དམར་གསུར།
༈ དམར་གསུར་ལ་ཆབ་བྲན། འབྲུ་གསུམ་ཀྱིས་འདོད་དགུ་མི་ཟད་ནམ་མཁའི་མཛོད་དུ་བརླབས་ལ། ༀ་ཨཱཿཧཱུྃ། དམར་གསུར་འདོད་ཡོན་རྒྱ་མཚོ་འདིས། །ཁམས་གསུམ་སྲིད་པར་གནས་པ་ཡི། །ལྷ་འདྲེ་འབྱུང་པོ་གདོན་བགེགས་རིགས། །གདུག་ཅིང་སྲོག་ལ་རྔམ་པ་དང་། །ཤ་ཁྲག་ཟས་ལ་དགའ་བ་རྣམས། །རང་རང་ཡིད་མཐུན་འདོད་དགུའི་གཏེར། །ཟག་མེད་བདེ་བའི་ཚིམ་གྱུར་ནས། །གནོད་འཚེ་གདུག་རྩུབ་ཞི་གྱུར་ཅིག །ཁྱད་པར་བདག་དང་སྦྱིན་བདག་གི། །ཚེ་རྐུ་བླ་འཁྱེར་སྲོག་ལ་འཇབ། །ཟས་ནོར་དཔལ་ལ་འགོང་བྱེད་པའི། །ལན་ཆགས་རྐྱེན་བགེགས་བྱེད་རྣམས་ལ། །འདོད་ཡོན་མི་ཟད་གཏེར་དུ་བསྔོ། །དགའ་མགུ་ཡི་རང་ཚིམ་གྱུར་ནས། །ཞི་ཞིང་བྱམས་པའི་སེམས་ལྡན་ཤོག །ཡུལ་འདིའི་སྣོད་དང་བཅུད་རྣམས་ལ། །རྟེན་ཅིང་འབྲེལ་བའི་ལྷ་འདྲེ་ནི། །མི་ལ་འཚེ་ཞིང་ཕྱུགས་ལ་གནོད། །ཟ་འདྲེ་གོད་འདྲེ་འགོང་པོའི་རིགས། ། རྦད་འདྲེ་ཤི་འདྲེ་ཕོ་མོ་དང་། །གློ་བུར་ལྷག་པའི་གདོན་བགེགས་ཚོགས། །གང་དག་ཇི་སྙེད་མཆིས་པ་ལ། །མི་ཟད་བདེ་བའི་གཏེར་དུ་བསྔོ། །འདི་ལྟར་གསུར་མཆོད་ཁྱད་པར་ཅན། །ངོ་བོ་བདེ་ཆེན་ཡེ་ཤེས་ལ། །རྣམ་པ་འདོད་དགུ་མི་ཟད་གཏེར། །གང་ལ་བསྔོས་པ་ཚིམ་གྱུར་ཅིག །འཁྲུལ་བའི་སེམས་ཀྱི་དབང་སོང་བས། །རྟག་ཏུ་གདུང་ཞིང་མནར་བ་ཡི། །ཡིད་ཅན་ཇི་སྙེད་མཆིས་རྣམས་ཀྱི། །ཡིད་ལ་བདེ་ཆེན་གཏེར་ལྡན་ཤོག །བྱང་ཆུབ་སེམས་ཀྱི་སྲོག་རྙེད་ཅིང་། །ཤེས་རབ་ཆེན་པོའི་མིག་ཐོབ་ནས། །རྒྱལ་བའི་སྲས་ཀྱི་སྤྱོད་པ་ལ། །འགྲོ་ཀུན་བདེ་བླག་འཇུག་པར་ཤོག །བདག་དང་སྤྱིན་པའི་བདག་པོ་ཡི། །ཚེ་རབས་ཐོག་མ་མེད་པ་ནས། །བུ་ལོན་ལན་ཆགས་སོད་གྱུར་ཅིག །སྐྱེ་བ་ཀུན་དུ་བགེགས་མེད་ཤོག །ཕྲལ་གྱི་རྐྱེན་བགེགས་བྱེད་རྣམས་ཀྱང་། །ཤ་མཁོན་སྡིག་སྒྲིབ་དག་གྱུར་ནས། །དེང་ནས་བྱང་ཆུབ་སྙིང་པོའི་བར། །གནོད་ཚེའི་སྦྱོར་བ་རྒྱུན་ཆད་ཤོག །གནོད་བྱེད་འབྱུང་པོའི་རིགས་རྣམས་ཀྱིས། །བཟུང་བ་ཐོང་ལ་བཅིང་པ་ཁྲོལ། །བསྡམ་པ་ཀློད་ལ་མནན་པ་ཁྱོགས། །གདོན་རྣམས་གདུག་རྩུབ་གནོད་འཚེ་ཞི། །བྱམས་པའི་སེམས་དང་ལྡན་གྱུར་ཏེ། །ཕན་ཚུན་བདེ་ལ་གནས་པར་ཤོག །རྐང་གཉིས་ཁྱེད་ཅག་འདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །སྐྱེ་དགུ་ཀུན་ཀྱང་བདེ་ལེགས་ཤིང་། །འཆི་སོགས་འཇིག་ཀུན་བྲལ་གྱུར་ཅིག །ཚེ་རིང་ནད་མེད་དཔལ་གྱིས་བརྒྱན། །རྟག་ཏུ་བདེ་ཞིང་དོན་ཀུན་བསྒྲུབ། །ཆོས་དང་ལྡན་ཞིང་བྱམས་ལ་གནས། །ཐམས་ཅད་སངས་རྒྱས་ཐོབ་པར་ཤོག །དེ་ལྟར་དམིགས་ལ། ༀ་ཨཱཿཧཱུྃ། ཇི་མང་བཟླའོ། །རབ་ཚེས་མེ་སྤྲེལ་ཟླ་བ་གཅིག་པའི་ཚེས་ཉེར་ལྔ་ལ་མི་ཕམ་པས་འཕྲལ་བྲིས་མངྒ་ལཾ།།