 སྔ་འགྱུར་བཀའ་མའི་ཆོས་སྡེའི་གླེགས་བམ་ཞེ་བརྒྱད་པ།གླེགས་བམ། ཚི༽མི་ཕམ་འཇམ་དབྱངས་རྣམ་རྒྱལ། དྷརྨ་ཀིརྟིའི། ཀུན་བཟང་དཔལ་ལྡན། མཁྱེན་བརྩེའི་བློ་གྲོས།སི་ཁྲོན་མི་རིགས་དཔེ་བསྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། མགོ་བརྗོད།རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར། ཐུགས་རྗེ་ཆེ་ཞུ།ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས། ངེས་ཤེས་རིན་པོ་ཆེའི་སྒྲོན་མེ།ངེས་ཤེས་རིན་པོ་ཆེའི་སྒྲོན་མེ་བཞུགས་སོ། །གང་ཡིད་ཐེ་ཚོམ་དྲྭ་བའི་སྦུབས་འཐུམས་པ། །འབྱེད་བྱེད་འཇམ་དཔལ་རྡོ་རྗེའི་མར་མེ་ནི། །སྙིང་ལ་ངེས་ཤེས་ཟབ་མོའི་ཚུལ་འཇུག་པ། །ལམ་བཟང་མཐོང་བའི་མིག་དེར་བདག་ཀྱང་དད། །ཀྱེ་མ་ཟབ་མོའི་གནས་ལུགས་ལ། །སྦྱོར་བྱེད་ངེས་ཤེས་རིན་པོ་ཆེ། །ཁྱོད་མེད་པས་ན་སྲིད་པ་འདི། །སྒྱུ་མའི་རྒྱར་ནི་འཐུམས་ཤིང་རྨོངས། །གཞི་ལམ་འབྲས་བུའི་ཆོས་རྣམས་ལ། །ངེས་པས་ཡིད་ཆེས་འདྲོང་བ་དང་། །ཐོས་པས་དད་པར་བྱེད་པ་གཉིས། །ལམ་དང་དེ་ཡི་གཟུགས་བརྙན་བཞིན། །རྨད་བྱུང་ཆོས་ཀྱི་ཟླ་བའི་གྲགས་པ་ནི། །ལེགས་བཤད་གསུང་གི་འོད་དང་ཆབ་ཅིག་པར། །ཐུབ་བསྟན་ལྷ་ལམ་ཡངས པོར་ཤར་བ་ཡིས། །ཐེ་ཚོམ་མུན་པ་ཐིབ་པོ་རྣམ་པར་འཇོམས། །ཐ་སྙད་དཔྱོད་པའི་ཚད་མ་ཡིས། །བླང་དོང་འཇུག་ལྡོག་མི་ནོར་ཞིང་། །ཁྱད་པར་བསྟན་དང་སྟོན་པ་ལ། །ཡིད་ཆེས་རྙེད་པའི་སྒོ་གཅིག་པུ། །ཚད་མའི་གཞུང་དང་གནས་ལུགས་དོན། །གཏན་འབེབས་དོན་དམ་རིག་ཤེས་ཀྱི། །ཚད་མ་དྲི་མེད་གསལ་བྱེད་པ། །ཐེག་མཆོག་དབུ་མ་རྣམ་པ་གཉིས། །ལེགས་པར་སྦྱངས་པའི་བློ་མིག་ཟུང་། །བགྲད་དེ་སྟོན་པས་བསྟན་པའི་ལམ། །དེར་ནི་གཞན་དྲིང་མི་འཇོག་པར། །ཡང་དག་ཞུགས་པ་དེ་ལ་བསྔགས། །དེ་ལྟར་སེམས་པའི་དྲང་སྲོང་ལ ། །ཐོལ་བྱུང་སྡོམ་བུ་པ་ཞིག་གིས། །རྟོག་གེའི་བརྒལ་བརྟག་བྱ་བའི་ཕྱིར། །དྲི་བ་བདུན་པོ་འདི་ལྟར་དྲིས། །གཞན་གྱི་རྗེས་སུ་ཟློས་ལ་མཁས་པས་ཅི། །རང་གི་རྣམ་པར་དཔྱོད་པ་བག་ཕོབ་ལ། །དྲིས་བའི་ལན་འདི་ཉེ་བར་ལྡོན་མཛོད་དང་། །ནང་གི་རྣམ་དཔྱོད་མཐོང་བ་བཞིན་དུ་གསལ། །མང་ཐོས་སྣ་ཞགས་རིང་དུ་བརྐྱང་ན་ཡང་། །ཁྲོན་པའི་ཆུ་ལྟར་ཟབ་པའི་ཆོས་ཀྱི་ཆུ། །མ་མྱོང་ད་རུང་མཁས་པའི་གྲགས་པ་ལ། །རེ་བ་རིགས་ངན་བཙུན་མོར་ཆགས་དང་འདྲ། །ལྟ་བ་དགག་གཉིས་གང་ལྟར་སྨྲ། །ཉན་རང་བདག་མེད་གཉིས་རྟོགས་སམ། །མཉམ་བཞག་འཛིན་སྟངས་ཡོད་དམ་མེད། །དཔྱད་ནས་བསྒོམ་མམ་བཞག་ནས་བསྒོམ། །བདེན་པ་གཉིས་ལས་གང་ཞིག་གཙོ། །མི་གཅིག་མཐུན་སྣང་བལྟ་བྱ་གང་། །དབུ་མར་ཁས་ལེན་ཡོད་དམ་མེད། །དེ་སྐད་སྟོང་ཉིད་ལས་བརྩམས་པའི། །ཟབ་མོའི་དྲི་བ་འདུན་པོ་འདིར། །ལུང་དང་བགལ་བ་མེད་བཞིན་དུ། །རིགས་པས་གྲུབ་པའི་ལན་ཐོངས་ཤིག །རྟོག་གེའི་ཚིག་ཕྲེང་ཚིར་མའི་མདུང་། །འབུམ་གྱིས་བསྣུབ་ཀྱང་མི་ཕིག་པ། །ཆེ་རྣམས་རྨོངས་པའི་དཀའ་གནད་ལ། །སྨྲ་བའི་ལྗགས་རིང་གློག་བཞིན་རྐྱོངས། །དེ་ལྟར་བློ་གྲོས་ཀྱིས་བསྐུལ་ངག་གི་རླུང་། །ཆུང་ངུར་གཡོས་པ་དེས་ཀྱང་དྲང་སྲོང་སྙིང་། །དུས་མཐའི་རླུང་གིས་རི་བཞིན་བསྒུལ་གྱུར་ནས། །མི་སྨྲའི་བརྟུལ་ཞུགས་དར་གཅིག་བཟུང་བའི་མཐར། །ཀྱེ་མ་བརྒྱ་ཕྲག་དཀའ་བའི་ཁུར་བརྟེན་ཅིང་། །ཡང་དང་ཡང་དཔྱད་བློ་གྲོས་རྣོན་པོའི་མེ། །བརྒྱུད་མར་ཆེས་ཆེར་སྦར་བ་དེས་ཀྱང་འདི། །སྐྱོན་བྲལ་ཁམས་སུ་བསྒྲུབ་པར་མི་ནུས་ན། །ལྷན་སྐྱེས་སྤོབས་པའི་བློ་ནུས་ཞན་གྱུར་ཅིང་། །ཡུན་རིང་སྦྱངས་པའི་ཁུར་ཀྱང་མ་བཟུང་བ། །དམན་པ་བདག་གིས་སྨྲ་བ་ག་ལ་ཞེས། །འཇམ་པའི་དབྱངས་ལ་གདུང་བའི་ཤུགས་ཀྱིས་བོས། །དེ་ཚེ་དེ་ཡི་མཐུ་ལས་ཡིན་སྙམ་པའི། །ཡིད་ལ་ཐོ་རེང་དུས་ཀྱི་སྣང་བ་ལྟར། །སྤོབས་པའི་གོ་སྐབས་ཅུང་ཟད་ཐོབ་པའི་མོད། །ལེགས་གསུང་དོན་བཞིན་རིགས་པས་དཔྱད་དེ་སྨྲས། །དགེ་ལྡན་ལྟ་བ་མེད་དགག་ཟེར། །གཞན་རྣམས་མ་ཡིན་དགག་ཏུ་སྨྲ། །སྔ་འགྱུར་རིང་ལུགས་གང་ཞེ་ན། །ཟུང་འཇུག་ཡེ་ཤེས་ཆེན་པོའི་ངོར། །མེད་ཅེས་དགག་བྱ་བཀག་ཤུལ་གྱི། །མེད་རྐྱང་དང་ནི་མ་ཡིན་ཞེས། །བཀག་ཤུལ་ཆོས་གཞན་ཅི་ཞིག་འཕེན། །དེ་གཉིས་བློ་ཡིས་བརྟག་པ་ཙམ། །དོན་ལ་གཉིས་ཀར་ཁས་མི་ལེན། །དགག་སྒྲུབ་གཉིས་དང་བྲལ་བ་ཡི། །བློ་འདས་གདོད་མའི་ཆོས་ཉིད་ཡིན། །སྟོང་ཚུལ་ཁོ་ནར་བསམས་ནས་ནི། །དྲི་ན་མེད་དགག་ཉིད་ཡིན་ཏེ། །འཕགས་ཡུལ་དཔལ་ལྡན་ཟླ་བ་དང་། །བོད་ན་རོང་ཟོམ་ཆོས་བཟང་གཉིས། །དགོངས་པ་གཅིག་དང་དབྱངས་གཅིག་གིས། །ཀ་དག་སྟོང་པ་ཆེན་པོ་བསྒྲུབས། །ཆོས་འདི་ཀ་ནས་དག་པའམ། །གདོད་ནས་རང་བཞིན་མེད་པའི་ཕྱིར། །བདེན་པ་གཉིས་ཆར་མ་སྐྱེས་པས། །མེད་ཅེས་བརྗོད་ལ་ཅི་ཞིག་ཚོམ། །ཀ་བ་ཀ་ནས་དག་པ་ཡི། །ཤུལ་ན་མི་སྟོང་ཅུང་ཟད་མེད། །ཀ་བ་མེད་ཅེས་མ་བཀག་ན། །ཀ་བ་མིན་ཞེས་ཅི་ཞིག་ཡིན། །ཀ་བ་ཁེག་པའི་སྟོང་པ་དང་། །ཤུལ་ན་ལུས་པའི་སྣང་བ་གཉིས། །སྟོང་དང་མ་སྟོང་ཟུང་འཇུག་ཏུ། །མི་རུང་སྲད་བུ་སྒྲིམ་པ་བཞིན། །ཀ་བ་ཀ་བས་མི་སྟོང་དང་། །ཆོས་ཉིད་ཀ་བས་སྟོང་ངོ་ཞེས། །སྟོང་གཞི་བཞག་ནས་གཞན་སྟོང་པ། །ཚིག་དང་དོན་གྱི་གཞན་སྟོང་གཉིས། །ཨེ་མ་དེས་དེ་མ་སྟོངས་ན། །སྟོང་གཞི་མི་སྟོང་ལྷག་མར་ལུས། །གཟུགས་ནི་གཟུགས་ཀྱིས་སྟོང་ངོ་ཞེས། །ལུང་དོན་རིགས་པར་བཅས་ལས་འགལ། །ཀ་བ་ཀ་བའི་བདེན་གྲུབ་གཉིས། །གཅིག་ན་གཅིག་ཁེག་གཅིག་ཀྱང་ཁེག །གཞན་ན་ཀ་བ་མ་ཡིན་པའི། །བདེན་གྲུབ་ཁེག་ཀྱང་ཀ་བ་ནི། །གང་གིས་མི་སྟོང་དཔྱད་བཟོད་འགྱུར། །བདེན་གྲུབ་ཡོད་མ་མྱོང་བའི་ཕྱིར། །གཅིག་དང་ཐ་དད་མི་དགོས་ན། །བདེན་གྲུབ་མེད་ཀྱང་སོ་སྐྱེའི་ངོར། །བུམ་པ་བདེན་པར་འཛིན་པའི་ཕྱིར། །མི་སྟོང་བུམ་པའི་ཕ་རོལ་ན། །བདེན་པར་གྲུབ་རྒྱུ་སུ་ཞིག་ཡིན། །དགག་བྱའི་སྣང་ཚུལ་ངེས་སོ་ལོ། །བདེན་གྲུབ་སོགས་ཀྱི་ཁྱད་པར་གང་། །དགག་བྱར་སྦྱར་ནས་སྟོན་པ་ནི། །རང་རྒྱུད་གཞུང་ལ་གྲགས་མོད་ཀྱང་། །དོན་དམ་དཔྱོད་པའི་དབང་དུ་ན། །དེ་སྦྱར་བ་ལ་དགོས་པ་ཅི། །སྟོང་ན་ཀུན་རྫོབ་ཙམ་དུ་ཡང་། །ཀ་བ་མེད་པ་ལྟར་སེམས་ནས། །ཚིག་འཁྲིའི་དོགས་པས་འདི་བྱས་ཀྱང་། །ཚིག་འཁྲིའི་འགལ་བ་འདི་ལ་ཆེ། །ཀུན་རྫོབ་ཙམ་དུ་ཀ་བ་ནི། །ཡོད་ཅེས་བྱས་པས་མི་ཆོག་པར། །དེས་དེ་མི་སྟོང་ཅི་ལ་ཟེར། །དེ་གཉིས་དོན་གཅིག་ཡིན་ཟེར་ན། །མ་ཡིན་ཀ་བ་ཡོད་ཅེས་དང་། །ཀ་བར་ཀ་བ་ཡོད་ཅེས་པ། །མི་མཚུངས་ཕྱི་མ་རྟེན་བརྟེན་པར། །དོན་གྱི་ཁས་བླངས་སོང་བ་བཞིན། །དོན་དམ་ཀ་བ་མི་དམིགས་ན། །ཀ་བ་ཀ་བས་མི་སྟོང་ཅི། །ཀུན་རྫོབ་ཀ་བ་ཀ་བས་ཞེས། །ལན་གཉིས་བརྗོད་པ་བརྡའ་ལ་རྨོངས། །རང་ནི་རང་གིས་མི་སྟོང་ན། །རང་ཡོད་བཞིན་དུ་གཞན་གྱིས་སྟོང་། །དགག་བྱ་གཞན་དུ་མེད་གྱུར་ན། །རང་གིས་མི་སྟོང་ཁས་ལེན་འགལ། །སྤྱིར་ན་གཞན་གྱིས་སྟོང་པ་དེས། །སྟོང་གོ་ངེས་པར་མི་ཆོད་དེ། །རྟ་ལ་བ་ལང་མ་གྲུབ་ཀྱང་། །རྟ་དེ་སྟོང་བར་ག་ལ་ངེས། །རྟ་མཐོང་དེ་ཡིས་བ་ལང་ལ། །ཅི་ཞིག་ཕན་ཏེ་ཅི་ཞིག་གནོད། །དེ་ཕྱིར་མི་སྟོང་མྱང་འདས་དང་། །འཁོར་བའང་ཆོས་དང་ཆོས་ཉིད་དུ། །མི་རུང་སྣང་སྟོང་ཟུང་འཇུག་དང་། །སྲིད་ཞི་མཉམ་ཉིད་འདི་ལ་མེད། །ཆུ་ཟླ་ཟླ་བ་མིན་ནོ་ཞེས། །གནམ་ཟླས་སྟོང་དང་ཆུ་ཟླ་རང་། །སྣང་དེ་ཟུང་འཇུག་ཡིན་ན་ཀོ། །ཟུང་འཇུག་རྟོགས་པ་སུས་ཀྱང་བླ། །བ་ལང་རྟ་མིན་ཀུན་གྱིས་ཤེས། །བ་ལང་སྣང་བར་མངོན་སུམ་མཐོང་། །དེ་རྟོགས་ངོ་མཚར་ཆེའོ་ཞེས། །བདག་ཉིད་ཆེན་པོ་ཇི་སྟེ་གསུངས། །དེས་ན་རང་གི་ལུགས་ལ་ནི། །ཆུ་ཟླ་བརྟགས་ན་ཆུ་ཟླ་ཉིད། །ཅུང་ཟད་མི་རྙེད་མེད་བཞིན་དུ། །ཆུ་ཟླ་སྣང་བར་མངོན་སུམ་ཚེ། །མེད་དགག་ཡིན་ཀྱང་སྣང་རུང་བ། །སྟོང་དང་ཡོད་པ་སོ་སྐྱེའི་བློར། །འགལ་ཡང་འདིར་ནི་མངོན་སུམ་དུ། །ཟུང་འཇུག་འདི་ལ་རྨད་བྱུང་ཞེས། །ངོ་མཚར་ཚིག་གིས་མཁས་རྣམས་བསྔགས། །སྟོང་པའི་ངོས་ནས་གཞལ་བ་ན། །མི་སྟོང་ཅུང་ཟད་ཡོད་མིན་ཕྱིར། །མེད་ཅེས་མཐའ་གཅིག་སྨྲར་གཏུབ་ཀྱང་། །མེད་དེའི་མེད་ཚུགས་མ་ཤོར་བཞིན། །སྣང་བ་འགག་མེད་ཉིད་དུ་ཤར། །སྣང་དེའི་སྣང་ཚུགས་མ་ཤོར་བཞིན། །གཞི་མེད་སྟོང་པ་ཆེན་པོར་གནས། །དེ་ལ་འདི་སྟོང་འདིས་སྟོང་དང་། །འདི་སྣང་འདི་སྟོང་དབྱེ་བ་ཞིག །ནམ་ཡང་རྙེད་པ་མེད་པ་ལ། །ཁོ་ཐག་ནང་ནས་ཆོད་པའི་ཚེ། །དོན་ཚོལ་མཁན་པོ་དོན་མེད་པས། །ཡིད་ཆད་སྐྱེ་བ་མེད་ཀྱི་རྟིང་། །ཡིད་བདེ་ཐོབ་པ་ངོ་མཚར་ཆེ། ༈ །འགའ་ཞིག་ཉན་རང་དགྲ་བཅོམ་པས། །ཆོས་ཀྱི་བདག་མེད་མ་རྟོགས་ཟེར། །ཕུང་པོར་ང་ཙམ་འཛིན་པའི་བདག །མ་ཁེག་དེ་སྲིད་དེའི་ནུས་པའི། །ཉོན་མོངས་སྤོང་བ་མེད་པ་དང་། །བདག་དེའང་ཕུང་པོ་ལ་བརྟེན་ནས། །བརྟགས་ཙམ་ངར་འཛིན་ལྷན་སྐྱེས་ཀྱི། །ཡུལ་ཡིན་དེ་དང་བུམ་སོགས་ལ། །སྟོང་གཞིའི་དབྱེ་བ་མ་གཏོགས་པ། །སྟོང་ཚུལ་ཁྱད་པར་འགའ་མེད་དེ། །ཆོས་དང་གང་ཟག་སོ་སོར་ཡང་། །རང་བཞིན་གྲུབ་པས་སྟོང་ཕྱིར་རོ། །དེ་ལྟར་ལུང་དང་རིགས་པས་ཀྱང་། །མངོན་སུམ་གྲུབ་ལས་བརྒལ་ནས་སུ། །ཉན་རང་ཆོས་བདག་མ་རྟོགས་ཞེས། །སྨྲ་བ་དམ་བཅའ་ཙམ་དུ་ཟད། །དེ་ལ་ཁ་ཅིག་ཐལ་ཆེས་ནས། །ཐེག་གསུམ་མཐོང་ལམ་གཅིག་པ་དང་། །རྟོགས་པ་མཐོ་དམན་མེད་པར་འདོད། །ཤེར་ཕྱིན་སྔགས་སོགས་མདོ་རྒྱུད་གཞུང་། །ཀུན་ཀྱང་དྲང་བའི་དོན་དུ་འགྲེལ། །དེ་ལ་དམན་ལམ་སྔོན་སོང་བའི། །ཐེག་ཆེན་མཐོང་ལམ་ཐོབ་སོགས་ཚེ། །སྤང་བྱ་ཅུང་ཟད་མེད་སོགས་སྐྱོན། །རིགས་པས་གནོད་པ་ཟློག་མེད་འབབ། །གཞན་ཡང་རྟོགས་བྱ་རྟོགས་གྱུར་ཀྱང་། །སྤང་བྱ་སྤོང་བར་གྲོགས་དགོས་ཟེར། །མ་རྟོགས་རྟོགས་པར་ཁས་བླང་འགལ། །རྟོགས་ན་སྤང་བྱ་མི་སྤོང་འགལ། །ཉི་མ་ཤར་ཡང་མུན་པའི་དཔུང་། །འཇོམས་པ་གཞན་ལ་ལྟོས་པ་མཚར། །ཁ་ཅིག་ཉན་རང་རང་རྒྱུད་ཀྱི། །ཕུང་པོ་ལྔ་པོ་སྟོང་རྟོགས་ཀྱང་། །ཆོས་གཞན་བདག་མེད་མི་རྟོགས་ཟེར། །ཕུང་པོ་ལྔ་པོ་སྟོང་རྟོགས་ན། །འདུས་མ་བྱས་ཙམ་མ་གཏོགས་པའི། །མ་རྟོགས་དངོས་གཞན་ཅི་ཞིག་ཡོད། །དེས་ན་རང་ལུགས་གང་ཡིན་ན། །དཔལ་ལྡན་ཟླ་བའི་རང་འགྲེལ་ལས། །ཉོན་མོངས་སྤངས་ཕྱིར་ཉན་རང་ལ། །རྒྱལ་བས་གང་ཟག་བདག་མེད་དང་། །ཤེས་སྒྲིབ་སྤངས་ཕྱིར་རྒྱལ་སྲས་ལ། །ཆོས་བདག་མེད་པ་རྫོགས་པར་བསྟན། །འོ་ན་ཉན་རང་གཉིས་པོ་ལ། །སྟོང་ཉིད་རྟོགས་པ་ཡོད་དོ་ཞེས། །སྨྲས་པ་ཇི་ལྟར་ཡིན་ཞེ་ན། །ཉན་རང་དེ་དག་ཀུན་ཉོན་ཙམ། །སྤངས་ཕྱིར་གང་ཟག་མེད་སྒོམ་གྱི། །ཆོས་ཀྱི་བདག་མེད་རྫོགས་པར་ནི། །སྒོམ་པ་མེད་ཅེས་གསུངས་བ་བཞིན། །ཀློང་ཆེན་རབ་འབྱམས་ཞལ་སྔ་ནས། །སྔོན་གྱི་སློབ་དཔོན་ཐམས་ཅད་ནི། །ཡོད་དང་མེད་ཅེས་རྩོད་ན་ཡང་། །རང་བཞེད་སྔོན་གྱི་ཉན་རང་ལ། །ཅི་རིགས་སྣང་ཡང་དགྲ་བཅོམ་པ། །འཐོབ་ལ་ཕུང་པོར་འཛིན་པའི་བདག །སྟོང་པར་མ་རྟོགས་ཐར་མིན་པས། །དེ་ཙམ་རྟོགས་པ་ཡོད་ན་ཡང་། །བདག་མེད་རྫོགས་པར་རྟོགས་པ་མེད། །ཡུངས་འབྲུ་སྲིན་གྱིས་ཟོས་པ་ཡི། །ནང་གི་མཁའ་བཞིན་ཉན་རང་གི །བདག་མེད་ཆུང་ངུར་གསུང་པ་སྟེ། །དེ་ཕྱིར་དམན་ལ་དགག་པའི་སྒྲས། །ཆོས་བདག་མ་རྟོགས་ཅེས་བཞེད་གསུང་། །འདི་ནི་ཕུལ་བྱུང་ལེགས་བཤད་དེ། །འདི་དང་མཚུངས་པ་གཞན་མ་མཆིས། །དཔེར་ན་རྒྱ་མཚོ་ཆེན་པོའི་ཆུ། །ཧུབ་གང་བཏུང་ཡང་རྒྱ་མཚོ་དེ། །མ་བཏུང་ཞེས་སུ་མི་རུང་ལྟར། །ཆོས་ཀྱི་བྱེ་བྲག་ང་ཙམ་པོ། །བདག་མེད་མཐོང་ཕྱིར་སྟོང་མཐོང་འདོད། །ཧུབ་གཅིག་འཐུང་བས་རྒྱ་མཚོའི་ཆུ། །རྫོགས་པར་ཁོང་དུ་མ་སོང་ལྟར། །མཐའ་དག་ཤེས་བྱའི་རང་བཞིན་ཀུན། །སྟོང་པར་རྟོགས་པ་མེད་པའི་ཕྱིར། །བདག་མེད་རྫོགས་པར་མ་མཐོང་འདོད། །གལ་ཏེ་ཆོས་གཅིག་སྟོང་མཐོང་ན། །ཐམས་ཅད་མི་མཐོང་ཅི་ཞེ་ན། །དེ་གས་ལུང་རིགས་མན་ངག་གིས། །བརྟགས་ན་དེ་ལྟར་མཐོང་མོད་ཀྱི། །རེ་ཞིག་ཉན་ཐོས་རིགས་ཅན་རྣམས། །གང་ཟག་མེད་ཙམ་ཁོ་ན་ལ། །ཞེན་པས་མཐའ་གཞན་རྟོགས་དཀའ་སྟེ། །བུམ་པ་བརྟགས་པར་འདོད་རྣམས་ཀྱང་། །རྡུལ་ཕྲན་རྫས་སུ་འདོད་པ་བཞིན། །གལ་ཏེ་བུམ་པ་བཏགས་པར་ནི། །རྟོགས་པའི་བློ་དེས་རྡུལ་ལ་ཡང་། །དཔྱད་ན་རྟོགས་པར་རིགས་མོད་ཀྱི། །རེ་ཞིག་མ་རྟོགས་དེ་བཞིན་ནོ། །རག་པའི་གཞི་དང་ཆ་མེད་རྡུལ། །འགལ་བར་སྣང་ཡང་དེ་དག་ལ། །རེ་ཞིག་ལུང་དང་མན་ངག་གིས། །དབེན་ཕྱིར་མི་འགལ་གྲུབ་མཐའ་སྒྲུབ། །དེ་བཞིན་སེམས་ཙམ་དག་གིས་ཀྱང་། །གཟུང་བ་མེད་ན་འཛིན་པ་ཡང་། །ཅི་ཕྱིར་མི་རྟོགས་རང་རྒྱུད་པས། །དོན་དམ་བདེན་མེད་རིག་པ་དེས། །ཐ་སྙད་དུ་ཡང་རང་མཚན་གྱིས། །གྲུབ་པ་མེད་པར་ཅིས་མ་རྟོགས། །དེས་ན་ཐམས་ཅད་ཐལ་འགྱུར་བ། །འབའ་ཞིག་ཉིད་དུ་ཁྱོད་ལ་ཐལ། །ཉན་རང་ཐེག་པ་ཆེན་པོ་ལ། །སྐུར་ཞིང་སྨོད་པའང་ག་ལ་སྲིད། །དེས་ན་གཅིག་གི་རང་བཞིན་ཉིད། །ཀུན་ལ་མཉམ་ཉིད་ཡིན་ན་ཡང་། །ཕྱི་དང་ནང་གི་རྐྱེན་གྱི་ཚོགས། །མ་ཚངས་དེ་སྲིད་རྟོགས་པ་བུལ། །སྤྱིར་ན་དབང་རྣོན་རང་སྟོབས་ཀྱིས། །རྟོགས་པ་ཡོད་ཀྱི་རྟུལ་པོ་ཡིས། །རང་གི་དེ་མ་ཐག་ཏུ་ཡང་། །ངེས་པར་རྟོགས་པའི་ཁྱབ་པ་མེད། །ནམ་ཞིག་ཅིས་ཀྱང་རྟོགས་ངེས་ཏེ། །བསྐལ་པ་སྟོང་ཕྲག་བཅུ་ཡི་མཐར། །འགོག་པའི་དབྱིངས་ལས་དགྲ་བཅོམ་པ། །ལྡང་སྟེ་ཐེག་ཆེན་འཇུག་པར་གསུངས། །ཚུལ་བཞིན་ཐེག་ཆེན་ཞུགས་པས་ཀྱང་། །གྲངས་མེད་བསྐལ་པར་གོམས་དགོས་ན། །ཉན་ཐོས་ཞི་བདེ་དོན་གཉེར་བས། །བསྐལ་པ་སྟོང་ཕྲག་དེ་ཙམ་ལ། །བདག་མེད་མཐའ་དག་མ་རྟོགས་པའི། །གནས་སྐབས་མི་སྲིད་ཅི་ལ་འགྱུར། །ས་ཐོབ་རྣམས་ལའང་ཆོས་ཀྱི་དབྱིངས། །ཇེ་བས་ཇེ་གསལ་རྫོགས་མིན་ནམ། །ཚོགས་བསག་གྲོགས་དང་རིག་པའི་སྒོ། །མཐའ་ཡས་ཚུལ་དང་བྱང་སེམས་ཀྱི། །སྤྱོད་པ་ཡོངས་བསྔོའི་རྐྱེན་ཚང་ན། །ངེས་པར་རྫོགས་པར་རྟོགས་འགྱུར་ཏེ། །ཐབས་ལ་མཁས་པའི་རྐྱེན་ཚང་བས། །སྔགས་ཀྱི་མྱུར་དུ་རྟོགས་བ་བཞིན། །རྟག་བདག་སྤངས་ཀྱང་ལྷན་སྐྱེས་ཀྱི། །ངར་འཛིན་ཕུང་པོར་བརྟེན་ནས་འཇུག །དེ་ཕྱིར་ཕུང་པོར་འཛིན་ཡོད་པ། །དེ་སྲིད་ངར་འཛིན་ཡོད་གསུང་དོན། །གདགས་བཞི་ཕུང་པོ་ཡོད་གྱུར་ཅིང་། །དེར་འཛིན་སེམས་པ་ཡོད་ཇི་སྲིད། །བདག་ཏུ་གདགས་པའི་རྒྱུ་ཚང་བས། །འབྲས་བུ་བདག་འཛིན་མི་ལྡོག་གསུང་། །གང་ཕྱིར་རྟག་བདག་སྤངས་ཀྱང་ནི། །གདགས་གཞིར་བརྟེན་ནས་བཏགས་པའི་བདག །ལྷན་སྐྱེས་ཞེན་ཡུལ་མ་བཀག་ཕྱིར། །ངར་འཛིན་སྐྱེ་ལ་གེགས་མེད་ཉིད། །དེ་ཕྱིར་ཉོན་མོངས་སྤང་བ་ལ། །ཕུང་སོགས་སྟོང་པར་རྟོགས་དགོས་ཞེས། །འཆད་པ་ལུང་འདིའི་དོན་མིན་ཏེ། །འདི་དོན་འདི་བཞིན་ཟླ་བས་བཀྲལ། །བཏགས་པའི་ང་ཙམ་ཤེས་གྱུར་ན། །ངར་འཛིན་ལྡོག་ལ་དེས་ཆོག་སྟེ། །ཐག་པ་མེད་པར་མ་ཤེས་ཀྱང་། །སྦྲུལ་འཛིན་སྦྲུལ་མེད་མཐོང་བས་ལྡོག །མཐར་ནི་ངེས་པར་རྟོགས་དགོས་ཏེ། །ཆོས་ཀུན་དེ་ཉིད་གཅིག་ཡིན་ཅིང་། །དེ་ཉིད་མཐོང་བའི་ཚུལ་གཅིག་པས། །མཐར་ཐུག་ཐེག་གཅིག་འགྲུབ་པ་ཡི། །རིགས་པ་ཀླུ་སྒྲུབ་ཡབ་སྲས་སྨྲ། །གལ་ཏེ་ཁྱོད་ཀྱི་ལུགས་ལྟར་ན། །དེ་ཉིད་ཉན་རང་མཐོང་ཟིན་པས། །རིགས་པ་དེ་ཡིས་ཐེག་གཅིག་ཏུ། །ཅི་ཞིག་འགྲུབ་སྟེ་དམ་བཅའ་ཙམ། །འདིར་ནི་ཟུང་འཇུག་ཡེ་ཤེས་གང་། །མཐར་ཐུག་གཟིགས་པ་དེ་ཁོ་ན། །དེ་བཞིན་ཉིད་གཅིག་དེ་ཡིན་ཏེ། །འཕགས་ཀུན་དེ་ལ་གཞོལ་ཞིང་འབབ། །དེས་ན་ཚུལ་འདི་ལེགས་རྟོགས་ན། །ཀླུ་སྒྲུབ་ལུགས་དང་བྱམས་པ འི་གཞུང་། །ཕན་ཚུན་བུ་ར མ་སྦྲང་རྩི་བཞིན། །ལྷན་ཅིག་ཡི་གས་བདེར་འཇུ་ཡི། །གཞན་དུ་མི་འཕྲོད་ཟས་བཞིན་དུ། །ཁོང་ན་མི་བདེའི་སྐྲན་གྱུར་ཚེ། །ལུང་རིགས་གཙགས་བུ་རྣོན་པོ་བརྒྱ། །གདེངས་ཤིང་འདེབས་ལ་ཡིད་གཏིང་སྡར། །ལྟ་བའི་དངོས་གཞི་སྐྱོང་བའི་དུས། །ཁ་ཅིག་ཅིར་ཡང་མི་འཛིན་ཟེར། །ཅིར་ཡང་མི་འཛིན་ཞེས་བའི་དོན། །ལེགས་པར་རྟོགས་དང་ལོག་རྟོག་གཉིས། །དང་པོ་མཐའ་བཞིའི་སྤྲོས་བྲལ་ཏེ། །འཕགས་པའི་ཡེ་ཤེས་ཀྱི་མདུན་ན། །གང་ཡང་གནས་པ་མེད་མཐོང་བས། །འཛིན་སྟངས་ངང་གིས་ཞིག་པ་སྟེ། །སྟོང་གསལ་མཁའ་ལ་ལྟ་དང་མཚུངས། །གཉིས་པ་དྲན་མེད་ཧ་ཤང་ལུགས། །མ་དཔྱད་ཙེ་ནེར་བཞག་པ་ཡིས། །ལྷག་མཐོང་གསལ་བའི་ཆ་མེད་པར། །མཚོ་གཏིང་རྡོ་བཞིན་ཐ་མལ་གནས། །དཔེར་ན་ཅི་ཡང་མེད་ཅེས་པ། །དབུ་མས་མེད་པར་མཐོང་བ་དང་། །གཟུགས་མེད་མེད་པར་མོས་པ་ལྟར། །ཚིག་ཙམ་མཚུངས་པ་འདི་དག་ཀྱང་། །དོན་ལ་མི་མཚུངས་གནམ་ས་བཞིན། །དེ་ལྟར་མཐའ་བཞི་སྤྲོས་བྲལ་ལ། །མཐའ་བཞི་གང་དུའང་མི་འཛིན་ན། །མཐའ་བཞི་ལས་འདས་འཛིན་སྟངས་ཞིག །མེད་པས་འཛིན་སྟངས་མེད་པར་འདོད། །གལ་ཏེ་འཛིན་སྟངས་མེད་ཅེས་པས། །བླུན་པོ་ཁ་ཅིག་དང་པོ་ནས། །ཅིར་མི་འཛིན་པར་ལྷོད་དོ་ལོ། །འགྲོ་ཀུན་ཐ་མལ་ཀློད་ཆེས་པས། །ཁམས་གསུམ་འཁོར་བར་གཏན་འཁྱམས་ན། །ད་དུང་བཀླགས་ཏེ་བསྐུལ་མི་དགོས། །གལ་ཏེ་དེ་དག་མི་ཤེས་བཞིན། །བདག་ཅག་རང་ངོ་ཤེས་ཟེར་ན། །དོན་དམ་རང་ངོ་ཤེས་པ་ལ། །བདེན་སྟོང་ཕུ་ཐག་ཆོད་པ་དགོས། །འཁྲུལ་སྣང་བདག་དང་གཞན་ནོ་ཞེས། །སུས་ཀྱང་ཤེས་ལ་སྒོམ་ཅི་དགོས། །གལ་ཏེ་སེམས་ལ་མདོག་དབྱིབས་དང་། །བྱུང་གནས་འགྲོ་ས་བརྟག་པའི་ཚེ། །མ་མཐོང་སྟོང་བར་རྟོགས་ཤེ་ན། །ཆོས་ཚུལ་ཤིན་ཏུ་ཟབ་པ་སྟེ། །འདི་ལའང་གོལ་ས་ཤིན་ཏུ་ཆེ། །སེམས་ནི་གཟུགས་ཅན་མ་ཡིན་པས། །སུས་ཀྱང་མདོག་སོགས་མཐོང་མི་སྲིད། །མ་མཐོང་ཙམ་ལ་སྟོང་པ་ཉིད། །ངོ་འཕྲོད་སྙམ་ན་ཤིན་ཏུ་གོལ། །ལན་བརྒྱར་བརྟག་ཀྱང་མི་ཡི་མགོར། །ཕྱུགས་ཀྱི་རཱ་ཅོ་མཐོང་མི་སྲིད། །དེ་མ་མཐོང་བས་དེ་སྟོང་པར། །རྟོགས་སོ་ཞེ་ན་སུས་ཀྱང་སླ། །དེས་ན་རིགས་པའི་དཔྱད་པ་དེས། །གནས་ལུགས་ཐིག་པོ་ཞིག་མཐོང་ན། །སེམས་དེ་སྒྱུ་མ་ལྟ་བུ་ལ། །ངོ་བོ་བདེན་མེད་གཏིང་ནས་རིག །དེ་ཚེ་ཐད་ཀའི་ནམ་མཁའ་ལ། །བལྟས་པ་བཞིན་དུ་རང་གི་སེམས། །འགྱུ་བཞིན་པ་ཡང་སྟོང་པ་ཡི། །ངེས་ཤེས་ཁོ་ཐག་ཆོད་པ་དགོས། །ཡང་ནི་ཁྱོད་ཀྱི་སེམས་དེ་ནི། །མེད་པ་མཁའ་འདྲ་ཞིག་འདུག་གམ། །སྣ་ཚོགས་ཤེས་པ་གང་ཡིན་ཟེར། །སྐད་ཅིག་མི་སྡོད་གཡོ་བའི་སེམས། །སུ་ལའང་ཡོད་ཕྱིར་ཤེས་པ་ཞིག །འདུག་པར་སུས་ཀྱང་ངེས་པར་སྨྲ། །དེ་ནས་ཡོད་པ་མ་ཡིན་ལ། །མེད་པའང་མིན་པའི་སེམས་དེ་ནི། །འོད་གསལ་ཆོས་སྐུ་ཡིན་ནོ་ཟེར། །དེས་ཀྱང་ངོ་འཕྲོད་རློམ་པ་བཅས། །ཐོས་པ་མང་པོ་མ་བྱས་ཀྱང་། །གཅིག་ཤེས་ཀུན་གྲོལ་ཤེས་སོ་ལོ། །རྫོགས་ཆེན་ཡོད་མིན་མེད་མིན་ནི། །མཐའ་བཞིའི་སྤྲོས་དང་བྲལ་བ་ཡིན། །ཁྱོད་ཀྱི་འདི་ནི་ལེགས་བརྟགས་ན། །ཡོད་པར་སྨྲ་རུ་མི་བཏུབ་ཅིང་། །མེད་པར་ཡང་ནི་སྨྲར་མེད་པ། །དོན་དུ་ཡོད་མེད་གཉིས་ཡིན་ནམ། །ཡང་ན་གཉིས་ཀ་མིན་པའི་མུ། །གང་རུང་ཞིག་ལས་མ་འདས་པར། །སེམས་དེ་ཡོད་མིན་མེད་མིན་གྱི། །གཞི་རུ་ཞེ་ལ་བརྣག་ཀྱིན་གདའ། །དེ་ནི་བསམ་མི་ཁྱབ་པའི་བདག །དེ་དང་མིང་གི་རྣམ་གྲངས་ལས། །དོན་ལ་འདོད་ཚུལ་ཁྱད་པར་མེད། །སེམས་དང་དེ་ལས་གཞན་གྱི་ཆོས། །ཀུན་ཀྱང་བདེན་མེད་ངེས་པའི་སྟེང་། །སྣང་བ་རྟེན་འབྱུང་དུ་ཤར་བས། །ཡིན་མིན་བསམ་བརྗོད་ལས་འདས་པ། །མཐའ་བཞིའི་སྤྲོས་དང་བྲལ་བའི་གནད། །གཏད་མེད་ཟང་མ་ཐལ་བྱུང ངོ་། །འདི་ནི་ཡིན་མིན་གཉིས་བྲལ་ཞེས། །བློ་ཡི་མདུན་ན་འབེམ་བཞིན་གནས། །བདག་གཞན་དངོས་འཛིན་འདིར་བརྟེན་ནས། །སྲིད་པའི་ཆུ་བོ་བརྒྱུད་མར་འཇུག །འདི་དག་ཟློག་པའི་གཉེན་པོ་ནི། །བདག་མེད་པ་ཡི་འཛིན་སྟངས་ཡིན། །དེ་ཡང་མེད་ཚུལ་མ་ཤེས་པར། །མེད་པར་མོས་པས་མི་ཕན་ཏེ། །ཐག་ཁྲར་སྦྲུལ་དུ་འཁྲུལ་པ་ལ། །སྦྲུལ་མེད་སྙམ་བས་མི་ཕན་ཀྱང་། །མེད་ཚུལ་མཐོང་ན་སྤངས་པ་བཞིན། །དེ་ཕྱིར་དཔྱད་པས་རྟོགས་བྱས་ནས། །དཔྱད་ཙམ་ཉིད་དུ་མི་བཞག་པར། །ཐོག་མེད་དངོས་ཞེན་གོམས་ཆེས་པས། །ཡང་ཡང་འཛིན་སྟངས་བཅས་ཏེ་བསྒོམ། །བདག་མེད་གོམས་པས་བདག་ལྟ་བ། །དྲུང་ནས་འབྱིན་ཕྱིར་འདི་དགོས་ཞེས། །དོན་གཟིགས་དུ་མས་ནན་ཏན་བསྒྲུབས། །དང་པོའི་ལས་ཅན་འཇུག་པའི་སྒོ། །གོལ་འཆུག་མེད་པ་འདི་ཡིན་ན། །དང་པོ་ནས་དེ་སྤོང་ཞེས་པ། །བདུད་ཀྱི་གསང་ཚིག་བཀྱེ་བ་ཡིན། །འཛིན་སྟངས་དེས་དྲངས་བདེན་སྟོང་ལ། །ངེས་ཤེས་མཆོག་ཏུ་འདྲོངས་བའི་ཚེ། །ད་གདོད་མེད་འཛིན་ཙམ་པོ་ནི། །གནས་ལུགས་མཐར་ཐུག་མ་ཡིན་པས། །སྒྲོ་འདོགས་སོ་གཉིས་བྲལ་བ་ཡི། །སྤྲོས་བྲལ་སྟོང་པ་ཆེན་པོ་བསྒོམ། །བདེན་སྟོང་ཕུ་ཐག་ཆོད་གྱུར་ནས། །སྟོང་པ་རྟེན་འབྱུང་ཤར་བ་ཡི། །སྣང་སྟོང་ཅིར་ཡང་མི་འཛིན་ལ། །མེ་ཡི་ཁ་ནས་དག་པའི་གསེར། །ཇི་བཞིན་ཡིད་ཆེས་རུང་མོད་ཀྱི། །གཞན་དུ་ཆེས་ཆེར་ཟབ་པའི་གནད། །འཕགས་བོད་མཁས་གྲུབ་ཆེ་རྣམས་ཀྱིས། །ཡུན་རིང་འབད་དེ་རྟོགས་པའི་དོན། །ཀྱེ་མ་བླུན་པོས་ཡུད་ཙམ་ལ། །རྟོགས་པར་སྨྲ་ལ་ཐེ་ཚོམ་གཡོ། །དངོས་གཞི་སྣང་སྲིད་འཁོར་འདས་ཀུན། །ཡོད་མེད་ལས་འདས་དོན་གྱི་གཤིས། །ཡོད་མེད་ཅིར་ཡང་མ་གྲུབ་ན། །ཕྱོགས་རེར་འཛིན་པ་སྤྲོས་དང་བཅས། །དེ་ཕྱིར་རིགས་པས་རྣམ་དཔྱད་ཚེ། །ཅིར་ཡང་གྲུབ་པ་མ་མཐོང་བས། །ཅིར་ཡང་འཛིན་པ་ག་ལ་སྐྱེ། །འོན་ཀྱང་མཐའ་བཞིའི་སྤྲོས་བྲལ་ཚུལ། །དཔྱད་པས་དྲངས་པའི་ངེས་ཤེས་ལས། །རང་བྱུང་འོད་གསལ་ཤེས་རབ་ཀྱི། །ལྷག་མཐོང་མར་མེ་བཞིན་དུ་གསལ། །དེ་དང་རྣམ་པ་འགལ་བ་ཡི། །མཐའ་བཞིའི་བློ་ངན་མུན་པའི་སྨག །དྲུང་འབྱིན་གཉེན་པོ་འདི་ཡིན་པས། །ནམ་བསྒོམ་ངེས་ཤེས་སྐྱེ་བ་དགོས། །མཐའ་བཞིའི་སྤྲོས་པ་ཅིག་ཅར་དུ། །ཁེག་པ་བློ་འདས་གཉུག་མའི་དབྱིངས། །སོ་སོའི་སྐྱེ་བོའི་ས་ཉིད་ན། །ཅར་ཕོག་ཚུལ་གྱིས་མཐོང་དཀའ་བས། །མཐའ་བཞིའི་སྤྲོས་པ་རེས་འཇོག་ཏུ། །འགོག་པ་ཐོས་བསམ་ལྟ་བའི་ལུགས། །དེ་ལ་ཇི་ཙམ་གོམས་པ་བཞིན། །ངེས་ཤེས་ཇེ་བས་ཇེ་གསལ་ནས། །ཕྱིན་ལོག་སྒྲོ་འདོགས་བསྣུབ་བྱས་པའི། །བློ་གྲོས་ཡར་ཟླ་ལྟ་བུར་འཕེལ། །ཅིར་ཡང་མི་འཛིན་ལྟ་ངན་ལ། །དངོས་པོ་ཅིར་ཡང་མ་གྲུབ་པའི། །ངེས་ཤེས་སྐྱེ་བ་ག་ལ་ཡོད། །དེས་ན་སྒྲིབ་པ་སྤོང་མི་ནུས། །དེ་ཕྱིར་འདི་གཉིས་ཁྱད་པར་ཡང་། །དུ་བའི་རྟགས་ལས་མེ་བཞིན་དུ། །སྤང་རྟོགས་བོག་སྐྱེད་ཚུལ་ལས་ཤེས། །གང་ཕྱིར་བླུན་བསྒོམ་ཐ་མལ་པ། །སྤངས་དང་རྟོགས་པའི་རྒྱུ་མིན་ལ། །ཡོན་ཏན་སྐྱེ་བའི་གེགས་ཡིན་ཕྱིར། །རྒྱ་ཇ་ཚགས་ལ་དྲངས་པ་བཞིན། །ལུང་རྟོགས་འགྲིབ་ཅིང་ཉོན་མོངས་འཕེལ། །ཁྱད་པར་རྒྱུ་འབྲས་ཡིད་ཆེས་ཆུང་། །ཡང་དག་ལྟ་བའི་མིག་ལྡན་ན། །སྔར་མེད་ལུང་དང་ཉམས་རྟོགས་འབར། །སྟོང་མཐོང་དེ་ཡི་ཡོན་ཏན་ལས། །རྒྱུ་འབྲས་རྟེན་འབྲེལ་བསླུ་མེད་ལ། །ཡིད་ཆེས་ཉོན་མོངས་ཆུང་བར་འགྱུར། །དཔྱད་པས་ངེས་ཤེས་དྲངས་བའི་ངང་། །རྩེ་གཅིག་བཞག་པའི་ཏིང་འཛིན་ལ། །མ་མཐོང་མཐོང་བ་དམ་པའི་དོན། །མཐོང་དོན་ཕྱོགས་སུ་མ་ལྷུང་བས། །ཅིར་ཡང་བཟུང་བ་མེད་མོད་ཀྱི། །ལྐུགས་པས་བུ་རམ་མྱོང་བ་ལྟར། །ཡིད་ཆེས་གོམས་པའི་རྣལ་འབྱོར་ལ། །སྐྱེ་ཡི་དཔྱད་པ་ཁོ་ན་མིན། ༈ །ཐེག་མཆོག་ལྟ་བ་བསྒོམ་པ་ལ། །དཔྱད་དང་འཇོག་པ་གང་འཐད་ན། །ལ་ལས་མི་དཔྱད་བཞག་སྟེ་བསྒོམས། །དཔྱད་པས་དོན་ལ་བསྒྲིབས་པས་ན། །མ་དཔྱད་སྦོམ་པོར་ཞོག་དང་ཟེར། །ལ་ལས་དཔྱད་པ་ཁོ་ན་བྱེད། །དཔྱད་པ་དང་བྲལ་བསྒོམ་པ་ནི། །གཉིད་དུ་སོང་ལྟར་མི་ཕན་པས། །ནམ་ཡང་དཔྱད་པ་དགོས་སོ་ཟེར། །སྒོམ་པ་དཔྱད་འཇོག་མཐའ་གཅིག་ཏུ། །ཕྱོགས་རེར་འཛིན་པ་མི་རུང་སྟེ། །མ་དཔྱད་པ་ཡི་འཇོག་སྒོམ་ཕལ། །ཞི་གནས་ཙམ་ཞིག་འགྲུབ་སྲིད་ཀྱང་། །བསྒོམས་པས་ངེས་ཤེས་མི་སྐྱེ་བས། །ཐར་ལམ་མིག་གཅིག་ངེས་ཤེས་ཉིད། །སྤངས་ནས་སྒྲིབ་པ་བསལ་མི་ནུས། །ཆོས་ཀྱི་རང་བཞིན་མ་ཤེས་ན། །ཅི་ཞིག་བསྒོམས་ཏེ་ཐ་མལ་གྱི། །རྣམ་རྟོག་བསྒོམས་པས་ཅི་ལ་ཕན། །མིག་མེད་ལམ་དུ་ཞུགས་པ་བཞིན། །ཐོག་མེད་འཁྲུལ་པའི་བག་ཆགས་ཀྱིས། །རང་བཞིན་ལོག་པར་ཞེན་གྱུར་པ། །ཐབས་ཚུལ་རིགས་པ་བརྒྱ་དག་གིས། །འབད་དེ་མ་བརྟག་རྟོགས་པར་དཀའ། །གང་ཕྱིར་འཁྲུལ་སྣང་ཞེན་པ་དང་། །ཡང་དག་དོན་མཐོང་འགལ་བས་ན། །ཆེས་གོམས་སྲིད་པའི་སྨག་རུམ་འདིར། །དེ་ཉིད་སྣང་བ་རྙེད་པར་དཀའ། །སྔོན་ནས་སྦྱངས་བའི་ལས་ཀྱི་འཕྲོ། །སྨིན་དང་བླ་མའི་བྱིན་རླབས་ལས། །བྱུང་གནས་འགྲོ་འོང་ཙམ་བརྟགས་པས། །བདེན་སྟོང་ངེས་པ་སྲིད་མོད་ཀྱི། །དེ་འདྲ་བརྒྱ་ལམ་རེས་འགའ་སྟེ། །ཀུན་གྱིས་དེ་ལྟར་རྟོགས་མི་ནུས། །ཀ་དག་གདར་ཤ་ཆོད་པ་ལ། །ཐལ་འགྱུར་ལྟ་བ་མཐར་ཕྱིན་དགོས། །སྤྲོས་བྲལ་ཙམ་གྱི་ཆ་ནས་ནི། །དེ་གཉིས་ཁྱད་པར་མེད་དོ་གསུང་། །སྟོང་པར་ཞེན་པ་བཟློག་ཕྱིར་དུ། །སྔགས་ལས་བདེ་བ་ཆེན་པོ་བསྟན། །བདེ་སྟོང་གཉིས་སུ་མེད་པའི་དབྱིངས། །ཡུལ་དང་ཡུལ་ཅན་བྲལ་བ་ཡི། །ཚུལ་གྱིས་ཉམས་སུ་མྱོང་བར་བྱེད། །སྣང་དང་གསལ་དང་རིག་པ་གསུམ། །བདེ་བ་དེ་ཡི་རྣམ་གྲངས་ཡིན། །སྣང་ཆ་གཟུགས་ཀྱི་སྐུ་འདིས་ནི། །སྲིད་པ་ཇི་སྲིད་ཕན་བདེ་ཡིས། །འགྲོ་ཀུན་སྐྱོབས་པར་མཛད་པས་ན། །མཐར་ཐུག་སྙིང་རྗེའི་རང་བཞིན་ཉིད། །དེ་ཕྱིར་རང་བཞིན་ཉིད་ཀྱིས་ཀྱང་། །སྲིད་ཞིར་མི་གནས་ཡེ་ཤེས་ཆེ། །གཞི་ལ་ཇི་ལྟར་བཞུགས་པ་ལྟར། །བདེ་སྟོང་ལམ་གྱི་ཨེ་ཝཾ་གྱིས། །བསྒྲུབས་པས་ཚེ་འདི་ཉིད་ལ་ཡང་། །ཟུང་འཇུག་འབྲས་བུ་མངོན་དུ་འགྱུར། །གཞི་ལམ་འབྲས་གསུམ་དོན་དུ་ན། །མི་ཕྱེད་རྡོ་རྗེའི་ཐེག་པ་ཡི། །འབྲས་བུ་བཞི་པའི་དབང་གི་ལམ། །རིག་སྟོང་རང་བྱུང་ཡེ་ཤེས་ཉིད། །ཁོ་ན་རྩལ་དུ་བཏོན་གྱུར་པ། །འོད་གསལ་རྡོ་རྗེ་རྩེ་མོའི་ལུགས། །མཐར་ཐུག་ཐེག་པའི་སྐྱེལ་སོ་ཡིན། །ཇི་སྲིད་ངེས་ཤེས་མ་སྐྱེས་པར། །ཐབས་དང་དཔྱད་པས་ངེས་ཤེས་དྲང་། །ངེས་ཤེས་སྐྱེས་ན་དེའི་ངང་དུ། །ངེས་ཤེས་ཉིད་དང་མ་བྲལ་བསྒོམས། །ངེས་ཤེས་མར་མེ་ལྟ་བུའི་རྒྱུན། །ཡང་དག་མིན་རྟོག་སྣུབ་བྱེད་པ། །དེ་ལ་རྟག་ཏུ་ནན་ཏན་བྱ། །བྲལ་ན་སླར་ཡང་དཔྱད་པས་དྲངས། །དང་པོར་དཔྱད་པ་གལ་ཆེ་སྟེ། །དཔྱད་པ་བཟང་པོས་མ་དྲངས་ན། །ངེས་ཤེས་བཟང་པོ་ག་ལ་སྐྱེ། །ངེས་ཤེས་བཟང་པོ་མ་སྐྱེས་ན། །སྒྲོ་འདོགས་ངན་པ་ག་ལ་ནུབ། །སྒྲོ་འདོགས་ངན་པ་མ་ནུབ་ན། །ལས་རླུང་ངན་པ་ག་ལ་འགག །ལས་རླུང་ངན་པ་མ་འགག་ན། །འཁོར་བ་ངན་པ་ག་ལ་སྤོང་། །འཁོར་བ་ངན་པ་མ་སྤང་ན། །སྡུག་བསྔལ་ངན་པ་ཅི་ལ་འཛད། །འཁོར་དང་མྱ་ངན་འདས་པ་ལ། །དོན་དུ་བཟང་ངན་ཡོད་མ་ཡིན། །བཟང་ངན་མེད་པར་མཉམ་ཉིད་དུ། །རྟོགས་པ་ངེས་ཤེས་བཟང་པོ་ཡིན། །ངེས་ཤེས་བཟང་པོས་འཁོར་བ་འདི། །སྤངས་ནས་མྱང་འདས་མ་བསྒྲུབས་པས། །འགལ་བ་ལྟར་སྣང་ཚིག་གི་དོན། །མི་འགལ་ལམ་གྱི་གལ་མདོ་སྟེ། །ལྟ་སྤྱོད་མན་ངག་གནད་གསང་འདི། །དཔྱད་དེ་དོན་གྱི་རོ་མྱོངས་ཤིག །བར་དུ་དཔྱད་འཇོག་སྤེལ་དགོས་ཏེ། །དཔྱད་ན་ངེས་ཤེས་སྐྱེ་འགྱུར་ཞིང་། །མ་དཔྱད་ཐ་མལ་ཞེན་གྱུར་ཚེ། །དཔྱད་ཅིང་དཔྱད་ཅིང་ངེས་ཤེས་དྲངས། །ངེས་ཤེས་སྐྱེས་ན་དེ་གའི་དང་། །མ་ཡེངས་རྩེ་གཅིག་ཉིད་དུ་བསྒོམས། །ངེས་ཤེས་དང་ནི་སྒྲོ་འདོགས་ཡིད། །ཕན་ཚུན་འགལ་བ་ཉིད་ཀྱི་ཕྱིར། །དཔྱད་པས་སྒྲོ་འདོགས་སུན་བྱུང་བས། །ངེས་ཤེས་གོང་ནས་གོང་དུ་སྤེལ། །ཐ་མར་དཔྱད་པས་མ་དྲངས་ཀྱང་། །ངེས་ཤེས་ངང་གིས་སྐྱེ་བ་ན། །དེ་གའི་ངང་དུ་འཇོག་པ་ལས། །དཔྱད་པས་གྲུབ་ཟིན་བསྒྲུབ་ཅི་དགོས། །ཐག་པར་སྦྲུལ་མེད་རྟོགས་པ་ན། །ངེས་ཤེས་དེ་གས་སྦྲུལ་འཛིན་ལྡོག །ད་རུང་སྦྲུལ་ནི་མེད་དོ་ཞེས། །ཡང་ཡང་དཔྱད་ཟེར་བླུན་མིན་ནམ། །འཕགས་ལམ་རྟོགས་པ་མངོན་གྱུར་ཚེ། །ད་རུང་དཔྱོད་པས་མི་བསྒོམས་ཏེ། །མངོན་སུམ་རྟོགས་ལ་རྒྱུ་མཚན་གྱི། །ཡིད་དཔྱོད་སྦྱོར་བ་ཅི་ཞིག་དགོས། །གལ་ཏེ་དཔྱད་པ་དང་བྲལ་ཚེ། །དོན་མཐོང་རྟོགས་པ་མི་འགྲུབ་ན། །འཕགས་དང་རྒྱལ་བའི་ཡེ་ཤེས་དང་། །འཇིག་རྟེན་གནོད་མེད་ཤེས་པ་ཡིས། །བཟུང་རྣམས་ཁྱོད་ལ་ཕྱིན་ཅི་ལོག །ཉིད་དུ་ཐལ་ཏེ་དེ་དག་ནི། །རྟོགས་ཟིན་ཡིན་ཕྱིར་དེ་དག་ལ། །རང་དུས་དཔྱད་པ་མེད་པའི་ཕྱིར། །མཐའ་བཞིའི་སྤྲོས་དང་བྲལ་བ་ཡི། །ངེས་ཤེས་ཁྱད་པར་ཅན་གྱི་ངོར། །འདི་དང་འདིའོ་སྙམ་པ་ཡི། །དམིགས་གཏད་དཔྱོད་པ་སྐབས་མི་ཐོབ། །གང་ཚེ་དཔྱོད་པའི་མཚན་འཛིན་དེས། །དར་གྱི་སྲིན་བུ་ཇི་བཞིན་དུ། །རྟོག་པ་དེ་ཡིས་དེ་བཅིངས་ནས། །ཡང་དག་དོན་ཇི་བཞིན་མི་མཐོང་། །ངེས་ཤེས་ཁྱད་པར་ཅན་འདིས་ནི། །ཡིན་ལུགས་སྒྲིབ་པའི་སྨག་བསལ་ཚེ། །གཉུག་མ་དོན་གྱི་འོད་གསལ་ངང་། །དེ་ཉིད་མ་ནོར་མཐོང་བ་གང་། །སོ་སོ་རང་གི་ཡེ་ཤེས་ཏེ། །སེམས་བྱུང་ཤེས་རབ་ག་ལ་ཡིན། །ཤེས་རབ་ཡུལ་ནི་འདིའོ་ཞེས། །རྣམ་པར་འབྱེད་ཅིང་དེར་རྟོག་ལ། །གང་ཕྱིར་ཡུལ་དང་ཡུལ་ཅན་དང་། །སྣང་སྟོང་རེ་རེ་གང་དུའང་། །མི་དམིགས་མཉམ་པའི་ཡེ་ཤེས་འདི། །སེམས་དང་སེམས་ལས་བྱུང་བ་ཡི། །མཚན་ཉིད་ཅན་དུ་གནས་མ་ཡིན། །དེ་ཕྱིར་དཔྱད་བས་དྲང་བ་ཡི། །ངེས་ཤེས་མཆོག་ལ་མཉམ་བཞག་པའི། །ཤེས་རབ་དྲི་མ་མེད་པའི་རྒྱུས། །འབྲས་བུ་ཟུང་འཇུག་ཡེ་ཤེས་ཐོབ། །ལྟ་བ་གཏན་ལ་ཕབ་པ་དང་། །ངེས་པའི་གྲུབ་མཐའ་སྒྲུབ་བྱེད་པ། །ཤན་འབྱེད་སོ་སོར་རྟོགས་པ་ཡི། །ཤེས་རབ་དྲི་མེད་ཚད་མ་ཡིན། །དེས་དྲངས་པ་ཡི་ངེས་ཤེས་ཀྱི། །ལམ་ནས་ཡིན་ལུགས་གཤིས་ཕེབ་པའི། །མཉམ་བཞག་ཡེ་ཤེས་གང་ཡིན་པ། །ཐེག་ཆེན་ལམ་གྱི་དངོས་གཞི་དེ། །འདི་དང་ལྡན་ན་ཟུང་འཇུག་གི །གོ་འཕང་ཚེ་འདིར་སྟེར་བའི་ཕྱིར། །ཐེག་པ་ཡིན་ལ་ཆེན་པོའང་ཡིན། །རྒྱུད་སྡེ་བཞི་ཡི་ལུགས་ལྟར་ན། །བླ་མེད་ཚིག་དབང་ལམ་འདི་ནི། །ཡེ་ཤེས་མཐར་ཐུག་ཡིན་མོད་ཀྱི། །ལོགས་སུ་ཐེག་པར་མ་བཞག་ཀྱང་། །དཔེར་ན་མཉམ་ཉིད་ཡེ་ཤེས་སྐུ། །རྩལ་དུ་བཏོན་ནས་འཆད་པ་ཡི། །དཔལ་ལྡན་དུས་ཀྱི་འཁོར་ལོ་ལ། །རྒྱུད་ཀྱི་མཐར་ཐུག་བཞེད་པ་བཞིན། །བླ་མེད་རྒྱུད་སྡེའི་ནང་ནས་ཀྱང་། །དབང་བཞིའི་ལམ་གྱི་ཡེ་ཤེས་གང་། །རྩལ་དུ་བཏོན་ནས་འཆད་པ་འདི། །རྒྱུད་སྡེ་ཀུན་གྱི་དགོངས་པའི་མཐིལ། །ལན་གྲངས་བཅུ་དྲུག་བཞུས་པའི་གསེར། །ཤིན་ཏུ་དག་པ་དེ་བཞིན་དུ། །ཐེག་གཞན་གྲུབ་མཐས་དཔྱད་པ་ཡིས། །ཇེ་བས་ཇེ་དག་འདིར་མཐར་ཕྱིན། །དེ་ཕྱིར་ཤེས་རབ་དྲི་མེད་ཀྱིས། །ཚད་མས་འདི་དོན་གྲུབ་པའི་ཚུལ། །རྒྱུད་དང་དགོངས་པ་འགྲེལ་ཀུན་དང་། །ཆོས་བཟང་རིགས་པས་རྣམ་དཔྱད་ལ། །བསམ་ན་བདུད་ཀྱི་ཡུལ་ལས་འདས། །མི་འཕྲོས་ཤེས་རབ་སྨིན་པར་བྱེད། །འོན་ཀྱང་ལྟ་བའི་དངོས་གཞི་ནི། །སྣང་སྟོང་ཕྱོགས་རེར་འཛིན་པ་སོགས། །སེམས་དང་སེམས་བྱུང་སྤྱོད་ཡུལ་དུ། །འདི་དོན་སྟོན་པར་བྱེད་པ་ནི། །བརྗོད་མིན་བརྗོད་བྱར་བྱས་པའི་ཕྱིར། །མཁས་པའི་དགོངས་པ་ཉིད་དང་འགལ། །གང་ཕྱིར་ཨ་ཏི་ཡོ་ག་ནི། །སྣང་སྟོང་བསམ་གྱིས་མི་ཁྱབ་པའི། །ཡེ་ཤེས་ཡིན་སླད་མ་དག་པའི། །སེམས་ལས་འདས་པ་ཁོ་ནའི་ཕྱིར། །འདི་ལ་ཀ་དག་སྟོང་པའི་ཆ། །གཏན་འབེབས་ཁྲེགས་ཆོད་ལྟ་བ་དང་། །ལྷུན་གྲུབ་སྐུ་དང་ཡེ་ཤེས་ཀྱི། །རང་བཞིན་གཏན་ལ་འབེབས་པ་ལ། །ནང་གསལ་གཞོན་ནུ་བུམ་པའི་སྐུར། །ཡིད་ཆེས་འོད་གསལ་ཐོད་རྒལ་གཉིས། །གཉིས་ཀའང་སོ་སོར་དབྱེར་མེད་དེ། །ཀ་དག་ལྷུན་གྲུབ་ཟུང་འཇུག་གི །ཡེ་ཤེས་ཆེན་པོ་ཁོ་ན་ཡིན། །རྒྱུད་སྡེ་གཞན་ན་མི་ཤིགས་པའི། །ཡེ་ཤེས་ཏི་ལ་ཀ་ཞེས་པ། །འདི་དང་མིང་གི་རྣམ་གྲངས་ཙམ། །འདིར་ནི་ཤིན་ཏུ་གསལ་པོར་བསྟན། །རྫོགས་ཆེན་སེམས་སྡེའི་མན་ངག་རེར། །མཁས་གྲུབ་སོ་སོའི་ཉམས་བཞེས་པས། །ཕྱག་ཆེན་ལམ་འབྲས་ཞི་བྱེད་དང་། །ཟུང་འཇུག་དབུ་མ་ཆེན་པོ་སོགས། །མཚན་གྱི་རྣམ་གྲངས་སོ་སོར་གྲགས། །དོན་ལ་སེམས་ལས་འདས་པ་ཡི། །ཡེ་ཤེས་ཡིན་ཕྱིར་ཀུན་ཀྱང་མཉམ། །སངས་རྒྱས་གྲུབ་ཐོབ་དགོངས་པ་ནི། །གཅིག་ཅེས་མཁས་ཀུན་མགྲིན་གཅིག་སྨྲ། །ལ་ལས་རང་ལུགས་རྫོགས་པ་ཆེ། །ཕྱག་ཆེན་སོགས་ལས་འཕགས་སོ་ཟེར། །མ་རྟོགས་ལམ་གྱི་ཐ་སྙད་མེད། །རྟོགས་ན་དགོངས་པ་གཅིག་པ་ལ། །རིགས་པས་འཐད་པའི་དབྱེ་བ་མེད། །དེ་བཞིན་བླ་མེད་རྒྱུད་ཀུན་གྱི། །བཞི་པའི་དབང་གི་ཡེ་ཤེས་ཀུན། །རྫོགས་པ་ཆེན་པོ་དབྱེ་བ་མེད། །འོན་ཀྱང་དེ་དག་ཐམས་ཅད་ཀྱི། །འབྱུང་གནས་རྫོགས་ཆེན་རྒྱུད་སྡེ་ལ། །སེམས་ཀློང་མན་ངག་སྡེས་ཕྱེ་བའི། །ཟབ་རྒྱས་ཁྱད་པར་འཕགས་པའི་གནད། །མན་ངག་ཐོར་བུའི་ཉམས་ལེན་པ། །གཞན་ལ་མ་གྲགས་མང་ཡོད་པར། །ཁྱད་ཆོས་ཡིན་ཞེས་སྨྲ་ཅི་དགོས། །དེ་ལ་རྫོགས་ཆེན་མཐར་ཐུག་པ། །ཟབ་ཞི་འོད་གསལ་འདུས་མ་བྱས། །སངས་རྒྱས་ཡེ་ཤེས་ཡིན་ན་ཡང་། །འདིར་ནི་གནས་སྐབས་ལམ་དག་ཏུ། །ཡེ་ཤེས་དེ་དང་རྗེས་མཐུན་པ། །དཔེ་དང་དོན་གྱི་ཟུང་འཇུག་རྣམས། །རི་མོར་བྲིས་པའི་ཟླ་བ་དང་། །ཆུ་ཟླ་ནམ་མཁའི་ཟླ་བ་བཞིན། །རིམ་པས་གཅིག་གིས་གཅིག་འདྲེན་པས། །རང་བྱུང་ཟག་མེད་ཡེ་ཤེས་གང་། །རང་གི་བློ་ནུས་དང་བསྟུན་ཏེ། །ཉམས་སུ་ལེན་པ་ཡོད་ཉིད་ཕྱིར། །དཔེར་ན་འཕགས་ལམ་ཡེ་ཤེས་གང་། །ཐོབ་ཕྱིར་རྗེས་མཐུན་བསྒོམ་པ་བཞིན། །ཆོས་ཉིད་ཟུང་འཇུག་ཡེ་ཤེས་ཆེ། །མངོན་སུམ་གཏན་ལ་ཕེབ་པ་ན། །ཡིད་དཔྱོད་འཛིན་པའི་ལྟ་བ་ཀུན། །ངེས་པར་ནུབ་ནས་སྤྲོས་བྲལ་མཐོང་། །དེ་ཕྱིར་སྐབས་ཤན་མ་ཕྱེད་པར། །འཛིན་སྟངས་ཡོད་མེད་ཕྱོགས་གཅིག་ཏུ། །སྨྲ་ལ་སྐྱོན་དང་ལེགས་ཆ་སྟེ། །ཟླ་བའི་འཕེལ་འགྲིབ་བཞིན་དུ་གནས། །འདི་ནི་ངེས་པའི་ལུང་བཞིན་དུ། །རིགས་པའི་ཚུལ་གྱིས་གྲུབ་པ་ཡིན། ༈ །བདེན་པ་གཉིས་ལས་གང་གཙོ་ན། །ཁ་ཅིག་དོན་དམ་གཙོ་ཆེར་འདོད། །ཀུན་རྫོབ་འཁྲུལ་པའི་སྣང་བ་ཞེས། །སྤང་བྱར་རྟོགས་ཤིང་དོན་དམ་པ། །མ་འཁྲུལ་ཡིན་པས་དོན་དམ་དེར། །ལྟ་བ་རྣམ་དག་ཡིན་ནོ་ཟེར། །ཀུན་རྫོབ་མ་འཁྲུལ་བདེན་གྱུར་ན། །དོན་དམ་སྟོང་པར་མི་རུང་ཕྱིར། །དེ་སྐད་དུ་ནི་གསུངས་མོད་ཀྱི། །ཀུན་རྫོབ་སྤངས་པའི་ཕ་རོལ་ན། །དོན་དམ་འགའ་ཡང་མི་གྲུབ་སྟེ། །དེ་གཉིས་ཐབས་དང་ཐབས་བྱུང་ཉིད། །བརྟག་བྱའི་དངོས་ལ་མ་བརྟེན་པར། །དེ་ཡི་དངོས་མེད་ཡོད་མིན་ཏེ། །དེས་ན་དངོས་དང་དངོས་མེད་པ། །གཉིས་ཀ་རྟེན་འབྲེལ་ཙམ་དུ་མཚུངས། །གལ་ཏེ་སྟོང་པར་ཞེན་པ་དེས། །སྣང་བ་རྣམ་པར་བཅད་གྱུར་ན། །སྟོང་པ་རྟེན་འབྱུང་དུ་ཤར་བའི། །ཀླུ་སྒྲུབ་ལུགས་བཟང་རྙོག་མར་བྱས། །སྟོང་མཐོང་དེ་ཡི་ལམ་གོམས་ནས། །སྟོང་དབྱིངས་འབའ་ཞིག་རྟོགས་ན་ནི། །འཕགས་པའི་མཉམ་བཞག་སྟོང་པ་ཉིད། །དངོས་པོའི་འཇིག་རྒྱུར་ཁྱོད་ལའང་ཐལ། །དེ་ཕྱིར་གདོད་ནས་སྟོང་ན་ཡང་། །སྟོང་སྣང་རིས་སུ་མ་ཆད་པས། །སྟོང་པ་ཁོ་ན་གཙོ་ཆེ་ཞེས། །འཛིན་པ་མཐར་ཐུག་དོན་མི་མཁས། །ལ་ལས་དོན་དམ་ཕར་བཅད་ནས། །ཀུན་རྫོབ་ཙམ་གྱི་ངོས་ནས་ནི། །རྒྱུད་སྡེའི་ལྟ་བ་མཐོ་ད མན་བྱེད། །དོན་དམ་སྟོང་པས་མ་ཟིན་པའི། །ཀུན་རྫོབ་རང་ཉིད་ལྟ་བ་ཡི། །མཐོ་དམན་བྱེད་ཆོས་སུ་མི་འཐད། །དོན་དམ་གདེང་དང་མི་ལྡན་པར། །ཀུན་རྫོབ་ལྷ་རུ་བསྒོམ་པ་ཙམ། །མོས་པ་ཙམ་ཡིན་ལྟ་བ་མིན། །མུ་སྟེགས་རིག་སྔགས་འགའ་ཞིག་ཀྱང་། །བཟླ་ཚེ་རང་ཉིད་གཞན་དུ་མོས། །ལ་ལས་ཀུན་རྫོབ་གལ་ཆེ་སྟེ། །བདེན་གཉིས་ཟུང་དུ་འཇུག་དགོས་ཟེར། །ཡང་ཡང་ཀུན་རྫོབ་ཕྱོགས་ལ་བསྔགས། །ཟུང་འཇུག་ལྟ་བ་སྐྱོང་དུས་ན། །ཟུང་འཇུག་དོར་ནས་མེད་རྐྱང་འཛིན། །བཤད་པ་བཟང་པོ་མ་ཡི་རྗེས། །ཉམས་ལེན་བུ་ཆུང་སླེབ་མ་ནུས། །དེས་ན་སྔ་འགྱུར་རིང་ལུགས་འདིར། །གཞི་ལམ་འབྲས་བུའི་ཆོས་སྐད་ལ། །རྟག་དང་མི་རྟག་བདེན་གཉིས་སོགས། །རྒྱ་ཆད་ཕྱོགས་ལྷུང་བྲལ་བ་ཡི། །ཟུང་འཇུག་ཁོ་ནའི་གྲུབ་མཐའ་སྐྱོང་། །ཀུན་རྫོབ་དང་ནི་དོན་དམ་པ། །ཡ་བྲལ་རེ་རེའི་སྟེང་དུ་ནི། །གཞི་ལམ་འབྲས་བུ་བཞག་མི་ནུས། །གཞི་ལམ་འབྲས་བུ་གསུམ་ཆར་དུའང་། །འདི་སྤང་འདི་བླང་དབྱེ་བ་མེད། །ཀུན་རྫོབ་སྤངས་པའི་ཕ་རོལ་ན། །དོན་དམ་མེད་ལ་དོན་དམ་པ། །སྤངས་པའི་ཀུན་རྫོབ་གཞན་མེད་ཉིད། །གང་སྣང་སྟོང་པས་ཁྱབ་པ་དང་། །གང་སྟོང་སྣང་བས་ཁྱབ་པ་སྟེ། །སྣང་ན་མི་སྟོང་མི་སྲིད་ཅིང་། །སྟོང་དེའང་མ་སྣང་མི་གྲུབ་ཕྱིར། །དངོས་དང་དངོས་མེད་གཉིས་པོ་ཡང་། །སྟོང་གཞིར་བྱས་ནས་སྟོང་དགོས་ཕྱིར། །སྣང་ཀུན་བཏགས་པ་ཙམ་ཞིག་ལ། །སྟོང་པའང་བློ་ཡིས་བཏགས་པ་ཙམ། །རིག་པས་དཔྱད་པས་ངེས་ཤེས་ལ། །འདི་གཉིས་ཐབས་དང་ཐབས་བྱུང་སྟེ། །གཅིག་ཡོད་ན་ནི་གཅིག་མེད་པ། །མི་སྲིད་འདུ་འབྲལ་མེད་པར་གནས། །དེ་ཕྱིར་སྣང་དང་སྟོང་པ་དག །སོ་སོའི་ཆར་ནི་ཤེས་ན་ཡང་། །དོན་དུ་ནམ་ཡང་དབྱེ་བ་མེད། །དེ་ཕྱིར་ཟུང་འཇུག་ཅེས་བརྗོད་དོ། །གནས་ལུགས་མཐོང་བའི་ངེས་ཤེས་ནི། །གང་མཐར་ལྷུང་བ་མེད་ཕྱིར་རོ། །ཡང་དག་དཔྱོད་པའི་ཤེས་རབ་ངོར། །སྣང་དང་སྟོང་པ་འདི་གཉིས་པོ། །ཡོད་མཉམ་མེད་མཉམ་ངོ་བོ་གཅིག །ལྡོག་པ་ཐ་དད་དབྱེ་བར་འདོད། །དེ་ཡང་དང་པོའི་ལས་ཅན་ལ། །དགག་བྱ་འགོག་བྱེད་ལྟ་བུར་སྣང་། །དེ་ཚེ་གཅིག་ཏུ་འདྲེས་པ་མེད། །ནམ་ཞིག་སྟོང་པའི་རང་བཞིན་ནི། །སྣང་བར་འཆར་ལ་ཡིད་ཆེས་ཐོབ། །དེ་ཡང་གདོད་ནས་སྟོང་པ་དང་། །སྣང་བ་འདི་དག་སྟོང་པ་ཡིས། །སྟོང་བཞིན་སྣང་ལ་སྣང་བཞིན་དུ། །སྟོང་མཐོང་ངེས་ཤེས་སྐྱེ་བ་ཉིད། །འདི་ནི་མདོ་རྒྱུད་མན་ངག་གི །ལམ་ཟབ་ཀུན་གྱི་རྩ་བ་སྟེ། །ཐོས་བསམ་སྒྲོ་འདོགས་ཆོད་པའི་དོན། །ཡང་དག་ལྟ་བ་འཁྲུལ་མེད་ཡིན། །གནད་དེ་ཇེ་བས་ཇེ་ཟབ་ཏུ། །རྟོགས་པས་ཀུན་རྫོབ་སྣང་བ་ཡང་། །རང་མཚན་ཞེན་པ་རིམ་སྤོང་བས། །རྒྱུད་སྡེའི་ཐེག་རིམ་དེ་ལྟར་སྣང་། །ཡིད་ཀྱིས་མོས་བསྒོམ་ཙམ་ཞིག་དང་། །སྣོད་བཅུད་ལྷར་སྣང་ངེས་ཤེས་ཀྱིས། །ལྟ་བ་གདེངས་སུ་གྱུར་པ་གཉིས། །མཚུངས་པའི་གོ་སྐབས་མི་སྲིད་དེ། །དབུ་མས་ཆོས་རྣམས་བདེན་སྟོང་དུ། །ངེས་པ་གང་དེ་ལྟ་ཡིན་ལ། །བྲམ་ཟེའི་ནད་ལ་སྔགས་འདེབས་ཚེ། །ནད་མེད་མོས་པ་ལྟ་མིན་བཞིན། །དོན་དམ་གནས་ལུགས་རྟོགས་པ་ཡིས། །ཀུན་རྫོབ་ལྷ་རུ་ཡིད་ཆེས་ཀྱི། །གཞན་དུ་འཁྲུལ་པའི་སྣང་ཚུལ་ལ། །གནས་ནས་ལྷ་རུ་ཇི་ལྟར་འགྲུབ། །གཟུང་འཛིན་འཁྲུལ་སྣང་འདི་མིན་པའི། །འཁོར་བ་ཞེས་བྱ་གཞན་དུ་མེད། །དེ་སྤོང་ལམ་གྱི་དབྱེ་བ་རྣམས། །དོན་དམ་ཁོ་ནའི་ངོས་ནས་མིན། །དོན་དམ་ཚུལ་གཅིག་ཉིད་ཡིན་ཕྱིར། །ཆོས་ཅན་ཀུན་རྫོབ་སྣང་བའི་ཆ། །དོན་དམ་གཤིས་སུ་མཐོང་གོམས་ཀྱི། །བློ་ནུས་ལ་བརྟེན་བྱ་བ་དང་། །ཆ་མཉམ་རྣལ་འབྱོར་བླ་མེད་བསྟན། །དེས་ན་བདེན་གཉིས་སོ་སོ་ཡིས། །རྒྱུད་སྡེའི་མཐོ་དམན་མི་འབྱེད་ཀྱང་། །བདེན་གཉིས་ཟུང་དུ་འཇུག་པ་ལ། །ཅི་ཙམ་ཡིད་ཆེས་ཐོབ་པ་བཞིན། །ཉམས་ལེན་དེ་ཡི་རྗེས་སུ་འབྲང་། །དེ་ཕྱིར་བླ་མེད་རྡོ་རྗེའི་ཐེག །ཚེ་གཅིག་གྲོལ་བ་སྟེར་བའི་ལམ། །མ་ནོར་ཇི་བཞིན་ཉམས་ལེན་ན། །མི་གཅིག་འགྲོ་བས་ཐ་དད་པར། །མཐོང་བའི་ཆུ་ཡིས་དཔེ་བཞིན་དུ། །དག་པའི་གཟིགས་པ་ལ་བརྟེན་ནས། །སྣང་སྲིད་གཞིར་གཞེངས་དཀྱིལ་འཁོར་དུ། །སུ་ཞིག་ཡིད་མི་ཆེས་པར་འགྱུར། །གལ་ཏེ་དེ་ལྟར་མ་ཤེས་ནས། །འཁོར་བའི་རང་བཞིན་མ་དག་པ། །འདོད་བཞིན་ལྷ་རུ་བསྒོམས་པས་ཀྱང་། །ངན་སྐྱུགས་བུམ་པར་དྲི་བཟང་གིས། །བྱུགས་པ་དང་འདྲར་སེམས་པ་དེས། །ཀྱེ་མ་མཉམ་ཉིད་རྡོ་རྗེའི་ཐེག །སྒོམ་པ་རི་མོའི་མར་མེ་བཞིན། །སྣང་ཚུལ་མ་དག་པར་སྣང་ཡང་། །དེ་ནི་འཁྲུལ་པས་གྲུབ་པའི་མཐའ། །གནས་ཚུལ་ཡང་དག་གཟིགས་པའི་དོན། །མི་ཕྱེད་རྡོ་རྗེའི་གྲུབ་མཐར་སྨྲ། །སྣོད་བཅུད་དག་པའི་རྟེན་བརྟེན་པར། །མིན་ནོ་སྙམ་དུ་ལྟ་བཞིན་དུ། །ཡིན་ནོ་སྙམ་པའི་སྒོམ་པ་གང་། །འགལ་འདུའི་རང་རྟགས་ངོམས་པ་ལ། །ལམ་དེ་ལམ་གྱི་གཟུགས་བརྙན་ཉིད། །སོལ་བ་བཀྲུས་པས་མི་དཀར་བཞིན། །མིན་ཀྱང་ཡིན་སྙམ་བཅོས་སྒོམ་གྱིས། །འབྲས་བུ་ཐོབ་པར་འགྱུར་ན་ནི། །བདེན་སྟོང་ངེས་ཤེས་མེད་བཞིན་དུ། །མུ་སྟེགས་ཉི་མ་པ་རྣམས་ཀྱིས། །སྣང་བ་སྤངས་པས་སྟོང་པ་སོགས། །བསྒོམས་པས་ཉོན་མོངས་སྤོང་བར་འགྱུར། །བྱ་སྤྱོད་བླ་མེད་རྒྱུད་སྡེ་ལ། །ལྟ་བའི་མཐོ་དམན་མེད་གྱུར་ན། །སྣང་སྲིད་དག་མཉམ་རྟོགས་པ་ཡི། །ལྟ་བ་གདེངས་སུ་གྱུར་བཞིན་དུ། །བདག་དང་ལྷ་ལ་བཟང་ངན་དང་། །གཙང་དང་མི་གཙང་སོ་སོར་ནི། །མ་མཐོང་བཞིན་དུ་དབྱེ་བ་ནི། །རང་གིས་རང་ལ་གནོད་པར་ཟད། །ཡང་ན་རྒྱུད་སྡེ་འོག་མ་བཞིན། །བླང་དོར་ཉིད་དུ་ཞེན་བཞིན་དུ། །བླ་མེད་སྦྱོར་སྒྲོལ་ཤ་ཆང་སོགས། །བླང་དོར་མཉམ་པ་ཉིད་སྤྱོད་པ། །མ་རྟོགས་ཐོ་ཅོའི་སྤྱོད་པ་ཞེས། །སྨད་པར་གྱུར་པ་དེ་མིན་ནམ། །ཇི་ལྟར་ཇི་ལྟར་གནས་ལུགས་དོན། །མཐོང་བའི་ངེས་ཤེས་ལྟ་བར་བརྗོད། །ལྟ་བས་ཇི་ལྟར་ཐག་བཅད་པ། །དེ་བཞིན་སྒོམ་དང་སྤྱོད་པས་སྐྱོང་། །ཐེག་པ་ལྟ་བའི་མཐོ་དམན་གྱིས། །འབྱེད་ཕྱིར་དགུར་མ་ངེས་ཤེས་ན། །ནང་པའི་གྲུབ་མཐའ་དམའ་ཤོས་ནས། །མཐར་ཕྱིན་རྡོ་རྗེ་རྩེ་མོའི་བར། །སྡེ་ཚན་དགུ་ཡི་གྲངས་སུ་ནི། །འཇོག་པའི་རྒྱུ་མཚན་ཡོད་ཕྱིར་ཏེ། །ཐེག་པ་མཐོ་དམན་མང་ཡོད་ཀྱང་། །གསུམ་སོགས་དགོས་པས་བཞག་བཞིན་ནོ། །དེས་ན་ནང་གི་ཡེ་ཤེས་སྟོབས། །ཇི་ལྟ་ཇི་ལྟར་སྟོབས་འཕེལ་བ། །དེ་ལྟ་དེ་ལྟར་སྣོད་བཅུད་རྣམས། །དག་དང་མ་དག་སོ་སོར་མཐོང་། །དེ་ཕྱིར་སྣང་སྟོང་དབྱེར་མེད་གཞི། །བདེན་གཉིས་དབྱེར་མེད་ཚུལ་གྱིས་རྟོགས། །ལམ་དེ་ཇི་བཞིན་གོམས་པ་ལས། །སྐུ་གཉིས་ཟུང་འཇུག་ཡེ་ཤེས་ཐོབ། ༈ །ཆུ་གཅིག་འགྲོ་བ་སོ་སོ་ལ། །མི་གཅིག་དངོས་པོར་སྣང་བའི་ཚེ། །ལ་ལས་ཐུན་མོང་བལྟ་བྱ་དེ། །ཆུ་ཡིན་དེ་མཐོང་ཡུལ་ཅན་རྣམས། །ཀུན་ཀྱང་ཚད་མ་ཡིན་ཞེས་ཟེར། །ཆུ་ལ་རང་བཞིན་འགའ་ཡོད་ན། །ཚད་མ་ཚད་མིན་མི་སྲིད་ཅིང་། །སོ་སོའི་ཡུལ་སྣང་ཐུན་མིན་ན། །ཀ་བུམ་མཐོང་བའི་བློ་བཞིན་དུ། །ཐུན་མོང་བལྟ་བྱ་མི་སྲིད་འགྱུར། །ལ་ལས་རླན་གཤེར་ཙམ་ཡིན་ཟེར། །ཐུན་མོང་སོ་སོར་རླན་གཤེར་ཙམ། །མ་ལོག་ཡོད་ན་རླན་གཤེར་ལ། །མི་གཅིག་མཐོང་སྣང་མང་བྱུང་ཞིང་། །གཅིག་མཐོང་གཅིག་ལ་མེད་པ་ཡི། །ཆུ་དང་རྣག་སོགས་གཞི་དེ་གང་། །གཞན་ཡང་ནམ་མཁའ་མཐའ་ཡས་པར། །རླན་གཤེར་གཞི་རུ་ག་ལ་འགྱུར། །རླན་གཤེར་ཆུ་དང་གཅིག་ཡིན་ན། །རྣག་སོགས་ཉིད་དུ་སྣང་མི་རུང་། །ཆུ་ལ་སོགས་ལས་ཐ་དད་དུ། །རླན་གཤེར་ཅི་ཡང་དམིགས་པ་མིན། །མི་གཅིག་མཐོང་སྣང་སོ་སོ་ལ། །ཐུན་མོང་བལྟ་བྱ་མི་སྲིད་ཅིང་། །ཐུན་མོང་མཐུན་པའི་དངོས་པོ་ལ། །སོ་སོར་སྣང་བ་མི་སྲིད་ཕྱིར། །ལྟོས་ནས་བཞག་པ་ཙམ་ཞིག་ལས། །དཔྱད་པའི་གཞི་ཞིག་ཁས་ལེན་ན། །གནས་ལུགས་ཡིན་པར་གྲུབ་དགོས་པས། །གང་ལྟར་བརྟགས་ཀྱང་མི་འཐད་ཉིད། །ཐུན་མོང་བལྟ་བྱ་མེད་གྱུར་ན། །སེམས་ཙམ་བཞིན་དུ་ཡུལ་མེད་པར། །ཤེས་ཉིད་ཡུལ་དུ་ཁས་ལེན་དགོས། །དེ་ནི་འཐད་པ་མ་ཡིན་ཏེ། །ཡུལ་མེད་བཞིན་དུ་འཛིན་པ་ཡང་། །དོན་ལ་མེད་པར་འདྲ་བ་ལ། །ཟུང་འཛིན་གཉིས་པོའང་ཀུན་རྫོབ་ཏུ། །སྣང་བར་མཉམ་ཕྱིར་གང་སྣང་བ། །དེ་ལ་བརྟགས་ནས་གཟུང་འཛིན་གཉིས། །ཡོད་མེད་ཕྱེ་བ་མི་འཐད་དེ། །ཡུལ་སྣང་ཡོད་ཀྱང་རྫུན་པ་ལྟར། །འཛིན་པ་སྣང་ཡང་མ་གྲུབ་ཕྱིར། །སྣང་ཙམ་ཐུན་མོང་བལྟ་བྱ་ནི། །མཐུན་པར་སྣང་དང་མི་སྣང་གཞིར། །ཡོད་པར་གྲུབ་ཕྱིར་དེ་མེད་པར། །མི་རུང་ཟློས་གར་མཐོང་སོགས་བཞིན། །ཡོད་ཙམ་འདི་ལས་མ་གཏོགས་པའི། །ཡོད་པ་གཞན་ནས་མི་སྲིད་པས། །འདི་མེད་ན་ནི་སྣང་བ་ཀུན། །མི་སྣང་ནམ་མཁའ་ལྟ་བུར་འགྱུར། །ཕྱི་དང་ནང་གི་རྐྱེན་གྱི་ནི། །དོན་དངོས་ཇི་བཞིན་མི་མཐོང་བ། །སྒྱུ་མའི་སྔགས་ཀྱིས་ཤིང་བུ་ལ། །རྟ་དང་གླང་པོར་སྣང་བ་བཞིན། །དེ་ཕྱིར་ཐུན་མོང་བལྟ་བྱ་ནི། །འདི་ཞེས་ངེས་པར་བཞག་མི་རུང་། །དེས་ན་རང་གི་ལུགས་ལ་ནི། །སྣང་སྟོང་རིས་སུ་མ་ཆད་པའི། །གཞི་ཉིད་ཅིར་ཡང་མ་གྲུབ་པ། །གང་སྣང་ཀུན་ལ་མཉམ་པའི་ཕྱིར། །དངོས་གཅིག་སྣ་ཚོགས་པར་ཡང་སྣང་། །གང་ལ་སྣང་སྟོང་རུང་བ་ན། །དེ་ལ་ཐམས་ཅད་རུང་བར་འགྱུར། །གང་ལ་སྣང་སྟོང་མི་རུང་བ། །དེ་ལ་ཐམས་ཅད་རུང་མི་འགྱུར། །འོ་ན་ཚད་མ་ཚད་མིན་གྱི། །རྣམ་དབྱེའང་འཐད་པ་མེད་ཅེ་ན། །གང་སྣང་དེ་ཉིད་གཞན་ཉིད་དུ། །མ་སྣང་དེ་ཕྱིར་ཚུལ་མཐོང་དེས། །གཞལ་བྱ་མི་གྲུབ་མ་ཡིན་ཏེ། །གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་པ། །གཅིག་དང་ཐ་དད་བྱར་རུང་བའི། །ཚད་མ་གྲུབ་པ་ཉིད་ཀྱི་ཕྱིར། །དེ་ཕྱིར་ལྟོས་ཏེ་ཚད་མ་ཉིད། །གྲུབ་ཀྱི་རང་དབང་ཆོས་རྣམས་ནི། །ཚད་མས་གྲུབ་པ་མ་ཡིན་ཏེ། །གྲུབ་ན་གནས་ལུགས་ཉིད་དུ་ཐལ། །ཆུ་གཅིག་པོ་ཡང་རང་འཛིན་གྱིས། །ཚད་མས་གྲུབ་ཀྱང་ལྟོས་མེད་དུ། །རང་དབང་ཁོ་ནས་གྲུབ་མིན་ཏེ། །དོན་དམ་དཔྱོད་པས་མི་གྲུབ་ཅིང་། །ཡི་དྭགས་ངོར་ཡང་གྲུབ་མི་འགྱུར། །རང་འཛིན་ཡུལ་ལ་མངོན་སུམ་དང་། །རྗེས་དཔག་ཚད་མས་ངེས་པ་ན། །དེ་ཡུལ་འཇུག་ལྡོག་མི་བསླུའི་ཕྱིར། །ཚད་མ་དོན་མེད་མ་ཡིན་ནོ། །དཔེར་ན་ཆུ་གཅིག་ལ་ཞེས་པ། །མི་ཡི་མཐོང་བ་ལ་ལྟོས་ནས། །བཞག་སྟེ་ལྷ་ལ་ལྟོས་ན་ནི། །བདུད་རྩི་གཅིག་ལ་བལྟ་གཞིར་འཛིན། །ཆུ་ལ་རྣག་ཆུ་བདུད་རྩི་རུ། །མཐོང་ཚེ་གསུམ་ཀ་ཚོགས་མིན་ལ། །དེ་གསུམ་གཅིག་ཀྱང་ཚད་མིན་ན། །དེ་ལས་དངོས་པོ་གཞན་ཞིག་ཏུ། །མཐོང་བ་ཚད་མས་སྒྲུབ་མི་ནུས། །མཐོང་དོན་གསུམ་ཀ་མེད་འགྱུར་བས། །མི་མཐོང་ཆུ་འདི་ཆུ་མིན་ན། །གཞན་ཞིག་ཆུ་རུ་མི་འཐད་པས། །ཆུ་ཞེས་བྱ་བ་གཏན་མེད་འགྱུར། །དེ་ལྟའི་ལུགས་ལའང་ཚད་མ་ཡི། །རྣམ་བཞག་འཐད་པར་མི་འགྱུར་རོ། །དེ་ཕྱིར་འཕྲལ་གྱི་འཁྲུལ་རྒྱུ་ཡིས། །མ་བསླད་དབང་པོའི་ཡུལ་དེ་ཉིད། །ཚད་མ་ཡིན་པར་བསྒྲུབ་དགོས་ཏེ། །ཆུ་དང་སྨིག་རྒྱུར་ཆུར་སྣང་བཞིན། །དེས་ན་གནས་སྐབས་ཡི་དྭགས་ཉིད། །ལས་ཀྱི་སྒྲིབ་པས་ཆུ་གཙང་མ། །རྣག་ཏུ་སྣང་ཡང་སྐྱོན་སོལ་ན། །ད་གདོད་ཆུ་རུ་སྣང་བའི་ཕྱིར། །ལྟོས་ནས་མིས་མཐོང་ཚད་མ་དང་། །གཞན་པ་རྐྱེན་གྱིས་བསྒྱུར་བའི་ཕྱིར། །རེ་ཞིག་ཆུ་ནི་ཚད་མར་བསྒྲུབས། །མཐར་ཐུག་རིག་པས་དཔྱད་པས་ན། ། དེ་ཀུན་བག་ཆགས་སྣང་བ་སྟེ། །གཞན་དུ་ཆུ་ཉིད་དག་པ་ཡི། །ཞིང་དང་སྐུ་ཡང་སྣང་བའི་ཕྱིར། །མི་ཡིས་མཐོང་བ་དེ་ཁོ་ན། །མཐའ་གཅིག་ཚད་མར་རུང་མ་ཡིན། །དེས་ན་སྒྲིབ་རྐྱེན་ཇེ་དག་པས། །མཐོང་བ་འོག་མ་ལ་ལྟོས་ནས། །གོང་མ་གོང་མ་ཚད་མ་རུ། །ཁས་བླང་བ་ནི་འཐད་པ་ཉིད། །མཐར་ཐུག་དེ་ཁོ་ན་ཉིད་ནི། །གཅིག་ལས་མེད་ཕྱིར་དེ་ཁོ་ན། །མཐོང་བའི་ཚད་མའང་གཅིག་ཡིན་ཏེ། །ཚད་མ་གཉིས་པ་མི་སྲིད་དོ། །གནས་ལུགས་བདེན་གཅིག་ཟུང་འཇུག་སྟེ། །ཚད་མ་རང་བྱུང་ཡེ་ཤེས་ཉིད། །སྤང་བྱ་མ་རིག་གཅིག་པུ་ལས། །མེད་ཕྱིར་རིག་དང་མ་རིག་ཙམ། །དེ་ཕྱིར་ཚད་མའི་ཚུལ་འདི་ཡིས། །སྣང་ཀུན་རང་བཞིན་ལྷར་སྒྲུབ་པ། །སྔ་འགྱུར་རིང་ལུགས་ཁོ་ན་སྟེ། །ཀུན་མཁྱེན་རོང་ཟོམ་པཎྜི་ཏའི། །ལེགས་བཤད་སེང་གེའི་ང་རོ་ཡིན། །གཞན་ན་ལུགས་འདི་ཚུལ་བཞིན་དུ། །སྨྲ་བ་མེད་པས་འདི་ཡི་ཐད། །གང་ལྟར་ཁས་བླང་འགལ་བར་མཐོང་། །དེ་ལ་ཐུན་མོངས་བལྟ་བྱ་དེ། །སྣང་སྟོང་རེ་རེ་མི་རུང་སྟེ། །གལ་ཏེ་སྟོང་པ་ཙམ་ཡིན་ན། །འགྲོ་བ་སུ་ཡང་རུང་ལ་ཡང་། །མཁའ་ཡང་བུམ་པར་སྣང་འགྱུར་ཞིང་། །བུམ་པ་མཁའ་ལྟར་སྣང་མི་འགྱུར། །སྣང་བ་དང་བྲལ་སྟོང་པ་ཙམ། །བལྟ་བྱར་རུང་ན་ཅི་མི་སྣང་། །དངོས་རྣམས་རྟག་ཏུ་ཡོད་པའམ། །མེད་པར་ཐལ་ཏེ་རྒྱུ་མེད་ལ། །ཇི་སྐད་བརྗོད་ཀུན་འདི་ལ་མཚུངས། །སྟོང་པའི་གནས་སྐབས་ཡིན་བཞིན་དུ། །སྣང་མེད་དེ་གཉིས་འགལ་བའི་ཕྱིར། །མ་སྟོང་པ་ཞིག་ཡོད་ན་ནི། །སྟོང་ཙམ་སྣང་གཞིར་བཞག་དང་འགལ། །འོ་ན་ཁྱོད་ཀྱི་གོང་དུ་ནི། །སྟོང་སྣང་མི་འགལ་ཅི་ཞེ་ན། །འདིར་ནི་མཐོང་དོན་ཐ་སྙད་པའི། །ཚད་མའི་རྣམ་བཞག་སྐབས་ཡིན་པས། །དེའི་ངོར་ཡོད་མེད་འགལ་བ་སྟེ། །དངོས་གཅིག་སྟེང་གི་བདེན་པ་གཉིས། །མི་འགལ་ཡེ་ཤེས་ཡུལ་ཡིན་ཕྱིར། །གལ་ཏེ་སྟོང་པ་དང་བྲལ་བའི། །སྣང་ཙམ་སྣང་གཞིར་མི་རུང་སྟེ། །སྣང་དེ་གང་ལྟར་སྣང་བ་ཡིན། །འདི་ཞེས་རིས་སུ་མ་ཆད་པའི། །སྣང་བ་བསམ་པར་མི་ནུས་ཕྱིར། །སྣང་གཞིར་འགྲུབ་པ་མ་ཡིན་ཏེ། །ཤེས་བྱེད་ཚད་མས་མ་མཐོང་བཞིན། །ཡོད་ཅེས་དམ་བཅའ་ཙམ་དུ་ཟད། །གང་སྣང་རིས་སུ་ཆད་གྱུར་ན། །དེ་ལས་གཞན་དུ་སྣང་མི་རུང་། །མི་སྟོང་སྣང་བ་ཡིན་ཕྱིར་ཡང་། །དེ་ཉིད་རིགས་པས་དཔྱད་བཟོད་འགྱུར། །ཆུ་རྣག་བདུད་རྩི་སོགས་ཀྱི་གཞི། །དེ་གསུམ་གང་ཡིན་ཀྱང་འགལ་ཏེ། །གལ་ཏེ་ཆུ་དེ་རྣག་ཡིན་ན། །ཆུ་རུ་སྣང་བ་ཇི་ལྟར་འགྱུར། །གལ་ཏེ་རྣག་མིན་ཆུ་ཡིན་ན། །རྣག་སོགས་གཞན་དུ་ཅི་ལ་སྣང་། །ཡི་དྭགས་ཡུལ་དུ་སྣང་དེ་ཡང་། །ཆུ་ཡིན་ཞེ་ན་རྣག་སྣང་ཡང་། །མེད་པར་ཁས་བླང་ཉིད་དུ་ཐལ། །གང་ཕྱིར་རང་ལ་སྣང་དེ་ལས། །སྣང་གཞི་ལོགས་སུ་ཡོད་མིན་ཏེ། །ཡོད་ན་ཐ་དད་དུ་འགྱུར་ཕྱིར། །ཀ་བུམ་གཅིག་གཞི་གཅིག་མིན་བཞིན། །དེས་ན་སྣང་སྟོང་ཟུང་འཇུག་གམ། །བདེན་སྟོང་སྣང་བ་ཙམ་ཞིག་དེ། །རྒྱ་ཆད་ཕྱོགས་ལྷུང་བྲལ་བ་ཡི། །ཟུང་འཇུག་རོ་མཉམ་ཆེན་པོ་རུ། །ཆོས་ཀུན་གདོད་ནས་མཉམ་པའི་ཕྱིར། །མཉམ་ཉིད་རྫོགས་པ་ཆེན་པོ་རུ། །གྲུབ་དོན་གཏན་ལ་ཕབ་བྱས་ནས། །ཚུལ་དེ་གོམས་པའི་ལམ་གྱི་སྐབས། །དག་པའི་གཟིགས་པ་ལ་བརྟེན་ནས། །མ་དག་སྣང་བ་རང་གྲོལ་བའི། །སྣང་སྲིད་དག་པའི་ཆོས་སྐུ་ཞེས། །ཡིད་ཆེས་རྡོ་རྗེའི་ལུང་དོན་འབྱོར། །ངེས་ན་སྒྱུ་འཕྲུལ་དྲྭ་བ་ལས། །ཕུང་ལྔ་སྒྱུ་མ་ལྟ་བུ་ཡི། །སྣང་བ་རིས་སུ་མ་ཆད་པ། །དེ་ཉིད་དག་པའི་ལྷ་སྣང་ཞེས། །དགོངས་པའི་དོན་ལ་ཡིད་ཆེས་ཉིད། །འདི་ལྟར་རྣག་འཛིན་ལས་ཟློག་ཚེ། །འཁྲུལ་བར་རྟོགས་ཤིང་དེ་གོམས་པས། །དེ་ལ་ཆུ་རུ་སྣང་བ་ཉིད། །དག་པའི་རྒྱལ་སྲས་ཆེན་པོ་ཡིས། །ཆུ་ཡི་རྡུལ་རེར་གྲངས་མེད་ཞིང་། །མཐོང་ཞིང་ཆུ་དེ་མཱ་མ་ཀིར། །མངོན་སུམ་སྣང་བ་ཉིད་དུ་འགྱུར། །མཐར་ཐུག་སྒྲིབ་གཉིས་སྤང་བའི་སར། །ཟུང་འཇུག་རོ་མཉམ་ཆེན་པོར་གཟིགས། །དེ་ཕྱིར་དག་པའི་གཟིགས་པ་ནི། །སྒྲིབ་པ་མ་ལུས་སྤངས་པའི་ཕྱིར། །དངོས་པོའི་གནས་ཚུལ་མ་ནོར་པ། །དེ་ཡིས་མཐོང་བ་ཁོ་ན་ལས། །གཞན་དུ་ཡོད་པ་མ་ཡིན་ན། །དེ་ཉིད་མཐར་ཐུག་ཚད་མ་རུ། །བཟུང་སྟེ་འ དི་ཀུན་གདོད་ནས་ཀྱང་། །དག་པའི་ཆོས་སྐུར་གནས་སོ་ཞེས། །དམ་བཅའ་གྲུབ་པའི་རྩེ་མོ་རུ། །རིགས་པའི་མིག་ལྡན་རྣམས་ལ་གྲུབ། །དེ་ལྟ་ན་ཡང་ཐེག་པ་དེ། །ངོ་མཚར་འོད་ཟེར་སྟོང་མངའ་བས། །དམན་པའི་ཡིད་ཅན་འབྱུང་པོའི་བྱ། །ཕལ་ཆེར་ལོང་བ་ལྟ་བུར་གྱུར། །དེ་ལ་མཐར་ཐུག་མཉམ་ཉིད་དབྱིངས། །ལྷ་སྣང་ཁོ་ནར་སྣང་ངོ་ཞེས། །ཕྱོགས་གཅིག་སྒྲུབ་པར་མི་ནུས་ཀྱང་། །རང་བཞིན་གདོད་ནས་དག་པ་ཡི། །དབྱིངས་དང་སྣང་ཆ་ཡེ་ཤེས་སྐུ། །འདུ་འབྲལ་མེད་ཕྱིར་སྣང་བའི་ཆ། །གདོད་ནས་ལྷ་རུ་དག་པ་ལ། །གནས་ལུགས་དཔྱད་པས་ཀྱང་མི་གནོད། །གང་ཕྱིར་སྒྲིབ་གཉིས་སྤངས་པ་ཡི། །སྣང་སྟོང་ཟུང་འཇུག་དབྱིངས་དེ་ནི། །མཐར་ཐུག་དེ་ཁོ་ན་ཉིད་ཡིན། །དེ་ལས་གཞན་དུ་གང་ལྟར་དུ། །རྟོགས་ཀྱང་མཐར་ཐུག་དོན་མིན་ཏེ། །སྒྲིབ་གཉིས་ཟད་པར་མ་སྤངས་པས། །གནས་སྣང་རྣམ་ཀུན་མི་མཐུན་ཕྱིར། །གནས་སྐབས་ལམ་གྱི་སྣང་བ་ལ། །མིག་སྐྱོན་དག་པའི་རབ་རིབ་བཞིན། །ཡུལ་ཅན་དྲི་མས་དག་པ་ལས། །ཡུལ་ཀྱང་དེ་བཞིན་དག་མཐོང་སྟེ། །ཡུལ་ཅན་དག་ཀྱང་ལོགས་ཤིག་ན། །ཡུལ་དེ་མ་དག་མེད་པའི་ཕྱིར། །དེ་ལྟ་ན་ཡང་གང་ཟག་གཅིག །འཚང་རྒྱ་དེ་ཚེ་མ་དག་དངོས། །གཞན་ལ་མི་སྣང་མི་འགྱུར་ཏེ། །རང་སྣང་སྒྲིབ་པས་རང་བསྒྲིབས་ཕྱིར། །དེས་ན་ཡུལ་དང་ཡུལ་ཅན་རྣམས། །རང་བཞིན་གདོད་ནས་དག་ན་ཡང་། །གློ་བུར་དྲི་མས་བསྒྲིབས་པའི་ཕྱིར། །དྲི་མ་སྦྱང་ལ་འབད་པར་བྱ། །སྦྱང་བྱའི་དྲི་མ་རྣམས་ཀྱང་ནི། །རང་གི་ངོ་བོས་དག་པ་ལས། །ལོགས་ཤིག་མ་དག་པ་མིན་པས། །རང་བཞིན་འོད་གསལ་མཉམ་པ་ཉིད། །དེ་ལྟར་སྣང་ཚུལ་སྣ་ཚོགས་པ། །མ་རྟོགས་དུས་ན་སོ་སོར་འཛིན། །བྱིས་པ་གང་ལ་སེམས་ཆགས་པ། །དེ་ནི་བྱིས་པ་རྨོངས་པ་སྟེ། །རྨོངས་པ་དེ་ཡིས་འཆིང་བར་བྱེད། །རྟོགས་ན་ཀུན་ཀྱང་རོ་མཉམ་གྱི། །ངང་དུ་འབྲས་བུའི་བཙན་ས་ཟིན། །དུས་གསུམ་དུས་མེད་གཉུག་མའི་ཀློང་། །རང་བྱུང་ཡེ་ཤེས་རྒྱལ་བར་འགྱུར། །དག་མཉམ་ཆེན་པོ་ཁས་ལེན་པའི། །ཚུལ་འདི་ལེགས་པར་གྲུབ་པ་སྟེ། །སྣང་སྟོང་ཅིར་ཡང་མ་གྲུབ་པས། །ཅིར་ཡང་རུང་ལ་ཅིར་ཡང་སྣང་། །དེ་ལས་གཞན་དུ་གང་བཏགས་པ། །ཅིར་ཡང་མི་རུང་ཅིར་མི་སྣང་། །ཚུལ་འདིའི་ཡིད་ཆེས་རྙེད་པའི་སྒོ། །སྟོང་དང་རྟེན་འབྱུང་ལམ་ཡིན་ཏེ། །སྣང་སྟོང་འདི་ལ་ངེས་ཤེས་ན། །བྲི་གང་བྲལ་བའི་དཀྱིལ་འཁོར་དུ། །སྲིད་པ་སྟོང་དང་མི་སྟོང་སོགས། །ཆོས་ཉིད་བསམ་གྱིས་མི་ཁྱབ་ལ། །ཟབ་མོའི་བཟོད་པ་ཁོང་ནས་སྐྱེ། །རྡུལ་གཅིག་ཁྱོན་ལ་རྡུལ་སྙེད་ཞིང་། །མཐོང་ཞིང་སྐད་ཅིག་ཡུན་ལ་ཡང་། །བསྐལ་བར་སྣང་སྟེ་དངོས་པོ་རྣམས། །བདེན་སྟོང་སྒྱུ་མའི་ངེས་ཤེས་ཀྱིས། །སངས་རྒྱས་སྤྱོད་ཡུལ་ཉིད་ལ་འཇུག །དེ་ཕྱིར་རང་སྣང་རིས་མེད་དང་། །རྒྱ་ཆད་ཕྱོགས་ལྷུང་བྲལ་བ་དང་། །གཞི་དབྱིངས་བསམ་གྱིས་མི་ཁྱབ་དང་། །ཆོས་ཉིད་ཅིར་ཡང་མ་གྲུབ་དང་། །སྣང་སྟོང་ཟུང་དུ་འཇུག་པ་སོགས། །གྲུབ་མཐའི་ཆོས་སྐད་ཙམ་འདིའི་དོན། །ལོ་བརྒྱར་བསྒྲིམས་ཏེ་བསམ་བྱས་ཀྱང་། །སྔོན་གོམས་སྨིན་པའི་རྒྱུ་མེད་ན། །བློ་ཆེན་སྦྱངས་པ་མི་དམན་མོད། །ཐུགས་སུ་ཆུད་པ་མ་ཡིན་ནོ། །དེ་ཕྱིར་གྲུབ་མཐའ་མཐའ་དག་གི །གཏིང་ཕུག་གང་དུ་གཞོལ་བ་ཡི། །བརྒྱ་ཕྲག་ཆོས་ཀྱི་ལེགས་བཤད་ཀླུང་། །འབབ་པའི་མཚོ་ཆེན་འདི་རྨད་བྱུང་། །སྣང་ཚུལ་གཞན་རྣམས་མ་ངེས་ཤིང་། །འགྱུར་བ་དག་དང་བཅས་ཏེ་སྣང་། །མཐར་ཕྱིན་ཟུང་འཇུག་ཡེ་ཤེས་ནི། །བསླུ་མེད་དོན་གཟིགས་འགྱུར་བ་མེད། ༈ །སྤྲོས་བྲལ་དབུ་མ་ཆེན་པོ་ལ། །ཁས་ལེན་ཡོད་མེད་དཔྱད་པའི་ཚེ། །སྔ་རབས་པ་རྣམས་མགྲིན་གཅིག་ཏུ། །དབུ་མའི་རང་ལུགས་ཡིན་མིན་དང་། །ཡོད་མེད་ལ་སོགས་ཅིར་ཡང་ནི། །མེད་ཕྱིར་ཁས་ལེན་མེད་པར་འདོད། །རང་གཞུང་རྣམས་ལས་ལམ་འབྲས་དང་། །རྟེན་འབྱུང་གྲུབ་མཐའི་རྣམ་བཞག་ཀུན། །ཁས་བླང་རང་ལུགས་ཡོད་བཞིན་དུ། །ཐ་སྙད་ཐམས་ཅད་གཞན་ངོ་ལ། །སྐྱེལ་བ་ཚིག་དོན་གཉིས་ཀར་འགལ། །ཀློང་ཆེན་རབ་འབྱམས་འདི་སྐད་དུ། །དབུ་མར་ཁས་ལེན་ཡོད་མེད་ལ། །སྔ་རབས་པ་རྣམས་ཕྱོགས་རེར་འཛིན། །ལུགས་རེར་སྐྱོན་ཡོན་གཉིས་རེ་གནས། །དེས་ན་རང་གིས་བཞེད་པ་ལ། །དོན་དམ་གནས་ལུགས་གཞལ་བའི་ཚེ། །གཤིས་ལ་ཅིར་ཡང་མ་གྲུབ་ལྟར། །ཁས་ཀྱང་ཅི་ཞིག་ལེན་པར་བྱེད། །དེ་ཕྱིར་གྲུབ་མཐའ་གནས་ལུགས་ཀྱི། །ཁས་ལེན་ཡིན་ཕྱིར་རྩོད་སོགས་ཚེ། །གཤིས་བཞིན་ཁས་ལེན་ཅི་ཡང་མེད། །རྗེས་ཐོབ་ལམ་འབྲས་གྲུབ་པའི་མཐའ། །ཇི་ལྟར་ཇི་སྙེད་རྣམ་བཞག་རྣམས། །མ་འདྲེས་སོ་སོར་ཁས་ལེན་འདོད། །ཕྱིན་ཆད་ཚུལ་འདི་སྨྲ་ཤེས་ན། །ཁོ་བོའི་ལེགས་བཤད་མཐུ་ཡིན་གསུངས། །དེར་བརྟེན་གངས་ཅན་མཁས་པ་འགས། །རང་ལུགས་ཁས་ལེན་ཡོད་པའི་ཕྱོགས། །ཁོ་ན་ཡང་ཡང་ཆེས་ཆེར་བསྒྲུབས། །དེ་ཡང་སྐབས་ཤན་མ་ཕྱེས་ན། །གཤིས་དོན་ཅིར་ཡང་མ་གྲུབ་ཕྱིར། །མཐའ་གཅིག་ཁས་ལེན་ཡོད་པའང་དཀའ། །དབུ་མ་རང་གི་ལུགས་ཞེས་པ། །དབུ་མའི་གྲུབ་མཐའ་མཐར་ཐུག་དོན། །ཇི་ལྟར་གཞལ་ཉིད་ཡིན་དགོས་ཏེ། །དེ་ལས་གཞན་པ་རང་ལུགས་མིན། །ཅི་སླད་དབུ་མ་རང་གིས་ནི། །གཞལ་ན་དེ་མ་གྲུབ་ཕྱིར་རོ། །དེས་ན་དེས་ཁས་བླངས་ཡིན་ན། །རང་དབང་དཔྱད་ནས་ཁས་བླང་བར། །རིགས་པས་འཕུལ་ནུས་ཉིད་ཀྱི་ཕྱིར། །ཁས་བླངས་པ་དེ་དོན་དམ་པར། །གྲུབ་ཅིང་དཔྱད་བཟོད་ཉིད་དུ་འགྱུར། །རང་ལུགས་ཁས་ལེན་མ་ཡིན་ན། །རང་ལ་ཁས་ལེན་ཡོད་པ་འགལ། །རང་ལ་དཔྱད་དང་མ་དཔྱད་པའི། །ཁས་ལེན་གཉིས་ནི་ཡོད་གྱུར་ཅིང་། །གཉིས་ཀ་ངེས་པར་བདེན་གྱུར་ན། །རང་ལུགས་ཞེས་པ་དེ་གཉིས་པོ། །རེ་རེ་ཡིན་ནམ་གཉིས་ཀ་ཡིན། །རེ་རེ་ཡིན་ན་གཅིག་ཤོས་འགལ། །ཡོད་པ་ཁས་བླངས་མ་ཡིན་ལ། །མེད་པར་ཁས་ནི་བླངས་གྱུར་ན། །ཡོད་ཅེས་བྱ་བའི་ཁས་ལེན་ནི། །ཀུན་རྫོབ་ཏུ་ཡང་མི་རུང་སྟེ། །མེད་པ་ཁོ་ན་ཁས་བླང་ཕྱིར། །གཉིས་ཀར་རང་གི་ཁས་བླངས་ན། །དཔྱད་མི་བཟོད་པ་བསལ་ནས་སུ། །རིགས་པས་གནོད་མེད་ཁས་ལེན་པ། །མིན་ཕྱིར་གཉིས་ཀ་དཔྱད་བཟོད་འགྱུར། །དེ་ལྟ་ན་ཡང་དེ་གཉིས་པོ། །ཚོགས་པ་སྲིད་པ་མ་ཡིན་ཏེ། །ཚོགས་ན་དཔྱད་པས་རྟོགས་ན་ཡང་། །མ་དཔྱད་དུས་བཞིན་ཡོད་རྟོག་ཉིད། །ཡོད་ཕྱིར་དཔྱད་པས་ཅི་ཞིག་ཕན། །ཀུན་རྫོབ་དཔྱད་གྲུབ་རིགས་མ་ཡིན། །དགག་བྱ་བཅད་པའི་མེད་དགག་ལས། །ལྷག་པའི་གནས་ལུགས་མེད་གྱུར་ན། །འཛིན་སྟངས་དེ་ལ་སྣང་བའི་ཆ། །སྐབས་མི་ཐོབ་ཕྱིར་མཐའ་གཅིག་ཏུ། །ལྟ་སྒོམ་སྤྱོད་པའི་སྐབས་ཀུན་ཀྱང་། །མེད་པར་ལྟ་བའི་ཡིད་ཅན་དུ། །ཅི་ཕྱིར་མི་འགྱུར་གནས་ལུགས་དང་། །རྗེས་མཐུན་ནམ་ཡང་གོམས་དགོས་ཕྱིར། །དེས་ན་ཀུན་མཁྱེན་བཞེད་པ་བཞིན། །རང་ལུགས་འདི་ལྟར་ཤེས་པར་བྱ། །དབུ་མ་མཚན་ཉིད་པ་ཡིན་ན། །ཟུང་འཇུག་དབུ་མ་ཆེན་པོའམ། །སྤྲོས་བྲལ་དབུ་མ་ཡིན་དགོས་ཏེ། །འཕགས་པའི་མཉམ་བཞག་ཡེ་ཤེས་དང་། །རྗེས་སུ་མཐུན་པར་གཏན་ཕབས་ནས། །ཡོད་མེད་ལ་སོགས་མཐའ་རྣམས་ཀུན། །ཉེར་ཞིའི་རང་བཞིན་ཡིན་ཕྱིར་རོ། །སྟོང་པ་འབའ་ཞིག་ཡུལ་བྱེད་པའི། །ལམ་དེ་བདེན་གཉིས་ཕྱོགས་གཅིག་ལ། །ལྟུང་ཕྱིར་ཉི་ཚེའི་ལྟ་བ་དེ། །ཟུང་འཇུག་དང་ནི་སྤྲོས་བྲལ་མིན། །ཟུང་འཇུག་ཡོད་དང་མེད་པའམ། །སྣང་དང་སྟོང་པ་མཉམ་ཉིད་ཀྱང་། །འདི་ནི་དོན་དམ་སྟོང་པའི་དབྱིངས། །འབའ་ཞིག་ཡུལ་ཅན་ཡིན་ཕྱིར་རོ། །སྤྲོས་པ་ཡོད་མེད་ལ་སོགས་པའི། །དམིགས་པའི་རྣམ་པ་ཐམས་ཅད་དེ། །འདི་ནི་མེད་པའི་སྤྲོས་པ་དང་། །མ་བྲལ་དེ་ལ་དམིགས་པའི་ཕྱིར། །དེས་ན་དབུ་མ་ཆེན་པོའི་ངོར། །ཁས་ལེན་ཅི་ཡང་ཡོད་མིན་ཏེ། །དེ་ཡིས་སྣང་སྟོང་མཉམ་ཉིད་དུ། །རྟོགས་སླད་ཡོད་མེད་ཡིན་མིན་སོགས། །དགག་སྒྲུབ་སྤྲོས་ཀུན་བྲལ་བས་ན། །གནས་ལུགས་དོན་བཞིན་ཆོས་ཀུན་ཀྱང་། །ཁས་བླང་རིགས་པས་མི་གྲུབ་ཕྱིར། །གང་དུ་ཁས་ནི་ལེན་མི་བྱེད། །དེ་ལྟར་གནས་ལུགས་མཐར་ཐུག་དོན། །ཁས་ལེན་མེད་ཀྱང་སྣང་ཚུལ་ལ། །ཐ་སྙད་བདེན་གཉིས་སོ་སོར་ཡང་། །ཁས་བླང་ཡོད་དེ་དེ་གཉིས་ཀྱང་། །བདེན་གཉིས་དབྱེར་མེད་གནས་ལུགས་ལ། །ལྟོས་ན་སོ་སོའི་སྣང་ཚུལ་ཙམ། །དབྱེར་མེད་དོན་མཐོང་ཡེ་ཤེས་ལ། །ལྟོས་ན་ཚད་མ་གཉིས་པོ་ཡང་། །ཉི་ཚེའི་གནས་ཡིན་དེ་གཅིག་གིས། །བདེན་གཉིས་འཛིན་པ་མི་སྲིད་ཕྱིར། །དེས་ན་ཐ་སྙད་དོན་དམ་གྱི། །ཚད་མ་གཉིས་པོ་ཤེས་རབ་སྟེ། །བུམ་སོགས་དེ་གཉིས་ཀྱིས་གཞལ་ན། །ངོ་བོ་གཉིས་ནི་རྙེད་ན་ཡང་། །གཅིག་ཚེ་གཅིག་ནི་ཡོད་མིན་པས། །སོ་སྐྱེའི་བློ་ལ་བདེན་པ་གཉིས། །རེས་འཇོག་ཚུལ་ལས་མི་སྣང་ཕྱིར། །སོ་སོ་གཞལ་བའི་ཁས་ལེན་གཉིས། །ཡོད་པ་ཉིད་དུ་གྲུབ་པ་ཡིན། །འོ་ན་ཁས་ལེན་ཡོད་མེད་དང་། །བདེན་གཉིས་ཁས་ལེན་ནང་འགལ་ཚུལ། །གོང་དུ་གཞན་ལ་ཇི་བརྗོད་པ། །རང་ལའང་མཚུངས་པར་ཐལ་ཞེ་ན། །ངེད་ཀྱིས་ཁྱད་པར་ཕྱེས་ནས་སུ། །ཤན་འབྱེད་ལམ་གྱི་དབུ་མ་དང་། །དངོས་གཞི་མཉམ་བཞག་དབུ་མ་གཉིས། །རགས་དང་ཕྲ་བའམ་རྒྱུ་འབྲས་སམ། །རྣམ་ཤེས་ཡེ་ཤེས་གནས་སྐབས་ཀྱི། །དབུ་མ་ཆེ་ཆུང་ཁྱད་ཕྱེས་ནས། །བཤད་ཕྱིར་སྐྱོན་དེ་ག་ལ་འཇུག །དེས་ན་དབུ་མ་ཆེན་པོ་ལ། །ཁས་ལེན་མེད་པ་རང་གི་ལུགས། །མཐར་ཐུག་དེ་ཡིན་རྗེས་ཐོབ་ལ། །བདེན་གཉིས་སོ་སོར་སྣང་བའི་ཚེ། །བདེན་གཉིས་སོ་སོའི་ཚད་མ་ཡིས། །གཞལ་བའི་དགག་སྒྲུབ་ཐམས་ཅད་ཀྱང་། །ལོག་རྟོག་རེ་རེ་དགག་པའི་ཆེད། །ཡིན་གྱི་གཤིས་ལ་དགག་སྒྲུབ་ཏུ། །ཁས་བླང་གང་ཡང་མེད་པའི་ཕྱིར། །གཤིས་ལ་བདེན་པ་གཉིས་པོ་ཡང་། །རིས་སུ་ཆད་པ་ཡོད་མེད་པས། །ཁས་ལེན་གཉིས་པོ་གང་ལྟར་ཡང་། །བདེན་པར་གྲུབ་པ་མེད་པའི་ཕྱིར། །གཉིས་ཀར་ཡང་ནི་ཁས་བླངས་ཀྱང་། །སྣང་ཚུལ་ཙམ་གྱི་དབང་ཕྱིར་དང་། །གནས་སྐབས་གཉིས་ཀ་སོ་སོ་ན། །བདེན་དེ་འགལ་བ་མེད་པའི་ཕྱིར། །དཔྱད་བཟོད་ལ་སོགས་སྐྱོན་མི་འབབ། །དངོས་པོའང་དཔྱད་པར་མི་བཟོད་དེ། །དངོས་མེད་ཀྱང་ནི་དཔྱད་མི་བཟོད། །མཐར་ཐུག་གཉིས་ཀ་མཚུངས་པ་ལ། །གནས་སྐབས་ལྟོས་ཏེ་བཏགས་པ་ཙམ། །མ་བརྟགས་གྲགས་པས་ཡོད་ཙམ་དེ། །སྣང་ཚུལ་ཡིན་གྱིས་གནས་ཚུལ་མིན། །བདེན་མེད་དཔྱོད་པའི་རིག་ཤེས་ཀྱིས། །མཐོང་བ་གནས་ཚུལ་དོན་དམ་འདོད། །དེ་ཡང་ཀུན་རྫོབ་ལ་ལྟོས་པའི། །དོན་དམ་ཡིན་གྱི་མཐར་ཐུག་ལ། །ལྟོས་ན་དོན་དམ་རྣམ་གྲངས་ཙམ། །གནས་སྣང་ཕན་ཚུན་འགལ་བ་ན། །བདེན་གཉིས་ཐ་དད་སྐྱོན་བཞི་འབབ། །གནས་སྣང་ཕན་ཚུན་གཞན་མིན་ན། །བདེན་གཉིས་གཅིག་པའི་སྐྱོན་བཞིས་གནོད། །ཚུལ་དེས་སངས་རྒྱས་སེམས་ཅན་ཀྱང་། །གནས་ཚུལ་སྣང་ཚུལ་ཙམ་ཡིན་གྱི། །རྒྱུ་འབྲས་ཉིད་དུ་འདོད་པ་ནི། །ཐེག་པ་ཆུང་ངུར་ཤེས་པར་བྱ། །གནས་སྣང་གཅིག་དང་ཐ་དད་དུ། །ཁས་བླངས་མེད་ཕྱིར་སེམས་ཅན་ནི། །སངས་རྒྱས་ཡིན་ན་སྣང་རུང་དང་། །ལམ་དང་སྒྲུབ་པ་དོན་མེད་དང་། །རྒྱུ་ལ་འབྲས་གནས་ཁས་ལེན་སོགས། །རིགས་པས་གནོད་པ་རྣམ་ཀུན་མེད། །གནས་ཚུལ་གང་ཡིན་སྒྲིབ་པ་ཡིས། །བསྒྲིབས་ཕྱིར་ཉེ་བར་མི་སྣང་བས། །ལམ་ལ་འབད་པར་བྱེད་པ་ནི། །རང་གཞན་གཉིས་ཀས་འདོད་པ་ཉིད། །བདེན་གཉིས་འགལ་བ་མེད་པའི་ཕྱིར། །ཡོད་དང་མེད་ཅེས་ལྟ་བ་ཡི། །ཁས་ལེན་གཉིས་པོའང་ཇི་ལྟར་འགལ། །ཕན་ཚུན་གཅིག་པའང་མིན་པའི་ཕྱིར། །ཁས་བླང་གཉིས་ཀྱི་རྣམ་པར་བཞག །དེ་ཕྱིར་ཇི་སྲིད་བདེན་པ་གཉིས། །སོ་སོར་སྣང་བ་དང་བཅས་པའི། །སེམས་ཀྱི་འཇུག་པ་ཡོད་ཀྱི་བར། །དེ་གཉིས་རྣམ་ཀུན་སྟོབས་མཚུངས་པས། །མཐའ་གཅིག་ཁས་ལེན་ཡོད་མིན་ཏེ། །མེད་ཅེས་བདེན་སྟོང་ངེས་པ་དང་། །ཡོད་ཅེས་སྣང་ཆ་ངེས་པ་གཉིས། །རེས་འཇོག་ཚད་མ་གཉིས་ཀྱིས་ནི། །གཞལ་ཚེ་སོ་སོས་རྙེད་དོན་ནམ། །མཐོང་དོན་བདེན་པ་གཉིས་ཞེས་བརྗོད། །དེ་གཉིས་གཅིག་དང་ཐ་དད་པ། །མིན་ཕྱིར་དེ་གཉིས་མཐའ་གཅིག་ཏུ། །གཅིག་སྤང་གཅིག་ནི་བཟུང་མི་རུང་། །དེ་གཉིས་ལ་དཔྱོད་ཤེས་རབ་ཀྱིས། །ཁས་ལེན་སོ་སོར་ཕྱེ་སྟེ་དཔེར། །མཐར་ཐུག་ཆོས་སྐུ་འཐོབ་པའི་ཚེ། །སེམས་དང་སེམས་བྱུང་མ་ལུས་པ། །ཐ་སྙད་དབང་དུ་འགག་ཅེས་བྱ། །དམ་པའི་དོན་དུ་འགག་པའང་མེད། །མདོ་དང་བསྟན་བཅོས་གཞུང་ཀུན་ན། །དགག་སྒྲུབ་རྣམ་པ་ཇི་སྙེད་པ། །ལ་ལ་དོན་དམ་ཁས་ལེན་ཏེ། །ལ་ལ་ཀུན་རྫོབ་དབང་དུ་གསུངས། །དོན་དམ་ཁོ་ནའི་དབང་དུ་ན། །ལམ་དང་སངས་རྒྱས་སེམས་ཅན་སོགས། །མེད་ཅེས་སྨྲ་བར་རུང་མོད་ཀྱི། །ཀུན་རྫོབ་ཉིད་ལ་ལྟོས་མེད་དུ། །དེ་གཅིག་ཁོ་ནར་མི་འགྱུར་ཏེ། །མེད་ཀྱང་འཁོར་འདས་སྣང་ཆ་ཀུན། །སྣང་བར་མངོན་སུམ་གྲུབ་པའི་ཕྱིར། །ཐ་སྙད་ཚད་མའི་དབང་བྱས་ནས། །ལམ་དང་སངས་རྒྱས་སེམས་ཅན་སོགས། །ཡོད་ཅེས་བརྗོད་པར་རིགས་མོད་ཀྱི། །དོན་དམ་ཉིད་ལ་ལྟོས་མེད་དུ། །དེ་གཅིག་ཁོ་ནར་མི་འགྱུར་ཏེ། །ཡོད་ཀྱང་དེ་ལྟར་མ་གྲུབ་པར། །དཔྱད་པ་ཚད་མས་ངེས་པའི་ཕྱིར། །དེས་ན་དེ་གཉིས་ནམ་དུ་ཡང་། །གཅིག་མེད་གཅིག་ཡོད་སྲིད་མ་ཡིན། །གཉིས་ཀ་སྟོབས་མཚུངས་བདེན་གྱུར་ཚེ། །དངོས་པོ་མི་སྟོང་འགྱུར་ཞེ་ན། །གཉིས་ཀའང་རང་བཞིན་མ་གྲུབ་དང་། །ཡུལ་གཉིས་དོན་གྱིས་ཐ་དད་པ། །མ་ཡིན་སྣང་བ་དེའི་ངོ་བོ། །སྟོང་ཕྱིར་མི་སྟོང་ག་ལ་ཡིན། །གཉིས་ཀ་མཚུངས་བར་སྣང་དེའི་ཕྱིར། །སྟོང་པར་གྲུབ་སྟེ་སྣང་མེད་ན། །སྟོང་པའང་ཅི་ཡིས་ཤེས་པར་འགྱུར། །དེས་ན་གཉིས་ཀ་མི་འགལ་བར། །ཕན་ཚུན་རྒྱུ་འབྲས་སུ་འཆར་ཞིང་། །གཅིག་ཡོད་གཅིག་ལ་ངེས་ཤེས་ན། །ནམ་ཡང་འདུ་འབྲལ་མེད་པའམ། །གང་ལ་གང་གིས་མ་ཁྱབ་པ། །མེད་ཕྱིར་གང་ལྟར་གཞལ་ཀྱང་བདེན། །སྣང་བ་སྟོང་པར་ཤེས་པ་ཡིས། །སྣང་བ་བདེན་པ་མེད་པར་རྟོགས། །སྟོང་པ་སྣང་བར་ཤེས་ན་ཡང་། །སྟོང་པ་བདེན་པར་ཡོད་མི་རྟོགས། །དེ་ཕྱིར་འདུ་འབྲལ་མེད་མཐོང་ཚེ། །བདེན་པར་ནམ་ཡང་སླར་མི་ལྡོག །གང་སྣང་དེ་ཡི་གནས་ལུགས་ནི། །སྟོང་པ་ཡིན་ཕྱིར་འདུ་འབྲལ་མེད། །སྣང་བ་སྤང་བའི་ཕ་རོལ་ཏུ། །སྟོང་པ་ཡན་གར་མི་འགྲུབ་ཕྱིར། །དེས་ན་ཇི་སྲིད་རེས་འཇོག་གིས། །བདེན་གཉིས་བསྒོམ་པ་ཤེས་རབ་སྟེ། །གཉིས་སྣང་འཁོར་བའི་སྐབས་འདི་ན། །སེམས་དང་སེམས་བྱུང་གཡོ་བ་ཡིས། །ཡེ་ཤེས་ཉེ་བར་མི་སྣང་ཕྱིར། །དཔྱད་པའི་ཤེས་རབ་དྲི་མེད་གཉིས། །སྤང་བླང་མེད་པར་གཟུང་བྱ་སྟེ། །གང་ཚེ་གཅིག་མ་ཚང་གྱུར་ན། །དེ་གཉིས་ལས་བྱུང་ཟུང་འཇུག་གི །ཡེ་ཤེས་ངེས་པར་མི་སྐྱེ་སྟེ། །གཙུབས་ཤིང་གཙུབས་སྟན་གང་རུང་དང་། །བྲལ་བའི་མེ་ནི་འབྱུང་མིན་བཞིན། །དེས་ན་ཐབས་དང་སྟོང་པ་ཉིད། །ཡ་བྲལ་ཡང་དག་ལམ་མིན་ཞེས། །རྒྱལ་དང་བརྒྱུད་འཛིན་གྱིས་གསུངས་ཕྱིར། །རྒྱུ་གཉིས་འདི་སྤང་ཡེ་ཤེས་ཆེ། །སྐྱེེ་བའི་ཐབས་གཞན་མི་སྲིད་དེ། །ཡེ་ཤེས་རང་གི་ངོ་བོ་ནི། །བསམ་བརྗོད་འདས་ཕྱིར་བརྡའ་ཐབས་དང་། །ཚིག་ཙམ་དག་གིས་མཚོན་པ་ལས། །དངོས་སུ་བསྟན་པར་མི་ནུས་པས། །སྔགས་སུ་ཚིག་དབང་ཞེས་གསུངས་ཏེ། །རྡོ་རྗེ་སྙིང་པོའི་རྒྱུད་སོགས་སུ། །ཚིག་དང་ཐབས་ཀྱི་སྒོ་ནས་བསྟན། །འཇིག་རྟེན་འདས་པའི་ཡེ་ཤེས་ཏེ། །དེ་ལྟར་གཞན་ལ་མ་ལྟོས་པར། །གཟུང་བར་ནུས་པ་མ་ཡིན་པའི། །བདེན་གཉིས་ལམ་གྱི་དབུ་མ་བསྟན། །བདེན་གཉིས་ཚུལ་གྱིས་དཔྱད་པའི་འབྲས། །ཟུང་འཇུག་ཉིད་དུ་གྲུབ་ནུས་པ། །དེས་ན་བདེན་གཉིས་གཏན་འབེབས་ཚེ། །སྣང་སྟོང་དགག་བྱ་འགོག་བྱེད་ཀྱི། །ཚུལ་དུ་རེས་འཇོག་ལྟ་བུར་བསྟན། །དེ་འབྲས་ཟུང་འཇུག་ཡེ་ཤེས་ཉིད། །རྒྱུད་སྡེར་རྣམ་གྲངས་དུ་མས་བསྟན། །དེས་ན་དབུ་མའི་ལུགས་ཐམས་ཅད། །བདེན་གཉིས་ཚུལ་གྱིས་རྣམ་པར་བཞག །བདེན་པ་གཉིས་ལ་མ་བརྟེན་པར། །ཟུང་འཇུག་ཁོང་དུ་ཆུད་མི་འགྱུར། །རྒྱལ་བས་ཇི་སྙེད་གསུངས་པ་ཡང་། །བདེན་པ་གཉིས་ལ་ཡང་དག་བརྟེན། །དེ་ཕྱིར་བདེན་གཉིས་སོ་སོ་ཡི། །ཁས་ལེན་དང་བཅས་དབུ་མ་དེ། །འབྲས་མིང་རྒྱུ་ལ་བཏགས་པ་ཡི། །རེས་འཇོག་དབུ་མ་ཆུང་ངུ་ཡིན། །ཕུང་པོ་རྣམ་དཔྱད་སྟོང་པ་ཉིད། །དགག་བྱ་བཅད་པའི་མེད་དགག་ཙམ། །དེ་ལ་ལྟོས་ན་མེད་ཅེས་པའི། །ཁས་ལེན་ཀྱང་ནི་ཡོད་པ་ཡིན། །རྒྱུའམ་ལམ་གྱི་དབུ་མ་དེས། །བདེན་གཉིས་ཇི་ལྟར་ཁས་བླངས་པ། །གཉིས་ཀ་རང་གི་ལུགས་ཡིན་གྱི། །དོན་དམ་རང་ལུགས་བྱས་ནས་སུ། །ཀུན་རྫོབ་གཞན་ངོར་སྐྱེལ་བ་མིན། །ཡིན་ན་རང་ལུགས་དོན་དམ་པ། །རྐྱང་རྐྱང་པོ་རུ་གྱུར་ནས་ཀྱང་། །གཞི་ལམ་འབྲས་བུའི་སྣང་བ་ཀུན། །འཁྲུལ་བ་སྤང་བྱ་ཁོ་ན་ཞེས། །སྐུར་པ་འདེབས་ཤིང་མཐར་ཕྱིན་ཚེ། །སྒྲིབ་བྲལ་དབྱིངས་སྟོང་འབའ་ཞིག་ཙམ། །ལྷག་མར་ལུས་ནས་མཁྱེན་གཉིས་སོགས། །མེད་འདོད་ཉན་རང་རང་ལམ་གྱི། །ལྷག་མེད་མྱང་འདས་འདོད་ཇི་བཞིན། །འདིར་ཡང་མར་མེ་རྒྱུན་ཆད་དང་། །དོན་ཁྱད་མེད་ཕྱིར་ཟུང་འཇུག་དབྱིངས། །མེད་པར་སྐུར་འདེབས་ནམ་མཁའ་དང་། །འདྲ་བའི་ཡིད་ཅན་ཤཱཀྱ་ཡི། །བསྟན་པའི་རྐུན་པོ་དམ་པའི་ཆོས། །འཇིག་པའི་སྐྱེས་བུར་རྒྱལ་བས་གསུངས། །རིགས་པས་ཀྱང་ནི་དེ་འདྲའི་ལུགས། །ཡོད་ལ་མེད་པར་སྐུར་བའི་ཚུལ། །ཡིན་པར་ངེས་ཤེས་རྡོ་རྗེའི་མེས། །ལྟ་ངན་རི་བོ་བརླག་པར་ནུས། །དེས་ན་དབུ་མའི་གཞུང་ཀུན་ཏུ། །ཤེས་རབ་རྒྱུ་ཡི་དབུ་མ་ཉིད། །རིགས་པས་དཔྱད་ཅིང་མ་གྲུབ་པར། །འབྲས་བུ་ཟུང་འཇུག་མི་གྲུབ་ཕྱིར། །བདེན་པ་གཉིས་ཀྱི་ཚུལ་དུ་ནི། །རིགས་པས་གཏན་ལ་ཕབ་ན་ཡང་། །འབྲས་བུ་བདེན་པ་དབྱེར་མེད་དུ། །གྲུབ་པ་རྒྱུ་འབྲས་ཐེག་པའི་བཅུད། །དེ་ཕྱིར་ཡེ་ཤེས་དེ་དག་ནི། །རེས་འཇོག་ཚུལ་གྱིས་མཐའ་གཉིས་ལ། །མི་གནས་བློ་ལས་འདས་པའི་ཕྱིར། །དབུ་མ་ཡིན་ལ་ཆེན་པོའང་ཡིན། །ཇི་སྲིད་རེས་འཇོག་ཚུལ་གྱིས་ནི། །ཡེ་ཤེས་དེ་ལ་མ་རེག་པར། །རྒྱལ་བ་ཀུན་གྱི་དགོངས་པའི་མཐིལ། །མཐར་ཐུག་དབུ་མ་ཆེན་པོ་མིན། །གཙུབས་ཤིང་གཙུབས་པའི་མེ་བཞིན་དུ། །བདེན་གཉིས་ཤེས་རབ་དྲི་མེད་ཀྱིས། །དྲངས་པ་ཟུང་འཇུག་ཡེ་ཤེས་ཆེ། །ཡོད་མེད་ཡིན་མིན་ལ་སོགས་པ། །མཐའ་བཞིའི་སྤྲོས་ཀུན་ཉེར་ཞི་བའི། །འཕགས་པའི་མཉམ་བཞག་ཡེ་ཤེས་ཉིད། །ཟུང་འཇུག་འབྲས་བུའི་དབུ་མར་བཞག །བདེན་གཉིས་ཕྱོགས་སུ་མ་ལྷུང་བ། །དེ་ལ་རྗེས་ཐོབ་ཤེས་རབ་ཀྱིས། །སྣང་སྟོང་ཟུང་དུ་འཇུག་པ་ཞེས། །བརྡའ་ཙམ་སྒོ་ནས་བཞག་མོད་ཀྱི། །མཉམ་བཞག་ཡེ་ཤེས་ཆེན་པོའི་ངོར། །སྣང་དང་སྟོང་དང་ཟུང་འཇུག་གི །ངོ་བོར་དམིགས་སུ་ཡོད་མ་ཡིན། །སྣང་བ་ཐ་སྙད་ཚད་མའི་ཡུལ། །སྟོང་པ་དོན་དམ་དཔྱོད་པའི་ཡུལ། །ཟུང་འཇུག་དེ་གཉིས་འདྲེས་པའི་ཆ། །དེ་རྣམས་སྒྲ་རྟོག་ཡུལ་ཡིན་ཕྱིར། །དེ་ལས་འདས་པའི་མཉམ་བཞག་ནི། །སོ་སོ་རང་གི་ཡེ་ཤེས་ཙམ། །སྣང་བཅས་སྣང་མེད་ལ་སོགས་ཀྱང་། །དེ་བཞིན་རིག་པས་མི་འགྲུབ་བོ། །དེས་ན་ཇི་སྲིད་རེས་འཇོག་གི །བདེན་གཉིས་བསྒོམ་པ་ཤེས་རབ་སྟེ། །ནམ་ཞིག་རེས་འཇོག་མེད་པར་ཡང་། །ཟུང་འཇུག་ཡེ་ཤེས་ཐོབ་པའི་ཚེ། །ཕུང་པོ་དགག་བྱ་རྣམ་དཔྱད་ཀྱིས། །བཅད་པའི་མེད་དགག་སྟོང་རྐྱང་ལས། །འདས་ཏེ་འགོག་དང་དགག་བྱ་ཡི། །ཚུལ་དུ་སོ་སོར་མི་སྣང་བ། །སྣང་ཆ་ཐབས་ཀྱི་རྣམ་པ་དང་། །ལྡན་པ་རྣམ་ཀུན་མཆོག་ལྡན་གྱི། །སྟོང་ཉིད་སྤྲོས་བྲལ་ཆེན་པོ་དང་། །ལྷན་སྐྱེས་ཕྱག་རྒྱ་ཆེན་པོ་སོགས། །མཚན་གྱི་རྣམ་གྲངས་མང་མངའ་བ། །སེམས་འདས་ཡེ་ཤེས་ཡིན་པའི་ཕྱིར། །རྟོག་པ་གཞན་གྱིས་བསམ་མི་ཁྱབ། །དེ་ནི་སྒྲ་རྟོག་ཡུལ་མིན་ཕྱིར། །མེད་དགག་མ་ཡིན་དགག་སོགས་དང་། །ཐ་དད་དང་ནི་སྣང་སྟོང་སོགས། །རིས་སུ་ཆད་པ་མེད་པ་སྟེ། །རྒྱ་ཆད་ཕྱོགས་ལྷུང་བྲལ་བས་ན། །ཁས་ལེན་ཡོད་མེད་ལས་འདས་ཀྱང་། །ཨེ་ཝཾ་ཟུང་དུ་ཞུགས་པ་ཡི། །རང་བྱུང་ཡེ་ཤེས་གནས་མེད་སྣང་། །དེ་ལྟར་ཁས་ལེན་ལས་འདས་པའི། །སྒྲོ་སྐུར་དང་བྲལ་དམ་པའི་དོན། །དབྱིངས་རིག་འདུ་འབྲལ་མེད་པའི་ཚུལ། །འདི་ཞེས་མཚོན་བརྗོད་མེད་པར་འདོད། །འོན་ཀྱང་བསམ་མིན་བྱེད་པོ་ལྟར། །སུ་ཡིས་རྟོགས་མེད་མ་ཡིན་ཏེ། །དྲི་མེད་རིག་པས་དཔྱད་པ་ཡིས། །རབ་དྲང་སོ་སོ་རང་རིག་པའི། །རྗེས་ལས་ཐོབ་པའི་ཡེ་ཤེས་ཀྱི། །ངེས་ཤེས་ཆོས་ཀྱི་མར་མེ་ནི། །ཐེ་ཚོམ་སྨག་དང་བྲལ་བ་དག །མངོན་སུམ་སྣང་བ་ཡོད་ཕྱིར་རོ། །མདོ་ལམ་ཐབས་དང་ཤེས་རབ་གཉིས། །གཅིག་ལ་གཅིག་གིས་རྩིས་ཟིན་པར། །བྱེད་ཀྱི་འདིར་ནི་ཐབས་ཤེས་ཉིད། །འདུ་འབྲལ་མེད་པར་རྟོགས་གོམས་ཉིད། །སྤྲོས་བྲལ་དབུ་མ་ཆེན་པོ་དང་། །འོད་གསལ་རྫོགས་པ་ཆེན་པོ་གཉིས། །དོན་གཅིག་མིང་གི་རྣམ་གྲངས་ཏེ། །དེ་ལས་ལྷག་པའི་ལྟ་བ་མེད། །གང་ཕྱིར་སྣང་སྟོང་རེས་འཇོག་ཏུ། །འཛིན་མེད་མཐའ་བཞིའི་སྤྲོས་པ་དང་། །བྲལ་ཕྱིར་དེ་ལས་གཞན་གྱུར་ན། །སྤྲོས་དང་བཅས་པ་ཉིད་ཕྱིར་རོ། །འོན་ཀྱང་མདོ་ལས་ཟུང་འཇུག་དོན། །དཔྱད་བས་གཏན་ལ་ཕབ་པ་ཉིད། །སྔགས་སུ་རང་གི་རིག་དབྱིངས་སུ། །ཐད་ཀར་མྱོང་བས་གྲུབ་པ་ཡིན། །དེ་ཕྱིར་དབུ་མ་ཞེས་པ་ཡང་། །བདེན་གཉིས་སོ་སོར་དཔྱོད་པ་ཡི། །ཤེས་རབ་ལམ་གྱི་དབུ་མ་དང་། །དེས་དྲངས་བདེན་གཉིས་རོ་གཅིག་པའི། །ཟུང་འཇུག་འབྲས་བུའི་དབུ་མ་གཉིས། །རྒྱུ་འབྲས་མདོ་སྔགས་ལྟ་བ་སྟེ། །སྔ་མ་ཤེས་རབ་ཆ་ཡིན་ལ། །ཕྱི་མ་ཡེ་ཤེས་ཁོ་ན་ཡིན། །དེ་ཕྱིར་ཕྱི་མ་འདི་ལ་ནི། །ཆེན་པོའི་སྒྲ་ཡིས་ཁྱད་དུ་བསྔགས། །གནས་ལུགས་ལ་ཡང་དེ་བཞིན་དུ། །དངོས་པོ་སྟོང་པའི་གནས་ལུགས་དང་། །བདེན་གཉིས་དབྱེར་མེད་གནས་ལུགས་གཉིས། །མིང་གཅིག་ན་ཡང་དོན་ལ་ནི། །ཁྱད་པར་གནམ་ས་བཞིན་དུ་མཆིས། །དེ་བཞིན་ཆོས་ཉིད་ཆོས་དབྱིངས་དང་། །སྟོང་ཉིད་སྤྲོས་བྲལ་འགོག་པའི་མཐའ། །དོན་དམ་ལ་སོགས་སྒྲ་མཚུངས་ཀྱང་། །མཐར་ཐུག་དང་ནི་ཉི་ཚེ་བའི། །ཁྱད་པར་ཆེ་ཕྱིར་སྐབས་སོ་སོར། །ཕྱེ་ནས་མ་ནོར་བཤད་བྱ་སྟེ། །སེནྡྷ་པ་ཡི་སྒྲ་བཞིན་ནོ། །དེ་ལྟར་ཟབ་མོའི་དྲི་བ་བདུན། །ཟབ་རྒྱས་དོན་ཅན་ཚིག་རྣམས་ཀྱིས། །བཀྲོལ་ཚེ་དྲི་བ་པོ་དེ་ཡང་། །གུས་བཅས་ངག་གིས་འདི་སྐད་དུ། །ཀྱེ་མ་ཁྲོན་པའི་ཆུ་ལ་རུས་སྦལ་བཞིན། །གཞན་གཞུང་ཆོས་ཀྱི་རྒྱ་མཚོ་ཆེན་པོའི་འཇིངས། །མ་མཐོང་རང་བཞེད་ཁྲོན་པས་དྲེགས་པའི་རོ། །མྱང་ལྡན་བདག་ཅག་ཁེངས་པ་གཏམ་འདིས་བསྙིལ། །རོང་ཀློང་ཞེས་གྲགས་འཇམ་དཔལ་དགྱེས་པའི་གར། །འཕགས་མཆོག་ཐུགས་ཀྱི་རྒྱ་མཚོ་ཆེན་པོ་ན། །སྣ་ཚོགས་ནོར་བུའི་ཆོས་མཛོད་མང་མངའ་བ། །དེ་སྤངས་གཞན་ལུགས་འཆིང་བུར་རེ་རྣམས་འཁྲུལ། །ཆོས་བཟང་རིག་པས་རྣམ་དཔྱད་བསམ་པ་ཅན། །རྟག་ཏུ་བདུད་ཀྱི་བར་ཆད་བྱེད་པ་མེད། །དེ་ཕྱིར་རིག་ལམ་སེང་གེའི་སྒྲ་བོ་ཆེ། །བསྒྲགས་པས་མཚོ་སྐྱེས་བསྟན་པའི་རང་ལུགས་ཀྱི། །ཁྱད་པར་མཆོག་ལ་ཡིད་ཆེས་རྙེད་གྱུར་ཅིང་། །ཕྱོགས་རེས་དྲེགས་པའི་གཞན་ཕྱོགས་སུན་འབྱིན་པ། །མི་འཕྲོག་ཤེས་རབ་རལ་གྲིའི་ཡུ་བ་ལ། །བརྟེན་པའི་གོ་སྐབས་གཞན་ལ་སྦྱིན་པར་མཛོད། །ཆོས་ཚུལ་ཐོས་པ་བདུད་རྩིའི་མཚོ་འདྲ་ལ། །ཟབ་མོའི་དོན་གང་དེ་ཡི་ནོར་བུ་བཞིན། དེ་དག་གང་ན་གནས་ཀྱང་བླང་བྱ་སྟེ། །ལྟར་སྣང་གང་ཟག་རྗེས་སུ་འབྲང་མི་བྱ། །མང་ཐོས་མང་དུ་སྨྲ་བས་ཀྱང་མིན་ལ། །སྐྱེས་སྦྱང་ཟབ་ཟབ་ལྟར་སྣང་དཔྱད་པས་ཀྱང་། །མི་ཕིགས་ཟབ་དོན་ས་འོག་གཏེར་འདྲ་བ། །གང་གིས་འདི་འཛིན་བློ་ལྡན་ཉིད་དུ་ཤེས། །བློ་གཏེར་འབུམ་ཕྲག་ནོར་བུའི་སྣོད་ཉིད་དུ། །བདག་བློ་ཟབ་ཡངས་རྒྱ་མཚོ་ཆེར་བསྒྲུབས་པའི། །གདམས་པའི་ལེགས་བྱས་སློང་བའི་དུས་རིག་ནས། །ཀླུ་དབང་དཔལ་གྱི་རྒྱ་མཚོར་དགའ་བཞིན་འཐུངས། །གང་ལས་བབས་པའི་ལེགས་བཤད་ཆུ་ཀླུང་གིས། །རྣམ་དཔྱོད་བློ་ཡི་རྒྱ་མཚོ་ཁྱོན་ཡངས་པར། །ངེས་རྟོགས་དེ་ཡི་འབྱུང་གནས་ཀླུ་དབང་ནི། །རིག་འཛིན་བརྒྱུད་པའི་ཞལ་ལུང་ཉིད་དུ་རྟོགས། །མཁའ་མཐའ་ཧུབ་ཀྱིས་འདྲེན་ཅིང་ཟོས་པའི་བཅུད། །སྙིང་ལ་ཀུན་ཕན་བདུད་རྩིའི་དཔྱིད་ཉིད་དུ། །ལེན་པའི་མཐུ་ཆེན་བློ་ལ་ཐོབ་མཛད་པའི། །ངོ་མཚར་ཆོས་ཀྱི་མར་མེ་གསལ་བར་མཛོད། །དེ་སྐད་ཟེར་ཞིང་གུས་བཏུད་ཚེ། །དྲང་སྲོང་དེ་ཡིས་དེ་ལ་ཡང་། །ཟབ་མིན་ཟབ་རྒྱས་སུ་བསྒྲུབས་པ། །གོང་གི་དོན་བསྡུས་འདི་ལྟར་གདམས། །ཆོས་མཆོག་སེང་གེའི་འོ་མ་ནི། །བློ་གྲོས་སྣོད་བཟང་ཁོ་ནས་འཛིན། །གཞན་དུ་འབད་ཀྱང་མི་གནས་ལྟར། །འདི་ཤོངས་སྣོད་ནི་འདི་ཡིན་ནོ། །ཨ་ནི་མ་སྐྱེས་ཆོས་ཀྱི་སྒོ། །ར་ནི་རྡུལ་དང་བྲལ་བའི་སྒོ། །པ་ནི་དོན་དམ་སྣང་བའི་སྒོ། །ཙ་ནི་འཆི་འཕོ་སྐྱེ་བ་མེད། །ན་ནི་མིང་དང་བྲལ་བ་ཉིད། །དྷཱིཿནི་བློ་གྲོས་ཟབ་མོའི་སྒོ། །སྒོ་དྲུག་དེ་དག་རེ་རེ་ཡང་། །བདེན་གཉིས་ཚུལ་གྱིས་དམིགས་ནས་སུ། །སྒྱུ་མའི་ཏིང་འཛིན་བསྒྲུབས་བྱས་ན། །མཐའ་མེད་རྒྱ་མཚོ་ཆེན་པོའི་ཆུ། །ཧུབ་ཀྱིས་ལྟོ་བ་འདྲེན་ནུས་པའི། །སྙིང་གའི་ནོར་བུ་དྲི་མེད་ལ། །གཟུངས་སྤོབས་བློ་ཡི་དཔལ་དུ་འབར། །མཐའ་བཞིའི་སྤྲོས་པ་ཁེགས་པའི་ངེས་ཤེས་ཀྱི། །ལམ་ནས་ཡིན་ལུགས་གཤིས་སུ་སོན་པ་ཡི། །བློ་ལས་འདས་པ་འོད་གསལ་གཉུག་མའི་དབྱིངས། །འཇམ་དཔལ་རྫོགས་པ་ཆེན་པོའི་ངང་དུ་ཞོག །མཐའ་བྲལ་ལྟ་བའི་རྒྱལ་པོ་ཡངས་པའི་ཀློང་། །མཉམ་པར་བཞག་པའི་བདེན་དོན་མཐོང་བ་ལས། །མཐའ་བཞིའི་བློ་ངན་མུན་པའི་སྣང་བ་ཀུན། །ངང་གིས་འགགས་པའི་འོད་གསལ་ཉི་མ་འཆར། །གཟུར་གནས་དཔྱོད་པ་དྲང་སྲོང་སྟེ། །ཐོལ་བྱུང་རྟོག་པ་ལྡོམ་བུ་བ། །དེ་དེས་དྲིས་ལན་ཚུལ་གྱིས་ནི། །དཀའ་གནས་རྒྱལ་སྲིད་གྲངས་ལྡན་བཤད། །བློ་ཆུང་རྟོག་གེ་བདག་འདྲ་ཡིས། །ཤིན་ཏུ་ཟབ་ཅིང་བརླིང་བའི་དོན། །བློ་ཆེན་འཕགས་པའི་ཐུགས་ནས་ཀྱང་། །བླངས་པ་བཞིན་དུ་འདི་ན་བཀོད། །དེ་སྐད་སྨྲས་པའི་ལེགས་བཤད་ཆོས་ཀྱི་ཆར། །རྒྱལ་སྲས་བྱེ་བས་བགྲོད་ཅིང་དགའ་བཞིན་གྱིས། །མཉན་པས་དོན་ཆེན་ཐོབ་པར་སེམས་པ་ཡིས། །དྲིས་ལ་ཡི་རངས་བདུད་རྩིའི་གོ་སྐབས་དབྱེ། །དེ་ཕྱིར་དེ་བས་དེ་ལྟར་ཡང་དང་ཡང་། །ཟབ་རྒྱས་དོན་སེམས་དུ་མའི་དོན་དུ་ཡང་། །ཡིད་ཀྱི་མེ་ལོང་ངོས་ལ་ཇི་ཤར་བཞིན། །རྩེད་འཇོའི་རོལ་པས་དྷཱིཿམིང་ཅན་གྱིས་སྤེལ། །བདེ་གཤེགས་ཆོས་ཚུལ་ཟབ་མོ་ནམ་མཁའི་མཐའ། །རྣམ་པ་ཀུན་ཏུ་བརྗོད་པར་མི་ནུས་ཀྱང་། །ངེས་ཤེས་རིན་པོ་ཆེ་ཡི་སྒྲོན་མེ་འདིར། །བརྟེན་ན་ཐེག་མཆོག་ལམ་བཟང་རྙེད་པར་ནུས། །མངྒལཾ།། །། ངེས་ཤེས་རིན་པོ་ཆེའི་སྒྲོན་མེའི་བསྡུས་དོན་པདྨ་དཀར་པོ།ངེས་ཤེས་རིན་པོ་ཆེའི་སྒྲོན་མེའི་བསྡུས་དོན་པདྨ་དཀར་པོ་བཞུགས། བསམ་གྱིས་མི་ཁྱབ་མཉམ་པ་ཉིད་ཀྱི་སྐུ། །ཡེ་ཤེས་སེམས་དཔའ་འཇམ་པའི་རྡོ་རྗེའི་གར། །འཇམ་དབྱངས་བླ་མའི་ཞབས་པད་ལ་བཏུད་དེ། །ངེས་ཤེས་རིན་ཆེན་སྒྲོན་མའི་བསྡུས་དོན་སྤེལ། །དེ་ལ་འདིར་སྟོང་པ་ཉིད་ལས་བརྩམས་པའི་ཟབ་མོ་ཤིན་ཏུ་རྟོགས་པར་དཀའ་བའི་གནད་ཉིན་མོར་བྱེད་པ་ངེས་ཤེས་རིན་པོ་ཆེའི་སྒྲོན་མེ་འདི་འཆད་པ་ལ་གསུམ། ཐོག་མར་དགེ་བ་ཀླད་དོན། བར་དུ་དགེ་བ་གཞུང་དོན། ཐ་མར་དགེ་བ་མཇུག་དོན་ནོ། །དང་པོ་ལ་གཉིས། མཚན་བསྟན་པ། མཆོད་པར་བརྗོད་པའོ། །དང་པོ། ངེས་ཤེས་རིན་པོ་ཆེའི༴ གཉིས་པ། གང་ཡིད་ཐེ་ཚོམ༴ གཉིས་པ་ལ་བཞི། གླེང་གཞིའི་སྒོ་ནས་མདོར་བསྟན། སོ་སོར་ཕྱེ་སྟེ་རྒྱས་པར་བཤད། ཡི་རངས་ཤིང་བསྡུས་ཏེ་གདམས་པ་ཇི་ལྟར་བསྟན་པའི་དོན་བསྡུ་བའོ། །དང་པོ་ལ་བཞི། ཚད་མ་གཉིས་དང་བྲལ་བའི་སྐྱོན། ལམ་ཡང་དག་དང་དེའི་གཟུགས་བརྙན་གྱི་ཁྱད་པར། ཡང་དག་ལམ་དང་དེར་ཞུགས་ལ་བསྔགས་པ། དྲི་ལན་ཚུལ་གྱིས་བསྟན་ཚུལ་བཤད་པའོ། །དང་པོ། ཀྱེ་མ་ཟབ་མོའི༴ གཉིས་པ། གཞི་ལམ་འབྲས་བུའི༴ གསུམ་པ། རྨད་བྱུང་ཆོས༴ བཞི་པ། དེ་ལྟར་སེམས་པའི༴ གཉིས་པ་སོ་སོར་ཕྱེ་སྟེ་རྒྱས་བཤད་ལ་དྲི་ལན་གྱི་རིམ་པ་ལྟར་བདུན་ལས། དྲི་ལན་དང་པོ་ལྟ་བ་མཐར་ཐུག་མེད་དགག་དང་མ་ཡིན་དགག་གང་ཐད་བསྟན་པ་ལ་གཉིས། གཞན་ལུགས་བརྗོད་ཅིང་རང་ལུགས་བཞག་པ་མདོར་བསྟན་པ་དང་། རྒྱས་པར་བཤད་པའོ། །དང་པོ། དགེ་ལྡན་ལྟ་བ༴ གཉིས་པ་ལ་གཉིས། མི་འཐད་པ་གཞན་ལུགས་དགག །འཐད་ལྡན་རང་ལུགས་བཞག་པའོ། །དང་པོ་ལ་གཉིས། གཞན་གྱི་མེད་དགག་མ་ཡིན་དགག་ཏུ་འགྱུར་ཞིང་ཚིག་དང་དོན་གྱིས་གཞན་སྟོང་ལ་ཟུང་འཇུག་མི་རུང་བར་མདོར་བསྟན་པ་དང་། རྒྱས་པར་བཤད་པའོ། །དང་པོ། ཀ་བ་ཀ་ནས༴ གཉིས་པ་ལ་གཉིས། ལུང་རིགས་ཁས་བླངས་དང་འགལ་བ། ཟུང་འཇུག་མི་རུང་བར་བསྟན་པའོ། །དང་པོ། ཨེ་མ་དེས༴ གཉིས་པ་སྤྱིར་ན་གཞན༴ གཉིས་པ། དེས་ན་རང་གི་ལུགས། དྲི་ལན་གཉིས་པ་ཉན་རང་དགྲ་བཅོམ་པས་ཆོས་ཀྱི་བདག་མེད་རྟོགས་སམ་མ་རྟོགས་གང་འཐད་ལ་གསུམ། གཞན་ལུགས་དགག །རང་ལུགས་བཞག །དེས་ན་བྱམས་ཀླུ་དགོངས་པ་གཅིག་ཏུ་བསྟན་པའོ། །དང་པོ། འགའ་ཞིག་ཉན་རང་༴ གཉིས་པ་ལ་གསུམ། དཔལ་ལྡན་ཟླ་བས་ཇི་ལྟར་བསྟན་ཚུལ། རང་ལུགས་ཀློང་ཆེན་ཞབས་ཀྱིས་དེ་ལྟར་བཞེད་ཚུལ། དེ་ལ་དོགས་པ་གསལ་ཏེ་མཐར་ཐུག་ཆོས་ཀྱི་བདག་མེད་རྟོགས་དགོས་ཚུལ་བསྟན་པའོ། །དང་པོ། དེས་ན་རང་ལུགས་སུ། གཉིས་པ། ཀློང་ཆེན་རབ་འབྱམས༴ གསུམ་པ་ལ་གསུམ། སྤྱིར་བསྟན་པ་དང་། བྱེ་བྲག་ལུགས་དོན་ལེགས་པར་བཀྲལ་ཏེ་འཁྲུལ་བ་བསལ་བ། དེ་ཁོ་ན་ཉིད་མཐོང་བས་ཐེག་གཅིག་འགྲུབ་ཚུལ་གསུངས་པ་གཞན་ལ་མི་འཐད་ཅིང་རང་ལ་འཐད་ཚུལ་བསྟན་པའོ། །དང་པོ། གལ་ཏེ་ཆོས་གཅིག༴ གཉིས་པ། རྟག་བདག་སྤངས་ཀྱང་། གསུམ་པ། མཐར་ནི་ངེས་པར་གསུམ་པ། དེས་ན་ཚུལ་འདི༴ དྲི་ལན་གསུམ་པ་མཉམ་བཞག་འཛིན་སྟངས་ཡོད་མེད་གང་འཐད་ལ་གཉིས་ཀའང་ལེགས་པར་ཕྱེ་སྟེ་བསྟན་པ་ལ་བཞི། ཅིར་ཡང་མི་འཛིན་པ་དང་། བདག་མེད་དུ་འཛིན་པ་དང་། ལོག་རྟོགས་བླུན་སྒོམ་དང་ཡང་དག་པའི་སྒོམ་གྱི་ཁྱད་པར་དང་། བསྒོམ་པའི་སྟོབས་ཀྱིས་འཛིན་སྟངས་ཀུན་གཞིག་དགོས་ཚུལ་ལོ། །དང་པོ་ལ་གཉིས། ལེགས་པར་རྟོགས་པ་དང་ལོག་པར་རྟོག་པ་གཉིས་ཡོད་པ་མདོར་བསྟན་པ་དང་། རྒྱས་པར་བཤད་པའོ། །དང་པོ། ལྟ་བའི་དངོས་གཞི༴ གཉིས་པ། དེ་ལྟར་མཐའ་བཞི༴ གཉིས་པ་ལ་གཉིས། དང་པོའི་ལས་ཅན་རིམ་གྱིས་པའི་བསྒོམ་ཚུལ་སྤྱིར་བསྟན་པ་དང་། ཐོས་བསམ་ལྟ་བའི་ལུགས་ཀྱི་བསྒོམ་ཚུལ་བྱེ་བྲག་ཏུ་བསྟན་པའོ། །དང་པོ་ལ་གསུམ། བདག་མེད་ཡང་དག་པར་ཤེས་པའི་འཛིན་སྟངས་དགོས་ཚུལ། མེད་འཛིན་དེ་ཡང་ཕྱིས་ནམ་སྤངས་དགོས་ཚུལ། དངོས་གཞི་འཛིན་སྟངས་ཀུན་བྲལ་དུ་བསྟན་པའོ། །དང་པོ། བདག་གཞན་དངོས་འཛིན༴ གཉིས་པ་འཛིན་སྟངས་དེས་དྲངས། གསུམ་པ། དངོས་གཞི་སྣང་སྲིད༴ གཉིས་པ། འོན་ཀྱང་མཐའ་བཞིའི༴ གསུམ་པ། དེ་ཕྱིར་འདི་གཉིས༴ བཞི་པ། དཔྱད་པས་ངེས་ཤེས༴ དྲི་ལན་བཞི་པ་དཔྱད་འཇོག་གང་འཐད་ལ་གསུམ། གཞན་ལུགས་བརྗོད་པ་དང་། རང་ལུགས་སོ་སོར་ཕྱེ་སྟེ་བསྟན་པ། དོན་བསྡུ་བའོ། །དང་པོ། ཐེག་མཆོག་ལྟ་བ༴ གཉིས་པ་ལ་གསུམ། སྤྱིར་བསྟན་པ། རིམ་པས་བྱེ་བྲག་ཏུ་བསྟན་པ། དེ་ལ་ལོག་རྟོག་བསལ་ཏེ་ལམ་མཆོག་བསྒྲུབ་པའོ། །དང་པོ། བསྒོམ་པ་དཔྱད་འཇོག །གཉིས་པ། དང་པོ་དཔྱད་པ༴ གསུམ་པ་ལ་ལྔ། ལོག་རྟོག་བསལ་ཏེ་དཔྱོད་ཤེས་ཀྱི་འཛིན་སྟངས་ཀུན་དང་བྲལ་བའི་མཉམ་བཞག་ཡེ་ཤེས་ཉིད་ཐེག་ཆེན་ལམ་གྱི་དངོས་གཞི་ཐེག་པ་དང་། ཆེན་པོའང་ཡིན་པར་བསྟན་པ། ཚུལ་དེས་ཨ་ཏི་ཡོ་ག་རྒྱུད་ཀྱི་མཐར་ཐུག་དང་ཐེག་པའི་རྩེ་མོར་བསྟན་པ་དེ་ཉིད་གང་གིས་གཏན་ལ་འབེབ་བྱེད་གཞན་ལས་མཆོག་ཏུ་བསྟན་པ། མདོ་རྒྱུད་མན་ངག་གི་བསྟན་དོན་མཐར་ཐུག་ཐམས་ཅད་འོད་གསལ་རྫོགས་པ་ཆེན་པོར་དབྱེ་བ་མེད་ཅིང་དེ་ཉིད་ཀུན་གྱི་འབྱུང་གནས་སུ་བསྟན་པ། ཡེ་ཤེས་དེ་ཉིད་སོ་སོ་སྐྱེ་བོས་རྗེས་མཐུན་པ་བསྒོམ་དུ་ཡོད་ཚུལ་བསྟན་པའོ། །དང་པོ། གལ་ཏེ་དཔྱད་པ༴ གཉིས་པ། རྒྱུད་སྡེ་བཞི་ཡི༴ གསུམ་པ། འོན་ཀྱང་ལྟ་བའི༴ བཞི་པ། རྫོགས་ཆེན་སེམས་སྡེའི༴ ལྔ་པ། དེ་ལ་རྫོགས་ཆེན༴ གསུམ་པ། དེ་ཕྱིར་སྐབས་ཤན། དྲི་ལན་ལྔ་པ་བདེན་པ་གཉིས་ལས་གང་གཙོ་ལ་གཉིས། གཞན་ལུགས་དགག །རང་ལུགས་བཞག་པའོ། །དང་པོ། བདེན་པ་གཉིས་ལས༴ གཉིས་པ་ལ་བཞི། བདེན་གཉིས་ཟུང་འཇུག་རྒྱ་ཆད་ཕྱོགས་ལྷུང་དང་བྲལ་བ་མདོ་རྒྱུད་མན་ངག་ཟབ་ལམ་ཀུན་གྱི་དགོངས་པ་འཁྲུལ་མེད་དུ་བསྟན་པ། ཚུལ་དེ་རྟོགས་པའི་གནད་ལས་རྒྱུད་སྡེའི་དབྱེ་བ་བསྟན་པ། དེ་ལ་ལོག་རྟོག་བསལ་བ། དོན་བསྡུ་བའོ། །དང་པོ། དེས་ན་སྔ་འགྱུར༴ གཉིས་པ། གནད་དེ་ཇེ་བས༴ གསུམ་པ་ལ་གསུམ། འཁོར་བའི་རང་བཞིན་མ་དག་པར་འདོད་པའི་ལོག་རྟོག་བསལ་བ། རྒྱུད་སྡེ་ལ་ལྟ་བའི་མཐོ་དམན་མེད་པར་འདོད་པའི་ལོག་རྟོག་བསལ་བ། ལྟ་བའི་དབང་གིས་ཐེག་དགུར་འཇོག་པའི་རྒྱུ་མཚན་བསྟན་པའོ། །དང་པོ། གལ་ཏེ་དེ་ལྟར༴ གཉིས་པ། བྱ་སྤྱོད་རྣལ་འབྱོར༴ གསུམ་པ། ཇི་ལྟ་ཇི་ལྟར༴ བཞི་པ། དེས་ན་ནང་གི༴ དྲི་ལན་དྲུག་པ་སྣང་བ་མི་གཅིག་པར་མཐོང་བའི་ཐུན་མོང་གི་བལྟ་བྱ་གང་འཐད་ལ་གཉིས། གཞན་ལུགས་དགག །རང་རང་ལུགས་བཞག་པའོ། །དང་པོ། ཆུ་གཅིག་འགྲོ་བ༴ གཉིས་ལ་གསུམ། ཐུན་མོང་དུ་སྤྱིར་བསྟན། དག་མཉམ་དབྱེར་མེད་ཆེན་པོར་བྱེ་བྲག་ཏུ་བསྟན་པ། བསམ་གྱིས་མི་ཁྱབ་པའི་སྒོ་ནས་དོན་བསྡུ་བའོ། །དང་པོ་ལ་གཉིས། སྣང་སྟོང་ཟུང་འཇུག་མཉམ་པ་ཉིད་དུ་བསྟན་པ་དང་། དེ་ལ་ཚད་མ་ཚད་མིན་མི་འཐད་པའི་རྩོད་པ་སྤངས་པའོ། །དང་པོ། དེས་ན་རང་གི་ལུགས༴ གཉིས་པ་ལ་གསུམ། རང་ལུགས་ལ་མངོན་རྗེས་ཀྱི་ཚད་མ་གྲུབ་ཅིང་། དོན་མེད་མ་ཡིན་པར་བསྟན་པ། གཞན་ལ་ཚད་མའི་རྣམ་བཞག་མི་འཐད་པར་བསྟན་པ། དེ་ཕྱིར་ཚད་མར་བསྒྲུབ་པའོ། །དང་པོ། འོ་ན་ཚད་མ༴ གཉིས་པ། དེས་ན་ཆུ་གཅིག༴ གསུམ་པ་ལ་གསུམ། གནས་སྐབས་གཉིས་སུ་བཞག་པ། མཐར་ཐུག་གཅིག་ཏུ་བསྒྲུབ་པ། དེ་ཕྱིར་དག་པ་ཆེན་པོ་བསྒྲུབ་པ་ཐུན་མོང་མིན་པའོ། །དང་པོ་ལ་གཉིས། མ་དག་ཚུལ་རོལ་མཐོང་བའི་ཐ་སྙད་ཚད་མ། དག་པའི་གཟིགས་པ་ལ་བརྟེན་པའི་ཐ་སྙད་ཚད་མའོ། །དང་པོ། དེ་ཕྱིར་འཕྲལ་གྱི༴ གཉིས་པ། མཐར་ཐུག་རིགས་པས༴ གཉིས་པ། མཐར་ཐུག་དེ་ཁོ༴ གསུམ་པ། དེ་ཕྱིར་ཚད་མའི༴ གཉིས་པ། དག་མཉམ་དབྱེར་མེད་ཆེན་པོར་བྱེ་བྲག་ཏུ་བསྟན་པ་ལ་གསུམ། ཐུན་མོང་གི་བལྟ་བྱ་སྣང་སྟོང་རེ་རེར་མི་རུང་བར་བསྟན་པ། ཟུང་འཇུག་དག་མཉམ་བདེན་པ་དབྱེར་མེད་དུ་བསྟན་པ། དག་མཉམ་ཆེན་པོར་གྲུབ་པའི་ཚུལ་དང་ངེས་པའི་ཡོན་ཏན་ནོ། །དང་པོ། དེ་ལ་ཐུན་མོང་༴ གཉིས་པ་ལ་གསུམ། གཞི་གནས་ཚུལ་སྣང་སྟོང་ཟུང་འཇུག་རྒྱ་ཆད་ཕྱོགས་ལྷུང་དང་བྲལ་བ་མཐར་ཐུག་པ་གནས་སྣང་རྣམ་ཀུན་མཐུན་པའི་དག་མཉམ་བདེན་པ་དབྱེར་མེད་དུ་བསྟན་པ། ལམ་སྣང་ཚུལ་དག་དང་མ་དག་པར་གནས་སྣང་མི་མཐུན་པར་སྣ་ཚོགས་སུ་སྣང་ཚུལ། དེ་ལྟར་མ་རྟོགས་པ་དང་རྟོགས་པའི་སྐྱོན་ཡོན་འབྲས་བུ་བསྟན་པའོ། །དང་པོ་ལ་གསུམ། དོན་དམ་དུ་མཉམ་པ་ཆེན་པོར་བསྟན་པ་དང་། ཀུན་རྫོབ་ཏུ་དག་པ་ཆེན་པོར་བསྒྲུབ་པ། མཐར་ཐུག་དབྱིངས་ཡེ་བདེན་པ་དབྱེར་མེད་ཟུང་འཇུག་ཏུ་བསྟན་པའོ། །དང་པོ། དེས་ན་སྣང་སྟོང་༴ གཉིས་པ། ཚུལ་དེ་གོམས་པའི༴ གསུམ་པ། དེ་ལ་མཐར་ཐུག༴ གཉིས་པ། དེ་ལས་གཞན་དུ། གསུམ་པ། དེ་ལྟར་སྣང་ཚུལ༴ གསུམ་པ། དག་མཉམ་ཆེན་པོར་གྲུབ་པའི་ཚུལ་དང་ངེས་པའི་ཡོན་ཏན་ནི། དག་མཉམ་ཆེན་པོར༴ གསུམ་པ་བསམ་གྱིས་མི་ཁྱབ་པར་བསྟན་ཅིང་དོན་བསྡུ་བ་ནི། དེ་ཕྱིར་རང་སྣང་༴ དྲི་ལན་བདུན་པ་སྤྲོས་བྲལ་དབུ་མ་ཆེན་པོ་ལ་ཁས་ལེན་ཡོད་མེད་གང་འཐད་ལ་བཞི། ཁས་ལེན་མེད་པའི་ལུང་དགག་པ། ཁས་ལེན་ཡོད་མེད་སོ་སོར་ཕྱེ་བའི་ཀློང་ཆེན་ཞབས་ཀྱི་བཞེད་པ་དགོད་པ། དེར་བརྟེན་ཁས་ལེན་ཡོད་པའི་ཕྱོགས་ཆེས་ཆེར་བསྒྲུབ་པའི་གཞན་ལུགས་དགག་པ། ཀློང་ཆེན་ཞབས་ཀྱི་རྗེས་སུ་འབྲང་སྟེ་རང་ལུགས་རྒྱས་པར་བསྟན་པའོ། །དང་པོ། སྤྲོས་བྲལ་དབུ་མ༴ གཉིས་པ། ཀློང་ཆེན་རབ་འབྱམས་གསུམ་པ། དེར་བརྟེན་གངས་ཅན༴ བཞི་པ་ལ་གསུམ། རང་ལུགས་ལ་སོ་སོར་ཕྱེ་སྟེ་བཞག་པ། དེ་ལ་རྩོད་པ་སྤང་བ། ཚུལ་དེས་མདོ་སྔགས་ཀྱི་ལམ་གནད་བསྟན་པའོ། །དང་པོ་ལ་གསུམ། མཉམ་རྗེས་སམ་རྒྱུ་འབྲས་ཀྱི་དབུ་མ་གཉིས་སུ་བསྟན་པ། དེས་ན་གནས་ལུགས་དབུ་མ་ཆེན་པོའི་ངོར་ཁས་ལེན་མེད་པར་བསྟན་པ། སྣང་ཚུལ་ལ་ཐ་སྙད་བདེན་གཉིས་སོ་སོར་ཁས་ལེན་ཡོད་པར་བསྟན་པའོ། །དང་པོ། དེས་ན་ཀུན་མཁྱེན༴ གཉིས་པ། དེས་ན་དབུ་མ༴ གསུམ་པ། དེ་ལྟར་གནས་ལུགས༴ གཉིས་པ་ལ་བཞི། རང་ལ་མཚུངས་པའི་རྩོད་སྤང་། གཉིས་ཀ་སྟོབས་མཚུངས་བདེན་པའི་རྩོད་སྤང་། བདེན་པ་གཉིས་སུ་ཕྱེ་སྟེ་ཁས་ལེན་དང་བཅས་པ་བསྟན་པའི་དགོས་འབྲས་བསྟན་པ། རྒྱུའམ་ལམ་གྱི་དབུ་མའི་ཁས་ལེན་དེ་ཡང་དོན་དམ་རང་ལུགས་སུ་བྱས་ནས་ཀུན་རྫོབ་གཞན་ངོར་སྐྱེལ་ནས་ལུང་རིགས་ཀྱིས་གནོད་ཚུལ་བསྟན་པའོ། །དང་པོ་ལ་གསུམ། རྩོད་པ་དགོད་པ། དེ་སྤངས་པ། ལུང་ལས་དགག་སྒྲུབ་ཇི་སྙེད་པས་བསྟན་ཚུལ་གྱི་སྒོ་ནས་མི་འགལ་བར་དོན་བསྡུ་བའོ། །དང་པོ། འོ་ན་ཁས་ལེན༴ གཉིས་པ་ལ་གསུམ། རྣམ་ཤེས་དང་ཡེ་ཤེས་སམ་མཉམ་རྗེས་སམ་གནས་སྣང་གི་གནས་སྐབས་ཀྱི་ཁྱད་པར་ཕྱེས་ཏེ་བསྟན་པས་གཤིས་ལ་ཁས་ལེན་མེད་པའི་ཕྱིར་ན་སྣང་ཚུལ་ལ་ཡོད་མེད་ཀྱི་ཁས་ལེན་གཉིས་ཡོད་ཀྱང་དཔྱད་གཟོད་ལ་སོགས་པའི་སྐྱོན་རང་ལ་མེད་པར་བསྟན་པ། ཚུལ་དེས་ལོག་རྟོག་གཞན་ཁེགས་པར་བསྟན་པ། རང་ལ་བདེན་གཉིས་ཁས་ལེན་ནང་འགལ་གྱི་སྐྱོན་མེད་པར་བསྟན་པའོ། །དང་པོ། ངེད་ཀྱི་ཁྱད་པར༴ གཉིས་པ། ཚུལ་དེས་སངས་རྒྱས༴ གསུམ་པ། བདེན་གཉིས་འགལ་བ། གསུམ་པ་ལུང་ལས་དགག་སྒྲུབ་ཇི་སྙེད་བསྟན་ཚུལ་གྱི་སྒོ་ནས་མི་འགལ་བར་དོན་བསྡུ་བ་ནི། མདོ་དང་བསྟན་བཅོས༴ གཉིས་པ་གཉིས་ཀ་སྟོབས་མཚུངས་བདེན་པའི་རྩོད་སྤང་ནི། གཉིས་ཀ་སྟོབས༴ གསུམ་པ་བདེན་པ་གཉིས་སུ་ཕྱེ་སྟེ་ཁས་ལེན་དང་བཅས་པ་བསྟན་པའི་དགོས་འབྲས་བསྟན་པ་ནི། རྒྱུ་གཉིས་འདི་སྤང་༴ བཞི་པ་རྒྱུའམ་ལམ་གྱི་དབུ་མའི་ཁས་ལེན་དེ་ཡང་དོན་དམ་རང་ལུགས་སུ་བྱས་ནས་ཀུན་རྫོབ་གཞན་ངོར་སྐྱེལ་ན་ལུང་རིགས་ཀྱིས་གནོད་ཚུལ་བསྟན་པ་ནི། རྒྱུའམ་ལམ་གྱི༴ གསུམ་པ་ཚུལ་དེས་མདོ་སྔགས་ཀྱི་ལམ་གནད་བསྟན་པ་ལ་གསུམ། མདོ་སྔགས་ཀྱི་ལམ་གནད་ཐུན་མོང་དུ་སྤྱིར་བསྟན་པ། མདོ་སྔགས་ཀྱི་ལམ་གནད་དང་ལྟ་བའི་ཁྱད་པར་བྱེ་བྲག་ཏུ་བསྟན་པ། ཚུལ་དེས་གཞན་ཡང་མཚོན་ཚུལ་བསྟན་པའོ། །དང་པོ་ལ་གསུམ། མདོར་བསྟན། རྒྱས་བཤད། དོན་བསྡུ་བའོ། །དང་པོ། དེས་ན་དབུ་མའི༴ གཉིས་པ། གཙུབ་ཤིང་གཙུབ་པའི། གསུམ་པ། མདོ་ལས་ཐབས་དང་། གཉིས་པ། འོན་ཀྱང་མདོ་ལས། གསུམ་པ། གནས་ལུགས་ལ་ཡང་༴ གསུམ་པ་ཡི་རངས་ཤིང་བསྡུས་ཏེ་གདམས་པ་ལ་གསུམ། ཡི་རངས་ཤིང་གུས་པས་བསྟོད་ཅིང་ངོ་མཚར་ཆོས་ཀྱི་སྒྲོན་མེ་གཞན་ལ་གསལ་བར་མཛད་པར་བསྐུལ་ཞིང་གསོལ་བ་གདབ་པ། ཆོས་མཆོག་འཛིན་ཅིང་ཤོང་བའི་སྣོད་བསྟན་པ། བསྡུས་ཏེ་སྙིང་པོའི་གདམས་དངོས་སོ། །དང་པོ། དེ་ལྟར་ཟབ་མོའི༴ གཉིས་པ། དེ་སྐད་ཟེར་ཞིང་༴ གསུམ་པ། ཨ་ནི་མ་སྐྱེས༴ བཞི་པ་ཇི་ལྟར་བསྟན་པའི་དོན་བསྡུ་བ་ནི། གཟུང་གནས་དཔྱོད་པ། གསུམ་པ་ཐ་མར་དགེ་བ་འཇུག་དོན་ལ་གསུམ། ལྷག་བསམ་ཤེས་རབ་ཀྱིས་གོ་ཕྱེས། གཞན་ཕན་སྙིང་རྗེས་ཇི་ལྟར་བརྩམས་པའི་མཛད་བྱང་། ཚུལ་འདིར་བརྟེན་ན་ཐེག་མཆོག་ལམ་བཟང་རྙེད་པར་བསྟན་པས་བརྟེན་པར་གདམས་པའོ། །དང་པོ། དེ་སྐད་སྨྲས༴ གཉིས་པ། དེ་ཕྱིར་དེ་བས༴ གསུམ་པ། བདེ་གཤེགས་ཆོས་ཚུལ༴ སྨྲས་པ། དེ་ལྟར་ཤིན་ཏུ་ཟབ་ཅིང་རྟོག་དཀའི་གནས། །སྐྱེས་སྦྱངས་བློ་དམན་བདག་འདྲའི་ཡུལ་མིན་ཀྱང་། །བདག་ཡིད་གཞུང་འདིར་འདྲིས་ཤིང་གོམས་ཕྱིར་དང་། །གཞན་གྱིས་བསྐུར་ཕྱིར་ཕན་པའི་སེམས་ཀྱིས་བྲིས། །དེ་ལྟ་ན་ཡང་དངོས་བསྟན་ཚིག་གི་དོན། །ཇི་བཞིན་རྟོགས་པའི་བློ་ནུས་ཡོད་མིན་ན། །ཚིག་ནུས་དང་ནི་ཤུགས་བསྟན་ལྟ་ཡང་ཅི། །རང་མཐོང་བྱིས་པའི་ཐལ་རྩེད་ཁོ་ནར་ཟད། །དེ་ཕྱིར་ཟབ་དོན་གནས་འདི་དོན་གཉེར་འགའ། །སྲིད་འདིར་མཆིས་གང་འཇམ་དབྱངས་བླ་མ་ཉིད། །བརྟེན་ཏེ་བསྡུས་དོན་ལ་སོགས་ཟབ་རྒྱས་ཀྱི། །བདུད་རྩིའི་སྒོ་དབྱེ་འགྲོ་འདིར་སྣང་བར་མཛོད། །ཉེས་པ་གང་མཆིས་ལྷ་དང་བླ་མར་བཤགས། །ལེགས་པ་གང་མཆིས་བསྟན་འགྲོར་སྨན་གྱུར་ཅིག །དེ་སྐད་ཀུ་སུ་ལུ་པ་ས་མནྟ། །དྷརྨ་ཀིརྟིའི་སྨོན་པ་ཛ་ཡན་ཏུ། །མངྒ་ལམ།། །། ངེས་ཤེས་རིན་པོ་ཆེའི་སྒྲོན་མེའི་ཚིག་གི་དོན་གསལ་བའི་འགྲེལ་ཆུང་བློ་གྲོས་སྣང་བའི་སྒོ་འབྱེད།ངེས་ཤེས་རིན་པོ་ཆེའི་སྒྲོན་མེའི་ཚིག་གི་དོན་གསལ་བའི་འགྲེལ་ཆུང་བློ་གྲོས་སྣང་བའི་སྒོ་འབྱེད་ཅེས་བྱ་བ་བཞུགས་སོ། །ན་མོ་གུ་རུ་མཉྫུ་ཤྲཱི་ཡེ། སྐལ་བཟང་རྣམ་འདྲེན་བཞི་པ་ཤཱཀྱའི་ཏོག །རྒྱལ་སྲས་བརྒྱད་དང་རྒྱན་དྲུག་མཆོག་གཉིས་དང་། །མཁན་སློབ་ཆོས་རྒྱལ་སྤྲུལ་པའི་ལོ་པཎ་སོགས། །འཕགས་བོད་དམ་པའི་ཚོགས་རྣམས་དད་བརྒྱས་བསྙེན། །སྡེ་གསུམ་ཀློང་དགུའི་ཤིང་རྟ་ཀློང་ཆེན་པ། །སྔ་འགྱུར་བསྟན་པའི་རྒྱལ་མཚན་འཇིགས་མེད་གླིང་། །ཡོངས་རྫོགས་བསྟན་པའི་མངའ་བདག་ཆོས་ཀྱི་དབང་། །ཡབ་སྲས་བརྒྱུད་པར་བཅས་པ་རྒྱལ་གྱུར་ཅིག །རྒྱལ་བའི་ཡེ་ཤེས་མཚན་དཔེར་ཤར་བའི་ལྷ། །འཇམ་པའི་རྡོ་རྗེ་ངུར་སྨྲིག་གར་གྱི་རོལ། །ཆོས་ཀྱི་རྒྱལ་པོ་ཀུན་མཁྱེན་མི་ཕམ་པ། །སྨྲ་བའི་ཉི་མ་སྙིང་གི་པདྨོར་རོལ། །ཡུན་རིང་སྦྱང་བའི་དཀའ་བ་ཁུར་བཟོད་པའི། །ལྔ་རིགས་སྨྲ་བའི་མཁས་པར་ཆེར་གྲགས་ཀྱང་། །ཟབ་མོའི་གནས་འདིར་རྟོག་དཀའ་རབ་གཟིགས་ནས། །ཇི་བཞིན་སྨྲ་བའི་སྤོབས་པ་བསྐྱུངས་གྲགས་ན། །སྒྲ་ཚད་སྙན་ངག་སྡེབས་སྦྱོར་མ་བྱང་ཞིང་། །སྐྱེས་སྦྱངས་བློ་གྲོས་དམན་པ་བདག་འདྲ་ཡིས། །ཟབ་དོན་སྨྲ་བའི་སྤོབས་པ་མ་མཆིས་ཀྱང་། །དེ་ལྟ་ན་ཡང་རྔ་དང་དབྱུག་གུ་བཞིན། །བློ་གྲོས་དམན་པར་གྱུར་ཀྱང་རྟོགས་དཀའི་གནས། །གཞུང་འདིར་བསྟན་ན་ཡང་དག་མཐོང་བའི་མིག །དྲི་མེད་བདེ་བླག་ཉིད་དུ་འབྱེད་པའི་ཕྱིར། །ཕན་པའི་སེམས་ཀྱིས་ཚིག་དོན་གསལ་བར་བྱ། །རྒྱལ་བ་མཆོག་དང་རྒྱལ་སྲས་མཆོག་རྣམས་ཀྱང་། །མ་ཧཱ་གུ་རུ་བློ་ལྡན་མཆོག་སྲེད་རྩལ། །རྩ་གསུམ་དམ་ཅན་རྒྱལ་མཚོའི་བདེན་མཐུ་ཡིས། །འདི་ཡིས་བསྟན་འགྲོར་སྨན་པར་བྱིན་གྱིས་རློབས། དེ་ལ་འདིར་དེ་བཞིན་གཤེགས་པ་ཐམས་ཅད་ཀྱི་དབྱིངས་དང་ཡེ་ཤེས་གཉིས་སུ་མེད་པའི་ཆོས་ཀྱི་སྐུ་ཉིད་མཚན་དཔེའི་གཟུགས་སྐུར་ཤར་བ་འཇམ་པའི་རྡོ་རྗེ་རྗེ་བཙུན་མ་ཧཱ་གུ་རུ་བློ་ལྡན་མཆོག་སྲེད་རྩལ་དང་རྣམ་དབྱེར་མ་མཆིས་པའི་ཁྱབ་བདག་རྒྱལ་བ་གཉིས་པ་ཀུན་མཁྱེན་འཇམ་དབྱངས་བླ་མ་ཉིད་སྐུ་ན་ཤིན་ཏུ་གཞོན་པའི་དུས་སུ་ཟབ་པ་དང་རྒྱ་ཆེ་བའི་དོན་ཟབ་ཅིང་ཤིན་ཏུ་རྟོགས་པར་དཀའ་བའི་གནས་རབ་ཏུ་གསལ་བར་བྱེད་པའི་གཞུང་བཟང་སྡེབས་སྦྱོར་གྱིས་སྤྲོས་པ་སྤང་བ་གང་ཤར་ལྷུག་པར་སྟན་གཅིག་ཏུ་བརྩམ་པར་མཛད་པའི་ལེགས་བཤད་འདི་བཤད་པ་ལ་གསུམ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐར་མར་དགེ་བ་མཇུག་གི་དོན་ནོ། །དང་པོ་ལ་གཉིས། མཚན་བསྟན་པ་དང་། མཆོད་པར་བརྗོད་པའོ། །དང་པོ། ངེས་ཤེས་རིན་པོ་ཆེའི་སྒྲོན་མེ་བཞུགས་སོ་ཞེས་པས་བསྟན་ཏེ། གཞུང་བཟང་འདི་ལ་ལེགས་པར་བརྟེན་ན་ཟབ་པ་དང་རྒྱ་ཆེ་བའི་དོན་ཤིན་ཏུ་རྟོགས་པར་དཀའ་བའི་གནས་ཟབ་མོའི་དེ་ཁོ་ན་ཉིད་ལ་སྒྲོ་བསྐུར་ཀུན་དང་བྲལ་བའི་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བའི་ཡིད་ཆེས་ཕྱིར་མི་ལྡོག་པ འི་བློ་མིག་ཡང་དག་པ་རང་རྒྱུད་ལ་བདེ་བླག་ཏུ་བསྐྱེད་པའི་ཕྱིར་དཔེར་ན་མུན་པ་སེལ་ཞིང་མཐོང་བའི་སྣང་བ་སྦྱིན་པའི། རིན་པོ་ཆེའི་སྒྲོན་མེ་རིན་ཐང་དང་བྲལ་བ་ལྟ་བུ་འདི་ན་བཞུགས་སོ་ཞེས་དཔེ་དོན་ཟུང་དུ་འབྲེལ་བའི་སྒོ་ནས་མཚན་དུ་བཏགས་པའོ། །གཉིས་པ། གང་ཡིད་ཐེ་ཚོམ་སོགས་ཤྭ་ལོ་ཀ་གཅིག་གིས་བསྟན་ཏེ། ལུང་རིགས་ཟབ་མོའི་དེ་ཉིད་དོན་དུ་གཉེར་བའི་གང་ཟག་གང་གི་ཡིད་ཟབ་པ་དང་རྒྱ་ཆེ་བའི་དོན་ཟབ་མོ་རྟོགས་པར་དཀའ་བའི་གནས་ལ་ཡིད་ནམ་མ་ཡིན་སྙམ་པའི་ཐེ་ཚོམ་གྱི་ན་བའི་སྦུབས་སུ་འཐུམས་ནས་ལུང་རིགས་དང་མི་འགལ་བའི་དོན་འདི་ཡོན་ནོ་ཞེས་གཅིག་ཏུ་ཐག་ཆོད་མེད་པར་ཁས་ལེན་ཅི་བྱ་གཏོལ་མེད་དུ་འཕྱན་པ་ལས་ཟབ་རྒྱས་ཀྱི་དེ་ཉིད་སོ་སོར་འགྱེད་ཅིང་རྟོགས་པར་བྱེད་པའི་བདེན་གཉིས་དཔྱོད་པའི་ཚད་མ་དྲི་མ་མེད་པའི་མཁྱེན་རབ་འཇམ་དཔལ་རྡོ་རྗེའི་མར་མེ་མཆོག་ཏུ་འབར་བ་གྱུར་པ་འདི་ནི་ཟབ་རྒྱས་ཀྱི་དེ་ཉིད་ཟབ་མོ་གསལ་བར་བྱེད་པ་དབང་རྣོན་ཆོས་ཀྱི་རྗེས་སུ་འབྲང་བ་རྣམས་ཀྱི་སྙིང་ལ་ཟབ་རྒྱས་ཀྱི་དོན་ལ་སྒྲོ་བསྐུར་དང་ཡིད་གཉིས་ཀུན་དང་བྲལ་བའི་ངེས་པའི་ཤེས་པ་ཟབ་མོའི་ཚུལ་སུས་ཀྱང་མི་འཕྲོག་པ་རྣམ་པར་དག་པ་བདེ་བླག་ཏུ་འདྲེན་ཅིང་འཇུག་པར་བྱེད་པ་ཡང་དག་པའི་ཚད་མ་གཉིས་ལམ་བཟང་པོ་བདེན་པ་གཉིས་ཀྱི་གནས་ལུགས་ཡང་དག་པར་མཐོང་བའི་མིག་ཏུ་གྱུར་པ་དེར་བསྟན་བཅོས་རྩོམ་པའི་བདག་ཉིད་ཀྱང་རབ་ཏུ་དད་དོ་ཞེས་མཆོད་པར་བརྗོད་པའོ། །ཀྱང་སྒྲས་ཟབ་རྒྱས་ཀྱི་དེ་ཉིད་ཟབ་མོ་མཐོང་བར་འདོད་པས་ཚད་མའི་མིག་བཟང་དད་པས་བསྐྱེད་དགོས་པར་བསྟན་ཏོ། །གཉིས་པ་བར་དུ་དགེ་བ་གཞུང་དོན་ལ་བཞི། གླིང་གཞིའི་སྒོ་ནས་མདོར་བསྟན་པ། སོ་སོར་ཕྱེ་སྟེ་རྒྱས་པར་བཤད་པ། ཡི་རངས་ཀྱིས་བསྔགས་པ་བརྗོད་ཅིང་དོན་བསྡུས་ཏེ་གདམས་པ་ཇི་ལྟར་བསྟན་པའི་དོན་བསྡུ་བའོ། །དང་པོ་ལ་བཞི། ཚད་མ་གཉིས་དང་བྲལ་བའི་སྐྱོན། ལམ་ཡང་དག་དང་དེའི་གཟུགས་བརྙན་གྱི་ཁྱད་པར། ལམ་ཡང་དག་དང་དེར་ཞུགས་པ་ལ་བསྔགས་པ། དྲི་ལེན་ཚུལ་གྱིས་ཇི་ལྟར་བསྟན་ཚུལ་བཤད་པའོ། །དང་པོ། ཀྱེ་མ་ཟབ་མོའི་སོགས་ཤྭ་ལོ་ཀ་གཅིག་གིས་བསྟན་ཏེ། ཀྱེ་མའོ་ཐ་སྙད་དང་དོན་དམ་པའི་ཟབ་མོའི་གནས་ལུགས་མ་ནོར་བར་རྟོགས་པ་ལ་ཡང་དག་པར་སྦྱོར་བར་བྱེད་པའི་བདེན་གཉིས་དཔྱོད་པའི་ཚད་མ་གཉིས་ཀྱིས་དྲངས་པའི་ངེས་ཤེས་རིན་པོ་ཆེའི་སྒྲོན་མེ་ལྟ་བུར་གྱུར་པ་ཁྱོད་ཉིད་རང་རྒྱུད་ལ་མ་བསྐྱེད་ཅིང་མེད་པས་ན་སྲིད་པ་འདི་ན་ཐོས་བསམ་བསྒོམ་པ་ཕལ་ཆེར་གནས་ལུགས་ཟབ་མོའི་དོན་ལ་ཐེ་ཚོམ་གྱི་སྒྱུ་མའི་རྒྱར་ནི་འཐུམས་ཤིང་བླང་དོར་ཁས་ལེན་ལ་རྨོངས་པར་གྱུར་པའི་སྐྱོན་འདི་བྱུང་བའོ། །གཉིས་པ། གཞི་ལམ་འབྲས་བུའི་སོགས་ཚིག་བཅད་གཅིག་གིས་བསྟན་ཏེ། རྒྱུ་འབྲས་སམ་མདོ་སྔགས་ཀྱི་ཐེག་པ་གང་ལ་ཞུགས་ཀྱང་། གཞི་སྣང་སྟོང་ངམ་སྟོང་དང་རྟེན་འབྱུང་། ལམ་ཐབས་ཤེས་སམ་ཚོགས་གཉིས། འབྲས་བུའི་ཆོས་ནི་སྐུ་གཉིས་ལ་སོགས་པ་ཡི་བསྡུས་པའི་ཆོས་རྣམས་ལ་རང་གིས་ལུང་རིགས་ཚད་མའི་ལམ་ནས་དྲངས་བའི་ངེས་པས་ཡིད་ཆེས་སུ་ཀྱང་མི་འཕྲོག་པ་རང་རྒྱུད་ལ་འདྲོང་བ་དང་གཞན་ལས་ཐོས་པས་དད་པར་བྱེད་པ་ཙམ་ལས་ངེས་པས་ཡིད་ཆེས་རང་རྒྱུད་ལམ་འདྲོང་བ་གཉིས་ནི་ལམ་དངོས་དང་དེ་ཡི་གཟུགས་བརྙན་བཞིན་ཏེ་ལམ་ཡང་དག་དང་ལྟར་སྣང་བའོ། །གསུམ་པ། རྨད་བྱུང་ཆོས་ཀྱི་སོགས་ཚིགས་བཅད་བཞིས་བསྟན་ཏེ། རྒྱན་འགྲེལ་དུ། དོན་དམ་མཁའ་ལྟར་ཞི་བའི་ཐུགས་བརྙེས་པས། །དཔལ་ལྡན་ཟླ་བ་འཇིག་རྟེན་གསུམ་ན་མཛེས། །ཐ་སྙད་འཇའ་ལྟར་མ་འདྲེས་གསལ་གཟིགས་པས། །ཆོས་ཀྱི་གྲགས་པས་ས་ཆེན་འདིར་ཁྱབ་ཀྱང་། །ཞེས་གསུངས་པའི་དོན་བཞིན། ཡོན་ཏན་རྨད་དུ་བྱུང་བའི་སློབ་དཔོན་དཔལ་ཆོས་ཀྱི་གྲགས་པ་དང་དེ་ཁོ་ན་ཉིད་གསལ་བར་མཛད་པ་དཔལ་ལྡན་ཟླ་བའི་གྲགས་པ་ནི་ཚད་མ་དང་དབུ་མའི་ལེགས་པར་བཤད་པའི་གསུང་གི་འོད་ཟེར་དང་ཆབ་གཅིག་པར་སྟོན་མཆོག་ཐུབ་པའི་དབང་པོའི་བསྟན་པའི་ལྷ་ལམ་སྟེ་ནམ་མཁའ་ཡངས་པོར་ཤར་བ་སྟེ་བྱོན་པ་ཡིས་ཚད་མ་གཉིས་ཀྱིས་ཟབ་རྒྱས་ཀྱི་དོན་ལ་ཐེ་ཚོམ་གྱི་མུན་པ་ཐིབས་ཕོ་མ་ལུས་པ་རྣམ་པར་འཇོམས་པར་མཛད་དེ་དེ་ཡང་རྒྱ་ཆེ་བ་ཐ་སྙད་ཀྱི་དེ་ཁོ་ན་ཉིད་དཔྱོད་པའི་ཚད་མ་ཡང་དག་པ་ཡིས་ཐ་སྙད་ཀྱི་ཚུལ་ཡང་དག་པར་གསལ་བར་བྱས་པས་ཐ་སྙད་ཀྱི་བླང་དོར་འཇུག་ལྡོག་མི་ནོར་ཞིང་མི་འཁྲུལ་བ་དང་། ཁྱད་པར་དུ་བསྟན་པ་ཡང་དག་པའི་འཇུག་ངོག་ཚད་མ་དང་སྟོན་པ་ཐམས་ཅད་མཁྱེན་པ་ཡང་དག་པའི་སྐྱེས་བུ་ཚད་མ་ཡིན་པ་ལ་འགྲོ་བ་ལྷ་དང་བཅས་པ་སུས་ཀྱང་མི་འཕྲོག་པའི་ཡིད་ཆེས་མཆོག་ཏུ་གྱུར་པ་རྙེད་པའི་སྒོ་གཅིག་པུ་པར་གྱུར་པ་ཚད་མའི་གཞུང་དང་གནས་ལུགས་ཟབ་མོ་སྤྲོས་བྲལ་སྟོང་པ་ཉིད་ཀྱི་དོན་གཏན་ལ་འབེབས་བྱེད་དོན་དམ་དཔྱོད་པའི་རིག་ཤེས་ཀྱི་ཚད་མ་དྲི་མ་མེད་པ་གང་གི་གནས་ལུགས་ཟབ་མོའི་ཡིན་ལུགས་ཇི་བཞིན་གསལ་བ་བྱེད་པ་ཐེག་མཆོག་དབུ་མ་ཆེན་པོའི་གཞུང་དང་རྣམ་པ་གཉིས་པོ་འདི་ཁོ་ན་ལམ་གྱི་སྙིང་པོ་ཡང་དག་པ་མཐོང་བའི་མིག་མཆོག་ཏུ་གྱུར་པ་ཡིན་ལ། དེའི་ཕྱིར་བདེན་གཉིས་དཔྱོད་པའི་ཚད་མ་གཉིས་ཀྱིས་ལེགས་པར་སྦྱང་བའི་བློ་གྲོས་ཀྱི་མིག་མཆོག་དང་ཕུལ་དུ་གྱུར་པ་བཟུང་སྟེ་གཉིས་ཟུམ་པ་མེད་པར་བགྲད་དེ་སྟོན་པ་ཐམས་ཅད་མཁྱེན་པས་ལེགས་པར་བསྟན་པའི་ལམ་ཟབ་པ་དང་རྒྱ་ཆེ་བའི་ལམ་ཡང་དག་དང་ལམ་དེར་ནི་གཞན་དྲིང་མི་འཇོག་པར་ཏེ་སུས་ཀྱང་གཞན་དུ་དྲང་མི་ཐུབ་པས་ཡང་དག་པར་ཚུལ་བཞིན་ཞུགས་པའི་གང་ཟག་དམ་པ་དེ་ལ་མཆོག་ཏུ་མོས་ཤིང་བསྔགས་པས་བསྟོད་དོ། །བཞི་པ། དེ་ལྟར་སེམས་པའི་སོགས་ཚིགས་བཅད་བཅུ་དང་རྐང་པ་གསུམ་གྱིས་བསྟན་ཏེ། གོང་དུ་བཤད་པ་དེ་ལྟར་སེམས་པའི་རྣམ་པར་དཔྱོད་པའི་བློ་གྲོས་གཟུ་བོར་གནས་པའི་དྲང་སྲོང་ཆེན་པོ་ལ། རང་གར་ཐོལ་གྱིས་བྱུང་བའི་རྣམ་དཔྱོད་ཀྱི་རྟོག་པ་ལྡོམ་བུ་པ་ཞིག་གིས་ཤིན་ཏུ་རྟོགས་པར་དཀའ་བ་ཟབ་མོའི་གནས་ལ་རྟོག་གེའི་བརྒལ་ཞིང་བརྟག་པར་བྱ་བའི་ཕྱིར་ཟབ་པའི་དྲི་བ་འོག་ནས་འབྱུང་བ་བདུན་པོ་འདི་ལྟར་དྲིས་ཏེ་འདི་དང་འདི་ཡི་ལན་རྣམས་ནི་མཁས་པ་གཞན་གྱི་སྔར་ཡང་དང་ཡང་དུ་བསྟན་པའི་རྗེས་སུ། སླར་དེ་ཁོ་ན་བསྐྱར་ཟློས་སམ་རྗེས་བརྗོད་ཙམ་ཤེས་པ་ལ་འདི་ནི་མཁས་པའོ་ཞེས་བསྟོད་བསྔགས་ཅི་ཞིག་བགྱི་སྟེ་དགོས་འབྲས་མེད་ལ། དེ་ལྟར་མ་ཡིན་པར་རྟོགས་དཀའ་ཟབ་མོའི་གནས་ལ་རང་གི་རྣམ་པར་དཔྱོད་པ་ཡང་དག་པར་གཟུ་བོར་གནས་ཤིང་བག་ཕོབ་སྟེ་ཞིབ་མའི་བློ་གྲོས་ཀྱིས་ཚུལ་བཞིན་དཔྱོད་ལ་གང་དྲིས་པའི་ལན་འདི་རྣམས་ལུང་རིགས་ཚད་མས་གྲུབ་པ་དེ་དང་དེ་ཉེ་བར་ལྡོན་པར་མཛོད་ཅིག་དང་། ད་བཟོད་ངག་གི་འབྲས་རྟགས་དེ་དང་དེས་ནང་གི་རྣམ་པར་དཔྱོད་པའི་བློ་གྲོས་མཁས་བླུན་ཇི་འདྲ་བ་དེ་བཞིན་མངོན་སུམ་མཐོང་བ་བཞིན་དུ་གསལ་ཞིང་ངེས་པར་འགྱུར་གྱིས། གཞན་དུ་གཞུང་མང་དུ་ཐོས་ཤིང་དགག་སྒྲུབ་ཀྱི་སྣ་ཞགས་རིང་དུ་བརྐྱངས་ནས་མཁས་པར་གྲགས་ཤིང་སྙེམས་པར་གྱུར་ན་ཡང་ཇི་ལྟར་ཁྲོན་པའི་ཆུ་མིག་ཆུང་ངུ་ལ་གནས་པའི་རུས་སྦལ་གྱིས་ཕྱིས་སུ་རྒྱ་མཚོ་ཆེན་པོ་མཐོང་བའི་དཔེ་ལྟར་རང་རང་གིས་ཇི་ལྟར་མཐོང་བའི་ཚུར་མཐོང་ཙམ་གྱིས་ཁེངས་ཤིང་ཚུར་མཐོང་གི་ཡུལ་ལས་འདས་པས་ཤིན་ཏུ་རྟོགས་པར་དཀའ་བའི་གནས་རྒྱ་ཆེ་ཞིང་གཏིང་ཟབ་པའི་ཆོས་ཀྱི་ཆུ་རྒྱ་མཚོ་ཆེན་པོ་ལྟར་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་པ་གཞན་དང་གཞན་མང་པོ་རྣམས་མ་མཐོང་མ་ཐོས་མ་མྱོང་བས་སེམས་མི་ཞུམ་པར་མ་ཟད་ད་དུང་མདོ་རྒྱུད་ཀྱི་དོན་ཟབ་མོ་ལ་མཁས་པའི་གྲགས་པ་ལ་རེ་ཞིང་ཆགས་པས་དགག་སྒྲུབ་ལྟར་སྣང་བ་སྣ་ཚོགས་རང་གར་སྤྲོ་བ་ནི་དཔེར་ན་རིགས་ངན་གྱིས་རྒྱལ་པོའི་བཙུན་མོར་ཆགས་པས་ལོག་པར་གཡེམ་བར་བྱས་ན་སྲོག་དང་བྲལ་བའི་ཕུང་ཁྲོལ་ཆེན་པོ་འབྱུང་བ་དང་འདྲ་སྟེ་ཟབ་མོའི་ཆོས་སྤངས་པའི་རྒྱུས་རང་དང་གཞན་རྣམས་མནར་མེད་པའི་དམྱལ་བ་ཆེན་པོར་བསྐལ་བ་ནས་བསྐལ་པའི་བར་དུ་འབར་ཞིང་རབ་ཏུ་འབར་བའི་སྡུག་བསྔལ་བར་འགྱུར་བས་བདག་ལེགས་སུ་འདོད་པ་དག་གིས་བག་ཡོད་པར་བྱོས་ཤིག །དོན་གྱི་གནས་ཟབ་མོ་གང་འདྲི་ན་འདི་ལྟར་མཁས་དབང་དམ་པ་རྣམས་ཀྱིས་གྲུབ་མཐའི་ཞལ་འཛིན་དང་། ལུང་དང་རིགས་པའི་བློས་གྲོས་ཀྱི་གཤོག་རྩལ་འགྲན་པའི་ཕྱིར་ཕན་ཚུན་བརྒལ་རྟགས་ཀྱིས་དགག་སྒྲུབ་སྣ་ཚོགས་དགོས་དབང་གིས་རྒྱ་ཆེར་མཛད་ན་ཡང་ལུང་རིགས་མན་ངག་དང་མི་འགལ་བའི་ཞལ་བཞེས་སྐྱོན་མེད་ཅིག་གང་ལའང་དཀའ་བར་སྣང་བའི་གནས་འདི་འདྲི་སྟེ། མཐར་ཐུག་ལྟ་བ་མཁས་དབང་ལ་ལས་མེད་དགག་དང་ལ་ལས་མ་ཡིན་དགག་ཏུ་གསུངས་པ་གཉིས་ལས་གང་ལྟར་སྨྲ་བ་གནས་ལུགས་མཐར་ཐུག་གི་དོན་དུ་གནས་ཤིང་ལུགས་རིགས་དང་མི་འགལ་བར་གང་འཐད་ཅེས་པ་དང་། དེ་བཞིན་དུ་ཉན་རང་དགྲ་བཅོམ་པས་ཆོས་དང་གང་ཟག་གི་བདག་མེད་གཉིས་རྟོགས་སམ་མ་རྟོགས་པར་སྨྲ་བ་གང་འཐད་དང་། གནས་ལུགས་ཀྱི་དོན་ལ་མཉམ་པར་བཞག་པའམ་འཇོག་ཚེ་འཛིན་སྟངས་ཡོད་དམ་མེད་པ་གང་ལྟར་སྨྲ་བ་འཐད་ཅེས་དང་། བསྒོམ་པ་ལའང་དཔྱད་ནས་བསྒོམ་མམ་མི་དཔྱད་པར་བཞག་ནས་བསྒོམ་པར་སྨྲ་བ་ལ་དང་། བདེན་པ་གཉིས་ལས་གང་ཞིག་ཀུན་རྫོབ་བམ་དོན་དམ་གཙོ་བོར་སྨྲ་བ་ལ་དང་། ཆུ་ལྟ་བུ་གཅིག་ལ་རིགས་དྲུག་གི་འགྲོ་བས་མཐོང་བ་མི་གཅིག་པ་དྲུག་ཏུ་སྣང་བ་དེ་ལ་མཐུན་སྣང་གི་བལྟ་བྱ་ཐུན་མོང་པ་ཡོད་དམ་མེད་གང་ལྟར་སྨྲ་བ་ལ་དང་། དབུ་མར་རང་ལུགས་ཀྱི་ཁས་ལེན་ཡོད་དམ་མེད་པར་སྨྲ་བ་ལུང་རིགས་དང་མི་འགལ་བར་གང་ཞིག་འཐད་ཅེས་དེ་སྐད་གནས་ལུགས་སྟོང་པ་ཉིད་ལས་བརྩམས་པའི་ཟབ་མོའི་དོན་ཅན་གྱི་དྲི་བ་བདུན་པོ་འདིར་ལུང་དང་འགལ་བ་མེད་པར་ལུང་གི་དོན་བཞིན་དུ་དངོས་སྟོབས་ཀྱི་རིགས་པས་གྲུབ་པའི་ལན་ཡང་དག་པ་ཐོངས་ཤིག །དེ་ལས་གཞན་དུ་རིགས་པས་མ་གྲུབ་པའི་ལན་གྱིས་ངལ་བས་ཅི་ཞིག་བྱ། ཞེས་སོ། །དེ་ལྟར་རྟོག་གེའི་ཐལ་དག་གི་ཚིག་གི་འཕྲེང་བ་ལྟར་སྣང་གི་རིགས་པ་ཚེར་མའི་མདུང་ལྟ་བུ་འབུམ་གྱིས་གཅིག་ཆར་བསྣུན་ཀྱང་ཅུང་ཟད་ཙམ་ཡང་མི་ཕིག་པ་སྟེ། དགག་སྒྲུབ་གང་ཡང་མི་ནུས་པས་མཁས་པར་གྲགས་པའི་ཆེ་བའམ་ཆེན་པོ་རྣམས་ཀྱང་རྨོངས་ཤིང་འཁྲུལ་བར་གྱུར་ནས་ཇི་བཞིན་རྟོགས་པར་མི་ནུས་པར་མི་ནུས་པའི་ཟབ་དོན་དཀའ་བའི་གནད་འདི་ལ། ལུང་རིགས་ཚད་མས་གྲུབ་པའི་ལན་སྨྲ་བའི་ལྗགས་མི་ཐུང་བར་རིང་པོ་གློག་འགྱུ་བ་བཞིན་མྱུར་བ་རྐྱོངས་ལ་ལ ན་ཐོངས་ཤིག་ཅེས་དེ་ལྟར་རྣམ་པར་དཔྱོད་པའི་བློ་གྲོས་ཀྱིས་རབ་ཏུ་བསྐུལ་པའི་ངག་གི་རླུང་ཅུང་ཟད་དམ་ཆུང་ངུར་གཡོས་ཏེ་དྲིས་པ་དེས་ཀྱང་གཟུ་བོར་གནས་པའི་དྲང་སྲོང་གི་སྙིང་དུས་མཐའི་རླུང་གིས་རི་བོ་བསྐྱོད་པ་བཞིན་དུ་བསྒུལ་བར་གྱུར་ནས་ལན་གྱི་ཁྱད་པར་གང་ཡང་མི་སྨྲའི་བརྟུལ་ཞུགས་ཅུང་ཟད་དམ་དལ་གཅིག་བཟུང་བ་སྟེ་ཅི་བྱ་གཏོལ་མེད་དུ་ཅུང་ཟད་གྱུར་པའི་མཐར་འདི་ལྟར་ཀྱེ་མའོ་ཡུན་རིང་སྦྱང་བརྩོན་གྱི་འབད་པ་བརྒྱ་ཕྲག་དུ་མའི་བཀའ་བའི་ཁུར་རྟག་ཏུ་བརྟེན་ཅིང་ཡང་དང་ཡང་དུ་རྣམ་པར་དཔྱད་པའི་བློ་གྲོས་རྣོན་པོའི་མེ་བར་ཆད་པ་རྒྱུན་མར་ཆེས་ཆེར་སྦར་བའི་མཁས་པ་ཆེན་པོར་གྱུར་པ་དེ་དང་དེས་ཀྱང་དྲི་བ་འདི་རྣམས་ལ་ལུང་རིགས་གང་དང་ཡང་མི་འགལ་བར་ཚད་མས་གྲུབ་པའི་ལན་གྱི་ཁྱད་པར་སྐྱོན་ཐམས་ཅད་དང་བྲལ་བའི་ཁས་ལེན་གསེར་ཞུན་མ་ལྟ་བུའི་ཁམས་སུ་བསྒྲུབ་པར་མ་ནུས་པ་འདི་ལྟར་ཡིན་ན། སྔོན་སྦྱང་གི་ལྷན་ཅིག་སྐྱེས་པའི་སྤོབས་པའི་བློ་ཡི་ནུས་པ་ཞན་པར་གྱུར་ཅིང་། དེ་ལྟར་འབད་པ་ཆེན་པོས་ཡུན་རིང་སྦྱང་པའི་དཀའ་བའི་ཁུར་བརྒྱ་ཕྲག་དག་ཀྱང་མ་བཟུང་བ་དམན་པ་བདག་གིས་འདི་ལ་ལན་གྱི་ཁྱད་པར་ཁས་ལེན་སྐྱོན་མེད་ཅིག་སྨྲ་བ་ག་ལ་ནུས་ཞེས་ལྷག་པའི་ལྷ་མཆོག་རྗེ་བཙུན་འཇམ་པའི་དབྱངས་ལ་སྙིང་ནས་དད་པས་གདུང་བའི་ཤུགས་ཀྱིས་བོས་ཤིང་གསོལ་བ་བཏབ་པ་དེ་ཡི་ཚེ་ན་ལྷག་པའི་ལྷ་དེ་ཡི་བྱིན་རླབས་ཀྱི་མཐུ་ལས་བྱུང་བ་ཡིན་སྙམས་པ་སྟེ་ལྷག་པའི་ལྷའི་བྱིན་རླབས་སྙིང་ལ་ཞུགས་པའི་སྟོབས་ཀྱིས་ཡིད་ལ་ཐོ་རང་ནམ་ལང་པའི་དུས་ཀྱི་མངོན་སུམ་སྐྱོན་མེད་ཀྱི་སྣང་བ་ལྟར་ལན་གྱི་ཁྱད་པར་ཁས་ལེན་སྐྱོན་བྲལ་ལུང་རིགས་ཚད་མས་གྲུབ་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་སྨྲ་ནུས་པའི་སྤོབས་པའི་གོ་སྐབས་ཡང་བ་ཅུང་ཟད་ཐོབ་པའི་འཕྲལ་ཏེ་དེ་མ་ཐག་ཏུ་ལེགས་པར་གསུངས་པའི་མདོ་རྒྱུད་མན་ངག་གི་དགོངས་དོན་ཇི་ལྟ་བ་བཞིན་དུ་དངོས་སྟོབས་ཀྱི་རིགས་པ་ཡང་དག་པས་དཔྱད་དེ་འདི་ལྟར་སྨྲས་པ་ཡིན་ནོ་ཞེས་སོ། །གཉིས་པ་སོ་སོར་ཕྱེ་སྟེ་རྒྱས་པར་བཤད་པ་ལ་དྲི་ལན་མདོར་བསྟན་པ་ལྟར་བདུན་ལས། དྲི་ལན་དང་པོ་ལྟ་བ་མཐར་ཐུག་མེད་དགག་དང་མ་ཡིན་དགག་ཏུ་འདོད་པ་གང་འཐད་བསྟན་པ་ལ་གཉིས། གཞན་ལུགས་བརྗོད་ཅིང་རང་ལུགས་བཞག་པ་མདོར་བསྟན་པ་དང་། རྒྱས་པར་བཤད་པའོ། །དང་པོ། དགེ་ལྡན་ལྟ་བ་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེ་ལ་སྤྱིར་དེ་བཞིན་གཤེགས་པའི་སྙིང་པོ་རང་གི་ངོ་བོས་མི་སྟོང་བར་གྱུར་ན་ཕྱི་རོལ་པའི་རྟག་བདག་དང་ཁྱད་པར་མེད་པས་རྣམ་ཐར་སྒོ་གསུམ་གྱི་རང་བཞིན་དུ་བསྟན་པ་དང་། འོད་གསལ་བའི་ཡེ་ཤེས་ཀྱང་མེད་པས་སྟོང་པ་ཕྱང་ཆད་ནམ་མཁའ་ལྟ་བུར་གྱུར་ན་གཅེར་བུ་པ་དང་ཁྱད་པར་མེད་པས་འོད་གསལ་བའི་ཡེ་ཤེས་འདུས་མ་བྱས་པར་བསྟན་པས་སྟོན་པའི་བཀའ་བར་ཐ་ངེས་པའི་ལུང་གིས་ངོ་བོ་སྟོང་པ་དང་རང་བཞིན་གསལ་བར་བསྟན་པ་དང་། དེའི་དགོངས་འགྲེལ་ཀྱང་། རྒྱལ་ཚབས་ཆེན་པོ་བྱམས་པས། རྒྱན་དང་རྒྱུད་བླ་སོགས་དང་། དཔལ་ལྡན་ཀླུས་རིགས་ཚོགས་དང་བསྟོད་ཚོགས་ཀྱིས་ལེགས་པར་བསྟན་པ་དག་ལ་འཕགས་ཡུལ་དུ་དཔལ་ལྡན་ཀླུའི་དབུ་མ་རྩ་བ་ཤེས་རབ་སོགས་རིགས་ཚོགས་ཀྱི་དགོངས་པ་སངས་རྒྱས་བསྐྱང་དང་ལེགས་ལྡན་འབྱེད་དང་། དཔལ་ལྡན་ཟླ་བས་སོ་སོར་བཀྲལ་ཞིང་དགག་བྱ་ལ་དོན་དམ་གྱི་ཁྱད་པར་སྦྱར་དང་དེའི་དབང་གིས་ཐ་སྙད་དུ་རང་མཚན་གྱིས་གྲུབ་སོགས་ཞལ་གྱིས་བཞེས་མི་བཞེས་ཀྱི་ཁྱད་པར་ལ་ཕན་ཚུན་དགག་སྒྲུབ་སྣ་ཚོགས་མཛད་ཅིང་དེར་བསྟེན་བོད་འདིར་ཡང་དབུ་མ་ཐལ་རང་ཞེས་ཆེས་མི་མཐུན་པ་ཞིག་ཏུ་གོ་ཞིང་མཁས་མཆོག་རྣམས་ཀྱིས་དབུ་མ་རང་བརྒྱུད་པའི་སྟོང་ཉིད་མ་ཡིན་དགག་ཏུ་སོང་བའི་འགལ་འདུའང་བསྟན་ལ། དཔལ་ལྡན་ཟླ་བའི་དབུ་མ་འཇུག་པ་རྩ་འགྲེལ་གྱི་དགོངས་པ་འགྲེལ་བ་པོ་གངས་ཅན་གྱི་མཁས་མཆོག་རྣམས་ཀྱང་ཕན་ཚུན་དཔལ་ལྡན་ཟླ་བའི་དགོངས་པ་ལོན་མ་ལོན་ཞེས་དགག་སྒྲུབ་སྣ་ཚོགས་པར་མཛད་པ་དང་། དེ་བཞིན་དུ་རྒྱལ་ཚབ་ས་ཆེན་པོ་བྱམས་པའི་རྒྱུད་བླ་མ་སོགས་ཀྱི་དགོངས་པ་འགྲེལ་པ་པོ་གངས་ཅན་གྱི་མཁས་མཆོག་རྣམས་ཀྱང་ཕན་ཚུན་དགག་སྒྲུབ་སྣ་ཚོགས་པ་སྤྲོ་བར་གྱུར་ན་ཡང་། གཟུ་བོར་གནས་པའི་བློས་དོན་ལ་རྟོན་པའི་རིགས་ལམ་དྲི་མ་མེད་པས་གནད་ཀྱི་དགོངས་དོན་ཉམས་སུ་བསྟར་ན་རྒྱལ་བའི་ཕྲིན་ལས་གདུལ་བྱའི་དབང་གིས་སོ་སོའི་དགོངས་གནད་རེ་རྩལ་བཏོན་མཛད་པའི་ཐ་སྙད་ཀྱི་ཞལ་བཞེས་ཅུང་ཟད་མི་འདྲ་བ་ཙམ་ལས་དོན་ལ་རྒྱ་བོད་གྲུབ་ཐོབ་དགོངས་པ་གཅིག་ཟེར་བ་ལྟར་མཐར་ཐུག་གི་དགོངས་པ་དབུ་མ་ཆེན་པོ་སྤྲོས་བྲལ་མཉམ་པ་ཉིད་དུ་དབྱེ་བསྲི་མེད་པར་གཅིག་ཏུ་གཞོལ་ཞིང་འབབ་པའི་ཚུལ་རྗེ་འཇམ་དབྱངས་བླ་མས་དབུ་མ་རྒྱན་འགྲེལ་དང་བདེ་གཤེགས་སྙིང་པོའི་སྟོང་ཐུན་སེང་གེའི་ང་རོ་སོགས་ལེགས་པར་བཀྲལ་ཟིན་པའི་ལུང་རིགས་ཟབ་མོའི་དགོངས་གནད་རང་གིས་ཉམས་སུ་བསྟར་བ་ལས་འདིར་བསྐྱར་ཟློས་སུ་མ་བྱས་ལ། དེས་ན་ཐ་སྙད་ཀྱི་ཞལ་བཞེས་ཅུང་ཟད་ཙམ་མི་འདྲ་བ་རེ་རང་གཞན་སུ་ལའང་ཡོད་པ་དེར་མི་འཐད་པའི་ཀླན་ཀ་དོན་ལ་མི་གནས་པ་ལྟ་ཅི་དོན་ལ་གནས་ནའང་དེ་ཙམ་གྱིས་ལྟ་ལོག་དང་ཆོས་ལོག་ཏུ་མི་འགྱུར་ཏེ། ཚིག་ལ་མི་རྟོན་དོན་ལ་རྟོན་དགོས་པར་གསུང་པའི་ཕྱིར། དེ་ལྟ་ནའང་རང་གཞན་སུ་ཡིན་ཀྱང་གཞན་ཟེར་རྗེས་བརྗོད་ཀྱི་བྲག་ཆར་མ་སོང་བར་ཡང་དག་པའི་རིགས་ལམ་གྱིས་ཐ་སྙད་སྐྱོན་མེད་པ་ཞིག་ལ་འཇུག་པ་གལ་ཆེ་སྟེ། ཇི་སྐད་དུ། ཐ་སྙད་བདེན་པ་ཐབས་སུ་གྱུར་པ་སྟེ། ཞེས་གསུངས་པས་སོ། །དེས་ན་ཚུལ་འདི་དང་འདྲའི་སྒོ་ནས་དྲི་ལན་ཐམས་ཅད་ཀྱི་སྐབས་སུའང་གཟུ་བོར་གནས་པའི་བློས་ལོག་པར་མི་ལྟ་བར་ཡང་དག་པའི་དོན་ཉིད་འཚོལ་བ་ནི་མཁས་པ་རྣམས་ཀྱིས་སྙིང་ནོར་དམ་པར་རྣལ་འབྱོར་དུ་བྱ་བ་ཁོ་ནའོ། །དངོས་དོན་ལ་གངས་ཅན་ལ་མངོན་པར་མཐོ་བ་རི་བོ་དགེ་ལྡན་པ་སོགས་སྔ་ཕྱིར་བྱོན་པའི་མཁས་མཆོག་ཕལ་ཆེ་བ་ཞིག་དབུ་མའི་ལྟ་བ་མཐར་ཐུག་པ་དགག་བྱ་བདེན་གྲུབ་བཅད་པའི་སྟོང་ཉིད་མེད་དགག་ཏུ་འདོད་དགོས་ཟེར་བ་དང་། གཞན་སྔ་ཕྱིར་བྱོན་པའི་མཁས་མཆོག་ལ་ལ་རྣམས་གནས་ལུགས་མཐར་ཐུག་དོན་དམ་པ་ཉིད་གཉིས་སྣང་འཁོར་བའི་ཆོས་ཀྱི་སྟོང་པས་སྟོང་ཉིད་མ་ཡིན་དགག་ཏུ་སྨྲ་བ་དང་། སྔ་འགྱུར་གྱི་རང་ལུགས་གཞན་དང་མ་འདྲེས་པའི་ཁས་ལེན་གང་ཡིན་ཞེ་ན། གནས་ལུགས་མཐར་ཐུག་པ་སྒྲོ་འདོགས་སོ་གཉིས་དང་བྲལ་བའི་སྤྲོས་བྲལ་མཉམ་པ་ཉིད་དམ་ཟུང་འཇུག་ཡེ་ཤེས་ཆེན་པོའི་དོར་མེད་དགག་ཅེས་བྱ་བ་བདེན་གྲུབ་ལ་སོགས་པ་བཀག་ཤུལ་གྱི་མེད་རྐྱང་ངམ་སྟོང་བ་ཕྱང་ཆད་དམ་སྟོད་རྐྱང་དང་ནི་མ་ཡིན་དགག་ཡིན་ཞེས་དགག་བྱ་བཀག་ཤུལ་དུ་ཆོས་ཉིད་ལ་སོགས་པ་ཆོས་གཞན་ཅི་ཞིག་འཕེན་ཏེ། དེ་གཉིས་ཀ་བློ་ཡིས་གཞན་སེལ་བའི་སྒོ་ནས་བརྟགས་པ་ཙམ་ལས་རང་གི་ངོ་བོས་མ་གྲུབ་པའི་ཕྱིར་ན་གཤིས་ལུགས་མཐར་ཐུག་པའི་དོན་ལ་མཁས་ལེན་ཐམས་ཅད་དང་བྲལ་བས་མེད་དགག་དང་མ་ཡིན་དགག་གཉིས་ཀར་ཁས་མི་ལེན་ཏེ། གནས་ལུགས་མཐར་ཐུག་པ་ནི་དགག་པ་མེད་དགག་དང་སྒྲུབ་པ་མ་ཡིན་དགག་ལ་སོགས་པའི་གཉིས་ཆོས་ཐམས་ཅད་དང་བྲལ་བ་ཡི་བློ་འདས་སྨྲ་བསམ་བརྗོད་མེད་སོ་སོ་རང་རིགས་པའི་ཡེ་ཤེས་ཀྱི་སྤྱོད་ཡུལ་གདོད་མའི་ཆོས་ཉིད་ཡིན་པའི་ཕྱིར་རོ། །དེ་ལྟ་ནའང་གནས་སྐབས་ཆོས་ཐམས་ཅད་ཀྱི་ངོ་བོ་སྟོང་པ་ཉིད་གཏན་ལ་འབེབ་ཚུལ་ཁོ་ནར་བསམ་ནས་ནི་མེད་དགག་དང་མ་ཡིན་དགག་གང་ཡིན་ཞེས་དྲི་ན་མེད་དགག་ཉིད་ཡིན་ཞེས་ཁས་ལེན་ཏེ་འཕགས་ཡུལ་གྱི་དཔལ་ལྡན་ཟླ་བ་གྲགས་པ་དང་བོད་ན་ཀུན་མཁྱེན་རོང་ཟོམ་ཆོས་བཟང་གཉིས་ཐུགས་ཀྱི་དགོངས་པ་གཅིག་དང་གསུང་གི་དབྱངས་གཅིག་གིས་འཁོར་འདས་ཀྱིས་བསྡུས་པའི་ཆོས་སོ་ཅོག་ཀུན་གདོད་མ་ནས་དག་པས་ཀ་དག་སྟོང་པ་ཆེན་པོ་ལུང་དང་རིགས་པས་བསྒྲུབས་པར་མཛད་པ་བཞིན་དུ་འཁོར་འདས་ཀྱིས་བསྡུས་པའི་ཆོས་འདི་ཐམས་ཅད་ཀ་ནས་དག་པའམ་གདོད་མ་ནས་རང་བཞིན་གྱིས་མ་གྲུབ་པའམ་མེད་པའི་ཕྱིར་ཀུན་རྫོབ་དང་དོན་དམ་པའི་བདེན་པ་གཉིས་ཆར་མཐའ་བཞི་ལས་མ་སྐྱེས་པས་ན་མེད་ཅེས་བརྗོད་པ་ལ་ཅི་ཞིག་ཚོམ་སྟེ་ཐེ་ཚོམ་ཅི་ཡང་མི་དགོས་ཏེ་མདོ་ལས་གཟུགས་མེད་སྒྲ་མེད་སོགས་གཟུགས་ནས་རྣམ་མཁྱེན་གྱི་བར་མེད་པའམ་སྟོང་པར་གསུངས་བཞིན་ནོ། །གཉིས་པ་ལ་གཉིས། མི་འཐད་པ་གཞན་ལུགས་དགག་པ། འཐད་ལྡན་རང་ལུགས་བཞག་པའོ། །དང་པོ་ལ་གཉིས། གཞན་གྱི་མེད་དགག་ཀྱང་མ་ཡིན་དགག་ཏུ་འགྱུར་ཞིང་ཚིག་དང་དོན་གྱི་གཞན་སྟོང་ལ་ཟུང་འཇུག་མི་རུང་བར་མདོར་བསྟན་པ་དང་། དེ་རྒྱས་པར་བཤད་པའོ། །དང་པོ། ཀ་བ་ཀ་ནས་སོགས་ཚིགས་བཅད་གསུམ་གྱིས་བསྟན་ཏེ། དེ་ལ་འདིར་ངོ་བོ་སྟོང་པའི་དབང་དུ་བྱས་ནས་སྤྲོས་བྲལ་མེད་དགག་དང་། རང་བཞིན་འོད་གསལ་བའི་དབང་དུ་བྱས་ན་ངོ་བོ་སྟོང་པའི་དབྱིངས་དང་འདུ་འབྲལ་མེད་པའི་སྐུ་དང་ཡེ་ཤེས་སོགས་དབྱིངས་ཡེ་གཉིས་སུ་མེད་པའི་འདུ་མ་བྱས་པའི་རང་གདངས་ལྷུན་གྱིས་གྲུབ་པའི་སངས་རྒྱས་ཀྱི་ཡོན་ཏན་བླ་ན་མེད་པ་རྣམས་ཀྱང་རྗེས་ཐོབ་ཤན་འབྱེད་པའི་ཚེ་དེ་ལྟར་ཁས་ལེན་ཅིང་། འདོད་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་པའི་ཕྱིར་མི་འཐད་པ་སྤུ་ཙམ་མེད་པར་མ་ཟད་བླ་ན་མེད་པའི་ཡོན་ཏན་ཀྱང་བདེ་བླག་ཉིད་དུ་ཐོབ་པར་འགྱུར་རོ། །འོ་ན་ཇི་ལྟར་ཞེ་ན། དོན་དམ་མཐར་ཐུག་དཔྱོད་པའི་རིགས་པ་གང་ཇི་སྙེད་པས་འཁོར་འདས་ཀྱིས་བསྡུས་པའི་ཆོས་ཅན་གང་ལ་དོན་དམ་དང་བདེན་གྲུབ་སོགས་ཀྱི་དགག་བྱའི་ཁྱད་པར་སྦྱར་ནས་དེ་ཁོ་ན་འགོགས་ཀྱི་གཞན་ཆོས་ཅན་གྱིས་སྣང་བ་འདི་འགོག་ན་འགོག་ཀྱང་མི་ནུས་ལ་ཐ་སྙད་ལ་བསྐུར་པ་བཏབ་པ་སོགས་ཀྱི་སྐྱོན་ཡང་ཆེའོ་ཞེས་དབུ་མ་རང་རྒྱུད་པའི་རྣམ་གྲངས་པའི་དོན་དམ་བདེན་སྟོང་མེད་དགག་ཙམ་ཁོ་ན་ཟབ་མོ་དབུ་མའི་ལྟ་བ་མཐར་ཐུག་ཏུ་ཞལ་གྱིས་བཞེས་ཤིང་རྩལ་འདོན་གྱིས་བསྒྲུབ་ན་མི་འཐད་དེ། དཔལ་ལྡན་ཟླ་བས། ཐ་སྙད་བདེན་པ་རིག་པའི་དཔྱད་བཟོད་དུ་ཐལ་བ་དང་། དོན་དམ་པའི་སྐྱེ་བ་མི་ཁེགས་བར་ཐལ་བ་དང་། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བའི་སྐྱོན་གསུམ་གསུངས་པ། བཟློག་མེད་དུ་འབབ་ཅིང་ཀུན་མཁྱེན་ཀློང་ཆེན་པས་ཡིད་བཞིན་མཛོད་དུ། རང་རྒྱུད་འོག་མའི་བྱེ་བྲག་སློབ་དཔོན་དཔལ་སྦས་སོགས་སྣང་སྟོང་ཐ་དད་དུ་འདོད་པ་དག་གི་ལུགས་དགག་པའི་སྐབས་སུ། སྣང་བ་མ་ཡིན་པའི་སྟོང་པ་བདེན་པ་གཉིས་ཆར་མི་སྲིད་པ་དང་། རྟོགས་བྱར་མི་རུང་བ་དང་ཐ་དད་དུ་གྱུར་ན་སྤང་གཉེན་དུ་མི་འཐད་དེ། དགྲ་ལ་ཞེ་སྡང་སྐྱེས་པ་ལ་ནམ་མཁའ་སྟོང་པར་ཤེས་པས་མི་ཕན་པ་ལྟར་གཞི་རྫུན་སྣང་ལ་ཞེན་ནས་ལོགས་སུ་སྟོང་པར་ཤེས་པས་ཅི་ཡང་མི་ཕན་པས་དེ་འདྲའི་སྟོང་པ་དེ་རྟོགས་པ་ལ་དགོས་པ་མེད་པར་འགྱུར་བའི་རིགས་པ་གང་གསུངས་པ་བཞིན་ནོ། །ཏིང་འཛིན་རྒྱལ་པོ་ལས་ཀྱང་། སུ་དག་བུ་མོར་འདུ་ཤེས་གནས། །དེ་དག་འདོད་ཆགས་རབ་ཏུ་འཕེལ། །འདུ་ཤེས་དག་ནི་རྣམ་བཤིག་ན། །འདོད་ཆགས་གྱིས་ནི་གོས་མི་འགྱུར། །ཞེས་གསུངས་པ་བཞིན་ཡིན་པས་འདིར་ཡང་ཆོས་ཅན་གྱི་སྣང་བ་ཀ་བ་ལ་སོགས་པ་རང་རང་གི་ངོ་བོ་ཀ་ནས་ཏེ་ཡེ་ནས་སྟོང་པའམ། དག་པ་ཡི་རང་བཞིན་ཡིན་པའི་ཕྱིར་དེ་ལྟར་རིགས་པས་གཏན་ལ་ཕབ་པའི་ཤུལ་ན་གང་མི་སྟོང་པ་ཅུང་ཟད་ཀྱང་ནམ་ཡང་ལུས་པ་མེད་ལ། གལ་ཏེ་ཡོད་ན་དེའི་རིགས་པས་དཔྱད་བཟོད་དུ་འགྱུར་བ། དེས་ན་གནས་ལུགས་མཐར་ཐུག་དཔྱོད་པའི་རིགས་པས་ཆོས་ཅན་ཀ་བ་རང་ཉིད་མེད་ཅེས་མ་བཀག་ན་སྟེ་མི་འགོགས་པ་ཀ་བ་བདེན་གྲུབ་མིན་ཞེས་བརྗོད་པས་འགོགས་མི་ནུས་པའི་ཆོས་ཅན་གྱི་ཀ་བ་འདི་ཅི་ཞིག་ཡིན་ཏེ་མི་འཐད་ལ། དེ་ལྟར་ན་བདེན་གྲུབ་ཀྱི་ཀ་བ་ཁེག་པས་བདེན་པའི་སྟོང་པ་ཉིད་དང་མི་ཁེག་པར་ཤུལ་ན་ལུས་པའི་སྣང་བ་ཡི་ཀ་བ་ཞིག་སྟེ་སྟོང་པ་དང་མི་སྟོངས་པའི་ཐ་དད་པ་དེ་གཉིས་མེ་དང་ཚ་བ་ལྟ་བུ་སྣང་སྟོང་དབྱེར་མེད་དམ་ཟུང་འཇུག་ཏུ་མི་རུང་སྟེ་དཔེར་ན་སྲད་བུ་དཀར་ནག་བསྒྲིལ་བ་ཟུང་འཇུག་གམ་དབྱེར་མེད་མིན་པ་བཞིན་ནོ། །དེས་ན་ཆོས་ཅན་གྱི་ཀ་བ་ཀ་བས་ཏེ་ག་པ་རང་གིས་མི་སྟོང་བར་དགག་བྱ་བདེན་གྲུབ་གཞན་གྱིས་སྟོང་པར་འདོད་པ་དང་ཆོས་ཉིད་ཆོས་ཉིད་རང་གིས་མི་སྟོང་བར་གཞན་ཀ་བས་སྟོང་ངོ་ཞེས་སྟོང་གཞི་ཀ་བ་དང་ཆོས་ཉིད་བཞག་ནས་བདེན་གྲུབ་དང་ཀ་བ་ལ་སོགས་པ་གཞན་གྱིས་སྟོང་པར་འདོད་པ་དག་ནི་ཚིག་གི་གཞན་སྟོང་དང་དོན་གྱི་གཞན་སྟོང་གཉིས་ཀ་ལའང་སྣང་བ་དང་སྟོང་པ་ཆོས་ཅན་དང་ཆོས་ཉིད་དུ་མི་རུང་བ་དང་དེ་བཞིན་དུ་སྣང་སྟོང་དབྱེར་མེད་དམ་ཟུང་འཇུག་དང་མཉམ་པ་ཉིད་དང་སྤྲོས་བྲལ་མི་རུང་བའི་རིགས་པའི་གནོད་པ་ཐུན་མོང་དུ་བཟློག་མེད་དུ་འབབས་སོ། །གཉིས་པ་ལ་གཉིས། ལུང་རིགས་ཁས་བླང་དང་འགས་པ། ཟུང་འཇུག་སོགས་མི་རུང་བར་བསྟན་པའོ། །དང་པོ། ཨེ་མ་དེས་དེ་སོགས་ཚིགས་བཅད་བཅུ་དང་རྐང་པ་གཅིག་གིས་བསྟན་ཏེ། འདི་ལ་ལུང་དང་རིགས་པ་དང་ཁས་བླང་དང་འགལ་བ་གསུམ་རིམ་པར་ཨེ་མ་ཀ་བ་དང་ཆོས་ཉིད་ལ་སོགས་དེ་དང་དེས་ཀ་བ་དང་ཆོས་ཉིད་ལ་སོགས་པ་རང་རང་གི་ངོ་བོས་དེ་དང་དེ་མ་སྟོང་པའམ་མི་སྟོང་བར་དགག་བྱ་བདེན་གྲུབ་ལ་སོགས་པ་ཁོ་ནས་སྟོང་པ་ཡིན་ན་སྟོང་གཞི་ཀ་བ་དང་ཆོས་ཉིད་ལ་སོགས་པ་མི་སྟོང་བར་ལྷག་མར་ལུས་ཏེ་རང་རང་གི་ངོ་བོས་གྲུབ་པར་འགྱུར་ཏེ། དེ་ལྟར་ན་གཟུགས་ནི་གཟུགས་ཀྱིས་སྟོང་ངོ་ཞེས་སོགས་གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་རང་རང་གི་ངོ་བོས་སྟོང་པར་གསུངས་པའི་ཡུམ་རྒྱས་འབྲིང་སོགས་ངེས་དོན་གྱི་ལུང་དོན་དང་འགལ་ཞིང་རིགས་པར་བཅས་པ་ལས་ཀྱང་འགལ་ཏེ། ཇི་ལྟར་འགལ་ན། ཆོས་ཅན་ཀ་བ་ལ་སོགས་པ་དང་དགག་བྱ་ཀ་བའི་བདེན་གྲུབ་ལ་སོགས་པ་དེ་གཉིས་ངོ་བོ་གཅིག་གམ་ཐ་དད་གང་ཡིན། དང་པོ་ལྟར་ངོ་བོ་གཅིག་ཡིན་ནོ་ཞེ་ན། དགག་བྱ་བདེན་གྲུབ་ལ་སོགས་པ་གཅིག་ཤོས་ཁེག་པས་ཆོས་ཅན་ཀ་བ་ལ་སོགས་པ་གཅིག་ཤོས་ཀྱང་ཁེག་པར་འགྱུར་ཏེ་དེ་གཉིས་གཅིག་ཡིན་པའི་ཕྱིར་དཔེར་ན་མེ་ཉིད་མེད་པས་ཚ་བ་ཡང་མེད་པར་འགྱུར་བ་བཞིན་ནོ། །དེས་ན་བདེན་གྲུབ་འགོགས་ཀྱི་ཀ་བ་མི་འགོགས་ཞེས་པ་དོན་མེད་དོ། །གཉིས་པ་ལྟར་ངོ་བོ་གཞན་ཡིན་ནོ་ཞེ་ན། ཆོས་ཅན་ཀ་བ་ལ་སོགས་པ་རང་རང་མ་ཡིན་པའི་དགག་བྱ་གཞན་བདེན་གྲུབ་ཅེས་པ་ལ་སོགས་པ་དེ་ཁེག་ཀྱང་། ཆོས་ཅན་ཀ་བ་ལ་སོགས་པ་རང་རང་གི་ངོ་བོ་ནི་དོན་དམ་དཔྱོད་པའི་རིགས་པ་གང་གིས་མི་སྟོང་བར་དཔྱད་བཟོད་པས་བདེན་གྲུབ་ཏུ་འགྱུར་བ་ལ་སོགས་པའི་སྐྱོན་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པ་གོང་དུ་ཇི་སྐད་བསྟན་པ་བཞིན་ནོ། །ཁོ་ན་རེ་བདེན་གྲུབ་ཐ་སྙད་དུ་ཡང་ཡོད་མ་མྱོང་བའི་ཕྱིར་ན་འདི་ལྟར་དེ་གཉིས་གཅིག་དང་ཐ་དད་གང་ཡིན་ཞེས་དཔྱོད་མི་དགོས་སོ་ཞེ་ན། དེ་མི་འཐད་དེ་དོན་ལ་བདེན་པར་གྲུབ་པ་ཞིག་མེད་ཀྱང་སོའི་སྐྱེའི་ངོར་བུམ་པ་ལ་སོགས་པ་བདེན་པ་འཛིན་པ་ཡོད་པའི་ཕྱིར་དེ་ལྟར་ངེས་པར་དཔྱད་དགོས་སོ། །དབུ་མ་ཐལ་འགྱུར་བའི་ལུགས་ཀྱི་དགག་བྱའི་ངོས་འཛིན་ཀྱང་དོན་དམ་དཔྱོད་པའི་རིགས་པས་དཔྱོད་བཟོད་ཀྱི་མི་སྟོང་པའི་བུམ་པའམ་འགོག་མི་ནུས་པའི་བུམ་པའི་ཕ་རོལ་ཏེ་གཞན་ལོགས་ཤིག་ན་དགག་བྱ་བདེན་པར་གྲུབ་རྒྱུ་དཔྱད་མི་བཟོད་པ་སུ་ཞིག་ཡིན་ཏེ་ཡན་གར་དུ་མེད་པའི་ཕྱིར་ན་དགག་བྱའི་སྣང་ཚུལ་ཀྱང་གཞན་དག་གི་ངོས་མ་ཟིན་ལ། ཁྱེེད་ཅག་ཁོ་ནས་ངོས་ཟིན་པས་ངེས་སོ་ལོ་སྟེ་ཞེས་མ་རངས་པའོ། །འོན་ཀྱང་བདེན་པར་གྲུབ་པ་སོགས་ཀྱི་ཁྱད་པར་གང་ཞིག་དགག་བྱར་སྦྱར་བའམ་དགག་བྱ་ལ་དོན་དམ་གྱི་ཁྱད་པར་སྦྱར་ནས་སྟོན་པ་ནི་བདེན་གཉིས་སོ་སོར་ཕྱེ་ནས་ཚང་མ་སོ་སོས་རྙེད་དོན་སོ་སོར་འཆད་པ་དབུ་མ་རང་རྒྱུད་པའི་གཞུང་ལ་ཆེས་གྲགས་ཤིང་གྲུབ་མོད་ཀྱང་འདིར་དོན་དམ་དཔྱད་པའི་རིགས་པའི་དབང་དུ་བྱས་ན་ཡང་ཀ་བ་དང་བུམ་པ་ལ་སོགས་པ་དེས་དེ་མི་སྟོང་ཞེས་པ་དེ་སྦྱར་བ་ལ་དགོས་ནུས་ཀྱི་འཐད་པ་ཅི་ཞིག་ཡོད་དེ་མེད་དོ། །གལ་ཏེ་བུམ་པ་བུམ་པས་སམ་ཀ་བ་ཀ་བས་སྟོང་པར་འགྱུར་ན་ཁྱོད་ཀུན་རྫོབ་ཐ་སྙད་ཙམ་དུ་ཡང་ཀ་བ་དང་བུམ་པ་ལ་སོགས་པ་དེ་དག་མེད་པ་ལྟར་ཞེས་གཏན་མེད་ལྟ་བུར་འགྱུར་བར་སེམས་ནས་ཐ་སྙད་ལ་བསྐུར་བ་འདེབས་པ་ལ་སོགས་པའི་ཚིག་འཁྲིའི་དོགས་པས་ཀ་བ་ཀ་བས་མི་སྟོང་ཞེས་ལ་སོགས་པ་འདི་སྦྱར་བར་བྱས་ཀྱང་ཚིགས་འཁྲིའི་འགལ་བ་བཟློག་ཏུ་མེད་པ་འདི་ལ་ལྷག་པར་ཆེ་སྟེ། ཇི་ལྟར་ན་ཀུན་རྫོབ་ཙམ་སྟེ་མ་བརྟགས་མ་དཔྱད་པའི་ཐ་སྙད་ཙམ་དུ་ཀ་བ་ནི་ཡོད་ཅེས་བརྗོད་པར་བྱས་པས་མི་ཆོག་པར་ཀ་བ་དེས་ཀ་བ་དེ་མི་སྟོང་ངོ་ཞེས་ཅི་ལ་ཟེར་ཏེ་འཆད་འགྱུར་ལྟར་མི་འཐད་དོ། །དེ་གཉིས་དོན་གཅིག་ཡིན་པས་མི་འཐད་པ་མེད་དོ་ཟེར་ན་དེ་གཉིས་དོན་གཅིག་མ་ཡིན་ཏེ། འདི་ལྟར་ཀ་བ་ཡོད་ཅེས་བརྗོད་པ་དང་ཀ་བར་ཏེ་ཀ་བ་ལ་ཀ་བ་ཡོད་ཅེས་བརྗོད་པ་གཉིས་མི་མཚུངས་ཏེ་ཕྱི་མ་ཀ་བ་ལ་ཞེས་རྟེན་དང་ཀ་བ་ཡོད་ཅེས་བརྟན་པར་དོན་གྱིས་ཁས་བླངས་སུ་སོང་བ་དཔེར་ན་རྟེན་ཀ་བ་གཞན་ལ་བརྟེན་པ་ཀ་བ་གཞན་བརྟེན་པར་ཁས་བླངས་བ་བཞིན་ནོ། །གཞན་ཡང་དེས་དེ་མི་སྟོང་ཞེས་པ་འདི་བདེན་པ་གཉིས་ཆར་མི་འཐད་དོ། །ཇི་ལྟར་ན། དོན་དམ་པར་དོན་དམ་དཔྱོད་པས་དཔྱད་བཟོད་ཀྱི་ཀ་བ་མི་དམིགས་པའམ་ཡོད་པ་མིན་པས་སྟོང་བར་གྱུར་ན་ཀ་བ་དེ་ཀ་བས་མེ་སྟོང་ཞེས་ཅི་སྟེ་བརྗོད་པ་འདི་ལ་དགོས་ནུས་ཅི་ཡང་མེད་པས་དོན་མེད་དུ་འགྱུར་ལ། ཀུན་རྫོབ་ཏུ་ནའང་ཀ་བ་ཀ་བས་ཞེས་ལན་གཉིས་བརྗོད་པ་འདི་བརྡ་ཐ་སྙད་ལ་རྨོངས་ཤིང་དོན་དང་འགལ་བའོ། །ཁས་བླངས་བ་དང་ཡང་འགལ་ཏེ། ཀ་བ་ལ་སོགས་པ་རང་རང་རྣམས་ནི་རང་གིས་ཏེ་རང་རང་གི་ངོ་བོས་མི་སྟོང་པར་འགྱུར་ན་རང་རང་གི་ངོ་བོ་ཡོད་བཞིན་དུ་བདེན་གྲུབ་སོགས་དགག་བྱ་གཞན་དང་གཞན་གྱི་སྟོང་པས་གཞན་སྟོང་དུ་ཁས་མི་ལེན་པར་རང་སྟོང་དུ་ཁས་ལེན་པ་འགལ་ཞིང་། ཀ་བ་ལ་སོགས་པའི་སྣང་བ་འདི་ལས་དགག་བྱ་གཞན་ཐ་དད་དུ་མེད་པས་རང་རང་ངོ་བོས་སྟོང་བར་གྱུར་ན་ཀ་བ་ཀ་བ་རང་གིས་མི་སྟོང་བར་ཁས་ལེན་པའང་འགལ་བ་ཡིན་ནོ། །གཉིས་པ་ནི། སྤྱིར་ན་གཞན་གྱིས་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། སྤྱིར་རྒོལ་སྔ་ཕྱི་སོགས་གྲུབ་མཐའ་སྨྲ་བ་སུ་ལྟར་ན་ཡང་ཆོས་ཅན་ཀ་བ་དང་ཆོས་ཉིད་མྱང་འདས་སོགས་རང་རང་གིས་མི་སྟོང་བར་དགག་བྱ་བདེན་གྲུབ་དང་འཁོར་བ་སོགས་གཞན་དང་གཞན་གྱིས་སྟོང་བར་གྱུར་དེ་དང་དེས་ཀ་བ་ལ་སོགས་པའི་ཆོས་ཅན་དེ་དང་དེ་སྟོང་པའི་གོ་ངེས་པར་མི་ཆོད་དེ། དེ་དག་ཆོས་ཅན་དང་དེའི་ཆོས་ཉིད། སྣང་བ་དང་། དེའི་སྟོང་ཉིད་མ་ཡིན་ཏེ་ཐ་དད་པ་ཉིད་ཡིན་པའི་ཕྱིར། དཔེར་ན་རྟ་ཉིད་བ་ལང་མིན་ལ་བ་ལང་རྟ་ཉིད་མ་ཡིན་པས་མངོན་སུམ་མ་འཁྲུལ་བས་མཐོང་བའི་རྟ་ལ་རྟ་དེ་ཉིད་ལས་གཞན་བ་ལང་ཞིག་རྟ་དེའི་སྟེང་དུ་མ་མཐོང་བས་ཐ་སྙད་དུ་ཡང་མ་གྲུབ་པས་བ་ལང་དེས་རྟ་དེ་སྟོང་པར་ཤེས་ཀྱང་དེས་རྟ་དེ་སྟོང་ཉིད་ཡིན་པར་ག་ལ་ངེས་ཏེ་ངེས་མི་ནུས་ཏེ། རྟ་ཉིད་ཡོད་པ་དང་བ་ལང་གང་མེད་པ་གཉིས་ཆོས་ཅན་དང་ཆོས་ཉིད། རྟེན་འབྱུང་དང་སྟོང་པ། ཐབས་དང་ཐབས་བྱུང་ཉིད་མ་ཡིན་ཏེ་འབྲེལ་མེད་ཐ་དད་ཡིན་པའི་ཕྱིར་ན་དེ་གཉིས་ལ་སྟོང་རྟེན་འབྱུང་ངམ་སྣང་སྟོང་དབྱེར་མེད་དམ་ཟུང་འཇུག་དོན་ཅི་ཡང་མི་བྱེད་དོ། །དེས་ན་རྟ་ཉིད་མཐོང་བ་དེ་ཡིས་ཀྱང་བ་ལང་སྟོང་པར་མཐོང་བ་ལ་ཅི་ཞིག་ཕན་ཏེ་མི་མཐོང་བ་ལང་ཅི་ཞིག་གནོད་དེ་ཕན་གནོད་ཅི་ཡང་མི་བྱེད་དོ། །དེ་ཡི་ཕྱིར་ན་རང་གིས་ངོ་བོས་མི་སྟོང་པའི་མྱང་འདས་ལ་སོགས་དང་། འཁོར་བ་ལ་སོགས་པས་དེ་དང་དེ་སྟོང་པའང་ཆོས་ཅན་དང་ཆོས་ཉིད་དུ་མི་རུང་སྟེ་རྟ་ཉིད་བ་ལང་གིས་སྟོང་པའམ་བུམ་པ་དང་རང་རི་རྭ་བཞིན་ནོ། །དེའི་ཕྱིར་དེ་གཉིས་སྣོང་བ་དང་སྟོང་པ་དབྱེར་མེད་དམ་ཟུང་འཇུག་དང་། སྲིད་པ་འཁོར་བ་དང་ཞི་བ་མྱང་འདས་གཉིས་མཉམ་པ་ཉིད་ལུགས་འདི་ལ་མི་རུང་བས་མེད་དེ་དཔེར་ན་ཡོད་པའི་རྟ་དང་བ་ལང་མེད་པའམ་བུམ་པ་དང་རི་བོ་གི་རྭ་གཉིས་ཟུང་འཇུག་དང་མཉམ་ཉིད་ཀྱི་དོན་མེད་པ་བཞིན་ནོ། །དེ་ལ་ཡང་ཆུ་ཟླ་ཉིད་ཟླ་བ་དངོས་མིན་ནོ་ཞེས་གནམ་ཟླས་སྟོང་པ་དང་ཆུ་ཟླ་རང་སྣང་བ་དེ་གཉིས་ཟུང་འཇུག་ཡིན་ན་ཀོ་སྟེ། དེ་འདྲའི་སྣང་སྟོང་ཟུང་འཇུག་ཉིད་རྟོགས་པ་མཁས་བླུན་སུས་ཀྱང་སླ་སྟེ་བླུན་པོ་བ་ལང་རྫིས་ཀྱང་རྟོགས་པར་འགྱུར་ལ་བ་ལང་རྟ་མིན་པའམ་རྟས་སྟོང་པར་མཁས་བླུན་ཀུན་གྱིས་ཤེས་ཤིང་བ་ལང་སྣང་བར་མངོན་སུམ་དུ་ཡང་མཁས་བླུན་ཀུན་གྱིས་མཐོང་བར་གྱུར་ན་དེ་འདྲའི་སྟོང་པ་དང་རྟེན་འབྱུང་དེ་རྟོགས་པ་ལ་ངོ་མཚར་ཆེའོ་ཞེས་བསྔགས་བརྗོད་སངས་རྒྱས་བཅོམ་ལྡན་འདས་བདག་ཉིད་ཆེན་པོས་ཇི་སྟེ་གསུང་སྟེ་གསུངས་མི་རིགས་སོ། །གཉིས་པ་འཐད་ལྡན་རང་ལུགས་བཞག་པ་ནི། དེས་ན་རང་གི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། ཇི་སྐད་བསྟན་པ་དེས་ན་སྔ་འགྱུར་པ་རང་གི་ལུགས་མ་འཁྲུལ་པ་ལ་ནི་ཆུ་ཟླ་ཡི་སྣང་བ་དེ་ཉིད་ལ་རིགས་པས་བརྟགས་ན་ཆུ་ཟླ་དེ་ཉིད་ཕྱི་ནང་གཞན་སོགས་གང་དུའང་རང་གི་ངོ་བོ་ཅུང་ཟད་ཙམ་དུ་ཡང་མི་རྙེད་པས་མེད་པའམ་སྟོང་བཞིན་དུ་ཆུ་ཟླ་ཉིད་སྣང་བར་མངོན་སུམ་ཏུ་མཐོང་བའི་ཚེ་ན་ཆུ་ཟླ་ཉིད་ཡོད་མེད་ལ་སོགས་པའི་སྤྲོས་པ་ཀུན་དང་བྲལ་བའི་མེད་དགག་ཡིན་ཀྱང་རྟེན་འབྱུང་འགགས་པ་མེད་པས་སྣང་རུང་བ་དེ་འདྲའི་སྟོང་བ་དང་སྣང་བའམ་ཡོད་པ་གཉིས་མེ་དང་ཚ་བ་བཞིན་དུ་རྣམ་དབྱེར་མེད་པ་སོ་སྐྱེའི་བློར་མ་ཤོང་བས་འགལ་བ་ལྟར་སྣང་ན་ཡང་འདིར་ནི་མངོན་སུམ་དུ་སྟོང་དང་རྟེན་འབྱུང་ངམ་སྣང་སྟོང་གཉིས་མི་འགལ་བར་མ་ཟད་མེ་དང་ཚ་བ་བཞིན་དུ་དབྱེར་མེད་དམ་ཟུང་འཇུག་ཏུ་མཐོང་བ་འདི་ལ་ཨེ་མ་ཧོ་རྨད་བྱུང་བས་ཀྱང་འདི་རྨད་བྱུང་བའོ་ཞེས་ཤིན་ཏུ་ངོ་མཚར་བའི་ཚིག་གིས་མཁས་པ་ཆེན་པོ་སངས་རྒྱས་བཅོམ་ལྡན་འདས་ཐུགས་ཀྱི་སྲས་མཆོག་དང་བཅས་པ་རྣམས་ཀྱིས་མགྲིན་གཅིག་ཏུ་བསྔགས་འོས་མཆོག་ལ་བསྔགས་བརྗོད་ཀྱང་ཆེར་མཛད་པ་ཡིན་ནོ། །དེ་འདྲའི་གནས་ལུགས་སྣང་སྟོང་དབྱེར་མེད་དམ་ཟུང་འཇུག་གི་ངོ་བོར་ཆོས་ཀུན་གདོད་ནས་གནས་པའི་ཕྱིར་ངོ་བོ་སྟོང་པའི་ངོས་ནས་གཏན་ལ་ཕབས་པའམ་གཞལ་བ་ན་འཁོར་འདས་ཀྱིས་བསྡུས་པའི་ཆོས་སོ་ཅོག་ཀུན་ལ་རང་གི་ངོ་བོས་མི་སྟོང་བ་གང་ཅུང་ཟད་ཙམ་དུ་གྲུབ་པ་ཡོད་པ་མིན་པ་དེའི་ཕྱིར་ན་ཆོས་ཐམས་ཅད་མེད་ཅེས་སམ་སྟོང་པ་ཉིད་ཡིན་ནོ་ཞེས་མཐའ་གཅིག་ཏུ་སྨྲར་བཏུབ་ཀྱང་དེ་ལྟ་ནའང་མེད་པའམ་སྟོང་པ་དེའི་མེད་ཚུགས་སམ་སྟོང་ཚུགས་མ་ཤོར་བཞིན་དུ་རྟེན་འབྱུང་གི་སྣང་བ་སུས་ཀྱང་འགོག་ཏུ་མེད་པ་ཉིད་དུ་རང་ཤར་བས་དབྱིངས་དང་ཡེ་ཤེས་གཉིས་སུ་མེད་པར་ལྷུན་གྱིས་གྲུབ་ན་ཡང་སྣང་བ་དེའི་སྣང་ཚུགས་དེ་སྣང་བའི་སྣང་ཚུལ་མ་ཤོར་བཞིན་དུ་གཞི་མེད་རྩ་བ་དང་བྲལ་བའི་སྟོང་པ་ཆེན་པོར་ཡེ་ནས་གནས་པ་སྟེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་གསུངས་པ་བཞིན་དུ། མེ་དང་ཚ་བ་ཆུ་དང་རླན་ལྟར་རྣམ་དབྱེར་མེད་པའི་ཟུང་འཇུག་མཉམ་པ་ཉིད་སྣང་སྟོང་རིས་སུ་མ་ཆད་པས་སྤྲོས་པ་དང་བྲལ་བའི་གནས་ལུགས་དེ་ལ་ཀ་བ་དང་མྱང་འདས་ལ་སོགས་པའི་ཆོས་ཅན་འདི་སྟོང་བ་དང་བདེན་གྲུབ་ལ་སོགས་པའི་དགག་བྱ་འདིས་སྟོང་བ་དང་འདི་ནི་སྣང་བ་འདི་ནི་སྟོང་པའོ་ཞེས་པ་ལ་སོགས་པའི་གཉིས་ཆོས་ཀྱི་དབྱེ་བ་ཞིག་ནམ་ཡང་རྙེད་པ་མེད་པ་སྤྲོས་ཀུན་བྲལ་བའི་སྣང་སྟོང་རིས་སུ་མ་ཆད་པ་ལ་ངེས་ཤེས་ཀྱི་ཁོ་ཐག་ནང་ནས་ཆོད་པའི་ཚེ་ན་གནས་ལུགས་མཐར་ཐུག་རྟོགས་པ་དོན་དུ་གཉེར་ཞིང་ཚོལ་བའི་མཁན་པོ་མཁས་པ་རྣམས་ལ་སྟོད་ན་སྣང་མི་རུང་སྣང་ན་སྟོང་མི་རུང་ངོ་སྙམ་དུ་སྣང་སྟོང་འགལ་བར་འཛིན་པ་ལ་སོགས་པ་དོན་མེད་པའི་ལོག་པར་རྟོག་པས་གནས་ལུགས་མཐར་ཐུག་གི་དོན་ཟབ་མོ་རྟོགས་པར་དཀའ་བའི་གནས་ཟབ་མོ་ལ་ཡིད་ཆད་པའི་ཡིད་མུག་སྐྱེ་བ་མེད་ཀྱི་སྟེང་སྟེ་མེད་པར་མ་ཟད་སླར་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་ཤེས་ཀྱི་ཁོ་ཐག་ནང་ནས་ཆོད་པས་ཡིད་བདེ་བླ་ན་བྲལ་བ་ཐོབ་པ་ཉིད་ཤིན་ཏུ་ངོ་མཚར་ཆེ་སྟེ་སྔ་འགྱུར་རིག་འཛིན་བརྒྱུད་པའི་རང་ལུགས་བཟང་པོའི་འབྲས་རྟགས་ཡང་དག་པའོ། །ཞེས་སོ། །དེ་ལྟར་ན་སྤྱིར་མདོ་རྒྱུད་མན་ངག་ཟབ་མོའི་གསང་ཚིག །བོད་སྔ་ཕྱིའི་མཁས་པའི་ཞལ་བཞེས། གསང་སྔགས་གསར་རྙིང་གི་བཀའ་སྲོལ་ནང་གི་བྱེ་བྲག་མི་འདྲ་བ་དུ་མའི་ཐ་སྙད། ལྟ་སྒོམ་སྤྱོད་པའི་ཆོས་སྐད། ཕྱག་བཞེས་ཕྲིན་སྒྲུབ་ཀྱི་རྣམ་བཞག་སྣ་ཚོགས་པ་འདི་སྙེད་ཅིག་དར་ཞིང་བཞུགས་པའི་ནང་པ་སངས་རྒྱས་པ་མཉམ་མེད་ཤཱཀྱའི་རྒྱལ་པོའི་བསྟན་པ་འདི་ལ་རང་གཞན་སུས་ཀྱང་འགལ་འདུར་མི་རྟོག་པར་གདུལ་བྱའི་ཁམས་དབང་དང་བསམ་པ་བཞིན་རྒྱལ་བའི་ཕྲིན་ལས་འགོགས་པ་མེད་པར་གང་ལ་གང་འདུལ་དུ་རང་ཤར་བ་ལ་དད་པས་ཡིད་ཆེས་པར་བྱས་ཏེ་རྟོགས་པར་བྱ་དགོས་ཏེ། མགོན་པོ་བྱམས་པས། རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཉིད། །ཅེས་གསུངས་པ་ལྟར། དད་པས་ལེགས་པར་ཞུགས་ཏེ། རྒྱུ་མཚན་ཉིད་ཀྱི་ཐེག་པ་དྲང་ངེས་ལྡེམ་དགོངས། སྔགས་རྡོ་རྗེའི་ཐེག་པར་མཐའ་དྲུག་ཚུལ་བཞིའི་སྒོ་ནས་བསྟན་པ་རྣམས་ངང་པས་ཆུ་ལས་འོ་མ་བཞིན་དོན་ལ་རྟོན་པས་གནས་སྐབས་དང་། མཐར་ཐུག་གི་དགོངས་གནད་ཇི་བཞིན་ཉམས་སུ་བསྟར་བས་བསྟན་པ་ཐམས་ཅད་འགལ་མེད་དུ་རྟོགས་པ་དང་། གཞུང་ལུགས་ཐམས་ཅད་གདམས་པར་འཆར་བའི་བཤད་སྒྲུབ་ནི་མང་དུ་ཐོས་པའི་མཁས་པ་རྣམས་ཀྱིས་ཉམས་ལེན་ཐུགས་དམ་གྱིས་སྙིང་ནོར་དུ་བགྱི་འོས་དམ་པར་སྐྱེས་པས་ཆོས་དང་གང་ཟག་གཞན་ལ་ཞེན་ལྟ་དང་ཕྱོགས་ཞེན་རང་མཐོང་གི་སྡང་ཞུགས་མི་བྱ་ཞིང་། དེ་ལྟར་ན་ཡང་སྔོན་ལས་བཙན་པོས་རང་རང་དང་པོ་ཉིད་ནས་གསར་རྙིང་གང་ལ་འཕྲད་པའི་ཆོས་དང་གང་ཟག་ལ་ལོག་པར་མི་བལྟ་བར་བཤད་པ་དང་བསྒྲུབ་པའི་བཀའ་སྲོལ་སུན་མི་འབྱིན་པར་རང་ནུས་གང་ཡོད་ཀྱིས་བཟུང་ཞིང་བསྐྱང་ན་འདི་ཕྱིར་དགེ་ཞིང་བསྟན་འགྲོ་ལ་ཕན་པ་འབྱུང་ཞིང་དོན་གཉིས་ཀྱི་འབྱོར་བའི་དམ་པ་ཡང་དག་པར་འགྱུར་ལ། གཞན་དུ་དམ་ཚིག་ཉམས་པའི་ཆད་པ་མི་ཟད་པས་འདི་ཕྱིར་ཕུང་ཁྲོལ་མཐའ་ཡས་པར་འགྱུར་རོ། །དེས་ན་རིགས་པའི་གནས་ཆེན་ལྔ་ལ་སོགས་པར་སྐྱེས་སྦྱང་གི་བློ་གྲོས་ཆེ་ཞིང་། ཉམས་མྱོང་གི་དྲོད་ཚད་རྙེད་པས་བླ་མ་ལྷག་པའི་ལྷས་མངོན་སུམ་རྗེས་སུ་བཟུང་ཞིང་ལུང་བསྟན་ལེགས་པར་ཐོབ་པའི་མཁས་གྲུབ་དམ་པ་རྣམས་ཀྱིས་བསྟན་འགྲོར་སྨན་ངེས་ཀྱིས་མཁས་པའི་བྱ་བ་འཆད་རྩོད་རྩོམ་གསུམ་གྱི་དགག་སྒྲུབ་ཀྱི་རྩོད་རིགས་དོན་ལྡན་སུ་ལ་ཡོད་ཀྱང་རང་གཞན་གྱི་མཁས་པ་སུ་ཡང་དེ་ལ་ལོག་པར་མི་ལྟ་བར་གཟུ་བོར་གནས་པས་དགོངས་གནད་ལེགས་པར་འཚོལ་པར་བྱས་ན་བློ་གྲོས་ཟབ་མོའི་གསོས་སུ་འགྱུར་བས་ཕན་པ་མཆོག་ལས་གནོད་པ་ཅི་ཡང་མེད་ལ། དེ་ལྟར་མ་ཡིན་པར་གལ་ཏེ་རང་གར་སྡང་ཞུགས་ཀྱིས་སུན་ཅི་ཕྱིན་དང་སྒྲོ་བསྐུར་ཅི་ཐོན་བྱས་ན་ཅི་ཡང་མི་ཤེས་པའི་བླུན་པོ་བ་ལང་རྫི་ཡན་ཆད་ཀྱང་རི་བོང་ཅལ་འགྲོགས་ཀྱིས་དེའི་རབ་མདར་བསྙགས་ནས་ཡང་དག་པའི་ཆོས་དང་གང་ཟག་ལ་ལོག་པར་ལྟ་བས་བསྐུར་འདེབས་ཀྱི་ཉེས་པ་ཤིན་ཏུ་ཆེ་བས་གཞན་ཕུང་ཁྲོལ་ཆེན་པོར་སྦྱོར་ཞིང་རང་ཡང་དམ་པའི་རྣམ་ཐར་ལས་རིང་ཞིང་སྨྲ་ལ་དགའ་བའི་ཕུང་ཁྲོལ་གྱིས་ཟིན་ཅིང་ནང་ཆ་མངོན་པ་ཡིན་ཏེ། རྒྱལ་བ་སྲས་དང་བཅས་པའི་གསུངས་ལས་ཀྱང་རིང་ཞིང་ཤིན་ཏུ་མི་རུང་བ་ཞིག་སྟེ། ཇི་ལྟར་ན་བདག་ཅག་གི་སྟོན་པ་མཆོག་གི་མདོ་སྡེ་དགོངས་པ་ངེས་འགྲེལ་ལས་ཆོས་འཁོར་གསུམ་ལས་རིམ་པར་ཐ་མ་ལ་མཆོག་ཏུ་བསྟོད་ཅིང་བསྔགས་པ་དང་། དང་པོ་དང་བར་པ་གཉིས་ལ་སུན་འབྱིན་གྱི་སྨད་པར་མཛད་པ་ལ་སོགས་པ་སྡེ་སྣོད་གསུམ་པོར་དགག་སྒྲུབ་ཅི་རིགས་པས་བསྟན་པར་མཛད་པ་དང་། རྡོ་རྗེའི་ཐེག་པ་ལའང་རྒྱུད་སྡེ་གོང་འོག་ནང་གི་དབྱེ་བ་དང་བཅས་པའི་ཁྱད་པར་དང་དགག་སྒྲུབ་སྣ་ཚོགས་པས་གསལ་བར་བསྟན་པ་དང་། བསྲེགས་བཅད་བརྡར་བས་གསེར་བཞིན་དུ་ལེགས་པར་བརྟགས་ཏེ་བླངས་དགོས་པ་དང་། ཡང་དག་པར་བརྟགས་པའི་ཕན་ཡོན་ཀྱང་མཐའ་ཡས་པ་དག་གསུངས་ཤིང་། བརྟགས་ཚུལ་ཀྱང་མགོན་པོ་བྱམས་པའི་མན་ངག་ལས། བརྒལ་ལེན་གྱི་སྒོ་ནས་བརྟགས་པར་གསུངས་པ་དང་། དེ་ལྟར་བརྟགས་པ་ན་གཞན་ལ་གནོད་པར་གྱུར་ཀྱང་ཉེས་པ་མེད་པ་ཡང་། དཔལ་ལྡན་ཟླ་བས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་མེད། །ཅེས་གསུངས་པའི་ཕྱིར་རོ། །ཉེས་པ་མེད་པར་མ་ཟད་དེ་ལྟ་བུའི་ཚུལ་འདི་ཆོས་བསྲུང་བའང་ཡིན་ཏེ། ཏིང་འཛིན་རྒྱལ་པོ་ལས། དེ་ལ་ཆོས་སྲུང་བ་གང་ཞེ་ན། འདི་ལྟ་སྟེ་སངས་རྒྱས་ཀྱི་ཆོས་ལ་སྨོད་པ་རྣམས་ཆོས་དང་མཐུན་པར་ཚར་གཅོད་པའོ། །ཞེས་དང་། ཆོས་འཛིན་པའང་ཡིན་པར། ནམ་མཁའ་མཛོད་ཀྱིས་ཞུས་པ་ལས། རྒྱལ་བའི་བྱང་ཆུབ་མཚན་ཉིད་གང་བརྙེས་པ། །ཆོས་ཀྱི་མཚན་ཉིད་དེ་ཉིད་ཡང་འཛིན་ཅིང་། །གང་གི་རྡུལ་མེད་མཐའ་འདི་རབ་ཤེས་པ། །དེ་ནི་སངས་རྒྱས་ཀུན་གྱི་ཆོས་འཛིན་ཡིན། །ཞེས་དང་། དེ་ལྟར་ཆོས་བཟུང་བ་དེ་ནི་སངས་རྒྱས་ལ་བྱས་པ་བཟོ་བ་དང་། བསོད་ནམས་ཚད་མེད་པའང་ཐོབ་སྟེ། དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པའི་མདོ་ལས། འདི་ལྟར་རྒྱལ་བའི་ཆོས་ཀྱིས་ཉེར་གནས་ཤིང་། །ཆས་ཀྱིས་ངེས་པར་འབྱུང་གི་ཟང་ཟིན་མིན། །དེ་བས་གང་ཞིག་བདེ་གཤེགས་ཆོས་འཛིན་པ། །དེ་ནི་སངས་རྒྱས་ཀུན་ལ་བྱས་པ་བཟོ། །ཞེས་དང་། ནམ་མཁའ་མཛོད་ཀྱིས་ཞུས་པའི་མདོ་ལས། ཇི་ལྟར་བསྐལ་བ་བྱེ་བ་སྟོང་བརྗོད་ཀྱང་། །སངས་རྒྱས་ཡེ་ཤེས་མཐའ་ཡོད་མ་ཡིན་ལྟར། །དེ་བཞིན་གཤེགས་ཀྱི་དམ་ཆོས་འཛིན་པ་ཡི། །བསོད་ནམས་དེ་ཡང་ཚད་ཡོད་མ་ཡིན་ནོ། །ཞེས་གསུངས་པས་སོ། །དེའི་ཕྱིར་འཕགས་བོད་ཀྱི་མཁས་དབང་དག་གིས་དགོས་དབང་གིས་རྣམ་པར་དཔྱོད་པའི་དགག་སྒྲུབ་ཇི་སྙེད་པར་བཞུགས་པ་གང་ལ་ཡང་ལོག་པར་མི་རྟོག་པར་བློ་གཟུར་བོར་གནས་པས་དགོངས་གནད་ལེགས་པར་བཙལ་བས་རང་གི་རྣམ་དཔྱོད་ཀྱི་རྩལ་རྫོགས་ཤིང་མདོ་རྒྱུད་ངེས་དོན་གྱི་དགོངས་དོན་ཟབ་མོ་ཉམས་སུ་བསྟར་བས་ཡོན་ཏན་གྱི་ལུས་ཟུང་བརྟས་ཏེ་བསྟན་འགྲོའི་གསོས་སྨན་ཆེན་པོར་འགྱུར་བའི་དམ་པའི་རྣམ་ཐར་ཉམས་འོག་ཏུ་ཆུད་པར་འགྱུར་བས་ན་འདིར་ཡང་ད་ལྟར་བཞུགས་ཤིང་སླད་ནས་འབྱོན་པ་རྣམས་ལ་སྙིང་ནས་དེ་ལྟར་གསོལ་བ་ཡང་ཡང་འདེབས་པ་ལགས་ན་ཆོས་མཐུན་སྤྲང་པོའི་ངག་ལས་ཀྱང་བླང་བར་འོས་ཕྱིར་ཕྱོགས་དུས་ཀྱི་མཁས་པ་རྣམས་ཀྱིས་ཐུགས་དམ་སྙིང་ནོར་དུ་བཅིངས་ཏེ་དགག་པ་དང་སྒྲུབ་པའི་ཚུལ་གྱིས་བརྟགས་པ་འདི་དང་གཞན་འོག་མ་འོག་མ་ལ་སོགས་པ་ལའང་ཐུགས་དམ་རྒྱུད་བསྐུལ་དུ་དང་ལེན་མཛད་ནས་བག་ཡོད་པ་རྣལ་འབྱོར་དུ་བྱའོ་ཞེས་གོང་འོག་ཀུན་གྱི་བར་གྱི་གསལ་བྱེད་དུ་བསྟན་པ་འདི་དག་བསྙེལ་བ་མེད་པར་ཐུགས་ལ་བཅིངས་ཏེ་བལྟ་ཞིང་ཉམས་སུ་ལེན་པར་ཞུ་བའོ། །རང་སྟོང་གཞན་སྟོང་ཕན་ཚུན་ཆེར་རྩོད་ཀྱང་། །སྣང་སྟོང་ཕྱོགས་སུ་ལྷུང་ན་སུ་ལའང་སྐྱོན། །སྣང་སྟོང་མི་འགལ་ཟུང་འཇུག་གྲུབ་མཐའི་མཆོག །འདི་འཛིན་ཕྱོགས་ལས་རྣམ་པར་རྒྱལ་མིན་ནམ། །ཞེས་ཀྱང་སྨྲས་སོ། །དྲི་ལན་གཉིས་པ་ཉན་རང་དགྲ་བཅོམ་པས་ཆོས་ཀྱི་བདག་མེད་རྟོགས་པའམ་མ་རྟོགས་པ་གང་འཐད་ལ་གསུམ། མི་འཐད་པ་དགག་པ། འཐད་ལྡན་རང་ལུགས་བཞག་པ། དེས་ན་བྱམས་ཀླུ་དགོངས་པ་གཅིག་ཏུ་བསྟན་པའོ། །དང་པོ། འགའ་ཞིག་ཉན་རང་སོགས་ཚིགས་བཅད་དགུ་དང་རྐང་པ་གཅིག་གིས་བསྟན་ཏེ། དེ་ལ་སྔ་རབས་པ་འགའ་ཞིག་གིས་ཉན་རང་དགྲ་བཅོམ་པས་གང་ཟག་གི་བདག་མེད་པ་ཙམ་རྟོགས་ཀྱི་ཆོས་ཀྱི་བདག་མེད་པའི་སྟོང་པ་ཉིད་མ་རྟོགས་སོ་ཞེས་ཟེར་བ་ནི་མི་འཐད་དེ། ཇི་ལྟར་ན་ཕུང་པོ་མ་བརྟགས་མ་དཔྱད་པར་བརྟེན་ནས་བཏགས་པའི་ང་ཙམ་དུ་འཛིན་པའི་བདག་དེ་ནི་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན་ལ་དེ་མ་ཁེག་པ་དེ་སྲིད་དུ་དེའི་ཡུལ་ཅན་ངར་འཛིན་ལྷན་སྐྱེས་ཀྱང་མི་ཁེག་ལ་དེ་མ་ཁེག་ན་དེའི་ནུས་པས་ཆགས་སོགས་ཉོན་མོངས་པ་སྤོངས་བ་མེད་པས་ལས་དེས་ཐར་བ་ཙམ་ཡང་འཐོབ་པར་མི་ནུས་པ་དང་། བདག་དེའང་ཕུང་པོ་ལ་མ་བརྟགས་མ་དཔྱད་པར་བརྟེན་ནས་འབྱུང་བའམ་བཏགས་པ་ཙམ་དེ་ཉིད་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན་ལ་དེ་དང་ཡན་ལག་ལ་སོགས་པའི་ཚོགས་པ་དང་ལྟོ་ལྡིར་ཞབས་ཞུམ་པ་སོགས་ལ་བརྟེན་ནས་འབྱུང་བའམ་བཏགས་པའི་ཕུང་པོ་དང་བུམ་པ་ལ་སོགས་པའི་ཆོས་རྣམས་ལ་བརྟེན་ནས་བཏགས་པའི་སྟོང་གཞིའི་ཆོས་ཅན་གྱི་དབྱེ་བ་ཙམ་མ་གཏོགས་པར་ཆོས་དང་གང་ཟག་གི་བདག་རང་རང་གི་ངོ་བོས་གྲུབ་པ་མེད་པས་སྟོང་ཚུལ་ལ་ཁྱད་པར་འགའ་ཡང་མེད་པས་སྟོང་པ་ཉིད་དེ་ཆོས་དང་གང་ཟག་གི་བདག་གཉིས་ཀ་ལ་སོ་སོར་ཡང་ཡང་དག་པའི་རིགས་པས་དཔྱད་ན་རང་བཞིན་གྱིས་གྲུབ་པ་མེད་པས་སྟོང་པ་ཉིད་ཡིན་པའི་ཕྱིརརོ། །དེས་ན་ཤིང་དང་ཤ་བ་བཞིན་བདག་གཉིས་སྤྱི་དང་བྱེ་བྲག་དང་། བདག་མེད་གཉིས་ཀྱང་སྤྱི་དང་བྱེ་བྲག་ཙམ་དུ་ཤེས་པར་བྱའོ། །ཞེས་གསུངས། དེ་ལྟར་ཡིན་པར་རྒྱལ་བའི་ཡུམ་ལས་ཤེས་རབ་ཀྱི་ཕ་ཏུ་རོལ་ཕྱིན་པ་སྲས་བཞི་བསྐྱེད་པའི་ཡུམ་ཡིན་པས་དེ་ལ་བསླབ་པར་བྱ་བར་གསུངས་པ་དང་། ཀླུ་སྒྲུབ་ཡབ་སྲས་ཀྱིས་ཇི་སྲིད་ཕུང་པོར་འཛིན་ཡོད་པར་དེ་སྲིད་དུ་དེ་ལ་ངར་འཛིན་ཡོད་པ་དང་དེ་ཡོད་ན་ལས་ཉོན་གྱིས་དབང་གིས་འཁོར་བར་སྐྱེ་བར་འགྱུར་བ་དང་། ཡུལ་བདག་མེད་མཐོང་བས་སྲིད་པའི་ས་བོན་སྤངས་ནས་ཐལ་བ་ཐོབ་པར་གསུངས་པའི་ལུང་རྣམས་དང་། བརྟེན་ནས་བརྟགས་པའམ་རྟེན་འབྱུང་གི་ཆོས་དེ་སྟོང་པ་ཉིད་དུ་མ་རྟོགས་ན་ཕྱི་རོལ་བའི་ཆགས་བྲལ་བཞིན་དུ་སླར་ཉོན་མོངས་པ་སྐྱེ་བར་འགྱུར་བ་དང་སྲིད་པ་ལས་མི་གྲོལ་ཞིང་བརྟེན་ནས་བཏགས་པའམ་རྟེན་འབྱུང་རང་བཞིན་མེད་པས་སྟོང་ཉིད་རྟོགས་ན་རྣམ་པར་གྲོལ་བའི་ཐར་བ་ཐོབ་པའི་ཞི་སྒོ་གཉིས་སུ་མེད་པར་སྒྲུབ་པའི་རིགས་པ་དང་བཅས་པས་ཀྱང་མངོན་སུམ་བསྙོན་དུ་མེད་པར་གྲུབ་པ་ལས་བརྒལ་ནས་སུ་ཉན་རང་དགྲ་བཅོམ་པས་བརྟེན་ནས་བཏགས་པའི་སྟོང་པ་ཉིད་མ་རྟོགས་ཞེས་མཐའ་གཅིག་ཏུ་སྨྲ་བ་རྣམས་ནི་དམ་བཅའ་བ་ཙམ་དུ་ཟད་དེ་ལུང་རིགས་ཀྱིས་སྒྲུབ་བྱེད་མེད་པས་སོ། །ཡང་དེ་ལ་ཕྱི་རབས་པ་ཁ་ཅིག་ཧ་ཅང་ཐལ་ཆེས་པ་དག་ཐེག་པ་གསུམ་ཆར་གྱི་མཐོང་ལམ་སྤང་རྟོགས་མཉམ་པས་གཅིག་པ་དང་། ཉན་རང་བྱང་སེམས་འཕགས་པ་གསུམ་ཆར་ལྟ་བ་བདག་མེད་གཉིས་རྟོགས་པས་རྟོགས་པ་ལ་མཐོ་དམན་མེད་པར་འདོད་ཅིང་དེ་དང་འགལ་བ་ཐེག་གསུམ་གྱི་མཐོང་ལམ་སྤང་རྟོགས་མི་འདྲ་བ་དང་རྟོགས་པའི་ལྟ་བ་མཐོ་དམན་ཡོད་པ་གསུངས་པའི་ཤེར་ཕྱིན་དང་སྔགས་རྡོ་རྗེའི་ཐེག་པ་ལ་སོགས་པ་མདོ་དང་རྒྱུད་སྡེའི་གཞུང་དུ་མ་ཀུན་ཀྱང་དྲང་བའི་དོན་དུ་འགྲེལ་ཞིང་འཆད་པ་དག་ཤིན་ཏུ་མི་འཐད་དེ། ཇི་ལྟར་ན་དེ་ལ་དམན་པ་ཉན་རང་གི་ལམ་སྔོན་དུ་སོང་བའི་དགྲ་བཅོམ་པ་སླར་ཐེག་ཆེན་དུ་ཞུགས་ནས་བསྐལ་པ་གྲངས་མེད་ལ་སོགས་པར་ཚོགས་གཉིས་བསགས་ཏེ་མཐོང་ལམ་གྱི་ཡེ་ཤེས་ཐོབ་པ་དང་ས་ནས་སར་འཕར་བའི་སྒོམ་ལམ་གྱི་ཡེ་ཤེས་ཐོབ་པ་ལ་སོགས་པའི་ཚེ་ན་ཉོན་སྒྲིབ་ནི་སྤངས་ཟིན་ལ་ཤེས་སྒྲིབ་ནི་མ་དག་ས་བདུན་དུ་མི་སྤོང་བར་ཁས་བླངས་པའི་ལུགས་ལ་སྤང་བྱ་ཅུང་ཟད་དམ་ཕྲ་བའང་མེད་པ་དང་། དེ་མེད་པས་རྟོགས་པའི་ཡེ་ཤེས་དེ་ལ་དགོས་ནུས་མེད་པ་དང་། གྲངས་མེད་ཀྱི་ཚོགས་གཉིས་དོན་མེད་པར་འགྱུར་བ་དང་། ཐེག་པ་མཆོག་དམན་དང་ལམ་ཟབ་མི་ཟབ་དབང་པོ་རྣོ་བརྟུལ་དྲངས་ངེས་སོགས་གོ་བཟློག་པ་ལ་སོགས་པའི་འགལ་འདུའི་སྐྱོན་གྱི་ཕུང་པོ་ཆེན་པོའི་རིགས་པས་གནོད་པ་ལན་གྱི་བཟློག་ཏུ་མེད་པ་ཐོག་ལྟར་དུ་འབབ་པར་འགྱུར་བ་དང་། སྐྱོན་གཞན་ཡང་རྟོགས་བྱ་བདག་མེད་གཉིས་ཇི་བཞིན་རྟོགས་པར་གྱུར་ཀྱང་རྟོགས་པའི་ཡེ་ཤེས་དེས་སྤང་བྱ་ཤེས་སྒྲིབ་སྤོང་བར་གྲོགས་བསོད་ནམས་ཀྱི་ཚོགས་མཐའ་ཡས་པའི་བརྒྱན་དགོས་པས་ན་དོན་མེད་དུ་མི་འགྱུར་རོ་ཟེར་ན་ཡང་མི་འཐད་དེ། དམན་ལམ་སྔོན་སོང་དེས་རྟོགས་བྱ་བདག་མེད་གཉིས་ཇི་ལྟར་བ་བཞིན་མ་རྟོགས་པར་གྱུར་ན་དེ་རྟོགས་པར་རང་གིས་ཁས་བླང་བ་དང་འགལ་བ། གལ་ཏེ་དེ་རྟོགས་པར་གྱུར་ན་དེས་སྤང་བྱ་མི་སྤོང་བ་ཡང་འགལ་ཏེ། གཉེན་པོ་ཡེ་ཤེས་ཀྱིས་སྤང་བྱ་མི་སྤོང་ན་གཞན་སྲིད་པ་གསུམ་ན་སྤང་བྱ་སྤོང་བའི་གཉེན་པོ་མི་སྲིད་དེ། དཔེར་ན་ཉི་མ་སྤྲིན་དང་བྲལ་བ་ཡང་དག་པ་ཤར་ཡང་མུན་པའི་དཔུང་འཇོམས་པ་ལ་གྲོགས་སྒྲོན་མེ་སོགས་གཞན་ལ་ལྟོས་དགོས་པར་ཁས་ལེན་པ་འདི་ནི་ངོ་མཚར་ཆེ་སྟེ་བཞད་གད་ཀྱི་གནས་སོ། །ཡང་དེ་ལ་ཕྱི་རབས་ཁ་ཅིག་ཉན་ཐོས་དགྲ་བཅོམ་པས་རང་རྒྱུད་ཀྱི་ཕུང་པོ་ལྔ་པོ་སྟོང་ཉིད་དུ་རྟོགས་པར་གྱུར་ཀྱང་དེ་ལས་ཆོས་གཞན་བདག་མེད་དམ་སྟོང་པ་ཉིད་དུ་མི་རྟོགས་སོ་ཞེས་ཟེར་བ་ཡང་མི་འཐད་དེ། ཇི་ལྟར་ན་འདུས་བྱས་ཀྱི་ཆོས་ཐམས་ཅད་ཕུང་པོ་ལྔར་འདུས་པས་ཕུང་པོ་ལྔ་པོ་སྟོང་པ་ཉིད་དུ་རྟོགས་པར་གྱུར་ན་དེ་ལས་གཞན་ནམ་མཁའ་སོགས་འདུས་མ་བྱས་པ་ཙམ་ཞིག་མ་གཏོགས་པའི་ཆོས་སྟོང་པ་ཉིད་དུ་མ་རྟོགས་པའི་དངོས་པོ་གཞན་ཅི་ཞིག་ཡོད་དེ་མེད་ལ་མཁའ་སོགས་འདུས་མ་བྱས་ནི། ཇི་སྐད་དུ། ནམ་མཁའ་མོ་གཤམ་བུ་དང་མཚུངས་ཞེས་པ་ལྟར་ཐ་སྙད་དུ་ཡང་མ་གྲུབ་ན་དོན་དམ་པར་ལྟ་ཅི། དེས་ན་རིགས་པར་སྨྲ་བས་བརྟག་བྱར་ཡང་མི་མཛད་པས་སྟོང་པར་རྟོགས་སླ་བ་དང་། ཉན་ཐོས་མདོ་སྡེ་པ་རང་གིས་ཀྱང་འདུས་མ་བྱས་རྣམས་བཏགས་པ་ཙམ་ལས་དངོས་པོར་མེད་པར་འདོད་པས་ཀྱང་གནོད་དོ། །གཉིས་པ་ལ་གསུམ། དཔལ་ལྡན་ཟླ་བས་ཇི་ལྟར་བསྟན་ཚུལ། རང་ལུགས་ཀློང་ཆེན་ཞབས་ཀྱིས་དེ་ལྟར་བཞེད་ཚུལ། དེ་ལ་དོགས་པ་བསལ་ཏེ་མཐར་ཐུག་ཆོས་ཀྱི་བདག་མེད་ངེས་པར་རྟོགས་དགོས་ཚུལ་བསྟན་པའོ། །དང་པོ། དེས་ན་རང་ལུགས་སོགས་ཚིགས་བཅད་གསུམ་དང་རྐང་པ་གཅིག་གིས་བསྟན་ཏེ། དེས་ན་སྔ་འགྱུར་རང་ལུགས་འཁྲུལ་བ་དང་བྲལ་བ་ཉིད་གང་ཡིན་ཞེ་ན། དཔལ་ལྡན་ཟླ་བའི་དབུ་མ་འཇུག་པ་རང་འགྲེལ་དུ་ཞི་སྒོ་གཉིས་སུ་མེད་པའི་སྟོང་པ་ཉིད་རྟོགས་དགོས་པར་ལུང་རིགས་ཀྱིས་སྒྲུབ་བསྒྲུབ་ནས་སླར་སྟོང་ཉིད་དེའི་རབ་ཏུ་དབྱེ་བ། བདག་མེད་འདི་ནི་འགྲོ་བ་རྣམ་གྲོལ་ཕྱིར། ཞེས་པའི་ཐད་ཀྱི་འཇུག་པར་རང་འགྲེལ་ལས་ཉན་རང་དང་བྱང་སེམས་ཀྱིས་རྟོགས་པའི་སྟོང་ཉིད་ཀྱི་རབ་དབྱེ་འདི་ལྟར་བསྟན་ཏེ་ཉོན་མོངས་པའི་སྒྲིབ་པ་སྤང་བའི་ཕྱིར་ཉན་རང་རྣམས་ལ་རྒྱལ་བས་གང་ཟག་གི་བདག་མེད་པའི་སྟོང་ཉིད་བསྟན་པ་དང་། ཤེས་བྱའི་སྒྲིབ་པ་སྤངས་པའི་ཕྱིར་རྒྱལ་སྲས་བྱང་ཆུབ་སེམས་དཔའ་རྣམས་ལ་ཆོས་ཐམས་ཅད་སྟོང་པའམ་བདག་མེད་པ་རྫོགས་པར་བསྟན་པར་མཛད་ལ་ཞེས་གསུངས་སོ། །འོ་ན་ཉན་རང་གཉིས་པོ་ལ་སྔར་སྟོང་པ་ཉིད་རྟོགས་པ་ཡོད་དོ་ཞེས་ལུང་དང་རིགས་པ་གང་སྨྲས་པ་དེ་ཇི་ལྟར་ཡིན་ཞེ་ན། ཅེས་རང་གཞུང་ལ་རང་གིས་དོགས་པ་བསླངས་ཏེ་བསལ་བ་ཉན་རང་དེ་དག་རང་འབྲས་དགྲ་བཅོམ་པ་དོན་དུ་གཉེར་བས་དེ་འཐོབ་པ་ལ་གཙོ་བོར་སྒྲིབ་པའི་ཀུན་ནས་ཉོན་མོངས་པ་སྟེ་ཉོན་སྒྲིབ་ཙམ་སྤངས་དགོས་པའི་ཕྱིར་དེའི་རྩ་བ་ངར་འཛིན་ལྷན་སྐྱེས་ཀྱི་གང་ཟག་གི་བདག་དེ་མེད་པའི་སྟོང་པ་ཉིད་རྟོགས་ཤིང་སྒོམ་གྱི་གཞན་ཆ་མེད་གཉིས་སོགས་ཆོས་ཀྱི་བདག་མེད་པའི་སྟོང་པ་ཉིད་རྫོགས་པར་ནི་རྟོགས་ཤིང་སྒོམ་པ་མེད་ཅེས་པ་དང་སྟོང་ཉིད་བཅུ་དྲུག་པོ་ཐེག་ཆེན་ཐུན་མོང་མིན་པར་བཤད་པས་རང་བཞེད་རང་གིས་གསལ་བར་བཀྲལ་ཏེ་གསུངས་པ་བཞིན་དུ་ཤེས་པར་བྱ་བ་ཁོ་ན་ལས་གཞན་དུ་རྟོགས་པར་མི་བྱའོ། །གཉིས་པ་ཀློང་ཆེན་རབ་འབྱམས་སོགས་ཚིགས་བཅད་དྲུག་དང་རྐང་པ་གཉིས་ཀྱིས་བསྟན་ཏེ། དཔལ་ལྡན་ཟླ་བས་ཇི་ལྟར་བཞེད་པ་དེ་བཞིན་དུ་རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཀྱི་ཞལ་སྔ་ནས་འདི་ལྟར་སྔོན་གྱི་སློབ་དཔོན་མཁས་པ་ཐམས་ཅད་ནི་ཉན་རང་ལ་ཆོས་ཀྱི་བདག་མེད་པ་ཡོད་དང་མེད་ཅེས་ཕན་ཚུན་རྩོད་པར་མཛད་ན་ཡང་ཁོ་བོ་རང་གིས་བཞེད་པ་ནི་སྔོན་གྱི་ཉན་རང་རྣམས་ལ་དབང་པོ་རྣོ་བརྟུལ་ཅི་རིགས་པ་ཡོད་པར་སྣང་ན་ཡང་རང་འབྲས་དགྲ་བཅོམ་པ་ཉིད་འཐོབ་པ་ལ། ཕུང་པོར་བརྟེན་ནས་བཏགས་པ་ངའོ་སྙམ་དུ་འཛིན་པའི་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་རང་བཞིན་གྱིས་གྲུབ་པ་མེད་པའི་སྟོང་བར་མ་རྟོགས་པ་དེ་སྲིད་དུ་རང་འབྲས་ཐར་བ་དེ་ཉིད་འཐོབ་པ་མིན་པས་བརྟེན་ནས་བཏགས་པའི་རྟེན་འབྱུང་ངར་འཛིན་ལྷན་སྐྱེས་ཀྱི་བདག་རང་བཞིན་མེད་པའི་སྟོང་པ་ཉིད་དེ་ཙམ་ཞིག་རྟོགས་པ་ཡོད་པས་དགྲ་བཅོམ་པ་ཐོབ་ན་ཡང་ཆ་མེད་གཉིས་སོགས་ཆོས་ཐམས་ཅད་བདག་མེད་པའི་སྟོང་པ་ཉིད་རྫོགས་པར་རྟོགས་པ་མེད་དེ། དཔེར་ན་ཆུང་ངུ་ཡུངས་འབྲུ་སྲིན་གྱིས་ཟོས་ཤིང་ཕུག་པ་ཡི་ནང་གི་ནམ་མཁའ་བཞིན་དུ་ཉན་རང་གི་བདག་མེད་རྟོགས་པའི་སྟོང་ཉིད་ཆུང་ངུར་མདོ་ལས་གསུངས་པ་སྟེ་དེ་ཡི་ཕྱིར་ན་སྟོང་ཉིད་རྟོགས་པ་དམན་པ་ལ་དགག་པའི་སྒྲས་སྟོང་པ་ཉིད་མ་རྟོགས་ཞེས་བཞེད་པར་ཡིད་བཞིན་རིན་པོ་ཆེའི་མཛོད་འགྲེལ་དུ་གང་གསུངས་པ་འདི་ནི་སྔོན་ཆད་མ་བྱུང་བས་ཕུལ་དུ་བྱུང་བའི་ལེགས་པར་བཤད་པ་ཉིད་དེ་འདི་དང་མཚུངས་པའི་ལེགས་པར་བཤད་པ་གཞན་གཅིག་ཀྱང་རང་གཞན་སུ་ལའང་མ་མཆིས་ཏེ། དཔེར་ན་རྒྱ་མཚོ་ཆེན་པོའི་ཆུ་ལས་ཧུབ་གང་ཙམ་ཞིག་བཏུང་ན་ཡང་དེ་ཙམ་གྱིས་རྒྱ་མཚོ་ཆེན་པོའི་ཆུ་ནི་མ་བཏུང་ངོ་ཞེས་སུ་ཁས་ལེན་དུ་མི་རུང་བར་ལྟར་ཆོས་ཀྱི་བྱེ་བྲག་ངར་འཛིན་ལྷན་སྐྱེས་ཀྱི་ཞེན་ཡུལ་ང་ཙམ་པོ་སྟོང་པའམ་བདག་མེད་པར་མཐོང་བའི་ཕྱིར་སྟོང་པ་ཉིད་མཐོང་བར་འདོད་དགོས་ལ་འོན་ཀྱང་རྒྱ་མཚོའི་ཆུ་ཧུབ་གཅིག་བཏུང་བས་རྒྱ་མཚོའི་ཆུ་ཡོངས་སུ་རྫོགས་པར་ཁོང་དུ་མ་སོང་བ་ལྟར་དུ་མཐའ་དག་ཤེས་བྱའི་རང་བཞིན་མ་ལུས་པ་ཀུན་སྟོང་པར་རྟོགས་པ་མེད་པའི་ཕྱིར་ན་བདག་མེད་དམ་སྟོང་པ་ཉིད་རྫོགས་པར་མ་མཐོང་ཞེས་འདོད་དགོས་སོ། །གསུམ་པ་ལ་གསུམ། སྤྱིར་བསྟན་པ་དང་། བྱེ་བྲག་ལུང་དོན་ལེགས་པར་བཀྲལ་ཏེ་འཁྲུལ་བ་བསལ་བ། དེ་ཁོ་ན་ཉིད་མཐོང་བས་ཐེག་གཅིག་འགྲུབ་ཚུལ་གསུངས་པ་གཞན་ལ་མི་འཐད་ཅིང་རང་ལ་འཐད་ཚུལ་བསྟན་པའོ། །དང་པོ། གལ་ཏེ་ཆོས་གཅིག་སོགས་ཚིགས་བཅད་བཅུ་གསུམ་དང་རྐང་པ་གཅིག་གིས་བསྟན་ཏེ། དཔེར་ན་འདམ་བུ་གཅིག་ཁོང་སྟོང་དུ་མཐོང་ན་འདམ་བུ་ཐམས་ཅད་ཁོང་སྟོང་དུ་མཐོང་བ་ལྟར་འདིར་ཡང་གལ་ཏེ་ཆོས་གཅིག་ཅེས་གང་ཟག་གི་བདག་སྟོང་ཉིད་དུ་མཐོང་ཞིང་རྟོགས་ན་ཆོས་གཞན་ཐམས་ཅད་སྟོང་ཉིད་དུ་མཐོང་ཞིང་རྟོགས་རིགས་ན་ཡང་ཆོས་གཞན་ཐམས་ཅད་སྟོང་པ་ཉིད་དུ་མི་མཐོང་ཞེས་པ་འདི་ཅི་ཞེ་ན། དེ་ལྟར་གཟུགས་ལ་སོགས་པའི་ཆོས་ཐམས་ཅད་ལ་དེ་གས་རང་བཞིན་མེད་པར་སྟོན་པའི་ངེས་པའི་ལུང་དང་ཡང་དག་པའི་རིགས་པ་དང་ཟབ་མོའི་མན་ངག་གིས་བརྟན་ས་ཤིང་མཐོང་བ་དོན་དུ་གཉེར་ན་ཆོས་གཅིག་སྟོང་བར་མཐོང་བ་དེ་ལྟར་ཆོས་གཞན་ཐམས་ཅད་སྟོང་པ་ཉིད་དུ་མཐོང་མོད་ཀྱི། འོན་ཀྱང་རེ་ཞིག་དམན་པ་ཉན་ཐོས་ཀྱི་རིགས་ཅན་རྣམས་ནི་རང་ཉིད་འཁོར་བར་སྐྲག་ནས་ཞི་བདེའི་ཐར་བ་ཙམ་ཞིག་དོན་དུ་གཉེར་བས་གང་ཟག་གི་བདག་མེད་ཙམ་ཁོ་ན་རྟོགས་པ་ལ་དོན་དུ་གཉེར་ཞིང་ཞེན་པས་བསྒོམ་གྱི་མཐའ་གཞན་ཆོས་ཐམས་ཅད་སྟོང་པ་ཉིད་དུ་རྟོགས་པས་དོན་དུ་མི་གཉེར་བས་རྟོགས་པར་དཀའ་སྟེ། དཔེར་ན་བུམ་པ་བཏགས་པར་ཏེ་བཏགས་ཡོད་དུ་འདོད་པ་ཉན་ཐོས་པ་རྣམས་ཀྱིས་ཀྱང་རྡུལ་ཕྲན་ཏེ་ཕྲ་རྡུལ་བཏགས་ཡོད་དུ་མི་འདོད་པར་རྫས་སུ་ཡོད་པར་འདོད་པ་བཞིན་ཡིན་ལ་གལ་ཏེ་ཉན་ཐོས་རྣམས་ཀྱིས་བུམ་པ་བཏགས་པར་ནི་སྟེ་བཏགས་ཡོད་ཙམ་དུ་རྟོགས་པའི་བློ་རིགས་དེས་ཕྲ་རྡུལ་ལ་ཡང་ལེགས་པར་དཔྱད་ན་བརྟགས་ཡོད་ཙམ་དུ་རྟོགས་པ་རིགས་མོད་ཀྱི་དེ་ལྟ་ནའང་རེ་ཞིག་ཕྲ་རྡུལ་བཏགས་ཡོད་དུ་མ་རྟོགས་པར་རྫས་ཡོད་དུ་འཛིན་གྱི་རྫས་ཀྱིས་སྟོང་པར་མཐོང་མི་དགོས་པ་དེ་བཞིན་དུ་ཆོས་གཅིག་སྟོང་པར་མཐོང་ཡང་ཆོས་ཐམས་ཅད་སྟོང་པར་མཐོང་དགོས་པ་མིན་ནོ། །དེར་མ་ཟད་རགས་པའི་གཞི་ཆ་བཅས་བཏགས་ཡོད་དང་ཆ་མེད་ཀྱི་རྡུལ་རྫས་ཡོད་བདེན་གྲུབ་དག་དངོས་སུ་འགལ་བར་སྣང་ན་ཡང་ད་དུང་འགལ་འདུའི་དངོས་པོ་དེ་དག་ལ་རེ་ཞིག་ཏུ་ཕྲ་རྡུལ་རང་བཞིན་མེད་པར་སྟོན་པའི་ངེས་པའི་ལུང་དང་ཟབ་མོའི་མན་ངག་གིས་དབེན་ཅིང་མེད་པའི་ཕྱིར་མི་འགལ་བའི་གྲུབ་མཐའ་བཟུང་ནས་བསྒྲུབས་པར་བྱེད་དོ། །དེ་བཞིན་དུ་དེ་ལྟར་མ་ཡིན་པར་ཆོས་གཅིག་སྟོང་པར་མཐོང་བས། ཆོས་ཐམས་ཅད་སྟོང་ཉིད་དུ་ངེས་པར་རྟོགས་དགོས་ན། ཐེག་ཆེན་སེམས་ཙམ་པ་དག་གིས་ཀྱང་གཟུང་བ་རང་བཞིན་མེད་པའི་སྟོང་པ་ཉིད་དུ་རྟོགས་ན་བློ་དེས་འཛིན་པ་ཡང་རང་བཞིན་མེད་པའི་སྟོང་པ་ཉིད་དུ་ཅི་ཡི་ཕྱིར་མི་རྟོགས་ཏེ་རྟོགས་དགོས་པ་དང་། དབུ་མ་རང་རྒྱུད་པས་ཀྱང་དོན་དམ་པར་ཆོས་ཐམས་ཅད་བདེན་གྲུབ་མེད་པའི་སྟོང་པ་ཉིད་དུ་རྟོགས་པའི་རིགས་པ་དེས་ཐ་སྙད་དུ་ཡང་རང་མཚན་གྱིས་གྲུབ་པ་མེད་པས་སྟོང་པ་ཉིད་ཡིན་པར་ཅིས་མི་རྟོགས་ཏེ་རྟོགས་དགོས་པར་འགྱུར་ཏེ། དེས་ན་གྲུབ་མཐའ་སྨྲ་བ་དེ་ཐམས་ཅད་དབུ་མ་ཐལ་འགྱུར་བ་འབའ་ཞིག་གམ་ཁོ་ན་ཉིད་དུ་ཁྱོད་ལ་ཐལ་བར་འགྱུར་ལ། དེ་ལྟར་ན་ཉན་རང་རྣམས་ཀྱིས་ཐེག་པ་ཆེན་པོ་ཡུམ་རྒྱས་འབྲིང་སོགས་ལ་སངས་རྒྱས་ཀྱི་བཀའ་མ་ཡིན་པ་ལ་སོགས་པས་བསྐུར་པ་འདེབས་ཤིང་སྨོད་པའང་ག་ལ་སྲིད་དེ་མི་སྲིད་པར་འགྱུར་རོ། །རྒྱུ་མཚན་དེས་ན་ཆོས་གཅིག་གི་རང་བཞིན་ཆོས་ཀྱི་དབྱིངས་ཉིད་ཆོས་ཀུན་ལ་མཉམ་པ་ཉིད་ཡིན་པས་རྣམ་དབྱེར་མེད་ན་ཡང་ཕྱི་དང་ནང་གི་ཡོངས་འཛིན་ལ་སོགས་པའི་རྐྱེན་གྱི་ཚོགས་པ་ཇི་ལྟར་བ་བཞིན་མ་ཚང་བ་དེ་སྲིད་དུ་ཆོས་ཐམས་ཅད་སྤྲོས་པ་ཐམས་ཅད་དང་བྲལ་བའི་ཆོས་ཀྱི་དབྱིངས་མཉམ་པ་ཆེན་པོར་རྟོགས་པ་བུལ་བ་ཡིན་པས་ན་རེ་ཞིག་དེ་ལྟར་རྟོགས་པ་མི་འགྱུར་ཏེ། སྤྱིར་ན་དབང་པོའི་ཁྱད་པར་ལས་དབང་པོ་ཤིན་ཏུ་རྣོན་པོས་རང་སྟོབས་ཀྱིས་སྤྲོས་པ་དང་བྲལ་བའི་སྟོང་པ་ཉིད་རྟོགས་པ་ཡོད་ཀྱི་དབང་པོ་རྟུལ་པོ་ཡིས་གཞན་ལ་མི་ལྟོས་པ་རང་གིས་དེ་མ་ཐག་ཏུ་ཡང་སྤྲོས་པ་དང་བྲལ་བའི་སྟོང་པ་ཉིད་ངེས་པར་རྟོགས་པའི་ཁྱབ་པ་མེད་ཀྱང་ནམ་ཞིག་ན་ཅིས་ཀྱང་སྟོང་པ་ཉིད་རྟོགས་པར་ངེས་ཏེ་ཉན་རང་དགྲ་བཅོམ་པ་རྣམས་ཕུང་པོ་ལྷག་མེད་དུ་འགོག་པའི་དབྱིངས་སུ་ཞུགས་ནས་བསྐལ་པ་སྟོང་ཕྲག་བཅུ་ཡི་མཐར་དེ་བཞིན་གཤེགས་པས་བསྐུལ་ཏེ་འགོག་པའི་དབྱིངས་དེ་ལས་སླར་དགྲ་བཅོམ་པ་རྣམས་ལྡང་སྟེ་གཟོད་ཐེག་པ་ཆེན་པོར་འཇུག་པར་དམ་ཆོས་པདྨ་དཀར་པོ་ལས་གསུངས་པས་སོ། །གཞན་ཡང་དབང་རྣོན་བྱང་ཆུབ་སེམས་དཔའི་རིགས་ཅན་རྣམས་ཕྱི་ནང་གི་ཡོངས་འཛིན་ཚང་བས་ཚུལ་ཇི་ལྟ་བ་བཞིན་དུ་ཐེག་པ་ཆེན་པོར་ཡང་དག་པར་ཞུགས་པས་ཀྱང་ཆོས་ཐམས་ཅད་སྤྲོས་པ་དང་བྲལ་བའི་སྣང་སྟོང་མཉམ་པ་ཆེན་པོ་བདག་མེད་མཐའ་དག་རྟོགས་པ་ལ་གྲངས་མེད་པའི་བསྐལ་པར་ཐབས་མཁས་དང་བཅས་པར་འབད་པ་ཆེན་པོས་གོམས་དགོས་ན་ཉན་ཐོས་རང་དོན་ཞི་བདེ་དོན་དུ་གཉེར་བས་མི་ཚེ་གསུམ་ལ་སོགས་པའམ་འགོག་པའི་དབྱིངས་སུ་བསྐལ་པ་སྟོང་ཕྲག་བཅུ་ལ་ཞུགས་པས་དུས་ཐུང་ངུ་དེ་ཙམ་ལ་བདག་མེད་མཐའ་དག་གམ་སྤྲོས་ཀུན་བྲལ་བའི་སྟོང་ཉིད་སྣང་སྟོང་མཉམ་པ་ཆེན་པོ་རྫོགས་པར་མ་རྟོགས་ཤིང་གཟོད་རྟོགས་དགོས་པའི་གནས་སྐབས་ཞིག་མི་སྲིན་པར་ཅི་ལ་འགྱུར་ཏེ་ཤིན་ཏུ་སྲིད་པ་འགྱུར་རོ། །དེ་མ་ཟད་ཐེག་ཆེན་འཕགས་པ་ས་ཐོབ་རྣམས་ལའང་རྫོགས་སྨིན་སྦྱངས་པའི་སྟོབས་ཀྱིས་ས་ནས་སར་ཆོས་ཀྱི་དབྱིངས་སྒྲིབ་པ་ལས་གྲོལ་བའི་མཐོང་བ་ཇེ་བས་ཇེ་གསལ་དུ་གོང་ནས་གོང་དུ་རྫོགས་པའང་ཡོད་པ་མིན་ནམ་སྟེ་ཡོད་ན་ཉན་རང་དགྲ་བཅོམ་པ་ལྟ་ཅི་སྨོས་སོ། །དེ་ལྟར་རྟོགས་པ་ལ་ཡང་སྦྱིན་པ་དང་ཚུལ་ཁྲིམས་སོགས་ཚོགས་མཐའ་ཡས་པ་བསགས་པའི་གྲོགས་དང་གཏན་ཚིགས་ཆེན་པོ་ལྔ་ལ་སོགས་པའི་རིགས་པའི་སྒོ་མཐའ་ཡས་པའི་ཚུལ་ཟབ་མོ་རྣམས་དང་བྱང་ཆུབ་སེམས་དཔའ་རྣམས་ཀྱི་རྫོགས་སྨིན་སྦྱང་བ་སོགས་ཀྱི་སྤྱོད་པ་དང་ཡོངས་བསྔོའི་རྐྱེན་ཕན་ཚུན་ཚོགས་པ་མ་ཚང་མེད་པར་ལེགས་པར་ཚང་ན་ངེས་པར་དུས་ཐུང་ངུའི་སྣང་སྟོང་དབྱེར་མེད་སྤྲོས་བྲལ་མཉམ་པ་ཆེན་པོ་རྫོགས་པར་རྟོགས་པར་འགྱུར་ཏེ། དཔེར་ན་རྡོ་རྗེ་ཐེག་པའི་ཐབས་ལ་མཁས་པའི་རྐྱེན་ཕུན་སུམ་ཚོགས་པ་ཚང་བས་ཉེ་ལམ་ཟབ་མོ་སྔགས་ཀྱིས་གནས་ལུགས་ཟབ་མོ་ཉིད་བདེ་མྱུར་དུ་རྟོགས་པ་ཡོད་པ་བཞིན་ནོ། །གཉིས་པ། རྟག་བདག་སྤངས་ཀྱང་སོགས་ཚིགས་བཅད་ལྔས་བསྟན་ཏེ། རིན་ཆེན་ཕྲེང་བ་ལ་སོགས་པའི་ལུང་དོན་ཇི་ལྟར་བཀྲལ་ན་ཕུང་པོ་ལ་རྟེན་ནས་བརྟགས་པ་ཙམ་གྱི་སྟོང་པར་ཁོང་དུ་མ་ཆུད་པར་ཕུང་པོ་ཉིད་ནི་ངེས་པར་ཡོད་ཀྱི་ཕུང་པོ་འདི་ལ་དབང་བྱེད་པའམ་བདག་པོར་གྱུར་པའི་བདག་རྟག་གཅིག་རང་དབང་ཅན་ཕྱི་རོལ་པས་ཀུན་ཏུ་བརྟགས་པའི་རྟག་པའི་བདག་དེ་འདྲ་མེད་པར་ཤེས་ནས་སྤངས་པར་གྱུར་ཀྱང་དེས་ངར་འཛིན་ཕྲ་བ་མི་སྤོང་སྟེ་འཁོར་རྩ་ལྷན་སྐྱེས་ཀྱི་བདག་འཛིན་ནམ་ངར་འཛིན་གྱི་ཕུང་པོ་རིལ་པོར་འཛིན་པ་ལ་བརྟེན་ནས་འཇུག་པའམ་སྐྱེ་བར་འགྱུར་བ་དེའི་ཕྱིར་ཇི་སྲིད་ཕུང་པོར་འཛིན་པ་ཡོད་པ་དེ་སྲིད་དུ་དེ་ལ་ངར་འཛིན་ཡོད་པར་གསུང་བའི་ལུང་གི་དོན་ནི་འདི་ལྟར་བདག་ངོ་བོས་གྲུབ་པ་མེད་པའི་སྟོང་པ་ཉིད་མ་མཐོང་བར་དུ་རྟག་བདག་སྤངས་ཀྱང་རུང་། གདགས་བཞི་རང་རྒྱུད་ཀྱི་ཕུང་པོ་ཡོད་པར་གྱུར་ཅིང་དེར་རིལ་པོར་འཛིན་པའི་སེམས་པ་ཡོད་པ་ཇི་སྲིད་དུ་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་ཏུ་གདགས་པའི་རྒྱུ་གེགས་མེད་པ་ཚང་བས་འབྲས་བུ་ངར་འཛིན་ལྷན་སྐྱེས་སམ་བདག་འཛིན་ལྷན་སྐྱེས་དེ་མི་ལྡོག་བར་གསུངས་པ་ཡིན་ཏེ། གང་ཕྱིར་རྟག་པའི་བདག་མེད་པར་ཤེས་ནས་སྤང་བར་གྱུར་ཀྱང་ལྷན་སྐྱེས་ཀྱི་ངར་འཛིན་སྤངས་མི་ནུས་པ་ནི་གདགས་གཞིར་ཏེ་ཕུང་པོར་རིལ་པོར་འཛིན་པ་ལ་བརྟན་ནས་བཏགས་པའི་ངའམ་བདག་ངར་འཛིན་ལྷན་སྐྱེས་ཀྱི་ཞེན་ཡུལ་དེ་མ་བཀག་པའི་ཕྱིར་ངར་འཛིན་དེ་སྐྱེ་བ་ལ་གེགས་བརྟེན་ནས་བཏགས་པའི་བདག་མེད་དམ་སྟོང་ཉིད་རྟོགས་པ་མེད་པ་ཉིད་ཡིན་པས་སོ། །དེ་སྐད་དུ་ཡང་། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པར། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཞེས་སོ། །དེ་ཡི་ཕྱིར་ན་ཐར་པ་ཙམ་ལ་སྒྲིབ་པའི་ཉོན་མོངས་པ་སྤོང་བ་ལ་ཕུང་སོགས་ཆོས་ཐམས་ཅད་སྟོང་བར་ཇི་ལྟ་བ་བཞིན་དུ་ངེས་པར་རྟོགས་དགོས་སོ་ཞེས་འཆད་པ་དག་གིས་ལུང་འདིའི་དོན་ཇི་བཞིན་དུ་བཀྲལ་བ་མིན་ཏེ། ལུང་དེ་ཡི་དོན་ཇི་སྐད་བཤད་པ་འདི་བཞིན་དཔལ་ལྡན་ཟླ་བས་ལེགས་པར་བཀྲལ་བ་ཡིན་པས་གཞན་དུ་རྟོགས་པར་མི་བྱ་སྟེ། ཇི་ལྟར་ན། འཇུག་པ་ལས། བདག་མེད་རྟོགས་ཚེ་རྟག་པའི་བདག་སྤངས་ཤིང་། །འདི་ནི་ངར་འཛིན་རྟེན་དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །རང་ཁྱིམ་རྩིག་པུག་སྤྲུལ་གནས་མཐོང་བཞིན་དུ། །འདི་ལ་གླང་ཆེན་མེད་ཅེས་དོགས་བསལ་ཏེ། །སྦྲུལ་གྱི་འཇིགས་པའང་སྤོང་བར་བྱེད་པ་ནི། །ཀྱེ་མ་གཞན་གྱི་གནམ་པོར་གྱུར་ཉིད་དོ། །ཞེས་སོ། །དེའི་ཕྱིར་ཉོན་མོངས་སྐྱོན་གྱི་རྩ་བ་འཁོར་རྩའི་བདག་གམ་ངར་འཛིན་ལྷན་སྐྱེས་དེ་སྤོང་དགོས་པ་ཡང་། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ཅིག །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་གསུངས་ཤིང་། དེས་ན་ཕུང་པོ་ལ་བརྟེན་ནས་བཏགས་པའི་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་ང་ཙམ་མམ་བདག་དེ་དངོས་པོ་གྲུབ་པ་མེད་པའམ་སྟོང་པ་ཉིད་དུ་ཤེས་པར་གྱུར་ན་འཁོར་བའི་རྩ་བ་ལྷན་སྐྱེས་ཀྱི་ངར་འཛིན་ཉོན་མོངས་པའི་སྐྱོན་རྣམས་ཀྱི་འབྱུང་གནས་དེ་ལྡོག་ཅིང་སྤང་བ་ལ་དེས་ཆོག་སྟེ་ཕུང་སོགས་སྟོང་བར་རྟོགས་མི་དགོས་ཏེ་དཔེར་ན་ཐག་པ་མཐོང་བ་ལ་བརྟེན་ནས་སྦྲུལ་དུ་འཁྲུལ་བས་སྦྲུལ་དུ་འཛིན་པ་ལ་གདགས་གཞི་ཐག་པ་རང་ཉིད་ཇི་ལྟ་བ་བཞིན་དུ་སྟོང་པའམ་མེད་པར་མ་ཤེས་ཀྱང་སྦྲུལ་འཛིན་དེ་ནི་ཡུལ་སྦྲུལ་ཉིད་མེད་པར་མཐོང་བས་ལྡོག་པར་འགྱུར་བ་བཞིན་ནོ། །དེ་ལྟར་ན་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་དེ་སྟོང་པར་རྟོགས་པས་ཉོན་མོངས་སྤངས་པས་ཉན་རང་གི་ཐར་པ་དགྲ་བཅོམ་པ་ཐོབ་པར་ལུང་རིགས་ཀྱིས་ཡང་དག་པར་གྲུབ་པས་གཞན་དུ་རྟོགས་པར་མི་བྱའོ། །གསུམ་པ། མཐར་ནི་ངེས་པར་སོགས་ཚིགས་བཅད་གསུམ་དང་རྐང་པ་གཅིག་གིས་བསྟན་ཏེ། ཆོས་ཐམས་ཅད་བདག་མེད་པའི་ཆོས་དབྱིངས་དེ་བཞིན་ཉིད་སྣང་སྟོང་ཟུང་འཇུག་སྤྲོས་བྲལ་མཉམ་པ་ཆེན་པོ་ཇི་ལྟ་བ་དེ་བཞིན་དུ་མཐར་ནི་ཉན་རང་གིས་ཀྱང་ངེས་པར་རྟོགས་དགོས་ཏེ། འཁོར་འདས་ཀྱི་བསྡུས་པའི་ཆོས་རྣམས་ཀུན་གྱི་ཆོས་དབྱིངས་དེ་བཞིན་ཉིད་ལ་རྣམ་དབྱེར་མེད་པས་གཅིག་ཡིན་ཅིང་དེ་ཉིད་མཐོང་བའི་ཡུལ་ཅན་ཡེ་ཤེས་ཀྱི་ཚུལ་ལའང་རྣམ་དབྱེར་མེད་པས་གཅིག་ཡིན་པས་མཐར་ཐུག་ཐེག་པ་གཅིག་ཉིད་དུ་འགྲུབ་པ་ཡི་རིགས་པའི་གནད་དམ་པ་འདི་ཉིད་ཀླུ་སྒྲུབ་ཡབ་སྲས་སྨྲ་སྟེ། དཔལ་ལྡན་ཟླ་བས། གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། ལྷུར་བྱེད་གཞན་མེད་ཆོས་རྣམས་དེ་ཉིད་རྣམ་འགྱུར་དབྱེ་ལའང་བསྟེན་མིན་ཞིང་། དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་བ་མ་ཡིན་ལ། དེ་ཡི་ཕྱིར་ན་ཁྱོད་ཀྱིས་འགྲོ་ལ་ཐེག་པ་མི་མཉམ་དབྱེར་མེད་བསྟན། ཞེས་ལེགས་པར་གསུངས་པ་ཡིན་ན་གལ་ཏེ་ཁྱོད་ཀྱི་འདོད་པའི་ལུགས་འདི་ལྟར་ན་རྣམ་དབྱེར་བྲལ་བའི་ཆོས་ཀྱི་དབྱིངས་དེ་ཉིད་ཉན་རང་དགྲ་བཅོམ་པ་རྣམས་ཀྱིས་སྔར་ནས་མཐོང་ཟིན་ཡིན་པས་སྔར་མ་མཐོང་བར་ད་ག ཟོད་དེ་དག་གིས་དེ་ཉིད་མཐོང་བའི་རིགས་པ་དེ་ཡིས་མཐར་ཐུག་ཐེག་པ་གཅིག་ཏུ་ཅི་ཞིག་འགྲུབ་སྟེ་སྒྲུབ་བྱེད་མེད་པས་དམ་བཅའ་བ་ཙམ་སྟེ་སྒྲུབ་བྱེད་མེད་བཞིན་དུ་བསྒྲུབ་བྱ་འགྲུབ་ན་གང་ཡང་འགྲུབ་པར་འགྱུར་བས་ཤིན་ཏུ་མི་འཐད་ལ་འཐད་ལྡན་གྱི་རང་ལུགས་འདིར་ནི་ཆོས་དབྱིངས་དེ་བཞིན་ཉིད་ནི་ངོ་བོས་མི་སྟོང་བས་རྟག་པའམ་སྟོང་པ་ཕྱོགས་ཆད་ཀྱང་མ་ཡིན་པས་སྣང་སྟོང་ངམ་དབྱིངས་ཡེ་ཟུང་དུ་འཇུག་པའི་ཡེ་ཤེས་གང་ཞིག་མཐར་ཐུག་པ་ཇི་ལྟ་བ་དེ་བཞིན་དུ་གཟིགས་པ་དེ་ཁོ་ན་ཆོས་ཀྱི་དབྱིངས་དེ་བཞིན་ཉིད་རྣམ་དབྱེར་མེད་པས་གཅིག་ཅེས་པ་དེ་ཡིན་ཏེ་འཕགས་པ་ཀུན་ཀྱང་དངོས་སམ་བརྒྱུད་ནས་ཆོས་ཀྱི་དབྱིངས་དེ་ལ་གཞོལ་ཞིང་འབབ་པས་མཐར་ཐུག་པར་འགྱུར་བ་ལས་གཞན་དུ་མེད་པའི་གནད་ཀྱིས་དེ་ཉིད་རྟོགས་པས་ཐེག་པ་གཅིག་ཏུ་སྒྲུབ་པ་ཤིན་ཏུ་ནི་འཐད་པ་དང་བཅས་པ་ཁོ་ནའོ། །གསུམ་པ། དེས་ན་ཚུལ་འདི་སོགས་ཚིགས་བཅད་གཉིས་ཀྱིས་བསྟན་ཏེ། དེས་ན་གོང་དུ་ཇི་སྐད་བཤད་པའི་ཚུལ་འདི་ལྟར་ལེགས་པར་རྟོགས་པར་གྱུར་ན་ངེས་པ་དོན་གྱི་བཀའ་དང་དགོངས་འགྲེལ་ཀླུ་སྒྲུབ་ཡབ་སྲས་ཀྱི་ལུགས་བཟང་དབུ་མ་རྩ་འཇུག་དང་། རྒྱལ་ཚབ་བྱམས་པའི་གཞུང་བཟང་ཤེར་ཕྱིན་ནས་ཇི་སྐད་བསྟན་པ་རྣམས་ནང་འགལ་བའི་ཉེས་པའི་ཆ་ཕྲ་བ་ཙམ་ཡང་མེད་པར་རྟོགས་པས་ཕན་ཚུན། དཔེར་ན་བུ་རམ་དང་སྦྲང་རྩི་རོ་གཅིག་པས་སྤང་བླང་མེད་པར་ཡིད་བདེ་བར་འབབ་པ་བཞིན་དུ་གཅིག་སྤང་གཅིག་བསྒྲུབ་མི་དགོས་པར་ལྷན་ཅིག་ཡིད་གས་བདེར་ཏེ་བདེ་བར་འཇུ་ཡི་སྟེ་དགོངས་པ་གཅིག་ཏུ་རྟོགས་པས་ཡིད་ཆས་བདེ་བླག་ཏུ་སྐྱེ་ཡི། དེ་ལས་གཞན་དུ་བཀྲལ་བ་དག །དཔེར་ན་མི་འཕྲོད་པའི་ཟས་ཟོས་པ་ཁོང་སྐྲན་གསོ་མེད་དུ་གྱུར་པ་བཞིན་དུ་ངེས་པ་དོན་གྱི་མདོ་རྒྱུད་དང་དབུ་མ་རྩ་འཇུག་དང་ཤེར་ཕྱིན་གྱི་དགོངས་དོན་ཕན་ཚུན་འགལ་འདུར་རྟོག་པས་གཅིག་སྤང་གཅིག་བསྒྲུབ་པས་ཁོང་ན་མི་བདེའི་སྐྲན་ཆེན་པོས་ཤིན་ཏུ་སྦོས་པར་གྱུར་པའི་ཚེ་དེ་ལ་མདོ་རྒྱུད་བསྟན་བཅོས་ཟབ་མོའི་ལུང་དང་ཡང་དག་པའི་རིགས་པ་ཟབ་མོའི་གཙགས་བུ་རྣོན་པོ་བརྒྱ་ཕྲག་དུ་མ་ལྷན་ཅིག་གདེངས་ཤིང་འདེབས་པར་གཟས་པ་ལ་ཡིད་གཏིང་ནས་སྡར་ཞིང་མི་བཟོད་པར་ཆོས་དང་གང་ཟག་ལ་ལོག་པར་ལྟ་བས་བསྐུར་འདེབས་ཀྱི་ངག་གི་ཅ་ཅོ་སྣ་ཚོགས་བས་ཤིན་ཏུ་ཕུང་ཁྲོར་ཆེན་འགྱུར་བས་བག་ཡོད་པ་རྣལ་འབྱོར་དུ་བྱ་བ་ཁོ་ནའོ། །ངེས་པའི་མདོ་རྒྱུད་བསྟན་བཅོས་ནང་འགལ་བའི། །ལུང་རིགས་བགྲོད་དཀར་འཕྱན་པའི་འཕྱང་མོ་ཉུག །འདི་ཚུལ་འདི་བཞིན་སྨྲ་བའི་རྟ་བདུན་དབང་། །ལུང་རིགས་མཁའ་ལ་རང་དབང་འབྱོར་མིན་ནམ། །ཞེས་ཀྱང་སྨྲས་སོ། །དྲི་ལན་གསུམ་པ་མཉམ་བཞག་འཛིན་སྟངས་ཡོད་མེད་གང་འཐད་ལ་གཉིས་ཀའང་ལེགས་པར་ཕྱེ་སྟེ་བསྟན་པ་ལ་བཞི། ཅིར་ཡང་མི་འཛིན་པ་དང་། བདག་མེད་དུ་འཛིན་པ་དང་། ལོག་རྟོག་བླུན་སྒོམ་དང་ཡང་དག་པའི་སྒོམ་གྱི་ཁྱད་པར་དང་། བསྒོམ་པའི་སྟོབས་ཀྱིས་འཛིན་སྟངས་ཀུན་གཞིག་དགོས་ཚུལ་ལོ། །དང་པོ་ལ་གཉིས། ལེགས་པར་རྟོགས་པ་དང་ལོག་པར་རྟོག་པ་གཉིས་ཡོད་པ་མདོར་བསྟན་པ་དང་། རྒྱས་པར་བཤད་པའོ། །དང་པོ་ལྟ་བའི་དངོས་གཞི་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། དེ་ལ་གནས་ལུགས་ལྟ་བའི་དངོས་གཞི་ལ་མཉམ་པར་བཞག་སྟེ་སྐྱོང་བའི་དུས་ན་ཁ་ཅིག་ཡོད་མེད་ལ་སོགས་པ་གང་ཅིར་ཡང་མི་འཛིན་ཏེ་འཛིན་དུ་མི་རུང་ངོ་ཞེས་ཟེར་བ་འདི་ལ་ལེགས་པར་བརྟགས་ན་གང་ཅིར་ཡང་མི་འཛིན་པ་བཞག་དགོས་ཞེས་པའི་དོན་འདི་ཉིད་ལ་ལེགས་པར་རྟོགས་པས་ཡང་དག་པ་དང་ལོག་པར་རྟོག་པས་འཁྲུལ་བ་དང་གཉིས་ཡོད་པ་ལས་དང་པོ་ནི་ཡོད་པ་དང་མེད་པ་ལ་སོགས་པ་མཐའ་བཞིའི་སྤྲོས་པ་ཐམས་ཅད་དང་བྲལ་བའི་ཆོས་ཀྱི་དབྱིངས་སྣང་སྟོང་ཟུང་འཇུག་རང་བྱུང་གི་ཡེ་ཤེས་བསམ་བརྗོད་ལས་འདས་པ་སྟེ་གཉིས་སྣང་ནུབ་པའི་འཕགས་པའི་མཉམ་བཞག་སོ་སོར་རང་རིག་པའི་ཡེ་ཤེས་ཀྱི་མདུན་ནམ་ངོས་ན་སྟོང་དང་མི་སྟོང་ཡོད་པ་དང་མེད་པ་ལ་སོགས་པའི་སྤྲོས་པ་གང་ཡང་གནས་པ་མེད་པ་ཉིད་ཇི་ལྟ་བར་ཡང་དག་པར་མཐོང་བས་ཡོད་མེད་ལ་སོགས་པའི་འཛིན་སྟངས་ཐམས་ཅད་ཆོས་ཀྱི་དབྱིངས་སུ་ཆུ་ལ་ཆུ་བཞག་པ་བཞིན་དུ་རང་གི་ངང་གིས་ཞིག་ནས་མེད་པ་སྟེ་སྟོང་གསལ་སྤྲོས་པ་དང་བྲལ་བའི་ཡེ་ཤེས་མཐོང་བ་དཔེ་གཞན་གྱིས་བསྙད་པར་ནུས་པ་མིན་པས་ནམ་མཁའ་ལ་ལྟ་བ་དང་མཚུངས་ཞེས་ཕྱོགས་ཙམ་མཚོན་པའི་དཔེར་ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་སོགས་མདོ་ལས་བསྟན་པ་བཞིན་ནོ། །གཉིས་པ་ཅི་ཡང་དྲན་མེད་ཐོ་མེ་བ་ཧ་ཤང་གི་ལུགས་ཏེ། གནས་ལུགས་སྤྲོས་བྲལ་མཉམ་པ་ཉིད་ཇི་ལྟ་བཞིན་དུ་གཏན་ལ་ཕེབས་པར་མ་དཔྱད་ཅིང་མ་རྟོགས་པར་རང་གར་ཅི་ཡང་ཡིད་ལ་མི་བྱེད་དོ་ཞེས་པའི་འཛིན་སྟངས་ཀྱིས་དྲན་མེད་ཐོ་མེ་བར་ཙན་ནེར་བཞག་པ་ཡིས་ངོ་བོ་སྟོང་པའི་རང་བཞིན་ལྷག་མཐོང་གསལ་བའི་ཡེ་ཤེས་ཀྱི་མཁྱེན་ཆ་མེད་པར་དཔེར་ན་མཚོ་གཏིང་ཟབ་མོར་རྡོ་འཕང་བ་བཞིན་དུ་ཅི་ཡིན་འདི་ཡིན་མེད་པར་གྱུར་ནས་རང་གི་ཤེས་རྒྱུད་སྔར་ལས་བཟང་དུ་མི་འགྲོ་བར་ཐ་མལ་པར་གནས་པར་གྱུར་ནས་ཆགས་སྡང་རྨོངས་སོགས་ཞི་བར་འགྱུར་བ་དང་། བྱམས་དང་སྙིང་རྗེ་བྱང་ཆུབ་ཀྱི་སེམས་དང་རྒྱུ་འབྲས་ལ་ཡིད་ཆེས་སྙིང་ནས་སྐྱེ་བ་སོགས་ལ་མ་རྟགས་ཀྱི་ཡོན་ཏན་ཅི་ཡང་མི་འབྱུང་བ་ནི་ལོག་པར་རྟོག་པའོ། །དེ་ཡང་དཔེར་ན་ཅི་ཡང་མེད་ཅེས་པ་འདི་ལ་དབུ་མས་སྤྲོས་པ་ཅི་ཡང་མེད་པར་མཐོང་བ་དང་གཟུགས་མེད་ཀྱིས་ཅི་ཡང་མེད་པར་མོས་པ་གཉིས་ཚིག་ཙམ་ཞིག་མཚུངས་ཀྱང་དོན་གཏན་ནས་མི་མཚུངས་པ་ལྟར་ཅི་ཡང་མི་འཛིན་ཞེས་པའི་ཚིག་ཙམ་མཚུངས་པ་ཞེས་འདྲ་བ་འདི་དག་ཀྱང་དོན་ལ་མི་མཚུངས་ཞེས་མི་འདྲ་བ་སྟེ་ལེགས་པར་རྟོགས་པ་དང་ལོག་པར་རྟོག་པས་མཆོག་དམན་གྱིས་ཁྱད་པར་གནམ་དང་ས་བཞིན་དུ་ཤིན་ཏུ་ཐ་དད་པ་ཡིན་པས་ལེགས་པར་ཤན་འབྱེད་དགོས་སོ། །གཉིས་པ། དེ་ལྟར་མཐའ་བཞི་སོགས་ཚིགས་བཅད་བཅུ་དང་རྐང་པ་གཉིས་ཀྱིས་བསྟན་ཏེ། དེ་ལྟར་ཡུལ་ཆོས་ཀྱི་དབྱིངས་ཡོད་མེད་ལ་སོགས་པའི་མཐའ་བཞིའི་སྤྲོས་པ་ཐམས་ཅད་དང་བྲལ་བའི་སྣང་སྟོང་ཟུང་འཇུག་མཉམ་པ་ཆེན་པོ་ལ་ཡུལ་ཅན་ཡེ་ཤེས་ཀྱིས་དེ་བཞིན་དུ་མཐའ་བཞི་པོ་གང་དུའང་མི་འཛིན་པར་ཤིན་ཏུ་ཕྲ་བའི་གཉིས་སྣང་ཐམས་ཅད་ནུབ་སྟེ་གཉིས་སུ་མེད་པར་གྱུར་ན་མཐའ་བཞི་པོ་དེ་ལས་འདས་པའམ་དེ་མ་ཡིན་པའི་འཛིན་སྟངས་གཞན་ཞིག་གཏན་ནས་མི་སྲིད་ཅིང་མེད་པས་འཛིན་སྟངས་ཐམས་ཅད་མེད་པས་ཅི་ཡང་མི་འཛིན་པར་འདོད་པ་འདི་ནི་ཡང་དག་པའོ། །གཞན་དུ་གལ་ཏེ་འཛིན་སྟངས་ཅི་ཡང་མེད་ཅེས་པའི་དོན་ཉིད་དེ་ལྟར་ཡང་དག་པར་མ་རྟོགས་པས་བླུན་པོ་ཁ་ཅིག་མན་ངག་གི་གནད་དམ་ལུང་རིགས་ཀྱིས་དཔྱད་པ་མེད་པར་དང་པོ་ནས་གང་དུའང་འཛིན་དུ་མི་རུང་བས་ཅིར་ཡང་མི་འཛིན་པར་ཐ་མལ་དུ་ལྷོད་དོ་ལོ་ཞེས་ཤིན་ཏུ་མི་འཐད་པས་མ་རངས་པའོ། །ཇི་ལྟར་ན་ཐོག་མ་མེད་པའི་དུས་ནས་འགྲོ་བ་འདི་ཀུན་ལུང་རིགས་མན་ངག་དོན་དུ་མི་གཉེར་བར་རང་གར་ཐ་མལ་དུ་ཀློད་ཤིན་ཏུ་ཆེས་པས་ཁམས་གསུམ་འཁོར་བར་གཅིག་ནས་གཅིག་ཏུ་བརྒྱུད་དེ་གཏན་དུ་འཁྱམས་པར་གྱུར་པ་ཡིན་ན་ད་རུང་ཡང་ལྷོད་དགོས་སོ་ཞེས་བཀླགས་པའམ་བསྣན་ཏེ་སླར་བསྐུལ་མི་དགོས་ཤིང་བསྐུལ་དུ་ཡང་མི་རུང་ངོ་། །ཡང་གལ་ཏེ་དེ་དག་ལུང་རིགས་མན་ངག་དང་བྲལ་བས་གནས་ལུགས་ཀྱི་དོན་མི་ཤེས་ཤིང་མ་མཐོང་བཞིན་དུ་བདག་ཅག་རང་གི་གནས་ལུགས་རང་ངོ་ཤེས་པས་རྟོགས་ལྡན་ཡིན་ནོ་ཞེས་ཟེར་ན། གནས་ལུགས་དོན་དམ་པའི་རང་ངོ་ཤེས་ཤིང་རྟོགས་པ་ལ་ལུང་རིགས་མན་ངག་གང་རུང་གིས་ཕྱི་ནང་གི་ཆོས་ཀུན་རང་རང་གི་ངོ་བོས་གདོད་ནས་སྟོང་པས་བདེན་པའི་སྟོང་པ་ཉིད་ཡིན་པ་ལ་ཕུ་ཐག་གཏིང་ནས་ཆོད་པ་ཞིག་ངེས་པར་དགོས་ན་དེ་ལྟ་མ་ཡིན་པར་རང་གར་འཁྲུལ་བའི་སྣང་བ་ལ་འདི་ནི་བདག་དང་འདི་ནི་གཞན་ཡིན་ནོ་ཞེས་བླུན་པོ་བ་ལང་རྫི་ཡན་ཆད་སུམ་ཡང་བདག་ཉིད་རང་ངོ་ཤེས་པ་ལ་འབད་པས་སྒོམ་ཅི་ཞིག་དགོས་ཏེ་མི་དགོས་པས་སྒོམ་པ་དོན་མེད་དོ། །གཞན་ཡང་གལ་ཏེ་རང་གིས་སེམས་འདི་ཉིད་ལ་དཀར་པོ་ལ་སོགས་ཁ་དོག་གི་མདོག་དང་གྲུ་བཞི་སོགས་དབྱིབས་དང་། དང་པོ་བྱུང་ས་བར་དུ་གནས་ས་ཐ་མལ་འགྲོ་ས་ལ་བརྟག་པའི་ཚེ་དེ་དག་ཅི་ཡང་མ་མཐོང་བས་སེམས་ཀྱི་གནས་ལུགས་སྟོང་པར་རྟོགས་སོ་ཞེ་ན་ཡང་འདི་ནི་འཁོར་འདས་ཀྱི་ཆོས་ཀུན་གྱི་གནས་ལུགས་གཏན་ལ་འབེབས་པའི་ཚུལ་ཤིན་ཏུ་ཟབ་པའི་མན་ངག་གི་གནད་དམ་པ་ཆོད་ཆེ་བ་སྟེ་འདི་ལའང་ལེགས་པར་མ་བརྟག་ན་གོལ་ས་ཤིན་ཏུ་ཆེ་བར་སྣང་སྟེ། ཇི་ལྟར་ན་སེམས་འདི་ནི་དབྱིབས་དང་ཁ་དོག་སོགས་གཟུགས་ཅན་གྱི་དངོས་པོ་མ་ཡིན་པས་ནམ་མཁའི་བླུན་སུས་ཀྱང་དབྱིབས་དང་མདོག་ལ་སོགས་པར་མཐོང་བ་མི་སྲིད་པས་དེ་དག་མ་མཐོང་བ་དེ་ཙམ་ལ་གནས་ལུགས་སྤྲོས་པ་དང་བྲལ་བའི་སྟོང་པ་ཉིད་ངོ་འཕྲོད་པའམ་རྟོགས་སོ་སྙམ་ན་ཤིན་ཏུ་གོལ་བ་ཡིན་ཏེ། དཔེར་ན་ལན་གཅིག་མ་ཡིན་པར་ལན་བརྒྱར་ཡང་ནས་ཡང་དུ་བརྟག་ཀྱང་མི་ཡི་མགོར་བ་ལ་སོགས་ཕྱུགས་ཀྱི་རྭ་ཅོ་ཡོད་པ་མ་ཡིན་པས་སུས་ཀྱང་དེ་ཡོད་པར་མཐོང་མི་སྲིད་ལ་དེ་མ་མཐོང་བས་མིའི་མགོ་བོ་དེ་སྟོང་པ་ཉིད་ཡིན་པར་རྟོགས་སོ་ཞེ་ན་དེ་ལྟ་ན་སྟོང་པ་ཉིད་སུས་ཀྱང་རྟོགས་པར་སླ་བས་བླུན་པོ་བ་ལང་རྫི་ཡང་འབད་མི་དགོས་པར་སྟོང་ཉིད་ཟབ་མོ་རྟོགས་ནས་གྲོལ་བར་ཐལ་བ་ལ་སོགས་པའི་སྐྱོན་དུ་འགྱུར་བས་ཤིན་ཏུ་མི་འཐད་པའི་ལོག་པར་རྟོགས་པའོ། །དེས་ན་སེམས་ཀྱི་ཁང་བུ་བཤིག་པ་སེམས་ལ་དབྱིབས་དང་ཁ་དོག་བྱུང་གནས་འགྲོ་གསུམ་སོགས་ལ་བརྟགས་པའི་རིགས་པའི་དཔྱད་པ་དེས་སེམས་ཀྱི་གནས་ལུགས་སྐྱོན་མེད་པའི་ཡང་དག་པ་ཐིག་པོ་ཞིག་མཐོང་བར་གྱུར་པ་ཡིན་ན་རང་གི་སེམས་དེ་ནི་སྣང་ཙམ་འགགས་པ་མེད་པས་སྒྱུ་མ་ལྟ་བུ་ལ་ངོ་བོ་ཡེ་སྟོང་བདེན་པ་མེད་པས་རིག་སྟོང་དབྱེར་མེད་པར་གཏིང་ནས་རིག་ཅིང་རྟོགས་པ་དེ་ཡི་ཚེ་རང་གི་ཐད་ཀའི་མདུན་གྱི་ནམ་མཁའ་ལ་བལྟས་པས། ཅི་ཡང་མ་མཐོང་བ་མེད་པ་བཞིན་དུ་རང་གི་སེམས་འདི་ནི་ཅིར་ཡང་མཐོང་བ་མེད་པས་སྟོང་བཞིན་པ་འདི་འགྱུར་བར་སྣང་བ་དང་། འགྱུ་བཞིན་པ་འདི་ཡང་སྤྲོས་པ་དང་བྲལ་བའི་སྟོང་པ་ཡི་ངེས་པའི་ཤེས་པ་ཐེ་ཚོམ་སྤུ་ཙམ་མེད་པས་ཁོ་ཐག་ནང་ནས་ཆོད་པས་སྟོང་དང་རྟེན་འབྱུང་ངམ་གསལ་སྟོང་ངམ་རིག་སྟོང་དབྱེར་མེད་པ་གཅིག་རྟོགས་དགོས་སོ་ཞེས་སོ། །ད་དུང་ཡང་ནི་ཁྱོད་ཉིད་ཀྱི་སེམས་ཞེས་པ་དེ་ནི་ཅི་ཡང་མེད་པ་ནམ་མཁའ་དང་འདྲ་བ་ཞིག་ཡིན་པར་འདུག་གམ་ཡང་ན་སྣ་ཚོགས་ཤེས་པ་ཞིག་ལས་གང་ཡིན་ཟེར་ཞེས་འདྲི་ན། ཅི་ཡང་མེད་པ་ནམ་མཁའ་དང་འདྲ་བ་ཞིག་མ་ཡིན་པར་སྣ་ཚོགས་པ་འཆར་བའི་ཤེས་པ་གསལ་ཞིང་རིག་པ་ཞིག་ཡིན་ནོ་སྙམ་ན་སྐད་ཅིག་གིས་མི་སྡོད་པས་གཡོ་ཞིང་འགྱུ་བའི་སེམས་གསལ་རིག་གི་ངོ་བོ་ཞིག་སུ་ལའང་ཡོད་པའི་ཕྱིར་ན་རང་རང་སོ་སོའི་རྒྱུད་ན་དེ་འདྲེའི་རིག་པའམ་ཤེས་པ་ཞིག་ཡོད་པའམ་འདུག་པར་མཁས་བླུན་སུས་ཀྱང་རང་སེམས་དེ་རང་གིས་མཐོང་ནས་ངེས་པར་རྟོགས་པར་སྨྲ་ན་དེ་ཙམ་གྱིས་སེམས་ཀྱི་གནས་ལུགས་རིགས་སྟོང་དབྱེར་མེད་སྤྲོས་པ་དང་བྲལ་བའི་ངོ་བོ་ཡང་དག་པར་མཐོང་བ་ཡིན་པར་ཇི་ལྟར་འགྱུར་ཏེ་མི་འགྱུར་ལ། གལ་ཏེ་དེ་ཙམ་མིན་པར་དེ་བས་སེམས་གསལ་རིགས་ངོ་བོ་དེ་ལ་བརྟགས་པས་དབྱིབས་དང་ཁ་དོག་སོགས་མེད་པས་ཡོད་པ་མ་ཡིན་ལ་འགྱུ་བ་གསལ་ཞིང་རིག་པའི་ངོ་བོར་ཡོད་པས་ཕྱང་ཆད་ནམ་མཁའ་དང་འདྲ་བའི་མེད་པའང་མིན་པའི་སེམས་ཀྱི་ངོ་བོ་དེ་ནི་གནས་ལུགས་རྫོགས་པ་ཆེན་པོ་འོད་གསལ་ཆོས་ཀྱི་སྐུ་ཡིན་ལ། དེ་མཐོང་བ་ནི་འོད་གསལ་ཆོས་ཀྱི་སྐུ་མཐོང་བ་ཡིན་ནོ་ཞེས་ཟེར་ནས་རང་གིས་ཐུགས་དམ་དུ་མཛད་ཅིང་གཞན་ལ་དེ་ངོ་སྤྲོད་པར་མཛད་པ་དེས་ཀྱང་འོད་གསལ་ཆོས་ཀྱི་སྐུ་ངོ་འཕྲོད་དོ་ཞེས་རང་མངོན་པར་རློམ་པ་དང་བཅས་པས་གཞི་ལམ་འབྲས་བུའི་ཆོས་ཀུན་མེད་ཅེས་བསྐུར་བ་འདེབས་ཤིང་མདོ་རྒྱུད་ཀྱི་གཞུང་ལ་ཐོས་པ་སློབ་གཉེར་མང་པོ་རང་ཉིད་ཀྱིས་མ་བྱས་པར་མ་ཟད་དགྲ་ལྟར་བལྟས་ཀྱང་གཅིག་ཤེས་ཀུན་གྲོལ་གྱི་འོད་གསལ་རྫོགས་པ་ཆེན་པོ་གྱི་སྐུ་མཐོང་བའམ་ཤེས་སོ་ལོ་སྟེ་ཤིན་ཏུ་མི་འཐད་པས་ལོ་ཞེས་མ་རངས་པའོ། །ཇི་ལྟར་མི་འཐད་ན་ཆོས་ཐམས་ཅད་ཀྱི་གནས་ལུགས་རིག་སྟོང་ངམ་གསལ་སྟོང་དབྱེར་མེད་དམ་ཟུང་འཇུག་འོད་གསལ་རྫོགས་པ་ཆེན་པོ་ཆོས་ཀྱི་སྐུ་ཉིད་ནི་ངོ་བོ་སྟོང་པ་ཡིན་པས་ཡོད་པ་མིན་ཞིང་རང་བཞིན་འོད་གསལ་ཞིང་ཐུགས་རྗེ་ཀུན་ཁྱབ་ཀྱི་རིག་པའམ་ཡེ་ཤེས་ཡིན་པས་མེད་པ་མིན་པ་དེ་ནི་ཡོད་མེད་ལ་སོགས་མཐའ་བཞིའི་སྤྲོས་པ་ཐམས་ཅད་དང་བྲལ་བ་བསམ་བརྗོད་ལས་འདས་པ་ཉིད་ཡིན་ལ་ཁྱོད་ཀྱི་མཐོང་ཞིང་བསྒོམ་པའི་སེམས་ངོ་འདི་ལ་ནི་ལེགས་པར་བརྟགས་ཤིང་དཔྱད་ན་དབྱིབས་དང་ཁ་དོག་སོགས་མེད་པས་ཡོད་པར་སྨྲ་རུ་མི་བཏུབ་ཅིང་འགྱུ་བ་གསལ་རིག་ཏུ་ཡོད་པས་མེད་པར་ཡང་ནི་སྨྲར་མེད་པ་སྟེ་དོན་དུ་ཁྱོད་ཀྱི་མཐོང་བའི་སེམས་ངོ་དེ་ནི་གསལ་རིག་གི་ངོ་བོར་ཡོད་པ་ཡིན་པ་དང་དབྱིབས་དང་ཁ་དོག་སོགས་ཀྱི་ངོ་བོར་མེད་པ་ཡིན་པས་གཉིས་ཡིན་ནམ་སྟེ་གཉིས་ཡིན་གྱི་གཞིའམ་ཡང་ན་གསལ་རིག་གི་ངོ་བོར་མེད་པ་མིན་པ་དང་དབྱིབས་སོགས་ཀྱི་ངོ་བོར་ཡོད་པ་མིན་པས་གཉིས་ཀ་མིན་པའི་མུ་སྟེ་གཉིས་མིན་གྱི་གཞི་གང་རུང་ཞིག་ལས་རྣམ་པ་ཀུན་དུ་མ་འདས་པར་སེམས་དེ་ནི་ཡོད་མིན་མེད་མིན་གྱི་གཞི་རུ་ཡོད་པ་ཉིད་དུ་ཞེ་ལ་མཆོག་ཏུ་བརྣག་ཀྱིན་ཡོད་པར་གདའ་བས་ཁྱད་ཀྱིས་བསྒོམ་པའི་སེམས་ངོ་དེ་ནི་ཕྱི་རོལ་པ་དག་གིས་ཡོད་མེད་ལ་སོགས་པའི་བསམ་གྱིས་མི་ཁྱབ་པའི་བདག་ཆེན་པོར་འདོད་པ་དེ་དང་འདི་གཉིས་མིང་གི་རྣམ་གྲངས་མི་འདྲ་བས་ཐ་དད་པ་ཙམ་ལས་དོན་གྱི་ངོ་བོ་ལ་འདོད་ཚུལ་ཐ་དད་པས་ཁྱད་པར་ཅི་ཡང་མེད་པ་ཉིད་དོ། །མདོར་ན་རང་གི་སེམས་འདི་ཉིད་དང་སེམས་དེ་ལས་གཞན་གྱི་ཆོས་སུ་སྣང་བ་འཁོར་འདས་ཀྱིས་བསྡུས་པ་ཀུན་ཀྱང་རང་རང་གི་ངོ་བོས་ཡེ་གདོད་མ་ནས་སྟོང་པས་བདེན་མེད་དུ་རྟོགས་ཤིང་ངེས་པའི་སྟེང་དུ་འཁོར་འདས་ཀྱི་སྣང་བར་རབ་འབྱམས་མུ་མཐའ་མེད་པར་རྟེན་འབྱུང་འགགས་མེད་དུ་རང་ཤར་བས་སྟོང་དང་རྟེན་འབྱུང་ངམ་གསལ་སྟོང་དབྱེར་མེད་དམ་ཟུང་དུ་འཇུག་པའི་གནས་ལུགས་ཡོད་མེད་ཡིན་མིན་ལ་སོགས་པར་སེམས་ཀྱིས་བསམ་པ་དང་ངག་གིས་བརྗོད་པ་ཐམས་ཅད་ལས་འདས་པ་མཐའ་བཞིའི་སྤྲོས་པ་མ་ལུས་པ་ཀུན་དང་བྲལ་བའི་གནད་ཟབ་མོ་མཐོང་བས་ཡོད་མེད་ལ་སོགས་པའི་འཛིན་སྟངས་ཀྱི་དམིགས་གཏད་ཅི་ཡང་མེད་པའི་རིག་སྟོང་དབྱེར་མེད་ཟང་མ་ཐལ་བྱུང་རྗེན་པར་མཐོང་ངོ་ཞིག་མཐོང་བ་དེ་ལ་འཛིན་སྟངས་ཅི་ཡང་མེད་པས་ཅིར་ཡང་མི་འཛིན་པ་ཞེས་ཡང་དག་པའོ། །དེ་ལྟ་མ་ཡིན་པར་ཁྱོད་ཀྱིས་བསྒོམ་པའི་སེམས་ངོ་འདི་ནི་གོང་དུ་བཤད་པ་ལྟར་ཡིན་མིན་གཉིས་བྲལ་བ་ཞིག་ཡིན་ཞེས་བློ་ཡི་མདུན་ནས་དམིགས་གཏད་ཀྱི་གཞི་ཞིག་འཕེན་བཞིན་དུ་གནས་ཤིང་མི་འདོར་བར་འཛིན་ཏོ་ཞེས་འཛིན་སྟངས་ཡོད་བཞིན་དུ་ཅིར་ཡང་མི་འཛིན་ཞེས་ལོག་པར་རྟོག་པའོ། །གཉིས་པ་ལ་གཉིས། དང་པོའི་ལས་ཅན་རིམ་གྱིས་པའི་བསྒོམ་ཚུལ་སྤྱིར་བསྟན་པ་དང་། ཐོས་བསམ་ལྟ་བའི་ལུགས་ཀྱི་བསྒོམ་ཚུལ་བྱེ་བྲག་ཏུ་བསྟན་པའོ། །དང་པོ་ལ་གསུམ། བདག་མེད་གཉིས་ཡང་དག་པར་ཤེས་པའི་འཛིན་སྟངས་དགོས་ཚུལ། མེད་འཛིན་དེ་ཡང་ཕྱི་ནས་སྤང་དགོས་ཚུལ། དངོས་གཞི་འཛིན་སྟངས་ཀུན་བྲལ་དུ་བསྟན་པའོ། །དང་པོ། བདག་གཞན་དངོས་འཛིན་སོགས་ཚིགས་བཅད་ལྔས་བསྟན་ཏེ། འཁོར་བའི་སེམས་ཅན་རྣམས་ཐོགས་མེད་ནས་དང་པོ་ང་ཞེས་བདག་ལ་ཞེན་ཅིང་བདག་གི་འདི་ཞེས་དངོས་ལ་ཆགས་པས་བདག་དང་བདག་གི་བ་སོགས་གཞན་དུ་རྟོག་ཅིང་ཞེན་པའི་དངོས་པོར་འཛིན་པ་འདིར་བརྟེན་ནས་སྲིད་པ་ཁམས་གསུམ་འཁོར་བའི་སྡུག་བསྔལ་གྱི་ཆུ་བོར་ཡང་ནས་ཡང་དུ་རྒྱུད་མར་འཇུག་ཅིང་འཁོར་བ་ཡིན་པས་ན་དངོས་འཛིན་འདི་དག་བཟློག་ཅིང་སྤོང་བར་བྱེད་པའི་གཉེན་པོ་ནི་གནས་ལུགས་བདག་མེད་པ་ཇི་བཞིན་རྟོགས་པ་ཡི་འཛིན་སྟངས་དོན་མཐུན་ཉིད་ཡིན་ལ། དེ་ལ་ཡང་དག་པའི་རིགས་པའི་ལམ་གྱིས་བདག་མེད་པའི་ཚུལ་ཇི་ལྟ་བ་བཞིན་དུ་མ་ཤེས་པར་རང་གར་བདག་མེད་པར་མོས་པས་ཏེ་མོས་པ་ཙམ་གྱིས་བདག་འཛིན་བཟློག་པ་ལ་ཅི་ཡང་མི་ཕན་ཏེ་དཔེར་ན་རྐྱེན་གྱི་དབང་གིས་ཐག་ཁྲ་ལ་སྦྲུལ་ཉིད་དུ་འཁྲུལ་བ་ལས་འཇིགས་ཤིང་སྐྲག་པ་ལ་འདི་ན་སྦྲུལ་དངོས་མེད་དོ་སྙམ་དུ་མོས་པས་འཇིགས་སྐྲག་ལ་ཅི་ཡང་མི་ཕན་ཀྱང་སྣང་བ་ལ་སོགས་པའི་རྐྱེན་ལ་བརྟེན་ནས་ཚུལ་བཞིན་བརྟག་པས་ཐག་ཁྲ་ཙམ་ཉིད་ལས་སྦྲུལ་དངོས་མེད་པའི་ཚུལ་ཇི་བཞིན་དུ་མཐོང་བར་གྱུར་ན་སྦྲུལ་གྱི་འཇིགས་སྐྲག་རྩ་བ་ནས་སྤངས་ནུས་པ་དེ་ཇི་ལྟ་བ་བཞིན་ནོ། །དེ་ཡི་ཕྱིར་ན་རིགས་ལམ་ཡང་དག་པས་ཚུལ་བཞིན་དཔྱད་པས་དང་པོ་ཉིད་དུ་བདག་མེད་པའི་གནས་ལུགས་རྟོགས་པར་བྱས་ནས་དཔྱད་པ་ཙམ་ཁོ་ནས་ཆོག་པར་མི་འཛིན་པའམ། དེ་ཙམ་ཉིད་དུ་མི་བཞག་པར་ཐོག་མ་མེད་པ་ནས་བདག་གཞན་དུ་རྟོག་པའི་དངོས་ཞེན་ལ་ཤིན་ཏུ་གོམས་ཆེས་པས་དེ་བཟློག་པར་དཀའ་བས་ཡང་ནས་ཡང་དུ་དེའི་དངོས་གཉེན་བདག་མེད་པའི་འཛིན་སྟངས་དོན་མཐུན་དང་བཅས་ཏེ་བསྒོམ་པ་ནི་ཤིན་ཏུ་གལ་ཆེ་སྟེ། བདག་མེད་པའི་གནས་ལུགས་ཇི་བཞིན་རྟོགས་ཤིང་གོམས་པས་འཁོར་བའི་རྩ་བ་བདག་ཏུ་ལྟ་བ་ཉིད་རྩ་བ་དྲུང་ནས་འབྱིན་ཅིང་སྤང་བའི་ཕྱིར་བདག་མེད་པའི་འཛིན་སྟངས་དོན་མཐུན་འདི་ཉིད་གལ་ཆེ་བས་ཅིས་ཀྱང་དགོས་ཞེས་གནས་ལུགས་ཀྱིི་དོན་ཇི་བཞིན་གཟིགས་པའི་དམ་པ་དུ་མས་ཡང་ཡང་ནན་ཏན་དུ་བསྒྲུབས་པར་མཛད་ཅིང་དང་པོའི་ལས་ཅན་ནམ་རིམ་གྱིས་པའི་གང་ཟག་ལས་དང་པོ་བ་ཐར་ལམ་ཡང་དག་པ་ལ་འཇུག་པའི་སྒོ་གོལ་ས་དང་འཆུགས་ཅུང་ཟད་རྩལ་ཡང་མེད་པ་ནི་བདག་མེད་པར་རྟོགས་པའི་འཛིན་སྟངས་འདི་ཁོ་ན་ཡིན་ནོ་ལས་དང་པོ་པ་ཉིད་ཀྱི་དུས་ནས་ཀྱང་དེ་ངེས་པར་སྤོང་དགོས་ཞེས་པ་འདི་ནི་བདུད་ཀྱི་གསང་ཚིག་ཐར་འདོད་ཀྱི་གང་ཟག་བསླུ་ཕྱིར་བཀྱེ་བ་ཡིན་པས་རིམ་གྱི་པའི་གང་ཟག་ལས་དང་པོ་པས་ཉན་པར་ཡང་མི་འོས་ན་ནན་ཏན་གྱིས་ཉམས་སུ་ལེན་པར་མི་འོས་པ་ལྟ་ཡང་ཅི་སྨོས་པས་བག་ཡོད་པར་བྱའོ། །གཉིས་པ། འཛིན་སྟངས་དེས་དྲངས་སོགས་ཚིགས་བཅད་བཞིའི་བསྟན་ཏེ། ཆོས་ཀུན་བདག་མེད་པའི་འཛིན་སྟངས་དོན་མཐུན་དེས་དྲང་སྟེ་འཁོར་འདས་ཀྱི་ཆོས་ཀུན་གདོད་མ་ནས་རང་རང་གི་ངོ་བོས་སྟོང་བས་བདེན་པས་སྟོང་པ་ཉིད་ཡིན་པ་ལ་ངེས་ཤེས་སུས་ཀྱང་མི་འཕྲོག་པ་མཆོག་ཏུ་གྱུར་པ་འདྲོངས་པའི་ཚེ་གདོད་གཞན་སེལ་གྱི་མེད་དགག་སྟོང་རྐྱང་ཙམ་པོ་པ་རྣམ་པར་རྟོག་པའི་གཟུགས་བརྙན་དེ་ནི་ཆོས་ཀུན་གྱི་གནས་ལུགས་མཐར་ཐུག་ཡང་དག་པ་མ་ཡིན་པས་དེར་འཛིན་པ་མེད་པར་འཛིན་པའི་མཐའ་ཤིན་ཏུ་ཕྲ་བའང་སྤངས་ཏེ་སྒྲོ་འདོགས་སོ་གཉིས་པོ་ཐམས་ཅད་དང་བྲལ་བ་ཡི་སྤྲོས་པའི་མཐའ་ཐམས་ཅད་ཀུན་དང་བྲལ་བའི་སྟོང་པ་ཉིད་སྣང་སྟོང་ཟུང་འཇུག་སྤྲོས་བྲལ་མཉམ་པ་ཆེན་པོ་དེ་ཉིད་གཏན་ལ་ཕབ་སྟེ་སྒོམ་དགོས་སོ། །དེ་ལྟར་ན་ཆོས་ཀུན་གདོད་མ་ནས་མ་སྐྱེས་པས་ངོ་བོས་སྟོང་པས་བདེན་པས་སྟོང་བར་ཕུ་ཐག་གཏིང་ནས་ཆོད་པས་ངེས་ཤེས་མཆོག་ཏུ་གྱུར་པ་འདྲོངས་ནས་སླར་ཡང་སྟོད་པ་དེ་ཉིད་རྟེན་འབྱུང་གི་སྣང་བ་འགགས་མེད་དུ་རང་ཤར་བ་ཡི་ངེས་ཤེས་བསྐྱེད་ཅིང་། དེ་ནས་སྟོང་རྟེན་འབྱུང་དབྱེར་མེད་དམ་ཟུང་འཇུག་ཏུ་ངེས་པར་གྱུར་ཏེ་མཐར་སྣང་སྟོང་གང་གི་ཕྱོགས་སུ་ཅིར་ཡང་མི་འཛིན་པས་སྤྲོས་བྲལ་མཉམ་པ་ཆེན་པོའི་དོན་ཉིད་ལ་མེ་ཡི་ཁ་ནས་ལན་གྲངས་དུ་མར་སྦྱངས་ཤིང་དག་པའི་གསེར་གཙོ་མ་ཇི་ལྟ་བ་དེ་བཞིན་དུ་འདི་ལ་མཆོག་ཏུ་ཡིད་ཆེས་སྐྱེ་བར་རུང་མོད་ཀྱི་དེ་ལས་གཞན་དུ་ཆེས་ཆེར་ཟབ་པའི་གནས་ལུགས་སྣང་སྟོང་དབྱེར་མེད་སྤྲོས་བྲལ་མཉམ་པ་ཆེན་པོའི་གནད་དམ་པ་འཕགས་བོད་ཀྱི་མཁས་ཤིང་གྲུབ་པའི་དབང་ཕྱུག་ཆེ་བའམ་ཆེན་པོ་རྣམས་ཀྱིས་ཡུན་རིང་བརྩོན་པས་ཆེར་འབད་དེ་རྟོགས་པར་བྱ་དགོས་པའི་དོན་ཟབ་མོ་དེ་ཉིད་ཀྱེ་མ་དེང་དུས་བླུན་པོས་ཀྱང་འབད་རྩོལ་མི་དགོས་པར་ཡུད་ཙམ་ཞིག་ལ་ཇི་བཞིན་རྟོགས་པར་སྨྲ་བ་འདི་ལ་བདེན་ནམ་མི་བདེན་སྙམ་པའི་ཐེ་ཚོམ་གཡོ་བར་འགྱུར་བས་ཡིད་ཆེས་སྐྱེ་བར་དཀའ་བ་ཞིག་གོ། །གསུམ་པ། དངོས་བཞི་སྣང་སྲིད་སོགས་ཚིགས་བཅད་གཅིག་དང་རྐང་པ་གསུམ་གྱིས་བསྟན་ཏེ། གནས་ལུགས་ལྟ་བའི་དངོས་གཞི་མཐར་ཐུག་པ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཀུན་གདོད་མ་ནས་ཡོད་མེད་ལ་སོགས་པ་གཉིས་ཆོས་ཀྱི་སྤྲོས་པ་ཀུན་ལས་འདས་པ་དོན་གྱི་གཤིས་ལུགས་ཡིན་པས་དེ་ལ་ཡོད་མེད་ལ་སོགས་པའི་སྤྲོས་པ་ཅི་ཡང་མ་གྲུབ་པས་ན་དེ་ལ་སྣང་སྟོང་ཕྱོགས་རེར་རྟོག་ཅིང་འཛིན་པ་ནི་སྤྲོས་པ་དང་བཅས་པར་འགྱུར་རོ། །དེ་ཡི་ཕྱིར་ན་མཐར་ཐུག་དཔྱོད་པའི་རིག་པས་འཁོར་འདས་ཀྱི་ཆོས་ཀུན་ལ་གཤིས་ལུགས་ཆོས་ཀྱི་དབྱིངས་བཞིན་དུ་ཡང་དག་པར་རྣམ་པར་དཔྱད་ཅིང་གཏན་ལ་ཕབ་པའི་ཚེ་ཡོད་མེད་ལ་སོགས་པའི་གཉིས་ཆོས་ཀྱི་མཐའ་ཡི་སྤྲོས་པ་ཅི་ཡང་གྲུབ་པ་མེད་པས་ཅིར་ཡང་མ་མཐོང་པས་ཆོས་ཀྱི་དབྱིངས་ཉིད་ལ་ཅིར་ཡང་འཛིན་པའི་སྤྲོས་པ་ཞིག་ག་ལ་སྐྱེ་བ་གནས་མེད་ཅིང་སྐབས་མེད་པ་ཡིན་པས་འཛིན་སྟངས་ཀུན་དང་བྲལ་བ་ཉིད་ཡིན་ནོ། །གཉིས་པ། འོན་ཀྱང་མཐའ་བཞིའི་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། འཁོར་འདས་ཀྱི་ཆོས་ཀུན་གདོད་ནས་སྤྲོས་པ་ཀུན་དང་བྲལ་བས་མཐར་འཛིན་སྐྱེ་བའི་གནས་མེད་མོད་འོན་ཀྱང་སྐལ་ལྡན་འགའ་ལས་ཀུན་གྱིས་དེ་ལྟར་འབད་མེད་དུ་རྟོགས་པར་དཀའ་བས་ན་ཡོད་མེད་ལ་སོགས་པའི་མཐའ་བཞིའི་སྤྲོས་པ་ཀུན་དང་བྲལ་བའི་ཚུལ་ཉིད་ཇི་ལྟར་རྟོགས་ཤིང་སྒོམ་ན། འདི་ལྟར་ཡོད་མེད་ལ་སོགས་མཐའ་བཞི་སོ་སོར་གནས་ལུགས་དཔྱད་པའི་རིགས་པས་དྲངས་པའི་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་ཤེས་མཆོག་ཏུ་སྐྱེས་པ་ལས་རང་བྱུང་གདོད་མའི་གནས་ལུགས་འོད་གསལ་བ་མཐོང་བའི་ཤེས་རབ་ཀྱི་ལྷག་མཐོང་གི་ཡེ་ཤེས་མར་མེ་འོད་འབར་ཞིང་གསལ་བ་བཞིན་དུ་འོད་གསལ་བ་ཉིད་སྐྱེ་བར་འགྱུར་ལ་ལྷག་མཐོང་དེ་དང་རྣམ་པ་ཤིན་ཏུ་འགལ་བ་ཡི་ཡོད་མེད་ལ་སོགས་པའི་མཐའ་བཞིའི་འཛིན་པའི་བློ་ངན་མུན་པའི་སྨག་རུམ་འཐུག་པོར་དྲུང་ནས་འབྱིན་ཅིང་སྤོང་བར་བྱེད་པའི་གཉེན་པོ་ལྷག་མཐོང་གི་ཡེ་ཤེས་འདི་ཉིད་ཡིན་པས་དུས་ནམ་ཡང་སྒོམ་པ་ནི་ངེས་ཤེས་དང་མ་བྲལ་བས་ངེས་ཤེས་མཆོག་ཏུ་སྐྱེ་བ་ཞིག་ངེས་པར་དགོས་ཀྱི་གཞན་དུ་མཐའ་བཞིའི་སྤྲོས་པ་ཐམས་ཅད་ཀུན་དུས་ཅིག་ཆར་ཉིད་དུ་ཁེགས་ནས་མེད་པ་བློ་ལས་འདས་པའི་ཆོས་ཉིད་གཉུག་མའི་དབྱིངས་རིག་སྟོང་དབྱེར་མེད་བསམ་བརྗོད་ལས་འདས་པའི་ཡེ་ཤེས་ཉིད་འཆིང་བ་ཀུན་ལྡན་གྱི་སོ་སོའི་སྐྱེ་བོའི་ས་ཐ་མལ་པའི་དུས་འདི་ཉིད་ན་ཅིག་ཆར་རམ་ཅར་ཕོག་གི་ཚུལ་གྱིས་ཇི་ལྟ་བ་བཞིན་དུ་ཐམས་ཅད་ཀུན་གྱིས་དེ་ལྟར་མཐོང་བ་དཀའ་བས་ན། དང་པོའི་ལས་ཅན་རྣམས་ཀྱིས་མཐའ་བཞིའི་སྤྲོས་པ་རྣམས་རིམ་གྱིས་སམ་རེས་འཇོག་ཏུ་འགོག་པར་བྱེད་པ་ཐོས་བསམ་གྱི་སྒོ་ནས་གཏན་ལ་ཕབ་པའི་ལྟ་བའི་གནས་ལུགས་བསྒོམ་པའི་ཚུལ་ལུགས་ཡང་དག་པ་ཡིན་ལ་དེ་ཉིད་ལ་ཅི་ཙམ་དུ་གོམས་པ་དེ་ཙམ་བཞིན་དུ་ཅིར་ཡང་མ་གྲུབ་པས་མཐའ་དང་བྲལ་བའི་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ཀྱི་ལྟ་བ་ལ་ངེས་ཤེས་ཟབ་མོ་ཇེ་བས་ཇེ་གསལ་གོང་འཕེལ་ཉིད་དུ་གྱུར་ནས་ཡོད་པ་དང་མེད་པ་ལ་སོགས་པའི་ཕྱིན་ཅི་ལོག་གི་སྒྲོ་འདོགས་བཞིའམ་བརྒྱད་དམ་སོ་གཉིས་པོ་རིམ་པར་བསྣུབ་པར་བྱས་པས་གནས་ལུགས་རྟོགས་པའི་བློ་གྲོས་ཡར་ངོའི་ཟླ་བ་ལྟ་བུར་འཕེལ་ཏེ་སྤང་རྟོགས་ཀྱི་ཡོན་ཏན་གོང་ནས་གོང་དུ་གསར་དུ་རྒྱ་ཆེར་སྐྱེ་བར་འགྱུར་རོ། །གཞན་དུ་གནས་ལུགས་ཀྱི་ལྟ་བ་ཇི་བཞིན་མ་རྟོགས་ཤིང་ངེས་ཤེས་མེད་པས་བླུན་པོས་རང་གར་ཅི་ཡང་མི་འཛིན་པའི་སྟོང་ལྟས་རྒྱུ་འབྲས་དང་ཚོགས་གཉིས་སོགས་ཁྱད་དུ་གསོད་པའི་ལྟ་ངན་ལ་ཅི་ཙམ་གོམས་ཀྱང་ཕྱི་ནང་གི་དངོས་པོ་མཐའ་དག་གདོད་ནས་ཅིར་ཡང་མ་གྲུབ་པའི་གནས་ལུགས་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་སྐྱེ་བ་ག་ལ་ཡོད་དེ་མེད་དོ། །དེ་མེད་པས་ལྷག་མཐོང་གི་ཡེ་ཤེས་འབྱུང་བ་གནས་མེད་ཅིང་སྐབས་མེད་པ་དེས་ན་ཡོད་མེད་ལ་སོགས་པའི་ཕྱིན་ཅི་ལོག་ཏུ་སྒྲོ་འདོགས་པའི་སྒྲིབ་པ་རྣམས་སྤོང་མི་ནུས་པས་སྤང་རྟོགས་ཀྱི་ཡོན་ཏན་གང་ཅུང་ཟད་ཀྱང་སྐྱེ་བར་མི་འགྱུར་རོ། །གསུམ་པ། དེ་ཕྱིར་འདི་གཉིས་སོགས་ཚིགས་བཅད་གསུམ་དང་རྐང་པ་གཉིས་ཀྱིས་བསྟན་ཏེ། དེ་ཕྱིར་མཁས་པས་ཡང་དག་པར་རྟོགས་པའི་བསྒོམ་པ་དང་བླུན་པོས་ལོག་པར་རྟོག་པ་ཡི་བསྒོམ་པ་འདི་གཉིས་མི་འདྲ་བའི་ཁྱད་པར་ཡང་དཔེར་ན་དུ་བའི་རྟགས་ཡང་དག་ལས་ལྐོག་གྱུར་གྱི་མེ་ཡོད་པར་དཔོག་པ་ལ་མི་འཁྲུལ་བ་བཞིན་དུ་སྤངས་དང་རྟོགས་པའི་ཡོན་ཏན་གོང་ནས་གོང་དུ་འཕེལ་ཞིང་བོག་སྐྱེད་པའི་ཚུལ་ལུས་ངག་གི་འབྲས་བུའི་རྟགས་ལས་མི་འཁྲུལ་བར་ཤེས་ནུས་ཏེ། རྒྱུ་མཚན་གང་གི་ཕྱིར་ན་བླུན་བསྒོམ་ལོག་པར་རྟོག་པས་རྣམ་རྟོག་ཐ་མལ་བ་ལ་ཅི་ཙམ་བསྒོམ་ཀྱང་སྤངས་དང་རྟོགས་པའི་ཡོན་ཏན་སྐྱེ་བའི་རྒྱུ་མིན་ལ་དེར་མ་ཟད་སྤངས་རྟོགས་ཀྱི་ཡོན་ཏན་སྐྱེ་བའི་གེགས་སུའང་ཆེ་བ་ཡིན་པའི་ཕྱིར། དཔེར་ན་རྒྱ་ཇ་ཚགས་ལ་དྲངས་ན་སྙིང་པོ་ཟག་ཅིང་སྙིགས་མ་ལུས་པ་བཞིན་དུ་ལུང་དང་རྟོགས་པའི་ཡོན་ཏན་འགྲིབ་ཅིང་ཆགས་སྡང་སོགས་ཉོན་མོངས་པ་ཆེར་འཕེལ་ཞིང་ཆེ་བར་འགྱུར་བ་དང་ཁྱད་པར་དུ་དགེ་སྡིག་རྒྱུ་འབྲས་བསླུ་མེད་ལ་ཡིད་ཆེས་ཆུང་བར་གྱུར་ནས་དགེ་སྡིག་རྒྱུ་འབྲས་ལ་མི་འཛེམས་པས་དགེ་བ་འགྲིབ་ཅིང་ཉོན་མོངས་པ་འཕེལ་བར་འགྱུར་བ་དང་། དེ་ལྟར་མ་ཡིན་པར་མཁས་པས་ཡང་དག་པར་རྟོགས་པའི་ལྟ་བའི་མིག་མཆོག་དང་ལྡན་ན་རང་རྒྱུད་ལ་སྔར་མེད་པའི་ཐོས་སོགས་ལུང་གི་ཡོན་ཏན་དང་ཉམས་རྟོགས་ཀྱི་ཡོན་ཏན་གོང་འཕེལ་དུ་འབར་ཞིང་སྐྱེ་བར་འགྱུར་བ་དང་ཁྱད་པར་དུའང་ཟབ་མོ་སྟོང་པ་ཉིད་མཐོང་བ་དེ་ཡི་ཡོན་ཏན་ལས་སྟོང་ཉིད་ཡིན་པའི་གནད་ཀྱི་རྟེན་འབྱུང་འགགས་པ་མེད་པའི་དགེ་སྡིག་རྒྱུ་འབྲས་རྟེན་ཅིང་འབྲེལ་འབྱུང་བསླུ་བ་མེད་པ་ཉིད་ལ་སུས་ཀྱང་མི་ལྡོག་པའི་ཡིད་ཆེས་ཆེ་བར་གྱུར་ནས་ལས་རྒྱུ་འབྲས་ལ་བླང་དོར་ཤིན་ཏུ་ཕྲ་བ་ནས་བགྱིད་ཅིང་སྟོང་ཉིད་སྙིང་རྗེའི་སྙིང་པོ་ཅན་ཡིན་པས་བྱམས་དང་སྙིང་རྗེ་བྱང་ཆུབ་ཀྱི་སེམས་ངམ་ངམ་ཤུགས་ཀྱིས་སྐྱེས་ཏེ་ཚོགས་གཉིས་ཀྱི་དགེ་བ་འཕེལ་ཞིང་ཆགས་སྡང་ལ་སོགས་པའི་ཉོན་མོངས་པ་འགྲིབ་ཅིང་ཆུང་བར་འགྱུར་བ་ནི་སྟོང་ཉིད་རྟོགས་པའི་འབྲས་རྟགས་ཡང་དག་པ་ཉིད་ཡིན་ནོ། །བཞི་པ། དཔྱད་པས་ངེས་ཤེས་སོགས་ཚིགས་བཅད་གཉིས་ཀྱིས་བསྟན་ཏེ། དེ་ལྟར་ཟབ་མོའི་ལུང་གི་སྣང་བ་ལ་བརྟེན་ཏེ་ཡང་དག་པའི་རིགས་པས་དཔྱད་པས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ཐེ་ཚོམ་གྱི་སྨག་དང་བྲལ་བའི་ངེས་ཤེས་བཟང་པོ་མཆོག་ཏུ་དྲངས་པའི་ངེས་ཤེས་དེ་ཀའི་རང་དུ་གཞན་དུ་མི་ཡེངས་བར་རྩེ་གཅིག་ཏུ་མཉམ་པར་བཞག་པའི་ཏིང་ངེ་འཛིན་བཟང་པོའི་རྟོགས་པ་ལ་ཅི་ཡང་མ་མཐོང་བས་མཐོང་བ་དམ་པའི་དོན་ཉིད་དེ་མཐོང་དོན་སྣང་སྟོང་ལ་སོགས་པ་གང་གི་ཕྱོགས་སུ་མ་ལྷུང་བས་སྣང་སྟོང་སོགས་ཅིར་ཡང་བློས་བཟུང་བ་མེད་མོད་ཀྱི་དེ་ལྟ་ནའང་ལྐུག་པས་བུ་རམ་གྱི་རོ་མྱོང་བ་ན་འདི་ཞེས་སྨྲར་མི་བཏུབ་ཅིང་རང་ཡིད་ཆེས་པ་ལྟར་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་མ་མཐོང་མཐོང་བ་དམ་པའི་དོན་ལ་ཡིད་ཆེས་ཤིང་ཡང་ཡང་སྒོམས་པའམ་བསྒོམ་པའི་རྣལ་འབྱོར་པ་ལ་སྐྱེ་ཡི་རིགས་པས་དཔྱད་པ་ཁོ་ནས་དེ་ལྟར་སྐྱེ་བ་མིན་པས་ན་ཆོས་ཉིད་ཀྱི་གནས་ལུགས་དངོས་བསྒོམ་པའི་སྟོབས་ཀྱིས་རྟོགས་པར་འགྱུར་བས་ན་བསྒོམ་པ་ཉིད་ལ་འབད་པར་བྱའོ་ཞེས་སོ། །གནས་ལུགས་དོན་ལ་མཉམ་པར་འཇོག་པ་ན། འཛིན་སྟངས་དགོས་དང་མི་དགོས་ཆེར་སྨྲ་ཡང་། །གང་ལའང་ལེགས་པར་རྟོགས་དང་ཉེས་པར་རྟོག །ཤན་འབྱེད་བློ་གྲོས་དྲི་མེད་མཆོག་གི་དཔྱིད། །ཅེས་ཀྱང་སྨྲས་སོ། །དྲི་ལེན་བཞི་པ་བསྒོམ་པ་དཔྱད་འཇོག་གང་འཐད་ལ་གསུམ། གཞན་ལུགས་བརྗོད་པ་དང་། རང་ལུགས་སོ་སོར་ཕྱེ་སྟེ་བསྟན་པ། དོན་བསྡུ་བའོ། །དང་པོ། ཐེག་མཆོག་ལྟ་བ་སོགས་ཚིག་བཅད་གཉིས་དང་རྐང་པ་གཅིག་གིས་བསྟན་ཏེ། ཐེག་མཆོག་ངེས་དོན་ཟབ་མོའི་ལྟ་བ་བསྒོམ་པ་ལ་རིགས་པས་དཔྱད་པ་ཁོ་ནས་བསྒོམ་པ་དང་མ་དཔྱད་པར་འཇོག་པའམ་བཞག་སྟེ་བསྒོམ་པ་གཉིས་གང་འཐད་ཅེ་ན། ལ་ལས་ཆོས་གང་ལ་ཡང་སྟོང་མི་སྟོང་སོགས་རིགས་པས་ཅི་ཡང་མི་དཔྱད་པར་མཉམ་པར་བཞག་སྟེ་བསྒོམ་དགོས་ཀྱི་དཔྱད་པས་གནས་ལུགས་ཟབ་མོའི་དོན་མཐོང་བ་ལ་སྒྲིབ་པར་འགྱུར་བ་ཡིན་པས་ན་མ་དཔྱད་པར་རང་གར་སྦོམ་པོར་ཞོག་དང་མན་ངག་གི་གནད་ཡིན་ནོ་ཞེས་ཟེར་བ་དང་། ཡང་ལ་ལས་ཆོས་གང་ལ་ཡང་སྟོང་བར་རིགས་པས་དཔྱད་པ་ཁོ་ན་ཡང་བྱེད་དགོས་ཀྱི་རིགས་པས་དཔྱད་པ་དང་བྲལ་བའི་བསྒོམ་པ་ནི་གཉིད་དུ་སོང་བ་ལྟར་ཅི་ཡིན་འདི་ཡིན་མེད་པའི་བསྒོམ་པས་ཅི་ཡང་མི་ཕན་པས་དུས་ནམ་དུ་ཡང་རིགས་པས་དཔྱད་པ་ཁོ་ན་དགོས་ཀྱི་དཔྱད་པ་དང་བྲལ་བས་སྟོང་ཉིད་མི་རྟོགས་སོ་ཞེས་ཟེར་རོ། །གཉིས་པ་ལ་གསུམ། སྤྱིར་བསྟན་པ་དང་། རིམ་པས་བྱེ་བྲག་ཏུ་བསྟན་པ། དེ་ལ་ལོག་རྟོག་བསལ་ཏེ་ལམ་མཆོག་ཏུ་བསྒྲུབ་པའོ། །དང་པོ། བསྒོམ་པ་དཔྱད་འཇོག་སོགས་ཚིགས་བཅད་བཅོ་ལྔ་དང་རྐང་པ་གཅིག་གིས་བསྟན་ཏེ། དེ་ལ་ཐེག་མཆོག་ལྟ་བ་ཇི་ལྟར་བསྒོམ་པ་ལ་དཔྱད་པ་དང་འཇོག་བསྒོམ་འདི་གཉིས་ལ་མཐའ་གཅིག་ཏུ་ཕྱོགས་རེར་ཁོ་ནར་ཞེན་པས་འཛིན་པར་མི་རུང་སྟེ་སྟོང་པ་ཉིད་ཡང་དག་པའི་རིགས་པས་གཏན་ལ་མ་དབབ་ཅིང་མ་དཔྱད་པ་ཡི་སྦོམ་པོར་འཇོག་པའི་སྒོམ་པ་ཕལ་ཆེར་གྱིས་ལེགས་ན་ཞི་གནས་ཙམ་ཞིག་སྟེ་བསམ་གཏན་དང་གཟུགས་མེད་ཀྱི་ཏིང་ངེ་འཛིན་ཙམ་རེ་འགྲུབ་སྲིད་ཀྱང་དེ་ལ་ཅི་ཙམ་བསྒོམ་པས་ཀྱང་སྟོང་པ་ཉིད་ལ་ངེས་ཤེས་ཅུང་ཟད་ཙམ་ཡང་མི་སྐྱེ་བའམ་སྐྱེ་བར་མི་འགྱུར་བས་ཐར་ལམ་ཡང་དག་པ་ཉིད་མཐོང་བའི་མིག་གཅིག་པུར་གྱུར་པ་སྟོང་པ་ཉིད་ལ་ངེས་ཤེས་སྐྱེས་པ་ཉིད་ཡིན་ལ་དེ་སྤང་ནས་ལྷག་མཐོང་གི་ཡེ་ཤེས་རང་རྒྱུད་ལ་མི་སྐྱེ་བས་ཕྱིན་ཅི་ལོག་གི་སྒྲིབ་པ་གང་ཡང་བསལ་མི་ནུས་པས་ཐར་པ་ཙམ་ཡང་མི་འཐོབ་སྟེ་ཆོས་ཀྱི་རང་བཞིན་སྟོང་པ་ཉིད་རིགས་པ་ཡང་དག་པས་དཔྱད་པས་གཏན་ལ་མ་དབབ་ཅིང་མ་ཤེས་ན་སྟོང་པ་ཉིད་ཅི་ཞིག་བསྒོམ་སྟེ་རང་གར་ཐ་མལ་གྱི་རྣམ་རྟོག་གཅིག་ཡང་ཡང་བསྒོམ་པར་བྱས་པས་སྒྲིབ་པ་སྤོང་བ་དང་རྟོགས་པའི་ཡེ་ཤེས་སྐྱེ་བ་ལ་ཅི་ལ་ཕན་ཏེ་ཐར་ལམ་གྱི་མིག་ཉིད་མི་རྙེད་ཅིང་མེད་པས་དཔེར་ན་མིག་གཉིས་མེད་པ་ལམ་དུ་ཞུགས་པས་ལམ་ཡང་དག་པར་མི་རྙེད་པ་བཞིན་ནོ། །དེས་ན་ཐོག་མ་མེད་པ་ནས་བདག་དང་གཞན་དུ་འཛིན་པས་འཁྲུལ་བའི་བག་ཆགས་ཆེས་གོམས་པའི་སྟོབས་ཀྱིས་ཆོས་ཐམས་ཅད་ཀྱི་རང་བཞིན་སྤྲོས་བྲལ་སྟོང་པ་ཉིད་ལས་གོལ་ཏེ་བདག་ཏུ་ལྟ་བ་དང་རྟག་པར་ལྟ་བ་ལ་སོགས་པའི་ཕྱིན་ཅི་ལོག་པར་ཞེན་པར་གྱུར་པའི་དངོས་པོར་འཛིན་པ་འདི་དག་ལ་ཐབས་ཚུལ་ཡང་དག་པའི་རིགས་པ་མི་འདྲ་བའི་སྒོ་བརྒྱ་ཕྲག་དག་གིས་འབད་དེ་དཔྱད་ཅིང་མ་བརྟག་ན་སྤྲོས་བྲལ་སྟོང་པ་ཉིད་དུ་རྟོགས་པར་དཀའ་སྟེ། གང་གི་ཕྱིར་ན་འཁྲུལ་བའི་སྣང་བ་ལ་དངོས་པོར་ཞེན་པ་དང་འཁྲུལ་སྣང་སྟོང་པར་ཤེས་པས་ཡང་དག་པའི་དོན་མཐོང་བ་དག་ཕན་ཚུན་སྣང་མུན་ལྟར་འགལ་བས་ན་ཐོག་མེད་ནས་ཆེས་ཆེར་གོམས་པའི་སྲིད་པའི་སྨག་རུམ་འཐུག་པོ་འདིར་དེ་ཁོ་ན་ཉིད་སྤྲོས་བྲལ་སྟོང་པ་ཉིད་མཐོང་བའི་སྣང་བ་ཡང་དག་པ་ཤིན་ཏུ་རྙེད་པར་དཀའ་བས་སོ། །འོན་ཀྱང་སྔོན་ནས་ལམ་ཡང་དག་པ་ལ་ལེགས་པར་སྦྱང་བའི་ལས་ཀྱི་འཕྲོ་སད་ཅིང་རྒྱུད་སྨིན་ཟིན་པ་དང་རྟོགས་ལྡན་བླ་མའི་བྱིན་རླབས་ཟབ་མོ་སྙིང་ལ་འཕོས་པ་ལས་རང་གི་སེམས་ཀྱི་བྱུང་ས་དང་གནས་ས་དང་འགྲོ་འོང་མེད་པ་ཙམ་ཡང་དག་པར་བརྟག་ཅིང་དཔྱད་པས་ཆོས་ཀུན་གདོད་ནས་སྤྲོས་ཀུན་བྲལ་བས་བདེན་པས་སྟོང་པ་ཉིད་ལ་ངེས་ཤེས་བཟང་པོ་སུས་ཀྱང་མི་འཕྲོག་པ་སྐྱེ་བ་སྲིད་མོད་ཀྱི་སྐལ་པ་བཟང་པོའི་གང་ཟག་དེ་འདྲ་བ་རྒྱ་ལམ་ན་སྲིད་མཐའ་མ་བཀག་པས་རེས་འགའ་ཙམ་སྟེ། གང་ཟག་མཆོག་དམན་མེད་པར་ཀུན་གྱིས་དེ་ལྟར་སྤྲོས་ཀུན་བྲལ་བའི་སྟོང་པ་ཉིད་དུ་རྟོགས་པར་མི་ནུས་སོ། །དེ་ལྟར་འཁོར་འདས་ཀྱི་ཆོས་ཀུན་ཀ་ནས་དག་པས་སྤྲོས་བྲལ་སྟོང་ཉིད་ཆེན་པོར་ཐེ་ཚོམ་མེད་པས་གདར་ཤ་གཏིང་ནས་ཆོད་པ་ལ་དབུ་མའི་མཐར་ཐུག་ཐལ་འགྱུར་བའི་ལྟ་བ་མཐར་ཕྱིན་པ་ཞིག་དགོས་ལ་ཡུལ་ཆོས་ཀྱི་དབྱིངས་རང་གི་ངོ་བོ་སྟོང་པ་ཉིད་སྤྲོས་པ་ཐམས་ཅད་དང་བྲལ་བ་ཞིག་ཡིན་པ་ཙམ་གྱི་ཆ་ནས་བསྐྲུན་ན་ནི་རྫོགས་ཆེན་ཀ་དག་དང་ཐལ་འགྱུར་བའི་སྟོང་པ་ཉིད་སྤྲོས་བྲལ་དེ་གཉིས་ལ་ཁྱད་པར་ཅི་ཡང་མེད་དོ་ཞེས་ཡུལ་ཆོས་ཀྱི་དབྱིངས་ངོ་བོས་སྟོང་པའི་ཆ་ནས་གསུངས་སོ། །འོན་ཀྱང་ངོ་བོ་སྟོང་བར་ཏེ་སྟོང་པ་ཕྱང་ཆད་དུ་འཛིན་ཅིང་ཞེན་པ་བཟློག་པའི་ཕྱིར་དུ་གསང་སྔགས་རྡོ་རྗེའི་ཐེག་པ་ལས་བདེ་བ་ཆེན་པོའི་ཡེ་ཤེས་སམ་འོད་གསལ་བའི་ཡེ་ཤེས་སམ་རིག་པར་རང་བྱུང་གི་ཡེ་ཤེས་འགྱུར་བ་མེད་པ་ཉིད་གསལ་བར་བསྟན་ཏེ། དེ་ལྟར་བདེ་བའི་ཡེ་ཤེས་དང་སྟོང་པའི་དབྱིངས་གཉིས་སུ་བྱར་མེད་པའི་ཆོས་ཀྱི་དབྱིངས་ཟུང་འཇུག་མཉམ་པ་ཆེན་པོ་ཡུལ་དང་ཡུལ་ཅན་གཉིས་སྣང་གི་འཛིན་པ་ཐམས་ཅད་དང་བྲལ་བ་ཡི་ཚུལ་གྱིས་མངོན་སུམ་དུ་ཉམས་སུ་མྱོང་བར་བྱེད་པ་ནི་སྔགས་རྡོ་རྗེའི་ཐེག་པའི་ཁྱད་ཆོས་བླ་ན་མེད་པའོ། །དེ་ཕྱིར་འགགས་པ་མེད་པའི་ལྷུན་གྲུབ་ཀྱི་སྣང་བ་རང་བཞིན་གྱིས་འོད་གསལ་བ་དང་རིག་པ་རང་བྱུང་ཡེ་ཤེས་གསུམ་བདེ་བ་ཆེན་པོའི་ཡེ་ཤེས་འདུས་མ་བྱས་པ་དེ་ཡི་མིང་གི་རྣམ་གྲངས་ཙམ་ཡིན་གྱི་དོན་ལ་ཐ་དད་མེད་པ་ཉིད་དོ། །དེས་ན་འགགས་པ་མེད་པའི་སྣང་བའི་ཆ་ལོངས་སྤྱོད་རྫོགས་པའི་སྐུ་ལ་སོགས་པ་གཟུགས་ཀྱི་སྐུ་འདིས་ནི་སྲིད་པ་འཁོར་བ་ཇི་སྲིད་མ་སྟོང་པ་དེ་སྲིད་དུ་གནས་སྐབས་ཀྱི་ཕན་པ་དང་མཐར་ཐུག་གི་བདེ་བ་ཡིས་ཕྱོགས་དང་རིས་མེད་པའི་འགྲོ་བ་ཀུན་དུས་རྟག་ཏུ་རྒུད་པ་ཀུན་ལས་སྐྱོབས་པར་མཛད་པ་ཡིན་པས་ན་འབྲས་བུའི་མཐར་ཐུག་བདེ་བ་ཆེན་པོའམ་ཐུགས་རྗེ་ཆེན་པོའི་བདག་ཉིད་དམ་དམིགས་པ་མེད་པའི་སྙིང་རྗེའི་རང་བཞིན་དུ་གྱུར་པ་ཉིད་ཡིན་ནོ། །དེ་ཡི་ཕྱིར་ན་རང་བཞིན་ནམ་ངོ་བོ་ཉིད་ཀྱིས་ཀྱང་སྲིད་ཞིར་གང་དུའང་མི་གནས་པའི་སྟོང་དང་སྙིང་རྗེའམ་བདེ་སྟོང་དབྱེར་མེད་དམ་ཟུང་འཇུག་གི་ཡེ་ཤེས་ཆེ་བའམ་ཆེན་པོ་འདུས་མ་བྱས་པ་ཉིད་གཞི་ལ་བྲི་གང་དང་བྲལ་བར་ཇི་ལྟར་བཞུགས་པ་དེ་ལྟར་བདེ་སྟོང་ལམ་གྱི་ངོ་བོ་སྟོང་པའི་དབྱིངས་ཨེ་དང་རང་བཞིན་གསལ་བའི་བདེ་བ་ཆེན་པོའི་ཡེ་ཤེས་ཝཾ་གྱིས་ཏེ་བདེ་སྟོང་ཟུང་འཇུག་གམ་དབྱེར་མེད་པའི་ཡེ་ཤེས་ཀྱིས་བསྒྲུབ་པས་སྙིགས་དུས་ཀྱི་ཚེ་ཐུང་འདི་ཉིད་ལའང་ཟུང་འཇུག་རྡོ་རྗེ་འཆང་ཆེན་པོའི་འབྲས་བུ་མངོན་དུ་འགྱུར་བ་ཡིན་ནོ། །དེ་ལྟར་ན་གཞི་དང་ལམ་དང་འབྲས་བུ་གསུམ་ཆར་ངེས་པའི་དོན་ཉིད་དུ་ན་གཉིས་སུ་དབྱེར་མི་ཕྱེད་པའི་ཟུང་འཇུག་རྡོ་རྗེའི་ཐེག་པ་ཡི་མཐར་ཐུག་གི་འབྲས་བུ་དབང་བཞི་པའམ་བཞི་པའི་དབང་གི་ལམ་རིག་སྟོང་དབྱེར་མེད་རང་བྱུང་གི་ཡེ་ཤེས་འོད་གསལ་བ་དེ་ཉིད་རྒྱུད་གཞན་ཆེན་པོ་རྣམས་སུའང་གབ་ཅིང་སྦས་པ་ཉིད་མ་གབ་མ་སྦས་པར་དེ་ཁོ་ན་ཤིན་ཏུ་གསལ་བར་རྩལ་དུ་བཏོན་ནས་སྟོན་པར་གྱུར་པ་འོད་གསལ་སྙིང་པོ་རྡོ་རྗེ་རྩེ་མོའི་རང་ལུགས་འདི་ནི་མཐར་ཐུག་ཐེག་པ་ཐམས་ཅད་པའི་སྐྱེལ་སོ་ཡིན་པས་གཞན་དང་ཐུན་མོང་མ་ཡིན་པའི་འབྲས་བུའི་ཐུས་ཀ་བླ་ན་མེད་པའོ། །དེས་ན་དང་པོ་ཇི་སྲིད་གནས་ལུགས་སྣང་སྟོང་དབྱེར་མེད་སྤྲོས་པ་དང་བྲལ་བའི་མཉམ་པ་ཉིད་ལ་ངེས་པའི་ཤེས་པ་ཐེ་ཚོམ་དང་བྲལ་བ་མ་སྐྱེས་ཀྱི་བར་དུ་ཐབས་སྣ་ཚོགས་དང་རིགས་པ་ཡང་དག་པས་ཚུལ་བཞིན་དཔྱད་པས་ངེས་ཤེས་བཟང་པོ་དྲང་དགོས་ལ་ངེས་ཤེས་ཡང་དག་པར་སྐྱེས་པར་གྱུར་ན་ངེས་ཤེས་དེ་ཡི་ངང་དུ་གཞན་དུ་མི་ཡེངས་པར་ངེས་ཤེས་དེ་ཉིད་དང་མ་བྲལ་བར་རྩེ་གཅིག་ཏུ་བསྒོམ་པས་ངེས་ཤེས་བཟང་པོ་ཇེ་བས་ཇེ་གསལ་མར་མེ་འོད་གསལ་བ་ལྟ་བུའི་རྒྱུན་གོང་ནས་གོང་དུ་འཕེལ་ནས་ཡང་དག་པ་མིན་པའི་ཕྱིན་ཅི་ལོག་ཏུ་སྒྲོ་འདོགས་པའི་གཉིས་ཆོས་ཀྱི་རྟོག་པ་ཕྲ་རགས་ཐམས་ཅད་བསྣུབ་པར་བྱེད་པ་དེ་ཉིད་ལ་དུས་རྟག་ཏུ་རྩོན་པས་ནན་ཏན་གྱིས་འབད་པར་བྱ་དགོས་ལ། ངེས་ཤེས་དང་ནམ་བྲལ་ན་སླར་ཡང་དཔྱད་པས་ངེས་ཤེས་དེ་ཉིད་དྲངས་ཏེ་བསྒོམ་པར་བྱ་དགོས་སོ། །གཉིས་པ། དང་པོ་དཔྱད་པ་སོགས་ཚིགས་བཅད་བཅུ་དང་རྐང་པ་གསུམ་གྱིས་བསྟན་ཏེ། རིམ་གྱིས་གང་ཟག་གིས་དང་པོ་ཟབ་མོའི་ལུང་གི་སྣང་བ་ལ་བརྟེན་པའི་རིགས་པ་ཡང་དག་པས་འཁོར་འདས་ཀྱི་ཆོས་ཀུན་སྣང་སྟོང་དབྱེར་མེད་དམ་ཟུང་འཇུག་སྤྲོས་བྲལ་མཉམ་པ་ཉིད་དུ་གཏན་ལ་དབབ་པའི་དཔྱད་པ་གལ་ཆེ་སྟེ། ཇི་ལྟར་ན་རང་རང་གིས་ལུང་རིགས་ཀྱིས་དཔྱད་པ་བཟང་པོས་ཡང་ཡང་མ་དྲང་ན་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་རང་རྒྱུད་ལ་ག་ལ་སྐྱེ་སྟེ་སྐྱེ་མི་ནུས་ལ། ངེས་ཤེས་བཟང་པོ་དེ་རང་རྒྱུད་ལ་ལེགས་པར་མ་སྐྱེས་ན་བདག་དང་གཞན་དུ་དངོས་པོར་རྟོག་པ་སོགས་སྒྲོ་འདོགས་ངན་པ་སྣ་ཚོགས་ལ་འདི་དག་ག་ལ་ནུབ་སྟེ་ནུབ་མི་ཐུབ་ལ། སྒྲོ་འདོགས་ངན་པ་དེ་རྣམས་མ་ནུབ་ན་འཁྲུལ་པའི་ལས་རླུང་ངན་པ་སྣ་ཚོགས་པ་འདི་དག་ག་ལ་འགག་སྟེ་འགག་མི་ཐུབ་ལ། ལས་རླུང་ངན་པ་དེ་རྣམས་མ་འགག་ན་འཁོར་བའི་སྣང་བ་ངན་པ་སྣ་ཚོགས་པ་འདི་རྣམས་ག་ལ་སྤང་སྟེ་སྤང་མི་ཐུབ་ལ། འཁོར་བའི་སྣང་བ་ངན་པ་སྣ་ཚོགས་པ་འདི་རྣམས་མ་སྤང་ན་སྡུག་བསྔལ་གྱིས་མནར་བ་ངན་པ་འདི་རྣམས་ཅི་ལ་འཛད་དེ་འཛད་པར་མི་ནུས་སོ། །འོ་ན་ངེས་ཤེས་བཟང་པོ་དེ་ཅི་ཞེ་ན་སྲིད་པ་འཁོར་བ་དང་ཞི་བ་མྱང་ངན་ལས་འདས་པ་ལ་ངེས་པའི་དོན་དུ་གནས་ལུགས་ཡེ་གདོད་མ་ནས་བཟང་ངན་ཅུང་ཟད་ཙམ་ཡང་ཡོད་པ་མ་ཡིན་པ་དེ། དེ་བཞིན་དུ་བཟང་ངན་ཅུང་ཟད་ཙམ་ཡང་མེད་པར་འཁོར་འདས་དབྱེར་མེད་མཉམ་པ་ཉིད་དུ་ཡང་དག་པར་རྟོགས་པ་ཡི་ངེས་ཤེས་ཐེ་ཚོམ་གྱི་སྨག་ཐམས་ཅད་དང་བྲལ་བ་ནི་བཟང་པོ་ཉིད་ཡིན་ལ། དེ་ལྟ་ན་ངེས་ཤེས་བཟང་པོས་འཁོར་བ་ངན་པ་འདི་སྤང་ནས་གཟོད་མྱང་འདས་བཟང་པོ་ཞིག་གཞན་ནས་མ་སྒྲུབས་པས་སྤང་བླང་མེད་པས་མཉམ་པ་ཉིད་ལ་འཁོར་བ་སྤང་བའི་མྱང་འདས་ཐོབ་པར་སྣང་བ་འགལ་བ་ལྟར་སྟོན་པ་སྣང་བའི་ཚིག་གི་དོན་འདི་ཉིད་ཀྱང་ཅུང་ཟད་ཙམ་ཡང་མི་འགལ་སྟེ་སྣང་ཚུལ་འཁོར་འདས་སུ་སྣང་ཡང་གནས་ཚུལ་ལ་བསལ་བཞག་གམ་སྤང་བླང་མེད་པས་འཁོར་འདས་དབྱེར་མེད་མཉམ་པ་ཉིད་དུ་ལྷུན་གྱིས་གྲུབ་པ་ཉིད་ནི་ལམ་གྱི་གནད་གལ་མདོ་སྟེ་དེས་ན་ལྟ་བ་བསལ་བཞག་གམ་སྤང་བླང་མེད་འཁོར་འདས་དབྱེར་མེད་མཉམ་པ་ཉིད་དང་སྤྱོད་པ་བླང་དོར་དང་བྲལ་བ་ནི་མན་ངག་གི་གནད་གསང་ཟབ་མོ་འདི་ལེགས་པར་དཔྱད་དེ་དོན་གྱི་རོ་ཚུལ་བཞིན་དུ་ཉམས་སུ་མྱོང་བར་གྱིས་ཤིག་ཅེས་གདམས་པར་མཛད་དོ། །བར་དུ་ཚུལ་བཞིན་ལེགས་པར་དཔྱད་པ་དང་དེས་དྲང་བའི་ངེས་ཤེས་བཟང་པོའི་ངང་ལ་མཉམ་པར་འཇོག་པ་དག་སྤེལ་དགོས་དཔྱད་ན་གནས་ལུགས་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་སྐྱེ་བར་འགྱུར་ཞིང་མ་དཔྱད་ན་ཐ་མར་དངོས་པོར་འཛིན་ཅིང་ཞེན་པར་གྱུར་པའི་ཚེ་ན་སླར་ཡང་ལེགས་པར་དཔྱད་ཅིང་དཔྱད་ཅིང་གནས་ལུགས་ཟབ་མོའི་དོན་ལ་ངེས་ཤེས་དྲངས་དགོས་ཏེ་ངེས་ཤེས་བཟང་པོ་ཡང་དག་པར་སྐྱེས་པར་གྱུར་ན་ངེས་ཤེས་དེ་གའི་དང་དུ་མ་ཡེངས་པར་རྩེ་གཅིག་ཉིད་དུ་མཉམ་པར་བཞག་སྟེ་བསྒོམས་དགོས་ཏེ་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ཀྱི་ངེས་ཤེས་དང་ནི་བདག་གཞན་དང་ཡོད་མེད་ལ་སོགས་པའི་ཕྱིན་ཅི་ལོག་ཏུ་སྒྲོ་འདོགས་ཀྱི་ཡིད་གཉིས་སྣང་མུན་ལྟར་ཕན་ཚུན་ཤིན་ཏུ་འགལ་བར་གྱུར་པ་ཉིད་ཀྱི་ཕྱིར་ཟབ་མོའི་རིགས་པ་ཡང་དག་པས་དཔྱད་པས་སྒྲོ་འདོགས་ཀྱི་རྟོག་པ་ཐམས་ཅད་སུན་བྱུང་བས་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་རྟོགས་པའི་ངེས་ཤེས་བཟང་པོ་གང་ནས་གོང་དུ་སྤེལ་དགོས་པས་སོ། །ཐ་མར་རིགས་པའི་དཔྱད་པས་ཡང་དང་ཡང་དུ་མ་དྲངས་ཀྱང་ངེས་ཤེས་བཟང་པོ་ངང་གིས་སྐྱེ་བར་གྱུར་པ་ན་ངེས་ཤེས་དེ་གའི་ངང་དུ་གཞན་དུ་མི་ཡེངས་པར་རྩེ་གཅིག་ཏུ་མཉམ་པར་འཇོག་པ་ལས་སླར་ཡང་རིགས་པས་དཔྱད་པས་ལེགས་པར་གྲུབ་ཟིན་པའི་དོན་དེ་ཉིད་ཡང་དང་ཡང་དུ་བསྐྱལ་ཏེ་བསྒྲུབས་པས་ངལ་བ་ཅི་ཞིག་དགོས་ཏེ། དཔེར་ན་ཐག་པར་སྦྲུལ་མེད་པར་ཇི་ལྟ་བ་བཞིན་དུ་རྟོགས་པ་ན་སྦྲུལ་མེད་པར་ངེས་པས་ངེས་ཤེས་དེ་གས་སྦྲུལ་འཛིན་ལྷག་མེད་དུ་ལྡོག་པར་གྱུར་ན་ད་དུང་ཡང་སྦྲུལ་ནི་འདིར་མེད་དོ་ཞེས་ཡང་ཡང་རིགས་པས་དཔྱད་དགོས་སོ་ཞེས་ཟེར་བ་ནི་བློ་གྲོས་བླུན་མིན་ནམ་སྟེ་བློ་གྲོས་བླུན་པའི་འབྲས་རྟགས་སོ། །གཞན་ཡང་འཕགས་ལམ་གྱི་རྟོགས་པ་སྤྲོས་བྲལ་མཉམ་པ་ཉིད་མངོན་སུམ་དུ་གྱུར་པའི་ཚེ་ན་ད་དུང་ཡང་རིགས་པས་དཔྱད་པས་མི་སྒོམས་ཏེ་མངོན་སུམ་དུ་རྟོགས་པ་སོ་སོ་རང་རིག་པའི་ཡེ་ཤེས་ཉིད་ལ་རྒྱུ་མཚན་གྱིའམ་རྟགས་ལ་བརྟེན་པའི་ཡིད་དཔྱོད་ཀྱི་གཏན་ཚིགས་སྦྱོར་བ་ཅི་ཞིག་དགོས་ཏེ་དགོས་པ་ཅི་ཡང་མེད་དེ་དཔེར་ན་མངོན་སུམ་མ་འཁྲུལ་བས་མེ་ཉིད་མཐོང་བ་ལ་དུ་བའི་རྟགས་སྦྱོར་བྱེད་པ་ཤིན་ཏུ་འཁྲུལ་བ་བཞིན་ནོ། །གསུམ་པ་ལ་ལྔ། ལོག་རྟོག་བསལ་ཏེ་དཔྱོད་ཤེས་ཀྱི་འཛིན་སྟངས་ཀུན་དང་བྲལ་བའི་མཉམ་བཞག་ཡེ་ཤེས་ཉིད་ཐེག་ཆེན་ལམ་གྱི་དངོས་གཞི་ཐེག་པ་དང་ཆེན་པོའང་ཡིན་པར་བསྟན་པ། ཚུལ་དེས་ཨ་ཏི་ཡོ་ག་རྒྱུད་ཀྱི་མཐར་ཐུག་དང་ཐེག་པའི་རྩེ་མོར་བསྟན་པ། དེ་ཉིད་གཏན་ལ་འབེབ་པར་བྱེད་པ་གང་ཞིག་གཞན་ལས་མཆོག་ཏུ་བསྟན་པ། མདོ་རྒྱུད་མན་ངག་གི་བསྟན་དོན་མཐར་ཐུག་ཐམས་ཅད་འོད་གསལ་རྫོགས་པ་ཆེན་པོར་དབྱེ་བ་མེད་ཅིང་དེ་ཉིད་ཀུན་གྱིས་འབྱུང་གནས་སུ་བསྟན་པ། ཡེ་ཤེས་དེ་ཉིད་སོ་སོའི་སྐྱེ་བོས་རྗེས་མཐུན་པ་བསྒོམ་དུ་ཡོད་ཚུལ་བསྟན་པའོ། །དང་པོ། གལ་ཏེ་དཔྱད་པ་སོགས་ཚིགས་བཅད་བཅུ་གཅིག་གིས་བསྟན་ཏེ། གོང་དུ་རིམ་པས་བསྟན་པ་དེ་ལྟར་མ་ཡིན་པར་གལ་ཏེ་རྣམ་པ་ཀུན་དུ་དཔྱད་པ་དང་བྲལ་བའི་ཚེ་གནས་ལུགས་དོན་དམ་པ་ཡང་དག་པར་མཐོང་ཞིང་རྟོགས་པ་ཉིད་ནམ་ཡང་མི་འགྲུབ་པ་དེ་ལྟ་ཡིན་ན་འཕགས་པ་རྣམས་ཀྱི་མཉམ་བཞག་གི་ཡེ་ཤེས་དང་རྒྱལ་བའི་ཡེ་ཤེས་ཐམས་ཅད་མཁྱེན་པ་དང་གཞན་འཇིག་རྟེན་གནོད་མེད་ཀྱི་ཤེས་པ་སྟེ་འཁྲུལ་རྒྱུའི་མ་སླད་པ་དེ་ཡིས་ཏེ་དེ་དང་དེ་ཡིས་རང་ཡུལ་གྱི་གཟུང་བ་ཡང་དག་པ་རང་མཚན་རྣམས་ཁྱོད་ལ་ཕྱིན་ཅི་ལོག་གི་གཟུང་བ་ཉིད་དུ་ཐལ་བར་འགྱུར་ཏེ། གང་ཕྱིར་མངོན་སུམ་དེ་དག་ནི་རང་ཡུལ་ཇི་ལྟ་བ་བཞིན་དུ་རྟོགས་ཟིན་པ་ཡིན་པའི་ཕྱིར་ན་དེ་དག་ལ་རང་དུས་དེ་དང་དེ་ཉིད་ན་ཡིད་རྟོག་གིས་དཔྱད་པ་མེད་པའི་ཕྱིར་ཏེ་དཔྱད་པ་དང་བྲལ་ན་དོན་དམ་མི་རྟོགས་པར་ཁས་བླང་བས་སོ། །དེ་ཡི་ཕྱིར་ན་མཐའ་བཞིའི་སྤྲོས་པ་མ་ལུས་པ་ཀུན་དང་བྲལ་བ་ཟུང་འཇུག་མཉམ་པ་ཉིད་ཇི་བཞིན་རྟོགས་པ་ཡི་ངེས་ཤེས་ཤིན་ཏུ་གསལ་བ་ཁྱད་པར་ཅན་གྱི་ངོར་འདི་དང་འདིའོ་སོགས་སུ་སྙམ་པ་ཡི་དམིགས་གཏད་ཀྱི་དཔྱོད་པ་ཤིན་ཏུ་ཕྲ་བ་ཡང་གནས་དང་སྐབས་མི་ཐོབ་པས་དམིགས་གཏད་ཐམས་ཅད་དང་བྲལ་བ་ཡིན་ནོ། །གང་གི་ཚེ་ཡིད་རྟོག་གིས་དཔྱད་པས་སྟོང་དང་མི་སྟོང་བར་འཛིན་པའི་མཚན་འཛིན་དེས་དར་གྱི་སྲིན་བུ་རྣམས་ཀྱིས་རང་གི་རང་ཉིད་བཅིངས་པ་ཇི་ལྟ་བ་བཞིན་དུ་ཡིད་རྟོག་གིས་དཔྱོད་པའི་འཛིན་པ་དེ་ཡིས་གནས་ལུགས་འཛིན་སྟངས་ཐམས་ཅད་དང་བྲལ་བའི་མཉམ་བཞག་ཡེ་ཤེས་དེ་བཅིངས་ཏེ་སྒྲིབ་པར་བྱས་ནས་གནས་ཚུལ་ཡང་དག་པའི་དོན་ཇི་ལྟ་བ་བཞིན་དུ་མི་མཐོང་བར་འགྱུར་རོ། །དེས་ན་མཐའ་བཞིའི་སྤྲོས་པ་དང་བྲལ་བའི་སྣང་སྟོང་དབྱེར་མེད་མཉམ་པ་ཉིད་ཀྱི་ངེས་ཤེས་ཁྱད་པར་ཅན་སྐྱེས་པ་འདིས་ནི་ཡིན་ལུགས་སམ་གནས་ལུགས་ལ་སྒྲིབ་པའི་སྒྲོ་འདོགས་ཀྱི་སྨག་ཐམས་ཅད་བསལ་བའི་ཚེ་ཆོས་ཀྱི་དབྱིངས་རང་བྱུང་གཉུག་མ་དོན་གྱི་ཡེ་ཤེས་འོད་གསལ་བའི་ངང་དེ་ཉིད་མ་ནོར་བ་ཇི་ལྟ་བ་བཞིན་དུ་མཐོང་བ་གང་ཡིན་པ་དེ་ནི་གཉིས་སྣང་ཐམས་ཅད་དང་བྲལ་བའི་འཕགས་པའི་མཉམ་བཞག་སོ་སོ་རང་གིའམ་རང་རིག་པའི་ཡེ་ཤེས་ཏེ་དེ་ནི་སེམས་བྱུང་ཤེས་རབ་གཟུང་འཛིན་ཅན་དེ་ག་ལ་ཡིན་ཏེ་མིན་ནོ། །འོ་ན་དེ་གཉིས་ཀྱི་ཁྱད་པར་ཅི་ཞེ་ན། སེམས་བྱུང་ཤེས་རབ་ཀྱིས་རང་ཡུལ་རྣམས་ལ་ནི་འདི་དང་འདིའོ་ཞེས་སོ་སོར་རྣམ་པར་འབྱེད་ཅིང་དེ་དང་དེ་ལ་དམིགས་ཅིང་རྟོག་པ་ཡིན་ལ་གང་ཕྱིར་གཟུགས་ལ་སོགས་པའི་ཡུལ་དང་། དེ་དང་དེར་འཛིན་པའི་ཡུལ་ཅན་དང་སྣང་བ་དང་སྟོང་པ་རེ་རེ་གང་དུའང་མི་དམིགས་པའམ་མི་རྟོག་པར་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་དུ་རྟོགས་པའི་འཕགས་པའི་མཉམ་བཞག་གི་ཡེ་ཤེས་འདི་ནི་སེམས་དང་སེམས་ལས་བྱུང་བ་ཡི་མཚན་ཉིད་གཟུང་འཛིན་ཅན་དུ་རྣམ་པ་ཀུན་ཏུ་གནས་པ་མ་ཡིན་ཏེ་ཞེས་མདོར་ན་འཛིན་སྟངས་ཡོད་མེད་ཀྱི་ཁྱད་པར་ཅན་དུ་རྟོགས་པར་བྱའོ། །དེ་ཕྱིར་ཡང་དག་པའི་དཔྱད་པས་ལེགས་པར་དྲངས་པ་ཡི་སྤྲོས་ཀུན་བྲལ་བའི་མཉམ་པ་ཉིད་ལ་ངེས་ཤེས་མཆོག་ཏུ་གྱུར་པ་ལ་མཉམ་པར་བཞག་པའི་ཤེས་རབ་རྣམ་པར་དག་པའི་དྲི་མ་མེད་པའི་རྒྱུས་སམ་རྒྱུ་དེས་འབྲས་བུ་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་རྟོགས་པའི་ཡེ་ཤེས་ཉིད་ཐོབ་པར་འགྱུར་རོ། །དེས་ན་གནས་ཚུལ་ལམ་གནས་ལུགས་ཀྱི་ལྟ་བ་ཇི་བཞིན་གཏན་ལ་ཕབ་པར་བྱེད་པ་དང་ངེས་པའི་གྲུབ་མཐའ་གང་ཞིག་སྒྲུབ་པར་བྱེད་པ་ནི་ཆོས་རྣམས་ལ་རང་མཚན་དང་སྤྱི་མཚན་ངོ་བོ་དང་རང་བཞིན་སྣང་བ་དང་སྟོང་པ་ཡོད་པ་དང་མེད་པ་ལ་སོགས་པར་གཏན་ལ་འབེབ་ཅིང་ཤན་འབྱེད་པར་བྱེད་པའི་སོ་སོར་ཡང་དག་པར་རྟོགས་པ་ཡི་ཤེས་རབ་འཁྲུལ་བའི་དྲི་མ་མེད་པའི་ཚད་མ་ཉིད་ཡིན་ལ་གནས་ལུགས་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་ཀྱི་དོན་གྱི་དོན་ལ་ཤེས་རབ་དྲི་མ་མེད་པ་དེས་ལེགས་པར་དྲང་པ་ཡི་ངེས་ཤེས་ཁྱད་པར་ཅན་གྱི་ལམ་ཡང་དག་པ་བསྒོམ་པ་ལ་བརྟེན་ནས་ཆོས་ཐམས་ཅད་ཀྱི་ཡིན་ལུགས་སམ་གནས་ལུགས་ཆོས་ཀྱི་དབྱིངས་གཉུག་མ་དོན་གྱི་འོད་གསལ་བའི་གཤིས་སུ་ཕེབ་པའམ་སོན་པའི་འཕགས་པའི་མཉམ་བཞག་གཉིས་སྣང་ཐམས་ཅད་ནུབ་པའི་ཡེ་ཤེས་གང་ཡིན་པ་དེ་ནི་ངེས་དོན་ཐེག་པ་ཆེན་པོའི་ལམ་གྱི་དངོས་གཞི་ཡང་དག་པ་ཉིད་དེ་འདི་དང་ཡང་དག་པར་ལྡན་ན་མི་སློབ་པའི་ཟུང་འཇུག་རྡོ་རྗེ་འཆང་གི་གོ་འཕང་སྙིགས་དུས་ཀྱི་ཚེ་ལུས་འདིར་བདེ་མྱུར་དུ་སྟེར་བའི་ཕྱིར་ན་འདི་ཉིད་ཐེག་པའི་ནང་ནས་ཐེག་པ་མཆོག་ཉིད་ཡིན་ལ་དེ་དང་མཉམ་པ་གཞན་མེད་པས་ཆེན་པོའང་ཡིན་ནོ། །གཉིས་པ། རྒྱུད་སྡེ་བཞི་ཡི་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། ཚུལ་དེ་ལྟར་ན་གསང་སྔགས་ཀྱི་རྒྱུད་སྡེ་དེ་ལ་བྱ་སྤྱོད་རྣལ་འབྱོར་རྣལ་འབྱོར་བླ་མེད་དང་བཞི་རུ་དབྱེ་བ་ཡི་ལུགས་ལྟར་ན་ཡང་བླ་ན་མེད་པའི་རྒྱུད་རྣམས་ཀྱི་ཚིག་དབང་སྟེ་དབང་བཞི་པའི་ལམ་གྱི་དངོས་གཞི་འདི་ནི་དོན་གྱི་འོད་གསལ་ཟུང་འཇུག་གི་ཡེ་ཤེས་མཐར་ཐུག་པ་ཉིད་ཡིན་མོད་ཀྱི་དེ་ལས་ལོག་སུ་ཐེག་པའི་རྩེ་མོ་གཞན་ཞིག་ཡིན་པར་མ་བཞག་ཀྱང་རྒྱུད་གང་ལས་དེ་ཉིད་རྩལ་དུ་བཏོན་ནས་བསྟན་དོན་ལ་གནས་པས་བཞག་དགོས་སོ། །དཔེར་ན་འཁོར་འདས་ཀྱི་ཆོས་ཀུན་མཉམ་པ་ཉིད་ཀྱི་ཡེ་ཤེས་འགྱུར་མེད་བདེ་བ་ཆེན་པོའི་སྐུ་ཉིད་རྩལ་དུ་བཏོན་ནས་གསལ་བར་འཆད་པ་ཡི་གཉིས་མེད་ཀྱི་རྒྱུད་དཔལ་ལྡན་དུས་ཀྱི་འཁོར་ལོ་ཉིད་ལ་རྒྱུད་ཐམས་ཅད་ཀྱི་རྒྱལ་པོའམ་རྒྱུད་ཀྱི་མཐར་ཐུག་ཡིན་པར་བཞེད་ཅིང་བཞག་པ་བཞིན་དུ་རྒྱུད་ཀྱི་མཐར་ཐུག་དང་ཐེག་པའི་རྩེ་མོར་ལོགས་སུ་བཞེད་ཅིང་འཇོག་དགོས་ཏེ། བླ་ན་མེད་པའི་ནང་རྒྱུད་མ་ཧཱ་ཨ་ནུ་ཨ་ཏི་སྟེ་ཡོ་ག་གསུམ་ལས་ཨ་ཏིའི་སེམས་ཀློང་མན་ངག་གི་སྡེའི་ནང་ནས་ཀྱང་དབང་བཞིའི་ཞེས་དབང་བཞི་པ་ཚིག་དབང་རིན་པོ་ཆེའི་ལམ་གྱི་ཡེ་ཤེས་རིག་སྟོང་དབྱེར་མེད་རང་བྱུང་གི་ཡེ་ཤེས་ཟུང་འཇུག་འདུས་མ་བྱས་པ་གང་ཞིག་མ་གབ་མ་སྦས་པར་རྩལ་དུ་བཏོན་ནས་ཤིན་ཏུ་གསལ་བར་བསྟན་ཅིང་འཆད་པ་ཨ་ཏི་ཡོ་གའི་མན་ངག་སྡེའི་རྒྱུད་འདི་ཉིད་ནི་རྒྱུད་སྡེ་བླ་ན་མེད་པ་ཀུན་གྱི་མཐར་ཐུག་གི་དགོངས་པའི་མཐིལ་སྐྱེལ་སོ་ཡིན་ཏེ། དཔེར་ན་ལན་གྲངས་བཅུ་དྲུག་བར་དུ་བཞུས་པའི་གསེར་གཙོ་མ་ཤིན་ཏུ་རྣམ་པར་དག་པ་དེ་བཞིན་དུ་འོག་མའི་ཐེག་པ་གཞན་ཀུན་གྱི་གྲུབ་མཐའ་ལུང་རིག་མན་ངག་གིས་དཔྱད་པ་ཡིས་ཇེ་བས་ཇེ་དག་གམ་ཇེ་གསལ་དུ་བསྟན་པས་རིག་སྟོང་དབྱེར་མེད་རང་བྱུང་གི་ཡེ་ཤེས་ཇི་བཞིན་པ་དེ་ཉིད་ཨ་ཏི་ཡོ་གའི་རྒྱུད་འདིར་ཡང་དག་པར་མཐར་ཕྱིན་པ་ཁོ་ན་ཡིན་པའི་ཕྱིར་འདི་ནི་རྒྱུད་ཐམས་ཅད་ཀྱི་མཐར་ཐུག་པ་དང་ཐེག་པ་ཐམས་ཅད་ཀྱི་རྩེ་མོར་ལེགས་པར་གྲུབ་པ་ཡིན་པར་སྨོས་ཅི་དགོས་སོ། །དེ་ཕྱིར་ཟབ་མོའི་ཤེས་རབ་དྲི་མེད་ཀྱི་ཚད་མས་རིག་སྟོང་ཟུང་འཇུག་རང་བྱུང་གི་ཡེ་ཤེས་འོད་གསལ་འདུས་མ་བྱས་པ་འདི་ཡི་དོན་ཉིད་ཡང་དག་པར་གྲུབ་པའི་ཚུལ་གསང་སྔགས་བླ་ན་མེད་པས་ཀྱང་ནང་རྒྱུད་ཡོ་ག་གསུམ་གྱི་རྒྱུད་དང་དེ་དག་གི་དགོངས་པ་འགྲེལ་བ་མན་ངག་དང་བཅས་པ་ཀུན་དང་པཎྜི་ཏ་ཆེན་པོ་ཀུན་མཁྱེན་རོང་ཟོམ་ཆོས་བཟང་གི་ཡང་དག་པའི་རིགས་པ་སུས་ཀྱང་མི་འཕྲོག་པས་རྣམ་པར་དཔྱད་པའི་ལུང་རིགས་མན་ངག་རྣམས་ལ་ཚུལ་བཞིན་དུ་བསམ་ན་བདུན་དང་ཕས་ཀྱི་རྒོལ་བའི་ཡུལ་ལས་འདའ་ཞིང་སུས་ཀྱང་གླགས་ཕྲ་བ་ཙམ་ཡང་མི་རྙེད་དེ་སུས་ཀྱང་མི་འཕྲོག་པའི་ཤེས་རབ་ཟབ་མོ་ཡོངས་སུ་སྨིན་པར་བྱེད་པའི་མཚན་ཉིད་དང་ཡང་དག་པར་ལྡན་པས་སོ། །རྒྱལ་ཚབ་བྱམས་པས་མདོ་སྡེ་རྒྱན་ལས་ཀྱང་། ཆོས་བཟང་རིགས་པས་རྣམ་དཔྱད་སོགས་ཡོངས་སྨིན་གྱི་མཚན་ཉིད་ཇི་སྐད་བསྟན་པ་འདིས་པཎྜི་ཏ་འདི་ཉིད་ཤིན་ཏུ་གསལ་བར་ལུང་བསྟན་པར་ཡང་རིག་པར་བྱའོ། །གསུམ་པ། འོན་ཀྱང་ལྟ་བའི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། དེ་ལྟར་གནས་ལུགས་མཐར་ཐུག་གི་ལྟ་བའི་དངོས་གཞི་རིགས་སྟོང་ཟུང་འཇུག་རང་བྱུང་གི་ཡེ་ཤེས་བསལ་བཞག་དང་བྲལ་བར་མདོ་རྒྱུད་ངེས་དོན་ཟབ་མོ་རྣམས་ལས་ཡང་དག་པར་བསྟན་མོད་ཀྱི་འོན་ཀྱང་དེ་ལྟར་མ་རྟོགས་ནས་གནས་ལུགས་ལྟ་བའི་དངོས་གཞི་མཐར་ཐུག་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་དེ་ནི་སྣང་བ་དང་སྟོང་པ་ཕྱོགས་རེར་འཛིན་པ་སོགས་གཟུང་འཛིན་ཅན་གྱི་སེམས་དང་སེམས་ལས་བྱུང་བའི་གཉིས་སྣང་གི་སྤྱོད་ཡུལ་ཅན་དུ་གནས་ལུགས་ཀྱི་ལྟ་བའི་དངོས་གཞི་མཐར་ཐུག་སེམས་ལས་འདས་པའི་ཡེ་ཤེས་སྨྲ་བསམ་བརྗོད་བྲལ་འདི་ཡི་དོན་ཉིད་ལུང་རིགས་ཀྱིས་བཀྲལ་ཞིང་སྟོན་པར་བྱེད་པ་རྣམས་ཀྱིས་ནི་བརྗོད་པར་བྱ་བ་མིན་པ་ཉིད་བརྗོད་བྱར་བྱས་པའི་ཕྱིར་ན་དོན་གཟིགས་མཁས་པའི་དབང་པོ་རྣམས་ཀྱི་དགོངས་པ་ཡང་དག་པ་ཉིད་དང་ཤིན་ཏུ་འགལ་བ་ཞིག་ཡིན་ཏེ། གང་ཕྱིར་རྫོགས་པ་ཆེན་པོ་ཨ་ཏི་ཡོ་ག་ཡི་ལྟ་བ་འདི་ནི་སྣང་བ་དང་སྟོང་པ་ཡོད་པ་དང་མེད་པ་སོགས་གང་དུའང་བསམ་གྱིས་མི་ཁྱབ་པའི་རིགས་སྟོང་དབྱེར་མེད་རང་བྱུང་གི་ཡེ་ཤེས་ཉིད་ཡིན་སླད་ཐ་མལ་མ་དག་པའི་གཟུང་འཛིན་ཅན་སེམས་དང་སེམས་ལས་འདས་པ་ཁོ་ནའི་སྟེ་ཁོ་ན་ཡིན་པའི་ཕྱིར་རོ། །གནས་ལུགས་མཐར་ཐུག་རིག་སྟོང་དབྱེར་མེད་རང་བྱུང་གི་ཡེ་ཤེས་འདི་ཉིད་ལ་ཡང་ངོ་བོ་ཡེ་ནས་དག་པས་ཀ་དག་སྟོང་བའི་ཆ་ཇི་བཞིན་པ་གཏན་ལ་འབེབ་པ་ལ་ཁྲེགས་ཆོད་ཀྱིི་ལྟ་བ་དང་རང་བཞིན་ལྷུན་གྱིས་གྲུབ་པའི་སྐུ་དང་ཡེ་ཤེས་ཀྱི་རང་བཞིན་ཡང་དག་པར་གཏན་ལ་འབེབ་པ་ལ་དབྱིངས་ནང་གསལ་ལྷུན་གྲུབ་འདུས་མ་བྱས་པའི་གཞོན་ནུ་བུམ་པའི་སྐུར་སུས་ཀྱང་ལྡོག་ཏུ་མེད་པར་ཡིད་ཆེས་པ་མངོན་སུམ་མཐོང་བའི་འོད་གསལ་ཐོད་རྒལ་དང་གཉིས་ཡིན་ལ་དེ་གཉིས་ཀའང་ཐ་དད་མེད་པས་སོ་སོར་དབྱེར་མེད་དེ་ངོ་བོ་ཀ་དག་གི་དབྱིངས་དང་རང་བཞིན་ལྷུན་གྱིས་གྲུབ་པའི་འོད་གསལ་ཟུང་འཇུག་གི་ཡེ་ཤེས་འདུས་མ་བྱས་ཆེན་པོ་ཁོ་ན་ཡིན་ནོ། །རྒྱུད་སྡེ་ཆེན་པོ་གཞན་ལས་ཀྱང་མི་ཤིག་པའི་ཡེ་ཤེས་ཏི་ལ་ཀ་ཞེས་པ་ལ་སོགས་པ་ཡང་ལྷུན་གྲུབ་གཞོན་ནུ་བུམ་སྐུ་འདི་དང་མིང་གི་རྣམ་གྲངས་ཙམ་ལས་དོན་ལ་ཐ་དད་མ་མཆིས་མོད་ཀྱི་འོན་ཀྱང་རྫོགས་ཆེན་ཨ་ཏི་ཡོ་ག་འདིར་ནི་གབ་སྦས་མེད་པར་ཆེས་ཤིན་ཏུ་གསལ་བོར་བསྟན་ཅིང་གཏན་ལ་ཕེབ་པར་མཛད་པས་ན་འདི་ནི་རྒྱུད་དང་ཐེག་པ་གཞན་ཐམས་ཅད་ལས་མཆོག་ཉིད་དུ་བསྟན་ནོ། །བཞི་པ། རྫོགས་ཆེན་སེམས་སྡེའི་སོགས་ཚིགས་བཅད་དྲུག་གིས་བསྟན་ཏེ། དེ་ལ་འོད་གསལ་རྫོགས་པ་ཆེན་པོ་ཡི་སེམས་ཀློང་མན་ངག་གི་སྡེ་གསུམ་ལས་སེམས་སྡེའི་མན་ངག་འཐོར་བུའི་གནད་རེར་མཁས་ཤིང་གྲུབ་པའི་དབང་ཕྱུག་སོ་སོའི་ཐུགས་ཉམས་སུ་བཞེས་པ་རྣམས་ལ་བཀའ་བརྒྱུད་པ་སོགས་ཀྱི་ཕྱག་རྒྱ་ཆེན་པོ་དང་། ས་སྐྱས་ལམ་འབྲས་དམ་པའི་ཞི་བྱེད་དང་། དབུ་མ་པས་ཟུང་འཇུག་གམ་སྤྲོས་བྲལ་དབུ་མ་ཆེན་པོ་སོགས་མཚན་གྱི་རྣམ་གྲངས་མི་འདྲ་བར་སོ་སོར་གྲགས་མོད་ཀྱང་དོན་ལ་ཡང་དག་པ་དེ་དག་ནི་སེམས་དང་སེམས་ལས་བྱུང་བ་ལས་འདས་པ་ཡི་རང་བྱུང་འོད་གསལ་བའི་ཡེ་ཤེས་ཉིད་ཡིན་པའི་ཕྱིར་དེ་དག་ཀུན་ཀྱང་མཉམ་པ་སྟེ་བཟང་ངན་མེད་པའོ། །དེས་ན་སངས་རྒྱས་རྣམས་དང་གྲུབ་ཐོབ་ཐམས་ཅད་དགོངས་པ་ནི་གཅིག་ཡིན་ནོ་ཞེས་མཁས་གྲུབ་ཀུན་མགྲིན་གཅིག་ཏུ་སྨྲ་ཞིང་གསུང་བར་མཛད་པ་ཡང་ཚུལ་དེ་ལྟ་བུ་ལ་དགོངས་པ་ཡིན་ནོ། །གཞན་ཡང་ལ་ལས་རང་གི་ལུགས་འོད་གསལ་རྫོགས་པ་ཆེའམ་ཆེན་པོ་ནི་གཞན་ཕྱག་རྒྱ་ཆེན་པོ་ལ་སོགས་པ་ལས་ཁྱད་པར་དུ་འཕགས་སོ་ཞེས་ཟེར་ནའང་། དེ་ལྟར་སེམས་ལས་འདས་པའི་ཡེ་ཤེས་དེ་ཉིད་ཇི་ལྟ་བ་བཞིན་དུ་མ་རྟོགས་ན་ནི་གནས་ལུགས་ཆོས་ཀྱི་དབྱིངས་ཟུང་འཇུག་སྤྲོས་པ་དང་བྲལ་བའི་ཡེ་ཤེས་མཉམ་པ་ཉིད་དངོས་སུ་མཐོང་བའི་ལམ་གྱི་ཐ་སྙད་ཡང་དག་པ་ཉིད་མེད་ལ་རྟོགས་པར་གྱུར་ན་ནི་སེམས་ལས་འདས་པའི་ཡེ་ཤེས་སུ་དགོངས་པ་གཅིག་ཡིན་པ་ལ་རིགས་པ་ཡང་དག་པས་འཐད་པ་དང་བཅས་པའི་དབྱེ་བ་མི་འདྲ་བ་འདི་དང་འདིའོ་ཞེས་བརྗོད་དུ་མེད་དོ། །དེ་བཞིན་དུ་སྔགས་བླ་མེད་ཀྱི་རྒྱུད་སྡེ་ཐམས་ཅད་ཀུན་གྱི་བཞི་བའི་དབང་གིའམ་དབང་བཞི་པའི་ཡེ་ཤེས་དོན་གྱི་འོད་གསལ་ཡང་དག་པ་ཐམས་ཅད་ཀུན་རིག་སྟོང་འོད་གསལ་རྫོགས་པ་ཆེན་པོར་འདུ་བས་དབྱེ་བ་མེད་དོ། །འོན་ཀྱང་ཕྱག་རྒྱ་ཆེན་པོ་ལ་སོགས་པའི་ཡེ་ཤེས་དེ་དག་ཐམས་ཅད་ཀྱི་འབྱུང་གནས་ཡེ་ཤེས་ཐམས་ཅད་ཀྱི་སྤྱི་གཟུགས་རིག་སྟོང་དབྱེར་མེད་ཟུང་འཇུག་གི་ཡེ་ཤེས་ཉིད་གབ་སྦས་མེད་པར་ཤིན་ཏུ་རྩལ་དུ་བཏོན་པར་མཛད་པའི་རྫོགས་པ་ཆེན་པོའི་རྒྱུད་སྡེ་ལ་ཡང་ཕྱི་སེམས་སྡེ་ནང་ཀློང་སྡེ་གསུང་བ་མན་ངག་གི་སྡེས་ཕྱེ་བའི་ཟབ་རྒྱས་ཀྱི་ཁྱད་པར་དུ་མས་འཕགས་པའི་གནད་ནི་ཞལ་ནས་སྙན་དུ་བརྒྱུད་པའི་མན་ངག་ཟབ་མོ་ཐོར་བུས་ཉམས་ལེན་ཕྱག་ཆེན་པ་སོགས་གཞན་ལའང་མིང་ཙམ་མ་གྲགས་པ་མང་པོ་ཡོད་པས་ན་འདི་ནི་ཁྱད་ཆོས་ཡིན་ཞེས་གསང་འཐོན་དུ་སྨྲ་ཅི་དགོས་ཏེ་མི་དགོས་སོ། །ལྔ་པ། དེ་ལ་རྫོགས་ཆེན་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། དེ་ལ་རིག་སྟོང་དབྱེར་མེད་པའི་འོད་གསལ་རྫོགས་པ་ཆེན་པོ་རང་བྱུང་གི་ཡེ་ཤེས་མཐར་ཐུག་པ་གང་ཞིག་ཟབ་ཞི་སྤྲོས་པ་ཀུན་དང་བྲལ་བའི་འོད་གསལ་འདུས་མ་བྱས་པ་ཉིད་སངས་རྒྱས་ཀྱི་ཡེ་ཤེས་དངོས་ཡིན་ན་ཡང་རང་ལུགས་འདིར་ནི་སོ་སོ་སྐྱེ་བོ་འཆིང་བ་ཀུན་ལྡན་གྱིས་གནས་སྐབས་སུ་ཡང་རྫོགས་པ་ཆེན་པོའི་མན་ངག་གི་ལམ་དག་ཏུ་སངས་རྒྱས་ཀྱི་ཡེ་ཤེས་དངོས་དེ་དང་རྗེས་སུ་མཐུན་པ་དཔེ་ཡི་ཡེ་ཤེས་དང་དོན་གྱི་ཡེ་ཤེས་དང་ཟུང་འཇུག་གི་ཡེ་ཤེས་རྣམས་ཏེ་གསུམ་པོ་ནི་དཔེར་ན་རི་མོར་བྲིས་པའི་ཟླ་བ་དང་ཆུ་ནང་གི་ཟླ་བ་དང་ནམ་མཁའ་ཟླ་བ་དངོས་བཞིན་དུ་ཡེ་ཤེས་དེ་དག་རིམ་པས་གཅིག་གིས་གཅིག་འདྲེན་ཅིང་མངོན་དུ་གྱུར་པ་ཡིན་པས་ན་རྒྱུ་རྐྱེན་རྩོལ་སྒྲུབ་ལས་འདས་པས་རང་བྱུང་ཟག་པ་མེད་པའི་ཡེ་ཤེས་གང་ཞིག་གང་ཟག་རང་རང་གི་བློ་ཡི་ནུས་པ་དང་བསྟུན་ཏེ་ཚུལ་ཇི་ལྟ་བ་བཞིན་དུ་ཉམས་སུ་ལེན་པ་ཡང་དག་པ་ཡོད་པ་ཉིད་ཡིན་པའི་ཕྱིར་ཏེ་དཔེར་ན་མདོ་ལམ་དུ་ཡང་སྤྲོས་པ་ཐམས་ཅད་དང་བྲལ་བ་འཕགས་པའི་ཡེ་ཤེས་གང་ཞིག་ཐོབ་པར་བྱ་བའི་ཕྱིར་དང་རྗེས་སུ་མཐུན་པ་སོ་སོའི་སྐྱེ་བོའི་ས་ཉིད་དུ་བསྒོམ་དུ་ཡོད་པ་བཞིན་ནོ། །དེས་ན་སྤྲོས་ཀུན་བྲལ་བའི་ཆོས་ཉིད་སྣང་སྟོང་ཟུང་འཇུག་གི་ཡེ་ཤེས་ཆེ་བའམ་ཆེན་པོ་མངོན་སུམ་དུ་ཡང་དག་པར་གཏན་ལ་ཕེབ་ཅིང་བསྒོམ་པར་བྱས་པ་ན་སྟོང་དང་མི་སྟོང་ལ་སོགས་པའི་ཡིད་དཔྱོད་ཀྱི་འཛིན་པའི་གཉིས་ཆོས་ཀྱི་ལྟ་བ་རགས་པ་ཐམས་ཅད་ཀུན་རིམ་པས་དེས་བར་ནུབ་ནས་སྤྲོས་པ་དང་བྲལ་བའི་རང་བྱུང་གི་ཡེ་ཤེས་ཉིད་རྗེན་པར་མཐོང་བར་འགྱུར་བ་ཡིན་ནོ། །གསུམ་པ། དེ་ཕྱིར་སྐབས་ཤན་སོགས་ཚིགས་གཅིག་དང་རྐང་པ་གཉིས་ཀྱིས་བསྟན་ཏེ། དེ་ཡི་ཕྱིར་ན་གོང་དུ་ཇི་སྐད་བཤད་པ་ལྟར་སྐབས་ཀྱི་ཤན་སོ་སོར་མ་ཕྱེད་པར་མཉམ་བཞག་ལ་འཛིན་སྟངས་ཡོད་དགོས་ཞེས་དང་མེད་དགོས་ཞེས་ཕྱོགས་སམ་མཐའ་གཅིག་ཏུ་འདི་ཁོ་ནའོ་ཞེས་སྨྲ་བ་ལ་སྐྱོན་གྱི་ཆ་རེ་དང་ལེགས་པའི་ཆ་རེ་ཡོད་པ་དཔེར་ན་ཟླ་བའི་འཕེལ་འགྲིབ་ཀྱི་སྐྱོན་ཡོན་བཞིན་དུ་གནས་པས་མི་འཐད་ཅིང་རང་ལུགས་སོ་སོར་ཕྱེ་སྟེ་བཤད་པ་འདི་ནི་མདོ་རྒྱུད་ཀྱི་ངེས་པའི་ལུང་གི་བསྟན་དོན་ཇི་ལྟ་བ་བཞིན་དུ་འཁྲུལ་པའི་དྲི་མ་མེད་པའི་རིགས་པའི་ཚུལ་གྱིས་ཡང་དག་པར་གྲུབ་པ་ཉིད་ཡིན་ནོ། །ཐེག་མཆོག་ལྟ་བ་བསྒོམ་པ་དཔྱད་འཇོག་ཏུ། །ཕྱོགས་རེར་འཛིན་ལ་སྐྱོན་དང་ལེགས་ཆ་རེ། །ཉེས་པའི་སྐྱོན་བྲལ་ཇི་བཞིན་ཤན་འབྱེད་པའི། །ལུང་རིགས་ཉི་མ་ཐེག་མཆོག་ལྟ་བའི་མིག །ཅེས་ཀྱང་སྨྲས་སོ། །དྲི་ལེན་ལྔ་པ་བདེན་པ་གཉིས་ལས་གང་གཙོ་ལ་གཉིས། གཞན་ལུགས་དགག །རང་ལུགས་བཞག་པའོ། །དང་པོ། བདེན་པ་གཉིས་ལས་སོགས་ཚིགས་བཅད་བཅུ་གཅིག་དང་རྐང་པ་གཉིས་ཀྱི་བསྟན་ཏེ། དེ་ལ་བདེན་པ་གཉིས་ལས་ཀུན་རྫོབ་བམ་དོན་དམ་གང་ཞིག་གཙོ་ཆེ་ཞེ་ན། སྣང་སྟོང་དབྱེར་མེད་མཉམ་པ་ཆེན་པོ་ཐུགས་སུ་མ་ཆུད་པར་སྟོང་པར་ཐུགས་ཞེན་ཆེ་བ་ཁ་ཅིག་སྟོང་ཉིད་དོན་དམ་པ་ཉིད་གཙོ་ཆེར་ཞེས་འདོད་དེ། འདི་ལྟར་སྣང་བ་ཀུན་རྫོབ་རྣམས་ནི་འཁྲུལ་བའི་སྣང་བ་ཁོ་ན་ཡིན་ནོ་ཞེས་སྤང་བྱར་རྟོག་ཅིང་འཛིན་ལ་སྟོང་ཉིད་དོན་དམ་པ་ནི་མ་འཁྲུལ་པ་ཡང་དག་པ་ཉིད་ཡིན་པས་དོན་དམ་པ་དེང་ལྟ་བ་ནི་རྣམ་པར་དག་པ་ཡིན་ནོ་ཞེས་ཟེར་བ་མི་འཐད་དེ། ཇི་ལྟར་ན་སྣང་བ་ཀུན་རྫོབ་རྣམས་མ་འཁྲུལ་བར་སྣང་བ་ལྟར་བདེན་པར་གྲུབ་པར་གྱུར་ན་དེ་དོན་དམ་པ་སྟོང་པ་ཉིད་ཡིན་པར་ཡང་མི་རུང་བའི་ཕྱིར་ཀུན་རྫོབ་འཁྲུལ་བའི་སྣང་བའོ་ཞེས་དེ་སྐད་དུ་ནི་གསུངས་པ་ཡིན་མོད་ཀྱི་འོན་ཀྱང་སྣང་བ་ཀུན་རྫོབ་འདི་སྤང་བའི་ཕ་རོལ་ཏེ་སྣང་བ་དེ་ལས་གཞན་ན་དེའི་སྟོང་པ་དོན་དམ་པ་ཞེས་པ་ཡན་གར་དུ་འགའ་ཅུང་ཟམ་ཙམ་ཡང་མི་འགྲུབ་སྟེ། དེ་གཉིས་ལས་ཀུན་རྫོབ་ཐབས་དང་། དོན་དམ་ཐབས་ལས་བྱུང་བ་ཉིད་ཡིན་ཏེ། གང་བརྟགས་བྱའི་དངོས་པོ་ཀ་བ་ལ་སོགས་པའི་སྣང་བ་ཀུན་རྫོབ་ཉིད་ལ་མ་བརྟེན་པར་དེ་ཡི་དངོས་མེད་དམ་སྟོང་ཉིད་དོན་དམ་པ་ཡན་གར་དུ་ཡོད་པ་མིན་ཏེ་དེས་ན་དངོས་པོ་དང་དངོས་པོ་མེད་པ་དེ་གཉིས་ཀ་ཡང་རྟེན་འབྲེལ་ཙམ་དུ་མཚུངས་པས་རྟེན་འབྲེལ་ཉིད་ཡིན་ཏེ་དངོས་པོ་རྣམས་བརྟེན་ནས་སྐྱེས་པ་དང་དངོས་མེད་བརྟེན་ནས་བརྟགས་པ་ཡིན་པས་སོ། །གལ་ཏེ་སྣང་བ་ཉིད་ལས་སྟོང་པ་ལོགས་སུ་མེད་པ་དེ་ལྟ་མ་ཡིན་པར་སྟོང་ཉིད་དོན་དམ་པར་གཙོ་ཆེ་ཞེས་སྟོང་པར་ཞེན་ཅིང་འཛིན་པ་དེས་སྣང་བ་རྣམ་པར་བཅད་པའམ་སྤང་བར་གྱུར་པ་ཞིག་ཡིན་ན་ངོ་བོ་སྐྱེ་བ་མེད་པའི་སྟོང་པ་ཉིད་ཡིན་པའི་གནད་ཀྱིས་སྣང་བ་འགགས་པ་མེད་པའི་རྟེན་འབྱུང་དུ་རང་ཤར་བས་སྣང་སྟོང་དབྱེར་མེད་རྟག་ཆད་ཐམས་ཅད་དང་བྲལ་བའི་ཟབ་མོ་དབུ་མའི་ལྟ་བ་དཔལ་ལྡན་ཀླུ་སྒྲུབ་ཀྱི་ལུགས་བཟང་སྣང་སྟོང་ཡ་མ་བྲལ་བ་ཉིད་ཕྱིན་ཅི་ལོག་གི་རྟོག་པས་དཀྲུགས་ཤིང་རྙོགས་མར་བྱས་པ་ཡིན་ལ། དེ་ལྟའི་སྣང་བ་ལས་གཞན་པའི་དོན་དམ་སྟོང་པར་མཐོང་བ་དེ་ཡིས་ལམ་དེ་ལ་ནན་ཏན་དུ་གོམས་པར་བྱས་ནས་མཐར་ཆོས་ཐམས་ཅད་སྟོང་པའི་དབྱིངས་ཕྱང་ཆད་འབའ་ཞིག་ཉིད་དུ་རྟོགས་ཏེ་དེའི་ངང་དུ་ཡུལ་དང་ཡུལ་ཅན་གཉིས་སུ་མེད་པར་གྱུར་ཏེ་གཉིས་སྣང་ཐམས་ཅད་ནུབ་པའི་ཚེ་ན་ནི་འཕགས་པའི་མཉམ་བཞག་གཉིས་སྣང་ཐམས་ཅད་ནུབ་པའི་སྟོང་པ་ཉིད་ནི་སྣང་བའི་དངོས་པོའི་སྟེ་དངོས་པོ་རྣམས་ཀྱི་འཇིག་རྒྱུར་ཁྱོད་ལའང་ཐལ་བར་འགྱུར་ཏེ། དཔེར་ན་བུམ་པའི་འཇིག་རྒྱུ་ཐོ་བཞིན་ནོ། །གཞན་ཡང་དེ་འདྲའི་གཞན་སེལ་གྱི་སྟོང་པ་ཕྱང་ཆད་ཁོ་ན་ལ་གཉིས་སྣང་ནུབ་པར་མི་སྲིད་ཅིང་སྲིད་ན་ཡང་ཆད་སྟོང་དུ་གྱུར་པའི་སྐྱོན་ལ་སོགས་པའང་གསུངས་སོ། །དེ་ཡི་ཕྱིར་ན་ཆོས་ཀུན་ཡེ་གདོད་མ་ནས་རང་རང་ངོ་བོས་སྟོང་པ་ཉིད་ཡིན་ན་ཡང་སྣང་བ་རྟེན་འབྱུང་འགགས་པ་མེད་པར་རང་ཤར་བས་སྟོང་རྟེན་འབྱུང་འབྲལ་མི་ཤེས་པས་དབྱེར་མེད་དམ་ཟུང་འཇུག་ཉིད་ཡིན་པའི་གནད་ཀྱིས་གང་སྣང་བ་དེ་ཉིད་སྟོང་པ་དང་གང་སྟོང་བ་དེ་ཉིད་སྣང་བ་སྟེ་སྣང་བ་དང་སྟོང་པ་སོ་སོར་རིས་སུ་མ་ཆད་པ་མེ་དང་ཚ་བ་བཞིན་དུ་རྣམ་དབྱེར་མེད་པར་ཡེ་ནས་གནས་པ་ཉིད་ཡིན་པས་ན་སྟོང་པ་ཉིད་དོན་དམ་པ་ཁོ་ན་གཙོ་ཆེའོ་ཞེས་འཛིན་པ་དེ་དག་ནི་གནས་ལུགས་མཐར་ཐུག་སྣང་སྟོང་དབྱེར་མེད་ཀྱི་དོན་ལ་མི་མཁས་པ་རིག་པར་བྱའོ། །གཞན་ཡང་སྣང་སྟོང་དབྱེར་མེད་གནད་དམ་པ་འདི་མ་རྟོགས་པ་ལས་དོན་དམ་སྟོང་པའི་དབྱིངས་ཕར་བཅད་ནས་ཏེ་དེ་ལ་མི་ལྟོས་པའི་སྣང་བ་ཡན་གར་བ་ལྷར་བསྒོམ་པ་སོགས་ཐབས་ཀུན་རྫོབ་ཁོ་ན་ཙམ་གྱི་ངོས་ནས་ནི་མདོ་དང་སྔགས་ཀྱི་རྒྱུད་སྡེའི་ལྟ་བ་རྣམས་མཐོ་དམན་དུ་བྱེད་པར་འདོད་པ་ཡང་དོན་དམ་པ་སྟོང་པས་མ་ཟིན་པས་ཐབས་ཀུན་རྫོབ་པ་རང་ཉིད་ཁོ་ནས་མདོ་སྔགས་རྒྱུད་སྡེ་གོང་འོག་གི་ལྟ་བ་ཡི་མཐོ་དམན་གྱི་ཁྱད་པར་བྱེད་ཆོས་སུ་བཤད་པ་འདི་ཡང་མི་འཐད་དེ། ཇི་ལྟར་ན་སྟོང་པའི་དབྱིངས་དང་སྣང་བའི་ཡེ་ཤེས་ཡེ་ནས་འདུ་འབྲལ་མེད་པའི་གནད་ཀྱི་སྣང་བ་ལྷར་ཡེ་ནས་དག་པ་ཉིད་ཡིན་པས་ལྷར་བསྒོམ་པ་དོན་དང་ལྡན་གྱི་གཞན་དུ་དོན་དམ་སྟོང་པའི་དབྱིངས་ཀྱི་གདེངས་དང་མི་ལྡན་པའམ་དེས་མ་ཟིན་པར་སྣང་བ་ཀུན་རྫོབ་པ་འཁྲུལ་བ་རང་ལྷ་རུ་བསྒོམ་པ་ཙམ་ནི་ལྷ་མིན་པ་ལ་ཡིན་པར་མོས་པ་ཙམ་ཡིན་གྱི་གནས་ལུགས་དང་མཐུན་པའི་ལྟ་བ་ཡང་དག་པ་ནི་མིན་ཏེ། དཔེར་ན་མུ་སྟེགས་ཕྱེད་ཀྱི་རིག་སྔགས་འགལ་ཞིག་ཀྱང་བཟླ་བའི་ཚེ་རང་ཉིད་རང་མིན་པ་གཞན་དུ་མོས་ནས་བཟླ་དགོས་པར་འདོད་པ་བཞིན་ནོ། །ཡང་ལ་ལས་རྟེན་འབྲེལ་གྱི་སྣང་བ་ཀུན་རྫོབ་ཉིད་ཤིན་ཏུ་གལ་ཆེ་སྟེ། ཅིའི་ཕྱིར་ཞེ་ན། གནས་ལུགས་སྣང་སྟོང་བདེན་གཉིས་ཟུང་དུ་འཇུག་པ་ཞིག་དགོས་སོ་ཞེས་ཟེར་ནས་ཡང་ནས་ཡང་དུ་ཀུན་རྫོབ་རྟེན་འབྲེལ་སྣང་བའི་ཕྱོགས་ལ་ཐུགས་ཞེན་གྱིས་ཧ་ཅང་ཐལ་ཆེས་ཏེ་དོན་དམ་དཔྱོད་པའི་རིགས་པ་གང་གིས་ཀྱང་སྣང་བ་འགོག་མི་རུང་སྟེ། འགོག་ན་ཐ་སྙད་ལ་བསྐུར་པ་བཏབ་ཅིང་ཆད་པའི་ལྟ་བར་འགྱུར་བ་སོགས་སྐྱོན་ཆེ་ཞིང་འགོག་ཀྱང་མི་ནུས་ཞེས་བསྔགས་ཤིང་བསྒྲུབ་ནས་དང་པོ་ལྟ་བ་གཏན་ལ་ཕབ་པར་མཛད་ན་ཡང་། ཉམས་ལེན་དངོས་གཞི་སྣང་སྟོང་ཟུང་འཇུག་གམ་དབྱེར་མེད་ལྟ་བ་སྐྱོང་ཞིང་བསྒོམ་པའི་དུས་ན་ཟུང་འཇུག་གི་ཉམས་ལེན་དོར་བའམ་སྤང་ནས་མེད་རྐྱང་ངམ་མེད་འཛིན་ལ་ཐུགས་བརྩེ་གཏོད་ཅིང་ཉམས་ལེན་གྱི་གནད་དུ་མཛད་པ་འདི་ཡང་དང་པོ་སྣང་སྟོང་བདེན་གཉིས་དབྱེར་མེད་དམ་ཟུང་འཇུག་ཏུ་གཏན་ལ་འབེབ་དགོས་ཞེས་པའི་བཤད་པ་གནས་ལུགས་དང་མཐུན་པའི་བཟང་པོ་མ་ལྟ་བུ་དེ་ཡི་རྗེས་སུ་དངོས་གཞིའི་ཉམས་ལེན་སྣང་སྟོང་དབྱེར་མེད་ཀྱི་བུ་ཆུང་གིས་སླེབ་པར་མ་ནུས་པས་སྣང་སྟོང་ལ་བྲལ་གྱི་སྒོམ་པ་འདི་ཡང་གནས་ལུགས་མཐར་ཐུག་གི་ཉམས་ལེན་མ་ཡིན་པས་མི་འཐད་པར་འགྱུར་རོ། །གཉིས་པ་རང་ལུགས་བཞག་པ་ལ་བཞི། བདེན་གཉིས་ཟུང་འཇུག་རྒྱ་ཆད་ཕྱོགས་ལྷུང་དང་བྲལ་བ་མདོ་རྒྱུད་མན་ངག་ཟབ་མོའི་ལམ་ཀུན་གྱི་དགོངས་པ་འཁྲུལ་མེད་ཡིན་པར་བསྟན་པ། ཚུལ་དེ་ཉིད་རྟོགས་པའི་གནད་ལས་རྒྱུད་སྡེའི་དབྱེ་བ་བསྟན་པ། དེ་ལ་ལོག་རྟོག་བསལ་བ། དོན་བསྡུ་བའོ། །དང་པོ། དེས་ན་སྔ་འགྱུར་སོགས་ཚིགས་བཅད་བཅུ་གཉིས་ཀྱིས་བསྟན་ཏེ། བདེན་པ་གཉིས་ཀྱི་རང་བཞིན་གཞི་ལམ་འབྲས་བུའི་ཆོས་ཀུན་ལ་སྣང་སྟོང་ངམ་བདེན་པ་གཉིས་ལ་རྩིས་ཆེ་ཆུང་རྒྱུ་བཟང་ངན་དགག་སྒྲུབ་བླང་དོར་གྱི་སྣང་སྟོང་ཡ་བྲལ་དུ་སོང་ན་གནས་ལུགས་དང་འགལ་བས་མི་འཐད་པ་དེས་ན་སྔ་འགྱུར་བའི་གྲུབ་མཐའ་རང་ལུགས་ཡང་དག་པ་འདིར་ནི་ཕུང་པོ་ཁམས་དང་སྐྱེ་མཆེད་སོགས་གཞི་དང་། བྱང་ཕྱོགས་སོ་བདུན་དང་ཕྱིན་དྲུག་སོགས་ལམ་དང་། བྲལ་སྨིན་གྱི་ཡོན་ཏན་འབྲས་བུའི་ཆོས་སྐད་དམ་ཐ་སྙད་གང་ལ་ཡང་རྟག་དང་མི་རྟག་སྣང་སྟོང་བདེན་གཉིས་སོགས་རྒྱ་གང་དུ་མ་ཆད་ཕྱོགས་གང་དུ་མ་ལྷུང་བའམ་བྲལ་བ་ཡི་སྣང་སྟོང་བདེན་གཉིས་དབྱེར་མེད་དམ་ཟུང་འཇུག་ཁོ་ནའི་རང་གི་གྲུབ་མཐའ་བསྐྱངས་ཏེ་འཇོག་པ་ཡིན་པས་འདི་ལས་གཞན་དུ་སྣང་བ་ཀུན་རྫོབ་དང་ནི་སྟོང་པ་དོན་དམ་པ་ཡ་བྲལ་བ་སྣང་སྟོང་རེ་རེའི་སྟེང་དུ་ནི་གཞི་དང་ལམ་དང་འབྲས་བུ་ཡི་རྣམ་བཞག་ཐམས་ཅད་སྐྱོན་མེད་ཅིག་འཇོག་མི་ནུས་པས་གཞི་ལམ་འབྲས་བུ་གསུམ་ཆར་གང་དང་གང་དུའང་སྣང་སྟོང་བདེན་པ་འདི་གཉིས་ལ་རྩིས་ཆེ་ཆུང་གིས་འདི་སྤང་བྱ་དང་འདི་བླང་བྱའོ་ཞེས་བཟང་ངན་གྱི་དབྱེ་བ་མེད་པས་མགོ་མཉམ་དུ་ཡེ་ནས་གནས་པས་ན་བླང་དོར་དུ་ལྟ་བ་མི་འཐད་དེ། སྣང་བ་ཀུན་རྫོབ་འདི་དང་སྤང་པའི་ཕ་རོལ་ལམ་གཞན་ཞིག་ན་སྟོང་བ་དོན་དམ་པ་ཡང་མེད་པས་མི་རྙེད་ལ། སྟོང་པ་དོན་དམ་པ་སྤང་བའི་ཕ་རོལ་ན་ཀུན་རྫོབ་གཞན་ཞིག་མེད་པ་ཉིད་ཡིན་པའི་ཕྱིར་ཏེ། དཔེར་ན་མེ་ཉིད་སྤང་བའི་ཚ་བ་དང་ཚ་བ་སྤང་བའི་མེ་ཉིད་མེད་པ་བཞིན་ནོ། །དེས་ན་གཞི་ལམ་འབྲས་བུའི་བསྡུས་པའི་ཆོས་གང་སྣང་བ་དེ་ལ་སྟོང་བས་ཁྱབ་པ་དང་གང་སྟོང་པ་དེ་ལ་སྣང་བས་ཁྱབ་པ་གྲུབ་སྟེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ་ཞེས་རྒྱལ་བའི་ཡུམ་ལས་གསུངས་པའི་ཕྱིར། མེ་དང་ཚ་བ་བཞིན་ནོ། །དེ་གང་གི་ཕྱིར་ན་མཆོག་གི་དོན་གཟིགས་དམ་པ་རྣམས་ཀྱིས། སྣང་དེ་ཅིའི་ཕྱིར་སྟོང་པའི་ཕྱིར། སྟོང་དེ་ཅིའི་ཕྱིར་སྣང་བའི་ཕྱིར། ཞེས་གསུངས་པ་བཞིན་ཆོས་གང་སྣང་ན་དེ་རང་གི་ངོ་བོས་ཡེ་ནས་མི་སྟོང་བ་ཞིག་ཡིན་མི་སྲིད་ཅིང་གལ་ཏེ་སྲིད་ན་དེ་འབའ་ཞིག་མ་གཏོགས་པ་གཞན་ཕྱོགས་དུས་ཀྱིས་བསྡུས་པའི་ཤེས་བྱ་གཅིག་ཀྱང་མི་སྲིད་དེ། འདི་ལྟར་རྟག་མཐའ་བཟུང་སྟེ་ཤེས་བྱའི་ཁོང་ན་གཅིག་བདེན་ཞིག་སྲིད་ན་ཆ་མེད་གཅིག་ཡིན་དགོས་པས་གལ་ཏེ་རྡུལ་ཕྲ་རབ་ལྟ་བུ་ཆ་མེད་གཅིག་བདེན་པར་གྲུབ་པར་ཡོད་པར་གྱུར་ན་ཕྱོགས་དུས་ཀྱི་ཤེས་པ་གང་ཇི་སྙེད་པས་དེ་འབའ་ཞིག་དམིགས་དགོས་པ་དང་། ཕྱོགས་དུས་ཀྱིས་བསྡུས་པའི་འཁོར་འདས་ཀྱི་ཆོས་གཅིག་ཀྱང་མི་སྣང་བར་དེ་འབའ་ཞིག་སྣང་དགོས་པ་དང་། མཐར་དེ་ཡུལ་དུ་བྱེད་པའི་ཡུལ་ཅན་གྱི་ཤེས་པ་ཡང་མི་སྲིད་ཅིང་དེ་རང་གི་ངོ་བོ་ལ་ཡང་སྣང་མི་སྣང་དང་ཕྲ་རྡུལ་ཡིན་མིན་གྱི་ཆ་ཡང་མི་སྲིད་པ་ཞིག་དགོས་པས་ཕྱང་ཆད་ནམ་མཁའ་ལྟ་བུ་འབའ་ཞིག་མ་གཏོགས་འཁོར་འདས་ཀྱི་སྣང་སྟོང་ཐ་སྙད་ཐམས་ཅད་ཤེས་བྱ་ལ་མི་སྲིད་པར་ངེས་པར་རྒྱུན་ཆད་དེ་གཏན་མེད་དུ་འབྱུང་དགོས་ནའང་དེ་ལྟར་མ་ཡིན་པར་འཁོར་འདས་ཀྱི་སྣང་རྟོག་བསླུ་མེད་ཀྱི་ཐ་སྙད་འགོག་ཏུ་མེད་པར་ཆེས་བཀྲ་བ་འདི་ཉིད་ཆོས་ཐམས་ཅད་རང་རང་གི་ངོ་བོས་སྟོང་པའི་གནད་ཀྱིས་རང་སྣང་བ་ཡིན་པར་ཤེས་པར་བྱའོ། །སྟོང་པ་ཉིད་དེའང་མི་སྣང་བའམ་སྣང་བ་མེད་ན་མི་གྲུབ་པ་ཡིན་པའི་ཕྱིར་ན་ཀུན་མཁྱེན་ཆོས་རྗེས། སྣང་བ་མ་ཡིན་པའི་སྟོང་པ་བདེན་པ་གཉིས་ཆར་མི་སྲིད་པ་དང་རྟོགས་བྱར་མི་རུང་བ་ལ་སོགས་པར་གསུངས་ཤིང་། ཇི་སྐད་དུ་མགོན་པོ་ཀླུས་ཀྱང་། །གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བས། །དེ་ལ་ཐམས་ཅད་རུང་མི་འགྱུར། །ཞེས་དང་། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པར། །ཆོས་འགའ་ཡོད་པ་མ་ཡིན་ནོ། །ཞེས་དང་། གང་ཞིག་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུངས་མཆོག་ཅེས་སོགས་གསུངས་པ་ཡིན་ནོ། །དེའི་ཕྱིར་དངོས་དང་དངོས་མེད་གཉིས་པོ་ཡང་ཆོས་ཅན་ནམ་སྟོང་གཞིར་བྱས་ནས་རང་རང་ངོ་བོས་སྟོང་དགོས་པའི་ཕྱིར་ན་གང་སྣང་བའི་དངོས་པོ་འདི་ཀུན་བརྟེན་ནས་སྐྱེ་ཤིང་སྣང་བ་རྨི་ལམ་གྱི་བུ་སྣང་ལྟར་དེ་དང་དེར་བཏགས་པ་ཙམ་ཞིག་ལས་དོན་ལ་གྲུབ་པ་མེད་ལ། དངོས་མེད་སྟོང་བའང་བརྟེན་ནས་བརྟགས་པ་རྨི་ལམ་གྱི་བུ་ཤི་བ་ལྟར་བློ་ཡིས་བཏགས་པ་ཙམ་ལས་གྲུབ་པ་མེད་པས་དེ་ལྟར་སྣང་བ་སྟོང་པ་དངོས་དང་དངོས་མེད་སྣང་བཏགས་ཀྱི་རྟེན་འབྲེལ་འདི་ལ་གནས་ལུགས་དཔྱོད་པའི་རིགས་པ་ཡང་དག་པས་དཔྱད་པ་ཟབ་མོས་དྲངས་པའི་སྣང་སྟོང་དབྱེར་མེད་པའི་ངེས་ཤེས་ཟབ་མོ་ལ་སྣང་བ་ཐ་སྙད་བདེན་པ་དང་སྟོང་པ་དོན་དམ་བདེན་པ་འདི་གཉིས་སྣང་བ་ཐབས་དང་སྟོང་པ་ཐབས་ལས་བྱུང་བ་ཉིད་དུ་འཆར་ཞིང་མཐོང་སྟེ། དེའི་ཕྱིར་དེ་གཉིས་ལས་གང་གཅིག་ཤོས་ཡོད་པར་གྱུར་ན་ནི་གཅིག་ཤོས་དེ་ཡང་མེད་པ་ཉིད་མི་སྲིད་པས་ཆུ་དང་བརླན་ལྟར་ཡེ་ནས་འདུ་འབྲལ་མེད་པར་གནས་པས་སོ་སོར་བྱར་མེད་པ་དེ་ཡི་ཕྱིར་ན་གཞི་ལམ་འབྲས་གསུམ་གང་ལ་ཡང་སྣང་བ་དང་དེའི་སྟོང་པ་ཉིད་དག་སོ་སོའི་ཆར་ནི་གཉིས་འཛིན་ཅན་གྱིས་ཤེས་ཤིང་རྟོག་ན་ཡང་གནས་ལུགས་ཀྱི་དོན་དུ་ནམ་ཡང་སོ་སོར་དབྱེ་བ་ཡེ་ནས་མེད་པ་དེ་ཡི་ཕྱིར་ན་སྣང་སྟོང་འདི་གཉིས་སྲད་བུ་དཀར་ནག་བསྒྲིལ་བ་དང་གཅིག་རྗེས་སུ་གཅིག་བྱུང་བ་ལྟ་བུ་མ་ཡིན་པར་མེ་དང་ཚ་བ་ལྟར་དབྱེར་མེད་པ་ཡིན་ལ་དེ་མཚོན་པའི་བརྡར་ཐ་སྙད་དུ་མདོ་དང་རྒྱུད་སྡེར་སྟོང་རྟེན་འབྱུང་ངམ་ཐབས་ཤེས་སམ་སྣང་སྟོང་ཟུང་འཇུག་ཅེས་བརྗོད་དེ། དེ་ཡང་ལྷ་ཡི་བུ་རབ་རྩལ་སེམས་ཀྱི་ཞུས་པའི་མདོ་ལས། ཤེས་རབ་དང་ནི་ཐབས་ཤེས་པ། །དེ་གཉིས་ཀུན་ཏུ་འདྲེས་གྱུར་ཅིང་། །གཉིས་ཀ་ཟུང་དུ་འཇུག་འགྱུར་ན། །དེས་ནི་དམ་པ་རྟོགས་པ་འགྱུར། །ཞེས་གསུངས་པས་སོ། །དེ་ལྟར་སྣང་སྟོང་དབྱེར་མེད་པའི་གནས་ལུགས་ཡང་དག་པ་མཐོང་བའི་ངེས་ཤེས་ཟབ་མོ་ནི་སྣང་སྟོང་གང་གི་མཐར་ལྷུང་བ་མེད་པའི་ཕྱིར་སྣང་སྟོང་སོ་སོའི་ཕྱོགས་སུ་ལྷུང་བའི་ངེས་ཤེས་ནི་གནས་ལུགས་མཐར་ཐུག་དང་མཐུན་པའི་ངེས་ཤེས་སུ་མི་འགྱུར་རོ། །དེས་ན་གནས་ལུགས་ཡང་དག་པར་དཔྱོད་པའི་ཤེས་རབ་ཟབ་མོའི་ངོར་གང་སྣང་བ་དང་དེའི་སྟོང་པ་ཉིད་འདི་གཉིས་པོ་ཡོད་ན་ཡོད་མཉམས་དང་། མེད་ན་མེད་མཉམས་ཡིན་པས་ངོ་བོ་གཅིག་ལ་ལྡོག་པ་ཐ་དད་ཙམ་གྱིས་དབྱེ་བར་འདོད་ཅིང་། དེ་ཡང་དང་པོའི་ལས་ཅན་གྱི་གང་ཟག་རྣམས་ལ་སྣང་སྟོང་འདི་གཉིས་དགག་བྱ་དང་འགོག་བྱེད་ལྟ་བུར་སོ་སོར་སྣང་བར་འགྱུར་ལ་དེ་ཚེ་སྣང་སྟོང་གཉིས་གཅིག་ཏུ་འདྲེས་པ་མེད་པས་ད་དུང་གཅིག་ཏུ་འདྲེས་པའི་སྣང་སྟོང་ཟུང་འཇུག་མཐོང་བ་མ་ཡིན་ནོ། །དེས་ན་གང་སྣང་བའི་ཆོས་ཀུན་གདོད་ནས་སྟོང་ཞིང་སྟོང་པའི་གནད་ཀྱིས་རྟེན་འབྱུང་དུ་རང་འཆར་བར་ངེས་ཤེས་བསྐྱེད་པ་དང་། དེས་ན་སྣང་སྟོང་དབྱེར་མེད་དམ་ཟུང་འཇུག་དང་། སྤྲོས་བྲལ་དང་མཉམ་པ་ཉིད་དེ་དབུ་མའི་ལྟ་རིམ་བཞིན་རང་རྒྱུད་ལ་རིམ་པར་བསྐྱེད་ཅིང་འབྱུང་དགོས་པ་ཡིན་ལ། དེའི་ཕྱིར་ནམ་ཞིག་ན་ཆོས་ཀུན་ཡེ་ནས་སྟོང་པའི་རང་བཞིན་ཉིད་ནི་རང་གསལ་བའམ་སྣང་བར་འཆར་བ་ལ་ཡིད་ཆེས་ཐོབ་སྟེ་སུས་ཀྱང་མི་འཕྲོག་པའི་ངེས་ཤེས་ཟབ་མོ་འཐོབ་ལ། དེ་ཡང་འཁོར་འདས་ཀྱིས་བསྡུས་པའི་ཆོས་ཐམས་ཅད་གདོད་ནས་ཏེ་ཡེ་ནས་སྟོང་པ་ཉིད་ཡིན་པའི་གནད་ཀྱིས་རྟེན་འབྱུང་དུ་རང་སྣང་བ་ཡིན་པ་དང་སྣང་བ་འདི་དག་རྟེན་འབྱུང་ཡིན་པའི་གནད་ཀྱིས་སྟོང་པ་ཡིས་ཏེ་ཡེ་སྟོང་དེའི་རང་བཞིན་ཡིན་པས་ན་སྟོང་བཞིན་དུ་སྣང་ལ་སྣང་བཞིན་དུ་སྟོང་པར་མཐོང་བས་སྣང་སྟོང་ཟུང་འཇུག་གི་ངེས་ཤེས་མཆོག་ཏུ་སྐྱེ་བར་འགྱུར་བ་ཉིད་ཡིན་ལ། དེ་ལྟར་གནས་ལུགས་སྣང་སྟོང་ཟུང་འཇུག་ཏུ་སྣང་བ་འདི་ནི་ངེས་དོན་གྱི་མདོ་དང་རྒྱུད་སྡེ་དང་མན་ངག་གི་ལམ་ཟབ་མོ་ཀུན་གྱི་རྩ་བའམ་སྙིང་པོ་སྟེ་ཐོས་བསམ་ཡང་དག་པའི་ལམ་གྱིས་གནས་ལུགས་ལ་སྒྲོ་འདོགས་ཐམས་ཅད་ལེགས་པར་ཆོད་པའི་དོན་ཡང་དག་པའི་ལྟ་བ་འཁྲུལ་བའི་དྲི་མ་མེད་པ་ཉིད་ཡིན་ནོ། །གཉིས་པ། གནད་དེ་ཇེ་བས་སོགས་ཚིག་བཅད་དགུ་དང་རྐང་པ་གཉིས་ཀྱིས་བསྟན་ཏེ། གོང་དུ་ཇི་སྐད་བསྟན་པའི་བདེན་གཉིས་སམ་སྣང་སྟོང་ཟུང་འཇུག་མཉམ་པ་ཆེན་པོར་མཐོང་བའི་གནད་དེ་གོང་ནས་གོང་དུ་ཇེ་བས་ཇེ་ཟབ་ཏུ་ཇི་བཞིན་རྟོགས་ཤིང་གོམས་པས་རང་བཞིན་གྱིས་རྣམ་པར་དག་པའི་དབྱིངས་དང་གཉིས་སུ་མེད་པའི་ཀུན་རྫོབ་ཀྱི་སྣང་བ་གང་ཇི་སྙེད་པ་ལ་ཡང་རང་མཚན་ཐ་མལ་གྱི་ཞེན་པ་རིམ་གྱིས་སྤོང་བར་འགྱུར་བས་དབྱིངས་སྣང་ཡེ་ཤེས་ལྷར་ཡེ་ནས་དག་པའི་གནས་ཚུལ་ཡང་དག་པ་གནས་སྣང་མཐུན་པའི་སྣང་བ་གོང་འཕེལ་དུ་དག་པའི་སྟོབས་ཀྱིས་རྒྱུད་སྡེའི་ཐེག་པའི་ལྟ་རིམ་གྱིས་ཁྱད་པར་དེ་ལྟར་སྣང་བ་ཡིན་ཏེ་མདོར་ན་སྣང་སྟོང་ངམ་དབྱིངས་ཡེ་གཉིས་སུ་མེད་པར་ཟུང་དུ་ཆུབ་པའི་གནད་མཐོང་གོམས་ཀྱི་ཁྱད་པར་ལས་དབྱིངས་དང་གཉིས་སུ་མེད་པའི་གནད་ཀྱིས་སྣོད་བཅུད་ཡེ་ནས་ལྷར་དག་པའི་དག་མཉམ་གྱི་ལྟ་བའི་མཐོང་བ་དག་ཚུལ་གྱིས་རྒྱུད་སྡེ་རིན་པོ་ཆེའི་མཐོ་དམན་གྱི་དབྱེ་བ་འཇོག་གི་གཞན་དུ་སྣོད་བཅུད་ཀྱི་སྣང་བ་མིན་པ་ལ་ལྷར་མོས་པའི་ཁྱད་པར་ལས་རྒྱུད་སྡེའི་མཐོ་དམན་དུ་མི་འབྱེད་ལ། དེའི་ཕྱིར་ན་སྣོད་བཅུད་ཀྱི་སྣང་བ་ཡེ་ནས་ལྷ་མ་ཡིན་པ་ལ་ཡིད་ཀྱིས་ལྷ་དང་དཀྱིལ་འཁོར་དུ་མོས་པས་བསྒོམ་པ་ཙམ་ཞིག་དང་། ཡེ་ནས་སྣོད་བཅུད་དག་པའི་ལྷར་སྣང་བའི་ངེས་ཤེས་ཀྱི་ལྟ་བ་མཐོང་གོམས་ཀྱིས་གདེངས་སུ་གྱུར་པ་གཉིས་གནམ་ས་བཞིན་ཡིན་པས་མཚུངས་པའི་གོ་སྐབས་རྣམ་པ་ཀུན་ཏུ་མི་སྲིད་དེ་དཔེར་ན་དབུ་མས་ཆོས་རྣམས་ཡེ་ནས་རང་བཞིན་གྱིས་སམ་བདེན་པའི་སྟོང་པ་ཉིད་དུ་ངེས་པ་གང་ཡིན་པ་དེ་ནི་དབུ་མའི་ལྟ་བ་ཡིན་ལ་བྲམ་ཟེས་ནད་པ་རྣམས་ལ་སྔགས་འདེབས་པའི་ཚེ་ན་ནད་མེད་པར་ཡིད་ཀྱིས་མོས་པ་དབུ་མའི་ལྟ་བ་མིན་པ་བཞིན་ནོ། །དེས་ན་ཚུལ་མཐོང་གི་སྤྱོད་ཡུལ་ལས་འདས་པའི་སྣང་སྟོང་ངམ་དབྱིངས་ཡེ་གཉིས་སུ་མེད་པའི་དོན་དམ་ཟབ་མོའི་གནས་ལུགས་ཇི་བཞིན་རྟོགས་པ་ཡིས་ཀུན་རྫོབ་ཀྱི་སྣང་བ་གང་ཇི་སྙེད་པ་ཡེ་ནས་དག་པའི་ལྷ་རུ་སུས་ཀྱང་མི་འཕྲོག་པའི་ཡིད་ཆེས་ཀྱི། དེ་ལས་གཞན་དུ་ཚུལ་མཐོང་འཁྲུལ་བའི་ཀུན་རྫོབ་ཀྱི་སྣང་ཚུལ་འདི་ཁོ་ན་ལ་གནས་ནས་སྣོད་བཅུད་ལྷ་རུ་ཇི་ལྟར་འགྲུབ་སྟེ་མི་སྲིད་དོ། །དེའི་ཕྱིར་གཟུང་འཛིན་འཁྲུལ་བའི་སྣང་བ་འདི་ཉིད་མིན་པའི་འཁོར་བ་ཞེས་བྱ་བ་ངན་པ་ཞིག་གཞན་དུ་གྲུབ་པ་མེད་ལ། འཁོར་བ་དེ་སྤོང་བར་བྱེད་ལམ་མཐོ་དམན་གྱི་དབྱེ་བ་ཇི་སྙེད་པ་རྣམས་ཀྱང་དོན་དམ་སྟོང་ཉིད་ཁོ་ནའི་ངོས་ནས་འཇོག་ནུས་པ་མིན་ཏེ། དོན་དམ་སྟོང་པའི་དབྱིངས་དེ་ཚུལ་གཅིག་ཉིད་ཡིན་པའི་ཕྱིར་དབྱེ་བར་མི་ནུས་པས་མཐོ་དམན་གྱི་དབྱེ་བ་མེད་དོ། །འོ་ན་ཅི་ཞེ་ན། ཆོས་ཅན་ཀུན་རྫོབ་ཀྱི་སྣང་བ་འོད་གསལ་བའི་ཆ་