བ་དྲག་པོ་བསྐྱེད་ལ། གསོལ་ཕུར་ཚུགས་སུ་གདབ། མཐར་རང་དང་ལྷ་འདྲེ་གཉིས་སུ་མེད་པར་བསྲེལ། ཅི་ཡང་མི་བསམ་མི་གནང་ངོ་། །བྱར་མེད་ཀྱི་ངང་ལ་མཉམ་པར་བཞག །རེས་འགའ་ལྷ་འདྲེ་དང་ཡི་དམ་གྱི་ལྷ་གཉིས་སུ་མེད་པར་སྙིང་གི་དཀྱིལ་དུ་བསྒོམ་ལ། རང་གི་ཡི་དམ་གྱི་བཟླས་པས་འཛབ་དབྱངས་སུ་གྱེར། རེས་འགའ་སྣང་སྲིད་ལྷ་འདྲེའི་རང་བཞིན་དུ་གྱུར་པ་དེ་ལ། རང་གིས་ལུས་རེ་རེར་སྤྲུལ་ལ་ཅི་བདེར་ལོངས་སྤྱོད་པར་དམིགས། རེས་འགའ་ལྷ་འདྲེའི་ཁང་པ་གནས་ལ་སོགས་པའི་ཕོ་བྲང་རང་གིས་སྒར་བཏབ། རེས་འགའ་རང་གིས་གནས་མལ་དང་ཁང་པར་ལྷ་འདྲེའི་ཕོ་བྲང་བཅས་པར་དམིགས། རྗེས་ལ་བློ་བསྒྱུར་བྱ། དེ་ལ་སོགས་པའི་དམིགས་པའི་སྤྲུལ་བསྒྱུར་མང་པོ་བྱ་ཞིང་ལུས་ངག་གི་ལོངས་སྤྱོད། དེ་ལྟར་སྙམ་མེད་པར་ཡང་ཡང་བྱས་པས་ཞག་ཁ་ཡར་ནས་ཆོ་འཕྲུལ་ཚར་ཚད་དུ.འགྱུར་ནས་ལམ་གྱི་འགག་གྲོལ། ལྟས་ངན་གཡང་དུ་ཁུག །སྐྱེལ་མ་དགྲ་ལ་བཅོལ་བས་གྲོག་གི་དམ་པར་འགྱུར། ནད་པ་འདྲེ་ལ་གཏད་པས་སྲུང་བའི་མཆོག་ཏུ་གྱུར། བདུད་རྩིའི་དོང་པོར་དུག་འཐུང་བས་འཆི་མེད་ཚེ་ཡི་རིག་འཛིན་བརྙེས། ལྷ་འདྲེ་བསྒོམ་པས་ལྷ་འགྱུར། གཞན་དོན་བྱས་པས་རང་དོན་ཞོར་ལ་འགྲུབ། ཉོན་མོངས་པ་ཡེ་ཤེས་སུ་འཆར། འཁོར་འདས་ཐམས་ཅད་ཁྱབ་གདལ་དུ་མ་རོ་གཅིག་ཏུ་རྟོག་པས་ལུས་ལ་བདེ་བ་རྒྱས། རྟོག་པ་སེམས་ལ་འཆར། བདེན་ཚིག་ངག་གིས་འགྲུབ། འདུན་མ་རྩེ་མོ་བྱུང་རྒྱལ་དུ་གྱུར་པའོ། །དེ་རྣམས་གང་ཡང་དང་པོ་སེམས་སྐྱེ་མེད་ཀྱི་རྩིས་བཟུང་བ་དང་། བར་དུ་སྟོང་ཉིད་སྙིང་རྗེས་རྒྱས་ཐེབ་པ་དང་། མཐར་འཁོར་གསུམ་མི་དམིགས་པའི་ངང་ནས་བསྔོ་སྨོན་གྱིས་རྒྱས་ཐེབ་པར་བྱ། མདོར་ན་གཅོད་བྱ་གཅོད་བྱེད་ཐམས་ཅད་ལ་འདུ་ཤེས་ཐེར་ཟུག་འཁྲུལ་པའི་བླང་དོར་རེ་དོག་གཉིས་འཛིན་མ་ཞུགས་པར་གཅིག་ཆོད་རང་གྲོལ་གྱིས་ངང་དུ་མཚན་མའི་རྩོལ་བ་དང་བྲལ་བར་བྱའོ། །དེ་ལྟར་ཉམས་སུ་བླང་པས་གཅོད་ལོག་ལ་ཡང་ལོག་གི་སླེབ་ནས། ཆོ་འཕྲུལ་རང་སར་ཞི་བདུད་བཞི་རང་གྲོལ་དུ་འགྱུར་རོ། །ནད་ལ་སོགས་པའི་མི་བདེ་བ་ཐམས་ཅད་བདེ་བར་འགྱུར། སྣང་བ་དབང་དུ་འདུས། རླུང་སེམས་ལས་སུ་རུང་། བཀའ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་དོན་ཁོང་དུ་ཆུད་དེ། སྙིང་པོ་གཏན་ལ་ཕེབ་པར་འགྱུར་རོ། །ཅེས་པདྨའི་གཏེར་གཅོད་ལས་གསུངས་སོ། །གཅོད་ཁྲིད་འདི་ལ་རྒྱས་པ་ལྟར་ཡིན་ན། བཤད་མཛོད་ཆེན་མོས་བྱེད་ལ་བཤད་དོ། །བསྡུས་པ་ལྟར་ཡིན་ན་རང་གཞུང་གཅོད་ཁྲིད་འདི་དག་གིས་ཆོག་གོ། །དེས་རྗེས་ཀྱི་རིམ་དེ་སོང་ངོ་། །དེ་ལྟར་ལེགས་བཤད་སྤྲིན་གྱི་བླ་བྲེ་ལས། །ཚིགས་དོན་གསལ་བའི་ཆར་པས་རབ་བརླན་ཅིང་། །མ་ལུས་འགྲོ་བའི་ལོ་ཐོག་རྒྱས་མཛད་དེ། །ཀུན་ཀྱང་ཀུན་ཏུ་བཟང་མོ་རྟོག་པར་ཤོག །དགེ་བ་འདི་ཡི་སྲིད་པའི་སེམས་ཅན་ཀུན། །རྒྱལ་བའི་དཀྱིལ་འཁོར་དག་ཏུ་རབ་ཞུགས་ཏེ། །མ་ལུས་ཐམས་ཅད་བྱང་ཆུབ་མཆོག་ཐོབ་ནས། །འགྲོ་བ་དོན་གཉིས་ལྷུན་གྱིས་གྲུབ་པར་ཤོག །གཅོད་ཁྲིད་འདི་ལ་རང་བཟོ་དང་ཕོ་ཚོད་མ་འདྲེས་ཤིང་། ཚད་གསུམ་ཟུང་དུ་འབྲེལ་བའི་དོན་ནི། སྲས་རྒྱལ་བ་དོན་འགྲུབ་ཀྱིས་གཅོད་ཁྲིད། ཟབ་དོན་ཐུགས་སྙིང་གི་གཅོད་ཁྲིད། སངས་རྒྱས་གཉན་སྟོན་གྱི་གཅོད་ཁྲིད། འདོར་བ་ཀུན་དགའ་དཔལ་བའི་གཅོད་ཁྲིད། ཨུ་རྒྱན་པདྨའི་གཏེར་གཅོད། དྲུང་ཆོས་དོར་བའི་སེམས་ཚོལ་ངོ་སྤྲོད་དེ་རྣམས་དང་། བླ་མ་དམ་པའི་མན་ངག་རྣམས་ལ་བརྟེན་ནས། གཅོད་ཁྲིད་གསལ་བའི་སྒྲོན་མེ་ཞེས་བྱ་བ་འདི། རི་ཁྲི་ལ་གཡུ་རྩེའི་ཞོལ། དངུལ་ཟླ་ཆུ་ཀློང་གི་གཡས་ཟུར། སློང་ཆེན་ངོས་ཀྱི་རི་ཁྲོད་ནས། པུ་ནེ་ཀླག་ཤས་སྦྱར་བ་རེ་ཞིག་རྫོགས་སོ།། །།ཤེས་བྱ་མཐའ་བྲལ་ཀ་དག་ཆོས་ཀྱི་སྐུ། །རང་རིག་གསལ་སྣང་ལྷུན་གྲུབ་ལོངས་སྤྱོད་རྫོགས། །དབྱེར་མེད་གསལ་སྣང་དུ་མ་སྤྲུལ་པར་ཤར། །ངེས་མེད་གཅིག་རྫོགས་ངོ་བོ་ཉིད་ཀྱི་སྐུ། །དབྱེར་མེད་ངོ་བོ་ཉིད་སྐུ་བླ་མར་འདུད། །གདོད་ནས་མ་སྐྱེས་འགགས་མེད་བསོད་ནམས་རྫོགས། །ཡོན་ཏན་དཔལ་བཞིན་ནམ་མཁའི་མཐའ་བཞིན་རྒྱས། །དོན་གཉིས་ལྷུན་གྲུབ་ཆོས་སྒོ་འབུམ་ཕྲག་གིས། །ཕྲིན་ལས་བཞི་འབྱུང་འགྲོ་བ་དཔག་མེད་འདྲེན། །བདུད་ཀྱི་གཅོད་ཡུལ་ཕ་རོལ་ཕྱིན་དོན་གྱིས། །མི་མཐུན་བདུད་བཞིའི་དགྲ་ལས་རྒྱལ་མཛད་པ། །འགྲོ་བ་བདུད་ལས་སྐྱོབ་པའི་མངའ་བོ་ཆེ། །བདུད་འདུལ་དཔའ་བོ་དཔའ་མོ་ཆེན་པོ་ལ། །ལྡོག་མེད་དོན་ལྡན་དཀོན་མཆོག་ཕ་མ་ཡི། །འགྱུར་མེད་མོས་ལྡན་བརྩེ་གཅིག་དད་ཆེན་པོས། །འབྲལ་མེད་མཚན་ལྡན་གྱི་དྭངས་མི་ཕྱེད་ནས། །དོན་གཉིས་འཆུག་མེད་ཆེན་པོས་དོན་མཛད་ཤོག །མངྒ་ལཾ་བྷ་ཝནྟུ། ༈ གཙང་ཉང་སྟོད་རྒྱ་རྩེའི་ལྷ་གཞིས་གཟིམ་ལྦུག་ན། ངག་དབང་བསྟན་འཛིན་རྣམ་རྒྱལ་ཕྱག་དཔེ་ཀཿསི་རིན་པོ་ཆེ་ཆོས་ཀྱི་རྒྱ་མཚོའི་ཀཿཐོག་དཔེ་མཛོད་དུ་བཞུགས་སུ་གསོལ་བ་དང་དཔེ་བསྡུར་ས་མནྟ་མ་ཏིས་བྱས་སོ། །ཡང་རྨུག་སང་དཔེ་དང་བསྡུར།། །།

ཀཿགཅོད་ཀུན་དགའ་འབུམ་པའི་ལུས་སྦྱིན་གདན་ཐོག་གཅིག་མ་དང་མཁའ་འགྲོའི་སྒྲུབ་ཐབས་དངོས་གྲུབ་བང་མཛོད་ཀྱི་གསལ་བྱེད་ནོར་བུའི་ལྡེའུ་མིག

ཀཿགཅོད་ཀུན་དགའ་འབུམ་པའི་ལུས་སྦྱིན་གདན་ཐོག་གཅིག་མ་དང་མཁའ་འགྲོའི་སྒྲུབ་ཐབས་དངོས་གྲུབ་བང་མཛོད་ཀྱི་གསལ་བྱེད་ནོར་བུའི་ལྡེའུ་མིག་བཞུགས་སོ། །ན་མོ་གུ་རུ་པྲ་ཛྙཱ་པ་ར་མི་ཏ་ཡེ་མངྒ་སིདྡྷི་ཧཱུྃ། ཆོས་ཉིད་ཡེ་གཞི་སྐྱོན་ཡོན་འབྲི་གང་འཕོ་འགྱུར་ཡང་བྲལ་ནམ་མཁའི་ཀློང་། །ལམ་སྣང་འཁྲུལ་རྟོགས་རབ་རིབ་སྤྲིན་ཀུན་རང་རིག་རང་གསལ་དྲི་གཞོན་གྱིས། །སྐུ་དང་ཡེ་ཤེས་ཡོན་ཏན་མཐའ་ཡས་ནུབ་མེད་འོད་ཟེར་སྟོང་འཕྲོ་བ། །བདག་བློའི་པདྨའི་གེ་སར་རབ་བཞད་བླ་མ་དབྱེར་མེད་ལབ་སྒྲོན་འདུད། །མ་གཅིག་ཡེ་ཤེས་མཁའ་འགྲོ་མའི། །ཟབ་གསང་ཐུགས་ཀྱི་སྙིང་ཁུའི་ཆོས། །འཁྲུལ་རྟོག་དབྱིངས་སུ་གཅོད་པའི་ཐབས། །གདན་ཐོག་གཅིག་མའི་གསལ་བྱེད་དབྱེ། །དབྱིངས་ཡེ་ལས་དང་འཇིག་རྟེན་གྱི། །མཁའ་འགྲོའི་ཚོགས་དང་ཆོས་སྐྱོང་གིས། །གནང་བ་མཛོད་ལ་མཆོག་ཐུན་གྱི། །དངོས་གྲུབ་གདན་ཐོག་གཅིག་སྩོལ་མཛོད། །དེའང་མ་གཅིག་ལབ་ཀྱི་སྒྲོན་མ་ནི། དུས་གསུམ་གྱི་སངས་རྒྱས་ཐམས་ཅད་བསྐྱེད་པའི་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་ཉིད་མི་ཡི་ཟོལ་དུ་བྱོན་པ་སྟེ། འཇམ་དཔལ་རྩ་རྒྱུད་ལས། ང་ཡི་བསྟན་པའི་སྙིགས་མ་ལ། །ཡུམ་ཆེན་ཕ་རོལ་ཕྱིན་མ་ཡི། །སྤྲུལ་པ་ལབ་སྒྲོན་ཞེས་བྱ་འབྱུང་། །ཕྲིན་ལས་ཆོས་ཀྱི་དབྱིངས་ལ་སྤྱོད། །དེ་དང་འབྲེལ་བ་གང་ཡོད་པ། །བླ་མེད་འབྲས་བུ་ཐོབ་པར་འགྱུར། །ཅེས་དང་། མདོ་དྭངས་སྙིགས་འབྱེད་པ་ལས། །སྐྱེ་མེད་སྙིང་པོའི་དོན་ལ་མཁས། །ཅེས་དང་། དེའི་ཆོས་ནི་རྒྱས་པར་འགྱུར། །ཅེས་གསུངས་པའི་དམ་ཆོས་བདུད་ཀྱི་གཅོད་འདི་ནི་ཆོས་པའི་ཤན་འབྱེད། རྟོག་པའི་བག་འདོན། ལྷ་འདྲེའི་དབང་སྡུད། དངོས་གྲུབ་རྣམ་གཉིས་འབྱུང་བའི་ནོར་བུ་ལྟ་བུ་འདི་སངས་རྒྱས་ཐུབ་པ་ཆེན་པོ་ནས་ད་ལྟའི་བར་བྱིན་རླབས་ཀྱི་བརྒྱུད་པ་བར་མ་ཆད་པ་བཀའ་བརྒྱུད་དོན་གྱི་གདམས་པ་འདི་ལ་ཟབ་མོ་བདུད་ཀྱི་གཅོད་ཅེས་གྲགས་ཏེ། ཕར་ཕྱིན་བདུད་ལས་ཀྱི་སྐབས་སུ། གཟུགས་ནས་རྣམ་མཁྱེན་གྱི་བར་གང་ལ་ཆགས་ན་བདུད་ཀྱི་ལས་སུ་རིགས་པར་བྱའོ། །ཅེས་དང་ཆོས་ཐམས་ཅད་མཉམ་པ་ཉིད་ལ་ཤེས་རབ་ཀྱི་ཕ་རོལ་དུ་ཕྱིན་པ་མཉམ་པ་ཉིད་དོ། །ཞེས་པའི་དོན་ཁོང་དུ་ཆུད་དེ་འཁྲུལ་རྟོག་དབྱིངས་སུ་གཅོད། འཁྲུལ་མེད་མངོན་དུ་གྱུར། བདུད་བཞི་རང་སར་གྲོལ། མཉམ་པ་ཉིད་ལ་ལ་བཟླ་བ་སྟེ། མ་གཅིག་གིས་རེ་བ་མེད་པས་སངས་རྒྱས་གཅོད། །དོགས་པ་མེད་པས་འཁོར་བ་གཅོད། །ཉམས་ང་མེད་པས་བདག་འཛིན་གཅོད། །འགོ་འཛིན་མེད་པས་ནད་རིམས་གཅོད། །གཅད་བྱ་མེད་པས་ཀུན་ཀྱང་གཅོད། །ཅེས་དང་། ཀཿཐོག་པ་བྱ་བྲལ་འཁྲུལ་ཞིག་རང་གྲོལ་གྱིས། །གཅོད་ཅེས་བྱ་བའི་སྒྲ་དོན་གཏན་ཚིགས་ནི། །གཅད་བྱ་ཉོན་མོངས་བརྒྱད་ཁྲི་བཞི་སྟོང་ཡང་། །རྩ་བ་བདག་འཛིན་མཁན་པོ་འདི་ལ་ཐུག །གཅོད་བྱེད་མ་བཅོས་ཤེས་པ་སོ་མ་ཡིན། །བདག་འཛིན་འཁྲི་བ་རྩད་ནས་ཆོད་པས་གཅོད། །ཅེས་པའི་དོན་མདོ་རུ་དྲིལ་ན་གསུམ་སྟེ། མ་གཅིག་གིས། གཉན་ས་རི་ཁྲོད་འགྲིམ་པ་ཕྱི་ཡི་གཅོད། །ཕུང་པོ་གཟན་དུ་བསྐྱུར་བ་ནང་གི་གཅོད། །བདག་འཛིན་རྩད་ནས་གཅོད་པ་གསང་བའི་གཅོད། །ཅེས་གསུངས་པས། དང་པོ་ནང་བདག་གི་འཛིན་པ་མ་ཆོད་ན་ཕྱི་གཉན་ས་ཆུ་མིག་བརྒྱ་རྩ་འགྲིམ་ཀྱང་ལྷ་འདྲེས་རང་སྲོག་རྒོལ་ཅིང་སྔོན་ཆད་འཁྲུལ་པ་ཡང་འཁྲུལ་གྱི་སྣོན་མ་གྱུར་ནས་ནག་པོ་ཁ་འབྱམས་གཅོད་ལོག་བདུད་ཀྱི་བསྟན་པ་འགྱུར་ཉན་ཆེ་བས། བྱ་བྲལ་འཁྲུལ་ཞིག་རང་གྲོལ་གྱིས། །ཡང་གཅིག་གསོན་དང་འདི་སྐད་ཞུ། །ཕུང་པོ་གཅེས་འཛིན་གྱི་གཉན་ཁྲོད་འཇིགས་པ་དེ། །སྐྱིད་འདོད་བདེ་འདོད་ལྷ་འདྲེའི་ཆོ་འཕྲུལ་ཅན། །གཉན་ས་འཇིག་ཤིང་ཡ་ང་གཅིག་དེ་ན་གདའ། །སྒྱུ་ལུས་ཞེན་མེད་ཀྱི་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །འདོད་ཡོན་ལན་ཚྭ་ཆུ་བོའི་མཚོ་འགྲམ་ན། །འདོད་སྲེད་གདུང་བའི་ལྷ་འདྲེ་ཆོ་འཕྲུལ་ཅན། །གཉན་ས་འཇིགས་ཤིང་ཡ་ང་གཅིག་དེ་ན་གདའ། །ཞེན་པ་རང་ལོག་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །བདག་འཛིན་རྒྱ་བྲག་དམར་པོའི་ལོག་ཤེད་ན། །བདག་བཟུང་གདུག་པའི་ལྷ་འདྲེ་ཆོ་འཕྲུལ་ཅན། །གཉན་ས་འཇིག་ཤིང་ཡ་ང་ཅིག་དེ་ན་གདའ། །རང་རིག་བདག་མེད་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །ཕྱོགས་རིས་དངོས་འཛིན་གྱི་གཉན་ཁྲོད་འཇིགས་པ་དེར། །ཕྱོགས་འཛིན་ཞེན་པའི་ལྷ་འདྲེ་ཆོ་འཕྲུལ་ཅན། །གཉན་ས་འཇིགས་ཤིང་ཡ་ང་ཅིག་དེ་ན་གདའ། །ཕྱོགས་མེད་ཁྱབ་གདལ་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །ཚེ་འདིར་ལྟར་སྣང་དུ་ཞེན་པའི་གཉན་ཁྲོད་དུ། །འཇིག་རྟེན་ཆོས་བརྒྱད་དུ་ཞེན་པའི་ལྷ་འདྲེ་ཆོ་འཕྲུལ་ཅན། །གཉན་ས་འཇིགས་ཤིང་ཡ་ང་གཅིག་དེ་ན་གདའ། །སྒྱུ་མའི་དཔེ་བརྒྱད་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །རྗེས་སྣང་སྒྱུ་མ་ལྟ་བུའི་དུར་ཁྲོད་དུ། །རྗེས་ཤེས་ཕྲ་རག་ལྷ་འདྲེ་ཆོ་འཕྲུལ་ཅན། །གཉན་ས་འཇིགས་ཤིང་ཡ་ང་གཅིག་དེ་ན་གདའ། །ཡང་དག་དྲན་ཤེས་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །འཁོར་འདས་བདེ་སྡུག་གཉིས་ཀྱི་གཉེན་ཁྲོད་དེར། །བཟང་ངན་རེ་དོག་གི་ལྷ་འདྲེ་ཆོ་འཕྲུལ་ཅན། །གཉན་ས་འཇིགས་ཤིང་ཡ་ང་གཅིག་དེ་ན་གདའ། །རང་གནས་ཡེ་ཐོག་དམིགས་པའི་འཁྲུལ་འཁོར་གྱིས། །གྲོགས་པོ་སྙེམས་གཅོད་གཅིག་མཛད་ན་དེ་ན་མཛོད། །ཅེས་གསུངས། དེས་ན་དང་པོ་ནང་དང་གསང་བའི་གཅོད་ཉམས་སུ་ལེན་པ་ལ། ཡེ་ཤེས་སྒྱུ་མའི་གར་མཁན་རིག་འཛིན་ཀློང་གསལ་སྙིང་པོས། མདོ་རུ་བསྡུ་ན་འདི་ལྟ་སྟེ། །སྣང་བ་འཁྲུལ་པ་ཚར་གཅོད་ནས། །ཞེན་མེད་རི་ཁྲོད་འགྲིམས་དང་གཅིག །སྒྱུ་ལུས་གཅེས་འཛིན་ཚར་གཅོད་ནས། །ཞེན་མེད་མཆོད་སྦྱིན་བྱེད་དང་གཉིས། །གཉིས་འཛིན་འཁྲུལ་པ་ཚར་གཅོད་ནས། །ཞེན་མེད་སྒྱུ་མའི་ལམ་ཁྱེར་གསུམ། །ཉམས་སུ་ལེན་པའི་རྩ་ཚིག་གོ། །ཞེས་གསུངས་པས། དང་པོ་འདུ་འཛིའི་ཉེས་དམིགས་དང་དབེན་པའི་ཡོན་ཏན་ལ་བསམ་ནས་རི་དྭགས་སྨས་མ་བཞིན་དུ་བས་མཐའ་ནགས་འདབས་བྲག་ཕུག་སོགས་སུ་སོང་ནས་དགྲ་འདུལ་གཉེན་སྐྱོང་གསོག་བྲུན་མེད་པར་ཕྱི་འཇིག་རྟེན་གྱི་འཁྲི་བ་བཙན་ཐབས་སུ་གཅོད་ཅིང་ཞེན་མེད་རི་ཁྲོད་དུ་སོང་ནས། གཅོད་ཁྲིད་གསལ་བའི་སྒྲོན་མེ་ལས་བཤད་པ་བཞིན་བློ་ལྡོག་རྣམ་པ་བཞི་དང་། བྱམས་སྙིང་རྗེ་བྱང་ཆུབ་སེམས་ལ་བློ་སྦྱང་བ་གལ་ཤིན་ཏུ་ཆེ་བ་ཡིན་ཏེ། གཏེར་ཆེན་ཀློང་གསལ་གྱིས། དང་པོ་དལ་འབྱོར་རྟེན་བཟང་འདི། །རྙེད་དཀའི་ཤེས་པས་ཕྱི་བཤོལ་གཅོད། །དུས་བཞིའི་འགྱུར་ལྡོག་སྐྱེ་འཆི་སོགས། །རིམ་པར་བསམ་པས་ལེ་ལོ་གཅོད། །ཆོས་ཀུན་ངང་ལ་བསུ་སྐྱེལ་སྤང་། །རག་ལུས་སྣང་ཡུལ་གཟུང་རྟོག་གཅོད། །བཟོ་བཅོས་བྲལ་བའི་རང་རིག་པས། །ང་བདག་འཛིན་པའི་རྟོག་པ་གཅོད། །རང་རིག་རྒྱལ་པོར་འཇུག་པ་ཡིས། །བྱིང་རྨུག་འཐིབ་སོགས་མ་རིག་གཅོད། །ཞེན་མེད་བདེ་གསལ་མི་རྟོག་པས། །རྟག་ཆད་མུ་བཞིའི་གོལ་ས་གཅོད། །ལྟ་སྒོམ་ལས་སུ་རུང་བ་ཡིས། །རེ་དོག་གཉིས་འཛིན་ཤེས་པ་གཅོད། །ཚད་མེད་བཞི་དང་བྱང་སེམས་ཀྱིས། །སྲིད་དང་ཞི་བའི་མཐའ་གཉིས་གཅོད། །དེ་ལྟའི་མན་ངག་ལམ་ཁྱེར་གྱིས། །ཆོས་མ་ཡིན་དང་ལོག་རྟོག་གཅོད། །ཅེས་གསུངས་སོ། །དེས་ཕྱི་འཇིག་རྟེན་གྱི་འཁྲི་བ་བཙན་ཐབས་སུ་གཅོད་ཅིང་ཞེན་མེད་རི་ཁྲོད་འགྲིམས་པ་དེ་སོང་། གཉིས་པ་ནང་གཅེས་འཛིན་གྱི་ཤེས་པ་བཙན་ཐབས་སུ་གཅོད་ཅིང་ཞེན་མེད་མཆོད་སྦྱིན་བཏང་བ་ལ། ཚོགས་བསགས་ལུས་སྦྱིན་གྱི་རིམ་པ་དང་། བསྐྱེད་བཟླས་ཏིང་འཛིན་གྱི་རིམ་པ། ཉམས་བསྐང་ཚོགས་འཁོར་གྱི་རིམ་པ་དང་གསུམ་ལས། དེ་དག་དཀྱུས་གཅིག་ཉམས་སུ་ལེན་པ་ལ། སྦྱོར་བ་ཡོ་བྱད་ཀྱི་ཉེ་ལྡོག་དང་། དངོས་གཞི་ཉམས་ལེན་གྱི་རིམ་པ་གཉིས་ལས། དང་པོ་རིང་སྦྱོར་ལ་མཁོ་བའི་ཡོ་བྱད་ནི། དྲེགས་པ་ཟིལ་གྱིས་གནོན་པའི་ཕྱིར། །ལྡེར་བཞི་མ་ཉམས་གཅན་གཟན་ལྤགས། །ལྟ་བ་ཡས་འབུབ་ཅོག་པུ་དང་། །སྤྱོད་པ་མས་འཛེག་ཁ་ཊཱྃ་ག །ལྷ་འདྲེ་དབང་སྡུད་མཆོག་ཆེན་རྐང་། །སྣང་བ་ཟིལ་གནོན་ཌཱ་མ་རུ། །མ་ཚོགས་དབང་སྒྱུར་དྲིལ་གཡེར་དང་། །སྟག་གཟིག་རས་མ་སྐྲའི་ཅོད་པན། །མདོར་ན་བརྟུལ་ཞུགས་སྤྱོད་པ་ལ། །འོས་པའི་ཆས་རྣམས་སྟ་གོན་བྱ། །ཅེས་རྫོགས་ཆེན་པ་རང་བྱུང་རྡོ་རྗེས་བཤད་པ་ལྟར་འདུ་བྱ་བ་ལ། དེ་ལ་གཅོད་པའི་རྣལ་འབྱོར་གྱིས། ཆས་ལ་འོས་པའི་ཡོ་བྱད་ནི། །སྦྱིན་པའི་དྲ་བ་ཚུལ་ཁྲིམས་སྟན། །བཟོད་པའི་ཅོག་པུ་བརྩོན་འགྲུས་དུང་། །བསམ་གཏན་པུས་འཁྱུད་ཤེས་རབ་ནི། །ཌཱ་རུའི་རྣམ་པར་བཞག་པའོ། །ཅེས་པ་ལྟར། རྐང་གླིང་དང་ཌཱ་རུའི་རྣམ་དབྱེ་ཅུང་ཟད་འབྲི་བ་ལ། །བཙུན་པ་སྡོམ་ལྡན་སྐྱེ་བོ་ཡ་རབ་དང་། །བུད་མེད་མཚན་ལྡན་སྐྱེས་པ་གྲིར་ཤིའི་རྐང་། །བཅུ་དྲུག་ནས་ནི་དྲུག་ཅུ་ཚུན་གྱི་རྐང་། །གཞན་གྱི་འགོམ་ཡུག་མ་ཕོག་མ་ཉམས་པ། །མགོ་མཇུག་ཚིག་མགོ་གཉིས་དང་བཅས་པ་སྟེ། །སེ་བ་རུས་དང་འབུར་ཆུང་བར་དུ་བཅད། །རུས་འབུར་གཉིས་སུ་མཐེབ་ཆེན་ཙམ་རེ་བྲུ། །རིང་ཞིང་ཅུང་ཟད་གུག་པ་སྣ་འདྲ། །སྲ་ལ་ཕྲ་ཟིང་ཧྲིལ་པོ་རྒང་ཐུར་འདྲ། །ལྷ་མགོ་མི་ཆུང་སེངྒེའི་སྣ་དང་འདྲ། །ནང་གི་རུས་གཏིང་གྲིམ་ཞིང་མ་འཁྱོག་པར། །མདོག་ནི་དཀར་པོ་རབ་ཡིན་སྨུག་ཀྱང་རུང་། །དེ་འདྲའི་རྐང་གཡས་དཔའ་བོའི་འབོད་རྫས་ཏེ། །གཡོན་པ་དག་ནི་དཔའ་མོ་འབོད་པའི་རྫས། །མཁའ་འགྲོའི་འབོད་རྫས་བུད་མེད་མཚན་ལྡན་རྐང་། །གྲི་རྐང་དར་མ་དཔའ་བོ་འབོད་པའི་རྫས། །ཅེས་དང་། ཡང་ཀུན་མཁྱེན་གྱིས། མཆོག་ཆེན་མི་རྐང་གླིང་བུ་ཡིན། །བརྡ་དོན་རྟགས་གསུམ་བཤད་ཀྱིས་ཉོན། །རྟོག་མེད་རོ་ཡི་ཡན་ལག་ལས། །ཆགས་སྡང་མེད་པའི་སེམས་ཀྱིས་བྲེག །ལྷ་བ་ཕྱུང་ཞིང་བྲད་བརྡར་བྱས། །ཕྱི་ནང་གཟུང་འཛིན་སྤང་བའི་བརྡ། །རྐང་གླིང་ཁ་སྒོ་གཅིག་པ་ནི། །ཆོས་ཀུན་དུ་མ་རོ་གཅིག་བརྡ། །རྩ་བ་མཛོ་སྣ་ཟུང་འབྲེལ་ཅན། །ཆོས་སྐད་ཟུང་འཇུག་གཅིག་ཏུ་སྟོན། །གཤམ་ལ་འབྲེང་ལྕགས་ཅོད་པན་ཅན། །གྲུབ་ཐོབ་རྗེས་སུ་འབྲང་བའི་དོན། །དྲང་ཞིང་སྟོང་པ་གཞུང་མིག་ཅན། །མཐའ་ལ་མི་གནས་དབུ་མའི་དོན། །འབུད་པ་རླུང་གི་རྟེན་འབྲེལ་ལས། །རོ་རྐྱང་དབུ་མ་ཡང་དག་འཛུད། །ཐོས་པས་ལྷ་འདྲེའི་ཡིད་རྩ་ཁོལ། །ཉན་པས་རང་སྣང་གཞན་སྣང་འགྱུར། །དབང་སྡུད་དུས་ལན་གསུམ་འབུད་པའི་ཚེ། །དང་པོས་ཐམས་ཅད་ཉོན་ཅིག་ཐོས། །གཉིས་པས་འདིར་འདུས་ཟེར་བ་ཐོས། །གསུམ་པས་མདུན་དུ་འདུས་པ་ཐོས། །གཞན་ལ་ལན་བཞི་འབུད་པའི་ཚེ། །དང་པོས་སྣང་བ་ཟིལ་གྱིས་གནོན། །གཉིས་པས་མགྲོན་རྣམས་སྤྱན་འདྲེན་བྱེད། །གསུམ་པས་ཕམ་རྒྱལ་མེད་པར་བསྔོ། །བཞི་པས་གཟུང་འཛིན་ཐད་ཀར་གཅོད། །སྤྱན་འདྲེན་ལ་ཛཿཧཱུྃ་བཾ་ཧོཿས་མཚོན། །ལེ་ལོའི་གཉིད་ལས་སད་པའི་ཕྱིར། །བརྩོན་འགྲུས་ཕ་རོལ་ཕྱིན་པ་ལགས། །རྐང་གླིང་ངན་པའི་མཚན་ཉིད་ནི། །དམེ་མུག་ནལ་དང་རབ་ཆད་ཤན། །ལྕེབ་ཡུག་མཛེ་ཕོ་མཚན་ངན་རྐང་། །སྐྱ་བོ་ཐལ་སྐྱ་འཐུག་དང་གསུ། །ཤད་ཤད་སོ་དང་ཧ་ཀྱང་གུག །གདོང་རུས་མི་དྲང་གཡས་གཡོན་འཁྱོག །དུམ་བུར་འཁྱོག་དང་ཐུམ་པོར་ཉམས། །ཧ་ཀྱང་སྦོམ་དང་གས་པ་དང་། །ལྷ་མགོ་ཆད་དང་ཕྲག་སྒང་ཆད། །ལེབ་ལེབ་པོ་དང་ཟུར་མང་དང་། །སྐད་ནི་མི་འཕྲང་འདོར་འདོར་འོང་། །ལྷ་མགོ་རྭ་ལྕགས་ཤིང་སྦྱར་བ། །དེ་དག་འཆང་དང་འབུད་མི་རུང་། །བུས་ན་སྒྲ་ལོག་གོ་གྱུར་ནས། །ཡིད་མི་དགའ་ཞིང་གནོད་སེམས་སྐྱེ། །ཡུལ་དེ་མི་དགེ་སྣ་ཚོགས་འབྱུང་། །དེ་དག་ནམ་ཡང་སྤང་བར་བྱ། ༈ །ཤེས་རབ་ཌཱ་རུའི་མཚན་ཉིད་བཤད། །གྲགས་སྟོང་སྒྲ་སྒྲོགས་ཌཱ་མ་རུ། །དཔའ་བོ་ཐབས་ཀྱི་གླུ་ལེན་པ། །རྩ་གསུམ་དམ་ཅན་འདུ་བའི་རྟེན། །ཌཱ་རུ་ཤིང་ལས་བྱས་པ་ནི། །བསྟན་པའི་སྲོག་ཤིང་འཛིན་པའི་བརྡའ། །ནང་དུ་སྟོང་པ་འདུག་པ་ནི། །སེམས་ཉིད་ཡེ་ནས་སྟོང་བའི་བརྡའ། །གཡས་གཡོན་ལྤགས་པས་གཡོག་པ་འདི། །གཉིས་སྣང་སྒོ་ཆོད་འགགས་པའི་བརྡའ། །ཐོད་པ་སྐམ་རློན་བྲིས་པ་འདི། །ཁྲག་འཐུང་དྲུག་ཅུའི་བསྐོར་བའི་བརྡའ། །ཌཱལ་ཆིང་འཁོར་གཅིག་བྱས་པ་འདི། །ཆོས་སྐུ་རོ་གཅིག་རྟོགས་པའི་བརྡ། །དུང་གདན་དཀར་པོ་བཏགས་པ་འདི། །དཔའ་བོ་དབང་དུ་འདུ་བའི་བརྡའ། །ལྷུ་འཛིན་ཨ་ལུང་བཏགས་པ་འདི། །གསང་སྔགས་ཆོས་འཁོར་བསྐོར་བའི་བརྡའ། །དར་ཚོན་སྣ་ལྔ་བཏགས་པ་འདི། །མཁའ་འགྲོ་དབང་དུ་འདུ་བའི་བརྡའ། །ཤི་སྐྲ་ཆུན་ཅིག་བཏགས་པ་འདི། །མི་རྟགས་རྒྱུད་ལ་བསྐོར་བའི་བརྡའ། །གསོན་སྐྲ་ཆུན་གཅིག་བཏགས་པ་འདི། །རྐྱེན་ངན་ལམ་དུ་སློང་བའི་བརྡའ། །གཅན་གཟན་ལྤགས་པ་བཏགས་པ་འདི། །ལྷ་འདྲེ་ཟིལ་གྱིས་གནོན་པའི་བརྡའ། །འགུགས་བྱེད་ལྕགས་ཀྱུ་བཏགས་པ་འདི། །ཁམས་གསུམ་སེམས་ཅན་འདྲེན་པའི་བརྡའ། །མགྲོན་ཐེམ་དཀར་པོ་བཏགས་པ་འདི། །མཐོ་རིས་ཐར་ལམ་བསྒྲོད་པའི་བརྡའ། །རིན་ཆེན་སྣ་ལྔ་བཏགས་པ་འདི། །སྐུ་ལྔའི་དངོས་གྲུབ་ཐོབ་པའི་བརྡའ། །སྣང་གསལ་མེ་ལོང་བཏགས་པ་འདི། །སྣང་སྲིད་ཆོས་སྐུར་ཤར་བའི་བརྡའ། །མཁའ་འགྲོའི་བརྡ་སྐད་སྒྲོགས་པ་འདི། །གཉན་ས་དུར་ཁྲོད་འགྲིམ་པའི་བརྡའ། །བརྡའ་དང་པོ་བླ་མ་ཡི་དམ་འབུལ། །གཉིས་པ་མ་དང་མཁའ་འགྲོར་འབུལ། །གསུམ་པ་ཆོས་སྐྱོང་སྲུང་མར་འབུལ། །བཞི་པ་སྣང་སྲིད་ལྷ་འདྲེ་སོགས། །སྒྲ་འདི་ཐོས་མ་གྱུར་སེམས་ཅན་ཀུན། །དོན་ཆོས་ཉིད་རང་སྒྲ་སྒྲོགས་གྱུར་ནས། །ལུས་འཇའ་ལུས་འོད་སྐུར་འགྲུབ་པར་ཤོག །མ་དང་མཁའ་འགྲོ། མ་དང་མཁའ་འགྲོ། མ་དང་མཁའ་འགྲོ། འདིར་འདུས་ཤིག །ཅེས་རྗེ་དྲུང་བཞད་པ་རྡོ་རྗེའི་གསུངས་དང་། ཀུན་མཁྱེན་རང་བྱུང་རྡོ་རྗེས། ཌཱ་རུ་ལ་འཁོར་འདས་ལམ་གསུམ་ཚང་། །འཁོར་བ་སྡུག་བསྔལ་གྱི་ནགས་ཁྲོད་ནས། །མྱང་འདས་ཀྱི་སྟ་རེ་རྣོན་པོ་ཡིས། །གཟུང་འཛིན་ལམ་གྱི་ལྗོན་ཤིང་བཅད། །མན་ངག་བདུན་ལྡན་གྱི་ཤིང་མཁན་དེས། །འཁོར་འདས་རྒྱང་གྱེས་ཀྱི་ཌཱ་རུ་བཟོས། །གཉིས་སྣང་འུབ་ཆུབ་ཀྱི་ལྤགས་པས་གཡོགས། །སྣང་སྟོང་ཟུང་འཇུག་གི་སྐེད་ཆིང་བཏང་། །ཐབས་དང་ཤེས་རབ་ཀྱི་དབྱུག་ཏོ་ཅན། །མཁའ་འགྲོ་བླ་ཆགས་ཀྱི་མགྲོན་ཚོམ་མཛེས། །ཡེ་ཤེས་ལྔ་ལྡན་གྱི་མན་ཚར་གདག །གསོན་སྐྲས་མ་མོ་བྲན་ཏུ་ཁོལ། །ཤི་སྐྲས་མཁའ་འགྲོ་དབང་དུ་སྡུད། །སྣང་བ་ཟིལ་གནོན་སྟག་གཟིག་རས། །མ་ཚོགས་དབང་འགྱུར་དྲིལ་གཡེལ་ཅན། །ཌཱཀྐ་ཌཱཀྐིའི་ཕྱག་མཚན་ཏེ། །མཐོང་བས་སྣང་སྲིད་རྣམ་རྟོག་འགག །འཁྲོལ་བས་གཞན་སྣང་དབང་དུ་འདུ། །བཅང་པས་མ་ཚོགས་མཁའ་འགྲོ་ཉེ། །སྣང་སྲིད་ལྷ་འདྲེའི་སྲོག་ནས་འདྲེན། །གྲགས་སྟོང་དབྱེར་མེད་རང་སྒྲ་ཡིས། །བསྟན་གཡོ་མ་ལུས་འདར་ཞིང་འཁྲུག །ཤེས་རབ་ཕ་རོལ་ཕྱིན་པའོ། །ཞེས་སོ། །སྤྱིར་གཅོད་ལ་རྒྱལ་བ་དོན་འགྲུབ་ནས་བརྒྱུད་པ་གཙོ་བོ་མདོ་ལུགས་དང་། ཐོད་སྨྱོན་བསམ་འགྲུབ་ནས་བརྒྱུད་པ་གཙོ་བོར་སྔགས་ལུགས་དང་། ཁུ་སྒོམ་ཆོས་སེང་ནས་བརྒྱུད་པ་མདོ་སྔགས་ཟུང་འཇུག་དང་། ལ་འདུལ་རྡོ་རྗེ་སྒྲོན་མ་ནས་བརྒྱུད་པ་གཏེར་མ་ཞེས་གྲགས་པ་ལས། འདིར་ནི་ཁུ་སྒོམ་ནས་བརྒྱུད་པ་མདོ་སྔགས་ཟུང་འཇུག་སྟེ། མ་གཅིག་གིས་ཕྱིས་གཅོད་ལོག་དར་བ་གསལ་བྱེད་རང་བྱུང་རྡོ་རྗེ་དང་། པཎྜི་ཏ་དོན་ཡོད་རྡོ་རྗེས་དབྱེ་གསལ་བྱེད་པོར་རྡོ་རྗེ་སྒྲོན་མས་བཀའ་གནང་ལུང་བསྟན་པའི་དོན་ཡོད་རྡོ་རྗེའི་གསུང་གི་རྗེས་འབྲང་གཅོད་ལོག་གི་འཁྲུལ་པ་དང་བྲལ་བར། ཀཿཐོག་པ་ལྔ་ཚོ་ཀུན་དགའ་འབུམ་པ་དང་། བསོད་ནམས་འབུམ་པའི་ཕྱག་བཞེས་དེང་གི་བར་ཟམ་མ་ཆད་པའི་བརྒྱུད་པའི་ཕྱག་བཞེས་ཉམས་སུ་ལེན་པ་ལ། དང་པོ་ཉེ་སྦྱོར་ལ་སྦྱོར་བ་ཡོ་བྱད་ཀྱི་བཅས་བཤམས་ལ་དུར་ཁྲོད་སོགས་གནས་དབེན་པར་སྟེགས་ཀྱི་ཁར་རབ་སྡུལ་ཚོན། འབྲིང་རས་བྲིས། ཐ་མ་ཚོམ་བུ་སྟེ་རྒྱས་འབྲིང་གི་ལག་ལེན་གཞུང་དུ་གསལ། འདིར་བསྡུས་པ་ཙམ་ལ་མཉྫུའི་ཁར་འབྲུའི་ཚོམ་བུ་ལྔ་བཀོད། དབང་ངམ་བདག་འཇུག་དང་འབྲེལ་ན། དེ་སྟེང་བུམ་པ་རྫས་སོ་ལྔ་བཅས་དབང་གཞུང་ལྟར་རྒྱབ་སྟེགས་ཀྱི་ཁར་རྩ་གསུམ་སྤྱི་ལྟར། ཚོམ་བུའི་མདུན་གདན་ཟླ་གམ་གསུམ་མམ་གཅིག་གི་སྟེང་ཟླུམ་གཏོར་རམ་སྟོད་ཟུར་གྲི་གུག་དབྱིབས་ཅན་ལྔ་ཚོམ་རྒྱན་སྤྲོས་ཅན། གཡས་གཡོན་སྨན་རག །ཚོམ་བུའི་ཟུར་བཞི། མགོན་པོ་ཤར། མ་མོ་ལྷོ། མགར་གཏོར་ནུབ། རྣམ་སྲས་བྱང་དུ་བཀོད། བསྐང་གཏོར་བྱ་ན་བང་རིམ་བཞི་སྟེང་མཁའ་འགྲོའི་གཏོར་མ་ལ་མཆོད་རྫས་སྣ་ཚོགས་དང་གཟུགས་འགྲོས་སྣ་ཚོགས་པར་བཏབ་པས་བསྐོར་རོ། །གཅོད་ཀྱི་སྲུང་མར་དམར་གཏོར་གཉིས་དཀར་གཅིག །རྣམ་བདུན་བསྐོར་བཤམས་དང་ཕྲེང་ཚར། ༈ སྤྲོ་ན་གཏེར་གཅོད་ལྟར་བཙན་གཏོར་མཁར་ཐབ་སྟེང་ནོར་བུ་སུམ་ཚུགས། གཡས་བཙན་གཏོར་གཡས་དཀྱུས། གཡོན་དུ་བདུད་གཏོར་གཡོན་དཀྱུས། རྒྱབ་ཏུ་གཤིན་རྗེ་ཟུར་གསུམ། མདུན་དུ་མ་མོ་ཟུར་གསུམ། འཁོར་གཏོར་ཆུང་བདུན་བྱ་དང་ཤ་སྣ་སྙིང་གིས་བརྒྱན། ཛ་སྤྲུལ་རིན་པོ་ཆེའི་ཟིན་ལས་གསུང་། གང་ལྟར་ཡང་རྣམ་ལྔ་སྨན་རཀ་གཏོར་གསུམ་སོགས་སྤྱན་གཟིགས་སྣ་ཚོགས་ཀྱིས་བསྐོར། གཏོར་འབུལ་བཤོས་ཟླུམ་སྙིང་གཟུགས། དཀར་བགེགས། བསྐུལ་ཆད་བརྟན་སྤྱི་ལྟར། ཚོགས་གཏོར་རིན་ཆེན་སྤུང་པ། གདན་ཟླུམ་པོའི་སྟེང་ནོར་བུ་ལྔ་ཚོམ་རིལ་བུ་མང་པོས་བསྐོར་བ། ཡང་ན་བམ་གཟུགས་ཤ་ཆང་སོགས་ཟས་སྣས་བསྐོར་བ་གཅན་གཟན་ལྤགས་པའི་སྟེང་ཤར་ལྷོར་བཀོད། དེ་ནས་རང་གི་མདུན་ཐོད་པ་མཚན་ལྡན་སྦྲང་ཆང་ཨ་མྲྀ་ཏས་སྦག་པ་ཁ་ཁེབ་ཅན། ཌཱ་མ་རུ། རྐང་གླིང་། རྡོར་དྲིལ། མི་ལྤགས་ར་ཐང་ལྤགས་པས་ཆོག་ཅེས་ཆགས་མེད་རིན་པོ་ཆེས་གསུངས། མཆན། ཀྱི་གཡབ་མོ། ཕུར་པ། འཐོར་ནས། ལས་བུམ་ཡང་ན་དཀྱིལ་འཁོར་གྱི་བྱང་ཤར་བཀོད། དེ་ནས་སྟན་བདེ་བར་ཀོ་ལྤགས་བཏིང་། གཅོད་མ་གྲོལ་བར་གདན་མི་བསྒུལ། མི་ལྤགས་ཀྱི་གཡང་གཞི་ས་སྟེང་ཁྱབ་པར་མོས་ནས་ཞག་རེ་ལ་བསྐལ་པ་རེ་ཡིན་པར་མོས་ནས་དོམ་རས་ཐོད་པར་གཡོག་ལ་དངོས་གཞིའི་ཉམས་ལེན་ལ་འཇུག་པར་བྱའོ། །དེ་ཡང་སློབ་དཔོན་ཉམས་མྱོང་གི་དྲོད་དང་ལྡན་པ་ལས་དབང་བསྐུར་ཆོས་ཀྱི་སྒོ་འབྱེད་ཅིང་རྒྱུད་སྨིན། ཁྲིད་ཡིག་གསལ་སྒྲོན་གྱིས་ཉམས་ལེན་གནད་སྨིན་གྱིས་གྲོལ་བའི་ཐབས་འབད། དམིགས་འབུམ་མུ་ཏིག་ཕྲེང་བའི་མན་ངག་ཡིད་ལ་འདྲེས་པར་བྱས། མཁའ་འགྲོ་སྡེ་ལྔའི་མངོན་རྟོག་ཆེ་ཆུང་གི་དོན་ལ་མི་རྨོངས་པར་རྒྱབ་བརྟེན་ལུང་བཅས་རྫོགས་པའི་གང་ཟག་གིས། ཟབ་མོ་བདུད་ཀྱི་གཅོད་འདི་ལ་འཇུག་པའི་དང་པོ་བདུད་ངོས་བཟུང་ནས་དེ་གཅོད་པའི་ཐབས་ངེས་དགོས་པས། བཀའ་ཚོམ་ལས། ཐོག་བཅས་བདུད་དང་ཐོག་མེད་བདུད། །དགའ་བྲོད་བདུད་དང་སྙེམས་བྱེད་བདུད། །དེའང་སྙེམས་བྱེད་བདུད་ལ་ཐུགས། །ཐོག་བཅས་ཡུལ་གྱི་འཁྲི་བ་བཅད། །ཐོག་མེད་ཡིད་ཀྱི་འཁྲི་བ་བཅད། །དགའ་བྲོད་ཞེན་པའི་འཁྲི་བ་བཅད། །སྙེམས་བྱེད་བདག་གི་འཁྲི་བ་བཅད། །ཅེས་གསུངས་པས་སོ། དབང་ཡུལ་དུ་གཟུགས་སོགས་དངོས་སུ་ཐགས་པ་ལ། བཟང་ངན་འཛིན་ནས་ཆགས་སྡང་སྐྱེ་བ་ནི་ཐོག་བཅས་ཀྱི་བདུད་དོ། །དབང་ཡུལ་དངོས་སུ་མེད་རུང་། ནང་བཟང་ངན་གྱི་རྟོག་པ་ཉོན་མོངས་གང་སྐྱེས་ཐོག་མེད་བདུད། རང་ལ་བསྙེན་བཀུར་དང་ཉམས་རྨི་ལྟས་སྙན་གྲགས་ལོངས་སྤྱོད་རྒྱས་པ་ལ་དགའ་ཞིང་བྲོད་པ་སྟེ་ང་རྒྱལ་སྐྱེ་བ་དགའ་བྲོད་བདུད། སྙེམས་བྱེད་ནི་བདུད་གོང་མ་གསུམ་གྱི་འབྱུང་ཁུང་ང་བདག་གཉིས་འཛིན་འདི་ལྷན་སྐྱེས་ཀྱི་མ་རིག་པ་སྟེ། དེ་ག་ཇི་ལྟར་གཅོད་ན། ལེ་ལགས་ལས། བདུད་རྣམས་མ་ལུས་སེམས་སུ་བཅད། །སེམས་ནི་སྐྱེ་མེད་དབྱིངས་སུ་གྲོལ། །ཅེས་པ་སྟེ། སེམས་གཞི་མེད་རྩ་བྲལ། སྣང་བ་བདེན་མེད་སྒྱུ་མ་ལ་ཞེན་མེད་རང་གྲོལ་དུ་བཞག་པས། བཀའ་ཚོམ་ལས། སེམས་ཀྱི་རྩ་བ་ཆོད་གྱུར་ན། །འདྲེ་རྣམས་རང་སར་ཡལ་བར་འགྱུར། །ཞེས་སོ། །འདོད་ཡོན་ལ་ཡེང་བ་རྣམ་གཡེང་ལྷ་བུའི་བདུད། ཕུང་པོ་ན་རྒས་ཕུང་པོའི་བདུད། ཉོན་མོངས་ཀྱི་འབྲས་བུ་སྡུག་བསྔལ་ཉོན་མོངས་བདུད། ལུས་སྲོག་འབྲལ་བ་འཆི་བདག་གི་བདུད། འདོད་ཡོན་ལ་ཞེན་པ་མེད་པས་དབེན་པར་རོ་སྙོམས་ཐོག་རྫིས་ཀྱིས། རྣམ་གཡེང་ལྷའི་བདུད་གཅོད། རིག་པ་མཁའ་ལ་སྤར་ཏེ་དབྱིངས་རིག་དབྱེར་མེད་གྱུར་ཚེ་སྐྱེ་འཆི་བྲལ་བ་འཆི་བདག་གི་བདུད་གཅོད། ལུས་སེམས་བྲལ་ནས་ཤ་ཁྲག་མཆོད་སྦྱིན་བྱས་པས། ཕུང་བདུད་དང་ཉོན་བདུད་གཅོད་པ་ཡིན། ད་ནི་བདུད་དེ་གཅོད་པར་བྱེད་པར་ལྷ་འདྲེ་དབང་བསྡུད་མཆོད་སྦྱིན་བྱེད་པ་ལ། དང་པོ་ལྷ་འདྲེ་ངོས་བཟུང་བ་ལ་རྣམ་པ་དྲུག་སྟེ། འཇིག་རྟེན་ཀུན་བཏགས་ཀྱི་ལྷ་འདྲེ། ངོ་བོ་གནས་ཚུལ་གྱི་ལྷ་འདྲེ། མཐོང་སྣང་སྒྲོ་བཏགས་ཀྱི་ལྷ་འདྲེ། རང་བཞིན་ལྷན་སྐྱེས་ཀྱི་ལྷ་འདྲེ། འགྱུར་མེད་ལས་དབང་གི་ལྷ་འདྲེ། མཐར་ཐུག་དོན་གྱི་ལྷ་འདྲེ་དང་དྲུག་གོ། །དང་པོ་འཇིག་རྟེན་ཀུན་བཏགས་ཀྱི་ལྷ་འདྲེ་ནི། འཇིག་རྟེན་པས་ཕན་བཏགས་པ་ལ་ལྷ། གནོད་བསྐྱལ་བ་ལ་འདྲེ་ཟེར་ཀྱང་། དགྲ་གཉེན་ངེས་མེད་སྐད་གཅིག་རེ་བཞིན་འགྱུར་ལྡོག་བྱེད་པ་ལ་ཉེ་རིང་ཆགས་སྡང་མེད་དགོས་ཏེ་གཉེན་གྱིས་ཆོས་ལ་ཕྱི་བཤོལ་བྱས་ནས་སྡུག་བསྔལ་གྱི་རྩ་བ་ཚུགས། དགྲ་ཡི་ལོག་སྒྲུབ་ལ་བཟོད་པས་ཆོས་དང་འཕྲད་ན་བདེ་བའི་མཆོག་ལ་སྦྱོར་བ་ཡིན་ནོ། །གཉིས་པ་ངོ་བོ་གནས་ཚུལ་ལ་གཟུགས་མེད་ཀྱི་ལྷ་འདྲེ་གཉིས་སྲིད་ཀྱང་། མཆོད་པའི་ལྷས་ཀྱང་ཕོག་ཐུག་གིས་གནོད་པ་བསྐྱལ་བ་དང་། བསྐྲད་བྱའི་འདྲེས་ཀྱང་མཐུན་པའི་གྲོགས་བྱེད་པའི་ཕྱིར། དེས་ན་བདེན་མེད་སྒྱུ་མའི་རང་བཞིན་ཆགས་སྡང་མེད་པར་བྱའོ། །གསུམ་པ་མཐོང་སྣང་སྒྲོ་བཏགས་ཀྱི་ལྷ་འདྲེ་ནི། འབྱུང་པོའི་རྒྱུད་རློམ་པའི་དཔའ་བོ་དང་ལྷ་མ་ལ་ཆོས་སྐྱོང་བབས་ནས་ལེགས་ཉེས་སྨྲ་བ། དུས་མིན་འཇའ་འོད་མེ་ཏོག་ལ་ལྷ་ཡི་དངོས་གྲུབ་བཟང་པོ་དང་། དུས་མིན་སྦྲུལ་གཅན་གཟན་སོགས་མཐོང་ན་འདྲེ་ཡི་ཆོ་འཕྲུལ་ཐན་ཞེས་ངན་པར་བརྩི་བ་ལ་སོགས་སྒྲོ་བཏགས་ཀུན་ལ་ཆེད་འཛིན་མེད་པར་སྒྱུ་མའི་རང་བཞིན་ཤེས་པར་བྱའོ། །བཞི་པ་རང་བཞིན་ལྷན་སྐྱེས་ཀྱི་ལྷ་འདྲེ་ནི། རིག་པ་ལས་ཡེ་ཤེས་ལྔ་མ་རིག་པ་ལས་དུག་ལྔ་རྣམས་བཟང་ངན་ལྷ་འདྲེ་ཟེར་རུང་། ཡེ་ཐོག་མེད་ནས་རང་ལ་ལྷན་སྐྱེས་གནས་ཀྱང་དོན་ལ་རང་ངོ་རང་གི་རིག་མ་རིག་ལས་གཞི་མེད་རྩ་བྲལ་ཤེས་པར་བྱའོ། །ལྔ་པ་འགྱུར་མེད་ལས་དབང་གི་ལྷ་འདྲེ་ནི་ལས་དཀར་ནག །དགེ་སྡིག །ཕན་གནོད། བདེ་སྡུག་འགྱུར་མེད་བསླུ་བ་མེད་པས་སྤང་བླང་མི་འཁྱོལ་བར་ཟབ་མོའི་ལམ་ལ་འཛིན་མེད་ཀྱི་བརྩོན་པར་བྱའོ། །དྲུག་པ་མཐར་ཐུག་དོན་གྱི་ལྷ་འདྲེ་ནི། སངས་རྒྱས་དང་སེམས་ཅན་མཐར་ཐུག་གི་ལྷ་འདྲེ་སྟེ། སངས་རྒྱས་ནི་གཏན་གྱི་སྐྱབས་བསླུ་བ་མེད། སེམས་ཅན་ཀུན་འཁོར་བ་ངན་སོང་གཏན་ཏུ་འཁྱམས་པ་ཀུན་དཀོན་མཆོག་གསུམ་ལ་ཚེ་རབས་གཏན་གྱི་སྐྱབས་གནས་ཞུ་ན། མཁའ་ཁྱབ་ཀྱི་སེམས་ཅན་ཀུན་སངས་རྒྱས་ཐོབ་པའི་ཆེད་དུ་འཁྲུལ་རྟོག་ང་བདག་དབྱིངས་སུ་གཅོད་པར་ཀ་དག་ཡེ་གྲོལ་ཆེན་པོའི་དབྱིངས་ལ་ཡེངས་མེད་གནས་བཞིན་མཆོད་སྦྱིན་ལ་འཇུག་པ་ཡིན་ནོ། །དེ་ནས་ཚོགས་བསགས་ལུས་སྦྱིན་ལ་འཇུག་པ་ལ་དོན་བརྒྱད་ཡོད་པ་ལས། གཉན་ས་བཅད་པའི་སྐབས། ས་རྒྱུས་མེད་པ་ལ་ཟིལ་གནོན་འཕེན་པ་ཚད་མེད་མཛོད་ཆེན་ལས། རང་ཉིད་ཁྲོས་མ་ནག་མོའི་ཐུགས་ཀ་ནས་ཕཊཿ གཅིག་བྱས་པ་ཙམ་གྱིས། གནམ་ལྕགས་ཀྱི་རྡོ་རྗེ་རྩེ་དགུ་པ་འཕྲོས་པས་ས་ཕྱོགས་དེར་ཕོག་པ་ཙམ་གྱིས་ཙམ་གཞོང་གསིག་པ་ལྟར་བྱས་ནས། ཕཊཿགཅིག་བྱས་པ་ཙམ་གྱིས། རྡོ་རྗེ་ཡོངས་སུ་གྱུར་པ་ལས་དཔའ་བོ་དཔའ་མོའི་གུར་ཁང་དེའི་རྒྱབ་མི་ནག་ལག་སྦྲེལ་གྱི་གུར་ཁང་། དེའི་རྒྱབ་མུན་པའི་གུར་ཁང་བསྒོམ། དེར་གནས་པའི་ལྷ་འདྲེ་ཐམས་ཅད་གར་ཡང་འགྲོ་དབང་མེད་པར་བསྒོམ། དེ་ནས་ས་མིག་བཙལ་བ་སོགས་ནི་གཞུང་དམིགས་འབུམ་ལས་གསལ་བར་འདིར་མ་སྤྲོས་སོ། །མཁའ་འགྲོ་སྡེ་ལྔའི་མངོན་རྟོག་ཆེ་བ་ནས། བདུད་རྩི་ནང་མཆོད་བྱིན་རླབས། ཧཾ་གིས་ལྕེར་མྱོང་། དེ་ནས་མཆོད་རྫས་བྱིན་རླབས། དྷརྨ་ར་ཎི་ལན་གསུམ། ཌཱ་རུའི་མཆོད་རོལ་ལན་གསུམ་བྱའོ། །དེ་ནས་དང་པོ་ཟིལ་གནོན་དབང་བསྡུད་ནི། མ་གཅིག་གིས། དམར་མོའི་དབང་བསྡུད་ནག་མོས་ཟིལ་གྱིས་གནོན། ཅེས་པས་དང་པོ་དབང་སྡུད་ནི། ཕཊཿ གཅིག་བྱས་པ་ཙམ་གྱིས། རང་ཉིད་རྗེ་བཙུན་མ་དམར་མོ་ཞལ་གཅིག་ཕྱག་གཉིས་སྤྱན་གསུམ་པ་སྐུ་སྟོད་མི་མངོན་དབྱིངས་སུ་སླེབ་པ། སྐུ་སྨད་ཞབས་གཉིས་རླུང་རི་ནག་པོ་རྡོ་རྗེ་རྒྱ་གྲམ་ལ་བརྟེན་པ། སྤྱན་གསུམ་མི་མངོན་ནམ་མཁའི་དབྱིངས་སུ་གཟིགས་པ་སྤྱན་གཡས་ཉི་མ། གཡོན་ཟླ་བ་དབུས་མ་ཁྲག་མཚོ་ཁོལ་པ། ཕྱག་གཡས་མི་ལྤགས་གཡང་གཞི་དམར་ལྷབ་ལྷབ་ཕྱར་བ། གཡོན་མི་རྐང་གླིང་བུ་ཚག་ཚག་འབུད་པས་ཁམས་གསུམ་དབང་དུ་བསྡུས་པ། སྲིད་གསུམ་ཟིལ་གྱིས་གནོན་པ་བར་སྣང་ལྷ་སྲིན་སྡེ་བརྒྱད་འདར་ཤིག་ཤིག་བྱེད་པ་གཅིག་ཏུ་གྱུར། ལག་གཡོན་མཐིལ་རྐང་གླིང་ཁ་བརྡབ་པ་དང་སྦྲག །ཕཊཿ ཕཊཿ ཕཊཿ འབྱུང་པོ་ཉམས་ཆུང་བ་རྣམས་མ་འཇིགས་ཤིག །མ་སྐྲག་ཅིག །མ་སྔང་ཞིག །ཐོས་པར་བསམ་ལ། འོ། གཙོ་བོའི་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཐོ་སྲིད་པའི་རྩེ་མོ་མན་ཆད་དམའ་ན་རག་གི་དམྱལ་ཁམས་ཡན་ཆད་མཐོ་བ་ནམ་མཁའི་ལྷ་བྲན་མན་ཆད། དམའ་བ་ས་འོག་གི་ལྟོ་འཕྱེ་ཡན་ཆད། དཔེ་དཀར་རྒྱལ་པོ་མན་ཆད། ཡུལ་འདྲེས་སྲིན་ཡན་ཆད་སྣང་ཞིང་སྲིད་པའི་ལྷ་འདྲེ་ཐམས་ཅད་ཚུར་འདུས་ཤིག །ཕཊཿ རྐང་དུང་གཅིག་འབུད། འོ། ཁྱད་པར་དུ་གཉན་ཁྲོད་འདི་ན་གནས་པའི་དཀར་པོ་ལྷ་ཡི་སྡེ་ཚན། ནག་པོ་བདུད་ཀྱི་སྡེ་ཚན། དམར་པོ་བཙན་གྱི༴ ཁྲ་བོ་གཟའ་ཡི་སྡེ༴ འཕེན་པོ་གཉན༴ ཕྱུག་པོ་ཀླུ༴ རཀྵ་སྲིན་པོ༴ ཕོ་མོ་མ་ནིང་གི་སྡེ་ཚན་དུ་གཏོགས་པའི་ལྷ་འདྲེ་ཐམས་ཅད་ཚུར་འདུས་ཤིག །ཕཊཿ རྐང་གླིང་གཅིག་འབུད། འོ། ཁྱད་པར་དུ་ཡང་ཆྒཻའི་ཕུང་པོ་ཁམས་དང་སྐྱེ་མཆེད་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མར་ནད་མི་ཕན་པར་བྱེད་པའི་ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། འཚེ་ལ་འདྲེ། མི་ལ་བསེ་རག །འགོང་པོ་ཐེའུ་རང་། གྲི་བོ་གྲེ་མོ། གནའ་འདྲེ་རྙིང་པ། ད་འདྲེ་སོ་མ། ཡུལ་འདྲེ་འཁྱམས་པོ། ཟ་འདྲེ་ཤི་གཤེད། ཁ་ཡི་དབུགས་ཕྲོག་ཅིང་ཁོག་པའི་སྲོག་གཅོད་པར་བྱེད་པའི་འབྱུང་པོ་བདུད་དང་ལོག་པར་འདྲེན་པ་ཐམས་ཅད་ཚུར་འདུས་ཤིག །ཕཊཿ རྐང་གླིང་གཅིག་འབུད། འོ། དེ་ལྟར་འདུས་པའི་ལྷ་འདྲེ་ཐམས་ཅད་བདག་ལ་ཉོན་ཅིག །ཁྱེད་རྣམས་ལས་དང་ཉོན་མོངས་པའི་དབང་དུ་གྱུར་པ་ཡིན་པས་བདག་གིས་ཁྱེད་རྣམས་ལ་ཟབ་མོ་ཆོས་ཀྱི་འབྲེལ་པ་བྱེད། དམ་པ་ཆོས་ཀྱི་འཁོར་ལོ་བསྐོར་བྱང་ཆུབ་མཆོག་ཏུ་སེམས་བསྐྱེད་ནས། རྣམ་མཁྱེན་སངས་རྒྱས་ཀྱི་ས་ལ་འགོད་པ་ཡིན་པས་བདག་གི་ཡིད་དད་གུས་དང་ལྡན་པས་ཉོན་ལ་ཕྲིན་ལས་མྱུར་དུ་བསྒྲུབ་ཤིག །བསྡུ་ན་འདི་ནས་ལུས་སྦྱིན་ལ་སྐྱབས་ཡུལ་ལ་འཇུག །དེ་ནས་ཌཱ་དྲིལ་བཅས་ལྷ་འདྲེའི་ལམ་གླུའི་རྟས། ཕཊཿ མ་མི་མངོན༴སོགས། སྐུ་མདོག་དམར་ནག༴སོགས། འདི་ན་དྲོ། ཕཊཿ སྤྱིར་སྟོང་གསུམ་གྱི་སོགས། འདིར་འདུས་ཤིག །ཧཱུྃ་ཧཱུྃ་ཧཱུྃ་ཕཊཿ ཐམས་ཅད་འདུས་པར་བསམ། ཕཊཿ རང་ཉིད་དཔའ་བོ་གོ་བརྗེ་བའི་ཚུལ་གྱིས་མ་ཅིག་ལབ་སྒྲོན་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིག་པ། ཕྱག་གཡས་ན་ཐོ་བ། གཡོན་ན་ལྕགས་ཀྱུ་བསྣམས་པ་གཅིག་ཏུ་གྱུར། པར་བསམ་ལ་ངག་ཏུ་ཧཱུྃ་བདུན་བརྗོད་པ་ཙམ་གྱིས། རང་གི་ཐུགས་ཀ་དང་སྨིན་མཚམས་བ་སྤུའི་གསེབ་ནས་ཁྲོ་ཆུང་རང་འདྲ་བ་གྲངས་མེད་པར་སྤྲོས་པས། ལྷ་འདྲེ་ཐམས་ཅད་གར་ཡང་འགྲོ་དབང་མེད་དེ་རང་ལ་ཕྱག་འཚལ་ཞིང་བཀའ་ཉན་གསུང་སྡོད་བྱེད་པར་གྱུར། ཕཊཿ ཌཱ་དྲིལ་བཅས་ཤ་ཟའི་འབོད་ཐུང་རྟས། ཧཱུྃ། མ་གཅིག་ཇོ་མོ་སོགས། ཟིལ་གྱིས་གནོན་པར་མཛོད། ཕཊཿ ཕཊཿ ཕཊཿ རྒྱུན་དུ་དམིགས་འབུམ་ལས་གསལ་ལྟར་དེ་ཙམ་གྱིས་ཆོག །ཅུང་ཟད་རྒྱས་པར་མོས་ན་དཔའ་བོ་གོ་བརྗེ་བ་ལྟར་ནག་མོས་དབང་བསྡུ། དམར་མོས་ཟིལ་གནོན་བྱ་སྟེ། ཁྲོས་མའི་དབང་བསྡུ། ཕཊཿ རང་ཐ་མལ་དུ་གནས་པའི༴སོགས། འབུམ་གྱིས་བསྐོར་བར་གྱུར། ཕཊཿ ཕཊཿ ཕཊཿ འོ། གཙོ་བོ་གདོན་ཆེན་སོགས་སྒྲུབས་ཤིག །ཁྲོས་མའི་དུར་ཁྲོད་བསྐུལ་པ། མ་འདི་ནས་ནུབ་ཀྱི་སོགས་ཟིལ་གྱིས་གནོན། ཕཊཿ ཕཊཿ ཕཊཿ དམར་མོས་ཟིལ་གནོན་ནི། ཕཊཿ རང་ཉིད་རྗེ་བཙུན་མ་དམར་མོ་སོགས་གོང་གི་དབང་སྡུད་ལྟར་བསྐྱེད་ནས། འདར་ཤིག་ཤིག་བྱེད་པ་གཅིག་ཏུ་གྱུར། ཕཊཿ ལི་ཁྲི་འབུམ་བསྐུལ། མ་གཅིག་ཇོ་མོ་སོགས་ནས། ཟིལ་གྱིས་གནོན་པར་མཛོད། ཕཊཿ ལྕགས་ཁང་སོགས། བསྐུལ་པ་དགོས་མིན་སྐབས་བསྟུན་ཆོག །གདོན་གནོད་ཚབ་ཆེ་བ་རྣམས་ནང་། ཆུང་བ་རྣམས་པར། དེ་དག་གི་རྒྱབ་རྟེན་རྣམས་ཕྱི་མར་འཁོད། དེའི་ཕྱི་ལ་དཔའ་བོ་དཔའ་མོའི་གུར་ཁང་། དེའི་རྒྱབ་རྡོ་རྗེའི་གུར། དེ་རྒྱབ་མི་ནག་ལག་སྦྲེལ། དེ་རྒྱབ་མུན་པའི་གུར་རྣམས་ཀྱིས་ནང་དུ་ཚུད་པས་ལྷ་འདྲེ་གར་ཡང་འགྲོ་དབང་མེད་པར་བསྒོམ། དབང་དུ་བསྡུ་ན། ས་འོག་ས་སྟེང་སོགས། འདུས་ཤིག །ཟིལ་གནོན་དམིགས་པས་འཐུས་སོ། །གཉིས་པ་སྐྱབས་འགྲོ་ནི། མ་ཅིག་གིས། བརྟེན་ས་དཀོན་མཆོག་གསུམ་པོ་གཅེས། ཞེས་པས་སྐྱབས་ཡུལ་གསལ་གདབ་པ་ནི། ཕཊཿ སྐད་ཅིག་གིས་མདུན་གྱི་ནམ་སོགས། བཞུགས་པར་བསམ། ཕཊཿ སོགས་ནས་ཡན་ལག་བདུན་པ་བཅས། སེམས་བསྐྱེད་དོ། །གསུམ་པ་སེམས་བསྐྱེད་ནི། མ་ཅིག་གིས། སྣང་སྲིད་སྙིང་རྗེས་སྐྱོང་བ་གཅེས། ཞེས་པས། ནམ་མཁའ་དང་མཉམ་པའི་སོགས། བྱའོ། །མ་ཅིག་གིས། ཚད་མེད་ཀྱི་སྙིང་རྗེ་རྒྱུད་ལ་སྦྱོང་། ཞེས་པས། སེམས་ཅན་ཐམས་ཅད༴ དུས་སོགས། དག་པར་བསམ། བཞི་པ་གསོལ་བ་བཏབ་པའི་ཡུལ་ཚོགས་ཞིང་གསལ་བ་ནི། ༀ་སྭ་བྷ་ཝ༴ བདག་དང་དངོས་པོ་སོགས། བཾ་ཧོཿ རྐང་གླིང་ཌཱ་དྲིལ་བཅས། སྤྱན་འདྲེན་ནི། མ་ཅིག་གིས་དབྱིངས་གླུས། ཧཱུྃ། མ་ལུས་སེམས་ཅན་སོགས། བཞུགས་གསོལ། ཕྱག་འཚལ། མཆོད་པ་རྒྱས་པར་ཕྱི་མཆོད་སོ་སོར་ཁ་ཕྲལ། དེ་ནས་མཎྜལ་ནི། མ་ཅིག་གིས། བདག་བདེ་ཕུལ་ན་ཚོགས་རྫོགས། གཞན་སྡུག་བླངས་ན་དོན་ཆེ། འཁྲི་བ་བཅད་ན་བློ་བདེ། དམིགས་པ་མེད་ན་མཐར་ཕྱིན། ཞེས་པ་འདི་འོག་མ་ཀུན་ལ་ཤེས་པ་གལ་ཆེ་བ་ཡིན། ཕཊཿ ཕུང་པོ་ཁྲོལ་གྱིས་ཞིག་སོགས། བཞེས་སུ་གསོལ། སྤྲོ་ན་གཅོད་ཁྲིད་ནས། ཨེ་མ་ཧོ། གདལ་ཁྱབ་སོགས། ཧཱུྃ་སྭཱ་ཧཱ། བསྡུ་ན། ས་གཞི་སྤོས་ཆུས་བྱུགས་ཤིང་སོགས། དེ་ནས་བསྟོད་པ། མ་ཆོས་དབྱིངས་རྣམ་དག་སོགས། ཕྱག་འཚལ་བསྟོད། བྱིན་བརླབ་ཞུ་བ་བདུད་རྩི་འབེབས་སྦྱོང་འདི་སྡིག་སྒྲིབ་སྦྱོང་བ་ལ་ཤིན་ཏུ་ཟབ་པས་གསོལ་འདེབས་ཀུན་གྱི་རྗེས་ལ་སྦྱར། རྒྱལ་བ་དོན་འགྲུབ་དགུང་ལོ་བཅུ་གཉིས་ནས་ཞེ་གཉིས་བར་རྐུན་ཇག་བྱས་པའི་སྒྲིབ་སྦྱང་མ་གཅིག་གིས་ཟླ་བ་གསུམ་དུ་བསྒོམ་བཅུག་པས་སྒྲིབ་པ་དག་ནས་རྟོག་པ་འཁྲུངས་པའི་ལོ་རྒྱུས་བཞིན་ནོ། །སྤྱི་བོའི་ལྷ་ཚོགས་ཀྱི་སོགས། སང་སང་དག་པར་བསམ་ནས་ག་ཏེ་བགྲང་ལ་དམིགས་པ་བཟུང་། གསོལ་འདེབས་དངོས་ལ། རང་གི་སྤྱི་གཙུག་སོགས། བཞུགས་པར་སྒོམ། ནས་རང་དང་ལྷ་འདྲེ་ཀུན་གྱི་མགྲིན་ཅིག་སྙིང་ཐག་པ་ནས་གསོལ་བ་འདེབས་པར་བསམ་ལ། གནས་འོག་མིན༴སོགས་རྒྱས་པ་མཐར་ཆགས་དང་། ཅུང་བསྡུ་ན། ཡུམ་ཆེན་ཤེས་རབ་ཕར་ཕྱིན་ལ་གསོལ་བ་འདེབས། ཚིག་རྐང་རྗེས་མ་གཉིས་བཞག་པས་ཆོག །དེ་ལས་ཅུང་ཟད་བསྡུ་ན་མ་ཅིག་མཚམས། གནས་ཤམ་པོ་གངས་ཀྱི་ར་བ་ནས། །རྗེ་བཙུན་ཟིལ་གནོན་ཆེན་པོ༴ གནས་བཀྲ་ཤིས་གླང་ལུང་གི་དགོན་པ་ན། །སྲས་རྒྱལ་བ་དོན་འགྲུབ༴ གནས་སྙི་མོ་ཁུ་ཡི་ར་བ་ན། །ཁུ་སྒོམ་ཆོས་ཀྱི་སེངྒེ༴ གནས་རྡོ་རྗེ་གུར་ཁང་གཞལ་ཡས་ན། །ལ་འདུས་རྡོ་རྗེ་སྒྲོན༴ གནས་གར་བཞུགས་ཆོས་ཀྱི་ཕོ་བྲང་ན། །བཀའ་བབས་བུ་ཆེན་བཅུ་དྲུག་ལ༴ །གནས་རྒྱལ་ཁམས་ཕྱོགས་མེད་ཀྱི་དགོན་པ་ན། །བརྒྱུད་འཛིན་བརྒྱ་དང་རྩ་བརྒྱད་ལ༴ གནས་རི་གང་དཔལ་གྱི་ཡང་དགོན་ན། །པཎ་ཆེན་དོན་ཡོད་རྡོ་རྗེ་ལ༴ གནས་སྟོད་ལུང་མཚུར་ཕུའི་དགོན་པ་ན། །གྲུབ་ཆེན་ཀར་རབས་རིམ་བྱོན་ལ༴ གནས་ཀཿཐོག་འཁོར་ལོ་ལྔ་ལྡན་ན། །གདན་རབས་གཅོད་བརྒྱུད་རྣམས་ལ༴ གནས་སྤྱི་གཙུག་སོགས་མན་ཆད་འདྲ། བྱིན་གྱིས་རློབས་ཤིག །ཤིན་ཏུ་བསྡུ་ན། ཆོས་དབྱིངས་སྤྲོས་དང་སོགས། གང་ལྟར་ཡང་། ཕཊཿ མ་ཅིག་བརྒྱུད་པའི་སོགས། སོང་གིས་དག་པར་བསམ། ལན་ཆགས་འཇལ་བའི་དམིགས་པ་གཙོ་ཆེར་ནད་པ་ལ། ཕཊཿ བདག་གཞན་གྱི་སྡིག་སྒྲིབ་སོགས་ནས། ལྡན་པར་བསམ། ལྔ་པ་བདུད་རྩི་དཀར་འགྱེད་ནི། མ་ཅིག་གིས། ཚད་མེད་ཀྱི་སྙིང་རྗེ་རྒྱུད་སྦྱང་། གཏད་མེད་ཀྱི་རིག་པ་དབྱིངས་སུ་བསྲེ། བདག་མེད་ཀྱི་ཕུང་པོ་གཟན་དུ་སྐྱུར། སྤྲོས་མེད་ཀྱི་ངང་དུ་ལྷན་ནེར་བཞག །ཅེས་དང་། གཞི་བསྲེས་ནམ་མཁའ་སྒོ་འབྱེད་གཅེས། ཞེས་པའི་དོན། བདག །ནད་པ། བླ་མ་དང་མཆེད། མ་ཅིག་དང་བཞིའི། ནད་པའི་ཤེས་པ་གསང་བ། བླ་མ་དང་མཆེད་ཀྱི་ཤེས་པ་ཐུགས་ཀར། དེ་མ་ཅིག་ཐུགས་དང་བསྲེ་བའོ། །དེའང་རྟོག་པ་མཐོ་ན་བདག་གཞན་དབྱེར་མེད་བསྲེ། སོ་སོར་འཕོ་བ་རང་ལ་གྲིབ་ཆུང་བས། ཕཊཿ ༀ་སྭ་བྷ་སོགས། སྟོང་པ་ཉིད་དུ་གྱུར། སྟོང་པའི་སོགས་ནས། འཕྲོ་བར་གྱུར། ཕཊཿ རེ་རེས། གསང་བ་༡། ལྟེ་བ་༢། སྙིང་ཁ་༣། སྤྱི་བོར། ཕཊཿ ཕཊཿ ལྔས་མ་ཅིག་གི་ཐུགས་ཀར་བསྟིམ། མ་ཅིག་བརྒྱུད་པའི་སོགས། སོང་བར་བསྒོམ། དེའི་ངང་ལ་ཅི་གནས་བཞག །མ་ཅིག་གིས། གྲིམ་གྱིས་བསྒྲིམ་ལ་རྒྱང་གིས་འཕང་། །རྒྱང་གིས་འཕང་ལ་ཕྱལ་གྱིས་ཞོག །རེ་དོག་མེད་པའི་ངང་ལ་གནས། །མཐའ་བྲལ་གྱི་ལྟ་བ་ཟིལ་གྱིས་ནོན། །མཐར་ཐུག་གི་ལྟ་བ་དེ་ལ་ཡོད། །ཅེས་དང་། གཅོད་ཀྱི་ནམ་མཁའ་སྒོ་འབྱེད་དེ། །དབང་བསྐུར་ཕལ་གྱི་དོ་ཟླ་མིན། །ཅེས་དང་། བེམ་རིག་ཕྲལ་ལ་དབྱིངས་རིག་བསྲེ། །ཕུང་པོ་གཏུབ་ལ་ཚོགས་སུ་འབུལ། །དེ་ཡང་ལན་གྲངས་མང་དུ་བྱ། །ཞེས་པའི་དོན། སྐྱེ་མེད་ཀྱི་ངང་ནས་རྟོག་པ་སོགས་ནས། བྱང་གྱུར་ཅིག །མ་ཅིག་གིས། བླ་མ་ཡི་དམ་མཁའ་འགྲོ་ལ། ཚོགས་མཆོད་དངོས་གྲུབ་བླང་བ་གཅེས། གསུངས་པས། མགྲོན་བཞི་པོ་སོགས་ཐོབ་པར་བསམ། དྲུག་པ་དམར་འགྱེད་ཀྱི་ཐོག་མར་གསོལ་འདེབས། དམིགས་པ་ལྔར་ལྟར། རང་གི་སྤྱི་གཙུག་ཏུ་སོགས་ཡུམ་ཆེན་ཤེས་རབ་ཕར་སོགས། བྱིན་གྱིས་རློབས། བརྒྱུད་འདེབས་བསྡུ་ན། ཆོས་དབྱིངས་སྤྲོས་བྲལ་སོགས། གང་ལྟར། མ་ཅིག་བརྒྱུད་པའི་སྐུ་ལས་སོགས། བྱིན་བརླབས་འབེབས་སྦྱང་སྔར་ལྟར་བྱས་ན་ལེགས། དབྱིངས་རིག་བསྲེ་བ། རང་ལུས་ཁང་སྟོང་སོགས། ཐུགས་ཀར་ཐིམ་པར་བསམ། རང་གཞན་གྱི་རོ་དེ་སོགས། འདུས་པར་བསམ། གང་གི་དབང་བསྡུད་ཚན་གསུམ་པོ་དེ་འདིར་འདོན་པའི་སྲོལ་མཆིས། ཅུང་བསྡུ་ན། ཕཊཿ མཐོ་སྲིད་པའི་རྩེ་མོ་མན་ཆོད། དམའ་ན་རག་དམྱལ་བ་ཡན་ཆད་སྟོང་གསུམ་འཇིག་རྟེན་ཁམས་ཀྱི་སྣང་སྲིད་ལྷ་འདྲེ་བཀའ་ལྷ་མ་སྲིན་སྡེ་བརྒྱད། དཀར་པོ་ལྷ་ཡི་སྡེ་ཚོགས། ནག་པོ་བདུད། དམར་པོ་བཙན། ཁྲ་བོ་གཟའ། སྔོན་པོ་ཀླུ། སེར་པོ་གཉན། སྨུག་པོ་རྨུ། ལྗང་གུ་ས་བདག །རཀྵ་སྲིན་པོ། ལ་གསུམ་ན་འགྲིམ་པའི་བཙན། ལུང་གསུམ་ན་འགྲིམ་པའི་བདུད། གང་གསུམ་ན་འགྲིམ་པའི་འདྲེ་མོ། གཙང་ཐིལ་འབར་ཐིལ། མགར་ཐིལ། བེར་དཀར། བེ་ནག་ལ་སོགས་པའི་གདུག་པ་ཅན་རྣམས་དང་། གཞན་ཡང་སྟེང་གདོན་གཟའ་དང་དྲང་སྲོང་འོག་གདོན་ཀླུ་དང་ས་བདག །བར་གདོན་གཉན་དང་ཐེའུ་བྲང་། བྱད་མ་ལྷ་སྲུང་བཅས་པ། ཟ་འདྲེ་ཤི་གཤེད་དང་བཅས་པ་ཐམས་ཅད་སྐད་ཅིག་རང་དབང་མེད་པར་འདིར་འདུས་ཤིག །ཧཱུྃ་ཧཱུྃ་ཧཱུྃ། འདིར་ཤོག །འདིར་འདུས། ཤ་ལ་དགའ་བས་ཤ་ཟོ། ཁུག་ལ་དགའ་བས་ཁྲག་འཐུང་། རུས་ལ་དགའ་བས་རུས་པ་མུར། པགས་པ་ལ་དགའ་བས་ལྤགས་པ་གྱོན། ཕཊཿ ཕཊཿ ཕཊཿ རྐང་གླིང་ཌཱ་དྲིལ་དྲག་ཏུ་འཁྲོལ་ལ་ཤ་ཟའི་འབོད་གླུ་རིང་མོས། ཀྱེ། འདུས་ཤིག་འདུས་ཤིག་ཤ་ཟ་འདུས། །དབུགས་ལེན་ཐམས་ཅད་འདིར་འདུས་ཤིག །བཤས་བཤུས་རོ་ལ་སླེབ་པ་གྱིས། །ཤ་བསྒོས་རོག་ལ་སླེབ་པར་གྱིས། །འདྲེ་ཁྱེད་རྣམས་བདག་གི་ཕ་མ་ཡིན། །བུ་ཡི་ཤ་ཁྲག་རོལ་དུ་ཤོག །ཁྱོད་ནི་དྲིན་ཆེན་ཕ་མ་ཡིན། །ད་རན་བཟང་ལེན་ལེན་དུ་ཤོག །སྔོན་ཚེ་ལུས་ལ་གཅེས་པར་བཟུང་། །རྒྱུ་དེས་ད་རུང་འཁོར་བར་འཁྱམས། །ད་ནི་མི་བཞག་སྟོན་མོར་སྦྱིན། །མགྲོན་རིགས་སྲིད་རྩེ་མན་ཆད་དང་། །ན་རཀ་དམྱལ་ཁམས་ཡན་ཆད་ལ། །གནས་པའི་ལྷ་དང་ལྷ་མ་སྲིན། །ཕོ་བདུད་ལས་ཀྱི་རྒྱལ་འགོང་འདུས། །མོ་བདུད་ལས་ཀྱི་འདྲེ་མོ༴ ཕོ་བདུད་རྒྱལ་འགོང་སྲོག་བདག༴ མོ་བདུད་འདྲེ་མོ་སྲིན་མོ་འདུས། །སྲིད་པའི་ཡུལ་ནི་འདྲེེ་དགུ༴ གཙུག་ལག་ཁང་གི་གདོན་བཅུ༴ བྱིས་པའི་གདོན་ཆེན་བཅོ་ལྔ༴ བགེགས་རིགས་སྟོང་ཕྲག་བརྒྱད་ཅུ༴ ཡེ་འབྲོག་སུམ་བརྒྱ་དྲུག་ཅུ༴ འདིར་ཤོག་འདིར་འདུས་ཤ་ཁྲག་རོལ། །སྤྱི་བོ་ཚང་བུག་མན་ཆད་དང་། །རྐང་མཐིལ་སེན་མོ་ཡན་ཆད་ཀྱིས། །ལུས་འདིའི་ཕྱི་ནང་ཐམས་ཅད་ལ། །ཁོ་བོའི་ཆགས་ཞེན་མི་བྱེད་དོ། །ཤ་ཟོ་ཁྲག་འཐུང་རུས་པ་མུར། །མགོ་བོ་ཡན་ལག་དོན་སྙིང་ཁྱེར། །ཐམས་ཅད་བག་ཕོབ་ཚིམ་པར་རོལ། །ཞི་བ་གྱིས་ཤིག་བརླག་པར་གྱིས། །ཕུང་བར་གྱིས་ཤིག་རྩ་བ་ཆོད། །ཐུལ་ཅིག་ཆོམས་ཤིག་ས་མ་ཡ། །ཕུད་ལྷག་མ་མེད་པར་བཞེས་སུ་གསོལ། །ཕཊཿཕཊཿཕཊཿ འདི་བདག་འཛིན་རྩད་ནས་གཅོད་ཕྱིར་པཎྜི་ཏ་ཇོ་བོ་རྗེས་མཛད་པ་འདི་ཀུན་གྱིས་འདོན་སྲོལ་ཡོད་ཕྱིར་བྲིས་པའོ། །དམར་འགྱེད་འདི་མདོ་ཕར་ཕྱིན་དང་མཐུན་བཅོམ་ལྡན་འདས་ཉ་རོ་ཧི་ཏ། སྲོག་ཆགས་དེས་བ། སྟག་མོ་ལུས་སྦྱིན་ལྟར་སྦྱིན་པ་ཡིན་ཏེ། མ་ཅིག་གིས། དམིགས་པ་ཤ་ཁྱེར་ཁྲག་ཁྱེར། །ཉམས་ལེན་ན་དགའ་ཤི་སྐྱིད། །ལམ་ཁྱེར་ཕུང་པོ་གཟན་བསྐྱུར། །ཞེས་གསུངས་པའི་ཕྱིར། དེ་ཙམ་བོས་ནས་ཅི་སྦྱིན་ན། ཨེ་བདག་ཅག་རྣམས་ཀྱིི་སོགས་རྒྱས་པ་སྟེང་ནམ་མཁའ་སོགས། བསྡུ་ན་འདི་བར་བཞག །སྤྱིར་འགྲོ་དྲུག་སོགས་བྱེར་བསྡུད་ནི། ཕཊཿ མགོ་བརྙན་ཅན་སོགས་ནས། མི་ཐུབ་ཐུབ་བྱེད་པར་བསམ། ཌཱ་རྐང་བཅས། འབོད་གླུ་ཐུང་བའི་རྟས། ཀྱཻ། ཁྱོད་སྣང་ཞིང་སྲིད་སོགས་བྱེར་བསྡུད་བརྒྱ་རྩ་སོང་ནས། སྤྱིར་སྔགས་ཕྱི་པ་བསང་བསུར་དང་མཐུན་པའི་དཀར་འགྱེད། ཕར་ཕྱིན་ཐེག་པ་བྱ་དཀའ་བའི་སྤྱོད་པ་དང་མཐུན་པའི་དམར་འགྱེད། བླ་མེད་ཐེག་པའི་ཚོགས་དང་མཐུན་པའི་ཁྲ་འགྱེད། སྡིག་སྒྲིབ་སྦྱོང་བ་བདུད་རྩི་འབེབས་སྦྱོང་དང་མཐུན་པའི་ནག་འགྱེད་དེ། འགྱེད་ཆེན་བཞི་ཞེས་གྲགས་པ་ལས། ཁྲ་བོ་ཚོགས་དངོས་ཡོད་པ་དང་། ནག་འགྱེད་གསོལ་འདེབས་ཀྱི་རྗེས། སྒྲིབ་སྦྱོང་བྱིན་རླབས་ཆུ་རྒྱུན་དེས་མཐུས། ཁྲ་འགྱེད་དམིགས་བསལ་བྱེད་པར་འདོད་ན། འདི་ཡི་དོན་བསྡུས་འཁྲུལ་ཞིག་དབང་དྲག་རྒྱ་མཚོའི་རིགས་དྲུག་སེམས་ཅན་འདོན། ནག་འགྱེད་ལོགས་སུ་མི་དགོས་སོ། །དེ་ནས་མགྲོན་ལ་བདེ་སྡུག་བཏང་ལེན་བྱ་བ་ནི། མ་ཅིག་གིས། བདག་བདེ་ཕུལ་ན་ཚོགས་རྫོགས། གཞན་སྡུག་བླང་ན་དོན་ཆེ། འཁྲི་བ་བཅད་ན་བློ་བདེ། དམིགས་པ་མེད་ན་མཐར་ཕྱིན། ཞེས་པའི་དོན་ནི། ཕཊཿ མདུན་གྱི་ནམ་མཁའི་སོགས་ག་ཏེའི་སྔགས་ཅི་འགྲུབ་བཟླའོ། །ཆོས་རྣམས་ཐམས་ཅད་སོགས། ཀརྨ་རབ་རིབ་སོགས། སྨྲ་བསམ་བརྗོད་མེད་སོགས། དུས་གསུམ་རྒྱལ་ཡུམ་དགོངས་དོན་རྟོགས་པར་ཤོག །ཅེས་བརྗོད། འདིར་ཕ་དམ་པའི་རྟགས་བསྟོད་སོགས་གསོལ་འདེབས་གང་རུང་འདོན་གསུངས་པས། སྤྱི་བོར་ཕ་གཅིག་དམ་པ་སོགས་ཕ བསྟོད་མ་ཅིག་གསུངས་རྔམས་པའི་ང་རོས་རྟས། ཌཱ་དྲིལ་བཅས། རྗེ་བླ་མ་རྣམས་སོགས། བསྒྱུར་དུ་གསོལ། མ་བསྟོད་ལ། སྤྱི་བོར་མ་ཅིག་ལབ་ཀྱི་སྒྲོན་མ་གསལ་བའི་སོགས། ད་ཕྲུག་གདུང་དབྱངས་ཀྱིས་རྟས་མ་བསྟོད་ཐོད་སྨྱོན་གྱི་གསུངས་ཌཱ་དྲིལ་བཅས། མ་དམན་པའི་སོགས། ཌཱ་ཀི་འབུམ་བསྐུལ་འདིར་འདོན་པའི་སྲོལ་འདུས་པས། སྤྱི་བོའི་མ་ཅིག་ལས་སོགས། ཀྱེ་མ་ཡུམ་ཆེན་སྐུ་སོགས། སྲས་བསྟོད་གཉན་ཆུང་ལོ་ཙའི་གསུངས། ཧཱུྃ། མ་ཡུམ་ཆེན་དེ་ཡི་སོགས་སྲས་བརྒྱུད་རྣམས་ཀྱི་བྱིན་རླབས་སོགས། ཞུགས་པར་བསམ་མོ། །དེ་ཡང་མ་ཅིག་གིས། འཕོ་བ་ནམ་མཁའ་སྒོ་འབྱེད་དེ། །འཕོ་བ་བརྒྱ་ཡི་དོ་ཟླ་མེད། །ཀུ་སུ་ལུ་ཡི་ཚོགས་བསགས་དེ། །ཚོགས་བསགས་བརྒྱ་ཡི་དོ་ཟླ་མིན། །ཉམས་ལེན་དཀར་འགྱེད་དམར་འགྱེད་དེ། །སྟོན་མོ་བརྒྱ་ཡི་དོ་ཟླ་མིན། །ཕུང་པོ་ཤ་ཁྱེར་ཁྲག་ཁྱེར་དེ། །རིམ་གྲོ་བརྒྱ་ཡི་དོ་ཟླ་མིན། །འདུག་ས་གཉེན་ས་རི་ཁྲོད་དེ། །དགོན་པ་བརྒྱ་ཡི་དོ་ཟླ་མིན། །ཡོན་བདག་སྣང་སྲིད་ལྷ་འདྲེ་དེ། །ཡོན་བདག་བརྒྱ་ཡི་དོ་ཟླ་མིན། །ལྟ་བ་ཀ་དག་མཐའ་བྲལ་དེ། །དམ་ཆོས་བརྒྱ་ཡི་དོ་ཟླ་མིན། །དམ་ཆོས་བདུད་ཀྱི་གཅོད་ཡུལ་དེ། །མན་ངག་བརྒྱ་ཡི་དོ་ཟླ་མིན། །ཞེས་སོ། ༈ །གཉིས་པ་སྔགས་བླ་མེད་ལྟར་བསྐྱེད་རྫོགས་བསྒོམ་བཟླས་ཀྱི་ལག་ལེན་ལ། དང་པོ་བརྒྱུད་འདེབས། ༀ་ཨཱཿཧཱུྃ། ཆོས་སྐུ་དབྱིངས་ཀྱི་སོགས། ཡུམ་ཆེན་ཤེར་ཕྱིན་སོགས་རེས་མོས་བྱ། སྐྱབས་སེམས་ལན་བདུན་སྔར་ལྟར་བྱ་བའམ་བསྡུ་ན་ཟུར་གསལ་ལྟར་བྱ། འཇིག་རྟེན་སྐྱོང་བ་ཀུན་ལ་གཏོར་མ་འབུལ་བ། སྭ་བྷ་ཝ་སོགས། ཀུན་འགྲུབ་མཛོད། བགེགས་གཏོར་ལས་བྱང་ཆུང་བའི། ༀ་ཨཱཿཧཱུྃ། སོགས། སྭཱ་ཧཱ། ས་བསྔོ། སྤྲོ་ན་ཁྲོས་མའི་མཚམས་ལྷ་བསྐྱེད། བསྡུ་ན། ༀ་བཛྲ་ཌཱ་ཀི༴ སོགས། རྔ་ཌཱལ་གང་སྤྲོ་བྱེད་ཆོག །བཀའ་བསྒོ། མཚམས་བཅད། བྱིན་འབེབས། མཆོད་རླབ། བདག་མདུན་བཞིན་དང་མེ་ལོང་གཟུགས་ལྟར་གྱེར་ཚིག་ཅིག་གིས་བསྐྱེད། སྤྱན་འདྲེན། བཞུགས་གསོལ། ཕྱག་འཚལ། མཆོད་བསྟོད། སྤྲོ་ན་མ་ཅིག་གསུང་ཌཱ་ཀི་འབུམ་བསྐུལ། བཤགས་པ། རྗེ་བཙུན་མཁའ་འགྲོ་སོགས། ཛབ་དམིགས་སྔགས་བཟླས་སྟོང་ཙམ་བཟླས། ཐུན་མཐར། རྗེ་བཙུན་མཁའ་འགྲོ་མའི་ལྷ་ཚོགས་འགྲུབ་པར་གྱུར་ཅིག །དབྱངས་གསལ་ཡིག་བརྒྱ་རྟེན་སྙིང་། ཧཱུྃ་ཧྲཱིཿ ཡོན་ཆབ་ཁྲུས་ཆབ༴ སོགས་གཞན་རྣམས་སྔགས་ཀྱིས་མཆོད། མཆོད་རོལ་རྔ་ཌཱལ་གང་འབྲེལ། མ་ཆོས་དབྱིངས་ཀྱིས་བསྟོད། དགེ་བ་བསྔོ། མ་མགོན་མགར་གསུམ་རྣམ་སྲས་གསོལ་ཀ་བྱ། ཡང་ན་དོ་ནུབ་བྱ། ༈ གསུམ་པ་སོགས་འཁོར་ཉམས་ཆགས་བསྐང་བའི་ཐབས་ལ་ཚོགས་རྐྱང་པའི་དུས་ཡིན་ན། སྐྱབས་སེམས་ཡན་ལག་བདུན་པ་སྔར་ལྟར་བྱ། ནམ་མཁའ་སྒོ་འབྱེད་སྔར་དཀར་འགྱེད་ལྟར་བྱ། སྟོང་པ་ཆོས་སྐུའི་སོགས་ལས་མཁན་བསྐྱེད། ཚོགས་ལ་བདུད་རྩི་འཐོར། ༀ་སརྦ་སོགས་དབྱིངས་བསྲེ། རོ་བསྲེ་བསྡེབ་བྱིན་རླབས་བྱས་ནས། ཌཱ་རྐང་བཞི་བཅས། ཚོགས་མཆོད་འདོད་ཡོན་ལམ་གླུས་རྟས། སྤྱན་འདྲེན་བྱ། དེ་ནས་སྨན་མཆོད་བྱ། མ་ཅིག་གསུང་མཛེས་མ་འབུམ་བསྐུལ་བྱ། ཚོགས་ཕུད་དུམ་བཞི་བྱས་ནས་རྩ་གསུམ་དང་ཆོས་སྐྱོང་གཏོར་མར་བཏབ་ལ། རྒྱུན་རྟའམ་བཤགས་དབྱངས་རྟས། ཧཱུྃ། ཞལ་ཟས་ཚོགས་ཀྱི་སོགས་ཌཱ་རུའི་མཆོད་རོལ་རེ་བྱ། དེ་ནས་བསྒྲལ་མཆོད་ལ་ཚོགས་དུམ་བུ་ལིངྒ་རཀྟས་བྲན་ལ། མདུན་དུ་བཀོད་ཌཱ་རྐང་བཅས། བསྐུལ་དབྱངས་ལྕེ་སྤྱང་འདུར་གླུའི་རྟས། མ་ཡུམ་ཆེན་སོགས་ཧཾ་བསྐྱེད་འགུགགས་པ་གསུམ། ཌཱ་རྐང་རྒྱུན་དབྱངས་ཀྱིས། མཁའ་འགྲོ་བཞི་བསྐུལ་གཟུགས་དབབ། ལྷ་དབྱེ། བྱད་བཅུག །སྨྱོར་བཅུག །ཕུར་གདབ་རྒྱས་བསྡུས་གང་སྤྲོ་དང་། རྟེན་པ་སྤར། རྟེན་བཏུབ། གཏུན་བརྡུང་ཞལ་གཏབ་རྒྱས་བསྡུས་གང་སྤྲོ། བསྐང་བ་ཚོགས་ཕུད་ཀྱི་རྗེས་སམ། ཞལ་སྟབས་ཀྱི་འཕྲོར་རམ། གཏོར་གཞོང་མའི་རྗེས་གསུམ་གང་བདེར་བཏང་ཆོག །དེ་ནས་བསྐང་བ་ལ། རྒྱས་པ། ཧཱུྃཿ སྲ་བརྟན་སོགས། གནས་མཆོག་འདིར། ཌཱ་རྐང་ངམ། རྔ་རོལ་བཅས། ཧཱུྃ། འོག་མིན་ཆོས་དབྱིངས་སོགས། པདྨ་ཀ་མ་ལྱེ་སྟཾ། དེ་ནས་བྱིན་འབེབས་ད་ནང་མ་བཏང་ན་འདིར་འདོན། དེ་ནས་བརྒྱུད་བསྐང་ཆེ་བ། གནས་འོག་མིན་སོགས་རྒྱས་པ་འདྲེས་གཤོང་། བསྡུ་ན་ཤར་འདོན། མཛོད། བར། ཡང་ན། ཧཱུྃ། སྐྱེ་མེད་སོགས་བསྡུས་པའི་སྐབས། འདིའི་མཐའ་བར། ཕ་བསྐང་། མ་བསྐང་རེས་མོས། བསྐང་བ་སྔ་མའི་འཕྲོས། ཧཱུྃ། ཁྱེད་ལ་ཕྱི་ཡི་སོགས་ནས་ཆོས་སྐྱོང་བསྐང་བའི་འཕྲོར་གཅོད་ཀྱི་སྲུང་མའི་བསྐང་བ་སྦྱར་ནས་བཟློག་མཐའ་བར་མཁའ་འགྲོའི་སྨྲེ་བཤགས་ཀློང་བཤགས་རེས་མོས། གཞུང་བསྐང་བསྡུས་པའི་སྐབས། དབུས་ཕྱོགས་མ། འོག་མིན་ལ། སྟོང་ཉིད་མ་གསུམ་གང་སྤྲོ། གཅོད་ཀྱི་སྲུང་མའི་བསྐང་བ། བཤགས་པ་བཅས་ཀྱི་དམ་ཚིག་ཉམས་ཆགས་རྣམས་བཤགས་པས་འགལ་ཉམས་འདས་རལ་རྣམས་གསོ་ནས་བསྐང་བྱ་བསྐང་བྱེད་བཤགས་བྱ་བཤགས་བྱེད་བྲལ་བའི་དེ་ཁོ་ན་ཉིད་ཀྱི་བསྐང་བཤགས་བརྗོད་བྲལ་གཉུག་མའི་ངང་ལ་རང་བབས་ཀྱི་ཡུད་ཙམ་བཞག་པས། བསྐལ་པར་བསགས་པའི་སྡིག་སྒྲིབ་སྐད་ཅིག་ལ་འདག་པར་རྒྱལ་གསུངས་ངེས་དོན་གྱི་ལུང་གི་དཔང་པོར་མཆིས་པ་བཞིན་ནོ། །སྐབས་འདིར་ནད་པ་ཡོད་ན། གདོན་ཚོགས་དགུ་མ། སྟབས་པ་ཆ་དྲུག །དྲི་ཆུ་མཐའ་གཏད། སྟབས་པ་དྲག་པོ། གཤེད་འདུལ་སོགས་གང་དགོས་ཆགས་མེད་གསུང་ལྟར་བྱ། བདུན་པ་གཏོར་གཞོང་མ་ནི། འབུལ་གཏོར་སྙིང་གཟུགས་མ་དང་། ཚོགས་བཅད་ཁམས་དུམ་བུར་གནམ་ཕུད་ཀྱི་དོད་དུ་བཤམས་ཤིང་ཕུད་རྒོད་བདུད་རྩིའི་བྲན་ལ། ཕཊ། ཀྱིས་དབྱིངས་རིག་བསྲེ། ཕཊ། རང་གཞན་གྱི་རོ་དེ་སོགས། རང་གི་རྣམ་པར་སོགས་ལས་མཁན་བསྐྱེད། ཀེཾ་ཀེཾ་ཀེཾ་སོགས། ཁྱུག་ཁྱུག་བྱེད་པར་བསྒོམ། ཀ་པཱ་ལའི་ཆེ་ཡོན་ནི། ཌཱ་ཀི་འབུམ་བཞད་རྟས་ཌཱ་དྲིལ་བཅས། ན་མོ། ཕྱི་སྣོད་འཇིག་རྟེན་སོགས། ཁྲོས་མ་མཁའ་འགྲོ་འབུམ་བསྐུལ་ནི། ཌཱ་རྐང་བཅས་མཁའ་འགྲོའི་གད་རྒྱང་རྟས། ཀྱེ་མ་མི་མིན་སོགས། མ་དབུས་ཕྱོགས་སོགས་དང་། མཁའ་འགྲོ་སྙིང་ཐིག་རྟས། ན་མོ། རྡོ་རྗེ་འཆང་ཆེན་མན་ཆད་སོགས་ནས། སརྦ་ཛྙཱ་ལོ་ཀ་གྷ་ན་ཙཀྲ་ཁ་ཧི། ཅེས་ཕྱི་རོལ་མཆོད་དོ། །སྤྲོ་ན་བདག་འཇུག་འདིར་བྱ། དེ་ནས་དྲོངས་བ་ལས་རྡོར་གྱིས་ཐབས་ཤེས་ཀྱི་རྫས། གཟའ་བ་གཡས་བཏུང་བ་གཡོན་དུ་ཐོག་ནས། བསྣོལ་མས། ཀྱེ། གཟིགས་ཤིག་མཛེས་ལྡན་སོགས་ཀྱིས་ཕུལ། སློབ་དཔོན་གྱིས་པད་སྐོར་བཅས། ཨ་ལ་ལ་ཧོ། བླང་ལ་དེའི་ཕུད་བཅད་ནས། ༀ་ཨ་གྲ་པིཎྜ་ཨཀྵི་བྷྱ་སྭཱ་ཧཱ་ས་ཕུད་ལ་དབང་བའི་འབྱུང་པོ་ལ་བསྔོས་ནས། རང་མཁའ་འགྲོ་མའི་ང་རྒྱལ་གྱིས་ཆོས་ཉིད་ཐིམ་པའི་ཚུལ་རོ་མཉམ་གྱི་ལྟ་བའི་ངང་ཚིམ་པར་རོལ་ནས་ལྷག་མ་རྣམས་སྣོད་གཅིག་ཏུ་བསགས། ཕུད་ལྷག་དང་ཚོགས་ལྷག་སྣོད་གཅིག་ཏུ་བཞག་ནས་བདུད་རྩི་དང་རཀྟ་བྲན། དཔལ་འབར་བཙུག །འབྲུ་གསུམ་གྱི་བྱིན་གྱིས་རླབས་ལ། རྡོ་རྗེ་རྩེ་ལྔའི་ཕྱག་རྒྱ་བཅས། ༀ་ཨེ་ཨ་ར་སོགས། ཧཱུྃ་ཕཊ། ཌཱ་རྐང་བཞི་བཅས་སྟག་མོའི་ངར་དབྱངས་ཀྱིས། རྒྱས་པ། བྷྱོ། ལས་ཀྱི་མཁའ༴ ལས་དང་འཇིག་རྟེན་ཤ་ཟ་ཤུགས་འགྲོ་ལ་འབུལ་བ་མཁའ་འགྲོ་སྙིང་ཐིག་ལས་བྱུང་བའམ་བསྡུ་ན། ཧཱུྃ་ཧྲཱིཿརྡོ་རྗེ་མཁའ་འགྲོ་སོགས། འགྲུབ་པར་མཛོད། གཙང་སར་ཕུལ་ལ། དེ་ནས་གཙོག་ལྷག་ལ་ཚོགས་ཆང་བྲན། ༀ་ཨཱཿཧཱུྃ་གིས་བྱིན་གྱིས་བརླབས་ནས། ཧཱུྃ། སྲིད་གསུམ་བྷནྡྷ་སོགས། ཚིམ་པར་གྱུར་ཅིག །ཅེས་སྲང་མདོར་ཕུལ་ཞིང་སྣོད་གཉིས་ཆུས་བཤལ་ལ། ཀྱེ། དགུང་སྔོན་སོགས། ཕྲིན་ལས་མཛོད། ཕྱི་རོལ་དུ་དོར། སྐབས་འདིར་རྣལ་འབྱོར་པ་ལ་དགྲ་ཡོད་ན་མཚོན་ཆ་ལྟ་བུའི་གདམས་ངག་ཡོད་པས་ལོགས་སུ་གབ་གསུངས་ལ། ལྷག་མ་དང་སྲུང་མའི་གཏོར་འབུལ་ལ་རང་ལུས་ཤ་ཁྲག་མི་བསྲེ་བས་སྤྱི་ཙམ་ལ། ལྷག་མའི་གང་དུ། ན་མོ་མཆོག་གསུམ་རྩ་གསུམ་སྲུང་མའི་བདེན་སྟོབས་དང་། །ཆོས་ཉིད་ཆོས་ཅན་རྒྱུ་འབྲས་བསླུ་མེད་མཐུས། །ད་དགྲ་ཐད་དུ་ལངས་པའི་དམ་ཉམས་པ། །དམིགས་པའི་ཡུལ་གྱུར་ལྷག་གཏོར་རྟེན་ལ་ཁུག །ནྲྀ་ཨ་ཀཪྴ་ཡ་ཛ། སྦྱོར། དེ་ནས་གཅོད་ཀྱི་སྲུང་མ་དམར་གཏོར་གཉིས་དང་། དཀར་གཏོར་སྐྱེམས་བཅས་བཤམས་ནས་བདུད་རྩི་བྲན་ལ། ན་མོ། དྲིན་ཆེན་གཅོད་ཡུལ་བརྒྱུད་པའི་བླ་མ་རྣམས་ཀྱི་བདེན་པ་དང་། དཀོན་མཆོག་གསུམ་གྱི་བདེན་པ་དང་། ཡི་དམ་རྡོ་རྗེ་རྣལ་འབྱོར་མ་ལྷ་ལྔ་བདུད་འདུལ་ཁྲོས་མ་ནག་མོའི་ལྷ་ཚོགས་འཁོར་དང་བཅས་པའི༴ མ་གཅིག་ལབ་ཀྱི་སྒྲོན་མ་མཁའ་འགྲོ་བྱེ་བ་འབུམ་སྡེ་བཀའ་སྲུང་ཆོས་སྐྱོང་དང་བཅས་པའི་བདེན་པ་དང་། བདེན་པ་ཆེན་པོའི་མཐུས་སྤྱིར་སངས་རྒྱས་བསྟན་པའི་སྤྱི་དགྲ། ཁྱད་པར་དུ་རྣལ་འབྱོར་པ་བདག་གིས་བཀའ་དང་དམ་ལ་མི་གནས་པའི་འགྱུ་ལོག་འཕར་ལྡང་མགོ་གཡོག་མགོ་སྐོར་བྱེད་པའི་གདོན་བགེགས། བསམ་ངན་འཆང་བའི་བྱད་མ། དོ་བསྔོ་ཞིང་ཕོད་བཙུག་པའི་དགྲ་བོ་ཐམས་ཅད་ཀྱི་བླ་སྲོག་རྣམ་པར་ཤེས་པ་སྐད་ཅིག་རང་དབང་མེད་པར་དྲག་པོ་དམར་གྱི་གཏོར་མ་འདི་ཡི་ནང་དུ་ཁུག་ཅིག །ཛ་ཧཱུྃ་བཾ་ཧོཿ བྷནྡྷ་ལྕང་ལོ་ཅན་གྱི་ནང་དུ་དགྲ་བགེགས་ཀྱི་ཤ་ཁྲག་དོན་སྙིང་གི་ངོ་བོར་བདུད་རྩིའི་རང་བཞིན་དུ་གྱུར། ༀ་ཨཱཿཧཱུྃ། ལན་གསུམ། ༀ་བཛྲ་ཌཱཀྐི་ནི་སརྦ་དྷརྨཱ་པཱ་ལ་ས་པ་ཏི་ཝཱ་ར་དགྲ་བགེགས་ཀྱི་མ་ཧཱ་མཾ་ས་ལ་ཁཱ་ཧི། མ་ཧཱ་རཀྟ་ལ་ཁ་ཧི། མ་ཧཱ་ཙིཏྟ་ལ༴ མ་ཧཱ་ཀོ་རོ་ཙ་ན་ལ༴ མ་ཧཱ་ཀི་ནི་རི་ཏི་ལ༴ མ་ཧཱ་བ་ལིངྟ་ལ་ཁཱ་ཧི་ཁཱ་ཧི། དེ་ནས་མཁའ་འགྲོ་ཁྲོས་མ་འབུམ་བསྐུལ། ཀྱེ་མ། མི་མིན་གྱི་ཡེ་ཤེས༴ མ་ཤར་ན༴ སོགས་བཏང་ནས། གཅོད་ཀྱི་བཀའ་སྲུང་རྣམས་ལ་གཏོར་མ་འབུལ་བ་མདོར་བསྡུས་ནི། ཧཱུྃ། མྱུར་མཛད་སྤྱན་རས་གཟིགས་སྤྲུལ་ཕྱག་དྲུག་པ། །ཡུམ་ཆེན་རེ་མ་ཏི་དང་གནོད་སྦྱིན་བཞི། །གཙང་རིས་དཔལ་མགོན་བདུན་ཅུའི་ཚོགས་རྣམས་ཀྱིས། །དམ་རྫས་བརྒྱན་པའི་གཏོར་མ་འདི་བཞེས་ལ། །བསོད་ནམས་བླ་མས་བཀའ་བསྒོས་དམ་བཞག་བཞིན། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། དཔལ་ལྡན་མ་ཧཱ་ཀ་ལ་ཨ་གྷོ་ར། །ཡུམ་ཆེན་བཟློག་བྱེད་མ་དང་ནོར་རྒྱུན་མ། །རིགས་བཞི་ཌཱཀྐི་བདུད་དང་ཌཱཀྐའི་ཚོགས། །དུར་ཁྲོད་བདག་པོ་ཡབ་ཡུམ་ཀེང་རུས་གཟུགས། །ཤ་ཟ་ཕོ་མོའི་ཁྲོམ་གྱིས་བསྐོར་བ་རྣམས། །དམ་རྫས་བརྒྱན་པའི་གཏོར༴ ཕ་གཅིག་དམ་པའི་སྤྱན་སྔར་ཁས་བླངས་བཞིན། །རྣལ་འབྱོར༴ བྷྱོ། རྡོ་རྗེ་ཕག་མོའི་བཀའ་ཉན་མཐུ་མོ་ཆེ། །མ་རྒྱུད་ཡོངས་ཀྱི་ལས་མཁན་མཐུ་མོ་ཆེ། །བུད་མེད་སྤྱང་སྟག་འཕར་བ་ཆིབས་པ་གསུམ། །ལས་བདག་མཚན་མོ་སྒྲ་སྒྲོགས་བཅས་པ་ཡིས། །དམ་རྫས༴ མ་ཅིག་སྤྱན་སྔར་ཁས་བླངས་དམ་བཅས་བཞིན། །རྣལ་འབྱོར༴ ཧཱུྃ། ཤམ་པོའི་གཟའ་བདུད་མགོ་དགུ་གདོང་མོ་བཞི། །ཕ་སྲིན་མ་ཀླུ་གཟའ་བརྒྱད་དྲེགས་པ་བརྒྱད། །བཙན་རྒོད་ཟངས་རི་འབར་བ་སྤུན་བདུན་དང་། །བསྟན་སྐྱོང་ཡ་མ་བཅུ་གཉིས་བཅས་པ་རྣམས། །དམ་རྫས༴ མ་ཅིག་ལབ་སྒྲོན་སྤྱན་སྔར་ཁས་བཅས་བཞིན། །རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད། །དེ་ནས་དཀར་གཏོར་བྲན་ལ། བྷྲཱུྃ་ལས་རིན་པོ་ཆེའི་སྣོད་དུ་ཁཾ་ལས་གཏོར་མ་དཀར་མངར་བདུད་རྩིའི་རྒྱ་མཚོ་ཆེན་པོར་གྱུར། །ༀ་ཨཱཿཧཱུྃ། ༀ་སརྦ་ལོ་ཀ་པཱ་ལ་ཨི་དམ་བྷ་ལིཾ་ཏ་ཁ་ཁ་ཁཱ་ཧི། ཌཱ་བཅས། ཧཱུྃ། ཞང་བློན་རྡོ་རྗེ་བདུད་འདུལ་ཡབ་ཡུམ་དང་། །ནོར་ལྷ་བརྒྱད་དང་འབྲོག་གནས་ལྔ་ལ་སོགས། །ལས་བཞིའི་ལས་བྱེད་ཉི་ཁྲི་ཆིག་སྟོང་དང་། །ནོར་ལྷ་གནོད་སྦྱིན་བྱེ་བའི་ཚོགས་བཅས་ཀྱི། །དམ་རྫས་དཀར་གསུམ་གཏོར་མ་འདི་བཞེས་ལ། །གྲྭ་པ་མངོན་ཤེས་ཅན་གྱི་བཀའ་བསྒོས་ལྟར། །རྣལ་འབྱོར་བཅོལ༴ ཧཱུྃ། རི་རབ་ཕྱོགས་བཞི་སྐྱོང་མཛད་རྒྱལ་ཆེན་བཞི། །གཉན་ཆེན་ཐང་ལྷ་ཡར་ལྷ་ཤམ་པོ་རྗེ། །མཁའ་རི་མིང་སྲིང་འོ་དེ་གུང་རྒྱལ་དང་། །ཀླུ་རྒྱལ་དྲག་པོ་ཟླ་སྐྱོང་འཁོར་དང་བཅས། །དམ་རྫས་དཀར་གསུམ་གཏོར་མ་འདི་བཞེས་ལ། །མ་ཅིག་ལབ་སྒྲོན་སྤྱན་སྔར་ཁས་བླངས་བཞིན། །རྣལ་འབྱོར་བཅོལ༴ ཧཱུྃ། སྤྲུལ་སྐུ་མ་ཅིག་ལབ་ཀྱི་སྒྲོན་མ་ཡིས། །གངས་རི་གཉེན་པོ་ཉི་ཤུ་རྩ་བརྒྱད་ལ། །གཉན་ས་བརྒྱ་དང་རྩ་བརྒྱད་བཅད་པའི་ཚེ། །བཀའ་དང་དམ་ལ་བཏགས་པའི་ལྷ་འདྲེ་རྣམས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །གཞན་ཡང་གཅོད་ཡུལ་བརྒྱུད་པའི་བླ་མ་ཡིས། །བཀའ་དང་དམ་ལ་བཏགས་པའི་ལྷ་སྲིན་རྣམས། །དམ་རྫས་དཀར་གསུམ་གཏོར་མ་འདི་བཞེས་ལ། །གཅོད་ཡུལ་བརྒྱུད་པ་ཕྱོགས་བཅུར་རྒྱས་པ་དང་། །བདག་གི་ཕྲིན་ལས་འགྲུབ་པའི་སྡོང་གྲོགས་མཛོད། །ཟངས་བཙན་འདིར་སྦྱར། ཅེས་ཕུལ་ལོ། །དེ་ནས་ཆད་བརྟན་ཟུར་གསལ་ལྟར་བཏང་ལ། བྲོ་བརྡུང་བ་ནི། ལྷག་མ་ཆད་བརྟན་གཏོར་འབུལ་སྣོད་རྣམས་ཁ་སྦུབ་པའི་སྟེང་རྡོ་རྗེ་རྒྱ་གྲམ་བྱས་པས་མནན་ནས། ན་མོ་གྲུབ་ཐོབ་གཅོད་ཀྱི་བརྒྱུད་པ་ཡི་དམ་ཆོས་སྐྱོང་རྣམས་ཀྱི་བདེན་པས་གནོད་བྱེད་དམ་སྲི་སྒབ་འདྲེ། མི་མིན་མི་རུ་བརྫུ.བ། ལྷ་མིན་ལྷ་རུ་བརྫུ.བ་མགོ་གཡོག་མགོ་བསྐོར་བྱེད་པ། བཀའ་དང་དམ་ལ་མི་གནས་པ་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག །ཛཿཧཱུྃ་བྃ་ཧོཿ ཞེས་བཀུག་ལ། བྷྱོཿ དབུས་ཀྱི་ཕྱོགས་ནས་སོགས་གཏོར་བྲོ་བྱ། མ་ཅིག་གིས་རྗེས་ཆོག་བྱས་པས་སྣང་སྲིད་དག །ཅེས་པའི་དོན་ནི། སྟོང་པའི་ངང་ལས་པད་དཀར་ཟླ་བའི་སྟེང་དུ་ཧྲཱིཿལས་རང་ཉིད་ཐུགས་རྗེ་ཆེན་པོ་ཁ་སར་པ་ཎི་དཀར་པོ་གཡས་མཆོད་སྦྱིན་གཡོན་པདྨ་དར་དང་རིན་པོ་ཆེའི་རྒྱན་པ། ཞབས་སེམས་དཔའི་དཀྱིལ་ཀྲུང་ཅན། རིགས་བདག་འོད་དཔག་མེད་དང་བཅས་པ་ཐུགས་ཀར་ཧྲཱིཿལ་ཡིག་དྲུག་གཡས་སུ་འཁོར་བ་ལས། འོད་ཟེར་བདུད་རྩི་དང་འདོད་ཡོན་གྱི་རྣམ་པར་སྤྲོས་ལྷ་འདྲེ་རྣམས་ཀྱི་སྡིག་སྒྲིབ་སྡུག་བསྔལ། ནད་དང་སྨས་འགྲམ། གནས་ཁང་ཞིག་རལ། ནོར་གྱི་ཤོར་གོད་རྣམས་སོས། ལང་ཚོ་བཀྲག་མདངས་ལྡན། གནོད་སེམས་འཁོར་འཛིན་ཞི། བྱམས་སྙིང་རྗེ་བྱང་ཆུབ་ཀྱིས་སེམས་དང་ལྡན་པར་བསམ་ལ་མ་ཎི་བརྒྱ་རྩ་བགྲངས། རྒྱུན་རྟས། ཕཊཿ ལུས་ཤ་ཁྲག་མཆོད་སྦྱིན་འདི་བསྔོས་པས། །ཚེ་རབས་འཁོར་བ་ཐོགས་མེད་ཀྱི། །བུ་ལོན་འབྲེལ་ཐག་ཆོད་གྱུར་ཅིག །ཤ་འཁོན་སྡིག་སྒྲིབ་དག་གྱུར་ཅིག །ཆོས་སྦྱིན་གྱི། རྒྱུན་རྟས། ན་མོ། ཆོས་རྣམས་ཐམས་ཅད་སོགས། སངས་རྒྱས་བསྟན་པ་ཡིན། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོམ་པའི་ལམ། །བར་ཆད་མེད་པའི་ལམ་སྒྲོད་ནས། །མ་ཡུམ་ཆེན་གྱི་གོ་འཕང་ཐོབ་པར་ཤོག །བཏང་རག་མཆོད་བསྟོད་ནི། ཧཱུྃ་ཧྲཱིཿ མཆོད་ཡོན་མེ་ཏོག་སོགས། ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཨརྒྷཾ་སོགས། རཱུ་པ་ཤཔྡ་སོགས། མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིངྟ་ཁ་ཧི། ཌཱ་རུའི་མཆོད་རོལ་བྱ། ཌཱར་འདོན་ནམ་རྒྱུན་རྟས། མ། ཆོས་དབྱིངས་རྣམ་དག་སྐྱེ་མེད་ཆོས་ཀྱི་ཡུམ། །འགགས་མེད་རྩ་བྲལ་སེམས་ཉིད་དོན་གྱི་ཡུམ། །མཐའ་དབུས་མེད་པས་མཐའ་བྲལ་སྟོང་པའི་ཡུམ། །ཡུམ་ཆེན་ཆོས་ཀྱི་སྐུ་ལ་ཕྱག་འཚལ་བསྟོད། །འགྱུར་བ་མེད་པ་རྡོ་རྗེའི་སྐུ་སྤྲུལ་མ། །དགོས་འདོད་འབྱུང་བ་རིན་ཆེན་སྐུ་སྤྲུལ་མ། །གདོད་ནས་དག་པ་པདྨའི་སྐུ་སྤྲུལ་མ། །ཕྲིན་ལས་གྲུབ་པ་ལས་ཀྱི་སྐུ་སྤྲུལ་མ། །ཡུམ་ཆེན་སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། །དང་པོ་ལུས་སེམས་བསྐྱེད་པའི་མ། །བར་དུ་ཟང་ཟིན་ཕོག་པའི་མ། །ཐ་མལ་སྐྱེ་མེད་སྟོན་པའི་མ། །མ་དྲིན་མོ་ཆེ་ལ་ཕྱག་འཚལ་བསྟོད། །བསྟོད་པ་འོས་སོགས། གཞུང་ལས་ཡིག་བརྒྱ་བསྔོ་བས་དགེ་རྩ་དག །ཅེས་གསུངས་པས། འདི་ལ་རིགས་དྲུག་གནས་སྦྱོང་དམིགས་པ་བྱ་བ་ཕྱག་ལེན་ལ་འབྱུང་བས། སྤྱི་བོའི་ནམ་མཁར་མ་ཅིག་བརྒྱུད་པ་བཅས་པ་གསལ་བཞིན། རང་གི་སྤྱི་བོར་ལྷ་ཡི་ས་བོན་ༀ་དཀར་པོ། མགྲིན་པར་ལྷ་མིན་ས་བོན་སུ་དམར་པོ། སྙིང་ཁར་མི་ཡི་ས་བོན་ཎི་ལྗང་གུ། ལྟེ་བར་བྱོལ་སོང་ས་བོན་ད་སྐྱ་བོ་གསང་བར་ཡི་དྭགས་ས་བོན་པྲེ་སེར་པོ། རྐང་ཞབས་དམྱལ་བའི་ས་བོན་དུ་ནག་པོ་རྣམས་ལ། རང་གཞན་སེམས་ཅན་ཐམས་ཅད་ཀྱི་འགྲོ་དྲུག་སྐྱེ་བའི་བག་ཆགས་ཐིམ། རྐང་མཐིལ་གྱི་ཡི་གེ་འོད་དུ་ཐིག་ལེ་ཡུངས་འབྲུ་ཙམ་གྱུར་གསང་བར་པྲེ་པ་ཐིམ། དེ་སྲན་མ་ཙམ་དུ་གྱུར་ནས་ལྟེ་བར་ད་ལ་ཐིམ། དེ་མཐེ་བོང་ཙམ་དུ་གྱུར་ནས་སྙིང་ཀར་ནྲྀ་ལ་ཐིམ། དེ་བྱིལ་སྒང་ཙམ་གྱུར་མགྲིན་པར་སུ་ལ་ཐིམ། དེ་བྱ་ཆེན་སྒོང་ང་ཙམ་དུ་གྱུར་ནས་སྤྱི་བོར་ༀ་ལ་ཐིམ། དེ་མ་ཅིག་གི་ཐུགས་ཀར་ཐིམ། ཐུགས་ཡིད་འདྲེས་རང་གི་ཕུང་པོ་བདུད་རྩིར་ཞུ་འཇིག་རྟེན་གང་འགྲོ་བ་ཀུན་གྱི་འཐུང་བས་སྒྲིབ་པ་དག་ནས་འཁོར་བ་གནས་སྟོང་། འགྲོ་དྲུག་སངས་རྒྱས་ཆོས་དབྱིངས་སྐྱེ་མེད་ཀྱི་ངང་ལ་གནས་པར་བསམ། ཐལ་མོ་སྦྱར་ཏེ་ལུས་སྦྱིན་ནང་། ན་མོ་ཧཱུྃ་བདེ་ལེགས་མཆོག་གི་སོགས་མགྲོན་ཀུན་ལ་བཤགས། རྒྱུན་རྟས། མ་འབྱོར་པ་དང་ཉམས་པ་དང་། །གང་ཡང་བདག་བློ་གཏི་མུག་པས། །ལེགས་བྱས་འདི་ལ་ཉེས་བྱས་གང་། །གང་ཕྱིན་ལུས་ཅན་སྐྱབས་གྱུར་པ། །དེ་ཀུན་མགྲོན་རིགས་རྣམས་ཀྱིས་བཟོད་པར་གསོལ། །གང་ཡང་བདག་ཅག་ལས་དང་པོ་པའི་སེམས་ཅན་དུ་གྱུར་པས། གཅོད་ཡུལ་ཉམས་སུ་བླངས་བ་ལ། ཆད་པ་དང་ལྷག་པ་གང་འོག་འཁྲུགས་པ་ཏིང་ངེ་འཛིན་མི་གསལ་བ། མཆོད་པའི་དངོས་པོ་ཆུང་ཞིང་ངན་པ། གཙང་སྦྲ་མ་བྱས་པ་སོགས་མདོར་ན་ཉེས་པའི་ཚོགས་ཅི་མཆིས་པ་ཐམས་ཅད་བཟོད་པར་མཛད་དུ་གསོལ། ཡིག་བརྒྱ་བཟླ། དེ་ནས་བྱིན་རླབས་དངོས་གྲུབ་བསྐུལ་པ་ལ། དང་པོ་སྔར་སྤར་བའི་རྣམ་ཤེས་དབབ་པ། ཕཊ། སྤྱི་བོར་མ་ཅིག་གི་ཐུགས་ཀ་ནས་རང་དང་སྲུང་བྱའི་རྣམ་ཤེས་འོད་ཀྱི་གོང་བུའི་དབུས་སུ་མ་ལབ་སྒྲོན་དཀར་གསལ། མཛེས་འཛུམ་གར་སྟབས་ཁྱུག་ཁྱུག་སྤྱི་བོར་ཚང་བུག་ནས་མར་བྱོན། སྙིང་པདྨ་འདབ་བརྒྱད་ཀྱི་དབུས་སུ་བུམ་སྐུའི་རྣམ་པར་བཞུགས་པར་མོས། དེ་ནས་དབང་བཞི་ལེན་པ། ཕཊཿ མ་ཅིག་བརྒྱུད་པའི་ལྷ་ཚོགས་རྣམས་ཀྱིས་བདག་ལ་དབང་བཞི་རྫོགས་པར་བསྐུར་བར་མཛད་དུ་གསོལ་ཞེས་གསོལ་བ་བཏབ་པས། མ་ཅིག་སྐུ་གསུང་ཐུགས་ལས་འོད་ཟེར་ཁ་དོག་སྣ་ཚོགས་པ་འཕྲོས་མདུན་གྱི་མཁའ་འགྲོ་སྡེ་ལྔའི་ཐུགས་བརྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་འོད་ཟེར་གྱི་རྣམ་པར་ཚུར་འདུས། སྤྱི་བོར་བརྒྱུད་པའི་ལྷ་ཚོགས་ལ་ཐིམ། དེ་རྣམས་ཀྱིས་འོད་དུ་ཞུ་ནས་མ་ཅིག་ཁ་དོག་ལྔ་ལྔར་གྱུར་ནས་བདག་གི་གནས་ལྔར་ཐིམ་པས་དུག་ལྔ་གནས་འགྱུར་སྐུ་ཡེ་ཤེས་ལྔ་མངོན་དུ་གྱུར་པར་བསམ་ལ། འབུམ་བསྐུལ་བྱིན་རླབ་ཆུ་རྒྱུན་གླང་ལུང་པའི་གསུང་། ཌཱ་དྲིལ་དབྱངས་བཅས། ཕཊ་ཕཊ་ཕཊ་ཕཊ་ཕཊ་ཕཊ་ཕཊ། ཀྱེ་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་ཡུམ་ཆེན་སོགས། ལམ་སྣ་དྲོངས། ཕཊ། མ་ཅིག་རིགས་ལྔ་སྐུ་གར་སྟབས་ཤིག་ཤིག །ཕྱག་ཌཱ་དྲིལ་སིལ་སིལ། འོད་ཟེར་འཇའ་མཚོན་གྱི་རྣམ་པར་རང་དང་སྲུང་བྱའི་གནས་ལྔར་ཐིམ་པས་དབྱེར་མེད་ཆོས་ཀྱི་སྐུར་ལམ་གྱི་སོང་བར་གྱུར། ཕཊ་ཕཊ་ཕཊ། ཅེས་བརྗོད་བྲལ་མི་རྟོག་པའི་ངང་ལ་ཡུན་རིང་དུ་བཞག་གོ། །དེ་ནས་བསྔོ་བ་རྒྱས་པར་ཟབ་དོན་ཐུགས་སྙིང་ལས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་གྲུབ་ཐོབ་གཅོད་ཡུལ་རྒྱུད་པའི་བླ་མ་ཐམས་ཅད་བདག་དང་སྲིད་པའི་ལྷ་འདྲེ་ཐམས་ཅད་ལ་དགོངས་སུ་གསོལ། ལྷ་འདྲེ་ཁྱེད་རྣམས་ཀྱི་དང་པོ་བདག་ལ་ཆོ་འཕྲུལ་གདུག་རྩུབ་བསྟན་ཅིང་གནོད་པ་བསྐྱལ་བ་དང་། ཕྱི་ནས་གུས་པར་འདུད་ཅིང་ཕན་པ་བཏག་པ་དང་། བདག་གིས་ཀྱང་ཁྱེད་རྣམས་ལ་སྤྱོད་ལམ་འཇམ་པོས་ལུས་ཀྱི་སྦྱིན་པར་བཏང་བ་དང་། སྤྱོད་ལམ་རྩུབ་མོས་གནོད་པ་བསྐྱལ་བ་ལ་སོགས་པ་ཐབས་སྣ་ཚོགས་ཀྱི་སྒོ་ནས་ལྷ་འདྲེ་བྱང་ཆུབ་ཀྱི་ལམ་ལ་བཀོད་པའི་དགེ་བའི་རྩ་བ་བརྟེན་ནས། ལྷ་འདྲེ་ཁྱེད་རྣམས་ཀྱི་རྒྱུད་ལ་ཡོད་པའི་བསམ་སྦྱོར་ཉོན་མོངས་པའི་གདུག་རྩུབ་ཐམས་ཅད་ཞི་ནས་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཁྱེད་རྣམས་ཀྱང་རྒྱལ་པོ་བྱམས་པའི་སྟོབས་དང་། གནོད་སྦྱིན་ཤ་ཟ་སྤུན་ལྔ་བཞིན་དུ་བདག་གི་འཁོར་གྱིས་འདུས་པ་དང་པོར་གྱུར་ཅིག །ཁྱེད་རྣམས་ཀྱི་ལས་ངན་གྱི་སྒྲིབ་པ་བག་ཆགས་དང་བཅས་པ་རྣམས་སྐད་ཅིག་ལ་བྱང་ཤིང་དག་ནས། ཀུན་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །རྣལ་འབྱོར་པ་བདག་ཀྱང་རྒྱལ་པོ་ཟླ་འོད་དང་རྒྱལ་བུ་དགེ་དོན་བཞིན་དུ་ཕ་རོལ་དུ་ཕྱིན་པ་ཐམས་ཅད་མྱུར་དུ་རྫོགས་ནས་རང་གཞན་ཐམས་ཅད་དོན་གཉིས་ལྡན་པའི་སངས་རྒྱས་ཀྱི་གོ་འཕང་རིན་པོ་ཆེ་མྱུར་དུ་ཐོབ་པར་གྱུར་ཅིག །ཅེས་ལྷ་འདྲེའི་དོན་དང་། འགྲོ་བ་སྤྱི་ལ་དམིགས་ནས། ལུས་སྦྱིན་ནས། ན་མོ། བདག་གཞན་སོགས་བསྔོ་སྨོན་བྱ། མདུན་གྱི་ཡེ་ཤེས་པ་རྟེན་ཡོད་ན་རྟེན་བཞུགས་པ་དང་། མེད་ན་གཤེགས་གསོལ་བྱ། དམ་ཚིག་པ་རང་ལ་བསྡུ། མགྲོན་གཞན་རྣམས་དགའ་ཡ་ལེ་འཛུམ་ཤིག་གེ་མགྲོན་པོ་རང་ཁྱིམ་སོང་བ་ལྟར་གཤེགས་པར་བསམ། རྒྱུན་རྟས། འབྱུང་པོ་ས་འོག་རྒྱུ་བ་དང་། །ས་བླར་འཁོད་པ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། །སརྦ་བྷུ་ཏ་གཙྪ་གཙྪ། གཤེགས་གསོལ་བྱ། སྣོད་བཅུད་ཐམས་ཅད་གཞལ་ཡས་ཁང་ལ་བསྡུ། གཞལ་ཡས་ཁང་གི་ལྷ་ཚོགས་ཐམས་ཅད་བདག་ཉིད་གཙོ་བོ་ལ་བསྡུ། བདག་ཀྱང་གདན་ནས་འོད་དུ་ཞུ་ནས་ཐུགས་ཀའི་སྔགས་ཕྲེང་ཧཱུྃ་ལ་བསྡུ། ཧཱུྃ་མཐའ་ནས་ཐིག་ལེར་བསྡུ། ཐིག་ལེ་དེ་དམིགས་མེད་སྤྲོས་བྲལ་ཆེན་པོའི་ངང་ལ་བཞག་སྟེ། རྒྱུན་དབྱངས་དལ་མོས། ཕཊ། རང་སེམས་འགྱུ་བ་དངོས་མེད་ཀྱི་ཆོ་འཕྲུལ་ལས། །འདི་ལས་གཞན་པའི་འདྲེ་བགེགས་ལོགས་སུ་མེད། །ང་དང་ཁྱོད་མེད་གནོད་བྱ་གནོད་བྱེད་མེད། །ལྷ་འདྲེ་གཉིས་མེད་འཇིག་དང་འཇིགས་ཡུལ་མེད། །བཟང་ངན་གཉིས་བདེ་དང་སྡུག་བསྔལ་མེད། །འཁོར་འདས་གཉིས་མེད་རེ་དང་དོགས་པ་མེད། །ཐམས་ཅད་རོ་སྙོམས་ཆོས་སྐུ་ཡུམ་ཆེན་ཐིམ། ཅེས་ཡེངས་མེད་འཛིན་མེད་ཀ་དག་རྒྱ་ཡན་བློ་འདས་ཀྱི་ངང། ཕ་དམ་པས། སེམས་ལ་རྟོགས་པ་མེད་པས་རྟོགས་པའི་འབྲས་བུ་ཆོས་སྐུ་ཐོབ་སྟེ། ཕཊ། ངག་སྒྲ་ལ་རང་བཞིན་མེད་པར་རྟོགས་པས་འབྲས་བུ་ལོངས་སྐུ་ཐོབ་སྟེ། ཕཊཿ ལུས་འཛིན་པ་མེད་དེ་གཞན་དོན་ནུས་པ་འབྲས་བུ་སྤྲུལ་སྐུ་ཐོབ་སྟེ། ཕཊཿབགྲང་བ་ནི། མ་ཅིག་གིས། ལྟ་བ་ཀ་དག་མཐའ་བྲལ་དེ། །དམ་ཆོས་བརྒྱ་ཡི་དོ་ཟླ་མིན། །དམ་ཆོས་བདུད་ཀྱི་གཅོད་ཡུལ་འདི། །མན་ངག་བརྒྱ་ཡི་དོ་ཟླ་མིན། །ཅེས་པའི་དོན་ཡིན། དེ་ནས་ཕཊཿབརྗོད་པའི་རྐྱེན་གྱིས། རང་ཉིད་མཁའ་འགྲོ་མ་རྒྱན་མེད་གཅེར་བུ་གནས་གསུམ་འབྲུ་གསུམ་གྱིས་མཚན་པའི་སྐུར་ལྡང་། ལ་སྤྱོད་ལམ་ལ་འཇུག་གོ། །དེ་ནས་རྒྱལ་དང་དེ་སྲས་ལྷ་དང་དྲང་སྲོང་ཀུན་གྱི་ཤིས་པའི་བདེན་ཚིག་བརྗོད་བཞིན་མེ་ཏོག་གི་ཆར་དབབ་པས་ཀྱང་དགེ་ལེགས་བྱས་པར་མོས་ནས། བཀྲ་ཤིས་ཁྲོས་མའི་བཞད་གདང་གིས། ༀ། བཅོམ་ལྡན་ཤཱཀྱ་ཐུབ་པ་སོགས་བཀྲ་ཤིས་ཅི་རིགས་བྱའོ། །གཅོད་ཀྱི་ཕན་ཡོན་ནི། གུ་རུ་རིན་པོ་ཆེའི་བོག་འདོན་གཅོད་ཁྲིད་ལས། ལམ་གྱི་གེགས་སེལ། རྟོགས་པའི་བོག་འདོན། གཉིས་ཆོས་ཀྱི་མཚན་མ་གྲོལ། འཁྲུལ་སྣང་ཡུལ་ཕུད། སྣང་སྲིད་སེམས་སུ་ཆོད། འཁོར་འདས་རང་སར་གྲོལ་བར་འགྱུར་ཏེ། གནས་ལུགས་རྟོགས་ནས་བོག་འདོན་པས། ལོ་གཅིག་སྟན་ཐོག་སྒོམ་པ་བས། གཉན་སར་སྙེམ་ཐག་ཞག་གཅིག་བཅད་པས་བོག་ཆེ་ཞེས་གསུངས། དཀོན་མཆོག་མཉེས་པས་དངོས་གྲུབ་ཀྱི་རྒྱུན་རིང་། ལུས་ཀྱི་གཅེས་འཛིན་ཐང་བས་ཕྱི་ནང་གི་བར་ཆད་ཞི། བླ་མ་ཡི་དམ་མཉེས་པས་དམ་ཚིག་ཉམས་ཆག་བསྐོང་། མཁའ་འགྲོ་ཆོས་སྐྱོང་མཉེས་པས་ཕྱི་ནང་བར་ཆད་སྲུང་། ལན་ཆགས་བུ་ལོན་འཁོར་བས་ལས་ཀྱི་སྒྲིབ་པ་དག །བདག་འཛིན་བློས་ཐང་བས་སྣང་སྲིད་དབང་དུ་འདུ། ལྷ་འདྲེ་སྡོང་གྲོགས་བྱེད་པས་ཤིན་ཏུ་ཟབ་གསུངས། མ་ཅིག་གིས། ཨ་ཟ་མ་ཡི་བུ་ཁྱོད་སྟོན། །ནད་པ་འདྲེ་ལ་གཏད་པ་ན། །ནད་མེད་བདེ་བ་ཐོབ་པ་ཡིན། །བཅོལ་མ་དགྲ་ལ་བྱེད་པ་ན། །འཇིགས་མེད་བཙན་སར་ཐོབ་པ་ཡིན། །མི་མཐུན་གྲོགས་སུ་ཁྱེར་བ་དེ། །ཨ་མ་ཇོ་མོས་བཞད་པ་ཡིན། །སྲུངས་ཤིག་སྐྱོབས་ཤིག་བརྒྱ་བས་ཀྱང་། །ཟོ་ཞིག་ཁྱེར་ཅིག་གཅིག་གིས་དགའ། །ལུས་སྲོག་གཟན་དུ་བོར་བ་ན། །སྲུང་འཁོར་བཏགས་དུ་མེད་པ་ཡིན། །ཅེས་སོ། །མ་ཅིག་གི་གཏེར་གཅོད་ལས། །ནང་རིག་པ་འཁྲུལ་གྱིས་གདམས་པ་འདི། །ཤེས་སམ་ཐོས་པ་ཙམ་གྱིས་ཀྱང་། །རིགས་ལྡན་རྒྱལ་བའི་ཞིང་དུ་སྐྱེ། །གོ་ཞིང་རྟོགས་པར་གྱུར་པ་ན། །རྐང་གཉིས་གཙོ་བོ་དངོས་སུ་འགྱུར། །གོལ་ས་བཀག་ནས་ཉམས་བླངས་ན། །བླ་མེད་བྱང་ཆུབ་ལག་འཆང་ཡིན། །ངེས་པར་ཀླུ་གཉན་ཡོད་པའི་སར། །ཆུ་མིག་བརྒྱ་རྩ་བརྟེན་ནས་སུ། །ཞག་རེ་གཉིད་ཐུན་རེ་ལོག་ན། །ཕྱིར་མི་ལྡོག་པའི་ས་ལ་གནས། །མ་ཡིས་ཐུགས་དམ་ཞལ་ཡང་གཟིགས། །ལྷ་ཡི་ལུང་བསྟན་དེ་རུ་ཐོབ། །དབུག་དབྱུང་པ་ཡི་གདམ་པའོ། །ཞེས་དང་། ཟབ་དོན་ཐུགས་སྙིང་ལས། རྒྱལ་བའི་དགོངས་པ་གཅོད་ཡུལ་མཆོག་འདི་སུས་འཛིན་པ། །ཐར་པའི་ལམ་སྟོན་ཡོན་ཏན་དཔག་མེད་རྒྱ་ཆེན་འགྱུར། །ཞེས་གསུངས་སོ། །ཕྱི་ཡི་གཉན་ས་ལག་ལེན་དམིགས་འབུལ་ལས་རྒྱ་ཆེར་གསུངས་པས་འདིར་མ་སྤྲོས་སོ། །ཡིད་བཞིན་ནོར་བུ་ལས། ཐབས་ཤེས་ཟུང་འཇུག་ཤིན་ཏུ་གཅེས། །སྣང་བ་ལམ་ལམ་ཁྱེར་དེ་བས་གཅེས། །ཞེས་པ་ལྟར། ཕར་ཕྱིན་དྲུག་དང་འབྲེལ་དགོས་ཏེ། ལུས་སྲོག་ལ་མི་ཆགས་པས་མཆོད་སྦྱིན་བྱེད་པ་སྦྱིན་པ། ཆགས་སྡང་སོགས་དང་མ་འདྲེས་པས་ཚུལ་ཁྲིམས། སྡུག་བསྔལ་ཁྱད་དུ་བསད་པས་བཟོད་པ། མ་ཡེངས་རྩེ་གཅིག་བསམ་གཏན་རྣམས་ཐབས། བརྩོན་འགྲུས་ཀྱི་ཐབས་ཤེས་གཉིས་ཀྱི་གྲོགས། ཤེས་རབ་ནི་མཆོད་རྒྱུ་མཆོད་མཁན་མཆོད་ཡུལ་ཐམས་ཅད་སྒྱུ་མ་ལྟ་བུ་ལས་རང་བཞིན་མ་གྲུབ་པར་ཤེས་པར་འཁོད་འདས་ལ་རེ་དོགས་གཅོད་པ་ཡིན་ནོ། །སྤྱོད་ལམ་རྣམ་བཞིའི་ཆིངས་ལ། ཉལ་བའི་ཚེ་ཕཊཿརང་གི་སྔགས་མགོར་མ་ཅིག་སྐྱིལ་ཀྲུང་མཛད་པའི་པང་ཐོག་ཏུ་རང་གི་མགོ་སྔས་པར་བསམ། ཕཊཿཀྱི་རྣམ་ཤེས་མ་ཅིག་ཐུགས་ཀར་བསྟིམ། དེ་འཕོ་བའི་ཆིང་ངོ་། །ཕཊཿཀྱི་དེའི་དབུ་གཙུག་ནས་ཤཱཀྱ་ཐུབ་པ་སངས་རྒྱས་སྟོང་རྩ་གཉིས་ཀྱི་བསྐོར་ནས་གནས་གདོན་ལུས་གདོན་སོགས་ལྷ་འདྲེ་ལ་ཆོས་འཆད་པར་བསྒོམ། དེ་སྟེང་ལྷ་ཚོགས་ཀྱི་ཆིང་ངོ་། །ཕཊཿཀྱི་རང་གི་རོ་ཆེ་བ་བློས་ཚད་གཅིག་གྱུར། དེ་བར་ལུས་ཀྱི་ཆིང་ངོ་། །ཕཊཿཀྱིས་ཞབས་ལྕགས་ཁང་ནང་གནས་གདོན་ལུས་གདོན་སོགས། ས་དེའི་ལྷ་འདྲེ་ཐམས་ཅད་ཚུད་ནས་གར་ཡང་འགྲོ་དབང་མེད་པར་སྒོམ། དེ་ནི་འོག་གདོན་གྱི་ཆིང་ངོ་། །འགྲོ་བའི་ཚེ་ཕཊཿཀྱིས་རྣམ་ཤེས་མ་ཡི་ཐུགས་ཀར་སྤང་། ཕཊཿཀྱིས་རང་རོ་འགྱེལ་བ་ལྷ་འདྲེས་ཧ་ཐོབ་བྱེད་པར་སྒོམ། ཡང་འགྲོ་དུས་ཕཊཿཀྱིས་མལ་ས་ཤཱཀྱ་ཐུབ་པ་བཞུགས་ནས་ལྷ་འདྲེར་ཆོས་གསུང་བར་མོས་ཚུར་ཕེབ་ཛཿཧཱུྃ་བཾ་ཧོ་ས་ཤཀ་ཐུབ་རང་ལ་ཐིམ་པར་བསམ། དེ་གནས་སྲུང་འགྲོ་བའི་ཆིང་ངོ་། །རྒྱུན་དུ་སྤྱི་བོར་བླ་མ་ཅིག་སྒོམ་རྣམ་ཤེས་བསྲེ་ཕུང་པོ་ལྷ་འདྲེར་འགྱེད་པ་འདི་གལ་ཆེ། གཅོད་པ་ཅི་ལྟར་ཞན་ཀྱང་འཕོ་བ་འདེབས་མི་དགོས་གསུངས་སོ། །སླར་སྨྲས་པ། རྒྱལ་བས་ལེགས་གསུངས་ཟབ་ཅིང་རྒྱ་ཆེ་མདོ་སྔགས་ཆོས་སྒོ་བརྒྱད་ཁྲི་བཞི་སྟོང་ཡོད་མོད་ཀྱང་། །གངས་རི་སེངྒེ་ནམ་མཁའ་རྔ་སྒྲ་དངོས་གྲུབ་ཆུ་མིག་རྟ་བཟང་སྤུ་མཚུངས་འདྲ་དཔེ་དྲུག །འཕོ་བ་ཚོགས་བསགས་སྟོན་མོ་རིམ་གྲོ་དགོན་པ་ཡོན་བདག་དམ་ཆོས་མན་ངག་ཟླ་མེད་བརྒྱད། །སྟོང་ཉིད་སྙིང་རྗེ་ཚོགས་གཉིས་རབ་རྫོགས་སྲིད་ཞི་གཉིས་སྤང་སྐུ་གཉིས་གདན་ཐོག་གཅིག་བྱེད་རྨད། །མདོ་ལུགས་སྔགས་ལུགས་ཟུངས་འཇུག་རྣམ་གྲངས་ཞེ་གཉིས་ཞེ་གཉིས་པོད་གྲངས་མཆིས། །བཀའ་མ་གཏེར་མ་རྒྱ་གཅོད་བོད་གཅོད་ཕོ་གཅོད་མོ་གཅོད་གཉིས་གཉིས་དང་། །ཕ་བརྒྱུད་མ་བརྒྱུད་སྲས་བརྒྱུད་སློབ་བརྒྱུད་དོན་བརྒྱུད་ཁྲིད་ཅན་ཁྲིད་མེད་རྣམས། །ཆུ་བརྒྱ་ཟམ་པ་གཅིག་འོག་འཛུད་ལྟར་མན་ངག་བསློབ་བརྒྱུད་འདི་འདྲ་མེད། །རིན་ཆེན་བརྒྱ་རྩ་ལྷན་ཅིག་བཞུས་ནས་ལུགས་སུ་བླུགས་པའི་མཆོད་སྡོང་བཞིན། །མཐོང་བས་ཡིད་འཕྲོག་ཐོས་པས་སེམས་གདུང་མྱོང་བས་རེ་བཀང་གཞུང་བཟང་ལ། །གསལ་བྱེད་རིན་ཆེན་ལྡེའུ་མིག་གསར་པས་ཇི་བཞིན་འབྱེད་པའི་ལེགས་བྱས་གང་། །གངས་རི་དུང་དང་པད་རྩ་ལྟར་དཀར་འགྲོ་རྣམས་བྱང་ཆུབ་ཐོབ་ཕྱིར་བསྔོ། །ནམ་མཁའི་མཐའ་དང་རྒྱ་མཚོའི་གཏིང་བཞིན་བྱིས་བློས་དཔོགས་པར་མི་ནུས་ཀྱང་། །ཉི་ཚེའི་བྲོ་གྲོས་ཀུ་ཤའི་རྩེར་བླངས་ཐིག་པའི་ཟེག་མ་ཕྲ་བ་ཡིས། །གཞན་གྱི་དྲི་མ་བཀྲུ་བར་མི་ནུས་རང་ངོར་ནག་ནོག་གསལ་བྱེད་འདི། །བླ་མ་མཁའ་འགྲོའི་བཀའ་ཆད་མི་འབྱུང་དངོས་གྲུབ་མཆོག་གི་དགའ་སྟོན་ཤོག །ཅེས་པ་འདི་ཡི་སྨིན་གྲོལ་གྱི་བརྒྱུད་པ་ཀཿཐོག་གདན་རབས་ནས། སྤྲང་པོ་བླ་མ་ཀུན་བཟང་འགྱུར་མེད་ནས་ཀཿསི་པཎྜི་ཏ་ཆོས་ཀྱི་རྒྱ་མཚོའི་མདུན་དང་། འཁྲུལ་ཞིག་ནམ་མཁའ་རྒྱ་མཚོའི་ལུང་བསྟན་པའི་གཅོད་ཀྱི་གྲུབ་ཐོབ་མི་དྲུག་ནས་བརྒྱུད་པ། ཨ་འཛོམ་རྡོ་རྗེ་འཆང་དང་། རྒྱལ་སྲས་འགྱུར་མེད་རྡོ་རྗེ་བཅས་ཀྱི་མདུན་ནས། སྐྱབས་མགོན་རིན་པོ་ཆེ་ཐུབ་བསྟན་པདྨ་དགྱེས་པ་གཞན་ཕན་ཆོས་ཀྱི་འོད་ཟེར་མི་འགྱུར་མཆོག་གྲུབ་རྩལ་གྱིས་ལན་གསུམ་གསན་ཤིང་། ཕྱིས་དམ་ཚིག་ཆགས་ཉམས་ལ་གཟོན་དབང་མ་གསུང་པ་ལོ་བཅུ་ཕྲག་བརྒལ་ཙམ་གྱུར་རུང་དགྱེས་པ་ཆེན་པོས་སྨིན་དབང་རྒྱས་པ་ཁྲིད་ལུང་བཅས་དཔེ་ཕྱག་ཁར་གང་བཞུགས་ཐོབ་ཅིང་། རྗེས་སུ་བསྟན་མཁས་ཡོན་ཏན་རྒྱ་མཚོའི་ཟ་མ་ཏོག་མཁན་རྒྱལ་མཚན་འོད་ཟེར་མདུན་ནས་འཕྲོས་རྣམས་མཁན་ཆེན་རིན་པོ་ཆེ་ལེགས་བཤད་འབྱོར་ལྡན་མདུན་ནས་གསན་པ་ལྟར་ཐོབ་ཅིང་། ཕྱིས་འདི་ཡི་ལག་ལེན་གྱི་འགྲིགས་རིམ་བལྟས་ན་ཤེས་པ་ཞིག་བྲིས་ཞེས་ཆོས་སྤྱན་མཁྱེན་པའི་མིག་ལྡན་དྷརྨ་ཤྲཱིས་བསྐུལ་བ་དང་། དེའི་སྔོན་ཞིག་ན་སྤང་ལྗང་ཉམས་དགའ་བར་བྲག་དཀར་རྩེ་མཐོ་དགུང་ལ་རེག་པ་ཁྱོན་ཆེ་བའི་རྩེ་ཀུན་རལ་གྲི་དང་ཁ་ཏྲཾ་ལྟ་བུར་ཡོད་པའི་རྩེར་གཡའ་དག་པའི་ནམ་མཁར་འོད་ལྔའི་ཟླུམ་བསྐོར་གྱི་དཀྱིལ། སྤྲིན་དཀར་ལ་དབྱིབས་སུ་དོད་འདྲའི་ཕག་མོ་དཀར་མོ་གྲི་ཐོད་ཅན་ཕྱི་ནང་ཆེར་མི་སྒྲིབ་པ་ཞིག་རྨི་ལམ་ན་མཇལ་བ་དང་། ཕྱིས་འདིས་གཅོད་ཚོགས་བརྒྱ་རྩ་ཞག་ཉེར་ལྔ་ཙམ་ལ་བཏང་། ཟིན་ཐོ་འབྲི་རུང་མིན་གྱི་གསོལ་བ་བཏབ་ནས་རྨི་ལམ་བཏགས་པས། དེ་ནུབ་གུ་རུའི་ཁ་ཊྭཱྃ་ཡིན་ཟེར་བ་ཁམས་པའི་སྒྲུབ་ཆེན་གྱི་གུ་རུའི་སྐུ་སོབ་ན་ཡོད་པ་དེ་དང་འདྲ་སྙམས་ལ་གསེར་གྱི་ལྗིབ་བྱུག་ཅན། དར་སྣ་ལྔ་སོགས་སྔར་གྱི་མཛོད་དར་ལ་ཅུང་བགྲེས་ཉམས་ཅན་ལག་ཏུ་འབྱོར་བས་ཕྲག་ལ་བཀལ་ནས་དོགས་པོའི་འཕྲང་ལས་བརྒལ་ཏེ་ཁྱེར་བས་ཡངས་པའི་ཁྱམས་ཞིག་ན་སླེབས་པས། དེ་ན་དུང་གླིང་འཕན་ཡོ་བྱད་ཐོགས་པའི་སེར་སྦྲེང་པ་ཀུན་གྱི་བསུས་སོང་བར་ཁྱེར་བས་ཁ་ཊྭཱྃ་དེ་རྔ་སེར་པོ་ཡུ་བ་ཅན་ཞིག་གྱུར། དེ་ཁྱེར་བས་མི་མགོ་སྐམ་པོ་གསེར་མདོག་ཅན་ཆེ་བ། བརྡུང་ན་རྔ་ཡི་སྐད་ཡོད་སྙམས་པ་ཞིག་ཏུ་གྱུར་པ་རྨིས་པས། ཁ་ཊྭཱྃ་མཁའ་འགྲོའི་བརྡའ་ལ་འབྲི་རུང་བའི་ལྟས་བཟུང་ནས། འཁྲུལ་པ་ལ་ཡང་འཁྲུལ་གྱི་སྣོན་མ་བཏབ་ཏེ་གཞན་ལ་ཕན་འདོད་ཀྱི་ལྷག་བསམ་སྤུ་ཙམ་མེད་རུང་། རང་གི་རྒྱུད་ལ་སྦྱར་ཚེ་དཔེ་ཚོལ་སླ་བའི་ཕྱིར་རིག་འཛིན་བདུལ་འདུལ་རྡོ་རྗེའི་གདུང་བརྒྱུད་དུ་གྲགས་ཤིང་དཔལ་རྒྱལ་བ་ཀཿཐོག་པའི་བཀའ་དྲིན་གྱི་ཞོ་ཤས་ཐོབ་པའི་ཉག་ཤིས་བ་སྙིགས་མའི་སེར་གཟུགས་འདུ་གསུམ་པ། རྨོངས་པ་བ་གླང་སོ་ལྡན་ཁྱི་ཕག་ལྟ་བུའི་གདོལ་སྤྱོད་མཁན་ས་མནྟ་བྷ་དྲ་མ་ཏིས་ས་ཁྱི་ཟླ་བ་གསུམ་པའི་ཚེས་ཉེར་ལྔ་ལ་གཅོད་ཚོགས་ཞིག་བཏང་ནས་བྲིས་ཤིང་བྲག་དཀར་གླང་ཆེན་འདྲ་བའི་རྩེར་གྲུབ་པར་བྱས་པ། སོ་སྐྱེའི་མ་རྟོག་ལོག་རྟོག་གི་འཁྲུལ་བའི་རབ་རིབ་བླ་མ་མཁའ་འགྲོ་ཆོས་སྲུང་གི་སྤྱན་སྔར་བཤགས་པས་འདི་དང་གཏན་གྱི་སྒྲིབ་པར་མ་གྱུར་ཅིག །དགེ་བར་སྲིད་ན་འགྲོ་ཀུན་བདག་ལྟའི་འཁྲུལ་རྟོག་གཅོད་ནས་འཁྲུལ་མེད་ཤེས་རབ་ཕ་རོལ་ཏུ་ཕྱིན་མ་གདན་ཐོག་གཅིག་ཏུ་གྲུབ་པའི་རྒྱུ་གྱུར་ཅིག །མངྒ་ལཾ།། །།དགེའོ། །དགེའོ། །དགེའོ།། །།

