ངེས་ཤེས་རིན་པོ་ཆེའི་སྒྲོན་མེའི་འགྲེལ་ཆུང་ཟབ་དོན་སྣང་བའི་འཆར་སྒོ་ཡིད་དཔྱོད་ཚིག་གི་མེ་ལོང།
ག མྦྷི རཱ ཪྠ ཿ ཨཱ ལོ ཀ སྱ ཨུ ད ཡ མུ ཁྱ མ ན བི ཙཱ ར བ ཙ སྱ ཨཱ ད ཪྴ ནཱ མ ནི ཛྙཱ ནཾ ར ཏྣ སྱ དི པཱཾ སྱ བི ཧར ཏི སྨ།
ངེས་ཤེས་རིན་པོ་ཆེའི་སྒྲོན་མེའི་འགྲེལ་ཆུང་ཟབ་དོན་སྣང་བའི་འཆར་སྒོ་ཡིད་དཔྱོད་ཚིག་གི་མེ་ལོང་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲི་ཀུ་མ་ར་ཡེ། རྣམ་འདྲེན་ལྷ་མའི་སྟོན་པ་ཤཱཀྱའི་ཏོག །རྒྱལ་སྲས་བརྒྱད་དང་གནས་བརྟེན་བརྒྱད་གཉིས་སྡེ། །ཤིང་རྟ་མཆོག་གཉིས་འཛམ་གླིང་རྒྱན་ཆེན་དྲུག །སྟོན་མཆོག་བརྒྱུད་འཛིན་བཅས་ལ་དད་བརྒྱས་བསྙེན། །མཁན་སློབ་ཆོས་རྒྱལ་པཎ་ཆེན་བི་མ་ལ། །བཻ་རོ་ཀ་ཅོག་ཞང་དང་གཉག་གནུབས་ཟུར། །ཀུན་མཁྱེན་རོང་ཀློང་རྣམ་གཉིས་ཀཿཐོག་པ། །ཡབ་སྲས་བརྒྱུད་པར་བཅས་པ་རྒྱལ་གྱུར་ཅིག །སྨྲ་བའི་སེང་གེ་ཀུན་མཁྱེན་མི་ཕམ་རྗེ། །པཎ་ཆེན་བླ་མ་བྱམས་མགོན་སྣང་བའི་གཏེར། །མཁན་ཆེན་རྣམ་གསུམ་མཆོག་སྤྲུལ་མ་ཏིའི་མཚན། །གྲུབ་མཆོག་དབང་པོ་རྣམས་ལ་ཕྱག་བྱས་ཏེ། །ཟབ་ལམ་གདམས་པའི་དེ་ཉིད་སྦྱིན་པའི་དཔལ། །ངེས་ཤེས་རིན་པོ་ཆེ་ཡི་སྒྲོན་མེ་ཞེས། །ལེགས་བཤད་ནོར་བུའི་སྣང་བ་འབུམ་འཇོ་བའི། །ཚུལ་འདིར་དང་བའི་ཡིད་ཀྱིས་འཇུག་པར་བྱ། །དེ་ལ་འདིར་ཁྱབ་བདག་རྒྱལ་བ་གཉིས་པ་ཀུན་མཁྱེན་འཇམ་དབྱངས་བླ་མ་མི་ཕམ་རྣམ་པར་རྒྱལ་བ་ཉིད་སྐུ་ན་ཤིན་ཏུ་གཞོན་པའི་དུས་སུ་ཟབ་ཅིང་རྒྱ་ཆེ་བའི་དོན་གྱི་དཀའ་གནད་གསལ་བར་བྱེད་པའི་གཞུང་བཟང་སྡེབ་སྦྱོར་གྱི་སྤྲོས་པ་སྤང་བ་གང་ཤར་སྟན་གཅིག་ཏུ་བརྩམ་པར་མཛད་པའི་ལེགས་བཤད་རྨད་དུ་བྱུང་བ་ཉིད་འཆད་པ་ལ་གསུམ། ཐོག་མར་དགེ་བ་ཀླད་ཀྱི་དོན་བསྟན་བཅོས་ལ་འཇུག་པའི་ཡན་ལག །བར་དུ་དགེ་བ་གཞུང་གི་དོན་བསྟན་བཅོས་ཀྱི་དངོས་དོན་བསྟན་པ། ཐ་མར་དགེ་བ་མཇུག་གི་དོན་བསྟན་བཅོས་རྫོགས་པའི་བྱ་བའོ། །དང་པོ་ལ་གཉིས། མཚན་བསྟན་པ་དང་། མཆོད་པར་བརྗོད་པའོ། །དང་པོ། ངེས་ཤེས་རིན་པོ་ཆེའི་སྒྲོན་མེ་བཞུགས་སོ་ཞེས་པས་བསྟན་ཏེ། གཞུང་བཟང་འདི་ལ་ལེགས་པར་བརྟེན་ན་ཟབ་པ་དང་རྒྱ་ཆེ་བའི་དོན་ཤིན་ཏུ་རྟོགས་པར་དཀའ་བའི་གནས་ཟབ་མོའི་དེ་ཁོ་ན་ཉིད་ལ་སྒྲོ་སྐུར་ཀུན་དང་བྲལ་བའི་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བའི་ཡིད་ཆེས་ཀྱི་བློ་མིག་ཡང་དག་པར་རང་རྒྱུད་ལ་བདེ་བླག་ཏུ་སྐྱེད་པའི་ཕྱིར་དཔེར་ན་མུན་པ་སེལ་ཞིང་སྣང་བ་སྦྱིན་པའི་རིན་པོ་ཆེའི་སྒྲོན་མེ་རིན་ཐང་དང་བྲལ་བ་ལྟ་བུ་འདི་ན་བཞུགས་སོ་ཞེས་དཔེ་དོན་ཟུང་དུ་འབྲེལ་བའི་སྒོ་ནས་མཚན་དུ་བཏགས་པའོ། །གཉིས་པ་ནི། གང་ཡིད་ཐེ་ཚོམ་སོགས། ཤྭ་ལོ་ཀ་གཅིག་གིས་བསྟན་ཏེ། ལུང་རིགས་ཟབ་མོའི་དེ་ཁོ་ན་ཉིད་དུ་གཉེར་བའི་གང་ཟག་གང་ཞིག་ཟབ་པ་དང་རྒྱ་ཆེ་བའི་དོན་རྟོགས་པར་དཀའ་བའི་གནས་ལ་འཇུག་པའི་ཡིད་ཀྱི་བློ་གྲོས་ཡིན་ནམ་མ་ཡིན་སྙམ་པའི་ཐེ་ཚོམ་གྱི་དྲྭ་བའི་སྦུབས་སུ་འཐུམས་ནས་གཅིག་ཏུ་ཐག་ཆོད་མེད་པར་ཁས་ལེན་ཅི་བྱ་གཏོལ་མེད་དུ་འཕྱན་པ་ལས་དངོས་སུ་འབྱེད་ཅིང་ཟབ་རྒྱས་ཆོས་ཀྱི་དེ་ཉིད་མངོན་སུམ་དུ་རྟོགས་པར་བྱེད་པའི་མཁྱེན་རབ་འཇམ་དཔལ་རྡོ་རྗེའི་མར་མེ་མཆོག་ཏུ་འབར་བ་ནི། རྡུལ་བྲལ་ཟག་པ་མེད་པ་སོ་སོ་རང་རིག་པའི་ཡེ་ཤེས་ངེས་པ་དོན་གྱི་འཇམ་དཔལ་གཞོན་ནུ་ཡིན་ལ། དེ་ཉིད་ཕྱིན་ཅི་མ་ལོག་པར་དབང་རྣོན་ཆོས་ཀྱི་རྗེས་སུ་འབྲང་བ་རྣམས་ཀྱི་སྙིང་ལ་གསལ་བར་འཆར་བའི་ཐབས་ནི་ཡིད་གཉིས་དང་སྒྲོ་སྐུར་ཀུན་དང་བྲལ་བའི་ངེས་པའི་ཤེས་པ་ཟབ་མོའི་ཚུལ་སུས་ཀྱང་མི་འཕྲོག་པའི་རྣམ་པར་དག་པ་འདྲེན་ཅིང་འཇུག་པར་བྱེད་པ་ཡང་དག་པའི་ཚད་མ་གཉིས་ནས་བདེན་གཉིས་ཟུང་དུ་འཇུག་པའི་ལམ་བཟང་པོ་གསལ་བར་མཐོང་བའི་ཚད་མའི་མིག་ཏུ་གྱུར་པ་དེར་རག་ལས་པར་མཐོང་ནས་བསྟན་བཅོས་རྩོམ་པ་པོ་བདག་ཉིད་ཀྱང་རབ་ཏུ་དད་དོ་། །ཞེས་མཆོད་པར་བརྗོད་པའོ། །འདི་ནི་བརྗོད་བྱའི་དོན་དང་མཐུན་པར་བསྔགས་པ་སྟེ་ཤེས་བྱ་བདེན་གཉིས་ཀྱི་དོན་ཚུལ་གཉིས་ཀྱིས་ཕྱིན་ཅི་མ་ལོག་པར་ངེས་པའི་ཤེས་པ་ལ་བརྟེན་ནས་ཡུལ་དང་ཡུལ་ཅན་གྱི་གཉིས་སྣང་གི་སྤྲོས་པ་དང་བྲལ་བའི་དེ་བཞིན་ཉིད་དང་གཉིས་སུ་མེད་པའི་ཡེ་ཤེས་ཉིད་མཐོང་བ་ལ་ཕྱག་མཛད་པས། དེ་ནི་འཕགས་མཆོག་ཀླུ་སྒྲུབ་ཀྱིས། །ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞིན་དུ། །རང་གིས་ངང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་གསུངས་པ་ལྟར་ཡིན་ལ། དེའང་དབྱེ་ན་འཇམ་དཔལ་ཞེས་པས་གཞི་ལམ་འབྲས་བུའི་དེ་ཉིད་དང་རྡོ་རྗེ་ཞེས་པས་དེ་གསུམ་དབྱེར་མི་ཕྱེད་པར་བསྟན་ཏོ། །ཀྱང་སྒྲས་ཟབ་རྒྱས་ཀྱི་དེ་ཉིད་ཟབ་མོ་མཐོང་བར་འདོད་པས་ཚད་མའི་མིག་བཟང་དད་པས་སྐྱེད་དགོས་པར་ཡང་བསྟན་ཏོ། །གཉིས་པ་བར་དུ་དགེ་བ་གཞུང་གི་དོན་བསྟན་བཅོས་དངོས་ཀྱི་དོན་རྣམ་པར་དབྱེ་བ་ལ་གསུམ། ཚད་མའི་འཇུག་ཡུལ་ལེགས་པར་མཐོང་བའི་ཕྱིར་ཤིང་རྟའི་ལམ་སྲོལ་སྤྱིར་བསྟན་ཏེ་གཞི་བཟུང་བ། ཚད་མའི་བློ་གྲོས་གསལ་བར་སྒྲུབ་པའི་ཕྱིར་བརྗོད་བྱའི་ཡན་ལག་རྒྱས་པར་བཤད་དེ་བྱེ་བྲག་ཏུ་དབྱེ་བ། ཚད་མའི་རྟོགས་པ་རྒྱུད་ལ་སྐྱེད་པའི་ཕྱིར་གཟུངས་སྤོབས་སྒྲུབས་པའི་སྒོ་ལ་གདམས་ཏེ་མཇུག་བསྡུ་བའོ། །དང་པོ་ལ་གསུམ། ངེས་ཤེས་མེད་པའི་སྐྱོན་དང་ལམ་ཡང་ལོག་གི་ཤན་འབྱེད་བསྟན་པ། ངེས་ཤེས་གང་ལས་སྐྱེ་བ་ཚད་མའི་ལམ་སྲོལ་ངོས་བཟུང་བ། དེ་ལ་ངེས་པར་ཞུགས་པའི་བློ་མཆོག་མངའ་བ་རྣམས་ལ་བསྔགས་པའོ། །དང་པོ། ཀྱེ་མ་ཟབ་མོའི་སོགས་ཤྭ་ལོ་ཀ་གཉིས་ཀྱིས་བསྟན་ཏེ། ཀྱེ་མའོ་ཐ་སྙད་དང་དོན་དམ་པའི་ཟབ་མོའི་གནས་ལུགས་མ་ནོར་བར་རྟོགས་པ་ལ་ཡང་དག་པར་སྦྱོར་བར་བྱེད་པའི་བདེན་གཉིས་དཔྱོད་པའི་ཚད་མས་དྲང་བའི་ངེས་ཤེས་རིན་པོ་ཆེ་ཡི་སྒྲོན་མེ་ལྟ་བུར་གྱུར་པ་ཁྱོད་ཉིད་རང་རྒྱུད་ལ་མ་སྐྱེད་ཅིང་མེད་པས་ན་སྲིད་པ་འདི་ན་གང་ཟག་ཕལ་ཆེ་བ་གནས་ལུགས་ཡང་དག་པའི་དོན་ལ་ཐོས་བསམ་སྒོམ་པའི་ངེས་པ་དང་བྲལ་ནས་ཐེ་ཚོམ་གྱི་སྒྱུ་མའི་རྒྱར་ནི་འཐུམས་ཤིང་བླང་དོར་མཁས་ལེན་ལ་རྨོངས་པར་གྱུར་པའི་སྐྱོན་འདི་བྱུང་བ་ཡིན་ལ། དེས་ན་མདོ་སྔགས་ཀྱི་ཐེག་པ་ལ་གང་ལ་ཞུགས་ཀྱང་གཞི་སྣང་སྟོང་ངམ་སྟོང་དང་རྟེན་འབྱུང་། ལམ་ཐབས་ཤེས་སམ་ཚོགས་གཉིས། འབྲས་བུ་སྐུ་གཉིས་སམ་མཁྱེན་གཉིས་ལ་སོགས་པས་བསྡུས་པའི་ཆོས་རྣམས་ལ་རང་གིས་ལུང་རིགས་ཚད་མའི་ལམ་ནས་དྲངས་པའི་ངེས་པའི་ཡིད་ཆེས་སུས་ཀྱང་མི་འཕྲོགས་པ་རྒྱུད་ལ་འདྲོང་བ་དང་གཞན་ལས་ཐོས་པས་དད་པར་བྱེད་པ་ཚིག་ཙམ་ལ་བརྟེན་ཞིང་ངེས་པ་མ་འདྲོང་བ་གཉིས་ནི་ལམ་དངོས་དང་དེ་ཡི་གཟུགས་བརྙན་བཞིན་དུ་ཡང་དག་དང་ལྟ་སྣང་གི་ཁྱད་པར་ཡོད་པའོ། །གཉིས་པ། རྨད་བྱུང་ཆོས་ཀྱི་སོགས་ཚིགས་བཅད་གསུམ་གྱིས་བསྟན་ཏེ། ཐ་སྙད་ཚད་མའི་ཚུལ་དང་དོན་དམ་དབུ་མའི་ཚུལ་གཉིས་དངོས་སྟོབས་ཀྱི་རིགས་པས་ཇི་ལྟ་བ་བཞིན་དུ་གཏན་ལ་དབབ་པས་ཤིང་རྟའི་སྲོལ་འབྱེད་གཉིས་ཀྱི་དགོངས་པ་མཐར་ཐུག་གསལ་བར་མཛད་པའི་རྨད་དུ་བྱུང་བའི་སློབ་དཔོན་ཆེན་པོ་རིགས་པའི་དབང་ཕྱུག་ཆོས་ཀྱི་གྲགས་པ་དང་མཁྱེན་པའི་གཏེར་ཆེན་དཔལ་ལྡན་ཟླ་བའི་གྲགས་པ་ཟུང་ནི་འོད་དཀར་ཅན་གྱི་གཟུགས་སུ་བཀོད་པ་སྟེ། མཚན་ཉིད་འཛིན་པའི་ཆོས་ཀྱང་ཡིན་ལ་དེའི་དངོས་མིང་དུའང་གྲངས་པའི་ཕྱིར་རོ། །དེས་ན་སློབ་དཔོན་དེ་གཉིས་ཀྱིས་ཚད་མ་དང་དབུ་མའི་གཞུང་གི་ལེགས་པར་བཤད་པའི་གསུང་གི་འོད་ཟེར་གྱི་སྣང་བ་དང་ཆབ་གཅིག་པར་སྟོན་མཆོག་ཐུབ་པའི་དབང་པོའི་ཟབ་ཅིང་རྒྱ་ཆེ་བའི་བདག་ཉིད་ཅན་གྱི་བསྟན་པའི་ལྷ་ལམ་སྟེ་ནམ་མཁའ་ཡངས་པོར་ཤར་བ་སྟེ་བྱོན་པ་ཡིས་བདེན་པ་གཉིས་ཀྱི་གནས་ལུགས་ལ་མ་རྟོགས་ལོག་རྟོག་ཐེ་ཚོམ་གྱི་མུན་པ་ཐིབ་པོ་མ་ལུས་པ་རྣམ་པར་འཇོམས་པར་མཛད་ཅིང་ཤིང་རྟའི་ལམ་སྲོལ་གསལ་བར་བྱས་པ་ཡིན་ལ། དེ་ཡང་གསུང་གི་འོད་ཀྱིས་ཇི་ལྟར་གསལ་ན། དཔལ་ཆོས་ཀྱི་གྲགས་པས། རྒྱ་ཆེ་བ་ཐ་སྙད་ཀྱི་དེ་ཁོ་ན་ཉིད་དཔྱོད་པའི་ཚད་མ་དྲི་མ་མེད་པ་དངོས་པོའི་སྟོབས་ལས་གྲུབ་པ་ཡིས་ཐ་སྙད་ཀྱི་སྣང་ཚུལ་ཡང་དག་པར་གསལ་བར་བྱས་པས་ཐ་སྙད་ཀྱི་བླང་ངོར་ལ་འཇུག་ལྡོག་མི་ནོར་ཞིང་མི་འཁྲུལ་པ་དང་། ཁྱད་པར་དུ་བསྟན་པ་ཡང་དག་པའི་འཇུག་ངོགས་ཚད་མ་དང་སྟོན་པ་ཐམས་ཅད་མཁྱེན་པ་ཡང་དག་པའི་སྐྱེས་བུ་ཚད་མ་ཡིན་པར་སྒྲུབས་པ་ལ་འགྲོ་བ་ལྷ་དང་བཅས་པ་སུས་ཀྱང་མི་འཕྲོག་པའི་ཡིད་ཆེས་མཆོག་ཏུ་གྱུར་པ་རྙེད་པའི་སྒོ་གཅིག་པུ་བར་གྱུར་པ་རྒྱས་པའི་བསྟན་བཅོས་ཚད་མ་རྣམ་པར་འགྲེལ་བ་ལ་སོགས་པའི་ཚད་མའི་གཞུང་དང་། དཔལ་ལྡན་ཟླ་བའི་ཞབས་ཀྱིས་གནས་ལུགས་ཟབ་མོ་སྤྲོས་བྲལ་སྟོང་པ་ཉིད་ཀྱི་དོན་རིགས་པའི་ལམ་ནས་གཏན་ལ་འབེབས་བྱེད་དོན་དམ་དཔྱོད་པའི་རིགས་ཤེས་ཀྱི་ཚད་མ་དྲི་མ་མེད་པས་གནས་ལུགས་ཟབ་མོའི་དེ་ཉིད་ཇི་བཞིན་དུ་གསལ་བར་བྱེད་པ་འཇུག་པ་རྩ་འགྲེལ་ལ་སོགས་པའི་ཐེག་མཆོག་དབུ་མའི་གཞུང་དང་རྣམ་པ་གཉིས་ཀྱིས་བསྟན་པའི་ལྷ་ལམ་གསལ་བར་མཛད་པ་ཡིན་པས་འདི་གཉིས་ཁོ་ན་ལམ་གྱི་སྙིང་པོ་ཡང་དག་པར་མཐོང་བའི་མིག་ཏུ་གྱུར་པ་ཡིན་ལ། དེའང་སྔ་མ་ཚུལ་བཞིན་དུ་ངེས་ན། དེ་ལས་གནས་ཡོངས་གྱུར་གྱི་ཚད་མ་ལ་ངེས་པར་འཇུག་ཅིང་མཐར་ཐུག་རང་བཞིན་ལྷུན་གྲུབ་ཀྱི་ཡེ་ཤེས་ཀྱང་ཚེགས་མེད་པར་རྟོགས་པ་དང་། ཕྱི་མ་ལེགས་པར་ངེས་ན། རྣམ་གྲངས་མིན་པའི་དོན་དམ་ཚུལ་བཞིན་དུ་མཐོང་ཞིང་མཐར་ཐུག་ངོ་བོ་ཀ་དག་གི་ཡེ་ཤེས་ལའང་བདེ་བླག་ཏུ་འཇུག་པར་འགྱུར་རོ། །གསུམ་པ་ལེགས་པར་སྦྱངས་པའི་སོགས་ཤྭ་ལོ་ཀ་གཅིག་གིས་བསྟན་ཏེ། དེ་ལྟར་བདེན་གཉིས་དཔྱོད་པའི་ཚད་མ་གཉིས་ཀྱིས་ལེགས་པར་སྦྱངས་པའི་བློ་གྲོས་ཀྱི་མིག་མཆོག་དང་ཕུལ་དུ་གྱུར་པ་ཟུང་སྟེ་གཉིས་པོ་ཟུམ་པ་མེད་པར་བགྲད་དེ་སྟོན་པ་ཐམས་ཅད་མཁྱེན་པས་ལེགས་པར་བསྟན་པའི་ལམ་ཟབ་ཅིང་རྒྱ་ཆེ་བ་དེར་ནི་གཞན་དྲིང་མི་འཇོག་པར་ཏེ་སུས་ཀྱང་གཞན་དུ་དྲང་མི་བཏུབ་པས་ཡང་དག་པར་ཚུལ་བཞིན་དུ་ཞུགས་པའི་གང་ཟག་དམ་པ་དེ་ལ་མཆོག་ཏུ་མོས་ཤིང་བསྔགས་པས་བསྟོད་དོ། །གཉིས་པ་ཚད་མའི་བློ་གྲོས་གསལ་བར་སྒྲུབས་པའི་ཕྱིར་བརྗོད་བྱའི་ཡན་ལག་རྒྱས་པར་བཤད་དེ་བྱེ་བྲག་ཏུ་དབྱེ་བ་ལ་གསུམ། ལྡོམ་བུ་པས་དྲིས་པའི་ཚུལ་གྱིས་གླེང་བསླངས་ཏེ་བརྗོད་བྱའི་ལུས་དོན་རྣམ་པར་བཞག་པ། དྲང་སྲོང་གི་ལན་གྱི་ཚུལ་དུ་སོ་སོའི་ཡན་ལག་རྒྱས་པར་སྤྲོས་ཏེ་དངོས་དོན་གཏན་ལ་དབབ་པ། དྲི་བ་པོ་གུས་པའི་ཚུལ་གྱིས་བསྟན་པ་མཆོག་ལ་བསྔགས་ཤིང་ངོ་མཚར་ཆོས་ཀྱི་སྒྲོན་མེ་གཞན་ལ་གསལ་བར་བསྐུལ་བའོ། །དང་པོ། དེ་ལྟར་སེམས་པའི་སོགས་ཚིགས་བཅད་བཅུ་དང་རྐང་པ་གསུམ་གྱིས་བསྟན་ཏེ། གོང་དུ་བཤད་པའི་དེ་ལྟར་ས ེམས་པའི་རྣམ་པར་དཔྱོད་པའི་བློ་གྲོས་གཟུ་བོར་གནས་པའི་དྲང་སྲོང་ཆེན་པོའི་གཟུགས་སུ་བཀོད་པ་དེ་ལ། རང་གར་ཐོལ་གྱིས་བྱུང་བའི་རྣམ་དཔྱོད་ཀྱི་རྟོག་པ་ཤར་བ་ནི་ལྡོམ་བུ་པ་ཞིག་གི་ཚུལ་དུ་བཀོད་ནས་དེ་ཡིས་རྟོགས་པར་དཀའ་བ་ཟབ་མོའི་གནས་ལ་རྟོག་གེའི་བརྒལ་ཞིང་བརྟག་པར་བྱ་བའི་ཕྱིར་དྲི་བ་བདུན་པོ་འོག་ནས་འབྱུང་བ་འདི་ལྟར་དྲིས་ཏེ་དེ་ཡང་འདི་དང་འདི་ཡི་ལན་རྣམས་མཁས་པ་གཞན་གྱི་སྔར་ནས་ཡང་ཡང་བསྟན་པའི་རྗེས་སུ་དེ་ཉིད་སླར་ཡང་བསྐྱར་ཟློས་སམ་རྗེས་བརྗོད་ཙམ་བྱས་པ་ལ་མཁས་པ་རྣམས་ཀྱིས་བསྔགས་པའི་གནས་སུ་ཅི་ཞིག་ཏུ་མཐོང་སྟེ་བསྔགས་འོས་མིན་ལ། དེ་ལྟར་མ་ཡིན་པར་རྟོགས་པར་དཀའ་བ་ཟབ་མོའི་གནས་འདི་དག་ལ་རང་གི་རྣམ་པར་དཔྱོད་པ་ཡང་དག་པར་གཟུ་བོར་གནས་ཤིང་བག་ཕོབ་སྟེ་ཞིབ་མོའི་བློ་གྲོས་ཀྱིས། ཚུལ་བཞིན་དུ་དཔྱོད་ལ་གང་ཞིག་དྲིས་པའི་ལན་འདི་རྣམས་ལུང་རིགས་ཚད་མ་དང་ལྡན་པའི་སྒོ་ནས་ཉེ་བར་ལྡོན་པར་མཛོད་ཅིག་དང་། ད་གཟོད་ངག་གི་འབྲས་རྟགས་དེ་ལས་ནང་གི་རྣམ་པར་དཔྱོད་པའི་བློ་གྲོས་དེ་ཡང་མངོན་སུམ་མཐོང་བ་བཞིན་དུ་གསལ་བར་འགྱུར་བས་བསྔགས་ཤིང་རྗོད་པའི་ཡུལ་དུའང་འགྱུར་རོ། །དེ་ལས་གཞན་དུ་གཞུང་ཚོགས་མང་དུ་ཐོས་པས་ལུས་བསྒྱིངས་ཤིང་དགག་སྒྲུབ་ཀྱི་སྣ་ཞགས་རིང་དུ་བརྐྱངས་ནས་མཁས་པར་གྲགས་ཤིང་སྙེམས་པར་གྱུར་ན་ཡང་། ཤིན་ཏུ་ཟབ་པའི་ཁྲོན་པའི་ཆུ་མིག་ལ་བཏུང་བར་མི་ནུས་པ་བཞིན་ཏེ་དཔེ་ཉིད་ཀྱང་རྩལ་གྱིས་བཤད་ན་ཁྲོན་པ་ཆུང་ངུ་ལ་གནས་པའི་རུས་སྦལ་གྱིས་ཕྱིས་སུ་རྒྱ་མཚོ་ཆེན་པོ་མཐོང་ནས་ཤི་བ་ལྟར་རང་རང་གིས་ཇི་ལྟར་མཐོང་བའི་ཚུར་མཐོང་གི་ཡུལ་ལ་དགག་སྒྲུབ་ཕྱོགས་རེ་ངེས་པ་ཙམ་གྱིས་ཁེངས་ཤིང་། དེ་ལས་འདས་པས་ཤིན་ཏུ་རྟོགས་པར་དཀའ་བའི་གནས་རྒྱ་ཆེ་ཞིང་གཏིང་ཟབ་པའི་ཆོས་ཀྱི་རྣམ་གྲངས་རྒྱ་མཚོ་ཆེན་པོའི་ཆུ་ལྟར་ཚད་མེད་ཅིང་མཐའ་ལས་འདས་པའི་ཆོས་ཚུལ་བསམ་གྱིས་མི་ཁྱབ་པ་གཞན་དང་གཞན་དག་མཐོང་ཐོས་སུ་མ་གྱུར་པས་དོན་གྱི་གནད་ཀྱང་ཚུལ་བཞིན་དུ་མ་མྱོང་བར་རང་གི་སྤྱོད་ཡུལ་མིན་པ་ལ་སེམས་མི་ཞུམ་པར་མ་ཟད་ད་དུང་མདོ་རྒྱུད་ཟབ་མོ་རྣམས་ལ་མཁས་པའི་གྲགས་པ་དང་སྙན་པ་ལ་རེ་ཞིང་ཆགས་ཏེ་ཁེང་བས་དཔེར་ན་རིགས་ངན་གདོལ་པའི་བུ་ཞིག་རྒྱལ་པོ་མངའ་ཐང་དང་དར་བའི་བཙུན་མོར་ཆགས་པ་དང་འདྲ་སྟེ་དེ་འདྲའི་དབང་ཐང་མེད་པའི་ཕྱིར་རོ། །དེར་ཡང་མ་ཟད་དགག་སྒྲུབ་ལྟར་སྣང་གི་ཚིག་ཚོགས་རང་གར་སྤྲོ་བ་ནི་རིགས་ངན་དེ་ཡང་གཡེམ་ལ་ཞུགས་ན་སྲོག་དང་བྲལ་བའི་ཕུང་ཁྲོལ་ཆེན་པོ་འབྱུང་བ་བཞིན་དུ་ཟབ་མོའི་ཆོས་རྣམས་སྤངས་པའི་རྒྱུ་ལས་རང་བཞན་དུ་མ་མནར་མེད་དམྱལ་བ་ཆེན་པོར་བསྐལ་བ་ནས་བསྐལ་པའི་བར་དུ་འབར་ཞིང་བསྲེགས་པའི་གནས་སུ་འགྱུར་བས་བདག་ལེགས་སུ་འདོད་པ་དག་གིས་བག་ཡོད་པར་བྱོས་ཤིག །དོན་གནད་ཟབ་མོ་གང་ཞིག་འདྲི་ན་འདི་ལྟར་མཁས་དབང་དམ་པ་རྣམས་ཀྱིས་གྲུབ་མཐའི་ཞལ་འཛིན་དང་། ལུང་དོན་འགྲེལ་ཚུལ་དང་། བློ་གྲོས་ཀྱི་གཤོག་རྩལ་འགྲན་པའི་ཕྱིར་ཕན་ཚུན་བརྒལ་བརྟགས་ཀྱི་དགག་སྒྲུབ་སྣ་ཚོགས་ཞིག་དགོས་དབང་གིས་རྒྱ་ཆེར་མཛད་ཀྱང་ལུང་རིགས་མན་ངག་དང་མི་འགལ་བའི་ཞལ་བཞེས་སྐྱོན་མེད་ཅིག་གང་ལའང་དཀའ་བར་སྣང་བའི་གནས་འདི་དག་འདྲི་སྟེ། མཐར་ཐུག་གི་ལྟ་བ་མཁས་དབང་ལ་ལས་མེད་དགག་དང་ལ་ལས་མ་ཡིན་དགག་ཏུ་གསུངས་པ་གཉིས་ལས་གང་ལྟར་སྨྲ་བ་ལུང་དང་རིགས་པས་གྲུབ་པ་ཡིན་ཞེས་དང་། དེ་བཞིན་དུ་ཉན་རང་དགྲ་བཅོམ་པས་ཆོས་དང་གང་ཟག་གི་བདག་མེད་གཉིས་ཀ་རྟོགས་སམ་མ་རྟོགས་པར་སྨྲ་བ་གང་འཐད་དང་། གནས་ལུགས་ཀྱི་དོན་ལ་མཉམ་པར་བཞག་པའམ་འཇོག་པའི་ཚེ་འཛིན་སྟངས་ཡོད་དམ་མེད་པ་གང་ལྟར་འཐད་དང་། སྒོམ་པ་ལའང་དཔྱད་ནས་སྒོམ་མ མ་དཔྱད་པ་མེད་པར་བཞག་ནས་བསྒོམ་པ་གང་འཐད་དང་། བདེན་པ་གཉིས་ལ་ཀུན་རྫོབ་དང་དོན་དམ་གང་ཞིག་གཙོ་བོར་སྨྲ་བ་འཐད་དང་། ཆུ་ལྟ་བུ་གཅིག་ལ་རིགས་དྲུག་གི་འགྲོ་བས་མཐོང་བ་མི་གཅིག་པ་དྲུག་ཏུ་སྣང་བ་དེ་ལ་མཐུན་སྣང་གི་བལྟ་བྱ་ཐུན་མོང་པ་ཡོད་མེད་གང་འཐད་དང་། དབུ་མ་ཆེན་པོར་རང་ལུགས་ཀྱི་ཁས་ལེན་ཡོད་དམ་མེད་པར་སྨྲ་བ་དག་ལས་སུ་ལ་ལུང་རིགས་ཀྱིས་སྒྲུབ་བྱེད་རྣམ་པར་དག་པ་ཡོད་ཅིང་སྒྲུབ་ཚུལ་ཇི་ལྟར་ཡིན་ཞེས་དེ་སྐད་གནས་ལུགས་སྟོང་པ་ཉིད་ལས་བརྩམས་པའི་ཟབ་མོའི་དོན་ཅན་གྱི་དྲི་བ་བདུན་པོ་འདིར་བདེ་བར་གཤེགས་པའི་ལུང་ཚད་མ་དང་འགལ་བ་མེད་པར་ལུང་དོན་བཞིན་དུ་དངོས་སྟོབས་ཀྱི་རིགས་པས་གྲུབ་པའི་ལན་གྱི་ཁྱད་པར་ཡང་དག་པར་ཐོངས་ཤིག །ལུང་བཞིན་རིགས་པས་མ་གྲུབ་པའི་ལན་གྱིས་དགོས་པ་མེད་དོ། །དེ་ལྟར་རྟོག་གེའི་ངག་དང་ཐལ་བའི་ཚིག་གི་ཕྲེང་བ་ལྟར་སྣང་གི་རིགས་པ་ཚེར་མའི་མདུང་དང་འདྲ་བ་འབུམ་གྱིས་ཅིག་ཆར་དུ་བསྣུན་ཀྱང་ཅུང་ཟད་ཙམ་ཡང་མི་ཕིག་པའམ་མི་ཤིག་པ་སྟེ་དགག་སྒྲུབ་གང་ཡང་མི་ནུས་པས་དེ་སྔོན་མཁས་པར་གྲགས་པའི་ཆེ་བའམ་ཆེན་པོ་རྣམས་ཀྱང་རྨོངས་ཤིང་འཁྲུལ་བར་གྱུར་ནས་ཇི་བཞིན་དུ་རྟོགས་པའི་སྨྲ་བ་དཀོན་ཞིང་དཀའ་བའི་གནད་ཟབ་མོ་འདི་དག་ལ། ལུང་རིགས་ཚད་མས་གྲུབ་པའི་ལན་གྱི་ཁྱད་པར་སྨྲ་བའི་ལྗགས་རྩེ་མི་ཐུང་བར་རིིང་པོ་གློག་བཞིན་དུ་མྱུར་བར་རྐྱོངས་ལ་ལན་གདབ་པར་མཛོད་ཅིག་ཅེས། དེ་ལྟར་རྣམ་པར་དཔྱོད་པའི་བློ་གྲོས་ཀྱིས་རབ་ཏུ་བསྐུལ་བའི་ངག་གི་རླུང་ཅུང་ཟད་དམ་ཆུང་ངུར་གཡོས་ཏེ་དྲིས་པ་དེས་ཀྱང་གཟུ་བོར་གནས་པའི་དྲང་སྲོང་དེ་ཡི་སྙིང་དཔེར་ན་དུས་མཐའི་རླུང་གིས་རི་བོ་བསྐྱོད་པ་བཞིན་དུ་བསྒུལ་བར་གྱུར་ནས་ལན་གྱི་རྣམ་པ་གང་ཡང་མི་སྨྲ་བའི་བརྟུལ་ཞུགས་དར་ཅིག་བཟུང་བ་སྟེ་ཅི་བྱ་གཏོལ་མེད་དུ་ཅུང་ཟད་གྱུར་པའི་མཐར། འདི་ལྟར་ཀྱཻ་མའོ་ཡུན་རིང་སྦྱོང་བརྩོན་གྱི་འབད་པ་བརྒྱ་ཕྲག་དུ་མའི་དཀའ་བའི་ཁུར་ཆེན་རྟག་ཏུ་བརྟེན་ཅིང་ཡང་དང་ཡང་དུ་རྣམ་པར་དཔྱད་པའི་བློ་གྲོས་རྣོན་པོའི་མེ་ཉིད་བར་ཆད་པ་མེད་པར་བརྒྱུད་མར་ཆེས་ཆེར་སྦར་བའི་མཁས་པ་ཆེན་པོར་གྱུར་པ་དེ་དང་དེས་ཀྱང་དྲི་བ་འདི་རྣམས་ལ་ཚད་མས་གྲུབ་པའི་ལན་གྱི་ཁྱད་པར་སྐྱོན་ཐམས་ཅད་དང་བྲལ་བའི་ཁས་ལེན་གསེར་ཞུན་མ་ལྟ་བུའི་ཁམས་སུ་བསྒྲུབ་པར་མ་ནུས་པ་འདི་ལྟར་ཡིན་ན། སྔོན་སྦྱང་གི་ལྷན་ཅིག་སྐྱེས་པ་སྤོབས་པའི་བློ་ཡི་ནུས་པ་ཞན་པར་གྱུར་ཅིང་། ད་ལྟར་འབད་པ་ཆེན་པོས་ཡུན་རིང་སྦྱང་བའི་དཀའ་བའི་ཁུར་བརྒྱ་ཕྲག་དག་ཀྱང་མ་བཟུང་བ་དམན་པ་བདག་གིས་འདི་དག་ལ་ལན་གྱི་ཁྱད་པར་སྐྱོན་མེད་ཅིག་སྨྲ་བ་ག་ལ་ནུས་ཞེས། ལྷག་པའི་ལྷ་མཆོག་རྗེ་བཙུན་འཇམ་པའི་དབྱངས་ལ་སྙིང་ནས་དད་པ་དྲག་པོས་གདུང་བའི་ཤུགས་ཀྱིས་བོས་ཤིང་གསོལ་བ་ཏབ་པ་དེ་ཡི་ཚེ་ན་ལྷག་པའི་ལྷ་དེ་ཡི་བྱིན་རླབས་ཀྱི་མཐུ་ལས་བྱུང་བ་ཡིན་ནམ་སྙམ་པ་སྟེ་ལྷག་པའི་ལྷའི་བྱིན་རླབས་སྙིང་ལ་ཞུགས་པའི་སྟོབས་ཀྱིས་གཟུར་གནས་དཔྱོད་པའི་ཡིད་ཀྱི་ཤེས་རབ་ལ་དཔེར་ན་ཐོ་རངས་ནམ་ལངས་པའི་དུས་ཀྱི་མངོན་སུམ་སྐྱོན་མེད་ཀྱི་སྣང་བ་ལྟར་ལན་གྱི་ཁྱད་པར་ཁས་ལེན་སྐྱོན་བྲལ་ལུང་རིགས་ཚད་མས་གྲུབ་པ་སོམ་ཉི་ཐམས་ཅད་དང་བྲལ་བ་སྨྲ་བར་ནུས་པའི་སྤོབས་པའི་གོ་སྐབས་ཡངས་པ་ཅུང་ཟད་ཐོབ་པའི་འཕྲལ་ཏེ། དེ་མ་ཐག་ཏུ་ལེགས་པར་གསུངས་པའི་བཀའ་ལུང་དྲི་མ་མེད་པ་མདོ་རྒྱུད་མན་ངག་གི་དགོངས་དོན་ཇི་ལྟ་བ་བཞིན་དུ་དངོས་སྟོབས་ཀྱི་རིགས་པ་ཡང་དག་པས་དཔྱད་དེ་འདི་ལྟར་སྨྲས་པ་ཡིན་ནོ། །ཞེས་སོ། །གཉིས་པ་ལ་དྲིས་པའི་རིམ་པ་ལྟར་ལན་གྱི་རྣམ་པར་བཞག་པ་ལའང་བདུན་ལས། དྲི་ལན་དང་པོ་ལྟ་བ་དགག་གཉིས་གང་ལྟར་སྨྲ་བའི་ལན་ལ་གཉིས། གཞན་ལུགས་བརྗོད་ཅིང་རང་ལུགས་ཀྱི་ལྟ་བའི་ངོ་བོ་ངོས་བཟུང་བ། དེ་ཡི་དགོངས་དོན་ལུང་དང་རིགས་པའི་ལམ་ནས་དགག་སྒྲུབ་ཀྱིས་གཏན་ལ་དབབ་པའོ། །དང་པོ། དགའ་ལྡན་ལྟ་བ་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེ་ལ་སྤྱིར་སྟོན་མཆོག་བུ་རམ་ཤིང་པས་ཆོས་ཉིད་བདེ་བར་གཤེགས་པའི་སྙིང་པོའི་གནས་ལུགས་གསལ་བར་མཛད་པའི་ཆོས་ཀྱི་འཁོར་ལོ་རིམ་པ་གསུམ་གདུལ་བྱའི་བློ་དང་མཐུན་པར་བསྐོར་བ་སྟེ། ཇི་སྐད་དུ། བསོད་ནམས་མ་ཡིན་དང་པོར་བཟློག །བར་དུ་བདག་ནི་བཟློག་པ་སྟེ། །ཐ་མས་ལྟ་གཞི་ཀུན་བཟློག་པར། །གང་གིས་ཤེས་ཏེ་མཁས་པ་ཡིན། །ཞེས་གསུངས་པ་ལྟར། འཁོར་ལོ་དང་པོར་མཚོན་ཚུལ་གྱིས་བསྟན་པ་ཙམ་ལས་རྩལ་དུ་བཏོན་ནས་མ་གསུངས་ལ། བཀའ་བར་བ་ལས་ནི་འདི་ལྟར་བདེ་གཤེགས་སྙིང་པོ་རང་གི་ངོ་བོས་མི་སྟོང་བར་གྱུར་ན་ཕྱི་རོལ་པའི་རྟག་བདག་དང་ཁྱད་པར་མེད་པས་རྣམ་ཐར་སྒོ་གསུམ་གྱི་རང་བཞིན་དུ་བསྟན་པ་དང་། བཀའ་ཐ་མ་ལས་ནི་འོད་གསལ་བའི་ཡེ་ཤེས་ཀྱང་མེད་པར་ཕྱང་ཆད་ནམ་མཁའ་ལྟ་བུ་གྱུར་ན་གཅེར་བུ་པ་དང་ཁྱད་པར་མེད་པས་འོད་གསལ་བའི་ཡེ་ཤེས་འདུས་མ་བྱས་པར་བསྟན་པས་ངོ་བོ་སྟོང་པ་དང་རང་བཞིན་གསལ་བ་གཉིས་སོ་སོའི་རྣམ་པར་བཞག་པ་རྩལ་དུ་བཏོན་ནས་བཀའ་སྩལ་བ་ཡིན་ལ། དེ་ཡི་དགོངས་འགྲེལ་ཡང་། དཔལ་ལྡན་ཀླུ་ཡི་དབང་པོས་བར་བའི་དགོངས་པ་རིགས་ཚོགས་དང་ཐ་མའི་དགོངས་པ་བསྟོད་ཚོགས་ཀྱིས་བཀྲལ་ཞིང་ཁྱད་པར་དངོས་བསྟན་སྟོང་ཉིད་གཙོ་བོར་བྱས་ཏེ་ཟབ་མོ་ལྟ་བའི་ལམ་སྲོལ་གསལ་བར་ཕྱེས་ཤིང་། དེའི་རྗེས་སུ་དབུ་མ་རྩ་བ་སོགས་ཀྱི་དགོངས་པ་སངས་རྒྱས་བསྐྱང་དང་ལེགས་ལྡན་འབྱེད་དཔལ་ལྡན་ཟླ་བ་སོགས་ཀྱིས་སོ་སོར་བཀྲལ་ཞིང་དགག་བྱ་ལ་དོན་དམ་གྱི་ཁྱད་པར་སྦྱར་མ་སྦྱར་དང་དེའི་དབང་གིས་ཐ་སྙད་ལ་རང་མཚན་གྱིས་གྲུབ་པ་ཞལ་གྱིས་བཞེས་མི་བཞེས་སོགས་ཀྱི་ཁྱད་པར་ལ་ཕན་ཚུན་དགག་སྒྲུབ་སྣ་ཚོགས་མཛད་ཅིང་། དེ་ལ་བརྟེན་ནས་བོད་འདིར་ཡང་དབུ་མ་ཐལ་རང་ཞེས་ཆེས་མི་མཐུན་པ་ཞིག་ཏུ་གོ་ཞིང་མཁས་མཆོག་ལ་ལས་དབུ་མ་རང་རྒྱུད་པའི་སྟོང་ཉིད་མ་ཡིན་དགག་ཏུ་སོང་བའི་འགལ་འདུའང་བསྟན་ལ། འཇུག་པ་རྩ་འགྲེལ་དང་སྤྱོད་འཇུག་ཤེས་རབ་ལེའུ་སོགས་ཀྱི་དགོངས་པ་འགྲེལ་བ་པོ་གངས་ཅན་གྱི་མཁས་པ་རྣམས་ཀྱང་ཕན་ཚུན་ཟླ་བ་དང་ཞི་བ་ལྷའི་དགོངས་པ་ལོན་མ་ལོན་སོགས་ཀྱིས་དགག་སྒྲུབ་སྣ་ཚོགས་པར་མཛད་པ་དང་། རྒྱལ་ཚབ་མི་ཕམ་མགོན་པོས་བར་བའི་དགོངས་པ་རྒྱན་དང་། ཐ་མའི་དགོངས་པ་རྒྱུད་བླ་མ་སོགས་ཀྱིས་བཀྲལ་ཞིང་ཤིང་རྟ་ཐོགས་མེད་ཀྱིས་དེ་གཉིས་ཀྱི་རྣམ་བཤད་དང་ས་སྡེ་སོགས་མཛད་ནས་ཤུགས་བསྟན་ལམ་གྱི་མངོན་རྟོགས་དང་སྙིང་པོའི་ཆོས་ཉིད་སོགས་གཙོ་བོར་བྱས་ཏེ་རྒྱ་ཆེན་སྤྱོད་པའི་ལམ་སྲོལ་གསལ་བར་ཕྱེས་ཤིང་། དེ་དག་གི་དགོངས་དོན་ལ་ཐུན་མོང་བ་ཀུན་བརྟགས་གཞན་དབང་ཡོངས་གྲུབ་གསུམ་དང་ཐུན་མོང་མིན་པ་ཀུན་བརྟགས་དང་ཡོངས་གྲུབ་གཉིས་ཀྱི་རྣམ་པར་བཞག་པ་སོགས་འཆད་ཚུལ་མང་དུ་བྱུང་ཞིང་ཐ་སྙད་ཀྱི་དེ་ཁོ་ན་ཉིད་རིགས་པའི་དབང་ཕྱུག་རྣམ་གཉིས་ཀྱིས་གསལ་བར་མཛད་པ་ཡིན་ལ་དེ་བཞིན་དུ་ལྗོངས་འདིར་ཡང་རྒྱུད་བླ་མ་སོགས་ཀྱི་དགོངས་པ་དྲང་ངེས་སོ་སོར་འགྲེལ་ཚུལ་མ་མཐུན་པའི་དབང་གིས་ཕན་ཚུན་དགག་སྒྲུབ་སྣ་ཚོགས་པ་སྤྲོ་བར་གྱུར་ན་ཡང་། གཟུ་བོར་གནས་པའི་བློས་དོན་ལ་རྟོན་པའི་རིགས་ལམ་དྲི་མ་མེད་པས་གནད་ཀྱི་དགོངས་དོན་ཉམས་སུ་བསྟར་ན་རྒྱལ་བའི་ཕྲིན་ལས་གདུལ་བྱའི་དབང་གིས་སོ་སོའི་དགོངས་གནད་རེ་རྩལ་འདོན་མཛད་པའི་ཐ་སྙད་ཀྱི་ཞལ་བཞེས་ཅུང་ཟད་མི་འདྲ་བ་ཙམ་ལས་དོན་ལ་རྒྱ་བོད་པཎ་གྲུབ་དགོངས་པ་གཅིག་ཟེར་བ་ལྟར་མཐར་ཐུག་གི་དགོངས་པ་དབུ་མ་ཆེན་པོ་སྤྲོས་བྲལ་མཉམ་པ་ཉིད་དུ་དབྱེ་བསྲི་མེད་པར་གཅིག་ཏུ་གཞོལ་ཞིང་འབབ་པ་ཡིན་ལ། དེ་ཡི་ཚུལ་རྒྱས་པ་ནི། རྗེ་འཇམ་དབྱངས་བླ་མས་དབུ་མ་རྒྱན་གྱི་འགྲེལ་བཤད། སྙིང་པོའི་སྟོང་ཐུན་སེང་གེའི་ང་རོ། གཞུང་སྤྱིའི་དཀའ་གནད་རིན་པོ་ཆེའི་ཟ་མ་ཏོག་ལ་སོགས་པ་ས་གསུམ་ན་རྙེད་པར་དཀའ་བ་རྣམས་ལས་ཤེས་པར་བྱ་དགོས་ལ། དེས་ན་དོན་གྱི་གནད་ལ་འགལ་བ་མེད་ན་ཐ་སྙད་ཀྱི་ཞལ་བཞེས་མི་འདྲ་བ་ཙམ་གྱིས་ཆོས་དེ་ལྟ་ལོག་དང་ཆོས་མིན་དུ་མི་འགྱུར་ཏེ་ཚིག་ལ་མི་རྟོན་དོན་ལ་རྟོན་དགོས་པར་གསུངས་པའི་ཕྱིར། དེ་ལྟའང་རང་གཞན་སུ་ཡིན་ཀྱང་གཞན་ཟེར་རྗེས་བརྗོད་ཀྱི་བྲག་ཆར་མ་སོང་བར་ཡང་དག་པའི་རིགས་ལམ་གྱིས་ཐ་སྙད་སྐྱོན་མེད་པ་ཞིག་ལ་འཇུག་པ་གལ་ཆེ་སྟེ། ཇི་སྐད་དུ། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་གསུངས་སོ། །དེས་ན་ཚུལ་འདི་དང་འདི་འདྲའི་སྒོ་ནས་དྲི་ལན་ཐམས་ཅད་ཀྱི་སྐབས་སུའང་གཟུ་བོར་གནས་པའི་བློས་ལེགས་པར་དཔྱད་དེ་ལོག་པར་མི་ལྟ་བར་ཡང་དག་པའི་དོན་ཉིད་ཚོལ་བ་ལ་འབད་པ་ནི་མཁས་པ་རྣམས་ཀྱིས་སྙིང་ནོར་དམ་པར་རྣལ་འབྱོར་དུ་བྱ་བ་ཁོ་ནའོ། །དངོས་དོན་ལ་གངས་ཅན་ན་མངོན་པར་མཐོ་བ་རི་བོ་དགའ་ལྡན་པ་སོགས་སྔ་ཕྱིར་བྱོན་པའི་མཁས་མཆོག་ཕལ་ཆེ་བ་ཞིག་གིས་དབུ་མའི་ལྟ་བ་མཐར་ཐུག་པ་དགག་བྱ་བདེན་གྲུབ་བཅད་པའི་སྟོང་ཉིད་མེད་དགག་ཏུ་འདོད་དགོས་ཞེས་ཟེར་བ་དང་། གཞན་སྔ་ཕྱིར་བྱོན་པའི་མཁས་མཆོག་ལ་ལ་རྣམས་གནས་ལུགས་མཐར་ཐུག་དོན་དམ་པ་ཉིད་གཉིས་སྣང་འཁོར་བའི་ཆོས་ཀྱི་སྟོང་པས་སྟོང་ཉིད་མ་ཡིན་དགག་ཏུ་སྨྲ་བ་ཡིན་ལ། འོ་ན་སྔ་འགྱུར་གྱི་རང་ལུགས་གཞན་དང་མ་འདྲེས་པའི་ཁས་ལེན་གང་ཡིན་ཞེ་ན། གནས་ལུགས་མཐར་ཐུག་པ་སྒྲོ་འདོགས་སོ་གཉིས་དང་བྲལ་བའི་སྤྲོས་བྲལ་མཉམ་པ་ཉིད་དམ་ཟུང་འཇུག་ཡེ་ཤེས་ཆེན་པོའི་ངོར་མེད་དགག་ཅེས་བྱ་བ་དགག་བྱ་བདེན་གྲུབ་བཀག་ཤུལ་གྱི་མེད་རྐྱང་ངམ་སྟོང་པ་ཕྱང་ཆད་དང་ནི་མ་ཡིན་དགག་ཞེས་དགག་བྱ་བཀག་ཤུལ་དུ་ཆོས་ཉིད་ལ་སོགས་པ་ཆོས་གཞན་ཅི་ཞིག་འཕེན་ཏེ། དེ་གཉིས་ཀ་བློ་ཡིས་གཞན་སེལ་བའི་སྒོ་ནས་བརྟགས་པ་ཙམ་ལས་རང་གི་ངོ་བོས་མ་གྲུབ་པའི་ཕྱིར་ན་གཤིས་ལུགས་མཐར་ཐུག་པའི་དོན་ལ་ཁས་ལེན་ཐམས་ཅད་དང་བྲལ་བ་ཡིན་པས་མེད་དགག་དང་མ་ཡིན་དགག་གཉིས་ཀར་ཁས་མི་ལེན་ཏེ། གནས་ལུགས་རང་གི་ངོ་བོ་མཐར་ཐུག་པ་ནི་དགག་པ་མེད་དགག་དང་སྒྲུབ་པ་མ་ཡིན་དགག་ལ་སོགས་པའི་གཉིས་ཆོས་ཐམས་ཅད་དང་བྲལ་བ་ཡི་བློ་འདས་སྨྲ་བསམ་བརྗོད་མེད་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་གདོད་མའི་ཆོས་ཉིད་ཡིན་པའི་ཕྱིར་རོ། །དེ་ལྟ་ནའང་གནས་སྐབས་ཆོས་ཐམས་ཅད་ཀྱི་ངོ་བོ་སྟོང་པ་ཉིད་གཏན་ལ་འབེབ་ཚུལ་ཁོ་ནར་བསམ་ནས་ནི་མེད་དགག་དང་མ་ཡིན་དགག་གང་ཡིན་ཞེས་དྲི་ན་མེད་དགག་ཉིད་དུ་ཁས་ལེན་དགོས་པ་ཡིན་ཏེ་འཕགས་པའི་ཡུལ་དུ་དཔལ་ལྡན་ཟླ་བ་གྲགས་པ་དང་བོད་ཀྱི་ལྗོངས་ན་ཀུན་མཁྱེན་རོང་ཟོམ་ཆོས་བཟང་གཉིས་ཐུགས་ཀྱི་དགོངས་པ་གཅིག་དང་གསུང་གི་དབྱངས་གཅིག་གིས་འཁོར་འདས་ཀྱིས་བསྡུས་པའི་ཆོས་སོ་ཅོག་ཐམས་ཅད་གདོད་མ་ནས་དག་པས་ཀ་དག་སྟོང་པ་ཆེན་པོ་ལུང་དང་རིགས་པས་བསྒྲུབ་པར་མཛད་པ་བཞིན་དུ་སྤྲོས་བྲལ་མེད་དགག་ཆེན་པོར་འདོད་པ་ཡིན་པས་འདི་ལྟར་འཁོར་འདས་ཀྱིས་བསྡུས་པའི་ཆོས་འདི་ཐམས་ཅད་ཀ་ནས་དག་པའམ་གདོད་མ་ནས་རང་བཞིན་གྱིས་གྲུབ་པ་ཅུང་ཟད་ཀྱང་མེད་པའི་ཕྱིར་ཀུན་རྫོབ་དང་དོན་དམ་པའི་བདེན་པ་གཉིས་ཆར་མཐའ་བཞི་ལས་མ་སྐྱེས་པས་ན་མེད་ཅེས་བརྗོད་པ་ལ་ཅི་ཞིག་ཚོམ་སྟེ་ཐེ་ཚོམ་ཅི་ཡང་མི་དགོས་པ་མདོ་ལས་གཟུགས་མེད་སྒྲ་མེད་སོགས་གཟུགས་ནས་རྣམས་མཁྱེན་གྱི་བར་ལ་ཁྱད་པར་གང་ཡང་མ་སྦྱར་བར་མེད་པར་གསུངས་པ་བཞིན་ནོ། །གཉིས་པ་ལ་གཉིས། མི་འཐད་པ་གཞན་ལུགས་དངོས་པོ་སྟོབས་ཞུགས་ཀྱི་རིགས་པས་དགག་པ། འཐད་ལྡན་རང་ལུགས་ལུང་རིགས་ཚད་མའི་སྒོ་ནས་སྒྲུབས་ཚུལ་བསྟན་པའོ། །དང་པོ་ལ་གཉིས། གཞན་གྱིས་མེད་དགག་མ་ཡིན་དགག་ཏུ་འགྱུར་ཞིང་ཟུང་འཇུག་མི་རུང་བས་ཚིག་དང་དོན་གྱི་གཞན་སྟོང་དུ་འགྱུར་ཚུལ་བསྟན་པ། དེ་གཉིས་ལ་མི་འཐད་པའི་གནོད་པ་སོ་སོར་བཤད་པའོ། །དང་པོ་ཀ་བ་ཀ་ནས་སོགས་ཚིགས་བཅད་གསུམ་གྱིས་བསྟན་ཏེ། དེ་ལ་འདིར་ངོ་བོ་སྟོང་པའི་དབང་དུ་བྱས་ན་སྤྲོས་བྲལ་མེད་དགག་ཏུ་འདོད་པ་དང་། རང་བཞིན་འོད་གསལ་བའི་དབང་དུ་བྱས་ན་སྟོང་པའི་དབྱིངས་དང་འདུ་འབྲལ་མེད་པའི་སྐུ་དང་ཡེ་ཤེས་སོགས་དབྱིངས་ཡེ་གཉིས་སུ་མེད་པ་འདུས་མ་བྱས་པའི་རང་གདངས་ལྷུན་གྱིས་གྲུབ་པའི་སངས་རྒྱས་ཀྱི་ཡོན་ཏན་བླ་ན་མེད་པ་ཇི་སྐད་གསུངས་པ་རྣམས་ཀྱང་དེ་བཞིན་དུ་འདོད་པ་ནི་རྗེས་ཐོབ་ཤན་འབྱེད་པའི་སྐབས་ཀྱི་ཁས་ལེན་ཡིན་པས་གནོད་བྱེད་གང་ཡང་མེད་ཅིང་སྒྲུབ་བྱེད་རྣམ་པར་དག་པ་ཡོད་པའི་ཕྱིར་མི་འཐད་པ་སྤུ་ཙམ་མེད་པར་མ་ཟད་ཡོན་ཏན་ཕུལ་དུ་བྱུང་བ་ཡང་བདེ་བླག་ཏུ་ཐོབ་པར་འགྱུར་རོ། །དེ་ལས་གཞན་དུ་དོན་དམ་དཔྱོད་པའི་རིགས་པ་ཇི་སྙེད་པས་འཁོར་འདས་ཀྱིས་བསྡུས་པའི་ཆོས་ཅན་གང་ལའང་དོན་དམ་དང་བདེན་གྲུབ་སོགས་ཀྱི་དགག་བྱའི་ཁྱད་པར་སྦྱར་ནས་དེ་ཁོ་ན་འགོགས་ཀྱི་གཞན་ཆོས་ཅན་གྱི་སྣང་བ་རྣམས་ནི་འགོགས་ཀྱང་མི་ནུས་ལ་འགོག་ནའང་ཐ་སྙད་ལ་སྐུར་བ་བཏབ་པ་སོགས་ཀྱི་སྐྱོན་ཡང་ཆེའོ་ཞེས་རྣམ་གྲངས་པའི་དོན་དམ་བདེན་སྟོང་མེད་དགག་ཙམ་ཁོ་ན་ཟབ་མོ་དབུ་མའི་ལྟ་བ་མཐར་ཐུག་ཏུ་ཞལ་གྱིས་བཞེས་ཤིང་རྩལ་འདོན་མཛད་ན། དཔལ་ལྡན་ཟླ་བས། རང་རྒྱུད་པ་ལ། ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ། དོན་དམ་པའི་སྐྱེ་བ་མི་ཁེགས་པར་ཐལ་བ། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བའི་སྐྱོན་གསུམ་གསུངས་པ་བཟློག་མེད་དུ་འབབ་ཅིང་། ཀུན་མཁྱེན་ཆོས་རྗེས། ཡིད་བཞིན་མཛོད་དུ། རང་རྒྱུད་འོག་མའི་བྱེ་བྲག་སློབ་དཔོན་དཔལ་སྦས་སོགས་སྣང་སྟོང་ཐ་དད་དུ་འདོད་པ་དག་གི་ལུགས་དགག་པའི་སྐབས་སུ། སྣང་བ་མ་ཡིན་པའི་སྟོང་པ་བདེན་པ་གཉིས་ཆར་མི་སྲིད་པ་དང་། དེ་ཉིད་རྟོགས་བྱར་མི་རུང་བ་དང་། ཐ་དད་དུ་གྱུར་ན་སྤང་གཉེན་དུའང་མི་འཐད་དེ་རྫུན་སྣང་ལ་ཞེན་ནས་ཆགས་སྡང་ལ་སོགས་སྐྱེས་པ་ལོགས་སུ་སྟོང་པར་ཤེས་པས་ཅི་ཡང་མི་ཕན་པས་དེ་འདྲའི་རྟོགས་པ་ལ་དགོས་པ་ཅི་ཡང་མེད་པའི་རིགས་པ་གང་གསུངས་པ་བཞིན་ནོ། །ཏིང་འཛིན་རྒྱལ་པོ་ལས་ཀྱང་། སུ་དག་བུ་མོར་འདུ་ཤེས་གནས། །དེ་དག་འདོད་ཆགས་རབ་ཏུ་འཕེལ། །འདུ་ཤེས་དག་ནི་རྣམ་བཤིག་ན། །འདོད་ཆགས་ཀྱིས་ནི་གོས་མི་འགྱུར། ཞེས་གསུངས་པ་བཞིན་ཡིན་པས། འདིར་ཡང་ཆོས་ཅན་གྱི་སྣང་བ་ཀ་པ་ལ་སོགས་པར་རང་རང་གི་ངོ་བོ་ཀ་ནས་ཏེ་ཡེ་ནས་སྟོང་པའམ་དག་པ་ཡི་རང་བཞིན་ཡིན་པའི་ཕྱིར་དེ་ལྟར་རིགས་པས་གཏན་ལ་དབབ་པའི་ཤུལ་ན་མི་སྟོང་པ་ཅུང་ཟད་ཙམ་ཡང་ལུས་པ་མེད་ལ། གལ་ཏེ་ཡོད་ན་དེ་ཉིད་རིགས་པས་དཔྱད་བཟོད་དུ་འགྱུར་བ་དེས་ན་མཐར་ཐུག་དཔྱོད་པའི་རིགས་པས་ཆོས་ཅན་ཀ་བ་རང་ཉིད་མེད་ཅེས་མ་བཀག་ན་སྟེ་མི་འགོགས་པར་ཀ་བ་བདེན་གྲུབ་མིན་ཞེས་བརྗོད་པས་འགོགས་མི་ནུས་པའི་ཆོས་ཅན་གྱི་ཀ་བ་འདི་ཅི་ཞིག་ཡིན་ཏེ་ནམ་ཡང་མི་འཐད་ལ། དེ་ལྟར་ན་བདེན་གྲུབ་ཀྱི་ཀ་བ་ཁེགས་པའི་བདེན་པའི་སྟོང་པ་ཉིད་དང་མི་ཁེགས་པར་ཤུལ་ན་ལུས་པའི་སྣང་བ་ཡི་ཀ་བ་ཞིག་སྟེ་སྟོང་པ་དང་མི་སྟོང་པའི་ངོ་བོ་ཐ་དད་དུ་གྱུར་བ་དེ་གཉིས་མེ་དང་ཚ་བ་ལྟར་སྣང་སྟོང་དབྱེར་མེད་དམ་ཟུང་འཇུག་ཏུ་མི་རུང་སྟེ་དཔེར་ན་སྲད་བུ་དཀར་ནག་བསྒྲིལ་བ་ཟུང་འཇུག་གམ་དབྱེར་མེད་མིན་པ་བཞིན་ནོ། །དེས་ན་ཆོས་ཅན་གྱི་ཀ་བ་ཀ་བས་ཏེ་ཀ་བ་རང་ཉིད་རང་གིས་མི་སྟོང་པར་དགག་བྱ་བདེན་གྲུབ་གཞན་གྱིས་སྟོང་པར་འདོད་པ་དང་ཆོས་ཉིད་ཆོས་ཉིད་རང་གིས་མི་སྟོང་བར་གཞན་ཀ་བ་སོགས་གཉིས་སྣང་འཁོར་བའི་ཆོས་ཀྱིས་སྟོང་ངོ་ཞེས་སྟོང་གཞི་ཀ་བ་དང་ཆོས་ཉིད་བཞག་ནས་བདེན་གྲུབ་དང་ཀ་བ་ལ་སོགས་པ་གཞན་གྱིས་སྟོང་པར་འདོད་པ་དག་ནི་སྔ་མ་ཚིག་གི་གཞན་སྟོང་དང་ཕྱི་མ་དོན་གྱི་གཞན་སྟོང་དུ་འགྱུར་ལ་དེ་གཉིས་གང་ལའང་སྣང་བ་དང་སྟོང་པ་ཆོས་ཅན་དང་ཆོས་ཉིད་དུ་མི་རུང་བ་དང་དེ་བཞིན་དུ་བདེན་གཉིས་ཟུང་འཇུག་སྤྲོས་བྲལ་མཉམ་པ་ཉིད་སོགས་རྣམ་པ་ཀུན་ཏུ་མི་རུང་བའི་རིགས་པས་གནོད་པ་ཐུན་མོང་དུ་བཟློག་པ་མེད་པར་འབབ་པ་ཡིན་ནོ། །གཉིས་པ་ལ་གཉིས། ཚིག་གི་གཞན་སྟོང་ལ་ལུང་རིགས་ཁས་བླང་དང་འགལ་བའི་སྐྱོན་གསུམ་བསྟན་པ། དོན་གྱི་གཞན་སྟོང་ལ་སྟོང་གོ་མི་ཆོད་ཅིང་ཆོས་དང་ཆོས་ཉིད་སོགས་མི་རུང་བས་འགལ་སྐྱོན་བསྟན་པའོ། །དང་པོ། ཨེ་མ་དེས་དེ་སོགས་ཚིགས་བཅད་བཅུ་དང་རྐང་པ་གཅིག་གིས་བསྟན་ཏེ། དེ་ཡང་འཁོར་འདས་ཀྱི་ཆོས་འདི་ཐམས་ཅད་མིང་དང་རྟོགས་པས་ཕར་བཏགས་ཙམ་ཞིག་བསྙོན་མེད་དུ་ཡོད་པས། ཐལ་འགྱུར་བ་རང་གི་ལུགས་ཀྱི་ལྟ་བ་མཐར་ཐུག་འཇོག་པའི་ཚེ་ཡང་རྟེན་འབྱུང་གི་རྣམ་བཞག་འདི་རྣམས་འཁྲུལ་ངོ་འབའ་ཞིག་ཏུ་སྐྱེལ་མི་དགོས་པར་དངོས་གནས་ལའང་ཚད་གྲུབ་ཏུ་བཞག་ཆོག་སྟེ་ཐ་སྙད་ཚད་མ་ཡིན་པའི་ཕྱིར་ཞེས་སོགས་ཀྱིས་དགག་བྱ་ངེས་པའི་གནད་འདི་གལ་ཆེ་བར་ནན་གྱི་སྒྲུབ་ནས་སྣང་བ་ལིང་ལིང་གི་དངོས་པོ་རངས་སར་བཞག་སྟེ་དགག་བྱ་བདེན་གྲུབ་ཞེས་པའི་རྭ་རེང་ངེ་བ་ཞིག་ཏུ་འདོད་པ་ལ་ལུང་རིགས་ཁས་བླང་དང་འགལ་བའི་སྐྱོན་འདི་ལྟར་ཡོད་དེ། ཨེ་མ་ཀ་བ་དང་གཟུགས་ལ་སོགས་པ་དེ་དང་དེས་ཀ་བ་དང་གཟུགས་ལ་སོགས་པ་རང་གི་ངོ་བོ་དེ་དང་དེ་མ་སྟོང་པའམ་མི་སྟོང་བར་དགག་བྱ་བདེན་གྲུབ་ལ་སོགས་པ་ཁོ་ནས་སྟོང་པ་ཡིན་ན་སྟོང་གཞི་ཀ་བ་དང་གཟུགས་ལ་སོགས་པ་མི་སྟོང་པར་ལྷག་མར་ལུས་ཏེ་རང་རང་གི་ངོ་བོས་གྲུབ་པར་འགྱུར་ལ། དེ་ལྟར་ན་གཟུགས་ནི་གཟུགས་ཀྱིས་སྟོང་ངོ་ཞེས་སོགས་གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་རང་རང་གི་ངོ་བོས་སྟོང་པར་གསུངས་པའི་ཡུམ་རྒྱས་འབྲིང་སོགས་ངེས་པ་དོན་གྱི་ལུང་དང་དེའི་དགོངས་འགྲེལ་དབུ་མ་འཇུག་པ་སོགས་ཀྱི་བསྟན་དོན་དང་དངོས་སུ་འགལ་ཞིང་། དེ་ཉིད་རིགས་པ་རྣམ་པར་དག་པས་སྒྲུབ་ཚུལ་དང་བཅས་པ་ལས་ཀྱང་འགལ་ཏེ། འདི་ལྟར་ཆོས་ཅན་ཀ་བ་ལ་སོགས་པ་དང་དགག་བྱ་ཀ་བའི་བདེན་གྲུབ་ལ་སོགས་པ་དེ་གཉིས་ངོ་བོ་གཅིག་གམ་ཐ་དད་གང་ཡིན། དང་པོ་ལྟར་ངོ་བོ་གཅིག་ཡིན་ནོ་ཞེ་ན། དགག་བྱ་བདེན་གྲུབ་ལ་སོགས་པ་གཅིག་ཤོས་ཁེག་པས་ཆོས་ཅན་ཀ་བ་ལ་སོགས་པ་གཅིག་ཤོས་ཀྱང་ཁེག་པར་འགྱུར་ཏེ་དེ་གཉིས་གཅིག་ཡིན་པའི་ཕྱིར་དཔེར་ན་མེ་ཉིད་མེད་པས་ཚ་བའང་མེད་པ་བཞིན་ནོ། །དེས་ན་བདེན་གྲུབ་འགོགས་ཀྱིས་ཀ་བ་མི་འགོགས་ཞེས་པ་དོན་མེད་དོ། །གཉིས་པ་ལྟར་ངོ་བོ་གཞན་ཡིན་ནོ་ཞེས་ཆོས་ཅན་ཀ་བ་ལ་སོགས་པ་རང་རང་མ་ཡིན་པའི་དགག་བྱ་གཞན་བདེན་གྲུབ་ཅེས་པ་དེ་ཁེག་ཀྱང་ཆོས་ཅན་ཀ་བ་ལ་སོགས་པ་རང་གི་ངོ་བོ་ནི་དོན་དམ་དཔྱོད་པའི་རིགས་པ་གང་གིས་ཀྱང་མི་སྟོང་པར་དཔྱད་བཟོད་པས་བདེན་གྲུབ་ཏུ་འགྱུར་ལ་དེ་ལྟར་ན་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པའི་སྐྱོན་གོང་དུ་བསྟན་པ་བཞིན་ནོ། །ཁོ་ན་རེ་བདེན་གྲུབ་ཐ་སྙད་དུའང་ཡོད་མ་མྱོང་པའི་ཕྱིར་ན་དེ་གཉིས་འདི་ལྟར་གཅིག་དང་ཐ་དད་གང་ཡིན་ཞེས་དཔྱད་མི་དགོས་སོ་ཞེ་ན་ཡང་དོན་ལ་འཁོར་འདས་ཀྱི་ཆོས་གང་ཡང་བདེན་པར་གྲུབ་པ་ཞིག་མེད་ཀྱང་སོ་སྐྱེའི་ངོར་ཀ་བ་དང་བུམ་པ་ལ་སོགས་པ་བདེན་པར་འཛིན་པ་ཡོད་པའི་ཕྱིར་དེ་ལྟར་ངེས་པར་དཔྱད་དགོས་ཏེ་ཨཱརྱ་དྷེ་ཝས། སྲིད་པའི་ས་བོན་རྣམ་ཤེས་ཏེ། །ཡུལ་རྣམས་དེ་ཡི་སྤྱོད་ཡུལ་ཡིན། །ཡུལ་ལ་བདག་མེད་མཐོང་ནས་ནི། །སྲིད་པའི་ས་བོན་ལྡོག་པར་འགྱུར། །ཞེས་གསུངས་པ་བཞིན་ནོ། །དེས་ན་དབུ་མ་ཐལ་འགྱུར་པའི་ལུགས་ཀྱི་དགག་བྱའི་ངོས་འཛིན་ཀྱང་དོན་དམ་དཔྱོད་པའི་རིགས་པས་དཔྱད་བཟོད་ཀྱི་མི་སྟོང་པའི་བུམ་པའམ་འགོག་མི་ནུས་པའི་བུམ་པའི་ཕ་རོལ་ཏེ་གཞན་ལོགས་ཤིག་ན་དགག་བྱ་བདེན་པར་གྲུབ་རྒྱུ་དཔྱད་མི་བཟོད་པ་སུ་ཞིག་ཡིན་ཏེ་ཡན་གར་དུ་མེད་པའི་ཕྱིར་ན་དགག་བྱའི་སྣང་ཚུལ་ཀྱང་གཞན་དག་གིས་ངོས་མ་ཟིན་ལ་ཁྱེད་ཅག་ཁོ་ནས་ངོས་ཟིན་པར་ངེས་སོ་ལོ་ཞེས་མ་རངས་པའི་ཚིག་གོ། །འོན་ཀྱང་བདེན་པར་གྲུབ་པ་སོགས་ཀྱི་ཁྱད་པར་གང་ཞིག་དགག་བྱར་སྦྱར་བའམ་དགག་བྱ་ལ་དོན་དམ་གྱི་ཁྱད་པར་སྦྱར་ནས་སྟོན་པ་ནི་བདེན་གཉིས་སོ་སོར་ཕྱེས་ནས་ཚད་མ་སོ་སོའི་རྙེད་དོན་སོ་སོར་འཆད་པ་དབུ་མ་རང་རྒྱུད་པའི་གཞུང་ལ་ཆེས་གྲགས་ཤིང་གྲུབ་མོད་ཀྱང་འདིར་དོན་དམ་པའི་གནས་ལུགས་མཐར་ཐུག་དཔྱོད་པའི་རིགས་པས་དབང་དུ་བྱས་ན་ཀ་བ་དང་བུམ་པ་ལ་སོགས་པ་དེས་དེ་མི་སྟོང་ཞེས་པ་དེ་སྦྱར་བ་ལ་དགོས་ནུས་ཀྱི་འཐད་པ་ཅི་ཞིག་ཡོད་ཅེས་ཅི་ཡང་མེད་དེ། དང་པོ་ནས་མཐའ་བཞིའི་སྤྲོས་བྲལ་དུ་གཏན་ལ་འབེབས་པའི་ཕྱིར། རྩོད་བཟློག་ལས། གང་ཚེ་ངས་དམ་བཅས་འགའ་ཡོད། །དེ་ཚེ་ང་ལ་སྐྱོན་དེ་ཡོད། །ང་ལ་དམ་བཅའ་མེད་པ་ན། །ང་ནི་སྐྱོན་མེད་ཁོ་ན་ཡིན། །གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །སྒྲུབ་པའམ་དགག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཞེས་གསུངས་པ་བཞིན་ནོ། །གལ་ཏེ་བུམ་པ་བུམ་པས་སམ་ཀ་བ་ཀ་བས་སྟོང་པར་གྱུར་ན་ཀུན་རྫོབ་ཐ་སྙད་ཙམ་དུ་ཡང་ཀ་བ་དང་བུམ་པ་ལ་སོགས་པ་དེ་དག་མེད་པ་ལྟར་ཞེས་གཏན་མེད་ལྟ་བུར་འགྱུར་བར་སེམས་ནས་ཐ་སྙད་ལ་སྐུར་པ་འདེབས་པ་སོགས་པའི་ཚིག་འཁྲིའི་དོགས་པས་ཀ་བ་ཀ་བས་མི་སྟོང་ཞེས་པ་ལ་སོགས་པ་འདི་སྦྱར་བར་བྱས་ཀྱང་ཚིག་འཁྲིའི་འགལ་བ་བཟློག་ཏུ་མེད་པ་འདི་ལ་ལྷག་པར་ཆེ་སྟེ། ཇི་ལྟར་ན་ཀུན་རྫོབ་ཙམ་སྟེ་མ་བརྟགས་མ་དཔྱད་པའི་ཐ་སྙད་ཙམ་དུ་ཀ་བ་ནི་ཡོད་ཅེས་བརྗོད་པར་བྱས་པས་མི་ཆོག་པར་ཀ་བ་དེས་ཀ་བ་དེ་མི་སྟོང་ངོ་ཞེས་ཅི་ལ་ཟེར་ཏེ་འཆད་འགྱུར་ལྟར་མི་འཐད་དོ། །དེ་གཉིས་དོན་གཅིག་ཡིན་པས་མི་འཐད་པ་མེད་དོ་ཟེར་ན་དེ་གཉིས་དོན་གཅིག་མ་ཡིན་ཏེ། འདི་ལྟར་ཀ་བ་ཡོད་ཅེས་བརྗོད་པ་དང་ཀ་བ་ལ་ཀ་བ་ཡོད་ཅེས་བརྗོད་པ་གཉིས་མི་མཚུངས་པས་ཕྱི་མ་ཀ་བ་ལ་ཞེས་རྟེན་དང་ཀ་བ་ཡོད་ཅེས་བརྟེན་པར་དོན་གྱིས་ཁས་བླངས་སུ་སོང་བ་དཔེར་ན་རྟེན་ཀ་བ་གཞན་ལ་བརྟེན་པ་ཀ་བ་གཞན་ཞིག་བརྟེན་པར་ཁས་བླངས་པ་བཞིན་ནོ། །གཞན་ཡང་དེས་དེ་མི་སྟོང་ཞེས་པ་འདི་བདེན་པ་གཉིས་ཆར་མི་འཐད་དོ། །དོན་དམ་པར་དོན་དམ་དཔྱོད་པས་དཔྱད་བཟོད་ཀྱི་ཀ་བ་ལ་སོགས་པ་འཁོར་འདས་ཀྱི་ཆོས་གང་ཡང་མ་དམིགས་པའམ་ཡོད་པ་མིན་ན་ཀ་བ་དེས་ཀ་བ་དེ་མི་སྟོང་ཞེས་པ་འདི་ཅི་སྟེ་བརྗོད་དེ་འདི་ལ་དགོས་ནུས་ཅི་ཡང་མེད་ལ། ཀུན་རྫོབ་ཏུའང་ཀ་བ་ཀ་བས་ཞེས་ལན་གཉིས་བརྗོད་པ་འདི་ནི་བརྡ་དང་ཐ་སྙད་ལ་རྨོངས་ཤིང་དོན་དང་འགལ་བ་ཙམ་ལས་དགོས་དོན་ཅི་ཡང་མེད་དོ། །རང་གི་ཁས་བླངས་དང་ཡང་འགལ་ཏེ། ཀ་བ་ལ་སོགས་པ་རང་རང་རྣམས་ནི་རང་གིས་ཏེ་རང་རང་གི་ངོ་བོས་མི་སྟོང་པར་གྱུར་ན་རང་གི་ངོ་བོ་ཡོད་བཞིན་དུ་བདེན་གྲུབ་སོགས་དགག་བྱ་གཞན་དང་གཞན་གྱིས་སྟོང་པས་གཞན་སྟོང་དུ་ཁས་མི་ལེན་པར་རང་སྟོང་དུ་ཁས་ལེན་པ་འགལ་ཞིང་ཀ་བ་ལ་སོགས་པའི་སྣང་བ་འདི་ལས་དགག་བྱ་གཞན་ཐ་དད་དུ་མེད་པས་རང་རང་ངོ་བོས་སྟོང་པར་གྱུར་ན་ཀ་བ་ཀ་བ་རང་གིས་མི་སྟོང་པར་ཁས་ལེན་པའང་འགལ་བ་ཡིན་པའི་ཕྱིར་རོ། །གཉིས་པ། སྤྱིར་ན་གཞན་གྱིས་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། སྤྱིར་རྒོལ་སྔ་ཕྱི་སོགས་གྲུབ་མཐའ་སྨྲ་བ་སུ་ལྟར་ན་ཡང་ཆོས་ཉིད་མྱང་འདས་ལ་སོགས་པ་རང་རང་གིས་མི་སྟོང་པར་དགག་བྱ་འཁོར་བ་ལ་སོགས་པ་གཞན་གྱིས་སྟོང་པར་གྱུར་པ་དེས་ཆོས་ཉིད་ལ་སོགས་པ་རང་གི་ངོ་བོས་སྟོང་པར་གྱུར་པའི་གོ་ངེས་པར་མི་ཆོད་དེ། དེ་དག་ཆོས་ཅན་དང་དེའི་ཆོས་ཉིད། སྣང་བ་དང་དེའི་སྟོང་ཉིད་མ་ཡིན་པར་ཐ་དད་པ་ཡིན་པའི་ཕྱིར། དཔེར་ན་རྟ་ཉིད་བ་ལང་མིན་ལ་བ་ལང་རྟ་ཉིད་མ་ཡིན་པས་མངོན་སུམ་མ་འཁྲུལ་པས་མཐོང་བའི་རྟ་དེ་ཉིད་ཡོངས་གཅོད་དུ་གྲུབ་པ་ལ་དེ་ཡི་སྟེང་དུ་གཞན་བ་ལང་ཞིག་མ་མཐོང་བས་མ་གྲུབ་པར་ཤེས་ཀྱང་བ་ལང་རྣམས་གཅོད་ལ་ཁེགས་པ་ཙམ་དེས་རྟ་དེ་ཡང་རང་གི་ངོ་བོས་སྟོང་ཉིད་ཡིན་པར་ག་ལ་ངེས་ཏེ། དེ་གཉིས་འབྲེལ་མེད་ཐ་དད་ཡིན་པའི་ཕྱིར་ཏེ་དེ་གཉིས་ཆོས་ཅན་དང་ཆོས་ཉིད། རྟེན་འབྱུང་དང་སྟོང་པ། ཐབས་དང་ཐབས་བྱུང་གང་ཡང་མ་ཡིན་པས་སྟོང་རྟེན་འབྱུང་ཟུང་འཇུག་དང་སྣང་སྟོང་དབྱེར་མེད་ཀྱི་དོན་ཅི་ཡང་མེད་པས་སོ། །དེས་ན་རྟ་ཉིད་མཐོང་བ་དེ་ཡིས་ཀྱང་བ་ལང་སྟོང་པར་མཐོང་བ་ལ་ཅི་ཞིག་ཕན་ཏེ་མི་མཐོང་བ་ལའང་ཅི་ཞིག་གནོད་དེ་ཕན་གནོད་ཅི་ཡང་མི་བྱེད་དོ། །དེ་ཡི་ཕྱིར་ན་རང་གི་ངོ་བོས་མི་སྟོང་པའི་མྱང་འདས་ལ་སོགས་པ་དང་། རང་གི་ངོ་བོས་སྟོང་པའི་འཁོར་བ་ལ་སོགས་པའང་ཆོས་ཅན་དང་ཆོས་ཉིད་དུ་མི་རུང་སྟེ་རྟ་ཉིད་པ་ལང་གིས་སྟོང་པའམ་བུམ་པ་དང་རི་རྭ་ལ་ཆོས་ཅན་དང་ཆོས་ཉིད་ཀྱི་དོན་མེད་པ་བཞིན་ནོ། །དེའི་ཕྱིར་དེ་གཉིས་སྣང་བ་དང་སྟོང་པ་དབྱེར་མེད་དམ་ཟུང་འཇུག་དང་། སྲིད་པ་འཁོར་བ་དང་ཞི་བ་མྱང་འདས་གཉིས་མཉམ་པ་ཉིད་དུ་གསུངས་པ་དེ་ཉིད་ལུགས་འདི་ལ་མི་རུང་བས་རྣམ་པ་ཀུན་ཏུ་མེད་དེ་དཔེར་ན་ཡོད་པའི་རྟ་དང་མེད་པའི་བ་ལང་ངམ་བུ མ་པ་དང་རི་རྭ་ལ་ཟུང་འཇུག་དང་མཉམ་པ་ཉིད་ཀྱི་དོན་མེད་པ་བཞིན་ནོ། །དེ་ཡང་འདི་ལྟར་ཆུ་ཡི་ཟླ་བ་མངོན་སུམ་དུ་སྣང་བ་ལ་འདི་ཉིད་ནམ་མཁའི་ཟླ་བ་དངོས་མིན་ནོ་ཞེས་གནམ་ཟླས་སྟོང་པ་དང་ཆུ་ཟླ་རང་ཉིད་གསལ་བར་སྣང་བ་དེ་གཉིས་ཟུང་འཇུག་ཡིན་ན་ཀོ་སྟེ་ཡིན་ན་ནི། དེ་འདྲའི་སྣང་སྟོང་ཟུང་འཇུག་དེ་ཉིད་རྟོགས་པ་མཁས་བླུན་སྲས་ཀྱང་སླ་བས་བླུན་པོ་བ་ལང་རྫིས་ཀྱང་རྟོགས་པར་འགྱུར་ལ་བ་ལང་རྟ་མིན་པའམ་རྟས་སྟོང་པར་མཁས་བླུན་ཀུན་གྱིས་ཤེས་ཤིང་བ་ལང་སྣང་བར་མངོན་སུམ་དུ་ཡང་མཁས་བླུན་ཀུན་གྱིས་མཐོང་བར་གྱུར་པ་ཡིན་ན་དེ་འདྲའི་རྟོགས་པ་དེ་ལ་མཆོག་ཏུ་ངོ་མཚར་ཆེའོ་ཞེས་པའི་བསྔགས་བརྗོད་རྨད་དུ་བྱུང་བ་བདག་ཉིད་ཆེན་པོ་སངས་རྒྱས་དང་བཅས་པས་ཅི་སྟེ་གསུངས་ཏེ་གསུངས་མི་རིགས་སོ། །གཉིས་པ་དེས་ན་རང་གི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། ཇི་སྐད་བསྟན་པ་དེས་ན་སྔ་འགྱུར་བ་རང་གི་ལུགས་འཁྲུལ་བའི་དྲི་མ་དང་བྲལ་བའི་ཁས་ལེན་རྣམ་པར་དག་པ་ལ་ནི་དཔེར་ན་ཆུ་ཡི་ཟླ་བའི་སྣང་བ་དེ་ལ་རིགས་པ་ཡང་དག་གིས་བརྟགས་ཤིང་དཔྱད་ན་ཆུ་ཟླ་དེ་ཉིད་ཕྱི་ནང་གཞན་སོགས་གང་དུའང་རང་གི་ངོ་བོ་ཅུང་ཟད་ཙམ་ཡང་མི་རྙེད་པས་མེད་པ་ཡིན་བཞིན་དུ་རྣམ་པ་ཆུ་ཟླ་ཉིད་དུ་སྣང་བར་མངོན་སུམ་དུ་མཐོང་བའི་ཚེ་ཆུ་ཟླ་དེ་ཡོད་མེད་ལ་སོགས་པའི་སྤྲོས་པ་ཀུན་དང་བྲལ་བའི་མེད་དགག་ཡིན་ཀྱང་རྟེན་འབྱུང་འགགས་པ་མེད་པས་སྣང་དུ་རུང་བ་དེ་ལྟར་དུ་སྣང་སྲིད་འཁོར་འདས་ཀྱི་བསྡུས་པའི་ཆོས་འདི་ཐམས་ཅད་རང་གི་ངོ་བོས་སྟོང་པ་དང་། རང་བཞིན་སྣང་བའམ་ཡོད་པ་གཉིས་ཡེ་ནས་རྣམ་དབྱེར་མེད་པ་མེ་དང་ཚ་བ་བཞིན་དུ་གནས་པ་དེ་ཉིད་སོ་སྐྱེའི་བློར་མ་ཤོང་བས་འགལ་བ་ལྟར་སྣང་ན་ཡང་འདིར་ནི་མངོན་སུམ་ཉིད་དུ་སྟོང་དང་རྟེན་འབྱུང་ངམ་སྣང་སྟོང་གཉིས་མི་འགལ་བར་མ་ཟད་ཆུ་དང་རླན་བཞིན་དབྱེར་མེད་དམ་ཟུང་འཇུག་ཏུ་མཐོང་བ་འདི་ལ་ཨེ་མ་ཧོ་རྨད་དུ་བྱུང་བའོ་ཞེས་ངོ་མཚར་བའི་ཚིག་གིས་མཁས་པ་ཆེན་པོ་སངས་རྒྱས་བཅོམ་ལྡན་འདས་ཐུགས་ཀྱི་སྲས་མཆོག་དང་བཅས་པ་རྣམས་ཀྱིས་མགྲིན་གཅིག་ཏུ་བསྔགས་པའི་མེ་ཏོག་རྒྱ་ཆེར་འཐོར་ཞིང་ཆེད་དུ་བརྗོད་པ་ཡིན་ཏེ། མདོ་ལས། ཚིག་བྲལ་དག་གི་ལམ་གྱིས་མི་མཚོན་པས། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རྣམ་སྤངས་པ། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་དང་། འཕགས་མཆོག་ཀླུས། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བརྟེན་པ་གང་། ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང་། །ཞེས་སོགས་བསྔགས་འོས་མཆོག་ལ་བསྔགས་བརྗོད་ཀྱང་ཆེ་ཐང་དུ་མཛད་པ་ཡིན་ནོ། །དེ་ལྟར་གནས་ལུགས་ཟུང་འཇུག་གི་ངོ་བོར་ཆོས་ཀུན་གདོད་ནས་གནས་པའི་ཕྱིར་ངོ་བོ་སྟོང་པའི་ངོས་ནས་གཞལ་བའམ་གཏན་ལ་དབབ་ན་འཁོར་འདས་ཀྱིས་བསྡུས་པའི་ཆོས་སོ་ཅོག་ཀུན་ལ་རང་གི་ངོ་བོས་མི་སྟོང་པ་ཅུང་ཟད་ཙམ་དུ་གྲུབ་པ་ཡོད་པ་མིན་པ་དེའི་ཕྱིར་ཆོས་ཐམས་ཅད་མེད་ཅེས་སམ་སྟོང་པ་ཉིད་ཡིན་ནོ་ཞེས་མཐའ་གཅིག་ཏུ་སྨྲར་གཏུབ་ཀྱང་། དེ་ལྟ་ནའང་མེད་པའམ་སྟོང་པ་དེའི་མེད་ཚུགས་སམ་སྟོང་ཚུགས་མ་ཤོར་བཞིན་དུ་རྟེན་འབྱུང་གི་སྣང་བ་སུས་ཀྱང་འགོག་ཏུ་མེད་པ་ཉིད་དུ་རང་ཤར་བ་ཡིན་ལ། སྣང་ཚུལ་ལ་ཅིར་ཡང་འཆར་དུ་རུང་བས་རྟེན་འབྱུང་གི་སྣང་ཆ་ནས་གཞལ་ན་སྣང་བ་དེའི་སྣང་ཚུགས་སམ་སྣང་ཚུལ་མ་ཤོར་བཞིན་དུ་གཞི་མེད་རྩ་བ་དང་བྲལ་བའི་སྟོང་པ་ཆེན་པོར་ཡེ་ནས་གནས་པས་དབྱིངས་ཡེ་གཉིས་སུ་མེད་པར་ལྷུན་གྱིས་གྲུབ་པ་ཉིད་དེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་གསུངས་པ་བཞིན་ནོ། །རྒྱུ་མཚན་དེས་ན་ཟུང་འཇུག་མཉམ་ཉིད་ཆེན་པོ་སྣང་སྟོང་རིས་སུ་མ་ཆད་པས་སྤྲོས་པ་ཀུན་དང་བྲལ་བའི་གནས་ལུགས་དེ་ལ་ཀ་བ་དང་མྱང་འདས་ལ་སོགས་པའི་ཆོས་ཅན་དང་ཆོས་ཉིད་འདི་སྟོང་ཞེས་པ་དང་། བདེན་གྲུབ་དང་འཁོར་བ་ལ་སོགས་པ་དགག་བྱ་འདི་དང་འདིས་སྟོང་ཞེས་པ་དང་འདི་ནི་སྣང་བ་ཀུན་རྫོབ་ཀྱི་ཆོས་སོ་འདི་ནི་སྟོང་པ་དོན་དམ་པའི་ཆའོ་ཞེས་པ་ལ་སོགས་པའི་གཉིས་ཆོས་ཀྱི་དབྱེ་བ་ཞིག་ནམ་ཡང་རྙེད་པ་མེད་པ་སྤྲོས་ཀུན་བྲལ་བའི་སྣང་སྟོང་རིས་སུ་མ་ཆད་པ་ལ་ངེས་ཤེས་ཀྱི་ཁོ་ཐག་ནང་ནས་ཆོད་པར་གྱུར་པའི་ཚེ་ན་གནས་ལུགས་མཐར་ཐུག་གི་རྟོགས་པ་དོན་དུ་གཉེར་ཞིང་ཚོལ་བ་ལ་འབད་པའི་མཁན་པོ་མཁས་པ་རྣམས་ལ་སྟོང་ན་སྣང་མི་རུང་སྣང་ན་སྟོང་མི་རུང་སྙམ་དུ་སྣང་སྟོང་འགལ་བར་འཛིན་པ་ལ་སོགས་དོན་མེད་པའི་ཐེ་ཚོམ་དང་ལོག་པར་རྟོག་པས་ཟབ་དོན་རྟོགས་པར་དཀའ་བའི་གནས་ལ་སྒྱིད་ལུགས་ཤིང་ཡི་ཆད་པའམ་ཡི་མུག་སྐྱེ་ཞིང་གཞན་ལ་འགྲམ་ཆུ་ལྡང་བ་མེད་པར་མ་ཟད་ཡིད་ཆེས་ཀྱི་སྟེང་དུ་སླར་ཡང་སྣང་སྟོང་མཉམ་པ་ཉིད་ཀྱི་གནས་ཚུལ་མཐོང་ནས་ཚོང་པ་ཁེ་སྤོགས་གྲུབ་པ་ལྟར་ཡིད་བདེ་བླ་ན་བྲལ་བ་ཐོབ་པར་ངེས་པ་འདི་ནི་ཤིན་ཏུ་ངོ་མཚར་ཆེ་ཞིང་མཆོག་དང་ཕུལ་དུ་གྱུར་པ་སྟེ་སྔ་འགྱུར་རིག་འཛིན་བརྒྱུད་པའི་རང་ལུགས་བཟང་པོའི་འབྲས་རྟགས་རྣམ་པར་དག་པའོ། །དེ་ལྟར་ན་མདོ་རྒྱུད་མན་ངག་ཟབ་མོའི་གསང་ཚིག །གངས་ལྗོངས་སྔ་ཕྱིའི་མཁས་པ་རྣམས་ཀྱི་ཞལ་བཞེས། གསང་སྔགས་གསར་རྙིང་གི་བཀའ་སྲོལ་དུ་མའི་ཐ་སྙད། ལྟ་སྒོམ་སྤྱོད་པའི་ཁས་ལེན་དང་ཆོས་སྐད་ཀྱི་ཁྱད་པར། ཕྱག་བཞེས་ཕྲིན་སྒྲུབ་ཀྱི་རྣམ་བཞག་སྣ་ཚོགས་པ་འདི་སྙེད་ཅིག་དར་ཞིང་བཞུགས་པའི་ནང་པ་སངས་རྒྱས་པ་མཉམ་མེད་ཤཱཀྱའི་རྒྱལ་པོའི་བསྟན་པ་རིན་པོ་ཆེ་འདི་ལ་རང་གཞན་སུས་ཀྱང་འགལ་འདུར་མི་རྟོག་པར་གདུལ་བྱའི་ཁམས་དབང་བསམ་པ་དང་མཐུན་པར་རྒྱལ་བའི་ཕྲིན་ལས་བསམ་གྱིས་མི་ཁྱབ་པར་འགོགས་པ་མེད་པར་དུས་སུ་སྨིན་པའི་དབང་གིས་གང་ལ་གང་འདུལ་དུ་རང་ཤར་བར་མཐོང་ནས། དད་ཅིང་གུས་པས་ཡིད་ཆེས་པར་བྱས་ཏེ་ཚུལ་བཞིན་དུ་རྟོགས་དགོས་པར། མགོན་པོ་བྱམས་པས། རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཉིད། །ཅེས་གསུངས་པ་ལྟར། དད་པས་ལེགས་པར་ཞུགས་ཏེ་གཟུ་བོར་གནས་པའི་བློ་གྲོས་ཀྱིས། རྒྱུ་མཚན་ཉིད་ཀྱི་ཐེག་པ་དྲང་ངེས་ལྡེམ་དགོངས། སྔགས་རྡོ་རྗེའི་ཐེག་པར་མཐའ་དྲུག་ཚུལ་བཞིའི་སྒོ་ནས་བསྟན་པ་ཐམས་ཅད་དད་པས་ཆུ་ལས་འོ་མ་བཞིན་དུ་ཚིག་ལ་མི་རྟོན་དོན་ལ་རྟོན་པས། གནས་སྐབས་དང་མཐར་ཐུག་གི་དགོངས་གནད་ཇི་བཞིན་དུ་ཉམས་སུ་བསྟར་བས་བསྟན་པ་ཐམས་ཅད་འགལ་མེད་དུ་རྟོགས་པ་དང་། གཞུང་ལུགས་མཐའ་དག་གདམས་པར་འཆར་བའི་བཤད་སྒྲུབ་ནི་མང་དུ་ཐོས་པའི་མཁས་པ་རྣམས་ཀྱིས་ཉམས་སུ་ལེན་པའི་སྙིང་པོ། ཐུགས་དམ་གྱི་མཐིལ་དང་སྙིང་ནོར་དུ་བགྱི་བར་འོས་པའི་མཁས་བཙུན་དམ་པ་རྣམས་ཀྱི་བཟང་པོའི་བཞེད་སྲོལ་རྨ་མེད་པ་ཡིན་པས། ཆོས་དང་གང་ཟག་གཞན་ལ་ཞེན་ལྟ་དང་རང་མཐོང་གིས་སྡང་ཞུགས་མི་བྱ་ཞིང་། རང་ཉིད་སྔོན་ལས་བཙན་པོས་དང་པོ་ཉིད་ནས་གསར་རྙིང་གང་ལ་འཕྲད་པའི་ཆོས་དང་གང་ཟག་ལ་སུན་འབྱིན་དང་ལོག་པར་མི་ལྟ་བར་བཤད་པ་དང་སྒྲུབ་པའི་བཀའ་སྲོལ་ལ་རང་ནུས་གང་ཡོད་ཀྱིས་བཟུང་ཞིང་བསྐྱང་སྟེ་དོན་གཉེར་བྱས་ན་བསྟན་འགྲོ་ལ་ཕན་པ་འབྱུང་ཞིང་དོན་གཉིས་ཀྱི་འབྱོར་པའི་དཔལ་དང་ལྡན་པར་འགྱུར་ལ། དེ་ལས་གཞན་དུ་རང་གར་སྡང་ཞུགས་ཀྱིས་སུན་ཅི་ཕྱིན་དང་སྒྲོ་སྐུར་ཅི་ཐོན་བྱས་ན་ཅི་ཡང་མི་ཤེས་པའི་བླུན་པོ་བ་ལང་རྫི་ཡན་ཆད་ཀྱང་རི་བོང་ཅལ་སྒྲོགས་ཀྱིས་དེའི་ར་མདར་བསྙགས་ནས་ཡང་དག་པའི་ཆོས་དང་གང་ཟག་ལ་ལོག་པར་ལྟ་ཞིང་སྐུར་འདེབས་ཀྱི་ཉེས་པ་ཤིན་ཏུ་ཆེ་བས་གཞན་རྣམས་ཕུང་ལ་སྦྱོར་ཞིང་རང་ཡང་དམ་པའི་རྣམ་ཐར་ལས་རིང་བ་དང་། མདོ་ལས་གསུངས་པའི་སྨྲ་ལ་དགའ་བའི་ཉེས་པས་ཀྱང་ཟིན་ནས་ནང་ཆ་མངོན་པ་ཡིན་ཏེ། དམ་ཚིག་ཉམས་པའི་ཆད་པ་མི་བཟད་པས་ཕོག་ནས་འདི་ཕྱིར་ཕུང་ཁྲོལ་མཐའ་ཡས་པར་འགྱུར་བའི་ཕྱིར་རོ། །དེས་ན་རིགས་པའི་གནས་ཆེན་ལྔ་ལ་སོགས་པར་སྐྱེས་སྦྱང་གི་བློ་གྲོས་ཆེ་ཞིང་ཉམས་མྱོང་གི་དྲོད་ཚད་རྙེད་པས་བླ་མ་ལྷག་པའི་ལྷས་མངོན་སུམ་རྗེས་སུ་བཟུང་ཞིང་ལུང་བསྟན་ལེགས་པར་ཐོབ་པའི་མཁས་གྲུབ་དམ་པ་རྣམས་ཀྱིས་བསྟན་འགྲོར་སྨན་པར་ངེས་པའི་མཁས་པའི་བྱ་བ་འཆ ད་རྩོད་རྩོམ་གསུམ་གྱི་དགག་སྒྲུབ་ཀྱི་རྩོད་རིགས་དོན་ལྡན་སུ་ལ་ཡོད་ཀྱང་། རང་གཞན་སུས་ཀྱང་དེ་ལ་ལོག་པར་མི་ལྟ་བར་དགོངས་གནད་ལེགས་པར་ཚོལ་བར་བྱས་ན་བློ་གྲོས་ཟབ་མོའི་གསོས་སུ་འགྱུར་བས་ཕན་པ་མཆོག་ལས་གནོད་པ་ཅི་ཡང་མེད་དེ། བདག་ཅག་གི་སྟོན་མཆོག་གིས་མདོ་སྡེ་དགོངས་པ་ངེས་འགྲེལ་ལས། ཆོས་འཁོར་གསུམ་ལས་རིམ་པར་ཐ་མ་ལ་མཆོག་ཏུ་བསྔགས་ཤིང་། དང་པོ་དང་བར་གཉིས་ལ་སུན་འབྱིན་གྱི་སྨད་པར་མཛད་པ་ལ་སོགས་པ་སྡེ་སྣོད་གསུམ་པོར་དགག་སྒྲུབ་ཅི་རིགས་པས་བསྟན་པར་མཛད་པ་དང་། རྡོ་རྗེའི་ཐེག་པ་ལའང་རྒྱུད་སྡེ་གོང་འོག་ནང་གི་དབྱེ་བ་དང་བཅས་པའི་ཁྱད་པར་དང་དགག་སྒྲུབ་སྣ་ཚོགས་པས་གསལ་བར་བྱས་པ་དང་། བསྲེགས་བཅད་བརྡར་བས་གསེར་བཞིན་དུ་ལེགས་པར་བརྟགས་ཏེ་བླངས་དགོས་པ་དང་། ཡང་དག་པར་བརྟགས་པའི་ཕན་ཡོན་ཀྱང་མཐའ་ལས་འདས་པར་གསུངས་ཤིང་། བརྟགས་ཚུལ་ཀྱང་མགོན་པོ་བྱམས་པའི་མན་ངག་ལས། གོ་རིམ་རིག་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་བརྒལ་ལན་གྱི་སྒོ་ནས་བརྟག་པར་གསུངས་པ་ཡིན་པས། དེ་ལྟར་བརྟགས་ནས་གཞན་ལ་གནོད་པར་གྱུར་ཀྱང་ཉེས་པ་མེད་པར་ཡང་། ཇི་སྐད་དུ། ཆོས་འདི་རྫོགས་པའི་སངས་རྒྱས་ཀྱིས། །རྩོད་པའི་ཆེད་དུ་མ་བསྟན་ཏེ། །དེ་ལྟའང་མ་ཡི་བུད་ཤིང་བཞིན། །འདི་ཡི་ཕས་ཀྱི་རྒོལ་བ་སྲེག །ཞེས་དང་། དཔལ་ལྡན་ཟླ་བས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་གྱུར་ན་ཉེས་པ་མེད། །ཞེས་སོ། །ཉེས་པ་མེད་པར་མ་ཟད་དེ་ལྟ་བུའི་ཚུལ་འདི་ཆོས་སྲུང་བའང་ཡིན་ཏེ། ཏིང་འཛིན་རྒྱལ་པོ་ལས། དེ་ལ་ཆོས་སྲུང་བ་གང་ཞེ་ན། འདི་ལྟ་སྟེ་སངས་རྒྱས་ཀྱི་ཆོས་ལ་སྨོད་པ་རྣམས་ཆོས་དང་མཐུན་པར་ཚར་གཅོད་པའོ། །ཞེས་དང་། ཆོས་འཛིན་པའང་ཡིན་པར། །ནམ་མཁར་མཛོད་ཀྱིས་ཞུས་པ་ལས། །རྒྱལ་བའི་བྱང་ཆུབ་མཚན་ཉིད་གང་བརྙེས་པ། །ཆོས་ཀྱི་མཚན་ཉིད་དེ་ཉིད་ཡང་འཛིན་ཅིང་། །གང་གིས་རྡུལ་མེད་མཐའ་འདི་རབ་ཤེས་པ། །དེ་ནི་སངས་རྒྱས་ཀུན་གྱི་ཆོས་འཛིན་ཡིན། །ཞེས་དང་། ཆོས་བཟུང་བ་དེ་ནི་སངས་རྒྱས་ལ་བྱས་པ་བཟོ་བའང་ཡིན་ཏེ། དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པའི་མདོ་ལས། འདི་ལྟར་རྒྱལ་བའི་ཆོས་ཀྱིས་ཉེར་གནས་ཤིང་། །ཆོས་ཀྱིས་ངེས་པར་འབྱུང་གིས་ཟང་ཟིང་མིན། །དེ་བས་གང་ཞིག་བདེ་གཤེགས་ཆོས་འཛིན་པ། །དེ་ནི་སངས་རྒྱས་ཀུན་ལ་བྱས་པ་གཟོ། །ཞེས་སོ། །དེ་དག་ལ་བརྟེན་ནས་བསོད་ནམས་ཚད་མེད་པའང་ཐོབ་སྟེ། ནམ་མཁའ་མཛོད་ཀྱིས་ཞུས་པའི་མདོ་ལས། ཇི་ལྟར་བསྐལ་བ་བྱེ་བ་སྟོང་བརྗོད་ཀྱང་། །སངས་རྒྱས་ཡེ་ཤེས་མཐའ་ཡོད་མ་ཡིན་ལྟར། །དེ་བཞིན་གཤེགས་ཀྱི་དམ་པའི་ཆོས་འཛིན་པའི། །བསོད་ནམས་དེ་ཡང་ཚད་ཡོད་མ་ཡིན་ནོ། །ཞེས་གསུངས་པས་སོ། །དེའི་ཕྱིར་འཕགས་བོད་ཀྱི་ཡུལ་དུ་བྱོན་པའི་མཁས་དབང་དམ་པ་དག་གིས་དགོས་པའི་དབང་གིས་རྣམ་པར་དཔྱོད་པའི་དགག་སྒྲུབ་ཇི་སྙེད་ཅིག་བཞུགས་པ་གང་ལའང་ལོག་པར་མི་རྟོག་པར་བློ་གཟུ་བོར་གནས་པས་དགོངས་གནད་ལེགས་པར་བཙལ་ན། རང་གི་རྣམ་དཔྱོད་ཀྱི་རྩལ་རྫོགས་ཤིང་མདོ་རྒྱུད་ངེས་དོན་གྱི་དགོངས་གནད་ཟབ་མོ་ཉམས་སུ་བསྟར་ཞིང་ཡོན་ཏན་གྱི་ལུས་ཟུང་བཏབ་སྟེ་བསྟན་འགྲོའི་གསོས་སྨན་ཆེན་པོར་འགྱུར་བར་ངེས་པའི་དམ་པའི་རྣམ་ཐར་ཉམས་འོག་ཏུ་ཆུད་པར་འགྱུར་བས་ན། འདིར་ཡང་ད་ལྟར་བཞུགས་ཤིང་སླད་ནས་འབྱོན་པ་རྣམས་ལ་སྙིང་ནས་གསོལ་བ་ཡང་ཡང་འདེབས་པ་ལགས་ན་ཆོས་མཐུན་སྤྲང་པོའི་ངག་ལས་ཀྱང་བླང་བར་འོས་ཕྱིར་ཕྱོགས་དུས་ཀྱི་མཁས་པ་རྣམས་ཀྱིས་ཐུགས་དམ་སྙིང་ནོར་དུ་བཅིངས་ཏེ་དགག་པ་དང་སྒྲུབ་པའི་ཚུལ་གྱིས་བརྟགས་པ་འདི་དང་གཞན་འོག་མ་འོག་མ་ལའང་ཐུགས་དམ་རྒྱུད་བསྐུལ་དུ་དང་ལེན་མཛད་ནས་བག་ཡོད་པ་རྣལ་འབྱོར་དུ་བྱའོ། །ཞེས་གོང་འོག་ཀུན་གྱི་བར་གྱི་གསལ་བྱེད་ལྟ་བུར་བསྟན་པ་འདི་དག་བསྙེལ་བ་མེད་པར་ཐུགས་ལ་བཅིངས་ཏེ་བལྟ་ཞིང་ཉམས་སུ་ལེན་པར་ཞུ་བའོ། །རང་སྟོང་གཞན་སྟོང་ཕན་ཚུན་ཆེར་རྩོད་ཀྱང་། སྣང་སྟོང་ཕྱོགས་སུ་ལྷུང་ན་སུ་ལའང་སྐྱོན། སྣང་སྟོང་མི་འགལ་ཟུང་འཇུག་གྲུབ་མཐའི་མཆོག །འདི་འཛིན་ཕྱོགས་ལས་རྣམ་པར་རྒྱལ་མིན་ནམ། །ཞེས་ཀྱང་སྨྲས་སོ། །འདི་རྣམས་རྗེ་མཁན་ཆེན་བླ་མའི་ལེགས་གསུང་དོན་ཡང་ཟབ་ལ་ཚིག་ཀྱང་སྙན་པས་རྟོག་གེའི་ཚིག་ཕྲེང་བརྒྱུས་པ་ལ་སྙིང་པོ་མེད་པས་དེ་རྣམས་ཁོ་ན་བྲིས་པ་ཡིན་ནོ། །དྲི་ལན་གཉིས་པ་ཉན་རང་འཕགས་པས་བདག་མེད་གཉིས་ཀ་རྟོགས་སམ་མ་རྟོགས་གང་འཐད་ཀྱི་ལན་ལ་གསུམ། མི་འཐད་པ་གཞན་ལུགས་ལུང་རིགས་ཚད་མའི་སྒོ་ནས་སོ་སོར་དགག་པ། འཐད་ལྡན་རང་ལུགས་ཤིང་རྟའི་བཞེད་གཞུང་བཞིན་དུ་གསལ་བར་སྒྲུབས་པ། ཚུལ་འདི་ལེགས་པར་རྟོགས་ན་ཀླུ་དང་བྱམས་པ་དགོངས་གནད་གཅིག་ཏུ་བསྟན་པའོ། །དང་པོ། འགའ་ཞིག་ཉན་རང་སོགས་ཚིགས་བཅད་དགུ་དང་རྐང་པ་གཅིག་གིས་བསྟན་ཏེ། དེ་ལ་སྔ་རབས་ཀྱི་མཁས་པ་འགའ་ཞིག་གིས་ཉན་རང་དགྲ་བཅོམ་པས་གང་ཟག་གི་བདག་མེད་པ་ཙམ་རྟོགས་ཀྱི་ཆོས་ཀྱི་བདག་མེད་སྟོང་པ་ཉིད་ནི་མ་རྟོགས་ཏེ་དེ་ལྟར་ན་ཐེག་ཆེན་བསྟན་པ་དོན་མེད་དུ་འགྱུར་བ་ལ་སོགས་པའི་སྐྱོན་དམིགས་པའི་ཕྱིར་རོ། །ཞེས་ཟེར་བ་ནི་མི་འཐད་དེ། ཇི་ལྟར་ན་ཕུང་པོ་ལྔ་པོར་མ་བརྟགས་མ་དཔྱད་པར་བརྟེན་ནས་བཏགས་པའི་ང་ཙམ་དུ་འཛིན་པའི་བདག་དེ་ནི་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན་ལ་དེ་མ་ཁེག་པ་དེ་སྲིད་དུ་དེའི་ཡུལ་ཅན་ངར་འཛིན་ལྷན་སྐྱེས་ཀྱང་མི་ཁེགས་ལ་དེ་མ་ཁེགས་ན་དེའི་ནུས་པས་ཆགས་སོགས་ཉོན་མོངས་པ་རྣམས་སྤོངས་པ་མེད་པས་ལམ་དེས་ཐར་བ་ཙམ་ཡང་ཐོབ་པར་མི་ནུས་པ་དང་། བདག་དེའང་ཕུང་པོ་ལ་མ་བརྟགས་མ་དཔྱད་པར་བརྟེན་ནས་འབྱུང་བའམ་བཏགས་པ་ཙམ་སྟེ་དེ་ཉིད་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན་པས། ཕུང་པོའི་ཚོགས་པ་ལ་བརྟེན་ནས་བཏགས་པའི་གང་ཟག་གི་བདག་དེ་དང་། ཡན་ལག་ལ་སོགས་པའི་ཚོགས་པ་དང་། ལྟོ་ལྡིར་ཞབས་ཞུམ་ལ་སོགས་པའི་རྣམ་པ་ལ་བརྟེན་ནས་བཏགས་པའམ་འབྱུང་བའི་ཕུང་པོ་དང་བུམ་པ་ལ་སོགས་པའི་ཆོས་ཀྱི་བདག་དང་དེ་གཉིས་ལ་བརྟེན་ནས་བཏགས་པའི་སྟོང་གཞིའི་ཆོས་ཅན་གྱི་དབྱེ་བ་ཙམ་མ་གཏོགས་པར་ཆོས་དང་གང་ཟག་རང་གི་ངོ་བོས་གྲུབ་པ་མེད་པས་སྟོང་ཚུལ་ལ་ཁྱད་པར་འགའ་ཡང་མེད་པར་སྟོང་པ་ཉིད་དེས་ཆོས་དང་གང་ཟག་གི་བདག་གཉིས་ཀ་སོ་སོར་ཡང་རིགས་པ་ཡང་དག་པས་དཔྱད་ན་རང་བཞིན་གྱིས་གྲུབ་པ་མེད་པས་སྟོང་པ་ཉིད་དུ་མཚུངས་པ་ཡིན་པའི་ཕྱིར་རོ། །དེས་ན་ཤིང་དང་ཤ་བ་བཞིན་དུ་བདག་གཉིས་སྤྱི་དང་བྱེ་བྲག་དང་། བདག་མེད་གཉིས་ཀྱང་སྤྱི་དང་བྲེ་བྲག་ཙམ་དུ་ཤེས་པར་བྱའོ། །ཞེས་གསུངས། དེ་ལྟར་ཡིན་པར་རྒྱལ་བའི་ཡུམ་ལས་ཤེས་རབ་ཀྱི་ཕ་རོལ་དུ་ཕྱིན་པ་སྲས་བཞི་བསྐྱེད་པའི་ཡུམ་ཡིན་པས་དེ་ལ་བསླབ་པར་བྱ་བར་གསུངས་པ་དང་། ཀླུ་སྒྲུབ་ཡབ་སྲས་ཀྱིས། ཇི་སྲིད་ཕུང་པོར་འཛིན་ཡོད་པ། །སོགས་དང་། ཡུལ་ལ་བདག་མེད་མཐོང་ན་ནི། །ཞེས་པ་ལ་སོགས་པའི་ལུང་དང་། བརྟེན་ནས་བཏགས་པའམ་རྟེན་འབྱུང་གི་ཆོས་དེ་སྟོང་པ་ཉིད་དུ་མ་རྟོགས་ན་ཕྱི་རོལ་བའི་ཆགས་བྲལ་བཞིན་དུ་སླར་ཉོན་མོངས་པ་སྐྱེ་བར་འགྱུར་ཞིང་སྲིད་པ་ལས་མི་གྲོལ་བ་དང་བརྟེན་ནས་བཏགས་པའམ་རྟེན་འབྱུང་གི་དེ་ཉིད་རྟོགས་ན་རྣམ་པར་གྲོལ་པའི་ཐར་པ་ཐོབ་པས་སྟོང་ཉིད་ཞི་སྒོ་གཉིས་སུ་མེད་པར་སྒྲུབས་པའི་རིགས་པ་དང་བཅས་པས་ཀྱང་མངོན་སུམ་བསྙོན་མེད་དུ་གྲུབ་པ་ལས་བརྒལ་ནས་སུ། ཉན་རང་དགྲ་བཅོམ་པས་བརྟེན་ནས་བཏགས་པའི་སྟོང་པ་ཉིད་མ་རྟོགས་ཞེས་མཐའ་གཅིག་ཏུ་སྨྲ་བ་རྣམས་ནི་དམ་བཅའ་བ་ཙམ་དུ་ཟད་དེ་ལུང་རིགས་ཀྱིས་སྒྲུབ་བྱེད་མེད་པས་ཕྱིར་རོ། །ཡང་དེ་ལ་ཕྱི་རབས་ཀྱི་བདག་ཉིད་ཆེན་པོ་ཁ་ཅིག་ཧ་ཅང་ཐལ་ཆེས་ནས་ཐེག་པ་གསུམ་ཆར་གྱི་མཐོང་ལམ་སྤང་རྟོགས་མཉམ་པས་གཅིག་པ་དང་ཉན་རང་བྱང་སེམས་འཕགས་པ་གསུམ་ཆར་ལྟ་བ་བདག་མེད་གཉིས་ཀ་རྫོགས་པར་རྟོགས་པས་རྟོགས་པ་ལ་མཐོ་དམན་རྡུལ་ཙམ་ཡང་མེད་པར་འདོད་ཅིང་དེ་དང་འགལ་བ་ཐེག་གསུམ་གྱི་མཐོང་ལམ་སྤང་རྟོགས་མི་འདྲ་བ་དང་རྟོགས་པའི་ལྟ་བ་ལ་མཐོ་དམན་ཡོད་པར་གསུངས་པའི་ཤེར་ཕྱིན་དང་སྔགས་རྡོ་རྗེའི་ཐེག་པ་ལ་སོགས་པ་མདོ་དང་རྒྱུད་སྡེའི་གཞུང་ངེས་དོན་དུ་གསལ་བར་གྲུབ་པ་ཀུན་ཀྱང་དྲང་བའི་དོན་དུ་འགྲེལ་ཞིང་འཆད་པ་དེ་དག་ལ། མཁས་པ་གཞན་དག་གིས་བརྒལ་པ་དེ་ལྟར་ན་དམན་པ་ཉན་རང་གི་ལམ་སྔོན་དུ་སོང་བའི་དགྲ་བཅོམ་པ་དག་སླར་ཐེག་ཆེན་དུ་ཞུགས་ནས་བསྐལ་པ་གྲངས་མེད་པ་ལ་སོགས་པར་ཚོགས་གཉིས་བསགས་ཏེ་མཐོང་ལམ་གྱི་ཡེ་ཤེས་ཐོབ་པ་དང་ས་ནས་སར་འཕར་བའི་སྒོམ་ལམ་གྱི་ཡེ་ཤེས་ཐོབ་པ་ལ་སོགས་པའི་ཚེ་ན་ཉོན་སྒྲིབ་ནི་སྤངས་ཟིན་ལ་ཤེས་སྒྲིབ་ནི་མ་དག་ས་བདུན་དུ་མི་སྤོང་བར་འདོད་པས་ན། སྤང་བྱ་ཅུང་ཟད་དམ་ཕྲ་བ་ཡང་མེད་པ་དང་། དེ་མེད་པས་རྟོགས་པའི་ཡེ་ཤེས་དེ་ལ་དགོས་ནུས་མེད་པ་དང་། གྲངས་མེད་ཀྱི་ཚོགས་གཉིས་དོན་མེད་པར་འགྱུར་བ་དང་། ཐེག་པ་མཆོག་དམན་དང་ལམ་ཟབ་མི་ཟབ་དབང་པོ་རྣོ་རྟུལ་དང་དྲང་ངེས་གོ་བཟློག་པ་ལ་སོགས་པའི་འགལ་འདུའི་སྐྱོན་གྱི་ཕུང་པོ་འགལ་བའི་ཁུར་ཆེན་གྱི་རིགས་པས་གནོད་པ་ཇི་སྙེད་བརྗོད་པ་ཀུན་ཀྱང་ལན་གྱིས་བཟློག་ཏུ་མེད་པར་ཐོག་ལྟར་དུ་འབབ་པར་འགྱུར་བ་ཡིན་ལ། སྐྱོན་གཞན་ཡང་རྟོགས་བྱ་བདག་མེད་གཉིས་ཇི་ལྟ་བ་བཞིན་དུ་རྟོགས་པར་གྱུར་ཀྱང་རྟོགས་པའི་ཡེ་ཤེས་དེས་སྤང་བྱ་ཤེས་སྒྲིབ་སྤོང་བར་བྱེད་པ་ལ་གྲོགས་བསོད་ནམས་ཀྱི་ཚོགས་མཐའ་ཡས་པས་བརྒྱན་ནས་སྒྲུབ་དགོས་པས་ས་དང་པོ་ནས་ཤེས་སྒྲིབ་སྤང་བས་བར་ཆད་མེད་ལམ་སོགས་མཚན་ཉིད་པར་འདོད་པ་ཞིག་ཀྱང་ཡོད། མཆན། ཡེ་ཤེས་ཀྱི་ཚོགས་ལ་ཡང་ཡང་མཉམ་པར་བཞག་ཅིང་བསོད་ནམས་ཀྱི་ཚོགས་སྦྱིན་དང་ཚུལ་ཁྲིམས་སོགས་གོང་ནས་གོང་དུ་འཕེལ་བ་ལ་ཆད་མེད་ལམ་སོགས་ལམ་མཚན་ཉིད་པ་འཇོག་ཏུ་མེད་ཅིང་ཡེ་ཤེས་དེས་ས་བརྒྱད་པའི་ཤེས་སྒྲིབ་སྤང་ནུས་ཀྱི་གཉེན་པོའི་ནུས་པ་མཐུ་བརྟས་པར་འགྱུར་བས་དོན་མེད་དུ་མི་འགྱུར་རོ་ཞེས་ཟེར་ན་ཡང་མི་འཐད་དེ། དམན་ལམ་སྔོན་སོང་དེས་རྟོགས་བྱ་བདག་མེད་གཉིས་ཇི་ལྟ་བ་བཞིན་དུ་མ་རྟོགས་པར་གྱུར་ན་དེ་རྟོགས་པར་རང་གིས་ཁས་བླང་བ་དང་འགལ་ལ། གལ་ཏེ་ཇི་བཞིན་དུ་རྟོགས་ནས་རྟོགས་པ་ལ་མཐོ་དམན་མེད་པར་གྱུར་ན་དེས་སྤང་བྱ་མི་སྤོང་བ་ཡང་འགལ་བ་ཡིན་ཏེ་གཉེན་པོའི་ཡེ་ཤེས་ཀྱིས་སྤང་བྱ་མི་སྤོང་ན་གཞན་སྲིད་པ་གསུམ་ན་སྤང་བྱ་སྤོང་ནུས་ཀྱི་གཉེན་པོ་མི་སྲིད་པའི་ཕྱིར་ཏེ། དཔེར་ན་ཉི་མ་སྤྲིན་དང་བྲལ་བ་ཡང་དག་པར་ཤར་ཡང་མུན་པའི་དཔུང་བསལ་བའམ་འཇོམས་པ་ལ་ནི་གྲོགས་སྒྲོན་མེ་སོགས་གཞན་ལ་ལྟོས་དགོས་པར་ཁས་ལེན་པ་དང་མཚུངས་པས་འདི་ནི་ཆེས་ངོ་མཚར་བ་ཞིག་སྟེ་བཞད་གད་ཀྱི་གནས་སོ། །ཡང་ཕྱི་རབས་ཀྱི་མཁས་པ་ཁ་ཅིག་གིས་ཉན་རང་དགྲ་བཅོམ་པས་རང་རྒྱུད་ཀྱི་ཕུང་པོ་ལྔ་པོ་སྟོང་ཉིད་དུ་རྟོགས་པ་ཡུམ་དང་དབུ་མའི་བསྟན་བཅོས་རྣམས་དང་འཇུག་པ་ལེའུ་དང་པོའི་དགོངས་དོན་ཡིན་ཀྱང་། ལེའུ་དྲུག་པར་དེ་ཉིད་ནང་སྟོང་པ་ཉིད་དུ་བསྡུས་ནས་གཞན་རྣམས་ཐེག་ཆེན་ཐུན་མིན་གྱི་རྟོགས་རིགས་སུ་བཤད་པས་གཟུགས་ལ་སོགས་པའི་ཆོས་གཞན་ཐམས་ཅད་བདག་མེད་སྟོང་པ་ཉིད་དུ་མི་རྟོགས་སོ་ཞེས་ཟེར་བའང་མི་འཐད་དོ། །ཇི་ལྟར་ན་འདུས་བྱས་ཀྱི་ཆོས་གཟུགས་ལ་སོགས་པ་ཕྲ་བའམ་རགས་པ། ངན་པའམ་གྱ་ནོམ་ལ་སོགས་པ་ཐམས་ཅད་སྤུངས་པའི་དོན་གྱི་ཕུང་པོ་ལྔར་འདུས་པར་མངོན་པའི་མདོ་དང་མཛོད་སོགས་ལས་གསལ་བར་བསྟན་པ་ལྟར་ཕུང་པོ་ལྔ་པོ་སྟོང་པ་ཉིད་དུ་རྟོགས་པར་གྱུར་ན་དེ་ལས་གཞན་ནམ་མཁའ་ལ་སོགས་པ་འདུས་མ་བྱས་པ་ཙམ་ཞིག་མ་གཏོགས་པའི་ཆོས་སྟོང་པ་ཉིད་དུ་མ་རྟོགས་པའི་དངོས་པོ་གཞན་ཅི་ཞིག་ཡོད་དེ་ཅི་ཡང་མེད་ལ། འཇུག་པ་རྩ་འགྲེལ་སོགས་ཀྱི་དགོངས་པའང་མིན་ཏེ། སྟོང་ཉིད་བཅུ་དྲུག་པོ་ཐེག་ཆེན་ཐུན་མོང་མིན་པར་དངོས་སུ་གསུང་པའི་ཕྱིར་དང་། རྒྱན་དང་ཡང་འགལ་ཏེ་ཉན་ཐོས་ཀྱི་རྟོགས་རིགས་བཤད་པའི་ཀུན་ཤེས་ཀྱི་མདོ་འཆད་པ་རྣམས་དང་དངོས་སུ་འགལ་བར་མ་ཟད། རང་རྒྱལ་གྱི་སྐབས་སུ་གཟུང་དོན་རྟོག་པ་སྤོང་ཕྱིར་དང་། འཛིན་པ་མི་སྤོང་ཕྱིར་དང་ནི། ཞེས་གསུངས་ན་རང་རྒྱུད་ཀྱིས་ཟིན་པའི་ཕུང་པོ་ལྔ་པོ་སྟོང་ཉིད་དུ་རྟོགས་ན་འཛིན་པ་སྤོང་པར་གྲུབ་པ་ལ་སོགས་པའི་ཕྱིར་རོ། །གཞན་ཡང་མཁའ་སོགས་འདུས་མ་བྱས་པ་ནི། ཇི་སྐད་དུ། ནམ་མཁའ་མོ་གཤམ་བུ་དང་མཚུངས། །ཞེས་པ་ལྟར་ཐ་སྙད་དུའང་མ་གྲུབ་ན་དོན་དམ་པར་ལྟ་ཅི། དེས་ན་རིགས་པར་སྨྲ་བས་བརྟགས་བྱར་ཡང་མི་མཛད་པས་ན་རྟོགས་པར་སླ་བ་དང་། ཉན་ཐོས་མདོ་སྡེ་བ་རང་གིས་ཀྱང་འདུས་མ་བྱས་རྣམས་བཏགས་པ་ཙམ་ལས་དངོས་པོ་མེད་པར་འདོད་པས་ཀྱང་གནོད་དོ། །གཉིས་པ་ལ་གཉིས། ཉན་རང་འཕགས་པའི་རྟོགས་རིགས་ཀྱི་ངོ་བོ་ལུང་རིགས་ཚད་མ་དང་མཐུན་པར་སྤྱིར་བཤད་པ། དེ་ཉིད་གཏན་ལ་འབེབ་པའི་འཕགས་པ་ཡབ་སྲས་ཀྱི་ལུང་དོན་བྱེ་བྲག་ཏུ་བཤད་པའོ། །དང་པོ་ལ་གཉིས། ཤིང་རྟའི་ལམ་སྲོལ་བཞིན་དུ་རྟོགས་པ་རང་གི་མཚན་ཉིད་ངོས་བཟུང་བ། དེ་ཉིད་ཚད་མར་སྒྲུབ་ཕྱིར་ལུང་དང་རིགས་པས་འཐད་ཚུལ་གསལ་བར་བསྟན་པའོ། །དང་པོ་ལ་གསུམ། འཕགས་ཡུལ་དཔལ་ལྡན་ཟླ་བས་ཇི་ལྟར་བསྟན་ཚུལ། བོད་འདིར་ཀུན་མཁྱེན་ཆོས་རྗེས་དེ་ལྟར་བཞེད་ཚུལ། དེ་ཉིད་ཤིང་རྟ་མཆོག་གཉིས་ཀྱི་དགོངས་པར་རིགས་པས་སྒྲུབ་པའོ། །དང་པོ། དེས་ན་རང་ལུགས་སོགས་ཚིགས་བཅད་གསུམ་དང་རྐང་པ་གཅིག་གིས་བསྟན་ཏེ། དེས་ན་སྔ་འགྱུར་རང་ལུགས་འཁྲུལ་བ་དང་བྲལ་བ་གང་ཉིད་ཡིན་ཞེ་ན། དཔལ་ལྡན་ཟླ་བའི་ཞབས་ཀྱིས་འཇུག་པ་ལེའུ་དང་པོ་རྩ་འགྲེལ་དང་དྲུག་པའི་གང་ཟག་བདག་མེད་ཀྱི་སྐབས་སུ་ཉན་རང་གིས་ཀྱང་ཞི་སྒོ་གཉིས་སུ་མེད་པའི་སྟོང་པ་ཉིད་ཇི་བཞིན་དུ་རྟོགས་དགོས་པར་ལུང་དང་རིགས་པས་རྒྱ་ཆེར་བསྒྲུབས་ནས་སླར་སྟོང་ཉིད་དེའི་རབ་ཏུ་དབྱེ་བ། བདག་མེད་འདི་ནི་འགྲོ་བ་རྣམས་དགྲོལ་ཕྱིར་ཞེས་པའི་ཐད་ཀྱི་རང་འགྲེལ་ལས། ཉན་རང་དང་བྱང་སེམས་ཀྱིས་རྟོགས་པའི་སྟོང་ཉིད་ཀྱི་རབ་དབྱེ་འདི་ལྟར་བསྟན་ཏེ་ཉོན་མོངས་པའི་སྒྲིབ་པ་སྤང་བའི་ཕྱིར་ཉན་རང་རྣམས་ལ་རྒྱལ་བས་གང་ཟག་གི་བདག་མེད་པའི་སྟོང་ཉིད་བསྟན་པ་དང་། ཤེས་བྱའི་སྒྲིབ་པ་སྤང་བའི་ཕྱིར་རྒྱལ་སྲས་བྱང་ཆུབ་སེམས་དཔའ་རྣམས་ལ་ཆོས་ཐམས་ཅད་སྟོང་པའམ་བདག་མེད་པ་རྫོགས་པར་བསྟན་པར་མཛད་ལ་ཞེས་གསུངས་ཤིང་། འོ་ན་ཉན་རང་གཉིས་པོ་ལ་སྔར་སྟོང་པ་ཉིད་རྟོགས་པ་ཡོད་དོ་ཞེས་ལུང་དང་རིགས་པ་གང་སྨྲས་པ་དེ་རྣམས་ཇི་ལྟར་ཡིན་ཞེ་ན་ཞེས། རང་གཞུང་ལ་རང་གིས་དོགས་པ་བསླངས་ཏེ་བསལ་བ་ཉན་རང་དེ་དག་རང་འབྲས་དགྲ་བཅོམ་པ་དོན་དུ་གཉེར་བས་དེ་ཐོབ་པར་བྱེད་པ་ལ་གཙོ་བོར་ཀུན་ནས་ཉོན་མོངས་པའི་སྒྲིབ་པ་ཙམ་སྤངས་དགོས་པར་གྲུབ་པའི་ཕྱིར་དེའི་རྩ་བ་ངར་འཛིན་ལྷན་སྐྱེས་ཀྱི་ཞེན་ཡུལ་གང་ཟག་གིབདག་དེ་མེད་པའི་སྟོང་པ་ཉིད་རྟོགས་ནས་སྒོམ་གྱི་གཞན་ཆ་མེད་གཉིས་སོགས་ཆོས་ཀྱི་བདག་མེད་པའི་སྟོང་པ་ཉིད་རྫོགས་པར་ནི་རྟོགས་ཤིང་སྒོམ་པ་མེད་ཅེས་གསལ་བར་བསྟན་ཅིང་སྟོང་ཉིད་ཉི་ཤུ་པོ་ཐམས་ཅད་ཐེག་ཆེན་ཐུན་མོང་མིན་པར་བཤད་པས་རང་བཞེད་རང་གིས་ལེགས་པར་བཀྲལ་ཏེ་གསུངས་པ་བཞིན་དུ་ཤེས་པར་བྱ་བ་ཁོ་ན་ཡིན་གྱི་གཞན་དུ་རྟོགས་པར་མི་བྱའོ། །གཉིས་པ་ཀློང་ཆེན་རབ་འབྱམས་སོགས་ཚིགས་བཅད་གསུམ་དང་རྐང་པ་གཉིས་ཀྱིས་བསྟན་ཏེ། དཔལ་ལྡན་ཟླ་བས་ཇི་ལྟར་གསུངས་པ་དེ་བཞིན་དུ་རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཀྱི་ཞལ་སྔ་ནས་འདི་ལྟར་སྔོན་གྱི་སློབ་དཔོན་མཁས་པ་ཐམས་ཅད་ནི། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་དང་མེད་ཅེས་ཕན་ཚུན་རྩོད་པར་མཛད་ན་ཡང་ཁོ་བོ་རང་གིས་བཞེད་པ་ནི་སྔོན་སྟོན་པ་ཞལ་བཞུགས་དུས་ཀྱི་ཉན་ཐོས་རྣམས་ལའང་བདག་ཡོད་མེད་སྨྲ་བ་གཉིས་བྱུང་བ་སོགས་དང་ཕྱིས་སུ་ཡང་བྱེ་མདོ་སོགས་གྲུབ་མཐའ་འཛིན་པ་སྡེ་བདུན་དང་མདོ་སྡེའི་རྗེས་སུ་འབྲང་བ་མང་ཞིག་བྱུང་བ་དང་རང་རྒྱལ་ལའང་བསེ་རུ་དང་ཚོགས་ན་སྤྱོད་པ་ལ་སོགས་དབང་པོ་རྣོ་རྟུལ་ཅི་རིགས་པར་ཡོད་པ་ལུང་ལས་གསལ་བར་སྣང་ནའང་དོན་ལ་དེ་དག་གིས་རང་འབྲས་དགྲ་བཅོམ་པ་ཉིད་ཐོབ་པ་ལ་ནི་ཕུང་པོར་བརྟེན་ནས་བཏགས་པའི་ངའོ་སྙམ་དུ་འཛིན་པའི་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་དེ་རང་བཞིན་གྱིས་གྲུབ་པ་མེད་པའི་སྟོང་ཉིད་ཡིན་པར་མ་རྟོགས་པ་དེ་སྲིད་དུ་རང་འབྲས་ཐར་བ་དེ་ཉིད་ཐོབ་པ་མིན་པས་བརྟེན་ནས་བཏགས་པའི་རྟེན་འབྱུང་ངར་འཛིན་ལྷན་སྐྱེས་ཀྱི་བདག་རང་བཞིན་མེད་པའི་སྟོང་པ་ཉིད་དེ་ཙམ་ཞིག་ཇི་བཞིན་དུ་རྟོགས་པ་ཡོད་པས་དགྲ་བཅོམ་ཐོབ་པར་གྱུར་པ་ཡིན་ན་ཡང་ཆ་མེད་གཉིས་སོགས་ཆོས་ཐམས་ཅད་བདག་མེད་པའི་སྟོང་པ་ཉིད་རྫོགས་པར་རྟོགས་པ་མེད་དེ། དཔེར་ན་ཆུང་ངུ་ཡུང་འབྲུ་སྲིན་གྱིས་ཟོས་ཤིང་ཕུག་པ་ཡི་ནང་གི་ནམ་མཁའ་བཞིན་དུ་ཉན་རང་གི་བདག་མེད་རྟོགས་པའི་སྟོང་ཉིད་ཆུང་ངུར་མདོ་ལས་གསུངས་པ་སྟེ་དེ་ཡི་ཕྱིར་ན་སྟོང་ཉིད་རྟོགས་པ་ཡོད་ཀྱང་ཆུང་ངུར་གྱུར་པ་ལ་དགོངས་ནས་དམན་པ་ལ་དགག་པའི་སྒྲས་ཆོས་ཀྱི་བདག་མེད་སྟོང་པ་ཉིད་མ་རྟོགས་ཞེས་བཞེད་པ་ཡིན་པར་ཡིད་བཞིན་རིན་པོ་ཆེའི་མཛོད་ཀྱི་འགྲེལ་པ་པདྨ་དཀར་པོར་གསུངས་པ་ཡིན་ནོ། །གསུམ་པ། འདི་ནི་ཕུལ་བྱུང་སོགས་ཚིགས་བཅད་གསུམ་གྱིས་བསྟན་ཏེ། འདི་འདྲའི་ལུང་རིགས་ཚད་མས་གྲུབ་པའི་བཞེད་པ་ནི་སྔོན་ཆད་སུ་ཡང་མ་བྱུང་བས་ཕུལ་དུ་བྱུང་བའི་ལེགས་པར་བཤད་པ་ཉིད་དེ་འདི་དང་མཚུངས་པའི་ངེས་པ་དོན་གྱི་བཀའ་དང་ཤིང་རྟའི་དགོངས་པ་གསལ་བར་བྱེད་པ་གཅིག་ཀྱང་རང་གཞན་སུ་ལའང་མ་མཆིས་ཏེ། དཔེར་ན་རྒྱ་མཚོ་ཆེན་པོའི་ཆུ་ལས་ཧུབ་གང་ཙམ་ཞིག་བཏུང་ན་ཡང་དེ་ཙམ་གྱི་རྒྱ་མཚོ་ཆེན་པོའི་ཆུ་ནི་མ་བཏུང་ངོ་ཞེས་སུ་ཁས་ལེན་དུ་མི་རུང་བ་ལྟར་ཆོས་ཀྱི་བྱེ་བྲག་ངར་འཛིན་ལྷན་སྐྱེས་ཀྱི་ཞེན་ཡུལ་ང་ཙམ་པོ་དེ་ཉིད་སྟོང་པའམ་བདག་མེད་པར་མཐོང་བའི་ཕྱིར་ན་སྟོང་པ་ཉིད་མཐོང་བར་འདོད་དགོས་པས་རིན་ཆེན་ཕྲེང་བ་ལས། ཇི་ལྟར་མིག་ནི་འཁྲུལ་བ་ཡིས། །འགལ་མེའི་འཁོར་ལོ་འཛིན་བྱེད་པ། །ཞེས་སོགས་ནས། རྒྱུ་མེད་པ་ཡི་མེ་བཞིན་དུ། །གནས་མེད་ལེན་མེད་མྱ་ངན་འདས། །ཞེས་པའི་བར་ཚིགས་བཅད་དགུ་དང་། བསྟོད་པར་ཡང་། མི་རྟག་སྡུག་བསྔལ་སྟོང་པ་ཞེས། །བྱ་བ་གསུམ་པོས་སེམས་སྦྱོང་བྱེད། །མཆོག་ཏུ་སེམས་ནི་སྦྱོང་བྱེད་པའི། །ཆོས་ནི་རང་བཞིན་མེད་པ་ཡིན། །ཞེས་སོགས་རྒྱ་ཆེར་སྒྲུབ་པ་དང་། རྣམ་འགྲེལ་ལས་ཀྱང་། སྟོང་ཉིད་ལྟ་བས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན་ཞེས་སོགས་གསུངས་པ་བཞིན་ནོ། །འོན་ཀྱང་རྒྱ་མཚོའི་ཆུ་ལ་ཧུབ་གཅིག་བཏུང་བས་རྒྱ་མཚོ་ཆེན་པོའི་ཆུ་ཡོངས་སུ་རྫོགས་པར་ཁོང་དུ་མ་སོང་བ་ལྟར་དུ་མཐའ་དག་ཤེས་བྱའི་རང་བཞིན་མ་ལུས་པ་ཀུན་སྟོང་པར་རྟོགས་པ་མེད་པའི་ཕྱིར་ན་ཆོས་ཀྱི་བདག་མེད་དམ་སྟོང་པ་ཉིད་རྫོགས་པར་མ་མཐོང་བར་འདོད་དགོས་པས། རྒྱན་ལས། ཆེར་འོས་སེམས་བསྐྱེད་སྤང་བའི་སྐྱེ་བོ་དག །གཞན་དོན་སེམས་དང་དེ་ཡི་ཐབས་རྙེད་དང་། །དགོངས་ཆེན་དོན་དང་དེ་ཉིད་མཆོག་མཐོང་བས། །བདེ་བ་དེ་སྤངས་ཞི་བར་འགྲོ་བར་འགྱུར། །ཞེས་སོགས་རྣམ་གྲངས་དུ་མས་སྒྲུབ་པ་དང་སློབ་དཔོན་གྱིས། ཁྱོད་ཀྱིས་ཐེག་པ་ཆེན་པོ་ལས། རང་གི་ཆོས་ལ་བདག་མེད་རྟོགས། །དེ་བཞིན་བློ་དང་ལྡན་རྣམས་ལ། །ཐུགས་རྗེའི་དབང་གིས་སྟོན་པར་མཛད། །ཅེས་སོགས་གསུངས་པ་བཞིན་ནོ། །གཉིས་པ་ལ་གཉིས། གནས་སྐབས་རྫོགས་པར་མ་རྟོགས་པའི་འཐད་སྒྲུབས་གྲུབ་མཐའི་ངེས་འབྱེད་དང་བཅས་པ། མཐར་ཐུག་རྫོགས་པར་རྟོགས་པའི་ལུང་དོན་རིགས་པས་སྒྲུབ་ཚུལ་དང་བཅས་པའོ། །དང་པོ། གལ་ཏེ་ཆོས་གཅིག་སོགས་ཚིགས་བཅད་བརྒྱད་དང་རྐང་པ་གསུམ་གྱིས་བསྟན་ཏེ། དཔེར་ན་འདམ་བུ་གཅིག་ཁོང་སྟོང་དུ་མཐོང་ན་འདམ་བུ་ཐམས་ཅད་ཁོང་སྟོང་དུ་མཐོང་བ་ལྟར་འདིར་ཡང་གལ་ཏེ་ཆོས་གཅིག་ཅེས་གང་ཟག་གི་བདག་སྟོང་པ་ཉིད་དུ་མཐོང་ཞིང་རྟོགས་ན། ཆོས་གཞན་ཐམས་ཅད་ཀྱང་སྟོང་པ་ཉིད་དུ་མཐོ་ཞིང་རྟོགས་རིགས་ན་ཡང་ཆོས་གཞན་ཐམས་ཅད་སྟོང་པ་ཉིད་དུ་མི་མཐོང་བ་ལ་རིགས་པས་འཐད་པ་ཅི་ཞིག་ཡོད་ཞེ་ན། འཐད་པ་ཤིན་ཏུ་ཡོད་དེ། ཉན་རང་དེ་གས་ཏེ་དེ་དག་རྣམས་ཀྱིས་གཟུགས་ལ་སོགས་པའི་ཆོས་ཐམས་ཅད་རང་བཞིན་མེད་པར་སྟོན་པ་ངེས་པའི་ལུང་དང་དེ་ལྟར་དཔྱོད་པའི་ཡང་དག་པའི་རིགས་པ་དང་ཟབ་མོའི་མན་ངག་དག་གིས་ཚུལ་བཞིན་ཏུ་བརྟགས་ཤིང་མཐོང་བ་དོན་དུ་གཉེར་ན་ཆོས་གཅིག་སྟོང་པར་མཐོང་བ་དེ་ལྟར་ཆོས་གཞན་ཐམས་ཅད་ཀྱང་སྟོང་པ་ཉིད་དུ་མཐོང་བར་འགྱུར་མོད་ཀྱི། འོན་ཀྱང་རེ་ཞིག་དམན་པ་ཉན་ཐོས་ཀྱི་རིགས་ཅན་རྣམས་ནི་རང་ཉིད་འཁོར་བར་སྒྲགས་ནས་ཞི་བདེའི་ཐར་བ་ཙམ་ཞིག་ཐོབ་པར་འདོད་ནས་གང་ཟག་གི་བདག་མེད་ཙམ་ཁོ་ན་རྟོགས་ཤིང་ཉོན་མོངས་སྤངས་པའི་ལམ་ལ་ཞེན་པས་སྒོམ་པ་དང་རང་རྒྱལ་གྱི་རིགས་ཅན་རྣམས་ཀྱང་རང་དོན་དུ་ཞི་བདེའི་འབྲས་བུ་ཐོབ་པར་འདོད་པས་སྟོན་པ་སངས་རྒྱས་དང་ཉན་ཐོས་རྣམས་ལས་གང་ཟག་གི་བདག་མེད་དང་རྟེན་ཅིང་འབྲེལ་འབྱུང་ལུགས་འབྱུང་ལྡོག་གི་ལམ་སོགས་སྟོན་པས་ཐེག་དམན་གྱི་སྡེ་སྣོད་ཙམ་ལ་བསྐལ་པ་བརྒྱ་ཡི་བར་སོགས་སུ་ཚོགས་ལམ་དུ་གོམས་པས་མཐར་རང་འབྲས་བྱང་ཆུབ་ཐོབ་པ་ཡིན་པས་མཐའ་གཞན་ཆོས་ཐམས་ཅད་སྟོང་པ་ཉིད་དུ་རྟོགས་པ་དོན་དུ་མི་གཉེར་བས་ཤིན་ཏུ་རྟོགས་པར་དཀའ་སྟེ་དཔེར་ན་བུམ་པ་བཏགས་པར་ཏེ་བཏགས་ཡོད་དུ་འདོད་པ་ཉན་ཐོས་པ་རྣམས་ཀྱིས་ཀྱང་རྡུལ་ཕྲན་ཏེ་ཕྲ་རྡུལ་བཏགས་ཡོད་དུ་མི་འདོད་པར་རྫས་སུ་ཡོད་པར་འདོད་པ་བཞིན་ཡིན་ནོ། །གལ་ཏེ་ཉན་ཐོས་རྣམས་ཀྱིས་ཀྱང་བུམ་པ་བཏགས་པར་ནི་ཞེས་བཏགས་ཡོད་ཙམ་དུ་རྟོགས་པའི་བློ་རིགས་དེས་ཕྲ་རྡུལ་ལ་ཡང་ལེགས་པར་དཔྱད་ན་བཏགས་ཡོད་ཙམ་དུ་རྟོགས་པར་རིགས་པ་ཡིན་མོད་ཀྱི་དེ་ལྟ་ནའང་རེ་ཞིག་ཕྲ་རྡུལ་བཏགས་ཡོད་དུ་མ་རྟོགས་པར་རྫས་ཡོད་ཀྱིས་སྟོང་པར་མཐོང་མི་དགོས་པ་དེ་བཞིན་དུ་ཆོས་གཅིག་སྟོང་པར་མཐོང་ཡང་ཆོས་ཐམས་ཅད་སྟོང་པར་མཐོང་དགོས་པ་མིན་ནོ། །དེར་མ་ཟད་རགས་པའི་གཞི་ཆ་བཅས་བཏགས་ཡོད་དང་ཆ་མེད་ཀྱི་ཕྲ་རྡུལ་རྫས་ཡོད་བདེན་གྲུབ་དག་དོན་ལ་དངོས་སུ་འགལ་བར་སྣང་བ་ཡིན་ན་ཡང་འགལ་འདུའི་དངོས་པོ་ཡིན་པར་མ་རྟོགས་ནས་ཉན་རང་དེ་དག་ལ་རེ་ཞིག་ཏུ་ཕྲ་རྡུལ་རང་བཞིན་མེད་པར་སྟོན་པའི་ངེས་པའི་ལུང་དང་མན་ངག་ཟབ་མོ་དག་གིས་དབེན་ཅིང་མེད་པའི་ཕྱིར་ན་མི་འགལ་བའི་གྲུབ་མཐའ་བཟུང་ནས་རང་གི་རིགས་པས་ཀྱང་སྣང་གཞི་མེད་ན་སྣང་བ་རྣམས་ཀྱང་སྣལ་མ་མེད་པའི་སྣམ་བུ་བཞིན་དུ་འགྱུར་བ་སོགས་ཀྱིས་སྒྲུབ་པ་ལ་འབད་པར་བྱེད་དོ། །དེ་བཞིན་དུ་དེ་ལྟར་མ་ཡིན་པར་ཆོས་གཅིག་སྟོང་པར་མཐོང་བས་ཆོས་ཀུན་སྟོང་པ་ཉིད་དུ་རྟོགས་པར་འགྱུར་ན་ཐེག་ཆེན་སེམས་ཙམ་པ་དག་གིས་ཀྱང་གཟུང་བ་དང་འཛིན་པའི་སྣང་བ་ཀུན་བརྟགས་རྣམས་རང་བཞིན་མེད་པའི་སྟོང་པ་ཉིད་དུ་རྟོགས་པ་ཡིན་ན་བློ་དེས་འཛིན་པའི་ངོ་བོ་ཤེས་པ་རང་རིག་རང་གསལ་ཡང་རང་བཞིན་མེད་པའི་སྟོང་པ་ཉིད་དུ་ཅི་ཡི་ཕྱིར་མི་རྟོགས་ཏེ་རྟོགས་དགོས་པ་དང་། དབུ་མ་རང་རྒྱུད་པས་ཀྱང་དོན་དམ་པར་ཆོས་ཐམས་ཅད་བདེན་གྲུབ་མེད་པའི་སྟོང་པ་ཉིད་དུ་རྟོགས་པའི་རིགས་པ་དེས་ཐ་སྙད་དུ་ཡང་རང་མཚན་གྱིས་གྲུབ་པ་མེད་པས་སྟོང་པ་ཉིད་ཡིན་པར་ཅིས་མི་རྟོགས་ཏེ་རྟོགས་པར་འགྱུར་ལ། དེ་ལྟར་འགྱུར་བ་དེས་ན་གྲུབ་མཐའ་སྨྲ་བ་དེ་དག་ཐམས་ཅད་དབུ་མ་ཐལ་འགྱུར་བ་འབའ་ཞིག་གམ་ཁོ་ན་ཉིད་དུ་ཁྱོད་ལ་ཐལ་བར་འགྱུར་རོ། །དེ་ལྟར་གྱུར་ན་ཉན་རང་རྣམས་ཀྱིས་ཐེག་པ་ཆེན་པོ་ཡུམ་རྒྱས་འབྲིང་སོགས་ལ་སངས་རྒྱས་ཀྱི་བཀའ་མ་ཡིན་པས་ལ་སོགས་པ་སྐུར་བ་འདེབས་ཤིང་སྨོད་པའང་ག་ལ་སྲིད་དེ་དགོངས་དོན་ཚུལ་བཞིན་དུ་ལོངས་པའི་ཕྱིར། དེ་འདྲ་མེད་བཞིན་དུ་རྒྱན་དང་སྤྱོད་འཇུག་སོགས་ལས་ཐེག་ཆེན་བཀའ་སྒྲུབ་བསྟན་པ་རྣམས་ཀྱང་སྐྱོན་མེད་ལ་སྐྱོན་འགལ་དུ་ཟད་པས་མི་འཐད་པར་འགྱུར་རོ། །རྒྱུ་མཚན་དེས་ན་ཆོས་གཅིག་གི་རང་བཞིན་ཆོས་ཀྱི་དབྱིངས་ཉིད་ཆོས་ཀུན་ལ་མཉམ་པ་ཉིད་ཡིན་པས་རྣམ་དབྱེར་མེད་ན་ཡང་ཕྱི་དང་ནང་གི་ཡོངས་འཛིན་ལ་སོགས་པའི་རྐྱེན་གྱི་ཚོགས་པ་ཇི་ལྟ་བ་བཞིན་དུ་མ་ཚང་བ་དེ་སྲིད་དུ་ཆོས་ཐམས་ཅད་སྤྲོས་པ་དང་བྲལ་བའི་ཆོས་ཀྱི་དབྱིངས་མཉམ་པ་ཆེན་པོར་རྟོགས་པའི་ཡེ་ཤེས་ཚུལ་བཞིན་དུ་སྐྱེ་བར་འགྱུར་བ་ཤིན་ཏུ་བུལ་བ་ཡིན་པས་རེ་ཞིག་རྟོག་པར་མི་འགྱུར་ཏེ། སྤྱིར་ན་དབང་པོའི་ཁྱད་པར་ལས་དབང་པོ་ཤིན་ཏུ་རྣོན་པོས་རང་སྟོབས་ཀྱིས་སྤྲོས་པ་དང་བྲལ་བའི་སྟོང་པ་ཉིད་རྟོགས་པ་ཡོད་མོད་ཀྱི། དབང་པོ་རྟུལ་པོ་ཡིས་ཀྱང་དེ་ལྟར་གཞན་ལ་མི་ལྟོས་པར་རང་གི་བློ་སྟོབས་ཁོ་ནས་དེ་མ་ཐག་ཏུ་སྤྲོས་པ་དང་བྲལ་བའི་སྟོང་པ་ཉིད་ཡང་དག་པར་ངེས་པར་རྟོགས་པར་འགྱུར་བའི་ཁྱབ་པ་མེད་པས་ཚུལ་འདི་ནི་ཤིན་ཏུ་འཐད་པ་དང་བཅས་པ་ཁོ་ན་ཡིན་ནོ། །གཉིས་པ་ནམ་ཞིག་ཅེས་ཀྱང་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། འོན་ཀྱང་ཉན་རང་དེ་རྣམས་ཀྱིས་ནམ་ཞིག་ན་ཆོས་ཐམས་ཅད་སྤྲོས་པ་དང་བྲལ་བའི་སྣང་སྟོང་མཉམ་ཉིད་ཆེན་པོ་ཅིས་ཀྱང་ཡོངས་སུ་རྫོགས་པ་རྟོགས་པར་འགྱུར་བ་ནི་ངེས་པ་ཡིན་ཏེ། ཉན་རང་དགྲ་བཅོམ་པ་རྣམས་ཕུང་པོ་ལྷག་མ་མེད་པ་འགོག་པའི་དབྱིངས་སུ་ཞུགས་ནས་བསྐལ་པ་སྟོང་ཕྲག་བཅུ་ཡི་བར་དུ་གནས་ལ་དེ་ཡི་མཐར་དེ་བཞིན་གཤེགས་པ་རྣམས་ཀྱིས། འདི་ལྟར་མྱ་ངན་འདས་པར་གང་བསྟན་པ་འཁོར་བའི་སྡུག་བསྔལ་དག་ལས་ཁྱེད་ཐར་ཡང་། ཁྱོད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་མཆོག་འདི་བཙལ་བར་གྱིས། །ཞེས་པ་ལ་སོགས་པས་བསྐུལ་ཏེ་འགོག་པའི་དབྱིངས་དེ་ལས་སླར་དགྲ་བཅོམ་པ་རྣམས་ལྡང་སྟེ་གཟོད་ཐེག་པ་ཆེན་པོར་འཇུག་པ་ཡིན་པར་དམ་ཆོས་པདྨ་དཀར་པོ་ལས་གསུངས་ཤིང་དེ་ནས་ཐེག་ཆེན་ཚོགས་ལམ་ཆུང་ངུ་ནས་ཞུགས་ཏེ་མཐར་བླ་ན་མེད་པའི་བྱང་ཆུབ་ཆེན་པོ་བརྙེས་པར་འགྱུར་བས་དགྲ་བཅོམ་པ་མང་ཞིག་སངས་རྒྱས་སུ་ལུང་བསྟན་པ་བཞིན་ནོ། །འདི་ལྟར་རིགས་པས་ཀྱང་འཐད་དེ་དབང་རྣོན་བྱང་ཆུབ་སེམས་དཔའི་རིགས་ཅན་རྣམས་ཕྱི་ནང་གི་ཡོངས་འཛིན་ཚང་བས་ཚུལ་ཇི་ལྟ་བ་བཞིན་དུ་ཐེག་པ་ཆེན་པོ་ལ་ཡང་དག་པར་ཞུགས་པས་ཀྱང་སྟོང་ཉིད་སྤྲོས་བྲལ་ཆེན་པོ་བདག་མེད་མཐའ་དག་རྟོགས་པ་ལ་གྲངས་མེད་པའི་བསྐལ་བར་ཐབས་མཁས་དང་བཅས་པས་འབད་པ་ཆེན་པོས་གོམས་དགོས་པ་ཡིན་ན། ཉན་ཐོས་དང་རང་རྒྱལ་རང་དོན་ཞི་བདེ་ཁོ་ན་དོན་དུ་གཉེར་བས་བསྐལ་པ་སྟོང་ཕྲག་བཅུ་པོ་དེ་ཙམ་ལ་འགོག་པའི་དབྱིངས་སུ་ཞུགས་ཀྱང་དུས་ཀྱི་ཡུན་ཐུང་ངུ་དེ་ཙམ་ལ་བདག་མེད་མཐའ་དག་གམ་སྤྲོས་ཀུན་བྲལ་བའི་སྟོང་ཉིད་སྣང་སྟོང་མཉམ་ཉིད་ཆེན་པོ་རྫོགས་པར་མ་རྟོགས་ཤིང་། ད་གཟོད་རྟོགས་དགོས་པའི་གནས་སྐབས་ཞིག་མི་སྲིད་པར་ཅི་ལ་འགྱུར་ཏེ་ཤིན་ཏུ་སྲིད་པར་འགྱུར་རོ། །དེར་མ་ཟད་ཐེག་ཆེན་འཕགས་པ་ས་ཐོབ་རྣམས་ལའང་རྫོགས་སྨིན་སྦྱངས་པའི་སྟོབས་ཀྱིས་ས་ནས་སར་ཆོས་ཀྱི་དབྱིངས་སྒྲིབ་པ་ལས་གྲོལ་བའི་མཐོང་བ་ཇེ་བས་ཇེ་གསལ་དུ་གོང་ནས་གོང་དུ་རྫོགས་ཤིང་འཕེལ་བ་ཡོད་པ་མིན་ནམ་སྟེ་ཡོད་ན་ཉན་རང་དགྲ་བཅོམ་པ་ལ་ལྟ་ཅི་སྨོས་སོ། །དེ་ལྟར་རྟོགས་པ་དེའང་སྦྱིན་པ་དང་ཚུལ་ཁྲིམས་ལ་སོགས་བསོད་ནམས་ཀྱི་ཚོགས་མཐའ་ཡས་པ་བསགས་པའི་གྲོགས་དང་དབུ་མའི་གཏན་ཚིགས་ཆེན་པོ་ལྔ་ལ་སོགས་པ་རིགས་པའི་སྒོ་མཐའ་ཡས་པའི་སྒྲུབ་ཚུལ་ཟབ་མོ་རྣམས་དང་བྱང་ཆུབ་སེམས་དཔའ་རྣམས་ཀྱི་རྫོགས་སྨིན་སྦྱང་བ་སོགས་ཀྱི་སྤྱོད་པ་དང་ཡོངས་བསྔོའི་རྐྱེན་རྣམས་ཕུན་སུམ་ཚོགས་པ་མ་ཚང་བ་མེད་པར་ལེགས་པར་ཚང་ན་ངེས་པར་དུས་ཡུན་ཐུང་ངུས་ཀྱང་སྣང་སྟོང་དབྱེར་མེད་སྤྲོས་བྲལ་མཉམ་པ་ཆེན་པོ་ཡོངས་སུ་རྫོགས་པར་རྟོགས་པར་འགྱུར་ཏེ། དཔེར་ན་རྡོ་རྗེ་ཐེག་པའི་ཐབས་ལ་མཁས་པའི་རྐྱེན་ཕུན་སུམ་ཚོགས་པ་རྣམས་ཚང་བས་ཉེ་ལམ་ཟབ་མོ་སྔགས་ཀྱི་ཐེག་པ་ལ་ཞུགས་པ་རྣམས་ཀྱིས་གནས་ལུགས་ཟབ་མོ་བདེ་མྱུར་ཉིད་དུ་རྟོགས་པ་ཡོད་པ་བཞིན་ནོ། །གཉིས་པ་ལ་གཉིས། ཉན་རང་གི་སྟོང་ཉིད་རྟོགས་པར་གསུངས་པའི་ལུང་དོན་འཁྱོགས་འཁྲུལ་མེད་པར་རིགས་པས་གསལ་བར་བསྟན་པ། མཐར་ཐུག་ཐེག་གཅིག་ཏུ་གསུངས་པའི་ལུང་དོན་རང་ལ་འཐད་ཅིང་གཞན་ལ་མི་འཐད་པར་བསྟན་པའོ། །དང་པོ། རྟག་བདག་སྤངས་ཀྱང་སོགས་ཚིགས་བཅད་ལྔས་བསྟན་ཏེ། དེ་ཡང་མདོ་ལས། བདག་ཅེས་བྱ་བ་བདུད་ཀྱི་སེམས། །ཁྱོད་ནི་ལྟ་བར་གྱུར་པ་ཡིན། །འདུ་བྱེད་ཕུང་པོ་འདི་སྟོང་སྟེ། །འདི་ལ་སེམས་ཅན་ཡོད་མ་ཡིན། །ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་ལྟར་བརྗོད་པ་ལྟར། །དེ་བཞིན་ཕུང་པོ་རྣམ་བརྟེན་ནས། །ཀུན་རྫོབ་སེམས་ཅན་ཞེས་བྱའོ། །ཞེས་གསུངས་པ་ལྟར་བརྟེན་ནས་བཏགས་པ་ཙམ་གྱི་སྟོང་པ་ཉིད་ཁོང་དུ་མ་ཆུད་པར་ཕུང་པོ་ཉིད་ནི་ངེས་པར་ཡོད་ཀྱི་ཕུང་པོ་འདི་ལ་དབང་བྱེད་པའི་བདག་པོར་གྱུར་པའི་བདག་རྟག་གཅིག་རང་དབང་ཅན་ཕྱི་རོལ་པས་ཀུན་ཏུ་བཏགས་པའི་རྟག་བདག་དེ་འདྲ་མེད་པར་ཤེས་ནས་སྤངས་པར་གྱུར་ཀྱང་དེས་ངར་འཛིན་ཕྲ་བ་མི་སྤོང་སྟེ་འཁོར་རྩ་ལྷན་སྐྱེས་ཀྱི་བདག་འཛིན་ནམ་ངར་འཛིན་དེ་ཡིས། ཕུང་པོ་ལ་ཡུལ་དུས་ཀྱི་ཆ་མ་ཕྱེ་བར་རིལ་པོར་འཛིན་པ་ལ་བརྟེན་ནས་ངའོ་སྙམ་པའི་བློ་འཇུག་པའམ་སྐྱེ་བར་འགྱུར་བ་ཡིན་ལ། དེའི་ཕྱིར་སློབ་དཔོན་འཕགས་པས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཞེས་གསུངས་པའི་དོན་ནི་འདི་ལྟར་བདག་ངོ་བོས་གྲུབ་པ་མེད་པའི་སྟོང་ཉིད་མ་མཐོང་བར་དུ་རྟག་བདག་སྤང་ཀྱང་རུང་གདགས་གཞི་རང་རྒྱུད་ཀྱི་ཕུང་པོ་ཡོད་པར་གྱུར་ཅིང་། དེར་རིལ་པོར་འཛིན་ཅིང་ཞེན་པའི་སེམས་པ་ཡོད་པ་ཇི་སྲིད་དུ་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་ཏུ་གདགས་པའི་རྒྱུ་ཚོགས་ཚང་ཞིང་གེགས་བྱེད་པ་མེད་པས་འབྲས་བུ་ངར་འཛིན་ལྷན་སྐྱེས་སམ་བདག་འཛིན་ལྷན་སྐྱེས་དེ་ནི་མི་ལྡོག་པས་ཕུང་པོར་འཛིན་པ་སྤངས་དགོས་པར་གསུངས་པ་ཡིན་ཏེ། རིན་ཆེན་ཕྲེང་བ་ལས། དེ་ལྟར་མེ་ལོང་བརྟེན་ནས་སུ། །རང་བཞིན་གཟུགས་བརྙན་སྣང་མོད་ཀྱི། །དེ་ནི་ཡང་དག་ཉིད་དུ་ན། །ཅུང་ཟད་ཀྱང་ནི་ཡོད་མིན་པ། །དེ་བཞིན་ཕུང་པོ་རྣམས་བརྟེན་ནས། །ངར་འཛིན་པ་ནི་དམིགས་པར་འགྱུར། །རང་གི་བཞིན་གྱི་གཟུགས་བརྙན་བཞིན། །ཡང་དག་ཉིད་དུ་དེ་འགའ་འང་མེད། །ཞེས་གསུངས་པའི་ཕྱིར་རོ། །གང་གི་ཕྱིར་ན་རྟག་པའི་བདག་དེ་མེད་པར་ཤེས་ནས་སྤངས་པར་གྱུར་ཀྱང་ལྷན་སྐྱེས་ཀྱི་ངར་འཛིན་སྤང་མི་ནུས་པའི་རྒྱུ་མཚན་ནི་འདི་ལྟར་གདགས་གཞིར་ཏེ་གདགས་གཞི་ཕུང་པོ་ལ་ཡུལ་དུས་ཀྱི་ཆ་མ་ཕྱེ་བར་རིལ་པོར་འཛིན་པ་ལ་བརྟེན་ནས་བཏགས་པའི་ངའམ་བདག་ཙམ་པོ་དེ་ནི་ངར་འཛིན་ལྷན་སྐྱེས་ཀྱི་ཞེན་ཡུལ་ཡིན་པས། དེ་མ་བཀག་པའི་ཕྱིར་ན་ངར་འཛིན་སྐྱེ་བ་ལ་གེགས་སུ་གྱུར་པ་བརྟེན་ནས་བཏགས་པའི་བདག་མེད་དམ་སྟོང་ཉིད་རྟོགས་པ་མེད་པས་ཡིན་པར་རིགས་པ་ཡང་དག་པས་ཀྱང་གྲུབ་པ་ཉིད་དོ། །དེས་ན་རིན་ཆེན་ཕྲེང་བ་ལས། ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་འགལ་མེ་ཡི། །དཀྱིལ་འཁོར་ལྟ་བུ་ཕན་ཚུན་དུ། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་བཞིན་གཉིས་ཀ་དང་། །དུས་གསུམ་ཉིད་དུའང་མ་མཐོང་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང་། །ཞེས་སོ། །དེ་ཡི་ཕྱིར་ན་ཐར་པ་ཙམ་ལ་སྒྲིབ་པའི་ཉོན་མོངས་པ་ས་བོན་དང་བཅས་པ་སྤོང་བར་བྱེད་པ་ལ་ཕུང་པོ་ལ་སོགས་པའི་ཆོས་ཐམས་ཅད་སྟོང་པ་ཉིད་ཡིན་པར་ཇི་ལྟ་བ་བཞིན་དུ་ངེས་པར་རྟོགས་དགོས་པ་ཡིན་ནོ། །ཞེས་འཆད་པ་དེ་དག་གིས་ནི་སློབ་དཔོན་གྱི་ལུང་འདིའི་དོན་ཇི་ལྟ་བ་བཞིན་དུ་བཀྲལ་བ་མིན་ཏེ། ལུང་དེ་ཡི་དོན་ཇི་སྐད་བཤད་པ་འདི་བཞིན་དུ་དཔལ་ལྡན་ཟླ་བས་གསལ་ཞིང་ལེགས་པར་བཀྲལ་བ་ཡིན་ཏེ། འཇུག་པ་ལས། གང་ཕྱིར་ཐུབ་པས་བདག་དེ་ས་ཆུ་མེ། །རླུང་དང་རྣམ་ཤེས་ནམ་མཁའ་ཞེས་བྱ་བ། །ཁམས་དྲུག་དང་ནི་མིག་སོགས་རེག་པ་ཡི། །རྟེན་དྲུག་དག་ལ་བརྟེན་ནས་ཉེར་བསྟན་ཞིང་། །སེམས་དང་སེམས་བྱུང་ཆོས་རྣམས་ཉེར་བཟུང་ནས། །དེས་གསུངས་དེ་ཕྱིར་དེ་ནི་དེ་རྣམས་དང་། །དེ་ཉིད་མ་ཡིན་ཚོགས་ཙམ་ཉིད་མིན་ཏེ། །དེ་ཕྱིར་ངར་འཛིན་བློས་དེ་རྣམས་ལ་མིན། །བདག་མེད་རྟོགས་ཚེ་རྟག་པའི་བདག་སྤོང་ཞིང་། །འདི་ནི་ངར་འཛིན་རྟེན་དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །རང་ཁྱིམ་རྩིག་ཕུག་སྦྲུལ་གནས་མཐོང་བཞིན་དུ། །འདི་ན་གླང་ཆེན་མེད་ཅེས་དོགས་བསལ་ཏེ། །སྦྲུལ་གྱི་འཇིགས་པའང་སྤོང་བར་བྱེད་པ་ནི། །ཀྱེ་མ་གཞན་གྱི་གནམ་པོར་གྱུར་ཉིད་དོ་ཞེས་སོ། །དེས་ན་ཉོན་མོངས་པའི་སྐྱོན་གྱི་རྩ་བ་འཁོར་རྩའི་བདག་གམ་ངར་འཛིན་ལྷན་སྐྱེས་དེ་སྤོང་དགོས་པར་ཡང་། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ཅིང་། །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་བ་ཡིས་བདག་ནི་འགོག་པར་བྱེད། །ཞེས་གསུངས་སོ། །རྒྱུ་མཚན་དེ་ལྟ་བུས་ན་ཕུང་པོ་ལ་བརྟེན་ནས་བཏགས་པའི་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་ང་ཙམ་མམ་བདག་དེ་དངོས་པོར་གྲུབ་པ་མེད་པའམ་སྟོང་པ་ཉིད་དུ་ཤེས་ཤིང་ཚུལ་བཞིན་དུ་སྒོམ་པར་བྱས་པས་གསལ་བར་རབ་གྱི་མཐར་ཐུག་ནས་བདག་མེད་པའི་གནས་ལུགས་མངོན་སུམ་དུ་མཐོང་བར་གྱུར་ན། ང་ཡིར་འཛིན་པ་དང་ཉོན་མོངས་པའི་སྐྱོན་རྣམས་ཀྱི་འབྱུང་གནས་སུ་གྱུར་པའི་འཁོར་བའི་རྩ་བ་ལྷན་སྐྱེས་ཀྱི་ངར་འཛིན་ཆ་དང་བཅས་པ་ཐམས་ཅད་བདག་མེད་རྟོགས་པའི་ཡེ་ཤེས་རྡོ་རྗེས་བཅོམ་ཤིང་གཏན་དུ་ལྡོག་སྟེ་ཉོན་མོངས་པ་ས་བོན་དང་བཅས་པ་རིམ་བཞིན་སྤངས་ནས་རྒྱུན་ཞུགས་ནས་དགྲ་བཅོམ་པའི་བར་ཐོབ་པར་འགྱུར་བས། རྡོ་རྗེ་གཅོད་པ་ལས་ཀྱང་། རབ་འབྱོར་འདི་ཅི་སྙམ་དུ་སེམས། རྒྱུན་དུ་ཞུགས་པ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་སམ། རབ་འབྱོར་གྱིས་གསོལ་བ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ནི་གང་ལའང་ཞུགས་པ་མ་མཆིས་པའི་སླད་དུ་སྟེ་དེས་ན་རྒྱུན་དུ་ཞུགས་པ་ཞེས་བགྱིའོ། །ཞེས་དང་། བཅོམ་ལྡན་འདས་གལ་ཏེ་རྒྱུན་དུ་ཞུགས་པ་དེ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་པར་གྱུར་ན་དེ་ཉིད་དེ་ཡི་བདག་ཏུ་འཛིན་པར་འགྱུར་བ་ལགས་སོ། །སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་ལགས་སོ། །ཞེས་པ་ནས་འབྲས་གནས་ཕྱི་མ་གསུམ་ལའང་དེ་བཞིན་དུ་གསུངས་སོ། །དེ་བཞིན་དུ་རང་རྒྱལ་རྣམས་ཀྱང་སྲིད་པ་ཐམ་པའི་སྐབས་སུ་དུར་ཁྲོད་ཀྱི་རུས་གོང་ལ་སོགས་པའི་རྐྱེན་ལས་རྟེན་འབྲེལ་ཡན་ལག་བཅུ་གཉིས་ཀྱི་དགོངས་དོན་ཚུལ་བཞིན་དུ་རྟོགས་ནས་ལམ་བཞི་སྟན་ཐོག་གཅིག་ཏུ་མངོན་པར་བྱས་ཏེ་རྟེན་འབྲེལ་གྱི་རྟོགས་པ་གསལ་ཞིང་ཟབ་པས་གཟུངས་དོན་རྟོག་པ་སྤོང་བར་ཡང་གྲུབ་བོ། །དེས་ན་ཉན་རང་དེ་དག་གིས་རང་འབྲས་ཐོབ་པ་ལ་རྟོགས་རིགས་དེ་ཁོ་ནས་ཆོག་པས། དཔལ་ལྡན་ཀླུས། སྐྱེས་པ་ཤེས་པས་འཇིག་པ་ཤེས། །འཇིག་པ་ཤེས་པས་མི་རྟག་ཤེས། །མི་རྟག་ཉིད་ལ་འཇུག་ཤེས་པས། །དམ་པའི་ཆོས་ཀྱང་རྟོགས་པར་འགྱུར། །གང་དག་རྟེན་ཅིང་འབྲེལ་འབྱུང་བ། །སྐྱེ་དང་འཇིག་པ་རྣམ་སྤང་བར། །ཤེས་པར་གྱུར་པ་དེ་དག་ནི། །ལྟར་གྱུར་སྲིད་པའི་རྒྱ་མཚོ་བརྒལ། །ཞེས་དང་། འཇུག་པར་ཡང་། གང་ལ་རྟག་ཏུ་འགྲོ་རྣམས་ངར་འཛིན་བློ། །རབ་ཏུ་འབྱུང་ཞིང་དེ་ཡི་གང་ཡིན་དེར། །ང་ཡིར་འཛིན་བློ་འབྱུང་བའི་བདག་དེ་ནི། །མ་བརྟགས་གྲག་པར་གཏི་མུག་ལས་ཡིན་ནོ། །གང་ཕྱིར་བྱེད་པོ་མེད་ཅན་ལས་མེད་པ། །དེ་ཕྱིར་བདག་གི་བདག་མེད་པར་ཡོད་མིན། །དེ་ཕྱིར་བདག་དང་བདག་གིས་སྟོང་ལྟ་ཞིང་། །རྣལ་འབྱོར་པ་དེ་རྣམ་པར་གྲོལ་བར་འགྱུར། །ཞེས་སོ། །དེ་ལས་གཞན་ཐེག་ཆེན་ནས་བཤད་པའི་ཆོས་ཀྱི་བདག་མེད་རྫོགས་པར་རྟོགས་པ་འཕགས་པ་ཡབ་སྲས་ཀྱི་དགོངས་པར་འཆད་པ་ནི་ཤིན་ཏུ་མི་འཐད་པ་ཞིག་སྟེ་རིགས་ཚོགས་དང་འཇུག་པ་སོགས་དང་དངོས་སུ་འགལ་བའི་ཕྱིར་རོ། །དེས་ན་རང་དོན་དུ་ཞི་བདེ་ཙམ་གྱི་ཐར་པ་ཐོབ་པ་ལ་ཕུང་པོ་ལྔ་དུ་མ་དང་སྐད་ཅིག་གི་ཚུལ་གྱིས་མི་བདེན་པར་མཐོང་ནས་རྣམ་བདུན་ཤིང་རྟའི་རིགས་པས་གང་ཟག་གི་བདག་མེད་ཇི་ལྟ་བར་རྟོགས་པ་ཁོ་ནས་འགྲུབ་པས་ན་གཞན་ཕུང་སོགས་ཆོས་ཐམས་ཅད་ཐེག་ཆེན་ནས་བཤད་པ་ལྟར་སྟོང་པར་རྟོགས་མི་དགོས་དེ་དཔེར་ན་ཐག་པ་མཐོང་བ་ལ་བརྟེན་ནས་རྐྱེན་གྱི་དབང་གིས་འཁྲུལ་ཏེ་སྤྲུལ་དུ་འཛིན་པ་ལ་གདགས་གཞི་ཐག་པ་རང་ཉིད་ཇི་ལྟ་བ་བཞིན་དུ་སྟོང་པའམ་མེད་པར་མ་ཤེས་ཀྱང་སྦྲུལ་འཛིན་དེ་ནི་ཡུལ་ཐག་པ་དེའི་དཀར་ནག་ལ་སོགས་པའི་རྣམ་པ་གསལ་ནས་སྦྲུལ་དུ་འཁྲུལ་བ་སྐྱེད་པའི་ཆ་མ་གྲུབ་ཅིང་སྦྲུལ་ཉིད་མེད་པར་མངོན་སུམ་དུ་མཐོང་བས་ལྡོག་པར་འགྱུར་བ་ལྟར་དུ་ཡིན་པས་ལུང་རྣམས་ལས། འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ་ཞེས་སོགས་གསུངས་པ་བཞིན་ནོ། །གཞན་ཡང་ཉན་རང་ལ་ཆོས་ཀྱི་བདག་མེད་སྟོང་ཉིད་རྟོགས་པ་མེད་པར་རང་ལམ་གྱིས་འབྲས་བུ་མི་ཐོབ་ན། དབུ་མ་ཐེག་གསུམ་ཐུན་མོང་བའི་ལམ་དུ་འགྱུར་བ་སོགས་སྐྱོན་མང་ངོ་། །གཉིས་པ། མཐར་ནི་ངེས་པའི་སོགས་ཚིགས་བཅད་གསུམ་དང་རྐང་པ་གཅིག་གིས་བསྟན་ཏེ། ཆོས་ཐམས་ཅད་བདག་མེད་པའི་གནས་ལུགས་ཆོས་དབྱིངས་དེ་བཞིན་ཉིད་སྣང་སྟོང་ཟུང་འཇུག་སྤྲོས་བྲལ་མཉམ་པ་ཆེན་པོ་ཇི་ལྟ་བ་དེ་བཞིན་དུ་མཐར་ནི་ཉན་རང་དེ་དག་གིས་ཀྱང་ངེས་པར་རྟོགས་དགོས་ཏེ། མདོ་ལས། འོད་སྲུང་ཆོས་ཐམས་ཅད་མཉམ་པ་ཉིད་དུ་རྟོགས་ན་མྱ་ངན་ལས་འདས་པ་ཡིན་ལ། དེ་ཡང་གཅིག་ཡིན་གྱི་གཉིས་དང་གསུམ་ནི་མ་ཡིན་ནོ། །ཞེས་གསུངས་པས། འཁོར་འདས་ཀྱི་བསྡུས་པའི་ཆོས་རྣམས་ཀུན་གྱི་ཆོས་དབྱིངས་དེ་བཞིན་ཉིད་ལ་རྣམ་དབྱེར་མེད་པས་གཅིག་ཡིན་ཅིང་དེ་ཉིད་སྒྲིབ་པ་ཕྲ་མོས་ཀྱང་མ་གོས་པར་ཤིན་ཏུ་གསལ་བར་མཐོང་བའི་ཡུལ་ཅན་གྱི་གཟིགས་ཚུལ་ལའང་རྣམ་དབྱེར་མེད་པར་གཅིག་ཡིན་པས་མཐར་ཐུག་ཐེག་པ་གཅིག་ཉིད་དུ་འགྲུབ་པ་ཡི་རིགས་པའི་གནད་དམ་པ་འདི་ཉིད་འཕགས་མཆོག་ཀླུ་སྒྲུབ་ཡབ་སྲས་ཀྱི་སྨྲ་བ་བླ་ན་མེད་པ་སྟེ། སློབ་དཔོན་གྱིས། ཆོས་ཀྱི་དབྱིངས་ལ་དབྱེར་མེད་ཀྱིར། །གཙོ་བོར་ཐེག་དབྱེར་མ་མཆིས་ཀྱང་། །ཁྱོད་ཀྱི་ཐེག་པ་གསུམ་བསྟན་པ། །སེམས་ཅན་རྣམས་ནི་བཞུགས་ཕྱིར་རོ། །ཞེས་དང་། དཔལ་ལྡན་ཟླ་བས། གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། ལྷུར་བྱེད་གཞན་མེད་ཆོས་རྣམས་དེ་ཉིད་རྣམ་འགྱུར་དབྱེ་ལའང་བསྟེན་མིན་ཞིང་། དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་བ་མ་ཡིན་པ། དེ་ཡི་ཕྱིར་ན་ཁྱོད་འགྲོ་ལ་ཐེག་པ་མི་མཉམ་དབྱེར་མེད་བསྟན། ཞེས་ལེགས་པར་གསུངས་པ་ཡིན་ན། གལ་ཏེ་ཁྱོད་ཀྱི་འདོད་པའི་ལུགས་འདི་ལྟར་ན་རྣམ་དབྱེར་བྲལ་བའི་ཆོས་ཀྱི་དབྱིངས་དེ་ཉིད་ཉན་རང་དགྲ་བཅོམ་པ་རྣམས་ཀྱིས་སྔར་ནས་མཐོང་ཟིན་པ་ཡིན་པས་སྔར་མ་མཐོང་བར་ད་གཟོད་དེ་དག་གིས་དེ་ཉིད་མཐོང་བའི་རིགས་པ་དེ་ཡིས་མཐར་ཐུག་ཐེག་པ་གཅིག་ཏུ་ཅི་ཞིག་འགྲུབ་སྟེ་སྒྲུབ་བྱེད་མེད་པའི་དམ་བཅའ་ཙམ་དུ་འགྱུར་ཏེ། སྒྲུབ་བྱེད་མེད་ཀྱང་བསྒྲུབ་བྱ་འགྲུབ་ན་གང་ཡང་འགྲུབ་པར་འགྱུར་ལ། ཚད་མས་གྲུབ་པའི་རང་ལུགས་འདིར་ནི་གསལ་སྟོང་ཟུང་དུ་འཇུག་པའི་ཡེ་ཤེས་གང་ཞིག་མཐར་ཐུག་པ་ཇི་ལྟ་བ་བཞིན་དུ་གཟིགས་པ་དེ་ཁོ་ན་ཉིད་ལ་ཡུལ་དང་ཡུལ་ཅན་གྱི་སྤྲོས་པ་སོགས་གང་ཡང་མ་གྲུབ་པས་ཆོས་དབྱིངས་དེ་བཞིན་ཉིད་ལ་རྣམ་དབྱེར་མེད་པས་གཅིག་ཅེས་སུ་གསུངས་པ་དེ་ལ་ཐེག་པ་རྣམས་མཐར་ཕྱིན་པར་གྱུར་པ་ཡིན་ཏེ། དབྱིངས་དེ་ནི་ངོ་བོས་མི་སྟོང་པས་རྟག་པ་དང་སྟོང་པ་ཕྱང་ཆད་ཀྱང་མ་ཡིན་པར་ཟུང་འཇུག་གདོད་མའི་ཆོས་ཉིད་ཇི་ལྟ་བ་བཞིན་མངོན་དུ་གྱུར་པ་ཡིན་པས་ཉན་རང་བྱང་འཕགས་ཀུན་ཀྱང་དངོས་སམ་བརྒྱུད་ནས་དེ་ལ་གཞོལ་ཞིང་འབབ་པས་མཐར་ཐུག་པར་གྱུར་པ་ལས་གཞན་གང་ཡང་མེད་པའི་གནད་ཀྱིས་དེ་ཉིད་རྟོགས་པས་མཐར་ཐུག་གཅིག་ཏུ་སྒྲུབ་པ་འདི་ཉིད་ཤིན་ཏུ་འཐད་པ་དང་བཅས་པ་ཁོ་ན་ཡིན་ནོ། །གསུམ་པ་དེས་ན་ཚུལ་འདི་སོགས་ཚིག་བཅད་གཉིས་ཀྱིས་བསྟན་ཏེ། དེས་ན་གོང་དུ་བཤད་པའི་ཚུལ་འདི་ལྟར་ལེགས་པར་རྟོགས་པར་གྱུར་ན་ངེས་པ་དོན་གྱི་བཀའ་དང་དེའི་དགོངས་འགྲེལ་ཀླུ་སྒྲུབ་ཡབ་སྲས་ཀྱི་ལུགས་དབུ་མ་རྩ་འཇུག་ལ་སོགས་པ་དང་། རྒྱལ་ཚབ་བྱམས་པའི་གཞུང་བཟང་རྒྱན་རྣམ་གཉིས་སོགས་ནས་ཇི་སྐད་བསྟན་པ་རྣམས་ལ་ནང་འགལ་གྱི་ཉེས་ཆ་ཕྲ་བ་ཙམ་ཡང་མེད་པར་རྟོགས་པས། ཕན་ཚུན་དཔེར་ན་བུ་རམ་སྦྲང་རྩི་རོ་གཅིག་པས་སྤང་བླང་མེད་པར་ཡིད་ལ་བདེ་བར་འབབ་པ་བཞིན་དུ་གཅིག་སྤང་གཅིག་སྒྲུབ་མི་དགོས་པར་ལྷན་ཅིག་ཡི་གར་དེར་ཏེ་བདེ་བ་འཇུ་ཡི་སྟེ་དགོངས་པ་གཅིག་ཏུ་རྟོགས་པས་ཡིད་ཆེས་བདེ་བླག་ཏུ་སྐྱེ་བར་འགྱུར་གྱི། དེ་ལས་གཞན་དུ་བཀྲལ་བ་དག་ནི་དཔེར་ན་མི་འཕྲོད་པའི་ཟས་ཟོས་པས་ཁོང་སྐྲན་གསོ་མེད་དུ་གྱུར་པ་བཞིན་དུ་ངེས་པ་དོན་གྱི་མདོ་རྒྱུད་དང་དབུ་མ་རྩ་འཇུག་དང་ཤེར་ཕྱིན་སོགས་ཀྱི་དགོངས་དོན་ཕན་ཚུན་འགལ་འདུར་རྟོགས་པས་གཅིག་སྤང་གཅིག་སྒྲུབ་ཏུ་དགོས་པས་ཁོང་ན་མི་བདེའི་སྐྲན་ཆེན་པོ་ལྟ་བུས་ཤིན་ཏུ་སྤོས་པར་གྱུར་པའི་ཚེ་དེ་ལ་མདོ་རྒྱུད་བསྟན་བཅོས་ཟབ་མོའི་ལུང་དང་ཡང་དག་པའི་རིགས་པ་ཕྱོགས་རེར་མ་སོང་བ་སྣ་ཚོགས་ཀྱི་གཙག་བུ་གཅིག་རྣོ་གཉིས་རྣོ་ལྟ་བུ་བརྒྱ་ཕྲག་དུ་མ་ལྷན་ཅིག་གདེངས་ཤིང་འདེབས་པར་གཟས་པ་ལ་ཡིད་གཏིང་ནས་སྔར་ཞིང་མི་བཟོད་པའི་དབང་གིས་ཆོས་དང་གང་ཟག་ལ་ལོག་པར་ལྟ་བས་སྐུར་འདེབས་ཀྱི་ངག་གི་ཅ་ཅོ་སྣ་ཚོགས་པས་གདུང་ཞིང་ཤིན་ཏུ་ཕུང་ཁྲོལ་ཆེན་པོར་འགྱུར་བར་ངེས་པས་བག་ཡོད་པར་བྱའོ། །ངེས་པའི་མདོ་རྒྱུད་བསྟན་བཅོས་ནང་འགལ་བའི། ལུང་རིགས་བགྲོད་དཀར་འཕྱན་པའི་འཕྱང་མོ་ཉུག །འདི་ཚུལ་འདི་བཞིན་སྨྲ་བའི་རྟ་བདུན་དབང་། །ལུང་རིགས་མཁའ་ལ་རང་དབང་འབྱོར་མིན་ནམ། ཞེས་ཀྱང་སྨྲས་སོ། །དྲིས་ལན་གསུམ་པ་མཉམ་བཞག་འཛིན་སྟངས་ཡོད་མེད་གང་འཐད་ཀྱི་ལན་ལ་གསུམ། མཉམ་བཞག་འཛིན་སྟངས་མེད་པར་བཞེད་པའི་ཤན་འབྱེད་གོལ་སྒྲིབ་བསལ་བའི་གཏན་ཚིག་དང་བཅས་པ། འཛིན་སྟངས་ཡོད་མེད་གཉིས་པོ་ལམ་གྱི་སྦྱོར་དངོས་སུ་སྒྲུབ་པའི་མཉམ་བཞག་གི་འཇུག་ཚུལ་འཁྲུལ་མེད་དུ་བསྟན་པ། མཐར་ཐུག་ངེས་ཤེས་ཀྱིས་དྲངས་པའི་སྒོམ་སྟོབས་ལས་འཛིན་སྟངས་ཀུན་དང་བྲལ་བའི་མཉམ་བཞག་ཡེ་ཤེས་ཀློང་དུ་འགྱུར་ཚུལ་ལོ། །དང་པོ་ལ་གཉིས། འཛིན་སྟངས་མེད་པར་གསུང་བའི་ཡང་ལོག་གི་འདོད་ཚུལ་ངོས་བཟུང་བ། ཡང་དག་པའི་དོན་ཉིད་གསལ་བར་རྟོགས་ཕྱིར་གོལ་སྒྲིབ་ཀྱི་འཁྲུལ་ཆ་རིགས་པས་བསལ་བའོ། །དང་པོ་ལའང་གཉིས། ལེགས་པར་རྟོགས་པ་མཐའ་བྲལ་འཕགས་པའི་ཡེ་ཤེས་སུ་བསྟན་པ། ལོག་པར་རྟོག་པ་ཐ་མལ་འཁྲུལ་ཤེས་སོར་བཞག་ཏུ་བསྟན་པའོ། །དང་པོ། ལྟ་བའི་དངོས་གཞི་སོགས་ཚིགས་བཅད་གཉིས་དང་རྐང་པ་གཅིག་གིས་བསྟན་ཏེ། དེ་ལ་གནས་ལུགས་ལྟ་བའི་དངོས་གཞི་ལ་མཉམ་པ་བཞག་སྟེ་སྐྱོང་བའི་དུས་ཁ་ཅིག་ཡོད་མེད་ལ་སོགས་པ་གང་ཅིར་ཡང་མི་འཛིན་དེ་འཛིན་དུ་མི་རུང་ངོ་ཞེས་ཟེར་བ་འདི་རིགས་པ་ཡང་དག་པས་ལེགས་པར་བརྟགས་ན་ཅིར་ཡང་མི་འཛིན་ཞེས་པའི་དོན་དེ་ཉིད་ལེགས་པར་རྟོགས་པས་ཡང་དག་པ་ཞིག་དང་ལོག་པར་རྟོག་ནས་འཁྲུལ་བར་འཕྱན་པ་ཞིག་དང་གཉིས་སུ་ཡོད་པས་དང་པོ་ནི་ཡོད་པ་དང་མེད་པ་ལ་སོགས་པ་མཐའ་བཞིའི་སྤྲོས་པ་ཐམས་ཅད་དང་བྲལ་བའི་ཆོས་དབྱིངས་སྣང་སྟོང་ཟུང་འཇུག་རང་བྱུང་གི་ཡེ་ཤེས་ཚུལ་བཞིན་དུ་རྟོགས་ནས་བསམ་བརྗོད་མཐའ་དག་ལས་འདས་པ་ཡིན་ཏེ། སྤྱོད་འཇུག་ལས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པ་ལྟར་གཉིས་སྣང་ནུབ་པའི་འཕགས་པའི་མཉམ་བཞག་སོ་སོ་རང་རིག་པའི་ཡེ་ཤེས་ཀྱི་མདུན་ན མ་ངོས་ན་སྟོང་དང་མི་སྟོང་ཡོད་པ་དང་མེད་པ་ལ་སོགས་པའི་སྤྲོས་པ་གང་ཡང་གནས་པ་མེད་པར་མངོན་སུམ་དུ་མཐོང་བས་ཡོད་མེད་ལ་སོགས་པའི་འཛིན་སྟངས་ཐམས་ཅད་ཆོས་ཀྱི་དབྱིངས་སུ་ཆུ་ལ་ཆུ་བཞག་པ་བཞིན་དུ་རང་གི་ངང་གིས་ཞིག་ནས་མེད་པར་གྱུར་བ་སྟེ། སྟོང་གསལ་སྤྲོས་པ་དང་བྲལ་བའི་ཡེ་ཤེས་མཐོང་བ་དེ་གཞན་གྱིས་བསྙད་པར་མི་ནུས་པས་ནམ་མཁའ་དྭངས་བའི་དབྱིངས་ལ་ལྟ་བ་དང་མཚུངས་པ་ཉིད་དེ། རྒྱལ་ཡུམ་སྡུད་པ་ལས་ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། ནམ་མཁའ་ཇི་ལྟར་མཐོང་ཞེས་དོན་འདི་བརྟགས་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །ཞེས་གསུངས་པ་བཞིན་ནོ། །གཉིས་པ། གཉིས་པ་དྲན་མེད་སོགས་ཚིགས་བཅད་གཉིས་དང་རྐང་པ་གཅིག་གིས་བསྟན་ཏེ། ཅིར་ཡང་མི་འཛིན་པའི་དོན་ལ་ལོག་པར་རྟོག་པས་གཉིས་པ་ལྟ་བའི་ངེས་ཤེས་དང་བྲལ་ནས་དྲན་མེད་ཐོ་མེ་བའི་ཚུལ་དུ་འཇོག་པར་འདོད་པ་ནི། གནས་ལུགས་མ་མཐོང་བཞིན་དུ་བྱར་མེད་དུ་འཇོག་པ་ཧ་ཤང་གི་ལུགས་དང་མཚུངས་ཏེ་འདི་ལྟར་གནས་ལུགས་སྤྲོས་བྲལ་མཉམ་པ་ཉིད་ཇི་ལྟ་བ་བཞིན་དུ་གཏན་ལ་ཕེབས་བར་མ་དཔྱད་ཅིང་མ་རྟོགས་པར་རང་གར་ཅི་ཡང་ཡིད་ལ་མི་བྱེད་དོ་ཞེས་འཛིན་སྟངས་ཀྱིས་དྲན་མེད་ཐོ་མེ་བའི་ཚུལ་དུ་རྩོལ་མེད་དུ་ཙེན་ནེར་བཞག་པ་ཡིས་ངོ་བོས་སྟོང་པའི་རང་བཞིན་ལྷག་པར་མཐོང་བས་གསལ་བའི་ཡེ་ཤེས་ཀྱི་མཁྱེན་ཆ་མེད་པར་དཔེར་ན་མཚོ་གཏིང་ཟབ་མོར་རྡོ་འཕང་བ་བཞིན་དུ་ཇི་ཡིན་འདི་ཡིན་མེད་པར་གྱུར་ནས་ཤེས་རྒྱུད་སྔར་ལས་བཟང་དུ་མི་འགྲོ་བར་ཐ་མལ་དུ་གནས་པ་ནི་ཆགས་སྡང་ལ་སོགས་པའི་གཉེན་པོར་མི་འགྱུར་ཞིང་། བྱམས་སྙིང་རྗེ་བྱང་ཆུབ་ཀྱི་སེམས་དང་རྒྱུ་འབྲས་ལ་ཡིད་ཆེས་སྙིང་ནས་སྐྱེ་བ་སོགས་ལམ་རྟགས་ཀྱི་ཡོན་ཏན་གང་ཡང་མི་འབྱུང་བས་ལོག་རྟོག་འཁྲུལ་ཤེས་སོར་བཞག་ཙམ་སྟེ། ལམ་གྱི་རྣལ་འབྱོར་གང་ཡང་མིན་ནོ། །དེ་ཡང་དཔེར་ན་ཅི་ཡང་མེད་པ་འདི་ལ། དབུ་མས་སྤྲོས་པ་ཅི་ཡང་མེད་པར་རིགས་པས་མཐོང་བ་དང་གཟུགས་མེད་ཀྱིས་ཅི་ཡང་མེད་པར་མོས་པས་སྒོམ་པ་གཉིས་ཚིག་ཙམ་ཞིག་མཚུངས་ཀྱང་དོན་ལ་གཏན་ནས་མི་མཚུངས་པ་ལྟར་ཅིར་ཡང་མི་འཛིན་ཞེས་པའི་ཚིག་ཙམ་མཚུངས་པའམ་འདྲ་བ་འདི་དག་ཀྱང་དོན་ལ་རྣམ་པ་ཀུན་ཏུ་མི་མཚུངས་པས་མི་འདྲ་བ་སྟེ་མཆོག་དམན་གྱི་ཁྱད་པར་གནམ་དང་ས་བཞིན་དུ་མཆིས་ཤིང་ཤིན་ཏུ་ཐ་དད་པ་ཡིན་པས་ལེགས་པར་ཤན་འབྱེད་དགོས་སོ། །གཉིས་པ་ལ་གཉིས། ངོ་བོ་སྟོང་ཆ་ལ་གོལ་ས་བསལ་ཕྱིར་ལ་བཟླ་བའི་མན་ངག་རིགས་པས་བསྟན་པ། རང་བཞིན་རིག་ཆ་ལ་སྒྲིབ་པ་སྤོང་ཕྱིར་ཤན་འབྱེད་ཀྱི་འགགས་དོན་གནད་དུ་དྲིལ་བའོ། །དང་པོ་དེ་ལྟར་མཐའ་བཞིའི་སོགས་ཚིགས་བཅད་དགུ་དང་རྐང་པ་གཅིག་གིས་བསྟན་ཏེ། དེ་ལྟར་ཡུལ་ཆོས་ཀྱི་དབྱིངས་ཡོད་མེད་ལ་སོགས་པའི་མཐའ་བཞིའི་སྤྲོས་པ་ཐམས་ཅད་དང་བྲལ་བའི་སྣང་སྟོང་ཟུང་འཇུག་མཉམ་པ་ཆེན་པོ་ལ་ཡུལ་ཅན་ཡེ་ཤེས་ཀྱིས་ཀྱང་དེ་བཞིན་དུ་མཐའ་བཞི་པོ་གང་དུའང་མི་འཛིན་པར་ཤིན་ཏུ་ཕྲ་བའི་གཉིས་སྣང་ཐམས་ཅད་ནུབ་སྟེ་གཉིས་སུ་མེད་པར་གྱུར་ན་མཐའ་བཞི་པོ་དེ་ལས་འདས་པའམ་དེ་མ་ཡིན་པའི་འཛིན་སྟངས་གཞན་ཞིག་གཏན་ནས་མེད་ཅིང་མི་སྲིད་པས་འཛིན་སྟངས་མཐའ་དག་མེད་པར་འདོད་པ་ཡིན་པས་འདི་ནི་ཅིར་ཡང་མི་འཛིན་ཞེས་པའི་དོན་ཚུལ་བཞིན་དུ་གཏན་ལ་ཕེབས་པ་ཡིན་ནོ། །དེ་ལས་གཞན་དུ་གལ་ཏེ་འཛིན་སྟངས་ཅི་ཡང་མེད་ཅེས་བརྗོད་པའི་ཚིག་དེས་དོན་དེ་ཉིད་ཡང་དག་པར་མ་རྟོགས་པས་བླུན་པོ་ཁ་ཅིག་མན་ངག་གི་གནད་མ་ལུང་རིགས་ཀྱིས་དཔྱད་པ་མེད་པར་དང་པོ་ནས་གང་དུའང་འཛིན་དུ་མི་རུང་བས་ཅིར་ཡང་མི་འཛིན་པར་ཐ་མལ་དུ་ལྷོད་པ་ཞིག་དགོས་པ་ཉིད་དོ་ཞེས་སྨྲ་བ་ནི་ཤིན་ཏུ་མི་རིགས་པས་ལོ་ཞེས་མ་རངས་པའོ། །ཇི་ལྟར་མི་འཐད་ན། ཐོག་མ་མེད་པའི་དུས་ན་འགྲོ་བ་འདི་ཀུན་ལུང་རིགས་མན་ངག་དོན་དུ་མི་གཉེར་བར་རང་གར་ཐ་མལ་དུ་ཀློད་ཤིན་ཏུ་ཆེས་པས་ཁམས་གསུམ་འཁོར་བར་གཅིག་ནས་གཅིག་ཏུ་བརྒྱུད་དེ་གཏན་དུ་འཁྱམས་པར་གྱུར་པ་འདི་ལྟར་ཡིན་ན་ད་དུང་ལྷོད་དགོས་སོ་ཞེས་བཀླགས་པའམ་བསྣན་ཏེ་བསྐུལ་དུ་ཅི་ཞིག་དགོས་ཏེ་མི་དགོས་ཤིང་བསྐུལ་ཡང་མི་རུང་ངོ་། །ཡང་གལ་ཏེ་སེམས་ཅན་དེ་དག་ལུང་རིགས་མན་ངག་དང་བྲལ་བས་གནས་ལུགས་ཀྱི་རང་ངོ་མི་ཤེས་ཤིང་མ་མཐོང་བའི་དབང་གིས་ཟོ་ཆུན་གྱི་རྒྱུན་བཞིན་དུ་འཁོར་བ་ཡིན་མོད། བདག་ཅག་གིས་ནི་གནས་ལུགས་ཟབ་མོའི་རང་གི་ངོ་བོ་ཚུལ་བཞིན་དུ་ཤེས་པས་རྟོགས་ལྡན་རྣལ་འབྱོར་གྱི་དབང་ཕྱུག་ཡིན་པས་ལྷོད་དེ་བཞག་པས་དོན་གྲུབ་བོ་ཟེར་ན། གནས་ལུགས་དོན་དམ་པའི་རང་ངོ་ཤེས་ཤིང་རྟོགས་པ་ལ་ལུང་རིགས་མན་ངག་གང་རུང་གིས་ཕྱི་ནང་གི་ཆོས་ཀུན་རང་རང་གི་ངོ་བོས་གདོད་ནས་སྟོང་པས་བདེན་པའི་སྟོང་པ་ཉིད་ཡིན་པ་ལ་ཕུ་ཐག་གཏིང་ནས་ཆོད་པ་ཞིག་ངེས་པར་དགོས་ཀྱི་དེ་ལྟ་མ་ཡིན་པར་རང་གར་འཁྲུལ་བའི་སྣང་བ་ལ་འདི་ནི་བདག་དང་འདི་ནི་གཞན་ཡིན་ནོ་ཞེས་བླུན་པོ་བ་ལང་རྫི་ཡན་ཆད་སུས་ཀྱང་བདག་ཉིད་རང་ངོ་ཤེས་པ་ཡིན་ན། དེ་ལ་འབད་པ་སྣ་ཚོགས་པས་མཉམ་པར་བཞག་སྟེ་སྒོམ་ཡང་ཅི་ཞིག་དགོས་ཏེ་སྒོམ་པ་དོན་མེད་དུ་འགྱུར་རོ། །གལ་ཏེ་དེ་ལྟར་མ་ཡིན་པར་རང་གི་སེམས་འདི་ལ་དཀར་པོ་ལ་སོགས་པ་ཁ་དོག་གི་མདོག་དང་གྲུ་བཞི་ལ་སོགས་པ་དབྱིབས་དང་དང་པོ་བྱུང་ས་བར་དུ་གནས་ས་ཐ་མ་འགྲོ་ས་ལ་བརྟག་པའི་ཚེ་དེ་དག་ཅི་ཡང་མ་མཐོང་བ་ཡིན་པས་གནས་ལུགས་སྟོང་པར་རྟོགས་པ་ཡིན་ནོ་ཞེ་ན་ཡང་འདི་ནི་འཁོར་འདས་ཀྱི་ཆོས་ཀུན་གྱི་གནས་ལུགས་གཏན་ལ་འབེབས་པའི་མན་ངག་གི་འཆད་ཚུལ་ཤིན་ཏུ་ཟབ་པའི་གནད་དམ་པ་རྟོགས་དཀའ་ལ་ཆོད་ཆེ་བ་སྟེ་འདི་ལའང་ལེགས་པར་མ་བརྟགས་ན་གོལ་ས་ཤིན་ཏུ་ཆེ་བར་སྣང་སྟེ། ཇི་ལྟར་ན་སེམས་འདི་ནི་དབྱིབས་དང་ཁ་དོག་སོགས་གཟུགས་ཅན་གྱི་དངོས་པོ་མ་ཡིན་པས་ན་མཁས་བླུན་སུས་ཀྱང་དབྱིབས་དང་མདོག་ལ་སོགས་པར་མཐོང་བ་མི་སྲིད་པས་དེ་དག་མ་མཐོང་བ། དེ་ཙམ་ལ་གནས་ལུགས་སྤྲོས་པ་དང་བྲལ་བའི་སྟོང་པ་ཉིད་ངོ་འཕྲོད་པའམ་རྟོགས་པ་ཡིན་ནོ་སྙམ་ན་ཤིན་ཏུ་གོལ་བ་ཡིན་ཏེ་དཔེར་ན་ལན་གཅིག་མ་ཡིན་པར་ལན་བརྒྱར་ཡང་ནས་ཡང་དུ་བརྟགས་ཀྱང་མི་ཡི་མགོར་བ་ལང་ལ་སོགས་ཕྱུགས་ཀྱི་རྭ་ཅོ་ཡོད་པ་མིན་པས་མཐོང་བ་མི་སྲིད་ལ་རྭ་ཅོ་དེ་མ་མཐོང་བས་མིའི་མགོ་བོ་དེ་ཉིད་སྟོང་པ་ཉིད་ཡིན་པར་རྟོགས་སོ་ཞེ་ན་སྟོང་ཉིད་སུས་ཀྱང་རྟོགས་པར་སླ་བས་བླུན་པོ་བ་ལང་རྫི་ཡང་སྟོང་ཉིད་འབད་མེད་དུ་རྟོགས་ནས་གྲོལ་བར་ཐལ་བ་ལ་སོགས་པའི་སྐྱོན་དང་བཅས་པའོ། །དེས་ན་སེམས་ཀྱི་ཁང་བུ་བཤིག་པའི་མན་ངག་ལ་བརྟེན་ནས་སེམས་ལ་དབྱིབས་དང་ཁ་དོག