སྐྱབས་འགྲོ་ཡན་ལག་དྲུག་པའི་རྣམ་འགྲེལ།

སྐྱབས་འགྲོ་ཡན་ལག་དྲུག་པའི་རྣམ་འགྲེལ། རྟེན་འབྱུང་ཆོས་ཀྱི་རིགས་པའི་རྩིབས་སྟོང་ལྡན་པ་གཏི་མུག་གཡུལ་རྒྱལ་མྱུར་བར་ཐར་གླིང་དབང་དུ་སྒྱུར་བྱེད་ལེགས་བཤད་གསེར་གྱི་འཁོར་ལོ་ཞེས་བྱ་བ་བཞུགས་སོ། །ན་མོ་བུདྡྷ་དྷརྨ་སཾ་གྷ་ཡ། པདྨ་བརྩེགས་མགོན་འཛམ་གླིང་བྱེ་ཕྲག་བརྒྱར། །རྫུས་སྐྱེས་འཇའ་ལུས་རྡོ་རྗེའི་སྐུར་སྤྲུལ་གང་། །སྟོན་པས་མཆོག་བསྔགས་རྡོ་རྗེ་འཆང་ཀུན་རྗེ། །རྒྱལ་དབང་པདྨ་འབྱུང་གནས་ཤིས་པ་རྩོལ། །འགྲོ་ལ་གཞིར་གནས་མཆོག་གསུམ་འདུས་མ་བྱས། །བྲལ་རྒྱུའི་ཉེར་ལེན་མོས་སོགས་ལམ་བདེན་དུ། །སྨིན་རྐྱེན་ཐུགས་རྗེ་མཛད་སྨོན་བླ་མེད་བདག །བདེ་གཤེགས་ཆོས་དང་འཕགས་ཚོགས་ལ་ཕྱག་འཚལ། །ཞིང་དང་བསྐལ་པ་རྡུལ་སྙེད་གྲངས་གཏུགས་པར། །སངས་རྒྱས་ཚུལ་བསྒྲུབས་མི་མཇེད་ཁམས་འདིར་ཡང་། །རྩོད་དུས་གདུང་འཕྲོག་མི་འཇིགས་རྩལ་མཚུངས་མེད། །སྟོན་མཆོག་ཁྱད་འཕགས་ཤཱཀྱ་སེང་གེར་འདུད། །དགེ་བ་གསུམ་ལྡན་དོན་ཚིག་བཟང་རྩ་བརྟན། །ཚངས་སྤྱོད་བཞི་ཡི་ལྷུན་མཐོའི་ལུང་གིས་བརྗིད། །ལམ་འབྲས་རྟོགས་པའི་དམ་ཆོས་གངས་འཐུག་པོར། །སྲས་ཚོགས་འོད་དཀར་བགྲང་ཡས་དཀྲིགས་ལ་འདུད། །བསྟན་པའི་བདག་པོའི་ལམ་གནད་སྐྱབས་འགྲོའི་ཆོས། །ལེགས་བཤད་སློབ་དཔོན་བི་མ་མི་དྲའི་གཞུང་། །བདེ་བླག་རྟོགས་བྱེད་ཐམས་ཅད་མཁྱེན་སྒྲུབ་ཐབས། །རྟེན་ཅིང་འབྲེལ་ལྡན་ཊི་ཀ་མངོན་གསལ་བྱ། །དེ་ཡང་སྐྱོབས་པ་བླ་ན་མ་མཆིས་པ་ལུང་དང་རྟོགས་པའི་བསྟན་པ་འདིའི་བདག་པོ། སྟོན་མཆོག་མཚུངས་པ་མེད་པ་བཅོམ་ལྡན་འདས་ཤཱཀྱ་སེང་གེ་ཞེས་ཡོངས་སུ་གྲགས་ཤིང་། འཁོར་འདྲེན་པ་ཟླ་མེད་འཕགས་ཚོགས་བགྲང་བ་ལས་འདས་པ་བསྐྲུན་པར་མཛད་པ་དེའི་ཆོ་འཕྲུལ་གསུམ་གྱི་ནང་ནས་མཆོག་ཏུ་གྱུར་པ། གསུང་རྗེས་སུ་བསྟན་པའི་ཆོ་འཕྲུལ་བསྟན་པ་དམ་པའི་ཆོས། འཛམ་གླིང་ན་མངོན་པར་གནས་པ་ཡང་ལེགས་པར་གསུངས་པའི་བཀའ་ཞེས་བྱ་བ་གཙོ་ཆེར་སྟོན་པ་རང་གིས་ཞལ་ནས་གསུངས་པ་དང་། དགོངས་པ་འགྲེལ་པའི་བསྟན་བཅོས་ཞེས་བྱ་བ་རྒྱ་གར་འཕགས་པའི་ཡུལ་གྱི་སློབ་དཔོན་དང་པཎྜི་ཏ་རྣམས་དང་བོད་ཀྱི་མཁས་གྲུབ་ཕལ་མོ་ཆེས་བཀའ་ཡི་དོན་རྒྱས་པ་བསྡུས་པ། བསྡུས་པ་རྒྱས་པ། འཁྲུགས་པ་བསྡེབས་པ། འཐོར་བ་རྣམས་སྡུད་པ། དཀའ་བ་འབྱེད་པ། མི་གསལ་བ་གསལ་བར་བྱས་ཏེ་རྗེས་འཇུག་དམ་པས་བརྩམས་པ་དང་གཉིས་སུ་ཡོད་པ་ལས། །བདེ་བར་གཤེགས་པའི་བཀའ་ཐམས་ཅད་ལ་ནི་གཞུང་ཆེན་པོ་ཞེས་བྱ་བས་ན་དེའི་དབང་དུ་བྱས་པའི་བསྟན་བཅོས་ཐམས་ཅད་ཀྱང་གཞུང་ཆེན་པོ་ཡིན་ལ། འདི་ནི་གཉིས་སུ་འགྱུར་ཏེ། མདོ་སྔགས་ཕྱོགས་རེ་སྟོན་པའི་གཞུང་ཆེན་ནི། རྒྱ་གར་ནས་བྱུང་བ། དཔེར་ན། སློབ་དཔོན་ཡོན་ཏན་འོད་ཀྱི་འདུལ་བ་མདོ་རྩ། ཤཱཀྱ་འོད་ཀྱི་ཀརྨ་ཤ་ཏཾ། སློབ་དཔོན་དབྱིག་གཉེན་གྱི་མངོན་མཛོད། འཕགས་པ་ཐོགས་མེད་ཀྱི་མངོན་པ་ཀུན་བཏུས་སོགས་སྡོམ་རྣམ་གཉིས། ས་སྡེ་ལྔ། རྒྱལ་སྲས་མི་ཕམ་པའི་བྱམས་ཆོས་སྡེ་ལྔ། འཕགས་པ་ཀླུ་སྒྲུབ་ཀྱི་དབུ་མ་ཚོགས་གསུམ་ལྟ་བུ་སྟེ་མདོ་ལམ་རྐྱང་བར་བསྟན་པ་རྣམས་ཡིན་ལ། སྔགས་རྐྱང་པར་བསྟན་པ་ཡང་དེ་བཞིན་ནོ། །མདོ་སྔགས་ཡོངས་རྫོགས་སྟོན་པའི་གཞུང་ཆེན་ནི། འཕགས་ཡུལ་དུ་སློབ་དཔོན་ཆེན་པོ་པདྨ་སམྦྷ་ཝའི་མན་ངག་ལྟ་བའི་ཕྲེང་བ་དང་། ཇོ་བོ་ཨ་ཏི་ཤའི་བྱང་ཆུབ་ལམ་སྒྲོན་ལྟ་བུ་རྣམས་ཡིན་ལ། བོད་ཡུལ་ན་ཀུན་མཁྱེན་རོང་ཟོམ་མ་ཧཱ་པཎྜི་ཏའི་ཐེག་ཆེན་ཚུལ་འཇུག་དང་། རྒྱལ་བའི་དབང་པོ་ཀློང་ཆེན་པའི་ངལ་བསོ་སྐོར་གསུམ་དང་། ཡིད་བཞིན་མཛོད་དང་། མངའ་རིས་པཎ་ཆེན་དང་། ས་པཎྜི་ཏའི་སྡོམ་གསུམ་ལྟ་བུ་རྣམས་ཡིན་ཏེ། མདོ་སྔགས་ཀྱི་ཆོས་ཐམས་ཅད་གཞུང་ལམ་གཅིག་ན་ཚང་བས་སོ། །དེ་ལྟ་བུའི་གཞུང་ཆེན་རྣམས་ནི་ཐར་པ་དང་ཐམས་ཅད་མཁྱེན་པར་འགྲོ་བའི་རྐྱེན་མཆོག་ཏུ་གྱུར་པ་ཡིན་པས། རྟོན་པ་བཞི་དང་ལྡན་པའི་ཐོས་བསམ་སྒོམ་གསུམ་བྱེད་དགོས་ཤིང་། དེ་ཡང་ཐོས་པ་བྱེད་པའི་དུས་ན་གང་ཟག་བླུན་པོ་འགའ་ཞིག་གི་ཕྱོགས་འཛིན་པ་དང་དེ་དག་གི་དབང་དུ་འགྱུར་བ་སྤང་ནས། ཆོས་ཀྱི་ཚིག་དོན་ལ་མཁས་པ་སུ་ཡོད་ལ་བསྟན་ནས་ཤེས་བྱ་དམ་པའི་ཆོས་ཁོ་ན་ལ་ཡིན་གཏད་ཅིང་དོན་དུ་གཉེར་བས་གང་ཟག་ལ་མི་རྟོན་ཆོས་ལ་རྟོན་དགོས་སོ། །བསམ་པའི་ཚེ་ན་བདེ་བར་གཤེགས་པའི་ལུང་ཁོ་ན་ལ་རྟོག་དཔྱོད་བྱེད་དགོས་ཤིང་དེ་ཡང་གཉིས་སུ་ཡོད་པ་ལས། མི་དགེ་བའི་ལས་སམ་ཉོན་མོངས་སམ་སྡུག་བསྔལ་འཁོར་བའི་ཆོས་དང་། སེམས་ཅན་དུ་ལྟ་བའི་གང་ཟག་ཡང་དག་པའི་དོན་ཡིན་པ་དང་ཡོད་པར་གསུངས་པའི་ཚིག་ཐམས་ཅད་དྲང་དོན་ཡིན་པས་དེ་ལ་མི་རྟོན་པར། ངེས་འབྱུང་གསུམ་སྒྲུབ་པའི་ཐབས་རྟེན་འབྱུང་སྣང་ལ་རང་བཞིན་མེད་པ་དང་། སྟོང་ཉིད་བསམ་བརྗོད་ལས་འདས་པའི་འོད་གསལ་ཏེ། བདེན་གཉིས་ཟུང་འབྲེལ་སྟོན་པའི་ཚིག་ཐམས་ཅད་ངེས་དོན་ཡིན་པས་དེ་ལ་ཡིད་རྟོན་དགོས་ལ། དེ་ནི་རང་བཞིན་མེད་པའི་སྟོང་ཉིད་དང་རྣམ་ཀུན་མཆོག་ལྡན་གྱི་སྟོང་ཉིད་གཉིས་སུ་གནས་སོ། །དྲང་ངེས་དབྱེ་ཚུལ་འདིར་ནི། དགོངས་པ་ངེས་འགྲེལ་ལས། སྒྲ་ཇི་བཞིན་མ་ཡིན་པ་དང་། ཇི་བཞིན་པས་འབྱེད་པར་གསུངས་པ་དང་། བློ་གྲོས་མི་ཟད་པར་གདུལ་བྱ་ལམ་ལ་འཇུག་པ་དང་འབྲས་བུ་ལ་འཇུག་ཕྱིར་གསུངས་པ་དང་། ཟླ་བ་སྒྲོན་མར་སྟོང་ཉིད་སྟོན་པ་དང་། དེ་མ་ཡིན་པར་སྟོན་པས་འབྱེད་པར་གསུང་བ་འགལ་མེད་དུ་ཚང་བར་གྱུར་ལ། གྲུབ་མཐའི་འདོད་པ་ལྟར་ན་ནི་ངེས་པ་མེད་པར་གྱུར་ཏེ་ཁ་ཅིག་གི་ངེས་དོན་ཁ་ཅིག་གི་དྲང་དོན་དུ་གྱུར་ཅིང་། བདེ་བར་གཤེགས་པའི་གཞུང་ཡང་སོ་སོར་མགོ་བཤའ་བྱེད་པའི་ལུགས་ནི་མི་འཐད་དེ། བཀའ་མཐའ་དག་དེ་བཞིན་ཉིད་སྟོན་པར་དོན་གཅིག་པ་དང་། གཞུང་གཅིག་བསམ་པ་དང་བསྒོམ་པས་ཐམས་ཅད་བསམ་ཞིང་བསྒོམ་པར་འགྱུར་ཞེས་གསུངས་པའི་ཕྱིར་ཏེ། ཏིང་འཛིན་རྒྱལ་པོ་ལས། འཇིག་རྟེན་ཁམས་ནི་སྟོང་དག་ཏུ། །ང་ཡི་ཆོས་རྣམས་གང་བསྟན་པ། །ཡི་གེ་ཐ་དད་དོན་གཅིག་སྟེ། །ཐམས་ཅད་བདག་མེད་དེ་བཞིན་ཉིད། །གཅིག་གི་ཚིག་དོན་བསམ་པས་ནི། །ཀུན་གྱི་ཚིག་དོན་བསམ་པར་འགྱུར། །གཅིག་གི་ཚིག་དོན་བསྒོམ་པས་ནི། །ཀུན་གྱི་ཚིག་དོན་བསྒོམ་པར་འགྱུར། །ཞེས་གསུངས་སོ། །འདིར་ནི་གཞུང་གིས་མི་འབྱེད་པར་ཚིག་གིས་འབྱེད་པར་འདོད་དེ། གཞུང་རེ་རེར་ཡང་གཞན་དག་ཆོས་འདིར་གཞུགས་པ་དང་ཡང་དག་པའི་ལམ་སྟོན་པའི་རྣམ་པ། གཞན་དང་མཐུན་པའི་ཚིག་འགའ་དང་། ཁྱད་པར་འཕགས་པའི་ཀུན་རྫོབ་ཀྱི་དོན་དང་དོན་དམ་པ་བཅས་སྟོན་པའི་ཚིག་འབྱུང་བའི་ཕྱིར་རོ། །ངེས་དོན་གྱི་ལུང་ལ་བརྟེན་ནས་ཀྱང་ཚིག་ཙམ་གྱི་མཐའ་ལ་དཔྱོད་པ་དང་རྟོག་གེ་ངན་པའི་དོན་མེད་ཅིང་དོན་ཕྱིན་ཅི་ལོག་པའི་ཚིག་གི་རིགས་པ་ལ་ཡིད་མི་རྟོན་པར། ཟབ་ཅིང་རྒྱ་ཆེ་བའི་དོན་སྤྱི་རྒྱ་རླབས་ཀྱིས་གཅོད་པ་དོན་གྱི་རིགས་པ་ལ་ཡིད་རྟོན་པར་བྱ་དགོས་སོ། །བསྒོམ་པའི་སྐབས་ན་གཟུང་འཛིན་ཐ་དད་དང་ཐ་མི་དད་དུ་ཞེན་པ་སེམས་ཡིད་རྣམ་ཤེས་ལ་ཕུག་མི་རྟོན་པར། དེ་རྣམས་དང་བྲལ་བ་ཞེན་མེད་རྣམ་པར་མི་རྟོག་པའི་ཡེ་ཤེས་ལ་འདུན་ཕུག་རྟོན་དགོས་སོ། །དེ་དག་གིས་ཆོས་ཀྱི་རྣམ་པར་བཞག་པ་སྤྱིའི་ཁོག་ཕུབ་ནས། དམ་པའི་ཆོས་སྒྲོགས་པ་ན་སློབ་དཔོན་གྱིས་འཆད་ཚུལ། སློབ་མས་ཉན་ཚུལ། འཆད་ཉན་བྱས་པའི་ཕན་ཡོན་ཏེ། འཆད་ཉན་བྱ་བའི་ཡན་ལག་ཤེས་པ་སྔོན་དུ་སོང་ནས། གང་ཞིག་བཤད་པར་བྱ་བ་ནི། རྒྱལ་བའི་དབང་པོ་ཀུན་མཁྱེན་ཆོས་རྗེའི་ཞལ་ནས། ཐར་པའི་ལམ་ལ་རིམ་གྱིས་བསླབ་པར་བྱ། །ལམ་རྣམས་ཀུན་གྱི་གཞི་རྟེན་སྐྱབས་སུ་འགྲོ། །ཞེས་གསུངས་པ་བཞིན། །ཐེག་དམན་གྱི་ཐར་པ་ཉན་ཐོས་རང་རྒྱལ་གྱི་བྱང་ཆུབ་གཉིས་དང་། ཐེག་ཆེན་གྱི་ཐར་པ་རྫོགས་པའི་སངས་རྒྱས་ཏེ་གསུམ་པོ་སྒྲུབ་བྱེད་ལམ་ཀྱང་གསུམ་ཡོད་ཅིང་། གསུམ་པོ་རེ་རེ་ལའང་ཐོག་མ་བར་མཐའི་སྔ་ཕྱིའི་ལམ་རིམ་པར་ཡོད་པ་གོང་ནས་གོང་དུ་བགྲོད་དགོས་ཀྱི། ཅིག་ཅར་འབྱུང་བ་མི་སྲིད་པས་རིམ་གྱིས་ལམ་ལ་བསླབ་པར་བྱ་དགོས་ཤིང་། ཐེག་པ་གསུམ་པོའི་ལམ་རྣམས་ཀུན་གྱི་གཞི་དང་རྟེན་ཡང་སྐྱབས་སུ་འགྲོ་བ་ཁོ་ན་ཡིན་ལ། སྐྱབས་འགྲོའི་ཚུལ་ལེགས་པར་གཏན་ལ་འབེབས་པའི་གཞུང་ནི། བཀའ་ལས་འཐོར་བ་རྣམས་སྡུད་པའི་བསྟན་བཅོས་སློབ་དཔོན་བི་མ་མི་ཏྲའི་སྐྱབས་འགྲོ་ཡན་ལག་དྲུག་པ་ཉིད་ཡིན་ཅིང་། འདི་ལ་ནི་ཐེག་པ་ཆེ་ཆུང་གི་མདོ་དང་སྔགས་ཕྱི་ནང་གི་རྒྱུད་གང་ཡིན་གྱི་སྐྱབས་འགྲོ་སྦྱར་ནས་བཀྲལ་ཆོག་པས་བསྟན་བཅོས་འདི་ནི་མདོ་སྔགས་ཡོངས་རྫོགས་ཀྱི་གཞུང་ཆེན་དུ་གཏོགས་སོ། །འདི་ཉིད་འཆད་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་འཇུག་གི་དོན་གསུམ་གྱི། དང་པོ་ལ། མཚན་སྨོས་པ་དང་། མཆོད་པར་བརྗོད་པ་དང་། རྩམ་པར་དམ་བཅའ་བ་གསུམ་ཡོད་པ་ལས། མཚན་སྨོས་པ་ནི་སྦྱོར་ཚུལ་བཞིའི་སྒོ་ནས་འཆད་དེ། དེ་ཡང་གང་ལ་མཚན་དུ་གསོལ། སྐྱབས་འགྲོའི་བསྟན་བཅོས་ལའོ། །གང་གིས་མཚན་གསོལ་ན་སློབ་དཔོན་ཆེན་པོ་བི་མ་ལ་མི་ཏྲས་སོ། །ཇི་ལྟར་མཚན་གསོལ་ན། དམིགས་བསལ་དགོས་པའི་དབང་དུ་སྐད་གཉིས་ཀྱིས་གསོལ་བ་སྟེ། དེའང་ཡུལ་གྱིས་ཁྱོན་དང་ལོངས་སྤྱོད་འབྱོར་པ་རྒྱ་ཆེ་བས་ན་རྒྱ། དཀར་པོ་དམ་པའི་ཆོས་ཀྱི་འབྱུང་ཁུངས་ཡིན་པས་གར། བི་ཤཱ་ཙ་ཤ་ཟ། ཨ་བ་བྷྲཾ་ཤ་ཟུར་ཆག །པྲ་ཀྲི་ཏ་རང་བཞིན་ན་མ་ཡུལ་སོ་སོ། སཾ་སྐྲྀ་ཏ་ལེགས་པར་སྦྱར་བ་སྟེ་འཕགས་ཡུལ་ན་སྐད་རིགས་ཆེན་པོ་བཞི་ཡོད་པའི་ནང་ནས་ཁྱད་པར་དུ་གྱུར་བ་ལེགས་སྦྱར་ལྷའི་སྐད་ཀྱི་དབང་དུ་བྱས་ཚེ། ཥ་ཊ་ཨཾ་ག་ས་ར་ཎཾ། ཞེས་པར་འགྱུར། དེ་ཉིད་བོད་ཆེན་པོ་ཡུལ་དབུས་ཀྱི་སྐད་དུ། ཥ་ཊ་དྲུག །ཨཾ་ག་ཡན་ལག །ས་ར་ཎཾ་སྐྱབས་འགྲོ་སྟེ། བོད་སྡེབ་ལས། སྐྱབས་འགྲོ་ཡན་ལག་དྲུག་པ་འབོད་དོ། །སྤྱིར་བཏང་གཞུང་ལ་མིང་གདགས་ཚུལ་གྱི་དབང་དུ་ནི་ལྔ་ཡོད་དེ། ཡུལ་དང་། གང་ཟག་དང་། གཞུང་ཚད་དང་། དཔེ་དང་། དོན་གྱི་སྒོ་ནས་འདོགས་པ་སྟེ། དེ་དག་གི་ནང་གསེས་རེ་རེར་ཡང་དབྱེ་བ་སོ་སོར་ཡོད་ཅིང་བསྟན་བཅོས་འདིའི་མཚན་ནི་དོན་གྱི་སྒོ་ནས་བཏགས་པ་ཡིན་ལ། དོན་དེར་ཡང་། དོན་གྱི་ངོ་བོ་ལས་བཏགས་པ་དང་། དོན་གྱི་ཁྱད་པར་ལས་བཏགས་པ་གཉིས་སུ་ཡོད་པའི་ནང་ནས་དོན་གྱི་ཁྱད་པར་ལས་བཏགས་པ་ཡིན་ཏེ། ངོ་བོ་སྐྱབས་འགྲོ། ཁྱད་པར་གྱི་ཆོས་ཡན་ལག་དྲུག་ཏུ་ཕྱེ་ནས་བསྟན་པའི་མཚན་ཡིན་པས་སོ། །ཅིའི་ཕྱིར་མཚན་གསོལ་ན་སྤྱིར་བཏང་གི་དགོས་པ་ནི། བརྗོད་བྱའི་དོན་མི་ཤེས་པའི་རྨོངས་པ་རྗོད་བྱེད་མིང་གིས་བསལ་ནས། མིང་གིས་དོན་ཤེས་པར་བྱེད་པས་ན། དབང་པོ་རབ་ཀྱིས་མིང་ཙམ་ལ་བརྟེན་ནས་དབུ་ཞབས་ཀྱི་དོན་རྟོགས། འབྲིང་གིས་ཕྱོགས་གར་གཏོགས་ཤེས། ཐ་མས་གཞན་དང་མ་ནོར་བ་མིང་གིས་ཤེས་ནས་གླེགས་བམ་བཙལ་སླ་བར་འགྱུར་ཏེ། ལང་ཀར་གཤེགས་པ་ལས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་བསལ་བའི་ཕྱིར། །ཆོས་རྣམས་མིང་དུ་གདགས་པར་མཛད། །ཅེས་གསུངས་པ་ལྟར་རོ། །དམིགས་བསལ་དུ་རྒྱ་སྐད་ཐོག་མར་སྨོས་པའི་དགོས་པ་ནི་བཞི་ཡོད་དེ། སྔགས་རྣམས་རྒྱ་སྐད་རང་སོར་བཞག་ནས་བཟླས་ན་ནུས་པ་ཆེ་བ་དེ་བཞིན་དུ་ལེགས་སྦྱར་གྱི་སྐད་ལ་སངས་རྒྱས་ཀྱི་བྱིན་རླབས་ཆེན་པོ་ལྡན་པས་དེ་ངག་ཏུ་བརྗོད་པ་ཙམ་གྱིས་རྒྱུད་ལ་སངས་རྒྱས་ཀྱི་བྱིན་རླབས་འབྱུང་བ་དང་། སྐད་མཆོག་ཏུ་གྱུར་པ་ཡོངས་སུ་ཤེས་པའི་བག་ཆགས་འཇོག་པ་དང་། རྒྱ་གར་ནས་བྱུང་བའི་བསྟན་བཅོས་རྣམས་ཀྱང་། རྩོམ་པ་པོ་རབ་ཆོས་ཉིད་ཀྱི་བདེན་པ་མཐོང་བའི་འཕགས་པ་ཡིན་པ་ཞིག་དང་། འབྲིང་ལྷག་པའི་ལྷའི་ཞལ་མཐོང་བའི་ཚོགས་སྦྱོར་གྱི་ལམ་ལ་གནས་པ་ཞིག་དང་། ཐ་མ་ཡང་ཚོགས་ལམ་ཙམ་ལ་གནས་ཤིང་རིག་པའི་གནས་ལྔ་མཐར་ཕྱིན་པའི་མཁས་པ་ཞིག་དགོས་ཤིང་ཁྲིམས་ལ་དབང་བའི་རྒྱལ་པོ་རྣམས་ཀྱིས། པཎ་གྲུབ་རྣམས་ལ་བརྒལ་བརྟགས་བྱེད་པར་བསྐུལ་ནས། མ་དག་པ་སུན་དབྱུང་བའི་སྲོལ་བཟང་པོ་ཡོད་པས་རྒྱ་ཆོས་ཁུངས་བཙུན་པར་ཤེས་པ་དང་། རྒྱ་སྐད་གོ་དཀའ་བ་བོད་ཡོངས་ཀྱི་རང་སྐད་གོ་སླ་བར་བསྒྱུར་བའི་བྱེད་པོ་ལོ་ཙཱ་རྣམས་ཀྱི་བཀའ་དྲིན་དྲན་པའི་དགོས་པ་དང་ལྡན་པའོ། །མཆོད་པར་བརྗོད་པ་ཡང་བཞིའི་སྒོ་ནས་འཆད་དེ། གང་ལ་མཆོད་པར་བརྗོད་ན་དཀོན་མཆོག་གསུམ་ལའོ། །གང་གིས་མཆོད་པར་བརྗོད་ན། སྔོན་བསྟན་བཅོས་འདི་རྩོམ་པའི་ཚེ་ན་སློབ་དཔོན་བི་མ་མི་ཏྲ་རང་གིས་ཡིན་གྱི་ལོ་ཙཱ་བའི་འགྱུར་ཕྱག་ཏུ་བཅུག་པ་ནི་མ་ཡིན་ཏེ་བཀས་བཅད་དང་མི་མཐུན་པའི་ཕྱིར་དང་། ལོ་ཙཱས་ཡི་གེ་བྲི་བ་ཙམ་ལས་བསྒྱུར་མ་དགོས་པ་སློབ་དཔོན་བོད་དུ་དངོས་སུ་བྱོན་ཏེ་ཞལ་ནས་གསུངས་པའི་ཕྱིར་རོ། །དེ་ཡང་ཕྱིས་སུ་འཆད་ཉན་སྒྲུབ་པ་བྱེད་པ་པོ་རྣམས་ཀྱིས་ནི་ཕྱག་འཚལ་བ་དེ་ཟློས་པས་ཡིན་ནོ། །ཅི་ལྟར་མཆོད་པར་བརྗོད་ན། ཁྱད་པར་གྱི་ཆོས་གསུམ་དང་ལྡན་པའི་དོན་གྱི་སྒོ་ནས་ཏེ། དེ་ཡང་མཉམ་པའམ་ལྷག་པའི་ཡོན་ཏན་གཞན་ལ་ཡོད་པ་བསལ་ནས་བསྟན་པ་ནི་དཀོན་མཆོག་ཅེས་པ་སྟེ། དཀོན་པའི་མཆོག་ཡིན་པའི་ཚུལ་ནི་འཇིག་རྟེན་གསུམ་ན་སེམས་དང་ལྡན་པའི་སྐྱེ་བོ་རྣམས་ཀྱི་ནང་དུ་ནི། གཟུགས་དང་ལང་ཚོ་རིགས་དང་སྟོབས་འབྱོར་ཁྱད་པར་འཕགས་པ་ཅན། ཆགས་བྲལ་གྱི་བདེ་བ་ཐོབ་པ་ཚངས་པ་ཆེན་པོ་དང་། ས་སྟེང་གི་འཇིག་རྟེན་ཀུན་གྱི་མཆོད་འོས་བརྒྱ་བྱིན་དང་། གླིང་བཞི་ལ་དབང་བའི་འཁོར་ལོས་སྒྱུར་རྒྱལ་སོགས་དཀོན་པ་ལྟར་སྣང་ཡང་། དེ་དག་གི་གོ་འཕང་ཐོབ་པ་ནི། དཀོན་མཆོག་གསུམ་རྐྱེན་མཆོག་ཏུ་གནས་པའི་མཐུ་ཡིས། །དམ་ཆོས་དགེ་བའི་བསམ་སྦྱོར་ཅུང་ཟད་རེ་སྐྱེ་བ་ལས་བྱུང་བ་ཡིན་པས་ན། དེ་དག་དཀོན་པའི་མཆོག་མ་ཡིན་པར་དེ་དག་གི་རྒྱུ་དཀོན་མཆོག་གསུམ་དཀོན་པའི་མཆོག་ཡིན་པ་ནི། དཔེར་ནོར་བུ་ལས་བྱུང་བའི་ཟས་གོས་སོགས་མི་དཀོན་གྱི་ནོར་བུ་དཀོན་པར་འཇོག་པ་བཞིན་ནོ། །སེམས་མེད་བེམ་པོ་རྣམས་ཀྱི་ནང་ནས་ནོར་བུ་དཀོན་པར་བཞག་ཀྱང་དེ་མཆོག་མ་ཡིན་ཏེ། སྤྱིར་དཀོན་མཆོག་མ་ཡིན་ཏེ། སྤྱིར་དཀོན་མཆོག་གསུམ་གྱི་མཐུ་ལས་བྱུང་བའི་ཕྱིའི་དངོས་པོ་ཡིད་འོང་ཡིན་པ་དང་། ཁྱད་པར་དུ་ནོར་བུ་དེས་ཚེ་འདིའི་མཐུན་རྐྱེན་ཙམ་སྒྲུབ་ནུས་ཀྱི། མཐོ་རིས་དང་ཐར་པའི་རྒྱུ་འབྲས་ལ་འགོད་པ་ནི་དཀོན་མཆོག་གསུམ་ཁོ་ན་ལ་རག་ལས་པས་སོ། །ཡང་གཅིག་ཏུ་བྱས་ན། ལྷ་ལས་ལྷག་པ། །དལ་བརྒྱད་འབྱོར་བཅུ་ཚང་བའི་མི་ཡི་ལུས་རྟེན། དཔེ་དང་གྲངས་ལ་སོགས་པའི་སྒོ་ནས་ཡང་དང་ཡང་དུ་བཅོམ་ལྡན་འདས་ཀྱིས་རྙེད་དཀའ་ཞིང་དཀོན་པར་གསུངས་པ་དེས་ཀྱང་དཀོན་མཆོག་གསུམ་དཀོན་པའི་མཆོག་ཡིན་པར་འགྲུབ་སྟེ། དལ་འབྱོར་བཅོ་བརྒྱད་པོ་ནི། དཀོན་མཆོག་གསུམ་དང་དེ་ཉིད་སྣང་དུ་རུང་བའི་སྣོད་ཁོ་ནས་འཇོག་པའི་ཕྱིར་རོ། །དེ་ཡང་གཞན་འབྱོར་ལྔ་ལས། སྟོན་པ་བྱོན་པ་སངས་རྒྱས་དཀོན་མཆོག །ཆོས་གསུངས་པ་དང་བསྟན་པ་གནས་པ་ཆོས་དཀོན་མཆོག་གནས་ཕྱིར་བཞུགས་པ་དང་གཞན་གྱིས་སྙིང་བརྩེ་བ་དགེ་འདུན་དཀོན་མཆོག་སྟེ། དེ་སྣང་རུང་བའི་སྣོད་ཀྱི་དབང་གིས་རང་འབྱོར་ལྔ་འཇོག་པ་ཡིན་ཏེ། སངས་རྒྱས་དཀོན་མཆོག་ལ་དད་ཅིང་མོས་པར་བྱེད་པའི་སྣོད་ཡུལ་དབུས་སུ་སྐྱེས་པ། ཆོས་དཀོན་མཆོག་གི་སྣོད་བསྟན་ལ་དད་པ། དགེ་འདུན་དཀོན་མཆོག་དང་སྤྱོད་ཡུལ་གཅིག་པའི་སྐལ་བ་ལྡན་ཅིང་སྙིང་བརྩེས་རྗེས་སུ་འཛིན་པའི་སྣོད་ལས་མཐར་མ་ལོག་པ་དང་། དབང་པོ་ཚང་བ་དང་། མིར་གྱུར་པ་ཡིན་ལ། རང་འབྱོར་ལྔ་ལྡན་དེར་མི་ཁོམ་བརྒྱད་སྤང་བའི་དལ་བ་བརྒྱད་ལེགས་པར་གྲུབ་ཅིང་ཚང་སྟེ། མིར་བྱུང་བས་མི་མ་ཡིན་པའི་མི་ཁོམ་བཞི་སྤང་བ་དལ་བ་བཞི་ཚང་། དབུས་སུ་སྐྱེ་བས་མུན་བསྐལ་སྤང་བའི་དལ་བ་ཚང་། དེ་བཞིན་དུ། དབང་པོ་ཚང་བས་ལྐུགས་པ་སྤང་། ལས་མཐའ་མ་ལོག་པས་ཀླ་ཀློ་སྤང་། བསྟན་ལ་དད་པས་ལོག་ལྟ་ཅན་སྤང་བའི་དལ་བ་ཚང་ངོ་། །ཁྱད་ཆོས་གཉིས་པ་ནི། མཉམ་པའམ་ལྷག་པའི་གྲངས་སུ་ཆུད་པ་གཞན་ཡོད་པ་བསལ་བ་གསུམ་ལ་ཞེས་བྱ་བ་སྟེ། དེ་ཡང་། བླང་བྱའི་ཡོན་ཏན་གྱི་དངོས་པོ་མྱ་ངན་ལས་འདས་པ། དེ་སྒྲུབ་པའི་ཐབས་སམ་རྒྱུ་དང་བཅས་པ་སྟོན་པ་དང་། དོར་བྱ་སྐྱོན་གྱི་དངོས་པོ་འཁོར་བ། དེ་སྒྲུབ་པའི་ཐབས་དང་བཅས་པ་གཞན་ལ་མཐོང་བར་བྱེད་པའི་སྟོན་པ་ནི་དཀོན་མཆོག་དང་པོ་ལས་གཞན་སུ་ཡང་མེད་པ་དང་། ཉོན་མོངས་མ་ལུས་འཆོས་ཤིང་ངན་སོང་གསུམ་དང་སྲིད་པ་འཁོར་བའི་སྡུག་བསྔལ་ཀུན་ལས་སྐྱོབ་པའི་བསྟན་པ་ནི་དཀོན་མཆོག་གཉིས་པ་ལས་གཞན་གང་ཡང་མེད་པ་དང་། རང་ཉིད་ཀྱིས་བསླབ་པ་གསུམ་ལ་ཚུལ་བཞིན་དུ་སློབ་ཅིང་གཞན་རྣམས་ཀྱང་དེ་ལ་འདྲེན་པའི་སློབ་མ་ནི་དཀོན་མཆོག་གསུམ་པ་ལས་གཞན་སུ་ཡང་མེད་པས་རྣམ་པར་བཞག་པའི་ཚུལ་འདིས། མུ་སྟེགས་བྱེད་སོགས་ཀྱི་སྟོན་པ་སོགས་སྟོན་པ་ལ་སོགས་པའི་གྲངས་སུ་མི་ཆུད་པས་མཉམ་པ་གཞན་ན་མེད་པར་ཤེས་དགོས་ཤིང་། གྲངས་གསུམ་ལས་ལྷག་པ་བཞི་སོགས་ཀྱང་ལྟོས་མེད་དུ་གནས་པ་མེད་པས་བསྟེན་པའི་ཡུལ་གསུམ་ཁོ་ནའོ། །ཁྱད་ཆོས་གསུམ་པ་ནི། གུས་པའི་སྒོ་ནས་ཕྱག་འཚལ་བའི་ཡུལ་གཞན་ན་མཉམ་པ་ཙམ་ཡང་ཡོད་པ་བསལ་བ་ཕྱག་འཚལ་ལོ། ཞེས་བྱ་བ་སྟེ། དེ་ཡང་དཀོན་མཆོག་གསུམ་པོ་ནི། ཡོན་ཏན་གྱི་ཚོགས་ལྡན་པའི་ངོས་ནས་ཀྱང་ཕྱག་འཚལ་བའི་ཡུལ་མཆོག་ཡིན་ཏེ། ཡོན་ཏན་གྱི་ངོ་བོ་འཇིག་རྟེན་པ་དང་ཐུན་མོང་བ་དང་ཐུན་མོང་མ་ཡིན་པ་དེ་གཉིས་ཀ་ཕན་བདེའི་རང་བཞིན་ཅན། ཡོན་ཏན་དེའི་ཁྱད་པར་ཤེས་བྱ་རྟོགས་པ། སྤངས་བྱ་སྤང་བ། གནས་འགྱུར་བྱ་གྱུར་པ། ཐོབ་བྱ་ཐོབ་པ་དང་བཞི་པོའི་ཁྱད་པར་གྱི་ཁྱད་པར་རེ་རེའང་ཟབ་པ་དང་རྒྱ་ཆེ་བ་རྒྱ་མཚོ་ལྟ་བུར་གྱུར་པ་དང་ལྡན་པའི་རྩེ་མོར་་ཕྱིན་པས་སོ། །ཕྱག་འཚལ་བའི་འབྲས་བུའི་ངོས་ནས་ཀྱང་གཞན་ན་མཉམ་པ་ཙམ་ཡང་མེད་པས་ཕྱག་འཚལ་བའི་ཡུལ་མཆོག་ཡིན་ཏེ། དཀོན་མཆོག་གསུམ་ལ་མ་ལྔ་ས་ལ་ཕབ་པའི་ལུས་ཀྱི་ཕྱག་གཅིག་བཙལ་ན་ལུས་ཀྱིས་ཁེབས་པའི་རྡུལ་ཕྲན་གསེར་གྱི་ས་གཞིའི་བར་དུ་ཅི་ཙམ་ཡོད་པའི་གྲངས་དང་མཚུངས་པར་འཁོར་ལོས་སྒྱུར་རྒྱལ་ཐོབ་ནུས་པ་དང་། དེ་བཞིན་དུ། དཀོན་མཆོག་གསུམ་ཡོད་པར་ཡིད་ཆེས་པའམ། ཡོན་ཏན་མཐོང་བས་སེམས་དྭངས་པའམ། ཕན་བདེ་བྱེད་པའི་ནུས་སྟོབས་མཐོང་ནས་འདོད་པ་སྐྱེ་བའི་དད་པ་གསུམ་རྒྱུད་ལ་འཁྲུངས་པ་སྐད་ཅིག་མ་ཡིད་ཀྱིས་ཕྱག་འཚལ་བ་དང་། བསྟོད་པའི་སྒྲ་འབྱིན་པ་ངག་གི་ཕྱག་འཚལ་བ་བྱས་ནས། དེ་དག་གི་འབྲས་བུ་བསམ་མི་ཁྱབ་པ་ནམ་ཡང་མེད་པར་མི་འགྱུར་བ་དང་། དེའང་ཡིད་འོང་ཁོ་ན་འབྱུང་བ་དང་། དེ་གཞན་ལས་མཆོག་ཏུ་གྱུར་པར་འབྱུང་བ་དང་། དེའང་མྱུར་དུ་འབྱུང་བ་དང་། མཐའ་ཡང་ཤིན་ཏུ་བཟང་བ་སངས་རྒྱས་ཁོ་ན་ཐོབ་པར་གསུང་བ་ལྟར་འབྱུང་བ་ཡིན་ལ། དེར་མ་ཟད་དཀོན་མཆོག་གསུམ་ལ་རང་བཞིན་གྱིས་དགའ་བའི་སེམས་སམ། ཐེ་ཚོམ་གྱི་སེམས་སམ། གཞན་ལ་ངོ་བསྟོད་བྱེད་པའི་སེམས་ཙམ་གྱིས་ཕྱག་འཚལ་ཀྱང་ལྷ་ཡི་བདེ་སྐྱིད་ཕུན་སུམ་ཚོགས་པ་ཐོབ་པར་འགྱུར་བས་སོ། །ཅིའི་ཕྱིར་མཆོད་པར་བརྗོད་ན། དགོས་པ་གསུམ་སྟེ། རང་གིས་ཐོབ་པའི་དགོས་པ། རང་ཉིད་དམ་པའི་ཁོངས་སུ་གཏོགས་པར་འགྱུར་བའོ། །གཞན་གྱིས་ཐོབ་པའི་དགོས་པ། གཞན་སུ་ཡང་རུང་བས་མཆོད་བརྗོད་དེ་མཐོང་ཚེ། སྟོན་པ་སངས་རྒྱས་སོགས་ལ་དད་པ་གསུམ་སྐྱེ་ཞིང་། དེ་སྔོན་དུ་སོང་བའི་བསྟན་བཅོས་ཡང་མཆོག་ཏུ་རིགས་ནས་དོན་དུ་གཉེར་བའི་འདུན་པ་སྐྱེ་བར་འགྱུར་རོ། །གཉིས་ཀས་ཐོབ་པར་འགྱུར་བའི་དགོས་པ། བསོད་ནམས་དགེ་བ་ཚད་མེད་པ་མཐོང་ཆོས་སོགས་ལ་མྱོང་བར་འགྱུར་བ་རང་རྒྱུད་ལ་འབྱུང་ཞིང་། བསྟན་བཅོས་མཐོང་ཞིང་ཐོས་པ་གཞན་ལའང་འབྱུང་ལ། རང་གི་རྩོམ་པ་ལ་བར་ཆད་མི་འབྱུང་བ་དང་། འཆད་ཉན་སྒོམ་སྒྲུབ་ཀྱང་མཐར་ཕྱིན་པར་འགྱུར་རོ། །རྩོམ་པར་དམ་བཅའ་བ་ནི། འཆད་ཐབས་ཀྱི་མན་ངག་སྤྱིའི་ཆིངས་ཆེན་པོ་ལྔས་བཤད་པར་བྱ་བ་ལ་ལྔ་ལས། དང་པོ་ཉན་པ་པོ་གུས་པ་བསྐྱེད་པའི་ཕྱིར་དགོས་དོན་ལའང་། སྤྱིར་ངག་ཙམ་ལ་ཡོད་པའི་དགོས་སོགས་ཆོས་བཞི་དཔེར་དགོད་པ། དགོས་འབྲེལ་ངག་ལ་ཡོད་པའི་དགོས་སོགས་ཆོས་བཞིས་བསྟན་བཅོས་ལ་འཇུག་པའི་རྒྱུ་བརྗོད་པ། བསྟན་བཅོས་ཀྱི་ལས་ལ་ཡོད་པའི་དགོས་སོགས་ཆོས་བཞིས་དོན་གཏན་ལ་དབབ་པ་གསུམ་ཡོད་པ་ལས། དང་པོ་ནི་འཇིག་རྟེན་ཕལ་པའི་དོན་ལྡན་གྱི་ཚིག་ཐམས་ཅད་ལ་ཚང་སྟེ། བུམ་པ་ཁྱེར་ལ་ཆུ་ལོངས་ཤིག་ཅེས་པའི་ཡང་། ཆུ་བརྗོད་བྱ། ཆུ་དེ་ཁྱིམ་དུ་ཐོབ་པ་དགོས་པ། ཆུ་དེས་སྐོམ་པ་བསལ་བ་སོགས་ཀྱི་དོན་གྲུབ་པ་ཉིང་དགོས། སྔ་མ་སྔ་མ་མེད་ན་ཕྱི་མ་ཕྱི་མ་མི་འབྱུང་བའི་འབྲེལ་བ་གྲུབ་པ་འབྲེལ་བའོ། །གཉིས་པ་ནི་བསྟན་བཅོས་ཀྱི་ཐོག་མར་དགོས་འབྲེལ་གྱི་ངག་བཀོད་པ་ལ་ཚང་སྟེ། བསྟན་བཅོས་ལུས་ཀྱི་དགོས་སོགས་ཆོས་བཞི་བརྗོད་བྱ། རྟོག་དཔྱོད་དང་ལྡན་པའི་གང་ཟག་གཞན་གྱི་དོགས་པ་བསལ་ནས་བསྟན་བཅོས་ལ་ཆོས་བཞི་ཡོད་པར་རྟོགས་པ་དགོས་པ། དེའི་དབང་གིས་དེ་ལ་ཞུགས་པ་ཉིང་དགོས། མེད་ན་མི་འབྱུང་གི་འབྲེལ་བ་རིམ་པར་གྲུབ་པ་འབྲེལ་བའོ། །གསུམ་པ་ནི། བསྟན་བཅོས་འདི་ཉིད་ཀྱིའང་ལུས་ལ་ཡོད་པ་སྟེ། འདིའི་བརྗོད་བྱ་ནི། བདེ་བར་གཤེགས་པའི་བཀའ་མཐའ་དག་ལས་སྐྱབས་འགྲོའི་དངོས་པོ་བསྟན་པ་རྣམས་སོ། །དགོས་པ་ནི། བསྟན་བཅོས་འདི་ལ་ཐོས་བསམ་སྒོམ་གསུམ་བྱེད་པ་རྣམས་ཀྱིས་སྐྱབས་འགྲོའི་དངོས་པོ་མཐའ་དག་ཁོང་དུ་ཆུད་པའོ། །ཉིང་དགོས་ནི། དེ་ཆུད་པས་རྣམ་པ་ཐམས་ཅད་མཁྱེན་པ་མངོན་དུ་བྱས་པའོ། །འབྲེལ་པ་ནི། བརྗོད་བྱ་དེ་ཐབས་ཀྱིས་བསྒྲུབ་བྱར་གནས་ལ། རྗོད་བྱེད་བསྟན་བཅོས་ནི་ཐབས་སུ་འགྱུར་བས་དེ་གཉིས་ཐབས་དང་ཐབས་ཀྱིས་བསྒྲུབ་པར་བྱ་བའི་ཚུལ་དང་འབྲེལ། རྗོད་བྱེད་དང་དགོས་པ་ཐབས་ལས་ཐབས་བྱུང་གི་ཚུལ་དུ་འབྲེལ། དགོས་པ་དང་ཉིང་དགོས་དེ་ལས་དེ་བྱུང་གི་ཚུལ་དུ་འབྲེལ་པ་གྲུབ་བོ། །དེ་ལྟར་བསྟན་བཅོས་ཀྱི་དབུ་རུ་དགོས་འབྲེལ་གྱི་ངག་བཀོད་པའི་དགོས་པ་ཅི་ཡིན་ཅེ་ན། འདི་ལ་མཁས་པའི་འདོད་ཚུལ་བཞི་ཡོངས་སུ་གྲགས་པ། ཆོས་བཞི་ཡོད་པའི་ངེས་ཤེས་སྐྱེ་བ་དང་། ཡོད་པར་བསྟན་པས་གཞུང་མཛེས་པ་བསྐྱེད་པ་དང་། གཞན་གྱི་སྦྱོར་བ་ངན་པ་བཟློག་པ་དང་། དབང་རྟུལ་ལ་ངེས་ཤེས་དབང་རྣོན་ལ་དོན་འགྱུར་གྱི་ཐེ་ཚོམ་སྐྱེད་པར་འདོད་པ་ལས། བཞི་པ་སློབ་དཔོན་སེང་གེ་བཟང་པོ་སོགས་ཀྱི་བཞེད་པ་རྩོད་མེད་དང་། སྔ་མ་གཉིས་རྩོད་བཅས་སུ་འཇོག་ཅིང་། གསུམ་པ་འདི་མཁན་པོ་དཔལ་ལྡན་ཞི་པ་འཚོའི་བཞེད་པ་ཡིན་ཀྱང་། འདི་ལའང་བོད་ཀྱི་འདུལ་འཛིན་མཚོ་སྣ་པ་ཤེས་རབ་བཟང་པོ་སོགས་ཀྱིས་རྩོད་མོད། དཔལ་ལྡན་ཇོ་བོ་ཆེན་པོས། ཨ་ལེ་ངེད་རྒྱ་གར་བས་མ་ཤེས་པ་ཁྱེད་བོད་རྣམས་ཀྱི་ཤེས་གསུངས་པ་བཞིན། འཕགས་ཡུལ་གྱི་མཁས་པ་བོད་ཀྱི་རིག་པ་མི་འགྲོ་ཞིང་། དེ་ལས་འགྲན་གྱི་དོ་མེད་མཁན་པོའི་བཞེད་པ་དགག་མི་རིགས་ཏེ་ཉིད་ཀྱི་སློབ་མ་སློབ་དཔོན་ཀ་མ་ཤཱི་ལ་ལྟ་བུའི་མདུན་སྨྲ་ན་ཧ་ཤང་ལ་མཛད་པ་བཞིན་མགོ་ལ་ཐོག་བརྒྱབ་པ་འདྲ་བའི་རིག་པ་གནང་བར་གདོན་མི་ཟའོ། །དེ་ཡང་མཁན་པོ་རང་གི་བཞེད་པ་ནི། གཞན་དག་འདི་སྐད་དུ་བསྟན་བཅོས་འདི་བརྩམས་བྱ་མ་ཡིན་ཏེ་དགོས་སོགས་ཆོས་བཞི་མེད་པའི་ཕྱིར་ཅེས་གཞན་གྱི་སྦྱོར་བ་བཀོད་ཅིང་། དེ་བཟློག་ཚུལ་རྟགས་མ་གྲུབ་པར་སྟོན་པ་དགོས་འབྲེལ་བཀོད་པས་བསྟན་བཅོས་ལ་ཆོས་བཞི་ཡོད་པ་གྲུབ། དེའི་ཕྱིར་བསྟན་བཅོས་བརྩམས་བྱ་ཡིན་པར་འགྲུབ་པར་དེས་དབང་རྟུལ་ལ་ཡིད་དཔྱོད་ཀྱི་ངེས་ཤེས་དང་། དབང་རྣོན་ལ་དོན་འགྱུར་གྱི་ཐེ་ཚོམ་སྐྱེད་ནུས་པས་ཤིན་ཏུ་འཐད་དོ། །རྩོད་སྨྲས། མཁན་པོ་རང་གི་དོགས་པ་བཀོད་པ་ཙམ་ལས། དེ་འདྲའི་སྦྱོར་ལ་འགོད་མཁན་གཞི་མ་གྲུབ་ཅིང་། དགོས་འབྲེལ་འདི་བརྩམས་བྱ་མ་ཡིན་ཏེ། དེ་ལའང་ཆོས་བཞི་མེད་པའི་ཕྱིིར་ཅེས་པའང་དགག་དགོས་པ་མགོ་མཚུངས་པས་ཐུག་མེད་ཀྱི་སྐྱོན་བྱུང་ཞེས་སྨྲ་ནའང་མི་འཐད། དེ་སློབ་དཔོན་གྱི་སྦྱོར་བ་མེད་བཞིན་ཡོད་ཅེས་མི་གསུངས་ཤིང་། རྒྱ་གཞུང་ཀུན་ཁྱེད་ཀྱིས་མཐོང་མ་ནུས་པས་གཞན་གྲུབ་ཀྱང་མི་ཤེས་སོ། །དེར་མ་ཟད་བྱ་རོག་སོ་རྟོག་སོགས་དགོས་འབྲེལ་མེད་ལ་འགོགས་པའི་ཚེ་སྦྱོར་བའང་འཕེན་དགོས་པས་སྦྱོར་བ་འགོད་པ་གཞི་མ་གྲུབ། ཅེས་སུ་སྨྲ་ནུས། ཁྱོད་ཀྱི་འདོད་པ་དེ་ལའང་ཐུག་མེད་ཀྱི་སྐྱོན་ཡོད་པར་སྒྲུབ་ནུས་སོ། དེའང་ཁྱེད་ཀྱི་དགོས་འབྲེལ་ངག་གི་དགོས་པ་བཀོད་པ་ཆོས་ཅན། བཀོད་ཚུལ་ཐུག་མེད་དུ་ཐལ། དེ་འདྲ་འགོད་ནུས་ཁྱེད་ལྟ་བུ་གྲངས་མེད་ཡོད་པས་སོ། །ཁྱེད་མཐོང་རྒྱ་ཆུང་ཞིང་མངོན་རློམ་ཆེ་བར་ཐལ། སློབ་དཔོན་དུལ་བའི་ལྷ་སོགས་ཀྱིས་ཀྱང་དེ་ལྟར་འདོད་པ་ལ་མཁན་ཆེན་ཁོ་ནའི་བཞེད་པར་བྱས་པའི་ཕྱིར་རོ། །གཉིས་པ་དགོས་པ་འགྲུབ་བྱེད་བསྡུས་དོན་ནི། སྐྱབས་འགྲོའི་རང་བཞིན་ལེགས་པར་ཤེས་པའི་ཤེས་རབ་དང་། ཤེས་ནས་རང་རྒྱུད་ལ་ལེན་པའི་བརྩོན་འགྲུས་གཉིས་ཀྱིས་བསྡུས་ཏེ། རིམ་པ་བཞིན་དེ་གཉིས་ཀྱིས་ཡན་ལག་སྔ་མ་ལྔ་དང་ཕྱི་མ་བསྡུས་པའི་ཕྱིར་ཏེ། ལྔ་སོ་སོར་ཤེས་པས་སྐྱབས་འགྲོའི་རང་བཞིན་ལེགས་པར་ཤེས་ཤིང་དེ་ཤིན་ཏུ་གནས་ལ། ཕྱི་མ་གཅིག་ནི་བརྩོན་འགྲུས་སུ་གནས་པས་སོ། །གསུམ་པ་བསྡུས་དོན་རྟོགས་བྱེད་ཚིག་དོན་ལ། སྐྱབས་འགྲོ་ཞེས་པའི་ངོ་བོ་འདོད་པའི་དད་པ་དང་མོས་པ་གཉིས་སུ་འཇོག་པའི་ཚུལ་ནི། མདོ་རྒྱན་ལས། དཀོན་མཆོག་གསུམ་པོ་དེ་ཡི་དངོས་པོ་དོན་དུ་གཉེར་བའི་འདོད་པས་ཁས་ལེན་པ་རུ་གསུངས་ཤིང་ཟླ་བ་སྒྲོན་མའི་མདོ་ལས། སེམས་བསྐྱེད་སྐྱེ་བའི་རྟེན་སྐྱབས་འགྲོ་དོན་གྱིས་བསྟན་པར་གཞན་རྒྱུད་བྱོན་ཟིན་པའི་དཀོན་མཆོག་གསུམ་ལ་དད་པ་རྒྱུའི་སྐྱབས་འགྲོས་བསྡུས་པ་དང་། རང་རྒྱུད་དུ་བསྒྲུབ་བྱ་བླ་མེད་བྱང་ཆུབ་ལ་དད་པ་འབྲས་བུའི་སྐྱབས་འགྲོས་བསྡུས་པ་དངོས་སུ་ལེགས་པར་བསྟན་པས་འདོད་པའི་དད་པ་ཡིན་པར་གྲུབ་ལ་སྐྱབས་འགྲོ་བདུན་ཅུ་པ་ལས། སངས་རྒྱས་སྐུ་གསུམ། ཆོས་འགོག་བདེན། དགེ་འདུན་ཐེག་དམན་གྱི་ཡ་བརྒྱད་ཐེག་ཆེན་བྱང་སེམས་རབ་བྱུང་རྣམས་ལ་མོས་པས་སྐྱབས་སུ་འགྲོ་བར་གསུངས་ཤིང་། མོས་པའི་ངོ་བོ་ནི། ཡུལ་ཡོན་ཏན་ཅན་དུ་ངེས་པ་མཐོང་ཤིང་ངེས་ཤེས་སྐྱེས་པ་ཡིན་ལ། བྱེད་ལས་གཞན་སུས་ཀྱང་འཕྲོག་མི་ནུས་པ་ཡིན་ནོ། །སྐྱབས་འགྲོའི་ངེས་ཚིགས་ས་ར་ཎ་སྐྱབས་སམ་རྟེན་ལ་འཇུག་ཅིང་སྐྱབས་ཀྱི་དོན་ནི། ཡུལ་གང་ལ་བརྟེན་པ་ཙམ་གྱིས་སྡུག་བསྔལ་ཐམས་ཅད་ལས་དུས་གཏན་དུ་ངེས་པར་ཐར་བར་བྱེད་ནུས་པ་ལ། མཛོད་འགྲེལ་ལས་གསུང་འདུག་གོ །ཎ་ལ་རྣམ་དབྱེ་གཉིས་པ་ལས་སུ་བྱ་བའི་དོན་ཨཾ་བྱིན་པ་ཎ་ཎི་ཞེས་པར་འགྱུར་བས། ཡུལ་ལ་བརྟེན་ཅིང་འགྲོ་བའི་བྱ་བ་བྱེད་པ་བསྟན་པ་ཡིན་ནོ། །མཚན་ཉིད་ཀྱང་། སྤྱིའི་མཚན་ཉིད་ཀྱིས་ནི་སྐྱེས་བུ་ཆུང་ངུའི་སྐྱབས་འགྲོ་སོགས་ཐམས་ཅད་བསྡུས་ལ། བྱེ་བྲག་གི་མཚན་ཉིད་ཀྱིས་ནི་ཐེག་ཆེན་སྐྱབས་འགྲོ་ཁོ་ན་བསྡུས་པ་ཡིན་ལ། མཚན་ཉིད་གཉིས་ནི་ཟླ་བའི་ཕྲེང་མཛེས་སུ་བཀོད་ཟིན་ཏོ། །དེ་ཡང་མཛོད་འགྲེལ་ལས། སྐྱབས་འགྲོ་རྣམས་ཀྱི་རང་བཞིན་ཅི་ཞེ་ན། ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ནོ། །ཞེས་གསུངས་འདུག་པས། རྣ་བས་དངོས་སུ་ཐོས་ནུས་པའི་རིག་བྱེད་ཅན། སྐྱབས་འགྲོའི་ཚིག་ངག་ནས་བརྗོད་པའི་ངོ་བོ་ཡང་གཙོ་ཆེ་བར་སྐྱབས་འགྲོའི་མཚན་ཉིད་དུ་འགྱུར་རོ། །དབྱེ་བ་ལ། བརྡར་བཏགས་པ་ཀུན་རྫོབ་སྐྱབས་འགྲོ་དང་། ཆོས་ཉིད་ཀྱིས་ཐོབ་པ་དོན་དམ་སྐྱབས་འགྲོ་གཉིས་ལས། ཀུན་རྫོབ་སྐྱབས་འགྲོ་ལ། རང་གི་ཐོབ་བྱ་བླ་ན་མེད་པའི་བྱང་ཆུབ་འདོད་པ་འབྲས་བུའི་སྐྱབས་འགྲོ་དང་། གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་སྟོན་པ་ལམ་གྲོགས་སུ་ཁས་ལེན་པས་རང་འབྲས་ཐོབ་པའི་རྒྱུ་བྱེད་པས་རྒྱུའི་སྐྱབས་འགྲོ་སྟེ་དབྱེ་བ་གཉིས་སོ། །ཡན་ལག་དྲུག་པ་བཤད་ཅེས་པའི་ཡན་ལག་ནི་ཡན་ལག་ཅན་དང་ཐ་དད་དུ་ཡོད་པ་ལ་འཇོག་པ་མ་ཡིན་གྱི། ཚོགས་པ་ཁྱད་པར་བར་གྲུབ་པ་ལ་སྐྱབས་འགྲོ་དང་། ཚོགས་པ་དེར་མེད་དུ་མི་རུང་བའི་ཆོས་ལ་དེ་ཡི་ཡན་ལག་ཏུ་འཇོག་པ་ནི་དཔེར་ན་ཤིང་རྟ་དང་། དེའི་ཡན་ལག་ལྟ་བུ་སྟེ། འདི་ནི་འདུས་པའི་ཡན་ལག་གི་ཡན་ལག་ཡིན་ནོ། །སྐྱབས་འགྲོ་ལ་ཐོག་མཐའ་བར་གསུམ་དུ་དགོས་པའི་ཡན་ལག་ཐམས་ཅད་དྲུག་པོ་འདིར་འདུས་པས་ཡན་ལག་དྲུག་སྟེ་རྒྱུ་ལ་སོགས་པའི་སྒོ་ནས་བཤད་པར་བྱའོ། །ཞེས་སློབ་དཔོན་རང་གི་རྩོམ་པ་མཐར་ཕྱིན་པའི་ཕྱིར་དམ་བཅའ་བའོ། །བཞི་པ་གོ་རིམ་དང་མི་འགལ་བ་མཚམས་སྦྱོར་ལ། སྤྱིར་གོ་རིམ་བཞི་སྟེ། བདེན་བཞིའི་རིམ་པ་ལྟ་བུ་མངོན་པར་རྟོགས་པའི་གོ་རིམ། བདེན་གཉིས་ལྟ་བུ་རྒྱུ་འབྲས་གོ་རིམ། བསམ་གཏན་བཞི་ལྟ་བུ་སྐྱེ་བའི་གོ་རིམ། ཡང་དག་སྤོང་བཞི་ལྟ་བུ་རྣམ་པར་བརྟགས་པའི་གོ་རིམ་མངོན་མཛོད་ལས་གསུངས་ཤིང་། སྐབས་འདིའི་ཡན་ལག་རྣམས་ཀྱི་རིམ་པ་ནི་རྣམ་པར་བརྟགས་པའི་གོ་རིམ་དུ་གནས་ཏེ། སྐྱབས་སུ་འགྲོ་བྱེད་ཡིན་པས་རྒྱུ་ཐོག་མར་བརྟགས་པའི་འཕྲོར་སྐྱབས་འགྲོའི་དམིགས་ཡུལ་བརྟགས་རྗེས་སུ། འགྲོ་བ་པོའི་གང་ཟག་གི་དུས་མཚམས་བརྟགས་པ་དེ་མ་ཐག་གང་ཟག་དེས་ཐོབ་བྱ་ཕན་ཡོན་བརྟགས་པའི་མཇུག་ཏུ། ཕན་ཡོན་གེགས་མེད་འགྲུབ་བྱེད་བསླབ་བྱ་བརྟགས་པའི་ཕྱིས་སུ། བསླབ་པ་ལྡན་བྱེད་བླང་བ་བརྟགས་པ་ལེགས་པར་གྲུབ་པས་སོ། །ལྔ་པ་རིགས་པ་དང་སྔ་ཕྱི་མི་འགལ་བར་གཏན་ལ་ཕབ་པ་བརྒལ་ལན་དང་བཅས་པ་ནི། སྤྱིར་ཟློས་པའི་དོགས་པ་དང་། མ་ཚང་བའི་དོགས་པ་དང་། འགལ་བའི་དོགས་པ་བསལ་བའི་ཕྱིར་བརྒལ་ལན་བསྟན་པ་ལས་ཅུང་ཟད་དཔེར་བརྗོད་ན། རྒྱུའི་སྐབས་སུ་ཡོན་ཏན་དྲན་པ་དང་འབྲས་བུ་ཕན་ཡོན་ཟློས་པར་འགྱུར་ཏེ། གཉིས་ཀ་སྤྱིར་ཡོན་ཏན་ཡིན་པར་གཅིག་པའི་ཕྱིར་ཞེས་བརྒལ་བ་བྱེད་ན། ལན་ནི་གཅིག་ཀྱང་ཟློས་པའི་ཉེས་པ་མེད་དེ། རྒྱུའི་སྐབས་གཞན་རྒྱུད་བྱོན་ཟིན་དཀོན་མཆོག་གི་ཡོན་ཏན་ཡིན་ཅིང་། ཕན་ཡོན་སྐབས་རང་རྒྱུད་ལ་ཐོབ་བྱའི་ཡོན་ཏན་རྣམས་བསྟན་པ་ཡིན་པས་སོ། །ཡང་ཡུལ་ཟློས་པར་འགྱུར་ཏེ། རྒྱུའི་སྐབས་ཡོན་ཏན་དྲན་པས་ཡུལ་གོ་ནུས་བཞིན་དུ་ཡུལ་ཡན་ལག་གཅིག་ཏུ་བཞག་པའི་ཕྱིར་ཞེས་བརྒལ་ན། ལན་ནི་བཞག་ཀྱང་མི་ཟློས་ཏེ། རྒྱུའི་སྐབས་ཡོན་ཏན་ཁོ་ན་གཙོ་བོར་བྱས་ནས་ཡུལ་ལ་དམིགས་པ་ཡིན་ལ། ཡུལ་གྱི་སྐབས་མཚན་ཉིད་དང་དབྱེ་བ་ལ་སོགས་པས་ཡུལ་གྱི་དངོས་པོ་གཏན་ལ་ཕབ་དགོས་པས་སོ། །ཡང་ཡོན་ཏན་དྲན་པ་ཟློས་པར་འགྱུར་ཏེ། རྒྱུ་དང་བསླབ་བྱ་གཉིས་ཀྱི་སྐབས་ཡོན་ཏན་དྲན་པ་འབྱུང་བའི་ཕྱིར་ཞེས་བརྒལ་ན། ལན་ནི་ཟློས་སྐྱོན་མེད་ད ེ་རྒྱུའི་སྐབས་སྐྱབས་སུ་མ་སོང་བ་འགྲོ་བྱེད་དུ་ཡོན་ཏན་དྲན་པ་དང་། ཐུན་མོང་གི་བསླབ་བྱའི་སྐབས་སྐྱབས་སུ་སོང་ཟིན་པ་བརྟན་པར་བྱེད་པའི་ཆེད་དུ་ཡོན་ཏན་དྲན་དགོས་པར་བསྟན་པས་སོ། །དེ་ཡན་གྱིས་ཐོག་མར་དགེ་བ་ཀླད་ཀྱི་དོན་བཤད་པ་གྲུབ་བོ། །གཉིས་པ་བར་དུ་དགེ་བ་གཞུང་གི་དོན་བཤད་པ་ལ། རྩ་བའི་སྡོམ་བསྟན་པ་དང་། སྡོམ་གྱི་དོན་རྒྱས་པར་བཤད་པ་གཉིས་ལས། དང་པོ་ནི། རྒྱུ་ཅི་ལྟ་བུ་ཡིས་སྐྱབས་སུ་འགྲོ་དགོས་པའི་ཚུལ་བསྟན་པ་དང་། གང་ལ་སྐྱབས་སུ་འགྲོ་བའི་ཡུལ་བསྟན་པ་དང་། ཅི་ཙམ་ཞིག་ཏུ་སྐྱབས་སུ་འགྲོ་བའི་དུས་བསྟན་པ་དང་། སྐྱབས་སུ་སོང་བ་ལས་བྱུང་བའི་འབྲས་བུ་ཕན་ཡོན་བསྟན་པ་དང་། ཕན་ཡོན་དེ་ལེགས་པར་འགྲུབ་ཅིང་སྐྱབས་འགྲོ་རྒྱུད་ལ་བརྟན་པར་གནས་བྱེད་བསླབ་བྱ་བསྟན་པ་དང་། རྒྱུད་བསླབ་སྡོམ་དང་ལྡན་པར་སྒྲུབ་བྱེད་སྐྱབས་འགྲོ་བླང་བའི་ཆོ་ག་བསྟན་པ་དང་དྲུག་པོ་ལ་ཡན་ལག་དྲུག་ཅེས་བྱའོ། །དེ་ལྟ་བུ་ཐོག་མར་བཀོད་པ་རྣམས་ཀྱིས་ནི་གཞུང་རྩ་བ་ཚིགས་སུ་བཅད་པའི་དོན་གྱི་ཚོགས་བསྡམས་བྱར་གྱུར་པ་དག །ཕན་ཚུན་མ་འདྲེས་པ་སོ་སོར་སྡོམ་བྱེད་དུ་ལེགས་པར་བསྟན་པ་ཡིན་ཅེས་གསུངས་པའོ། །དེ་ལ་གཞུང་ཉིད་རྩ་བར་ཇི་ལྟར་འཇོག་ཞེ་ན། རྩ་བ་ཞེས་པ་གཉིས་ལ་འཇུག་སྟེ། བརྟན་ཅིང་མི་འགྱུར་བ་དང་། འོག་ཏུ་དམའ་བར་གནས་པ་གཉིས་སུ་མཛོད་ལས་བཤད་ཅིང་། འདིར་ནི་བརྟན་པ་ཉིད་ངེས་པར་བཟུང་བར་བྱ་སྟེ། གཞུང་གི་ཚིག་རྣམས་སུས་ཀྱང་གཞན་དུ་བསྒྱུར་མི་ནུས་པ་དང་། རྒྱ་ཆེར་ཇི་ལྟར་བཤད་པ་ཐམས་ཅད་མདོར་སྡུད་བྱེད་དུ་འདི་བརྟན་ཅིང་མི་འགྱུར་བར་རྟག་ཏུ་གནས་པས་སོ། །གཉིས་པ་སྡོམ་གྱི་དོན་རྒྱས་པར་བཤད་པ་ལ་ཡན་ལག་དྲུག་ཡོད་པ་ལས། ཡན་ལག་དང་པོ་རྒྱུ་ཅིས་སྐྱབས་སུ་འགྲོ་དགོས་ཚུལ་བསྟན་པ་ལ། སྤྱིར་རྒྱུ་དང་རྐྱེན་དོན་གཅིག་པར་ཤེས་དགོས་ལ། རྒྱུ་ལ་དབྱེ་ན་དྲུག་ཡོད་དེ། རང་གི་ངོ་བོའི་རྒྱུ་ལས་གཞན་པ། ཕན་འདོགས་ནུས་པ་དང་གེགས་མི་བྱེད་ཆེད་ཐམས་ཅད་བྱེད་རྒྱུ། རང་དང་ལྷན་ཅིག་ཕན་ཚུན་རྒྱུ་འབྲས་སུ་འབྱུང་བ་ལྷན་ཅིག་འབྱུང་བའི་རྒྱུ། སྔ་ཕྱི་འདྲ་བའི་ངོ་བོར་སྐྱེད་པ་སྐལ་མཉམ་གྱི་རྒྱུ། སེམས་སེམས་བྱུང་རྟེན་མཚུངས་གཙོ་བོར་གྱུར་བའི་མཚུངས་པ་ལྔ་ལྡན་པའི་མཚུངས་ལྡན་རྒྱུ། ཉོན་མོངས་ཕྱི་མའི་ཉེར་ལེན་ཀུན་འགྲོའི་རྒྱུ། མི་དགེ་བ་དང་དགེ་བ་ཟག་བཅས་ཐམས་ཅད་རྣམ་སྨིན་གྱི་རྒྱུ་ཡིན་ལ། དེ་རྣམས་གཉིས་སུ་གནས་ཏེ། སྐལ་མཉམ་ཀུན་འགྲོ་རྣམ་སྨིན་གསུམ་ཉེར་ལེན་གྱི་རྒྱུ། ལྷན་འབྱུང་བྱེད་རྒྱུ་མཚུངས་ལྡན་གསུམ་ལྷན་ཅིག་བྱེད་པའི་རྒྱུ་ཡིན་ནོ། །རྐྱེན་ལ་བཞི་སྟེ། རྒྱུ་ལྔ་ནི་རྒྱུའི་རྐྱེན། བྱེད་རྒྱུ་ནི་བདག་པོའི་རྐྱེན། ཤེས་པའི་དམིགས་ཡུལ་དེ་དམིགས་རྐྱེན། ཤེས་པ་འགགས་མ་ཐག་པ་མཚུངས་པ་དེ་མ་ཐག་རྐྱེན་ཡིན་ལ། དེའང་གཉིས་སུ་གནས་ཏེ། སྔར་བཞིན་རྒྱུའི་ནང་ནས་གསུམ་དང་དེ་མ་ཐག་རྐྱེན་ནི་ཉེར་ལེན་ཡིན་ཅིང་། གཞན་ཐམས་ཅད་ལྷན་ཅིག་བྱེད་རྐྱེན་ཡིན་ནོ། །དེ་དག་ཀྱང་རང་འབྲས་དང་ཉེ་ཞིང་འདྲ་བ་ལེན་བྱེད་ཉེར་ལེན་གྱི་རྒྱུ། ཉེར་ལེན་དང་ལྷན་གཅིག་ཏུ་ཚོགས་ནས་འབྲས་བུ་སྐྱེད་པ་ལ་ཕན་འདོགས་བྱེད་ཐམས་ཅད་ལྷན་ཅིག་བྱེད་པའི་རྒྱུ་ཡིན་ནོ། །སྤྲོས་པས་ཆོག་གོ་སྐབས་དོན་ཉིད་ལ་འཇུག་པར་བྱ་སྟེ། དེ་ཡང་སྐབས་སུ་འགྲོ་བའི་ཉེར་ལེན་ལའང་གཉིས་སུ་ཡོད་པ་ལས། བརྒྱུད་པའི་ཉེར་ལེན་ནི། སེམས་ཅན་ཐམས་ཅད་ཀྱི་རྒྱུད་ལ། ཉོན་མོངས་པའི་དྲི་མ་དང་ལྡན་བཞིན་དུ་ངོ་བོ་ཡེ་དག་གི་དེ་བཞིན་ཉིད་དཀོན་མཆོག་གསུམ་གྱི་རིགས་ཞེས་བྱ་བ་རྟོགས་བྱའི་ཚུལ་དུ་གནས་པ་ལས་རང་རྒྱུད་ལའང་འབྲས་བུའི་དཀོན་མཆོག་གསུམ་འབྱུང་བ་ཡིན་ནོ། །རིགས་སམ་ཁམས་དེ་སད་པར་བྱེད་པའི་རྐྱེན་ནི་གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་ཡིན་ཅིང་དེའང་རིགས་དེ་མངོན་གྱུར་རྟོགས་པ། གློ་བུར་འཕྲལ་དག་གི་སངས་རྒྱས་བྱང་ཆུབ། ཡོན་ཏན་གྱི་ཆོས་ཕུན་སུམ་ཚོགས་པའི་ཡན་ལག་ཅན་གཞན་ལ་རིགས་རྟོགས་པར་བྱེད་པའི་ལྷུན་གྲུབ་རྣམ་པར་མི་རྟོག་པ་རྒྱལ་བའི་མཛད་པ་དང་ལྡན་པ་སངས་རྒྱས་དཀོན་མཆོག་དང་། དེ་ལས་བྱུང་བ་ཆོས་དང་དགེ་འདུན་དཀོན་མཆོག་རྣམས་ཡིན་ཀྱང་དེའི་རྣམ་བཞག་འོག་ནས་བཤད་བྱ་ཡིན་ནོ། །དངོས་ཀྱི་ཉེར་ལེན་ནི། ལམ་མ་ཞུགས་པ་ཐ་མལ་གྱི་སེམས་ཅན་ལ་དད་མོས་སྤྱི་ཁྱབ་པ་ཞིག་རིགས་ཡོད་པའི་རྟགས་སུ་ངང་གིས་འབྱུང་བ་དེ་ཡིན་ནོ། །སྐྱབས་འགྲོའི་ལྷན་ཅིག་བྱེད་རྒྱུ་ལའང་གཉིས་སུ་གནས་པ་ལས། ཐུན་མོང་མ་ཡིན་པའི་ལྷན་ཅིག་བྱེད་པའི་རྒྱུ་ནི། འཇིགས་པ་དྲན་པས་སྐྱབས་སུ་འགྲོ་བ་ཡིན་ཏེ། སྐྱེས་བུ་གསུམ་གྱི་སྐྱབས་འགྲོ་ལ་སོ་སོར་འཇིགས་པ་དྲན་པ་གསུམ་འབྱུང་དགོས་པས་སོ། །དེ་ནི་འདིར་འདུས་བྱས་འཁོར་བའི་འཇིགས་པ་དྲན་པ། འདུས་མ་བྱས་མྱང་འདས་འཇིགས་པ་དྲན་པ། འཇིགས་ལ་བརྟེན་ཏེ་སྙིང་རྗེ་ཆེན་པོ་བསྐྱེད་པ་དང་གསུམ་དུ་ཡོད་པ་ལས། དང་པོ་ལ་གསུམ་ལས། རྒྱུ་ཉོན་མོངས་ཅན་གྱི་མ་རིག་པ་བརྟེན་པར་བཅས་པའི་འཇིགས་པ་དྲན་པ་ནི། བརྟེན་འབྲེལ་བཅུ་གཉིས་ཀྱིས་ཤེས་དགོས་ཤིང་། དེ་ཉིད་སྐབས་འདིར་རྣམ་པ་ལྔས་གཏན་ལ་དབབ་པ་ལ། རྟེན་འབྲེལ་གྱི་ངོ་བོ་རྒྱུ་འབྲས་གཉིས་སུ་གནས་སོ། །རྟེན་འབྲེལ་གྱི་ངེས་ཚིག་ནི། པྲ་ཏི་ཏ་རྟེན་པའི་དོན་ལ་འཇུག་སྟེ་ལྷན་ཅིག་བྱེད་རྒྱུ་ཡིན་ནོ། །སམ་ཞེས་བྱ་བ་སམྦྷ་བ་སྟེ་འབྲེལ་བ་ལ་འཇུག་ཅིང་དེ་ནི་ཉེར་ལེན་གྱི་རྒྱུའོ། །ཨུཏྤད་འབྱུང་བ་ལ་འཇུག་སྟེ་དེ་ནི་སྐྱེ་བའ་ིདོན་ཏོ། །སྒྲ་བསྡུས་ན་པྲ་ཏི་ཏ་ས་མུཏྤ་ད་ཞེས་པར་འགྱུར་ཏེ་རྟེན་ཅིང་འབྲེལ་འབྱུང་ངོ་། །རྟེན་འབྲེལ་གྱི་མཚན་ཉིད་ནི་མངོན་པ་ཀུན་བཏུས་ལས། གཡོ་བ་མེད་པ་དང་། མི་རྟག་དང་། ནུས་པའི་རྐྱེན་ལས་བྱུང་བར་གསུངས་པས་ན། མདོ་ལས། འདི་ཡོད་ན་འདི་འབྱུང་། འདི་སྐྱེས་པས་འདི་སྐྱེ། འདི་ལྟ་སྟེ། མ་རིག་པའི་རྐྱེེན་གྱིས་འདུ་བྱེད་སོགས་གསུངས་པའི་དགོངས་དོན་ཡང་རིམ་གྱིས་ལེགས་པར་བཀྲལ་བ་ཡིན་ཅིང་། དེས་ནི་བསལ་བྱའི་གཙོ་བོ་རྒྱུ་མེད་ལས་སྐྱེས་པ་དང་། མི་མཐུན་པའི་རྒྱུ་ལས་སྐྱེས་པ་ག ཉིས་ཀྱང་བསལ་ཏེ། དབང་ཕྱུག་སོགས་ཀྱི་བློའ་ིགཡོ་བ་སྔོན་བཏང་གིས་བྱ་བ་མེད་པས། རང་གི་རྒྱུ་ཡོད་ཙམ་བྱེད་པར་བསྟན་པས་དང་པོ་བསལ། རྒྱུ་ཡིན་མི་སྲིད་པ་རྟག་པ་ལས་མི་འབྱུང་བར། མི་རྟག་པ་ལས་འབྱུང་བ་དང་། རྒྱུ་ཡིན་པའི་མི་རྟག་པ་ཐམས་ཅད་ལས་ཐམས་ཅད་མི་འབྱུང་བར་ནུས་པ་ལྡན་པའི་ཉེར་ལེན་བྱེད་རྐྱེན་ལས་སྐྱེ་བར་བསྟན་པས་གཉིས་པ་བསལ་བས་སོ། །རྟེན་འབྲེལ་གྱི་རྣམ་བཞག་ལ། ཡན་ལག་གི་རྣམ་པར་དབྱེ་བ། ཡན་ལག་མདོར་བསྡུ་བ། ཡན་ལག་རྐྱེན་དུ་རྣམ་པར་བཞག་པ། ཡན་ལག་གི་ལས་བསྟན་པ། ཡན་ལག་ཀུན་ནས་ཉོན་མོངས་གསུམ་དུ་བསྡུ་བ། རབ་དབྱེ་བཤད་པ་དང་དྲུག་ལས། དང་པོ་ལ་བཅུ་གཉིས་ཀྱི། མ་རིག་པ་ནི་གཉིས་ཏེ། དངོས་པོར་འཛིན་པ་ཉོན་མོངས་ཅན་གྱི་མ་རིག་པ་དང་། དངོས་མེད་འཛིན་པ་ཉོན་མོངས་ཅན་མ་ཡིན་པའི་མ་རིག་པ་ལས། སྲིད་པའི་རྩ་བ་ནི་དང་པོ་ཡིན་ཏེ། སྟོང་ཉིད་བདུན་ཅུ་པ་ལས། དངོས་པོ་སྟོང་པར་ངེས་རྟོགས་པས། །ཡང་དག་མཐོང་ཕྱིར་རྨོངས་མི་འགྱུར། །དེ་ནི་མ་རིག་འགོག་པ་ཡིན །དེ་ནས་ཡན་ལག་བཅུ་གཉིས་འགགས། །ཞེས་དང་། རིགས་པ་དྲུག་ཅུ་པ་ལས། དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་ལ་སོགས་དང་། །ལྟ་བ་མི་ཟད་མ་རུང་འབྱུང་། །དེ་མེད་ཉོན་མོངས་མི་སྐྱེ་སྟེ། །ཞེས་གསུངས་ཤིང་སྐྱབས་འགྲོ་བདུན་ཅུ་པ་ལས་བསྟན་པ་ཡང་འདི་ལྟར། མ་རིག་པ་ཉོན་མོངས་ཅན་གྱིས་བྱས་པའི་རྟོགས་པ་རང་གི་ངོ་བོ་ནི། དོན་རང་གི་མཚན་ཉིད་ཀྱི་ངོས་ནས་བྱ་བ་བྱེད་ནུས་པའི་དངོས་པོ་མེད་བཞིན་དུ་ཡོད་པར་སྒྲོ་བཏགས་ནས་འཛིན་པར་འདོད་ལ། འདི་ནི་བྱིས་པ་སོ་སོའི་སྐྱེ་བོ་རྣམས་ཀྱི་འཁོར་བར་སྐྱེ་བའི་རྒྱུའི་དང་པོ་ཡིན་ཅིང་དེ་ལྟ་བུའི་དངོས་པོར་རྟོག་པ་དེ་ནི་དེ་ཁོ་ན་ཉིད་ལ་རྨོངས་པའི་མ་རིག་པ་ཡིན་ཏེ། སྟོང་ཉིད་ལ་དངོས་པོར་སྒྲོ་བཏགས་ཤིང་བདག་རྟག་ཏུའང་ཞེན་པས་སོ། །ཡང་དེ་འདྲའི་དངོས་རྟོག་གཉིས་པར་འགྱུར་བ་ཆོས་རྒྱུ་དང་འབྲས་བུ་ལ་རྨོངས་པས་ནོར་བར་སྒྲོ་བཏགས་པ་ལོག་པའི་ཤེས་པ་དངོས་པོར་འཛིན་པ་ནི་འབྲས་བུ་རྣམ་པར་སྨིན་པ་ལ་རྨོངས་པའི་མ་རིག་པའོ། །སྔ་མ་ནི་རྒྱུན་མ་ཆད་པར་འཁོར་བའི་ཚེ་ན་འཇུག་ཅིང་འཁོར་བའི་ཆོས་ཐམས་ཅད་ལ་ཁྱབ་བྱེད་དུའང་གནས་པས་མ་རིག་འདི་ལ་ནི་ལྷན་ཅིག་པའི་མ་རིག་པ་ཞེས་ཀྱང་བྱ་ལ་འདིའི་རྒྱུ་གཞན་ཡང་བརྟགས་མི་དགོས་པས་ཐུག་མེད་དུ་མི་འགྱུར་བར་ཡན་ལག་བཅུ་གཉིས་སུ་ངེས་ཤིང་རང་གི་ཉེར་ལེན་ལ་ཐོག་མ་མེད་པས་འཁོར་བ་ཐོག་མ་ཅན་དུའང་མི་འགྱུར་འདི་ཉིད་འཁོར་བའི་རྩ་བ་ཡིན་ནོ། །ཕྱི་མ་ནི་མི་དགེའི་ལས་ཙམ་སློང་བྱེད་ཡིན་པས་མ་འདྲེས་པའི་མ་རིག་པ་ཞེས་བྱའོ། །མ་རིག་དང་པོས་ནི་འདོད་པའི་མཐོ་རིས་སུ་འཕེན་བྱེད་བསོད་ནམས་དང་ཁམས་གོང་མར་འཕེན་བྱེད་མི་གཡོའི་ལས་སེམས་པ་འདུ་བྱེད་ཅིང་། གཉིས་པས་ནི་ངན་འགྲོར་འཕེན་བྱེད་མི་དགེའི་ལས་སེམས་པ་འདུ་བྱེད་པ་ནི་འདུ་བྱེད་དོ། །ལས་འདུ་བྱེད་ཀྱིས་བག་ཆགས་བགོས་པ་ནི་རྣམ་ཤེས་ཏེ། ཚོགས་བརྒྱད་འདོད་པ་ལྟར་ན་ཀུན་གཞི་དང་། ཚོགས་དྲུག་འདོད་པ་ལྟར་ཡིད་ཤེས་སོ། །རྣམ་ཤེས་དེ་མངལ་དུ་ཉིང་མཚམས་སྦྱར་བའི་སྐད་ཅིག་ནི་མིང་གཟུགས་ཏེ། དེ་ཡང་། སྲིད་པ་ཕྱི་མར་གཞོལ་བས་སམ་རང་གི་ངོ་བོའི་རྒྱུན་མི་འཆད་པར་སྟོན་པས་མིང་ཞེས་བྱ་སྟེ་གཟུགས་ཅན་མིན་པའི་ཕུང་པོ་བཞི་ཡིན་ལ། གཟུགས་ཅན་གྱི་ཕུང་པོ་ནི་གཟུགས་སོ། །མིང་ལས་ཡིད་ཀྱི་སྐྱེ་མཆེད་འགྲུབ་ཅིང་། གཟུགས་ལས་མིག་སོགས་གཟུགས་ཅན་གྱི་སྐྱེ་མཆེད་ལྔ་གྲུབ་པ་སྐྱེ་མཆེད་དོ། །ནང་གི་སྐྱེ་མཆེད་དྲུག་པོ་ཡུལ་གྱི་སྐྱེ་མཆེད་དྲུག་དང་ཕྲད་པ་ནི་རེག་པ་སྟེ་མིག་གི་འདུས་ཏེ་རེག་པ་སོགས་དྲུག་གོ །རེག་པས་ཡུལ་ཡོངས་སུ་བཅད་པ་ཉམས་སུ་མྱོང་བ་ཚོར་བ་སྟེ་དེ་ཡང་འདོད་པའི་ཚོར་བ་བདེ་སྡུག་བར་མ་གསུམ། གཟུགས་ཀྱི་བསམ་གཏན་དང་པོའི་དབེན་པ་ལས་སྐྱེ་བའི་ཚོར་བ་བདེ་བ། གཉིས་པའི་ཏིང་ངེ་འཛིན་ལས་སྐྱེས་པའི་བདེ་བ། གསུམ་པའི་དགའ་བ་མེད་པའི་བདེ་བ། བཞི་པའི་ཚོར་བ་བཏང་སྙོམས་གཟུགས་མེད་པའི་བཏང་སྙོམས་ཀྱི་ཚོར་བ་རྣམས་སོ། །ཚོར་བ་བདེ་བ་དང་བཏང་སྙོམས་ལ་མ་བྲལ་བར་འདོད་པ་འདོད་སྲེད། སྡུག་བསྔལ་བྲལ་འདོད་ཀྱི་འཇིག་སྲེད་གཉིས་སྐྱེ་བ་སྲེད་པའོ། །ཡུལ་ལྔའི་འདོད་པ་ཉེ་བར་ལེན་པ། དྲུག་ཅུ་རྩ་བཞིའི་ལྟ་བ་ཉེ་བར་ལེན་པ། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ། བདག་ཏུ་སྨྲ་བ་ཉེར་ལེན་པ་བཞི་དང་བཅས་ཤིང་ད་ལྟའི་སྲིད་པ་འདི་ལས་གཞན་པ་སྐྱེ་བ་ཕྱི་མ་ཡང་སྲིད་དོན་གཉེར་གྱི་ཆགས་པ། སྲིད་པ་འདོད་པའི་སྲེད་པ་ནི་ལེན་པ་ཡིན་ནོ། །སྲིད་འདོད་ཀྱི་སྲེད་པའི་དབང་གིས་ཡང་སྲིད་ཀྱི་ཕུང་པོ་ལྔ་འགྲུབ་མ་རག་པའི་ལས་ནུས་མཐུ་ཅན་ནི་སྲིད་པ་སྟེ་ཁམས་གསུམ་གྱིས་བསྡུས་པ་གསུམ་མོ། །ལས་ཀྱིས་སྐྱེ་གནས་གྲུབ་པ་ནི་སྐྱེ་བ་སྟེ། བརྫུས་སྐྱེས་ལ་སོགས་པ་སྐྱེ་བ་བཞིའོ། །སྐྱེ་བའི་རྒྱུན་དེ་ནི་ན་ཚོད་འགྱུར་བ་རྒ་བ་དང་། སྲོག་འགྱུར་བ་ཤི་བ་སྟེ་འདི་གཉིས་ཡན་ལག་གཅིག་ཏུ་བགྲངས་བ་ནི་མ་རྒས་པར་འཆི་བ་ཡོད་པས་སོ། །ཡང་རྒ་ཤིའི་འབྲས་བུ་མ་བསྟན་པའི་ཕྱིར་འཁོར་བ་ལ་ཐ་མ་ཡོད་པར་འགྱུར་རོ་ཞེ་ན། སྐྱེ་བ་དང་རྒ་བ་ནི་སྐྱེ་བའི་མི་རྟག་པ་ཡིན། ཤི་བ་ནི་འཇིགས་པའི་མི་རྟག་པ་ཡིན་པས་མི་རྟག་འདི་གཉིས་འཁོར་བའི་ཡན་ལག་གཞན་ཐམས་ཅད་ཀྱི་རྒྱུ་དང་། ངོ་བོ་དང་། འབྲས་བུར་ལྡན་པ་ཡིན་པས་འབྲས་བུར་བསྟན་པ་ཡིན་ནོ། །ཡན་ལག་བཅུ་གཉིས་པོ་འདི་ནི་མངལ་སྐྱེས་ཀྱི་དབང་དུ་མངོན་པ་མཛོད་ལས་བཤད་ཀྱང་ལེགས་པར་བརྟགས་ན་བརྫུས་ཏེ་སྐྱེ་བ་ལ་ཡང་རིམ་གྱིས་འགྲུབ་ནས་ཚང་སྟེ། བརྫུས་སྐྱེའི་མིང་གི་རྟེན་ནི་འབྱུང་བཞིའི་རྡུལ་ཕྲན་ཤིན་ཏུ་དྭངས་པ་མང་པོ་ཅིག་ཅར་བསྡུས་པ་ལས་གཟུགས་རྫོགས་པར་ཅིག་ཅར་གྲུབ་པར་འདོད་དགོས་ཀྱི་དེ་ལྟ་མིན་ན་རྣམ་པར་རིག་བྱེད་ཀྱི་གཟུགས་དབང་པོ་དང་ལྡན་པ་རྒྱུ་མེད་དུ་འགྱུར་ཞིང་སྣང་དུའང་མི་རུང་ངོ་། །མཛོད་ལས་ཕྱིའི་ས་བོན་མེད་པར་གསུངས་པ་ནི་འབྱུང་རྡུལ་རགས་པ་མེད་པ་ལ་དགོངས་སོ། །དེ་ལྟ་ན་བར་དོའི་རྣམ་ཤེས་རྡུལ་ཕྲན་དྭངས་པ་དང་འཕྲད་པ་ཙམ་མིང་གཟུགས་ཏེ་དེ་ལས་སྐྱེ་མཆེད་གྲུབ་པའོ། །ཞེས་པ་དོགས་སྤོང་ངོ་། །འཆི་བས་འཇིགས་ཤིང་གདུང་བ་མྱ་ངན་དང་། སྡུག་བསྔལ་གྱི་ཚིག་འབྱིན་པ་སྨྲེ་སྔགས། ལུས་ཚོར་གྱི་སྡུག་བསྔལ་སྡུག་བསྔལ། ཡིད་ཚོར་སྡུག་བསྔལ་ཡིད་མི་བདེ། ཉོན་མོངས་དང་ཉེ་ཉོན་ལང་བ་འཁྲུགས་པ་སྟེ་ཉེས་དམིགས་སྣ་ཚོགས་ལྡན་པའི་ཕུང་པོ་ཆེན་པོ་གྲུབ་པའོ། །གཉིས་པ་ཡན་ལག་མདོར་བསྡུ་བ་ལ། རྟེན་འབྲེལ་ཚར་གཅིག་རྒྱུ་འབྲས་ཆ་གཉིས་སུ་འཇོག་པ་དང་། རྒྱུ་འབྲས་ཆ་གཅིག་ཏུ་འཇོག་པའི་ལུགས་གཉིས་ཡོད་པ་ལས། སྔ་མ་ནི། བདག་ཚེ་སྔ་མ་ནས་འདིར་དང་འདི་ནས་ཕྱི་མར་འབྱུང་བ་ལ་རྨོངས་པ་བཟློག་ཕྱིར་སྐྱེ་བའི་ཆ་གསུམ་ལ་སྔ་མ་ནས་འདིར་རྒྱུ་འབྲས་ཆ་གཅིག་འདི་ནས་ཕྱི་མར་རྒྱུ་འབྲས་ཆ་གཅིག་ཏུ་འཇོག་པ་ནི་འཕེན་འགྲུབ་དམིགས་ཀྱིས་མ་བསལ་བར། སྤྱིར་རྒྱུ་འབྲས་ཡན་ལག་ཙམ་དུ་བསྡུས་པའོ། །ཕྱི་མ་ནི། མངོན་པ་ཀུན་བཏུས་ལྟར་ན་ཡན་ལག་བཞིར་བསྡུ་སྟེ། མ་རིག་པས་ཀུན་ནས་བསླང་སྟེ་འདུ་བྱེད་སེམས་པའི་ལས་ཀྱི་བག་ཆགས་རྣམ་ཤེས་ལ་བགོས་པ་ནི་འཕེན་བྱེད། རྣམ་ཤེས་དེ་ལ་མིང་གཟུགས་ནས་ཚོར་བའི་བར་བཞི་འབྱུང་རུང་གི་ནུས་པ་གནས་པ་ནི་འཕང་བ་སྟེ། འདི་གཉིས་ནི་བརྒྱུད་རྒྱུ་ཡིན་ལ་འགྲུབ་བྱེད་ཀྱི་བར་དུ་བསྐལ་པ་ཡང་མང་པོས་ཆོད་པ་ཡོད་དེ་མདོ་ལས། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བ་གནས་པ་ཡིན། །ཞེས་གསུངས་པ་འདི་ལ་དགོངས་སོ། །ལས་ཀྱི་བག་ཆགས་བརྒྱུད་རྒྱུར་གནས་པ་དེ་སྲེད་ལེན་གྱིས་གསོས་བཏབ་སྟེ་ཡང་སྲིད་བར་མ་ཆད་དུ་འགྲུབ་རུང་གི་ནུས་པ་ནི་སྲིད་པ་སྟེ་གསུམ་པོ་དེ་འགྲུབ་བྱེད་ཡིན་ལ་འདི་ནི་དངོས་རྒྱུ་ཡིན་ཅིང་། དེ་ལས་ཕྱི་མར་ཉིང་མཚམས་སྦྱར་བའི་སྐྱེ་བ་སོགས་གཉིས་ནི་མངོན་པར་གྲུབ་པའི་ཡན་ལག་སྟེ་འགྲུབ་བྱེད་འགྲུབ་པ་གཉིས་ཀྱི་བར་དུ་ནི་སྐྱེ་བ་གཞན་གྱིས་ཀྱང་བར་དུ་ཆོད་མི་རིགས་ཏེ། སྔ་མའི་འཕྲོར། ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་ལྟར་རོ། །གསུམ་པ་ཡན་ལག་རྐྱེན་དུ་རྣམ་པར་བཞག་པ་ལ། སྤྱིར་བཏང་དུ། ཤེས་པས་ཤེས་པ་སྐྱེད་པ་ལ་རྐྱེན་བཞི་བྱེད། ཤེས་པས་བེམ་པོ་ལ་བདག་རྐྱེན་གཅིག་པུ་བྱེད། བེམ་པོས་ཤེས་པ་ལ་བདག་དམིགས་གཉིས་བྱེད། བེམ་པོས་བེམ་པོ་སྐྱེད་པ་ལ་བདག་རྐྱེན་རྒྱུ་རྐྱེན་གཉིས་བྱེད་པ་ཡིན་ཀྱང་། མངོན་པ་ཀུན་བཏུས་ལས། དང་པོའི་དབང་དུ་བྱས་ནས་གསུངས་པ་ལྟར་ན། མ་རིག་པའི་བག་ཆགས་རྒྱུའི་རྐྱེན། དེ་རང་གི་མཚན་ཉིད་ཐ་མི་དད་པའི་རྒྱུ་ནི་སྐྱེད་པའི་ཤུགས་ཅན་འགགས་པ་དེ་མ་ཐག་རྐྱེན། སྒྲོ་བཏགས་ཀྱི་ཡུལ་ཡིད་ལ་བྱེད་པ་དམིགས་རྐྱེན། ལྷན་ཅིག་འབྱུང་བ་འདུ་བྱེད་ཀྱི་བག་ཆགས་བདག་རྐྱེན་ཏེ། མ་རིག་ཕྱི་མ་སྐྱེད་ཚུལ་ཡིན་ཅིང་འདུ་བྱེད་སོགས་ལའང་དེ་བཞིན་སྦྱར་བར་བྱ་ཞིང་། མ་རིག་པ་ནི་འདུ་བྱེད་ཀྱི་བདག་རྐྱེན་ཁོ་ནར་ངེས་པས། བསྡུ་བ་ལས། བདག་རྐྱེན་གཅིག་པུ་བྱེད་པར་གསུངས་པའི་དགོངས་པ་སྟེ། ས་སྡེ་ལས་རྒྱུའི་རྐྱེན་མ་གཏོགས་གསུམ་བྱེད་པར་གསུངས་པ་དོན་དམ་པའི་རྒྱུའི་རྐྱེན་ཀུན་གཞིར་ངེས་པས་སོ། །བཞི་པ་ཡན་ལག་གི་ལས་བསྟན་པ་ལ་གཉིས་ཏེ། འདྲ་བའི་ལས་ནི་སྔ་མ་རྣམས་ཀྱིས་ཕྱི་མ་སྐྱེ་བའི་རྐྱེན་བྱེད་པའོ། །མི་འདྲ་བའི་བྱེད་ལས་ནི། མ་རིག་པས་བདེན་པའི་དོན་ལ་རྨོངས་པའི་དབང་གིས་སྒྲིབ་པར་བྱེད། འདུ་བྱེད་ཀྱིས་ལས་མ་བྱས་པ་དང་མི་ཕྲད་པར་འགྲོ་བའི་རིགས་སོ་སོར་འབྱེད་པའི་ལས་ཀྱི་ས་བོན་འདེབས་པར་བྱེད། རྣམ་ཤེས་ཀྱིས་ལས་བྱས་པ་ཆུད་མི་ཟ་བར་སྐྱེ་བ་ཕྱི་མར་འཁྲིད་པར་བྱེད། མིང་གཟུགས་ཀྱིས་ལུས་འཛིན་པར་བྱེད། སྐྱེ་མཆེད་ཀྱིས་ལུས་ཀྱི་དབང་པོ་ཡོངས་སུ་རྫོགས་པར་བྱེད། རེག་པས་ཡུལ་དབང་རྣམ་ཤེས་གསུམ་འདུས་ཏེ་ཡིད་དུ་འོང་མི་འོང་བར་མའི་ཡུལ་གསུམ་གྱི་གང་རུང་ཞིག་ཡོངས་སུ་གཅོད་པར་བྱེད། །ཚོར་བས་ཡུལ་ཉམས་སུ་མྱོང་བས་ཉེ་བར་ལོངས་སྤྱོད་པར་བྱེད། སྲེད་པས་ས་བོན་གསོས་བཏབ་སྟེ་སྐྱེ་བ་སྡུད་པར་བྱེད། ལེན་པས་སྐྱེ་བ་ལ་བར་ཆད་མེད་པར་སྦྱོར་བར་བྱེད། སྲིད་པས་སྐྱེ་བ་ལ་མངོན་སུམ་དུ་ཕྱོགས་པར་བྱེད། སྐྱེ་བས་མིང་གཟུགས་ནས་ཚོར་བའི་བར་མངོན་པར་བསྒྲུབ་སྟེ་སྡུག་བསྔལ་བར་བྱེད། རྒ་ཤིའི་སྐྱེ་བའི་གནས་སྐབས་འགྱུར་བ་ལ་སྤྱོད་པས་སྡུག་བསྔལ་བར་བྱེད་པའོ། །ལྔ་པ་ཡན་ལག་ཀུན་ནས་ཉོན་མོངས་པར་བསྡུ་བ་ནི་མ་རིག །སྲེད་པ། ལེན་པ་གསུམ་ཉོན་མོངས་པའི་ཀུན་ནས་ཉོན་མོངས་པ། འདུ་བྱེད་སྲིད་པ་གཉིས་ལས་ཀྱི་ཀུན་ནས་ཉོན་མོངས། ལྷག་མ་བདུན་རྣམ་པར་སྨིན་པའི་ཀུན་ནས་ཉོན་མོངས་སུ་བསྡུ་བ་མཛོད་དང་དབུ་མའི་གཞུང་ལས་འབྱུང་ལ། སེམས་ཙམ་ལས་རྣམ་ཤེས་ལས་སུ་བསྡུ་བ་གཉིས་མི་འགལ་ཏེ། འདུ་བྱེད་དང་། འབྲེལ་བའི་ཚེ་ན་ལས་ཀྱི་ས་བོན་འཛིན་པས་རྒྱུ་དུས་ཀྱི་རྣམ་ཤེས་ཞེས་བཏགས་རིགས་ཤིང་། མིང་གཟུགས་ཀྱི་དངོས་རྒྱུར་བྱུང་ཚེ་འབྲས་བུ་ལ་ཕྱོགས་པའི་ཕྱིར་ན་འབྲས་དུས་ཀྱི་རྣམ་ཤེས་ཞེས་བཏགས་ཆོག་པས་སོ། །དྲུག་པ་རབ་དབྱེ་ལ། སྐད་ཅིག་པ་དང་འབྲེལ་བ་ཅན་རྒྱུན་ཆགས་པ་དང་གནས་སྐབས་པ། སེམས་ཅན་དུ་སྟོན་པ་ནང་གི་རྟེན་འབྲེལ། སེམས་ཅན་མ་ཡིན་པར་སྟོན་པ་ཕྱིའི་རྟེན་འབྲེལ་བཞི་ལས། དང་པོ་ནི། སྐད་ཅིག་མའི་ལས་སྲོག་གཅོད་ལྟ་བུ་ལ་ཚང་བ་སྟེ་མི་ཤེས་བཞིན་དུ་ལས་ལ་འཇུག་པ་མ་རིག་པ། སེམས་པ་དེ་འདུ་བྱེད་ཡུལ་རིག་པ་རྣམ་ཤེས་དེ་ལ་ལྡན་པའི་ཕུང་པོ་གཞན་བཞི་མིང་གཟུགས། མིག་སོགས་སྐྱེ་མཆེད། གསུམ་འདུས་པ་རེག་པ། ཉམས་སུ་མྱོང་བ་ཚོར་བ། ལས་དེར་ཆགས་པ་སྲེད་པ། མཚུངས་ལྡན་གྱི་ཉོན་མོངས་གཞན་རྣམས་ལེན་པ། དེ་དག་གིས་ཀུན་ནས་བསླང་བ་ལུས་ངག་གི་ལས་ལ་ཕྱོགས་པ་སྲིད་པ། ལས་མངོན་དུ་བྱུང་བ་སྐྱེ་བ། ལས་རྣམས་ཆེར་སྨིན་པ་རྒ་བ། ལས་ཞིག་པ་ཤི་བ་སྟེ། འདི་ནི་མཛོད་འགྲེལ་ལྟར་ཡིན་ལ་འཇོག་ཚུལ་མི་འདྲ་བ་གཞན་ཡང་མཐོང་ངོ་། །གཉིས་པ་གསུམ་པ་དོན་གཅིག་ཅིང་སྔར་བཤད་པ་རྣམས་ཡིན་ཀྱང་དེ་ལ་རྒྱུ་དང་འབྲེལ་བ་སྔ་མ་ལས་ཕྱི་མ་འབྱུང་བ་དང་། རྐྱེན་དང་འབྲེལ་བ་ནང་འབྱུང་ལྔ་རྣམ་ཤེས་དང་དྲུག་འདུས་པས་སྐྱེད་པ་སྟེ་གཉིས་ཡོད་དོ། །བཞི་པ་ལའང་གཉིས་ཏེ། ས་བོན་ལས་མྱུ་གུ་ལ་སོགས་པ་རྒྱུ་དང་འབྲེལ་བ། ཕྱིའི་འབྱུང་ལྔ་བྱེད་རྒྱུར་གྱུར་བས་སྐྱེད་པ་རྐྱེན་དང་འབྲེལ་བའོ། །འདི་དག་གི་རྣམ་བཞག་ལེགས་པར་ཤེས་པ་ལ་ནང་གི་རྟེན་འབྲེལ་འདི་ལྟར་ངེས་དགོས་ཏེ། སྤྱིར་བེམ་ཤེས་ལྡན་མིན་འདུ་བྱེད་གསུམ་དུ་གནས་པ། གཟུགས་གཟུགས་ཅན་གྱི་སྐྱེ་མཆེད་སྲིད་པའི་གཟུགས་ཕུང་རྣམས་བེམ་པོ། སེམས་རྣམ་ཤེས་ཡིད་ཀྱི་སྐྱེ་མཆེད་དང་། སེམས་བྱུང་མ་རིག་སེམས་པ་མིང་ཆོས་ཀྱི་སྐྱེ་མཆེད་རེག་པ་ཚོར་བ་སྲེད་ལེན་སྲིད་པའི་ཕུང་པོ་བཞི་སྟེ་དེ་དག་ཤེས་པ། སྐྱེ་བ་རྒ་ཤི་ལྡན་མིན་འདུ་བྱེད་དེ། འདི་དག་གིས་འབྲས་བུ་སྐྱེད་པ་ནི། རྣམ་འགྲེལ་ལས། རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མ་ཡིན་ཕྱིར་ཡང་གྲུབ། །ཅེས་གསུངས་པ་བཞིན། བེམ་པོའི་ཉེར་ལེན་ཡིན་ན་བེམ་པོ། རྣམ་ཤེས་ཀྱི་ཉེར་ལེན་རྣམ་ཤེས། ལྡན་མིན་གྱི་ཉེར་ལེན་ལྡན་མིན་ཡིན་དགོས་ཤིང་། ལྷན་ཅིག་བྱེད་རྐྱེན་ནི་བེམ་པོས་ཤེས་པའི་རྐྱེན་བྱེད། ཤེས་པས་བེམ་པོའི་རྐྱེན་བྱེད་པ་སོགས་དང་། དེ་དག་རེ་རེའི་རྐྱེན་གཉིས་ཀྱིས་བྱེད་པ་སོགས་ཡོད་པ་ཡིན་ནོ། །ཚུལ་འདི་ཤེས་ན་ཕྱིའི་རྟེན་འབྲེལ་ལའང་མཁས་པར་འགྱུར་རོ། །རྟེན་འབྲེལ་རྫོགས་ཚུལ་ལས། རྒྱུ་འབྲས་ཆ་གཉིས་སུ་འཇོག་པ་བྱེ་བྲག་སྨྲ་བ་ལྟར་ན། ཚེ་གསུམ་ལ་རྫོགས་ཏེ། རྒྱུ་མ་རིག་འདུ་བྱེད་གཉིས་སྔོན་གྱི་ཚེར་རྫོགས། རྣམ་ཤེས་སོགས་འབྲས་བུ་ལྔ་དང་ཕྱི་མའི་རྒྱུ་སྲེད་ལེན་སྲིད་གསུམ་རྣམས་ད་ལྟར་གྱི་ཚེར་རྫོགས། འབྲས་བུ་སྐྱེ་བ་རྒ་ཤི་ཕྱི་མར་རྫོགས་པའོ། །རྒྱུ་འབྲས་ཆ་གཅིག་ཏུ་འཇོག་པ་སེམས་ཙམ་ལྟར་ན། སྐྱེ་ནས་མྱོང་འགྱུར་གྱི་ལས་ལ་ཚེ་གཉིས་སུ་རྫོགས་ཏེ། ཚེ་སྔ་མར་འཕེན་བྱེད་གསུམ་གྱིས་འཕང་བའི་ས་བོན་ལྔ་འཆི་ཀ་ཚུན་ཆད་དུ་སྲེད་ལེན་གྱིས་གསོས་ནས་སྲིད་པར་གྱུར་ནས། ཚེ་ཕྱི་མར་འགྲུབ་པ་གཉིས་འབྱུང་བས་སོ། །ལན་གྲངས་གཞན་ལ་མྱོང་འགྱུར་གྱི་ལས་ལ། ཚེ་གསུམ་གྱིས་རྫོགས་ཏེ། ཚེ་སྔ་མར་འཕེན་འཕངས་བརྒྱད་རྫོགས་ཅིང་། བར་བའི་ཚེར་འགྲུབ་བྱེད་གསུམ་རྫོགས་ནས། དེའི་ཕྱི་མར་འགྲུབ་པ་གཉིས་རྫོགས་དགོས་སོ། །ངོ་བོ་བསླུ་ཞིང་མི་རྟག་པའི་འཇིགས་པ་དྲན་པ་ནི། འཁོར་བའི་སེམས་ཅན་ནི་འདི་ཙམ་ནས་བྱུང་ཞེས་ཐོག་མ་མེད་ཅིང་སེམས་ཅན་ཟད་པའི་མཐའ་ཡང་མེད་དེ། ནམ་མཁའ་ལ་མཐའ་མི་སྲིད་པ་ལ་ནམ་མཁས་གར་ཁྱབ་ཏུ་སེམས་ཅན་གྱིས་མ་ཁྱབ་མེད་པས་སོ། །ཟག་བཅས་ཉེར་ལེན་གྱི་ཕུང་པོ་ལྔ་ལ་སྲིད་པ་ཞེས་བྱ་ཞིང་། དེ་ནི་འཁོར་བའི་མིང་གི་རྣམ་གྲངས་ཡིན་ལ་འཁོར་བ་ཞེས་པ་ནི། ཉོན་མོངས་ལས་ལས་དག་འབྱུང་ཞིང་ལས་ལས་རྣམ་སྨིན་རྣམས་འབྱུང་ལ་རྣམ་སྨིན་ལས་ཡང་ཉོན་མོངས་བྱུང་ནས་ཕུང་པོ་ལྔ་མགལ་མེ་ལྟར་འཁོར་བའོ། །འཁོར་བ་རང་གི་དབང་དུ་བྱས་ན། སེམས་ཅན་གཅིག་གི་ཐོག་མ་མི་རྙེད་དེ། སེམས་ཅན་གྱི་སྲིད་པའི་གཙོ་བོ་རྣམ་ཤེས་སྐད་ཅིག་མ་ཐོག་མར་སྐྱེ་བ་ནི། རྣམ་ཤེས་རང་གི་ཉེར་ལེན་སྔ་མའི་སྟོབས་ལས་བྱུང་བ་ཡིན་ཏེ། རྣམ་ཤེས་འདོད་འདུན་དང་མཚུངས་ལྡན་ཅན་སྔར་བྱུང་བ་དེ་རྣམ་ཤེས་ཕྱི་མའི་ཉེར་ལེན་ཡིན་པའི་ཕྱིར་ཏེ། དཔེར་ན་ད་ལྟའི་རྣམ་པར་ཤེས་པ་སྔ་ཕྱིར་འབྱུང་བ་བཞིན་ནོ། །དེ་ཡང་སློབ་དཔོན་ཞི་བ་འཚོས། དེའི་ཕྱིར་ཐོག་མའི་རྣམ་པར་ཤེས། །རང་གི་ཉེར་ལེན་སྟོབས་ལས་བྱུང་། །རྣམ་ཤེས་ཉིད་སོགས་གཏན་ཚིག་གིས། །ད་ལྟའི་རྣམ་པར་ཤེས་པ་བཞིན། །ཞེས་གསུངས་སོ། །སེམས་ཅན་གཅིག་གི་ཐ་མ་ཡང་མི་རྙེད་དེ། སེམས་ཅན་འཆི་ཁ་མའི་རྣམ་ཤེས་སྐད་ཅིག་མས་རྣམ་ཤེས་རང་གི་ཉེར་བླང་དུ་གྱུར་པའི་རྣམ་ཤེས་སྐད་ཅིག་མ་བསྐྱེད་ནུས་ཏེ། འདོད་འདུན་གྱིས་ཆགས་པར་བྱེད་པས་འབྲེལ་བའི་ཉེར་ལེན་གྱི་རྣམ་ཤེས་ཡིན་པས་ཏེ། དཔེར་ན་ཚེ་སྔོན་མའི་རྣམ་པར་ཤེས་པས་སྐྱེ་བ་འདི་ཉིད་ཀྱི་རྣམ་ཤེས་བསྐྱེད་ནུས་པ་དེ་བཞིན་ནོ། །དེ་ཡང་། སྔ་མའི་འཕྲོར། འཆི་ཁའི་སྐད་ཅིག་རྣམ་ཤེས་འདིའི། །རང་གི་ཉེར་བླང་བསྐྱེད་ནུས་ཏེ། །ཆགས་པར་བྱེད་པས་འབྲེལ་བ་ཉིད། །སྔོན་གྱི་རྣམ་པར་ཤེས་པ་བཞིན། །ཞེས་གསུངས་སོ། །དེ་ལྟར་འཁོར་ཚེ། དད་པ་ལ་སོགས་པའི་དབང་པོ་ལྔའི་འཇུག་པ་བྲལ་ཞིང་ཡེ་ཤེས་ཀྱི་སྣང་བ་ངེས་མི་ནུས་པའི་རྨོངས་པ་མ་རིག་པའི་གཉིད་མོ་ཆེར་ལོག་པའི་འགྲོ་བ་རྣམས་ལ་ལས་ཉོན་གང་དང་སྣོད་བཅུད་བདེ་སྡུག་གང་སྣང་བ་དེ། མེད་པ་ལ་ཡོད་པའི་སྣང་བའི་སྒྲོ་བཏགས་བརྫུས་མའི་རང་བཞིན་རྫུན་པ་ཡིན་ཅིང་ཡོད་པ་སྐད་ཅིག་ཙམ་ཡང་མི་གནས་པར་སྐྱེ་བའི་མི་རྟག་པ་དང་། འཇིག་པའི་མི་རྟག་པའི་རང་བཞིན་གྱིས་བསླུ་བའི་ཆོས་ཅན་ཏེ། དཔེར་ན་རྨི་ལམ་ལྟ་བུར་འདོད་པར་བྱ་དགོས་སོ། །མི་རྟག་པ་དེ་གཉིས་ཀྱི་རང་བཞིན་རགས་པ་འགྱུར་བའི་མི་རྟག་པ་དང་། ཕྲ་བ་ཆོས་ཉིད་ཀྱི་མི་རྟག་པ་གཉིས་ལས། འགྱུར་བའི་མི་རྟག་པ་ལ། སྣོད་ཀྱི་འཇིག་རྟེན་མི་རྟག་ཚུལ་དང་། བཅུད་ཀྱིས་སེམས་ཅན་མི་རྟག་ཚུལ་གཉིས་ལས། སྣོད་ནི། བསམ་གཏན་གསུམ་པ་ནས་བཟུང་འཐབ་བྲལ་བར་གྱི་གནས་རྣམས་ཡས་ནས་མར་ཆགས། ཡང་མས་ནས་ཡར་སྔ་མ་ལ་ཕྱི་མ་བརྟེན་པའི་རིམ་པས་ནམ་མཁའ་རླུང་གི་དཀྱིལ་འཁོར། དེ་ལ་ཆུའི་དཀྱིལ་འཁོར། དེར་གསེར་གྱི་ས་གཞི། དེའི་སྟེང་དུ་ཤར་དངུལ། ལྷོ་བཻཌཱུརྱ། ནུབ་ཤེལ། བྱང་གསེར་ཏེ་རིན་པོ་ཆེ་བཞི་ལས་གྲུབ་པའི་རི་རྒྱལ་ལྷུན་པོ་དཔག་ཚད་འབུམ་དང་དྲུག་ཁྲི་ཡོད་པའི་མཐའ་སྐོར་དུ་གསེར་གྱི་རི་གཉའ་ཤིང་འཛིན། གཤོལ་མདའ་འཛིན། སེང་ལྡེང་ཅན། ལྟ་ན་སྡུག །རྟ་རྣ། རྣམ་འདུད། མུ་ཁྱུད་འཛིན་ཏེ་བདུན། དེ་དག་གི་བར་དུ་རོལ་མཚོ་བདུན། མཐའ་སྐོར་དུ་བ་ཚྭ་ཅན་གྱི་རྒྱ་མཚོ། ཕྱོགས་བཞིར་གླིང་བཞི་གླིང་ཕྲན་བརྒྱད། ཕྱི་རོལ་ལྕགས་ལས་གྲུབ་པའི་འཁོར་ཡུག་གི་རི་སྟེ། དེ་དག་ལ་གླིང་བཞི་པའི་འཇིག་རྟེན་བཞི་བྱ། དེ་རྣམས་དང་ཚངས་པའི་འཇིག་རྟེན་བཅས་པ་སྟོང་ལ་སྟོང་དང་པོ་སྤྱི་ཕུད་ཀྱི་འཇིག་རྟེན། སྤྱི་ཕུད་སྟོང་ལ་སྟོང་གཉིས་པ་བར་མའི་འཇིག་རྟེན། བར་མ་སྟོང་ལ་སྟོང་གསུམ་མི་མཇེད་འཇིག་རྟེན་བྱེ་བ་ཕྲག་བརྒྱ་ཞེས་བྱ་བ་འདི་བར་བསྐལ་གཅིག་ཏུ་ཆགས། ཆགས་པ་དེ་འགྱུར་བཞིན་བར་བསྐལ་ལྔ་བཅུ་ང་བརྒྱད་དུ་གནས། གནས་པ་དེ་འགྱུར་བས་བར་བསྐལ་གཅིག་ཏུ་བསམ་གཏན་དང་པོ་དང་། གཉིས་པ་དང་། གསུམ་པ་མན་ཆད་རིམ་བཞིན་མེ་བདུན་ཆུ་གཅིག་རླུང་གི་འཇིག །འཇིག་པ་དེ་བར་བསྐལ་ཉི་ཤུར་སྟོང་པར་སྐྱེ་ནས་མི་རྟག་གོ །བཅུད་ཀྱི་འཇིག་རྟེན་ནི་སྤྱིར་ཁམས་གསུམ་ལས། གཟུགས་མེད་ཁམས་བཞི་སྟེ། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད་པ། ཡོད་མིན་མེད་མིན་ནོ། །གཟུགས་ཁམས་བཞི་ཡོད་པ་ལས། གཟུགས་ཁམས་བསམ་གཏན་བཞི་པ་ལའང་སོ་སྐྱེའི་གནས་གསུམ་སྤྲིན་མེད་སྐྱེས། བསོད་ནམས་སྐྱེས། འབྲས་བུ་ཆེ་བ་དེའི་ཕྱོགས་འདུ་ཤེས་མེད་པར་བཅས་པ་དང་། འཕགས་པའི་གནས་ལྔ། མི་ཆེ་བ། མི་གདུང་བ། གྱ་ནོམ་སྣང་བ། ཤིན་ཏུ་མཐོང་། འོག་མིན་ནོ། །བསམ་གཏན་གསུམ་པ་མན་ཆད་ཡས་ནས་མར་ཆགས་པ་ཡིན་ཅིང་། གསུམ་པ་དེ་ལ་གནས་གསུམ་སྟེ། དགེ་ཆུང་། ཚད་མེད་དགེ །དགེ་རྒྱས་སོ། གཉིས་པའང་། འོད་ཆུང་། ཚད་མེད་འོད། འོད་གསལ་གསུམ་མོ། །དང་པོ་ཚངས་རིས། ཚངས་པ་མདུན་ན་འདོན། ཚངས་ཆེན་གསུམ་སྟེ་ཐམས་ཅད་བསྡོོམས་ན་གཟུགས་ཁམས་གནས་རིས་བཅུ་བདུན་ཞེས་བྱའོ། །འདོད་ཁམས་ལ་མཐོ་རིས་ལྷ་མི་གཉིས་ལས། ནམ་མཁའ་ལ་བརྟེན་པའི་ལྷ་འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་བཞི། ས་ལ་བརྟེན་པའི་ལྷ། རི་རབ་ཀྱི་བང་རིམ་མན་ཆད་ལ་བརྟེན་པ་རྒྱལ་ཆེན་རིས་བཞི། རི་རབ་ཀྱི་རྩེ་མོར་གནས་པ་སུམ་ཅུ་རྩ་གསུམ་མོ། །ལྷ་མ་ཡིན་ལྷའི་ཁོངས་སུའང་གཏོགས་ལ་རི་རབ་ཀྱི་ཁོང་གསེང་ན་རིམ་པར་འོད་ལྡན་གྱི་གྲོང་ན་སྒྲ་གཅན་འཛིན། དཀར་འཕྲེང་ན་མགུལ་ཕྲེང་། བརྟན་པའི་གྲོང་ན་རབ་གནོན། ཟབ་པའི་གྲོང་ན་ཐག་བཟང་རིས་གནས་སོ། །འདོད་ཁམས་ངན་སོང་གསུམ་ལས། དུད་འགྲོ་བྱིང་གནས་རྒྱ་མཚོ་ཆེན་པོར་ཀླུ་དང་སྲོག་ཆགས་སྣ་ཚོགས་སུ་གནས་ཤིང་། ཁ་འཐོར་ལྷ་མིའི་ཡུལ་ན་གནས་སོ། །ཡི་དྭགས་འཛམ་བུའི་གླིང་གི་འོག་ཏུ་དཔག་ཚད་ལྔ་བརྒྱས་བཅད་པ་ན་གཤིན་རྗེའི་རྒྱལ་པོ་འཁོར་བཅས་ཀྱི་རྒྱལ་ཁབ་ཡོད་ཅིང་། མཁའ་རྒྱུ་མི་ཡུལ་ནའང་ཡོད་དོ། །དམྱལ་བ་འཛམ་བུའི་གླིང་གི་འོག་དཔག་ཚད་ཉི་ཁྲིའི་མཚམས་ན་མནར་མེད་པ་ཡོད་ཅིང་སྟེང་དུ་བརྩེགས་མར་ཡང་སོས་བར་ཚ་དམྱལ་བརྒྱད་ཡོད་ལ། དེ་དག་གི་གནས་རེ་རེའི་འདབས་འབྱོར་དུ་གྲང་དམྱལ་བརྒྱད་རེ་རེ་ཆུ་བུར་ཅན་སྟེང་དུ་བྱས་ནས་བརྩེགས་ཏེ་པདྨ་ཆེ་ལྟར་གས་པ་ལ་ཐུག་བར་ཡོད་དོ། །ཉེ་འཁོར་མནར་མེད་པའི་མཐའ་མེ་མ་མུར་གྱི་འོབས་སོགས་རེ་རེས་ལྕགས་རི་ལྟར་བསྐོར་ནས་ཡོད་པ་ཕྱོགས་མཚམས་བརྒྱད་ཀྱིས་བཅུ་དྲུག་ཏུ་ཕྱེ་བར་ཡང་མཛོད་འགྲེལ་ལས་བཤད་དོ། །ཉེ་ཚེ་བ་ངེས་མེད་ཀྱི་གནས་ན་ཡོད་དོ། །དེ་ལྟ་བུའི་སེམས་ཅན་རྣམས་ཆགས་པ་ལ། བར་བསྐལ་བཅུ་དགུའི་ཡུན་ཡོད། །ཆགས་པ་ན་མི་རྣམས་ཚེ་ལོ་དཔག་མེད་ཐུབ་པ་ཡིན་ཅིང་། མར་འགྲིབས་ཏེ་ཚེ་ལོ་བཅུ་པར་ཐུག་པ་ལ་ཡ་ཐོག་རིང་མོ། བཅུ་པ་ནས་བརྒྱད་ཁྲི་རུ་འཕེལ། བརྒྱད་ཁྲི་བཅུ་པར་གྱུར་པའི་ཁུག་པ་དེ་འདྲ་བཅོ་བརྒྱད་ནི་བར་ཁུག་བཅོ་བརྒྱད། བཅུ་པ་དཔག་མེད་དུ་འཕེལ་བ་མ་ཐོག་རིང་མོ། མཛོད་ལས་འདི་ཡང་བརྒྱད་ཁྲི་ལས་ལྷག་པར་མི་འཕེལ་བར་བཤད་འདུག །དེ་ཀུན་བསྡོམས་པ་བར་བསྐལ་ཉི་ཤུ་སྟེ། དེ་ཙམ་དུ་འགྱུར་བཞིན་སྐྱེ་བའི་མི་རྟག་པས་གནས། དེ་ནས་བར་བསྐལ་བཅུ་དགུའི་ཡུན་དུ་དམྱལ་བ་ནས་བཟུང་བསམ་གཏན་གསུམ་པའི་བར་གྱི་སེམས་ཅན་ཐམས་ཅད་འཇིག་རྟེན་འདིར་སླར་མི་ལྡོག་པར་འཆི་བར་འགྱུར་བར་སེམས་ཅན་འཇིག །དེ་ནས་བར་བསྐལ་ཉི་ཤུ་རྩ་གཉིས་ཀྱི་ཡུན་ལ་སེམས་ཅན་གྱིས་སྟོང་པར་གྱུར་ནས་མི་རྟག་པར་ཡིན་ནོ། །སྐྱེ་འཇིག་དེ་རྣམས་ནི་རྒྱུན་འགྱུར་བས་མི་རྟག་པར་བཞག་གོ །ཕྲ་བ་ཆོས་ཉིད་ཀྱི་མི་རྟག་པ་ནི། དངོས་པོ་རྣམས་རང་གི་བདག་ཉིད་ཐོབ་པ་ཞིག་ཏུ་ཚུར་སྐྱེ་བའི་ཚེའམ། ཕར་འཇིག་པའི་ཚེ་ཙམ་ལ་འཇོག་ཅིང་། འདི་གཉིས་ཀྱི་ཡུན་ནི་སྐྱེས་བུ་སྟོབས་ལྡན་གྱི་སེ་གོལ་གཅིག་གཏོགས་པ་ན་སྐྱེ་བའ་ིབྱ་བ་ལྟ་བུ་དྲུག་ཅུ་རྩ་ལྔར་འདའ་བར་མངོན་པ་ལས་གསུངས་པས་དེ་དག་ལ་སྐད་ཅིག་མའི་མི་རྟག་ཅེས་བྱ་ཞིང་། འདུས་བྱས་ཡིན་ཚད་ཀྱི་ཆོས་ཉིད་ནི་འདི་ལས་མ་འདས་པར་གནས་སོ། །འབྲས་བུ་སྡུག་བསྔལ་དབྱུང་བའི་འཇིགས་པ་དྲན་པ་ནི། མི་རྟག་པ་ཡིན་ན་ནི་རྐྱེན་གྱིས་ངེས་པར་གནོད་པ་བྱ་རུང་ཞིང་། གནོད་པ་ཡོད་པ་དེ་སྡུག་བསྔལ་དུ་གནས་པ་ཡིན་པས་ན་བཅོམ་ལྡན་འདས་ཀྱིས། གང་མི་རྟག་པ་དེ་སྡུག་བསྔལ་ལོ་ཞེས་གསུངས་སོ། །འཁོར་བའི་སྡུག་བསྔལ་ཐམས་ཅད་ནི་གསུམ་གྱིས་བསྡུས་པ་ཡིན་ཏེ། སེམས་ཙམ་ལྟར་ཐུན་མོང་སྤྱིའི་ལུགས་སུ་བྱས་ན། ཚོར་བ་བདེ་བ་རྒྱུ་དང་བཅས་པ་འགྱུར་བའི་སྡུག་བསྔལ། སྡུག་བསྔལ་རྒྱུ་དང་བཅས་པ་སྡུག་བསྔལ་གྱི་སྡུག་བསྔལ། བཏང་སྙོམས་རྒྱུ་དང་བཅས་པ་འདུ་བྱེད་ཀྱི་སྡུག་བསྔལ། དེ་རྣམས་ཀྱི་བྱེ་བྲག་ནི་བརྒྱད་དེ། དོག་པ་སྐྱེ་བའི་སྡུག་བསྔལ། ན་ཚོད་འགྱུར་བ་རྒ་བའི་སྡུག་བསྔལ། ཁམས་འགྱུར་བ་ན་བའི་སྡུག་བསྔལ། སྲོག་འགྱུར་པ་འཆི་བའི་སྡུག་བསྔལ། ཡིད་དུ་མི་འོང་བ་མི་སྡུག་པ་དང་ཕྲད་པའི་སྡུག་བསྔལ། ཡིད་འོང་སྡུག་པ་དང་བྲལ་བའི་སྡུག་བསྔལ། འདོད་པ་བཙལ་ཏེ་མ་རྙེད་པའི་སྡུག་བསྔལ། ཉེར་ལེན་ཕུང་པོའི་སྡུག་བསྔལ་ཏེ་བརྒྱད་པོ་དེ་ཡང་གསུམ་དུ་གནས་པ་ནི། སྡུག་པ་དང་བྲལ་བ་དང་། འདོད་པ་བཙལ་ཏེ་མ་རྙེད་པའི་སྡུག་བསྔལ་གཉིས་འགྱུར་བའི་སྡུག་བསྔལ་ཡིན་ཅིང་། ཉེར་ལེན་ཕུང་པོའི་སྡུག་བསྔལ་འདུ་བྱེད་ཀྱི་སྡུག་བསྔལ། ལྷག་མ་ཐམས་ཅད་སྡུག་བསྔལ་གྱི་སྡུག་བསྔལ་ཡིན་ནོ། །དེ་ཡང་དབུ་མ་ལྟར་ན་བདག་མེད་ལ་བདག་ཏུ་འཛིན་པ་དང་། སྡུག་བསྔལ་ལ་བདེ་བར་འཛིན་པ་དང་བཅས་པ་སྡུག་བསྔལ་གྱི་སྡུག་བསྔལ། མི་རྟག་པ་ལ་རྟག་པར་འཛིན་པ་འགྱུར་བའི་སྡུག་བསྔལ། སྟོང་པ་ལ་དངོས་པོར་འཛིན་པ་འདུ་བྱེད་ཀྱི་སྡུག་བསྔལ་དུའང་འཇོག་གོ །དེ་དག་ལ་ཀུན་རྫོབ་ཀྱི་སྡུག་བསྔལ་དུ་གསུངས་ཤིང་། དོན་དམ་པའི་སྡུག་བསྔལ་ནི། སྡུག་བསྔལ་སྟོང་པ་བདག་མེད་མི་རྟག་བཞི་རུ་མངོན་པ་ཀུན་བཏུས་ལས་གསུངས་སོ། །དེ་ལྟ་ན་ཁམས་གསུམ་ནི་སྡུག་བསྔལ་ལས་མ་འདས་ཏེ། ངན་སོང་གསུམ་ནི་སྡུག་བསྔལ་གྱི་སྡུག་བསྔལ་ཤས་ཆེ་བས་མནར། མི་རྣམས་དང་། འདོད་ལྷ་དྲུག་དང་། བསམ་གཏན་གསུམ་པ་མན་ཆད་ནི་འགྱུར་བའི་སྡུག་བསྔལ་ཤས་ཆེ་བས་མནར། བསམ་གཏན་བཞི་པ་དང་གཟུགས་མེད་བཞི་ནི་འདུ་བྱེད་ཀྱི་སྡུག་བསྔལ་གྱིས་མནར་བས་སོ། །འདུས་མ་བྱས་མྱང་འདས་འཇིགས་པ་དྲན་པ་ལ། ཉན་ཐོས་རྣམས་ཀྱིས་ནི། ཀུན་ཏུ་བཏགས་པའི་བདག་མུ་སྟེགས་པས་སེམས་ཅན་རྟག་གཅིག་རང་དབང་བ་ཞིག་ཡོད་པར་འདོད་པ་དང་། ལྷན་སྐྱེས་བདག་གྲུབ་མཐར་མ་ཞུགས་པ་བྱ་དང་རི་དྭགས་སོགས་ཀྱིས་ཀྱང་རྟག་ཏུ་ངའོ་སྙམ་པ་དང་ངའི་འོ་སྙམ་པའི་ང་དང་ང་ཡིར་འཛིན་པའི་ཡུལ་གང་ཟག་གི་བདག་གཅིག་ཡོད་པར་ལྟ་བ་དག་ཕུང་པོ་ལ་གཅིག་ཏུ་བྲལ་གྱིས་བཙལ་ཚེ་མེད་པར་མཐོང་། ཆ་ཤས་དུ་མ་ཚོགས་པའི་ཕུངས་ཁམས་སྐྱེ་མཆེད་རྫུན་སྣང་སྒྱུ་མ་ལྟ་བུ་ཀུན་རྫོབ་ཏུ་ཡོད་ཅིང་། ཕུང་སོགས་ཀྱི་རྩོམ་བྱེད་གཟུང་བ་བེམ་ཆོས་རྡུལ་ཕྲན་ཆ་མེད་དང་། འཛིན་པའི་ཤེས་པ་སྐད་ཅིག་ཆ་མེད་ཙམ་དོན་དམ་དུ་ཡོད་པར་ལྟ་བས། ཆོས་ཀྱི་བདག་མེད་རགས་པ་ཙམ་མཐོང་སྟེ་ཕུང་སོགས་རྫུན་པར་མཐོང་བས་སོ། །ཕྲ་བ་མ་རྟོགས་ཏེ་རྡུལ་ཤེས་ཆ་མེད་འདོད་པས་སོ། །ཆོས་བདག་རགས་པར་རྟོགས་པས་ཉོན་མོངས་མ་ལུས་པར་སྤོང་ནུས་ཏེ། ཉོན་མོངས་རྣམས་ནི་ཚོགས་པ་ལ་དམིགས་ཤིང་བརྟེན་ནས་སྐྱེ་བ་ཡིན་ལ་ཚོགས་པ་ནི་མེད་སྣང་གཟུགས་བརྙན་ལྟ་བུར་རྟོགས་པས་སོ། །དེའི་ཕྱིར་འཇུག་འགྲེལ་ལས་ཀྱང་། ཆོས་བདག་རྫོགས་པར་མ་རྟོགས་ཤིང་ཉོན་མོངས་སྤོང་ཐབས་ཙམ་རྟོགས་པར་གསུངས་པའི་ཐབས་ཙམ་ཞེས་པ་ནི་དེ་ཡིན་ནོ། །རང་སངས་རྒྱས་ཀྱིས་ནི་གཟུང་བ་མེད་པར་རྟོགས་ལ་འཛིན་མེད་མ་རྟོགས་སོ། །དེ་ལྟ་ན་ཉན་རང་གི་མྱང་འདས་ནི་ཆོས་ཀྱི་བདག་མེད་རྫོགས་པར་མ་རྟོགས་པས་ཉོན་མོངས་ཅན་མ་ཡིན་པའི་མ་རིག་པ་དངོས་པོ་མེད་པའི་འཛིན་པ་ཤེས་སྒྲིབ་ཀྱི་དམིགས་པ་དང་བཅས་པའི་ས་ལ་གནས་པས་རང་དོན་ཡང་མཐར་མ་ཕྱིན་ལ། འཁོར་བ་མ་སྟོང་པར་སེམས་ཅན་གཞ ན་གྱི་དོན་དུ་གནས་པར་འདོད་པའི་སྙིང་རྗེ་ཆེན་པོ་དང་བྲལ་བ་ཡིན་པས་ཐེག་ཆེན་ནས་འཇིགས་པ་བསྐྱེད་དགོས་ཤིང་། འདིའི་ཚུལ་རྒྱས་པ་སྐྱབས་འགྲོ་བདུན་ཅུ་པའི་ལུང་བཞིན་ཁོ་བོས་བརྩམས་པ་ཟླ་བའི་ཕྲེང་མཛེས་སུ་བལྟ་བར་བྱའོ། །འཇིགས་ལ་བརྟེན་ཏེ་སྙིང་རྗེ་ཆེན་པོ་བསྐྱེད་པ་ལ། ཐེག་ཆེན་སྐྱབས་འགྲོའི་རྒྱུན་སྙིང་རྗེ་ཡིན་པས་སྙིང་རྗེ་བསྐྱེད་དགོས་ཤིང་། སྙིང་རྗེ་དེ་སྡུག་བསྔལ་གྱི་འཇིགས་པ་བྲེལ་འདོད་ཚད་མེད་བཞི་རུ་གནས་པ་དེ་རྒྱུད་ལ་ལེགས་པར་བསྐྱེད་པ་ལ་ཐོག་མར་སེམས་ཅན་རང་གི་མ་ཡིན་པ་ལ་ཡིན་པའི་ངེས་ཤེས་གཏིང་ནས་སྐྱེ་དགོས་པས་དེའི་ཚུལ་ནི། སེམས་ཅན་གཅིག་ཁོ་ནས་རང་གི་མ་བྱས་པའི་གྲངས་ཀྱི་མཐའ་ལ་ཐུག་པ་མེད་དེ། ཇི་སྐད་དུ། མྱ་ངན་ལས་འདས་པའི་མདོ་ལས། ས་ཆེན་པོ་འདི་རིལ་བུ་སྲན་མ་ཙམ་དུ་བྱས་ནས་སེམས་ཅན་གཅིག་གིས་བདག་གི་མ་བྱས་པའི་གྲངས་བགྲངས་ན་ས་ཆེན་པོ་ནི་ཟད་པར་འགྱུར་གྱིས། སེམས་ཅན་གཅིག་གིས་མ་བྱས་པའི་གྲངས་ནི་ཟད་པར་མི་འགྱུར་རོ། །ཞེས་གསུངས་པའི་ལུང་གིས་གྲུབ་ཅིང་། རིགས་པས་ཡང་འགྲུབ་སྟེ། ད་ལྟར་གྱི་སེམས་ཅན་ཇི་སྙེད་པ་རང་གི་མ་ངེས་པར་ཡིན་ཏེ། བྱེ་བྲག་གི་རྒྱུན་ཇི་ལྟ་བུར་གྱུར་ཀྱང་མ་བྱེད་དུས་ཀྱི་སེམས་ཅན་ཙམ་གྱི་སྤྱི་རྒྱུན་དེ་ལ་གནས་པས་ན། དཔེ་བུ་ལོ་བརྒྱད་ཅུ་པའི་མདུན་ན་མ་ལོ་བརྒྱ་པ་གནས་པ་ལྟ་བུའམ་མཚན་གྱུར་ནས་ཕོ་རུ་གནས་པ་བཞིན་ནོ། །འདི་འདྲའི་ལུང་རིགས་དུ་མས་སེམས་ཅན་ཐམས་ཅད་མ་ཉིད་ཡིན་པ་ངེས་པར་བྱས་ནས། དེའི་དྲིན་དྲན་དགོས་པས། བུའི་ཕྱིར་དུ་རང་གི་སྲོག་འདོར་ཕོད་པའི་བྱམས་སེམས་ཀྱི་ཟས་ནུ་ཞོ་མངར་མོས་གསོས། ཤའི་དྲོད་ཀྱིས་གོས་བཞིན་དུ་གཡོག །སྐྱུག་བྲོ་བའི་མི་གཙང་བ་ཡང་ཁ་ལག་གིས་བསལ། ལེགས་ན་དགའ་ཞིང་ཉེས་ན་མི་དགའ་བའི་བསམ་བཟང་གིས་རང་ནུས་ཀྱི་འབད་པས་རྟག་ཏུ་སྐྱོངས་བས་དྲིན་ཤིན་ཏུ་ཆེ་བ་ལ་བསམ་མོ། །དེ་ལྟར་དྲིན་ཆེ་ཡང་དྲིན་མི་གཟོ་བ་འཇིག་རྟེན་ནའང་སྐྱེ་བོ་མ་རབས་ཀྱི་ལུགས་ཡིན་ལ། འབྲས་བུ་རྣམ་སྨིན་ཡང་། ས་ཆེན་པོ་འདི་ཁུར་དུ་བྱུང་ན་སུས་ཀྱང་ཁུར་མི་ནུས་པའི་ཁུར་ཆེན་པོར་སྣང་ཡང་། དྲིན་ལན་མི་འཇལ་བའི་སྡིག་པའི་རྣམ་སྨིན་གྱི་ཁུར་སྡུག་བསྔལ་སྣ་ཚོགས་ཕྱི་མར་མྱོང་དགོས་པའི་ཁུར་བཟོད་དཀའ་ཆེན་པོ་ནི་གཞན་ན་མེད་པར་གསུངས་པ་ལ་བསམ་དགོས་ཤིང་། དྲིན་ལན་འཇིག་རྟེན་པའི་ལེ་ལན་གྱིས་འཇལ་བས་མི་འོང་གིས་སེམས་ཅན་ཐམས་ཅད་འཁོར་བ་ལས་ངེས་པར་ཐར་བར་བྱེད་པའི་སྒོ་ནས་དྲིན་གཟོ་བ་ཡིན་ནོ། །དེ་ལྟ་བུའི་སེམས་ཅན་ལ་ཉེས་པ་བཅུ་ཡོད་པ་ཤེས་ནས་སྙིང་རྗེ་སྐྱེ་སྟེ་ཉོན་མོངས་རབ་ཏུ་འབར་བ་དང་། སྡིག་པའི་བཤེས་དང་གྲོགས་ཀྱི་དབང་དུ་སོང་བ་དང་། ངན་སོང་གསུམ་དང་མཐོ་རིས་ཀྱི་སྡུག་བསྔལ་མྱོང་བ་དང་། སྡོམ་མིན་ལ་གནས་པ་དང་། འཁོར་བ་ལ་དགའ་ཞིང་ཐར་འདོད་ཏིལ་ཙམ་མེད་པ་དང་། མུ་སྟེགས་རྟག་ཆད་ཀྱི་ལྟ་བས་བཅིངས་པ་དང་། བསམ་གཏན་གྱི་བདེ་བ་ལ་ཆགས་པ་དང་། སྟོང་ཉིད་མ་རྟོགས་ཀྱང་རྟོགས་པར་རློམ་པ་མངོན་པའི་ང་རྒྱལ་ཅན་དང་། ལམ་གོལ་ཞུགས་པ་ཉན་རང་དང་བྱང་སེམས་སྟོབས་ཆུང་བ་སྟེ་བཅུ་མདོ་རྒྱན་ལས་གསུངས་སོ། །དེའི་ཐབས་སེམས་ཅན་ཚད་མེད་པ་ལ་དམིགས་པ། བསོད་ནམས་ཡེ་ཤེས་ཀྱི་ཚོགས་ཚད་མེད་པའི་གཞིར་གྱུར་པ། ཡོན་ཏན་གྱི་ཆོས་ཚད་མེད་པ་ཐོབ་པའི་རྒྱུར་གྱུར་པ། ཡེ་ཤེས་ཚད་མེད་པའི་སྤྱོད་ཡུལ་དུ་གྱུར་པས་ཚད་མེད་པ་ཞེས་ཟེར་བའི་ཚད་མེད་ཀྱི་ངེས་ཚིག་དང་ལྡན་པ་བཞི་པོ་སྒོམ་པར་བྱ་དགོས་ལ། དེ་ཡང་གྲངས་ངེས་ནི་གནོད་སེམས་ཀྱི་གཉེན་པོ་བྱམས་པ། གཞན་ལ་སྡུག་བསྔལ་གཏོད་པར་བྱེད་པའི་རྣམ་འཚེའི་གཉེན་པོ་སྙིང་རྗེ། གཞན་བདེ་སྐྱིད་ལྡན་པ་ལ་མི་དགའ་བའི་གཉེན་པོ་དགའ་བ། ཉོན་མོངས་ཆགས་སྡང་གི་གཉེན་པོ་བཏང་སྙོམས་ཡིན་ཅིང་། མཚན་ཉིད་ནི་ཁྱད་པར་བཞི་ལྡན་ཏེ་མི་མཐུན་པའི་ཕྱོགས་བཞི་སྤང་བ་སྤང་བའི་དང་། རྣམ་པར་མི་རྟོག་པའི་ཡེ་ཤེས་ལྡན་པ་གྲོགས་ཀྱི་དང་། གང་ཟག་ཆོས་དམིགས་མེད་གསུམ་ལ་འཇུག་པ་དམིགས་པའི་དང་། ཐེག་པ་གསུམ་ལ་སེམས་ཅན་སྨིན་པར་བྱེད་པ་བྱེད་ལས་ཀྱི་ཁྱད་པར་རོ། །རྒྱུ་ནི་བཞི་སྟེ་རང་རང་གི་ཡུལ་བཞི་དམིགས་རྐྱེན་རིགས་སམ་ཁམས་རྒྱུའི་རྐྱེན། །ཚད་མེད་སྟོན་པའི་དགེ་བའི་བཤེས་གཉེན་བདག་རྐྱེན། སྙིང་རྗེའི་བག་ཆགས་དང་ལྡན་པའི་སེམས་སེམས་བྱུང་འགགས་མ་ཐག་པ་དེ་མ་ཐག་རྐྱེན་དེ་གཞི་ལས་སྐྱེ་དགོས་སོ། །ངོ་བོ་ནི་གསུམ་ཡིན་ཏེ། བྱམས་སྙིང་རྗེ་གཉིས་ཞེ་སྡང་མེད་པ། དགའ་བ་ཡིད་བདེ་བ། བཏང་སྙོམས་མ་ཆགས་པའི་ངོ་བོ་ཅན་ནོ། །སྒོམ་ཚུལ་ནི། རེ་རེ་ལའང་དམིགས་རྣམ་གཉིས་ལས། བྱམས་པའི་དམིགས་ཡུལ། བདེ་བ་རྒྱུ་འབྲས་མེད་པ་བར་མར་གནས་པའི་སེམས་ཅན། རྣམ་པ་འབྲས་བུ་བདེ་བ་དང་ལྡན་ཅིང་རྒྱུ་དག་པ་དང་ལྡན་པར་ཤོག་སྙམ་པ། སྙིང་རྗེའི་དམིགས་ཡུལ། སྡུག་བསྔལ་རྒྱུ་འབྲས་ལ་སྤྱོད་པའི་སེམས་ཅན། རྣམ་པ་འབྲས་བུ་སྡུག་བསྔལ་བྲལ་ཞིང་རྒྱུ་སྡིག་པ་བྲལ་བར་ཤོག་སྙམ་པ། དགའ་བའི་དམིགས་ཡུལ། བདེ་བ་རྒྱུ་འབྲས་ལ་སྤྱོད་པའི་སེམས་ཅན། རྣམ་པ་དེ་གཉིས་ལྡན་པ་དེ་དང་རྟག་ཏུ་མི་འབྲལ་བར་ཤོག་བསམ་པ། བཏང་སྙོམས་ཀྱི་དམིགས་ཡུལ། ཆགས་སྡང་གི་ཉོན་མོངས་བག་ཆགས་དང་བཅས་པ་ཅན་གྱི་སེམས་ཅན། རྣམ་པ་ཉོན་མོངས་བག་ཆགས་དང་བཅས་པ། དེ་དག་བྲལ་ནས་སེམས་ཆགས་སྡང་མེད་པའི་སྙོམས་པ་ལ་གནས་པར་ཤོག་བསམ་པའོ། །དམིགས་པའི་ཁྱད་པར་ལས་དབྱེ་བ་གསུམ་སྟེ་གང་ཟག་གི་བདག་མེད་པ་ལ་བདག་འཛིན་གྱིས་བཅིང་པ་ལ་དམིགས་པ་སེམས་ཅན་ལ་དམིགས་པའི་དང་། ཆོས་མི་རྟག་པ་ལ་རྟག་པར་འཛིན་པས་བཅིང་པ་ལ་དམིགས་པ་ཆོས་ལ་དམིགས་པའི་དང་། རང་བཞིན་མེད་པ་ལ་དངོས་པོར་འཛིན་པས་བཅིང་པ་ལ་དམིགས་པ་དམིགས་པ་མེད་པའི་སྙིང་རྗེ་སོགས་བཞི་སྐྱེས་པའོ། །དེ་རྣམས་ཀྱི་སྙིང་རྗེ་བཏང་སྣོམས་གཉིས་ནི་ཉེ་བ་དང་བྲལ་འདོད་ཡིན་པས་ཕན་པའི་བསམ་པ་ཡིན་ལ། བྱམས་པ་དགའ་བ་གཉིས་ནི། ལེགས་པ་དང་ལྡན་འདོད་ཡིན་པས་བདེ་བའི་དགོངས་པ་ཡིན་ནོ། །འབྲས་བུ་ནི་ལྔ་སྟེ་སེམས་ཅན་གྱི་དོན་དུ་འདོད་ཁམས་སུ་སྐྱེ་བ་རྣམ་སྨིན་གྱི་དང་། ཚོགས་གཉིས་རྫོགས་པར་བྱེད་པ་བདག་པོའི་དང་། ཚེ་རབ་ཀུན་ཏུ་ཚད་མེད་སྒོམ་པ་དང་མི་འབྲལ་བ་རྒྱུ་མཐུན་གྱི་དང་། སེམས་ཅན་སྨིན་པར་བྱེད་པ་སྐྱེས་བུ་བྱེད་པའི་དང་། མི་མཐུན་ཕྱོགས་བཞི་སྤོང་བ་བྲལ་བའི་འབྲས་བུ་སྟེ་འདི་དག་གི་ལུང་མདོ་སྡེ་རྒྱན་ལས་ཤེས་པར་བྱའོ། །ཐུན་མོང་གི་ལྷན་ཅིག་བྱེད་རྐྱེན་ཡོན་ཏན་དྲན་པས་སྐྱབས་སུ་འགྲོ་དགོས་པས། །དེ་ཡང་མདོ་སྡེ་དཀོན་མཆོག་སྤྲིན་སོགས་ལས་གསུངས་པ་དཀོན་མཆོག་རྗེས་སུ་དྲན་པའི་མདོ་བཤད་པ་ལ། མཚམས་སྦྱར་བའི་ཚིག་གིས་ཡོན་ཏན་དྲན་པར་བསྐུལ་བ་དང་། རྣམ་བཞག་བསྟན་པའི་ཚིག་གིས་ཡོན་ཏན་དྲན་པ་བསྐྱེད་པ་གཉིས་ལས། དང་པོ་ནི་དཀོན་མཆོག་གསུམ་གྱི་ཡོན་ཏན་ནི་འདི་ལྟར་དྲན་པར་བྱ་དགོས་སོ་ཞེས་གསུངས་པའོ། །གཉིས་པ་ལ། སངས་རྒྱས་དང་ཆོས་དང་དགེ་འདུན་དཀོན་མཆོག་གི་ཡོན་ཏན་དྲན་ཚུལ་གསུམ་ལས། དང་པོ་ལ། ཀུན་མཁྱེན་རོང་ཟོམ་པཎྜི་ཏའི་ཞལ་ནས། ཡོན་ཏན་གྱི་མཚན་གྱི་རྣམ་གྲངས་ཀྱི་བརྗོད་པ་ཞེས་དང་། རྣམ་པར་གྲོལ་བའི་ཡེ་ཤེས་ཀྱི་སྐུ་དང་། བདག་ཉིད་རྩ་བའི་སྐུ་དང་། འཕྲུལ་བ་སྤྲུལ་བའི་སྐུ་དང་བཅས་པ་ཞེས་གསུངས་པ་ཇི་བཞིན་དུ། རྗོད་བྱེད་མཚན་གྱི་རྣམ་གྲངས་ཀྱི་ཡོན་ཏན་དྲན་པ་དང་། བརྗོད་བྱ་དོན་གྱི་ངོ་བོས་ཡོན་ཏན་དྲན་ཚུལ་གཉིས་ལས། དང་པོ་ནི། མ་རིག་པའི་གཉིད་སངས་ཤིང་ཤེས་བྱ་ལ་བློ་གྲོས་རྒྱས་པ་དང་། བདུད་བཞི་བཅོམ་ལ་ལེགས་པ་དྲུག་ལྡན་ཅིང་། སྲིད་ཞིའི་མཐའ་ལས་འདས་པ་དང་། ཆོས་ཉིད་དེ་བཞིན་ཉིད་ཀྱི་གནས་ལུགས་དང་མཐུན་པར་གཤེགས་པ་དང་། དགྲ་སྒྲིབ་གཉིས་ཡོངས་སུ་བཅོམ་པ་དང་། སྤང་རྟོགས་ཡང་དག་པར་རྫོགས་པའི་སངས་རྒྱས་དང་། སྔོན་གནས་རྗེན་དྲན། འཆི་འཕོ་སྐྱེ་བ་མཁྱེན་པ། ཟག་པ་ཟད་པ་སྟེ་རིག་པ་གསུམ་དང་ལྡན་ཅིང་ཕུན་སུམ་ཚོགས་པ་བཞི་ཞབས་སུ་ལྡན་པ། དེ་ཡང་སྤྱོད་ཡུལ་མ་ཡིན་པའི་གནས་ལྔ་རྒྱལ་པོའི་ཕོ་བྲང་། ཤན་པའི་ཁྱིམ། གདོལ་པའི་ཁྱིམ། སྨད་འཚོང་མའི་གནས། ཆང་འཚོང་མའི་གནས་སྤང་པས་སྤྱོད་ཡུལ་ཕུན་སུམ་ཚོགས་པ། ཚུལ་ཁྲིམས་ཏིང་འཛིན་གྱིས་བསྡམ་པའི་སྤྱོད་པ་ཕུན་སུམ་ཚོགས་པ། སྐྱོན་གྱི་ཆ་ཐམས་ཅད་བྲལ་བའི་བཟློག་པ་ཕུན་སུམ་ཚོགས་པ། ཡོན་ཏན་ཀུན་ལ་མངའ་བརྙེས་པས་ཆོ་ག་ཕུན་སུམ་ཚོགས་པའོ། །སྡུག་བསྔལ་དང་ལམ་མཐོང་སྤངས་ཀྱི་ཉོན་མོངས་སྤང་པས་ལེགས་པར་གཤེགས། ཀུན་འབྱུང་དང་འགོག་པའི་མཐོང་སྤངས་སྤངས་པས་མི་ལྡོག་པར་གཤེགས། སྒོམ་སྤངས་ཤེས་སྒྲིབ་ཐམས་ཅད་སྤངས་པས་མ་ལུས་པར་གཤེགས་པ་སྟེ་སྤངས་པའི་ཡོན་ཏན་གསུམ། ཡང་དེ་ཁོ་ན་ཉིད་ཁྱད་པར་དུ་མཁྱེན་པས་ལེགས་པར་གཤེགས། མི་འགྱུར་བརྟན་པའི་ཁྱད་པར་དུ་མཁྱེན་པ་ཡིན་པས་མི་ལྡོག་པར་གཤེགས། ཤེས་བྱ་མ་ལུས་པ་ཁྱད་པར་དུ་མཁྱེན་པས་མ་ལུས་པར་གཤེགས་པ་སྟེ་རྟོགས་པའི་ཡོན་ཏན་གསུམ་དང་ལྡན་པས་བདེ་བར་གཤེགས་པའོ། །དེ་དག་ནི་རང་དོན་ཕུན་ཚོགས་ཀྱི་མཚན་བདུན་ཡིན་ནོ། །འཇིག་རྟེན་ཀུན་རྫོབ་ཀྱི་བདེན་པ་ཕྲ་རགས་མ་ལུས་པ་མཁྱེན་པ་དང་། སྐྱེས་བུ་གསུམ་པོའི་རྒྱུད་ཀྱི་ཉེས་པ་འདུལ་བའི་སྒོ་ནས་མྱ་ངན་འདས་པ་ལ་ཁ་ལོ་སྒྱུར་བའི་ཐབས་མཁས་བླ་ན་མེད་པ་ཅན་དང་། འགྲོ་བའི་གཙོ་བོ་ལྷ་དང་མི་རུ་བཅས་པའི་སེམས་ཅན་རྣསམ་ལ་སྙིང་རྗེ་ཆེན་པོས་སྦ་གསང་མེད་པར་ཆོས་ལེགས་པ་གསུངས་ཤིང་མཁྱེན་པའི་ཡེ་ཤེས་ཀྱི་སྒྲོ་སྐུར་མེད་པའི་བདེན་པར་གསུངས་པས་ལམ་གྱི་སྟོན་པ་མཆོག་ཏུ་གྱུར་པ་སྟེ། གཞན་དོན་ཕུན་སུམ་ཚོགས་ཀྱི་མཚན་གསུམ་ཡིན་ལ། དེ་ལྟ་བུ་དང་ལྡན་པ་ནི་སངས་རྒྱས་བཅོམ་ལྡན་འདས་སོ། །གཉིས་པ་ལ། རྒྱས་པར་བཤད་པར་དང་། དོན་བསྡུ་བ་གཉིས་ལས། དང་པོ་ལ་གཟུགས་སྐུའི་ཡོན་ཏན་དྲན་པ་དང་། ཆོས་སྐུའི་ཡོན་ཏན་དྲན་པ་གཉིས་ལས། དང་པོ་ལའང་། གཟུགས་སྐུའི་རྒྱུ་ཕུན་ཚོགས་ཀྱི་ཡོན་ཏན་དྲན་པ་དང་། གཟུགས་སྐུ་རང་གི་ངོ་བོའི་ཡོན་ཏན་དྲན་པ་གཉིས་ཀྱི། དང་པོ་ནི། སྤྱིར་གཟུགས་སྐུའི་རྒྱུ་བསོད་ནམས་ཀྱི་ཚོགས་ཡིན་ཅིང་དེ་ནི་ཕ་རོལ་ཕྱིན་པ་བཞི་ཡིན་ནོ། །ཆོས་སྐུའི་རྒྱུ་ཡེ་ཤེས་ཀྱི་ཚོགས་ཡིན་ཅིང་དེའང་འཇུག་འགྲེལ་དུ། བསམ་གཏན་ཤེས་རབ་ཡེ་ཤེས་ཀྱི་ཚོགས་ཡིན། །ཞེས་གསུངས་པ་ལྟར་ཕར་ཕྱིན་གཉིས་ཡིན་ནོ། །དེ་དག་ངེས་པར་བྱས་ནས་གཞུང་དོན་ལ། དེ་བཞིན་གཤེགས་པ་དེ་ནི་སྦྱིན་པའི་ཕ་རོལ་ཕྱིན་པ་བསོད་ནམས་དག་གི་རྒྱུ་མཐུན་པའི་འབྲས་བུར་གྲུབ་པས་རང་ཉིད་ནམ་མཁའ་མཛོད་ཀྱི་ལོངས་སྤྱོད་ལ་མངའ་བརྙེས་ཤིང་། །གཞན་ལ་སྦྱིན་པ་གསུམ་འབད་མེད་དུ་བྱིན་པས་རེ་བ་རྫོགས་པར་བྱེད་པ། ཚུལ་ཁྲིམས་ཀྱི་ཕ་རོལ་ཕྱིན་པས་རང་གི་དགེ་རྩ་ཐམས་ཅད་གེགས་མེད་དུ་སྨིན་ཅིང་གཞན་གྱིས་སངས་རྒྱས་དེ་ལ་བརྟེན་པའི་དགེ་རྩ་རྣམས་སངས་རྒྱས་མ་ཐོབ་པར་དུ་ཆུད་མི་ཟ་བ། བཟོད་པའི་ཕ་རོལ་ཕྱིན་པས་བཟོད་པ་གསུམ་གྱིས་རབ་ཏུ་བརྒྱན་ཅིང་མཛེས་པ། བརྩོན་འགྲུས་གྱི་ཕ་རོལ་ཕྱིན་པས་བསོད་ནམས་དགེ་ཆོས་ཟད་མི་ཤེས་པ་ཉིད་ཀྱི་གཏེར་རྣམས་ཀྱི་ལྡན་པའི་གཞིར་གྱུར་པའོ། །གཉིས་པ་ལ། ལོངས་སྐུའི་ཡོན་ཏན་དྲན་པ་དང་། སྐུལ་སྐུའི་ཡོན་ཏན་དྲན་པ་གཉིས་ལས། དང་པོ་ལ་གསུམ་ལས། མཚན་དཔེས་སྤྲས་པ་སྐུའི་ཡོན་ཏན་ལ། ཐུགས་རྒྱུད་ན་བྱམས་སོགས་ཀྱི་ཡོན་ཏན་ཡོད་པའི་དཔེ་ཕྱི་རོལ་ན་བཀྲ་བའ་ིདཔེ་བྱད་བརྒྱད་ཅུ་སྐུའི་བྱེ་བྲག་གི་ཆོས་ཟེའུ་འབྲུ་ལྟ་བུ་བཟང་པོ་ཞེས་མཛེས་པ་རྣམས་ཀྱིས་སྤྲས་པ་ཕྱི་རོལ་ནས་འཁོར་དང་ལོངས་སྤྱོད་སོགས་ཀྱི་འབྱོར་པ་ཕུན་སུམ་ཚོགས་པའི་རྟགས་ཅན། སྐུའི་སྤྱིའི་ཆོས་མཚན་སུམ་ཅུ་སོ་གཉིས་རྣམས་ཀྱི་མེ་ཏོག་ཆེར་རྒྱས་པ་སྟེ་གཙུག་ཏོར་དང་མཛོད་སྤུ་མ་གཏོགས་པ་འདི་དག་འཁོར་ལོས་སྒྱུར་རྒྱལ་རྣམས་ལ་ཆ་མཐུན་ཙམ་ཡོད་ཀྱང་། སངས་རྒྱས་ཀྱི་མཚན་ནི་ཁྱད་པར་འཕགས་པ་གསུམ་གྱིས་འཕགས་པ་ཡིན་ཏེ། ཡུལ་རང་གི་གོ་ས་མ་འཆོལ་བ་ནི་གནས་པ་དང་། ངོ་བོ་ཤིན་ཏུ་གསལ་བར་ཡོད་པ་དང་། གྲངས་མ་ལུས་ཡོངས་སུ་རྫོགས་པར་ཡོད་པའོ། །དཔེ་བྱད་བརྒྱད་ཅུ་ལས། དཀུ་ཟླུམ་པ་ནི་ལྟེ་འོག་ཟླུམ་པའོ། །སྐབས་ཕྱིན་པ་ནི་རྐེད་སྐབས་ཕྱེད་པའོ། །མ་རྙོངས་པ་ནི་ཧ་ཅང་མི་རིང་བའོ། །ཕྱང་ངེ་བ་ནི་མཐོ་དམན་མེད་པའོ། །བིམ་པ་ནི་ཤིང་ཏོག་དམར་པོ་ཞིག་ཡིན་ནོ། །མི་གཤོར་བ་ནི། དབུ་སྐྲ་གྱེན་དུ་བརྫེས་པ་མ་ཡིན་པའོ། །གཞན་གོ་སླའོ། །མཚན་རྣམས་ལས། བདུན་དག་མཐོ་བ་ནི། ཕྱག་གི་བོལ་གཉིས། ཞབས་ཀྱི་བོལ་གཉིས། དཔུང་པ་གཉིས། ལྟག་པ་དང་བདུན་ནོ། །ཤིང་ནྱ་གྲོ་དྷ་ལྟར་ཆུ་ཞེང་གབ་པ་ནི་ལྟེ་བ་ཡན་ཆད་དང་མན་ཆད་ཚད་མཉམ་པའོ། །འདི་དག་ཞིབ་པར་སློབ་དཔོན་སེང་གེ་བཟང་པོའི་ཤེར་ཕྱིན་གྱི་འགྲེལ་ཆུང་དོན་གསལ་ལས་རྟོགས་པར་བྱའོ། །བརྡས་གོ་བ་གསུང་གི་ཡོན་ཏན་ནི། ལོངས་སྤྱོད་རྫོགས་པའི་དགྱེས་པ་ཚུལ་དྲུག་གི་སྤྱོད་པ་ཐམས་ཅད་གདུལ་བྱའི་ཡུལ་བྱང་སེམས་འཕགས་པ་རྣམས་ཀྱི་རྒྱུད་དང་རན་པར་མཐུན་པས་འཇུག་པ། སྐུ་དེ་མཐོང་བ་ན་ས་བཅུའི་མི་མཐུན་ཕྱོགས་ཀྱི་སྒྲིབ་པ་རྣམས་མེད་པར་བྱེད་པ། ས་གོང་མ་ཐོབ་པར་འདོད་པའི་དད་པས་མོས་པའི་འཕགས་པ་རྣམས་ལ་ས་ནས་སར་འཕར་བའི་མངོན་པར་དགའ་བ་བསྐྱེད་པའོ། །བླ་ན་མེད་པ་ཐུགས་ཀྱི་ཡོན་ཏན་ནི། མི་འཇིགས་བཞི་དང་ལྡན་པའི་ཤེས་རབ་མུ་སྟེགས་གཞན་གྱིས་ཟིལ་གྱིས་མི་ནོན་པ་མངའ་བ་སྟེ། དེ་ཡང་རང་དོན་ངས་ནི་ཤེས་བྱ་ཐམས་ཅད་མངོན་པར་བྱང་ཆུབ་པར་རྟོགས་སོ་ཞེས་ཡེ་ཤེས་དང་། ངས་ནི་ཟག་པ་ཐམས་ཅད་ཟད་པར་བྱས་སོ་ཞེས་སྤང་བ་གཉིས་ཞལ་གྱིས་བཞེས་པ་དང་། གཞན་དོན་དུ། ཐེག་པ་གསུམ་གྱི་ལམ་འདི་འཁོར་བ་ལས་ངེས་པར་འབྱིན་པའི་ལམ་ཡིན་ནོ་ཞེས་ལམ་དང་། ཉོན་མོངས་པ་འདི་དག་ཐར་པའི་བར་དུ་གཅོད་པའི་ཆོས་ཡིན་ནོ་ཞེས་གེགས་སུ་སྟོན་ཅིང་ཞལ་བཞེས་མཛད་པ་ལ་འཇིག་རྟེན་ན་དཀའ་ཐུབ་ཀྱིས་ང་རྒྱལ་བ་དགེ་སྦྱོང་ངམ། རིགས་ཀྱི་ང་རྒྱལ་ཅན་བྲམ་ཟེའམ། ལོངས་སྤྱོད་ཀྱིས་ང་རྒྱལ་བ་ལྷའམ། ནུས་པས་ང་རྒྱལ་ཅན་བདུད་དམ། ཆགས་བྲལ་གྱིས་ང་རྒྱལ་བ་ཚངས་པའམ། སྐྱེ་དགུའི་ཚོགས་གཞན་སུས་ཀྱང་ཆོས་དང་མཐུན་པར་རྒོལ་བའི་རྒྱུ་ཡང་དག་པར་རྗེས་སུ་མ་མཐོང་བས། ལུས་བདེ། ངག་བག་ཚ་བ་མེད། སེམས་མི་འཇིགས་པ་ཐོབ་ནས་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་ཞིང་། འཁོར་གྱི་ནང་དུ་སེང་གེའི་སྒྲ་བསྒྲགས་ལ། ཚངས་པའི་འཁོར་ལོ་འཇིག་རྟེན་ན་དགེ་སྦྱོང་སོགས་སུས་ཀྱང་བསྐོར་མི་ནུས་པ་བསྐོར་བའོ། །མཁྱེན་པའི་སྟོབས་བཅུ་པོ་གནས་དང་གནས་མ་ཡིན་པ་མཁྱེན་པའི་སྟོབས་ཀྱིས་རྒྱུ་མེད་པ་དང་། མི་མཐུན་པའི་རྒྱུ་བསལ་ནས་བདེ་འགྲོའི་འབྱུང་གནས་དགེ་བ་ཡིན་གྱི་མི་དགེ་མིན་པར་བསྟན་པས་གསོད་པའི་མཆོད་སྦྱིན་སོགས་བདེ་འགྲོའི་ཐབས་སུ་འདོད་པའི་ཐབས་ལ་བསླུ་བའི་བདུད་འཇོམས་པ་དང་། ལས་བདག་གིར་བྱ་བ་མཁྱེན་པའི་སྟོབས་ཀྱིས་དགེ་སྡིག་གི་ལས་མ་བྱས་པ་དང་མི་ཕྲད། བྱས་པ་ཆུད་མི་ཟ་བ་རང་གིས་བྱས་པ་རང་གི་མྱོང་བར་བསྟན་པས། དགེ་མང་སྡིག་ཅན་ཡིན་ཀྱང་དབང་ཕྱུག་སོགས་མཉེས་ན་ངན་སོང་དུ་མི་ལྷུང་བར་འདོད་པའི་སྐྱབས་ལ་བསླུ་བའི་བདུད་འཇོམས་པ་དང་། བསམ་གཏན་རྣམ་ཐར་ཏིང་འཛིན་སྙོམས་འཇུག་མཁྱེན་པའི་སྟོབས་ཀྱིས་འཇིག་རྟེན་པའི་བསམ་གཏན་ཙམ་གྱིས་གྲོལ་བར་སྟོན་པ་དག་པ་ལ་བསླུ་བའི་བདུད་འཇོམས་པ་དང་། བཤད་པའི་སྣོད་དད་སོགས་ཀྱི་དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་དང་། བསམ་པའི་བྱེ་བྲག་གི་མོས་པ་སྣ་ཚོགས་མཁྱེན་པའི་སྟོབས་དང་། བག་ལ་ཉལ་བའི་རིགས་ཁམས་སྣ་ཚོགས་མཁྱེན་པའི་སྟོབས་དང་། དམིགས་པ་ཀུན་ཉོན་དང་རྣམ་བྱང་གི་བྱེ་བྲག་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་། རྒྱུ་ཚོགས་སུ་འགྱུར་བ་སྔོན་གནས་རྗེས་དྲན་མཁྱེན་པའི་སྟོབས་དང་། སྐྱེ་འཇིག་གི་འོས་སུ་འགྱུར་བ་འཆི་འཕོ་དང་སྐྱེ་བ་མཁྱེན་པའི་སྟོབས་དང་། ངེས་འབྱུང་གསུམ་གྱི་བྱེ་བྲག་ཟག་པ་ཟད་པ་མཁྱེན་པའི་སྟོབས་ཏེ་བདུན་པོ་དེའི་སྒོ་ནས་ཐེག་ཆེན་གྱི་རིགས་ཅན་རྣམས་ཐེག་ཆེན་ལ་འགོད་པས་ཐེག་པ་ཆེན་པོ་ངེས་པར་འབྱུང་བ་ལ་བསླུ་བའི་བདུད་འཇོམས་པས། དེ་རྣམས་ལྡན་པ་ལ་བརྟེན་ནས་བདུད་ཀྱིས་བརྫི་བ་མེད་པའོ། །སྤྲུལ་སྐུའི་ཡོན་ཏན་དྲན་པ་ལ་བཞི་ལས། མཛད་པ་རྨད་བྱུང་ཕྲིན་ལས་ཡོན་ཏན་ལ། ལམ་དུ་མ་ཞུགས་པ་དང་ལམ་ཞུགས་ཀྱི་སོ་སྐྱེ་འཕགས་པས་བསྡུས་པའི་སེམས་ཅན་ཐམས་ཅད་ཀྱི་སྟོན་པ་མཛད་པ་ནི། ཡོན་ཏན་འདི་དག་གི་སྒོ་ནས་འབྱུང་སྟེ། དེ་ཡང་། འབད་མེད་དུ་ལྷུན་གྱིས་གྲུབ་ཅིང་ཆགས་སོགས་ཉོན་མོངས་མེད་ལ་ཤེས་བྱ་ལ་ཐོགས་པའི་སྒྲིབ་པ་མི་མངའ་ཞིང་རྟག་ཏུ་མཉམ་པར་བཞག་ཅིང་འདྲི་བ་ཀུན་གྱི་ལན་ལྡོན་པར་མཛད་པའི་སྨོན་ལམ་མཁྱེན་པ་དང་། བཞེད་པ་བཞིན་བཞུགས་པའི་ཚེ་ལ་དབང་བ་དང་། དེ་བཞིན་དུ་ཏིང་ངེ་འཛིན་དཔག་མེད་ཐོབ་པས་སེམས་ལ་དང་། ནམ་མཁའ་མཛོད་ཀྱི་ཏིང་ངེ་འཛིན་གྱིས་འབྱོར་བ་སྣ་ཚོགས་ཀྱི་ཆར་འབེབས་པས་ཡོ་བྱད་ལ་དང་། སྐྱེ་ནས་མྱོང་འགྱུར་སོགས་ཀྱི་ལས་མཐོང་ཆོས་ལ་སྨིན་པར་བྱེད་པ་སོགས་ལས་ལ་དང་། བསམ་གཏན་ལ་གནས་བཞིན་འདོད་པར་སྐྱེ་བ་སོགས་སྐྱེ་བ་ལ་དང་། ཅི་ལྟར་བཏབ་པ་བཞིན་འགྲུབ་པའི་སྨོན་ལམ་ལ་དང་། ཅི་ལྟར་མོས་པ་བཞིན་འབྱུང་བ་མོས་པ་ལ་དང་། གཅིག་དང་དུ་མར་སྒྱུར་བའི་རྫུ་འཕྲུལ་ལ་དང་། སོ་སོ་ཡང་དག་པར་རིག་པ་བཞི་ལ་མངའ་བརྙེས་པས་ཡེ་ཤེས་ལ་དང་། གསུང་རབ་ཡན་ལག་བཅུ་གཉིས་ལ་མངའ་བརྙེས་པས་ཆོས་ལ་དབང་བ་སྟེ་དབང་བཅུ་དང་ལྡན་པ་འདི་དག་ཕར་ཕྱིན་དྲུག་གི་འབྲས་བུ་ཡིན་པར་སློབ་དཔོན་ཆོས་ཀྱི་བཤེས་གཉེན་གྱིས་གསུངས་སོ། །སྐུ་གསུང་ཐུགས་ཀྱི་སྤྱོད་པ་ཤིན་ཏུ་དག་པས་ན་སྐྱོན་ཤེས་ཀྱིས་དོགས་པའི་བསྲུང་ཞིང་། བཅབ་དགོས་ཀྱི་འཇིགས་པ་མེད་པས་བག་བརྐྱང་སྟེ་གསུངས་པ་བསྲུང་བ་མེད་པ་གསུམ་དང་། གདུལ་བྱ་ཆོས་ལ་གུས་པ་ཡོད་པ་དང་མེད་པ་དང་གཉིས་ཀ་ཅན་གསུམ་ལ་རིམ་བཞིན་ཉོན་མོངས་ཆགས་པ་དང་། སྡང་བ་དང་། འདྲེས་མ་གསུམ་སྤང་ནས་ཆོས་སྟོན་པ་དྲན་པ་ཉེ་བར་བཞག་པ་གསུམ་དང་། ཐམས་ཅད་མཁྱེན་པའི་མཚན་དང་ལྡན་པ་ལ་ཐམས་ཅད་མཁྱེན་པ་མིན་པའི་མི་ཤེས་པའི་སྤྱོད་པ་ཕྲ་མོ་ཙམ་ཡང་མི་མངའ་བ་བག་ཆགས་ཡང་དག་བཅོམ་པ་སྟེ་ཉན་ཐོས་དགྲ་བཅོམ་རྣམས་ནི། ཉོན་མོངས་སྤངས་ཀྱང་བག་ཆགས་ཡང་དག་པར་མ་བཅོམ་པས་གླང་པོ་ཆེ་མྱོས་པར་ཐུག་པ་སོགས་མི་ཤེས་པའི་སྤྱོད་པ་མངའོ། །གདུལ་བྱ་འདུལ་བའི་དུས་ལ་བབ་ན་དུས་ལས་ཡོལ་བ་སྐད་ཅིག་ཀྱང་མེད་པར་རྟག་ཏུ་བླ་ན་མེད་པ་སངས་རྒྱས་ཀྱི་མཛད་པའི་དོན་མི་འདོར་བར་ཡོད་པ་བསྙེལ་བ་མི་མངའ་བ་དང་། ཡོངས་སུ་དག་པ་བཞི་པོ་ལུས་ལེན་པའམ། ཚེའི་འདུ་བྱེད་བྱིན་གྱི་བརླབས་ནས་བཞེད་པ་བཞིན་གནས་པའམ། དུས་སུ་གཏོང་བ་སྟེ་རྟེན་ཡོངས་སུ་དག་པ། ཇི་ལྟར་བཞེད་བཞིན་ཏུ་སྤྲུལ་ཞིང་བསྒྱུར་བ་དམིགས་པ་ཡོངས་སུ་དག་པ། ཏིང་ངེ་འཛིན་གྱི་སྒོ་མཐའ་ཡས་པར་དབང་བསྒྱུར་བ་ཐུགས་ཡོངས་སུ་དག་པ། གཟུངས་ཀྱི་སྒོ་ཀུན་ཏུ་འཛིན་པ་ཡེ་ཤེས་ཡོངས་སུ་དག་པ་དེ་ནི་བཞི་སྟེ་ཚིག་གིས་གཟུངས། དོན་གྱི་དང་། བཟོད་པ་ཐོབ་པའི་སྒོའི་དང་། སྔགས་ཀྱི་གཟུངས་སོ །བྱང་ཆུབ་སེམས་དཔའ་རྣམས་ལ་སེམས་མ་སྐྱེད་པ་བསྐྱེད་དུ་གཞུག་ཅིང་། བསྐྱེད་པ་གོང་དུ་སྤེལ་བའི་ཐབས་ཀྱིས་ཡབ་མཛད་པ་དེ་ཡང་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་རང་ཉིད་ལ་མཐར་ཕྱིན་པར་མངའ་ཞིང་གཞན་ལའང་བསྐྱེད་པར་མཛད་པའི་སྒོ་ནས་ཏེ་རྩ་བདུན་ལ་བཞི་ལས། རྫས་སམ་ངོ་བོ་ནི། དད་བརྩོན་དྲན་པ་ཤེས་རབ་ཏིང་འཛིན་བཏང་སྙོམས་དགའ་བ་རྟོག་པ་ཚུལ་ཁྲིམས་ཤིན་ཏུ་སྦྱངས་བ་དང་བཅུར་མཛོད་ལས་བཤད་དོ། །ངེས་ཚིག་ནི། ཟད་མི་སྐྱེ་ཤེས་པ་བྱང་ཆུབ་ཡིན་ལ་དེའི་རྒྱུར་གྱུར་བས་ཕྱོགས་མཐུན་ནོ། །དབྱེ་བ་ནི། གཞི་དངོས་པོའི་མཚན་ཉིད་ལ་མི་མཁས་པའི་སྐྱོན་སྤངས་པ་དྲན་པ་ཉེར་བཞག་བཞི། ལེ་ལོའི་སྐྱོན་སྤངས་པ་ཡང་དག་སྤོང་བཞི། བྱིང་རྒོད་གཉིས་ཀྱི་ཏིང་ངེ་འཛིན་ཉམས་པའི་སྐྱོན་སྤངས་པ་རྫུ་འཕྲུལ་རྐང་པ་བཞི། དད་སོགས་མི་སྐྱེད་བའི་སྐྱོན་སྤངས་པ་དབང་པོ་ལྔ། དད་སོགས་ཉམས་ཆུང་བའི་སྐྱོན་སྤངས་པ་སྟོབས་ལྔ། མཐོང་སྤངས་ལྟ་བ་སོགས་ཀྱི་སྐྱོན་སྤངས་པ་བྱང་ཆུབ་ཀྱི་ཡན་ལག་བདུན། སྒོམ་སྤངས་གནས་ངན་ལེན་གྱི་སྐྱོན་སྤངས་པ་འཕགས་ལམ་ཡན་ལག་བརྒྱད་དེ་བྱང་ཕྱོགས་སོ་བདུན་ནོ། །ས་མཚམས་ནི། བྱང་ཕྱོགས་སྡེ་ཚན་བདུན་པོ་དེ། བྱེ་བྲག་སྨྲ་བའི་ལུགས་ལ། ཚོགས་ལམ་དྲོད། རྩེ་མོ། བཟོད་པ། ཆོས་མཆོག །སྒོམ་ལམ། མཐོང་ལམ་ན་རིམ་བཞིན་རེ་རེ་ཡོད་པར་འདོད། ཐེག་ཆེན་གྱིས་ཚོགས་ལམ་ན་སྡེ་ཚན་གསུམ། སྦྱོར་ལམ་ན་སྡེ་ཚན་གཉིས། མཐོང་སྒོམ་གཉིས་སུ་རིམ་པར་རེ་རེ་འདོད་དོ། །མ་འདྲེས་པའི་ཆོས་བཅོ་བརྒྱད་དང་ལྡན་པས། ཉན་རང་བྱང་ཆུབ་སེམས་འཕགས་པའི་གང་ཟག་རྣམས་ཀྱི་རྒྱལ་པོ་མཛད་པ་ལས། བཅོ་བརྒྱད་ནི། སྐུ་འཁྲུལ་པ་མེད་པ་དང་ཆགས་སྡང་བྲལ་བའི་ཕྱིར་ཅ་ཅོ་མེད་ཅིང་རྨོངས་པ་བྲལ་བའི་ཕྱིར་རྗེས་སུ་ཅ་ཅོ་མེད་པས་ཅ་ཅོ་མེད་པ་དང་། བསམ་གཏན་སོགས་ལ་འཇུག་པའམ་མཐུན་པར་ཆོས་སྟོན་པ་སོགས་ཀྱི་བྱ་བ་བརྗེད་པར་མི་འགྱུར་བ་བསྙེལ་བ་མེད་པ་དང་། རྟག་ཏུ་མཉམ་པར་བཞག་པའི་ཏིང་ངེ་འཛིན་ཟབ་མོ་མཆོག་ཐོབ་ཅིང་སྒྲིབ་པ་མེད་པའི་བསམ་གཏན་ལ་གནས་ཤིང་། རྒྱལ་བའི་བྱིན་རླབས་མ་གཏོགས་སུས་ཀྱང་སངས་རྒྱས་སེམས་ལ་ལྟ་ནུས་པ་མེད་པས་མཉམ་པར་མ་བཞག་པ་མེད་པ་དང་། ཆོས་ཐམས་ཅད་མཉམ་པ་ཉིད་དུ་གནས་པས་ཐ་དད་པའི་འདུ་ཤེས་མེད་པ་དང་། ལམ་དང་ཤེས་རབ་སྒོམ་ཞིང་ཡེ་ཤེས་དང་ལྡན་ཅིང་། འཇིག་རྟེན་ལས་མ་འདས་པ་ཡིན་པའི་བཏང་སྙོམས་ཆེན་པོ་ལྡན་པས་སོ་སོར་མ་བརྟགས་པའི་བཏང་སྙོམས་མི་མངའ་བ་སྟེ་དྲུག་ནི་སྤྱོད་པས་བསྡུས་པ་ཡིན་ཏེ། ཡུལ་ལ་འཇུག་པས་ཕྱེ་བའི་ཕྱིར་རོ། །དེ་བཞིན་གཤེགས་པ་འདུན་པས་འགྲོ་བ་མིན་གྱི། དེའི་འདུན་པ་ནི་ཡེ་ཤེས་སྔོན་དུ་འགྲོ་བ་ཅན་དགེ་ཆོས་ཐམས་ཅད་ལ་འདུན་པ་སྟེ། བྱམས་སྙིང་རྗེ་ཆོས་སྟོན་པ་སེམས་ཅན་འདུལ་བ། སེམས་ཅན་ཡོངས་སུ་སྨིན་པར་བྱ་བ། རབ་ཏུ་དབེན་པ། སེམས་ཅན་ལ་བྱང་ཆུབ་ཡང་དག་པར་འཛིན་འཇུག་པ། དཀོན་མཆོག་གསུམ་གྱི་རིགས་རྒྱུད་མི་གཅོད་པ་ལ་འདུན་པ་ཉམས་པ་མི་མངའ་བ་དང་། གདུལ་བྱ་གཅིག་གི་ཕྱིར་སངས་རྒྱས་ཞིང་གང་གཱའི་ཀླུང་གི་བྱེ་མ་སྙེད་འདས་ནས་འགྲོ་བ་ལ་ངལ་བ་མེད་པའི་འདུལ་བྱ་ཡལ་བར་མི་འདོར་བའི་བརྩོན་འགྲུས་སམ་བསྐལ་བར་མི་སྐྱོ་བས་ཆོས་ཉན་པ་ཡོད་ན་དེ་བཞིན་གཤེགས་པས་ཁ་ཟས་མི་གསོལ་བར་བསྐལ་པར་ཆོས་སྟོན་པ་ཆོས་ཉན་པ་རྣམས་ལ་བསྙེལ་བ་མེད་པའི་བརྩོན་འགྲུས་ལྡན་པས་བརྩོན་འགྲུས་ཉམས་པ་མི་མངའ་བ་དང་། སེམས་ཅན་གྱི་ཁམས་ལ་གཟིགས་པ་ལ་བརྗེད་པ་མེད་པས་དྲན་པ་ཉམས་པ་མི་མངའ་བ་དང་། ཆོས་ཀྱི་དབྱིངས་མཉམ་པ་ཆེན་པོ་ཇི་ལྟ་བ་བཞིན་མངོན་དུ་གྱུར་པས་ཏིང་ངེ་འཛིན་ཉམས་པ་མི་མངའ་བ་དང་། ཆོས་ཐམས་ཅད་རབ་ཏུ་ཤེས་པའི་ཤེས་རབ་ཐུག་པ་མེད་པ་མངའ་བས་ཤེས་རབ་ཉམས་པ་མི་མངའ་བ་དང་། ཡུལ་ལ་ཆགས་པ་དང་ཡུལ་ཅན་གྱི་འཛིན་པ་ཐམས་ཅད་དང་བྲལ་བ་རྫོགས་སངས་རྒྱས་ཀྱི་རྣམ་གྲོལ་ལྡན་པས་རྣམ་པར་གྲོལ་བ་ཉམས་པ་མི་མངའ་བ་སྟེ་དྲུག་ནི་རྟོགས་པས་བསྡུས་པ་ཡིན་ཏེ། ཡུལ་ཅན་ཡེ་ཤེས་ཀྱི་རང་བཞིན་ཡིན་པས་སོ། །དུས་གསུམ་ལ་ཉོན་སྒྲིབ་སྤངས་པས་མ་ཆགས་ཤིང་ཤེས་སྒྲིབ་སྤངས་པས་མ་ཐོགས་པའི་ཡེ་ཤེས་མངའ་བ་ནི་ཡེ་ཤེས་མ་འདྲེས་པ་གསུམ་ཡིན་ནོ། །སྐུ་གསུང་ཐུགས་ཀྱི་ཕྲིན་ལས་ཐམས་ཅད་ལ་རྒྱུའི་ཀུན་སློང་གི་ཚུལ་དུ་ཡེ་ཤེས་སྔོན་དུ་འགྲོ་ཞིང་དུས་ཀྱི་ཀུན་སློང་གི་ཚུལ་དུ་ཡེ་ཤེས་རྗེས་སུ་འབྲངས་པ་ཕྲིན་ལས་མ་འདྲེས་པ་གསུམ་ཡིན་ནོ། །བཅོ་བརྒྱད་པོ་འདི་དག་འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོའི་དགོངས་པ་ལྟར་བཤད་པ་ཡིན་ལ་མདོ་དེར་དེ་བཞིན་གཤེགས་པའི་ལས་སུམ་ཅུ་རྩ་གཉིས་སུ་ཕྱེ་འདུག་ཅིང་། དེའི་འབྱེད་ཚུལ་ནི། ཐོག་མར་སྐུ་འཁྲུལ་པ་མེད་པ་ལ། ལུས་ཀྱི་ལས་འཁྲུལ་པ་མེད་པ་ལྔ་སྟེ། ཤིན་ཏུ་མཛེས་པའི་སྤྱོད་ལམ་བཞི་ཡོད་པ་དང་། གྲོང་སོགས་སུ་འཇུག་ཅིང་འབྱུང་བ་ན་རྐང་མཐིལ་ས་ལ་མི་རེག་པར་འཁོར་ལོ་རྩིབས་སྟོང་ལྡན་པ་འཇོག་པའི་པདྨ་མངོན་དུ་འབྱུང་བ་དང་། ཞབས་ལ་བྱོལ་སོང་གིས་རེག་ན་ཞག་བདུན་བར་རེག་བྱའི་བདེ་བ་ལྡན་ཅིང་། ཤི་ནས་ལྷར་སྐྱེས་པ་དང་། སྐུ་ལ་ཆོས་གོས་སོར་བཞི་ཙམ་གྱིས་མ་རེག་མོད་རླུང་ཆེན་པོས་ཀྱང་བཟློག་མི་ནུས་པ་དང་། སྐུའི་འོད་ཀྱིས་མནར་མེད་པའི་བར་གྱི་སེམས་ཅན་བདེ་བར་བྱེད་པའོ། །ངག་གི་ལས་འཁྲུལ་པ་མེད་པ་ལྔ་སྟེ་སྨྲ་བའི་སྐབས་ཁྱད་པར་དུ་འཕགས་པ་དུས་སུ་སྨྲ་བ་དང་། སྨྲ་བའི་ངོ་བོ་ཁྱད་འཕགས་ཚིགས་སུ་སྨྲ་ཞིང་ཡང་དག་པར་སྨྲ་བ་དང་། སྨྲ་བའི་ཁྱད་པར་ཁྱད་འཕགས་ཤིན་ཏུ་ངེས་པའི་ཚིག་དང་ལྡན་པ། སེམས་ཅན་ཐམས་ཅད་ཚིམས་བྱེད་ཀྱི་ཚིག་དང་། མི་ཟློག་པའི་ཚིག་དང་། དོན་དང་ཚིག་འབྲས་བུས་བརྒྱན་པའི་ཚིག་དང་ལྡན་པ་དང་། སྨྲ་བའི་རྒྱུ་ཁྱད་འཕགས་ཇི་སྐད་སྨྲས་པ་དེ་བཞིན་བྱེད་པ་དང་། སྨྲ་བའི་བྱེད་ལས་ཁྱད་འཕགས་སྐད་ཅིག་བརྗོད་པས་སེམས་ཅན་ཐམས་ཅད་ཀྱི་བསམ་པ་ཚིམས་པར་བྱེད་པའོ། །ཡིད་ཀྱི་ལས་འཁྲུལ་པ་མེད་པ་ལྔ་སྟེ། མཉམ་པར་བཞག་པའི་གནས་མི་འདོར་ཞིང་། སངས་རྒྱས་ཀྱི་བྱ་བ་ཐམས་ཅད་བྱེད་ཀྱང་། སེམས་དེར་མི་གཏོང་ཞིང་ཆོས་ཐམས་ཅད་ལ་ཆགས་པ་དང་། ཐོགས་པ་མེད་པ་ཡེ་ཤེས་ཀྱི་མཐོང་བ་འཇུག་པའོ། །བཅོ་ལྔ་པོ་དེའི་ཁར་གཞན་རྣམས་བསྡམས་པས་ལས་སུམ་ཅུ་སོ་གཉིས་སུ་འགྱུར་རོ། །ཉོན་མོངས་མེད་པའི་ཏིང་ངེ་འཛིན་གྱིས་སེམས་ཅན་ཐམས་ཅད་ཀྱི་ཉོན་མོངས་པའི་ས་བོན་བག་ཆགས་བཅས་བཅོམ་པའི་ཐབས་བསྟན་ནས་མྱ་ངན་ནམ་སྡུག་བསྔལ་ཐམས་ཅད་ལས་གཏན་དུ་ཐར་བའམ་འདས་པ་ཞི་བདེའི་གྲོང་ཁྱེར་དུ་འགྲོ་བའི་རིགས་ཅན་གསུམ་གྱི་གང་ཟག་རྣམས་ཀྱི་ལམ་སྟོན་ལ་མཁས་པའི་དེད་དཔོན་དམ་པ་མཛད་པའོ། །ཉན་ཐོས་ཀྱི་ཉོན་མོངས་མེད་པ་ནི་གཞན་གྱི་ཉོན་མོངས་སྐྱེ་བའི་རྐྱེན་མི་བྱེད་ཙམ་ཡིན་ལ་སངས་རྒྱས་ནི་ཉོན་མོངས་ཅན་གྱི་སྡུན་ལ་ཆེད་དུ་གཤེགས་ནས་ཉོན་མོངས་རྒྱུན་གཅོད་པར་བྱེད་པ་ཡིན་ནོ། །མཁྱེན་རབ་མཐའ་ཡས་ཐུགས་ཀྱི་ཡོན་ཏན་ལ། ཇི་ལྟ་ཇི་སྙེད་མཐའ་དག་གཟིགས་པའི་ཡེ་ཤེས་དཔག་ཏུ་མེད་པ་མངའ་སྟེ། དེ་ཡང་རྣམ་པ་ཐམས་ཅད་མཁྱེན་པ་དང་སྤྱན་དང་མངོན་ཤེས་ཀྱི་རྣམ་པར་གནས་པ་ལས་རྣམ་པ་ཐམས་ཅད་མཁྱེན་པ་ཉིད་ནི་གསུམ་སྟེ། ཕུང་སོགས་ཆོས་ཐམས་ཅད་གང་ཟག་གི་བདག་མེད་པར་རྟོགས་པ་གཞི་ཐམས་ཅད་མཁྱེན་པ་དང་། ཉན་རང་བྱང་སེམས་ཀྱི་ལམ་གསུམ་ཀུན་རྫོབ་ཏུ་མ་འདྲེས་པར་མཁྱེན་ཅིང་དོན་དམ་པར་སྐྱེ་མེད་དུ་རྟོགས་པ་ལམ་ཐམས་ཅད་མཁྱེན་པ་དང་། ཤེས་བྱར་སྲིད་ཚད་མཁྱེན་པ་རྣམ་པ་ཐམས་ཅད་མཁྱེན་པའོ། །སྤྱན་ལྔ་ནི། འཇིག་རྟེན་ཁམས་ཀྱི་གཟུགས་ཕྲ་རགས་ཐམས་ཅད་གཟིགས་པ་ཤའི་སྤྱན། དགེ་བའི་རྣམ་སྨིན་ལས་སྐྱེས་ཤིང་སེམས་ཅན་རྣམས་ཀྱི་དེ་ལྟར་གྱི་འཆི་འཕོ་སྐྱེ་བ་མཁྱེན་པ་ལྷའི་སྤྱན། ལུང་རྟོགས་ཀྱི་ཆོས་ཀུན་གཟིགས་པ་ཆོས་ཀྱི་སྤྱན། བདག་མེད་གཉིས་ཀྱི་ཆོས་ཉིད་གཟིགས་པ་ཤེས་རབ་ཀྱི་སྤྱན། སངས་རྒྱས་ཀྱི་ཉེར་ལེན་ལ་སེམས་ཅན་ཐམས་ཅད་གནས་པ་གཟིགས་པ་སངས་རྒྱས་ཀྱི་སྤྱན་ནོ། །མངོན་ཤེས་དྲུག་ནི། རྫུ་འཕྲུལ་གྱི་མངོན་པར་ཤེས་པའི་ངོ་བོ་སྤྲུལ་པ་དང་བསྒྱུར་བའི་རྣམ་འཕྲུལ་སྣ་ཚོགས་སྟོན་པ། བྱེད་ལས་གདུལ་བྱའི་དྲུང་དུ་གཤེགས་པའོ། གཞན་སེམས་ཤེས་པའི་མངོན་ཤེས་ཀྱི་ངོ་བོ་གཞན་དག་གི་སེམས་དགེ་མི་དགེ་ལུང་མ་བསྟན་གང་ལ་སྤྱོད་པ་ཤེས་པ། བྱེད་ལས་གདུལ་བྱའི་སེམས་ཀྱི་སྤྱོད་པ་མཁྱེན་པར་མཛད་པའོ། །ལྷའི་རྣ་བའི་མངོན་ཤེས་ཀྱི་ངོ་བོ་འཇིག་རྟེན་ཁམས་ཀྱི་ཟིན་མ་ཟིན་པའི་སྒྲ་ཆེ་ཆུང་ཐམས་ཅད་གསན་པ། བྱེད་ལས་གདུལ་བྱའི་རང་སྐད་ཀྱིས་ཆོས་སྟོན་པའོ། །སྔོན་གནས་རྗེས་དྲན་གྱི་མངོན་ཤེས་ཀྱི་ངོ་བོ་རང་གཞན་གྱི་ཚེ་རབས་དུ་མ་ཤེས་པ། བྱེད་ལས་སྔོན་གྱི་མཐའ་ནས་འདིར་འོང་བ་སྟོན་པའོ། །ལྷའི་མིག་གི་མངོན་ཤེས་ཀྱི་ངོ་བོ་འཆི་འཕོ་སྐྱེ་བ་མཁྱེན་པ། བྱེད་ལས་ཕྱི་མའི་མཐར་འགྲོ་བ་གཞན་ལ་ཤེས་པར་བྱེད་པའོ། །ཟག་པ་ཟད་པའི་མངོན་ཤེས་ཀྱི་ངོ་བོ་ཐར་པའི་ལམ་འབྲས་བུ་དང་བཅས་པ་མཁྱེན་པ། བྱེད་ལས་ངེས་འབྱུང་གསུམ་གྱི་ལམ་ལེགས་པར་འདོམས་པའོ། །མངོན་ཤེས་དེ་དག་གི་རྒྱུ་ཡང་འཕེན་བྱེད་ཀྱི་རྒྱུ་ནི། རིན་ཆེན་ཕྲེང་བ་ལས། མཆོད་རྟེན་ལ་མར་མེའི་ཕྲེང་བ་ཕུལ་བ་དང་། སེམས་ཅན་ལ་མུན་པ་སེལ་བྱེད་བྱིན་ན་ལྷའི་མིག་ཐོབ་ཅེས་གསུངས་པ་སོགས་སོ། །འགྲུབ་བྱེད་ཀྱི་རྒྱུ་ནི་རྟེན་བསམ་གཏན་བཞི་པ། གྲོགས་རྣམ་པར་མི་རྟོག་པའི་ཡེ་ཤེས་བསྒོམ་པ། ཡིད་ལ་བྱེད་པ་དྲུག་པོ་ཇི་ལྟ་བུའི་རྣམ་པ་ལ་གནས་པ་ཡིད་ལ་བྱེད་པ་སྟེ། དེ་ཡང་མངོན་ཤེས་དྲུག་གི་ཐབས་གོ་རིམ་བཞིན་དུ། སྣང་བ་དང་ལྡན་པའི་གཟུགས་ཡིད་ལ་བྱེད་པ་དང་། སྒྲའི་བྱེ་བྲག་དུ་མར་སེམས་གཏོད་པ་དང་། གཞན་སེམས་ཀྱི་གནས་སྐབས་དུ་མ་དང་། སྔོན་གྱི་གནས་སྐབས་དུ་མ་དང་རང་ལུས་ཡང་ཞིང་ཐོགས་པ་མེད་པར་ཡིད་གཏོད་པ་དང་། རྣམ་པར་མི་རྟོག་པ་སྒོམ་པའོ། །སོ་སོ་ཡང་དག་པར་རིག་པ་བཞི་དང་ལྡན་པས་སྤོབས་པ་བསམ་གྱིས་མི་ཁྱབ་པ་མངའ་བ་སྟེ། བཞི་ནི་རྟེན་མིང་གི་རྣམ་གྲངས་རྣམས་ཐོགས་མེད་ཤེས་པ་ཆོས་སོ་སོ་ཡང་དག་རིག་པ། བརྟེན་པ་རང་དང་སྤྱིའི་མཚན་ཉིད་དང་དགོངས་པ་ཐོགས་མེད་ཤེས་པ་དོན་སོ་སོ་ཡང་དག་པར་རིག་པ། གསུངས་ཡུལ་རང་རང་གི་སྐད་དང་མཐུན་པར་ཆོས་ཀྱི་ངེས་ཚིག་ཐོགས་མེད་ཤེས་པ་ངེས་པའི་ཚིག་སོ་སོ་ཡང་དག་པར་རིག་པ། མཁྱེན་པ་ཆོས་རྣམས་ཀྱི་རབ་དབྱེ་སྣ་ཚོགས་ཐོགས་མེད་ཤེས་པ་སློབས་པ་སོ་སོ་ཡང་དག་པར་རིག་པ་སྟེ་སྔ་མ་གཉིས་ནི་བཤད་པར་བྱ་བས་བསྡུས་ཤིང་། ཕྱི་མ་གཉིས་ནི་ཆོས་འཆད་བྱེད་ཡིན་ནོ། །ཚངས་དབྱངས་ལྡན་པ་གསུང་གི་ཡོན་ཏན་ནི། གསང་བ་བསམ་གྱིས་མི་ཁྱབ་པའི་མདོ་ལས་འབྱུང་བ་ཚངས་དབྱངས་ཡན་ལག་དྲུག་ཅུ་པོ་ཡང་། དོན་མཆོག་ཏུ་སྟོན་པས་རྣམ་པར་དག་པའི་ཚིག་གིས་བསྡུས་པ་མཉེན་པ། འཇམ་པ། ཡིད་དུ་འོང་བ། ཡིད་དུ་འཐད་པ། དག་པ་དྲི་མ་མེད་པ། གསལ་བ་ལ་སོགས་རྣམས་དང་། སྒྲའི་དབྱངས་སྙན་པས་བསྡུས་པ་སེངྒེའི་སྒྲ། གླང་པོ་ཆེའི་སྒྲ་སྐད། འབྲུག་གི་སྒྲའི་དབྱངས། ཀླུའི་དབང་པོའི་སྒྲ། དྲི་ཟའི་གླུ་དབྱངས། ཀ་ལ་པིངྐའི་སྒྲ། ཚངས་པའི་དབྱངས། ཤང་ཤང་ཏིའུའི་སྒྲ་དབྱངས་སུ་གྲགས་པ། ལྷའི་དབང་པོའི་སྒྲ་དབྱངས་ལྟར་སྙན་པ། རྔའི་སྒྲ་ལ་སོགས་པ་རྣམས་སྦྱར་བར་བྱའོ། །ཤིན་ཏུ་མཛེས་པ་སྐུའི་ཡོན་ཏན་ནི། །མཆོག་གི་སྤྲུལ་སྐུ་ལ་མཚན་དཔེ་ཡོངས་རྫོགས་མངའ་བ་སྐུའི་བྱད་དབྱིབས་དེ་སོ་སྐྱེའམ་ཉན་ཐོས་འཕགས་པ་རྣམས་ཀྱིས་མཐོང་ཚེ་བལྟ་བའི་ཆོག་མི་ཤེས་པ། དཔེར་ན་རྒྱ་མཚོ་ཆེན་པོ་དང་ལྷུན་པོ་ལ་བལྟས་པས་མི་ངོམས་པ་ལྟ་བུ། བཟོ་དང་སྐྱེ་བ་སྤྲུལ་སྐུའི་སྐུ་ཡང་ཕལ་པ་གཞན་གང་དང་མཚུངས་པ་སྟེ་འདྲ་བ་མེད་པར་ཁྱད་འཕགས་ཞིག་ཏུ་སྣང་བའོ། །གཉིས་པ་ཆོས་སྐུའི་ཡོན་ཏན་དྲན་པ་ལའང་། ཆོས་སྐུའི་རྒྱུ་ཕུན་ཚོགས་ཀྱི་ཡོན་ཏན་དྲན་པ་དང་། ཆོས་སྐུ་རང་གི་ངོ་བོའི་ཡོན་ཏན་དྲན་པ་གཉིས་ལས། དང་པོ་ལ་ཏིང་ངེ་འཛིན་གསུམ་གྱི་བདག་ཉིད་བསམ་གཏན་གྱི་ཕ་རོལ་ཏུ་ཕྱིན་པའི་ཡོན་ཏན་དང་། རྣམ་ཐར་གསུམ་སོགས་ཀྱི་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་ཡོན་ཏན་གཉིས་ཀྱི། དང་པོ་ལའང་། སྒྱུ་མ་ལྟ་བུའི་ཏིང་ངེ་འཛིན་དང་། དཔའ་བར་འགྲོ་བའི་ཏིང་ངེ་འཛིན་དང་། རྡོ་རྗེ་ལྟ་བུའི་ཏིང་ངེ་འཛིན་ཏེ་གསུམ་ལས། དང་པོ་ལ། སྒྲ་འདོམས་པའི་ཚེ་ན་ཏིང་ངེ་འཛིན་ཞེས་བྱ་བ་ཞི་གནས་རྐྱང་པ་ལ་འདོགས་པའི་ནང་ནས། སེམས་གནས་པའི་ཐབས་དགུའི་སྒོ་ནས་བསྒྲུབ་པར་འདོད། སེམས་རྩེ་གཅིག་པ་དག་ཐོབ་ཀྱང་གཞན་ཕལ་པའི་རྒྱུད་ལ་ཡོད་པ་ལས་ཁྱད་པར་འཕགས་ཤིང་འདོད་པའི་སྐྱོན་དག་གིས་མ་གོས་པ་སྟེ། ཐབས་དགུ་ནི། དམིགས་ཡུལ་སེམས་འཇོག་པ་དང་། མ་བརྗེད་པར་དྲན་པ་མཐུད་ནས་ཡུན་རིང་བར་རྒྱུན་དུ་འཇོག་པ་དང་། རྣམ་པར་གཡེངས་པའི་ཚེ་གཡེང་བ་རྟོགས་ནས་བླན་ཏེ་འཇོག་པ་དང་། ཡང་ཡང་དུ་གྲངས་མང་བར་ཉེ་བར་འཇོག་པ་དང་། ཏིང་ངེ་འཛིན་གྱི་ཡོན་ཏན་བསམ་སྟེ་དུལ་བར་བྱེད་པ་དང་། རྣམ་གཡེང་གི་སྐྱོན་མཐོང་ནས་ཞི་བར་བྱེད་པ་དང་། ཏིང་ངེ་འཛིན་གྱི་མི་མཐུན་ཕྱོགས་འདོད་ལ་འདུན་པ་གནོད་སེམས་གཉིད་རྨུག་རྒོད་འགྱོད་ཐེ་ཚོམ་སྟེ་སྒྲིབ་པ་ལྔ་སོགས་བསལ་ཏེ་རབ་ཏུ་ཞི་བར་བྱེད་པ་དང་། འབད་རྩོལ་བཅས་པའི་སེམས་གནས་ཐོབ་པ་རྩེ་གཅིག་ཏུ་བྱེད་པ་དང་། འབད་རྩོལ་མེད་པར་ཐོབ་པ་མཉམ་པར་འཇོག་པའོ། །གཟུགས་ཀྱི་བསམ་གཏན་བཞི་ཡོད་ཅིང་། དེའང་རྒྱུ་སྙོམས་འཇུག་གི་བསམ་གཏན་དང་། འབྲས་བུ་དེར་སྐྱེས་པའི་བསམ་གཏན་གཉིས་ཀྱི་འདིར་ནི་དང་པོ་དེ་དང་ལྡན་པ་ཡིན་ཅིང་། དེ་ནི་ཉེར་བསྡོགས་དང་དངོས་གཞི་གཉིས་སུ་རྣམ་པར་བཞག་པ་ལས། ཉེར་བསྡོགས་ལ་ཡིད་བྱེད་དྲུག་སྟེ། ཐོས་བསམ་འདྲེས་མའི་སྒོ་ནས་འདོད་པ་ལ་རགས་པ་དང་བསམ་གཏན་ལ་ཞི་བར་ལྟ་བ་མཚན་ཉིད་རབ་ཏུ་རིག་པ་དང་སྒོམ་བྱུང་གིས་མཐོང་བ་མོས་པ་ལས་བྱུང་བ་དང་། འདོད་ཉོན་ཆེན་པོ་རྣམས་སྤང་བ་རབ་ཏུ་དབེན་པ་དང་། འབྲིང་པོ་རྣམས་སྤངས་བ་དགའ་བ་སྡུད་པ་དང་། ཉོན་མོངས་ཡོད་མེད་རྟོགས་པ་དཔྱོད་པ་དང་། ཆུང་ངུ་གསུམ་སྤང་བ་སྦྱོར་བའི་མཐའི་ཡིད་བྱེད་ཡིན་ནོ། །སྦྱོར་བའི་མཐའི་འབྲས་བུ་ཡིད་ལ་བྱེད་པ་ནི་དངོས་གཞིའི་བསྡུས་པ་ཡིན་ཅིང་། བསམ་གཏན་གྱི་དངོས་གཞི་རྣམས་ནི་ཡན་ལག་དང་ལྡན་པ་ཡིན་པས། བསམ་གཏན་དང་པོ་ལ་ལྔ་སྟེ། རྟོག་དཔྱོད་གཉིས་གཉེན་པོའི་ཡན་ལག །དགའ་བདེ་ཕན་ཡོན་གྱི་ཡན་ལག །ཏིང་ངེ་འཛིན་ངོ་བོའི་ཡན་ལག་གོ །གཉིས་པ་ལ་བཞི་སྟེ། རབ་དྭངས་གཉེན་པོའི་ཡན་ལག །ལྷག་མ་གསུམ་སྔ་མ་དང་འདྲའོ། །གསུམ་པ་ལ་ལྔ་སྟེ། དྲན་ཤེས་བཞིན་བཏང་སྙོམས་གསུམ་གཉེན་པོའི་ཡན་ལག །བདེ་བ་ཕན་ཡོན་གྱི་ཡན་ལག །ཏིང་ངེ་འཛིན་ངོ་བོའི་ཡན་ལག །བཞི་པ་ལ་བཞི་སྟེ། དྲན་པ་འདུ་བྱེད་བཏང་སྙོམས་གཉིས་གཉེན་པོའི་ཡན་ལག །ཚོར་བ་བཏང་སྙོམས་ཕན་ཡོན་གྱི་ཡན་ལག །ཏིང་འཛིན་ངོ་བོའི་ཡན་ལག་གོ །བསམ་གཏན་འདི་དག་ལའང་། ཉོན་མོངས་ཅན་དང་། དག་པ་བ་དང་། ཟག་མེད་གསུམ་ཡོད་ལ། ཐོག་མ་ནི། སྲེད་པའམ། ལྟ་བའམ། ང་རྒྱལ་ལམ། ཐེ་ཚོམ་ཤས་ཆེ་བའོ། །བར་པ་ལ་ནི། འོག་ས་དང་མཐུན་པ་ཉམས་པ་ཆ་མཐུན། རང་ས་དང་མཐུན་པ་གནས་པ་ཆ་མཐུན། གོང་ས་དང་མཐུན་པ་ཁྱད་པར་ཆ་མཐུན། ཟག་མེད་ཀྱི་རྟེན་དུ་གྱུར་པ་ངེས་འབྱེད་ཆ་མཐུན་བཞི་ཡོད་དོ། །དེ་ལས་སྔ་མ་གཉིས་ཀྱི་སྐྱོན་ཅན་དག་གིས་ཉེ་བར་མ་གོས་པར་ཟག་མེད་ཀྱི་རྟེན་དང་ངོ་བོར་གྱུར་བ་བསམ་གཏན་བཞིའི་སྙོམས་པར་འཇུག་པ་ཡོངས་རྫོགས་སུ་ལྡན་པ་ཡིན་ནོ། །གཟུགས་མེད་ལའང་གཉིས་ཡོད་ཀྱང་། རྒྱུ་སྙོམས་འཇུག་གི་ཆ་དང་ལྡན་པ་ཡིན་ཅིང་། དང་པོ་ནམ་མཁའི་ཉེར་བསྡོགས་ལ། དབྱིབས་དང་ཁ་དོག་གི་གཟུགས་ཀྱི་འདུ་ཤེས་དང་། ར་བ་སོགས་ཐོགས་པའི་འདུ་ཤེས་གཉིས་སྣང་བ་མེད་པས་ནུབ་པ་དང་། མཛེས་མི་མཛེས་སོགས་སྣ་ཚོགས་པའི་འདུ་ཤེས་ཡིད་ལ་མི་བྱེད་པས། འདི་ཤེས་གསུམ་བཤིགས་ཏེ། དངོས་གཞིར་དེ་བཞིན་གྲུབ་ནས་ཆོས་ཐམས་ཅད་ནམ་མཁའ་དང་རྣམ་ཤེས་ལྟར་མཐའ་ཡས་སོ་སྙམ་པའི་འདུ་ཤེས་དང་། ཅི་ཡང་མེད་དོ་སྙམ་པ་དང་། འདུ་ཤེས་རགས་པ་ཡོད་པ་མ་ཡིན་ཅིང་། ཕྲ་བ་མེད་པ་མ་ཡིན་པ་མཚན་མ་མེད་པའི་འདུ་ཤེས་ཅན་བཞི་ལའང་ཉོན་མོངས་ཅན་སོགས་གསུམ་ཡོད་པ་ལས་སྔ་མ་གཉིས་ཀྱི་སྐྱོན་ཅན་དག་དང་མ་འདྲེས་པ་ཟག་མེད་ཁོ་ན་དང་མཚུངས་པར་ལྡན་པའི་སྙོམས་འཇུག་བཞི་ལ་དབང་འབྱོར་བ་ཡིན་ནོ། །མཐོང་ཆོས་ལ་བདེ་བར་གནས་ཤིང་མྱ་ངན་ལས་འདས་པ་དང་འདྲ་བ་སྡུག་བསྔལ་གྱི་ཚོར་བ་ཐམས་ཅད་ལས་འགོག་པ་ཐོབ་པའི་རྣམ་པར་གྲོལ་བ་འགོག་པའི་སྙོམས་འཇུག་ཡིན་ལ། འདིས་ནི་སྲིད་རྩེའི་སེམས་ཕྲ་བ་འདུ་བྱེད་ཀྱི་སྡུག་བསྔལ་ཚོར་བ་བཏང་སྙོམས་ཀྱང་བཀག་ནུས་ཤིང་། འཕགས་པ་ཁོ་ནའི་རྒྱུད་ལ་འབྱུང་བ་ཡིན་པས་འདུ་ཤེས་མེད་པའི་སྙོམས་འཇུག་ལས་ཁྱད་པར་འཕགས་པ་ཡིན་ནོ། །དེ་ལྟར་ན་བསམ་གཟུགས་བརྒྱད་འགོག་སྙོམས་དང་བཅས་པ་ལ་མཐར་གྱིས་གནས་པའ་ིསྙོམས་འཇུག་དགུ་ཞེས་བྱ་ཞིང་། འདི་དག་ལ་འཇུག་ཚུལ་ཐོད་རྒལ་གྱི་ཏིང་ངེ་འཛིན་ཐེག་པ་དམན་མཆོག་གི་ལུགས་སོ་སོར་ཡོད་པའང་ཤེས་པར་བྱའོ། །དེ་བཞིན་དུ་རྣམ་ཐར་སོགས་ཀྱི་ཏིང་འཛིན་ཡང་བྲལ་ཐོབ་ཀྱི་ཆ་ནས་སྟོན་པས་དེའི་ཚུལ་ལ། སྤྱིར་བཏང་ཆོས་དུ་མ་སྤུངས་པའི་དོན་ཅན་ནི་ཕུང་པོ་ཡིན་ཅིང་དངོས་པོའི་གནས་སྐབས་ཚོགས་པ་བསྟན་པའོ། །ཆོས་སོ་སོའི་རང་རང་གི་རིགས་ཀྱི་དོན་ཅན་ནི་ཁམས་ཡིན་ཅིང་དངོས་པོའི་རྒྱུ་ཉེར་ལེན་བསྟན་པའོ། །འབྲས་བུ་སྐྱེ་བའ་ིསྒོའི་དོན་ནི་སྐྱེ་མཆེད་ཡིན་ཅིང་དངོས་པོའི་ལྷན་ཅིག་བྱེད་རྐྱེན་བསྟན་པའོ། །ཕུང་པོ་ལྔ་ལས། འགྱུར་བ་བསྐྱེད་པའི་སྒོ་ནས་གནོད་པ་བྱ་རུང་བ་གཟུགས་སུ་རུང་བ་གཟུགས་ཕུང་གི་མཚན་ཉིད། དབྱེ་ན་རྒྱུ་གཟུགས་ས་སོགས་འབྱུང་བ་བཞི། འབྲས་གཟུགས་མིག་སོགས་དབང་པོ་ལྔ། གཟུགས་སོགས་ཡུལ་ལྔ། རྣམ་རིག་མིན་པའི་གཟུགས་རྣམས་སོ། །ཉམས་སུ་མྱོང་བ་ཚོར་ཕུང་གི་མཚན་ཉིད། དབྱེ་ན་བདེ་སྡུག་བར་མ་གསུམ་མོ། །མཚན་མར་འཛིན་པ་འདུ་ཤེས་ཕུང་པོའི་མཚན་ཉིད། དབྱེ་ན་རྒྱ་ཆེ་ཆུང་བར་མ་ཚད་མེད་པ། མཚན་མ་མེད་པའི་འདུ་ཤེས་ལྔའོ། །ཕུང་པོ་བཞི་ལ་ཞེན་ཅིང་མངོན་པར་འདུ་བྱེད་པ་འདུ་བྱེད་ཕུང་པོའི་མཚན་ཉིད། དབྱེ་ན་ལྡན་པའི་འདུ་བྱེད་སེམས་པ་ལ་སོགས་སེམས་བྱུང་ཞེ་དགུ། ལྡན་མིན་འདུ་བྱེད་ཐོབ་པ་ལ་སོགས་ཉེར་གསུམ་མོ། །ཡུལ་སོ་སོར་རྣམ་པར་རིག་པ་རྣམ་ཤེས་ཕུང་པོའི་མཚན་ཉིད། དབྱེ་ན་ཚོགས་དྲུག་གམ་བརྒྱད་དོ། །ཁམས་ནི་བཅོ་བརྒྱད་དོ། །གཟུགས་ལ་སོགས་པ་དམིགས་པ་ཡུལ་གྱི་ཁམས་དྲུག །མིག་སོགས་རྟེན་དབང་པོའི་ཁམས་དྲུག །མིག་ཤེས་སོགས་བརྟེན་པ་རྣམ་ཤེས་ཀྱི་ཁམས་དྲུག་གོ །སྐྱེ་མཆེད་བཅུ་གཉིས་ཏེ། མིག་སོགས་ནང་གི་སྐྱེ་མཆེད་དྲུག །གཟུགས་སོགས་ཕྱིའི་སྐྱེ་མཆེད་དྲུག་གོ །གསུམ་དུ་བསྟན་པའི་དགོས་པ་ཡང་སེམས་ལ་གཅིག་ཏུ་འཛིན་པའི་རྨོངས་པ་བཟློག་ཅིང་དབང་པོ་རབ་དང་། བསྡུས་པས་གོ་བར་འདོད་པ་རྣམས་ཀྱི་ཕྱིར་ཕུང་པོ་བསྟན། གཟུགས་ལ་རིལ་བུ་གཅིག་འཛིན་གྱི་རྨོངས་པ་བཟློག་ཅིང་དབང་པོ་འབྲིང་དང་། འབྲིང་པོས་གོ་བར་འདོད་པ་རྣམས་ཀྱི་ཕྱིར་སྐྱེ་མཆེད་བསྟན། གཉིས་ཀ་ལ་གཅིག་འཛིན་གྱི་རྨོངས་པ་བཟློག་ཅིང་དབང་པོ་ཐ་མ་དང་། རྒྱས་པས་གོ་བར་འདོད་པའི་ཕྱིར་ཁམས་བསྟན་ནོ། །འདིར་ནི་བྲལ་བའི་ཆ་ལས་ཡོན་ཏན་ཐོབ་ཚུལ་འདི་ལྟར་གོ་བར་བྱ་སྟེ། རྣམ་ཐར་བརྒྱད་དང་ལྡན་ཅིང་ཕུང་པོ་དག་ལས་རབ་ཏུ་རྣམ་པར་གྲོལ་བ་སྟེ། བརྒྱད་ནི། ནང་མི་སྡུག་པའི་མཚན་ཉིད་ཅན་གྱི་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་སྣོད་ཀྱི་འཇིག་རྟེན། ཆུང་ངུ་སེམས་ཅན་གྱི་འཇིག་རྟེན། ངན་པ་མི། བཟང་པོ་ལྷ་རྣམས། མཛེས་པ་ཡིད་འོང་། མི་མཛེས་པ་ཡིད་མི་འོང་བ་སྟེ། དེ་རྣམས་ལ་མི་སྡུག་པར་ལྟ་བ་ནི་གཟུགས་ཅན་གཟུགས་ལ་ལྟ་བའི་རྣམ་ཐར་རོ། །ནང་རང་ལུས་ལ་མི་སྡུག་པའི་གཟུགས་མེད་པར་འདུ་ཤེས་བཞག་ནས་ཕྱི་རོལ་གྱི་གཟུགས་ཆེ་ཆུང་བཟང་ངན་ཀུན་ལ་མི་སྡུག་པའི་འདུ་ཤེས་བཞག་ནས་ལྟ་བ་ནི་གཟུགས་མེད་གཟུགས་ལ་ལྟ་བའ་ིརྣམ་ཐར་རོ། །མི་སྡུག་བསྒོམ་པ་དེའི་སེམས་སྐྱོ་བ་བསལ་ཕྱིར་རམ་སྒོམ་པ་དེ་གྲུབ་མ་གྲུབ་བརྟགས་ཕྱིར་གཟུག་སྡུག་མི་སྡུག་ཕན་ཚུན་ལྟོས་དང་། ཕན་ཚུན་རྗེས་སུ་འབྲེལ་བ་དང་། ཕན་ཚུན་རོ་གཅིག་པའི་འདུ་ཤེས་འཇོག་པ་ནི་སྡུག་པའི་རྣམ་ཐར་རོ། །ཞི་བའི་རྣམ་ཐར་ནམ་མཁའ་སོགས་གཟུགས་མེད་ཀྱི་རྣམ་ཐར་བཞི་དང་། འགོག་པ་འདུ་ཤེས་དང་ཚོར་བ་འགོག་པའི་རྣམ་ཐར་ཏེ་བརྒྱད་དེ་དག་གིས་སྒྲིབ་པ་བཞི་རྣམ་པར་གྲོལ་བར་བྱེད་པས་ན་རྣམ་ཐར་ཞེས་བྱ་ཞིང་སྒྲིབ་པ་བཞི་ནི། རྣམ་ཐར་དང་པོ་གཉིས་ཀྱིས་སྤྲུལ་པའི་སྒྲིབ་པ་ལས་རྣམ་པར་ཐར་བར་བྱེད། སྡུག་པས་སྡུག་མི་སྡུག་ལ་བརྟེན་ནས་ཉོན་མོངས་འབྱུང་བའི་སྒྲིབ་པ་ལས་ཐར་བར་བྱེད། གཟུགས་མེད་བཞིས་ཞི་བའི་རྣམ་ཐར་ལ་ཆགས་པའི་སྒྲིབ་པ་ལས་ཐར་བར་བྱེད། འགོག་པས་འདུ་ཚོར་འགོག་པར་སྒྲིབ་པ་ལས་རྣམ་པར་ཐར་བར་བྱེད་པ་ཡིན་ནོ། ཁམས་རྣམས་ཀྱི་སྣང་ཞེན་འཐས་པ་དང་བྲལ་ཞིང་མི་ལྡན་ལ་ཟད་པར་གྱི་སྐྱེ་མཆེད་བཅུ་དང་ལྡན་ཅིང་། བཅུ་ནི་ས་ཆུ་མེ་རླུང་སྟེ་འབྱུང་བའི་ཟད་པར་བཞི་དང་། སྔོ་སེར་དཀར་དམར་ཏེ་ཁ་དོག་གི་ཟད་པར་བཞི་དང་། ནམ་མཁའི་ཟད་པ་དང་། རྣམ་ཤེས་ཀྱི་ཟད་པ་སྟེ་མདོར་ན་ཤེས་བྱའི་ཡུལ་འདུས་བྱས་བསྡུས་པ་དང་པོ་བརྒྱད། ཡུལ་འདུས་མ་བྱས་བསྡུས་པ་བར་པ་གཅིག་དང་། ཡུལ་ཅན་གྱི་བསྡུས་པ་ཐ་མ་སྟེ། དེ་དག་ལ་མཁྱེན་པས་ཁྱབ་པའོ། །འཇིག་རྟེན་ཐམས་ཅད་ཟིལ་གྱིས་གནོན་པར་བྱེད་པའི་ཟིལ་གནོན་བརྒྱད་ལ་དབང་འབྱོར་ཞིང་སྐྱེ་མཆེད་རྣམས་ཀྱིས་དབང་དུ་མི་འགྱུར་བས་བསྡམས་པ་སྟེ། བརྒྱད་ནི་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་སོགས་ལ་ཟིལ་གྱིས་གནོན་ཕྱིར་ལྟ་ཞིང་དེ་དག་ཞི་གནས་ཀྱིས་ཟིལ་གྱིས་མནན་ནས་ཤེས། ལྷག་མཐོང་གིས་ཟིལ་གྱིས་མནན་ནས་མཐོང་བ། དེ་བཞིན་དུ་གཟུགས་ཆེན་པོ་སོགས་ལ་སྦྱར་བ་དང་། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་སོགས་ལ་ལྟ་ཞིང་། དེ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང་བ། དེ་བཞིན་དུ་གཟུགས་ཆེན་པོ་སོགས་ལ་སྦྱར་བས་དབྱེ་བས་ཟིལ་གནོན་བཞི་དང་། ནང་གཟུགས་མེད་པ་ཁོ་ནའི་འདུ་ཤེས་པས་ཕྱི་རོལ་གྱི་གཟུགས་སྔོན་པོ་ཞེས་སྤྱིར་བསྟན་ཅིང་། ཁ་དོག་སྔོན་པོ་ཞེས་པས་ལྷན་སྐྱེས་བསྟན་ནས།'སྔོོན་པོ་ལྟ་བུར་སྟོན་པ་ཞེས་པས་སྦྱར་བྱུང་བསྟན་ལ། འོད་སྔོན་པོ་འབྱུང་བ་ཞེས་པས་གཉིས་ཀ་ཡོད་པའི་སྣང་བ་བསྟན་ཅིང་། ལྷན་སྐྱེས་དཔེ་ཟར་མའི་མེ་ཏོག་དང་སྦྱར་བྱུང་གི་དཔེ་རས་ཁ་དོག་གཞན་ལས་ཁྱད་པར་འཕགས་པ་ཡུལ་ཝཱ་རཱ་ནཱ་སིའི་རས་ཕུན་སུམ་ཚོགས་པའི་སྔོན་པོ་བསྟན་ནས། དེ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང་བ་ཟིལ་གནོན་གཅིག་དང་། དེ་བཞིན་དུ་སེར་པོ་ལ་དོང་ཁའི་མེ་ཏོག་དང་། དམར་པོ་ལ་བིནྡྷུ་ཛི་བ་ཀའི་མེ་ཏོག་དང་། དཀར་པོའི་དཔེར་སྐར་མ་ལ་པ་བ་སངས་སྦྱར་ནས་གཞན་སྔ་མ་ལྟར་བྱས་པ་གསུམ་དང་བཅས་པ་ཁ་དོག་གི་ཟད་པར་བཞི་ཡིན་ཅིང་། སྔ་མ་བཞི་མི་སྡུག་པའི་རྣམ་ཐར་གྱིས་བསྡུས་ལ་། ཕྱི་མ་བཞི་སྡུག་པའི་རྣམ་ཐར་གྱིས་བསྡུས་སོ། །དེ་གསུམ་གྱི་ཁྱད་པར་ནི་དམིགས་པ་ལ་མོས་པ་བརྟན་པར་བྱེད་པ་རྣམ་ཐར། དམིགས་པར་དབང་བསྒྱུར་བ་ཟིལ་གནོན། དམིགས་པ་ལ་ཁྱབ་པར་བྱེད་པ་ཟད་པར་ཡིན་ནོ། །དཔའ་བར་འགྲོ་བའི་ཏིང་ངེ་འཛིན་ནི། ཏིང་ངེ་འཛིན་གྱི་ལུས་ལ་བར་དུ་གཅོད་པའི་མདུད་པ་བཞི་པོ་བརྣབ་སེམས་ལུས་ཀྱི་མདུད་པ། གནོད་སེམས་ལུས་ཀྱི་མདུད་པ། ཚུལ་ཁྲིིམས་དང་བརྟུལ་ཞུགས་མཆོག་འཛིན་ལུས་ཀྱི་མདུད་པ། མངོན་པར་ཞེན་པ་ལུས་ཀྱི་མདུད་པ་རྣམས་རྩད་ནས་ཤིན་ཏུ་བཅད་པ་དང་། ཡོངས་སུ་གདུང་བ་གསུམ་པོ་འདོད་ཆགས་ཀྱི་ཡོངས་སུ་གདུང་བ། ཞེ་སྡང་གིས་ཡོངས་སུ་གདུང་བ། གཏི་མུག་གིས་ཡོངས་སུ་གདུང་བ་དག་ལས་ཐུགས་རྣམ་པར་གྲོལ་བ། སྲེད་པ་གསུམ་པོ་འདོད་ཡོན་ལྔ་ལ་ཆགས་པ་འདོད་པའི་སྲེད་པ། ཡང་སྲིད་ཀྱི་ཕུང་པོ་འདོད་པ་སྲིད་པའི་སྲེད་པ། ཕུང་པོ་དང་བྲལ་བར་འདོད་པ་འཇིག་པའི་སྲེད་པ་དེ་རྣམས་ལས་གྲོལ་བའི་ཏིང་འཛིན་ཐོབ་པའོ། །རྡོ་རྗེ་ལྟ་བུའི་ཏིང་འཛིན་ནི། ཆུ་བོ་བཞི་པོ་འདོད་ཉོན་རྣམས་འདོད་པའི་ཆུ་བོ། ཁམས་གོང་མའི་ཉོན་མོངས་རྣམས་སྲིད་པའི་ཆུ་བོ། འཇིག་ལྟ་སོགས་ལྟ་བའི་ཆུ་བོ། མི་ཤེས་པ་ཐམས་ཅད་མ་རིག་པའི་ཆུ་བོ་དེ་དག་ཀུན་ལས། རྡོ་རྗེ་ལྟ་བུའི་ཏིང་འཛིན་བར་ཆད་མེད་པ། བརྟན་པ། སྲ་བ། རོ་གཅིག་པ། ཁྱབ་པ་སྟེ་ཁྱད་ཆོས་ལྔ་ལྡན་དུ་གསུངས་པ་ཐོབ་ནས་བརྒལ་བའོ། །རྣམ་ཐར་གསུམ་སོགས་ཀྱི་བདག་ཉིད་ཤེས་རབ་ཀྱི་ཕ་རོལ་ཏུ་ཕྱི ན་པའི་ཡོན་ཏན་ནི། རྣམ་ཐར་སྒོ་གསུམ་དང་། དུས་གསུམ་མཉམ་པ་ཉིད་དང་། རིག་པ་གསུམ་མངོན་དུ་བགྱིས་པའི་ཡེ་ཤེས་སམ་ཤེས་རབ་ཐམས་ཅད་ཡོངས་སུ་རྫོགས་པའོ། །ཆོས་སྐུ་རང་གི་ངོ་བོའི་ཡོན་ཏན་དྲན་པ་ལ་གསུམ། རང་བཞིན་འོད་གསལ་བའི་ཡོན་ཏན། ངོ་བོ་སྤྲོས་བྲལ་གྱི་ཡོན་ཏན། ཀུན་ཁྱབ་ཐུགས་རྗེའི་ཡོན་ཏན་ནོ། །དང་པོ་ནི། འདས་པ་དང་། མ་བྱོན་པ་མ་འོངས་པ་དང་ད་ལྟར་བཞུགས་པའི་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་བརྙེས་པའི་རྣམ་པ་ཐམས་ཅད་མཁྱེན་པའི་ཡེ་ཤེས་འོད་གསལ་ཆེན་པོ་ལ་རྟག་ཏུ་གནས་པའོ། །གཉིས་པ་ནི། དངོས་མེད་ལས་གྲོལ་བའི་མྱ་ངན་ལས་འདས་པའི་མཐའ་ལ་མི་གནས་ཤིང་། སྲིད་ཞིའི་མཐའ་ལས་གྲོལ་བ་སྤྲོས་བྲལ་ཆོས་ཀྱི་དབྱིངས་ཡང་དག་པའི་དེ་བཞིན་ཉིད་ཀྱི་མཐའ་ལ་གནས་པའོ། །གསུམ་པ་ནི། སྔར་བཤད་པའི་ཚད་མེ་བཞི་དང་ཉིན་མཚན་ལན་དྲུག་ཏུ་ཁམས་གསུམ་གྱི་སེམས་ཅན་ཐམས་ཅད་ལ་གཟིགས་པའི་ཐུགས་རྗེ་ཆེེན་པོ་དང་ལྡན་ཅིང་། སེམས་ཅན་མི་འདོར་བའི་གཞན་དོན་ཕུན་ཚོགས་ཀྱི་ས་ལ་རྟག་ཏུ་བཞུགས་པའོ། །དེ་ནི་ལྷག་མ་འདྲེན་པའི་ཚིག་གོ། །གཉིས་པ་དོན་བསྡུ་བ་ནི། འདི་ལྟར་བཤད་པ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སྐུ་གསུམ་པོའི་ཆེ་བའི་ཡོན་ཏན་སྒྲོ་སྐུར་མེད་ཅིང་ཡོངས་སུ་རྫོགས་པའི་སྒོ་ནས་ཡང་དག་པར་བརྗོད་པ་རྣམས་ཡིན་པས་སོ། །ཆོས་དཀོན་མཆོག་གི་ཡོན་ཏན་དྲན་ཚུལ་ལ། ཀུན་མཁྱེན་རོང་ཟོམ་པཎྜི་ཏའི་ཞལ་ནས། བཅོམ་ལྡན་འདས་ཀྱི་ཆོས་ལེགས་པར་གསུངས་པ། ལམ་དང་བཅས་པ། འབྲས་བུ་དང་བཅས་པ། ཞེས་གསུངས་པ་ཇི་བཞིན་དུ། ལུང་གི་ཡོན་ཏན་དྲན་པ་དང་། རྟོགས་པའི་ཆོས་ཀྱིི་ཡོན་ཏན་དྲན་ཚུལ་གཉིས་ལས། དང་པོ་ནི། དམ་པའི་ཆོས་ནི་ཞེས་སྤྱིར་བསྟན་ནས། ཚུལ་ཁྲིམས་ཀྱི་བསླབ་པ་སྟོན་པས་རྒྱུ་འབྲས་ཡིད་ཆེས་དད་པ་བསྐྱེད་པས་ཐོག་མར་དགེ་བ། ཏིང་འཛིན་གྱི་བསླབ་པ་སྟོན་པས་མངོན་ཤེས་སོགས་ཀྱི་དགའ་བ་བསྐྱེད་པས་བར་དུ་དགེ་བ། ཤེས་རབ་ཀྱི་བསླབ་པ་སྟོན་པས་ཟག་མེད་ཀྱི་བློ་ཡི་རྒྱུར་གྱུར་བས་ཐ་མར་དགེ་བ་སྟེ། བཀས་བཅད་ཀྱི་བླ་དཔེ་ལས་སྦྱོར་ཚུལ་དེ་ལྟར་འབྱུང་ལ། ཡང་ན་ཐོས་བསམ་སྒོམ་གསུམ་ལ་སྦྱར་བར་བྱའོ། །ཀུན་རྫོབ་དོན་དམ་གྱི་བདེན་པའི་དོན་གཉིས་སྟོན་པས་དོན་བཟང་པོ། འཇིག་རྟེན་གྱི་གྲགས་པ་བཞིན་སྟོན་པས་ཚིག་གཟུང་སླ་བས་ཚིག་འབྲུ་བཟང་པོའོ། །ཚངས་པ་མྱང་འདས་དེ་ཐོབ་པར་བྱེད་པའི་ཕྱིར་ན་སྤྱོད་པ་དེའི་ཁྱད་པར་འཕགས་ཆོས་ཡོན་ཏན་གྲངས་བཞིར་གནས་པ་ཚངས་སྤྱོད་ཀྱི་ཡོན་ཏན་བཞི་པོ་སྟོན་པ་སྟེ། དེ་ཡང་མུ་སྟེགས་སོགས་ཕལ་པ་དང་ཐུན་མོང་མ་ཡིན་པའི་དོན་དང་ལྡན་པས་མ་འདྲེས་པ། ཁམས་གསུམ་གྱི་ཉོན་མོངས་མ་ལུས་སྤོང་བའི་གཉེན་པོ་ཚང་བས་ཡོངས་སུ་རྫོགས་པ། ངོ་བོ་ཟག་མེད་ཉིད་ཡིན་པས་ཡོངས་སུ་དག་པ། གློ་བུར་གྱི་དྲི་མ་བྲལ་བས་ཡོངས་སུ་བྱང་བ་སྟེ། དེ་དག་གི་ཡོན་ཏན་ཅན་ནི་བཅོམ་ལྡན་འདས་ཀྱི་རྗོད་བྱེད་ལུང་གི་ཆོས་ཞལ་ནས་ལེགས་པར་གསུངས་པ་རྣམས་ཡིན་ནོ། །གཉིས་པ་ལ། མཚན་ཉིད་བཞི་དང་ལྡན་པ་འབྲས་བུ་འགོག་བདེན་གྱི་ཡོན་ཏན་དང་། མཚན་ཉིད་བཞི་དང་ལྡན་པ་རྒྱུ་ལམ་བདེན་གྱི་ཡོན་ཏན་གཉིས་ལས། དང་པོ་ནི། ཆོས་ཉིད་ཇི་ལྟ་བ་ཡང་དག་པར་མཐོང་བ་དེ་ཉོན་མོངས་དང་ཉེ་ཉོན་ཀུན་གྱི་ནད་མེད་པས་ན་འགོག་པ། དེ་བཞིན་ཉིད་དུས་གསུམ་དུ་གནས་པས་ཆད་པ་མེད་པ། དེ་ཉིད་ཀྱིས་སྡུག་བསྔལ་བྲལ་བ་ཉེ་བར་གཏོད་པས་ན་ཞི་བ། ཆགས་བྲལ་འདི་མཐོང་བ་ལ་དོན་ཆེན་པོའི་ཡོན་ཏན་དཔག་མེད་ཡོད་ཅིང་། དེ་མཁས་པའི་སྐྱེ་བོ་འཕགས་པ་རྣམས་ཀྱི་སོ་སོ་རང་གི་ཡེ་ཤེས་ཀྱིས་རིག་པའམ་མཐོང་བྱ་ཡིན་པས་གྱ་ནོམ་པ། བཅོམ་ལྡན་འདས་ཀྱིས་ཆོས་ཀྱི་སྒོ་ཉོན་མོངས་འདུལ་བའི་གཉེན་པོར་གསུངས་པ་ཐམས་ཅད་ཀྱི་ནང་ནས་གཉེན་པོ་ཟླ་མེད་མཆོག་ལ་ལེགས་པར་རྟོན་པ་ཅན་ཡིན་ཅིང་། དེ་ནི་འཁོར་བ་ལས་ངེས་པར་འབྱུང་བའི་མཚན་ཉིད་ཅན་ཡིན་པས་ངེས་པར་འབྱུང་བའོ། །གཉིས་པ་ནི། རྫོགས་པའི་བྱང་ཆུབ་ཏུ་འགྲོ་བར་བྱེད་པས་ན་ལམ། མི་མཐུན་སྒྲིབ་པ་ཐམས་ཅད་མེད་པར་བྱེད་པའི་གཉེན་པོར་གྱུར་ཅིང་། དག་གསལ་འདུས་པའི་ཁྱད་ཆོས་དང་ལྡན་པས་རིགས་པ། རང་རྒྱུད་ཕྱིན་ཅི་མ་ལོག་པར་སྒྲུབ་པའི་ཕྱིར་བརྟེན་པ་ཡོད་པ། འཁོར་བའི་རྒྱུ་བ་རིམ་བཞིན་བཅད་ནས་ངེས་པར་འབྱིན་པ་སྟེ་རྒྱུ་བ་ནི་རྒྱུན་གྱི་དོན་ཡིན་ནོ། །དགེ་འདུན་དཀོན་མཆོག་གི་ཡོན་ཏན་དྲན་ཚུལ་ལ། ཀུན་མཁྱེན་རོང་ཟོམ་པཎྜི་ཏའི་ཞལ་ནས། ལྟ་བ་དང་དད་པ་མི་ཕྱེད་པ་མཆོད་གནས་ཀྱི་དཔལ་ཞིང་། བཀུར་བའི་འོས། ཕྱག་གི་གནས་ཞེས་གསུངས་པ་ཇི་བཞིན་དུ། རང་ངོར་རྫོགས་པ་འཕགས་ལམ་དང་མི་ཕྱེད་པར་ལྡན་པའི་ཡོན་ཏན་དང་། གཞན་ངོར་འབྱུང་བ་ལུས་བརྟེན་མཆོད་ཡུལ་མཆོག་ཏུ་གྱུར་པའི་ཡོན་ཏན་གཉིས་ལས། དང་པོ་ནི། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ཞེས་སམ། ཐེག་པ་ཆེན་པོའི་དགེ་འདུན་ནི་ཞེས་པས་མིང་སྤྱིར་བསྟན་ནས། ཐེག་དམན་གྱི་དབང་དུ་བྱས་ན་རྒྱུན་ཞུགས་དང་། ཐེག་ཆེན་གྱི་དབང་དུ་ན་ས་དང་པོ་རབ་ཏུ་དགའ་བ་ལ་མཐོང་སྤངས་སྤངས་ནས་ལེགས་པར་ཞུགས་པ། དམན་པའི་ཕྱིར་འོང་དང་ཆེན་པོའི་མ་དག་ས་བདུན་ལ་རིག་པར་ཞུགས་པ། དམན་པའི་ཕྱིར་མི་འོང་དང་ཆེན་པོའི་དག་པ་ས་གསུམ་ལ་དྲང་པོར་ཞུགས་པ། དམན་པའི་དགྲ་བཅོམ་དང་ཆེན་པོའི་ས་བཅུའི་རྒྱུན་མཐའ་ལ་སངས་རྒྱས་དང་མཐུན་པར་ཞུགས་པའོ། །གཉིས་པ་ལ་གསུམ་ལས། གུས་པའི་ཡུལ་མཆོག་ཏུ་གྱུར་པ་ནི། མཚན་བརྗོད་པའམ་ཡིད་ལ་དྲན་པ་ཙམ་ན་ཐལ་མོ་སྦྱར་བའི་འོས་སུ་གྱུར་པ། དངོས་སུ་མཐོང་བའམ་ཚོགས་བསགས་སྒྲིབ་པ་སྦྱོང་བའི་ཕྱིར་ཕྱག་བྱ་བའི་འོས་སུ་གྱུར་པའོ། །བརྟེན་པའི་ཡུལ་མཆོག་ཏུ་གྱུར་པ་ནི། བརྟེན་པ་ཙམ་གྱིས་བསོད་ནམས་དགེ་བའི་ཆོས་རྣམས་ཀྱི་དཔལ་ཕུན་སུམ་ཚོགས་པ་འཕེལ་བ་ཉིད་ཀྱི་ཞིང་དམ་པར་གྱུར་ཅིང་། ལུང་རྟོགས་ཀྱི་ཡོན་ཏན་ཕུན་ཚོགས་པ་སྒྲུབ་པར་བྱེད་པ་དང་། གོང་དུ་སྤེལ་བའི་སྒོ་ནས་ཡོན་ཏན་ཡོངས་རྫོགས་གོང་ནས་གོང་དུ་སྦྱོང་བར་བྱེད་པའི་བདག་ཉིད་ཆེན་པོར་བཞུགས་པའོ། །མཆོད་པའི་ཡུལ་མཆོག་ཏུ་གྱུར་པ་ནི། གནས་སྐབས་མཐོ་རིས་ཀྱི་ཡོན་ཏན་ཐོབ་ཕྱིར་ཟས་སོགས་སྦྱིན་པའི་གནས་སུ་གྱུར་པ། མཐར་ཐུག་ཐར་པའི་རྒྱུ་འབྲས་ཐོབ་པའི་ཕྱིར་ཀུན་ཏུའམ་རྟག་ཏུ་སྦྱིན་པའི་གནས་སུ་གྱུར་པ་འཇིག་རྟེན་ལས་འདས་པས་བླ་ན་མེད་པ་ཆེན་པོའོ། །ཡན་ལག་གཉིས་པ་གང་ལ་སྐྱབས་སུ་འགྲོ་བའི་ཡུལ་ལ། སྤང་བྱར་གྱུར་པའི་ཡུལ་དང་། བསྟེན་བྱར་གྱུར་པའི་ཡུལ་གཉིས་ཡོད་པ་ལས། དང་པོ་ནི། མི་ཡིན་པ་མུ་སྟེགས་སོགས་ཀྱི་སྟོན་པ་སོགས་དང་། འཇིག་རྟེན་གྱི་རྒྱལ་པོ་དང་། བློན་པ་ལ་སོགས་པའོ། །མི་མ་ཡིན་པ་མདོ་རྒྱལ་མཚན་དམ་པ་ལས་གསུངས་པ་ལྟར་རི་དང་། ཤིང་ལྗོན་པ་དང་། ཀུན་དགའ་ར་བ། སྐྱེད་ཚལ་དང་། ནགས་ཚལ་ལ་གནས་པའི་འཇིག་རྟེན་གྱི་ལྷ་རྣམས་དང་། ངན་སོང་གི་འགྲོ་བ་ཀླུ་སྲིན་པོ་སོགས་དང་། དེ་དག་མཆོད་པའི་རྟེན་གཟུགས་བརྙན་དང་། རྟེན་མཁར་དག་ཡིན་ནོ། །དེ་དག་ལ་སྐྱབས་སུ་འགྲོ་བ་ལྟ་ཞོག་གུས་པའི་བྱ་བ་ཙམ་ཡང་སྤང་དགོས་སོ། །འཇིག་རྟེན་གྱི་མི་དང་མི་མིན་དེ་རྣམས་ནི་རང་ཉིད་ལས་ཉོན་དཔག་མེད་ཀྱི་གཞན་དབང་དུ་གྱུར་པས་བསླུ་བ་ཡིན་པས་དེ་དག་སྤང་བྱའི་ཡུལ་ལོ། །བསྟེན་བྱར་གྱུར་པའི་ཡུལ་ལ། གནས་གསུམ་ཞེས་པས་སྐྱབས་ངོས་བཟུང་བ་དང་། བསྟེན་པའི་ཞེས་པས་བསླུ་མེད་དུ་བསྒྲུབ་པ་དང་། ཡུལ་དེ་ལ་ཞེས་པས་བྱ་བྱེད་འཇུག་པའི་ཡུལ་དམིགས་ཀྱིས་བསལ་བ་གསུམ་ལས། དང་པོ་ནི། གནས་སམ་རྟེན་ནམ་སྐྱབས་ཞེས་པ་དོན་གཅིག་ཡིན་པས་སྐྱབས་གསུམ་ཞེས་པར་གོ་དགོས་ཤིང་། དེ་ཡང་སྐྱབས་ཀྱི་དོན་ཐུན་མོང་ལྟར་ན། གང་ལ་བརྟེན་ན་སྡུག་བསྔལ་ཐམས་ཅད་ལས་གཏན་དུ་ངེས་པར་ཐར་བར་བྱེད་པ་ཡིན་ཀྱང་། ཐེག་ཆེན་གྱི་དབང་དུ་བྱས་ན། སྐྱོབ་པ་ལྔ་དང་ལྡན་པ་སྐྱབས་ཀྱི་དོན་ཏེ་དེ་ཡང་། མདོ་རྒྱན་ལས། འཚེ་བ་དག་ནི་ཐམས་ཅད་དང་། །ངན་སོང་དང་ནི་ཐབས་མིན་དང་། །འཇིག་ཚོགས་ཐེག་པ་དམན་དག་ལས། །སྐྱོབ་ཕྱིར་སྐྱབས་ཀྱི་དམ་པར་འདོད། །ཅེས་གསུངས་པ་བཞིན་ནོ། །དེ་ནི་དཀོན་མཆོག་གསུམ་ཡིན་ཅིང་ཚུལ་དེ་ལ་སྤྱིར་བསྟན་པ་དང་། དབྱེ་བ་སོ་སོ་ནས་རྒྱས་པར་བཤད་པ་གཉིས་ལས། དང་པོ་ནི། འདིར་རྣམ་པ་དྲུག་གིས་གཏན་ལ་དབབ་པ་ལ་དཀོན་མཆོག་གསུམ་གྱི་ངོ་བོ་ནི། ཐུན་མོང་དུ་མཛོད་འགྲེལ་ལས། དད་པ་ནི་གཉིས་ཏེ་ཆོས་དང་གང་ཟག་ལ་དད་པ་ཡིན་ཅེས་གསུངས་པ་ལྟར། དམ་པའི་ཆོས་དང་། འཕགས་པའི་གང་ཟག་གཉིས་སུ་གནས་མོད། ཐུན་མོང་མ་ཡིན་པ་ནང་པ་སངས་རྒྱས་པའི་ལུགས་ལ་གང་ཟག་བཏགས་ཡོད་ཙམ་དུ་འདོད་པས་ཆོས་དང་ཆོས་ཉིད་གཉིས་ཀྱིས་འཇོག་ལ། དེ་ཡང་ཐེག་དམན་ལྟར་ན་སངས་རྒྱས་སུ་བྱེད་པའི་ཆོས་ལམ་བདེན་མི་སློབ་པས་བསྡུས་པ་སངས་རྒྱས་དཀོན་མཆོག་དང་། དགེ་འདུན་དུ་བྱེད་པའི་ཆོས་ལམ་བདེན་སློབ་མི་སློབ་གཉིས་ཀས་བསྡུས་པ་དགེ་འདུན་དཀོན་མཆོག་དང་། ཆོས་ཀྱི་མཆོག་འགོག་བདེན་མྱ་ངན་ལས་འདས་པ་ཆོས་དཀོན་མཆོག་ཏུ་འཇོག་པས་ན་ཆོས་སུ་གནས་སོ། །ཐེག་ཆེན་ལྟར་ན་དཀོན་མཆོག་གསུམ་གྱི་ངོ་བོ་ཆོས་ཅན་ཀུན་རྫོབ་དང་། ཆོས་ཉིད་དོན་དམ་པ་གཉིས་ཀྱིས་འཇོག་པར་སྣང་ངོ་། །ངེས་ཚིག་ནི། རྒྱུད་བླ་མར་གསུངས་པ་བཞིན། ཡིད་བཞིན་ནོར་བུ་དང་ཆོས་མཚུངས་དྲུག་སྦྱར་བ། འཇིག་རྟེན་བསགས་དམན་གྱི་ངོར་དཀོན་མཆོག་གསུམ་འབྱུང་བ་དཀོན་པ་དང་། སྒྲིབ་པའི་དྲི་མ་མེད་པ། མངོན་ཤེས་སོགས་ཡོན་ཏན་དཔག་མེད་ཀྱི་མཐུ་དང་ལྡན་པ། འཇིག་རྟེན་གྱི་བདེ་བ་དང་དགེ་བའི་ཆོས་འཕེལ་བའི་རྐྱེན་ཡིན་པས་རྒྱན་དུ་གྱུར་པ། ནོར་བུ་འཆིང་བུ་སོགས་ལས་འཕགས་པ་ལྟར་དཀོན་མཆོག་གསུམ་འཇིག་རྟེན་ལས་འདས་པས་ན་མཆོག་ཏུ་གྱུར་པ། གནས་སྐབས་མཐར་ཐུག་ཀུན་ཏུ་འདུས་མ་བྱས་ཡིན་པས་འགྱུར་བ་མེད་པའི་ཕྱིར་ན་དཀོན་མཆོག་ཅེས་བྱའོ། །མཚན་ཉིད་ནི། སངས་རྒྱས་དེ་ཡི་ཆོས་དགེ་འདུན་གྱིས་བསྡུས་པ་གང་ཞིག་ཐར་པ་འདོད་པ་རྣམས་ཀྱི་སྐྱབས་བླ་ན་མེད་པ་དཀོན་མཆོག་གསུམ་གྱི་མཚན་ཉིད་དོ། །དབྱེ་ན། སངས་རྒྱས། ཆོས། དགེ་འདུན་དཀོན་མཆོག་གསུམ་མོ། །གྲངས་ངེས་ནི་རྒྱུད་བླ་མ་བཞིན་ཏེ། སྟོན་པས་སངས་རྒྱས་ཀྱི་ཡོན་ཏན་ཐོབ་པར་དོན་དུ་གཉེར་བ་བྱང་ཆུབ་སེམས་དཔའི་ཐེག་པ་དང་། མངོན་མཐོའི་བློ་ཅན་སངས་རྒྱས་ལ་བྱ་བ་བྱེད་པར་མོས་པའི་ངོར་སངས་རྒྱས་དཀོན་མཆོག་བཞག །བསྟན་པ་ཆོས་ཀྱི་ཡོན་ཏན་རང་བྱུང་དུ་ཐོབ་པ་དོན་གཉེར་བ་རང་རྒྱལ་གྱི་ཐེག་པ་དང་། མངོན་མཐོའི་བློ་ཅན་ཆོས་ལ་བྱ་བྱེད་མོས་ངོར་ཆོས་དཀོན་མཆོག་བཞག །སློབ་མ་དགེ་འདུན་གྱི་ཡོན་ཏན་དོན་དུ་གཉེར་བ་ཉན་ཐོས་ཀྱི་ཐེག་པ་དང་། མངོན་མཐོའི་བློ་ཅན་དགེ་འདུན་ལ་བྱ་བྱེད་མོས་ངོར་དགེ་འདུན་དཀོན་མཆོག་བཞག་པའོ། །གོ་རིམ་ངེས་པ་ནི། སངས་རྒྱས་ཀྱིས་ཆོས་གསུངས་པ་ལས་སློབ་པ་འཕགས་ཚོགས་འབྱུང་བས་ན་རྒྱུ་འབྲས་ཀྱི་གོ་རིམ་ཡིན་ནོ། །གཉིས་པ་ལ། སངས་རྒྱས། ཆོས། དགེ་འདུན་དཀོན་མཆོག་སོ་སོར་བཤད་པ་གསུམ་ལས། དང་པོ་ལ་ངོ་བོ་ནི། སྤངས་རྟོགས་མཐར་ཕྱིན་གྱི་འཕགས་པའི་གང་ཟག་གོ། །ངེས་ཚིག་ནི། བུདྡྷཱ་ཞེས་པའི་སྒྲ་སངས་པ་དང་། རྒྱས་པ་གཉིས་ཀར་འཇུག་པས་མ་རིག་པ་སངས་ཤིང་ཤེས་བྱ་ལ་མཁྱེན་པ་རྒྱས་པའོ། །མཚན་ཉིད་ནི། དོན་གཉིས་མཐར་ཕྱིན་པའི་ཡོན་ཏན་དྲུག་ལྡན་པའོ། །དྲུག་ནི། སྐྱེ་འཇིག་གནས་གསུམ་བྲལ་བའི་འདུས་མ་བྱས། རྣམ་རྟོག་ཐམས་ཅད་ཞི་བས་ལྷུན་གྲུབ། རང་བྱུང་གི་ཡེ་ཤེས་ཀྱིས་རིག་པར་བྱ་བས་གཞན་རྐྱེན་གྱིས་མི་རྟོགས་པ་གསུམ་ནི་རང་དོན་གྱི་ཡོན་ཏན་ཡིན་ལ། ཆོས་ཐམས་ཅད་མཁྱེན་པ། སེམས་ཅན་ལ་བརྩེ་བ། ཕན་བདེ་བྱེད་ནུས་པ་གསུམ་ནི་གཞན་དོན་གྱི་ཡོན་ཏན་ནོ། །དབྱེ་བ་ལ། རྟེན་སྐུ་གསུམ། བརྟེན་པ་ཡེ་ཤེས་ལྔ། འབད་མེད་ཀྱི་མཛད་པ་གསུམ་ལས། དང་པོ་ནི། སྤྲོས་བྲལ་རྣམ་པར་མི་རྟོག་པའི་ཡེ་ཤེས་དག་པ་གཉིས་ལྡན་ཟག་མེད་ཀྱི་ཆོས་སྡེ་ཚན་ཉེར་གཅིག་གི་ཡོན་ཏན་ཡོངས་སུ་རྫོགས་པ་ཆོས་སྐུའོ། །གནས་འོག་མིན་གྱི་གཞལ་ཡས་ཁང་སྟོན་པ་མཚན་དཔེས་བརྒྱན་པ་རྣམ་སྣང་སོགས་འཁོར་ས་བཅུའི་བྱང་སེམས་ཆོས་སྐུའི་སྒོ་ནས་ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པར་བྱེད་པ། དུས་སྐྱེ་འཇིག་གི་དངོས་པོ་ལས་འདས་པ་རྟག་པ་རྒྱུན་གྱི་འཁོར་ལོ་སྟེ་ངེས་པ་ལྔ་པོ་དེ་དང་ལྡན་པ་ལོངས་སྐུའོ། །འགྲོ་རྣམས་ཀུན་གྱི་མོས་པ་དང་སྐལ་པའི་དབང་གིས་སངས་རྒྱས་སུ་སྣང་བ་བྱང་ཆུབ་ཆེན་པོ། སེམས་ཅན་དུ་སྣང་བ་སྐྱེ་བ། བེམ་པོར་སྣང་བས་དོན་མཛད་པ་བཟོ་སྤྲུལ་སྐུ་གསུམ་ནི་སྤྲུལ་སྐུའོ། །བརྟེན་པ་ཡེ་ཤེས་ལྔ་ནི། སྟོབས་སོགས་སངས་རྒྱས་ཀྱི་ཆོས་རྣམས་འབྱུང་བའི་དབྱིངས་སུ་གྱུར་པ་སྒྲིབ་གཉིས་རྣམ་པར་དག་པའི་རང་བཞིན་ཆོས་དབྱིངས་ཡེ་ཤེས། ཆོས་ཀྱི་དབྱིངས་ཀྱི་ཡུལ་ཅན་རྟོག་མེད་འོད་གསལ་བའི་རང་བཞིན་མེ་ལོང་ཡེ་ཤེས། བདག་གཞན་མཉམ་ཉིད་དུ་རྟོགས་པ་མཉམ་ཉིད་ཡེ་ཤེས། ཤེས་བྱ་ཐམས་ཅད་ཐོགས་མེད་དུ་མ་འདྲེས་པར་མཁྱེན་པ་སོར་རྟོག་ཡེ་ཤེས། སེམས་ཅན་ཐམས་ཅད་ཀྱི་དོན་རྟག་ཏུ་འབད་མེད་དུ་མཛད་པའི་ཐབས་སྣ་ཚོགས་མཁྱེན་པ་བྱ་གྲུབ་ཡེ་ཤེས་ཏེ། ལྔ་པོ་དེ་ཡེ་ཤེས་གསུམ་དུ་ཡང་གནས་ཏེ་མཉམ་ཉིད་ཇི་ལྟ་བ་མཁྱེན་པ། སོར་རྟོག་བྱ་གྲུབ་གཉིས་ཇི་སྙེད་མཁྱེན་པ། ཆོས་དབྱིངས་མེ་ལོང་ནི་གཉིས་མེད་མཁྱེན་པའི་ཡེ་ཤེས་ཡིན་ནོ། །ཕྲིན་ལས་ནི། ཡིད་བཞིན་ནོར་ལྟར་རྟོག་མེད་འབད་རྩོལ་བྲལ་བས་རྟག་ཏུ་འགྲོ་བའི་རེ་འདོད་སྐོང་ཞིང་ཕན་བདེ་དཔག་མེད་བྱེད་པ་ཡིན་ནོ། །གཉིས་པ་ལ་ངོ་བོ་ནི། ངེས་ལེགས་སྒྲུབ་བྱེད་ཀྱི་ཚིག་དོན་ནོ། །ངེས་ཚིག་ནི། དྷརྨ་ཞེས་པ་འཛིན་པའི་དོན་དུ་འཇུག་ཅིང་དེ་ཡང་འདིར་ནི། ཀུན་རྫོབ་སྐྱེ་འཇིག་གི་མཚན་ཉིད་འཛིན་པ་དང་། དོན་དམ་བརྗོད་མེད་ཀྱི་མཚན་ཉིད་འཛིན་པས་ཆོས་ཞེས་བྱའོ། །མཚན་ཉིད། རྣམ་བྱང་གི་བདེན་པའི་ཡོན་ཏན་དྲུག་དང་ལྡན་པའོ། །དྲུག་ནི་རྟོག་གེའི་མུ་བཞིའི་བསམ་བརྗོད་ལས་འདས་ཤིང་རང་གིས་རིག་བྱ་ཡིན་པས་བསམ་མེད། ལས་ཉོན་གཉིས་བྲལ་བས་གཉིས་མེད། རྣམ་རྟོག་ཀུན་ཞི་བས་རྟོག་མེད་དེ་གསུམ་ནི་འགོག་བདེན་གྱི་ཡོན་ཏན་ཡིན་ལ། ཉོན་མོངས་ཉེ་ཉོན་ཀུན་དག་པར་བྱེད་པ་དང་། ཤེས་བྱ་གསལ་བར་བྱེད་པ་དང་། དེ་ཁོ་ན་ཉིད་མཐོང་བའི་སྒྲིབ་པའི་གཉེན་པོར་གྱུར་པ་གསུམ་ནི་ལམ་བདེན་གྱི་ཡོན་ཏན་ནོ། །དབྱེ་བ་ལ། ལུང་གི་ཆོས་དང་། རྟོགས་པའི་ཆོས་གཉིས་ཀྱི། དང་པོ་ལ་ནི། གསུང་རབ་ཡན་ལག་བཅུ་གཉིས་དང་། སྡེ་སྣོད་གསུམ་མམ་བདུན་དུ་ཡོད་པ་ལས། དང་པོ་ནི། ཕན་ཡོན་བཅུ་གཟིགས་ནས། ཚིག་དོན་གཉིས་ཀ་མདོར་བསྡུས་ཏེ་ལྷུག་པའམ་རྐྱང་བར་གསུངས་ཤིང་སྡེ་ཚན་དུ་བཅད་པ་ནི་མདོ་སྡེ་སྟེ་ཕན་ཡོན་བཅུ་ནི། རྣམ་པར་བཞག་སླ་བ་དང་། བཤད་སླ་བ་དང་། གཟུང་སླ་བ་དང་། ཆོས་ལ་གུས་པས་མྱུར་དུ་ཚོགས་ཡོངས་སུ་རྫོགས་པར་བྱེད་པ་དང་། མྱུར་དུ་ཆོས་ཉིད་རྟོགས་པར་འགྱུར་བ་དང་། སངས་རྒྱས་ལ་ཤེས་ནས་དད་པ་ཐོབ་པ་དང་། ཆོས་དང་དགེ་འདུན་ལ་ཤེས་ནས་དད་པ་ཐོབ་པ་དང་། མཐོང་བའི་ཆོས་ལ་བདེ་བར་གནས་པའི་མཆོག་ལ་རེག་པ་དང་། འབེལ་བའི་གཏམ་གྱིས་གཏན་ལ་འབེབས་པས་དམ་པ་རྣམས་ཀྱི་སེམས་མགུ་བར་བྱེད་དེ། མཁས་པ་མཁས་པ་ཞེས་བྱ་བའི་གྲངས་སུ་འགྲོ་བའོ། །དབུས་དང་ཐ་མར་ཚིགས་སུ་བཅད་ནས་བསྟན་པ་དང་དྲང་དོན་གྱི་མདོ་སྡེ་རྟོགས་བྱེད་ནི་དབྱངས་བསྙད། འབྱུང་འགྱུར་གྱི་གང་ཟག་སོགས་ལུང་བསྟན་པ་དང་ངེས་དོན་གྱི་མདོ་སྡེ་ནི་ལུང་བསྟན། །ཚིགས་བཅད་རྐང་པ་གཉིས་པ་དང་། གསུམ་པ་དང་། བཞི་པ་དང་། ལྔ་པ་དང་། དྲུག་པ་ཁོ་ནས་བསྟན་པ་ཚིགས་བཅད། ཞུ་བ་པོ་སོགས་ལ་མ་ལྟོས་པར་བསྟན་པ་གནས་པའི་ཆེད་དུ་གསུངས་པ་ཆེད་བརྗོད། བསླབ་པ་བཅས་ཁྲིམས་མཛད་པ་གླེང་གཞི། དཔེ་དང་བཅས་ནས་གསུངས་པ་རྟོགས་བརྗོད། སྔོན་བྱུང་གི་གཏམ་གསུངས་པ་དེ་ལྟར་བྱུང་བ། བྱང་ཆུབ་སེམས་དཔའི་སྐབས་ཀྱི་སྤྱོད་པ་གསུངས་པ་སྐྱེས་རབས། ཟབ་ཅིང་རྒྱ་ཆེ་བའི་དོན་བསྟན་པ་ཤིན་ཏུ་རྒྱས་པ། ཉན་ཐོས་བྱང་སེམས་སངས་རྒྱས་རྣམས་ཀྱི་ཡོན་ཏན་བསྟན་པ་རྨད་བྱུང་། ཆོས་རྣམས་ཀྱི་རང་དང་སྤྱིའི་མཚན་ཉིད་ཕྱིན་ཅི་མ་ལོག་པར་བསྟན་པ་གཏན་ལ་ཕབ་པའི་སྡེ་ཞེས་བྱ་ཞིང་། འདི་དག་སྡེ་སྣོད་གསུམ་དུ་འགྱུར་ཚུལ་ལ། ཐེག་དམན་གྱི་ལུགས་ནི། གླེང་གཞི་སོགས་བཞི་འདུལ་བ། མདོ་སྡེ་སོགས་ལྔ་མདོ་སྡེ། གཞན་གསུམ་མངོན་པར་བསྡུ། ཐེག་ཆེན་ལྟར་ན། བྱང་ས་ལས། ཤིན་ཏུ་རྒྱས་པའི་སྡེ་དང་སེམས་ཀྱི་སྡེ་སྣོད། གཞན་ཐམས་ཅད་ཉན་ཐོས་ཀྱི་སྡེ་སྣོད་དུ་གསུངས་ཐུན་མོང་གི་ལུགས་ལྟར་ན། མངོན་པ་ཀུན་བཏུས་ལས། མདོ་སྡེ་སོགས་ལྔ་ཐེག་དམན་གྱི་མདོ་སྡེའི་སྡེ་སྣོད། གླེང་གཞི་སོགས་བཞི་ཐེག་པ་ཆེ་ཆུང་གཉིས་ཀའི་འདུལ་བའི་སྡེ་སྣོད། ཤིན་ཏུ་རྒྱས་པ། རྨད་བྱུང་གཉིས་ཐེག་ཆེན་གྱི་མདོ་སྡེའི་སྡེ་སྣོད། གཏན་དབབ་གཉིས་ཀའི་མངོན་པའི་སྡེ་སྣོད་དུ་བསྡུ་བ་ཡིན་ནོ། །གཉིས་པ་ལ། དོན་གྱི་སྡེ་ཚན་མང་པོ་བསྡུས་ཤིང་བརྟེན་པའི་སྣོད་ཡིན་པས་ན་སྡེ་སྣོད་ཅེས་བྱ་ལ། དེའང་གསུམ་མམ་བདུན་ལས་སྤྱིར་བཏང་གསུམ་གྱི་འདུལ་བ་ནི། མདོ་རྒྱན་ལས། ལྟུང་དང་འབྱུང་དང་ལྡང་བ་དང་། །ངེས་པར་འབྱུང་དང་གང་ཟག་དང་། །བཅས་པ་དང་ནི་རབ་འབྱེད་པ། །རྣམ་པར་ངེས་ཕྱིར་འདུལ་བ་ཉིད། །ཅེས་གསུངས་པ་བཞིན། ཕམ་པ་༤། ལྷག་མ་༡༣། སྤང་ལྟུང་༣༠། ལྟུང་བྱེད་༩༠། སོར་བཤགས་༤། ཉེས་བྱས་ཏེ་༡༡༢། ལྟུང་བ་སྡེ་ལྔ་དང་། ལྟུང་བ་འབྱུང་བའི་རྒྱུ་བཞིའོ། །མི་ཤེས། མ་གུས། བག་མེད། ཉོན་མོངས་མང་བ། འགྱོད་པ་དང་སྡོམ་པའི་སྟོབས་ཀྱིས་ལྟུང་བ་ལས་ལྡང་བ་དང་། ངེས་འབྱུང་བདུན་པོ། བཤགས་པ་དང་ཆད་པའི་ལས་ཁས་ལེན་པ། དགོངས་པའི་དབང་གིས་རྣམ་གྲངས་ཀྱིས་གནང་བ་གློད་པ། དགེ་འདུན་ཚོགས་པས་བག་ཡངས་སུ་བཅས་པ། དགེ་སློང་ཕ་མ་མཚན་གྱུར་ཚེ་རྟེན་ཡོངས་སུ་གྱུར་པས་ལྟུང་བ་ཐུན་མོང་མ་ཡིན་པ་རྣམས་ཉེས་མེད་དུ་འགྱུར་པ། ཆོས་ཀྱི་སྡོམ་བཞི་ལ་སོ་སོར་རྟོག་པ་དང་། བདེན་པ་མཐོང་ཚེ་ལྟུང་བ་ཕྲ་མོ་ཡང་རྣམ་པར་དག་པའི་ཆོས་ཉིད་ཐོབ་པའོ། །གང་ཟག་འགའ་ཞིག་ལ་བརྟེན་པ་དང་། བསླབ་པ་བཅས་པ་དང་། ལྟུང་བ་རྣམས་ཞིབ་པར་རབ་ཏུ་དབྱེ་བ་དང་། ལྟུང་བ་དང་ལྟུང་མེད་རྣམ་པར་ངེས་པར་བྱས་པ་ནི་འདུལ་བའོ། མདོ་སྡེ་ནི། གནས་རྣམས་དང་ནི་མཚན་ཉིད་དང་། །ཆོས་དོན་ངེས་ཕྱིར་མདོ་ཡིན་ནོ། །ཞེས་གནས་དང་སྟོན་པ་འཁོར་སོགས་བསྟན་པ་དང་། ཀུན་རྫོབ་དོན་དམ་པའི་མཚན་ཉིད་དང་། ཆོས་ཕུང་ཁམས་སྐྱེ་མཆེད་དང་། དོན་ཡོད་མེད་སོགས་ངེས་པར་བསྟན་ཕྱིར་མདོ་སྡེའོ། །མངོན་པ་ནི། མངོན་དུའི་ཕྱིར་དང་ཡང་ཡང་ཕྱིར། །ཟིལ་གནོན་རྟོགས་ཕྱིར་མངོན་པའི་ཆོས། །ཆོས་བདེན་བཞི་བསྟན་པའི་སྒོ་ནས་ཆོས་ཉིད་མཐོང་བ་ལ་མངོན་དུ་ཕྱོགས་པ་བྱེད་པའི་ཕྱིར་དང་། ཕུང་པོ་ལྟ་བུ་གཅིག་ཀྱང་གཟུགས་ཅན་ནམ་གཟུགས་ཅན་མིན་པའམ། རྫས་ཡོད་དམ་བཏགས་ཡོད་སོགས་ཀྱིས་ཡང་ཡང་སྟོན་པ་དང་། རང་དང་སྤྱིའི་མཚན་ཉིད་ལེགས་པར་ཕྱེ་ནས་ཕས་རྒོལ་ཟིལ་གྱིས་གནོན་པ་དང་། མདོ་སྡེའི་དོན་རྟོགས་པར་བྱེད་པའི་ཕྱིར་རོ། །དེ་ཡང་སྡེ་སྣོད་གསུམ་ནི་ཉན་ཐོས་ཀྱི་དབང་དུ་བྱས་པ་ཡིན་ཅིང་། ཐེག་ཆེན་ལས་ནི་སྡེ་སྣོད་བདུན་དུ་བཤད་དེ་གསུམ་གྱི་ཁར། བྱང་སེམས་ཀྱི་སྡེ་སྣོད་དང་། རིག་འཛིན་གྱི་སྡེ་སྣོད་དང་། ཤིན་ཏུ་རྒྱས་པའི་སྡེ་སྣོད་དང་། སྐྱེ་བ་རབས་ཀྱི་སྡེ་སྣོད་དང་བཅས་པ་སྟེ་འདིའི་ཁུངས་ནི་སྐྱབས་འགྲོ་བདུན་ཅུ་པ་ལས་ཤེས་པར་བྱའོ། །གཉིས་པ་རྟོགས་པའི་ཆོས་ལའང་། ས་བཅུ་དང་། ལམ་ལྔ་སྟེ་གཉིས་སུ་ཡོད་པ་དང་། དང་པོ་ལ་བཞི་ལས། ངོ་བོ་ནི། ཆོས་ཀྱི་དབྱིངས་གློ་བུར་དྲི་མའི་གཉེན་པོར་སྐྱེ་བའོ། །ངེས་ཚིག་ལ་སྤྱིའི་ངེས་ཚིག་ནི། འབྱུང་པོ་དཔག་ཏུ་མེད་པ་མཐོང་སྒོམ་གྱི་སྤང་བྱའི་འཇིགས་པ་མེད་པར་བྱེད་ཅིང་ཡོན་ཏན་གོང་འཕེལ་གྱི་རྟེན་དུ་གྱུར་པས་ན་ས་ཞེས་བྱ་ལ། བྱེ་བྲག་ས་རེ་རེའི་ངེས་ཚིག་ནི། མདོ་རྒྱན་དང་། རིན་ཆེན་ཕྲེང་བ་ལྟར་ཤེས་པར་བྱའོ། །མཚན་ཉིད་ཀྱང་སྤྱིའི་མཚན་ཉིད་ནི། རང་གི་གོ་ས་མི་འདོར་ཞིང་ཡོན་ཏན་སྐྱེ་བའི་སྐབས་འབྱེད་པ་ཡུལ་ཆོས་དབྱིངས་ཀྱི་ངོ་བོ་སའི་མཚན་ཉིད་དུ་འགྱུར་ལ། བྱེ་བྲག་ས་བཅུ་གཅིག་རེ་རེའི་མཚན་ཉིད་ནི། མདོ་རྒྱན་ལས། སྟོང་པ་ཉིད་ནི་མཆོག་རྟོགས་ནས། །ལས་རྣམས་ཆུད་མི་ཟ་བར་གནས། །བསམ་གཏན་རབ་བདེས་གནས་ནས་ནི། །དེ་ཡི་འོག་ཏུ་འདོད་པར་སྐྱེ། །དེ་ནས་བྱང་ཆུབ་ཕྱོགས་མཐུན་རྣམས། །འཁོར་བ་དག་ཏུ་ཡོངས་སུ་བསྔོ། །སེམས་ཀུན་ཉོན་མོངས་མེད་པར་ནི། །སེམས་ཅན་རྣམས་ཡོངས་སྨིན་པར་བྱེད། །ཆེད་དུ་བསམ་སྟེ་སྐྱེ་བས་ན། །ཀུན་ནས་ཉོན་མོངས་རྗེས་སུ་སྲུངས། །བགྲོད་པ་གཅིག་པའི་ལམ་དང་འབྲེལ། །མཚན་མེད་གཅིག་ཏུ་ངེས་པའི་ལམ། །མཚན་མ་མེད་པར་ལྷུན་གྱིས་གྲུབ། །ཞིང་ཡང་རྣམ་པར་སྦྱོང་བ་སྟེ། །དེ་ཡི་འོག་ཏུ་སེམས་ཅན་ནི། །སྨིན་པར་བྱེད་པ་འགྲུབ་པར་འགྱུར། །ཏིང་ངེ་འཛིན་དང་གཟུངས་རྣམས་དང་། བྱང་ཆུབ་རྣམ་པར་དག་པ་ཉིད། །རྣམ་པར་བཞག་པ་འདི་དག་གིས། །ས་ཡི་མཚན་ཉིད་ཤེས་པར་བྱ། །ཞེས་སོ། །དབྱེ་བ་ལ། སྤྱིར་བཏང་ཐེག་དམན་གྱི་ས་བརྒྱད་དང་། ཐེག་ཆེན་གྱི་ས་གཉིས་སུ་གནས་ཤིང་། བརྒྱད་ནི། སྦྱོར་ལམ་དུ་རིགས་ངེས་པ་རིགས་ཀྱི་སའམ་དཀར་པོ་རྣམ་པར་མཐོང་བའི་ས། ཡས་ནས་མར་བགྲངས་པའི་བརྒྱད་པ་རྒྱུན་ཞུགས་ཞུགས་པ་དེ་བརྒྱད་པའི་ས། ཟག་མེད་མཐོང་བ་རྫོགས་པ་འབྲས་གནས་དེ་མཐོང་བའི་ས། འདོད་ཉོན་ཕལ་ཆེར་བསྲབས་པ་ཕྱིར་འོང་བསྲབས་པའི་ས། འདོད་ཉོན་ཐམས་ཅད་སྤང་བ་ཕྱིར་མི་འོང་འདོད་ཆགས་བྲལ་བའི་ས། ཁམས་གསུམ་གྱི་ཉོན་མོངས་སྤང་བར་བྱས་ཤིང་ཟད་མི་སྐྱེ་རྟོགས་པ་ཐོབ་པ་དགྲ་བཅོམ་དེ་བྱས་པ་རྟོགས་པའི་ས། དེ་དག་གི་ཁར་ཐེག་པ་ཐ་དད་ཤེས་པའི་ཕྱིར། ཉན་ཐོས་ཀྱི་ས་ནི་ཕྱི་མ་གསུམ་གྱི་ཞུགས་པ་གསུམ་པོ་ཡིན་ལ། རང་སངས་རྒྱས་ཀྱི་ས་ནི་རང་གི་ཞུགས་གནས་བརྒྱད་ཡིན་ནོ། །གཉིས་ནི། མོས་པས་སྤྱོད་པའི་ས་དང་། འཕགས་པའི་ས་གཉིས་ཀྱི་ཕྱི་མ་ལ་བྱང་སེམས་འཕགས་པའི་ས་བཅུ་དང་། སངས་རྒྱས་འཕགས་པའི་ས་བཅུ་གཅིག་ཀུན་ཏུ་འོད་ཀྱི་སའོ། །དམིགས་བསལ་གྱི་དབྱེ་བ་ས་བཅུ་ལ། དབྱེ་བ་དངོས་དང་། གྲངས་ངེས་གཉིས་ལས། དང་པོ་ལ་བདུན་ལས། བྱེད་པའི་ཡོན་ཏན་གྱི་སྒོ་ནས་དབྱེ་བ་ནི། ས་དང་པོར་སྐད་ཅིག་གཅིག་ལ་ཡོན་ཏན་བརྒྱ་ཕྲག་བཅུ་གཉིས་མངོན་དུ་བྱེད། གཉིས་པ་ལ་སྟོང་། གསུམ་པ་ལ་འབུམ། བཞི་པ་ལ་བྱེ་བ། ལྔ་པ་ལ་བྱེ་བ་ཕྲག་སྟོང་། དྲུག་པ་ལ་བྱེ་བ་ཕྲག་འབུམ། བདུན་པ་ལ་བྱེ་བ་ཁྲག་ཁྲིག་འབུམ། བརྒྱད་པ་ལ་སྟོང་གསུམ་འབུམ་ཕྲག་བཅུའི་རྡུལ་སྙེད། དགུ་པ་ལ་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་སྙེད། བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་སྙེད་ཐོབ་པའོ། །རྣམ་སྨིན་གྱི་ཡོན་ཏན་གྱི་སྒོ་ནས་དབྱེ་བ་ནི། ས་རེ་རེར་རིམ་པ་བཞིན་ཕ་རོལ་ཕྱིན་པ་བཅུ་རྫོགས་པར་འགྲུབ་པ་དང་། འཛམ་གླིང་གི་རྒྱལ་པོ་ནས་འོག་མིན་གྱི་བདག་པོ་དབང་ཕྱུག་ཆེན་པོའི་བར་བྱེད་ནུས་པའོ། །བྲལ་བའི་ཡོན་ཏན་གྱི་སྒོ་ནས་དབྱེ་བ་ནི་ས་དང་པོ་ཐོབ་ནས། འཚོ་བ་མེད་པ་དང་། མི་བསྔགས་པ་དང་། ངན་འགྲོ་དང་། འཁོར་གྱི་འཇིགས་པ་དང་། འཆི་བ་སོགས་ཉམ་ངའི་འཇིགས་པ་སྟེ་འཇིགས་པ་ལྔ་པོ་དེ་དང་བྲལ་བ་སོགས་སོ། །རྟོགས་པའི་ཡོན་ཏན་གྱི་སྒོ་ནས་དབྱེ་བ་ནི། དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་དང་ནི། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་དོན་དང་། །ཉོན་མོངས་རྣམ་དག་མིན་དོན་དང་། ཐ་དད་མེད་པའི་དོན་ཉིད་དང་། །བྲི་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་གནས། །ཞེས་དང་། དབང་བཞི་ནི། ཡིད་དང་འཛིན་དང་རྣམ་པར་རྟོག །གྱུར་ཕྱིར་རྣམ་པར་མི་རྟོག་དང་། །ཞིང་དང་ཡེ་ཤེས་ལས་དག་ལ། །དབང་ནི་རྣམ་པ་བཞི་ཡིན་ཏེ། །དབང་དེ་མི་གཡོ་ལ་སོགས་པའི། །ས་གསུམ་ལ་ནི་རྣམ་པ་བཞི། །གཅིག་ལ་རྣམ་གཉིས་དེ་ལས་གཞན། །དབང་ནི་རེ་རེར་འདོད་པ་ཡིན། །ཞེས་སོ། །བསླབ་པ་གསུམ་གྱི་སྒོ་ནས་དབྱེ་བ་ནི། བསླབ་པ་གསུམ་གྱི་རྒྱུ་ངོ་བོ་འབྲས་བུའི་སྒོ་ནས་ས་བཅུར་དབྱེ་སྟེ། དེའང་ས་དང་པོར་སྦྱིན་པའི་ཕར་ཕྱིན་གཙོ་བོར་སྒྲུབ་པ་དང་ཟག་མེད་ཀྱི་བསླབ་གསུམ་སྤྱིར་ཐོབ་པས། ཁྱད་པར་བ་རྣམས་ཀྱི་རྒྱུར་འགྱུར་ལ། ངོ་བོ་ནི། ས་གཉིས་པར་ལྟུང་བའི་ཆ་ཕྲ་མོས་ཀྱང་གོས་པར་མི་འགྱུར་བས་ཚུལ་ཁྲིམས་ཀྱི་བསླབ་པ་རྣམ་པར་དག །གསུམ་པར་ཚེ་རབས་ཀུན་ཏུ་མི་ཉམས་པའི་བསམ་གཏན་ཐོབ་པར་ཏིང་འཛིན་གྲུབ། བཞི་པར་བྱང་ཆུབ་ཕྱོགས་མཐུན་ཤེས་པའི་ཤེས་རབ་དང་། ལྔ་པར་བདེན་བཞི་འབྱེད་པའི་ཤེས་རབ་དང་། དྲུག་པར་འཁོར་འདས་རྟེན་འབྲེལ་ཤེས་པའི་ཤེས་རབ་མཐར་ཕྱིན་པ་ཐོབ་བོ། །ལྷག་མ་རྣམས་ནི་བསླབ་གསུམ་གྱི་འབྲས་བུས་ཕྱེ་སྟེ། བདུན་པར་འབད་པ་དང་བཅས་ནས་མཚན་མ་མེད་པར་འཇུག །བརྒྱད་པར་འབད་མེད་དུ་འགོག་པར་འཇུག་ཅིང་ཞིང་རྣམ་པར་དག །དགུ་པར་སེམས་ཅན་ཡོངས་སུ་སྨིན་པར་བྱེད་ལ། སྨིན་བྱེད་ཀྱི་རྒྱུ་ནི་སོ་སོ་ཡང་དག་པར་རིག་པ་བཞི་ཡིན་ཅིང་། ཐབས་ནི་བསྡུ་དངོས་བཞི་སྟེ། སྦྱིན་པས་འཁོར་དུ་སྡུད། ལུང་གི་ཆོས་སྙན་པར་སྨྲ་བས་མི་ཤེས་པ་བསལ། རྟོགས་པའི་ཆོས་ཀྱི་དོན་ལ་སྤྱོད་དུ་གཞུགས་པས་རྒྱུད་རྣམ་པར་གྲོལ། རང་གིས་ཀྱང་ཇི་བཞིན་དོན་མཐུན་པར་སྒྲུབ་པས་ཡིད་ཆེས་པར་བྱེད་པའོ། །བཅུ་པར་ཏིང་ངེ་འཛིན་དང་གཟུངས་རྣམས་ཡོངས་སུ་རྫོགས་པའོ། །ས་ཐོབ་པའི་སྒོ་ནས་དབྱེ་བ་ནི་བཞི་སྟེ། ཚོགས་སྦྱོར་དུ་འཕགས་ས་ལ་ལྷག་པར་མོས་པ་མོས་པས་ཐོབ་པ་དང་། རྒྱུ་ཆོས་སྤྱོད་བཅུ་སྒྲུབ་པ་སྤྱོད་པས་ཐོབ་པ་སྟེ་བཅུ་ནི། ལུས་ཀྱིས་སྡེ་སྣོད་གསུམ་ཡི་གེར་འདྲི་བ། དེར་མཆོད་པ། གཞན་ལ་སྦྱིན་པ། རྣ་བས་ཆོས་ཉན་པ་དང་། ངག་གིས་གླེགས་བམ་ཀློག་པ། རྒྱུན་དུ་ཁ་ཏོན་བྱེད་པ། གཞན་ལ་འཆད་པ་དང་། ཡིད་ཀྱིས་ཚིག་བློ་ལ་ལེན་པ། དོན་སེམས་པ། སྒོམ་པར་བྱེད་པའོ། །ས་དང་པོ་ནས་བདུན་པའི་བར་འཇུག་པ་རྟོགས་པས་ཐོབ་པ་དང་། བརྒྱད་པ་ནས་འབད་མེད་དུ་འཇུག་པ་འགྲུབ་པས་ཐོབ་པའོ། །ཐོབ་པའི་ཡུན་གྱི་སྒོ་ནས་དབྱེ་བ་ནི། བསྐལ་པ་གྲངས་མེད་གཅིག་གིས་ས་དང་པོ་ཐོབ། གཅིག་གིས་བརྒྱད་པ་ཐོབ། གཅིག་གིས་བཅུ་པ་ཐོབ་ཅེས་བྱང་ས་ལས་གསུངས་སོ། །གཉིས་པ་ལམ་ལའང་བཞི་ལས། ངོ་བོ་ནི། བདག་མེད་རྟོགས་པའི་ཤེས་རབ་དང་ཏིང་འཛིན། ངེས་ཚིག་ལ་སྤྱིའི་ངེས་ཚིག་ནི། མྱང་འདས་ཚོལ་བར་འགྱུར་བའམ་ཐོབ་པར་འགྱུར་བས་ན་ལམ་ཞེས་བྱ། བྱེ་བྲག་གི་ངེས་ཚིག་ནི། ཐོས་བསམ་དང་བསོད་ནམས་ཀྱི་ཚོགས་གཙོ་བོར་གྱུར་པས་ཚོགས་ལམ། མཐོང་ལམ་ལ་སྦྱོར་བས་སྦྱོར་ལམ། བདེན་པ་མངོན་སུམ་དུ་མཐོང་བས་མཐོང་ལམ། མཐོང་ཟིན་གོམས་པར་བྱེད་པས་སྒོམ་ལམ། སློབ་པ་མཐར་ཕྱིན་པས་མི་སློབ་ལམ་ཞེས་བྱ། མཚན་ཉིད་ལ་སྤྱིའི་མཚན་ཉིད་ནི། ཞི་གནས་དང་ལྷག་མཐོང་བདག་མེད་རྟོགས་པའི་ཤེས་རབ་ཟུང་དུ་འབྲེལ་བ་ཡུལ་ཅན་ཡེ་ཤེས་ཀྱི་ངོ་བོའོ། །བྱེ་བྲག་གི་མཚན་ཉིད་ནི། རྒྱལ་བའི་དབང་པོ་ཀློང་ཆེན་པའི་གཞུང་ལས་ཤེས་པར་བྱའོ། །དབྱེ་བ་ལ་ལམ་ལྔ་ལས། ཚོགས་ལམ་ཆུང་འབྲིང་ཆེ་གསུམ་རིམ་པ་ལྟར་སྦྱོར་ལམ་སྐྱེ་བའི་དུས་མ་ངེས་པ་དང་། ངེས་པ་དང་ཚེ་དེར་སྐྱེ་ངེས་པས་བཞག་པ་ཉིད་ཀྱི། ཆུང་ངུ་དྲན་པ་ཉེར་བཞག་བཞི་ལ་ལྔ་ལས། ངོ་བོ་ནི་ཤེས་རབ་ཀྱི་ཡུལ་ལ་དྲན་པ་འཇོག་པས་ན་ཤེས་རབ་དང་དྲན་པའོ། །གྲོགས་དེ་དང་མཚུངས་ལྡན་སེམས་སེམས་བྱུང་གི་ཆོས་རྣམས་སོ། །དམིགས་ཡུལ་ནི། སོ་སོའི་སྐྱེ་བོ་རྣམས་ཀྱིས་བདག་ཏུ་འཛིན་པའི་གནས་ལུས་དང་། བདག་གི་ལོངས་སྤྱོད་ཚོར་བ་དང་། བདག་གི་དངོས་པོ་སེམས་དང་། བདག་ཀུན་ནས་ཉོན་མོངས་དང་། རྣམ་པར་བྱང་བའི་དངོས་པོ་ཆོས་སོ། །རྣམ་པ་སྒོམ་ཚུལ་ནི་ལུས་དྲན་པ་ཉེར་བཞག་ལ། ནང་གི་ལུས་ནང་གི་སྐྱེ་མཆེད་གཟུགས་ཅན། ཕྱིའི་ལུས་ཕྱིའི་སྐྱེ་མཆེད་གཟུགས་ཅན། ནང་ཕྱིའི་ལུས་སེམས་ཅན་གཞན་རྒྱུད་ཀྱི་སྐྱེ་མཆེད་གཟུགས་ཅན་རྣམས་ནི་ལུས་ཡིན་ལ། དེ་དག་ལ་དུར་ཁྲོད་ཀྱི་ལུས་སམ་རྨི་ལམ་གྱི་ལུས་ཀྱི་རྗེས་སུ་མཐུན་པར་ལྟ་བས་ཉན་ཐོས་ལྟར་ན་མི་གཙང་བ་དང་། ཐེག་ཆེན་ལྟར་ན་རང་བཞིན་མེད་པར་སྒོམ་པའོ། །ཚོར་བ་དྲན་པ་ཉེར་བཞག་ནི། ལུས་གསུམ་ལས་བྱུང་བའི་ཚོར་བ་གསུམ་ལ་དམན་པས་སྡུག་བསྔལ་པ་དང་། ཐེག་ཆེན་གྱིས་རྨི་ལམ་གྱི་ཚོར་བ་དང་རྗེས་སུ་མཐུན་པར་རང་བཞིན་མེད་པར་སྒོམ་པའོ། །དེ་བཞིན་དུ་ཕྱི་ནང་ལས་བྱུང་བའི་སེམས་གསུམ་དང་། ཆོས་གསུམ་དག་ལ་ཐེག་དམན་གྱིས་སེམས་མི་རྟག་པ་དང་ཆོས་གང་ཟག་གི་བདག་མེད་པར་སྒོམ་ལ། ཐེག་ཆེན་གྱིས་རྨི་ལམ་གྱི་སེམས་དང་ཆོས་ལྟར་རྣམ་པར་རྟོག་པའི་གཟུགས་བརྙན་དུ་སྣང་ལ་རང་བཞིན་མེད་པ་དང་། ཆོས་ཀྱི་བདག་ཀྱང་མེད་པར་སྒོམ་མོ། །དེ་དག་ནི་ལུས་སོགས་ལ་ལུས་སོགས་ཀྱི་རྗེས་སུ་ལྟ་བའི་དྲན་པ་ཉེ་བར་བཞག་པ་ཞེས་གསུངས་པའི་དོན་ཏོ། །བསྒོམ་པའི་འབྲས་བུ་ལ་གསུམ་ལས། བདེན་པ་བཞི་ལ་འཇུག་པ་ནི། ལུས་རྣམ་སྨིན་གྱི་གནས་ངན་ལེན་འདུ་བྱེད་ཀྱི་སྡུག་བསྔལ་དུ་རྟོགས་པས་སྡུག་བསྔལ་ཤེས་པ་ལ་འཇུག །ཚོར་བ་ཀུན་འབྱུང་གི་གཙོ་བོ་སྲེད་པའི་རྒྱུར་རྟོགས་པས་ཀུན་འབྱུང་སྤོང་བ་ལ་འཇུག །སེམས་བདག་ལྟ་སྐྱེ་བའི་གཞི་དེ་མི་རྟག་ཅིང་རང་བཞིན་མེད་པར་རྟོགས་པས་བདག་ཆད་ཀྱིས་དོགས་པའི་འཇིགས་པ་དང་བྲལ་ནས་འགོག་པ་མངོན་དུ་བྱེད། སྤང་བླང་གི་ཆོས་ལ་མ་རྨོངས་པས་ཆོས་དྲན་པ་ཉེར་བཞག་གིས་ལམ་བདེན་པ་འཇུག་གོ །ཕྱིན་ཅི་ལོག་བཞི་སྤང་བ་ནི། ལུས་སོགས་རང་བཞིན་མེད་པའ་ིསྟོང་ཉིད་དུ་རྟོགས་པས་གཙང་བདེ་རྟག་བདག་བཞི་ཐམས་ཅད་ཐུན་མོང་དུ་སྤོང་ལ། མི་གཙང་སོགས་བསྒོམ་པས་བྱེ་བྲག་སོ་སོར་རེ་རེ་ནས་རིམ་པར་སྤོང་བ་ཡིན་ནོ། །ལུས་སོགས་་དང་བྲལ་བ་ནི། ལུས་ལ་སོགས་པ་དངོས་པོར་འཛིན་པའི་སྣང་བ་དང་། ཞེན་པ་ཐམས་ཅད་དང་བྲལ་བར་འགྱུར་བའོ། །ཚོགས་ལམ་འབྲིང་ཡང་དག་པར་སྤོང་བ་བཞི་ལའང་ལྔ་ལས། ངོ་བོ་ནི་བརྩོན་འགྲུས་ཡིན་ཅིང་། གྲོགས་ནི་སྔ་མ་དང་འདྲ། དམིགས་ཡུལ་ནི་མི་མཐུན་ཕྱོགས་དང་། གཉེན་པོའི་ཕྱོགས་གཉིས་ཕྱོགས་གཉིས་ཡིན་ལ། རྣམ་པ་སྒོམ་ཚུལ་ནི། མི་དགེ་བའི་ཆོས་སྒྲིབ་པ་ལྔ་པོ། གནོད་སེམས་དང་། འདོད་པ་འདུན་པ་དང་། གཉིད་རྨུགས་དང་། རྒོད་འགྱོད་དང་། ཐེ་ཚོམ་སྟེ་དེ་རྣམས་མ་སྐྱེས་པ་མི་སྐྱེ་བའི་ཕྱིར་དུ་བརྩོན་འགྲུས་བསྒོམ་པ་ལྔ་པོ་བརྩོན་འགྲུས་ཀྱི་བརྟེན་པའི་རྒྱུ་ནི་ཞི་ལྷག་དོན་གཉེར་གྱི་འདུན་པའོ། །རང་གི་ངོ་བོ་ལ། བྱིང་རྒོད་མེད་པའི་ཞི་ལྷག་སྐྱེ་བའི་ཚེ་བཏང་སྙོམས་ཀྱི་མཚན་མ་ཡིད་ལ་བྱེད་པ་འབད་པའི་བརྩོན་འགྲུས། བྱིང་རྒོད་བྱུང་བའི་ཚེ་བྱིང་རྒོད་སེལ་བའི་བརྩོན་འགྲུས་རྩོམ་མོ། །སེལ་བའི་གཉེན་པོ་ཡང་བྱིང་ན་རབ་ཏུ་འཛིན་པ་ལྷག་མཐོང་ཡིད་ལ་བྱེད་ཅིང་། རྒོད་ན་རབ་ཏུ་འཇོག་པ་ཞི་གནས་ཡིད་ལ་བྱེད་པའོ། །དེ་བཞིན་དུ་མི་དགེ་བའི་ཆོས་སྐྱེས་པ་རྒྱུན་གཅོད་པའི་ཕྱིར་འདུན་པ་བསྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སེམས་རབ་ཏུ་འཇོག་གོ་ཞེས་ལྔ་སྒོམ་ཅིང་། དགེ་བའི་ཆོས་མ་སྐྱེས་པ་སྐྱེ་བའི་ཕྱིར་ལྔ་དང་། སྐྱེས་པ་སྤེལ་བའི་ཕྱིར་བརྩོན་འགྲུས་སྒོམ་པ་ལྔ་འབྱུང་བའོ། །འབྲས་བུ་ནི། མི་མཐུན་ཕྱོགས་མ་ལུས་ཉམས་པར་གྱུར་པ་དང་། གཉེན་པོ་ཐོབ་པར་གྱུར་པ་དང་། འཕེལ་བར་གྱུར་པ་གསུམ་སྟེ། རིམ་བཞིན་མི་དགེ་སྤོང་བ་སྔ་མ་གཉིས་དང་། གཉེན་པོ་སྐྱེད་པ་དང་། གོང་དུ་སྤེལ་པ་ལས་བྱུང་བའོ། །ཚོགས་ལམ་ཆེན་པོ་རྫུ་འཕྲུལ་གྱི་རྐང་པ་བཞི་ལ་ལྔ་སྟེ། ངོ་བོ་ནི་ཏིང་ངེ་འཛིན་ཏོ། །གྲོགས་ནི། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ་དང་། དེ་བཞིན་དུ་བརྩོན་འགྲུས་ཀྱི་དང་། སེམས་པའི་དང་། དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ་སྟེ་བཞི། དེ་དག་དང་མཚུངས་ལྡན་གྱི་སེམས་སེམས་བྱུང་གི་ཆོས་རྣམས་ཀྱང་ཡིན་ནོ། །བཞི་པོ་དེ་ནི་རིམ་པ་བཞིན། གུས་སྦྱོར་གྱིས་སེམས་རྩེ་གཅིག་ཐོབ་པ་དང་། རྟག་སྦྱོར་གྱིས་སེམས་རྩེ་གཅིག་ཐོབ་པ་དང་། རང་གི་སྔོན་ཚེ་ཏིང་འཛིན་བསྒོམ་པའི་བག་ཆགས་ཀྱིས་སེམས་རྩེ་གཅིག་ཐོབ་པ་དང་། གཞན་གྱིས་བསྟན་ནས་ཤེས་རབ་ཀྱིས་སེམས་རྩེ་གཅིག་ཐོབ་པ་རྣམས་ཡིན་ནོ། །དམིགས་ཡུལ་ནི། ཏིང་ངེ་འཛིན་གྱིས་བསྒྲུབ་བྱ་རྫུ་འཕྲུལ་སྣ་ཚོགས་ལས་གང་འདོད་དེ་ཡིན་ལ། རྣམ་པ་སྒོམ་ཚུལ་ནི། ཉེས་པ་ལྔ་སྤོང་བྱེད་སྤོང་བའི་འདུ་བྱེད་བརྒྱད་སྒོམ་པ་ཡིན་ཅིང་། ལྔ་ནི། ཏིང་འཛིན་ལ་ཐོག་མར་འཇུག་པའི་གེགས་ལེ་ལོ། ཞུགས་ཙམ་ན་གེགས་གདམས་ངག་བརྗེད་པ་སྟེ་དེ་གཉིས་སྦྱོར་བའི་གེགས་ཡིན། དངོས་གཞིའི་གེགས་བྱིང་རྒོད། བྱིང་རྒོད་བྱུང་བའི་ཚེ་ན་གེགས་གཉེན་པོ་འདུ་མི་བྱེད་པ། བྱིང་རྒོད་ཞི་བའི་ཚེ་ན་གེགས་འདུ་བྱེད་པའོ། །བརྒྱད་ནི། བརྩོན་འགྲུས་ཀྱི་རྟེན་གནས་འདུན་པ། དེ་ལ་གནས་པ་ལེ་ལོའི་གཉེན་པོ་བརྩོན་འགྲུས། འདུན་པའི་རྒྱུ་དད་པ་ཡིན་ཏེ་ཡིད་ཆེས་དད་པ་ཡོད་ན་དོན་གཉེར་གྱི་འདུན་པ་འབྱུང་བས་སོ། །བརྩོན་འགྲུས་ཀྱི་འབྲས་བུ་ཤིན་སྦྱངས་ཡིན་ཏེ་ལུས་སེམས་ལས་སུ་རུང་བས་སོ། །གདམས་ངག་བརྗེད་པའི་གཉེན་པོ་དྲན་པ། བྱིང་རྒོད་ཀྱི་གཉེན་པོ་དེ་གཉིས་བྱུང་བ་ཤེས་པའི་ཤེས་བཞིན་འདུ་མི་བྱེད་པའི་གཉེན་པོ་སེམས་པ། འདུ་བྱེད་པའི་གཉེན་པོ་བཏང་སྙོམས་ཡིན་ལ། འདི་དག་གི་ལུང་དབུས་མཐའ་རྣམ་འབྱེད་ལས་ཤེས་པར་བྱའོ། །ཚོགས་ལམ་གྱི་མིང་གི་རྣམ་གྲངས་ཡང་ཆོས་མངོན་རྟོགས་ཞེས་ཀྱང་བྱ་སྟེ། བདེན་པའི་དབང་དུ་བྱས་པའི་ཆོས་རྣམས་ལ་དད་པ་དང་མོས་པ་ཆེན་པོ་ཐོབ་པས་སོ། །དེ་བཞིན་དུ་ལས་དང་པོ་པའི་ས་དང་། དད་པའི་ས་དང་། ཐར་པ་ཆ་མཐུན་རྣམས་སུ་བཏགས་པའོ། །སྦྱོར་ལམ་ཡང་། མཐོང་ལམ་སྐྱེ་བར་མ་ངེས་པ་དང་། ངེས་པ་དང་། ཚེ་དེར་སྐྱེ་ངེས་པ་གསུམ་གྱིས་རིམ་བཞིན་ཆུང་འབྲིང་ཆེ་གསུམ་བཞག་པ་ལས། ཆུང་ངུ་གཉིས་ནི་ཉོན་མོངས་ཀྱི་བུད་ཤིང་སྲེག་བྱེད་འཕགས་ལམ་གྱི་མེ་འབྱུང་བའི་སྔ་ལྟས་སུ་གྱུར་པ་དྲོད་དང་། དགེ་རྩ་གཡོ་བའི་རྩེ་མོར་ཕྱིན་པ་རྩེ་མོ་སྟེ་རེ་རེ་ལའང་ཆུང་འབྲིང་ཆེ་གསུམ་རེ་ཡོད་དོ། །འབྲིང་བཟོད་པའང་གསུམ། ཆེན་པོ་ཆོས་མཆོག་ཀྱང་གསུམ་རེ་ཡོད་དོ། །སྦྱོར་ལམ་ཆ་བཞི་རུ་གནས་པ་འདིའི་ངོ་བོ་ནི་ཤེས་རབ་ཡིན་ཏེ་ཆོས་དྲན་པ་ཉེར་བཞག་གི་རྣམ་པ་ཅན་ཡིན་པས་སོ། །གྲོགས་ནི། དྲན་པ་ཉེར་བཞག་ལྷག་མ་གསུམ་དང་སེམས་སེམས་བྱུང་མཚུངས་ལྡན་རྣམས་སོ། །དམིགས་ཡུལ་ནི། བདེན་པ་བཞི་ཡིན་ལ། རྣམ་པ་སྒོམ་ཚུལ་ལ་ཉན་ཐོས་ལྟར་ན་ཆོས་དྲན་པ་ཉེར་བཞག་གི་རྣམ་པ་མི་རྟག་སོགས་བཅུ་དྲུག་ཡིད་ལ་བྱེད་ཅིང་དྲན་པ་ཉེར་བཞག་ལྷག་མ་རྣམས་དྲོད་རྩེ་གཉིས་སུ་སྒོམ་མོད། བཟོད་པ་ཡན་ཆད་ཆོས་དྲན་པ་ཉེར་བཞག་ཁོ་ནས་འཕེལ་བར་བྱེད་ལ། ཁྱད་པར་དྲོད་དུ་ཡང་དག་སྤོང་བཞི་སྒོམ་པ་ནས་རིམ་པར་ཆོས་མཆོག་ཏུ་སྟོབས་ལྔ་སྒོམ་པར་འདོད། ཐེག་ཆེན་གྱི་ལུགས་ལ་དྲོད་སྣང་བ་ཐོབ་པའི་ཡེ་ཤེས་དང་། རྩེ་མོ་སྣང་བ་མཆེད་པའི་ཡེ་ཤེས་གཉིས་སུ་དབང་པོ་ལྔ་སྒོམ་པ་ལས། ལྔ་པོའི་ངོ་བོ་དད་སོགས་ལྔ། གྲོགས་དེ་དག་དང་མཚུངས་ལྡན་གྱི་སེམས་སེམས་བྱུང་གི་ཆོས་རྣམས། དམིགས་ཡུལ་བདེན་བཞི། རྣམ་པའི་སྒོམ་ཚུལ་དད་པའི་དབང་པོ་བདེན་པ་རྣམས་ལ་མངོན་པར་ཡིད་ཆེས་པའི་ཚུལ་གྱིས་སྒོམ། ཡིད་ཆེས་པའི་བདེན་པ་མངོན་པར་རྟོགས་ཕྱིར་སྤྲོ་བའི་ཚུལ་གྱིས་བརྩོན་འགྲུས་སྒོམ་པར་འགྱུར། བརྩོན་འགྲུས་བརྩམ་པའི་བདེན་པ་རྣམས་མི་བརྗེད་པའི་ཚུལ་གྱིས་དྲན་པ་སྒོམ་པར་འགྱུར། དྲན་པ་ལ་གནས་པའི་བདེན་པ་རྣམས་ལ་སེམས་རྩེ་གཅིག་པའི་ཚུལ་གྱིས་ཏིང་འཛིན་སྒོམ་པར་འགྱུར། ཏིང་འཛིན་གྱིས་བདེན་པ་ལ་མཉམ་པར་བཞག་པའི་རབ་ཏུ་རྣམ་པར་འབྱེད་པའི་ཚུལ་གྱིས་ཤེས་རབ་སྒོམ་པར་འགྱུར་རོ། །འབྲས་བུ་ནི། བདེན་པ་མྱུར་དུ་རྟོགས་པར་བྱེད་པ་དང་། དྲོད་སོགས་བཞི་སྒྲུབ་པའོ། །བཟོད་པ་དེ་ཁོ་ན་ཉིད་ཕྱོགས་གཅིག་པའི་ཡེ་ཤེས་དང་། ཆོས་མཆོག་དེ་མ་ཐག་པའི་ཡེ་ཤེས་གཉིས་སུ་སྟོབས་ལྔ་སྒོམ་པ་ལས། ངོ་བོ་སོགས་དབང་པོ་དང་འདྲ་ལ། ཁྱད་པར་ནི་དད་སོགས་ཀྱི་མི་མཐུན་པའི་ཕྱོགས་མ་དད་པ་སོགས་འཇོམས་པས་ན་སྟོབས་ཞེས་བྱའོ། །འབྲས་བུ་ནི། ཉན་ཐོས་ལྟར་ན་སྟན་ཐོག་གཅིག་ཏུ་འཕགས་ལམ་རྣམས་སྐྱེད་པ་དང་། རྩེ་མོ་ཐོབ་ནས་ངན་སོང་དུ་སྐྱེ་ཡང་དགེ་རྩ་མི་འཆད་པ། བཟོད་པ་ཐོབ་ནས་ངན་སོང་དུའང་མི་སྐྱེ་ལ། ཟག་པ་མེད་པའི་ཉེར་ལེན་གྱི་རྒྱུ་མེད་ཀྱང་ཆོས་མཆོག་སྐད་ཅིག་མའི་སྟོབས་རྩལ་གྱིས་ཟག་མེད་ལམ་དེ་མ་ཐག་སྐྱེད་ནུས་པར་འདོད་དོ། །ཐེག་ཆེན་ལྟར་ན་གཟུང་འཛིན་གྱི་རྟོག་པ་སྤོང་སྟེ་དེའང་། སེམས་ཙམ་ལྟར་ན། བཟོད་པ་མན་ཆད་དུ་གཟུང་རྟོག་སྤོང་ལ་ཆོས་མཆོག་ཏུ་འཛིན་རྟོག་སྤང་བར་འདོད། དབུ་མས་དྲོད་རྩེར་གཟུང་རྟོག་དང་། བཟོད་ཆོས་སུ་འཛིན་རྟོག་སྤང་བར་བཤད་ལ། ཟག་མེད་ཀྱི་ཉེར་ལེན་རིགས་ཀྱིས་ལྷན་ཅིག་བྱེད་རྐྱེན་བྱས་ནས་འཕགས་ལམ་མངོན་དུ་བྱེད་པ་ཡིན་ནོ། །སྦྱོར་ལམ་གྱི་མིང་གི་རྣམ་གྲངས་ཡང་། བདེན་བཞིའི་ཆོས་ལ་ངེས་པར་སེམས་ཤིང་། འབྱེད་ནུས་པའི་བཟོད་པ་ཐོབ་པས་ན་དེ་མངོན་རྟོགས་དང་། དེ་བཞིན་དུ་མོས་སྤྱོད་ཀྱི་ས་དང་། ངེས་འབྱེད་ཆ་མཐུན་ཞེས་གྲགས་སོ །མཐོང་ལམ་ལའང་། ངོ་བོ་ནི་ཡེ་ཤེས་བཅུ་དྲུག་སྟེ་ཆོས་བཟོད་བཞི། ཆོས་ཤེས་བཞི། རྗེས་བཟོད་བཞི། རྗེས་ཤེས་བཞིའོ། །བཅུ་དྲུག་པོ་དེ་ཐེག་ཆེན་གྱི་ལུགས་ལ་མཐོང་ལམ་ཡིན་ལ། ཉན་ཐོས་ཀྱི་ལུགས་ལ་ལམ་རྗེས་ཤེས་ནི། ལམ་སྔ་མ་རྣམས་ཞིག་ཀྱང་དེ་ཉིད་རྒྱུན་ཆགས་ཡིན་པས་སྒོམ་ལམ་ཡིན་ནོ་ཞེས་ཟེར་རོ། །གྲོགས་ནི་དེ་དང་མཚུངས་ལྡན་གྱི་ཆོས་སེམས་སེམས་བྱུང་རྣམས་སོ། །དམིགས་པ་ནི། འཕགས་པའི་བདེན་པ་བཞི་པོའི་རང་གི་མཚན་ཉིད་ཡིན་ལ། རྣམ་པ་སྒོམ་ཚུལ་ནི། བྱང་ཆུབ་ཀྱི་ཡན་ལག་བདུན་ཏེ། རེ་རེ་བཞིན་བདེན་པ་བཞིའི་ངོ་བོ་ཅན་དུ་སྒོམ་པས་ན། དྲན་པ་ཡང་དག་བྱང་ཆུབ་ཀྱི་ཡན་ལག་སྡུག་བསྔལ་ཞི་བའི་དབེན་པ་ལ་གནས་པ། ཀུན་འབྱུང་གི་འདོད་ཆགས་སོགས་ཉོན་མོངས་བྲལ་བ་ལ་གནས་པ། ངེས་པར་འབྱུང་བའི་འགོག་པ་ལ་གནས་པ་མཐོང་སྤང་རྣམས་རྣམ་པར་སྤོང་ནུས་ལམ་གྱི་བདེན་པས་ཡོངས་སུ་བསྒྱུར་བ་སྒོམ་པའོ། །དེ་བཞིན་དུ་ཆོས་རབ་རྣམ་འབྱེད་ཡང་དག་པ་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་བསྒྱུར་བ་སྒོམ་པ་དང་། ལྷག་མ་རྣམས་ལའང་རེ་རེ་བཞིན་བདེན་བཞིའི་ཚིག་དེ་སྦྱར་བཞིན་དུ་བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ་སོགས་སོ། །འདི་དག་སོ་སོའི་ངེས་པ་ནི་མཐོང་ལམ་གྱི་ཡེ་ཤེས་འདུས་མ་བྱས་ཁོ་ནའི་དམིགས་མེད་ཀྱི་ངང་སྒོམ་ཡིན་པས་དེ་ལ་སྦྱར་བ་བྱང་ཆུབ་ཕྱོགས་བསྟན་པའི་མདོ་སོགས་ལས་འབྱུང་བ་ལྟར་ཤེས་དགོས་ཤིང་། འདུས་བྱས་ཐ་སྙད་རྒྱུ་འབྲས་སོགས་ལྟར་སྦྱར་བ་ནི། བྱམས་པ་མགོན་པོས་བཀྲལ་བ་ལྟར་ཡན་ལག་ལྔར་འགྱུར་ཏེ། རང་བཞིན་ཡན་ལག་ཆོས་རབ་རྣམ་འབྱེད། གནས་ཀྱི་ཡན་ལག་དྲན་པ། ངེས་འབྱུང་ཡན་ལག་གསུམ་པ་བརྩོན་འགྲུས། ཕན་ཡོན་ཡན་ལག་བཞི་པ་དགའ་བ། ཉོན་མོངས་མེད་པའི་ཡན་ལག་རྣམ་པ་གསུམ་པོ་ནི། ཉོན་མོངས་མེད་པའི་གཞི་ཤིན་སྦྱངས། མེད་པའི་གནས་ཏིང་འཛིན། མེད་པའི་ངོ་བོ་ཉིད་བཏང་སྙོམས་སོ། །འབྲས་བུ་ནི་མཐོང་སྤངས་རྣམས་སྤངས་པ་ཡིན་པས། དེ་ལ་སྤང་བྱ་ངོས་བཟུང་བ་དང་། སྤོང་བྱེད་གཉེན་པོ་གཉིས་ལས། དང་པོ་ལ་ངོ་བའི་སྒོ་ནས་དབྱེ་ན་ནི་སྲིད་པའི་ཕྲ་རྒྱས་བཅུ་སྟེ། འཇིགས་ལྟ། མཐར་ལྟ། ལོག་ལྟ། ལྟ་བ་མཆོག་འཛིན། ཚུལ་ཁྲིམས་བརྟུལ་ཞུགས་མཆོག་འཛིན་དེ་རྣམས་ལྟ་བ་ལྔ་ཡིན་ཅིང་། འདོད་ཆགས། ཁོང་ཁྲོ། ང་རྒྱལ། མ་རིག །ཐེ་ཚོམ་དེ་དག་ལྟ་མིན་ལྔའོ། །ལོག་པར་འཇུག་ཚུལ་གྱིས་དབྱེ་ན། སྤྱིར་བཏང་ནི། འདོད་ཆགས། ཁོང་ཁྲོ། ང་རྒྱལ་གསུམ་དངོས་པོའི་ཕྱོགས་གཅིག་ལ་འཇུག་པ་ཡིན་ཏེ། དངོས་པོ་འགའ་ཞིག་རྒྱུ་མཚན་དུ་བྱས་ནས་ཆགས་པ་སོགས་འབྱུང་བས་སོ། །ལྷག་མ་ཐམས་ཅད་ནི། དང་པོ་མཐའ་དག་ལ་འཇུག་པ་ཡིན་ཏེ། ཤེས་བྱའི་ནང་ནས་འགའ་ཞིག་ཕྱོགས་གཅིག་ཏུ་དམིགས་ཀྱིས་བསལ་བ་ལ་མི་ལྟོས་པར་ཁྱབ་པའི་འཛིན་སྟངས་འཇུག་པས་སོ། །བྱེ་བྲག་ཏུ་ལོག་པར་འཇུག་ཚུལ་ནི། མཐོང་སྤང་ལ་ལྟོས་ན་ཤེས་བྱ་བདེན་པ་བཞི་ལ། འཇིག་ལྟས་བདག་དང་བདག་གིར་ལྟ། མཐར་ལྟས་རྟག་ཆད་དུ་ལྟ། ལོག་ལྟས་མེད་པར་ལྟ་བས་ན་དེ་གསུམ་ནི་ཤེས་བྱ་ལ་ལོག་པར་རྟོགས་པས་འཇུག་པའོ། །མཆོག་འཛིན་གཉིས་དང་། ཆགས་ཁྲོ་ང་རྒྱལ་གསུམ་སྟེ་ལྔ་པོ་རྣམས་ཀྱིས་ནི་ལྟ་བ་གསུམ་ལ་ལོག་པར་རྟོགས་པས་འཇུག་པ་ཡིན་ཏེ། ལྟ་བ་གསུམ་གྱིས་ཡོངས་སུ་བཅད་པའི་ལྟ་བ་ངན་པ་དང་། དེས་དྲངས་པའི་སྤྱོད་པ་ངན་པ་ལ་དག་གྲོལ་ངེས་འབྱིན་དུ་འཛིན་པ་རིམ་པར་ལྟ་བ་མཆོག་འཛིན་དང་། ཚུལ་ཁྲིམས་བརྟུལ་ཞུགས་མཆོག་ཏུ་འཛིན་པར་གྱུར་ཅིང་། དེ་བཞིན་དུ་ལྟ་ངན་ལ་ཆགས་པ་སྐྱེས་ཤིང་སེམས་ཁེངས་པར་གྱུར་པ་དང་། རང་ལྟ་དང་མི་མཐུན་པ་ལ་ཁོང་ཁྲོ་འབྱུང་བས་སོ། །ཐེ་ཚོམ་ནི་གཉེན་པོ་ལ་ལོག་པར་རྟོགས་པ་ཡིན་ཏེ། ཕྲ་རྒྱས་ཀྱི་གཉེན་པོ་སྡུག་བསྔལ་ཤེས་པ་སོགས་ལ་ཡང་དག་ཡིན་ནམ་མ་ཡིན་སྙམ་པས་སོ། །མ་རིག་པ་ནི་ཐམས་ཅད་ལ་ལོག་པར་རྟོགས་པ་ཡིན་ཏེ་ཤེས་བྱ་དང་ལྟ་བ་དང་གཉེན་པོ་རྣམས་ཀྱི་རང་བཞིན་ཇི་ལྟར་གནས་པ་མི་ཤེས་ཤིང་རྨོངས་པས་སོ། །བདེན་པ་བཞི་ལ་ལོག་པར་འཇུག་ཚུལ་གཞན་ཡང་འདི་ལྟར་ཤེས་དགོས་ཏེ། ཕྲ་རྒྱས་བཅུ་པོ་དེ་སྡུག་བསྔལ་བདེན་པའི་རྒྱུ་རུ་གནས་པ་ལ་ལོག་པར་རྟོགས་པ་དང་། ཀུན་འབྱུང་གི་རང་བཞིན་དུ་གནས་པ་ལ་ལོག་པར་རྟོགས་པ་དང་། འགོག་ལམ་གཉིས་ལ་གཡང་སར་འདུ་ཤེས་པས་སྐྲག་པ་སྐྱེད་པས་ལོག་པར་ཞུགས་པ་ཡིན་ནོ། །ཚུལ་དེ་དག་མངོན་པ་ཀུན་བཏུས་ལས་བྱུང་བ་ལྟར་ཡིན་ཅིང་། གཞན་ཡང་ཤེས་བྱ་ལ་ལོག་པར་ལྟ་བ་གསུམ་པོ་དེ་དང་མ་རིག་ཐེ་ཚོམ་སྟེ་ལྔ་ནི་བདེན་བཞི་ལ་དངོས་སུ་འཇུག་ཅིང་ལྷག་མ་ལྔ་ནི་དངོས་ཞུགས་ལྔ་ལ་ཞུགས་པའི་དབང་གིས་བདེན་པ་ལ་བརྒྱུད་ནས་འཇུག་པར་གསུངས་པས་ཤེས་པར་བྱའོ། །ཁམས་ཀྱི་སྒོ་ནས་དབྱེ་ན། མཐོང་སྤང་བརྒྱ་དང་བཅུ་གཉིས་སུ་འགྱུར་ཏེ། འདོད་ཁམས་ན་བདེན་བཞི་རེ་རེ་ལ་བཅུ་རེ་ཞུགས་པས་བཞི་བཅུ་ཁམས་གོང་མ་གཉིས་ན་ཁོང་ཁྲོ་མི་འཇུག་པས་བདེན་བཞི་རེ་རེ་ལ་དགུ་རེ་ཞུགས་པས་སུམ་ཅུ་སོ་དྲུག་པ་གཉིས་དེ་ཐམས་ཅད་བསྡོམས་པ་བརྒྱ་རྩ་བཅུ་གཉིས་སོ། །གཉིས་པ་གཉེན་པོ་ལའང་། གཉེན་པོ་ངོས་བཟུང་བ་དང་། གཉེན་པོས་སྤང་ཚུལ་བཤད་པ་གཉིས་ལས། དང་པོ་ལ། སུན་འབྱིན་པའི་གཉེན་པོ་དང་། སྤོང་བའི་གཉེན་པོ་དང་། རྟེན་གྱི་གཉེན་པོ་དང་། ཐག་བསྲིང་གི་གཉེན་པོ་སྟེ་བཞི་ལས། སྤོང་བའི་གཉེན་པོ་ལའང་། མགོ་གནོན་གྱིས་སྤོང་བ་དང་། རྩད་འབྱིན་གྱིས་སྤོང་བ་གཉིས་ཡོད་དོ། །སྤོང་ལམ་ཡང་བཞི་སྟེ། སྦྱོར་ལམ། བར་ཆད་མེད་ལམ། རྣམ་གྲོལ་ལམ། ཁྱད་པར་ལམ་མོ། །གཉིས་པ་ལ། ཇི་ལྟར་སྤང་བ་དང་། ཡིད་ལ་བྱེད་པ་ཅི་འདྲ་བས་སྤང་བ་དང་། གང་ཞིག་གང་ལས་སྤང་བའི་ཚུལ་གསུམ་ཀུན་བཏུས་སུ་བཤད་པ་ལྟར་ལས། དང་པོ་ནི། མཐོང་སྤང་སྤོང་བྱེད་ཡེ་ཤེས་བཅུ་དྲུག་ཏུ་སྐྱེ་བ་ཡིན་ལ། འདི་དག་སྐད་ཅིག་བཅུ་དྲུག་ཏུ་རིམ་པར་སྐྱེ་བར་འདོད་པའི་ལུགས་དང་། སྐད་ཅིག་བཞི་ལ་ངོ་བོ་རིགས་བཞི་ལྡོག་པ་བཅུ་དྲུག་ཏུ་སྐྱེ་བར་འདོད་པའི་ལུགས་གཉིས་ཡོད་པ་ལས། དང་པོ་ནི། ཉན་ཐོས་སོགས་ཕལ་ཆེར་གྱིས་བཞེད་ཅིང་དེའི་ཚུལ་ནི། དམིགས་ཡུལ་འདོད་ཁམས་ཀྱི་སྡུག་བདེན་ལ་དམིགས་པ། རྣམ་པ་མི་རྟག་སོགས་སུ་སྐྱེ་བ་འདོད་པའི་མཐོང་སྤང་གི་གཉེན་པོ་བར་ཆད་མེད་ལམ་གྱི་མཚན་ཉིད་ཅན་གྱི་སྡུག་བསྔལ་ཆོས་བཟོད་སྐད་ཅིག་མ་གཅིག་ཏུ་སྐྱེས་པས་འདོད་པའི་སྡུག་བསྔལ་མཐོང་སྤང་སྤོངས། དམིགས་རྣམ་དེ་འདྲ་བ་ལ་རྣམ་གྲོལ་ལམ་གྱི་མཚན་ཉིད་ཅན་སྡུག་བསྔལ་ཆོས་ཤེས་སྐད་ཅིག་མ་གཅིག་སྐྱེ་བ་དེ་བཞིན་དུ་བདེན་པ་ལྷག་མ་རྣམས་ལ་ཡང་རེ་རེ་བཞིན་ཡེ་ཤེས་གཉིས་རེར་སྐྱེ་ཚུལ་དེས་རིགས་འགྲེ་ཡིན་ཅིང་། ཡང་དམིགས་ཡུལ་ཁམས་གོང་མའི་སྡུག་བདེན་ལ་དམིགས་ཏེ། རྣམ་པ་མི་རྟག་སོགས་སུ་སྐྱེ་བ་ཁམས་གོང་མའི་མཐོང་སྤང་གི་གཉེན་པོ་བར་ཆད་མེད་ལམ་གྱི་མཚན་ཉིད་ཅན་གྱི་སྡུག་བསྔལ་རྗེས་བཟོད་སྐད་ཅིག་གཅིག་སྐྱེ་བས་ཁམས་གོང་མའི་སྡུག་བསྔལ་མཐོང་སྤང་སྤོངས། དམིགས་རྣམས་དེ་འདྲ་བ་ལས་སྤང་བྱ་ལས་རྣམ་པར་གྲོལ་བའི་ལམ་གྱི་མཚན་ཉིད་ཅན་སྡུག་བསྔལ་རྗེས་ཤེས་སྐད་ཅིག་མ་སྐྱེ་བ་དེ་བཞིན་བདེན་པ་ལྷག་མ་རྣམས་ལའང་སྦྱར་བ་སྐད་ཅིག་བཅུ་དྲུག་རིམ་པར་འབྱུང་ཚུལ་ནི་དེ་ཡིན་ནོ། །ལུགས་གཉིས་པ་ནི། འཕགས་པ་ཀླུ་སྒྲུབ་ཀྱིས། ཆོས་ཤེས་པ་ཡི་མཇུག་ཐོགས་སུ། །འདི་ལ་བྱེ་བྲག་ཡོད་ན་ནི། །ཤིན་ཏུ་ཕྲ་བའི་དངོས་ལའང་། །གང་གིས་སྐྱེ་བར་རྣམ་བརྟགས་པས། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང་། །ཞེས་གསུས་པ་ལྟར། ཁམས་གསུམ་གྱི་སྤང་བྱ་ཐམས་ཅད་དྲིལ་ནས་ཅིག་ཆར་སྤོང་སྟེ། དེ་ཡང་སྤོང་བའ་ིགཉེན་པོ་བར་ཆད་མེད་ལམ་ཆོས་བཟོད་ངོ་བོ་སྐྱེ་མེད་རྟོགས་པར་རིགས་གཅིག་ལྡོག་པ་བཞི་ཅན་དུ་སྐད་ཅིག་གཅིག་ཏུ་སྐྱེས། རྟེན་གྱི་གཉེན་པོ་རྣམས་གྲོལ་ལམ་ཆོས་ཤེས་ངོ་བོ་རིགས་གཅིག་ལྡོག་པ་བཞི་སྐད་ཅིག་མར་སྐྱེ། ཐག་བསྲིང་གི་གཉེན་པོ་ཁྱད་པར་གྱི་ལམ་རྗེས་བཟོད་རྣམས་དེ་བཞིན་སྐད་ཅིག་གཅིག་ཏུ་སྐྱེ་ཞིང་། རྗེས་ཤེས་ཡང་དེ་བཞིན་སྐྱེ་བའོ། །དེ་ལྟ་ན་བྱང་ཆུབ་སེམས་དཔའ་ལ་ནི་ཞུགས་གནས་ཀྱི་རྣམ་བཞག་མཚན་ཉིད་པ་རྩི་མི་རུང་བར་ཀུན་བཏུས་སུ་གསུངས་པས་ཞུགས་གནས་མི་རུང་བའི་སྐྱོན་མེད་དོ། །དེ་ཡང་ཀུན་བཏུས་ལས། ཡོངས་སུ་ཤེས་པ་གང་ཞེ་ན། དེའི་གཞིའི་དངོས་པོ་ཡོངས་སུ་ཤེས་པ་དང་། ངོ་བོ་ཉིད་ཡོངས་སུ་ཤེས་པ་དང་། ཉེས་དམིགས་ཡོངས་སུ་ཤེས་པའོ། །ཞེས་གསུངས་པ་ནི། འདི་འདྲར་ཤེས་དགོས་ཏེ། །ཚོགས་ལམ་གྱིས་མཐོང་སྤང་གི་ཉེས་དམིགས་ཤེས་པས་སུན་འབྱིན་གྱི་གཉེན་པོ་བྱས། སྦྱོར་ལམ་གྱིས་མཐོང་སྤང་གི་ངོ་བོ་ཤེས་པས་མགོ་གནོན་གྱི་གཉེན་པོ་བྱས། མཐོང་ལམ་གྱི་དངོས་རྒྱུ་དེས་མཐོང་སྤང་གི་གཞིའི་ས་བོན་གྱི་རྒྱུ་ཤེས་ཤིང་། ཆོས་བཟོད་བར་ཆད་མེད་ལམ་སྐྱེ་བ་ལ་ཕྱོགས་ཚེ་མཐོང་སྤང་གི་ཉེར་ལེན་འགགས་པ་ལ་ཕྱོགས་ནས་ཆོས་བཟོད་སྐྱེ་བ་ནི་མཐོང་སྤང་གི་ཉེར་ལེན་དེ་རྩད་ནས་འགགས་པར་བྱེད་པའི་རྩད་འབྱིན་གྱི་གཉེན་པོ་ཡིན་ནོ། གཉིས་པ་ནི། འདྲེས་པ་ལ་དམིགས་པའི་ཡིད་བྱེད་ཀྱིས་སྤོང་སྟེ། ཆོས་ཐམས་ཅད་བདག་མེད་པ་གཅིག་ཏུ་གནས་པའི་རང་གི་མཚན་ཉིད་ཡིད་ལ་བྱེད་པས་སྤོང་བ་ཡིན་ཅིང་མི་རྟག་པའི་རྣམ་པ་སོགས་ནི་བདག་མེད་ཀྱི་རྣམ་པ་ཡོངས་སུ་སྦྱོང་བྱེད་ཡིན་པར་གསུངས་སོ། །སྦྱོང་བྱེད་དུ་ཇི་ལྟར་འགྱུར་ཞེ་ན། གང་མི་རྟག་པ་སྡུག་བསྔལ་ཞིང་སྡུག་བསྔལ་བདག་གིར་བཟུང་བྱས་སྟོང་པར་ཤེས་པ་ནི་བདག་མེད་ཀྱི་རྣམ་པ་མཆོག་ཐོབ་བྱེད་དུ་འགྱུར་བས་སོ། །གསུམ་པ་ནི། སྤང་བྱ་འདས་པ་འགགས་པའི་ཕྱིར་དང་མ་འོངས་པ་མ་སྐྱེས་པའི་ཕྱིར་ན་སྤོང་མི་རིག་ལ། ད་ལྟར་བྱུང་བ་ནི་གཉེན་པོ་ལམ་དང་མཉམ་དུ་འཇུག་མི་རུང་བས་སྤོང་བ་མ་ཡིན་མོད། འོན་ཀྱང་སྔར་ལྟར་གཉེན་པོ་མཐོང་ལམ་སྐྱེ་བ་དང་སྤང་བྱའི་ས་བོན་གནས་ངན་ལེན་འགགས་པ་དུས་མཉམ་པ། དཔེར་ན། སྣང་བ་འབྱུང་བ་དང་མུན་པ་འགགས་པ་ལྟ་བུ་ཡིན་ནོ། །ཡང་ཀུན་ཏུ་སྦྱོར་བ་གསུམ་སྤངས་པས་མཐོང་ལམ་ཐོབ་པར་གསུངས་པ་ནི་གཞན་སྤང་མི་དགོས་པར་བཤད་པ་མིན་གྱིས་སྤང་བྱ་གཙོ་བོར་སྟོན་པ་ཡིན་ཏེ། ལྟ་བའི་ཀུན་སྦྱོར་གསུམ་ནི་སོ་སྐྱེ་རྣམས་སྡུག་བསྔལ་ལ་ཆགས་པ་ལས་མི་འཕགས་པའི་རྒྱུ་ཡིན་པ་དང་། འཛིན་པའི་ཀུན་སྦྱོར་གཉིས་ནི་འཕགས་ཀྱང་ལྟ་སྤྱོད་ལོག་པ་ཡང་དག་པ་མིན་པས་ཐར་པ་ཚོལ་བའི་རྒྱུ་ཡིན་པ་དང་། ཐེ་ཚོམ་གྱི་ཀུན་ཏུ་སྦྱོར་བ་ནི་ཡང་དག་པའི་ལམ་གྱིས་ཐར་པ་འཚོལ་བ་མ་ཡིན་པའི་རྒྱུ་ཡིས་སོ། །རང་གི་ཡོན་ཏན་རྣམས་མངོན་དུ་ཐོབ་པའང་འབྲས་བུའི་ཕྱོགས་གཅིག་ཡིན་ནོ། །མིང་གི་རྣམ་གྲངས་ནི། ས་དང་པོ་རབ་ཏུ་དགའ་བ། ཐེག་ཆེན་གྱི་མཐོང་ལ། ཆོས་བཟོད་རྣམས་ཀྱིས་མཐོང་སྤང་གི་རྡུལ་དང་བྲལ་ཞིང་ཆོས་ཤེས་རྣམས་ཀྱིས་དྲི་བྲལ་ཐོབ་པས་ན་རྡུལ་མེད་ཅིང་དྲི་མ་དང་བྲལ་བ་ཟག་མེད་ཀྱ་ིསེམས་དང་པོར་བསྐྱེད་པ། རྫོགས་སངས་རྒྱས་ཀྱི་རིགས་སུ་བྱུང་བ། ངེས་པར་འབྱེད་པ། དེ་ཁོ་ན་ཉིད་མངོན་པར་རྟོགས་པ། སྐྱོན་མེད་པ་ལ་ཞུགས་པ། ལྷག་བསམ་དག་པ་ལ་ཞུགས་པ་རྣམས་དོན་གཅིག་གོ །སྒོམ་ལམ་ལའང་། ངོ་བོ་ནི། ཟག་མེད་ཀྱི་ཡེ་ཤེས་ཆུང་འབྲིང་ཆེ་གསུམ་དགུ་རུ་གོམས་པ་སྐྱེ་བར་སློབ་པའོ། །གྲོགས་ནི། བསམ་གཏན་བཞི་དང་གཟུགས་མེད་ཐ་མ་མ་གཏོགས་པ་གསུམ་དང་བཅས་པའི་ཏིང་ངེ་འཛིན་དུ་ཀུན་བཏུས་ལས་གསུངས་སོ། །དམིགས་ཡུལ་ནི། མངོན་སུམ་དུ་མཐོང་ཟིན་པའི་འཕགས་པའི་བདེན་པ་བཞིའི་རང་གི་མཚན་ཉིད་དོ། །རྣམ་པ་སྒོམ་ཚུལ་ནི། འཕགས་ལམ་ཡན་ལག་བརྒྱད་དེ། རེ་རེ་བཞིན་བདེན་བཞིའི་ངོ་བོ་ཅན་དུ་སྒོམ་པས་ན། ཡང་དག་པའི་ལྟ་བ་འཕགས་པའི་ལམ་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤོང་བས་ཡོངས་སུ་བསྒྱུར་བར་བསྒོམས་པ་སྟེ་དེ་བཞིན། ཡང་དག་པའི་རྟོགས་པ་དང་། ངག་དང་ལས་གྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཏིང་ངེ་འཛིན་འཕགས་པའི་ལམ་ཡན་ལག་དབེན་པ་ལ་གནས་པ་སོགས་རེ་རེ་ནས་སྦྱར་རོ། །འདི་དག་གི་སོ་སོའི་ངེས་པ་ནི་བྱང་ཆུབ་ཕྱོགས་བསྟན་པའི་མདོ་ལས་གསུངས་པ་བཞིན་མཉམ་བཞག་གི་ལྟ་བ་དམིགས་མེད་ཀྱི་སྒོམ་པའི་ངོ་བོ་སྐྱེ་ཚུལ་ལྟར་ཤེས་དགོས་ཤིང་། རྗེས་ཐོབ་སྤྱོད་པའི་ཆས་དབྱེ་ན་ནི། ཡན་ལག་བཞིར་འགྱུར་ཏེ། ལྟ་བ་ནི་སྒོམ་ལམ་གྱིས་མཇལ་བྱ་ཆོས་ཉིད་ཟབ་མོ་སྒྲུབ་པའི་ངོ་བོར་ཡོངས་སུ་གཅོད་པའི་ཡན་ལག་གོ །རྟོགས་པ་ནི་ལྟ་བའི་དོན་འབྱེད་པའི་ཤེས་རབ་སྟེ། དེས་ནི་ལྟ་བ་རང་གི་ངོ་བོ་ཇི་བཞིན་ཤེས་ཤིང་དེ་སྟོན་པའི་མདོ་སྡེ་རྣམས་ཀྱང་ཤེས་པས་གཞན་ལ་སྟོན་བྱེད་ཀྱི་རྒྱུ་རུ་གྱུར་པ་དེ་ནི་གོ་བྱེད་ཀྱི་ཡན་ལག་གོ །རང་གི་རྟོགས་དོན་ཇི་བཞིན་གཞན་ལ་སྟོན་པས་ལྟ་བ་རྣམས་དག་ཏུ་ཡིད་ཆེས་པར་བྱེད་པ་ངག་དང་། ལུས་ཀྱི་ལས་རྣམ་པར་དག་པས་ཚུལ་ཁྲིམས་ཕུན་སུམ་ཚོགས་པར་ཡིད་ཆེས་པར་བྱེད་པ་ལས་ཀྱི་མཐའ་དང་། ལོག་འཚོ་ལྔ་སྤངས་ཏེ། ཡོ་བྱད་ལ་འདོད་ཆུང་ཆོག་ཤེས་པས་ཡོ་བྱད་བསྙུང་བར་ཡིད་ཆེས་བྱེད་འཚོ་བ་སྟེ་གསུམ་པོ་དེ་གཞན་ཡིད་ཆེས་པར་བྱེད་པའི་ཡན་ལག་གོ །ཤེས་སྒྲིབ་ནི་སྤྱིར་རྩ་ཉོན་དྲུག་གི་མ་རིག་པ་དེ་གཉིས་ཀྱི་ནང་ནས་ཉོན་མོངས་ཅན་མ་ཡིན་པའི་མ་རིག་ཡིན་པས་ཉོན་མོངས་པ་ཤེས་སྒྲིབ་ཀྱི་གཉེན་པོ་རྩོལ་བ་དང་། སྒོམ་ལམ་གྱི་ཉེ་བའི་སྤང་བྱ་ཉོན་མོངས་པའི་གཉེན་པོ་དྲན་པ་དང་། བསམ་གཏན་སོགས་ཡོན་ཏན་ཁྱད་པར་ཅན་ལ་སྒྲིབ་པའི་གཉེན་པོ་ཏིང་ངེ་འཛིན་ཏེ་དེ་གསུམ་གཉེན་པོའི་ཡན་ལག་གོ །འབྲས་བུ་ནི། སྒོམ་སྤངས་རྣམས་སྤང་བ་དང་། སའི་སྐབས་སུ་སྔར་བཤད་ལྟ་བུའི་ཡོན་ཏན་མངོན་དུ་བྱེད་པ་ཡིན་ལ། དེ་ཡང་སྒོམ་སྤང་དེ་ངོས་བཟུང་བ་དང་། སྤོང་བྱེད་གཉེན་པོ་བསྟན་པ་གཉིས་ལས། དང་པོ་ནི། རྒྱུད་བླ་མར་གསུངས་པ་ལྟར་ན་ཉོན་མོངས་ཐམས་ཅད་མཐོང་ལམ་ནས་སྤང་ཕྱིར། ཤེས་སྒྲིབ་ཁོ་ན་སྒོམ་སྤང་དུ་འགྱུར་ལ། དབུ་མ་འཇུག་པ་ལྟར་ན་ས་བརྒྱད་མན་ཆད་ཉོན་སྒྲིབ་དེ་ཡན་ཆད་ཤེས་སྒྲིབ་སྤང་བར་གསུངས་མོད། མངོན་པ་ཀུན་བཏུས་ནས། རྒྱུན་མཐར་སྒྲིབ་པ་གཉིས་ཀ་ཅིག་ཆར་སྤང་བར་གསུངས་པས། ཉོན་སྒྲིབ་ཀུན་བཏགས་རྣམས་མཐོང་སྤང་། ལྷན་སྐྱེས་རྣམས་སྒོམ་སྤང་། ཤེས་སྒྲིབ་རགས་པ་མཐོང་སྤང་། ཕྲ་བ་སྒོམ་སྤང་ཡིན་ཅིང་། ཤེས་སྒྲིབ་ལ་གཟུང་འཛིན་གྱི་རྟོག་པ་གཉིས་ལས། གཟུང་རྟོག་ཀྱང་བྱང་སེམས་ཀྱི་ལམ་འབྲས་ལ་ཕྱིན་ཅི་ལོག་ཏུ་སྣང་བའི་འཇུག་པ་གཟུང་རྟོག་དགུ་དང་། ཐེག་དམན་གྱི་ལམ་འབྲས་ངོ་བོ་ལྡོག་པ་གཟུང་རྟོག་དགུ་དང་། འཛིན་རྟོག་ཀྱང་སོ་སྐྱེས་རྒྱུད་ཀྱི་གང་ཟག་རྫས་འཛིན་རྟོག་པ་དགུ་དང་། འཕགས་རྒྱུད་ཀྱི་སྐྱེས་བུ་བཏགས་འཛིན་རྟོག་པ་དགུ་སྟེ་སུམ་ཅུ་རྩ་དྲུག་ཡོད་པ་དེ་ཁམས་གསུམ་གྱིས་ཕྱེ་བས་བརྒྱ་དང་བརྒྱད་ནི་མཐོང་སྤང་ཡིན་ལ། སྒོམ་སྤང་ནི་བརྒྱ་རྩ་བརྒྱད་དེ་ཕྲ་བའི་ཆ་ལ་ཆེ་འབྲིང་ཆུང་གསུམ་དགུར་ཕྱེ་བས་དགུ་བརྒྱ་དང་བདུན་ཅུ་རྩ་གཉིས་ཡིན་ནོ། །འདི་ནི་སྤྱིར་ཧ་ལམ་བར་གོ་བྱ་ཡིན་གྱི་ཞིབ་མོར་བྱས་ན། མཐོང་སྒོམ་གྱི་རྟོག་པ་བཞི་བཞི་པོའི་འཇོག་ཚུལ་ལ་ཁྱད་པར་སོ་སོར་ཆེ་བ་ཤེས་དགོས་སོ། །ཉོན་སྒྲིབ་ལྷན་སྐྱེས་ནི། ངོ་བོའི་སྒོ་ནས་དབྱེ་ན་དྲུག་ཡོད་པ་ལས། འདོད་ཆགས་ནི་ཁམས་གོང་མའི་རྒྱུད་ཀྱི་སྲིད་པའི་འདོད་ཆགས་དང་འདོད་པའི་རྒྱུད་ཀྱི་འདོད་པའི་འདོད་ཆགས་གཉིས་ཡིན། སྡུག་བསྔལ་དང་སྡུག་བསྔལ་གྱི་གནས་ཀྱི་ཆོས་རྣམས་ལ་ཀུན་ནས་མནར་སེམས་པ་ཁོང་ཁྲོ་ཡིན། །དམན་པ་ལས་ང་ལྷག་ཅིང་མཉམ་པ་དང་ང་འདྲ་སྙམ་པ་ང་རྒྱལ། མཉམ་པ་ལས་ལྷག་ཅིང་ལྷག་པ་དང་འདྲ་སྙམ་པ་ལྷག་པའི་ང་རྒྱལ་ལམ་ཆེ་བའི་ང་རྒྱལ། ལྷག་པ་ལས་ཅུང་ཟད་ང་དམན་སྙམ་པ་ཅུང་ཟད་སྙམ་པའི་ང་རྒྱལ། ལྷག་པ་ལས་ང་ལྷག་གོ་སྙམ་པ་ང་རྒྱལ་ལས་ཀྱང་ང་རྒྱལ། ངའོ་སྙམ་པ་ངའོ་སྙམ་པའི་ང་རྒྱལ། རང་གི་སྐྱོ ན་སྡིག་པ་དང་ཉོན་མོངས་རྣམས་ཡོན་ཏན་ཡིན་སྙམ་པས་སེམས་ཁེངས་པ་ལོག་པའི་ང་རྒྱལ། འཇིག་རྟེན་པའི་ལྟ་བ་དང་ཏིང་འཛིན་ཙམ་ཐོབ་པ་ན་ངས་འཕགས་པའི་ས་ཐོབ་བོ་སྙམ་པས་ཁེངས་པ་མངོན་པའི་ང་རྒྱལ་ཏེ་བདུན་གྱི་ནང་ནས་ཕྱི་མ་གཉིས་མཐོང་ལམ་དུ་སྤང་དགོས། ལྷག་མ་ལྔ་འདིའི་ང་རྒྱལ་ཡིན་པར་འདོད་པས། འདོད་ཆགས་སོགས་དེ་གསུམ་ལ་ལྟ་བ་ལ་ལོག་པར་ཞུགས་པ་དང་། །ཡུལ་ལ་ལོག་པར་ཞུགས་པ་གཉིས་ཀུན་བཏུས་ལས་འབྱུང་བའི་ནང་ནས་ཡུལ་ལ་ལོག་པར་འཇུག་པ་འདིའི་སྤང་བྱར་འདོད་ལགས། མ་རིག་པ་གཉིས་ལས་ཉོན་མོངས་ཅན་གྱི་མ་རིག་པ་ཡིན། རང་གི་ཕུང་པོ་ལ་བདག་ཏུ་འཛིན་པ་དང་། གཞན་རང་དང་འབྲེལ་བའི་ཆོས་ལ་བདག་གིར་འཛིན་པ་འཇིག་ཚོགས་ལ་ལྟ་བ་ཡིན། རྒྱུན་གྱི་རྟག་ལྟ་དང་ཆད་ལྟ། ངོ་བོ་རྟག་ལྟ་དང་ཆད་ལྟ་ཡོད་མེད་དུ་ལྟ་བ་མཐར་འཛིན་ལྟ་བ་ལྷན་སྐྱེས་ཡིན་ནོ། །སའི་སྒོ་ནས་དབྱེ་ན། ཁམས་གསུམ་ས་དགུ་ལས། འདོད་པ་ན་དྲུག་ཡོད། གཟུགས་གཟུགས་མེད་བརྒྱད་པོ་ན་ཁོང་ཁྲོ་མེད་པས་ལྔ་པ་བརྒྱད་དེ་བཞི་བཅུ་ཡོད་དེ་ཐམས་ཅད་བསྡོམས་པ་ཞེ་དྲུག་ཡིན་ནོ། །ཆེ་འབྲིང་གི་སྒོ་ནས་དབྱེ་ན། ཞེ་དྲུག་པོ་རེ་རེ་ལ་ཆེན་པོའི་ཆེན་པོ་སོགས་ནས་ཆུང་ངུའི་ཆུང་ངུ་བར་དགུར་ཕྱེ་བས་བཞི་བརྒྱ་དང་བཅུ་བཞི་ཡིན་པ་དེ་སྒོམ་སྤང་གི་ཉོན་མོངས་པའོ། །སྤང་བྱ་ཐམས་ཅད་མཐོང་སྤང་དང་སྒོམ་སྤང་གཉིས་སུ་འདུ། སྒྲིབ་པ་ཐམས་ཅད་ཉོན་སྒྲིབ་དང་ཤེས་སྒྲིབ་གཉིས་སུ་འདུ་བས་གསུམ་པ་མེད་པ་ཁོ་ནའོ། །འོ་ན་རྒྱུད་བླ་མ་ལས་སྙོམས་འཇུག་གི་སྒྲིབ་པ་དང་གསུམ་གསུངས་པ་ཅི་ཞེ་ན། སྙོམས་འཇུག་གི་སྒྲིབ་པ་དེ་ནི་ཤེས་སྒྲིབ་ཏུ་མི་འདུ་སྟེ། དགྲ་བཅོམ་པ་གཉིས་ཀའི་ཆ་ལས་རྣམ་གྲོལ་དང་སོ་སྐྱེ་བསམ་གཟུགས་བརྒྱད་ཐོབ་པ་དག་གིས་ཤེས་སྒྲིབ་ཕྲ་རགས་ཅུང་ཟད་ཀྱང་མ་སྤང་ཡང་དེ་སྤང་བས་སོ། །སྙོམས་འཇུག་གི་སྒྲིབ་པ་དེ་ནི་ཉོན་སྒྲིབ་ཀྱི་ཕྱོགས་ཡིན་ཅིང་དེ་རུ་འདུ་བར་འདོད་ལགས། འོ་ན་ཤེས་རབ་ཀྱི་ཆ་ལས་རྣམ་པར་གྲོལ་བས་ཉོན་སྒྲིབ་ཐམས་ཅད་སྤང་བས་དེ་ཡང་སྤང་བར་འགྱུར་རོ་ཞེས་སྨྲ་ན། ཉོན་སྒྲིབ་སྤངས་ཀྱང་དེའི་ཕྱོགས་དེ་སྤང་མི་དགོས་ཏེ། དཔེར་ན་ལྷག་བཅས་མྱང་འདས་ཚེ་ན། ཉོན་མོངས་སྤངས་ཀྱང་སྔར་ཡོད་ཀྱི་ལས་ཀྱི་ཀུན་ནས་ཉོན་མོངས་པ་དང་། རྣམ་སྨིན་གྱི་ཀུན་ནས་ཉོན་མོངས་པ་ཕུང་པོ་དང་བཅས་པ་མ་སྤང་བ་བཞིན་ནོ། །འོ་ན་དེ་གསུམ་གང་དུ་འདུ་ཞེ་ན། རྣམ་སྨིན་གྱི་ཀུན་ནས་ཉོན་མོངས་པར་འདུ་སྟེ་འདུ་བྱེད་ཀྱི་ཕུང་པོའི་རྟོགས་དཔྱོད་སོགས་སྙོམས་འཇུག་གི་སྒྲིབ་པ་ཡིན་པས་སོ། །སྤོང་བྱེད་གཉེན་པོ་བསྟན་པ་ནི། སྔར་བཤད་པ་ཀུན་བཏུས་ལས་གསུངས་པའི་སྤོང་ཚུལ་ཀྱང་སྦྱར་དགོས་ལ། གཉེན་པོ་ཆུང་ངུའི་ཆུང་ངུ་ས་གཉིས་པ་དྲི་མ་མེད་པས་སྤང་བྱ་ཆེན་པོའི་ཆེན་པོ་རྣམས་སྤངས་པ་ནི་དཔེར་ན་གོས་སོགས་ལ་དྲི་མ་ཆེན་པོ་ཡོད་པ་དེ་དྲི་མ་སྦྱོང་བའི་རྩོལ་བ་ཆུང་ངུས་གཅོད་ནུས་པ་ལྟ་བུའོ། །དེ་བཞིན་དུ་གཉེན་པོ་ཆུང་ངུའི་འབྲིང་པོ་གསུམ་པ་འོད་བྱེད་པ། ཆུང་ངུའི་ཆེན་པོ་བཞི་པ་འོད་འཕྲོ། འབྲིང་པོའི་ཆུང་ངུ་ལྔ་པ་སྦྱངས་དཀའ། འབྲིང་པོའི་འབྲིང་པོ་དྲུག་པ་མགོན་གྱུར། འབྲིང་པོའི་ཆེན་པོ་བདུན་པ་རིང་སོང་། ཆེན་པོའི་ཆུང་ངུ་བརྒྱད་པ་མི་གཡོ་བ། ཆེན་པོའི་འབྲིང་པོ་དགུ་པ་ལེགས་པའི་བློ་གྲོས་བར་དྲི་མ་ཆེ་རིམ་ནས་རིམ་པར་སྦྱར་ནས། གཉེན་པོ་ཆེན་པོའི་ཆེན་པོ་བཅུ་པ་ཆོས་ཀྱི་སྤྲིན་འདིས་སྤང་བྱ་ཆུང་ངུའི་ཆུང་དུ་ཤིན་ཏུ་ཕྲ་བ་སྤོང་བ་ཡིན་ཏེ། དཔེར་ན་གོས་སོགས་ཀྱི་དྲི་མ་ཤིན་ཏུ་ཆུང་ངུ་གཅོད་པ་ལ་ནི་རྩོལ་བ་ཆེན་པོ་བསྟེན་དགོས་པ་བཞིན་ནོ། །དྲི་མ་དེ་དག་སྤོང་བ་ན་ལམ་བཞི་ལས། ས་སྔ་མའི་མཇུག་དེ་གོང་མར་སྦྱོར་བའི་སྦྱོར་ལམ་ཡིན་པའི་རྐྱེན་གྱིས་རང་གི་སྤང་བྱ་རགས་པ་སྤང་བས་མགོ་གནོན་གྱི་གཉེན་པོ་བྱས་ནས་སྤང་བྱའི་ས་བོན་རབ་ཆད་ཞིག་བསྐྱེད། རང་གིས་དེ་སྐྱེ་བ་བར་ཆད་མེད་ལམ་ཡིན་པའི་རྐྱེན་གྱིས་རབ་ཆད་པོ་དེ་ངང་གིས་རྩད་ནས་ཞིག་པས་རྩད་འདོན་གྱིས་སྤོང་བའི་གཉེན་པོར་གྱུར། སའི་དངོས་གཞི་སྤང་བྱ་ལས་རྣམ་པར་གྲོལ་བའི་རྣམ་གྲོལ་ལམ་ཡིན་ཅིང་རྟེན་གྱི་གཉེན་པོའང་ཐོབ། སའི་མཇུག་གི་རང་ས་ལས་ཁྱད་པར་འཕགས་པས་གོང་མའི་རྒྱུ་བྱས་པས་ཁྱད་པར་ལམ་དུ་གྱུར་ཅིང་རང་གི་སྤང་བྱ་ཐམས་ཅད་ཆེས་ཐག་རིང་བ་བྱས་པའི་ཐག་བསྲིང་གི་གཉེན་པོའང་ཡིན་ནོ། །བྱང་སེམས་རྣམས་ཀྱིས་མཐོང་ལམ་ཐོབ་ནས་ཉོན་མོངས་མ་སྤངས་ཀྱང་སྨན་ནམ་སྔགས་ཀྱིས་བཏབ་པའི་དུག་ལྟ་བུའམ། ཐམས་ཅད་སྤང་བའི་དགྲ་བཅོམ་དང་འདྲ་བས་ན་གནོད་པ་བྱེད་པའི་ནུས་པ་མེད་པས་སྒོམ་ལམ་དུ་ཤེས་སྒྲུབ་གཙོ་བོར་བྱས་ནས་སྤང་བར་ཀུན་བཏུས་ལས་གསུངས་ཤིང་། མཉམ་རྗེས་གང་གིས་དེ་སྤོང་སྙམ་ན་རྒྱུད་བླ་མར་རྗེས་ཐོབ་ཀྱི་ཡེ་ཤེས་ཀྱིས་སྤང་བར་གསུངས་ཀྱང་། མདོ་རྒྱན་ལས་ནི། མཉམ་རྗེས་གཉིས་ཀས་སྤོང་བར་གསུངས་སོ། །མི་སློབ་ལམ་གྱི་རྟོགས་པའི་ཆོས་བཅུ་ནི། འཕགས་ལམ་བརྒྱད་ཀྱི་ཁར་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཉིས་བསྣན་པ་སྟེ། དེ་རྣམས་ནི་ཟག་མེད་ཀྱི་ཕུང་པོ་ལྔས་བསྡུས་ཏེ་ངག་ལས་འཚོ་བ་གསུམ་ཚུལ་ཁྲིམས་ཀྱི་ཕུང་པོ། རྩོལ་དྲན་ཏིང་འཛིན་གསུམ་ཏིང་འཛིན་གྱི་ཕུང་པོ། ལྟ་རྟོག་གཉིས་ཤེས་རབ་ཀྱི་ཕུང་པོ། སྤང་བྱ་ལས་རྣམ་པར་གྲོལ་བའི་དབྱིངས་ནི་རྣམ་པར་གྲོལ་བའི་ཕུང་པོ། གཉེན་པོ་ཡེ་ཤེས་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་སྟེ། འདི་གཉིས་གློ་བུར་འཕྲལ་དག་གི་ཆ་ཡིན་པས་འདུས་བྱས་ཕུང་པོ་རྒྱུ་དངོས་སུ་བཞག་ཆོག་ཅིང་། ངོ་བོ་ཡེ་དག་གི་དབྱིངས་ཡེ་ཤེས་གཉིས་ནི་འདུས་མ་བྱས་ཆེན་པོ་ཡིན་ལ་ཟག་མེད་ཀྱི་ཕུང་པོ་འདུས་བྱས་ཀུན་གྱི་ཁྱབ་བྱེད་དང་། རྟེན་ཐུན་མོང་མ་ཡིན་པ་ཡིན་ཕྱིར་རྟེན་གྱི་ཚུལ་དུ་འདུ་བའོ། །གསུམ་པ་དགེ་འདུན་དཀོན་མཆོག་སོ་སོར་བཤད་པ་ལ། ངོ་བོ་ནི། སྤངས་རྟོགས་མཐར་མ་ཕྱིན་པའི་འཕགས་པའི་གང་ཟག་གོ། །ངེས་ཚིག་ནི། །སཾ་གྷ་ཞེས་པའི་སྒྲར་འདུས་ཤིང་མི་ཕྱེད་པའི་དོན་ལ་འཇུག་པས་སངས་རྒྱས་ཀྱི་ཆོས་དང་རང་རྒྱུད་གཉིས་སོ་སོར་ཕྱེ་བའམ་དབྱེ་བར་མི་ནུས་པར་གྱུར་པས་ན་དགེ་འདུན་ཞེ་བྱའོ། །མཚན་ཉིད་ནི། ཆོས་ཉིད་ཀྱི་དོན་མངོན་སུམ་རིག་ཅིང་གློ་བུར་དྲི་མ་ཕལ་ཆེར་གྲོལ་བ་རིག་གྲོལ་གྱི་ཡོན་ཏན་དྲུག་དང་ལྡན་པའོ། །དྲུག་ནི། རང་གི་སེམས་ཉིད་འོད་གསལ་བར་རྟོགས་པ་ཇི་ལྟ་རིག་པ། ཆོས་ཐམས་ཅད་བདག་མེད་དམ་མཐའ་བྲལ་དུ་ཡང་དག་པར་གཟིག་པ་ཇི་སྙེད་རིག་པ། བདེ་གཤེག་སྙིང་པོས་སེམས་ཅན་ལ་ཁྱབ་པར་གཟིགས་པ་ནང་གི་ཡེ་ཤེས་གཟིགས་པ་སྟེ་རིག་པའི་ཡོན་ཏན་གསུམ། ཆགས་སོགས་ཉོན་སྒྲིབ་དག་པ། ཤེས་བྱ་ལ་ཐོགས་པའི་སྒྲིབ་པ་དག་པ། རང་དོན་ཡིད་བྱེད་དམན་སྒྲིབ་དག་པ་སྟེ་གྲོལ་བའི་ཡོན་ཏན་གསུམ་ཡིན་ནོ། །དབྱེ་བ་ལ། ཐེག་དམན་གྱི་དགེ་འདུན་དང་། ཐེག་ཆེན་གྱི་དགེ་འདུན་གཉིས་སུ་ཡོད་པ་ལས། དང་པོ་ནི། སྐྱབས་འགྲོ་བདུན་ཅུ་པ་ལས། འཕགས་པའི་བདེན་པ་རྣམ་པ་བཞི། །རྟོགས་ཏེ་ཤེས་ནས་དད་གྱུར་པ། །སྐྱེས་བུ་གང་ཟག་ཡ་བརྒྱད་པོ། །མི་ཕྱེད་དགེ་འདུན་ཡིན་པར་བཤད། །ཅེས་གསུངས་པ་བཞིན་དུ་འཆད་པ་ལས། བླང་དོར་གྱི་ཤེས་བྱ་འཕགས་པའི་བདེན་པ་བཞི་བཤད་པ། དེ་ལས་ཤེས་ནས་དད་པ་བཞི་སྐྱེ་ཚུལ་བཤད་པ། ཤེས་ནས་དད་པ་དང་ལྡན་པའི་གང་ཟག་གི་དབྱེ་བ་བཤད་པ་གསུམ་ལས། དང་པོ་ལ་ལྔ་ལས། ངོ་བོ་ནི། ཀུན་ཉོན་རྒྱུ་འབྲས་དང་རྣམ་བྱང་རྒྱུ་འབྲས་སུ་གནས་པའོ། །ངེས་ཚིག་ནི། འཕགས་པའི་གང་ཟག་གིས་ཚུལ་བཞིན་གཟིགས་པ་ཡིན་ལ། རང་གི་གནས་ཚུལ་ཕྱིན་ཅི་མ་ལོག་པའི་མཚན་ཉིད་དུ་ཡོད་པས་སྐྱེ་འཕགས་ཐམས་ཅད་ལ་བདེན་ཀྱང་གཟིགས་ཚུལ་ལ་ལྟོས་པས་ནི་འཕགས་པའི་བདེན་པ་བཞི་ཞེས་བྱའོ། །མཚན་ཉིད་ནི། ཟག་བཅས་ཉེར་ལེན་གྱི་ཕུང་པོ་ལྔ་རྒྱུ་འབྲས་སུ་གྱུར་པ་དང་། དེ་དག་གི་གཉེན་པོ་སྤང་བ་ཟག་མེད་དང་། སྤོང་བྱེད་ཟག་མེད་གཉིས་སུ་གནས་པའོ། །དབྱེ་བ་ལ་གསུམ་སྟེ། དབྱེ་བ་དངོས་དང་། གྲངས་ངེས་དང་། གོ་རིམ་ངེས་པའོ། །དང་པོ་ལ་བཞི་ལས། སྡུག་བསྔལ་གྱི་བདེན་པའི་མཚན་བཞི་ནི། རྣམ་སྨིན་གྱི་འབྲས་བུ་སེམས་ཅན་གྱི་འཇིག་རྟེན། བདག་པོའི་འབྲས་བུ་སྣོད་ཀྱི་འཇིག་རྟེན་གཉིས་ཡིན་ལ། མཚན་ཉིད་ནི་བཞི་སྟེ། རྒྱུན་དང་སྐད་ཅིག་གིས་འཇིག་པས་མི་རྟག་པ། གནོད་པས་སྡུག་བསྔལ་བ། ལྷན་སྐྱེས་ཀྱི་བདག་མེད་པས་སྟོང་པ། ཀུན་བཏགས་ཀྱི་བདག་མེད་པས་བདག་མེད་དམ་པའོ། །ཀུན་འབྱུང་གི་བདེན་པའི་མཚན་གཞི་ནི། ཀུན་སློང་ཉོན་མོངས་པ་དང་། དེས་ཀུན་ནས་བསླང་བ་ལས་གཉིས་ཡིན་ལ། མཚན་ཉིད་ནི་བཞི་སྟེ། འབྲས་བུ་སྒྲུབ་པར་བྱེད་པས་ཀུན་འབྱུང་བ། ཉེར་ལེན་དུ་གྱུར་པས་རྒྱུ། ལྷན་ཅིག་ཕན་འདོགས་བྱེད་རྐྱེན། རྒྱུ་གཉིས་པོ་དེ་མ་ཚང་མེད་པར་ཚོགས་པས་རབ་ཏུ་སྐྱེ་བའོ། །འགོག་བདེན་གྱི་མཚན་གཞི་ནི། འོད་གསལ་བའི་དེ་བཞིན་ཉིད་འགྱུར་བ་མེད་པ་དྲི་མ་དང་བྲལ་བའི་ཆ་ཡིན་ལ། མཚན་ཉིད་བཞི་ནི་སྔར་བཤད་གྲུབ་བོ། །ལམ་བདེན་གྱི་མཚན་གཞི་ནི། བདག་མེད་རྟོགས་པའི་ཤེས་རབ་འཁོར་དང་བཅས་པ་ཡིན་ལ། མཚན་ཉིད་བཞི་ནི་བཤད་ཟིན་ཏོ། །གྲངས་ངེས་ནི། དགོས་པ་ལ་ལྟོས་པའི་གྲངས་ངེས་ཡིན་ཏེ། ཐར་པ་འདོད་པས་བླང་དོར་གཉིས་ཤེས་པ་ལ་བརྟེན་ནས་ཉེས་པ་སྤང་། ལེགས་པ་བསྟེན་དགོས་ཤིང་། དེ་གཉིས་རེ་རེ་ལའང་རྒྱུ་འབྲས་གཉིས་རེར་ངེས་པས་བཞིར་ངེས་ལ། འདིར་ནི་བླང་དོར་གྱི་ཤེས་བྱ་ཁོ་ན་བསྟན་པ་ཡིན་པས་བདེན་པ་བཞི་པོས་ཤེས་བྱ་ཐམས་ཅད་མ་བསྡུས་སོ། །གོ་རིམ་ངེས་པ་ནི། དཔེར་ན་སྨན་པས་ནད་ན་བ་ཐོག་མར་རྟོགས་དགོས། དེ་ནས་ནད་ཀྱི་རྒྱུ་རླུང་མཁྲིས་སོགས་སྤང་བྱར་ཤེས་དགོས། དེ་ནས་སྤང་བའི་བདེ་བ་རྟོགས་ལ། དེ་ནས་སྤོང་བྱེད་དང་བདེ་བ་ཐོབ་བྱེད་ཀྱི་ཐབས་སྨན་བདེན་པ་རྟོགས་པ་དེ་བཞིན་དུ་སྡུག་བསྔལ་ཤེས་བྱ། ཀུན་འབྱུང་སྤང་བྱ། འགོག་པ་མངོན་དུ་འགྱུར་བྱའམ་རིག་བྱ། ལམ་རྒྱུད་ལ་བསྟེན་བྱར་དང་པོ་དཔྱད་པ་བྱེད་ཚེ་ན་ཤེས་པར་བྱས་ན་མཐར་བདེན་པ་མངོན་སུམ་རྟོགས་པའི་ཚེ་ན་ཡང་། དེ་བཞིན་རྟོགས་པས་ན་མངོན་པར་རྟོགས་པའི་གོ་རིམ་མོ། །བདེན་པ་བཞི་པོ་དེ་རྟེན་འབྲེལ་བཅུ་གཉིས་ཀྱིས་གཏན་ལ་འབེབས་ཚུལ་ནི། རྟེན་འབྱུང་ལ་ཀུན་ནས་ཉོན་མོངས་པའི་ལུགས་འབྱུང་ལྡོག་གཉིས། རྣམ་བྱང་གི་ལུགས་འབྱུང་ལྡོག་གཉིས་ཡོད་པ་ལས། ཀུན་ཉོན་ལུགས་འབྱུང་མ་རིག་པ་ལས་འདུ་བྱེད་སོགས་ཀྱིས་འབྲས་བུ་སྡུག་བདེན་གཏན་ལ་འབེབས། རྒ་ཤི་གང་གི་རྐྱེན་ཅན་ཡིན་ན་སྐྱེ་བའི་རྐྱེན་ཅན་ཡིན་སོགས་ཀྱིས་རྒྱུ་ཀུན་འབྱུང་གཏན་ལ་འབེབས། རྣམ་བྱང་གི་ལུགས་འབྱུང་མ་རིག་འགག་པས་འདུ་བྱེད་དགག་སོགས་ཀྱིས་འབྲས་བུ་འགོག་བདེན་གཏན་ལ་འབེབས། རྒ་ཤི་གང་གིས་འགགས་ན་སྐྱེ་བ་འགགས་པས་འགེགས་སོགས་ཀྱི་རྒྱུ་ལམ་བདེན་གཏན་ལ་འབེབས་པ་ཡིན་ནོ། །ཤེས་ནས་དད་པ་བཞི་སྐྱེ་ཚུལ་བཤད་པ་ནི། སྡུག་ཀུན་གཉིས་མཐོང་ན་ལས་ཉོན་རྒྱུ་འབྲས་དང་བཅས་པ་སྤོང་བའི་ཚུལ་ཁྲིམས་ལ་ཤེས་ནས་དད་པ་ཐོབ། ཆོས་ཀྱི་མཆོག་འགོག་བདེན་མཐོང་ན་ཆོས་ལ་ཤེས་ནས་དད་པ་ཐོབ། ལམ་མངོན་སུམ་དུ་མཐོང་ན་སངས་རྒྱས་དང་དགེ་འདུན་བྱེད་པའི་ཆོས་ལམ་བདེན་ཡིན་པས་སངས་རྒྱས་ལ་ཤེས་ནས་དད་པ་ཐོབ་པ་དང་། དགེ་འདུན་ལ་ཤེས་ནས་དད་པ་ཐོབ་ཅིང་། དེར་མ་ཟད་ལམ་གྱིས་ཚུལ་ཁྲིམས་དང་ཆོས་གཉིས་ཀ་བསྡུས་པས་ན་དེ་གཉིས་ལ་ཡང་དད་པ་ཐོབ་པར་མཛོད་ལས་གསུངས་སོ། །དད་པ་དང་ལྡན་པའི་གང་ཟག་གི་དབྱེ་བ་བཤད་པ་ལ། ངོ་བོ། གྲངས་ངེས། དབྱེ་བ་གསུམ་ལས། དང་པོ་ནི། དགེ་སྦྱོང་གི་ཚུལ་ཟག་མེད་བར་ཆད་མེད་ལམ་ཡིན་ཅིང་། དེའི་རྒྱུ་མཐུན་གྱི་འབྲས་བུ་རྣམ་གྲོལ་ལམ། བྱེད་པའི་འབྲས་བུ་སོ་སོར་བརྟགས་པའི་འགོགས་པ་རྣམས་ཡིན་ནོ། །གཉིས་པ་ནི། སྤང་བྱ་སྤངས་པའི་དགོས་པ་ལ་ལྟོས་པས་བཞིར་བཞག་པ་ཡིན་ཏེ། མཐོང་སྤང་སྤང་བས་རྒྱུན་ཞུགས། འདོད་པའི་སྒོམ་སྤང་ཕལ་ཆེར་སྤང་བའི་ཕྱིར་འོང་། ཐམས་ཅད་སྤང་བ་དང་གོང་མའི་སྒོམ་སྤང་སྲིད་རྩེ་མ་གཏོགས་སྤང་བས་ཕྱིར་མི་འོང་། སྲིད་རྩེའི་སྒོམ་སྤང་སྤང་བས་དགྲ་བཅོམ་པར་འཇོག་པས་སོ། །གསུམ་པ་ནི། ཟག་མེད་རྒྱུད་ལ་སྐྱེས་པའི་གང་ཟག་ཟུང་བཞི་དང་ཡ་བརྒྱད་དུ་གནས་པ་ཡིན་ཅིང་། དེ་དག་བཤད་པ་ལ། རིམ་གྱིས་པ་དང་། ཐོད་རྒལ་བ་གཉིས་སུ་ཡོད་པའི་ནང་ནས། དང་པོ་ནི། འདོད་པའི་སྒོམ་སྤང་ཆེན་པོ་གསུམ་དང་། འབྲིང་པོའི་ཆེན་པོ་སྟེ་བཞི་སྤང་ངམ་མ་སྤངས་ཀྱང་མཐོང་ལམ་སྐད་ཅིག་བཅོ་ལྔ་ལ་གནས་པ་རྒྱུན་ཞུགས་ཞུགས་པ། བཅུ་དྲུག་པ་ལ་གནས་པ་རྒྱུན་ཞུགས་འབྲས་གནས། དེ་ཡང་ཞུགས་པའི་སྐབས་ན་དབང་པོ་རྟུལ་པོ་ལ་དད་པའི་རྗེས་འབྲངས་དང་། །རྣོན་པོ་ལ་ཆོས་ཀྱི་རྗེས་འབྲང་ཟེར་ཞིང་། འབྲས་གནས་སྐབས་སུ་དེ་གཉིས་ལ་རིམ་པར་དད་མོས་དང་མཐོང་ཐོབ་ཟེར་ལ། རྒྱུན་ཞུགས་དེ་ལ་སྐྱེ་བའི་སྒོ་ནས་དབྱེ་ན། འདོད་པའི་ལྷ་དང་མིའི་ནང་དུ་ལན་བདུན་སྐྱེ་ནས་དགྲ་བཅོམ་ཐོབ་པར་གྱུར་པའི་རེ་ལྟར་ཐོག་ན་ལན་བདུན་པ་དང་། ལྷའམ་མིའི་ནང་དུ་སྐྱེ་བ་རིགས་འདྲ་བ་ལན་གཉིས་སམ་གསུམ་ཐོབ་ནས་དགྲ་བཅོམ་ཐོབ་པ་རིགས་ནས་རིགས་