མཁའ་འགྲོ་སྡེ་ལྔའི་མངོན་རྟོགས་ལས་བྱུང་བའི་གནས་དང་ཡོ་བྱད་བྱིན་བརླབ།

༅། །མཁའ་འགྲོ་སྡེ་ལྔའི་མངོན་རྟོགས་ལས་བྱུང་བའི་གནས་དང་ཡོ་བྱད་བྱིན་བརླབ་ནི། ༀ་བཛྲ་ཨ་མྲྀ་ཏ༴ ༀ་སྭ་བྷ་ཝ་སོགས། སྟོང་པ་ཉིད་དུ་གྱུར། སྟོང་པའི་ངང་ལས་ལྷ་རྫས་ལས་གྲུབ་པའི་གཞལ་ཡས་ཁང་གི་ཕྱི་ནང་ཀུན་ཏུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃཿའོད་དུ་ཞུ་བ་ལས་གྲུབ་པའི། མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོའི་སྒྲ་ལ་སོགས་པ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པར་གྱུར། མ་ཧཱ་གུ་རུ་དྷེ་ཝ་ཌཱཀྐི་ནི་ཨརྒྷཾ་པྲ་ཏིཙྪ་ཡེ་སྭཱ་ཧཱ། དེ་བཞིན་དུ། པ་དྱཾ། པུཥྤེ་སོགས། ཤཔྡ་པྲ་ཏིཙྪ་ཡེ་སྭཱ་ཧཱ། བླ་མ་ཡི་དམ་མཁའ་འགྲོ་སྤྲིན་གཏིབས་པ་ལྟར་བྱོན་ནས་བྱིན་གྱིས་བརླབས་པར་མོས་ལ། ༀ་བཛྲ་དྷརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙ་ལི་ནི། པྲ་ཛྙཱ་པ་ར་མི་ཏ། ན་ད་སྭ་བྷ་ཝན། བཛྲ་དྷརྨཱ་ཧྲཱིཿད་ཡ། སནྟོ་ཥ་ནོ་ཧཱུྃ་ཧཱུྃ་ཧཱུྃ། ཧོ་ཧོ་ཧོ། ཨ་ཁཾ་སྭཱ་ཧཱ། ཅེས་ལན་གསུམ་བརྗོད་ནས་རོལ་མོའི་སྒྲ་དག་ཏུ་བྱའོ།། །།

ཟབ་མོ་གཅོད་ཀྱི་སློབ་བརྒྱུད་ཀྱི་གསོལ་འདེབས་བསྡུས་པ།

༅། །ཟབ་མོ་གཅོད་ཀྱི་སློབ་བརྒྱུད་ཀྱི་གསོལ་འདེབས་བསྡུས་པ་བཞུགས། ཡུམ་ཆེན་ཤེར་ཕྱིན་ཤཱཀྱ་སེངྒེ་དང་། འཇམ་དཔལ་སྨྲ་སེང་ཨརྱ་ཏ་རེ་མ། སུ་ཁ་སིདྡྷི་ཨརྱ་དེ་བ་དང་། དམ་པ་རྒྱ་གར་རྣམས་ལ་གསོལ་བ་འདེབས། །སྐྱོ་སྟོན་བསོད་ནམས་མ་ཅིག་ལབ་ཀྱི་སྒྲོན། །ཁུ་སྒོམ་ཆོས་སེང་དོལ་པ་ཟང་ཐལ་དང་། །རྒྱ་ནག་གཅེར་བུ་སངས་རྒྱས་རབ་སྟོན་དང་། །ཟལ་མོ་དགེ་སློང་རྣམས་ལ་གསོལ་བ་འདེབས། །ཞེན་མེད་རས་པ་སངས་རྒྱས་གཉེན་སྟོན་དང་། །རས་པ་ཆོས་སེང་བཛྲ་སེངྷ་དང་། །པྲ་ཛྙཱ་གུ་རུ་རྗེ་བཙུན་དཔལ་འབར་བ། །ནམ་མཁའ་རྡོ་རྗེ་རྣམས་ལ་གསོལ་བ་འདེབས། །ཚུལ་ཁྲིམས་རྒྱལ་མཚན་ཆོས་ཀྱི་རྡོ་རྗེ་དང་། །ཡེ་ཤེས་རྒྱལ་མཚན་ཀུན་དགའ་འབུམ་པ་དང་། །བསོད་ནམས་འབུམ་པ་རྡོ་རྗེ་འོད་ཟེར་དང་། །ནམ་མཁའ་རྡོ་རྗེ་རྣམས་ལ་གསོལ་བ་འདེབས། །ནམ་མཁའ་བློ་གྲོས་ཀ་ལ་བཛྲ་དང་། །འཁྲུལ་ཞིག་རང་གྲོལ་ཆོས་སྐྱོང་རྒྱ་མཚོ་དང་། །ཀློང་གསལ་སྙིང་པོ་རྟོགས་ལྡན་ལུ་གུ་དང་། །བཀྲ་ཤིས་ཕུན་ཚོགས་རྣམས་ལ་གསོལ་བ་འདེབས། །ནམ་མཁའ་རྒྱ་མཚོ་དྲི་མེད་ཞིང་སྐྱོང་མགོན། །ཚེ་དབང་མཆོག་གྲུབ་ཀུན་བཟང་ངེས་དོན་དབང་། །འགྱུར་མེད་བསྟན་འཛིན་ཆོས་ཀྱི་བློ་གྲོས་དང་། །ཀུན་བཟང་འགྱུར་མེད་རྣམས་ལ་གསོལ་བ་འདེབས། །བཤད་སྒྲུབ་བསྟན་པའི་ཉི་མ་ཆོས་ཀྱི་རྗེ། །རྡོ་རྗེ་ལེགས་བཤད་འདུས་པ་རྩལ་ཆེན་དང་། །དྲིན་ཆེན་རྩ་བའི་བླ་མ་ལ་སོགས་པའི། །ཟབ་མོ་གཅོད་བརྒྱུད་རྣམས་ལ་གསོལ་བ་འདེབས། །ཐོག་བཅས་ཐོག་མེད་དགའ་བྲོད་སྙེམས་བྱེད་བདུད། །བདུད་བཞི་ཚར་གཅོད་སྙེམས་ཐག་ནང་ནས་ཆོད། །བདག་འཛིན་བློས་ཐང་བདག་མེད་མངོན་དུ་གྱུར། །གཟུང་འཛིན་མདུད་གྲོལ་མ་རིག་འཁྲུལ་པ་སངས། །ན་ཚ་བོག་ཐོན་རྐྱེན་ངན་ལམ་དུ་སློང་། །དགོས་མེད་རྒྱུད་སྐྱེ་གཉན་ས་རི་ཁྲོད་འགྲིམ། །འགྲོ་དོན་མཐར་ཕྱིན་སྟོང་ཉིད་སྙིང་རྗེ་སྤྱོད། །བདག་དོན་ཆོས་སྐུ་གཞན་དོན་གཟུགས་སྐུ་ཐོབ། །འཁོར་བ་དོང་སྤྲུགས་ཕྲིན་ལས་མཐར་ཕྱིན་ཤོག །རིང་བརྒྱུད་གསོལ་འདེབས་ཉུང་བསྡུས་འདི། །ལམ་འདིར་སྙིང་ནས་མོས་བྱེད་པ། །ས་མནྟ་ཡིས་སུག་བྲིས་སྤེལ། །དགེ་བས་ཡུམ་ཆེན་མངོན་གྱུར་ཤོག །དགེའོ།། །།

གཅོད་ཀྱི་འབུམ་བསྐུལ་བྱིན་རླབས་བདུད་རྩིའི་ཆུ་རྒྱུན་མ།

༅། །གཅོད་ཀྱི་འབུམ་བསྐུལ་བྱིན་རླབས་བདུད་རྩིའི་ཆུ་རྒྱུན་མ་བཞུགས་སོ། །མ་ཡུམ་ཆེན་ཐུགས་ལས་སྤྲུལ་པའི་སྲས། །མ་ཅིག་ཇོ་མོ་རྣལ་འབྱོར་མ། །ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །སྐལ་མེད་ཐར་པའི་ལམ་འདྲེན་མ། །ཛཿཧཱུྃ་བཾ་ཧོ་གནས་འདིར་བྱོན། །མཐོ་སྤྱི་གཙུག་རྒྱན་དེར་བཞུགས་སུ་གསོལ། །བཞུགས་ནས་བྱིན་གྱིས་བརླབས་དུ་གསོལ། །མ་ཆོས་དབྱིངས་ནམ་མཁའ་ཡོངས་པའི་ཕོ་བྲང་ནས། །ཐུགས་རྗེའི་སྤྲིན་ཕུང་ཐིབས་སེ་ཐིབ། །ཤེས་རབ་ཉི་འོད་ཏ་ལེ་བ། །ཉམས་དབྱངས་མགུར་མ་འུ་རུ་རུ། །བྱིན་རླབ་ཆུ་རྒྱུན་སི་ལི་ལི། །བྱིན་གྱིས་རློབས་ཤིག་མ་ཅིག་མ། །བར་ཆད་སོལ་ཅིག་མ་ཅིག་མ། །དབང་མཆོག་བསྐུར་ཞིག་མ་ཅིག་མ། །དངོས་གྲུབ་སྩོལ་ཞིག་མ་ཅིག་མ། །ལམ་སྣ་དྲོངས་ཤིག་མ་ཅིག་མ། །མ་མི་མིན་ཡེ་ཤེས་མཁའ་འགྲོ་མ། །ལབ་སྒྲོན་ཁྱོད་ལ་ཕྱག་འཚལ་བསྟོད། །འོག་མིན་གནས་སུ་ལམ་སྣ་དྲོངས། །མཁའ་སྤྱོད་གནས་སུ་ལམ་སྣ་དྲོངས། །ཨུ་རྒྱན་གནས་སུ་ལམ་སྣ་དྲོངས། །མ་ཤར་ནས་གོམ་བདུན་བྱོན་པའི་ཚེ། །སྐུ་ལུས་ཆུང་ལ་སྐུ་མདོག་དཀར། །རྡོ་རྗེ་མཁའ་འགྲོ་འབུམ་གྱིས་བསྐོར། །ཛཿཧཱུྃ་བྃ་ཧོཿསོགས་གང་ལྟར་འདྲེས། མ་ལྷོ་ནས་གོམ་བདུན་བྱོན་པའི་ཚེ། །སྐུ་ལུ་ཆུང་ལ་སྐུ་མདོག་སེར། །རིན་ཆེན་མཁའ་འགྲོ་འབུམ་གྱིས་བསྐོར། །ཛཿཧཱུྃ་སོགས། མ་ནུབ་ནས་གོམ་བདུན་བྱོན་པའི་ཚེ། །སྐུ་ལུས་ཆུང་ལ་སྐུ་མདོག་དམར། །པདྨ་མཁའ་འགྲོ་འབུམ་གྱིས་བསྐོར། །ཛཿཧཱུྃ༴སོགས། མ་བྱང་ནས་གོམ་བདུན་བྱོན་པའི་ཚེ། །སྐུ་ལུས་ཆུང་ལ་སྐུ་མདོག་ལྗང་། །ལས་ཀྱི་མཁའ་འགྲོ་འབུམ་གྱིས་བསྐོར། །ཛཿཧཱུྃ་སོགས། མ་དབུས་ནས་གོམ་བདུན་བྱོན་པའི་ཚེ། །སྐུ་ལུས་ཆུང་ལ་སྐུ་མདོག་སྔོ། །སངས་རྒྱས་མཁའ་འགྲོ་འབུམ་གྱིས་བསྐོར། །ཛཿཧཱུྃ་བཾ་ཧོས་གནས་འདིར་བྱོན། །མཐོ་སྤྱི་གཙུག་རྒྱན་དེར་བཞུགས་སུ་གསོལ། །བཞུགས་ནས་སོགས་ནས། ཨུ་རྒྱན་གནས་སུ་ལམ་སྣ་དྲོངས། །འབུམ་བསྐུལ་བྱིན་རླབ་བདུད་རྩིའི་ཆུ་རྒྱུན་གླང་ལུང་པས་གསུངས་པ་རྫོགས་སོ།། །།

ཁྲོས་མ་ནག་མོའི་དབང་སྡུད།

༅། །ཁྲོས་མ་ནག་མོའི་དབང་སྡུད་བཞུགས་སོ། །བླ་མ་ཡུམ་ཆེན་མཁའ་འགྲོ་ལ། །སྒོ་གསུམ་གུས་པས་ཕྱག་འཚལ་བསྟོད། །འགྲོ་རྣམས་ཐར་པ་ཐོབ་བྱའི་ཕྱིར། །ལུས་ཀྱི་མཆོད་སྦྱིན་འདིར་བརྗོད་བྱ། །རང་ཐ་མལ་དུ་གནས་པའི་རྣམ་པར་ཤེས་པ་དེ། ཡི་གེ་ཧཱུྃ་མཐིང་ནག་གི་རྣམ་པར་སྤྱི་གཙུག་ཚངས་པའི་བུ་ག་ནས་ཐོན། གནས་འགྱུར་གྱིས་ཁྲོས་མ་ནག་མོ། ཞལ་གཅིག་ཕྱག་གཉིས་པ། ཞལ་གདངས་བ་མཆེ་བ་གཙིག་པ། ལྗག་འདྲིལ་བ། གཡས་ཉི་མའི་སྤྱན་ནི་དམར་ཀྱི་ལི་ལི། གཡོན་ཟླ་བའི་སྤྱན་ནི་ངང་སྒ་ར་ར། དབུས་ཀྱི་སྤྱན་ལ་ཉི་ཟླ་སྐར་གསུམ་གའུ་དམར་ནག་ཏུ་འཁྲུག་པ། རལ་པ་ཟར་བུ་གྱེན་དུ་ཟིངས་པ། ཕག་ཞལ་ནག་པོ་སྤྱི་གཙུག་ཏུ་ཐོན་པ། ངུར་བའི་སྒྲས་ཁམས་གསུམ་མ་ལུས་དབང་དུ་བསྡུད་པ། ཟེ་བ་དམར་པོ་མེ་ལྟར་འབར་བ། མི་མགོ་སྐམ་པོ་ལྔས་དབུ་ལ་རྒྱན་པ། རློན་པ་ལྔ་བཅུ་རྩ་གཅིག་གི་དོ་ཤལ་བྱས་པ། ཞབས་གཡས་པ་གཡོན་པའི་བླ་ལ་གཏད་པ། ཕྱི་རྟིང་གི་བྷ་ག་ལ་བཅར་བ། རྐེད་པ་སྒེག་པ་ནུ་མ་འབུར་བ། བཅུ་དྲུག་ལོན་པའི་ན་ཚོད་དང་ལྡན་པ། གྲུ་མོ་ན་ཁ་ཊྭཱྃ་ཁ་འཛིན་པ། ཞབས་གཡོན་པ་འགྱིང་སྟབས་ཀྱི་ཚུལ་དུ་མར་བརྐྱང་པས། དམྱལ་བ་ན་རག་གི་སྒོ་བཞི་ནོན་པ། དབུ་སུམ་ཅུ་རྩ་གསུམ་གྱི་ལྷ་གནས་སུ་སླེབ་པ། སྐུ་སྟོད་ཡན་ཆད་ནམ་མཁའ་ལ་ཁྱབ་པས། ལྷ་ཁམས་ཐམས་ཅད་དབང་དུ་བསྡུད་པ། སྐུ་སྨད་མན་ཆད་ས་གཞི་ལ་ཁྱབ་པ། ཀླུ་ཁམས་ཐམས་ཅད་དབང་དུ་བསྡུད་པ། སྐེད་པ་རྡོ་རྗེ་སྤྲུག་པས་བར་སྣང་ལ་ཁྱབ་པ། སྣང་སྲིད་ལྷ་འདྲེ་དྲེགས་པ་ཅན་ཐམས་ཅད་དབང་དུ་བསྡུད་པ། སྐུ་ལ་ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ། མི་ལྤག་གི་གཡང་གཞི། གླང་ཆེན་གྱི་ཀོ་རློན། སྟག་ལྤགས་ཀྱིས་ཤམ་ཐབས། རུས་པ་དང་རིན་པོ་ཆེའི་རྒྱན་དྲུག་གིས་བརྒྱན་པ། ཕྱག་གཡས་པས་མི་ལྤགས་གིས་གཡང་གཞི་ཁྲག་དམར་རྩ་རེ་བ། གླད་ལ་གཡུག་ཅིང་ས་ལ་གདབ་པས། ཁམས་གསུམ་དབང་དུ་བསྡུད་པ། གཡོན་པས་མི་རྐང་གླིང་བུ་རྩེར་རྩེར་འབུད་པ། སྲིད་གསུམ་ཟིལ་གྱིས་ནོན་པ། དེའི་སྤྱི་གཙུག་ན་མ་དབང་བསྡུད་ཀྱི་ཁྲོས་མ་ནག་མོ་ལ། དབང་བསྡུད་ཀྱི་མཁའ་འགྲོ་མ་འབུམ་གྱིས་བསྐོར་བར་གྱུར། ཕཊཿ མ་མི་མངོན་ནམ་མཁའི་དབྱིངས་རུམ་ན། །སྤྱི་གཙུག་པད་ཟླའི་གདན་སྟེང་ན། །མི་མིན་ཡེ་ཤེས་མཁའ་འགྲོ་མ། །མ་ཅིག་ལབ་སྒྲོན་དྲག་མོའི་ཞལ། །གསོལ་བ་འདེབས་སོ་བྱིན་གྱིས་རློབས། །སྐུ་མདོག་མཐིང་ནག་འཇིག་པ་ལ། །སྤྱན་གསུམ་སྤྱན་རྩ་དམར་ལ་འཁྲུག །དབུ་སྐྲ་དམར་སེར་ཟི་ར་ཁོལ། །རུས་པའི་རྒྱན་གྱིས་རབ་ཏུ་མཛེས། །སྤྱི་གཙུག་བཀའ་བརྒྱུད་བླ་མ་བཞུགས། །བླ་མའི་བྱིན་བརླབས་ཤ་ར་ར། །གཡས་སུ་དཔའ་བོའི་ངར་དང་བཅས། །དཔའ་བོས་བྲོ་བརྡུང་ཁྲིགས་སེ་ཁྲིག །གཡོན་དེར་དཔའ་མོས་མདངས་དང་ལྡན། །དཔའ་མོས་གར་བྱེད་ཁྱུགས་སེ་ཁྱུག །དབང་སྡུད་མཁའ་འགྲོ་འབུམ་གྱི་བསྐོར། །ཕྱག་གཡས་མི་ལྤག་གཡང་གཞི་འཕྱར། །གཡོན་པས་མི་རྐང་གླིང་བུ་འབུད། །མི་ལྤག་གཡུག་ལ་གླིང་བུ་བུས། །གཡུག་པས་ལྷ་འདྲེ་དབང་དུ་བསྡུད། །གཡུག་པས་བྱད་མ་དབང་དུ་བསྡུད། །སྟེང་གདོན་ལྷ་དང་དྲང་སྲོང་བསྡུས། །འོག་གདོན་ཀླུ་དང་ས་བདག་བསྡུས། །བར་གདོན་ལྷ་སྲིན་སྡེ་བརྒྱད་བསྡུས། །ལྷ་དང་ལྷ་མིན་དབང་དུ་བསྡུས། །མི་དང་མི་མིན་དབང་དུ་བསྡུས། །དབང་བསྡུད་མཁའ་འགྲོ་མཐུ་མ་ཆུང་། །མི་ལྤགས་གཡང་བཞི་རྩལ་མ་ཞན། །མི་རྐང་གླིང་བུ་ངར་མ་ཆུང་། །རིགས་བཞི་མཁའ་འགྲོ་བང་མ་བུལ། །སྲིད་པའི་རྩེ་མན་ཆད་དང་། །ན་རག་དམྱལ་བ་ཡན་ཆད་དུ། །ནམ་མཁའི་སྤྲིན་ཚོགས་བཞིན་དུ་བསྡུས་ལ་ཤོག །བར་སྣང་ཆར་པ་བཞིན་དུ་བོབ་པ་ཤོག །ས་གཞི་རླུང་དམར་བཞིན་དུ་འཚུབས་ལ་ཤོག །མཆོད་པ་རྒྱ་ཆེན་འདི་ན་ཆེ། །བཟའ་བ་ཤ་ནི་འདི་ན་ཆེ། །བཏུང་བའི་ཁྲག་གི་འདི་ན་ཆེ། །མུར་བའི་ལྷ་བ་འདི་ན་སྣུམ། །གོན་པའི་ལྤགས་པ་འདི་ན་དྲོ། །ཕཊཿ སྤྱིར་སྟོང་གསུམ་གྱི་སྟོང་ཆེན་པོའི་བཀའ་ཡི་ལྷ་མ་སྲིན་སྡེ་བརྒྱད། སྒོས་ལྷོ་རྒྱལ་འཛམ་གླིང་འདིའི་བཀའི་ལྷ་མ་སྲིན་སྡེ་བརྒྱད། ཡང་སྒོས་གཉན་ས་འདིའི་སྟོད་སྨད་བར་གསུམ་ལ་གནས་པའི་སྟེང་གི་ལྷ། འོག་གི་ཀླུ་བར་གྱི་གཉན་ཐམས་ཅད་བདག་ཁྲོས་མ་ནག་མོའི་བཀའ་ཉན་དང་གསུང་སྡོད་ཀྱི་ཚུལ་དུ་འུར་གྱིས་འདིར་འདུས་ཤིག །ཧཱུྃ་ཧཱུྃ་ཧཱུྃ་ཕཊ། ཐམས་ཅད་འདུས་པར་བསམ་མོ། ༈ །གཞུང་དམིགས་འབུམ་ལྟར་ན། ས་རྒྱུས་མེད་པ་ཟིལ་གནོན་འཕེན་པ། ཚད་མེད་མཛད་ཆེན་ལས། རང་ཉིད་ཁྲོས་མ་ནག་མོའི་ཐུགས་ཀ་ནས། ཕཊ། གཅིག་བྱས་པ་ཙམ་གྱིས། གནམ་ལྕགས་རྡོ་རྗེ་རྩེ་དགུ་པ་འཕྲོས་པས་ས་ཕྱོགས་དེར་ཕོག་པ་ཙམ་གྱིས་ཙམ་གཞོང་གསིག་པ་ལྟར་བྱས་ནས་ཕཊ། གཅིག་བྱས་པ་ཙམ་གྱིས། རྡོ་རྗེ་ཡོངས་སུ་གྱུར་པ་ལས་དཔའ་བོ་དཔའ་མོའི་གུར་ཁང་། དེའི་རྒྱབ་རྡོ་རྗེའི་རྭ་གུར། དེའི་རྒྱབ་དུ་མི་ནག་ལག་སྦྲེལ་གྱི་གུར་ཁང་། དེའི་རྒྱབ་ཏུ་མུན་ནག་གི་གུར་ཁང་སྒོམ། དེར་གནས་པའི་ལྷ་འདྲེ་ཐམས་ཅད་གར་ཡང་འགྲོ་དབང་མེད་པར་བསྒོམ། དབང་བསྡུད་འོག་ན་ཡོད་ལྟར་བྱས་ནས་རྐང་དུང་ལན་གསུམ་འབུད་ནས། ༈ གཉིས་པ་ཟིལ་གནོན་ནི། ཕཊཿ བྱས་པ་ཙམ་གྱིས། རང་ཉིད་དཔའ་བོ་གོ་བརྗེ་བའི་ཚུལ་གྱིས་མ་ཅིག་ལབ་སྒྲོན་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིག་པ། ཕྱག་གཡས་ན་ཐོ་བ། གཡོན་ན་ལྕགས་ཀྱུ་བསྣམ་པ་གཅིག་ཏུ་གྱུར་པར་བསམ་ལ་ངག་ཏུ། ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། ཧཱུྃ། ལན་བདུན་བརྗོད་པ་ཙམ་གྱིས། རང་གི་ཐུགས་ཀ་དང་། སྨིན་མཚམས་བ་སྤུའི་གསེབ་ནས་ཁྲོ་ཆུང་རང་འདྲ་བ་གྲངས་མེད་པར་སྤྲོས་པས། ལྷ་འདྲེ་ཐམས་ཅད་གར་ཡང་འགྲོ་དབང་མེད་དེ། རང་ལ་ཕྱག་འཚལ་ཞིང་བཀའ་ཉན་གསུང་སྡོད་བྱེད་པར་བསྒོམ། ཁྲོ་ཆུང་རྣམས་ཀྱང་སྔ་མོའི་ལབ་སྒྲོན་དང་འཆབ་པའི་གུར་ཅིག་བསྒོམ་མོ། །དེ་ནས་ལྕགས་ཁང་བསྐུལ་པ་བྱའོ།། །།

ལྕགས་ཁང་བསྐུལ་པ་ཆེ་བ་ན།

༅། །ལྕགས་ཁང་བསྐུལ་པ་ཆེ་བ་ནི། ཧཱུྃཿ མ་ཅིག་ཇོ་མོ་ལབ་སྒྲོན་མ། །གཉན་ས་རི་ཁྲོད་བསྒྲོད་པའི་དུས། །ཁྲོ་མོ་སྐུ་མདོག་མཐིང་ནག་འབར་བ་ཆེན་པོ་ལ། །ཞལ་གཅིག་ཕྱག་གཉིས་སྤྱན་གསུམ་མ། །ཉི་ཟླ་དམར་ནག་འདྲེས་པའི་ཧུར་གྱིས་གཟིགས། །ཞལ་ནས་མཆེ་བ་གངས་རི་ལྟར་དུ་གཙིགས། །ཤང་ནས་ཧཱུྃ་གི་ཀླུ་ལེན་ཀྱུ་རུ་རུ། །དབུ་སྐྲ་མེ་འབར་སྟེང་གི་ལྷ་གནས་སླེབ། །ཡེ་ཤེས་ལྔ་ཡི་ཚྭ་ཚྭ་སྤུངས་སེ་སྤུང་། །ཕྱག་གཡས་རྡོ་རྗེ་ལྕགས་ཀྱུ་ཁྱུགས་སེ་ཁྱུག །ཐ་ཐང་བརྡབ་པའི་ལྷ་སྲིན་སྡེ་བརྒྱད་སྙིང་ནས་ཟུངས། །གཡོན་པའི་གནམ་ལྕགས་ཐོ་བ་སི་ལི་ལི། །ལྷ་འདྲེ་ཕོ་མོ་ཐམས་ཅད་ཟིལ་གྱིས་གནོན། །སྐུ་སྟོད་མི་ལྤགས་ཁྲག་འཛག་གསོལ། །ཁྲག་ཆེན་གྱི་ཐིག་ལེ་ལྷུབས་སེ་ལྷུབ། །ཐོད་རློན་ལྔ་བཅུའི་དོ་ཤལ་བྱས། །སྐུ་སྨད་སྟག་གི་ཤམ་ཐབས་བྱས། །ཞབས་གཉིས་བརྐྱང་བསྐུམ་ལྕགས་ཁང་གདན་ལ་བཞུགས། །བ་སྤུའི་སྨིན་མཚམས་ཐམས་ཅད་ལ། །ཧཱུྃ་གིས་ཆར་པ་སི་ལི་ལི། །ཧཱུྃ་ལས་འོད་ཟེར་འཕྲོས་པའི་སྐུ། །རང་འདྲའི་ཁྲོ་འཁོར་སྟོང་གསུམ་གང་། །ཀུན་ཀྱང་ཧཱུྃ་སྒྲ་ཏི་རི་རི། །འཇིག་པས་ཕཊ་སྒྲ་འངས་སེའང་། །རྡོ་རྗེའི་ལྕགས་ཀྱུ་སྲངས་སེ་སྲང་། །གནམ་ལྕགས་ཐོ་བ་ཤ་ར་ར། །རྡོ་རྗེ་ཁྱུང་གི་མདའ་འཕེན་ཤ་ར་ར། །རྡོ་རྗེ་ཐོགས་འདྲིལ་སེར་བ་ཁྲ་ལ་ལ། །རཀྟ་ཁྲག་གིས་ཆར་པ་སི་ལི་ལི། །བྱིན་རླབས་ཡེ་ཤེས་ན་བུན་ཐིབས་སེ་ཐིབ། །མཚོན་ཆ་སྣ་ཚོགས་གོ་ར་ཁྲིགས་སེ་ཁྲིག །ཁྲོས་མ་ནག་མོ་གུར་ཁང་ཀྱི་ལི་ལི། །ཁྱུང་དམར་མེ་འབར་གྱི་གཤོག་བརྡུང་ཁྲིགས་སེ་ཁྲིག །མི་ནག་ལག་སྦྲེལ་གུར་ཁང་སྐངས་སེ་སྐང་། །རལ་གྲི་ལོ་མའི་ནགས་ཚལ་ཤིགས་སི་ཤིག །རྒྱ་སྟག་ངར་མ་གྲམ་ཁྲོད་སྤུངས་སེ་སྤུང་། །སེངྒེ་རྒྱ་སྟག་གུར་དང་ལྷངས་སེ་ལྷང་། །མུན་པ་ནག་པོའི་གུར་ཁང་ཐིབས་སེ་ཐིབ། །ཡེ་ཤེས་བསྐལ་པའི་མེ་རི་ཕྱི་རིམ་འབར། །མཛེ་ཕོ་མཛེ་མོའི་གུར་ནི་ཉི་ལི་ལི། །སྟེང་ནས་རྡོ་རྗེའི་ཆར་པ་འབབ་པ་ལ། །འོག་ནས་ཁྲག་གི་རྒྱ་མཚོ་མ་ར་བསྒོམ། །ཞབས་ནས་ལྕགས་ཁང་དམར་ནག་འོངས་སེ་འོང་། །ནང་དུ་གདོན་མགོ་བསྐོར་རྗེས་སྙོག་བྱེད་པའི་ལྷ་འདྲེ་དང་། །དམ་ཉམས་གནོད་བྱེད་ཐམས་ཅད་ནང་དུ་ཚུད། །དབང་དུ་བསྡུས་ཤིག་མ་ཅིག་མ། །ཟིལ་གྱིས་གནོན་ཞིག་མ་ཅིག་མ། །དམ་ལ་ཐོག་ཅིག་མ་ཅིག་མ། །གཉན་ས་འདི་ལ་གནས་པའི་ལྷ་འདྲེ་རྣམས། །ཇི་སྲིད་སངས་རྒྱས་བྱང་ཆུབ་མ་ཐོབ་བར། །ཁྲོ་མོ་ཆེན་མོས་ཟིལ་གྱི་གནོན་པར་མཛོད། །ཕཊ་ཕཊ་ཕཊ། མི་དམིགས་པའི་ངང་ལ་བཞག་པ་གལ་ཆེའོ། །ལྕགས་ཁང་ཕུབ་པ་ནི། འོག་ལྕགས་ཁང་ནག་པོའི་གདན་སྟེང་ནས། །པདྨ་ཉི་ཟླའི་གདན་སྟེང་དུ། །སྤྲུལ་པའི་སྐུ་མཆོག་ལབ་སྒྲོན་མ། །ཁྲོས་པའི་སྐུ་མདོག་དམར་མོ་སྤྲུལ། །ཞལ་གདངས་སྙན་པའི་ཧཱུྃ་སྒྲ་སྒྲོགས། །ཁྲག་གིས་ཐིག་ལེ་སྐུ་ལ་བརྒྱན། །འཁོར་ཡང་ཁྲོས་མ་གྲངས་མེད་བསྐོར། །མི་ལྤག་གཡང་གཞི་ཕྱར་བ་སྟོང་གིས་བསྐོར། །མི་རྐང་གླིང་བུ་འབུད་པ་སྟོང་གིས་བསྐོར། །ཞིང་ཆེན་ཁུར་བ་སྟོང་གིས་བསྐོར། །ཐོད་དབྱུག་ཁུར་བ་སྟོང་གིས་བསྐོར། །མ་མཁའ་འགྲོའི་དམག་དཔུང་དབང་བསྡུས་ལ། །ཁྲོས་མ་ནག་མོས་དམག་སྣ་ཁྲིད། །རྗེ་བཙུན་དམར་མོའི་དམག་དཔུང་བསྐྱེད། །བཀའ་དང་དམ་ལས་འདའ་མི་རྣམས། །གྲུབ་ཐོབ་གཅོད་ལ་མི་ཉན་པ། །ཟབ་མོ་ཆོས་ཀྱི་འབྲེལ་བ་མི་བྱེད་པ། །དམ་པའི་ཆོས་ཀྱི་འཁོར་ལོ་མི་བསྐོར་པས། །ལྷ་སྲིན་སྡེ་བརྒྱད་ཐམས་ཅད་རྣམས། །ལྕགས་ཁང་ནག་པོའི་ནང་དུ་ཚུད། །མི་ལྤགས་དམར་པོས་ཁ་ཁོབ་ཅིག །མི་མགོ་ཕྲེང་བས་མཐའ་ནོན་ཞིག །བཅོལ་བའི་ཕྲིན་ལས་འགྲུབ་པར་མཛོད།། །།

གཅོད་ཀྱི་དབང་བསྡུད།

༅། །གཅོད་ཀྱི་དབང་བསྡུད་ནི། ཕཊ་ཕཊ་ཕཊཿ རང་ཉིད་རྗེ་བཙུན་མ་དམར་མོ་ཞལ་གཅིག་ཕྱག་གཉིས་གཡས་པས་མི་ལྤགས་ཀྱི་གཡང་གཞི་བསྣམས་ཞིང་། གཡོན་པས་མི་རྐང་གི་གླིང་བུ་འབུད་པར་གྱུར། ཕཊཿ འོ་གཙོ་བོ་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཐོ་སྲིད་པའི་རྩེ་མོ་མན་ཆད་དམའ་ན་རག་དམྱལ་ཁམས་ཡན་ཆད། བར་སྣང་ཞིང་སྲིད་པའི་ལྷ་འདྲེ་ཐམས་ཅད་འདིར་འདུས་ཤིག །ཕཊཿ འོ་ཁྱད་པར་གཉན་ཁྲོད་ཆེན་པོ་འདི་ལ་གནས་པའི་དཀར་པོ་ལྷ། དམར་པོ་བཙན། ནག་པོ་བདུད། ཁྲ་བོ་གཟའ། འཕེན་པོ་གཉན། ཕྱུག་པོ་ཀླུ། རཀྴ་སྲིན་པོ། ཕོ་མོ་མ་ནང་གི་སྡེ་ཚན་ཐམས་ཅད་འདིར་འདུས་ཤིག །ཕཊཿ དེ་ལྟར་འདུས་ལྷ་འདྲེ་ཐམས་ཅད་བདག་ལ་ཉོན་ཅིག །ཁྱེད་རྣམས་ལས་དང་ཉོན་མོངས་པའི་དབང་དུ་གྱུར་པ་ཡིན་པས། བདག་གིས་ཁྱེད་རྣམས་ལ་ཟབ་མོ་ཆོས་ཀྱི་འབྲེལ་བ་བྱེད། དམ་པ་ཆོས་ཀྱི་འཁོར་ལོ་བསྐོར། བྱང་ཆུབ་མཆོག་ཏུ་སེམས་བསྐྱེད་ནས། རྣམ་མཁྱེན་སངས་རྒྱས་ཀྱི་ས་ལ་འགོད་པ་ཡིན་པས་ཡིད་དད་གུས་དང་ལྡན་པས་ཉོན་ལ་ཕྲིན་ལས་མྱུར་དུ་བསྒྲུབས་ཤིག །ཀློང་གསལ་སྙིང་པོས་སོ། ༈ །རྗེ་བཙུན་མ་དམར་མོའི་ཟིལ་གནོན་ནི། ཕཊཿ རང་ཉིད་རྗེ་བཙུན་མ་དམར་མོ་ཞལ་གཅིག །ཕྱག་གཉིས་སྤྱན་གསུམ་པ། སྐུ་སྟོད་མི་མངོན་ནམ་མཁའི་དབྱིངས་སུ་སླེབ་པ། སྐུ་སྨད་ཞབས་གཉིས་རླུང་རི་ནག་པོ་རྡོ་རྗེ་རྒྱ་གྲམ་ལ་བརྟེན། སྤྱན་གསུམ་མི་མངོན་ནམ་མཁའི་དབྱིངས་སུ། སྤྱན་གཡས་ཉི་མ། གཡོན་ཟླ་བ། དབུས་མ་ཁྲག་མཚོ་ཁོལ་བ། ཕྱག་གཡས་མི་ལྤགས་གཡང་གཞི་དམར་ལྷབ་ལྷབ་ཕྱར་བ། གཡོན་པས་མི་རྐང་གླིང་བུ་ཚག་ཚག་འབུད་པས་ཁམས་གསུམ་དབང་དུ་སྡུད་པ། སྲིད་གསུམ་ཟིལ་གྱིས་གནོན་པ། བར་སྣང་ལྷ་སྲིན་སྡེ་བརྒྱད་འདར་ཤིག་ཤིག་བྱེད་པ་གཅིག་ཏུ་གྱུར། ཕཊ་ཕཊ་ཕཊ༔ དེ་ནས་ཟིལ་གནོན་བསྐུལ་བ་ནི། ལི་ཁྲི་འབུམ་བསྐུལ་འདིར་བྱའོ།། །།

ལི་ཁྲི་འབུམ་བསྐུལ།

༅། །ལི་ཁྲི་འབུམ་བསྐུལ་གྱི་དབུའོ། །མ་ཅིག་ཇོ་མོ་ལབ་སྒྲོན་མ། །མ་དྲག་པོའི་ལས་ལ་བསྐུལ་པ་ནི། །རྗེ་བཙུན་རྡོ་རྗེ་རྣལ་འབྱོར་མ། །སྐུ་མདོག་དམར་མོ་ལི་ཁྲིའི་མདོག །ཞལ་གཅིག་ཕྱག་གཉིས་སྤྱན་གསུམ་མཆེ་བ་གཙིགས། །སྤྱན་གསུམ་སྡང་མིག་བར་སྣང་ཁམས་སུ་བགྲད། །ཞབས་གཉིས་བརྐྱང་བསྐུམ་གར་ཐབས་སྣ་ཚོགས་མཛད། །དབུ་སྐྲ་དམར་སེར་ལྷ་ཡི་གནས་སུ་འབར། །རིན་པོ་ཆེ་དང་ཐོད་སྐམ་ལྔ་ཡི་བརྒྱན། །ཞལ་ནས་ཕཊ་སྒྲ་འབྲུག་སྒྲ་ཏི་རི་རི། །ཁྲོ་གཉེར་སྨིན་མ་གློག་ལྟར་ཁྱུགས་སེ་ཁྱུག །སྐུ་ལ་ཁྲག་གིས་ཆར་པ་སི་ལི་ལི། །སྙན་ནས་རྡོ་རྗེའི་ཐོ་བ་ཤ་ར་ར། །ཤང་ནས་ཡེ་ཤེས་རླུང་དམར་ཚུབས་སེ་ཚུབ། །ལྗགས་ལ་ཡེ་ཤེས་མེ་འབར་ཏ་ལ་ལ། །ཕྱག་གཡས་མི་ལྤགས་གཡང་གཞི་ལྷབས་སེ་ལྷབ། །ལན་གསུམ་བརྡབ་པས་སྲིད་གསུམ་ཟིལ་གྱིས་གནོན། །ཕྱག་གཡོན་པས་མི་རྐང་གླིང་བུ་འབུད། །ཐང་གསུམ་འབུད་པས་ཁམས་གསུམ་དབང་དུ་བསྡུས། །མ་སྐུ་སྟོད་ཞིང་ཆེན་ཨ་གྷ་ར། །རཀྟ་ཁྲག་གིས་ཐིག་པ་ཤ་ར་ར། །སྐུ་སྨད་སྟག་གིས་ཤམ་ཐབས་ཅན། །གནམ་ལྕགས་ཐོག་གིས་ཆར་པ་སི་ལི་ལི། །ཐོད་ཕྲེང་སྦྲུལ་ཆུན་དོ་ཤལ་ས་ལ་བཤལ། །ཞབས་གཉིས་རྡོ་རྗེ་དམྱལ་བ་གནོན། །མ་གར་ཐབ་ཀྱིས་གློག་དམར་བྲེངས་སེ་བྲེང་། །རུས་པའི་རྒྱན་ཆ་ཁྲ་ལ་ལ། །བྷནྡྷའི་ཕྲེང་བ་ཁྲི་ལི་ལི། །ཐལ་ཆེན་ཐལ་བ་ཐུ་ལུ་ལུ། །ཞག་གིས་ཟོ་རིས་ཤིགས་སེ་ཤིག །རྡོ་རྗེ་གྲི་གུག་སོ་ཚིག་ཤ་ར་ར། །མི་ནག་ལག་སྦྲེལ་གྱིས་གུར་ཁང་ཤགས་སེ་ཤག །དྲག་པོ་དམིགས་ཐུན་ཤིགས་སེ་ཤིག །ཕཊ་ཀྱི་འབྲུག་སྒྲ་ཏི་རི་རི། །སྟེང་ན་ལྷ་ཚོགས་ཐིབས་སེ་ཐེབ། །བར་ན་མཁའ་འགྲོ་དཔུངས་སེ་དཔུང་། །འོག་ན་ཆོས་སྐྱོང་ཁྲིགས་སེ་ཁྲིག །ཁྱོད་རང་འདྲ་བ་མང་པོས་བསྐོར། །མ་ཁམས་གསུམ་དབང་དུ་བསྡུས་ཅིང་བྱོན། །སྲིད་གསུམ་ཟིལ་གྱིས་གནོན་ཅིང་བྱོན། །སྟོང་གསུམ་ཕཊ་སྒྲའི་ཁེང་ཞིང་བྱོན། །རྣལ་འབྱོར་བདག་ཅག་འཁོར་བཅས་ལ། །གདོན་མགོ་བསྐོར་བྱེད་པའི་ལྷ་འདྲེ་ཕོ་མོ་རྣམས། །ཞབས་ལྕགས་ཁང་ནག་པོ་ནང་དུ་ཆུག །མི་ལྤགས་གཡང་གཞིའི་ཁ་ཁོབ་ལ། །མི་མགོ་ཕྲེང་བའི་མཐའ་ནས་ནོན། །སྟེང་ནས་ཁྲོ་བོ་ཁྲོ་མོའི་ཟིལ་གྱིས་གནོན་པར་མཛོད། །ཕཊ། ལི་ཁྲི་འབུམ་བསྐུལ་རྫོགས་སོ།། །།

མ་ཅིག་ཁྲོས་མ་ནག་མོའི་དུར་ཁྲོད་བསྐུལ་པ།

༅། །མ་ཅིག་ཁྲོས་མ་ནག་མོའི་དུར་ཁྲོད་བསྐུལ་པ་བཞུགས་སོ། །མ་འདི་ནས་ནུབ་ཀྱི་ཕྱོགས་རོལ་ནས། །ཨུ་ཙ་ལ་ཡི་དུར་ཁྲོད་ནས་། །རི་བོ་ཐམས་ཅད་རུས་པའི་རི། །རྩི་ཤིང་ཐམས་ཅད་མདའ་དང་མདུང་། །ཆུ་ཀླུང་ཐམས་ཅད་ཁྲག་དང་རྣག །སྒྲ་སྐད་ཐམས་ཅད་མཁའ་འགྲོའི་སྒྲ། །དུས་གསུམ་སངས་རྒྱས་ཐམས་ཅད་ཡ་ང་བ། །ཁྲོ་བཅུ་རྒྱུ་བ་མི་ནུས་ཤིང་། །ཕྱག་ན་རྡོ་རྗེ་འཇིག་པའི་ས། །ཨུ་ཙ་ལ་ཡི་དུར་ཁྲོད་ནས། །མ་ཅིག་ཁྲོས་མ་ནག་མོ་བཞེངས་སུ་གསོལ། །མ་ཅིག་ཁྲོས་མ་ནག་མོ་བཞེངས་ཙ་ན། །སྐུ་མདོག་ནག་མོ་འཇིགས་པའི་གཟི་མདངས་ཅན། །ཕྱག་གཡས་པས་ཞིང་ཆེན་གཡང་གཞི་སྡེབ། །བརྡབ་པས་སྣང་སྲིད་ལྷ་འདྲེ་དབང་དུ་བསྡུད། །ཕྱག་གཡོན་པས་མི་རྐང་གླིང་བུ་འབུད། །འབུད་པས་ལྷ་སྲིན་སྡེ་བརྒྱད་དམྱལ་ཐག་ཆོད། །སྤྱན་གཡས་པས་ཉི་མ་གྱེན་ལ་གཟིགས། །སྟེང་ཚངས་སོགས་ལྷ་རྣམས་དབང་དུ་བསྡུས། །སྤྱན་གཡོན་པས་ཟླ་བ་ཐུར་དུ་གཟིགས། །འོག་གྲུལ་བུམ་ཀླུ་རྣམས་དབང་དུ་བསྡུད། །ཞབས་གཉིས་ཀྲིག་ཀྲིག་ས་ལ་བརྡབ། །འཇིག་རྟེན་ཁམས་རྣམས་གཡོ་བར་བྱེད། །སྤྱི་གཙུག་ཕག་ཞལ་མཁའ་ལ་ངུར། །ངུར་བའི་ལྷ་སྲིན་སྡེ་བརྒྱད་དབང་དུ་བསྡུད། །མ་དབང་བསྡུད་མཁའ་འགྲོ་མཐུ་མ་ཆུང་། །དབང་སྡུད་མཁའ་འགྲོ་རྩལ་མ་ཞན། །རིགས་བཞི་མཁའ་འགྲོ་མཐུ་མ་ཆུང་། །རིགས་བཞིའི་མཁའ་འགྲོ་རྩལ་མ་ཞན། །ནམ་མཁའི་སྤྲིན་ཚོགས་བཞིན་དུ་འདུས་ལ་ཤོག །བར་སྣང་ཆར་པ་བཞིན་དུ་ཕོབ་ལ་ཤོག །ས་གཞི་རླུང་དམར་བཞིན་དུ་འཚུབས་ལ་ཤོག །ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། མ་ཐུགས་ཀ་ལས་ནི་འོད་ཟེར་འགྱེད། །ཞིང་ཆེན་གཡང་གཞི་ཤར་དུ་གཡུགས། །རྡོ་རྗེ་མཁའ་འགྲོ་ཕོ་ཉར་འགྱེད། །རྡོ་རྗེ་མཁའ་འགྲོའི་བརྟུལ་ཞུགས་ཀྱིས། །ཤར་ཕྱོགས་ཕོ་གདོན་རྒྱལ་པོ་དབང་དུ་བསྡུས། །མོ་གདོན་སྲིན་མོ་དབང་དུ་བསྡུས། །གཉན་སའི་ལྷ་འདྲེ་དབང་དུ་བསྡུས། །ཁྱི་དམར་རྒྱལ་འགོང་༴ གནས་གདོན་ལུས་གདོན༴ ཟ་འདྲེ་ཤི་གཤེད༴ སྲོག་གཅོད་དབུག་ལེན༴ གསོན་བདུད་གཤིན་ལྕགས༴ གོད་འདྲེ་གོད་སྲི་དབང་དུ༴ བགབ་འདྲེ་བགབ་སྲི༴ ན་ཚ་ན་འདྲེ་དབང་༴ ཆེ་འདྲེ་ཆུང་སྲི་དབང་དུ་བསྡུས། །དབང་དུ་བསྡུས་ལ་ཟིལ་གྱིས་གནོན། །ཕཊ་ཕཊ་ཕཊཿ ལྷོ་སོགས་འདྲེས།། །།

ཟབ་དོན་གཅོད་ཀྱི་ཕུང་པོ་མཆོད་སྦྱིན་གདན་ཐོག་གཅིག་མ་ཉམས་སུ་ལེན་པའི་རིམ་པ།

ཟབ་དོན་གཅོད་ཀྱི་ཕུང་པོ་མཆོད་སྦྱིན་གདན་ཐོག་གཅིག་མ་ཉམས་སུ་ལེན་པའི་རིམ་པ་བཞུགས་སོ། །སྤྱི་དོན་གཉིས་པ་དངོས་གཞི་ཉམས་ལེན་གྱི་རིམ་པ་ལ་བཞི་སྟེ། མངོན་པར་རྟོགས་པའི་གོ་རིམ་བསྟན་པ། ནད་གདོན་གཟེར་བུའི་གདམ་པ་བསྟན་པ། མན་ངག་འཐོར་བའི་ལས་ཚོགས་བསྟན་པ། སྤྱི་ཆིང་གལ་མདོའི་རིམ་པ་བསྟན་པའོ། །དང་པོ་ལ་བདུན་ཏེ། དང་པོ་དབང་བསྡུད་ཟིལ་གནོན་གྱི་རིམ་པ། གཉིས་པ་སྐྱབས་སུ་འགྲོ་བ་དང་། གསུམ་པ་སེམས་བསྐྱེད་པ། བཞི་པ་གསོལ་བ་གདབ་པ། ལྔ་པ་བདུད་རྩི་དཀར་འགྱེད། དྲུག་པ་དམར་འགྱེད། བདུན་པ་གཏོར་གཞོང་མའོ། །དང་པོ་ནི་ནན་ཏན་བྱ་བའི་ཕྱིར་སྐབས་འདིར་ཡང་དབང་བསྡུད་ཟིལ་གནོན་གྱི་རིམ་པ་གཞུང་ལྟར་བྱའོ། །དབང་སྡུད་བསྡུ་ན། ས་འོག་ས་སྟེང་ས་བླ་གསུམ་གྱི་བཀའ་སྣང་ཞིང་སྲིད་པའི་ལྷ་འདྲེ་ཐམས་ཅད་འདིར་འདུས་ཤིག །ཅེས་བརྗོད་པས་ལྷ་འདྲེ་ཐམས་ཅད་འུབ་ཀྱིས་འདུས་པར་བསྒོམ། ཟིལ་གནོན་གཞུང་དང་འདྲའོ། །དེས་དབང་བསྡུད་ཟིལ་གནོན་སོང་ནས། རྒྱུན་དུ་གཅེས་པ་རྣམ་བརྒྱད་ནི། བརྟེན་ས་དཀོན་མཆོག་གསུམ་པོ་གཅེས། །སྣང་སྲིད་སྙིང་རྗེས་སྐྱོངས་བ་གཅེས། །ཅེས་གསུངས་པས། གཉིས་པ་སྐྱབས་སུ་འགྲོ་དགོས་པས། སྐྱབས་ཡུལ་ནི། ཕཊཿ གཅིག་བྱས་པ་ཙམ་གྱིས། སྐད་ཅིག་གིས་མདུན་གྱི་ནམ་མཁའི་གནས་སུ། པདྨ་དང་ཟླ་བའི་གདན་ལ། མ་ཅིག་ལབ་ཀྱི་སྒྲོན་མ་ལ། གྲུབ་ཐོབ་གཅོད་ཀྱི་བརྒྱུད་པ་རྣམས་དང་། བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བཀྲ་དཔུང་ངེ་འོད་ཐིབས་སེ་བསྐོར་ནས་རང་ལ་ཞལ་གྱི་ཕྱོགས། སྤྱན་གྱིས་གཟིགས། ཐུགས་ཀྱིས་དགོངས་ནས་བཞུགས་པར་སྒོམ། ཕཊཿ གཅིག་གིས་རང་ཉིད་ཐ་མལ་པ་རེད་པར་བསྒོམ་ལ། རང་ཉིད་དང་ལྷ་འདྲེ་ཀུན་གྱིས་སྐྱབས་འགྲོ་མགྲིན་གཅིག་ཏུ་བྱེད་པར་བསམ་ཞིང་འདི་སྐད་དོ། །གནས་གདོན་ལུས་གདོན་གཉིས་ཀྱི་གཙོར་བྱས་ནམ་མཁའ་དང་མཉམ་པའི་སེམས་ཅན་ཐམས་ཅད། བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ མ་ཅིག་ལབ་ཀྱི་སྒྲོན་མ་ལ༴ འཁོར་རིགས་བཞི་མཁའ་འགྲོ་མ་རྣམས་ལ༴ གྲུབ་ཐོབ་གཅོད་ཀྱི་བརྒྱུད་པ་རྣམས་ལ༴ རྟོགས་ལྡན་ཉམས་ཀྱི་བརྒྱུད་པ་རྣམས་ལ༴ མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ལ་སྐྱབས་སུ་མཆིའོ། །དེ་ལྟར་ལན་བདུན་ཚར་ནས་ཐུན་མོང་མ་ཡིན་པའི་སྐྱབས་འགྲོ་དང་ཡན་ལག་བརྒྱད་པ་ཆབ་གཅིག་བྱེད་པ་ནི་འདི་སྐད་དོ། །ན་མོ། གཉན་ས་འདིར་གནས་ཀྱི་ལྷ་འདྲེ་དང་། །བདག་ལ་ཆོ་འཕྲུལ་སྟོན་པའི་ལུས་གདོན་རྣམས། །མ་མི་མིན་ཡེ་ཤེས་མཁའ་འགྲོ་མ། །ལབ་སྒྲོན་ཁྱེད་ལ་སྐྱབས་སུ་མཆིའོ། །རང་རིག་ཡེ་ཤེས་སྟོན་མཛད་པའི། །བླ་མ་རྣམས་ལ་སྐྱབས་སུ་མཆིའོ། །དངོས་གྲུབ་ངེས་པར་སྟེར་མཛད་པའི། །ཡི་དམ་རྣམས་ལ༴ བརྩེ་གདུང་དམ་ཚིག་ལྡན་པ་ཡིས། །མཁའ་འགྲོ་རྣམས་ལ༴ བགེགས་དང་བར་ཆད་ཞི་མཛད་པའི། །ཆོས་སྐྱོང་རྣམས་ལ༴ སྤངས་རྟོགས་ཕུན་སུམ་ཚོགས་པ་ཡིས། །སངས་རྒྱས་རྣམས་ལ༴ ཞི་གྱུར་འདོད་ཆགས་བྲལ་བ་ཡི། །དམ་ཆོས་རྣམས་ལ༴ གང་ལ་ཕུལ་ན་དོན་ཆེ་བའི། །དགེ་འདུན་རྣམས་ལ༴ གཞོན་ནུའི་ཚུལ་འཛིན་ཡོན་ཏན་ལྡན། །འཇམ་དཔལ་དབྱངས་ལ༴ ངེས་པར་སྙིང་རྗེ་བསྐྱེད་པ་ཡི། །སྤྱན་རས་གཟིགས་ལ༴ མཐུ་སྟོབས་ཆེན་པོས་གདུག་པ་འདུལ། །རྡོ་རྗེ་བསྣམས་ལ༴ བདག་སོགས་འགྲོ་བ་སེམས་ཅན་རྣམས། །ཇི་སྲིད་སྙིང་པོ་བྱང་ཆུབ་བར། །ཁྱེད་རྣམས་ལ་ནི་སྐྱབས་སུ་མཆི། །ཁྱེད་རྣམས་ལ་ནི་གསོལ་བ་འདེབས། །ཁྱེད་རྣམས་ལ་ནི་བརྟེན་བཅའོ། །འདོད་ཡོན་ལྔ་ཡི་མཆོད་པ་འབུལ། །ཕུང་པོ་ལྔ་པོ་མཆོད་པར་བཞེས། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །ཆོས་ཀྱིས་འཁོར་ལོ་བསྐོར་དུ་གསོལ། །མྱ་ངན་མི་མདའ་གསོལ་བ་འདེབས། །དགེ་དེས་སེམས་ཅན་བདེ་གྱུར་ཅིག །རྫོགས་སངས་རྒྱས་སུ་སེམས་བསྐྱེད་དོ། །ཅེས་མ་ཅིག་གིས་མཛད་པའི་སྐྱབས་འགྲོ་ཡན་ལག་བརྒྱད་པའོ། །གསུམ་པ་སེམས་བསྐྱེད་པ་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་གཅོད་ཉམས་སུ་ལེན་པར་བྱ་སྙམ་དུ། བསམ་ནས་ངག་ཏུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །བྱས་པ་ཙམ་གྱིས། སྐྱབས་ཡུལ་གྱི་ལྷ་ཚོགས་རྣམས་དགྱེས་ཤིང་འཛུམ་པའི་ཚུལ་གྱིས། གདན་ཁྲི་དང་བཅས་པ་འོད་དུ་ཞུ་ནས། རང་གི་ཚངས་བུག་ཏུ་ཐིམ་པ་ཙམ་གྱིས་ལུས་ཕྱི་ནང་གི་སྡིག་སྒྲིབ་དམ་ཚིག་ཆགས་ཉམས་ཐམས་ཅད་སངས་ཀྱི་དག་པར་བསམ། དེས་སེམས་བསྐྱེད་པ་སོང་། བཞི་པ་གསོལ་བ་གདབ་པ་ལའང་གསུམ་སྟེ། དང་པོ་ལྷ་བསྐྱེད་མཆོད་བསྟོད་ནི། ༀ་སྭ་བྷ་ཝ་ཤུདྡྷ་སརྦ་དྷརྨཱ་སྭ་བྷ་ཝ་ཤུདྡྷོ྅་ཧཾ། བདག་དང་དངོས་པོ་ཐམས་ཅད་སྟོང་པར་གྱུར། སྟོང་པའི་ངང་ལས་རང་གི་སྤྱི་བོར་མདའ་གང་ཙམ་གྱི་སྟེང་དུ། པདྨ་ཉི་མ་ཟླ་བའི་གདན་ལ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བའི་བླ་མ་དང་གཉིས་སུ་མེད་པའི་མ་ཅིག་ལབ་ཀྱི་སྒྲོན་མ་སྐུ་མདོག་གངས་རི་ལ་ཉི་མ་ཤར་བ་ལྟར་དཀར་བ། ཞལ་གཅིག་ཕྱག་གཉིས་གཡས་གསེར་གྱི་ཌཱ་མ་རུ། གཡོན་དངུལ་དཀར་གྱི་དྲིལ་བུ་གཡེར་ཁ་དཀྲོལ་བ། སྐུ་ལ་རས་ཕྲུག་དཀར་པོའི་རལ་ཀ་མནབ་པ། དབུ་སྐྲ་སིལ་མས་སྐུ་རྒྱབ་ནོན་པ། ཞབས་རྡོ་རྗེའི་སྐྱིལ་ཀྲུང་གི་བཞུགས་པ། མཚན་དང་དཔེ་བྱད་འོད་ཟེར་དང་ལྡན་པར་བསམ། མ་ཅིག་གི་སྤྱི་བོར་པད་ཟླ་ཉི་མའི་སྟེང་དུ། ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་གསེར་གྱི་མདོག་འདྲ་བ། ཞལ་གཅིག་ཕྱག་བཞི་མ་གཡས་ཀྱི་དང་པོ་ན་གསེར་གྱི་རྡོ་རྗེ་ལྔ་པ་ཐུགས་ཀར་བསྣམས་པ། འོག་མ་ན་ཤེས་རབ་ཀྱི་རལ་གྲི། གཡོན་དང་པོ་མཉམ་བཞག །འོག་མ་ན་ཤེས་རབ་ཀྱི་པོ་ཏི་བསྣམས་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། རལ་པ་ཐོར་ཚུགས་ལྷག་མ་ཐུར་དུ་གྲོལ་བ། རིན་པོ་ཆེ་དང་དར་སྣ་ཚོགས་ཀྱིས་སྤྲས་པ། མཚན་དང་དཔེ་བྱད་འོད་ཟེར་འབར་བ་གཅིག་ཏུ་བསམ། མ་ཅིག་གི་གཡས་སུ་པད་ཟླ་ཉི་མའི་སྟེང་དུ་སངས་རྒྱས་བསྟན་པའི་གཙོ་བོ་ཤཱཀྱ་ཐུབ་པ་གསེར་གྱི་མདོག་འདྲ་བ། ཞལ་གཅིག་ཕྱག་གཉིས་གཡས་ས་ནོན། གཡོན་མཉམ་བཞག །ཆོས་གོས་ངུར་སྨྲིག་གསོལ་བ། མཚན་དང་དཔེ་བྱད་འོད་ཟེར་འདོམ་གང་དང་བཅས་པར་བསྒོམ། མ་ཅིག་གིས་གཡོན་དུ་འཇམ་དཔལ་སྨྲ་བའི་སེང་གེ་ཞལ་གཅིག་ཕྱག་གཉིས། གཡས་རལ་གྲི། གཡོན་ཨུཏྤལའི་ཁར་ཤེས་རབ་ཀྱི་པོ་ཏི་བསྣམས་པ། གསེར་མདོག་རལ་པ་སྤྱི་བོར་བཅིངས་པ། ལྷག་མ་གྲོལ་བ། རིན་པོ་ཆེ་སྣ་ཚོགས་ཀྱིས་བརྒྱན་ཅིང་དར་སྣ་ལྔའི་ཤམ་ཐབས་ཅན། སེམས་དཔའི་སྐྱིལ་ཀྲུང་གིས་བཞུགས་པར་བསམ། ཡུམ་སྲས་དེ་བཞི་ལ་མདུན་ནས་གཡས་བསྐོར་དུ་པད་ཟླའི་གདན་ལ། རྗེ་བཙུན་སྒྲོལ་མ། མཁའ་འགྲོ་སུ་ཀ་སི་ཏི། རྗེ་ཨརྱ་དེ་བ། ཕ་དམ་པ་རྒྱ་གར། སྐྱོ་སྟོན་བསོད་ནམས་བླ་མ། མ་ཅིག་ལབ་ཀྱི་སྒྲོན་མ། ཁུ་སྒོམ་ཆོས་ཀྱི་སེངྒེ། ཕ་དོལ་པ་ཟང་ཐལ། རྒྱ་ནག་གཅེར་བུ། སངས་རྒྱས་རབ་སྟོན། སངས་རྒྱས་དགེ་སློང་། སངས་རྒྱས་རས་པ། སངས་རྒྱས་གཉན་སྟོན། ཞེན་མེད་རས་པ། ཆོས་ཀྱི་སེང་གེ། གཡུ་གཞེར་སྟོན་པ། བཛྲ་སེངྷ། སློབ་དཔོན་པྲ་ཛྙཱ་གུ་རུ། རྗེ་བཙུན་དཔལ་འབར་བ། རྡོ་རྗེ་དཔལ་བ། རྟོགས་ལྡན་ནམ་མཁའ་རྡོ་རྗེ། སྐྱེས་མཆོག་ཚུལ་ཁྲིམས་རྒྱལ་མཚན། མཚུངས་མེད་ཆོས་ཀྱི་རྡོ་རྗེ། མཁས་གྲུབ་ཛྙཱ་ན་ཀེ་ཏུ། སྐྱེས་མཆོག་བསོད་ནམས་དཔལ་བ། བྱ་བཏང་ཀུན་དགའ་འབུམ་པ། མཁས་གྲུབ་པུཎྱེ་ལཀྵ། སྟོན་པ་ཤཱཀྱ་འོད་ཟེར། མཁས་མཆོག་ཀེ་ཏུ་སེངྷ། མགོན་པོ་ནམ་མཁའ་རྡོ་རྗེ། ག་ག་མ་ཏི། ཀ་ལ་བཛྲ། དབང་དྲག་རྒྱ་མཚོ། ཆོས་སྐྱོང་རྒྱ་མཚོ། ཀློང་གསལ་སྙིང་པོ། ཆོས་ཉིད་རྒྱ་མཚོ། བཀྲ་ཤིས་ཕུན་ཚོགས། ནམ་མཁའ་རྒྱ་མཚོ། ༈ འཇུ་བླ་པདྨ་ཆོས་དབྱིངས། སངས་རྒྱས་གྲགས་པ། ནམ་མཁའ་ཆོས་སྐྱོང་། འཇིགས་མེད་བསམ་གཏན། ཀུན་བཟང་རྣམ་རྒྱལ། རཏྣ་གུ་རུ། ཆོས་ཀྱི་རྒྱ་མཚོ། རྡོ་རྗེ་ལེགས་བཤད། རྩ་བའི་བླ་མ་སོགས་ཞེས་སམ། ཡང་ན་མན་ངག་དོན་བརྒྱུད་ལྟར་ན་ནམ་མཁའ་རྒྱ་མཚོའི་རྗེས། དྲི་མེད་ཞིང་སྐྱོང་། ཚེ་དབང་མཆོག་གྲུབ། ངེས་དོན་དབང་པོ། འགྱུར་མེད་བསྟན་འཛིན། ཆོས་ཀྱི་བློ་གྲོས། ཀུན་བཟང་འགྱུར་མེད། ཆོས་ཀྱི་རྒྱ་མཚོ། རྡོ་རྗེ་ལེགས་བཤད། རྩ་བའི་བླ་མ་སོགས། གྲུབ་ཐོབ་གཅོད་ཀྱི་བརྒྱུད་པའི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མ་ཐམས་ཅད་སྤྲིན་གཏིབ་པ་ལྟར་བསྐོར་ནས་བཞུགས་པའི་སྤྱི་བོར་ༀ། མགྲིན་པ་ཨཱཿ ཐུགས་ཀར་ཧཱུྃ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། བཛྲ་ས་མ་ཡ་ཛ་ཛ། ཛཿཧཱུྃ་བཾ་ཧོཿ གཉིས་སུ་མེད་པར་གྱུར་པར་བསམ། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་ཟད་འཇོམ་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །ཡུམ་ཆེན་འཁོར་བཅས་གནས་འདིར་གཤེགས་སུ་གསོལ། །ཧཱུྃ། ཡང་དག་ཉིད་དུ་དག་མོད་ཀྱང་། །འཇིག་རྟེན་སྲི་ཞུའི་ཚུལ་གྱིས་ནི། །ཕྱག་དང་ཞབས་གཉིས་བསིལ་མཛོད་ལ། །འདི་ཉིད་དུ་ནི་བཞུགས་སུ་གསོལ། །ཞེས་ཁྲུས་གསོལ། ཧཱུྃ། མྱ་ངན་མི་མདའ་ཐུགས་རྗེའི་ངང་། །ཉོན་མོངས་མ་སྤངས་གོས་པ་མེད། །མ་ཆགས་རང་བཞིན་དག་པ་ཡིས། །པདྨའི་གདན་ལ་བཞུགས་སུ་གསོལ། །པདྨ་ཀ་མ་ལ་ཡེ་སྟྭཾ། ཞེས་གདན་འབུལ། ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །ཡིད་བཞིན་རིན་ཆེན་ལྟ་བུའི་སྐུ། །བླ་མ་རྣམས་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་སྡེའི་དཔུང་འཇོམས་པ། །གསེར་གྱི་ལྷུན་པོ་ལྟ་བུ་མཛེས་པའི་སྐུ། །ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་བརྒྱན། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་ལོ། །ཞེས་ཕྱག་འཚལ། དེ་ནས་ཉེར་སྤྱོད་ལྔའི་མཆོད་ཅིང་། མཎྜལ་འབུལ་བ་ནི། ཕཊ་ཕཊ། ཕུང་པོ་ཁྲོལ་གྱི་ཞིག་པས་མཆོད་པའི་སྤྲིན་སྤུངས་དུ་གྱུར། དྲི་མེད་ཡིད་དུ་འོང་བ་ཡིས། །ལྷ་རྫས་དམ་པའི་མཆོད་ཡོན་འདི། །ཞབས་བསིལ་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་རོལ་མོ་འདི། །བླ་མ་ཡུམ་ཆེན་ཌཱཀྐིའི་ཚོགས་ལ་འབུལ། །འགྲོ་བའི་དོན་དུ་མཆོད་ཅིང་བཞེས་སུ་གསོལ། །ༀ་བཛྲ་ཨརྒྷཾ་པ་ཏྱཾ་ནས་ཤཔྡ་བར་བརྗོད་ལ། ཕཊཿ ལྤགས་པ་ཕྱལ་གྱིས་བཏིང་བ་དབང་ཆེན་གསེར་གྱི་ས་གཞིར་གྱུར། ཕཊཿ ཁྲག་ཆིལ་གྱིས་བྱུང་བས་དྲི་བཟང་གི་ཆུར་གྱུར། ཕཊཿ ཤ་ཉིལ་གྱིས་སྤུངས་བས་མེ་ཏོག་གི་ཚོམ་བུར་གྱུར། ཕཊཿ གཟུགས་ཁོག་རི་རབ་ཏུ་གྱུར། ཕཊཿ ཡན་ལག་བཞི་གླིང་བཞིར་གྱུར། ཕཊཿ ཉིང་ལག་ཐམས་ཅད་གླིང་ཕྲན་བརྒྱད་དུ་གྱུར། ཕཊཿ མགོ་བོ་རྣམ་པར་རྒྱལ་བའི་ཁང་བཟང་དུ་གྱུར། ཕཊཿ མིག་གཉིས་ཉི་མ་དང་ཟླ་བར་གྱུར། ཕཊཿ སོ་ཐམས་ཅད་སྐར་མར་གྱུར། ཕཊཿ རྩ་རྣམས་དཔག་བསམ་གྱི་ལྗོན་ཤིང་དུ་གྱུར། ཕཊཿ བ་སྤུ་རྣམས་ཙན་དན་གྱི་ནགས་ཚལ་དུ་གྱུར། ཕཊཿ རྒྱུ་མ་ཕྱི་ཡི་ལྕགས་རི་འཁོར་ཡུག་དུ་གྱུར། ཕཊཿ སྙིང་ལ་སོགས་པའི་ནང་རོལ་རྣམས་ཡིད་བཞིན་གྱི་ནོར་བུ་ལ་སོགས་པའི་ལྷ་མིའི་ལོངས་སྤྱོད་ཕུན་སུམ་ཚོགས་པས་གང་བར་གྱུར། ས་གཞི་སྤོས་ཆུས་བྱུགས་ཤིང་མེ་ཏོག་སོགས་ནས། ཏྲཾ་གུ་རུ་རཏྣ་མཎྜལ་པུ་ཙ་མེ་གྷ་ས་མུན་ཏྲ་སྥ་ར་ཎ་ས་མ་ཡེ་ཨཱ་ཧཱུྃ། ཞེས་མཆོད་ཅིང་བསྟོད་པ་ནི། མ་ཆོས་དབྱིངས་རྣམ་དག་སྐྱེ་མེད་དབྱིངས་ཀྱི་ཡུམ། །འགགས་མེད་རྩ་བྲལ་སེམས་ཉིད་དོན་གྱི་ཡུམ། །མཐའ་དབུས་མེད་པ་མཐའ་བྲལ་སྟོང་པའི་ཡུམ། །མ་ཡུམ་ཆེན་ཆོས་ཀྱི་སྐུ་ལ་ཕྱག་འཚལ་བསྟོད། །འགྱུར་བ་མེད་པའི་རྡོ་རྗེའི་སྐུ་སྤྲུལ་མ། །དགོས་འདོད་ཀུན་འབྱུང་རིན་ཆེན་སྐུ་སྤྲུལ་མ། །གདོད་ནས་དག་པ་པདྨའི་སྐུ། །ཕྲིན་ལས་སྤྲུལ་པ་ལས་ཀྱི་སྐུ། །མ་ཡུམ་ཆེན་སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། །མ་དང་པོ་ལུས་སྲོག་བསྐྱེད་པའི་མ། །བར་དུ་ཟང་ཟིན་བྱིན་པའི་མ། །ཐ་མ་སྐྱེ་མེད་སྟོན་པའི་མ། །མ་དྲིན་མོ་ཆེ་ལ་ཕྱག་འཚལ་བསྟོད། །དྲི་མེད་རྣམ་དག་དམ་ཚིག་མཁའ་འགྲོ་མ། །ཡེ་ཤེས་དཔག་མེད་སྣ་ཚོགས་མཁའ་འགྲོ་མ། །ཆོས་ཉིད་ཀློང་ཡངས་ཐམས་ཅད་མཁའ་འགྲོ་མ། །འགྲོ་རྣམས་ཀུན་འདྲེན་འཇིག་རྟེན་མཁའ་འགྲོ་མ། །སྤངས་རྟོགས་མཐར་ཕྱིན་སངས་རྒྱས་མཁའ་འགྲོ་མ། །ཌཱཀྐི་ཡོངས་རྫོགས་སྐུ་ལ་ཕྱག་འཚལ་བསྟོད། །ཕཊཿ སྤྱི་བོའི་ལྷ་ཚོགས་རྣམས་ཀྱིས་ཐུགས་ཀ་ནས་འོད་ཟེར་བྱུང་བས་རང་དང་ལྷ་འདྲེ་ལ་ཕོག་པས་ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་ཐམས་ཅད་དག་པར་བསམ་ནས་ཅུང་ཟད་བཟླ། གཉིས་པ་གསོལ་བ་གདབ་པ་དངོས་ནི། དབྱངས་དང་བཅས་པས་འདི་སྐད་དོ། །ཕཊཿ རང་གི་སྤྱི་གཙུག་ཏུ་མ་ཅིག་ལབ་ཀྱི་སྒྲོལ་མ་ལ་འཁོར་གྲུབ་ཐོབ་གཅོད་ཡུལ་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསམ། གནས་འོག་མིན་ཆོས་དབྱིངས་ཕོ་བྲང་ནས། །ཡུམ་ཆེན་ཤེས་རབ་ཕར་ཕྱིན་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །གནས་བྱ་རྒོད་ཕུང་པའི་རི་བོ་ནས། །བཅོམ་ལྡན་ཤཱཀྱ་ཐུབ་པ་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །བྲག་སེང་ཆེན་བསྣོལ་བའི་ཁྲི་སྟེང་ནས། །འཇམ་དཔལ་སྨྲ་བའི་སེང་གེ་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །གནས་གཡུ་ལོ་བཀོད་པའི་ཞིང་ཁམས་ནས། །མ་རྗེ་བཙུན་སྒྲོལ་མ་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །གནས་འཇའ་འོད་འཁྱིལ་བའི་ཕོ་བྲང་ནས། །མཁའ་འགྲོ་སུ་ཁ་སིདྡྷི་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །བྱིན་རླབས་ཅན་གྱི་བྱིན་གྱིས་རློབས། །གནས་རྒྱ་གར་ཆོས་ཀྱི་ཕོ་བྲང་ནས། །རྗེ་བཙུན་ཨཱརྻ་དེ་བ་བྱིན་རླབས་ཅན། །རྗེ་བྱིན་རླབས་ཅན་ལ༴ བྱིན་རླབས་ཅན་གྱི༴ གཙང་ལ་སྟོད་དེང་རིའི་དགོན་པ་ན། །ཕ་དམ་པ་རྒྱ་གར་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་དབུས་གཙང་གཉིས་ཀྱི་ས་མཚམས་ནས། །སྐྱོ་སྟོན་བསོད་ནམས་བླ་མ༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་ཟངས་རི་མཁར་དམར་གྱི་དགོན་པ་ནས། །མ་ཅིག་ལབ་ཀྱི་སྒྲོན་མ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི་བྱིན༴ གནས་སྙེ་མོ་ཁུ་ཡི་ར་བ་ནས། །ཁུ་སྒོམ་ཆོས་ཀྱི་སེངྒེ་བྱིན༴ རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །གནས་སྨད་ལུང་ལྕགས་སར་གྱི་དགོན་པ་ནས། །ཕ་དོལ་པ་ཟངས་ཐལ་བྱིན་རླབས་ཅན། །རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ དཔལ་ཆུ་བོ་རི་ཡི་དགོན་པ་ནས། །རྗེ་རྒྱ་ནག་གཅེར་བུ་བྱིན༴ རྗེ་བྱིན་རླབས་ཅན༴ རྗེ་བྱིན་རླབས༴ གནས་རབ་གྲོང་སེ་བའི་གླིང་གང་ནས། །སངས་རྒྱས་རབ་སྟོན་བྱིན་རླབས༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན༴ གནས་ཟལ་མོ་བྲག་གི་དགོན་པ་ནས། །ཟལ་མོ་དགེ་སློང་བྱིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན༴ གནས་ཁ་རག་མུན་སོང་གི་དགོན་པ་ནས། །ཕ་ཞེན་མེད་རས་པ་བྱིན༴ རྗེ་བྱིན་རླབས་ཅན༴ རྗེ་བྱིན་རླབས༴ གནས་རི་གང་དཔལ་གྱི་དབེན་གནས་ནས། །སངས་རྒྱས་གཉན་སྟོན་བྱིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན༴ འབངས་པ་བཀྲ་ཤིས་ཀྱི་དགོན་པ་ནས། །དྷརྨཱ་སེང་ཧ་བྱིན་རླབས༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་གར་བཞུགས་ཆོས་ཀྱི་ཕོ་བྲང་ནས། །བཛྲ་སེངྷ་བྱིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན༴ གནས་ཀཿཐོག་དཔལ་གྱི་དབེན་གནས་སུ། པྲ་ཛྙཱ་གུ་རུ་བྱིན༴ རྗེ་བྱིན་རླབས༴ རྗེ་བྱིན་རླབས་ཅན༴ གནས་དཔལ་འབར་བཀྲ་ཤིས་དགོན་པ་རུ། །རྡོ་རྗེ་དཔལ་བ་བྱིན་རླབས་ཅན། །རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ སྣང་སྲིད་ཆོས་སྐུའི་ཕོ་བྲང་ནས། །ནམ་མཁའ་རྡོ་རྗེ་བྱིན་རླབས་ཅན། །རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ དགའ་ལྡན་གནམ་སྟོང་རི་ཁྲོད་ནས། །ཤི་ལ་ཀེ་ཏུ་བྱིན་རླབས༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ སྤང་ཀ་མ་ཆོས་གླིང་རི་ཁྲོད་ནས། །དྷརྨ་བཛྲ༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ དོན་གཉིས་གྲུབ་པའི་ཕོ་བྲང་ནས། །ཛྙཱ་ན་ཀེ་ཏུ་བྱིན་རླབས་ཅན། །རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་ཙ་རི་མཆོག་གི་དགོན་པ་ནས། །སྐྱེས་མཆོག་བསོད་ནམས་དཔལ་བ༴ རྗེ་བྱིན་རླབས༴ རྗེ་བྱིན་རླབས་ཅན་གྱི༴ གནས་ཆོས་བརྒྱད་རང་གྲོལ་གྱི་ཕོ་བྲང་ནས། །བྱ་བཏང་ཀུན་དགའ་འབུམ་པ་བྱིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་དོན་གཉིས་ལྷུན་གྲུབ་ཕོ་བྲང་ནས། །རྗེ་པུཎྱེ་ལ་ཀྵ༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་ལྷུན་གྲུབ་འོད་ལྔའི་ཕོ་བྲང་ནས། །སྟོན་པ་ཤཱཀྱ་འོད་ཟེར་བྱིན་རླབས་ཅན། །རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་གར་བཞུགས་དག་པའི་ཕོ་བྲང་ནས། །རྗེ་རྒྱལ་མཚན་སེངྒེ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྟོང་ཉིད་ཆོས་ཀྱི་ཕོ་བྲང་ནས། །རྗེ་ག་ག་བཛྲ་བྱིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་རང་རིག་རང་གསལ་ཕོ་བྲང་ནས། །རྗེ་ག་ག་མ་ཏི༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་མ་བཅོས་ལྷུན་གྲུབ་ཕོ་བྲང་ནས། །རྗེ་ཀ་ལ་བཛྲ༴ རྗེ་བྱིན་རླབས༴ རྗེ་བྱིན༴ གནས་སྐུ་ལྷ་དཔལ་གྱི་རི་ཁྲོད་ནས། །རྗེ་འཁྲུལ་ཞིག་རང་གྲོལ༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན༴ གནས་ཁམས་གང་བྱང་ཆུབ་གླིང་དགོན་དུ། །རྗེ་ཆོས་སྐྱོང་རྒྱ་མཚོ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་ཀཿཐོག་རྡོ་རྗེའི་གདན་སྟེང་ནས། །རྗེ་ཀློང་གསལ་སྙིང་པོ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་གསང་སྔགས་རབ་བསྟན་ཆོས་གླིང་ནས། །རྗེ་ཆོས་ཉིད་རྒྱ་མཚོ་བྱིན་རླབས༴ རྗེ་བྱིན་རླབས༴ རྗེ་བྱིན་རླབས་ཅན་གྱི༴ གནས་གདུང་ཤུགས་དྲག་པའི་དབེན་གནས་ནས། །རྗེ་བཀྲ་ཤིས་མཚན་ཅན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་ཤིང་སྒོ་གངས་ཀྱི་ར་བ་རུ། །དྲུང་ནམ་མཁའ་རྒྱ་མཚོ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་འཁྲུལ་པ་རང་གྲོལ་ཕོ་བྲང་ནས། །རྗེ་པདྨ་ཆོས་དབྱིངས༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྣང་གྲགས་ཆོས་སྐུའི་ཕོ་བྲང་ནས། །རྗེ་སངས་རྒྱས་གྲགས་པ༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་ཚོགས་གཉིས་ལྷུན་གྲུབ་ཕོ་བྲང་ན། །རྗེ་ནམ་མཁའ་ཆོས་སྐྱོང་༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་གང་ཤར་རང་གྲོལ་ཕོ་བྲང་ནས། །རྗེ་འཇིགས་མེད་བསམ་གཏན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྨིན་གྲོལ་རྒྱ་མཚོའི་མཛོད་ཁང་ནས། །རྗེ་ཀུན་བཟང་རྣམ་རྒྱལ་ལ༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྣང་བཞི་མཐར་ཕྱིན་ཕོ་བྲང་ནས། །རྗེ་རཏྣ་གུ་རུ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་བཤད་སྒྲུབ་ནོར་བུའི་ལྷུན་པོ་ནས། །རྗེ་ཆོས་ཀྱི་རྒྱ་མཚོ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་བྲག་གདོང་བཀྲ་ཤིས་དགེ་འཕེལ་དུ། །རྗེ་རྡོ་རྗེ་ལེགས་བཤད་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྤྱི་གཙུག་པད་ཟླའི་གདན་སྟེང་ན། །རྗེ་རྩ་བའི་བླ་མ་བྱིན་རླབས༴ རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱི་རློབས། །མན་ངག་དོན་བརྒྱུད་ལྟར་ན་གྲུབ་ཐོབ་ནམ་མཁའ་རྒྱ་མཚོའི་རྗེས། གནས་མོས་གུས་མཐར་ཕྱིན་ཕོ་བྲང་ནས། །རྗེ་དྲི་མེད་ཞིང་སྐྱོང་༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་མཁྱེན་བརྩེ་ནུས་མཐུའི་ཕོ་བྲང་ནས། །རྗེ་ཚེ་དབང་མཆོག་གྲུབ་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་སྟོང་ཉིད་བདེ་ཆེན་ཕོ་བྲང་ནས། །རྗེ་ངེས་དོན་དབང་པོ༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་རྟོགས་འཁྲུལ་རང་གྲོལ་ཡང་དབེན་ནས། །རྗེ་འགྱུར་མེད་བསྟན་འཛིན༴ རྗེ་བྱིན་རླབས་ཅན༴ རྗེ་བྱིན་རླབས་ཅན་གྱི༴ གནས་བྱང་ཆུབ་སེངྒེའི་ནག་ཁྲོད་ནས། །རྗེ་ཆོས་ཀྱི་བློ་གྲོས་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་ཕྱོགས་མེད་དཔལ་གྱི་གཉན་ཁྲོད་ནས། །རྗེ་ཀུན་བཟང་འགྱུར་མེད་བྱིན་རླབས་ཅན། །རྗེ་བྱིན་རླབས་ཅན་ལ༴ རྗེ་བྱིན་རླབས་གྱི༴ གནས་བཤད་སྒྲུབ་ནོར་བུའི་ལྷུན་པོ༴ སོགས་སྦྲེལ། གནས་སྤྱི་གཙུག་པད་ཟླའི་གདན་སྟེང་ནས། །དྲིན་ཆེན་རྩ་བའི་བླ་མ་བྱིན་རླབས་ཅན། །རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་གཉན་ས་རི་ཁྲོད་ཀྱི་དགོན་པ་ནས། །མཆེད་གྲོགས་ཆོས་མཛད་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ ཡུལ་ཉི་ཤུ་རྩ་བཞིའི་གནས་མཆོག་ནས། །ཡི་དམ་ལྷ་ཚོགས་བྱིན༴ རྗེ་བྱིན་རླབས་ཅན་ལ༴ རྗེ་བྱིན་རླབས་ཅན་གྱི༴ གནས་བསིལ་བ་ཚལ་གྱི་དུར་ཁྲོད་ནས། །ཆོས་སྐྱོང་མ་མགོན་ལྕམ་དྲལ་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །རྗེ་བྱིན་རླབས་ཅན་གྱི་བྱིན་གྱིས་རློབས། །སྙེམས་ཐག་ཆོད་པར་བྱིན་གྱིས་རློབས། །བདག་འཛིན་བློ་ཡིས་ཐོང་པར་བྱིན་གྱིས་རློབས། །མི་རྟགས་རྒྱུད་ལ་སྐྱེ་བ་བྱིན༴ དགོས་མེད་རྒྱུད་ལ་སྐྱེ་བར༴ རང་སེམས་སྐྱེ་མེད་རྟོག་པར༴ སྣང་སེམས་དབྱེར་མེད་རྟོགས་པར༴ དག་སྣང་ཕྱོགས་མེད་འབྱོང་པར༴ ན་ཚ་བོགས་སུ་ཐོན་པར་བྱིན༴ རྐྱེན་ངན་ལམ་དུ་སློང་བར་བྱིན༴ གཉན་ས་རི་ཁྲོད་འགྲིམ་པར༴ འགྲོ་དོན་མཐའ་རུ་ཕྱིན་པར༴ གཅོད་ཡུལ་ཉམས་སུ་ལེན་པར༴ ལྷ་འདྲེའི་འགྲོ་དོན་ནུས་པར༴ སྐུ་འགྱུར་བ་མེད་པར༴ གསུང་འགགས་པ་མེད་པ་བྱིན༴ ཐུགས་འཁྲུལ་བ་མེད་པར་བྱིན་གྱིས་རློབས། །ལུས་ཤག་མ་ཤིག་མ་བྱིན་གྱིས༴ སེམས་ཁྲལ་མ་ཁྲོལ་མར༴ ཉམས་འར་མ་འུར་མ༴ སྣང་བ་བན་མ་བུན་མར༴ རྟོགས་པ་ཆལ་མ་ཆོལ་མ༴ གཉན་ས་རི་ཁྲོད་འདི་རུ༴ འདུག་ས་འདི་རུ་བྱིན་གྱིས་རློབས། །མྱུར་བ་ཉིད་དུ་བྱིན༴ ད་ལྟ་ཉིད་དུ་བྱིན་གྱིས་རློབས། །ཕཊཿ ཕཊཿ མ་ཅིག་བརྒྱུད་པ་དང་བཅས་པའི་སྐུ་ལས་ཟག་མེད་ཡེ་ཤེས་ཀྱི་བདུད་རྩི་དཀར་ལ་དྭངས་པ་ཁྲ་ལ་ལ་བབ་པས་བདག་གི་སྤྱི་གཙུག་ཚངས་བུག་དུ་མར་བྱུང་བས་ལས་དང་ཉོན་མོངས་པའི་སྡིག་སྒྲིབ་བག་ཆགས་ཐམས་ཅད་ཆུ་ལམ་དང་འོག་སྒོ་སེན་ཕྲག་ནས་མར་བུད་ནས་ཞབས་དབང་ཆེན་གསེར་གྱི་ས་གཞིའི་ཞབས་སུ་ལས་ཀྱི་གཤིན་རྗེ་སོགས་ལན་ཆགས་ཤ་མཁོན་བུ་ལོན་གྱི་མགྲོན་རྣམས་ཀྱི་ཁར་འུབ་འུབ་སིབ་སིབ་དུ་ཐིམ་པར་བསམ། ཕཊཿ ཚོགས་ཞིང་རྣམས་ལས་འོད་ཟེར་བྱིན་རླབས་སྤྲིན་དཔུང་ལྟ་བུར་འཕྲོས་འགྲོ་དྲུག་སེམས་ཅན་དང་སྣང་ཞིང་སྲིད་པའི་ལྷ་འདྲེ་རྣམས་ལ་ཕོག་པས་དེ་རྣམས་ཀྱི་ལས་དང་ཉོན་མོངས་པའི་སྡིག་སྒྲིབ་བག་ཆགས་ཐམས་ཅད་སང་གིས་དག་པར་བསམ། ཕཊཿ ནད་པ་ལ་ལན་ཆགས་འཇལ་བའི་དམིགས་པ་སྤྱི་ཙམ་དུ། ཕཊཿ བདག་གཞན་གྱི་སྡིག་སྒྲིབ་བཀྲུས་པའི་ཁུ་བ་ངོ་བོ་བདུད་རྩིའི་རྣམ་པར་འདོད་ཡོན་ལོངས་སྤྱོད་ཕུན་སུམ་ཚོགས་པ། ལུས་གདོན་ནད་བདག་ལན་ཆགས་ཤ་མཁོན་བདག་པོ་ཀུན་གྱི་ཁར་སོང་བས། དགའ་ཞིང་མགུ། ངོམ་ཞིང་ཚིམ་ནས་ལན་ཆགས་སོད། བུ་ལོན་བྱང་ཤ་མཁོན་དག །གནོད་སེམས་ཞི་ནས་ཕན་སེམས་དང་ལྡན་པར་བསམ། ཕཊཿ རང་གི་ནད་གནོད་ཤ་ཁྲག་དང་བཅས་པ་དག་ནས་ལུས་ཁྲུ་མ་ཕུས་བཏབ་ཟིན་འོ་མས་གང་བ་ལྟར་སྒོམ་མོ། །གསུམ་པ་དབྱིངས་རིག་བསྲེ་བ་ནི། ༀ་སྭ་བྷ་ཝས་སྟོང་པར་སྦྱོངས། སྟོང་པའི་ངང་ལས་རང་ལུས་སྟོང་ར་ཁང་སྟོང་ཀ་བ་གཅིག་པ་ལྟ་བུའི་ལྟེ་བ་ནས་སྤྱི་གཙུག་གི་བར་དུ་རྩ་དབུ་མ་སྙུག་དོང་ཁ་ཕྱེ་བ་ལྟ་བུ། ཡར་སྣེ་སྤྱི་གཙུག་ཚངས་པའི་བུ་གར་ཟུག་པ། མར་སྣེ་ལྟེ་འོག་སོར་བཞིའི་ཐད་དུ་ཡོད་པའི་ནང་དུ། རང་གི་རྣམ་པར་ཤེས་པའི་ངོ་བོ་ཐིག་ལེ་དཀར་ལ་དམར་བའི་མདངས་ཆགས་པ། བྱ་མ་གསར་གྱི་སྒོང་ང་ལྟ་བུར་སྣུམ་ལ་འདྲིལ་བ་དཀར་ལ་འཚེར་བ། ནམ་ཐོ་རངས་ཀྱི་སྐར་ཆེན་ཤར་བར་ལྟར་འཕར་ལིང་ལིང་བྱེད་པ་འོད་ཟེར་ཀུན་ཏུ་འཕྲོ་བར་བསྒོམ། ཕཊཿ བྱས་པ་ཙམ་གྱི་ཡར་ལྟེ་བར་འཕར་བ་བསམ། ཕཊཿ སྙིང་ཁར། ཕཊཿ མགྲིན་པར། ཕཊཿ ཀླད་པར་དུང་ཁང་། ཕཊཿ ཚངས་བུག །ཕཊཿ མ་ཅིག་ཐུགས་ཀར་ཐིམ་པར་བསམ། མ་ཅིག་བརྒྱུད་པའི་བླ་མ་དང་བཅས་པ་ནམ་མཁའ་ལ་འཇའ་ཡལ་བ་ལྟར་སོང་བར་བསྒོམ། ཕཊ། དབྱིངས་དང་རིག་པ་ནམ་མཁའ་གསུམ་དབྱེར་མེད་སྟོང་པ་གཅིག་ཏུ་གྱུར་པའི་ངང་ལ་ཅི་གནས་སུ་བཞག་གོ། །བཞི་བསྲེ་ནམ་མཁའ་སྒོ་འབྱེད་གཅེས། ཅེས་གསུངས་པས། བདག་དང་། ནད་པ། འཁོར་ཁལ་རྟ་དང་། མ་ཅིག་དང་བཞིའི་ཤེས་པ་བསྲེ་བར་བྱའོ། །ཤེས་པ་བཞིའི་བསྲེ་ལུགས་ནི། ནད་པ་འཁོར་ཁལ་རྟ་གསུམ་གྱི་ཤེས་པ་ཐིག་ལེ་དཀར་ལ་དམར་བའི་མདངས་ཆགས་པའི་ཚུལ་དུ་བླ་མའི་གསང་གནས་ཀྱི་ཤེས་པའི་ངོ་བོ་ལ་བསྲེ། བླ་མ་དང་གྲོགས་ཆོས་མཐུན་གྱི་ཤེས་པ་ཐུགས་ཀར་བསྲེ། དེས་དབྱིངས་བསྲེ་སོང་ངོ་། །རོ་བསྲེ་བ་ནི། རོ་ཐམས་ཅད་བླ་མའི་རོ་ལ་བསྟིམ། འཁོར་ཐམས་ཅད་དང་བླ་མ་དང་སྒར་པ་ཀུན་གྱི་ཤེས་པ་རྣམས་རོ་གོང་བཞིན་དུ་རང་རང་ལ་བསྲེའོ། །རོ་བསྲེས་དང་དབྱིངས་བསྲེས་སྡེབ་ན་ཆུན་ཅིག་ཏུ་ཆོད་པའི་གནད་དོ། །དེ་ཡང་མ་ཅིག་གིས་ཞལ་ནས། །ནམ་མཁའ་སྒོ་འབྱེད་རེ་རེ་དེ། །དབང་བསྐུར་ཕལ་གྱི་དོ་ཟླ་མིན། །ཅེས་གསུངས་སོ། །དེས་བཞི་བསྲེ་ནམ་མཁའ་སྒོ་འབྱེད་སོང་། ༈ ལྔ་པ་བདུད་རྩི་དཀར་འགྱེད་ནི། རང་གི་རོ། གཞན་གྱི་རོ། གཅིག་ཏུ་བསྲེབ་དང་གཅིག །སྦྱངས་བྱེད་ཀྱི་ཡི་གེ་འབྲུ་གསུམ་དང་གཉིས། བྱིན་གྱིས་རླབས་བྱེད་ཡི་གེ་འབྲུ་གསུམ་བདུད་རྩི་བསྒྱུར་བ་དང་གསུམ་སྟེ། མ་ཅིག་གི་ཞལ་ནས། བླ་མ་ཡི་དམ་མཁའ་འགྲོ་ལ། །ཚོགས་མཆོད་དངོས་གྲུབ་བླང་བར་གཅེས། །ཕ་མ་སེམས་ཅན་ཐམས་ཅད་ལ། །ཆོས་དང་ཟང་ཟིང་སྦྱིན་པ་གཅེས། །ཅེས་གསུངས་པ་ལྟར། སྐྱེ་མེད་ཀྱི་ངང་ལས་རྟོག་པ་གཅིག་བྱུང་མ་ཐག་ཏུ། ཕཊཿ གཅིག་བྱས་པ་ཙམ་གྱིས། སྟོང་པ་ཆོས་ཀྱི་སྐུ་ལས་གཟུགས་སྐུར་བཞེངས་ནས། རང་གི་རིག་པའི་ངོ་བོ་རྗེ་བཙུན་མ་སྐུ་མདོག་དམར་པོ་ཕྱག་ན་གྲི་གུག་དང་ཐོད་ཁྲག་འཛིན་པ་གཅིག་ཏུ་གྱུར། ཕཊཿ ཕཊཿ ཕཊཿ དེའི་མདུན་དུ་རང་གི་རོ་དེ་ཆེ་ལ་ཚོ་བ་སྣུམ་ལ་མཛེས་པ་དཀར་ལ་འཚེར་བ་སྟོང་གསུམ་ནམ་མཁའི་ཁམས་དང་མཉམ་པ་གཅིག་ཏུ་གྱུར། ཕཊཿ རྗེ་བཙུན་མའི་གྲི་གུག་གིས་བེམ་པོ་དེའི་དཔྲལ་མདོ་ན་གཅིག་བརྒྱབ་པས། ཤག་གིས་བཤགས་ནས་ལྤགས་པ་སིལ་གྱིས་བཤུས་ཤིང་མཆོག་ཕུར་བཞི་ཧར་གྱི་བཙུག །ལྤགས་པ་དེའི་ཡན་ལག་བཞི་འཐེན་ནས་ལྷུ་ཚིགས་དང་པུས་ཚིགས་བཞི་བཅད་ནས་ཡན་ལག་བཞི་ལྤགས་པའི་གློར་འབྱར་བར་བསྒོམ། ཕཊཿ གཅིག་བྱས་པས། ལྤགས་དེ་ཕྱལ་གྱིས་བཏིང་བས་གླིང་བཞི་ཁྱབ་པར་བསྒོམ། ཕཊཿ གཅིག་བྱས་པས། ཡན་ལག་བཞི་ཕྱོགས་བཞི་ཟུག་ནས། ཡན་ལག་བཞིའི་ཁ་ན་ལྤགས་པ་དེ་དམར་ཐང་ངེ་ཡོད་པར་བསྒོམ། ཕཊཿ གཅིག་བྱས་པས། རྗེ་བཙུན་མའི་གྲི་གུག་གི་རྩེ་མོས་བེམ་པོ་དེ་བླངས་ནས་ལྤགས་པའི་ཐོག་ཏུ་འཕང་སྟེ་རྗེས་སུ་གྲི་གུག་གི་རོ་ལ་གཅིག་བརྒྱབ་པས་དམར་ཉོབ་ཀྱིས་སོང་ནས། ཕཊཿ གཏི་མུག་ཤ་ཡི་རི་བོ། ཕཊཿ འདོད་ཆགས་ཁྲག་གི་རྒྱ་མཚོ། ཕཊཿ ཞེ་སྡང་རུས་པའི་གྲམ་ཁྲོད་ཆེན་པོར་གྱུར་པར་བསམ་ལ་ངག་ཏུ། རཾ་ཡཾ་ཁཾ། ཅེས་ལན་གསུམ་བརྗོད་པ་ཙམ་གྱིས། རང་ཉིད་རྗེ་བཙུན་མའི་ཐུགས་ཀ་ནས་གཟབ་ཡིག་རཾ་དམར་པོ་གཅིག་འཕྲོས་པས་ཤ་ཁྲག་ལ་ཕོག་ནས་མེ་འབར་ཏེ་དངོས་པོ་མ་དག་པ་ཐམས་ཅད་ཐལ་བ་བུན་གྱིས་སོང་བར་བསམ། ཡཾ་སྔོ་སྐྱ་གཅིག་སྤྲོས་པ་ལས་རླུང་བྱུང་ནས་མེས་བསྲེགས་ཟིན་གྱི་ཐལ་བ་མ་ལུས་པ་བཀྲུས་པར་བསམ། ཁཾ་སྔོན་པོ་གཅིག་སྤྲོས་པས་ཆུ་བྱུང་བས་རླུང་གིས་གཏོར་ཟིན་གྱི་ཐལ་བ་རྣམས་མ་ལུས་པ་བཀྲུས་པར་བསམ། མལ་དུ་དྭངས་མ་ཡོད་པ་དེ། ༀ་ཨཱཿཧཱུྃ་གསུམ་དུ་གྱུར་པ་དེ་ཡར་གཅིག་ཐོག་ན་གཅིག་བརྩེགས་ནས་ཡོད་པར་བསྒོམ། ངག་ཏུ། ༀ་ཨཱཿཧཱུྃ་ལན་གསུམ། བརྗོད་པ་ཙམ་གྱིས་འོད་དུ་ཞུ་བ་ལས་ཟག་མེད་ཡེ་ཤེས་ཀྱི་བདུད་རྩི་རྒྱ་མཚོ་ཆེན་པོ་ནམ་མཁའ་དང་མཉམ་པར་བསམ་ལ། ཕཊཿ མགྲོན་ཚན་བཞི་པོ་མདུན་དུ་རིམ་བཞིན་འཁོད་ནས་ཡོད་པར་དམིགས་ལ། དང་པོ་སྲིད་ཞུའི་མགྲོན་ལ་འབུལ་བ་ནི། ན་མོ། ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་གྲུབ་ཐོབ་གཅོད་ཡུལ་བརྒྱུད་པའི་བླ་མ་རྣམས་དང་། ཉན་ཐོས་རང་རྒྱལ་རྣམས་དང་། ཆོས་སྐུ་ཀུན་ཏུ་བཟང་པོ་མན་ཆད་རྩ་བའི་བླ་མ་ཡན་ཆད། རིག་འཛིན་བརྒྱུད་པ་དང་བཅས་པ་རྣམས་དང་། ཡི་དམ་མཁའ་འགྲོ་ཆོས་སྐྱོང་སྲུང་མ་འཁོར་དང་བཅས་པ་རྣམས་ལ་མཆོད་དོ། །འབུལ་ལོ་བཞེས་སུ་གསོལ། འཁོར་བ་མ་སྟོང་གི་བར་དུ་བདག་གི་ལུས་འདི་ཀུན་ཏུ་བཟང་པོའི་མཆོད་སྤྲིན་དུ་གྱུར་ནས། དཀོན་མཆོག་གསུམ་ལ་མཆོད་ཅིང་མཉེས་པར་གྱུར་ཅིག །བདག་སོགས་སེམས་ཅན་ཐམས་ཅད་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཕཊཿ ལྷ་ཚོགས་རྣམས་དགྱེས་པའི་སྐན་སྒྲ་དང་བཅས་པས་གསོལ་བར་བསམ། ཕཊཿ གཅིག་གིས་ལྷ་ཚོགས་རྣམས་དགྱེས་ནས་མི་དམིགས་པའི་ངང་ལ་བཞག་གོ། །ཕཊཿ གཅིག་གིས་ལྷག་མ་གསལ་བར་བསྐྱེད་ནས། གཉིས་པ་ཡོན་ཏན་མགྲོན་ལ་འབུལ་བ་ནི། ཕཊཿ གཅིག་བྱས་པ་ཙམ་གྱིས་ཡང་རོ་སྔ་མ་ལྟར་བསྐྱེད་ལ། ༀ་ཨཱཿཧཱུྃ། ཅེས་ལན་གསུམ་བརྗོད་པ་ཙམ་གྱིས། དཀར་གསུམ་མངར་གསུམ་ཞལ་ཟས་རོ་མཆོག་བརྒྱ་དང་ལྡན་པ་སྟོང་གསུམ་ནམ་མཁའ་དང་མཉམ་པར་བསམ། སྟོང་གསུམ་མི་འཇེད་ཀྱི་བདག་པོ་དཔལ་ཚངས་པ་དང་བརྒྱ་བྱིན་རྒྱལ་པོ་ཆེན་པོ་སྡེ་བཞི་ལ་སོགས་པ། གཙང་རིགས་ཀྱི་དཔལ་མགོན་བདུན་ཅུ་རྩ་ལྔ་འཁོར་དང་བཅས་པས་རྣམས་ལ་མཆོད་དོ། །འབུལ་ལོ། །བཞེས་སུ་གསོལ། ཅི་འདོད་པའི་ལོངས་སྤྱོད་དུ་གྱུར་ནས་དགྱེས་ཤིང་ཚིམ་པར་གྱུར་ཅིག །ཁྱེད་རྣམས་ཀྱི་སངས་རྒྱས་ཀྱི་བསྟན་པ་སྲུང་བ་དང་། སེམས་ཅན་ཐམས་ཅད་ལ་བདེ་སྐྱིད་འབྱུང་བར་མཛད་དུ་གསོལ། ཕཊཿ བྱས་པ་ཙམ་གྱིས། ལྷ་ཚོགས་རྣམས་དགྱེས་པར་བསམ། ཕཊཿ གཅིག་གིས་གོང་བཞིན་མི་དམིགས་པ་དང་། ༀ་ཨཱཿཧཱུྃ། ལན་གསུམ་བྱས་པ་ཙམ་གྱིས། རིན་པོ་ཆེའི་མཆོད་སྡོང་ཆེན་པོ་ནམ་མཁའ་དང་མཉམ་པར་གྱུར། རང་རང་གི་ཅི་ལྟར་མོས་པའི་ཚོགས་སུ་གྱུར་པ་འདི་ཉིད་བསྔོ་ཞིང་འབུལ་བའི་གནས་ནི་གནས་ཡུལ་ཆེན་པོ་གཞི་ཡི་བདག་པོ་སོགས་བཀའ་ཡི་ལྷ་མ་སྲིན་སྡེ་བརྒྱད་རྣམས་དང་། འགྲོ་བ་དྲུག་གི་སེམས་ཅན་རྣམས་ལ་སྦྱིན་ནོ། །སོ་སོ་ཅི་འདོད་པའི་ལོངས་སྤྱོད་དུ་གྱུར་ནས། འཁོར་བ་མ་སྟོང་གིས་བར་དུ་སེམས་ཅན་ཐམས་ཅད་སྐྱེ་བ། ན་བ། རྒས་པ། འཆི་བ། འོན་པ། ལོང་བ། ལྐུག་པ། སྨྱོ་བ། དབུལ་བ། ཕོངས་པ། ཚེ་ཐུང་བ། ནད་མང་བ། ཉམས་ཐག་པ། ལ་སོགས་པའི་སྡུག་བསྔལ་ཐམས་ཅད་དང་བྲལ་བར་གྱུར་ཅིག །ཚེ་དང་བསོད་ནམས་དཔལ་དང་འབྱོར་པ་གྲགས་པ་དང་ལོངས་སྤྱོད་ཅི་འདོད་པའི་བདེ་སྐྱིད་དཔལ་འབྱོར་ཕུན་སུམ་ཚོགས་པ་དང་ལྡན་པར་མྱུར་དུ་སངས་རྒྱས་ཐོབ་པར་གྱུར་ཅིག །ཕཊཿ གཅིག་གི། དགྱེས་ནས་སོ་སོའི་གནས་སུ་སོང་ནས་སངས་རྒྱས་པར་བསམ། ཕཊཿ གཅིག་གི་གོང་བཞིན་དམིགས་ལ། བཞི་པ་ལན་ཆགས་མགྲོན་ལ་འབུལ་བ་ནི། ཕཊཿ གཅིག་བྱས་པ་ཙམ་གྱིས་རོ་སྔར་ལྟར་བསམ་ལ། ༀ་ཨཱཿཧཱུྃ་ལན་གསུམ་བྱས་པ་ཙམ་གྱིས། འདོད་ཡོན་གྱི་ཚོགས་སུ་གྱུར་ནས་རང་རང་གི་ཇི་ལྟར་མོས་པའི་ཚོགས་སུ་གྱུར་པ་འདི་ཉིད་བསྔོ་ཞིང་སྦྱིན་པའི་གནས་ནི། གནས་གདོན་ལུས་གདོན་གཉིས་ཀྱིས་གཙོར་བྱས། བདག་ཅག་གིས་ཚེ་རབས་གྲངས་མེད་ཀྱི་བགེགས་རིགས་སྟོང་ཕྲག་བརྒྱད་ཅུ། བདུད་སྡེ་བཞི། བཙན་ཁ་བཞི། མགྱོགས་སྡེ་བརྒྱད། ཡ་བདུད་རྒྱལ་པོ། མ་བདུད་རྒྱལ་མོ་འཁོར་དང་བཅས་པ་རྣམས་དང་། རྒྱལ་པོ་དང་རྒྱལ་བྱིན། འབྱུང་པོ་དང་རོ་ལངས། ས་བདག་དང་ཀླུ་སྲིན་དལ་ཡམས་ནད་ཀྱི་བདག་པོ་བདག་མོ། རིམས་ཀྱི་བདག་པོ་བདག་མོ། གྲིབ་ཀྱི་བདག་པོ་བདག་མོ། ལན་ཆགས་ཀྱི་བདག་པོ་བདག་མོ་རྣམས་ལ་སྟེར་བ་ཡིན་པས་བུ་ལོན་སོད། ལན་ཆགས་བྲལ། ཤ་མཁོན་བྱང་ནས་ཁྱེད་རྣམས་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཕཊཿ བྱས་པ་ཙམ་གྱིས། འདོད་ཡོན་གྱིས་ཚིམ་ནས་སངས་རྒྱས་པར་བསམ། ཕཊཿ གཅིག་གིས་ལྷག་མ་ཡང་གསལ་སྟེ། ལྔ་པ་དབང་དམན་ལ་སྦྱིན་པ་ནི། ལྷག་མ་གསལ་བ་དེ་ཉིད། ༀ་ཨཱཿཧཱུྃཿ ལན་གསུམ་གྱིས་བྱིན་གྱིས་རླབས་ལ། ལྷག་མ་རྣམས་འགྲོ་བ་རིགས་དྲུག་གི་ནང་ནས་ཁས་ཞན་ཅིང་དབང་ཆུང་བ། ཞ་བོ། ལོང་བ། འོན་པ། ལྐུག་པ། ལ་སོགས་པ་ལྷག་མ་ལ་དབང་བ་རྣམས་ལ་སྦྱིན་ནོ། །ཞ་བོ་རྫུ་འཕྲུལ་གྱི་རྐང་པ་བཞི་དང་ལྡན་པར་གྱུར་ཅིག །ལོང་བ་ཡེ་ཤེས་ཀྱི་སྤྱན་དང་ལྡན་པར་གྱུར་ཅིག །ལྐུག་པ་ཚངས་པའི་དབྱངས་དང་ལྡན་པར་གྱུར་ཅིག །འོན་པས་ཆོས་ཀྱི་སྒྲ་ཐོས་པར་གྱུར་ཅིག །རྗེ་བླ་མའི་ཐུགས་དགོངས་རྫོགས་པར་གྱུར་ཅིག །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པས་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །སོ་སོར་ཅི་འདོད་པའི་ལོངས་སྤྱོད་དུ་གྱུར་ནས་མྱུར་དུ་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཅེས་བརྗོད་དེས་ནས། མགྲོན་བཞི་པོ་དེ་ཐམས་ཅད་རྗེ་བཙུན་མ་སྐུ་མདོག་དམར་མོའི་ཚུལ་དུ་བསྒོམ་ལ། དེ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ཅན་ཐམས་ཅད་ཡི་གེ་ༀ་ཨཱཿཧཱུྃ་གིས་ཚུལ་དུ་གྱུར་ནས། རང་གི་གནས་གསུམ་དུ་ཐིམ་ནས་སྐུ་གསུང་ཐུགས་ཀྱི་དངོས་གྲུབ་མ་ལུས་པ་ཐོབ་པར་བསམ་མོ། །དེས་ལྔ་པ་བདུད་རྩི་དཀར་འགྱེད་དེ་སོང་ངོ་། ༈ །དྲུག་པ་དམར་འགྱེད་ནི། སྤྱི་བོར་མ་ཅིག་ལབ་ཀྱི་སྒྲོན་མ་གྲུབ་ཐོབ་གཅོད་ཀྱི་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསྒོམ་ལ། ཐོག་མར་གསོལ་བ་བཏབ་པ་ནི། ཡུམ་ཆེན་ཤེས་རབ་ཕར་ཕྱིན་ལ་སོགས་པ། །སྐྱེ་མེད་ཆོས་ཀྱི་སྐུ་ལ་གསོལ་བ་འདེབས། །རྒྱལ་བ་ཤཱཀྱ་ཐུབ་པ་ལ་སོགས་པའི། །ཕྱོགས་བཅུའི་སངས་རྒྱས་རྣམས་ལ༴ འཇམ་དཔལ་སྨྲ་བའི་སེངྒེ་ལ་སོགས་པའི། །རྒྱལ་སྲས་འཕགས་པ་རྣམས་ལ༴ སེང་ལྡིང་ནགས་ཀྱི་སྒྲོལ་མ་ལ་སོགས་པའི། །འཇིགས་པ་བརྒྱད་སྐྱོབ་རྣམས་ལ༴ མཁའ་འགྲོ་སུ་ཁ་སིདྡྷི་ལ་སོགས་པའི། །མ་བརྒྱུད་མཁའ་འགྲོ་རྣམས་ལ༴ རྗེ་བཙུན་ཨཱརྱ་དེ་བ་ལ་སོགས་པའི། །འཛམ་གླིང་སྐྱེས་མཆོག་རྣམས་ལ༴ ཕ་གཅིག་དམ་པ་རྒྱ་གར་ལ་སོགས་པའི། །རྒྱ་གར་གྲུབ་ཆེན་རྣམས་ལ༴ སྐྱོ་སྟོན་བསོད་ནམས་བླ་མ་ལ་སོགས་པའི། །བོད་ཡུལ་སྐྱེས་མཆོག་རྣམས་ལ༴ མ་ཅིག་ལབ་ཀྱི་སྒྲོན་མ་ལ་སོགས་པའི། །ཡེ་ཤེས་མཁའ་འགྲོ་རྣམས་ལ༴ ཁུ་སྒོམ་ཆོས་ཀྱི་སེངྒེ་ལ་སོགས་པའི། །སྐྱེ་མེད་དོན་རྟོགས་རྣམས་ལ༴ ཕ་ཅིག་དོལ་པ་ཟང་ཐལ་ལ་སོགས་པའི། །སྐྱེས་མཆོག་དོན་གྲུབ་རྣམས༴ རྗེ་བཙུན་རྒྱ་ནག་གཅེར་བུ་ལ་སོགས་པའི། །རྣལ་འབྱོར་འཁྲུལ་ཞིག་རྣམས་ལ༴ སངས་རྒྱས་རབ་སྟོན་ལ་སོགས་པའི། །མཁས་གྲུབ་ཆེན་པོ་རྣམས་ལ༴ སངས་རྒྱས་དགེ་སློང་རྣམ་དག་ལ་སོགས་པའི། །ཚུལ་ཁྲིམས་མཐར་ཕྱིན་རྣམས་ལ༴ སངས་རྒྱས་སུམ་བྷ་རས་ཆེན་ལ་སོགས་པའི། །བརྟུལ་ཞུགས་གྲུབ་པ་རྣམས་ལ༴ གྲུབ་ཐོབ་སངས་རྒྱས་གཉན་སྟོན་ལ་སོགས་པའི། །ཆོས་ཀྱི་སྤྱན་ལྡན་རྣམས་ལ་གསོལ་བ་འདེབས། །རས་པ་ཆོས་ཀྱི་སེངྒེ་ལ་སོགས་པའི། །རྣལ་འབྱོར་དབང་ཕྱུག་རྣམས་ལ༴ རྗེ་བཙུན་བཛྲ་སེངྷ་ལ་སོགས་པའི། །དམ་ཆོས་སྨྲ་བ་རྣམས་ལ༴ སློབ་དཔོན་པྲ་ཛྙཱ་གུ་རུ་ལ་སོགས་པའི། །རྟོགས་ལྡན་དམ་པ་རྣམས་ལ༴ རྗེ་བཙུན་བཛྲ་ཤྲཱི་ལ་སོགས་པའི། །འགྲོ་བའི་མགོན་པོ་རྣམས་ལ༴ རྟོགས་ལྡན་ནམ་མཁའ་རྡོ་རྗེ་ལ་སོགས་པའི། །དོན་གཉིས་གྲུབ་པ་རྣམས་ལ༴ སྐྱེས་མཆོག་ཚུལ་ཁྲིམས་རྒྱལ་མཚན་ལ་སོགས་པའི། །བསྐྱེད་རྫོགས་བརྟན་ཐོབ་རྣམས་ལ༴ མཚུངས་མེད་ཆོས་ཀྱི་རྡོ་རྗེ་ལ་སོགས་པའི། །སྟོང་ཉིད་མཐར་ཕྱིན་རྣམས་ལ༴ དྲིན་ཆེན་ཛྙཱ་ན་ཀེ་ཏུ་ལ་སོགས་པའི། །མཁས་བཙུན་དམ་པ་རྣམས་ལ༴ རཏྣ་ཤྲཱི་ཀུན་དགའ་འབུམ་པ་སོགས། །གཅོད་ཀྱི་བཀའ་བབས་རྣམས་ལ༴ པུཎྱེ་ལཀྵ་རྡོ་རྗེ་འོད་ཟེར་སོགས། །བྱ་བཏང་རྣལ་འབྱོར་རྣམས་ལ༴ རྒྱལ་མཚན་སེངྒེ་ག་ག་བཛྲ་སོགས། །རྣལ་འབྱོར་རྟོགས་ལྡན་རྣམས་ལ༴ ག་ག་མ་ཏི་ཀ་ལ་བཛྲ་སོགས། །བསྟན་འཛིན་སྐྱེས་མཆོག་རྣམས་ལ༴ དབང་དྲག་རྒྱ་མཚོ་ཆོས་སྐྱོང་རྒྱ་མཚོ་སོགས། །འཁྲུལ་ཞིག་དབང་ཕྱུག་རྣམས་ལ༴ ཀློང་གསལ་སྙིང་པོ་ཆོས་ཉིད་རྒྱ་མཚོ་སོགས། །རྫོགས་ཆེན་རྣལ་འབྱོར་རྣམས༴ བཀྲ་ཤིས་ཕུན་ཚོགས་ནམ་མཁའ་རྒྱ་མཚོ་སོགས། །སྙན་བརྒྱུད་འཛིན་པ༴ པདྨ་རིན་ཆེན་འཇུ་བླ་གསང་སྔགས་སོགས། །གཅོད་ཀྱི་གྲུབ་ཐོབ་རྣམས་ལ༴ པདྨ་ཆོས་དབྱིངས་སངས་རྒྱས་གྲགས་པ་སོགས། །བཀབ་བབས་ལུང་ཟིན་རྣམས༴ ནམ་མཁའ་ཆོས་སྐྱོང་འཇིགས་མེད་བསམ་གཏན་སོགས། །འཁྲུལ་རྟོགས་ཚར་གཅོད༴ ཀུན་བཟང་རྣམ་རྒྱལ་དཀོན་མཆོག་བླ་མ་སོགས། །སྙིགས་དུས་འགྲོ་མགོན་རྣམས༴ དྷརྨཱ་སཱ་ར་རྡོ་རྗེ་ལགས་བཤད་སོགས། །འགྲན་བྲལ་སྐྱེས་ཆེན་རྣམས་ལ༴ དྲིན་ཆེན་རྩ་བའི་བླ་མ་ལ་སོགས་པའི། །གྲུབ་ཐོབ་གཅོད་བརྒྱུད་རྣམས་ལ༴ གཉན་ས་རི་ཁྲོད་འགྲིམ་པ་ལ་སོགས་པའི། །མཆེད་གྲོགས་ཆོས་མཛད་རྣམས་ལ༴ ཡི་དམ་མཁའ་འགྲོ་སྡེ་ལྔ་ལ་སོགས་པའི། །དཀྱིལ་འཁོར་ལྷ་ཚོགས་རྣམས་ལ༴ ཆོས་སྐྱོང་མ་མགོན་ལྕམ་དྲལ༴ བཀའ་སྲུང་དམ་ཅན་རྣམས་ལ༴ ཐར་པའི་ལམ་སྟོན་རྣམས་ལ༴ ཕན་བདེའི་འབྱུང་གནས་རྣམས་ལ༴ འཕགས་པའི་དགེ་འདུན་རྣམས་ལ༴ བདག་སོགས་མཁའ་མཉམ་འགྲོ་བ་སེམས་ཅན། །མ་རིགས་འཁྲུལ་པ་སངས་པར་བྱིན་གྱིས་རློབས། །གཟུང་འཛིན་མདུད་པ་གྲོལ་བར་བྱིན་གྱིས་རློབས། །སྒྲིབ་གཉིས་བག་ཆགས་དག་པར་བྱིན༴ སྨོན་འཇུག་སེམས་བསྐྱེད་འབྱུང་བར་བྱིན༴ ཕ་རོལ་ཕྱིན་དྲུག་རྫོགས་པར༴ རྐྱེན་ངན་གྲོགས་སུ་འཆར་བར་བྱིན༴ སྣང་སྲིད་ཆོས་སྐུར་རྟོག་པར༴ སྟོང་ཉིད་སྙིང་རྗེ་འབྱོང་བར༴ བདག་དོན་ཆོས་སྐུ་རྟོགས་པར༴ གཞན་དོན་གཟུགས་སྐུ་འབྱུང་བར༴ དོན་གཉིས་ཕུན་སུམ་ཚོགས་པར་བྱིན་གྱིས་རློབས། །ཞེས་དང་གོང་དུ་དཀར་འགྱེད་སྐབས་ལྟར། མ་ཅིག་བརྒྱུད་པ་དང་བཅས་པའི༴ སོགས་བྱིན་རླབས་འབེབས་སྦྱོང་དང་དབྱིངས་རིག་བསྲེ། སྭ་བྷ་ཝས་སྦྱོངས། སྟོང་པའི་ངང་ལས་རང་གི་ལུས་སྟོང་ར་ཁོང་སྟོང་སོགས་ནས། མ་ཅིག་ཐུགས་ཀར་ཐིམ་པར་བསམ་བར་བརྗོད། དེ་ནས་དམར་འགྱེད་དངོས་ནི། ཕཊཿ རང་གཞན་གྱི་རོ་དེ་ཆེ་ལ་ཚོ་བ་སྣུམ་ལ་མཛེས་ཤིང་ཡིད་དུ་འོང་བ། དྲི་དང་རོ་ཕུན་སུམ་ཚོགས་པ་འཇིག་རྟེན་གྱི་ཁམས་ཐམས་ཅད་གང་བར་གྱུར། ཕཊཿ དེའི་མདུན་དུ་རང་གི་རྣམ་པར་ཤེས་པའི་ངོ་བོ་དེ་གཤིན་རྗེ་ཨ་ཝ་གླང་མགོ། ཞེ་སྡང་སྦྲུལ་མགོ། འདོད་ཆགས་བྱ་མགོ། གཏི་མུག་ཕག་མགོ། ང་རྒྱལ་རྔམ་པ་དྲེད་ཀྱི་མགོ་བོ་ཅན། གཞན་ཡང་སྟག་གཟིག་ལ་སོགས་པ་གཅན་གཟན་སྣ་ཚོགས་ཀྱི་མགོ་བརྙན་ཅན། ཐོག་པ་དེ་རྣམས་ཀྱིས་རོ་གཏུབ་པར་བསམ། ཕཊཿ གཏི་མུག་ཤ་ཡི་རི་བོ། ཕཊཿ འདོད་ཆགས་ཁྲག་གི་རྒྱ་མཚོ། ཕཊཿ ཞེ་སྡང་རུས་པའི་གྲམ་ཁྲོད་ཆེན་པོ་གཅིག་གྱུར་པར་བསམ། ཕཊཿ ཕཊཿ ཕཊཿ གཤིན་རྗེ་དེ་རྣམས་ཀྱིས་སྐད་གདངས་ཆེན་པོས་སྟོང་གསུམ་ནམ་མཁའི་ཁྱབ་ཚད་ཀྱི་ལྷ་སྲིན་སྡེ་བརྒྱད་བཅོལ་བས། ས་འོག་ས་སྟེང་ས་བླའི་ལྷ་འདྲེ་སྡེ་བརྒྱད་ཐམས་ཅད་འུབ་འུབ་འདུས་པར་བསམ་ནས་འདི་སྐད་འབོད་དོ། །འ། གཙོ་བོ་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་རྒྱལ་པོ། མོ་གདོན་བསེན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཐོ་སྲིད་པའི་རྩེ་མོ་མན་ཆད། དམའ་ན་རག་དམྱལ་ཁམས་ཡན་ཆད། མཐོ་ནམ་མཁའི་ལྷ་བྲན་མན་ཆད། དམའ་ས་འོག་ལྟོ་འཕྱེ་ཡན་ཆད། པེ་དཀར་རྒྱལ་པོ་མན་ཆད། ཡུལ་འདྲེ་ས་སྲིན་འཁྱམས་པོ་ཡན་ཆད། སྣང་ཞིང་སྲིད་པའི་ལྷ་འདྲེ་ཐམས་ཅད་ཤ་ཁྲག་དགའ་སྟོན་ལ་འདིར་འདུས་ཤིག །ཕཊཿ ཕཊཿ ཕཊཿ འོ། ཁྱད་པར་དུའང་གཉན་ཁྲོད་ཆེན་པོ་འདི་ན་གནས་པའི་དཀར་པོ་ལྷ་ཡི་སྡེ་ཚན། ནག་པོ་བདུད་ཀྱི་སྡེ་ཚན། དམར་པོ་བཙན་གྱི་སྡེ་ཚན། ཁྲ་བོ་གཟའ་ཡི་སྡེ་ཚན། འཕན་པོ་གཉན་གྱི་སྡེ་ཚན། ཕྱུག་པོ་ཀླུ་ཡི་སྡེ་ཚན། རཀྵ་སྲིན་པོ་སྡེ་ཚན། ཕོ་མོ་མ་ནིང་གི་སྡེ་ཚན་དུ་གཏོགས་པའི་སྣང་ཞིང་སྲིད་པའི་ལྷ་འདྲེ་ཐམས་ཅད་ཤ་ཁྲག་གི་དགའ་སྟོན་ལ་འདིར་འདུས་ཤིག །ཕཊཿ ཕཊཿ ཕཊཿ འོ། ཁྱད་པར་དུའང་བདག་གམ་ཆྒཻའི་ཕུང་པོ་ཁམས་དང་སྐྱེ་མཆེད་ལ། དང་པོ་ནད་ཀྱི་སྣ་འདྲེན་པ། བར་དུ་གདོན་གྱི་ཚང་བཅའ་བ། ཐ་མ་ནད་ལ་མི་ཕན་པ་བྱེད་པའི་ཕོ་གདོན་རྒྱལ་པོ། མོ་གདོན་བསེན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཚུན་འདྲེ་མི་ལ། བསེ་རག་འགོང་པོ། ཐེའུ་རང་། གྲི་བོ། གྲི་མོ། གནའ་འདྲེ་རྙིང་པ། ད་འདྲེ་གསར་པ། ཡུལ་འདྲེ་འཁྱམས་པོ། ཟ་འདྲེ་ཤི་གཤེད། དམ་སྲི་རྒྱལ་འགོངས། ཁ་ཡི་ནང་གི་དབུག་འཕྲོག་པ། ཁོག་པའི་ནང་གི་སྲོག་གཅོད་པའི་གདོན་བགེགས་བདུད་དང་ལོག་པར་འདྲེན་པ་ཐམས་ཅད་ཤ་ཁྲག་གི་དགའ་སྟོན་ལ་འདིར་འདུས་ཤིག །ཕཊཿ ཕཊཿ ཕཊཿ འོ། ཁྱད་པར་དུའང་གཉན་ཁྲོད་ཆེན་པོ་འདིའི་ཕུ་མདའ་ཉིན་སྲིབ་ལ་གནས་པའི་ལྷ་འདྲེ་བཀའ་ལ་འཁུ་བ་དམ་ལས་ལོག་པ། མགོ་སྐོར་རྗེས་སྙོགས་བྱེད་པའི་ལྷ་འདྲེ་གོང་རལ་འཁྱམས་གསུམ་འཇབ་རྒྱུག་ལོག་གསུམ་བྱེད་པའི་ལྷ་འདྲེ་བཀའ་ལ་མི་ཉན་པ། དབང་དུ་མི་འདུ་བ། དམ་ལ་མི་གནས་པ། དངོས་གྲུབ་མི་སྟེར་བ་བྱེད་པའི་ལྷ་འདྲེ་ཐམས་ཅད་ཤ་ཁྲག་གི་དགའ་སྟོན་ལ་འདིར་འདུས་ཤིག །ཟིན་བྲིས་ནང་། ཀྱེ་འདུས་ཤིག༴ སོགས་ཇོ་བོ་རྗེའི་གསུང་ཁྱད་པར་ཅན་འདིར་སྦྱར། མཆན། གོང་ལྟར་བོས་པའི་ཚན་གསུམ་པོ་ཐམས་ཅད་འདུས་པར་བསམ། དེ་ཙམ་བོས་ནས་ཅི་སྦྱིན་ན། ཕཊཿ འོ། བདག་ཅག་རྣམས་ཀྱི་ལྷ་འདྲེ་ཁྱེད་རྣམས་འབོད་ནས་ཅི་སྦྱིན་ཅི་སྟེར་ཟེར་ན། བདག་ཅག་རྣམས་ཀྱི་སྤྱི་བོའི་གཙུག་མན་ཆད་རྐང་མཐིལ་ཡན་ཆད། ལྷུ་ཚིགས་བཅུ་གཉིས། མགོ་དང་བཅུ་གསུམ། དབང་པོ་རྣམ་ལྔ། དོན་སྙིང་རྣམ་པ་ལྔ། ནང་རོལ་རྣམ་པ་ལྔ། ཤ་དང་རུས་པ། ཁྲག་དང་ཆུ་སེར། སོ་དང་སེན་མོ། སྐྲ་དང་བ་སྤུ། རྐང་དང་རྐང་མར། ཀླད་པ་དང་ཀླད་རྒྱ། ལྷ་བ་དང་གཞུང་པ། ཞག་དང་སྙིང་ཁྲག །དབུགས་དང་ཚེ་སྲོག་བཀྲག་དང་གཟི་མདངས། ཁམས་དང་སྐྱེ་མཆེད་བཅུ་གཉིས་ལ་སོགས་པ་རྣམས་སྟེར་བ་ཡིན་པས། ཟོ་ཅིག །རོལ་ཅིག །འཐུང་ཞིག །ཁྱེར་ཅིག །བསྣམས་ཤིག །དགྱེས་པར་མཛོད་ཅིག །རྒྱས་པར་སྤྲོ་ན། ཕཊཿ སྟེང་འཇའ་འོད་ལས་གྲུབ་པའི་གུར་ཁང་ནང་དུ། གཟའ་མཆོག་ཆེན་པོ་རཱ་ཧུ་ལ་མགོ་དགུ་པ་མགོ་ལུས་མེད་པར་མིག་གིས་གང་བ། སྟེང་ཞལ་བྱ་རོག་གི་མགོ་གཅིག་ཏུ་ཡོད་པ། ཕྱག་གཉིས་སྦྲུལ་ཞག་དང་རྭ་ཡི་མདའ་གཞུ་འགེང་བ། དེ་ལ་གདོང་མོ་བཞི། གཟའ་ཆེན་བརྒྱད། གཟའ་ཕྲན་བྱེ་བ་དུང་ཕྱུར། བཀའ་ཡི་ལྷ་སྲིན་སྡེ་བརྒྱད། སྟེང་གདོན་གཟའ་ཡི་རིགས་ཚོགས་དང་བཅས་པ་རྣམས་ཀྱིས་བདག་གཞན་གྱི་ཤ་ཁྲག་རུས་གསུམ་འདི་ལ་ཟོ་ཞིག །རོལ་ཅིག །འཐུང་ཞིག །ཁྱེར་ཅིག །སྣོམས་ཤིག །དགྱེས་པར་མཛོད་ཅིག །ཕཊཿ བར་ལྷ་ཁང་བྱ་འདབ་གསུམ་པའི་ནང་དུ། རྒྱལ་པོ་པེ་ཧར་གསེར་ཐུལ་ཅན་གླང་པོ་ཆེ་ལ་ཞོན་པ། དེ་ལ་བན་ཆེན་བརྒྱ། བོན་ཆེན་སྟོང་། ཤན་པ་གྲི་ཐོགས་བརྒྱ། ལས་བྱེད་པཱ་ཏྲ་པུ་ཏྲ་བརྒྱ། ཕྱི་བློན་ནང་བློན་བརྒྱ། ཕྱག་གཙང་ཕྱག་བརྙན་ཆེ་བ་པེ་ཧར། འབྲིང་བ་ཤ་བཀྲ། ཆུང་བ་བེར་ནག །སྲིན་མོ་དམ་སྲི་ནག་མོ། གྲོང་རྒྱུག་འདྲེ་མོ་ནག་མོ། བར་གདོན་རྒྱལ་འགོང་གི་རིགས་ཀྱི་ཚོགས་དང་བཅས་པ་རྣམས་ཀྱི་བདག་ཅག་གི་ཤ་ཁྲག་རུས་གསུམ་འདི་ལ་ཟོ་ཞིག །རོལ་ཅིག །འཐུང་ཞིག །ཁྱེར་ཅིག །སྣོམས་ཤིག །དགྱེས་པར་མཛོད་ཅིག །ཕཊཿ འོག་རྒྱ་མཚོ་ཆེན་པོ་སྔོ་མེར་གྱི་གང་བའི་ནང་དུ། ཀླུ་ནག་པོ་དུར་བ་མགོ་དགུ་པ། ཕྱག་ན་ཆུ་གྲི་ཐོགས་པ། དེ་ལ་ཀླུ་ཆེན་བརྒྱད་ཀླུ་ཕྲན་བྱེ་བ་དུང་ཕྱུར། སྦལ་སྦྲུལ་སྡོམ་སྡིག །ཉ་དང་ལྕོང་མོ་ལ་སོགས་འོག་གདོན་ཀླུའི་རིགས་ཀྱི་ཚོགས་དང་བཅས་པ་རྣམས་ཀྱིས་བདག་གི་ཤ་ཁྲག་རུས་གསུམ་འདི་ལ་ཟོ་ཞིག༴ སོགས། ཕཊཿ ཁྱད་པར་དུ་ཡུལ་ཁམས་འདིར་གནས་པའི་བཙན་གྱི་སྡེ་ཚོགས་མ་མོའི་སྡེ་ཚོགས། ཐེའུ་རང་གི་སྡེ་ཚོགས། དྲི་ཟའི་སྡེ་ཚོགས། བདུད་ཀྱི་སྡེ་ཚོགས། གཤིན་རྗེའི་སྡེ་ཚོགས། ཉུལ་ལེ་བཅུ་གཉིས། སྲིན་མོ་རོ་སྒྱེ་ཁུར་བ། ལུ.བ་ཚ་རིམས་ཀྱི་བདག་པོ་བདག་མོ། སྟོང་གསུམ་ནད་ཡམས་ཀྱི་བདག་པོ་བདག་མོ། སྣང་ཞིང་སྲིད་པའི་ལྷ་འདྲེ་རྣམས་ལ་བདག་ཅག་རྣམས་ཀྱི་ཤ་ཁྲག་རུས་གསུམ་སྟེར་བ་ཡིན་པ་ཟོ་ཞིག་སོགས། ཕཊཿ ཡོད་ན་ཡོད་ཚད་ཀྱི་ལྷ་འདྲེ་རྣམས་ཀྱིས་བདག་གཞན་རྣམས་ཀྱི་ཤ་ཁྲག་རུས་གསུམ་ཕུང་པོ་འདི་ལ། ཤ་ལ་ཟ་རེ་བ་རྣམས་ཀྱིས་ཤ་ཟོ། ཁྲག་ལ་འཐུང་རེ་བ་རྣམས་ཀྱིས་ཁྲག་འཐུང་། ལྤགས་ལ་གྱོན་རེ་བ་རྣམས་ཀྱིས་ལྤགས་པ་གྱོན། སོ་སོའི་འདོད་དགུ་སོ་སོའི་བསམ་དགུ་སྐྱིད་དགའ་ལོངས་སྤྱོད་ཆེ་ཆུང་ཕམ་རྒྱལ་མེད་པར་གྱུར་ཅིག །ཕཊཿ ཕཊཿ བསྡུ་ན་གོང་གི་སྟེང་ནམ་མཁའ་ནས་འདི་བར་བཞག་གོ། །སྤྱིར་རིགས་དྲུག་གི་སེམས་ཅན་རྣམས་ཀྱི་གླུད་དུ་བསྔོ། སྒོས་དྲིན་ཆེན་ཕ་མའི་གླུད་དུ་བསྔོ། ཡང་སྒོས་རྩ་བའི་བླ་མའི་གླུད་དུ་བསྔོ། ཁྱད་པར་དུ་ལྷ་འདྲེ་ཁྱེད་རྣམས་ལ་གཟན་དུ་སྟེར་བ་ཡིན་པས་ཟོ་ཞིག་སོགས། ཕཊཿ བདག་གི་ལུས་འདི་བྲམ་ཟི་སྐྱེ་བ་བདུན་པའི་ཤ་ཁྲག་ཏུ་བྱིན་གྱིས་རླབ་པ་ཡིན་པས་ཁྱེད་རྣམས་ཀྱིས་ལོངས་སྤྱོད་པ་ཙམ་གྱིས་ཁམས་གསུམ་གྱི་འཁོར་བ་ལས་ཐར། རིགས་དྲུག་གི་སྡུག་བསྔལ་དང་བྲལ། སངས་རྒྱས་ཀྱི་གོ་འཕང་རིན་པོ་ཆེ་ཐོབ་ནས། སེམས་ཅན་མ་བསྒྲལ་བ་རྣམས་བསྒྲལ་བར་བྱེད་པ་ཡིན། མ་གྲོལ་བ་རྣམས་གྲོལ་བ་བྱེད་པ་ཡིན། དབུགས་མ་དབྱུང་བ་རྣམས་དབུགས་དབྱུང་བར་བྱེད་པ་ཡིན། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ཡིན་པས་ཟོ་ཞིག །རོལ་ཅིག །འཐུང་ཞིག །ཁྱེར་ཅིག །སྣོམས་ཤིག །དགྱེས་པར་མཛོད་ཅིག །ཕཊཿ ཕཊཿ ཅེས་བརྗོད་པས། ལྷ་འདྲེ་ཐམས་ཅད་དགའ་ཞིང་མགུ་ནས། ཧབ་དིར་གྱིས་བྱེའུ་ཆུང་ཆུ.ལ་རུབ་པ་བཞིན་ཧབ་དི་རི་རི་ཟོས་འཐུང་། ངོམ་ཞིང་དགྱེས་ནས་ཡོད་ཚད་ཟོས། ཁྱག་ཚད་ཁུར་ནས་དགའ་ཡ་ལེ་མགུ་ཞིང་ཚིམ་ནས་བུ་ལོན་སོད། ལན་ཆགས་བྱང་། འགྲས་ཤིང་འཁོན་པ་ཐམས་ཅད་འདུམ་ཅི་བསྒོ་བའི་ཕྲིན་ལས་སྒྲུབ་པར་ཁས་བླངས་ཏེ་ཐམས་ཅད་རྗེེ་བཙུན་མར་སངས་རྒྱས་པར་བསམ། དེ་ལྟར། ཕཊཿ རེ་དང་མགྲོན་ཐེབ་རེ་སྤྲད་པའི་བརྒྱ་རྩ་བརྒྱད་བྱེད་དོ། །དེ་ལྟར་བྱས་པའི་ཡོན་ཏན་ནི། མ་ཅིག་གིས། ལུས་ཀྱི་མཆོད་སྦྱིན་རེ་རེ་དེ། །ཚོགས་བསགས་མང་པོས་དོ་ཟླ་མེད། །ཅེས་དང་། དུས་འཁོར་ལས། རྟ་དང་གླང་པོ་བརྒྱ་འགྱུར། །བུ་དང་ཆུང་མར་སྟོང་འགྱུར། །ལུས་ཀྱི་མཆོད་སྦྱིན་འབུམ་འགྱུར། །ཆོས་ཀྱི་མཆོད་སྦྱིན་བརྗོད་ལས་འདས། །ཅེས་གསུང་། ཁྲོས་མ་འབུམ་བསྐུལ་དང་། མཛེས་མ་འབུམ་བསྐུལ་གཉིས་འདིར་འདོན། ༈ དེ་ནས་བྱེར་སྡུད་ནི། ཕཊཿ གཅིག་བྱས་པས། རོ་སྔ་མ་ལྟར་བསམ་ལ། མགོ་བརྙན་ཅན་རྣམས་ཀྱི་ཕྱག་ན་མཚོན་ཆ་སྣ་ཚོགས་ཐོགས་ཏེ་རོ་དེ་གཙབ་རེས་མི་ཐོབ་ཐོབ་བྱེད་ནས། ལུས་གདོན་རྣམས་ཀྱིས་སྐད་ངན་ཙི་རི་རི་འདོན་ཅིང་། སྣང་སྲིད་ཀྱི་བཀའ་ཡི་ལྷ་མ་སྲིན་སྡེ་བརྒྱད་རྣམས་ཀྱང་འུབ་འུབ་འདུས་ནས་བཀག་མི་ཐུབ་ཐུབ་བྱེད་པར་བསམ་ལ་འདི་སྐད་དོ། །ཕཊཿ ཀྱཻ། ཁྱོད་སྣང་ཞིང་སྲིད་པའི་ལྷ་འདྲེ་རྣམས། །རང་དབང་མེད་པར་འདིར་འདུས་ཤིག །ནམ་མཁའ་གང་བའི་ལྷ་དམག་འདུས། །བར་སྣང་གང་བའི་གཉན་དམག་འདུས། །ས་གཞི་གང་བའི་ཀླུ་དམག་འདུས། །སེམས་འགྱུ་བ་དངོས་མེད་སྟོང་པ་འདི། །འདྲེ་ཁྱོད་བས་ངས་ཀྱང་མཐོང་བ་མེད། །རབ་མཛེས་བདག་གི་ཕུང་པོ་འདི། །འདྲེ་ཁྱོད་ལ་མཁོ་བས་བདག་གིས་སྦྱིན། །བདག་ཅག་ཤ་ཁྲག་གཟུགས་ཕུང་ལ། །ཤ་ཟ་ཧབ་སྒྲ་དི་རི་རི། །ཁྲག་འཐུང་མྱིག་པ་ཀྱུ་རུ་རུ། །རུས་འཆའ་སོ་སྒྲ་ཁྲིགས་སེ་ཁྲིག །ལྷ་བ་རྐང་འཇིབ་ཆེམས་སེ་ཆེམ། །ལྤགས་པ་གོས་གྱོན་ལྷབས་སེ་ལྷབ། ཕཊཿ ཁོག་སྟོད་ཡ་བདུད་རྒྱལ་པོས་ཁྱེར། །ཡ་བདུད་རྒྱལ་པོ་ཚིམ་གྱུར་ཅིག །ཁོག་སྨད་མ་བདུད་རྒྱལ་མོས་ཁྱེར། །མ་བདུད་རྒྱལ་མོ་ཚིམ་གྱུར་ཅིག །སྐེད་པ་ཀླུ་བདུད་ནག་པོས་ཁྱེར། །ཀླུ་བདུད་ནག་པོ་ཚིམ་གྱུར་ཅིག །མགོ་བོ་གཟའ་བདུད་མགོ་དགུས་ཁྱེར། །གཟའ་བདུད་མགོ་དགུ་ཚིམ༴ ཡན་ལག་གཉན་ཆེན་སྡེ་བཞིས་ཁྱེར། །གཉན་ཆེན་སྡེ་བཞི༴ ནང་ཆ་སྣང་སྲིད་ལྷ་འདྲེས་ཁྱེར། །སྣང་སྲིད་ལྷ་འདྲེ་ཚིམ༴ མཆིན་པ་སྨུག་པོ་བདུད་ཀྱིས་ཁྱེར། །བདུད་ཀྱི་སྡེ་ཚོགས༴ གློ་བ་དམར་པོ་བཙན་གྱིས་ཁྱེར། །བཙན་གྱི་སྡེ་ཚོགས༴ ཕོ་བ་ཁྲ་བོ་གཟའ་ཡིས་ཁྱེར། །གཟའ་ཡི་སྡེ་ཚོགས༴ དོན་སྙིང་པེ་ཧར་རྒྱལ་པོས་ཁྱེར། །པེ་ཧར་རྒྱལ་པོ༴ མཆེར་པ་མོ་གདོན་བསེན་གྱིས་ཁྱེར། །མོ་གདོན་བསེན་མོ༴ མཁལ་མ་ཀླུ་གདོན་ས་བདག་ཁྱེར། །ཀླུ་གདོན་ས་བདག་ཚིམ༴ རྒྱུ་མ་ལམ་གྱི་ལྷ་འདྲེས་ཁྱེར། །ལམ་གྱི་ལྷ་འདྲེ༴ ལྤགས་པ་འདི་བསེ་རག་འགོང་པོས་ཁྱེར། །བསེ་རག་འགོང་པོ༴ སྲོག་རྩ་འཆི་བདག་གཤིན་རྗེས་ཁྱེར། །འཆི་བདག་གཤིན་རྗེ་ཚིམ༴ ཕྱི་ཤ་ཕྱི་ཡི་ལྷ་འདྲེས་ཁྱེར། །ཕྱི་ཡི་ལྷ་འདྲེ༴ ནང་ཤ་ནང་གི་ལྷ་འདྲེས་ཁྱེར། །ནང་གི་ལྷ་འདྲེ་ཚིམ་གྱུར་ཅིག །བར་ཤ་བར་གྱི་ལྷ་འདྲེས་ཁྱེར། །བར་གྱི་ལྷ་འདྲེ་ཚིམ༴ ཁྱོད་སྣང་ཞིང་སྲིད་པའི་ལྷ་འདྲེ་རྣམས། །ཤ་འདོད་རྣམས་ཀྱིས་ཤ་ཁྱེར་ཅིག །ཤ་ཡི་ས་བདག་ཚིམ༴ ཁྲག་འདོད་རྣམས་ཀྱིས་ཁྲག་ཁྱེར་ལ། །ཁྲག་གི་ཀླུ་རྣམས་ཚིམ༴ རུས་འདོད་རྣམས་ཀྱིས་རུས་པ་ཁྱེར། །རུས་པས་གཉན་རིགས་ཚིམ༴ མདངས་ཀྱིས་བསེན་མོ་ཚིམ༴ བཀྲག་གི་རྒྱལ་འགོང་ཚིམ༴ ཁྱེད་རིང་བ་རྣམས་ཀྱིས་རློན་པ་ཁྱེར། །མི་རིང་རྣམས་ཀྱིས་བཙོས་ལ་ཟོ། །ཤ་ཚིལ་ཅི་འདོད་གང་དགའ་གྱིས། །ཅི་ཟ་གྱིས་ལ་ཅི་ཁྱག་ཁྱེར། །བསྔོས་པ་བཞིན་དུ་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །རྣམ་བཞིའི་མགྲོན་དུ་གྱུར་པ་ལ། །ཚད་མེད་ལུས་སྦྱིན་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །སྔོན་ཆད་འཁོར་བ་ཐོག་མེད་ཀྱི། །བུ་ལོན་འབྲེལ་ཐག་ཆོད་གྱུར་ཅིག །ལན་ཆགས་ཤ་འཁོན་བྱང་གྱུར་ཅིག །ཁྱེད་རྣམས་དགའ་མགུ་ཡི་རང་ཞིང་། །བསམ་སྦྱོར་ངན་པ་རབ་ཞི་ནས། །ཟག་མེད་སྟོང་ཉིད་སྙིང་རྗེའི་རྒྱུད་བརླན་ཅིང་། །རྣམ་མཁྱེན་རྫོགས་པའི་སངས་རྒྱས་མྱུར་ཐོབ་ཤོག །ཕཊཿ རེ་བྱས་པ་ཙམ་གྱིས། ལྷ་འདྲེ་ཐམས་ཅད་འདུས་ནས་ཧབ་ཐོབ་ལིང་གིས་བཏང་ནས་ཟོས་པ་བསམ། ཕཊཿ ཅེས་བརྗོད་པས། སོ་སོར་དགྱེས་པར་བསམ། དེ་ལྟར་དམིགས་པ་གོང་བཞིན་བྱེད་ནས། ཕཊཿ བརྒྱ་རྩ་བརྒྱད་བརྗོད་པ་ཡིན་ནོ། །དེ་ནི་བྱེར་སྡུད་དོ། ༈ །དེ་ནས་བདེ་སྡུག་བཏང་ལེན་ནི། མདུན་གྱི་ནམ་མཁའི་གནས་སུ་པདྨ་དང་ཟླ་བའི་གདན་ལ། མ་ཅིག་ལབ་ཀྱི་སྒྲོན་མ་འོད་ཟེར་ཉི་མ་འབུམ་ཤར་བའི་གཟི་བརྗིད་ཆེ་བ་གཅིག་བསྒོམ་ལ། མ་ཅིག་གིས་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་གྲངས་མེད་པར་མར་འཕྲོས་པས། འགྲོ་བ་རིགས་དྲུག་ན་གནས་པའི་སེམས་ཅན་ཐམས་ཅད་དང་། ཁྱད་པར་ཟས་ཁ་ལག་གི་འབྲེལ་ཚད་ཀྱི་སེམས་ཅན་ཐམས་ཅད་བསྔོ་དགོས་ཡིད་ལ་དྲན་ཚད་མ་ནམ་མཁས་ཁྱབ་ཚད་སེམས་ཅན་རྣམས་ཀྱི་རྣམ་པར་ཤེས་པ་འོད་ཀྱི་ཐིག་ལེ་རེ་རེ་གྱུར་ནས། མ་ཅིག་གི་ཐུགས་ཀའི་འོད་ཟེར་ལྕགས་ཀྱུ་རྣོན་པོས་ཡར་དྲངས་ཐུགས་ཆོས་ཉིད་ཀྱི་ཀློང་དུ་ཐིམ་པར་གྱུར། ཕཊཿ ཕཊཿ ཕཊཿ གཉན་ཁྲོད་ཆེན་པོ་འདིར་གནས་པའི་སྣང་ཞིང་སྲིད་པའི་ལྷ་འདྲེ་རྣམས་ཀྱི་རྒྱུད་ལ་ཡོད་པའི་སྡིག་སྒྲིབ་བག་ཆགས་ཐམས་ཅད་རང་ལ་སྨིན་པར་གྱུར་ཅིག །ཕཊཿ རང་གི་དཀར་པོ་དགེ་བའི་རྩ་བ་ཆོས་དང་ཟང་ཟིང་གི་སྦྱིན་པ་ཐམས་ཅད་ལྷ་འདྲེ་རྣམས་ལ་སྨིན་པར་གྱུར་ཅིག །ཕཊཿ ལྷ་འདྲེ་རྣམས་ཀྱི་གནོད་ཅིང་གདུག་པའི་ངན་སེམས་ཞི་ནས། བསམ་པ་བྱང་ཆུབ་ཀྱི་སེམས་དང་ལྡན་ནས་མྱུར་དུ་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཕཊཿ ཕན་བདེ་མ་ལུས་ཀུན་ལ་འབུལ། །ཕན་བདེས་ནམ་མཁའ་གང་བར་ཤོག །སྡུག་བསྔལ་མ་ལུས་བདག་ལ་འདུས། །སྡུག་བསྔལ་གྱི་རྒྱ་མཚོ་སྐེམ་པར་ཤོག །ཕཊཿ ཕཊཿ ཕཊཿ ལན་གསུམ་བརྗོད་དོ། །ཆོས་ཀྱི་སྦྱིན་པ་ནི། སེམས་ཅན་ཐམས་ཅད་ལ་ཆོས་ཀྱི་སྦྱིན་པ་དེ་དག་གིས་དོན་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་སུམ་དུ་རྟོག་པར་བསམ་ལ། བདག་ཉིད་སྐད་ཅིག་གི་མ་ཅིག་ལབ་ཀྱི་སྒྲོན་མ་སྐུ་མདོག་དཀར་མོ་གཟི་དམངས་དང་ལྡན་པའི་ཐུགས་ཀར་ཨཱཿདཀར་པོ་འོད་དང་ལྡན་པ་དང་། རང་གི་སྤྱི་བོར་ཡུམ་ཆེན་མོ་སྐུ་མདོག་སེར་མོ་གཙོ་མའི་མདོག་ལྟ་བུ་ཞལ་གཅིག་ཕྱག་བཞི་པ་ཞལ་ནང་དུ་གྱུ་བའི་ཐུགས་ཀར་ཨཱཿསེར་པོ་དེ་ཉིད་ཀྱི་མཐར་ག་ཏེའི་སྔགས་ཀྱིས་གཡོན་དུ་འཁོར་བ་བསྒོམ་ལ། ༀ་སྭ་བྷ་ཝས་སྦྱོངས། སྟོང་པའི་ངང་ལས་ཕྱི་སྣོད་ཀྱི་འཇིག་རྟེན་ཐམས་ཅད་འོག་མིན་ཆོས་ཀྱི་དབྱིངས་ཀྱི་ཞིང་ཁམས་སུ་གྱུར། ནང་བཅུད་ཀྱི་སེམས་ཅན་ཐམས་ཅད་ཆོས་སྐུ་རྒྱལ་བ་ཡུམ་ཆེན་མོའི་སྐུར་གྱུར། སྒྲར་གྲགས་ཚད་ཐམས་ཅད་ག་ཏེའི་སྔགས་སྒྲ་འུར་ཏི་རི་རི་སྒྲོགས་པར་བསྒོམ། ལྷ་འདྲེ་རྣམས་གནོད་ཅིང་གདུག་རྩུབ་ངན་པའི་སེམས་ཞི་ནས། ཡུམ་ཆེན་ཤེས་རབ་ཀྱི་ཕ་རོལ་ཏུ་ཕྱིན་མའི་དོན་མངོན་སུམ་དུ་རྟོགས་པར་གྱུར་ཅིག །དོན་མངོན་སུམ་དུ་རྟོགས་ནས་ལྷ་འདྲེ་རྣམས་ཀྱིས་དུས་གཅིག་ཏུ་སྔགས་སྒྲ་འུར་འུར་བཟླས་པར་བསྒོམ། ཏདྱ་ཐཱ། ༀ་ག་ཏེ་ག་ཏེ་པ་ར་ག་ཏེ་པ་ར་སཾ་ག་ཏེ་བོ་དྷི་སྭཱ་ཧཱ། ཅི་འགྲུབ་ཟླའོ། །དེ་ནས། ཆོས་རྣམས་ཐམས་ཅད་རྒྱུ་ལས་སོགས། ཀརྨ་རབ་རིབ་སོགས། སྨྲ་བསམ་བརྗོད་སོགས་ནས། དུས་གསུམ་རྒྱལ་ཡུམ་དགོངས་དོན་རྟོགས་པར་ཤོག །ཅེས་བརྗོད། ཕ་དམ་པའི་རྟགས་བསྟོད་སོགས་གསོལ་འདེབས་གང་རུང་འདིར་འདོན། ལུང་ལས། གཟེར་བུ་གདམ་པ་མ་དང་སྤྲོད། །ཅེས་གསུང་པས། ནད་གདོན་གཟེར་བུའི་གདམ་པ་དགོས་པ་བྱུང་ན་བྱེད་ལས་འོག་ཏུ་ཞིབ་པས་གང་དགོས་སྐབས་དང་བསྟུན་ནས་འདིར་ལེན་དགོས་སོ། །དེས་དྲུག་པ་དམར་འགྱེད་སོང་། ༈ སྤྱི་དོན་བདུན་པ་གཏོར་གཞོང་མ་འདི་ལ་དོན་བཞིའི་སྟོན་པས། དང་པོ་ལས་མཁན་བསྐྱེད་པ་ནི། ཕཊཿ གཅིག་བྱས་པས་ཡང་རོ་སྔ་མ་ལྟར་རང་གཞན་གྱི་རོ་དེ་ཆེ་ལ་ཚོ་བ་བསྣུམ་ལ་མཛེས་ཤིང་ཡིད་དུ་འོང་བ་འཇིག་རྟེན་གྱི་ཁམས་གང་བ་ཅིག་ཏུ་གྱུར། བར་བསམ་ལ། རང་གི་རྣམ་པར་ཤེས་པའི་ངོ་བོ་རྗེ་བཙུན་མ་སྐུ་མདོག་དམར་མོ་གྲི་གུག་ཅན་གཅིག་ཏུ་གྱུར་པར་བསྒོམ། གཉིས་པ་ཀ་པཱ་ལ་བསྐྱེད་པ་ནི། ངག་ཏུ། ཀཾ་ཀཾ་ཀཾ་བརྗོད་པ་ཙམ་གྱིས་ཐོད་པའི་སྒྱེད་པུ་གསུམ་དུ་གྱུར། རང་གི་ཐུགས་ཀ་ནས་བྷྲཱུྃ་ཁ་དོག་ལྔ་དང་ལྡན་པ་གཅིག་སྤྲོས་པས། ཐོད་གསུམ་གྱི་ཁར་ཕོག་པས་འོད་དུ་ཞུ་བ་ལས། ཀ་པཱ་ལ་ཡངས་ཤིང་རྒྱ་ཆེ་བ་བློས་ཁྱབ་ཚད་གཅིག་དུ་བསྒོམ། ཕཊཿ གཅིག་བྱས་པ་ཙམ་གྱིས། གྲི་གུག་གིས་རྩེ་མོས་རོ་བླང་སྟེ་ཀ་པཱ་ལའི་ནང་དུ་འཕངས་ནས་རྗེས་སུ་གྲི་གུག་གིས་རོ་ལ་གཅིག་བརྒྱབ་པས་དམར་ཉོབ་ཀྱིས་སོང་ནས། གཏི་མུག་ཤ་ཡི་རི་བོ། འདོད་ཆགས་ཁྲག་གི་རྒྱ་མཚོ། ཞེ་སྡང་རུས་པའི་གྲམ་ཁྲོད་ཆེན་པོ་སྟོང་གསུམ་འཇིག་རྟེན་གྱི་ཁམས་གང་བར་གྱུར། ངག་ཏུ། རཾ་ཡཾ། བརྗོད་པ་ཙམ་གྱིས་ཀ་པཱ་ལའི་ཞབས་ཀྱི་ཡཾ་ལས་རླུང་བྱུང་རྃ་ལ་ཕོག །རྃ་ལས་མེ་འབར་བས་ཀ་པཱ་ལ་དྲོས་ཏེ་ཁོལ་ནས་དངོས་པོ་མ་དག་པ་ཐམས་ཅད་སྦུ་བའི་ཚུལ་དུ་ཕྱིར་འཕོས་ནས། དྭངས་མའི་བདུད་རྩིའི་སྟེང་དུ་ཡི་གེ་ༀ་ཨཱཿཧཱུྃ་གསུམ་འོད་དུ་ཞུ་བ་ལས། ཟག་མེད་ཡེ་ཤེས་ཀྱི་བདུད་རྩིར་གྱུར་ནས། ཀ་པཱ་ལ་སྟེམས་ཀྱིས་གང་བར་དམིགས། ཕུད་རླངས་པ་ཡར་ཆད་པ་ལས་རྗེ་བཙུན་མ་སྐུ་མདོག་དམར་མོ་ཐོད་ཞལ་འཛིན་པ་གྲངས་མེད་དུ་གྱུར་ནས། གཡས་སྐོར་དུ་གར་སྟབས་ཁྱུག་ཁྱུག་བྱེད་པ་གཅིག་ཏུ་གྱུར། གསུམ་པ་ཀ་པཱ་ལའི་ཆེ་ཡོན་ནི། མ་ཅིག་གི་ཞལ་གདམ་བཅོ་བརྒྱད་ལས། ན་མོ། ཕྱི་སྣོད་འཇིག་རྟེན་གཏོར་གཞོང་དུ། །ནང་བཅུད་སེམས་ཅན་གཏོར་མས་བཀང་། །སྐྱེ་འཆི་བྲལ་བའི་མཆོད་པ་བཞེས། །གཏོར་གཞོང་དུ་ཕྱི་ནམ་མཁའ་ཡངས་པའི་ནང་འབྱུང་བཞི་ཡི་གཏོར་མས་བཀང་རང་གསལ་རང་དག་མཆོད་པ་བཞེས། །བཀའ་ཕ་རོལ་ཕྱིན་པའི་གཏོར་གཞོང་དུ། །ས་བཅུ་དག་པའི་གཏོར་མས་བཀང་། །མྱང་འདས་ཆེན་པོའི་མཆོད༴ བཀའ་རྫོགས་པ་ཆེན་པོའི་གཏོར་གཞོང་དུ། །ཐེག་པ་བརྒྱད་ཀྱི་གཏོར་མས༴ མ་འདྲེས་ཡོངས་རྫོགས་མཆོད་པ་བཞེས། །ཀུན་གཞི་ཡངས་པའི་གཏོར་གཞོང་དུ། །རྣམ་ཤེས་ཚོགས་བརྒྱད་གཏོར་མས༴ འཕེལ་འགྲིབ་བྲལ་བའི་མཆོད་པ༴ རང་སེམས་གཉུག་མའི་གཏོར་གཞོང་དུ། །ལུས་ངག་ཡིད་གསུམ་གཏོར་མས༴ བརྗོད་དུ་མེད་པའི་མཆོད་པ་བཞེས། །སྐྱེ་བ་མེད་པའི་གཏོར་གཞོང་དུ། །རིག་པ་ཚོར་མྱོང་གཏོར་མས་བཀང་། །འགྱུ་བ་རང་གྲོལ་མཆོད་པ༴ ཆོས་སྐུ་དག་པའི་གཏོར་གཞོང་དུ། །གཟུགས་སྐུ་རྣམ་གཉིས་གཏོར་མས་བཀང་། །ཐུགས་རྗེས་འགྲོ་དོན་མཆོད་པ༴ སྟོང་པ་ཉིད་ཀྱི་གཏོར་གཞོང་དུ། །སྣང་བ་དཀར་དམར་གཏོར་མས༴ སྣང་མེད་ཆེན་པོ་མཆོད་པ༴ རང་རྒྱུད་དག་པའི་གཏོར་གཞོང་དུ། །གཉིས་མེད་གདམས་ངག་གཏོར་མས༴ ངོས་བཟུང་མེད་པའི་མཆོད་པ༴ ཆོས་ཉིད་དག་པའི་གཏོར་གཞོང་དུ། །བདེ་གསལ་ཆེན་པོའི་གཏོར་མས༴ དངོས་འཛིན་བྲལ་བའི་མཆོད་པ༴ རང་ལུས་རྒྱལ་བའི་གཏོར་གཞོང་དུ། །རང་སེམས་སྐྱེ་མེད་གཏོར་མས༴ རེ་དོག་མེད་པའི་མཆོད་པ༴ ཀ་པཱ་ལ་ཡི་གཏོར་གཞོང་དུ། །ཤ་ཁྲག་རུས་གསུམ་གཏོར་མས༴ འཛིན་ཆགས་བྲལ་བའི་མཆོད་པ་བཞེས། །རིན་ཆེན་སྣོད་ཀྱི་གཏོར་གཞོང་དུ། །དཀར་གསུམ་མངར་གསུམ་གཏོར་མས་བཀང་། །རོ་བརྒྱ་ལྡན་པའི་མཆོད་གཏོར་བཞེས། །ཕཊཿ དེས་ཀ་པཱ་ལའི་ཆེ་ཡོན་རྫོགས་ནས། བཞི་པ་མཆོད་པ་དངོས་ནི། བདུད་རྩི་དཀར་ལ་དམར་བའི་མདངས་ཆགས་པ་རྒྱ་མཚོ་ཙམ་དུ་བསྐྱེད་ལ། ཕཊཿ ན་མོ། རྡོ་རྗེ་འཆང་ཆེན་མན་ཆད་དང་། །རྩ་བའི་བླ་མ་ཡན་ཆད་ལ། །ལུས་མཆོད་སྦྱིན་གཏོར་མ་འདི་བསྔོས་པས། །བསྔོས་པ་བཞིན་དུ་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཡུམ་ཆེན་ཤེར་ཕྱིན་མན་ཆད་དང་། །ཡི་དམ་ལྷ་ཚོགས་ཡན་ཆད་ལ། །ལུས་མཆོད་སྦྱིན་གཏོར་མ༴ བསྔོས་པ་བཞིན་དུ༴ བསམ་པ་བཞིན་དུ༴ ཀུན་ཏུ་བཟང་པོ་མན་ཆད་དང་། །འཇག་མའི་སྲིན་བུ་ཡན་ཆད་ལ། །ལུས་མཆོད་སྦྱིན་གཏོར་མ༴ བསྔོས་པ་བཞིན༴ བསམ་པ་བཞིན་དུ་འགྲུབ༴ ཤཱཀྱ་ཐུབ་པ་མན་ཆད་དང་། །དམྱལ་ཁམས་བཅོ་བརྒྱད་ཡན་ཆད་ལ། །ལུས་མཆོད་སྦྱིན་གཏོར་མ༴ བསྔོས་པ་བཞིན་དུ༴ བསམ་པ་བཞིན་དུ༴ སངས་རྒྱས་མཁའ་འགྲོ་མན་ཆད་དང་། །ཤ་ཟ་ཤུགས་འགྲོ་ཡན་ཆད་ལ། །ལུས་མཆོད་སྦྱིན་གཏོར་མ་འདི༴ བསྔོས་པ་བཞིན་དུ་ཚིམ༴ བསམ་པ་བཞིན་དུ༴ ཆོས་སྐྱོང་མ་མགོན་མན་ཆད་དང་། །གིང་ཆེན་གིང་ཆུང་ཡན་ཆད་ལ། །ལུས་མཆོད་སྦྱིན་གཏོར་མ༴ བསྔོས་པ༴ བསམ་པ་བཞིན་དུ་འགྲུབ༴ ལྷ་སྲིན་སྡེ་བརྒྱད་མན་ཆད་དང་། །ཐེའུ་རང་སྤུན་དགུ་ཡན་ཆད་ལ། །ལུས་མཆོད་སྦྱིན༴ བསྔོས་པ་བཞིན༴ བསམ་པ་བཞིན་དུ་འགྲུབ༴ ཚངས་པ་བརྒྱ་བྱིན་མན་ཆད་དང་། །ནམ་མཁའི་ལྷ་བྲན་ཡན་ཆད་ལ། །ལུས་མཆོད་སྦྱིན་གཏོར་མ༴ བསྔོས་པ་བཞིན་དུ་ཚིམ༴ བསམ་པ་བཞིན་དུ༴ བི་ན་ཡ་ཀ་མན་ཆད་དང་། །ས་བདག་ལྟོ་འཕྱེ་ཡན་ཆད་ལ། །ལུས་མཆོད་སྦྱིན་ཤ་ཁྲག༴ བསྔོས་པ་བཞིན་དུ་ཚིམ༴ བསམ་པ་བཞིན་དུ་འགྲུབ༴ རི་དབང་རྒྱལ་པོ་མན་ཆད་དང་། །མཚོ་སྨན་ཕྱུག་མོ་ཡན་ཆད་ལ། །ལུས་མཆོད༴ བསྔོས་པ༴ བསམ་པ༴ པེ་ཧར་རྒྱལ་པོ་མན་ཆད་དང་། །ཡུལ་འདྲེ་འཁྱམས་པོ་ཡན་ཆད་ལ། །ལུས་མཆོད༴ བསྔོས་པ༴ བསམ་པ༴ སྲིན་མོ་ནག་རུལ་མན་ཆད་དང་། །གྲོང་ཡུལ་འདྲེ་མོ་ཡན་ཆད་ལ། །ལུས་མཆོད་སྦྱིན༴ བསྔོས་པ་བཞིན༴ བསམ་པ༴ ཕོ་སྲི་མགོ་སྐྱ་མན་ཆད་དང་། །མོ་སྲི་རྐང་སྐྱ་ཡན༴ ལུས་མཆོད༴ བསྔོས་པ༴ བསམ་པ༴ གཞོན་སྲི་དར་མ་མན་ཆད༴ ཆུང་སྲི་ཁ་དམར་ཡན་ཆད་ལ། །ལུས་མཆོད༴ བསྔོས་པ༴ བསམ་པ༴ ཐེའུ་རང་གྲེ་བོ་གྲེ་མོ་མན་ཆད་དང་། །བསེ་རག་འགོང་པོ་ཡན་ཆད་ལ། །ལུས་མཆོད༴ བསྔོས་པ༴ བསམ་པ༴ སྣང་སྲིད་ལྷ་འདྲེ་མན་ཆད་དང་། །གཉན་སའི་ལྷ་འདྲེ་ཡན་ཆད་ལ། །ལུས་མཆོད༴ བསྔོས་པ་བཞིན༴ བསམ་པ༴ གནས་གདོན་ལུས་གདོན་མན་ཆད་དང་། །བག་ལ་ཉལ་བ་ཡན་ཆད་ལ། །ལུས་མཆོད༴ བསྔོས་པ༴ བསམ་པ༴ གཏོར་མ་འདི་བསྔོས་ཡོན་ཏན་གྱིས༴ བདག་དང་མཐའ་ཡས་སེམས་ཅན་རྣམས། །ལུས་ལ་བདེ་བ་རྙེད་གྱུར་ཅིག །ངག་ལ་ནུས་པ་འབར་གྱུར་ཅིག །སེམས་ལ་རྟོགས་པ་འཆར་གྱུར་ཅིག །མཆོག་གི་དངོས་གྲུབ་ཐོབ་པར་ཤོག །སརྦ་ཛྙཱ་ན་ལོ་ཀ་ག་ཎ་ཙཀྲ་ལ་ཁ་ཁ་ཁཱ་ཧི། ཅེས་འབུལ་གཏོར་སྙིང་གཟུགས་མ་དང་། གནམ་ཕུད་ཕྱི་རོལ་མཆོད། ཕཊཿ ཕཊཿ ཕཊཿ ན་མོ། ཤ་ཁྲག་སྦྱིན་བཏང་བགྱིས་པ་འདི། །སྤྱིར་འགྲོ་དྲུག་ཡོངས་ཀྱི་གླུད་དུ་བསྔོ། །དགོས་དྲིན་ཆེན་ཕ་མའི་གླུད་དུ་བསྔོ། །ཡང་དགོས་རྩ་བའི་བླ་མའི་གླུད་དུ་བསྔོ། །ཐམས་ཅད་མཁྱེན་པའི་སངས་རྒྱས་མྱུར་ཐོབ་ཤོག་ཕཊཿ ན་མོ། བླ་མ་དམ་པའི་ཐུགས་དགོངས་རྫོགས་གྱུར་ཅིག །རྒྱལ་བ་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལྷ་སྲིན་སྡེ་བརྒྱད་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །རྣམ་བཞིའི་མགྲོན་དུ་གྱུར་པ་ལ། །ཚད་མེད་ལུས་སྦྱིན་འདི་བསྔོས་པས། །ལོངས་སྤྱོད་ལྡན་ཞིང་ཚོགས་རྫོགས་ནས། །ཐམས་ཅད་མཁྱེན་པའི་སངས་རྒྱས་མྱུར་ཐོབ་ཤོག །ཕཊཿ ཕཊཿ ཕཊཿ དེ་ནས་བཤགས་པ་བྱ་བ་ནི། ཧཱུྃ། བདེ་ལེགས་མཆོག་གི་རྙེད་ཐོབ་དེ། །རྩ་བའི་བླ་མ་ཡིན་པར་མ་ཤེས་ནས། །དངོས་གྲུབ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །རང་སེམས་རྩ་བ་ཆོད་པ་དེ། །ཆོས་སྐུ་ཡིན་པ་མ་ཤེས་ནས། །སངས་རྒྱས་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །རྣམ་རྟོག་རང་བཞིན་ཤར་བ་དེ། །སྐྱེ་མེད་ཡིན་པ་མ་ཤེས་པས། །གཉེན་པོ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ༴ སེམས་ཉིད་ཡིད་བཞིན་ནོར་བུ་དེ། །དགོས་འདོད་འབྱུང་བར་མ་ཤེས་པས། །འབད་རྩོལ་གཞན་དུ་བྱས་པ་དེ། །མ་སྤྲུལ་པའི་སྐུ་ལ༴ ང་བདག་རྩ་བ་ཆོད་པ་དེ། །ཉམས་ལེན་ཡིན་པར་མ་ཤེས་པ། །ལྷ་འདྲེ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ༴ ལྷ་འདྲེ་སེམས་ཀྱི་འཛིན་པ་དེ། །ཆོ་འཕྲུལ་ཡིན་པར་མ་ཤེས་པས། །ཉམས་ཀྱི་བྱ་ར་བྱེད་པ་དེ། །མ་སྤྲུལ་པའི་སྐུ་ལ༴ གསུམ་ལྡན་རྩ་བའི་བླ་མ་དེ། །སྐྱབས་གནས་ཡིན་པ་མ་ཤེས་པས། །མོས་གུས་ཕུལ་སྙིང་ཆུང་བ་དེ། །མ་སྤྲུལ་པའི་སྐུ་ལ༴ འདི་ཕྱི་བདེ་ལེགས་ཇི་སྙེད་པ། །རྩ་བའི་བླ་མ་འབྱུང་བ་ལ། །དངོས་གྲུབ་གཞན་དུ་རྩལ་བ་དེ། །མ་སྤྲུལ་པའི་སྐུ་ལ༴ དངོས་འབྱོར་ཡིད་སྤྲུལ་མཆོད་པ་དེ། །ཚོགས་གཉིས་རྫོགས་པར་མ་ཤེས་པས། །རློམ་སེམས་སེར་སྣ་བྱས་པ་དེ། །མ་སྤྲུལ་པའི་སྐུ་ལ༴ ཟབ་མོ་མཁའ་འགྲོའི་ཚོགས་གྲལ་དེ། །གསང་གནས་ཡིན་པ་མ་ཤེས་པས། །ཉམས་གྲིབ་ཅན་དང་འགྲོགས་པ་དེ། །མ་སྤྲུལ་པའི་སྐུ་ལ༴ ཞལ་ཟས་ཚོགས་གཉིས་ལོངས་སྤྱོད་དེ། །དངོས་གྲུབ་ཡིན་པ་མ་ཤེས་པས། །ལོག་ལྟ་ཅན་ལ་སྤེལ་བ་དེ། །མ་སྤྲུལ་པའི་སྐུ་ལ༴ བརྩེ་གདུང་འདྲེས་པའི་མཆེད་གྲོགས་དེ། །དཔའ་བོ་མཁའ་འགྲོ་ཡིན་པ་མ་ཤེས་ནས། །ཉམས་པའི་ཁོང་ཁྲོ་ཤེས་པ་དེ། མ་སྤྲུལ་པའི་སྐུ་ལ༴ ཚུལ་ཁྲིམས་རྣམ་དག་དྲི་མེད་དེ། །ཐར་ལམ་ཡིན་པར་མ་ཤེས་ནས། །འཆལ་བའི་མངོན་ལྐོག་ཤོར་བ་དེ། །མ་སྤྲུལ་པའི་སྐུ་ལ༴ ཁམས་གསུམ་སེམས་ཅན་ཐམས་ཅད་ཀུན། །ཕ་མ་ཡིན་པར་མ་ཤེས་ནས། །སེམས་ཅན་གཞན་ལ་གནོད་པ་དེ། །མ་སྤྲུལ་པའི་སྐུ་ལ༴ འཛིན་ཞེས་ཆགས་པ་ཆེ་བ་དེ། །ལྟ་ངན་ཡིན་པར་མ་ཤེས་ནས། །རྟག་ཏུ་རེ་བ་བྱེད་པ་དེ། །མ་སྤྲུལ་པའི་སྐུ་ལ༴ མན་ངག་བདུད་ཀྱི་གཅོད་ཡུལ་འདི། །གསང་སྔགས་ཡིན་པར་མ་ཤེས་ནས། །རྒྱལ་ཁམས་ཡོངས་ལ་སྤེལ་བ་དེ། །མ་སྤྲུལ་པའི་སྐུ་ལ༴ ཆགས་མེད་ལུས་སྦྱིན་གཏོང་བ་དེ། །ཚོགས་གཉིས་ཡིན་པ་མ་ཤེས་ནས། །རང་ལུས་གཅེས་འཛིན་བྱས་པ་དེ། །མ་སྤྲུལ་པའི་སྐུ༴ མཐོལ་ལོ་བཤགས་སོ་མི་མིན་མཁའ་འགྲོ་མ། །གནོང་ངོ་འགྱོད་དོ་གྲུབ་ཐོབ་གཅོད་ཀྱི་བརྒྱུད། །སྦྱང་ངོ་བསལ་ལོ་དཔའ་བོ་མཁའ་འགྲོའི་ཚོགས། །ཆོས་ཉིད་མཉམ་པའི་ངང་དུ་མཐོལ་ལོ་བཤགས། །དོན་དམ་སྐྱེ་མེད་ངང་དུ་བཟོད་པར་གསོལ། །རྣམ་དག་བདེ་ཆེན་ངང་དུ་དག་གྱུར་ཅིག །བདག་དང་འགྲོ་དྲུག་སེམས་ཅན་རྣམས། །ཚོགས་རྫོགས་སྒྲིབ་པ་བྱང་ནས་ཀྱང་། །མྱུར་དུ་སངས་རྒྱས་ཐོབ་པར་ཤོག །ཕཊཿ ཟིན་བྲིས་ནང་། མ་འབྱོར་པ་དང་སོགས། མཆན། དེ་ནས་བསྔོ་བ་སྨོན་ལམ་གྱི་འཇུག་བསྡུ་བ་ལ། དང་པོ་བསྔོ་བ་ནི། ན་མོ། བདག་གཞན་ཀུན་གྱི་དུས་གསུམ་དུ། །དགེ་རྩ་འདུས་བྱས་འདུས་མ་བྱས། །དེ་བཞིན་ཟག་བཅས་ཟག་པ་མེད། །དེ་དག་ཀུན་ལ་ཡི་རང་ངོ་། །ཡི་རང་བྱང་ཆུབ་ཆེན་པོར་བསྔོ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པ་ཁྱ་པར་ལམ། །བྱང་ཆུབ་བར་ཆད་མེད་པའི་ལམ། །བར་ཆད་མེད་པར་འཇུག་པར་ཤོག །བར་ཆད་མེད་པར་འཇུག་ནས་ཀྱང་། །ཇི་སྲིད་འཁོར་བ་མ་སྟོང་བར། །སྟོང་ཉིད་དམ་པ་ཐོབ་པར་ཤོག །ཕཊཿ དེ་ནས་སྨོན་ལམ་ནི། ཕཊཿ བདག་གི་དགེ་བའི་རྩ་བ་འདིས། །བདག་དང་འགྲོ་དྲུག་སེམས་ཅན་རྣམས། །ཕ་རོལ་ཕྱིན་དྲུག་རྫོགས་བྱས་ནས། །རྣམ་མཁྱེན་རྫོགས་པའི་སངས་རྒྱས་མྱུར་འགྲུབ་ཤོག །དགེ་བ་འདི་ཡི་མྱུར་དུ་བདག །ཆོས་སྐུ་ཡུམ་ཆེན་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། ཐམས་ཅད་དེ་ཡི་ས་ལ་འགོད་པར་ཤོག །དེ་ནས་བཀྲ་ཤིས་ནི། ༀ། བཅོམ་ལྡན་ཤཱཀྱ་ཐུབ་པ་ཡིས། །བྱང་ཆུབ་མཆོག་ཏུ་སེམས་བསྐྱེད་ནས། །ལམ་བསྒྲོད་བྱང་ཆུབ་མཆོག་ཐོབ་ནས། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྐྱེ་བ་མེད་ལས་གཟུགས་སྐུ་འཆར། །འགྲོ་རྣམས་བདེ་ལ་བཀོད་མཛད་མ། །ཡུམ་ཆེན་ཤེས་རབ་ཕ་རོལ་ཕྱིན་མ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐུགས་ལས་འཁྲུངས་པའི་ཕྱོགས་བཅུའི་སངས་རྒྱས་སྲས། །ཉན་ཐོས་རང་རྒྱལ་བྱང་ཆུབ་སེམས་དཔའི་ཚོགས། །རྒྱལ་བ་སྲས་དང་བཅས་པ་མ་ལུས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཚངས་པ་བརྒྱ་བྱིན་རྒྱལ་ཆེན་བཞིས། །མཆོད་པའི་ཚོགས་ཀྱིས་རབ་མཆོད་ཀྱིས། །ཉིན་མཚན་ཀུན་ཏུ་བསྲུང་བྱེད་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གནས་འདིར་ཉིན་མོ་བདེ་ལེགས༴ སོགས། དེ་ལྟར་འགྲུབ་པར་བྱེད་སོགས་ཅི་རིགས་བརྗོད། མཆན། དེས་བདུན་པ་གཏོར་གཞོང་མ་སོང་། ཡིད་བཞིན་ནོར་བུ་ལས། ཐབས་ཤེས་ཟུང་འཇུག་ཤིན་ཏུ་གཅེས། །སྣང་བ་ལམ་ཁྱེར་དེ་བས་གཅེས། །ཅེས་གསུངས་པས། གོང་གི་ཉམས་ལེན་དེ་རྣམས་ཀྱང་། ཕ་རོལ་ཏུ་ཕྱིན་པ་དྲུག་ལྡན་གྱིས་སྒོ་ནས་ཉམས་སུ་ལེན་དགོས་ཏེ། དེའང་། ལུས་སྲོག་ལ་མ་ཆགས་པར་འཁོར་འདས་ཐམས་ཅད་མཆོད་སྦྱིན་རྒྱ་ཆེན་བསྔོ་བ་ནི་སྦྱིན་པ། མི་དགེ་བ་ལ་སོགས་སྡིག་དང་མ་འདྲེས་པ་ཚུལ་ཁྲིམས། འཕང་སེམས་མེད་ཅིང་སྡུག་བསྔལ་ཁྱད་དུ་བསད་པ་བཟོད་པ། མ་ཡེངས་པ་རྩེ་གཅིག་ཏུ་བྱེད་པ་བསམ་གཏན་ཏེ། དེ་བཞི་ཐབས་ཀྱི་ཉམས་ལེན་ཡིན་ལ། བརྩོན་འགྲུས་ནི་ཐབས་ཤེས་གཉིས་མྱུར་དུ་བསྒྲུབ་པའི་གྲོགས་ཡིན་ཅིང་། ཤེས་རབ་ནི་མཆོད་མཁན་བདག །མཆོད་རྒྱུ་ལུས་སོགས། མཆོད་ཡུལ་མགྲོན་བཞི་ལ་སོགས་པ་ཐམས་ཅད་སྒྱུ་མ་ལྟ་བུར་རང་བཞིན་མེད་པར་ཤེས་པ་ཡིན་ཏེ། རེ་བ་མེད་པ་སངས་རྒྱས་གཅོད། །དོག་པ་མེད་པས་འཁོར་བ་གཅོད། །ཉམས་ང་མེད་པས་འདྲེ་བདུད་གཅོད། །འགོས་འཛེམ་མེད་པས་ནད་རིམས་གཅོད། །གཅོད་བྱ་མེད་པས་ཀུན་ཀྱང་གཅོད། །ཅེས་གསུངས། ཞིབ་པར་འོག་སྤྱི་ཆིང་གལ་མདོའི་སྐབས་སུ་གསལ་ལོ། །གོང་གི་ཉམས་ལེན་དེ་རྣམས་ཞག་གཅིག་གིས་ནང་ཐུན་དྲུག་གི་སྒོ་ནས། གཉན་ཁྲོད་འགྲིམ་པར་བྱ་སྟེ། དེ་ཡང་ཐུན་དྲུག་ལ། ཉིན་མོའི་ཐུན་གསུམ་ནི། རི་མགོའི་ཉི་མ་རྩེ་ཤར་དང་གཅིག །ཉིན་ཕྱེད་དྲང་པོ་དང་གཉིས། གྲིབ་ཆེན་འདུས་པ་དང་གསུམ་མོ། །མཚན་མོའི་ཐུན་གསུམ་ནི། སྲོད་ནམ་མཁའ་ལ་སྐར་མ་ཤར་བ་དང་གཅིག །ནམ་ཕྱེད་དྲང་པོ་དང་གཉིས། ཐོ་རང་སྐར་མ་བྱེར་བའི་དུས་དང་གསུམ་མོ། །གཉན་ས་མིན་ན་ནུབ་རེ་གཅོད་ཐུན་རེ་མ་ཆགས་པར་བྱེད་དོ། །ཐུན་སྐབས་རྣམས་སུ་བཏང་ལེན་བྱེད་པ་ནི། སེམས་ཅན་ཐམས་ཅད་ཀྱི་སྡིག་སྡུག་ཐམས་ཅད་བདག་ལ་སྨིན་པར་གྱུར་ཅིག །བདག་གི་བདེ་བ་མ་ལུས་པ་སེམས་ཅན་ཐམས་ཅད་ཀྱི་ཐོབ་པར་གྱུར་ཅིག །ཅེས་བརྗོད་པས་རང་ལ་དངོས་སུ་སྨིན་ཞིང་གཞན་གྱིས་དངོས་སུ་ཐོབ་པས་སྡིག་སྡུག་ཐམས་ཅད་དང་བྲལ་ནས་སངས་རྒྱས་ཐོབ་པར་བསམ་སྟེ། ཐེག་ཆེན་བློ་སྦྱོངས་ལས། གཏོང་ལེན་གཉིས་པོ་སྤེལ་མར་བྱ། །དེ་ཉིད་རླུང་ལ་སྐྱོན་དེ་སྦྱངས། །ཡུལ་གསུམ་དུག་གསུམ་དགེ་བ་གསུམ། །ཅེས་གསུངས་པ་ལྟར་ཡུན་རིང་དུ་བསྒོམ། དེས་མངོན་པར་རྟོགས་པའི་རིམ་པ་སོང་། གདན་ཐོག་གཅིག་མ་འདི་ནི་ཆོས་གྲྭ་ཆེན་པོ་ཤར་ཀཿཐོག་རྡོ་རྗེ་གདན་གྱི་འབངས་སུ་གྱུར་པའི་བྱ་བྲལ་བ་ཀུན་དགའ་འབུམ་གྱིས་གནས་མཆོག་དམ་པ་འཕགས་མཚོའི་རི་ཁྲོད་དུ་སྦྱར་བའོ།། །།བཀྲ་ཤིས་དཔལ་འབར་འཛམ་གླིང་ཡོངས་ཁྱབ་ཤོག །

གསོལ་འདེབས་བསྡུས་པ།

༅། །གསོལ་འདེབས་བསྡུས་པ་ནི། རང་གི་སྤྱི་གཙུག་ཏུ་མ་ཅིག་ལབ་ཀྱི་སྒྲོན་མ་ལ་འཁོར་གྲུབ་ཐོབ་གཅོད་ཡུལ་བརྒྱུད་པའི་བླ་མ་རྣམས་ཀྱིས་བསྐོར་ནས་བཞུགས་པར་བསམ་ལ། ༀ་ཨཱཿཧཱུྃ། ཆོས་དབྱིངས་སྤྲོས་དང་བྲལ་བའི་ཕོ་བྲང་ནས། །ཕ་རོལ་ཕྱིན་དང་ཤཱཀྱའི་རྒྱལ་པོ་དང་། །སྨྲ་བའི་སེངྒེ་དང་ནི་འཕགས་མ་སྒྲོལ། །སུ་ཁ་སིདྡྷི་ཨཱརྱ་དེ་བ་དང་། །དམ་པ་རྒྱ་གར་བསོད་ནམས་བླ་མ་དང་། །མ་ཅིག་ལབ་སྒྲོན་ཁུ་སྒོམ་ཆོས་སེང་དང་། །དོལ་པ་ཟང་ཐལ་སྐྱ་ནག་གཅེར་བུ་དང་། །སངས་རྒྱས་རབ་སྟོན་རྟོག་ལྡན་དགེ་སློང་དང་། །སངས་རྒྱས་གཉེན་སྟོན་ཞེན་མེད་རས་པ་དང་། །ཆོས་ཀྱི་སེངྒེ་བཛྲ་སིདྡྷི་དང་། །པྲ་ཛྙཱ་གུ་རུ་རྗེ་བཙུན་དཔལ་འབར་བ། །ག་ག་བཛྲ་ཤི་ལ་ཀེ་ཏུ་དང་། །ཛྙཱ་ན་ཀེ་ཏུ་ཀུན་དགའ་འབུམ་པ་དང་། །བསོད་ནམས་འབུམ་པ་རྡོ་རྗེ་འོད་ཟེར་དང་། །ནམ་མཁའ་རྡོ་རྗེ་ནམ་མཁའ་བློ་གྲོས་དང་། །ནག་པོ་རྡོ་རྗེ་དབང་དྲག་རྒྱ་མཚོ་དང་། །ཆོས་སྐྱོང་རྒྱ་མཚོ་ཀློང་གསལ་སྙིང་པོ་དང་། །ཆོས་ཉིད་རྒྱ་མཚོ་བཀྲ་ཤིས་ཕུན་ཚོགས་དང་། །ནམ་མཁའ་རྒྱ་མཚོ་དྲི་མེད་ཞིང་སྐྱོང་མགོན། །ཚེ་དབང་མཆོག་གྲུབ་ངེས་དོན་དབང་པོ་དང་། །འགྱུར་མེད་བསྟན་འཛིན་ཆོས་ཀྱི་བློ་གྲོས་དང་། །ཀུན་བཟང་འགྱུར་མེད་ཆོས་ཀྱི་རྒྱ་མཚོ་དང་། །རྡོ་རྗེ་ལེགས་བཤད་རྩ་བའི་བླ་མ་སོགས། །ཟབ་དོན་གཅོད་ཡུལ་བརྒྱུད་པའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བདག་གཞན་ལུས་དང་ལོངས་སྤྱོད་དངོས་པོ་ཀུན། །ཞེན་པ་མེད་པ་འབུལ་ལོ་བཞེས་སུ་གསོལ། །རྐྱེན་ངན་ལམ་དུ་ལོང་བར་བྱིན་གྱིས་རློབས། །ཐུན་མོང་མཆོག་གི་དངོས་གྲུབ་མྱུར་ཐོབ་ནས། །གདན་ཐོག་གཅིག་ཏུ་གྲོལ་བར་བྱིན་གྱིས་རློབས། །ཅེས་གསོལ་བ་བ ཏབས་པས། མ་ཅིག་བརྒྱུད་པའི་སྐུ་ལས༴ སོགས་གཞུང་ལྟར་བྱ།། །།

ཁྲོས་མ་འབུམ་བསྐུལ་དང་ལྷ་འདྲེ་འབུམ་བསྐུལ།

༅། །ཁྲོས་མ་འབུམ་བསྐུལ་དང་ལྷ་འདྲེ་འབུམ་བསྐུལ་བཞུགས་སོ། །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། །སྣང་སྲིད་ལྷ་འདྲེས་འཁོར་གྱིས་བསྐོར། །མ་འདིར་གཤེགས་བརྒྱན་གྱི་མཆོད་པ་འབུལ། །སྣང་སྲིད་ལྷ་འདྲེས་བཞེས་སུ་གསོལ། །སྣང་སྲིད་ལྷ་འདྲེས་བཞེས་ནས་ཀྱང་། །འདོད་ཡོན་ལྔ་ཡི་ཚིམ་གྱུར་ཅིག །འདོད་ཡོན་ལྔ་ཡི་ཚིམ་ནས་ཀྱང་། །བསྔོས་པ་བཞིན་དུ་ཚིམ་གྱུར་ཅིག །བསྔོས་པ་བཞིན་དུ་ཚིམ་ནས་ཀྱང་། །བསམ་པ་བཞིན་དུ་འགྲུབ་གྱུར་ཅིག །ཚེ་རབས་འཁོར་བ་ཐོག་མེད་ཀྱི། །བུ་ལོན་ལན་ཆགས་བྱང་གྱུར་ཅིག །བུ་ལོན་ལན་ཆགས་བྱང་ནས་ཀྱང་། །ཤ་མཁོན་སྡིག་སྒྲིབ་དག་གྱུར་ཅིག །ཤ་འཁོན་སྡིག་སྒྲིབ་དག་ནས་ཀྱང་། །ཐམས་ཅད་མཆོག་གི་དངོས་གྲུབ་ཐོབ་པར་ཤོག །མ་ཤར་རྡོ་རྗེ་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། ༈ །སྣང་སྲིད་ལྷ་འདྲེས་འཁོར་གྱིས་བསྐོར། །མ་འདིར་གཤེགས་བརྒྱན་གྱི་མཆོད་པ་འབུལ། །སྣང་སྲིད་ལྷ་འདྲེས་བཞེས་སུ་གསོལ། །སྣང་སྲིད་ལྷ་འདྲེས་བཞེས་ནས་ཀྱང་། །འདོད་ཡོན་ལྔ་ཡི་ཚིམ་གྱུར་ཅིག །འདོད་ཡོན་ལྔ་ཡི་ཚིམ་ནས་ཀྱང་། །བསྔོས་པ་བཞིན་དུ་ཚིམ་གྱུར་ཅིག །བསྔོས་པ་བཞིན་དུ་ཚིམ་ནས་ཀྱང་། །བསམ་པ་བཞིན་དུ་འགྲུབ་གྱུར་ཅིག །ཚེ་རབས་འཁོར་བ་ཐོག་མེད་ཀྱི། །བུ་ལོན་ལན་ཆགས་བྱང་གྱུར་ཅིག །བུ་ལོན་ལན་ཆགས་བྱང་ནས་ཀྱང་། །ཤ་འཁོན་སྡིག་སྒྲིབ་དག་གྱུར་ཅིག །ཤ་མཁོན་སྡིག་སྒྲིབ་དག་ནས་ཀྱང་། །ཐམས་ཅད་མཆོག་གི་དངོས་གྲུབ་ཐོབ་པར་ཤོག །མ་ལྷོ་རིན་ཆེན་རིགས་ཀྱི་མཁའ་འགྲོ་མ། །མཁའ་འགྲོ་བྱེ་སོགས། མ་ནུབ་པདྨ་རིགས་ཀྱི་མཁའ༴ མཁའ་འགྲོ་སོགས། མ་བྱང་ལས་ཀྱི་རིགས་ཀྱི༴ མཁའ་འགྲོ་བྱེ་སོགས། མ་སྟེང་མཁའ་སྤྱོད་རིགས་ཀྱི་མཁའ་འགྲོ་མ། །མཁའ་འགྲོ་སོགས། མ་འོག་ས་སྤྱོད་རིགས་ཀྱི་མཁའ་འགྲོ་མ། །མཁའ་འགྲོ་སོགས། མ་མཚམས་འཇིག་རྟེན་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་སོགས། ས་འོག་ས་སྟེང་ས་བླ་ཡི། །འཁོར་འདས་གཉིས་ཀྱི་མགྲོན་རིགས་ལ། །འདོད་ཡོན་ལྔ་ཡི་མཆོད་པ་རྣམས། །བསྔོས་པ་བཞིན་དུ་ཚིམ་གྱུར་ཅིག །བསྔོས་པ་སོགས་ནས། ཐམས་ཅད་མཆོག་གི་དངོས་གྲུབ་ཐོབ་པར་ཤོག །ཕཊཿཕཊཿཕཊཿ བརྗོད་ལ་ལྷོད་དེ་འབོལ་ལེ་ཤིག་གེ་སེམས་མ་བཅོས་པའི་ངང་ནས་མ་ཡེང་པར་ཞོག །རྗེས་སུ་དགེ་བ་བྱང་ཆུབ་ཏུ་བསྔོས།། །།

རྗེ་རིན་པོ་ཆེའི་རྟགས་བསྟོད།

རྗེ་རིན་པོ་ཆེའི་རྟགས་བསྟོད་ཞེས་བྱ་བ་བཞུགས་སོ། །སྤྱི་བོར་ཕ་གཅིག་དམ་པར་གསལ་བའི་སྐུ་ལས། བྱིན་རླབས་མེ་ཡི་ཚྭ་ཚྭ་ཕྲོམ་ཕྲོམ་འཕྲོས་པས། གདོན་ལུས་དང་བཅས་པ་ཐལ་བ་བུན་གྱི་བསྲེག །བྱིན་རླབས་རྒྱུད་ལ་ཞུགས་སྐྱེ་བ་མེད་པའི་དོན་མངོན་སུམ་རྟོགས་པར་བསམ་ན། རྗེ་བླ་མ་རྣམས་ལ་ཕྱག་འཚལ་ལོ། །བཀའ་བརྒྱུད་པ་རྣམས་ལ་གསོལ་བ་འདེབས། །དགོས་བཀའ་དྲིན་ཅན་གྱི་བྱིན་གྱིས་རློབས། །རྗེ་མཚན་ལྡན་བླ་མས་ལམ་སྣ་དྲོངས། །གནས་ཡ་གི་ཡ་ཀིའི་དགོན་པ་ནས། །ཕྱི་སྐོར་ཅིག་བསྐོར་གཉིས་བསྐོར་དང་གསུམ། །ཕྱི་བསྐོར་བ་ལྕགས་རི་མུ་ཁྱུད་བསྐོར། །བར་བསྐོར་བ་ལྷོ་རྒྱལ་འཛམ་བུ་གླིང་། །ནང་བསྐོར་བ་དེང་རིའི་བླ་བསྐོར་ནས། །རི་མཁན་པ་ཁྲོད་ཀྱི་གནས་མཆོག་ཏུ། །ཌཱཀྐི་ཉི་ཟླའི་གདན་སྟེང་ནས། །གནས་དེ་རུ་སུ་བཞུགས་སུ་མ་བཞུགས། །གནས་དེ་རུ་དམ་པ་རྒྱ་གར་བཞུགས། །སྐུ་འཁྲུངས་ས་རྒྱ་གར་ཡུལ་དུ་འཁྲུངས། །གསུང་བསྒྲགས་པ་བོད་ཡུལ་དབུས་སུ་བསྒྲགས། །ཆགས་ཕེབས་པ་དེང་རིའི་དགོན་དུ་ཕེབས། །འགྲོན་པོ་ཕྱོགས་རིས་མི་མངའ་བ། །རྗེ་འགྲོ་བའི་མགོན་པོ་རྡོ་རྗེ་འཆང་། །མི་ཕམ་མགོན་པོ་བཅོམ་ལྡན་འདས། །སྨྲ་བའི་སེང་གེ་མཚུངས་པ་མེད། །དཔལ་ཆེན་བིར་བ་དྲོད་ཚད་མཁས། །ཨརྱ་དེ་ཝ་སྒྲ་ཚད་མཁས། །དམ་པ་མུ་སྟེག་རྒྱུད་སྡེ་མཁས། །འཇམ་བུ་གླིང་གི་རྒྱན་གཅིག་པོ། །བླ་མ་བརྒྱུད་པའི་བརྩེ་བ་ཅན། །མཉམ་བཞག་ཀུན་གྱི་སྙིང་པོ་མཛད། །སངས་རྒྱས་ཀུན་གྱི་སྲས་གཅིག་པོ། །མཁའ་འགྲོ་སྡེ་ལྔའི་བུ་གཅིག་པོ། །འགྲོ་བ་ཀུན་གྱི་སྐྱབས་གནས་མཆོག །ཕ་དེར་བཞུགས་པ་ལ་གསོལ་བ་འདེབས། །དེར་བཞུགས་དམ་པས་བྱིན་གྱིས་རློབས། །སྟེང་དེར་ལྷ་ཚོགས་དཔུངས་སེ་དཔུང་། །བྱིན་རླབས་ཆར་རྒྱུན་སི་ལི་ལི། །གཡས་དེར་དཔའ་བོ་གར་དང་ཆས། །དཔའ་བོའི་བྲོ་བརྡུང་ཁྲིགས་སེ་ཁྲིག །གཡོན་དེར་དཔའ་མོ་མདངས་དང་ལྡན། །མཁའ་འགྲོའི་ཉམས་མྱོང་འུ་རུ་རུ། །སྐབས་དེར་ཌཱཀྐི་ཤིགས་སེ་ཤིག །དངོས་གྲུབ་རྣམ་གཉིས་སྤུངས་སེ་སྤུང་། །མདུན་དེར་དམ་ཅན་དཔུངས་སེ་དཔུང་། །འོ་དེར་གདོན་ཚོགས་མྱ་ལ་ལ། །རྗེ་རྒྱང་དེར་བཞུགས་ན་མོས་ཕྱག་འཚལ། །མདུན་དེར་བཞུགས་ན་གུས་ཕྱག་འཚལ། །སེམས་མོས་གུས་ཕྱག་ལ་ཉེ་རིང་མེད། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་ཐུགས་ཀྱི་ཀློང་ནས་ཞུགས། །སྐུ་ཡི་བྱིན་རླབས་ལུས་ལ་འཇུག །ལུས་ལ་བདེ་དྲོད་འབར་བ་དང་། །ལུས་ཀྱི་སྡིག་སྒྲིབ་དག་ནས་ཀྱང་། །ལུས་སྤྲུལ་སྐུར་གྲོལ་བ་བྱིན་གྱིས་རློབས། །གསུང་གིས་བྱིན་རླབས་ངག་ལ་འཇུག །ངག་ལ་ནུས་པ་འབར་བ་དང་། །ངག་གི་སྡིག་སྒྲིབ་དག་ནས་ཀྱང་། །ངག་ལོངས་སྐུ་གྲོལ་བར་བྱིན་གྱིས་རློབས། །ཐུགས་ཀྱི་བྱིན་རླབས་ཡིད་ལ་འཇུག །ཡིད་ལ་ནུས་པ་འབར་བ་དང་། །ཡིད་ཀྱི་སྡིག་སྒྲིབ་དག་ནས་ཀྱང་། །སེམས་ཆོས་སྐུར་གྲོལ་བར་བྱིན་གྱིས་རློབས། །རྒྱུ་འདོད་ཆགས་ཞེ་སྡང་གཏི་མུག་གསུམ། །དུག་གསུམ་ངང་གི་ཞི་རུ་གསོལ། །རྐྱེན་ཕོ་གདོན་མོ་གདོན་ཀླུ་གདོན་གསུམ། །གདོན་གསུམ་རྣམ་རྟོག་ཡལ་དུ་གསོལ། །ནད་རླུང་མཁྲིས་བད་ཀུན་འདུས་པ་བཞི། །བཞི་བརྒྱ་རྩ་བཞིའི་ནད་རྣམས་ཡལ་དུ་གསོལ། །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་མངོན་དུ་དབྱུང་དུ་གསོལ། །གཞན་དོན་དཔག་མེད་འབྱུང་དུ་གསོལ། །རྗེ་དེར་བཞུགས་དམ་པ་ལ་གསོལ་བ་འདེབས། །དེར་བཞུགས་དམ་པས་བྱིན་གྱིས་རློབས། །ཕ་ནག་པོ་ཆེན་པོ་གཟི་མདངས་ཅན། །སྐུ་སྟོད་སེང་གེ་འགྱིང་བ་འདྲ། །དེ་བདུད་བཞི་ཟིལ་གྱིས་གནོན་པའི་རྟགས། །སྐེད་པ་རྡོ་རྗེ་འགྲིལ་བ་འདྲ། །དེ་འཁྲུལ་གཞི་རྩད་ནས་གཅོད་པའི་བརྡའ། །ཞབས་གཉིས་སྦ་བྲན་བཤིབ་པ་འདྲ། །དེ་བྱང་ཆུབ་ལམ་ལ་བཞུགས་པའི་བརྡའ། །སྐུ་དམོག་ནག་ལ་སྨུག་པ་ནི། །དེ་ཆོས་དབྱིངས་ངང་ལ་ཞུགས་པའི་བརྡ། །དབུ་སྐྲ་ཁམས་ནག་གྱེན་དུ་འཁྱིལ། །དེ་མཐོ་རིས་ཐར་ལམ་བསྒྲོད་པའི་བརྡ། །སྤྱན་རྩ་དམར་ལ་འཁྲུག་པ་ནི། །སྟོང་གསུམ་ཀུན་ཏུ་གཟིགས་པ་པའི་བརྡ། །ཤང་རྒྱུད་རིང་ལ་ཤང་རྩེ་རྣོ། །དེ་ཐེག་ཆེན་གྱིས་རྒྱུད་དོན་རྟོགས་པའི་བརྡ། །ཚེམས་མདོག་དཀར་ལ་ཚེམ་རྩེ་རྣོ། །དེ་སྐྱེ་ཤི་རྩད་ནས་གཅོད་པའི་བརྡ། །ཕྱག་སོར་རིང་ལ་ཕྱག་སེན་རྣོ། །དེ་སེར་སྣའི་མདུད་པ་གྲོལ་བའི་བརྡ། །ཞབས་གཉིས་སེང་འབྲུག་བཀྲམ་པ་འདྲ། །སྐལ་ལྡན་ཐུགས་རྗེ་འདྲེན་པའི་བརྡ། །རྗེ་དེར་བཞུགས་དམ་པ་ལ་གསོལ་བ་འདེབས། །དེར་བཞུགས་དམ་པས་བྱིན་གྱིས་རློབས། །རྗེ་རེས་འགའ་ཉིན་མཚན་བར་མེད་གཟིམས། །ཉིན་མཚན་འཁོར་བར་གཟིམ་ཙ་ན། །ཆོས་སྐུ་གཉུག་མ་རྒྱུན་ཆད་མེད་པའི་བརྡ། །རྗེ་རེས་འགའ་རྟེན་འབྲེལ་སྣ་ཚོགས་མཛད། །རྟེན་འབྲེལ་སྣ་ཚོགས་མཛད་ཙ་ན། །བཀའ་འཁོར་གྱི་བར་ཆད་སེལ་བའི་བརྡ། །རྗེ་རེ་རེས་སྨྱོན་པའི་བརྟུལ་ཞུགས་མཛད། །སྨྱོན་པའི་བརྟུལ་ཞུགས་མཛད་ཙ་ན། །རྐྱེན་ཕོ་གདོན་མོ་གདོན་འདུལ་བའི་བརྡ། །རྗེ་རེ་རེ་རྒྱ་གྲམ་སྲོང་དུ་གཟིམ། །རྒྱ་གྲམ་སྲོང་དུ་གཟིམ་ཙ་ན། །དེ་ཐེག་དམན་ཟིལ་གྱིས་གནོན་པའི་བརྡ། །རྗེ་རེ་འགའ་རས་གོས་རྐྱང་ཅིག་མནབ། །རས་གོས་རྐྱང་གཅིག་མནབ་ཙམ་ན། །བདེ་དྲོད་ལུས་ལ་འབར་བའི་བརྡ། །རྗེ་དེར་བཞུགས་དམ་པ་ལ༴ དེར་བཞུགས་དམ་པས་བྱིན༴ བདག་ལུས་ངག་ཡིད་གསུམ་མཆོད་པ་འབུལ། །ལུས་ལ་བདེ་དྲོད་འབར་དུ་གསོལ། །ངག་ལ་ནུས་པ་སྦར་དུ་གསོལ། །སེམས་ལ་རྟོགས་པ་འཆར་དུ་གསོལ། །རྗེ་དྲུང་ན་བཞུགས་ན་དྲུང་ཕྱག་འཚལ། །རྒྱང་ན་བཞུགས་ན་རྒྱང་ཕྱག་འཚལ། །མོས་གུས་ཕྱག་ལ་ཉེ་རིང་མེད། །མཁའ་སྤྱོད་གནས་སུ་ལམ་སྣ་དྲོངས། །རྐྱེན་ཕྱི་ཡི་བར་ཆད་ཕྱི་ནས་སེལ། །ནང་གི་བར་ཆད་ནང་ནས་སེལ། །རྐྱེན་ངན་པ་གྲོགས་སུ་འཆར་གྱུར་ཅིག །འགལ་རྐྱེན་མཐུན་རྐྱེན་དག་པ་བསྒྱུར་དུ་གསོལ། ཕཊཿ ཕ་དམ་པ་རིན་པོ་ཆེའི་རྟགས་བསྟོད་སྨ་ར་སེར་པོས་བསྐུལ་ནས་མ་ཇོ་མོས་མཛད་པ་རྫོགས་སོ།། །། ༈ མ་བརྒྱུད་གསོལ་འདེབས་བཞུགས་སོ། །སྤྱི་བོར་མ་ཅིག་ལབ་སྒྲོན་གསལ་བའི་སྐུ་གསུང་ཐུགས་ལས་འོད་ཟེར་ཁ་དོག་སྣ་ཚོགས་པ་བྱུང་། རང་གི་གནས་གསུམ་དུ་ཐིམ། སྒྲིབ་གསུམ་བག་ཆགས་རྣམས་ཉི་མས་བ་མོ་ཞུ་བ་ལྟར་དག་བྱིན་རླབས་སེམས་ལ་ཞུགས་ནས་འཁྲུལ་མེད་ཀྱི་རྟོགས་པ་སེམས་ལ་འཆར་བར་བསམ། མ་དམན་པའི་ལུས་ལ་རྒྱལ་བའི་མ། །མ་མི་མིན་ཡེ་ཤེས་མཁའ་འགྲོ་མ། །རང་རིག་ནང་ནས་ཤར་བའི་མ། །ལུས་སྲོག་གཟན་དུ་བོར་བའི་མ། །ལུས་ལ་བདེ་དྲོད་འབར་བའི་མ། །ངག་ལ་ནུས་པ་ཐོན་པའི་མ། །སེམས་ལ་རྟོགས་པ་ཤར་བའི་མ། །བུ་སྒོ་གསུམ་གུས་པས་གསོལ་བ་འདེབས། །མ་ཐུགས་རྗེས་དགོངས་ལ་བྱིན་གྱིས་རླབས། །མ་ལབ་ནི་ས་ལམ་གཅིག་ཆོད་ལབ། །སྒྲོན་ནི་མ་རིག་མུན་པ་སེལ། །མ་ནི་འགྲོ་བ་ཀུན་གྱིས་མ། །མཚན་དོན་དང་ལྡན་མ་ཅིག་མ། །བུ་སྒོ་གསུམ་གུས་པས་གསོལ་བ་འདེབས། །མ་ཐུགས་རྗེས་དགོངས་ལ་བྱིན་གྱིས་རློབས། །མ་རྟག་ཆད་གཉིས་ལ་མི་འཇིག་པ། །བཀའ་རྫོགས་པ་ཆེན་པོའི་སྒོ་རུ་ཞུགས། །ཐེག་ཆེན་གྱི་ལམ་རྟོགས་ཟིལ་གྱིས་གནོན། །ཆོས་ལྟ་བ་དབྱིངས་སུ་གྲོལ་བའི་མ། །བུ་སྒོ་གསུམ་གུས་པས་གསོལ༴ མ་ཐུགས་རྗེས་དགོངས་ལ་བྱིན་གྱིས་རློབས། །མ་བྱིང་རྒོད་རྐྱེན་གྱིས་མི་འཇིག་པ། །ཆོས་སྡུག་བསྔལ་ཞི་བྱེད་ཀྱི་སྒོ་རུ་ཞུགས། །ཉོན་མོངས་རྣམ་རྟོག་ཟིལ་གྱིས་གནོན། །ཆོས་སྒོམ་པ་ཀློང་དུ་གྱུར་པའི་མ། །བུ་སྒོ་གསུམ༴ མ་ཐུགས་རྗེས༴ མ་བར་ཆད་རྐྱེན་གྱིས་མི་འཇིགས་པ། །བདུད་ཀྱི་གཅོད་ཡུལ་སྒོ་རུ་ཞུགས། །ལོག་འདྲེན་གྱི་གདོན་བགེགས་ཟིལ་གྱིས་གནོན། །ཆོས་སྤྱོད་པ་ལམ་དུ་སློང་བའི་མ། །བུ་སྒོ་གསུམ༴ མ་ཐུགས༴ མ་བདག་འཛིན་གྱིས་འཁྲུལ་པས་མི་འཇིགས་པ། །ཆོས་དུ་མ་རོ་གཅིག་སྒོ་རུ་ཞུགས། །རེ་དོག་གི་འཇིགས་པ་ཟིལ་གྱིས་གནོན། །ཆོས་འབྲས་བུ་ལྷུན་གྱིས་གྲུབ་པའི་མ། །བུ་སྒོ་གསུམ༴ མ་ཐུགས་རྗེས༴ མ་འཁོར་བ་ངན་སོང་ལ་མི་འཇིགས་པ། །ཆོས་དགེ་བ་བཅུ་ཡི་སྒོ་རུ་ཞུགས། །མི་དགེ་བཅུ་པོ་ཟིལ་གྱིས་ནོན། །ལས་དགེ་སྡིག་རང་སར་གྲོལ་བའི་མ། །བུ་སྒོ་གསུམ༴ མ་ཐུགས་རྗེས༴ མ་བག་ཆགས་ལས་ཀྱི་མི་འཇིགས་པ། །ཆོས་བསྡུ་དངོས་བཞི་ཡི་སྒོ་རུ་ཞུགས། །སྐལ་ལྡན་གྱིས་སེམས་ཅན་ཟིལ་གྱིས་གནོན། །གདུལ་བྱ་སྨིན་གྲོལ་མཛད་པའི་མ། །བུ་སྒོ་གསུམ༴ མ་ཐུགས༴ གདོན་ཡམ་བདག་ཕོ་མོའི་བར་ཆད་སེལ། །བགེགས་ལོག་འདྲེན་འབྱུང་པོ་རྡུལ་དུ་བཟློག །ནད་འདུ་བ་རྣམ་བཞི་གཞོམ་དུ་གསོལ། །བདག་མོས་པའི་བུ་ལ་བྱིན་ལ་བྱིན་གྱིས་རློབས། །ད་ལྟ་ཉིད་དུ་བྱིན་གྱིས་རློབས། །མྱུར་བ་ཉིད་དུ་བྱིན་གྱིས་རློབས། །རྟོགས་པ་གཤའ་མ་རྒྱུད་ལ་སྐྱེ་བར་བྱིན་གྱིས་རློབས། །ཕཊཿ མ་ཅིག་གསོལ་འདེབས་ཐོད་སྨྱོན་བསམ་འགྲུབ་ཀྱིས་མཛད་པ་རྫོགས་སོ།། །།ཌཱཀྐི་འབུམ་བསྐུལ་འདིར། ༈ ཧཱུྃ། མ་ཡུམ་ཆེན་དེ་ཡི་ཐུགས་ཀྱི་སྲས། །སྐུ་ཡི་བྱིན་རླབས་ལུས་ལ་ཞུགས་པས་གཟི་བརྗིད་ཆེ། །གསུང་གི་བྱིན་རླབས་ངག་ལ་ཞུགས་པས་ནུས་པ་ཆེ། །ཐུགས་ཀྱི་བྱིན་རླབས་སེམས་ལ་ཞུགས་པས་རྟོགས་པ་ཆེ། །ཡོན་ཏན་བྱིན་རླབས་ཞུགས་པས་ཐུགས་རྗེ་ཆེ། །ཕྲིན་ལས་བྱིན་རླབས་ཞུགས་པས་འགྲོ་དོན་ཆེ། །རྗེ་མཁྱེན་པ་ཀུན་ལྡན་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་རླབས་པར་མཛད་དུ་གསོལ། །རྗེ་ཐོག་བཅས་བདུད་ཀྱི་དོན་རྟོགས་པས། །དངོས་སྣང་སྒྱུ་མ་ལྟ་བུར་མཁྱེན། །ཐོག་མེད་བདུད་ཀྱི་དོན་རྟོགས་པས། །ཉོན་མོངས་རང་སར་གྲོལ་བ་མཁྱེན། །དགའ་བྲོད་བདུད་ཀྱིས་དོན་རྟོགས་པས། །ཡོན་ཏན་སེམས་སུ་མཉམ་པར་མཁྱེན། །སྙེམ་བྱེད་བདུད་ཀྱི་དོན་རྟོགས་པས། །འཁོར་བ་དབྱིངས་སུ་གྲོལ་བར་མཁྱེན། །རྗེ་ཐམས་ཅད་མཁྱེན་པ་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་རླབས་པར་མཛད་དུ་གསོལ། །ཡུམ་ཆེན་སྲས་སུ་གྱུར་པའི་རིགས་བརྒྱུད་ཅན། །ལྟ་སྒོམ་དམིགས་པ་བྲལ་བའི་རྟོགས་པ་ཅན། །སྒྲོ་འདོགས་སེམས་སུ་ཆོད་པའི་མཁྱེན་པ་ཅན། །རྒྱ་བོད་ཧོར་གསུམ་ཐོས་པའི་གྲགས་པ་ཅན། །རྗེ་ཡོན་ཏན་ཀུན་ལྡན་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་རླབས་པར་མཛད་དུ་གསོལ། །ཕཊཿ ཅེས་སྲས་བརྒྱུད་རྣམས་ཀྱི་བྱིན་རླབས་བདུད་རྩིའི་རྣམ་པར་བྱུང་། བདག་གི་ཁར་ཞུགས་པས་འགགས་མེད་གསུང་གི་བྱིན་རླབས་ངག་ལ་ཞུགས་པར་བསམ། སྲས་བསྟོད་གཉེན་ཆུང་ལོ་ཙ་བས་མཛད་པའོ།། །།

ཌཱཀྐི་འབུམ་བསྐུལ།

༅། །ཌཱཀྐི་འབུམ་བསྐུལ་བཞུགས་སོ། །སྤྱི་བོའི་མ་ཅིག་ལས་མཁའ་འགྲོ་སྡེ་ལྔ་དང་། ཡང་སྤྲུལ་མཁའ་འགྲོ་འབུམ་སྤྲོས་པ་ལས་འོད་ཟེར་ཁ་དོག་སྣ་ཚོགས་བྱུང་ནས་རང་ལ་ཐིམ་པས་ཡང་དག་བདེ་ཆེན་ཡེ་ཤེས་སྐྱེས་པར་བསམ་ནས། ཧཱུྃ། མ་ཡུམ་ཆེན་སྐུ་ཡི་སྤྲུལ་པའི་སྲས། །དབུས་ཕྱོགས་སངས་རྒྱས་རིགས་ཀྱི་ཌཱཀྐི་འབུམ། །ཡང་དག་བདེ་ཆེན་སྤྱོད་པའི་ཌཱཀྐི་མ། །དད་མོས་དྲག་པོའི་སྟོབས་ཀྱིས་གསོལ་བ་འདེབས། །ཐུགས་རྗེ་དབྲི་བཀོལ་མེད་པར་དགོངས་མཛོད་ལ། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ལས་ཅན་ཕོ་མོ་བྱིན་གྱིས་རླབས་དུ་གསོལ། །མ་ཡུམ་ཆེན་ཐུགས་ཀྱི་སྤྲུལ་པའི་སྲས། །ཤར་ཕྱོགས་རྡོ་རྗེ་རིགས་ཀྱི་ཌཱཀྐི་འབུམ། །ཡང་དག་བདེ་ཆེན་སོགས་འདྲེས། མ་ཡུམ་ཆེན་ཡོན་ཏན་སྤྲུལ་པའི་སྲས། །ལྷོ་ཕྱོགས་རིན་ཆེན་རིགས་ཀྱི་ཌཱཀྐི་འབུམ། །ཡང་དག་སོགས། མ་ཡུམ་ཆེན་གསུང་གི་སྤྲུལ་པའི་སྲས། །ནུབ་ཕྱོགས་པདྨ་རིགས་ཀྱི་ཌཱཀྐི་འབུམ། །ཡང་དག་བདེ་ཆེན་སོགས། མ་ཡུམ་ཆེན་ཕྲིན་ལས་སྤྲུལ་པའི་སྲས། །བྱང་ཕྱོགས་ལས་ཀྱི་རིགས་ཀྱི་ཌཱཀྐི་འབུམ། །ཡང་དག་སོགས། མ་གཡས་བསྐུམ་གཡོན་བརྐྱང་གར་གྱིས་བཞེངས་པ་ནི། །ཐབས་ཤེས་འདུ་འབྲལ་མེད་པའི་ཌཱཀྐི་འབུམ། །ཡང་དག་སོགས། མ་ཡི་གྲི་གུག་ཐོད་ཁྲག་ཐུགས་ཀར་འཛིན་པ་ནི། །རྣམ་རྟོག་རྩད་ནས་གཅོད་པའི་ཌཱཀྐི་འབུམ། །ཡང་དག་སོགས། མ་ཡི་ཐོད་ཀམ་ལྔ་ཡི་དབུ་ལ་བརྒྱན་པ་ནི། །ཡོན་ཏན་ཐམས་ཅད་རྒྱས་པའི་ཌཱཀྐི་འབུམ། །ཡང་དག་སོགས། མ་ཡི་མི་མགོ་ལྔ་བཅུའི་དོ་ཤལ་བྱས་པ་ནི། །འཁྲུལ་པའི་བདུད་སྡེ་ཟད་པའི་ཌཱཀྐི་འབུམ། །ཡང་དག་སོགས། མ་ཡི་རུས་པའི་རྒྱན་དྲུག་སྐུ་ལ་བརྒྱན་པ་ནི། །ཕ་རོལ་ཕྱིན་དྲུག་རྫོགས་པའི་ཌཱཀྐི་འབུམ། །ཡང་དག༴ མ་ཡི་ཀླུ་ཆེན་བརྒྱད་ཀྱི་སྐུ་ལ་བརྒྱན་པ་ནི། །གདུག་རྩུབ་ཞེ་སྡང་ཞི་བའི་ཌཱཀྐི་འབུམ། །ཡང་དག་སོགས། མ་ཡི་ཁ་ཊྭཱྃ་རྩེ་གསུམ་མཆན་དུ་བཅུག་པ.ནི། །དུག་གསུམ་རྩད་ནས་གཅོད་པའི་ཌཱཀྐི་འབུམ། །ཡང་དག་སོགས། མ་ཡི་མི་མགོ་སུམ་བརྩེགས་རབ་ཏུ་བརྒྱན་པ་ནི། །སྲིད་གསུམ་ཟིལ་གྱིས་གནོན་པའི་ཌཱཀྐི་འབུམ། །ཡང་དག་སོགས། མ་ཡི་ཌཱ་རུ་ཅང་ཏེ་གསེར་གྱི་རྔ་ཆུང་ལ། །དོན་དམ་སྙན་བརྒྱུད་འཛིན་པའི༴ ཡང་དག་སོགས། མ་ཡི་དྲིལ་བུ་གཡེར་ཁའི་གསུང་སྙན་སྒྲོགས་པ་ནི། །སྟོང་གསུམ་ཆོས་སྒྲས་གང་བའི༴ ཡང་དག་སོགས། མ་ཡིས་མི་རྐང་གླིང་བུའི་བཞད་གད་སྟོན་པ་ནི། །མཁའ་འགྲོའི་བརྡ་སྐད་སྟོན་པའི་ཌཱཀྐི་འབུམ། །ཡང་དག་སོགས། མ་ཡི་དར་གྱི་འཕུར་ལྕེས་རབ་ཏུ་བརྒྱན་པ་ནི། །མཁའ་འགྲོའི་ཞིང་ཁམས་འགྲིམ་པའི་ཌཱཀྐི་འབུམ། །ཡང་དག་བདེ་ཆེན་སྤྱོད་པའི་ཌཱཀྐི་མ། །དད་མོས་དྲག་པོའི་སྟོབས་ཀྱི་གསོལ་བ་འདེབས། །ཐུགས་རྗེ་བྲི་བསྐོལ་མེད་པར་དགོངས་མཛོད་ལ། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ལས་ཅན་ཕོ་མོ་བྱིན་གྱིས་བརླབས་ཏུ་གསོལ། །ཅེས་མ་ཅིག་གིས་གསུངས་པའི་ཌཱཀྐི་འབུམ་བསྐུལ་རྫོགས་སོ།། །།བཀྲ་ཤིས།

བརྒྱུད་འདེབས།

༅། །ༀ་ཨཱཿཧཱུྃ༔ ཆོས་སྐུ་དབྱིངས་ཀྱི་ཡུམ་ཆེན་ལ་གསོལ་བ་འདེབས། །བྱིན་རླབས་སེམས་ལ་འཇུག་པར་བྱིན་གྱིས་རློབས། །ལོངས་སྐུ་རྡོ་རྗེ་ཕག་མོ་ལ་གསོལ༴ སྤྲུལ་སྐུ་མ་ཅིག་ལབ་སྒྲོན་ལ༴ ཧཿ རྡོ་རྗེ་རིགས་ཀྱི་མཁའ་འགྲོ་ལ༴ རིཿ རིན་ཆེན་རིགས་ཀྱི་མཁའ་འགྲོ༴ ནིཿ པདྨ་རིགས་ཀྱི་མཁའ་འགྲོ་ལ༴ སཿ ལས་ཀྱི་རིགས་ཀྱི་མཁའ་འགྲོ་ལ༴ བཾཿ སངས་རྒྱས་རིགས་ཀྱི་མཁའ་འགྲོ་ལ༴ ཕ་རྒྱུད་ཐབས་ཀྱི་བརྒྱུད་པ་ལ༴ མ་རྒྱུད་ཤེས་རབས་ཀྱི་བརྒྱུད་པ་ལ༴ སྲས་རྒྱུད་ཉམས་མྱོང་གིས་བརྒྱུད་པ་ལ༴ ཟབ་མོ་གཅོད་ཀྱི་བརྒྱུད་པ་ལ༴ རྒྱུ་འདོད་ཆགས་ཞེ་སྡང་གཏི་མུག་གསུམ། །དུག་གསུམ་རྣམ་རྟོག་ཡལ་དུ་གསོལ། །རྐྱེན་ཕོ་གདོན་མོ་གདོན་ཀླུ་གདོན་གསུམ། །གདོན་གསུམ་རྣམ་རྟོག་ཞི་གྱུར་ཅིག །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་མངོན་དུ་གྱུར་པར་ཤོག །ཕྱི་འཁོར་འདས་ཀྱི་སྣང་བ་སྣ་ཚོགས་པ། །ནང་རང་སེམས་སྟོང་པའི་རང་རྩལ་སྟེ། །དེ་ཐོག་མཐའ་དབུས་མེད་ངོས་བཟུང་མེད། །ཡུལ་སེམས་ཀྱི་གཟུང་འཛིན་གཞི་རྩ་བྲལ། །རང་བྱུང་གི་ཡེ་ཤེས་རང་གསལ་ལ། །སྤང་བླང་དང་རེ་དོག་མ་མཆིས་པས། །གཤིས་རང་བབ་སྙེམ་མེད་སོ་མ་ལ། །གནད་གཅེར་མཐོང་རང་གྲོལ་མངོན་གྱུར་ཤོག །ཀཿགཅོད་བརྒྱུད་འདེབས་ཡིག་རྙིང་ལ། །ཤྭ་ལོ་ཀ་གཉིས་སི་ཏུས་གསུངས། །ཁ་སྐོང་ས་མནྟ་ཡི་སབ། །བྱིན་རླབས་སེམས་ལ་ཞུགས་གྱུར་ཅིག། །།

ཟབ་མོ་བདུད་ཀྱི་གཅོད་ཡུལ་གྱི་སྐྱབས་སེམས་ཚོགས་བསགས་སྔོན་གཏོར་གྱི་རིམ་པ།

༅། །ཟབ་མོ་བདུད་ཀྱི་གཅོད་ཡུལ་གྱི་སྐྱབས་སེམས་ཚོགས་བསགས་སྔོན་གཏོར་གྱི་རིམ་པ་བཞུགས་སོ། །སྐྱབས་ཡུལ་གསལ་གདབ་པ་ནི། མདུན་གྱི་ནམ་མཁའི་གནས་སུ་པདྨ་དང་ཟླ་བའི་གདན་ལ་མ་ཅིག་ལབ་ཀྱི་སྒྲོན་མ་ལ་འཁོར་རིགས་བཞིའི་མཁའ་འགྲོ་མ་རྣམས་དང་གྲུབ་ཐོབ་གཅོད་ཡུལ་བརྒྱུད་པའི་བླ་མ་ཡི་དམ་མཁའ་འགྲོའི་ཚོགས་དང་བཅས་པ་རྣམས་ཀྱིས་བཀྲ་དཔུང་ངེ་འོད་ཐིབས་སེ་བསྐོར་ནས་བཞུགས་པར་བསམ། སྐྱབས་སུ་འགྲོ་ཞིང་ཚོགས་བསགས་པ་ནི། མ་མི་མིན་ཡེ་ཤེས་ཀྱི་མཁའ་འགྲོ་མ། ལབ་སྒྲོན་ཁྱེད་ལ་སྐྱབས་སུ་མཆི། །རང་རིག་ཡེ་ཤེས་སྟོན་མཛད་པའི། །བླ་མ་རྣམས་ལ་སྐྱབས་སུ་མཆི། །དངོས་གྲུབ་ངེས་པར་སྟེར་མཛད་པའི། །ཡི་དམ་ལྷ་ལ་སྐྱབས་སུ༴ བརྩེ་གདུང་དམ་ཚིག་འབྲེལ་བ་མོ། །མཁའ་འགྲོ་རྣམས་ལ༴ བགེགས་དང་ལོག་འདྲེན་འདུལ་མཛད་པའི། །ཆོས་སྐྱོང་རྣམས་ལ༴ གང་ལ་ཕུལ་ན་དོན་ཆེ་བ། །སྤང་རྟོགས་ཕུན་སུམ་ཚོགས་པ་ཡིན། །སངས་རྒྱས་རྣམས་ལ༴ ཞི་གྱུར་འདོད་ཆགས་བྲལ་བ་ཡི། །དམ་ཆོས་རྣམས༴ གང་ལ་ཕུལ་ན་དོན་ཆེ་བ། །དགེ་འདུན་རྣམས་ལ༴ གཞོན་ནུའི་ཚུལ་འཛིན་ཡོན་ཏན་ལྡན། །འཇམ་དཔལ་དབྱངས་ལ༴ ངེས་པར་སྙིང་རྗེ་བསྐྱེད་མཛད་པ། །སྤྱན་རས་གཟིགས་ལ༴ མཐུ་སྟོབས་ཆེན་པོས་གདུག་པ་འདུལ། །རྡོ་རྗེ་ལ༴ ཅི་སྲིད་བྱང་ཆུབ་སྙིང་པོའི་བར། །ཁྱེད་རྣམས་ལ་ནི་སྐྱབས་སུ་མཆི། །ཁྱེད་རྣམས་ལ་ནི་གསོལ༴ ཁྱེད་རྣམས་ལ་ནི་རྟེན་བཅའོ། །འདོད་ཡོན་ལྔ་ཡི་མཆོད་པ་འབུལ། །ཕུང་པོ་ལྔ་པོ་མཆོད་པ་བཞེས། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་མདའ་གསོལ་བ་འདེབས། །དགེ་དེས་སེམས་ཅན་བདེ་གྱུར་ཅིག །རྫོགས་པའི་སངས་རྒྱས་སེམས་བསྐྱེད་དོ། །མ་ཅིག་ཞལ་གསུངས་མའོ། །མཎྜལ་འབུལ་བ་ནི། ས་གཞི་སྤོས་ཆུས་སོགས། མ་ཧཱ་གུ་རུ་ཌཱཀྐི་ནི་ས་པཱ་རི་ཝ་ར་མཎྜལ་པཱུ་ཛ་ཨཱ་ཧཱུྃ། ཅེས་བརྗོད་ཅིང་འབུལ། སེམས་བསྐྱེད་པ་ནི། སེམས་ཅན་ཐམས་ཅད་བདེ་བ་དང་བདེ་བའི༴ སྡུག་བསྔལ་དང་༴ སྡུག་བསྔལ་མེད་པའི༴ ཉེ་རིང་ཆགས་སྡང་གཉིས་དང་བྲལ༴ གྱུར་ཅིག །སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ་པས་སྡིག་སྒྲིབ་ཐམས་ཅད་སང་གིས་དག་པར་གྱུར། ཅེས་བརྗོད། ༈ དེ་ནས་དཀར་གཏོར་གསེར་སྐྱེམས་བཤམས་ལ། སྭ་བྷ་ཝས་སྦྱོང་སྟོང་པའི་ངང་ལས་ཨ་ལས་ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དངས་ཤིང་ཐོག་པ་མེད་པར་ཟག་པ་མེད་པའི་ཡེ་ཤེས་ཀྱི་བདུད་རྩི་རྒྱ་མཚོ་ཆེན་པོ་ཁ་དོག་དྲི་རོ་རེག་བྱ་རོ་བཅུད་ནུས་པ་ཕུན་སུམ་ཚོགས་པ་མགྲོན་རིགས་རྣམས་ཀྱི་འདོད་པའི་ཡོན་ཏན་དང་ལྡན་པ་སྟོང་གསུམ་རབ་འབྱམས་ནམ་མཁའ་དང་མཉམ་པར་བསམ་འབར་བའི་ཕྱག་རྒྱས་དཔྲལ་བའི་དབྱིངས་སུ་བསྐོར་ལ། མིག་གྱེན་དུ་ལྟ་བ་དང་བཅས་འདི་སྐད་དོ། །ༀ་བཛྲ་ཨ་ར་ལི་ཧོ་ཛཿཧཱུྃ་བཾ་ཧོཿ བཛྲ་ཌཱཀྐི་ནི་ས་མ་ཡ་སྟྭཾ། ཏྲི་ཤྱ་ཧོཿ ཕེཾ་ཕེཾ། ཞེས་བརྗོད་པས། རང་གི་སྙིང་ཁ་ནས་འོད་ཟེར་ལྕགས་ཀྱུ་ལྟ་བུ་དཔག་ཏུ་མེད་པར་འཕྲོས་པས་གདོད་ནས་གྲུབ་པའི་དུར་ཁྲོད་ཆེན་པོ་བརྒྱད་ལ་གནས་པའི་འཇིག་རྟེན་གྱི་མཁའ་འགྲོ་མ་ཐམས་ཅད་སྤྱན་དྲངས་ནས་གཏོར་མ་དངོས་སུ་གསོལ་བར་བསམ། ༀ་ཁ་ཁ་ཁ་ཧི་ཁ་ཧི། སརྦ་ཡཀྵ་རཀྵ་སརྦ་བུདྡྷ་པྲེ་ཏ་པི་ཤ་ཙ། ཨུརྨན་ཏ། ཨ་ས་སྨ་ར། ཌཱ་ཀ་ཌཱ་ཀི། བི་ཏ་ཡ། ཨེ་དཾ་བྷ་ལིངྟ་གྷྲི་ཧྞནྟུ། ས་མ་ཡ་རཀྵནྟུ། མ་མ་སརྦ་སིདྡྷི་མེ་པྲ་ཡ་ཙྪནྟུ། ཡ་ཐེ་བཾ་ཡ་ཐེ་སྟྭཾ། བྷུ་ཛ་ཐ། པི་པ་ཐ། མ་ཏི་པྲ་མ་ཐ། མ་མ་སརྦ་ཀརྟ་ཡ། སད་སུ་ཁཾ། བྷི་ཤུདྡྷ་ཡེ་སྭཱ་ཧཱ། ཡ་ཀ་བྷ་ཝནྟུ་སྭཱ་ཧཱ། ལན་གསུམ། ཨརྒྷཾ་ལ་སོགས་པས་མཆོད། མཆོད་སྦྱིན་གྱིས་གཏོར་མ་རྒྱ་ཆེན་པོ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། དཀྱིལ་འཁོར་ཆེན་པོའི་ཕྱི་རོལ་ན་ལྷག་པའི་མཁའ་འགྲོ་དང་ཤུགས་འགྲོ་ཕྱོགས་ཞིང་སྐྱོང་བའི་ལྷ་ཀླུ་ལ་སོགས་པའི་འབྱུང་པོ། དཀྱིལ་འཁོར་ཟབ་མོའི་ཆོ་ག་ལ་ཉན་པར་མི་དབང་བའི་དཀར་ཕྱོགས་སྐྱོང་བ་རྣམས་ལ། མཆོད་སྦྱིན་གྱི་གཏོར་མ་རྒྱ་ཆེན་པོ་འདིས་ཚིམ་པར་གྱིས་ལ་འདིར་འཁོད་པ་ལ་དཀྱིལ་འཁོར་ཟབ་མོ་སྒྲུབ་པའི་གྲོགས་མཛོད་ཅིག །ལྷ་ཡི་ཚོགས་རྣམས་མ་ལུས་དང་། །ཀླུ་ཡི་ཚོགས་རྣམས་མ་ལུས་དང་། །གནོད་སྦྱིན་ཚོགས་རྣམས༴ སྲིན་པོའི་ཚོགས་རྣམས༴ འབྱུང་པོའི་ཚོགས༴ ཡི་དྭགས་ཚོགས༴ ཤ་ཟའི་ཚོགས༴ སྨྱོ་བྱེད་ཚོགས༴ བརྗེད་བྱེད་ཚོགས༴ མཁའ་འགྲོའི་ཚོགས༴ མ་མོའི་ཚོགས་རྣམས༴ མ་ལུས་པ་རྣམས་ཐམས་ཅད་ཀུན། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་སོགས། ཀུན་འགྲུབ་མཛོད། །ཅེས་གཏོར་མ་གསེར་སྐྱེམས་མཆོད་དོ། །དེ་ནས་བགེགས་ལ་གཏོར་མ་བསྔོ་བ་ནི། སྔོན་དུ་འགྲོ་བའི་གཏོར་མ། ༀ་ཨཱཿཧཱུྃ་གིས་བྱིན་གྱིས་རླབས། ༀ་སརྦ་བིགྷྣ་ན་ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ༴ ལན་གསུམ་གྱིས་བསྔོས་ལ། ཁྲོས་མའི་མཚམས་ལྷ་བསྐྱེད་པ་ནི། ཕཊཿ རང་ཉིད་སྐད་ཅིག་གི་རྗེ་བཙུན་ཁྲོས་མ་ནག་མོ་ཞལ་ཅིག་ཕྱག་གཉིས་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། སྤྱི་བོར་ཕག་ཞལ་ནག་པོ་ངུར་སྒྲ་སྒྲོགས་པ། ཕྱག་གཉིས་གྲི་ཐོད་བསྣམས་ཤིང་གྲུ་གཡོན་ཁ་ཊྭཱྃ་ཀ་གྱེན་དུ་སློང་བ། ཞབས་གཉིས་གར་སྟབས་འགྱིང་བའི་མེ་དཔུང་འབར་བའི་ཀློང་ན་བཞུགས་པའི་སྐུའི་བ་སྤུ་ལས་རང་འདྲའི་ཁྲོ་ཆུང་དང་མེ་ཡི་ཚྭ་ཚྭ་དཔག་ཏུ་མེད་པ་འཕྲོས། གནོད་བྱེད་རྒྱལ་འགོང་དམ་སྲི་འབྱུང་པོ་ཐམས་ཅད་ཚར་གཅོད་པའི་བདག་ཉིད་ཅན་དུ་གྱུར། ༀ་བཛྲ་ཌཱཀྐི་ནི་ཀྲོ་ཏེ་ཀཱ་ལི་བཾ་ཧ་རི་ནི་ས་ཧཱུྃ། ཅེས་བདག་ཉིད་ཁྲོས་མའི་སྐུ་ཝལ་གྱིས་བསྐྱེད་ལ་གཞུང་གི་བཀའ་བསྒོ་ལ་འཇུག་གོ།། །།

བྱིན་དབང་དངོས་གྲུབ་ཆར་འབེབས

བྱིན་དབང་དངོས་གྲུབ་ཆར་འབེབས་བཞུགས་སོ། །གཅོད་ཀྱི་བྱིན་འབེབ་ནི། ཚིལ་ཆེན་གྱི་སྤོས་དང་། རོལ་མོ་སྒྲོགས། ཐོད་རྔ་བརྡུང་། རྐང་གླིང་འབུད། དབྱངས་རིང་པོ་འཐོན་ལ་འདི་སྐད་དོ། །ༀ་ཨཱཿཧཱུྃ༔ བཾ་གུ་རུ་ཧ་རི་ནི་ས་བཛྲ་ས་མ་ཡ་ཛ་ཛ། ཛཿཧཱུྃ་བཾ་ཧོཿ ཧཱུྃ། ཡུལ་གྱི་མིང་ནི་ཆོས་ཀྱི་དབྱིངས། །ཆོས་སྐུ་ཀུན་བཟང་ཡུམ་ཆེན་ལ། །སྐྱེ་མེད་དབྱིངས་ཀྱི་མཁའ་འགྲོས་བསྐོར། །གནས་མཆོག་འདི་རུ་གཤེགས་སུ་གསོལ། །བསྒྲུབ་ཁང་འདི་རུ་བྱིན་ཕོབ་ཅིག །མཎྜལ་འདི་ལ་བརྟེན་ཆོས་ལ། །དཀྱིལ་འཁོར་འདི་ལ་བཀྲག་ཅིག་སྟོན། །སྒྲུབ་རྫས་འདི་རྣམས་བྱིན་གྱིས་རློབས། །མར་མེ་འདི་ལ་མདངས་ཅིག་སྩོལ། །ཞལ་ཟས་འདི་ལ་བཅུད་ཅིག་ཕོབ། །ཚོགས་འཁོར་འདི་ལ་བྱིན་གྱིས་རློབས། །སྒྲུབ་པ་པོ་ལ་དབང་བཞི་བསྐུར། །ཧཱུྃ། ཡུལ་གྱི་མིང་ནི་ཨུ་རྒྱན་ཡུལ། །ལོངས་སྐུ་རྡོ་རྗེ་ཕག་མོ་ལ། །འགགས་མེད་མཁའ་འགྲོ་འབུམ་གྱི་བསྐོར། །གནས་མཆོག༴ འགྲེས། ཧཱུྃ། ཡུལ་གྱི་མིང་གི་མཁའ་སྤྱོད་གནས། །སྤྲུལ་སྐུ་མ་ཅིག་ལབ་སྒྲོན་མ། །མཁའ་འགྲོ་བྱེ་བ་འབུམ་གྱི་བསྐོར། །གནས་མཆོག་སོགས། ཧཱུྃ། སྤྲོས་བྲལ་ཆོས་སྐུའི་ཕོ་བྲང་ནས། །ཕ་གཅིག་དམ་པ་རྒྱ་གར་ལ། །གྲུབ་ཐོབ་གཅོད་རྒྱུད་རྣམས་ཀྱིས་བསྐོར། །གནས་མཆོག་སོགས། ཧཱུྃ། བདེ་བ་ཅན་གྱི་ཕོ་བྲང་ནས། །རྗེ་བཙུན་རིགས་ཀྱི་མཁའ་འགྲོས་བསྐོར། །གནས་མཆོག་སོགས། ཧཱུྃ། དུར་ཁྲོད་ཆེན་པོའི་ཕོ་བྲང་ནས། །མ་ཅིག་ཁྲོས་མ་ནག་མོ་ལ། །དུར་ཁྲོད་བརྒྱད་ཀྱི་མཁའ་འགྲོས་བསྐོར། །གནས་མཆོག་སོགས། ཧཱུྃ། ཆོས་དབྱིངས་ཡེ་ཤེས་ཕོ་བྲང་ནས། །དབུས་ཕྱོགས་སངས་རྒྱས་མཁའ་འགྲོ་མ། །སངས་རྒྱས་མཁའ་འགྲོ་འབུམ༴ གནས་མཆོག་སོགས། ཧཱུྃ། མེ་ལོང་ཡེ་ཤེས་ཕོ་བྲང་ནས། །ཤར་ཕྱོགས་རྡོ་རྗེ་མཁའ་འགྲོ་མ། །རྡོ་རྗེ་མཁའ་འགྲོ་འབུམ་གྱིས་བསྐོར། །གནས་མཆོག་སོགས། ཧཱུྃ། མཉམ་ཉིད་ཡེ་ཤེས་ཕོ་བྲང་ནས། །ལྷོ་ཕྱོགས་རིན་ཆེན་མཁའ་འགྲོ་མ། །རིན་ཆེན་མཁའ་འགྲོ་འབུམ་གྱིས༴ གནས་མཆོག་སོགས། ཧཱུྃ། སོར་རྟོག་ཡེ་ཤེས་ཕོ་བྲང་ནས། །ནུབ་ཕྱོགས་པདྨ་མཁའ་འགྲོ་མ། །པདྨ་མཁའ་འགྲོ་འབུམ་གྱིས་བསྐོར། །གནས་མཆོག་སོགས། ཧཱུྃ། བྱ་གྲུབ་ཡེ་ཤེས་ཕོ་བྲང་ནས། །བྱང་ཕྱོགས་ལས་ཀྱི་མཁའ་འགྲོ་མ། །ལས་ཀྱི་མཁའ་འགྲོ་འབུམ་གྱིས་བསྐོར། །གནས་མཆོག་སོགས། ཧཱུྃ། ཕྱོགས་བཞི་མཚམས་བརྒྱད་སྟེང་འོག་ན། །བཞུགས་པའི་སྣ་ཚོགས་མཁའ་འགྲོ་མ། །སྣ་ཚོགས་མཁའ་འགྲོ་འབུམ་གྱིས་བསྐོར། །གནས་མཆོག་འདི༴ སྒྲུབ་ཁང་སོགས། ཧཱུྃ། ཕྱི་རོལ་ཤ་ཟ་མཁའ་འགྲོ་དང་། །ཞིང་སྐྱོང་ལས་བྱེད་ཤུགས་འགྲོ་མ། །དམ་ཅན་མ་སྲིང་རྒྱ་མཚོས་བསྐོར། །གནས་མཆོག་སོགས་ནས། དབང་བཞི་བསྐུར༴ བྱིན་རླབས་ན་བུམ་ཐིབས་སེ་ཐེབ། །དངོས་གྲུབ་ཆར་འབེབས་སི་ལི་ལི། །དབུ་སྐྲ་ཐོར་ཚུགས་ལྡེམས་སེ་ལྡེམ། །དབུ་རྒྱན་དར་དཔྱང་པུ་རུ་རུ། །སྣ་ཚོགས་གར་བྱེད་ཁྱུགས་སེ་ཁྱུག །མཁའ་འགྲོའི་བརྡ་སྐད་ཏི་རི་རི། །བྱིན་གྱིས་རླབས་ཕྱིར་གཤེགས་སུ་གསོལ། །སྒྲུབ་པ་པོ་ལ་དབང་བཞི་བསྐུར། །ༀ་ཨཱཿཧཱུྃ་བཾ་གུ་རུ་ཧ་རི་ནི་ས་སརྦ་ཌཱཀྐི་ནི་ཀ་ཡ་ཝཀྐ་ཙིཏྟ་སིདྡྷི་ཕ་ལ་ཨ་ཝེ་ཤ་ཡ་ཨ་ཨཱ། ཧཱུྃཿ དུར་ཁྲོད་གནས་མཆོག་ཉམས་རེ་དགའ། །ཚོགས་བརྒྱད་གནས་སུ་དག་པའི་བརྡ། །ཉི་ཟླ་བརྩེགས་པ་འོད་རེ་གསལ། །འགགས་མེད་སྣ་ཚོགས་ཤར་བའི་བརྡ། །རྟོག་མེད་རོ་གདན་བག་རེ་བྲོ། །སྣང་སྲིད་མཉམ་ཉིད་ཡུམ་གྱི་ཐུགས། །བླ་མ་ཡི་དམ་མཁའ་འགྲོ་ལ། །བདག་གིས་དད་པས་འབུལ་བ་ནི། །ཞིང་གི་བླ་རེ་རྒྱངས་སེ་རྒྱང་། །མ་དང་མཁའ་འགྲོ་རྣམས་ལ་འབུལ། །རོ་རས་ཡོལ་བ་ལྷུབས་སེ་ལྷུབ། །མ་དང་མཁའ་འགྲོ་རྣམས་ལ་འབུལ། །མུན་སེལ་ཉི་ཟླ་འོད་རེ་གསལ། །མ་དང་མཁའ༴ ཤ་ཆེན་ཐང་མ་ཀད་དེ་ཀད། །མ་དང་མཁའ༴ ཚོགས་དྲུག་མེ་ཏོག་རུགས་སེ་རུག །མ་དང་མཁའ་འགྲོ༴ གསུར་ཆེན་དུད་པ་ཕྱུ་རུ་རུ། །མ་དང་མཁའ་འགྲོ་རྣམས་ལ་འབུལ། །རཀྟའི་ཁྲག་མཚོ་མེ་རེ་རེ། །མ་དང་༴ འདོད་ཡོན་གཏོར་མ་སྤུངས་སེ་སྤུང་། །མ་དང་མཁའ་འགྲོ་རྣམས་ལ་འབུལ། །སྨན་ཆེན་བདུད་རྩི་ཆི་ལི་ལི། །མ་དང་༴ རྐང་ཆེན་གླིང་བུ་ཀྱུ་རུ་རུ། །མ་དང་༴ ཐོད་པའི་རྔ་ཆེན་ཁྲབས་སེ་ཁྲབ། །མ་དང་༴ སྦ་གླིང་སྙུག་གླིང་ཀྱུ་རུ་རུ། །མ་དང་༴ མཁའ་འགྲོ་གར་དང་བརྡ་སྐད་སྒྲོགས། །མ་དང་༴ དཔའ་བོའི་བྲོ་བརྡུང་ཧཱུྃ་སྒྲ་སྒྲོགས། །མ་དང་༴ ནམ་མཁའ་མུ་མེད་གཏོར་གཞོང་དུ། །འབྱུང་བཞི་འགགས་མེད་རྩི་འབྲས་ལ། །འཛིན་མེད་མཆོད་པ་བསམ་མི་ཁྱབ། །མུ་མེད་མཐའ་ཡས་བརྗོད་དུ་མེད། །ནམ་མཁའི་མཐའ་མཉམ་མཆོད་པ་འདི། །མ་དང་མཁའ་འགྲོ་རྣམས་ལ་འབུལ། །བླ་མ་ཡི་དམ་མཁའ་འགྲོ་ལ། །ཕྱི་ནང་གསང་གསུམ་མཆོད་པ་འབུལ། །བདག་ཅག་ཡོན་མཆོད་འཁོར་བཅས་ལ། །ཚེ་བསྲིང་དཔལ་བསྐྱེད་བསམ་པ་བསྒྲུབ། །ལྷ་འདྲེ་མི་གསུམ་དབང་བསྡུས་ལ། །ཟས་ནོར་དངོས་གྲུབ་ཆར་ལྟར་ཕོབ། །བསམ་པ་ཡིད་བཞིན་འགྲུབ་པར་མཛོད། །ཅི་བསམ་དོན་རྣམས་འགྲུབ་པར་ཤོག །ཅེས་མཁའ་འགྲོ་རྣམས་ཀྱིས་བྱིན་བརླབས་སྤྲིན་དཔུང་གཏིབ་པ་ལྟར་བསམ་ཞིང་། སྒྲུབ་ཁང་ལྷའི་གཞལ་ཡས་ཁང་དུ་བྱིན་གྱིས་བརླབ་བོ། །ཟབ་མོ་གཅོད་ཀྱི་ལས་བྱང་ལས་གཅོད་ཀྱི་བྱིན་འབེབ་རྫོགས་སོ།། །།

མཁའ་འགྲོ་སྡེ་ལྔའི་ལས་བྱང་བྱིན་རླབས་སྒོ་འབྱེད།

མཁའ་འགྲོ་སྡེ་ལྔའི་ལས་བྱང་བྱིན་རླབས་སྒོ་འབྱེད་ཅེས་བྱ་བ་བཞུགས་སོ། །ན་མོ་གུ་རུ་དྷེ་ཝ་ཌཱཀྐི་ནི་ཧཱུྃ། བླ་མ་ཡུམ་ཆེན་ཌཱཀྐིའི་ཚོགས་རྣམས་ལ། །གུས་པས་བཏུད་དེ་མཁའ་འགྲོ་སྡེ་ལྔ་ཡི། །བསྒྲུབ་པའི་ཁ་བསྐང་ལས་བྱང་འདིར་སྤྲོ་བྱ། །དེ་ལ་གསུམ་སྟེ་སྔོན་འགྲོ་དངོས་གཞི་རྗེས། །བྱེ་བྲག་བདུན་གསུམ་ཉེར་གཅིག་གྲངས་སུ་བསྟན། །སྦྱོར་བ་སྔོན་འགྲོ་བདུན་སྟེ་རྟེན་བཤམས་དང་། །སྐྱབས་འགྲོ་སེམས་བསྐྱེད་རྒྱུན་བཤགས་བྱ་བ་དང་། །བཀའ་བསྒོ་མཚམས་གཅོད་མཆོད་རྫས་བྱིན་རླབས་དང་། །དངོས་གཞི་བདུན་སྟེ་བརྟེན་པ་ལྷ་བསྐྱེད་ཅིང་། །སྤྱན་འདྲེན་བཞུགས་གསོལ་ཕྱག་འཚལ་མཆོད་པ་དང་། །བསྟོད་པ་བྱ་ཞིང་གསང་སྔགས་བཟླས་པའོ། །རྗེས་ལ་བདུན་ཏེ་ཚོགས་བསྐུལ་སྦྱིན་བསྲེགས་དང་། །གཏོར་མ་བཏང་ཞིང་བཤགས་པ་བྱ་བ་དང་། །བཀྲ་ཤིས་བརྗོད་དང་རྫོགས་རིམ་བསྒོམ་པའོ། །དེ་ནི་ཕྲིན་ལས་རྩ་བ་སྡོམ་བྱང་ངོ་། །དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །འདིར་རྣལ་འབྱོར་པ་དབང་ཐོབ་ཅིང་དམ་ཚིག་དང་ལྡན་པས། །མཁའ་འགྲོ་སྡེ་ལྔའི་སྒྲུབ་པ་ཉམས་སུ་ལེན་པ་ལ་གསུམ། །ཐོག་མར་སྦྱོར་བ་སྔོན་འགྲོའི་དང་པོ་རྟེན་བཤམས་པ་ནི། །གནས་དུར་ཁྲོད་དམ་རབ་ཏུ་དབེན་པའི་སར། །མཎྜལ་མཆོད་གཏོར་རྣམས་གཞུང་ལྟར་བཤམས་ལ། གཉིས་པ་སྐྱབས་སུ་འགྲོ་བ་ནི། ཐུན་མོང་སྤྱི་དང་མཐུན་པར་བྱས་ལ། གསུམ་པ་སེམས་བསྐྱེད་པ་ནི། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་ཕྱིར་དུ། བདག་གི་སྒོ་གསུམ་མཁའ་འགྲོའི་དཀྱིལ་འཁོར་དུ་འཇུག་ཨཾ་སྙམ་པའི་སྨོན་པ་སེམས་བསྐྱེད་དང་ལྡན་པའི་ངང་ནས་ཚད་མེད་བཞི་བསྒོམ་མོ། །བཞི་པ་རྒྱུན་བཤགས་བྱ་བ་ནི། མ་མི་མིན་ཡེ་ཤེས་ཀྱི་མཁའ་འགྲོ་མ། །ལབ་སྒྲོན་ཁྱེད་ལ་སྐྱབས་སུ་མཆི། སོགས་ཚང་བར་བརྗོད། ལྔ་པ་བགེགས་ལ་བཀའ་བསྒོ་བ་ནི། སྔོན་དུ་འགྲོ་བའི་གཏོར་མ་ལ། ༀ་ཨཱཿཧཱུྃ་གིས་བྱིན་གྱིས་བརླབས་ལ། ༀ་སརྦ་བིགྷྣནྣ་ༀ་ན་མ་སརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཐཏྑཾ་ཨུ་ག་ཏེ་སྥ་ར་ཎ་ཨེ་མཾ་ག་ག་ན་ཁཾ་གྲྀཧྣ་དཾ་ཨེ་དཾ་བྷ་ལིང་ཏ་ཡེ་སྭཱ་ཧཱ། ཅེས་པས་བགེགས་འབུལ་ཏེ་བཀའ་བསྒོ་བ་ནི། ༀ་བཛྲ་དྷ་ཀི་ནི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ། ཅེས་ཁྲོས་མ་ནག་མོའི་སྐུར་ཝལ་གྱིས་བསྐྱེད་ལ། ཧཱུྃ། ཉོན་ཅིག་བགེགས་དང་ལོག་འདྲེན་འབྱུང་པོའི་ཚོགས། །བདུད་སྡེ་མི་བཟད་དཔུང་དང་བཅས་པ་རྣམས། །ང་ནི་རབ་འཇིགས་རྡོ་རྗེ་ཁྲོས་མའི་སྐུ། །ང་ཡི་བཀའ་དང་དམ་ལས་མ་འདའ་བར། །མཆོད་སྦྱིན་གླུད་གཏོར་དམ་པ་འདི་ལོངས་ལ། །ང་ཡི་གནས་འདིར་མ་འདུག་ཕྱིར་དེངས་ཤིག །གལ་ཏེ་མི་འགྲོ་བཀའ་ལས་འདའ་གྱུར་ན། །ཁྲོ་བོ་ཁྲོ་མོའི་ཚོགས་དང་བཅས་རྣམས་ཀྱིས། །ཁྱོད་ཀྱི་ལུས་ངག་ཡིད་གསུམ་ཐམས་ཅད་ཀུན། །མ་རུང་བརླག་པ་འགྱུར་བ་གདོན་མི་ཟ། །དེ་བས་འདི་རུ་མ་འདུག་གཞན་དུ་དེངས། །ༀ་བཛྲ་ཌཱཀྐི་ནི་ཀྲོ་ཏི་ཀ་ལི་བྃ་ཧ་རི་ནི་ས་ཧཱུྃ། ༀ་སུམ་བྷ་ནི་སུམ་བྷ་ནི་ཧཱུྃ། གྲྀཧྣ་གྲྀཧྣ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོཿ བྷ་ག་ཝཱན། བིདྱཱ་རཱ་ཛ་ཡ་ཧཱུྃ་ཕཊཿ ཞེས་ཧཱུྃ་བཞིའི་སྔགས་བརྗོད་ཅིང་བགེགས་བསྐྲད་དོ། །དྲུག་པ་མཚམས་བཅད་པ་ནི། ཧཱུྃ་ཧྲཱིཿ ང་ནི་རབ་འཇིགས་ཁྲོས་མ་ནག་མོའི་སྐུ། །མཚོན་ཆ་འོད་ཟེར་ཁྲོ་ཚོགས་དཔག་མེད་འཕྲོས། །རྡོ་རྗེ་འཁོར་ལོ་རལ་གྲི་འབར་བ་དང་། །ཐོ་བ་རྒྱ་གྲམ་ཕུར་པ་བྲག་རིའི་གུར། །ཡེ་ཤེས་ལྔ་ཡི་མེ་དཔུང་ཕྱོགས་བཅུར་འབར། །བསྒྲུབ་ལ་བར་དུ་གཅོད་པའི་དགྲ་དང་བགེགས། །ཐམས་ཅད་རྡུལ་ཕྲན་བཞིན་དུ་བརླག་པར་བྱེད། །སྟེང་འོག་ཕྱོགས་མཚམས་ཀུན་དུ་ཁྱབ་པར་བསྲུང་། །བཀའ་དང་དམ་ལ་སུ་ཡང་འདའ་མ་བྱེད། །ༀ་བཛྲ་ཀརྨ་ཀི་ལི་ཀི་ལ་ཡ་ཛྭ་ལ་རཾ་ཡཀྴ་ཀྲོ་ཏ་མཎྜ་ལ་ཧཱུྃ་ཕཊ། བདུན་པ་མཆོད་རྫས་བྱིན་གྱིས་བརླབས་པ་ནི། ༀ་སྭ་བྷ་ཝས་སྦྱངས། སྟོང་པའི་ངང་ལས་སྨན་རཀ་གཏོར་གསུམ་མཆོད་པའི་ཡོ་བྱད་ཐམས་ཅད་ༀ་ཨཱཿཧཱུྃ། ལན་གསུམ་གྱིས་བྱིན་གྱི་བརླབས། ༀ་ཨཱཿཧཱུྃ་པུཥྤེ་དྷུཥྤེ་ཨ་ལོ་ཀེ་གྷནྡྷེ་ནཻ་ཝི་ཏྱ་ཤཔྡ་ཨཱ་ཧཱུྃ། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཋཱ། ཅེས་སྨན་ཕུད་རིགས་ལྔ་འོད་དུ་ཞུ་ནས་ཡེ་ཤེས་བདུད་རྩིར་བྱིན་གྱིས་བརླབས། ༀ་ཨཱཿཧཱུྃ་མ་ཧཱ་རཀྟ་ཛྭ་མ་མཎྜ་ལ་ཧཱུྃ་ཧྲཱི་ཋཱ། ཅེས་རཀྟ་བྱང་སེམས་དམར་པོ་ཡེ་ཤེས་བདུད་རྩིར་བྱིན་གྱིས་བརླབས། ༀ་ཨཱཿཧཱུྃ་མ་ཧཱ་བྷ་ལིངྟ་ཏེ་ཛྭ་བྷ་ལིངྟ་བྷ་ལ་བྷ་ཏི་གུ་ཧྱ་ས་མ་ཡ་ཧཱུྃ་ཧྲཱི་ཋཱ། ཅེས་གཏོར་མ་ཡེ་ཤེས་ཀྱི་བདུད་རྩིར་འདོད་ཡོན་ལྔའི་ཕུང་པོ་བྱིན་གྱིས་བརླབས། སྤྱི་དོན་གཉིས་པ་དངོས་གཞི་ལ་བདུན་དང་པོ་རྟེན་དམ་ཚིག་པ་བསྐྱེད་པ་ནི། ༀ་སྭ་བྷཱ་ཝ་ཤུདྡྷེ་སརྦ་དྷརྨཱ་སྭ་བྷ་ཝ་ཤུདྡྷེ་ཨ། ཕྱི་ནང་གི་དངོས་པོ་ཐམས་ཅད་མི་དམིགས་སྟོང་པ་ཉིད་དུ་གྱུར། སྟོང་པའི་ངང་ལས་ཞིང་ཁམས་རྣམ་པར་དག་པ་ཨུ་རྒྱན་རང་བྱུང་གི་དུར་ཁྲོད་ཆེན་པོའི་དབུས་སུ། ཐོད་པ་སྐམ་རློན་བརྩེགས་པ་སྤེལ་མ་དང་། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། གྲུ་བཞི་སྒོ་བཞི་རྒྱན་རྟ་བབ་བང་རིམ་པདྨ་གདུག་ཏོག་རི་དྭགས་ཆོས་འཁོར་དང་ལྡན་པའི་སྟེང་ཁང་ཕྱུར་བུ་བང་རིམ་བཞི་པ་ལ། རྡོ་རྗེ་རིན་པོ་ཆེའི་ཏོག་གིས་མཚན་པ་ཕྱི་རྡོ་རྗེའི་རྭ་གུར་དང་ཡེ་ཤེས་ཀྱི་མེ་རི་དམར་ནག་རབ་ཏུ་འབར་བའི་ཕོ་བྲང་གིས་ཕྱི་ནང་མེད་པར་འོད་དམར་པོའི་རྦ་ཀློང་འཁྲུགས་པའི་དབུས་སུ། གདན་པདྨ་འདབ་བཞི་དང་ཆོས་འབྱུང་ཉི་མ་རོའི་སྟེང་དུ་ཨཱཿམཐིང་ནག་འོད་དུ་འབར་བ་ལས་འོད་ཟེར་འཕྲོས་བསྐུལ་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། ཨ་མ་ལབ་ཀྱི་སྒྲོན་མ་ཁྲོས་མ་ནག་མོ་དང་རྡོ་རྗེ་མཁའ་འགྲོ་མ་དབྱེར་མེད་པ། སྐུ་མདོག་མཐིང་ནག་ཏུ་འདུག་པ་ཞལ་གཅིག་ཕྱག་གཉིས་པ་སྤྱི་བོར་ན་ཕག་ཞལ་ནག་པོའི་ངུར་སྒྲ་སྒྲོག་པ། ཤར་གྱི་པད་འདབ་ལ་སངས་རྒྱས་མཁའ་འགྲོ་དཀར་མོ། ལྷོའི་པད་འདབ་ལ་རིན་ཆེན་མཁའ་འགྲོ་སེར་མོ། ནུབ་ཀྱི་པད་འདབ་ལ་པདྨ་མཁའ་འགྲོ་དམར་མོ། བྱང་གི་པད་འདབ་ལ་ལས་ཀྱི་མཁའ་འགྲོ་ལྗང་མོ། ཐམས་ཅད་ཀྱང་གཅེར་བུ་རིན་པོ་ཆེ་དང་རུས་པའི་རྒྱན་དྲུག་གིས་བརྒྱན་པ། སྤྱན་གསུམ་ཁྲོ་འཛུམ་འདུག་ཅིང་། དབུ་སྐྲ་ནག་པོ་མཐུར་དུ་ཁྲོལ་བ་གཡས་གྲི་གུག་ནམ་མཁའ་ལ་ཕྱར་བ། གཡོན་ཐོད་ཁྲག་ཐུགས་ཀར་འཛིན་པ་གྲུ་མོ་ཁ་ཊྭཱྃ་ཁ་བསྣམས་པ་ལ། ཌཱ་མ་རུ་དང་ཏིང་ཏིང་ཤགས་ཀྱིས་བརྒྱན་པ། ཞབས་གཡས་བསྐུམ་པའི་རྟིང་པ་བྷ་ག་ལ་གཏད་པ། གཡོན་བརྐྱང་བ་གར་ཐབས་སུ་བཞེངས་པ། གཙོ་འཁོར་དེ་རྣམས་ལ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་ཤུགས་འགྲོ་བྱེ་བ་དུང་ཕྱུར་ཚོགས་ཀྱིས་བསྐོར་བ། ལྷ་ཚོགས་དེ་དག་གི་སྤྱི་བོར་ༀ། མགྲིན་པ་ཨཱཿ ཐུགས་ཀར་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་དབང་གི་ལྷ་རྒྱལ་བ་རིགས་ལྔ་སྤྱན་དྲངས། དེ་ནས་དབང་བསྐུར་ཁྲུས་གསོལ་ནི། པཉྩ་ཀུ་ལ་ས་པཱ་རི་ཝ་ར་བཛྲ་ས་མ་ཡ་ཧཱུྃ་ཛཿ པཉྪ་ཀུ་ལ་ས་པ་རི་ཝ་ར་ཨརྒྷཾ་ཅེས་བརྗོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཇི་ལྟར་བལྟམས་པ་སོགས། བདུད་རྩིའི་ཆུས་དབང་བསྐུར་བས་ལུས་ངག་ཡིད་གསུམ་གྱི་སྒྲིབ་པ་དག །ཆུའི་ལྷག་མ་ཡར་ལུད་པ་ལས། གཙོ་མོ་ལ་མི་བསྐྱོད་པས་དབུ་རྒྱན། སངས་རྒྱས་མཁའ་འགྲོ་ལ་རྣམ་པར་སྣང་མཛད། རིན་ཆེན་མཁའ་འགྲོ་ལ་རིན་ཆེན་འབྱུང་ལྡན། པདྨ་མཁའ་འགྲོ་ལ་སྣང་བ་མཐའ་ཡས། ལས་ཀྱི་མཁའ་འགྲོ་ལ་དོན་ཡོད་གྲུབ་པས་དབུ་བརྒྱན་པར་གྱུར། ༀ་ཧཱུྃ་ཏྲཾ་ཧྲཱིཿཨཱཿ གཉིས་པ་ལྷའི་དཀྱིལ་འཁོར་སྤྱན་འདྲེན་པ་ནི། ནང་གི་སྤོས་ཆེན་སྦར། རྐང་གླིང་དང་ཐོད་རྔ་ལ་སོགས་པའི་རོལ་མོ་དཀྲོལ་ལ། ཧཱུྃ་ཧྲཱིཿ ཆོས་ཉིད་མི་འགྱུར་དབྱིངས་ཀྱི་ཕོ་བྲང་ནས། །རྡོ་རྗེ་མཁའ་འགྲོ་འཁོར་བཅས་གཤེགས་སུ་གསོལ། །རང་བྱུང་ལྷུན་གྱིས་གྲུབ་པའི་ཕོ་བྲང་ནས། །སངས་རྒྱས་མཁའ་འགྲོ་འཁོར་བཅས་གཤེགས༴ དགོས་འདོད་ཡོན་ཏན་འབྱུང་བའི༴ རིན་ཆེན་མཁའ་འགྲོ་འཁོར་བཅས༴ ཆགས་མེད་སྐྱོན་དང་བྲལ་བའི་ཕོ་བྲང་ནས། །པདྨ་མཁའ་འགྲོ་འཁོར་བཅས༴ མངོན་སྤྱོད་ཕྲིན་ལས་གྲུབ་པའི༴ ལས་ཀྱི་མཁའ་འགྲོ་འཁོར་བཅས་གཤེགས་སུ་གསོལ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་བཛྲ་ས་མ་ཡ་ཧཱུྃ་ཛཿ ཛཿཧཱུྃ་བཾ་ཧོཿ ཅེས་ཡེ་ཤེས་ཀྱི་དཀྱིལ་འཁོར་དམ་ཚིག་པ་ལ་ཐིམ་པར་བསམ་ལ། གསུམ་པ་བཞུགས་སུ་གསོལ་བ་ནི། ཧཱུྃ་ཧྲཱིཿ བདེ་ཆེན་ལྷུན་གྱིས་གྲུབ་པའི་ཕོ་བྲང་ནས། །ཐབས་ཤེས་ཉི་ཟླ་པདྨའི་གདན་སྟེང་དུ། །མཁའ་འགྲོ་དཔའ་བོ་དཔའ་མོའི་ཚོགས་རྣམས་ཀུན། །མི་གཡོ་དགྱེས་ཤིང་བརྟན་པར་བཞུགས་སུ་གསོལ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ས་མ་ཡ་ཏིཥྛ་ལྷན། ཅེས་དམ་ཚིག་པ་དང་ཡེ་ཤེས་པ་དབྱེར་མེད་པར་བསྟིམ་མོ། །བཞི་པ་ཕྱག་འཚལ་བ་ནི། ཧཱུྃ་ཧྲཱིཿ མི་འགྱུར་དབྱིངས་ཀྱི་ཡུམ་ཆེན་མཁའ་འགྲོ་མ། །དཔའ་བོ་མཁའ་འགྲོ་འཁོར་དང་བཅས་པ་ལ། །བདག་ཅག་ལུས་ངག་ཡིད་གསུམ་རབ་དད་པའི། །སྒོ་གསུམ་གཉིས་མེད་གུས་པས་ཕྱག་འཚལ་ལོ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ཨ་ཏི་པུ་ཧོ། པྲ་ཏི་ཛ་ཧོ། ལྔ་པ་མཆོད་པ་འབུལ་བ་ནི། ཧཱུྃ་ཧྲཱིཿ ཡོན་ཆབ་ཁྲུས་ཆབ་བདུག་སྤོས་སྣ་ཚོགས་དང་། །མེ་ཏོག་མར་མེ་དྲི་བཟང་མཆོད་པའི་སྤྲིན། །ཞལ་ཟས་སྒྲ་སྙན་རོལ་མོ་སྣ་ཚོགས་དང་། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །བླ་མ་ཌཱཀྐིའི་ཚོགས་ལ་མཆོད་པ་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཨརྒྷཾ་པཏྱཾ་པུཥྤེ་དྷུཔྤེ་ཨ་ལོ་ཀེ་གྷནྡྷེ་ནཻ་བི་དྱ་ཤཔྡ་པུཙྪ་ཧོ། ཧཱུྃ་ཧྲཱིཿ ཁམས་གསུམ་ཞིང་ཁམས་མ་ལུས་ཐམས་ཅད་ནས། །སྐུ་གསུམ་ལྷ་ཚོགས་འཁོར་བཅས་ཐུགས་རྗེའི་མགྲོན། །སྟོང་གསུམ་བདུད་རྩི་ལྔ་ཡིས་ཁེངས་པའི་རྫས། །རཀྟ་ཉོན་མོངས་ཁམས་གསུམ་བསྒྲལ་བའི་ཁྲག །གཏོར་མ་འདོད་པའི་ཡོན་ཏན་ལྔ་རུ་བསྔོ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་མ་ཧཱ་པཉྩ་ཨ་མྲྀ་ཏ་ཁ་ཧི། མ་ཧཱ་རཀྟ་ཁ་ཧི། མ་ཧཱ་བ་ལིངྟ་ཁ་ཧི། ཅེས་མཆོད་རྫས་འདོད་ཡོན་གྱི་ཚོགས་སུ་གྱུར་ནས་ལྷ་ཚོགས་ཐམས་ཅད་དགྱེས་པར་བསམ་མོ། །དྲུག་པ་བསྟོད་པ་བྱ་བ་ནི། ཧཱུྃ་ཧྲཱིཿ ཆོས་ཀྱི་དབྱིངས་ལས་སྒྱུ་མའི་སྐུར་སྟོན་པ། །རྒྱལ་བའི་ཡུམ་ཆེན་བཅོམ་ལྡན་རྣལ་འབྱོར་མ། །མ་ཆགས་སྐྱོན་བྲལ་ཁྲོས་མ་ནག་མོར་སྟོན། །གར་དགུའི་ཉམས་ལྡན་ཁྲོ་དང་འཛུམ་པའི་ཞལ། །ཞལ་གཅིག་ཕྱག་གཉིས་མཐིང་ནག་རྔམས་པའི་སྐུ། །སྤྱན་གསུམ་སྡང་མིག་དམར་ཟླུམ་གློག་ལྟར་འཁྱུག །མཆེ་གཙིགས་ལྗག་འདྲིལ་སྨིན་མ་མེ་ལྟར་འབར། །གཡས་པས་གྲི་གུག་སྐྱེ་ཤི་རྩད་ནས་གཅོད། །གཡོན་པས་ཆགས་མེད་བྷནྡྷ་དམར་བསྐང་བསྣམས། །བརྐྱང་བསྐུམ་ཞབས་གཉིས་རོ་ཡི་གདན་ལ་འགྱིང་། །དབུ་གཙུག་ཕག་ཞལ་མཐིང་ནག་ངུར་སྒྲ་ཡིས། །ཁམས་གསུམ་མ་ལུས་དབང་དུ་བསྡུད་པར་བྱེད། །དབུ་སྐྲ་ཁམས་ནག་རིགས་ལྔས་དབུ་ལ་བརྒྱན། །སྙན་ཆ་མགུལ་ཆིངས་གདུ.འུ་རབ་ཏུ་བརྒྱན། །ཁ་ཊྭཱྃ་མཆན་བཅུག་དུག་གསུམ་རྩད་ནས་གཅོད། །འདུ་བྱེད་རྣམ་དག་མགོ་ཕྲེང་དུ་མས་བརྒྱན། །རིན་ཆེན་རྒྱན་སྤྲས་དར་གྱི་ཅོད་པན་འཕུར། །རུས་པའི་རྒྱན་དྲུག་དྲིལ་ཆུང་ཕྲེང་བས་མཛེས། །གླང་ཆེན་སྟག་དང་ཞིང་ཆེན་ན་བཟའ་གསོལ། །ཧཱུྃ་ཧཱུྃ་ཕཊ་ཕཊ་ཕེམ་གྱི་སྒྲ་སྒྲོག་པས། །དཔའ་བོ་མཁའ་འགྲོ་དབང་བསྡུད་ལས་ལ་འགྱེད། །ལས་བཞི་བསྒྲུབ་ཕྱིར་ཌཱཀྐི་སྡེ་བཞིས་བསྐོར། །ཡེ་ཤེས་མཁའ་འགྲོ་མ་ལ་ཕྱག་འཚལ་བསྟོད། །ཆོས་དབྱིངས་རྣམ་དག་སྐྱེ་མེད་ཆོས་ཀྱི་དབྱིངས། །འགགས་མེད་རྩ་བྲལ་སེམས་ཉིད་དོན་གྱི་ངང་། །མཐའ་དབུས་མེད་པ་མཐའ་བྲལ་སྟོང་པའི་ཡུམ། །མ་ཡུམ་ཆེན་ཆོས་ཀྱི་སྐུ་ལ་ཕྱག་འཚལ་བསྟོད། །འགྱུར་བ་མེད་པ་རྡོ་རྗེའི་སྐུ་སྤྲུལ་མ། །དགོས་འདོད་ཀུན་འབྱུང་རིན་ཆེན་སྐུ་སྤྲུལ་མ། །གདོད་ནས་དག་པ་པདྨའི་སྐུ་སྤྲུལ་མ། ཕྲིན་ལས་གྲུབ་པ་ལས་ཀྱི་སྐུ་སྤྲུལ་མ། །མ་ཡུམ་ཆེན་སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། །ཅེས་དོན་དང་མཐུན་པར་བསྟོད་དོ། །བདུན་པ་བཟླས་པ་བྱ་བ་ནི། གཙོ་འཁོར་ལྔའི་སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པ་པདྨའི་སྟེང་དུ་ཨཱཿདམར་པོ། ཐུགས་ཀར་ཉི་མའི་སྟེང་དུ་ཧཱུྃ་སྔོན་པོ། ལྟེ་བར་ཆོས་འབྱུང་དམར་པོའི་སྟེང་དུ་བྃ་དམར་པོ་དེ་དག་གི་མཐར། ༀ་ཨཱཿཧཱུྃ་གུ་རུ་ཌཱཀྐི་ནི་ཀྲོ་ཏི་ཀ་ལི་བྃ་ཧ་རི་ནི་ས་ཧཱུྃ། ཅེས་ཁ་དོག་རྩ་བའི་ཡེ་གེ་དང་མཐུན་པར་གཡོན་དུ་འཁོར་བ་ལས་འོད་ཟེར་ཕྱོགས་བཅུར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་ཐམས་ཅད་ཀྱི་སྐུ་གསུང་ཐུགས་མཉེས་པའི་མཆོད་པ་འབུལ་བས་དེ་དག་གི་སྐུ་གསུང་ཐུགས་ཀྱི་དབང་དང་བྱིན་རླབས་དངོས་གྲུབ་མ་ལུས་པ་འོད་ཟེར་དམར་པོའི་རྣམ་པར་བསྡུས་ནས་བདག་གི་གནས་ལྔར་ཐིམ་པས་སྡིག་སྒྲིབ་བག་ཆགས་དག་ནས་མཆོག་ཐུན་མོང་གི་དངོས་གྲུབ་མ་ལུས་པ་ཐོབ་སྟེ། རྩ་འཁོར་ལོ་ལྔ་དང་བཅས་པ་ཐམས་ཅད་མཁའ་འགྲོའི་སྐུ་ནས་འབྲས་ཙམ་དཔག་མེད་ཏིལ་གྱི་གོང་བུ་ལྟར་གཏིབ་པར་བསམ་ལ་བདག་གི་སྔགས་བརྗོད་པ་ཙམ་གྱིས་གནས་ལྔའི་ལྷ་རྣམས་ཀྱི་སྔགས་སྒྲ་ཏི་རི་རི་སྒྲོགས་པ། སྟོང་གསུམ་ཐམས་ཅད་འདར་ཤིག་ཤིག་འུར་འུར་ལྡེམ་ལྡེམ་དུ་གྱུར་ནས་དབང་དུ་འདུས་པར་བསམ་ལ། གོང་གི་འབྲུ་བཅོ་བརྒྱད་པ་སྙིང་པོ་ཅི་འགྲུབ་བཟླ་ཞིང་། ཐུན་མཐར་སྟོང་ཚིག་མཆོད་བསྟོད་བྱའོ། ༈ །སྤྱི་དོན་གསུམ་པ་རྗེས་ཀྱི་ཆོ་ག་ལ་བདུན་ཏེ། དང་པོ་ཚོགས་ཀྱི་མཆོད་པ་དང་། གཉིས་པ་གནད་ནས་བསྐུལ་པ་དང་། གསུམ་པ་སྦྱིན་སྲེག་གི་ཆོ་ག་རྣམས་ནི་གཞན་དུ་ཤེས་ལ། བཞི་པ་གཏོར་མ་བཏང་ཞིང་ལྷག་མའི་ཆོ་ག་བྱ་བ་ནི། གཏོར་མ་ཕྱིར་དཔག་ལ་རཀྟའི་ཕུད་བྲན་ལ། ལྷག་མགྲོན་འགྱེད་པ་ནི། མཛེས་པའི་རྡོ་རྗེ་རྩེ་ལྔ་པ་མཚོན་པའི་ཕྱག་རྒྱ་བཅའ་ལ། ཨེ་ཨ་ར་ལི་ཧོ། ཛཿཧཱུྃ་བྃ་ཧོཿ ས་མ་ཡ་ཕེཾ་ཕེཾ། ཏ་ཀི་ར་ཙ་ཧཱུྃ་ཛ་ཛ༔ ཅེས་སོགས་དེ་ནས་མཆོད་ཅིང་ཕྲིན་ལས་བཅོལ་བ་ནི། ཧཱུྃ་ཧྲཱིཿ རྡོ་རྗེ་ཁྲོས་མའི་བཀའ་ཉན་ལས་བྱེད་ཚོགས། །རིགས་བཞི་མཁའ་འགྲོ་ཤུགས་འགྲོ་འཁོར་དང་བཅས། །དབང་ཕྱུག་ཉེར་བརྒྱད་མཁའ་འགྲོ་སུམ་ཅུ་གཉིས། །གིང་ཆེན་བཅོ་བརྒྱད་ལོང་ཀ་བཅུ་དྲུག་མ། །མ་བདུན་སྲིང་བཞི་འབར་མ་ཆེན་མོ་བརྒྱད། །ཕོ་ཉ་དྲུག་ཅུ་རྩ་བཞི་འབུམ་ཕྲག་མཁའ་འགྲོའི་ཚོགས། །གང་བཅོལ་ཕྲིན་ལས་ཐོག་མེད་སྒྲུབ་མཛད་པ། །བསྟན་མ་བཅུ་གཉིས་སྡེ་བརྒྱད་འཁོར་དང་བཅས། །བཀའ་ཡི་ཕམ་འབབ་ལྷག་གཏོར་འདི་ལོངས་ལ། །ཞི་རྒྱས་དབང་དྲག་འགུགས་འདྲེན་མནན་གཟིར་སོགས། །ཅི་ལྟར་བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་ཕྱིར་བསྐྱང་ངོ་། །ལྔ་པ་བཤགས་པ་བྱ་བ་ནི། ཡིད་ཀྱིས་གནོང་འགྱོད་དྲག་པོས་ཐལ་མོ་སྦྱར་ལ། རྗེ་བཙུན་མཁའ་འགྲོའི་ལྷ་ཚོགས་དགོངས་སུ་གསོལ། །བདག་སོགས་མ་རིག་རྨོངས་ཤིང་ལས་ངན་པས། །ཉེས་ལྟུང་སྒྲིབ་པའི་ལས་རྣམས་ཅི་བགྱིས་པ། །མི་འཆབ་གནོང་འགྱོད་དྲག་པོས་མཐོལ་བཤགས་ནས། །བྱམས་པའི་ཐུགས་རྗེས་བདག་ལ་དགོངས་ནས་ཀྱང་། །དམིགས་མེད་དོན་གྱི་ཚངས་པ་སྩལ་དུ་གསོལ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ས་མ་ཡ༴ སོགས་ཡིག་བརྒྱ་བཟླས། དྲུག་པ་བཀྲ་ཤིས་བརྗོད་པ་ནི། མེ་ཏོག་འཐོར་ཞིང་། བཅོམ་ལྡན་ཤཱཀྱ་ཐུབ་པ་ཡི། །བྱང་ཆུབ་མཆོག་ཏུ་སེམས་བསྐྱེད་ནས། །ལམ་བགྲོད་བྱང་ཆུབ་མཆོག་ཐོབ་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྐྱེ་བ་མེད་ལས་གཟུགས་སྐུ་འཆར། །འགྲོ་རྣམས་བདེ་ལ་བཀོད་མཛད་པ། །ཡུམ་ཆེན་ཤེས་རབ་ཕར་ཕྱིན་མའི། །བཀྲ་ཤིས༴ ཚངས་པ་བརྒྱ་བྱིན་རྒྱལ་ཆེན་བཞིས། །མཆོད་པའི་ཚོགས་ཀྱིས་རབ་མཆོད་ཅིང་། །ཉིན་མཚན་ཀུན་ཏུ་སྲུང་བྱེད་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཚང་བའམ་ཌཱཀྐི་ལྔའི་བཀྲ་ཤིས་བརྗོད་དོ། །བདུན་པ་རྫོགས་རིམ་ནི། སྣོད་བཅུད་ཐམས་ཅད་རྟེན་གཞལ་ཡས་ཁང་ལ་བསྡུ། གཞལ་ཡས་ཁང་གི་ལྷ་ཚོགས་ཐམས་ཅད་བདག་ཉིད་གཙོ་མོ་ལ་ཐིམ་ནས། བདག་ཀྱང་རིམ་གྱིས་འོད་དུ་ཞུ་ནས། ཐུགས་ཀའི་སྔགས་ཕྲེང་ཧཱུྃ་དང་བཅས་པ་ལ་བསྡུ། ཧཱུྃ་མཐའ་ནས་ཐིག་ལེ་ན་དཱ་ལ་ཐིམ་སྟེ། དམིགས་མེད་སྤྲོས་བྲལ་གྱི་ངང་ལ་བཞག་ལ། དགེ་བ་བྱང་ཆུབ་ཏུ་བསྔོའོ། །མཁའ་འགྲོ་སྡེ་ལྔའི་དཀྱིལ་འཁོར་ཆོ་ག་བྱིན་རླབ་སྒོ་འབྱེད་ཅེས་བྱ་བ། དོན་ཡོད་རྡོ་རྗེའི་གཞུང་ལ་བརྟེན་ནས། བྱ་བྲལ་བ་ཀུན་དགའ་འབུམ་གྱིས་རབ་ཏུ་གསལ་བར་བྱས་སོ།། །།བཀྲ་ཤིས་པར་གྱུར་ཅིག །དགེ་ལེགས་འཕེལ།

སྡུད་རིམ།

༅། །ཐུན་གྱི་མཐར། རྗེ་བཙུན་མཁའ་འགྲོའི་ལྷ་ཚོགས་འགྲུབ་པར་གྱུར་ཅིག །དབྱངས་གསལ་རྟེན་བརྒྱ་རྟེན་སྙིང་རྣམས་ལན་གསུམ་རེ་བཟླས་ལ། མཆོད་པ་ནི། ཧཱུྃ་ཧྲཱིཿ ཡོན་ཆབ་ཁྲུས་ཆབ་བདུག་སྤོས་སྣ་ཚོགས་དང་། །མེ་ཏོག་མར་མེ་དྲི་བཟང་མཆོད་པའི་སྤྲིན། །ཞལ་ཟས་སྒྲ་སྙན་རོལ་མོ་སྣ་ཚོགས་དང་། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །བླ་མ་ཌཱཀྐིའི་ཚོགས་ལ་མཆོད་པ་འབུལ། །ཐུགས་རྗེ་བརྩེར་དགོངས་དབང་དང་དངོས་གྲུབ་སྩོལ། །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ཨརྒྷཾ་སོགས་ནས་ཤཔྡ་རཱུ་པ་སོགས། སྤཪྴེ་མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིངྟ་ཁ་ཧི། བསྟོད་པ་ནི། མ་ཆོས་དབྱིངས་རྣམ་དག་སྐྱེ་མེད་ཆོས་ཀྱི་དབྱིངས། །འགགས་མེད་རྩ་བྲལ་སེམས་ཉིད་དོན་གྱི་ངང་། །མཐའ་དབུས་མེད་པ་མཐའ་བྲལ་སྟོང་པའི་ཡུམ། །མ་ཡུམ་ཆེན་ཆོས་ཀྱི་སྐུ་ལ་ཕྱག་འཚལ་བསྟོད། །འགྱུར་བ་མེད་པ་རྡོ་རྗེའི་སྐུ་སྤྲུལ་མ། །དགོས་འདོད་ཀུན་འབྱུང་རིན་ཆེན་སྐུ་སྤྲུལ་མ། །གདོད་ནས་དག་པ་པདྨའི་སྐུ་སྤྲུལ་མ། །ཕྲིན་ལས་གྲུབ་པ་ལས་ཀྱི་སྐུ་སྤྲུལ་མ། །མ་ཡུམ་ཆེན་སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། །ཅེས་བསྟོད། དགེ་བ་འདི་ཡི༴ མཁའ་འགྲོ་སྡེ་ལྔའི་ལྷ་ཚོགས༴ འགྲོ་བ༴ ཐམས་ཅད་དེ་ཡི་ས་ལ་འགོད་པར་ཤོག །ཅེས་དགེ་བ་བསྔོ།། །།

མཁའ་འགྲོ་སྡེ་ལྔའི་མངོན་རྟོགས།

མཁའ་འགྲོ་སྡེ་ལྔའི་མངོན་རྟོགས་བཞུགས་པ་ལགས་སོ། །སྐུ་བཞིའི་བདག་ཉིད་ཡུམ་ཆེན་དང་། །དབྱེར་མེད་མཁའ་འགྲོའི་ཞབས་ལ་ཕྱག་འཚལ་ནས། །དེ་ཡི་བསྒྲུབ་མཆོད་ཚོགས་ལས་རིམ་པ་དང་། །བདག་ཉིད་རྒྱུད་དབང་ལམ་དུ་བྱེད་པའི་ཚུལ། །དད་ལྡན་སློབ་མས་ཡང་ཡང་བསྐུལ་བའི་ངོར། །ཕྱག་ལེན་བཞིན་དུ་གུས་པས་བྲིས་པ་ཡིས། །བླ་མ་མཁའ་འགྲོའི་ཚོགས་ཀྱིས་བཟོད་མཛོད་ཅིང་། །སླར་ཡང་བརྩེ་བའི་ཐུགས་ཀྱིས་བྱིན་གྱིས་རློབས། །སྟེགས་བུ་གང་ཡང་རུང་བ་ལ་ཚོམ་བུ་ལྔ་བཀོད། །མཆོད་པའི་འཚོགས་ཆས་ཅི་འབྱོར་པ་དང་། །གཏོར་མ་ལྔ། ཚོགས་གཡོན། སྔོན་འགྲོའི་གཏོར་མ་བཤམ། དེ་ཉིད་བྲན་༡ ལ། ༀ་བཛྲ་ཨ་མྲྀ་ཏ་ཀུནྡྷ་ལི་ཧ་༢ན་ཧ་ན་ཧཱུྃ་ཕཊ། ༀ་༣བརྗོད་སྟོང་པར། ཨཱཿ༤ ལས་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ། ཧཱུྃ།༦ ཆུ་ཆང་གི་བྲན།༡ ལས་ཤ་ལྔ་བདུད་རྩི་ལྔ། གཏོར་མ་ཞེས་བརྗོད་༢ལ་བགེགས་སྦྱངས། །གཏོར་༣མ་ལ་ལག་པ་གཡོན། །གཏོར་༤མ་ལ་ལག་པ་གཡས་བསྟན་ཏེ། །གཉིས་ཀ་བསྟན་༦ཏེ། ཡི་གེ་ལྔས་ཡོངས་སུ་གང་བར་གྱུར། པར་བསམ། ཧོ་ལས་འདོད་ཡོན་ཕུན་སུམ་ཚོགས་པའི་བདུད་རྩིར་གྱུར། པར་བསམ། ༀ་ཨཱཿཧཱུྃ་ཧ་ཧོ་ཧྲཱིཿ ཕེཾ་ཕེཾ་བཛྲ་ཨ་ར་ལི་ཧོཿ འབར་བའི་ཕྱག །ཞེས་བརྗོད་པས་ཡེ་ཤེས་ཀྱི་བདུད་རྩིར་བྱ་ཁྱུང་གི་ཕྱག་རྒྱ་དང་། རྒྱ་དཔྲལ་བ་གཡོན་དུ་བསྐོར་ཞིང་། ཛཿཧཱུྃ་བཾ་ཧོཿ བཛྲ་ཐལ་མོ་ཁ་གྱེན་དུ་ཕྱེས་ལ། དྷ་ཀི་ནི་ས་མ་ཡ་སྟྭཾ། དྲྀ་ཤྱ་ཧོཿ རྡོ་རྗེ་ཐོད་པའི་ཕྱག་རྒྱ་དང་། ༀ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཀྵ། སརྦ་བུདྡྷ་སྲེ་ཏ་ཤ་ཙ། ཨུད་མནྟ། ཨ་པ་སྥ་ར། ཌ་ཀ་ཌཱཀྐི་ནི་ཏ་ཡ། ཨི་དམ་བྷ་ལིཾ་ཏ་གྷྲི་ཧྣ་དུ། ས་མ་ཡ། རཀྵན་དུ། མ་མཁའ་འགྲོ་མ་ལ་སོགས་པ་བསམ་གྱིས་མི་ཁྱབ་པ་བྱོན་ནས། གཏོར་མ་གསོལ་བར་བསམ་ཞིང་། རྡོ་རྗེ་ཐལ་མོ་གསུམ་མམ་བདུན་གྱིས་འབུལ། མ་སརྦ་སིདྡྷི་མེ་ཡད་ཙནྡྷུ། ཡེ་ཏ་བཾ། ཡ་ཏེ་སྟཾ། བྷུ་ཛ་ཐ། པི་པ་ཐ། མ་ཏི་ཀྲ་མ་ཐ། མ་མ་སརྦ་ཀཏྠ་ཡཱ། སད་སུ་ཁཾ་བྷི་ཤུདྡྷ་ཡ་སྭཱ་ཧཱ། ཨི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། མ་ཧཱ་ཨརྒྷཾ་ལ་སོགས་པས་མཆོད་ལ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོར་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱི་ནི་འོད་གསལ་མཆོག །སངས་རྒྱས་མཁའ་འགྲོར་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པ་གོས་པ་མེད། །རིན་ཆེན་མཁའ་འགྲོར་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་རྡོ་རྗེ་ནམ་མཁའི་དབྱིངས། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོར་ཕྱག་འཚལ་བསྟོད། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང་། །སྣ་ཚོགས་མཁའ་འགྲོར་ཕྱག་འཚལ་བསྟོད། །ཅེས་པས་བསྟོད། ཕྲིན་ལས་གཞོལ་བ་ནི། ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །གཟའ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་པོ་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའི་ཚོགས་རྣམས་མ་ལུས་དང་། །འགྲེས། འབྱུང་པོའི་ཚོགས༴ ཡིད་བཏགས༴ ཤ་ཟའི༴ སྨྱོ་བྱེད༴ རྗེད་བྱེད༴ མཁའ་འགྲོའི༴ མ་མོའི་ཚོགས༴ དེ་ལ་སོགས་ཏེ་འབྱུང་པོའི་ཚོགས། །མ་ལུས་ཅི་སྙེད་ཡོད་པ་དང་། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་བསྣམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བར་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཅན་གྱི་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཐམས་ཅད་འབྱུང་བ་དང་། །ཡིད་ལ་འདོད་པ་ཀུན་འགྲུབ་ཤོག །དཀར་པོའི་རིགས་བསྟན་པ་ལ་མངོན་པར་དགའ་བ་རྣམས། མཆོད་སྦྱིན་གྱི་གཏོར་མ་འདིས་ཚིམས་པར་གྱིས་ལ། བདག་གིས་དཀྱིལ་འཁོར་གྱི་བྱ་བ་མ་ཚར་བར་དུ་སྡོང་གྲོགས་མཛོད་ཅིག །དཀྱིལ་འཁོར་ཆེན་པོ་ལ་བལྟ་བ་དང་ཉན་པ་ལས་མི་དབང་བའི་བགེགས་དང་ལོག་པར་འདྲེན་པ་ཐམས་ཅད་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་སོངས་ཤིག །ༀ་བཛྲ་ཌཱཀྐི་ནི་ཧཱུྃ་ཕཊ། ཅེས་སོགས་དང་། སུམྦྷ་ནི་ཧཱུྃ་ཞེས་བརྗོད་ལ་བགེགས་བསྐྲད། མ་སོང་བ་སྲིད་ན་བཀའ་བསྒོ་ཞིང་མཚམས་བཅད་པ་ནི། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར་མ་འདུག་གཞན་དུ་དེངས། །གལ་ཏེ་མི་འགྲོ་འདུག་གྱུར་ན། །རྡོ་རྗེ་མཁའ་འགྲོ་ཁྲོས་པ་ཡི། །རྡོ་རྗེ་འབར་བའི་མཚོན་ཆ་ཡིན། །ལུས་ངག་ཡིད་གསུམ་རྡུལ་དུ་རློག །ༀ་བཛྲ་ཌཱཀྐི་ནི་ཧཱུྃ་ཕཊ། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར༴ གལ་ཏེ་མི༴ སངས་རྒྱས་མཁའ་འགྲོ༴ འཁོར་ལོ་འབར་བའི༴ ལུས་ངག་ཡིད་གསུམ༴ ༀ་བུདྡྷ་ཌཱཀྐི་ནི་ཧཱུྃ་ཕཊ། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར་མ་འདུག་གཞན་དུ་དངེས། །གལ་ཏེ་མི་འགྲོ་འདུག་གྱུར་ན། །རིན་ཆེན་མཁའ་འགྲོ་ཁྲོས་པ་ཡི། །རིན་ཆེན་འབར་བའི་མཚོན་ཆ་ཡིན། །ལུས་ངག་ཡིད་གསུམ་རྡུལ་དུ་རློག །ༀ་རཏྣ་ཌཱཀྐི་ནི་ཧཱུྃ་ཕཊ། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར༴ གལ་ཏེ༴ པདྨ་མཁའ་འགྲོ་ཁྲོས༴ དགྲ་སྟྭ་འབར་བའི༴ ལུས་ངག་ཡིད་གསུམ༴ ༀ་པདྨ་ཌཱཀྐི་ནི་ཧཱུྃ་ཕཊ། ཧཱུྃ་ཉོན་ཅིག་བགེགས༴ གནས་འདིར༴ གལ་ཏེ༴ ལས་ཀྱི་མཁའ་འགྲོ་ཁྲོས༴ རལ་གྲིའི་འབར་བའི༴ ལུས་ངག་ཡིད༴ ༀ་ཀརྨ་ཌཱཀྐི་ནི་ཧཱུྃ་ཕཊ། ཧཱུྃ། སྲིད་པའི་རྩེ་མོ་མན་ཆོད་དང་། །ན་རག་དམྱལ་ཁམས་ཡན་ཆད་དུ། །ལོག་པར་ལྟ་བའི་དགྲ་དང་བགེགས། །འདི་རུ་མ་འདུག་གཞན་དུ་དེངས། །སུམྦྷ་ནི་སུམྦྷ་ནི་ཧཱུྃ། ཞེས་སོགས་བརྗོད་ནས་བགེགས་མེད་པར་བྱ། བདག་ཏུ་བཟུང་བ་མཚོན་ཆ་ལྔའི་གུར་ཁང་ནི། ཧཱུྃ། སྟེང་ཡང་རྡོ་རྗེའི་བླ་རེ་ལ། །འོག་ཀྱང་རྡོ་རྗེའི་ས་གཞི་སྟེ། །ཕྱོགས་འཚམས་རྡོ་རྗེ་འབར་བས་གཏམས། །རྡོ་རྗེའི་མཚམས་ལས་མ་འདའ་ཞིག །ༀ་བཛྲ་རཀྵ་རཀྵ་ཧཱུྃ་ཕཊ་སྭཱ་ཧཱ། ཧཱུྃ། སྟེང་ཡང་འཁོར་ལོའི་བླ༴ འོག་ཀྱང་འཁོར་ལོའི་ས༴ ཕྱོགས་མཚམས་འཁོར་ལོ༴ འཁོར་ལོའི་མཚམས༴ ༀ་བཛྲ་ཙཀྲ་ཙཀྲ་རཀྵ༴ ཧཱུྃ། སྟེང་ཡང་དབྱུགས་པའི༴ འོག་ཀྱང་དབྱུག་པའི་ས༴ ཕྱོགས་མཚམས་དབྱུག་པའི༴ དབྱུག་པའི་མཚམས༴ ༀ་དནྟྲ་རཀྵ༴ ཧཱུྃ། སྟེང་ཡང་དགྲ་སྟྭའི་བླ༴ འོག་ཀྱང་དགྲ་སྟྭའི་ས༴ ཕྱོགས་མཚམས་དགྲ་སྟྭའི༴ དགྲ་སྟྭའི་མཚམས༴ ༀ་པ་ར་ཤུ་རཀྵ༴ ཧཱུྃ་སྟེང་ཡང་རལ་གྲིའི་བླ༴ འོག་ཀྱང་རལ་གྲིའི་ས༴ ཕྱོགས་མཚམས་རལ་གྲིའི༴ རལ་གྲིའི་མཚམས༴ ༀ་ཁརྒ་རཀྵ༴ ཧཱུྃ། ཕྱི་རོལ་ཀུན་ནས་འོད་འཕྲོས་པས། །བདུད་དཔུང་ངེས་པར་བསྲེག་མཛད་པ། །ས་དང་ནམ་མཁའ་གང་བ་ཡི། །འབར་བ་མེ་ཡི་ཕུང་པོར་གྱུར། །ༀ་བཛྲ་ཛྭ་ལ་རཾ་བཛྲ་ཛྭ་ལ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། དེ་ནས་གནས་དང་ཡོ་བྱད་བྱིན་གྱིས་བརླབ་པ་ནི། ༀ་བཛྲ་ཨ་མྲྀ་ཏ་ཀུནྡྷ་ལི་ཧ་ན་ཧ་ན་ཧཱུྃ་ཕཊ། ༀ་སྭཱ་བྷ་ཝས་སྟོང་པར་གྱུར། སྟོང་པའི་ངང་ལས་ལྷ་རྫས་ལས་གྲུབ་པའི་གཞལ་ཡས་ཁང་གི་ཕྱི་ནང་ཀུན་ཏུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃ་ཞུ་བ་ལས་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས། རོལ་མོའི་སྒྲ་ལ་སོགས་པ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པར་གྱུར། གུ་རུ་ཌཱཀྐི་ནི་ཨརྒྷཾ་པྲ་ཏིཙྪ་ཡེ་སྭཱ་ཧཱ། པཱདྱཾ་པྲ་ཏིཙྪ་ཡེ་སྭཱ་ཧཱ། བཛྲ་པུཥྤེ་ཨཱཿཧཱུྃ། རྡུ་པེ༴ ཨ་ལོ་ཀེ༴ གྷནྡྷེ༴ ནེ་བི་ཏེ༴ ཤཔྡ་ཨཱཿཧཱུྃ། ༀ་བཛྲ་གྷནྜེ་ར་ཎི་ཏ། དང་པོ་གནས་དང་ཡོ་བྱད་བྱིན་གྱིས་བརླབས། བླ་མ་ཡི་དམ་མཁའ་འགྲོ་སྤྲིན་གཏིབས་པ་བཞིན་བྱོན་ནས། པྲ་ར་ཎི་ཏ། སཾ་པྲ་པྲ་ར་ཎི་ཏ། སརྦ་བུདྡྷ་ཀྵེ་ཊ། པྲ་ཙ་ལི་ཏེ། པྲཛྙཱ་པ་ར་མི་ཏ། ན་ཏ་སཾ་བྷ་ཝེ་ཏ། བཛྲ་ཧྲི་ད་ཡ་ནི། སོནྟ་ཥ་ནི་ཧཱུྃ་ཧཱུྃ་ཧཱུྃ། ཧོ་ཧོ་ཧོ། ཨ་ཁཾ་སྭཱ་ཧཱ། ཞེས་ལན་གསུམ་བརྗོད་པས། རོལ་མོའི་སྒྲ་དྲག་ཏུ་བྱས་པས། གཞལ་ཡས་ཁང་དུ་མཆོད་རྫས་དུ་མ་སྤྲོས་པས། བླ་མ་ཡི་དམ་མཁའ་འགྲོ་སྲུང་མ་རྒྱལ་མཚོའི་ཚོགས་དང་བཅས་པས་ནམ་མཁའ་གང་བར་བྱོན་ནས། དེ་དག་ལ་ནམ་མཁའ་དང་མཉམ་པའི་སེམས་ཐམས་ཅད་ཐུན་མོང་དང་། ཐུན་མོང་མ་ཡིན་པའི་སྐྱབས་འགྲོ་ཡན་ལག་བརྒྱད་པ་གདན་ཐོག་གཅིག་མ་ལྟར་བྱ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཟབ་མོའི་ཚོགས་ཀྱི་ལས་ལ་འཇུག་པར་བགྱིས། ཞེས་པས་སེམས་བསྐྱེད། རང་གི་སྤྱི་བོར་པདྨ་དང་ཟླ་བའི་སྟེང་དུ། ཧཱུྃ་ལས་བླ་མ་དམ་པ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་པས་རྡོ་རྗེ། གཡོན་པས་དྲིལ་བུ་འཛིན་པ་ཡུམ་ལ་འཁྱུད་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པའི་པང་ན། ཡུམ་རྡོ་རྗེ་སྙེམ་མ་དཀར་མོ་གྲི་གུག་དང་ཐོད་ཁྲག་འཛིན་པས་ཡབ་ལ་འཁྱུད་ཅིང་། པདྨའི་སྐྱིལ་ཀྲུང་གིས་འཁྲིལ་བ། གཉིས་ཀ་ཡང་རུས་པ་དང་རིན་པོ་ཆེས་བརྒྱན་པའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད། ཛཿཧཱུྃ་བཾ་ཧོཿ གཉིས་སུ་མེད་པར་བསྟིམ། ལུས་ལོངས་སྤྱོད་ཐམས་ཅད་འབུལ། བླ་མས་བདག་གི་ལུས་ངག་ཡིད་གསུམ་གྱི་སྡིག་སྒྲིབ་རྩ་བ་ཡན་ལག་གི་དམ་ཚིག་ཆག་ཉམས་ཐམས་ཅད་དག་པར་མཛད་དུ་གསོལ། ཅེས་གསོལ་བ་བཏབ་པས། ཡུམ་གྱི་སྦྱོར་མཚམས་ནས་བདུད་རྩི་བབས་པས་ལུས་ཕྱི་ནང་གི་སྡིག་སྒྲིབ་སྒོ་གསུམ་གྱི་ཉེས་ལྟུང་ཐམས་ཅད་དག་ནས། ཚངས་བུག་ནས་ལུས་སེམས་དཀར་མེར་གྱིས་གང་བར་བསམ་ཞིང་། ༀ་ཤྲཱི་བཛྲ་ཧེ་རུ་ཀ །ས་མ་ཡཱ། མ་ནུ་པཱ་ལ་ཡཱ། བཛྲ་ཧེ་རུ་ཀ་ཏྭེ་ནོ་པ་ཏིཥྛ། ཌི་ཌྷོ་མེ་བྷ་ཝ། སུ་ཏོ་ཎྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝན྄། བཛྲ་ཧེ་རུ་ཀ །བཛྲ་ས་བྷ་ཝ། མ་ཧཱ་ས་མ་ཡ་ས་ཏྭ་ཨཱ་མཐར་ཕཊ་ཅེས་ཅི་ནུས། ཞེས་བརྗོད། སྭཱ་ཧཱ། བདག་ནི་མི་ཤེས་རྨོངས་པ་ཡིས། །དམ་ཚིག་ལ་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ༀ་ཨཱཿཧཱུྃ། ཞེས་བརྗོད་པས་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་ནས་རང་ལ་ཐིམ། རང་ཉིད་སྐད་ཅིག་གིས་པདྨ་དང་ཉི་མའི་སྟེང་དུ། རྡོ་རྗེ་མཁའ་འགྲོ་མ་སྐུ་མདོག་སྔོན་མོ། དེའི་ཐུགས་ཀར་ཨ་སྔོན་པོ་ལས་འོད་ཟེར་འཕྲོས། བདག་གི་སྡིག་སྒྲིབ་སྦྱངས། ཕྱིར་འཕྲོས་པས་ཆོས་ཀྱི་དབྱིངས་ཀྱི་ཕོ་བྲང་ནས། མཁའ་འགྲོ་སྡེ་ལྔ་འཁོར་དང་བཅས་པ་ལ་བླ་མ་མི་བསྐྱོད་པས་དབུ་བརྒྱན་པ། བཛྲ་ས་མ་ཡ་ཛ་ཛ་ཛཿ མཆོད་སྤྲིན་གྱིས་སྤྲས་པའི་གཞལ་ཡས་ཁང་གི་པད་ཉིའི་སྟེང་དུ་བཞུགས་པར་བསམ། རང་རང་གི་ལུས་དཔག་ཏུ་མེད་པ་སྤྲུལ་ལ། བླ་མའི་ཞབས་ལ་ཕྱག་འཚལ་ལོ། །ན་མོ་རཏྣ་གུ་རུ་བྷྱཿ ཡི་དམ་ལ་ཕྱག་བྱ། ན་མོ་དྷ་ཀི་ནི་མ་དྷ་ལ་བྷྱཿ རང་གི་ཐུགས་ཀ་ནས་མཆོད་པ་ནི་ལྷ་མོས་མཆོད་རྫས་དཔག་ཏུ་མེད་པ་ཐོགས་ནས་གྲངས་མེད་པས་དལ་གྱི་ལྷ་ཚོགས་ལ་མཆོད་པར་བསམ་ཞིང་། མ་ཧཱ་གུ་རུ་ས་པ་རི་ཝ་ར་ཨརྒྷཾ་ལ་སོགས་པས་མཆོད། དཀོན་མཆོག་གསུམ་ལ་བརྒྱུད་ནས་གསུངས། བདག་སྐྱབས་རང་རང་ཕྱག་རྒྱ་དང་སོ་སོའི་བཅས་པས། མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རངས། །སངས་རྒྱས་བྱང་ཆུབ་ཡིད་ཀྱིས་བཟུངས། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་འཆི། །རང་གཞན་དོན་ནི་རབ་བསྒྲུབས་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་ཏུ་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་བར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་གྱིས་རྒྱུན་བཤགས་སྐྱབས་འགྲོ་སེམས་བསྐྱེད་དང་རྒྱུད་སཾ་བུ་ཏྲི་ནས། སངས་རྒྱས་སྲས་བཅས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་སུ། །ཇི་སྲིད་སྙིང་པོ་བྱང་ཆུབ་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པས། །སྡོམ་པ་དེང་ནས་བཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་དང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ཡིས། །ཉིན་རེ་བཞིན་དུ་དུས་དྲུག་ལ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གི་བསྒྲལ། །མ་གྲོལ་བ་རྣམས་བདག་གིས་གྲོལ། །དབུགས་མ་དབྱུང་བ་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །རིགས་ལྔ་སྤྱི་དང་ཁྱད་པར་སྡོམ་པ་བཟུང་ནས། ཅེས་ལན་གསུམ་བརྗོད། སེམས་ཅན་བྱམས་པ་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་སྙིང་རྗེ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་དགའ་བ་མེད་པའི་བདེ་བ་དང་མི་འབྲལ་བར་གྱུར་ཅིག །བཏང་སྙོམས་དགྲ་གཉེན་ཉེ་རིང་ཆགས་སྡང་མེད་པའི་བཏང་སྙོམས་ཆེན་པོ་དང་ལྡན་པར་གྱུར་ཅིག །ཚད་མེད་པ་བཞི་བསྒོམ་པ་ནི། བསོད་ནམས་ཀྱི་ཚོགས་བསགས་པའོ། །ༀ་སྭ་དྷརྨའི་སྔགས་བརྗོད་པས་ཆོས་ཐམས་ཅད་སྟོང་པར་བསམ་པ་ནི་བསོད་ནམས་ཀྱི་ཚོགས་བསགས་པའོ། །བྷཱ་ཝ་ཤུདྡྷོ་སརྦ་དྷརྨཱ་སོགས། ༀ་བཛྲ་ཨ་མྲྀ་ཏ་ཀུནྡྷ་ལི༴ ༀ་སྭ་བྷཱ་ཝ༴ སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ། རྃ་ལས་ཉི་མའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་སྔོན་པོ་ཧཱུྃ་གིས་མཚན་པ་ལས་འོད་ཟེར་ཕྱོགས་བཅུར་འཕྲོས་པས། འོག་རྡོ་རྗེའི་ས་གཞི། ཐ་མ་རྡོ་རྗེའི་ར་བ་དང་དྲྭ་བ། སྟེང་རྡོ་རྗེའི་གུར་དང་བླ་རེ། དེ་དག་གི་ཕྱི་རོལ་དུ་མདའི་དྲ་བ་མིག་མང་རིས་སུ་བྲིས་པའི་ཕྱི་རོལ་དུ་ཡེ་ཤེས་ཀྱི་མེ་འབར་བས་བསྐོར་བའི་བསྲུང་འཁོར་ཡངས་ཤིང་རྒྱ་ཆེ་བ། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་ལན་གསུམ་བསྒོམས་པས་བསྲུང་འཁོར་བརྟན་པར་བྱ། དེའི་ནང་དུ་ཨེ་ལས་ཆོས་ཀྱི་གཞིའི་ཡན་ལག །སྐྱེ་གནས་ཐམས་ཅད་དབྱིངས། འབྱུང་གནས། གྲུ་གསུམ་ཆོས་ཐམས་ཅད་མཉམ་པ་ཉིད་རྣམ་ཐར་སྒོ་གསུམ་མཚོན། ཕྱི་དཀར་ཐབས་ལ་ནང་དམར་ཤེས་རབ་བ་གདེངས་ཁ་ཆེན་པོ་གྱེན་དུ་ཕྱོགས་སངས་རྒྱས་ཀྱི་ཡོན་ཏན་གོང་ནས་གོང་དུ་འཕེལ་བ། པ། རྩ་བ་སྙིང་རྗེ་ཆེན་པོས་སེམས་ཅན་གྱི་དོན་མཛད་པ། ཕྲ་བ་མཐུར་དུ་ཟུག་པའི་ནང་དུ་སྐྱེ་བ་སྦྱོང་བ། ཡྃ་ལས་རླུང་ལྗང་ནག་ཟླ་གམ་ཡྃ་གྱིས་མཚན་པ། རྃ་ལས་མེ་དལ་གྲུ་གསུམ་དམར་པ་རྃ་གྱིས་མཚན་པ། བྃ་དལ་དཀར་པོ་བྃ་གྱིས་མཚན་པ། ལས་ཆུ། ལྃ་གྲུ་བཞི་སེར་པོ་ལྃ་གྱི་མཚན་པ། ལས་སའི་དཀྱིལ་འཁོར། དེའི་སྟེང་དུ་སུྃ་ཡོན་ཏན་དང་ཕྲིན་ལས་རྫོགས་པས་སེམས་ཅན་གྱི་དོན་བྱེད་པ་དང་། ལས་རི་རབ་ཀྱི་སྟེང་དུ། བྷྲཱུྃ་རྣམ་སྣང་གི་ངོ་བོ། ལས་རིན་པོ་ཆེ་སྣ་ཚོགས་ལས་གྲུབ་པའི་ཞལ་ཡས་ཁང་གྲུ་བཞི་སྒོ་བཞི་ཁ་ཁྱེར་བཞི་དང་བཅས་པ། ནང་ནས་རིམ་པ་བཞིན་དུ་ནག་པོ། ཆོས་དབྱིངས་ཡེ་ཤེས། ལྗང་ཁུ། བྱ་གྲུབ་ཡེ་ཤེས། དམར་པོ། སོར་རྟོག་ཡེ་ཤེས། སེར་པོ། མཉམ་ཉིད་ཡེ་ཤེས། དཀར་པོའི་མེ་ལོང་ལྟ་བུའི་ཡེ་ཤེས། རྩིག་པ་རིམ་པ་སྦྱོར་ལམ་དབང་པོ་ལྔ་དང་སྟོབས། ལྔ་དང་ལྡན་པ། རྩིག་ཚོགས་ལམ་བཞི་གསུམ་བཅུ་གཉིས། པའི་སྟེང་དུ་རིན་པོ་ཆེའ་ཕ་གུ་སེར་པོ། དྲྭ་བ་དང་དྲ་ཕྱེད་པས་འཕྱངས་པའི་སྟེང་དུ་རིན་པོ་ཆེ་རྣམ་པར་སྤེལ་བའི་མདའ་ཡབ་དང་། པུ་ཤུ་མཆོད་རྟེན་གྱི་རྣམ་པར་མཛེས་པར་བྱས་པ། རྩིགས་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་མཆོད་པའི་ལྷ་མོ་བཅུ་གཉིས་མཆོད་རྫས་དུ་མ་ཐོགས་ནས། བཅོམ་ལྡན་འདས་ལ་མཆོད་པ། ནང་ཀ་འཕགས་པའི་ལམ་ཡན་ལག་བརྒྱད་པ། བ་བརྒྱད་ཀྱིས་བཏེགས་པ། རྡོ་རྗེའི་གདུང་བཞིས་མིག་མང་རིས་སུ་བྲིས་ཤིང་མཛེས་པར་ཕུབ་པའི་དབུས་ཕྱུར་བུ་ཟླུམ་པོར་མི་སློབ་པའི་ལམ་རང་དོན་དམ་པའི་སངས་རྒྱས་སྤྲོས་པ་ཐམས་ཅད་དང་བྲལ་བ། གྱུར་པའི་སྟེང་དུ། རྡོ་རྗེ་ཕྱེད་པ་ནོར་བུ་རིན་པོ་ཆེས་མཚན་པ། སྒོའི་ཐད་སོ་བཞིར་ཀ་བ་བཞི་བཞིས་བཏེགས་པའི་རྟ་བབས་རིམ་པ་བཞི་བཞི་དང་ལྡན་པའི་སྟེང་དུ། པདྨ་ལ་གནས་པའི་ཆོས་ཀྱི་འཁོར་ལོ་དང་། གདུགས་བྱང་ཆུབ་ཀྱི་ཡན་ལག་བདུན། དང་རི་དྭགས་དང་གོས་དང་ཕན་དང་། མེ་ཏོག་གི་འཕྲེང་བ་དང་། དྲིལ་བུ་གཡེར་ཁ་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་བརྒྱན་པ། དྭངས་ཤིང་ཐོགས་པ་མེད་པའི་ཕྱིར་རོལ་ཏུ། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་གཞལ་སྦྱོང་བྱེད་མྱ་ངན་ལས་འདས་པའི་ཆོས་རྣམས། ཡས་ཁང་པའི་དབུས་སྔོ། ཤར་དཀར། ལྷོ་སེར། ནུབ་དམར། བྱང་ལྗང་། དབུས་སུ་པདྨ་དམར་བའམ་སྣ་ཚོགས་པདྨ། འདབ་མ་བཞི་པའི་ལྟེ་བ་དང་འདབ་མ་རྣམས་སུ་ཨ་ལས་ཟླ་ཁུ་བ་བ། རྃ་ལས་ཉི་རཀྟ་དང་མ་དང་། རོའི་བདག་མེད་པ་སྟེང་། དབུས་སུ་ཨ་ཡིག་སྔོན་པོ། སྐྱེ་བ་མེད་པ། ཤར་དཀར། གཏི་མུག་མེ་ལོང་ཡེ་ཤེས། ལྷོ་སེར། ང་རྒྱལ་མཉམ་ཉིད་ཡེ་ཤེས། ནུབ་དམར། འདོད་ཆགས་སོར་རྟོག་ཡེ་ཤེས། བྱང་ལྗང་ཁུ་ཕྲག་དོག་བྱ་གྲུབ་ཡེ་ཤེས། དེ་རྣམས་ཡོངས་སུ་གྱུར་པ་ལས། གྲི་གུག་རང་རང་གི་མདོག་ཅན་ཨས་མཚན་པ་ལས་འོད་འཕྲོས་སེམས་ཅན་གྱི་དོན་སྡིག་སྒྲིབ་དག་མཁའ་འགྲོ་སྡེ་ལྔའི་གོ་འཕང་ལ་བཀོད། བྱས་འཕགས་པ་མཆོད་མཆོད་སྤྲིན་བསམ་གྱིས་མི་ཁྱབ་པས་མཆོད་པར་བསམ། ཚུལ་འདུས་ཡོངས་སུ་གྱུར་པ་ལས། དབུས་རྣམ་པར་ཤེས་པའི་ཕུང་པོ་ཆུ་དག་པ་མི་བསྐྱེད་པའི་ངོ་བོ། སུ་རང་ཉིད་རྡོ་རྗེ་མཁའ་འགྲོ་མ་སྐུ་མདོག་སྔོན་པོ། ཤར་ཁམས་བརྒྱད་ཞེ་སྡང་ཆོས་ཉིད་ལས་འགྱུར་བ་མེད་པ་གཟུགས་ཕུང་ནམ་མཁའ་དག་པ་རྣམ་སྣང་། དུ་སངས་རྒྱས་མཁའ་འགྲོ་སྐུ་མདོག་དཀར་མོ། ལྷོར་རང་བཞིན་ས་དག་པ་ཚོར་བའི་ཕུང་པོ་དག་པ་རིན་འབྱུང་། རིན་ཆེན་མཁའ་འགྲོ་སྐུ་མདོག་སེར་མོ། ནུབ་ཏུ་འདུ་ཤེས་མེ་དག་པས་སྙིང་རྗེ་སེམས་ཅན་ལ་ཆགས་ཤིང་དབང་གི་ལས་འགྲུབ། པདྨ་མཁའ་འགྲོ་སྐུ་མདོག་དམར་མོ། བྱང་དུ་ལས་ཀྱི་མཁའ་འགྲོ་འདུ་བྱེད་རླུང་དག་པས་ཕྲིན་ལས་སྣ་ཚོགས་ཀྱིས་དོན་སྒྲུབ་ཅིང་དྲག་པོའི་ལས། སྐུ་མདོག་ལྗང་ཁུ། ཐམས་ཅད་ཀྱང་ཞལ་གཅིག་ཆོས་ཉིད་དེ་བཞིན་ཉིད་དུ་རོལ་གཅིག་པ། ཕྱག་གཉིས་ཐབས་ཤེས་ཟུང་དུ་འཇུག་པས་སྤྱན་ཁམས་གསུམ་གཟིགས་ཤིང་དུས་གསུམ་གྱི་དངོས་པོ་མཁྱེན་པ། ཅུང་ཟད་བསྒྲད་པ། ཞལ་སྙིང་རྗེས་སེམས་ཅན་རྗེས་སུ་འཛིན་ཅིང་ཚད་མེད་བཞི་དང་ལྡན་པ། ཅུང་ཟད་གདངས་ཤིང་མཆེ་བ་གཙེགས་པ། དབུ་སྐྲ་ནག་པོ་སིལ་མར་གྱུར་པས་སྐུ་རྒྱབ་ནོན་པ་ཕྱག་གཡས་པས་གྲི་གུག་ནམ་མཁའ་འཕྱར་བ། ང་རྒྱལ་ལ་སོགས་པའི་སྐྱོན་དྲུག་བཅད་པ། གཡོན་པས་ཐོད་ཁྲག་ཟག་མེད་ཀྱི་བདེ་བ་དང་ལྡན་པས། ཐུགས་ཀར་བསྣམས་པ། གྲུ་མོ་ནང་ན་ཡབ་ཀྱི་ངོ་བོ་དང་ཁ་ཊྭཱཾ་ཁ་ཡོད་པ་ཚངས་པའི་སྐུད་པ་དང་ཐབས་ཤེས་ཟུང་དུ་འཇུག་པ། འཁོར་འདས་ཐམས་ཅད་ཆོས་ཉིད་དུ་འདྲེས་པས་དུང་ཆེན་གྱི་ཕྲེང་བ་མཆོད་ཕྱིར་ཐོགས་པ། མི་མགོ་སྐམ་པོ་ལྔ་རིགས་ལྔས་ལྔས་དབུ་བརྒྱན་ཅིང་། རློན་པ་ལྔ་ཨ་ལི་ཀ་ལི་ལྔ་བཅུ། བཅུས་དོ་ཤལ་བྱས་པ། འཁོར་ལོ་བསམ་གཏན་རྣ་ཆ་བཟོད་པ་གདུ་བུ་ཚུལ་ཁྲིམས་མགུལ་རྒྱན། སྦྱིན་པ། བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །སྐུ་རེག་སྟེ་རུས་པའི་རྒྱན་ལྔས་སྦྱིན་སོགས་ཐབས་ཕ་རོལ་ཏུ་ཕྱིན་པ་ལྔ་དག་པས། བརྒྱན་པ། ཞབས་གཡས་མྱ་ངན་ལས་འདས་པའི་མཐའ་དང་། བསྐུམ་པའི་རྟིང་པ་བྷ་གར་གཏད་ཅིང་། གཡོན་བརྐྱངས་ནས་གར་ཐབས་སུ་བཞུགས་པ། དྭངས་ཤིང་གསལ་ལ་ཉི་མ་འབུམ་གྱི་ཤེས་རབ་ཀྱི་ཕ་རོལ་ཏུ་ཕྱིན་ལ། གཟི་བརྗིད་ཅན། ཡེ་ཤེས་རང་སེམས་ལ། ཀྱི་མེ་འབར་བའི་དབུས་ན་འཁོར་བའི་མཐའ་མནན་པ་བཞུགས་པ། དེ་དག་ཐམས་ཅད་དཔྲལ་བར་ༀ། སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོ། མགྲིན་པར་ཨཱཿ གསུང་རྡོ་རྗེའི་ངོ་བོ། ཐུགས་ཀར་ཐུགས་རྡོ་རྗེའི་ངོ་བོ། ཧཱུྃ། དེ་ལས་འོད་ཟེར་འཕྲོས་པས་འོག་མིན་ནས་སྤྱན་དྲངས་བར་བསམ། མ་ཧཱ་གུ་རུ་ཌཱཀྐི་ས་པཱ་རི་ཝ་ར་བཛྲ་ས་མ་ཡ་ཞེས་བརྗོད་པས་བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་མདུན་དུ་བྱོན་ནས། ཛ་ཛཿ པདྨ་པདྨའི་གདན་ལ་བཞུགས་པར་བསམ་མོ། །ཀ་མ་ལ་ཡེ་སྟྭཾ། མ་ཧཱ་ཨརྒྷཾ་ཞེས་པ་ལ་སོགས་ཀྱིས་མཆོད་ནས། མ་ཧཱ་གུ་རུ་ཨཾ་གུ་ཤ་ཡ་ཛཿ ཞེས་བརྗོད་ནས་ནས་རང་གི་ཐུགས་ཀ་ནས་ལྕགས་ཀྱུ་ཐོགས་པ་དཔག་ཏུ་མེད་པ་འཕྲོས་པས་ཡེ་ཤེས་པ་རྣམས་བཀུག་ནས། ཞགས་པས་བཅིང་། བཛྲ་པཱ་ཤ་ཧཱུྃ། བཛྲ་སྥོ་ཊ་བཾ་ལྕགས་སྒྲོག་གིས་སྡོམ། དྲིལ་བུ་ཐོགས་པས་དབྱེར་མེད་དུ་བྱས་ནས། ༀ་བཛྲ་གྷཎྜེ་ཧོཿ བཛྲ་ཨ་ཝེ་ཤ་ཡ་གཉིས་སུ་མེད་པར་བསམ། རིགས་ལྔ། མི་བསྐྱོད་པ། རྣམ་པར་སྣང་མཛད། རིན་ཆེན་འབྱུང་ལྡན། སྣང་བ་མཐའ་ཡས། དོན་ཡོད་གྲུབ་པའོ། །ཡུམ་བཞི་སངས་རྒྱས་སྤྱན། ལ་མ་ཀི་གོས་དཀར་མོ། དམ་ཚིག །སྒྲོལ་མའོ། །བྱང་ཆུབ་སེམས་དཔའ་བརྒྱད། བྱམས་པ། སའི་སྙིང་པོ། ནམ་མཁའི་སྙིང་པོ། སྒྲིབ་པ་རྣམ་སེལ། ཀུན་ཏུ་བཟང་པོ། འཇམ་དཔལ། སྤྱན་རས་གཟིགས། ཕྱག་ན་རྡོ་རྗེའོ། །ཁྲོ་བོ་བཅུ། གཤིན་རྗེ། ཤེས་རབ་མཐར་བྱེད། པདྨ་མཐར་བྱེད། བིབ་ག་ན་མཐར་བྱེད། མི་གཡོ་བ། དབྱུག་པ་ཅན། འདོད་པའི་རྒྱལ་པོ། སྟོབས་པོ་ཆེ། གཙུག་ཏོར་འཁོར་ལོ་སྒྱུར་རྒྱལ། གནོད་མཛེས་སོ། །ལྷ་མོ་དྲུག །གཟུགས་རྡོ་རྗེ་མ། སྒྲ་རྡོ་རྗེ་མ། དྲི་རྡོ་རྗེ་མ། རོ་རྡོ་རྗེ་མ། རེག་རྡོ་རྗེ་མ། ཆོས་རྡོ་རྗེ་མའོ། །པཉྩ་ཀུ་ལ་ས་པཱ་རི་ཝ་ར་བཛྲ་ས་མ་ཡ་ཛ་ཛཿ མདུན་དུ་བྱོན་ནས་པདྨ་ཀ་མ་ལ་ཡེ་སྟྭཾ་གདན་ལ་བཞུགས་པར་བསམ། ༀ་ན་མཿསརྦ་ཏ་ཐཱ་ག་ཏ་ས་པཱ་རི་ཝཱ་ར་ཨརྒྷཾ་སྭཱ་ཧཱ། སྔར་ལྟར་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། རིགས་ལྔ་དབང་གི་ལྷ་རྣམས་ཀྱིས། ཅི་ལྟར་བལྟམས་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། ལྷ་ཡི་ཆུ་ནི་དག་པ་ཡི། དེ་བཞིན་བདག་གིས་སྐུ་ཁྲུས་གསོལ། ༀ་ན་མཿསརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུངས་ཤིང་དབང་བསྐུར་བས། དྲི་མ་དག །དབང་ཐམས་ཅད་ཐོབ། ལུས་ཐམས་ཅད་གང་ཆུའི་ལྷག་མ་ཡར་ལུད་པ་ལས། གཙོ་མོ་ལ་མི་བསྐྱོད་པ་གཞན་རྣམས་ལ་རིགས་བཞིས་དབུ་བརྒྱན་གསུངས། ཡང་ན་མི་བསྐྱོད་པས་དབུ་བརྒྱན། ཨརྒྷཾ་ཞེས་སོགས། ༀ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ༀ་སྭཱ་བྷཱ་ཝ༴ སྟོང་པར་གྱུར། སྟོང་པའི་ངང་ལས་ༀ་ཨཱཿཧཱུྃ་གསུམ་ལས་མི་མགོའི་སྒྱེད་པུ་གསུམ་གྱི་དབུས་སུ། ཡྃ་ལས་རླུང་། རྃ་ལས་མེ། ཨ་ལས་ཐོད་པ་དཀར་པོ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པའི་ནང་དུ། ཨ་ལས་ཟླ་བའི་སྟེང་དུ། ཤར་དུ་གྷོ་ལས་བ་གླང་གི་ཤ །ལྷོ་ཀུ་ལ་ཁྱིའི་ཤ །ནུབ་ཏུ་དྷ་ལས་རྟའི་ཤ །བྱང་དུ་ཧ་ལས་གླང་པོ་ཆེའི་ཤ །དབུས་སུ་ན་ལས་མིའི་ཤ །དེ་རྣམས་ཀྱི་སྟེང་དུ་ཤར་དུ་བྷྲཱུྃ་ལས་དྲི་ཆེན། ལྷོར་ཨྃ་ལས་རཀྟ། ནུབ་ཏུ་ཛྃ་ལས་བྱང་སེམས། བྱང་དུ་ཁྃ་ལས་ཀླད་པ། དབུས་སུ་ཧཱུྃ་ལས་དྲི་ཆུ། དེའི་སྟེང་དུ་ཤར་དུ་བྷྲཱུྃ་ལས་མེ་ལོང་ལྟ་བུའི་ཡེ་ཤེས། ལྷོར་ཨཱྃ་ལས་མཉམ་པ་ཉིད་ཀྱི་ཡེ་ཤེས། ནུབ་ཏུ་ཛྃ་ལས་སོ་སོར་རྟོག་པའི་ཡེ་ཤེས། བྱང་དུ་ཁྃ་ལས་བྱ་བ་གྲུབ་པའི་ཡེ་ཤེས། དབུས་སུ་ཧཱུྃ་ལས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ། ཟླ་བའི་མཐར་གཡོན་སྐོར་དུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཱཻ། ཨོ་ཨ། ཨཾ་ཨཿ གཡས་སྐོར་དུ། ཀ་ཁ་ག་གྷ་ང། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། དེ་ཐམས་ཅད་ཀྱི་སྟེང་གི་ནམ་མཁའ་ལ་ༀ་དཀར་པོ་མགོ་མཐུར་དུ་བསྟན་པའི་སྟེང་དུ། ཟླ་བ་ལ་གནས་པའི་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ་དང་བཅས་པས་ཐོད་པའི་ཁ་བཅད་པ། ཧཱུྃ་ལས་འོད་ཟེར་འཕྲོས་པས་རླུང་གཡོས་མེ་སྦར་ནས་ཐོད་པ་དྲོས། རྫས་རྣམས་ཡི་གེ་དང་བཅས་པ་འོད་དུ་ཞུ་ཞིང་ཁོལ་བའི་རླངས་པ་ༀ་ལ་ཕོག་པས་བདུད་བརྩིའི་ཆུ་རྒྱུན་འཛག་ཧཱུྃ་ལ་ཕོག་པས་འོད་ཟེར་རླངས་པ་དང་བཅས་པ་ཕྱོགས་བཅུར་འཕྲོས་པས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩིས་གང་བའི་ཐོད་པ་དཔག་ཏུ་མེད་པ་སྤྱན་དྲངས། ཧཱུྃ་ལ་ཐིམ་པས་ལྗིད་ཀྱིས་སྣ་ཚོགས་རྡོ་རྗེ་ཟླ་བ་ༀ་དང་བཅས་པ་ཐོད་པའི་ནང་དུ་ལྷུང་། མེར་གྱི་ཞུ་ནས་ཡེ་ཤེས་ཀྱི་བདུད་རྩི་དང་། དམ་ཚིག་གི་བདུད་རྩི་དང་གཉིས་སུ་མེད་པར་འདྲེས་པས། ཁ་དོག་དྲི་རོ་རེག་བྱ་ཕུན་སུམ་ཚོགས་པར་གྱུར། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་བསམ་ཞིང་། བཟང་པོར་སྤེལ་བར་བྱེད། ༀ་ཨཱཿཧཱུྃ། ཧ་ཁ་དོག་ཕྲོག་པར་བྱེད། ཧོ་ཡིས་དྲི་འཛིན་འཇོམས་པར་བྱེད། ཧྲཱི༔ ཡིས་ནུས་པ་འཇོམས་པར་བྱེད། ༀ་ན་མཿསརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭཱ་བྷཱ་ཝ་ཨཏྨ་ཀོ྅་བདུད་རྩི་ལྕེ་ལ་བཞག་ཅིང་ལྷ་ཐམས་ཅད་བདུད་རྩིས་ཚིམ་པར་བསམ། ཧཾ། ཞེས་བརྗོད་ཅིང་གཡོན་པའི་མཐེབ་སྲིན་གྱིས་དཀྲུག་ཅིང་དར་གཅིག་བཞག །མ་ཆོས་དབྱིངས་རྣམ་དག །ཅེས་སོགས་གདན་ཐོག་གཅིག་མ་ནས་བྱུང་བ་ལྟར་གྱིས་བསྟོད་དོ། །བསྐྱེད་རིམ་མོ། ༈ །རྫོགས་རིམ་ནི། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཅེས་གསུངས་པས། སེམས་ཀྱི་ཆོས་ཉིད་གདོད་མ་ནས་སྤྲོས་པ་ཐམས་ཅད་དང་བྲལ་བ་ཡིན་པས། དེའི་ངང་ལ་སྒོ་གསུམ་མ་བཅོས་པར་སེམས་རྩེ་གཅིག་ཏུ་ལྷོད་ཀྱིས་ཀློད་ལ་བཞག་གོ། །ཡང་ན་བདེ་མཆོག་ལས། རྟག་ཏུ་སྙིང་ལ་གནས་པ་ཡིས། །ཐིག་ལེ་གཅིག་ལས་འགྱུར་མེད་པས། །དེ་བསྒོམ་བྱེད་པའི་སྐྱེས་བུ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་གསུངས་པས། ལུས་གནད་བཅའ། རླུང་རོ་འབུད་ནས། སྙིང་པདྨ་ལྟར་གྱེས་པའི་ལྟེ་བར་ཟླ་དལ་སྲན་མ་ཕྱེད་ཚལ་ཙམ་གྱི་སྟེང་དུ། རང་གི་སེམས་ཀྱི་ངོ་བོ་ཐིག་ལེ་དཀར་པོ་ཡུངས་འབྲུ་ཙམ་འོད་ཀྱི་རང་བཞིན་ཅན། རྣམ་པ་བདེ་བ། རང་བཞིན་གསལ་བ། ངོ་བོ་སྟོང་པར་རྩེ་གཅིག་ཏུ་རླུང་ཁ་སྦྱོར་བསྒོམ་མོ། །༼བདེ་སྟོང་ཉམས་ཁྱད་པར་ཅན་སྐྱེ།༽བཟླས་བ་བྱེད་ན། རང་ལྷའི་སྐུར་གསལ་བའི་ལག་པར་འཕྲེང་བ་བཟུང་ལ། ༀ་རུ་ཙི་ར་མ་ནི་པྲ་བྷ་དྷ་ཡ་ཧཱུྃ། ཞེས་ལན་བདུན་བཟླས་ནས་ཕྲེང་བ་བཏབ་སྟེ་བགྲངས་ནས་ལས་ཐམས་ཅད་འགྲུབ་པར་རྒྱུད་དེ་ནས་གསུངས་སོ། །ལྷ་རྣམས་ཀྱི་ཐུགས་ཀར་ཉི་མ་ལ་རང་རང་གི་ཁ་དོག་དང་མཐུན་པའི་ཨའི་ཐ་མར། རང་རང་གི་སྔགས་ཀྱིས་བསྐོར་བ་ལས་འོད་ཟེར་འཕྲོས། སྣང་སྲིད་ཐམས་ཅད་ཀྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་ཐམས་ཅད་རང་ལ་ཞུགས་པར་བསམ་ཞིང་། ༀ་བཛྲ་དྷ་ཀི་ནི་ཧཱུྃ་ཕཊ་སྭཱ་ཧཱ། གཙོ་བོའི་སྔགས་སོ། །ༀ་བུདྡྷ་དྷ་ཀི་ནི་ཧཱུྃ་སངས་རྒྱས་མཁའ་འགྲོ། ཕཊ་སྭཱ་ཧཱ། ༀ་རིན་ཆེན་མཁའ་འགྲོ། རཏྣ་དྷ་ཀི་ནི་ཧཱུྃ་ཕཊ་སྭཱ་ཧཱ། ༀ་པདྨ་དྷ་ཀི་ནི་ཧཱུྃ་པདྨ་མཁའ་འགྲོ། ཕཊ་སྭཱ་ཧཱ། ༀ་ཀརྨ་དྷ་ཀི་ནི་ཧཱུྃ་ལས་ཀྱི་མཁའ་འགྲོ། ཕཊ་སྭཱ་ཧཱ། ཨ་ལི་ཀ་ལིའི་མཐར། ལས་ཐམས་ཅད་འགྲུབ་དངོས་གྲུབ་མྱུར་དུ་འགྲུབ་གསུངས། པར་གྱུར་ཅིག་སྭཱ་ཧཱ་ཞེས་བརྗོད་ཅིང་། བསྙེན་པ་རྐྱངས་པ་ཡིན་ན། དཀྱིལ་འཁོར་རྟེན་དང་བསྟན་པར་བཅས་པའི་དལ་རང་ལ་བསྡུ། རང་གཙོ་བོའི་ང་རྒྱལ་དང་ལྡན་པས། བསྙེན་པ་རྐྱང་པ་བྱེད་ན་འདི་ཡན་ཆད་ཐུན་བཞིར་བཅད་ལ་ཐུན་མཇུག་ཏུ་གཏོར་མ་འབུལ། གསོལ་བ་གདབ། བསྔོ་བ་སྨོན་ལམ་བཏབ་ཐུན་མཚམས་ཀྱི་རྣལ་འབྱོར་དང་མ་བྲལ་བར་བྱའོ། །མདུན་བསྐྱེད་བསྒྲུབ་པས་བསང་སྦྱང་བྱ། མཆོད་རྫས་རྣམས་སྔར་བདག་བསྐྱེད་ཀྱི་སྐབས་ལྟར་བྱིན་གྱིས་བརླབས། སྟོང་པའི་ངང་ལས་རྡོ་རྗེའི་ས་གཞི་དང་༴ རིགས་ཀྱི་བདག་པོས། བརྒྱན་པའི་བར་བདག་བསྐྱེད་ལྟར་བྱས་ལ། ༼མདུན་བསྐྱེད་བྱེད་ན་དཀྱིལ་འཁོར་བསྡུ་མི་དགོས།༽གནས་མཁའ་དབྱིངས་རྣམ་དག་གི་ཕོ་བྲང་ནས། །བླ་མ་ཡི་དམ་མཁའ་འགྲོ་གསུམ། །ཆོས་སྐུ་ལོངས་སྐུ་སྤྲུལ་སྐུ་གསུམ། །སངས་རྒྱས་ཆོས་དང་དགེ་འདུན་གསུམ། །ཁྱེད་སངས་རྒྱས་བྱང་སེམས་ཚོགས་དང་བཅས། །གནས་འདིར་སྤྱན་འདྲེན་བཞུགས་སུ་གསོལ། །བཞུགས་ནས་དབང་བསྐུར་བྱིན་གྱིས་རློབས། །གནས་འོག་མིན་ཆོས་དབྱིངས་ཕོ་བྲང་ནས། །ཡུམ་ཆེན་ཕར་ཕྱིན་མན་ཆད་དང་། །རྩ་བའི་བླ་མ་ཡན་ཆད་ཀྱི། །མ་རྒྱུད་དཔའ་མོའི་ལྷ་ཚོགས་རྣམས། །ཁྱེད་དཔའ་བོ་མཁའ་འགྲོའི་ཚོགས་དང་བཅས། །གནས་འདིར་སྤྱན་འདྲེན་བཞུགས་སུ་གསོལ། །བཞུགས་ནས་དབང་བསྐུར་བྱིན་གྱིས་རློབས། །གནས་བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀྱ་ཐུབ་པ་མན་ཆད་དང་། །རྩ་བའི་བླ་མ་ཡན་ཆད་ཀྱི། །ཕ་རྒྱུད་དཔའ་བོའི་ལྷ་ཚོགས་རྣམས། །ཁྱེད་དཔའ་བོ་མཁའ་འགྲོའི་ཚོགས་དང་བཅས། །གནས་འདིར༴ བཞུགས་ནས༴ བཀྲ་ཤིས་གླང་ལུང་གི་དགོན་པ་ནས། །རྒྱལ་བ་དོན་གྲུབ་མན་ཆད་དང་། །རྩ་བའི་བླ་མ་ཡན་ཆད་ཀྱི། །སྲས་རྒྱུད་ཉམས་མྱོང་གི་ལྷ་ཚོགས་རྣམས། །ཁྱེད་སྡེ་སྣོད་རྒྱུད་སྡེའི་བླ་མ་རྣམས། །གནས་འདིར༴ བཞུགས་ནས༴ གར་བཞུགས་དག་པའི་ཞིང་ཁམས་ནས། །ཕ་རྩ་བའི་བླ་མ་རྡོ་རྗེ་འཆང་། །ཁྱེད་བཀའ་བརྒྱུད་བླ་མའི་ཚོགས་ཀྱིས་བསྐོར། །གནས་འདིར༴ བཞུགས་ནས༴ གནས་གཉན་ས་རི་ཁྲོད་དགོན་པ་ནས། །གྲོགས་སྙེམས་ཐག་ཆོད་པ་སྤྲུལ་པའི་སྐུ། །སྐལ་ལྡན་ཕོ་མོའི་ཚོགས་དང་བཅས། །གནས༴ བཞུགས༴ ཉི་ཤུ་རྩ་བཞིའི་གནས་མཆོག་ནས། །ཡི་དམ་ལྷ་ཚོགས༴ རྒྱུད་སྡེ་བཞི་ཡི་ཚོགས༴ གནས་འདིར༴ བཞུགས་ནས༴ བསིལ་བ་ཚལ་གྱི་དུར་ཁྲོད་ནས། །ཆོས་སྐྱོང་མ་མགོན་ལྕམ་དྲལ་ལ། །དམ་ཅན་རྒྱ་མཚོའི་ཚོགས་ཀྱིས༴ གནས་འདིར་སྤྱན་འདྲེན་བཞུགས་སུ་གསོལ། །བཞུགས་ནས་དབང་བསྐུར་བྱིན་གྱིས་རློབས། །མ་ཧཱ་གུ་རུ་དྷ་ཀི་ནི་ས་པཱ་རི་ཝཱ་ར་བཛྲ་ས་མ་ཡ་ཛ་ཛཿ ཞེས་བརྗོད་ཅིང་རྡོ་རྗེ་བསྡུས་པའི་ཕྱག་རྒྱ་བྱས་པས་ཐམས་ཅད་མདུན་དུ་བྱོན་པར་བསམ། པདྨ་ཀ་མ་ལ་ཡེ་སྟྭཾ། མ་ཧཱ་གུ་རུ་ཞེས་སོགས་སྔོན་དུ་འགྲོ་བ་ལ་སོགས་པས་མཆོད་ནས། ཛཿཧཱུྃ་བྃ་ཧོཿ ཐམས་ཅད་ཡི་དམ་གྱི་དཀྱིལ་འཁོར་དུ་བཞུགས་པར་བསམ་པ་ནི་བསྒྲུབ་པའོ། །ཡན་ལག་བདུན་པ་༼རྒྱས་བསྡུས་གང་རུང་མ་ཐོགས་ནས་མདུན་གྱི་ལྷ་ཚོགས་རྣམས་ལ་མཆོད་པར་བསམ་ཞིང་།༽བྱ་ཞིང་། ༼ཅེས་བརྗོད་པས་མདུན་བསྐྱེད་དང་དབྱེར་མེད་པར་གྱུར་པ་ལ་གཞལ་ཡས་ཁང་དང་ཡོ་བྱད་རྣམས་འབུལ་བས་རབ་ཏུ་དགྱེས་ནས་བཞུགས་པར་བསམ། རང་གི་ཐུགས་ཀ་ནས་མཆོད་པའི་ལྷ་མོ་གྲངས་མེད་པ་རྣམས་སྤྲོས་པས་མཆོད་རྫས་དུ།༽དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་མཆོད་ཡོན་འདི། །བླ་མ་མཁའ་འགྲོ་འཁོར་དང་བཅས་ལ་འབུལ། །འགྲོ་བའི་དོན་ལ་བཞེས་སུ་གསོལ། །མ་ཧཱ་གུ་རུ་ཌཱཀྐི་ནི་ས་པ་རི་ཝཱ་ར་ཨརྒྷཾ་པུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དྲི་མེད་ཡིད་དུ་འོང་བ་ཡི། །ལྷ་རྫས་བཟང་པོའི་ཞབས་བསིལ་འདི། །བླ་མ་མཁའ་འགྲོ་འཁོར་དང་བཅས་ལ་འབུལ། །འགྲོ་བའི་དོན་ལ་བཞེས་སུ་གསོལ། །མ་ཧཱ་གུ་རུ་དྷ་ཀི་ནི་ས་པཱ་རི་ཝཱ་ར་པདྱཾ་པུ་ཛ་མེ་གྷ་ས་མུ་དྲ་སྥ་ར་ཎ་ས་མེ་ཡེ་ཧཱུྃ། དྲི་མེད་ཡིད་དུ་འོང་བ་ཡིས། །ལྷ་རྫས་བཟང་པོའི་མེ་ཏོག་འདི། །བླ་མ་མཁའ་འགྲོ་འཁོར་དང་བཅས་ལ་འབུལ། །འགྲོ་བའི་དོན་ལ་བཞེས་སུ་གསོལ། །མ་ཧཱ་གུ་རུ་དྷ་ཀི་ནི་ས་པཱ་རི་ཝ་ར་པུཥྤེ་པུ་ཛ་མེ་གྷ་ས་མུ་དྲ་སྥ་ར་ཎ་ས་མེ་ཡེ་ཧཱུྃ། དྲི་མེད་ཡིད་དུ་འོང་བ་ཡི། །ལྷ་རྫས་བཟང་པོའི་བདུག་སྤོས་འདི། །བླ་མ་མཁའ་འགྲོ༴ འགྲོ་བའི༴ མ་ཧཱ་གུ༴ དྷུ་པེ་པུ་ཛ༴ དྲི་མེད་ཡིད་དུ་འོང་བ་ཡི༴ ལྷ་རྫས་བཟང་པོའི་སྣང་གསལ་འདི། །བླ་མ་མཁའ་འགྲོ༴ འགྲོ་བའི༴ མ་ཧཱ༴ ནས། ཨ་ལོ་ཀེ་པུ༴ དྲི་མེད་ཡིད་དུ་འོང་བ་ཡི། །ལྷ་རྫས་བཟང་པོའི་དྲི་མཆོག་འདི། །བླ་མ་མཁའ་འགྲོ༴ འགྲོ་བའི༴ མ་ཧཱ༴ ནས། གྷནྡྷེ༴ དྲི་མེད་ཡིད་དུ་འོང་བ་ཡི། །ལྷ་རྫས་བཟང་པོའི་ཞལ་ཟས་འདི། །བླ་མ༴ འགྲོ་བའི༴ མ་ཧཱ༴ ནས། ནཻ་བིདྱ༴ ལྷ་རྫས་བཟང་པོའི་རོལ་མོ་འདི། །བླ་མ༴ འགྲོ་བའི༴ མ་ཧཱ༴ ནས། ཤཔྡ་པུ་ཛ༴ ཞེས་པ་དང་། ༀ་གྷནྡྷེ་ར་ཎི༴ ༼སྔགས་བརྗོད་ཅིང་འདིར་རོལ་མོ་འབུལ། འདོད་ཡོན་ཕུན་སུམ་ཚོགས་པ་ནམ་མཁའ་དང་མཉམ་པར་བསྣམས་པའི་གསུང་རྡོ་རྗེ་མ་ལ་སོགས་པས་མཆོད།༽ཅེས་སོགས་དང་། དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་གཟུགས་མཆོག་འདི། །བླ་མ་མཁའ་འགྲོ་འཁོར་དང་བཅས་ལ་འབུལ། །འགྲོ་བའི་དོན་ལ་བཞེས་སུ་གསོལ། །མ་ཧཱ་གུ༴ ནས། རཱུ་པ་ཀ་མ་གུ་ཎ་པུ་ཛི་ཏ་ཨཱཿཧཱུྃ། དྲི་མེད་ཡིད་དུ་འོང་བ་ཡི། །ལྷ་རྫས་དམ་པའི་སྒྲ་སྙན་འདི། །བླ་མ་མཁའ་འགྲོ༴ འགྲོ་བའི༴ ཤཔྡ་ཀ་མ༴ དྲི་མེད་ཡིད་དུ༴ ལྷ་རྫས་དམ་པའི་དྲི་མཆོག་འདི། །བླ་མ༴ འགྲོ་བའི༴ གྷནྡྷེ༴ དྲི་མེད་ཡིད་དུ༴ ལྷ་རྫས་དམ་པའི་རོལ་མཆོག་འདི། །བླ་མ༴ འགྲོ་བའི༴ ར་ས་ཀ་མ༴ དྲི་མེད༴ ལྷ་རྫས་དམ་པའི་རེག་མཆོག་འདི། །བླ་མ་མཁའ་འགྲོ༴ འགྲོ་བའི༴ འགྲོ་བའི༴ སྤཪྴེ་ཀ་མ་གུ་ཎ་པུ་ཛི་ཏ་ཨཱཿཧཱུྃ། ཞེས་སོ། །ཕྱིའི་མཆོད་པའོ། །ནང་གི་མཆོད་པ། མཆོད་དོ་ཕ་དྲིན་ཅན་རྩ་བའི་བླ་མ། དབང་བསྐུར། རྒྱུད་བཤད། མན་ངག་གནང་བའི་བླ་མ་བརྒྱུད་པ་དང་བཅས་པའི་བླ་མ་རྣམས་ཀྱི་ཞལ་དུ་ༀ་ཨཱཿཧཱུྃ། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ། བཅོམ་ལྡན་ཤཱཀྱ་ཐུབ་པ། འཇམ་དཔལ་སྨྲ་བའི་སེང་གེ། རྗེ་བཙུན་སྒྲོལ་མ། མཁའ་འགྲོ་སུ་ཀ་སིདྡྷི། ཨཱརྱ་དེ་ཝ། དམ་པ་སངས་རྒྱས། སྐྱོ་སྟོན་བསོད་ནམས་བླ་མ། མ་གཅིག་ལབ་ཀྱི་སྒྲོལ་མ། ཁུ་སྒོམ་ཆོས་སེང་། དོལ་པ་ཟང་ཐལ། རྒྱ་ནག་གཅེར་བུ། སངས་རྒྱས་རབ་སྟོན། ཟལ་མོ་དགེ་སློང་། རྟོག་ལྡན་དགེ་སློང་ཟེར། སུམ་པ་རས་པ། ཞེན་མེད་རས་པ་ཟེར། སངས་རྒྱས་སྟོན་པ། བརྩོན་འགྲུས་སེང་གེ་ཟེར། རས་པ་ཆོས་ཀྱི་སེང་གེ། རྡོ་རྗེ་སེང་གེ། ཤེས་རབ་བླ་མ། རྗེ་བཙུན་བཛྲ་ཤྲཱི། རྟོགས་ལྡན་ནམ་མཁའ་རྡོ་རྗེ། སྐྱེས་མཆོག་ཚུལ་ཁྲིམས་རྒྱལ་མཚན། མཚུངས་མེད་ཆོས་ཀྱི་རྡོ་རྗེ། མཁས་གྲུབ་ཛྙཱ་ན་ཀེ་ཏུ། དེ་རྣམས་ཀྱི་ཞལ་དུ་ༀ་ཨཱཿཧཱུྃ། རང་རང་སོ་སོ་བརྒྱུད་པའི་བླ་མ་རྣམས་ལ་འབུལ། གཞན་ཡང་སྡེ་སྣོད་གསུམ། རྒྱུད་སྡེ་བཞིའི་བརྒྱུད་པའི་བླ་མ་རྣམས་ཀྱི་ཞལ་དུ་ༀ་ཨཱཿཧཱུྃ། ༀ་བཛྲ་དྷཀྐི་ནི༴ ཞེས་སོགས་མཁའ་འགྲོ་སྡེ་ལྔའི་རྩ་སྔགས་དང་། གཞན་ཡང་བླ་མ་ཡི་དམ་གང་ཡིན་གྱི་སྙིང་པོའི་མཐར། ༀ་ཨཱཿཧཱུྃ་གིས་འབུལ། ཆོས་སྐྱོང་ལྕམ་དྲལ་ལ་སོགས་རང་རང་གི་ཆོས་སྐྱོང་གང་ཡིན་གྱི་སྙིང་པོ་དང་། རྩ་སྔགས་ཀྱིས་འབུལ། གཞན་ཡང་ཤ་ཟ་མཁའ་འགྲོ། ཞིང་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པ། རིགས་ལ་སྐྱེས་པ། གནས་གསུམ་མཁའ་འགྲོ་དུར་ཁྲོད་ཀྱི་བདག་མོ། གནས་ཉེར་བའི་གནས། ཞིང་ཉེ་བའི་ཞིང་། ཚན་དྷོ་ཉེ་བའི་ཚན་དྷོ། འདུ་བ་ཉེ་བའི་འདུ་བ། དུར་ཁྲོད་ཉེ་བའི་དུར་ཁྲོད། ཐུང་གཅོད་ཉེ་བའི་ཐུང་གཅོད། ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། ཡུལ་ཆེན་བཞི་བཅུ་རྩ་བཞི་ན་བཞུགས་པའི་སྤྲལ་པ་དང་ཡང་སྤྲུལ་བསམ་གྱིས་མི་ཁྱབ་པ་རྣམས་ཀྱི་ཞལ་དུ་ༀ༴ མདོར་ན་རིག་པ་རྒྱལ་པོའི་ཚོགས། ཁྲོ་བོ་ཁྲོ་མོའི་ཚོགས། ཚོགས་བདག་གི་ཚོགས། ཕོ་ཉའི་ཚོགས། བྲན་གྱི་ཚོགས་དང་བཅས་པ་རྣམས་ཀྱི་ཞལ་དུ་ༀ༴ ལྷ་ཆེན་པོ་བརྒྱད། ཀླུ་ཆེན་བརྒྱད། ཕྱོགས་སྐྱོང་བཅུ། རྒྱལ་པོ་ཆེན་པོ་སྡེ་བཞི། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་དགུ། ཆུང་མ་དང་བཅས་པ། འཕྲོག་མ་མ་བུ་ལྔ་བརྒྱ་འཁོར་དང་བཅས་པ་རྣམས་ཀྱི་ཞལ་དུ༴ རྒྱ་གར་རྒྱ་ནག་ལི་ཡུལ་དང་བལ་ཡུལ་རྣམས་དང་། བོད་གངས་ཆེན་ཁྲོད་ཀྱི་གནས་ཁྱད་པར་ཅན་ལ་གནས་པའི་སྲུང་མ་རྣམས་ཀྱི་ཞལ་དུ༴ གཞན་ཡང་མཐའ་འདུལ་གྱི་གཙུག་ལག་ཁང་བརྒྱ་རྩ་བརྒྱད། ཡང་འདུལ་གྱི་གཙུག་ལག་ཁང་སྟོང་རྩ་གཉིས་ལ་གནས་པའི་སྲུང་མ་རྣམས་ཀྱི་ཞལ་དུ། སྟོང་གསུམ་གྱི་འཇིག་རྟེན་གྱི་ཁམས་དང་། འཛམ་བུའི་གླིང་དང་། བོད་ཁམས་སྐྱོང་བའི་བསྟན་མ་བཅུ་གཉིས་འཁོར་དང་བཅས་པ་རྣམས་ཀྱི་ཞལ་དུ༴ བྱེ་བྲག་ཏུ་ཡང་ས་ཕྱོགས་ཡུལ་རིས་འདི་ལ་གནས་པའི་གཞི་བདག་རྣམས་ཀྱི་ཞལ་དུ༴ གཞན་ཡང་རིགས་དྲུག་གི་སེམས་ཅན་ཐམས་ཅད་ཚིམ་པར་གྱུར་ཅིག །ༀ་ཨཱཿཧཱུྃ། སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་རྣམས་སྐུ་ཁམས་བཟང་ཞིང་སྒྲུབ་པ་བསམ་གཏན་མཐར་ཕྱིན་པ་དང་། སེམས་ཅན་རྣམས་བདེ་ཞིང་སྐྱིད་པའི་ཕྲིན་ལས་མཛོད་ཅིག །ལྷ་རྣམས་མཉེས་ནས་རྡོ་རྗེའི་གླུ་གར་བྱེད་པར་བསམ་ཞིང་། ༀ་རྣམ་ལྔ་འདོད་པའི་ཕྱག་རྒྱ་བསྐོར་ཞིང་། ན་མཿསརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ཞེས་བརྗོད་དོ། །གསང་བའི་མཆོད་པ་ནི། གྲུ་མོའི་ཁ་ཊྭཱཾ་ཀ་ཡབ་ཏུ་གྱུར་པས་ཡབ་ཡུམ་ཐམས་ཅད་སྙོམས་པར་བཞུགས་པས་ཟག་མེད་བདེ་བའི་ལྷན་ཅིག་སྐྱེས་པའི་ཡེ་ཤེས་ཀྱིས་ཚིམས་པར་བསམ་ཞིང་། ༼འཁྱུད་པའི་ཕྱག་རྒྱ་བྱས་ལ།༽ༀ་ན་མཿསརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷ་ཝ་ཨཏྨ་ཀོ྅་ཧཾ། དེ་ཁོ་ན་ཉིད་ཀྱི་ནི། མཆོད་བྱ་མཆོད་བྱེད་མཆོད་ཚུལ་གསུམ་རང་བཞིན་མེད་པ་ལ་བློ་མཉམ་པར་བཞག་གོ། །བསྟོད་པ་ནི། གང་གི་དྲིན་གྱིས་བདེ་ཆེན་ཉིད།སོགས། །མ་ཆོས་དབྱིངས།སོགས། རྣམ་རྒྱལ་བུམ་པ་དང་། ལས་བུམ་གཉིས་གཅིག་ཏུ་བསྐྱེད་པ་ནི། ༀ་ཨ་མྲྀ་ཏ་སོགས། ༀ་སྭ་བྷཱ་ཝ་སོགས། སྟོང་པར་གྱུར། སྟོང་པའི་ངང་ལས་པྃ་པྃ་ལས་པདྨ། ཨ་ཨ་ལས་ཟླ་བའི་སྟེང་དུ། བྷྲཱུྃ་བྷྲཱུྃ་ལས་རིན་པོ་ཆེའི་བུམ་པ་ལྟོ་བ་ཡངས་ཤིང་། མགྲིན་པ་ཕྲ་བ། ཞབས་ཞུམ་ཞིང་མཆུ་འཕྱང་བ། དཔག་བསམ་ཤིང་གི་ཁ་རྒྱན་དང་། ལྷའི་གོས་ཀྱིས་འགུལ་པ་དཀྲིས་བ། ཡངས་ཤིང་རྒྱ་ཆེ་བ། དྭངས་ཤིང་ཐོགས་པ་མེད་པ། བཅུད་ཐམས་ཀྱིས་ཡོངས་སུ་གང་བའི་རྣམ་རྒྱལ་བུམ་པར་པདྨ་འདབ་མ་བཞིའི་ལྟེ་བ་དང་འདབ་མ་རྣམས་སུ་ཨ་ལས་ཟླ་བ། རྃ་ལས་ཉི་མ་དང་རོའི་སྟེང་དུ་ཨ་ལས་མཁའ་འགྲོ་སྡེ་ལྔ་བདག་བསྐྱེད་ལྟར་བསྐྱེད། དེའི་མཆན་གཡོན་ཕྱོགས་སུ། ལས་བུམ་གྱི་ནང་དུ་པདྨ་ཉི་མའི་སྟེང་དུ། ཧཱུྃ་ལས་བདུད་རྩི་འཁྱིལ་བ་སྐུ་མདོག་སྔོན་པོ། ཞལ་གཅིག་ཕྱག་གཉིས་སྤྱན་གསུམ་པ། ཞལ་གདངས་ཤིང་མཆེ་བ་བརྩིགས་པ། དབུ་སྐྲ་དམར་སེར་གྱེན་དུ་བརྫེས་པ། ཕྱག་གཡས་པས་སྣ་ཚོགས་རྡོ་རྗེ་ནམ་མཁར་འཕྱར་བ། གཡོན་པས་དེའི་ཡུ་བ་བྱས་པའི་དྲིལ་བུ་འཛིན་པ། ཐུགས་ཀར་སྡིགས་མཛུབ་མཛད་པ། སྟག་ལྤགས་རློན་པའི་ཤམ་ཐབས་ཅན། ཀླུ་ཆེན་པོ་བརྒྱད་ཀྱི་བརྒྱན་པ། ཞབས་གཡས་བསྐུམ། གཡོན་བརྐྱངས་པས་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པ། གནས་གསུམ་གྱི་བྱིན་གྱིས་བརླབས། ཡེ་ཤེས་པ་བསྟིམ། དབང་བསྐུར། མཁའ་འགྲོ་སྡེ་ལྔ་ལ་མི་བསྐྱོད་པས། བདུད་རྩི་འཁྱིལ་པ་ལ་དོན་ཡོད་གྲུབ་པས་དབུ་བརྒྱན། ཡེ་ཤེས་པ་སྤྱན་འདྲེན་དང་མཆོད་པ་འབུལ་བ་ལ་སོགས་བདག་བསྐྱེད་ལྟར་དུས་གཅིག་བྱ། རྣམ་རྒྱལ་བུམ་པའི་བསྟོད་པ་ནི། བདག་བསྐྱེད་ལྟར་བྱ། ལས་བུམ་གྱི་བསྟོད་པ་ནི། བདུད་རྩི་འཁྱིལ་པ་ཁྲོ་བོ་ཆེ། སངས་རྒྱས་ཀུན་གྱི་ཐབས་ཆེན་པོ། མ་རུང་ཐམས་ཅད་བསྒྲལ་མཛད་པ། སྲུང་མཛད་ལྷ་ལ་ཕྱག་འཚལ་བསྟོད། མཁའ་འགྲོ་སྡེ་ལྔ་རང་གིས་སྔགས་དང་། རང་གི་ཐུགས་ཀ་ནས་སྔགས་ཀྱི་འཕྲེང་བ་གཟུངས་ཐག་ལ་བསྟེན་ནས། བུམ་ལྷ་རྒྱུད་བསྐུལ། སྐུའི་ཆ་ཐམས་ཅད་ལས་བདུད་བརྩིའི་ཆུ་རྒྱུན་བབས་ནས་བུམ་པ་ཁེངས་པར་བསམ་ཞིང་། ༀ་སརྦ་ཏ་ཐཱ་ག་ཏ་ཨ་བྷི་ཥི་ཀ་ཏེ་ས་མ་ཡ་ཤྲི་ཡེ་ཧཱུྃ། ༀ་བཛྲ་ཨ་མྲྀ་ཏ་ཀུནྡྷ་ལཱི་ཧ་ན་ཧ་ན་ཧཱུྃ་ཕཊ། མཆོད་བསྟོད། ༼གོང་ལྟར།༽ༀ་ཨཱཿཧཱུྃ་ཞེས་བརྗོད་ནང་དུ་ཆོས་ཀྱི་ཆུ་བླུགས་པས་ལྷ་ཐམས་ཅད་འོད་དུ་ཞུ་བའི་ཆུ་ནུས་ལྡན་དུ་བསམ། ལྷ་དལ་གྱི་བྱ་བ་མ་ཚར་གྱི་བར་དུ་ཕྲིན་ལས་མཛད་ཅིང་བཞུགས་པར་མོས། མ་འབྱོར་བ་དང་༴ ནོངས་པ་བཟོད་གསོལ། ༼ཡི་གེ་བརྒྱ་པས།༽ལྷག་ཆད་ཁ་བསྐང་། ༀ་ཨཱཿཧཱུྃ། ལན་གསུམ། གཏོར་མ་ནི་ནང་༼ནང་མཆོད་ཆུ་དང་ཆང་གི་བྲན་ལ།༽མཆོད་ལྟར་བྱིན་གྱིས་བརླབས། རང་གི་ཐུགས་ཁ་ནས་འོད་ཟེར་འཕྲོས་པས་འཁོར་འདས་ཐམས་ཅད་སྤྱན་དྲངས་ནས་མདུན་བསྐྱེད་ལ་ཐིམ་པས། ཐམས་ཅད་བླ་མ་ཡི་དམ་ལྷའི་ངོ་བོར་གྱུར་པའི་ཞལ་ནས་འོད་ཀྱི་སྦུ་གུ་བྱུང་ནས་གཏོར་མ་གསོལ་བར་བསམ་ཞིང་། ཐལ་མོ་ཁ་གྱེན་དུ་ཕྱོགས་ཞིང་། མ་ཧཱ་གུ་རུ་དྷ་ཀི་ནི་ས་པཱ་རི་ཝཱ་ར་ཨི་དཾ་བྷ་ལིངྟ་ཁ་ཁ་ཁ་ཧི་ཁཱ་ཧི། ༀ་ཨཱཿཧཱུྃ་སྭཱ་ཧཱ། ཞེས་ལན་གསུམ་འབུལ། ཁམས་གསུམ་མ་ལུས་ཞིང་ཁམས་ནས། སྐུ་གསུམ་འཁོར་འདས་ཐུགས་རྗེའི་མགྲོན། སྟོང་གསུམ་བདུད་རྩིས་བཀང་བའི་རྫས་གཏོར་མ་འདོད་ཡོན་ལྔ་རུ་བསྔོ། ཨརྒྷཾ༴ ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད། གང་གི་དྲིན་གྱིས་སོགས་དང་། མ་ཆོས་དབྱིངས་ཞེས་སོགས་ཀྱིས་བསྟོད། བླ་མ་མཁའ་འགྲོ་སྡེ་ལྔའི་ཚོགས། །འདིར་གཤེགས་བདག་ལ་དགོངས་སུ་གསོལ། །ཅེས་སོགས་བརྗོད་ཅིང་ཕྲིན་ལས་གཞོལ་ཅེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གོང་གི་སྔོན་འགྲོ་གཏོར་མའི་སྐབས་ལྟར་བྱ། ཡི་དམ་གཉིས་པ་དང་། ༼གཏོར་མ་ཀྱིས་པ།༽ཆོས་སྐྱོང་རྣམས་ལ་རང་གི་གཏོར་ཆོག་གི་བསྔོ། ༼འོག་མ་ཆོས་སྐྱོང་།༽ ༼དམ་ཆེན་རྒྱ་མཚོའི་ཚོགས་ལ་འབུལ་ནས།༽མགྲོན་སྤྱི་གཏོར། འཕྲོག་མ་གཞི་བདག་ལ་བསྔོས་ལ་བཀའ་བསྒོ་བྱ། ༈ ཁྱད་པར་གྱི་ཚོགས་ལ་ལྔ། ཚོགས་ཀྱི་ཡོ་བྱད་གསོག་པ། ཚོགས་བྱིན་གྱིས་བརླབ་པ། འབུལ་བ། བསྒྲལ་མཆོད་བྱ་བ། ཕྱི་ནང་གི་མཁའ་འགྲོ་མ་རྣམས་ཚོགས་ལ་རོལ་བའོ། །དང་པོ་ནི། དེར་འདུས་པའི་རྣལ་འབྱོར་ཕོ་མོ་རྣམས། གདན་ཐོག་གཅིག་མ་ལྟར། ནམ་མཁའ་སྒོ་འགྱེད་ཀྱི་དམིགས་པས་བེམ་རིག་ཕྲལ། དབྱིངས་རིགས་བསྲེས་ལ། རོ་བསྲེས་དང་དབྱིངས་བསྲེས་བསྡེབ་པར་བྱའོ། །རང་གཞན་གྱི་རོ་ཆེ་ལ་ཚོ་བ་སྣུམ་ཞིང་ཡིད་དུ་འོང་བ། དེའི་མདུན་དུ་རང་གི་རྣམ་ཤེས་རྗེ་བཙུན་མ་དམར་མོ་གྲི་གུག་དང་ཐོད་པ་འཛིན་པའི་གྲི་གུག་གིས་མགོ་བོ་རྦད་རྦད་ལན་གསུམ་བཅད་ནས་སྒྱེད་པོར་བཙུག་པའི་ཁར། སྨིན་མཚམས་ནས་བདུད་སྒོའི་བར་སྐད་ཅིག་གིས་བྲག་ནས། དཔྲལ་བ་རང་ལ་བསྟན་པ། བསྐལ་པའི་འཇིག་རྟེན་གྱི་ཁམས་དང་མཉམ་པར་གྱུར་པའི་ནང་དུ། ཤའི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་ཆེན་པོ་བྱང་སེམས་དཀར་དམར་གྱིས་བྲན་པར་བསམ། དེ་དང་ཚོགས་ཀྱི་རྫས་གཉིས་སུ་མེད་པར་གྱུར་པར་བསམ། བྱིན་རླབས་ནི་ནང་མཆོད་ལྟར་བྱས་ལ། འབུལ་བ་ནི། སྔར་སྤྱན་འདྲེན་པའི་སྐབས་བླ་མ་ཡི་དམ་མཁའ་འགྲོ་གསུམ། །ཞེས་སོགས་ཅི་ལྟ་བ་བཞིན་བརྗོད་ལ། གནས་འདིར་སྤྱན་འདྲེན་སོགས་ཀྱི་མལ་དུ། འདིར་གཤེགས་ཚོགས་ཀྱི་མཆོད་པ་བཞེས། །གནས་ཁང་རིན་ཆེན་འབར་བ་འདི། །འོག་མིན་གནས་སུ་བྱིན་གྱིས་རློབས། །འོག་ཏུ་དགོངས་བསྐྱོད་མའི་སྐབས་སུ་ཨོ་རྒྱན་གནས་སུ་ཞེས་སོགས་མཆན་གོང་ལྟར་འདོན་པ་བསྒྱུར། མཎྜལ་འདི་ལ་བཞུགས་སུ་གསོལ། །མར་མེ་འདི་ལ་མདངས་ཤིག་ཕྱུངས། །ཚོགས་འཁོར་འདི་ལ་བཅུད་ཅིག་ཕོབ། །སློབ་མ་རྣམས་ལ་བྱིན་གྱིས་རློབས། །དབང་བསྐུར་ན་སློབ་མ་རྣམས་ལ་དབང་བསྐུར་ཅེས་བརྗོད་དོ། །རིན་ཆེན་ལ་སོགས་སྣོད་རྣམས་ཀུན། །མཚན་ལྡན་ཐོད་པར་བྱིན་གྱིས་རློབས། །ཚོགས་ཀྱི་མཆོད་པ་རྒྱ་ཆེན་འདི། །ཡེ་ཤེས་བདུད་བརྩིར་བྱིན་གྱིས་རློབས། །ཟག་མེད་ཀྱི་བདུད་རྩིར་བྱིན་གྱིས་རློབས། འདིར་ཚོགས་རྣལ་འབྱོར་ཕོ་མོ་རྣམས། །དཔའ་བོ་མཁའ་འགྲོ་དཔའ་མོར་དེ་ནས། རྒྱུད་སྨིན་ཅིང་གྲོལ་བར་བྱིན་གྱིས་རློབས། །རྐྱེན་ཕྱི་ནང་གཉིས་ཀྱི་བར་ཆད་སོལ། །མཆོག་ཐུན་མོང་གཉིས་པར་བར་གྱི་ཚིག་ཁ་གྱུར། ཀྱི་དངོས་གྲུབ་སྤྲོ་ན་སྩོལ། །གནས་འོག་མིན་ཆོས་དབྱིངས་ཕོ་བྲང་ནས། །ཞེས་པ་ནས། སྡེ་སྣོད་རྒྱུད་སྡེའི་བླ་མ་རྣམས། །མ་ཡུམ་ཆེན་གཟུགས་ཀྱི་མཆོད་པ་ཁྱད་པར་འཕགས། །ཞེས་སོགས་བྱ། ཐུགས་ལས་སྤྲུལ་པའི་སྲས། །ཞེས་པ་ཡན་ཆད་ཀྱི་མཚན་གསུམ་པོ་དེ། གོང་ལྟར་ཚིག་ཁ་བསྒྱུར་ནས་བརྗོད། །དེ་ནས་ཡུམ་ཆེན་ཐུགས་ལས་སྤྲུལ་པའི་སྲས། །ཞེས་སོགས་དགོངས་བསྐྱོད་མ་བྱེད། དེ་ནས་གར་བཞུགས་དག་པའི་ཞིང་ཁམས་ནས། །ཞེས་པ་ནས། དམ་ཆེན་རྒྱ་མཚོའི་ཚོགས་ཀྱིས་བསྐང་། །ཞེས་པ་ཡན་ཆད་བརྗོད་པ་ལས། ཁྱད་པར་དུ་མ་གཅིག་མཁའ་འགྲོ་སྡེ་ལྔ་ལ་ཚོགས་འབུལ་བ་ནི། རྣལ་འབྱོར་ཕོ་མོ་རྣམས་རིག་པ་སྐྱེ་མེད་ཀྱི་ངང་ནས་འགག་མེད་ཀྱི་ངང་ཉམས་མྱོང་དང་ལྡན་པས། ཌཱ་མ་རུ་དང་རྐང་གླིང་ལ་སོགས་བསྒྲག་ཅིང་། མ་གཅིག་ཇོ་མོ་རྣལ་འབྱོར་མ། །ཕ་རོལ་ཕྱིན་མའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །གསང་སྔགས་ཀུན་གྱི་བརྒྱུད་འཛིན་མ། །དུས་གསུམ་སངས་རྒྱས་གདུང་འཛིན་མ། །མ་བདག་དང་མཁའ་མཉམ་སེམས་ཅན་ལ། །ཐུགས་རྗེས་དགོངས་ལ་གནས་འདིར་གཤེགས། །ཚོགས་དང་གཏོར་མ་བཞེས་སུ་གསོལ། །གནས་ཁང་རིན་ཆེན་འབར་བ་འདི། །འདི་མན་ཆད་སྔར་དང་འདྲ། མ་སྐྱེས་བ་དམའ་ལ་དགོངས་པ་མཐོ། །སྐུ་ལུས་ཆུང་ལ་གཟི་བརྗིད་ཆེ། །སྐུ་མདོག་དཀར་ལ་འོད་ཟེར་འབར། །ཀུན་དང་མཐུན་པའི་སྤྱོད་པ་ཅན། །མ་བདག་དང་མཁའ་མཉམ་སེམས་ཅན་ལ། །དེ་མན་ཆད་སྔར་དང་འདྲ། མ་སེར་སྣ་མེད་པའི་དོན་རྟོགས་ནས། །ཀུན་ཁྱབ་ཀྱི་སྦྱིན་པ་བློས་ཐེང་མ། །རང་སེམས་ཡེ་ཤེས་དོན་རྟོགས་ནས། །ཉམས་པ་མེད་པའི་ཁྲིམས་བསྲུང་མ། །བདག་གཞན་མེད་པའི་དོན་རྟོགས་ནས། །སྐྱེ་མེད་བཟོད་པ་བསྒོམ་མཛད་མ། །བྱ་བཙལ་མེད་པའི་དོན་རྟོགས་ནས། །འབད་མེད་བརྩོན་འགྲུས་བརྩམ་མཛད་མ། །ཡེང་བ་མེད་པའི་དོན་རྟོགས་ཤིང་། །ཡེངས་མེད་བསམ་གཏན་བསྒོམ་མཛད་མ། །འཁོར་འདས་མེད་པའི་དོན་རྟོགས་ནས། །བདག་མེད་རྟོགས་པའི་ཤེས་རབ་ཅན། །མ་བདག་དང་མཁའ་མཉམ་སོགས་སྔར་བཞིན། མ་དགོངས་པ་ཤར་དུ་བསྐྱེད་ཙམ་ན། །དོན་འགྱུར་བ་མེད་པའི་ཉམས་དང་ལྡན། །རྡོ་རྗེ་མཁའ་འགྲོ་འབུམ་གྱིས་བསྐོར། །སྐུ་མདོག་སྔོན་མོ་གཟི་མདངས་ཅན། ༈ །མ་བྱིན་རླབས་ཀྱི་ན་བུན་འཐིབས་སེ་འཐིབ། །གདམས་ངག་གི་སྦྲང་ཆར་སི་ལི་ལི། །ཉམས་མྱོང་གི་མགུར་མ་འུ་རུ་རུ། །རུས་པའི་རྒྱན་ཆ་ཁྲ་ལ་ལ། །ཞབས་ཀྱི་བྲོ་བརྡུང་ཁྲིགས་སེ་ཁྲིག །ཕཊ་ཀྱི་བརྡའ་སྐད་སང་སེ་སང་། །ཞེས་ཚིག་རྐང་དྲུག་པོ་འདི་ཕྱོགས་བཞི་དབུས་དང་ལྔ་ལ་སྦྱར། མ་དགོངས་པ་ལྷོ་རུ་བསྐྱོད་ཙམ་ན། །ཡོན་ཏན་རྫོགས་པའི་ཉམས་དང་ལྡན། །རིན་ཆེན་མཁའ་འགྲོ་འབུམ་གྱིས་བསྐོར། །སྐུ་མདོག་སེར་མོ་གཟི་མདངས་ཅན། །མ་བྱིན་རླབས་སོགས་འགྲེ། མ་དགོངས་པ་ནུབ་ཏུ་བསྐྱེད་ཙམ་ན། །དོན་གདོད་ནས་དག་པའི་ཉམས་དང་ལྡན། །པདྨ་མཁའ་འགྲོ་འབུམ་གྱིས་བསྐོར། །སྐུ་མདོག་དམར་མོ་གཟི་མདངས་ཅན། །མ་བྱིན་རླབས་ཀྱི་སོགས་འགྲེ། མ་དགོངས་པ་བྱང་དུ་བསྐྱོད་ཙམ་ན། །དོན་ཕྲིན་ལས་གྲུབ་པའི་ཉམས་དང་ལྡན། །ལས་ཀྱི་མཁའ་འགྲོ་འབུམ་གྱི་བསྐོར། །སྐུ་མདོག་ལྗང་མོ་གཟི་མདངས་ཅན། །མ་བྱིན་རླབས་ཀྱི་སོགས། མ་དགོངས་པ་དབུས་སུ་བསྐྱེད་ཙམ་ན། །དོན་སྐྱེ་འགག་མེད་པའི་ཉམས་དང་ལྡན། །སངས་རྒྱས་མཁའ་འགྲོ་འབུམ་གྱིས་བསྐོར། །སྐུ་མདོག་དཀར་མོ་གཟི་དམངས་ཅན། །མ་བྱིན་རླབས་ཀྱི་སོགས། མ་གཉན་ས་རི་ཁྲོད་འགྲིམ་ཙ་ན། །གནད་ཀྱི་གདམས་པ་ཤ་ར་ར། །བདུད་ཀྱི་གཅོད་ཐབས་སི་ལི་ལི། །མཁའ་འགྲོ་མང་པོ་དཔུངས་སེ་དཔུང་། །མ་བདག་དང་༴ མན་ཆད་སྔར་དང་འདྲ། མ་གཡའ་རི་གངས་རི་འགྲིམ་ཙ་ན། །ལྟ་བའི་འབྲུག་སྒྲ་དི་རི་རི། །སྒོམ་པའི་གློག་དམར་ཁྱུགས་སེ་ཁྱུག །སྤྱོད་པའི་ཐོག་མདའ་ཤ་ར་ར། །འབྲས་བུའི་ཆར་རྒྱུན་སི་ལི་ལི། །དར་གྱི་ཅོད་པན་པུ་རུ་རུ། །མི་རྐང་གི་གླིང་བུ་ཀྱུ་རུ་རུ། །བྷནྡྷ་ཅང་ཏེལ་ཁྲ་ལ་ལ། །དྲིལ་བུ་གཡེར་ཀ་སི་ལི་ལི། །གླུ་ལེན་གར་བྱེད་ཁྱུགས་སེ་ཁྱུག །སྟེང་དེར་ལྷ་ཚོགས་ཐིབས་སེ་ཐིབ། །འོག་དེར་གདོན་ཚོགས་མྱ་ལ་ལ། །བར་དེར་དྷ་ཀི་ཤིགས་སེ་ཤིག །མ་བདག་དང་སོགས། ཕྱི་གཉིས་འཛིན་གྱི་ལྟ་བ་ཕྱ་ལ་ལ། །ནང་གཉིས་མེད་ཀྱི་རྟོགས་པ་ཁྲ་ལ་ལ། །བར་གཟུང་འཛིན་གྱི་རྒྱ་མདུད་ཤིགས་སེ་ཤིག །ཐུགས་འོད་གསལ་ཆོས་སྐུ་ཡ་ལ་ལ། །དོན་བདེ་སྟོང་རྒྱུད་ལ་སི་ལི་ལི། །ཕཊ་ཀྱི་བརྡའ་སྐད་སངས་སེ་སང་། །མ་བདག་དང་༴ མན་ཆད་སྔར་འདྲ། མ་ལ་ལས་ཆོས་ཀྱི་གྷཎྜི་བརྡུང་། །མ་ལ་ལས་ཆོས་ཀྱི་བགྲོ་གླེང་བྱེད། །མ་ལ་ལས་སྐྱེ་མེད་ངང་དུ་བཞུགས། །མ་ལ་ལས་སྒྲུབ་བརྒྱུད་སྤྱོད་པ་མཛད། །མ་ལ་ལས་བརྟུལ་ཞུགས་སྤྱོད་པ་མཛད། །མ་ལ་ལས་འདོད་ཡོན་གྱི་མཆོད་པ་འབུལ། །མ་ལ་ལས་ཚོགས་ཀྱི་འཁོར་ལོ་བསྐོར། །མ་ལ་ལས་མི་རྐང་གི་གླིང་བུ་འབུད། །མ་ལ་ལས་ཌཱ་རུ་ཅང་ཏེལ་དཀྲོལ། །མ་ལ་ལས་ཤ་ཆེན་དུད་པ་གཏོང་། །མ་ལ་ལས་ཚིལ་ཆེན་གྱི་སྒྲོན་མེ་སྦར། །དགོངས་བསྐྱོད་མ་འདི་གལ་ཆེ་ན་མིན་པ་མི་བསྐུལ། གཅོད་དབང་མི་ཐོབ་པའི་སར་མི་བྱ། བྱས་ན་མཁའ་འགྲོའི་ཆད་པ་འབྱུང་བར་གསུངས། མ་བདག་དང་མཁའ་མཉམས་སེམས་ཅན་རྣམས། །གཟུགས་ཀྱི་མཆོད་པ་ཁྱད་པར་འཕགས། །ཞེས་པ་ནས། ཀུན་ཀྱང་སངས་རྒྱས་ཐོབ་པར་ཤོག །ཅེས་པ་ཡན་ཆད་བརྗོད། བསྒྲལ་མཆོད་མི་བྱེད་ན། གཟུགས་ཀྱི་མཆོད་པ་ཁྱད་པར་འཕགས། །ཞེས་པ་མན་ཆད་གཞུང་བསྲང་ངོ་། །བསྒྲལ་མཆོད་འབུལ་བ་ནི། ཟན་ནམ། ཤའམ། གྲོ་ཤོག་ལ་གཟུགས་བྱས་པའི་སྙིང་ཁར་ཏྲི་བྲིས། རང་དང་མདུན་བསྐྱེད་ཀྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཁོ་གར་གནས་པ་རང་དབང་མེད་པར་བཀུག་པར་བསམ་ཞིང་། འདོད་པའི་རྒྱལ་པོའི་ཕྱག་རྒྱ་བཅས་ལ་རིག་པ་ངར་བསྐྱེད་ལ་འདི་སྐད་དོ། །ན་མོ་རྗེ་བཙུན་དམ་རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱི་བཀའ་བདེན་པ་དང་། ཕ་བརྒྱུད་དཔའ་བོ་མ་བརྒྱུད་དཔའ་མོ། སྲས་བརྒྱུད་ཉམས་མྱོང་གི་ལྷ་ཚོགས་སྟེ་གཅོད་ཡུལ་བརྒྱུད་པའི་བླ་མ་རྣམས༴ བཀའ་སྡོད་དམ་པ་ཆོས་སྐྱོང་བའི་སྲུང་མ༴ ཆོས་ཉིད་རྣམ་པར་དག་པའི་བདེན་པ་ཆེན་པོ་རྣམས་ཀྱི་བདེན་པའི་མཐུ་དང་། ཐུགས་རྗེ་རྣམ་པར་དག་པའི་བདེན་པས། བླ་མའི་སྐུ་དགྲ། སངས་རྒྱས་ཀྱི་བསྟན་དགྲ། དམ་ཚིག་ཅན་གྱི་སྡང་དགྲ། ཆོས་མཛད་སྒྲུབ་པ་པོ་རྣམས་ཀྱི་སྒྲུབ་པ་དང་བསོད་ནམས་ལ་བར་དུ་གཅོད་པར་བྱེད་པ། སེམས་ཅན་ཡོངས་ལ་གནོད་འཚེ་བྱེད་པ་རྣམས་དང་། ཁྱད་པར་དུ་ཆེ་གེ་མོའི་ཁྱིམ་སྒོ་ལམ་སྲང་དུ་མི་ནོར་ཟས་གསུམ་ལ་གནོད་ཅིང་འཚེ་བར་བྱེད་པ་བར་དུ་བཅད་པ་གང་ཡིན་པ་དེ་དག་ཐམས་ཅད། ཁམས་གསུམ་རིགས་དྲུག་སྐྱེ་གནས་བཞི་གར་གནས་ཀྱང་སྐད་ཅིག་ལ་གཟུགས་ལིངྒ་འདི་ལ་མཆིས་པར་གྱུར་ཅིག །དེ་དག་གི་བདེན་པས་བཀུག་ལ་གཟུགས་ལ་ཐིམ་པར་བསམ་ཞིང་། བཛྲ་ཌཱཀྐི་ནི་ཧཱུྃ་ཛཿ མཁའ་འགྲོ་བཞི་ཕྱིར་ཚོགས་པས་ཕྱོགས་བཅུར་སྤྲོས་ནས་བཀུག་པར་བསམ་ཞིང་། ཧཱུྃ་ཡུམ་ཆེན་ཐུགས་ཀྱི་སྤྲུལ་པ་ལས། །ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུའི། །ཕྱོགས་རྣམས་ཀུན་ནས་དགྲ་དང་བགེགས་བཀུག་མ། །སྣ་ཚོགས་རིགས་ཀྱི་མཁའ་འགྲོ་འབུམ། །སྐུ་མདོག་སྣ་ཚོགས་གཟི་མདངས་ཅན། །མཁའ་འགྲོ་མང་པོ་ཕོ་ཉར་འགྱེད། །མཁའ་འགྲོ་མང་པོ་བྲན་དུ་བཀོལ། །མཁའ་འགྲོ་མང་པོ་ས་ལྟར་གཡོ། །མཁའ་འགྲོ་མང་པོ་ཆུ་ལྟར་འཁྱིལ། །མཁའ་འགྲོ་མང་པོ་མེ་ལྟར་འབར། །མཁའ་འགྲོ་མང་པོ་རླུང་ལྟར་འཚུབས། །གཡས་པས་མཚོན་ཆ་སྣ་ཚོགས་བསྣམས། །གཡོན་པ་བྷནྡྷ་ཁྲག་བཀང་གསོལ། །དགྲ་བགེགས་སྙིང་ནས་དྲངས་ཤིང་ཁུག །རིངས་པར་ཁུག་ལ་མྱུར་དུ་སྒྲོལ། །དམ་ཉམས་ལས་ངན་སྡིག་ཅན་འདི། །བྱང་བུ་དཀར་ལ་བྲིས་པ་འདི། །ལིངྒ་དམར་ལ་བསྐྱོན་པ་འདི། །མིང་དང་རུས་ནས་སྨོས་པ་འདི། །ནམ་མཁའི་དབྱིངས་ན་གནས་ཀྱང་རུང་། །ནམ་མཁའི་དབྱིངས་ནས་ཁུག་ལ་ཤོག །རྒྱལ་མཚོའི་གཏིང་ནས་གནས་ཀྱང་རུང་། །རྒྱལ་མཚོའི་གཏིང་ནས་ཁུག་ལ་ཤོག །གངས་རིའི་རྩེ་ན་གནས་ཀྱང་རུང་། །གངས་རིའི་རྩེ་ནས་ཁུག་ལ་ཤོག །ཆུ་བོའི་གཞུང་ན་གནས་ཀྱང་རུང་། །ཆུ་བོའི་གཞུང་ནས་ཁུག་ལ་ཤོག །བྲག་དམར་ལོགས་ལ་གནས་གྱུར་ཀྱང་། །བྲག་དམར་ལོགས་ནས་ཁུག་ལ་ཤོག །རྩི་ཤིང་ནགས་ཚལ་གསེབ་ནས་ཁུག་ལ་ཤོག །ལས་ཀྱི་རླུང་དམར་དྲག་པོས་རྒྱབ་ནས་འཕུལ། །འཇིག་བྱེད་ལྕགས་ཀྱུས་སྙིང་ནས་དྲོངས། །གནམ་གྱི་འཇུ་ཐག་ཆོད་ལ་ཞོག །ས་ཡི་རྟེན་ཕུར་ཕུད་ལ་ཤོག །ལིངྒ་འདི་ལ་མྱུར་དུ་ཕོབ། །བྱང་བུ་འདི་ལ་མྱུར་དུ་སྐྱོན། །རིངས་པར་ཁུག་ལ་མྱུར་དུ་སྒྲོལ། །རྟགས་དང་མཚན་མ་ད་ལྟ་སྟོན། །ཅེས་སྒོ་མ་བཞིའི་སྔགས་བརྗོད་ཅིང་། དགུག་གཞུགས་བྱེད་ཅིང་དབང་དུ་བྱ། རྒྱས་པར་སྤྲོ་ན་ཡུམ་ཆེན་ལ་མཁའ་འགྲོ་སོ་སོ་གྲངས་མེད་པར་སྤྲོས་ནས། དེ་དག་བཀུག་པར་བསམ་ཞིང་། ཧཱུྃ། ཡུམ་ཆེན་ཐུགས་ཀྱི་སྤྲུལ་པ་ལས། །ཞེས་པས་ཕྱོགས་བཞི་ཀུན་ལ་སྦྱར། ཤར་གྱི་ཕྱོགས་ནས་དགྲ་དང་བགེགས་བཀུག་མ། །རྡོ་རྗེ་རིགས་ཀྱི་མཁའ་འགྲོ་མ། །སྐུ་མདོག་སྔོན་མོ་གཟི་བརྗིད་འབར། །གཡས་པས་ལྕགས་ཀྱི་གྲི་གུག་བསྣམས། །གཡོན་པས་བྷནྡྷ་བདུད་བཞི་ཁྲག་བཀང་བསྣམས་སོགས། ལྷོ་ཡི་ཕྱོགས་ནས་དགྲ་དང་བགེགས་བཀུག་མ། །རིན་ཆེན་རིགས་ཀྱི་མཁའ་འགྲོ་མ། །སྐུ་མདོག་སེར་མོ་གཟི་བརྗིད་འབར། །གཡས་པས་གསེར་གྱི་གྲི་གུག་བསྣམས། །གཡོན་པས་བྷནྡྷ་བདུད་བཞིའི་ཁྲག་བཀང་བསྣམས། །ནུབ་ཀྱི་ཕྱོགས་ནས་དགྲ་དང་བགེགས་བཀུག་མ། །པདྨ་རིགས་ཀྱི་མཁའ་འགྲོ་མ། །སྐུ་མདོག་དམར་མོ་གཟི་བརྗིད་འབར། །གཡས་པས་ཟངས་ཀྱི་གྲི་གུག་བསྣམས། །གཡོན་པས་བྷནྡྷ་བདུད་བཞིའི་ཁྲག་བཀང་བསྣམས། །བྱང་གི་ཕྱོགས་ནས་དགྲ་དང་བགེགས་བཀུག་མ། །ལས་ཀྱི་རིགས་ཀྱི་མཁའ་འགྲོ་མ། །སྐུ་དམོག་ལྗང་མོ་གཟི་བརྗིད་འབར། །གཡས་པས་རལ་གྲི་འབར་བ་བསྣམས། །གཡོན་པས་བྷནྡྷ་བདུད་བཞིའི་ཁྲག་བཀང་བསྣམས། །ཞེས་སྦྱར། ཁོ་ལྷ་དང་དབྱེ་བ་ནི། ཧཱུྃ་ང་ཡིས་མ་ཉེས་ཁོ་ཡིས་ཉེས། །ང་ནི་མ་ཉེས་མ་གཡོའོ། །དཀོན་མཆོག་གསུམ་གྱིས་གཟུ་དཔང་མཛོད། །དམ་ཉམས་ལས་ངན་སྡིག་ཅན་འདི། །བླ་མ་རྣམས་ཀྱི་སྐུ་ལ་བསྡོས། །བླ་མ་རྣམས་དང་ཕྱེས་ལ་ཤོག །དཀོན་འདི་ཡིས་བསྡོས། །དཀོན་མཆོག་དང་ཕྱེས་ལ་ཤོག །ཡི་དམ་ལྷ་ལ་འདི་ཡིས་བསྡོས། །ཡི་དམ་ལྷ་དང་ཕྱེས་ལ་ཤོག །ཆོས་སྐྱོང་སྲུང་མ་རྣམས་ལ་འདི༴ ཆོས་སྐྱོང་སྲུང་མ་རྣམས་དང་ཕྱེས༴ འགོ་བའི་ལྷ་ལ་འདི་ཡིས༴ འགོ་བའི་ལྷ་དང་ཕྱེས༴ སྐྱོབ་པའི་ལྷ་ལ་འདི༴ སྐྱོབ་པའི་ལྷ་དང་༴ ཕ་མེས་བརྒྱུད་ཀྱི་ལྷ་ལ༴ ཕ་མེས་བརྒྱུད་ཀྱི་ལྷ་དང་༴ ལེའུའི་ལྷ་ལ་འདི༴ ལེའུའི་ལྷ་དང་ཕྱེས༴ མ་ལྷ་ཞང་ལྷ་རྣམས་ལ་འདི༴ མ་ལྷ་ཞང་ལྷ་རྣམས་དང་ཕྲོལ། །ཡུམ་ལྷ་བཞི་བདག་རྣམས་ལ་འདི་ཡིས་བསྡོས། །ཡུལ་ལྷ་གཞི་བདག་རྣམས་དང་ཕྱེས་ལ་ཤོག །ཅེས་བརྗོད་ཅིང་འགོ་བའི་ལྷ་དང་སྐྱོབ་པའི་ལྷ་དང་འཕྲལ། ཕུར་པ་བསྐྱེད་ཆོག་ནི། ནང་མཆོད་གཏོར་ཞིང་ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་པྃ་ལས་པདྨ། རྃ་ལས་ཉི་མའི་སྟེང་དུ། ཨ་ཡིག་སྔོན་མོ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། སྐུ་སྟོད་ཁྲོས་མ་ནག་མོ་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་བཞི་བརྩིགས་པ། སྤྱི་བོ་ན་ཕག་ཞལ་ནག་པོ་ཐོན་པ། ཁམས་གསུམ་དབང་དུ་སྡུད་པ། སྲིད་གསུམ་ཟིལ་གྱིས་གནོན་པ། ནུས་པའི་ངུར་སྒྲ་དྲག་པོ་སྒྲོགས་པ། གཡས་པས་རྡོ་རྗེས་ཡུ་བ་བྱས་པའི་གྲི་གུག་ནམ་མཁར་འཕྱར་བ། གཡོན་པས་བདུད་བཞིའི་ཁྲག་གིས་བཀང་བའི་ཐོད་པ་ཐུགས་ཀར་འཛིན་པ། སྐུ་སྨད་གནམ་ལྕགས་ཀྱི་ཕུར་པ་ཟུར་གསུམ་པ། རྣོ་བའི་ངར་དང་ལྡན་པ། དགྲ་བགེགས་བསྒྲལ་བའི་ནུས་མཐུ་ཕུན་སུམ་ཚོགས་པ་དང་ལྡན་པ། དེ་ཡི་དཔྲལ་བར་ༀ་ལ་སོགས་གནས་གསུམ་བྱིན་གྱིས་རློབས། ཕུར་པ་བསྐྱེད་མཆོག་འདི་མདུན་བསྐྱེད་ཀྱི་སྐབས་སུ་བྱ་སྟེ། དེ་ཡང་དང་པོ་མདུན་བསྐྱེད་ཀྱི་དམ་ཚིག་པ་བསྐྱེད། དེ་ནས་ཕུར་པའི་དམ་ཚིག་པ་བསྐྱེད། དེ་ནས་སྤྱན་འདྲེན་མཆོད་བསྟོད་ལ་སོགས་དུས་གཅིག་ཐུན་མོང་དུ་བྱའོ། །དེ་ནས་བསྒྲལ་བ་ནི། གོང་དུ་བསྐྱེད་པའི་ཕུར་པའམ། མཚོན་རྣོན་པོ་ཐོགས་ལ། འདེབས་པའི་ཚུལ་བྱ་ཞིང་། དམ་ཉམས་ལས་ངན་སྡིག་ཅན་འདི། །དབང་པོ་རྣམ་ལྔ་མགོ་ལ་ཚང་། །ཀླད་པའི་དཀྱིལ་དུ་ཀཱི་ལ་ཡ། །དམ་ཉམས་ལས་ངན༴ འགྲེལ་སོ། ལྟ་བར་བྱེད་པ་མིག་ཡིན་ཏེ། །མིག་གི་གཡས་གཡོན་ཀཱ་ལ་ཡ། །དམ་ཉམས༴ ཉན་པར་བྱེད་པ་རྣ་བ་ཡིན། །རྣ་བ་གཡས་གཡོན་ཀཱི་ལ་ཡ། །དམ་ཉམས༴ སྣོམ་པར་བྱེད་པ་སྣ་ཡིན་ཏེ། །སྣ་ཡི་དཀྱིལ་དུ༴ དམ་ཉམས༴ མྱོང་བར་བྱེད་པ་ལྕེ་ཡིན་ཏེ། །ལྕེ་ཡི་དཀྱིལ་དུ༴ དམ་ཉམས༴ སྙབ་པར་བྱེད་པ་ལག་པ་ཡིན། །སོག་པ་གཡས་གཡོན༴ དམ་ཉམས༴ འགྲོ་བ་བྱེད་པ་རྐང་པ་ཡིན། །བརླ་རྩ་གཡས་གཡོན༴ དམ་ཉམས༴ འཁོར་བར་བྱེད་པ་གསང་གནས་ཏེ། །གསང་བའི་གནས་སུ༴ དམ་ཉམས༴ སྐྱེད་པར་བྱེད་པ་ལྟེ་བ་ཡིན། །ལྟེ་བའི་དཀྱིལ་དུ་ཀཱི་ལ་ཡ། །དམ་ཉམས༴ བསམ་པར་བྱེད་པ་སྙིང་ཡིན་ཏེ། །ཙིཏྟའི་དཀྱིལ་དུ་ཀཱི་ལ་ཡ། །ༀ་བཛྲ་ཀི་ལི་ཀཱི་ལ་ཡ་སརྦ་བིག྄་ནན་བྃ་ཧཱུྃ་ཕཊ། ༀ་བཛྲ་དྷ་ཀྐི་ནི་ཧཱུྃ། ཞེས་བརྗོད་ནས་སྙིང་དཀར་ནག་མཚམས་སུ་བརྒྱབ་པས། བེམ་རིག་འཕྲལ་ནས་རྣམ་པར་ཤེས་པ་སྤར། ལིང་རོ་དེ་ལ་ༀ་ཨཱཿཧཱུྃ་གི་ཟག་མེད་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས། དམིགས་པས་ཚོགས་དང་དབྱེར་མེད་དུ་གྱུར་པར་དམིགས་ལ། ཚོགས་ཟན་དང་ཆོས་སྐྱོང་གཏོར་མ་རྣམས་ནད་པའི་སྟེང་དུ་བཞག་ནས། རྣལ་འབྱོར་ཕོ་མོ་རྣམས་ཀྱིས་བཏེག་ལ་དམིགས་པ་གསལ་པོས་བསྟབ་པ་བྱེད་དེ། ཧཱུྃ་བླ་མ་ཡི་དམ་མཁའ་འགྲོ་གསུམ། །རང་རང་གནས་ནས་སྐུ་ཡར་བཞེངས། །ནམ་མཁའ་ཙམ་གྱི་ཞལ་ཚུར་ཕྱེས། །གློག་དམར་ཙམ་གྱི་ལྗགས་ཚུར་རྐྱོངས། །གངས་རི་ཙམ་གྱི་མཆེ་བ་གཙིགས། །ཉི་ཟླ་ཙམ་གྱི་སྤྱན་ཡར་ཕྱེས། །དགྲ་བགེགས་བསྒྲལ་བའི་ཤ་ཁྲག་རུས། །འདོད་ཡོན་རྣམ་པ་ལྔ་རུ་སྤྲུལ། །ཟག་མེད་བདུད་རྩིར་བྱིན་གྱིས་བརླབས། །སྟོང་གསུམ་བདུད་རྩིས་བཀང་བ་འདི། །ཞལ་དུ་བསྟབ་བོ་ཁ་རྃ་ཁཱ་ཧི། །མགུལ་དུ་བསྟིམ་མོ་ཨ་ར་ལི། །ལྷག་མ་མེད་པར་བཞེངས་སུ་གསོལ། །ཡུམ་ཆེན་ཕ་བརྒྱུད་མ་བརྒྱུད་སྲས་བརྒྱུད་རྣམས། །དཔའ་བོ་མཁའ་འགྲོའི་ཚོགས་དང་བཅས། །རང་རང་གནས་ནས་སྐུ་ཡར་བཞེངས། །འདི་མན་ཆད་འགྲོས་སོ། །དྲུག་པ་རྡོ་རྗེ་འཆང་ཆེན་མན་ཆད་དང་། །ཡི་དམ་ལྷ་ཚོགས་ཡན་ཆད། །རྒྱུད་སྡེ་བཞི་ཡི་ལྷ་ཚོགས་རྣམས། །རང་རང་གནས་ནས་སྐུ་ཡར་བཞེངས། །འགྲེས་སོ། །ཆོས་སྐྱོང་མ་མགོན་ལྕམ་དྲལ་མན་ཆད་དང་། །ཞིང་སྐྱོང་ལས་མཁན་ཡན་ཆད་དུ། །བསྟན་སྲུང་གཉན་པོ་འཁོར་བཅས་རྣམས། །རང་རང་གནས༴ ཀུན་ཏུ་བཟང་པོ་མན་ཆད་དང་། །འཇག་མའི་སྲིན་བུ་ཡན་ཆད་དུ། །འཁོར་འདས་གཉིས་ལ་གནས་པ་རྣམས། །རང་རང་གནས༴ ཁྱད་པར་འདི་ན་གནས་པ་ཡི། །རི་དབང་རྒྱལ་པོ་ཐམས་ཅད་དང་། །མཚོ་སྨན་རྒྱལ་མོ་ལ་སོགས་པའི། །སྣང་ཞིང་སྲིད་པའི་ལྷ་འདྲེ་རྣམས། །རང་རང་གནས་ནས་སྐུ་ཡར་བཞེངས། །གཟུགས་ཀྱི་མཆོད་པ་ཁྱད་པར་འཕགས། །སྒྲ་ཡི་མཆོད་པ་ཡིད་འོང་ལྡན། །དྲི་ཡི་མཆོད་པས་ཚིམ་པར་མཆོད། །རོ་ཡི་མཆོད་པ་རོ་མཆོག་ལྡན། །རེག་བྱའི་མཆོད་པ་བླ་ན་མེད། །མཆོད་པ་རྣམ་པ་ལྔ་རྣམས་ཀྱིས། །རབ་འབྱམས་རྒྱ་མཚོ་ཡོངས་བཀང་ནས། །བླ་མ་ཡི་དམ་ལྷ་ལ་འབུལ། །བླ་མ་དཀོན་མཆོག་མཆོད་པས་མཉེས་གྱུར་ཅིག །མཁའ་འགྲོ་ཆོས་སྐྱོང་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །བུ་ལོན་ལན་ཆགས་བྱང་གྱུར་ཅིག །ཤ་འཁོན་ཐམས་ཅད་བྲལ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །བསྔོས་པ་བཞིན་དུ་ཚིམ་གྱུར་ཅིག །རེ་བ་བཞིན་དུ་བསྐང་གྱུར་ཅིག །ཀུན་ཀྱང་སངས་རྒྱས་ཐོབ་པར་ཤོག །ཕྱིའི་དཔའ་བོ་རྣལ་འབྱོར་མ་རྣམས་ཚོགས་ལ་རོལ་བ་ནི། བསྒྲལ་མཆོད་ཀྱི་སྐབས་སུ་བརྗོད་པའི་ཚིག་གོང་མ་རྣམས་ཇི་ལྟ་བ་བཞིན་བརྗོད་ལ། རང་རང་གནས་ནས་མི་ཟེར་བར། འདིར་གཤེགས་ཚོགས་དང་གཏོར་མ་རོལ། །ཅེས་པའི་མཐར། ནམ་མཁའ་གང་བའི་ཚོགས་འདི་རོལ། །ཅེས་པ་ནས། ལྷག་ལ་དགྱེས་པ་ལྷག་ལ་རོལ། །ཅེས་པ་ཡན་ཆད་ཀྱི་བར་དང་། བསྟབ་པའི་ཚིག་བཅད་རྣམས། ཚིགས་ཁ་བསྒྱུར་ཅིང་བསྲེས་ནས་བརྗོད་པར་བྱའོ། །ནམ་མཁའ་གང་བའི་ཚོགས་འདི་རོལ། །བར་སྣང་གང་བའི་ཚོགས་འདི་རོལ། །ས་གཞི་གང་བའི་ཚོགས༴ སྟོང་གསུམ་གང་བའི་ཚོགས༴ ཕྱི་སྣོད་འཇིག་རྟེན་གང་བའི༴ ནང་བཅུད་འདོད་ཡོན་ཚོགས༴ སྐྱེ་བ་མེད་པའི༴ འགག་པ་མེད་པའི༴ སྐྱེ་འགག་བྲལ་བའི༴ ཆོས་ཀྱི་དབྱིངས་ཀྱི་ཚོགས༴ ལ་ལས་ཕྱི་ཡི་ཚོགས་ལ་རོལ། །ལ་ལས་ནང་གི་ཚོགས་ལ་རོལ། །ལ་ལས་གསང་བའི་ཚོགས་ལ་རོལ། །ཚོགས་ལ་དགྱེས་པས་ཚོགས་ལ་རོལ། །ཕུད་ལ་དགྱེས་པ་ཕུད་ལ་རོལ། །ལྷག་ལ་དགྱེས་པ་ལྷག་ལ་རོལ། །སྤྲོས་པ་ལ་དགའ་ན་གཟུགས་ཀྱི་མཆོད་པ་ཁྱད་པ་འཕགས། །ཞེས་སོགས་བརྗོད། ཚོགས་ཕུད་འབུལ་བ་ནི། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་བརྩི་མཆོག་གིས་མཆོད་པར་བགྱི། །སྒྲིབ་པའི་དྲི་མ་ཀུན་བསལ་ནས། །རྟོག་པ་ཀུན་ལས་རྣམ་གྲོལ་བས། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཨཱ་ཧོ་སུ་ཁ་ཧོ། ཞེས་བརྗོད་ལ་འབུལ། གཏོར་མའི་མགྲོན་ལ་རང་རང་གི་གཏོར་སྔགས་ཀྱིས་འབུམ་ལ་ཕྱིའི་ལྷ་རྣམས་ཚིམ་པར་བྱའོ། །ནང་གི་དཔའ་བོ་རྣལ་འབྱོར་མ་རྣམས་ཚོགས་ལ་རོལ་བ་ནི། དམ་ཚིག་དྲང་། རྣལ་འབྱོར་ཕོ་མོ་རྣམས་ར་རོ་བ་དང་། བག་མེད་པའི་སྤྱོད་པ་སྤངས་ལ། ཁ་ཟས་ཀྱི་རྣལ་འབྱོར་དང་ལྡན་པས་ཚོགས་ལ་ལོངས་སྤྱོད་དོ། །ནང་གི་ལྷ་ཚོགས་རྣམས་སོ་སོར་ཚིམ་པར་བྱས་ལ། ལྷག་མ་བསྡུའོ། །དེ་ནས་བདག་ཉིད་འཇུག །དབང་བསྐུར། ལྷག་མ་སྔར་མ་བཏང་ན། ལྷག་མ་ཆང་དང་ཁ་ཕྲུས་གདབ། སྭ་བྷཱ་ཝས་སྟོང་པར་སྦྱངས། བྷྲ྄྄ཱུྃ་ལས་རིན་ཆེའི་སྣོད་ཀྱི་ནང་དུ༴ ཨ་ཀ་རོས་བདུད་རྩི་འདོད་ཡོན་ལོངས་སྤྱོད་ཕུན་སུམ་ཚོགས་པར་བསམས་ལ་འདི་སྐད་དོ། །ཧཱུྃ། སྲིད་གསུམ་བྷནྡྷ་འབར་བའི་གཞལ་ཡས་ནས། །ལྷག་མའི་ཕུང་པོ་གླིང་བཞི་རི་རབ་ཙམ། །འདོད་ཆགས་ཁྲག་གི་རྒྱ་མཚོ་ཀྱི་ལི་ལི། །ཞེ་སྡང་རུས་པའི་ཕུང་པོ་ཁྲ་ལ་ལ། །གཏི་མུག་ཤ་ཡི་ལྷུ་དུམ་ཉི་ལི་ལི། །བདུད་རྩི་ལྔ་ཡི་ལོངས་སྤྱོད་བསམ་མི་ཁྱབ། །འཁོར་དུ་གཏོགས་པའི་དྷ་ཀི་དམ་ཅན་དང་། །སྡོང་གྲོགས་བྱེད་པའི་ལྷ་སྲིན་སྡེ་བརྒྱད་དང་། །ཕྱི་ནང་བགེགས་རིགས་སྟོང་ཕྲག་བརྒྱད་ཅུའི་ཚོགས། །བཀའ་ཡི་ཕ་འབབ་གཏོར་མ་འདིར་བཞེས་ལ། །ཅི་ལྟར་བཅོལ་པའི་ཕྲིན་ལས་གྲུབ་པར་མཛོད། །ༀ་ཨུ་ཙིཥྛ་བྷ་ལིཾ་ཏ་བྷཀྵ་སི་སྭཱ་ཧཱ། ལྷག་མ་ལ་དབང་བའི་འབྱུང་པོ་ནམ་མཁའི་མཐའ་དང་མཉམས་པའི་སེམས་ཅན་ཐམས་ཅད་ཚིམ་པར་གྱུར་ཅིག །ཅེས་བསྐྱང་ངོ་། །བཤལ་ཆུ་བདུད་རྩིའི་རྒྱ་མཚོར་བསྐྱེད་ལ། ཧཱུྃ། དགུང་སྔོན་གངས་རིའི་གཡའ་རྩེ་ན། །སྤང་ལྗོངས་ནགས་དང་སྐྱེ་མོའི་ཚལ། །མཚོ་དང་ནེའུ་སེང་དག་ལ་གནས་པ་ཡི། །སྨན་མོ་བཞི་དང་བདུད་མོ་བཞི། །གནོད་སྦྱིན་ཆེན་མོ་བཞི་ལ་སོགས་པ་ཡི། །བོད་ཁམས་སྐྱོང་བའི་བརྟན་མ་རྣམས། །ལྷབ་ལྷུབ་མང་པོའི་རྒྱན་དང་བཅས། །བྲན་གཡོགས་མང་པོའི་འཁོར་དང་བཅས། །འདིར་གཤེགས་དམ་བསྐང་ཕྲིན་ལས་མཛོད། །ཅེས་ནམ་མཁའ་ལ་དོར་རོ། །དེ་ནས་སྔར་ལྟར་མཆོད་པ་བྱིན་རླབས་དང་། མདུན་བསྐྱེད་སྐད་ཅིག་གིས་གསལ་བཏབ། ཕྱི་ནང་གསང་བའི་མཆོད་པ་ལ་སྔགས་ཀྱིས་མཆོད་ནས། ཆོས་དབྱིངས་རྣམ་པར་དག་པས་བསྟོད། དངོས་གྲུབ་བླངས། འདོད་པའི་དོན་ལ་གསོལ་བ་གདབ། ཡི་གེ་བརྒྱ་པས་ལྷག་ཆད་ཁ་བསྐང་། བཟོད་གསོལ་ནི། གང་ཡང་བདག་བློ་གཏི་མུག་པས། །ཞེས་སོགས་བརྗོད། བསྔོ་བ་སྨོན་ལམ་གདབ། རྟེན་མེད་ན། མདུན་བསྐྱེད་ཀྱི་ཡེ་ཤེས་པ་གཤེགས། །དམ་ཚིག་པ་བདག་ལ་བསྡུ། །རྟེན་ཡོད་ན་རྟེན་བཞུགས་བྱས་པས་རབ་ཏུ་གནས་པས་རབ་གནས་མཆོག་ཏུ་འགྱུར་རོ། །དེ་ནས་བཀྲ་ཤིས་བརྗོད། གནས་གསུམ་བསྲུངས་ལ་སྤྱོད་ལམ་གྱི་རྣལ་འབྱོར་ལ་འཇུག་པར་བྱའོ། །རྒྱུན་དུ་ཉམས་སུ་ལེན་པར་འདོད་པས་ཚོགས་ལས་དང་འབྲེལ་ན་དེ་ལྟར་ཡིན་ལ། མ་འབྲེལ་ན་སྐྱབས་འགྲོ། སེམས་བསྐྱེད། ཡིག་བརྒྱ། བདག་བསྐྱེད། མདུན་བསྐྱེད། མཆོད་བསྟོད། བུམ་བཟླས། བདག་འཇུག །གཏོར་བསྔོ། རྗེས་ཆོག་གོ། །ཡང་ན་གཏོར་བསྔོ། བདག་འཇུག་གོ། །མ་སྣང་ཞིང་སྲིད་པའི་སྐྱེ་འགྲོ་ཀུན། །ཚོགས་གཉིས་དགའ་བདེས་ཚིམས་བྱས་ནས། །ཟག་མེད་སྐུ་བཞིའི་དཔལ་ཐོབ་ཕྱིར། །ཚོགས་ལས་བདག་འཇུག་འདི་ཙམ་དགེ། །ནོངས་གྱུར་མཁའ་འགྲོས་བཟོད་མཛོད་ཅིག །བརྩེ་བས་རྗེས་སུ་བཟུང་བ་དང་། །ཆོས་འདི་ཕྱོགས་རྣམས་མ་ལུས་པར། །དར་ཞིང་རྒྱས་པར་མཛད་དུ་གསོལ། །ཀཿཐོག་ཀུན་གཟིགས་ཕྱག་དཔེར། །འདི་ནི་འདོར་པ་ཀུན་དགའ་དཔལ་བ་ཞེས་བྱ་བས་མཛད་པ་ཡིན་འདུག །ཀཿཐོག་པའི་ཀུན་དགའ་འབུམ་པ་དང་འདི་གཉིས་གཅིག་ཡིན་པར་ངེས་མཚན་གྱི་རྣམ་གྲངས་ཙམ་མོ། །དོན་དུ་ཀཿཐོག་པའི་ཀུན་དགའ་འབུམ་པའི་གཅོད་གཞུང་གི་མཁའ་འགྲོ་སྡེ་ལྔའི་ལས་བྱང་ནི་འདི་ཀ་ཡིན་པར་འདུག་གོ། །མཁན་སྟོབས་ལྡན་ཕྱག་བྲིས་དུ་དེ་ལྟར་གསུངས།། །།

མཁའ་འགྲོའི་ཚོགས་མཆོད་ཚོགས་གཉིས་བདུད་རྩིའི་ཆུ་རྒྱུན།

མཁའ་འགྲོའི་ཚོགས་མཆོད་ཚོགས་གཉིས་བདུད་རྩིའི་ཆུ་རྒྱུན་བཞུགས་སོ། །བླ་མ་ཡི་དམ་མཁའ་འགྲོའི་ཚོགས་ལ་ཕྱག་འཚལ་ལོ། །གཅོད་ཀྱི་སྒོ་ནས་ཚོགས་མཆོད་བྱེད་པར་འདོད་ན། ཚོགས་ཀྱི་ཞལ་ཟས་བཟའ་བ་ཤ་མར་ཟླ་རྒྱས་པ་ལ་སོགས་པ་རང་གི་མདུན་གཡས་སུ་བཤམས། ཇ་ཆང་སོགས་ཛ་གད་བཏུང་བའི་རིགས་ཐམས་ཅད་གཡོན་དུ་བཤམས། དེ་ནས་རྣལ་འབྱོར་པ་རྣམས་གྲལ་དུ་འཁོད་ལ། ཐུན་མོང་གི་སྐྱབས་འགྲོ་སེམས་བསྐྱེད་བྱ་བ་ནི། མ་མི་མིན་ཡེ་ཤེས་མཁའ་འགྲོ་མ། །ལབ་སྒྲོན་ཁྱེད་ལ་སོགས། ཅེས་སོགས་ཀྱི་རྣམ་དག་བྱ་ཞིང་། ཕཊ་ཕཊཿ བརྗོད་པས་ནམ་མཁའ་སྒོ་འབྱེད་བྱ་ཞིང་། དབྱིངས་རིགས་བསྲེས་དེ་ནས་ངག་ཏུ། ཕཊཿཕཊཿ སྐད་ཅིག་གིས་སྟོང་པ་ཆོས་སྐུའི་ངང་ལས་རང་གི་རྣམ་པར་ཤེས་པའི་ངོ་བོ་རྗེ་བཙུན་མ་སྐུ་མདོག་དམར་མོ་གྲི་གུག་ཐོད་ཁྲག་འཛིན་པ་ཅིག་ཏུ་གྱུར། དེ་ནས་ཚོགས་བྱིན་གྱིས་བརླབས་པ་ནི། བསང་ཆུའི་ཟེར་གཏོར་ཞིང་། ༀ་སརྦ་དྲ་པྱཾ་ཤྭ་དྷ་ནི་ཧཱུྃ་ཕཊཿ ཡཾ་ལས་རླུང་གི་དཀྱིལ་འཁོར། རཾ་ལས་མེ་ཡི་དཀྱིལ་འཁོར། དེའི་སྟེང་དུ་ཀཾ་ཀཾ་ཀཾ་ལས་ཐོད་པའི་སྒྱེད་པུ་གདོང་པ་ཕྱིར་བསྟན་ཅིང་། ལྟག་པ་ནང་དུ་བསྟན་པ་གསུམ་གྱི་སྟེང་དུ། ཨཱ་ལས་བྷནྡྷ་ཀཱ་པ་ལ་ཕྱི་དཀར་ལ་ནང་དམར་བ། ཡངས་ཤིང་རྒྱ་ཆེ་བའི་ནང་དུ། ཚོགས་ཀྱི་ཡོ་བྱད་དང་། རང་གི་རོ་དེ་ཉིད་གཅིག་ཏུ་འདྲེས་པ་ལས། ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་ཆེན་པོ་གཅིག་ཏུ་གྱུར། ཡཾ་སྥ་ར་ཎ་ཕཊ། རཾ་ཛྭ་ལ་རཾ། རང་ཐུགས་ཀ་ནས་འོད་ཟེར་འཕྲོས། རླུང་གཡོས། མེ་སྦར་ཐོད་པ་དྲོས། རྫས་རྣམས་འོད་དུ་ཞུ་བའི་རླང་པ་སྤྲིན་བཞིན་དུ་འཁྲིགས་པ་ལས། ཟླ་བའི་དཀྱིལ་འཁོར་རྡོ་རྗེ་ཕྱེད་པས་མཚན་པའི་རྩེ་མོ་ༀ་ཨཱཿཧཱུྃ་སྭཱ་ཧཱ། མུྃ་ལྃ་མྃ་པྱྃ་ཏྱྃ་གིས་མཚན་པ་དང་བཅས་པ་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཆོས་ཉིད་ཀྱི་བདུད་རྩི་ཆུ་རྒྱུན་བསྡུས་པས། ཡི་གེ་འབྲུ་བཅུ་ལ་ཐིམ། ཡི་གེ་འབྲུ་བཅུ་འོད་དུ་ཞུ་སྟེ་རྡོ་རྗེར་ཐིམ། རྡོ་རྗེ་འོད་དུ་ཞུ་སྟེ་ཟླ་བ་ལ་ཐིམ། ཟླ་བ་འོད་དུ་ཞུ་སྟེ། དམ་ཚིག་བདུད་རྩི་དང་ལྷན་ཅིག་དུ་འདྲེས་པ་ལས། བྷནྡྷ་ལྟེམས་ཀྱིས་གང་བར་གྱུར། ༀ་ཨཱཿཧཱུྃ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ། ༀ་ཨཱཿཧཱུྃ་མ་ཧཱ་བྷ་ལིངྟ་ཏེ་ཛྭ་བྷ་ལིངྟ་བྷ་ལ་བྷ་ཏི་གུ་ཧྱ་ས་མ་ཡེ་སྭཱ་ཧཱ། ཅེས་ལན་བདུན་བརྗོད། དེ་ནས་ཚོགས་སྤྱན་འདྲེན་ཅིང་མཆོད་པ་འབུལ་བ་ནི། གསུར་ཆེན་གྱི་སྤོས་གཏུལ། རྐང་ཆེན་གྱི་དུང་འབུད། རོལ་མོ་དབྱངས་དང་བཅས་པས་འདི་སྐད་དོ། །ཧཱུྃཿ གནས་མཁའ་དབྱིངས་རྣམ་དག་ཕོ་བྲང་ནས། །བླ་མ་ཡི་དམ་མཁའ་འགྲོའི་ཚོགས། །ཆོས་སྐུ་ལོངས་སྐུ་སྤྲུལ་སྐུ་གསུམ། །སངས་རྒྱས་ཆོས་དང་དགེ་འདུན་གསུམ། །ཁྱེད་སངས་རྒྱས་བྱང་སེམས་ཚོགས་བཅས་རྣམས། །གནས་འདིར་སྤྱན་འདྲེན་གཤེགས་སུ་གསོལ། །ཚོགས་ཀྱི་མཆོད་པ་ཡར་བཞེས་ལ། །མཆོག་ཐུན་མོང་དངོས་གྲུབ་སྩལ་དུ་གསོལ། །གནས་འོག་མིན་ཆོས་དབྱིངས་ཕོ་བྲང་ནས། །ཡུམ་ཆེན་ཤེས་རབ་ཕར་ཕྱིན་མན་ཆད་ནས། །རྩ་བའི་བླ་མ་ཡན་ཆད་ཀྱིས། །ཁྱེད་མ་རྒྱུད་དཔའ་མོའི་ཚོགས་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ཚོགས་ཀྱི་མཆོད་པ་དམ་པ་ཡར་བཞེས་ལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །གནས་བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀྱ་ཐུབ་པ་མན་ཆད་ནས། །རྩ་བའི་བླ་མ་ཡན་ཆད་ཀྱི། །ཁྱོད་ཕོ་བརྒྱུད་དཔའ་བོའི་ཚོགས་དང་བཅས། །དཔའ་བོ་མཁའ་འགྲོ་འཁོར་དང་བཅས། །གནས་འདིན་སྤྱན་འདྲེན་གཤེགས་སུ་གསོལ། །ཚོགས་ཀྱི་མཆོད་པ་དམ་པ་ཡར་བཞེས་ལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །གནས་བཀྲ་ཤིས་གླང་ལུང་གི་དགོན་པ་ན། །སྲས་རྒྱལ་བ་དོན་འགྲུབ་མན་ཆད་ནས། །ད་ལྟ་རྩ་བའི་བླ་མ་ཡན་ཆད་ནས། །ཁྱེད་སྲས་ཉམས་མྱོང་གི་བརྒྱུད་པ་འཁོར་དང་བཅས། །གནས་འདིར་སོགས་ཀུན་ལ་འགྲེས། གནས་སྤྱི་གཙུག་ཉི་ཟླའི་གདན་སྟེང་ནས། །དྲིན་ཆེན་རྩ་བའི་བླ་མ་རྡོ་རྗེ་འཆང་། །ཁྱོད་བཀའ་བརྒྱུད་བླ་མའི་ཚོགས་དང་བཅས། །གནས་འདིར་སོགས། གནས་གཉན་ས་རི་ཁྲོད་ཀྱི་དགོན་པ༴ གྲོགས་སྙེམས་ཐག་ཆོད་པ་སྤྲུལ་པའི། །ཁྱེད་དཔའ་བོ་དཔའ་མོའི་ཚོགས་དང་བཅས། །གནས་འདིར་སོགས་ཡུལ་ཉི་ཤུ་རྩ་བཞིའི་གནས་མཆོག་ནས། །ཡི་དམ་རྒྱལ་བའི་དཀྱིལ་འཁོར་ལྷ་ཚོགས་རྣམས། །ཁྱོད་མཁའ་འགྲོ་ཤུགས་འགྲོའི་ཚོགས་དང་བཅས། །གནས་འདིར་སོགས། གནས་བསིལ་བ་ཚལ་གྱི་དུར་ཁྲོད་ནས། །ཆོས་སྐྱོང་མ་མགོན་ལྕམ་དྲལ་སོགས། །ཁྱེད་དམ་ཅན་རྒྱ་མཚོའི་ཚོགས་དང་བཅས། །གནས་འདིར་སོགས། ཚོགས་ཁང་གཞལ་ཡས་ཕོ་བྲང་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐལ་ལྡན་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་ཆེན་ལ་སོགས་སྣོད་རྣམས་ཀུན། །པདྨར་བྷནྡྷར་བྱིན་གྱིས་རློབས། །ཞལ་ཟས་ཚོགས་ཀྱི་མཆོད་པ་འདི། །ཟག་མེད་བདུད་རྩིར་བྱིན་གྱིས་རློབས། །བྱིན་རླབས་ཐུགས་རྗེ་རྒྱུན་མ་ཆད། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །རྐྱེན་ཕྱི་ནང་གཉིས་ཀྱི་བར་ཆད་སོལ། །མ་ཧཱ་སུ་ཁ་ཨ་ལ་ལ་ཧོ། དེ་ནས་སྨན་མཆོད་བྱ་བ་ལ། ཐོག་མར་སྨན་གྱི་ཆེ་བ་བརྗོད་པ་ནི། ཧོ། རང་བྱུང་གདོད་ནས་རྣམ་དག་པའི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་རྣམས་ཀྱི། །ལྷ་དང་ལྷ་མོ་གསང་བའི་བདག །ཐུགས་དམ་དབྱིངས་ཉིད་བསྐུལ་བའི་ཚོགས། །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ༀ་སརྦ་པཉྩ་ཨ་མྲྀ་ཏ་ཁ་རཾ་ཁ་ཧི། དེ་ནས་འབུལ་བ་དངོས་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །ཕ་རོལ་ཕྱིན་མ་ཤཱཀྱའི་རྒྱལ་པོ་དང་། །སྨྲ་བའི་སེང་གེ་དང་ནི་འཕགས་པ་ལྷ། །སྒྲོལ་མ་མ་ཧཱ་སུ་ཀ་སིདྡྷི་དང་། །ཀ་མ་ཤི་ལ་བསོད་ནམས་བླ་མ་དང་། །མ་ཅིག་ལབ་སྒྲོན་ཁུ་སྒོམ་ཆོས་སེང་དང་། །དོལ་པ་ཟང་ཐལ་རྒྱ་ནག་གཅེར་བུ་དང་། །སངས་རྒྱས་རབ་བརྟན་རྟོག་ལྡན་དགེ་སློང་དང་། །སངས་རྒྱས་གཉན་སྟོན་ཞེན་མེད་རས་པ་དང་། །ཆོས་ཀྱི་སེངྒེ་བཛྲ་སེངྷ་དང་། །པྲ་ཛྙཱ་གུ་རུ་བཛྲ་ཤྲི་པ་དང་། །ག་ག་བཛྲ་ཤི་ལ་ཀེ་ཏུ་དང་། །ཛྙཱ་ན་ཀེ་ཏུ་གུ་ཎ་ཤྲི་དང་ནི། །བྱ་བཏང་ཆེན་པོ་ཀུན་དགའ་འབུམ་པ་དང་། །བསོད་ནམས་འབུམ་པ་ཤཱཀྱ་འོད་ཟེར་དང་། །་ཀེ་ཏུ་སེངྷ་ནམ་མཁའ་རྡོ་རྗེ་དང་། །ག་ག་མ་ཏི་ཀ་ལ་བཛྲ་དང་། །དབང་དྲག་རྒྱ་མཚོ་ཆོས་སྐྱོང་རྒྱ་མཚོ་དང་། །ཀློང་གསལ་སྙིང་པོ་ཆོས་ཉིད་རྒྱ་མཚོ་དང་། །བཀྲ་ཤིས་ཕུན་ཚོགས་ནམ་མཁའ་རྒྱ་མཚོ་དང་། །འཇུ་བླ་པད་ཆོས་སངས་རྒྱས་གྲགས་པ་དང་། །ནམ་མཁའ་ཆོས་སྐྱོང་འཇིག་མེད་བསམ་གཏན་དང་། །ཀུན་བཟང་རྣམ་རྒྱལ་རཏྣ་གུ་རུ་དང་། །ཆོས་ཀྱི་རྒྱ་མཚོ་རྡོ་རྗེ་ལེགས་བཤད་རྩལ། །རྩ་བ་བརྒྱུད་སོགས་སམ་ཡང་ན་མན་ངག་དོན་བརྒྱུད་ལྟར་ན། ནམ་མཁའ་རྒྱ་མཚོའི་རྗེས་སུ། དྲི་མེད་ཞིང་སྐྱོང་ཚེ་དབང་མཆོག་གྲུབ་དང་། །ངེས་དོན་དབང་པོ་འགྱུར་མེད་བསྟན་འཛིན་དང་། །ཆོས་ཀྱི་བློ་གྲོས་ཀུན་བཟང་འགྱུར་མེད་དང་། །ཆོས་ཀྱི་རྒྱ་མཚོ་རྡོ་རྗེ་ལེགས་བཤད་རྩལ། །རྩ་བར་བརྒྱུད་པའི་བླ་མ་བཅས་པ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་སརྦ་པཉྩ་ཨ་མྲྀ་ཏ་ཁ་རཾ་ཁ་ཧི། ཆོས་དབྱིངས་དུར་ཁྲོད་འབར་བའི་ཕོ་བྲང་ནས། །ཞི་ཁྲོ་རབས་འབྱམས་རྒྱལ་བ་རྒྱ་མཚོའི་ཚོགས། །གསང་སྔགས་ཕྱི་ནང་བརྒྱུད་པའི་ལྷ་ཚོགས་ལ། །རྣམ་དག་བདུད༴ ཐུགས༴ ༀ་སརྦ་པཉྩ༴ རྣམ་དག་ཨུ་རྒྱན་བཀོད་པའི་ཕོ་བྲང་དུ། །མཁའ་འགྲོའི་གཙོ་མོ་རྡོ་རྗེ་རྣལ་འབྱོར་མ། །རིགས་བཞི་མཁའ་འགྲོ་ཤུགས་འགྲོ་འཁོར་བཅས་ལ། །རྣམ་དག༴ ཐུགས་རྗེས་བརྩེར་དགོངས༴ ༀ་སརྦ་པཉྩ༴ བཀའ་དང་དམ་ཚིག་གཉེན་པོའི་ཕོ་བྲང་ནས། །འཇིག་རྟེན་དང་ནི་འཇིག་རྟེན་ལས་འདས་པའི། །བསྟན་པ་བསྲུང་མཛད་ཆོས་སྐྱོང་སྲུང་མ་ལ། །རྣམ་དག༴ ཐུགས་རྗེས༴ ༀ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ཅེས་བཟེད་ཞལ་དུ་སྦྲེང་ཞིང་འབུལ་ལོ། །དེ་ནས་ཚོགས་བཀྲོལ་ཏེ། དང་པོ་བཀའ་བརྒྱུད་བླ་མ་ལ་འབུལ་བ་ནི། བཅད་ཁམས་གཅིག་བཅད་ལ་བཟེད་ཞལ་དུ་བཅུག་ལ་ཆང་གིས་བྲན་ཏེ། སློབ་མས་བཏབ་ཚུལ་བྱ་ཞིང་། སློབ་དཔོན་གྱིས་རོལ་མོ་དང་བཅས་པས། ཀྱེ་གཟིགས་ཤིག་མཛེས་ལྡན་དམ་པའི་ཆོས། །དེ་ལ་རྣམ་རྟོག་བྱེད་མི་རུང་། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་དགོངས་ཏེ་རོལ། །རིན་ཐང་མེད་ལ་ལེགས་འོང་ཆོས། །འདོད་ཆགས་དྲི་མ་དང་རྣམ་པར་དག །གཟུང་དང་འཛིན་པ་ཀུན་སྤང་པ། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོ། ཧཱུྃ། ཞལ་ཟས་ཚོགས་ཀྱི་མཆོད་པ་འདི། །སྟོང་གསུམ་ཙམ་དུ་དཔེ་བླངས་བཞིན། །སྲིད་གསུམ་ཙམ་དུ་བཀང་བྱས་པ། །རི་རབ་ཙམ་དུ་འུ་རུ་རུ། །རྒྱ་མཚོ་ཙམ་དུ་མེ་རེ་རེ། །གླིང་བཞི་ཙམ་དུ་ཀྱི་ལི་ལི། །རྩ་བའི་བླ་མ་བཀའ་དྲིན་ཅན། །བརྒྱུད་པའི་བླ་མ་བྱིན་བརླབས་ཅན། །འདྲེན་པའི་བླ་མ་ཐུགས་རྗེ་ཅན། །ཁྱོད་ཚོགས་ལ་དགའ་བས་ཚོགས་ལ་རོལ། །ལ་ལ་ཕྱི་ཡི་ཚོགས་ལ་རོལ། །ལ་ལ་ནང་གི་ཚོགས་ལ་རོལ། །ལ་ལ་གསང་བའི་ཚོགས་ལ་རོལ། །ལ་ལ་དེ་བཞིན་ཉིད་ཀྱི་ཚོགས་ལ་རོལ། །ཨ་ལ་ལ་སྟེ་ཚོགས་ལ་རོལ། །ཨ་ལ་ལ་སྟེ་བཞེས་སུ་གསོལ། །ཕྱི་སྣོད་འཇིག་རྟེན་ནང་བཅུད་འདོད་ཡོན་ལྔ། །ཕྱི་ཡི་ཚོགས་སུ་འབུལ་ལོ་རོལ་པར་བཞེས། །གཟུགས་ཕུང་སྣོད་དུ་ཤ་ལྔ་བདུད་རྩི་ལྔ། །ནང་གི་ཚོགས་སུ་འབུལ་ལོ་དགྱེས་པར་བཞེས། །དབང་པོའི་སྣོད་དུ་དུག་ལྔ་ཡེ་ཤེས་ལྔ། །གསང་བའི་ཚོགས་སུ་འབུལ་ལོ་སྟོང་པར་བཞེས། །ཕྱི་ནང་གསང་བའི་ཚོགས་ཀྱི་མཆོད་པ་འདི། །གཉིས་མེད་ཆོས་དབྱིངས་ངང་དུ་མཉམ་པར་བཞེས། །མ་ཧཱ་སུ་ཁ་ས་མ་ཡ་ཧོ། གྲུབ་ཐོབ་གཅོད་ཀྱི་བརྒྱུད་པ། །རྟོགས་ལྡན་ཉམས་ཀྱི་བརྒྱུད་པ། །བཀའ་བརྒྱུད་བླ་མ་ཡབ་སྲས་སོགས་རིག་འཛིན་བརྒྱུད་པའི་ཚོགས་དང་བཅས་པ་རྣམས་ཀྱི་ཞལ་དུ་གྷ་ན་ཙ་ཀྲ་པུཙྪ་མེ་གྷ་ཁ་ཁ་ཁཱ་ཧི། བདག་གི་དམ་ཚིག་ཆགས་ཉམས་ཐམས་ཅད་བྱང་ཞིང་དག་ནས། མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་བླ་མའི་གཏོར་མར་འབུལ་ལོ། །དེ་ན་ཡང་བཅད་ཁམས་གཅིག་ཡི་དམ་ལའོ། །ཧོ། ཞལ་ཟས་ཚོགས་ཀྱི་མཆོད་པ་དམ་པ་འདི། །སྟོང་གསུམ་ཙམ་དུ་དཔེ་བླངས་ཞིང་། །སྲིད་གསུམ་ཙམ་གྱིས་བཀང་བྱས་པ། །རི་རབ་ཙམ་དུ་འུ་འུ་རུ། །རྒྱ་མཚོ་ཙམ་དུ་མེ་རེ་རེ། །གླིང་བཞི་ཙམ་དུ་ཀྱི་ལི་ལི། །དངོས་གྲུབ་སྩོལ་བའི་ཡི་དམ་ལྷ། །ཁྱོད་ཚོགས་ལ་དགའ༴ གོང་བཞིན་སོགས་འགྲེལ་མ་ཧཱ་སུ་ཁ་ས་མ་ཡ་ཧོ། ཡི་དམ་རྒྱལ་བའི་དཀྱིལ་འཁོར་ལྷ་ཚོགས་འཁོར་དང་བཅས་པ་རྣམས་ཀྱི་ཞལ་དུ་གྷ་ཎ་ཙ་ཀྲ་པུཙྪ་ཁ་ཁ་ཁཱ་ཧི། བདག་གི་དམ་ཚིག་ཆགས་ཉམས་ཐམས་ཅད་བྱང་ཞིང་དག་ནས་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་བརྗོད་ལ་ཡི་དམ་གཏོར་མ་ལ་འབུལ་ལོ། །དེ་ནས་ཡང་གཅིག་བཤམས། ཧཱུྃ། ཞལ་ཟས་ཚོགས་ཀྱི་མཆོད་པ་དམ་པ་འདི། །སྟོང་གསུམ་ཙམ་དུ་དཔེ་བླངས་ཞིང་། །སྲིད་གསུམ་ཙམ་གྱིས་བཀང་བྱས་པ། །རི་རབ་ཙམ་དུ་འུ་རུ་རུ། །རྒྱ་མཚོ་ཙམ༴ གླིང་བཞི་ཙམ་དུ༴ བྱིན་གྱིས་བརླབ་པའི་མཁའ་འགྲོ་མ། །ཁྱེད་ཚོགས་སོགས་ནས། ཡེ་ཤེས་དང་ལས་ལ་གྲུབ་པའི་དཔའ་བོ་མཁའ་འགྲོ་ཤུགས་འགྲོ་བྱེ་བ་དུང་ཕྱུར་ཚོགས་དང་བཅས་པ་རྣམས་ཀྱི་ཞལ་དུ་ག་ཎ་ཙ་ཀྲ་པུཙྪ་མེ་གྷ་ཁ་ཁ་ཁཱ་ཧི། བདག་གི་དམ་ཚིག་ཆགས་ཉམས་ཐམས་ཅད་བྱང་ཞིང་དག་ནས་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། མཁའ་འགྲོའི་གཏོར་མར་འབུལ་ལོ། །དེ་ནས་ཆོས་སྐྱོང་ལ་འབུལ་སྟེ། ཧཱུྃ། ཞལ་ཟས་ཚོགས་ཀྱིས་མཆོད་པ་འདི། །སྟོང་གསུམ་ཙམ་དུ་དཔེ་བླངས་ཤིང་། །སྲིད་གསུམ་ཙམ་གྱིས་བཀང་བྱས་པ། །རི་རབ་ཙམ་དུ་འུ་རུ་རུ། །རྒྱ་མཚོ་ཙམ་དུ་མེ་རེ་རེ། །གླིང་བཞི་ཙམ་དུ་ཀྱི་ལི་ལི། །མཐུ་རྩལ་ཅན་གྱི་ཆོས་སྐྱོང་དང་། །ཕྲིན་ལས་བསྒྲུབ་པའི་དམ་ཅན་རྣམས། །ཁྱེད་ཚོགས་ལ་དགའ་སོགས་ནས། སངས་རྒྱས་ཀྱིས་བསྟན་པ་བསྲུང་བར་ཞལ་གྱིས་བཞེས་པའི་དམ་པ་ཆོས་སྐྱོང་བའི་སྲུང་མ། དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་ཞལ་དུ་གྷ་ཎ་ཙ་ཀྲ་པུཙྪ་མེ་གྷ་ཁ་ཁ་ཁ་ཧི། བདག་གིས་དམ་ཚིགས་ཆགས་ཉམས་ཐམས་ཅད་དག་ཅིང་བྱང་ནས་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་བརྗོད་ལ་ཆོས་སྐྱོང་གཏོར་མ་བཅུག་གོ། །ཚོགས་བསྒྲལ་ལ་འཇུག་གོ། །མ་ཡུམ་ཆེན་སོགས། མཆན། ༈ དེ་ནས་སྣོད་ཅིག་ཏུ་ཚོགས་བཅད་ཁམས་གཅིག་བཅུག །ཕུད་རྒོད་བྲན་ལ་བཤམ་སྟེ། འཁོར་འདས་ཐམས་ཅད་ལ་བསྔོ་ཞིང་། རྡོ་རྗེའི་ལྟ་བ་བསལ་བ་ནི། ན་མོ། ཕྱི་སྣོད་འཇིག་རྟེན་གཏོར་གཞོང་དུ། །ནང་བཅུད་སེམས་ཅན་སོགས་གདན་ཐོག་གཅིག་མའི་ནང་ལྟར་འགྲེས། སརྦ་ཛྙཱ་ན་ལོ་ཀ་གྷ་ཎ་ཙ ཀྲ་ལ་ཁ་ཁ་ཁཱ་ཧི། ཅེས་བསྔོ་ལ་ཕུད་རྒོད་ཕྱོགས་བཅུར་གཏོར། དེ་ནས་རྣལ་འབྱོར་པ་རྣམས་སྤྲོ་དགའ་དང་བཅས་པས། རོལ་བར་བྱའོ། །རྗེས་སུ་ལྷག་མ་སྣོད་གཅིག་བསྡུས་ལ། ཚོགས་ཆང་གིས་བྲན། ༀ་ཨཱཿཧཱུྃ། གིས་བྱིན་གྱིས་བརླབ་ཏེ། ལྷག་མགྲོན་ལ་འདི་སྐད་དོ། །ཧཱུྃ། སྲིད་གསུམ་བྷནྡྷ་ཡངས་པའི་གཏོར་གཞོང་དུ། །ལྷག་མའི་ཕུང་པོ་རི་རབ་གླིང་བཞི་ཙམ། །འདོད་ཆགས་ཁྲག་གི་རྒྱ་མཚོ་ཀྱི་ལི་ལི། །ཞེ་སྡང་རུས་པའི་ཕུང་པོ་ཁྲ་ལ་ལ། །གཏི་མུག་ཤ་ཡི་ལྷུ་དུམ་ཉི་ལི་ལི། །བདུད་རྩི་ལྔ་ཡི་ལོངས་སྤྱོད་བསམ་མི་ཁྱབ། །འཁོར་དུ་གཏོགས་པའི་ཌཱཀྐི་དམ་ཅན་དང་། །སྡོང་གྲོགས་མཛད་པའི་ལྷ་སྲིན་སྡེ་བརྒྱད་དང་། །ཕྱི་ནང་བགེགས་རིགས་སྟོང་ཕྲག་བརྒྱད་བཅུའི་ཚོགས། །བཀའ་ཡི་ཕ་འབབ་ལྷག་གཏོར་འདི་བཞེས་ལ། །ཅི་ལྟར་བཅོལ་བའི་ཕྲིན་ལས་འགྲུབ་པར་མཛོད། །ཨོུཾ་ཨུ་ཙི་ཏ་བྷ་ལིངྟ་བྷཀྵ་སི་སྭཱ་ཧཱ། ལྷག་མ་དབང་བའི་འབྱུང་པོ་ནམ་མཁའི་མཐའ་དང་མཉམས་པའི་སེམས་ཅན་ཐམས་ཅད་ཚིམ་པར་གྱུར་ཅིག །ཅེས་ཕྱིར་སྐྱོང་ངོ་། །དེ་ནས་གཏོར་གཞོང་ཆུས་ལ་ཆུ་འབྲུ་གསུམ་གྱི་བདུད་རྩིའི་རྒྱ་མཚོར་བྱིན་གྱིས་བརླབས་ལ། བསྟན་མ་རྣམས་ལ་བསྔོ་བ་ནི། ཀྱེ། དགུང་སྔོན་གཡའ་རི་གངས་རྩེ་དང་། །སྤངས་ལྗོང་དང་ནི་བསྐྱེད་མོས་ཚལ། །མཚོ་དང་ནེའུ་སེང་ལ་གནས་པའི། །བདུད་མོ་བཞི་དང་སྨན་མོ་བཞི། །གནོད་སྦྱིན་ཆེན་མོ་བཞི་ལ་སོགས། །བོད་ཁམས་སྐྱོང་བའི་བསྟན་མ་རྣམས། །ལྷབ་ལྷུབ་མང་པོའི་རྒྱན་དང་བཅས། །བྲན་གཡོག་མང་པོའི་འཁོར་དང་བཅས། །འདིར་བྱོན་བཤལ་ཆུའི་གཏོར་མ་འདི་ལོངས་ལ། །དམ་བསྐང་བཅོལ་པའི་ཕྲིན་ལས་མཛོད། །ཞེས་བཤལ་ཆུ་ཕྱི་རོལ་གཙང་སར་དོར་རོ། །གཏོར་གཞོང་ཁ་སྦུབ་ཞིང་དགྲ་བགེགས་འགུག་གཞུགས་དྲག་ཏུ་བྱས་ལ། གཏོར་བྲོ་ནི། ཧཱུྃ། དབུས་ཀྱི་ཕྱོགས་ནས་གྲོ་བྱུང་བ། །སངས་རྒྱས་མཁའ་འགྲོའི་བྲོ་བརྡུང་པས། །དཔའ་བོའི་བྲོ་བརྡུང་ཁྲིགས་སེ་ཁྲིག །དཔའ་མོའི་གར་བྱེད་ཁྱུགས་སེ་ཁྱུག །དགྲ་བགེགས་ཕྱེ་མར་བཏང་བའི་བྲོ། །ནད་གདོན་ཐལ་བར་བརླག་པའི་བྲོ། །བྲོ་འོག་འདི་ནས་མ་ལྡང་ཅིག །མནན་འོག་འདི་ནས་མ་འཕར་ཅིག །ཧཱུྃ། ཤར་གྱི་ཕྱོགས་ནས་བྲོ་བྱུང་བས། །རྡོ་རྗེ་མཁའ་འགྲོའི་བྲོ་བརྡུང་བས། །དཔའ་བོའི༴ དཔའ་མོའི༴ དགྲ་བགེགས༴ བྲོ་འོག༴ མནན་འོག༴ ཧཱུྃ། ལྷོ་ཡི་ཕྱོགས་ནས་བྲོ་བྱུང་བས། །རིན་ཆེན་མཁའ་འགྲོའི་བྲོ་བརྡུང་པས། །དཔའ་བོའི༴ དཔའ་མོའི༴ དགྲ་བགེགས༴ ནད་གདོན༴ བྲོ་འོག༴ མནན་འོག༴ ཧཱུྃ། ནུབ་ཀྱི་ཕྱོགས་ནས་བྲོ་བྱུང་བས། །པདྨ་མཁའ་འགྲོའི་བྲོ་བྱུང་བས། །དཔའ་བོའི༴ དཔའ་མོའི༴ དགྲ་བགེགས༴ ནད་གདོན༴ བྲོ་འོག༴ མནན་འོག༴ ཧཱུྃ། བྱང་གི་ཕྱོགས་ནས་བྲོ་བྱུང་བས། །ལས་ཀྱི་མཁའ་འགྲོའི་བྲོ་བརྡུང་པས། །དཔའ་བོའི་བྲོ་བརྡུང་ཁྲིགས་སེ་ཁྲིག །དཔའ་མོའི་གར་བྱེད་ཁྱུགས་སེ་ཁྱུག །དགྲ་བགེགས་ཕྱེ་མར་བཏགས་པའི་བྲོ། །ནད་གདོན་ཐལ་བར་བརླག་པའི་བྲོ། །བྲོ་འོག་འདི་ནས་མ་ལྡང་ཅིག །མནན་འོག་འདི་ནས་མ་འཕར་ཅིག །ༀ་ལཾ་ཧཱུྃ་ལཾ་སྟྭཾ་བྷ་ཡ་ནན། བསྐལ་པའི་བར་མི་ཐར་བར་བསམ། དཀྱིལ་འཁོར་བསྡུ་ལ་ལས་ཀྱི་རྗེས་མི་མངོན་པར་བྱའོ། །པཎྜི་ཏ་དོན་ཡོད་རྡོ་རྗེའི་མཛད་པའི་གཞུང་དང་། སངས་རྒྱས་མཉེན་སྟོན་གྱི་མཛད་པའི་ཚོགས་ལ་བརྟེན་ནས། ཅུང་ཞིག་གསལ་བར་བྱས་པ་ཀུན་དགའ་འབུམ་གྱིས་སྦྱར་བའོ།། །།

