མནོལ་བསང་ལྷ་ཆབ་སྔོན་མོའི་ཁོག་དབུབ་སྤྱི་ཆིངས་མདོར་བསྡུས།
མནོལ་བསང་ལྷ་ཆབ་སྔོན་མོའི་ཁོག་དབུབ་སྤྱི་ཆིངས་མདོར་བསྡུས་བཞུགས། ན་མོ་གུ་རུ་པདྨཱ་ཀ་ར་ཡེ། མནོལ་བསང་ལྷ་ཆབ་སྔོན་མོ་འདི་ཉིད་ལག་ཏུ་ལེན་པ་ལ། སྦྱོར་བ་གཙང་མའི་སྟེགས་བུ་རས་དཀར་གྱི་ཁེབས་དང་ལྡན་པའི་ཁར། སྣོད་གཙང་མར་འབྲུ་སྣའི་ཕྱེ་དང་བསང་རྫས་བརྒྱ་རྩ་སོགས་འོག་གི་ཚིག་རིས་དང་མཐུན་པའི་སྨན་སྣ། དར་ཟབ་གོས་སྣ། དཀར་གསུམ་མངར་གསུམ་བཅས་མར་ཁུས་སྤགས་པས་བཀང་བ་བཤམ། མཐའ་བསྐོར་དུ་འོ་ཕུད། ཆང་ཕུད། ཇ་ཕུད། ཤིང་ཏོག་བཟང་པོའི་ཁུ་བའི་རིགས། ཆུ་གཙང་དྲི་བཟང་ལྔ་ཚན་ལྔ་སྦྱར་བ་བཅས་ཀྱིས་བཀང་བའི་ཞལ་བུ་གྲལ་སྟབས་སུ་འགོད། ཕྱི་ནང་གི་ཕྱོགས་གང་བདེར་ཤིང་སྣའི་མེ་དང་། རོལ་མོའི་རིགས་བྱེད་སོགས་འདིར་མཁོ་བའི་ཡོ་བྱད་རྣམས་འདུ་བྱས་ནས། ཆོ་ག་དངོས་ལ། འདི་ཉིད་ལྷ་བསང་རྒྱག་བརྔན་སོགས་བསང་གཞུང་གཞན་གྱི་ཁོངས་སུ་བསྒྲུབ་ན་སྔོན་རྗེས་ཀྱི་ཆོས་རྣམས་ཟུར་དུ་མི་དགོས་པས་མནོལ་བསང་དངོས་ལ་འཇུག་པས་ཆོག་ཅིང་། འདི་ཁོ་ན་སྒེར་དུ་གཏོང་སྐབས་སུ། ཐོག་མར་སྦྱོར་བའི་ཆོས་མདོར་བསྡུས་ནི། ན་མོ། བདག་སོགས་འགྲོ་ཀུན་དེང་ནས་བྱང་ཆུབ་བར། །བླ་མ་རྩ་གསུམ་ལྷ་ལ་སྐྱབས་སུ་མཆི། །གཞན་དོན་རྫོགས་པའི་སངས་རྒྱས་ཐོབ་བྱའི་ཕྱིར། །ཟབ་མོའི་རྣལ་འབྱོར་བསྒོམ་པར་སེམས་བསྐྱེད་དོ། །ཞེས་སྐྱབས་སེམས་ལན་གསུམ། ཀ་དག་ཆོས་སྐུའི་དབྱིངས་ལས་འགགས་མེད་རྩལ། །པདྨ་ཐོད་ཕྲེང་དཀར་དམར་གཞོན་ཚུལ་མཛེས། །མཚན་དཔེའི་གཟི་འབར་རྡོ་རྗེ་ཐོད་པ་བསྣམས། །མཛེས་བརྗིད་རྒྱན་དང་ཆ་བྱད་ཡོངས་སུ་རྫོགས། །དམ་ཡེ་དབྱེར་མེད་རྒྱལ་ཀུན་འདུས་པའི་གཟུགས། །འཁོར་འདས་ཀུན་གྱི་སྤྱི་དཔལ་ཆེན་པོར་གྱུར། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱ་རྩ་སོགས་བཟླས་མཐར། བསང་རྫས་རྣམས་ལ་བསང་ཆུ་འཐོར་ཞིང་། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲཱུྂ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་དྲི་བཟང་གི་མཆོད་པ། རྩི་ཤིང་སྣ་ཚོགས་ཀྱི་དུད་པ། ཞལ་ཟས་ཕྱེ་མར་གྱི་འོ་སྐོལ། གསུར་གྱི་དུད་སྤྲིན་ཆེན་པོ། དུ་བ་ཡེ་ཤེས་ཀྱི་བདུད་རྩིས་ས་དང་བར་སྣང་ཐམས་ཅད་གང་བ། གཟུགས་མཛེས་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ། བཟའ་བས་མི་ཟད་པ། བཏུང་བས་མི་ཟད་པ། རྒོལ་བས་མི་སྡིགས་པ། རི་རྒྱལ་ལས་དཔངས་མཐོ་བ། རྒྱ་མཚོ་ལས་གཏིང་ཟབ་པ། ཞིང་རྡུལ་ལས་གྲངས་མང་བ། ཉི་ཟླ་ལས་འོད་གསལ་བ། རྒྱ་ཆེ་ནམ་མཁའི་མཐའ་དང་མཉམ་པ། ནད་པ་གསོ་བའི་སྨན། འཆི་བ་བསླུ་བའི་བདུད་རྩིའི་རྒྱ་མཚོ་ཆེན་པོར་གྱུར། ནམ་མཁའ་མཛོད་ཀྱི་སྔགས་རྒྱ་ལན་བདུན་གྱིས་བྱིན་བརླབ་ལ། བཛྲ་སྥ་ར་ཎ་ཁཾ་གིས་སྤེལ། ན་མོ། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །སེམས་ཅན་རྣམས་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །ཐོགས་པ་མེད་པར་འབྱུང་གྱུར་ཅིག །ཅེས་བདེན་པའི་སྟོབས་བརྗོད། དེ་ནས་མནོལ་བསང་ལྷ་ཆབ་སྔོན་མོའི་གཞུང་ལ་འཇུག །སྐབས་སུ་བསང་ཁ་གསོ་ཞིང་སྐྱེམས་རིགས་རྣམས་ཐབ་ཏུ་འཐོར། མཐར་ཆགས་སུ་བཏང་མཐར། རྗེས་རིམ་ནི། འབྱུང་པོ་གང་དག་འདིར་ནི་ལྷག་གྱུར་ཏམ། །ས་འམ་འོན་ཏེ་བར་སྣང་འཁོད་ཀྱང་རུང་། །སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །འདིར་ནི་རྒྱལ་བ་དགྲ་རྒྱལ་བདེན་གང་གིས། །ཤིན་ཏུ་བདེན་པར་གསུངས་ཤིང་རྫུན་མེད་པ། །བདེན་པ་དེས་ཀྱང་དེང་འདིར་བདེ་ལེགས་ཤོག །དེང་ཀུན་འཇིགས་པ་ཆེ་ལས་ཐར་གྱུར་ཅིག །ཅེས་སོགས་སྨོན་ལམ་གདབ་ཅིང་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པའང་རང་གཞན་གྲོང་སྔགས་པ་རྣམས་འཇུག་བདེའི་ངག་ཁྲིགས་སུ་འཇིགས་བྲལ་ཡེ་ཤེས་རྡོ་རྗེས་བསྡེབས་པ་དགེ།། །།