སྐྱེ་སྟེ་གཉིས་ཡོད་དོ། །འདོད་པའི་སྒོམ་སྤང་ལྔ་ཚུན་ཆད་སྤང་བ་ཕྱིར་འོང་ཞུགས་པ་ཡིན་ཅིང་། དྲུག་པ་སྤང་བ་ཕྱིར་འོང་འབྲས་གནས་ཡིན་ཏེ། སྒོམ་སྤང་ཆུང་ངུ་རྣམས་མ་སྤངས་བས་ན་འདོད་ཁམས་སུ་ལན་གཅིག་སྐྱེ་དགོས་པས་སོ། །ཕྱིར་འོང་འབྲས་གནས་དེས་བདུན་པའམ་བརྒྱད་པ་དེ་སྤངས་ན་དེ་ལ་ཚེ་གཅིག་བར་ཆད་གཅིག་པ་ཞེས་བྱ་སྟེ། མྱང་འདས་ཐོབ་པ་ཚེ་གཅིག་གིས་ཆོད་པ་དང་། ཕྱིར་མི་འོང་གི་འབྲས་བུ་ཐོབ་པ་ལ་ཉོན་མོངས་གཅིག་གིས་ཆོད་པས་སོ། །འདོད་ཉོན་བདུན་ནམ་བརྒྱད་སྤང་བ་ལ་གནས་པ་དེ་ཕྱིར་མི་འོང་ཞུགས་པའང་ཡིན་ལ། དགུ་པ་སྤང་ཚེ་ཕྱིར་མི་འོང་འབྲས་གནས་ཡིན་ཅིང་འདི་ལ་ལྔ་ཡོད་དེ། གཟུགས་ཁམས་ཀྱི་ཉོན་མོངས་མ་སྤང་བ་གཟུགས་སུ་ཉེར་འགྲོ། གཟུགས་མེད་པའི་ཉོན་མོངས་མ་སྤང་བ་གཟུགས་མེད་ཉེར་འགྲོ། བདེན་པ་མངོན་སུམ་མཐོང་བའི་རྟེན་དེ་ལ་དགྲ་བཅོམ་ཐོབ་པ་མཐོང་ཆོས་ཞི། ཁམས་གསུམ་པོར་འཕགས་པའི་སྐྱེ་བ་བརྒྱུད་ནས་དགྲ་བཅོམ་ཐོབ་པ་ཚེ་ཡོངས་སུ་གྱུར་པས་འགོག་པ་ཐོབ་པ་ལུས་མངོན་བྱེད་དོ། །དང་པོ་ལའང་ལྔ་སྟེ། བར་དོ་གྲུབ་ནས་མྱ་ངན་འདའ་བ་བར་འདའ། ཕྱི་མའི་སྐྱེ་བ་བླང་མ་ཐག་དགྲ་བཅོམ་ཐོབ་པ་སྐྱེ་འདའ། སྐྱེ་བ་དེར་ལམ་ལ་འབད་རྩོལ་དང་བཅས་པས་མྱང་འདས་ཐོབ་པ་མངོན་པར་འདུ་བྱེད་དང་བཅས་པས་འདའ་བ། འབད་མེད་དུ་ལམ་འབྱོངས་པ་འདུ་བྱེད་མེད་པར་འདའ་བ། བསམ་གཏན་གྱི་སྤེལ་སྒོམ་ཐོབ་པ་འོག་མིན་འགྲོ་དང་། མ་ཐོབ་པ་སྲིད་རྩེར་འགྲོ་བ་གཉིས་ན་གོང་འཕོ་ཡིན་ནོ། །བསམ་གཏན་གྱི་སྤེལ་སྒོམ་ནི། དང་པོ་བསམ་གཏན་བཞི་པ་སྤེལ་ཏེ། དེ་ཡང་ཟག་མེད་གཉིས་ཀྱི་བར་ཟག་བཅས་གཅིག་སྤེལ་བ་ཆུང་ངུ་གསུམ་སྤེལ། དེ་བཞིན་འབྲིང་དྲུག་སྤེལ། ཆེན་པོ་དགུ་སྤེལ། ཆེས་ཆེན་པོ་བཅུ་གཉིས་སྤེལ། ཤིན་ཏུ་ཆེས་ཆེན་པོ་བཅོ་ལྔ་སྤེལ་བའོ། །གོང་འཕོ་དེ་ལའང་གསུམ་སྟེ། འདོད་པའི་རྟེན་ལ་བསམ་གཏན་སྤེལ་སྒོམ་བཅས་ཐོབ་ཀྱང་བསམ་གཏན་ཕྱི་མ་གསུམ་ལས་ཉམས་པ་དེ་ཚངས་རིས་སུ་སྐྱེ་བ་ན་སྔོན་གྱི་བག་ཆགས་ཀྱིས་བསམ་གཏན་སྤེལ་ནུས་པས་སྤེལ་སྒོམ་ལ་བརྟེན་ནས་འོག་མིན་དུ་འགྲོ་བ་འཕར་བ། གནས་གཙང་ལྔའི་གང་རུང་དུ་སྐྱེ་བ་ཕྱེད་འཕར། ལྔ་བོ་རིམ་བཞིན་སྐྱེ་བ་གནས་ཐམས་ཅད་ནས་འཆི་འཕོ་བའོ། །སྲིད་རྩེར་འགྲོས་ནི། བསམ་གཏན་བཞི་རིམ་པར་བརྒྱུད་གནས་གཙང་ལྔ་བོར་ནས་གཟུགས་མེད་པར་རིམ་པར་འཇུག་ཅིང་སྲིད་རྩའི་རྟེན་ལ་མྱ་ངན་འདའ་བ་ཡིན་ནོ། །གཟུགས་མེད་ཉེར་འགྲོ་ནི། འདོད་པའི་རྟེན་ལས་གཟུགས་ལ་ཆགས་པ་དང་བྲལ་བས་གཟུགས་མེད་རྣམས་ཁོ་ནར་འཇུག་ཅིང་དེར་མྱ་ངན་འདའ་བ་ཡིན་ལ། འདི་ལའང་བར་དོ་མེད་པས་བར་འདའ་མེད་ཅིང་སྐྱེ་འདའ་སོགས་བཞི་ཡོད་དོ། །འབྲས་གནས་རྣམས་ནི། གོང་མ་ཐོབ་པར་མི་བརྩོན་ཚེ་འབྲས་གནས་ཙམ་པོ་བ་ཡིན་ཅིང་། བརྩོན་ཚེ་འབྲས་གནས་ཁྱད་པར་བ་ཡོད་པར་ཤེས་དགོས་སོ། །སྲིད་རྩེའི་སྒོམ་སྤང་སྤོང་བར་བརྩོན་པ་དགྲ་བཅོམ་ཞུགས་པ། སྤང་བ་དེ་དགྲ་བཅོམ་འབྲས་གནས་ཡིན་ཅིང་། འདི་ལ་དྲུག་ཡོད་དེ། སློབ་བའི་དུས་ན་གུས་རྟག་གི་བརྩོན་འགྲུས་མེད་པའི་དབང་གིས་འབྲས་བུ་ཐོབ་ཚེ། ཉམས་པའི་ཆོས་ཅན། འཆི་བར་སེམས་པའི་ཆོས་ཅན་དུ་གྱུར་པ་དང་། སྔར་རྟག་སྦྱོར་གྱི་བརྩོན་འགྲུས་དང་ལྡན་པ་རྗེས་སུ་བསྲུང་བའི་ཆོས་ཅན། གུས་སྦྱོར་ལྡན་པ་གནས་པ་ལས་མི་བསྐྱོད་པའི་ཆོས་ཅན། གཉིས་ཀ་ལྡན་པའི་དབང་རྟུལ་རྟོགས་པའི་སྐལ་པ་ཅན། སྔར་གཉིས་ཀ་ལྡན་པའི་དབང་རྣོན་མི་གཡོ་བའི་ཆོས་ཅན་ཏེ། སྔ་མ་ལྔ་དབང་རྟུལ་དུས་དང་སྦྱོར་བའི་རྣམ་པར་གྲོལ་བ་ཡིན། ཐ་མ་དེ་དབང་རྣོན་དུས་དང་མི་སྦྱོར་བའི་རྣམ་པ་གྲོལ་བ་མངོན་དུ་བྱེད་པ་ཡིན་ནོ། །ཐོད་རྒལ་བ་ལ་གཉིས་ཡོད་དེ། ཆགས་བྲལ་སྔོན་སོང་གི་ཐོད་རྒལ་བ་དང་། སྤང་བྱ་ཅིག་ཆར་སྤོང་བའི་ཐོད་རྒལ་བའོ། དང་པོ་ནི། མཐོང་ལམ་གྱི་སྔོན་དུ་མཐོང་སྤང་སྤོང་མི་རུང་བས་དགྲ་བཅོམ་ལའང་མེད་པས་ཕྱིར་འོང་མི་འོང་གཉིས་ཁོ་ན་ཡིན་ལ། དེའི་ཚུལ་ནི་མཐོང་ལམ་གྱི་སྔོན་སྒོམ་སྤང་འདོད་ཉོན་དྲུག་པ་ནས་བརྒྱད་པའི་བར་ཅི་རིགས་སྤང་བ། ཆགས་བྲལ་སྔོན་སོང་གི་ཕྱིར་འོང་ཞུགས་པ་བཅུ་དྲུག་པའི་རྟགས་པ་ཐོབ་ཚེ་འབྲས་གནས་སོ། །འདི་ཉིད་ཀྱིས་སྒོམ་སྤང་འདོད་ཉོན་དགུ་པ་སྤོང་བ་ལ་བརྩོན་ཚེ་མཐར་གྱིས་པའི་ཕྱིར་མི་འོང་ཞུགས་པ་དང་། སྤང་བ་ན་འབྲས་གནས་སུ་གཏོགས་སོ། །མཐོང་ལམ་གྱི་སྔོན་དུ་འདོད་པའི་སྒོམ་སྤང་དགུ་པ་སྤངས་ཤིང་ཅི་ཡང་མེད་མན་ཆད་ལ་ཆགས་པ་དང་བྲལ་བ་དེ་ཆགས་བྲལ་སྔོན་སོང་གི་ཕྱིར་མི་འོང་ཞུགས་པ་སྐད་ཅིག་བཅུ་དྲུག་པའི་ཡེ་ཤེས་ཐོབ་ཚེ་འབྲས་གནས་འདིས་དགྲ་བཅོམ་ཐོབ་པ་ནི་མཐར་གྱིས་པའི་དགྲ་བཅོམ་དུ་གཏོགས་དགོས་སོ། །སྤང་བྱ་ཅིག་ཅར་སྤོང་བའི་ཐོད་རྒལ་བ་ལ། རྒྱུན་ཞུགས་ཅིག་ཆར་བ་དང་། ཅིག་ཆར་བའི་དགྲ་བཅོམ་གཉིས་ཡོད་ཅིང་། དང་པོ་ནི། ཆོས་བཟོད་ཀྱི་སྐབས་སུ་ཁམས་གསུམ་གྱི་མཐོང་སྤང་རྣམས་ཅིག་ཅར་སྤོང་བ་ཡེ་ཤེས་བཅུ་དྲུག་སྐད་ཅིག་བཞི་ལ་ལྡོག་པ་བཅུ་དྲུག་ཏུ་སྐྱེ་བ་བྱང་སེམས་ལྟར་ཡིན་པས་ཞུགས་གནས་རིམ་པར་འབྱུང་བ་མེད་ལ། འདི་ཉིད་སྨོན་ལམ་གྱི་སྟོབས་ཅན་ཡིན་པས་སྨོན་ལམ་གྱི་དབང་གིས་འདོད་ཁམས་སུ་སྐྱེ་ནས་སངས་རྒྱས་བྱོན་ན་མྱ་ངན་འདའ་བའམ། སངས་རྒྱས་འབྱུང་བ་མེད་ན་རང་རྒྱལ་དུ་འགྱུར་རོ། །གཉིས་པ་ནི། མཐོང་ལམ་ཐོབ་ནས་འདོད་པའི་སྒོམ་སྤང་ཆེན་པོ་རྣམས་སྤངས་བའི་ཚེ་ན་གོང་མའི་ཆེན་པོ་རྣམས་ཀྱང་སྤང་བ་ནས་ཆུང་ངུ་རྣམས་སྤང་ཚེ་སྲིད་རྩེའི་ཆུང་ངུ་རྣམས་ཀྱང་སྤང་ནས་དགྲ་བཅོམ་ཐོབ་པའོ། །དེ་ཡང་འབྲས་བུ་ཐོབ་ཚུལ་གྱིས་ནི་ཐོད་རྒལ་བར་འཇོག་པ་ཡིན་ལ། སྤང་བྱ་སྤོང་ཚུལ་གྱིས་ཅིག་ཆར་བར་འཇོག་པའོ། །གཉིས་པ་ཐེག་ཆེན་གྱི་དགེ་འདུན་ནི། ཀུན་འདུས་ལས་གསུངས་པ་ལྟར་ན། རྒྱུན་ཞུགས་མིན་ཏེ་ཟག་མེད་མྱང་འདས་ཉེར་ལེན་སྔར་ནས་ཡོད་པས་སོ། །ལན་ཅིག་ཕྱིར་འོང་མིན་ཏེ་འདོད་པར་གྲངས་མེད་དུ་སྐྱེ་བ་འཛིན་པས་སོ། །ཕྱིར་མི་འོང་མིན་ཏེ་བསམ་གཏན་ལ་གནས་བཞིན་འདོད་པར་སྐྱེ་བས་སོ། །དེ་བས་ན་ས་བཅུ་ལ་གནས་པའི་འཕགས་པ་ཕ་རོལ་ཕྱིན་པ་བཅུ་ལ་སྤྱོད་པ་རྣམས་ཡིན་ཅིང་བཅུ་པོ་ལ་ལྔ་ལས། ངོ་བོ་ནི། རྣམ་མཁྱེན་གྱི་རྒྱུ་ཚོགས་གཉིས་སོ། །ངེས་ཚིག་ལ་སྤྱིའི་ངེས་ཚིག་ནི། དམ་པ་བཅུ་གཉིས་དང་ལྡན་པས་འཇིག་རྟེན་པ་དང་ཉན་རང་གི་དགེ་བ་ཀུན་ལས་འདས་ཤིང་སྲིད་ཞིའི་ཕ་རོལ་ཏུ་ཕྱིན་པའི་ཕྱིར་རོ། །བཅུ་གཉིས་ནི། ཕར་ཕྱིན་དྲུག་པོ་བྱང་ཆུབ་སེམས་ཀྱིས་ཟིན་པས་རྒྱ་ཆེ་བ་དམ་པ། མི་ཚེ་གཅིག་ཙམ་ལྟ་བུ་མ་ཡིན་པར་བསྐལ་པར་གྲངས་མེད་པ་གསུམ་དུ་གོམས་པས་ཡུན་རིང་དམ་པ། སེམས་ཅན་ཐམས་ཅད་ཀྱི་དོན་དུ་སྒྲུབ་པས་ཆེད་དུ་བྱ་བ་དམ་པ། བསྔོ་བས་རྒྱས་གདབ་པས་མི་ཟད་དམ་པ། སྨོན་ལམ་བཏབ་པས་ཚེ་རབས་ཀུན་ཏུ་འབྱུང་བས་རྒྱུན་མི་འཆད་པ་དམ་པ། གཞན་གྱི་སྤྱོད་པ་ལ་ཡི་རང་བྱས་པས་རང་ལའང་དེ་བཞིན་ཐོབ་པས་ཚེགས་མེད་དམ་པ། ནམ་མཁའ་མཛོད་ཀྱི་ཏིང་ངེ་འཛིན་ཐོབ་པས་དབང་འབྱོར་དམ་པ། རྣམ་པར་མི་རྟོག་པའི་ཡེ་ཤེས་ཀྱིས་ཟིན་པས་ཡོངས་བཟུང་དམ་པ། མོས་སྤྱོད་དུ་འཕེལ་བས་རྩོམ་པ་དམ་པ། ས་དང་པོར་ཟག་པ་མེད་པར་རྙེད་པས་འཐོབ་པ་དམ་པ། ས་གཉིས་པ་ནས་དགུ་པའི་བར་རྒྱུ་མཐུན་ལས་ངང་གིས་འབྱུང་བ་རྒྱུ་མཐུན་དམ་པ། བཅུ་པར་མཐར་ཕྱིན་པར་འགྲུབ་པས་འགྲུབ་པ་དམ་པ་སྟེ་གྲངས་དབུས་མཐའ་རྣམ་འབྱེད་ལས་གསུངས་སོ། །སོ་སོའི་ངེས་ཚིག་ནི། དབུལ་བ་འདོར་བར་བྱེད་པས་སྦྱིན། ལས་ཉོན་གྱི་གདུང་བ་ལས་བསིལ་བ་ཐོབ་པས་ཚུལ། ཁོང་ཁྲོ་མི་སྐྱེ་བའི་བཟོད། ལས་ཀྱི་མཆོག་དགེ་བ་ལ་སྦྱོར་བས་བརྩོན། ཡིད་རྣམ་གཡེང་ལས་འཛིན་པས་བསམ། དོན་དམ་པའི་གནས་ལུགས་ཤེས་པས་ཤེས་རབ་སྟེ་མདོ་རྒྱན་ལས་གསུངས་སོ། །མཚན་ཉིད་ནི། སངས་རྒྱས་ཀྱི་སྐུ་གཉིས་སྐྱེ་བའི་རྒྱུ་ཚོགས་ཁྱད་ཆོས་བཞི་ལྡན་གྱི་དགེ་བའོ། །བཞི་ནི་སེར་སྣ་ལ་སོགས་པ་རང་གི་མི་མཐུན་ཕྱོགས་ཉམས་པ། རྣམ་པར་མི་རྟོག་པའི་ཡེ་ཤེས་དང་ལྡན་པ། གནས་སྐབས་ཀྱི་འདོད་དོན་ཀུན་ཡོངས་སུ་རྫོགས་པར་བྱེད་པ། མཐར་ཐུག་གི་ཐེག་པ་གསུམ་དུ་སེམས་ཅན་གྱི་རྒྱུད་སྨིན་པར་བྱེད་པའོ། །དབྱེ་བ་ལ། དངོས་དང་། གྲངས་ངེས་དང་། གོ་རིམ་ངེས་པ་གསུམ་ལས། དང་པོ་ནི། སྦྱིན་སོགས་བཅུ་ལས། སྦྱིན་པའི་ཕར་ཕྱིན་ལ། གཏོང་བ། གཏོང་བ་ཆེན་པོ། ཤིན་ཏུ་གཏོང་བའི་རྣམ་པ་ཅན་ཟང་ཟིང་གི་སྦྱིན་པ་དང་། དེ་ལས་གཞན་ཆོས་ཀྱི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་སྟེ་གསུམ། ཚུལ་ཁྲིམས་ཀྱི་ཕར་ཕྱིན་ལ། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ། བཟོད་པའི་ཕར་ཕྱིན་ལ། སྡུག་བསྔལ་གྱིས་མི་བརྫི་བ། གནོད་བྱེད་ལ་ཇི་མི་སྙམ་པ། ཆོས་ཉིད་ཟབ་མོའི་དོན་ཤེས་པ་ལ་མི་སྐྲག་པ་གསུམ། བརྩོན་འགྲུས་ཀྱི་ཕར་ཕྱིན་ལ། གོ་ཆའི་བརྩོན་འགྲུས། སྦྱོར་བའི་བརྩོན་འགྲུས། མི་འགོང་བའི་བརྩོན་འ གྲུས། མི་ལྡོག་པའི་བརྩོན་འགྲུས། ཆོག་ཤེས་མེད་པའི་བརྩོན་འགྲུས་ལྔ་མངོན་པ་ཀུན་བཏུས་ལས་གསུངས། བསམ་གཏན་གྱི་ཕར་ཕྱིན་ལ། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགེ་གསུམ། ཤེས་རབ་ལ། སྤྱིར་ཐོས་བསམ་བསྒོམ་པའི་ཤེས་རབ་གསུམ། ཁྱད་པར་དུ་འཇིག་རྟེན་པའི་ཤེས་རབ། ཐེག་དམན་གྱི་ཤེས་རབ། ཐེག་ཆེན་གྱི་ཤེས་རབ་གསུམ་མམ། ཀུན་རྫོབ་རྟོགས་པ། དོན་དམ་རྟོགས་པ། གཞན་དོན་སྒྲུབ་པའི་ཤེས་རབ་གསུམ་ཡང་བཤད་དོ། །ཐབས་ཀྱི་ཕར་ཕྱིན་ནི། དགེ་རྩ་བསགས་པ་རྣམས་མི་ཟད་པར་བྱེད་པའི་བསྔོ་བ་ཡིན་ནོ། །སྨོན་ལམ་གྱི་ཕར་ཕྱིན་ནི། དགེ་བའི་ལས་སྣ་ཚོགས་དང་འབྲས་བུ་སྣ་ཚོགས་ལ་ཚེ་རབས་ཐམས་ཅད་དུ་རྒྱུན་ཆད་མེད་པར་འཇུག་བྱེད་ཡུལ་མཆོག་ལ་སེམས་པ་དང་། དེ་དག་དོན་གཉེར་གྱི་འདུན་པས་ཀུན་ནས་བསླང་བའི་ངག་ཚིག་ཕུན་སུམ་ཚོགས་པ་ཡིན་ནོ། །སྟོབས་ཀྱི་ཕར་ཕྱིན་ནི། གཉེན་པོའི་ཆོས་ཀུན་སྒྲུབ་པ་དང་མི་མཐུན་པའི་ཆོས་ཀུན་ངེས་པར་སྤོང་བ་ཡིན་ནོ། །ཡེ་ཤེས་ཀྱི་ཕར་ཕྱིན་ནི། འཁོར་གསུམ་དུ་རྣམ་པར་མི་རྟོག་པའི་ངོ་བོ་ཅན། བྱེད་ལས། ཕར་ཕྱིན་གྱི་ཆོས་རྣམས་ལ་ལོངས་སྤྱོད་ཅིང་། སེམས་ཅན་ཐམས་ཅད་རྣམ་པར་གྲོལ་བའི་ལམ་ལ་སྨིན་པར་བྱེད་པ་ཡིན་ནོ། །བཞི་པོ་འདི་དག་ཕར་ཕྱིན་དྲུག་གི་ནང་དུ་སྡུད་ཚུལ་ལ། དགོངས་པ་ངེས་པར་འགྲེལ་པའི་མདོ་ལས། ཐབས་ནི་སྔ་མ་གསུམ་གྱི་གྲོགས་ཡིན་ལ། སྨོན་ལམ་བརྩོན་འགྲུས་ཀྱི་གྲོགས། སྟོབས་བསམ་གཏན་གྱི་གྲོགས། །ཡེ་ཤེས་ཤེས་རབ་ཀྱི་གྲོགས་སུ་གསུངས་ལ། སློབ་དཔོན་དབྱིག་གཉེན་གྱིས་དབུས་མཐའི་འགྲེལ་པ་ལས། ཐམས་ཅད་ཤེས་རབ་ཀྱི་ཕར་ཕྱིན་གྱི་ཕྱོགས་ཡིན་ཅིང་། དེ་ཡང་ཤེས་རབ་ནི་རྣམ་པར་མི་རྟོག་པའི་ཡེ་ཤེས་མཉམ་བཞག་གི་ངོ་བོ་དང་། ཐབས་སོགས་བཞི་རྗེས་ཐོབ་ཀྱི་ཆ་སེམས་ཅན་སྨིན་བྱེད་དུ་བཤད་དོ། །དབུས་མཐའ་ལྟར་ན་བཞི་པོ་ཕར་ཕྱིན་དྲུག་པོའི་གྲོགས་སུའང་འགྱུར་བ་དམ་པ་བཅུ་གཉིས་ཀྱིས་ཤེས་སོ། །གཉིས་པ་ལ་གསུམ་ལས། མངོན་མཐོ་ངེས་ལེགས་སྒྲུབ་པའི་གྲངས་ངེས་ནི། སྦྱིན་པས་ལོངས་སྤྱོད། ཚུལ་ཁྲིམས་ཀྱིས་མངོན་མཐོའི་ལུས། བཟོད་པས་འཁོར། བརྩོན་འགྲུས་ཀྱིས་རྩོམ་པ་ཕུན་ཚོགས་ཀྱི་མངོན་མཐོ་སྒྲུབ་པ་དང་། བསམ་གཏན་གྱིས་ཉོན་མོངས་པའི་དབང་དུ་མི་འགྲོ་ཞིང་། ཤེས་རབ་ཀྱིས་ཤེས་པར་བྱ་བ་རྣམས་ལ་ཤེས་སྒྲིབ་བྲལ་ནས་ཕྱིན་ཅི་མ་ལོག་པར་འཇུག་པར་བྱེད་པས་ངེས་ལེགས་སྒྲུབ་པའོ། །དོན་གཉིས་སྒྲུབ་པའི་གྲངས་ངེས་ནི། སྦྱིན་པས་སེམས་ཅན་རྣམས་མི་ཕོངས་པར་བྱེད། ཁྲིམས་ཀྱིས་རྣམ་པ་མི་འཚེ། བཟོད་པས་གཞན་གྱིས་རང་ལ་འཚེ་བ་བྱས་པ་བཟོད། བརྩོན་པས་གཞན་དོན་བྱ་བར་མི་སྐྱོ། བསམ་གཏན་གྱིས་རྫུ་འཕྲུལ་བསྟན་ནས་དགའ་བར་བྱེད། ཤེས་རབ་ཀྱིས་ཐེ་ཚོམ་སེལ་ནུས་ཀྱི་ཆོས་ལེགས་པར་བརྗོད་པའི་ཕྱིར་གཞན་དོན་ལེགས་པར་བསྒྲུབ་པ་དེ་ཡིས་རང་དོན་མཆོག་ཏུ་འགྲུབ་པ་ཡིན་ནོ། །བསླབ་གསུམ་སྒྲུབ་པའི་གྲངས་ངེས་ནི། སེམས་ཅན་དང་རྙེད་སོགས་ལ་བདག་འཛིན་སྤང་བའི་སྦྱིན་པ་དེ་ཚུལ་ཁྲིམས་འབྱུང་བའི་རྒྱུ་ཁྲིམས་དེ་རང་གི་ངོ་བོ་ཡིན། གཤེ་ཡང་སླར་མི་གཤེ་བ་སོགས་ཀྱི་རྣམ་པ་ཅན་གྱི་བཟོད་པས་ཚུལ་ཁྲིམས་རྣམ་པར་དག་པར་བྱེད་པས་ན་དེ་ཚུལ་ཁྲིམས་རང་གི་འཁོར་ཡིན། བསམ་གཏན་ཏིང་འཛིན་གྱི་བསླབ་པ་དང་། ཤེས་རབ་ཤེས་རབ་བསླབ་པའི་ངོ་བོ། བརྩོན་འགྲུས་བསླབ་པ་གསུམ་ཀའི་གྲོགས་ཡིན་པས་སོ། །གསུམ་པ་ལའང་གསུམ་ལས། རྒྱུ་འབྲས་གོ་རིམ་ནི། སྔ་མ་སྔ་མར་རྒྱུ་བྱས་ནས་ཕྱི་མ་ཕྱི་མ་འབྱུང་བའོ། །དམན་མཆོག་གི་གོ་རིམ་ནི། སྔ་མ་དམན་ཞིང་ཕྱི་མ་མཆོག་ཡིན་ཏེ། དཔེར་ན་ལོ་བརྒྱར་སྦྱིན་པ་བཏང་བ་བས་ཀྱང་ཉིན་ཞག་གཅིག་ཏུ་ཚུལ་ཁྲིམས་སྲུང་བ་མཆོག་ཡིན་པར་གསུངས་པ་ལྟ་བུའོ། །རགས་ཕྲའི་གོ་རིམ་ནི། དཔེར་ན་སྦྱིན་པ་ཤན་པ་རྣམས་ཀྱང་ཅུང་ཟད་གཏོང་ནུས་མོད། སྡིག་པ་སྤོང་བའི་ཚུལ་ཁྲིམས་མི་ལེན་པ་ལྟ་བུའོ། །སྒྲུབ་ཚུལ་ནི། ལན་ལ་མི་རེ་བའི་སྦྱིན་པ་སྒྲུབ། ཡང་སྲིད་འཁོར་བའི་བདེ་བ་མི་འདོད་པའི་ཚུལ་ཁྲིམས་སྒྲུབ། སྡུག་བསྔལ་དང་གནོད་པ་ཐམས་ཅད་ལ་བཟོད་པའི་བཟོད་པ་སྒྲུབ། དགེ་ཚོགས་ཐམས་ཅད་སྡུད་པའི་བརྩོན་འགྲུས་སྒྲུབ། །གཟུགས་མེད་རྣམས་བསལ་བའི་བསམ་གཏན་སྒྲུབ། ཐབས་སྙིང་རྗེ་ཆེན་པོ་དང་ལྡན་པའི་ཤེས་རབ་སྒྲུབ་པའོ། །གཉིས་པ་བསྟེན་པའི་ཞེས་པས་བསླུ་མེད་དུ་སྒྲུབ་པ་ལ། རང་འབྲས་སྒྲུབ་བྱེད་རྒྱུའི་གནས་སྐབས་ལ་ལྟོས་ན། གཞན་རྒྱུད་ལ་བྱོན་པའི་དཀོན་མཆོག་གསུམ་ཀ་བསྟེན་བྱ་བསླུ་བ་མེད་པའི་སྐྱབས་ཡིན་ཏེ། སངས་རྒྱས་ནི་བརྩེ་བའི་བདག་ཉིད་ཡིན་པས་ལེགས་པར་ཕན་པའི་ཐབས་གསུངས་པ་དང་། མཁྱེན་པའི་བདག་ཉིད་ཡིན་པས་སྒྲོ་སྐུར་མེད་པར་བདེན་པའི་ཐབས་སམ་ལམ་གསུངས་པས་ན་སྟོན་པ་བླ་མེད་ཡིན་ཅིང་། ཆོས་ནི་ཐར་པར་འགྲོ་བའི་ལམ་བླ་ན་མེད་པ་ཡིན་ལ། དགེ་འདུན་ནི་ཐར་པ་དང་མཐུན་པར་སྒྲུབ་པའི་གྲོགས་བླ་མེད་ཡིན་ནོ། །རང་འབྲས་སྒྲུབ་པར་བྱ་བ་མཐར་ཐུག་ལ་ལྟོས་ན། ལུང་གི་ཆོས་རྣམས་བདེན་པ་མཐོང་ནས་ས་བཞི་པའི་ཚེ་སྤང་བའི་ཕྱིར་དང་། རྟོགས་པའི་ཆོས་ལས་ཀྱང་ལམ་བདེན་གོང་མ་ལ་ལྟོས་ན་འོག་མ་དྲི་བཅས་མ་དག་པ་བསླུ་བའི་རང་བཞིན་ཅན་ཡིན་པའི་ཕྱིར་དང་། ཐེག་དམན་གྱི་ལྷག་མེད་མྱང་འདས་འགོག་བདེན་དངོས་མེད་ཡིན་པའི་ཕྱིར་དང་། སློབ་པའི་འཕགས་ཚོགས་ཐམས་ཅད་སྒྲིབ་གཉིས་ཀྱི་འཇིགས་པ་ལས་མ་ཐར་བའི་ཕྱིར་ཆོས་དང་དགེ་འདུན་དེ་དག་གཏན་གྱི་སྐྱབས་མ་ཡིན་པར། དོན་དམ་པའི་སྐྱབས་སངས་རྒྱས་ཉག་གཅིག་གི་ཐུབ་པ་སྤང་བ་ཕུན་ཚོགས་སངས་རྒྱས་དང་། རྟོགས་པ་ཆོས་ཀྱི་སྐུ་ཆོས་དང་། དེ་ཉིད་ཚོགས་ཀྱི་མཆོག་ཡིན་པས་དགེ་འདུན་ཡང་མཐར་ཐུག་པར་མངའ་བའི་རང་བཞིན་ཅན་དེ་ཉིད་བསླུ་བ་མེད་པ་འབྲས་བུའི་སྐྱབས་ཡིན་ཏེ་རྒྱུད་བླ་མ་ལས། དམ་པའི་དོན་དུ་འགྲོ་བ་ཡིན། །སྐྱབས་ནི་སངས་རྒྱས་ཉག་གཅིག་སྟེ། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཡིན། །ཅེས་སོ། །གསུམ་པ་ཡུལ་དེ་ལ་ཞེས་པས་བྱ་བྱེད་འཇུག་པའི་ཡུལ་དམིགས་ཀྱིས་བསལ་བ་ལ་རྒྱུའི་སྐྱབས་འགྲོའི་བྱ་བ་འཇུག་པའི་དམིགས་ཡུལ་གཞན་བྱུང་གི་དཀོན་མཆོག་གསུམ་རྐྱེན་དུ་གནས་པ་དེ་ཉིད་ཡིན་ཅིང་། འབྲས་བུའི་སྐྱབས་འགྲོའི་བྱ་བ་འཇུག་པའི་དམིགས་ཡུལ་རང་ལས་བྱུང་བ་དག་པ་གཉིས་ལྡན་གྱི་སངས་རྒྱས་ཆོས་སྐུ་ཉེར་བླང་དུ་ངེས་པ་ཉིད་ཡིན་ནོ། །ཡན་ལག་གསུམ་པ་ཅི་ཙམ་དུ་སྐྱབས་སུ་འགྲོ་བའི་དུས་བསྟན་པ་ལ། སྤྱིར་བྱ་བ་བྱས་ཟིན་འདས་པ་དང་། བྱ་བ་བྱེད་བཞིན་པ་ད་ལྟ། །བྱ་བ་བྱེད་པར་འགྱུར་བ་མ་འོངས་པའི་དུས་གསུམ་དུ་ཡོད་པ་ལས། འདིར་ནི་སྐྱབས་སུ་འགྲོ་བའི་བྱ་བ་བྱེད་བཞིན་པ་ད་ལྟ་བ་ནས་བཟུང་། འབྲས་བུ་མཐར་ཐུག་པ་ཐོབ་པ་ཚུན་ཆད་ཀྱི་སྐྱབས་འགྲོ་བྱེད་པར་འགྱུར་བ་ཐམས་ཅད་སྐྱབས་འགྲོའི་དུས་ཡིན་པར་བསྟན་པ་ཡིན་ཅིང་། དེ་ཡང་སྐྱེས་བུ་གསུམ་གྱི་དབང་གིས་སྐྱབས་འགྲོའི་དུས་ཀྱང་གསུམ་དུ་འགྱུར་ལ། སྐྱེས་བུ་གསུམ་གྱི་སྐྱབས་འགྲོ་ལ་ཐུན་མོང་དུ་འཇུག་པའི་དུས་ཞིག་དང་། ཐུན་མོང་མ་ཡིན་པར་འཇུག་པའི་དུས་ཞིག་སྟེ་གཉིས་སུ་ཡོད་པ་ལས། དང་པོ་ནི། འདི་ནས་ཞེས་པས་བསྟན་ཏེ། སྐྱབས་སུ་འགྲོ་བཞིན་པ་ད་ལྟའི་དུས་འདི་ཉིད་ནས་བརྩམས་ཏེ་ཞེས་པར་འགྱུར་བས་སོ། །འདི་ནི་གསུམ་ཀར་སོ་སོར་གྱུར་བའི་ཁྱད་པར་མེད་པས་ཐུན་མོང་བ་ཡིན་ནོ། །གཉིས་པ་ནི། བྱང་ཆུབ་ཐོབ་བར་རོ། །ཞེས་པས་བསྟན་ཅིང་། འདི་ནི་ཐུན་མོང་མ་ཡིན་པ་མ་འོངས་པའི་དུས་མཚམས་བཟུང་བ་ཡིན་ལ། དེ་ཡང་སྐྱེས་བུ་ཆུང་ངུའི་དུས་ཕྱི་མར་ལྷ་མིའི་བདེ་འབྲས་མ་ཐོབ་ཀྱི་བར་དུ་འགྲོ་བ་ཡིན་ཅིང་དེ་ནི་ཞར་ལས་བསྟན་པར་བྱས་ལ། དངོས་སུ་ནི་འབྲིང་ཉན་རང་དང་། ཆེན་པོ་བྱང་ཆུབ་སེམས་དཔའི་དུས་མཚམས་བསྟན་ཏེ། བྱང་ཆུབ་ཅེས་པ་ལ་ཐེག་དམན་སྐྱེས་བུ་འབྲིང་པོ་གཉིས་ཀྱི་བྱང་ཆུབ་དང་། ཐེག་པ་ཆེན་པོ་སྐྱེས་བུ་ཆེན་པོའི་བྱང་ཆུབ་སྟེ་གཉིས་སུ་ཡོད་པ་ལས། ཐེག་དམན་གྱི་གནས་སྐབས་སུ་ཇི་སྲིད་འཚོའི་བར་དང་། མཐར་ཐུག་ཉན་རང་གི་བྱང་ཆུབ་མ་ཐོབ་ཀྱི་བར་དུ་འགྲོ་ལ། ཐེག་ཆེན་གྱིས་མཐར་ཐུག་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ་འགྲོ་བ་ནི་ཐེག་ཆེན་གྱི་སྐྱབས་འགྲོའི་དུས་ཀྱི་ཁྱད་པར་དུ་འགྱུར་རོ། །དེ་ཡང་སྤང་བྱ་ལས་གྲོལ་བས་བྱང་བ་དང་། རྟོགས་པའི་ཡོན་ཏན་ཕུན་སུམ་ཚོགས་པས་ཆུབ་པ་ནི་བྱང་ཆུབ་ཀྱི་དོན་དུ་ཤེས་པར་བྱའོ། །ཡན་ལག་བཞི་པ་སྐྱབས་སུ་སོང་བ་ལས་བྱུང་བའི་འབྲས་བུ་ཕན་ཡོན་བསྟན་པ་ལ། སྤྱིར་འབྲས་བུ་ལྔ་ནི། རྒྱུའི་རྫས་སམ་ངོ་བོ་དང་འདྲ་བར་སྐྱེ་བའི་ཆ་ནི་རྒྱུ་མཐུན་གྱི་འབྲས་བུ། རང་གི་ངོ་བོ་ལུང་མ་བསྟན་ཡིན་པ་ལུང་དུ་བསྟན་པའི་ཟག་བཅས་དགེ་བའམ་མི་དགེ་གང་རུང་གི་རྒྱུ་ལས་ལྷན་ཅིག་དང་དེ་མ་ཐག་ཏུ་མ་ཡིན་པར་ཕྱིས་སུ་བྱུང་བ་རྒྱུའི་ངོ་བོ་དང་མི་འདྲ་བར་སྨིན་པ་སེམས་ཅན་ཁོ་ནའི་རྒྱུད་ལ་ཐུན་མོང་མ་ཡིན་པར་སྨིན་པ་དེ་རྣམ་སྨིན་གྱི་འབྲས་བུ། རྒྱུ་གང་གི་བྱེད་པ་པོ་བྱས་པའི་སྟོབས་ཀྱིས་རྒྱུ་དང་ལྷན་ཅིག་གམ་དེ་མ་ཐག་ཏུ་བྱུང་བའི་ཆོས་སྐྱེས་བུ་བྱེད་པའི་འབྲས་བུ་སྟེ། འདི་ནི་རྣམ་སྨིན་གྱི་རྒྱུ་མ་གཏོགས་པ་རྒྱུ་གཞན་ཐམས་ཅད་ལ་ཡོད་པར་མཛོད་ལས་གསུངས་སོ། །རྒྱུའི་སྔོན་དུ་བྱུང་བ་མ་ཡིན་པ་ཡི་འདུས་བྱས་རྒྱུ་དུ་མས་ཐུན་མོང་དུ་འཕང་བའི་དངོས་པོ་དེ་བདག་པོའི་འབྲས་བུ། ཤེས་རབ་ཀྱི་སྟོབས་ཀྱིས་སྤང་བྱ་སྤང་བ་བྲལ་འབྲས་ཡིན་ཅིང་། འདི་མ་གཏོགས་གཞན་རྣམས་སྔར་གྱི་རྒྱུ་དྲུག་གི་འབྲས་བུ་ཡིན་ཏེ་བདག་འབྲས་བྱེད་རྒྱུ་ལས་སྐྱེ། སྐྱེས་བུ་བྱེད་པ་ལྷན་མཚུངས་ཀྱི་ཡིན། རྒྱུ་མཐུན་སྐལ་མཉམ་ཀུན་འགྲོའི་འབྲས་བུ། རྣམ་སྨིན་རྣམ་སྨིན་ལས་བྱུང་བའོ། །གཞུང་དོན་ལ། སྐྱབས་སུ་སོང་བའི་ཕན་ཡོན་ནམ་འབྲས་བུ་ལྔ་ལས། རྒྱུ་མཐུན་གྱི་འབྲས་བུར་གྱུར་པའི་ཕན་ཡོན་ལ། ལྡོག་ཕྱོགས་ངོས་བཟུང་བ་དང་། དེ་ལས་ལོག་ནས་སངས་རྒྱས་པར་ཚེ་རབས་ཀུན་ཏུ་སྐྱེ་ཚུལ་གཉིས་ལས། དང་པོ་ནི། མུ་སྟེགས་ཞེས་པའི་ཕྱིན་ཅི་ལོག་གི་སྒོ་ནས་ཐར་པ་འཚོལ་ཀྱང་འཁོར་བའི་མཐའ་རུ་ལྷུང་བས་མུ། དགེ་བཅུ་དང་བསམ་གཏན་དང་རིགས་པ་སྣ་ཚོགས་ཁས་ལེན་པས་མྱང་འདས་རྟེན་བཅའ་བས་སྟེགས་ཡིན་ལ། དེའི་མཚན་གཞི་ནི་རྟོག་གེ་སྡེ་ལྔ་སྟེ། རྟག་ལྟ་སྡེ་བཞི་གྲངས་བྱེ་སྤྱོད་གཅེར་དང་། ཆད་ལྟ་སྡེ་གཅིག་རྒྱང་འཕེན་པ་ཡིན་ཅིང་དེ་ལྔ་པོ་རེ་རེ་ལའང་། སྟོན་པ་དང་། ལམ་དང་། གྲོགས་ཕྱིན་ཅི་ལོག་གསུམ་རེ་ཡོད་དོ། །དེ་ལ་མུ་སྟེགས་གྲངས་ཅན་པའི་སྟོན་པ་དྲང་སྲོང་སེར་སྐྱ། ལམ་གཙོ་བོ་དང་བདག་ཤེས་རིག་གི་སྐྱེས་བུ་རྟག་པར་སྒྲུབ་ཅིང་། བསྟེན་བྱའི་ལྷ་དབང་ཕྱུག་རྟག་པར་བཤད་ནས་དེ་ལ་གསོད་པ་སེམས་ཀྱི་མཆོད་སྦྱིན་བྱེད་ཚུལ་སྟོན། གྲོགས་ལམ་ངན་དེ་ལ་ཞུགས་པ་རྣམས་ཡིན་ནོ། །མུ་སྟེགས་བྱེ་བྲག་པའི་སྟོན་པ་གཟེག་ཟན་པ། ལམ་ཤེས་མེད་བེམ་པོའི་བདག་རྟག་པ་ཞིག་ཀུན་ཏུ་བཏགས་ནས་ལྷ་དབང་ཕྱུག་བསྟེན་པ་ཡང་སྟོན། གྲོགས་དེར་ཞུགས་པའོ། །མུ་སྟེགས་སྤྱོད་པ་བའི་སྟོན་པ་བྲམ་ཟེ་རྒྱལ་དཔོག །ལམ་བདག་ཤེས་རིག་གི་རང་བཞིན་ཅན་གྱི་སྐྱེས་བུ་རྟག་པ་སྣོད་བཅུད་རྣམས་ཀྱི་རྒྱུ་ཡིན་ཅིང་ཐམས་ཅད་ལ་ཁྱབ་པ་ཞིག་གཏན་ལ་ཕབ་ནས་ལྷ་ཁྱབ་འཇུག་སྒྲུབ་པར་བཤད། གྲོགས་དེར་ཞུགས་པའོ། །མུ་སྟེགས་གཅེར་བུ་པའི་སྟོན་པ་རྒྱལ་བ་དམ་པ། ལམ་འབྱུང་བཞི་དང་ཤིང་ལ་སེམས་ཡོད་པ་དང་བདག་རྟག་པ་ལུས་ཆེ་ཆུང་ལ་སྲོག་དེ་ཆེ་ཆུང་དུ་ཡོད་པར་སྨྲ་ཞིང་ལྷ་ཚངས་པ་མཆོད་བྱར་སྟོན། གྲོགས་དེར་ཞུགས་པའོ། །མུ་སྟེགས་རྒྱང་འཕེན་པའི་སྟོན་པ་ལྷས་ལྷ་མིན་ལ་འཐབ་པའི་ཆེད་དུ་ཆད་ལྟ་སྟོན་པ་པོ་ཕུར་བུ། ལམ་ཚེ་སྔ་ཕྱི་ལས་རྒྱུ་འབྲས་མེད་པར་བཤད་པ། འབྱུང་བཞི་དང་རྫས་གཅིག་པའི་བདག་ཞིག་སྒྲུབ་ཅིང་ལྷ་བརྒྱ་བྱིན་དང་ཉི་ཟླ་རྣམས་བསྟེན་བྱར་འཆད། གྲོགས་ལམ་ངན་དེ་ཚུལ་བཞིན་ཉམས་སུ་ལེན་མཁན་རྣམས་ཡིན་ནོ། །དེ་དག་ནི་སྐྱོན་ལ་སྤྱོད་པའི་བདག་ཉིད་ཅན་ཡིན་ཏེ། དེ་ཡང་སྟོན་པ་རྣམས་ནི་རྣམ་མཁྱེན་དང་བྲལ་ཞིང་མ་རིག་ལས་ཉོན་ལ་སྤྱོད་པས་ན་གང་སྨྲས་པ་ལ་ཆེར་སྒྲོ་སྐུར་གྱི་རྫུན་ཡིན་ཕྱིར་བདེན་པར་གསུངས་པ་མ་ཡིན། སྙིང་རྗེ་དང་བྲལ་ཅིང་རང་འདོད་ལ་སྤྱོད་པས་གཞན་ལས་ཉོན་སྡུག་བསྔལ་འབྱུང་བའི་ཐབས་སྟོན་པའི་ཕྱིར་ན་ཕན་པར་གསུངས་པ་མ་ཡིན་པས་སོ། །ལམ་རྣམས་ནི་བདག་མེད་གཉིས་ཀྱི་འགལ་ཟླ་དང་སྡུག་བསྔལ་ལ་སྤྱོད་པའི་ཐབས་ཡིན་པས་སོ། །གྲོགས་རྣམས་ནི་སྟོན་ངན་གྱི་འཁོར་ལམ་ངན་ལ་ཕྱོགས་སུ་ཞེན་པ་ཡིན་པས་སོ། །དེས་ན་དེ་རྣམས་ལས་ལོག་དགོས་སོ། །གཉིས་པ་སངས་རྒྱས་པར་ཚེ་རབས་ཀུན་ཏུ་སྐྱེ་ཚུལ་ནི། སྐྱོན་ཐམས་ཅད་ཟད་ཅིང་ཡོན་ཏན་དཔག་མེད་ལྡན་པ་ཐམས་ཅད་མཁྱེན་ཅིང་ཐུགས་རྗེ་དང་ལྡན་པའི་སྟོན་པ་ཤཱཀྱ་ཐུབ་པ་ལྟ་བུ་དང་། དེའི་བསྟན་པ་དང་། དེ་འཛིན་པའི་གྲོགས་རྣམས་ཁོ་ན་ལ་སྐྱབས་འགྲོ་བྱེད་པའི་གང་ཟག་ཏུ་ཚེ་རབས་ཕྱི་མ་ཀུན་ལ་སྐྱེ་བར་འགྱུར་བས་ཕྱི་རོལ་པ་ལས་ལོག་ཅིང་ནང་པ་སངས་རྒྱས་པའི་ཁོངས་སུ་ཆུད་པ་ནི་ད་ལྟར་སྐྱབས་འགྲོ་བྱས་པའི་རྒྱུ་མཐུན་ཡིན་ནོ། །རྣམ་སྨིན་གྱི་འབྲས་བུར་གྱུར་པའི་སྐྱབས་འགྲོའི་ཕན་ཡོན་ནི། སྐྱབས་སུ་སོང་ནས་བཟུང་གང་ཟག་དེ་རྣམ་སྨིན་ངན་པའི་སྒྲིབ་པ་ཅན་ངན་སོང་གསུམ་དུ་མི་སྐྱེ་ཞིང་མཐོ་རིས་ལྷ་མིའི་ལུས་སུ་སྐྱེ་བར་འགྱུར་ཏེ། ཕག་གི་རྟོགས་པ་བརྗོད་པའི་མདོ་ལས། གང་ཞིག་སངས་རྒྱས་སྐྱབས་འགྲོ་བ། །དེ་དག་ངན་འགྲོར་མི་འགྲོ་སྟེ། །མི་ཡི་ལུས་ཀྱང་སྤངས་ནས་ནི། །ལྷ་ཡི་ལུས་སུ་སྐྱེ་བར་འགྱུར། །ཞེས་སོ། །བྱེད་པའི་འབྲས་བུར་གྱུར་པ་སྐྱབས་འགྲོའི་ཕན་ཡོན་ལ་བཞི་ལས། སྡོམ་པ་ཐམས་ཅད་ཀྱི་རྟེན་བྱེད་པ་ནི། དཀོན་མཆོག་གསུམ་ལ་སྐྱབས་སུ་སོང་བ་ན་ཡང་དག་གི་དགེ་བསྙེན་ཡིན་པར་གསུངས་པས། སྤྱིར་དགེ་བསྙེན་དུ་འགྱུར་ལ། སྐྱབས་སུ་འགྲོ་བ་དེ་ནི་སྡོམ་པ་ཐམས་ཅད་ཀྱི་རྩ་བ་ཡིན་ཅིང་། སྡོམ་པ་ཞེས་པ་ནི་སྤྱིར་དགེ་བ་སྤྱད་པར་ཁས་བླངས་པ་ནི་སྡོམ་པ་དང་། མི་དགེ་ལ་མཐའ་གཅིག་ཏུ་སྤྱོད་པར་ཁས་བླངས་པ་ནི་སྡོམ་མིན་དང་། ཁས་བླངས་པ་མེད་ཀྱང་དགེ་མི་དགེ་གཉིས་གང་རུང་ལ་བར་སྐབས་སུ་འཇུག་པ་ནི་བར་མའི་དགེ་བའམ་མི་དགེ་ཞེས་པར་འགྱུར་བ་ལས་འདི་ནི་གསུམ་པ་དེའི་ནང་ཚན་སྡོམ་པ་ཡིན་ཅིང་། དེ་ལའང་གསུམ་ཡོད་དེ། སོ་ཐར་གྱི་སྡོམ་པ་དང་། བསམ་གཏན་གྱི་སྡོམ་པ་དང་། ཟག་མེད་ཀྱི་སྡོམ་པའོ། །སོ་ཐར་གྱི་སྡོམ་པའི་བསམ་བའི་རྟེན་ནི་སྐྱབས་འགྲོ་ཡིན་ལ། ལུས་རྟེན་ནི། ཟ་མ་མ་ནིང་སྒྲ་མི་སྙན་མཚན་གཉིས་ཅིག་ཆར་བྱུང་བ་མ་གཏོགས་པའི་མི་ཡིན་ནོ། །ངོ་བོ་ནི། བྱེ་བྲག་སྨྲ་བས་གཟུགས་སུ་འདོད་ཅིང་། མདོ་སྡེ་པ་ཡན་ཆད་ཀྱིས་སྤོང་སེམས་མངོན་དུ་གྱུར་པ་དང་ས་བོན་དུ་གནས་པ་ལ་འདོད་དོ། །ངེས་ཚིག་ནི། རྒྱུད་སྡིག་ཏོ་མི་དགེ་བའི་ཆོས་ལ་སོ་སོར་ཐར་པས་ན་སོ་ཐར། དབྱེ་བ་ལ་གཉིས་ལས། མིང་གི་སྒོ་ནས་དབྱེ་ན་བརྒྱད་ཡིན་ཏེ། བསྙེན་གནས་དང་། དགེ་བསྙེན་ཕ་མ་གཉིས། དགེ་ཚུལ་ཕ་མ་གཉིས། དགེ་སློབ་མ། དགེ་སློང་ཕ་མ་གཉིས་སོ། །རྫས་སམ་ངོ་བོས་དབྱེ་ན་བཞི་ཡིན་ཏེ། མཚན་གྱུར་ན་དགེ་བསྙེན་གཉིས་ཕན་ཚུན་ངོ་བོ་གཅིག་པས། དཔེར་ན་ཕ་འགྱུར་ན་མ་ཞེས་མིང་བཏགས་ཆོག་སྟེ་སྡོམ་པ་གཏོང་རྒྱུ་མ་ཡིན་ཅིང་སྡོམ་པ་གཞན་ཐོབ་པའི་རྒྱུ་ཡང་མིན་པས་སོ། །དེ་བཞིན་དུ་དགེ་སློང་གཉིས་ལའང་འདྲ་ལ། དགེ་སློབ་མ་ནི་མཚན་གྱུར་ན་དགེ་ཚུལ་བར་འགྱུར་ཞིང་དགེ་ཚུལ་གཉིས་ཀྱང་ནང་ཕན་ཚུན་འདྲ་བའོ། །གྲངས་ངེས་ནི། མངོན་པ་ཀུན་བཏུས་སུ་གསུངས་པ་ལྟར་འདོད་པ་དང་ཉེས་པ་གཉིས་ཀ་ལས་དབེན་པར་སྤྱོད་མི་ནུས་པའི་དེར་བསྙེན་གནས་བཞག །འདོད་པ་ལས་དབེན་པར་སྤྱོད་མི་ནུས་ལ་ཉེས་པ་ལས་དབེན་པ་སྤྱོད་པའི་ངོར་དགེ་བསྙེན་བཞག །གཉིས་ཀ་ལས་དབེན་པར་སྤྱོད་ནུས་པའི་ངོར་ལྷག་མ་གསུམ་བཞག་པ་ཡིན་ཅིང་། དེའང་ལུས་ངག་གི་ཉེས་པ་ཕལ་ཆེར་ལས་དབེན་པར་སྤྱོད་པ་དགེ་ཚུལ་དང་དགེ་སློབ་མ་ཐམས་ཅད་ལས་དབེན་པར་སྤྱོད་པས་དགེ་སློང་བཞག་པའོ། །ཡུལ་གང་ལས་འཐོབ་པ་ནི། དགེ་སློང་ཕ་མ། དགེ་སློབ་མ་གསུམ་དགེ་འདུན་ལས་ཐོབ་ལ། གཞན་ཐམས་ཅད་གང་ཟག་ལས་ཐོབ། སྤང་བྱ་ཅི་ཙམ་སྤང་བ་ནི། སྲོག་གཅོད། མ་བྱིན་ལེན། ལོག་གཡེམ། རྫུན། ཆང་ལ་བཟའ་བའི་རིགས་ཕབ་དང་སྦྱར་བའི་མྱོས་བྱེད་འབྲུའི་ཆང་། བཅའ་བ་ལྔ་མྱོས་བྱེད་དུ་གྱུར་པ་བཅོས་པའི་ཆང་སྟེ། འབྲུའི་ཆང་དང་། བཅོས་པའི་ཆང་སྦྱར་བའི་ཆང་ཞེས་པ་ནི་གཉིས་ཀའི་ཐུན་མོང་གི་མིང་ཡིན་ཏེ་མངོན་པ་ལས་བཅོས་པའི་ཆང་ལ་སྦྱར་བའི་ཆང་དུ་གསུངས། འདུལ་གཞུང་ཁ་ཅིག་ལས་འབྲུའི་ཆང་ལ་སྦྱར་བའི་ཆང་དུ་གསུངས་འདུག་གོ། །དེ་རྣམས་བསྡོམས་པ་ལྔ་སྤང་བ་དགེ་བསྙེན། ཡང་ཚུལ་ཁྲིམས་ཀྱི་ཡན་ལག་སྔ་མ་བཞི་སྤང་བ། བག་ཡོད་ཀྱི་ཡན་ལག་ཆང་སྤང་བ། བརྟུལ་ཞུགས་ཀྱི་ཡན་ལག་གླུ་གར་རོལ་མོ། སྤོས། ཕྲེང་བ་ཁ་དོག་སྣ་ཚོགས་པའི་ཚོན་གྱིས་བྱུགས་པའི་གོས་སོགས་བྱུགས་པ་སྟེ་དྲུག་གཅིག་ཏུ་བྱས་པ་དང་། ཁྲི་སྟན་ཆེ་མཐོ་དང་། བསྙེན་གནས་ཀྱི་དྲན་པ་ལ་གནས་ཤིང་སྐྱོ་བའི་ཡིད་གནས་བྱེད་དུས་མ་ཡིན་པའི་ཟས་ཏེ་གསུམ། དེ་རྣམས་བསྡོམས་པ་བརྒྱད་སྤང་བ་བསྙེན་གནས། །སྔ་མའི་གར་ཕྲེང་གཉིས་གཉིས་སུ་ཕྱེ་བའི་ཁར་གསེར་དངུལ་ལེན་པ་སྤང་བ་བསྣན་པས་བཅུ་དགེ་ཚུལ། ལུས་ངག་གི་མི་དགེ་ཐམས་ཅད་སྤོང་བ་དགེ་སློང་ངོ་། །དེ་དག་གི་སྡོམ་པ་གཏོང་བའི་རྒྱུན་བསླབ་པ་ཕུལ་བ། ཤི་བ། མཚན་གཉིས་ཅིག་ཆར་བྱུང་བ། དགེ་རྩ་ཆད་པ་བཞི་པོ་སོ་ཐར་བརྒྱད་པོ་ཐམས་ཅད་ཀྱི་ཐུན་མོང་གི་ཡིན། མཚན་མོ་འདས་པ་བསྙེན་གནས་གཏོང་རྒྱུ་ལྷག་པ་ཡིན་ནོ། །དེ་ལ་བསྙེན་གནས་ཀྱི་རྟེན་དུ་སྐྱབས་འགྲོ་དེ་ཇི་སྲིད་འཚོ་དང་བྱང་ཆུབ་ཀྱི་རྟེན་ཅན་དུ་དགེ་བསྙེན་མ་ཡིན་པས་ནི་ལེན་མི་རུང་སྟེ། སྐྱབས་སྡོམ་མ་བསྲུང་ན་ཉེས་པ་དཔག་མེད་ཡོད་པའི་ཕྱིར། མཛོད་འགྲེལ་ལས། དགེ་བསྙེན་མ་ཡིན་པ་ལའང་ཉིན་ཞག་དེ་ལ་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་སོང་ནས་སྡོམ་པ་ནོད་པ་དེ་ལ་བསྙེན་གནས་ཀྱི་སྡོམ་པ་སྐྱེ་བར་འགྱུར་ཏེ་གཞན་དུ་ནི་མ་ཡིན་ནོ། །ཞེས་གསུངས་པས་ན། སྐྱབས་འགྲོ་དེ་ཡང་ཉིན་ཞག་གི་མཐའ་ཅན་ཡིན་པར་བསྟན་པ་ཤེས་དགོས་སོ། །དེས་ན་སྐྱབས་འགྲོ་ལའང་ཉིན་ཞག་གི་མཐའ་ཅན་དང་། ཇི་སྲིད་འཚོ་དང་། བྱང་ཆུབ་ཀྱི་མཐའ་ཅན་ཡོད་པ་ཡིན་ཅིང་། སོ་ཐར་གྱི་སྡོམ་པ་ཉིན་ཞག་གི་མཐའ་ཅན་བསྙེན་གནས་དང་། སྲོག་གི་མཐའ་ཅན་དགེ་བསྙེན་སོགས་བདུན་པོ་དེ་ཐམས་ཅད་སྐྱབས་འགྲོ་མེད་ན་མི་སྐྱེ་ཞིང་སྐྱབས་འགྲོ་དེ་ཐོག་མར་སྐྱེ་བ་དང་བར་དུ་གནས་པའི་རྟེན་མཆོག་ཉིད་དུ་འགྱུར་བ་ཡིན་ནོ། །བར་ཆད་ཐམས་ཅད་མེད་པར་བྱེད་པ་ནི། སྐྱབས་སུ་སོང་བ་ཙམ་གྱིས་ཕུང་པོ་ལ་མངོན་པར་ཞེན་པ་དང་། ཉོན་མོངས་སྐྱེ་བ་དང་། འཆི་བ་དངོས་པོར་མཐོང་བའི་སྐྲག་པ་རིམ་བཞིན་མེད་པར་གྱུར་པས་རང་རྒྱུད་ཕུང་པོའི་བདུད་སོགས་གསུམ་དང་བྲལ་བས་དེ་དག་གིས་བར་ཆད་བྱེད་པ་མེད། བར་ཆད་ཀྱི་རྒྱུ་ནང་ན་ཡོད་པའི་བདུད་དེ་རྣམས་མེད་པས། ཕྱི་རོལ་ན་རྐྱེན་དུ་གནས་པའི་ལྷའི་བུ་དགའ་རབ་དབང་ཕྱུང་འཁོར་བཅས་དང་བགེགས་རིགས་འབྱུང་པོ་སུས་ཀྱང་བདེ་དགེ་ལ་གནོད་པའི་བར་ཆད་བྱེད་མི་ནུས་པས་ལྷའི་བུའི་བདུད་དང་བྲལ་བ་ཡིན་ཏེ། ཉི་མའི་སྙིང་པོའི་མདོ་ལས། སངས་རྒྱས་སྐྱབས་སུ་སེམས་ཅན་སུ་སོང་བ། །བདུད་རྣམས་བྱེ་བས་གསད་པར་མི་ནུས་ཏེ། །ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་གསུངས་པ་བཞིན། བདུད་བཞིས་བར་དུ་གཅོད་པའི་ཉེས་པའི་ཆད་པ་ཀུན་མེད་པར་བྱེད་པས་སོ། །ནད་ཉུང་བར་བྱེད་པ་ནི། སྐྱབས་སུ་སོང་ནས་སྐད་ཅིག་རེ་རེ་ལ་ཡང་བསོད་ནམས་ཀྱི་ཕུང་པོ་ཚད་མེད་པ་འཕེལ་བ་ཡིན་ཏེ། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཅེས་གསུངས་པ་ལྟར་བསོད་ནམས་ཚད་མེད་པ་རང་རྒྱུད་ལ་སྐྱེ་བ་དེ་ཡི་རྐྱེན་གྱིས་སྔོན་གྱི་ཚེ་ན་སེམས་ཅན་གཞན་ལ་བརྡུང་བརྡེགས་བྱས་པའམ། དུག་དང་མི་འཕྲོད་པའི་ཟས་སྟེར་བ་སོགས་ཀྱིས་ནད་བསྐྱེད་པར་བྱས་པའི་ལས་ངན་བསགས་པ་སོགས་རང་ལ་ནད་འབྱུང་རུང་གི་ལས་ངན་ཡོད་པ་ཐམས་ཅད་ཟིལ་གྱིས་གནོན་པ་དང་ཟད་པར་བྱེད་པས་ན། ལུས་ཀྱི་འབྱུང་བ་བཞི་འཁྲུགས་པའི་རླུང་མཁྲིས་བད་ཀན་ལྡན་པའི་ནད་སྣ་ཚོགས་དང་། འགོ་ནད་སྣ་ཚོགས་བྱུང་བ་སོས་ཤིང་། མ་བྱུང་བ་མི་འབྱུང་བར་ལུས་ལ་ནད་ཉུང་བས་བདེ་བར་འགྱུར་བ་ཡིན་ཏེ། སྤྱོད་འཇུག་ལས། བསོད་ནམས་ཀྱིས་ནི་ལུས་བདེ་ན། །ཞེས་གསུངས་པ་བཞིན་ནོ། །ཚེ་རིང་བར་བྱེད་པ་ནི། ཚེ་ཞེས་པ་འབྱུང་བཞིས་ནང་ནས་ཀྱང་གཙོ་བོ་མེ་ཁམས་དྲོད་དང་། དབུགས་དག་དང་། རྣམ་ཤེས་རྣམས་མི་ལ་སོགས་པའི་སེམས་ཅན་གྱི་རིས་དང་ཅི་ཙམ་ཞིག་ཏུ་གནས་པར་བྱེད་པ་གཟུགས་ཅན་རྣམས་ལ་འབྱུང་བ་དང་། རྣམ་ཤེས་གཉིས་ཀའི་སྟོབས་དང་གཟུགས་མེད་ལ། རྣམ་ཤེས་ཀྱི་སྟོབས་སྔོན་ལས་ཀྱིས་འཕངས་པའི་ཆ་ཡིན། སྔོན་ལས་ཀྱི་འཕེན་པ་ཟད་ཀྱང་མཐོང་ཆོས་མྱོང་འགྱུར་གྱི་བསོད་ནམས་གསར་དུ་བསགས་པའམ་ད་ལྟ་བསོད་ནམས་བསགས་པའི་རྐྱེན་གྱིས་ཚེ་གནས་པའི་ལས་སྔོན་ཡོད་པ་བསླང་ནས་སླར་ཡུན་རིང་དུ་གནས་པར་རུང་བས། སྐྱབས་འགྲོའི་བསོད་ནམས་ནི་དཔག་ཏུ་མེད་པ་ཕལ་ཆེར་མཐོང་ཆོས་ལ་སྨིན་པས་ན། སྐྱབས་སུ་སོང་བའི་བསོད་ནམས་རླབས་ཆེན་དེས་རྐྱེན་བྱས་ནས། སྔོན་ལས་ཀྱི་འཕེན་པ་དང་འབྱུང་བ་རྣམ་ཤེས་ཀྱི་ཚེ་སྟོབས་ཟད་པ་ཡིན་ཀྱང་། ཚེའི་ལས་གཞན་བསླང་བའམ་རང་གི་རྩལ་གྱིས་འབྱུང་བ་དང་། རྣམ་ཤེས་ལ་ནུས་སྟོབས་གསར་དུ་བསྐྱེད་ནས་ཚེ་ཡུན་རིང་བར་གནས་པར་བྱེད་པ་ཡིན་ནོ། །བྲལ་བའི་འབྲས་བུར་གྱུར་པའི་སྐྱབས་འགྲོའི་ཕན་ཡོན་ནི། འདོད་ཆགས་ལ་སོགས་པ་ཉོན་མོངས་པའི་ཀུན་ནས་ཉོན་མོངས་པ་དང་། སྲོག་གཅོད་སོགས་ལས་ཀྱི་ཀུན་ནས་ཉོན་མོངས་པ་དང་། སྐྱེ་བ་དང་རྒ་ཤི་སོགས་རྣམ་སྨིན་གྱི་ཀུན་ནས་ཉོན་མོངས་པ་དང་། གནས་ཀྱིས་བསྐལ་དོན་སོགས་མ་ཤེས་པ་འཁོར་གསུམ་གྱི་རྣམ་པར་རྟོག་པ་ཤེས་བྱའི་སྒྲིབ་པ་སྟེ། སྒྲིབ་གཉིས་རྣམས་སྐྱབས་སུ་སོང་མ་ཐག་ནས་རིམ་པར་འབྱང་བར་འགྱུར་ཏེ། མདོ་རྒྱན་ལས། རྟག་ཏུ་ཉོན་མོངས་ཚོགས་ཀུན་དང་། །ཉེས་པར་སྤྱད་པ་ཐམས་ཅད་དང་། །རྒ་དང་འཆི་བ་དག་ལས་ཀྱང་། །སངས་རྒྱས་ཉིད་ནི་ཡོངས་སུ་སྐྱོབས། །ཞེས་གསུངས་པ་ལྟར། སྐྱོན་ཐམས་ཅད་བྲལ་ཞིང་སྤང་བར་བྱེད་པས་སོ། །བདག་པོའི་འབྲས་བུར་གྱུར་པའི་སྐྱབས་འགྲོའི་ཕན་ཡོན་ནི། སྐྱབས་སུ་སོང་བ་ན་བསོད་ནམས་དང་ཡེ་ཤེས་ཀྱི་ཚོགས་མཐའ་ཡས་པ་རྫོགས་ཤིང་སོག་པར་བྱེད་དོ། མྱ་ངན་ལས་འདས་པའི་མདོ་ལས། གསུམ་ལ་སྐྱབས་སུ་འགྲོ་བ་གང་། །བསོད་ནམས་ཡེ་ཤེས་དམ་པའི་ཚོགས། །འཇིག་རྟེན་རྒྱལ་བའི་ཆོས་འགྲུབ་ནས། །སངས་རྒྱས་ཉིད་ནི་ཐོབ་པར་འགྱུར། །ཞེས་གསུངས་པ་བཞིན་གཞུང་གི་སྐབས་འདིར་རྒྱུ་དངོས་སུ་བསྟན་པས་འབྲས་བུ་སངས་རྒྱས་ཀྱི་སྐུ་གཉིས་གེགས་མེད་དུ་འགྲུབ་པར་འགྱུར་བ་ཞར་ལས་བསྟན་པར་འགྱུར་ཏེ། རིག་པའི་དབང་ཕྱུག་ཆོས་ཀྱི་གྲགས་པས། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་བྱེད། །ཅེས་གསུངས་པའི་ཚུལ་གྱིས་སོ། །དེ་རྣམས་ནི་རྒྱུ་སྐྱབས་འགྲོ་བྱས་པ་ལས་བྱུང་བ་འབྲས་བུ་ཕན་ཡོན་ལེགས་པར་བསྟན་པ་ཡིན་ནོ། །ཡན་ལག་ལྔ་པ་ཕན་ཡོན་དེ་ལེགས་པར་འགྲུབ་ཅིང་སྐྱབས་འགྲོ་རྒྱུད་ལ་བརྟེན་པར་གནས་བྱེད་བསླབ་བྱ་བསྟན་པ་ལ། སྐྱབས་གསུམ་སོ་སོའི་བསླབ་བྱ་བཤད་པ་དང་། ཐུན་མོང་གི་བསླབ་བྱ་བཤད་པ་གཉིས་ལས། དང་པོ་ལ། རྩ་བའི་བསླབ་བྱ་གསུམ་སོ་སོར་བཤད་པ་དང་། ཡན་ལག་གི་བསླབ་བྱ་གསུམ་སོ་སོར་བཤད་པ་སྟེ་གཉིས་སུ་ཡོད་པ་ལས། དང་པོ་ལའང་གསུམ་ལས། སངས་རྒྱས་དཀོན་མཆོག་ལ་སྐྱབས་སུ་སོང་བའི་རྩ་བའི་བསླབ་བྱ་ནི། འདི་ཕྱི་གཏན་གྱི་སྐྱབས་གནས་དཀོན་མཆོག་གསུམ་དུ་ཡོད་པ་ལས། དང་པོ་སངས་རྒྱས་དཀོན་མཆོག་ལ་སྐྱབས་སུ་སོང་བ་རྣམས་ཀྱིས་དགག་པའི་སྒོ་ནས་བསླབ་པར་བྱ་བ་ནི། དགག་བྱ་གང་སུ་ཡང་རུང་བ་ལ་ནད་གཏོང་བ་སོགས་ཀྱི་གནོད་པ་སྣ་ཚོགས་བྱེད་ལ། འཇིག་རྟེན་པས་མཆོད་སྦྱིན་བྱ་བའི་ཡུལ་ཡིན་ཅིང་མཆོད་སྦྱིན་ལ་དགའ་བ་འཇིག་རྟེན་ལས་འདས་པ་ལས་གཞན་དུ་གྱུར་པ་མུ་སྟེགས་སོགས་ཀྱི་མཆོད་བྱ་འཇིག་རྟེན་པའི་ལྷ་ཀླུ་སོགས་མི་མ་ཡིན་པའི་འབྱུང་པོ་ཐམས་ཅད་ཡིན་ནོ། །ཇི་ལྟར་དགག་ན་དད་པས་སྐྱབས་སུ་མི་བརྟེན་པ་དང་། གུས་པས་ཕྱག་མི་འཚལ་བས་དགག་དགོས་སོ། །དེ་ཡང་བརྟེན་པ་ནི་སྐྱབས་སུ་འགྲོ་བའི་དོན་ཡིན་ན་དེ་མི་རུང་བ་ནི། མདོ་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །ཞེས་གསུངས་སོ། །ཕྱག་འཚལ་མི་རུང་བ་ནི། སྐྱབས་འགྲོ་བདུན་ཅུ་པ་ལས། དགེ་བསྙེན་དུ་ནི་དམ་བཅའ་བས། །སྐྱབས་ནི་གསུམ་པ་བསྲུང་བར་བྱ། །མུ་སྟེགས་ཀུན་ལ་གུས་པ་ཡིས། །མཆོད་དང་ཕྱག་འཚལ་མི་བྱའོ། །ཞེས་གསུངས་ཤིང་། གཞུང་དམ་པ་འདིར་ནི་གཉིས་ཀ་བསྡུས་པ་ཡིན་ནོ། །མདོ་ལས་ནི་མཐོ་རིས་ཀྱི་ལྷ་ཡིན་ཀྱང་འཇིག་རྟེན་པ་ལ་བརྟེན་མི་རུང་བར་གསུངས་པ་ཡིན་ནོ། །ངན་སོང་གི་འགྲོ་བ་ཡི་དྭགས་དང་དུད་འགྲོའི་རིགས་ལ་ཇི་ལྟར་བརྟེན་རུང་འོན་ཀྱང་དུས་ངན་གྱི་སྐྱེ་བོ་ལས་ངན་རྣམས་ཀྱིས་མི་ཤེས་པས་བརྟེན་པ་ལ་མི་རུང་བའི་ཕུང་བ་བཅོ་བརྒྱད་ཡོད་ཚུལ་ནི། ཟླ་བའི་ཕྲེང་མཛེས་ལས་ཤེས་པར་བྱའོ། །དམ་ཆོས་དཀོན་མཆོག་ལ་སྐྱབས་སུ་སོང་བའི་རྩ་བའི་བསླབ་བྱ་ནི། དཀོན་མཆོག་གཉིས་པ་ཆོས་ལ་སྐྱབས་སུ་སོང་བས་དགག་པའི་བསླབ་བྱ་ལ་བཤད་པའི་ཚུལ་གསུམ་ལས། ཡུལ་གང་ལས་དགག་པ་ནི། སེམས་ཅན་ཡིན་ཚད་ཐམས་ཅད་ཀྱི་སྲོག་དང་ལོངས་སྤྱོད་དང་མིང་གཟུགས་དང་མིང་རྣམས་ལ་ཡིན་ཏེ་མཛོད་ལས། གཞི་ནི་སེམས་ཅན་ལོངས་སྤྱོད་དང་། །མིང་དང་གཟུགས་དང་མིང་ཡིན་ནོ། །ཞེས་གསུངས་པ་བཞིན། སྲོག་གཅོད་གནོད་སེམས་ཀྱི་གཞི་སེམས་ཅན། འདོད་ལོག་མ་བྱིན་ལེན་བརྣབ་སེམས་ཀྱི་གཞི་ལོངས་སྤྱོད། ལོག་ལྟའི་གཞི་མིང་གཟུགས། །རྫུན་སོགས་བཞིའི་གཞི་མིང་ཡིན་ནོ། །དགག་བྱ་ཅི་ཞིག་དགག་པ་ནི་མི་དགེ་བ་རྣམས་ཡིན། དེ་ཡང་སྤྱིར་ངོ་བོ་ནི། ལོག་པའི་ལུས་ངག་ཡིད་གསུམ་དང་མཚུངས་པར་ལྡན་པའི་སེམས་པ་མི་དགེ་བའོ། །ངེས་ཚིག་ནི། ཡིད་དུ་མི་འོང་བའི་འབྲས་བུས་བསྐྱེད་པས་ན་མི་དགེ་ཞེས་བྱའོ། །མཚན་ཉིད་ནི། རང་བཞིན་ནམ་བཅས་པའི་ཁ་ན་མ་ཐོ་བས་བསྡུས་པའོ། །དེ་ལ་སྔ་མ་ནི་རང་གི་མཚན་ཉིད་ཀྱིས་མི་དགེ་བའི་ངོ་བོར་གནས་པ་ཡིན་ལ། ཕྱི་མ་ནི་གཞན་སྟེན་པས་མི་དགེ་བའི་རྒྱུར་གནས་པ་བཅས་ཁྲིམས་མཛད་པ་རྣམས་སོ། །དབྱེ་བ་ལ་སྤྱིར་དབྱེ་བ་དང་། བྱེ་བྲག་སོ་སོར་དབྱེ་བ་གཉིས་ལས། དང་པོ་ནི་བཞི་སྟེ། དོན་དམ་པའི་མི་དགེ་བ་འཁོར་བ། ངོ་བོ་ཉིད་ཀྱི་མི་དགེ་བ་རྩ་བ་གསུམ་འདོད་ཆགས་ཞེ་སྡང་གཏི་མུག་དང་། ངོ་ཚ་མེད་པ་དང་ཁྲེལ་མེད་པ་བཅས་ལྔའོ། །མཚུངས་ལྡན་གྱི་མི་དགེ་བ་དེ་དག་དང་མཚུངས་པར་ལྡན་པའི་སེམས་སེམས་བྱུང་རྣམས་སོ། །ཀུན་ནས་བསླང་བའི་མི་དགེ་བ་དེ་དག་གིས་ཀུན་ནས་བསླང་བའི་ལུས་ངག་ཡིད་ཀྱི་བྱ་བ་རྣམས་ཡིན་ནོ། །གཉིས་པ་ལ་ལྔ་སྟེ། རྒྱུ་ཀུན་སློང་གིས་དབྱེ་བ། སོ་སོའི་ངོ་བོས་དབྱེ་བ། རང་གི་འབྲས་བུས་དབྱེ་བ། དབྱེ་བའི་གྲངས་ངེས། གོ་རིམ་ངེས་པའོ། །དང་པོ་ནི། རྒྱུའི་ཀུན་སློང་འདོད་ཆགས་ཞེ་སྡང་གཏི་མུག་གསུམ་ཀ་མི་དགེ་རེ་རེ་ལ་ཡང་སྔོན་དུ་འགྲོ་བ་ཡིན་ལ། དེ་ཡང་སྲོག་གཅོག་ལྟ་བུ་ཆགས་པས་བསླང་བ་ཤ་སོགས་ཀྱི་ཕྱིར་གསོད་པ། ཞེ་སྡང་གིས་བསླང་བ་གནོད་པ་བྱེད་པ་གསོད་པ། གཏི་མུག་གིས་བསླང་བ་མ་དག་པའི་སྦྱིན་པ་ཡིན་པའི་ཕྱིར་སྡིག་པ་ཡིན་ཀྱང་དགེ་བ་ཡིན་སྙམ་ནས་མཆོད་སྦྱིན་གྱི་ཕྱིར་གསོད་པ་ལྟ་བུ་སྟེ་ཐམས་ཅད་ལ་སྦྱར་དགོས་སོ། །དུས་ཀྱི་ཀུན་སློང་ནི། གསོད་དང་གནོད་སེམས་ཚིག་རྩུབ་གསུམ་ཞེ་སྡང་གིས་མཐར་ཕྱིན་པར་བྱེད། བརྣབ་སེམས་འདོད་ལོག་མ་བྱིན་ལེན་གསུམ་འདོད་ཆགས་ཀྱིས་རྫོགས་པར་བྱེད། ལོག་ལྟ་གཏི་མུག་གིས་མཐར་བྱེད། རྫུན་ཕྲ་མ་ངག་ཀྱལ་གསུམ་དུ་གསུམ་ཀས་རྫོགས་པའོ། །དུག་གསུམ་དེ་གང་ཡིན་ན། ཡུལ་ཡིད་དུ་འོང་བ་ལ་ཆགས་པ་འདོད་ཆགས། མི་འོང་བ་ལ་སྡང་བ་ཞེ་སྡང་། གཏི་མུག་ལ་གཉིས་ཡོད་དེ་ཤེས་བྱའི་གནས་ཚུལ་ཇི་ལྟ་བ་བཞིན་མ་རྟོགས་པས་དེ་མ་ཡིན་པ་ལ་ཡིན་པར་སྒྲོ་འདོགས་པ་དང་། ཡིན་པ་ལ་མིན་པར་སྐུར་འདེབས་ཀྱི་སྣང་བ་དང་རྟོག་པ་ནི་འཁོར་བའི་རྩ་བ་མ་རིག་པ་ཡིན་པས་དེས་བསྐྱེད་པའི་ཕྱིར་འཁོར་བ་དོན་དམ་པའི་མི་དགེ་བར་འགྱུར་བ་ཡིན་ནོ། །དུག་གསུམ་གྱི་སྐབས་ཀྱི་གཏི་མུག་ནི་དེ་མ་ཡིན་ཏེ་འདིའི་གཏི་མུག་ནི་ལས་ཐམས་ཅད་ངན་སོང་གསུམ་སོགས་ཀྱི་སྡུག་བསྔལ་སྐྱེད་བྱེད་ཀྱི་མི་དགེ་བར་སྒྱུར་བྱེད་ཡིན་པས་ན། དགེ་སྡིག་གི་གནས་ཚུལ་ཇི་བཞིན་མ་རྟོགས་པ་ཉིད་ཀྱིས། མི་དགེ་བ་ཞིག་དགེ་བར་ཞེན་པའམ། དགེ་བ་ཞིག་མི་དགེ་བ་ཡིན་སྙམ་པའམ། དགེ་བ་ཡིན་པ་ཞིག་དེ་མིན་སྙམ་པའམ། མི་དགེ་ཡིན་པ་མི་དགེ་མིན་སྙམ་གྱི་བློ་སྐྱེ་བ་ཐམས་ཅད་དང་བདེ་སྡུག་གི་རྒྱུ་ནོར་ནས་བཟུང་བ་ཀུན་ཡིན་ལ། ལུང་མ་བསྟན་རྣམས་དགེ་སྡིག་གང་རུང་དུ་ཞེན་པ་ནི་མ་རིག་པར་གཏོགས་སོ། །ཚུལ་འདི་དག་ནི་ངེས་པར་ཤེས་དགོས་པ་གལ་པོ་ཆེ་ཡིན་པས་ལེགས་པར་ཁོང་དུ་ཆུད་དགོས་པ་ལགས་སོ། །གཉིས་པ་ལ་སྲོག་གཅོད་པ་ནི། གཞི་གསད་བྱ་མ་ནོར་བ་རང་ལས་གཞན་སེམས་ཅན་ཡིན་པ། བསམ་པ་གསོད་སེམས་སྐྱེས་པ། སྦྱོར་བ་དུག་སྟེར་བའམ་མཚོན་འདེབས་སམ་སྲོག་ལ་འཇིགས་པ་ཡོད་པར་གཏོང་བ་སོགས་ཀྱིས་འཆི་བར་བྱེད་པ་རང་གིས་བྱེད་བའམ་གཞན་ལ་བྱེད་དུ་འཇུག་གམ། བྱས་པ་ལ་རྗེས་སུ་ཡི་རང་བའང་། དོན་དེ་སྒྲུབ་པའི་ཕྱིར་གྲོགས་དང་གཅིག་ཏུ་མཐུན་པར་ཞུགས་པ་སྟེ་བྱེད་ཚུལ་བཞི་པོ་གང་ཡང་རུང་བ་བསྟན་པ་ཡིན་ཅིང་། གསད་བྱའི་སྔོན་ནམ་མཉམ་དུ་ཤི་བ་ལ་སྲོག་གཅོད་པའི་སྡིག་པ་མེད་པར་གསུངས་པ་ནི། སྲོག་གི་དབང་པོའི་སྐད་ཅིག་མ་འགགས་པ་ལ་སྔ་མ་དང་དུས་མཉམ་རྩི་བ་ཡིན་གྱིས་རྒྱུན་ལ་ནི་མ་ཡིན་པར་མཛོད་འགྲེལ་ལས་གསལ་ལོ། །འདིའི་ཕྱོགས་སུ་གཏོགས་པ་མཚམས་མེད་ལྔ་དང་དེ་དང་ཉེ་བ་ལྔ་ལས་ནི། མཚམས་མེད་དངོས་ཕ་གསོད་པ་དེ་དང་ཉེ་བ་བྱང་སེམས་གསོད་པ། དེ་བཞིན་དུ་མ་གསོད་པ་དང་ཉེ་བ་མ་ཡང་ཡིན་དགྲ་བཅོམ་ཡང་ཡིན་པ་ལ་མི་ཚངས་སྤྱོད་པ། དགྲ་བཅོམ་པ་གསོད་པ་དང་ཉེ་བ་འཕགས་པ་སློབ་པ་གསོད་པ། དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་ཕྱུང་པ་དང་ཉེ་བ་མཆོད་རྟེན་བཤིགས་པའོ། །དགེ་འདུན་འཁོར་ལོའི་དབྱེན་ནི་རྫུན་དུ་གཏོགས་ཤིང་། དེ་དང་ཉེ་བ་དགེ་འདུན་གྱི་འདུ་བའི་སྒོ་ཕྲོག་པ་ནི་མ་བྱིན་ལེན་པར་གཏོགས་པ་ཤེས་དགོས་སོ། །མ་བྱིན་ལེན་ནི་གཞི་བླང་བྱ་མ་ནོར་བར་གཞན་གྱི་ནོར་རྫས་ཡིན་ལ། བསམ་པ་ལེན་སེམས་སྐྱེས་པ། སྦྱོར་བ་མཐུ་ཡོད་པས་འཕྲོགས་པ་དང་མེད་ན་འཇབ་བུས་རྐུ་བས་ཐོབ་པར་བྱེད་པ། དེ་ཡང་རང་གིས་བྱེད་པའམ་སོགས་བྱེད་ཚུལ་བཞི་བསྟན་པ་ཡིན་ཅིང་འདིའི་ཕྱོགས་སུ་གཏོགས་པ། ལོག་འཚོ་ལྔ་སྟེ་རྙེད་པ་དང་བཀུར་སྟི་འོང་བའི་ཆེད་དུ་སྤྱོད་ལམ་ཤིན་ཏུ་མཛེས་པས་དབང་པོ་སྡོམ་པ་ཚུལ་འཆོས་ཡིན། རྙེད་བཀུར་གྱི་ཕྱིར་ཆོས་གཏམ་སྨྲ་བ་སོགས་ཚིག་འཇམ་པ་བཤད་པ་ཁ་གསག་ཡིན། རང་ལ་དགོས་རྒྱུའི་རྫས་དེ་ལ་བསྟོད་པ་གཞོག་སློང་ཡིན། སྔར་རང་ལ་བྱིན་པ་ལ་བསྔགས་པ་བྱེད་པ་རྙེད་པས་རྙེད་འཚོལ་ཡིན། རང་ལ་མི་སྦྱིན་པ་ལ་སྨོད་དམ་རྫས་ངན་པ་དང་ཆུང་བ་སོགས་ལ་སྨོད་པ་ཐོབ་མཇལ་ཡིན་ནོ། །འདོད་པས་ལོག་པར་གཡེམ་པ་ནི། གཞི་ཆགས་པ་སྤྱད་བྱ་མ་ནོར་བ་རང་གི་ཕོ་མོའི་དབང་པོ་ལས་གཞན་པ་རང་གཞན་གྱི་ཁ་ལག་སོགས་སམ། གཞན་གྱིས་བདག་ཏུ་བཟུང་བའི་བུད་མེད་དམ་རང་གི་ཡིན་ཀྱང་དེའི་ཡན་ལག་གོ །དེ་ཡང་བཞི་སྟེ་བསྒྲོད་བྱ་མིན་པ་མ་སོགས། ཡུལ་མིན་པ་གཙུག་ལག་ཁང་སོགས་དཀོན་མཆོག་གི་རྟེན་ཡོད་པ། དུས་མིན་པ་ནད་པ་དང་སྦྲུམ་མ་སོགས། ཡན་ལག་མ་ཡིན་པ་ཁ་ལག་གཤང་ལམ་སོགས་ཏེ། བསམ་པ་ཆགས་སེམས་སྐྱེ་བ། སྦྱོར་བ་ཁུ་བ་ཕྱུང་བ་སྟེ་འདིའང་བྱེད་ཚུལ་བཞི་ལྡན་ནོ། །རྫུན་གྱི་གཞི་ནི། སྨྲ་བའི་ཡུལ་མ་ནོར་ཞིང་དོན་གོ་བའི་སེམས་ཅན། བསམ་པ་བསླུ་སེམས་སྐྱེས་པ། སྦྱོར་བ་ཆོས་འཇིག་རྟེན་གང་ཡིན་ཀྱང་མ་མཐོང་བ་མཐོང་ངོ་། །མ་ཐོས་པ་ཐོས་སོ། །མ་ཤེས་པ་ཤེས་སོ། །མ་རྟོགས་པ་རྟོགས་སོ་ཞེས་ཐ་སྙད་བཞི་སྨྲ་བ་གོ་བའོ། །མ་གོ་བ་ནི་ངག་འཁྱལ་དུ་འགྱུར་བ་སྟེ་བྱེད་ཚུལ་བཞི་ལྡན་གྱིས་སོ། །ཕྲ་མ་ནི། གཞི་སྨྲ་བར་བྱ་བའི་ཡུལ་མ་ནོར་བ་དེ་དོན་གོ་བའི་སེམས་ཅན་གཞན་ཡིན་པ་ལ། བསམ་པ་མི་མཐུན་པར་སོ་སོར་དབྱེ་འདོད་པ་ཉོན་མོངས་འབར་བ་ལས་བྱུང་བ་ཡིན་པ། སྦྱོར་བ་འབྱེད་ཚིག་གོ་བར་སྨྲས་པ་སྟེ་ཕ་རོལ་གྱིས་གོ་ནས་བཟུང་མ་ཕྱེ་ནའང་ཉེས་པ་འབྱུང་ངོ་། །འདིའང་བྱེད་ཚུལ་བཞི་ལྡན་གྱིས་ཐོབ་བོ། །ཚིག་རྩུབ་ནི། གཞི་སྨྲ་ཡུལ་མ་ནོར་བ་དེ་སེམས་ཅན་གཞན་ཡིན་པ། བསམ་པ་ཉོན་མོངས་པས་སྨྲ་འདོད་སྐྱེས་པ། སྦྱོར་བ་སྐྱོན་མཚང་བརྗོད་པ་མི་སྙན་པའི་ཚིག་སྨྲ་བ་སྟེ་བྱེད་ཚུལ་བཞིས་ཉེས་པ་ཐོབ་པའོ། །ངག་འཁྱལ་ནི། གཞི་སེམས་ཅན་གྱིས་ཐོས་སམ་མི་ཐོས་པའི་ཡུལ་ན། བསམ་པ་ཉོན་མོངས་ཅན་ཁོ་ནའི་སེམས་ཀྱིས། སྦྱོར་བ་མི་ཡི་རྒྱལ་པོ་དང་བློན་པོ་ལ་སོགས་པ་འཇིག་རྟེན་འཁོར་བའི་ལུགས་ལ་བསྟོད་པ་ཁ་གསག་བརྗོད་པ། གླུ་ལེན་པ་མྱ་ངན་གྱིས་སྨྲེ་སྔགས་འདོན་པ། སྐད་སྣ་ཚོགས་ཀྱི་ལད་མོ་བྱེད་པའི་ཟློས་གར། མུ་སྟེགས་དངོས་སམ་དེ་དང་ཕྱོགས་མཐུན་སྡིག་པའི་བཤེས་གཉེན་རྣམས་ཀྱིས་བརྩམས་པའི་ཡུལ་ལྷའམ་བཙན་སོགས་འབྱུང་པོ་རྣམས་ཀྱི་སྒྲུབ་ཐབས་བསང་མཆོད། འཇིག་རྟེན་ཆོས་བརྒྱད་བསྒྲུབ་རབས་ཀྱི་རྣམ་ཐར། མདོ་རྒྱུད་གཉིས་དང་མི་མཐུན་པའི་ཆོ་ག་སྣ་ཚོགས། ཕྱི་རོལ་པའི་ངན་པ་དྲུག་པོ་དང་ལྡན་པའི་ཆོས་ལུགས་བཤད་པ་དང་བརྩམས་པ་རྣམས་བསྟན་བཅོས་ངན་པ་སྟེ། དེ་དག་གི་ལུང་གཞན་ལ་འཆད་པ་དང་། རང་གིས་རྟག་ཏུ་ཁ་ཏོན་བྱེད་པ་དང་། སྐབས་རེ་ཀློག་པ་དང་། འདོན་པ་ཐམས་ཅད་ངག་ཀྱལ་བ་ཡིན་ཅིང་དེ་ཡང་བྱེད་ཚུལ་བཞི་ལས་འབྱུང་ངོ་། །བརྣབ་སེམས་ནི། གཞི་གཞན་གྱི་ལོངས་སྤྱོད་ནོར་རྫས་ལ། བསམ་པ་ཆགས་སེམས་སྐྱེས་པ། སྦྱོར་བ་ལོག་པའི་བྱ་བ་མཐུ་དང་འཇབ་བུས་རང་ལ་ཐོབ་པར་འདོད་པ་གཡང་འབོད་དང་། གཞན་གྱི་ཤེས་རབ་རྐུ་ཐབས་སོགས་ཀྱི་བསམ་པ་སྐྱེ་བ་སྟེ་བྱ་ཚུལ་བཞི་ཡང་ཡོད་དོ། །གནོད་སེམས་ནི། གཞི་ཡིད་དུ་མི་འོང་བའི་ཡུལ་སེམས་ཅན་སོགས་ལ། བསམ་པ་སྡང་སེམས། སྦྱོར་བ་བདེ་བ་དང་བྲལ། སྡུག་བསྔལ་ཞིག་འབྱུང་བར་འདོད་པ་སྟེ། མཐུ་དང་ངན་སྔགས་བྱེད་མཁན་རྣམས་ལའང་ལྷག་པར་ཡོད་ཅིང་བྱེད་ཚུལ་བཞི་ཡིས་ཐོབ་བྱའོ། །ལོག་ལྟ་ནི། གཞི་ལྟ་ཡུལ་མ་ནོར་བ་དགེ་སྡིག་རྒྱུ་འབྲས་འཕགས་པ་རྣམས་ལ། བསམ་པ་གཡོ་བའི་བསམ་པ་ཅན་སྲེད་པ་སྤྱད་པ་རྣམས་མ་ཡིན་པར་སྡིག་སེམས་བརྟན་པ་རྟག་ཆད་ཀྱི་ལྟ་བ་སྤྱད་པས་མེད་སེམས་སྐྱེ་བ། སྦྱོར་བ་ལས་དགེ་སྡིག་མེད་དོ། །ཆོས་རྒྱུ་འབྲས་མེད་དོ། །དཀོན་མཆོག་གསུམ་མེད་དོ་སྙམ་པའི་སྐུར་འདེབས་ཀྱི་རྣམ་པ་ཅན་ཏེ་མུ་སྟེགས་བྱེད་དང་རང་སྡེ་ཐོས་བསམ་ལེགས་པར་མི་བྱེད་པའི་བླུན་པོ་སྟོང་ཉིད་ཀྱི་གོ་བ་རྙེད་པ་ཕལ་མོ་ཆེ་ལ་ཡོད་དེ་འདིས་ནི་དགེ་རྩ་ཐམས་ཅད་རྩད་ནས་གཅོད་ཅིང་འབྲས་བུའང་མནར་མེད་ཁོ་ན་ལ་སྨིན་པར་གསུངས་པས་ཤིན་ཏུ་མ་རུང་བ་སྟེ་བྱེད་ཚུལ་བཞི་ལས་ཀྱང་འབྱུང་བའོ། །ལས་བྱེད་ཚུལ་བཞི་ནི། རང་གི་དེ་དག་བྱེད་པ་དང་། གཞན་ལ་ལས་བྱེད་བཅུག་པ་དཔེར་ན་སྲོག་གཅོད་ལྟ་བུའང་ནོར་རྫས་བྱིན་ནས་གསད་པར་བྱ་རྒྱུ་གསོད་འཇུག་པའམ་དབང་ཆེ་བས་དེ་སོད་ཅིག་ཅེས་ཚིག་བརྗོད་པའམ་སྡིག་པའི་བཤེས་གཉེན་མ་རུང་བས་བསྟན་འགྲོའི་དོན་དུ་གསོད་པ་དགེ་བ་ཡིན་ཟེར་བའི་ལོག་པའི་ཆོས་བཤད་པའམ་བརྡའ་བསྟན་ནས་གཞན་སྲོག་གཅོད་ལ་སྦྱོར་བ་དེ་དག་ལ་གཞན་གྱི་སྡིག་པ་དེ་འདྲ་བ་ཁྱད་མེད་ཐོབ་པའོ། །བྱས་པ་ལ་རྗེས་སུ་ཡི་རང་བ་གཞན་གྱིས་སྡིག་པ་བྱེད་པ་ལ་དགའ་བའམ། སྡིག་ཅན་གྱི་གང་ཟག་ལ་མི་དཔའ་བོ་ཟེར་བ་ལྟ་བུས་ཆོམ་རྐུན་པ་དང་སྡིག་རྒྱལ་སོགས་ལ་བསྟོད་ཅིང་དེ་ལ་སེམས་དགའ་བ་སྐད་ཅིག་ཙམ་སྐྱེ་ཡང་དེའི་སྡིག་པ་དེ་དང་འདྲ་བ་ཐོབ་པ་ཡིན་ནོ། །དོན་གཅིག་ཏུ་ཞུགས་པ་ནི། མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཅེས་གསུངས་པ་སྟེ། མི་གཅིག་གསོད་པའི་ཕྱིར་མི་བརྒྱ་སོང་ནས་དེའི་ནང་གི་དམག་མི་གཅིག་གིས་མི་དེ་བསད་ན་གཞན་གོ་དགུ་པོ་རྣམས་རེ་རེ་ལའང་དོན་གཅིག་ཏུ་ཞུགས་པའི་དབང་གིས་མི་རེ་རེ་བསད་པའི་སྡིག་པ་ཐོབ། དེ་ཡང་དམག་མི་དེ་རྣམས་ལ་གསོད་འདོད་པའི་སེམས་ཡོད་པས་ཐོབ་པ་ཡིན་ནམ་སྙམ་ན། གསོད་སེམས་ཡོད་མི་དགོས་ཏེ་ཁོ་རང་འགྲོ་འདོད་མེད་ཀྱང་གཞན་གྱི་དབང་མེད་དུ་ཁྲིད་སོང་ན་མི་འགྲོ་ཐབས་མེད་ཀྱང་སྲོག་ལ་ཐུག་ནའང་སེམས་ཅན་མི་གསོད་དོ་སྙམ་པའི་དམ་བཅའ་དྲག་པོ་བྱས་ནས་སོང་ན་སྡིག་པ་མི་ཐོབ་མོད། དེ་འདྲའི་དམ་བཅའ་མ་བྱས་པར་རང་དབང་མེད་པར་འགྲོ་དགོས་བྱུང་ཡང་དོན་གཅིག་ཏུ་ཞུགས་པའི་སྡིག་པ་ཐོབ་པར་གསུངས་ཏེ། མཛོད་འགྲེལ་ལས། གང་ཞིག་ནན་གྱིས་ཁྲིད་བ་དེ་ཇི་ལྟ་བུ་ཞེ་ན། དེ་ལའང་བྱེད་པ་པོ་གཞི་ལྡན་པར་འགྱུར་ཏེ་གལ་ཏེ་འདི་སྙམ་དུ་སྲོག་གི་ཕྱིར་ཡང་སྲོག་ཆགས་མི་གསོད་དོ་སྙམ་དུ་ངེས་པར་བྱས་ཏེ་འགྲོ་བ་ནི་མ་གཏོགས་སོ། །ཞེས་གསུངས་པའོ། །དམག་མི་དེ་རྣམས་ལ་སྡིག་པ་ཐོབ་བ་ན་མང་ཉུང་ཡོད་དམ་སྙམ་ན། ཡོད་དེ་གསོད་མཁན་དེ་བྱེད་པ་པོ་ཡིན་པས་རང་གིས་བྱས་པའི་སྡིག་པ་ཐོབ། གོ་དགུའི་ནང་ནས་དེ་ལ་དགའ་སྤྲོ་སྐྱེ་བ་རྣམས་ལ་དོན་གཅིག་ཏུ་ཞུགས་པ་དང་། ཡི་རང་བ་བྱས་པའི་སྡིག་པ་གཉིས་རེ་ཐོབ། དམག་དཔོན་བྱེད་པ་ལ་སོད་ཅིག་ཅེས་གཞན་ལ་བྱེད་བཅུག་པ་དང་། བསད་པ་ལ་དགའ་བས་ཡི་རང་བ་དང་། དོན་གཅིག་ཏུ་ཞུགས་པའི་སྡིག་པ་སྟེ་གསུམ་ཐོབ། ཐོབ་པ་དེ་དག་དེ་མ་ཐག་འདུལ་བ་ལུང་སོགས་ལས། ལས་གཅིག་ལ་སྡུག་བསྔལ་ལྔ་བརྒྱ་འབྱིན་པའི་ནུས་ལྡན་དུ་འགྱུར་བར་གསུངས་ཤིང་། ཐེག་ཆེན་གྱི་ལུང་ལས་སྟོང་ཕྲག་ཏུ་འགྱུར་བར་གསུངས་པ་དག་ལས་རང་གིས་མཚན་ཉིད་ལ་གནས་པ་ཡིན་ནོ། །དེ་བཞིན་དུ་རྐུ་བའི་ཕྱིར་མི་བརྒྱ་སོང་ནས། མི་གཅིག་གིས་གཞན་གྱི་ནོར་ཞིག་བརྐུས་པ་གྲོགས་རྣམས་ལ་གསང་ཞིང་སྦས་ནའང་གོ་དགུ་པོ་ལ་དེ་འདྲ་བརྐུས་པའི་སྡིག་པ་རེ་དོན་གཅིག་ཏུ་ཞུགས་པའི་དབང་གིས་འཐོབ། གཞན་ལ་མ་སྦས་པར་བསྟན་ཚེ་དགའ་སྤྲོ་བྱེད་པ་ལ་གཉིས་རེ་དང་། རྐུན་དཔོན་ལ་གསུམ་རེ་ཐོབ་པའི་ཚུལ་སྔ་མ་ཇི་ལྟ་བ་བཞིན་ཡིན་ལ། མི་དགེ་གཞན་རྣམས་ལ་ཡང་དེ་བཞིན་སྦྱར་ཤེས་པར་བྱའོ། །དེ་ཡང་སྲོག་གཅོད་སོགས་གསུམ་ལུས་ཀྱི་ལས། རྫུན་སོགས་བཞི་ངག་གི་ལས། བརྣབ་སེམས་སོགས་གསུམ་ཡིད་ཀྱི་ལས་ཡིན་ཀྱང་། ལས་སྒྲུབ་ཚུལ་གྱི་ཁྱད་པར་ལ་ལྟོས་ན། ལུས་ཀྱིས་ཀྱང་ཚུལ་འཆོས་བྱས་ནས་རྫུན་བྱེད་པ་དང་། ངག་གིས་ནི། གཞན་ལ་སྐུལ་བའམ་སྲོག་ལ་འཇིགས་པའི་སར་ལམ་སྟོན་པས་སྲོག་གཅོད་བྱེད་པ་སོགས་ཐམས་ཅད་བྱེད་རུང་ལ། ཡིད་ཀྱིས་དྲང་སྲོང་ཁྲོས་པས་འཆི་བར་བྱེད་པ་སོགས་ལུས་ངག་ལས་ཀྱང་ཕལ་ཆེར་བྱེད་པར་མངོན་པ་ལས་གསུངས་སོ། །ལས་དེ་དག་ཁམས་གང་ན་ཡོད་མེད་ནི། ཁམས་གོང་ན་སྡིག་ཏོས་དབེན་པའི་ཕྱིར་མི་དགེ་མངོན་གྱུར་མེད་ལ་ས་བོན་ཅིའི་ཕྱིར་མེད། འདོད་པ་ཁོ་ནར་མངོན་གྱུར་ཡོད་དོ། །འདོད་པར་ཡོད་ཚུལ་ཡང་དམྱལ་བ་ན་བསད་ཀྱང་མི་འཆི་བའི་ཕྱིར་སྲོག་གཅོད་མེད། ཡིད་འོང་གི་ལོངས་སྤྱོད་མེད་ཕྱིར་ལེན་ལོག་བརྣབ་གསུམ་མེད། དགོས་པ་མེད་པས་རྫུན་མེད། ཕྱེ་ཟིན་པའི་ཕྱིར་ཕྲ་མ་མེད། ལས་འབྲས་མངོན་དུ་གྱུར་ཕྱིར་ལོག་ལྟ་མངོན་གྱུར་མེད་ལ། ཚིག་རྩུབ། ཀྱལ་བ། གནོད་སེམས་རྣམས་མངོན་གྱུར་རྟག་པར་ཡོད་དོ། །བརྣབ་སེམས་ལོག་ལྟ་གཉིས་འཆིང་བྱེད་ཀྱི་ཚུལ་དུ་ལྡན་ནོ། །ངན་སོང་གཞན་ན་ཐམས་ཅད་ཡོད། མིའི་ནང་ནས་སྒྲ་མི་སྙན་ན་ཚེ་ངེས་པས་སྲོག་གཅོད་མེད། བདག་ཏུ་བཟུང་བ་མེད་པས་བརྣབ་སེམས་མ་བྱིན་ལེན་མེད། བུད་མེད་ཀྱང་ཤིང་གི་དྲུང་དུ་ཁྲིད་ཚེ་རང་ལ་དབང་ན་ཤིང་གི་ཡལ་གས་སྒྲིབ། མི་དབང་ན་མི་སྒྲིབ་པས་སྤྱད་པ་ལས་བདག་ཏུ་བཟུང་བ་མེད་པས་ལོག་གཡེམ་མེད། རྒྱུད་ཤིན་ཏུ་བཟང་བས་རྫུན་སོགས་གསུམ་དང་གནོད་སེམས་མེད། སྡིག་སེམས་ཅན་མིན་པས་ལོག་ལྟ་མེད། གླུ་ལེན་པ་སོགས་ངག་ཀྱལ་དངོས་སུ་ཡོད་ལ་མི་གཞན་དང་མཐོ་རིས་ན་ཐམས་ཅད་ཡོད་དོ། །ལས་ལ་འབྲས་བུ་ཡོད་པ་དང་མེད་པའི་ཁྱད་པར་ནི། ལས་བྱས་ཀྱང་འབྲས་བུ་འབྱིན་མི་ནུས་པ་ཐམས་ཅད་ལ། བྱས་ཤིང་མ་བསགས་པའི་ལས་ཟེར། ནུས་པ་ཐམས་ཅད་ལ་བྱས་ཤིང་བསགས་པའི་སྡིག་པ་ཡང་ཟེར། ལས་ཀྱི་འབྲས་བུ་འབྱིན་ཚུལ་གྱི་ཁྱད་པར་ནི། འབྲས་བུ་འབྱིན་པའི་དུས་ངེས་པ་ངེས་པའི་ལས་དང་། དུས་མ་ངེས་བ་མ་ངེས་པའི་ལས་གཉིས་ཡོད་པ་ལས། དང་པོ་ལ་གསུམ་ཡོད་པ་ཡང་། ཚེ་འདིར་སྨིན་པ་མཐོང་ཆོས་མྱོང་འགྱུར་ནི་མཛོད་ལས། མཐོང་ཆོས་འབྲས་བུ་ཅན་གྱི་ལས། །ཞིང་དང་བསམ་པའི་ཁྱད་པར་ལས། །ཞེས་གསུངས་པ་ལྟར། ཞིང་གི་ཁྱད་པར་ནི་གང་ཟག་དང་། དགེ་འདུན་གཉིས་སུ་ཡོད་པ་ལས། དང་པོ་ནི་ལྔ་སྟེ། འགོག་པའི་ཏིང་འཛིན་ལ་གནས་པ་ལངས་མ་ཐག་པའམ། བྱམས་པའི་ཏིང་འཛིན་ལ་གནས་པ། ཉོན་མོངས་མེད་པའི་ཏིང་འཛིན་ལ་གནས་པ། མཐོང་ལམ་ལ་གནས་པ། དགྲ་བཅོམ་འབྲས་བུ་ཐོབ་པ་ལ་གནས་པ་དེ་དག་ལངས་མ་ཐག་པའོ། །འདི་དག་ལ་གནོད་པ་བྱས་པའི་སྡིག་པ་ཡང་ཚེ་འདིར་སྨིན་པ་ཡིན་ནོ། །གཉིས་པ་ནི། སངས་རྒྱས་དགེ་སློང་གི་དགེ་འདུན་གྱིས་བསྐོར་བ་སངས་རྒྱས་འཁོར་བཅས་ལ་བརྟེན་པའོ། །བསམ་པའི་ཁྱད་པར་ནི་སེམས་སྟོབས་དྲག་པོས་སྤྱད་པའི་སྡིག་པ་རྣམས་ཀྱང་མཐོང་ཆོས་ལ་སྨིན་ནོ། །སྐྱེ་བ་དེ་ཡི་འོག་ཏུ་དེ་མ་ཐག་མྱོང་བ་སྐྱེ་ནས་མྱོང་འགྱུར་གྱི་ནི་མཚམས་མེད་ལྔ་དང་། སྡིག་པ་གཞན་དུས་ཀྱི་ཁྱད་པར་གྱི་རྒྱུན་དུ་བྱས་པ། བློའི་ཁྱད་པར་གོམས་པར་བྱས་པ། གྲངས་ཀྱི་ཁྱད་པར་ཡང་ཡང་མང་དུ་བྱས་པ་རྣམས་ཡིན་ནོ། །སྐྱེ་བ་གཉིས་ཕན་ཆད་དུ་རང་སྟོབས་ཀྱིས་སྨིན་ངེས་པ་ནི། ལན་གྲངས་གཞན་ལ་མྱོང་འགྱུར་ཡིན་ནོ། །རང་སྟོབས་ཀྱིས་སྨིན་མི་ནུས་ཀྱང་རྐྱེན་དང་འཕྲད་ན་སྨིན་པ་དེ་མ་ངེས་པའི་ལས་ཡིན་ལགས། ལས་མང་པོ་ཡོད་པ་སྨིན་པའི་གོ་རིམ་ནི། ལྕི་ཡང་ལས་ལས་ལྕི་བ་དེ་སྔོན་དུ་སྨིན་ལ་ལྕི་བ་གཉིས་སོགས་འདྲ་བ་ན། འཆི་ཁར་མངོན་དུ་གྱུར་བའི་ཉེ་བའམ། གོམས་ཆེ་བའམ། སྔར་བྱས་པ་གང་ཡིན་སྔོན་དུ་སྨིན་ནོ། །འཕེན་རྫོགས་ཀྱི་ལས་གཉིས་སུ་གནས་ཚུལ་ནི། དཔེར་ན། ཕྱི་མའི་སྐྱེ་བ་འགྲུབ་བྱེད་ལ་འཕེན་བྱེད་ཅེས་བྱ་ཞིང་། སྐྱེ་བ་དེར་བདེ་སྡུག་སྣ་ཚོགས་མྱོང་བྱེད་ཀྱི་ལས་ལ་རྫོགས་བྱེད་ཀྱི་ལས་ཞེས་བྱའོ། །དགེ་སྡིག་གཉིས་སྟོབས་ཆེ་ཆུང་གི་ཁྱད་པར་ནི། རྣམ་བཤད་རིག་པ་ལས། འདུ་བྱེད་རྣམ་པ་མཚུངས་པར་ལྡན། །ས་ཉིད་འབྲས་བུ་རྣམ་གཉིས་ཉིད། །འཆད་དང་ཆུང་ངུས་ཡང་དག་འཇོམས། །སྤོང་དང་ཕྱོགས་ཀྱི་ཁྱད་པར་ཉིད། །ཅེས་པ་དགེ་བ་མ་འབད་པར་ངང་གིས་འབྱུང་བ་དང་། སྡིག་པ་འབད་པས་སྒྲུབ་དགོས་པ་ནི་འདུ་བྱེད་པའི་ཁྱད་པར། དགེ་བ་ཕྱིན་ཅི་མ་ལོག་པའི་རྣམ་པ་དང་། སྡིག་པ་ཕྱིན་ཅི་ལོག་གིས་འཇུག་པ་ནི་རྣམ་པའི་ཁྱད་པར། དགེ་བ་དུག་གསུམ་མེད་པ་དང་ལྷན་ཅིག་གནས་ལ། གཅིག་ཤོས་ཉོན་མོངས་དུག་གསུམ་གང་རུང་རེ་རེ་དང་ལྷན་ཅིག་འབྱུང་བ་མཚུངས་ལྡན་གྱི་ཁྱད་པར། དགེ་བ་ཁམས་གསུམ་ས་དགུ་ན་ཡོད་ཅིང་། གཅིག་ཤོས་འདོད་ཁམས་སུ་ཡོད་པ་ས་ཡི་ཁྱད་པར། དགེ་བ་ལ་འབྲས་བུ་ལྔ་འབྱུང་ཞིང་། གཅིག་ཤོས་ལ་བྲལ་འབྲས་མེད་པས་བཞི་འབྱུང་བ་འབྲས་བུའི་གྲངས་ཀྱི་རྣམ་པ་དང་། དགེ་བས་འཇིག་རྟེན་ནའང་སྲིད་རྩེར་བསྐལ་ཆེན་བརྒྱད་ཁྲི་རྫོགས་དགོས་ཤིང་མི་དགེས་འབྲས་མཐའ་མནར་མེད་ཀྱི་ཚེ་ཚད་བསྐལ་ཆེན་གཅིག་གིས་རྫོགས་པ་མཐར་ཕྱིན་པའི་རྣམ་པ་སྟེ་འབྲས་བུ་རྣམ་གཉིས་ཀྱི་ཁྱད་པར། ལོག་ལྟ་ལྟ་བུས་དགེ་རྩ་རེ་ཞིག་གཅོད་ལ། གཅིག་ཤོས་ལམ་བདེན་མངོན་དུ་གྱུར་ཚེ་གཏན་དུ་གཅོད་པ་འཆད་པའི་ཁྱད་པར། དགེ་བ་ཆུང་ངུས་སྡིག་པ་ཆེན་པོ་འཇོམས་ནུས་ཤིང་། གཅིག་ཤོས་ཆུང་ངུས་དགེ་བ་ཆེན་པོ་འཇོམས་མི་ནུས་པ་འཇོམས་ཚུལ་གྱི་ཁྱད་པར། དགེ་བ་སྤང་བྱ་མ་ཡིན་པ་དང་། སྡིག་པ་སྤང་བྱ་ཡིན་པ་སྤོང་བའི་ཁྱད་པར། དགེ་བའི་ཕྱོགས་སངས་རྒྱས་ཡིན་པས་སངས་རྒྱས་རྐྱེན་གྱིས་སྐྱེད་པ་དང་། སྡིག་པའི་ཕྱོགས་བདུད་ཡིན་པས་བདུད་ཀྱི་རྐྱེན་གྱིས་སྐྱེད་པ་ཕྱོགས་ཀྱི་ཁྱད་པར་ཏེ་ཁྱད་པར་དགུས་ཕྱེ་བ་ཡིན་ནོ། །གསུམ་པ་རང་གི་འབྲས་བུའི་དབྱེ་བ་ནི། མཛོད་ལས། ཐམས་ཅད་རྣམ་སྨིན་རྒྱུ་མཐུན་དང་། །བདག་པོའི་འབྲས་བུ་འབྱིན་པར་འདོད། །ཅེས་གསུངས་པ་ལྟར། ངན་སོང་གི་སྡུག་བསྔལ་མྱོང་བ་མི་དགེ་བའི་རྣམ་སྨིན་གྱི་འབྲས་བུའོ། །རྒྱུ་མཐུན་གྱི་འབྲས་བུ་ནི་ཀུན་བཏུས་ལས། མིའི་ལུས་དང་ཡོངས་སུ་བཟུང་བ་མི་འབྱོར་བ་ཞེས་གསུངས་པ་བཞིན། སྲོག་གཅོད་ཀྱི་མི་རུ་གྱུར་ཀྱང་དབང་པོ་ལྔ་པོའི་ལུས་མ་ཚང་ཞིང་སྐྱོན་ཅན་དུ་གྱུར་བ་དང་། ཡོངས་བཟུང་གི་ལོངས་སྤྱོད་ལས་ལས་ཀྱི་ལོངས་སྤྱོད་དང་སྲོག་གཅོད་ལ་སྤྱོད་པ་ཅན། ཚེའི་ལོངས་སྤྱོད་ཚེ་ཐུང་བ་ནད་མང་བ་ལ་སྤྱོད་པའོ། །མི་འབྱོར་བ་ཞེས་པ་ངན་པའི་དོན་ཏེ་ཡོངས་བཟུང་ལོངས་སྤྱོད་ངན་པའོ། །དེ་བཞིན་དུ་མ་བྱིན་བླངས་པས། ལུས་ངན་པ་ལུས་ཀྱི་བཅུད་སྟོབས་མེད་པ་དང་། ལོངས་སྤྱོད་ངན་པ་ལས། ལས་ཀྱི་ལོངས་སྤྱོད་ངན་པ་རྐུ་བ་ལ་སྤྱོད་པ། ཡོ་བྱད་ཀྱི་ལོངས་སྤྱོད་ངན་པ་ཟས་ནོར་གྱིས་དབུལ་ཞིང་ཕོངས་པ་དང་། ཡོད་ཀྱང་གཞན་གྱིས་འཕྲོག་པར་འགྱུར་བ་སྟེ་དེ་བཞིན་ཐམས་ཅད་ལ་སྦྱར་བར་བྱའོ། །སྦྱོར་ཚུལ་གཞན་ཡང་། ལུས་མི་འབྱོར་བ་ཚེ་ཐུང་བ་ལྟ་བུ་སྲོག་གཅོད་ཁོ་ནའོ་མྱོང་བ་རྒྱུ་མཐུན་དང་། ཡོངས་སུ་བཟུང་བ་མི་འབྱོར་བ་མ་བྱིན་ལེན་པ་སོགས་ཀྱི་ལོངས་སྤྱོད་དབུལ་བ་སོགས་དགུའི་མྱོང་བ་རྒྱུ་མཐུན་ལ་སྦྱོར་བ་མཐོང་ངོ་། །བདག་པོའི་འབྲས་བུ་ནི། ཕྱི་རོལ་ཡུལ་གྱི་དངོས་པོ་མི་འབྱོར་བའམ་ངན་པར་འགྱུར་བ་སྟེ་སྲོག་གཅོད་ཀྱིས་ས་ཕྱོགས་གཟི་མདངས་མེད་པ། མ་བྱིན་ལེན་གྱིས་སེར་བ་དང་ཆར་བ་ཆེ་བས་ལོ་འབྲས་མེ་ཏོག་བཅོམ་ནས་གཟི་བྱིན་མེད་པར་བྱེད་པའི་ཡུལ་ཏེ་ཐམས་ཅད་ལ་མཛོད་འགྲེལ་ལྟར་སྦྱར་ཤེས་པར་བྱའོ། །དེ་ཡང་ངན་སོང་གི་སྣོད་བཅུད་ཡིད་དུ་མི་འོང་བ་ནི་འབྲས་བུ་དང་པོ་ནི་དེ་ཡིན་ལ། མཐོ་རིས་ཀྱི་སྣོད་བཅུད་ཡིད་མི་འོང་གི་ཆ་ནས་འབྲས་བུ་ཕྱི་མ་གཉིས་ཡིན་པ་ཆོས་མངོན་པ་ལས་གསལ་ལོ། །དབྱེ་བའི་གྲངས་ངེས་ནི། ལུས་ངག་ཡིད་གསུམ་གྱིས་མི་དགེ་བ་ལ་འབད་པའི་ལས་ཀྱི་གཙོ་བོ་རྣམས་བསྡུས་ན་བཅུར་ངེས་པ་ཡིན་ཏེ། ལུས་ཀྱིས་སེམས་ཅན་གྱི་སྲོག་དང་ལོངས་སྤྱོད་བྲལ་བ་ལ་རྩོལ་བ་གསུམ་དུ་ངེས། ངག་གིས་དོན་ལ་མི་གནས་པ་བརྗོད་པ། ཀུན་ནས་ཉོན་མོངས་ཕྱོགས་ཀྱི་དོན་ལ་གནས་པ་བརྗོད་པ། སེམས་ཅན་མི་མཐུན་པར་བྱེད་པའི་ཚིག་བརྗོད་པ། ཡིད་འཁྲུགས་པའི་ཚིག་བརྗོད་པ་རྩོལ་བ་བཞི་རུ་ངེས། ཡིད་ཀྱིས་ཡིད་དུ་འོང་བའི་ནོར་ཐོབ་བློ་མི་འོང་བའི་ཕྱོགས་ལ་སྡང་བ། ཡོད་པ་ལ་སྐུར་བའི་སེམས་སྐྱེ་བ་གསུམ་དུ་ངེས་པས་དངོས་པོ་ལ་གནས་པའི་གྲངས་ངེས་ཡིན་ནོ། །གོ་རིམ་ངེས་པ་ནི། རྟེན་སྒོ་གསུམ་ལ་ཕྲ་རགས་ཡོད་པས་དེ་ལ་བརྟེན་པའི་ལས་ཕྲ་རགས་སུ་གནས་པ་རྣམས་ཀྱིས་རགས་པ་སྔར་བརྟགས་ཕྲ་བ་ཕྱིས་སུ་བརྟགས་ནས་བཞག་པ་རྣམ་པར་བརྟགས་པའི་གོ་རིམ་མོ། །ཡང་གཟུགས་ཅན་ཡིན་མིན་འབྱེད་ཕྱིར་གཟུགས་ཅན་བདུན་གྱི་ལྕི་བ་སྔོན་དང་། ཡང་བ་རྗེས་སུ་བཞག །གཟུགས་ཅན་མིན་པ་གསུམ་གྱི་ཡང་བ་སྔོན་དང་། ལྕི་བ་ཕྱིས་སུ་བསྟན་ནོ། །དེ་ལྟར་སྤྱིར་ཤེས་པར་བྱས་ནས་གཞུང་དོན་དུ་གཞན་ལ་འཚེ་བ་བྱེད་པ་ནི། སྲོག་དང་བྲལ་བས་འཚེ་བ་དང་། ནོར་ལེན་པས་འཚེ་བ་དང་། སངས་རྒྱས་ཀྱིས་སྨད་པའི་མུ་སྟེགས་བྱེད་ཀྱི་སྤྱོད་པས་རང་གཞན་གྱིས་སྡོམ་པ་རྩད་ནས་བརླག་པའི་འཁྲིགས་པའམ་གཞན་གྱི་ཆུང་མ་མི་མཛེས་པར་བྱེད་པས་འཚེ་བ་དང་། གཞན་ལུགས་གཉིས་ཀྱིས་ཚིག་གིས་བསླུ་བས་འཚེ་བ་དང་། གཞན་ཚིག་གིས་མི་མཐུན་པར་བྱེད་པས་འཚེ་བ་དང་། གཞན་ལ་མི་སྙན་སྨྲ་བས་འཚེ་བ་དང་། འཁོར་བའི་གཏམ་སྣ་ཚོགས་དང་། ཆོས་ལྟར་བཅོས་པའི་གཏམ་སྨྲ་བས་གཞན་ལ་དུག་གསུམ་གྱི་ཉེས་པ་བསྐྱེད་པའི་འཚེ་བ་སྟེ་ལུས་ངག་གི་མི་དགེ་བདུན་དང་། ཡིད་ཀྱི་གཞན་ལ་ཡོད་པའི་འབྱོར་བ་རང་ལ་ཐོབ་འདོད་ཀྱི་བརྣབ་སེམས་ཡང་འཚེ་བའི་བསམ་པ་ཡིན་པས་བརྒྱད་པོ་དེ་དགག་བྱའོ། །དེ་དག་ཇི་ལྟར་དགག་པ་ནི། ཅི་ནས་ཀྱང་མི་དགེ་དེ་རྣམས་ནི་སྤང་བར་བྱའོ། །སྙམ་དུ་དམ་བཅའ་བྱ་ཞིང་སྤོང་སེམས་ལ་གནས་པ་ནི་སྡིག་པ་འགོག་བྱེད་གཉེན་པོ་སྡོམ་པ་ཡིན་ཏེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་འདོད། །ཅེས་གསུངས་སོ། །དེ་བཞིན་དུ་ཡིད་ཀྱི་མི་དགེ་བ་གཞན་ལས་ནི། དམ་ཆོས་ལ་སྐྱབས་སུ་སོང་བའི་བསླབ་བྱའི་འགལ་ཟླ་གནོད་སེམས་ཡིན་ཏེ། མདོ་ལས། དམ་པའི་ཆོས་ལ་སྐྱབས་སོང་ན། །འཚེ་ཞིང་གནོད་པའི་སེམས་དང་བྲལ། །ཞེས་གསུངས་པའི་འཚེ་བ་བྲལ་བ་ནི་བཤད་མ་ཐག་པ་དེ་ཡིན་ལ། ཡིད་ཀྱི་མི་དགེ་བ་གསུམ་ལས་གནོད་སེམས་དམིགས་ཀྱིས་བསལ་བ་ནི་དགག་བྱ་ཡིན་ནོ། །དེ་ཇི་ལྟར་དགག་ན་ཕན་ཚུན་སྤངས་ཏེ་གནས་པའི་མཚན་ཉིད་ཅན་གྱིས་ལྷན་ཅིག་ཏུ་མི་གནས་པའི་འགལ་བ་ནི་གནོད་སེམས་ཀྱི་གཉེན་པོ་བརྩེ་བའི་སྙིང་རྗེ་ཡིན་ཅིང་། ཚད་མེད་བཞི་པོ་ལ་སྤྱིར་བརྩེ་བ་ཞེས་བྱང་ས་ལས་གསུངས་ཤིང་། དོན་ལ་གཞན་སྡུག་བསྔལ་བར་འདོད་པ་དང་བདེ་བ་བྲལ་བར་འདོད་པ་གནོད་སེམས་དེ་སྤང་ནས་སྡུག་བསྔལ་བྲལ་འདོད་བདེ་བ་ལྡན་འདོད་ཀྱི་བརྩེ་བ་རྟག་ཏུ་སེམས་རྒྱུད་ལ་འཆར་བ་བྱ་དགོས་སོ། །ལོག་ལྟ་ནི་སོ་སོའི་བསླབ་བྱར་མི་འདུ་སྟེ། སྐྱབས་སྡོམ་ཐམས་ཅད་གཏོང་བྱེད་ཡིན་པ་ནི། ཀུན་མཁྱེན་ཆོས་རྗེས། གཏོང་རྒྱུ་བཏགས་པ་ཁས་ལེན་འདས་པ་དང་། །མཚན་ཉིད་པ་ནི་ལོག་ལྟ་སྐྱེས་པས་གཏོང་། །ཞེས་གསུངས་པ་ལྟར། སངས་རྒྱས་སོགས་འཕགས་པའི་གང་ཟག་གམ། ཆོས་ཀུན་རྫོབ་རྒྱུ་འབྲས་སམ། དོན་དམ་བདག་མེད་དང་བདེ་གཤེགས་སྙིང་པོ་རྣམས་ལས་གང་རུང་ཞིག་མེད་པར་ལྟ་བ་བྱུང་ན་སྐྱབས་སྡོམ་ཐམས་ཅད་རྩད་ནས་གཏོང་བ་ཡིན་ཏེ། རྒྱུད་བླ་མ་ལས། གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་ཟབ་མོའི་ཆོས་སྤང་བའི་དབང་དུ་བྱས་ནས་གསུངས་པ་སྟེ་ཐར་པ་མེད་ལ་སྐྱབས་སྡོམ་ཡོད་པ་ནི་སུས་ཀྱང་འདོད་མི་རིགས་སོ། །སོ་སོའི་བསླབ་བྱའི་འགལ་ཟླ་བྱུང་ན་ཅི་ལྟར་གཏོང་བྱེད་དུ་འགྱུར་བ་ཡིན་ནམ་སྙམ་ན། མཁས་པ་མང་པོས། དཔེར་ན་ལྷ་གཞན་ལ་ཕྱག་འཚལ་བས་ཀྱང་སྐྱབས་སྡོམ་ཐམས་ཅད་གཏོང་བར་གསུངས་ཀྱང་། འདིར་ནི་མི་འདོད་དེ། ཀུན་མཁྱེན་གྱིས། བསླབ་པ་ཉམས་པས་དམན་པར་ལྟུང་བའི་ཕྱིར། །ཞེས་གསུངས་པས་ན། གནོད་སེམས་ལྟ་བུ་ཞིག་སྐད་ཅིག་མར་སྐྱེས་ཀྱང་ཆོས་ལ་སྐྱབས་སུ་སོང་བའ་ིསྡོམ་པ་རྩད་ནས་གཏོང་གི། གཞན་གཉིས་མི་གཏོང་བར་ཤེས་དགོས་སོ། །རང་གི་སངས་རྒྱས་ལ་སྐྱབས་སུ་སོང་བའི་ཁར་ལྷ་གཞན་ལ་སྐྱབས་སུ་སོང་ཡང་དེ་གཏོང་གི །གཞན་མི་གཏོང་བ་ཐམས་ཅད་ལ་སྦྱར་རོ། །དེ་ལྟ་བུའི་མི་དགེ་སྤང་ཞིང་དགེ་བཅུ་སྤྱོད་པ་ནི་མཐོ་རིས་ཐར་པའི་རྒྱུ་ཡིན་པས་གལ་ཆེ་སྟེ་མདོ་ལས། སྲིད་པའི་སྡུག་བསྔལ་ཀུན་གཅོད་ཅིང་། །བླ་མེད་བྱང་ཆུབ་ཐོབ་འདོད་པས། །དགེ་བཅུ་འཁོར་ལོའི་ནན་ཏན་ལ། །ལེ་ལོ་མ་བྱེད་བརྩོན་པར་གྱིས། །ཞེས་གསུངས་པས་སོ། །དགེ་འདུན་དཀོན་མཆོག་ལ་སྐྱབས་སུ་སོང་བའི་རྩ་བའི་བསླབ་བྱ་ནི། དཀོན་མཆོག་གསུམ་པ་དགེ་འདུན་ལ་སྐྱབས་སུ་སོང་བའི་དགག་པའི་བསླབ་བྱ་ལའང་ཚུལ་གསུམ་ལས། གཞི་གང་ལས་དགག་པ་ནི། བདག་གམ་རང་གི་སྡེ་པ་ནང་པ་སངས་རྒྱས་པ་དང་སྤྱོད་ཡུལ་གཅིག་ཏུ་གནས་པའམ། གཞན་སྡེ་ཕྱི་རོལ་མུ་སྟེགས་པ་ཀུན་གྱི་སྤྱོད་ཡུལ་དང་གཅིག་པར་གནས་པ་སྟེ་ཕྱོགས་གཉིས་པོ་དེ་ཡིན་ནོ། །དགག་བྱ་ཅི་ཞིག་དགག་པ་ནི། སྡིག་པ་ལ་སྤྱད་པ་ཅན་གྱི་གང་ཟག་རྣམས་ཡིན་ལ། དེ་ལ་གཉིས་ཡོད་དེ། རང་སྡེ་ནང་པ་སངས་རྒྱས་པར་ཁས་འཆེ་བའི་སྡིག་ཅན་ཞིག་དང་། གཞན་སྡེ་ཕྱི་རོལ་མུ་སྟེགས་པ་སྡིག་ཅན་ནོ། །དང་པོ་བཤད་པ་ལ། སྤྱིར་གྲུབ་མཐའ་ལ་མ་ཞུགས་པར་ཐར་པ་དང་ཐམས་ཅད་མཁྱེན་པ་ཐོབ་མི་ནུས་ཤིང་། དེ་ཡང་བདེན་པ་གཉིས་བསྡུས་ཀྱི་དགེ་བ་ལ་ཡོན་ཏན་དུ་ཤེས་པ་དང་། སྡིག་པ་མི་དགེ་བ་ལ་ཉེས་པའི་སྐྱོན་དུ་ཤེས་པའི་གྲུབ་མཐའ་རྣམ་དག་ཞིག་དགོས་ཀྱི། དགེ་སྡིག་སྐྱོན་ཡོན་འབྱེད་མི་ཤེས་པའི་ཐར་འདོད་ཀྱི་བློ་ཅན་དགེ་སྡིག་འཆོལ་བར་སྤྱོད་པ་དེ་ནི་གང་བྱས་སྡིག་པར་འགྱུར་བྱེད་གཏི་མུག་གི་གྲུབ་མཐའ་མི་བཟད་མ་རུང་བ་འདི་ཕྱི་ཀུན་ཏུ་རང་གཞན་ལ་གནོད་པའི་གདོན་ཆེན་པོས་རྒྱུད་ལ་བགོས་པ་ཡིན་པར་ཤེས་དགོས་ཏེ། རིག་པའི་དབང་ཕྱུག་ཆོས་ཀྱི་གྲགས་པས། སྐྱེ་བོ་རིང་པོར་སྐྱེ་འགྱུར་ལ། །ཡོན་ཏན་ཉེས་པ་མ་མཐོང་བའི། །ཀྱེ་མ་གྲུབ་མཐའ་མི་བཟད་པའི། །གདོན་འདི་སུ་ཡིས་བགོས་པ་ཡིན། །ཞེས་གསུངས་སོ། །དེ་ཡང་སངས་རྒྱས་ཀྱི་ཆོས་སྡིག་པར་བསྒྱུར་བ་ཆོས་མིན་ཆོས་ལྟར་བཅོས་པ་དང་། ཆོས་མིན་ལ་སྤྱོད་པ་གང་ཟག་སྡིག་པ་ཅན་ཏེ་གཉིས་སུ་ཡོད་དོ། །དང་པོ་ནི། སློབ་དཔོན་དབྱིག་གཉེན་གྱི་མཛོད་འགྲེལ་དུ་འདི་ལྟར། མི་རྣམས་ཚེ་ལོ་བཅུ་པ་ན། ཆོས་མ་ཡིན་པ་ལ་འདོད་ཆགས་ཀྱིས་ལྷག་པར་ཆགས་པ་དང་། ཡ་ང་བའི་ཆོས་ལ་ཆགས་པས་ཟིལ་གྱིས་ནོན་པ་དང་། ལོག་པའི་ཆོས་ཀྱིས་ཀུན་ནས་དཀྲིས་པར་འགྱུར་རོ། །ཞེས་གསུངས་པ་རྣམས་ནད་མཚོན་མུ་གེའི་བསྐལ་པ་འབྱུང་བའི་རྐྱེན་དུ་བཞག་པ་འདི་དག་གི་རྒྱུ་དང་ངོ་བོ་ལ་སྤྱོད་པ་དེང་སང་མང་སྟེ། འདོད་ཆགས་ཀྱིས་འདུལ་བ་སོ་ཐར་ལོག་པར་སྤྱོད་པ་ནི་དང་པོ་དེའོ། །ཞེ་སྡང་གིས་མདོ་སྡེ་བྱང་སེམས་ལོག་པར་སྤྱོད་པ་ནི་གཉིས་པའོ། །གཏི་མུག་གིས་གསང་སྔགས་མངོན་པ་ལོག་པར་སྤྱོད་པ་ནི་གསུམ་པ་དེ་ཡི་རྒྱུ་དང་ངོ་བོ་མ་ནོར་བར་འདུག་གོ །དེ་ལ་ལོག་སྤྱོད་དང་པོའི་དངོས་པོ་ནི། སངས་རྒྱས་བཅོམ་ལྡན་འདས་ཀྱིས་ཉེས་པ་དཔག་མེད་གཟིགས་ནས་མཆིལ་མའི་ཐལ་བ་བཞིན་སྤོང་བར་བགྱིས་ཤིང་། སངས་རྒྱས་ཀྱི་བསྟན་པ་ལ་ཤིན་ཏུ་སྨད་པར་གྱུར་པ་མུ་སྟེགས་གཞོན་ནུ་པའམ་དབང་ཕྱུག་པ་རྣམས་ཀྱིས་ཚངས་སྤྱོད་བརྟེན་པ་ན་བུད་མེད་ཀྱི་འཁྲིག་པའི་སྦྱོར་བ་བདུན་ཉམས་སུ་ལེན་པ་ལྟར། ཕོ་ལ་བརྟེན་ནས་ཀྱང་འཁྲིགས་པའི་སྦྱོར་བ་བདུན་པོ་འབྱུང་བར་ཁྱད་མེད་ལ། འཁོར་བའི་རྩ་བ་འདོད་ཆགས་ཆེས་ཆེར་འཕེལ་བྱེད་ཀྱི་འདྲ་བ་ཡིན་ཏེ། རིག་པའི་དབང་ཕྱུག་གིས་རྣམ་འགྲེལ་ལས། གཅིག་ལས་བྱུང་བའི་ཆགས་གང་ཡིན། །དེ་ཉིད་རྣམ་གྲངས་ཀྱིས་བསྐྱེད་ཚེ། །ཆགས་པ་ཀུན་གྱི་ས་བོན་ཡིན། །ཅེས་པས་སོ། །ཁུ་བ་དབྱུང་བས་འདོད་ཆགས་བྲལ་བར་འདོད་པ་ནི་མུ་སྟེགས་རྒྱང་འཕེན་པའི་ལུགས་ཡིན་པས་དེ་དགག་པ་དང་བཅས་པ་རྣམ་འགྲེལ་ལས་རྒྱ་ཆེར་འབྱུང་ངོ་། །སྐྱེས་པ་ལ་བརྟེན་པའི་ལོག་གཡེམ་ལ་ཐུགས་དམ་བྱེད་པའི་རབ་བྱུང་གི་གཟུགས་བརྙན་རྣམས་ལ་འདུལ་བའི་དྲི་ཙམ་ཡང་མེད་དེ་གཉེན་པོ་འདུལ་བའི་སྤང་བྱ་ལ་གནས་པའི་ཕྱིར་རོ། །དེ་ལ་ཚངས་སྤྱོད་མེད་དེ། འདུལ་བ་ལུང་རྣམ་འབྱེད་ལས། དགེ་སློང་གིས་སྐྱེས་པ་དང་། བུད་མེད། མ་ནིང་གསུམ་པོ་དང་ལྷན་ཅིག་མི་ཚངས་པར་སྤྱོད་པ། འཁྲིག་པའི་ཆོས་ལ་བརྟེན་ན་ཕམ་པར་འགྱུར་རོ། །ཞེས་གསུངས་སོ། །ཡང་སངས་རྒྱས་པའི་སྨད་བྱ་སྐྱ་བསེང་བུའི་ལུགས་དེ་ཡིན་ཏེ། སློབ་དཔོན་དཔའ་བོས། སྐྱ་བསེང་བུ་ནི་བརྗོད་བྱས་ན། །བསོད་ནམས་འགྱུར་ཞེས་སོ་སོར་སྨྲ། །གང་ཞིག་བགྲོད་མིན་བགྲོད་བྱེད་པ། །དེ་དག་ཁྱོད་ཀྱི་བསྟན་ལ་སྨད། །ཅེས་སོ། །དེས་ན་ཆོས་མ་ཡིན་པ་ཕོ་ལ་འཁྲིག་པ་སོགས་འཁྲིག་པའི་ཆོས་ལ་ཆགས་ག་ལ་རུང་། དེ་བཞིན་དུ་འདུལ་འཛིན་རྣམས་དགེ་སྦྱོང་དུ་བྱེད་པའི་ཆོས་གཤེ་ཡང་སླར་མི་གཤེ། མཚང་འབྲུ་ཡང་སླར་མི་འདྲུ་བ། ཁྲོས་ཀྱང་སླར་མི་ཁྲོ་བ། བརྡེགས་ཀྱང་སླར་མི་བརྡེགས་པ་སྟེ་བཞི་ལ་མི་གནས་པར་ཁོང་ཁྲོ་དང་འཁྲུགས་རྩོད་ལ་དགའ་ཞིང་དེ་ལ་ཆགས་པ་ཡ་ང་བ་ཆོས་ལ་ཆགས་པའོ། །འདོད་ཆགས་ཁོང་ཁྲོའི་ལས་རྣམས་སངས་རྒྱས་ཀྱི་ལུགས་ཡིན་པར་བསམ་ཞིང་སྨྲ་བ་ནི། ལོག་རྟོག་གཏི་མུག་གིས་ཆོས་ཀྱི་ཀུན་དཀྲིས་སོ། །ལོག་སྤྱོད་གཉིས་པ་ནི། བྱང་ཆུབ་སེམས་དཔའི་ལུགས་ལ། ཞེ་སྡང་ནི་རང་བཞིན་གྱི་སྡིག་པ་ཡིན་ཕྱིར་དང་། ཞེ་སྡང་སྐྱེ་ཚེ་སྙིང་རྗེ་སྐྱེ་མི་རུང་བས་ཞེ་སྡང་གི་སེམས་ལ་སྙིང་རྗེའི་ཐབས་ཀྱི་ཟིན་པར་བྱ་མི་རུང་བའི་ཕྱིར་དང་། གཞན་གནོད་པ་ལས་བཟློག་པའི་དོན་དུ་ཞེ་སྡང་ཞིག་བསྐྱེད་ནའང་། རང་རྒྱུད་ཀྱི་སྙིང་རྗེའི་དངོས་པོ་ཡོད་པའི་ནུས་པ་ཉམས་པར་བྱས་ཏེ་ཞེ་སྡང་གི་ཉེར་ལེན་སྟོབས་ཆེན་འཕེལ་བས་གཞན་དོན་ཆེན་པོ་འབྱུང་བའི་རྒྱུན་ལ་གནོད་པའི་ཕྱིར་ན། སེམས་ཅན་འགའ་ཞིག་ལ་ཕན་ཀྱང་ཞེ་སྡང་སྐད་ཅིག་ཙམ་ཡང་བསྐྱེད་མི་རུང་བར་གསུངས་ཏེ། བསླབ་བཏུས་ལས། ཞེ་སྡང་ནི་རང་བཞིན་གྱི་ཁ་ན་མ་ཐོ་བ་དང་བཅས་པའི་ཕྱིར། སྙིང་རྗེ་དང་བྲལ་བས་ན་ཐབས་ཉིད་མི་སྲིད་པའི་ཕྱིར་རོ། །གནོད་པ་ལ་བཟློག་པའི་ཕྱིར་ཁྲོས་ན་ཉེས་པ་ཡོད་དམ་ཞེ་ན། དེའི་བག་ཆགས་གསོས་པར་འགྱུར་བས་ན་སྙིང་རྗེ་ཉམས་པའི་ཉེས་པར་འགྱུར་རོ། །གལ་ཏེ་སེམས་ཅན་དེ་ལ་ཕན་དུ་ཟིན་ཀྱང་བྱང་ཆུབ་སེམས་དཔའ་སྙིང་རྗེ་ཉམས་པས་སེམས་ཅན་གྱི་དོན་ཆེན་པོའི་རྒྱུན་ཉམས་པར་འགྱུར་རོ། །ཞེས་གསུངས་ཀྱང་། བསྟན་པ་དང་སེམས་ཅན་གྱི་དོན་དུ་ཞེ་སྡང་གི་བྱ་བ་འཐབ་རྩོད་སོགས་བྱེད་པ་དགེ་བའི་ཆོས་ཡིན་པར་འདོད་ན་དེ་ལ་བྱང་སེམས་ཀྱ ི་ལམ་ཡོད་པ་ཕར་ཞོག །ཐར་པ་ཙམ་ཡང་མེད་དེ། མདོ་སྡུད་པ་ལས། སྡང་ཤིང་བཟོད་དང་བྲལ་ལ་ཐར་ལམ་ག་ལ་ཡོད། །ཅེས་གསུངས་སོ། །ཡ་ང་བའི་ཆོས་ཞེ་སྡང་ཁོང་ཁྲོ་དང་བཅས་པས་ཤི་བ་མཐོ་རིས་སོགས་སུ་སྐྱེ་བར་འདོད་པའི་ཆོས་དེ་མུ་སྟེགས་པའི་ལུགས་ཡིན་ཏེ། ཁྱད་པར་འཕགས་བསྟོད་ལས། ཁྲོས་པས་གཡུལ་ངོར་བསད་ན་ནི། །བདེ་འགྲོར་འགྱུར་ཞེས་རྒྱས་པ་ཟེར། །མགོན་པོ་ཁྱོད་ཀྱིས་གནས་སྐབས་དེའི། །སེམས་ནི་ངན་འགྲོ་ཡིན་ཅེས་གསུངས། །ཞེས་སོ། །ལོག་སྤྱོད་གསུམ་པ་ནི། རྒྱལ་བའི་དབང་པོ་ཀུན་མཁྱེན་ཆོས་རྗེའི་ཞལ་ནས། ས་ལེ་ཧྲིག་གེ་བར་མཚམས་ངོས་བཟུང་ནས། །དོན་མཐོང་འདོད་པས་དོན་མེད་ཕྱིན་ཅི་ལོག །སྐད་ཅིག་ཡུད་ཙམ་ངོས་བཟུང་འགྱུར་བའི་ཕྱིར། །སྔ་ཕྱི་བསྒོམ་གྱི་བར་དེར་སུ་ཡིས་བཅུག །དེ་འདྲའི་ལམ་ངན་མདོ་རྒྱུད་དང་འགལ་བ། །ཐར་ལམ་འདོད་པས་ནམ་ཡང་བསྟེན་མི་བྱ། །ཞེས་གསུངས་པ་བཞིན་གོ་ཡུལ་ཙམ་བྱུང་བ་ན་དེ་ལ་རྟག་ལྟ་དང་མངོན་པའི་ང་རྒྱལ་བསྐྱེད་ནས། མུ་སྟེགས་གྲངས་ཅན་པའི་སེར་སྐྱ་བའི་བདག་ཤེས་རིག་གི་སྐྱེས་བུའི་སྒོམ་དུ་སོང་ནས། སྔགས་ཀྱི་ལུགས་ལ་རྣམ་རྟོག་ཉོན་མོངས་སྤོང་མི་དགོས་པར་རང་དགར་བཞག་ཆོག་པར་འདོད་པའི་ལུགས་ནི་མི་སྟེགས་པ་སྟེ། ཁྱད་པར་འཕགས་བསྟོད་ལས། སེར་སྐྱ་ཡུལ་རྣམས་ལ་སྤྱོད་བཞིན། །ཡེ་ཤེས་འགྱུར་མཆི་སྡིག་བྲལ་བ། །ཁྱོད་ཀྱིས་ཀུན་ནས་ཉོན་མོངས་ལ། །ཐར་པ་ག་ལ་ཡོད་ཅེས་གསུངས། །ཞེས་གསུངས་སོ། །སེམས་ཅན་བསད་ནས་མཆོད་སྦྱིན་བྱེད་པ་སྔགས་ཀྱི་ལུགས་ཡིན་པར་འདོད་པ་ནི་སྔགས་ལུགས་ལྟ་ཞོག །སངས་རྒྱས་པའི་ཆོས་ཀྱི་ཕྱོགས་ཙམ་ཡང་མ་ཡིན་པར་འཇིག་རྟེན་ཀླ་ཀློའི་ལུགས་ཡིན་ཏེ། དེ་ཉིད་ལས། ལྷ་རྟེན་དང་ནི་མཆོད་སྦྱིན་ལ། །སེམས་ཅན་གསོད་པར་བྱེད་པ་གང་། །འཇིག་རྟེན་པ་ནི་ཆོས་སུ་འཚལ། །ཁྱོད་ཀྱི་བསྟན་ལ་དེ་སྨད་ལགས། །གང་ཞིག་སྲོག་ཆགས་ལ་རྟག་གནོད། །དེ་ལ་ཆོས་ཉིད་ག་ལ་ཡོད། །གཙོ་བོ་ཁྱོད་ཀྱིས་རང་ཉིད་ཀྱི། །སྲོག་གི་སེམས་ཅན་ལེགས་པར་བསྲུང་། །ཅེས་གསུངས་སོ། །ཁ་ཅིག་མ་རིག་སེམས་ཀྱི་རྒྱུན་སངས་རྒྱས་སུ་འགྱུར་ཞིང་སེམས་དང་རྫས་འགལ་བའི་ཡེ་ཤེས་གསང་སྔགས་ཀྱི་ལམ་གནད་དེ་ཐོག་མཐའ་ཀུན་ཏུ་ཡོད་པར་མི་འདོད་པར་ཆགས་སོགས་སྤང་བར་ཁས་ལེན་པའི་ལུགས་ནི་ཕྱི་རོལ་པའི་ལམ་ཡིན་ཏེ། དེ་ཉིད་ལས། ལྷ་ཆེན་གྱིས་ནི་འདོད་པ་དག །བསྲེགས་ཉེས་པས་ན་ཕྱིར་ཡང་དྲངས། །ཁྱོད་ཀྱི་ཡེ་ཤེས་ཞུགས་ཀྱིས་ནི། །འདོད་པ་རྩར་བཅས་བསྲེགས་ནས་བཏོན། །ཅེས་སོ། །ཡང་བདེ་བར་གཤེགས་པའི་མངོན་པ་དང་ཤེར་ཕྱིན་གཉིས་ལ་རྒྱབ་འགལ་བྱས་པ་མཐོང་བ་ཕྱིན་ཅི་ལོག་གི་གྲུབ་མཐའ། གང་ཞིག་ཡོད་པ་མི་མཐོང་མེད་མཐོང་བ། །དེ་འདྲའི་མུན་ནག་རྣམ་པ་དེ་གང་ཞིག །ཅེས་བྱམས་མགོན་གྱིས་ཀྱང་ཤིན་ཏུ་སྨད་པ་སྣང་བས་དགེ་སྡིག་ཡོད་མཐའ་བསལ་ནས་སྣང་བ་ལ་དགེ་སྡིག་མེད་པར་སོང་བ། སྟོང་པས་དགེ་སྡིག་མེད་མཐའ་བསལ་བས་སྟོང་པ་ལ་དགེ་སྡིག་མེད་པར་སོང་བའི་ལས་མ་བྱས་པ་དང་འཕྲད་ཅིང་། བྱས་པ་ཆུད་ཟོས་སུ་ཐལ་བའི་ལུགས་ཀྱང་གཏི་མུག་གི་གྲུབ་མཐའ་ཆེན་པོར་འགྱུར་བའོ། །དེ་ཡང་མི་དགེ་བའི་ལས་དང་ཉོན་མོངས་དུག་ལྔ་དང་སྡུག་བསྔལ་སྣ་ཚོགས་རང་གཞན་ལ་སྐྱེད་པའི་ཆོས་མིན་ཆོས་སུ་སྣང་བ་ལ་དང་བ་དང་། འདོད་པ་དང་། ཡིད་ཆེས་སྐྱེ་བ་ཐམས་ཅད་དད་པ་མ་ཡིན་པར་དད་པ་ཡིན་ནོ་སྙམ་པ་དང་བཅས་པ་ཐམས་ཅད་ནི། གང་བྱས་ལས་ཀུན་སྡིག་པར་སྒྱུར་བྱེད་ཀྱི་གཏི་མུག་ཡིན་ཏེ། མི་དགེ་བའི་ཕྱོགས་ཐམས་ཅད་དགེ་བ་ཡིན་པའི་བློ་སྐྱེ་བས་སོ། །དེ་འདྲའི་ལས་ངན་ལ་ཞེན་པས་དེའི་མི་མཐུན་ཕྱོགས་ཡང་དག་པའི་ལམ་རྣམས་ཡང་དག་མིན་ནོ་སྙམ་པའི་དགེ་རྩ་གཅོད་པའི་ལོག་ལྟ་མི་བཟད་པ་རྒྱུན་དུ་སྐྱེ་ཞིང་། ལམ་ངན་ལ་ཅི་ཙམ་འབད་ཀྱང་འདི་ཕྱི་ཀུན་ཏུ་རང་གཞན་ཕུང་བྱེད་ཀྱི་རྒྱུ་འབྲས་བཟོད་དཀའ་བ་སྐྱེད་པར་རྒྱལ་བ་སྲས་བཅས་ཀྱིས་གསུངས་པ་ཡིན་པས། ཐར་འདོད་རྣམས་ཀྱིས་སྡིག་པའི་ཆོས་ལ་ལེགས་པར་བརྟགས་ཤེས་དགོས་སོ། །གཉིས་པ་ལ། དམ་པའི་ཆོས་ཀྱི་སྒོར་ཞུགས་པའི་སྡིག་ཅན། མ་ཞུགས་པའི་སྡིག་ཅན་གཉིས་སུ་ཡོད་པ་ལས། དང་པོ་ལའང་གཉིས་ལས། འདུལ་བ་གཟུགས་བརྙན་དུ་སྒྱུར་མཁན་དང་། བྱང་སེམས་གཟུགས་བརྙན་དུ་བསྒྱུར་མཁན་གྱི་གང་ཟག་གོ། །དང་པོ་ནི། སྤྱིར་འདུལ་སྡོམ་ལེན་པ་ན་དག་པ་གསུམ་ལྡན་གྱིས་སྒྲུབ་དགོས་པར་གསུངས་མོད། བླངས་ཡུལ་རྒྱུད་དག་པ་མཁན་སློབ་སོགས་ཀྱི་རྒྱུད་ལ་ཕམ་ལྷག་ལྟ་ཞོག་ཉེས་བྱས་ཕྲ་མོས་ཀྱང་མ་གོས་པ་དགོས་རྒྱུ་ཡིན་པ་ལ། རྒྱུད་ལ་ལྷག་མ་སོགས་བྱུང་བཞིན་དུ་མཁན་སློབ་སོགས་ཀྱི་གཟུགས་བཟུང་ནས་གཞན་ལ་སྡོམ་པ་འབོག་པའི་སྡིག་པའི་སྙིང་སྐྲན་ཆེ་བ་དང་། ལས་མཁན་བརྗོད་པ་དག་པ་ལས་སློབ་མཁན་པོ་རྣམས་ཀྱི་ཚིག་གི་ཕྱེད་ཙམ་ལ་ལྷག་ཆད་སོང་ཀྱང་སྡོམ་པ་མི་སྐྱེ་བར་གསུངས་ཡང་བརྗོད་པ་མ་དག་པས་སྡོམ་པ་སྦྱིན་པ་དང་། ལེན་པ་པོ་བསམ་པ་དག་པ་སྐྱོ་ཤས་ངེས་འབྱུང་གི་བློ་ཡོད་དགོས་རྒྱུ་ལ། མི་སྐྱ་བོའི་བསམ་པ་ཅན་གཟུགས་སྒྱུར་བར་ལྷག་པ་སྟེ། བླངས་ཡུལ་མ་དག་པའི་རྐྱེན་གྱིས་ནི། ལེན་པ་པོ་རྒྱུ་བསམ་པ་མ་དག་པ་ཞིག་ཡིན་ན་ཤིན་ཏུ་མ་རུང་བ་ཞིག་ཏུ་འགྱུར་བའི་རྐྱེན་བྱེད་པ་དང་། ཅུང་ཟད་དག་པ་ཞིག་ཡིན་ན་མ་དག་པར་འགྱུར་བ་དང་། ཤིན་ཏུ་དག་པ་ཞིག་ཡིན་ཀྱང་དྲོད་གཤེར་མ་རུང་བའི་རྐྱེན་གྱིས་ལོ་ཏོག་བརླག་པར་བྱེད་པ་བཞིན་དུ་ངན་པར་འགྱུར་བའི་རྐྱེན་བྱེད་པ་ནི་ཀུན་རྫོབ་བསླུ་མེད་ཀྱི་བདེན་པའི་ཚུལ་སུས་ཀྱང་བརླག་མི་ནུས་པ་ཡིན་ན། རང་སྡིག་ལ་ཅི་མི་སྙམ་པའི་མཁན་སློབ་མི་གཙང་བས་རྙེད་བཀུར་གྲགས་འདོད་ཀྱིས་འདུལ་བའི་ལུགས་ལས་ལོགས་པར་འདུལ་བ་སྟོན་པས་ནི་རང་གི་བསོད་ནམས་ཆེན་པོ་ཉམས་ནས་སྡིག་པ་མང་པོ་རྒྱུད་ལ་བསགས་པར་བྱེད་དོ། མཛོད་འགྲེལ་ལས། གང་དག་ཆོས་ལོག་པར་འཆད་པ་དང་། སེམས་ཉོན་མོངས་ཅན་རྙེད་པ་དང་བཀུར་སྟི་དང་གྲགས་པ་འདོད་པས་འཆད་པ་ནི་བདག་ཉིད་ཀྱི་བསོད་ནམས་ཆེན་པོ་ཉམས་པར་བྱེད་དོ། །ཞེས་གསུངས་སོ། །ཡང་འདུལ་བ་ལ་གནས་པའི་ཚེ་ན་སངས་རྒྱས་ཀྱིས་འདུལ་ཁྲིམས་ཉིས་བརྒྱ་ལྔ་བཅུ་རྩ་གསུམ་གྲངས་སུ་བཅད་ནས་གསུངས་པ་རྣམས་ཅི་ཡང་མི་ཤེས། ཤེས་ཀྱང་དེ་ལ་མི་གནས་པར་བདུད་བཞིའི་དབང་དུ་གྱུར་པ་འཇིག་རྟེན་ཐ་མལ་པའི་སྐྱེ་བོ་བྱིས་པ་རྣམས་ཀྱི་མིག་སྔར་གང་མཛེས་ཚུལ་འཆོས་སྣ་ཚོགས་དང་། རང་རྒྱུད་ཀྱི་ཆགས་སྡང་སོགས་ཉོན་མོངས་པའི་བདུད་ཀྱི་སྣང་བ་ལ་འཐད་པ་སྡིག་ལྟུང་ཡིན་ཀྱང་འདུལ་བ་ཡིན་པའི་རློམས་སེམས་དང་ལོག་པའི་ང་རྒྱལ་ལ་གནས་པ་ནི། ལྗོན་ཤིང་གི་མདོ་ལས། ངུར་སྨྲིག་གྱོན་ནས་འདྲེ་ལ་བསྲུང་སྐྱོབ་ཞུ། །སྡོམ་པ་བླངས་ནས་བསླབ་བྱ་བདུད་དང་བསྟུན། །ཞེས་གསུངས་པ་བཞིན། བསླབ་བྱ་སངས་རྒྱས་ཀྱི་གསུངས་དང་མི་བསྟུན་པ་ནི། བསླབ་བྱ་བདུད་བསྟུན་གྱི་འདུལ་བ་ལོག་པ་ཡིན་ནོ། །བདེ་བར་གཤེགས་པའི་དྲང་སྲོང་གི་རྒྱལ་མཚན་ཆོས་གོས་གསུམ་དང་། ལྷུང་བཟེད་སོགས་རབ་བྱུང་གི་ཡོ་བྱད་རྣམས་བསླབ་པ་ཉམས་པའི་གང་ཟག་གིས་སྐད་ཅིག་ཙམ་འཆང་ནའང་། ཆོས་གོས་འབར་བ་ལྷུང་བཟེད་འབར་བར་འགྱུར། །ཅེས་འདུལ་བ་ལ་དགག་པ་ཡང་ཡང་གསུངས་ཀྱང་སྡོམ་པ་ཉམས་པ་རྣམས་ཀྱིས་འཆང་བ་ནི་ཤིན་ཏུ་མི་རུང་སྟེ། རྒྱལ་སྲས་ཆེན་པོ་ཞི་བ་ལྷ་ལྟ་བུ་ས་ཆེན་པོ་ལ་གནས་པའི་འཕགས་པས་ཀྱང་ཆང་གསོལ་བའི་ཚེ་ན་རྣལ་འབྱོར་པའི་ཆས་སུ་ཞུགས་ནས་བཞུགས་པ་ཡིན་ན་ཐ་མལ་བ་སུ་ཞིག་གི་སྡིག་པ་དང་ལྡན་བཞིན་ངུར་སྨྲིག་གྱོན་པ་སོགས་རུང་། དེ་བས་ན་འདུལ་བ་ལུང་ལས། གང་ཞིག་བསླབ་ལ་མི་གནས་པས། །བདེ་གཤེགས་རྒྱལ་མཚན་འཆང་བ་ལས། བསླབ་ལ་མི་གནས་སྐད་ཅིག་ལ། །གཟུགས་བོར་ཁྱིམ་པར་གནས་ན་བཟང་། །ཅེས་གསུངས་སོ། །སྡིག་སྲན་ཅན་ཁ་ཅིག་ན་རེ། སྔོན་དུས་བཟང་བའི་ཚེ་ན་འདུལ་ཁྲིམས་ཐམས་ཅད་བསྲུང་དགོས་ཀྱང་། དེང་སང་དུས་ངན་ཉོན་མོངས་ཆེ་བའི་ཚེ་ན་མ་བསྲུང་ཀྱང་གཟུགས་བརྙན་བཟུང་ན་ཉེས་པ་མེད་ཅིང་ཐམས་ཅད་བསྲུང་མི་དགོས་པ་རང་གིས་བསམ་ཞིང་གཞན་ལ་སྨྲ་བ་ནི་བདུད་ཚིག་མ་རུང་བ་ཡིན་ཏེ། ཁྱོད་ལྟར་ན་ལྟུང་བ་མི་ཤེས་པ་དང་། བསླབ་པ་ལ་མ་གུས་པ་དང་། ཉོན་མོངས་ཤིན་ཏུ་མང་བ་དང་། བླང་དོར་ཇི་བཞིན་བྱེད་མི་ནུས་པ་བག་མེད་པ་སྟེ་ལྟུང་བ་འབྱུང་བའི་སྒོ་བཞི་པོ་འདི་ཡང་ལྟུང་བ་མི་འབྱུང་བའི་སྒོ་རུ་འགྱུར་ཏེ། དུས་ངན་པས་མ་གུས་ཉོན་མོངས་སོགས་ཤིན་ཏུ་ཆེ་བས་སོ། །ཉོན་མོངས་ཆེ་བས་མང་པོ་བསྲུང་མི་དགོས་ལ། ཆུང་བས་བསྲུང་དགོས་ན་སངས་རྒྱས་ཀྱིས་བསླབ་པ་བཅས་པ་ཐམས་ཅད་མི་འཐད་དེ། བུད་མེད་ཉོན་མོངས་ཆེ་བས་དགེ་སློང་མ་ལ་ཕམ་པ་བརྒྱད་དང་། ཆུང་བ་དགེ་སློང་ཕ་ལ་ཕམ་པ་བཞི་ལས་མ་གསུངས་བས་སོ། །དེའི་ཕྱིར་ཉོན་མོངས་སོགས་ཆེ་བ་རྣམས་ཀྱིས་ནི་དགེ་སློང་ཕ་ཡིན་ཀྱང་སྔོན་གྱི་ཚེ་བས་ལྷག་པར་བསྲུང་དགོས་པར་ཤིན་ཏུ་གསལ་བས་ན། རང་གིས་མི་བསྲུང་བའི་སྡིག་པའི་ཁར་གཞན་རྣམས་ཀྱང་ལོག་པར་སྦྱར་ནས་སྐྱོན་ཅན་བྱེད་པའི་ཐར་མེད་ཀྱི་སྡིག་པ་མང་པོ་མ་བསགས་ན་དགའ་འམ་སྙམ་མོ། །ཡང་ཕྱི་རོལ་མུ་སྟེགས་རྣམས་སྡིག་པ་ཐམས་ཅད་མི་སྤང་བས་ཚུལ་ཁྲིམས་ཙམ་ཡོད་ཀྱང་སོ་ཐར་མེད་པར་གསུངས་འདུག་ན། །ཁྱོད་ལྟར་ན་སྡིག་པ་ཁ་ཅིག་སྤང་བས་དེ་ལ་འདུལ་བ་ཡོད་པར་འགྱུར་རོ། །ལར་བདེ་བར་གཤེགས་པའི་གསུང་གིས་བཀས་བཅད་དེ་གསུངས་པའི་ཚིག་གཅིག་ཀྱང་ཡལ་བར་དོར་ནས་འདའ་མི་རུང་སྟེ། ཡུལ་གྱི་གནས་ཚུལ་ལ་རྒྱུ་ངོ་བོ་འབྲས་བུའི་ཚུལ་དུ་ངེས་པར་གནས་པ་དེ་མངོན་པར་མཁྱེན་ནས་སྒྲོ་སྐུར་མེད་པར་གསུངས་པ་ཡིན་གྱི། ཡུལ་ལ་མེད་པ་ཞིག་ནི་བཅས་ཁྲིམས་མི་མཛད་པས་ན་བཅས་པའི་ཁ་ན་མ་ཐོ་བ་རྣམས་ཀྱང་ལྟུང་བ་དངོས་ཀྱི་རྒྱུ་ཡིན་པ་གཟིགས་ནས་བཅས་པ་ཡིན་ཏེ། སློབ་དཔོན་ཆོས་ཀྱི་ཚོང་དཔོན་གྱི་ཞལ་ནས། འདི་ན་ལ་ལས་རྒྱལ་པོའི་ཚིག་ཆེན་དག །ལན་འགར་འདས་ཀྱང་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདས་བྱས་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་གསུངས་པ་སྔོན་སངས་རྒྱས་འོད་སྲུང་གི་རྗེས་སུ་ཞུགས་པའི་དགེ་སློང་ཞིག་གི་ཆོས་གོས་ཤིང་ལ་ཐོགས་པ་ན་ཤིང་གི་ཡལ་ག་ཞིག་བཅད་པས་ལྟུང་བྱེད་དེའི་རྣམ་སྨིན་གྱིས་ཀླུ་ཨེ་ལའི་འདབ་མ་ཅན་ཞེས་ད་ལྟའང་ཡོད་པ་ནི་མགོ་བདུན་ལ་ཤིང་སྡོང་ཆེན་པོ་བདུན་སྐྱེ་བ་དེ་རླུང་གིས་བསྒུལ་བའི་ཚེ་ནའང་སྐད་ངན་འབྱིན་པའི་སྡུག་བསྔལ་ཅན་དེ་ཡིན་ནོ། །དོན་ཡུལ་ན་མེད་བཞིན་དུ་གསུངས་པ་ཁོ་ནས་ཉེས་པ་བསྐྱེད་ན་ནི་ཉེས་མེད་ལས་བསྐྱེད་པ་ཡིན་པས་དེ་འདྲ་དེ་ནི་ཤིན་ཏུའང་མི་བཟང་ངོ་། །དེ་བས་ན་སངས་རྒྱས་ཀྱི་གསུང་ནི་བདེན་པ་ཁོ་ནའི་ཚིག་ཡིན་པས། དེ་ལ་སྨན་པའམ་འདས་ན་ཉེས་པ་ཆེན་པོ་འབྱུང་བ་ནི། དཔེར་ན་འཇིག་རྟེན་དུའང་བསམ་ཡོད་བདེན་པའི་ངག་མ་ཉན་པས་ཉེས་པ་བྱུང་བ་མངོན་དུ་སྣང་བ་བཞིན་ནོ། །དེ་ལྟ་ན་མུ་བཞི་ལས། སངས་རྒྱས་ཀྱི་འདུལ་ཁྲིམས་མི་ཤེས་ཤིང་དེ་ལ་མི་གནས་བཞིན་འདུལ་བ་པ་ཡིན་རློམས་ཀྱིས་གཟུགས་བརྙན་ལ་ཞུགས་པ་རྣམས་ནི་འདུལ་རྫུ་ཞེས་པ་ཡིན་ལ། གཟུགས་བརྙན་ལ་ཞུགས་པ། དེའི་ཁར་སྡིག་པ་ཕལ་ཆེར་ཀྱང་འདུལ་བའི་ལུགས་ཡིན་ཞེས་སྟོན་པར་བྱེད་པ་དེ་དག་ནི་བདུད་ཀྱིས་བརླམ་པ་ཡིན་པས་འདུལ་ལོག་ཅེས་བྱའོ། །དགེ་འདུན་ཚོགས་པས་བག་ཡངས་སུ་བྱས་པ་ཞེས་གསུངས་པ་ནི་རྒྱུན་ཞུགས་ཡན་ཆད་ཀྱི་འཕགས་པའི་གང་ཟག་ཚོགས་པས་བཅས་པ་འགའ་ཞིག་བག་ཡངས་སུ་གནང་ཆོག་པ་ཡིན་གྱི། འདོད་ཆུང་ཆོག་ཤེས་ཀྱི་ཡན་ལག་སྦྱང་ཡོན་བཅུ་གཉིས་ལ་མི་གནས་པར་འདོད་ཆེན་ཆོག་མི་ཤེས་པ། དགེ་སྦྱོང་གི་ཆོས་བཞི་དང་བྲལ་བ། ཅི་བྱས་ཆོས་དང་འགལ་བ་རབ་བྱུང་གི་གཟུགས་བརྙན་རྣམས་ནི་མདོ་ལས། སྣལ་མ་སེར་པོ་ལ་ཐར་ལམ་ག་ལ་ཡོད། མགོ་རེགས་བྱས་པ་ལ་ཐར་ལམ་ག་ལ་ཡོད། ཅེས་གསུངས་པ་སོགས་སྟོན་པ་སངས་རྒྱས་ཀྱིས་ཡང་ཡང་སྨད་པའི་གང་ཟག་ལ་དགེ་འདུན་གྱི་སྒྲ་ཡང་མི་འཇུག་ན། དེ་དག་གི་རང་བཟོས་བཞག་པ་ཐམས་ཅད་ཡངས་པ་ཅན་གྱི་དགེ་སློང་མང་པོས་བྱས་པ་མི་རུང་བའ་ིགཞི་བཅུ་ཞེས་རྒྱ་གར་འཕགས་ཡུལ་གྱི་འདུལ་འཛིན་རྣམས་ཀྱིས་ཚར་གཅོད་མཛད་པའི་ཕྱོགས་ཁོ་ནར་འགྱུར་རོ། །འཕགས་པ་ཐོགས་མེད་ཀྱིས་ས་སྡེ་ལས་འདུལ་ལོག་འབྱུང་བར་གསུངས་པ་ནི་ཤིན་ཏུ་མང་བས་བདག་ལེགས་སུ་འདོད་པ་རྣམས་ཀྱིས་བརྟག་པར་བྱ་དགོས་སོ། །གཉིས་པ་བྱང་ཆུབ་ཀྱི་སེམས་དང་དེའི་བསླབ་པ་རྣམས་མི་ཤེས་པ་དང་། ཤེས་ཀྱང་རྒྱུད་ལ་མི་སྦྱར་བར་ང་རྒྱལ་གྱིས་བྱང་སེམས་ཡིན་པར་རློམ་པ་བྱང་རྫུ་ཡིན། གཞན་གྱིས་སྡིག་པ་བྱེད་པ་མཐོང་ན་ཉེས་དམིགས་སྨྲ་བ་སོགས་ཀྱིས་བཟློག་པ་ལ་མི་བརྩོན་པར། དེའི་སེམས་དང་འཐད་པར་སྨྲ་ཞིང་བྱམས་པར་བྱེད་པའི་སྙིང་རྗེ་ཕྱིན་ཅི་ལོག་ཅན་དང་། ཡང་དཔེར་ན་དེད་དཔོན་སྙིང་རྗེ་ཆེན་པོས་ཚོང་པ་ལྔ་བརྒྱའི་སྲོག་ཐར་པའི་ཕྱིར་དང་། མི་ནག་མདུང་ཐུང་ཅན་སྡིག་པ་མི་འབྱུང་བའི་ཕྱིར་མདུང་ཐུང་ཅན་སྙིང་རྗེ་ཁོ་ནའི་སེམས་ཀྱིས་རང་འདོད་མེད་པར་བསད་པ་ན། སྙིང་རྗེའི་དབང་གིས་ཚོགས་མང་པོ་ཞིག་རྫོགས་ཀྱང་དེ་ལ་གསོད་པའི་སྦྱོར་བ་སྡིག་པ་དེ་ཡི་རྣམ་སྨིན་བྱང་ཆུབ་སེམས་དཔའི་ཚེ་ན་སྡུག་བསྔལ་མང་དུ་མྱོང་ཞིང་། སངས་རྒྱས་པ་ནའང་ཞབས་ལ་སེང་ལྡེང་གི་ཚལ་པ་ཟུག་པ་ལྟ་བུ་དགེ་སྡིག་གི་འབྲས་བུ་དེ་མ་འདྲེས་པར་སོ་སོར་སྨིན་པ་ལས་སྡིག་པ་དགེ་བར་འགྱུར་གཏན་ནས་མི་རུང་ཀྱང་། བླུན་པོ་མི་ཤེས་པ་ང་རྒྱལ་ཅན་རྣམས་ཀྱིས་སེམས་ཅན་བསད་ནས་མཆོད་སྦྱིན་བྱེད་པ་སོགས་སྡིག་པ་ཕལ་ཆེར་བྱང་ཆུབ་སེམས་དཔའ་ལ་དགེ་བར་འགྱུར་སྙམ་པ་ནི་ཤིན་ཏུ་མི་རུང་བ་སྟེ། ཁྱད་པར་འཕགས་བསྟོད་ལས། གཞན་དག་རང་གི་དོན་གྱི་ཕྱིར། །གཞན་གྱི་སྲོག་གིས་སྦྱིན་སྲེག་བྱེད། །ཁྱོད་ཀྱིས་གཞན་གྱི་དོན་གྱི་ཕྱིར། །རང་གི་སྲོག་གིས་སྦྱིན་སྲེག་མཛད། །ཅེས་གསུངས་པ་ལྟར་བྱང་ཆུབ་སེམས་དཔའ་ཡིན་ན་རང་གི་ཤ་ཁྲག་སེམས་ཅན་ལ་སྦྱིན་རིགས་པ་དང་ལྷ་མཆོད་རིགས་ཤིང་། ཀུན་མཁྱེན་རོང་ཟོམ་པས། སྡིགས་མཛུབ་གཏད་པའམ། མཚོན་ཕྱར་བའམ། ཡིད་གཏད་པ་ཙམ་གྱིས་རྣམ་ཤེས་སྤར་ནས་འཆི་བར་བྱེད་ནུས་ན་མ་གཏོགས་དུད་འགྲོ་བསད་ན་འདྲེན་མི་ནུས་སོ་གསུངས་པས། དེ་འདྲའི་ཡོན་ཏན་མེད་པར་སེམས་ཅན་གསོད་པ་ཤན་པ་དང་འདྲའོ། །དེ་འདྲའི་སྐྱེ་བོ་གཏི་མུག་ཅན་རྣམས་ཀྱི་ཉེ་འཁོར་བཅས་པ་ཚེ་འདིར་ཡང་བཀྲ་མི་ཤིས་པ་བྱུང་བ་མངོན་སུམ་དུ་མཐོང་བའོ། །དེ་བཞིན་དུ་ཆོས་དང་འཇིག་རྟེན་གྱི་དབང་དུ་བྱས་ནས་ལོག་གཡེམ་དང་འཁྲུགས་རྩོད་སློང་བ་སོགས་སྡིག་པའི་མིག་ལྟོས་ངན་པ་འཇོག་པའི་གང་ཟག་སྔར་བྱུང་བ་ལྟ་བུ་རྣམས་གོ་ས་མཐོ་ཞིང་མདོ་སྔགས་ཀྱི་ལམ་ལ་སྦྱང་བ་དང་ལྡན་ཀྱང་བདུད་ཀྱིས་བརླམ་པ་ཡིན་པས་བྱང་སེམས་ལོག་པ་ཞེས་བྱའོ། །གཞན་ཡང་སྤྲུལ་སྐུ་ཞེས་བྱིས་པ་ལ་མིང་བཏགས་བྱེད་པའི་སྲོལ་འདི་རྒྱ་གར་དུ་སྔོན་མ་གྲགས་ཤིང་། བོད་ནས་ཀྱང་ཀུན་མཁྱེན་ཆོས་རྗེ་བཞུགས་སྐབས་ཡན་ཆད་དུ་དང་པོ་སྐྱེ་བའི་ཚེ་ན་རྟགས་བྱུང་མ་བྱུང་ཇི་ལྟར་ཡིན་ཀྱང་སྤྲུལ་སྐུར་མིང་བཏགས་སྲོལ་མེད་པར་འདུག་སྟེ། བླ་མའི་གཟུགས་ལ་དགག་པ་མཛད་ཀྱང་སྤྲུལ་སྐུ་ལ་དགག་པ་མ་བྱུང་བས་སོ། །འོན་ཀྱང་ཕྱིས་སུ་བོད་འགའ་ཞིག་གིས་བཏགས་པ་ཡིན་ཅིང་། དེའི་རྒྱུན་ཆེར་འཕེལ་ནས། རང་གར་འགྲོ་ཇི་ལྟར་ཡིན་མ་ཤེས་པའི་བླུན་པོ་རྣམས་ཀྱིས་འཁྲུལ་སྣང་གི་རྨི་ལམ་སོགས་ལ་ཚད་བཞག་ནས་རང་ངན་སོང་དུ་འགྲོ་བའི་སྡིག་པ་ཆེན་པོ་བསགས་པའི་རྒྱུ་གཞན་ལ་སྤྲུལ་སྐུའི་མིང་འདོགས་བྱེད་པ་དྲན་ནའང་། སྤྲུལ་སྐུ་དེས་དཀོར་ནག་པོ་མི་བཟད་པ་ཟོས་གྲངས་ཀྱི་སྡིག་པ་མང་པོ་དང་། དེ་མི་ཚངས་སྤྱོད་སོགས་སྡིག་པ་བྱེད་མཁན་དུ་བྱུང་ན་དེའི་སྡིག་པ་གང་བྱས་ཐམས་ཅད་སྤྲུལ་སྐུའི་མིང་བཏགས་བྱེད་མཁན་དེ་ལ་ཐོབ་པར་འགྱུར་བ་ནི། དཔེར་ན་མཚོན་ཆ་མགར་མཁན་གྱིས་མཚོན་གཞན་ལ་བྱིན་པ་ན་དོན་གྱི་དངོས་པོ་མཚོན་དེས་སྡིག་པ་གང་བྱས་ཐམས་ཅད། བར་མའི་མི་དགེ་བའི་རང་བཞིན་དུ་མགར་བ་ལ་ཐོབ་པ་དང་འདྲའོ། །དེ་ལ་ལུང་རྟོགས་ཀྱི་ཡོན་ཏན་མེད་ཅིང་དགེ་བ་ལ་བརྩོན་མི་ནུས་པ་ཞིག་ཡིན་ན་སྤྲུལ་རྫུའོ། །སྡིག་པ་བྱེད་མཁན་ཞིག་ཡིན་ན་སྤྲུལ་ལོག་ཅེས་བྱའོ། །ཡང་གྲྭ་བ་ལ་ཡོད་དགོས་རྒྱུའི་ལུང་རྟོགས་ཀྱི་ཡོན་ཏན་ཅུང་ཟད་ཙམ་མི་ལྡན་པར་གཞན་གྱི་གོ་སར་བཞག་པའམ་རང་གིས་བྱས་པའི་བླ་མའི་མིང་འདོགས་ལྡན་པ་རྣམས་ནི་བླ་རྫུ་ཡིན་ཏེ། བླ་ན་མ་མཆིས་པའི་ཡོན་ཏན་གྱི་ཆ་ཤས་ཀྱང་མེད་པའི་ཕྱིར་རོ། །དེ་འདྲའི་གང་ཟག་འཇིག་རྟེན་ཆོས་བརྒྱད་དང་སྡིག་སྤྱོད་ལྡན་པ་ཞིག་ཡིན་ན་བླ་ལོག་ཅེས་བྱའོ། །སྟོང་པའི་གོ་ཡུལ་ཙམ་གྱིས་འཕགས་པའི་གང་ཟག་ཡིན་སྙམ་གྱི་མངོན་པའི་ང་རྒྱལ་སྐྱེ་བ་རྣམས་ནི་གྲུབ་རྫུ་ཞེས་བྱའོ། །དེ་འདྲའི་གང་ཟག་གིས་དགེ་སྡིག་འདྲེས་མར་སྤྱད་པ་འབྱུང་པོའི་ཆོས་ལུགས་སམ། སྡིག་པ་ལ་གཙོ་ཆེར་སྤྱོད་ཅིང་མངོན་ཤེས་རྫུ་འཕྲུལ་ཆལ་ཆོལ་ཡོད་པར་རང་གཞན་ཀུན་ལོག་པར་སྦྱོར་བ་ནི་གྲུབ་ལོག་ཅེས་བྱ་སྟེ་བདུད་ཀྱིས་བརླམས་པའོ། །གོ་ཡུལ་གྱི་སྣང་བ་ཙམ་གྱིས་དངོས་སམ་རྨི་ལམ་དུ་ལྷ་མཐོང་སོགས་རྣམ་རྟོག་གི་བག་ཆགས་ཤར་བ་ཙམ་མམ། སྔོན་གྱི་གཏེར་ཆོས་རྣམས་དང་འདྲ་བ་རང་བཟོས་བྱས་ནས་སྒྲུབ་ཐབས་སྣ་ཚོགས་བྱེད་ཅིང་གཏེར་སྟོན་དུ་བཅོས་པ་རྣམས་ནི་གཏེར་རྫུའོ། །གོ་ཡུལ་ཙམ་གྱིས་ང་རྒྱལ་སྐྱེས་ནས་རང་རྒྱུད་ཀྱི་ཉོན་མོངས་དུག་ལྔ་རང་གར་ཤོར་བའི་རྒྱུ་དང་འབྲེལ་བུད་མེད་སྤྱོད་པ་སོགས་སྡིག་སྤྱོད་ལ་བརྟེན་བཅས་པའི་རྐྱེན་ཅན། དེ་ལྟ་བུའི་རྟེན་འབྲེལ་ལོག་པ་ལས་བྱུང་བའི་གང་ཟག་སྡིག་ཅན་བདུད་ལས་ལ་ཞུགས་པ་རྣམས་གཏེར་སྟོན་ལྟར་སྣང་བ་ནི་གཏེར་ལོག་ཅེས་བྱ་སྟེ། དེ་དག་གི་གཏེར་ཆོས་བཅས་པ་ནི་རང་གཞན་ཀུན་ལ་བཀྲ་མི་ཤིས་པ་ཡིན་ཅེས་གྲུབ་ཐོབ་ཀརྨ་ཆགས་མེད་ཀྱིས་གསུངས་པ་ལྟར་རོ། །མི་ནག་ཁྱིམ་པ་སྐྱ་བོའི་བསམ་ངན་སྤུ་མ་བརྗེ་མདོག་མ་བསྒྱུར་བར་འཇིག་རྟེན་ཆོས་བརྒྱད་ཀྱི་བློས་གྲྭ་པའི་གཟུགས་བརྙན་དུ་ཞུགས་པ་རྣམས་ནི་གྲྭ་རྫུའོ། །བཅོམ་ལྡན་འདས་ཀྱིས་གཞན་ལ་གནོད་འཚེ་བྱེད་པ་དགེ་སྦྱོང་མ་ཡིན་པར་གསུངས་པ་དང་། སྲོག་གཅོད་སོགས་སྡིག་པ་འདི་དང་འདི་ལྟ་བུ་བྱེད་པ་རྣམས་ཀྱི་སྟོན་པ་ང་མིན་ལ། དེ་དག་ངའི་རྗེས་འཇུག་མིན་ཅེས་གསུང་ཡང་ཡང་གནང་ཀྱང་མི་རུང་བའི་སྡིག་པ་ཐམས་ཅད་ལ་རྟག་ཏུ་སྤྱད་བཞིན་དུ། ངེད་ཚོ་གྲྭ་པ་ཡིན་ནོ་སྙམ་པའི་གཏི་མུག་དང་ལོག་པའི་ང་རྒྱལ་བྱེད་ཅིང་། ངེད་ཚོ་གྲྭ་པ་ཡིན་ནོ་ཞེས་ཁ་ནས་སྨྲ་བའི་རྫུན་དང་སངས་རྒྱས་ཀྱི་ན་བཟའ་གྱོན་ནས་གྲྭ་པ་ཡིན་མདོག་བྱེད་པའི་ལུས་ཀྱི་བརྡས་རྫུན་བྱེད་པའི་སྡིག་པ་ལ་རྟག་ཏུ་ཞུགས་པ་རྣམས་ནི་གྲྭ་པ་ལོག་པ་ཞེས་བྱ་སྟེ་མི་ནག་སྐྱ་བོའི་བསམ་ངན་དེ་དགུ་འགྱུར་དུ་བདུད་ཀྱི་སྟོབས་ཀྱིས་ཆེར་སོང་བ་རྣམས་སངས་རྒྱས་ཀྱི་ན་བཟའ་ལ་ལོངས་སྤྱོད་པའི་དབང་གིས་ལྷ་དང་བཅས་པའི་འཇིག་རྟེན་གྱི་ཕྱག་འཚལ་བའི་གནས་སངས་རྒྱས་ཀྱི་ན་བཟའ་རྣམ་ལའང་ཁྱིམ་པ་རྣམས་ཀྱིས་ཅི་མི་སྙམ་ཞིང་དད་གུས་མེད་པར་འགྱུར་བས་སོ། །མདོར་ན་སྐྱོན་དེ་རྣམས་ནི་བདུད་བཞི་ལས་བྱུང་བ་ཡིན་པའང་། དགེ་བ་ལ་བསླུ་བའི་བདུད་ཀྱིས་མངོན་པའི་ང་རྒྱལ་བསྐྱེད་པ་དང་། ཐབས་དང་སྐྱབས་ལ་བསླུ་བའི་བདུད་ཀྱིས་རྒྱུ་འབྲས་ཁྱད་དུ་གསོད་པ་དང་། ཐེག་ཆེན་ངེས་པར་འབྱུང་བ་ལ་བསླུ་བའི་བདུད་ཀྱིས་སྐལ་མེད་ཐེག་ཆེན་ལ་སྤྱོད་པའམ་སྐལ་ལྡན་ཐེག་དམན་ལ་སྦྱོར་བ་སྟེ། ཚུལ་དེ་དག་གིས་རང་གཞན་ངན་སོང་དུ་འཕེན་པ་ནི། ཁྱད་པར་དུ་བྱང་ཕྱོགས་བོད་ཡུལ་འདིར་ཆོས་སྒོར་ཞུགས་པའི་རབ་བྱུང་ཕལ་མོ་ཆེ་ལ་འབྱུང་ངེས་པར་སངས་རྒྱས་ཀྱིས་ལུང་བསྟན་གསལ་བར་མཛད་དེ། སྙིང་རྗེ་ཆེན་པོ་པདྨ་དཀར་པོའི་མདོ་ལས། བྱང་ཕྱོགས་ཕོ་བྲང་རྒྱས་ལྡན་དུ་བྲམ་ཟེ་དང་ཁྱིམ་པ་བསྟན་པ་ལ་དད་པ་མང་པོ་འབྱུང་སྟེ་ཤི་ནས་དགའ་ལྡན་དུ་སྐྱེ་ལ། རབ་ཏུ་བྱུང་བ་ཕལ་ཆེར་ཆོས་བཞིན་མི་སྤྱོད་པས་ལོག་པར་ལྟུང་ངོ་། །ཞེས་གསུངས་པས་ན་རང་རང་གི་ཚུལ་སངས་རྒྱས་ཆོས་དང་མཐུན་མི་མཐུན་ཅི་ནས་བརྟགས་ཏེ་ཡོན་ཏན་ཕྲ་མོ་རེ་ལ་རློམ་སེམས་དང་ང་རྒྱལ་གྱི་བསམ་སྦྱོར་ཐམས་ཅད་སྤོང་དགོས་པར་སྣང་ངོ་། །ཆོས་སྒོར་མ་ཞུགས་པའི་སྡིག་ཅན་ནི། མངོན་པ་གོང་མ་ལས་ཀྱང་འབྱུང་ལ། དེ་བཞིན་སློབ་དཔོན་དབྱིག་གཉེན་གྱི་མཛོད་འགྲེལ་ལས། འདི་དག་ནི་སྡོམ་པ་མ་ཡིན་པ་ཅན་ཡིན་ཏེ། འདི་ལྟ་སྟེ། ཤན་པ་རྣམས་དང་། བྱ་གག་གསོད་པ་རྣམས་དང་། ཕག་གསོད་པ་རྣམས་