ཚོགས་ཀྱི་བསྒྲལ་མཆོད།

ཚོགས་ཀྱི་བསྒྲལ་མཆོད་བཞུགས་སོ། །གློ་བུར་གྱིས་དགྲ་བགེགས་དྲག་པོའི་མཚན་མ་བྱུང་བའམ། ནད་པ་ཚབ་ཆེན་ལ་སྐབས་འདིར་བསྒྲལ་མཆོད་བྱ་བ་ནི། ཉའོ་དགྲ་གཟུགས་ཀྱིས་དངོས་སུ་བྱ་བའམ། གང་དུ་ཚོགས་བཏབ་པའི་ལྷག་མ་ལ། དམིགས་རྟེན་དུ་བྱ་བ་ནི། ཐོག་མར་དཀྱིལ་འཁོར་གྱིས་ལྷ་ཚོགས་རྣམས་ཐུགས་དམ་གནད་ནས་བསྐུལ་བ་ནི། རོལ་མོ་དྲག་ཏུ་འཁྲོལ་སྟེ། མ་ཡུམ་ཆེན་ཐུགས་ལས་སྤྲུལ་པའི་སྲས། །མ་ཅིག་ཇོ་མོ་རྣལ་འབྱོར་མ། །ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་འགྲོལ་མ། །མ་བདག་དང་མཁའ་མཉམ་སེམས་ཅན་རྣམས། །མ་ཐུགས་རྗེས་བདག་ལ་བྱིན་གྱིས་རློབས། །མ་སྐུ་ལུས་ཆུང་ལ་གཟི་བརྗིད་ཆེ། །སྐུ་ཤ་དཀར་ལ་འོད་ཟེར་འཕྲོ། །སྐྱེ་བ་དམན་ལ་དགོངས་པ་མཐོ། །དུས་གསུམ་སངས་རྒྱས་གདུང་འཛིན་མ། །མ་བདག་དང་མཁའ་མཉམ་སེམས་ཅན་ལ། །མ་ཐུགས་རྗེས་དགོངས་ལ་བྱིན་གྱིས་རློབས། །མ་དགོངས་པས་དབུས་སུ་བསྐྱོད་ཙམ་ན། །དོན་གཉིས་ལྷུན་གྱིས་གྲུབ་པའི་ཉམས་དང་ལྡན། །སངས་རྒྱས་མཁའ་འགྲོ་འབུམ་གྱིས་བསྐོར། །སྐུ་མདོག་དཀར་མོ་གཟི་མདངས་ལྡན། །རུས་པའི་རྒྱན་ཆ་ཁྲ་ལ་ལ། །དར་གྱི་ཅོད་པཎ་པུ་རུ་རུ། །ཌཱ་རུ་ཅང་ཏིལ་ཁྲ་ལ་ལ། །སིལ་སྣན་མང་པོ་སི་ལི་ལི། །མི་རྐང་གླིང་བུ་ཀྱུ་རུ་རུ། །གར་དང་རོལ་མོ་ཁྲིགས་སེ་ཁྲིག །ཉམས་མྱོང་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །གདམ་ངག་སྦྲང་ཆར་སི་ལི་ལི། །འགྲོ་དོན་ཕྱོགས་མེད་ཡ་ལ་ལ། །མ་འཁོར་དང་བཅས་པ་ཁྱེད་རྣམས་ཀྱི། །ཚོགས་ཀྱི་མཆོད་པ་འདི་བཞེས་ལ། །མ་བདག་དང་མཁའ་མཉམ་སེམས་ཅན་རྣམས། །མ་ཐུགས་རྗེས་བདག་ལ་བྱིན་གྱིས་རློབས། །མ་དགོངས་པ་ཤར་དུ་བསྐྱོད་ཙམ་ན། །དོན་འགྱུར་བ་མེད་པའི་ཉམས་དང་ལྡན། །རྡོ་རྗེ་མཁའ་འགྲོ་འབུམ་གྱིས་བསྐོར། །སྐུ་མདོག་སྔོན་མོ་གཟི་བརྗིད་ཅན། །རུས་པའི་རྒྱན་ཆ་ཁྲ་ལ་ལ། །དར་གྱི་ཅོད་པཎ་པུ་རུ་རུ། །ཌཱ་རུ་ཅང་ཏིལ་ཁྲ་ལ་ལ། །སིལ་སྙན་མང་པོ་སི་ལི་ལི། །མི་རྐང་གླིང་བུ་ཀྱུ་རུ་རུ། །གར་དང་རོལ་མོ་ཁྲིགས་སེ་ཁྲིག །ཉམས་མྱོང་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །གདམ་ངག་སྦྲང་ཆར་སི་ལི་ལི། །འགྲོ་དོན་ཕྱོགས་མེད་ཡ་ལ་ལ། །མ་འཁོར་དང་བཅས་པ་ཁྱེད་རྣམས་ཀྱི། །ཚོགས་ཀྱིས་མཆོད་པ་འདི་བཞེས་ལ། །བདག་དང་མཁའ་མཉམ་སེམས་ཅན་རྣམས། །མ་ཐུགས་རྗེས་བདག་ལ་བྱིན་གྱིས་རློབས། །མ་དགོངས་པ་ལྷོ་རུ༴ དོན་ཡོན་ཏན་རྫོགས་པའི༴ རིན་ཆེན་མཁའ༴ སྐུ་མདོག་སེར་མོ༴ རུས་པའི༴ འདྲེས་སོ། །མ་དགོངས་པ་ནུབ་ཏུ༴ དོན་ཆགས་པ་མེད༴ པདྨ་མཁའ༴ སྐུ་མདོག་དམར་མོ༴ རུས་པའི་སོགས། མ་དགོངས་པ་བྱང་དུ༴ དོན་ཕྲིན་ལས་འགྲུབ་པའི༴ ལས་ཀྱི་མཁའ་འགྲོ༴ སྐུ་མདོག་ལྗང་༴ རུས་པའི་སོགས། མ་གཡའ་རི་གངས་ཁྲོད་འགྲིམས་རྩ་ན། །ལྟ་བའི་འབྲུག་སྒྲ་འུ་རུ་རུ། །བསྒོམ་པའི་ན་བུན་ཐིབས་སེ་ཐིབ། །སྤྱོད་པའི་སྦྲང་ཆར་སི་ལི་ལི། །ཐུགས་རྗེའི་འོད་གསལ་ཡ་ལ་ལ། །འཁོར་དང་བཅས་པ་ཁྱེད་རྣམས་ཀྱིས། །ཚོགས་ཀྱི་མཆོད་པ་འདི་བཞེས་ལ། །བདག་དང་མཁའ༴ མ་ཐུགས་རྗེས༴ མ་འགྲོ་བའི་དོན་དུ་བྱོན་ཙམ་ན། །གནད་ཀྱི་གདམ་པ་ཤ་ར་ར། །བདུད་ཀྱི་གཅོད་ཐབས་སི་ལི་ལི། །རུས་པའི་སོགས། ཅེས་བསྐུལ་ལོ། །དེ་ནས་བསྒྲལ་མཆོད་དངོས་ནི། ཕཊཿ མདུན་དུ་ཨེ་ལས་གནམ་ལྕགས་ཀྱི་ཁོང་སྒྲོམ་ནག་པོ་གྲུ་གསུམ་པ། འཆི་བདག་ལས་ཀྱི་གཤིན་རྗེའི་བཙོན་ཁང་དྲག་པོ་ཐར་པའི་དུས་མེད་པ་ནད་མཚོན་དུག་གི་ཆར་འབེབ་པ་དེའི་ནང་དུ་ནྲྀ་དང་ཏྲི་ལས་བདག་ཅག་རྣམས་ལ་ལོག་པར་བལྟ་བའི་བསྟན་དགྲ་དམ་ཉམས་འདྲེ་གདོན་མ་རུང་པ་ཐམས་ཅད་གཟུགས་སྔོ་ལ་སྐྱ་བ་བམ་པ་རུལ་བ་འདར་ཕྲི་ལི་ལི་བྱེད་པ་གཅིག་ཏུ་གྱུར།། །།

འགྲེས་བྱང་།

༅། །འགྲེས་བྱང་། རུས་པའི་རྒྱན་ཆ་ཁྲ་ལ་ལ། །དར་གྱི་ཅོད་པན་པུ་རུ་རུ། །ཌཱ་རུ་ཅང་ཏིལ་ཁྲ་ལ་ལ། །སིལ་སྙན་མང་པོ་སི་ལི་ལི། །མི་རྐང་གླིང་བུ་ཀྱུ་རུ་རུ། །གར་དང་རོལ་མོ་ཤིགས་སེ་ཤིག །ཉམས་མྱོང་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །གདམ་ངག་སྦྲང་ཆར་སི་ལི་ལི། །འགྲོ་དོན་ཕྱོགས་མེད་ཡ་ལ་ལ། །མ་འཁོར་དང་བཅས་པ་ཁྱེད་རྣམས་ཀྱིས། །བདག་དང་མཁའ་མཉམ་སེམས་ཅན་ལ། །མ་ཐུགས་རྗེས་དགོངས་ལ་བྱིན་གྱིས་རློབས།། །།

ཕུར་གདབ་བསྡུས་པ།

༅། །ཕུར་གདབ་བསྡུས་པ། ཧཱུྃ། དུས་གསུམ་བདེ་གཤེགས་ཐམས་ཅད་དང་། །ཡུམ་ཆེན་སྐུ་གསུང་ཐུགས་ཀྱི་སྤྲུལ་པ་ལས། །སྲས་མཆོག་རིགས་ལྔའི་ཀི་ལ་ཡ། །མགོ་བོ་རྒྱ་མདུད་རྩེ་ཟུར་གསུམ། །ཟུར་བརྒྱད་གཟི་བྱིན་དབལ་དང་ལྡན། །དམ་ཉམས་དགྲ་བོ་སྡིག་ཅན་གྱི། །ལུས་ངག་ཡིད་ལ་གདབ་བྱས་ནས། །རྡུལ་ཕྲན་བཞིན་དུ་བརླག་པར་མཛོད། །ༀ་བུདྡྷ་བཛྲ་རཏྣ་པདྨ་ཀརྨ་ཀི་ལི་ཀཱི་ལ་ཡ་དགྲ་བགེགས་སརྦ་ཤ་ཏྲུཾ་མ་ར་ཡ་ཧཱུྃ་ཕཊ། ཅེས་འཚིང་བ་སུམ་ལྡན་གྱི་དགོངས་གནད་དང་བཅས་བསྒྲལ་ལོ།། །།

བདེན་བརྡབ།

༅། །ན་མོ། དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ ཡི་དམ་རྒྱལ་བའི་དཀྱིལ་འཁོར༴ ཆོས་སྐྱོང་སྲུང་མ་རྣམས་ཀྱི༴ ཁྱད་པར་དུ་མ་ཅིག་ལབ་ཀྱི་སྒྲོལ་མ་འཁོར་རིགས་བཞིའི་མཁའ་འགྲོ་མ་རྣམས་དང་། གྲུབ་ཐོབ་གཅོད་ཡུལ་བརྒྱུད་པའི་ལྷ་ཚོགས་རྣམས་ཀྱི་བཀའ་བདེན་པ་ཆེན་པོའི་མཐུ་སྟོབས་ཀྱི། བདག་ཅག་དཔོན་སློབ་དགོན་སྡེ་གྲྭ་ཚང་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས། ཚེ་ལེན་གྱི་བདུད། བར་དུ་གཅོད་པར་བྱེད་པའི་དགྲ་བགེགས་བྱད་མ་དེ་ཉིད་མཐོ་རི་རབ་ཀྱི་རྩེ། དམའ་རྒྱ་མཚོའི་གཏིང་། བར་འབྱུང་བ་བཞི་རྣམས་སུ་གར་གནས་ཀྱང་ཕོ་ཉ་ལྕགས་ཀྱུ་འབར་བ་ཅན་གྱིས་སྙིང་ནས་ཟུངས། ཞགས་པ་འབར་བ་ཅན་གྱིས་མགུལ་དུ་ཆིངས། །ལྕགས་སྒྲོག་འབར་བ་ཅན་གྱི་ཡན་ལག་བསྡོམ། །དྲིལ་བུ་འབར་བ་ཅན་གྱིས་མྱོས་སུ་ཆུགས། །འཇིགས་པའི་མུན་ནག་ཆེན་པོས་སྔོན་ནས་བསུས། །ལས་ཀྱི་རླུང་དམར་ཆེན་པོས་རྒྱབ་ནས་ཕུལ། །སྐད་ཅིག་རང་དབང་མེད་པར་དམིགས་པའི་རྟེན་འདི་ལ་མྱུར་དུ་ཁུག་ཅིག །བཛྲ་ཨ་ཀར་ཤ་ཡ་ཧཱུྃ་ཛཿ ཅེས་ལན་གསུམ། གཡོན་ལྕགས་ཀྱུའི་ཕྱག་རྒྱ་དང་། གཡས་རྡོ་རྗེ་གསོར་ཞིང་། སྤྲོ་རིགས་བཞི་སོ་སོར་ཕྲལ་བ་དང་། བསྡུ་ན། ཧཱུྃ་ཧཱུྃ། ཡུམ་ཆེན་སྐུ་གསུང་ཐུགས་ལས་སྤྲུལ་པ་ལ། །རིགས་བཞི་མཁའ་འགྲོ་གིང་དང་བཅས། །ཡང་སྤྲུལ་ཕོ་ཉ་བསམ་མི་ཁྱབ། །སྐུ་མདོག་སྣ་ཚོགས་ཅིར་ཡང་སྟོན། །གཡས་ཀྱི་ཕྱག་ན་ཕུར་པ་བསྣམས། །གཡོན་གྱི་ཕྱག་ན་ལྕགས་ཀྱུ་དང་། །ཞགས་པ་ལྕགས་སྒྲོགས་དྲིལ་བུ་བསྣམས། །མྱུར་མགྱོགས་རླུང་གིས་རྟ་ལ་ཞོན། །དམ་ཉམས་དགྲ་བགེགས་སྡིག་ཅན་རྣམས། །ཕྱོགས་མཚམས་སྟེང་འོག་ཐམས་ཅད་ཀྱིས། །ས་སྟེང་ས་འོག་ས་བླ་ཀུན། །འབྱུང་བ་བཞི་ཡི་གནས་རྣམས་ནས། །རང་དབང་མེད་པར་འདིར་ཁུག་ཅིག །བསྲུང་ཞིང་སྐྱོབ་པའི་ལྷ་དང་ཕྲོལ། །གཟུགས་བྱང་འདི་ལ་བསྟིམ་པར་གྱིས། །ༀ་བཛྲ་རཏྣ་པདྨ་ཀརྨ་ཌཱཀྐི་ནི་གནོད་བྱེད་འབྱུང་པོ་དགྲ་བགེགས་སརྦ་ཤ་ཏྲུཾ་བཛྲ་ཨངྐུ་ཤ་ཛ་ཛ། རཏྣ་པ་ཤ་ཧཱུྃ། པདྨ་སྥོ་ཊ་བཾ། ཀརྨ་གྷནྜེ་ཧོ། ནྲྀ་ཡང་ཛ་ཛཿ ཏྲི་ཡང་ཛ་ཛ། ཅེས་གཟུགས་ལ་དགུག་ཤིང་བསྟིམ། སླར་ཡང་སངས་རྒྱས་མཁའ་འགྲོའི་གཟུགས་ལ་དབབ་པ་ནི། བྷྱོ། སངས་རྒྱས་མཁའ་འགྲོའི་དུས་ལ་བབ། །གནོད་ཅིང་འཚེ་བའི་དགྲ་དང་བགེགས། །གདུག་ཅིང་སྡང་སེམས་ལྡན་པ་ཀུན། །རྣམ་ཤེས་གཟུགས་ལ་མྱུར་དུ་ཕོབ། །ཨ་མུ་ཀ་ཨ་ཝེ་ཤ་ཡ་ཧཱུྃ་ཕཊཿ རྡོ་རྗེ་མཁའ་འགྲོའི་ལྷ་དང་དབྱེ་བ་ནི། བྷྱོ། རྡོ་རྗེ་མཁའ་འགྲོའི་དུས་ལ་བབས། །གནོད་ཅིང་འཚེ་བའི་དགྲ་དང་བགེགས། །གདུག་ཅིང་སྡང་སེམས་ལྡན་པ་རྣམས། །འགོ་བའི་ལྷ་དང་ཕྲལ་བར་གྱིས། །ནྲྀ་ཏྲི་རུ་ཏྲ་པྲ་ཝེ་ཤ་ཡ་ཕཊཿ རིན་ཆེན་མཁའ་འགྲོའི་བྱད་དུ་བཅུག་པ་ནི། བྷྱོ། རིན་ཆེན་མཁའ་འགྲོའི་དུས་ལ་བབས། །གནོད་ཅིང་འཚེ་བའི་དགྲ་དང་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་ཆིངས་ཤིག་རྣམ་པར་ཆིང་། །ཨ་མུ་ཀ་ཤ་ཏྲུཾ་ཨ་པ་ན་ཡ་ཧཱུྃ་ཕཊཿ པདྨ་མཁའ་འགྲོའི་མྱོས་སུ་བཅུག་པ་ནི། བྷྱོ། པདྨ་མཁའ་འགྲོའི་དུས་ལ་བབས། །གནོད་ཅིང་འཚེ་བའི་དགྲ་དང་བགེགས། །གདུག་ཅིང་སྡང་སེམས་ལྡན་པ་ཀུན། །ལུས་ངག་ཡིད་གསུམ་མྱོས་པར་གྱིས། །ཨ་མུ་ཀ་ཛྭ་ལ་པ་ཡ་ཧཱུྃ་ཕཊཿ དེ་ནས་ཁྲོས་མ་ནག་མོས་གདབ་ཅིང་བསྒྲལ་བ་ནི། ཕུར་བུ་ལག་ཏུ་ཐོག་ལ། སྟོང་པའི་ངང་ལས་རང་ཉིད་ཁྲོས་མ་ནག་མོར་གསལ་བའི་ལག་པ་གཡས་གཡོན་གྱི་སོར་མོ་བཅུ་རིགས་ལྔ་ཡབ་ཡུམ་བཅུར་སྦྱོར་བ་མཛད་པའི་བྱང་སེམས་ཧཱུྃ་ཡིག་མཐིང་ནག་འབར་བ་ཡོངས་སུ་གྱུར་པ་ལས་རྗེ་བཙུན་ཁྲོས་མ་ནག་མོ་སྐུ་སྨད་གནམ་ལྕགས་ཀྱི་ཕུར་པ་མགར་གྱི་སོལ་མེ་ནས་བྱུང་བ་ལྟར་དམར་ཟིང་ངེར་བ། དགྲ་བགེགས་གནོད་བྱེད་ཀྱི་སྙིང་ལ་གཟིར་བར་བསམ། ཕུར་བུ་ལས་འོད་ཟེར་འཕྲོས། ཕྱོགས་བཅུའི་བདེ་བར་གཤེགས་པ་ཐམས་ཅད་ལ་མཆོད་པ་ཕུལ། དེ་རྣམས་འོད་དུ་ཞུ་ནས་ཕུར་བུ་ལ་ཐིམ་པས་བསྒྲིལ་བ་ཙམ་གྱིས་ཁམས་གསུམ་སྒྲོལ་ནུས་པའི་དབང་དང་བྱིན་རླབས་ཐོབ་པར་བསམ། ༀ་སརྦ་ཏ་ཐཱ་ག་ཏ་ཀ་ཡ་ཝཱཀྐ་ཙིཏྟ་ཨ་བྷི་ཥིཉྩ་མཾ། ༀ་ཡེ་དྷརྨ་སོགས་བརྗོད་ལ་རབ་གནས་བྱ། དེ་ནས་ཕུར་བུ་བསྒྲིལ་ཞིང་། ཧཱུྃཿ དུས་གསུམ་བདེ་གཤེགས་ཐམས་ཅད་དང་། །ཡུམ་ཆེན་སྐུ་ཡི་སྤྲུལ་པ་ལ་སྲས་མཆོག་བུདྡྷ་ཀི་ལ་ཡ། །མགོ་བོ་རྒྱ་མདུད་རྩེ་ཟུར་གསུམ། །ཟུར་བརྒྱད་གཟི་བྱིན་དབལ་དང་ལྡན། །དམ་ཉམས་དགྲ་བགེགས་སྡིག་ཅན་གྱིས། །སྤྱི་བོའི་དཀྱིལ་དུ་གདབ་བྱས་པས། །ལུས་ཀྱི་རྟེན་དང་ཕྲལ་བར་མཛོད། །ༀ་བུདྡྷ་ཀི་ལི་ཀཱི་ལ་ཡ་དགྲ་བགེགས་ཤ་ཏྲུཾ་མ་ར་ཡ་ཧཱུྃ་ཕཊཿ ཧཱུྃ། དུས་གསུམ་བདེ་གཤེགས་ཐམས་ཅད་དང་། །ཡུམ་ཆེན་གསུང་གི་སྤྲུལ་པ་ལ། །སྲས་མཆོག་པདྨ༴ མགོ་བོ་རྒྱ་མདུད༴ ཟུར་བརྒྱད་གཟི་བྱིན༴ དམ་ཉམས་དགྲ༴ ལྕེ་ཡི་དཀྱིལ་དུ་གདབ༴ ངག་གི་རྟེན་དང་ཕྲལ་བར༴ ༀ་པདྨ་ཀི་ལི་ཀཱི་ལ་ཡ་དགྲ་བགེགས་ཤ་ཏྲུཾ༴ ཧཱུྃ། དུས་གསུམ༴ ཡུམ་ཆེན་ཐུགས་ཀྱི༴ སྲས་མཆོག་བཛྲ་ཀི༴ མགོ་བོ་རྒྱ་མདུད་རྩེ༴ ཟུར་བརྒྱད་གཟི་བྱིན༴ ཙིཏྟའི་དཀྱིལ་དུ་གདབ་བྱས་པས། །རྣམ་ཤེས་རྟེན་དང་ཕྲལ་བར་མཛོད། །ༀ་བཛྲ་ཀི་ལི་ཀཱི་ལ་ཡ་དགྲ་བགེགས་ཤ་ཏྲུཾ་མ༴ ཧཱུྃ། དུས་གསུམ་བདེ་གཤེགས༴ ཡུམ་ཆེན་ཡོན་ཏན་སྤྲུལ་པ་ལ། །སྲས་མཆོག་རཏྣ་ཀི་ལ་ཡ། །མགོ་བོ་རྒྱ་མདུད་རྩེ༴ ཟུར་བརྒྱད་གཟི་བྱིན༴ དམ་ཉམས་དགྲ༴ ལྟེ་བའི་དཀྱིལ་དུ་གདབ༴ ལུས་ཀྱི་རྟེན་དང་ཕྲལ་བར་མཛོད། །ༀ་རཏྣ་ཀི་ལི་ཀཱི་ལ་ཡ་དགྲ་བགེགས་ཤ་ཏྲུཾ་མ་ར་ཡ་ཧཱུྃ་ཕཊཿ ཧཱུྃ། དུས་གསུམ་བདེ༴ ཡུམ་ཆེན་ཕྲིན་ལས་སྤྲུལ༴ སྲས་མཆོག་ཀརྨ་ཀི་ལ་ཡ། །མགོ་བོ་རྒྱ་མདུད་རྩེ་ཟུར༴ ཟུར་བརྒྱད་གཟི་བྱིན་དབལ་དང་ལྡན། །གསང་བའི་དཀྱིལ་དུ་གདབ་བྱས་པས། །རྡུལ་ཕྲན་བཞིན་དུ་བརླག་པར་མཛོད། །ༀ་ཀརྨ་ཀི་ལི་ཀཱི་ལ་ཡ་དགྲ་བགེགས་ཤ་ཏྲུཾ་མ་ར་ཡ་ཧཱུྃ་ཕཊ། ཅེས་ཚེ་ཁྲུས་ཀྱི་དགོངས་པ་དང་ལྡན་པའི་ཕུར་བུ་གདབ་བསྒྲལ། དེ་ནས་ལས་ཀྱི་མཁའ་འགྲོས་གཏུན་དུ་བརྡུང་བ་ནི། ལིང་ག་ཧོམ་ཁུང་དུ་རྡོ་རྗེ་ཐོ་བས་བརྡུང་ལ། ཧཱུྃ་བྷྱོ། ལས་ཀྱི་མཁའ་འགྲོའི་དུས་ལ་བབས། །དངོས་གྲུབ་འཕྲོག་པར་བྱེད་པ་ཡི། །གདུག་ཅིང་སྡང་སེམས་ལྡན་པ་རྣམས། །ལུས་ངག་རྡུལ་ཕྲན་བཞིན་དུ་རློགས། །ཨ་མུ་ཀ་ཏ་ཐ་ཡ་ཧཱུྃ་ཕཊཿ དེ་ནས་ལིང་རོ་ཞིང་ལྤགས་གམ་སྣོད་དུ་བཅུག་ལ་མཁའ་འགྲོའི་གཏོར་མར་བསྟབས། སྦྱིན་སྲེག་བྱ་ཚེ་མེ་ནང་འབུལ་ལོ། །གང་ལྟར་བསྟབས་པ་ནི། ཧཱུྃ། རྡོ་རྗེ་འཆང་ཆེན་མན་ཆད་ནས། །རྩ་བའི་བླ་མ་ཡན་ཆད་ཀྱིས། །ཁྱེད་གྲུབ་ཐོབ་བརྒྱུད་པའི་བླ་མ་རྣམས། །གནམ་ས་ཙམ་གྱི་ཞལ་གདངས་ལ། །རི་རབ་ཙམ་གྱིས་མཆེ་བ་གཙིགས། །བར་སྣང་ཙམ་གྱིས་ལྗགས་བརྐྱང་ལ། །སྟོང་གསུམ་ཙམ་གྱི་དམིགས་པ་རུ། །དམ་ཉམས་ལས་ངན་སྡིག་ཅན་གྱི། །དུག་ལྔ་བསྒྲལ་བའི་ཕུང་པོ་དང་། །ཤ་ཁྲག་རུས་པའི་ཚོགས་རྣམས་དང་། །དབང་པོ་ནང་རོལ་བཅས་པ་ཀུན། །ཞལ་དུ་བསྟབས་སོ་ཁ་རཾ་ཁཱ་ཧི། །མགུར་དུ་སྒྲིམ་མོ་ཨ་ར་ལི། །དབྱིངས་སུ་བསྟིམ་མོ་ས་མ་ཡ། །ཚོགས་སུ་འབུལ་ལོ་དགྱེས་པར་རོལ། །བཞེས་ཤིག་ལྷག་མ་མེད་པར་མཛོད། །ཡུམ་ཆེན་ཤེས་རབ་ཕར་ཕྱིན་མན་ཆད་དང་། །ཡི་དམ་ལྷ་ཚོགས་ཡན་ཆད་ལ། །ཁྱེད་སྡེ་སྣོད་རྒྱུད་སྡེའི་ལྷ་ཚོགས་རྣམས། །གནམ་ས་ཙམ་སོགས། མ་མགོན་ལྕམ་དྲལ་མན་ཆད་དང་། །གིང་ཆེན་གིང་ཆུང་ཡན་ཆད་ཀྱིས། །ཁྱེད་ཆོས་སྐྱོང་ཕོ་རྒྱུད་མོ་རྒྱུད་རྣམས། །གནམ་ས་ཙམ་སོགས། ཚངས་པ་བརྒྱ་བྱིན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱིས། །ཁྱེད་ཕྱི་རིམ་དཔལ་མགོན་སྲུང་མ་རྣམས། །གནས་ས་སོགས། བེ་ཧར་རྒྱལ་པོ་མན་ཆད་དང་། །གྲོང་རྒྱུག་འདྲེ་མོ་ཡན་ཆད་ཀྱིས། །ཁྱེད་ལྷ་སྲིན་སྡེ་བརྒྱད་འཁོར་བཅས་ཀྱིས། །གནམ་ས་ཙམ་སོགས། བྱི་ན་ཡ་ག་མན་ཆད་དང་། །ཐེའུ་རང་སྤུན་དགུ་ཡན་ཆད་ཀྱིས། །ཁྱེད་བགེགས་རིགས་སྟོང་ཕྲག་བརྒྱད་ཅུ་རྣམས། །གནམ་ས་སོགས། རི་དབང་རྒྱལ་པོ་མན་ཆད་དང་། །གཉན་ས་འདིར་གནས་ཡན་ཆད་ཀྱི། །ཁྱེད་སྣང་ཞིང་སྲིད་པའི་ལྷ་འདྲེ་རྣམས། །གནམ་ས་སོགས། ལྷག་མ་མེད་པར་མཛོད། །དེ་ནས་གཏོར་གཞོང་མ་ལྟར་གསལ། དེ་ནས་རྣལ་འབྱོར་པ་རྣམས་ཀྱིས་རོལ། རྗེས་ལྷག་མ་བྱའོ། །ནད་པ་གལ་ཆེ་མ་སློང་པ་དང་། རང་བཞིན་བློ་བུར་ནད་དང་། སྨྱོ་འབོག་ལ་སོགས་བྱུང་ན་ཞིང་ལྤགས་གམ་ཕྱར་བ་རུ་ཚོགས་ཀྱི་ཞལ་ཟས་དང་ནད་པ་བཅུག་ལ་གོ་འབྱེད་ལ་སོགས་བྱས་ལ། འདིའི་སྐབས་སུ་རྣལ་འབྱོར་པ་རྣམས་ཀྱིས་བཟུང་སྟེ། གོང་བཞིན་བསྟབ་པ་བྱས། རྗེས་སུ་ཡང་དམག་འགྱེད་ཀྱི་ཚིག་བཤད། གནས་སོར་མདོ་ཀྱིས་མཐའ་གཏད་རྣམས་བྱའོ། །དེ་མན་ཆད་གར་ཐོད་ཐོད་དུ་མི་བྱ་བ་གནད་ཡིན་ནོ། །འདི་པཎྜི་ཏ་ཆིག་དོན་ཡོད་རྡོ་རྗེས་མཛད་པའི་གཞུང་དང་། སངས་རྒྱས་གཉེན་སྟོན་གྱིས་མཛད་པའི་ཚོགས་བསྒྲལ་མཆོད་གཞུང་ལ་བརྟེན་ནས། ཅུང་ཞིག་གསལ་བར་ངག་འདོན་རྒྱུན་ཆགས་སུ་བྱ་བྲལ་ཀུན་དགའ་འབུམ་གྱིས་བྲིས་པ་དགེ་ལེགས་འཕེལ།། །།མངྒ་ལམ་བྷ་ཝནྟུ།

འགྲེས་བྱང་།

༅། །འགྲེས་བྱང་། ཁྱོད་ཚོགས་ལ་དགའ་བས་ཚོགས་ལ་རོལ། །ལ་ལ་ཕྱི་ཡི་ཚོགས་ལ་རོལ། །ལ་ལ་ནང་གི་ཚོགས་ལ་རོལ། །ལ་ལ་གསང་བའི་ཚོགས་ལ་རོལ། །ལ་ལ་དེ་བཞིན་ཉིད་ཀྱི་ཚོགས་ལ་རོལ། །ཨ་ལ་ལ་སྟེ་བཞེས་སུ་གསོལ། །ཕྱི་སྣོད་འཇིག་རྟེན་ནང་བཅུད་འདོད་ཡོན་ལྔ། །ཕྱི་ཡི་ཚོགས་སུ་འབུལ་ལོ་རོལ་པར་བཞེས། །གཟུགས་ཕུང་སྣོད་དུ་ཤ་ལྔ་བདུད་རྩི་ལྔ། །ནང་གི་ཚོགས་འབུལ་ལོ་དགྱེས་པར་བཞེས། །དབང་པོའི་སྣོད་དུ་དུག་ལྔ་ཡེ་ཤེས་ལྔ། །གསང་བའི་ཚོགས་སུ་འབུལ་ལོ་སྟོང་པར་བཞེས། །ཕྱི་ནང་གསང་བའི་ཚོགས་ཀྱི་མཆོད་པ་འདི། །གཉ ིས་མེད་ཆོས་དབྱིངས་ངང་དུ་མཉམ་པར་བཞེས། །མ་ཧཱ་སུ་ཁ་ས་མ་ཡ་ཧོ།། །།

ཚོགས་བསྒྲལ་བསྡུས་པ།

༅། །ཚོགས་བསྒྲལ་བསྡུས་པ་ནི། ཚོགས་རྫས་ཀྱི་སྟེང་དུ་ལིངྒ་བཅུག་ལ། ཧཱུྃ། ལྷ་གསལ་མདུན་དུ་ཨེ་ལས་བྲུབ་ཁུང་ནང་། །དངོས་བཤམས་ཡིད་ཀྱིས་རྒྱལ་བའི་བསྟན་བཤིགས་པའི། །མ་རུངས་ལོག་པར་བྱེད་པའི་རུ་ཊ་ཀུན། །དམིགས་རྟེན་རུས་པ་འདི་ཡི་སྟེང་དུ་ཁུག །ལྕགས་ཀྱུ་ཞགས་པ་ལྕགས་སྒྲོགས་དྲིལ་བུ་སོགས། །རྣོ་ངར་འབར་བའི་མཚོན་ཆས་གཏུབ་གསོད་བརྡུང་། །ཕྱེ་མར་བཏང་ནས་རྣམས་ཤེས་སྤར་རོལ་ལ། །ཟག་མེད་བདུད་རྩི་གྱུར་པའི་ཤ་ཁྲག་རུས། །དབང་པོ་རྣམ་ལྔ་རྩ་རྒྱུས་ཡན་ལག་ཀུན། །བླ་མ་ཌཱཀྐི་ཆོས་སྐྱོང་སྲུང་མ་རྣམས། །དམ་ཅན་རྒྱ་མཚོའི་ཞལ་དུ་ཁ་རཾ་ཁ་ཧི། །མ་རིག་འཁྲུལ་པའི་གཟུང་འཛིན་རང་དག་ནས། །རང་རིག་ཡེ་ཤེས་ངོ་བོ་བསྟན་དུ་གསོལ། །ཅེས་བསྒྲལ་ལ་བསྟབ་བོ། །ཟབ་དོན་ཚོགས་མཆོད་ལས་ཁོལ་དུ་ཕྱུང་བའོ། །ཚོགས་གྲངས་བསགས་སྐབས་དང་བསྡུས་པའི་སྐབས་འདི་སྦྱར་ན་ལེགས།། །།

བསྟབ་པའི་འགྲེས་བྱང་།

༅། །བསྟབ་པའི་འགྲེས་བྱང་། གནམ་ས་ཙམ་གྱི་ཞལ་གདངས་ལ། །རི་རབ་ཙམ་གྱིས་མཆེ་བ་གཙིག །བར་སྣང་ཙམ་གྱི་ལྗགས་བརྐྱང་ལ། །སྟོང་གསུམ་ཙམ་གྱི་དམིགས་པ་རུ། །དམ་ཉམས་ལས་ངན་སྡིག་ཅན་གྱིས། །དུག་ལྔ་བསྒྲལ་བའི་ཕུང་པོ་དང་། །ཤ་ཁྲག་རུས་པའི་ཚོགས་རྣམས་དང་། །དབང་པོ་ནང་རོལ་བཅས་པ་ཀུན། །ཞལ་དུ་བསྟབ་པོ་ཁ་རཾ་ཁཱ་ཧི། །མགུར་དུ་སྒྲིམ་མོ་ཨ་ར་ལི། །དབྱིངས་སུ་བསྟིམ་མོ་ས་མ་ཡཱ། །ཚོགས་སུ་འབུལ་ལོ་དགྱེས་པར་རོལ། །བཞེས་ཤིག་ལྷག་མ་མེད་པར་མཛོད།། །།

ཟབ་དོན་བསྒྲལ་མཆོད་ཀྱི་བསྟབ་པ།

༈ ཟབ་དོན་བསྒྲལ་མཆོད་ཀྱི་བསྟབ་པ་ནི། ཧཱུྃ། མ་གནམ་ས་ཙམ་གྱི་ཞལ་གདངས་ལ། །གངས་རི་ཙམ་གྱི་མཆེ་བ་གཙིག །བར་སྣང་ཙམ་གྱི་ལྗགས་བརྐྱང་ལ། །དབུས་ཕྱོགས་སངས་རྒྱས། ཤར་རྡོ་རྗེ། ལྷོ་རིན་ཆེན། ནུབ་པདྨ། བྱང་ཀརྨ། རིགས་ཀྱི་མཁའ་འགྲོ་མ། །བསྟབ་བོ་བསྟབས་སོ་ཞལ་དུ་བསྟབས། །གཏི་མུག །ཞེ་སྡང་། ང་རྒྱལ། འདོད་ཆགས། ཕྲག་དོག །ཕུང་པོ་ཞལ་དུ་བསྟབས། །ལུས་ཤ་ཁྲག་རུས་གསུམ་ཚོགས་ལ་རོལ། །སེམས་དམིགས་མེད་ཆོས་ཀྱི་དབྱིངས་སུ་བསྟིམ། །ཧཱུྃ། མ་གནམ་ས་ཙམ་གྱི་ཞལ་གདངས་ལ། །གངས་རི་ཙམ་གྱི་མཆེ་བ་གཙིག །བར་སྣང་ཙམ་གྱི༴ མ་སྟེང་འོག་ཕྱོགས་མཚམས་དུར་ཁྲོད་ནས། །སྣ་ཚོགས་ཌཱཀྐིའི་ཞལ་དུ་བསྟབ། །ལུས་ཤ་ཁྲག་རུས་གསུམ་ཚོགས་སུ་འབུལ། །སེམས་དམིགས་མེད་ཆོས་ཀྱི་དབྱིངས་སུ་བསྟིམ། །བདེ་བ་ཆེན་པོའི་དངོས་གྲུབ་བརྩལ་དུ་གསོལ། །ཅེས་སོ། །མངྒ་ལཾ།། །།

ལྷག་མ་བྱིན་གྱིས་རླབས་པ།

༅། །ལྷག་མ་བྱིན་གྱིས་རླབས་པ་ནི། ལྷག་མ་ལ་ཆང་དང་ཁ་ཁྲུ་བཏབ་ལ། སྭ་བྷ་ཝས་སྟོང་པར་སྦྱོངས། བྷྲཱུྃ་ལས་རིན་པོ་ཆེའི་སྣོད་ཀྱི་ནང་དུ་ལྷག་གཏོར་འདོད་ཡོན་གྱི་ལོངས་སྤྱོད་ཕུན་སུམ་ཚོགས་པར་གྱུར། ཨ་ཀ་རོས་བརླབ་ལ། ལྷག་མགྲོན་སྤྱན་འདྲེན་པ་ནི། རྡོ་རྗེ་རྩེ་ལྔའི་རྒྱ་བཅས་ལ། ༀ་ཨེ་ཨ་ར་ལི་ཧོ། ཛཿཧཱུྃ་བཾ་ཧོཿ ས་མ་ཡ་ཕེཾ་ཕེཾ། ཏ་ཀ་ར་ཙ་ཡ་ཛ་ཛཿ ཨད་ཀ་ཏ་ཡ། ཨད་ཀ་ཏ་ཡ། པྲ་ཝེ་ཤ་ཡ། ཨ་ཝེ་ཤ་ཡ། ཨ་ཝེ་ཤ་ཡ། ཏིཥྛ་ཡ། ཏིཥྛ་ཡ། བྷནྡྷ་ཡ། བྷནྡྷ་ཡ། ངོ་ཥ་ཡ། ངོ་ཥ་ཡ། མོ་ཧ་ཡ། མོ་ཧ་ཡ། སརྦ་དྷཱཀྐི་ནི་ནན་ཧྲཱིཿད་ཡ་ཧཱུྃ་ཕཊ། དེ་ནས་མཆོད་ཅིང་ཕྲིན་ལས་བཅོལ་བ་ནི། ཧཱུྃ་ཧྲཱིཿ རྡོ་རྗེ་མཁའ་འགྲོའི་བཀའ་ཉན་ལས་བྱེད་ཚོགས། །རིགས་བཞི་མཁའ་འགྲོ་ཤུགས་འགྲོ་འཁོར་དང་བཅས། །དབང་ཕྱུག་ཉེར་བརྒྱད་མཁའ་འགྲོ་སུམ་ཅུ་གཉིས། །གིང་ཆེན་བཅོ་བརྒྱད་ལང་ཀ་དུར་ཁྲོད་བདག་མ་བདུན་སྲིང་བཞི་འབར་མ་ལྔ་བཅུ་བརྒྱད། །དྲུག་ཅུ་རྩ་བཞི་འབུམ་ཕྲག་མཁའ་འགྲོའི་ཚོགས། །གང་བཅོལ་ཐོག་མེད་ཕྲིན་ལས་སྒྲུབ་མཛད་པའི། །བསྟན་མ་བཅུ་གཉིས་སྡེ་བརྒྱད་འཁོར་དང་བཅས། །བཀའ་ཡི་ཕམ་ཕབ་ལྷག་གཏོར་འདི་ལོངས་ལ། །ཞི་རྒྱས་དབང་དྲག་འགུགས་འདྲེན་མནན་གཟིར་སོགས། །ཅི་ལྟར་བཅོལ་པའི་ཕྲིན་ལས་འགྲུབ་པར་མཛོད། །ཅེས་གཏོར་མ་ཕྱིར་སྐྱོང་། དེ་ནས་གཙོག་ལྷག་འབྲུ་གསུམ་གྱིས་བྱིན་གྱིས་བརླབ་ལ། ཧཱུྃ། སྲིད་གསུམ་བྷནྡྷ་སོགས།། །།

མཛེས་མ་འབུམ་བསྐུལ་བསྡུས་པ།

༅། །མཛེས་མ་འབུམ་བསྐུལ་བསྡུས་པ་བཞུགས། མ་ཤར༴ ལྷོ༴ ནུབ༴ བྱང་༴ དབུས༴ མཚམས༴ ན་བཞུགས་པའི་མཁའ་འགྲོ་མ། །སྐུ་མདོག་སྔོན་མོ༴ སེར་མོ༴ དམར༴ ལྗང་མོ༴ དཀར་མོ༴ སྣ་ཚོགས༴ མཛེས་པའི་ཆ་བྱད་ཅན། །འཁོར་ཡང་སྔོན༴ སེར༴ དམར༴ ལྗང་༴ དཀར༴ སྣ་ཚོགས༴ མོ་མཛེས་མ་འབུམ་གྱིས་བསྐོར། །པདྨ་སྔོན༴ སེར༴ དམར༴ ལྗང་༴ དཀར༴ སྣ་ཚོགས༴ མོའི་གདན་ལ་བཞུགས། །ཕྱག་ན་པད་སྣོད་སྔོན་པོ༴ སེར་པོ༴ དམར་པོ༴ ལྗང་གུ༴ དཀར་པོ༴ སྣ་ཚོགས༴ བསྣམས། །དབུ་ལ་ཐོར་ཚུགས་བརྒྱན་གྱིས་བརྒྱན། །རྒྱན་དང་ཆ་ལུགས་མཚན་དཔེ་སྤྲས། །མ་འཁོར་དང་བཅས་པ་ཁྱེད་རྣམས་ལ། །ཚོགས་ཀྱི་མཆོད་པ་འདི་འབུལ་གྱིས། །རྒྱན་གྱི་གཏོར་མ་འདི་བཞེས་ལ། །བདག་ཅག་རྣལ་འབྱོར་འཁོར་བཅས་ཀྱི། །རྐྱེན་དང་བར་ཆད་ཞི་བར་མཛོད། །མ་ཅིག་ཞལ་གསུངས་པའོ།། །།

ལྷག་མའི་ཆོ་ག་རྒྱས་པར་སྤྲོ་ན་ལྷག་གཏོར་བཤམས།

༅། །ལྷག་མའི་ཆོ་ག་རྒྱས་པར་སྤྲོ་ན་ལྷག་གཏོར་བཤམས་ལ་འདི་སྐད་དོ། །བྷྱོ། ལས་ཀྱི་མཁའ་འགྲོ་མི་སྲུན་མ། །ཤིན་ཏུ་འཇིགས་པ་ཀིང་རུས་གཟུགས། །ཡན་ལག་རུས་པའི་འཁོར་ལོས་བརྒྱན། །སྙིང་ཁྲག་འཐུང་ཞིང་རྐན་སྒྲ་བརྡེབ། །རྐང་མགྱོགས་བཏུལ་ཤུགས་རྫུ་འཕྲུལ་ཅན། །དམ་ཚིག་ཅན་གྱི་ལས་མཁན་ཡིན། །དམ་ཉམས་རུ་ཏྲའི་སྲོག་གཅོད་ཡིན། །ལྷག་མའི་གཏོར་མ་འདི་བཞེས་ལ། །དགྲ་བགེགས་ཞིང་བཅུ་བསྒྲལ་དུ་གསོལ། །དྲག་པོའི་ལས་མཛད་བསྟན་པ་བསྲུང་། །ཁྱེད་ཀྱི་ཐུགས་དམ་དུས་ལ་བབ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། འཇིག་རྟེན་གིང་གང་རྫུ་འཕྲུལ་ཅན། །སྲིན་པོའི་ལུས་ལ་གཅན་སྤྱང་གདོང་། །སྦྲུལ་ནག་ལྕེ་ལ་སྤྱན་མིག་གློག །ཁ་རླངས་དུག་ལ་ང་རོ་འབྲུག །ཁྲོས་པའི་སྨྲེ་ངག་སེར་ཆེན་འབེབ། །མི་ལྤག་གཡང་གཞི་ཕྱོགས་བཞིར་བརྡེབས། །རྒྱུ་ཞགས་འདོམ་དགུས་དགྲ་བོ་འཆིང་། །བ་སྤུ་མཚོན་ཆ་མེ་ལྟར་འབར། །བྱེ་བ་དུང་ཕྱུར་འཁོར་དང་བཅས། །དམ་ཚིག་ཅན་གྱི་ལས་མཁན་མ། །དམ་ཉམས་རུ་ཏྲའི་སྲོག་གཅོད་ཡིན། །ལྷག་མའི་གཏོར་མ་འདི་བཞེས་ལ། །དགྲ་བགེགས་ཞིང་བཅུ་བསྒྲལ་དུ་གསོལ། །དྲག་པོའི་ལས་མཛད་བསྟན་པ་སྲུངས། །ཁྱོད་ཀྱི་ཐུགས་དམ་དུས་ལ་བབ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཤ་ཟ་མཁའ་འགྲོ་ཡང་སྤྲུལ་ཚོགས། །ཡི་དྭགས་ལུས་ལ་དུར་བྱའི་བུ། །དུར་ཁྲོད་རྐང་ལ་ཐོད་པས་བརྒྱན། །ལུས་ལ་ཁྲག་རུལ་ཆུ་སེར་འབབས། །སྨྲེ་ངག་ཚིག་གིས་ངུར་མོ་དབྱངས། །ཕྱི་ན་འདྲེ་འཚུབ་སྤྲིན་ལྟར་གཏིབ། །རོ་ལོང་རྐང་ལ་དུར་ཁྲོད་ལུས། །ཕུང་སྲིན་མིག་ལ་གཟའ་སྲིན་ལག །དམ་ཚིག༴ དམ་ཉམས༴ ལྷག་མའི༴ དགྲ་བགེགས༴ དྲག་པོའི༴ ཁྱོད་ཀྱི༴ བཅོལ་པའི༴ བྷྱོ། གཞན་ཡང་མཁའ་འགྲོ་ཕོ་ཉའི་ཚོགས། །ལས་ལ་མྱུར་མགྱོགས་བསྟན་པ་སྲུང་། །བུ་ཆུང་ལུས་ལ་བྱ་རོག་མགོ། །སྐྱུག་གླུའི་དབྱངས་ལ་ཐི་བྱའི་ཚིག །རི་གསུམ་འགྲིམ་ཞིང་ལུང་གསུམ་བསྐོར། །ཆུ་ལ་ཞོན་ནས་གྲིབ་སོ་འགྲིམ། །གཅན་སྤྱང་ཕོ་མོའི་དྲི་ལ་བསྣམས། །ད་ལའི་མཐའ་ལ་བསྐོར་ཞིང་ཉུལ། །ལས་བྱེད་མི་སྡུག་འཁོར་དང་བཅས། །དམ་ཚིག་ཅན་གྱི༴ དམ་ཉམས༴ ལྷག་མའི༴ དགྲ་བགེགས༴ དྲག་པོའི༴ ཁྱེད་ཀྱི་ཐུགས་དམ༴ བཅོལ་པའི་ཕྲིན་ལས་འགྲུབ་པར་མཛོད། །ཅེས་ལྷག་གཏོར་གཏོང་།། །།

གཅོད་ཀྱི་ཆད་ཐོ་བཏང་བ།

༅། །གཅོད་ཀྱི་ཆད་ཐོ་བཏང་བ་ནི། གཏོར་མ་ལ་སྨན་རཀ་སྦྲན་ཏེ། བྷྱོ། སྔོན་ཚེ་བསྐལ་པ་དང་པོ་འདས་དུས་སུ། །གཞི་མེད་རྩ་བ་བྲལ་བའི་གནས་མཆོག་ཏུ། །ངོ་བོ་ངོས་བཟུང་བྲལ་བའི་སློབ་དཔོན་གྱིས། །གཟུང་ཡུལ་རིག་དང་བྲལ་བའི་སློབ་མ་ལ། །རྣམ་རྟོག་མཚན་མ་བྲལ་བའི་དབང་བསྐུར་ཚེ། །སྔར་མ་འདས་པའི་རྟོགས་པ་ཀུན་འདུས་ནས། །ཆོས་སྐུ་ཡེ་སངས་རྒྱས་པར་མ་ཆད་དམ། །ཚོགས་དྲུག་འགྱུ་བའི་གཏོར་མ་འདི་བཞེས་ལ། །ཆོས་སྐུ་ཟང་ཐལ་གྲུབ་པའི་ཕྲིན་ལས་མཛོད། །ད་ལྟ་བར་གྱི་རྟོག་པ་བར་མ་ལ། །སྣང་བ་མ་འགགས་གསལ་བའི་གནས་མཆོག་ཏུ། །ཅི་ཤར་ཞིང་ཁམས་རྒྱས་པའི་སློབ་དཔོན་གྱིས། །བློ་རྟོག་སྤྲོས་པ་ཆོད་པའི་སློབ་མ་ལ། །རིག་པ་མངོན་སུམ་བསྟན་པའི་དབང་བསྐུར་ཚེ། །དེ་ལ་གནས་པའི་དྲན་རྟོག་ཀུན་འདུས་ནས། །ལོངས་སྐུ་ཉམས་སྣང་འཕེལ་བའི་ཕྲིན་ལས་མཛོད། །གདོད་ནས་མ་འོང་རྟོག་པའིཐ་མ་ལ། །ཅི་ཤར་རྗེས་མེད་ཡལ་བའི་གནས་མཆོག་ཏུ། །འཁོར་འདས་ཐིག་ལེ་རྫོགས་པའི་སློབ་དཔོན་གྱིས། །བཟང་ངན་བློ་དང་བྲལ་བའི་སློབ་མ་ལ། །རྫོགས་རིམ་མིང་དང་བྲལ་བའི་དབང་བསྐུར་ཚེ། །མ་འོང་སླད་ཀྱི་དྲན་པ་ཀུན་འདུས་ནས། །འབྲས་བུ་སྐུ་གསུམ་ཐོབ་པར་མ་ཆད་དམ། །ཀ་དག་དམིགས་གཏད་བྲལ་བའི་གཏོར་མ་བཞེས། །འབྲས་བུ་ཆོས་ཟད་བློ་འདས་གྲུབ་པར་མཛོད། །ཕཊ་ཕཊ་ཕཊཿ ཅེས་གཏོར་སྐྱེམས་གཙང་སར་མཆོད། འདིའི་བྱུང་ཁུང་མིང་གསལ་ཡང་ཆོ་ག་སྤྱིའི་འགྲིགས་ལྟར་ཉེ་བར་མཁོ་བའི་ཕྱིར་མཁན་ས་མནྟའི་གཅོད་པོད་ནང་གི་ཕྱག་བྲིས་ཇི་ལྟ་བ་ཞལ་བཤུས་པ་དགེ་ལེགས་འཕེལ།། །།

བརྟན་མ་སྐྱོང་བ།

༅། །དེ་ནས་བརྟན་མ་སྐྱོང་བ་ནི་གཏོར་མ་ལ་བཤལ་ཆུས་བྲན་ལ། བྷྱོ། བརྟན་མ་སྐྱོང་མཛད་མ་སྲིན་རྒྱ་མཚོའི་ཚོགས། །དཔོན་གཡོག་མང་པོ་སྨན་ཕྲན་མང་པོ་བཅས། །འདིར་གཤེགས་རྒྱན་གྱི་གཏོར་མས་ཕྲིན་ལས་མཛོད། །བྷྱོ། བདུད་མོ་བཞི་དང་གནོད་སྦྱིིན་སྨན་མོ་བཞི། །འཁོར་བཅས་སིལ་སྙན་དྲོད་རྟགས་སྒྲ་དང་བཅས། །འདིར་གཤེགས་བརྒྱན་གྱི་གཏོར་མ་འདི་བཞེས་ལ། །སློབ་དཔོན་བཀའ་བཞིན་བོད་ཁམས་བུ་ལྟར་སྐྱོངས། །བསྒྲུབ་བྱེད་བསྟན་འཛིན་སྐྱེས་བུའི་ཕྲིན་ལས་མཛོད། །བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ཨེ་དཾ་བ་ལིངྟ་ཁ་ཧི། ཅེས་ཕུལ་ལ་གཏོར་འགུགས་དང་རྟ་བྲོ་སོགས་བྱའོ།། །།

བྲོ་འགུགས།

༈ བྲོ་འགུགས་ནི། ལྷག་མ་ཆད་བསྟན་གཏོར་འབུལ་སྣོད་རྣམས་ཁ་བུབ་པའི་སྟེང་རྒྱ་གྲམ་བྱས་པས་མནན་ལ། ན་མོ། གྲུབ་ཐོབ་གཅོད་ཀྱི་བརྒྱུད་པ། ཡི་དམ་ཆོས་སྐྱོང་རྣམས་ཀྱི་བདེན་པས་གནོད་བྱེད་དམ་སྲི་རྒབ་འདྲེ་མི་མིན་མི་རུ་བརྫུབ་མགོ་གཡོག་མགོ་བསྐོར་བྱེད་པ། བཀའ་དང་དམ་ལ་མི་གནས་པ་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག །ཛཿཧཱུྃ་བཾ་ཧོཿ ཞེས་བཀུག་ལ་རྟ་བྲོ་བྱ།། །།

མཁའ་འགྲོ་སྡེ་ལྔའི་བསྐང་བ།

མཁའ་འགྲོ་སྡེ་ལྔའི་བསྐང་བའི་དབུ་ཕྱོགས་ལགས་སོ། །ན་མོ་གུ་རུ་བཛྲ་ཌཱཀྐི་ནི་ཡེ། བླ་མ་རྡོ་རྗེ་མཁའ་འགྲོའི་ཞབས་ལ་གུས་པར་ཕྱག་འཚལ་ལོ། །རྣལ་འབྱོར་དམ་ཚིག་དང་སྡོམ་པའི་ཆགས་ཉམས་གསོ་བ་དང་། བླ་མ་ཡི་དམ་མཁའ་འགྲོའི་ཐུགས་དམ་བསྐང་ཞིང་མཆོག་དང་ཐུན་མོང་གིས་དངོས་གྲུབ་བདེ་ལེགས་སུ་སྒྲུབ་པར་འདོད་པས། དུར་ཁྲོད་ལ་སོགས་པའི་གནས་ཁྱད་པར་ཅན་དུ་དཀོན་མཆོག་གསུམ་གྱིས་རྟེན་བཀྲམ། མཁའ་འགྲོ་སྡེ་ལྔའི་རྡུལ་ཚོན་ནམ། ཚོམ་བུས་དཀྱིལ་འཁོར་བྱ། མཆོད་པའི་ཚོགས་དང་གཏོར་མ་འདོད་ཡོན་ཕུན་སུམ་ཚོགས་པས་བརྒྱན་པ་ལྔ། ནང་མཆོད་དང་རྡོ་རྗེ་དྲིལ་བུ་ལ་སོགས་པ་རོལ་མོའི་བྱེ་བྲག་རྣམས་དང་། གཞན་ཡང་མཆོད་པའི་རྫས་ཅི་འབྱོར་པ་དང་། ཚོགས་གཏོར་ལ་སོགས་བཤམས་ལ་དགེ་འདུན་ལ་སོགས་འཚོགས་ནས་གདན་ལ་འཁོད་དེ། སྔོན་འགྲོའི་གཏོར་མ་ནས་ཚོགས་ཀྱི་གཞུང་བསྲང་སྟེ། དམ་ཚིག་གིས་དྲངས་ནས། ཚོགས་ཀྱིས་འཁོར་ལོས་དཔའ་བོ་དཔའ་མོ་རྣལ་འབྱོར་པ་རྣམས་ཀྱིས་འཚོ་བར་བྱས་ལ། དམིགས་པས་རྒྱས་པ་དཀྱིལ་འཁོར་གདབ་ཅིང་། སྙན་པའི་དབྱངས་དང་བཅས་པས་འདི་སྐད་དོ། །ཧཱུྃ། སྲ་བརྟེན་རྒྱ་ཁྱོན་ཆེས་ཆེ་བས། །རྡོ་རྗེའི་ས་གཞི་རྭ་གུར་དང་། །བླ་རེ་བསྐལ་པའི་མེ་རིའི་བསྐོར། །དབུས་སུ་ཆོས་འབྱུས་རྒྱ་ཆེ་བར། །རླུང་མེ་ཆུ.ས་རི་རབ་སྟེང་། །སྟེང་དུ་གཞལ་མེད་ཁང་ཆེན་པོ། །གྲུ་བཞི་སྒོ་བཞི་རྟ་བབ་བཞི། །རྒྱན་རྣམས་ཀུན་གྱིས་རྣམ་པར་སྤྲས། །འཇིག་རྟེན་ཁམས་ནི་མ་ལུས་པས། །རྒྱས་པར་ཁེངས་པའི་འོད་འཕྲོ་ཞིང་། །དུར་ཁྲོད་ཆེན་པོ་བརྒྱད་དང་བཅས། །དབུས་སྔོ་ཤར་དཀར་ལྷོ་སེར་ཞིང་། །ནུབ་དམར་བྱང་ལྗང་དབུས་སུ་ནི། །སྣ་ཚོགས་པདྨའི་ལྟེ་བ་དང་། །འདབ་མ་རྣམས་སུ་ཉི་མ་ལ། །བདག་མེད་སྟོང་པའི་རོའི་གདན། །ཕྱི་ནང་ཀུན་ཏུ་ལྷ་རྫས་ལས། །གྲུབ་པའི་ཀུན་བཟང་མཆོད་པའི་སྤྲིན། །དགྲ་བགེགས་བསྒྲལ་བའི་གཏོར་ཆེན་ལས། །འདོད་ཡོན་ཕུན་སུམ་ཚོགས་པའི་བརྒྱན། །ལྷ་རྫས་རྣམས་ཀྱི་ཡིད་འཕྲོག་པས། །བླ་ན་མེད་པའི་གནས་མཆོག་འདིར། །ཅེས་པས་གནས་དང་མཆོད་རྫས་གསལ་གདབ་ལ། རོལ་མོའི་སྒྲ་དང་བཅས་པ་སྤྱན་འདྲེན་པར་བྱ་སྟེ། ཧཱུྃ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །རྡོ་རྗེ་འཆང་དབང་རྩ་བའི་བླ་མ་དང་། །གཞན་ཡང་ཆོས་ཀྱི་འབྲེལ་བའི་དཀྱིལ་འཁོར་ནས། །བརྒྱུད་པའི་བླ་མ་གྲུབ་ཐོབ་ཕོ་མོ་རྣམས། །བརྩེ་བའི་ཐུགས་རྗེ་བདག་ལ་ཉེར་དགོངས་སྟེ། །བླ་ན་མེད་པའི་གནས་འདིར་གཤེགས་སུ་གསོལ། །ཧཱུྃ། རང་བཞིན་ལྷུན་གྱིས་གྲུབ་པའི་དཀྱིལ་འཁོར་ནས། །ཆོས་སྐུ་སྤྲོས་བྲལ་སྨྲ་བསམ་ལས་འདས་ཞིང་། །ཡེ་ཤེས་སྒྱུ་མའི་གཟུགས་སྐུའི་གཞན་དོན་མཛད། །མཁའ་འགྲོའི་ཚོགས་རྣམས་བརྩེ་བས་གནས་འདིར་གཤེགས། །ཧཱུྃ། མཁའ་དབྱིངས་རྣམ་དག་ཀློང་ཡང་དཀྱིལ་འཁོར་ནས། །སངས་རྒྱས་བསྟན་འཛིན་སྐྱོང་བ་དང་། །བསྟན་ལ་གནོད་བྱེད་བསྒྲལ་བ་དམ་བཅས་པས། །ཕྱི་ནང་ཆོས་སྐྱོང་ཚོགས་རྣམས་གནས་འདིར་གཤེགས། །ཧཱུྃ། སངས་རྒྱས་བསྟན་ལ་དད་པ་བརྟེན་གྱུར་ཅིག །བསྟན་འཛིན་ཐམས་ཅད་ཆོས་བཞིན་སྐྱོང་བ་དང་། །འདོད་དོན་མ་ལུས་བསྒྲུབ་པའི་མཐུ་རྩལ་ཅན། །དྲེགས་པ་ཅན་རྣམས་གནས་འདིར་གཤེགས་སུ་གསོལ། །ༀ་མ་ཧཱ་གུ་རུ་དྷེ་ཝ་ཌཱཀྐི་ནི་སརྦ་དྷརྨ་པ་ལ་ས་པ་རི་ཝ་ར་ཨེ་ཧྱ་ཧི། ཅེས་སྤྱན་འདྲེན། པདྨ་ཀ་མ་ལ་ཡེ་སྟཾ། ཅེས་པས། གདན་དང་གཞལ་ཡས་ཕུལ་ལ་ཕྱི་ཡི་མཆོད་པས་ཐུགས་དམ་བསྐང་བ་ནི། ཧཱུྃ། ཕྱི་ཡི་མཆོད་པ་འབུལ་བ་ནི། །ཐོད་པ་མཚན་ལྡན་ཀ་པ་ལ། །རཀྟའི་མཆོད་ཡོན་ཞབས་བསིལ་དང་། །དབང་པོ་ལྔའི་མེ་ཏོག་དང་། །ཤ་ཆེན་ལང་ལིང་བདུག་སྤོས་དང་། །ཞུན་ཆེན་སྦར་བའི་སྣང་གསལ་དང་། །རྡོ་རྗེ་རང་བྱུང་དྲི་ཆབ་དང་། །ཤ་ཁྲག་རུས་པ་ལས་བྱུང་བས། །རོ་བརྒྱ་ལྡན་པའི་ཞལ་ཟས་དང་། །དམ་སྲི་ཕོ་མོ་བསྒྲལ་བ་ཡི། །དུང་ཆེན་གླིང་བུ་ཐོད་ལྔ་དང་། །སྤྱི་བོར་སྤྲད་པའི་ཅང་ཏིལ་དང་། །མཁའ་འགྲོའི་ཚོགས་རྣམས་དབང་བསྡུད་ཕྱིར། །གསང་བའི་རྔེའུ་ཆུང་ལ་སོགས་པའི། །སྣ་ཚོགས་རོལ་མོའི་སྒྲ་དབྱངས་འདི། །བླ་མ་བརྒྱུད་པ་བཅས་ལ་འབུལ། ༈ །སྐུ་གསུང་ཐུགས་མཆོག་མཉེས་གྱུར་ཅིག །རྣལ་འབྱོར་ལམ་མཆོག་བསྒྲུབ་པ་ཡི། །རྩ་བ་དང་ནི་ཡན་ལག་གིས། །དམ་ཚིག་ཆགས་ཉམས་གྱུར་པ་རྣམས། །བསྐང་གྱུར་དབང་དང་དངོས་གྲུབ་སྩོལ། །རྒྱུ་སྦྱོར་ཡོན་གྱི་བདག་པོ་ཡི། །ཚེ་བསྲིང་དཔལ་བསྐྱེད་བསམ་པ་བསྒྲུབ། །མི་མཐུན་རྐྱེན་དང་བར་ཆད་སེལ། །འདོད་པའི་དོན་རྣམས་འགྲུབ་པར་མཛོད། །ཧཱུྃ། དཀྱིལ་འཁོར་ཆེན་པོའི་དབུས་བཞུགས་པའི། །ཞེ་སྡང་རྣམ་ཤེས་རྣམ་དག་ཅིང་། །ཆོས་དབྱིངས་ཡེ་ཤེས་རྡོ་རྗེའི་སྐུ། །རང་བཞིན་འགྱུར་མེད་སྐུ་མདོག་སྔོ། །བདེ་སྟོང་ཟུང་འཇུག་ཕྱག་གཉིས་མ། །རྒྱུ་དྲུག་གཅོད་པའི་གྲི་གུག་དང་། །བདུད་བཞིའི་ཁྲག་བཀང་ཐོད་པ་བསྣམས། །བཅོམ་ལྡན་རྡོ་རྗེ་མཁའ་འགྲོ་མ། །འཁོར་དང་བཅས་ལ་གུས་པར་འབུལ། །སྐུ་གསུང་ཐུགས་མཆོག་མཉེས༴ གང་བཞིན་འགྲེས། ཧཱུྃ། ཤར་གྱི་ཕྱོགས་ན་བཞུགས་པ་ཡི། །གཏི་མུག་གཟུགས་ཕུང་རྣམ་དག་པ། །མེ་ལོང་ཡེ་ཤེས་རྡོ་རྗེའི་སྐུ། །ནད་གདོན་ཞི་མཛད་སྐུ་མདོག་དཀར། །ཕྱག་གཉིས་གྲི་གུག་ཐོད་པ་འབྲེལ། །བཅོམ་ལྡན་སངས་རྒྱས་མཁའི་འགྲོ་མ། །འཁོར་དང་བཅས་ལ་གུས་པར་འབུལ། །སྐུ་གསུང་ཐུགས་མཆོག་སོགས། ཧཱུྃ། ལྷོ་ཡི་ཕྱོགས་ནས་བཞུགས་པ་ཡི། །ང་རྒྱལ་ཚོར་ཕུང་རྣམ་དག་ཅིང་། །མཉམ་ཉིད་ཡེ་ཤེས་རྡོ་རྗེའི་སྐུ། །ཚེ་དཔལ་རྒྱས་མཛད་སྐུ་མདོག་སེར། །ཕྱག་གཉིས་གྲི་གུག་ཐོད་པ་འབྲེལ། །བཅོམ་ལྡན་རིན་ཆེན་མཁའ་འགྲོ་མ། །འཁོར་དང་བཅས་ལ་གུས་པས་འབུལ། །སྐུ་གསུང་ཐུགས་མཆོག་མཉེས་གྱུར་ཅིག །རྣལ་འབྱོར་ལམ་མཆོག་བསྒྲུབ་པ་ཡི། །རྩ་བ་དང་ནི་ཡན་ལག་གིས། །དམ་ཚིག་ཆགས་ཉམས་གྱུར་པ་ཀུན། །བསྐང་གྱུར་དབང་དང་དངོས་གྲུབ་སྩོལ། །རྒྱུ་འབྱོར་ཡོན་གྱི་བདག་པོ་ཡི། །ཚེ་བསྲིང་དཔལ་བསྐྱེད་བསམ་པ་བསྒྲུབ། །མེ་མཐུན་རྐྱེན་དང་བར་ཆད་སེལ། །འདོད་པའི་དོན་རྣམས་འགྲུབ་པར་མཛོད། །ཧཱུྃ། ནུབ་ཀྱི་ཕྱོགས་ནས་བཞུགས་པ་ཡིས། །འདོད་ཆགས་འདུ་ཤེས་རྣམ་དག་ཅིང་། །སོར་རྟོག་ཡེ་ཤེས་རྡོ་རྗེའི་སྐུ། །ལྷ་མི་དབང་བསྡུད་སྐུ་མདོག་དམར། །ཕྱག་གཉིས་གྲི་གུག་ཐོད་པ་འབྲེལ། །བཅོམ་ལྡན་པདྨ་མཁའ་འགྲོ་མ། །འཁོར་དང་བཅས་ལ་གུས་པར་འབུལ། །སྐུ་གསུང་ཐུགས༴ སོགས། ཧཱུྃ། བྱང་གི་ཕྱོགས་ན་བཞུགས་པ་ཡི། །ཕྲག་དོག་འདུ་ཤེས་རྣམ་དག་ཅིང་། །བྱ་གྲུབ་ཡེ་ཤེས་རྡོ་རྗེའི་སྐུ། །དགྲ་བགེགས་སྒྲོལ་མཛད་སྐུ་མདོག་ལྗང་། །ཕྱག་གཉིས་གྲི་གུག་ཐོད་པ་འབྲེལ། །བཅོམ་ལྡན་ལས་ཀྱི་མཁའ་འགྲོ་མ། །འཁོར་དང་བཅས་ལ༴ སྐུ་མདོག་ཐུགས་མཆོག༴ སོགས། ཧཱུྃ། དུས་གསུམ་མཁྱེན་ཅིང་ཁམས་གསུམ་ལ། །གཟིགས་པ་སྤྱན་གསུམ་གཡོན་དུ་བསྒྱུར། །ཡེ་ཤེས་མཁའ་འགྲོ་སྡེ་ལྔ་ཡིས། །བསྐང་ངོ་བསྐལ་པའི་ཐུགས་དམ་བསྐང་། །འཁོར་བ་དང་ནི་མྱང་འདས་ཀྱི། །མཐའ་གཉིས་མི་གནས་བརྐྱང་བསྐུམ་བཞུགས། །ཡེ་ཤེས་མཁའ་འགྲོ་སྡེ་ལྔ་ཡི། །བསྐང་ངོ་བསྐལ༴ སྐུ་གསུང་ཐུགས་ཡོན་ཕྲིན་ལས་མཚོན། །ཐབས་ཀྱི་རང་བཞིན་ཁ་ཊྭཱཾ་ཁ། །ཤེས་རབ་མཁའ་འགྲོ་སྡེ་ལྔ་ཡི། །བསྐང་ངོ་བསྐལ༴ རུས་པའི་འཁོར་ལོ་རྡོ་རྗེ་སེམས། །རྣ་བའི་རྒྱན་ཆ་འོད་དཔག་མེད། །མགུལ་གྱི་ཕྲེང་བ་རིན་ཆེན་འབྱུང་། །གདུབ་བུ་རྣམ་པར་སྣང་མཛད་དང་། །སྐུ་རེག་དོན་ཡོད་གྲུབ་པ་སྟེ། །ཐབས་ཤེས་ཕ་རོལ་ཕྱིན་ལྔ་ཡི། །ཤེས་རབ་ཕ་རོལ་ཕྱིན་པའི་ཐུགས་དམ་བསྐང་། །བསྐང་ངོ་བསྐལ་པའི༴ དེ་བཞིན་གཤེགས་པ་ལྔ་དག་པས། །ཐོད་སྐམ་ལྔ་ཡི་དཔའ་བོ་ཡི། །དབུ་ལ་རབ་ཏུ་མཛེས་པར་བརྒྱན། །བསྐང་ངོ་བསྐལ་པའི༴ ཨ་ལི་ཀ་ལི་རྣམ་དག་པའི། །ཐོད་རློན་འཕྲེང་བ་ལྔ་བཅུའི་དོ་ཤལ་དང་། །ཐབས་ཤེས་ཟུང་འཇུག་ཚང་སྐུད་དང་། །དུང་ཆེན་ཕྲེང་བ་དཔའ་བོ་ཡི། །རབ་ཏུ་མཛེས་པར་བརྒྱན་པ་ཡི། །བསྐང་ངོ་བསྐལ་པའི༴ སྒྲིབ་པའི་ཚང་ཚིང་ཀུན་བསྲེག་ཅིང་། །ཡེ་ཤེས་འོད་ལྔའི་འོད་ཆེན་པོ། །འུར་འུར་ཚྭ་ཚྭ་མེ་འབར་བའི། །ཡེ་ཤེས་མཁའ་འགྲོ་སྡེ་ལྔ་ཡི། །བསྐང་ངོ་བསྐལ༴ ཧཱུྃ། གཞན་ཡང་ཐུགས་དམ་བསྐང་བའི་རྫས། །འཇིག་རྟེན་ཁམས་ནི་ཅི་སྙེད་བར། །ཁ་དོག་དབྱིབས་ལེགས་གཟུགས་རྣམས་དང་། །ཟིན་དང་མ་ཟིན་སྒྲ་སྙན་དང་། །ཡིད་ལ་བསམ་པའི་དྲི་མཆོག་དང་། །རོ་བརྒྱ་ལྡན་པའི་ཞལ་ཟས་དང་། །འཇམ་མཉེན་འཁྲིལ་ཆག་རིགས་རྣམས་དང་། །རི་རབ་གླིང་བཞི་གླིང་ཕྲན་དང་། །རི་བདུན་རོལ་པའི་མཚོ་བདུན་དང་། །ཉི་མ་ཟླ་བའི་སྣང་གསལ་དང་། །རྣམ་རྒྱལ་ཁང་བཟང་བལྟ་ན་སྡུག །འདོད་ཁམས་གཟུགས་ཁམས་གཟུགས་མེད་ཁམས། །མཆོད་པར་འོས་པ་ཅི་སྙེད་པས། །ཡེ་ཤེས་མཁའ་འགྲོ་སྡེ་ལྔ་ཡི། །བསྐང་ངོ་བསྐལ་པའི་ཐུགས་དམ་བསྐང་། །དེ་ནས་ནང་གི་མཆོད་པས་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བའི་རྫས། །འབྲུ་གསུམ་ལས་གྲུབ་ཐོད་སྒྱེད་གསུམ། །སྟེང་དུ་ཡེ་ཤེས་ཀཱ་པ་ལ། །ཤ་ལྔ་བདུད་རྩི་ཡེ་ཤེས་ལྔ། །མེ་རླུང་སྦྱོར་བའི་བཞུས་བསྐུལ་བས། །དྲི་མ་ཕུད་འཇིག་རྟེན་དང་། །འཇིག་རྟེན་ལས་འདས་བཅུད་རྣམས། །ཡེ་ཤེས་ལྔའི་ཁ་དོག་དྲི། །རེག་བྱ་ནུས་པ་ཕུན་སུམ་ཚོགས། །ནང་གི་མཆོད་པ་རྒྱ་ཆེན་འདི། །བླ་མ་བརྒྱུད་པ་བཅས་ལ་འབུལ། །ཡི་དམ་མཁའ་འགྲོ་སྡེ་ལྔ་དང་། །རྒྱུད་སྡེ་བཞི་ཡི་ལྷ་ཚོགས་དང་། །ཕྱོགས་བཅུའི་དུས་གསུམ་བཞུགས་པ་ཡི། །རྒྱལ་བ་སྲས་དང་བཅས་ལ་འབུལ། །སྐུ་གསུང་ཐུགས་མཆོག་མཉེས་གྱུར་ཅིག །རྣལ་འབྱོར་ལམ་མཆོག་སྒྲུབ་པ་ཡི། །རྩ་བ་དང་ནི་ཡན་ལག་གིས། །དམ་ཚིག་ཆག་ཉམས་གྱུར་པ་ཀུན། །བསྐང་གྱུར་དབང་དང་དངོས་གྲུབ་སྩོལ། །རྒྱུ་སྦྱོར་ཡོན་གྱི་བདག་པོ་ཡི། །ཚེ་བསྲིང་དཔལ་བསྐྱེད་བསམ་པ་བསྒྲུབ། །མི་མཐུན་རྐྱེན་དང་བར་ཆད་སེལ། །འདོད་པའི་དོན་རྣམས་འགྲུབ་པར་མཛོད། །ཧཱུྃ། གཞན་ཡང་ཐུགས་དམ་བསྐང་བ་ནི། །རྡོ་རྗེ་འཆང་གིས་སྤྱན་སྔ་རུ། །བསྟན་པ་སྲུང་བར་ཁས་བླངས་པ། །ཡེ་ཤེས་མགོན་པོ་ཅི་སྙེད་པ། །མ་ཅིག་ལྷ་མོའི་ཚོགས་རྣམས་དང་། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བའི་ཚོགས་དང་བཅས། །སྤྲུལ་པ་ཡང་སྤྲུལ་བཅས་ལ་འབུལ། །སྐུ་གསུང་ཐུགས་མཆོག་སོགས། དེ་ནས་སྲུང་མའི་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བ་ནི། །མ་ཅིག་ལབ་སྒྲོན་སྤྱན་སྔ་རུ། །བསྟན་པ་སྲུང་བར་ཞལ་བཞེས་པའི། །མྱུར་མཛད་མགོན་པོ་ཕྱག་དྲུག་པ། །འདོད་ཁམས་དབང་ཕྱུག་རེ་མ་ཏི། །ཀྵེ་ཊ་པ་ལ་གནོད་སྦྱིན་བཞི། །གཙང་རིས་དཔལ་མགོན་བདུན་ཅུ་གཉིས། །ཞི་བྱེད་སྲུང་མ་ཨ་གྷོ་ར། །བཟློག་བྱེད་མ་དང་ནོར་རྒྱུན་མ། །གཅོད་ཀྱི་བཀའ་སྲུང་དུར་ཁྲོད་བདག །མཚན་མོ་སྒྲ་སྒྲོག་སྤྱང་ཞོན་མ། །སྟག་ཞོན་མ་དང་འཕར་ཞོན་མ། །ཤམ་པོའི་གཟའ་བདུད་མགོ་དགུ་དང་། །ཐོག་གི་བུ་ཡུག་གདོང་མོ་བཞི། །གཟའ་བརྒྱད་ཟངས་རི་འཁྱིལ་བ་སོགས། །སྤྲུལ་འཁོར་བཅས་པའི་ཐུགས་དམ་བསྐང་། །སྐུ་གསུང་ཐུགས་སོགས། ཧཱུྃ། གཞན་ཡང་ཐུགས་དམ་བསྐང་བ་ནི། །ཞང་བློན་རྡོ་རྗེ་བདུད་འདུལ་དང་། །ཡུམ་གཉིས་མཆེད་བརྒྱད་གནོད་སྦྱིན་ཁྲི། །འབྲོག་གནས་ལྔ་དང་རྒྱལ་ཆེན་བཞི། །ཐང་ལྷ་འོ་དེ་གུང་རྒྱལ་དང་། །མཁའ་རི་ལྕམ་དྲལ་ཡར་ལྷ་ཤམ། །བརྟན་མ་བཅུ་གཉིས་སྨན་ཕྲན་འབུམ། །ཀླུ་རྒྱལ་དྲག་པོ་ཟླ་སྐྱོང་སོགས། །ཟབ་མོ་གཅོད་ཀྱི་བསྟན་སྲུང་དང་། །ས་ཕྱོགས་འདི་ཡི་གཞི་བདག་སོགས། ། ཆོས་ལ་དགའ་བ་ཀུན་ལ་འབུལ། །སྐུ་གསུང་ཐུགས་མཆོག་སོགས། དེ་ནས་གཏོར་མའི་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བ་ནི། །སངས་རྒྱས་བསྟན་ལ་གནོད་བྱེད་པ། །དགྲ་བགེགས་ལོག་འདྲེན་བསྒྲལ་བ་ཡིས། །གཏོར་ཆེན་དམར་གྱི་བརྒྱན་པ་དང་། །སྨན་རག་ཆང་དང་ཕུད་ཀྱིས་བྲན། །བསང་སྦྱང་འདོད་ཡོན་ཕུན་སུམ་ཚོགས། །ཁ་དོག་དྲི་རོ་ནུས་ལྡན་ཞིང་། །བླ་ན་མེད་པའི་མཆོད་པ་འདི། །བླ་མ་བརྒྱུད་པར་བཅས་ལ་འབུལ། །མཁའ་འགྲོ་སྡེ་ལྔའི་ཚོགས་ལ་འབུལ། །རྒྱུད་སྡེ་བཞི་ཡི་ལྷ་ལ་འབུལ། །ཕྱོགས་བཅུའི་རྒྱལ་བ་རྣམས་ལ་འབུལ། །ཕྱི་ནང་དགེ་འདུན་རྣམས་ལ༴ འཇིག་རྟེན་འདས་དང་མ་འདས་པ། །བསྲུང་མ་དམ་ཅན་རྣམས་ལ༴ སྐྱོང་མ་བསྟན་མ་ཤུག་འགྲོ་དང་། །དྲེགས་པ་ཅན་གྱིས་ཚོགས་ལ་འབུལ། །སྐུ་གསུང་ཐུགས་མཆོག་སོགས། འགྲུབ་པར་མཛོད། །གནམ་སའི་རྒྱན་ལ་སོགས་པས་མཆོད་ཅིང་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བ་ནི། །སངས་རྒྱས་བསྟན་ལ་གནོད་བྱེད་པའི། །དགྲ་དང་བགེགས་རྣམས་བསྒྲལ་བ་ཡི། །ཀིང་རུས་ཕྲེང་བ་ས་གཞིའི་བརྒྱན། །ཙིཏྟ་ཙ་ལག་ཚོང་བ་དང་། །རྒྱུ་རློན་ལྡ་ལྡི་བར་སྣང་བརྒྱན། །གཡང་གཞི་བླ་རེ་ནམ་མཁའི་རྒྱན། །རྒྱན་ཆ་ཡིད་འོང་སྣ་ཚོགས་དང་། །ཁྲག་ཞག་རྒྱ་མཚོ་འཁྱིལ་པ་དང་། ཤ་རིགས་སྣ་ཚོགས་རི་ལྟར་སྤུངས། །ཀླད་པ་ནང་རོལ་སྣ་ཚོགས་དང་། །དྲོད་དང་དྲི་བསུང་མ་ཡལ་བ། །དཔའ་བོ་མཁའ་འགྲོ་མཉེས་བྱེད་པ། །བླ་ན་མེད་པའི་མཆོད་པ་འདི། །བླ་མ་བརྒྱུད་པ་བཅས་ལ་འབུལ། །མཁའ་འགྲོ་སྡེ་ལྔའི་ཚོགས་ལ་འབུལ། །རྒྱུད་སྡེ་བཞི་ཡི་ལྷ་ལ་འབུལ། །ཕྱོགས་བཅུའི་རྒྱལ་བ་རྣམས་ལ་འབུལ། །ཕྱི་ནང་དགེ་འདུན་རྣམས་ལ༴ འཇིག་རྟེན་འདས་དང་མ་འདས་པ། །སྲུང་མ་དམ་ཅན་རྣམས་ལ་འབུལ། །སྐྱོང་མ་བསྟན་མ་ཤུག་འགྲོ་དང་། །དྲེགས་པ་ཅན་གྱི་ཚོགས་ལ་འབུལ། །སྐུ་གསུང་ཐུགས་མཆོག་སོགས། དེ་ནས་བསྐང་རྫས་སྣ་ཚོགས་ཀྱི་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བའི་རྫས། །མཁའ་ལྡིང་ལ་སོགས་འདབ་ཆགས་དང་། །སེང་གེ་སྟག་གཟིག་ཁྱི་ལ་སོགས། །གཅན་གཟན་ཅི་སྙེད་ཡོད་པ་དང་། །ཅང་ཤེས་རྟ་མཆོག་ལ་སོགས་པ། །མྱུར་འགྱོགས་རླུང་གི་གཤོག་པ་ཅན། །གཡག་ནག་ཞུབ་ཅན་ལུག་ནག་སོགས། །རབ་མཛེས་ཡིད་འོང་དུ་མ་ཡིས། །སྣ་ཚོགས་བརྒྱན་གྱིས་བརྒྱན་པ་དང་། །རིན་ཆེན་སྣ་ལྔའི་ཕྱེ་མ་ཡི། །ཞལ་ཟས་ཚོགས་ཀྱི་མཆོད་པ་དང་། །དྲག་པོའི་བཤོས་བུ་ཟུར་གསུམ་དང་། །སྣ་ཚོགས་དར་གྱི་ལྷབ་ལྷུབ་དང་། །མཁའ་ལྡིང་ནག་པོ་གསེར་མིག་དང་། །ཁྲག་གིས་འོད་ཟེར་འབར་བ་དང་། །ཙ་ར་རོག་པོ་མཁལ་དཀར་དང་། །གསང་བའི་རྒྱལ་མཚན་འཕན་གདུག་དང་། །བྱ་མོ་ནག་མོ་ལ་སོགས་དང་། །རླུང་གི་ཁྱེར་བའི་ཤིང་ལོ་དང་། །གསང་བའི་ཤ་ཁྲག་ལ་སོགས་པའི། །མ་སྲིང་མཁའ་འགྲོ་འདུ་བའི་རྫས། །ཅི་སྙེད་ཡོད་པ་ཐམས་ཅད་དང་། །བླ་མ་བརྒྱུད་པ་བཅས་ལ་འབུལ། །ཐུགས་དམ་དགོངས་པ་བསྐང་གྱུར་ཅིག །རྣལ་འབྱོར་བདག་གིས་ཉམས་ཆགས་ཀུན། །བསྐང་གྱུར་དབང་དང་དངོས་གྲུབ་སྩོལ། །གཞན་ཡང་ཐུགས་དམ་བསྐང་བ་ནི། །ཡི་དམ་དཀྱིལ་འཁོར་ལྷ་ཚོགས་དང་། །ཕྱོགས་བཅུའི་རྒྱལ་བ་སྲས་བཅས་དང་། །ཕྱི་དང་ནང་གི་སྲུང་མ་དང་། །བསྟན་ལ་དགའ་བའི་ལྷ་ཀླུ་ཡི། །ཐུགས་དམ་དགོངས་པ་བསྐང་གྱུར་ནས། །རྣལ་འབྱོར་བདག་གི་ཉམས་ཆག་ཀུན། །བསྐང་གྱུར་དབང་དང་དངོས་གྲུབ་སྩོལ། །སྐུ་གསུང་ཐུགས་མཆོག་མཉེས་གྱུར་ཅིག །རྣལ་འབྱོར་ལམ་མཆོག་བསྒྲུབ་པ་ཡིས། །རྩ་བ་དང་ནི་ཡན་ལག་གིས། །དམ་ཚིག་ཆག་ཉམས་ཐམས་ཅད་ཀུན། །བསྐང་གྱུར་དབང་དང་དངོས་གྲུབ་སྩོལ། །རྒྱུ་འབྱོར་ཡོན་གྱི་བདག་པོ་ཡིས། །ཚེ་བསྲིང་དཔལ་བསྐྱེད་བསམ་པ་སྒྲུབ། །མི་མཐུན་རྐྱེན་དང་བར་ཆད་སོལ། །འདོད་པའི་དོན་རྣམ་འགྲུབ་པར་མཛོད། །དེ་ནས་གསང་བའི་མཆོད་པས་ཐུགས་དམ་བསྐང་བ་ནི། ཧཱུྃ། བླ་མ་ཡི་དམ་མཁའ་འགྲོའི་ཚོགས། །ཤེས་རབ་གཟུགས་སུ་སྣང་བ་ལ། །རབ་མཛེས་ཡིད་འོང་ཐབས་ཀྱི་མཆོད། །ཐབས་ཀྱི་གཟུགས་སུ་སྣང་བ་ལ། །ཤེས་རབ་ཉི་ཟླས་རྒྱལ་བ་མཆོད། །འདུ་ཤེས་སུམ་ལྡན་སྙོམས་འཇུག་ལ། །ལྷན་སྐྱེས་བདེ་སྟོང་ཟུང་འཇུག་ལས། །བླ་མ་དཀོན་མཆོག་ཐུགས་དམ་བསྐང་། །ཡི་དམ་ལྷ་ཚོགས་ཐུགས་དམ་བསྐང་། །རྒྱལ་བ་སྲས་བཅས་ཐུགས་དམ༴ མ་སྲིང་མཁའ་འགྲོའི་ཐུགས༴ གནས་གསུམ་དཔའ་བོའི༴ ཆོས་སྐྱོང་སྲུང་མའི༴ ནག་པོ་འབུམ་སྡེའི་ཐུགས༴ ལས་མཁན་རྣམས་ཀྱི༴ མ་ཅིག་ལྷ་མོའི་ཐུགས༴ མ་མོ་བྱེ་བའི་ཐུགས༴ ལས་ལ་བསྐུལ་བའི་ཐུགས་དམ་བསྐང་། །གཙང་རིགས་མགོན་པོའི་ཐུགས༴ བསྟན་མ་སྐྱོང་མཛད་ཤུགས་འགྲོ་དང་། །དྲེག་པ་ཅན་གྱི༴ སྐུ་གསུང་ཐུགས་མཆོག་སོགས། དེ་ཁོ་ན་ཉིད་ཀྱིས་ཐུགས་དམ་བསྐང་བ་ནི། ཧཱུྃ། གཞན་ཡང་ཐུགས་དམ་བསྐང་བ་ནི། །དེ་ལྟར་ཐུགས་དམ་བསྐང་ཡུལ་དང་། །རྣལ་འབྱོར་བསྐང་བར་བྱེད་པ་དང་། །བསྐང་བ་ཡི་ནི་ཆོ་ག་དང་། །རྟེན་དང་བརྟེན་པ་བཅས་པ་དང་། །སྣང་སྲིད་བརྟེན་གཡོ་ལ་སོགས་པ། །ཀུན་རྫོབ་སྒྱུ་མ་རྨི་ལམ་ལྟར། །དོན་དམ་ཆོས་ཉིད་སྤྲོས་དང་བྲལ། །སྐྱེ་འགགས་གནས་པའི་མཐའ་དང་བྲལ། །ཡོད་མིན་མེད་མིན་ཀུན་དང་བྲལ། །བློ་ཡི་འཛིན་པ་ཀུན་དང་བྲལ། །མཐའ་བྲལ་དབུ་མ་ཆེན་པོ་ལ། །ཡེ་ནས་བཤགས་བྱ་བཤགས་བྱེད་མེད། །རང་བཞིན་འོད་གསལ་ལྷུན་གྲུབ་ལ། །བསྐང་བ་ཅི་བྱས་མ་བསྐང་ཞིང་། །དོན་དམ་ཆོས་ཉིད་སྤྲོས་དང་བྲལ། །ཀུན་རྫོབ་སྒྱུ་མ་ལྟ་བུ་ཡི། །ངང་ནས་བསྐང་བ་བྱེད་པ་སྟེ། །གཟུགས་ཀྱི་མཆོད་པ་ཁྱད་པར་འཕགས། །སྒྲ་ཡི་མཆོད་པ་ཡིད་འོང་ལྡན། །དྲི་ཡི་མཆོད་པ་ཚིམ་པར་མཆོད། །རོ་ཡི་མཆོད་པ་བདེ་མཆོད་ལྡན། །རེག་བྱའི་མཆོད་པ་བླ་ན་མེད། །བདེ་ཆེན་ཟུང་འཇུག་མཆོད་པ་འདི། །བླ་མ་དཀོན་མཆོག་ཐུགས་དམ་བསྐང་། །ཡི་དམ་ལྷ་ཚོགས༴ རྒྱལ་བ་སྲས་བཅས༴ མ་སྲིང་མཁའ་འགྲོའི༴ གནས་གསུམ་དཔའ་བོ༴ ཆོས་སྐྱོང་སྲུང་མའི༴ ནག་པོ་འབུམ་སྡེའི༴ མ་ཅིག་ལྷ་མོའི༴ མ་མོ་བྱེ་བའི་ཐུགས༴ ལས་ལ་བསྐུལ༴ གཙང་རིག་མགོན་པོའི༴ བརྟེན་མ་སྐྱོང་མ་ཤུག་འགྲོ་དང་། །དྲེགས་པ་ཅན་གྱིས༴ སྐུ་གསུང་ཐུགས་མཆོག་མཉེས་གྱུར་ཅིག །རྣལ་འབྱོར་ལམ་མཆོག་སྒྲུབ་པ་ཡི། །རྩ་བ་དང་ནི་ཡན་ལག་གིས། །དམ་ཚིག་ཉམས་ཆགས་གྱུར་པ་རྣམས། །བསྐང་གྱུར་དབང་དང་དངོས་གྲུབ་སྩོལ། །རྒྱུ་འབྱོར་ཡོན་གྱིས་བདག་པོ་ཡི། །ཚེ་བསྲིང་དཔལ་བསྐྱེད་བསམ་པ་བསྒྲུབ། །མི་མཐུན་རྐྱེན་དང་བར་ཆད་སོལ། །འདོད་པའི་དོན་རྣམས་འགྲུབ་པར་མཛོད། །ཧཱུྃ། བསྐང་བ་མེད་དེ་བདེན་གཉིས་ངང་དུ་བསྐང་། །བཤགས་བྱ་མེད་དེ་བདེན་གཉིས་ངང་དུ་བཤགས། །བཟློག་བྱ་མེད་དེ་བདེན་གཉིས་ངང་དུ་བཟློག །མཁའ་འགྲོའི་ཐུན་དང་ཕུར་ཟོར་བཟློག །ཧེ་རུ་ཀ་ཡི་གཟི་བརྗིད་བཟློག །སྟོབས་པོ་ཆེ་ཡི་ཟིར་གནོན༴ ལྷ་རྣམས་ཀུན་གྱི་རྩུབ་རིགས་བཟློག །ལྷ་མི་རྣམས་ཀྱི་དམག་སྣ༴ གཟའ་ཆེན་རྣམས་ཀྱི་གདུག་ཟེར༴ གཤིན་རྗེ་ཕོ་མོའི་འཁྲུལ་འཁོར༴ བདུད་དམག་རྣམས་ཀྱི་ཁྲམ་ཁ་བཟློག །མ་མོ་རྣམས་ཀྱི་ཁྲག་ནད་བཟློག །ཀླུའི་བྱད་དུ་བཅུག་པ༴ ཐེའུ་རང་སྲི་ལ་རྐུ་བ༴ གནོད་སྦྱིན་རྣམས་ཀྱི་གཟེར་ནད༴ བཙན་གྱི་རྒྱུ་ཞག་འཕེན་པ་བཟློག །རྒྱལ་པོའི་སྨྱོ་འབོག་གཏོང་བ་བཟློག །འབྱུང་པོའི་ཡི་དྭགས་རིམས་ནད་བཟློག །བནྡེའི་སྔགས་ཟོར་འཕེན་པ་བཟློག །སྔགས་པའི་ཕུར་ཟོར་འཕེན་པ་བཟློག །བོན་པོའི་བསྡིག་ཟོར་འཕེན་པ་བཟློག །སྐྱེས་པའི་མདའ་ཟོར་འཕེན་པ་བཟློག །བུད་མེད་དམོད་ཟོར་འཕེན་པ་བཟློག །སླད་ཀྱི་གཤེད་བཞི་མཆིས་པ་བཟློག །མོ་རྩིས་ངན་པ་ཐམས་ཅད་བཟློག །དེ་ལ་སོགས་པའི་གདུག་སེམས་རྣམས། །ཐམས་ཅད་སྡང་བའི་དགྲ་ལ་བྷྱོཿ ཐམས་ཅད་རྦོད་སྟོང་སྟེང་དུ་བྷྱོཿ ༀ་བཛྲ་དྷ་ཀྐི་ནི། དགྲ་བགེགས་བྱེད་མ་རྦོད་སྟོང་མ་ར་ཡ་བྷྱོ་བྷྱོཿ བཟློག་བཟློག །ཐུམ་རིལ་རྦད་སྭཱ་ཧཱ། བླ་མ་ཡི་དམ་མཁའ་འགྲོ་འཁོར་བཅས་ལ། །ཕྱི་ནང་གསང་བ་དེ་ཁོ་ནས། །མཆོད་ཅིང་ཐུགས་དམ་བསྐང་བ་ནི། །དོན་གཉེར་རྣམས་ཀྱིས་བསྐུལ་བའི་ངོར། །བཟང་གི་ས་མདོར་ཀུན་དགས་སྦྱར། །གནོང་བ་བཟོད་པ་མཛད་དགེ་བས། །མ་གྱུར་འགྲོ་བ་མ་ལུས་པས། །རྡོ་རྗེ་འཆང་དབང་ཐོབ་པར་ཤོག། །།དགེའོ། །

མཁའ་འགྲོ་སྡེ་ལྔའི་བསྐང་བ།

མཁའ་འགྲོ་སྡེ་ལྔའི་བསྐང་བ་བཞུགས་སོ། །ཧཱུྃ། འོག་མིན་གནས་དང་ཨོ་རྒྱན་གནས། །མཁའ་སྤྱོད་གནས་དང་བདེ་ཆེན་གནས། །དུར་ཁྲོད་ཆེན་པོའི་གནས་རྣམས་ནས། །མཁའ་འགྲོ་སྡེ་ལྔ་འཁོར་དང་བཅས། །སྤྲུལ་པ་ཡང་སྤྲུལ་ཕོ་ཉར་བཅས། །འབུམ་ཚོ་ལྔ་ཡི་ཚོགས་བཅས་རྣམས། །གནས་འདིར་སྤྱན་འདྲེན་གཤེགས་སུ་གསོལ། །ཚོགས་མཆོད་འབུལ་ཕྱིར་གཤེགས་སུ་གསོལ། །ཐུགས་དམ་བསྐང་ཕྱིར་གཤེགས་སུ་གསོལ། །ཉམས་ཆག་བསྐང་ཕྱིར་གཤེགས་སུ་གསོལ། །བྱིན་གྱིས་བརླབ་ཕྱིར་གཤེགས་སུ་གསོལ། །དངོས་གྲུབ་སྟེར་ཕྱིར་གཤེགས་སུ་གསོལ། །གཤེགས་ནས་བྱིན་གྱིས་བརླབ་ཏུ་གསོལ། །ཧཱུྃ། ཤར་རྡོ་རྗེ་རིགས་ཀྱི་མཁའ་འགྲོ་མ། །སྐུ་མདོག་སྔོན་མོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་བསྒྲད། །ཕྱག་གཡས་པས་གྲི་གུག་ནམ་མཁར་ཕྱར། །གཡོན་པས་བྷནྡྷ་ཐུགས་ཀར་བསྣམས། །ཞལ་གདངས་མཆེ་གཙིག་དབུ་སྐྲ་མཛེས། །རུས་པའི་བརྒྱན་དྲུག་སྐུ་ལ་བརྒྱན། །ཐོད་སྐམ་ལྔ་ཡི་དབུ་ལ་བརྒྱན། །ཐོད་རློན་ལྔ་བཅུའི་དོ་ཤལ་བྱས། །གཡས་བརྐྱང་གཡོན་བསྐུམ་རོའི་གདན། །ཁ་ཊྭཱྃ་ཀ་ནི་གྲུ་མོར་ཐོག །རྡོ་རྗེ་མཁའ་འགྲོའི་ཐུགས་དམ་བསྐང་། །སྔོན་མོ་འབུམ་གྱི་ཐུགས་དམ་བསྐང་། །འཁོར་དང་བཅས་པའི་ཐུགས་དམ་བསྐང་། །ཧཱུྃ། དབུས་སངས་རྒྱས་རིགས་ཀྱི་མཁའ་འགྲོ་མ། །སྐུ་མདོག་དཀར་མོ་གཟི་དམངས་ཅན། །ཞལ་གཅིག་ཕྱག་གཉིས་སྤྱན་གསུམ་བསྒྲད། །གཡས་པས་གྲི་གུག་ནམ་མཁར་ཕྱར། །གཡོན་པས་བྷནྡྷ་ཐུགས་ཀར་བསྣམས། །ཞལ་གདང་མཆེ་གཙིག་དབུ་སྐྲ་མཛེས། །རུས་པའི་རྒྱན་དྲུག་སྐུ་ལ་མཛེས། །ཐོད་སྐམ་ལྔ་ཡི་དབུ་ལ་བརྒྱན། །ཐོད་རློན་ལྔ་བཅུའི་དོ་ཤལ་བྱས། །གཡས་བརྐྱང་གཡོན་བསྐུམ་རོ་ཡི་གདན། །ཁ་ཊྭཱྃ་ཀ་ནི་གྲུ་མོར་ཐོག །སངས་རྒྱས་མཁའ་འགྲོའི་ཐུགས༴ དཀར་མོ་འབུམ་གྱི༴ འཁོར་དང་བཅས་པའི༴ ཧཱུྃ། ལྷོ་རིན་ཆེན་རིགས་ཀྱི་མཁའ་འགྲོ་མ། །སྐུ་མདོག་སེར་མོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་བསྒྲད། །གཡས་པས་གྲི་གུག་ནམ་མཁར་ཕྱར། །གཡོན་པས་བྷནྡྷ་ཐུགས་ཀར་བསྣམས། །ཞལ་གདོངས་མཆེ་གཙིག་དབུ་སྐྲ་མཛེས། །རུས་པའི་བརྒྱན་དྲུག་སྐུ་ལ་བརྒྱན། །ཐོད་སྐམ་ལྔ་ཡི་དབུ་ལ་བརྒྱན། །ཐོད་རློན་ལྔ་བཅུའི་དོ་ཤལ་བྱས། །གཡས་བརྐྱང་གཡོན་བསྐུམ་རོ་ཡི་གདན། །ཁ་ཊྭཱྃ་ཀ་ནི་གྲུ་མོར་ཐོག །རིན་ཆེན་མཁའ་འགྲོའི༴ སེར་མོ་འབུམ་གྱིས༴ འཁོར་དང་བཅས་པའི༴ ཧཱུྃ། ནུབ་པདྨ་རིགས་ཀྱི་མཁའ་འགྲོ་མ། །སྐུ་མདོག་དམར་མོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་བསྒྲད། །གཡས་པས་གྲི་གུག་ནམ་མཁའ་ཕྱར། །གཡོན་པས་བྷནྡྷ་ཐུགས་ཀར་བསྣམས། །ཞལ་གདོངས་མཆེ་གཙིག་དབུ་སྐྲ་མཛེས། །རུས་པའི་བརྒྱན་དྲུག་སྐུ་ལ་བརྒྱན། །ཐོད་རློན་ལྔ་བཅུའི་དོ་ཤལ་བྱས། །གཡས་བརྐྱང་གཡོན་བསྐུམ་རོའི་གདན། །ཁ་ཊྭཱྃ་ཀ་ནི་གྲུ་མོར་ཐོགས། །པདྨ་མཁའ་འགྲོའི༴ དམར་མོ་འབུམ་གྱི༴ འཁོར་དང་བཅས་པའི༴ ཧཱུྃ། བྱང་ལས་ཀྱི་རིགས་ཀྱི་མཁའ་འགྲོ་མ། །སྐུ་མདོག་ལྗང་ཀུ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་བསྒྲད། །གཡས་པས་གྲི་གུག་ནམ་མཁར་ཕྱར། །གཡོན་པས་བྷནྡྷ་ཐུགས་ཀར་བསྣམས། །ཞལ་མདངས་མཆེ་གཙིག་དབུ་སྐྲ་མཛེས། །རུས་པའི་བརྒྱན་དྲུག་སྐུ་ལ་གསོལ། །ཐོད་སྐམ་ལྔའི་དབུ་བརྒྱན་ཅན། །ཐོད་རློན་ལྔ་བཅུའི་དོ་ཤལ་བྱས། །གཡས་བརྐྱང་གཡོན་བསྐུམ་རོ་ཡི་གདན། །ཁ་ཊྭཱྃ་ཀ་ནི་གྲུ་མོར་ཐོགས། །ལས་ཀྱི་མཁའ་འགྲོའི༴ ལྗང་མོ་འབུམ་གྱི༴ འཁོར་དང་བཅས་པའི༴ ཧཱུྃ། མཁའ་འགྲོ་སྡེ་ལྔ་འཁོར་བཅས་ལ། །ཕྱི་ཡི་མཆོད་པ་འབུལ་བ་ནི། །ཆུ་གཙང་ཡིད་དུ་འོང་བའི་ཕྱིར། །ཞབས་སིལ་ཞལ་བསིལ་འཐོར་འཐུང་དང་། །མཆོད་ཡོན་ཅི་སྙེད་ཡོད་པ་རྣམས། །མཁའ་འགྲོ་སྡེ་ལྔའི་ཐུགས་དམ་བསྐང་། །འཁོར་འབུམ་ཚོ་ལྔའི་ཐུགས༴ །ཨ་ག་རུ་དང་སྦྲུལ་སྙིང་དང་། །དུ་རུ་ཀ་དང་གོར་ཤི་ཀ །སྤོས་དཀར་ཛ་ཏི་ལ་སོགས་པའི། །བདུག་སྤོས་རྣམ་པ་སྣ་ཚོགས་ཀྱི། །མཁའ་འགྲོ་སྡེ་ལྔའི་ཐུགས༴ འཁོར་འབུམ་ཚོ་ལྔའི༴ ཉི་མ་མེ་ཤེལ་ལ་སོགས་པའི། །ཟླ་བ་ཆུ་ཤེལ་ལས་གྲུབ་པའི། །ཀརྨ་འོད་དང་ལྡན་པར་དང་། །མར་གྱི་མེ་ཆེན་ལ་སོགས་པའི། །མཁའ་འགྲོ་སྡེ་ལྔའི༴ འཁོར་འབུམ་ཚོ་ལྔ་ཡི༴ ག་པུར་དང་ནི་གུར་གུམ་དང་། །ཙནྡན་དཀར་དམར་ལ་སོགས་པའི། །དྲི་མཆོག་རྣམ་པ་སྣ་ཚོགས་གི། །མཁའ་འགྲོ་སྡེ་ལྔའི་ཐུགས༴ འཁོར་འབུམ་ཚོ་ལྔའི༴ ཀ་ར་བུ་ར་མ་སྦྲང་རྩི་དང་། །འོ་ཞོ་མར་ཐུད་རྒྱ་ཇ་དང་། །ཤིང་ཐོག་སིལ་ཐོག་སྣ་ཚོགས་དང་། །ནས་དང་གྲོ་སོགས་འབྲུ་ཡི་རིགས། །འབྲས་དང་བཤོས་གཙང་ལ་སོགས་པའི། །ཞལ་ཟས་རྣམ་པ་སྣ་ཚོགས་གི། །མཁའ་འགྲོ་སྡེ་ལྔའི་ཐུགས་དམ་བསྐང་། །འཁོར་འབུམ་ཚོ་ལྔའི༴ རྔ་ཆེན་དུང་དང་པི་ཝང་དང་། །མཁར་རྔ་སིལ་སྙན་ཏིང་ཏིང་ཤག །ཆ་ལང་དྲིལ་བུ་ལ་སོགས་པའི། །སྒྲ་སྙན་རྣམ་པ་སྣ་ཚོགས་ཀྱི། །མཁའ་འགྲོ་སྡེ་ལྔའི༴ འཁོར་འབུམ་མཚོ་ལྔའི༴ གདུག་དང་རྒྱལ་མཚན་བ་དན་དང་། །རྔ་ཡབ་དང་ནི་དར་ཆེན་དང་། །ལྡ་ལྡི་ཕྱེ་མ་ཕུར་མ་དང་། །འཕན་དང་བླ་བྲེ་ལ་སོགས་པའི། །མཆོད་པ་རྣམ་པ་སྣ་ཚོགས་གི། །མཁའ་འགྲོ་སྡེ་ལྔའི༴ འཁོར་འབུམ་ཚོ་ལྔའི༴ ཧཱུྃ། མཁའ་འགྲོ་སྡེ་ལྔ་འཁོར་བཅས་ལ། །ནང་གི་མཆོད་པ་འབུལ་བ་ནི། །ཤ་ལྔ་དང་ནི་བདུད་རྩི་ལྔ། །ཡེ་ཤེས་ལྔའི་བྱིན་རླབས་ཀྱི། །ཟག་པ་མེད་པའི་བདུད་རྩི་འདི། །མཁའ་འགྲོ་སྡེ་ལྔའི༴ འཁོར་འབུམ་ཚོ་ལྔའི༴ བཟའ་བ་ཤ་ཡི་རི་བོ་དང་། །བཏུང་བ་ཁྲག་གི་རྒྱ་མཚོ་དང་། །ཞེ་སྡང་རུས་པའི་གྲམ་ཁྲོད་ཀྱི། །མཁའ་འགྲོ་སྡེ་ལྔའི༴ འཁོར་འབུམ་ཚོ༴ འབྲུ་བཅུད་ནས་ཀྱི་ཆང་མཆོད་དང་། །བདུད་རྩི་རིལ་བུ་སྦྱར་བ་འདི། །མཁའ་འགྲོ་སྡེ་ལྔའི༴ འཁོར་འབུམ་ཚོ༴ རྐང་ཆེན་དུང་གི་གླིང་བུ་དང་། །ཐོད་པ་ལྟག་སྤྲོད་རྔ་སྒྲ་ཡི། །མཁའ་འགྲོ་སྡེ་ལྔའི༴ འཁོར་འབུམ་ཚོ་བདུན༴ ཤ་ཆེན་སྤོས་ཀྱི་དུད་པ་དང་། །ཚིལ་ཆེན་མར་མེ་མདངས་གསལ་གྱི། །མཁའ་འགྲོ་སྡེ་ལྔའི༴ འཁོར་འབུམ་ཚོ༴ འབྲས་ཀྱི་གཏོར་མ་ཆེན་པོ་ལ། །ཤ་སྣ་ཁྲག་སྣ་མང་པོས་བརྒྱན། །སྐྱེ་འགྲོ་སེམས་ཅན་སྣ་ཚོགས་བཅུག །འབྲུ་སྣ་ཀུན་གྱི་ཆང་གིས་བྲན། །མཁའ་འགྲོ་སྡེའི༴ འཁོར་འབུམ་ཚོ༴ ཀླད་པ་ཀོ་རོ་ཙ་ན་དང་། །ཙིཏྟ་སྙིང་སྣ་ཐམས་ཅད་ཀྱི། །མཁའ་འགྲོ་སྡེ་ལྔའི༴ འཁོར་འབུམ་ཚོ༴ ཧཱུྃ། མཁའ་འགྲོ་སྡེ་ལྔའི་འཁོར་བཅས་ལ། །གསང་བའི་མཆོད་པ་འབུལ་བ་ནི། །ཐབས་ཀྱི་རང་བཞིན་ཡབ་ཆེན་དང་། །ཤེས་རབ་རང་བཞིན་ཡུམ་མཆོག་དང་། །གཉིས་མེད་སྦྱོར་བའི་བྱང་སེམས་ཀྱི། །མཁའ་འགྲོ་སྡེ་ལྔའི༴ འཁོར་འབུམ་ཚོ་བདུན་གྱི༴ ཧཱུྃ། མཁའ་འགྲོ་སྡེ་ལྔ་འཁོར་བཅས་ལ། །དེ་ཁོ་ན་ཉིད་ཀྱི་མཆོད་པ་ནི། །ཆོས་རྣམས་གཟུགས་བརྙན་ལྟ་བུ་ལ། །བཟུང་དུ་མེད་ཅིང་བརྗོད་དུ་མེད། །དངོས་པོ་མེད་པའི་ཆོས་ཉིད་མཆོག །སྟོང་ཉིད་སྙིང་རྗེ་ཆེན་པོ་འདི། །མཁའ་འགྲོ་སྡེ་ལྔའི༴ འཁོར་འབུམ་ཚོ༴ ཧཱུྃ། མཁའ་འགྲོ་སྡེ་ལྔ་འཁོར་བཅས་ལ། །མཎྜལ་ཆེན་པོ་འབུལ་བ་ནི། །དབང་ཆེན་གསེར་གྱི་ས་གཞི་ལ། །རི་རབ་གླིང་བཞི་གླིང་ཕྲན་བཅས། །ཉི་མ་ཟླ་བ་གཉིས་ཀྱི་བརྒྱན། །འཁོར་ལོ་ནོར་བུ་བཙུན་མོ་དང་། །བློན་པོ་གླང་པོ་རྟ་མཆོག་དང་། །དམག་དཔོན་ལ་སོགས་རྒྱལ་སྲིད་བདུན། །གཟུགས་སྒྲ་དྲི་རོ་རེག་བྱ་སོགས། །དཔལ་བེ་པདྨ་འཁོར་ལོ་དང་། །རྒྱལ་མཚན་གདུག་དང་བུམ་པ་དང་། །དུང་དང་གསེར་ཉ་ལ་སོགས་པའི། །བཀྲ་ཤིས་རྟགས་བརྒྱད་ཐམས་ཅད་དང་། །འདོད་ཡོན་རྣམ་པ་སྣ་ཚོགས་བརྒྱན། །གསེར་རི་བདུན་དང་རོལ་མཚོ་བདུན། །ཨ་མོ་ལི་ཀའི་རྡོ་ལེབ་དང་། །མ་རྨོས་པ་ཡི་ལོ་ཐོག་དང་། །དཔག་བསམ་ཤིང་དང་ཙན་དན་ཚལ། །གུར་གུམ་སྤང་རི་ཆེན་པོ་དང་། །འདོད་འཇོའི་བ་ལ་སོགས་པ་ཡི། །གསེར་དངུལ་མུ་ཏིག་བཻཌཱུརྱ། །རིན་ཆེན་སྣ་ཚོགས་བརྒྱན་པ་ཡི། །འཛམ་གླིང་སྐྱེ་འགྲོ་ཐམས་ཅད་བཀོད། །བདག་ལུས་ལོངས་སྤྱོད་བཅས་པ་ཡི། །སྟོང་གསུམ་བཀོད་པའི་མཎྜལ་འདི། །མཁའ་འགྲོ་སྡེ་ལྔའི༴ འཁོར་འབུམ་ཚོ་བདུན་གྱི༴ ཧཱུྃ། མཁའ་འགྲོ་སྡེ་ལྔ་འཁོར་བཅས་ལ། །ཐུགས་དམ་བསྐང་བའི་དམ་རྫས་ནི། །དངོས་སུ་འབྱོར་དང་ཡིད་ཀྱིས་སྤྲུལ། །ས་དང་བར་སྣང་གང་བ་ཡི། །བསྐང་རྫས་རྣམ་པ་སྣ་ཚོགས་ཀྱི། །མཁའ་འགྲོ་སྡེ་ལྔའི༴ འཁོར་འབུམ་ཚོ་བདུན་གྱི༴ མཁའ་འགྲོ་རྣམས་ཀྱི༴ ཡང་འཁོར་རྣམས་ཀྱི༴ ཤ་ཟ་རྣམས་ཀྱི༴ དམེན་མོ་རྣམས་ཀྱི༴ ལས་མཁན་རྣམས་ཀྱི་ཐུགས་དམ་བསྐང་། །བྲན་མོ་རྣམས་ཀྱི༴ ཧཱུྃ། བདག་ནི་རང་རིག་བློ་དང་མ་ལྡན་པས། །བླ་མ་རྣམས་ཀྱི་ཐུགས་དང་ཅི་འགལ་བ། །གནོང་ཤིང་འགྱོད་པས་མཐོལ་ལོ་བཤགས། །ཡི་དམ་ལྷ་ཡི་ཐུགས་དང་ཅི་འགལ་བ། །གནོང་ཤིང་འགྱོད་པས་མཐོལ་ལོ་བཤགས། །མཁའ་འགྲོ་རྣམས་ཀྱི་ཐུགས་དང་ཅི་འགལ་བ། །གནོང་ཤིང་འགྱོད་པས་མཐོལ་ལོ་བཤགས། །ཆོས་སྐྱོང་རྣམས་ཀྱི་ཐུགས་དང་ཅི་འགལ་བ། །གནོང་ཤིང་འགྱོད་པས་མཐོལ་ལོ་བཤགས། །མཐོལ་ལོ་བཤགས་སོ་བཟོད་པར་གསོལ། །བཟོད་པ་བཞེས་ནས་ཚང་པར་སྩལ་དུ་གསོལ། །ཅེས་མཁའ་འགྲོ་སྡེ་ལྔའི་འབུམ་བསྐང་ཆེན་པོ་འདི་ཀཿཐོག་པའི་འབངས་ཀྱི་ཐ་ཤལ་དཔོན་པུཎྱེ་ལ་ཀྵས་བྲིས་པ་རྫོགས་སོ།། །།དགེའོ། །

ཕག་མོ་ཁྲོས་མའི་བསྐང་བ།

༅། །ཕག་མོ་ཁྲོས་མའི་བསྐང་བ་བཞུགས་སོ། །ཧཱུྃ། སྟོང་ཉིད་ཆོས་ཀྱི་དབྱིངས་ཀྱི་དཀྱིལ་འཁོར་ནས། །ཐུགས་རྗེའི་སྤྲུལ་པ་བདག་གཞན་གཉིས་ཀྱི་དཔལ། །རྣམ་པར་ཐར་པ་གསུམ་གྱི་སྒོ་འབྱེད་མ། །ཤེས་རབ་ཕ་རོལ་ཕྱིན་མའི་ཐུགས་དམ་བསྐང་། །རྟོག་མེད་སྒེག་པའི་ཚུལ་གྱི་སྐུ་སྤྲུལ་པ། །ནག་མོ་ཁྲོས་མས་ལྷ་རྣམས་ཟིལ་གྱིས་གནོན། །ཆོས་ཉིད་མི་འགྱུར་སྐུ་མདོག་མཐིང་ནག་མ། །མ་ལོངས་སྤྱོད་རྫོགས་པའི་སྐུ་ཡི་ཐུགས་དམ་བསྐང་། །ཧཱུྃ། གཡས་ནས་གཅོད་བྱེད་གྲི་གུག་བསྣམས་པ་ཡི། །བདུད་དང་གཏི་མུག་ཚོགས་རྣམས་བསྲེག་པར་བྱེད། །ཉོན་མོངས་རྣམ་རྟོག་ཐམས་ཅད་རྩད་ནས་གཅོད། །ཕྲིན་ལས་མཐར་ཕྱིན་མ་ཡིས་ཐུགས་དམ༴ གཡོན་པས་ཐོད་པ་ཁྲག་གི་གང་བ་བསྣམས། །ཐུགས་རྗེའི་ཁྱབ་པའི་ཚུལ་གྱི་འགྲོ་དོན་མཛད། །སྟོང་ཉིད་ཐུགས་རྗེའི་འབྲེལ་བའི་བདག་ཉིད་ཅན། །ཐུགས་རྗེའི་འགྲོ་དོན་མཛད་མ་ཁྱོད་ཀྱི་ཐུགས་དམ་བསྐང་། །ཧཱུྃ། ཕྱག་མཚན་ཁ་ཊྭཱྃ་ག་ནི་ཐུགས་ཀར་འཛིན། །དུག་གསུམ་རྩད་གཅོད་འཁོར་བའི་གཡུལ་ངོ་སེལ། །སྐུ་གསུང་ཐུགས་དང་མཉམ་སྦྱོར་ཁྲོ་མོའི་སྐུ། །སྐུ་གསུམ་ལྷུན་གྱིས་གྲུབ་པའི་ཐུགས་དམ་བསྐང་། །སྲིད་གསུམ་རྣམ་རྟོག་ཐམས་ཅད་འཇོམ་པའི་ཕྱིར། །འཇིག་བྱེད་ཆེན་མོ་ཕག་གི་གདོང་པ་ཅན། །མེ་དཔུང་ཀློང་ན་བཞུགས་པའི་ཁྲོ་གཉེར་ཅན། །མཐུ་སྟོབས་བདག་མོ་ཁྱོད་ཀྱི་ཐུགས་དམ་བསྐང་། །ཟ་བྱེད་ཆེན་པོ་གདུག་པའི་མཆེ་བ་ཅན། །ལོག་འདྲེན་ཐམས་ཅད་ཟིལ་གྱིས་གནོན་མཛད་པ། །ཞལ་གདངས་ལྗག་རྐྱང་མཁའ་ལ་རབ་ཏུ་སྤྱོད། །སྟོང་གསུམ་སྒྲ་སྒྲོག་ཁྱོད་ཀྱི་ཐུགས་དམ་བསྐང་། །སྲིད་གསུམ་འཐོར་བྱེད་སྤྱན་གསུམ་མེ་འོད་འཕྲོ། །ཡེ་ཤེས་ལྔ་ལྡན་དབུ་ལ་ཐོད་པས་བརྒྱན། །སྐུ་ལྔ་རབ་རྫོགས་ཡེ་ཤེས་མཁའ་འགྲོ་མ། །ཡོན་ཏན་རྫོགས་ཕྱིར་དུར་ཁྲོད་རྒྱན་གྱིས་བརྒྱན། །ཡོན་ཏན་མཐར་ཕྱིན་ཁྱོད་ཀྱི་ཐུགས་དམ་བསྐང་། །ངོ་མཚར་ཆེན་པོ་དགྱེས་པའི་གད་རྒྱང་ཅན། །བཞད་པའི་གད་མོས་འཁོར་བ་ཐར་པར་འདྲེན། །ཁྲོས་པའི་གད་མོས་དགྲ་བགེགས་བརླག་པར་བྱེད། །གདུག་པ་བརླག་མཛད་ཁྱོད་ཀྱིས་ཐུགས་དམ་བསྐང་། །ཞེ་སྡང་འཇོམས་མཛད་སྦྲུལ་གྱི་ཞག་པ་ཅན། །ང་རྒྱལ་འཇོམ་མཛད་སྟག་གི་ཤམ་ཐབ་ཅན། །འབྱུང་པོ་ཚར་གཅོད་ཐོད་པའི་ཕྲེང་བས་བརྒྱན། །རྟགས་ཀྱི་འགྲོ་དོན་མཛད་པའི་ཐུགས་དམ་བསྐང་། །བཅོམ་ལྡན་ཁྲོས་མ་ནག་མོའི་ཐུགས་དམ་བསྐང་། །ཆོས་སྐུ་འགགས་མེད་རྟགས་སུ་ཕག་གི་དབུ། །ཕག་སྐད་དྲག་པོ་སྟེང་དུ་སྒྲ་སྒྲོག་པའི། །གཟུགས་མེད་ཁམས་གསུམ་མ་ལུས་དབང་དུ་སྡུད། །བསྐང་ངོ་ཁྱེད་ཀྱི་ཐུགས་དམ་བསྐང་། །བཅོམ་ལྡན་ཁྲོས་མ་ནག་མོའི༴ ཕག་སྐད་དྲག་པོ་བར་དུ་སྒྲོག་པ་ཡིས། །གཟུགས་ཁམས་ཐམས་ཅད་མ་ལུས་དབང་དུ༴ གཟུགས་ཁམས་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས༴ བཅོམ་ལྡན་ཁྲོས་མ་ནག་མོའི༴ ཕག་སྐད་འོག་ཏུ་སྒྲོག་པ་ཡི། །འདོད་ཁམས་ཐམས་ཅད་དབང་དུ་བསྡུས། །འདོད་ཁམས་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས༴ བཅོམ་ལྡན་རྡོ་རྗེ་ཕག་མོའི༴ ཕག་སྐད་ཤར་དུ་སྒྲོགས་པ་ཡི། །རྡོ་རྗེ་མཁའ་འགྲོ་ཕོ་ཉར་འགྱེད། །ཤར་ཕྱོགས་བརྒྱ་བྱིན་རྡུལ་དུ་བརློག །བརྒྱ་བྱིན་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས༴ བཅོམ་ལྡན་རྡོ་རྗེ་ཕག་མོའི་ཐུགས༴ ཕག་སྐད་ལྷོ་རུ་སྒྲོག་པ་ཡི། །རིན་ཆེན་མཁའ་འགྲོ་ཕོ་ཉར་འགྱེད། །ལྷོ་ཕྱོགས་གཤིན་རྗེ་རྡུལ་དུ༴ གཤིན་རྗེ་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི༴ ཕག་སྐད་ནུབ་ཏུ་སྒྲོགས་པ་ཡིས། །པདྨ་མཁའ་འགྲོ་ཕོ་ཉར་འགྱེད། །ནུབ་ཕྱོགས་ཀླུ་གདོན་རྡུལ་དུ༴ ཀླུ་གདོན་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི༴ ཕག་སྐད་བྱང་དུ་སྒྲོགས་པ་ཡི། །ལས་ཀྱི་མཁའ་འགྲོ་ཕོ་ཉར་འགྱེད། །བྱང་ཕྱོགས་གནོད་སྦྱིན་རྡུལ༴ གནོད་སྦྱིན་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི༴ ཕག་སྐད་ཤར་ལྷོར་སྒྲོག་པ་ཡི། །དམ་ཚིག་མཁའ་འགྲོ་ཕོ་ཉར་འགྱེད། །ཤར་ལྷོ་མེ་ལྷ་རྡུལ༴ མེ་ལྷ་འདུལ་མཛད་ཕག་གི༴ བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི༴ ཕག་སྐད་ལྷོ་ནུབ་སྒྲོགས་པ་ཡི། །སྣ་ཚོགས་མཁའ་འགྲོ་ཕོ་ཉར་འགྱེད། །ལྷོ་ནུབ་སྲིན་པོ་རྡུལ༴ སྲིན་པོ་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས་དམ་བསྐང་། །བཅོམ་ལྡན་རྡོ་རྗེ༴ ཕག་སྐད་ནུབ་བྱང་སྒྲོགས་པ་ཡི། །ཐམས་ཅད་མཁའ་འགྲོ་ཕོ་ཉར་འགྱེད། །ནུབ་བྱང་རླུང་ལྷ་རྡུལ་དུ༴ རླུང་ལྷ་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས་དམ༴ བཅོམ་ལྡན༴ ཕག་སྐད་བྱང་ཤར་སྒྲོགས་པ་ཡི། །འཇིག་རྟེན་མཁའ་འགྲོ་ཕོ་ཉར་འགྱེད། །བྱང་ཤར་འབྱུང་པོ་རྡུལ༴ འབྱུང་པོ་འདུལ་མཛད་ཕག་གི༴ བསྐང་ངོ་ཁྱེད་ཀྱི་ཐུགས༴ བཅོམ་ལྡན༴ ཕག་སྐད་སྟེང་དུ་སྒྲོགས་པ་ཡི། །སངས་རྒྱས་མཁའ་འགྲོ་ཕོ་ཉར་འགྱེད། །སྟེང་གི་ཚངས་པ་རྡུལ་དུ༴ ཚངས་པ་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ༴ ཕག་སྐད་འོག་ཏུ་སྒྲོགས་པ་ཡི། །སྣ་ཚོགས་མཁའ་འགྲོ་ཕོ་ཉར་འགྱེད། །འོག་གི་ས་བདག་རྡུལ༴ ས་བདག་འདུལ་མཛད་ཕག་གི་དབུ། །བསྐང་ངོ་ཁྱེད་ཀྱི་ཐུགས༴ སྲིད་གསུམ་ཐམས་ཅད་ཟིལ་གྱིས་གནོན། །འཁོར་དུ་མ་གྱུར་གང་ཡང་མེད། །ཁམས་གསུམ་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི༴ ཁམས་གསུམ་ཐམས་ཅད་ཁྱོད་ཀྱི་ཟས། །ཟས་སུ་མ་གྱུར་གང་ཡང་མེད། །ཁམས་གསུམ་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོའི་ཐུགས་དམ་བསྐང་། །འདོད་ཁམས་ཐམས་ཅད་ཁྱོད་ཀྱི་ཟས། །བདེ་བ་ཆེན་པོའི་ངང་དུ་བཞེས། །འདོད་ཆགས་འདུལ་མཛད་ཕག་གི་དབུ། །བདེ་ཆེན་ཁྲོས་མའི་ཐུགས༴ བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །ཞེ་སྡང་ཐམས་ཅད་ཁྱོད་ཀྱི་ཟས། །སྐྱེ་བ་མེད་པའི་མཆོད་པ་བཞེས། །ཞེ་སྡང་འདུལ་བྱེད་ཁྲོས་མ་ཡི། །སྐྱེ་མེད་ཁྲོས་མའི༴ བསྐང་ངོ་བསྐལ་པའི༴ བཅོམ་ལྡན་རྡོ་རྗེ་ཕག་མོ་ཡི། །ང་རྒྱལ་ཐམས་ཅད་ཁྱོད་ཀྱི་ཟས། །མཉམ་པ་ཉིད་ཀྱི་ངང་དུ་བཞེས། །ང་རྒྱལ་འདུལ་མཛད་ཁྲོས་མ་ཡི། །མཉམ་ཉིད་མཁའ༴ བསྐང་ངོ་ཁྱེད་ཀྱི་ཐུགས༴ བཅོམ་ལྡན་རྡོ་རྗེ་ཕག་མོ་ཡི། །ཕྲག་དོག་ཐམས་ཅད་ཁྱོད་ཀྱི་ཟས། །རང་བྱུང་ཆེན་པོའི་ངང་དུ་བཞེས། །ཕྲག་དོག་འདུལ་མཛད་ཁྲོས་མ་ཡི། །རང་བྱུང་ཁྲོས་མའི༴ བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །གཏི་མུག་ཐམས་ཅད་ཁྱོད་ཀྱི་ཟས། །ཆོས་སྐུ་ཆེན་པོའི་ངང་དུ་བཞེས། །གཏི་མུག་འདུལ་མཛད་ཁྲོས་མ་ཡི། །ཆོས་སྐུ་ཁྲོས་མའི༴ བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །ཀླུ་གཉེན་ས་བདག་ཁྱོད་ཀྱི་ཟས། །ཀླུ་གཉེན་ས་བདག་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །བཙན་དང་འགོང་པོ་ཁྱོད་ཀྱི་ཟས། །བཙན་དང་འགོང་པོ་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །བདུད་དང་རྒྱལ་པོ་ཁྱོད་ཀྱི་ཟས། །བདུད་དང་རྒྱལ་པོ་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །དཀོར་བདག་དམ་སྲི་ཁྱོད་ཀྱི་ཟས། །དམ་སྲི་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །བདུད་པོ་ཡི་དྭགས་འདུལ་མཛད་ཁྲོས་མ་ཡི། །བསྐང་ངོ་ཁྱེད་ཀྱི༴ བཅོམ་ལྡན་རྡོ་རྗེ་ཕག་མོ་ཡི། །ཐུགས་དམ་བསྐང་གྱུར་དབང་དང་དངོས་གྲུབ་སྩོལ། །རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད། །ཨོ་རྒྱན་བྷརྱ་པས་མཛད་པའོ།། །།