ཇི་སྙེད་པ་འདི་ཀུན་ཆོས་ཉིད་དོན་དམ་པ་དབྱིངས་རྣམས་པར་དག་པའི་གཤིས་སུ་སོན་པའི་སྣང་སྟོང་ངམ་དབྱིངས་ཡེ་ཟུང་དུ་འཇུག་པའི་གནད་མཐོང་གོམས་ཀྱི་བློ་གྲོས་ཀྱི་ནུས་པ་གོང་འཕེལ་དུ་སྣང་བ་ལྷར་ཇི་ལྟར་དག་པའི་ཚུལ་གྱི་རིམ་པ་ལ་བརྟེན་ནས་བྱ་བ་ཡི་རྒྱུད་དང་ཆ་མཉམ་སྤྱོད་རྒྱུད་དང་རྣལ་འབྱོར་རྒྱུད་དང་རྣལ་འབྱོར་བླ་ན་མེད་པའི་རྒྱུད་དེ་རྒྱུད་སྡེ་རིན་པོ་ཆེའི་དབྱེ་བ་བཞིའམ་དྲུག་ཏུ་བསྟན་པ་ཡིན་ནོ། །དེས་ན་སྣང་སྟོང་བདེན་པ་གཉིས་སོ་སོ་བའམ་རེ་རེ་རྐྱང་པ་ཡིས་རྒྱུད་སྡེའི་མཐོ་དམན་འཇོག་པ་གང་དག་མི་འཐད་པས་མི་འབྱེད་ཀྱང་ཇི་ལྟར་ན་སྣང་སྟོང་ངམ་དབྱིངས་ཡེ་དབྱེར་མེད་དམ་བདེན་གཉིས་ཟུང་དུ་འཇུག་པ་ཡི་གནས་ལུགས་ཟབ་མོའི་ལྟ་བ་ལ་ཅི་ཙམ་མཐོང་གོམས་ཀྱི་ཡིད་ཆེས་ཟབ་མོ་ཅི་ཙམ་ཐོབ་པ་ཡི་ལྟ་བའི་ཁྱད་པར་དེ་ཙམ་བཞིན་དུ་ལམ་ཉམས་ལེན་གྱི་བསྒོམ་པ་དང་སྤྱོད་པའི་ཁྱད་པར་གྱི་གནད་རྣམས་ཀྱང་དེ་ཡི་རྗེས་སུ་འབྲང་བ་ཡིན་པས་དེ་ཙམ་གྱིས་རྒྱུད་སྡེའི་མཐོ་དམན་གྱི་ཁྱད་པར་འབྱེད་པ་ཡིན་ནོ། །དེ་ཡི་ཕྱིར་ན་སངས་རྒྱས་ལས་ཀྱང་འཕྲད་པར་དཀའ་བའི་གསང་སྔགས་བླ་ན་མེད་པའི་རྡོ་རྗེའི་ཐེག་པ་རིན་པོ་ཆེ་སྙིགས་དུས་ཀྱི་ཚེ་ལུས་གཅིག་གིས་གྲོལ་བ་ཟུང་འཇུག་རྡོ་རྗེ་འཆང་གི་གོ་འཕང་བདེ་མྱུར་དུ་སྟེར་བའི་ལམ་ཟབ་མོ་མ་ནོར་བ་ཇི་བཞིན་ཉམས་སུ་ལེན་པར་བཞེད་ན་སེམས་ཅན་གྱི་རྒྱུད་ཀྱི་ཁྱད་པར་ལས་བལྟ་བྱ་ཆུ་ལྟ་བུ་གཅིག་ལ་མཐོང་བ་མི་གཅིག་པ་རིགས་དྲུག་གི་འགྲོ་བས་ཁྲོ་ཆུ་དང་རྣག་དང་གནས་ཁང་དང་ཆུ་དང་བདུད་རྩི་དང་རྣལ་འབྱོར་བས་མ་མ་ཀི་ལ་སོགས་པ་མི་འདྲ་བ་ཐ་དད་པར་མཐོང་བའི་ཆུ་ཡི་དཔེ་ཇི་ལྟ་བ་བཞིན་དུ་རྒྱུད་དག་པའི་འཕགས་པ་ཆེན་པོས་ཇི་ལྟར་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མའི་སྒོ་ནས་སྣོད་བཅུད་ཀྱི་སྣང་བ་ཡེ་ནས་དག་པ་རབ་འབྱམས་སྣང་སྲིད་གཞིར་བཞེངས་ཀྱི་ལྷ་སྔགས་ཡེ་ཤེས་ཀྱི་དཀྱིལ་འཁོར་དུ་གྲུབ་ཅིང་བསྒྲུབ་པ་ལ་སྐལ་བ་དང་ལྡན་པ་སུ་ཞིག་ཡིད་མི་ཆེས་པར་འགྱུར་ཏེ་ཤིན་ཏུ་ཡིད་ཆེས་སུས་ཀྱང་བཟློག་ཏུ་མེད་པ་སྐྱེ་བར་འགྱུར་རོ། །གསུམ་པ་དེ་ལ་ལོག་རྟོག་བསལ་བ་ལ་གསུམ། འཁོར་བའི་རང་བཞིན་མ་དག་པར་འདོད་པའི་ལོག་རྟོག་བསལ་བ། རྒྱུད་སྡེ་ལ་ལྟ་བའི་མཐོ་དམན་མེད་པར་འདོད་པའི་ལོག་རྟོག་བསལ་བ། ལྟ་བའི་དབང་གིས་ཐེག་དགུར་འཇོག་པའི་རྒྱུ་མཚན་བསྟན་པའོ། །དང་པོ། གལ་ཏེ་དེ་ལྟར་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། གལ་ཏེ་སྣོད་བཅུད་སྣང་གྲགས་རིགས་གསུམ་ཡེ་ནས་དག་པ་ལྷ་སྔགས་ཡེ་ཤེས་སུ་གྲུབ་པར་གོང་དུ་བསྟན་པ་དེ་ལྟར་མ་ཤེས་ནས་སྡུག་བདེན་འཁོར་བའི་རང་བཞིན་ལས་ཉོན་ཀུན་འབྱུང་གི་འབྲས་བུ་ཕུང་ཁམས་སྐྱེ་མཆེད་ཀྱིས་བསྡུས་པའི་སྣོད་བཅུད་སྣང་ཚུལ་མ་དག་པར་སྣང་བ་དེ་ལྟར་དོན་ལའང་མ་དག་པར་འདོད་བཞིན་དུ་སྣང་བ་ཐམས་ཅད་དག་པའི་རྟེན་དང་བརྟན་པའི་ལྷ་རུ་བསྒོམས་པས་ལྷ་དང་དཀྱིལ་འཁོར་དུ་གྲོལ་བར་འདོད་ཀྱང་འདོད་པའི་གྲུབ་འབྲས་མངོན་དུ་མི་འབྱིན་ཏེ་དཔེར་ན་རང་ལུས་ངན་སྐྱུག་གི་བུམ་པར་འདྲ་བ་ཡི་དམ་བདེ་དགྱེས་འཇིགས་གསང་སོགས་སུ་བསྒོམ་པ་དྲི་བཟང་གིས་ལེགས་པར་བྱུགས་པ་དང་འདྲར་ཏེ་འདྲ་བར་སྣོད་བཅུད་ལྷ་དང་དཀྱིལ་འཁོར་མིན་པ་ལ་ལྷ་དང་དཀྱིལ་འཁོར་དུ་ཡིན་ནོ་སྙམ་དུ་བསྒོམས་པ་རྡོ་རྗེ་ཐེག་པའི་ཁྱད་ཆོས་སུ་སེམས་ཤིང་འདོད་པ་དེས་ཀྱེ་མ་འཁོར་འདས་དབྱེར་མེད་མཉམ་པ་ཉིད་མི་ཕྱེད་པའི་རྡོ་རྗེ་ཐེག་པའི་ལྟ་བ་དང་བསྐྱེད་རྫོགས་ཀྱི་སྒོམ་པ་ཐམས་ཅད་རི་མོའི་མར་མེ་བཞིན་དུ་གཟུགས་བརྙན་ཙམ་དུ་བས་པར་འགྱུར་རོ། །དེས་ན་སྣོད་བཅུད་ཀྱི་ཆོས་གང་ཇི་སྙེད་པ་གནས་ཚུལ་ཡང་དག་པའི་དོན་ལ་ལྷ་དང་དཀྱིལ་འཁོར་དུ་ཡེ་ཤེས་གནས་སུ་ཟིན་ཀྱང་དེ་ལྟར་མ་རྟོགས་པའི་ཚུལ་མཐོང་བྱིས་པས་ཀུན་ཏུ་ཐ་སྙད་པའི་ངོར་གནས་སྣང་མི་མཐུན་པར་སྣང་ཚུལ་ལ་མ་དག་པར་སྣང་ན་ཡང་སྣང་དུས་ཉིད་ནས་ཡེ་ནས་དག་པ་ཆེན་པོར་གནས་པར་མ་མཐོང་བ་དེ་ནི་ཚུར་མཐོང་མ་དག་པ་འཁྲུལ་བས་གྲུབ་པའི་མཐའ་ཉིད་ཡིན་ལ། འཕགས་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མའི་ངོར་སྣོད་བཅུད་ཀྱི་གནས་ཚུལ་སྟོང་པའི་དབྱིངས་དང་གཉིས་སུ་མེད་པའི་ཡེ་ཤེས་ལྷ་དང་དཀྱིལ་འཁོར་དུ་སྣང་བ་གནས་སྣང་མཐུན་པ་ཇི་ལྟ་བ་བཞིན་དུ་འཕགས་ཆེན་རྣམས་ཀྱིས་ཡང་དག་པར་གཟིགས་པའི་དོན་ཉིད་གང་གིས་མི་བྱེད་པའི་རྡོ་རྗེའི་ཐེག་པའི་གྲུབ་པའི་མཐར་སྨྲ་ཞིང་མཆོག་ཏུ་འདོད་པ་ཡིན་ནོ། །དེའི་ཕྱིར་སྣོད་བཅུད་ཐམས་ཅད་ཡེ་ནས་ལྷའི་དཀྱིལ་འཁོར་དུ་དག་པའི་རྟེན་དང་བརྟེན་པར་མིན་ནོ་སྙམ་དུ་མ་དག་པར་ལྟ་བཞིན་དུ་དག་པ་ལྷའི་རྟེན་དང་བརྟེན་པའི་དཀྱིལ་འཁོར་དུ་ཡིན་ནོ་སྙམས་པའི་སྒོམ་པ་གང་ཡིན་པ་དེ་གཉིས་སྣང་མུན་ལྟར་འགལ་འདུའི་རང་རྟགས་ཤིན་ཏུ་གསལ་བར་ངོམས་པ་ཡི་ལམ་དེ་ནི་རྡོ་རྗེ་ཐེག་པའི་ལམ་གྱི་གཟུགས་བརྙན་ལས་ཀྱང་གཟུགས་བརྙན་ཉིད་ཡིན་ཏེ་དེ་ལྟར་ཅི་ཙམ་འབད་པས་བསྒོམ་པར་བྱས་ཀྱང་མཐར་འབྲས་སྣོད་བཅུད་ལྷ་དང་དཀྱིལ་འཁོར་དུ་དག་པའམ་གྲོལ་བ་ཉིད་མི་ཐོབ་སྟེ། དཔེར་ན་སོལ་བ་ནག་པོ་འབད་པའི་ཅི་ཙམ་བཀྲུས་པས་ཀྱང་མི་དཀར་བའམ་དཀར་བར་མི་འགྱུར་བ་བཞིན་ནོ། །གལ་ཏེ་སྣོད་བཅུད་ཡེ་ནས་ལྷར་དག་པ་ཉིད་མིན་ཀྱང་ལྷ་ཡིན་ནོ་སྙམས་པས་བཅོས་མའི་བསྒོམ་པ་དེ་ཙམ་གྱིས་འབྲས་བུ་སྣོད་བཅུད་ལྷར་དག་པའམ་གྲོལ་བ་ཐོབ་པར་འགྱུར་ན་ནི་དོན་དམ་དཔྱོད་པའི་རིགས་ལམ་གྱིས་ངོ་བོས་སམ་བདེན་པའི་སྟོང་པ་ཉིད་ལ་ངེས་ཤེས་ཅི་ཡང་མེད་བཞིན་དུ་ཕྱི་རོལ་མུ་སྟེགས་ཉི་མ་པ་རྣམས་ཀྱིས་སྣང་བ་སྤངས་པའམ་མེད་པས་སྟོང་པ་སོགས་བསྒོམ་པས་ཀྱང་རང་བཞིན་ནམ་བདེན་པས་སྟོང་པ་ཉིད་ཡང་དག་པར་མཐོང་སྟེ་ཉོན་མོངས་པ་སྤོང་བར་འགྱུར་རིགས་དགོས་པས་ཤིན་ཏུ་མི་འཐད་པ་ཞིག་གོ། །གཉིས་པ། བྱ་སྤྱོད་བླ་མེད་སོགས་ཚིགས་བཅད་གསུམ་དང་རྐང་པ་གཉིས་ཀྱིས་བསྟན་ཏེ། དེ་ལ་རྡོ་རྗེ་ཐེག་པ་བྱ་བ་སྤྱོད་པ་རྣལ་འབྱོར་བླ་ན་མེད་པ་སོགས་རྒྱུད་སྡེ་བཞིའམ་དྲུག་ལ་གནས་ལུགས་མཐོང་བའི་ལྟ་བའི་མཐོ་དམན་ཅི་ཡང་མེད་པར་གྱུར་ན་ཤིན་ཏུ་མི་འཐད་པའི་སྐྱོན་གཉིས་ཏེ། དེ་ཇི་ལྟར་ན་སྣང་སྲིད་ཐམས་ཅད་ཡེ་ནས་བཟང་ངན་གཉིས་ཆོས་དང་བྲལ་བའི་དག་མཉམ་ཆེན་པོར་རྟོགས་པ་ཡི་ལྟ་བ་ལ་གོམས་པ་གདེངས་དུ་གྱུར་པའི་རྣལ་འབྱོར་པ་མཆོག་ཡིན་བཞིན་དུ་བདག་དམ་ཚིག་པ་དང་ལྷ་ཡེ་ཤེས་པ་ལ་བཟང་ངན་དང་། གཙང་བ་དང་མི་གཙང་བ་སོགས་འདོད་ཡོན་ལ་བླང་དོར་སོ་སོར་ནི་གནས་ལུགས་ལ་མེད་པས་མ་མཐོང་བཞིན་དུ་བླང་དོར་མེད་པ་ལ་བླང་དོར་གྱི་དབྱེ་བ་སྣ་ཚོགས་པས་ངལ་བ་དང་དུ་ལེན་ན་རང་གི་རང་ལ་ཤེས་བཞིན་དུ་བླང་དོར་སྣ་ཚོགས་པས་དོན་མེད་པར་སྡུག་བསྔལ་གྱིས་གནོད་པ་བྱེད་པར་ཟད་དོ། །ཡང་ན་བྱ་རྒྱུད་སོགས་རྒྱུད་སྡེ་འོག་མ་བཞིན་དུ་བདག་དང་ལྷ་ལ་བཟང་ངན་དང་གཙང་སྨེ་སོགས་བླང་དོར་ཡོད་པ་ཉིད་དུ་སོ་སོར་ཞེན་ཅིང་ཆགས་བཞིན་དུ་བླ་ན་མེད་པའི་རྒྱུད་ཀྱི་དག་མཉམ་གྱི་དགོངས་སྤྱོད་ཟབ་མོ་སྦྱོར་སྒྲོལ་དང་ཤ་ཆང་སོགས་བླང་དོར་མེད་པར་མཉམ་པ་ཉིད་ཡིན་ཅེས་འདོད་ཡོན་ལ་རང་གར་སྤྱོད་པར་བྱེད་ན་བླ་ན་མེད་པའི་དག་མཉམ་བླང་དོར་མེད་པའི་དགོངས་སྤྱོད་ཟབ་མོ་ཉམས་འོག་དུ་མ་ཆུད་བཞིན་དུ་དེ་ལྟར་སྤྱོད་པ་ནི་མ་རྟོགས་ཐོ་ཅོའི་སྤྱོད་པ་ཞེས་མདོ་རྒྱུད་ཀུན་ནས་རྒྱལ་བས་ཡང་ཡང་སྨད་པར་འགྱུར་བ་དེ་མིན་ནམ་སྟེ་ཡིན་ནོ། །གསུམ་པ། ཇི་ལྟ་ཇི་ལྟར་སོགས་ཚིགས་བཅད་གསུམ་གྱིས་བསྟན་ཏེ། དེ་ལ་ཇི་ལྟ་ཇི་ལྟར་གནས་ལུགས་སྣང་སྟོང་ངམ་དག་མཉམ་དབྱེར་མེད་ཟུང་འཇུག་དོན་ཇེ་བས་ཇེ་ཟབ་གོང་འཕེལ་དུ་མཐོང་བའི་རིམ་པའི་ངེས་ཤེས་ཟབ་མོ་ལྟ་བར་བརྗོད་ཅིང་འདོད་ལ་ལྟ་བས་ཇི་ལྟར་ཇི་ལྟར་གཏན་ལ་ཕབ་ཅིང་ཐག་བཅད་པ་དེ་དང་དེ་བཞིན་དུ་བསྒོམ་པས་ཉམས་སུ་བླང་བ་དང་སྤྱོད་པས་ལ་དོར་ཞིང་སྐྱོང་དགོས་པ་ཡིན་ལ་དེས་ན་ཐེག་པ་གོང་འོག་གི་རིམ་པ་ནི་ལྟ་བའི་མཐོ་དམན་གྱིས་འབྱེད་དགོས་པ་ཡིན་པའི་ཕྱིར་གཞན་དུ་བསམ་པར་མི་བྱའོ། །དེ་ལྟ་ནའང་ཐེག་པའི་རིམ་པ་དགུར་མ་ངེས་སོ་ཤེ་ན། དེ་ནི་ཤིན་ཏུ་ངེས་ཏེ། ཇི་ལྟ་ན་ནང་བའི་གྲུབ་མཐའ་ཀུན་ལས་དམའ་ཤོས་ཉན་ཐོས་ཀྱི་ཐེག་པ་ནས་མཐར་ཕྱིན་རྡོ་རྗེ་རྩེ་མོའི་ཨ་ཏི་ཡོ་གའི་ཐེག་པའི་བར་སྡེ་ཚན་དགུ་ཡི་གྲངས་སུ་ནི་འཇོག་པའི་རྒྱུ་མཚན་ཡང་དག་པ་དང་དབང་པོ་རབ་འབྲིང་ཐ་གསུམ་རེ་རེ་ལའང་དབང་པོ་ཐ་མའི་ཐ་མ་ཐ་མའི་འབྲིང་ཐ་མའི་རབ་སོགས་གསུམ་གསུམ་དུ་དབྱེ་བ་ལ་སོགས་པ་ཡོད་པའི་ཕྱིར་ཡིན་ཏེ། དཔེར་ན་ཐེག་པ་མཐོ་དམན་དང་དབྱེ་བསྡུ་མང་དུ་ཡོད་ཀྱང་ཐེག་པ་གསུམ་ལ་སོགས་པར་གདུལ་བྱའི་ཁམས་དབང་མོས་པ་སོགས་ལ་ལྟོས་ཏེ་དགོངས་པས་བཞག་པ་ཇི་ལྟ་བ་དེ་བཞིན་དུ་ཡིན་ནོ་ཞེས་སོ། །བཞི་པ་དོན་བསྡུ་བ་ནི། དེས་ན་ནང་གི་སོགས་ཚིགས་བཅད་གཉིས་ཀྱིས་བསྟན་ཏེ། གོང་དུ་ཇི་སྐད་བསྟན་པ་དེས་ན་བདེན་གཉིས་ཟུང་འཇུག་གི་གནས་ལུགས་དག་པ་ཆེན་པོ་མཐོང་བའི་ནང་གི་ཡེ་ཤེས་ཀྱི་སྟོབས། ཇི་ལྟ་ཇི་ལྟར་སྟོབས་འཕེལ་བར་གྱུར་བ་དེ་ལྟ་དེ་ལྟར་སྣོད་བཅུད་རྣམས་གནས་སྣང་མཐུན་པར་དག་པར་མཐོང་བ་དང་ནང་གི་ཡེ་ཤེས་ཀྱི་སྟོབས་ཅི་ཙམ་ཞེན་པ་དེ་ཙམ་དུ་གནས་སྣང་མི་མཐུན་པ་མ་དག་པར་མཐོང་བ་སྟེ་དེ་ལྟར་དག་པ་དང་མ་དག་པར་སོ་སོར་མཐོང་བ་ཡིན་ལ། དེ་ཡི་ཕྱིར་སྣང་སྟོང་ཡེ་ནས་འདུ་འབྲལ་སྤང་བས་དབྱེར་མེད་དམ་ཟུང་འཇུག་ཏུ་གནས་པ་གཞི་ཡིན་ལ། གཞི་དེ་བདེན་གཉིས་ཟུང་འཇུག་དབྱེར་མེད་པའི་ཚུལ་གྱིས་ཇི་ལྟ་བ་བཞིན་དུ་རྟོགས་པ་ལམ་ཡིན་ལ། ལམ་དེ་ཇི་བཞིན་གོམས་པ་མཐར་ཕྱིན་པ་ལས་ཆོས་གཟུགས་ཀྱི་སྐུ་གཉིས་ཟུང་འཇུག་མཐར་ཐུག་གི་ཡེ་ཤེས་མཆོག་ཉིད་ཐོབ་པར་གྱུར་པ་ནི་འབྲས་བུ་ཡང་དག་པའོ། །སྟོང་དེ་ཅིའི་ཕྱིར་རང་བཞིན་སྣང་བའི་ཕྱིར། སྣང་དེ་ཅིའི་ཕྱིར་ངོ་བོས་སྟོང་པའི་ཕྱིར། །སྣང་སྟོང་ཡེ་ནས་འདུ་འབྲལ་སྣང་པའི་ཕྱིར། །ཟུང་འཇུག་འདི་ལས་གཞན་གང་གཙོ་ཞེས་བྱ། །ཞེས་ཀྱང་སྨྲས་སོ། །དྲི་ལན་དྲུག་པ་སྣང་བ་གཅིག་ཉིད་མི་གཅིག་པར་མཐོང་བའི་ཐུན་མོང་གི་བལྟ་བྱ་གང་འཐད་ལ་གཉིས། མི་འཐད་པ་གཞན་ལུགས་སོ་སོར་དགག །འཐད་ལྡན་རང་ལུགས་བཞག་པའོ། །དང་པོ། ཆུ་གཅིག་འགྲོ་བ་སོགས་ཚིགས་བཅད་བཅུ་བཞིས་བསྟན་ཏེ། འདི་ལྟར་སྣང་བའི་ཆུ་གཅིག་ལ་རིགས་དྲུག་གི་འགྲོ་བ་ལས་སྣང་མི་གཅིག་པ་སོ་སོ་ལ་ཁྲོ་ཆུ་དང་རྣག་ལ་སོགས་པ་མི་གཅིག་པའི་དངོས་པོར་སྣང་བའི་ཚེ་ན་དེ་ལ་ལ་ལས་ཐུན་མོང་གི་བལྟ་བྱ་ཡོད་པར་འདོད་པ་སྟེ་དེ་གང་ཞེ་ན་ཆུ་ཉིད་ཡིན་ལ་དེ་མཐོང་བའི་ཡུལ་ཅན་རྣམས་ཀུན་ཀྱང་ཚད་མ་ཡིན་ཞེས་ཟེར་བ་ཡང་མི་འཐད་དེ། ཆུ་ལ་རང་བཞིན་གྱིས་གྲུབ་པའི་བལྟ་བྱ་ཐུན་མོང་པ་འགའ་ཞིག་ཚད་མས་གྲུབ་པ་ཡོད་ཅིང་རིགས་དྲུག་གི་འགྲོ་བས་དེ་དང་དེ་མཐོང་ཞིང་ཡུལ་ཅན་རྣམས་ཚད་མ་ཡིན་ན་ཆུ་གཙང་མ་ལ་རྣག་ཏུ་མཐོང་བ་ལ་སོགས་པའི་རིགས་དྲུག་གིས་མཐོང་བ་སོ་སོ་པ་ལ་ཚད་མ་དང་ཚད་མིན་གྱི་དབྱེ་བ་མེད་པས་འཁྲུལ་བ་ཞིག་གཏན་ནས་མི་སྲིད་ཅིང་། གལ་ཏེ་སོ་སོའི་ཡུལ་སྣང་རྣག་དང་ཆུ་སོགས་རང་རང་ལ་གང་སྣང་བ་དེ་གཞན་དང་ཐུན་མོང་མིན་པར་གྱུར་ན་ཀ་བ་དང་བུམ་པ་གཉིས་མཐོང་བའི་བློ་ལ་ཐུན་མོང་བའི་བལྟ་བྱ་མེད་པ་བཞིན་དུ་ཐུན་མོང་གི་བལྟ་བྱ་མི་སྲིད་པར་འགྱུར་བས་བལྟ་བྱ་ཐུན་མོང་པ་ཞིག་ཡོད་ཅེས་པ་འདི་མི་འགྲུབ་བོ། །ཡང་ལ་ལས་ཐུན་མོང་གི་བལྟ་བྱ་རླན་གཤེར་ཙམ་ཞིག་ཡིན་ནོ་ཟེར་བ་ཡང་མི་འཐད་དེ། རིགས་དྲུག་གི་འགྲོ་བ་ཐུན་མོང་དུ་རང་རང་སོ་སོར་རླན་གཤེར་ཙམ་མ་ལོག་པར་བལྟ་བ་ཡོད་ཅིང་དེ་མཐོང་བ་ཡིན་ན། དེ་འདྲའི་ཐུན་མོང་གི་རླན་གཤེར་ཙམ་དེ་ལ་རིགས་དྲུག་གི་འགྲོ་བས་ཆུ་རྣག་སོགས་མི་གཅིག་པའི་མཐོང་སྣང་མི་འདྲ་བ་མང་དུ་བྱུང་ཞིང་ཕན་ཚུན་གཅིག་གི་མཐོང་བ་དེ་ཉིད་གཅིག་ཤོས་ལ་སྣང་ནས་མཐོང་བ་མེད་པ་ཡི་ཆུ་དང་རྣག་ལ་སོགས་པར་སྣང་བ་དེ་ལས་གཞན་པའི་སྣང་གཞི་རླན་གཤེར་དེ་གང་ཞིག་ཡིན་ཏེ་དེ་འདྲ་བ་ཞིག་མི་སྲིད་དོ། །གཞན་ཡང་གཟུགས་མེད་ནམ་མཁའ་མཐའ་ཡས་པར་རླན་གཤེར་ཙམ་དེ་ཉིད་གང་སྣང་བ་ཐམས་ཅད་ནམ་མཁའ་འབའ་ཞིག་ཏུ་སྣང་བའི་གཞི་རུ་ག་ལ་འགྱུར་ཏེ་མི་འགྱུར་རོ། །གཅིག་དང་ཐ་དད་དུ་བརྟགས་ན་ཡང་ཐུན་མོང་གི་བལྟ་བྱ་རླན་གཤེར་ཙམ་དེ་ཆུ་ཉིད་དང་གཅིག་ཡིན་ན་དེ་ཉིད་ཆུ་ཁོར་ནར་སྣང་བ་ལས་རྣག་ལ་སོགས་པ་གཞན་པ་ཉིད་དུ་རྣམ་པ་ཀུན་ཏུ་སྣང་མི་རུང་སྟེ་དེ་ཆུ་ཉིད་དུ་སྣང་བའི་ཕྱིར་དཔེར་ན་ཆུ་ཉིད་ལ་ཆུར་སྣང་ཞིང་དམིགས་པ་བཞིན་ནོ། །གལ་ཏེ་རླན་གཤེར་དེ་ཆུ་ལ་སོགས་པ་ལས་གཞན་ཐ་དད་དུ་ཡོད་པར་གྱུར་ན་རླན་གཤེར་ཙམ་དེ་ཉིད་ཅི་ཡང་དམིགས་པ་མིན་ཏེ་ཆུ་ལ་སོགས་པ་གཞན་སྣང་ཞིང་དམིགས་པའི་ཕྱིར་དཔེར་ན་ཆུ་ཉིད་དམིགས་པ་གཞན་དམིགས་པ་མ་ཡིན་པ་བཞིན་ནོ། །དེ་ཕྱིར་ཆུ་དང་རྣག་སོགས་མི་གཅིག་པའི་མཐོང་སྣང་མི་འདྲ་བ་སོ་སོ་བ་ལ་ཐུན་མོང་གི་བལྟ་བྱ་འདིའོ་ཞེས་གཅིག་ཏུ་གྲུབ་པ་ཞིག་མི་སྲིད་ཅིང་ཐ་སྙད་དུའང་ཐུན་མོང་དུ་མཐུན་པར་སྣང་བའི་དངོས་པོ་གཅིག་ཉིད་ལ་མི་འདྲ་བ་སོ་སོར་སྣང་བ་སྣ་ཚོགས་པ་ཡང་མི་སྲིད་པའི་ཕྱིར་ཏེ་དཔེར་ན་ཀ་བུམ་སོགས་མི་འདྲ་བར་སོ་སོར་སྣང་བ་ལ་ཐུན་མོང་གི་བལྟ་བྱ་ཞིག་མི་སྲིད་ཅིང་ལས་སྣང་མཐུན་པའི་མི་རྣམས་ལའང་ཐུན་མོང་དུ་མཐུན་པར་སྣང་བའི་ཆུ་གཅིག་ཉིད་ལ་ཆུ་རུ་སྣང་བ་ལས་རྣག་ལ་སོགས་པར་མི་འདྲ་བར་སོ་སོར་སྣང་བ་ཡང་མི་སྲིད་པ་བཞིན་ནོ། །དེས་ན་ཕན་ཚུན་ལྟོས་ནས་ཆུ་དང་རྣག་ལ་སོགས་པ་མཐོང་བ་མི་གཅིག་པར་རྣམ་པར་བཞག་པ་ཙམ་ཞིག་ལས་གཞན་དུ་རིགས་པས་དཔྱད་པའི་ཆུ་དང་རླན་གཤེར་སོགས་ཐུན་མོང་གི་བལྟ་གཞིའམ་བལྟ་བྱ་ཞིག་ཁས་ལེན་པར་བྱེད་ན་དེ་གནས་ལུགས་དོན་དམ་པ་ཡིན་པར་གྲུབ་དགོས་པས་དེ་ལྟར་ན་དེ་རིགས་པས་དཔྱད་བཟོད་དུ་གྲུབ་པ་ལ་སོགས་པར་འགྱུར་བས་གང་ལྟར་བརྟགས་པའམ་མཁས་བླང་ཀྱང་མི་འཐད་པ་ཉིད་དུ་འགྱུར་རོ། །གལ་ཏེ་མཐུན་པར་སྣང་བའི་ཐུན་མོང་གི་བལྟ་བྱ་ཞིག་གཏན་ནས་མེད་པར་གྱུར་ན་སེམས་ཙམ་པའི་འདོད་པ་བཞིན་དུ་གཟུགས་ལ་སོགས་པའི་ཡུལ་ཕྱི་དོན་དུ་གྲུབ་པ་མེད་པར་ནང་ཤེས་པ་ཉིད་བག་ཆགས་ཀྱི་དབང་གིས་གཟུགས་ལ་སོགས་པའི་ཡུལ་སྣང་གཟུང་རྣམ་དུ་སྣང་བར་ཁས་ལེན་དགོས་ན་ཡང་། དེ་ནི་ཡང་དག་པར་འཐད་པ་མ་ཡིན་ཏེ་ཡུལ་དོན་ལ་གྲུབ་པ་མེད་པ་དེ་བཞིན་དུ་ནང་འཛིན་པ་སེམས་དེ་ཡང་དོན་ལ་གྲུབ་པ་མེད་པར་འདྲ་བའམ་མཉམ་པ་ཡིན་ལ་གཟུང་འཛིན་གཉིས་པོའང་ཐ་སྙད་ཀུན་རྫོབ་ཙམ་དུ་སྣང་བར་ཡང་མཉམ་པ་ཡིན་པའི་ཕྱིར་ན་གང་སྣང་བ་དེ་ལ་དོན་དམ་དཔྱོད་པའི་རིགས་པས་བརྟགས་ན་གཟུང་འཛིན་གཉིས་ལས་འཛིན་པ་ཡོད་ལ་བཟུང་བ་མེད་དོ་ཞེས་དོན་ལ་སོ་སོར་ཕྱེ་བ་འདི་མི་འཐད་དེ་ཇི་ལྟར་ན་ཐ་སྙད་དུ་གཟུགས་ལ་སོགས་པ་ཡུལ་སྣང་གཟུང་བར་སྣང་བ་ཡོད་ཀྱང་དོན་དུ་གྲུབ་པ་མེད་པས་རྫུན་པ་ཡིན་པ་དེ་ལྟར་འཛིན་པར་སྣང་ཡང་དཔྱད་ན་མ་གྲུབ་པས་རྫུན་པ་ཡིན་པའི་ཕྱིར་རོ། །དེས་ན་ཤེར་མདོ་ལས། ཡུལ་སེམས་གཉིས་མཚུངས་པར་བཀག་ཅིང་མངོན་པའི་ཆོས་ལས་མཚུངས་པར་ཡོད་ཅེས་གསུངས་པ་ཡིན་ནོ། །གོང་དུ་ཇི་སྐད་བསྟན་པ་དེ་ཕྱིར་སྣང་སྟོང་རིས་སུ་མ་ཆད་པས་རྒྱ་ཆད་ཕྱོགས་ལྷུང་བྲལ་བའི་སྣང་ཙམ་ཐུན་མོང་གི་བལྟ་བྱ་ནི་མི་དང་ལྷ་ལ་སོགས་པར་ཆུ་དང་བདུད་རྩི་ལ་སོགས་པ་མཐུན་པར་སྣང་བ་དང་མི་སྣང་བའི་གཞིར་ཡོད་པར་གྲུབ་ཕྱིར་དེ་མེད་པར་འདོད་དུ་མི་རུང་སྟེ། དཔེར་ན་མ་བརྟགས་མ་དཔྱད་པའི་སྣང་ཙམ་གྱི་ཟློས་གར་མཁན་ཐ་སྙད་དུ་ཡོད་ན་ལྷ་ལ་སོགས་པའི་ཟློས་གར་གྱི་རྣམ་འགྱུར་མི་འདྲ་བ་སྣ་ཚོགས་པ་མཐོང་བར་རུང་བ་དང་མེད་ན་མི་རུང་བ་ལ་སོགས་པ་བཞིན་ནོ། །དེ་ཡང་སྣང་སྟོང་རིས་སུ་མ་ཆད་པའི་ཡོད་ཙམ་འདི་ཁོ་ན་ལས་མ་གཏོགས་པའི་ཡོད་པ་གཞན་ཞིག་ནས་ཀྱང་གྲུབ་པ་མི་སྲིད་པས་མེད་ལ་སྣང་སྟོང་རིས་སུ་མ་ཆད་པའི་སྣང་ཙམ་འདི་ཉིད་གལ་ཏེ་མེད་པར་གྱུར་ན་ནི་ཐ་སྙད་ཀྱི་སྣང་བ་འདི་ཀུན་གཏན་ནས་མི་སྣང་བར་ཐམས་ཅད་ནམ་མཁའ་འབའ་ཞིག་ལྟ་བུར་ཅི་ཡང་མེད་པར་འགྱུར་དགོས་པས་དེ་ནི་ཤིན་ཏུ་མི་འཐད་དོ། །དེ་ལྟ་ན་ཡང་ཕྱི་དང་ནང་གི་འཁྲུལ་བའི་རྐྱེན་སྣ་ཚོགས་ཀྱིས་ནི་དོན་གྱི་གནས་ཚུལ་དངོས་ཇི་ལྟ་བ་བཞིན་དུ་མི་མཐོང་བར་རྣམ་པར་གཞན་དང་གཞན་དུ་ཕྱིན་ཅི་ལོག་ཏུ་མཐོང་བར་འགྱུར་བ་དཔེར་ན་སྒྱུ་མའི་སྔགས་བཏབས་པའི་སྟོབས་ཀྱིས་ཤིང་བུ་སོགས་ལ་དེ་དང་དེར་མི་མཐོང་བར་རྟ་དང་གླང་པོ་ཆེ་ལ་སོགས་པར་སྣང་ཞིང་མཐོང་བ་བཞིན་ནོ། །དེ་ཕྱིར་མཐུན་པར་སྣང་བའི་ཐུན་མོང་གི་བལྟ་བྱ་ནི་འདི་ཁོ་ནའོ་ཞེས་དཔྱད་པའི་གཞི་ཞིག་ངེས་པར་བཞག་ཏུ་མི་རུང་ངོ་ཞེས་སོ། །གཉིས་པ་ལ་གསུམ། ཐུན་མོང་དུ་སྤྱིར་བསྟན་པ། དག་མཉམ་དབྱེར་མེད་ཆེན་པོར་བྱེ་བྲག་ཏུ་བསྟན་པ། བསམ་གྱིས་མི་ཁྱབ་པའི་སྒོ་ནས་དོན་བསྡུ་བའོ། །དང་པོ་ལ་གཉིས། སྣང་སྟོང་ཟུང་འཇུག་མཉམ་པ་ཉིད་དུ་བསྟན་པ་དང་། དེ་ལ་ཚད་མ་དང་ཚད་མིན་མི་འཐད་པའི་རྩོད་པ་སྤང་བའོ། །དང་པོ། དེས་ན་རང་གི་ལུགས་སོགས་ཚིགས་བཅད་གཉིས་དང་རྐང་པ་གཅིག་གིས་བསྟན་ཏེ། ཇི་སྐད་བསྟན་པ་དེས་ན་འཐད་ལྡན་རང་གི་ལུགས་ལ་ནི་རྒྱ་ཆད་ཕྱོགས་ལྷུང་བྲལ་བའི་སྣང་སྟོང་རིས་སུ་མ་ཆད་པའི་གཞི་སྣང་སྟོང་དབྱེར་མེད་མཉམ་པ་ཉིད་རང་གི་ངོ་བོ་སྟོང་དང་མི་སྟོང་ལ་སོགས་པའི་སྤྲོས་པ་ཅིར་ཡང་མ་གྲུབ་པ་དེ་ཉིད་གང་ཅིར་སྣང་བ་ཐམས་ཅད་ཀུན་ལ་མཉམ་པ་ཡིན་པའི་ཕྱིར་དངོས་པོ་གཅིག་ཉིད་དངོས་པོ་སྣ་ཚོགས་པར་ཡང་སྣང་བར་ཤིན་ཏུ་རུང་ཞིང་འཐད་དེ། གང་ལ་སྣང་སྟོང་མི་འགལ་བར་རིས་སུ་མ་ཆད་པས་སྣང་སྟོང་དབྱེར་མེད་ཉིད་རུང་བའམ་འཐད་པ་ཡིན་ན་དེ་ལ་སྣང་དང་མི་སྣང་ཚད་མ་དང་ཚད་མིན་ཐུན་མོང་གི་བལྟ་བྱ་ལ་སོགས་པའི་ཐ་སྙད་ཐམས་ཅད་རུང་པར་ཆེས་འཐད་པར་འགྱུར་ལ། གང་ལ་སྣང་སྟོང་དབྱེར་མེད་འགལ་བར་རྟོག་པས་མི་རུང་བ་དེ་ལ་སྣང་དང་མི་སྣང་སོགས་ཐ་སྙད་ཐམས་ཅད་རུང་བར་མི་འགྱུར་ཏེ་ཐ་སྙད་ཐམས་ཅད་རྒྱུན་ཆད་པས་ཆེས་མི་འཐད་དོ། །གཉིས་པ་ལ་གསུམ། རང་ལུགས་ལ་མངོན་རྗེས་ཀྱི་ཚད་མ་གྲུབ་ཅིང་དོན་མེད་མ་ཡིན་པར་བསྟན་པ། གཞན་ལ་ཚད་མའི་རྣམ་བཞག་མི་འཐད་པར་བསྟན་པ། དེ་ཕྱིར་ཚད་མར་བསྒྲུབ་བའོ། །དང་པོ། འོ་ན་ཚད་མ་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། འོ་ན་གང་སྣང་ཀུན་ལ་མཉམ་པ་ཉིད་ཡིན་པ་དེའི་ཕྱིར་ཚད་མ་དང་ཚད་མིན་གྱི་རྣམ་དབྱེའང་འཐད་པ་མེད་པར་འགྱུར་ཅེ་ན། ཚུལ་མཐོང་གི་ཤེས་པ་འཕྲལ་གྱིས་འཁྲུལ་རྒྱུས་མ་བསླད་པའི་ངོར་ཆུ་ལ་སོགས་པ་གང་སྣང་བ་དེ་ཉིད་རྣག་ལ་སོགས་པ་གཞན་པ་ཉིད་དུ་མ་སྣང་བའམ་མི་སྣང་བ་དེ་ཡི་ཕྱིར་ན་ཚུལ་མཐོང་གི་ཤེས་པ་འཁྲུལ་རྒྱུས་མ་བསླད་པ་དེས་ཡུལ་གཞལ་བྱ་རང་མཚན་མི་འགྲུབ་པ་མ་ཡིན་པས་ཤིན་ཏུ་འགྲུབ་པར་འགྱུར་ཏེ། གང་གི་ཕྱིར་ཆུ་ལ་སོགས་པའི་དངོས་པོར་གང་སྣང་བ་ཀུན་རང་བཞིན་གྱིས་རང་མིན་གཞན་ཐམས་ཅད་ལས་ལོག་པའི་སྲ་གཤེར་སོགས་རང་རང་གི་ངོ་བོ་ཐུན་མོང་མ་ཡིན་པ་ལ་གནས་པ་ཉིད་ཡིན་པས་དེ་ལ་ལྡོག་པའི་སྒོ་ནས་གཅིག་དང་ཐ་དད་ལ་སོགས་པའི་རྣམ་དབྱེ་བྱར་རུང་བའི་གཞལ་བྱ་རང་མཚན་དང་དེ་ཡང་དག་པར་འཇལ་བའི་ཚད་མ་བསླུ་མེད་དུ་གྲུབ་པ་ཉིད་ཀྱི་ཕྱིར་རོ། །དེ་ཡི་ཕྱིར་ན་གཞལ་བྱ་དང་འཇལ་བྱེད་ཕན་ཚུན་ལྟོས་ཏེ་གཞལ་བྱ་གཞལ་བའི་ཚད་མ་ཉིད་གྲུབ་ཀྱི་ལྟོས་པ་མེད་པར་རང་དབང་ཁོ་ནས་ཆོས་རྣམས་ལ་ནི་གཞལ་བྱ་དང་འཇལ་བྱེད་ཚད་མས་གྲུབ་པར་འཇོག་པ་ཉིད་མ་ཡིན་ཏེ། གལ་ཏེ་རང་དབང་ཁོ་ནས་གྲུབ་པར་གྱུར་ན་གནས་ལུགས་དཔྱད་བཟོད་ཉིད་དུ་ཐལ་བར་འགྱུར་རོ། །དེས་ན་ཆུ་གཅིག་པོ་ལ་ཞེས་པ་དེ་ཡང་འཁྲུལ་རྒྱུས་མ་བསླད་པས་ཆུ་རང་འཛིན་གྱིས་ཚད་མས་བསླུ་མེད་དུ་གྲུབ་ཀྱང་དེར་ལྟོས་མེད་དུ་རང་དབང་ཁོ་ནས་གྲུབ་པ་ཉིད་མིན་ཏེ། འདི་ལྟར་དོན་དམ་དཔྱོད་པས་དཔྱད་བཟོད་མེད་པས་ཆུ་ཚད་མས་མི་འགྲུབ་ཅིང་ཡི་དྭགས་ཀྱི་ཤེས་ངོར་ཡང་ཆུ་དེ་ཚད་མས་གྲུབ་པར་མི་འགྱུར་བའི་ཕྱིར་རོ། །དེ་ཕྱིར་ལྟོས་ཏེ་ཆུ་སོགས་རང་སོགས་རང་འཛིན་གྱི་ཡུལ་གཞལ་བྱ་རྣམས་ལ་འཁྲུལ་རྒྱུས་མ་བསླད་པས་མངོན་སུམ་ཚད་མ་དང་། རྟགས་ཡང་དག་གིས་རྗེས་དཔག་ཚད་མས་དྲངས་པའི་ངེས་པ་ན་དེ་ཡི་ཡུལ་རྣམས་ལ་ཚད་མས་ཇི་ལྟར་བཅད་པ་དེ་ལྟར་བླང་དོར་འཇུག་ལྡོག་གང་དོན་ལ་དེ་ལྟར་བསླུ་བ་མེད་པའམ་མི་བསླུ་བའི་ཕྱིར་ཏེ་དེས་ན་ཚད་མ་ལེགས་པར་གྲུབ་ཅིང་དེས་ཇི་ལྟར་བཅད་པ་ལྟར་བསླུ་བ་མེད་པས་དེ་བསྟན་པ་དོན་མེད་པ་མ་ཡིན་ནོ། །དེའི་ཤུགས་ཀྱིས་ལྡོག་ཕྱོགས་ཚད་མིན་འཁྲུལ་བ་ཉིད་དུ་ཡང་བསྟན་ནོ། །གཉིས་པ། དེས་ན་ཆུ་གཅིག་སོགས་ཚིགས་བཅད་གསུམ་དང་རྐང་པ་གསུམ་གྱིས་བསྟན་ཏེ། དེས་ན་ཆུ་གཅིག་ལ་ཞེས་པ་དེ་ཡང་རང་འཛིན་མི་ཡི་མཐོང་བ་འཁྲུལ་རྒྱུས་མ་བསླད་པའི་ཚད་མ་ཁོ་ན་ལ་ལྟོས་ནས་ཚད་མས་གྲུབ་པའི་ཆུ་བལྟ་གཞིར་བཞག་སྟེ་གཞན་ལྷ་ཉིད་ལ་ལྟོས་ན་ནི་ཚད་མས་གྲུབ་པའི་བདུད་རྩི་གཅིག་ཉིད་ལ་བལྟ་གཞིར་འཛིན་དགོས་ཀྱི་གཞན་ཆུ་དང་རྣག་ལ་བལྟ་གཞིར་མི་འཛིན་ལ་དེ་ལྟར་མ་ཡིན་པར་གང་ཡང་ཚད་མས་གྲུབ་པ་མེད་ན་ཆུ་ཕོར་པ་གང་ལྟ་བུ་ལ་ཡི་དྭགས་ཀྱིས་རྣག་དང་མིས་ཆུ་དང་ལྷས་བདུད་རྩི་རུ་མཐོང་བར་གྱུར་པའི་ཚེ་དེ་གསུམ་ཀ་གཞི་གཅིག་པོ་དེ་ལ་ཚངས་ཞིང་ཚོགས་པ་ཡོད་པ་མིན་ལ་དེ་གསུམ་པོ་ལས་གཅིག་ཀྱང་ཚད་མས་གྲུབ་པའི་བལྟ་གཞི་མིན་ན་དེ་གསུམ་མ་ཡིན་པ་ལས་དངོས་པོ་གཞན་དང་གཞན་ཞིག་ཏུ་མཐོང་བ་འདིའོ་ཞེས་ཚད་མས་སྒྲུབ་མི་ནུས་པས་བལྟ་གཞི་གཏན་གནས་མེད་པར་འགྱུར་བས་མཐོང་དོན་རྣག་ལ་སོགས་པ་གསུམ་ཀ་མེད་པར་འགྱུར་བས། དེ་ལྟར་ན་མིས་མཐོང་བའི་ཆུ་འདི་ཡང་ཆུ་ཉིད་མིན་པར་གྱུར་ན་དེ་ལས་གཞན་ཞིག་ཆུ་རུ་མཐོང་བ་འདིའོ་ཞེས་འཐད་པ་སྒྲུབ་ཏུ་མེད་པས་མི་འཐད་པ་ཁོ་ན་ཡིན་པས་ཆུ་ཞེས་བྱ་བ་གཏན་མེད་དུ་ཐལ་བར་འགྱུར་རོ། །དེ་ལྟའི་ལུགས་དེ་ལའང་ཐ་སྙད་པའི་ཚད་མ་ཡི་རྣམ་པར་བཞག་པ་ཀུན་གཏན་ནས་འཐད་པར་མི་འགྱུར་དེ་ལ་དེ་ལྟར་ན་ཚད་མིན་གྱི་རྣམ་བཞག་རྣམས་ཀྱང་མི་འཐད་པས་བླང་དོར་འཇུག་ལྡོག་ཐམས་ཅད་དོན་མེད་པར་འགྱུར་རོ། །གསུམ་པ་གསུམ། གནས་སྐབས་གཉིས་སུ་བཞག་པ། མཐར་ཐུག་གཅིག་ཏུ་བསྒྲུབ་པ། དེ་ཕྱིར་དག་པ་ཆེན་པོར་བསྒྲུབ་པ་ཐུན་མོང་མིན་པའོ། །དང་པོ་ལ་གཉིས། མ་དག་ཚུར་རོལ་མཐོང་བའི་ཐ་སྙད་ཚད་མ། དག་པའི་གཟིགས་པ་ལ་བརྟེན་པའི་ཐ་སྙད་ཚད་མའོ། །དང་པོ། དེ་ཕྱིར་འཕྲལ་གྱི་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ཕྱིར་ཕྱི་ནང་གི་འཕྲལ་གྱི་འཁྲུལ་རྒྱུ་ཡིས་མ་བསླད་པའི་དབང་པོའི་ཡུལ་དུ་སྣང་བའི་དངོས་པོ་དེ་ཉིད་ཚད་གྲུབ་བམ་རང་མཚན་ཡིན་པ་རེ་ཞིག་ཚུར་མཐོང་དེའི་ངོར་བསྒྲུབ་དགོས་ཏེ་དཔེར་ན་དབང་ཤེས་ལ་ཆུ་ཉིད་ཆུ་དང་སྨིག་རྒྱུར་ཆུར་སྣང་བ་ལ་ཆུར་སྣང་བའི་ཤེས་པ་འཕྲལ་གྱི་འཁྲུལ་རྒྱུས་མ་བསླད་པས་མ་འཁྲུལ་བའི་ཤེས་པ་ཚད་མ་དང་སྨིག་རྒྱུར་ཆུར་སྣང་བའི་ཤེས་པ་འཁྲུལ་རྒྱུས་བསླད་པས་འཁྲུལ་བའི་ཤེས་པ་ཚད་མིན་དང་། དེ་གཉིས་ཡུལ་ཡང་ཐ་སྙད་དུ་ཆུ་ལ་རང་མཚན་ཡོད་པ་དང་སྨིག་རྒྱུ་ལ་རང་མཚན་མེད་པའི་ཁྱད་པར་བཞིན་དུ་ཤེས་པར་བྱའོ། །དེས་ན་གནས་སྐབས་སུ་ཡི་དྭགས་ཉིད་ལ་སྔོན་ལས་ཀྱི་སྒྲིབ་པ་ངན་པས་མི་རྣམས་ཀྱིས་མཐོང་བའི་ཆུ་གཙང་མ་ཉིད་ལ་རྣག་ཏུ་སྣང་ཡང་སྔོན་གྱི་ལས་ངན་པའི་སྐྱོན་ནམ་སྒྲིབ་པ་དེ་ཉིད་བྲལ་བའམ་སེལ་བར་གྱུར་བ་ན་ད་གདོད་དམ་ད་གཟོད་མི་རྣམས་བཞིན་དུ་ཆུ་རུ་སྣང་ཞིང་མཐོང་བའི་ཕྱིར་དེ་ལ་ལྟོས་ནས་རེ་ཞིག་མིས་ཆུར་མཐོང་བ་དེ་ཉིད་ཚད་མ་དང་གཞན་པ་ཡི་དྭགས་ལ་ལས་ཀྱི་སྒྲིབ་པ་ངན་པའི་སྐྱོན་གྱིས་བསྒྱུར་བས་རྣག་ཏུ་མཐོང་བའི་ཕྱིར་རེ་ཞིག་ཚུར་མཐོང་དེའི་ངོར་ཆུ་ཉིད་ནི་ཚད་མར་བསྒྲུབས་པ་ཡིན་ནོ། །དེ་བཞིན་དུ་ཆུ་དང་བཅུད་རྩི་ལ་སོགས་པ་ལའང་འདྲའོ། །གཉིས་པ། མཐར་ཐུག་རིག་པས་སོགས་ཚིགས་བཅད་གཉིས་དང་རྐང་པ་གཉིས་ཀྱིས་བསྟན་ཏེ། གནས་ཡོངས་སུ་གྱུར་པས་ཐ་སྙད་ཀྱི་གནས་ཚུལ་མཐར་ཐུག་པ་ཇི་བཞིན་མཐོང་བའི་དག་པའི་གཟིགས་པ་ལ་བརྟེན་པའི་ཚད་མའི་རིགས་པས་དཔྱད་པ་ན་མ་དག་ཚུར་རོལ་མཐོང་བའི་སྣང་བ་ཆུ་དང་རྣག་ལ་སོགས་པ་དེ་དག་ཀུན་ཀྱང་བག་ཆགས་འཁྲུལ་བའི་དབང་གིས་སྣང་བ་སྟེ། དེ་ལས་གཞན་དུ་བག་ཆགས་འཁྲུལ་སྣང་སྤངས་བས་གནས་ཡོངས་སུ་གྱུར་པའི་འཕགས་མཆོག་རྣམས་ལ་མི་རྣམས་ཀྱི་མཐོང་བའི་ཆུ་འདི་ཉིད་དག་པ་ཡིས་སངས་རྒྱས་ཀྱི་ཞིང་ཁམས་དང་ཡུམ་ཆེན་མ་མ་ཀི་ཡི་སྐུར་ཡང་སྣང་ཞིང་མཐོང་བའི་ཕྱིར་ན་མི་ཡིས་མཐོང་བ་ཡི་ཆུ་དེ་ཁོ་ན་གཞན་ལ་ལྟོས་པ་མེད་པར་མཐའ་གཅིག་ཏུ་ཚད་མར་མི་འགྲུབ་པས་བསྒྲུབ་ཏུ་རུང་བ་མ་ཡིན་ལ་དེས་ན་སྔོན་ལས་ངན་པའི་བག་ཆགས་འཁྲུལ་པའི་སྒྲིབ་པའི་རྐྱེན་མ་དག་པ་རྣམས་ཇེ་དག་པས་ཞེས་ཇེ་དག་ཇེ་དག་ཏུ་ཅི་ཙམ་སོང་བ་དེ་ཉིད་དུ་མཐོང་བ་འོག་མ་འོག་མ་ལ་ལྟོས་ནས་མཐོང་བ་གོང་མ་གོང་མ་ཚད་མ་རུ་ཁས་བླང་བ་འདི་ཉིད་ནི་ཐ་སྙད་དཔྱོད་པའི་རིགས་པས་གྲུབ་ཅིང་གནོད་པ་མེད་པས་འཐད་པ་ཡང་དག་པ་ཉིད་ཡིན་ནོ། །གཉིས་པ་མཐར་ཐུག་གཅིག་ཏུ་བསྒྲུབ་པ་ནི། མཐར་ཐུག་དེ་ཁོ་ན་སོགས་ཚིགས་བཅད་གཉིས་ཀྱིས་བསྟན་ཏེ། གནས་ལུགས་མཐར་ཐུག་ཆོས་ཀྱི་དབྱིངས་དེ་ཁོ་ན་ཉིད་ནི་བདེན་གཉིས་དབྱེར་མེད་དམ་ཟུང་འཇུག་གཅིག་ལས་གཉིས་སུ་མེད་པའི་ཕྱིར་དེ་ཁོ་ན་ཉིད་ཇི་བཞིན་མཐོང་བའི་ཚད་མའང་མཐར་ཐུག་པ་གཉིས་སུ་མེད་པས་གཅིག་ཉིད་ཡིན་ཏེ་ཚད་མ་མཐར་ཐུག་གཉིས་པ་ཞིག་མི་སྲིད་པས་མེད་དོ། །དེ་ཕྱིར་གནས་ལུགས་མཐར་ཐུག་བདེན་པ་གཅིག་པུ་དག་མཉམ་ཟུང་འཇུག་སྟེ། དེ་ཇི་ལྟ་བ་བཞིན་དུ་གཟིགས་པའི་ཚད་མ་ཡང་རང་བྱུང་གི་ཡེ་ཤེས་རྣམ་པ་ཐམས་ཅད་མཁྱེན་པ་གཅིག་པུ་ཉིད་ལས་གཞན་དུ་མེད་ལ་གནས་ལུགས་དེ་ཉིད་མཐོང་བ་ལ་སྒྲིབ་པའི་སྤང་བྱ་གང་ཇི་སྙེད་པ་ཡང་མ་རིག་པ་སྟེ་རྨོངས་པའི་རང་བཞིན་གཅིག་པུ་ལས་མེད་པའམ་མ་འདས་པའི་ཕྱིར་ན་སངས་རྒྱས་དང་སེམས་ཅན་རིག་པ་དང་མ་རིག་པ་ཙམ་དུ་སྔ་འགྱུར་གྱི་རྒྱུད་དང་མན་ངག་རྣམས་སུ་བསྟན་པ་ཉིད་ཤིན་ཏུ་ཟབ་མོའི་དོན་ངེས་པའི་སྙིང་པོ་མཐར་ཐུག་ཡང་དག་པའོ། །གསུམ་པ་དེའི་ཕྱིར་དག་པ་ཆེན་པོར་བསྒྲུབ་པ་ཐུན་མོང་མ་ཡིན་པ་ནི། དེ་ཕྱིར་ཚད་མའི་སོགས་ཚིགས་བཅད་གཉིས་ཀྱིས་བསྟན་ཏེ། ཇི་སྐད་བསྟན་པ་དེ་ཕྱིར་དག་པའི་གཟིགས་པ་ལ་བསྟེན་པའི་ཐ་སྙད་ཚད་མའི་ཚུལ་འདི་ཡིས་ཕྱི་ནང་གི་སྣང་བ་འདི་ཐམས་ཅད་ཀུན་གདོད་ནས་རང་བཞིན་གྱིས་རྣམ་པར་དག་པའི་ཞིང་དང་ལྷར་བསྒྲུབ་པ་འདི་ནི་སྔ་འགྱུར་རྡོ་རྗེ་ཐེག་པའི་རང་ལུགས་ཟབ་ཟབ་མོ་ཁོ་ན་སྟེ། དེ་ཉིད་ཇི་ལྟ་བ་བཞིན་དུ་གཟིགས་ཤིང་ལེགས་པར་སྟོན་པར་མཛད་པའི་ཀུན་མཁྱེན་རོང་ཟོམ་མ་ཧ་པཎྜི་ཏ་ཡི་སྣང་བ་ལྷ་བསྒྲུབ་ལ་སོགས་པའི་ལེགས་པར་བཤད་པ་སེང་གེའི་ང་རོ་ལྟ་བུ་རྣམས་ཀྱིས་མཚོན་ཏེ། ཀུན་མཁྱེན་ཀློང་ཆེན་པ་ལ་སོགས་པའི་སྔ་འགྱུར་བའི་ཀུན་རྫོབ་ཏུ་དག་པ་ཆེན་པོར་བསྒྲུབ་པའི་ལུང་རིགས་མན་ངག་རྣམས་ནི་འགྲན་ཟླ་ཀུན་དང་བྲལ་བས་གཞན་དང་ཐུན་མོང་མ་ཡིན་པ་ཁོ་ན་ཡིན་ལ། དེ་ལས་གཞན་ན་ཀུན་རྫོབ་ཏུ་དག་པ་ཆེན་པོར་བསྒྲུབ་པའི་ཚུལ་ལུགས་འདི་ཉིད་ཚུལ་བཞིན་དུ་སྨྲ་བ་མེད་པས་དག་པ་ཆེན་པོར་བསྒྲུབ་ཚུལ་འདི་ཡི་ཐད་གང་ལྟར་ཁས་བླང་ཀྱང་འགལ་བར་མཐོང་བས་ན་རྒྱུད་དོན་ཟབ་མོ་ཇི་བཞིན་དུ་རྟོགས་པས་དབེན་པ་ཉིད་དོ། །གཉིས་པ་དག་མཉམ་དབྱེར་མེད་ཆེན་པོར་བྱེ་བྲག་ཏུ་བསྟན་པ་ལ་གསུམ། ཐུན་མོང་གི་བལྟ་བྱ་སྣང་སྟོང་རེ་རེས་མི་རུང་བསྟན་པ། ཟུང་འཇུག་དག་མཉམ་པ་བདེན་པ་དབྱེར་མེད་དུ་བསྟན་པ། དག་མཉམ་ཆེན་པོར་གྲུབ་པའི་ཚུལ་དང་ངེས་པའི་ཡོན་ཏན་ནོ། །དང་པོ། དེ་ལ་ཐུན་མོང་སོགས་ཚིགས་བཅད་བཅུ་གཅིག་དང་རྐང་པ་གསུམ་གྱིས་བསྟན་ཏེ། དེ་ལ་ཐུན་མོང་གི་བལྟ་བྱ་ཞེས་པ་དེ་ཉིད་སྣང་བ་དང་སྟོང་པ་སོ་སོ་བ་རེ་རེས་མི་རུང་སྟེ་མི་འཐད་ལ་དེའི་རྒྱུ་མཚན་རྒྱས་པར་བསྟན་པ། གལ་ཏེ་ཐུན་མོང་གི་བལྟ་བྱ་ཞེས་པ་དེ་ཉིད་སྣང་བ་དང་སྟོང་པ་སོ་སོ་བ་རེ་རེས་མི་རུང་སྟེ་མི་འཐད་ལ་དེའི་རྒྱུ་མཚན་རྒྱས་པར་བསྟན་པ། གལ་ཏེ་ཐུན་མོང་གི་བལྟ་བྱ་ཅི་ཡང་མེད་པས་སྟོང་པ་རྐྱང་པ་ཙམ་ཡིན་ན་འགྲོ་བ་མི་ལ་སོགས་པ་སུ་ཡང་རུང་ལ་ཡང་ཅི་ཡང་མེད་པའི་ནམ་མཁའ་ཡང་དོན་བྱེད་ནུས་པའི་བུམ་པ་ལ་སོགས་པར་སྣང་བར་འགྱུར་ཞིང་བུམ་པ་ལ་སོགས་པ་དོན་བྱེད་པའི་དངོས་པོ་རྣམས་ཀྱང་ནམ་མཁའ་ལྟར་ཅི་ཡང་མེད་པས་མི་སྣང་བར་འགྱུར་དགོས་ལ་དེའི་ཕྱིར་སྣང་བ་དང་བྲལ་བའི་ཅི་ཡང་མེད་པས་སྟོང་པ་ཙམ་ཐུན་མོང་གི་བལྟ་བྱར་རུང་ཞིང་ཆུ་ལ་སོགས་པར་སྣང་ན་མོ་གཤམ་གྱི་བུ་དང་ནམ་མཁའི་མེ་ཏོག་ལ་སོགས་པ་ཐུན་མོང་གི་བལྟ་བྱར་རུང་ཞིང་ཆུ་ལ་སོགས་པ་ཐམས་ཅད་དུ་ཅི་ཡི་ཕྱིར་མི་སྣང་སྟེ་སྣང་དགོས་ལ། དེ་ལྟར་ན་དངོས་པོ་རྣམས་ཕྱོགས་དུས་གཅིག་ན་ཡོད་པ་ལྟར་ཕྱོགས་དུས་ཐམས་ཅད་ན་རྟག་ཏུ་ཡོད་པའམ། ཡང་ན་ཕྱོགས་དུས་གཅིག་ན་མེད་པ་ལྟར་ཕྱོགས་དུས་ཐམས་ཅད་ན་མེད་པར་ཐལ་བར་འགྱུར་ཏེ། དངོས་པོ་རྣམས་རྒྱུ་མེད་དུ་འདོད་པ་ལ་ཇི་སྐད་བརྗོད་པའི་སྐྱོན་ཀུན་འདི་ལ་ཡང་འཇུག་པར་མཚུངས་པས་སོ། །གཞན་ཡང་ཅི་ཡང་མེད་པའི་སྟོང་པའི་གནས་སྐབས་དངོས་མེད་དེ་ཉིད་ཡིན་བཞིན་དུ་ཆུ་ལ་སོགས་པའི་སྣང་བའི་དངོས་པོ་ཡིན་པའང་མེད་དེ། ཅིའི་ཕྱིར་ན་དེ་གཉིས་ཕན་ཚུན་འགལ་བའི་ཕྱིར་རོ། །གལ་ཏེ་ངོ་བོས་མ་སྟོང་པ་ཡི་སྣང་བ་ཐུན་མོང་གི་བལྟ་བྱ་ཞིག་ཡོད་པར་གྱུར་ན་ནི་ཅི་ཡང་མེད་པས་སྟོང་ཉིད་ཙམ་ཐུན་མོང་གི་བལྟ་བྱའམ། སྣང་གཞིར་བཞག་པའི་རང་ཚིག་དང་འགལ་བ་ཡིན་པས་མི་འཐད་པ་ཁོ་ན་རོ། །འོ་ན་ཁྱོད་ཀྱི་གོང་དུ་རང་ལུགས་ལ་ནི་སྟོང་པ་ཉིད་དང་རྟེན་འབྱུང་གི་སྣང་བ་གཉིས་མི་འགལ་བར་ཟུང་འཇུག་གམ་དབྱེར་མེད་དུ་བསྟན་པ་དེ་ཅི་ཞེ་ན། འདིར་ནི་གཉིས་ཆོས་ཀྱི་སྣང་བ་ཚུ་རོལ་མཐོང་པའི་དོན་ལ་དཔྱད་པའི་ཀུན་ཏུ་ཐ་སྙད་པའི་ཚད་མའི་རྣམ་བཞག་གི་སྐབས་ཡིན་པས་ན་དེའི་ངོར་དངོས་པོ་གཅིག་ཉིད་ཡོད་པ་དང་མེད་པ་གཉིས་འགལ་བ་སྟེ། ཕན་ཚུན་སྤང་བས་གཉིས་ཀ་ཡིན་པ་མི་སྲིད་དོ། །གོང་དུ་ཇི་སྐད་བསྟན་པའི་དངོས་པོ་གཅིག་གི་སྟེང་གི་སྣང་སྟོང་བདེན་པ་གཉིས་མེ་དང་ཚ་བ་བཞིན་དུ་མི་འགལ་བར་བསྟན་པ་ནི་འཕགས་པའི་ཡེ་ཤེས་གཉིས་སྣང་མེད་པའི་ཡུལ་ཡིན་པའི་ཕྱིར་དེ་གཉིས་ཀྱི་ཤན་ལེགས་པར་བྱེད་པ་གཅེས་སོ། །གཉིས་པ་སྟོང་པ་ལས་རིས་སུ་ཆད་པའི་སྣང་བ་ཁོ་ནས་མི་རུང་བ་ནི་གལ་ཏེ་རང་གི་ངོ་བོས་སྟོང་པ་དང་བྲལ་བའི་མི་སྟོང་པའི་སྣང་བ་ཙམ་ཞིག་ཐུན་མོང་གི་བལྟ་བྱའི་སྣང་གཞིར་མི་རུང་སྟེ། ཇི་ལྟར་ན་མི་སྟོང་བའི་ཐུན་མོང་གི་སྣང་གཞི་དེ་ཉིད་ཆུ་རྣག་བདུད་རྩི་ལ་སོགས་པའི་སྣང་བ་རྣམས་ལས་གང་ལྟར་སྣང་བ་ཡིན་ཞེས་བརྟགས་ན་འདི་ལྟར་སྣང་བ་ཡིན་ནོ་ཞེས་སོ་སོར་རིས་སུ་མ་ཆད་པའི་སྣང་བ་ཞིག་སུས་ཀྱང་བསམ་པར་མི་ནུས་པའི་ཕྱིར་བསམ་བརྗོད་ལས་འདས་པས་ཤིན་ཏུ་མི་འཐད་དོ། །དེའི་ཕྱིར་ཐུན་མོང་གི་སྣང་གཞི་ནི་མི་སྟོང་བའི་སྣང་བ་ཙམ་ཞིག་ཡོད་ཅེས་པ་འདི་ཉིད་འགྲུབ་པ་མ་ཡིན་ཏེ་ཅིའི་ཕྱིར་ན་ཤེས་བྱེད་ཀྱི་ཚད་མས་ཏེ་ཚད་མ་གང་གིས་མ་མཐོང་བཞིན་དུ་དེ་འདྲའི་སྣང་གཞི་ཡོད་ཅེས་སྒྲུབ་བྱེད་མེད་པའི་དམ་བཅའ་ཙམ་དུ་ཟད་པས་རྣམ་པ་ཀུན་ཏུ་མི་འགྲུབ་པ་ཁོ་ནའོ། །སྐྱོན་གཞན་ཡང་ཆུ་རྣག་སོགས་གང་སྣང་བ་དེ་ཉིད་མི་སྟོང་བར་རིས་སུ་ཆད་པར་གྱུར་ན་ནི་ཆུ་སོགས་གང་ལྟར་སྣང་བ་དེ་ལས་རྣག་སོགས་གཞན་དུ་རྣམ་པ་ཀུན་ཏུ་སྣང་མི་རུང་ཞིང་། དེ་ཉིད་མི་སྟོང་བ་བདེན་གྲུབ་ཀྱི་སྣང་བ་ཡིན་པའི་ཕྱིར་ན་ཡང་སྣང་བ་དེ་ཉིད་དོན་དམ་དཔྱོད་པའི་རིགས་པས་དཔྱད་བཟོད་དུ་འགྱུར་བ་ལ་སོགས་པ་དང་། གཞན་ཡང་ཆུ་དང་རྣག་དང་བདུད་རྩི་སོགས་ཀྱི་ཐུན་མོང་གི་སྣང་གཞི་ཉིད་ནི་ཆུ་ལ་སོགས་པ་དེ་གསུམ་སོ་སོ་བ་གང་ཡིན་ཀྱང་འགལ་བ་སྟེ་འདི་ལྟར་གལ་ཏེ་ཆུ་རུ་སྣང་བ་དེ་ཡི་སྣང་གཞི་རྣག་ཉིད་དུ་གྲུབ་པ་ཡིན་ན་དེ་ཉིད་ཆུ་རུ་སྣང་བར་ཇི་ལྟར་འགྱུར་ཏེ། མེ་ཉིད་ཆུ་རུ་སྣང་བར་མི་འགྱུར་བ་བཞིན་ནོ། །གལ་ཏེ་ཆུ་རུ་སྣང་བའི་གཞི་དེ་ཉིད་རྣག་ཉིད་མིན་པར་ཆུ་ཉིད་མིན་པར་ཆུ་ཉིད་ཡིན་པར་གྲུབ་ན་ནི། ཆུ་ཉིད་ཆུར་སྣང་བ་ལས་རྣག་ལ་སོགས་པ་གཞན་དུ་ཅི་ལ་སྣང་སྟེ་སྣང་མི་རིགས་ཏེ། ཆུ་ཉིད་མེ་ལ་སོགས་པ་གཞན་པ་ཉིད་དུ་སྣང་མི་རུང་བ་བཞིན་ནོ། །གལ་ཏེ་ཡི་དྭགས་ཀྱི་མཐོང་བའི་ཡུལ་དུ་གང་སྣང་བ་དེ་ཡང་ཆུ་འདི་ཉིད་ཡིན་ནོ་ཞེ་ན། དེ་ལྟར་ན་ཡི་དྭགས་ལ་རྣག་སྣང་དེ་ཡང་མེད་པར་ཁས་བླང་བ་ཉིད་དུ་ཐལ་བ་འགྱུར་བས་མི་འཐད་པར་འགྱུར་རོ། །མདོར་ན་གང་ཕྱིར་རིགས་དྲུག་གི་འགྲོ་བ་རང་རང་སོ་སོ་ལ་གང་ཆུ་ལ་སོགས་པ་ཐུན་མིན་གྱི་སྣང་བ་དེ་དང་དེ་ལས་སྣང་གཞི་ལོགས་སུ་ཅི་ཡང་ཡོད་པ་མིན་ཏེ་གལ་ཏེ་ཡོད་པར་གྱུར་ན་གང་སྣང་བ་དང་དེའི་སྣང་གཞི་ཐ་དད་དུ་འགྱུར་བའི་ཕྱིར་མི་འཐད་དེ། དཔེར་ན་ཀ་བ་དང་བུམ་པ་གཉིས་ཕན་ཚུན་གཅིག་གཞི་གཅིག་ཤོས་ཉིད་མིན་པ་བཞིན་ནི། དེས་ན་གང་སྣང་བ་དེ་ལས་གཞན་དུ་སྣང་གཞི་ལོགས་སུ་ཐ་དད་པ་ཉིད་མེད་པར་རིགས་པར་བྱའོ། །གཉིས་པ་ལ་གསུམ། གཞི་གནས་ཚུལ་སྣང་སྟོང་ཟུང་འཇུག་རྒྱ་ཆད་ཕྱོགས་ལྷུང་དང་བྲལ་བ་མཐར་ཐུག་པ་གནས་སྣང་རྣམ་ཀུན་མཐུན་པའི་དག་མཉམ་བདེན་པར་དབྱེར་མེད་དུ་བསྟན་པ། ལམ་སྣང་ཚུལ་དག་དང་མ་དག་པར་གནས་སྣང་མི་མཐུན་པར་སྣ་ཚོགས་སུ་སྣང་ཚུལ། དེ་ལྟར་མ་རྟོགས་པ་དང་རྟོགས་པའི་སྐྱོན་ཡོན་འབྲས་བུ་བསྟན་པའོ། །དང་པོ་ལ་གསུམ། དོན་དམ་དུ་མཉམ་པ་ཆེན་པོར་བསྟན་པ་དང་། ཀུན་རྫོབ་ཏུ་དག་པ་ཆེན་པོར་བསྒྲུབ་པ་དང་། མཐར་ཐུག་དབྱིངས་ཡེ་བདེན་པ་དབྱེར་མེད་ཟུང་འཇུག་ཏུ་བསྟན་པའོ། །དང་པོ། དེས་ན་སྣང་སྟོང་སོགས་ཚིགས་བཅད་གཅིག་དང་རྐང་པ་གཉིས་ཀྱིས་བསྟན་ཏེ། གོང་དུ་ཇི་སྐད་བསྟན་པ་དེས་ན་ཆོས་ཀུན་གདོད་ནས་སྣང་སྟོང་རིས་སུ་མ་ཆད་པའི་ཟུང་འཇུག་གམ་རང་གི་ངོ་བོས་བདེན་པའམ་གྲུབ་པ་མེད་པའི་སྟོང་པའི་དབྱིངས་དང་འདུ་འབྲལ་མེད་པའི་སྣང་བ་ཙམ་ཞིག་དེ་རྒྱ་གང་དུ་མ་ཆད་ཕྱོགས་གང་དུ་ལྷུང་བ་དང་བྲལ་བ་ཡི་སྣང་སྟོང་ཟུང་འཇུག་སྤྲོས་བྲལ་རོ་མཉམ་ཆེན་པོ་རུ་འཁོར་འདས་ཀྱི་ཆོས་ཀུན་ཡེ་གདོད་མ་ནས་མཉམ་པ་ཆེན་པོར་གནས་པའི་ཕྱིར་ན་དེ་ལྟར་མཉམ་པ་ཉིད་རང་བྱུང་གི་ཡེ་ཤེས་འོད་གསལ་རྫོགས་པ་ཆེན་པོ་རུ་གདོད་ནས་གྲུབ་པའི་དོན་དེ་ཉིད་རྟོག་གེའི་རིགས་པས་མ་དཀྲུགས་པར་ངེས་པའི་མདོ་རྒྱུད་ཟབ་མོའི་ལུང་རིགས་ཀྱིས་གཏན་ལ་ཕབ་པར་བྱས་ནས་གནས་ལུགས་བསལ་བཞག་མེད་པར་མཉམ་པར་འཇོག་པ་ནི་མཉམ་ཉིད་རྫོགས་པ་ཆེན་པོ་སྟེ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྤྲོས་བྲལ་དབུ་མ་ཆེན་པོ་ཡང་ཡིན་ནོ། །གཉིས་པ། ཚུལ་དེ་གོམས་པའི་སོགས་ཚིགས་བཅད་བརྒྱད་དང་རྐང་པ་གཅིག་གིས་བསྟན་ཏེ། གོང་དུ་ཇི་སྐད་བསྟན་པའི་ཚུལ་དེ་ལ་ཇི་བཞིན་གོམས་པར་བྱེད་པའི་ལམ་གྱི་གནས་སྐབས་སུ་ཡང་དང་པོར་དག་པའི་གཟིགས་པ་ལ་བརྟེན་པའི་རིགས་པ་ཚད་མའི་ལམ་ནས་ཕྱི་དང་ནང་གི་དངོས་པོ་མ་དག་པའི་སྣང་བ་འདི་ཐམས་ཅད་ཡེ་ནས་དག་པའི་ཡེ་ཤེས་ཆེན་པོར་རང་གྲོལ་བའི་སྣང་སྲིད་རྣམ་པར་དག་པའི་ཆོས་ཀྱི་སྐུ་ཉིད་ཡིན་ནོ་ཞེས་ཡིན་པ་ལ་ཡིན་པར་ངེས་པའི་ཡིད་ཆེས་པ་ནི། བསླུ་བ་མེད་པའི་རྡོ་རྗེའི་ལུང་རྒྱུད་ཀྱི་དགོངས་པའི་དོན་ལ་ཡང་དག་པར་འབྱོར་ཞིང་གྲུབ་པ་རྒྱུད་དོན་དང་ཤིན་ཏུ་མཐུན་ཏེ་དེས་ན་སྒྱུ་འཕྲུལ་དྲ་བ་གཉིས་སུ་མེད་པའི་རྒྱུད་ལས་ཕུང་པོ་ལྔ་སྣང་ལ་རང་བཞིན་མེད་པའི་སྒྱུ་མ་ལྟ་བུ་ཡི་སྣང་བ་ཕྱོགས་དང་རིས་སུ་མ་ཆད་པ་དེ་ཉིད་ཡེ་ནས་རྣམ་པར་དག་པའི་ཞིང་དང་ལྷར་སྣང་བ་ཡིན་ནོ་ཞེས་གང་གསུང་བའི་དགོངས་པའི་དོན་ཟབ་མོ་ལ་ཡིད་ཆེས་ཕྱིར་མི་ལྡོག་པ་ཉིད་ཡང་དག་པར་སྐྱེ་བར་འགྱུར་ཏེ། འདི་ལྟར་ཡི་དྭགས་ཀྱི་འགྲོ་བ་རྣམས་ཆུ་གཙང་མ་འདི་ཡང་རྣག་ཏུ་མཐོང་བའི་ལས་ངན་གྱི་སྒྲིབ་པ་རྣམས་དག་པའི་སྟོབས་ཀྱིས་རྣག་སྣང་དང་རྣག་འཛིན་ལས་བཟློག་པའམ་ལོག་པའི་ཚེ་ན་གཟོད་ཆུ་ཉིད་ལ་ཆུར་སྣང་ཞིང་། མཐོང་བར་གྱུར་པས་ན་རྣག་སྣང་དང་རྣག་འཛིན་དེ་ཡང་ཕྱིན་ཅི་ལོག་གི་མཐོང་བ་འཁྲུལ་བའི་སྣང་བར་རྟོགས་ཤིང་དེ་བཞིན་དུ་གནས་སྣང་མི་མཐུན་པར་སྣང་ཚུལ་མ་དག་པར་གང་མཐོང་བ་དེ་ཉིད་འཁྲུལ་བར་རྟོགས་ཤིང་གནས་ཚུལ་ཡེ་ནས་དག་པ་ཆེན་པོ་ལྷའི་དཀྱིལ་འཁོར་དུ་རྟོགས་ཤིང་དེ་ཉིད་ལ་ཚུལ་བཞིན་དུ་གོམས་པར་བྱས་པས་དེ་ལ་ཆུ་གཙང་མ་རུ་སྣང་བ་འདི་ཉིད་ཀྱང་ལས་སྒྲིབ་རབ་ཏུ་དག་པའི་རྒྱལ་སྲས་བྱང་ཆུབ་སེམས་དཔའ་ཆེན་པོ་ཡིས་ཆུ་དེ་ཡི་རྡུལ་ཕྲ་རབ་རེ་རེར་ཡང་གྲངས་མེད་པའི་སངས་རྒྱས་ཀྱི་དག་པའི་ཞིང་ཁམས་སུ་མཐོང་ཞིང་ཆུ་དེ་ཡུམ་ཆེན་མ་མ་ཀིར་མངོན་སུམ་དུ་མཐོང་ཞིང་སྣང་ནས་རོལ་པའི་བྱ་བ་བྱེད་ཅིང་བདེ་སྟོང་གི་ཡེ་ཤེས་ཆེན་པོའི་གྲོགས་ཉིད་དུ་འགྱུར་བ་ཡིན་ལ། ཤིན་ཏུ་རྣམ་པར་དག་པ་མཐར་ཐུག་པ་སྒྲིབ་གཉིས་བག་ཆགས་ཕྲ་བ་ཡང་ཤིན་ཏུ་དག་པའམ་སྤངས་པའི་སངས་རྒྱས་ཀྱི་སར་དག་མཉམ་ཟུང་འཇུག་རོ་མཉམ་ཆེན་པོར་གཟིགས་པ་གང་ཞིག་བྲི་གང་དང་བྲལ་བར་གནས་སྣང་རྣམ་པ་ཀུན་ཏུ་མཐུན་པས་དག་པ་ཆེན་པོར་རྟག་ཏུ་མཐོང་བར་འགྱུར་བའོ། །དེ་ཡི་ཕྱིར་ན་ཤིན་ཏུ་རྣམ་པར་དག་པའི་སངས་རྒྱས་ཀྱི་གཟིགས་པ་ནི་སྒྲིབ་གཉིས་བག་ཆགས་དང་བཅས་པ་མ་ལུས་པ་སྤངས་པའི་ཕྱིར་དངོས་པོའི་གནས་ཚུལ་ཡང་དག་པར་མཐར་ཐུག་ཇི་བཞིན་མ་ནོར་བ་ཉིད་ནི་སངས་རྒྱས་དེ་ཡིས་མཐོང་བ་དེ་ཁོ་ན་ལས་གཞན་དུ་ཅུང་ཟད་ཀྱང་ཡོད་པ་མ་ཡིན་པས་ན་དེ་ཉིད་ཁོ་ན་མཐར་ཐུག་གི་ཚད་མ་རུ་བཟུང་སྟེ་ཕྱི་ནང་གི་སྣང་གི་སྣང་བ་མ་དག་པ་འདི་ཐམས་ཅད་ཀུན་ཡེ་གདོད་མ་ནས་ཀྱང་ཤིན་ཏུ་དག་པའི་ཡེ་ཤེས་ཆོས་ཀྱི་སྐུར་གནས་སོ་ཞེས་དམ་བཅའ་བ་གང་ཞིག་གྲུབ་པའི་རྩེ་མོ་རུ་ཟབ་མོའི་ལུང་དང་རིག་པའི་བློ་གྲོས་ཀྱི་མིག་མཆོག་དང་ལྡན་པ་རྣམས་ལ་ཤིན་ཏུ་གྲུབ་ཅིང་གསལ་བ་ཡིན་གྱི་རྟོག་གེ་གཞན་གྱི་སྤྱོད་ཡུལ་ནི་མ་ཡིན་ནོ། །དེ་ལྟར་ན་ཡང་གཞན་དང་ཐུན་མོང་མ་ཡིན་པའི་ཟབ་མོའི་ཐེག་པ་མཆོག་དེ་ནི་ཐེག་པ་ཐམས་ཅད་ཀྱི་རྩེ་མོ་ངོ་མཚར་རྨད་དུ་བྱུང་བའི་འོད་ཟེར་གྱིས་འོད་ཟེར་འབུམ་ཕྲག་སྟོང་དུ་མངའ་བས་ཤིན་ཏུ་གསལ་བའི་འོད་ཟེར་འབུམ་དུ་བརྡལ་བའི་ཉི་མ་ལྟ་བུ་འདི་ལ་དམན་པའི་ཡིད་ཅན་ལུང་རིགས་ཟབ་མོའི་བློ་གྲོས་ཀྱི་མིག་དང་བྲལ་བའི་འབྱུང་པོའི་བྱ་ལྟ་བུ་ཕལ་ཆེར་ཟབ་མོའི་དོན་མཐོང་བ་ལ་ལོང་བ་ལྟ་བུར་འགྱུར་བས་ན་གོང་དུ་ཇི་སྐད་བསྟན་པ་དེ་ཉིད་རྟོགས་པར་མ་གྱུར་ཏོ། །གསུམ་པ། དེ་ལ་མཐར་ཐུག་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ལ་ཤིན་ཏུ་མཐར་ཐུག་པ་གཉིས་སུ་མེད་པའི་མཉམ་པ་ཉིད་ཀྱི་དབྱིངས་དེ་ཉིད་གཞན་གང་དུའང་མི་སྣང་བར་ལྷ་སྣང་ཁོ་ནར་སྣང་ངོ་ཞེས་ཕྱོགས་གཅིག་གམ་མཐའ་གཅིག་ཏུ་བསྒྲུབ་པར་མི་ནུས་ཀྱང་དོན་ལ་མ་དག་པའི་སྣང་བ་གང་ཇི་སྙེད་པ་ཐམས་ཅད་རང་གྲོལ་བའི་རང་བཞིན་ཡེ་གདོད་མ་ནས་ཤིན་ཏུ་རྣམ་པར་དག་པ་ཡི་དབྱིངས་ཀ་དག་ཆེན་པོ་དང་རང་བཞིན་འོད་གསལ་བའི་སྣང་ཆ་ཡེ་ཤེས་ཆོས་ཀྱི་སྐུ་གཉིས་ཡེ་ནས་ཟུང་འཇུག་འདུ་འབྲལ་མེད་པའི་ཕྱིར་སྣང་བའི་ཆ་གང་ཇི་སྙེད་པ་ཡེ་གདོད་མ་ནས་ཡེ་ཤེས་ཀྱི་ལྷ་རུ་དག་པ་ལ་གནས་ལུགས་དཔྱད་པའི་རིགས་པས་ཀྱང་མི་གནོད་དེ་གང་གི་ཕྱིར་ན་སྒྲིབ་གཉིས་བག་ཆགས་དང་བཅས་པ་མ་ལུས་པ་ཤིན་ཏུ་སྤངས་བའམ་ཤིན་ཏུ་དག་པ་ཡི་སྣང་སྟོང་ཟུང་དུ་འཇུག་པའི་དབྱིངས་དང་ཡེ་ཤེས་དབྱེར་མེད་པ་དེ་ནི་མཐར་ཐུག་གི་དེ་ཁོ་ན་ཉིད་ཡིན་པའི་ཕྱིར་རོ། །གཉིས་པ་ས་ལམ་སྣང་ཚུལ་དག་དང་མ་དག་པར་གནས་སྣང་མི་མཐུན་པར་སྣ་ཚོགས་སུ་སྣང་ཚུལ་ནི། དེ་ལས་གཞན་དུ་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། གཟིགས་པ་ཤིན་ཏུ་དག་པའི་སངས་རྒྱས་ཀྱིས་ཇི་ལྟར་གཟིགས་པ་དེ་ཁོ་ན་ལས་གཞན་དུ་སུས་གང་ལྟར་དུ་བརྟགས་ཀྱང་དེ་ནི་དབྱིངས་ཡེ་གཉིས་སུ་མེད་པའི་མཐར་ཐུག་གི་དོན་ཡང་དག་པ་ཉིད་མིན་ཏེ་སྒྲིབ་གཉིས་བག་ཆགས་དང་བཅས་པ་ཟད་པར་མ་སྤངས་པས་གནས་ཚུལ་དང་སྣང་ཚུལ་རྣམ་པ་ཀུན་ཏུ་མི་མཐུན་པ་ཡིན་པའི་ཕྱིར་རོ། །དེས་ན་གནས་སྐབས་སུ་རྣལ་འབྱོར་བའི་ལམ་གྱི་སྣང་བ་གང་ལ་དཔེར་ན་མིག་གི་སྐྱོན་ཅི་ཙམ་པ་དག་པའི་རིམ་པས་རབ་རིབ་ཀྱི་སྣང་བ་དེ་ཙམ་ཉིད་དུ་དག་པར་འགྱུར་བ་བཞིན་དུ་ཡུལ་ཅན་སྒྲིབ་པའི་དྲི་མས་ཅི་ཙམ་ཅི་ཙམ་དག་པ་ལས་དེ་ཙམ་དེ་ཙམ་ཉིད་དུ་ཡུལ་ཀྱང་དེ་བཞིན་དུ་དག་པ་ཉིད་དུ་མཐོང་བར་འགྱུར་བ་སྟེ་ཡུལ་ཅན་དྲི་མས་དག་ཀྱང་ད་དུང་དེ་ལས་ལོགས་ཤིག་ན་ཡུལ་དེ་མ་དག་པའམ་མ་དག་པའི་ཡུལ་ཞིག་མེད་པའི་ཕྱིར་དག་པ་ཁོ་ནའོ། །དེས་ན་ཡུལ་དང་ཡུལ་ཅན་གྱི་དག་པ་གཉིས་སུ་མེད་པར་རིགས་པ་བྱའོ། །དེ་ལྟ་ན་ཡང་གང་ཟག་གཅིག་གིས་མ་དག་འཁྲུལ་བའི་སྣང་བ་མ་ལུས་པ་དག་ནས་འཚང་རྒྱ་བའམ་སངས་རྒྱས་པར་གྱུར་བ་དེ་ཡི་ཚེ་ན་གཞན་སུ་ལ་ཡང་མ་དག་པའི་དངོས་པོ་གཅིག་ཀྱང་མི་སྣང་བར་འགྱུར་དགོས་སོ་ཞེ་ན། སངས་རྒྱས་པ་པོ་དེ་ལས་གཞན་པ་དག་ལ་མ་དག་པའི་དངོས་པོ་མི་སྣང་བར་མི་འགྱུར་ཏེ་རང་རང་གི་སྣང་བ་མ་དག་པའི་སྒྲིབ་པས་རང་རང་ལ་སྒྲིབས་པའི་ཕྱིར་ན་མ་དག་པར་སྣང་ཞིང་མཐོང་བར་འགྱུར་རོ། །དེས་ན་གནས་ཚུལ་ཡང་དག་པ་ལ་ཡུལ་དང་ཡུལ་ཅན་རྣམས་ཀྱི་རང་བཞིན་ཡེ་གདོད་མ་ནས་སྒྲིབ་པས་གོས་མ་མྱོང་བས་ཤིན་ཏུ་རྣམ་པར་དག་ན་ཡང་རང་སྣང་འཁྲུལ་བའི་གློ་བུར་གྱི་དྲི་མས་རང་རང་ལ་སྒྲིབ་པའི་ཕྱིར་ན་མཁྲིས་ནད་ཅན་གྱིས་དུང་བཞིན་དུ་དག་པར་མི་མཐོང་བས་དྲི་མ་དེ་སྦྱང་བའི་ཐབས་ལ་འབད་པར་བྱ་དགོས་ལ། སྤྱང་བྱའི་དྲི་མ་གློ་བུར་བ་དེ་རྣམས་ཀྱང་ནི་ཡེ་ནས་རང་རང་གི་ངོ་བོས་རྣམ་པར་དག་པ་ལས་ལོགས་ཤིག་ན་སྦྱང་བྱའི་དྲི་མ་མ་དག་པ་ཉིད་གྲུབ་པ་མིན་པས་གདོད་ནས་རང་བཞིན་གྱིས་རྣམ་པར་དག་པའི་འོད་གསལ་མཉམ་པ་ཉིད་དུ་གནས་པ་ཉིད་ཤེས་པར་བྱའོ། །གསུམ་པ་དེ་ལྟར་མ་རྟོགས་པ་དང་རྟོགས་པའི་སྐྱོན་ཡོན་འབྲས་བུ་བསྟན་པ་ནི། དེ་ལྟར་སྣང་ཚུལ་སོགས་ཚིགས་བཅད་གཉིས་དང་རྐང་པ་གཅིག་གིས་བསྟན་ཏེ། དེ་ལྟར་སྣང་ཚུལ་གནས་དོན་ལུས་ལ་སོགས་པ་ཡུལ་དང་ཡུལ་ཅན་མི་འདྲ་བ་སྣ་ཚོགས་པ་ཉིད་རང་བཞིན་མཉམ་པ་ཆེན་པོར་མ་རྟོགས་པའི་དུས་ན་གནས་དོན་ལུས་སོགས་སྣ་ཚོགས་པ་སོ་སོར་འཛིན་པས་བྱིས་པ་སོ་སོའི་སྐྱེ་བོ་རྣམས་གང་ལ་སེམས་ཆགས་ཤིང་ཞེན་པ་དེ་ནི་བྱིས་པ་རྣམས་རང་སྣང་ལ་གཞན་དུ་འཁྲུལ་བས་རྨོངས་པ་སྟེ་རྨོངས་པ་དེ་ཡིས་དར་གྱི་སྲིན་བུ་ལྟར་རང་གིས་རང་ཉིད་འཆིང་བར་བྱེད་དོ། །གལ་ཏེ་སྣང་ཚུལ་སྣ་ཚོགས་པ་རང་སྣང་གི་རང་བཞིན་མཉམ་པ་ཆེན་པོར་རྟོགས་ཤིང་གོམས་པར་གྱུར་ན་འཁོར་འདས་ཀྱི་ཆོས་ཀུན་ཀྱང་ཟུང་འཇུག་རོ་མཉམ་གྱི་ངང་དུ་མཐར་ཐུག་གི་འབྲས་བུའི་བཙན་ས་ཟིན་ཏེ་དུས་གསུམ་གྱི་འཛིན་པ་བྲལ་བས་དུས་བཞི་མཉམ་པ་ཉིད་དུས་གསུམ་དུས་མེད་འོད་གསལ་གཉུག་མའི་ཀློང་ཆེན་པོར་རྒྱུ་ལས་མ་བསྐྱེད་རྐྱེན་ལ་མ་བྱུང་བས་རང་བྱུང་གི་ཡེ་ཤེས་ཐམས་ཅད་མཁྱེན་པའི་རྒྱལ་བར་ཏེ་ཡེ་ཤེས་ཆོས་ཀྱི་སྐུ་ཉིད་བརྙེས་པར་འགྱུར་རོ། །གསུམ་པ་དག་མཉམ་ཆེན་པོར་གྲུབ་པའི་ཚུལ་དང་ངེས་པའི་ཡོན་ཏན་ནི། དག་མཉམ་ཆེན་པོར་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། དེ་ལྟར་ཆོས་ཀུན་དག་མཉམ་ཆེན་པོར་ཡེ་ནས་གནས་པར་ཁས་ལེན་པའི་ཟབ་མོའི་ཚུལ་འདི་ཉིད་ལེགས་པར་རྟོགས་ཤིང་གྲུབ་པ་སྟེ་གྲུབ་པར་གྱུར་པ་ན་དེ་ལ་སྣང་བ་དང་སྟོང་པ་ཉིད་ཅེས་ཅིར་ཡང་མ་གྲུབ་པས་རང་རང་གི་ངོ་བོས་སྟོང་པ་ཡིན་པའི་གནད་ཀྱིས་སྟོང་དང་མི་སྟོང་འཁོར་བ་དང་འདས་པ་སོགས་ཅིར་ཡང་རུང་ཞིང་འཐད་པར་འགྱུར་ལ། དེ་ལྟར་ན་དག་པ་དང་མ་དག་པ་སོགས་འཁོར་འདས་ཀྱི་སྣང་བ་རྟེན་འབྱུང་འགགས་མེད་པས་ཅིར་ཡང་སྣང་དུ་རུང་ཞིང་ཆེས་འཐད་པ་ཡིན་ལ། དེ་ལས་གཞན་དུ་རང་གི་ངོ་བོས་མི་སྟོང་པའི་རྟག་པ་དང་སྣང་བ་མེད་པའི་སྟོང་པ་ཕྱང་ཆད་ཀྱི་མཐའ་བྲལ་སོགས་གང་བརྟགས་པ་དེ་ལ་སྟོང་དང་མི་སྟོང་སོགས་ཅིར་ཡང་མི་རུང་བར་འགྱུར་ཞིང་འཁོར་འདས་ཀྱི་སྣང་བ་རབ་འབྱམས་འགགས་པ་མེད་པས་རྟེན་འབྱུང་འདི་དག་ཅིར་ཡང་མི་སྣང་བས་གཏན་མེད་དུ་འགྱུར་ལ། དེ་ལྟར་ན་སྟོང་དང་རྟེན་འབྱུང་གཉིས་སུ་མེད་པའི་རྟེན་ཅིང་འབྲེལ་བར་འབྱུང་བ་གང་ལེགས་པར་གསུང་པ་ཉིད་དང་ཤིན་ཏུ་འགལ་བར་འགྱུར་བའོ། །དེ་ཡི་ཕྱིར་ན་བདེན་པ་དབྱེར་མེད་དག་མཉམ་ཆེན་པོར་བསྒྲུབ་པའི་ཚུལ་ཟབ་མོ་འདིའི་ཡིད་ཆེས་ཕྱིར་མི་ལྡོག་པ་སྙིང་ལ་རྙེད་པའི་སྒོ་གཅིག་པུ་པར་གྱུར་པ་ནི་སྟོང་དང་རྟེན་འབྱུང་འགལ་བ་མེད་པའི་ཟུང་འཇུག་གི་ལམ་མཆོག་འདི་ཁོ་ན་ཡིན་ཏེ། དེས་ན་སྣང་སྟོང་དབྱེར་མེད་དམ་ཟུང་འཇུག་འདི་ལ་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་སྐྱེས་ཤིང་གོམས་པར་གྱུར་ན། ཆོས་ཀུན་གདོད་ནས་དག་མཉམ་ཆེན་པོར་བྲི་གང་དང་བྲལ་བའི་རྒྱལ་བའི་དཀྱིལ་འཁོར་ཉིད་དུ་རང་གྲོལ་བ་ལ་སྲིད་པ་འཁོར་བ་སྟོང་དང་མི་སྟོང་དག་དང་མ་དག་པ་སོགས་ཆོས་ཉིད་དག་མཉམ་ཟུང་འཇུག་ཆེན་པོ་ཕལ་པའི་བློས་བསམ་གྱི་མི་ཁྱབ་པའི་དོན་ཉིད་ལ་ཟབ་མོའི་བཟོད་པ་མཆོག་ཏུ་གྱུར་པ་ཁོང་ནས་སྐྱེ་བར་འགྱུར་རོ། །དེའི་ཚེ་རྡུལ་ཕྲ་རབ་གཅིག་གི་ཁྱོན་ལ་རྡུལ་སྙེད་ཀྱི་སངས་རྒྱས་ཀྱི་ཞིང་ཁམས་རྟེན་བརྟེན་པ་དང་བཅས་པ་མཐོང་ཞིང་དུས་མཐའི་སྐད་ཅིག་གཅིག་གི་ཡུན་ལ་ཡང་གྲངས་མེད་ཀྱི་བསྐལ་བར་སྣང་ཞིང་མཐོང་བ་ལ་སོགས་པ་སྟེ་སྣང་བའི་དངོས་པོ་རྣམས་གདོད་ནས་བདེན་སྟོང་སྣང་ལ་རང་བཞིན་མེད་པའི་སྒྱུ་མའི་ངེས་ཤེས་ཀྱི་སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པའི་ཟབ་མོ་ཉིད་ལ་ལེགས་པར་འཇུག་པར་འགྱུར་རོ། །གསུམ་པ་བསམ་གྱིས་མི་ཁྱབ་པར་བསྟན་ཅིང་དོན་བསྡུ་བ་ནི། དེ་ཕྱིར་རང་སྣང་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། དེ་ཕྱིར་ཆོས་ཀུན་ཡེ་ནས་སྣང་སྟོང་དག་མཉམ་པ་བདེན་པ་དབྱེར་མེད་དམ་ཟུང་འཇུག་ཏུ་གནས་པའི་དོན་དེ་མཚོན་པའི་བརྡར་རང་སྣང་རིས་སུ་མ་ཆད་པས་རིས་མེད་ཅེས་པ་དང་། རྒྱ་ཆད་ཕྱོགས་ལྷུང་ཀུན་དང་བྲལ་བ་ཞེས་དང་། གཞི་དབྱིངས་བསམ་གྱིས་མི་ཁྱབ་དང་། ཆོས་ཉིད་སྟོང་མི་སྟོང་སོགས་ཀྱི་སྤྲོས་པ་ཅིར་ཡང་གྲུབ་པ་ཞེས་དང་། མེ་དང