དང་། བྱ་པ་རྣམས་དང་། ཉ་པ་རྣམས་དང་། རི་དྭགས་འཆོར་བ་རྣམས་དང་། ཆོམ་རྐུན་པ་རྣམས་དང་། གཤེད་མ་རྣམས་དང་། བཙོན་རྫི་རྣམས་དང་། གླང་པོ་ཆེ་འཆོར་བ་རྣམས་དང་། ཁྱི་འཆོར་བ་རྣམས་དང་། བ་ཀུ་རི་འཆོར་བ་རྣམས་སོ། རྒྱལ་པོ་དང་། བློན་པོ་དང་། ཤགས་ཟིན་པོ་རྣམས་ཀྱང་དོན་གྱིས་ན་སྡོམ་པ་མ་ཡིན་ནོ། །ཞེས་གསུངས་པ་སྟེ། སྡོམ་མིན་ལ་གནས་པ་ཡིན་ན་ནི་རྒྱུད་ལ་ཉིན་མཚན་རྟག་ཏུ་མི་དགེ་སྡིག་པ་འཕེལ་ཞིང་འབྱུང་བ་ཡིན་པས་ན་དེ་ནི་ཤིན་ཏུ་མ་རུང་བའི་སྡིག་ཅན་ནོ། །གཉིས་པ་གཞན་སྡེ་ཕྱི་རོལ་མུ་སྟེགས་པ་སྡིག་ཅན་ནི། ལྟ་བ་རྟག་ཆད་དུ་སོང་ཞིང་། སྤྱོད་པ་རང་གཞན་ལ་འཚེ་བ་སྟོན་པ་སྡིག་པའི་ཆོས་ཡིན་ལ། དེ་ཉམས་སུ་ལེན་པ་རྣམས་སྡིག་པ་ཅན་གྱི་གང་ཟག་ཡིན་མོད། མུ་སྟེགས་རང་རྒྱུད་པའི་གྲུབ་མཐའ་དངོས་སོ་ཁས་ལེན་མཁན་ནི་བོད་འདི་ན་སློབ་དཔོན་སངས་རྒྱས་གཉིས་པའི་བཀའ་དྲིན་གྱིས་མེད་དེ། འཇམ་དབྱངས་ས་པཎ་གྱིས་སྡོམ་གསུམ་རབ་དབྱེར་མཁན་ཆེན་ཞི་བ་འཚོས་རྒྱལ་པོ་ཁྲི་སྲོང་ལྡེའུ་བཙན་ལ་གསུངས་པ་བཀོད་པ། རྒྱལ་པོ་ཁྱོད་ཀྱི་བོད་ཡུལ་འདི། །སློབ་དཔོན་པདྨ་འབྱུང་གནས་ཀྱིས། །བསྟན་མ་བཅུ་གཉིས་ལ་གཏད་པས། །མུ་སྟེགས་དངོས་ནི་མི་འབྱུང་ཀྱང་། །ཞེས་བཀའ་ཆེམས་གནང་བ་བཞིན་ཡིན་ལ། རྒྱ་གར་ན་ནི་མང་ངོ་། །དེ་དག་ཚུལ་ཇི་ལྟར་དགག་པ་ནི། དེ་ལྟར་ཆོས་མིན་སྡིག་པའི་ཆོས་ལ་སྤྱོད་པ་ཅན་གྱི་གང་ཟག་དེ་དག་དང་ཡིད་མཐུན་པ་བྱེད་པས་འགྲོགས་པ་ནི་སྐད་ཅིག་མ་ཙམ་ཡང་རུང་བ་མིན་ཏེ། དེ་དག་ལ་དགའ་བའི་སེམས་སྐད་ཅིག་མ་ཞིག་སྐྱེས་ཀྱང་། སྡིག་པ་བྱེད་ཚུལ་བཞི་ལས་ཡི་རང་གི་སྟོབས་ཀྱིས་འདྲ་བར་སྡིག་པ་ཐོབ་ནས་སྡོམ་པ་གཏོང་བ་ཡིན་པ་དང་། དེ་དང་ཉིན་གཅིག་ཙམ་ལྷན་ཅིག་འགྲོགས་ན་ཡང་དོན་མཐུན་པར་ཞུགས་པའི་སྟོབས་ཀྱིས་སྡིག་པ་ཐོབ་པས་སོ། །དེ་བས་ན་དེ་དག་ཐག་རིང་ན་ཡོད་ཀྱང་ཡིད་དགའ་བ་སྐྱེད་པས་འགྲོགས་པ་དང་ཉེ་བ་ན་ཡོད་ན་ལུས་དང་འགྲོགས་པར་མི་བྱ་བས་སྤང་དགོས་ཤིང་། སྤྱིར་སྡིག་པ་དང་སྡུག་བསྔལ་ཅན་གྱི་གང་ཟག་ཉིད་དུ་ནི་སངས་རྒྱས་དང་སེམས་ཅན་སུ་སྣང་ཡང་དེ་ལ་ཡིད་སྐྱོ་ཤས་དང་སྙིང་རྗེ་དྲག་པོ་བསྐྱེད་དགོས་ཀྱི། དེ་ལ་དག་སྣང་ལྟ་བུ་སྦྱང་ན་ནི་གཏི་མུག་དང་གནོད་སེམས་ཡིན་པས་སྡིག་པ་དཔག་མེད་ཐོབ་ཀྱིས་དགེ་བའི་ཕྱོགས་ཙམ་དུ་ཡང་མི་འགྱུར་རོ། །སངས་རྒྱས་བྱང་སེམས་ཡིན་ཀྱང་སྡིག་པ་ཡོད་པར་སྣང་ན་དེ་ལ་སྨན་ཅིང་སྐྱོ་ཤས་དྲག་པོ་བྱས་ན་རང་སྡིག་སྲབ་ནས་དེ་དག་གི་ཞལ་མཐོང་བ་སོགས་ཀྱི་གྲོགས་སུ་འགྱུར་ཏེ། དཔེར་ན་ལི་ཡུལ་གྱི་དགེ་ཚུལ་གཉིས་ཀྱིས་བོད་ན་སྤྱན་རས་གཟིགས་ཡོད་པར་ཐོས་ནས་མཇལ་དུ་འོང་བ་ན། ཆོས་རྒྱལ་སྲོང་བཙན་སྒམ་པོས་བོད་རྣམས་འདུལ་བའི་ཕྱིར་རང་ཉིད་ཀྱིས་སྤྲུལ་པའི་རྐུན་ཇག་སོགས་སྡིག་པ་བྱེད་པ་མང་པོའི་མགོ་གཅོད་པ་སོགས་ཁྲིམས་ངན་པ་བྱེད་པ་སྟོན་བཞིན་བཞུགས་པ་དགེ་ཚུལ་གཉིས་ཀྱི་མཐོང་ཚེ་སྐྱོ་ཤས་སྙིང་རྗེ་དང་བཅས་ཕྱིར་འབྲོས་པ་བརྩམས་པ་ན། དེ་མ་ཐག་ཆོས་རྒྱལ་གྱི་མདུན་དུ་ཁྲིད་ནས་ཆོས་བསྟན་པའི་ལོ་རྒྱུས་ལྟ་བུ་མདོ་སྡེ་ནའང་མང་དུ་བཞུགས་སོ། །སྡུག་བསྔལ་མྱོང་བ་མཐོང་ནའང་སྙིང་རྗེ་བསྐྱེད་ན་དེ་བཞིན་འགྱུར་བ་ནི། འཕགས་པ་ཐོགས་མེད་ཀྱིས་རྒྱལ་བ་བྱམས་པ་ཁྱི་མོ་ཁོག་སྨད་རུལ་ཞིང་འབུས་ཟ་བར་མཐོང་བ་ན་སྙིང་རྗེ་སྐྱེ་བས་ཞལ་མཐོང་བ་ལྟ་བུའོ། །དེ་བས་ན་འཇིག་རྟེན་པ་ནི་སྡིག་སྡུག་གི་སྐྱོན་ཐམས་ཅད་ཡོན་ཏན་ཡིན་སྙམ་པའི་གཏི་མུག་མ་རུང་བ་ལ་གནས་པ་ཡིན་ཏེ། ཁྱད་པར་འཕགས་བསྟོད་ལས། གང་ཕྱིར་འཇིག་རྟེན་སྐྱོན་ལ་དགའ། །ཡོན་ཏན་འཛིན་ལ་ཞེན་པས་ན། །སྐྱོན་ཡང་ཡོན་ཏན་ལྟར་མཐོང་ནས། །གཞན་ལ་སྐྱབས་སུ་མཆི་བར་གྱུར། །ཞེས་གསུངས་པས་ན། སྐྱོན་སྡིག་སྡུག་ཅན་ལ་སྙིང་རྗེ་ཁོ་ན་བྱེད་པ་རིགས་ཀྱི། ཅི་མི་སྙམ་པ་སོགས་མི་རིགས་སོ། །དེ་ལྟ་བས་ན་སྐད་ཅིག་ཙམ་ཡང་བསྟེན་མི་རུང་བའི་མི་བླུན་པོ་གཏི་མུག་ཅན་མང་པོས་ཡུལ་གང་ཟག་ངན་པ་ཡིན་ཀྱང་རང་གི་དད་པ་བྱས་ན་དགེ་བ་ཡོད་པ་དཔེར་ན། དད་པ་ཡོད་ན་རྒན་མོ་ཁྱི་སོས་སངས་རྒྱས་པ་ལྟ་བུ་ཡིན་ཟེར་ཡང་། དེ་ནི་ཤིན་ཏུ་མི་རུང་སྟེ། ཁྱི་སོ་བེམ་པོ་སེམས་མེད་ཡིན་ལ། སེམས་མེད་ལ་སྡིག་པའང་མེད་དེ། སྤྱོད་འཇུག་ལས། སྒྱུ་མའི་སྐྱེས་བུ་བསད་སོགས་ལ། །སེམས་མེད་ཕྱིར་ན་སྡིག་མེད་དེ། །ཞེས་གསུངས་པ་ལྟར། སེམས་མེད་བེམ་པོའི་རིགས་ལ་དགེ་སྡིག་གང་ཡང་མེད་པ་ལུང་མ་བསྟན་དུ་གནས་པ་ཡིན་པས། དཔེར་ན། ཁྱི་ཡི་རུས་པ་ལ་སངས་རྒྱས་སྐུ་གཟུགས་བྱས་ཏེ་མཆོད་ན་བྱིན་རླབས་དགེ་བ་འོང་། བདུད་དང་སྲིན་པོའི་གཟུགས་བྱས་ནས་མཆོད་ན་བྱིན་རླབས་སྡིག་པ་འོང་བར་ངེས་ན་ཁྱི་སོ་སངས་རྒྱས་སུ་མོས་པ་བྱས་པ་དང་། གང་ཟག་མི་ལ་སོགས་སེམས་ལྡན་དགེ་སྡིག་སྣ་ཚོགས་དང་ལྡན་པ་མི་འདྲ་སྟེ། སྤྱོད་འཇུག་ལས། སྒྱུ་མའི་སེམས་དང་ལྡན་པ་ལ། བསོད་ནམས་དང་ནི་སྡིག་པ་འབྱུང་། །ཞེས་གསུངས་པ་ལྟར། ཡུལ་གང་ཟག་ངན་པ་ནི། དཔེར་ན་མུ་སྟེགས་སྟོན་པ་དྲུག་གི་ནང་ནས་ཡང་དག་རྒྱལ་བ་ཅན་ཞེས་པ་ཟག་བཅས་ལམ་གྱི་རྫུ་འཕྲུལ་མངོན་ཤེས་ཐོབ་པའི་གྲུབ་ཐོབ་རིགས་པའི་གནས་ལྔ་ལ་མཁས་པ། སངས་རྒྱས་ལ་འགྲན་ནུས་པ་དེ་མིང་རྒྱལ་བར་ཐོགས་ཤིང་དོན་རྒྱལ་བ་ཡང་དག་པ་ཡིན་པར་ཁོ་རང་གིས་བསམ་ཀྱང་མངོན་པའི་ང་རྒྱལ་གྱི་དབང་གིས་དགེ་རྩ་ཆད་ནས་དམྱལ་བར་སོང་བ་ཡིན། རྗེས་འཇུག་གཞན་རྣམས་ཀྱིས་རྒྱལ་བར་བཏགས་ཤིང་བཟུང་ནས་དད་པ་རྩེ་གཅིག་བྱས་ཀྱང་སངས་རྒྱས་བྱིན་རླབས་ཏིལ་ཙམ་མ་བྱུང་བའི་ཁར་སྡིག་པའི་སྐྱོན་ཁོ་རང་ལྟར་ཐོབ་པ་དང་འདྲ། དེ་བས་ན་ཁྱི་སོས་སངས་རྒྱས་པ་དེ་སེམས་མེད་ས་རྡོ་སོགས་ལ་སངས་རྒྱས་སུ་མོས་ནས་དད་པ་བྱས་པའི་དཔེ་ཡིན་མོད། དེ་སེམས་ལྡན་གྱི་བྱ་བ་སྒྲུབ་བྱེད་དུ་དཔེར་འཇོག་པ་ཧ་ཅང་ཐལ་བ་བླུན་པོའི་ལུགས་མཁས་པས་བཞད་གད་བྱ་བའི་གནས་ཡིན་ནོ། །ལར་ཤེས་བྱའི་གནད་གལ་པོ་ཆེ་འཕགས་མཆོག་ཀླུ་སྒྲུབ་ཀྱིས་དམྱལ་བ་མནར་མེད་དུ་སྐྱེ་བའི་རྒྱུ་བཞི་གསལ་བར་གསུངས་པ། ཆོས་ཤེས་བྱ་བ་དགེ་བ་སྟེ། དེ་ཆོས་མིན་ཞེས་པ་སྡིག་པ་ཡིན་པར་ཤེས་ནས་སྨྲ་བ་དང་། ཆོས་མིན་སྡིག་པ་ཆོས་དགེ་བ་ཡིན་པར་བཟུང་ནས་སྨྲ་བ་དང་། ཆོས་དགེ་བ་རྒྱུད་ལྡན་གྱི་གང་ཟག་ཁོ་ན་སྐྱེས་བུ་དམ་པ་ཡིན་ལ། དེའི་ཡོན་ཏན་ཡིད་དུ་མི་འབབ་པའི་ཞེ་སྡང་སྐྱེ་བ་དང་འཇིག་རྟེན་ན་སྐྱེས་བུ་དམ་པ་མེད། ཆོས་དང་ཆོས་མིན་གྱི་དབྱེ་བ་ག་ལ་ཡོད་སྙམ་པའི་བློ་སྐྱེས་པ་དང་བཞི་ཡིན་ཏེ། རིན་ཆེན་ཕྲེང་བ་ལས། གང་ཞིག་ཆོས་ལ་ཆོས་མིན་དང་། །ཆོས་མ་ཡིན་ལ་ཆོས་སྨྲ་དང་། །སྐྱེས་བུ་དམ་པ་དག་ལ་སྡང་། །མེད་པར་ལྟ་བས་མནར་མེད་ལྟུང་། །ཞེས་གསུངས་པ་ལྟར། ཆོས་དང་གང་ཟག་བཟང་ངན་ཅི་འདྲ་ཡིན་བསྲེགས་བཅད་བརྡར་བའི་གསེར་བཞིན་ལེགས་པར་མ་བརྟགས་པར་དེང་སང་ལྟ་ངན་དང་ཉོན་མོངས་སྙིགས་མ་ཆེ་བས་གཟིར་བ་རང་གི་སེམས་ཀྱི་སྣང་བ་ལ་འཐད་པ་ཙམ་གྱིས་བསྟེན་ན་མི་ཚེ་དེར་དད་པ་དག་སྣང་ཆེ་མདོག་ཁ་རུ་གནས་ནའང་འཆི་ཁར་གར་བྱུང་མེད་པར་གནར་མེད་དུ་སྐྱེ་བ་རག་ཏུ་མངོན་སུམ་མཐོང་བ། དཔེར་ན། གོད་འདྲེ་ཕུགས་ཀྱི་ལྷར་བྱས་པས། གོད་ཁས་ཚང་ལོག་ཏུ་གྱུར་པ་ལྟར་བྱུང་ན་མི་རུང་ལ། གཞན་ཡང་ཇི་སྐད་དུ། འཕགས་པ་ཐོགས་མེད་ཀྱིས། མངོན་པ་ཀུན་བཏུས་ལས། སྐྱེས་བུ་དམ་པ་མ་ཡིན་པ་བསྟེན་པ་དང་། དམ་པའི་ཆོས་མ་ཡིན་པ་ཉན་པ་དང་། ཚུལ་བཞིན་མ་ཡིན་པའི་ཡིད་ལ་བྱེད་པ་ལས་སྡིག་པ་ཐམས་ཅད་སྐྱེ། ཞེས་གསུངས་པ་སོགས་ཀྱིས་ཀྱང་ལེགས་པར་བརྟགས་དགོས་སོ། །གཉིས་པ་ཡན་ལག་གི་བསླབ་བྱ་གསུམ་སོ་སོར་བཤད་པ་ལ་གསུམ་ལས། དང་པོ་སངས་རྒྱས་དཀོན་མཆོག་ལ་སྐྱབས་སུ་སོང་བའི་ཡན་ལག་གི་བསླབ་བྱ་བཤད་ཚུལ་གསུམ་གྱི། ཡུལ་གང་ལ་གུས་པ་སྒྲུབ་ན། སངས་རྒྱས་རྣམས་ཀྱི་སྐུ་ཡི་གཟུགས་བརྙན་སྔོན་སྟོན་པ་བཞུགས་པའི་ཚེ་ན་བཅོམ་ལྡན་འདས་ཀྱི་སྐུའི་བྱད་རས་ཀྱི་གཞི་ལ་སྤྲོས་པ་བཞིན་བཟོ་བོས་རིས་མོར་བྲིས་པ་སིང་ག་ལའི་རྒྱལ་པོའི་བུ་མོ་མུ་ཏིག་འཁྲི་ཤིང་ལ་རྟེན་དུ་བརྩལ་བ་ཐུབ་པ་འོད་ཟེར་ཅན་དུ་གྲགས་པ་ལྟ་བུའམ། ཀརྨ་བི་ཤྭས་ལུགས་སུ་བླུགས་ཤིང་ལྡེར་དུ་བཞེངས་པ་རྣམས་དང་། རང་བྱོན་དུ་གྲུབ་པ་ནི་ཕྱིས་སུ་ཁྱད་པར་འཕགས་བསྟོད་མཛད་པ་པོ་སློབ་དཔོན་དཔའ་བོ་དང་། ལྷ་ལས་ཕུལ་བྱུང་མཛད་པ་པོ་སློབ་དཔོན་བདེ་བྱེད་བདག་པོ་གཉིས་ཀྱི་ཙན་དན་གྱི་ལྡེ་གུ་སྤུངས་ནས་གསོལ་བ་བཏབ་པ་ཙམ་གྱིས་མ་གྷ་དྷའི་བྱང་ཆུབ་ཆེན་པོའི་སྐུ་མངོན་སུམ་དུ་འཁྲུངས་པ་ལྟ་བུ་སྟེ། རིས་སུ་བྲིས་པ། འབུར་དུ་གཏོད་པ། ལྡེར་བཟོར་སྣང་བ། བཞེངས་པ་དང་། རང་བྱོན་པ་རྣམས་ཀྱི་སྐུའི་ཆ་ཤས་ཡན་ཆད་ཡིན་ལ། ཚིགས་སུ་བཅད་པ་ཞེས་པ་ནི། མངོན་པ་ཀུན་བཏུས་ལས་གསུངས་པ་ལྟར་ཚིགས་སུ་བཅད་པ་རྩ་བ་གཉིས་པ་དང་། རྩ་བ་གསུམ་པ་དང་། རྩ་བ་བཞི་པ་དང་། རྩ་བ་ལྔ་པ་དང་། རྩ་བ་དྲུག་པ་རྣམས་སུ་བཤད་པ་ཡང་། སྤྱིར་དོན་གྱི་ཁྱད་པར་བརྗོད་པ་ལ་ཚིག་དང་། ངོ་བོ་བརྗོད་པ་ལ་མིང་དང་། དེ་གཉིས་རྗོད་བྱེད་དམ་གསལ་བྱེད་ཡི་གེ་ཡིན་ཅིང་ཕྱི་རོལ་དུ་སྣང་བའི་ཡི་གེ་ལ་གཉིས་ཡོད་དེ། བརྗོད་པ་སྒྲའི་ཡི་གེ་རྣམ་འགྲེལ་ལས། ཡི་གེ་ཀུན་སློང་ཤེས་པ་ལས། སྐྱེ་ལ་ཤེས་པས་སྒྲ་སྐྱེའོ། །ཞེས་གསུངས་པ་ལྟར་དང་། བྲིས་པ་གཟུགས་ཀྱི་ཡི་གེ་སྟོན་པས་བཟོ་ལ་སྦྱང་ཕྱིར་ཡིག་མཁན་ཀུན་གྱི་བཤེས་གཉེན་གྱི་རྩར་ཕེབས་ནས། ཁྱོད་ཀྱིས་བདག་ཅག་ལ་ནཱ་ག་རའི་ཡི་གེ་ལ་སོགས་པ་ཡིག་རིགས་དྲུག་ཅུ་རྩ་བཞི་ཡོད་པ་གང་བསླབ་ཅེས་དྲིས་པ་ལྟ་བུ་ལཉྩ་དང་ཝ་རྡུཾ་ལ་སོགས་ཡིག་རིགས་དྲུག་ཅུ་རྩ་བཞི་རྣམས་ཡིན་ནོ། །ཡི་གེ་ནི་མི་འགྱུར་བ་ལ་འཇུག་པ་ཡིན་ལ། རྩ་བ་ནི་མི་འགྱུར་བརྟན་པ་ལའང་འཇུག་པས། ཚིགས་སུ་བཅད་པའི་རྩ་བ་ནི་ཡི་གེ་ཡིན་དགོས་ཤིང་། དེ་ཡང་རྩ་བ་གཉིས་པ་ནི། དཔེར་ཁ་ཆེ་ཞེས་པ་ལྟ་བུ་ཚིག་ཏུ་གྲུབ་པ་ཉིད་དོ། །དེ་བཞིན་དུ་རྩ་བ་དྲུག་པའི་བར་སྦྱར་ཏེ་དཔྱད་པར་བྱ་ཞིང་འགྲེལ་པར་ནི་རྩ་བ་རྐང་པ་ཡིན་པར་བཤད་པ་སངས་རྒྱས་རང་གི་ལུགས་ཀྱི་ཚིགས་བཅད་ཀྱི་ཚུལ་ཉིད་དུ་འདུག་གོ། །དེ་ལྟ་ན་ཚིག་ནི་མིང་ལ་བརྟེན་ཅིང་། མིང་གི་རྟེན་ཡི་གེ་དང་བཅས་པ་ཡིན་ནོ། །གཞན་ཡང་གོས་ཀྱི་ལྷན་པ་གྲུ་བཞི་སོགས་ལ་སངས་རྒྱས་ཀྱི་གནང་བའི་རུང་བའི་ཚོན་གསུམ་འདུལ་བ་ལས། སྔོན་པོ་བཙག་དང་དུར་སྨྲིག་དང་། །ཞེས་སྔོན་པོ་སེར་པོ་དམར་པོ་གསུམ་གང་རུང་གིས་བགོས་པ་རྣམས་ཡིན་མོད། འདིར་ནི་བསྟན་པའི་བདག་པོ་རང་གི་སྐུ་མདོག་དང་མཐུན་པ་སེར་པོ་མཚོན་བྱེད་དུ་བྱས་ནས་རུང་བའི་ཁ་དོག་གཞན་གྱིས་བཏབ་པ་ཡང་མཚོན་པར་མཛད་པ་ཡིན་ནོ། །གུས་པའི་སྒོ་གང་ལ་བརྟེན་ནས་སྒྲུབ་པ་ནི། དེ་ལྟ་བུའི་གཞི་རྣམས་ལ་དོན་གཉེར་གྱི་འདུན་པའི་རྟེན་བྱེད་པའི་ལས་ཅན་དད་པ་གསུམ་དང་། གཞན་གྱིས་མི་འཕྲོག་པའི་བྱེད་ལས་ཅན་མོས་པ་སྟེ་དེ་གཉིས་ཀྱི་སྒོ་ལ་བརྟེན་ནས་གུས་པ་སྒྲུབ་པ་ཡིན་ནོ། །ཚུལ་ཇི་ལྟར་གུས་པ་སྒྲུབ་པ་ནི། ཡུལ་རྣམས་བསྟན་པའི་བདག་པོ་སྟོན་པ་བཅོམ་ལྡན་འདས་དངོས་ཀྱི་སྤྲུལ་པ་ཡིན་པ་ལ་ཡིན་པར་ཤེས་དགོས་ཏེ། དེ་ཡང་སྐུ་གཟུགས་སྤྲུལ་པ་ཡིན་པའི་རྒྱུ་མཚན་ནི། པདྨ་དཀར་པོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྤྱོད་པའི་དོན་མཛད་དོ། །ཞེས་གསུངས་ལ། མིང་གཞི་ཡི་གེ་སྤྲུལ་པ་ཡིན་པ་ནི། སྙན་གྱི་གོང་རྒྱན་ལས། ལྔ་བརྒྱ་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་གྱིས། །ཞེས་གསུངས་ཤིང་། ངུར་སྨྲིག་གི་རྟགས་སྤྲུལ་པ་ཡིན་པའི་གཏན་ཚིགས་ནི་དྲན་ཤེས་བག་ཡོད་ཀྱི་རྒྱུར་དེ་དག་ཏུ་སྤྲུལ་པར་འདུལ་བ་ལས་འབྱུང་ཞིང་། སྔོན་གྱི་ཚེ་ནའང་། ལུང་ལས། དེ་བཞིན་གཤེགས་པ་ཚུར་ཤོག་བཀའ་བསྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །ཞེས་གསུངས་པ་བཞིན་དེ་མ་ཐག་སྣམ་སྦྱར་སོགས་སྤྲུལ་པའི་རྣམ་པར་བྱུང་བ་ལྟར་ཏེ། དེ་ཀུན་བཟོ་སྤྲུལ་སྐུ་ཡིན་པས་ན་སངས་རྒྱས་ཀྱི་སྤྲུལ་པ་ཡིན་པར་རྟག་ཏུ་སེམས་ཀྱིས་བརྟགས་ཅིང་ཤེས་པར་བྱ་དགོས་སོ། །གཉིས་པ་ཆོས་དཀོན་མཆོག་ལ་སྐྱབས་སུ་སོང་བའི་ཡན་ལག་གི་བསླབ་བྱ་ལ་ཚུལ་གསུམ་གྱི། གཞི་གང་ལ་གུས་པ་སྒྲུབ་ན། སངས་རྒྱས་རང་ཉིད་ཀྱི་བདག་རྐྱེན་ལས་བྱུང་བའི་བཀའ་ཆོས་རྣམས་མ་བརྟགས་ཉམས་དགའི་ངོར་བྱས་ཏེ་བདེན་བཞིའི་ཆོས་འཁོར་དང་། བརྟགས་ན་དངོས་བཟུང་མེད་པའི་དབང་དུ་བྱས་ནས་བར་པ་མཚན་ཉིད་མེད་པའི་ཆོས་འཁོར་དང་། ཤིན་ཏུ་བརྟགས་ཚེ་མཐའ་བྲལ་བརྗོད་དུ་མེད་པའི་ངོར་བྱས་ཏེ་ཐ་མ་ལེགས་པ་རྣམ་པར་ཕྱེ་བའི་འཁོར་ལོ་བསྐོར་བ་སྟེ་དེ་གསུམ་གྱིས་བསྡུས་པ། ཞལ་ནས་གསུངས་པའི་བཀའ་དང་། རྗེས་སུ་གནང་བའི་བཀའ་དང་། བྱིན་གྱིས་བརླབས་པའི་བཀའ་སྟེ་གསུམ་དུ་གནས་པ་ནི་ཡུལ་གྱི་གནས་ཚུལ་ལ་ཇི་ལྟར་གནས་པ་ལ་སྒྲོ་འདོགས་དང་སྐུར་འདེབས་ཀྱི་རྫུན་འབྱིན་མི་སྲིད་པ་སྨྲ་བ་མཆོག་གི་འབྱུང་གནས་བཅོམ་ལྡན་འདས་ཀྱི་ཞལ་གྱི་དཀྱིལ་འཁོར་ཆེན་པོ་ནས་རྗེས་སུ་བསྟན་པའི་ཆོ་འཕྲུལ་དུ་བྱུང་བ་ལེགས་པར་གསུངས་པའི་བཀའ་ཞེས་བྱ་བ་ཡིན་ནོ། །ཚད་ཅི་ཙམ་ཞིག་ལ་གུས་པ་སྒྲུབ་ན། འཇིག་རྟེན་དང་འཇིག་རྟེན་ལས་འདས་པའི་ཐེག་པ་གཉིས་སུ། ཡིད་འོང་གི་ཆོས་དོན་དུ་གཉེར་བྱ་ཇི་སྙེད་པའི་མཐའ་ཡོངས་སུ་དག་ཅིང་རྫོགས་པ་ཐམས་ཅད་འདུས་པས་དེ་གཉིས་ལ་གུས་པ་སྒྲུབ་དགོས་ཤིང་། རང་འབྲས་སྒྲུབ་བྱེད་ཐེག་པ་དེ་གཉིས་ཀྱི་བསྒྲུབ་བྱ་བཅས་པ་ནི། དབུ་མ་རིན་ཆེན་ཕྲེང་བ་ལས། དང་པོ་མངོན་པར་མཐོ་བ་དང་། །ཕྱི་ནས་ངེས་པར་ལེགས་འབྱུང་བ། །མངོན་པར་མཐོ་བ་བདེ་བ་སྟེ། །ངེས་པར་ལེགས་པ་ཐར་པའོ། །ཞེས་འཇིག་རྟེན་པའི་ཐེག་པའི་བསྒྲུབ་བྱ་མངོན་མཐོ་ལྷ་མི་དང་། འདས་པའི་ཐེག་པའི་བསྒྲུབ་བྱ་ངེས་ལེགས་ཐར་པ་གསུམ་བསྟན་པའོ། །དེ་དག་སྒྲུབ་བྱེད་ཐབས་ཀྱི་ཚུལ་ཐེག་པ་གཉིས་ནི། དེ་ཡི་བསྒྲུབ་ཚུལ་མདོར་བསྡུས་ན། མདོར་ན་དད་དང་ཤེས་རབ་བོ། །དད་ཅན་ཉིད་ཕྱིར་ཆོས་ལ་བརྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་དད་པ་སྟེ། །དེ་ཡི་སྔོན་འགྲོ་ཤེས་རབ་ཡིན། །ཞེས་གསུངས་པའི། རྒྱུ་འབྲས་ཡིད་ཆེས་ཀྱི་དད་པ་མེད་ན་ནི་ཅི་བྱས་དགེ་བ་ཙམ་དུའང་མི་འགྲོ་ལ། འཁོར་གསུམ་མི་རྟོག་གི་ཤེས་རབ་མེད་ན་ནི་དགེ་བ་བྱས་ཀྱང་ཐར་པ་ཆུང་ངུ་ཙམ་གྱི་རྒྱུ་རུའང་མི་འགྱུར་བ་ནི་ཤིན་ཏུ་ཤེས་པ་གལ་ཆེ་ཞིང་དེ་བས་ན་འཇིག་རྟེན་པའི་ཐེག་པ་ནི་དད་པའི་རྩ་བ་ཅན་ཡིན་ལ། འཇིག་རྟེན་འདས་པའི་ཐེག་པ་ནི་ཤེས་རབ་ཀྱི་རྩ་བ་ཅན་ཡིན་ནོ། །དད་པ་དེ་ཇི་ལྟ་བུ་ཡིན་ན་ཚེ་འདི་དང་ཕྱི་མར་མཐོ་རིས་ཀྱི་བདེ་བ་དོན་གཉེར་གྱི་འདུན་པ་ལ་སོགས་འགྲོ་བ་བཞི་ཡིས་བཟློག་མི་ནུས་པར་ཆོས་རྒྱུ་འབྲས་ལས་དགེ་སྡིག་གི་བླང་དོར་ལ་འཇུག་པ་ནི་དད་པ་ཅན་ཞེས་བྱ་སྟེ། འདུན་དང་ཞེ་སྡང་འཇིགས་པ་དང་། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ཞེས་གསུངས་སོ། །ཤེས་རབ་ཇི་ལྟ་བུ་ཡིན་ན་རང་ལ་ཕན་པར་འདོད་པའམ་གཞན་ལ་ཕན་པར་འདོད་པའི་ཀུན་སློང་གི་ཐབས་ཀྱིས་བཟུང་བ་འཁོར་གསུམ་རྣམ་པར་མི་རྟོག་པའི་རང་བཞིན་ཅན་ཤེས་རབ་ཡིན་ཏེ། ལུས་དང་ངག་དང་ཡིད་ཀྱི་ལས། །རྣམ་པ་གསུམ་དུ་མི་རྟོག་པར། །རང་དང་གཞན་ལ་ཕན་ཤེས་ནས། །རྟག་ཏུ་བྱེད་པ་དེ་ཤེས་རབ། །ཅེས་གསུངས་སོ། །ཤེས་རབ་ཀྱི་རྩ་བ་ཅན་འཇིག་རྟེན་ལས་འདས་པའི་ཐེག་པ་ལ་ནི་རིམ་པ་དགུ་རུ་གནས་སྐབས་ལམ་སྟེགས་ཀྱི་ཚུལ་དུ་གནས་ལ། དེའི་གྲངས་ངེས་ནི། རྟེན་གྱི་གང་ཟག་ཐར་པ་འདོད་པ་ལ་དབང་པོ་རབ་འབྲིང་ཐ་མ་དགུ་རུ་ངེས་པ་དང་། དེ་དག་ལ་ལྟོས་ཏེ་མཐོང་བྱེད་ཁོ་ན་ཉིད་ཀྱང་དགུ་རུ་ངེས་ཏེ། མདོ་ལས། ཆོས་ཉིད་དང་། ཆོས་ཀྱི་དབྱིངས་དང་། ཆོས་གནས་པ་ཉིད་དང་། ཆོས་སྐྱོན་མེད་པ་ཉིད་དང་། དེ་བཞིན་ཉིད་དང་། མ་ནོར་བའི་དེ་བཞིན་ཉིད་དང་། གཞན་མ་ཡིན་པའི་དེ་བཞིན་ཉིད་དང་། ཡང་དག་པའི་མཐའ་དང་། བསམ་གྱིས་མི་ཁྱབ་པའི་དབྱིངས་ནི་རང་བཞིན་གྱིས་གནས་ཞེས་ཡང་ཡང་གསུངས་པ་བཞིན། དེ་ཁོ་ན་ཉིད་དགུ་པོ་མཇལ་བའི་ཡུལ་ཅན་ཡེ་ཤེས་ཀྱང་དགུ་རུ་གནས་ཤིང་། ཡེ་ཤེས་དགུ་རུ་རིམ་པར་སྐྱེ་བའི་དབང་གིས་ཐེག་པ་ཡང་རིམ་པ་དགུ་རུ་ཡོད་དགོས་ཏེ། ཡེ་ཤེས་གཅིག་གམ་དུ་མ་ཡོད་ན་ཐེག་པའང་གཅིག་གམ་དུ་མ་འཇོག་པས་ཐེག་པའི་འཇོག་བྱེད་ནི་ཡེ་ཤེས་ཡིན་པའི་ཕྱིར་ཏེ། སློབ་དཔོན་ཟླ་བ་གྲགས་པས་འཇུག་འགྲེལ་དུ། དེ་ལ་མཐོང་བ་ཐ་དད་ཀྱང་། དེ་ཁོ་ན་ཉིད་འདི་མི་འགྱུར་བ་ཡིན་ལ། གང་གི་ཕྱིར་དབྱེ་བ་དང་རྣམ་པར་འགྱུར་བ་མེད་པ་དེའི་ཕྱིར། དེ་ཁོ་ན་ཉིད་ཀྱི་ཡུལ་ཅན་ཡེ་ཤེས་ཀྱང་རང་བཞིན་གཅིག་ཡིན་ནོ། །གལ་ཏེ་ཡེ་ཤེས་ཀྱི་རང་བཞིན་དུ་མ་ཉིད་ཡིན་ན་ནི་ཡེ་ཤེས་ཀྱིས་དེ་ཁོ་ན་ཉིད་མ་རྟོགས་པར་འགྱུར་ཏེ། རང་བཞིན་ཇི་ལྟར་གནས་པ་མ་རྟོགས་པའི་ཕྱིར་རོ། །གང་གི་ཕྱིར་དེ་ལྟར་དེ་ཁོ་ན་ཉིད་འདི་གཅིག་ཡིན་པས་དེ་ཁོ་ན་ཉིད་ཀྱི་ཡུལ་ཅན་ཡེ་ཤེས་ཀྱང་ཐ་མི་དད་པ་དེའི་ཕྱིར་ཐེག་པ་འདི་ཡང་གཅིག་ཁོ་ན་ཡིན་གྱི། ཐེག་པ་གསུམ་པོ་ནི་ཡོད་པ་མ་ཡིན་ཏེ། མདོ་ལས། འོད་སྲུངས་ཆོས་ཐམས་ཅད་མཉམ་པ་ཉིད་དུ་རྟོགས་པ་བྱང་ཆུབ་ཡིན་ན་དེ་ནི་གཅིག་ཉིད་ཡིན་གྱི། གཉིས་དང་གསུམ་ལ་སོགས་པ་ནི་ཡོད་པ་མ་ཡིན་ནོ། །ཞེས་ལུང་དང་བཅས་པའི་སྒོ་ནས་ལེགས་པར་སྒྲུབ་པར་མཛད་པ་དེ་བཞིན་དུ། སངས་རྒྱས་ཀྱི་ཡེ་ཤེས་ཀྱི་བྱེ་བྲག་གི་རིམ་པ་གོང་ནས་གོང་དུ་སྐྱེ་བ་ལ་ལྟོས་ནས་འཇིག་རྟེན་ལས་འདས་པའི་ཐེག་པ་རིམ་པ་དགུ་རུ་གྲུབ་ཅིང་། དེ་ཡང་མཐར་ཐུག་གི་ངོ་བོ་ནི་སངས་རྒྱས་ཀྱི་ཡེ་ཤེས་གཅིག་ཡིན་པས་ཐེག་པ་གཅིག་ཁོ་ནར་ངེས་པས་ན། རིམ་པ་མེད་པའི་ཕྱོགས་ཆད་ཀྱི་ཐེག་པ་གསུམ་སོགས་མེད་ལ། གནས་སྐབས་སུའང་ཉན་ཐོས་ཐེག་པས་ཀྱང་སངས་རྒྱས་ཆུང་ངུ་ཞིག་ཐོབ་པ་ཡིན་ཏེ། འཇུག་འགྲེལ་ལས། སངས་རྒྱས་ཀྱི་སྒྲ་ནི་སངས་རྒྱས་ཀྱི་ས་དེ་ཉིད། ཉན་ཐོས་དང་རང་སངས་རྒྱས་གསུམ་ཅར་ལའང་འཇུག་པར་མཐོང་ངོ་། །ཞེས་གསུངས་པས། ཐེག་པ་རིམ་པ་དགུ་སངས་རྒྱས་ཀྱི་ཐེག་པ་གཅིག་ཏུ་གྲུབ་བོ། །ཚུལ་ཇི་ལྟར་གུས་པ་སྒྲུབ་ན། དེ་ལྟ་བུའི་རྒྱལ་བའི་བཀའ་འཇིག་རྟེན་དང་འཇིག་རྟེན་འདས་པའི་ཐེག་པ་མཐའ་དག་གི་ཆ་ཤས་ཙམ་ལའང་འདི་ནི་སངས་རྒྱས་ཀྱི་ཆོས་མ་ཡིན་ནོ། །དམན་ནོ་སྙམ་པ་སེམས་ནས་བསམ་ཚེ་ལོག་ལྟར་འགྱུར་བ་དང་། ཁ་ནས་སྨྲས་ཚེ་རྫུན་དུ་གྱུར་བས་ཡིན་པ་ལ་མིན་ནོ་ཞེས་པའི་སྐུར་པ་མ་རུང་བ་ནི་དུས་ནམ་ཡང་མི་གདབ་སྟེ་སངས་རྒྱས་ཀྱི་ཆོས་ཇི་ལྟར་ཡིན་ཀྱང་དེ་ལ་འདི་མ་ཡིན་བསམ་པའི་རང་འདོད་ཞིག་སྐྱེ་ཙམ་ནས་སྐུར་འདེབས་ཁོ་ན་ཡིན་པས་སོ། །དེ་བས་ན་སངས་རྒྱས་ཀྱི་ཆོས་ཐེག་པ་མཐའ་དག་ལ་ལུང་དང་རྟོགས་པ་གཉིས་སུ་གནས་པས་དེ་དག་དམན་པར་མི་བལྟ་བར་ལུང་གི་ཆོས་རྣམས་སྨྲ་བའི་སྒོ་ནས་གུས་པ་བྱེད་པ་དང་། རྟོགས་པའི་ཆོས་སྒྲུབ་པའི་སྒོ་ནས་གུས་པས་སྤྱི་བོར་ལེན་དགོས་ལ། ལུང་རྟོགས་ཀྱི་ཡོན་ཏན་ཐམས་ཅད་ཀྱི་གཞི་ནི་ཚུལ་ཁྲིམས་ཡིན་ཏེ། འཕགས་པ་ཀླུ་སྒྲུབ་ཀྱིས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པའི་ཚུལ་ཁྲིམས་ནི་ལུས་དང་ལོངས་སྤྱོད་ཀུན་ལ་མ་ཆགས་པས་རྣམ་དག་ཏུ་སྒྲུབ་དགོས་ཤིང་། མ་ཆགས་པའི་དངོས་པོ་སྒྲུབ་བྱེད་ནི་བཅོམ་ལྡན་འདས་ཀྱིས་སྦྱང་བའི་ཡོན་ཏན་བཅུ་གཉིས་སུ་བཀའ་སྩལ་པ་འདི་ཉིད་ཡིན་ཅིང་། རྒྱ་གར་འཕགས་པའི་ཡུལ་དུ་ནི་སངས་རྒྱས་ཀྱི་རྗེས་འཇུག་མཁས་པ་དང་གྲུབ་ཐོབ་གང་ཡིན་ཐམས་ཅད་བཅུ་གཉིས་པོ་འདི་ཁོ་ན་ལ་གནས་པ་ཡིན་ནོ། །བཅུ་གཉིས་ནི་བཞི་རུ་གནས་ཏེ། ཟས་ལ་ཆགས་པས་སྤོང་བྱེད་གསུམ་ནི། ཟས་བཟང་པོ་ལ་ཆགས་པ་སྤང་བ་བསོད་སྙོམས་པ། མང་པོ་ལ་ཆགས་པ་སྤོང་བ་ཕྱིས་མི་ལེན། ཡང་ཡང་ཟ་བར་ཆགས་པ་སྤོང་བྱེད་སྟན་གཅིག་པའོ། །གོས་ལ་ཆགས་པ་སྤོང་བྱེད་གསུམ་ནི། གོས་བཟང་པོ་ལ་ཆགས་པ་སྤང་བ་ཕྱག་དར་ཁྲོད་པ། གོས་མང་པོ་ལ་ཆགས་པ་སྤོང་བ་ཆོས་གོས་གསུམ་པ། གོས་འཇམ་པོ་ལ་ཆགས་པ་སྤོང་བ་ཕྱིང་བ་པའོ། །གནས་པ་ཆགས་པ་སྤོང་བྱེད་བཞི་ནི། གནས་འདུ་འཛི་ཅན་ལ་ཆགས་པ་སྤོང་བ་དགོན་པ་བ། གནས་བཟང་པོ་ལ་ཆགས་པ་སྤོང་བ་དུར་ཁྲོད་པ། གནས་ཁང་སྟེང་གཡོགས་ཅན་ལ་ཆགས་པ་སྤང་བ་བླ་གབ་མེད་པ། གནས་ཁང་བསྐོར་བ་ཅན་ལ་ཆགས་པ་སྤོང་བ་ཤིང་དྲུང་བའོ། །མལ་དང་ཉལ་བ་ལ་ཆགས་པ་སྤང་བ་གཉིས་ནི་ཡང་ཡང་མི་བརྗེ་བར་གནས་པ་གཞི་ཇི་བཞིན་པ། ཙོག་གེར་འདུག་པ་ཙོག་པུ་པའོ། །ཆོས་ཀྱི་རྩ་བ་དེ་དག་ཁ་ཙམ་དུ་མི་བཞག་པར་ལག་ཏུ་བླང་དགོས་སོ། །གསུམ་པ་དགེ་འདུན་དཀོན་མཆོག་ལ་སྐྱབས་སུ་སོང་བའི་ཡན་ལག་གི་བསླབ་བྱ་ལ་བཤད་པའི་ཚུལ་གཉིས་ལས། གང་ལ་གུས་པ་སྒྲུབ་ན། སྤྱིར་གང་ཟག་ཅེས་བྱ་བའི་སྒྲ་དོན་ནི། ཕུ་ག་ལ་ཞེས་པ་རྒྱུན་མི་འཆད་པ་སྐྱེ་བ་ལ་ཡང་ཡང་སྦྱོར་བ་ལའང་འཇུག །སྐྱེ་ནས་དར་གྱི་བར་དུ་ནི་འཕེལ་བས་གང་བ་དང་། དར་ཡོལ་ནས་ཤི་བའི་བར་དུ་གོད་པས་ཟག་པ་ལའང་འཇུག་པར་བཤད། གང་ཟག་གི་ངོ་བོ་ནི། སངས་རྒྱས་པའི་ལུགས་ལ་ཆོས་ཀྱི་རྒྱུན་ཙམ་ལ་བཏགས་པའི་བཏགས་ཡོད་དུ་འདོད་པ་ཡིན་ནོ། །དབྱེ་ན་དག་མ་དག་གཉིས་ཡོད་པ་ལས། སྤྱིར་དག་པ་ནི་མཐོ་རིས་གསུམ་གྱི་འགྲོ་བ་དང་། མ་དག་པ་ངན་སོང་གསུམ་གྱི་འགྲོ་བ་རྣམས་ལ། ཇི་ལྟར་གུས་པ་བསྒྲུབ་ན། དམ་པར་གྱུར་པ་བྱང་སེམས་འཕགས་པའི་སྤྲུལ་པ་སྣ་ཚོགས་སུ་གནས་པར་བལྟ་བར་བྱ་དགོས་པ་ཡིན་ལ། བྱེ་བྲག་གཞན་ནི་གང་ཟག་དག་དང་ཞེས་བྱ་བ་ལ་འདུལ་བ་འཛིན་པའི་གང་ཟག་དག་པ་ཡང་མུ་བཞི་པོའི་ནང་ནས་ནི་གཉིས་ཡིན་ཏེ། འདུལ་བ་འཛིན་པའི་གང་ཟག་ནི། བཅོམ་ལྡན་འདས་ཀྱི་འདུལ་བ་སོ་ཐར་རིགས་བརྒྱད་པོའི་སྡོམ་པ་ཚུལ་བཞིན་བླངས་ཤིང་ཆོས་འདུལ་བ་བཞིན་དུ་སྡོམ་པ་རྣམ་དག་བསྲུང་བ་ལ་གནས་པའོ། །འདུལ་འཛིན་དང་འདྲ་བ་ནི། སྡོམ་པ་མ་བླངས་ཀྱང་སྐྱེས་ཐོབ་ཀྱིས་མི་དགེ་སྤངས་ཏེ་དགེ་བ་ལ་སྤྱོད་པའོ། །བྱང་ཆུབ་སེམས་དཔའ་ནི། སྙིང་རྗེ་དང་བྱང་ཆུབ་ཀྱི་སེམས་རྒྱུད་ལ་སྐྱེས་ཤིང་གཞན་ལ་ཕན་པ་སྒྲུབ་པར་ཞུགས་པའོ། །བྱང་ཆུབ་སེམས་དཔའ་དང་འདྲ་བ་ནི། གཞན་ལ་གནོད་པ་གཞི་དང་བཅས་པ་སྤང་བའོ། །བླ་མ་ནི། བརྟན་མཁས་བཙུན་པ་ཕན་འདོགས་ཀྱི་ཡོན་ཏན་བླ་ན་མེད་པ་རྣམས་ཀྱི་མཚན་ཉིད་དང་ལྡན་པའོ། །བླ་མ་དང་འདྲ་བ་ནི། གྲྭ་པའི་མཚན་ཉིད་ཡང་དག་དང་ལྡན་པ་ལ་བླ་མའི་མིང་འདོགས་པའོ། །གྲྭ་པའི་མཚན་ཉིད་ནི། སློབ་དཔོན་ཤཱཀྱ་འོད་ཀྱིས། བླ་མ་ལ་གུས་ཚུལ་ཁྲིམས་ཡོངས་དག་དང་། །བསམ་གཏན་དང་ནི་འདོན་ལ་རྟག་ཏུ་བརྩོན། །གྲིམས་ཤིང་དུལ་ལ་བཟོད་དང་ལྡན་པ་སྟེ། །སྡོམ་བརྩོན་གནས་པའི་ཆོས་བདུན་ལེགས་པར་གསུངས། །ཞེས་སོ། །དེ་རྣམས་ལ་མ་དག་པ་སྣང་བ་ནི། གཟུགས་མི་མཛེས་པ་དང་། རིགས་དམན་པ་དང་། ལོངས་སྤྱོད་དབུལ་བ་དང་། ནད་ཀྱིས་བཏབ་པ་སོགས་སྔོན་གྱི་རྣམ་སྨིན་ལུང་མ་བསྟན་གྱི་ཆ་དུ་མ་ལྡན་པའམ། རང་ཉིད་ཀྱི་བློ་ཆོས་བརྒྱད་དང་མི་དགེ་བས་གྱོང་ཁེང་དུ་གྱུར་པའི་སྣང་བ་ལས། དེ་རྣམས་ལ་ཚུལ་ཁྲིམས་ཏིང་འཛིན་དང་། ཐོས་བསམ་སྒོམ་གསུམ་གྱི་ཤེས་རབ་དང་། དེ་རྣམས་ཀྱི་གྲོགས་རིམ་པར་འཆད་རྩོད་སྩོམ་གསུམ་སྟེ་དེ་ལྟའི་ཡོན་ཏན་དགེ་ཚོགས་ཡོད་པ་ཕལ་ཆེར་སྐྱོན་ཡིན་པར་ཤར་བ་ཡང་མ་དག་པའི་སྣང་བ་མི་བཟད་པའོ། །ཡང་གང་ཟག་དག་པ་ལ་གྲུབ་ཐོབ་ནི། སྔགས་ལམ་ཚུལ་བཞིན་བསྟེན་པ་ལས་བྱུང་བ་སྦྱོར་ལམ་བཟོད་པ་ཡན་ཆད་ལ་གནས་པའི་རྟགས་ཁྱད་འཕགས་ལྡན་པའོ། །གྲུབ་འདྲ་ནི། ཚོགས་ལམ་ཆེན་པོ་ཡན་ཆད་ཀྱི་རྟགས་ཁྱད་འཕགས་ལྡན་པའོ། །གཏེར་སྟོན་ནི། སློབ་དཔོན་ཆེན་པོ་དངོས་སུ་མཇལ་ནུས་ཤིང་ས་གཏེར་དང་ཞལ་ནས་གསུངས་པ་ལ་དབང་བའོ། །གཏེར་འདྲ་ནི། ཉམས་སྣང་ལ་ཞལ་མཐོང་ཞིང་བྱིན་གྱིས་བརླབས་པ་ལས་བྱུང་བའི་ཆོས་ཀྱི་སྒོ་བརྙེས་པའོ། །དེ་ཚེ་ནང་དག་པར་ངེས་ཤིང་དགོས་དབང་གིས་ཕྱིའི་ཀུན་སྤྱོད་ལ་མ་དག་པའི་སྐྱོན་སྣང་བ་ནི། ཆང་སོགས་དམ་རྫས་ལ་རོལ་བ་དང་། འགྲོ་བ་འདུལ་བའི་ཐབས་ཚུལ་སྣ་ཚོགས་སྟོན་པ་རྣམས་ཀྱི་སྐྱོན་ཅན་དུ་ལྟ་མི་རུང་སྟེ། དཔེར་ན་སྔོན་གྲུབ་ཐོབ་མཻ་ཏྲི་པས་དམ་རྫས་ཆང་བསྣམས་པ་ཇོ་བོ་ཨ་ཏི་ཤས་གཟིགས་ནས་དགེ་འདུན་གྱི་གྲལ་ནས་ཕུད་པས། སྒྲིབ་པའི་དབང་གིས་རྟག་ཏུ་མཇལ་རྒྱུའི་རྗེ་བཙུན་སྒྲོལ་མའི་ཞལ་མ་མཐོང་བར་བཤགས་སྡོམ་མང་དུ་མཛད་པས་ཞལ་གཟིགས་པ་ན་ཁྱོད་སྡིག་པ་དེས་སྦྲུལ་ཆེན་པོ་རི་རྒྱལ་ལྷུན་པོ་ལ་དཀྲིས་གསུམ་བྱས་པར་སྐྱེ་བར་འདུག་པས་བཤགས་པ་བྱེད་དགོས་ཚུལ་གསུངས་པ་ལྟ་བུ་ཡིན་པས་སོ། །དེ་དག་ལའང་ཚུལ་ཇི་ལྟར་གུས་པ་སྒྲུབ་ན། འགྲོ་ལ་ཕན་བདེ་བྱེད་པའི་གང་ཟག་དེ་རྣམས་ལ་སངས་རྒྱས་སམ་དོན་དམ་པའི་ཆོས་ཉིད་ཟབ་མོ་མངོན་སུམ་དུ་རྟོགས་པ་ས་དང་པོ་ཡན་ཆད་བཅུ་པ་མན་གྱི་བྱང་སེམས་འཕགས་པའི་སྤྲུལ་པ་ཡིན་པར་བལྟ་བ་དང་། སྤང་རྟོགས་ཕུན་ཚོགས་ཀྱི་མཁྱེན་པ་ལྡན་ཅིང་འགྲོ་བ་ལ་རྩེ་གཅིག་ཏུ་ཕན་འདོགས་བྱེད་པའི་ཡོན་ཏན་གྱི་ཆ་ནས་དགའ་བ་དང་གུས་པ་རྒྱ་ཆེར་སྒྲུབ་པའི་བྱ་བ་བྱེད་དགོས་པ་ཡིན་ནོ། །གཉིས་པ་སྐྱབས་གསུམ་མཐུན་མོང་གི་བསླབ་བྱ་བཤད་པ་ལ། སྤྱིར་དབང་པོ་ཉི་ཤུ་རྩ་གཉིས་ནི་མཛོད་ལས་འབྱུང་བ་ལྟར། རང་རང་གི་ཡུལ་ལྔ་ལ་དམིགས་ནས་དབང་བྱེད་པ་མིག་རྣ་བ་སྣ་ལྕེ་ལུས་ལྔ། ཡུལ་ཐམས་ཅད་ལ་དམིགས་པས་དབང་བྱེད་པ་ཡིད་ཀྱི་དབང་པོ། ཕོ་མོའི་བྱེ་བྲག་འབྱེད་པས་དབང་བྱེད་པ་ཕོ་དབང་དང་མོ་དབང་གཉིས། སེམས་ཅན་གྱིས་རིས་མཐུན་གནས་པ་ལ་དབང་བྱེད་པ་སྲོག་གི་དབང་པོ། ཀུན་ནས་ཉོན་མོངས་ཆགས་སྡང་གཏི་མུག་ལ་དབང་བྱེད་པ་ཡིད་ཚོར་བདེ་བ་དང་། ཡིད་མི་བདེ་བ། ལུས་ཚོར་བདེ་བ་དང་། སྡུག་བསྔལ་བ། ཚོར་བ་བཏང་སྙོམས་ཀྱི་དབང་པོ་སྟེ་ཚོར་བའི་དབང་པོ་ལྔ་ཡིན། རྣམ་བྱང་ལ་དབང་བྱེད་པ་དད་པའི་དབང་པོ་ལ་སོགས་པ་ལྔ་དང་། ཟག་མེད་མྱ་ངན་ལས་འདས་པ་གོང་ནས་གོང་དུ་ཐོབ་པ་ལ་དབང་བྱེད་པ་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་མཐོང་ལམ་གྱིས་བསྡུས་པ། ཀུན་ཤེས་པའི་དབང་པོ་སྒོམ་ལམ་གྱིས་བསྡུས་པ། ཀུན་ཤེས་ལྡན་པའི་དབང་པོ་མི་སློབ། ལས་ཀྱིས་བསྡུས་པ་སྟེ་ཟག་མེད་ཀྱི་དབང་པོ་གསུམ་མོ། །དེ་དག་ངེས་པར་བྱས་ནས་གཞུང་དོན་ལ། ཐུན་མོང་གི་བསླབ་བྱ་སྒྲུབ་པ་དང་དགག་པས་བསྡུས་པ་གཉིས་བཤད་པ་དང་། ཐུན་མོང་གི་བསླབ་བྱ་སྒྲུབ་པས་བསྡུས་པ་གསུམ་བཤད་པ་ལས། དང་པོ་ནི། མིག་སོགས་ལྔ་ཕོ་མོའི་དབང་པོ་དང་བཅས་པ་དབང་པོ་གཟུགས་ཅན་བདུན་ནི་ལུས་ཡིན་ལ། བརྟེན་པ་ཡིད་དབང་གི་རྟེན་སྲོག་གི་དབང་པོ་སྟེ་འདི་དག་ནི་ཤིན་ཏུ་གཅེས་པ་ཡིན་ན་དེ་དག་བསྲུང་བའི་ཕྱིར་དང་། ཡང་ཞེས་པ་སྡུད་ཚིག་གིས་བསྟན་པ། བཏང་སྙོམས་དང་ཡིད་བདེ་དང་ལུས་བདེ་བའི་ཚོར་བ་བསྐྱེད་པའི་དངོས་པོ་ལོངས་སྤྱོད་ནོར་ཡོད་པ་རྣམས་ཤོར་ཀྱང་དཀོན་མཆོག་གསུམ་པོ་གཏན་ནས་མི་སྤོང་བའི་དམ་བཅའ་བརྟན་པོ་ལ་གནས་པ་དང་། ད་ལྟ་འཁོར་བའི་སེམས་ཅན་རྐྱེན་ངན་བསྲན་དཀའ་བའི་དུས་འདི་འདྲ་བར་རང་ལ་ཡིད་མི་བདེ་བ་དང་། སྡུག་བསྔལ་གྱི་ཚོར་བ་འབྱུང་བྱེད་ནང་གི་འདུ་བ་འཁྲུགས་པའི་ཕྱི་རོལ་གྱི་སེམས་ཅན་དང་སེམས་ཅན་མ་ཡིན་པས་གནོད་པའི་རྐྱེན་ངན་པ་སྣ་ཚོགས་ཡོད་པ་རྣམས་ལས་ཅི་འདྲ་ཞིག་བྱུང་ན་ཡང་། མཐུན་པའི་རྐྱེན་སྒྲུབ་པའི་མགོན་དང་མི་མཐུན་འགལ་རྐྱེན་སེལ་བའི་སྐྱབས་དཀོན་མཆོག་གསུམ་ལ་བློ་གཏད་པའི་སྣང་བ་དང་བཅས་བཞིན་མ་གཏོགས་སྣང་མེད་ཀྱི་མི་དང་མི་མིན་སོགས་གཞན་གྱི་དབང་དུ་བྱས་ནས་ཐབས་ཀྱི་རྣམ་པ་གང་ཡང་བཙལ་བའི་བསམ་སྦྱོར་སྐད་ཅིག་ཀྱང་བསྐྱེད་རུང་བ་མིན་ནོ། །གཉིས་པ་ལ། ཡིད་དང་ལུས་ཀྱི་བསྒྲུབ་བྱར་གྱུར་པའི་བསླབ་བྱ་གཉིས་མཉམ་དུ་བསྟན་པ། ངག་གི་བསྒྲུབ་བྱར་གྱུར་པའི་བསླབ་བྱ་གཅིག་ཡན་ག་བར་བསྟན་པ་གཉིས་ཀྱི། དང་པོ་ལའང་གཉིས་ལས། ཡིད་ཀྱིས་དྲན་བྱ་དང་། ལུས་ཀྱིས་མཆོད་བྱ་གཉིས་ལྷན་ཅིག་ཏུ་བསྟན་པ་ནི། གཞན་ལས་ཁྱད་འཕགས་སུ་གྱུར་པ་ལ་ནི་ཆེ་བ་ཞེས་བྱ་ལ་འདིའི་ངོ་བོ་ནི། གཞན་ལས་མཆོག་ཏུ་གྱུར་པ་ཟག་པ་མེད་པའི་ཡོན་ཏན་ཡིན་ཅིང་། དེ་ནི་ཟག་མེད་ཀྱི་དབང་པོ་དང་པོ་གཉིས་པོས་བསྡུས་པ་སློབ་ལམ་དང་། གསུམ་པས་བསྡུས་པ་མི་སློབ་ལམ་སྟེ་ཟག་མེད་ཀྱི་ལམ་གཉིས་པོ་རྟེན་དང་བཅས་པས་ཡུལ་གང་ལ་ཡོན་ཏན་མངའ་ཞིང་མཆོད་ཡུལ་མཆོག་ཏུ་གྱུར་བ་དཀོན་མཆོག་གསུམ་ལེགས་པར་བསྡུས་ཏེ། མི་སློབ་ལམ་ལ་གནས་པའི་རྟེན་གྱི་གང་ཟག་ནི་སངས་རྒྱས་དཀོན་མཆོག །སློབ་ལམ་ལ་གནས་པའི་རྟེན་གྱི་གང་ཟག་ནི་དགེ་འདུན་དཀོན་མཆོག་ཏུ་གྲུབ་ཅིང་ལམ་ནི་ཆོས་དཀོན་མཆོག་ཏུ་གནས་པས་སོ། །དེ་དག་གི་ཟབ་ཅིང་རྒྱ་ཆེ་བའི་ཡོན་ཏན་རྣམས་ནི་དྲན་པར་བྱ་རྒྱུ་ཡིན་ནོ། །ཟས་ཤེས་བྱས་ནི་སྲིད་པ་གསོལ་བར་བྱེད་པ་ཡིན་ལ་སྐྱེས་ཟིན་ཚེ་འདིའི་སྲིད་པ་གསོ་བྱེད་ཁམ་གྱི་ཟས་དང་། རིག་པའི་ཟས་གཉིས། སྐྱེ་འགྱུར་མ་འོངས་ཕྱི་མའི་སྲིད་པ་གསོ་བྱེད་སེམས་པའི་ཟས་དང་། རྣམ་པར་ཤེས་པའི་ཟས་གཉིས་ཏེ་བཞི་ཡོད་པའི་ཁམ་གྱི་ཟས་ནི་འདོད་ཁམས་ཁོ་ན་ན་ཡོད་པ་རྡུལ་ཕྲན་གྱིས་ཁམ་དུ་བཅད་ནས་མིད་པར་བྱ་བ་དྲི་རོ་རེག་བྱའི་སྐྱེ་མཆེད་ཀྱི་རྫས་ཡིན་གྱི་གཟུགས་ཀྱི་སྐྱེ་མཆེད་ནི་མ་ཡིན་ཏེ་ཟས་ཀྱི་བྱ་བ་དབང་པོ་རྒྱས་པ་དང་འབྱུང་བཞི་འཕེལ་བའི་སྒོ་ནས་དབང་པོ་ལ་ཕན་པའི་བྱ་བ་མི་བྱེད་པས་སོ། །རེག་པའི་ཟས་ནི། དབང་ཡུལ་ཤེས་གསུམ་འདུས་པ་ཡིན་ནོ། །སེམས་པའི་ཟས་ནི་ཟག་བཅས་ཀྱི་ལས་དགེ་སྡིག་རྣམས་ཡིན་ནོ། །རྣམ་པར་ཤེས་པའི་ཟས་ནི་ལས་ཀྱིས་ས་བོན་དང་ལྡན་པའི་རྣམ་ཤེས་སེམས་དང་སེམས་བྱུང་བཅས་པ་ཡིན་ནོ། །ཁམ་ཟས་གནས་དབང་པོ་རྒྱས་པར་བྱེད་ཅིང་རེག་ཟས་བརྟེན་པ་པོ་རྣམ་ཤེས་རྒྱས་པར་བྱེད་ལ། སེམས་ཟས་ཕྱི་མའི་སྲིད་པ་འཕེན་ཞིང་། ཤེས་ཟས་ཡང་སྲིད་འགྲུབ་པར་བྱེད་པ་ཡིན་ནོ། །ཟས་འདི་རྣམས་ལ་མཆོད་པར་བྱ་བའི་རྫས་སུ་འོས་པ་ཡོད་པས་ན་དབང་པོ་དྲུག་རྒྱས་པར་བྱེད་པའི་ལོངས་སྤྱོད་བཞི་པོ་དེ་དག་གིས་བསྡུས་པ་ཕལ་ཆེར་མཆོད་བྱའི་དངོས་པོ་ཡིན་ནོ། །ཡིད་ཀྱིས་དྲན་པ་དང་། ལུས་ཀྱི་མཆོད་པའི་བྱ་བ་གཉིས་ལྷན་ཅིག་ཏུ་བསྟན་པ་ནི། །ཟ་འཆགས་ཉལ་འདུག་གི་སྤྱོད་ལམ་བཞི་པོས་དུས་སམ་ཉིན་མཚན་གྱི་དུས་རྟག་པ་སྟེ་རྒྱུན་མ་ཆད་པ་ཉིད་དག་ཏུ་དཀོན་མཆོག་གསུམ་གྱི་ཆེ་བའི་ཡོན་ཏན་རྒྱས་པ་དང་། བསྡུས་པའི་སྒོ་ནས་ཇི་སྐད་བཤད་པ་ལྟར་དྲན་པར་བྱ་དགོས་པ་ཡིན་ཅིང་། དྲན་པའི་དབང་པོ་དེའི་རྒྱུ་ནི་དྲན་བྱ་ལེགས་པར་ཤེས་པའི་ཤེས་རབ་ཡིན་ལ། གྲོགས་ནི་ཡོན་ཏན་ལ་དམིགས་པ་དང་བའི་དད་པ་དང་། སྤྲོ་བའི་བརྩོན་འགྲུས་གཉིས་སུ་གནས་ཤིང་། འབྲས་བུ་ནི་ཡོན་ཏན་ལ་སེམས་རྩེ་གཅིག་ཏུ་གནས་པའི་ཏིང་འཛིན་དུ་འགྱུར་བས་དྲན་པ་གཙོ་བོར་གྱུར་པའི་དབང་པོ་ལྔ་འབྱུང་ངོ་། །ཟས་བཞི་པོ་འདི་དང་ཕྱི་མའི་སྲིད་པ་དག་གསོ་བྱེད་དུ་གྱུར་པ་མཆོད་པར་འོས་པ་གང་བྱུང་གིས་དེ་མ་ཐག་པ་རྟག་ཏུ་དཀོན་མཆོག་གསུམ་ལ་ལེགས་པར་མཆོད་དགོས་པ་ཡིན་ལ། དེ་ཡང་མཆོད་པར་འོས་པ་ནི། ཁམ་གྱི་ཟས་དྲི་ཞིམ་པ་རོ་མངར་བ་སོགས་ཕུན་སུམ་ཚོགས་པ། རེག་བྱ་འཇམ་པ་ཁྲུས་དང་གོས་ལ་སོག་པ་རྣམས་དང་། རེག་ཟས་མིག་དབང་ཡུལ་མཛེས་པའི་གཟུགས་མིག་ཤེས་གསུམ་པོ་འདུས་པ་ལས་བྱུང་བ་ཚོར་བ་བདེ་བ་དང་བར་མ་སྐྱེད་བྱེད་གང་བྱུང་ཐམས་ཅད་དང་། དེ་བཞིན་དུ་རྣ་བའི་འདུས་ཏེ་རེག་པ་ཚོར་བ་བར་མ་དང་བདེ་བའི་རྒྱུར་གྱུར་པ་སྒྲ་སྙན་པ་ཐམས་ཅད་དང་། སྣའི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་ཚོར་བ་བཏང་སྙོམས་དང་བདེ་བའི་རྒྱུ་ཐམས་ཅད་དང་། སེམས་པའི་ཟས་དགེ་བའི་ལས་དང་ལུང་མ་བསྟན་པའི་ལས་ཐམས་ཅད་དང་། རྣམ་པར་ཤེས་པ་ནི་བདག་གམ་སེམས་ཅན་དུ་འདོགས་པའི་གཞི་ཡིན་པས་དེ་ཕུལ་ན་ནི་བདག་ཉིད་ཕུལ་བ་ཡིན་ནོ། །མཆོད་མི་འོས་པ་ནི། རང་གི་ཡིད་དུ་མི་འོང་བའི་ཡུལ་ལམ་ཚོར་བ་སྡུག་བསྔལ་གྱི་རྒྱུ་རེག་པ་རྣམས་འབུལ་མི་རུང་སྟེ། དཀོན་མཆོག་གསུམ་ལ་རྣམ་རྟོག་མེད་ཀྱང་། འབུལ་མཁན་རང་ལ། ཅི་འདྲ་བ་ཡི་ལས་བསགས་པ། །དེ་འདྲ་བ་ཡི་འབྲས་བུ་འབྱུང་། །གསུངས་པ་བཞིན་ཉེས་པ་བསྐྱེད་པ་དང་། ཁྱད་པར་དུ་མི་དགེ་བའི་ལས་ནི་སེམས་ཅན་ལ་འཚེ་ཞིང་གནོད་པའི་རྐྱེན་ཡིན་པས་དེ་ནི་དཀོན་མཆོག་ལ་ཕུལ་ཀྱང་བཞེས་མི་སྲིད་ལ། སྡིག་པ་ནི་མཆོད་བྱར་ཡང་གཏན་ནས་མི་རུང་ངོ་། །ངག་གི་བསྒྲུབ་བྱར་གྱུར་པའི་བསླབ་བྱ་གཅིག་ཡན་ག་བར་བསྟན་པ་ལའང་གཉིས་ལས། སྐྱབས་འགྲོ་རང་གི་བརྗོད་ཚུལ་ནི། རབ་ཀྱིས་བརྗོད་ཚུལ་དང་། འབྲིང་དང་ཐ་མས་བརྗོད་ཚུལ་གཉིས་ལས། དང་པོ་ནི། སྤྱིར་རྒྱུན་ཅེས་པ་ནི་སྐད་ཅིག་མ་མིན་པ་ལ་མེད། དུས་མཐའི་སྐད་ཅིག་མ་གཅིག་ལ་མེད། སྐད་ཅིག་མང་པོ་གཅིག་ཅར་ཚོགས་པ་ལའང་མེད། སྐད་ཅིག་ལ་རང་གི་མཚན་ཉིད་འབྲེལ་མེད་སོ་སོ་ཐ་དད་པ་སྔ་ཕྱིར་བྱུང་བ་ལ་རྒྱུན་གཅིག་ཅེས་པ་མེད་དེ། འཇུག་པ་ལས། གང་དག་རང་མཚན་ཉིད་ཀྱི་སོ་སོ་བ། །དེ་དག་རྒྱུད་གཅིག་གཏོགས་པ་རིགས་མ་ཡིན། །ཞེས་གསུངས་པ་ལྟར་ལས། འདུས་བྱས་སྐད་ཅིག་སྔ་མ་དང་ཕྱི་མ་རང་གི་ངོ་བོ་ཉེ་བའི་འབྲེལ་བ་ཡོད་པ་སྐད་ཅིག་གཉིས་ཕན་ཆད་གནས་པ་རྒྱུན་ཡིན་ཅིང་འདྲ་བའི་ཆ་དེ་ལ་ནི་རྒྱུན་གཅིག་ཅེས་བྱ་ཞིང་། མི་འདྲ་བའི་རྒྱུན་མཐུད་པ་ལ་ནི་རྒྱུན་ཐ་དད་ཅེས་བྱའོ། །འདིར་ནི་ཉིན་མཚན་གྱི་དུས་ལ་སྐད་ཅིག་དུ་མ་ཡོད་ཅིང་དེ་ཡང་ཉིན་གྱི་རྒྱུན་དང་མཚན་མོའི་རྒྱུན་ནི་རྒྱུན་ཐ་དད་པ་གཉིས་མཐུད་པ་སྟེ། དབང་པོ་རབ་རྣམས་ཀྱི་ཉིན་མཚན་དེ་དག་གི་རྒྱུན་གྱི་དངོས་པོ་དང་འབྲེལ་བར་བར་མ་ཆད་དུ་ངག་གི་རྣམ་པར་རིག་བྱེད་ཀྱི་སྐྱབས་འགྲོ་བརྗོད་པར་བྱ་དགོས་པའོ། །དེ་ལས་སྐྱབས་འགྲོ་ལ་རྒྱུ་དང་འབྲས་བུའི་སྐྱབས་འགྲོ་གཉིས་སུ་ཡོད་པའི། །ཐེག་ཆེན་གྱི་འབྲས་བུའི་སྐྱབས་འགྲོ་ཡང་སྙིང་རྗེས་གཞན་དོན་ལ་དམིགས་པ་དང་། ཤེས་རབ་ཀྱིས་རྫོགས་པའི་བྱང་ཆུབ་ལ་དམིགས་པའི་དོན་གཉིས་དང་ལྡན་པ་སྨོན་པ་བྱང་ཆུབ་ཀྱི་སེམས་དང་འདྲ་ན་འདི་གཉིས་ཀྱི་ཁྱད་པར། རྗེ་བཙུན་བསོད་ནམས་རྩེ་མོས་ནི། དམ་བཅའ་བའི་ལྕགས་ཀྱུ་གཉིས་པས་མ་ཟིན་པ་དང་། ཟིན་པས་འཇོག་པར་བཞེད་ལ། ཀུན་མཁྱེན་ཆོས་རྗེས་ནི་རང་ཉིད་སངས་རྒྱས་སུ་འདོད་པའི་ཆ་ནི་སྐྱབས་འགྲོ། སེམས་ཅན་ཐམས་ཅད་སངས་རྒྱས་སུ་འདོད་པའི་ཆ་ནི་སྨོན་པ་སེམས་བསྐྱེད་དུ་བཞེད་ཅིང་། འོ་ན་ཡེ་ཤེས་དམ་པའི་སེམས་བསྐྱེད་དང་། འདོད་ཆེན་པོའི་སེམས་བསྐྱེད་གཉིས་ཀྱང་རང་ཉིད་སངས་རྒྱས་འདོད་པ་མིན་ནམ་ཞེ་ན། སེམས་བསྐྱེད་ལ་ནི་རང་ཉིད་སངས་རྒྱས་སུ་འདོད་མི་འདོད་ཅི་ལྟར་ཡིན་ཀྱང་སེམས་ཅན་སངས་རྒྱས་སུ་འདོད་པ་ངེས་པར་གཙོ་བོ་ཡིན་ལ། འབྲས་བུའི་སྐྱབས་འགྲོར་ནི། སྙིང་རྗེས་སེམས་ཅན་གྱི་དོན་ལ་དམིགས་པ་ལས་ངེས་པར་དེ་དག་གིས་སངས་རྒྱས་ཐོབ་པ་ལ་དམིགས་མི་དགོས་སོ། །སྐྱབས་སུ་འགྲོ་བའི་ཚིག་རྣམས་ཕལ་ཆེར་ལས་ནི་རྒྱུ་འབྲས་ཚིག་གཉིས་ཀ་འབྱུང་ཞིང་། འགའ་ཞིག་ལས་ནི་རྒྱུའི་ཚིག་ཁོ་ན་གཙོ་བོར་འབྱུང་བ་ཡིན་ནོ། །གཉིས་པ་ནི། དབང་པོ་འབྲིང་རྣམས་ཀྱིས་ཉིན་པར་སྔ་དྲོ། གོང་། ཕྱི་དྲོ་གསུམ་དང་། མཚན་གྱི་ནམ་སྟོད། ནམ་གོང་། ནམ་སྨད་གསུམ་སྟེ་དུས་གྲངས་དྲུག་ཏུ་གནས་པ་ལ་སྐྱབས་འགྲོ་བརྗོད་པར་བྱ་ལ། དབང་པོ་ཐ་མ་རྣམས་ཀྱི་དུས་དྲུག་གི་ནང་ཚན་གསུམ་དང་གཉིས་སོགས་སུ་རྟག་ཏུ་བརྗོད་པར་དམ་བཅའ་དགོས་སོ། །སྐྱབས་འགྲོ་གཞན་ལ་བརྗོད་པར་བསྐུལ་བའི་ཚུལ་ནི། སྔར་བཤད་པ་བཞིན་རབ་རྣམས་ལ་རྒྱུན་གྱི་སྐྱབས་འགྲོ་བརྗོད་པ་དང་། དེ་བཞིན་དུ་བར་གྱི་ཚིག་བསྡུས་ནས་མི་མངོན་པར་བྱས་པ། འབྲིང་ལ་དུས་དྲུག་དང་ཐ་མ་ལ་དུས་གསུམ་སོགས་སུ་སྐྱབས་འགྲོ་བྱེད་པར་གང་ཟག་གཞན་རྣམས་ལ་སྐུལ་མ་འདེབས་དགོས་པ་ཡིན་ནོ། །ཡན་ལག་དྲུག་པ་རྒྱུད་བསླབ་སྡོམ་དང་ལྡན་པར་སྒྲུབ་བྱེད་སྐྱབས་འགྲོ་བླངས་པའི་ཆོ་ག་བཤད་པ་ལ་གཉིས་ཏེ། ཞོར་ལས་འབྱུང་བ་སྡོམ་པའི་རྟེན་སྦྱིར་བརྟན་པ་དང་། དངོས་སུ་བྱུང་བ་སྡོམ་པ་བླངས་ཚུལ་བྱེ་བྲག་ཏུ་བཤད་པའོ། །དང་པོ་ལ། ལུས་རྟེན་དང་། སེམས་རྟེན་གཉིས་ལས། སྐྱབས་འགྲོའི་སྡོམ་པ་སྐྱེ་བའི་ལུས་རྟེན་ནི། གཞན་སྟོབས་རྒྱུ་དང་འབྲས་བུའི་སངས་རྒྱས་ཀྱི་དབང་དུ་བྱས་ན་ནི་རིགས་དྲུག་གི་འགྲོ་བ་ཐམས་ཅད་ལ་སྐྱེ་རུང་མོད། སེམས་ཅན་རང་སྟོབས་ཀྱིས་སྐྱེ་བ་མེད་པའི་ཕྱིར་གཟུགས་དང་གཟུགས་མེད་ཀྱི་ལྷ་ལ་མི་སྐྱེ། རྣམ་སྨིན་གྱི་སྒྲིབ་པ་ཤས་ཆེ་བས་ངན་སོང་གསུམ་དང་སྒྲ་མི་སྙན་པའི་མི་ལ་མི་སྐྱེ། ཕོ་མོ་གཉིས་ཀའི་ཉོན་མོངས་ཤས་ཆེ་བ་དང་བློ་མང་བས་བསམ་པ་མི་བརྟན་པ་དང་ངོ་ཚ་ཁྲེལ་ཡོད་ཆུང་བས་ན་ཟ་མ་དང་མ་ནིང་ལ་མི་སྐྱེ་ཞིང་། གླིང་གསུམ་གྱི་མི་དང་འདོད་པའི་ལྷ་རྣམས་ལ་སྐྱེ་བའོ། །སེམས་རྟེན་ནི། སེམས་ཅན་ཐམས་ཅད་ལ་གནོད་པ་སྤང་བར་འདོད་པའིདགེ་སེམས་ཡོད་པ་དང་ངོ་ཚ་ཁྲེལ་ཡོད་ལྡན་པ་ཞིག་དགོས་ཏེ། མཛོད་འགྲེལ་ལས། སེམས་ཅན་ཐམས་ཅད་ཀྱི་རྗེས་སུ་སོང་བའི་དགེ་བ་ལ་གནས་པས་སྡོམ་པ་ཐོབ་ཀྱི། གཞན་དུ་ནི་མ་ཡིན་ཏེ་སྡིག་པའི་བསམ་པ་དང་མ་བྲལ་བའི་ཕྱིར་རོ། །ཞེས་དང་། གང་དང་ལྡན་པ་དང་གང་མེད་པས་སྡོམ་པ་དང་སྡོམ་པ་མ་ཡིན་པ་དག་ཏུ་འགྱུར་བ་ངོ་ཚ་ཤེས་པ་དང་ཁྲེལ་ཡོད་པ་ཤས་ཆེན་པོ། ཞེས་གསུངས་སོ། །ཁྱད་པར་དུ་ཐེག་ཆེན་སྐྱབས་འགྲོ་ལ་ངེས་པར་སྙིང་རྗེ་ལྡན་དགོས་ཏེ། མདོ་རྒྱན་ལས། དེ་ཡང་སྙིང་རྗེ་ལས་རིག་བྱ། ཞེས་གསུངས་སོ། །དེ་ཡང་ཡན་ལག་བདུན་པ་ཐམས་ཅད་སྔོན་དུ་འགྲོ་བའམ་མིན་ཀྱང་ཕྱག་འཚལ་བ་དང་མཆོད་པ་གཉིས་སྔོན་དུ་ངེས་པར་བཏང་བས་རང་རྒྱུད་དག་པར་སྒྲུབ་དགོས་ཏེ། སྤྱོད་འཇུག་ལས། སྐྱབས་འགྲོའི་སྔོན་དུ་དེ་གཉིས་གསུངས་པ་དང་། །ཀུན་མཁྱེན་ཆོས་རྗེས། རྣམ་པ་དངོས་ཡིད་གསང་བས་རབ་མཆོད་དེ། །བདག་དང་འགྲོ་ཀུན་གུས་པས་ཐལ་སྦྱར་ནས། །བླ་མ་སངས་རྒྱས་ཆོས་དང་དགེ་འདུན་ལ། །ལན་གསུམ་བར་དུ་གཞན་དོན་སྐྱབས་སུ་འགྲོ། །ཞེས་གསུངས་པས་སོ། །ཕྱག་འཚལ་ནི་ཐོག་མར་འབྱུང་བས་མཚོན་པར་བྱ་ལ། མཆོད་པ་ནི་བཟང་པོ་སྤྱོད་པ་ལྟ་བུ་སྦྱར་བར་བྱའོ། །གཉིས་པ་ལ། ཐུན་མོང་གི་ངོ་བོ་བཤད་པ། ནང་ཚན་ཐ་དད་ཀྱི་ལྡོག་པ་བཤད་པ་སྟེ་གཉིས་ལས། དང་པོ་ནི། མངོན་པ་ཀུན་བཏུས་ལས་བརྩོན་འགྲུས་ལྔ་རུ་གསུངས་པའི་ནང་ནས་དགེ་བའི་ཆོས་ལ་མི་ལྡོག་པའི་སེམས་མངོན་པར་སྤྲོ་བ་དགེ་བའི་ཆོས་ཐམས་ཅད་ཡོངས་སུ་རྫོགས་པ་དང་ཡོངས་སུ་སྒྲུབ་པའི་བྱེད་ལས་ཅན་མི་ལྡོག་པའི་བརྩོན་འགྲུས་སྤྱིར་སྡོམ་པ་བླངས་པའི་ངོ་བོ་ཡིན་ཏེ། སྤྱོད་འཇུག་ལས། མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླང་གྱུར་པ། །ཞེས་གསུངས་པ་བཞིན་དུ། དཀོན་མཆོག་གསུམ་ལ་སྐྱབས་སུ་འགྲོ་བ་ལ་མི་ལོག་པའི་དམ་བཅའི་སེམས་སྤྲོ་བས་ཀུན་ནས་བསླང་བ་ངག་གི་རྣམ་པར་རིག་བྱེད་ཉིད་ཀྱིས་ཁས་ལེན་པ་སྐྱབས་སྡོམ་བླང་བ་དག་གི་ངོ་བོ་ཡིན་པ་ཤེས་པར་བྱའོ། །གཉིས་པ་ལ། མ་ཐོབ་པ་གསར་དུ་ལེན་པའི་ལྡོག་པ། ཐོབ་ཟིན་ཡང་ཡང་ལེན་པའི་ལྡོག་པ་གཉིས་ལས། དང་པོ་ནི། སྐྱབས་སྡོམ་སྔར་ལེན་མ་མྱོང་བ་རྣམས་ཀྱིས་མ་སྐྱེས་པ་སྐྱེ་བའི་ཕྱིར་དུ་ཆོས་སྒོར་དང་པོ་ཉིད་ལ་འཇུག་པ་ན་ཤེས་རབ་དང་ལྡན་པས་ན་རང་སྟོབས་ཀྱིས་སྡོམ་པ་ལེན་པ་ཤེས་པས་ལེན་ཚུལ་ཞེས་བྱ་སྟེ། འཇམ་དཔལ་དབྱངས་རྒྱལ་པོ་ཨམ་བ་ར་ཛར་གྱུར་ཚེ་སེམས་བསྐྱེད་ཀྱི་སྡོམ་པ་བླངས་པ་ལྟ་བུ་ཡིན་ལ། དེ་ནི་རྟེན་ཡོད་པ་སྐུ་གཟུགས་སོགས་དེ་རྣམས་ཀྱི་དྲུང་དང་། མེད་ཀྱང་མདུན་མཁར་དཀོན་མཆོག་གསུམ་ཡིད་ཀྱིས་དམིགས་ཏེ་ཚུལ་ཇི་བཞིན་སྐྱབས་སུ་འགྲོ་བའོ། །རང་སྟོབས་ཀྱིས་ལེན་མི་ཤེས་པས་ནི་གཞན་སྟོབས་དགེ་བའི་བཤེས་གཉེན་ལ་བསྟེན་ནས་དེས་ཇི་ལྟར་བསླབ་པ་བཞིན་བྱ་བ་ནི་བྱ་བས་ལེན་ཚུལ་ཞེས་བྱ་ཞིང་། བླང་ཡུལ་དགེ་བའི་བཤེས་གཉེན་གྱི་མཚན་ཉིད་ནི། ཆོས་སྒྲུབ་པའི་འགལ་རྐྱེན་འཇིག་རྟེན་ཆོས་བརྒྱད་སྤོང་ཞིང་མཐུན་རྐྱེན་ཕུན་སུམ་ཚོགས་བྱེད་ཆགས་ཞེན་མེད་པའི་ཆོག་ཤེས་ལྡན་པ། ལེགས་པའི་ཡོན་ཏན་ཕུན་སུམ་ཚོགས་པའི་རྟེན་སྡིག་པའི་ལས་ཀུན་སྤང་བ་ཚུལ་ཁྲིམས་ལྡན་པ། གཞན་དོན་བྱེད་པའི་ཐེག་ཆེན་གྱི་རྩ་བ་སྙིང་རྗེ་ཡོད་པ། ཐར་པའི་རྩ་བ་མ་རིག་ཉོན་མོངས་འཇོམས་པའི་ཤེས་རབ་ཆེ་བ་སྟེ་བཞི་དང་ལྡན་དགོས་ཏེ། འཕགས་པ་ཀླུ་སྒྲུབ་གྱི་ཞལ་ནས། དགེ་བའི་བཤེས་གཉེན་རྣམས་ཀྱི་ནི། །མཚན་ཉིད་མདོར་བསྡུས་མཁྱེན་པར་མཛོད། །ཆོག་ཤེས་ཚུལ་ཁྲིམས་སྙིང་རྗེ་ལྡན། །ཉོན་མོངས་སེལ་བའི་ཤེས་རབ་ཅན། །ཅེས་གསུངས་པ་དེ་ཡང་སྡོམ་པ་ཉི་ཤུ་པ་ལས་བཤད་པ་ལྟར་ཡོན་ཏན་གསུམ་དུ་འདུ་སྟེ། ཆོག་ཤེས་དང་སྐྱབས་སྡོམ་ལ་རང་ཉིད་གནས་པའི་ཚུལ་ཁྲིམས་གཉིས་བརྟན་པའི་ཡོན་ཏན། ཤེས་རབ་ཅན་ནི་མཁས་པའི་ཡོན་ཏན་རྙེད་བཀུར་ལ་ཆགས་ཤིང་སྡོམ་མེད་ཚུལ་ཆོས་ཅན་ནམ་བླུན་པོ་མཁས་རློམ་གྱི་ང་རྒྱལ་ཅན་གྱིས་ཁ་ནས་ཚིག་རྩུབ་ཀྱི་ཆོ་ག་སྒྲོགས་ནུས་པ་མ་ཡིན་པར། གཞན་སྙིང་རྗེའི་དབང་གིས་རང་འདོད་མེད་པར་རྗེས་སུ་འཛིན་ནུས་པ་ཕན་འདོགས་ཀྱི་ཡོན་ཏན་ཡིན་ནོ། །སློབ་དཔོན་དེས་སྡོམ་པ་སྦྱིན་ཚུལ་ནི། ལེན་པ་པོ་སློབ་མ་རྣམས་པུས་མོ་གཡས་པའིལྷ་ང་ས་ལ་ཕབས་ནས་ཙོག་པུའི་འདུག་སྟངས་གུས་པ་དང་བཅས་ཐལ་མོ་སྦྱར་བས་འདུག་བཅུག་ལ། སྐྱབས་སུ་འགྲོ་བའི་ཚིག་ལན་གསུམ་རྗེས་ཟློས་བྱས་པས་སྡོམ་པ་ཐོབ་ཅིང་མཐར་སྡོམ་པའི་ཐོབ་མཚམས་ངོ་ཤེས་པར་བྱ་བའི་ཕྱིར་ཐབས་ཡིན་ནོ་ཞེས་བརྗོད་པ་ནི་ཐབས་འདིས་སྡོམ་པ་ཐོབ་པ་ཡིན་ནོ་ཟེར་བ་ཡིན་ལ། སློབ་མས་ཀྱང་ཆོས་དང་བླ་མ་ལ་གུས་པ་བསྐྱེད་ཕྱིར་ལེགས་སོ་འབུལ་བ་ཡིན་ནོ། །སྐྱབས་འགྲོའི་ཚིག་ནི་བཀའ་དང་བསྟན་བཅོས་ལས་སྣ་ཚོགས་མང་དུ་འབྱུང་ཡང་། མ་ཐོབ་པ་ལེན་པས་ནི། ཐོག་མར་སྟོན་པ་སངས་རྒྱས་ཁོ་ན་གཙོ་བོར་བྱས་ནས་ལེན་དགོས་ཀྱི། དེ་ལས་གཞན་བླ་མ་དགེ་བའི་གཤེས་གཉེན་གཙོ་བོར་བྱེད་པ་མི་ཉན་ཏེ་འདི་ཉིད་སྡོམ་པ་བཅའ་བའི་སྟོན་པ་བླ་མེད་ཐམས་ཅད་མཁྱེན་པ་མ་ཡིན་པ་སྟོན་པ་གཅིག་གི་རྗེས་འཇུག་ཏུ་སྐྱབས་འགྲོས་ཁྱད་པར་དུ་འབྱེད་དགོས་པས་ངེས་པར་སངས་རྒྱས་ལ་སྟོན་པ་གཅིག་པུར་འཛིན་དགོས་པ་དང་། འདུལ་བ་མདོ་སྡེའི་གཞུང་ལས་སྐྱབས་འགྲོ་རྩོམ་བྱེད་དུ་བྱས་ཏེ་སོ་བྱང་གི་སྡོམ་པ་ལེན་སྐབས་དཀོན་མཆོག་གསུམ་ལས་མཁན་སློབ་དག་པའི་བཤེས་ལ་དང་པོར་སྐྱབས་སུ་འགྲོ་བ་མ་གསུངས་པས་སོ། །དེས་ན་སྡོམ་པ་ལེན་པའི་ཚིག་ཀྱང་འདི་ཉིད་དེ་བཙུན་པ་དགོངས་སུ་གསོལ། །བདག་མིང་འདི་ཞེས་བགྱི་པ་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པ་ཕྱིར་མི་ལྡོག་པའི་དགེ་འདུན་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་བྱང་ཆུབ་སྙིང་པོ་ལ་མཆིས་ཀྱི་བར་དུ་དཀོན་མཆོག་གསུམ་ལ་སྐྱབས་སུ་འགྲོ་བར་བཙུན་པས་གཟུང་དུ་གསོལ། །ཞེས་གསུངས་པ་ལྟ་བུ་ཁོ་ནས་ལེན་དགོས་སོ། །ཐོབ་ཟིན་གྱིས་ནི་སྡོམ་པ་སླར་ལེན་པའི་ཚེ་བླ་མ་ལའང་སྐྱབས་འགྲོ་བྱ་བར་མདོ་ལམ་ནས་ཀྱང་གང་ཟག་ལ་མི་རྟོན་ཆོས་ལ་རྟོན་པའི་སྟོབས་སོགས་ཀྱིས་འགྲུབ་པས་ན། བླ་མ་ལ་སྐྱབས་སུ་མཆིའོ་སོགས་ནི་ཐུན་མོང་གི་སྐྱབས་འགྲོ་བཞི་སྐོར་མར་གྲགས་པ་ཡིན་ཏེ། འདི་ལ་ནི་ཡུལ་ཙམ་ལས་ཐེག་པ་ཆེ་ཆུང་གི་ཀུན་སློང་སོགས་ནི་མེད་པས་སོ། །ཐེག་ཆེན་གྱི་སྐྱབས་འགྲོ་བཞི་སྐོར་བ་ནི། མདོ་དང་སྔགས་ཀྱི་དགོངས་དོན་བཞིན་དུ། སེམས་ཉིད་ངལ་བསོའི་འགྲེལ་པ་ཤིང་རྟ་ཆེན་པོ་ལས་འབྱུང་བ་ཡིན་ཏེ་འདི་ལྟར། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་སེམས་ཅན་ཐམས་ཅད་ཀྱི་དོན་དུ་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་གསུངས་པ་འདིའི་སྒོ་ནས་སྡོམ་པ་ལེན་པར་ཡང་