ཕ་དམ་པ་རྒྱ་གར་གྱི་བསྐང་བ་རྔམ་པའི་ང་རོ།

ཕ་དམ་པ་རྒྱ་གར་གྱི་བསྐང་བ་རྔམ་པའི་ང་རོ་བཞུགས་སོ། །ཕ་དམ་པའི་བསྐང་བ་ནི། ཌཱ་མ་རུ་དང་། རྐང་དུང་དང་། རོལ་མོ། ཐོད་ཆང་མར་ཁུ་ལ་སོགས་ཐོགས་ནས། དགའ་བའི་དབྱངས་དང་བཅས་པས་འདི་སྐད་བརྗོད་དོ། །ཧཱུྃ། ལྷོ་ཕྱོགས་ཆེན་པོ་བྷེ་ཏིའི་ཡུལ། །ཚ་རི་སིང་ང་ཞེས་བྱའི་གླིང་། །ཐུགས་རྗེ་ཆེན་པོའི་བྱིན་རླབས་ཡུལ། །གླིང་མཆོག་དེ་ན་སྐུ་འཁྲུངས་ཏེ། །ཡབ་ནི་བྲམ་ཟེ་བརྩོན་འགྲུས་གོ་ཆ་ཅན། །ཡུམ་ནི་བྲམ་ཟེ་ས་རལ་ཏ། །སྲས་མཆོག་གསུམ་གྱི་བར་མ་ནི། །ཁྱད་པར་དྲུག་ལྡན་རིན་པོ་ཆེ། །ཡབ་ཡུམ་འཁོར་དང་བཅས་པ་རྣམས། །ཐུགས་དམ་བསྐང་ཕྱིར་སྤྱན་འདྲེན་ནས། །མཆོད་པའི་གནས་འདིར་གཤེགས་སུ་གསོལ། །ཡབ་ཡུམ་དེ་གཉིས་སྲས་བུ་ནི། །འབྲིང་བ་དམ་པ་རྒྱ་གར་སྐུ། །བསླབ་བྱ་ཚུལ་ཁྲིམས་ཆེ་བ་ནི། །དགུང་ལོ་བཅུ་གསུམ་ལོན་པའི་དུས། །ཀརྨ་ལ་ཤིའི་གཙུག་ལག་ཏུ། །རབ་བྱུང་དགེ་ཚུལ་སྡོམ་པ་མཛད། །དམ་པ་རྒྱ་གར་ཐུགས་དམ་བསྐང་། །ཁྱེད་ཀྱི་རྩ་བའི་བླ་མ་བཀའ་དྲིན་ཅན། །གསེར་གླིང་པ་ཡི་ཐུགས༴ རྣལ་འབྱོར་ལྔ་བཅུ་རྩ་བརྒྱད་དང་། །དབང་ཐོབ་སྡོམ་བླང་བླ་མ་རྣམས། །བསྐང་ངོ་མཆོད་དོ་ཐུགས༴ དེའི་སློབ་མ་དམ་པ་རིན་པོ་ཆེ། །གསང་སྔགས་དམ་ཚིག་སྲུང་བ་པོ། །བྱིན་རླབ་ནུས་མཐུ་དཔག་མེད་ལྡན། །དམ་པ་རྒྱ་གར་ཐུགས་དམ་བསྐང་། །སྡེ་སྣོད་རྒྱུད་སྡེ་མ་ལུས་མཁྱེན། །རིགས་པའི་གནས་ལྔ་མཁྱེན་པ་པོ། །པཎྜི་ཏ་ནི་ཆེན་པོ་སྟེ། །དམ་པ་རྒྱ་གར་ཐུགས༴ འབྲས་བུ་དངོས་གྲུབ་ཆེ་བ་ནི། །ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། །དམ་པ་རྒྱ་གར་ཐུགས༴ དེ་ནས་བོད་ཡུལ་དབུས་སུ་བྱོན། །ཁྱེད་ཀྱི་རྩ་བའི་བླ་མ་ནི། །འཕགས་པ་ཨརྱ་དེ་བ་མཚན། །རྫུས་སྐྱེས་པདྨའི་ནང་ནས་འཁྲུང་། །སྒྲ་ཚད་མཛེས་པའི་སྐྱིལ་ཀྲུང་བཞུགས། །སྐུ་ལ་དར་ཟབ་སྣ་ཚོགས་གསོལ། །དབུ་ལ་སྒོམ་ཞུ་མཛེས་པར་མནབ། །པདྨ་དམར་པོ་སྐྱེས་པའི་ཐུགས༴ གཅོད་བརྒྱུད་བླ་མའི་ཐུགས༴ ཨརྱ་དེ་བའི༴ དམ་པ་རྒྱ་གར༴ དེ་ནས་དེང་རིའི་གནས་སུ་བྱོན། །རི་མཁན་པ་ཁྲོད་ཀྱི་ཡང་དགོན་ནས། །ཌཱཀྐི་པདྨའི་གདན་སྟེང་ནས། །མི་ཕམ་མགོན་པོ་འཛམ་གླིང་རྒྱན། །རྗེ་འགྲོ་བའི་མགོན་པོ་བཅོམ་ལྡན་འདས། །དུས་གསུམ་སངས་རྒྱས་སྲས་གཅིག་པོ། །མཁའ་འགྲོ་སྡེ་ལྔའི་བུ་གཅིག་པོ། །དམ་པ་ཡོངས་ཀྱི་སྐྱབས་གཅིག་པོ། །དམ་པ་རྒྱ་གར༴ སྐུ་མདོག་སྨུག་ནག་བརྗིད་པའི་སྐུ། །དབུ་སྐྲ་ནག་པོ་གྱེན་དུ་འཁྱིལ། །སྤྱན་མིག་དམར་ལ་ཟླུམ་པའི་ཚུལ། །མཆེ་བ་དཀར་པོ་ཟིངས་སེ་ཟེང་། །ཞལ་ནས་ཕཊ་སྒྲ་ལྷངས་སེ་ལྷང་། །རིག་པ་ཧུར་ལ་ཨག་ཚོམ་དམར། །ཕྱག་གཡས་གསེར་གྱི་ཌཱ་མ་རུ། །དཔའ་བོའི་ཚོགས་རྣམས་དབང་དུ་བསྡུས། །མི་ཕམ་མགོན་པོའི་མགོན་པོ་ཐུགས། །ཕྱག་གཡོན་མི་རྐང་གླིང་བུ་འབུད། །བར་སྣང་ཁམས་སུ་འུ་རུ་རུ། །དཔའ་མོའི་ཚོགས་རྣམས་དབང་དུ་བསྡུས། །དམ་པ་རྒྱ་གར༴ རྟེན་འབྲེལ་ག་ལ་བུ་ཁྲ་ལ་གཟར། །རྟེན་འབྲེལ་བདག་པོའི་ཐུགས༴ སྐུ་སྟོད་དར་དཀར་ལྷབ་ལྷུབ་གཡོ། །རྒྱ་གར་གྲུབ་ཆེན་འབུམ་གྱིས་བསྐོར། །སྟེང་ན་བཀའ་བརྒྱུད་ཐིབས་སེ་ཐིབ། །གཡས་ན་དཔའ་བོ་གར་དང་ལྡན། །གཡོན་ནས་དཔའ་མོ་ཁྲབས་སེ་ཁྲབ། །མདུན་ནས་དམ་ཅན་དཔུངས་སེ་དཔུང་། །རྒྱབ་ན་ཌཱཀྐི་ཤིགས་སེ་ཤིག །འོག་ནས་གདོན་ཚོགས་མྱ་ལ་ལ། །རྗེ་དམ་པ་སངས་རྒྱས་རིན་པོ་ཆེ། །བྱིན་རླབས་ཆུ་བོ་རྒྱུན་མི་ཆད། །ཐུགས་དམ་བསྐང་ངོ་དངོས་གྲུབ་སྩོལ། །རྗེ་གཞན་ལས་སྤྲུལ་པ་མཛད་པའི་དུས། །འབིར་བ་པ་ཡི་ཆ་བྱེད་འགྱིང་བག་ཅན། །རྒྱལ་པོའི་འདུག་སྟོང་སྟག་གི་གདན། །ཕྱག་གཡས་ཐོད་པ་འཆང་གིས་བཀང་། །ཕྱག་གཡོན་སྡིག་འཛུབ་ཉི་མ་གཏོད། །སྤྱན་རྩ་དམར་ལ་བར་སྣང་གཟིགས། །རུས་རྒྱན་བསྒོམ་ཐག་སྐུ་ལ་བརྒྱན། །བྷིར་བ་པ་ཡི་ཐུགས་དམ་བསྐང་། །སྤྲུལ་ཡང་སྤྲུལ་ཐུགས༴ དམ་པ་སངས་རྒྱས་རིན་པོ་ཆེ། །གླང་ཆེན་རོ་ལ་རིག་འཇུག་མཛད། །དམ་པ་ནག་ཆུང་སོབ་ལ་ཞུག །སྤྲུལ་པ་མཛད་པའི་ཐུགས༴ དམ་པ་སངས་རྒྱས་རིན་པོ་ཆེ། །རྗེ་གཞན་ཡང་སྤྲུལ་པ་མཛད་པའི་ཚེ། །སྐུ་མདོག་སྨུག་ནག་འཇིག་པ་ལ། །ཕྱག་གཡས་གསེར་གྱི་ཌཱ་མ་རུ། །གཡོན་པས་ཐོད་པ་ཆང་གིས་བསྐང་། །ཞབས་གཉིས་རྡོ་རྗེའི་སྐྱིལ་ཀྲུང་བཞུག །དམ་པ་རྒྱ་གར༴ ཧཱུྃ། ཕ་ནག་པོ་ཆེན་པོ་གཟི་མདངས་ཅན། །སྐུ་མདོག་ནག་ལ་སྨུག་པ་དེར། །ཆོས་སྐུ་འགྱུར་བ་མེད་པའི་རྟགས། །དམ་པ་རྒྱ་གར༴ སྐུ་སྟོད་སེང་ཆེན་འགྱིང་བ་འདྲ། །བདུད་བཞི་ཟིལ་གྱི་གནོན་པའི་རྟགས། །དམ་པ་རྒྱ༴ སྐེད་པ་རྡོ་རྗེ་འཁྲིལ་བ་འདྲ། །དེ་འཁྲུལ་གཞི་རྩད་ནས་གཅོད་པའི་རྟག །དམ་པ༴ སྐུ་སྨད་རྨ་བྱ་འཇོལ་བ་འདྲ། །དུག་ལྔ་ཟིལ་གྱིས་ནོན་པའི་རྟགས། །དམ་པ་རྒྱ་གར་ཐུགས་དམ༴ ཞབ་གཉིས་སྦ་བྲན་གཤིབ་པ་འདྲ། །དེ་བྱང་ཆུབ་ལམ་ལ་བསྒྲོད་པའི་རྟགས། །དམ་པ་རྒྱ་གར་ཐུགས་དམ༴ དབུ་སྐྲ་ནག་སྨུག་གྱེན་དུ་འཁྱིལ་བ་དེ། །དེ་མཐོ་རིས་ཐར་ལམ་བསྟན་པའི༴ དམ་པ་རྒྱ༴ སྤྱན་རྩ་དམར་ལ་ཟླུམ་པ་དེ། །སྟོང་གསུམ་ཟིལ་གྱི་ནོན་པའི་རྟག །དམ་པ་རྒྱ༴ ཚེམས་མདོག་དཀར་ལ་ཚེམས་རྩེ་རྣོ། །སྐྱེ་འཆི་རྩད་ནས་གཅོད་པའི་རྟགས། །དམ་པ༴ ཕྱག་བར་ཡང་ལ་ཕྱག་སེན་རྣོ། །སྐལ་ལྡན་ཐུགས་རྗེས་འདྲེན་པའི་རྟགས། །དམ་པ་རྒྱ་གར༴ ཕྱག་སོར་སིང་ཕྲུག་འདྲིམས་པ་འདྲ། །སེར་སྣའི་མདུད་པ་གྲོལ་བའི་རྟགས། །དམ་པ་རྒྱ་གར༴ རྗེ་རེས་འགའ་ཉིན་མཚན་མེད་པར་གཟིམས་ཙ་ན། །ཆོས་གཉུག་མ་རྒྱུན་ཆད་མེད་པའི་རྟགས། །དམ་པ་རྒྱ་གར༴ རྗེ་རེས་འགའ་བརྟུལ་ཞུགས་སྤྱོད་པ་མཛད། །སྨྱོན་པའི་བརྟུལ་ཞུགས་མཛད་པའི་ཚེ། །བཀའ་འཁོར་བར་ཆད་སེལ་བའི་བརྡའ། །དམ་པ་རྒྱ༴ རྗེ་རེ་གྷ་གྲོང་ཁྱེར་གྱིས་གྲོང་ནས་གཟིམས། །གཙང་ཙོག་ངོ་ཚ་སྤང་བའི་བརྡའ། །དམ་པ་རྒྱ་གར༴ འགྲོ་བའི་མགོན་པོའི་ཐུགས༴ ཀུན་ཤེས་ཀུན་རིག་དམ་པ་པོ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་སྲས་མཆོག་སྐུ་སྤྲུལ་རྗེ། །མི་ཕམ་མགོན་པོའི་ཐུགས༴ གསུང་ཨ་ལི་ཀ་ལིའི་སྒྲ་དོན་རྟོགས། །བཀའ་མདོ་རྒྱུད་དགོངས་པ་ཐུགས་སུ་ཆུད། །ཁོང་བརྟུལ་ཞུགས་སྤྱོད་པས་འགྲོ་དོན་མཛད། །དམ་པ་རྒྱ་གར༴ གསུང་ཚངས་པའི་སྒྲ་དབྱངས་དམ་ཆོས་གསུང་། །དམ་པ་རིན་པོ་ཆེའི་ཐུགས་དམ༴ བྱང་ཆུབ་སེམས་ཀྱི་ལམ་སྣ་དྲང་དུ་གསོལ། །དམ་པ་རྒྱ༴ དགོས་འདོད་ཀུན་འབྱུང་ནོར་བུའི་རེ་བ་བསྐང་། །དམ་པ་རྒྱ༴ ཕྲིན་ལས་རྟེན་འབྲེལ་ཆེ་བའི་བར་ཆད་སེལ། །ཕ་སྐུ་ལྔ་ཡོན་ཏན་ཆེ་བའི་ཐུགས༴ ཕ་དམ་པ་རྒྱ༴ ཕ་སྐྱེ་འཆི་མེད་པའི༴ ཕ་འདུ་འབྲལ་མེད་པའི༴ ཕ་ལྷུན་གྱིས་གྲུབ་པའི༴ ཕ་དགོས་འདོད་འབྱུང་བའི༴ ཁྱེད་ཀྱི་ཐུགས་དམ་བསྐང་བ་ནི། །མེ་ཏོག་ཕྲེང་བ་དར་གྱི་ཆུན་པོ་དང་། །རོལ་མོ་སྒྲ་སྙན་སྣ་ཚོགས་དང་། །འདོད་པའི་ཡོན་ཏན་སྣ་ཚོགས་དང་། །བླ་བྲེ་འཕན་གདུག་རྒྱལ་མཚན་དང་། །རྔ་དང་བྷ་ལིང་གཏོར་མ་དང་། །སྐྱེས་བུ་མཚན་བཟང་ཐོད་པ་དང་། །བུ་མོ་མཚན་བཟང་གཉིས་དག་གི། །བཅུ་དྲུག་ལོ་ལོན་ཐོད་པ་གཉིས། །སྤྱི་བོ་སྟག་སྤྲོད་རྔ་སྒྲ་འདིས། །དམ་པ་རྒྱ་གར༴ བུད་མེད་མཁའ་འགྲོའི་མཚན་ཚང་བ། །སྨིན་མཚམས་གྲས་པའི་ཀ་པ་ལར། །རིན་ཆེན་སྨན་ཆང་བདུད་རྩིའི་བཀང་། །དམ་པ་རྒྱ༴ གྲི་རྐང་གླིང་བུ་གླང་སྣ་ཅན། །འུར་འུར་སྙན་པའི་གླིང་བུ་འདི། །དམ་པ་རྒྱ་གར༴ རིན་ཆེན་གསེར་གྱི་ཌཱ་མ་རུ། །དར་སྣ་ལྔ་ཡི་བརྒྱན་པ་འདི། །དམ་པ་རྒྱ་གར༴ ཅང་ཏེའུ་ཐོད་པའི་རྔ་སྒྲ་འདི། །དམ་པ་རྒྱ་གར༴ སྨན་སྣ་དྲི་བཟང་སྤོས་དུད་འདི། །དམ་པ་རྒྱ་གར༴ སྙན་པའི་དབྱངས་ཀྱིས༴ དམ་པ་སངས་རྒྱས༴ བྷ་ལིང་འཕན་དར་བཙུག་པ་འདི། །དམ་པ་སངས་རྒྱས་ཐོད་ཞལ་བྷནྡྷ་འདི་དག་དང་། །གསེར་ཞལ་གཡུ་ཞལ་དངུལ་ཞལ་འདི། །དམ་པ་སངས་རྒྱས༴ ཚོགས་ཀྱི་གར་ཐབས་མཆོད་པ་འདི། །དམ་པ༴ རུས་བརྒྱན་དངུལ་གྱི་དྲིལ་བུ་འདི། །དམ་པ་སངས་རྒྱས༴ བདག་གི་ཤ་ཁྲག་ཕུང་པོ་འདི། །རིག་པ་མཁའ་ལ་སྤར་ནས་ཀྱང་། །ཤ་ཁྲག་བདུད་རྩིར་དམིགས་པ་འདི། །ལྤགས་པ་གསེར་གྱི་ས་གཞི་ལ། །ནང་རོལ་ཡང་དག་ཚོམ་བུར་བཀོད། །རིན་ཆེན་གསེར་གྱི་མཎྜལ་འདི། །རྗེ་དམ་པ་སངས་རྒྱས༴ གཅོད་བརྒྱུད་བླ་མ་རྣམས་ཀྱི་ཐུགས༴ ཕ་བརྒྱུད་དཔའ་བོའི་ཚོགས་ཀྱི༴ རྒྱ་གར་གྲུབ་ཆེན་རྣམས་ཀྱི༴ རྐྱེན་དང་བར་ཆད་མེད་པར་མཛོད། །བདག་ཅག་མཁའ་སྤྱོད་གནས་སུ་ལམ་སྣ་དྲངས། །གལ་ཏེ་འཆི་བའི་དུས་བྱུང་ན། །མི་ཕམ་མགོན་པོས་ལམ་སྣ་དྲོངས། །ཁྱེད་ཀྱི་སྐུ་ཡི་འོད་ཟེར་གྱི། །བདུད་རྩིའི་ཆུ་རྒྱུན་མཐིང་ཀ་ལི། །བདག་གི་ལུས་ལ་སྨིན་པར་མཛོད། །འདིར་ཚོགས་སྐལ་ལྡན་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །གནས་ཁང་རིན་ཆེན་འབར་བ་འདི། །མཁའ་སྤྱོད་གནས་སུ་བྱིན་གྱིས་བརློབས། །ཁྱེད་ཀྱི་སྐུ་ཡི་བྱིན་རླབས་ལུས་ལ་ཞུགས། །ལུས་ལ་བདེ་དྲོད་འབར་དུ་གསོལ། །གསུང་གི་བྱིན་རླབ་ངག་ལ་ཞུགས། །ངག་ལ་ནུས་པ་འབར་དུ་གསོལ། །ཐུགས་ཀྱི་བྱིན་རླབ་སེམས་ལ་ཞུགས། །སེམས་ཆོས་སྐུ་ཐོབ་པར་མཛད་དུ་གསོལ། །རྐྱེན་དང་བར་ཆད་ཐམས་ཅད་བཟློག །བསམ་པ་ཡིད་བཞིན་འགྲུབ་པར་མཛོད། །རྐྱེན་ངན་གྲོགས་སུ་འཆར་བར་བྱིན་གྱིས་རློབས།། །།

མ་ཅིག་ལབ་ཀྱི་སྒྲོན་མའི་བསྐང་བ།

༅། །མ་ཅིག་ལབ་ཀྱི་སྒྲོན་མའི་བསྐང་བ་བཞུགས་སོ། །ཧཱུྃ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །ཡུམ་ཆེན་ཤེས་རབ་ཕར་ཕྱིན་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །སྐུ་མདོག་སེར་མོ་གསེར་འོད་འབར། །ཞལ་གཅིག་པ་ལ་ཕྱག་བཞི་ལྡན། །གཡས་ཀྱི་དང་པོ་རྡོ་རྗེ་བསྣམས། །གཡོན་གྱི་དང་པོ་ཏིང་ངེ་འཛིན། །འོག་མ་གཉིས་ཀྱི་མཉམ་བཞག་མཛད། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །དབུ་སྐྲ་ནག་པོ་སིལ་མར་གྱུར། །དར་དང་རིན་པོ་ཆེའི་རྒྱན། །ཡུམ་ཆེན་ཤེས་རབ་ཕར་ཕྱིན་ཐུགས་དམ་བསྐང་། །ཐུགས་སྤྲུལ་ལབ་སྒྲོན་ཐུགས་དམ་བསྐང་། །ཆོས་སྐུའི་ཐུགས་དམ་བསྐང་གྱུར་ཅིག །ཡུམ་གྱི་ཐུགས་ཀྱི་སྤྲུལ་པ་ནི། །མ་ཅིག་ལབ་ཀྱི་སྒྲོན་མ་ནི། །འགྲོ་བ་གང་ལ་གང་འདུལ་གྱི། །སྤྲུལ་པ་དུ་མ་མཛད་པའི་ཚུལ། །ཧཱུྃ། ནུབ་ཕྱོགས་ཨོ་རྒྱན་གནས་མཆོག་ནས། །རྡོ་རྗེ་ཕག་མོ་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །ཞལ་གཅིག་ཕྱག་གཉིས་སྤྱན་གསུམ་ལྡན། །གཡས་པས་གྲི་གུག་ཐུར་དུ་བཟུང་། །གཡོན་པས་ཐོད་ཁྲག་གྱེན་དུ་རོལ། །ཞབས་གཉིས་བརྐྱང་བསྐུམ་ཚུལ་དུ་བཞེངས། །དབུ་སྐྲ་དམར་སེར་གྱེན་དུ་བརྫེས། །མི་མགོ་རུས་པའི་རྒྱན་གྱིས་བརྒྱན། །སྐུ་མདོག་དཀར་བ་དམར་མདངས་བཀྲ། །གཅིག་བུའི་ལུས་ལ་གཟི་མདངས་ཅན། །རང་འདྲའི་འཁོར་ཚོགས་མང་པོས་བསྐོར། །རྗེ་བཙུན་མའི་ཐུགས་དམ༴ མཁའ་སྤྱོད་མའི་ཐུགས་དམ༴ རྡོ་རྗེ་ཕག་མོའི་ཐུགས༴ མ་ཅིག་ལབ་སྒྲོན༴ ཡེ་ཤེས་མཁའ་འགྲོའི༴ འཁོར་ཚོགས་རྣམས་ཀྱི༴ ཧཱུྃ། མ་ཅིག་ལབ་སྒྲོན་སྤྲུལ་པ་ནི། །པོ་ཏ་ལ་ཡི་གནས་མཆོག་ནས། །རྗེ་བཙུན་སྒྲོལ་མ་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །ལྗང་ཁུ་བཻཌཱུརྱ་ལྟར་སྔོ། །ཞལ་གཅིག་ཕྱག་གཉིས་ཞི་བའི་སྐུ། །ཞབས་གཉིས་གཡས་བརྐྱང་གཡོན་བསྐུམ་བཞུགས། །ཕྱག་གཡས་མཆོད་སྦྱིན་ཨུད་པ་ལ། །གཡོན་པས་མཉམ་བཞག་པདྨ་བསྣམས། །དབུ་སྐྲ་རལ་པའི་ཐོར་ཅོག་ཅན། །ཁ་དོག་དར་གྱི་ན་བཟང་དང་། །རིན་པོ་ཆེའི་རྒྱན་གྱིས་སྤྲས། །འཕགས་མ་སྒྲོལ་མའི་ཐུགས་དམ་བསྐང་། །དམ་ཚིག་ལྷ་ཚོགས་ཐུགས་དམ་བསྐང་། །རླུང་བསྐྱེད་མའི་ཐུགས་དམ་བསྐང་། །མ་ཅིག་ལབ་སྒྲོན༴ ཡེ་ཤེས་མཁའ་འགྲོའི༴ ཧཱུྃ། མ་ཅིག་ལབ་སྒྲོན་སྤྲུལ་པ་ནི། །རྒྱ་གར་གནས་མཆོག་དམ་པ་ནས། །ལྷ་མོ་སྒྱུ་འཕྲུལ་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །སྐུ་མདོག་ཨུ་དུམ་ཝ་རའི་མདོག །ཞལ་གཅིག་ཕྱག་གཉིས་ཞི་འཛུམ་ལྡན། །ཞབས་གཉིས་ཞི་བདེའི་ཚུལ་དུ་བཞུགས། །ཕྱག་གཉིས་བདེ་གཤེགས་བསྐྱེད་མཛད་མ། །སྐུ་ལ་རིན་ཆེན་རྒྱན་ཆ་མཛེས། །དར་གོས་ན་བཟའ་ལྷབ་ལྷུབ་ཅན། །ལྷ་མོ་སྒྱུ་འཕྲུལ་ཐུགས་དམ༴ ཡུམ་ཆེན་ལྷ་ཚོགས་ཐུགས༴ སངས་རྒྱས་བསྐྱེད་ཡུམ༴ མ་ཅིག་ལབ་སྒྲོན་ཐུགས༴ ཡེ་ཤེས་མཁའ་འགྲོའི་ཐུགས༴ ཧཱུྃ། མ་ཅིག་ལབ་སྒྲོན་སྤྲུལ་པ་ནི། །སུམ་ཅུ་རྩ་གསུམ་ལྷ་ཡི་ཡུལ། །ནོར་བུའི་ཕུན་ཚོགས་གནས་མཆོག་ནས། །མཁའ་འགྲོ་སེར་མོ་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །སྐུ་མདོག་སེར་མོ་གསེར་མདོག་ཅན། །ཞལ་གཅིག་ཕྱག་གཉིས་སྤྱན་གསུམ་བགྲད། །ཞབས་གཉིས་བརྐྱང་བསྐུམ་ཚུལ་གྱི་བཞེང་། །གཡས་པས་གྲི་གུག་ནམ་མཁར་ཕྱར། །གཡོན་པས་ཐོད་ཁྲག་ཐུགས་ཀར་འཛིན། །དབུ་སྐྲ་དམར་སེར་གྱེན་དུ་བརྫེས། །གཅེར་བུ་རུས་པའི་རྒྱན་དྲུག་སྤྲས། །ཐོད་སྐམ་ལྔ་ཡི་དབུ་ལ་བརྒྱན། །ཐོད་རློན་ལྔ་བཅུའི་དོ་ཤལ་བྱས། །གསང་སྔགས་ཨུ་དུམ་ཝ་ར་ཡི། །ལྷ་རྣམ་འགྲོ་བའི་དོན་མཛད་པ། །མཁའ་འགྲོ་སེར་མོའི་ཐུགས༴ ལྷ་ཡི་མཁའ་འགྲོའི་ཐུགས་དམ་བསྐང་། །གསང་སྔགས་སྟོན་པའི་ཐུགས་དམ་བསྐང་། །མ་ཅིག་ལབ་སྒྲོན༴ ཡེ་ཤེས་མཁའ་འགྲོའི་ཐུགས་དམ་བསྐང་། །འཁོར་དང་བཅས་པའི༴ ཧཱུྃ། མ་ཅིག་ལབ་སྒྲོན་སྤྲུལ་པ་ནི། །རྒྱ་གར་སེར་སྐྱའི་གནས་མཆོག་ནས། །སྤྲུལ་པ་པཎ་ཆེན་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །སྐུ་མདོག་མི་ཤའི་ངང་ཉིད་ལ། །ཞལ་གཅིག་པ་ལ་ཕྱག་གཉིས་པ། །ཞབས་གཉིས་སྐྱིལ་མོ་ཀྲུང་དུ་བཞུགས། །ལྷུང་བཟེད་མཁར་སིལ་པོ་ཏི་བསྣམས། །སྲབ་འཇམ་རེག་བྱའི་ཤམ་ཐབ་དང་། །ཆོས་གོས་རྣམ་གསུམ་སྐུ་ལ་མནབ། །ཉན་ཐོས་བསླབ་པ་ཕྲ་རག་བསྲུང་། །མུ་སྟེག་འབུམ་ཚོ་བཅུ་བདུན་ནི། །ནང་པའི་སྡེ་ལ་བཙུད་པར་མཛད། །སྨོན་འགྲུབ་ཀྱི་ཐུགས་དམ་བསྐང་། །པཎྜི་ཏའི་ཐུགས༴ བསྟན་པའི་བདག་པོའི༴ ནག་ཕྱོགས་བཏུལ་བའི༴ མ་ཅིག་ལབ་སྒྲོན༴ ཡེ་ཤེས་མཁའ་འགྲོའི་ཐུགས༴ འཁོར་དང་བཅས༴ ཧཱུྃ། མ་ཅིག་ལབ་སྒྲོན་སྤྲུལ་པ་ནི། །བོད་ཡུལ་གནས་མཆོག་དམ་པ་ནས། །ཡེ་ཤེས་མཚོ་རྒྱལ་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །སྐུ་མདོག་གཅིག་ཏུ་མ་ངེས་པ། །ཞལ་གཅིག་ཕྱག་གཉིས་ཞི་དང་ལྡན། །ཞབས་གཉིས་མཉམ་པོར་བཤིབ་ནས་བཞེངས། །དབུ་སྐྲ་ལེན་ཕྲན་སིལ་བུར་གྱུར། །ཕྱག་གཉིས་ཐབས་ཤེས་ཕྱག་རྒྱ་མཛད། །ན་བཟའ་ཁ་དོག་མཛེས་པར་གསོལ། །ནོར་བུ་རིན་ཆེན་རྒྱན་དང་ལྡན། །གསང་སྔགས་ཟབ་མོའི་གཏེར་སྒོ་ཕྱེས། །ལས་འཕྲོ་ཅན་རྣམས་དེ་ལ་བཅུད། །གཏེར་ཆོས་སྤྱོད་རྣམས་འགྲོ་དོན་མཛད། །ཡེ་ཤེས་མཚོ་རྒྱལ་ཐུགས་དམ་བསྐང་། །བོད་ཡུལ་མཁའ་འགྲོའི་ཐུགས༴ མཁར་ཆེན་བཟའི༴ གཏེར་ཁ་ཕྱེ་བའི༴ མ་ཅིག་ལབ་སྒྲོན༴ ཡེ་ཤེས་མཁའ་འགྲོའི༴ བྲན་གཡོག་རྣམས་ཀྱི༴ ཧཱུྃ། མ་ཅིག་དྲང་པོ་སྐུ་སྤྲུལ་ཚེ། །ཟངས་རི་མཁར་ནས་གཤེགས་སུ་གསོལ། །ཐུགས་དམ་བསྐང་བའི་གནས་འདིར་བྱོན། །བྱང་ཕྱོགས་ལབ་ཀྱི་གྲོང་ཁྱེར་དུ། །ཡབ་ནི་ཁེར་གད་ཆོས་ལྷ་དང་། །ཡུམ་ནི་ཕྱུག་མོ་འབུམ་སྒྲོན་མ། །ཡབ་ཡུམ་གནས་འདིར་གཤེགས་སུ་གསོལ། །ཐུགས་དམ་བསྐང་ཕྱིར་གཤེགས་སུ་གསོལ། །དེ་གཉིས་སྲས་མོ་ལབ་སྒྲོན་ནི། །སྐུ་མདོག་དཀར་པོ་དུང་འོད་འབར། །ཞལ་གཅིག་ཕྱག་གཉིས་སྤྱན་གསུམ་ལྡན། །ཞབས་གཉིས་གར་སྟབས་ཚུལ་དུ་བཞུགས། །དབུ་སྐྲ་ནག་པོ་སིལ་བུར་གྱུར། །ཕྱག་གཡས་གསེར་གྱི་ཌཱ་རུ་བསྒྲག །གཡོན་པས་དངུལ་དཀར་དྲིལ་བུ་བསྣམས། །རིན་ཆེན་རུས་པའི་རྒྱན་གྱིས་བརྒྱན། །སྐུ་ལ་རས་འཕྲུག་ན་བཟའ་མནབ། །ཁ་ཊྭཱྃ་ཀ་ནི་ཡབ་ཕྱིར་ཐོག །ཞི་བའི་ཞལ་འཛུམ་མདངས་དང་ལྡན། །གང་འདུལ་སོ་སོར་འདྲེན་མཛད་མ། །ཁ་བ་ཅན་རྣམས་བདེ་ལ་བཀོད། །ལབ་ཀྱི་སྒྲོན་མའི༴ ཡུམ་གྱི་སྤྲུལ་པའི༴ མཁའ་འགྲོའི་གཙོ་མོའི༴ རིགས་བཞི་བདག་མོའི༴ འགྲོ་བ་འདྲེན་མཛད་མའི༴ ཡེ་ཤེས་མཁའ་འགྲོའི༴ འཁོར་དང་བཅས་པའི་ཐུགས་དམ་བསྐང་། །ཧཱུྃ། མ་ཅིག་ཤར་དུ་སྤྲུལ་པའི་ཚེ། །སྐུ་མདོག་སྔོན་མོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་ལྡན། །སྐྲ་གྲོལ་རུས་པའི་རྒྱན་གྱིས་བརྒྱན། །རིན་ཆེན་དོ་ཤལ་ཅོད་པཎ་མཛེས། །གྲི་གུག་ཐོད་ཕྲག་ཁ་ཊྭཱྃ་འཛིན། །ཞབས་གཉིས་བརྐྱང་བསྐུམ་ཚུལ་གྱི་བཞེང་། །རང་འདྲའི་སྔོན་མོ་འབུམ་གྱིས་བསྐོར། །མ་ཅིག་ལབ་སྒྲོན་ཐུགས༴ མཁའ་འགྲོ་འབུམ་གྱི༴ འཁོར་དང་བཅས་པའི༴ ཧཱུྃ། མ་ཅིག་ལྷོ་རུ་སྤྲུལ་པའི་ཚེ། །སྐུ་མདོག་སེར་མོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་ལྡན། །སྐྲ་གྲོལ་མི་མགོ་རུས་པས་བརྒྱན། །རིན་པོ་ཆེ་དང་ཅོད་པཎ་མཛེས། །གྲི་གུག་ཐོད་ཁྲག་ཁ་ཊྭཱྃ་ཀ །ཞབས་གཉིས་བརྐྱང་བསྐུམ་ཚུལ་གྱི་བཞེངས། །རང་འདྲའི་སེར་མོ་འབུམ་གྱིས་བསྐོར། །མ་ཅིག་ལབ་སྒྲོན༴ མཁའ་འགྲོ་འབུམ་གྱི༴ འཁོར་དང་བཅས་པའི༴ ཧཱུྃ། མ་ཅིག་ནུབ་ན་སྤྲུལ་པའི་ཚེ། །སྐུ་མདོག་དམར་པོ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་ལྡན། །སྐྲ་གྲོལ་མི་མགོ་རུས་པས་བརྒྱན། །རིན་པོ་ཆེ་དང་ཅོད་པན་མཛེས། །གྲི་གུག་ཐོད་ཁྲག་ཁ་ཊྭཱྃ་ཐོག །ཞབས་གཉིས་བརྐྱང་བསྐུམ་ཚུལ་གྱིས་བཞེངས། །རང་འདྲའི་དམར་མོ་འབུམ་གྱི་བསྐོར། །མ་ཅིག་ལབ་སྒྲོན་ཐུགས་དམ༴ མཁའ་འགྲོ་འབུམ༴ འཁོར་དང་བཅས་པའི༴ ཧཱུྃ། མ་ཅིག་བྱང་ནས་སྤྲུའི་པའི་ཚེ། །སྐུ་མདོག་ལྗང་ཁུ་གཟི་མདངས་ཅན། །ཞལ་གཅིག་ཕྱག་གཉིས་སྤྱན་གསུམ་ལྡན། །སྐྲ་གྲོལ་མི་མགོ་རུས་པའི་རྒྱན། །རིན་པོ་ཆེ་དང་ཅོད་པཎ་མཛེས། །གྲི་གུག་ཐོད་ཁྲག་ཁ་ཊྭཱྃ་ཐོག །ཞབས་གཉིས་བརྐྱང་བསྐུམ་ཚུལ་གྱི་བཞེངས། །རང་འདྲའི་ལྗང་མོ་འབུམ་གྱིས་བསྐོར། །མ་ཅིག་ལབ་སྒྲོན༴ མཁའ་འགྲོ་འབུམ་གྱི༴ འཁོར་དང་བཅས༴ ཧཱུྃ། མ་ཅིག་དབུས་སུ་སྤྲུལ་པའི་ཚེ། །སྐུ་མདོག་དཀར་མོ་འབུམ་མདངས་ཅན། །ཞལ་ཅིག་ཕྱག་གཉིས་སྤྱན་གསུམ་ལྡན། །སྐྲ་གྲོལ་མི་མགོ་རུས་པས་བརྒྱན། །རིན་པོ་ཆེ་དང་ཅོད་པཎ་མཛེས། །གྲི་གུག་ཐོད་ཁྲག་ཁ་ཊྭཱྃ་ཐོགས། །ཞབས་གཉིས་བརྐྱང་བསྐུམ་ཚུལ་གྱིས་བཞེངས། །རང་འདྲ་དཀར་མོ་འབུམ་གྱིས་བསྐོར། །མ་ཅིག་ལབ་སྒྲོན༴ མཁའ་འགྲོ་འབུམ་གྱིས༴ འཁོར་དང་བཅས་པའི༴ ཧཱུྃ། མ་ཅིག་མཚམས་སུ་སྤྲུལ་པའི་ཚེ། །སྐུ་མདོག་སྣ་ཚོགས་གཟི་མདངས་ཅན། །ཞལ་གཅིག་ཕྱག་གཉིས༴ སྐྲ་གྲོལ༴ རིན་པོ་ཆེ་དང་༴ གྲི་གུག་ཐོད་ཁྲག༴ ཞབས་གཉིས༴ རང་འདྲའི་སྣ་ཚོགས་འབུམ་གྱིས་བསྐོར། །མ་ཅིག་ལབ་སྒྲོན་ཐུགས་དམ་བསྐང་། །མཁའ་འགྲོ་འབུམ༴ འཁོར་དང་བཅས་པའི༴ ཧཱུྃ། མ་གཉེན་ས་རི་ཁྲོད་འགྲིམ་ཙ་ན། །གཡའ་རི་གངས་རྩེར་བཞུགས་པའི་ཚེ། །ཡི་དམ་ལྷ་ཚོགས་ཐིབས་སེ་ཐིབ། །དཔའ་བོའི་གྲོ་བརྡུང་ཁྲེགས་སེ་ཁྲེག །དཔའ་མོའི་ཉམས་དབྱངས་འུ་རུ་རུ། །མཁའ་འགྲོ་མང་པོ་དཔུངས་སེ་དཔུང་། །གདོན་ཚོགས་མང་པོ་མྱ་ལ་ལ། །གནད་ཀྱི་གདམ་པ་ཤ་ར་ར། །བདུད་ཀྱི་གཅོད་ཐབས་སི་ལི་ལི། །ལྟ་བའི་འབྲུག་སྒྲ་ཏི་རི་རི། །བསྒོམ་པའི་གློག་དམར་ཁྱུགས་སེ་ཁྱུག །སྤྱོད་པའི་ཐོག་སྒྲ་ཤ་ར་ར། །འབྲུའི་ཆར་རྒྱུན་སི་ལི་ལི། །བརྒྱན་ཆ་མང་པོ་ཁྲ་ལ་ལ། །རོལ་མོ་མང་པོ་ཏི་རི་རི། །དར་གྱི་ཅོད་པཎ་པུ་རུ་རུ། །གླུ་ལེན་གར་བྱེད་ཁྱུགས་སེ་ཁྱུག །ཌཱ་རུ་ཅང་ཏེ་ཁྲ་ལ་ལ། །དྲིལ་བུ་གཡེར་ཀ་སི་ལི་ལི། །མི་རྐང་གླིང་བུ་ཀྱུ་རུ་རུ། །ཕཊ་ཀྱི་སྒྲ་སྐད་ཟངས་སེ་ཟང་། །ཤ་ཆེན་གྱི་དུད་པ་ཏི་རི་རི། །ཚིལ་ཆེན་གྱི་སྒྲོན་མེ་ཡ་ལ་ལ། །མ་ཅིག་ལབ་སྒྲོན༴ རི་ཁྲོད་འགྲིམས་མའི༴ རིགས་བཞི་མཁའ་འགྲོའི༴ འཁོར་དང་བཅས་པའི༴ མ་གཞན་ཡང་ཕྱོགས་མེད་མཛད་པའི་ཚེ། །བསྐྱེད་རྫོགས་གཉིས་ལ་བརྟན་པ་ཐོབ། །གཟུང་འཛིན་གཉིས་ལ་མདུད་པ་གྲོལ། །ཐབས་ཤེས་གཉིས་ཀྱི་སྤྱོད་པ་མཛད། །བཀའ་བརྒྱུད་གདུང་བརྒྱུད་སྲས་བརྒྱུད་སྐྱེད། །སྣང་སྟོང་དབྱེར་མེད་མཁའ་དབྱིངས་དག །འཁོར་འདས་གཉིས་ཀྱི་རེ་དོག་བྲལ། ། སེམས་བསྐྱེད་བར་སྣང་འཇའ་ལྟར་བཀྲ། །བྱམས་དང་སྙིང་རྗེ་རྒྱུད་ལ་སྐྱེ། །ཆགས་སྡང་ཉེ་རིང་གཉིས་དང་བྲལ། །གཞན་དོན་ཕྱོགས་མེད་ལྷུན་གྱིས་གྲུབ། །མ་ཅིབ་ལབ་སྒྲོན་ཐུགས་དམ་བསྐང་། །གཞན་དོན་མཐར་ཕྱིན༴ འགྲོ་བ་འདྲེན་མའི༴ ཧཱུྃ། མ་ཅིག་ལབ་ཀྱི་སྒྲོན་མ་ལ། །བདག་ཉིད་དད་པའི་ཐུགས་དམ་བསྐང་། །ཁྱེད་ཀྱི་ཡོན་ཏན་ཕྲིན་ལས་ཀྱི། །ཚེ་ཡི་འགལ་རྐྱེན་མི་འབྱུང་ཞིང་། །ཕྱི་མའི་དོན་ལ་འབད་པ་དང་། །དཀར་པོའི་དལ་ཁ་སྤེལ་དུ་གསོལ། །ནག་པོའི་བདུད་རྣམས་བཟློག་ཏུ་གསོལ། །ཟས་ནོར་ལོངས་སྤྱོད་ཆར་བཞིན་ཕོབ། །ལྷ་འདྲེ་མི་གསུམ་དབང་དུ་བསྡུས། །དགྲ་བགེགས་གནོད་བྱེད་རྡུལ་དུ་བཟློག །སྡང་བའི་དགྲ་ལ་རྟགས་ཕྱུང་ཅིག །གནོད་པའི་བགེགས་ལ་ལས་མཛོད་ཅིག །བཅོལ་བའི་ཕྲིན་ལས་འགྲུབ་པར་མཛོད། །མ་ཅིག་ལབ་སྒྲོན་ཐུགས་དམ་བསྐང་། །མ་ཅིག་བསྐང་བའི་བྱིན་རླབས་ཀྱིས། །བདག་གི་བསམ་པ་ཆོས་ལ་བསྒྱུར། །ཅི་བསམ་དོན་རྣམས་འགྲུབ་པར་མཛོད། །བདག་མཁའ་སྤྱོད་གནས་སུ་ལམ་སྣ་དྲངས། །ཧཱུྃ། མ་སྐྱེ་མེད་ངང་དུ་གཤེགས་པའི་ཚེ། །དཔའ་བོ་དཔའ་མོའི་བསུ་མ་བྱེད། །ལྷ་དང་ལྷ་མོ་ཐམས་ཅད་ཀྱི། །འཇའ་ཚོན་སྣ་ལྔའི་གུར་ཁང་ཕུབ། །ལྷའི་བདུད་རྩིའི་ཆར་རྒྱུན་འབེབས། །མེ་ཏོག་ཆར་པ་སྣ་ཚོགས་འབབ། །དྲི་ངད་ལྡན་པའི་དུད་པ་བཏང་། །རོལ་མོ་བྱེ་བྲག་ཏུ་སྒྲོག །གར་དང་དབྱངས་ཀྱི་མཆོད་པ་འབུལ། །མ་ཅིག་སེངྒེ་ཆིབ་ནས་སུ། །འཁོར་ཚོགས་རིགས་བཞི་མཁའ་འགྲོ་དང་། །འབུམ་ཚོ་བཅུ་ཡི་འཁོར་གྱི་བསྐོར། །ནམ་མཁའི་དབྱིངས་ནས་གཤེགས་ནས་ཀྱང་། །སྤྲུལ་པའི་འགྲོ་དོན་མཛད་གྱུར་ན། །ཆོས་ཉིད་ངང་ལས་གཤེགས་སུ་གསོལ། །མ་ཅིག་ལབ་སྒྲོན༴ འགྲོ་དོན་མཛད་པའི༴ ཆོས་ཀྱི་དབྱིངས་མའི༴ སྐྱེ་མེད་སྟོན་མའི་ཐུགས་དམ༴ ཁྱེད་ཀྱི་ཐུགས་དམ་བསྐང་གྱུར་ཅིག །ཧཱུྃ། མ་གཏི་མུག་དག་ནས་ཆོས་དབྱིངས་ངང་། །སངས་རྒྱས་མཁའ་འགྲོའི༴ ཞེ་སྡང་དག་ནས་མེ་ལོང་ངང་། །རྡོ་རྗེ་མཁའ་འགྲོའི༴ ང་རྒྱལ་དག་ནས་མཉམ་ཉིད་ངང་། །རིན་ཆེན་མཁའ་འགྲོའི༴ འདོད་ཆགས་དག་ནས་སོར་རྟོག་ངང་། །པདྨ་མཁའ་འགྲོའི༴ ཕྲག་དོག་དག་ནས་བྱ་གྲུབ་ངང་། །ལས་ཀྱི་མཁའ་འགྲོའི༴ ཡེ་ཤེས་མཁའ་འགྲོ་སྡེ་ལྔའི༴ འཁོར་མཁའ་འགྲོ་བྱེ་བ་འབུམ་གྱི་ཐུགས་དམ་བསྐང་། །ཐུགས་དམ་བསྐངས་གྱུར་དབང་དང་དངོས་གྲུབ་སྩོལ། །ཅེས་དམ་ཆོས་སྡུག་བསྔལ་ཞི་བྱེད་ཀྱི་བཀའ་བབ་ཕ་དམ་པ་རྒྱ་གར་དང་། བདུད་བཞི་ཚར་གཅོད་ཀྱི་བཀའ་བབ་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་བཅས་ཀྱི་རྣམ་ཐར་དང་འབྲེལ་བའི་བསྐང་བ་འདི་ཡང་ལྔ་ཚོ་ཀུན་དགའ་འབུམ་པས། མ་དང་མཁའ་འགྲོ་འདུ་བའི་གནས་མཆོག་ཀཿཐོག་རྡོ་རྗེ་གདན་གྱི་དབེན་གནས་སུ་བྲིས་པ་རྫོགས་སོ།། །།

ཡུམ་ཆེན་གཅོད་ཀྱི་བརྒྱུད་པའི་བསྐང་བ།

ཡུམ་ཆེན་གཅོད་ཀྱི་བརྒྱུད་པའི་བསྐང་བ་བཞུགས་སོ། །ཨེ་མ་ཧོ། མ་བཅོས་སྤྲོས་བྲལ་རྒྱལ་བའི་ཡུམ་ལ་ཕྱག་འཚལ་ལོ། །གཅོད་ཀྱི་ཕྲིན་ལས་སྣ་ཚོགས་དང་། །དབང་སྒྲུབ་ཁྱིམ་གཅོད་བསྒྲལ་མཆོད་དང་། །མེ་ཚག་ལ་སོགས་བཅས་འཛོམ་དུས། །བསྐང་བའི་ཆོ་ག་འདི་ཉིད་གཅེས། །བསྐང་བའི་དམ་རྫས་གཞན་དང་མཐུན། །ཕྱི་ནང་གསང་བའི་མཆོད་པའི་རྫས། །གཟུགས་འགྲོས་སྣ་ཚོགས་བྱས་ཤིང་། །གདུང་བའི་དབྱངས་ཀྱི་འདི་སྐད་བསྐང་བའོ། །གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །ཡུམ་ཆེན་ཤེས་རབ་ཕར་ཕྱིན་རིན་པོ་ཆེ། །ཁྱེད་འཁོར་དཔའ་བོ་མཁའ་འགྲོའི་དབུས་ན་བཞུགས། །ཞི་རྒྱས་དབང་དྲག་ལྷ་ཚོགས་དང་། །དཔའ་བོ་དཔའ་མོ་ཆོས་སྐྱོང་དང་། །དམ་ཅན་མ་སྲིན་མཁའ་འགྲོ་དང་། །ལས་བྱེད་ཤ་ཟ་ཁྲག་འཐུང་དང་། །ཕོ་ཉ་སྲོག་གཅོད་ཤན་པའི་ཚོགས། །སྔོན་གྱི་ཐུགས་དམ་དགོངས་པ་བཞིན། །ལོངས་སྤྱོད་ཚོགས་ཀྱི་མཆོད་པ་འདི། །དོ་ནུབ་གནས་འདིར་ཐུགས་དམ་བསྐང་། །བསྐང་གྱུར་དབང་དང་དངོས་གྲུབ་སྩོལ། །མ་དེའི་ཐུགས་དམ་བརྒྱུད་འཛིན་མ། །གནས་བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀ་ཐུབ་རིན་པོ་ཆེ། །ཁྱེད་འཁོར་དཔའ་བོ་མཁའ་འགྲོའི་དབུས་ན་བཞུགས། །སོགས་ཚིག་རྐང་བཅུ་པོ་འགྲེས། མ་དེའི་ཐུགས་དམ་བརྒྱུད་འཛིན་མ། །གནས་སེང་ཆེན་བསྣོལ་བའི་ཁྲི་སྟེང་ནས། །འཇམ་དཔལ་སྨྲ་བའི་སེང་གེ་རིན་པོ་ཆེ། །ཁྱེད་འཁོར་དཔའ་བོ་སོགས། མ་དེའི་ཐུགས་དམ་བརྒྱུད་འཛིན་མ། །གནས་གཡུ་ལོ་བཀོད་པའི་ཞིང་ཁམས་ནས། །རྗེ་བཙུན་འཕགས་མ་སྒྲོལ་མོ་རིན་པོ་ཆེ། །ཁྱེད་འཁོར་དཔའ་སོགས། མ་དེའི་ཐུགས་དམ་བརྒྱུད་འཛིན་མ། །གནས་འཇའ་འོད་འཁྱིལ་པའི་གུར་ཁང་ནས། །མཁའ་འགྲོ་སུ་ཀ་སིདྡྷི་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་རྒྱ་གར་ཆོས་ཀྱི་ཕོ་བྲང་ནས། །རྗེ་ཨརྱ་དེ་བ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གཙང་ལ་སྟོད་དེང་རི་དགོན་པ་ནས། །ཕ་དམ་པ་རྒྱ་གར་སངས་རྒྱས་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ར་ས་སྤང་ལུང་གི་དགོན་པ་ནས། །སྐྱོབ་པ་ཤཱཀྱ་ཡེ་ཤེས་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་དབུས་གཙང་གཉིས་ཀྱི་ས་མཚམས་ནས། །སྐྱོ་སྟོན་བསོད་ནམས་བླ་མ་རིན་པོ་ཆེ། །ཁྱེད་འཁོར་དཔའ་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཟངས་རི་མཁར་དམར་གྱི་དགོན་པ་ནས། །མ་ཅིག་ལབ་ཀྱི་སྒྲོལ་མ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཤམ་པོ་གངས་ཀྱི་ར་བ་ནས། །སྲས་རྒྱལ་བ་དོན་འགྲུབ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །དཔལ་ཆུ་བོ་རི་ཡི་དགོན་པ་ནས། །ཁུ་སྒོམ་ཆོས་ཀྱི་སེངྒེ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ལུང་སྨད་ལྕང་སར་གྱི་དགོན་པ་ནས། །ཕ་དོལ་པ་ཟངས་ཐལ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །དཔལ་ཆུ་བོ་རི་ཡི་དགོན་པ་ནས། །རྗེ་བཙུན་རྒྱ་ནག་གཅེར་བུ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་རབ་གྲོང་ཆོས་ཀྱི་ཕོ་བྲང་ནས། །མཁས་གྲུབ་སངས་རྒྱས་རབ་སྟོན་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཟལ་མོ་བྲག་གི་དགོན་པ་ནས། །སངས་རྒྱས་དགེ་སློང་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཁ་རག་མུན་སེང་གི་དགོན་པ་ནས། །སུམ་པ་རས་ཆེན་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་རི་གང་ཆོས་ཀྱི་དགོན་པ་ནས། །སངས་རྒྱས་གཉེན་སྟོན་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །འབང་པ་བཀྲ་ཤིས་དགོན་པ་ནས། །དྷརྨ་སིངྷ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་གར་བཞུགས་ཆོས་ཀྱི་ཕོ་བྲང་ནས། །བཛྲ་སིངྷ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཀཿཐོག་དཔལ་གྱི་སྒྲུབ་གནས་སུ། །པྲ་ཛྙཱ་གུ་རུ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་དཔལ་འབར་བཀྲ་ཤིས་དགོན་པ་རུ། །རྡོ་རྗེ་དཔལ་བ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་དཔལ་འབར་བཀྲ་ཤིས་དགོན་པ་རུ། །རྡོ་རྗེ་དཔལ་བ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །སྣང་སྲིད་ཆོས་སྐུའི་ཕོ་བྲང་ནས། །ནམ་མཁའ་རྡོ་རྗེ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །དགའ་ལྡན་གནམ་སྟོང་རི་ཁྲོད་ནས། །ཤི་ལ་ཀེ་ཏུ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །སྤང་སྐམ་ཆོས་གླིང་རི་ཁྲོད་ནས། །དྷརྨ་བཛྲ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །དོན་གཉིས་གྲུབ་པའི་ཕོ་བྲང་ནས། །ཛྙཱ་ན་ཀེ་ཏུ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཆོས་བརྒྱད་རང་གྲོལ་ཕོ་བྲང་ནས། །བྱ་བཏང་ཀུན་དགའ་འབུམ་པ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་དོན་གཉིས་ལྷུན་གྲུབ་ཕོ་བྲང་ནས། །རྗེ་པུཎྱེ་ལ་ཀྵ༴ ཁྱེད་འཁོར༴ མ་དེའི་ཐུགས་དམ་བརྒྱུད་འཛིན་མ། །གནས་ལྷུན་གྲུབ་འོད་ལྔའི་ཕོ་བྲང་ནས། །རྗེ་བཛྲ་རསྨི་རིན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྟོང་ཉིད་ཆོས་དབྱིངས་ཀྱི་ཕོ་བྲང་ནས། །རྗེ་ག་ག་བཛྲ་རིན་པོ༴ ཁྱེད་འཁོར༴ མ་དེའི་ཐུགས་དམ་བརྒྱུད་འཛིན་མ། །གནས་རང་རིག་རང་གསལ་ཕོ་བྲང་ནས། །རྗེག་ག་ག་མ་ཏི་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་མ་བཅོས་ལྷུན་གྲུབ་ཕོ་བྲང་ནས། །རྗེ་ཀ་ལ་བཛྲ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྐུ་ལྔ་དཔལ་གྱི་རི་ཁྲོད་ནས། །རྗེ་འཁྲུལ་རང་གྲོལ༴ ཁྱེད་འཁོར་སོགས། མ་དེའི་ཐུགས་དམ་རྒྱུད་འཛིན་མ། །གནས་ཁམ་གང་བྱང་ཆུབ་གླིང་དགོན་དུ། །རྗེ་ཆོས་སྐྱོང་རྒྱ་མཚོ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཀཿཐོག་རྡོ་རྗེའི་གདན་སྟེང་ནས། །རྗེ་ཀློང་གསལ་སྙིང་པོ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་གསང་སྔགས་རབ་བརྟན་ཆོས་གླིང་ནས། །རྗེ་ཆོས་ཉིད་རྒྱ་མཚོ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་གདུང་ཤུག་དྲག་པོའི་དབེན་གནས་ནས། །རྗེ་བཀྲ་ཤིས་མཚན་ཅན་རིན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཤིང་སྒོ་གངས་ཀྱི་རྭ་བ་ནས། །དྲུང་པ་ནམ་མཁའ་རྒྱ་མཚོ༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་འཁྲུལ་པ་རང་གྲོལ་ཕོ་བྲང་ནས། །རྗེ་པདྨ་ཆོས་དབྱིངས༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྣང་གྲགས་ཆོས་སྐུའི་ཕོ་བྲང་ནས། །རྗེ་སངས་རྒྱས་གྲགས་པ༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཚོགས་གཉིས་ལྷུན་གྲུབ་ཕོ་བྲང་ནས། །རྗེ་ནམ་མཁའ་ཆོས་སྐྱོང་༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་གང་ཤར་རང་གྲོལ་ཕོ་བྲང་ནས། །རྗེ་འཇིག་མེད་བསམ་གཏན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྨིན་གྲོལ་རྒྱ་མཚོའི་ཕོ་བྲང་ནས། །རྗེ་ཀུན་བཟང་རྣམ་རྒྱལ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་རྒྱུད་འཛིན་མ། །གནས་སྣང་བཞི་མཐར་ཕྱིན་ཕོ་བྲང་ནས། །རྗེ་རཏྣ་གུ་རུ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་བཤད་སྒྲུབ་ནོར་བུའི་ལྷུན་པོ་ནས། །རྗེ་ཆོས་ཀྱི་རྒྱ་མཚོ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་བྲག་གདོང་བཀྲ་ཤིས་དགེ་འཕེལ་དུ། །རྗེ་རྡོ་རྗེ་ལེགས་བཤད་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྤྱི་གཙུག་པད་ཟླའི་གདན་སྟེང་ནས། །དྲིན་ཆེན་རྩ་བའི་བླ་མ་རིན་པོ་ཆེ། །སོགས་དཀྱུས་ལྟར། ཡང་ན་མན་ངག་དོན་བརྒྱུད་ལྟར་ན། ནམ་མཁའ་རྒྱ་མཚོ་ཡན་སྔར་ལྟར་ལ། མ་དེའི་ཐུགས་དམ་བརྒྱུད་འཛིན་མ། །གནས་མོས་གུས་མཐར་ཕྱིན་ཕོ་བྲང་ནས། །རྗེ་དྲི་མེད་ཞིང་སྐྱོང་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་མཁྱེན་བརྩེ་ནུས་མཐུའི་ཕོ་བྲང་ནས། །རྗེ་ཚེ་དབང་མཆོག་གྲུབ་རིན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྟོང་ཉིད་བདེ་ཆེན་ཕོ་བྲང་ནས། །རྗེ་ངེས་དོན་དབང་པོ་རིན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་རྟོག་འཁྲུལ་རང་གྲོལ་ཡང་དབེན་ནས། །རྗེ་འགྱུར་མེད་བསྟན་འཛིན་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་བྱང་ཆུབ་སེངྒེའི་ནགས་ཁྲོད་ནས། །རྗེ་ཆོས་ཀྱི་བློ་གྲོས༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་ཕྱོགས་མེད་དཔལ་གྱི་གཉེན་ཁྲོད་ནས། །རྗེ་ཀུན་བཟང་འགྱུར་མེད་རིན༴ ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་བཤད་སྒྲུབ་ནོར་བུའི་ལྷུན་པོ་ནས། །རྗེ་ཆོས་ཀྱི་རྒྱ་མཚོ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་བྲག་གདོང་བཀྲ་ཤིས་དགེ་འཕེལ་ནས། །རྗེ་རྡོ་རྗེ་ལེགས་བཤད་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་སྤྱི་གཙུག་པད་ཟླའི་གདན་སྟེང་ནས། ༈ །དྲིན་ཆེན་རྩ་བའི་བླ་མ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །གནས་གཉན་ས་རི་ཁྲོད་ཀྱི་དགོན་པ་ནས། །གྲུབ་ཐོབ་གཅོད་ཡུལ་བརྒྱུད་པ་རིན་པོ་ཆེ། །ཁྱེད་འཁོར་སོགས། མ་དེའི་ཐུགས་དམ་བརྒྱུད་འཛིན་མ། །དམ་ཅན་མ་སྲིང་རྒྱ་མཚོའི་ཚོགས། །ཁྱེད་རྣམས་ཐུགས་དམ་བསྐང་བའི་དམ་རྫས་ནི། །དཀར་གསལ་འོད་ཀྱི་མཆོད་པ་འདིས། །མ་སྲིང་མཁའ་འགྲོའི་ཐུགས་དམ་བསྐང་། །འོད་ཟེར་སྤྲུལ་པ་བརྒྱན་ཆ་འདིས། །མ་སྲིང་མཁའ༴ གསེར་གཡུ་མུ་ཏིག་བརྒྱན་ཆ་འདི། །མ་སྲིང་མཁའ༴ ཉི་ཟླ་མི་རོའི་རྒྱལ་མཚན་འདི། །མ་སྲིང་མཁའ༴ བནྡྷ་འབར་བའི་གསོལ་སྡེར་འདི། །མ་སྲིང་མཁའ༴ འབྲུ་སྣ་དགུའི་བདུད་རྩི་འདི། །མ་སྲིང་༴ གནམ་རྒྱན་སྤྲུལ་པའི་མཆོད་པ་འདི། །མ་སྲིང་མཁའ༴ ཤ་སྣ་ལྔའི་རི་བོ་འདི། །མ་སྲིང་མཁའ༴ བམ་ཆེན་རྙིང་པ་རུལ་པམ་འདི། །མ་སྲིང་མཁའ༴ ཞག་དང་ཁྲག་གི་རྒྱ་མཚོ་འདི། །མ་སྲིང་མཁའ་འགྲོའི༴ བྷནྡྷ་སྟག་སྤྲོད་རྔ་སྒྲ་འདི། །མ་སྲིང་༴ རྐང་ཆེན་གསང་བའི་གླིང་བུ་འདི། །མ་སྲིང་༴ ཚིལ་ཆེན་གསང་བའི་དུད་སྤྲིན་འདི། །མ་སྲིང་མཁའ་སིལ་སྤོས་ཀྱི་དུད་པ་འདི། །མ་དང་མཁའ་འགྲོའི༴ རུས་པའི་ཕྲེང་བ་རྒྱན་དྲུག་འདི། །མ་སྲིང་མཁའ་འགྲོའི་ཐུགས༴ སྣ་ཚོགས་དར་གྱི་ཅོད་པན་འདི། །མ་སྲིང་མཁའ་འགྲོའི་ཐུགས་དམ༴ གདུང་བའི་སྒྲ་དབྱངས་སྣ་ཚོགས་འདི། །མ་སྲིང་མཁའ༴ ལྡེམ་འཛུམ་འཁྲིལ་སྦྱོར་གར་འཁྱམས་འདིས། །མ་སྲིང་༴ རུས་བརྒྱན་གསང་བའི་ན་བཟའ་འདི། །མ་སྲིང་མཁའ་འགྲོའི༴ ལྕང་ལོ་མཛེས་པའི་རྒྱན་ཆ་འདི། །མ་སྲིང་མཁའ༴ ཕྱག་མཚན་ཁ་ཊྭཱྃ་གྲི་གུག་དང་། །མ་སྲིང་༴ འདོད་ཡོན་གཏོར་མའི་མཆོད་རྫས་འདི། །མ་སྲིང་མཁའ༴ ཁྱེད་ཀྱི་ཐུགས་དམ་བདག་གི་བསྐང་། །རྣལ་འབྱོར་བདག་ཅག་ཡོན་མཆོད་ཀྱི། །འཁོར་རྣམས་བསྲུང་ལ་རྐྱེན་རྣམས་བཟློག །མཆོག་དང་ཐུན་མོང་དངོས་གྲུབ་སྩོལ། །ལྷ་འདེ་མི་གསུམ་དབང་དུ་བསྡུས། །བཅོལ་པའི་ཕྲིན་ལས་འགྲུབ་པར་མཛོད། །བཤགས་པ་ནི། ཡི་གེ་བརྒྱ་པ་བརྗོད། རྫོགས་སོ།། །།ཨུ་རྒྱན་གནས་སུ་པདྨས་མ་ཅིག་ལབ་སྒྲོན་ལ་གསུང་པའོ། །

བརྒྱུད་བསྐང་ཆེ་བའི་འགྲེས་བྱང་།

༅། །བརྒྱུད་བསྐང་ཆེ་བའི་འགྲེས་བྱང་ནི། ཁྱེད་འཁོར་དཔའ་བོ་མཁའ་འགྲོའི་དབུས་ན་བཞུགས། །ཞི་རྒྱས་དབང་དྲག་ལྷ་ཚོགས་དང་། །དཔའ་བོ་དཔའ་མོ་ཆོས་སྐྱོང་དང་། །དམ་ཅན་མ་སྲིང་མཁའ་འགྲོ་དང་། །ལས་བྱེད་ཤ་ཟ་ཁྲག་འཐུང་དང་། །ཕོ་ཉ་སྲོག་གཅོད་ཤན་པའི་ཚོགས། །སྔོན་གྱི་ཐུགས་དམ་དགོངས་པ་བཞིན། །ལོངས་སྤྱོད་ཚོགས་ཀྱི་མཆོད་པ་འདི། །དོ་ནུབ་གནས་འདིར་ཐུགས་དམ་བསྐང་། །བསྐང་གྱུར་དབང་དང་དངོས་གྲུབ་སྩོལ།། །།

བརྒྱུད་བསྐང་གྱི་འགྲེལ་བཤད།

༈ བརྒྱུད་བསྐང་གྱི་འགྲེལ་བཤད་ནི། ཁྱེད་འཁོར་དཔའ་བོ་མཁའ་འགྲོ་ལ། །ལུས་དང་ལོངས་སྤྱོད་ལ་སོགས་པ། །ཕྱི་ནང་གསང་བའི་མཆོད་པ་འབུལ། །དམ་ཚིག་ཉམས་ཆག་མཐོལ་ལོ་བཤགས། །མཆོག་དང་ཐུན་མོང་དངོས་གྲུབ་སྩོལ། །བརྒྱུད་པ་རེ་རེ་བཞིན་འགྲེལ་སྦྱར་རོ། །གཞུང་གི་དེ་ཚིག་མང་བས་འདི་ཁྱེར་བདེ་བར་མངོན་ནོ།། །།

ཟབ་མོ་གཅོད་ཀྱི་བརྒྱུད་བསྐང་ཉམས་ཆག་སྦྱང་།

ཟབ་མོ་གཅོད་ཀྱི་བརྒྱུད་བསྐང་ཉམས་ཆག་སྦྱང་བ་བཞུགས་སོ། །ཧཱུྃ། སྐྱེ་མེད་རྣམ་དག་མཐའ་དབུས་བྲལ་བ་ལ། །འགགས་མེད་ཐོག་བཅས་ཐོག་མེད་སྙེམ་བྱེད་བདུད། །གང་ཤར་ཡུལ་མེད་རང་རིག་དབྱིངས་སུ་གཅོད། །གྲུབ་ཐོབ་གཅོད་བརྒྱུད་བླ་མའི་ཐུགས་དམ་བསྐང་། །རང་རིག་ངོ་བོ་སྨྲ་བསམ་ཡུལ་ལས་འདས། །ཡུམ་ཆེན་ཕ་རོལ་ཕྱིན་མའི་ཐུགས་དམ༴ དོན་གཉིས་ཕུན་ཚོགས་མཛད་པ་མཐར་ཕྱིན་པ། །བཅོམ་ལྡན་ཤཱཀྱའི་རྒྱལ་པོའི་ཐུགས༴ མ་རིགས་མུན་པ་བློ་གྲོས་སྣང་བ་རྒྱས། །འཕགས་པ་འཇམ་དབྱངས་ལྷ་ཚོགས༴ འགྲོ་རྣམས་འཇིག་པ་བརྒྱད་ལ་སྐྱོབ་མཛད་མ། །རྗེ་བཙུན་འཕགས་མ་སྒྲོལ་མའི་ཐུགས་དམ་བསྐང་། །མ་བརྒྱུད་དཔའ་མོ་ཀུན་གྱིས་ཡང་རྗེ་མོ། །མཁའ་འགྲོ་སུ་ཀ་སི་ཏིའི༴ སྒྲ་ཚད་དོན་གཉིས་འཛམ་གླིང་རྒྱན་དུ་ཤར། །རྗེ་བཙུན་ཨརྱ་དེ་བའི་ཐུགས༴ རྒྱ་བོད་ཀུན་ལ་གདུལ་བྱ་སྨིན་གྲོལ་མཛད། །གྲུབ་ཐོབ་ཀརྨ་ཤཱི་ལའི༴ ཐེག་ཆེན་རྒྱུད་འཛིན་མན་ངག་བཅུད་དང་ལྡན། །སྐྱོ་སྟོན་བསོད་ནམས་བླ་མའི༴ བཀའི་དོན་རྟོགས་འགྲོ་བའི་དཔལ་དུ་ཤར། །མ་ཅིག་ལབ་ཀྱི་སྒྲོན་མའི་ཐུགས༴ སྒོ་གསུམ་གུས་པས་མ་ཅིག་མཉེས་པ་སྒྲུབ། །ཁུ་བསྒོམ་ཆོས་ཀྱི་སེངྒེའི་ཐུགས༴ བཀའ་བཞིན་དོན་གྱི་གཅོད་ཀྱི་རྒྱུད་འཛིན་མ། །སྐྱེས་སྟོན་དོལ་པ་ཟང་ཐལ༴ སྐྱེ་མེད་དོན་རྟོགས་ཆོས་བརྒྱད་རང་སར་གྲོལ། །རྗེ་བཙུན་རྒྱ་ནག་གཅེར་བུའི༴ ཆོས་རྣམས་ཐུགས་བཅུད་བསྒྲུབ་མཛད་མཐར་ཕྱིན་པ། །མཁས་གྲུབ་སངས་རྒྱས་རབ་སྟོན༴ སྡོམ་གསུམ་བསླབ་གསུམ་དོན་ལྡན་མཁྱེན་པ་རྒྱས། །རྟོགས་ལྡན་ཟལ་མོ་དགེ་སློང་༴ སྙེམས་རྟོག་ཆོད་ནས་ལུས་ཀྱི་གདོན་རྣམས་ཐུལ། །བླ་མ་ཞེན་མེད་རས་པའི༴ དགོངས་པའི་རྟེན་ཐོབ་ཆོས་ཀྱི་སྤྱན་དང་ལྡན། །གུ་རུ་སངས་རྒྱས་རབ་སྟོན༴ སྐྱེ་མེད་དོན་ལ་འགགས་མེད་བློ་འབྱོར་པ། །རས་པ་དྷརྨ་སེངྷའི༴ གར་བཞུགས་ཆོས་འཁོར་ཀུན་ཏུ་བསྐོར་མཛད་པ། །སྟོབ་པ་བཛྲ་སེངྷའི༴ གཉེན་ས་རྒྱ་ཆེ་ཆོས་ཉིད་དོན་དང་ལྡན། །སློབ་དཔོན་པྲ་ཛྙཱ་གུ་རུའི་ཐུགས༴ འགྲོ་བའི་མགོན་གྱུར་ཐིག་ཆེན་ཆོས་སྒྲ་སྒྲོག །ཆོས་རྗེ་བཛྲ་ཤྲཱི༴ གཉིས་འཛིན་རང་གྲོལ་སྣང་སྲིད་ཆོས་སྐུར་ཤར། །རྟོག་ལྡན་ནམ་མཁའ་རྡོ་རྗེའི་ཐུགས༴ ཐོས་བསམ་རྒྱ་ཆེ་བསྐྱེད་རྫོགས་ཟུང་དུ་འཇུག །མཁས་ཆེན་ཤི་ལ་ཀེ་ཏུའི༴ དབུ་རྫོགས་ཕྱག་གསུམ་དོན་གྱི་བཀའ་བབ་པ། །མཚུངས་མེད་ཆོས་ཀྱི་རྡོ་རྗེའི༴ ཕྱི་ནང་གསང་བའི་ཆོས་རྣམས་ཁོང་དུ་ཆུད། །མཁས་བཙུན་ཛྙཱ་ན་ཀེ་ཏུའི༴ དམ་ཆོས་བདུད་ཀྱི་གཅོད་ཡུལ་བཀའ་བབ་པ། །དཔལ་ལྡན་ཨ་ནན་ལཀྵིའི༴ ཐིག་ལེ་དོན་ལྡན་ཚོགས་གཉིས་ཟུང་དུ་འཇུག །མཁས་རྟོག་པུཎྱེ་ལཀྵིའི༴ རླུང་སེམས་དབང་ཐོབ་འགྲོ་དོན་དམ་ལ་བཏགས། །བཤེས་གཉེན་བཛྲ་རསྨིའི༴ ནམ་མཁའ་རྡོ་རྗེ་ག་ག་མ་ཏི་དང་། །ཀ་ལ་བཛྲ་རྣམས་ཀྱི༴ དབང་དྲག་རྒྱ་མཚོ་ཆོས་སྐྱོང་རྒྱ་མཚོ་དང་། །ཀློང་གསལ་སྙིང་པོ་རྣམས་ཀྱི༴ ཆོས་ཉིད་རྒྱ་མཚོ་བཀྲ་ཤིས་ཕུན་ཚོགས་དང་། །ནམ་མཁའ་རྒྱ་མཚོ་རྣམས་ཀྱི༴ དྲི་མེད་ཞིང་སྐྱོང་སྐྱབས་མགོན་པཎྜི་ཏ། །ངེས་དོན་དབང་པོ་རྣམས་ཀྱི༴ འགྱུར་མེད་བསྟན་འཛིན་ཆོས་ཀྱི་བློ་གྲོས་དང་། །ཀུན་བཟང་འགྱུར་མེད་རྣམས་ཀྱི༴ །ཆོས་ཀྱི་རྒྱ་མཚོ་རྡོ་རྗེ་ལེགས་བཤད་སོགས། །གཅོད་ཆོས་ཐོབ་ཚད་བླ་མའི་ཐུགས་དམ་བསྐང་། །བཀའ་རྒྱུད་བླ་མའི་ལུང་རིག་བཅུད་འདུས་པས། །དྲིན་ཆེན་རྩ་བའི་བླ་མའི་ཐུགས་དམ་བསྐང་། །གཉིས་འཛིན་བདུད་རྣམས་རང་སར་གཅོད་མཛད་པ། །མཆེད་གྲོགས་ཆོས་མཛད་ཡོངས་ཀྱི་ཐུགས་དམ་བསྐང་། །གསང་སྔགས་ཕྱི་ནང་གཉིས་ཀྱི་བསྡུས་པ་ཡི། །ཡི་དམ་ཞི་ཁྲོའི་ལྷ་ཚོགས་ཐུགས་དམ་བསྐང་། །ཧཱུྃ། དབུས་ཕྱོགས་ལྷུན་གྱིས་གྲུབ་པའི་དུར་ཁྲོད་ནས། །ཆོས་འབྱུང་པད་ཉི་རོའི་གདན་སྟེངས་སུ། །སངས་རྒྱས་མཁའ་འགྲོ་ཉིད་དང་དབྱེར་མེད་པ། །སྐུ་ལྔ་ཡོངས་རྫོགས་རྡོ་རྗེ་རྣལ་འབྱོར་མ། །སྐུ་མདོག་དམར་ནག་ཞལ་ཅིག་ཕྱག་གཉིས་པ། །གཡས་པས་གྲི་གུག་གཡོན་པས་ཐོད་ཁྲག་བསྣམས། །དབུ་སྐྲ་ཐོར་ཚུག་ལྷག་མ་མཐུར་དུ་གྲོལ། །སྤྱི་གཙུག་ཕག་ཞལ་མཐིང་ནག་ངུར་སྒྲ་སྒྲོག །དར་འཕེན་རུས་རྒྱན་མེ་ལོང་དྲིལ་བུ་དང་། །རིན་ཆེན་རྒྱན་སྤྲས་ཁ་ཊྭཱྃ་མཚན་དུ་བཙུག །ཞབས་གཉིས་བརྐྱང་བསྐུམ་རོའི་གདན་ལ་འགྱིང་། །ལས་བཞི་ལྷུན་གྲུབ་རིགས་བཞི་མཁའ་འགྲོས་བསྐོར། །རྒྱལ་བ་ཀུན་གྱི་གསང་བ་ཡུམ་མཆོག་མ། །རྡོ་རྗེ་རྣལ་འབྱོར་མའི་ཐུགས་དམ་བསྐང་། །ཡུམ་ཆེན་རྡོ་རྗེ་ཕག་མོའི་ཐུགས་དམ་བསྐང་། །སངས་རྒྱས་མཁའ་འགྲོ་མ་ཡི་ཐུགས་དམ་བསྐང་། །ཧཱུྃ། ཤར་ཕྱོགས་གཏུམ་དྲག་འབར་བའི་དུར་ཁྲོད་ནས། །ཞི་བའི་ལས་མཛད་རྡོ་རྗེ་རྣལ་འབྱོར་མ། །རྡོ་རྗེ་རིགས་ཀྱི་མཁའ་འགྲོ་འབུམ་གྱིས་བསྐོར། །སྐུ་མདོག་དཀར་མོ་རྡོ་རྗེ་ཐོད་ཁྲག་བསྣམས། །རྡོ་རྗེ་མཁའ་འགྲོ་འཁོར་བཅས་ཐུགས་དམ་བསྐང་། །ལྷོ་ཕྱོགས་གཏུམ་དྲག་འབར་བའི་དུར་ཁྲོད་ནས། །རྒྱས་པའི་ལས་མཛད་རིན་ཆེན་མཁའ་འགྲོ་མ། །རིན་ཆེན་རིགས་ཀྱི་མཁའ་འགྲོ་འབུམ་གྱིས་བསྐོར། །སྐུ་མདོག་སེར་མོ་རིན་ཆེན་ཐོད་ཁྲག་བསྣམས། །རིན་ཆེན་མཁའ་འགྲོ༴ ཧཱུྃ། ནུབ་ཕྱོགས་པདྨ་འཁྱིལ་བའི་དུར་ཁྲོད་ནས། །དབང་གི་ལས་མཛད་པདྨ་མཁའ་འགྲོ་མ། །པདྨ་རིགས་ཀྱི་མཁའ་འགྲོ་འབུམ་གྱི་བསྐོར། །སྐུ་མདོག་དམར་མོ་པདྨ་ཐོད་ཁྲག་བསྣམས། །པདྨ་མཁའ་འགྲོ་འཁོར་བཅས༴ ཧཱུྃ། བྱང་ཕྱོགས་ཀི་ལ་ཡ་ཡིའི་དུར་ཁྲོད་ནས། །དྲག་པོའི་ལས་མཛད་ཀརྨ་མཁའ་འགྲོ་མ། །ལས་ཀྱི་མཁའ་འགྲོ་འབུམ་གྱིས་བསྐོར། །སྐུ་མདོག་ལྗང་མོ་རྒྱ་གྲམ་ཐོད་ཁྲག་བསྣམས། །ལས་ཀྱི་མཁའ་འགྲོ་འཁོར་བཅས་ཐུགས་དམ་བསྐང་། །ཀུན་ཀྱང་དབུ་སྐྲ་ཐོར་ཚུག་ལྷག་མ་གྲོལ། །དར་འཕེན་རུས་རྒྱན་མེ་ལོང་དྲིལ་བུ་དང་། །རིན་ཆེན་རྒྱན་སྤྲས་ཁ་ཊྭཱྃ་མཆན་དུ་བཅུག །ཞབས་གཉིས་བརྐྱང་སྐུམ་རོའི་གདན་ལ་འགྱིང་། །རིགས་ལྔ་མཁའ་འགྲོ་འཁོར་བཅས༴ ཤུགས་འགྲོ་ལྔའི་ཚོགས་ཀྱི༴ མཁའ་འགྲོ་སེང་གདོང་མའི༴ གཞན་ཡང་འཇིག་རྟེན་འདས་དང་མ་འདས་པ། །མཁའ་འགྲོ་ཤུགས་འགྲོ་རྒྱ་མཚོ་ཡི། །མ་སྲིང་རྒྱ་མཚོའི་ཚོགས་ཀྱི༴ མཁའ་འགྲོ་སུམ་ཅུ་རྩ་གཉིས༴ འབར་མ་ཆེན་མོ་བརྒྱད་ཀྱི༴ མ་བདུན་སྲིང་མོ་བཞིའི༴ དབང་ཕྱུག་ཉི་ཤུ་བརྒྱད་ཀྱི༴ འབུམ་ཕྲག་ཡངས་པའི་མཁའ་འགྲོའི༴ མ་ཡུམ་བསྟན་མ་བཅུ་གཉིས༴ སྤྲུལ་པ་ཡང་སྤྲུལ་རྣམས་ཀྱི༴ ཐུགས་དམ་གཉན་པོ་བསྐང་བའི་དམ་རྫས་ནི། །ཕྱི་མཆོད་འདོན་ཡོན་ལྔ་དང་ཉེར་སྤྱོད་ལྔ། །ནང་མཆོད་སྨན་དང་རཀྟ་བ་ལིངྟ། །འདོད་ཡོན་ཚོགས་ཀྱི་མཆོད་པས་ཐུགས་དམ་བསྐང་། །བདག་གིས་ཉམས་ཆག་སྡིག་སྒྲིབ་ཅི་མཆིས་བཤགས། །ཚེ་དང་བསོད་ནམས་བསྒྲུབ་པ་མཐར་ཕྱིན་སོགས། །བྱང་ཆུབ་སྒྲུབ་པའི་མཐུན་རྐྱེན་དངོས་གྲུབ་སྩོལ། །ནད་གདོན་དགྲ་བགེགས་དུས་མིན་འཆི་བ་སོགས། །བྱང་ཆུབ་བསྒྲུབ་པའི་འགལ་རྐྱེན་བཟློག་ཏུ་གསོལ། །གྲུབ་ཐོབ་གཅོད་ཀྱི་རྒྱུད་པའི་བསྐང་བ་ཉམས་ཆག་དག་བྱེད་ཚོགས་གཉིས་ཆུ་རྒྱུན་ཞེས་བྱ་བ་འདི། བྱ་བྲལ་བ་ཀུན་དགའ་འབུམ་གྱི་ཕག་མཚོ་རི་ཁྲོད་སྦྱར་བའོ།། །།

གཅོད་ཟབ་དོན་གྱིས་ལྷན་ཐབས་བསྒྲུབ་ཐབ་དངོས་གྲུབ་སྒོ་འབྱེད་ཀྱིས་མཆོད་འབུལ།

གཅོད་ཟབ་དོན་གྱིས་ལྷན་ཐབས་བསྒྲུབ་ཐབ་དངོས་གྲུབ་སྒོ་འབྱེད་ཀྱིས་མཆོད་འབུལ་བཞུགས་སོ། །བླ་མ་ཡི་དམ་མཁའ་འགྲོའི་ཚོགས་ལ་འདུད། །མཁའ་འགྲོའི་མཆོད་འབུམ་ཐུགས་དམ་བསྐང་བྱེད་ནི། །སྦྱོར་བ་དངོས་གཞི་རྗེས་གསུམ་བསྟན་པར་བྱ། །སྦྱོར་བ་སྔོན་དུ་འགྲོ་བའི་ཆོས་གསུམ་ནི། །སྐྱབས་འགྲོ་སེམས་བསྐྱེད་བསྲུང་འཁོར་བསྒོམ་པའོ། །སྐྱོབས་འགྲོ་དཀོན་གསུམ་མདུན་དུ་བསམ་བྱས་ལ། །སྒོ་གསུམ་བག་ལྡན་གུས་གདུང་དད་པ་ཡིས། །སྐུ་གསུམ་མངོན་གྱུར་ཕྱོགས་བཅུ་དུས་གསུམ་གྱིས། །སངས་རྒྱས་རྣམས་ལ་ཕྱག་འཚལ་སྐྱབས་སུ་མཆི། །ཞི་བ་འདོད་ཆགས་ཀུན་དང་བྲལ་བ་ཡིས། །དམ་ཆོས་རྣམས་ལ་ཕྱག་འཚལ་སྐྱབས་སུ་མཆི། །མ་ནོར་ལམ་མཆོག་ཕྱིར་མི་ལྡོག་པ་ཡིས། །དགེ་འདུན་རྣམས་ལ་ཕྱག་འཚལ་སྐྱབས་སུ་མཆི། །སྨིན་ཅིང་གྲོལ་མཛད་རྩ་བ་བརྒྱུད་པ་ཡིས། །བླ་མ་རྣམས་ལ་ཕྱག་འཚལ་སྐྱབས་སུ་མཆི། །མཆོག་ཐུན་དངོས་གྲུབ་མ་ལུས་སྟེར་མཛད་པའི། །ཡི་དམ་རྣམས་ལ་ཕྱག་འཚལ་སྐྱབས་སུ་མཆི། །ལེགས་པར་བྱིན་རླབས་ཕྱི་ནང་བར་ཆད་སེལ། །མཁའ་འགྲོ་རྣམས་ལ་ཕྱག་འཚལ་སྐྱབས་སུ་མཆི། །སངས་རྒྱས་བསྟན་པ་སྲུང་ཞིང་དགྲ་བོ་སྒྲོལ། །ཆོས་སྐྱོང་རྣམས་ལ་ཕྱག་འཚལ་སྐྱབས་སུ་མཆི། །གཉིས་པ་འགྲོ་བའི་དོན་དུ་སེམས་བསྐྱེད་པ་ནི། བླ་མ་ཡི་དམ་མཁའ་འགྲོ་དགོངས་སུ་གསོལ། །བདག་ནི་རྒྱལ་སྲས་རྣམས་ཀྱི་རྗེས་སློབ་ཅིང་། །སེམས་ཅན་ཐམས་ཅད་སངས་རྒྱས་མ་ཐོབ་བར། །མཁའ་མཉམ་འགྲོ་བ་ཀུན་གྱིས་དོན་བྱེད་ཤོག །ཀུན་གྱི་སྐྱབས་མགོན་དཔལ་དུ་བདག་གྱུར་ཅིག །སེམས་ཅན་ཐམས་ཅད་སྡུག་བསྔལ་ཀུན་བསྒྲལ་ཏེ། །བདེ་བ་བླ་མེད་བྱང་ཆུབ་མཆོག་ལ་འགོད། །དེ་དག་ཐམས་ཅད་བྱང་ཆུབ་གྱུར་པ་ལ། །མྱ་ངན་མི་མདའ་ཆོས་འཁོར་བསྐོར་བ་དང་། །དམ་ཆོས་བཟུང་ཞིང་བརྟན་པ་བརྟན་པར་གྱིས། །སངས་རྒྱས་ཀུན་གྱི་ཕྲིན་ལས་བདག་བསྒྲུབ་ཅིང་། །དེ་སྙེད་ཡོན་ཏན་མ་ལུས་རྫོགས་པར་བྱའོ། །ༀ་ཨཱཿཧཱུྃ། གསུམ་པ་བསྲུང་བའི་འཁོར་ལོ་བསྒོམ་པར་བྱ་བ་སྟེ། ཧཱུྃ། ལས་མཁའ་དབྱིངས་དག་པའི་ཀློང་དཀྱིལ་ནས། །རིན་ཆེན་སྣ་ཚོགས་རྡོ་རྗེ་དབུས་མཐིང་ནག །ཤར་དཀར་ལྷོ་སེར་ནུབ་དམར་བྱང་ལྗང་ཁུ། །རྒྱ་གྲམ་མཐའ་ཡས་རྡོ་རྗེའི་ས་གཞིར་གྱུར། །སྣ་ཚོགས་རྡོ་རྗེའི་ལྟེ་བར་པད་ཉིའི་སྟེང་། །ཧཱུྃ། བསམ་འོད་འཕྲོས་རྡོ་རྗེའི་རྭ་བ་དང་། །རི་བོ་ལྟ་བུར་བརྟན་ཅིང་ཡངས་པ་ཡིས། །རྡོ་རྗེ་ཡང་པའི་གུར་ཁང་ཆེན་པོར་གྱུར། །རྃཿ ཞེས་བརྗོད་པས་ཕྱི་རོལ་རྣམས། །འུར་འུར་ཚིག་ཚིག་ཡེ་ཤེས་མེ་ཆེན་འབར། །ཁ་དོག་སྣ་ཚོགས་བདུད་དཔུང་ངེས་པར་བསྲེག །ས་གཞི་མེ་དཔུང་འབར་བའི་གུར་ཁང་གྱུར། །དེ་དབུས་པད་ཉིའི་སྟེང་དུ་ཧཱུྃ་ལས་ནི། །རིན་ཆེན་ས་གཞི་ལས་གྲུབ་སྲ་བརྟན་ཞིང་། །ཡངས་ཞིང་རྒྱ་ཆེ་འཁོར་ལོ་རྩིབ་སྟོང་བར། །དགྲ་བགེགས་ཕྱེ་མར་བརླག་ཞིང་འཁོར་བའི་ཚུལ། །རྩིབ་སྟོང་ནང་དུ་ཧཱུྃ་སྟོང་འཕྲོས་པ་ལས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིས། །མཁའ་འགྲོ་གྱུར་པས་ཕྱོགས་བཅུར་མ་ལུས་ཁྱབ། །འཇིགས་གཟུགས་ཅན་གྱིས་སྐུ་མདོག་སྣ་ཚོགས་པ། །ཞལ་གདངས་མཚེ་གཅིག་སྤྱན་གསུམ་གློག་ལྟར་འཁྱུག །དུར་ཁྲོད་ཆས་བརྒྱད་སྐུ་ལ་མེ་དཔུང་འབར། །ཕྱག་མཚན་སྣ་ཚོགས་རབ་ཏུ་གདེང་པ་ཡིས། །དགྲ་བགེགས་འབྱུང་པོ་གནོད་བྱེད་མ་ལུས་པ། །རྒྱལ་འབོག་སྔང་ཞིང་རབ་ཏུ་ཞི་བར་བྱེད། ༀ་བཛྲ་རཀྵ་རཀྵ་ཧཱུྃ་ཧཱུྃ་སྭཱ་ཧཱ། དངོས་གཞི་རྒྱལ་བ་མཉེས་བྱེད་ཡན་ལག་བདུན། །དམ་ཚིག་བསྐྱེད་དང་ཡེ་ཤེས་སྤྱན་དྲངས་བཞུགས། །ཕྱི་ནང་གསང་མཆོད་བསྟོད་པ་བྱ་བ་དང་། ཚོགས་གཏོར་འབུལ་དང་བསྐྱེད་རྫོགས་ངང་ལ་གནས། དང་པོ་སེམས་བསྐྱེད་རྒྱལ་བ་མཉེས་བྱེད་ནི། ཕྱི་སྣོད་འཇིག་རྟེན་ཁམས་ནི་གཞལ་ཡས་ཁང་། །ནང་བཅུད་སེམས་ཅན་ལྷ་དང་ལྷ་མོར་གསལ། །རང་ལུས་ལྷ་བསྐྱེད་རྒྱལ་བའི་ད་ལ་རུ། །ཡེ་ནས་ལྷུན་གྲུབ་གཞལ་ཡང་ཁང་གི་དབུས། །དབུས་དང་ཕྱོགས་བཞིར་ཟླ་པད་རོའི་སྟེང་། །ངོ་བོ་བླ་མ་མ་ཅིག་ལབ་སྒྲོན་ནི། །རྣམ་པ་རྡོ་རྗེ་ཕག་མོ་སྐུ་མདོག་མཐིང་། །ཞལ་ཅིག་ཞི་ཁྲོ་སྤྱན་གསུམ་དབུ་སྐྲ་གྲོལ། །ཕྱག་གཡས་ཅང་ཏེའུ་གཡོན་པས་ཐོད་ཁྲག་བསྣམས། །ཁ་ཊྭཱྃ་རྩེ་གསུམ་མཆན་ཁུང་གཡོན་ན་འགྱིང་། །རིན་ཆེན་རུས་པ་དུར་ཁྲོད་ཆས་ཀྱི་བརྒྱན། །གར་དགུའི་ཉམས་ལྡན་ཞབས་གཉིས་བརྐྱང་བསྐུམ་བཞུགས། །ཤར་དུ་རྡོ་རྗེ་མཁའ་འགྲོ་སྐུ་མདོག་དཀར། །ཕྱག་གཡས་རྡོ་རྗེ་གཡོན་པས་ཐོད་ཁྲག་བསྣམས། །ཞལ་གཅིག་ཞི་ཁྲོ་སྤྱན་གསུམ་དབུ་སྐྲ་གྲོལ། །ཁ་ཊྭཱྃ་རྩེ་གསུམ་མཆན་ཁུང་གཡོན་ན་འགྱིང་། །རིན་ཆེན་རུས་པ་དུར་ཁྲོད་ཆས་ཀྱི་བརྒྱན། །གར་དགུའི་ཉམས་ལྡན་ཞབས་གཉིས་བརྐྱང་བསྐུམ་བཞུགས། །ལྷོ་རུ་རིན་ཆེན་མཁའ་འགྲོ་སྐུ་མདོག་སེར། །ཕྱག་གཡས་རིན་ཆེན་གཡོན་པ་ཐོད་ཁྲག་བསྣམས། །ཞལ་གཅིག་ཞི་ཁྲོ་སྤྱན་གསུམ་དབུ་སྐྲ་གྲོལ། །ཁ་ཊྭཱྃ་རྩེ་གསུམ་མཆན་ཁུང་གཡོན་ན་འགྱིང་། །རིན་ཆེན་རུས་པ་དུར་ཁྲོད་ཆས་ཀྱིས་བརྒྱན། །གར་དགུའི་ཉམས་ལྡན་ཞབས་གཉིས་བརྐྱང་བརྐུམ་བཞུགས། །ནུབ་ཏུ་པདྨ་མཁའ་འགྲོ་སྐུ་མདོག་དམར། །ཕྱག་གཡས་པདྨ་གཡོན་པས་ཐོད་ཁྲག་བསྣམས། །ཞལ་གཅིག་ཞི་ཁྲོ་སྤྱན་གསུམ་དབུ་སྐྲ་གྲོལ། །ཁ་ཊྭཱྃ་རྩེ་གསུམ་མཆན་ཁུང་གཡོན་ན་འགྱིང་། །རིན་ཆེན་རུས་པ་དུར་ཁྲོད་ཆས་ཀྱིས་བརྒྱན། །གར་དགུའི་ཉམས་ལྡན་ཞབས་གཉིས་བརྐྱང་བསྐུམ་བཞུགས། །བྱང་དུ་ལས་ཀྱི་མཁའ་འགྲོ་སྐུ་མདོག་ལྗང་། །ཕྱག་གཉིས་རལ་གྲི་གཡོན་པས་ཐོད་ཁྲག་བསྣམས། །ཞལ་གཅིག་ཞི་ཁྲོ་སྤྱན་གསུམ་དབུ་སྐྲ་གྲོལ། །ཁ་ཊྭཱྃ་རྩེ་གསུམ་མཆན་ཁུང་གཡོན་ན་འགྱིང་། །རིན་ཆེན་རུས་པ་དུར་ཁྲོད་ཆས་ཀྱིས་བརྒྱན། །གར་དགུའི་ཉམས་ལྡན་ཞབས་གཉིས་བརྐྱང་བསྐུམ་བཞུགས། །རང་རང་འཁོར་གྱིས་ས་གཞི་གང་བར་བསམ། །ༀ་ཨཱཿཧཱུྃ། གཉིས་པ་སྤྱན་འདྲེན་རྒྱལ་མཉེས་བྱེད་ནི། ཆོས་དབྱིངས་རྣམ་དག་ཕོ་བྲང་ནས། །བླ་མ་ཡི་དམ་མཁའ་འགྲོ་ཐམས་ཅད་ཀྱིས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །བདག་ཉིད་ཆེན་མོ་མ་ཅིག་ལབ་སྒྲོན་ནི། །ཕག་མོར་སྐུ་བཞེངས་རིགས་བཞིར་མཁའ་འགྲོས་བསྐོར། །དཔའ་བོས་བྲོ་བརྡུང་ཕཊ་སྐད་སངས་སེ་སང་། །དཔའ་མོས་གར་བྱེད་ཧཱུྃ་གླུ་ཀྱུ་རུ་རུ། །རིན་ཆེན་རུས་བརྒྱན་སྒྲ་སྙན་ཁྲོ་ལོ་ལོ། །གནས་མཆོག་འདི་རུས་སྤྱན་འདྲེན་གཤེགས་སུ་གསོལ། །བསྒྲུབ་མཆོག་བདག་ལ་དབང་བསྐུར་བྱིན་གྱིས་རློབས། །མི་མཐུན་རྐྱེན་དང་བར་ཆད་བཟློག་ཏུ་གསོལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མེ་ལོང་ཡེ་ཤེས་དག་པའི་ད་ལ་ནས། །ཞི་བའི་ལས་མཛད་རྡོ་རྗེ་མཁའ་འགྲོ་ནི། །རྡོ་རྗེ་རིགས་ཀྱི་མཁའ་འགྲོ་ཡོངས་ཀྱིས་བསྐོར། །དཔའ་བོས་བྲོོ་བརྡུང་ཕཊ་སྐད་སངས་སེ་སང་། །དཔའ་མོས་གར་བྱེད་ཧཱུྃ་གླུ་ཀྱུ་རུ་རུ། །རིན་ཆེན་བརྒྱན་ཆ་སྒྲ་སྐད་ཁྲོ་ལོ་ལོ། །གནས་མཆོག་འདི་རུ་སྤྱན་འདྲེན་གཤེགས་སུ་གསོལ། །བསྒྲུབ་མཆོག་བདག་ལ་དབང་བསྐུར་བྱིན་གྱིས་རློབས། །མི་མཐུན་རྐྱེན་དང་བར་ཆད་བཟློག་ཏུ་གསོལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མཉམ་ཉིད་ཡེ་ཤེས་དག་པའི་ད་ལ་ནས། །རྒྱས་པའི་ལས་མཛད་རིན་ཆེན་མཁའ་འགྲོ་ནི། །རིན་ཆེན་རིགས་ཀྱི་ལྷ་ཚོགས་ཡོངས་ཀྱི་བསྐོར། །དཔའ་བོས་བྲོ་བརྡུང་ཕཊ་སྐད་སངས་སེ་སང་། །དཔའ་མོས་གར་བྱེད་ཧཱུྃ་གླུ་ཀྱུ་རུ་རུ། །རིན་ཆེན་རུས་རྒྱན་སྒྲ་སྙན་ཁྲོ་ལོ་ལོ། །གནས་མཆོག་འདི་རུ་སྤྱན་འདྲེན༴ བསྒྲུབ་མཆོག་བདག་ལ༴ མི་མཐུན་རྐྱེན་དང་བར་ཆད༴ མཆོག་དང་ཐུན་མོང་༴ སོར་རྟོག་ཡེ་ཤེས་དག་པའི་ད་ལ་རུ། །དབང་གི་ལས་མཛད་པདྨ་མཁའ་འགྲོ་ནི། །པདྨ་རིགས་ཀྱི་ལྷ་ཚོགས༴ དཔའ་བོའི་བྲོ་བརྡུང་ཕཊ་སྐད༴ དཔའ་མོས་གར་བྱེད་ཧཱུྃ༴ རིན་ཆེན་རུས་བརྒྱན་སྒྲ༴ གནས་མཆོག་འདི༴ བསྒྲུབ་མཆོག་བདག༴ མི་མཐུན་རྐྱེན་དང་བར་ཆད༴ མཆོག་དང་ཐུན་མོང་༴ བྱ་གྲུབ་ཡེ་ཤེས་དག་པའི་ད་ལ་ནས། །དྲག་པོའི་ལས་མཛད༴ ལས་ཀྱི་རིགས་ཀྱི་ལྷ་ཚོགས་ཡོངས༴ དཔའ་བོ་བྲོ་བརྡུང་ཕཊ་སྐད༴ དཔའ་མོའི་གར་བྱེད་ཧཱུྃ༴ རིན་ཆེན་རུས་བརྒྱན་སྒྲ༴ གནས་མཆོག་འདི་རུ༴ བསྒྲུབ་མཆོག་བདག་ལ༴ མི་མཐུན་རྐྱེན་དང་བར་ཆ ད་སོལ། །མཆོག་དང་ཐུན་མོང་དངོས་གྲུབ་སྐུལ། །ༀ་བཛྲ་ས་མ་ཡ་ཛ་ཛཿ གསུམ་པ་བཞུགས་གསོལ་རྒྱལ་བ་མཉེས་བྱེད་ནི། གཟུགས་ཚོར་ལ་སོགས་ཕུང་པོ་རྣམ་ལྔ་ནི། །ཡེ་ནས་ལྷུན་གྲུབ་རྒྱལ་བའི་ད་ལ་རུ། །ཉོན་མོངས་སྐྱོན་བྲལ་ཉི་ཟླའི་ད་རོའི་སྟེང་། །སྐུ་ལྔ་རབ་རྫོགས་བླ་མ་ལབ་སྒྲོན་བཞུགས། །ཡེ་ཤེས་ལྔ་ལྡན་ཡི་དམ་ལབ་སྒྲོན་བཞུགས། །ཕྲིན་ལས་བཞི་མཛད་མཁའ་འགྲོ་ལབ་སྒྲོན་བཞུགས། །རང་བྱུང་སྤྲུལ་སྐུ་གར་དགུའི་ཉམས་དང་ལྡན། །བདག་སོགས་ལུས་ངག་ཡིད་གསུམ་བྱིན་རློབས་ཅིང་། །འགྲོ་བའི་དོན་དུ་གཉིས་མེད་བརྟན་པར་བཞུགས། །ཕྲིན་ལས་རྣམ་བཞི་མྱུར་དུ་འགྲུབ་པར་མཛོད། །རྣམ་ཤེས་ཕུང་པོ་དག་པའི་ད་ལ་རུ། །ཉོན་མོངས་སྐྱོན་བྲལ་ཉི་ཟླ་པད་རོའི་སྟེང་། །གར་དགུའི་ཉམས་ལྡན་མེ་ལོང་ཡེ་ཤེས་ཅན། །རྡོ་རྗེ་མཁའ་འགྲོ་འཁོར་བཅས་མ་ལུས་པ། །འགྲོ་བའི་དོན་ཕྱིར་གཉིས་མེད་བརྟན་པར་བཞུགས། །མི་མཐུན་གནོད་པའི་རྐྱེན་རྣམས་ཞི་བར་མཛོད། །ཚོར་བའི་ཕུང་པོ་དག་པའི་ད་ལ་རུ། །ཉོན་མོངས་སྐྱོན་བྲལ་ཉི་ཟླ་པད་རོའི་སྟེང་། །གར་དགུའི་ཉམས་ལྡན་མཉམ་ཉིད་ཡེ་ཤེས་ཅན། །རིན་ཆེན་མཁའ་འགྲོ་འཁོར་བཅས་མ་ལུས་པ། །འགྲོ་བའི་དོན་དུ་གཉིས་མེད་བརྟན་པར་བཞུགས། །ཤེས་རབ་ཚེ་དབང་ལོངས་སྤྱོད་རྒྱས་པར་མཛོད། །འདུ་ཤེས་ཕུང་པོ་དག་པའི་ད་ལ་རུ། །ཉོན་མོངས་སྐྱོན་བྲལ་ཉི་ཟླ་པད་རོའི་སྟེང་། །གར་དགུའི་ཉམས་ལྡན་སོར་རྟོག་ཡེ་ཤེས་ཅན། །པདྨ་མཁའ་འགྲོ་འཁོར་བཅས་མ་ལུས་པ། །འགྲོ་བའི་དོན་ཕྱིར་གཉིས་མེད་བརྟན་པར་བཞུགས། །ཁམས་གསུམ་མ་ལུས་བདག་གི་དབང་དུ་བསྡུད། །འདུ་བྱེད་ཕུང་པོ་དག་པའི་ད་ལ་རུ། །ཉོན་མོངས་སྐྱོན་བྲལ་ཉི་ཟླ་པད་རོའི་སྟེང་། །གར་དགུའི་ཉམས་ལྡན་བྱ་གྲུབ་ཡེ་ཤེས་ཅན། །ཀརྨ་མཁའ་འགྲོ་བཅས་མ་ལུས་པ། །འགྲོ་བའི་དོན་ཕྱིར་གཉིས་མེད་བརྟན་པར་བཞུགས། །དྲག་པོའི་ལས་རྣམས་མྱུར་དུ་འགྲུབ་པར་མཛོད། །ༀ་ཨཱཿཧཱུྃ་ཏིཥྛ་བཛྲ་ལྷན། བཞི་པ་མཆོད་པ་རྒྱལ་བ་མཉེས་བྱེད་ནི། །མཆོད་པའི་བྱེ་བྲག་ཇི་སྙེད་མ་ལུས་པ། ༀ་ཨཱཿཧཱུྃ་ཞེས་བརྗོད་བྱིན་བརླབ་པས། ཀུན་བཟང་བླ་མེད་མཆོད་སྤྲིན་ཆེན་པོར་བསམ། རབ་འབྱམས་འཇིག་རྟེན་ཁམས་འདི་དཔག་མེད་ན། །མེ་ཏོག་བདུག་སྤོས་མར་མེ་དྲི་ཆབ་དང་། །ཞལ་ཟས་རོལ་མོ་སྒྲ་སྙན་མཆོད་སྤྲིན་རྣམས། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །ཐུགས་རྗེ་འགྲོ་བའི་དོན་དུ་བཞེས་སུ་གསོལ། །བདག་སོགས་འགྲོ་བ་སེམས་ཅན་ཐམས་ཅད་ཀྱིས། །ཚོགས་གཉིས་རྫོགས་ནས་སྐུ་གཉིས་མྱུར་ཐོབ་ཤོག །རབ་འབྱམས་འཇིག་རྟེན་ཁམས་འདི༴ འཁོར་ལོ་ནོར་བུ་བཙུན་མོ་བློན་པོ་དང་། །གླང་པོ་རྟ་མཆོག་དམག་དཔོན་རིན་ཆེན་རྣམས། །བླ་མ་ཡི་དམ་མཁའ་འགྲོའི༴ ཐུགས་རྗེས་འགྲོ་བའི་དོན་དུ༴ བདག་སོགས་འགྲོ་བ་སེམས་ཅན༴ ཚོགས་གཉིས་རྫོགས་ནས༴ རབ་འབྱམས་འཇིག་རྟེན༴ སྒེག་མོ་འཕྲེང་བ་གླུ་མ་གར་མ་དང་། །མེ་ཏོག་བདུག་སྤོས་མར་མེ་དྲིའི་ལྷ། །བླ་མ་ཡི་དམ་མཁའ་འགྲོའི་ཚོགས་ལ༴ ཐུགས་རྗེ་འགྲོ་བའི༴ བདག་སོགས་འགྲོ་བ༴ ཚོགས་གཉིས་རྫོགས༴ རབ་འབྱམས་འཇིག་རྟེན༴ གཏེར་ཆེན་བུམ་པ་ཉི་ཟླ་རྒྱ་ཆེན་གདུག །རི་རབ་རི་བདུན་གླིང་བཞི་གླིང་ཕྲན་རྣམས། །བླ་མ་ཡི་དམ་མཁའ་འགྲོའི༴ ཐུགས་རྗེ་འགྲོ་བའི་དོན་དུ༴ བདག་སོགས་འགྲོ་བ༴ ཚོགས་གཉིས་རྫོགས་ནས༴ རབ་འབྱམས་འཇིག་རྟེན༴ གཟུགས་སྒྲ་དྲི་རོ་རེག་བྱ་ཆོས་ལ་སོགས། །ཤ་ལྔ་བདུད་རྩི་ལྔ་དང་སྨན་རཀ་སོགས། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །ཐུགས་རྗེ་འགྲོ་བའི་དོན༴ བདག་སོགས་འགྲོ་བ༴ ཚོགས་གཉིས་རྫོགས༴ རབ་འབྱམས་འཇིག་རྟེན་ཁམས་འདི་དཔག་མེད་ན། །བདེ་བ་ཆེན་པོ་ཡང་དག་མཉམ་སྦྱོར་བཞིས། །གཉིས་མེད་ཆུ་བོའི་ཐིག་ལེ་ཆེན་པོ་འདི། །བླ་མ་ཡི་དམ་མཁའ་འགྲོའི་ཚོགས་ལ༴ ཐུགས་རྗེ་འགྲོ་བའི་དོན་ལ༴ བདག་སོགས་འགྲོ་བ༴ ཚོགས་གཉིས༴ རབ་འབྱམས་འཇིག་རྟེན༴ ཕྱི་ནང་གསང་བའི་མཆོད་རྫས་ཇི་སྙེད་རྣམས། །བླ་མ་ཡི་དམ་མཁའ་འགྲོ་རྒྱ་མཚོའི་དྲུང་། །ཀུན་བཟང་མཆོད་སྤྲིན་རྒྱུན་མི་ཆད་གྱུར་ཅིག །ༀ་ཨཱཿཧཱུྃ་པཱུ་ཙ་ཧོཿ ལྔ་པ་བསྟོད་པ་རྒྱལ་བ་མཉེས་བྱེད་ནི། ཡོན་ཏན་མི་ཟད་རྒྱ་མཚོའི་དབྱངས་ཀྱི་བསྟོད། སྐྱེ་མེད་ཆོས་ཀྱི་དབྱིངས་ལས་མ་གཡོས་ཀྱང་། །འགགས་མེད་ལོངས་སྐུ་མཚན་དཔེ་རབ་ཏུ་བརྒྱན། །གཉིས་མེད་སྤྲུལ་སྐུ་འགྲོ་བ་འདུལ་བ་ཡིས། །སྐུ་གསུམ་ལྷུན་གྲུབ་མ་ཅིག་ལབ་སྒྲོན་ནི། །བདུད་བཞི་འཇོམ་མཛད་ཞལ་གདང་མཆེ་བ་གཙིག །དུས་གསུམ་གཟིགས་ཕྱིར་སྤྱན་གསུམ་ཕྱོགས་བཅུར་གཟིགས། །གཟུགས་མཛེས་གཟི་བརྗིད་དབུ་སྐྲ་ལྕང་ལོ་ཁྲོལ། །ཁམས་གསུམ་དབང་སྡུད་སྤྱི་གཙུག་ཕག་ཞལ་ངུར། །ཆོས་ཀྱི་སྒྲ་སྒྲོག་གཡས་པ་ཅང་ཏིའུ་འཁྲོལ། །དངོས་གྲུབ་སྟེར་ཕྱིར་ཕྱག་གཡོན་ཐོད་ཁྲག་བསྣམས། །ཐབས་ཤེས་ཟུང་འཇུག་ཁ་ཊྭཱྃ་མཆན་ཁུང་གཡོན། །རྟག་ཆད་མཐའ་འདས་ཞབས་གཉིས་བརྐྱང་བསྐུམ་བཞུགས། །ཕ་རོལ་ཕྱིན་རྫོགས་རིན་ཆེན་རུས་པས་བརྒྱན། །ཡོན་ཏན་རབ་རྫོགས་གར་དགུའི་ཉམས་དང་ལྡན། །རྡོ་རྗེ་ཕག་མོའི་སྐུ་དང་གཉིས་སུ་མེད། །མ་ཅིག་ལབ་སྒྲོན་སྐུ་ལ་ཕྱག་འཚལ་བསྟོད། །ཁམས་གསུམ་ཟིལ་གནོན་ཉི་ཟླ་པད་རོའི་སྟེང་། །ཞེ་སྡང་དག་པ་མེ་ལོང་ཡེ་ཤེས་ཅན། །རྣམ་ཤེས་གནས་དག་རྡོ་རྗེ་མཁའ་འགྲོ་ནི། །ཞི་བའི་ལས་མཛད་སྐུ་མདོག་དཀར་མོར་སྤྲུལ། །བདུད་བཞི་འཇོམ་མཛད་ཞལ་གདངས་མཆེ་བ་གཙིག །དུས་གསུམ་གཟིགས་ཕྱིར་སྤྱན་གསུམ་ཕྱོགས་བཅུར་གཟིགས། །གཟུགས་མཛེས་གཟི་བརྗིད་དབུ་སྐྲ་ལྕང་ལོ་ཁྲོལ། །སྟོང་ཉིད་མཚོན་ཕྱིར་ཕྱག་གཡས་རྡོ་རྗེ་བསྣམས། །དངོས་གྲུབ་སྟེར་ཕྱིར་ཕྱག་གཡོན་ཐོད་ཁྲག་བསྣམས། །ཐབས་ཤེས་ཟུང་འཇུག་ཁ་ཊྭཱྃ་མཆན་ཁུང་གཡོན། །རྟག་ཆད་མཐའ་སྤོང་ཞབས་གཉིས་བརྐྱང་བསྐུམ་བཞུགས། །ཕ་རོལ་ཕྱིན་རྫོགས་རིན་ཆེན་རུས་པས་བརྒྱན། །ཡོན་ཏན་རབ་རྫོགས་གར་དགུའི་ཉམས་དང་ལྡན། །རྡོ་རྗེ་མཁའ་འགྲོའི་སྐུ་ལ་ཕྱག་འཚལ་བསྟོད། །ཁམས་གསུམ་ཟིལ་གནོན་ཉི་ཟླ་པད་རོའི་སྟེང་། །ང་རྒྱལ་དག་པ་མཉམ་ཉིད་ཡེ་ཤེས་ཅན། །ཚོར་བའི་གནས་དག་རིན་ཆེན་མཁའ་འགྲོ་ནི། །རྒྱས་པའི་ལས་མཛད་སྐུ་མདོག་སེར་མོར་བཞུགས། །བདུད་བཞི་འཇོམས་མཛད་ཞལ་གདངས་མཆེ་བ་གཙིག །དུས་གསུམ་གཟིགས་ཕྱིར་སྤྱན་གསུམ་ཕྱོགས་བཅུར་གཟིགས། །གཟུགས་མཛེས་གཟི་བརྗིད་དབུ་སྐྲ་ལྕང་ལོ་ཁྲོལ། །ཡོན་ཏན་རྒྱས་ཕྱིར་ཕྱག་གཡས་ནོར་བུ་བསྣམས། །དངོས་གྲུབ་སྟེར་ཕྱིར་ཕྱག་གཡོན་ཐོད་ཁྲག་བསྣམས། །ཐབས་ཤེས་ཟུང་འཇུག་ཁ་ཊྭཱྃ་མཆན་ཁུང་གཡོན། །རྟག་ཆད་མཐའ་སྤོང་ཞབས་གཉིས་བརྐྱང་བསྐུམ་བཞུགས། །ཕ་རོལ་ཕྱིན་རྫོགས་རིན་ཆེན་རུས་པས་བརྒྱན། །ཡོན་ཏན་རབ་རྫོགས་གར་དགུའི་ཉམས་དང་ལྡན། །རིན་ཆེན་མཁའ་འགྲོའི་སྐུ་ལ་ཕྱག་འཚལ་བསྟོད། །ཁམས་གསུམ་ཟིལ་གནོན་ཉི་ཟླ་པད་རོའི་སྟེང་། །འདོད་ཆགས་དག་པ་ཀུན་རྟོགས་ཡེ་ཤེས་ཅན། །འདུ་ཤེས་གནས་དག་པདྨ་མཁའ་འགྲོ་ནི། །དབང་གི་ལས་མཛད་སྐུ་མདོག་དམར་མོར་བཞུགས། །བདུད་བཞི་འཇོམས་མཛད་ཞལ་གདངས་མཆེ་བ་གཙིག །དུས་གསུམ་གཟིགས་ཕྱིར་སྤྱན་གསུམ་ཕྱོགས་བཅུར་གཟིགས། །གཟུགས་མཛེས་གཟི་བརྗིད་དབུ་སྐྲ་ལྕང་ལོ་ཁྲོལ། །འཁོར་བར་མ་གོས་ཕྱག་གཡས་པདྨ་བསྣམས། །དངོས་གྲུབ་སྟེར་ཕྱིར་ཕྱག་གཡོན་ཐོད་ཁྲག་བསྣམས། །ཐབས་ཤེས་ཟུང་འཇུག་ཁ་ཊྭཱྃ་མཆན་ཁུང་གཡོན། །རྟག་ཆད་མཐའ་སྤོང་ཞབས་གཉིས་བརྐྱང་བསྐུམ་བཞུགས། །ཕ་རོལ་ཕྱིན་བཅུས་རིན་ཆེན་རུས་བརྒྱན་སྤྲས། །ཡོན་ཏན་རབ་རྫོགས་གར་དགུའི་ཉམས་དང་ལྡན། །པདྨ་མཁའ་འགྲོའི་སྐུ་ལ་ཕྱག་འཚལ་བསྟོད། །ཁམས་གསུམ་ཟིལ་གནོན་ཉི་ཟླ་པད་རོའི་སྟེང་། །ཕྲག་དོག་དག་པ་བྱ་གྲུབ་ཡེ་ཤེས་ཅན། །འདུ་བྱེད་གནས་དག་ཀརྨ་མཁའ་འགྲོ་ནི། །དྲག་པོའི་ལས་མཛད་སྐུ་མདོག་ལྗང་གུར་སྤྲུལ། །བདུད་བཞིར་འཇོམས་མཛད་ཞལ་གདངས་མཆེ་བ་གཙིག །དུས་གསུམ་གཟིགས་ཕྱིར་སྤྱན་གསུམ་ཕྱོགས་བཅུར་གཟིགས། །གཟུགས་མཛེས་གཟི་བརྗིད་དབུ་སྐྲ་ལྕང་ལོ་ཁྲོལ། །ཉོན་མོངས་གཅོད་མཛད་ཕྱག་གཡས་རལ་གྲི་བསྣམས། །དངོས་གྲུབ་སྟེར་ཕྱིར་ཕྱག་གཡོན་ཐོད་ཁྲག་བསྣམས། །ཐབས་ཤེས་ཟུང་འཇུག་ཁ་ཊྭཱྃ་མཆན་ཁུང་གཡོན། །རྟགས་ཆད་མཐའ་སྤོང་ཞབས་གཉིས་བརྐྱང་བསྐུམ་བཞུགས། །ཕ་རོལ་ཕྱིན་རྫོགས་རིན་ཆེན་རུས་པས་བརྒྱན། །ཡོན་ཏན་རབ་རྫོགས་གར་དགུའི་ཉམས་དང་ལྡན། །ཀརྨ་མཁའ་འགྲོའི་སྐུ་ལ་ཕྱག་འཚལ་བསྟོད། །རིགས་བཞིའི་འཁོར་ནི་ཕྲིན་ལས་བཞི་བསྒྲུབ་པའི། །མ་མོ་མཁའ་འགྲོ་བྱེ་བའི་ཚོགས་ཀྱིས་བསྐོར། །རང་རང་སྐུ་མདོག་ཕྱག་མཚན་སྣ་ཚོགས་པ། །མཐུ་དང་རྫུ་འཕྲུལ་དཔག་མེད་ལྡན་པ་ཡི། །རྣལ་འབྱོར་ཕྲིན་ལས་རྣམ་བཞི་མྱུར་བསྒྲུབ་པའི། །མ་མོ་མཁའ་འགྲོ་རྣམས་ལ་ཕྱག་འཚལ་བསྟོད། །ༀ་ཨཱཿཧཱུྃ། དྲུག་པ་ཚོགས་གཏོར་རྒྱལ་བ་མཉེས་བྱེད་ནི། །བདུད་རྩི་ཚོགས་གཏོར་བྱིན་བརླབ་སྟེ། །ཤ་ཟན་ཆང་སོགས་གཏོར་མ་མདུན་དུ་བཤམ། །རང་ཉིད་ཡི་དམ་ལྷར་གསལ་ཐུགས་ཀ་ནས། །ཡྃ་འཕྲོས་ཡཾ་ལས་རླུང་བྱུང་བག་ཆགས་གཏོར། །རྃ་འཕྲོས་རྃ་ལས་མེ་བྱུང་བག་ཆགས་སྲེག །ཁཾ་འཕྲོས་ཁཾ་ལས་ཆུ་བྱུང་གཉིས་འཛིན་བཀྲུས། །རཾ་ཡཾ་ཁཾ། ༀ་ལས་འོད་འཕྲོས་ཡངས་ཆེན་སྣོད་དུ་གྱུར། །ཨཱཿལས་འོད་འཕྲོས་འདོད་ཡོན་རྣམ་ལྔ་གང་། །ཧཱུྃ་ལས་འོད་འཕྲོས་ཡེ་ཤེས་བདུད་རྩིར་གྱུར། །ༀ་ཨཱཿཧཱུྃ། ཐེབ་སྲིན་དཀོན་མཆོག་རྩ་བ་གསུམ་སོགས་མཆོད། །ཚོགས་ཕུད་གཏོར་མར་བྲན་ལ་ཕུལ་བ་ནི། །རི་རབ་གླིང་བཞི་གླིང་ཕྲན་ལྟར། །རྒྱ་ཆེན་བཀོད་ལེགས་བརྗིད་པའི་ཚོགས་གཏོར་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །རྩ་བ་གསུམ་གྱིས་ཐུགས་དམ་བསྐང་གྱུར་ཅིག །རྣལ་འབྱོར་ཉེས་ལྟུང་སྒྲིབ་གཉིས་མཐོལ་ལོ་བཤགས། །མཆོག་དང་ཐུན་མོངས་དངོས་གྲུབ་སྩལ་དུ་གསོལ། །སངས་རྒྱས་བསྟན་པ་བཤིག་པ་དང་། །རྣལ་འབྱོར་བདག་ལ་སྡང་བ་ཡིས། །དགྲ་བོའི་ཤ་ཁྲག་ལ་ཁ་རཾ་ཁ་ཧི། །རྒྱ་མཚོར་ནོར་བུ་ཉི་ཟླ་གཟའ་སྐར་ལྟར། །ཟག་མེད་གསལ་མདངས་རྒྱས་པའི་གཏོར་མ་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །རྩ་བ་གསུམ་གྱི་ཐུགས་དམ་བསྐང་༴ རྣལ་འབྱོར་ཉེས་ལྟུང་སྒྲིབ་གཉིས་མཐོལ་ལོ་བཤགས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །སངས་རྒྱས་བསྟན་པ་བཤིག་པ་དང་། །རྣལ་འབྱོར་བདག་ལ་སྡང་བ་ཡིས། །དགྲ་བོའི་ཤ་ཁྲག་ཁ་རཾ་ཁ་ཧི། །གཟུགས་སྡུག་སྒྲ་སྙན་དྲི་ཞིམ་རོ་བརྒྱ་ལྡན། །རེག་འཇམ་འདོད་ཡོན་ལྔ་ལྡན་ཚོགས་གཏོར་འདི། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །རྩ་བ་གསུམ་གྱི་ཐུགས་དམ་བསྐང་གྱུར་ཅིག །རྣལ་འབྱོར་ཉེས་ལྟུང་སྒྲིབ་གཉིས་མཐོལ་ལོ་བཤགས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །སངས་རྒྱས་བསྟན་པ་བཤིག་པ་དང་། །རྣལ་འབྱོར་བདག་ལ་སྡང་བ་ཡི། །དགྲ་བོའི་ཤ་ཁྲག་ལ་ཁ་རཾ་ཁ་ཧི། །ཤ་ཁྲག་བདུད་རྩི་ལྔ་དང་སྨན་རག་སོགས། །རབ་འབྱམས་འཇིག་རྟེན་ཁམས་ཀྱི་མཆོད་འོས་རྣམས། །བླ་མ་ཡི་དམ་མཁའ་འགྲོའི་ཚོགས་ལ་འབུལ། །རྩ་བ་གསུམ་གྱིས་ཐུགས་དམ་བསྐང་གྱུར་ཅིག །རྣལ་འབྱོར་ཉེས་ལྟུང་སྒྲིབ་གཉིས་མཐོལ་ལོ་བཤགས། །མཆོག་དང་ཐུན་མོང་དངོས་གྲུབ་བརྩལ་དུ་གསོལ། །སངས་རྒྱས་བསྟན་པ་བཤིགས་པ་དང་། །རྣལ་འབྱོར་བདག་ལ་སྡང་བ་ཡིས། །དགྲ་བོའི་ཤ་ཁྲག་ལ་ཁ་རཾ་ཁ་ཧི། །ༀ་ཨཱཿཧཱུྃ་མ་ཧཱ་པུ་ཙ་ཁ་ཧི། དེ་ནས་དམ་ཚིག་དྲངས་ལ་ཚོགས་ལ་རོལ། ལྷག་གཏོར་བཏང་ལ། བདུན་པ་བསྐྱེད་རྫོགས་ཟུང་འཇུག་རྣལ་འབྱོར་ནི། སྣང་སྲིད་འཁོར་འདས་མ་ལུས་རང་གི་སེམས། །སེམས་ཉིད་སྤྲོས་བྲལ་སྐྱེ་མེད་ཆོས་སྐུར་རྫོགས། །སྐྱེ་མེད་འགགས་མེད་གཟུགས་སྐུ་བསྐྱེད་རིམས་སོགས། །བསྐྱེད་དང་རྫོགས་པ་ལྷན་ཅིག་སྐྱེས་པའི་ངང་། །གཉིས་མེད་ངང་ནས་སྤྱོད་ལམ་རྣམ་བཞི་སྐྱོངས། །རྗེས་སུ་བཀྲ་ཤིས་བསྔོ་བ་སྨོན་ལམ་ནི། བཀྲ་ཤིས་ཚོགས་པ་རྣམས་ཀྱི་མཐུན་པ་རུ། །སྤྱི་དང་མཐུན་པའི་བཀྲ་ཤིས་བརྗོད་པར་བྱ། བསྔོ་བ་སྨོན་ལམ་དམིགས་མེད་ངང་ལས་ནི། བླ་མ་ཡི་དམ་མཁའ་འགྲོ་དགོངས་སུ་གསོལ། །བདག་གིས་དུས་གསུམ་བསགས་པའི་དགེ་བ་མ་ལུས་རྣམས། །མཁའ་མཉམ་སེམས་ཅན་དོན་དུ་བྱང་ཆུབ་ཆེན་པོར་བསྔོ། །དགེ་བ་འདི་ཡི་འགྲོ་ཀུན་རྣམ་མཁྱེན་མྱུར་ཐོབ་ཤོག །ཚེ་རབ་ཀུན་ཏུ་དལ་འབྱོར་ལྡན་པ་དང་། །རྒྱལ་སྲས་བླ་མ་ཡི་དམ་མཉེས་བྱེད་ཅིང་། །དེ་དག་རྣམས་ཀྱིས་རྗེས་སུ་སློབ་པ་དང་། །འཕགས་མཆོག་རྣམས་ཀྱི་དགོངས་པ་བླ་མེད་ཡོངས་རྫོགས་ཤོག །མཁའ་འགྲོའི་མཆོད་འབུམ་ཐུགས་དམ་བསྐང་བྱེད་ཞེས་བྱ་བ་རྫོགས་སོ།། །།བྱ་བྲལ་བ་ཀུན་དགའ་འབུམ་གྱིས་བྲིས་པ་རྫོགས་སོ།། །།ཤུ་བྷཾ།

ཀུན་དགའ་འབུམ་པའི་བུམ་སྒྲུབ་གབ་སྤྲད་ཚུལ།

༅། །ཀུན་དགའ་འབུམ་པའི་བུམ་སྒྲུབ་གབ་སྤྲད་ཚུལ་ལོ། །བུམ་བསྐྱེད་ནི། ༀ་སྭ་བྷ་ཝ་སོགས། སྟོང་པ་ངང་ལས་བྷྲཱུྃ་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་བུམཔ་མཚན་ཉིད་དང་ལྡན་པ་ཞབས་ཞུམ་པ། ལྟོ་བ་ལྡིར་བ། མགྲིན་པ་ཕྲ་བ། མཆུ་འཕྱངས་བ། ཁ་གཡེལ་བ། ལྷ་ཡི་གོས་ཀྱི་མགུལ་ཆིངས་དང་། དཔག་བསམ་ཤིང་གིས་ཁ་རྒྱན་པ། བཅུད་སྣ་ཚོགས་པས་བཀང་བ་རྣམ་རྒྱལ་བུམ་པའི་ཆུའི་དབུས་སུ་པདྨ་འདབ་བཞིའི་ལྟེ་བར་ཉི་མ་དང་རོ་ཡི་སྟེང་དུ་ཨཱཿམཐིང་ནག་ཡོངས་གྱུར་པ་ལས། སོགས་ནས། དུང་ཕྱུར་གྱིས་ཚོགས་ཀྱི་བསྐོར་བ། ལས་བུམ་གྱི་ནང་དུ་པདྨ་ཉི་མ་རོའི་སྟེང་དུ་ཧཱུྃ་ལྗང་སྔོན་སོགས། བཞུགས་པ། ལྷ་ཚོགས་དེ་དག་ཐམས་ཅད་ཀྱི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ལས་འོད་ཟེར་དང་བཅས་པའི་རང་བཞིན་གྱི་གནས་ནས་བླ་མ་ཡི་དམ་མཁའ་ལྷ་ཚོགས་ཡེ་ཤེས་མཁའ་འགྲོ་སྤྱན་དྲངས། ཧཱུྃ་ཧྲཱིཿ ཆོས་དབྱིངས་མི་འགྱུར་སོགས། ཛཿཧཱུྃ་བཾ་ཧོཿ མ་ལུས་སེམས་ཅན་སོགས། པདྨ་ཀ་མ་ལ་ཡེ་སྟྭཾ། གྱི་བར་རོ། །སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་དབང་གི་ལྷ་རིགས་སོགས། ཧྲཱིཿཨཿ བདུད་རྩི་འཁྱིལ་པ་ལ་དོན་ཡོད་གྲུབ་པས་དབུ་བརྒྱན། བཞུགས་གསོལ། ཧཱུྃ་ཧྲཱིུཿ བདེ་ཆེན་ལྷུན་གྱིས་གྲུབ་པའི་སོགས་ནས། ཕྱག་འཚལ་ཡན་ལག་དང་། མཆོད་པ་བྱིན་རླབས་གཞུང་ནས། ༀ་བཛྲ་པུཥྤེ༴ སྨན་རཀ་གཏོར་གསུམ་བརླབ། ཧཱུྃ་ཧྲཱིཿ ཡོན་ཆབ་ཁྲུས་ཆབ་སོགས། སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། བར་དང་། བདུད་རྩི་འཁྱིལ་པ་ལ། སྐུ་གསུང་ཐུགས་འཛིན་སོགས། བདུད་རྩི་འཁྱིལ་ལ་ཕྱག་འཚལ་བསྟོད། གཟུང་ཐག་འཛིན་ལ། བདག་གི་ཐུགས་ཀ་ནས་འོད་ཟེར་བཅས་ཏེ་བུམ་ལྷའི་ཐུགས་བརྒྱུད་བསྐུལ་ནས། སྐུ་གསུང་ཐུགས་ལས་བདུད་རྩིའི་རྒྱུན་བྱུང་ནས་བུམ་པ་གང་བར་བསམ་ལ་མཁའ་འགྲོ་སྡེ་ལྔའི་སྔགས་ལ། ཨ་བྷི་ཥིཉྩ་ཧཱུྃ། ལས་བུམ་ལ། ༀ་བཛྲ་ཨ་མྲྀ་ཏ་ཀུནྜ་ལི་ཚིནྡྷ་ཚིནྡྷ་ཧཱུྃ་ཕཊ། བཟླས་མཐར་མཆོད་བསྟོད་བྱ། ལྷ་རྣམས་འོད་དུ་ཞུ་ནས་ཡེ་ཤེས་ཀྱི་བདུད་རྩིར་གྱུར། དེས་བུམ་བཟླས་ཀྱི་རིམ་པ་ཆད་ལྷག་མེད་པར་གྲུབ་སྙམ། མངྒ་ལཾ།། །།ཤུ.བྷཾ།