་ཚ་བ་བཞིན་དུ་སྣང་སྟོང་དབྱེར་མེད་དམ་ཟུང་དུ་འཇུག་པ་ཞེས་པ་ལ་སོགས་པ་གྲུབ་མཐའི་ཆོས་སྐད་ཟབ་མོ་དེ་ཙམ་པ་འདིའི་དོན་ཡང་ལོ་བརྒྱར་བསྒྲིམས་ཏེ་ཡང་ཡང་བསམ་པར་བྱས་ཀྱང་རང་རྒྱུད་ལ་ཟབ་མོའི་དོན་ལ་སྔོན་གོམས་ཆེར་ཡོད་པ་མིན་པས་སམ་སྔོན་གོམས་ཀྱི་རྒྱུ་མེད་ན་ད་ལྟ་བློ་ཤེས་རབ་ཆེན་པོ་བརྩོན་པས་སྦྱངས་པ་ཡང་མི་དམན་པ་རབ་ཏུ་བཟང་པོ་ཡོད་མོད་ཀྱང་ཇི་བཞིན་ཐུགས་སུ་ཆུད་པ་ནི་མ་ཡིན་པས་ཡང་དག་པར་དགོངས་པར་མི་འགྱུར་ཏེ། འདི་ནི་གསན་རྒྱ་ཆེ་ཡང་གཞན་གྱི་ཐུགས་སུ་ཆུད་མི་འགྱུར་ཞེས་གསུངས་པ་བཞིན་ནོ། །དེ་ཕྱི་མདོ་རྒྱུད་ཀྱི་གྲུབ་མཐའ་ཟབ་མོ་གང་ཇི་སྙེད་པ་མཐའ་དག་གི་དགོངས་པའི་གཏིང་ཕུག་གང་དུ་དབབ་ཅིང་གཞོལ་བ་ཡི་བརྒྱ་ཕྲག་དམ་པའི་ཆོས་ཀྱི་ལེགས་བཤད་ཟབ་མོའི་ཆུ་ཀླུང་གི་བཅུད་ཐམས་ཅད་འབབ་པའི་མཚོ་ཆེན་པོ་སྣང་སྟོང་ཟུང་འཇུག་མཐར་ཐུག་དག་མཉམ་བདེན་པ་དབྱེར་མེད་དུ་གནས་པ་འདི་ནི་ངོ་མཚར་བས་ཀྱང་ཆེས་ངོ་མཚར་རྨད་དུ་བྱུང་བ་ཁོ་ནའོ། །དེ་ལྟར་གནས་ལུགས་མཐར་ཐུག་གནས་སྣང་རྣམ་ཀུན་མཐུན་པ་དེ་ལས་སྣང་ཚུལ་གཞན་དག་པ་དང་མ་དག་པར་གང་སྣང་བ་རྣམས་ནི་རེ་འགའ་བས་གཅིག་ཏུ་མ་ངེས་ཤིང་མི་རྟག་པ་འབྱུང་ཞིང་བསླུ་བ་དག་དང་བཅས་ཏེ་སྣང་ལ། སྒྲིབ་པ་མཐའ་དག་སྤང་བའི་གནས་ལུགས་ཇི་ལྟ་བ་བཞིན་དུ་མཐར་ཕྱིན་པ་མངོན་དུ་གྱུར་པའི་དག་མཉམ་བདེན་པ་དབྱེར་མེད་ཟུང་འཇུག་གི་ཡེ་ཤེས་ནི་འགྱུར་བ་མེད་པས་འདུས་མ་བྱས་བསླུ་བ་མེད་པའི་དོན་གཉིས་སུ་མེད་པར་གཟིགས་པའི་རང་བྱུང་གི་ཡེ་ཤེས་གནས་སྣང་རྣམ་ཀུན་ཤིན་ཏུ་མཐུན་པས་འགྱུར་ན་མེད་པ་ཉིད་ཡིན་ནོ། །ཨེ་མ་འདི་ལས་གཞན་དུ་གང་བརྟགས་པའི། །དམ་བཅའི་འབྲས་བུ་མངོན་དུ་འབྱིན་མིན་ལ། །རྒྱ་ཆད་ཕྱོགས་བྲལ་ཟུང་འཇུག་གང་རུང་བར། །ཐམས་ཅད་རུང་བར་གཅིག་ཤེས་ཀུན་གྲོལ་ལགས། །ཞེས་ཀྱང་སྨྲས་སོ། །དྲི་ལན་བདུན་པ་སྤྲོས་བྲལ་དབུ་མ་ཆེན་པོ་ལ་ཁས་ལེན་ཡོད་མེད་གང་འཐད་ལ་བཞི། ཁས་ལེན་མེད་པའི་ལུགས་དགག་པ། ཁས་ལེན་ཡོད་མེད་སོ་སོར་ཕྱེ་བའི་ཀློང་ཆེན་ཞབས་ཀྱི་ཀྱིས་བཞེད་པ་འགོད་པ་དེར་བརྟེན་ཁས་ལེན་ཡོད་པའི་ཕྱོགས་ཆེས་ཆེར་བསྒྲུབ་པའི་གཞན་ལུགས་དགག་པ། ཀློང་ཆེན་ཞབས་ཀྱི་རྗེས་སུ་འབྲང་སྟེ་རང་ལུགས་རྒྱས་པར་བསྟན་པའོ། །དང་པོ། སྤྲོས་བྲལ་དབུ་མ་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། ཟུང་འཇུག་རབ་ཏུ་མི་གནས་པའི་སྤྲོས་བྲལ་དབུ་མ་ཆེན་པོ་ཐལ་འགྱུར་བ་ལ་རང་ལུགས་ལ་ཁས་ལེན་ཡོད་དམ། མེད་ཅེས་དཔྱད་པའི་ཚེ་བོད་སྔ་རབས་པའི་མཁས་པ་ཕལ་ཆེ་བ་རྣམས་མགྲིན་གཅིག་ཏུ་ཟུང་འཇུག་རབ་ཏུ་མི་གནས་པའི་དབུ་མའི་རང་ལུགས་ལ་འདི་ཡིན་འདི་མིན་དང་ཡོད་མེད་ལ་སོགས་པའི་སྤྲོས་པ་གང་ཅིར་ཡང་ནི་མེད་པའི་ཕྱིར་རྣམ་པ་ཀུན་ཏུ་ཅིར་ཡང་ཁས་ལེན་མེད་པར་འདོད་པ་ཡང་མི་འཐད་དེ། འདི་ལྟར་དཔལ་ལྡན་ཟླ་བའི་རང་གཞུང་དབུ་མ་འཇུག་པ་རྩ་འགྲེལ་རྣམས་ལས་གཞི་ཕུང་ཁམས་སྐྱེ་མཆེད་ཀྱི་རྟེན་འབྲེལ་དང་ལམ་ས་བཅུ་དང་འབྲས་བུ་སྟོབས་བཅུ་ལ་སོགས་པ་རྣམ་པ་ཐམས་ཅད་མཁྱེན་ཉིད་དང་བཅས་པ་སྣང་ཙམ་བསླུ་མེད་ཀྱི་རྟེན་ཅིང་འབྲེལ་བར་འབྱུང་བའི་གྲུབ་མཐའི་རྣམ་པར་བཞག་པ་ཀུན་ཁས་བླང་བའི་རང་ལུགས་གསལ་བོར་ཡོད་བཞིན་དུ་ཁས་ལེན་རྣམ་ཀུན་མེད་ཅེས་མངོན་སུམ་དུ་བསྙོན་ནས་གཞི་དང་ལམ་དང་འབྲས་བུ་ལ་སོགས་པའི་ཐ་སྙད་ཀྱི་རྣམ་བཞག་ཐམས་ཅད་གཞན་ངོ་ཁོ་ན་ལ་འཇོག་ཅིང་སྐྱེལ་བ་དེ་ནི་དཔལ་ལྡན་ཟླ་བའི་རང་གཞུང་གི་རྗོད་བྱེད་ཀྱི་ཚིག་དང་། བརྗོད་བྱའི་དོན་གཉིས་གར་འགལ་བ་འདུ་བའི་ཕྱིར་དེ་ལྟར་མ་ཡིན་ནོ། །གཉིས་པ། ཀློང་ཆེན་རབ་འབྱམས་སོགས་ཚིགས་བཅད་བཞིས་བསྟན་ཏེ། རྒྱལ་བ་གཉིས་པ་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་བཟང་པོའི་ཞལ་ནས་འདི་སྐད་དུ་དཔལ་ལྡན་ཟླ་བའི་རང་ལུགས་ཀྱི་དབུ་མར་ཏེ་དབུ་མ་ཐལ་འགྱུར་བ་ལ་ཐ་སྙད་ཀྱི་རྣམ་བཞག་ཁས་ལེན་ཡོད་དམ་མེད་གང་ཡིན་དཔྱད་པ་ལ། གངས་ཅན་པའི་སྔ་རབས་ཀྱི་མཁས་པ་ཕལ་ཆེར་རྣམས་ཡོད་མེད་ཕྱོགས་རེར་འཛིན་ཏེ་འདི་ལྟར་བ་ཚབ་བུ་བཞིའི་ཡ་གྱལ་ཚིགས་དོན་གཉིས་ཀར་མཁས་པ་རྨ་བྱ་བྱང་བརྩོན་གྱིས་ཁས་ལེན་ཡོད་པར་འདོད་པ་དང་། མཁས་མཆོག་གཙང་བ་ནི་ཁས་ལེན་མེད་པར་འདོད་པ་ལ་ཡང་དཔྱད་ན་ལུགས་གཉིས་པོ་དེ་རེ་རེར་ཡང་སྐྱོན་ཡོན་གྱི་ཆ་གཉིས་རེ་གནས་ཤིང་ཡོད་པས་ལེགས་པར་མ་ཕྱེད་པའོ། །དེས་ན་སྐྱོན་ཐམས་ཅད་དང་བྲལ་བའི་རང་གི་བཞེད་པ་ལ་ནི་འཕགས་པའི་མཉམ་བཞག་ཡེ་ཤེས་དང་རྗེས་སུ་མཐུན་པར་དོན་དམ་པའི་གནས་ལུགས་ཇི་བཞིན་གཞལ་བ་མཉམ་བཞག་ལ་ཟློ་བའི་ཚེ་གཤིས་ལུགས་ཆོས་ཀྱི་དབྱིངས་ལ་ཡིན་མིན་ཡོད་མེད་ལ་སོགས་པའི་སྤྲོས་པ་ཅིར་ཡང་མ་གྲུབ་པ། དེ་ལྟར་ཁས་ཀྱང་ཡོད་མེད་ལ་སོགས་པ་ཅི་ཞིག་ལེན་པར་བྱེད་དེ་ཁས་ལེན་ཅི་ཡང་མེད་པ་ཉིད་ཡོན་ནོ། །དེ་ཕྱིར་རང་གི་གྲུབ་མཐའ་ཞེས་པ་གནས་ལུགས་མཐར་ཐུག་གི་དོན་རང་རང་གིས་མི་ལྟ་གཞལ་བ་དེ་ཉིད་ཡིན་པས་ཡོད་མེད་སོགས་གང་དུ་ཁས་བླངས་ཀྱང་གནས་ལུགས་ཀྱི་ཁས་ལེན་ཡིན་པའི་ཕྱིར་མཉམ་བཞག་ཡེ་ཤེས་ཡུལ་དུ་བྱེད་པ་དང་གཞན་ལ་བརྩོད་པ་ལ་སོགས་པའི་ཚེ་གཤིས་སམ་གནས་ལུགས་ཡོད་མེད་ལ་སོགས་པའི་སྤྲོས་མཚན་ཤིན་ཏུ་ཕྲ་བ་ཡང་མེད་པའི་ཆོས་ཀྱི་དབྱིངས་ཇི་ལྟ་བ་བཞིན་ཡོད་དང་མེད་སྟོང་དང་མི་སྟོང་སོགས་ཀྱི་ཁས་ལེན་ཅི་ཡང་མེད་པ་ཉིད་དོ། །ལམ་རྗེས་ཐོབ་པ་ཐ་སྙད་ཡུལ་དུ་བྱེད་པའི་ཚེ་གཞི་ལམ་འབྲས་བུར་བཅས་པའི་གྲུབ་པའི་མཐའ་ཇི་ལྟ་ཇི་སྙེད་ཀྱི་རྣམ་པར་བཞག་པ་ཡང་དག་པའི་ལུང་ལས་ཇི་ལྟར་བསྟན་པ་རྣམས་མ་འཁྲུགས་ཤིང་མ་འདྲེས་པར་སོ་སོར་ཁས་ལེན་དགོས་པར་ཁོ་བོས་འདོད་ལ། ཕྱིན་ཆད་ཁས་ལེན་མི་ལེན་གྱི་ཚུལ་འདི་ལྟར་དམ་བཅའ་ཞིང་སྨྲ་ཤེས་ན་ཁོ་བོས་ལེགས་པར་བཤད་པ་ཡིད་བཞིན་མཛོད་ཀྱི་འགྲེལ་ཆེན་པདྨ་དཀར་པོའི་མཐུ་ཡིན་པར་བལྟའོ་ཞེས་གསུངས་སོ། །གསུམ་པ། དེར་བསྟེན་གངས་ཅན་སོགས་ཚིགས་བཅད་བཅུ་གཉིས་ཀྱིས་བསྟན་ཏེ། དེ་ལྟར་ཁས་ལེན་ཡོད་པའི་ཕྱོགས་དེར་བརྟེན་པའི་གངས་ཅན་གྱི་མཁས་པ་འགའ་དང་འགས་དབུ་མ་ཐལ་འགྱུར་བའི་རང་ལུགས་ལ་དཔྱད་ན་བདེན་གྲུབ་ཀྱི་ཁས་ལེན་མེད་ཀྱང་མ་དཔྱད་མ་བརྟགས་འཇིག་རྟེན་གྲགས་པའི་ཐ་སྙད་ཁས་ལེན་ཡོད་པའི་ཕྱོགས་ཁོ་ན་ལུང་དང་རིགས་པ་ཡང་དང་ཡང་དུ་རྩལ་དུ་བཏོན་ནས་ཆེར་ཆེར་བསྒྲུབས་པར་མཛད་པ་ཡང་ལེགས་པར་མ་ཕྱེད་དེ། ཇི་ལྟར་ན་དེ་ཡང་མཉམ་རྗེས་ཀྱི་དབུ་མ་ཕྲ་བ་དང་རགས་པ་ལ་སོགས་པའི་སྐབས་ཤན་སོ་སོར་ལེགས་པར་མ་ཕྱེས་པར་རྣམ་ཀུན་ཁས་ལེན་ཡོད་པར་བསྒྲུབ་ན་གཤིས་དོན་གནས་ལུགས་ཆོས་ཀྱི་དབྱིངས་ལ་ཡོད་མེད་ལ་སོགས་པའི་སྤྲོས་པ་ཅིར་ཡང་མ་གྲུབ་པའི་ཕྱིར་ན་དབུ་མ་ཐལ་འགྱུར་བའི་རང་ལུགས་ལ་མ་བརྟགས་འཇིག་རྟེན་གྲགས་པའི་ཐ་སྙད་ཐམས་ཅད་མཐའ་གཅིག་ཏུ་ཁས་ལེན་ཡོད་པའང་འགྲུབ་པར་ཤིན་ཏུ་དཀའ་སྟེ། འདི་ལྟར་དབུ་མ་ཐལ་འགྱུར་བ་རང་གི་ལུགས་ཞེས་པ་དབུ་མའི་གྲུབ་པའི་མཐས་གནས་ལུགས་མཐར་ཐུག་པའི་དོན་རིགས་པས་ཇི་ལྟར་གཞལ་བ་གནོད་པ་མེད་པ་ཉིད་ཡིན་དགོས་ཏེ། དེ་ལས་གཞན་པ་དག་གིས་ཐ་སྙད་ཀྱི་ཁས་ལེན་རྣམས་ནི་རིགས་པས་གནོད་པ་ཡོད་པས་རང་ལུགས་མིན་ཏེ་དེ་ཅི་ཡི་སླད་དུ་ཞེ་ན། དབུ་མ་ཐལ་འགྱུར་བ་རང་གིས་ནི་དོན་དམ་དཔྱོད་བྱེད་ཀྱི་རིགས་པས་གཞལ་ན་གཞན་ལུགས་ཀྱི་ཐ་སྙད་གང་ཁས་བླངས་བ་དེ་དག་དེ་ལྟར་མ་གྲུབ་པའི་ཕྱིར་རོ། །དེས་ན་ཐལ་འགྱུར་བ་དེས་རང་ལུགས་ཀྱི་ཐ་སྙད་ཁས་བླངས་བ་ཡིན་ན་དེ་ཉིད་དོན་དམ་དཔྱོད་པའི་རིགས་པས་ཀྱང་གཞལ་ན་གྲུབ་པར་རང་དབང་ཅན་དོན་དམ་དཔྱོད་བྱེད་ཀྱི་རིགས་པས་དཔྱད་ནས་ཁས་བླངས་བར་རིགས་པ་ཡང་དག་པས་འཕུལ་ནུས་པ་དེ་ཉིད་ཀྱི་ཕྱིར་དེས་གང་ཁས་བླངས་པ་ཡི་མ་བརྟགས་གྲགས་པའི་ཐ་སྙད་དེ་ཡང་དོན་དམ་པར་བདེན་པར་གྲུབ་ཅིང་དོན་དམ་དཔྱོད་པའི་རིགས་པས་དཔྱད་བཟོད་ཉིད་དུ་འགྱུར་ཏེ། འདི་ལྟར་ཐལ་འགྱུར་བ་རང་གིས་དབུ་མ་རང་རྒྱུད་པ་ལ་བརྗོད་པ་ཐ་སྙད་བདེན་པ་རིགས་པས་དཔྱོད་བཟོད་དུ་ཐལ་བ་དང་དོན་དམ་པའི་སྐྱེ་བ་མི་ཁེགས་པ་དང་། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བའི་སྐྱོན་གསུམ་རང་ལ་ཡང་མཚུངས་པར་འབབ་པས་སོ། །གལ་ཏེ་མ་བརྟགས་གྲགས་པའི་ཁས་ལེན་དེ་ཐལ་འགྱུར་བ་རང་ལུགས་ཀྱི་ཁས་ལེན་མ་ཡིན་ནོ་ཞེ་ན། རང་ལུགས་ལ་འཇིག་རྟེན་རྒན་པོའི་ཇི་ལྟར་ཁས་བླང་བ་ལྟར་ཁས་ལེན་ཡོད་པ་ཡིན་ཞེས་པའི་རང་ཚིག་དང་འགལ་བ་མ་ཡིན་ནམ། གཞན་ཡང་རང་ལ་དོན་དམ་དཔྱོད་པའི་རིགས་པས་དཔྱད་ན་བདེན་གྲུབ་མེད་ཅེས་པ་དང་མ་དཔྱད་འཇིག་རྟེན་རྒན་པོར་གྲགས་པའི་ཐ་སྙད་ཐམས་ཅད་གནོད་མེད་དུ་ཡོད་ཅེས་པའི་ཁས་ལེན་གཉིས་ནི་ཡོད་པར་གྱུར་ཅིང་དེ་གཉིས་ཀ་ངེས་པར་བདེན་པའམ་ཡང་དག་པར་གྱུར་ན་དབུ་མའི་རང་ལུགས་ཞེས་པ་དེ་གཉིས་པོ་ལས་རེ་རེ་ཡིན་ནམ་འོན་ཏེ་གཉིས་ཀ་ཡིན། དེ་ལྟར་གང་རུང་རེ་རེ་ནས་རང་ལུགས་ཡིན་ནོ་ཞེ་ན་གཅིག་ཤོས་རང་ལུགས་སུ་འཐད་པ་མ་ཡིན་ཏེ་དངོས་འགལ་ཡིན་པའི་ཕྱིར་རོ། །གལ་ཏེ་ཡོད་ཅེས་པ་རང་ལུགས་ཀྱི་ཁས་བླངས་བ་མ་ཡིན་ལ་མེད་པར་ཁས་ནི་བླངས་བར་གྱུར་པ་ནི་རང་ལུགས་ཡིན་ནོ་ཞེ་ན། དེ་ལྟ་ན་ཡོད་ཅེས་བྱ་བའི་ཁས་ལེན་ནི་རང་ལུགས་ལ་མ་བརྟགས་འཇིག་རྟེན་གྲགས་པའི་ཀུན་རྫོབ་ཙམ་དུ་ཡང་མི་རུང་སྟེ་མེད་པ་ཁོ་ན་རུང་ལུགས་ཁས་བླང་ཡིན་པའི་ཕྱིར་ནའོ། །གཉིས་པ་ལྟར་ཡོད་མེད་གཉིས་ཀ་རང་གི་ལུགས་ཡིན་པས་ཁས་བླངས་བ་ཡིན་ནོ་ཞེ་ན། ཆོས་གང་ཡང་རིགས་པས་དཔྱད་མི་བཟོད་པ་དེ་ཁས་མི་ལེན་པའམ་བསལ་ནས་སུ་རིགས་པས་གནོད་པ་མེད་པས་དཔྱད་བཟོད་པའམ་སྐྱོན་མེད་པ་དེ་ཁས་ལེན་པ་ཡིན་པའི་ཕྱིར་ཡོད་མེད་གཉིས་ཀ་རིགས་པས་དཔྱད་བཟོད་དུ་འགྱུར་རོ། །དེ་ལྟ་ན་ཡང་རིགས་པས་དཔྱད་པས་སྟོང་པའམ་མེད་པ་དང་མ་དཔྱད་པའི་སྣང་བའམ་ཡོད་པ་སྟེ། དེ་གཉིས་པོ་ལྷན་ཅིག་ཏུ་དངོས་པོ་གཅིག་ལ་འདུ་ཞིང་ཚོགས་པ་འཇིག་རྟེན་ན་སྲིད་པ་མ་ཡིན་ཏེ། གལ་ཏེ་ཚོགས་ན་དོན་དམ་དཔྱོད་བྱེད་ཀྱིས་དཔྱད་པས་མེད་པའམ་སྟོང་བར་རྟོགས་པའི་ཚེ་ན་ཡང་མ་དཔྱད་འཇིག་རྟེན་རྒན་པོའི་དུས་བཞིན་དུ་དངོས་པོ་དེ་ཉིད་ཡོད་ཅིང་དེར་འཛིན་གྱི་ཡོད་རྟོག་དེ་ཉིད་ཡོད་དགོས་པའི་ཕྱིར་ན་དོན་དམ་དཔྱོད་པས་ཡོད་རྟོག་ལྡོག་མི་ཐུབ་པས་དོན་དམ་དཔྱོད་བྱེད་ཀྱི་རིགས་པའི་དཔྱད་པས་ཅི་ཞིག་ཕན་ཏེ་དཔྱད་པ་དོན་མེད་དུ་འགྱུར་ཞིང་དེར་མ་ཟད་ཀུན་རྫོབ་མ་བརྟགས་འཇིག་རྟེན་གྲགས་པའི་ཡོད་པ་དེ་ཡང་དོན་དམ་དཔྱད་པའི་རིགས་པས་དཔྱད་བཟོད་དུ་ཡང་གྲུབ་པར་འགྱུར་ན་དེ་རིགས་ཤིང་འཐད་པ་མ་ཡིན་ཏེ་ཤེས་བྱའི་ཁོང་ན་དོན་དམ་དཔྱོད་པའི་རིགས་པས་དཔྱད་བཟོད་པའི་ཆོས་གང་ཡང་མི་སྲིད་པའི་ཕྱིར་ནའོ། །གཞན་ཡང་དོན་དམ་དཔྱོད་བྱེད་ཀྱི་རིགས་པས་རྙེད་དོན་དགག་བྱ་བདེན་གྲུབ་བཅད་པའི་མེད་དགག་སྟོང་རྐྱང་དེ་ལས་ལྷག་པའི་གནས་ལུགས་ཀྱི་ལྟ་བ་མཐར་ཐུག་པ་ཞིག་མེད་པར་གྱུར་ན་དེ་ཉིད་མངོན་དུ་གྱུར་པའི་ཚེ་ན་མེད་དགག་སྟོང་རྐྱང་དེ་ཁོ་ན་འཛིན་པའི་འཛིན་སྟངས་དེ་ལ་གང་སྣང་བའི་ཆ་ཅུང་ཟད་ཀྱང་འཛིན་པའི་སྐབས་རྣམ་པ་ཀུན་ཏུ་མི་ཐོབ་པའི་ཕྱིར་གང་སྣང་བའི་ཆ་ཐམས་ཅད་སྟོང་རྐྱང་མེད་པ་ཁོ་ནའི་དབྱིངས་སུ་རྒྱས་གདབ་པས་ན་མཐའ་གཅིག་ཏུ་ལྟ་བ་དང་སྒོམ་པ་དང་སྤྱོད་པའི་གནས་སྐབས་ཐམས་ཅད་ཀུན་ཀྱང་མེད་པར་ཏེ། མེད་པ་ཁོ་ནར་ལྟ་བའི་ཡིད་ཅན་དུ་རྩི་ཡི་ཕྱིར་མི་འགྱུར་ཏེ། འདི་ལྟར་གནས་ལུགས་གཏན་ལ་ཕབ་པའི་ལྟ་བ་དང་རྗེས་སུ་མཐུན་པ་ཉིད་ནམ་དུ་ཡང་གོམས་པའང་བསྒོམ་དགོས་པའི་ཕྱིར་རང་སྤྱོད་པ་ཡང་ལྟ་སྒོམ་གྱི་རྗེས་སུ་འབྲངས་དགོས་པས་སོ། །བཞི་པ་ལ་གསུམ། རང་ལུགས་ལ་སོ་སོར་ཕྱེ་སྟེ་བཞག་པ། དེ་ལ་རྩོད་པ་སྤོང་བ། ཚུལ་དེས་མདོ་སྔགས་ཀྱི་ལམ་གནད་བསྟན་པའོ། །དང་པོ་ལ་གསུམ། མཉམ་རྗེས་སམ་རྒྱུ་འབྲས་ཀྱི་དབུ་མ་གཉིས་སུ་བསྟན་པ། དེས་ན་གནས་ལུགས་དབུ་མ་ཆེན་པོའི་ངོར་ཁས་ལེན་མེད་པར་བསྟན་པ། སྣང་ཚུལ་ལ་ཐ་སྙད་བདེན་གཉིས་སོ་སོར་ཁས་ལེན་ཡོད་པར་བསྟན་པའོ། །དང་པོ། དེས་ན་ཀུན་མཁྱེན་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེས་ན་ཀུན་མཁྱེན་རྒྱལ་བ་གཉིས་པ་ཀློང་ཆེན་པས་ཇི་ལྟར་བཞེད་པ་བཞིན་དུ་སྔ་འགྱུར་གྱི་རང་ལུགས་རྙོགས་པའི་དྲི་མ་མེད་པ་ནི་འདི་ལྟར་ཤེས་པར་བྱ་སྟེ། ཟུང་འཇུག་རབ་ཏུ་མི་གནས་པའི་དབུ་མ་ཐལ་འགྱུར་མཚན་ཉིད་པ་རྟོག་གེས་རྙོགས་དང་བྲལ་བ་ཞིག་ཡིན་ན་སྣང་སྟོང་ཟུང་དུ་འཇུག་པའི་དབུ་མ་ཆེན་པོའམ་སྤྲོས་པ་ཐམས་ཅད་དང་བྲལ་བའི་དབུ་མ་ཆེན་པོ་ཉིད་ཡིན་དགོས་ཏེ། དེ་ནི་འདི་ལྟར་ཐེག་ཆེན་འཕགས་པའི་མཉམ་བཞག་གཉིས་སྣང་མེད་པའི་ཡེ་ཤེས་དང་རྗེས་སུ་མཐུན་པར་དོན་དམ་མཐར་ཐུག་དཔྱོད་པའི་རིགས་པ་ཡང་དག་གིས་གཏན་ལ་ཕབ་ནས་ཡོད་མེད་རྟག་ཆད་ལ་སོགས་པའི་མཐའ་རགས་པ་དང་ཤིན་ཏུ་ཕྲ་བ་རྣམས་མ་ལུས་པ་ཀུན་ཉེར་ཞི་བའམ་ཉེར་ཞིའི་རང་བཞིན་བདེན་གཉིས་ཟུང་འཇུག་གི་གནས་ལུགས་ཡིན་པའི་ཕྱིར་རོ། །དེ་ལས་གཞན་དུ་དགག་བྱ་བདེན་གྲུབ་བཅད་པའི་སྟོང་པ་མེད་དགག་འབའ་ཞིག་ཡུལ་དུ་བྱེད་པའི་ལམ་དེ་ཉིད་སྣང་སྟོང་བདེན་གཉིས་ཟུང་འཇུག་གི་ཕྱོགས་གཅིག་སྟོང་པའི་མཐའ་ལ་ལྷུང་བའི་ཕྱིར་ལྟ་བ་ཉི་ཚེ་བའམ་ཉི་ཚེའི་ལྟ་བ་དེ་ནི་ལྟ་བ་མཐར་ཐུག་སྣང་སྟོང་ཟུང་འཇུག་དང་ནི་སྤྲོས་ཀུན་བྲལ་བའི་ལྟ་བ་མཐར་ཐུག་པ་ཉིད་ནི་མིན་ཏེ། ལྟ་བ་མཐར་ཐུག་པ་ནི་སྣང་སྟོང་ཟུང་དུ་འཇུག་པའི་སྤྲོས་པ་ཐམས་ཅད་དང་བྲལ་བ་ཉིད་ནི་ཡོད་པ་དང་མེད་པའམ་སྣང་བ་དང་སྟོང་པ་ཟུང་འཇུག་མཉམ་པ་ཉིད་ཡིན་དགོས་ཀྱང་ཉི་ཚེའི་ལྟ་བ་འདི་ནི་དོན་དམ་མེད་དགག་སྟོང་པའི་དབྱིངས་འབའ་ཞིག་གམ་ཁོ་ནའི་ཡུལ་ཅན་ཡིན་པས་སྤྲོས་པ་ཐམས་ཅད་དང་མ་བྲལ་བ་ཉིད་ཡིན་པའི་ཕྱིར་རོ། །དེ་ཡང་འདི་ལྟར་སྤྲོས་པ་ཞེས་པ་ནི་ཡོད་པ་དང་མེད་པ་སྟོང་དང་མི་སྟོང་པ་ལ་སོགས་པའི་དམིགས་པའི་རྣམ་པ་གཟུང་འཛིན་ཅན་གང་ཇི་སྙེད་པ་ཐམས་ཅད་དེ་སྤྲོས་པ་ཉིད་ཡིན་པས་འདི་ནི་སྟོང་པའམ་མེད་པའི་སྤྲོས་པ་དང་མ་བྲལ་བའི་མེད་དགག་དེ་ལ་དམིགས་པའི་ཕྱིར་ན་རྣམ་པར་རྟོག་པས་གཞན་སེལ་སེམས་ཀྱི་སྤྱོད་ཡུལ་གྱི་ལྟ་བ་ཉི་ཚེ་བ་ཡིན་ནོ། །གཉིས་པ། དེས་ན་དབུ་མ་སོགས་ཚིགས་བཅད་གཉིས་ཀྱིས་བསྟན་ཏེ། དེས་ན་གནས་ལུགས་ཟུང་འཇུག་སྤྲོས་བྲལ་དབུ་མ་ཆེན་པོའི་ངོར་བྱས་ན་དགག་པ་དང་སྒྲུབ་པའི་ཁས་ལེན་ཅི་ཡང་རྣམ་པ་ཀུན་ཏུ་ཡོད་པ་མིན་ཏེ། དབུ་མ་ཆེན་པོའི་རྣལ་འབྱོར་པ་དེ་ཡིས་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་སྟོང་ཟུང་དུ་འཇུག་པའི་སྤྲོས་བྲལ་མཉམ་པ་ཉིད་དུ་རྟོགས་པའི་སླད་དེ་དོན་གྱིས་ཆོས་ཐམས་ཅད་ཀྱི་གནས་ལུགས་ཟུང་འཇུག་ཆོས་ཀྱི་དབྱིངས་ཡོད་མེད་ཡིན་མིན་ལ་སོགས་དགག་སྒྲུབ་ཀྱི་སྤྲོས་པ་ཐམས་ཅད་ཀུན་དང་བྲལ་བས་སམ་བྲལ་བ་ཡིན་པས་ན་གནས་ལུགས་ཟུང་འཇུག་སྤྲོས་པ་ཐམས་ཅད་དང་བྲལ་བའི་དོན་ཉིད་ཇི་ལྟ་བ་བཞིན་དུ་འཁོར་འདས་ཀྱི་ཆོས་ཀུན་ཀྱང་ཟུང་འཇུག་སྤྲོས་པ་དང་བྲལ་བས་ཡོད་མེད་སོགས་གང་དང་གང་ཁས་བླངས་པ་དེ་དང་དེ་གནས་ལུགས་མཐར་ཐུག་དཔྱོད་པའི་རིགས་པས་དེ་ལྟར་མི་འགྲུབ་པའི་ཕྱིར་ཡོད་པ་དང་མེད་པ་སྟོང་པ་དང་མི་སྟོང་བ་སྣང་བ་དང་མི་སྣང་བ་སོགས་གང་དུ་ཡང་ཁས་ནི་ལེན་པར་མི་བྱེད་དོ། །དེས་ན་དབུ་མ་ཐལ་འགྱུར་བའི་རང་ལུགས་ལ་མཉམ་བཞག་ལ་ཟློ་བའི་ཚེ་ཁས་ལེན་མེད་དོ་ཞེས་གྲུབ་ཅིང་ཤེས་པར་བྱའོ། །གསུམ་པ། དེ་ལྟར་གནས་ལུགས་སོགས་ཚིགས་བཅད་བཞི་དང་རྐང་པ་གསུམ་གྱིས་བསྟན་ཏེ། དེ་ལྟར་མཉམ་བཞག་ལ་ཟློ་བའི་ཚེ་ཆོས་ཐམས་ཅད་གནས་ལུགས་སྣང་སྟོང་དབྱེར་མེད་པའི་ཟུང་འཇུག་གི་དབྱིངས་མཐར་ཐུག་པའི་དོན་ནམ་གཤིས་ལ་གཉིས་ཆོས་ཐ་སྙད་ཀྱི་སྤྲོས་པ་ཅི་ཡང་མེད་པས་ཁས་ལེན་མེད་པར་གྲུབ་ཀྱང་རྗེས་ཐོབ་ཤན་འབྱེད་པའི་ཚེ་གནས་སྐབས་སྣང་ཚུལ་ལ་ཐ་སྙད་ཙམ་དུ་བདེན་པ་གཉིས་ཀ་སོ་སོར་ཡང་ཀུན་རྫོབ་ཏུ་ཡོད་ལ་དོན་དམ་དུ་མེད་ཅེས་པའི་ཁས་བླང་ཡོད་དེ་ཁས་ལེན་ཅན་དེ་འདྲའི་ཐ་སྙད་ཀྱི་བདེན་པ་གཉིས་ཀྱང་བདེན་གཉིས་དབྱེར་མེད་ཟུང་འཇུག་གི་གནས་ལུགས་ལ་ལྟོས་ན་བདེན་གཉིས་སོ་སོའི་སྣང་ཚུལ་མི་འགོགས་པའི་ཐ་སྙད་ཙམ་ཞིག་ཡིན་ལ། བདེན་གཉིས་དབྱེར་མེད་པའི་གནས་ལུགས་ཀྱི་དོན་ཇི་ལྟ་བར་མཐོང་ཡེ་ཤེས་ལ་ལྟོས་ན་བདེན་གཉིས་དཔྱོད་པའི་ཚད་མ་གཉིས་པོ་དེ་ཡང་ཉི་ཚེ་བའི་ཚད་མའམ་ཉི་ཚེའི་གནས་ཡིན་ཏེ་ཚད་མ་དེ་གང་རུང་གཅིག་གིས་བདེན་གཉིས་ཅིག་ཆར་འཛིན་པ་མི་སྲིད་པའི་ཕྱིར་རོ། །དེས་ན་ཐ་སྙད་དཔྱོད་བྱེད་དང་དོན་དམ་དཔྱོད་བྱེད་ཀྱི་ཚད་མ་གཉིས་པོ་སེམས་བྱུང་ཤེས་རབ་སྟེ། བུམ་པ་ལ་སོགས་པའི་དངོས་པོ་ཀུན་ཚད་མ་དེ་གཉིས་ཀྱིས་སོ་སོར་དཔྱད་ཅིང་གཞལ་བ་ན། ཇི་སྐད་དུ་དབུ་མ་འཇུག་པ་ལས། དངོས་ཀུན་ཡང་དག་རྫུན་པར་མཐོང་བ་ཡི། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཞེས་གསུངས་པ་ལྟར། རྫུན་པ་དང་ཡང་དག་པའི་ངོ་བོ་སྣང་བ་དང་སྟོང་པ་གཉིས་ནི་རྙེད་ཅིང་རྟོགས་པར་གྱུར་ན་ཡང་ཚད་མ་དེ་གཉིས་ཡུལ་སོ་སོ་བ་ཡིན་པས་གང་རུང་གཅིག་གིས་རང་ཡུལ་དེ་གཞལ་ཞིང་རྟོགས་པའི་ཚེ་གཅིག་ཤོས་ཀྱང་གཞལ་ཞིང་རྟོགས་པ་ནི་ཡོད་པ་མིན་པས་ཚད་དེ་གཉིས་གང་ཡིན་ཀྱང་རུང་བདེན་གཉིས་ཅིག་ཆར་མི་གཞལ་ཞིང་མི་རྟོགས་པས་སོ་སྐྱེའི་བློ་གཉིས་སྣང་ཅན་དེ་ལ་བདེན་པ་གཉིས་རེས་འཇོག་གི་ཚུལ་དུ་སོ་སོར་སྣང་བ་ལས་ཅིག་ཆར་དུ་མི་སྣང་བའི་ཕྱིར་ན་ཚད་མ་གཉིས་སོ་སོས་ཇི་ལྟར་གཞལ་བའི་རྙེད་དོན་ཡོད་མེད་ཀྱི་ཁས་ལེན་གཉིས་ཀྱང་ཡོད་པ་ཉིད་དུ་གྲུབ་པ་ཡིན་པར་ཤེས་པར་བྱའོ། །གཉིས་པ་ལ་བཞི། རང་ལ་མཚུངས་པའི་རྩོད་སྤང་། གཉིས་ཀ་སྟོབས་མཚུངས་ལྡན་པའི་རྩོད་སྤང་། བདེན་པ་གཉིས་སུ་ཕྱེ་སྟེ་ཁས་ལེན་དང་བཅས་པ་བསྟན་པའི་དགོས་འབྲས་བསྟན་པ། རྒྱུ་འམ་ལམ་གྱི་དབུ་མའི་ཁས་ལེན་དེ་ཡང་དོན་དམ་རང་ལུགས་སུ་བྱས་ནས་ཀུན་རྫོབ་གཞན་ངོར་སྐྱེལ་ན་ལུང་རིགས་ཀྱིས་གནོད་ཚུལ་བསྟན་པའོ། །དང་པོ་ལ་གསུམ། རྩོད་པ་དགོད་པ། དེ་སྤང་བ། ལུང་ནས་དགག་སྒྲུབ་ཇི་སྙེད་པ་བསྟན་ཚུལ་གྱི་སྒོ་ནས་མི་འགལ་བར་དོན་བསྡུ་བའོ། །དང་པོ། འོ་ན་ཁས་ལེན་སོགས་ཚིགས་བཅད་གཅིག་གིས་བསྟན་ཏེ། འོ་ན་དེ་ལྟར་ཁས་ལེན་ཡོད་མེད་དང་བདེན་གཉིས་ཀྱི་ཁས་ལེན་ནང་འགལ་བའི་ཚུལ་གྱི་སྐྱོན་གོང་དུ་རང་གིས་གཞན་ལ་ཇི་སྙེད་བརྗོད་པ་ཡི་སྐྱོན་དེ་དག་རང་ལའང་མཚུངས་པར་ཐལ་ཞེ་ན་ཞེས་རྩོད་པའོ། །གཉིས་པ་རྩོད་པ་དེ་སྤང་བ་ལ་གསུམ། རྣམ་ཤེས་དང་ཡེ་ཤེས་སམ་མཉམ་རྗེས་སམ་གནས་སྣང་གི་སྐབས་ཀྱི་ཁྱད་པར་ཕྱེས་ཏེ་བསྟན་པས་གཤིས་ལ་ཁས་ལེན་མེད་པའི་ཕྱིར་ན་སྣང་ཚུལ་ལ་ཡོད་མེད་ཀྱི་ཁས་ལེན་གཉིས་ཡོད་ཀྱང་དཔྱད་བཟོད་ལ་སོགས་པའི་སྐྱོན་རང་ལ་མེད་པར་བསྟན་པ་དང་། ཚུལ་དེས་ལོག་རྟོག་གཞན་ཡང་ཁེགས་པར་བསྟན་པ། རང་ལ་བདེན་གཉིས་ཁས་ལེན་ནང་འགལ་གྱི་སྐྱོན་མེད་པར་བསྟན་པའོ། །དང་པོ། ངེད་ཀྱི་ཁྱད་པར་སོགས་ཚིགས་བཅད་བཅུས་བསྟན་ཏེ། དེ་ལ་ངེད་ཀྱིས་འདི་ལྟར་སྐབས་ཀྱི་ཁྱད་པར་ལེགས་པར་ཕྱེས་ནས་སུ་རྗེས་ཐོབ་ཤན་འབྱེད་ལམ་གྱི་དབུ་མ་དང་དངོས་གཞི་འཕགས་པའི་མཉམ་བཞག་ཟུང་འཇུག་ཡེ་ཤེས་ཀྱི་དབུ་མ་ཆེན་པོ་གཉིས་རིམ་པར་རགས་པ་བརྡའི་དབུ་མ་དང་། ཕྲ་བ་ཆོས་ཉིད་ཀྱི་དབུ་མའམ་རྒྱུ་དང་འབྲས་བུའི་སམ་རྣམ་ཤེས་ཀྱི་སྤྱོད་ཡུལ་དང་ཡེ་ཤེས་ཀྱི་སྤྱོད་ཡུལ་གྱི་གནས་སྐབས་ཀྱི་དབུ་མ་ཆེ་ཆུང་གི་ཁྱད་ལེགས་པར་ཕྱེས་ནས་ཕྲ་བ་ཆོས་ཉིད་ཀྱི་དབུ་མའམ་ཟུང་འཇུག་འབྲས་བུའི་དབུ་མའམ་མཉམ་བཞག་ཡེ་ཤེས་ཀྱི་དབུ་མའམ་ཆེན་པོར་ཁས་ལེན་མེད་པར་བསྟན་པ་དང་། རགས་པ་སེམས་ཀྱི་སྤྱོད་ཡུལ་རྗེས་ཐོབ་ཤན་འབྱེད་རྒྱུའམ་ལམ་གྱི་དབུ་མར་ཁས་ལེན་ཡོད་པར་བཤད་པའི་ཕྱིར་ན་གོང་དུ་ཐ་སྙད་པའི་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པའི་སྐྱོན་གསུམ་གཞན་ལ་གང་བརྗོད་པ་དེ་དག་རང་ལ་ག་ལ་འཇུག་སྟེ་མི་འཇུག་ཅེས་མདོར་བསྟན་ནས་དེ་རྒྱས་པར་བསྟན་པ་དེས་ན་མཉམ་བཞག་ཡེ་ཤེས་ཟུང་འཇུག་འབྲས་བུའི་དབུ་མ་ཆེན་པོ་ལ་ཡོད་མེད་སོགས་གཉིས་ཆོས་ཀྱི་ཁས་ལེན་ཅི་ཡང་མེད་པར་ཇི་སྐད་བསྟན་པ་དེ་ཉིད་རང་གི་ལུགས་གནས་ལུགས་མཐར་ཐུག་བདེན་པ་དབྱེར་མེད་དེ་ཡིན་མོད་ཀྱང་དེ་ལྟ་ནའང་ལམ་རྗེས་ཐོབ་ཤན་འབྱེད་རྒྱུའམ་ལམ་གྱི་དབུ་མ་ལ་སྣང་སྟོང་བདེན་པ་གཉིས་སོ་སོར་སྣང་བའི་ཚེ་སྣང་བ་ལྟར་བདེན་གཉིས་དཔྱོད་པའི་རིགས་པ་སོ་སོའི་ཚད་མ་ཡིས་གཞལ་བའི་དགག་པ་མེད་པ་སྟོང་པ་དང་སྒྲུབ་པ་ཡོད་པ་སྣང་བ་སྟེ་བདེན་པ་གཉིས་སོ་སོ་ལ་ལྟོས་པའི་བདེན་གྲུབ་མེད་པ་དང་ཐ་སྙད་དུ་ཡོད་པའི་ཁས་ལེན་ཐམས་ཅད་ཀྱང་རིམ་པར་སྒྲོ་འདོགས་དང་བསྐུར་འདེབས་ཀྱི་ལོག་རྟོག་རེ་རེ་དགག་པའི་ཆེད་དུ་ཡིན་གྱི་གཤིས་སམ་གནས་ལུགས་ཟུང་འཇུག་འབྲས་བུའི་དབུ་མ་བདེན་གཉིས་དབྱེར་མེད་དགག་སྒྲུབ་བསལ་བཞག་ལས་འདས་པ་ལ་བདེན་པ་གཉིས་སོ་སོར་ལ་ལྟོས་པའི་དགག་སྒྲུབ་ཏུ་ཁས་བླངས་པ་གང་ཡང་མེད་པའི་ཕྱིར་གཤིས་གནས་ལུགས་མཐར་ཐུག་བདེན་པ་དབྱེར་མེད་ཟུང་འཇུག་མཉམ་པ་ཉིད་ལ་བདེན་པ་གཉིས་པོ་ཡང་སོ་སོར་རིས་སུ་ཆད་པ་ཡང་ཡེ་མེད་པས་ཡོད་མེད་ཀྱི་ཁས་ལེན་དགག་སྒྲུབ་གཉིས་པོ་གང་ལྟར་ཡང་རང་གི་ངོ་བོས་བདེན་པར་གྲུབ་པ་ཅུང་ཟད་ཀྱང་མེད་པའི་ཕྱིར་ན་དགག་སྒྲུབ་ཀྱི་ཁས་ལེན་ཅི་ཡང་མེད་པར་ཤེས་པར་བྱའོ། །དེས་ན་མཉམ་རྗེས་ཀྱི་དབུ་མའི་ཁྱད་ལེགས་པར་ཕྱེས་ནས་མཉམ་བཞག་ལ་བཟློ་བའི་ཚེ་གཤིས་ལ་སྤྲོས་པ་མེད་པས་ཁས་ལེན་མེད་པ་རང་ལུགས་མཐར་ཐུག་ཏུ་བསྟན་པའི་གནས་ཀྱིས་རྗེས་ཐོབ་ཤན་འབྱེད་པའི་ཚེ་བདེན་པ་གཉིས་ལ་ལྟོས་པའི་དགག་སྒྲུབ་གཉིས་ཀར་ཡང་གང་དང་གང་ནི་ཁས་བླང་བར་གྱུར་ཀྱང་ཐ་སྙད་སྣང་ཚུལ་ཀུན་རྫོབ་ཙམ་གྱི་དབང་དུ་བྱས་ཏེ་ཁས་བླང་བ་ཡིན་པའི་ཕྱིར་དང་། གནས་སྐབས་སུ་བདེན་གཉིས་སོ་སོར་དཔྱོད་པའི་ཚད་མ་སོ་སོས་རྙེད་དོན་དགག་སྒྲུབ་གཉིས་ཀ་སོ་སོ་ན་རེ་ཞིག་ཇི་ལྟར་བཅད་པ་དེ་ལྟར་བདེན་དེ་ཚད་མ་སོ་སོ་དང་འགལ་བ་མེད་པ་ཉིད་ཡིན་པའི་ཕྱིར་རོ། །དེ་ཡང་རང་ལུགས་མཐར་ཐུག་པ་ཉིད་མ་ཡིན་པས་ན་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པའི་སྐྱོན་གསུམ་པོ་གང་ཡང་རང་ལ་མི་འབབ་སྟེ་སྣང་བའི་དངོས་པོའང་བརྟེན་ནས་སྐྱེས་པའི་ཕྱིར་དོན་དམ་དཔྱོད་པའི་རིགས་པས་དཔྱད་ན་མི་བཟོད་དེ་གཅིག་དང་དུ་མ་བྲལ་ཞིང་རྟེན་འབྲེལ་ཡིན་པས་སོ། །དངོས་མེད་ཀྱང་ནི་ལྟོས་ནས་བཏགས་པའི་ཕྱིར་རིགས་པས་དཔྱད་པ་མི་བཟོད་དེ་ལྟོས་པ་དང་རྟེན་འབྲེལ་ཡིན་པས་སོ། །དེའི་ཕྱིར་མཐར་ཐུག་གི་དོན་ལ་དགག་སྒྲུབ་པ་མ་སྟོང་དང་མི་སྟོང་པ་གཉིས་ཀ་དཔེར་ན་རྨི་ལམ་གྱི་བུ་དང་དེ་ཤི་བ་ཇི་ལྟ་བ་བཞིན་ཐ་སྙད་གཞིར་མ་གྲུབ་པར་མཚུངས་པ་ལ་གནས་སྐབས་ཀྱི་དགག་སྒྲུབ་གཉིས་བདེན་གཉིས་སོ་སོ་ལ་ལྟོས་ཏེ་ཐ་སྙད་དུ་སྣང་ཚུལ་མི་འགོག་པས་བཏགས་པ་ཙམ་ཞིག་ཡིན་ཏེ། དེ་ཡང་མ་བརྟགས་འཇིག་རྟེན་གྲགས་པའི་ཡོད་ཙམ་དེ་སྣང་ཚུལ་ཐ་སྙད་དུ་ཡོད་པ་ཡིན་གྱི་གནས་ཚུལ་དོན་དམ་དུ་ཡོད་པ་མིན་ལ། བདེན་མེད་དོན་དམ་དཔྱོད་པའི་རིགས་ཤེས་ཀྱིས་མཐོང་བའི་སྟོང་བ་གནས་ཚུལ་དོན་དམ་དུ་འདོད་པ་དེ་ཡང་སྣང་ཚུལ་ཀུན་རྫོབ་ཀྱི་ཟླ་ལ་ལྟོས་པའི་དོན་དམ་ཡིན་གྱི་གནས་ལུགས་མཐར་ཐུག་བདེན་པ་དབྱེར་མེད་ལ་ལྟོས་ན་དོན་དམ་རྣམ་གྲངས་པ་ཙམ་མམ་མཐུན་པའི་དོན་དམ་ཞེས་དོན་དམ་མཐར་ཐུག་པ་ཉིད་མ་ཡིན་པ་དེ་ཡང་ཐ་སྙད་ཀྱི་ཁོངས་སུ་གཏོགས་སོ། །གཞན་ཡང་གལ་ཏེ་དེ་འདྲའི་བདེན་པ་གཉིས་པོ་དེ་ཡང་གནས་ཚུལ་དང་སྣང་ཚུལ་ཐ་དད་པས་ཕན་ཚུན་འགལ་བ་ཉིད་ཡིན་ན་བདེན་གཉིས་ཐ་དད་དུ་འདོད་པ་ལ་ཡང་སྐྱོན་བཞི་འབབ་པར་མདོ་སྡེ་དགོང་པ་ངེས་འགྲེལ་ལས་གསུང་པའི་དོན། འདི་ལྟར་དོན་དམ་མངོན་སུམ་དུ་རྟོགས་ཀྱང་ཀུན་རྫོབ་དེར་དེར་མ་འདུས་པས་ལོགས་སུ་དམིགས་པའི་ཕྱིར་མྱང་འདས་མི་ཐོབ་པ་དང་། ཀུན་རྫོབ་དང་ཐ་དད་པའི་དོན་དམ་པའི་བདེན་པ་དེ་ཀུན་རྫོབ་བདེན་པའི་ཆོས་ཉིད་མ་ཡིན་པར་འགྱུར་ཏེ་བུམ་པ་སྣམ་བུའི་ཆོས་ཉིད་མ་ཡིན་པ་བཞིན་ནོ། །བདེན་གཉིས་ཐ་དད་པའི་ཕྱིར་ཀུན་རྫོབ་ཀྱི་བདག་རབ་ཏུ་མ་གྲུབ་པ་ཙམ་དོན་དམ་པའི་བདེན་པ་ནི་མ་ཡིན་པར་འགྱུར་ཏེ། བུམ་པ་རབ་ཏུ་མ་གྲུབ་པ་ཙམ་སྣམ་བུ་མ་ཡིན་པ་བཞིན་ནོ། །དོན་དམ་བདེན་པ་རྟོགས་ནས་མྱང་འདས་ཐོབ་པའི་དུས་ནའང་ཀུན་རྫོབ་དེ་བས་ལོགས་སུ་དམིགས་པས་ཀུན་ནས་ཉོན་མོངས་པར་ཡང་འགྱུར་བས་སྐྱེས་བུ་གཅིག་གི་རྒྱུད་ལ་ཀུན་ཉོན་དང་རྣམ་བྱང་དུས་གཅིག་ལ་འཇུག་པ་མི་འགལ་བར་འགྱུར་བ་དང་བཞིའོ། །ཡང་གལ་ཏེ་དེ་འདྲའི་བདེན་གཉིས་གནས་སྣང་ཕན་ཚུན་གཞན་མིན་པས་གཅིག་པ་ཉིད་ཡིན་ན་བདེན་གཉིས་གཅིག་པའི་སྐྱོན་ཡང་བཞིས་གནོད་པར་མདོ་དེ་ལས་གསུངས་པ་ནི། སོ་སོའི་སྐྱེ་བོ་ཐམས་ཅད་ཀྱིས་ཀུན་རྫོབ་མཐོང་བའི་ཕྱིར་དོན་དམ་ཡང་མཐོང་བར་འགྱུར་བ་དང་། ཀུན་རྫོབ་ལ་བརྟེན་ནས་ཟག་པ་འཕེལ་བ་ལྟར་དོན་དམ་ལ་བརྟེན་ནས་ཀྱང་ཟག་པ་འཕེལ་བར་ཐལ་བ་དང་། དོན་དམ་ལ་དབྱེ་བ་མེད་པ་ལྟར་ཀུན་རྫོབ་ལའང་དབྱེ་བ་མེད་པར་ཐལ་བར་དང་། ཀུན་རྫོབ་ཇི་ལྟར་མཐོང་བ་དང་ཐོས་པ་ལས་བཙལ་བར་བྱ་མི་དགོས་པ་བཞིན་དོན་དམ་ཀྱང་དེ་ལྟར་འགྱུར་བ་སྟེ་བཞིའོ། །དེས་ན་གནས་སྣང་གཅིག་ཐ་དད་དུ་ཁས་བླང་བར་མི་བྱ་སྟེ། མདོ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་སེམས་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས་པས་སོ། །གཉིས་པ་ཚུལ་དེས་ལོག་རྟོག་གཞན་ཁེགས་པར་བསྟན་པ། ཚུལ་དེས་སངས་རྒྱས་སོགས་ཚིགས་བཅད་གསུམ་དང་རྐང་བ་གཉིས་ཀྱིས་བསྟན་ཏེ། གོང་དུ་གནས་སྣང་གཅིག་ཐ་དད་གང་དུ་ཡང་ཁས་མི་ལེན་པའི་ཚུལ་དེས་འདིར་སངས་རྒྱས་དང་སེམས་ཅན་ཀྱང་གནས་ཚུལ་དང་སྣང་ཚུལ་ཙམ་ཡིན་གྱི་སེམས་ཅན་རྒྱུ་དང་སངས་རྒྱས་འབྲས་བུ་ཉིད་དུ་འདོད་པ་ནི་ཐེག་པ་དམན་པ་ཆུང་ངུར་ཤེས་པར་བྱ་དགོས་སོ། །དེས་ན་གནས་སྣང་གཉིས་གཅིག་དང་ཐ་དད་གང་དུ་ཡང་ཁས་བླངས་བ་མེད་པའི་ཕྱིར་ན་སེམས་ཅན་རྣམས་ནི་སངས་རྒྱས་ཡིན་ན་མཚན་དཔེས་བརྒྱན་པའི་སངས་རྒྱས་ཉིད་དུ་སྣང་རུང་དུ་ཡོད་དགོས་པ་དང་། ལམ་སྒོམ་པ་དང་སྒྲུབ་པ་ཐམས་ཅད་དོན་མེད་འབའ་ཞིག་ཏུ་འགྱུར་དགོས་པ་དང་། རྒྱུ་ལ་འབྲས་བུ་གནས་ན་ཟན་ཟ་བ་མི་གཙང་བ་ཟ་བར་ཁས་ལེན་དགོས་པ་ལ་སོགས་པའི་རིགས་པས་གནོད་པ་རྣམ་པ་ཀུན་ཏུ་རང་ལུགས་འདི་ལ་མེད་དེ། སེམས་ཅན་གྱི་གནས་ཚུལ་སངས་རྒྱས་གང་ཡིན་པ་དེ་ཡང་སེམས་ཅན་རྣམས་རང་སྣང་གློ་བུར་གྱི་སྒྲིབ་པ་ཡིས་རང་རང་སྒྲིབ་པའི་ཕྱིར་ན་སངས་རྒྱས་ཉིད་དུ་སྣང་རུང་མ་ཡིན་པས་སངས་རྒྱས་སུ་ཉེ་བར་མི་སྣང་བས་གློ་བུར་གྱི་སྒྲིབ་པ་དེ་དང་བྲལ་བའི་དོན་དུ་ལམ་སྒོམ་པ་དང་། སྒྲུབ་པ་ལ་འབད་པར་བྱེད་དགོས་པ་ནི་རང་གཞན་གཉིས་ཀས་འདོད་དགོས་པ་ཉིད་དེ་ཁྱོད་རང་གིས་ཀྱང་སེམས་ཅན་རྣམས་རང་བཞིན་གྱིས་རྣམ་པར་དག་པར་ཁས་བླང་ཀྱང་ལམ་རྩོལ་བྱེད་དགོས་པར་འདོད་པ་མ་ཡིན་ནམ་དེ་འདྲའི་སྨྲ་བ་འབྲེལ་མེད་ཀྱིས་ཅི་ཞིག་བྱ་སྟེ་དགོས་འབྲས་མེད་དོ། །གསུམ་པ་རང་ལ་བདེན་གཉིས་ཁས་ལེན་ནང་འགལ་གྱི་སྐྱོན་མེད་པར་བསྟན་པ། བདེན་གཉིས་འགལ་བ་སོགས་ཚིགས་བཅད་དྲུག་གིས་བསྟན། རང་ལུགས་ལ་མེ་དང་ཚ་བ་བཞིན་དུ་སྣང་སྟོང་བདེན་པ་གཉིས་ཕྱོགས་སུ་ལྷུང་བའི་འགལ་བ་ཅུང་ཟད་ཀྱང་མེད་པའི་ཕྱིར་ན་ཐ་སྙད་དུ་ཡོད་ཅེས་པ་དང་དོན་དམ་དུ་མེད་ཅེས་ལྟ་བ་ཡི་ཁས་ལེན་དེ་གཉིས་པོའང་ཇི་ལྟར་འགལ་ཏེ་མི་འགལ་བ་ཁོ་ནའོ། །དེ་མ་ཟད་སྣང་སྟོང་བདེན་པ་གཉིས་པོ་ཕན་ཚུན་གཅིག་པའང་མིན་པའི་ཕྱིར་ན་ཀུན་རྫོབ་ཏུ་ཡོད་དོན་དམ་དུ་མེད་ཅེས་པའི་ཁས་བླང་གཉིས་ཀྱི་རྣམ་པར་བཞག་པའང་ཤིན་ཏུ་འཐད་པ་ཉིད་ཡིན་ནོ། །དེ་ཕྱིར་ཇི་སྲིད་སྣང་སྟོང་བདེན་པ་འདི་གཉིས་སྣང་སྟོང་སོ་སོར་སྣང་བ་དང་བཅས་པའི་སེམས་ཀྱི་འཇུག་པ་ཐམས་ཅད་དབྱིངས་སུ་མ་ནུབ་པར་ཇི་སྲིད་ཡོད་ཀྱི་བར་དེ་སྲིད་དུ་སྣང་སྟོང་བདེན་པ་དེ་གཉིས་ཕན་ཚུན་ལྟོས་ཏེ་བཞག་པ་ཙམ་ཡིན་པའི་ཕྱིར་ན་གཅིག་ཡོད་གཅིག་མེད་མི་སྲིད་པས་སྣང་སྟོང་གཉིས་པོ་ཡོད་མཉམ་མེད་མཉམ་ཡིན་པས་རྣམ་པ་ཀུན་ཏུ་སྟོབས་མཚུངས་པ་ཉིད་ཡིན་པས་ན་གཅིག་ཡོད་གཅིག་མེད་ཅེས་མཐའ་གཅིག་ཁོ་ནར་ཁས་ལེན་པ་མིན་ཏེ། གཅིག་ཏུ་བྲལ་ལ་སོགས་པའི་རེགས་པས་དངོས་ཀུན་བདེན་པར་གྲུབ་པ་མེད་ཅེས་བདེན་སྟོང་གདར་ཤ་ཆོད་པས་ངེས་པ་དང་། ཀུན་ཏུ་ཐ་སྙད་པའི་རིགས་པས་མ་བརྟགས་འཇིག་རྟེན་གྲགས་པའི་ཐ་སྙད་ལས་རྒྱུ་འབྲས་ཚེ་སྔ་ཕྱི་སོགས་བསླུ་མེད་དུ་ཡོད་ཅེས་རྟེན་ཅིང་འབྲེལ་འབྱུང་གི་སྣང་ཆ་ངེས་པ་གཉིས་རེས་འཇོག་གམ་རིམ་གྱིས་བདེན་གཉིས་དཔྱོད་པའི་ཚད་མ་གཉིས་ཀྱིས་ནི་ཕྱི་ནང་གི་དངོས་པོ་ཀུན་གཞལ་བའི་ཚེ་ན་ཚད་མ་གཉིས་པོ་རང་རང་སོ་སོས་རྙེད་དོན་ནམ་མཐོང་དོན་དེ་ལ་སྣང་སྟོང་ངམ། ཀུན་རྫོབ་དང་དོན་དམ་སྟེ་བདེན་པ་གཉིས་ཞེས་ཐ་སྙད་ཙམ་དུ་བརྗོད་དོ། །བདེན་པ་དེ་གཉིས་ངོ་བོ་གཅིག་པ་དང་ཐ་དད་པ་ཡང་མིན་པའི་ཕྱིར་ན་སྣང་སྟོང་བདེན་པ་དེ་གཉིས་ཕན་ཚུན་མི་ལྟོས་པའི་མཐའ་གཅིག་ཏུ་གང་རུང་གཅིག་སྤང་ནས་གཅིག་ཤོས་ཉིད་ནི་ཟུང་དུ་མི་རུང་སྟེ་དཔེར་ན་མེ་ལ་མི་ལྟོས་པའི་ཚ་བ་ཚ་བ་ལ་མི་ལྟོས་པའི་མེར་བཟུང་དུ་མི་རུང་བ་བཞིན་ནོ། །དེས་ན་བདེན་པ་དེ་གཉིས་ལ་སོ་སོར་དཔྱོད་པའི་ཚད་མ་སེམས་བྱུང་ཤེས་རབ་ཀྱིས་སྣང་སྟོང་ཡོད་མེད་ཁས་ལེན་སོ་སོར་ཕྱེ་སྟེ་སྨྲ་བའི་དཔེར་བརྗོད་ན། འབྲས་བུའི་མཐར་ཐུག་སེམས་དང་སེམས་བྱུང་གི་གཉིས་སྣང་མཐའ་དག་འགག་པའི་ཡེ་ཤེས་ཆོས་ཀྱི་སྐུ་ཐོབ་པའི་ཚེ་ན་སེམས་དང་སེམས་བྱུང་གི་གཉིས་སྣང་མ་ལུས་པ་ཐ་སྙད་དབང་དུ་འགག་ཅེས་ཁས་ལེན་བྱ་དགོས་པ་དང་གནས་ལུགས་དམ་པའི་དོན་ཉིད་དུ་གདོད་ནས་དག་པས་འགག་པའང་མེད་དོ་ཞེས་ཁས་ལེན་བྱ་དགོས་པ་དེ་བཞིན་ནོ། །གསུམ་པ་ལུང་ལས་དགག་སྒྲུབ་ཇི་སྙེད་བསྟན་ཚུལ་གྱི་སྒོ་ནས་མི་འགལ་བར་དོན་བསྡུ་བ་ནི། མདོ་དང་བསྟན་བཅོས་སོགས་ཚིགས་བཅད་ལྔས་བསྟན་ཏེ། རྒྱལ་བའི་བཀའ་ཡུམ་ཤེར་ཕྱིན་དང་བདེན་པ་གཉིས་སོགས་དང་སྙིང་པོ་བསྟན་པའི་མདོ་ལ་སོགས་པ་དང་བསྟན་བཅོས་ཆེན་པོ་འཕགས་པ་ཀླུ་སྒྲུབ་ཀྱི་དབུ་མ་རིགས་པའི་ཚོགས་དང་ཆོས་དབྱིངས་བསྟོད་པ་ལ་སོགས་པ་དང་། རྒྱལ་ཚབ་ས་བཅུའི་སེམས་དཔའ་ཆེན་པོས་ཤེར་ཕྱིན་དང་རྒྱུད་བླ་མ་ལ་སོགས་པའི་གཞུང་ཀུན་ན་དགག་པ་དང་སྒྲུབ་པའི་རྣམ་པ་ཇི་སྙེད་ཅིག་གང་བསྟན་པ་དེ་དག་ལས་ལ་ལ་གནས་ལུགས་དོན་དམ་པའི་དབང་དུ་བྱས་ནས་གཞི་ལམ་འབྲས་བུའི་ཆོས་ཐམས་ཅད་སྟོང་པའམ་མེད་པར་ཁས་ལེན་པར་གསུངས་ཏེ་ལ་ལ་ཐ་སྙད་སྣང་ཚུལ་ཀུན་རྫོབ་ཀྱི་དབང་དུ་བྱས་ནས་གཞི་ལམ་འབྲས་བུའི་ཆོས་ཐམས་ཅད་ཡོད་པར་གསུངས་པ་སྟེ། དེ་ཡང་གནས་ལུགས་དོན་དམ་པ་ཁོ་ནའི་དབང་དུ་བྱས་ན་ལམ་ལྔ་ས་བཅུ་དང་སངས་རྒྱས་དང་སེམས་ཅན་ལ་སོགས་པ་མདོར་ན་གཞི་ལམ་འབྲས་བུས་བསྡུས་པའི་ཆོས་ཐམས་ཅད་གདོད་ནས་དག་པས་སྟོང་པའམ་མེད་ཅེས་སོམ་ཉི་མི་དགོས་པར་སྨྲ་བར་རུང་མོད་ཀྱི་འོན་ཀྱང་ཐ་སྙད་སྣང་ཚུལ་ཀུན་རྫོབ་ཉིད་ལ་རྣམ་པ་ཀུན་ཏུ་ལྟོས་མེད་དུ་མེད་པའམ་སྟོང་པ་དེ་གཅིག་པུ་ཁོ་ནར་མི་འགྱུར་ཏེ་མེད་པའམ་སྟོང་པ་ཉིད་ཡིན་ཀྱང་སྣང་ཚུལ་རྟེན་འབྱུང་འགགས་པ་མེད་པས་གཞི་ལམ་འབྲས་བུས་བསྡུས་པའི་ཆོས་འཁོར་འདས་ཀྱི་སྣང་བའི་ཆ་འདི་ཀུན་སྣང་བར་མངོན་སུམ་བསླུ་མེད་ཉིད་དུ་གྲུབ་ཅིང་ཡོད་པའི་ཕྱིར་རོ། །སྣང་ཚུལ་ཐ་སྙད་ཚད་མའི་དབང་དུ་བྱས་ནས་ས་ལམ་དང་སངས་རྒྱས་དང་སེམས་ཅན་ལ་སོགས་པ་གཞི་ལམ་འབྲས་བུའི་སྣང་བ་རབ་འབྱམས་ཐམས་ཅད་མངོན་སུམ་སྣང་བ་ཡོད་ཅེས་ཐེ་ཚོམ་མེད་པར་བརྗོད་པར་རིགས་མོད་ཀྱི་འོན་ཀྱང་གནས་ལུགས་སྟོང་པ་དོན་དམ་པ་ཉིད་ལ་རྣམ་པ་ཀུན་ཏུ་ལྟོས་མེད་དུ་ཡོད་པའམ་སྣང་བ་དེ་གཅིག་པུ་ཁོ་ནར་མི་འགྱུར་ཏེ། སྣང་བ་རབ་འབྱམས་ཐམས་ཅད་མངོན་སུམ་གྱིས་ཡོད་པ་ཉིད་ཡིན་ཀྱང་དོན་ལ་དེ་ལྟར་མ་གྲུབ་པས་སྟོང་པ་ཉིད་ཡིན་པར་དོན་དམ་དཔྱོད་པའི་ཚད་མས་ངེས་ནུས་པའི་ཕྱིར་རོ། །དེས་ན་ཡོད་མེད་དམ་སྣང་སྟོང་ངམ་ཀུན་རྫོབ་དང་དོན་དམ་པའི་བདེན་པ་དེ་གཉིས་དུས་ནམ་དུ་ཡང་ཆུ་དང་བརླན་བཞིན་དུ་གཅིག་མེད་ན་གཅིག་ཤོས་ཀྱང་ཡོད་པ་སྲིད་པ་མ་ཡིན་ཞིང་དེ་བཞིན་དུ་གཅིག་ཡོད་ན་གཅིག་ཤོས་ཀྱང་མེད་པ་མི་སྲིད་པར་ཤེས་པར་བྱ་བ་ཉིད་གནད་ཀྱི་དོན་ཏོ། །གཉིས་པ་གཉིས་ཀ་སྟོབས་མཚུངས་བདེན་པའི་རྩོད་སྤང་ནི། གཉིས་ཀ་སྟོབས་མཚུངས་མེད་སོགས་ཚིགས་བཅད་བཅུས་བསྟན་ཏེ། བདེན་གཉིས་དཔྱོད་པའི་ཚད་མ་སོ་སོས་རྙེད་དོན་སྣང་སྟོང་ངམ་བདེན་པ་གཉིས་གྲུབ་ཀ་སྟོབས་མཚུངས་པའམ་མགོ་མཉམ་པས་བདེན་པ་སྟེ་ཡང་དག་པར་གྱུར་ཚེ། དེ་ལྟར་ན་དངོས་པོ་ཀུན་རྫོབ་པ་རྣམས་མི་སྟོང་པར་དོན་དམ་པར་འགྱུར་རོ་ཞེ་ན། བདེན་པ་གཉིས་ཀའང་ཡེ་གདོད་མ་ནས་རང་བཞིན་གྱི་མ་གྲུབ་པས་སྟོང་པ་ཉིད་དུ་མཉམ་པའམ་མཚུངས་པ་ཡིན་པ་དང་། སྣང་བ་ཀུན་རྫོབ་དང་སྟོང་པ་དོན་དམ་པའི་ཡུལ་གཉིས་པོ་རང་བཞིན་གྱིས་སམ་དོན་གྱིས་ཐ་དད་དུ་གྲུབ་པ་ཉིད་མ་ཡིན་པས་ན་གང་སྣང་བ་དེའི་ངོ་བོ་སྟོང་པ་ཡིན་པའི་ཕྱིར་ན་དངོས་པོ་རྣམས་མི་སྟོང་བ་ག་ལ་ཡིན་ཏེ་མ་ཡིན་ལ། བདེན་པ་གཉིས་ཀ་མཚུངས་པར་སྣང་བ་དེའི་ཕྱིར་ན་ཡང་སྣང་སྟོང་བདེན་པ་གཉིས་ཀའང་མཚུངས་པར་སྟོང་བར་ངེས་པར་གྲུབ་པ་ཡིན་ཏེ། གང་སྣང་བ་ཉིད་མེད་ན་དེ་སྟོང་བའང་ཡིན་པར་ཅི་ཡིས་ཤེས་པར་འགྱུར་ཏེ་མི་འགྱུར་བ་ཁོ་ན་སྟེ། གང་མ་སྣང་བ་དེ་སྟོང་པར་ཡང་རྟོགས་སུ་མི་རུང་བའི་ཕྱིར་རོ། །དེས་ན་སྣང་སྟོང་གཉིས་ཀ་ཕན་ཚུན་མི་འགལ་བར་མ་ཟད་ཕན་ཚུན་རྒྱུ་འབྲས་སུ་སྟེ་སྟོང་པ་རྟེན་འབྱུང་དང་། རྟེན་འབྱུང་སྟོང་པར་འཆར་ཞིང་སྣང་སྟོང་གང་རུང་གཅིག་ཡོད་ཚེ་གཅིག་ཤོས་ཀྱང་མེ་དང་ཚ་བ་བཞིན་འབྲལ་མི་ཤེས་པར་ཡོད་པ་ལ་གཏིང་ནས་ངེས་པའི་ཤེས་པ་ནམ་སྐྱེས་པར་གྱུར་པ་དེའི་ཚེ་ན་སྣང་སྟོང་གཉིས་དུས་ནམ་ཡང་ཡེ་ནས་འདུ་འབྲལ་མེད་པའི་དོན་ལ་ཐེ་ཚོམ་གྱི་དྲྭ་བ་མ་ལུས་པ་ཆོད་པའོ། །དེའི་ཕྱིར་སྣང་སྟོང་གཉིས་གང་ལ་གང་གིས་ཕན་ཚུན་མ་ཁྱབ་པ་མེད་པའི་ཕྱིར་གང་སྣང་བ་དེ་སྟོང་པ་ཉིད་ཡིན་པས་ཁྱབ་ལ་གང་སྟོང་པ་དེ་སྣང་བ་ཡིན་པས་ཁྱབ་པས་ན་སྣང་སྟོང་གཉིས་གང་ལྟར་གཞལ་ཀྱང་འགལ་བ་མེད་པས་དེ་ལྟར་བལྟར་བདེན་ཏེ་གང་སྣང་བ་དེ་སྟོང་པ་དང་། སྟོང་པ་དེ་སྣང་བའི་ཕྱིར་ཏེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ་ཞེས་གསུངས་སོ། །དེ་ཡང་གཟུགས་ལ་སོགས་པའི་སྣང་བ་འདི་རང་སྟོང་པར་ཤེས་པ་ཡིས་སྣང་བ་ཉིད་བདེན་པར་གྲུབ་པ་མེད་པར་སྟོང་པར་རྟོགས་པ་དང་། སྟོང་པ་ཉིད་གཟུགས་སོགས་སུ་སྣང་བར་རམ་སྣང་བ་ཡིན་པར་ཤེས་ན་ཡང་སྟོང་པ་ཉིད་རང་བདེན་དངོས་སུ་གྲུབ་པར་ཡོད་པ་མི་རྟོག་སྟེ་ཞེས་མི་འཛིན་པས་སྟོང་པའང་བདེན་མེད་དུ་རྟོགས་པར་འགྱུར་བ་དེ་ཡི་ཕྱིར་སྣང་སྟོང་འདུ་འབྲལ་མེད་པའི་ཟུང་འཇུག་ཏུ་མཐོང་བའི་ཚེ་ན་སྣང་སྟོང་གཉིས་བདེན་དངོས་སུ་གྲུབ་པར་དུས་ནམ་ཡང་སླར་མི་ལྡོག་སྟེ་ཞེས་དུས་ནམ་ཡང་བདེན་དངོས་སུ་ཐ་དད་པར་མི་འགྱུར་བས་དེར་འཛིན་པར་ཡང་མི་འགྱུར་རོ། །དེ་ལྟར་འདུ་འབྲལ་མེད་ཡང་གཟུགས་ལ་སོགས་པ་གང་སྣང་བ་དེ་དང་དེ་ཡི་གནས་ལུགས་ནི་སྟོང་པ་ཉིད་ཡིན་པའི་ཕྱིར་ན་ཡེ་ནས་སྟོང་པ་ཉིད་འདུ་འབྲལ་མེད་པ་ཉིད་ཡིན་ལ། གཟུགས་ལ་སོགས་པ་གང་སྣང་བ་དེ་སྤང་བའི་ཕ་རོལ་ལམ་གཞན་དུ་སྟོང་པ་ཉིད་འདིའོ་ཞེས་ཡན་གར་དུ་ཅུང་ཟད་ཙམ་ཡང་མི་འགྲུབ་ཅིང་མེད་པའི་ཕྱིར་ན་གདོད་ནས་སྣང་བ་དང་འདུ་འབྲལ་མེད་པ་ཉིད་ཡིན་ཏེ། མདོར་ན་ཡེ་ནས་གང་སྣང་བ་དེ་སྟོང་པ་དང་འདུ་འབྲལ་མེད་པ་དང་གང་སྟོང་བའང་སྣང་བ་ཉིད་དང་འདུ་འབྲལ་མེད་པ་དབྱེར་མེད་དམ་ཟུང་འཇུག་ཏུ་བསྟན་ཏོ། །སྣང་སྟོང་བདེན་པ་གཉིས་པོ་འདུ་འབྲལ་མེད་པས་མགོ་མཉམ་པའམ་མཚུངས་པ་དེས་ན་ཇི་སྲིད་བདེན་གཉིས་སོ་སོར་དཔྱོད་པའི་ཚད་མ་གཉིས་རེས་འཇོག་གིས་རྙེད་དོན་བདེན་པ་གཉིས་སོ་སོར་བསྒོམ་པ་སེམས་བྱུང་ཤེས་རབ་སྟེ་གཟུང་འཛིན་ཅན་སེམས་བྱུང་ཤེས་རབ་ཡིན་ལ་གཟུང་འཛིན་གཉིས་སྣང་ཅན་འཁོར་བའི་གནས་སྐབས་འདི་ན་སེམས་དང་སེམས་བྱུང་གི་གཡོ་བ་གཟུང་འཛིན་གྱི་རྣམ་པར་རྟོག་པའི་སྒྲིབ་པ་ཡིས་གཟུང་འཛིན་གཉིས་སྣང་གི་རྣམ་པར་རྟོག་པའི་སྤྲོས་པ་ཤིན་ཏུ་ཕྲ་བ་དང་ཡང་བྲལ་བའི་གཉིས་སུ་མེད་པའི་ཡེ་ཤེས་འོད་གསལ་བ་ཉིད་ཉེ་བར་མི་སྣང་ཞིང་རྟོགས་པར་མི་ནུས་པའི་ཕྱིར་ན་ཇི་སྐད་བསྟན་པའི་སྣང་སྟོང་བདེན་པ་གཉིས་ལ་སོ་སོར་དཔྱད་པའི་ཤེས་རབ་འཁྲུལ་པའི་དྲི་མ་མེད་པའི་ཚད་མ་གཉིས་གཅིག་སྤང་གཅིག་བླང་མེད་པར་མགོ་མཉམ་དུ་བཟུང་བ་བྱ་དགོས་པ་སྟེ། དེའི་རྒྱུ་མཚན་འདི་ལྟར་གང་གི་ཚེ་བདེན་གཉིས་དཔྱོད་པའི་ཚད་མ་གཉིས་ལས་གང་རུང་གཅིག་མ་ཚང་བའམ་མེད་པར་གྱུར་ན་རྒྱུ་བདེན་གཉིས་དཔྱོད་པའི་ཚད་མ་དེ་གཉིས་ལས་ལེགས་པར་བྱུང་བའི་འབྲས་བུ་གཉིས་སུ་མེད་པའི་ཟུང་འཇུག་གི་ཡེ་ཤེས་ཉིད་ངེས་པར་མི་སྐྱེ་ཞིང་མི་འབྱུང་སྟེ་རྒྱུ་མ་ཚང་བའི་ཕྱིར་དཔེར་ན་གཙུབས་ཤིང་དང་གཙུབས་གཏན་གྱི་ཤིང་གཉིས་ལས། གང་རུང་དང་བྲལ་བའི་མེ་ནི་ཡང་དག་པར་འབྱུང་བ་མིན་པ་བཞིན་ནོ། །དེས་ན་ཐབས་སྣང་བའི་ཆ་དང་། ཤེས་རབ་སྟོང་པ་ཉིད་ཀྱི་ཆ་ཡ་བྲལ་ཏེ་ཕྱོགས་སོ་སོར་ལྷུང་བ་དག་ཐབས་ཤེས་ཟུང་འཇུག་ཡང་དག་པའི་ལམ་ཉིད་མིན་ནོ་ཞེས་རྒྱལ་བ་མཆོག་གིས་མདོ་རྒྱུད་དང་བརྒྱུད་འཛིན་མཁས་གྲུབ་རྣམས་ཀྱི་བསྟན་བཅོས་མཆོག་རྣམས་ལས་ཡང་དང་ཡང་དུ་གསུངས་པར་མཛད་པ་ཡིན་ནོ། །གསུམ་པ་བདེན་པ་གཉིས་སུ་ཕྱེ་སྟེ་ཁས་ལེན་དང་བཅས་པ་བསྟན་པའི་དགོས་འབྲས་བསྟན་པ་ནི། རྒྱུ་གཉིས་འདི་སྤངས་སོགས་ཚིགས་བཅད་བརྒྱད་དང་རྐང་པ་གཉིས་ཀྱིས་བསྟན་ཏེ། དེས་ན་རྒྱུ་བདེན་གཉིས་དཔྱོད་པའི་ཚད་མ་འདི་གཉིས་མ་ཚོགས་པར་གང་རུང་སྤངས་པའམ་བྲལ་ན་འབྲས་བུ་གཉིས་སུ་མེད་པའི་ཟུང་འཇུག་གི་ཡེ་ཤེས་ཆེ་སྟེ་ཆེན་པོ་རང་རྒྱུད་ལ་སྐྱེ་ཞིང་འབྱུང་བའི་ཐབས་སམ་རྒྱུ་གཞན་ཅི་ཡང་མི་སྲིད་པས་རྒྱུ་དེ་ལ་བརྟེན་དགོས་པ་ཡིན་ལ། དེ་ལྟ་ནའང་ཟབ་ཞི་སྤྲོས་པ་དང་བྲལ་བའི་ཟུང་འཇུག་ཡེ་ཤེས་རང་གི་ངོ་བོ་ནི་གཉིས་སྣང་གི་བློོ་གང་གིས་བསམ་པ་དང་ངག་གི་བརྗོད་པའི་ཡུལ་ལས་འདས་པའི་ཕྱིར་ན་གནས་ལུགས་ངོ་སྤྲོད་ཀྱི་བརྡ་ཐབས་སྣ་ཚོགས་དང་ཚིག་ཙམ་དག་གིས་མཚོན་པར་བྱས་ཏེ་སྟོན་པར་བྱེད་པ་ནི་དཔེར་ན་མཛུབ་མོས་ཟླ་བ་སྟོན་པར་བྱེད་པར་ཇི་ལྟ་བ་བཞིན་ལས་ཡེ་ཤེས་རང་གི་ངོ་བོ་དངོས་སུ་ལྗེན་ཅེར་དུ་སུས་ཀྱང་བསྟན་པར་མི་ནུས་པས་ན་གསང་བསྔགས་སུ་གནས་ལུགས་ཀྱི་ཡེ་ཤེས་ངོ་སྤྲོད་པའི་བརྡ་ཐབས་མན་ངག་དེ་ལ་ཚིག་དབང་རིན་པོ་ཆེ་ཞེས་བརྡ་ཐ་སྙད་ཀྱིས་གསུངས་ཏེ། རྡོ་རྗེའི་སྙིང་པོའི་རྒྱུད་ལ་སོགས་པ་ཟབ་པའི་རྒྱུད་སྡེ་རིན་པོ་ཆེ་རྣམས་སུ་ཡང་དབྱིངས་ཡེ་ཟུང་འཇུག་གཉིས་སུ་མེད་པའི་ཡེ་ཤེས་དེ་ཉིད་ཚིག་དང་བརྡ་ཐབས་སྣ་ཚོགས་ཀྱི་སྒོ་ནས་བསྟན་བར་མཛད་པ་ཡིན་ནོ། །དེའི་ཕྱིར་འཇིག་རྟེན་ལས་འདས་པའི་ཡེ་ཤེས་ཟབ་ཞི་སྤྲོས་པ་དང་བྲལ་བའི་ཟུང་འཇུག་འོད་གསལ་བ་དེ་ཉིད་དེ་ལྟར་བརྡ་ཐབས་དང་ཚིག་གཞན་ལ་མ་ལྟོས་པར་རང་གི་ངོ་བོ་འདིའོ་ཞེས་ལྗེན་ཅེར་དུ་གཉིས་སྣང་ཅན་གྱིས་བློ་གང་གིས་ཀྱང་དངོས་སུ་གཟུང་བར་ནུས་པ་མ་ཡིན་པས་ན་བདེན་གཉིས་དཔྱོད་པའི་ཚད་མ་ལམ་གྱི་དབུ་མ་ཉིད་བསྟན་པ་ཡིན་ལ། དེ་ལྟར་ལམ་གྱི་དབུ་མ་བདེན་གཉིས་རེས་འཇོག་གི་ཚུལ་གྱིས་དཔྱད་ཅིང་བསྒོམ་པའི་འབྲས་བུ་དངོས་གཞི་མཉམ་བཞག་གི་དབུ་མ་བདེན་གཉིས་དབྱེར་མེད་ཟུང་འཇུག་གི་ཡེ་ཤེས་མངོན་སུམ་ཉིད་དུ་གྲུབ་ཅིང་མཐོང་བར་ནུས་པ་དེས་ན་བདེན་པ་གཉིས་ཀྱི་གནས་ལུགས་སམ་ཡིན་ལུགས་ཚད་མ་གཉིས་ཀྱིས་གཏན་ལ་འབེབ་པའི་ཚེ་ན་སྣང་སྟོང་བདེན་པ་གཉིས་ལས་སྣང་བ་ཀུན་རྫོབ་དགག་བྱ་དང་སྟོང་པ་དོན་དམ་འགོག་བྱེད་ཀྱི་ཚུལ་དུ་བདེན་པ་གཉིས་རེས་འཇོག་ལྟ་བུར་བསྟན་པར་མཛད་པ་ཡིན་པ་དེ་ཡི་འབྲས་བུ་བདེན་གཉིས་དབྱེར་མེད་བསལ་བཞག་དང་བྲལ་བའི་ཟུང་འཇུག་གི་ཡེ་ཤེས་ཉིད་རྡོ་རྗེ་ཐེག་པའི་རྒྱུད་སྡེར་བདེ་བ་ཆེན་པོ། ཕྱག་རྒྱ་ཆེན་པོ། རྫོགས་པ་ཆེན་པོ་སོགས་པ་མཚན་གྱི་རྣམ་གྲངས་དང་བརྡ་ཐབས་དུ་མས་བསྟེན་པར་མཛད་དོ། །དེས་ན་གནས་ལུགས་གཏན་ལ་དབབ་པའི་དབུ་མའི་གཞུང་ལུགས་མང་པོ་དང་། བསྟན་བཅོས་ཇི་སྙེད་པ་ཐམས་ཅད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀུན་རྫོབ་དང་དོན་དམ་པའི་བདེན་པ་གཉིས་ཀྱི་ཚུལ་གྱིས་གཏན་ལ་ཕར་ཅིང་རྣམ་པར་བཞག་པར་མཛད་པ་ཡིན་ཏེ། འདི་ལྟར་སྣང་སྟོང་སོགས་བདེན་པ་གཉིས་དཔྱོད་པའི་ཚད་མ་གཉིས་ལ་ཡང་དག་པར་མ་བརྟེན་པར་བདེན་གཉིས་དབྱེར་མེད་ཟུང་དུ་འཇུག་པའི་ཡེ་ཤེས་ཉིད་ཇི་ལྟ་བ་བཞིན་དུ་ཁོང་དུ་ཆུད་པར་མི་འགྱུར་ཏེ་མི་རྟོགས་པས་ན། ཀུན་མཁྱེན་རྒྱལ་བས་ཆོས་ཀྱི་སྒོ་གང་ཇི་སྙེད་ཅིག་གསུངས་པ་ཡང་འཇིག་རྟེན་ཀུན་རྫོབ་ཀྱི་བདེན་པ་དང་དམ་པའི་དོན་གྱི་བདེན་པ་སྟེ་བདེན་པ་དེ་གཉིས་པོ་ལ་ཡང་དག་པར་བརྟེན་པ་ཁོ་ན་ཡིན་ནོ། །དེ་ཡི་ཕྱིར་ན་བདེན་པ་གཉིས་སོ་སོ་རུ་དཔྱད་པ་ཡི་ཚད་མ་ཡོད་མེད་ཀྱི་ཁས་ལེན་དང་བཅས་པ་དེ་ལ་ལམ་གྱི་དབུ་མ་ཞེས་བརྗོད་དེ། འབྲས་བུའི་དབུ་མ་མཉམ་བཞག་ཡེ་ཤེས་ཀྱི་མིང་རྒྱུ་ཉིད་ལ་བརྟགས་པ་ཡིས་བདེན་གཉིས་རེས་འཇོག་རྒྱུའམ་ལམ་གྱི་དབུ་མ་ཆུང་ངུ་ཞེས་བརྗོད་པ་ཡིན་ནོ། །དེ་ལ་ཡང་ཐ་སྙད་ཀུན་རྫོབ་ཏུ་ཡོད་ཅེས་པའི་ཁས་ལེན་ཡོད་པར་མ་ཟད། དོན་དམ་དུ་ཡང་དོན་པ་ཉིད་ན་ཕུང་པོ་ཁམས་དང་སྐྱེ་མཆེད་ལ་སོགས་པ་དོན་དམ་དཔྱོད་བྱེད་ཀྱིས་རྣམ་པར་དཔྱད་པའི་སྟོང་པ་ཉིད་དགག་བྱ་བདེན་གྲུབ་སེལ་བའམ་བཅད་པའི་མེད་པར་དགག་པ་རྐྱང་བ་ཙམ་ཉིད་ཡིན་པས་དགག་བྱ་དེ་ལ་ལྟོས་ནས་བདེན་གྲུབ་བམ་དོན་དམ་པར་མེད་ཅེས་པའི་ཁས་ལེན་ཀྱང་ནི་ངེས་པར་ཡོད་པ་ཡིན་ནོ། །བཞི་པ་རྒྱུའམ་ལམ་གྱི་དབུ་མའི་ཁས་ལེན་དེ་ཡང་དོན་དམ་རང་ལུགས་སུ་བྱས་ནས་ཀུན་རྫོབ་གཞན་ངོར་སྐྱེལ་ནས་ལུང་རིགས་ཀྱིས་གནོད་ཚུལ་བསྟན་པ་ནི། རྒྱུའམ་ལམ་གྱི་སོགས་ཚིགས་བཅད་དྲུག་གིས་བསྟན་ཏེ། དེ་ལྟར་རྒྱུའམ་ལམ་གྱི་དབུ་མ་དེས་བདེན་གཉིས་སོ་སོར་དཔྱད་པའི་ཚད་མས་དངོས་པོ་རྣམས་དོན་དམ་པར་སྟོང་པའམ་མེད་དོ་ཞེས་པ་དང་། ཐ་སྙད་ཀུན་རྫོབ་ཙམ་དུ་སྣང་བའམ་ཡོད་ཞེས་བདེན་པ་གཉིས་སོ་སོ་ལ་ལྟོས་ཏེ་ཇི་ལྟར་ཁས་བླང་པ་དེ་གཉིས་ཀའང་དབུ་མ་པ་དང་དེ་རང་གི་ལུགས་ཉིད་ཡིན་གྱི་གཞན་དུ་དོམ་དམ་པར་མེད་པའམ་སྟོང་པར་ཁས་ལེན་པ་རང་ལུགས་སུ་བྱས་ནས་ཀུན་རྫོབ་ཏུ་ཡོད་ཅེས་པའི་ཁས་ལེན་རྣམས་གཞན་འཇིག་རྟེན་རྒན་པོའི་ངོར་འཇོག་པའམ་སྐྱེལ་བ་འདི་འཐད་ཅིང་རིགས་པ་མིན་ཏེ། གལ་ཏེ་ཡིན་ན་དེ་འདྲའི་དབུ་མ་དེ་ཡི་རང་ལུགས་དེ་དོན་དམ་པ་སྟོང་པ་ཕྱང་ཆད་རྐྱང་རྐྱང་པོ་ཁོ་ན་རུ་གྱུར་ནས་ཀྱང་གཞི་ལམ་འབྲས་བུའི་སྣང་བ་ཀུན་རྫོབ་ཐམས་ཅད་ཀུན་མེད་པ་ལ་ཡོད་པར་འཛིན་པས་འཁྲུལ་བའི་སྣང་བ་སྤང་བྱ་ཁོ་ན་ཡིན་པས་མེད་དོ་ཞེས་གཞི་ལམ་འབྲས་བུའི་སྣང་བ་ཐམས་ཅད་ལ་སྐུར་བ་མི་བཟད་པ་འདེབས་ཤིང་དེ་འདྲའི་ལམ་དེ་མཐར་ཕྱིན་ཏེ་སངས་རྒྱས་པའི་ཚེ་སྒྲིབ་པ་ཐམས་ཅད་དང་བྲལ་བའི་དབྱིངས་དེ་ཡང་སྣང་སྟོང་ཡ་བྲལ་བས་སྟོང་པ་ཕྱང་ཆད་འབའ་ཞིག་ཙམ་ལྷག་མར་ལུས་པའམ་ཆད་སྟོང་ནམ་མཁའ་ལྟ་བུར་གྱུར་ནས་འབྲས་ཆོས་ཀྱི་ཡོན་ཏན་མཁྱེན་པ་གཉིས་སོགས་ཅི་ཡང་མེད་པར་འདོད་པ་ཁྱོད་ནི་ཐེག་དམན་པས་ཉན་རང་རང་ལམ་གྱིས་ཕུང་པོ་ལྷག་མ་མེད་པར་བུད་ཤིང་ཟད་པའི་མེ་བཞིན་དུ་ཅི་ཡང་མེད་པས་མྱང་འདས་སམ། མྱ་ངན་ལས་འདས་པར་འདོད་པ་ཇི་ལྟ་བ་བཞིན་དུ་དེ་འདྲའི་དབུ་མའི་རང་ལུགས་འདོད་པ་འདིར་ཡང་ཐེག་ཆེན་གྱི་མྱང་འདས་མངོན་པར་རྫོགས་པར་སངས་རྒྱས་ཀྱང་མཁྱེན་གཉིས་ཀྱི་ཡེ་ཤེས་སོགས་འབྲས་ཆོས་ཀྱི་ཡོན་ཏན་རྣམས་སྣུམ་ཟད་པས་མར་མེ་རྒྱུན་ཆད་པ་ལྟར་ཅི་ཡང་མེད་པར་འགྱུར་ན་ཐེག་དམན་པས་འདོད་པ་དང་དོན་ལ་ཁྱད་པར་རྡུལ་ཙམ་ཡང་མེད་པའི་ཕྱིར་ན་ཤིན་ཏུ་མི་འཐད་ཅིང་དེར་མ་ཟད་ཟུང་འཇུག་གི་དབྱིངས་སམ་སྣང་སྟོང་གཉིས་སུ་མེད་པའི་འབྲས་ཆོས་ཀྱི་ཡེ་ཤེས་མེད་པར་སྐུར་བ་ཤིན་ཏུ་མི་བཟད་པ་འདེབས་པས་ཆད་སྟོང་ནམ་མཁའ་དང་འདྲ་བའི་ཡིད་ཅན་ཁྱོད་ནི་མཉམ་མེད་ཤཱཀྱ་སེང་གེ་ཡི་བསྟན་པའི་སྙིང་པོ་སྣང་སྟོང་ཟུང་འཇུག་གི་རྐུན་པོ་ངེས་དོན་ཟབ་མོའི་དམ་པའི་ཆོས་འཇིག་པར་བྱེད་པའི་སྐྱེས་བུར་ཀུན་མཁྱེན་རྒྱལ་བས་མདོ་རྒྱུད་དུ་མ་ནས་གསལ་བར་གསུངས་པའི་ལུང་རྣམས་ཀྱིས་ཤིན་ཏུ་ཕམ་པར་བྱས་ཤིང་ཡང་དག་པའི་རིགས་པས་ཀྱང་ནི་སྟོང་བདེན་གཉིས་འགལ་བར་རྟོག་པས་སྣང་སྟོང་ཡ་བྲལ་བའི་སྟོང་པ་ཕྱང་ཆད་དེ་འདྲའི་རང་ལུགས་འདོད་པ་དག་ཐ་སྙད་ཡང་དག་པའི་ཚད་མའི་རྙེད་དོན་ཡོད་པ་ལ་མེད་པར་ཤིན་ཏུ་སྐུར་བའི་ཚུལ་ཅན་ཡིན་པར་བདེན་གཉིས་དཔྱོད་པའི་ཚད་མ་ཡང་དག་པའི་ལམ་གྱིས་ངེས་ཤེས་མི་ཤིག་པའི་རྡོ་རྗེའི་མེས་སྣང་སྟོང་ཡ་བྲལ་ཞིང་སྐུར་འདེབས་ཕྱང་ཆད་སྟོང་པའི་ལྟ་ངན་གྱི་རི་བོ་རྩ་སྤུར་བཞིན་དུ་བསྲེགས་ནས་ལྷག་མེད་དུ་བརླག་པར་ནུས་པས་ན་རིགས་པས་གནོད་པ་བཟློག་མེད་དུ་འབབ་པར་ཤེས་པར་བྱའོ། །གསུམ་པ་ཚུལ་དེས་མདོ་སྔགས་ཀྱི་ལམ་གནད་བསྟན་པ་ལ་གསུམ། མདོ་སྔགས་ཀྱི་ལམ་གནད་ཐུན་མོང་དུ་སྤྱིར་བསྟན་པ། མདོ་སྔགས་ཀྱི་ལམ་གནད་དང་ལྟ་བའི་ཁྱད་པར་བྱེ་བྲག་ཏུ་བསྟན་པ། ཚུལ་དེས་གཞན་ཡང་མཚོན་ཚུལ་བསྟན་པའོ། །དང་པོ་ལ་གསུམ། མདོར་བསྟན་པ། རྒྱས་པར་བཤད་པ། དོན་བསྡུ་བའོ། །དང་པོ། དེས་ན་དབུ་མའི་སོགས་ཚིགས་བཅད་བཞིས་བསྟན་ཏེ། དེས་ན་གནས་ལུགས་གཏན་ལ་དབབ་པའི་དབུ་མའི་གཞུང་བཀའ་དང་བསྟན་བཅོས་ཀུན་ཏུ་སྣང་སྟོང་བདེན་པ་གཉིས་ལ་སོ་སོར་དཔྱོད་པའི་ཚད་མས་དྲངས་པའི་ཤེས་རབ་རྒྱུ་ཡི་དབུ་མ་ཉིད་རིགས་པས་ཚུལ་བཞིན་དུ་དཔྱད་ཅིང་ཡང་དག་པར་མ་གྲུབ་པར་གྱུར་པ་དེ་སྲིད་དུ་ཟུང་འཇུག་འབྲས་བུའི་དབུ་མའམ་འབྲས་བུའི་མཉམ་བཞག་གི་ཡེ་ཤེས་བདེན་གཉིས་ཟུང་དུ་འཇུག་པ་ཉིད་མི་འགྲུབ་པའི་ཕྱིར་ན་རེ་ཞིག་དངོས་པོའི་ཆོས་ཐམས་ཅད་ཀྱི་གནས་ལུགས་སྣང་སྟོང་བདེན་པ་གཉིས་ཀྱི་ཚུལ་དུ་ནི་བདེན་གཉིས་དཔྱོད་པའི་རིགས་པ་ཡང་དག་པས་གཏན་ལ་ཕབ་པར་མཛད་ན་ཡང་འབྲས་བུ་གནས་ལུགས་བདེན་པ་དབྱེར་མེད་དམ་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་དུ་གྲུབ་ཅིང་རྟོགས་པ་ནི་