གསུངས་པ་ཆེས་འཐད་པས་སོ། །ཐོབ་ཟིན་ཡང་ཡང་ལེན་པའི་ལྡོག་པ་ནི། སྐྱབས་སྡོམ་བླངས་ཟིན་པའི་གང་ཟག་གིས། སྐྱེས་པ་གོང་དུ་འཕེལ་བའི་ཕྱིར་དུ་རྟག་པར་དཀོན་མཆོག་གསུམ་ཁོ་ན་ཡིད་ལ་བྱེད་པས་ཡང་ནས་ཡང་དུ་སྐྱབས་སུ་འགྲོ་བར་བྱེད་པ་ཡིན་ལ། སྐྱབས་འགྲོའི་ཐུན་མོང་མ་ཡིན་པའི་རྒྱུའི་གཙོ་བོར་རང་ཉིད་དམ་ཁྱད་པར་དུ་སེམས་ཅན་གཞན་རྣམས་ལ་སྡུག་བསྔལ་དང་སྡིག་པ་མི་དགེ་བའི་འཇིགས་པ་མ་རུང་བ་སྐྱེད་པའི་རྐྱེན་ཕྱི་རོལ་ན་ཡོད་པ་མི་དང་མི་མ་ཡིན་པའི་སེམས་ཅན་དང་། སེམས་མེད་འབྱུང་བ་བཞི་དག་གི་གཟུགས་ཡིད་དུ་མི་འོང་བ་མཐོང་བའམ། སྒྲ་ཡིད་དུ་མི་འོང་བ་ཐོས་པའམ། དུག་ལ་སོགས་པའི་དྲི་དང་རོ། བཀྲེས་སྐོམ་ཚ་གྲང་ལ་སོགས་པའི་རེག་བྱ་མངོན་སུམ་བྱུང་བའམ། ནང་ན་ཡོད་པའི་རྐྱེན་མ་རུང་བ་ཉོན་མོངས་དྲག་པོ་འབྱུང་བའམ་ལས་ངན་མི་དགེ་བ་སྤྱོད་པའམ་སྤྱོད་རུང་དུ་གྱུར་པའམ། འབྱུང་བ་ཆ་མ་མཉམ་པས་འདུ་བ་འཁྲུགས་པ་རྣམས་དངོས་སུ་བྱུང་བའམ་བྱུང་ཟིན་གྱི་དྲན་པ་བྱུང་བ་དང་། ཡང་འཁོར་བ་དང་ངན་སོང་གསུམ་གྱི་སྡུག་བསྔལ་སྡིག་སྤྱོད་ཀྱི་ཉེས་དམིགས་ཡིད་ལ་དྲན་པའམ། མཐོང་ཐོས་སོགས་བྱུང་བ་དེ་དག་གི་ཚེ་ན་སྐྱབས་འགྲོ་བྱེད་པའི་རྒྱུའི་བསྐུལ་མ་བྱུང་བ་ཡིན་པ་ལེགས་པར་ཤེས་པའི་སྒོ་ནས། སྐྱབས་འགྲོ་ཚུལ་བཞིན་བྱེད་པ་ལ་འཇུག་དགོས་ཤིང་། ཁྱད་པར་རང་དང་རང་གི་ཕྱོགས་ལ་ཡིད་དུ་མི་འོང་བའི་སྡུག་བསྔལ་ནད་སོགས་ཇི་ལྟར་བྱུང་བའི་ཚེ་ན་སྐྱོ་ཤས་ཀྱིས་ཡིད་སུན་ཅིང་མི་དགའ་སྐྱེ་བ་ཐམས་ཅད་ཞེ་སྡང་ཡིན་ཅིང་། བཟློག་ཐབས་འཇིག་རྟེན་གྱི་བྱ་བ་གང་ལ་བརྩོན་ཀྱང་འདོད་ཆགས་དང་གཏི་མུག་ལས་མ་འདས་པས། དེ་དག་གི་ཚེ་ན་འཁོར་བ་རྒྱུ་འབྲས་ཆོས་ལ་ཡིད་བརྟན་མི་འཆའ་བར་ངེས་འབྱུང་གི་རྩ་བ་མཆོག་ཏུ་གྱུར་བ་དཀོན་མཆོག་གསུམ་ཁོ་ན་ལ་བློ་གཏད་ལྡོག་མེད་ཀྱི་སྐྱབས་འགྲོ་ལ་འབད་པ་བརྒྱ་འགྱུར་དུ་བསྐྱེད་པར་བྱའོ། །ཚུལ་དེ་དག་གིས་ཆོས་ཅན་ཀུན་རྫོབ་སྐྱབས་འགྲོ་ལེགས་པར་བཤད་ནས། ཆོས་ཉིད་དོན་དམ་པའི་སྐྱབས་འགྲོ་ཡང་བསྡུས་ཏེ་གཏན་ལ་དབབ་པར་བྱ་སྟེ། དེ་ཡང་མེད་དགག་གཏན་ཚིགས་སུ་བཀོད་པ་གཅིག་ཏུ་བྲལ་གྱིས་གང་ཟག་གི་བདག་མེད་བསྟན་པ། མ་ཡིན་དགག་གཏན་ཚིགས་སུ་བཀོད་པ་རྟེན་འབྲེལ་ཆེན་མོས་ཆོས་ཀྱི་བདག་མེད་བསྟན་པ། དགག་སྒྲུབ་བླང་དོར་ལས་འདས་པ་ཤེས་བྱ་ཤེས་བྱེད་གཉིས་སུ་མེད་པའི་ཡེ་ཤེས་བསྟན་པ་དང་གསུམ་ལས། དང་པོ་ལའང་། དཔེ་བཀོད་པ། དོན་བསྟན་པ་གཉིས་ཀྱི། དང་པོ་ནི། དཔེར་ན་འཁོར་ལོ་དང་སྲོག་ཤིང་དང་གཟེར་བུ་སོགས་ཡན་ལག་གི་ཆོས་རྣམས་མངོན་སུམ་དུ་མིག་གི་བཟུང་བའི་ཚེ་ན། རྟོགས་པ་ཤིག་རྟའོ་ཞེས་ཡན་ལག་ཅན་གཅིག་པུར་འཛིན་པའི་བློ་སྐྱེ་ནའང་རྣམ་པར་དཔྱོད་པས་དཔྱད་ན་ཡན་ལག་ཅན་དང་ཡན་ལག་གཉིས་གཅིག་ཡིན་ན་ནི་ཤིང་རྟ་དེ་ཡན་ལག་གི་གྲངས་བཞིན་དུ་མར་ཡོད་པར་འགྱུར་ལ། དེ་གཉིས་གཞན་ཡིན་ན་ནི་ཡན་ལག་མེད་ཀྱང་ཤིང་རྟ་ཡོད་པ་གཟུང་དུ་ཡོད་པར་འགྱུར་དགོས་པས་ཤིང་རྟ་ཞེས་གཅིག་ཏུ་ཡོད་པའི་བློ་སྐྱེ་བ་དོན་ལ་རྣམ་པ་ཀུན་ཏུ་མི་དམིགས་ཅིང་མེད་བཞིན་རྟོག་པས་སྒྲོ་བཏགས་ནས་ཡོད་པར་འཛིན་པ་དེ་བཞིན་དུ་ཞེས་པ་ནི་དཔེའོ། །གཉིས་པ་ལ་བཞི་ལས། དགག་གཞི་ནི། གཟུགས་ལ་སོགས་པའི་ཕུང་པོ་ལྔས་བསྡུས་པའི་ཆོས་ཡིན་ལ། དགག་བྱ་ནི། ཆོས་དེ་དག་ལས་བརྩམས་ཤིང་བརྟེན་ཏེ་སེམས་ཅན་ནམ་གང་ཟག་ནི་ངའོ་སྙམ་པ་དང་ངའི་འོ་སྙམ་པའི་ང་དང་ང་ཡིར་འཛིན་པའི་དམིགས་ཡུལ་དུ་གྱུར་པ་བདག་རྟག་པ་དང་གཅིག་པུའི་བློ་འཇུག་པ་དེ་ཡིན་ཅིང་། འགོག་བྱེད་ཀྱི་རིགས་པ་ནི། གལ་ཏེ་གང་ཟག་གི་བདག་དེ་ཕུང་པོ་ལྔ་རང་ཉིད་ཡིན་ན་ནི་ཕུང་པོ་སྐྱེ་འཇིག་བྱེད་པ་ལྟར། གང་ཟག་མི་རྟག་པར་འགྱུར་ཞིང་། ཕུང་པོ་ལྔ་ཡིན་པ་ལྟར་གང་ཟག་གི་བདག་དུ་མར་འགྱུར་རོ། །གལ་ཏེ་བདག་ཕུང་ལྔ་ལས་ཐ་དད་དམ་གཞན་ཡིན་ན་ནི། ཕུང་ལྔའི་མཚན་ཉིད་མེད་པར་བདག་ཏུ་ལྟ་བའི་བློ་འཇུག་པར་འགྱུར་བ་དང་། ཕུང་ལྔའི་མཚན་ཉིད་ལ་བདག་ཏུ་ལྟ་བའི་བློ་འཇུག་པ་མེད་པ་འགྱུར་རོ། །བཀག་པའི་གྲུབ་དོན་ནི། ཅི་ནས་ཀྱང་ཆོས་རྣམས་ལ་གང་ཟག་གི་བདག་བཙལ་ན་ནི་རྗེས་སུ་གྲུབ་པ་ནམ་ཡང་དམིགས་སུ་མི་འགྱུར་བས་ན་བཏགས་ཡོད་ཙམ་དུ་ཤེས་པར་བྱའོ། །གཉིས་པ་ལའང་བཞི་ལས། དགག་གཞི་ནི། རྣམ་གྲངས་མ་ཡིན་པའི་དོན་དམ་བདེན་པ་འོད་གསལ་བའི་ཆོས་ཉིད་འདུས་མ་བྱས་རང་བཞིན་གྱི་མཚན་ཉིད་དང་ལྡན་པ་ཉིད་ཡིན་ཏེ། འཇུག་འགྲེལ་ལས། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་ཡོད་མ་ཡིན། །ཅེས་སློབ་དཔོན་གྱིས་བསྟན་བཅོས་ལས་ཁྱད་པར་མཛད་པའི་རང་བཞིན་དེ་ལྟ་བུ་སློབ་དཔོན་གྱིས་ཞལ་གྱིས་བཞེས་པ་ཞིག་ཡོད་དམ་ཞེ་ན། གང་གི་དབང་དུ་བྱས་ནས་བཅོམ་ལྡན་འདས་ཀྱིས། དེ་བཞིན་གཤེགས་པ་རྣམས་བྱོན་ཡང་རུང་། མ་བྱོན་ཡང་རུང་། ཆོས་རྣམས་ཀྱི་ཆོས་ཉིད་འདི་ནི་གནས་པ་ཉིད་དོ། །ཞེས་གསུངས་པས་ཆོས་ཉིད་ནི་ཡོད་དོ། །ཆོས་ཉིད་དེ་ཡང་ཅི་ཞིག་ཅེ་ན་མིག་ལ་སོགས་པ་འདི་དག་གི་རང་བཞིན་ནོ། །རང་བཞིན་དེ་ཡང་གང་ཞེ་ན་འདི་དག་ནི་བྱིས་པས་བལྟ་བར་བྱ་བ་མ་ཡིན་པ་སྟེ་འཕགས་པ་རྣམས་ཀྱིས་སོ་སོར་རང་གིས་རིག་པར་བྱ་བའི་རང་གི་ངོ་བོ་ཉིད་དོ། །ཅི་དོན་དམ་པ་དེ་ཡོད་དམ་མེད་དོ་ཞེས་དེ་སྐད་སྨྲ་གལ་ཏེ་མེད་ན་ནི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པའི་ལམ་སྒོམ་པར་འགྱུར་ཏེ། གང་གི་ཕྱིར་ཆོས་ཉིད་དེ་རྟོགས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་དཀའ་བ་བརྒྱ་ཕྲག་རྩོམ་པ་ཡིན་ནོ། །ཅེས་གསུངས་པ་སོགས་སློབ་དཔོན་ཟླ་གྲགས་ཀྱིས་ལུང་རིགས་དུ་མས་ཡང་ཡང་བསྒྲུབས་ཤིང་རྩོད་སྤངས་བཅས་མཛོད་པ་ལྟར་རོ། །དགག་པར་བྱ་བ་ནི། ཆོས་ཅན་ཀུན་རྫོབ་ཕུང་ཁམས་སྐྱེ་མཆེད་ཀྱིས་བསྡུས་པ་ལ་རང་བཞིན་ཡོད་པར་ཞེན་པ་དང་། ཆོས་ཉིད་དོན་དམ་ཟབ་མོ་རང་བཞིན་གྱིས་འོད་གསལ་བ་ལ་མཐའ་དང་མཐའ་མེད་སོགས་ཀྱི་མུ་བཞིའི་དམིགས་པར་ཞེན་པ་དེ་གཉིས་ཡིན་ནོ། །འགོག་བྱེད་ཀྱི་རིགས་པ་ནི། རྟེན་འབྲེལ་ཆེན་མོ་ཡིན་ལ་འདི་ལ་གཉིས་ཡོད་དེ། ཀུན་རྫོབ་སྣང་བའི་རྟེན་འབྲེལ་དང་། དོན་དམ་གཤིས་ཀྱི་རྟེན་འབྲེལ་དུ་གནས་པ་ལས། དང་པོ་ནི། དེ་ཡང་སྤྱིར་རང་བཞིན་ཞེས་པའང་དངོས་སྨྲ་རྣམས་ཀྱིས་ཆོས་སོ་སོའི་མཚན་ཉིད་ལ་འདོད་དེ། རྣམ་འགྲེལ་ལས། གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱིས་དངོས་དག་ལས། །ལྡོག་པ་ལ་ནི་བརྟེན་པ་ཅན། །ཞེས་གསུངས་པ། མཚོན་བྱ་དངོས་པོ། མཚན་ཉིད་རང་བཞིན། མཚན་གཞི་རང་གི་ངོ་བོ། དེ་གསུམ་རེ་རེ་ཡང་རང་དང་འདྲ་བ་མཐུན་པའི་དངོས་པོ་གཉིས་པ་དང་མི་འདྲ་བ་མི་མཐུན་གཞན་དངོས་ལས་ལོག་པ་ལྡོག་པ་གསུམ་དུ་བཤད་པ་ཡིན་ཀྱང་། དབུ་མ་པས་ནི་མཚན་ཉིད་ཡིན་ཚད་རང་བཞིན་ཡིན་པར་མི་བཞེད་དེ། འཇུག་འགྲེལ་ལས། གང་དག་མེ་ལ་སོགས་པ་འདི་དག་གི་རང་བཞིན་ཚ་བ་ཉིད་ལ་སོགས་པ་ཡིན་པར་འདོད་པ་དེ་དག་གི་ལྟར་ན་རྣམ་པ་ཐམས་ཅད་དུ་མི་རུང་སྟེ་རྟེན་ཅིང་འབྲེལ་བར་འབྱུང་བ་ཉིད་ཀྱིས་བཅོས་མ་ཡིན་པ་དང་གཞན་ལ་ལྟོས་པ་དང་བཅས་པའི་ཕྱིར་རོ། །ཞེས་གསུངས་པས་ནི། རང་བཞིན་གྱི་མཚན་ཉིད་ནི་རྒྱུས་མ་བཅོས་པ་དང་རྐྱེན་ལ་མི་ལྟོས་པ་ཡིན་ལ་བཅོས་ཤིང་ལྟོས་པ་ནི་རང་བཞིན་ནམ་ངོ་བོ་ཉིད་དམ་ཆོས་ཉིད་རྣམས་དོན་གཅིག་མིང་གི་རྣམ་གྲངས་ཡིན་པ་དེ་དག་ཏུ་འཇོག་མི་རུང་སྟེ། སྐྱབས་འགྲོ་བདུན་ཅུ་པ་ལས། ངོ་བོ་ཉིད་ནི་རྒྱུ་རྐྱེན་ལས། །འབྱུང་བ་ཡིན་པར་རིགས་མིན་ཏེ། །ཞེས་སོགས་གསུངས་པ་ཟླ་ཕྲེང་དུ་བཀོད་ཟིན་ཅིང་། དེ་ལྟ་ན། ཆོས་ཀུན་རྫོབ་ཕུང་པོ་སོགས་ལ་རང་བཞིན་མེད་དེ། རྟེན་རྒྱུའམ་ལྷན་ཅིག་བྱེད་རྐྱེན་མིང་གི་རྣམ་གྲངས་ཡིན་པ་དེ་ལ་ལྟོས་ཤིང་། འབྲེལ་རྒྱུའམ་ཉེར་ལེན་རྣམ་གྲངས་ཡིན་པ་དེས་བཅོས་མར་བྱས་པའི་རྟེན་འབྲེལ་ཡིན་པའི་ཕྱིར། རྟེན་འབྲེལ་ཡིན་པ་ནི་མཐའ་བརྒྱད་དང་བྲལ་བ་ཡིན་ཏེ། དབུ་མ་རྩ་བ་ལས། གང་གི་རྟེན་ཅིང་འབྲེལ་བར་འབྱུང་། །འགགས་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་གསུངས་པ་ནི། དཔེར་ན་ནས་རང་གི་འབྱུང་བའི་ཁྱད་པར་གྱིས་ལྡོག་པ་ཉེར་ལེན་བྱས། དེས་རང་འབྲས་སྐྱེད་པ་ལ་ཕན་འདོགས་ནུས་པའི་ཆུ་ལུད་དྲོད་གཤེར་སོགས་མཐུན་པའི་འབྱུང་བ་གཞན་གྱིས་ལྷན་ཅིག་བྱེད་པའི་རྐྱེན་བྱས་ཏེ། ནས་ཀྱི་འབྱུང་བའི་ཁྱད་པར་གྱི་ལྡོག་པ་ཅན་ཉེར་བླངས་འབྲས་བུ་འཇིག་རྟེན་ན་མངོན་སུམ་འབྱུང་བར་མཐོང་བ་ན་རྐྱེན་ལ་ལྟོས་དགོས་པས་ཉེར་ལེན་ཁོ་ན་འབྲས་བུར་གྱུར་པ་མ་ཡིན་པས་རྟག་མཐའ་བསལ་ཉེར་ལེན་ཉེར་བླང་དུ་འབྲེལ་ནས་འདྲ་བར་བདག་ཉིད་ཐོབ་པས་ས་བོན་མྱུ་གུ་གཉིས་གཞན་མ་ཡིན་པའི་རྒྱུ་ཆད་པར་གྱུར་པའམ་འབྲས་བུ་ཆད་པ་ལས་བྱུང་བའི་མཐའ་བསལ་བ་ཡིན་ཏེ། བཅོམ་ལྡན་འདས་ཀྱིས། ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་པ། །དེའི་ཕྱིར་ཆད་མིན་རྟག་མིན་ཆོས་ཉིད་དོ། །ཞེས་གསུངས་པས་མཚོན་ནས་དཔྱད་པར་བྱའོ། །དེ་བས་ན་ཀུན་རྫོབ་ཏུ་ཡང་སྣང་ཙམ་ནི་རྟེན་འབྲེལ་ཡིན་ལ་རྟེན་འབྲེལ་ནི་མཐའ་བྲལ་ཡིན་ཀྱང་བྱས་པས་མ་བརྟགས་པར་མངོན་སུམ་ངེས་མི་ནུས་ལ། ངེས་པར་གྱུར་ན་ནི་མཐའ་རུ་ཞེན་པ་ཐམས་ཅད་འཇོམས་པའི་གཉེན་པོ་ཡིན་པའི་ཕྱིར་ན་སྣང་བ་དགག་བྱ་མིན་པར་གསུངས་ཏེ། སློབ་དཔོན་འཕགས་པ་ལྷས། ཇི་ལྟར་སྣང་སྙིད་དགག་མིན་ཏེ། །རྟེན་ཅིང་འབྲེལ་བར་འབྱུང་བའི་ཕྱིར། །འདིར་ནི་སྡུག་བསྔལ་རྒྱུར་གྱུར་པ། །བདེན་པར་ཞེན་པ་བཟློག་བྱ་ཡིན། །ཞེས་གསུངས་པ་སྟེ། སངས་རྒྱས་པའི་ཆོས་ཀྱི་རྩ་བ་རྟེན་འབྲེལ་ཆེན་པོ་འདི་ལ་དཔྱད་པར་འབད་དགོས་སོ། །གཉིས་པ་དོན་དམ་གཤིས་ཀྱི་རྟེན་འབྲེལ་ནི། རྩ་ཤེས་ལས། རྟག་དང་མི་རྟག་པ་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། །ཞི་བ་འདི་ལ་ག་ལ་ཡོད། །ཅེས་གསུངས་པ་ལྟར། མཐའ་བརྒྱད་དང་། མཐའ་བརྒྱད་བྲལ་བ་དང་། གཉིས་ཀ་དང་། གཉིས་ཀ་མ་ཡིན་པའི་མུ་བཞི་ཐམས་ཅད་ལས་འདས་པའི་ཆོས་ཀྱི་དབྱིངས་ལ་ནི་སྔ་མ་དང་ཕྱི་མའི་ཆ་མེད་པས་ཕྱི་མའི་ཉེར་ལེན་སྔ་མས་བྱེད་པ་དང་མ་རིག་སེམས་ཀྱི་ཉེར་ལེན་བྱེད་པ་མེད་ཀྱང་རང་གི་ངོ་བོ་ཉིད་མི་འདོར་བའི་ཆ་ནས་ཉེར་ལེན་དུ་བརྗོད་དེ། ལང་ཀར་གཤེགས་པ་ལས། སེམས་ཅན་རྣམས་ཀྱི་ཉེར་ལེན་ནི། །མཐའ་དང་མཐའ་མེད་སྤང་བའོ། །ཞེས་གསུངས་སོ། །མ་རིག་པའི་རང་བཞིན་ཀུན་རྫོབ་ཆོས་ཀྱི་རྟེན་རྒྱུའམ་བདག་རྐྱེན་བྱེད་དེ། རྒྱུད་བླ་མ་ལས། དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་པར་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །ཅེས་གསུངས་པ་དེ་དག་གིས་གཤིས་ཀྱི་རྟེན་འབྲེལ་དུ་འཇོག་རིགས་སོ། །དེ་ཡང་ཐ་སྙད་བཅོས་ཤིང་ལྟོས་པ་ལ་ལྟོས་ནས་ཀྱང་རྣམ་གྲངས་མ་ཡིན་པའི་དོན་དམ་པ་རང་བཞིན་དུ་གྲུབ་སྟེ། འཇུག་འགྲེལ་ལས། དེ་ཡང་བདག་གིས་ཀུན་རྫོབ་ཀྱི་བདེན་པ་ལ་ལྟོས་ནས་བཅོས་མ་ཡིན་པ་དང་། ལྟོས་པ་མེད་པ་ཉིད་དུ་རྣམ་པར་བཞག་གོ །ཞེས་གསུངས་སོ། །རང་བཞིན་མེད་པ་ཙམ་ནི་བྱས་པའི་ཤེས་རབ་དང་འཕགས་པ་གཉིས་ཀས་མཐོང་བས་གཉིས་ཀ་ལ་གྲུབ་པའི་ཐུན་མོང་གི་དོན་དམ་ཡིན་ལ། འཕགས་པ་ཁོ་ནས་ཐུན་མོང་མ་ཡིན་པའི་མཐོང་བ་ཆེན་པོ་མཐོང་མེད་ཀྱི་མཐོང་བྱ་ཡིན་པས་ཀྱང་སྤྲོས་བྲལ་གྱི་དོན་དམ་རང་བཞིན་ཡིན་ཅིང་། འདི་ཉིད་དངོས་དངོས་མེད་གཉིས་སུ་ནི་གང་དུའང་འཇོག་མི་རུང་སྟེ། དེ་གཉིས་ནི་རང་བཞིན་མེད་པ་ཡིན་པའི་ཕྱིར་ཏེ། འཇུག་འགྲེལ་ལས། གང་ཞིག་བྱིས་པའི་སྐྱེ་བོས་བལྟ་བར་བྱ་བ་མ་ཡིན་པ་དེ་ནི་རང་བཞིན་དུ་རིགས་ལ་དེ་ཙམ་གྱིས་དོན་དམ་པ་དངོས་པོ་མ་ཡིན་ཞིང་དངོས་པོ་མེད་པའང་མ་ཡིན་ཏེ་དེ་ནི་རང་བཞིན་གྱིས་ཞི་བ་ཉིད་ཀྱི་ཕྱིར་རོ། །ཞེས་གསུངས་སོ། །བཀག་པའི་གྲུབ་དོན་ནི། ཤེས་བྱར་གྱུར་པའི་ཆོས་རྣམས་ནི་སྣང་ཙམ་ཉིད་ན་རང་བཞིན་དང་གཞན་ལ་སོགས་པའི་མུ་བཞིའི་ངོ་བོ་ཉིད་དུ་ནི། མ་རྟོགས་པ་དང་རྟོགས་པའི་དུས་ཐམས་ཅད་ལ་ཡོད་པ་མ་ཡིན་པས་ཆོས་བདག་མེད་པ་ཉིད་དུ་གྲུབ་བོ། །གསུམ་པ་ནི། དགག་སྒྲུབ་བླང་དོར་གྱི་ཞེན་པ་དང་རྩོམ་པའི་བྱ་བ་ཐམས་ཅད་བློ་རྣམ་པར་རྟོག་པའི་ཆོས་ཡིན་པས་འཁོར་བ་ལས་མི་འདའ་སྟེ། རིག་པའི་དབང་ཕྱུག་གིས། བླང་དང་དོར་བྱའི་ཁྱད་ཡོད་ན། །གཅིག་ལས་བྱུང་བའི་ཆགས་གང་ཡིན། །དེ་ཉིད་རྣམ་གྲངས་ཀྱིས་བསྐྱེད་ཚེ། །ཆགས་པ་ཀུན་གྱི་ས་བོན་ཡིན། །ཞེས་དང་། ཆགས་བྲལ་མིན་དང་སྲེད་ལྡན་དང་། །རྩོམ་པ་ཀུན་ལ་བརྟེན་པ་དེ། །ལས་དང་ཉོན་མོངས་ལས་མི་གྲོལ། །དེ་འདྲ་འཁོར་བ་པ་ཞེས་བྱ། །ཞེས་གསུངས་པས་དེ་ལ་འདའ་དགོས་ཏེ། དེ་ཉིད་ཀྱིས། བླང་དང་དོར་བྱ་སྤང་བའི་ཕྱིར། །ཐམས་ཅད་ལ་ནི་མཉམ་སྙོམས་ཅན། །ཙན་དན་སྟེའུ་མཚུངས་པ་ལ། །ཆགས་བྲལ་ཞེས་ནི་བརྗོད་པ་ཡིན། །ཅེས་གསུངས་སོ། །བློ་འདས་རྣམ་པར་མི་རྟོག་པའི་ཡེ་ཤེས་ནི། ཡིད་བྱེད་མེད་པ་ཙམ་དང་། རྟོག་དཔྱོད་ལས་འདས་པ་ཙམ་དང་། སེམས་སེམས་བྱུང་རྣམ་པར་ཞི་བ་ཙམ་དང་། རྟོག་པ་མེད་པའི་ངོ་བོ་ཉིད་ཙམ་དང་། དམིགས་པའི་ཡུལ་འཛིན་པ་ཙམ་ནི་མ་ཡིན་ཏེ། རིམ་པ་བཞིན། གཉིད་དང་བརྒྱལ་བ་སོགས་དང་བསམ་གཏན་གཉིས་པ་སོགས་དང་འདུ་ཤེས་ཚོར་བ་འགོག་པ་དང་གཟུགས་སོགས་དང་ཤེས་པ་ཐམས་ཅད་མི་རྟོག་ཡེ་ཤེས་སུ་འགྱུར་བའི་ཕྱིར་ཏེ། མངོན་པ་ཀུན་བཏུས་ལས། སྤྲོས་པ་མེད་པའི་རྣམ་པར་མི་རྟོག་པ་ནི། ཡིད་ལ་བྱེད་པ་མེད་པས་མ་ཡིན། ཡང་དག་པར་འདས་པས་མིན། རྣམ་པར་ཞི་བས་མིན། ངོ་བོ་ཉིད་ཀྱིས་མིན། དམིགས་པ་ལ་འདུ་བྱེད་པས་མིན། འོན་ཀྱང་དམིགས་པ་ལ་འདུ་བྱེད་པ་མེད་པར་བལྟའོ། །ཞེས་གསུངས་པ་བཞིན། ཡུལ་ཤེས་པར་བྱ་བ་དངོས་དངོས་མེད་དུ་སྣང་བ་སྲིད་ཞི་གཉིས་ཀྱི་འཛིན་པ་མེད་པའི་དམིགས་མེད་ཀྱི་ཡེ་ཤེས་རིག་གསལ་རྗེན་སང་ངེ་བ་བདེ་གཤེགས་སྙིང་པོ་མ་རིག་པའི་རྟོག་ཚོགས་ཡེ་ནས་བྲལ་བར་གནས་པ་ཉིད་ནི་གཅིག་ཐ་དད་གང་དུའང་གཞག་མི་རུང་བ་ཤེས་བྱ་ཤེས་བྱེད་དུ་གྲུབ་པ་མ་ཡིན་པས་དམིགས་བསམ་བརྗོད་པ་ཀུན་ལས་འདས་པའི་དབྱིངས་སྐྱེ་བ་མེད་པས་བླ་ན་མེད་པ་རབ་ཀྱི་མཆོག་ཏུ་ཕྱེ་ནས་སྲིད་ཞི་ཡོངས་ལ་ཁྱབ་པར་བཞུགས་པ་ཡིན་ཏེ། སྐྱབས་འགྲོ་བདུན་ཅུ་པ་ལས། གཉིས་མེད་ཡེ་ཤེས་མ་རིག་ཟད། །ཤེས་བྱ་སྐྱེ་མེད་པས་རབ་ཕྱོ། །ཞེས་དང་། འཕགས་མཆོག་སྐུ་སྒྲུབ་ཀྱིས། ཕྱི་རོལ་དངོས་པོ་ཡོད་མེད་མིན། །སེམས་ཀྱང་ཡོངས་སུ་གཟུང་མ་ཡིན། །ལྟ་བ་ཐམས་ཅད་རབ་སྤང་བ། །དེ་ནི་སྐྱེ་མེད་མཚན་ཉིད་དོ། །ཞེས་གསུངས་པ་ལེགས་པར་ཁོང་དུ་ཆུད་པར་བྱ་བ་ཡིན་ནོ། །གསུམ་པ་ཐ་མར་དགེ་བ་མཇུག་གི་དོན་བསྟན་པ་ལ་ལྔ་སྟེ། མཛད་པ་པོ་སློབ་དཔོན་གྱི་ཆེ་བ་བརྗོད་པ། མཛད་པའི་ཆོས་ཀྱི་ཆེ་བ་བརྗོད་པ། ཆེ་བ་ལྡན་པའི་ཆོས་བོད་ཡིག་ཏུ་བྲི་བའི་ལོ་ཙཱ་བ་བསྟན་པ། དགེ་ཚོགས་གཞན་དོན་དུ་བསྡོ་བས་རྒྱས་གདབ་པ། བསྟན་བཅོས་བྱེད་པོ་སློབ་དཔོན་པཎ་ཆེན་གྱི་མཚན་བསྟན་པའོ། །དང་པོ་ནི། རྒྱུད་ལ་ཞེས་པས་མཁྱེན་པའི་ཤེས་རབ་སྤྲུལ་པ་པོ་སྤྱན་རས་གཟིགས་ཀྱི་ཐུགས་རྒྱུད་དང་དབྱེར་མེད་དུ་གྱུར་པའི་ཆེ་བ་བསྟན་པར་འགྱུར་ཏེ། སློབ་དཔོན་བི་མ་ལ་མི་དྲ་ཉིད་སྐུ་བལྟམས་པའི་ཚེ་ན། ཡུམ་རྒྱལ་པོ་དྷརྨ་ཨ་ཤྭ་ཀའི་སྲས་མོ་ལྷ་ལྕམ་དྷརྨ་བོ་དྷིའི་རྨི་ལམ་དུ་མི་དཀར་པོ་ཤིན་ཏུ་མཛེས་པ་འོད་ཟེར་དཀར་པོའི་ཕུང་པོ་འཕྲོ་བ་ཞིག་བྱུང་ནས། བདུད་རྩིའི་བུམ་པའི་ཆུ་རྒྱུན་སྤྱི་བོར་བླུགས་ཚེ་ལུས་བདེ་བས་གང་བར་རྨིས་པས་དེ་ལ་བརྟེན་ནས་བུ་གཅིག་བཙས་པ་ན། ཁྱོ་མེད་བུ་ངོ་ཚར་བརྩིས་ནས་བྱེ་མའི་གསེབ་ཏུ་བོར་ཀྱང་གནོད་པ་མེད་པར་མིག་ཁྲ་ཧྲིག་གེར་བཞུགས་པ་སླར་བླངས་ནས་གསོས་པས་ལོ་ལྔ་ལོན་ཚེ་ཆོས་ལ་སྦྱངས་པས་ཆོས་ཀུན་འབད་མེད་དུ་ཐུགས་སུ་ཆུད་པའི་མཁྱེན་རབ་བླ་ན་མེད་པ་མངའ་བ་དེ་ཉིད་སྤྱན་རས་གཟིགས་རང་གི་སྤྲུལ་པ་ཡིན་ནོ། །ཤེས་བྱ་ཞེས་པས་མཁྱེན་བྱ་རིག་པའི་གནས་ལྔ་ལ་ལེགས་པར་སྦྱངས་པའི་ཆེ་བ་བསྟན་པར་འགྱུར་ཏེ། སྤྱིར་རིག་གནས་ལྔ་ལ་རིག་པའི་གནས་ཆེན་ལྔ་དང་། དེའི་ནང་ཚན་གནས་ཆུང་ལྔ་རུ་ཡོད་པ་ལས། གནས་ཆེན་ལྔ་ནི་གཞན་གྱི་དབང་དུ་བྱས་པ་བཞི་དང་། རང་གི་དབང་དུ་བྱས་པ་གཅིག་སྟེ་ལྔར་གནས་པའི་བཞི་ནི། བསྟན་པ་ལ་མ་དད་པ་རྣམས་ཚིག་གིས་ཚར་གཅོད་ཕྱིར་སྒྲ་དང་དོན་གྱིས་ཚར་གཅོད་ཕྱིར་ཚད་མ་སྟེ་ཚར་གཅོད་པའི་རིག་པ་གཉིས་སོ། །བསྟན་ལ་དད་པ་རྣམས་ཕྱི་ཡུལ་ལྔའི་ལོངས་སྤྱོད་ཀྱིས་དགའ་བ་བསྐྱེད་ནས་རྗེས་སུ་འཛིན་པ་བཟོ་དང་། ནང་དབང་པོ་ལྔའི་ལུས་ཀྱི་སྡུག་བསྔལ་བསལ་ནས་རྗེས་སུ་འཛིན་པ་གསོ་བ་སྟེ་རྗེས་སུ་འཛིན་པའི་རིག་པ་གཉིས་སོ། །གཅིག་ནི། རང་ཉིད་ཀྱིས་ལུང་དང་རྟོགས་པའི་ཆོས་ཀུན་ཡོངས་སུ་ཤེས་པར་བྱ་བའི་ཕྱིར་ནང་རིག་པའམ་གཞུང་དོན་རིག་པ་སྡེ་སྣོད་བདུན་ཏེ་ཀུན་ཤེས་བྱ་བའི་རིག་པ་གཅིག་ཉིད་དོ། །དེའི་ནང་ཚན་གནས་ཆུང་ལྔ་ནི་བཟོ་རིགས་པའི་ཆ་ཤས་ཡིན་པས། ལུས་བཟོ་ངག་བཟོ་གཉིས་ལས་མ་འདས་ཤིང་དེ་ནི་གྲངས་ལ་མི་རྨོངས་པ་སྐར་རྩིས། མིང་ལ་མི་རྨོངས་པ་མངོན་བརྗོད། ཚིག་གི་རྒྱན་ལ་མི་རྨོངས་པ་སྙན་ངག །ཚིགས་སུ་བཅད་པར་མི་རྨོངས་པ་སྡེབ་སྦྱོར། སྐད་ལ་མི་རྨོངས་པ་ཟློས་གར་ཏེ་ལྔའོ། །འཕགས་ཡུལ་བས་རིག་གནས་ཐམས་ཅད་ཤེས་པ་ལ་མ་ཧཱ་པཎྜི་ཏ་དང་། ཕལ་ཆེར་ཤེས་པ་ལ་ཨལྤ་པཎྜི་ཏར་འདོགས་པར་གྲགས་ཤིང་སློབ་དཔོན་འདིས་ཤེས་བྱ་གནས་ལྔ་ཐམས་ཅད་ལ་མཁྱེན་པ་ལོ་ལྔ་བཞེས་པའི་ཚེ་ན་རྒྱས་པར་འགྱུར་བ་ཡིན་ནོ། །མང་མཆིས་ཅེས་པས། མཁྱེན་སྦྱང་གི་ཡོན་ཏན་འགྲན་ཟླ་བྲལ་བ་ཡོངས་སུ་རྫོགས་པའི་ཆེ་བ་བསྟན་པ་ཡིན་ཏེ། ཤེས་བྱ་ལྔ་པོ་རེ་རེ་ལའང་སློབ་དཔོན་གཞན་གྱིས་གཏན་ལ་དབབ་ཚུལ་ཐ་དད་པས་རྣམ་པར་བཞག་པའི་ལུགས་མང་པོ་ཡོད་པ་ཐམས་ཅད་དང་། རང་གིས་གཟིགས་པའི་ཁྱད་པར་གྱི་ཆོས་བླ་ན་མེད་པ་མང་པོ་རྙེད་པ། ཐོས་བསམ་གྱིས་མཐའ་ཆོད་པ་མཁས་པའི་ཡོན་ཏན་མཆིས་ཤིང་། སྒོམ་པས་དོན་ཟབ་ཅིང་ཕྲ་བ་རྟོགས་པས་མངོན་ཤེས་དྲུག་དང་ལྡན་པ་གྲུབ་པའི་ཡོན་ཏན་མཆིས་པས་རྒྱ་གར་འཕགས་ཡུལ་ན་གཙུག་ལག་ཁང་ཆེན་པོ་གཉིས་སུ་ཡོད་པའི་ནང་ནས། བི་ཀྲ་མ་ཤཱི་ལའི་གཙུག་ལག་ཁང་གི་པཎ་ཆེན་ལྔ་བརྒྱའི་མཆོག་ཏུ་གྱུར་པར་བཞུགས་པ་ཡིན་པས་ཡིད་ཆེའི་དད་པའི་གནས་སུ་གྲུབ་མོད་ཀྱང་། ཅེས་གསུངས་སོ། །གཉིས་པ་ནི། ཐ་མར་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་པ་པོ་ཆོས་རྒྱལ་ཁྲི་སྲོང་ལྡེའུ་བཙན་གྱིས་ཅོག་རོ་ཀླུའི་རྒྱལ་མཚན་སོགས་ལོ་ཙཱ་བ་གསུམ་ལ་གསེར་ཕྱེ་བྲེ་གཉིས་གསེར་གྱི་པ་ཏྲ་འགའ་ཞིག་ཆོས་རྒྱལ་དྷརྨ་ཙཀྲ་ལ་སྐྱེས་སུ་བསྐུར་ནས་སྐྱེས་ལན་དུ་ཕྱི་ནང་གི་ཆོས་མཐའ་དག་ལ་མཁས་པའི་པཎྜི་ཏ་ཞིག་གཏོང་བར་ཞུས་པས། མཆོད་གནས་པཎ་ཆེན་ལྔ་བརྒྱའི་དབུས་ནས་སློབ་དཔོན་བི་མ་ལ་མི་ཏྲ་ཉིད་ཀྱི་བོད་འདུལ་བའི་དུས་ལ་བབ་པར་མཁྱེན་ནས། གཡས་ཕྱོགས་བཞུགས་པའི་པཎ་ཆེན་བརྒྱ་ཕྲག་གི་ཕྱེད་ཉིས་བརྒྱ། གཡོན་ཕྱོགས་ན་བཞུགས་པའི་པཎ་ཆེན་བརྒྱ་ཕྲག་གི་ཕྱེད་དང་ཉིས་བརྒྱས་དབུས་ཀྱི་སློབ་དཔོན་ལ་སྤྱན་གྱིས་གཟིགས་ཏེ་འབྱོན་པའི་བརྡས་བསྐུལ་ནས་སློོབ་དཔོན་བོད་དུ་ཕེབས་ཏེ་བསམ་ཡས་སུ་རྒྱལ་བློན་རྣམས་ཀྱི་བསུ་བ་མཛད་ནས་འཁོར་ས་ཆེན་མོར་སྤྱན་དྲངས་པས་རྒྱལ་པོ་དང་ལྷ་ཁང་གང་ལ་ཡང་ཕྱག་མ་མཛད་པས། བློན་པོ་རྣམས་ཀྱིས་ངེད་ཀྱི་ལྷ་ཁང་འདིར་སྔར་པཎྜི་ཏ་མང་པོ་སྤྱན་དྲངས། ད་ཡང་འདྲེན་རྒྱུ་ཡིན་ན་ངེད་ཀྱི་རྒྱལ་པོ་དང་ལྷ་ཁང་གཉིས་གང་ལ་ཡང་ཕྱག་མི་འཚལ་བ་ཅི་ལགས་ཞུས་པས། ཁྱེད་རྒྱལ་བློན་རྣམས་ཕྱག་གི་དོན་ཤེས་སམ་གསུངས་ཚེ། རྒྱལ་པོས་མི་ཤེས་ཞུས་པས། ངས་རང་ལྷ་གཉིས་མེད་དོན་གྱི་ཕྱག་གཅིག་བྱས་ཟིན་བརྡས་ཕྱག་ལྷས་མི་ཐུབ་པས་ལྷ་ལ་ཕྱག་མི་འཚལ་གསུངས་པས། རྒྱལ་བློན་རྣམས་ཀྱི་ཐུགས་ལ་འོ་ན་ནང་པ་སངས་རྒྱས་པ་མིན་པ་ཕྱི་པ་མུ་སྟེགས་པ་ཡིན་ནམ་སྙམ་པ་ན། རྒྱལ་པོ་ཐུགས་ཡིད་མ་ཆེས་སམ་གསུངས་ཏེ། སློབ་དཔོན་གྱིས་ཆོས་གོས་གསོལ་ཏེ་རྫུ་འཕྲུལ་གྱི་ཕྱག་མཛད་པ། རྣམ་པར་སྣང་མཛད་གཟུགས་སྐུ་ལ། །བི་མ་ཡེ་ཤེས་ལྷ་ཡི་ཕྱག །ཀུན་རྫོབ་ངོ་གར་ཕྱག་འབུལ་ལོ། །ཞེས་གསུངས་བཞིན་ཕྱག་འཚལ་སྟངས་མཛད་པས། རྣམ་སྣང་གི་དབུ་ནས་གདན་ཁྲི་བར་གས་ནས་ཕྱེད་ཚལ་དུ་སོང་ངོ་། །དེ་ནས་རྒྱལ་པོས་འདི་མུ་སྟེགས་ངེས་པར་འདུག་སྙམ་སྟེ་ཞལ་ངོ་ནག་རོག་གེ་སོང་བ་དང་། །སློབ་དཔོན་གྱིས་རྒྱལ་པོ་ཡིད་མ་ཆེས་སམ་གསུངས་པ་ན། རྒྱལ་པོས་མ་དགའ་ལགས་ཞུས་པས། ཡང་ཕྱག་རྒྱ་མཛད་ནས། རྣམ་པར་སྣང་མཛད་ཡེ་ཤེས་ལྷའི་ཕྱག་རྒྱར། །བི་མ་མི་ཏྲ་གཟུགས་ཀྱི་ཕུང་པོ་ཡིས། །ཡེ་ཤེས་ལྔ་ལྡན་རྟགས་ཀྱི་དབང་བསྐུར་རོ། །གསུངས་ནས་རྣམ་སྣང་གི་སྤྱི་བོར་ཕྱག་བཞག་པས། སྔར་ལས་མཛེས་པར་གྱུར་ཅིང་འོད་ཟེར་བྱུང་སྟེ་བསམ་ཡས་ཀྱི་ལྷ་ཁང་ཐམས་ཅད་ཁྱབ་པར་གང་བས་རབ་གནས་མཛད་དོ། །དེ་ནས་རྒྱལ་པོ་ལ་ཕྱག་བགྱིའོ་གསུངས་ཚེ། རྒྱལ་པོའི་ཞལ་ནས་ཁྱེད་ཕྱི་དགེ་སློང་གི་དགེ་འདུན་ཡིན་པ་ནང་གསང་སྔགས་ཀྱི་གྲུབ་ཐོབ་རྣལ་འབྱོར་པར་གདའ་བས་ཕྱག་མི་མཛད་པར་ཞུ་གསུངས་པས། སློབ་དཔོན་གྱི་ཞལ་ནས། ཁྱོད་བོད་ཆོས་སྐྱོང་བའི་རྒྱལ་པོར་འདུག་པས་ཅིས་ཀྱང་ཕྱག་འཚལ་གསུངས་ནས་ཕྱག་སྟངས་མཛད་པས། རྒྱལ་པོའི་ན་བཟའ་སློབ་དཔོན་གྱི་ཕྱག་གི་འོད་ཟེར་འབར་བས་ཧྲོག་ཧྲོག་ཚིག་པས། རྒྱལ་པོས་དེ་མ་ཐག་སློབ་དཔོན་ལ་ཕྱག་འཚལ་བར་མཛད་དོ། །དེ་ནས་སློབ་དཔོན་བི་མ་ལ་མི་དྲ་གདན་སེང་གེའི་ཁྲི་ལ་བཞུགས། གབ་རྩེ་དགུ་བརྩེགས་གཏན་དུ་བཏིང་། ཟབ་འོག་སྨུག་བེར་སྐུ་ལ་གསོལ། གསོལ་ཟས་ཀྱི་རྣམ་པ་མང་པོ་དྲངས། གསེར་ཕྱེ་བྲེ་གསུམ་དངུལ་གྱི་བུམ་པར་བླུགས་ནས་ཕུལ་བས། སློབ་དཔོན་ཞལ་ནག་ཐོམ་མེ་བཞུགས་ནས་ཅང་མ་གསུངས། རྒྱལ་པོའི་ཐུགས་ལ་ལྷོ་བ་ལ་འདོད་པ་ཅན་ད་དུང་མ་ཚིམས་པར་འདུག་སྙམ་པ་དང་། རྒྱལ་པོའི་ཐུ་བར་བྱེ་མ་བྲེ་གསུམ་བླུགས་ནས་དར་ཅིག་ཟུངས་ཤིག་གསུངས། རྒྱལ་པོས་ཐུ་བ་མ་ཐུབ་ཙ་ན་བྱེ་མ་གསེར་དུ་སོང་འདུག །རྒྱལ་པོ་ཆེན་པོ་ང་ལ་སྣང་བ་ཐམས་ཅད་གསེར་དུ་ཡོད་ཀྱང་། རྒྱལ་པོའི་དགོངས་པ་གྲུབ་ཕྱིར་རེ་ཞིག་བླང་གི་གསུངས་སོ། །ཇི་སྐད་བཤད་པ་བཞིན་སློབ་དཔོན་ལ་བོད་ཀྱི་རྒྱལ་བློན་རྣམས་དང་པོ་ཡིད་མ་ཆེས་པའི་ཐེ་ཚོམ་སྐྱེ་བ་ཀུན་རྫུ་འཕྲུལ་ཆེན་པོས་བསལ་བར་མཛད་ཅིང་དམ་པའི་ཆོས་ལ་ནི། ཆོས་རྒྱལ་དང་ཆོས་བློན་རྣམས་ཡིད་ཆེ་ཡང་། རྒྱལ་པོའི་བློན་པོ་ཕལ་ཆེར་བོན་ལ་དགའ་བས། དེ་དག་གིས་སྡིག་པ་ལ་སོགས་པའི་སྐྱོན་ཡོན་ཏན་དུ་རྩི་ཞིང་། སེམས་ཅན་གསོད་པ་སོགས་འཚེ་བ་ཆོས་སུ་སྨྲ་བས་སངས་རྒྱས་ཀྱི་ཆོས་རྒྱས་པར་མི་འདོད་ཅིང་ཡིད་ཆེ་ཞན་ལ་དགའ་བ་མ་བྱུང་བར་གྱུར་བ་མང་བས། དེ་རྣམས་ཀྱི་ཉེས་པ་བཅོམ་ནས་རང་རང་གི་རྒྱུད་ལ་བདེ་དགེའི་ཡོན་ཏན་དཔག་མེད་འཕེལ་ཞིང་། གཞན་ལ་སྙིང་རྗེའི་འཚེ་བ་སྤོང་སེམས་སྐྱེ་བས་ཀུན་ནས་བསླང་སྟེ་སངས་རྒྱས་ཀྱི་ཆོས་ཀྱང་ཕྱོགས་དུས་ཀུན་ཏུ་རྒྱས་པར་བྱེད་པའི་རྐྱེན་ནི་སྐྱབས་འགྲོ་ཡིན་ཏེ། བྱམས་པ་མགོན་པོས། སྐྱབས་སུ་འགྲོ་བ་འདིར་སོང་དོན་ཆེན་ཏེ། །དེས་ན་དཔག་མེད་ཡོན་ཏན་ཚོགས་འཕེལ་བྱེད། །འགྲོ་བ་འདི་ལ་སྙིང་རྗེའི་བསམ་པས་ཁྱབ། །མཚུངས་མེད་འཕགས་ཆེན་ཆོས་ཀྱང་རྒྱས་པར་བྱེད། །ཅེས་གསུངས་པས་ན། སྐྱབས་འགྲོ་ལ་གཉིས་སུ་ཡོད་པ་ལས་བརྡར་བཏགས་པ་ཀུན་རྫོབ་སྐྱབས་འགྲོ་ཆོ་གས་བླངས་ནས་སྐྱེ་བ་ན་ཆོས་གཞན་གྱིས་གདུལ་དཀའ་བའང་འདུལ་བའི་ཆེ་བ་ཆེན་པོ་དཔག་མེད་ལྡན་པ་སྐྱབས་སུ་འགྲོ་བ་ལ་ཇི་ལྟར་འཇུག་པའི་ཐབས་སམ་ཆོ་ག་སློབ་དཔོན་བི་མ་ལ་མི་ཏྲ་བདག་གིས་བཤད་པ་ཡིན་ནོ། །ཞེས་གསུངས་སོ། །འོ་ན་དོན་དམ་སྐྱབས་འགྲོ་རྒྱུད་ལ་ཇི་འདྲ་བྱས་ནས་སྐྱེ་སྙམ་ན། སྲིད་པའི་རྩ་བ་སེམས་སུ་ཤེས་ནས་སེམས་སྐྱེ་བ་མེད་པར་སོ་སོར་རྟོག་པའི་ཤེས་རབ་ཀྱི་མཐོང་བ་དྲན་པས་ལེགས་པར་བསྐྱངས་བཞིན་ཀུན་རྫོབ་སྐྱབས་འགྲོར་ནན་ཏན་དུ་འབད་པའི་རྒྱུ་ལས་ཅི་ཞིག་ན་རྣམ་པར་མི་རྟོག་པའི་ཡེ་ཤེས་ཆོས་ཉིད་ཀྱིས་ཐོབ་པ་རྒྱུད་ལ་སྐྱེ་སྟེ། སྐྱབས་འགྲོ་བདུན་ཅུ་པ་ལས། ཡེ་ཤེས་སྤྲོས་པ་མེད་པ་གང་། །ཤེས་བྱ་སྐྱེ་བ་མེད་ལས་བྱུང་། །ཞེས་གསུངས་སོ། །གསུམ་པ་ནི། སློབ་དཔོན་རང་ཉིད་ཀྱིི་ཞལ་ནས་གསུངས་པའི་ཚིག་ཆད་ལྷག་མེད་པར་ཡི་གེར་འགོད་པ་ནི་ལེགས་པར་བྲི་བ་ཡིན་ཅིང་། དེ་ལྟ་བུའི་ཡོན་ཏན་ལྡན་པའི་ལོ་ཙཱ་བ་ལ་སློབ་དཔོན་གྱིས་དེ་བཞིན་ཡེ་གེར་བྱོས་ཤིག་ཅེས་བསྐུལ་བ་ཡིན་ལ། འདིས་ནི་སྒྱུར་ཅིག་མ་གསུངས་པས་སློབ་དཔོན་གྱིས་བོད་སྐད་ལྟར་གསུངས་པ་ལོ་ཙཱས་ཡི་གེར་བཀོད་པ་ཡང་གསལ་བར་བསྟན་ཏོ། །ལོ་ཙཱ་བ་ཆེན་པོ་ནི། ཡུལ་ཡར་ཀླུང་དུ་སྐུ་འཁྲུངས་པ་ཡབ་གཉགས་སྟག་དགྲ་ལྷ་སྣང་དང་། ཡུམ་སྲུ་ཟ་སྒྲོལ་མ་སྐྱིད་གཉིས་ཀྱི་སྲས། ཛྙཱ་ན་ཀུ་མཱ་ར་ཞེས་བྱ་བ་བོད་སྐད་དུ་ཡེ་ཤེས་གཞོན་ནུ་རུ་གྲགས་པ་ས་དྲུག་པ་མངོན་དུ་གྱུར་བ་ལ་གནས་ཤིང་ཆེ་བའི་ཡོན་ཏན་དཔག་མེད་ལྡན་པའི་སློབ་མ་ཡང་བློ་རྣོ་བ་གསུམ་དང་། ལུང་མན་ངག་གི་བདག་པོ་ལྔ་རྣམས་ཟག་བཅས་ཀྱི་ཕུང་པོ་མ་སྤངས་པར་རྡོ་རྗེའི་སྐུར་གྱུར་ནས་རིག་འཛིན་གྱི་ཞིང་དུ་གཤེགས་པ་ཤ་སྟག་བྱུང་ལ། ཨ་རོ་ཡེ་ཤེས་འབྱུང་གནས་ཀྱང་འདི་ཉིད་ཀྱི་སློབ་མ་ཡིན་ནོ། །བཞི་པ་བསྔོ་བའི་དགོས་ཆེད་བསྟན་པ། བསྔོ་བའི་ངོ་བོ་བསྟན་པ། བསྔོ་བའི་དམིགས་ཡུལ་བསྟན་པ། བསྔོ་བྱེད་བློའི་རྣམ་པ་བསྟན་པ་བཞི་ལས། དང་པོ་ནི། བསླབ་བཏུས་ལས། རང་འདོད་རྣམ་སྨིན་སྲེད་སྤངས་པས། །དགེ་བ་ཀུན་ཏུ་བསྲུང་བར་འགྱུར། །འགྱོད་པ་ཡང་ནི་མི་བྱ་སྟེ། །བྱས་པར་གྱུར་ཀྱང་བསྒྲགས་མི་བྱ། །ཞེས་གསུངས་ལྟར་དགེ་བ་ལ་རང་གི་ཡིན་པའི་འདོད་པས་མ་བསྔོས་པ་དང་། མཐོ་རིས་ཀྱི་རྣམ་སྨིན་ལ་སྲེད་པས་ལོག་པར་བསྔོས་པ་དང་། དགེ་བ་བྱས་པ་ལ་འགྱོད་པ་དང་། གཞན་ལ་ཆེ་འདོད་ཀྱིས་ངོམ་པར་བྱེད་པ་རྣམས་དགེ་བ་འཛད་པའི་རྒྱུ་བཞི་ཡིན་པས། དེ་དག་གིས་མི་ཟད་པའི་ཕྱིར་དང་། དགེ་བའི་ངོ་བོ་མང་དུ་འཕེལ་བའི་ཕྱིར་དང་། བྱང་ཆུབ་ཀྱི་རྒྱུ་རུ་འགྱུར་བའ་ིཕྱིར་ཡོན་ཏན་དེ་ལྟ་བུ་ལྡན་པ་ཡིན་ཏེ། འབྲི་གོང་སྐྱོབས་པས། བསྔོ་བ་མི་ཟད་ལམ་ཡིན་ཏེ། །སྤེལ་དང་བསྒྱུར་བའི་ཆོས་ཅན་ནོ། །ཞེས་གསུངས་སོ། །གཉིས་པ་ནི། དགེ་ཚོགས་བྱང་ཆུབ་ཏུ་འདུན་པས་སྒྱུར་བའི་བློ་ཡིན་ལ། བསྔོ་བ་དང་སྨོན་ལམ་གྱི་ཁྱད་པར་ནི་དོན་དུ་གཉེར་བྱ་རྒྱུའམ་འབྲས་བུ་ཞིག་འགྲུབ་པའི་ཕྱིར་དུ་དགེ་རྩའི་དམིགས་པ་ལ་བརྟེན་པའི་སེམས་པ་དང་འདུན་པ་ནི་བསྔོ་བ་ཡིན་ཅིང་། དགེ་རྩའི་དམིགས་པ་ལ་མི་བརྟེན་པར་དོན་གང་འགྲུབ་པ་ལ་སེམས་འདུན་སྐྱེ་བ་ནི་སྨོན་ལམ་ཡིན་ནོ། །གསུམ་པ་ལ་གསུམ་ལས། བསྔོ་བྱའི་རྫས་ལ་དམིགས་པ་ནི། བསོད་ནམས་བྱ་བའི་གཞི་གསུམ་ལས། སྦྱིན་པ་ལས་བྱུང་བའི་བསོད་ནམས་བྱ་བའི་གཞི་ཡི་རྒྱུ་ཀུན་སློང་ནི། ཡུལ་མཆོག་ལ་མཆོད་པར་འདོད་པ་དང་། དམན་པ་ལ་ཕན་གདགས་པར་འདོད་པས་ཀུན་ནས་བསླང་བ་སྟེ་མཛོད་ལས། མཆོད་དང་ཕན་གདགས་འདོད་པ་ཡིས། །ཞེས་གསུངས་སོ། །ངོ་བོ་ནི། མུ་བཞིའི་བསྡུས་པ་ཁྱད་པར་གསུམ་དང་ལྡན་པའི་གཏོང་བ་ཡིན་ལ། བཞི་ནི། རང་ཉིད་ཀྱིས་ལེགས་པའི་དོན་ཐོབ་པ་འདོད་པས་སྐུ་གཟུགས་སོགས་རྟེན་ལ་མཆོད་པ་རང་དོན་གྱི་སྦྱིན་པ། རང་འདོད་མེད་པའི་འཕགས་པས་སེམས་ཅན་ལ་སྦྱིན་པ་གཞན་དོན་དུ་སྦྱིན་པ། རང་འདོད་ཅན་གྱིས་སེམས་ཅན་ལ་སྦྱིན་པ་གཉིས་ཀའི་ཕྱིར་སྦྱིན་པ། འཕགས་པས་རྟེན་ལ་གུས་པ་སྐྱེ་བས་མཆོད་པ་གཉིས་ཀའི་དོན་མིན་པའི་ཕྱིར་སྦྱིན་པ་ཡིན་ནོ། །གསུམ་ནི། སྦྱིན་བདག་གི་ཁྱད་པར་རྒྱུ་འབྲས་ཡིད་ཆེས་དད་པ་ལྡན་པའམ། ཚུལ་ཁྲིམས་སོགས་ལྡན་པས་སྦྱོར་བ་ན་བཀུར་སྟི་ཐོབ་བྱེད་གུས་པའི་སྒོ་ནས་སྦྱིན་པ་དང་། རྒྱ་ཆེན་པོའི་ལོངས་སྤྱོད་འདོད་པ་བཞིན་ཐོབ་བྱེད་རང་གི་ལག་གིས་སྦྱིན་པ་དང་། མཁོ་དུས་སུ་ཐོབ་བྱེད་གཞན་ལ་དགོས་དུས་སུ་སྦྱིན་པ་དང་། བར་ཆད་མེད་པར་ཐོབ་བྱེད་གཞན་ལ་མི་གནོད་པར་སྦྱིན་པའོ། །དངོས་པོའི་ཁྱད་པར་གཟུགས་བཟང་པོ་ཐོབ་བྱེད་ཁ་དོག་ཕུན་ཚོགས་སྦྱིན་པ་དང་། གྲགས་པ་ཐོབ་བྱེད་དྲི་ཕུན་ཚོགས་སྦྱིན་པ་དང་། དགའ་བ་ཐོབ་བྱེད་རོ་ཕུན་ཚོགས་སྦྱིན་པ་དང་། ཤིན་ཏུ་གཞོན་ཤ་ཅན་དང་རེག་པ་ཙམ་གྱིས་བདེ་བ་སྐྱེད་པའི་ལུས་ཐོབ་བྱེད་རེག་བྱ་ཕུན་ཚོགས་སྦྱིན་པའོ། །ཞིང་གི་ཁྱད་པར། དུད་འགྲོ་དང་ཚུལ་ཁྲིམས་འཆལ་བ་ལྟ་བུ་འགྲོ་བའི་ཞིང་ཁྱད་འཕགས། ནད་པ་ནད་གཡོག་ལྟ་བུ་སྡུག་བསྔལ་ཅན་གྱི་ཞིང་ཁྱད་འཕགས། ཕ་མ་སོགས་རང་ལ་ཕན་འདོགས་བྱེད་པ་ཕན་འདོགས་ཞིང་ཁྱད་འཕགས། །འབྲས་བུ་འབུམ་འགྱུར་ཐོབ་བྱེད་ཚུལ་ཁྲིམས་ལྡན་པ་ལྟ་བུ་སོགས་ཡོན་ཏན་ཞིང་ཁྱད་འཕགས་ཏེ་ཞིང་བཞི་རུ་གསུངས་སོ། །འབྲས་བུ་ནི། མཛོད་ལས། དེ་འབྲས་ལོངས་སྤྱོད་ཆེན་པོ་ཅན། །ཅེས་སོ། །ཚུལ་ཁྲིམས་ལས་བྱུང་བའ་ིབསོད་ནམས་བྱ་བའི་གཞི་ཡི་རྒྱུ་ཀུན་སློང་ནི། སྒོ་གསུམ་གྱི་སྡིག་ཏོ་མི་དགེ་བ་སྤོང་འདོད་པའོ། །ངོ་བོ་ནི། རྣམ་པར་དག་པ འི་ཡོན་ཏན་བཞི་དང་ལྡན་པ་སྟེ། དེ་ཡང་སྲོག་གཅོད་སོགས་རང་བཞིན་གྱི་ཁ་ན་མ་ཐོ་བ་འཆལ་ཁྲིམས་མ་བྱུང་བ། དེའི་རྒྱུ་བཅས་པའི་ཁ་ན་མ་ཐོ་བ་དང་ཉོན་མོངས་པའི་འཕེན་མ་བྱུང་བ། འཆལ་ཁྲིམས་ཀྱི་གཉེན་པོ་དྲན་པ་ཉེར་བཞག་དང་སྲོག་བསྐྱབས་པ་སོགས་དགེ་བའི་ཚོགས་ལ་བརྟེན་པ། འཇིག་སྐྱོབ་ལེགས་སྨོན་ཙམ་མ་ཡིན་པར་ངེས་འབྱུང་ངམ་ཞི་བའི་བསམ་པ་ལ་བརྟེན་པའོ། །འབྲས་བུ་ནི་བདེ་འགྲོ་མཐོ་རིས་ཐོབ་བྱེད་ཀྱིའང་རྒྱུའི་གཙོ་བོར་གྱུར་པའོ། །བསྒོམ་པ་ལས་བྱུང་བའི་བསོད་ནམས་བྱ་བའི་གཞིའི་རྒྱུ་ཀུན་སློང་ནི། ཉོན་མོངས་དང་རྟོག་ཚོགས་བསལ་བར་འདོད་པའོ། །ངོ་བོ་ནི། མཉམ་པར་བཞག་པའི་དགེ་བ་ཞི་ལྷག་གི་རྣལ་འབྱོར་བསམ་གཏན་ཏིང་ངེ་འཛིན་དང་བདག་མེད་རྟོགས་པའི་ཤེས་རབ་གོམས་པར་བྱས་པས་སེམས་ཀྱི་རྒྱུན་དེ་དག་ཏུ་བསྒྱུར་ནས་བགོ་བར་བྱེད་པའི་ཆོས་ནི་བསྒོམ་པ་ཡིན་ལ། བཟོད་པ་དང་བརྩོན་འགྲུས་གཉིས་ཀྱང་གཞན་དུ་སྡུད་ཚུལ་ཡོད་ཀྱང་བསྒོམ་པ་འདིར་བཞག་གོ། །འབྲས་བུ་ནི། ཉོན་མོངས་དང་རྟོག་སྒྲིབ་ཐམས་ཅད་ས་བོན་ནས་འབྲལ་བར་བྱེད་པའི་རྒྱུའི་གཙོ་བོར་གྱུར་པའོ། །དེ་ལྟ་བུའི་བསོད་ནམས་དགེ་བའི་ཚོགས་རང་གིས་བྱས་པ། གཞན་ལ་བྱེད་དུ་བཅུག་པ། བྱས་པ་ལ་རྗེས་སུ་ཡི་རང་བ། མཐུན་པར་དོན་གཅིག་ཏུ་ཞུགས་པ་སྟེ་དགེ་བ་བྱེད་ཚུལ་བཞིའི་སྒོ་ནས་འདས་པའི་དུས་ན་བྱས་པ། མ་འོངས་པ་ན་བྱེད་པར་འགྱུར་བ། ད་ལྟར་བྱེད་བཞིན་པ་ཐམས་ཅད་དང་། བསྟན་བཅོས་འདི་ཉིད་དང་པོ་སློབ་དཔོན་གྱིས་བརྩམས་པ་ན་བསྔོ་བ་མཛད་པ་བཞིན། རང་ཅག་རྗེས་འཇུག་རྣམས་ཀྱིས་དེ་ལ་འཆད་ཉན་སོགས་བགྱིས་པའི་དགེ་རྩ་ཀུན་བསྔོ་བྱ་ཡིན་ནོ། །གཞན་ཡང་འགྲོ་བ་ཀུན་གྱི་རྒྱུད་ལ་དོན་དམ་པའི་དགེ་བ་བདེ་གཤེགས་སྙིང་པོ་ཟག་མེད་ཀྱི་དགེ་ཚོགས་རྣམ་པ་ཀུན་ཇི་སྙེད་རྫོགས་པའི་མཆོག་དང་ལྡན་པར་རང་བཞིན་གྱིས་ཡོད་པ་དཔེར་ན་སློབ་དཔོན་ཟླ་གྲགས་ཀྱིས་འཇུག་འགྲེལ་དུ། ཡོད་པ་ཉིད་ཀྱི་ཕྱིར། དེ་ལ་བཅོས་མ་མ་ཡིན་པ་དང་གཞན་ལ་ལྟོས་པ་མིན་པ་ཉིད་དུ་ཡོད་དོ། །ཞེས་ཀྱང་བརྗོད་རིགས་ཏེ་དེ་ལ་ཞེས་པ་འདིས་མཆོག་ཏུ་འཛིན་པའི་དངོས་པོ་མེད་པའི་ཕྱིར་ལ་ཀུན་རྫོབ་ཏུ་དེ་ལྟ་བུའི་དོན་སྟོན་པའི་ཕྱིར་རོ། །ཞེས་གསུངས་པ་ཆོས་ཉིད་དེ་བཞིན་ཉིད་དེ་བསྔོ་དགོས་ཏེ། དོན་དམ་པའི་དགེ་བ་ཡིན་པའི་ཕྱིར་དང་། ཟག་མེད་ཀྱི་དགེ་ཚོགས་བླ་ན་མེད་པ་དེ་ལ་དབྱེར་མི་ཕྱེད་པར་ལྡན་པའི་ཕྱིར་དང་། སངས་རྒྱས་ཀྱི་སྤྱན་གྱི་ཡུལ་སྙིང་པོ་དེ་ལ་མོས་པ་སྐྱེ་བ་ཙམ་གྱིས་སངས་རྒྱས་ཐོབ་པའི་སྣོད་དུ་འགྱུར་བར་གསུངས་པའི་ཕྱིར་དང་། དེ་ལ་དགའ་བ་སྐྱེས་ཙམ་གྱིས་སེམས་ཅན་ཀུན་གྱི་བསོད་ནམས་དགེ་ཚོགས་ཀུན་ཟིལ་གྱིས་གནོན་པའི་ཡོན་ཏན་དཔག་མེད་འཕེལ་བར་གསུངས་པའི་ཕྱིར་དང་། དྲི་མ་མེད་པར་གྲགས་པས་བསྟན་པའི་མདོ་ལས། ཆོས་རྣམ་ཆོས་ཉིད་བསྔོ་བ་ཡིས། །མི་འགྱུར་གལ་ཏེ་འགྱུར་ན་ནི། །དང་པོའི་སངས་རྒྱས་གཅིག་ཉིད་ཀྱི། །བསྔོ་བ་དེང་སང་ཅིས་མི་འགྲུབ། །ཅེས་བསྔོ་དགོས་པར་གསུངས་པའི་ཕྱིར་ཏེ། དེ་ཡང་ཆོས་ཉིད་དེ་བཞིན་ཉིད་ངོ་བོ་ཡེ་དག་ཏུ་གནས་ཀྱང་གཞན་གྱིས་བསྔོས་པས་གློ་བུར་འཕྲལ་དག་ཏུ་མི་འགྱུར་ལ། འགྱུར་ན་ནི་གཞན་དང་པོའི་སངས་རྒྱས་གཅིག་ཁོ་ན་ཞིག་གིས་ཀྱང་སེམས་ཅན་ཐམས་ཅད་ཀྱི་ཆོས་ཉིད་ལན་མང་དུ་བསྔོས་པ་གྲུབ་ནས་དེང་སང་ཐམས་ཅད་སངས་རྒྱས་ཟིན་པ་ཞིག་ཅི་ལ་མི་འོང་། ཞེས་གསུངས་པ་དེ་ནི། དཔེར་ན། དཔེ་མེད་པའི་སེམས་བསྐྱེད་ཅན་གྱི་སངས་རྒྱས་གྲངས་མེད་པ་བྱུང་པས་སེམས་ཅན་ཐམས་ཅད་སྔོན་ལ་སངས་རྒྱས་པར་འགྱུར་བའི་སྨོན་ལམ་དཔག་མེད་བཏབ་ཀྱང་། ད་ལྟ་དེ་འདྲའི་འབྲས་བུ་དེ་བཞིན་དུ་མ་གྲུབ་པ་བཞིན་ནོ། །ཞེས་པར་འགྱུར་རོ། །དེ་བས་ན་ཆོས་ཉིད་བསམ་གྱིས་མི་ཁྱབ་པ་ལ་དམིགས་པ་ཙམ་གྱི་རང་གི་དགེ་ཚོགས་ཐམས་ཅད་ཀྱང་ཁྱད་པར་འཕགས་སུ་བྱེད་པས་ན་བསྔོ་བ་ཡིན་ནོ། །ཆོས་ཉིད་དང་ལྡན་པས་བེམ་པོ་སོགས་བསྔོ་བྱར་འགྱུར་རོ་སྙམ་ན་ནི། བྱིས་པའི་སྐྱེ་བོ་རྣམས་ཀྱིས་དགེ་ཚོགས་ཐམས་ཅད་ལ་ལྡན་པའི་ཉོན་མོངས་ཅན་གྱི་མ་རིག་པའང་བསྔོ་བར་འགྱུར་བས་དེ་འདྲ་མི་བསམ་མོ། །སྙིང་རྗེས་གཞན་དོན་ལ་དམིགས་པ་ནི། སྟོང་གསུམ་གྱི་འཇིག་རྟེན་གྱི་སེམས་ཅན་ཙམ་ལ་སོགས་པ་ཡུལ་ཡོངས་སུ་ཆད་པ་མ་ཡིན་པར། ནམ་མཁའ་མཐའ་མེད་པས་ཇི་ཙམ་ཁྱབ་པ་ན། སེམས་ཅན་གང་ཞིག་རིག་དྲུག་གི་གནས་གཅིག་ནས་གཅིག་ཏུ་བརྒྱུད་དེ་འགྲོ་བ་ཡི་སྐྱེ་བོ་མཐའ་མེད་པ་ལས་གཅིག་ཀྱང་མ་ལུས་པ་ཐམས་ཅད་ཡོངས་སུ་རྫོགས་པ་ལ་དམིགས་པ་ཡིན་ནོ། །ཤེས་རབ་རྫོགས་བྱང་ལ་དམིགས་པ་ནི་བསོད་ནམས་ཞེས་བསྔོ་རྒྱུ་བརྗོད་པས་ཞར་ལ་བསྟན་པས་དངོས་སུ་མ་གསུངས་པ་ཡིན་ཏེ། དེ་ཡང་སྐྱབས་འགྲོ་བགྱིས་པའི་བསོད་ནམས་དགེ་བས་ནི་མཐར་ཐུག་སངས་རྒྱས་ཁོ་ན་འགྲུབ་པར་ངེས་པས་ན་རྒྱུ་ཡིས་འབྲས་བུ་བསྡུས་པའི་དབང་དུ་མཛད་པས་ན་ལོགས་སུ་དམིགས་མི་དགོས་མོད། འོན་ཀྱང་སྤྲོས་ལ་དགའ་ན་སྐྱབས་འགྲོ་བདུན་ཅུ་པ་ལས་གསུངས་པ་ལྟར། བསོད་ནམས་གང་དེས་འགྲོ་བ་ཀུན། །དཀོན་མཆོག་གསུམ་ལ་གཞོལ་བར་ཤོག །ཅེས་གསུངས་པའི་དོན་ཡིད་ལ་དྲན་པར་བྱའོ། །བཞི་པ་བསྔོ་བྱེད་བློའི་རྣམ་པ་བསྟན་པ་ལ། གཞན་སྟོབས་ལ་བསྟེན་པའི་རྣམ་པ་དང་། རང་གི་བློ་སྟོབས་བསྐྱེད་པའི་རྣམ་པ་གཉིས་ལས། དང་པོ་ནི། དུས་གསུམ་གྱི་སངས་རྒྱས་རྣམས་ཀྱིས་ཇི་ལྟར་བསྔོས་པ་བཞིན་བསྔོའོ་སྙམ་པའི་སེམས་བྱེད་པ་དང་། འཇམ་དཔལ་ལ་སོགས་བྱང་སེམས་འཕགས་པ་རྣམས་ཀྱི་རྗེས་སུ་བསླབ་ནས་དེ་དག་གིས་ཇི་ལྟར་བསྔོ་བ་བཞིན་བསྔོ་སྙམ་པས་ནི་ཟབ་ཅིང་རྒྱ་ཆེ་བའི་བསྔོ་བ་བླ་མེད་དུ་འགྱུར་རོ། །གཉིས་པ་ནི། བསྔོ་བ་པོའི་གང་ཟག །བསྔོ་བྱའི་དགེ་བ། བསྔོ་ཡུལ་སེམས་ཅན་རྣམས་དངོས་པོ་ཡོད་པར་ལྟ་བའི་རྟག་ལྟའི་མཚན་མ་དང་། དངོས་པོ་མེད་པའོ་སྙམ་པའི་རྒྱས་འདེབས་བྱེད་པ་ཆད་ལྟའི་མཚན་མའི་དམིགས་པ་ཅན་ནི་དུག་ཅན་གྱི་བསྔོ་བར་གསུངས་པས་ཐར་པའི་རྒྱུར་མི་འགྱུར་ཏེ། མདོ་སྡུད་པ་ལས། གལ་ཏེ་མཚན་མར་བྱེད་ན་བྱང་ཆུབ་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཅེས་གསུངས་སོ། །དེས་ན་གང་ཟག་ཕྱོགས་ཞེན་ཅན་ཁ་ཅིག་གིས་རང་རང་གི་ལུགས་ལ་བསྟན་པའི་མིང་བཏགས་ཏེ་དེ་རྒྱས་པའི་ཕྱིར་རང་ཕྱོགས་ལ་ལྷག་པར་ཆགས་པའི་བློས་བསྔོ་བ་བྱེད་པ་ནི་ཐར་པའི་རྒྱུ་ལྟ་ཞོག །དགེ་བར་ཡང་མི་འགྱུར་ཏེ་འདོད་ཆགས་ཀྱིས་བསྔོ་བ་ཡིན་པའི་ཕྱིར་རོ། །དེ་དག་གི་དྲི་མས་མ་གོས་པ་དམིགས་མེད་ཀྱི་རྣམ་པ་ཅན་གྱི་བསྔོ་བ་ནི། འཁོར་གསུམ་གྱི་ཆོས་མ་བརྟགས་ཉམས་དགའ་ངོ་བོར་རྟེན་འབྱུང་སྒྱུ་མ་ལྟ་བུ་མི་མཐུན་པ་དང་རྒྱུ་མེད་ལས་བྱུང་བ་སྤང་ནས་སྐྱེ་བའི་སྣང་བས་མེད་མཐའ་བསལ། རྟེན་འབྱུང་གི་རིགས་པས་བརྟགས་ཅིང་དཔྱད་ན་བདག་གཞན་གྱི་དངོས་པོའི་སྐྱེ་བ་དང་དངོས་མེད་ཀྱི་སྐྱེ་བ་གང་དུ་ཡང་ངོས་བཟུང་བ་མི་རྙེད་པའི་སྟོང་པས་ཡོད་མཐའ་གསལ། ཤིན་ཏུ་བརྟགས་པའི་མཐར་ཐུག་པ་ཆོས་ཉིད་ཀྱི་རིག་པས་གཞལ་ངོར་མཐའ་དང་མཐའ་མེད། ཤེས་བྱ་ཤེས་བྱེད་སོགས་གཉིས་ཆོས་སུ་བློས་བཏགས་ཤིང་སྣང་བའི་མ་རིག་པ་ཐམས་ཅད་རང་སར་ཞིག་ནས་བསམ་བརྗོད་ལས་འདས་པའི་ཡེ་ཤེས་འོད་གསལ་བར་གནས་པ་མངོན་སུམ་མཐོང་བའི་དམིགས་མེད་ཀྱི་ངང་ནས་དམིགས་པ་ལྟར་སྣང་བ་ལ་འཇུག་པའ་ིརྣམ་པ་ནི་བསྔོ་བའི་རྣམ་པ་ཡིན་ནོ། །རྩ་བའི་ས་བཅད་ལྔ་པ་ལ། གང་ཞིག་མཛད་ན། ཡང་དག་ལམ་གྱི་སྐྱབས་འགྲོ་རྒྱུད་ལ་སྐྱེད་པའི་རྟེན་གཞུང་གི་སྐྱབས་འགྲོ་ཡན་ལག་དྲུག་ཏུ་ངེས་པར་བསྡུས་པ་ཉིད་ཡིན་ལ། གང་གིས་མཛད་ན། འཕགས་པའི་ཡུལ་ནས་བྱུང་བ་དགེ་ཞིང་ཤེས་པའི་རང་བཞིན་དམ་པའི་ཆོས་ཀྱི་སྒོ་རྣམས་ལེགས་པར་སློབ་པར་བྱེད་པས་གདུལ་བྱ་སྐྱེ་མཆོག་དམ་པ་མང་པོའི་གཙོ་བོའི་དཔོན་དུ་གྱུར་པ། བསྟན་བཅོས་རྩོམ་པའི་རྒྱུ་གསུམ་ཡོངས་སུ་རྫོགས་ཤིང་འཇའ་ལུས་རྡོ་རྗེའི་ལྟ་བུའི་སྐུ་གྲུབ་ནས་བསྐལ་པ་མ་ཞིག་གི་བར་རྒྱ་ནག་རི་བོ་རྩེ་ལྔར་བཞུགས་ནས་ལོ་བརྒྱ་རེའི་མཚམས་སུ་བོད་དུ་སྤྲུལ་པ་རེ་འབྱོན་པའི་དམ་བཅའ་ཞལ་བཞེས་གནང་བ། རྒྱ་གར་སྐད་དུ། བི་མ་ལ་མི་ཏྲ་ཞེས་པ་བོད་སྐད་དུ་བསྒྱུར་ན། དྲི་མེད་བཤེས་གཉེན་ཏེ་གང་གི་ཞལ་ནས་སོ། །ཚུལ་ཇི་ལྟར་མཛད་ན། དོན་དང་ལྡན་པ་སྒྲུབ་པ་ལྷུར་ལེན་པ། བརྩེ་བས་གཞན་དོན་གཉེར་བའི་སྒོ་ནས་མཛད་པ་ཉིད་ནི་སྐྱབས་སུ་འགྲོ་བའི་ཐབས་ཀྱི་ཚིག་དང་དོན་ཐམས་ཅད་ཡོངས་སུ་རྫོགས་པའི་བསྟན་བཅོས་བླ་ན་མེད་པ་འཇིག་རྟེན་དུ་སྣང་བ་བྱས་སོ། །བསྟན་བཅོས་དེ་མཛད་པའི་དགོས་ཆེད་ནི། འགྲོ་བ་རྣམས་ཀྱི་ཕན་བདེའི་འབྱུང་གནས་སྟོན་པ་མཉམ་མེད་ཤཱཀྱ་སེང་གེའི་བསྟན་པ་སེམས་ཅན་གྱི་ཁམས་སུ་ཡུན་རིང་བསྐལ་པའི་བར་གནས་ནས་སྒྲོན་མའ་ིབསྐལ་པ་ཆེན་པོར་བྱེད་པའི་ཕྱིར་མཛད་དེ། སློབ་དཔོན་བཙུན་པ་ངོ་བོ་ཉིད་མེད་པར་སྨྲ་བའི་ཞལ་ནས། ཆོས་རྣམས་བཀའ་དང་བསྟན་བཅོས་གཉིས་སུ་གནས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་ནི། །ཡུན་རིང་འཇིག་རྟེན་ཁམས་འདིར་གནས་པ་ཡིན། །ཅེས་གསུངས་པ་བཞིན་ཏེ། དེ་དག་གིས་རྣམ་པར་འགྲེལ་བའི་ཚུལ་ཚད་མ་གསུམ་ལྡན་གྱིས་བསྡུས་པའི་བཤད་པ་གྲུབ་ནས་སླར། ཡེ་དྷརྨཱ་ཧེ་ཏུ་པྲ་བྷ་བཱ། ཧེ་ཏུནྟེ་ཥཱནྟ་ཐ་ག་ཏོ་ཧྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དི་མ་ཧཱ་ཤྲཱ་མ་ཎ། རིགས་ཀྱི་རྟགས་སྣང་དད་མོས་ཉེར་ལེན་མཚོ། །སྲིད་ཞིའི་སྐྱོན་ཡོན་ལེགས་དྲན་ལྷས་བསྲུབས་ཚེ། །མཆོག་གསུམ་བྱང་ཆུབ་བར་བརྟེན་དཔའ་འབར་ཟླ། །གདུང་བྲལ་སྐྱེས་བཅས་རྣམ་འགྲེལ་ནམ་མཁའ་ཕྱེ། །རྗོད་བྱེད་འདིར་འཁྱུད་དགེ་ཚོགས་རྟ་བདུན་འདྲས། །འགྲོ་བ་ཀུན་གྱི་རྨོངས་ཆེན་གཉིད་འཐུག་པོ། །གཏན་སངས་རྣམ་མཁྱེན་པད་ཚལ་རྒྱས་མཚུངས་པའི། །བདེ་གཤེགས་རྟག་མཐོང་སྲིད་གསུམ་མི་མཐོང་ཤོག །རང་ལ་ལྷག་ཆགས་རྟག་པར་བདེ་འདོད་ཅན། །ལས་ཀྱི་དབང་མེད་ངན་སོང་སྲིད་གདུང་ཆེ། །འཁྲུགས་པའི་འགྲོ་དང་རྨོངས་ལྡན་ཞི་མཐའ་ཡི། །འཇིགས་རུང་དྲན་སེམས་སྙིང་རྗེར་མཆེད་པར་ཤོག །དཀོན་མཆོག་གསུམ་གྱི་ཆེ་བའི་ཆ་ཤས་ཙམ། །བརྗོད་ནུས་ངག་ཅན་སྐྱེ་བོ་ཡོད་མིན་ཡང་། །གང་འབྱིན་རྣམ་འདྲེན་ལྗགས་རྩེའི་ངོ་མཚར་འཕྲུལ། །བསམ་ཡས་དྲན་པས་དྲན་གཞན་རྟག་འགོག་ཤོག །བསླུ་བ་མེད་ཡུལ་སངས་རྒྱས་དེ་ཡི་ཆོས། །འཕགས་ཚོགས་མཐུ་ཡིས་དེད་དཔོན་སྟོན་པ་ཆེ། །ལམ་བཟང་གྲོགས་མཆོག་མིང་ཡང་ངེས་ཕྲོག་པའི། །ཟླ་མེད་འཇིག་རྟེན་རྒྱན་རྒྱུར་ལ་བརྟེན་ཤོག །གནས་སྐབས་རྒྱུན་ཆགས་སྐྱབས་གསུམ་ཁོ་ན་ཉིད། །དཔུང་གཉེན་སྒྲུབ་པའི་ཡིད་བྱེད་འཇུག་པ་ཡིས། །ཚོགས་ཆེན་རྫོགས་པས་རང་འབྲས་བྱང་ཆུབ་ཆེའི། །དགའ་མཆོག་སྐྱེད་པར་བྱེད་པའི་དཔྱིད་ཐོབ་ཤོག །མཐོང་དང་མ་མཐོང་མཐར་ཐུག་ལེགས་དོན་གྱི། །འབྱོར་བ་གཉེར་ལ་ལེགས་ཚོགས་འབད་མེད་དུ། །འབྱུང་ཕྱིར་གནས་ཉིད་སྐྱབས་འགྲོར་རབ་གྲགས་པར། །ཕྲེང་བའི་སྐལ་བཟང་ཕུན་ཚོགས་རྟག་ཐོབ་ཤོག །ཉེས་སྐྱོན་ལས་གྲུབ་གདོན་རྣམས་ངོ་མ་ཤེས། །རང་བརླག་གཞན་ལ་གནོད་སེམས་འཚེ་མ་དོར། །སྡིག་སྡུག་ལ་འཛུད་བཤེས་གྲོགས་མ་བསྐྲད་པར། །རྨོངས་པར་བྱིང་བའི་བསམ་སྦྱོར་ཀུན་སྤོང་ཤོག །རིན་ཆེན་རྣམ་པ་གསུམ་གྱི་ཆར་གཏོགས་ཀུན། །ལྷར་བཅས་འགྲོ་བའི་བཀུར་སྟིའི་ཞིང་མཆོག་གྱུར། །ཡོན་ཏན་དཔལ་ལས་གྲུབ་པའི་ཆེན་པོ་རྣམས། །ཡོངས་ཀྱི་གཙུག་ཏུ་མཐོ་ལ་ཆེར་གུས་ཤོག །མཆོག་གསུམ་ཁོ་ན་དྲན་པའི་དགའ་སྐྱེས་ཡིད། །གཞན་ལ་འཇུག་ཐབས་བྲལ་ནས་ཅི་སྤྱོད་རྫས། །ཡང་ཡང་འབུལ་བརྩོན་ངག་གི་རིག་བྱེད་སྒྲ། །སྐྱབས་འགྲོར་རྒྱུན་འབྱིན་གཅིག་པུས་དགའ་འབྱུང་ཤོག །སྲོག་ནི་བསྲུང་ཆེད་བདོག་ཀུན་གཏོང་བ་ཡི། །འཁུར་ཆེན་བཟོད་པའི་སྙིང་སྟོབས་ལ་གནས་བཞིན། །འཚོ་ཕྱིར་དམ་བཅའ་ལྡོག་པར་ནུས་མིན་པའི། །སྐྱབས་སྡོམ་བླངས་སེམས་བརྟན་པོ་རྟག་འཆར་ཤོག །སྲིད་གསུམ་འགྲོ་རྒྱུད་མ་བཀྲུས་པར་དག་ཅིང་། །རྩོལ་བ་བྲལ་བཞིན་བསོད་ནམས་ཁོ་ན་སྐྱེ། །བསྒྲུབ་པ་མིན་ཡང་མཐོ་རིས་ཡོན་ཏན་རྫོགས། །བསལ་བཞག་མེད་པར་བྱང་ཆུབ་འགྲུབ་གྱུར་ཅིག །ཆོས་གོས་གསུམ་བཀླུབས་སངས་རྒྱས་བསླབ་ཚུལ་གཞོམ། །སེམས་བསྐྱེད་ཁས་ལེན་ཕྱོགས་ཞེན་སྡང་འཁྲུགས་རེམ། །གཏི་མུག་སྡིག་འཆང་བསྐྱེད་རྫོགས་སྤྱོད་པས་བྲེལ། །རང་གཞན་མ་བཅོམ་མེད་ལུགས་སྤོང་གྱུར་ཅིག །སྒྲོན་མེའི་བསྐལ་པ་བཟང་བྱེད་སངས་རྒྱས་ཀྱི། །ལུང་རྟོགས་ཆོས་དང་འཕགས་བོད་མཁས་འགྲུབ་ཀྱི། །གྲུབ་མཐའ་ཕན་བདེ་ཁོ་ན་མངོན་འབྱུང་དང་། བསྟན་འཛིན་སྐྱེས་རྣམས་ལྷན་ཅིག་འཕེལ་གྱུར་ཅིག །ལེགས་བཤད་ཚུལ་འདིས་གཏི་མུག་ཉེས་འབྲལ་ཞིང་། །རྒྱལ་བསྟན་གསལ་གནས་མཚོན་ཕྱིར་ཉིན་བྱེད་ཀྱིས། །མུན་བསལ་པདྨའི་ཚལ་ཀུན་ཆེར་རྒྱས་བྱེད། །མཐོང་ཐོས་དྲན་ལ་བཀྲ་ཤིས་དཔལ་འཕེལ་ཤོག །ལྷ་ཡི་བཀྲ་ཤིས་བརྒྱ་བྱིན་ཚངས་པས་སྲུང་། །མི་ཡི་བཀྲ་ཤིས་འཁོར་ལོས་སྒྱུར་སྟོབས་འགུག །འཇིག་རྟེན་བཀྲ་ཤིས་བདེ་ལྡན་ཞིང་སྣང་སྟོན། །མཆོག་གསུམ་བཀྲ་ཤིས་གཞུང་འདིས་བྱེད་པར་ཤོག །ཅེས་སྐྱབས་འགྲོ་ཡན་ལག་དྲུག་པའི་རྣམ་འགྲེལ་བསྡུས་པ་ལེགས་བཤད་གསེར་གྱི་འཁོར་ལོ་ཞེས་བྱ་བ་འདི་ཡང་། ཀུན་མཁྱེན་ཆེན་པོའི་བཞེད་པ་ལྟར་ན་བསྟན་པའི་བདག་པོ་བཅོམ་ལྡན་འདས་ཤཱཀྱ་སེང་གེའི་བཀའ་རྣམས་བསྡུ་བ་དང་པོ་བྱས་ནས་བགྲངས་བྱ་བཞི་སྟོང་དང་སུམ་ཅུ་རྩ་གསུམ་ལོན་པའི་མཚམས། འཕགས་ཡུལ་གྱི་སློབ་དཔོན་ཆེན་པོ་པདྨཱ་ཀ་ར་ཉིད་སིནྡྷུའི་རྒྱ་མཚོ་ནས་པདྨའི་སྦུབས་ལས་བརྫུས་ཏེ་འཁྲུངས་པའི་ལོ། །རབ་བྱུང་བཅོ་ལྔ་པའི་ནང་ཚན་རྒྱ་གར་གྱི་སྐད་དུ་བྷཱ་ནུ་ཏཱ་ར་ཞེས་སུ་གྲགས་པ་དེ་བོད་སྐད་ལ་ཉི་སྒྲོལ་བྱེད་ཅེས་སུ་བྱ་བ། མ་ཧཱ་ཙི་ནས་གྱི་ཤིན་ཞེས་པར་འབོད་པ་ཤིང་ཕོ་སྤྲེའུའི་ལོར་རྟ་ལྗང་ཅན་གྱིས་ལུག་ཁྱིམ་ནས་གླིང་བཞི་ལ་སྣང་བའི་དགེ་མཚན་སྟེར་ཞིང་། ལྷ་ཡི་བླ་མ་དྲང་སྲོང་ཕུར་བུ་རྒྱལ་གྱི་སྐར་མ་དང་འགྲོགས་ཏེ། ཚེས་ལ་དབང་བསྒྱུར་་བའི་ཉིན་མོ་སེང་གེའི་ཏལྐ་ལ་བབ་པའི་དུས་སུ་ཤཱཀྱའི་བཙུན་པ་དཔལ་གྱི་སེང་གེའི་མིང་ཅན་གྱིས་རྫོགས་པར་སྦྱར་བ་འདིས་ཀྱང་ཕན་བདེའི་འབྱུང་གནས་བདེ་བར་གཤེགས་པའི་བསྟན་པ་ཕྱོགས་བཅུར་འཕེལ་ཞིང་ཡུན་རིང་དུ་གནས་ལ་སེམས་ཅན་ཐམས་ཅད་བདེ་བ་དགེ་བ་ཁོ་ནའི་དཔལ་ལ་སྤྱོད་པར་གྱུར་ཅིག། ༈ །།མཁན་སློབ་ཆོས་གསུམ་རིང་ལུགས་ཆེ། །འཛམ་གླིང་ས་གསུམ་ཁྱབ་པར་འཕེལ། །འགྲོ་རྒྱུད་མཆོག་གསུམ་སྣང་བ་དང་། །མི་འབྲལ་དུས་གསུམ་དགེ་ལེགས་ཤོག། །།