དབང་བསྐུར་ཆོས་ཀྱི་སྒོ་འབྱེད།

དབང་བསྐུར་ཆོས་ཀྱི་སྒོ་འབྱེད་བཞུགས་སོ། །དབང་བསྐུར་ཆོས་ཀྱི་སྒོ་འབྱེད་པ་ལ་གསུམ་སྟེ། སྦྱོར་བ། དངོས་གཞི། རྗེས་གསུམ་མོ། །དང་པོ་སྦྱོར་བའི་ཆོས་ལ་གཉིས་སྟེ། སྟ་གོན་དང་མཇུག་ཆོག་གཉིས་སོ། །དང་པོ་སྟ་གོན་ལ་ལྔ་སྟེ། དཀྱིལ་འཁོར་སྟ་གོན། མཆོད་པ་སྟ་གོན། ལྷ་སྟ་གོན། བུམ་པ་སྟ་གོན། སློབ་མ་སྟ་གོན་ནོ། །དང་པོ་དཀྱིལ་འཁོར་སྟ་གོན་ནི། མཎྜལ་གྲུ་བཞི་དྲི་བཟང་གིས་བྱུག་ལ། ཆང་དང་བདུད་རྩིའི་ཆག་ཆག་གདབ་ལ། ཆོས་འབྱུང་བསྣོལ་མར་བྲི། དེའི་དབུས་སུ་པདྨ་འདབ་བཞི། ཆོས་འབྱུང་གིས་ཕྱི་རོལ་དུ་མུ་ཁྱུད་གྲུ་ཆད་ལྷ་རྣམ་དང་ལྡན་པ་བྲི། དེ་རྒྱབ་སྒོ་བཞི་སྒོ་རྒྱན་ལྡན་པ་བྲི། དེ་རྒྱབ་རྡོ་རྗེ་རྭ་བ་མེ་རིས་བསྐོར། ཆོས་འབྱུང་གིས་མཚམས་སུ་གཡུ་དྲུང་འཁྱིལ་པ་བྲི། ཚོན་ཁ་དོག་ནི་ཆོས་འབྱུང་དམར་པོ། རེ་ཁ་སྔོན་པོ། པད་འདབ་ཕྱོགས་མཚོན། ལྟེ་བ་སྔོན་པོ། གྲུ་ཆད་ལྗང་ཀུ། ལྷ་རྣམ་དང་སྒོ་བཞི་ཕྱོགས་མཚོན་ནོ། །སྒོ་རྒྱན་ལ་སོགས་སྤྱི་མཐུན་ནོ། །ཡང་ན་དྲ་ཕྱི་ནང་གཙང་མའི་སྟེང་དུ། དྲི་བཟང་གི་ཆུ་གཏོར་ཞིང་། སྭ་བྷ་ཝས་སྟོང་པར་སྦྱངས། དེའི་སྟེང་དུ་ཚོམ་བུ་བཀོད་པ་ནི། ༀ་བཛྲ་ཌཱཀྐི་ནི་ཧཱུྃ་ཕཊ། པཾ་པདྨ་མཎྜལ། ཨ་ཙནྡྲ་མཎྜལ། མ་སུ་རྱ་མཎྜལ། ཀ་ཡ་ཝཀ་ཙིཏྟ། ཏི་ཏ་བཛྲ་ས་མ་ཡ་སྟྭཾ། ཞེས་བརྗོད་པ་དང་སྤྲད་ཅིང་། དབུས་སུ་ཚོམ་བུ་བཀོད་ལ། རྡོ་རྗེ་མཁའ་འགྲོ་མོས། དེ་བཞིན་ཕྱོགས་བཞིར་ཚོམ་བུ་བཞི། སྔགས་དང་བཅས་པ་བཀོད་ལ། མཁའ་འགྲོ་སྡེ་བཞིར་མོས། དེས་དཀྱིལ་འཁོར་སྟ་གོན་སོང་། གཉིས་པ་མཆོད་པ་སྟ་གོན་ནི། རྡུལ་ཚོན་ནམ། ཚོམ་བུའི་ཐ་མར་མཆོད་པ་རྣམས་ལྔ་དཔུང་ཆེ་བ་བསྐོར། དཀྱིལ་འཁོར་ཤར་དུ་ཚངས་ཐིག་གིས་སྟེང་དུ། རྐང་གསུམ་ཁར་བཞག་ལ། རྣམ་རྒྱལ་བུམ་པ་ཁ་རྒྱན་ཚང་བ་བཤམས་ལ། ཀ་པཱ་ལར། སྦྲང་ཆང་ལ་སིནྡྷུ་ར་བདལ། དེའི་ཁར་མེ་ལོང་གིས་སྟེང་དུ་དར་གྱིས་བཀབ་ནས་བུམ་པའི་ཁར་བཤམས། ལས་བུམ་བྱང་ཤར་མཚམས་སུ་བཤམ། དེ་ནས་མ་ཅིག་གིས་གཏོར་མ་ནི། གདན་ཟླ་གམ་གྱི་སྟེང་དུ་གཏོར་མ་ཟླུམ་པོ་ཆེ་བ་གཅིག་ལ། བཤོས་བྲན་ཟླུམ་པོ་བཞི་བསྐོར། ཡང་ན་ཡུམ་ཆེན་གྱི་གཏོར་མ་ནི། གཏོར་མ་ཟླུམ་པོ་ཆེ་བ་གཅིག་ལ། བཤོས་བྲན་བཅུའི་བསྐོར། དེ་དག་ཀྱང་དར་འཕེན་དང་། ཡུམ་ཆེན་ལ་སོགས་གྲུབ་ཐོབ་གཅོད་བརྒྱུད་ཀྱིས་ཙཀ་ལིས་བརྒྱན་ནས་ནུབ་ཏུ་བཤམས། ཤར་དུ་བླ་མའི་གཏོར་མ་བཤམས། ཡང་ན་དབང་གཏོར་དང་གཉིས་ཀ་གཅིག་ལ་བསྡུ་བས་ཆོག་གསུངས། ཟུར་བཞིར་གཏོར་ཆེན་བཞི་གཡོན་བསྐོར་དུ་བཤམས། མགོན་པོ་ཤར། མ་མོ་ལྷོ། རྣམ་སྲས་བྱང་། མགར་གཏོར་ནུབ། ཡང་ན་གྲལ་ཐབས་སུ་བཤམས། སྔོན་འགྲོའི་གཏོར་མ་བཤོས་བུ་སྙིང་འདྲ་བ་ཟུར་ཟླུམ་ཅིག་གང་བདེར་བཤམས། ཡང་ན་བླ་མ་དང་ཞི་བ་དབྱེར་མེད་གཅིག །ཡི་དམ་ཁྲོ་བོ་ལ་གཅིག །ཆོས་སྐྱོང་གཏོར་མ་གཉིས། མཁའ་འགྲོ་སྤྱི་གཏོར་གཅིག་དང་ལྔ། དབང་གཏོར་དང་སྔོན་འགྲོ་གཏོར་མ་གོང་དང་མཐུན། གང་ལྟར་ཡིན་ཀྱང་ཚོགས་གཏོར་རིན་ཆེན་དཔུང་པ་ནི། གདན་ཟླུམ་པོའི་སྟེང་དུ་ནོར་བུ་བཞི་ཚོམ་གཅིག་བཞག །དེ་ལ་རུ་ལུ་མང་པོས་བསྐོར་བ། སྤུང་ཆེ་བ་གཅིག་ལ་ཤ་ཆང་བཟའ་བཅའ་བཅས་ཤར་ལྷོར་བཤམས། ནང་མཆོད་སྨན་ཆང་མདུན་དུ་བཤམ། དེས་མཆོད་པ་སྟ་གོན་སོང་། གཞན་ཡང་གྲིབ་གཏོར་རྫས་བཞི་འཚག་བྱའོ། །གསུམ་པ་ལྷ་སྟ་གོན་ནི། མཁའ་འགྲོ་སྡེ་ལྔའི་མངོན་རྟོགས་ཚོགས་ལས་ཀྱི་ནང་ན་ཡོད་པ་ལྟར་བྱེད་ཅིང་། ཞོར་ལ་བདག་འཇུག་ལེན་པ་ནི། གཞན་ལ་དབང་ཅི་ལྟར་བཀུར་བ་བཞིན་དུ། རང་གི་ཡང་དེ་ལྟར་ལེན་པ་ཡིན་ནོ། །དེའི་ལྷ་སྟ་གོན་སོང་། བཞི་པ་བུམ་པ་སྟ་གོན་ནི། རྣམ་རྒྱལ་དང་ལས་བུམ་གཉིས། མཁའ་འགྲོ་སྡེ་ལྔའི་མངོན་རྟོགས་ཚོགས་ལས་ཀྱི་ནང་ན་ཡོད་པ་ལྟར་བུམ་པ་གཉིས་བསྐྱེད་པར་བྱའོ། །དེས་བུམ་པ་སྟ་གོན་སོང་། ལྔ་པ་སློབ་མ་སྟ་གོན་ལ་དྲུག་སྟེ། དང་པོ་གྲིབ་ཆོག་བྱེད་པ། གཉིས་པ་ལས་རྒྱུ་འབྲས་དང་ལོ་རྒྱུས་བཤད་པ། གསུམ་པ་མཎྜལ་ཕུལ་ཤིང་སྐྱབས་འགྲོ་སེམས་བསྐྱེད་ཀྱི་སྡོམ་པ་འབོག་པ། བཞི་པ་གསོལ་བ་གདབ་ཅིང་ལེན་མོ་བྱིན་པ། ལྔ་པ་རང་གཞུང་གི་སྐྱབས་འགྲོ་དང་སེམས་བསྐྱེད་ཀྱི་སྡོམ་པ་ཞུ་བ་དང་། དྲུག་པ་རྫས་བཞི་གཏད་པའོ། །དང་པོ་གྲིབ་ཆོག་ནི། དབང་བསྐུར་སྤྱི་དང་མཐུན་ནོ། །གཉིས་པ་ལས་རྒྱུ་འབྲས་དང་ལོ་རྒྱུས་རྒྱས་པ་གཞན་དུ་ཤེས་སོ། །འདིར་བསྡུས་པ་ནི། དུས་ད་རེས་ཐུབ་པའི་བསྟན་པ་རིན་པོ་ཆེ་འདི་ལ་རྟེན་མི་ལུས་གཙང་མ་ཐོབ། དབང་པོ་སྒོ་ལྔ་ཚང་། རྒྱུད་ལ་དད་པ་རྟེན་པོ་སྐྱེས། ཡུལ་བླ་མ་མཚན་ལྡན་དང་མཇལ། ཆོས་ཕ་རོལ་ཕྱིན་མ་བདུད་ཀྱི་གཅོད་ཡུལ་འདི་ཉིད་ཉམས་སུ་བླང་རྒྱུ་ཡོད་པ་འདི། འོ་སྐོལ་རྣམས་ཀྱིས་བསོད་ནམས་བསགས་པ་ཡིན། དེ་ལྟ་བུའི་ཆོས་ཉམས་སུ་ལེན་པར་བྱེད་པ་ལ། ཕྱི་ལྟར་ན་ཕ་རོལ་ཏུ་ཕྱིན་པའི་དགོངས་པ་ཡིན། ནང་ལྟར་ན་གསང་སྔགས་ཀྱི་ལྟ་བ་ཡིན། གསང་བ་ལྟར་ན་རྣལ་འབྱོར་བླ་ན་མེད་པའི་རྒྱུད་ཉམས་སུ་ལེན་པ་ནི། འདིར་ངོ་སྤྲོད་འབོག་པའི་སྔོན་དུ་རྒྱུད་སྨིན་པར་བྱེད་པའི་ཐབས་ཟབ་མོ། སྣོད་དུ་རུང་བར་བྱེད་པའི་ཕྱིར། དབང་བསྐུར་དགོས་པས། དབང་ཐོབ་པ་བྱེད་པ་ཡིན། གསུམ་པ་མཎྜལ་འབུལ་ཞིང་ཐུན་མོང་གི་སྐྱབས་འགྲོ་སེམས་བསྐྱེད་ཀྱི་སྡོམ་པ་འབོག་པ་སྤྱི་དང་མཐུན་པ་གཞན་དུ་ཤེས་སོ། །བཞི་པ་གསོལ་བ་གདབ་པ་ཅིང་ལན་མོ་སྦྱིན་པ་ནི། སློབ་མས་མཎྜལ་འབུལ་ཞིང་དེ་ནས་གསོལ་བ་གདབ་པ་ནི། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་སྟེ། །སྐྱབས་གསུམ་དག་ཀྱང་བདག་ལ་རྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོའི་བདག་ཉིད་བཞུགས་སུ་གསོལ། །ཅེས་ལན་གསུམ་གསོལ་བ་གདབ། དེ་ནས་སློབ་དཔོན་གྱིས། བུ་ཁྱོད་སུ་ཡིན་ཅི་ལ་དགའ། སློབ་བུས། སྐལ་བཟང་བདག་ལ་བདེ་ཆེན་འཚལ། སློབ་དཔོན་གྱིས། བུ་ལ་ཅི་ཞིག་བྱ། སློབ་བུས། སངས་རྒྱས་མཆོག་གིས་དམ་ཚིག་གོ། །ཅེས་བརྗོད་དོ། །ལྔ་པ་རང་གཞུང་གི་སྐྱབས་འགྲོ་སེམས་བསྐྱེད་སྡོམ་པ་ཞུ་བ་ལས། དང་པོ་སྐྱབས་སུ་འགྲོ་བ་འདིའི་རྗེས་བཟློས་མཛོད། སངས་རྒྱས་ཆོས་དང་དགེ་འདུན་ཚོགས་བཅས་ལ། །བྱང་ཆུབ་མ་ཐོབ་པར་དུ་བདག་ནི་སྐྱབས་སུ་མཆི། །འཁོར་བའི་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ་བའི་ཕྱིར། །དཀོན་མཆོག་གསུམ་གྱི་རྗེས་སུ་བཟུང་དུ་གསོལ། །ལན་གཉིས་པ་དང་གསུམ་པའི་རྗེས་ཟློས་བརྗོད། དེ་ནས་སེམས་བསྐྱེད་ནི། སློབ་དཔོན་གྱིས། རིགས་ཀྱི་བུ་ཁྱེད་རང་རྣམས་སོ་སོར་ཐར་པའི་རིགས་བདུན་ལས་གང་ཡང་རུང་བའི་སྡོམ་པ་དང་། བྱང་ཆུབ་སེམས་དཔའི་བསླབ་པ་དང་། རིག་པ་སྔགས་ཀྱིས་དམ་ཚིག་ལས། སྔར་བརྟེན་ནམ། ད་བརྟན་ནམ། ད་བཟོད་བརྟན་པ་སྤྲོའམ། བརྗོད། སློབ་བུས་སྤྲོ་ལགས། བརྗོད། སློབ་དཔོན་བདག་ལ་དགོངས་སུ་གསོལ། །འཁོར་བ་སྡུག་བསྔལ་བསྒྲལ་བའི་ཕྱིར། །མི་དགེ་སྤང་བའི་ཚུལ་ཁྲིམས་དང་། །དགེ་བའི་ཆོས་བསྡུད་ཚུལ་ཁྲིམས་དང་། །དགེ་བའི་ཆོས་རྣམས་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱིས། །དེང་ནས་བཟུང་སྟེ་མི་སྤང་བཞིན། །གུས་པའི་ཚུལ་གྱིས་བསླབ་པར་བགྱིའོ། །ལན་གསུམ། ལྔ་པ་རང་གི་སྐྱབས་འགྲོ་སེམས་བསྐྱེད་སོང་ནས། དྲུག་པ་རྫས་བཞི་གཏད་པ་ནི། དེ་ནས་རྫས་བཞིའི་མཎྜལ་ནི། དཀྱིལ་འཁོར་ལྷོ་ཕྱོགས་སུ་ཚོམ་བུ་ལྔ་བཀོད་ལ། དང་པོ་བཟང་ཤིང་འབྲས་བུ་དང་། མེ་ཏོག་བདུད་རྩི་ཅན་སོར་བཅུ་གཉིས་པ། རྩེ་ལ་དྲི་བཟང་གིས་བྱུག་པ་ཐོག་ལ། དང་པོ་ཚེམ་ཤིང་གླིང་གཞི་བརྗོད་པ་ནི། ལྷོ་ཕྱོགས་ཀྱི་དེ་བཞིན་གཤེགས་པ་བཞད་པ་ལམ་ལ་གནས་ནས། བྱང་ཆུབ་སེམས་དཔའི་མཛད་པ་མཛད་པའི་དུས་སུ། མངོན་པར་ཤེས་པ་སེམས་ཅན་ལ་གཟིགས་ནས། སེམས་ཅན་གྱི་སྐྱེ་བ་སྔ་མ་ལ། ཕ་དང་། མ་དང་། མཁན་སློབ་དང་། སློབ་དཔོན་དུ་གྱུར་པ་ལས་ཀྱི་ཁ་ལོ་བསྒྱུར་ནས། འདིར་སེམས་ཅན་དུ་སྐྱེས་པའི་ཤ་ཟོས་ནས། དེའི་རྣམ་པར་སྨིན་པ་དེ་ནི་ཤིན་ཏུ་ལྕི་བས། དེ་དག་པར་བྱ་བ་དང་། ངག་ལ་བྱུང་བའི་ཉེས་པ་ཐམས་ཅད་དག་པར་བྱ་བའི་ཕྱིར། ངའི་མིང་དང་སྔགས་ཀྱིས་སོ་ཤིང་ལ་བཏབ་ནས། ཡི་གེ་བརྒྱ་པ་བརྗོད་ཅིང་སོ་ཤིང་གིས་སོའི་རྩ་བ་བྲུས་ནས། ཉེས་པ་དག་པར་འགྱུར་རོ། །ཞེས་ལུང་བསྟན་ནས། དེའི་རྗེས་སུ་འཇུག་པ་ཡིན། བཞད་པ་རྡོ་རྗེ་དགྱེས་པའི། ཚེམ་ཤིང་དག་གིས་མནོས་ནས་ནི། །བསྐང་པ་གྲངས་མེད་འཁོར་བའི་འཁོར། །ཕྱིན་ཅི་ལོག་བཞིས་དབང་བསྒྱུར་བས། །དགེ་བཤེས་ཕ་མ་གཉེན་འདུན་གྱིས། །ལས་ཀྱི་འཁོར་བའི་ཤ་ཟོས་པ། །ཚིམ་ཤིང་དམ་ཚིག་མནོས་པ་འདི། །སྐད་ཅིག་ཡུད་ལ་བྱང་བར་ཤོག །བཛྲ་ཧ་ས་ཏྲཾ་སརྦ་པ་པཾ་བྷི་ཤྭ་དྷ་ཡེ་སྭཱ་ཧཱ། ཅེས་བཀྲམ། ཡིག་བརྒྱ་བརྗོད་ལ་སོ་བྲུས། ཚེ་རབ་སྔ་མ་ལ་ཕ་མ་གཉེན་བཤེས་མཁན་སློབ་དུ་གྱུར་པ་ཐམས་ཅད་འདིར་ལས་ཀྱི་ཁ་ལོ་བསྒྱུར་བས། དུད་འགྲོར་སྐྱེས་པའི་ཤ་ཟོས་པའི་རྣམ་པར་སྨིན་པ་དང་ཁྱད་པར་དུ་ངག་ལས་བྱུང་བའི་སྡིག་པ་དག་པར་བསམ་ལ་ཚོམ་བུའི་སྟེང་དུ་དོར་བས། ལྟས་ནི་ཕྱོགས་བཞིན་ལས་བཞི། མཚམས་བཞི་ལ་ཕྲིན་ལས་བཞི། སྟེང་མཁའ་སྤྱོད། མཐུར་དུ་བསྟན་ན་ས་འོག་གི་དངོས་གྲུབ་ཐོབ་པའི་ལྟས་ཏེ། འོན་ཀྱང་དང་པོ་པས། ལྷོ་ཕྱོགས་སུ་བསྟན་ན་གཤིན་རྗེའི་བར་ཆད་འོང་དོག་ཡོད་པས་དཀྱིལ་འཁོར་ལ་གཏོར་མ་རེ་འབུལ་བས་བཟློག་པར་བཤད་དོ། །དེ་ནས་དྲི་བཟང་གིས་ཆུས་སྭ་བྷ་ཝས་དག་བྱེད་ཀྱིས་ཆུ་ནུས་པ་ཅན་དུ་བྱིན་གྱིས་རླབ་ལ། དྲི་ཆབ་ཀྱི་གླིང་བཞི་ནི། འདི་ཡང་ནུབ་ཕྱོགས་ཀྱི་དེ་བཞིན་གཤེགས་པ་རྡོ་རྗེ་གནོན་པ་ཞེས་བྱ་བ། ལམ་ལ་གནས་ནས་བྱང་ཆུབ་སེམས་དཔའི་མཛད་པ་མཛད་པའི་དུས་སུ། མངོན་པར་ཤེས་པས་སེམས་ཅན་ལ་གཟིགས་ནས། ཁམས་གསུམ་གྱི་སེམས་ཅན་ཐམས་ཅད་ལུས་ངག་ཡིད་གསུམ་བག་ཆགས་བཅས་ལ་ཐུགས་རྗེ་སྐྱེས་ནས། དྲི་ཆབ་ལ་ང་ཡི་མིང་དང་སྔགས་བཏབ་ལ། ཁྲུས་བྱས་ཁོང་དུ་འཐུང་ན། ལུས་ངག་ཡིད་གསུམ་གྱི་བག་ཆགས་དག་པར་འགྱུར་རོ། །ཞེས་ལུང་བསྟན་པས་དེའི་རྗེས་འཇུག་པ་ཡིན། རྡོ་རྗེ་རྣོན་པོ་ཐོག་མེད་ཀྱིས། དག་བྱེད་དམ་ཚིག་མནོས་ནས་ནི། ལུས་ངག་ཡིད་ལས་བྱུང་བ་ཡིས། །བག་ཆགས་མ་ལུས་དག་པར་ཤོག །ༀ་བཛྲ་ཏིག་སྣ་ཧྲཱི་བྷི་ཤྭ་དྷ་ཡ་པ་པཾ་ཙ་པ་ཤོ་དྷ་ཡ་སྭཱ་ཧཱ། ཅེས་ཁྱོར་བར་བླུག་ལ། ཧུབ་གཅིག་ཕྱིར་ཕོ། དེ་ནས་ཧུབ་གསུམ་འཐུང་པས། ལུས་ངག་ཡིད་གསུམ་གྱིས་བག་ཆགས་ཐམས་ཅད་དག་པར་བསམ། ལག་གིས་གདོང་བྱུག་གོ། །དེ་ནས་སྲུང་སྐུད་དམར་པོ་ལུས་ངག་ཡིད་གསུམ་གྱི་རྟགས་སུམ་བསྒྲིལ་གཉིས་སྟེབ་ལ་གཙོ་བོའི་སྔགས་དང་། ༀ་བཛྲ་ཡཀྵ་ཧཱུྃ། བརྗོད་ཅིང་མདུད་པ་གསུམ་མཾ་བདུན་མདུད་ཅིང་། རྡོ་རྗེ་ལུག་བརྒྱུད་དུ་བརླབ་པ་ཐོག་སྟེ། བསྲུང་སྐུད་ཀྱིས་གླིང་བཞི་ནི། བྱང་ཕྱོགས་ཀྱིས་དེ་བཞིན་གཤེགས་པ་རྡོ་རྗེ་བསྲུང་བ་ལམ་ལ་གནས་ནས། བྱང་ཆུབ་སེམས་དཔའི་མཛད་པ་མཛད་པའི་དུས་སུ་མངོན་པར་ཤེས་པའི་སེམས་ཅན་ལ་ལམ་གྱིས་བར་ཆད་མང་བར་གཟིགས་ནས། དེ་ལ་ཐུགས་རྗེ་སྐྱེས་ནས་རྒྱུ་རུང་བའི་བསྲུང་སྐུད་ལ། ངའི་མིང་དང་སྔགས་ཀྱིས་བཏབ་ནས། དཔུང་གཡོན་ལ་བཏག་ནས། བར་ཆད་ལས་གྲོལ་བར་འགྱུར་རོ། །ཞེས་ལུང་བསྟན་ནས། དེའི་རྗེས་སུ་འཇུག་པ་ནི། བསྲུང་བ་རྡོ་རྗེ་གོ་ཆ་ཡི། །བསྲུང་སྐུད་དམ་ཚིག་མནོས་ནས་ནི། །བདུན་ནམ་ཉི་ཤུ་རྩ་གཅིག་གིས། བར་དུ་སྔགས་སྟེ་མདུད་བོར་ནས། །འཆི་བདག་བདུད་ལས་རྒྱལ་བར་འགྱུར་རོ། །རྩ་སྔགས་དང་། ༀ་བཛྲ་ཡཀྴ་ཧཱུྃ་གིས་ཕོའི་དཔུང་པ་གཡོན། བུད་མེད་ཀྱི་གཡས་ལ་བཏག་སྟེ། རྡོ་རྗེ་ལུ་གུ་རྒྱུད་ཀྱིས་གོ་ཁྲབ་དང་ལྡན་པར་བསམ། བདུན་ནམ་ཉེར་གཅིག་གིས། ཚེ་དབང་དུ་གྱུར་ཅིག །དབང་དངོས་གྲུབ་དུ་གྱུར་ཅིག །ཚེ་དབང་ཕུན་ཚོགས་པའི་སྐལ་པར་ལྡན་པར་གྱུར་ཅིག །ཅེས་དེ་ནས་ཀུ་ཤ་གཞན་གྱིས་ལོང་ལ་སྤྱད་པ་ཆེ་ཆུང་གཉིས་ཐོག་ལ། ཀུ་ཤའི་གླིང་བཞི་བརྗོད་པ་ནི། འདི་ཡང་ཤར་ཕྱོགས་ཀྱི་དེ་བཞིན་གཤེགས་པ་རྡོ་རྗེ་ལེགས་པ་ལམ་ལ་གནས་ནས་བྱང་ཆུབ་སེམས་དཔའི་མཛད་པ་མཛད་པའི་དུས་སུ། མངོན་པར་ཤེས་པས་སེམས་ཅན་རྣམས་ལ་གཟིགས་ནས། སེམས་ཅན་ཐམས་ཅད་མ་རིག་པའི་གཏིབ་འོག་ལ། ངའི་མིང་དང་སྔགས་ཀྱིས་བཏབ་ནས། སྔས་དང་སྟན་དུ་བྱས་ནས་རྨི་ལམ་རྣོ་བ་དང་ལེགས་ཉེས་དགེ་སྡིག་རྣམས་ཤེས་པར་འགྱུར་རོ། །ཞེས་ལུང་བསྟན་ནས། དེ་དང་རྗེས་མཐུན་པ་ཡིན། རྡོ་རྗེ་ལེགས་པ་དགྱེས་པ་ཆེ། །རབ་དགྱེས་རྒྱལ་པོ་སངས་རྒྱས་མཆོག །ཀུ་ཤ་འདི་ནི་ཁྱོད་ཀྱི་ལོང་། །ཁྱོད་ཀྱིས་ཉལ་བའི་སྔས་སྟན་གྱིས། དགེ་དང་མི་དགེའི་ཆོས་རྣམས་ཀུན། རྨི་ལམ་དུ་ནི་ཅི་རྨིས་པ། སང་ནི་བདག་ལ་སྙད་པར་བྱོས། ༀ་བཛྲ་ས་ཏྭ་ཧཱུྃ། ཙི་ལི་མི་ལི་ཧཱུྃ། ༀ་ཨཱཿཧཱུྃ། མང་བ་ལ་སྟན་གྱིས། ཉུང་བ་ལ་སྔས་གྱིས། སེངྒེའི་ཉལ་སྟབས་ཀྱིས་བླ་མ་དང་དཀྱིལ་འཁོར་གྱིས་ཕྱོགས་སུ་མགོ་སྟོན་ལ་ཉོལ་དང་། སང་ནང་པར་དཀྱིལ་འཁོར་ཆེན་པོ་མཐོང་བར་འགྱུར་གྱིས། ནང་པར་རྨི་ལམ་བཟང་ངན་བརྟག་ལ་བཤད་པ་གྱིས། བཟང་ན་བྲོད་པ་བསྐྱེད་དང་། ངན་ན་ཞི་བའི་སྦྱིན་སྲེག་བྱེད། དེ་ཡན་ཆད་ཀྱིས་སྟ་གོན་སོང་། སྤྱི་དོན་གསུམ་པ་འཇུག་ཆོག་ལ་བཅུ་གཅིག་སྟེ། དང་པོ་གདོང་གཡོག་བཅིང་བ། གཉིས་པ་ཕྲེང་བ་འཛིན་པ། གསུམ་པ་གསོལ་བ་གདབ་པ། བཞི་པ་ཡེ་ཤེས་དབབ་པ། ལྔ་པ་མེ་ཏོག་ཕུལ་བ། དྲུག་པ་སྔགས་ཕྲེང་དུ་བྱིན་གྱིས་རླབས་ནས་སློབ་མ་ལ་གཏད་པ། བདུན་པ་སྤྱན་དར་དབྱེ་བ། བརྒྱད་པ་དཀྱིལ་འཁོར་བསྟན་པ། དགུ་པ་དམ་ཆུ་བླུད་པ། བཅུ་པ་བླ་མའི་བཀའ་ལ་ཉན་པ། བཅུ་གཅིག་པ་དབང་ཐོབ་མ་ཐོབ་ཀྱི་སྐྱོན་ཡོན་ནོ། །དང་པོ་ནི། དར་དམར་པོ་ལ་རྡོ་རྗེ་དཀར་པོ་མིག་མང་རིས་སུ་བྲིས་པ་རེས། གདོང་གཡོག་བཅིང་པའི་མོས་པ་གྱིས། །ཅེས་བརྗོད་ལ་དར་དམར་པོའི་གདོང་གཡོག་བཅིང་བའོ། །གཉིས་པ་མེ་ཏོག་གི་ཕྲེང་བ་འཛིན་ལ། ཨུ་དུམ་ཝ་རིའི་མ་དྷ་ལ། །ཡུང་དུ་དང་ནི་མ་ཀི་ཏ། །ཀ་ནི་ཀ་ཡི་ཕྲེང་བ་འདི། །ལེགས་པར་ལོང་ལ་བུས་ཟུང་ཞིག །ༀ་བཛྲ་ཨ་འདི་ཏི་ཤ་ཧཱུྃ། གསུམ་པ་གསོལ་བ་གདབ་པ་ནི། སློབ་མས་གསོལ་བ་གདབ་པ། ཡེ་ཤེས་དབབ་པའི་དོན་དུ་གསོལ་བ་གདབ། སྙམ་པའི་མོས་པ་གྱིས་ལ་ངའི་རྗེས་ཟློས་མཛོད། །འགྲོ་བའི་བླ་མ་སྟོན་པ་པོ། །སྡུག་བསྔལ་རྒྱ་མཚོ་བྱིང་བ་ལས། །མགོན་པོ་ཁྱོད་ནི་དཔལ་དུ་བྱོན། །དེང་འདིར་བཀའ་དྲིན་གནང་དུ་གསོལ། །ཅེས་ལན་གསུམ་བརྗོད། བཞི་པ་ཡེ་ཤེས་དབབ་པ་ལ། སློབ་དཔོན་གྱིས་འདི་སྐད་དུ། འོ་ན་ཐུགས་ལ་ཅི་ལྟ་བ་བཞིན་དུ་བཞག་པར་ཞུ། སློབ་བུ་རྗེས་སུ་འཇུག་པའི་ཕྱིར། བདུད་ཀྱི་གཅོད་ཡུལ་ངོ་སྤྲོད་འདེབས་པའི་སྔོན་དུ་རྒྱུའི་སྣོད་དུ་རུང་བའི་ཕྱིར། དབང་བསྐུར་བའི་ཐོག་མར་ཡེ་ཤེས་དབབ་པ་ནི། འདི་ལྟར་དུ་བསྒོམ་ཅིག །སྟེང་གི་ནམ་མཁའ་ལ་མ་ཅིག་ལབ་ཀྱི་སྒྲོན་མ་བརྒྱུད་པའི་བླ་མ་རྣམས་དང་ཐ་དད་མེད་པར། སྐུ་གཅེར་བུ་རུས་པའི་རྒྱན་དྲུག་གིས་བརྒྱན་པ། ཐོད་སྐམ་ལྔའི་དབུ་རྒྱན་དང་། ཐོད་རློན་གྱིས་དོ་ཤལ་བྱས་པ། གཡས་པས་གསེར་གྱི་ཌཱ་མ་རུ་སྟོང་གསུམ་ཁྱབ་པར་དཀྲོལ་ནས། གཡོན་པས་དངུལ་དཀར་གྱི་དྲིལ་བུ་དཀྲོལ་བ། མཆན་ཁུང་དུ་ཁ་ཏྲཾ་ག་བསྣམས་པ། ཞབས་གཡོན་བརྐྱང་པས་རོ་ཡི་སྙིང་གནོན་པ། གཡས་བསྐུམ་པ་རྟིང་པའི་བླ་ལ་གཏད་པ། ཁམས་གསུམ་ཟིལ་གྱིས་གནོན་ནུས་པའི་བདག་ཉིད་དོ། །འཁོར་དུ་མཁའ་འགྲོ་དཔག་ཏུ་མེད་པས་བསྐོར་བ། ལ་ལས་རྡོ་རྗེའི་གླུ་ལེན། ལ་ལས་རྡོ་རྗེའི་གར་བྱེད། ལ་ལས་རྡོ་རྗེའི་བྲོ་འཁྲབ་པའི་དབུས་ནས་མ་ཅིག་སྤྱན་གསུམ་སྟེང་གིས་ནམ་མཁའ་ལ་གཟིགས་པ། གར་ཐབ་ལིང་ལིང་བྱེད་ཅིང་བྲོ་འཁྲབ་པའི་ལུགས་བཞིན་བསྒོམ། མོས་གུས་ཏོང་ཏོང་བྱེད་ལ། དེ་རྣམས་ཀྱི་སྐུ་གསུང་ཐུགས་ལ་ༀ་ཨཱཿཧཱུྃ་གསུམ་བྱུང་ནས་ཁྱེད་རྣམས་ཀྱི་ལུས་ངག་ཡིད་གསུམ་ལ་སིབ་སིབ་ཐིབ་པར་བསྒོམ་མཛོད་ལ། ཌཱ་རུ་དང་དྲིལ་བུ་འཁྲོལ་ལ་སྤོས་བསྲེགས་བརྒྱུད་པའི་གསོལ་འདེབས་བྱེད་ཚར་ནས། སྤྱི་བོ་ནས་དེ་རྣམས་མར་བྱོན་ནས་སློབ་མ་རྣམས་ཀྱི་སྤྱི་བོར་ཐིམ་པས་སློབ་མའི་ལུས་ངག་ཡིད་གསུམ་ལ་ཟག་མེད་ཀྱི་བདེ་བས་ལྟེམ་ལྟེམ་སྐྱེས་པར་བསྒོམ་མོ། །རྫས་རྒོད་གུ་གུལ་དུད་པས་བདུག་གོ། །འོ་དེ་ལྟར་བྱས་པས་སྐུ་ཕེབ་ན་གར་བྱེད་པ་འཁྲབ་ཅིང་ཕྱག་རྒྱ་བསྒྱུར་བའོ། །གསུང་ཕེབ་ན་སྔགས་བཟླ་བའོ། །རྒྱ་གར་སྐད་དང་ཧ་ཧ་ཧི་ཧིའི་སྒྲ་སྒྲོག་ཏུ་འོང་། ཐུགས་ཕེབ་ན་གསལ་སྟོང་འཛིན་མེད་ཀྱིས་ཉམས་སུ་ལེན་པ་འཆར། བློ་བདེ་འབོལ་ལེ་བ་འོང་། ཉམས་དགའ་ཡ་ལེ་བར་འོང་ངོ་། །ལྔ་པ་མེ་ཏོག་འབུལ་བ་ནི། སྔོན་གྱི་ཡི་དམ་གྱི་ལྷ་གང་ཡིན་པ་དེ་ལ་མེ་ཏོག་ཕྲེང་བ་ཕོག་པར་གྱུར་ཅིག །སྙམ་པའི་མོས་པ་གྱིས་ལ་ངའི་རྗེས་ཟློས་མཛད། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་རྗེ་བརྩེར་དགོངས་ནས། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ཏེ་བཞེས་སུ་གསོལ། །ༀ་པྲ་ཏི་ཛ་བཛྲ་ས་མ་ཡ་ཧོ། བརྗོད་ལ་མེ་ཏོག་དཀྱིལ་འཁོར་ལ་གཏོར་རོ། །དྲུག་པ་སྔགས་ཕྲེང་གཏད་པ་ནི། ལྷ་ཚོགས་ཀྱི་སྔགས་ཕྲེང་དུ་བྱིན་གྱིས་བརླབ་ནས། སློབ་མ་རང་ལ་གནང་བར་བསམ། མེ་ཏོག་རིན་ཆེན་ལ་སོགས་ཏེ། །གང་ལ་ཕོགས་པར་རིགས་ཀྱི་ལྷ། །གཙོ་བའི་རིགས་དེ་འགྲུབ་ནས་ནི། །དངོས་གྲུབ་བྱུང་སྟེ་ཐེ་ཚོམ་མེད། །ༀ་པྲ་ཏི་གྷྲི་རྣ་ཧཱུྃ། བདུན་པ་སྤྱན་དར་དབྱེ་བ་ནི། མ་རིགས་པའི་ལིང་ཏོག་དང་སྤྱན་དར། ལྷན་ཅིག་ཏུ་བསལ་སྙམ་པའི་མོས་པ་མཛོད། རྡོ་རྗེ་མཁའ་འགྲོ་དེང་ཁྱོད་ཀྱིས། །མིག་འབྱེད་པ་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ༀ་ཙཀྵུ་པྲ་ཝེ་ཤ་ཡ་ཧཱུྃཿ སྤྱན་དར་བླང་ལ། མིག་དང་མི་ཤེས་པའི་རབ་རིབ་བསལ་བར་བསམ། བརྒྱད་པ་དཀྱིལ་འཁོར་བསྟན་པ་ནི། ད་ཁྱེད་རང་རྣམས་སྔོན་མ་མཐོང་བའི་དཀྱིལ་འཁོར་བཟང་མཐོང་སྙམས་པའི་མོས་པ་གྱིས། ཐར་པ་ཆེན་པོའི་གྲོང་མཆོག་ཏུ། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་སྐྱེ། །ཁྱེད་ནི་སངས་རྒྱས་དངོས་གྲུབ་ཐོབ། །དཀྱིལ་འཁོར་ཁ་དོག་ཅི་འདྲ་དྲི་དོན་བཤད་དོ། །དགུ་པ་དམ་ཆུ་བླུད་པ་ནི། གཅོད་ཀྱི་གཞུང་དུ་བཤད་པ་བཞིན་དུ། དམ་ཚིག་དང་སྡོམ་པ་བསྲུང་སྙམ་པའི་མོས་པ་གྱིས། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ནས་བསྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེའི་བདུད་རྩི་ཆུ་འདི་འགྲུབ། །ༀ་བཛྲ་པཉྩ་ཨ་མྲྀ་ཏ་ཨུ་ཏྲ་ཀ་ཐཱ་ཐཱ། བཅུ་པ་བླ་མའི་བཀའ་ཉན་པའི་སྒོ་ནས། དམ་བཞག་པ་ནི། བླ་མས་ཅི་ལྟར་གསུངས་པ་བཞིན་དུ་བཀའ་དང་དམ་ཚིག་ལ་མི་འདའ་སྙམ་པའི་མོས་པ་གྱིས། རྡོ་རྗེ་སྤྱི་བོར་བཞག་ལ། དུས་འདི་ཉིད་ལ་ཁྱོད་ཉིད་ཀྱིས། །མཁའ་འགྲོ་སྡེ་ལྔ་ང་ཡིན་གྱིས། །ང་ཡི་ཅི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་གྱིས། །གང་ཡང་ང་ལ་བརྙས་པ་མིན། །དེ་བཞིན་མོས་པ་མ་བྱས་ན། །བདུད་ཀྱིས་བཅོམ་ནས་དམྱལ་བར་འགྲོ། །དེ་བས་དམ་ཚིག་བུས་ཟུང་ཅིག །ཅེས་བརྗོད་དོ། །བཅུ་གཅིག་པ་དབང་ཐོབ་མ་ཐོབ་ཀྱིས་སྐྱོན་ཡོན་ལ་གཉིས་ཏེ། དང་པོ་མ་ཐོབ་པའི་ཉེས་དམིགས་ནི། སྣོད་དུ་མི་རུང་བས་གདམས་པ་གཅིག་ཉན་པ་ལ་མི་དབང་། སྐལ་བ་མེད་པས་ངོ་སྤྲོད་གདབ་ཏུ་མི་རུང་། རྗེས་གནང་བ་མེད་པས་ཉེ་དུ་མི་བཏུབ་བོ། །དཔལ་དུས་འཁོར་ལས། དབང་མེད་པ་ལ་དངོས་གྲུབ་མེད། །བྱེ་མ་བཙིར་བའི་མར་དང་འདྲ། །དེ་བས་དབང་བསྐུར་དམ་པ་ཡིན། །བར་དུ་འབད་མེད་བླང་བར་བྱས། །ཅེས་སོ། །གཉིས་པ་དབང་ཐོབ་པའི་ཕན་ཡོན་ནི། གནས་སྐབས་སུ་གདམ་པ་ཟབ་མོ་ཉན་པའི་སྣོད་དུ་རུང་བས། ནམ་མཁའ་གོ་འབྱེད་ཀྱིས་ངོ་སྤྲད་བཏབ་ཏུ་གཏུབ། མཐར་ཐུག་སྐུ་ལྔ་ཡེ་ཤེས་ལྔ། ཕྲིན་ལས་བཞིའི་ངོ་བོར་སངས་རྒྱས་པ་ཡིན་ཏེ། དཔལ་དེ་ཉིད་འདུས་པ་ལས། །ཡོངས་སུ་རྫོགས་པའི་དབང་ཐོབ་ནས། །སངས་རྒྱས་གོ་འཕང་རྒྱང་མི་རིང་། །ལག་ན་རིན་ཆེན་ཐོག་པའི་མིས། །ལོངས་སྤྱོད་རྒྱང་མི་རིང་བ་བཞིན། །ཅེས་སོ། །དེ་ཡན་ཆད་སྦྱོར་བའི་དབང་སོང་། སྤྱི་དོན་གཉིས་པ་དངོས་བཞིའི་རིམ་པ་ལ་བཞི་སྟེ། བུམ་དབང་། གསང་དབང་། ཤེས་རབ་ཡེ་ཤེས་དབང་། ཚིག་དབང་ངོ་། །བུམ་དབང་ལ་བདུན་སྟེ། དང་པོ་རྡོ་རྗེ་མཁའ་འགྲོ་བུམ་པའི་དབང་ནི། མཎྜལ་འབུལ་ཞིང་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་བྱང་ཆུབ་རྡོ་རྗེ་སངས་རྒྱས་ལ། །མཆོད་ཅིང་ཅི་ལྟར་རྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །རྡོ་རྗེ་མཁའ་འགྲོ་བུམ་པའི་དབང་། །དེ་རིང་བདག་ལ་བསྐུར་དུ་གསོལ། །ཅེས་ལན་གསུམ་བརྗོད། དེ་ནས་སྤྲོས་པ་ལ་དགའ་ན། བཀྲ་ཤིས་ཀྱི་གླེང་བཞི་དང་། བཀྲ་ཤིས་དབང་སྤྱི་དང་མཐུན་པར་བརྗོད། མདུན་འདིར་མཎྜལ་གྱི་སྟེང་དུ། པདྨ་དམར་པོ་འདབ་མ་བཞི་བསམ། དབུས་ཀྱི་ལྟེ་བ་ལ་མ་ཅིག་ལབ་ཀྱི་སྒྲོན་མ། ངོ་བོ་བླ་མ་དང་དབྱེར་མེད་པ། རྣམ་པ་རྡོ་རྗེ་རིགས་ཀྱི་མཁའ་འགྲོ་མ་གཅེར་བུ་མཐིང་ནག་དུར་ཁྲོད་ཀྱི་རྒྱན་དྲུག་གསོལ་བ། མི་མགོའི་དོ་ཤལ། ཐོད་པའི་དབུ་རྒྱན་མཛད་པ། ཕྱག་གཡས་ན་ཐོད་པ་བདུད་རྩིའི་བཀང་བ་བསྣམས་པ། མཆན་ཁུང་ན་ཁ་ཊྭཱྃ་ཁ་བསྣམས་པ། གདན་མི་རོའི་སྟེང་ན་བཞུགས་པ། ཞལ་ཅིག་ཕྱག་གཉིས་སྤྱན་གསུམ་པ། སྙན་ཆ་རུས་པའི་རྒྱན་འང་མིག་བཅུག་པ། ཞབས་གཡས་བསྐུམ་པའི་རྟིང་བ་བྷ་ག་ལ་གཏད་པ། གཡོན་བརྐྱང་པ། སྐུ་ལ་མེ་རི་དང་མེ་དཔུང་འབར་བ་གཅིག་བསམ། དེའི་ཤར་གྱི་པད་འདབ་ལ། སངས་རྒྱས་མཁའ་འགྲོ་སྐུ་མདོག་དཀར་མོ། རྒྱན་ཆ་ལུག་གཙོ་མོ་དང་མཐུན་པར་བསྒོམ། ལྷོ་ཡི་པད་འདབ་ལ་རིན་ཆེན་རིགས་ཀྱི་མཁའ་འགྲོ་མ་སྐུ་མདོག་སེར་མོ། ནུབ་ཀྱི་པད་འདབ་ལ་པདྨ་རིགས་ཀྱི་མཁའ་འགྲོ་མ་སྐུ་མདོག་དམར་མོ། བྱང་གིས་པད་འདབ་ལ་ལས་ཀྱི་རིགས་ཀྱི་མཁའ་འགྲོ་མ་ལྗང་གུ། དེ་ཐམས་ཅད་ཕྱག་མཚན། ཆ་ལུགས་བཞུགས་ཚུལ་གཙོ་མོ་ལྟར་བསྒོམ། དེ་ནས་གཙོ་མོས་མ་པ་བདུད་རྩིའི་བཀང་པ་ཕྱག་ན་བསྣམས་པ། ཁྱེད་རང་རྣམས་ཀྱི་སྤྱི་བོར་བཞག་པར་བསྒོམ་ལ། ཞལ་ནས་འདི་སྐད་གསུང་པར་སྒོམ། བླ་མས་བུམ་པ་མགོ་ཐོག་ཏུ་བཟུང་ལ། རྡོ་རྗེ་མཁའ་འགྲོ་ཆུའི་དབང་། དེ་རིང་ཁྱོད་ལ་བསྐུར་བར་བྱ། སངས་རྒྱས་ཐུགས་ནི་རབ་བསྒྲུབ་ཕྱིར། རྡོ་རྗེ་མཁའ་འགྲོ་ཁྱེད་གྱུར་ཅིག །ༀ་བཛྲ་ཌཱཀྐི་ནི་ཨ་བྷི་ཥིཉྩ་ཧཱུྃ། ཅེས་བརྗོད་པ་ནི། སློབ་དཔོན་གྱིས་ཀྱང་བརྗོད། ཏིང་ངེ་འཛིན་ནི་དབུས་ཀྱི་གཙོ་མོའི་བརྗོད་པར་བསྒོམ། ཁྱེད་རང་རྣམས་རྡོ་རྗེ་མཁའ་འགྲོ་མར་གྱུར་པར་བསྒོམ་ལ། སྟེང་གི་ནམ་མཁའ་ལ་བརྒྱུད་པའི་བླ་མ་རྣམས་དང་། ཡི་དམ་དཔའ་བོ་དཔའ་མོ་ཐམས་ཅད་ཀྱིས་བདུད་རྩིའི་ཆར་ཕབ། རོལ་མོའི་སྒྲ་སྒྲོགས། བཀྲ་ཤིས་ཀྱི་དབྱངས་ལེན། འདོད་ཡོན་གྱི་མཆོད་པ་འབུལ། སྐུ་གསུང་ཐུགས་ཀྱི་བྱིན་གྱིས་རླབས། མཆོག་ཐུན་མོང་གིས་དངོས་གྲུབ་ཐོབ་པར་སྒོམས་ཤིག །བུམ་ཆུ་བླུད་ནས། ཅི་ལྟར་བལྟམ་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དེ་བཞིན་བདག་གིས་སྐུ་ཁྲུས་གསོལ། །ༀ་ན་མ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། དབང་བསྐུར་བས་དྲི་མ་དག །ལུས་གང་དབང་ཐོབ། ཆུའི་ལྷག་མ་ཡར་སྤྱི་གཙུག་ཏུ་ལུད་པ་ལས། མི་སྤྱོད་པས་དབུ་བརྒྱན་པར་བསྒོམས་ཤིག །གྱིས་ལ། ཨརྒྷཾ་ལ་སོགས་ཀྱིས་མཆོད་ལ། རོལ་མོའི་སྒྲ་ཐུང་བ་ཅིག་བསྒྲགས་ཚར་བའི་རྗེས་སུ་བཤད་པ་ནི། དེའི་དག་པ་ནི། རྡོ་རྗེ་མཁའ་འགྲོ་ཆུའི་དབང་བསྐུར་བས། རྣམ་པར་ཤེས་པའི་ཕུང་པོ་རྡོ་རྗེ་རིགས་ཀྱི་མཁའ་འགྲོའི་ལྷ་ཚོགས་སུ་དག །ཉོན་མོངས་པ་ཞེ་སྡང་མེ་ལོང་ལྟ་བུའི་ཡེ་ཤེས་གནས་པར་འགྱུར། འབྱུང་བ་ཆུའི་ངོ་བོ་ལྷ་མོ་མ་མ་ཀིའི་སྐུ་ཐོབ་པའི་བག་ཆགས་དང་། ས་བོན་རྒྱུད་ལ་བཞག་པའོ། །གཉིས་པ་རིན་ཆེན་མཁའ་འགྲོ་ཅོད་པན་གྱི་དབང་བསྐུར་ལ། དང་པོ་གསོལ་བ་གདབ་པ་ནི། ཀྱཻ་བྱང་ཆུབ་རྡོ་རྗེ་སངས་རྒྱས་ལ། །མཆོད་ཅིང་ཅི་ལྟར་བཙལ་བ་ལྟར། །བདག་ཀྱང་སྐྱོབ་པའི་དོན་གྱིས་ཕྱིར། །རིན་ཆེན་མཁའ་འགྲོ་ཅོད་པན་དབང་། །དེ་རིང་ཁྱོད་ལ་བསྐུར་དུ་གསོལ། །ཅེས་བརྗོད་དོ། །དེ་ནས་རིན་ཆེན་མཁའ་འགྲོ་ཅོད་པན་གྱིས་དབང་ནི། ལྷོ་ཕྱོགས་ཀྱི་པད་འདབ་ཀྱིས་སྟེང་ན་བཞུགས་པའི་རིན་ཆེན་མཁའ་འགྲོའི་རིགས་ལྔའི་དབུ་རྒྱན་གྱིས་ཁྱེད་རང་རྣམས་ཀྱིས་དབུ.ལ་བརྒྱན་པར་བསྒོམ་ལ། ཞལ་ནས་ཚིག་འདི་གསུངས་པར་བསྒོམ་ཞིག །རིན་ཆེན་མཁའ་འགྲོ་དབུ་རྒྱན་དབང་། །དེ་རིང་ཁྱོད་ལ་བསྐུར་བ་བྱ། །སངས་རྒྱས་ཡོན་ཏན་རབ་བསྒྲུབ་ཕྱིར། །རིན་ཆེན་མཁའ་འགྲོར་ཁྱོད་གྱུར་ཅིག །ༀ་རཏྣ་ཌཱཀྐི་ནི་ཨ་བྷི་ཥིཉྩ་ཨཱཿ ཚིག་དེ་སློབ་དཔོན་གྱིས་བརྗོད་ཀྱང་། ཏིང་ངེ་འཛིན་ནི་རིན་ཆེན་མཁའ་འགྲོའི་བརྗོད་པར་བསྒོམ་ལ། ཁྱེད་རང་རྣམས་རིན་ཆེན་མཁའ་འགྲོ་མར་གྱུར་པ་ལ། སྟེང་གི་ནམ་མཁའ་ལ་བརྒྱུད་པའི་བླ་མ་རྣམས་དང་། ཡི་དམ་དཔའ་བོ་ཐམས་ཅད་ཀྱིས་བདུད་རྩིའི་ཆར་ཕབ། རོལ་མོའི་སྒྲ་སྒྲོགས། བཀྲ་ཤིས་ཀྱི་དབྱངས་ལེན། འདོད་ཡོན་གྱི་མཆོད་པ་འབུལ། སྐུ་གསུང་ཐུགས་ཀྱི་བྱིན་གྱིས་རླབས། མཆོག་ཐུན་མོང་གིས་དངོས་གྲུབ་ཐོབ་པར་གྱུར་ཅིག །བུམ་ཆུ་བླུད་ནས། ཇི་ལྟར་བལྟམ་པ་ཙམ་གྱིས་ནི། ལྷ་རྣམས༴ ལྷའི་ཆུ༴ དེ་བཞིན༴ ༀ་ན་མ༴ དབང་བསྐུར་ནས་དྲི་མ་དག །ལུས་གང་། དབང་ཐོབ། ཆུའི་ལྷག་མ་སྤྱི་གཙུག་ཏུ་ལུད་པ་ལས། མི་བསྐྱོད་པས་དབུ་རྒྱན་པར་བསྒོམ་ཞིག །གྱིས་ལ། ཨརྒྷཾ་ལ་སོགས་ཀྱིས་མཆོད་ལ། རོལ་མོའི་སྒྲ་ཐུང་བ་གཅིག་བསྒྲགས་ཚར་ནས་དོན་བཤད་པ་ནི། དེའི་དག་པ་ནི། རིན་ཆེན་མཁའ་འགྲོའི་དབུ་རྒྱན་གྱིས་དབང་བསྐུར་བས། ཚོར་བའི་ཕུང་པོ་རིན་ཆེན་རིགས་ཀྱི་ལྷ་ཚོགས་སུ་དག །ཉོན་མོངས་པ་ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གནས་འགྱུར། འབྱུང་བ་སའི་ལྷ་མོ་སངས་རྒྱས་སྤྱན་མའི་དབང་ཐོབ་ཅིང་བག་ཆགས་དང་ས་བོན་རྒྱུད་ལ་བཞག་པའོ། །གསུམ་པ་པདྨ་མཁའ་འགྲོའི་དབང་ལ། དང་པོ་གསོལ་བ་གདབ་པ་ནི། ཀྱཻ། བྱང་ཆུབ་རྡོ་རྗེ་སངས་རྒྱས་ལ། མཆོད༴ བདག་ཀྱང་༴ པདྨ་མཁའ་འགྲོ་རྡོ་རྗེའི་དབང་། །དེ་རིང་༴ ནུབ་ཕྱོགས་པད་འདབ་སྟེང་ན་བཞུགས་པའི་པདྨ་མཁའ་འགྲོས། གསེར་གྱི་རྡོ་རྗེ་ཁྱེད་རང་རྣམས་ཀྱི་སྤྱི་བོར་བཞག་པར་བསྒོམ་ལ། ཞལ་ནས་གསུང་བར་བསྒོམ་ཞིག །པདྨ་མཁའ་འགྲོའི་རྡོ་རྗེའི་དབང་། །དེ་རིང་༴ སངས་རྒྱས་གསུང་ནི་རབ་བསྒྲུབ་ཕྱིར། །པདྨ་མཁའ་འགྲོར་ཁྱོད་གྱུར་ཅིག །པདྨ་ཌཱཀྐི་ནི་ཨ་བྷི་ཥིཉྩ་ཧཱུྃ། ཚིག་དེ་སློབ་དཔོན་གྱིས་བརྗོད་ཀྱང་། ཏེང་ངེ་འཛིན་ནི་པདྨ་མཁའ་འགྲོས་བརྗོད་པར་བསྒོམ། ཁྱེད་རང་པདྨ་མཁའ་འགྲོར་གྱུར་པ་ལ། །སྟེང་གིས་ནམ་མཁའ་བརྒྱུད་པའི་བླ་མ་སོགས་འགྲེའོ། །དེས་དག་པ་ནི། པདྨ་མཁའ་འགྲོའི་རྡོ་རྗེའི་དབང་བསྐུར་བས། འདུ་ཤེས་ཀྱི་ཕུང་པོ་པདྨ་རིགས་ཀྱི་ལྷ་ཚོགས་སུ་དག །ཉོན་མོངས་པ་འདོད་ཆགས་སོ་སོར་རྟོགས་པའི་ཡེ་ཤེས་གནས་པར་འགྱུར། འབྱུང་བ་མེའི་ལྷ་མོ་གོས་དཀར་མོའི་དབང་ཐོབ། བག་ཆགས་དང་ས་བོན་རྒྱུད་ལ་བཞག་པའོ། །བཞི་པ་ལས་ཀྱི་མཁའ་འགྲོའི་དྲིལ་བུའི་དབང་སྟེ། དང་པོ་གསོལ་བ་གདབ་པ་ནི། ཀྱཻ། བྱང་ཆུབ་རྡོ་རྗེ་སངས་རྒྱས་ལ། །མཆོད༴ བདག༴ ལས་ཀྱི་མཁའ་འགྲོའི་དྲིལ་བུའི་དབང་། །དེ་རིང་ཁྱོད་ལ༴ ཅེས་བརྗོད། དེ་ནས། བྱང་གི་པད་འདབ་སྟེང་ན་བཞུགས་པའི་ལས་ཀྱི་མཁའ་འགྲོའི་དངུལ་གྱི་དྲིལ་བུ་ཁྱོད་རྣམས་ཀྱི་སྤྱི་བོར་བཞག་པར་བསྒོམ་ལ། ཞལ་ནས་གསུང་ཚིག་གསུང་པའི་བསྒོམ་ཅིག །ལས་ཀྱི་མཁའ་འགྲོ་དྲིལ་བུའི་དབང་། དེ་རིང་ཁྱོད༴ སངས་རྒྱས་ཕྲིན་ལས་རབ་བསྒྲུབ་ཕྱིར། ལས་ཀྱི་མཁའ་འགྲོ་ཁྱོད་གྱུར་ཅིག །ༀ་ཀརྨ་ཌཱཀྐི་ནི་ཨ་བྷི་ཥིཉྩ་ཧཱུྃ། ཚིག་དོན་སློབ་དཔོན་བརྗོད་ཀྱང་། ལས་ཀྱི་མཁའ་འགྲོས་བརྗོད་པར་བསམ། ཁྱེད་རང་རྣམས་ལས་ཀྱི་མཁའ་འགྲོ་མར་གྱུར་པར་བསྒོམ་ལ། སྟེང་གིས་ནམ་མཁའ་ཅེས་སོགས་གོང་གིས་འདྲེས་སོ། །དེས་དག་པ་ནི། ལས་ཀྱི་མཁའ་འགྲོའི་དྲིལ་བུའི་དབང་བསྐུར་བས། འདུ་བྱེད་ཀྱིས་ཕུང་པོ་ལས་ཀྱི་རིགས་ཀྱི་ལྷ་ཚོགས་སུ་དག །ཉོན་མོངས་པ་ཕྲག་དོག་བྱ་བ་གྲུབ་པའི་ཡེ་ཤེས་སུ་དག་པར་གྱུར། འབྱུང་བ་རླུང་གིས་ལྷ་མོ་དམ་ཚིག་སྒྲོལ་མའི་དབང་ཐོབ་ཅིང་། བག་ཆགས་དང་ས་བོན་རྒྱུད་ལ་བཞག་པའོ། །ལྔ་པ་སངས་རྒྱས་མཁའ་འགྲོ་མིང་གི་དབང་ལ་དང་པོ། གསོལ་བ་གདབ་པ་ནི། ཀྱཻ། བྱང་ཆུབ་རྡོ་རྗེ༴ མཆོད༴ བདག་ཀྱང་༴ སངས་རྒྱས་མཁའ་འགྲོ་མིང་གིས་དབང་། །དེ་རིང་ཁྱོད་ལ༴ ཅེས་བརྗོད། ཤར་ཕྱོགས་ཀྱི་པད་འདབ་སྟེང་ན་བཞུགས་པའི་སངས་རྒྱས་མཁའ་འགྲོས། རྡོ་རྗེ་དྲིལ་བུ་ཁྱེད་རྣམས་ཀྱི་སྤྱི་བོར་བཞག་པར་བསྒོམ་ལ། ཞལ་ནས་གསུང་བར་སྒོམས་ཤིག །སངས་རྒྱས་མཁའ་འགྲོ་མིང་གིས་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་སྐུ་ནི་རབ་བསྒྲུབ་ཕྱིར། །སངས་རྒྱས་མཁའ་འགྲོ་ཁྱོད་གྱུར་ཅིག །ༀ་བུདྡྷ་ཌཱཀྐི་ནི་ཧཱུྃ། གསང་མཚན་སྐབས་འདིར་བཏགས་ཀྱང་ཉན། མེད་ཀྱང་བཟོད། ཚིག་སློབ་དཔོན་གྱིས་བརྗོད་ཀྱང་། སངས་རྒྱས་མཁའ་འགྲོས་བརྗོད་པར་བསམ་ལ། སྟེང་གི་ནམ་མཁའ་ལ་བརྒྱུད་པའི་བླ་མ་རྣམས་དང་། ཅེས་སོགས་གོང་དང་འདྲ། དེའི་དག་པ་ནི། སངས་རྒྱས་མཁའ་འགྲོ་མིང་གི་དབང་བསྐུར་བས། གཟུགས་ཕུང་དེ་བཞིན་རིགས་ཀྱི་ལྷ་ཚོགས་སུ་དག །ཉོན་མོངས་པ་གཏི་མུག་ཆོས་ཀྱི་དབྱིངས་སུ་ཡེ་ཤེས་སུ་གནས་གྱུར་ཅིག །འབྱུང་བ་ལྷ་མོ་ནམ་མཁའ་དབྱིངས་ཀྱི་དབང་ཕྱུག་མའི་དབང་ཐོབ་ཅིང་། བག་ཆགས་དང་ས་བོན་རྒྱུད་ལ་བཞག་པའོ། །དེ་རྣམས་ཀྱི་མ་རིག་པ་རིགས་ལྔར་བསྒྱུར་བས་རིག་པའི་དབང་ལྔའོ། །དྲུག་པ་གཙོ་མོའི་བདག་པོའི་དབང་ནི། མཎྜལ་འབུལ། གསོལ་བ་འདེབས་པའི་རྗེས་ཟློས་མཛོད་ཅིག །བླ་མའི་དཀྱིལ་འཁོར་ལྷ་ཚོགས་རྣམས། །གཙོ་མོ་བདག་གིས་དབང་མཆོག་འདི། །བདག་ཅག་རྣམས་ལ་བསྐུར་དུ་གསོལ། །ཅེས་ལན་གསུམ་བརྗོད། འོ་མཁའ་འགྲོ་སྡེ་ལྔའི་ཐང་སྐུ་དང་། བསྒྲུབ་ཐབས་ཀྱི་དཔེ་དང་། མེ་ལོང་རྣམས་བླ་མས་སྤྱི་བོར་བཞག་པར་བསྒོམ་ལ། བྱས་ལ་ཚིག་འདི་བརྗོད། སངས་རྒྱས་ཀུན་གྱི་བྱིན་རླབས་པས། རྡོ་རྗེ་མཁའ་འགྲོ་སྐུ་གསུང་ཐུགས། བློ་ཆེན་ཁྱོད་ཀྱིས་བཟུང་བར་གྱིས། སངས་རྒྱས་རྣམས་དང་མཉམ་པར་འགྱུར་རོ། །ༀ་བཛྲ་ཌཱཀྐི་ནི་ཀ་ཡ་ཝཀ་ཙིཏྟ་དྷ་ར་ཧཱུྃ། དེས་དག་པ་ནི། གཙོ་མོའི་བདག་པོའི་དབང་ནི་ཐོབ་པ་ཡིན་པས། གཅོད་ཀྱི་སྐོར་ཉན་པ་དང་འཆང་བ་དང་། ཉམས་སུ་ལེན་པ་ལ་དབང་བར་བྱེད་དོ། །བདུན་པ་རྡོ་རྗེའི་སློབ་དཔོན་གྱི་དབང་ནི། སློབ་མས་མཎྜལ་འབུལ་ཞིང་གསོལ་བ་གདབ་པ་འདིའི་རྗེས་ཟློས་མཛོད་གཅིག །ཁྱེད་ཞབས་པདྨའི་བཀའ་དྲིན་གྱིས། །བདག་ལ་རང་དང་གཞན་གྱི་དོན། །རྫོགས་ཕྱིར་རྡོ་རྗེ་སློབ་དཔོན་དབང་། །ཐུགས་རྗེའི་གཏེར་ཕྱེས་བདག་ལ་སྩོལ། །ཅེས་ལན་གསུམ་བརྗོད། ངས་ཁྱེད་རང་གིས་གཡས་རྡོ་རྗེ་གཏད། གཡོན་དུ་དྲིལ་བུ་གཏད། མགོ་རྒྱན་དབུ་ལ་བཀོན། མཆན་དུ་ཁ་ཊྭཱྃ་གཏད་པར་བསྒོམ་ཞིག །བྱས་ལ། རྡོ་རྗེ་མཁའ་འགྲོ་ལེགས་བྱིན་པའི། །རྡོ་རྗེ་སློབ་དཔོན་དབང་བསྐུར་སྟེ། རྡོ་རྗེ་འཛིན་པ་ཁྱེད་གྱུར་ཏོ། །སློབ་མ་ཡོངས་སུ་སྡུད་པར་གྱིས། །ༀ་བཛྲ་ཌཱཀྐི་ནི་མ་ཧཱ་གྷུ་རུ་ཧཱུྃ། དག་པ་ནི་སློབ་མའི་ཚོགས་སྡུད་ནས་གཞན་དོན་ལ་དབང་བ་ཡིན་ནོ། །དེ་བདུན་གྱིས་བུམ་དབང་སོང་། གཉིས་པ་གསང་བའི་དབང་བསྐུར་བ་ནི། མཎྜལ་འབུལ་ལ། གསོལ་བ་འདེབས་པ་འདིའི་རྗེས་ཟློས་མཛོད་ཅིག །བླ་མ་དཀྱིལ་འཁོར་ལྷ་ཚོགས་རྣམས། །གསང་བའི་དབང་མཆོག་རིན་པོ་ཆེ། །བདག་ཅག་རྣམས་ལ་བསྐུར་དུ་གསོལ། །ལན་གཉིས་པ་དང་གསུམ་པའི་རྗེས་ཟློས་མཛོད་ཅིག །ཡང་འདི་ལྟར་དུ་བསྒོམ། ཕྱོགས་བཞིའི་མཁའ་འགྲོ་སྡེ་ལྔ། དབུས་ཀྱི་གཙོ་མོ་རྡོ་རྗེ་མཁའ་འགྲོ་མ་ལ་ཐིམ། ཁ་ཊྭཱྃ་ག་ཡབ་དུ་གྱུར་ནས་ཡབ་ཡུམ་གཉིས་སྙོམ་པར་ཞུགས་པས། ཐིག་ལེ་དཀར་དམར་གཙོ་མོའི་བྷ་གའི་ནང་དུ་བབ་སྟེ། ཚུར་འཕྲོས་པས་ཁྱེད་རང་རྣམས་ཀྱི་ལྕེ་ཐོག་ཏུ་བྱུང་བར་བསྒོམ་ཞིག །བྱས་ལ་ཚིག་འདི་བརྗོད། སངས་རྒྱས་ཀུན་གྱི་སྐུ་གསུང་ཐུགས། །ཐབས་དང་ཤེས་རབ་གཉིས་མེད་པས། །གསང་བའི་གནས་ལ་ལེགས་བྱུང་བས། །རིགས་ཀྱི་བུ་ལ་དབང་བསྐུར་རོ། །ༀ་ཤུ་ཏྲ་རག་ཏྲ་ཨ་མྲྀ་ཏ་ཧཱུྃ། དེ་ལྟར་བརྗོད་པས། སངས་རྒྱས་ཐམས་ཅད་ཐིག་ལེ་དཀར་དམར་གྱི་རྣམ་པར་ཞུ་ནས། རང་གིས་མགྲིན་པར་ཐིམ་པར་བསམ་པ་ནི་གསང་བའི་དབང་ངོ་། །གསུམ་པ་ཤེས་རབ་ཡེ་ཤེས་ཀྱི་དབང་ནི། མཎྜལ་འབུལ། གསོལ་བ་གདབ་པའི་རྗེས་ཟློས་མཛོད་ཅིག །བླ་མ་དཀྱིལ་འཁོར་ལྷ་ཚོགས་རྣམས། །ཤེས་རབ་ཡེ་ཤེས་དབང་མཆོག་ནི། །བདག་ཅག་རྣམས་ལ་བསྐུར་དུ་གསོལ། །ལན་གཉིས་པ་དང་གསུམ་པའི་རྗེས་ཟློས་མཛོད་ཅིག །རྗེ་བཙུན་མའི་ཙཀ་ལི་གཏད་ལ། འདི་ལྟར་བསྒོམ་མཛོད། གཙོ་མོ་ཕོ་བྲང་གི་དབུས་ནས་བྱོན་ཏེ། སྐྱེས་པ་རྣམས་ཀྱི་དོན་དུ་རྡོ་རྗེ་མཁའ་འགྲོར་གྱུར། བུད་མེད་རྣམས་ཀྱི་དོན་དུ་བཛྲ་ཧེ་རུ་ཀར་གྱུར་སྟེ། རང་རང་ལ་ཞལ་སྦྱོར་བར་སྒོམས་ཤིག །བྱས་ལ། སློབ་དཔོན་གྱིས་འདི་བརྗོད་ཅིག །སྟོང་ཉིད་སྙིང་རྗེ་དབྱེར་མེད་པས། །བདེ་ཆེན་ཐབས་དང་ཤེས་རབ་འདི། །ཁྱོད་ཀྱིས་རྟག་ཏུ་བརྟེན་གྱུར་ཅིག །སངས་རྒྱས་རྣམས་དང་མཉམ་པར་གྱུར། །ༀ་བཛྲ་མ་ཧཱ་སུ་ཀ་ཤུ་ཛྙཱ་ན་ཧཱུྃ། ཅེས་བརྗོད་པས་སྙོམ་པར་ཞུགས་པས། བདེ་སྟོང་དབྱེར་མེད་པའི་ཉམས་རྒྱུད་ལ་སྐྱེ་བར་བསྒོམ་པ་ནི། ཤེས་རབ་ཡེ་ཤེས་ཀྱི་དབང་ཡིན་ནོ། །བཞི་པ་ཚིག་དབང་བསྐུར་བ་ནི། མཎྜལ་འབུལ། གསོལ་བ་གདབ་པ་འདིའི་རྗེས་ཟློས་མཛོད། བླ་མ་དཀྱིལ་འཁོར་ལྷ་ཚོགས་རྣམས། །བཞི་པ་ཚིག་དབང་རིན་པོ་ཆེ། །བདག་ཅག་རྣམས་ལ་བསྐུར་དུ་གསོལ། །ལན་གཉིས་པ་དང་གསུམ་པའི་རྗེས་ཟློས་མཛོད། ད་འདི་ལྟར་དུ་བསྒོམ། ཡུམ་རྡོ་རྗེ་རིགས་ཀྱི་མཁའ་འགྲོ་མ་དེ་རང་ལ་ཐིམ། དབང་བསྐུར་མཁན་པོ་སློབ་དཔོན་ཀྱང་རང་ལ་ཐིམ། རྟེན་སྣོད་བཅུད་ཐམས་ཅད་རང་བཞིན་འཇའ་ཡལ་བ་བཞིན་སྟོང་པ་ཉིད་དུ་སོང་། དབང་བསྐུར་མཁན་གྱི་སློབ་དཔོན། ལེན་པའི་སློབ་མ་དབང་རྫས་དང་ཐམས་ཅད་འཁོར་གསུམ་ཡོངས་སུ་དག་པར་བསྒོམ་ཅིག་བྱས་ལ། སློབ་དཔོན་གྱིས་ཚིག་འདི་བརྗོད། འདི་ལྟར་འདས་དང་བརྟན་གཡོའི་ཚོགས། །སྒྱུ་མ་ཆེན་པོ་རང་བཞིན་ཆེ། །ཐམས་ཅད་ཆོས་སྐུ་མཉམ་པ་ཉིད། །རིགས་ཀྱི་བུ་ཁྱོད་དབང་བསྐུར་རོ། །ༀ་སརྦ་དྷརྨཱ་སྭ་བྷ་ཝ་ཤུདྡྷོ྅་ཧོ། ཅེས་བརྗོད་པས། སྣང་སྲིད་འཁོར་འདས་ཀྱི་ཆོས་ཐམས་ཅད་རང་རིག་སེམས་ཀྱི་ཆོ་འཕྲུལ་དག་པ་གསུམ་གྱི་ངོ་བོ་དབྱེར་མེད་སྟོང་པ་རང་བཞིན་ཡིན་སྙམ་དུ་བསམ་མོ། །དེ་རྣམས་ནི་དབང་བཞི་གདན་ཐོག་གཅིག་ཏུ་བསྡུས་པའི་ཆོ་གའོ། །དེ་དངོས་གཞི་སོང་། སྤྱི་དོན་གསུམ་པ་རྗེས་ལ་གསུམ་སྟེ། ཡུམ་ཆེན་གྱི་གཏོར་དབང་དང་། མ་ཅིག་གི་གཏོར་དབང་དང་། དམ་པའི་གཏོར་དབང་ངོ་། །དང་པོ་མཎྜལ་འབུལ། གསོལ་བ་གདབ་པ་ནི། བླ་མ་དཀྱིལ་འཁོར་ལྷ་ཚོགས་རྣམས། །གཏོར་མའི་དབང་ཆོག་དམ་པ་ནི། །བདག་ཅག་རྣམས་ལ་བསྐུར་དུ་གསོལ། །ཅེས་ལན་གསུམ་དབང་གཏོར་སློབ་མའི་སྤྱི་བོར་བཞག་ལ། འོ། ཁྱེད་རང་རྣམས་ཀྱི་སྤྱི་བོར་གཏོར་མ་འདི་དང་ཐ་དད་མེད་པར་ཆོས་སྐུ་ཡུམ་ཆེན་མོ་ལ་སྲས་ཕྱོགས་བཅུ་སངས་རྒྱས་དང་། བླ་མ་བརྒྱུད་པ་དང་བཅས་པས་བསྐོར་ནས་བཞུགས་པར་བསྒོམ་ལ། བརྒྱུད་པའི་གསོལ་འདེབས་བྱེད་ཚར་ནས། རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱིས་བྱིན་གྱིས་རློབས་ཤིག །མ་ཅིག་ལབ་སྒྲོན་མས་བྱིན་གྱིས༴ ཡུམ་ཆེན་མོ་ཤེས་རབ་ཀྱིས་ཕ་རོལ་ཏུ་ཕྱིན་མས་བྱིན་གྱིས༴ ད་ལྟ་ཉིད་དུ་བྱིན་གྱིས་རློབས་ཤིག །ཚར་ནས། ཆོས་སྐུ་ཡུམ་ཆེན་མོ་འཁོར་དང་བཅས་པ་འོད་དུ་ཞུ་ནས་ཁྱེད་རང་རྣམས་ལ་ཐིམ་པར་བསྒོམ་མཛོད། གཏོར་ཆུ་བླུད། མ་ཅིག་ལབ་སྒྲོན་གྱི་གཏོར་དབང་ནི། དབང་གཏོར་ལ་སྐྱེམས་མཆོད་བྱ། མཎྜལ་འབུལ་ལ་གསོལ་བ་གདབ་པ་ནི། བླ་མ་དཀྱིལ་འཁོར་ལྷ་ཚོགས་རྣམས། །གཏོར་མའི་དབང་མཆོག་དམ་པ་འདི། །བདག་ཅག་རྣམས་ལ་བསྐུར་དུ་གསོལ། །ཅེས་ལན་གསུམ། སློབ་མའི་སྤྱི་བོར་གཏོར་མ་བཞག་ལ། འོ། ཁྱེད་རང་རྣམས་ཀྱི་སྤྱི་བོར་གཏོར་མ་དང་ཐ་དད་མེད་པར་མ་ཅིག་སྐུ་མདོག་དཀར་མོ་གཞུང་ལྟར་བསྐྱེད་ལ། དེའི་ཕྱི་རོལ་ཤར་རྡོ་རྗེ་མཁའ་འགྲོ་ལ་རྡོ་རྗེ་མཁའ་འགྲོ་འབུམ་གྱིས་བསྐོར་བ། དེ་བཞིན་དུ་ལྷོ་རིན་ཆེན་མཁའ་འགྲོ་ལ༴ ནུབ་པདྨ་མཁའ་འགྲོ་ལ་པདྨ༴ བྱང་ལས་ཀྱི༴ ལས་ཀྱི༴ ཅེས་དེ་དང་། དེའི་ཕྱི་རོལ་དུ་ཤ་ཟའི་མཁའ་འགྲོ་དང་། འཇིག་རྟེན་མཁའ་འགྲོས་སྤྲིན་དཔུང་གཏིབ་པ་ལྟར་བསྒོམ། གསོལ་འདེབས་ལན་མོ་བྱེད་དུ་གཞུག །ཡུམ་ཆེན་ཐུགས་ལས་སྤྲུལ་པའི་སྲས། །ཞེས་སོགས། མཁའ་འགྲོ་འབུམ་བསྐུལ་ཚངས་བར་བྱེད། དེ་ནས་མ་ཅིག་འོད་དུ་ཞུ་ནས་གཏོར་ཆུ་བླུད་པའོ། །དམ་པའི་གཏོར་དབང་བྱེད་པ་ནི། གཏོར་ཆུ་བླུག་ལ། གཏོར་མ་མི་དམིགས་པ་ལས་པད་ཟླའི་སྟེང་དུ་དམ་པ་རྒྱ་གར་སྐུ་མདོག་སྨུག་ནག་སེང་ལྡེང་གིས་མདོག་ལྟ་བུ། ཞལ་གཅིག་ཕྱག་གཉིས་གཡས་ཌཱ་མ་རུ་དང་གཡོན་པས་མི་རྐང་གིས་གླིང་བུ་ཚག་ཚག་འབུད་པ། སྤྱན་ཁྲ་ཧྲིག་ཧྲིག་མཛད་པ། དེའི་སྤྱི་བོར་བཀའ་རྒྱུད་ཀྱི་བླ་མ་བཞུགས་པ། གཡས་སུ་དཔའ་བོ། གཡོན་དུ་མཁའ་འགྲོ་མདུན་དུ་དམ་ཅན། རྒྱབ་ཏུ་ཆོས་སྐྱོང་། སྐབས་ན་ཌཱཀྐི་མ་རྣམས་ཀྱིས་བསྐོར་བར་དམིགས་ལ། སློབ་མས་གསོལ་འདེབས་ཀྱི་ལན་མོ་བྱེད་ཅིང་། རྗེ་བླ་མ་རྣམས་ལ་སོགས་དམ་པའི་རྟག་བསྟོད་བྱེད་ཅིང་། དེ་ཚར་ནས། དམ་པ་འཁོར་དང་བཅས་པ་འོད་དུ་ཞུ་ནས། ཁྱེད་རང་རྣམས་ལ་ཐིམ་པར་བསྒོམ། །ཅེས་བརྗོད་ལ་གཏོར་ཆུ་བླུད། དེས་རྗེས་ཀྱི་བྱ་བ་སོང་། དེ་ལྟར་སྦྱོར་དངོས་རྗེས་གསུམ་གྱི་དབང་བསྐུར་ཆོས་ཀྱི་གོ་འབྱེད་ཀུན་དགའ་འབུམ་པས་བྲིས་པའོ།། །།གཅོད་དབང་ནམ་མཁའ་གོ་འབྱེད་རྒྱས་སྤྲོས་ཅན་བཞུགས། ༀ་སྭཱ་སྟི། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །རྒྱལ་བའི་ཡུམ་གྱུར་ཤེས་རབ་ཕ་རོལ་ཕྱིན། །སྐྱེ་འགག་མཐའ་བྲལ་དེ་ལ་གུས་བཏུད་ནས། །འགྲོ་ལ་ཕན་ཕྱིར་སྐྱེ་མེད་གཅིག་ཆོད་ཀྱིས། །ཆོས་དབང་སེམས་ལ་བསྐུར་བ་བྲི་བར་བྱ། །དེ་ལ་ཤེས་རབ་ཀྱིས་ཕ་རོལ་ཏུ་ཕྱིན་པ་སྐྱེ་མེད་གཅིག་ཆོད་དུ་བསྟན་པ། བཀའ་བརྒྱུད་དོན་གྱི་མན་ངག །བཀའ་དངོས་ཀྱི་སྒོ་ནས་སློབ་མ་རྗེས་སུ་བཟུང་བ་ལ་གསུམ་སྟེ། སྦྱོར་བ་དང་། དངོས་གཞི། རྗེས་དང་གསུམ་མོ། །དང་པོ་ལ་བཅུ་གཉིས་སྟེ། མཎྜལ་དང་། མཆོད་གཏོར་བཤམ་པ་དང་། བགེགས་གཏོར་བཏང་ཞིང་བཟླས་པ་བྱ་བ་དང་། དམ་ཚིག་པ་བསྐྱེད་པ་དང་། ཡེ་ཤེས་སེམས་དཔའ་སྤྱན་འདྲེན་པ་དང་། མཆོད་ཡོན་འབུལ་བ། ཁྲུས་གསོལ་བ། གདན་འབུལ་བ། མཆོད་པ་བྱིན་གྱིས་རླབས་ཅིང་འབུལ་བ། བསྟོད་པ་བྱ་བ། སློབ་མའི་བློ་བཅོས་པ། སྐྱབས་འགྲོ་སེམས་བསྐྱེད་བྱེད་པ། ཡན་ལག་བརྒྱད་པ་བྱའོ། །དང་པོ་མཎྜལ་དང་མཆོད་གཏོར་བྱ་བ་ནི། གནས་ཤིང་གཅིག་གམ། དུར་ཁྲོད་དམ། བས་མཐའ་ལ་སོགས་བླ་གབ་མེད་པར། དབེན་པའི་གནས་སུ། བླ་རེ་དང་ཡོལ་བ་བྲེས་ནས། སྐུ་གསུང་ཐུགས་ཀྱིས་རྟེན་བཀྲམ། དེ་ལ་མཎྜལ་གྲུ་བཞི་ལ་བ་ཡི་རྣམ་ལྔས་བྱུག །ཐིག་གདབ་པདྨ་འདབ་བཅུ་ཕྱོགས་མཚོན་བྱ། ལྟེ་བ་སེར་པོ་གྲུ་ཆད་ལྗང་ཀུ་ཁྱམས་ཕྱོགས་མཚོན་བྱའོ། །དེ་ནས་པདྨའི་ལྟེ་བ་དང་འདབ་མ་ལ། མེ་ཏོག་ཚོམ་བུ་བཅུ་གཅིག་བཀོད། ཁྱམ་གྱི་ཕྱོགས་བཞིར་བཞི། གྲུ་ཆད་ལ་བཞི་སྟེ་བཅུ་དགུ་བཀོད། ལྷ་བཤོས་དང་གཏོར་མ་ལྷ་གྲངས་དང་མཉམ་པར་བཀོད། གཏོར་མ་བཟང་པོ་གཅིག་ལ། ཤ་དང་ཁུར་བ་ལ་སོགས་པའི་ཚོགས་རྫས་དང་། རྒྱན་སྣ་ཚོགས་ཀྱིས་བརྒྱན་པ་པདྨའི་ལྟེ་བར་སྟེག་གི་སྟེང་དུ་བཞག་གོ། །དེ་ལ་མཆོད་པ་འབྱོར་ཚད་ཀྱིས་བསྐོར་བར་བྱའོ། །གཉིས་པ་བགེགས་གཏོར་བཏང་ཞིང་བཟླས་པ་བྱ་བ་ནི། སློབ་མ་དུ་ཡོད་པའི་གྲངས་དང་མཉམ་པའི་གླུད་གཏོར་བྱས་ལ། ལན་ཆགས་ཀྱིས་མགྲོན་ལ་སྦྱིན་ལ་བཀའ་བསྒོ་བྱའོ། །སློབ་མ་རྣམས་ཀྱིས་བརྒྱད་སྟོང་ངམ། སྡུད་པ་འདོན། ཡུམ་གྱིས་བསྐྱེད་རིམས་བསྟན་ནས་ག་ཏེ་བཟླས་སུ་བཞུགས་ལ་ཆུ་གཏོར་བཏང་། དེས་ནི་དཔོན་སློབ་རྣམས་ལ་བར་ཆད་མི་འོང་བ་ཡིན་ནོ། །གསུངས་སོ། །གསུམ་པ་དམ་ཚིག་པ་བསྐྱེད་པ་ནི། མཎྜལ་མི་དམིགས་པ་ལས། རིན་ཆེན་སྣ་བཞི་ལས་གྲུབ་པའི་ཕོ་བྲང་གིས་དབུས་སུ། པདྨའི་སྡོང་པོ་ཆེན་པོ་ཡལ་ག་ལོ་འདབ་རྒྱས་པ། ནམ་མཁའ་ཐམས་ཅད་ཁེངས་པར་བསམ། དེའི་དབུས་སུ་པདྨ་འདབ་མ་བཅུའི་ལྟེ་བ་ལ། སེངྒེ་དང་པད་ཟླའི་སྟེང་དུ་ཡུམ་ཆེན་མོ་ཤེས་རབ་ཀྱིས་ཕ་རོལ་ཏུ་ཕྱིན་མ། སྐུ་མདོག་གསེར་གཙོ་མ་ལྟ་བུ་ཞལ་གཅིག་ཕྱག་བཞི་པ། ཞབས་རྡོ་རྗེའི་དཀྱིལ་ཀྲུང་དུ་བཞུགས་པ། གཡས་དང་པོ་རྡོ་རྗེ་རྩེ་ལྔ་པ་ཐུགས་ཀར་འཛིན་པ། འོག་མ་ཤེས་རབ་ཀྱི་རལ་གྲི། གཡོན་དང་པོ་མཉམ་བཞུགས། འོག་མ་ན་ཤེས་རབ་ཀྱི་ཕ་རོལ་དུ་ཕྱིན་པའི་པོ་ཏི་བསྣམས་པ། ལང་ཚོ་དར་ལ་བབ་པ་རྒྱན་སྣ་ཚོགས་ཀྱིས་བརྒྱན་པའོ། །འོད་ཀྱིས་རང་བཞིན་ཅན། ཉི་མ་འབུམ་གྱི་གཟི་བརྗིད་ཅན་དུ་བསྒོམ། དེའི་གཡས་སུ་མར་མེ་མཛད་ལ་སོགས་པའི་སངས་རྒྱས་རྣམས་བསམ། གཡོན་དུ་བྱམས་པ་ལ་སོགས་པའི་མ་བྱོན་པའི་སངས་རྒྱས་རྣམས་བསམ། སྟེང་གི་ནམ་མཁར་ཤཱཀྱ་ཐུབ་པ་ལ་སོགས་ད་ལྟར་བཞུགས་པའི་སངས་རྒྱས་རྣམས་དང་། བརྒྱུད་པའི་བླ་མ་རྣམས་དང་ཡི་དམ་མབཞུགས་པར་བསམ། དེ་ནས་ཤར་ཕྱོགས་ཀྱིས་འདབ་མ་ལ་ཐུགས་ལས་འཁྲུངས་པའི་སྲས་ཡང་དག་པར་རྫོགས་པའི་སངས་རྒྱས་དཀོན་མཆོག་འབྱུང་གནས་བཞུགས་པར་བསམ། དེ་བཞིན་དུ་ལྷོར་མྱ་ངན་མེད་པའི་དཔལ། ནུབ་ཏུ་རིན་ཆེན་འོད་འཕྲོ། བྱང་དུ་རྒྱལ་བའི་དབང་པོ། བྱང་ཤར་དུ་ཏིང་ངེ་འཛིན་གྱི་གླང་པོ་དམ་པའི་དཔལ། ལྷོ་ནུབ་ཏུ་ཉི་མའི་དཀྱིལ་འཁོར་སྣང་བ་དམ་པའི་དཔལ། ནུབ་བྱང་དུ་གདུག་དམ་པའི་དཔལ། ཡང་ཤར་གྱི་འདབ་མ་ལ་དགའ་བའི་དཔལ། ནུབ་ཀྱིས་འདབ་མ་ལ་པདྨའི་དཔལ་བཞུགས་པར་བསམ། དེ་དག་ཀྱང་ཆོས་འཆད་ཀྱི་ཕྱག་རྒྱ་ཅན། སྤྲུལ་སྐུའི་ཆ་ལུགས་སྐུ་མདོག་མ་ངེས་སོ། །རང་རང་གིས་འཁོར་གྱིས་བསྐོར་བར་བསམ། པདྨའི་ཡལ་ག་ཕྲ་མོ་རྣམས་གྱེས་པ་ལ། ལྷའི་བུ་དང་བུ་མོ་རྣམས་ཀྱི་མེ་ཏོག་གི་ཆར་འབེབས་པ། སྤོས་ཀྱི་དུད་པ་འཐུལ་པ། ལ་ལས་ཕེག་རྡོབ་པ། དུང་འབུད་པ་དང་། གླུའི་མཆོད་པ་འབུལ་བ་ལ་སོགས་པ་དཔག་ཏུ་མེད་པར་བསམ། པད་འདབ་བཅུའི་འོག་གིས་འདབ་མ་ལ། ས་བཅུའི་བྱང་ཆུབ་སེམས་དཔའ་རྣམས་དང་། ཀུན་དགའ་བོ་ལ་སོགས་ཉན་ཐོས་དཔག་ཏུ་མེད་པ་རྣམས་ཀྱང་བཞུགས་པར་བསམ། དེའི་འོག་གིས་པད་འདབ་རྣམས་ལ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་ལ་སོགས་པ་རྣམས་ཡུམ་ལ་འདུད་པའི་ཚུལ་དུ་བསམ། གྲུ་ཆད་ལ་མཆོད་པའི་ལྷ་མོ་རྣམས་བསམ། འཁྱམས་ཀྱི་ཕྱོགས་བཞིར། ཤར་དུ་འཕགས་སྐྱེས་པོ་དཀར་པོ། ལྷོར་ཡུལ་འཁོར་སྲུང་སེར་པོ། ནུབ་ཏུ་སྤྱན་མི་བཟང་དམར་པོ། བྱང་དུ་རྣམ་ཐོས་སྲས་ལྗང་གུ། དེ་རྣམས་ཀྱང་རང་རང་གིས་འཁོར་དཔག་ཏུ་མེད་པས་བསྐོར་ནས། མཆོད་པ་དཔག་ཏུ་མེད་པ་འབུལ་ནས་བསྟན་པ་བསྲུང་བར་བསམ། དེ་ལྟར་གནས་དེ་ཉིད་གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་བལྟ་བར་བྱའོ། །བཞི་པ་ཡེ་ཤེས་པ་སྤྱན་དྲང་བ་ནི། རང་གིས་སྙིང་ཁ་ནས་འོད་འཕྲོས་པས། ཡུམ་ཆེན་མོ་འཁོར་དང་བཅས་པ་སྤྱན་འདྲེན་པར་བྱ་སྟེ། མ་ལུས་སེམས་ཅན་ཀུན་གྱིས་མགོན་གྱུར་ཅིག །བདུད་སྡེ་དཔུང་བཅས་མི་བཟད་འཇོམ་མཛད་ལྷ། །དངོས་རྣམས་མ་ལུས་ཅི་བཞིན་མཁྱེན་གྱུར་པས། །ཡུམ་ཆེན་འཁོར་བཅས་མ་ལུས་གཤེགས་སུ་གསོལ། །ཐུགས་ལས་སྐྱེས་པའི་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་དཔའ་ཉན་ཐོས་ཚོགས་རྣམས་དང་། །ཚངས་པ་བརྒྱ་བྱིན་རྒྱལ་པོ་ཆེན་པོ་བཞི། །བསྟན་པ་སྲུང་མཛད་འཁོར་བཅས་གཤེགས་སུ་གསོལ། །ཨེ་ཧྱ་ཧི་བྷ་གྷ་ཝན་མ་ཧཱ་ཀ་རུ་ནི་ཀ་ཏྲི་ཤ་ས་པ་རི་ཝ་ར་ས་མ་ཡ་སྟྭཾ། བཛྲ་ས་མ་ཡ་ཛ་ཛཿ ཅེས་པས་སྤྱན་འདྲེན་ལ། དམ་ཚིག་པ་ལ་བསྟིམ། ལྔ་པ་མཆོད་ཡོན་འབུལ་བ་ནི། ཡུམ་ཆེན་འདིར་ནི་བྱོན་པ་ལེགས། །བདག་བསོད་ནམས་སྐལ་བར་ལྡན། །བདག་གིས་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ༀ་ན་མ་སརྦ་ཏ་ཐཱ་ག་ཏ་ག་ག་ན་པུ་ཙ་མེ་ག་ས་མ་ཡེ་ཧཱུྃ། ཅེས་པས་ལྷ་མོ་མཆོད་ཡོན་ཐོག་པ་མང་པོས་འབུལ། དྲུག་པ་སྐུ་ཁྲུས་གསོལ་བ་ནི། ཅི་ལྟར་བལྟམ་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷའི་ཆུ་ནི་དག་པ་ཡི། །དེ་བཞིན་བདག་གིས་སྐུ་ཁྲུས་གསོལ། །ༀ་ན་མ་སརྦ་ཏ་ཐཱ་ག་ཏ་ཨ་བྷི་པྲ་བྷི་སད་ཀ་ར་པྲ་ཏི་ཛ་ཧཱུྃ། ཞེས་ལྷ་མོས་བུམ་ཆུ་ཐོག་པས་ཁྲུས་གསོལ། བདུན་པ་གདན་འབུལ་བ་ནི། སེངྒེ་པདྨའི་གདན་སྟེང་དུ། །ཡུམ་ཆེན་བདག་ལ་བརྩེ་དགོངས་སྟེ། །ཅི་སྲིད་མཆོད་པ་བདག་བགྱིས་པ། །དེ་སྲིད་ཡུམ་ཆེན་བཞུགས་སུ་གསོལ། །ༀ་སརྦ་ཏ་ཐཱ་ག་ཏ་པདྨ་ཀ་མ་ལ་ཡེ་སྟྭཾ། ཅེས་ཕུན་སུམ་ཚོགས་པའི་གདན་འབུལ་ལོ། །བརྒྱད་པ་མཆོད་པ་སྦྱིན་པ་བྱེད་ཅིང་འབུལ་བ་ནི། ག་ཏེའི་སྔགས་ལན་བདུན་བརྗོད་པས། མཆོད་རྫས་ཀྱི་ཉེས་སྐྱོན་དང་དྲི་མ་དག་ནས་གཙང་བར་བྱས་པར་བསམ། ༀ་ཨཱཿཧཱུྃ། ལན་བདུན་བརྗོད་པ། མཆོད་པ་རྣམས་ལྔས་འདོད་ཡོན་ལྔ་དང་རྒྱལ་སྲིད་རིན་ཆེན་སྣ་བདུན་དང་། མཆོད་པའི་སྤྲིན་བསམ་གྱིས་མི་ཁྱབ་པར་བསམ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཅི་སྙེད་ཡོད་པ་དང་། །ཡུམ་ཆེན་འཁོར་དང་བཅས་ལ་འབུལ། །ཐུགས་རྗེས་དགོངས་ཏེ་བཞུགས་སུ་གསོལ། །ༀ་ན་མ་སརྦ་ཏ་ཐ་ག་ཏ་ཨརྒྷཾ་པྲ་ཏི་ཙ་པུ་ཛ་མེ་གྷ་ས་མུ་ཏྲ་སྥ་ར་ན་ས་མ་ཡེ་ཧཱུྃ། རབ་འབྱམས་རྒྱ་མཚོ་དཔག་མེད་ན། །མེ་ཏོག་ཇི་སྙེད༴ ཡུམ་ཆེན༴ ཐུགས་རྗེ༴ པུཥྤེ་སོགས་དེ་བཞིན་དུ། བདུག་སྤོས། དྷུ་པེ༴ སྣང་གསལ༴ ཨ་ལོ་ཀེ༴ དྲི་མཆོག༴ གྷནྡྷེ༴ ཞལ་ཟས༴ ནེ་ཝེ་དྱེ༴ སྒྲ་སྙན༴ ཤཔྡ་སོགས་སྦྱར་ལ་སྤྲོས་པ་ལ་དགའ་ན། འདོད་ཡོན་ལྔ་རཏྣ་ལ་སོགས་པ་མཆོད་པར་བྱའོ། །ཡུམ་གཏོར་ནི་སྔར་གཏོར་མ་གཞན་དང་དུས་གཅིག །བྱིན་རླབས་བྱས་ལ། ག་ཏེའི་སྔགས་ཤམ་དུ་ཁ་ཧི་ཅེས་འབུལ་ལོ། །དགུ་པ་བསྟོད་པ་ནི། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་ལྟ་བས་ཆོག་མི་ཤེས། །བསམ་གྱི་མི་ཁྱབ་ཡོན་ཏན་ལྡན། །བླ་མའི་སྐུ་ལ་ཕྱག་འཚལ་བསྟོད། །བླ་མའི་གསུང་ནི་ཚངས་པའི་དབྱངས། །བདག་མེད་སེངྒེའི་སྒྲ་སྒྲོགས་ཤིང་། །མུ་སྟེག་ལོག་ལྟ་འཇོམས་མཛད་པའི། །བླ་མའི་གསུངས་ལ་ཕྱག་འཚལ་བསྟོད། །བླ་མའི་ཐུགས་ནི་ནམ་མཁའ་འདྲ། །བདེ་གསལ་མི་རྟོག་ངང་ཚུལ་ཅན། །རྣམ་ཐར་གསུམ་ལ་ངེས་འབྱུང་བའི། །བླ་མའི་ཐུགས་ལ་ཕྱག་འཚལ་བསྟོད། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་བསྟོད། །བལྟ་བས་མི་ངོམ་འགྲོ་བའི་དཔལ་དུ་ཤར། །ཞལ་གཅིག་ཕྱག་བཞི་གཙོ་མ་གསེར་གྱི་མདོག །རིན་ཆེན་རྒྱན་སྤྲས་རྡོ་རྗེའི་དཀྱིལ་ཀྲུང་བཞུགས། །རྒྱལ་བའི་ཡུམ་གྱུར་ཁྱོད་ལ་ཕྱག་འཚལ་བསྟོད། །ཞིང་ཁམས་རྣམ་དག་གསེར་གྱི་ས་གཞི་ལ། །རིན་ཆེན་རྣམ་པ་མང་པོ་གཅལ་དུ་བཀྲམ། །མེ་ཏོག་པུནྜ་རི་ཀ་ཆར་དུ་འབེབ། །ཡུམ་གྱུར་དགེ་མ་ཁྱོད་ལ་ཕྱག་འཚལ་བསྟོད། །ཚོགས་གཉིས་ལས་འཁྲུངས་ཡིད་བཞིན་དཔག་བསམ་ཤིང་། །འགྲོ་བའི་རེ་སྐོང་གང་ལ་གང་འདུལ་གྱིས། །སེམས་ཅན་མ་ལུས་སྨིན་ཅིང་གྲོལ་མཛད་པའི། །ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་བསྟོད། །སྟོང་ཉིད་བཅོ་བརྒྱད་ཆོས་ཀྱི་སྡོང་པོ་ལ། །ཚད་མེད་བཞིའི་ལོ་འདབ་རྒྱས་གྱུར་ཅིག །སྐྱེ་འགགས་མེད་པའི་འབྲས་བུ་སོ་སོར་སྨིན། །ས་བཅུའི་བྱང་ཆུབ་སེམས་དཔའ་རྣམས་ལ་ཕྱག་འཚལ་བསྟོད། །དེ་ནས་ཚོགས་མཆོད་དང་གྲིབ་ཆོག་བྱ། བཅུ་པ་སློབ་མའི་བློ་བཅོས་པ་ནི། དལ་འབྱོར་རྙེད་དཀའ་ནས། འཆི་བ་མི་རྟག་པ་ལས་རྒྱུ་འབྲས་འཁོར་བའི་ཉེས་དམིགས་རྣམས་བཤད་པར་བྱའོ། །བཅུ་གཅིག་པ་སྐྱབས་འགྲོ་སེམས་བསྐྱེད་ནི། སངས་རྒྱས་ཆོས་ཀྱི་སྐུ། ཆོས་སྟོང་ཉིད་སྙིང་རྗེ་དབྱེར་མེད་པ། དགེ་འདུན་དག་པའི་ས་ལ་གནས་པ་ལ་སྐྱབས་སུ་འགྲོ་སྟེ། རང་གི་ལུས་ལོངས་སྤྱོད་ཐམས་ཅད་མཆོད་པར་འབུལ་ལ། བླ་མ་ལ་སངས་རྒྱས་ཀྱི་འདུ་ཤེས་བཞག་ལ། རྗེས་ཟློས་བྱ་བ་ནི། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་དམ་པ་རྣམས་ཀྱི་མཆོག །ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཞི་བ་འདོད་ཆགས་བྲལ་བ་རྣམས་ཀྱི་མཆོག །དོན་དམ་པ་མྱ་ངན་ལས་འདས་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །ས་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པའི་དགེ་འདུན་པ་རྣམས་ལ་སྐྱབས་མཆིའོ། །ཅེས་ལན་གསུམ་བརྗོད། མེ་ཏོག་ལན་གཉིས་གཏོར་ལ། ཐབས་ཡིན་ནོ། །ལེགས་སོ། །ཞེས་བརྗོད་ལ། དེ་ནས་སེམས་བསྐྱེད་པ་ནི། བླ་མ་ལ་སངས་རྒྱས་ཀྱི་འདུ་ཤེས་བསྐྱེད་ལ། བདག་གིས་ལུས་དང་ལོངས་སྤྱོད་ཐམས་ཅད་སེམས་བསྐྱེད་པ་ཡོན་དུ་འབུལ་བར་བྱ་སྟེ། སློབ་དཔོན་ཞི་བ་ལྷའི་ཞལ་ནས། བདག་གིས་ལུས་དང་ལོངས་སྤྱོད་རྣམས། །ཕོང་པ་མེད་པར་བཏང་བར་བྱ། །དེ་ནི་མྱ་ངན་འདས་ལ་སྐྱེ། །ཞེས་གསུངས་པས། སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ་སྟེ། དེའི་ཆེད་དུ་སྨོན་པ་བྱང་ཆུབ་མཆོག་ཏུ་སེམས་བསྐྱེད། སྙམས་དུ་བསམ་ནས། རྗེས་ཟློས་བྱ་བ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། ཚེ་འཁོར་བ་ཐོག་མ་མེད་པ་ནས། ཐ་མ་ད་ལྟ་ལ་ཐུག་གི་བར་དུ། སྦྱིན་པའི་རང་བཞིན་དང་། ཚུལ་ཁྲིམས་ཀྱི་རང་བཞིན་དང་། བསྒོམ་པའི་རང་བཞིན་གྱིས་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ཀྱིས། ཇི་ལྟར་ཐུགས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་ནས། སྙིང་པོ་བྱང་ཆུབ་ལ་མཆིས་ཀྱི་བར་དུ། སེམས་བསྐྱེད་པར་བགྱི་སྟེ། སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་གྲོལ་བར་བགྱིའོ། །དབུག་མ་དབྱུང་རྣམས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་ལན་གསུམ་བརྗོད་ལ་མེ་ཏོག་ལན་གསུམ་གཏོར། ཐབས་ཡིན་ནོ། །ལེགས་སོ་ཞེས་བརྗོད་དོ། །དེ་ནས་ཡང་འཇུག་པ་སེམས་བསྐྱེད་པ་ནི། ལུས་ལོངས་སྤྱོད་ཕུལ་ལ། ཕ་རོལ་ཏུ་ཕྱིན་པ་དྲུག་གི་སྒོ་ནས། སེམས་ཅན་ཐམས་ཅད་ཀྱིས་དོན་དངོས་སུ་བྱ་སྙམས་ནས། རྗེས་ཟློས་བྱ་བ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུངས་ཏེ། སྙིང་པོ་བྱང་ཆུབ་ལ་མཆིས་ཀྱི་བར་དུ། སྦྱིན་པའི་ཕ་རོལ་དུ་ཕྱིན་པ་ལ་མཐར་གྱིས་བསླབ་པ་དང་། མཐར་གྱིས་སྦྱངས་པ་དང་། མཐར་གྱིས་ནན་ཏན་ཏུ་སེམས་རྣམ་པར་བསྐྱེད་པར་བགྱིའོ། །དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཐར་གྱིས་བསླབ་པ་དང་། མཐར་གྱིས་སྦྱངས་པ་དང་། མཐར་གྱིས་ནན་ཏན་དུ་སེམས་རབ་ཏུ་བསྐྱེད་པར་བགྱིའོ། །ཅེས་ལན་གསུམ་གྱིས་བརྗོད་དོ། །དེ་ལྟར་སེམས་བསྐྱེད་པ་དེ། ཁྱེད་རྣམས་བྱང་ཆུབ་སེམས་དཔའི་རིགས་སུ་གྱུར་ཏེ། རྒྱལ་བའི་ཡུམ་ལས་ཀྱང་། བྱང་ཆུབ་སེམས་དཔའི་ཁྱིམ་པའི་སྤྱོད་པ་དང་། རབ་ཏུ་བྱུང་བ་དང་ཁྱེའུ་དང་བུ་མོའི་གཟུགས་སུ་འདུག་པ་ཞེས་པའི་དོན་ཡིན་ནོ། །སེམས་བསྐྱེད་པ་དེས་སངས་རྒྱས་ཀྱི་རིགས་དང་། སྲས་ཀྱི་ཐུ་བོར་གྱུར་པ་ཡིན་ཏེ། སློབ་དཔོན་ཞི་བ་ལྷའི་ཞལ་ནས། དེང་འདིར་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པ་ཐོབ། །དེང་འདིར་སངས་རྒྱས་རིགས་སུ་སྐྱེ། །སངས་རྒྱས་སྲས་སུ་ད་གྱུར་ཏོ། །ཞེས་གསུངས་སོ། །བཅུ་གཉིས་པ་ཡན་ལག་བརྒྱད་པ་བྱ་བ་ནི། ཚར་གཉིས་རྗེས་ཟློས་བྱ། ཚར་གཅིག་བཤད་པར་བྱའོ། །གཉིས་པ་དངོས་གཞི་ལ་བཞི་སྟེ། བཅའ་གཞི་གསུམ་གྱི་བཀའི་ཐོག་ཏུ་བཞག་པ་དང་། བཅོས་སླད་མེད་པར་རིག་པ་ངོས་བཟུང་བ་དང་། ཡེ་ཤེས་ལྔའི་དབང་བསྐུར་བ་དང་། ཚོགས་ལ་ལོངས་སྤྱོད་པའོ། །དང་པོ་བཅའ་གཞི་གསུམ་གྱིས་བཀའི་ཐོག་ཏུ་བཞག་པ་ནི། ཐོག་མར་ལོངས་སྤྱོད་དང་། དངོས་མེད་ཀྱི་མཆོད་པ་ཚོགས་ཚད་འབུལ་བར་བྱའོ། །ཨརྱ་དྷེ་བའི་ཞལ་ནས། དངོས་དང་དངོས་མེད་བློ་ལ་སྣང་བ་ཡི། །མཆོད་པ་རྒྱ་ཆེན་དག་ཀྱང་འབུལ་བར་བྱ། །ཞེས་གསུངས་སོ། །དཀོན་མཆོག་གསུམ་ལ་མཆོད་པ་འབུལ་ཞིང་། བླ་མ་ལ་ལོངས་སྤྱོད་ཡོད་པའི་སུམ་ཆ་འབུལ་ལ། ཚོགས་རྫོགས་པར་བྱས་ཏེ། དེ་ལྟར་བྱས་ན། ནད་དང་གདོན་དང་སྡིག་སྒྲིབ་དག་ནས། སྟོང་ཉིད་ཡུམ་གྱི་དོན་རྒྱུད་ལ་སྐྱེས་ཏེ། མདོ་ཚིགས་སུ་བཅད་པ་ལས། ཇི་སྲིད་དགེ་བའི་རྩ་བར་མ་རྫོགས་པར། །དེ་སྲིད་སྟོང་ཉིད་དམ་པ་རྟོགས་མི་འགྱུར། །ཅེས་གསུངས་པས། མཎྜལ་ཡང་གླིང་བཞི་བརྒྱན་པ་འབུལ། དེ་ནས་བཅའ་གཞི་ནི། ཡར་ལངས་ལ་རྐང་པ་གཤིབ་ལ། །ཐལ་མོ་སྤྱི་བོར་བཞག་ལ། རིག་པ་བསྒྲིམ་སྟེ། ངག་གིས་རླུང་གཉིས་ཁ་སྦྱར་ལ་བཟུང་ངོ་། །སེམས་ཀྱིས་རྐང་མཐིལ་དུ་རྣམ་པར་ཤེས་པ་བྱ་ངང་པའི་སྒོང་ང་ཙམ་འོད་ཀྱིས་རང་བཞིན་ཅན་དུ་བསམ། སྤྱི་གཙུག་ནས་གསང་གནས་བར་དུ་སྨྱུག་ཟམ་ལྟ་བུ་སྟོང་སང་ངེ་བ་ཅིག་བསྒོམ། སློབ་དཔོན་གྱིས་རོལ་མོའི་སྒྲ་སྒྲོགས་གུ་གུལ་གྱིས་བདུག །རྩ་བ་དང་བརྒྱུད་པའི་བླ་མ་རྣམས་ཀྱིས་བྱིན་གྱིས་རློབས་ཤིག །ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མས་བྱིན་གྱིས་རློབས་ཤིག །མ་ཅིག་ཇོ་མོ་ལབ་སྒྲོན་མས་བྱིན་གྱིས་རློབས་ཤིག །ཅེས་དྲག་ཏུ་བརྗོད་པས། རྐང་མཐིལ་གྱི་རྣམ་ཤེས་འཕུར་ལ་ཁད་པ་དེ། སྒྱིད་མོ་ཁུག་ནས་ཡར་ནར་གྱི་བྱུང་ནས། གསང་གནས་སུ་སླེབ་པ་དང་། འོད་ཀྱི་ལི་ལི་འདུག་པ་ལ་ཤེས་པ་གཏད། བྱིན་གྱིས་རློབས་ཤིག་གོང་དང་འདྲ། ཡར་ལྟེ་བར་བྱུང་བ་ལ་ཤེས་པ་གཏད། བྱིན་རློབ་ཅིག་གོང་དང་འདྲ། ཡར་ལྟེ་བར་བྱུང་བ་ལ་ཤེས་པ་གཏད། དེ་ན་སྙིང་གར་གཏད། དེ་ནས་མགྲིན་པ་དེ་ནས་སྤྱི་བོར་སླེབ་པ་དང་། དཀར་མོའི་ཐུགས་ཀར་ཐིམ། དཀར་མོ་དེ་འོད་འཇའ་བཞིན་དུ་ནམ་མཁའ་ལ་ཡལ། སོང་བ་དང་། ནམ་མཁའི་གར་ཁྱབ་རིག་པས་ཁྱབ་སྟེ། དབྱིངས་དང་རིག་པ་འདྲེས་པར་བསམ། དེ་ཡང་ཡུམ་ལས། སྤྱི་གཙུག་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ཡོད་དོ། །ནམ་མཁར་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ཡོད་དོ། །ཅེས་གསུངས་པའི་དོན་ནོ། །གཉིས་པ་བཅོས་སླད་མེད་པར་རིག་པ་ངོས་བཟུང་བ་ནི། མ་ཅིག་ལབ་སྒྲོན་མའི་ཞལ་ནས། གྲིམ་གྱིས་གྲིམ་ལ་ཀློད་ཀྱིས་ཀློད། །རིག་པའི་བཞག་ས་གཅིག་དེ་ན་གདའ། །མཐར་ཐུག་ལྟ་བ་ཅིག་དེ་ན་གདའ། །མཐར་ཐུག་གིས་སངས་རྒྱས་གཅིག་དེ་ན་གདའ། །ཞེས་གསུངས་པས། ལུས་ཀློད་རླུང་བཏང་ལ། སེམས་གསལ་སྟོང་འཛིན་མེད་བཅོས་སླད་མེད་པའི་ངང་ལ་བཞག་གོ། །གསུམ་པ་ཡེ་ཤེས་ལྔའི་དབང་བསྐུར་བ་ནི། བླ་མ་ལ་མཎྜལ་ཕུལ་ལ་གསོལ་བ་གདབ་པ་ནི། བླ་མ་ཡུམ་ཆེན་འཁོར་བཅས་ཀྱི། །བདག་དང་འགྲོ་ལ་ཐུགས་བརྩེའི་ཕྱིར། །དུག་ལྔ་གདོན་ལྔ་གནས་དག་ཕྱིར། །ཡེ་ཤེས་ལྔའི་དབང་བསྐུར་གསོལ། །ཅེས་གསོལ་བ་ལན་གསུམ་གདབ་པ་དང་། གཏོར་མ་སློབ་མའི་སྤྱི་བོར་བཞག་ལ། གཏོར་མ་སློབ་མའི་སྤྱི་བོར་བཞག་པས། བཅོམ་ལྡན་འདས་རྣམ་པར་སྣང་མཛད་དུ་བསྒོམ། དེ་རང་གིས་རྒྱུད་ལ་ཐིམ་པས། གཏི་མུག་དག་ནས་ཆོས་ཀྱི་དབྱིངས་ཀྱི་ཡེ་ཤེས་རྒྱུད་ལ་སྐྱེ་བར་བསྒོམ། དེ་བཞིན་དུ་གཏོར་མ་དཔྲལ་བར་བཞག་པས། མི་སྤྱོད་པ་རྒྱུད་ལ་ཐིམ་པས་ཞེ་སྡང་དག་ནས། མེ་ལོང་ཡེ་ཤེས་རྒྱུད་ལ་སྐྱེས་པར་བསྒོམ། རྣ་བ་གཡས་པར་བཞག་པས། རིན་འབྱུང་རྒྱུད་ལ་ཐིམ་ནས། ང་རྒྱལ་དག་ནས་མཉམ་ཉིད་ཡེ་ཤེས་རྒྱུད་ལ་སྐྱེས་པར་བསྒོམ། ལྟག་པར་བཞག་པས་སྣང་བ་མཐའ་ཡས་རྒྱུད་ལ་ཐིམ་པར་བསྒོམ། འདོད་ཆགས་དག་ནས་སོ་སོར་རྟོགས་པའི་ཡེ་ཤེས་རྒྱུད་ལ་སྐྱེས་པར་བསྒོམ། རྣ་བར་གཡོན་པར་བཞག་པས། དོན་ཡོད་གྲུབ་པར་ཐིམ། ཕྲག་དོག་གནས་སུ་དག་ནས། བྱ་བ་གྲུབ་པའི་ཡེ་ཤེས་རྒྱུད་ལ་སྐྱེ་བར་བསྒོམ། དེ་ལྟར་དུག་ལྔ་དག་པས་དེ་བསྐྱེད་པའི་རླུང་རིག་ལྔ་འཁོར་དང་བཅས་པ་དག་ནས། ཡེ་ཤེས་ལྔ་ལས་གྲུབ་པའི་ལུགས་སུ་གྱུར་པར་བསྒོམ་པར་བྱའོ། །དེ་ནས་གཏོར་མ་དེ་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་དང་བརྒྱུད་པའི་བླ་མས་བསྐོར་བར་བསམ་ལ། སྤྱི་གཙུག་ཏུ་བཞག་ལ། བདག་གིས་ནད་གདོན་ཞི་བར་མཛད་དུ་གསོལ། སྡིག་སྒྲིབ་དག་པར་མཛད་དུ་གསོལ། རྟོགས་པ་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། བྱས་ནས་སློབ་མས་གསོལ་བ་གདབ་པར་བྱའོ། །སློབ་དཔོན་གྱིས། རྩ་བ་དང་རྒྱུད་པའི་བླ་མ་རྣམས་ཀྱིས་བྱིན་གྱིས་རློབས་ཤིག །ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མས་བྱིན་གྱིས་རློབས་ཤིག །མ་ཅིག་ལབ་ཀྱི་སྒྲོན་མས་བྱིན་གྱིས་རློབས་ཤིག །ནད་གདོན་ཞི་བར་བྱིན་གྱིས་རློབས་ཤིག །རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་རློབས་ཤིག །ད་ལྟ་ཉིད་དུ་བྱིན་གྱིས་རློབས་ཤིག །འདུག་ས་འདི་ཉིད་དུ་བྱིན་གྱིས་རློབས་ཤིག །ཅེས་ལན་གསུམ་བརྗོད་པར་བྱའོ། །དེ་ནས་སྤྱི་བོར་ནས་མར་ཐིམ་པར་བསམ་པ་དང་། ཡུམ་ཆེན་མོའི་བྱིན་རླབས་ཞུགས་ཏེ་ཡུམ་ཆེན་མོ་དང་དབྱེར་མེད་དུ་བསམ། ཐུན་མོང་མ་ཡིན་པའི་ཟབ་པའི་དབང་བཀའ་ནི། བླ་མའི་ཞལ་ལས་ཤེས་པར་བྱའོ། །བཞི་པ་ཚོགས་ལ་ལོངས་སྤྱོད་པ་ནི། རྫས་ཀྱི་སྟེང་དུ་ཡེ་ཤེས་ལྔའི་རང་བཞིན་གྱི་འོད་ཁ་དོག་ལྔ་བསམ་ལ་ཚོགས་ལ་ཐིམ་པས་ཡེ་ཤེས་ལྔའི་ངོ་བོར་གྱུར་པར་བསམ། ཡང་། ༀ་ཨཱཿཧཱུྃ་བསམ་ནས། ག་དེ་བཟླས་པས། ཡི་གེ་གསུམ་འོད་དུ་ཞུ་ནས་སྐྱེ་མེད་ཀྱིས་བདུད་རྩིར་གྱུར་པར་བསམ་ལ། དེ་ནས་ཚོགས་ཕུད་གཏོར་མར་བཅུག་ལ། ལྷ་ཚོགས་རྣམས་དང་གཞི་བདག་དང་གནོད་སྦྱིན་ལ་ཕུལ་ལོ། །དེ་ནས། རང་གི་མགྲིན་པར་བརྒྱུད་པའི་བླ་མ། སྙིང་གར་ཡུམ་ཆེན་མོ། ལྟེ་བར་ཕྱོགས་བཅུའི་སངས་རྒྱས་ཐམས་ཅད་བསམ་ནས། ཚོགས་ལ་ལོངས་སྤྱོད་པས་ཡེ་ཤེས་ཀྱི་བདུད་རྩི་གནས་གསུམ་གྱིས་ལྷ་ཚོགས་མཆོད་པས་མཉེས། མཆོག་ཐུན་མོང་གིས་དངོས་གྲུབ་ཐོབ་པར་བསམ། དེ་ནས་གསང་སྔགས་ཀྱི་ལྷ་ཚོགས་མ་ལ་བཀྲ་ཤིས་ལ་སོགས་བྱ། གསུམ་པ་རྗེས་ལ་བཞི་སྟེ། བཀྲ་ཤིས་བརྗོད་པ་དང་། གཟོད་པར་གསོལ་བ་དང་། གཤེགས་སུ་གསོལ་བ་དང་། བསྔོ་བ་བྱའོ། །དང་པོ་ནི། བཅོམ་ལྡན་ཐུབ་པར་སེམས་བསྐྱེད་ནས། །ལབ་སྒྲོན་བྱང་ཆུབ་མཆོག་ཐོབ་པའི། །སྐྱེ་འགྲོ་ཀུན་ལ་བཀྲ་ཤིས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྐྱེ་བ་མེད་ལ་གཟུགས་སྐུར་ཤར། །འགྲོ་རྣམས་བདེ་ལ་བཀོད་པ་ཡི། །ཡུམ་ཆེན་ཕ་རོལ་ཕྱིན་མ་ཡི། །བཀྲ་ཤིས་དེས༴ ཚངས་དང་བརྒྱ་བྱིན་ལ་སོགས་བཞི། །མཆོད་པའི་ཚོགས་ཀྱི་རབ་ཏུ་མཆོད། །ཉིན་མཚན་ཀུན་ཏུ་སྲུང་མཛད་པའི། །བར་ཆད་མེད་པའི་བཀྲ་ཤིས་ཤོག །ཅེས་བརྗོད། གཉིས་པ་ནི། གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་གྱུར་གང་། །གང་ཕྱིར་ལུས་ཅན་སྐྱབས་གྱུར་པ། །དེ་ཀུན་མགོན་པོས་བཟོད་པར་གསོལ། །གཙོ་བོ་ནུས་པ་མ་མཆིས་དང་། །ལྷག་པ་དང་ནི་མ་ཚང་བ། །དེ་འདྲའི་བྱ་བ་གང་བྱས་པ། །དེ་ཀུན་མགོན་པོས་བཟོད་པར་གསོལ། །གསུམ་པ་ནི། ༀ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཅེས་པས། ཡེ་ཤེས་པ་གཤེགས་སུ་གསོལ། །དམ་ཚིག་པ་རང་ལ་བསྡུ། གཏོར་མ་གཙང་སར་དོར། བཞི་པ་ནི། བདག་གིས་དགེ་བའི་རྩ་བ་དེས། །ཕ་རོལ་ཕྱིན་དྲུག་རྫོགས་བྱས་ནས། །བདག་དང་འགྲོ་དྲུག་སེམས་ཅན་རྣམས། །ཐམས་ཅད་མཁྱེན་པ་ཐོབ་པར་ཤོག །ཅེས་བྱང་ཆུབ་ཆེན་པོར་བསྔོ་བར་བྱའོ། །ཡུམ་གྱུར་ཕ་རོལ་ཕྱིན་མ་འདི། །བྱང་ཕྱོགས་ཁ་བ་ཅན་ལྗོངས་སུ། །རྒྱས་པར་འགྱུར་ཞེས་ལུང་བསྟན་ནས། །དོན་གཉིས་ཉམས་ལེན་དབང་གིས་བཀའ། །བཤེས་གཉེན་དམ་པས་གསོལ་བཏབ་ངོར། །བླ་མས་གསུང་བཞིན་ཡི་གེར་བཀོད། །དེ་ལ་ཡུམ་ཆེན་བཟོད་པར་གསོལ། །དགེ་དེས་བྱང་ཆུབ་མྱུར་ཐོབ་ཤོག །ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྲུལ་པས་རྗེས་སུ་བཟུང་བའི། རྣལ་འབྱོར་གྱི་དབང་ཕྱུག་ཆེན་པོ་མཆོག་གི་དགེ་སློང་བརྩོན་འགྲུས་སེང་གེས་བླ་མའི་ཕྱག་ལེན་ལྟར་གཞན་ཕན་གྱིས་བློ་ཁོ་ནས། ཡི་གེར་བཀོད་པ་རྫོགས་སོ།། །།

ནམ་མཁའ་གོ་འབྱེད་བསྡུས་པ།

ནམ་མཁའ་གོ་འབྱེད་བསྡུས་པ་བཞུགས། ཐུན་མོང་མ་ཡིན་པ་ཟབ་པའི་དབང་བཀའ་ནི། བཅའ་བཞི་གསུམ་གྱིས་བཀའ་ཐོག་ན་བཞག །བཅོས་བསླད་མེད་པར་རིག་པ.ངོས་བཟུང་། །ཅེས་གསུངས་པས། དང་པོ་ལུས་ཀྱི་བཅའ་གཞི་ནི། ཡར་ལང་ལ་རྐང་པ་གཉིས་ཤིབ་ཀྱི་གཤིབ། ལག་པ་གཉིས་ཤད་ཀྱིས་བརྐྱང་ལ་ཐལ་མོ་སྦྱར། ངག་གི་བཅའ་གཞི་ནི། སྟེང་རླུང་འོག་རླུང་གཉིས་ཁ་སྦྱར་ལ་བཟུང་། སེམས་ཀྱི་བཅའ་གཞི་ནི། རང་གི་སྤྱི་བོ་མདའ་གང་ཙམ་གྱི་ནམ་མཁའ་ལ། མ་ཅིག་ལབ་ཀྱི་སྒྲོན་མ་སྐུ་མདོག་དཀར་མོ། དབུ་སྐྲ་སིལ་མས་སྐུ་རྒྱབ་ནོན་པ། གཡས་ན་ཌཱ་མ་རུ་འཁྲོལ་བ། གཡོན་ན་དྲིལ་བུ་གཡེར་ཁ་འཁྲོལ་བ་གཅིག་བསམ། དེ་ལ་སངས་རྒྱས་ཤཱཀྱ་ཐུབ་པས་གཙོ་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བརྒྱུད་པའི་བླ་མས་བསྐོར་བར་བསྒོམ། རང་གི་ལུས་འདི་ཡང་སྨྱུག་དུང་ལྟ་བུའི་སྤྱི་གཙུག་ནས་གསང་གནས་ཡན་ཆད་སྟོང་སང་ངེ་བ་གཅིག་བསམ། རང་གི་རྣམ་པར་ཤེས་པ་མི་འགྱུ་དགུ་འགྱུ། དྲན་རིག་ཏུར་ཏུར་པོ་འདི་ཡང་རྐང་མཐིལ་རྒྱུ་ཞབས་གཉིས་སུ། བྱ་དམར་སར་གྱི་སྒོང་ང་ཙམ། གསལ་ལ་དང་པ། དཀར་ལ་འཚེར་བ། སྣུམ་ལ་དྲིལ་བ། མནན་གྱིས་མི་ནོན་པ། འཕར་ལ་ཁད་པར་བསམ། དེ་ནས་སྤྱི་བོའི་མ་ཅིག་ལབ་ཀྱི་སྒྲོན་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ལ། ལུས་དང་ལོངས་སྤྱོད་ལྟོས་པ་མེད་པར་ཕུལ་ལ། བདག་ལ་དབང་བསྐུར་ཞིང་བྱིན་གྱིས་རླབས་པར་མཛད་དུ་གསོལ། ཅེས་གསོལ་བ་གདབ་བོ། །ཡང་རང་གི་ལྟེ་བ་འདིར། སྣ་ཚོགས་པདྨ་སྟོང་དང་ལྡན་པའི་དབུས་ན། མ་ཅིག་ལབ་ཀྱི་སྒྲོན་མ་སྐུ་མདོག་སྣ་ཚོགས་སུ་འདུག་པ། གཡས་ན་ཌཱ་མ་རུ་སྒྲ་དང་བཅས་པ། གཡོན་ན་དྲིལ་བུ་གཡེར་ཁ་དཀྲོལ་བ། རུས་པའི་རྒྱན་དྲུག་གིས་བརྒྱན་པ་གཅིག་བསམ། དེ་ལ་མོས་གུས་དུང་གིས་བྱས་པ་དང་། གདན་པདྨ་དེ་གཡས་ཕྱོགས་སུ་སྒ་ར་ར་འཁོར། མ་ཅིག་དེ་ཡང་གཡས་ཕྱོགས་སུ་ཞལ་སྒ་ར་ར་འཁོར་བ་ལས། འོད་ཟེར་སྣ་ཚོགས་བྱུང་ནས་ཁོང་པའི་ནང་གི་ཐམས་ཅད་འོད་ཀྱིས་ཁེང་པ་དང་། ནད་གདོན་སྡིག་སྒྲིབ་ཐམས་ཅད་སང་སང་དག་པར་བསམ། མ་ཅིག་དེ་ཡང་ཌཱ་མ་རུའི་སྒྲ་དང་རུ་ལུའི་སྒྲ་འུ་རུ་རུ་སྒྲོག་ཅིང་། རྐང་མཐིལ་ན་ཡོད་པའི་རྣམ་ཤེས་དེ་ལ། རིགས་ཀྱི་བུ་ཡར་ཤོག་བདེ་བར་འོང་། ལེགས་པར་འོང་། བདག་གིས་བླ་ན་མེད་པའི་བྱང་ཆུབ་ཏུ་བཀོད་པར་བྱའོ། །གསུངས་པར་བསྒོམ་ནས། སློབ་དཔོན་གྱིས་ཚིགས་སུ་བཅད་ཅིང་རོལ་མོའི་སྒྲ་སྒྲོག །དེ་ནས་མ་ཅིག་དེ་འོད་ཡལ་གྱི་སོང་བར་བསྒོམ་མོ། །དེ་བཞིན་དུ་སྙིང་ཁར་པདྨ་སྟོང་ལྡན་གྱི་སྟེང་དུ། མ་ཅིག་ལབ་སྒྲོན་སྐུ་མདོག་སྔོན་མོ་ལས། འོད་ཟེར་སྔོན་མོ་བྱོན་པ་དང་། དག་བྱ་དང་རིགས་ཀྱི་བུ་ལ་སོགས་བརྗོད་པ་གོང་དང་འདྲའོ། །མགྲིན་པར་པདྨ་དམར་པོ་དེ་ལས། འོད་འཕྲོས་པར་བསྒོམ་སྤྱི་བོར་ཀླད་རྒྱའི་སྟེང་དུ་དཀར་པོའོ། །དེ་ནས་མ་ཅིག་དེའི་སྤྱི་བོ་མདའ་གང་གི་ནམ་མཁའ་ལ་བཞུགས་པར་བསམ། རིགས་ཀྱི་བུ་ཡར་ཤོག །བདེ་བར་འོང་། ལེགས་པར་འོང་། བདག་གིས་བླ་ན་མེད་པའི་བྱང་ཆུབ་ཏུ་བཀོད་པར་བྱའོ། །ཞེས་བརྗོད་པར་བསམ། རྣམ་ཤེས་དེ་ནར་གྱིས་བྱུང་ནས། དང་བརླ་ཡི་རྩ་བོ་ཆེ་བརྒྱུད་ནས། ལྟེ་བ་ན་འོད་ཀྱི་ལི་ལི་འདུག་པ་ལ་ཡང་། གོང་ལྟར་བརྗོད། ཡར་སྙིང་ཁར་དྲངས། དེ་ནས་མགྲིན་པ། དེ་ནས་ཀླད་རྒྱའི་སྟེང་དུ། དེ་ནས་ཚང་བུག་ནས་བཏོན་སྟེ། མ་ཅིག་གིས་ཐུགས་ཀར་ཐིམ་པ་དང་། མ་ཅིག་འོད་དུ་གྱུར་ཏེ། ཡར་ནམ་མཁའ་ལ་སངས་ཀྱིས་སོང་སྟེ། ནམ་མཁས་གར་ཁྱབ་རིག་པས་ཁྱབ་ནས། དབྱིངས་དང་རིགས་འདྲེས་པར་བསམ། དེ་ཡང་ཡུམ་རྒྱས་མ་ལས། སྤྱི་གཙུག་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་ཡོད་དོ། །ནམ་མཁའ་རྣམ་པར་འགེང་པ་ཞེས་བྱ་བའི་ཏིང་ངེ་འཛིན་ཡོད་དོ། །ནམ་མཁའ་རྣམ་པར་ཁྱབ་པ་ཞེས་བྱ་བའི་ཏིང་ངེ་འཛིན་ཡོད་དོ། །ཞེས་གསུངས་པའི་དོན་ཡང་དེ་ཡིན་ནོ། །ཡང་མ་ཅིག་ལབ་ཀྱི་སྒྲོན་མའི་ཞལ་ནས། གྲིམ་གྱིས་སྒྲིམ་ལ་གློད་ཀྱིས་གློད། །རིག་པའི་བཞག་ས་གཅིག་དེ་ན་གདའ། །མཐར་ཐུག་གི་སངས་རྒྱས་ཞིག་དེ་ན་གདའ། །ཅེས་པའི་དོན་ཡང་ཡིན་པས། ལུས་ཀློད་ཀྱིས་ལྷོད། ངག་རླུང་བཏང་། སེམས་གསལ་སྟོང་འཛིན་མེད་བཅོས་སླད་མེད་པའི་ངང་དུ་ཞོག་ཅིག །ཅེས་ངོ་སྤྲོད་དོ། །དེ་ནས་སྤྱི་བོར་མ་ཅིག་དཀར་མོ་དེས་བུམ་དབང་བསྐུར་བྱ་ལུས་ལ་བསྐུར། དག་བྱ་ལུས་ཀྱི་སྒྲིབ་པ་དག་གོ། །དེ་བཞིན་མགྲིན་པར་གསང་དབང་། བསྐུར་བྱ་ངག་ལ་བསྐུར། དག་བྱ་ངག་གིས་སྒྲིབ་པ་དག །སོགས་འདྲེས་སོ། །དེའི་ངང་ལ་གསལ་སྟོང་འཛིན་མེད་བསྒོམ། དེ་བས་བསྡུས་པ་བྱེད་ན་མ་ཅིག་བཞི་ཀ་དཀར་པོ་བྱེད་གསུངས། ཡེ་ཤེས་ལྔའི་དབང་བསྐུར་དང་། ཚོགས་བྱིན་གྱིས་རླབས་ཅིང་རོལ་པ་དང་། རྗེས་ཀྱི་ཆོ་ག་རྣམས་གཞན་དུ་ཤེས་པར་བྱའོ། །ཐུན་མོང་མ་ཡིན་པའི་བཀའ་དབང་འདི་གསང་བར་བྱའོ། །ནམ་མཁའ་གོ་འབྱེད་རྫོགས་སོ།། །།བཀྲ་ཤིས།

དམ་པ་རྒྱ་གར་དང་མ་ཅིག་ལབ་སྒྲོན་ཡུམ་ཆེན་མོ་རྣམས་ཀྱི་གཏོར་དབང་གི་ཁ་འཕང་རྣམས།

དམ་པ་རྒྱ་གར་དང་མ་ཅིག་ལབ་སྒྲོན་ཡུམ་ཆེན་མོ་རྣམས་ཀྱི་གཏོར་དབང་གི་ཁ་འཕང་རྣམས་བཞུགས་སོ། །དམ་པའི་གཏོར་དབང་བྱེད་པ་ནི། གཏོར་མ་ཆུས་བྲན་ལ། གཏོར་མ་མི་དམིགས་པའི་ངང་ལས། པད་ཟླའི་སྟེང་དུ་དམ་པ་རྒྱ་གར་སྐུ་མདོག་དམར་སྨུག་སེང་ལྡེང་གི་མདོག་ལྟ་བུ། ཞལ་གཅིག་ཕྱག་གཉིས་པ་གཡས་པས་ཌཱ་མ་རུ། གཡོན་ན་མི་རྐང་གླིང་བུ་འབུད་པ། སྤྱན་ཧྲིག་གེར་མཛད་པ། དེའི་སྤྱི་བོར་བརྒྱུད་པའི་བླ་མ། གཡས་ན་དཔའ་བོ། གཡོན་ན་དཔའ་མོ། མདུན་ན་དམ་ཅན། རྒྱབ་ན་ཆོས་སྐྱོང་། སྐབས་ན་ཌཱཀྐི་རྣམས་ཀྱིས་བསྐོར་བ་བསྒོམ། དེ་ནས་གསོལ་འདེབས་ཀྱི་ལན་མོ་མཛོད། རྗེ་བླ་མ་རྣམས་ལ་ཕྱག་འཚལ་ལོ། །བཀའ་བརྒྱུད་པ་རྣམས་ལ་གསོལ་བ་འདེབས། །དགོས་བཀའ་དྲིན་ཅན་གྱི་བྱིན་གྱིས་རློབས། །གནས་ཡ་ཀི་ཡ་ཀི་ཡ་ཀི་ནས། །ཕྱི་བསྐོར་གཅིག་བསྐོར་གཉིས་བསྐོར་དང་གསུམ། །ཕྱི་བསྐོར་བ་ལྕགས་རི་མུ་ཁྱུད་བསྐོར། །བར་བསྐོར་བ་ལྷོ་རྒྱལ་འཛམ་བུའི་གླིང་། །ནང་བསྐོར་བ་དེང་རི་བླ་འཁོར་ནས། །རི་མཁན་པ་ཁྲོད་ཀྱི་དགོན་པ་རུ། །མཁའ་འགྲོ་པདྨའི་གདན་སྟེང་ནས། །དེ་ན་སུ་བཞུགས་སུ་མ་བཞུགས། །དེ་ན་དམ་པ་རྒྱ་གར་བཞུགས། །ཁོང་བཞུགས་པ་ཆོས་ཉིད་ངང་དེར་བཞུགས། །མཛད་པ་སེམས་ཅན་འགྲོ་དོན་མཛད། །སྐུ་འཁྲུངས་པ་རྒྱ་གར་ཡུལ་དུ་བཞུགས། །གསུང་བསྒྲགས་པ་བོད་ཡུལ་དབུས་སུ་བསྒྲགས། །ཆགས་ཕེབ་པ་དེང་རི་དགོན་དུ་ཕེབས། །འགྲོ་བའི་མགོན་པ་རྡོ་རྗེ་འཆང་། །སྨྲ་བའི་སེངྒེ་མཚུངས་པ་མེད། །དཔལ་ཆེན་བྷིརྱ་དྲོད་ཚད་མཁན། །ཨརྱ་དེ་བ་སྒྲ་ཚད་མཁན། །དམ་པ་མུ་སྟེགས་རྒྱུད་སྡེ་མཁན། །རྗེ་མི་ཕམ་མགོན་པོ་བཅོམ་ལྡན་འདས། །ཁོང་འཛམ་བུ་གླིང་གིས་རྒྱན་གཅིག་པོ། །རྗེ་དེར་བཞུགས་དམ་པ་ལ་གསོལ་བ་འདེབས། །དེར་བཞུགས་དམ་པས་བྱིན་གྱིས་རློབས། །ཁོང་སྟེང་དེར་བཀའ་བརྒྱུད་ཐིབས་སེ་ཐིབ། །བར་དེར་ལྷ་ཚོགས་ཁྲིགས་སེ་ཁྲིག །གཡས་དེར་དཔའ་བོ་ངར་དང་བཅས། །གཡོན་དེར་དཔའ་མོ་ངར་དང་ལྡན། །མདུན་དེར་དམ་ཅན་དཔུངས་སེ་དཔུང་། །སྐབས་དེར་ཌཱཀྐི་ཤིགས་སེ་ཤིག །འོག་དེར་གདོན་ཚོགས་མྱ་ལ་ལ། །རྗེ་དེར་བཞུགས་དམ་པ་ལ་གསོལ་བ་འདེབས། །རྗེ་དེར་བཞུགས་དམ་པས༴ བྱིན་རླབས་ཀྱི་ཆུ་བོ་རྒྱུན་མི་ཆད། །རྗེ་དྲུང་ན་བཞུགས་ན་གུས་ཕྱག་འཚལ། །རྒྱབ་ན་བཞུགས་ན་མོས་ཕྱག་འཚལ། །མོས་གུས་ཀྱི་ཕྱག་ལ་ཉེ་རིང་མེད། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་ཐུགས་ཀྱི་ཀློང་ནས་སྩོལ། །སྐུའི་བྱིན་རླབས་ལུས་ལ་ཞུགས། །ལུས་ལ་བདེ་དྲོད་འབར་དུ་གསོལ། །ལུས་ཀྱི་སྒྲིབ་པ་སྦྱང་དུ་གསོལ། །སྤྲུལ་སྐུ་ཐོབ་པར་མཛད་དུ་གསོལ། །གསུང་གིས་བྱིན་རླབས་ངག་ལ་ཞུགས། །ངག་ལ་ནུས་འབར་དུ་གསོལ། །ངག་གིས་སྒྲིབ་པ་དག་ནས་ཀྱང་། །ལོངས་སྐུ་ཐོབ་པར་མཛད་དུ་གསོལ། །ཐུགས་ཀྱི་བྱིན་རླབས་སེམས་ལ་ཞུགས། །སེམས་ལ་རྟོག་པ་འཆར་དུ་གསོལ། །ཡིད་ཀྱི་སྒྲིབ་པ་དག་ནས་ཀྱང་། །ཆོས་སྐུ་ཐོབ་པར་མཛད་དུ་གསོལ། །འདོད་ཆགས་ཞེ་སྡང་གཏི་མུག་གསུམ། །དུག་གསུམ་ངང་གིས་ཞིག་ཏུ་གསོལ། །རྐྱེན་ཕོ་གདོན་མོ་གདོན་ཀླུ་གདོན་གསུམ། །གདོན་གསུམ་རྣམ་རྟོག་ཡལ་དུ་གསོལ། །ནད་རླུང་མཁྲིས་འདུས་པ་བད་ཀན་བཞི། །བཞི་བརྒྱ་རྩ་བཞིའི་ནད་རྣམས་བསལ་དུ་གསོལ། །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་མངོན་དུ་འབྱུང་དུ་གསོལ། །གཞན་དོན་དཔག་མེད་འབྱུང་དུ་གསོལ། །རྗེ་དེར་བཞུགས༴ རྗེ་དེར་བཞུགས་དམ་པས༴ ཕ་ནག་པོ་ཆེན་པོ་གཟི་མདངས་ཅན། །སྐུ་སྟོད་སེངྒེ་འགྱིང་བ་འདྲ། །དེ་བདུད་བཞི་ཟིལ་གྱིས་ནོན་པའི་བརྡ། །སྐེད་པ་རྡོ་རྗེ་འཁྲིལ་བ་འདྲ། །དེ་འཁྲུལ་བཞི་རྩད་ནས་བཅད་པའི་བརྡ། །ཞབས་གཉིས་རྦ་བྲན་གཤིབ་པ་འདྲ། །དེ་བྱང་ཆུབ་ལམ་ལ་ཞུགས་པའི་བརྡ། །སྐུ་མདོག་ནག་པོ་སྨུག་པ་ནི། །དེ་ཆོས་ཉིད་ངང་ལ་བཞུགས་པའི་བརྡ། །དབུ་སྐྲ་ཁམས་ནག་གྱེན་དུ་འཁྱིལ། །དེ་མཐོ་རིས་ཐར་ལམ་ཕྱེད་པའི་བརྡ། །སྤྱན་རྩ་དམར་ལ་འཁྲུག་པ་ནི། །དེ་སྟོང་གསུམ་ཀུན་ལ་གཟིགས་པའི་བརྡ། །ཤངས་རྒྱུད་རིང་ལ་ཤང་རྩེ་རྣོ་བ་དེ། །དེ་ཐེག་ཆེན་གྱིས་རྒྱུད་དོན་རྟོགས་པའི་བརྡ། །ཚེམས་མདོག་དཀར་ལ་ཚེམ་རྩེ་རྣོ། །དེ་སྐྱེ་ཤི་རྩད་ནས་གཅོད་པའི་བརྡ། །ཕྱག་སོར་རིང་ལ་ཕྱག་སེན་རྣོ། །དེ་སེར་སྣ་མདུད་པ་གྲོལ་བའི་བརྡ། །ཞབས་སོར་སེང་ཕྲུག་བཀྲམ་པ་འདྲ། །སྐལ་ལྡན་ཐུགས་རྗེས་འཛིན་པའི་བརྡ། །རྗེ་དེར་བཞུགས་དམ་པ་ལ༴ རྗེ་དེར་བཞུགས་དམ་པས༴ རྗེ་རེ་རེས་ཉིན་མཚན་འཁོར་བར་གཟིམ། །ཉིན་མཚན་འཁོར་བར་གཟིམ་ཙམ་ན། །ཆོས་གཉུག་མ་རྒྱུན་ཆད་མེད་པའི་བརྡ། །རྗེ་རེ་རེས་རྟེན་འབྲེལ་སྣ་ཚོགས་མཛད། །རྟེན་འབྲེལ་སྣ་ཚོགས་མཛད་ཙམ་ན། །བཀའ་འཁོར་གྱི་བར་ཆད་བསལ་བའི་བརྡ། །རྗེ་རེ་རེས་སྨྱོན་པའི་བརྟུལ་ཞུགས་མཛད། །སྨྱོན་པའི་བརྟུལ་ཞུགས་མཛད་ཙམ་ན། །རྐྱེན་ཕོ་གདོན་མོ་གདོན་འདུལ་བའི་བརྡ། །རྗེ་རེ་རེས་རྒྱ་གྲམ་སྲང་དུ་གཟིམ། །རྒྱ་གྲམ་སྲང་དུ་གཟིམ་ཙམ་ན། །དེ་ཐེག་དམན་གྱི་ཟིལ་གྱིས་གནོན་པའི་བརྡ། །རྗེ་རེ་རེས་རས་གོས་རྐྱང་ཅིག་མནབ། །རས་གོས་རྐྱང་ཅིག་མནབ་ཙམ་ན། །བདེ་དྲོད་ལུས་ལ་སྦར་བའི་བརྡ། །རྗེ་དེར་བཞུགས་དམ་པ་ལ༴ རྗེ་དེར་བཞུགས་དམ་པས༴ བདག་ལུས་ངག་ཡིད་གསུམ་མཆོད་པར་བུལ། །ལུས་ལ་བདེ་དྲོད་འབར་དུ་གསོལ། །ངག་ལ་ནུས་པ་འབར་དུ་གསོལ། །སེམས་ལ་རྟོགས་པ་འཆར་དུ་གསོལ། །རྗེ་དྲུང་ན་བཞུགས་ན་དྲུང་ཕྱག་འཚལ། །རྒྱང་ལ་བཞུགས་ན་མོས་ཕྱག་འཚལ། །མོས་གུས་ཀྱི་ཕྱག་ལ་ཉེ་རིང་མེད། །མཁའ་སྤྱོད་གནས་སུ་ལམ་སྣ་དྲོངས། །ཨུ་རྒྱན་གནས་སུ་ལམ་སྣ་དྲོངས། །རྐྱེན་ཕྱི་ཡི་བར་ཆད་ཕྱི་ནས་སེལ། །ནང་གིས་བར་ཆད་ནང་ལ་སེལ། །རྐྱེན་ངན་པ་བྱང་ཆུབ་གྲོགས་སུ་བསྒྱུར། །འགལ་རྐྱེན་མཐུན་རྐྱེན་དམ་པ་བསྒྱུར་དུ་གསོལ། །ཕཊ། ཕ་དམ་པའི་རྟགས་བསྟོད་ཇོ་མོས་མཛད་པ་རྫོགས་སོ།། །།དེ་ནས་མ་ཅིག་ལབ་སྒྲོན་གྱིས་དབང་ཁྲིད་བྱེད་པ་ལ། དང་པོ་གཏོར་མ་སྤྱི་བོར་བཞག་ཅིང་ཆུ་བླུག་ལ། ད་ཁྱེད་རང་རྣམས་ཀྱི་འདི་ལྟར་བསྒོམ་ལ། གཏོར་མ་མི་དམིགས་པ་ལས། པདྨ་ཟླ་བ་ཉི་མའི་གདན་ལ། རྩ་བའི་བླ་མ་དང་གཉིས་སུ་མེད་པའི་མ་ཅིག་ལབ་ཀྱི་སྒྲོན་མ་སྐུ་མདོག་དཀར་མོ་གངས་རི་ལ་ཉི་མ་ཤར་བ་ལྟར་དཀར་ལ། ཞལ་ཅིག་ཕྱག་གཉིས། གཡས་གསེར་གྱི་ཌཱ་མ་རུ། གཡོན་དངུལ་དཀར་གྱི་དྲིལ་བུ་འཛིན་པ། སྐུ་ལ་རས་ཕྲུག་དཀར་པོའི་ན་བཟའ་མནབ་པ་དབུ་སྐྲ་སིལ་མས་སྐུ་རྒྱབ་ནོན་པ། ཞབས་སེམས་དཔའི་སྐྱིལ་ཀྲུང་དུ་བཞུགས་པ། མཚན་དང་དཔེ་བྱད་འོད་ཟེར་དང་ལྡན་པར་བསྒོམ། དེའི་ཕྱི་རོལ་ན་ཤར་ན་རྡོ་རྗེ་མཁའ་འགྲོ་ལ། རྡོ་རྗེ་མཁའ་འགྲོ་འབུམ་གྱིས་བསྐོར་བ། ལྷོར་རིན་ཆེན་མཁའ་འགྲོ་ལ། རིན་ཆེན་མཁའ་འགྲོ་འབུམ་གྱིས་བསྐོར་བ། ནུབ་ཏུ་པདྨ་མཁའ་འགྲོ་ལ། པདྨ་མཁའ་འགྲོ་འབུམ་གྱིས་བསྐོར་བ། བྱང་དུ་ལས་ཀྱི་མཁའ་འགྲོ་ལ། ལས་ཀྱི་མཁའ་འགྲོ་འབུམ་གྱིས་བསྐོར་བ། དེའི་ཕྱི་རོལ་དུ་ཤ་ཟའི་མཁའ་འགྲོ་དང་འཇིག་རྟེན་མཁའ་འགྲོ་སྤྲིན་དཔུང་གཏིབ་པ་ལྟར་བསྒོམ་པའི་མོས་པ་མཛོད། གསོལ་འདེབས་ཀྱི་ལད་མོ་མཛོད། མ་ཡུམ་ཆེན་ཐུགས་ལས་སྤྲུལ་པའི་སྲས། །མ་ཅིག་ཇ་མོ་རྣལ་འབྱོར་མ། །ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །བྱིན་གྱིས་རླབས་པར་མཛད་དུ་གསོལ། །སྐུ་ལུས་ཆུང་ལ་གཟི་མདངས་ཅན། །སྐུ་མདོག་དཀར་ལ་འོད་ཟེར་ཅན། །སྐྱེ་བ་དམན་ལ་དགོངས་པ་མཐོ། །ཀུན་དང་མཐུན་པའི་སྤྱོད་པ་ཅན། །བྱིན་གྱིས་བརླབ་པར༴ དུས་གསུམ་སངས་རྒྱས་གདུང་འཛིན་མ། །བདག་དང་མོས་པའི་བུ་སློབ་རྣམས། །བྱིན་གྱིས༴ སེར་སྣ་མེད་པའི་དོན་རྟོགས་ཤིང་། །ཕ་རོལ་ཕྱིན་པའི་བློ་མཐོ་མ། །བདག་དང་མོས་པའི་བུ་སློབ་རྣམས། །བྱིན་གྱིས༴ མ་རང་བྱུང་ཡེ་ཤེས་དོན་རྟོགས་ཤིང་། །ཉམས་པ་མེད་པའི་ཁྲིམས་སྲུང་མ། །བདག་དང་༴ བྱིན་གྱིས༴ མ་ཆགས་ཞེན་མེད་པའི་དོན་རྟོགས་ཤིང་། །སྐྱེ་མེད་བཟོད་པ་བསྒོམ་མཛད་མ། །བདག་དང་༴ བྱིན་གྱིས༴ མ་གནས་བརྩལ་མེད་པའི་དོན་རྟོགས་ཤིང་། །འབད་མེད་བརྩོན་འགྲུས་བརྩམ་མཛད་མ། །བདག་དང་༴ བྱིན་གྱིས༴ མ་ཡེངས་བ་མེད་པའི་དོན་རྟོགས་ཤིང་། །ཡེངས་མེད་བསམ་གཏན་སྒོམ་མཛད་མ། །བདག་དང་༴ བྱིན་གྱིས༴ མ་ཀུན་གྱི་རང་བཞིན་དོན་རྟོགས་ཤིང་། །བདག་མེད་ཤེས་པའི་རྣལ་འབྱོར་མ། །བདག་དང་༴ བྱིན་གྱིས༴ མ་ཕྱོགས་མེད་ལྟ་བ་ཞན་པ་གྲོལ། །མཉམ་ཉིད་རྟོགས་པས་དམིགས་པ་གྲོལ། །མ་རྟོག་མེད་རྟོགས་པས་ཉམས་ང་གྲོལ། །བདག་དང་༴ བྱིན་གྱིས་རླབས༴ མ་སྟོང་ཉིད་ངང་ལ་གཟིགས་ཙམ་ན། །ཉོན་མོངས་སྤང་ནས་ཡེ་སངས་རྒྱས། །སངས་རྒྱས་མཁའ་འགྲོ་འབུམ་གྱིས་བསྐོར། །བདག་དང་༴ བྱིན་གྱིས༴ མ་མཉམ་ཉིད་ངང་དུ་བཞུགས་ཙམ་ན། །རྗེ་བོ་རྟོག་པའི་ཉམས་དང་ལྡན། །ཡེ་ཤེས་མཁའ་འགྲོ་འབུམ་གྱིས་བསྐོར། །ཉམས་དབྱངས་མགུར་མ་འུ་རུ་རུ། །བྱིན་རླབ་ན་བུན་ཐིབས་སེ་ཐིབ། །མ་དགོངས་པ་ཤར་དུ་སྤྱོད་ཙམ་ན། །དོན་འགྱུར་བ་མེད་པའི་ཉམས་དང་ལྡན། །རྡོ་རྗེ་མཁའ་འགྲོ་འབུམ་གྱིས་བསྐོར། །མཁའ་འགྲོ་དཀར་མོའི་ཚོགས་དང་བཅས། །གསུང་དབྱངས་མགུར་མ་འུ་རུ་རུ། །གར་དང་རོལ་མོ་ཁྲིགས་སེ་ཁྲིག །བྱིན་རླབས་ན་བུན༴ གདམ་ངག་སྦྲང་ཆར་སི་ལི་ལི། །འགྲོ་དོན་ཕྱོགས་མེད་ཡ་ལ་ལ། །བདག་དང་༴ བྱིན་གྱིས༴ མ་དགོངས་པ་ལྷོ་རུ་སྤྱོད་ཙམ་ན། །ཡོན་ཏན་རྫོགས་པའི་ཉམས་དང་ལྡན། །རིན་ཆེན་མཁའ་འགྲོ་འབུམ་གྱིས་བསྐོར། །མཁའ་འགྲོ་སེར་མོའི་ཚོགས་དང་བཅས། །གསུང་དབྱངས༴ གར་དང་རོལ་མོ་བྱིན་རླབས་ན༴ གདམ་ངག་སྦྲང་ཆར༴ འགྲོ་དོན་ཕྱོགས༴ བདག་དང་༴ བྱིན་གྱིས༴ མ་དགོངས་པ་ནུབ་ཏུ་སྤྱོད་ཙམ་ན། །དོན་ཆགས་པ་མེད་པའི་ཉམས་དང་ལྡན། །པདྨ་མཁའ༴ མཁའ་འགྲོ་དམར་མོའི༴ གསུང་དབྱངས༴ གར་དང་རོལ་མོ༴ བྱིན་རླབས་ན་བུན༴ གདམ་ངག་སྦྲང་ཆར༴ འགྲོ་དོན་ཕྱོགས་མེད་ཡ་ལ༴ བདག་དང་༴ བྱིན་གྱིས་རླབས༴ མ་དགོངས་པ་བྱང་དུ་སྤྱོད་ཙམ་ན། །དོན་འགྱུར་བ་མེད་པའི༴ ལས་ཀྱི་མཁའ་འགྲོ་འབུམ༴ མཁའ་འགྲོ་ལྗང་ཀུའི་ཚོགས༴ གསུང་དབྱངས༴ གར་དང་༴ བྱིན་རླབས༴ གདམ་ངག༴ འགྲོ་དོན༴ བདག་དང་༴ བྱིན་གྱིས༴ མ་དགོངས་པ་དབུས་སུ་བྱོན་ཙ་ན། །དོན་མཐའ་དབུས་མེད་པའི་ཉམས་དང་ལྡན། །སངས་རྒྱས་མཁའ་འགྲོ་འབུམ་དང་༴ སྐུ་མདོག་མཐིང་ཁའི༴ གསུང་༴ གར་དང་༴ བྱིན་གྱིས༴ གདམ་ངག༴ འགྲོ་དོན༴ བདག་དང་༴ བྱིན་གྱིས༴ མ་ཡུམ་ཆེན་ཐུགས་ལས་སྤྲུལ་པའི་སྲས། །མ་ཅིག་ཇོ་མོ་རྣལ་འབྱོར་ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །སྐལ་མེད་ཐར་པའི་ལམ་འདྲེན་མ། །ཛཿཧཱུྃ་བཾ་ཧོཿས་གནས་འདིར་བྱོན། །མཐོ་སྤྱི་གཙུག་རྒྱན་དེར་བཞུགས་སུ་གསོལ། །བཞུགས་ནས་བྱིན་གྱིས་བརླབ་ཏུ་གསོལ། །མ་ཆོས་དབྱིངས་ནམ་མཁའ་ཡངས་པའི་ཕོ་བྲང་ནས། །ཐུགས་རྗེ་སྤྲིན་ཐུང་ཐིབས་སེ་ཐིབ། །ཤེས་རབ་ཀྱི་འོད་ཏ་ལེ་བ། །ཉམས་མྱོང་ན་བུན་ཐིབས་སེ་ཐིབ། །བྱིན་རླབ་ཆར་རྒྱུན་སི་ལི་ལི། །བྱིན་གྱིས་རློབས་ཤིག་མ་ཅིག་མ། །བར་ཆད་སོལ་ཅིག་མ་ཅིག་མ། །དབང་མཆོག་བསྐུར་ཅིག་མ་ཅིག་མ། །དངོས་གྲུབ་སྩོལ་ཅིག་མ་ཅིག་མ། །ལམ་སྣ་དྲོངས་ཤིག་མ་ཅིག་མ། །ཀྱཻ་མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་དེ་ལ་ཕྱག་འཚལ་བསྟོད། །འོག་མིན་གནས་སུ་ལམ་སྣ་དྲོངས། །ཨོ་རྒྱན་གནས་སུ་ལམ་སྣ་དྲོངས། །མཁའ་སྤྱོད་གནས་སུ༴ སྟོང་ཉིད་དབྱིངས་སུ༴ མ་མི་མིན་ཡེ་ཤེས་མཁའ་འགྲོ་མ། །ཤར་ནས་གོམ་གསུམ་བྱོན་པའི་ཚེ། །སྐུ་ལུས་ཆུང་ལ་སྐུ་མདོག་དཀར། །རྡོ་རྗེ་མཁའ་འགྲོ༴ ཛཿཧཱུྃ་བཾ་ཧོས་གནས་འདིར་བྱོན། འགྲེས་སོ། །མ་མི་མིན་ཡེ་ཤེས་མཁའ་འགྲོ་མ། འདྲེས་སོ། །ལབ་ཀྱི་སྒྲོན་མ་ཁྱེད་ལ་ཕྱག་འཚལ་བསྟོད། །འོག་མིན་གནས་སུ་ལམ་སྣ་དྲོངས། །ཨུ་རྒྱན་གནས་སུ༴ ལྷོའི༴ ནུབ་ནས༴ བྱང་༴ དབུས་སུ༴ སོགས་འགྲེས་སོ། །དེ་ནས་མ་ཅིག་འོད་དུ་ཞུ་ནས་གཏོར་ཆུ་བླུག །བཀྲ་ཤིས་བརྗོད། ཡུམ་ཆེན་ཕ་རོལ་ཕྱིན་མ་ལ་ཕྱག་འཚལ་ལོ། །ཡུམ་ཆེན་གྱི་གཏོར་དབང་བླ་མའི་ཕྱག་ལེན་ལྟར། ཉམས་སུ་ལེན་བདེ་བྲི་བར་བྱ། འདི་ལ་སྦྱོར་བ་དངོས་གཞི་རྗེས་གསུམ་མོ། །ཐོག་མར་སྦྱོར་བའི་ཆོ་ག་ནི། སྔོན་དུ་གཏོར་མ་ཟླ་གམ་བང་རིམ་གསུམ་པ་བྱས་ལ། ཅོག་ཟླུམ་ཉི་ཟླ་རིལ་བུ་ནོར་བུས་བརྒྱན་པའི་དབུས་སུ་བཤམས། ཕྱོགས་བཞི་བཤོས་བྲན་བཞི་བཞག་ལ། ཤ་ཐུད་ཀྱིས་ལེགས་པར་བརྒྱན་ཅིང་བཤམས། གཞན་ཡང་རྣམ་ལྔ་དང་ཆ་བཞིར་གཏོར་མ་དང་། མཆོད་པ་གྲངས་མང་པོས་མཐའ་བསྐོར། མཆོད་པ་བཤམས་ཚར་ནས། དེ་ནས་གསང་འདུས་གཏོར་བསྔོ་མཆོད་པ་ཡན་ཆད་ཚང་བར་བྱའོ། །དེ་ནས་ཡན་ལག་བརྒྱད་པ་དང་ཐུན་མོང་གི་སྐྱབས་འགྲོ་སེམས་བསྐྱེད་རྒྱས་པར་བྱའོ། །དེ་ནས་གཏོར་མ་སློབ་མའི་སྤྱི་བོར་བཞག་ལ་དམིགས་པ་འདི་ལྟར་མཛོད། འོ། ཁྱེད་རང་རྣམས་ཀྱི་མགོ་ཐོག་གི་གཏོར་གཞོང་དེ་ཉིད་མི་དམིགས་པ་ལས་ཐར་པ་ཆེན་པོའི་གཞལ་ཡས་ཁང་གི་དབུས་སུ་ཉི་ཟླའི་གདན་ལ་མ་ཅིག་ལབ་སྒྲོན་སྐུ་མདོག་གངས་རིལ་ཉི་མ་ཤར་བ་ལྟ་བུ་ཞལ་གཅིག་ཕྱག་གཉིས་པ། གཡས་གསེར་གྱི་ཌཱ་མ་རུ། གཡོན་དངུལ་དཀར་གྱི་དྲིལ་བུ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། དེའི་སྤྱི་བོར་ཡུམ་ཆེན་མོ་གསེར་གྱི་མདོག་འདྲ་བ། ཞལ་གཅིག་ཕྱག་བཞི་མ། གཡས་དང་པོ་གསེར་གྱི་རྡོ་རྗེ་རྩེ་ལྔ་པ། འོག་མས་ཤེས་རབ་ཀྱི་རལ་གྲི། གཡོན་དང་པོ་མཉམ་བཞག །འོག་མས་ཤེས་རབ་ཀྱི་པོ་ཏི་བསྣམ་པ། ཞབས་རྡོ་རྗེའི་དཀྱིལ་ཀྲུང་དུ་བཞུགས་པ། མ་ཅིག་གིས་གཡས་ཕྱོགས་སུ་བཅོམ་ལྡན་འདས་ཤཱཀྱ་ཐུབ་པ་སྐུ་མདོག་གསེར་བཙོ་མའི་མདོག་ལྟ་བུ། ཞལ་གཅིག་ཕྱག་གཉིས་པ། གཡས་ས་ནོན་གཡོན་མཉམ་བཞག་མཛད་པ། ཞབས་རྡོ་རྗེའི་དཀྱིལ་ཀྲུང་དུ་བཞུགས་པ། གཡོན་དུ་འཇམ་དཔལ་སྨྲ་བའི་སེངྒེ་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་པས་ཤེས་རབ་ཀྱི་རལ་གྲི། གཡོན་དུ་མེ་ཏོག་པདྨ་དཀར་པོའི་ཁར་པོ་ཏི་བསྣམས་པ། ཞབས་རྡོ་རྗེའི་དཀྱིལ་ཀྲུང་དུ་བཞུགས་པ། ཡུམ་སྲས་དེ་བཞི་ལ་མདུན་ནས་གཡས་བསྐོར་དུ་པད་ཟླའི་གདན་ལ། རྗེ་ཨརྱ་དྷེ་ཝ། ཕ་དམ་པ་རྒྱ་གར། སྐྱོ་སྟོན་བསོད་ནམས་བླ་མ། མ་ཅིག་ལབ་ཀྱི་སྒྲོན་མ། ཁུ་སྒོམ་ཆོས་ཀྱི་སེངྒེ། ཕ་ཅིག་དམ་པ་ཟང་ཐལ། རྗེ་བཙུན་རྒྱ་ནག་གཅེར་བུ། སངས་རྒྱས་རབ་སྟོན། སངས་རྒྱས་དགེ་སློང་སངས་རྒྱས་རས་པ། སངས་རྒྱས་གཉེན་སྟོན། རས་པ་ཆོས་ཀྱི་སེངྒེ། གཡུ་གཞེར་སྟོན་པ། སློབ་དཔོན་ཤེས་རབ་བླ་མ། རྗེ་བཙུན་དཔལ་འབར་བ། རྟོག་ལྡན་ནམ་མཁའ་རྡོ་རྗེ། སྐྱེས་མཆོག་ཚུལ་ཁྲིམས་རྒྱལ་མཚན། མཚུངས་མེད་ཆོས་ཀྱི་རྡོ་རྗེ། དྲིན་ཆེན་རྩ་བའི་བླ་མ། ཛྙཱ་ན་ཀེ་ཏུ་ལ་སོགས་གྲུབ་ཐོབ་གཅོད་ཀྱི་བརྒྱུད་པ་རྣམས་ཀྱི་བསྐོར་བ། གཞན་ཡང་སངས་རྒྱས་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་བསྒོམ་ལ། ལྷ་ཚོགས་རྣམས་ཀྱི་སྐུ་ལ་འོད་ཟེར་དཀར་དམར་མཐིང་གསུམ་དང་། གཞན་ཡང་སྐུའི་ཆ་ནས་ཁྲོ་ཆུང་ཕྱག་མཚན་རྡོ་རྗེའི་ཚོགས་དཔག་ཏུ་མེད་པ་བྱུང་ནས། ཁྱེད་རང་རྣམས་ཀྱི་ལུས་ངག་ཡིད་གསུམ་ལ་ཐིམ་པར་བསམ་ལ་མོས་པ་བརྩེ་གཅིག་ཏུ་གྱིས། གསོལ་བ་འདེབས་པའི་ལད་མོ་གྱིས། ཡུམ་ཆེན་ཤེས་རབ་ཕར་ཕྱིན་ལ་སོགས་པའི། །སྐྱེ་མེད་ཆོས་ཀྱི་སྐུ་ལ་གསོལ་བ་འདེབས། །རྒྱལ་བ་ཤཱཀྱའི་རྒྱལ་པོ་ལ་སོགས་པའི། །ཕྱོགས་བཅུའི་སངས་རྒྱས་རྣམས་ལ༴ འཇམ་དཔལ་སྨྲ་བའི་སེངྒེ་ལ༴ རྒྱལ་སྲས་འཕགས་པ་རྣམས་ལ༴ རྗེ་བཙུན་ཨརྱ་དེ་བ་ལ༴ འཛམ་གླིང་སྐྱེས་མཆོག་རྣམས་ལ་གསོལ༴ པ་གཅིག་དམ་པ་རྒྱ་གར་ལ༴ རྒྱ་གར་གྲུབ་ཆེན་རྣམས་ལ༴ སྐྱོ་སྟོན་བསོད་ནམས་བླ་མ༴ བོད་ཡུལ་སྐྱེས་མཆོག་རྣམས་ལ༴ མ་ཅིག་ལབ་ཀྱི་སྒྲོན་མ་ལ༴ ཡེ་ཤེས་མཁའ་འགྲོ་རྣམས་ལ༴ ཁུ་བསྒོམ་ཆོས་ཀྱི་སེངྒེ་ལ་སོགས་པའི། །སྐྱེ་མེད་དོན་སྟོན་རྣམས་ལ༴ ཕ་གཅིག་དོལ་པ་ཟང་ཐལ་ལ༴ སྐྱེས་ཆེན་དོན་འགྲུབ་རྣམས་ལ༴ རྗེ་བཙུན་རྒྱ་ནག་གཅེར་བུ་ལ༴ རྣལ་འབྱོར་འཁྲུལ་ཞིག་རྣམས་ལ༴ མཁས་པ་སངས་རྒྱས་རབ་སྟོན་ལ༴ མཁས་གྲུབ་ཆེན་པོ་རྣམས་ལ༴ སངས་རྒྱས་དགེ་སློང་ལ༴ ཚུལ་ཁྲིམས་མཐར་ཕྱིན་རྣམས༴ སངས་རྒྱས་སུམ་པ་རས་ཆེན་ལ༴ བརྟུལ་ཞུགས་གྲུབ་པ་རྣམས་ལ༴ སངས་རྒྱས་གཉེན་སྟོན་ལ༴ ཆོས་ཀྱི་སྤྱན་ལྡན་རྣམས་ལ༴ རས་པ་ཆོས་ཀྱི་སེངྒེ་ལ༴ རྣལ་འབྱོར་དབང་ཕྱུག་རྣམས་ལ༴ རྗེ་བཙུན་བཛྲ་སེངྷ་ལ༴ དམ་ཆོས་སྨྲ་བ་རྣམས་ལ༴ སློབ་དཔོན་པྲ་ཛྙཱ་གུ་རུ་ལ༴ རྟོག་ལྡན་དམ་པ་རྣམས་ལ༴ ཆོས་རྗེ་བཛྲ་ཤྲི་ལ་སོགས་པའི། །འགྲོ་བའི་མགོན་པོ་རྣམས་ལ། །རྟོགས་ལྡན་ནམ་མཁའ་རྡོ་རྗེ་ལ༴ དོན་གཉིས་གྲུབ་པ་རྣམས་ལ༴ སྐྱེས་མཆོག་ཚུལ་ཁྲིམས་རྒྱལ་མཚན་ལ༴ བསྐྱེད་རྫོགས་བསྟན་ཐོབ་རྣམས་ལ༴ མཚུངས་མེད་ཆོས་ཀྱི་རྡོ་རྗེ་ལ༴ སྡོམ་གསུམ་མཐར་ཕྱིན་རྣམས་ལ༴ རིན་ཆེན་ཛྙཱ་ན་ཀེ་ཏུ་ལ༴ མཁས་བཙུན་དམ་པ་རྣམས་ལ༴ དྲིན་ཆེན་རྩ་བའི་བླ་མ་ལ༴ གྲུབ་ཐོབ་བརྒྱུད་པ་རྣམས་ལ༴ ཐར་པའི་ལམ་སྟོན་རྣམས་ལ༴ ཕན་བདེའི་འབྱུང་གནས་རྣམས་ལ༴ འཕགས་པའི་དགེ་འདུན་རྣམས་ལ༴ བདག་སོགས་མཁའ་ཁྱབ་འགྲོ་བ་རྣམས། །སེམས་ཅན་མ་རིག་འཁྲུལ་པ་སང་བར་བྱིན་གྱིས་རློབས། །གཟུང་འཛིན་མདུད་པ་གྲོལ་བར་བྱིན་གྱིས་རློབས།། །།ཅེས་ཚང་བར་བྱའོ། །དེ་ནས་མ་ཅིག་འོད་དུ་ཞུ་ནས་གཏོར་ཆུ་བླུད། བཀྲ་ཤིས་བརྗོད།

བླ་མ་མཁའ་འགྲོའི་བསྒྲུབ་པ་མཁའ་འགྲོའི་སྲོག་འདྲེན།

༅། །བླ་མ་མཁའ་འགྲོའི་བསྒྲུབ་པ་མཁའ་འགྲོའི་སྲོག་འདྲེན་བཞུགས་སོ། །སྐྱབས་སེམས། མ་རིགས་དྲུག་སྣང་སྲིད་ལྷ་འདྲེ་རྣམས། །སེམས་སྙེམ་ཐག་ཆོད་པར་སྐྱབས་སུ་མཆི། །བཀའ་ཟབ་མོ་གཅོད་ཡུལ་ཉམས་ལེན་གྱིས། །བདུད་ཆོས་སྐུར་གྲོལ་བར་སེམས་བསྐྱེད་དོ། །བསྒོམས་ལ། དངོས་གཞི་ནི། ༀ་མ་ཧཱ་ཤུ་ནྱ༴ རིག་པ་རང་བྱུང་ཀ་དག་ཅིང་། །ལྷུན་གྲུབ་རོལ་རྩལ་གདལ་བ་ལ། །ཀུན་ལ་ཁྱབ་པའི་ཡེ་ཤེས་ཆེ། །དམིགས་བསམ་བྲལ་བ་བཟོ་མེད་ངང་། །རང་ཉིད་ཧྲཱིཿལས་རྣལ་འབྱོར་མ། །རྒྱན་དང་ཆ་ལུགས་ཡོངས་རྫོགས་པར། །གྲི་གུག་ཐོད་པ་ཁ་ཊྭཱྃ་བཅས། །བརྐྱང་བསྐུམ་གར་གྱིས་པད་ཉིར་རོའི། །སྙིང་ཁར་བརྫིས་བཞུགས་ཡེ་ཤེས་དང་། །འཇིག་རྟེན་མཁའ་འགྲོ་གྲངས་མེད་བསྐོར། །སྤྱི་བོར་པད་ཟླར་བླ་མ་དང་། །དབྱེར་མེད་ཡུམ་ཆེན་སྐུ་མདོག་སེར། །ཕྱག་གཉིས་མཉམ་བཞག་རྡོ་རྗེ་ནི། །རྩེ་ལྔ་ལངས་སྟབས་བསྣམས་པ་བསམ། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །ཐུགས་སྟོད་ཨཱཿཡིག་གསེར་འོད་འབར། །འོད་འཕྲོས་རྒྱལ་བ་རྒྱ་མཚོའི་ཚོགས། །རྒྱུད་བསྐུལ་ཡེ་ཤེས་ལྷའི་རྣམ་པ། །ཆར་བཞིན་བབ་སྟེ་ཐིམ་ནས་འདྲེས། །མཆོད་ཚོགས་སྤྲིན་བཞིན་འཁྲིགས་པས་མཆོད། །བསྟོད་དབྱངས་རྒྱ་མཚོས་སྙན་སྒྲ་སྒྲོགས། །དམིགས་པ་མ་ཡེངས་དད་མོས་སྦར། །ཤེར་སྙིང་བཟླ། མཐར་ནི་ཡུམ་ཆེན་རང་ལ་ཐིམ། །གནས་བཞིར་ༀ་དཀར་ཨཱཿདམར་དང་། །ཧཱུྃ་མཐིང་བཾ་དམར་གྱུར་པ་ལས། །བཟླས་བྱའི་སྔགས་ཀྱིས་བསྐོར་བར་བསམ། །ༀ་ཨཱཿཧཱུྃ་གུ་རུ་ཌཱཀྐི་ནི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊཿ འོད་ཟེར་ལུས་ཀུན་བརྡལ་བ་ལས། །མཁའ་འགྲོ་ཏིལ་གང་ལྟ་བུར་གཏམས། །དེ་དག་སྔགས་དབྱངས་ལྡིར་བ་ཡིས། །སྲིད་པ་གསུམ་པོ་དབང་བསྡུས་བསམ། །བཟླས། ཐུན་མཚམས་སུ་ཚོགས་ཀྱི་འཁོར་ལོ་བཅས་མཆོད་མཐར། བསྐྱེད་པར་ལྷ་ཡི་རྣམ་པ་ཀུན། །མེ་ལོང་ཧས་བཏབ་བཞིན་དུ་ཡལ། །གཉུག་མའི་བླ་མ་ལྷག་པའི་ལྷ། །རྒྱལ་བ་རྒྱ་མཚོའི་ཀློང་ཆེན་པོར། །ཇི་སྲིད་བར་དུ་གཡོ་བ་བྲལ། །སྒོ་གསུམ་ཡེ་ནས་རྡོ་རྗེ་གྱུར། །ཞེས་པའི་དོན་ལ་མཉམ་པར་གཞག་ལ་གཉུག་མའི་ངང་སྐྱོང་བ་འདི་ལྟ་བུའི་རྣལ་འབྱོར་གྱིས་ཀྱང་མཆོག་ལ་སྦྱོར་བར་གྱུར་ཅིག །བི་ཛས་སྨྲས་སོ། །ཆོས་དབྱིངས་རྣམ་དག་སྐྱེ་མེད་ཆོས་ཀྱི་སྐུ། །འགག་མེད་རྩ་བྲལ་སེམས་ཉིད་དོན་གྱི་ཡུམ། །མཐའ་དབུས་མེད་པ་མཐའ་བྲལ་སྟོང་པའི་ཡུམ། །མ་ཡུམ་ཆེན་ཆོས་ཀྱི་སྐུ་ལ་ཕྱག་འཚལ་བསྟོད།། །།

ཟབ་མོ་གཅོད་ཀྱི་ཚོགས་མཆོད་བསྡུས་པ་དངོས་གྲུབ་ཀྱི་ས་བོན།

༅། །ཟབ་མོ་གཅོད་ཀྱི་ཚོགས་མཆོད་བསྡུས་པ་དངོས་གྲུབ་ཀྱི་ས་བོན་བཞུགས། རླུང་མེ་ཐོད་སྒྱེད་ལ་གནས་ཀ་པཱ་ལར། །ཚོགས་ཀྱི་ཡོ་བྱད་དམ་རྫས་ཀུན་ཚང་ཞིང་། །རང་རིག་མཁའ་འགྲོ་རང་ལུས་དེ་དང་འདྲེས། །ཕཊ་ཕཊ་ཕཊ་ཕཊཿ ཤ་རུས་ཁྲག་གིས་ཕྱུར་བུར་གཏམས་པ་ལ། རཾ་ཡཾ་ཁཾ་སྤྲོས་མ་དག་ངོས་འཛིན་སྦྱངས། །རྫས་ཞུ་རླངས་པ་ཟླ་ཕྱེད་རྡོ་རྗེ་ཡིས། །རྭ་ལ་རིགས་ལྔའི་སྙིང་པོ་བཅུད་གསལ་བའི། །འོད་ཟེར་གྱིས་བསྐུལ་འཁོར་འདས་བདུད་རྩི་བཀུག །ཡས་རིམ་གྱིས་ཞུ་ཐོད་པའི་བདུད་རྩིར་འདྲེས། །ༀ་ཨཱཿཧཱུྃ། གནས་རང་བཞིན་རྣམ་དག་ཕོ་བྲང་ནས། །ཁྱེད་སྐྱབས་གནས་མཆོག་དང་སྙིང་རྗེའི་མགྲོན། །གནས་འདིར་སྤྱན་འདྲེན་གཤེགས་སུ་གསོལ། །ཚོགས་ཀྱི་མཆོད་པ་འདི་བཞེས་ལ། །མཆོག་དང་ཐུན་མོང་དངོས་གྲུབ་སྩོལ། །བྱིན་རླབས་ཐུགས་རྗེ་རྒྱུན་མ་ཆད། །ཕྱི་ནང་གཉིས་ཀྱི་བར་ཆད་སོལ། །མ་ཧཱ་སུ་ཁ་ས་མ་ཡ་ཧོ། གྷ་ན་ཙ་ཀྲ་པུ་ཙ་ཁ་ཁ་ཁཱ་ཧི། འཁོར་འདས་གཉིས་བསྡུས་མགྲོན་རྣམས་ལ། །ཞལ་ཟས་ཚོགས་གཏོར་འདི་བསྔོས་པས། །བསྔོས་པ་བཞིན་དུ་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཕེཾ། ཧཱུྃ་ཧྲཱིཿ རྡོ་རྗེ་ཁྲོས་མའི་བཀའ་ཉན་ལས་བྱེད་ཚོགས། །བཀའ་ཡི་ཕ་འབབ་ལྷག་གཏོར་འདི་བཞེས་ལ། །ཞི་རྒྱས་དབང་དྲག་འགུགས་འདྲེན་མནན་གཟིར་སོགས། །ཇི་ལྟར་བཅོལ་བའི་ཕྲིན་ལས་འགྲུབ་པར་མཛོད། །ཅེས་པའང་བཀའ་མའི་དགོངས་པ་བསྡུས་ནས་སྙིང་སྡུག་གི་བུ་རཏྣས་བསྐུལ་ངོར་བི་ཛའི་མིང་གིས་བྲིས་པ་མཆོག་ཐུན་གྱི་དངོས་གྲུབ་བདེ་བླག་ཏུ་འགྲུབ་པའི་རྒྱུར་གྱུར་ཅིག །དགེའོ།། །།

ཟབ་མོ་གཅོད་ཀྱི་བསྐྱེད་བཟླས་དང་ཕུང་པོ་མཆོད་སྦྱིན་ཚོགས་མཆོད་བཅས་བདུད་རྩིའི་ཆར་རྒྱུན།

ཟབ་མོ་གཅོད་ཀྱི་བསྐྱེད་བཟླས་དང་ཕུང་པོ་མཆོད་སྦྱིན་ཚོགས་མཆོད་བཅས་བདུད་རྩིའི་ཆར་རྒྱུན་ཞེས་བྱ་བ་བཞུགས་སོ། །ན་མོ་གུ་རུ་དྷེ་ཝ་ཌཱཀྐི་ནི་ཧཱུྃ། ཆོས་སྐུ་ཡུམ་ཆེན་མཁའ་ཁྱབ་ཡོངས་པའི་ཀློང་། །ལོངས་སྐུ་སྒྲོལ་མའི་ཡངས་ཁྱབ་སྤྲིན་ཕུང་འཁྲིགས། །སྤྲུལ་སྐུ་ལབ་སྒྲོན་ཀུན་ཁྱབ་ཐུགས་རྗེའི་ཆར། །འགྲོ་ཀུན་རྒྱུད་སྨིན་དྲིན་མོ་ཆེ་ལ་འདུད། །མ་ཅིག་ཐུགས་རྗེའི་མཁའ་ཀློང་ལས་བྱུང་བའི། །གཅོད་ཡུལ་གྱི་ཉམས་ལེན་མན་ངག་དཔག་ཏུ་མེད་པ་ཞིག་འདུག་ཀྱང་། །འདིར་དོན་གསུམ་དུ་བསྡུའོ། །དེ་ཡང་ཕྱི་འཇིག་རྟེན་འཁོར་བའི་ཆག་ཞེན་གྱི་འཁྲི་བ་བཙན་ཐབས་སུ་གཅོད་ཅིང་། ཞེན་མེད་རི་ཁྲོད་འགྲིམ་པ་དང་གཅིག །ནང་སྒྱུ་ལུས་ཀྱི་ཕུང་པོ་གཅེས་འཛིན་གྱི་འཆིང་བ་བཙན་ཐབས་སུ་གཅོད་ཅིང་། ཆགས་མེད་མཆོད་སྦྱིན་དུ་བཏང་བ་དང་གཉིས། གསང་བ་གཉིས་འཛིན་གྱི་ལྷ་འདྲེའི་འཇིག་སྐྲག་བཙན་ཐབས་སུ་གཅོད་ཅིང་། གཉིས་མེད་སྒྱུ་མའི་ལམ་དུ་ཁྱེར་བ་དང་གསུམ་མོ། །དང་པོ་མན་ངག་ལས་ཤེས་ཤིང་། གཉིས་པ་ཕུང་པོ་མཆོད་སྦྱིན་འདི་ལྟར་རོ། །ཐོག་མར་བློ་ལྡོག་རྣམ་བཞིས་རྒྱུད་སྦྱངས། དེ་ནས་མགྲོན་བསྡུ་བའི་ཀློང་གསལ་སྙིང་པོའི་གསུང་ལས། ཕཊཿ རང་ཉིད་རྗེ་བཙུན་མ་དམར་མོ་གཡས་པས་མི་ལྤགས་ཀྱི་གཡང་གཞི་བསྣམས་ཞིང་། གཡོན་པས་མི་རྐང་གི་གླིང་བུ་འབུད་པ། ཕཊཿ ཧོ་གཙོ་བོའི་གདོན་ཆེན་བཅོ་བརྒྱད། བྱིས་པའི་གདོན་ཆེན་བཅོ་ལྔ། ཕོ་གདོན་འབྱུང་པོ། མོ་གདོན་སྲིན་མོ། ཀླུ་གདོན་ས་བདག །གཟའ་གདོན་རྒྱུ་སྐར། མཐོ་སྲིད་པའི་རྩེ་མོ་མན་ཆད། དམའ་ན་རག་དམྱལ་ཁམས་ཡན་ཆད་སྣང་ཞིང་སྲིད་པའི་ལྷ་འདྲེ་ཐམས་ཅད་ཚུར་འདུས་ཤིག །ཕཊཿ དེ་ལྟར་འདུས་པའི་ལྷ་འདྲེ་ཐམས་ཅད་བདག་ལ་ཉོན་ཅིག །ཁྱེད་རྣམས་ལས་དང་ཉོན་མོངས་པའི་དབང་དུ་གྱུར་པ་ཡིན་པས། བདག་གིས་ཁྱེད་རྣམས་ལ་ཟབ་མོ་ཆོས་ཀྱི་འབྲེལ་བ་བྱེད། དམ་པ་ཆོས་ཀྱི་འཁོར་ལོ་བསྐོར་བྱང་ཆུབ་མཆོག་ཏུ་སེམས་བསྐྱེད་ནས། རྣམ་མཁྱེན་སངས་རྒྱས་ཀྱི་ས་ལ་འགོད་པ་ཡིན་པས། ཡིད་གུས་པ་དང་ལྡན་པས་ཉོན་ལ་བདག་གིས་ཕྲིན་ལས་སྒྲུབ་ཤིག །ཅེས་སོ། །ཕཊ་ཕཊཿ ཕཊཿ རིགས་དྲུག་སེམས་ཅན་སྣང་སྲིད་ལྷ་འདྲེ་ཀུན། །ཐོག་མ་མེད་ནས་དྲིན་ཆེན་ཕ་མ་སྟེ། །དེ་ལྟར་མ་ཤེས་ལྷ་དང་འདྲེ་རུ་འཛིན། །གནོད་བྱ་གནོད་བྱེད་གཉིས་འཛིན་རྒྱུན་ཆད་མེད། །ད་ནི་མ་དང་བུ་ཡིས་འདུ་ཤེས་ཀྱིས། །བདག་གི་ཟག་བཅས་ཕུང་པོ་དྲིན་དུ་འབུལ། །ཟག་མེད་དགེ་བ་བྱང་ཆུབ་རྒྱུ་རུ་བསྔོ། །རྣམ་མཁྱེན་སངས་རྒྱས་ས་རུ་འགོད་པར་བྱ། །ཕཊ་ཕཊཿ མ་རིག་གཉིས་འཛིན་འཁྲུལ་པའི་ལྷ་འདྲེ་རྣམས། །གཉིས་མེད་ཡེ་ཤེས་བྱང་ཆུབ་མ་ཐོབ་བར། །སྐྱབས་གནས་དཀོན་མཆོག་གསུམ་ལ་སྐྱབས་སུ་མཆི། །ཨ་མ་ལབ་ཀྱི་སྒྲོན་མས་ཐུགས་རྗེས་ཟུངས། །འགྲོ་བའི་མགོན་པོ་རྣམས་ལ་གསོལ་བ་འདེབས། །བདག་གཞན་ལུས་དང་ལོངས་སྤྱོད་མཆོད་པ་འབུལ། །དགེ་ལ་ཡི་རང་མི་དགེ་སྡིག་པ་བཤགས། །མྱ་ངན་མི་འདའ་ཆོས་འཁོར་བསྐོར་དུ་གསོལ། །འགྲོ་དྲུག་སེམས་ཅན་སངས་རྒྱས་ཐོབ་པར་ཤོག །ཕཊ྄་ཕཊ྄ཿ མདུན་གྱི་ནམ་མཁའ་འཇའ་འོད་འཁྲིགས་པའི་དབུས། །སེང་ཁྲི་པད་ཟླ་ཉི་མའི་གདན་སྟེངས་སུ། །རྒྱལ་བའི་ཡུམ་མཆོག་ལབ་ཀྱི་སྒྲོན་མའི་སྐུ། །དཀར་གསལ་སྤྱན་གསུམ་ནམ་མཁའི་མཐོང་ལ་གཟིགས། །གཡས་པས་ཌ་རུ་གཡོན་པས་དྲིལ་བུ་འཁྲོལ། །ཞབས་གཉིས་གར་སྟབས་རོལ་པའི་ཚུལ་གྱིས་བཞུགས། །མ་ཅིག་སྤྱི་བོར་པད་ཉི་ཟླ་བའི་སྟེང་། །ཆོས་སྐུ་ཡུམ་ཆེན་གསེར་མདོག་ཕྱག་བཞི་མ། །གཡས་གཉིས་གསེར་རྡོར་རྩེ་ལྔ་རལ་གྲི་དང་། །གཡོན་གཉིས་མཉམ་བཞག་ཤེར་ཕྱིན་གླེགས་བམ་བསྣམས། །ཞབས་གཉིས་སྐྱིལ་ཀྲུང་དར་དང་རིན་ཆེན་རྒྱན། །གཙོ་མོའི་གཡས་སུ་སྟོན་པ་ཤཱཀྱ་ཐུབ། །གཡོན་དུ་འཇམ་དཔལ་སྨྲ་བའི་སེངྒེ་དང་། །མཐའ་བསྐོར་གྲུབ་ཐོབ་གཅོད་ཡུལ་བརྒྱུད་པའི་གཙོས། །བླ་མ་ཡི་དམ་སངས་རྒྱས་བྱང་སེམས་ཚོགས། །རིན་ཆེན་དཔའ་བོ་མཁའ་འགྲོ་འབུམ་གྱིས་བསྐོར། །གནས་གསུམ་ༀ་དཀར་ཨཱཿདམར་ཧཱུྃ་མཐིང་འོད། །རང་བཞིན་གནས་ནས་སྤྱན་དྲངས་གཉིས་མེད་གྱུར། །སྟོང་གསུམ་རབ་འབྱམས་འཇིག་རྟེན་ཁམས་ཀུན་གྱི། །འདོན་ཡོན་ལྔ་ཡི་མཆོད་སྤྲིན་རྒྱ་མཚོ་འབུལ། །ཐུགས་རྗེའི་བརྩེ་བ་ཆེན་པོའི་བཞེས་སུ་གསོལ། །ཕཊཿ ཕཊཿ བདག་ལུས་སྟོང་གསུམ་མཎྜལ་ལྷུན་གྱིས་གྲུབ། །རྣམ་ཤེས་ཚོགས་བརྒྱད་གསལ་བའི་ཚོམ་བུར་བཀོད། །སེམས་ཉིད་རང་གསལ་མཛེས་པའི་ཉི་ཟླས་བརྒྱན། །ཕྱི་ནང་གསང་བའི་མཎྜལ་རྒྱ་ཆེན་འདི། །མ་ཅིག་རིན་ཆེན་གྲུབ་ཐོབ་རྒྱ་མཚོ་ལ། །གུས་པས་འབུལ་ལོ་ཐུགས་རྗེས་བཞེས་སུ་གསོལ། །ཕཊཿ མ་ཅིག་ཡུམ་ཆེན་དཀྱིལ་འཁོར་ལྷ་ཚོགས་ཀྱི། །ཐུགས་ཀར་ཐུགས་སྲོག་ས་བོན་སྔགས་ཀྱིས་བསྐོར། །བཟླས་པས་འཁོར་བའི་འོད་ཀྱིས་རྒྱལ་བ་མཆོད། །བྱིན་རླབས་ཚུར་བསྡུས་ལྷ་ཚོགས་སྔགས་ཕྲེང་ལས། །ཟག་མེད་ཡེ་ཤེས་བདུད་རྩིའི་ཆར་བབ་ནས། །ལྷ་འདྲེའི་གཙོ་བྱས་ཁམས་གསུམ་འགྲོ་ལ་ཕོག །ལས་ཉོན་སྡིག་སྒྲིབ་སྡུག་བསྔལ་ཀུན་སྦྱང་བསམ། ༀ་ཨཱཿཧཱུྃ་བཾ་གུ་རུ་དྷེ་ཝ་ཌཱཀྐི་ནི་ཧ་རི་ཎི་ས་སིདྡྷི་ཧཱུྃ། ག་ཏེ་ཡང་བཟླའོ། །ཕཊཿ ཕཊཿ ན་མོ། སྟོང་ཉིད་མཐའ་དང་བྲལ་བ་ནམ་མཁའི་ངང་། སྐྱེ་མེད་ཆོས་སྐུ་ལབ་ཀྱི་སྒྲོན་མ་ལ། །གསོལ་བ་འདེབས་སོ་བདག་རྒྱུད་སྨིན་པ་དང་། །བདག་མེད་ཆོས་སྐུར་གྲོལ་བར་བྱིན་གྱིས་རློབས། །མ་འགགས་རོལ་པ་མཁྱེན་བརྩེའི་ཡེ་ཤེས་ཤར། །འགགས་མེད་ལོངས་སྐུ་ལབ་ཀྱི་སྒྲོན་མ་ལ། །གསོལ་བ༴ བདག་མེད༴ གང་འདུལ་ཐབས་ཀྱིས་འགྲོ་ཀུན་སྲིད་མཚོ་སྒྲོལ། །ཐུགས་རྗེ་སྤྲུལ་སྐུ་ལབ་ཀྱི་སྒྲོན་མ་ལ། །གསོལ་བ༴ བདག་མེད༴ མ་ཅིག་ཐུགས་རྗེ་ལས་བྱུང་བྱིན་རླབས་ཅན། །གཅོད་ཡུལ་འཛིན་པའི་སྐྱེས་མཆོག་ཐབས་ཅད་ལ། །གསོལ་བ༴ བདག་མེད༴ བྱིན་རླབས་གཉིས་སྩོལ་དངོས་གྲུབ་ཆར་རྒྱུན་འབེབས། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་ལ། །གསོལ་བ༴ བདག་མེད༴ ང་མེད་ངར་འཛིན་ཨ་འཐས་འཁྲུལ་པ་འདི། །གཏད་མེད་རྒྱ་ཡན་ངང་དུ་བཤིག་ཏུ་གསོལ། །བདག་མེད་གཅེས་འཛིན་སྒྱུ་ལུས་ཕུང་པོ་འདི། །ཞེན་མེད་སྒྱུ་མའི་ངང་དུ་སྦྱང་དུ་གསོལ། །ལྷ་འདྲེ་གཉིས་འཛིན་འཁྲུལ་བའི་རྣམ་རྟོག་འདི། །གཉིས་མེད་སྟོང་ཉིད་ངང་དུ་སྦྱང་དུ་གསོལ། །རང་སེམས་མ་བཅོས་ཐིག་ལེ་ཉག་ཅིག་འདི། །མ་ཅིག་ཐུགས་རྗེས་མཁའ་ཀློང་ཡངས་པར་འཕོ། །ཕཊ་ཕཊཿ སླར་ཡང་སྐྱེ་མེད་ཆོས་དབྱིངས་ངང་ཉིད་ལས། །རང་སེམས་རྡོ་རྗེ་རྣལ་འབྱོར་མ་རུ་ཤར། །རང་གི་ཐོད་པ་བྷནྡྷ་སྟོང་གསུམ་ཁྱོན། །ཤ་ཁྲག་རུས་པ་ཟག་མེད་བདུད་རྩི་ལྔ། །འདོད་ཡོན་ལྔ་ལྡན་འོད་ཟེར་ཕྱོགས་བཅུར་འཕྲོ། །ཀུན་བཟང་མཆོད་སྤྲིན་ནམ་མཁའི་མཐའ་ཀླས་བཀང་། །སྐྱབས་གནས་དམ་པ་བླ་མ་དཀོན་མཆོག་གསུམ། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་ལ། །མཆོད་པ་འབུལ་ལོ་ཚོགས་གཉིས་རྫོགས་གྱུར་ཅིག །ཕཊ་ཕཊཿ བདག་ལུས་ལྤགས་པ་གསེར་གྱི་ས་གཞིའི་སྟེང་། །ཟག་བཅས་ཕུང་པོ་འདོད་པའི་ཡོན་ཏན་ལྔ། །རྒྱལ་སྲིད་སྣ་བདུན་འདོད་ཡོན་ཕུན་སུམ་ཚོགས། །མ་ཚང་མེད་པའི་འདོད་རྫས་མཁོ་དགུ་ལྡན། །མི་མཇེད་བདག་པོ་གཙང་རིས་མགོན་པོ་སོགས། །ཨརྒ་དཀར་པོའི་མངའ་བདག་རྣམས་ལ་འབུལ། །དགའ་མགུ་ཡི་རང་བྱང་ཆུབ་སེམས་ལྡན་ཞིང་། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །ཕཊ་ཕཊཿ བདག་ལུས་ཟག་བཅས་གཟུགས་ཀྱི་ཕུང་པོ་འདི། །དཀར་གསུམ་མངར་གསུམ་འོ་མའི་རྒྱ་མཚོ་དང་། །རྟ་དང་བ་གླང་དཀོར་ནོར་ལྗོན་པའི་ཤིང་། །སོ་སོ་རང་རང་འདོད་རྫས་མཁོ་དགུར་ལྡན། །གཉེན་ཁྲོད་འདི་དང་འཇིག་རྟེན་ཁམས་ཀུན་གྱི། །ལྷ་དང་ས་བདག་ཟོ་དོར་རྣམས་ལ་འབུལ། །དགའ་མགུ་ཡི་རངས་བྱང་ཆུབ་སེམས་ལྡན་ཞིང་། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །ཕཊ་ཕཊཿ བདག་ལུས་ཕུང་པོ་ཡོན་ཏན་ཀུན་དང་ལྡན། །གང་ལ་གང་དགོས་ཅི་ལ་ཅི་འདོད་པའི། །འབད་མེད་སོ་སོའི་འདོད་རྫས་ཕུན་སུམ་ཚོགས། །རིགས་དྲུག་འཁོར་བའི་སེམས་ཅན་རྣམས་ལ་འབུལ། །བཀྲེས་པའི་ཟས་དང་ན་བའི་སྨན་མཆོག་དང་། །འཇིགས་པའི་སྐྱབས་དང་བརྟེན་པའི་གནས་གྱུར་ཏེ། །སྡུག་བསྔལ་ཞི་ཞིང་ཚོགས་གཉིས་རབ་རྫོགས་ནས། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །ཕཊ་ཕཊཿ བདག་ལུས་གཡང་གཞི་སྟོང་གསུམ་ཚད་དུ་གྲུབ། །ཤ་ཡི་རི་བོ་ཁྲག་གི་རྒྱ་མཚོ་དང་། །སླ་བ་རུས་པའི་གྲམ་ཁྲོད་ཆེན་པོར་གྱུར། །སྲིད་པའི་རྩེ་མན་ན་རག་དམྱལ་ཁམས་ཡན། །དུག་གསུམ་ལས་བྱུང་སྣང་སྲིད་ལྷ་འདྲེའི་ཚོགས། །ཕོ་གདོན་རྒྱལ་པོ་མོ་གདོན་སྲིན་མོ་དང་། །ཀླུ་གདོན་ས་བདག་ནད་དང་ཡམ་གྱི་བདག །སྟོང་ཕྲག་བརྒྱད་བཅུའི་བགེགས་ཀྱི་ཚོགས་རྣམས་ཀུན། །གཏི་མུག་ཤ་ཡི་རི་ལ་ཚིམ་པར་ཟོ། །འདོད་ཆགས་ཁྲག་གི་མཚོ་ལ་ངོམ་པར་འཐུང་། །ཞེ་སྡང་སླ་བ་རུས་པ་རྔམ་པར་རོལ། །དགའ་མགུ་ཡི་རང་བྱང་ཆུབ་སེམས་ལྡན་ཞིང་། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །ཕཊ་ཕཊཿ སྔོན་ཆད་མ་སླེབ་ད་ལྟ་གློ་བུར་གྱིས། །ལྷག་པའི་འབྱུང་པོ་ཁས་ཞན་དབང་ཆུང་བ། །ཞ་ལོང་འོན་ལྐུག་ཚོགས་རྣམས་ཚིམ་གྱུར་ཅིག །ཡེ་ཤེས་སྤྱན་ལྡན་རྫུ་འཕྲུལ་རྐང་པ་ལྡན། །ཆོས་ཀྱི་སྒྲ་ཐོས་ཚངས་པའི་དབྱངས་ལྡན་ཞིང་། །རྣམ་མཁྱེན་རྫོགས་པའི་སངས་རྒྱས་མྱུར་ཐོབ་ཤོག །དེ་ནས་བདེ་སྡུག་གཏོང་ལེན་གྱི་དམིགས་པ་ནན་ཏན་དང་ཆོས་སྦྱིན་བྱའོ། །ཚོགས་མཆོད་ནི། ༈ ཟབ་མོ་གཅོད་ཀྱི་ཚོགས་མཆོད་བསྡུས་པ་གྲུབ་གཉིས་ཀྱི་ས་བོན་བཞུགས། རླུང་མེ་ཐོད་སྒྱེད་ལ་གནས་ཀ་པཱ་ལར། །ཚོགས་ཀྱི་ཡོ་བྱད་དམ་རྫས་ཀུན་ཚང་ཞིང་། །རང་རིག་མཁའ་འགྲོ་རང་ལུས་ཚོགས་དང་འདྲེ། །ཕཊ་ཕཊཿ ཕཊ་ཕཊཿ ཤ་རུས་ཁྲག་གིས་ཕྱུར་བུར་གཏམ་པ་ལ། རྃ་ཡྃ་ཁྃ་སྤྲོས་མ་དག་དངོས་འཛིན་སྦྱང་། །རྫས་ཞུ་རླངས་པ་ཟླ་དཀྱིལ་རྡོ་རྗེ་ཕྱེད། །རྭ་ལ་རིགས་ལྔའི་སྙིང་པོ་བཅུ་གསལ་བའི། །འོད་ཟེར་གྱིས་བསྐུལ་འཁོར་འདས་བདུད་རྩི་བཀུག །ཡས་རིམ་གྱིས་ཞུ་ཐོད་པའི་བདུད་རྩིར་འདྲེས། །ༀ་ཨཱཿཧཱུྃ། གནས་རང་བཞིན་རྣམ་དག་ཕོ་བྲང་ནས། །ཁྱེད་སྐྱབས་གནས་མཆོག་དང་སྙིང་རྗེའི་མགྲོན། །གནས་འདིར་སྤྱན་འདྲེན་གཤེགས་སུ་གསོལ། །ཚོགས་ཀྱི་མཆོད་པ་འདི་བཞེས་ལ། །མཆོག་དང་ཐུན་མོང་དངོས་གྲུབ་སྩོལ། །བྱིན་རླབས་ཐུགས་རྗེ་རྒྱུན་མ་ཆད། །ཕྱི་ནང་གཉིས་ཀྱི་བར་ཆད་སོལ། །མ་ཧཱ་སུ་ཁ་ས་མ་ཡ་ཧོ། གྷ་ན་ཙཀྲ་པཱུཙྪ་ཁ་ཁ་ཁཱ་ཧི། འཁོར་འདས་གཉིས་བསྡུས་མགྲོན་རྣམས་ལ། །ཞལ་ཟས་ཚོགས་གཏོར་འདི་བསྔོས་པས། །བསྔོས་པ་བཞིན་དུ་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཕེཾ། ཧཱུྃ་ཧྲཱིཿ རྡོ་རྗེ་ཁྲོས་མའི་བཀའ་ཉན་ལས་བྱེད་ཚོགས། །བཀའ་ཡི་ཕ་འབབ་ལྷག་གཏོར་འདི་བཞེས་ལ། །ཞི་རྒྱས་དབང་དྲག་འགུགས་འདྲེན་མནན་གཟིར་སོགས། །ཇི་ལྟར་བཅོལ་པའི་ཕྲིན་ལས་འགྲུབ་པར་མཛོད། །ཅེས་པའང་བཀའ་མའི་དོན་བསྡུས་ནས་སྙིང་སྡུག་གི་བུ་རཏྣས་བསྐུལ་ངོར་བི་ཛའི་མིང་གིས་བྲིས་པ་མཆོག་ཐུན་བདེ་གླག་ཏུ་འགྲུབ་པའི་རྒྱུ་གྱུར་ཅིག །དེ་ནས་ས་བཅད་གསུམ་པ་ལྷ་འདྲེ་གཉིས་འཛིན་གྱི་འཁྲི་བ་བཙན་ཐབས་སུ་གཅོད་པའི་ཕྱིར་གཉིས་མེད་སྒྱུ་མ་ལམ་དུ་ཁྱེར་བ་ནི། ཕཊ་ཕཊཿ རང་སེམས་འགྱུ་བ་དངོས་མེད་ཆོ་འཕྲུལ་ལས། །དེ་ལས་མ་གཏོགས་ལྷ་འདྲེ་ལོགས་སུ་མེད། །ང་དང་ཁྱེད་མེད་གནོད་བྱ་གནོད་བྱེད་མེད། །ལྷ་འདྲེ་གཉིས་མེད་འཇིགས་དང་འཇིགས་ཡུལ་མེད། །བཟང་ངན་གཉིས་མེད་བདེ་དང་སྡུག་བསྔལ་མེད། །འཁོར་འདས་གཉིས་མེད་རེ་དང་དོག་པ་མེད། །ཐམས་ཅད་རོ་སྙོམས་ཡུམ་ཆེན་ཆོས་སྐུའི་ཀློང་། །ཕཊ་ཕཊཿ ན་མོ། བདག་ལུས་ཟག་བཅས་ཕུང་པོའི་མཆོད་སྦྱིན་འདིས། །བླ་མ་དམ་པའི་ཐུགས་དགོངས་རྫོགས་གྱུར་ཅིག །རྒྱལ་བ་ཞི་ཁྲོ་མཆོད་པས་མཉེས་གྱུར་ཅིག །དམ་ཅན་རྒྱ་མཚོ་ཐུགས་དམ་བསྐང་གྱུར་ཅིག །རིགས་དྲུག་སེམས་ཅན་འདོད་པ་ཚིམ་གྱུར་ཅིག །དུས་གསུམ་ལས་ཀྱི་ལན་ཆགས་བྱང་གྱུར་ཅིག །ཕ་མ་རིགས་དྲུག་སྣང་སྲིད་ལྷ་འདྲེ་རྣམས། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །ཕཊ་ཕཊཿ ཅེས་གཅོད་ཀྱི་མན་ངག་བསྡུས་དོན་གསུམ་པ་འདི་ནི། ཉམས་ལེན་རྒྱུན་ཁྱེར་བདེ་བའི་ཕྱིར་དུ་ཚིག་ཉུང་དོན་གསལ་ལ་གོ་བདེ་བ་ཉུང་ངུར་འདི་ནི་བྱ་བྲལ་བ་འཁྲུལ་ཞིག་རང་གྲོལ་གྱིས་སྐུ་བླ་རི་ཁྲོད་དུ་བགྱིས་པའོ། །འདིའི་སྒོ་ནས་གཤིན་པོ་ལ་ཕན་གདག་པ་གཤེད་འདུལ་དཀར་ནག་སོགས་སྤྲོ་ནའང་བྱའོ། །ཞེས་པའང་དེ་ལྟར་འཁྲུལ་ཞིག་ཆེན་པོའི་གསུང་ལས་ཚིག་གཅིག་བཅོས་སླད་མེད་པ་སོར་བཞག་ཁ་བསྐང་འོས་པ་ཀཿཐོག་རྙིང་མའི་དོན་གཅོད་འཁྲུལ་མེད་བསྡུས་ཏེ་སྒྱུ་མའི་རྣལ་འབྱོར་པ་དྲི་མེད་འོད་ཟེར་གྱིས་ལྕགས་སྤྲེལ་ཧོར་ཟླ་གཉིས་པའི་ཚེས་བཅུ་ཉིན་རང་དང་གཞན་ལ་ཉེར་མཁོའི་ཆེད་དུ་བྲིས་པ་དགེ་ཞིང་བཀྲ་ཤིས་པར་གྱུར་ཅིག། །།

གཅོད་ཀྱི་མེ་མཆོད་གསལ་བྱེད་མེའི་པ་ཏྲ།

གཅོད་ཀྱིས་མེ་མཆོད་གསལ་བྱེད་མེའི་པ་ཏྲ་བཞུགས་སོ། །བླ་མ་དང་ཡུམ་ཆེན་མོ་ལ་ཕྱག་འཚལ་ལོ། །གཅོད་ཀྱིས་མེ་མཆོད་སྐབས་སུ་མཁོ་བའི་ཟིན་བྲིས་ལ་གཉིས་ཏེ། རྩ་བའི་དཀྱིལ་འཁོར་དང་། ལས་ཀྱི་དཀྱིལ་འཁོར་རོ། །དང་པོ་ནི། ཚོམ་བུ་བཀོད་ཕྱི་ནང་གསང་སུམ་གྱིས་མཆོད་པ་བཤམས། མཁའ་འགྲོ་སྡེ་ལྔའི་མངོན་རྟོག་གཞུང་སྲོང་ཞིང་། བསྐང་བ་ཚོགས་མཆོད་དང་བཅས་པ་ཚང་བར་བྱེད། གཉིས་པ་ལས་ཀྱི་དཀྱིལ་འཁོར་ལ་གསུམ་སྟེ། སྦྱོར་བ་དང་། དངོས་གཞི། རྗེས་གསུམ་མོ། །དང་པོ་སྦྱོར་བ་ལ། བཅས་ཀྱི་རིམ་པ་ནི། མཎྜལ་གྲུ་བཞི་མདའ་གང་པ་བྱས་ལ། དཀྱིལ་འཁོར་དེའི་འོག་ཏུ། ཐོད་པའི་ནང་དུ་དགྲ་གདོན་གང་ཡིན་གྱི་ལིངྒ་དང་། ལྕགས་བཅུག་ལ་འགུགས་འདྲེན་མང་དུ་བྱས་ལ་སྤའོ། །མདོར་པ་ཀུན་དགའ་དཔལ་གྱི་བཞེད་པ་ལྟར། ལས་བཞིའི་དཀྱིལ་འཁོར་བྲི་ཐབས་ནི། དང་པོ་ཞི་པའི་སྦྱིན་སྲེག་བྱེད་ན། ཞི་བའི་ཐབས་ཁུང་ཁ་དོག་དཀར་ལ་དབྱིབ་ཟླུམ་པོ། རྒྱར་ཁྲུ་གང་ཟབས་སུ་ཁྲུ་ཕྱེད་པ་ལ་ཁ་ཁྱེར་ལ་སོར་བཞི་བསྐྱེད་པའི་སྟེང་དུ། མུ་རན་སོར་བཞི་པ་ལ། མཚམས་བཞིར་རྡོ་རྗེའི་ཕྲེང་བ་ཕྱོགས་བཞིར་ཟླ་ཕྱེད་རྡོ་རྗེའི་མཚན་པ། དེའི་དབུས་སུ་པདྨ་འདབ་བཞི་ཕྱོགས་མཚོན་བྲིའོ། །རྒྱས་པ་ལ་གྲུ་བཞི་སེར་པོ། རྒྱར་ཁྲུ་དོ། ཟབ་ཏུ་ཁྲུ་གང་པ་ཁ་ཁྱེར་དང་མུ་རན་སོར་བརྒྱད་པ་ལས། ནོར་བུ་རིན་པོ་ཆེའི་ཕྲེང་བས་མཚན་པ། དེའི་དབུས་སུ་པདྨ་འདབ་བཞི་ཕྱོགས་མཚོན་བྲིའོ། །དབང་ལ་ཟླ་གམ་དམར་པོ། རྒྱར་ཁྲུ་གང་ཟབས་སུ་ཁྲུ་ཕྱེད་པ། མུ་རན་དང་ཁ་ཁྱེར་ལ་སོར་བཞི་བཞིའོ། །མུ་རན་ལ་ལྕགས་ཀྱུ་ལྟ་བུའམ་པདྨའི་ཕྲེང་བ། དེའི་དབུས་སུ་པདྨ་འདབ་བཞི་ཕྱོགས་མཚོན་ནོ། །དྲག་པོ་ལ་གྲུ་གསུམ་ནག་པོ། རྒྱར་སོར་མོ་ཉི་ཤུ། ཟབས་སུ་སོར་བཅུ་པ། ཁ་ཁྱེར་དང་མུ་རན་སོར་གསུམ་གསུམ་པ་ལ། རྡོ་རྗེ་གདེང་བའི་ཕྲེང་བས་བརྒྱན་པ། དེའི་དབུས་སུ་པདྨ་འདབ་བཞི་ཕྱོགས་མཚོན་བྲིའོ། །ཡང་ན་ནི་ཞི་བ་ལ་མུ་ཁྱུད་དཀར་པོ་ཟླུམ་པོའི་ནང་དུ། པདྨ་འདབ་བཞི་ཕྱོགས་མཚོན་བྲི། རྒྱས་པ་ལ་གྲུ་བཞི་སེར་པོའི་ནང་དུ་པདྨ་འདབ་བཞི་དབང་ལ་མུ་ཁྱུད་དམར་པོའི་ནང་དུ་པདྨ་འདབ་བཞི། དྲག་པོ་ལ་མུ་ཁྱུད་གྲུ་གསུམ་དམར་པོའི་ནང་དུ་པདྨ་འདབ་བཞི་ཕྱོགས་མཚོན་བྲིའོ། །དེ་རྣམས་ཀུན་གྱི་རྒྱབ་ཏུ་རྡོ་རྗེ་དཀར་པོའི་ཕྲེང་བ་དང་མེ་རི་དམར་པོས་བསྐོར་བར་བྱའོ། །དེ་རྣམས་གང་ལྟར་ཡིན་ཀྱང་མེ་ཐབས་བརྩིག་ལུགས་ནི། ལས་བཞི་རང་རང་གི་ཤིང་གིས་ཞི་བ་ལ་ཤིང་དྲུག་གིས་ཟླུམ་པོ་དྲུག་བསྐོར་ལ་མཐོ་དམན་སུམ་རིམ་དུ་བརྩིག །རྒྱས་པ་ལ་ཤིང་བཞི་བསྐོར་དུ་བརྩིགས་ལ་མཐོ་དམན་གོང་དང་འདྲ། དབང་ལ་ཤིང་ལྔས་ཟླ་གམ་དུ་བརྩིག་ལ་མཐོ་དམན་གོང་དང་འདྲ། དྲག་པོ་ལ་ཤིང་གསུམ་གྱི་གྲུ་གསུམ་དུ་བརྩིག་ལ་མཐོ་དམན་གོང་ལྟར་ཡང་ན་ནི། ཨོ་རྒྱན་པདྨས་དམ་པ་རྒྱ་གར་ལ་གསུང་པའི་གཅོད་ཀྱི་ལས་བཞི་ལྷུན་གྲུབ་ཏུ་བྱེད་ན། དཀྱིལ་འཁོར་བྲི་ཐབས་ནི། དབུས་སུ་པདྨ་འདབ་བཞི་ཕྱོགས་མཚོན་ནོ། །དེ་རྒྱབ་ཏུ་ཆོས་འབྱུང་གྲུ་གསུམ་ཁ་དོག་སྔོན་པོའམ་ནག་པོ་བྱ། དེ་རྒྱབ་ཟླ་གམ་དམར་པོ། དེ་རྒྱབ་མུ་ཁྱུད་ཟླུམ་པོ་དཀར་པོ་བྱ། དེ་རྒྱབ་གྲུ་བཞི་སེར་པོ་བྱ། དེ་རྒྱབ་སྒོ་འདོག་བྱས་ན་བསོད་ནམས་ཆེ་གསུང་། དེ་ལྟར་མ་འཕྲོད་ཀྱང་། རྡོ་ར་མེ་རིས་བསྐོར་རོ། །དེའི་ལྟེ་བར་ཧྲཱི་མ་པདྨ་འདབ་བཞི་ལ་ཧ་རི་ནི་ས་བཞི་བྲི། ཆོས་འབྱུང་གིས་རྒྱབ་ཟླ་གམ་གསུམ་གྱི་སྟེང་དུ་རཾ་དྲུག་བྲིའོ། །དེའི་མེ་ཐབས་བརྩིགས་ལུགས་ནི། ལས་བཞིའི་ཤིང་ཆོས་འབྱུང་བསྣོལ་མར་བརྩིག །དེའི་མཐར་ཤིང་རྩི་སྣ་ཚོགས་ཀྱིས་བསྐོར། དེའི་མཐར་མཆོད་པ་རྣམས་ལྔས་བསྐོར་རོ། །དེའི་སྟེང་དུ་དར་དམར་པོའི་མདའ་དར་བཙུག་གོ། །དེ་ནས་མཆོད་པའི་ཡོ་བྱད་ནི། མཆོད་པ་རྣམ་ལྔ། དེ་ནས་སྨན། གཏོར་མ་དང་བཅས་པ་གཡས་སུ་བཤམས། བསྲེག་རྫས་ནི་སྨན་སྣ། འབྲུ་སྣ། རིན་པོ་ཆེ་སྣ་ཚོགས། ཕྱེ་མར། སྔོ་རྔད་དང་། མེ་ཏོག་གིས་རིགས། གཞན་ཡང་དབྱི་སྤྱང་། དར་རས། འཕྲུག་ཐེར་མ་ཁྲབ་ལ་སོགས། ལས་བཞི་སོ་སོར་འདོད་ན། རང་གི་རྫས་ལ་བུང་བསྐྱེད་ལ་གཡོན་དུ་བཤམས། རྡོར་དྲིལ། ཌ་རུ། དགོངས་བླུག་གཟར། འབྲང་འབྲང་། ཞོ་ཆང་མར་ཁུའི་ཚོགས་རྣམས་མདུན་དུ་བཤམས། སྨྱོན་པའམ་ནད་པ་འདྲེ་གདོན་ཅན་གྱི་དོན་དུ་སྦྱིན་སྲེག་བླུག་ན། ལིིངྒ་དང་གཏོར་ཆུང་བརྒྱ་རྩ་བརྒྱད་བྱས་ལ་བཞག །བསྡུ་ན་ཉི་ཤུ་རྩ་གཅིག་བྱའོ། །དེ་ནི་སྦྱོར་བ་བཅས་ཀྱི་རིན་པའོ། །དངོས་གཞི་ལ་ལྔ་སྟེ། དང་པོ་ལས་བཞིའི་བསྙེན་པ་བྱེད་པ། གཉིས་པ་མཚམས་བཅད་པ། གསུམ་པ་མཆོད་པ་བྱིན་རླབས་དང་། བཞི་པ་འཇིག་རྟེན་པའི་མེ་ལྷ་བསྐྱེད་པ། ལྔ་པ་ཡེ་ཤེས་ཀྱི་མེ་ལྷ་བསྐྱེད་པའོ། །དང་པོ་ནི་བསྐང་བ་ཚོགས་དང་བཅས་པ་ཚར་བའི་རྗེས་སུ། རང་ཉིད་ཡི་དམ་དུ་བསྒོམ་ཞིང་། མདུན་གྱིས་ནམ་མཁར་ཡང་ལས་གཞིའི་ལྷ་ཚོགས་རྣམས་བསྒོམ་ལ། ལས་བཞིའི་དམིགས་པ་འཕྲོ་འདུ་བྱེད་ཅིང་དེའི་སྔགས་ནི། ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་བཾ་ཧ་རི་ནི་ས་ཤནྟིཾ་པུཥྚིཾ་པ་ཤཾ་མ་ར་ཡ་རྦད། ཅེས་པས་ལས་བཞིའི་བསྙེན་པའོ། །གཉིས་པ་འཚམས་བཅད་པ་ནི། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར་མ་འདུག་གཞན་དུ་དེང་། །གལ་ཏེ་མི་འགྲོ་འདུག་གྱུར་ན། །རྡོ་རྗེ་མཁའ་འགྲོ་ཁྲོས་པས་པའི། །རྡོ་རྗེ་འབར་བའི་མཚོན་ཆ་ཡི། །ལུས་ངག་ཡིད་གསུམ་བརྡུལ་དུ་བཟློག །ༀ་བཛྲ་ཌཱཀྐི་ནི་ཧཱུྃ་ཕཊ། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །གནས་འདིར༴ གལ་ཏེ༴ སངས་རྒྱས༴ འཁོར་ལོ༴ ལུས་ངག༴ ༀ་བུདྡྷ་ཌཱཀྐི༴ ཧཱུྃ། ཉོན་ཅིག༴ གནས་འདིར༴ གལ་ཏེ༴ རིན་ཆེན༴ རིན་ཆེན༴ ལུས་ངག་ཡིད༴ ༀ་རཏྣ་ཌཱཀྐི་ནི་ཧཱུྃ་ཕཊ། ཧཱུྃ། ཉོན་ཅིག༴ གནས་འདིར༴ གལ་ཏེ༴ པདྨ་མཁའ་འགྲོ༴ མེ་དཔུང་འབར༴ ལུས་ངག་ཡིད༴ ༀ་པདྨ༴ ཧཱུྃ། ཉོན་ཅིག༴ གནས་འདིར༴ གལ་ཏེ༴ ལས་ཀྱི༴ རལ་གྲི༴ ལུས་ངག་ཡིད༴ ༀ་ཀརྨ་ཌཱཀྐི་ནི་ཧཱུྃ་ཕཊ། ཧཱུྃ། སྲིད་པའི་རྩེ་མོ་མན་ཆད་དང་། །ན་རག་དམྱལ་ཁམས་ཡན་ཆད་དུ། །ལོག་པར་ལྟ་བའི་དགྲ་དང་བགེགས། །འདི་རུ་མ་འདུག་གཞན་དུ་དེང་། །ༀ་སུམྦྷ་ནི་སོགས། ཅེས་བརྗོད་ནས་བགེགས་མེད་པར་བྱས། ཧཱུྃ། སྟེང་ཡང་རྡོ་རྗེའི་བླ་རེ་ལ། །འོག་ཀྱང་རྡོ་རྗེའི་ས་གཞིའི་སྟེ། །སྟེང་འོག་ཕྱོགས་མཚམས་རྡོ་རྗེ་འབར་བས་བསྟམ། །རྡོ་རྗེའི་མཚམས་ལ་མ་འདའ་ཞིག །ༀ་བཛྲ་རཀྵ་རཀྵ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཧཱུྃ། སྟེང་ཡང་འཁོར་ལོའི་བླ༴ འོག་ཀྱང་༴ སྟེང་འོག༴ འཁོར་ལོའི༴ ༀ་ཙཀྲ་རཀྵ༴ ཧཱུྃ། སྟེང་ཡང་དབྱུག་པའི༴ འོག་ཀྱང་༴ སྟེང་འོག༴ དབྱུག་པའི༴ ༀ་ཏནྟྲ༴ ཧཱུྃ། སྟེང་ཡང་དགྲ་སྟྭའི༴ འོག་ཀྱང་སྟེང་འོག༴ དགྲ་སྟྭའི༴ ༀ་པ་ར་ཤུ༴ ཧཱུྃ། སྟེང་ཡང་རལ་གྲིའི༴ འོག་ཀྱང་༴ སྟེང་འོག༴ རལ་གྲིའི༴ ༀ་ཁ་ཁཱ༴ ཧཱུྃ། ཕྱི་རོལ་ཀུན་ཏུ་འོད་འཕྲོས་པས། །བདུད་དཔུང་ངེས་པར་སྲེག་མཛད་པ། །ས་དང་ནམ་མཁའ་གང་བ་ཡི། །འབར་བ་མེ་ཡི་ཕུང་པོར་གྱུར། །ༀ་བཛྲ་ཛ་ལ་རཾ། བཛྲ་ཛྭ་ལ་རཀྵ་རཀྵ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊ། དེ་ནས་གནས་དང་ཡོ་བྱད་བྱིན་གྱིས་རླབས་པ་ནི། ༀ་སྭ་བྷ་ཝ༴ སྟོང་པར་གྱུར། སྟོང་པའི་ངང་ལས་ༀ་ལས་ལྷ་རྫས་ལས་གྲུབ་པའི་གཞལ་ཡས་ཁང་གིས་ཕྱི་ནང་ཀུན་ཏུ་ཨ་ལས་ཡེ་ཤེས་ཀྱི་ཀ་པ་ལ་ཡངས་ཤིང་རྒྱ་ཆེ་བའི་ནང་དུ། ༀ་ཨཱཿཧཱུྃ་གསུམ་ཞུ་བ་ལས་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས། རོལ་མོའི་སྒྲ་ལ་སོགས་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་སྤྲིན་བསམ་གྱི་མི་ཁྱབ་པར། མ་ཧཱ་གུ་རུ་ཌཱཀྐི་ནི་ཨརྒྷཾ་པྲ་ཏི་ཛ་ཡེ་སྭཱ་ཧཱ། པ་ཏྱཾ། ༀ་བཛྲ་དྷུ་པེ་ཨཱ་ཧཱུྃ། པུཥྤེ༴ ཨ་ལོ༴ གྷནྡྷེ༴ ནཻ་བི་དྱེ༴ ཤཔྡ་ཨཱ་ཧཱུྃ་སྭཱ་ཧཱ། ༀ་བཛྲ་གྷནྡྷེ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ། སརྦ་བུདྡྷ་ཀྵེ་ཊ། པྲ་ཙ་ལི་ཏི། པྲ་ཛྙཱ་པ་ར་མི་ཏ། ན་ཏ་སཾ་བྷ་ཝེ་ཏ། བཛྲ་དྷརྨ་ཧྲཱི་དྷ་ཡ་ནི། སནྟོ་ཥ་ནི་ཧཱུྃ་ཧཱུྃ་ཧཱུྃ། ཧེ་ཧོ་ཧོ་ཨ་ཁཾ་སྭཱ་ཧཱ། བཞི་མེ་ལྷ་བསྐྱེད་པ་ལ་གཉིས་ཏེ། མེ་ཐབ་སྐྱེད་པ་དང་། མེ་ལྷ་བསྐྱེད་པའོ། །དང་པོ་ནི། ༀ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊ། ༀ་སྭ་བྷ་ཝ༴ སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་རཾ་ལས་ཉི་མའི་སྟེང་དུ། ཧཱུྃ་དཀར་པོ་ཡོངས་སུ་གྱུར་པ་ལས་ཞི་བའི་ཐབ་ཁུང་ཟླུམ་པོ་དཀར་པོ་རྒྱར་ཁྲུ་གང་ཟབས་སུ་ཁྲུ་ཕྱེད་པ་ལས། ཁ་ཁྱེར་སོར་བཞི་བསྐྱེད་པའི་སྟེང་དུ་མུ་རན་སོར་བཞི་པ་ལ། ཕྱོགས་བཞིར་རྡོ་རྗེའི་ཕྲེང་བ་དང་། གྲྭ་བཞིར་ཟླ་ཕྱེད་རྡོ་རྗེས་མཚན་པ། རྒྱས་པ་ལ་གྲུ་བཞི་སེར་པོ། རྒྱར་ཁྲུ་དོ་ཟབས་སུ་ཁྲུ་གང་པ། ཁ་ཁྱེར་དང་མུ་རན་སོར་བརྒྱད་པ་ལ། རིན་པོ་ཆེའི་ཕྲེང་བས་བརྒྱན་པ། དབང་ལ་ཟླ་གམ་དམར་པོ། རྒྱར་ཁྲུ་གང་པ། ཟབས་སུ་ཁྲུ་ཕྱེད་པ། སོར་བཞིའི་ཁ་ཁྱེར་དང་མུ་རན་ལ། ལྕགས་ཀྱུའམ་པདྨའི་ཕྲེང་བས་བརྒྱན་པ། དྲག་པོ་ལ་གྲུ་གསུམ་ནག་པོ་རྒྱར་སོར་མོ་ཉི་ཤུ། ཟབས་སུ་སོར་བཅུ་པ། ཁ་ཁྱེར་མུ་རན་སོར་གསུམ་པ.ལས་རྡོ་རྗེ་གདེང་པོའི་ཕྲེང་བས་བརྒྱན་པ། རང་རང་གི་ད་ཤིང་གིས་བརྩིག་པས་ཡོངས་སུ་གང་བ། དྭངས་ཞིང་ཐོག་མ་མེད་པར་གྱུར། དེ་ལྟ་བུའི་ཐབས་ཁུང་གི་ནང་དུ། སྟོང་པའི་ངང་ལས་པཾ་ལས་པདྨ་རཾ་ལས་ཉི་མའི་སྟེང་དུ། རཾ་ལས་བསྒྲང་ཕྲེང་རཾ་གྱིས་མཚན་པ་ལས། མེ་ལྷ་སྐུ་མདོག་དཀར་པོ་ཞལ་གཅིག་ཕྱག་བཞི་པ། གཡས་པ་གཉིས་ཀྱི་མཆོད་སྦྱིན་དང་བསྒྲང་ཕྲེང་འཛིན་པ། གཡོན་པ་གཉིས་ཀྱིས་དབྱུག་གུ་རྩེ་གསུམ་པ་དང་། བདུད་རྩིའི་གང་བའི་རིལ་བ་བསྣམས་པ། རལ་པ་ཐོར་ཚུགས་ཅན། ཨག་ཙམ་འཕྱང་བ། ཚངས་པའི་སྐུད་པ་ཅན། ར་སྐྱེས་ཁམས་པའི་གདན་ལ་བཞུགས་པ། དྲང་སྲོང་གི་ཚོགས་ཀྱིས་བསྐོར་བ། ལས་བཞི་སྒྲུབ་པའི་དཀྱིལ་འཁོར་བདུད་རྩིའི་ཆུ་རྒྱུན་འཕྲོ་བ། དེ་དག་ཐམས་ཅད་ཀྱིས་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། དེའི་འོད་ཀྱིས་ཤར་ལྷོ་ནས་མེ་ལྷ་འཁོར་དང་བཅས་པ་སྤྱན་དྲངས་བར་བསམ་ཞིང་། རྡོ་རྗེ་དྲིལ་བུ་འཛིན་ལ། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེག་བླུག་ཞལ་ཟས་བཞེས་སླད་དུ། །འབར་བའི་གདན་ལ་བཞུགས་སུ་གསོལ། །ༀ་ཨེ་ཧྱ་ཧི་བྷ་ག་ཝན་ཨག་ནེ་ཡེ་ཨ་ཀཪྵ་ཡ་ས་མ་ཡ་སྟཾ། ཡེ་ཤེས་སེམས་དཔའ་དང་དམ་ཚིག་པ་གཉིས་མེད་དུ་བསྟིམ། དེ་ནས་ཕྱིའི་མཆོད་པ་རྣམ་ལྔ་འབུལ་བ་ནི། མེ་ལྷ་དྲང་སྲོང་འཁོར་བཅས་ལ། །ལྷ་རྫས་ཕྱི་མཆོད་འབུལ་བ་ནི། །མེ་ཏོག་བདུག་སྤོས་མར་མེ་དྲི། །བཤོས་གཙང་སིལ་སྙན་རོལ་མོ་རྣམས། །སྤྱན་ཤང་ཐུགས་ཀ་སྐུ་ལུས་དང་། །ཞལ་དང་སྙན་དུ་ཐིམ་གྱུར་ཅིག །ཨགྣེ་ཡི་ཨརྒྷཾ་སོགས་བརྗོད། ནང་མཆོད་རྣམ་ལྔ་འབུལ་བ་ནི། ཚིལ་ཆེན་བདུག་སྤོས་ཞུན་ཆེན་མར་མེ་དང་། །རང་བྱུང་དྲི་ཆེན་ཞལ་ཟས་དང་། །རྐང་གླིང་ཐོད་པའི་རྔ་སྒྲ་རྣམས། །མེ་ལྷ་དྲང་སྲོང་འཁོར་བཅས་ལ། །མཆོད་པ་འབུལ་ལོ་བཞེས་སུ་གསོལ། །དབང་དང་དངོས་གྲུབ་བདག་ལ་སྩོལ། །ཨགྣེ་ཡེ་བདུད་རྩི་ལྔ་ལ་ཁ་རཾ་ཁ་ཧི། །དེ་ནས་མར་འབུལ། དེ་ནས་སྲེག་རྫས་ཆ་གཅིག་བཟུང་ལ། ཡེ་ཤེས་མེ་ཡི་དཀྱིལ་འཁོར་དུ། །མེ་ལྷ་དྲང་སྲོང་འཁོར་བཅས་ལ། །འདོད་ཡོན་བསྲེག་རྫས་མེ་མཆོད་འབུལ། །ཕྲིན་ལས་རྣམ་བཞི་བསྒྲུབ་ཏུ་གསོལ། །ༀ་ཨགྣེ་ཡེ་ཛྭ་ལ་རཾ་ཁྷཱི། ཤནྟིཾ་པུཥྚིཾ་པ་ཤང་ཀུ་རུ་ཪྣྲི་ཏྲི་ཤ་ཏྲུཾ་མ་ར་ཡ་ཧཱུྃ་ཕཊ༔ ཅེས་སོགས་ཉེར་གཅིག་གམ་བདུན་འབུལ། དེ་ནས་ཡང་མར་འབུལ། ཕྱི་ནང་རྣམ་ལྔ་སྔགས་ཀྱིས་འབུལ། དེ་ནས་བསྟོད་པ་ནི། འཇིག་རྟེན་དབང་ཕྱུག་མཆོག་གི་སྲས། །ལོ་ཀའི་རྒྱལ་པོར་དབང་བསྐུར་བས། །ཤེས་རབ་མཆོག་གི་ཉོན་མོངས་ཐམས་ཅད་སྲེག །འཇིག་རྟེན་མེ་ལྷ་ཉིད་ལ་རྣམ་པར་འདུད། །དེ་ནས་འཇིག་རྟེན་གྱི་མེ་ལྷ་དེས་སོང་། ལྔ་པ་ཡེ་ཤེས་ཀྱི་མེ་ལྷ་བསྐྱེད་པ་དེ་ལ་ལྔ་སྟེ། དང་པོ་ཤར་གྱིས་ཞི་བའི་སྦྱིན་སྲེག །གཉིས་པ་ལྷོར་རྒྱས་པའི་སྦྱིན་སྲེག །གསུམ་པ་ནུབ་ཏུ་དབང་གིས་སྦྱིན་སྲེག །བཞི་པ་བྱང་དྲག་པོའི་སྦྱིན་སྲེག །ལྔ་པ་དབུས་ལྷུན་གྲུབ་ཀྱི་སྦྱིན་སྲེག་གོ། །དང་པོ་ནི་མེ་ལྷའི་ལྟོ་བར་ཡེ་ཤེས་པའི་མེ་ལྷ་བསྐྱེད་པ་ནི། ༀ་བཛྲ་ཨ་མྲྀ་ཏ་ཀུནྜ་ལི༴ ༀ་སྭ་བྷ་ཝ༴ སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ། རཾ་ལས་ཉི་མའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་སྔོན་པོ་ཧཱུྃ་གིས་མཚན་པ་ལས་འོད་ཟེར་ཕྱོགས་བཅུར་འཕྲོས་པས། འོག་རྡོ་རྗེའི་ས་གཞི། ཐ་མ་རྡོ་རྗེའི་ར་བ་དང་། དྲ་བ་སྟེང་རྡོ་རྗེའི་གུར་དང་བླ་རེ་དེ་དག་གིས་ཕྱི་རོལ་དུ་མདའི་དྲྭ་བ་དང་མིག་མང་རིས་སུ་བྲིས་པའི་ཕྱི་རོལ་དུ་ཡེ་ཤེས་ཀྱི་མེ་འབར་བས་བསྐོར་བའི་བསྲུང་འཁོར་ཡངས་ཤིང་རྒྱ་ཆེ་བ། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། དེའི་ནང་དུ་ཨེ་ལས་ཆོས་ཀྱི་འབྱུང་གནས། གྲུ་གསུམ་ཕྱི་དཀར་ལ་ནང་དམར་བ། གདེང་ཀ་ཆེན་པོ་གྱེན་དུ་ཕྱོགས་པ། རྩ་བ་ཕྲ་བ་ཐུར་དུ་ཟུག་པའི་ནང་དུ། ཡཾ་ལས་རླུང་། རཾ་ལས་མེ། བཾ་ལས་ཆུ། ལཾ་ལས་སའི་དཀྱིལ་འཁོར། དེའི་སྟེང་དུ་སུཾ་ལས་རི་རབ་ཀྱི་སྟེང་དུ་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་ཁ་ཁྱེར་བཞི་དང་བཅས་པའི་ནང་ནས་རིམ་པ་བཞིན་དུ། ནག་པོ། ལྗང་ཁུ། དམར་པོ། སེར་པོ། དཀར་པོའི་བརྩིག་པ་རིམ་པ་བཞི་དང་ལྡན་པ། རྩིག་པའི་སྟེང་དུ་རིན་པོ་ཆེ་ཕ་གུ་སེར་པོ་ལ། དྲྭ་བ་དང་དྲྭ་བ་ཕྱེད་པ་འཕྱང་པའི་སྟེང་དུ། རིན་པོ་ཆེའི་རྣམ་པར་སྤེལ་བའི་མདའ་ཡབ་དང་། པུ་ཤུ་མཆོད་རྟེན་གྱི་རྣམ་པས་མཛེས་པར་བྱས་པ། རྩིག་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་མཆོད་པའི་ལྷ་མོ་བཅུ་དྲུག་གིས་མཆོད་རྫས་དུ་མ་ཐོག་ནས་བཅོམ་ལྡན་འདས་མ་ལ་མཆོད་པ། ནང་ཀ་བ་བརྒྱད་ཀྱིས་བརྟེག་པ། རྡོ་རྗེའི་གདུང་བཞིས་མིག་མང་རིས་སུ་བྲིས་ཤིང་མཛེས་པར་ཕུབ་པའི་དབུས་ཕྱུར་བུ་ཟླུམ་པོར་གྱུར་པའི་སྟེང་དུ། རྡོ་རྗེ་ཕྱེད་པ་ནོར་བུ་རིན་པོ་ཆེའི་མཚན་པ། སྒོ་བཞི་བཞིའི་ཐད་སོར་ཀ་བ་བཞི་བཞིས་བཏེགས་པའི་རྟ་བབ་བང་རིམ་བཞི་བཞི་དང་ལྡན་པའི་སྟེང་དུ། པདྨ་ལ་གནས་པའི་ཆོས་ཀྱི་འཁོར་ལོ་དང་། གདུག་དང་། རི་དྭགས་དང་། གོས་དང་། ཕན་དང་། མེ་ཏོག་གིས་ཕྲེང་བ་དང་། དྲིལ་བུ་གཡེར་ཁ་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་བརྒྱན་པ། ངང་ཞིང་སྒྲིབ་པ་མེད་པའི་ཕྱི་རོལ་དུ། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་གཞལ་ཡས་ཁང་གི་དབུས་སྔོ། ཤར་དཀར་ལྷོ་སེར། ནུབ་དམར། བྱང་ལྗང་དབུས་པདྨ་འདབ་མ་བཞི་པའི་ལྟེ་བ་དང་། འདབ་མ་རྣམས་སུ་ཨ་ལས་ཟླ་བ་རཾ་ལས་ཉི་མ། རོའི་གདན་སྟེང་དབུས་སུ་ཨཱ་ཡིག་སྔོན་པོ། ཤར་དཀར། ལྷོ་སེར། ནུབ་དམར། བྱང་ལྗང་ཁུ་དེ་རྣམས་ཡོངས་སུ་གྱུར་པ་ལས། དབུས་སུ་རང་ཉིད་རྡོ་རྗེ་མཁའ་འགྲོ་མ་སྐུ་མདོག་སྔོན་མོ། གྲི་གུག་རང་རང་གི་མདོག་ཅན་ཨ་ཡིག་གིས་མཚན་པ་ལས་འོད་འཕྲོས་སེམས་ཅན་གྱི་དོན་བྱས་འཕགས་པ་མཆོད་ཚུར་འདུས་ཡོངས་སུ་གྱུར་པ་ལས། དབུས་སུ་རང་ཉིད་རྡོ་རྗེ་མཁའ་འགྲོ་མ་སྐུ་མདོག་སྔོན་མོ། ཤར་དུ་སངས་རྒྱས་མཁའ་འགྲོ་དཀར་མོ། ལྷོར་རིན་ཆེན་མཁའ་འགྲོ། ནུབ་ཏུ་པདྨ་མཁའ་འགྲོ། བྱང་དུ་ལས་ཀྱི་མཁའ་འགྲོ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་ཅུང་ཟད་བསྒྲད་པ། ཞལ་ཅུང་ཟད་གདང་ཞིང་མཆེ་བ་གཙིག་པ། དབུ་སྐྲ་ནག་པོ་སིལ་མར་གྱུར་པས་སྐུ་རྒྱབ་ནོན་པ། གཡས་པས་གྲི་ཁུག་ནམ་མཁར་ཕྱར་བ། གཡོན་པས་ཐོད་ཁྲག་ཐུགས་ཀར་བསྣམས་པ། གྲུ་མོ་ན་ཁ་ཊྭཱཾ་ཁ་ཡོད་པ། ཚངས་པའི་སྐུད་པ་དང་། དུང་ཆེན་གྱིས་ཕྲེང་བ་མཆོད་ཕྱིར་ཐོག་པ། མི་མགོ་སྐམ་པོ་ལྔ་ལྔས་དབུ་བརྒྱན་པ། རློན་པ་ལྔ་བཅུའི་དོ་ཤལ་བྱས་པ། འཁོར་ལོ་རྣ་ཆ་གདུའུ་མགུལ་རྒྱན་སྐུ་རེག་སྟེ་རུས་པའི་རྒྱན་ལྔས་བརྒྱན་པ། ཞབས་གཡས་བསྐུམ་པའི་ཏིང་པ་བ་ག་ལ་གཏད་ཅིང་། གཡོན་བརྐྱང་པ་གར་ཐབས་ཀྱི་རོའི་གདན་ལ་བཞུགས་པ། དང་ཞིང་གསལ་བ་ལ་ཉི་མ་འབུམ་གྱིས་གཟི་བརྗིད་ཅན། ཡེ་ཤེས་ཀྱི་མེ་འབར་བའི་དབུས་སུ་བཞུགས་པ། དེ་དག་ཐམས་ཅད་ཀྱིས་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། མ་ཧཱ་གུ་རུ་ཌཱཀྐི་ནི་ས་པ་རི་ཝ་ར་བཛྲ་ས་མ་ཡ་ཛ་ཛ། པདྨ་ཀ་མ་ལ་ཡེ་སྟཾ། ལྷ། ཨརྒྷཾ་ལ་སོགས་བརྗོད། མ་ཧཱ་གུ་རུ་ཨཱ་གུ་ཤ་ཛ། བཛྲ་པ་ཤ་ཧཱུྃ། བཛྲ་སྥོ་ཊ་བཾ། ༀ་བཛྲ་ཨ་བེ་ཤ་ཡ་ཨཱཿ ཡང་ཐུགས་ཀ་ནས་འོད་ཟེར་འཕྲོས་པས་དབང་གིས་ལྷ། རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ཁྲོ་བོ་བཅུ། ལྷ་མོ་དྲུག །པན་ཙ་ཀུ་ལ་ས་པ་རི་ཝ་ར། བཛྲ་ས་མན་ཛ་ཛ། པདྨ་ཀ་མ་ལ་ཡེ་སྟྭཾ། ༀ་ན་མ་སརྦ་ཏ་ཐཱ་ག་ཏ་ས་པ་རི་ཝ་ཨརྒྷཾ་སྭཱ་ཧཱ། དེས་བདག་ལ་དབང་བསྐུར་དུ་གསོལ། ཇི་ལྟར་བལྟམ་པ་ཙམ་གྱིས་ནི། ལྷ་རྣམས་ཀྱིས་ནི་ཁྲུས་གསོལ་ལྟར། ལྷའི་ཆུ་ནི་དག་པ་ཡི། དེ་བཞིན་བདག་གིས་སྐུ་ཁྲུས་གསོལ། ༀ་ན་མ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཅེས་གསུང་ཞིང་དབང་བསྐུར་བས། དྲི་མ་དག །དབང་ཐམས་ཅད་ཐོབ་ནས་ལུས་ཐམས་ཅད་གང་། ཆུའི་ལྷག་མ་ཡར་ལུད་པ་ལས། གཙོ་མོ་ལ་མི་བསྐྱོད་པ། གཞན་རྣམས་ལ་རིགས་བཞིས་དབུས་རྒྱན། ཡང་ན་མི་སྤྱོད་པས་དབུ་རྒྱན། ཨརྒྷཾ༴ དེ་ནས་ཡེ་ཤེས་པ་སྤྱན་དྲངས་པ་ནི། གནས་མཁའ་དབྱིངས་རྣམ་དག་གིས་ཕོ་བྲང་ནས། །བླ་མ་ཡི་དམ་མཁའ་འགྲོ་གསུམ། །ཆོས་སྐུ་ལོངས་སྐུ་སྤྲུལ་པའི་སྐུ། །སངས་རྒྱས་ཆོས་དང་དགེ་འདུན་གསུམ། །ཁྱེད་སངས་རྒྱས་བྱང་སེམས་ཚོགས་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །བཞུགས་ནས་དབང་བསྐུར་བྱིན་གྱིས་རློབས། །གནས་འོག་མིན་ཆོས་དབྱིངས་ཕོ་བྲང་ནས། །ཡུམ་ཆེན་ཕར་ཕྱིན་མན་ཆད་དང་། །རྩ་བའི་བླ་མ་ཡན་ཆད་ཀྱིས། །མ་རྒྱུད་དཔའ་མོའི་ལྷ་ཚོགས་རྣམས། །ཁྱེད་དཔའ་བོ་མཁའ་འགྲོའི་ཚོགས་དང་བཅས། །གནས་འདིར་སྤྱན༴ བཞུགས་ནས༴ གནས་བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀྱ་ཐུབ་པ་དང་། །རྩ་བའི་བླ་མ༴ ཕ་བརྒྱུད་དཔའ་བོའི་ལྷ་ཚོགས་ལ། །དཔའ་མོ་མཁའ་འགྲོའི༴ གནས་འདིར༴ བཞུགས་ནས༴ གནས་བཀྲ་ཤིས་གླང་ལུང་གི་དགོན་པ་ནས། །རྒྱལ་བ་དོན་འགྲུབ་མན་ཆད་དང་། །རྩ་བ་བརྒྱུད་པའི༴ སྲས་རྒྱུད་ཉམས་མྱོང་གིས༴ སྡེ་སྣོད་རྒྱུད་སྡེའི་བླ་མ་རྣམས༴ གནས་འདིར༴ བཞུགས༴ གནས་གར་བཞུགས་དག་པའི་ཞིང་ཁམས་ནས། ཕ་དྲིན་ཆེན་རྩ་བའི་བླ་མ་རྡོ་རྗེ་འཆང་། ཁྱེད་བཀའ་བརྒྱུད་བླ་མའི་ཚོགས་ཀྱིས༴ གནས་འདིར༴ བཞུགས་ནས༴ གནས་གཉན་ས་རི་ཁྲོད་དགོན་པ་ནས། །གྲོག་སྙེམ་ཐག་ཆོད་པ་སྤྲུལ་པའི་སྐུ། །སྐལ་ལྡན་ཕོ་མོའི་ཚོགས་ཀྱིས་བསྐོར། །གནས༴ བཞུགས༴ གནས་ཉི་ཤུ་རྩ་བཞིའི་གནས་མཆོག་ནས། །ཡི་དམ་ལྷ་ཚོགས༴ རྒྱུད་སྡེ་བཞིའི་ཚོགས་ཀྱིས༴ གནས༴ བཞུགས༴ བསིལ་བ་ཚལ་གྱི་དུར་ཁྲོད་ནས། །ཆོས་སྐྱོང་མ་མགོན་ལྕམ་དྲལ་ལ། །དམ་ཅན་རྒྱ་མཚོའི་ཚོགས་ཀྱི༴ གནས་འདིར༴ བཞུགས༴ མ་ཧཱ་གུ་རུ་ཌཱཀྐི་ནི་ས་པ་རི་ཝ་ར༴ བཛྲ་ས་མ་ཡ་ཛ་ཛ། ཅེས་བརྗོད་ཅིང་རྡོ་རྗེ་བསྡུས་པའི་ཕྱག་རྒྱ་བྱས་ལ་ཐམས་ཅད་མདུན་དུ་བྱོན་པར་བསམ། པདྨ་ཀ་མ་ལ་ཡེ་སྟྭཾ། མ་ཧཱ་གུ་རུ༴ ཅེས་སོགས་སྔོན་དུ་འགྲོ་བ་མ་སོགས་པས་མཆོད་ནས། ཛཿཧཱུྃ་བཾ་ཧོཿ དེ་ནས་མཆོད་པ་འབུལ་བ་ནི། དང་པོ་སྤྱི་མཆོད་པ་རྣམ་ལྔ། ཨརྒྷཾ་སོགས་སྔགས་ཀྱིས་འབུལ། དེ་ནས་ནང་མཆོད་འབུལ་བ་ནི། ན་མ་སརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭ་བྷ་ཝ་ཨཏྨ་ཀོ྅་ཧཾ། ཅེས་པས་འབུལ། དེ་ནས་གསང་མཆོད་འབུལ་བ་ནི། ན་མ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སྭ་བྷ་ཝ་ཨཏྨ་ཀོ྅་ཧཾ། ཅེས་པས་འབུལ། དེ་ནས་དེ་ཁོ་ན་ཉིད་ཀྱིས་མཆོད་པ་ནི། འཁོར་གསུམ་མི་དམིག་པས་འབུལ་ལོ། །དེ་ནས་ཐོག་མ་མར་ལ་ཐ་མ་མར། །ཅེས་པས་མར་ཆོས་ཉིད་ཀྱིས་ངོ་བོར་དམིགས་ལ་འབུལ་བ་ནི། ༀ་ཨག་ནེ་ཡེ་སྭཱ་ཧཱ། ཅེས་པ་བརྗོད་ལ་མར་འབུལ། དེ་ནས་སྲེག་རྫས་བཟུང་ལ། འབུལ་ཚིག་ནི། ཡེ་ཤེས་མེ་ཡི་དཀྱིལ་འཁོར་དུ། །བླ་མ་ཡིད་དམ་མཁའ་འགྲོ་ལ། །འདོད་ཡོན་བསྲེག་རྫས་མེ་མཆོད་འབུལ། །ཕྲིན་ལས་རྣམ་བཞི་བསྒྲུབ་ཏུ་གསོལ། །ནད་དང་སྡུག་བསྔལ་ཞི་གྱུར་ཅིག །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་བཾ་ཧ་རི་ནི་ས་ཛྭ་ལ་རཾ། ཨགྣེ་ཡེ་པུ་ཙ་ཧཱུྃ། ནད་གདོན་སྡིག་སྒྲིབ་འཇིག་བརྒྱད་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ། ཅེས་བརྗོད་དོ། །དེའི་དམིགས་པ་ནི། ཡེ་ཤེས་ཀྱི་བདུད་རྩི་དཀར་པོ་བསམ་ལ། ལྷ་ཚོགས་རྣམས་སྐུ་མདོག་དཀར་པོར་གྱུར་པ་ལ་ཕུལ་བས། མཉེས་ཤིང་དགྱེས་པའི་ཡོན་ཏན་གྱིས། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་དཀར་པོ་མ་ར་འཕྲོས་པས། བདག་དང་ཡོན་བདག་གིས་འཇིགས་པ་བརྒྱད་ཞི་བར་བསམ་ཞིང་། དགང་བླུག་གཟར་མ་འཛོམ་ན། རང་གིས་ལག་པའི་སོར་མོ་ལྔ་འདོད་ཡོན་གྱིས་ལྷ་མོ་ལྔར་བསམ་ལ་བརྒྱ་རྩ་བརྒྱད་འབུལ་ལོ། །དེས་མར་འབུལ་དེ་ནས་ཡམ་ཤིང་། ༀ་བོ་དྷི་པྲིཀྵ་ཡེ་སྭཱ་ཧཱ། ཅེས་ཡམ་ཤིང་འབུལ་ལོ། །དེ་ནས་གཏང་རག་གིས་མཆོད་པ་ནི། ཕྱི་ནང་གསང་གསུམ་གྱིས་མཆོད་པ་གོང་ལྟར་འབུལ། དེ་ནས་བསྟོད་པ་བྱ་བ་ནི། མ་ཆོས་དབྱིངས་རྣམ་དག་སྐྱེ་མེད་ཡུམ། ཅེས་པ་ནས། མ་དྲིན་མོ་ཆེ་ལ་ཕྱག་འཚལ་བསྟོད། ཅེས་པ་བསྟོད། ཀ་ཡ་བཛྲ་ༀ། ཝཀྐ་བཛྲ་ཨཱཿ ཙིཏྟ་བཛྲ་སིདྡྷི་ཧཱུྃ། ཅེས་པས་དངོས་གྲུབ་བླང་། དེ་ནས། མ་འབྱོར་པ་དང་ཉམས་པ་དང་། ཅེས་པས་བཟོད་པ་གསོལ། དེ་ནས་ཡི་གེ་བརྒྱ་པ ས་ལྷག་ཆད་ཀྱི་ཁ་བསྐང་། དེ་ནས་སྨོན་ལམ་ནི། ན་མོ་བདག་གཞན་ཀུན་གྱི་དུས་གསུམ་དུ། །དགེ་རྩ་འདུས་བྱས་འདུས་མ་བྱས། །དེ་བཞིན་ཟག་བཅས་ཟག་པ་མེད། །དེ་དག་ལ་ནི་ཡི་རང་ངོ་། །ཡི་རང་བྱང་ཆུབ་ཆེན་པོར་བསྔོ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བར་ཆད་མེད་པར་འཇུག་པར་ཤོག །བར་ཆད་མེད་པར་འཇུག་ནས་ཀྱང་། །ཇི་སྲིད་འཁོར་བ་མ་སྟོང་པར། །སྟོང་ཉིད་དམ་པ་ཐོབ་པར་ཤོག །དེ་ནས་བཀྲ་ཤིས་ནི། བཅོམ་ལྡན་ཤཱཀྱ་ཐུབ་པ་ཡིས། །བྱང་ཆུབ་མཆོག་ཏུ་སེམས་བསྐྱེད་ནས། །ལམ་བསྒྲོད་བྱང་ཆུབ་མཆོག་ཐོབ་པས། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྐྱེ་བ་མེད་ལ་གཟུགས་སྐུ་འཆར། །འགྲོ་རྣམས་བདེ་ལ་བཀོད་མཛད་པའི། །ཡུམ་ཆེན་ཕ་རོལ་ཕྱིན་མའི་བཀྲ་ཤིག་ཤོག །ཚངས་པ་བརྒྱ་བྱིན་རྒྱལ་ཆེན་བཞི། །མཆོད་པའི་ཚོགས་ཀྱི་རབ་མཆོད་ཅིང་། །ཉིན་མཚན་ཀུན་ཏུ་བསྲུང་བྱེད་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད། གཉིས་པ་ལྷོར་རྒྱས་པའི་སྦྱིན་སྲེག་ནི། དང་པོ་མཚམས་བཅད། གཉིས་པ་མཆོད་པ་བྱིན་རླབས། གསུམ་པ་རྒྱས་པའི་མེ་ཐབ་བསྐྱེད་པ། བཞི་པ་འཇིག་རྟེན་པའི་མེ་ལྷ་གསལ་གདབ་ཅིང་། ལྔ་པ་ཡེ་ཤེས་ཀྱི་མེ་ལྷ་བསྐྱེད་པ། སྤྱན་དྲངས་པ་སོགས་པ་རྣམས་གོང་ལྟར་དུ་རྒྱས་པར་བྱེད་དོ། །ཡང་ན་སྐད་ཅིག་དྲན་རྫོགས་བསྐྱེད་ཅིང་བསྡུས་ཀྱང་རུང་ངོ་། །དེ་ནས་མཆོད་པ་འབུལ་བ་ནི། ཕྱི་ནང་གསང་གསུམ་གྱིས་མཆོད་པ་གང་བཞིན་འབུལ། དེ་ནས་མར་གོང་བཞིན་དུ་འབུལ། དེ་ནས་སྲེག་རྫས་འབུལ་བ་ནི། ཡེ་ཤེས་མེ་ཡི་དཀྱིལ་འཁོར་དུ། །བླ་མ་ཡི་དམ་མཁའ་འགྲོ་ལ། །འདོད་ཡོན་བསྲེག་རྫས་མེ་མཆོད་འབུལ། །ཕྲིན་ལས་རྣམས་བཞི་བསྒྲུབ་ཏུ་གསོལ། །ཚེ་དང་བསོད་ནམས་རྒྱས་གྱུར་ཅིག །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཚེ་དང་བསོད་ནམས་ལ་སོགས་འབྱོར་པ་དྲུག་པུཥྚིཾ་ཀུ་རུ་ཡེ་སྭཱ་ཧཱ། དེའི་དམིགས་པ་ནི། ཡེ་ཤེས་ཀྱི་བདུད་རྩི་སེར་པོ་བྱིན་གྱིས་རླབས་ལ། ལྷ་ཚོགས་རྣམས་སྐུ་མདོག་སེར་པོར་གྱུར་པ་ལས་ཕུལ་བས། མཉེས་ཤིང་དགྱེས་པའི་འོད་ཟེར་གྱིས། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་ཕར་འཕྲོས་པས། བདག་དང་ཡོན་བདག་གིས་ཚེ་དང་བསོད་ནམས་ལ་སོགས་འབྱོར་པ་དྲུག་རྒྱས་པར་བསམ་ཞིང་། གོང་ལྟར་འབུལ་ལོ། །དེ་ནས་ཡང་མར་དང་ཡམ་ཤིང་ཡང་གོང་ལྟར་འབུལ་ལོ། །གཏང་རག་གི་མཆོད་པ་གང་ལྟར་བྱེད། དེ་ནས་དངོས་གྲུབ་ལེན་པ། བཟོད་པ་གསོལ་བ། ལྷག་ཆད་ཁ་བསྐང་སྨོན་ལམ་བཀྲ་ཤིས་དང་བཅས་པ་གོང་ལྟར་བྱའོ། །དེ་ནས་གསུམ་པ་ནུབ་ཏུ་དབང་གིས་སྦྱིན་བསྲེག་ནི། མཚམས་བཅད་པ། མཆོད་པ་བྱིན་གྱིས་བརླབ་པ། དབང་གིས་མེ་ཐབས་བསྐྱེད་པ། འཇིག་རྟེན་གྱིས་མེ་ལྷ་དང་། ཡེ་ཤེས་ཀྱི་ལྷ་བསྐྱེད་པ། སྤྱན་འདྲེན་པ། ཕྱི་ནང་གསང་གསུམ་གྱིས་མཆོད་པ་མར་དང་བཅས་པ་འབུལ་བ་ནི་གོང་ལྟར་རོ། །དེ་ནས་སྦྱིན་སྲེག་རྫས་འབུལ་བ་ནི། ཡེ་ཤེས་མེ་ཡི་དཀྱིལ་འཁོར་དུ། །བླ་མ་ཡི་དམ༴ འདོད་ཡོན༴ ཕྲིན་ལས༴ མི་ནོར་ཟས་གསུམ་བསྡུས་གྱུར་ཅིག །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི། ཁམས་གསུམ་སྲིད་གསུམ་ལྷ་འདྲེ་མི་གསུམ་ཐམས་ཅད་པ་ཤཾ་ཀུ་རུ་ཡེ་སྭཱ་ཧཱ། དེའི་དམིགས་པ་ནི། ཡེ་ཤེས་ཀྱི་བདུད་རྩི་དམར་པོར་བསམ་ལ་འབུལ་བས། མཉེས་ཞིང་དགྱེས་པའི་འོད་ཟེར་གྱིས། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་དམར་པོ་འཕྲོས་པས་ཁམས་གསུམ་སྲིད་པ་གསུམ་གྱི་ལྷ་འདྲེ་མི་གསུམ་ཐམས་ཅད་དབང་དུ་བསྡུས་པར་བསམ་ལ་གང་ལྟར་རོ། །དེ་ནས་མར་དང་ཡམ་ཤིང་། གཏོང་རག་གིས་མཆོད་པ། བསྟོད་པ། དངོས་གྲུབ་ལེན་པ། བཟོད་གསོལ། ལྷག་ཆད་ཁ་བསྐང་། སྨོན་ལམ་བཀྲ་ཤིས་དང་བཅས་པ.གོང་ལྟར་བྱའོ། །དེ་ནས་བཞི་པ་བྱང་དུ་དྲག་པོའི་སྦྱིན་སྲེག་ནི། མཚམས་བཅད་པ། མཆོད་པ་བྱིན་གྱིས་རླབས་པ། དྲག་པོའི་མེ་ཐབ་བསྐྱེད་པ། འཇིག་རྟེན་གྱི་མེ་ལྷ་དང་། ཡེ་ཤེས་ཀྱི་མི་ལྷ་བསྐྱེད་པ། སྤྱན་དྲངས་བ། ཕྱི་ནང་གསང་གསུམ་གྱིས་མཆོད་པ་མར་དང་བཅས་པ་འབུལ་བ་ནི་གང་ལྟར་རོ། །དེ་ནས་སྲེག་རྫས་འབུལ་བ་ནི། ཡེ་ཤེས་མེ་ཡི༴ བླ་མ་ཡི་དམ༴ འདོད་ཡོན༴ ཕྲིན་ལས༴ དགྲ་བགེགས་ཐམས་ཅད་ཕུང་ཞིང་སྒྲོལ་གྱུར་ཅིག །ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་དགྲ་བགེགས་གནོད་བྱེད་ཐམས་ཅད་ཪྣྲི་ཏྲི་ཤ་ཏྲུཾ་མ་ར་ཡ་ཧཱུྃ་ཕཊ། དེའི་དམིགས་པ་ནི། ཡེ་ཤེས་ཀྱི་བདུད་རྩི་མཐིང་ནག་དུ་བསམ་ལ། ལྷ་ཚོགས་རྣམས་སྐུ་མདོག་མཐིང་ནག་ཏུ་གྱུར་པར་བསམ་ལ་ཕུལ་བས། མཉེས་ཤིང་དགྱེས་པའི་ཡོན་ཏན་གྱིས། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་མཐིང་ནག་འཕྲོས་པས། བདག་དང་ཡོན་བདག་གིས་དགྲ་འདྲེ་གདོན་གསུམ་ཐམས་ཅད་བརླག་པར་བསམ་ལ་གོང་ལྟར་རོ། །ཁྱད་པར་དུ་ནད་པ་ཡོད་ན་གོང་གི་གཏོར་ཆུང་དང་ལིངྒ་ལ་འགུགས་བཞུགས་མང་དུ་བྱས་ལ། ལིངྒ་གདོན་བགེགས་དངོས་སུ་བསམ་ལ། ལྷ་ཚོགས་རྣམས་ཀྱི་ཞལ་དུ་འབུལ་བར་བསམ་ཞིང་། གཏོར་ཆུང་ཡང་ཡེ་ཤེས་ཀྱི་མེ་དཔུང་དུ་བསམ་ལ། གདོན་བགེགས་རྣམ་བསྲེག་པར་བསམ་ལ་སྔགས་ཚར་རེ་དང་ལིངྒ་རེ་སྤྲད་ལ་འབུལ་ལོ། །དེ་ནས་མར་དང་ཡམ་ཤིང་། གཏོར་རག་གིས་མཆོད་པ། བསྟོད་པ་དངོས་གྲུབ་ལེན་པ། བཟོད་གསོལ། ལྷག་ཆད་ཁ་བསྐང་། སྨོན་ལམ་བཀྲ་ཤིས་དང་བཅས་པ་གོང་ལྟར་རོ། །ལྔ་པ་ལྷུན་གྲུབ་ཀྱི་སྦྱིན་སྲེག་ནི། མཚམས་བཅད། མཆོད་པ་བྱིན་བརླབ། མེ་ཐབ་ནི་ལས་བཞི་ལྷུན་གྲུབ་ཀྱིས་མེ་ཐབ་ལྟར་བསྐྱེད་ལ། འཇིག་རྟེན་གྱི་མེ་ལྷ་ནི་སྨུག་པོར་བསྐྱེད་ལ། ཡེ་ཤེས་ཀྱི་མེ་ལྷ་རང་གིས་མདོག་ལྟར་བསྐྱེད་ལ། དེ་ནས་སྤྱན་འདྲེན་པ་དང་། ཕྱི་ནང་གསང་གསུམ་གྱིས་མཆོད་པ་མར་དང་བཅས་པ་འབུལ་བ་ནི་གོང་ལྟར་རོ། །དེ་ནས་སྲེག་བརྫས་འབུལ་བ་ནི། ཡེ་ཤེས་མེ་ཡི་དཀྱིལ་འཁོར་དུ། །བླ་མ་ཡི༴ འདོད་ཡོན༴ ཕྲིན་ལས༴ ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཤནྟིཾ་པུཥྚིཾ་པ་ཤང་ཪྣྲི་ཏྲི་ཤ་ཏྲུཾ་མ་ར་ཡ་ཕཊ། རྦད། དེའི་དམིགས་པ་ནི། ཡེ་ཤེས་ཀྱི་བདུད་རྩི་ཁ་དོག་སྣ་ལྔར་བསམ་ལ། ལྷ་ཚོགས་རྣམས་ལ་ཕུལ་བས། མཉེས་ཤིང་དགྱེས་པའི་ཡོན་ཏན་གྱིས། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་ཁ་དོག་སྣ་ཚོགས་འཕྲོས་པས། བདག་དང་ཡོན་ཏན་བདག་གིས་ལས་བཞིའི་དོན་སྒྲུབ་པར་བསམ། ལ་གང་སྐབས་ཙམ་གྱིས་འབུལ། དེ་ནས་མར་དང་ཡམ་ཤིང་། གཏོང་རག་གིས་མཆོད་པ། བསྟོད་པ། དངོས་གྲུབ་ལེན་པ། བཟོད་གསོལ། ལྷག་ཆད་ཁ་བསྐང་། སྨོན་ལམ་བཀྲ་ཤིས་དང་བཅས་པ་གོང་ལྟར་བྱའོ། །མེ་ཞག་བྱ་ན། ཞུགས་རྫས་ཐོག་ནས། བྱང་། ནུབ། ལྷོ། ཤར། དབུས། སྡིག་བསྐུལ་གྱིས་མེ་ཞགས་བརྒྱབ་པར་བྱའོ། །དེ་ནས་ཡེ་ཤེས་ཀྱི་མེ་ལྷ་གཤེགས། དམ་ཚིག་མེ་ལྷ་བདག་ལ་བསྡུ། འཇིག་རྟེན་གྱི་མེ་ལྷ་རང་གིས་གནས་སུ་གཤེགས། དེ་ནས་བྲོ་བརྡུང་བ་ནི། མེ་གཞི་བསྐོར་ཏེ་འཆམ་ཐབ་བྱའོ། །བྲོ་འདི་གང་དང་གང་གིས་བྲོ། །བྲོ་འདི་ཕ་བརྒྱུད་དཔའ་བོའི་བྲོ། །ཕ་བརྒྱུད་དཔའ་བོའི་བྲོ་བརྡུང་པས། །ཕྱི་སྟོང་ཉིད་ངང་དུ་ཟངས་སེ་ཟང་། །བར་མཉམ་ཉིད་ངང་དུ་ཕྲི་ལི་ལི། །ནང་ཡེ་ཤེས་ངང་དུ་ཡ་ལ་ལ། །གདོན་འདྲེ་བགེགས་ཀྱི་མགོ་དེར་ཆེམས་སེ་ཆེམ། །བྲོ་འདི་གང་དང་གང་གི་བྲོ། །བྲོ་འདི་མ་བརྒྱུད་དཔའ་མོའི་བྲོ། །མ་རྒྱུད་དཔའ་མོའི་བྲོ་བརྡུང་པས། །ཕྱི་སྟོང་ཉིད༴ བར་མཉམ་ཉིད༴ ནང་ཡེ་ཤེས༴ གདོན་འདྲེ༴ བྲོ་འདི༴ བྲོ་འདི་སངས་རྒྱས་མཁའ་འགྲོའི་བྲོ། །སངས་རྒྱས་མཁའ༴ ཕྱི་སྟོང་ཉིད༴ བར་མཉམ༴ ནང་ཡེ་ཤེས༴ གདོན་འདྲེ༴ བྲོ་འདི་གང་༴ བྲོ་འདི་མཁའ་འགྲོ་སྡེ་ལྔའི་བྲོ། །མཁའ་འགྲོ་སྡེ་ལྔའི་བྲོ་བརྡུང་པས། །ཕྱི་སྟོང་ཉིད༴ བར་མཉམ་ཉིད༴ ནང་ཡེ་ཤེས་ངང་དུ་ཡ་ལ་ལ། །གདོན་འདྲེ་བགེགས་ཀྱིས་མགོ་དེར་ཆེམས་སེ་ཆེམ། །དེ་ཡན་ཆད་དངོས་གཞི་དེ་སོང་ནས། སྤྱི་དོན་གསུམ་པ་རྗེས་ཀྱི་བྱ་བ་ནི། ལྷག་མ་ལ་སོགས་སྤྱི་དཀྱུས་ལྟར་བྱའོ། །སྦྱིན་སྲེག་འདི་ནི་སློབ་དཔོན་པདྨས་དམ་པ་རྒྱ་གར་ལ་གནང་བའི་གཅོད་ཀྱིས་མེ་མཆོད་དང་། ཟབ་དོན་ཐུགས་ཐིག་གི་མེ་མཆོད་དང་། འདོར་པ་ཀུན་དགའ་དཔལ་བས་མཛད་པའི་མེ་མཆོད་དང་ལ་བརྟེན་ནས། གཅོད་ཀྱིས་མེ་མཆོད་གསལ་བྱེད་མེའི་པ་ཏྲ་ཞེས་བྱ་བ་འདི། འཇང་ཆུ་སྔོན་མོའི་གཡས་ཟུར། རི་མོ་ནམ་མཆེད་བརྒྱད་ཀྱི་ཞོལ། རི་ཚར་ཆོས་གླིང་གིས་རི་ཁྲོད་ནས། ཀཿཐོག་པའི་འབངས་ཀྱི་ཐ་མལ་གྱུར་པའི་ཀུ་སུ་ལུ་པུཎྱེ་ལ་ཀྵས་སྦྱར་བ་རེ་ཞིག་རྫོགས་སོ།། །།དགེའོ། །

མེ་བསྐུལ།

༅། །མེ་བསྐུལ་བཞུགས་སོ། །ཧཱུྃ། དབུས་ཕྱོགས་དེ་བཞིན་རིགས་ཀྱི་དུར་ཁྲོད་ནས༔ ཆོས་དབྱིངས་ཡེ་ཤེས་མེ་དཔུང་འབར་བ་འདི༔ ལན་གཅིག་དབུས་ཀྱི་ཕྱོགས་སུ་འཕྲོས༔ མེ་ལྕེ་དཀར་པོ་ཆོས་དབྱིངས་ཆེན་པོ་གདལ༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འགྱུར༔ ཡང་སྤྲུལ་ཚ་ཚ་སྐར་ལྟར་འཁྲུག༔ མེ་ལྕེ་འབར་བ་འུར་འུར་ཆེམ་ཆེམ་སྒྲོག༔ སངས་རྒྱས་མཁའ་འགྲོའི་ཚོགས་ཀྱང་དེ་འདྲ་སྟེ༔ མཐོ་སྲིད་པའི་རྩེ་མོ་མན་ཆད་དང༔ དམའ་ས་འོག་ལྟོ་འཕྱེ་ཡན་ཆད་ཀྱི༔ ཕྲིན་ལས་རྣམ་བཞི་འགྲུབ་གྱུར་ཅིག༔ རྩ་སྔགས། ཧཱུྃ། ཤར་ཕྱོགས་རྡོ་རྗེ་རིགས་ཀྱི་དུར་ཁྲོད་ནས༔ མེ་ལོང་ཡེ་ཤེས་མེ་དཔུང་འབར་བ་འདི༔ ལན་ཅིག་ཤར་གྱི་ཕྱོགས་སུ་འཕྲོས༔ མེ་ལྕེ་དཀར་པོའི་སྟོང་གསུམ་གང༔ མེ་ཞགས་དཀར་པོ་མེ་ལོང་ཆེན་པོ་གདལ༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འགྱུ༔ ཡང་སྤྲུལ་ཚ་ཚ་སྐར་ལྟར་འཁྲུག༔ མེ་སྐད་འབར་བ་འུ་རུ་རུ༔ རྡོ་རྗེ་མཁའ་འགྲོའི་ཚོགས་ཀྱང་དེ་འདྲ་སྟེ༔ མཐོ་སྲིད་པའི་རྩེ་མོ་མན་ཆད་དང༔ དམའ་ས་འོག་ལྟོ་འཕྱེ་ཡན་ཆད་ཀྱིས༔ ཞི་བའི་ཕྲིན་ལས་འགྲུབ་གྱུར་ཅིག༔ རྩ་སྔགས། ཧཱུྃ། ལྷོ་ཕྱོགས་རིན་ཆེན་རིགས་ཀྱི་དུར་ཁྲོད་ནས༔ མཉམ་ཉིད་ཡེ་ཤེས་མེ་དཔུང་འབར་བ་འདི༔ ལན་གཅིག་ལྷོ་ཡི་ཕྱོགས་སུ་འཕྲོས༔ མེ་ལྕེ་སེར་པོའི་སྟོང་གསུམ་གང༔ མེ་ཞགས་སེར་པོ་མཉམ་ཉིད་ཆེན་པོ་གདལ༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འགྱུ༔ ཡང་སྤྲུལ་ཚ་ཚ་སྐར་ལྟར་འཁྲུག༔ མེ་སྐད་འབར་བ་འུར་འུར་ཆེམ་ཆེམ་སྒྲོག༔ རིན་ཆེན་མཁའ་འགྲོའི་ཚོགས་ཀྱང་དེ་འདྲ་སྟེ༔ མཐོ་སྲིད་པའི་རྩེ་མོ་མན་ཆད་དང༔ དམའ་ས་འོག་ལྟོ་འཕྱེ་ཡན་ཆད་ཀྱིས༔ རྒྱས་པའི་ཕྲིན་ལས་འགྲུབ་གྱུར་ཅིག༔ རྩ་སྔགས། ཧཱུྃ༔ ནུབ་ཕྱོགས་པདྨ་རིགས་ཀྱི་དུར་ཁྲོད་ནས༔ སོར་རྟོགས་ཡེ་ཤེས་མེ་དཔུང་འབར་བ་འདི༔ ལན་ཅིག་ནུབ་ཀྱི་ཕྱོགས་སུ་འཕྲོས༔ མེ་ལྕེ་དམར་པོའི་སྟོང་གསུམ་གང༔ མེ་ཞགས་དམར་པོ་སོར་རྟོགས་ཆེན་པོ་གདལ༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འགྱུ༔ ཡང་སྤྲུལ་ཚ་ཚ་སྐར་ལྟར་འཁྲུག༔ མེ་སྐད་འབར་བ་འུར་འུར་ཆེམ་ཆེམ་སྒྲོག༔ པདྨ་མཁའ་འགྲོའི་ཚོགས་ཀྱང་དེ་འདྲ་སྟེ༔ མཐོ་སྲིད་པའི་རྩེ་མོ་མན་ཆད་དང༔ དམའ་ས་འོག་ལྟོ་འཕྱེ་ཡན་ཆད་ཀྱིས༔ དབང་གི་ཕྲིན་ལས་འགྲུབ་གྱུར་ཅིག༔ རྩ་སྔགས་བརྗོད། ཧཱུྃ༔ བྱང་ཕྱོགས་ལས་ཀྱི་རིགས་ཀྱི་དུར་ཁྲོད་ནས༔ བྱ་གྲུབ་ཡེ་ཤེས་མེ་དཔུང་འབར་བ་འདི༔ ལེན་གཅིག་བྱང་གི་ཕྱོགས་སུ་འཕྲོས༔ མེ་ལྕེ་ལྗང་ཀུའི་སྟོང་གསུམ་གང༔ མེ་ཞག་ལྗང་གུ་བྱ་གྲུབ་ཆེན་པོ་གདལ༔ ཡེ་ཤེས་མེ་སྒྲ་འབྲུག་ལྟར་ལྡིར༔ སྤྲུལ་པའི་མེ་ལྕེ་གློག་ལྟར་འགྱུ༔ ཡང་སྤྲུལ་ཚ་ཚ་སྐར་ལྟར་འཁྲུག༔ མེ་སྐད་འབར་བ་འུར་འུར་ཆེམ་ཆེམ་སྒྲོག༔ ལས་ཀྱི་མཁའ་འགྲོའི་ཚོགས་ཀྱང་དེ་འདྲ་སྟེ༔ མཐོ་སྲིད་པའི་རྩེ་མོ་མན་ཆད་དང༔ དམའ་ས་འོག་ལྟོ་འཕྱེ་ཡན་ཆད་ཀྱིས༔ དྲག་པོའི་ཕྲིན་ལས་འགྲུབ་གྱུར་ཅིག༔ ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊ༔ གནོད་བྱེད་ནད་འདྲེ་གདོན་བགེགས་ཟ་འདྲེ་ཤི་གཤེད་སྲོག་གཅོད་དབུགས་ལེན་ཐམས་ཅད་ཨགྣེ་ཡེ་ཛྭ་ལ་རཾ་རཾ་ཎི་ཏྲི་མ་ར་ཡ་རྦད་རྦད་ཕཊ་ཕཊ༔ སྐྱབས་མགོན་ཕྱག་དཔེ་ལས་བཤུས།། །།

སྡིག་པ་མེ་ཡི་མཐའ་གཏད།

༅། །སྡིག་པ་མེ་ཡི་མཐའ་གཏད་བཞུགས་སོ། །ཧཱུྃ། གྲུ་གསུམ་ཕུང་པོ་མེ་རི་དགུ་ཀློང་ནས། །གནོད་བྱེད་འདྲེ་གདོན་འབྱུང་པོའི་གཉན་པོ་ནི། །ཁྲོ་བོའི་སྤྲུལ་པ་མེ་ཡི་སྡིག་པ་ཅན། །མགོ་དགུའི་རྭ་ནི་བཅོ་བརྒྱད་ནམ་མཁའ་གང་། །ཞལ་དགུ་དྲག་པོ་འབྲུག་སྒྲ་ཏི་རི་རི། །ལྗག་དགུ་གློག་ཞག་དམར་པོ་ཁྱུགས་སེ་ཁྱུག །རྭ་དགུའི་རྩ་ལ་རྡོ་རྗེ་ཐོག་མདའ་རྒྱུག །མགོ་ལུས་མེད་པར་གཉེར་མའི་ཚ་ཚ་འཕྲོས། །གཉེར་མའི་ནང་ནས་ཞལ་དང་མཆེ་བས་གང་། །ངར་སྐད་དྲག་པོས་རི་རབ་ཐལ་བར་བསྙིལ། །ལུས་ལ་མེ་ཆེན་འབར་བས་རྒྱ་མཚོ་སྐམ། །འཁྲོས་པའི་སྐན་སྒྲ་ཉི་ཟླ་ཚོགས་པོར་འཕེན། །རྔམ་པའི་སྟོབས་ཀྱི་སྟོང་གསུམ་ཞལ་དུ་གསོལ། །སྤྱན་གྱི་སྡང་མིག་ལྷ་སྲིན་འདར་ཞིང་བསྡངས། །གནོད་བྱེད་གཤེད་མའི་སྡིག་པ་ནག་པོ་ཁྱོད། །འཇིགས་བྱེད་མེ་སྡིག་དམར་པོ་ཞལ་ཕྱེས་ཤིག །གནོད་བྱེད་ནད་གདོན་འདུལ་བའི་དུས་ལ་བབ། །ཕོ་གདོན་འབྱུང་པོ་འདུལ༴ མོ་གདོན་སྲིན་མོ་འདུལ༴ ཀླུ་གདོན་ས་གདོན་འདུལ༴ གཟའ་གདོན་རྒྱུ་སྐར༴ གནོད་བྱེད་བྱད་མ་འདུལ༴ གྲི་བོ་གཤེད་འཁྱམས་འདུལ༴ དམིགས་པས་གཟིར། ངར་མི་བསྲེག །ཧཱུྃ། ཤར་ཕྱོགས་དུར་ཁྲོད་མེ་རི་འབར་བའི་ཕོ་བྲང་ནས། །མེ་དཔུང་མཐིང་ནག་དགུ་ཀློང་དཀྱིལ་འཁོར་ནས། །དྲི་ཟ་ཕོ་མོ་བསྣོལ་བའི་གདན་སྟེང་ནས། །ཇོ་མོ་ལབ་སྒྲོན་སྐུ་མདོག་མཐིང་ནག་ལ། །ཞལ་གཅིག་ཕྱག་གཉིས་སྤྱན་གསུམ་ལྡན། །མཁའ་འགྲོའི་ཆ་ལུགས་མཆེ་བ་གཙིགས། །མེ་ཡི་རལ་པ་ལྷབས་སེ་ལྷབ། །སྤྱན་གསུམ་སྡང་མིག་ཀྱི་ལི་ལི། །ཞལ་ནས་ཕཊ་སྒྲ་ལྷངས་སེ་ལྷང་། །ལྗག་ལ་གློག་དམར་ཁྱུགས་སེ་ཁྱུག །ཞབས་གཉིས་འགྱིང་བག་གར་ཐབས་ཀྱི། །མེ་དཔུང་འབར་བའི་ཀློང་ན་བཞུགས། །སྐུ་ལ་མེ་ཡི་ཚ་ཚ་འཕྲོས། །ཕྱག་གཡས་མེ་དཔུང་འབར་བ་བསྣམས། །གཡོན་པས་མེ་ཡི་ཧབ་ཟོར་བརྣམས། །མེ་ཡི་ཧམ་ཟེར་འོངས་སེ་འོང་། །ནད་གདོན་འབྱུང་པོ་ཐམས་ཅད་བསྲེགས། །མེའི་མཁའ་འགྲོ་འབུམ་གྱིས་བསྐོར། །མེ་དཔུང་འབར་བ་ཅི་ལི་ལི། །མེ་ཡི་ཞགས་པ་ཁྱུགས་སེ་ཁྱུག །མེ་ཡི་ཚ་ཚ་དཔུངས་སེ་དཔུང་། །མེ་ཡི་སེ་བ་ཐ་ར་ར། །མེ་ཡི་ཆར་པ་སི་ལི་ལི། །མེ་ཡི་མཁའ་འགྲོ་ཐིབས་སེ་ཐིབ། །མེ་ཡི་ཐོག་མདའ་ཤ་ར་ར། །མེ་ཡི་འུར་སྒྲ་ཏི་རི་རི། །མེ་ཡི་འཁོར་ལོ་ཅི་ལི་ལི། །བདག་ཅག་རྣལ་འབྱོར་བཅས་ལ། །ལུས་དང་ལུས་གདོན་བཅས་པ་དང་། །བར་ཆད་འདྲེ་གདོན་ཕོ་མོ་རྣམས། །མེ་དཔུང་འབར་བའི་གཞོབ་ཏུ་བསྲེག །རཾ་རཾ་ཕོ་གདོན་འབྱུང་པོ་རཾ། །རཾ་རཾ་མོ་གདོན་སྲིན་མོ་རཾ། །རཾ་རཾ་གདོན་བགེགས་ཐམས་ཅད་རཾ། །རཾ་རཾ་ནད་འདྲེ་དྲི་བོ་རཾ། །རཾ་རཾ་བར་ཆད་རྐྱེན་རྣམས་རཾ། །དམིགས་པ་བསྒྲིམས་ལ་ཕཊ་དགུ་བྱ། ཧཱུྃ། ལྷོ་ཕྱོགས་དུར་ཁྲོད་མེ་རི་དགུ། །མེ་དཔུང་སེར་ནག༴ གཤིན་རྗེ་ཕོ་མོ༴ ཇོ་མོ་ལབ་སྒྲོན་སྐུ་མདོག་སེར་ནག་ལ། །ཞལ་གཅིག༴ འདྲེས་སོ། །ཧཱུྃ། ནུབ་ཕྱོགས་དུར་ཁྲོད་མེ་རི༴ མེ་དཔུང་དམར་ནག༴ ཀླུ་གདོན༴ ཇོ་མོ་ལབ་སྒྲོན་སྐུ་མདོག་དམར་ནག་ལ། །ཞལ་གཅིག༴ ཧཱུྃ། བྱང་ཕྱོགས་དུར་ཁྲོད་མེ་རི༴ མེ་དཔུང་ལྗང་ནག༴ གནོད་སྦྱིན༴ ཇོ་མོ་ལབ་སྒྲོན་སྐུ་མདོག་ལྗང་ནག་ལ། །ཞལ་གཅིག༴ ཧཱུྃ། དབུས་ཕྱོགས༴ མེ་དཔུང་སྨུག་ནག༴ གཟའ་གདོན་ཕོ་མོ༴ ཇོ་མོ་ལབ་སྒྲོན་སྐུ་མདོག་སྨུག་ནག་ལ། །ཞལ་གཅིག༴ ཧཱུྃ། འོག་ཕྱོགས་དུར་ཁྲོད༴ མེ་དཔུང་སྨུག་ནག༴ ས་བདག་ཕོ་མོ༴ ཇོ་མོ་ལབ་སྒྲོན་སྐུ་མདོག་ནག་པོ་ལ༴ ཞལ་གཅིག༴ ཧཱུྃ། མཚམས་བཞི་དུར་ཁྲོད༴ མེ་དཔུང་སྣ་ཚོགས༴ མེ་ལྷའི་ཕོ་མོ་རླུང་ལྷའི་གདན་སྟེང་ནས། །ཇོ་མོ་ལབ་སྒྲོན་སྐུ་མདོག་སྣ་ཚོགས་ལ། །ཞལ་གཅིག༴ ཡུལ་ཉི་ཤུ་རྩ་བཞིའི༴ མེ་རི་དགུ་ཀློང་འབར་བའི་དཀྱིལ་འཁོར་ནས། །བདུད་བཞི་ཕོ་མོ་བསྣོལ་བའི༴ ཡི་དམ་རྒྱལ་བའི་ལྷ་ཚོགས་རྣམས། །ཞལ་གཅིག༴ ཡི་དམ་ལྷ་ཚོགས་འབུམ་གྱིས་བསྐོར། །ཡི་དམ་ལྷ་ཚོགས་ཐིབས་སེ་ཐིབ། །ཧཱུྃ། བྱང་ཕྱོགས་བསིལ་བ་ཚལ་གྱི་དུར་ཁྲོད་ནས། །མེ་དཔུང་རླུང་ནག་དགུ་ཀློང་༴ ནད་གདོན་དགྲ་བགེགས་བསྣོལ་བའི༴ ཆོས་སྐྱོང་མ་མགོན་ལྕམ་དྲལ་རྣམས། །སྐུ་མདོག་མཐིང་ནག་འབར་བ་ལ། །ཞལ་གཅིག་ཕྱག་གཉིས་སྤྱན་གསུམ་ལྡན། །ཆོས་སྐྱོང་ཕོ་མའི་འཁོར་དང་བཅས། །མེ་ཡི་རལ་པ་ལྷབས་སེ་ལྷབ། །སྤྱན་གསུམ་སྡང་མིག་ཀྱི་ལི་ལི། །ཞལ་ནས་ཕཊ་སྒྲ་ལྷངས་སེ་ལྷང་། །ལྗགས་ལ་གློག་དམར་ཁྱུགས་སེ་ཁྱུག །ཞབས་གཉིས་འགྱིང་བག་གར་ཐབས་ཀྱི། །མེ་དཔུང་འབར་བའི་ནང་ལ་བཞུགས། །སྐུ་ལ༴ ཕྱག༴ གཡོན༴ མེ༴ ནད་གདོན༴ ཆོས་སྐྱོང་ཕོ་རྒྱུད་མོ་བརྒྱུད་རྣམས། །མེ་ཡི༴ མེ་ཡི་ཚ་ཚ་དཔུངས་སེ༴ མེ་ཡི་སེར་བ་ཐ་ར་ར། །མེ་ཡི་ཆར་པ་སི་ལི་ལི། །མེ་ཡི་མཁའ་འགྲོ་ཐིབས་སེ་ཐིབ། །མེ་ཡི་ཐོག་མདའ་ཤ་ར་ར། །མེ་ཡི་འུར་སྒྲ་ཏི་རི་རི། །མེ་ཡི་འཁོར་ལོ་ཅི་ལི་ལི། །རྣལ་འབྱོར་བདག་ཅག་འཁོར་བཅས་ཀུན། །ལུས་དང་ལུས་གདོན་བཅས་པ་དང་། །བར་ཆད་འདྲེ་གདོན་ཕོ་མོ་རྣམས། །མེ་དཔུང་འབར་བའི༴ རཾ་རཾ་ཕོ་གདོན༴ རཾ་རཾ་མོ་གདོན༴ རཾ་རཾ་ནད་འདྲེ་གདོན་བགེགས་རཾ། མེ་ཐབས་དགུ་བསྐོར་བྱའོ། །དམིགས་པས་གཟིར། ཕྲིན་ལས་ནད་གདོན་ཚར་གཅོད་དོ། །ཨཐྎ། ཞུགས་མའི་ཞགས་པས་ཐུན་བརྡེག་ན། །སྦང་མ་རྐམ་པོ་བརྔོས་སེ་བཏགས། །དེ་ལ་མར་ནག་ཁུ་བས་སྦགས། །དེ་ཉིད་ཞུགས་མེར་བརྒྱབ་པའི་དུས། །ཕྱར་བ་ཙམ་གྱིས་མེ་ཆད་ངེས། །ཡང་ན་ལྕི་བ་སེར་ཀ་མའི། །ཕྱེ་མ་བྱས་ཀྱང་རུང་ཙམ་ཡིན། །མཁར་གོང་ཕྱེ་ཞིབ་དང་བསྲེས་ན། །མེ་ལྕེ་རྒྱང་རིང་ཆད་པ་ཡིན། །ཡང་ན་ར་ཚིལ་ཞུན་ཕྱེ་སྦྱར། །ཚ་ཚ་འཕྲོ་ཞིང་མཐོང་ཡུལ་འགེང་། །ཡང་ན་མར་ནག་བཙན་དུག་ཕྱེ། །ཆང་ལ་བུལ་ཏོག་བཏབ་པ་བྱུག །སླ་ངར་བསྐོར་བ་བསྐམ་པའི་ཕྱེས། །སྒྲ་བཅས་མེས་ཁྱིམ་གང་བར་མཆེད། །དེ་ཡི་སྔོན་དུ་བྱང་བུལ་ཆུས། །ཁྱིམ་ཀུན་བྱུག་པས་མི་ཚིག་གོ། །འདྲེ་གདོན་བྲབ་སོགས་དྲག་ལས་ཀྱི། །མེ་ཧོམ་སྦར་ལ་ཉེར་མཁོ་འདི། །ས་མནྟ་ཡི་སུག་བྲིས་སྤེལ། །ཁྲོས་ནག་གཞུང་ལས་གུད་ཕྱུང་དགེ།། །།

ཟབ་དོན་གཅོད་ཀྱི་བསྲེགས་པའི་ལས་མཐའ་དུས་མཐའི་མེ་ཆེན།

ཟབ་དོན་གཅོད་ཀྱི་བསྲེགས་པའི་ལས་མཐའ་དུས་མཐའི་མེ་ཆེན་དབུ་ཕྱོགས་བཞུགས་སོ། །སྐྱེ་མེད་དབྱིངས་ལས་འགགས་མེད་སྒྱུ་མའི་འཕྲུལ། །མི་བཟད་གར་དགུའི་ཉམས་ཀྱི་ཡེ་ཤེས་མེས། །བདུད་དཔུང་སྲེག་མཛད་རྡོ་རྗེ་རྣལ་འབྱོར་མ། །བླ་མ་མཆོག་དང་དབྱེར་མེད་དེར་ཕྱག་འཚལ། །དེ་ཡང་དབང་ཐོབ་ཅིང་དམ་ཚིག་ལ་གནས་པའི་རྣལ་འབྱོར་པས་ཟབ་དོན་གཅོད་ཀྱི་སྒོ་ནས་སྦྱིན་སྲེག་བྱེད་པར་འདོད་ན། ཟླ་བ་མར་ངོ་དུས་ཚོད་འཕྲོད་སྦྱོར་ངན་པའི་དུས་སུ། གདུག་པའི་ས་སྣ་གསུམ་གྱི་སྟེག་བུ་དུག་ཁྲག་གིས་བྱུག་པ་མདའ་གང་གི་ཁར་མ་ཊཾ་གི་ཁོག་པར་གྲུ་གསུམ་བང་རིམ་སུམ་ལྡན། ཁ་ཁྱེར་ལ་རལ་གྲིས་མཚན་པ་མི་རིས་བསྐོར་བའི་དབུས་སུ་པདྨ་འདབ་བཞི་མཁའ་འགྲོ་སྡེ་ལྔའི་ལྷ་གནས་ཚོམ་བུ་དང་བཅས་པ་བྲིས། སྟེང་དུ་སྐྱེར་པ་སོགས་དུག་ཤིང་གྲུ་གསུམ་དུ་བརྩིག་ཚིལ་ཆེན་གྱིས་སྦག་པའི་མར་མེ་དབུས་སུ་བཞག །གཡས་ངོས་སུ་མེ་སྲོག་འཛིན་པའི་རྫས་ཡམ་ཤིང་གྲུ་གསུམ་པ་སོར་བཅུ་གཉིས་པ་ཚིལ་ཞུན་གྱིས་བྱུག་པ་རྩ་བའི་རྫས་གནོད་བྱེད་ཀྱི་ལིངྒ་གྲངས་ལྡན། དྲག་པོའི་རྫས་ཤ་སྣ་བག་ཕྱེ་དང་བསྲེས་པའི་རྫས་རིལ་བུ་མིང་རུས་ཅན། གནད་ཀྱི་རྫས་སྦལ་སྦྲུལ་ཉྭ་ཕྱིས་སོགས་ཀྱི་ཤ་དུག་སྣ་དང་བསྲེས་པ། གསོད་པའི་རྫས་ཟངས་ལྕགས་རྡོའི་ཕྱེ་མ། མྱོས་པའི་རྫས་དམར་ནག་དམེ་མནོལ་གྱི་ཁྲག་སྦྱར་བ། ཚ་བའི་རྫས་ཏིལ་དང་ཡུངས་དཀར་ལྕེ་ཚ་དབྱི་མོ་སྲུབ་ཀ་གསུམ། དེ་ལྟར་རྫས་བདུན་པོ་ལྕགས་སམ་ཐོད་པའི་སྣོད་དུ་གྲལ་རིམ་གྱིས་བཀོད། གཡོན་ངོས་སུ་ཆུ་གཉིས་ཉེར་སྤྱོད། འཇིག་རྟེན་དང་འཇིག་རྟེན་ལས་འདས་པའི་གཏོར་མ་སྨན་རག་དང་བཅས་པ་བཤམས། མདུན་དུ་ལས་བུམ་རྡོ་དྲིལ་ཌཱ་མ་རུ། དགོང་བླུག་མེ་ཏོག་སོགས་མཁོ་བའི་ཡོ་བྱད་ཐམས་ཅད་ཚང་བར་བྱས་ལ། བདག་ཉིད་སྐྱབས་སེམས་ནས་བཟུང་ཚོགས་ལྷག་མའི་བར་བཏང་། རྒྱུ་དུས་ཀྱི་ཀུན་སློང་སྙིང་རྗེ་བསྐྱེད་ཅིང་། སྐབས་འདིར་ཀུན་སློང་ཞེ་སྡང་དྲག་པོའི་ཚུལ་དུ་དགྲ་བགེགས་བསྒྲལ་བའི་ཆས་སུ་ཞུགས་ནས། ཁ་ལྷོར་ཕྱོགས་པའི་གདན་ལ་འཁོད། ལས་བུམ་དུ་བདུད་རྩི་འཁྱིལ་པ་བསྐྱེད་སྟེ་མཆོད་བསྟོད་བཟླས་པ་སྔོན་དུ་འགྲོ་བའི་མཆོད་རྫས་བསང་སྦྱང་། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་སྟོང་གསུམ་དང་མཉམ་པའི་ནང་དུ་ནྲྀ་དང་ཏྲི་ལས་དགྲ་བགེགས་ཤ་ཁྲག་རུས་གསུམ་ཕུང་ཁམས་སྐྱེ་མཆེད། དེ་ལས་བྱུང་བའི་མཆོད་རྫས་རྣམས་ངོ་བོ་ཡེ་ཤེས་ཀྱིས་བདུད་རྩིའི་རྣམ་པ་སོ་སོའི་མཚན་ཉིད་ཡོངས་སུ་རྫོགས་པའི་ནམ་མཁའ་གང་བར་བསམ་ལ། ༀ་བཛྲ་ཨརྒྷཾ་སོགས་ནས། ཤཔྡའི་བར་མཆོད་རྫས་དང་། ༀ་ཀྲོ་ཏི་ཀཱ་ལི་ཧ་རི་ནི་ས་ནྲྀ་ཏྲི་མ་ར་ཡ་ཛ་ཛ། ལན་གསུམ་གྱིས་བསྲེག་རྫས་རྣམས་བྱིན་གྱིས་བརླབ་བོ། །དེ་ནས་དེམ་མགར་སོགས་ཀྱིས་མེ་སྦར་ལ། ཧཱུྃ། སྔོན་གྱི་བསྐལ་པའི་དང་པོ་ལ། །བཅོམ་ལྡན་རྒྱལ་བ་རིགས་ལྔ་ཡི། །ཐུགས་ཀའི་འོད་ཀྱི་གོང་བུ་ནས། །ཡི་གེ་རཾ་གྱི་འཕྲོ་འདུ་ལས། །ཡེ་ཤེས་ལྔ་ཡི་མེ་འབར་བའི། །དུག་ལྔ་ཉོན་མོངས་གཏན་ནས་བསྲེགས། །ཡེ་ཤེས་ལྔ་རུ་ལྷུན་གྱིས་གྲུབ། །ༀ་ཨགྣེ་ཡེ་ཧ་བྱ་ཀ་བྱ་ཛཿགནོད་བྱེད་མ་ར་ཡ་ཛྭ་ལ་རཾ། ཞེས་རླུང་གཡབ་དང་བཅས་པས་མེ་སྤར། ༀ་ཨགྣེ་ཡེ་ཛྭ་ལ་རཾ། ཞེས་མར་ནག་བླུག་གཟར་བདུན་གྱིས་གསོ། མེ་ཐབ་བསང་སྦྱང་། སྟོང་པའི་ངང་ལས་ཧཱུྃ་ལས་དྲག་པོའི་ཐབ་ཁུང་ནག་པོ་གྲུ་གསུམ་བང་རིམ་སུམ་ལྡན། རྒྱ་ཁྱོན་ཆོས་ཀྱི་དབྱིངས་དང་མཉམ་པའི་ནང་དུ་ར་སྐྱེས་ཁམ་པའི་སྟེང་དུ་རང་ཉིད་ཀྱི་ཐུགས་ཀ་ནས་འཕྲོས་པའི་རཾ་ཡིག་ཡོངས་སུ་གྱུར་པ་ལས་དྲག་པོའི་མེ་ལྷ་མཐིང་ནག་ཁྲོ་གཏུམ་འཇིག་པའི་ཉམས་ཅན། ཞལ་གཅིག་ཕྱག་བཞི་པ། གཡས་གཉིས་རྡོ་རྗེ་དང་བགྲང་ཕྲེང་། གཡོན་གཉིས་དབྱུག་པ་དང་གྷནྡྷེ་བསྣམས་པ། མེ་འབར་བའི་དབུས་ན་བཞུགས་པར་གྱུར། རང་གི་ཐུགས་ཀ་ནས་ཛཿཧཱུྃ་བཾ་ཧོ་བཞི་འཕྲོས་པས་ཡེ་ཤེས་ཀྱི་མེ་ལྷ་སྤྱན་དྲངས་པར་གྱུར། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་མེ་ལྷ་དྲང་སྲོང་ཆེ། །རང་གི་དམ་ཚིག་ཚུལ་བཞིན་དུ། །འབར་བའི་གནས་འདིར་གཤེགས་སུ་གསོལ། །ༀ་ཨགྣེ་ཡེ་དེ་བ་རི་ཥི་ག་ན་ཛ་ཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། ཧཱུྃ། གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་བསྒྲུབ་ཅིང་། །ཐུགས་རྗེས་སེམས་ཅན་དོན་མཛད་པ། །འབར་བའི་གདན་ལ་བཞུགས་སུ་གསོལ། །ༀ་ཨགྣེ་ཡེ་དེ་བ་རྀ་ཥི་ག་ན་སརྦ་ས་མ་ཡ་ཏིཥྛན་ཏུ། ཞེས་གདན་འབུལ། ཧཱུྃ། མེ་ལྷའི་རྒྱལ་པོ་དྲང་སྲོང་མཆོག །ཞི་རྒྱས་དབང་དྲག་སྣ་ཚོགས་པའི། །ཕྲིན་ལས་ཀུན་གྱི་དཔང་པོ་མཛོད། །ཏིང་ངེ་འཛིན་ལྷ་ལ་ཕྱག་འཚལ་ལོ། །ༀ་ཨགྣེ་ཨ་ལ་ལ་པྲ་ཏིཙྪ་ཧོ། ཕྱག་འཚལ་བའོ། །ཧཱུྃ། ཡེ་ཤེས་མེ་ཡི་དཀྱིལ་འཁོར་དུ། །མེ་ལྷ་དྲང་སྲོང་འཁོར་བཅས་ལ། །འདོད་ཡོན་བསྲེག་རྫས་མེ་མཆོད་འབུལ། །ཕྲིན་ལས་རྣམ་བཞི་སྒྲུབ་ཏུ་གསོལ། །ༀ་ཨགྣེ་ཡེ་དེ་བ་ས་པ་རི་ཝ་ར་ཨརྒྷཾ་སོགས་ནས། ཤཔྡའི་བར་དང་། པཉྩ་ཀརྨ་གུ་ཎ་ཨ་མྲྀ་ཏ་རཀྟ་བ་ལིངྟ་པུ་ཙ་ཁ་ཧིཿ ཞེས་མཆོད། ཧཱུྃ། འཇིག་རྟེན་དབང་ཕྱུག་ཚངས་དབང་མཆོག་གི་སྲས། །ལོ་ཀའི་རྒྱལ་པོ་ཆེན་པོར་མངའ་གསོལ་ལོ། །ཤེས་རབ་མཆོག་གི་ཉོན་མོངས་ཐམས་ཅད་བསྲེག །འཇིག་རྟེན་མེ་ལྷ་མཆོག་ལ་ཕྱག་འཚལ་བསྟོད། །ཅེས་བརྗོད་བྱོན་ཟན་ནི། མེ་ལྷའི་ལྗགས་རྡོ་རྗེ་རྩེ་གཅིག་པར་རཾ་དང་དགངས་བླུག་གི་ཁར་ཧཱུྃ་མཐིང་ནག་འབར་བ་རེས་མཚན་པར་གྱུར། ༀ་ཨགྣེ་ཡེ་དེ་བྱ་དེ་བྱ་བྷི་ཤུདྡྷེ་མ་ཧཱ་ཤྲཱི་ཧ་བྱ་ཀ་བྱ་བ་ཧ་ན་ཡ་བདག་ཅག་དཔོན་སློབ་རྒྱུ་སྦྱོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་མ་ར་ཡ་རྦད། ཅེས་ལན་གསུམ་གྱིས་ཕུལ་ལ། ན་མོ། རིག་པའི་རྒྱལ་པོ་དྲང་སྲོང་མེ་ལྷ་ཁྱོད་ཀྱིས་ལས་ཐམས་ཅད་བྱེད་པའི་བསྲེག་རྫས་ལྷ་ཡི་ཞལ་དུ་བསྟབ་པ་དང་མེ་ཉིད་ཡེ་ཤེས་ཀྱི་མེར་མཛད་ནས་བདག་གི་ཕྲིན་ལས་མ་ལུས་པར་མཛད་དུ་གསོལ། ཞེས་བརྗོད་ནས་ཡམ་ཤིང་ལ། ༀ་ཨགྣེ་ཡེ་ཛྭ་ལ་བདག་ཅག་དཔོན་སློབ་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་མ་ར་ཡ་རྦད། ཅེས་པའི་བར་འབུལ། མར་ཁུ། ༀ་ཨགྣེ་ཡེ་བདག་ཅག་སོགས། སྔ་མ་ལྟར་རྫས་གཞན་རྣམས་ལ། ༀ་ཨགྣེ་ཡེ་ཀྲོ་ཏ་ཡེ་དགྲ་བགེགས་གནོད་བྱེད་འབྱུང་པོ་མཱ་ར་ཡ་ཛྭ་ལ་རཾ་ཧཱུྃ་ཕཊཿ ཅེས་རྩ་བའི་རྫས་ནས་ཚ་བའི་རྫས་ཀྱི་བར་ཉེར་གཅིག་སོགས་སྐབས་དང་སྦྱར་ཏེ་འབུལ། བསྟོད་པ་སྔར་ལྟར་བྱས་ལ་འདོད་དོན་གསོལ། ༈ དེ་ནས་འདས་པའི་མེ་ལྷ་མཆོད་པ་ནི། དམ་ཚིག་གི་མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་ནང་དུ་ཞིང་ཁམས་རྣམ་པར་དག་པ་ཨོ་རྒྱན་རང་བྱུང་གི་དུར་ཁྲོད་ཅེས་སོགས་ནས། མ་ཡུམ་ཆེན་སྐུ་ལྔ་ལྷུན་གྲུབ་མ་ལ་ཕྱག་འཚལ་བསྟོད། ཞེས་པའི་བར་ལས་བྱང་བཞིན་བྱའོ། །དེ་ནས། ལྷ་ཚོགས་རྣམས་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་བཟོད་པར་དཀའ་བའི་གཟི་བྱིན་ཅན་དྲག་པོའི་བསྲེག་བྱ་ཟ་བའི་ལས་ལ་རྔམ་པར་བསམ་ལ། བྱོན་ཟན་ནི། ཡེ་ཤེས་ལྷ་ཚོགས་རྣམས་ཀྱི་ལྗགས་རྡོ་རྗེ་རྩེ་གཅིག་རཾ་དང་དགངས་བླུག་གི་ཁར་ཧཱུྃ་མཐིང་ནག་འབར་བ་རེས་མཚན་པར་གྱུར། ཞེས་པའི་བར་གཡོན་བསྐོར་བཞིན། ཁྱད་པར་འདི་ལྟར། ༀ་བཛྲ་ཌཱཀྐི་ནི་ཀྲོ་ཏི་ཀ་ལི་ཧ་རི་ནི་ས་ཧཱུྃ་ཕཊཿ ལན་བདུན་གྱིས་དགངས་གཟར་བཀང་ནས། ༀ་ཨགྣེ་ཡེ་དེ་བྱ་མ་ཧཱ་ཤྲི་ཧ་བྱ་ཀ་བྱ་བ་ཧ་ན་ཡེ་དགྲ་བགེགས་གནོད་བྱེད་མ་ར་ཡ་རྦད། ཅེས་པའི་བར་འཇིག་རྟེན་པའི་སྐབས་བཞིན་ནོ། །དེ་ནས་བསྒྲལ་མཆོད་ནི། ཧཱུྃ། མ་ཡུམ་ཆེན་ཐུགས་ལས་སྤྲུལ་པའི་སྲས། ཞེས་པ་ནས་བཟུང་བསྟབ་པའི་བར་བཏང་། དེ་ནས། ཧཱུྃ། གདུབ་རྩུབ་དྲག་པོའི་ཧོམ་ཁུང་དུ། །ཁྲོས་མ་ནག་མོའི་ལྷ་ཚོགས་ལ། །སྡང་དགྲ་གནོད་བྱེད་བགེགས་ཚོགས་ཀྱི། །ཕྱི་ཡི་ཕུང་ཁམས་སྐྱེ་མཆེད་འབུལ། །ནང་གི་བླ་ཚེ་སྲོག་དབུག་འབུལ། །ཁ་རྗེ་དབང་ཐང་རླུང་རྟ་འབུལ། །བཞེས་ཤིག་རོལ་ཅིག་ཁ་རཾ་ཁ་ཧི། །གནོད་བྱེད་དམ་སྲི་ལས་ངན་འདི། །ཁྲོས་མ་ནག་མོའི་ཞལ་དུ་བསྟབས། །རིགས་བཞིའི་མཁའ་འགྲོའི་ཞལ་དུ་བསྟབས། །འཁོར་ཚོགས་ཌཱཀྐའི༴ བཀའ་སྲུང་དམ་ཅན༴ བཞེས་ཤིག་རོལ་ཅིག་ཁ་རཾ་ཁ་ཧི། །འཁོར་བཅས་དགྱེས་ཤིང་ཚིམ་གྱུར་ནས། །དགྲ་བགེགས་བརླག་པའི་ཕྲིན་ལས་མཛོད། །ཛཿ སྲིད་པའི་བཙོན་ཁང་དྲག་པོའི་ཨེ། །བསྐལ་པའི་མེ་དཔུང་འབར་བའི་ཀློང་། །གདུག་པའི་ཡམ་ཤིང་མར་ནག་ཚིལ། །དམིགས་པའི་གཟུགས་རྟེན་དྲག་པོའི་རྫས། །གནད་འབེབས་མྱོས་བྱེད་གསོད་པའི་མཚོན། །ཚ་བའི་ནད་བསྐྱེད་རྫས་རྒོད་རྣམས། །བསྲེགས་པས་གནོད་བྱེད་དམ་སྲིའི་ཚོགས། །ལུས་ངག་རྡུལ་དུ་བསྲེག་ནས་ཀྱང་། །རྗེས་ཤུལ་ལྷག་མ་མེད་པར་མཛོད། །ༀ་གུ་རུ་དྷེ་ཝ་ཌཱཀྐི་ནི་ཀྲོ་ཏི་ཀ་ལི་རྩ་སྔགས་མཐར། གནོད་བྱེད་དགྲ་བགེགས་འབྱུང་པོ་ཨགྣེ་ཡེ་ཛྭ་ལ་རཾ་ཁ་ཧི། ཅེས་མེ་སྲོག་འཛིན་པའི་རྫས་ནས་ཚ་བའི་རྫས་ཀྱི་བར་སྔགས་བསྟུན་བརྒྱ་རྩའམ་ཉེར་གཅིག་སོགས་སྐབས་དང་བསྟུན་ལ་འབུལ། དེ་ནས་མེའི་འཁྲུལ་འཁོར་བྱེད་ན་ཐོག་མར་ཁྲོས་མའི་འབུམ་བསྐུལ་བྱེད་པ་ནི། མ་ཤར་ན་བཞུགས་པའི་མཁའ་འགྲོ་མ། སོགས་ནས། ཕཊཿ དེ་ནས་མེ་མཆོད་དང་ཧམ་མཆོད་གང་རུང་བརྒྱབ། དེ་མཐར་བྱོན་ཟན་ཇི་ལྟ་བ་བཞིན་གཤེགས་སྐྱེམས་འབུལ། སླར་ཡང་ཕྱི་ནང་གི་ཉེར་སྤྱོད་སྨན་རག་གཏོར་མ་དང་བཅས་པས་མཆོད་ཅིང་། ༀ་བཛྲ་ཏམྦུ་ལ་ཡེ་སྭཱ་ཧཱ། སོ་རྩི་དང་། ༀ་བཛྲ་ཝ་ཏྲ་ཡེ་སྭཱ་ཧཱ། གོས་ཟུང་ཕུལ་ནས། བསྟོད་པ་ལས་བྱང་བཞིན་བྱ། འདོད་དོན་གསོལ་བ་ནི། ཧོ། བདུད་འདུལ་ཁྲོས་མ་ནག་མོའི་ལྷ་ཚོགས་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ཕྲིན་ལས་སུ་བཅོལ་བའི་མདོ་ནི་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་སྔོན་གྱི་ལས་དང་འཕྲལ་གྱི་རྐྱེན་ལས་གྱུར་པའི་གནོད་བྱེད་དགྲ་བགེགས་འབྱུང་པོ་ཐམས་ཅད་ཀྱི་གདུག་རྩུབ་བསམ་སྦྱོར་ངན་པ་ཐམས་ཅད་ཞི་བར་མཛོད་ཅིག །ཞི་རྒྱས་དབང་དྲག་གི་ཕྲིན་ལས་རྣམ་པ་བཞི་ལྷུན་གྱིས་གྲུབ་པ་དང་། ཁྱད་པར་དགྲ་ཡི་ཞིང་དུ་གྱུར་པའི་དགྲ་བགེགས་གནོད་བྱེད་གདུག་པ་ཅན་ཐལ་བའི་རྡུལ་ཕྲན་བཞིན་དུ་བརླག་པའི་ཕྲིན་ལས་མཛོད་ཅིག །ཅེས་འདོད་དོན་གསོལ། ཡི་གེ་བརྒྱ་པས་ལྷག་ཆད་ཁ་བསྐང་། རྗེ་བཙུན་མཁའ་འགྲོའི༴ སོགས་ཀྱིས་བཟོད་གསོལ་བྱ། ༀ། ཁྱེད་ཀྱི་སེམས་ཅན་སོགས་ནས། བཛྲ་མུཿ ཡེ་ཤེས་པ་རང་གནས་སུ་གཤེགས། དམ་ཚིག་པ་བདག་ལ་བསྟིམ་ནས། སླར་ཡང་འཇིག་རྟེན་པའི་མེ་ལྷའི་བཏང་རག་བྱ་བ་ནི། ༀ་ཨགྣེ་ཡེ་དེ་བ་ས་པ་རི་ཝ་ར་ཨརྒྷཾ། ནས་ཤཔྡའི་བར་དང་བསྲེག་རྫས་བདུན་རེ་སྔར་བཞིན་གཤེགས་སྐྱེམས་བྱོན་ཟན་གོང་ལྟར་འབུལ་འདོད་དོན་གསོལ། ཏམྦུ་ལའི་སོ་རྩི་དང་། ཝ་སྟྲས་གོས་ཟུང་འབུལ། དམར་གཏོར་ལ། ༀ་ཨགྣེ་ཡེ་དེ་བ་ས་པ་རི་ཝ་ར་མ་ཧཱ་པ་ལིངྟ་ཁ་ཧི། ལན་གསུམ་གྱིས་འབུལ་ལ་འདོད་དོན་གསོལ་བ་ནི། མཆོད་སྦྱིན་གཏོར་མ་འདི་ཞེས་ལ། །སོགས་བྱའོ། །སླར་ཡང་མཆོད་ཅིང་བསྟོད་ལ་ནོངས་པ་བཤགས་པ་ནི། བདག་གི་དོན་དང་གཞན་གྱི་དོན། །བྱིན་ཟ་ཁྱེད་ཀྱི་སྒྲུབ་ཀྱིས་གཤེགས། །ཇི་བཞིན་དུས་སུ་ཚུར་བྱོན་ལ། །བདག་གིས་འདོད་པ་ཐམས་ཅད་བསྒྲུབ། །བཛྲ་མུཿ ཡེ་ཤེས་པ་རང་གནས་སུ་གཤེགས། །དམ་ཚིག་པ་མེ་འབར་བའི་རྣམ་པར་གྱུར། །པར་བསམ་ལ། ཤིས་བརྗོད་དང་བསྔོ་སྨོན་བྱ། མེ་དུག་ཁྲག་གིས་གཞིལ་ལ་བྲོ་བརྡུང་བྱ་བ་ནི། ཧཱུྃ། བྲོ་འདི་གང་དང་གང་གི་བྲོ། །བྲོ་འདི་ཕ་བརྒྱུད་དཔའ་བོའི་བྲོ། །ཕ་རྒྱུད་དཔའ་བོའི་བྲོ་བརྡུང་བས། །ཕྱི་སྟོང་ཉིད་ངང་དུ་ཟིངས་སེ་ཟིང་། །བར་མཉམ་པ་ཉིད་དུ་ཕྲི་ལི་ལི། །ནང་ཡེ་ཤེས་ངང་དུ་ཡ་ལ་ལ། །གདོན་འདྲེ་གདོན་མགོ་ལ་ཆེམས་སེ་ཆེམ། །ཧཱུྃ། བྲོ་འདི་གང་དང་གང་གི༴ བྲོ་འདི་མ་རྒྱུད་དཔའ་མོའི་བྲོ། །མ་རྒྱུད་དཔའ་མོའི་སོགས། ཧཱུྃ། བྲོ་འདི་གང་དང་༴ བྲོ་འདི་རྡོ་རྗེ་མཁའ་འགྲོའི་བྲོ། །སོགས། ཧཱུྃ། བྲོ་འདི་གང་དང་༴ བྲོ་འདི་རིན་ཆེན༴ རིན་ཆེན་མཁའ་འགྲོའི༴ ཧཱུྃ། བྲོ་འདི་གང་དང་༴ བྲོ་འདི་པདྨ༴ པདྨ་མཁའ་འགྲོའི་སོགས། ཧཱུྃ། བྲོ་འདི་གང་༴ བྲོ་འདི་ལས་ཀྱི་མཁའ༴ ལས་ཀྱི་མཁའ་སོགས། ཧཱུྃ། བྲོ་འདི་གང་དང་༴ བྲོ་འདི་སངས་རྒྱས༴ སངས་རྒྱས་མཁའ་འགྲོའི་བྲོ་བརྡུང་པས། །སོགས་འདྲེས་སོ། །ༀ་ལཾ་ཨཱཿལཾ་ཧཱུྃ་ལཾ་སྟྭཾ་བྷ་ཡ་ནན། ཅེས་བརྗོད་ལ་བསྲེགས་ཐལ་མནན་པའམ། ལམ་རྒྱ་གྲམ་ལམ་ལྷ་འདྲེ་རྒྱུ་བའི་གནས་སུ་གཏོར་ལ། ལས་རྗེས་མི་མངོན་པར་བྱའོ། །ཟབ་དོན་གཅོད་ཀྱི་བསྲེགས་པའི་ལས་མཐའ་དུས་མཐའ་མེ་ཆེན་ཞེས་བྱ་བ་འདི་ནི་གཞུང་ཚིག་རྣམས་གཞིར་བཞག་སྟེ་ལག་ལེན་འཇུག་བདེའི་ཕྱིར་དུ་ཚུལ་ལྡན་གྱི་སྦྱིན་བསྲེག་གཞན་ནས་ཁ་བསྐང་སྟེ། དགེ་སློང་པདྨ་ཆོས་དབྱིངས་ཀྱི་འཕྲལ་དུ་བྲིས་པའོ། །མངྒ་ལཾ།། །།

མ་ཅིག་གི་བཀའ་སྲུང་ཟངས་རིའི་བཙན་རྒོད་སྤུན་གཉིས་ཀྱི་གཏོར་ཆོག

༅། །མ་ཅིག་གི་བཀའ་སྲུང་ཟངས་རིའི་བཙན་རྒོད་སྤུན་གཉིས་ཀྱི་གཏོར་ཆོག་བཞུགས། ཡུམ་ཆེན་ཌཱཀྐིའི་ཚོགས་ལ་ཕྱག་འཚལ་ལོ། །མ་ཅིག་གི་བཀའ་སྲུང་ཟངས་རིའི་བཙན་རྒོད་སྒྲུབས་ཐབས་ལས་བྱང་སྦྱོར་དངོས་རྗེས་གསུམ་ནི། རྣལ་འབྱོར་པ་གཉན་ས་རི་ཁྲོད་འགྲིམས་པའི་དུས་བློ་བུར་དགྲ་བྱུང་ཞིང་ཏིང་ངེ་འཛིན་གཏོར་བས་ལྟས་ངན་ཆོ་འཕྲུལ་བློ་བུར་བཏང་བར་འདོད་ན་རིན་པོ་ཆེ་ཟངས་ག་མཚལ་དང་ར་ཁྲག་གི་ལིངྒ་དང་སྒྲུབ་གཏོར་བཅའ་བར་བྱས་ལ། མདུན་བསྐྱེད་བྱ་བ་ནི། རང་ཉིད་རྗེ་བཙུན་མ་བསྒོམ་པའི་སྤྱི་བོར་མ་ཅིག་མ་བསྐྱེད་ཅིང་ཐུགས་ཀའི་ཛཿདམར་པོ་ལས་འོད་ཟེར་ལྕགས་ཀྱུ་ལྟ་བུར་འཕྲོས་པས་མདུན་དུ་ཟངས་རིའི་བཙན་རྒོད་སྐུ་མདོག་དམར་པོ་ཞལ་གཅིག་ཕྱག་གཉིས་ཟངས་ཀྱི་མདུང་དར་བསྣམས་པ། ཆིབས་སུ་ཟངས་རྟ་དམར་པོ་ལ་བཅིབས་པ། སྐུ་ལ་ཟངས་ཁྲབས་གསོལ་བ། དབུ་ལ་ཟངས་རྨོག་བྱ་རུ་བཙུགས་པ། བཙན་ཆས་འཁོར་གསུམ་གསོལ་བ། མི་དམར་སྔོན་ནས་འགྲོ་བ། ཁྱི་དམར་རོལ་དུ་ཁྲིད་པ། བྱ་དམར་ཀླད་ནས་ལྡིང་བ། དེ་འདྲའི་འཁོར་ཚོགས་སྤྲུལ་པ་དཔག་ཏུ་མེད་པས་ཕྲིན་ལས་སྒྲུབ་པར་བསྒོམ། ༀ་ཙ་ཏྲི་ཧུར་ཐུམ་ཕཊ། འབོད་སྔགས་སོ། །ༀ་ཙ་ཏྲི་ཧུར་ཐུམ་མ་ར་ཡ་རྦད་ཕཊཿ རྦད་སྔགས་སོ། །ༀ་ཙ་ཏྲི་ཧུར་ཐུམ་ཛ་ཏྲི་ནན། ༀ་ཙ་ཏྲི་ཧུར་ཐུམ་ཏྲིལ་རྦད་སོད་སྭཱ་ཧཱཿ འགུགས་པ་གོང་དུ་སོང་བས་འདིར། ནྲི་ཏྲི་བཛྲ་ཨངྐུ་ཤ་ཛ་ཛཿཧཱུྃ་བཾ་ཧོཿ བརྗོད་ལ་ཌཱ་འུར་བཅས། བདེན་པ་བདར་གུ་གུལ་བདུག་ལ་གཏོར་མ་ཉ་བོ་རྣམས་བཀའ་སྲུང་ལ་མཆོད་ཅིང་། ར་ཙ་ཧུར་ཐུམ་ཨེ་དམ་བྷ་ལིངྟ་ཁ་ཁི་ཁཱ་ཧི། ཧཱུྃ། ཟངས་རི་མཁར་དམར་གྱི་དགོན་པ་ན། །སྲོག་ཟན་ཤན་པ་མཆེད་གཉིས་ནི། །བཙན་རྒོད་འབར་བ་མདུང་ཐུང་ཅན། །ཆིབས་སུ་བཙན་རྟ་དམར་པོ་བཅིབས། །སྐུ་ལ་བསེ་ཁྲབ་དམར་པོ་གསོལ། །དབུ.ལ་བསྭེ་རྨོག་དམར་པོ་མནབ། །རྨོག་ཕོར་བྱ་རྒོད་དང་རུ་བཙུག །གླད་ན་བྱ་དམར་ལིངས་སེ་ལིང་། །སྔོན་ན་མི་དམར་བྲེངས་སེ་བྲེང་། །ཕྱི་ནས་ཁྱི་དམར་ཁེངས་སེ་ཁེང་། །བཙན་ཆས་འཁོར་གསུམ་ཁྲ་ལ་ལ། །མདུང་དར་དམར་པོ་ལྷབས་སེ་ལྷབ། །བཙན་རྟ་དམར་པོ་ཟིངས་སེ་ཟིང་། །བཙན་ཁྱི་དམར་པོ་ཁེངས་སེ་ཁེང་། །བཙན་ཞགས་དམར་པོ་རྒྱངས་སེ་རྒྱང་། །རྒྱན་གྱི་གཏོར་མ་འདི་བཞེས་ལ། །སྔོན་ཚེ་ཡུམ་གྱི་བཀའ་ལུང་བཞིན། །སྡང་བྱེད་དགྲ་ལ་རྟག་ཕྱུང་ཅིག །གནོད་བྱེད་བགེགས་ལ་ལས་མཛོད་ཅིག །རི་ཁྲོད་འགྲིམས་པའི་མཐུན་རྐྱེན་གྱིས། །སྟོང་ཉིད་བསྒོམ་པའི་ཡོན་བདག་མཛོད། །མོས་གུས་ཅན་གྱི་བུ་སློབ་སྐྱོངས། །གནོད་ཅིང་འཚེ་བའི་དགྲ་བགེགས་ཐུལ། །བཅོལ་པའི་ཕྲིན་ལས་འགྲུབ་པར་མཛོད། །ༀ་ཙ་ཏྲི་ཧུར་ཐུམ་ཨེ་དམ་བྷ་ལིངྟ་ཁ་ཧི་ཁཱ་ཧི། ཌཱ་འུར་སུམ་བཅད་ཀྱིས་བཞག །སྔོན་ཚེ་མ་ཅིག་ལབ་སྒྲོན་སྤྱན་སྔ་རུ། །ཚུལ་བཞིན་སོགས། གང་ཞིག་ཡིད་ལ་སོགས། ཆད་ཐོ་བྱ། འདི་ཡན་གཏོར་འབུལ་ནང་ནུབ་བྱས་ན་ལུས་དང་གྲིབ་མ་བཞིན་དུ་འོང་བའོ། ༈ །འདི་མན་ཆད་ལྷག་མའི་གཏོར་མ་དགྲ་ཕྱོགས་སུ་གྲུ་གསུམ་ནང་དུ་ཐུན་གྱི་བྲབ་ཅིང་ལིངྒ་མེ་ལ་སྲེགས། ཕ་རོལ་པོའི་སྔགས་པ་དང་འགྲས་ན་བྲི་ཐབས་བསད་སྔགས་འདིའོ། །ཚེས་ཞབས་སུ་མནན་ན་གཉན། རྒྱུག་སྔགས་ནི། ཧཱུྃ། ཟངས་རི་མཁར་དམར་གྱི་དགོན་པ་ནས། །བཙན་རྒོད་འབར་བ་མདུང་ཐུང་ཅན། །དགྲ་ལ་དམག་སྣ་དྲོངས་དུ་གསོལ། །དགྲ་མཁར་ཐོག་གིས་བསྒྱེལ་དུ་གསོལ། །དགྲ་ཡུལ་སེར་བས་ད་ཕུད་ཅིག །དགྲ་བོའི་ཁང་ཁྱིམ་ཐན་གྱི་ཁེངས་པར་གྱིས། །དགྲ་བོའི་ཕ་ཚན་ད་ཕྱེས་ཤིག །བུ་ཚ་མ་ཚན་ད་ཕྱེས་ཤིག །དགྲ་ལ་གཟེར་ནད་ད་ཐོངས་ཅིག །དགྲ་ལ་ཞ་གྲུམ་ད་ཐོང་ཅིག །སྙིང་གི་སྒོ་ང་ད་ཆོག་ཅིག །སེམས་ཀྱི་མར་མེ་ད་སོད་ཅིག །རྒྱུག་སྒོ་དགྲ་ལ་ད་ཕྱེས་ཤིག །ལོ་རོ་དགྲ་ལ་ད་ཕོབས་ཅིག །མ་ཅིག་ལབ་སྒྲོན་བཀའ་ལུང་བཞིན། །དམ་ཚིག་ཚུལ་བཞིན་གཉེར་འདི་གཏད། །བཅོལ་བའི་ཕྲིན་ལས་འགྲུབ་པར་མཛོད། །ༀ་ཙ་ཏྲི་ཧུར་ཐུམ་ཏྲིལ་རྦད་སོད་ཕཊཿ མ་ཅིག་བཀའ་སྲུང་ཟངས་རི་བཙན་རྒོད་ཀྱིས་ལས་བྱང་འབོད་རྦད་བསད་གསུམ་སྔགས་དང་བཅས་པ་རྫོགས་སོ།། །།མངྒ་ལཾ། ཀུན་དགའ་འབུམ་གྱི་གཅོད་པོད་ནང་ནས་མ་ཇི་བཞིན་བཤུས།