རྒྱུ་དང་འབྲས་བུ་མདོ་སྔགས་ཀྱི་ཐེག་པའི་དགོངས་བཅུད་ཟབ་མོའི་གནད་དམ་པ་ཡིན་པར་ཤེས་པར་བྱའོ། །དེ་ཡི་ཕྱིར་ན་འཕགས་པའི་མཉམ་བཞག་ཟུང་འཇུག་གི་ཡེ་ཤེས་དེ་དང་རྗེས་སུ་མཐུན་པར་གཏན་ལ་དབབ་ཅིང་བསྒོམ་པ་དེ་དག་གིས་ནི་བདེན་གཉིས་རེས་འཇོག་གི་བསྒོམ་པའི་ཚུལ་གྱིས་མཐའ་གཉིས་རིམ་གྱིས་སྤང་བའི་ཚུལ་གྱིས་མཐའ་གང་ལ་ཡང་མི་གནས་པས་བློ་ལས་འདས་པའི་ཟུང་འཇུག་གི་ཡེ་ཤེས་སུ་ལ་ཟློ་བའི་ཕྱིར་ན་དབུ་མ་ཡིན་ལ་ཆེན་པོའང་ཡིན་ནོ། །དེ་ལྟ་ན་ཇི་སྲིད་རེས་འཇོག་གི་བདེན་གཉིས་བསྒོམ་པའི་ཚུལ་གྱིས་ནི་ནམ་ཞིག་རེས་འཇོག་དང་བྲལ་བའི་ཟུང་འཇུག་གི་ཡེ་ཤེས་དེ་ལ་དངོས་སུ་མ་རེག་པར་དེ་སྲིད་དུ་རྒྱལ་བ་ཀུན་གྱི་དགོངས་པའི་བཅུད་དམ་མཐིལ་མཐར་ཐུག་པའི་ཟུང་འཇུག་གཉིས་སུ་མེད་པའི་ཡེ་ཤེས་དབུ་མ་ཆེན་པོ་རང་མིན་ནོ། །གཉིས་པ། གཙུབས་ཤིང་གཙུབས་པའི་སོགས་ཚིགས་བཅད་བཅུ་བཞི་དང་རྐང་པ་གཅིག་གིས་བསྟན་ཏེ། དཔེར་ན་གཙུབས་ཤིང་དང་གཙུབས་བརྟེན་གྱི་ཤིང་གཉིས་ཡ་མ་བྲལ་བར་གཙུབས་པའི་སྟོབས་ལས་བྱུང་བའི་མེ་ཡིས་རང་གང་ལས་བྱུང་བའི་ཤིང་གཉིས་ཀྱང་ལྷག་མེད་དུ་བསྲེག་པ་བཞིན་དུ་སྣང་སྟོང་བདེན་གཉིས་སོ་སོར་དཔྱོད་པའི་ཚད་མ་གཉིས་ཀྱི་ཤེས་རབ་དྲི་མ་མེད་པ་ཟུང་དུ་ཚོགས་པའི་སྟོབས་ཀྱིས་བྱུང་བའམ་དྲངས་པ་ཡི་བདེན་གཉིས་སམ་སྣང་སྟོང་གཉིས་སུ་མེད་པར་ཟུང་དུ་འཇུག་པའི་ཡེ་ཤེས་ཀྱིས་མེས་ཡོད་པ་དང་མེད་པ་ཡིན་པ་དང་མིན་པ་ལ་སོགས་པ་མཐའ་བཞིའི་སྤྲོས་པ་གཉིས་སྣང་གི་རྒྱུ་བ་མཐའ་དག་མ་ལུས་པ་ཀུན་ཉེ་བར་ཞི་བའི་འཕགས་པའི་མཉམ་བཞག་ཡུལ་དང་ཡུལ་ཅན་གཉིས་སུ་མེད་པའི་ཡེ་ཤེས་ཉིད་ལ་བདེན་གཉིས་ཟུང་འཇུག་ཆེན་པོ་འབྲས་བུའི་དབུ་མར་ཞེས་ཐ་སྙད་དུ་བརྗོད་ཅེས་བཞག་པ་ཡིན་ལ་དེ་འདྲའི་བདེན་པ་གཉིས་སྣང་སྟོང་སོ་སོའི་ཕྱོགས་སུ་མ་ལྷུང་ཟུང་འཇུག་གཉིས་སུ་མེད་པའི་ཡེ་ཤེས་དེ་ལ་རྗེས་ཐོབ་ཤན་འབྱེད་པའི་ཤེས་རབ་ཀྱིས་བདེན་གཉིས་སམ་ཐབས་ཤེས་སམ་དབྱིངས་ཡེའམ། སྣང་སྟོང་ཟུང་དུ་འཇུག་པ་ཞེས་མིང་ངམ་བརྡ་ཙམ་གྱིས་སྒོ་ནས་ཐ་སྙད་དུ་རྣམ་པར་བཞག་ཅིང་བསྟན་མོད་ཀྱི་དངོས་སུ་ན་སྒྲ་རྟོག་གི་ཡུལ་ལས་འདས་པའི་འཕགས་པའི་མཉམ་བཞག་གཉིས་སུ་མེད་པའི་ཟུང་འཇུག་ཡེ་ཤེས་ཆེན་པོའི་ངོར་སྣང་བ་དང་སྟོང་བ་དང་ཟུང་འཇུག་གི་ངོ་བོ་ནི་འདི་དང་འདི་ཞེས་སོ་སོར་ཅི་ཡང་དམིགས་སུ་ཡོད་པ་མ་ཡིན་ཏེ་སྣང་བ་ཀུན་རྫོབ་ཐ་སྙད་དཔྱོད་པའི་ཚད་མའི་ཡུལ་ལམ་རྙེད་དོན་དང་། སྟོང་པ་དོན་དམ་དཔྱོད་པའི་ཚད་མའི་ཡུལ་ལམ་རྙེད་དོན་དང་། ཟུང་འཇུག་སྣང་སྟོང་དེ་གཉིས་རྣམ་དབྱེར་མེད་པས་འདྲེས་པའི་ཆ་ཡིན་ལ། དེ་རྣམས་ནི་གཞན་སེལ་གྱི་སྒྲ་དང་རྟོག་པའི་ཡུལ་ཉིད་ཡིན་པའི་ཕྱིར་རོ། །དེ་ཡི་ཕྱིར་ན་སྒྲ་རྟོག་གི་ཐ་སྙད་དེ་དག་ལས་འདས་པའི་འཕགས་པའི་མཉམ་གཞག་དངོས་ནི་སོ་སོ་རང་གི་རིག་པ་གཉིས་སུ་མེད་པའི་ཡེ་ཤེས་ཙམ་ཉིད་ལས་མཉམ་བཞག་སྣང་བཅས་དང་སྣང་མེད་ལ་སོགས་པའི་ཐ་སྙད་ཐམས་ཅད་ཀྱང་སྣང་སྟོང་སོ་སོའི་ཕྱོགས་སུ་ཆད་ཅིང་སྒྲ་རྟོག་གི་ཡུལ་ཡིན་པའི་ཕྱིར་ན་གང་དུ་ཇི་སྐད་བསྟན་པ་དེ་བཞིན་དུ་འཕགས་པའི་མཉམ་བཞག་གི་ཡེ་ཤེས་ཆེན་པོའི་ངོར་རིགས་པས་ཡང་དག་པར་མི་འགྲུབ་བོ་སྟེ་འགྲུབ་པར་མི་འགྱུར་རོ། །དེས་ན་ཇི་སྲིད་སྣང་སྟོང་སོ་སོར་སྣང་བ་དང་བཅས་པའི་རེས་འཇོག་གི་བདེན་པ་གཉིས་ཡང་དག་པར་བསྒོམ་པ་ནི་གཉིས་སྣང་ཅན་སེམས་བྱུང་ཤེས་རབ་སྟེ་ནམ་ཞིག་ན་རེས་འཇོག་གི་བདེན་པ་གཉིས་བསྒོམ་པ་མེད་པར་ཡང་འཕགས་པའི་མཉམ་བཞག་ཟུང་འཇུག་གཉིས་སུ་མེད་པའི་ཡེ་ཤེས་མངོན་སུམ་དུ་མཐོང་བའམ་ཐོབ་པའི་ཚེ་ན་ཕུང་པོ་དང་ཁམས་ལ་སོགས་པའི་དགག་བྱ་རྣམས་དོན་དམ་རྣམ་པར་དཔྱད་པའི་ཚད་མ་རྣམས་ཀྱིས་རང་བཞིན་མེད་པར་བཅད་པའམ་གཏན་ཕབ་པའི་མེད་དགག་སྣང་བ་སྤང་བའི་སྟོང་རྐྱང་ཆུ་ཤིང་ལྟ་བུ་སྙིང་པོ་མེད་ལས་ཡང་དག་པར་འདས་ཏེ་སྟོང་པ་འགོག་བྱེད་དང་སྣང་བ་དགག་བྱ་ཡི་ཚུལ་དུ་སྣང་སྟོང་གཉིས་རིས་ཆད་དུ་སོ་སོར་མི་སྣང་བར་གཉིས་སྣང་ཐམས་ཅད་ནུབ་ན་ཡང་སྣང་ཆ་འགགས་པ་མེད་པའི་ཐབས་ཀྱི་རྣམ་པ་ཀུན་དང་ལྡན་པ་ཡི་རྣམ་པ་ཀུན་གྱི་མཆོག་ལྡན་གྱི་སྟོང་ཉིད་སྤྲོས་བྲལ་ཆེན་པོ་ཞེས་དང་། སྤྲོས་བྲལ་དབུ་མ་ཆེན་པོ་ཞེས་དང་། བདེན་གཉིས་དབྱེར་མེད་དམ་ཟུང་འཇུག་ཞེས་དང་། སྣང་སྟོང་ཟུང་འཇུག་དང་། ཤེས་རབ་ཀྱི་ཕ་རོལ་དུ་ཕྱིན་པ་དང་། ལྷན་སྐྱེས་ཕྱག་རྒྱ་ཆེན་པོ་དང་། འོད་གསལ་རྫོགས་པ་ཆེན་པོ་སོགས་མཚོན་བྱེད་བརྡའམ་མཚན་གྱི་རྣམ་གྲངས་མང་པོ་མངའ་བ་ཡི་ཟུང་འཇུག་གཉིས་སུ་མེད་པའི་གནས་ལུགས་དེ་སེམས་དང་སེམས་བྱུང་ལས་འདས་པའི་གཉིས་སུ་མེད་པའི་ཡེ་ཤེས་ཡིན་པའི་ཕྱིར་ན་གཟུང་འཛིན་གཉིས་སྣང་ཅན་གྱི་སེམས་སམ་རྟོགས་པ་གཞན་རྣམས་ཀྱིས་ཏེ་རྟོག་པ་གང་གིས་ཀྱང་བསམ་གྱིས་མི་ཁྱབ་པ་སྟེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན་ཞེས་གསུངས་པ་ལྟ་བུའོ། །བསམ་གྱིས་མི་ཁྱབ་པའི་ཡེ་ཤེས་དེ་ནི་སྒྲ་དང་རྟོག་པ་གང་གི་ཡུལ་མིན་པའི་ཕྱིར་མེད་དགག་སྣང་བ་སྤང་བའི་སྟོང་པ་ཕྱང་ཆད་དང་མ་ཡིན་དགག་རང་གི་ངོ་བོས་མི་སྟོང་པའི་སྣང་བ་རྟག་པ་དང་། སྣང་སྟོང་སོ་སོ་བ་བློས་ཟུང་དུ་སྦྱར་བའི་ཐ་གུ་དཀར་ནག་བསྒྲིལ་བ་ལྟ་བུའི་ཟུང་འཇུག་ལ་སོགས་པ་དང་གཅིག་དང་ཐ་དད་པ་དང་ནི། སྣང་བ་དང་སྟོང་པ་ལ་སོགས་གང་གི་ཕྱོགས་སུ་ལྟུང་བའམ་རིས་སུ་ཆད་པ་མེད་པ་སྟེ། རྒྱ་གང་དུ་མ་ཆད་ཕྱོགས་གང་དུའང་མ་ལྷུང་བས་སྤྲོས་པ་ཐམས་ཅད་དང་བྲལ་བ་གཉིས་སུ་མེད་པའི་ཡེ་ཤེས་རང་བཞིན་གྱིས་འོད་གསལ་བས་ན་མ་སྐྱེས་མི་འགག་ནམ་མཁའི་ངོ་བོ་ཉིད། ཅེས་གསུངས་པ་ལྟ་བུའོ། །དེ་ནི་ཁས་ལེན་ཡོད་མེད་དམ་ཡོད་མེད་སྣང་སྟོང་ལ་སོགས་པའི་ཁས་ལེན་ཐམས་ཅད་ལས་འདས་ཀྱང་ཅི་ཡང་དྲན་མེད་ཐོམ་མེ་བ་གཉིད་ཐུག་དང་བརྒྱལ་བ་ལ་སོགས་པ་ལྟ་བུ་མ་ཡིན་པར་མཐར་འཛིན་གྱི་ལྟ་བ་ངན་པའི་སྨག་ཐམས་ཅད་སེལ་ནུས་པའི་ཆོས་ཀྱི་དབྱིངས་ཨེ་ཝཾ་སྟེ་སྟོང་པའི་ཡེ་ཤེས་དབྱིངས་དང་གསལ་བའི་ཡེ་ཤེས་བདེ་བ་ཆེན་པོ་གཉིས་འདུ་འབྲལ་མེད་པས་དབྱེར་མེད་ཟུང་དུ་ཞུགས་པ་ཡི་རང་བྱུང་གི་ཡེ་ཤེས་རྣལ་འབྱོར་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱིས་མཐོང་བ་མེད་པའི་ཚུལ་གྱིས་མཐོང་ཞིང་གནས་པ་མེད་པའི་ཚུལ་གྱིས་གནས་ཤིང་སྣང་བ་མེད་པའི་ཚུལ་གྱིས་སྣང་བ་སྟེ། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་གསུངས་པ་ལྟ་བུའོ། །དེ་ལྟར་ན་ཡོད་མེད་ཡིན་མིན་སྟོང་དང་མི་སྟོང་ལ་སོགས་པའི་ཁས་ལེན་ཐམས་ཅད་ལས་འདས་པའི་གནས་ལུགས་སྣང་སྟོང་གཉིས་སུ་མེད་པའི་ཆོས་ཀྱི་དབྱིངས་ཉིད་རང་གི་ངོ་བོས་མི་སྟོང་བར་སྒྲོ་འདོགས་པ་དང་དབྱིངས་དང་གཉིས་སུ་མེད་པའི་འོད་གསལ་བའི་ཡེ་ཤེས་ཀྱི་སྣང་བ་ཉིད་མེད་པར་སྐུར་པ་འདེབས་པ་ཐམས་ཅད་དང་བྲལ་བའི་གནས་ལུགས་དམ་པའི་དོན་ཟུང་འཇུག་གཉིས་སུ་མེད་པའི་འོད་གསལ་བའི་ཡེ་ཤེས་ཀྱི་སྣང་བ་ཉིད་མེད་པར་སྐུར་པ་འདེབས་པ་ཐམས་ཅད་དང་བྲལ་བའི་གནས་ལུགས་དམ་པའི་དོན་ཟུང་འཇུག་གཉིས་སུ་མེད་པའི་ཡེ་ཤེས་དབྱིངས་དང་རིག་པའམ་དབྱིངས་དང་ཡེ་ཤེས་ཡེ་ནས་འདུ་འབྲལ་མེད་པའི་གནས་ཚུལ་ཟབ་མོ་དེ་ཁོ་ན་ཉིད་རང་གི་ངོ་བོ་ནི་ལྗེན་ཅེར་དུ་འདི་ཞེས་རྟགས་གཏན་ཚིགས་དཔེ་དང་སྒྲ་རྟོག་གང་གིས་མཚོན་ཞིང་བརྗོད་དུ་མེད་པས་ཤིན་ཏུ་སྨྲ་བསམ་བརྗོད་པ་ལས་འདས་པར་འདོད་པའོ། །དེ་ལྟ་ནའང་འོན་ཀྱང་ཕྱི་རོལ་པའི་འདོད་པའི་བསམ་མིན་གྱི་བྱེད་པོ་ལྟར་གང་ཟག་སུ་ཡིས་ཀྱང་རྟོགས་སུ་མེད་པ་ཉིད་ནི་མ་ཡིན་ཏེ། འདི་ལྟར་དྲི་མ་མེད་པའི་ལུང་གི་སྣང་བ་ལ་བརྟེན་ཏེ། རིགས་པ་དྲི་མ་མེད་པས་དཔྱད་པ་ཡིས་རབ་ཏུ་དྲངས་པའི་འཕགས་པའི་མཉམ་བཞག་ཟུང་འཇུག་གཉིས་སུ་མེད་པའི་ངོ་བོ་རྣལ་འབྱོར་པ་རྣམས་ཀྱི་སོ་སོར་རང་རིག་པའི་ཡེ་ཤེས་ཀྱི་རྗེས་ལས་ཐོབ་པའི་དག་པའི་ཡེ་ཤེས་ཀྱིས་ངེས་པའི་ཤེས་པ་ཆོས་ཀྱི་དབྱིངས་སྣང་སྟོང་འདུ་འབྲལ་མེད་པས་བསལ་བཞག་མེད་པའི་གནས་ལུགས་ཉིད་ཇི་ལྟ་བར་གསལ་བར་བྱེད་པའི་མར་མེ་ནི་ཐེ་ཚོམ་གྱི་སྨག་ཐམས་ཅད་དང་བྲལ་བ་དག་རྣལ་འབྱོར་པ་རྣམས་ལ་མངོན་སུམ་དུ་སྣང་བ་ཉིད་ཡོད་པའི་ཕྱིར་རོ། །གསུམ་པ་ནི། མདོ་ལམ་ཐབས་དང་སོགས་ཚིགས་བཅད་གསུམ་གྱིས་བསྟན་ཏེ། མདོ་ལམ་ནས་ཐབས་སྣང་བའི་ཆ་དང་ཤེས་རབ་སྟོང་པའི་ཆ་གཉིས་ཕན་ཚུན་གཅིག་ལ་གཅིག་གི་རྩིས་ཟིན་པའི་རྒྱས་གདབ་པས་འདུ་འབྲལ་མེད་པར་བྱེད་ཀྱི་རྡོ་རྗེའི་ཐེག་པ་སྔགས་ཀྱི་ལམ་ཟབ་མོ་འདིར་ནི་ཐབས་སྣང་བ་དང་ཤེས་རབ་སྟོང་པ་ཉིད་གཉིས་ཡེ་ནས་འདུ་འབྲལ་མེད་པར་མངོན་སུམ་མྱོང་བས་རྟོགས་ཤིང་གོམས་པར་བྱེད་པའི་ཁྱད་པར་ཙམ་ཉིད་ལས་དོན་རང་གི་ངོ་བོ་སྣང་སྟོང་ཟུང་དུ་ཞུགས་པའི་སྤྲོས་བྲལ་དབུ་མ་ཆེན་པོ་དང་དབྱིངས་ཡེ་གཉིས་སུ་མེད་པའི་འོད་གསལ་རྫོགས་པ་ཆེན་པོ་གཉིས་ཟུང་འཇུག་གཉིས་སུ་མེད་པའི་ཡེ་ཤེས་སུ་དོན་གཅིག་ལ་མཚོན་བྱེད་ཀྱི་མཚན་ནམ་མིང་གི་རྣམ་གྲངས་ཙམ་ཡིན་ཏེ། དེ་ལས་ལྷག་པའམ་མཆོག་ཏུ་འཕགས་པའི་ལྟ་བ་གཞན་མེད་དེ་གང་གི་ཕྱིར་ན་སྣང་སྟོང་བདེན་གཉིས་རེས་འཇོག་ཏུ་ཡོད་པ་དང་མེད་པ་དང་གཉིས་ཀ་དང་གཉིས་མིན་ལ་སོགས་པའི་འཛིན་སྟོངས་ཅི་ཡང་མེད་པས་མཐའ་བཞིའི་སྤྲོས་པ་ཀུན་དང་བྲལ་བའི་ཕྱིར་ཏེ་འཛིན་སྟངས་ཀུན་དང་བྲལ་བ་དེ་ལས་གཞན་དུ་གྱུར་པའི་ལྟ་བ་ཞིག་གལ་ཏེ་ཡོད་པར་གྱུར་ན་དེ་ཉིད་འཛིན་སྟང་གི་སྤྲོས་པ་དང་བཅས་པ་ཉིད་དུ་འགྱུར་བའི་ཕྱིར་རོ། །གཉིས་པ། མདོ་སྔགས་ཀྱི་ལམ་གནད་དང་ལྟ་བའི་ཁྱད་པར་བྱེ་བྲག་ཏུ་བསྟན་པ་ནི། འོན་ཀྱང་མདོ་ལས་སོགས་ཚིགས་བཅད་ཕྱེད་དང་ལྔས་བསྟན་ཏེ། དེ་ལྟར་ན་མདོ་སྔགས་ཀྱི་ལྟ་བ་ཉིད་ཆོས་ཀྱི་དབྱིངས་སྣང་སྟོང་ཟུང་འཇུག་སྤྲོས་པ་དང་བྲལ་བར་དོན་གཅིག་ནའང་། འོན་ཀྱང་མདོ་ལས་བདེན་གཉིས་སམ་སྣང་སྟོང་ངམ་ཐབས་ཤེས་ཟུང་དུ་འཇུག་པའི་ཡེ་ཤེས་ཀྱི་དོན་གང་ཞིག་བདེན་གཉིས་དཔྱོད་པའི་གཏན་ཚིགས་ཀྱིས་དཔྱད་པས་རྗེས་དཔག་གིས་གཏན་ལ་ཕབ་ཅིང་བསྒོམ་པ་ཉིད་རྡོ་རྗེའི་ཐེག་མཆོག་གསང་བ་བླ་ན་མེད་པའི་སྔགས་ལུགས་སུ་རྣལ་འབྱོར་པ་རྣམས་ཀྱིས་སོ་སོ་རང་རང་གི་རིགས་པའི་ཡེ་ཤེས་ཀྱི་དབྱིངས་སུ་འདུ་འབྲལ་མེད་པའི་ཟུང་འཇུག་གི་ཡེ་ཤེས་ཉིད་ཐད་ཀར། སྐད་ཅིག་གིས་བཙན་ཐབས་སུ་ཉམས་སུ་མྱོང་བས་མངོན་སུམ་གྱིས་གྲུབ་པ་ཡིན་པས་ཆེས་ཟབ་ཅིང་ཁྱད་པར་དུ་འཕགས་པ་ཉིད་ཡིན་ནོ། །དོན་དེ་ཡི་ཕྱིར་ན་ཡང་སྣང་སྟོང་བདེན་གཉིས་ཟུང་དུ་འཇུག་པའི་དབུ་མ་ཞེས་པ་འདི་ལ་ཡང་བདེན་གཉིས་སོ་སོར་དཔྱོད་པ་ཡི་ཚད་མ་སེམས་བྱུང་ཤེས་རབ་རྒྱུའམ་ལམ་གྱི་དབུ་མ་དང་། ཚད་མ་གཉིས་པོ་དེས་དྲངས་པ་ཡི་སྣང་སྟོང་བདེན་པ་གཉིས་རྣམ་དབྱེར་མེད་པར་རོ་གཅིག་པའི་དངོས་གཞི་འཕགས་པའི་མཉམ་བཞག་གི་ཡེ་ཤེས་ཟུང་འཇུག་འབྲས་བུའི་དབུ་མ་དང་གཉིས་པོ་ཡང་རིམ་པར་རྒྱུ་དང་འབྲས་བུའམ་རྣམ་ཤེས་དང་ཡེ་ཤེས་ཀྱི་གནས་སྐབས་ཡིན་ལ། དེ་བཞིན་དུ་མདོ་དང་སྔགས་ཀྱི་ལྟ་བ་སྟེ་ཞེས། མདོ་སྔགས་ཀྱི་ལྟ་བའི་ཁྱད་པར་ཡང་རྗེས་དཔག་དང་མངོན་སུམ་མམ་རྣམ་ཤེས་དང་ཡེ་ཤེས་ཀྱི་གནས་སྐབས་སམ་རྒྱུ་དང་འབྲས་བུའི་ཚུལ་གྱིས་སྔ་མ་ལས་ཕྱི་མ་གོང་ནས་གོང་དུ་ཁྱད་པར་འཕགས་པ་སྟེ། སྔ་མ་གཉིས་སྣང་ཅན་སེམས་བྱུང་ཤེས་རབ་ཀྱི་ཆ་ཡིན་ལ་ཕྱི་མ་སེམས་ལས་འདས་པའི་ཟུང་འཇུག་གཉིས་སུ་མེད་པའི་ཡེ་ཤེས་ཁོ་ན་ཡིན་པས་སོ། །དེ་ཡི་ཕྱིར་ན་ཕྱི་མ་འདི་ལ་ནི་སྟོང་ཉིད་སྤྲོས་བྲལ་ཆེན་པོ་དང་། ལྷན་སྐྱེས་ཕྱག་རྒྱ་ཆེན་པོ་དང་། འོད་གསལ་རྫོགས་པ་ཆེན་པོ་སོགས་ཆེན་པོའི་སྒྲ་ཡིས་སྔ་མ་ལས་ཁྱད་པར་དུ་འཕགས་པར་བསྔགས་ཤིང་བསྟན་པར་མཛད་པ་ཡིན་ནོ། །གསུམ་པ་ཚུལ་དེས་གཞན་ཡང་མཚོན་པའི་ཚུལ་བསྟན་པ་ནི། གནས་ལུགས་ལ་ཡང་ཚིགས་བཅད་གསུམ་གྱིས་བསྟན་ཏེ། དེ་ཕྱིར་མདོ་རྒྱུད་བསྟན་བཅོས་ལས་གནས་ལུགས་ཞེས་གང་ཇི་སྙེད་ཅིག་གསུངས་པ་ལ་ཡང་གོང་དུ་དབུ་མ་ལ་ཡང་གཉིས་སུ་དབྱེ་བར་བྱས་པ་དེ་བཞིན་དུ་ཕུང་ཁམས་སྐྱེ་མཆེད་ཀྱིས་བསྡུས་པའི་སྣང་བའི་དངོས་པོ་ཀུན་སྟོང་པའི་གནས་ལུགས་མེད་དགག་དང་། སྣང་སྟོང་བདེན་གཉིས་དབྱེར་མེད་པའི་གནས་ལུགས་ཟུང་འཇུག་གི་ཡེ་ཤེས་གཉིས་ལ་གནས་ལུགས་ཞེས་བརྗོད་བྱེད་ཀྱི་མིང་གཅིག་ཡིན་ན་ཡང་བརྗོད་བྱའི་དོན་ལ་ནི་ངོ་བོ་སྟོང་པའི་དབྱིངས་དང་ཡེ་ནས་འདུ་འབྲལ་མེད་པའི་རང་བཞིན་གསལ་བའི་སྣང་བ་ཉིད་སྤང་བའི་སྟོང་པ་ཕྱང་ཆད་དང་། མ་སྤང་བའི་སྣང་སྟོང་ཟུང་འཇུག་གི་ཁྱད་པར་གནམ་དང་ས་ཡི་མཐོ་དམན་བཞིན་དུ་མཆིས་ཤིང་ཡོད་པ་ཉིད་ཡིན་ནོ། །དེ་བཞིན་དུ་ཆོས་ཉིད་དེ་བཞིན་ཉིད་ཅེས་པ་ལ་ཡང་དངོས་པོ་སྟོང་པའི་ཆོས་ཉིད་མེད་དགག་དང་། བདེན་གཉིས་དབྱེར་མེད་པའི་ཆོས་ཉིད་ཟུང་འཇུག་གི་ཡེ་ཤེས་གཉིས་དང་། ཆོས་ཀྱི་དབྱིངས་ཞེས་པ་ལའང་དངོས་པོ་སྟོང་པའི་མེད་དགག་དང་བདེན་གཉིས་དབྱེར་མེད་པའི་ཟུང་འཇུག་གི་ཆོས་དབྱིངས་གཉིས་དང་། སྟོང་ཉིད་ལའང་སྟོང་ཉིད་མེད་དགག་དང་སྟོང་ཉིད་ཟུང་འཇུག་གཉིས་དང་། སྤྲོས་བྲལ་ལའང་སྟོང་པ་ཕྱང་ཆད་དམ་སྟོང་རྐྱང་སྤྲོས་བྲལ་དང་། བདེན་གཉིས་དབྱེར་མེད་དམ་སྣང་སྟོང་ཟུང་འཇུག་གི་སྤྲོས་བྲལ་གཉིས་དང་། འགོག་པའི་མཐའ་ལའང་མེད་དགག་སྟོང་རྐྱང་དང་། སྣང་སྟོང་ཟུང་འཇུག་གི་འགོག་པ་གཉིས་དང་། དོན་དམ་ལའང་མེད་དགག་རྣམ་གྲངས་པ་དང་། ཟུང་འཇུག་རྣམ་གྲངས་མ་ཡིན་པའི་དོན་དམ་གཉིས་དང་། སོགས་པའི་སྒྲས་མྱང་འདས་དང་། འདུས་མ་བྱས་དང་། ངོ་བོ་ཉིད་སྐུ་དང་། ཆོས་དབྱིངས་ཡེ་ཤེས་སོགས་ལའང་མེད་དགག་སྟོང་རྐྱང་གི་དང་། སྣང་སྟོང་ཟུང་འཇུག་གི་སྟེ་གཉིས་རེ་གཉིས་རེ་ཡོད་ཀྱང་རྗོད་བྱེད་ཀྱི་མིང་དམ་སྒྲ་གཅིག་ཉིད་མཚུངས་པར་འཇུག་ཀྱང་བརྗོད་བྱའི་དོན་ལ་མེད་དགག་སྟོང་རྐྱང་དང་སྣང་སྟོང་ཟུང་འཇུག་གི་ཁྱད་པར་རམ་མཐར་ཐུག་པ་དང་ནི་ཉི་ཚེ་བའི་ཁྱད་པར་གནམ་སའི་མཐོ་དམན་བཞིན་དུ་ཤིན་ཏུ་ཆེ་བའི་ཕྱིར་ན་རྒྱུ་དང་འབྲས་བུའམ། རགས་པ་དང་ཕྲ་བའམ། རྗེས་ཐོབ་དང་མཉམ་བཞག་གམ། རྣམ་ཤེས་དང་ཡེ་ཤེས་ཀྱི་སྤྱོད་ཡུལ་གྱི་སྐབས་སོ་སོར་ཕྱེ་ནས་ལུང་རིགས་དྲི་མ་མེད་པའི་སྒོ་ནས་མ་ནོར་མ་འཁྲུལ་བར་ལེགས་པར་བཤད་པར་བྱ་སྟེ། དཔེར་ན་སིནྡྷ་པ་ཡི་སྒྲ་གནས་སྐབས་སོ་སོ་ལ་ལྟོས་ནས་འཇུག་པས་དེ་ལྟར་གོ་དགོས་སོ། །དཔེར་ན་སིནྡྷ་པ་འོན་ཅིག་ཅེས་པ་ཡང་དམག་ལ་འགྲོ་ཚེ་ཤིང་རྟ་དང་། ཆུ་ལ་བརྒལ་ཚེ་གྲུ་ལ་འཇུག་ཅིང་གོ་དགོས་པ་ལ་སོགས་པ་བཞིན་ནོ། །མཉམ་རྗེས་ཤན་མ་འབྱེད་པའི་ཁས་ལེན་གྱི། སོ་མ་ཉིའི་དྲྭ་བར་འཕྱན་པའི་རྨོངས་པའི་སྨག །དཔྱིས་འབྱིན་ཡེ་ཤེས་ཉི་མ་ལམ་མེ་བ། རྡོ་རྗེའི་རིག་སྔགས་མཆོག་འདི་ཨེ་མ་ཧོ། ཞེས་བར་སྐབས་ཀྱི་ཚིགས་སུ་བཅད་པའོ། །གསུམ་པ་ཡི་རངས་ཤིང་བསྡུས་ཏེ་གདམས་པ་ལ་གསུམ། ཡི་རངས་ཤིང་གུས་པས་བསྟོད་ཅིང་ངོ་མཚར་ཆོས་ཀྱི་སྒྲོན་མེ་གཞན་ལ་གསལ་བར་མཛད་པར་བསྐུལ་ཞིང་གསོལ་བ་གདབ་པ། ཆོས་མཆོག་འཛིན་ཅིང་ཤོད་པའི་སྣོད་བསྟན་པ། བསྡུས་ཏེ་སྙིང་པོའི་གདམས་པ་དངོས་སོ། །དང་པོ། དེ་ལྟར་ཟབ་མོའི་སོགས་ཚིགས་བཅད་བཅུས་བསྟན་ཏེ། དེ་ལྟར་ཤིན་ཏུ་རྟོགས་པར་དཀའ་བའི་དོན་ཟབ་མོའི་གནས་ལ་ཇི་སྐད་བསྟན་པའི། དྲི་བ་རྣམ་པ་བདུན་པོ་ཟབ་རྒྱས་སམ་ཟབ་པ་དང་རྒྱ་ཆེ་བའི་དོན་ཅན་རྣམས་དེ་ལྟར་ལུང་རིགས་དྲི་མ་མེད་པས་ལེགས་པར་བཤད་པའི་ཚིག་རྣམས་ཀྱིས་ཡང་དག་པར་བཀྲོལ་བའི་ཚེ་ན་ཐོལ་བྱུང་སྡོམ་བུ་པའི་དྲི་བ་པོ་དེ་ཡང་ཟབ་མོ་ཤིན་ཏུ་རྟོགས་པར་དཀའ་བའི་གནས་བདུན་པོའི་དོན་ལ་ངེས་པའི་ཤེས་པ་ཐེ་ཚོམ་གྱི་སྨག་དང་བྲལ་བར་གྱུར་ཏེ་དགའ་མགུ་ཡི་རང་ནས་ལུས་གུས་པ་དང་བཅས་ཏེ་ངག་གིས་འདི་སྐད་དུ་ཀྱེ་མ་ཞེས་སྐྱོ་བའི་ཉམས་ཀྱིས་དཔེར་ན་ཁྲོན་པའི་ཆུ་མིག་ཆུང་ངུ་ལ་གནས་པའི་རུས་སྦལ་གྱིས་ཆུ་མིག་ཆུང་ངུ་དེ་རྒྱ་མཚོ་ཆེན་པོར་བརློམས་པས་མཆོག་ཏུ་སྙེམས་པས་ཁེངས་པར་གྱུར་པ་ཡང་གཟོད་རྒྱ་མཚོ་ཆེན་པོ་མཐོང་བས་བསྙིལ་ཞིང་བརྒྱལ་ཏེ་ཤི་བར་གྱུར་པ་བཞིན་དུ་རང་ལ་མ་གྲགས་པའི་གཞན་གཞུང་མདོ་རྒྱུད་ཟབ་མོའི་ཆོས་ཀྱི་ཚུལ་རྒྱ་མཚོ་ཆེན་པོའི་འཇིངས་ལྟ་བུ་རང་གིས་ཇི་བཞིན་མ་མཐོང་ཞིང་མ་རྟོགས་པར་རང་གཞུང་ཚུར་མཐོང་གི་བཞེད་པ་ཁྲོན་པའི་ཆུ་མིག་ལྟ་བུ་མཆོག་ཏུ་རློམས་ཤིང་སྙེམས་པས་དྲེགས་པའི་རོ་རབ་ཏུ་མྱོང་བ་དང་ལྡན་པའི་བདག་ཅག་རྣམས་ཀྱི་མཆོག་ཏུ་རློབས་པའི་ཁེངས་པ་ཁྱེད་གསུངས་ངོ་མཚར་ཟབ་མོའི་གཏམ་འདིས་རྨང་མེད་དུ་བསྙིལ་བར་མཛད་པ་འདི་ནི་ཤིན་ཏུ་ཡི་རངས་ཤིང་གུས་པའི་གནས་མཆོག་ཏུ་གྱུར་པའོ། །དེ་ཕྱིར་ཤིན་ཏུ་ཟབ་པ་དང་རྒྱ་ཆེ་བས་ངོ་མཚར་གཏམ་གྱི་འབྱུང་གནས་ཀུན་མཁྱེན་གཉིས་པ་རོང་ཟོམ་མ་ཧཱ་པཎྜི་ཏ་ཆོས་བཟང་དང་རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཞེས་མཚན་སྙན་གྱི་གདུགས་དཀར་པོ་ས་གསུམ་ན་མངོན་པར་མཐོ་ཞིང་གྲགས་པ་རྗེ་བཙུན་ངག་གི་དབང་པོ་ངུར་སྨྲིག་གར་གྱིས་རོལ་པར་བསྟན་པའི་འཇམ་དཔལ་དགྱེས་པའི་ཟློས་གར་འཕགས་མཆོག་རྣམ་པ་གཉིས་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྒྱ་མཚོ་ཆེན་པོའི་ཀློང་ན། ཐུན་མོང་མ་ཡིན་པའི་མདོ་རྒྱུད་སྣ་ཚོགས་པའི་ངེས་དོན་ཟབ་མོའི་ནོར་བུའི་ཆོས་མཛོད་རབ་ཏུ་མང་པོ་བསམ་གྱིས་མི་ཁྱབ་པ་མངའ་བ་ལས་ལེགས་པར་འཁྲུངས་པའི་ཆོས་ཚུལ་ཟབ་མོའི་དགོངས་འགྲེལ་ནོར་བུ་རིན་པོ་ཆེ་དབང་གི་རྒྱལ་པོ་ལྟ་བུ་ད་ལྟར་མངོན་སུམ་དུ་བཞུགས་པ་དེ་དག་རྣམས་སྤངས་ནས་དེ་དག་ལ་བསྐྲུན་ན་གཞན་གྱི་གཞུང་ལུགས་ནོར་བུ་འཆིང་བུར་རེ་ཞིང་མཆོད་པ་བརློམས་པ་རྣམས་འཁྲུལ་བའི་གཞན་དབང་གིས་ཐུན་མོང་མིན་པའི་ངེས་དོན་ཟབ་མོའི་ནོར་བུ་རིན་པོ་ཆེ་མཆོག་གི་བགོ་སྐལ་ལས་རེ་ཞིག་རང་རང་ཕྱི་བཤོལ་དུ་གྱུར་པ་ནི་ཀྱེ་མ་འོ་དམན་པའི་གནས་ལ་ཕྱིན་པའོ། །དེས་ན་བདེན་པ་གཉིས་ཀྱི་ཆོས་ཀྱི་ཚུལ་ཤིན་ཏུ་བཟང་པོར་བདེན་གཉིས་དཔྱོད་པའི་ཚད་མ་ཡང་དག་པའི་རིགས་པས་རྣམ་པར་དཔྱད་པས་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་མཆོག་ཏུ་རྙེད་པའི་བསམ་པ་ཅན་ནམ་བློ་གྲོས་ཅན་ལུང་དང་རིགས་པ་ཟབ་མོ་ལ་དབང་འབྱོར་བ་རྣམས་ནི་དུས་རྟག་ཏུ་མདོ་རྒྱུད་ངེས་དོན་ཟབ་མོ་ལས་བློ་ཕྱིར་བཟློག་པའི་བདུད་དང་ཕས་ཀྱི་རྒོལ་བ་གང་གིས་ཀྱང་མི་ཚུགས་ཤིང་བར་ཆད་བྱེད་པ་མེད་པས་གཡུལ་ལས་མཆོག་ཏུ་རྣམ་པར་རྒྱལ་ཏེ་ལོག་སྨྲ་ཚར་གཅོད་པ་དང་། སྐལ་ལྡན་རྗེས་སུ་འཛིན་པ་ལ་གཞན་ལས་མཆོག་ཏུ་འཕགས་ཤིང་འགྲན་ཟླ་ཀུན་དང་བྲལ་བ་ཁོ་ན་ཡིན་ནོ། །དེ་ཡི་ཕྱིར་ན་ཚུར་མཐོང་བྱིས་པའི་རི་དྭགས་སུས་ཀྱང་བཟོད་པར་དཀའ་བའི་མདོ་རྒྱུད་ཟབ་མོའི་བདེན་གཉིས་དཔྱོད་པའི་རིགས་ལམ་སེང་གེའི སྒྲ་བོ་ཆེ་ཇི་སྐད་བསྟན་པ་རབ་ཏུ་བསྒྲགས་པས་དཔལ་ལྡན་སངས་རྒྱས་པདྨ་སྐྱེས་སམ་ཨོ་རྒྱན་མཚོ་སྐྱེས་རྡོ་རྗེའི་བསྟན་པའི་རིང་ལུགས་སྔ་འགྱུར་གྱི་མདོ་རྒྱུད་ཟབ་མོའི་ཁྱད་པར་མཆོག་ལ་གཞན་དྲིངས་མི་འཇོག་པས་ཡིད་ཆེས་ཟབ་མོ་རྙེད་པར་གྱུར་ཅིང་རང་མཐོང་གི་མདོ་རྒྱུད་དགོངས་འགྲེལ་ཕྱོགས་རེས་ཁེངས་ཤིང་དྲེགས་པས་མཆོག་ཏུ་བསྙེམས་པས་གཞན་ཕྱོགས་ཀྱི་གྲུབ་མཐར་སུན་འབྱིན་སྤྲོ་བར་བྱེད་པ་གཞན་དག་སུས་ཀྱང་མི་བཟློག་པའམ་མི་འཕྲོག་པའི་ཚད་མ་བདེན་གཉིས་དཔྱོད་པའི་ཤེས་རབ་ཀྱི་རལ་གྲིའི་ཡུ་བ་མཆོག་ལ་ཡང་དག་པར་བརྟེན་པའི་སྐལ་བ་བཟང་པོའི་གོ་སྐབས་གཞན་པ་དེ་དག་ལ་གནང་ཞིང་སྦྱིན་པར་མཛོད་ཅིག་དང་། ཟབ་མོའི་ཆོས་ཀྱི་ཕོངས་རྒུད་དང་བྲལ་ཞིང་མདོ་རྒྱུད་ངེས་དོན་མཆོག་ལ་ངེས་པ་རྙེད་པའི་སྐལ་བཟང་དམ་པར་འགྱུར་རོ། །དེས་ན་མདོ་སྔགས་ཀྱི་ཆོས་ཚུལ་ཐུན་མོང་པ་མང་དུ་ཐོས་པ་རོ་བཅུད་ཞིམ་མངར་ལྡན་པའི་བདུད་རྩིའི་རྒྱ་མཚོ་ཆེན་པོ་དང་འདྲ་བའི་ཐུན་མོང་མ་ཡིན་པའི་མདོ་རྒྱུད་ཟབ་མོའི་དགོངས་དོན་ཕུན་སུམ་ཚོགས་པ་གང་ཡིན་པ་དེ་ནི་བདུད་རྩིའི་རྒྱ་མཚོ་དེ་ཡི་ཡང་སྙིང་པོར་གྱུར་པ་ཡིད་བཞིན་གྱི་ནོར་བུ་དབང་གི་རྒྱལ་པོ་བཞིན་དུ་གནས་པ་དེ་དག་རང་དང་གཞན་གྱི་གང་ཟག་གི་སྙིང་ན་ངེས་པར་གནས་ཤིང་བཞུགས་པར་གྱུར་ན་དེ་ཉིད་ལྟར་སྣང་ལ་མཆོག་དམན་བཟང་ངན་ཅི་འདྲར་སྣང་ཡང་རུང་རང་མཐོང་གིས་སྙེམས་པ་མེད་པར་འབད་རྩོལ་བརྒྱ་ཕྲག་དག་གིས་གུས་པ་མཆོག་གིས་བླང་བར་བྱ་སྟེ། ཟབ་མོའི་དོན་གྱིས་དབུལ་ན་གང་ཟག་སུ་ཡང་ལྟར་སྣང་ཅི་ཙམ་བཟང་ཡང་མི་ཕན་པས་གང་ཟག་ལ་མི་རྟོན་ཆོས་ལ་རྟོན་དགོས་པའི་ཕྱིར་ན་གྲགས་སྙན་གྱིས་རྗེས་སུ་འབྲང་བར་མི་བྱ་བར་ངེས་དོན་ཟབ་མོའི་དོན་ལ་རྟོན་པས་བརྩོན་པས་འབད་པ་རྣལ་འབྱོར་དུ་བྱ་དགོས་སོ། །དེ་ཡི་ཕྱིར་ན་ཐུན་མོང་མ་ཡིན་པའི་མདོ་རྒྱུད་ངེས་དོན་ཟབ་མོའི་དགོངས་དོན་ཉིད་ཐུན་མོང་གི་མདོ་སྔགས་རིགས་གནས་དང་བཅས་པ་མང་དུ་ཐོས་ཤིང་ལུང་རིགས་མང་དུ་སྨྲ་བས་ཀྱང་རང་གར་རྟོགས་པ་མིན་ལ་དེར་མ་ཟད་སྔོན་བསགས་སྐྱེས་ཐོབ་ཀྱི་ཤེས་རབ་ཆེ་ཞིང་ད་ལྟར་སྦྱངས་བརྩོན་མི་དམན་པས་བློ་གྲོས་ཟབ་ཟབ་མོ་ལྟར་སྣང་བ་རྣམས་ཀྱིས་གཏན་ཚིགས་ཀྱིས་དཔྱད་པས་ཀྱང་མི་རིགས་པའམ་མི་རྟོགས་པའི་ངེས་པའི་མདོ་རྒྱུད་ཟབ་མོའི་དགོངས་དོན་ས་འོག་ན་གནས་པའི་ཡིད་བཞིན་གྱི་ནོར་བུ་རིན་པོ་ཆེའི་གཏེར་བཟང་པོ་དང་འདྲ་བ་ལྟར་སྣང་ཇི་འདྲར་གནས་ཀྱང་གང་ཟག་གང་གིས་འདི་ཉིད་རང་གིས་འཛིན་ཅིང་གཞན་ལ་སྤེལ་བ་དེ་ནི་ཚོགས་བསགས་སྒྲིབ་པ་དག་པའི་བློ་གྲོས་མཆོག་དང་ལྡན་པས་གཞན་ལས་ཁྱད་པར་དུ་འཕགས་པའི་སྐྱེས་བུ་དམ་པ་ཉིད་དུ་འབྲས་བུའི་རྟགས་ཀྱིས་ཤེས་ཤིང་རྟོགས་ནུས་པའི་ཕྱིར་ན་དུས་རྟག་ཏུ་དེ་ལ་གུས་པ་མཆོག་གིས་བརྟེན་ཅིང་མཉེས་པར་བྱས་ཏེ་གདམས་པའི་བདུད་རྩི་རབ་ཏུ་མྱོང་བར་བྱ་དགོས་སོ། །དེས་ན་མདོ་རྒྱུད་སྙིང་པོའི་དགོངས་དོན་ཟབ་མོ་ཇི་བཞིན་རྟོགས་པའི་བློ་གྲོས་ཀྱི་གཏེར་ཟབ་མོ་འབུམ་ཕྲག་ནོར་བུའི་སྣོད་མཆོག་ཉིད་དུ་ཕྱོགས་རེར་ཞེན་པའི་བདག་གི་བློ་འདི་ཡང་ཟབ་ཅིང་ཡངས་པ་རྒྱ་མཚོ་ཆེན་པོའམ་ཆེར་བསྒྲུབས་པའི་ཟབ་མོའི་གདམས་པའི་ལེགས་བྱས་མཆོག་སློང་བའི་དུས་ལ་བབ་པར་རིགས་ནས་ཀླུ་ཡི་དབང་པོ་བློ་གྲོས་མཆོག་གི་མཐུ་དཔལ་གྱི་བྱུང་བའི་ཟབ་རྒྱས་ཀྱི་གདམས་པའི་རྒྱ་མཚོར་གུས་པ་ཆེན་པོས་དགའ་མགུ་ཡི་རངས་བཞིན་དུ་ལེགས་པར་འཐུངས་ཤིང་ཚིམ་པར་བྱའོ། །གང་གི་ཐུགས་གཉིས་སུ་མེད་པའི་བློ་གྲོས་ཟབ་མོའི་མཐུ་ལས་བབས་པའི་ལེགས་པར་བཤད་པའི་ཟབ་རྒྱས་ཀྱི་གདམས་པ་ཆུ་ཀླུང་བཟང་པོ་དག་གིས་དེ་ཉིད་གང་ལས་བྱུང་བའི་རྣམ་པར་དཔྱོད་པའི་བློ་གྲོས་ཟབ་ཅིང་རྒྱ་ཆེ་བ་ཡི་རྒྱ་མཚོ་ཟབ་ཅིང་ཁྱོན་ཡངས་པར་ངེས་པར་རྟོགས་པར་འགྱུར་ལ། དེ་འདྲའི་བློ་གྲོས་མཆོག་རྒྱ་མཚོ་ཆེན་པོ་ལྟ་བུ་དེ་ཡི་འབྱུང་གནས་ཀླུ་ཡི་དབང་པོའམ་རྒྱལ་པོ་ལྟ་བུ་ནི་སྔ་འགྱུར་རིག་འཛིན་བརྒྱུད་པའི་ཞལ་ལུང་མདོ་རྒྱུད་མན་ངག་ཟབ་མོ་ཉིད་དུ་ངེས་པར་རྟོགས་པར་ཡང་འགྱུར་རོ། །དེ་ན་ཐུན་མོང་མིན་པའི་མདོ་རྒྱུད་མན་ངག་ཟབ་མོའི་དགོངས་དོན་ནམ་མཁའ་ལྟ་བུ་ཕ་མཐའ་དང་བྲལ་བ་བློ་གྲོས་ཆེན་པོའི་ཧུབ་ཀྱིས་ཏེ་ཧུབ་གཅིག་གིས་སྐད་ཅིག་ཉིད་དུ་འདྲེན་ཅིང་ཟོས་པའི་དགོངས་བཅུད་ཟབ་མོ་སྙིང་ལ་ཀུན་དུ་ཕན་པའི་བདུད་རྩིའི་རྒྱ་མཚོ་ཆེན་པོའི་དཔྱིད་དཔལ་ཉིད་དུ་ལེན་པའི་མཐུ་ཆེན་པོ་བློ་ལ་མྱུར་དུ་ཐོབ་པར་མཛད་པའི་ངོ་མཚར་རྨད་བྱུང་བ་ཐུན་མོང་མ་ཡིན་པའི་མདོ་རྒྱུད་མན་ངག་ཟབ་མོའི་ཆོས་ཀྱི་སྒྲོན་མེ་བཟང་པོ་མཆོག་ཏུ་འབར་བ་སྐལ་བཟང་དམ་པ་རྣམས་ལ་གསལ་ཞིང་སྣང་བར་མཛོད་ཅིག་ཅེས་བསྐུལ་ཞིང་གསོལ་བ་གདབ་པའོ། །གཉིས་པ། དེ་སྐད་ཟེར་ཞིང་སོགས་ཚིགས་བཅད་གཉིས་ཀྱིས་བསྟན་ཏེ། གོང་དུ་བསྟན་པ་དེ་སྐད་ཟེར་ཞིང་གུས་པ་མཆོག་གིས་བཏུད་དེ་གནས་པའི་ཚེ་གཟུ་བོར་གནས་པའི་དྲང་སྲོང་མཆོག་དེ་ཡིས་དྲི་བ་པོ་དེ་ལ་ཡང་བློ་གྲོས་ཆུང་ཞིང་ཟབ་པ་མིན་པ་ཉིད་བློ་གྲོས་ཆེ་ཞིང་ཟབ་རྒྱས་སུ་བསྒྲུབ་པར་བྱེད་པ་གོང་དུ་ཇི་སྐད་བསྟན་པ་དག་གི་དོན་རྣམས་བསྡུས་ནས་འདི་ལྟར་གདམས་ཏེ། དེ་ལ་ཡང་དང་པོ་ཆོས་མཆོག་མདོ་རྒྱུད་ཟབ་མོ་སེང་གེའི་འོ་མ་ལྟ་བུ་འདི་ནི་བློ་གྲོས་ཟབ་མོའི་སྣོད་བཟང་པོ་རིན་ཆེན་གསེར་སྣོད་མཆོག་ལྟ་བུ་ཁོ་ནས་འཛིན་ཅིང་སྣོད་གཞན་ཕལ་པ་གང་དུ་ཇི་ལྟར་འབད་ཀྱང་མི་གནས་པར་སྣོད་ཀྱང་འཆགས་ལ་བཅུད་ཀྱང་ཟག་ནས་ཆུད་ཟ་བ་ལྟར་བློ་གྲོས་དམན་པ་དག་གིས་ཇི་ལྟར་འབད་ཀྱང་མདོ་རྒྱུད་མན་ངག་ཟབ་མོའི་དོན་བློ་ལ་མི་ཤོང་ཞིང་མི་རྟོགས་པས་འཛིན་པར་མི་ནུས་པས་ཆུད་གཟན་པར་འགྱུར་ལ། ཆོས་མཆོག་མདོ་རྒྱུད་མན་ངག་ཟབ་མོའི་དོན་འདི་ཤོང་ཞིང་འཛིན་པའི་སྣོད་ནི་བློ་གྲོས་བཟང་པོ་ཟབ་ཅིང་རྒྱ་ཆེ་བ་འདི་ཁོ་ན་ཡིན་ནོ། །གསུམ་པ་བསྡུས་ཏེ་སྙིང་པོའི་གདམས་པ་དངོས་ནི། ཨ་ནི་མ་སྐྱེས་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེ་ལ་གོང་གི་དོན་ཇི་ལྟར་བསྡུས་ཏེ་གདམས་ན། མདོ་རྒྱུད་ཐམས་ཅད་ཀྱི་གནད་དྲིལ་བའི་མན་ངག་ཟབ་འདི་ལ། ཨ་ཞེས་པའི་ཡི་གེ་འདི་ནི་སྐྱེ་བ་མེད་པས་མེད་དགག་ཡིད་བཞིན་དུ་རང་སྣང་བ་སྟེ། དེས་ན་བདེན་པ་གཉིས་ཆར་མི་སྐྱེ་བར་བསྟན་པས་སྐྱེ་བ་མེད་པའི་སྒོ་མཚོན་བྱེད་ཡིན་པས་མ་སྐྱེས་པའི་ཆོས་ཀྱི་སྒོ་ཞེས་བྱའོ། །དེ་བཞིན་དུ་ར་ཞེས་པ་འདི་ནི་རྡུལ་མེད་པས་མཉམ་པ་ཉིད་རྟོགས་པ་ལ་རང་དོན་དུ་སྲིད་པ་དང་ཞི་བ་ལ་དགའ་བའི་ཡིད་ཀྱི་ཆགས་རྡུལ་མེད་པར་འཇུག་དགོས་པའི་སྒོ་མཚོན་བྱེད་ཡིན་པས་རྡུལ་དང་བྲལ་བའི་སྒོ་ཞེས་བྱའོ། །པ་ཞེས་པ་འདི་ནི་མཉམ་བཞག་ཡང་དག་པ་ལ་འཛིན་སྟངས་ཅི་ཡང་མེད་ཀྱང་དྲན་མེད་མུན་པ་འཐུམས་པོ་ལྟ་བུ་ལྷག་མཐོང་གི་སྣང་བ་དང་བྲལ་བའང་མིན་པས་དོན་དམ་མཐར་ཐུག་མཐོང་བའི་སྒོ་མཚོན་བྱེད་ཡིན་པས་དོན་དམ་སྣང་བའི་སྒོ་ཞེས་བྱའོ། །ཙ་ཞེས་པ་འདི་ནི་དཔྱད་པ་ཡང་དག་པས་མཐའ་བཞིའི་སྤྲོས་པ་ཉེ་བར་ཞི་བའི་ངེས་ཤེས་ཟབ་མོས་དྲངས་པའི་མཉམ་པར་འཇོག་པ་ཁྱད་པར་ཅན་ཡིན་པས་རྣམ་པར་རྟོག་པའི་འགྱུར་བའམ་བློས་བྱས་ཀྱི་འཆི་འཕོ་མེད་པར་མཉམ་པ་ཉིད་ཆོས་ཀྱི་སྐུར་གནས་པའི་སྒོ་མཚོན་བྱེད་ཡིན་པས་འཆི་འཕོ་སྐྱེ་བ་མེད་པའི་སྒོ་ཞེས་བྱའོ། །ན་ཞེས་པ་འདི་ནི་བདེན་པ་གཉིས་ལ་གཙོ་ཆེ་ཆུང་རྣམ་པ་ཀུན་ཏུ་མེད་དེ་སྣང་སྟོང་གཉིས་འབྲལ་མི་ཤེས་པའི་ཕྱིར་མེ་དང་ཚ་བ་བཞིན་ནོ། །དེ་གཉིས་ཐ་སྙད་དུ་ནི་མགོ་མཉམ་སྟེ་ཐ་སྙད་སྒྲ་རྟོག་གི་ཡུལ་ཡིན་པས་སོ། །དོན་དམ་པར་དེ་གཉིས་དབྱེར་མེད་པའི་གནས་ལུགས་ནི་སྒྲ་རྟོགས་གི་ལམ་ལས་འདས་པ་ན་མིང་དང་བྲལ་ཏེ་བསམ་གྱིས་མི་ཁྱབ་པར་སྟོན་པའི་སྒོ་མཚོན་བྱེད་ཡིན་པས་མིང་དང་བྲལ་བ་ཉིད་ཀྱི་སྒོ་ཞེས་བྱའོ། །དྷཱི་ཞེས་པ་འདི་ནི་དེ་འདྲའི་སྣང་སྟོང་བདེན་པ་དབྱེར་མེད་པའི་དོན་ཟབ་མོ་ཉིད་ཆོས་ཅན་རྡུལ་ཕྲན་ལྟ་བུ་གཅིག་གི་སྟེང་དུ་ད་ལྟ་ནས་གཏན་ལ་ཕབ་སྟེ་ཆོས་ཐམས་ཅད་མཉམ་པ་ཉིད་ཚུར་མཐོང་ལས་འདས་པའི་དོན་ཟབ་མོ་ཤེས་ཤིང་རྟོགས་ན་ཡང་མཐུན་སྣང་གི་བལྟ་བྱའི་སྣང་བ་ལ་དཔྱད་དེ། དེ་དཔེར་བཟུང་ན། དོན་དམ་སྤྲོས་བྲལ་ཁས་ལེན་མེད་པའི་ཚུལ་དང་། ཐ་སྙད་ཁས་ལེན་ཡོད་པའི་ཚུལ་དང་། དེ་གཉིས་མི་འགལ་བར་སྦྱར་ནས་ཐ་སྙད་ཀྱི་ཁས་ལེན་ཚུལ་མཐོང་གི་རྣམ་བཞག་ཕར་ཕྱིན་ཐེག་པ་ནས་སྔགས་རྡོ་རྗེ་ཐེག་པའི་བར་དུ་ཤེས་པའི་སྒོའམ་མཚན་བྱེད་ཡིན་པས་བློ་གྲོས་ཟབ་མོའི་སྒོ་ཞེས་བྱའོ། །དེ་ལ་དྲི་བ་དང་པོ་དངོས་གཞི་སྣང་སྟོང་ཟུང་འཇུག་གི་ཚུལ། གཉིས་པས་དེ་ཉན་རང་སོགས་ཀྱི་སྤྱོད་ཡུལ་མིན་པས་ཟབ་པར་བསྟན་ནོ། །གསུམ་པས་ཟུང་འཇུག་དེ་ཇི་ལྟར་སྒོམ་ཚུལ། བཞི་པས་བསྒོམ་པ་དེ་རྒྱུད་ལ་ཇི་ལྟར་སྐྱེད་ཚུལ། ལྔ་པས་ཟབ་མོའི་རྟོགས་པ་རྒྱུད་ལ་སྐྱེས་པའི་ངོར་བདེན་གཉིས་ཇི་ལྟར་འཆར་ཚུལ་དང་། དྲུག་པ་དེའི་ངོར་ཆོས་ཐམས་ཅད་མཉམ་པ་ཉིད་དུ་འཆར་ཚུལ་གཉིས། བདུན་པས་རང་གིས་རྟོགས་པ་བཞིན་གཞན་ལ་ཟབ་མོའི་ལྟ་བ་འདོམས་ཚུལ་བསྟན་ཏོ། །དེ་ལྟར་རྒྱལ་བས་གསུང་བའི་རྒྱུ་འབྲས་ཐེག་པའི་མདོ་འགགས་ཐམས་ཅད་དེར་འདུས་པ་ཡིན་པས་འདིའི་གནད་དོན་ཚུལ་བཞིན་དུ་ཤེས་པར་གྱུར་ན་མདོ་སྔགས་རྒྱ་མཚོའི་འགགས་མདུད་ཁྲོལ་པས་རང་གིས་རྟོགས་པ་དང་གཞན་ལ་འདོམས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་འབྱེད་པ་ཡིན་ནོ། །དེས་ན་ཡི་གེའི་སྒོ་རེ་རེ་ལས་ཕྱོགས་དུས་ཀྱིས་བསྡུས་པའི་ཆོས་ཚུལ་ཚད་མེད་པ་གོ་ཞིང་རྟོགས་པ་ནི་བརྡའ་ཞེས་བྱ་བ་ཡིན་ལ། དོན་གཅིག་ལས་བརྩམས་ཏེ་དོན་ཀུན་བསྐལ་བ་ནས་བསྐལ་པར་བརྗོད་ཀྱང་ཟད་པར་མི་འགྱུར་བས་བློ་གྲོས་མི་ཟད་པའང་ཡིན། དོན་གཅིག་གི་ནང་དུ་ཆོས་ཀུན་འདུ་ཞིང་དོན་གཅིག་གིས་ཀྱང་ཆོས་ཀུན་སྟོན་པར་ནུས་པ་ནི་ཆོས་ཀྱི་གཏེར་འདོན་པའང་ཡིན། ཡི་གེ་གཅིག་གི་ནང་དུ་ཡི་གེ་ཀུན་བསྡུ་ཞིང་མཉམ་པ་ཉིད་དུ་ངེས་པའང་ཡིན་ལ་ཐམས་ཅད་བསྡོམས་ནས་མཉམ་པ་ཉིད་ཟུང་འཇུག་གི་ཡེ་ཤེས་གཅིག་ཉིད་གཏན་ལ་ཕབས་པའང་ཡིན་ནོ། །དེ་ནི་ཆོས་ཀྱི་གཏེར་འདོན་པའི་མན་ངག་ཟབ་མོ་ཡང་ཡིན་ཏེ་ཡི་གེའི་སྒོ་ཨ་ལ་སོགས་པ་དྲུག་པོ་དེ་དག་རེ་རེར་ཡང་བདེན་པ་གཉིས་གཉིས་ཀྱི་ཚུལ་གྱིས་སྣང་སྟོང་བདེན་གཉིས་དབྱེར་མེད་ཟུང་འཇུག་སྐྱེ་འགགས་དང་བྲལ་བར་དམིགས་ནས་སུ་སྟེ། འདི་ལྟར་ཡི་གེ་ཨ་ལྟ་བུ་རྗོད་བྱེད་དང་མ་སྐྱེ་བས་ལྟ་བུ་བརྗོད་བྱའི་དོན་དག་ཀྱང་གདོད་མ་ནས་སྐྱེ་བ་མེད་པ་ཡིན་པས་མཉམ་པ་ཉིད་ཡིན་ལ་མཉམ་པ་ཉིད་ཀྱི་མཉམ་པ་ཉིད་ལ་བརྗོད་དུ་མེད་དེ་ནམ་མཁའ་ལ་ནམ་མཁས་རི་མོ་བྲིས་པ་བཞིན་ཏེ། དེ་ལྟ་ནའང་བརྗོད་མེད་བརྗོད་པ་ཀུན་གྱི་རྒྱུ་མཆོག་ཡིན་པས་བསྐལ་པ་ནས་བསྐལ་བར་བརྗོད་ཀྱང་ཆོས་ཀྱི་དབྱིངས་ལ་བྲི་གང་ངམ་ཟད་འཕེལ་ཡོང་ཡེ་མེད་ཅིང་ཆོས་ཐམས་ཅད་བརྗོད་པ་ཙམ་དུ་ཤེས་པ་ནི་དོན་དམ་པར་དམིགས་པའི་སྒོ་དང་། དེ་བཞིན་དུ་བརྗོད་བྱེད་ར་དང་བརྗོད་བྱ་རྡུལ་དང་བྲལ་བ། བརྗོད་བྱེད་པ་དང་བརྗོད་བྱ་དོན་དམ་འོད་གསལ། བརྗོད་བྱེད་ཙ་དང་བརྗོད་བྱ་འཆི་འཕོ་མེད་པ། བརྗོད་བྱེད་ན་དང་བརྗོད་བྱ་མིང་དང་བྲལ་བ། དྷཱིཿལྟ་བུ་བརྗོད་བྱེད་ཟུང་འཇུག་གཉིས་སུ་མེད་པའི་ཡེ་ཤེས་ཟབ་མོ་ལྟ་བུ་བརྗོད་བྱའི་དོན་དེ་དག་ཀྱང་རེ་རེ་བཞིན་དུ་རྗོད་བྱེད་དང་བརྗོད་བྱ་གཉིས་སྐྱེ་བ་མེད་པས་མཉམ་པ་ཉིད་ཡིན་པས་གང་གིས་གང་ཞིག་བརྗོད་དེ་རྗོད་དུ་མེད་པར་ཡེ་ནས་གནས་པའི་གནད་ཀྱིས་བསྐལ་བར་བརྗོད་ཀྱང་བྲི་གང་བྲལ་བའི་ཆོས་ཀྱི་དབྱིངས་ཟད་འཕེལ་མེད་ཅིང་། ཆོས་ཐམས་ཅད་མིང་ངམ་བརྗོད་པ་ཙམ་དུ་ཤེས་པ་ནི་དོན་དམ་པར་དམིགས་པའི་སྒོའོ། །དེ་ལྟར་མཉམ་པ་ཉིད་ལས་མ་གཡོས་མི་གཡོ་གཡོ་བར་མི་འགྱུར་བཞིན་དུ་ཨ་ལས་གྱུར་པའི་ཡི་གེ་སྐྱེ་གནས་ཨ་ཉིད་མགྲིན་རྐན་སྤྱི་བོ་མཆུའི་གནས་ལྔར་བྱེད་རྩོལ་གྱིས་བསྒྱུར་བའི་ངོར་སྣང་བ་ཡིན། མཆན། ལྔ་པ་ཅན་ཨ་ར་པ་ཙ་སོགས་འདི་དག་དང་ཡི་གེ་གཞན་རྣམས་ཀྱིས་ཀྱང་། ཀུན་བྱང་གིས་བསྡུས་པའི་ཆོས་ཀུན་ཤེས་ཤིང་གོ་བར་བྱེད་པ་ནི་རྟེན་འབྱུང་བསླུ་མེད་ཙམ་སྟེ། ཤིན་ཏུ་ངོ་མཚར་རྨད་དུ་བྱུང་བའི་ཆོ་འཕྲུལ་ཆེན་པོ་ཀུན་ཏུ་ཉེ་བར་སྟོན་པའོ་ཞེས་ཤེས་པ་ཀུན་རྫོབ་ལ་དམིགས་པའི་སྒོ་སྟེ། དེ་གཉིས་དབྱེར་མེད་ཟུང་དུ་ཆུད་པ་ཡི་ངང་ནས་བློ་གྲོས་ཀྱི་གཏེར་ལ་སོགས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་མྱུར་དུ་འབྱེད་པའི་རྒྱུ་སྒྱུ་མའི་སྟེ་སྒྱུ་མ་ལྟ་བུའི་ཏིང་ངེ་འཛིན་མཆོག་ཏུ་གྱུར་པ་བསྒྲུབ་པར་བྱས་ན་མདོ་རྒྱུད་མན་ངག་ཟབ་ཅིང་རྒྱ་ཆེ་བ་ཕ་མཐའ་མེད་པའི་རྒྱ་མཚོ་ཆེན་པོའི་ཆུ་ཉིད་བློ་གྲོས་ཟབ་མྱུར་གྱི་ཧུབ་ཀྱིས་ཏེ་ཧུབ་གཅིག་གིས་ལྟོ་བར་འདྲེན་ནུས་པའི་སྙིང་གའི་ནོར་བུ་གཉིས་སུ་མེད་པའི་ཡེ་ཤེས་དྲི་མ་མེད་པ་ལ་གཟུངས་དང་སྤོབས་པ་བློ་ཡི་དཔལ་ཕུན་སུམ་ཚོགས་པ་ཉིད་དུ་རབ་ཏུ་འབར་བར་འགྱུར་རོ། །དེ་ལྟར་སྣང་སྟོང་ཟུང་འཇུག་ཟབ་མོའི་དོན་ལ་རང་བྱན་ཆུད་པའི་སྒོ་ནས་མཐའ་བཞིའི་སྤྲོས་པ་ཐམས་ཅད་ཁེགས་པའི་ཟབ་མོའི་ངེས་ཤེས་ཀྱི་ལམ་ནས་ཆོས་ཐམས་ཅད་ཀྱི་ཡིན་ལུགས་ཇི་ལྟ་བ་བཞིན་གཤིས་སུ་སོན་པ་ཡི་གནས་ལུགས་སེམས་དང་སེམས་བྱུང་གི་བློ་ལས་རབ་ཏུ་འདས་པ་ཡི། དབྱིངས་ཡེ་གཉིས་སུ་མེད་པའི་འོད་གསལ་གཉུག་མའི་དབྱིངས་ངེས་པ་དོན་གྱི་འཇམ་དཔལ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོའི་ངང་དུ་མ་བཅོས་པར་མཉམ་པར་ཞོ་གཅིག་དང་། མཐའ་བྲལ་ལྟ་བའི་རྒྱལ་པོ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོ་ཀུན་མཉམ་ཡངས་པའི་ཀློང་ཆེན་པོར་ཇི་བཞིན་མཉམ་པར་བཞག་པའི་བདེན་དོན་འོད་གསལ་རྫོགས་པ་ཆེན་པོའི་ཆོས་ཉིད་མངོན་སུམ་དུ་མཐོང་བ་ལས་ཡོད་མེད་ལ་སོགས་པའི་མཐའ་བཞིའི་འཛིན་སྟངས་ཀྱི་བློ་ངན་མུན་པའི་སྣང་བ་ཐམས་ཅད་ཀུན་ངང་གིས་དྭངས་ཤིང་འགགས་པའི་འོད་གསལ་བའི་མཁྱེན་གཉིས་ཡེ་ཤེས་ཀྱི་ཉི་མ་ཁོང་ནས་འཆར་བར་གྱུར་ཏེ་ཇི་ལྟ་དང་ཇི་སྙེད་ཀྱི་དགོངས་པ་ཡེ་ཤེས་ཀྱི་ཀློང་རྡོལ་ཏེ་མགྲིན་པའི་རྩ་འཁོར་གསུངས་ཡི་གེའི་འཁོར་ལོའི་སྤྲིན་དུ་དྭངས་པས་འཆད་རྩོད་རྩོམ་པ་གང་ལ་ཡང་ཐོགས་པ་མེད་པས་སུས་ཀྱང་མི་འཕྲོག་པའི་རྣམ་དཔྱོད་འགྲན་ཟླ་ཐམས་ཅད་དང་བྲལ་བ་ལ་དབང་འབྱོར་བར་གདོན་མི་ཟ་བ་ཁོ་ན་ཡིན་ནོ། །བཞི་པ་ཇི་ལྟར་བསྟན་པའི་དོན་བསྡུ་བ་ནི། གཟུང་གནས་དཔྱོད་པ་སོགས་ཚིགས་བཅད་གཉིས་ཀྱིས་བསྟན་ཏེ། གང་ལ་འདྲི་བའི་གནས་བརྩོམ་པ་པོ་རང་གི་བློ་ཕྱོགས་སུ་མ་ལྷུང་བའི་གཟུར་གནས་ཏེ་གཟུ་བོར་གནས་པའི་རྣམ་པར་དཔྱོད་པ་དྲང་པོ་ཉིད་མཁས་པའི་དྲང་སྲོང་ཆེན་པོ་ཉིད་དུ་བཀོད་པ་སྟེ། གང་གིས་འདྲི་བ་པོ་ཡང་རང་གི་བློ་ཟབ་མོའི་གནས་ལ་འགལ་འདུའི་དོགས་པ་ཐོལ་བྱུང་གི་རྣམ་པར་རྟོག་པ་དེ་ཉིད་སྡོམ་བུ་པ་རྟོག་གེའི་བརྒལ་བརྟགས་བྱེད་པ་པོར་བཀོད་དེ་བརྗོད་ནས། དྲང་སྲོང་དེ་ལ་སྡོམ་བུ་པ་དེས་དྲིས་ཤིང་བརྒལ་ལན་གྱིས་ཚུལ་གྱིས་ནི་ཤིན་ཏུ་རྟོགས་པར་དཀའ་བའི་གནད་ཟབ་མོ་རྒྱལ་སྲིད་རིན་པོ་ཆེ་སྣ་བདུན་གྱི་གྲངས་དང་ལྡན་པ་རབ་ཏུ་གསལ་བས་ལེགས་པར་བཤད་པ་ཡིན་ནོ། །དེ་ཡང་བློ་གྲོས་ན་ཚོད་མ་སྨིན་པས་ཆུང་བ་རྟོག་གེ་བ་བདག་འདྲ་ཡིས་སྐྱེས་སྦྱངས་བློ་མཆོག་མངའ་བར་གྲགས་པའི་ཆེན་པོ་རྣམས་ཀྱང་སོམ་ཉིའི་དྲ་བར་འཕྱན་པའི་གནས་ཤིན་ཏུ་ཟབ་ཅིང་རྟོགས་པར་དཀའ་བ་རྟོག་གེའི་རིགས་མདུང་འབུམ་གྱིས་མི་ཕིགས་པའི་རབ་ཏུ་བརླིང་བའི་དོན་དེ་རྣམས་བློ་གྲོས་ཆེན་པོ་མངའ་བའི་འཕགས་པའི་གང་ཟག་མཆོག་རྣམས་ཀྱིས་ཐུགས་གཉིས་སུ་མེད་པའི་ཡེ་ཤེས་ཟབ་པ་དང་རྒྱ་ཆེ་བའི་མཁྱེན་པའི་གཏེར་གསང་བ་ཟབ་མོ་ནས་ཀྱང་ཡང་དག་པར་བླང་པ་ཇི་ལྟར་བ་བཞིན་ཏུ་གཟུར་གནས་དམ་པ་ཡོངས་ཀྱི་དཔྱིད་དཔལ་དུ་འདི་ན་ལེགས་པར་བཀོད་པར་བྱས་པ་ཡིན་ནོ། །གསུམ་པ་ཐ་མར་དགེ་བ་འཇུག་གི་དོན་ལ་གསུམ། ལྷག་བསམ་ཤེས་རབ་ཀྱིས་གོ་ཕྱེས་པ་དང་། གཞན་ཕན་སྙིང་རྗེས་ཇི་ལྟར་བརྩམ་པའི་མཛད་བྱང་དང་། ཚུལ་འདིར་བརྟན་ན་ཐེག་པ་མཆོག་གི་ལམ་བཟང་རྙེད་པས་བརྟེན་པར་གདམས་པའོ། །དང་པོ། དེ་སྐད་སྨྲས་པ་སོགས་ཚིགས་བཅད་གཅིག་གིས་བསྟན་ཏེ། དེ་སྐད་ཟབ་དོན་ཡང་དག་པར་སྨྲས་པའི་ལེགས་པར་བཤད་པའི་འབྲུག་སྒྲ་སྙན་པར་སྒྲོགས་པ་དང་བཅས་པའི་ཆོས་ཀྱི་ཆར་རབ་ཏུ་བཟང་པོ་འབབ་པར་རྒྱལ་བའི་སྲས་པོ་མཁས་མཆོག་བྱེ་བས་ཟབ་མོའི་དགོངས་དོན་ཡང་དག་པར་བགྲོད་པའམ་རྟོགས་པར་འདོད་ཅིང་ཡིད་དད་པས་དགའ་བཞིན་གྱིས་མཉན་ཅིང་སེམས་པས་དོན་ཆེན་པོ་ཐོབ་པར་སེམས་པའི་ལྷག་པའི་བསམ་པ་ཡིས་གང་ཞིག་དྲིས་པ་རྣམས་ལ་དགའ་སྤྲོ་ཡི་རངས་པའི་ཚུལ་གྱིས་ལན་གྱི་ཁྱད་པར་ཟབ་མོའི་ཆོས་ཀྱི་བདུད་རྩིའི་ཆར་ཆེན་པོའི་གོ་སྐབས་འདི་ཉིད་ལེགས་པར་དབྱེ་བར་བྱས་སོ། །གཉིས་པ། དེ་ཕྱིར་དེ་བས་སོགས་ཚིགས་བཅད་གཅིག་གིས་བསྟན་ཏེ། གང་མདོ་རྒྱུད་ཟབ་མོའི་དགོངས་དོན་ཇི་བཞིན་རྙེད་པའི་ལམ་དངོས་ཡང་དག་པར་མཐོང་བའི་མིག་ཏུ་གྱུར་པ་བདེན་པ་གཉིས་ཀྱི་དེ་ཁོ་ན་ཉིད་དཔྱོད་པའི་ཚད་མའི་ལམ་ནས་ངེས་པའི་ཤེས་པ་ཟབ་མོ་ཐེ་ཚོམ་གྱི་སྨག་ཐམས་ཅད་དང་བྲལ་བ་ཉིད་དགོངས་པ་ཡིན་པ་དེ་ཡི་ཕྱིར་ན་ཚད་མ་དང་བྲལ་ན་ངེས་ཤེས་ཟབ་མོ་མི་རྙེད་པས་ལམ་གྱི་གཟུགས་བརྙན་དུ་འགྱུར་བ་དེ་ལྟ་བས་ན། དཔལ་ཆོས་ཀྱི་གྲགས་པ་དང་དཔལ་ལྡན་ཟླ་བའི་རིང་ལུགས་བཞིན་བདེན་གཉིས་སོ་སོར་དཔྱོད་པའི་ཚད་མ་དང་མཐར་ཐུག་བདེན་གཉིས་དབྱེར་མེད་ཟུང་འཇུག་ངེས་པའི་ཚད་མའི་མིག་བཟང་པོ་དཔྱད་གསུམ་གྱིས་སྦྱངས་ཤིང་བགྲད་དེ་མདོ་རྒྱུད་ཟབ་མོའི་གནས་ལ་གཞན་དྲིང་མི་འཇོག་པར་ཡང་དག་པར་བཞུགས་དགོས་པའི་ཚུལ་དེ་ལྟར་ཡང་དང་ཡང་དུ་མདོ་རྒྱུད་ཟབ་རྒྱས་ཀྱི་དོན་རྟོགས་པར་འདོད་ཅིང་སེམས་པའི་བློ་ལྡན་གཟུ་བོར་གནས་པའི་སྐལ་བཟང་དུ་མའི་དོན་དུ་ཡང་ཟབ་རྒྱས་ཀྱི་དོན་ལ་ཇི་བཞིན་རྟོག་པའི་ཡིད་ཀྱི་མེ་ལོང་དྲི་མ་མེད་པའི་ངོས་ལ་ཇི་ལྟར་ཤར་བ་བཞིན་དུ་རྣམ་དཔྱོད་བློ་ཡི་རྩེད་འཇོའི་རོལ་བས་དྷཱིཿམིང་ཅན་གྱིས་ཏེ་བློ་གྲོས་དྲི་མེད་ཀྱིས་ལེགས་པར་ཡང་དག་པར་སྤེལ་བའོ། །གསུམ་པ། བདེ་གཤེགས་ཆོས་ཚུལ་སོགས་ཚིགས་བཅད་གཅིག་གིས་བསྟན་ཏེ། བདེ་བར་གཤེགས་པ་སངས་རྒྱས་བཅོམ་ལྡན་འདས་རྣམས་ཀྱི་བཀའ་མདོ་རྒྱུད་ཀྱི་ཆོས་ཚུལ་ཟབ་མོ་ནམ་མཁའི་མཐའ་དང་མཉམ་པ་ཇི་སྙེད་པ་ཐམས་ཅད་རྣམ་པ་ཀུན་ཏུ་སྒྲ་རྟོག་གི་བརྗོད་པར་མི་ནུས་ཤིང་ཟད་པར་ཡང་མི་འགྱུར་ཀྱང་མདོ་རྒྱུད་ཟབ་མོའི་གནད་ལ་ངེས་པའི་ཤེས་པ་ཟབ་མོ་ཐེ་ཚོམ་གྱི་སྨག་ཐམས་ཅད་དང་བྲལ་བའི་སྣང་བ་མཆོག་ཏུ་གསལ་བར་བྱེད་པའི་རིན་པོ་ཆེ་ཡི་སྒྲོན་མེ་འདིར་ཡང་དག་པར་བརྟེན་ན་མདོ་རྒྱུད་ཐེག་མཆོག་ཟབ་མོའི་ལམ་བཟང་པོ་རང་གིས་ཇི་བཞིན་དུ་བདེ་བླག་ཏུ་རྙེད་ཅིང་རྟོགས་ནས་གཞན་ལ་ནོར་འཁྲུལ་མེད་པར་སྟོན་པར་ནུས་པས་ན་གཟུ་བོར་གནས་པའི་བློ་ཅན་ཆོས་ཀྱི་སྤྱན་ལྡན་སྐལ་བཟང་མཁས་པའི་ཚོགས་ཀྱིས་ལེགས་པར་བསྟེན་པར་མཛོད་ཅིག་ཅེས་ཡང་དག་པར་གདམས་པར་མཛད་པའོ། །སླར་རྗེ་ཉིད་ཀྱི་གཟིགས་གནང་མཛད་པའི་ཞལ་བྱང་ནི། ངེས་ཤེས་རིན་པོ་ཆེའི་སྒྲོན་མེ་འདི་རང་ལོ་ཤིན་ཏུ་གཞོན་ཞིང་སློབ་གཉེར་གསར་བུ་བའི་དུས་ཞིག་ན་འཕྲལ་དུ་ཡིད་ལ་ཤར་རྩོམ་སྟན་གཅིག་པར་བྲིས་པ་ཡིན་མོད། དོན་ལ་འགལ་བ་མེད་ཅིང་གོ་རྒྱུ་གནད་ཅན་འདུག་པས་མ་བཅོས་པར་དེ་གར་བཞག་པ་ཡིན་ནོ་ཞེས་མི་ཕམ་པས་རང་ལོ་ང་བདུན་པར་སྨྲས་དགེའོ། །ཞེས་པས་ཚིག་གི་སྡེབས་སྦྱོར་ལྷུར་མ་བླང་བར་དོན་ལ་རྟོན་པར་བྱས་པ་ཡིན་ནོ་ཞེས་ཚིག་ལ་མི་རྟོན་དོན་ལ་རྟོན་པར་གདམས་པའི་ཤུགས་ཀྱིས་གང་ཟག་ལ་མི་རྟོན་ཆོས་ལ་རྟོན་པ་དང་། དོན་ལ་ཡང་དྲང་དོན་ལ་མི་རྟོན་ངེས་དོན་ལ་རྟོན་པ་དང་། ངེས་དོན་ལ་ཡང་རྣམ་ཤེས་ཀྱི་སྤྱོད་ཡུལ་ལ་མི་རྟོན་ཡེ་ཤེས་ཀྱི་སྤྱོད་ཡུལ་ལ་རྟོན་པར་གདམས་པར་མཛད་པ་འདི་ནི་མཁས་པ་ཡོངས་ཀྱི་ཐུགས་ཀྱིས་བརྣག་བྱ་གཡར་དམ་དུ་བྱ་བའི་གདམས་པ་ཕུན་སུམ་ཚོགས་པ་ཞིག་ལགས་སོ། །འདིར་སྨྲས་པ། གང་ཡང་མདོ་རྒྱུད་ཟབ་མོའི་ལུང་རིགས་དག །ལེགས་པར་ཤན་མ་འབྱེད་པའི་གཉིད་འཐུག་པོར། །འཕྱན་པར་གྱུར་གང་བཙན་ཐབས་སློང་བྱེད་པ། །འཇམ་དབྱངས་རྣམ་པར་རྒྱལ་བའི་འབྲུག་སྒྲ་ཉིད། ༡ །ཁྱོད་མེད་པས་ན་རྟོགས་དཀའ་ཟབ་མོ་འདིར། །སྐྱེས་སྦྱངས་བློ་གྲོས་ཟབ་ཟབ་ལྟར་སྣང་ཡང་། །ལུང་རིགས་འབུམ་ཕྲག་རྡོ་རྗེའི་ཁུར་ལྕི་བས། །སོམ་ཉིའི་དཔྱང་ཐག་དམ་པོས་གཉིད་དུ་ཡུར། ༢ །སྐལ་བཟང་མཁས་པའི་མདུན་སར་རབ་གྲགས་པའི། །མདོ་རྒྱུད་གྲུབ་མཐའི་ལུང་རིགས་མན་ངག་དག །ཕྱོགས་རེར་ཞེན་པས་ཕན་ཚུན་འཐེན་ཁྱེར་གྱིས། །རྩོད་པའི་དྲྭ་བར་ཆུད་པའི་འཕྱང་མོ་ཉུག ༣ །མངོན་སུམ་མཆོད་ཅེས་འཇམ་པའི་རྡོ་རྗེ་ཡིས། །ཡེ་ཤེས་ཕྱག་གི་རལ་གྲིའི་དབང་བསྐུར་ཞིང་། །དབུགས་དབྱུང་གསུང་གི་སྣང་དང་ཆབ་གཅིག་པར། །ངེས་ཤེས་རིན་ཆེན་སྒྲོན་མེ་མཆོག་ཏུ་འབར། ༤ །ཆོས་སྤྱན་ལྡན་ལ་ཉིན་མོའི་སྣང་བ་བཞིན། །ཟབ་དོན་མངོན་སུམ་མཐོང་བའི་དཔྱིད་དཔལ་དེ། །གང་ལ་གཟན་པར་གྱུར་ཀྱང་རང་སྐྱོན་ཉིད། །འདི་ཡི་སྐྱོན་དུ་བསྒྱུར་བའི་ཅི་ཞིག་རུང་། ༥ །དེང་དུས་སྙིགས་མའི་གཞན་དབང་ཆེར་བདོ་བས། །གཟུ་བོར་མི་གནས་བྱིས་པའི་རང་མཐོང་གིས། །ཆགས་སྡང་སྙེམས་པ་མཐོ་བས་སྤྱི་བརྡོལ་གྱིས། །ཆོས་དང་གང་ཟག་མཆོག་ལའང་སྐྱོན་འདོགས་བྱེད། ༦ །ཡུལ་དུས་གང་ཟག་དམན་པ་བདག་འདྲ་ཡིས། །འཆད་རྩོད་རྩོམ་མིན་དུས་མིན་བདག་གིས་འཚལ། །དེ་ལྟ་ན་ཡང་འཁོར་ལོའི་མགོན་པོ་ཡི། །བཀའ་ཡིས་གནང་བསྐུལ་དོན་ལྡན་མཐོང་ཕྱིར་དང་། ༧ །བདག་ཡིད་གོམས་ཕྱིར་གཞན་དག་བསྐུལ་ཕྱིར་དང་། །ཕན་པའི་སེམས་ཕྱིར་ཚིགས་གསལ་འདི་བྱས་སོ། །ཟབ་ཕྱིར་དངོས་བསྟན་ཙམ་ཡང་རྟོགས་མིན་ན། །ཚིག་ནུས་དང་ནི་ཤུགས་བསྟན་ལྟ་ཡང་ཅི། ༨ །དེ་ཕྱིར་རང་མཐོང་བྱིས་པས་མ་རྟོགས་པས། །མ་ཚང་མ་འབྲེལ་མི་དགོས་ལ་སོགས་པའི། །ཉེས་པ་གང་མཆིས་རྩ་གསུམ་སྲུང་མ་དང་། །ཆོས་སྤྱན་ལྡན་ལ་འཆགས་ཀྱི་དག་ཚངས་སྩོལ། ༩ །འདིས་མཚོན་དུས་གསུམ་དགེ་ཚོགས་ཅི་མཆིས་པ། །བསྟན་འཛིན་ཞབས་བརྟན་དགེ་འདུན་སྡེ་འཕེལ་ཞིང་། །བཤད་སྒྲུབ་བསྟན་པ་རྟག་ཏུ་དར་རྒྱས་ཏེ། །སྣོད་བཅུད་རྫོགས་ལྡན་འབྱོར་བའི་རྒྱུ་རུ་བསྔོ། ༡༠ །བདག་ཀྱང་དེང་ནས་བྱང་ཆུབ་མཆོག་གི་བར། །འཇམ་པའི་དབྱངས་ཀྱིས་མངོན་སུམ་རྗེས་བཟུང་ནས། །བདུད་བཞིའི་གཡུལ་ལས་རྟག་ཏུ་རྣམ་རྒྱལ་ཏེ། །རྒྱལ་བ་ཀུན་གྱི་དམ་ཆོས་འཛིན་གྱུར་ཅིག ༡༡ །འདི་དང་གང་འབྲེལ་འཇམ་པའི་དབྱངས་ཉིད་ཀྱིས། །བྱིན་རླབས་རྗེས་བཟུང་ཚེ་རིང་ནད་མེད་ཅིང་། །ངེས་དོན་སྙིང་པོའི་ལམ་བཟང་མཐོང་གྱུར་ཏེ། །ཕྱོགས་དུས་ཀུན་ཏུ་འཛིན་སྐྱོང་སྤེལ་གྱུར་ཅིག ༡༢ །མཁའ་ཁྱབ་ཞིང་གི་རྒྱལ་བ་སྲས་བཅས་དང་། །རབ་འབྱམས་རྩ་གསུམ་རྒྱ་མཚོའི་བདེན་མཐུ་ཡིས། །ཇི་ལྟར་སྨོན་པ་འགྲུབ་པའི་མཐུན་གྱུར་དང་། །ཕྱོགས་དུས་ཀུན་ཏུ་དགེ་བའི་བཀྲ་ཤིས་སྩོལ། ༡༣ །དེ་ལྟར་མདོ་རྒྱུད་གྲུབ་མཐའི་ཟབ་ཁྱད། །ཉམས་ལེན་བསྒོམ་པའི་གནད་གསང་ཁས་ལེན་ཤན་འབྱེད་གྱི་གསང་ལམ་ངེས་ཤེས་རིན་པོ་ཆེའི་སྒྲོན་མེ་འདི་རང་ཆུང་ནས་མཇལ་ཞིང་མོས་པས་ཞུགས་ཀྱང་ངེས་པའི་དོན་གྱིས་དབུལ་ན་ཡང་། གངས་ཅན་ན་མངོན་པར་མཐོ་བའི་མ་གྷ་དྷ་གཉིས་པར་གྲགས་པའི་ཤར་རྒྱལ་བ་ཀཿཐོག་རྡོ་རྗེའི་གདན་གྱི་གནྡྷོ་ལའི་བསྟན་པ་བཤད་སྒྲུབ་ལས་གསུམ་གྱིས་གཞིར་བཞེས་སུ་མཛད་པའི་མཁྱེན་བརྩེ་ནུས་པའི་གཏེར་ཆེན་སི་ཏུ་རིན་པོ་ཆེས་གསལ་དུ་བསྐྲུན་པའི་རྒྱུད་སྡེ་ལྷ་ཁང་ཐུབ་བསྟན་བཤད་སྒྲུབ་ནོར་བུའི་ལྷུན་པོར་རྗེ་ཉིད་ཀྱི་བདག་རྐྱེན་ལས་གཞུང་མང་རབས་ཀྱི་བཤད་པ་བགྱིད་ཚེ་གཞུང་འདི་འཆད་སྐབས། བཀའ་དྲིན་མཚུངས་བྲལ་བླ་མ་རིན་པོ་ཆེ་ཐུབ་བསྟན་རྒྱལ་མཚན་འོད་ཟེར་གྱི་ཞལ་སྔ་ནས་བཤད་ལུང་ལེགས་པར་མནོས་ཤིང་བསྡུས་དོན་ཞིག་ཀྱང་བཀའ་བསྐུལ་གནང་། ཁྱད་པར་ཕྱིས་སུ་ཡང་གདན་ས་རིན་པོ་ཆེ་དེར་ཀུན་མཁྱེན་སངས་རྒྱས་གཉིས་པ་རྗེ་འཇམ་དབྱངས་བླ་མའི་བཀའ་ཡི་བསྡུ་བའི་ཐུགས་སྩོལ་གནང་བའི་བདག་རྐྱེན་མཆོག་གིས་དཔལ་དུས་ཀྱི་འཁོར་ལོ་དང་། འདི་ཀ་སོགས་ཀྱི་བཤད་ལུང་ཕུལ་སྐབས། བདག་ཅག་གི་བཀའ་དྲིན་གསུམ་ལྡན་འཁོར་ལོའི་མགོན་པོ་མདོ་སྔགས་བསྟན་པ་ཡོངས་ཀྱི་རྒྱལ་མཚན་སྔ་འགྱུར་བསྟན་པའི་སྲོག་ཤིང་མཁས་གྲུབ་ཡོངས་ཀྱི་གཙུག་རྒྱན་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན། ༧འཇམ་མགོན་སི་ཏུ་རིན་པོ་ཀུན་གཟིགས་ཆོས་ཀྱི་རྒྱ་མཚོ་ཞེས་སྙན་པའི་བ་དན་སྲིད་ན་མངོན་པར་མཐོ་བ་གང་གིས་བཀྲ་ཤིས་པའི་ལྷ་རེག །གསང་བ་སྔགས་ཀྱི་ནང་གི་དམ་ཚིག་གི་རྟེན་མཆོག །དཀྱིལ་འཁོར་ཐམས་ཅད་ཀྱི་ངོ་བོ་རྡོ་རྗེ་དང་དྲིལ་བུ། རྡོ་རྗེའི་ལང་ཚོ་བསྒྲུབ་པའི་རིན་པོ་ཆེའི་རིལ་བུ་དང་བྲི་གཞི་ཤོག་བུ་བཅས་བཀའ་ལུང་གསེར་གྱི་ཅོད་པན་སྤྱི་བོར་ཡང་ཡང་རྩལ་གནང་ཉིད། རྟེན་འབྲེལ་གྱི་དགོངས་གནད་ཆེ་བར་མོས་ཤིང་རང་ཡང་མཆོག་གི་བསྟན་བཅོས་ཀྱིས་བསྟན་རྒྱུན་སྲིད་མཐར་སྤེལ་བའི་ས་བོན་བཟང་པོ་རྩོམས་པའི་སྐལ་བཟང་དུ་བགྱིད་པའི་དད་མོས་ལེགས་མཐོང་དང་། གཞན་ཡང་ལུང་རིགས་སྨྲ་བའི་ཆོས་ཀྱི་སྤྱན་ལྡན་དུ་མས་བཀའ་ཡི་བསྐུལ་ངོར་ཆུད་གསན་མ་ཕོད་པར་སྐྱེས་སྦྱང་བློ་གྲོས་ལྡན་ལ་འདི་འདྲས་ཅི་ཡང་མི་མཁོ་བས་ན་རྗེ་ཀུན་མཁྱེན་འཇམ་དབྱངས་བླ་མའི་ལེགས་བཤད་སོགས་མཁས་པའི་རིགས་ལམ་ཟབ་མོ་རྣམས་བསྡུ་ཞིང་མདོ་རྒྱུད་ཟབ་མོའི་ལུང་སྦྱར་མང་དུ་འབྲི་བར་བྱས་ན། ཡི་གེ་མང་དུ་དོགས་ནས་རྒྱས་སྤྲོས་དང་ཚིག་གི་སྡེབས་སྦྱོར་བསྐྱུངས་ནས་རང་འདྲའི་སྐལ་མཉམ་ལས་དང་པོ་པ་ཤེས་བརྩོན་ཞན་པའི་རིགས་རྣམས་ལ་ཚིག་དོན་གསལ་བའི་འབྲུ་འགྲེལ་གོ་ཅི་བདེ་གཙོ་བོར་བྱས་ན་བློ་གྲོས་སྣང་བའི་སྒོ་འབྱེད་དུ་ཅུང་ཟད་ཕན་དུ་རེ་བའི་སེམས་ཀྱིས་ཨོ་རྒྱན་འཇིགས་མེད་ཆོས་ཀྱི་དབང་པོ། ཨོ་རྒྱན་བསྟན་འཛིན་ནོར་བུ། འཇམ་དབྱངས་མཁྱེན་བརྩེའི་དབང་པོ། ཀོང་སྤྲུལ་རིན་པོ་ཆེ། ཀུན་མཁྱེན་འཇམ་དབྱངས་མི་ཕམ་རྣམ་རྒྱལ་རྒྱ་མཚོ་སོགས་མཁས་ཤིང་གྲུབ་པའི་དབང་ཕྱུག་མང་པོའི་ཞབས་རྡུལ་རེག་པའི་སློབ་འབངས་ཡོངས་ཀྱི་ཐ་ཤལ་ཤཱཀྱའི་བཙུན་གཟུགས་རྨོངས་བརྟུལ་གྱི་ན་བ་ཚེ་རབས་ཀུན་ཏུ་ཨོ་རྒྱན་པདྨའི་བྲན་དུ་སྨོན་པའི་ཡིད་ཅན་ཀུན་བཟང་དཔལ་ལྡན་ནམ་ཐུབ་བསྟན་ཀུན་བཟང་ཆོས་གྲགས་དུ་འབོད་པས། དཔལ་སྤྲུལ་རིན་པོ་ཆེའི་གདན་སའི་མཐིལ་དཀར་ཆུང་རི་ཁྲོད་དབེན་གནས་དམ་པའི་ཡོན་ཏན་ཕུན་སུམ་ཚོགས་པར་རིག་འཛིན་འཆི་མེད་གྲུབ་པའི་ཆོས་སྒར་ཐུབ་བསྟན་བཤད་སྒྲུབ་གླིང་དུ་ཨོ་རྒྱན་སངས་རྒྱས་གཉིས་པ་གངས་ལྗོངས་བོད་ཡུལ་དབུས་སུ་བྱོན་ཏེ་མདོ་སྔགས་ཀྱི་ཆོས་འཁོར་བསྐོར་བའི་ཚེས་བཅུའི་དུས་མཆོད་དང་བཅས་པར་རྫོགས་པར་བགྱིས་པ་འདིས་ཀྱང་ཕྱོགས་དུས་ཀུན་ཏུ་རིས་མེད་པའི་བསྟན་འགྲོ་ལ་སྨན་པར་བསླུ་བ་མེད་པའི་བླ་མ་དཀོན་མཆོག་རྩ་གསུམ་རྒྱ་མཚོའི་ཐུགས་བསྐྱེད་དང་སྨོན་ལམ་བདེན་པ་ཆེན་པོའི་མཐུས་བྱིན་གྱིས་བརླབས་པར་མཛད་དེ་དར་ཞིང་རྒྱས་ལ་དགེ་ཞིང་བཀྲ་ཤིས་པར་གྱུར་ཅིག །ཤུབྷཾ། སརྦ་མངྒ་ལཾ།། ངེས་ཤེས་རིན་པོ་ཆེའི་སྒྲོན་མེའི་འགྲེལ་ཆུང་ཟབ་དོན་སྣང་བའི་འཆར་སྒོ་ཡིད་དཔྱོད་ཚིག་གི་མེ་ལོང།ག མྦྷི རཱ ཪྠ ཿ ཨཱ ལོ ཀ སྱ ཨུ ད ཡ མུ ཁྱ མ ན བི ཙཱ ར བ ཙ སྱ ཨཱ ད ཪྴ ནཱ མ ནི ཛྙཱ ནཾ ར ཏྣ སྱ དི པཱཾ སྱ བི ཧར ཏི སྨ། |