་བྱུང་གནས་འགྲོ་གསུམ་སོགས་ལ་བརྟགས་པའི་རིགས་པའི་དཔྱད་པ་དེས། སེམས་ཀྱི་ཆོས་ཉིད་ཆོས་དབྱིངས་དེ་བཞིན་ཉིད་ཀྱི་གནས་ལུགས་སྐྱོན་མེད་པའི་ཡང་དག་པ་ཐིག་པོ་ཞིག་མཐོང་བར་གྱུར་པ་ཡིན་ན། རང་གི་སེམས་དེ་ནི་སྣང་ཙམ་འགགས་པ་མེད་པས་སྒྱུ་མ་ལྟ་བུ་ལ་ངོ་བོ་ཡེ་སྟོང་བདེན་པ་མེད་པས་རིག་སྟོང་དབྱེར་མེད་ཆེན་པོར་གཏིང་ནས་རིག་ཅིང་རྟོགས་པར་འགྱུར་ལ། དེ་ཡི་ཚེ་རང་གི་ཐད་ཀའི་མདུན་གྱི་ནམ་མཁའ་ལ་པ་ལྟས་པས་ཅི་ཡང་མཐོང་བ་མེད་པ་བཞིན་དུ་རང་གི་སེམས་ཉིད་ཅི་ཡང་མཐོང་བ་མེད་པར་ཡེ་སྟོང་རྩ་བ་དང་བྲལ་བས་སྟོང་པ་ཡིན་བཞིན་དུ་དེ་ཉིད་རྣམ་པ་འགྱུ་བར་སྣང་བ་དང་། འགྱུ་བཞིན་པའི་རྣམ་པ་འདི་ཡང་ངོ་བོ་སྤྲོས་པ་དང་བྲལ་བའི་སྟོང་པ་ཡི་བདག་ཉིད་ཅན་དུ་ངེས་པའི་ཤེས་པ་ཐེ་ཚོམ་ཐམས་ཅད་དང་བྲལ་ནས་ཁོ་ཐག་ནང་ནས་ཆོད་ཅིང་སྟོང་རྟེན་འབྱུང་ངམ་གསལ་སྟོང་ངམ་རིག་སྟོང་གཉིས་སུ་མེད་པའི་གནས་ལུགས་ཡང་དག་པར་རྟོགས་པ་ཞིག་ངེས་པར་དགོས་པ་ཡིན་ནོ། །གཉིས་པ། ཡང་ནི་ཁྱོད་ཀྱི་སོགས་ཚིགས་བཅད་བརྒྱད་དང་རྐང་པ་གཅིག་གིས་བསྟན་ཏེ། ད་དུང་ཡང་ནི་ཁྱོད་ཉིད་ཀྱི་སེམས་ཞེས་པ་དེ་ནི་ཅི་ཡང་མེད་པ་ནམ་མཁའ་དང་འདྲ་བ་ཞིག་ཡིན་པར་འདུག་གམ་ཡང་ན་སྣ་ཚོགས་ཤེས་པ་གསལ་རིག་ཞིག་ལས་གང་ཡིན་ཟེར་ཞེས་འདྲི་ན། ཅི་ཡང་མེད་པ་ནམ་མཁའ་ལྟ་བུ་ཞིག་མ་ཡིན་པར་སྣ་ཚོགས་འཆར་བའི་ཤེས་པ་རྩེ་གཅིག་ཏུ་གནས་པའམ་སྐད་ཅིག་ཏུའང་མི་སྡོད་པས་གཡོ་ཞིང་འགྱུ་བའི་སེམས་གསལ་རིག་ཅན་འདི་སེམས་ཅན་གྱི་དངོས་པོ་སུ་ལའང་ཡོད་པའི་ཕྱིར་ན་རང་རང་སོ་སོའི་རྒྱུད་ན་དེ་འདྲའི་རིག་པའམ་ཤེས་པ་ཞིག་ཡོད་པའམ་འདུག་པར་མཁས་བླུན་སུས་ཀྱང་མཐོང་བས་དེ་ཉིད་རང་ངོ་རང་གིས་མཐོང་བ་ཡིན་པར་ངེས་པར་སྨྲ་ན། དེ་ཙམ་གྱིས་སེམས་ཀྱི་གནས་ལུགས་རིག་སྟོང་དབྱེར་མེད་སྤྲོས་པ་དང་བྲལ་བའི་ངོ་བོ་ཡང་དག་པར་མཐོང་བ་ག་ལ་ཡིན་ཏེ་མིན་ལ། གལ་ཏེ་དེ་ཙམ་མིན་པར་དེ་ནས་སེམས་གསལ་རིག་གི་ངོ་བོ་དེ་ལ་བརྟགས་པས་དབྱིབས་དང་ཁ་དོག་སོགས་མེད་པས་ཡོད་པ་མ་ཡིན་ལ་འགྱུ་བའམ་གནས་པ་གསལ་རིག་གི་ངོ་བོར་ཡོད་པས་ཕྱང་ཆད་ནམ་མཁའ་ལྟ་བུའི་མེད་པའང་མིན་པའི་སེམས་ཀྱི་ངོ་བོ་དེ་ཉིད་གནས་ལུགས་རྫོགས་པ་ཆེན་པོ་འོད་གསལ་ཆོས་ཀྱི་སྐུ་ཡིན་ལ། དེ་མཐོང་བ་ནི་འོད་གསལ་ཆོས་སྐུའི་མཐོང་བ་ཡིན་ནོ་ཞེས་ཟེར་ནས་དེ་ལྟར་མཐོང་བ་དེས་ཀྱང་འོད་གསལ་ཆོས་སྐུ་ངོ་འཕྲོད་པ་ཡིན་ནོ་ཞེས་རང་ཡང་མངོན་པར་རློམ་པ་དང་བཅས་པས་ཐུགས་དམ་དུ་མཛད་ཅིང་གཞན་ལའང་ངོ་སྤྲོད་པར་བྱེད་པ་དག་གིས་གཞི་ལམ་འབྲས་བུའི་ཆོས་ཀུན་མེད་ཅེས་སྐུར་བ་འདེབས་ཤིང་མདོ་རྒྱུད་ཀྱི་གཞུང་ལ་ཐོས་པ་སློབ་གཉེར་མང་པོ་མ་བྱས་བར་མ་ཟད་དགྲ་ལྟར་བལྟས་ཀྱང་གཅིག་ཤེས་ཀུན་གྲོལ་གྱི་འོད་གསལ་རྫོགས་པ་ཆེན་པོའི་ཡེ་ཤེས་ཆོས་ཀྱི་སྐུ་མཐོང་བའམ་ཤེས་སོ་ལོ་ཞེས་ཤིན་ཏུ་མི་འཐད་པས་མ་རངས་བའོ། །ཇི་ལྟར་མི་འཐད་ན་ཆོས་ཐམས་ཅད་ཀྱི་གནས་ལུགས་མཐར་ཐུག་རིག་སྟོང་ཟུང་འཇུག་འོད་གསལ་རྫོགས་པ་ཆེན་པོའི་རང་ལུགས་ཀྱི་ཆོས་སྐུའི་རང་བྱུང་གི་ཡེ་ཤེས་ནི་རིག་པ་རང་གི་ངོ་བོ་ཡེ་སྟོང་སྤྲོས་པ་དང་བྲལ་བ་ཡིན་པས་ཡོད་པ་མིན་ཞིང་རང་བཞིན་འོད་གསལ་ལྷུན་གྲུབ་གདལ་ཁྱབ་ཆེན་པོའི་ཡེ་ཤེས་ཡིན་པས་མེད་པ་མིན་ལ་དེ་གཉིས་དབྱེ་བ་མེད་པའི་ཐུགས་རྗེ་ཀུན་ཁྱབ་ཟང་ཐལ་རིག་པ་རྗེན་པ་ནི་ཡོད་མེད་ལ་སོགས་པའི་མཐའ་བཞིའི་སྤྲོས་པ་ཐམས་ཅད་དང་བྲལ་བ་བསམ་བརྗོད་ལས་འདས་པ་གཉུག་སེམས་དོན་གྱི་ཡེ་ཤེས་ཡིན་ལ། །ཁྱོད་ཀྱི་མཐོང་ཞིང་སྒོམ་པའི་སེམས་ངོ་འདི་ནི་ལེགས་པར་བརྟགས་ཤིང་དཔྱད་ན་དབྱིབས་དང་ཁ་དོག་སོགས་མེད་པས་ཡོད་པར་སྨྲ་རུ་མི་བཏུབ་ཅིང་འགྱུ་བ་གསལ་རིག་ཏུ་ཡོད་པས་མེད་པར་ཡང་ནི་སྨྲར་མེད་པ་སྟེ་དོན་དུ་གསལ་རིག་གི་ངོ་བོར་ཡོད་པ་ཡིན་པ་དང་དབྱིབས་དང་ཁ་དོག་སོགས་ཀྱི་ངོ་བོར་མེད་པ་ཡིན་པས་གཉིས་ཡིན་ནམ་སྟེ་གཉིས་ཡིན་གྱི་གཞིའམ་ཡང་ན་གསལ་རིག་གི་ངོ་བོ་མེད་པ་མིན་པ་དང་དབྱིབས་སོགས་ཀྱི་ངོ་བོར་ཡོད་པ་མིན་པས་གཉིས་ཀ་མིན་པའི་མུ་སྟེ་གཉིས་མིན་གྱི་གཞི་གང་རུང་ཞིག་ལས་རྣམ་པ་ཀུན་ཏུ་མ་འདས་པར་སེམས་དེ་ནི་ཡོད་མིན་མིད་མིན་གྱི་གཞི་རུ་ཡོད་པ་ཞིག་ཏུ་ཞེ་ལ་མཆོག་ཏུ་བརྣག་ཅིང་ཞེན་གྱིན་གདའ་བས་སེམས་ངོ་དེ་ནི་ཕྱི་རོལ་གསང་བ་པ་དག་གིས་ཡོད་མེད་ལ་སོགས་པར་བསམ་གྱིས་མི་ཁྱབ་པའི་བདག་ཆེན་པོར་འདོད་པ་དེ་དང་འདི་གཉིས་མིང་གི་རྣམ་གྲངས་མི་འདྲ་བ་ཙམ་ལས་དོན་གྱི་ངོ་བོ་ལ་འདོད་ཚུལ་ཐ་དད་པར་ཁྱད་པར་ཅི་ཡང་མེད་པ་ཉིད་དོ། །དེས་ན་གནད་ཀྱི་དོན་ལ་རང་གི་སེམས་འདི་ཉིད་དང་སེམས་དེ་ལས་གཞན་གྱི་ཆོས་སུ་སྣང་བ་འཁོར་འདས་ཀྱིས་བསྡུས་པ་ཀུན་ཀྱང་རང་རང་གི་ངོ་བོས་ཡེ་གདོད་མ་ནས་སྟོང་པས་བདེན་མེད་དུ་རྟོགས་ཤིང་ཚུལ་བཞིན་དུ་ངེས་པའི་སྟེང་དུ་འཁོར་འདས་ཀྱི་སྣང་བ་རབ་འབྱམས་མུ་མཐའ་མེད་པར་རྟེན་འབྱུང་འགགས་མེད་དུ་རང་ཤར་བས་སྟོང་དང་རྟེན་འབྱུང་དབྱེར་མེད་དམ་གསལ་སྟོང་ཟུང་དུ་འཇུག་པའི་གནས་ལུགས་ཡོད་མེད་ཡིན་མིན་ལ་སོགས་པར་སེམས་ཀྱིས་བསམ་པ་དང་ངག་གིས་བརྗོད་པ་ཐམས་ཅད་ལས་འདས་པ་མཐའ་བཞིའི་སྤྲོས་པ་མ་ལུས་པ་ཀུན་དང་བྲལ་བའི་གནད་དོན་ཟབ་མོ་ཡང་དག་པར་མཐོང་བས་ཡོད་མེད་ལ་སོགས་པའི་འཛིན་སྟངས་ཀྱི་དམིགས་གཏན་ཅི་ཡང་མེད་པའི་རིག་སྟོང་དབྱེར་མེད་ཟང་མ་ཐལ་བྱུང་ངོ་ཞེས་ཟང་ཐལ་རིག་པ་རྗེན་པ་ཡེ་གྲོལ་ཁྱབ་པ་རང་དག་གི་ངོ་བོ་མཐོང་ནས་འཛིན་སྟངས་ཅི་ཡང་མེད་པར་མཉམ་པར་བཞག་པ་ནི་ཅིར་ཡང་མི་འཛིན་པའི་དོན་ཡང་དག་པ་ཡིན་ནོ། །དེ་ལྟ་མ་ཡིན་པར་ཁྱོད་ཀྱིས་སྒོམ་པའི་སེམས་ངོ་འདི་ནི་གོང་དུ་བཤད་པ་ལྟར་ཡིན་མིན་གཉིས་དང་བྲལ་བ་ཞིག་ཡིན་ཞེས་བློ་ཡི་མདུན་ན་དམིགས་གཏད་ཀྱི་གཞི་ཞིག་འབེན་བཞིན་དུ་གནས་ཤིང་མི་འདོར་བར་འཛིན་ཏོ་ཞེས་འཛིན་སྟངས་ཡོད་བཞིན་ཅིར་ཡང་མི་འཛིན་ཞེས་ལོག་པར་རྟོག་པ་ཁོ་ནའོ། །གཉིས་པ་ལ་གཉིས། དང་པོའི་ལས་ཅན་རིམ་གྱིས་པས་ཇི་ལྟར་སྒོམ་པ་ལམ་གྱི་རིམ་པའི་གཞི་འཛུགས་པ། དེ་ལ་ནོར་འཁྲུལ་ལེགས་པར་བསལ་ཕྱིར་ཤན་འབྱེད་རིག་པའི་འཕྱོངས་བཤད་པའོ། །དང་པོ་ལ་གསུམ། ཐོག་མར་ཐོས་པའི་ཤེས་རབ་ཀྱིས་སྤྲོས་བྲལ་མེད་དགག་གི་དོན་ལ་འཛིན་སྟངས་དང་བཅས་ཏེ་ཇི་ལྟར་སྒོམ་ཚུལ། བར་དུ་བསམ་པའི་ཤེས་རབ་ཀྱི་ཟུང་འཇུག་སྤྲོས་བྲལ་ཆེན་པོའི་དོན་ལ་ངེས་པའི་འཛིན་སྟངས་དང་བཅས་ཏེ་ཡང་ཡང་མཉམ་པར་འཇོག་ཚུལ། དངོས་གཞི་བསྒོམ་པའི་ཤེས་རབ་ལ་བརྟེན་ནས་སྤྲོས་བྲལ་བློ་འདས་ཆེན་པོའི་དོན་ལ་འཛིན་སྟངས་ཀུན་བྲལ་དུ་ཇི་ལྟར་གནས་པའི་ཚུལ་ལོ། །དང་པོ། བདག་གཞན་དངོས་འཛིན་སོགས་ཚིགས་བཅད་ལྔས་བསྟན་ཏེ། འཁོར་བའི་སེམས་ཅན་མཐའ་དག་དང་པོ་རང་ཞེས་བདག་ལ་ཞེན་ཅིང་བདག་གི་འདི་ཞེས་དངོས་ལ་ཆགས་པས་བདག་དང་བདག་གི་བ་སོགས་གཞན་དུ་རྟོག་ཅིང་ཞེན་པའི་དངོས་པོར་འཛིན་པ་འདིར་བརྟེན་ནས་སྲིད་པ་ཁམས་གསུམ་འཁོར་བའི་སྡུག་བསྔལ་གྱི་ཆུ་བོར་ཡང་ནས་ཡང་དུ་བརྒྱུད་མར་འཇུག་ཅིང་འཁོར་བ་ཡིན་པས་ན་དངོས་འཛིན་འདི་དག་བཟློག་ཅིང་སྤོང་བར་བྱེད་པའི་གཉེན་པོ་ནི་གནས་ལུགས་བདག་མེད་པ་ཡི་དོན་ཇི་བཞིན་དུ་རྟོགས་པ་ཡིས་འཛིན་སྟངས་དོན་མཐུན་དེ་ཉིད་ཡིན་ལ། དེ་ཡང་ཡང་དག་པའི་རིགས་པའི་ལམ་གྱིས་བདག་མེད་པའི་གནས་ཚུལ་ཇི་ལྟར་ཡིན་པ་ཚུལ་བཞིན་དུ་མ་ཤེས་པར་རང་གར་བདག་མེད་པར་མོས་པས་ཏེ་མོས་པ་ཙམ་གྱིས་བདག་འཛིན་བཟློག་པ་ལ་ཅི་ཡང་མི་ཕན་ཏེ། དཔེར་ན་རྐྱེན་གྱི་དབང་གིས་ཐག་ཁྲལ་སྦྲུལ་ཉིད་དུ་འཁྲུལ་བ་ལས་འཇིགས་ཤིང་སྐྲག་པ་སྐྱེ་བ་ལ་འདི་ན་སྦྲུལ་དངོས་མེད་དོ་སྙམ་དུ་མོས་པས་འཇིགས་སྐྲག་སེལ་བ་ལ་ཅི་ཡང་མི་ཕན་ཀྱང་སྣང་བ་ལ་སོགས་པའི་རྐྱེན་ལ་བརྟེན་ནས་ཚུལ་བཞིན་བརྟགས་པས་ཐག་ཁྲ་ཙམ་ལས་སྦྲུལ་དངོས་མེད་པའི་ཡིན་ཚུལ་ཇི་བཞིན་དུ་མཐོང་བར་གྱུར་ན་སྦྲུལ་གྱི་འཇིགས་སྐྲག་རྩ་བ་ནས་སྤངས་ནུས་པ་ཇི་ལྟ་བ་དེ་བཞིན་ནོ། །དེ་ཡི་ཕྱིར་ན་རིགས་ལམ་ཡང་དག་པར་ཚུལ་བཞིན་དུ་དཔྱད་པས་དང་པོ་ཉིད་དུ་བདག་མེད་པའི་གནས་ལུགས་ཚུལ་བཞིན་དུ་རྟོགས་པར་བྱས་ནས་དེ་ནས་དཔྱད་པ་ཙམ་ཁོ་ནས་ཆོག་པར་མི་འཛིན་པའམ་དེ་ཙམ་ཉིད་དུ་མི་བཞག་པར་ཐོག་མ་མེད་པ་ནས་བདག་གཞན་དུ་རྟོགས་པའི་དངོས་ཞེན་ལ་ཤིན་ཏུ་གོམས་ཆེས་པར་དེ་ཉིད་བཟློག་པར་དཀའ་བས་ཡང་ནས་ཡང་དུ་དེའི་དངོས་གཉེན་བདག་མེད་ལྟ་བ་ངེས་ཤེས་ཀྱི་འཛིན་སྟངས་དོན་མཐུན་དང་བཅས་ཏེ་མཉམཔར་བཞག་ཅིང་སྒོམ་པ་ནི་ཤིན་ཏུ་གལ་ཆེ་བ་ཉིད་དེ། འདི་ལྟར་བདག་མེད་པའི་གནས་ལུགས་ཇི་བཞིན་པར་རྟོགས་ཤིང་གོམས་པས་འཁོར་བའི་རྩ་བ་བདག་ཏུ་ལྟ་བ་ཉིད་དྲུང་ནས་འབྱིན་ཅིང་སྤོང་བར་བྱེད་པའི་ཕྱིར་ན་བདག་མེད་ཀྱི་འཛིན་སྟངས་དོན་མཐུན་འདི་ཉིད་ཅིས་ཀྱང་དགོས་སོ་ཞེས་གནས་ལུགས་ཀྱི་དོན་ཇི་བཞིན་དུ་གཟིགས་པའི་དམ་པ་དུ་མས་ནན་ཏན་དུ་སྒྲུབ་པར་མཛད་པ་ལྟར་ཡིན་པས་གལ་ཤིན་ཏུ་ཆེ་ལ་དང་པོའི་ལས་ཅན་ནམ་རིམ་གྱིས་པའི་གང་ཟག་ལས་དང་པོ་བ་རྣམས་ཐར་ལམ་ལ་འཇུག་པའི་སྒོ་ཡང་དག་པ་གོལ་ས་དང་འཆུགས་ས་ཅུང་ཟད་ཙམ་ཡང་མེད་པ་ནི་བདག་མེད་པར་རྟོགས་པའི་འཛིན་སྟངས་དོན་མཐུན་ལ་གོམས་པ་འདི་ཁོ་ན་ཡིན་ན། ལས་དང་པོ་བ་ཉིད་ཀྱི་གནས་སྐབས་ནས་ཀྱང་དེ་ཉིད་ངེས་པར་སྤོང་ལ་རང་གར་འཇོག་པ་དགོས་ཞེས་སྨྲ་ཞིང་སྟོན་པ་འདི་ནི་ཐར་འདོད་ཀྱི་གང་ཟག་བསླུ་བའི་ཕྱིར་བདུད་ཀྱི་གསང་ཚིག་རྔམ་པོ་ཆེ་བཀྱེ་བ་ཡིན་པས་རིམ་གྱིས་པའི་གང་ཟག་ལས་དང་པོ་པས་ཉན་པར་ཡང་མི་འོས་ན་ནན་ཏན་གྱིས་ཉམས་སུ་ལེན་མི་འོས་པར་ལྟ་ཡང་ཅི་སྨོས་པས་བག་ཡོད་པར་བྱའོ། །གཉིས་པ་འཛིན་སྟངས་དེས་དྲང་སོགས་ཚིགས་བཅད་བཞིས་བསྟན་ཏེ། ཆོས་ཀུན་བདག་མེད་པའི་འཛིན་སྟངས་དོན་མཐུན་དེས་དྲང་སྟེ་འཁོར་འདས་ཀྱི་ཆོས་ཀུན་གདོད་མ་ཉིད་ནས་རང་རང་གི་ངོ་བོས་སྟོང་པས་བདེན་པས་སྟོང་པ་ཉིད་ཡིན་པ་ལ་ངེས་ཤེས་སུས་ཀྱང་མི་འཕྲོག་པ་མཆོག་ཏུ་གྱུར་པ་འདྲོངས་པའི་ཚེ་ན། ད་གདོད་གཞན་སེལ་གྱི་མེད་དགག་སྟོང་རྐྱང་ཙམ་པོ་བ་རྣམ་པར་རྟོག་པའི་གཟུགས་བརྙན་དེ་ནི་ཆོས་ཀུན་གྱི་གནས་ལུགས་མཐར་ཐུག་ཡང་དག་པ་མ་ཡིན་པས་དེར་ཡང་འཛིན་པ་མེད་པར་འཛིན་པའི་མཐའ་ཤིན་ཏུ་ཕྲ་བའང་སྤངས་ཏེ་སྒྲོ་འདོགས་སོ་གཉིས་པོ་ཐམས་ཅད་དང་བྲལ་བ་ཡི་སྤྲོས་པ་ཀུན་དང་བྲལ་བའི་སྟོང་པ་ཉིད་སྣང་སྟོང་ཟུང་འཇུག་མཉམ་ཉིད་ཆེན་པོ་དེ་ཉིད་གཏན་ལ་ཕབ་ཅིང་ཡང་དག་པར་མཉམ་པར་བཞག་སྟེ་སྒོམ་པར་བྱ་དགོས་སོ། །དེ་ལྟར་ན་ཆོས་ཀུན་གདོད་མ་ནས་མ་སྐྱེས་པར་ངོ་བོས་སྟོང་པས་བདེན་སྟོང་ཡིན་པར་ཕུ་ཐག་གཏིང་ནས་ཆོད་ཅིང་ངེས་ཤེས་མཆོག་ཏུ་གྱུར་པ་འདྲོངས་ནས་སླར་ཡང་སྟོང་པ་དེ་ཉིད་རྟེན་འབྱུང་གི་སྣང་བ་འགགས་མེད་ཉིད་དུ་རང་ཤར་བ་ཡི་ཟུང་འཇུག་གི་དོན་ལ་ངེས་ཤེས་ཡང་དག་པ་བསྐྱེད་དེ་གོམས་པར་གྱུར་པ་ལ་བརྟེན་ནས་མཐར་སྣང་བ་དང་སྟོང་པའི་ཕྱོགས་གང་དུའང་ཅིར་ཡང་མི་འཛིན་པས་སྤྲོས་བྲལ་མཉམ་པ་ཆེན་པོའི་དོན་ཇི་ལྟ་བར་རྟོགས་པར་སྨྲ་བ་དེ་ཉིད་ལ་ནི་དཔེར་ན་མེ་ཡི་ཁ་ནས་ལན་གྲངས་དུ་མར་སྦྱངས་ཤིང་དག་པའི་གསེར་བཙོ་མ་ཇི་ལྟ་བ་བཞིན་དུ་ཡིད་ཆེས་མཆོག་ཏུ་གྱུར་པ་སྐྱེ་བར་རུང་མོད་ཀྱི། དེ་ལས་གཞན་དུ་ཆེས་ཆེར་ཟབ་པའི་གནས་ལུགས་སྣང་སྟོང་དབྱེར་མེད་སྤྲོས་བྲལ་མཉམ་པ་ཆེན་པོའི་གནད་དམ་པ་འཕགས་བོད་ཀྱི་མཁས་ཤིང་གྲུབ་པའི་དབང་ཕྱུག་ཆེ་བའམ་ཆེན་པོ་རྣམས་ཀྱིས་ཡུན་རིང་པོའི་བར་དུ་བརྩོན་པ་ཆེན་པོས་འབད་དེ་རྟོགས་པར་བྱ་དགོས་པའི་དོན་ཕུལ་དུ་བྱུང་བ་དེ་ཉིད་ཀྱེ་མ་དེང་གི་དུས་སུ་བླུན་པོས་ཀྱང་འབད་མི་དགོས་པར་ཡུད་ཙམ་ཞིག་ལ་ཇི་བཞིནདུ་རྟོགས་པར་སྨྲ་བ་འདི་ལ་བདེན་ནམ་མི་བདེན་སྙམ་དུ་ཐེ་ཚོམ་གཡོ་བར་འགྱུར་བས་ཡིད་ཆེས་སྐྱེ་བར་དཀའ་བ་ཞིག་གོ། །གསུམ་པ། དངོས་གཞི་སྣང་སྲིད་སོགས་ཚིགས་བཅད་གཅིག་དང་རྐང་པ་གསུམ་གྱིས་བསྟན་ཏེ། གནས་ལུགས་ལྟ་བའི་དངོས་གཞི་མཐར་ཐུག་པ་ནི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཀུན་གདོད་མ་ནས་ཡོད་མེད་ལ་སོགས་པ་གཉིས་ཆོས་ཀྱི་སྤྲོས་པ་ཀུན་ལས་འདས་པ་དོན་གྱི་གཤིས་ལུགས་མངོན་དུ་གྱུར་པ་ཡིན་པས་དེ་ལ་ཡོད་མེད་ལ་སོགས་པའི་སྤྲོས་པ་ཅིར་ཡང་མ་གྲུབ་པ་ཡིན་ན་དེ་ལ་སྣང་སྟོང་ལ་སོགས་པ་ཕྱོགས་རེར་རྟོག་ཅིང་འཛིན་པ་ཐམས་ཅད་ནི་སྤྲོས་པ་དང་བཅས་པར་འགྱུར་ལ། དེ་ཡི་ཕྱིར་ན་མཐར་ཐུག་དཔྱོད་པའི་རིགས་པས་འཁོར་འདས་ཀྱི་ཆོས་མ་ལུས་པ་ཀུན་ལ། གཤིས་ལུགས་ཆོས་ཀྱི་དབྱིངས་བཞིན་དུ་ཡང་དག་པར་རྣམ་པར་དཔྱད་ཅིང་གཏན་ལ་དབབ་པའི་ཚེ་ཡོད་མེད་ལ་སོགས་པའི་གཉིས་ཆོས་ཀྱི་མཐའ་ཡི་སྤྲོས་པ་གང་ཅིར་ཡང་གྲུབ་པ་མ་མཐོང་བས་ཆོས་ཀྱི་དབྱིངས་སྤྲོས་བྲལ་མཉམ་པ་ཆེན་པོ་ཇི་བཞིན་དུ་གསལ་བར་མཐོང་བ་ལ་ཡུལ་ཅན་བློ་ཡིས་ཅིར་ཡང་འཛིན་པའི་སྤྲོས་པ་ཞིག་ག་ལ་སྐྱེ་སྟེ་སྐྱེ་བ་གནས་མེད་ཅིང་སྐབས་མེད་པ་ཡིན་པས་འཛིན་སྟངས་ཀུན་དང་བྲལ་བའི་མཉམ་བཞག་གི་ཡེ་ཤེས་མཐར་ཐུག་པ་གཏན་ལ་ཕེབས་པ་ཡིན་ནོ། །གཉིས་པ་ལ་གཉིས། རྟོགས་དོན་ལྟ་བའི་ཤན་འབྱེད་སྤངས་རྟོགས་ཀྱི་བོགས་སྐྱེད་ལས་དབྱེ་བར་བསྟན་པ། སྒོམ་པའི་མངོན་རྟོགས་ཀྱི་ཤན་འབྱེད་སྐྱོན་ཡོན་འཕེལ་འགྲིབ་ལས་དབྱེ་ཚུལ་བསྟན་པའོ། །དང་པོ། འོན་ཀྱང་མཐའ་བཞིའི་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། འཁོར་འདས་ཀྱི་ཆོས་ཀུན་གདོད་ནས་སྤྲོས་པ་ཀུན་དང་བྲལ་བས་མཐར་འཛིན་སྐྱེ་བའི་གནས་མེད་མོད། འོན་ཀྱང་སྐལ་ལྡན་འགའ་ལས་ཀུན་གྱིས་དེ་ལྟར་འབད་མེད་དུ་རྟོགས་པར་དཀའ་བས་ན་ཡོད་མེད་ལ་སོགས་པའི་མཐའ་བཞིའི་སྤྲོས་པ་ཀུན་དང་བྲལ་བའི་གནས་ལུགས་རྟོགས་པའི་ཚུལ་ནི། དང་པོ་ཐོས་བསམ་ཡང་དག་པ་ལ་བརྟེན་ནས་ཡོད་མེད་ལ་སོགས་པ་མཐའ་བཞི་སོ་སོར་དཔྱད་པའི་རིགས་པས་ཚུལ་བཞིན་དུ་དྲངས་པའི་མཐའ་བྲལ་སྣང་སྟོང་ཟུང་འཇུག་གནས་ལུགས་མཉམ་པ་ཉིད་ལ་ངེས་ཤེས་མཆོག་ཏུ་གྱུར་པ་སྐྱེས་པར་གྱུར་ན། དེ་ལ་གོམས་ཤིང་བློ་གྲོས་ལས་སུ་རུང་བ་ལས་ནི་རང་བྱུང་གདོད་མའི་གནས་ལུགས་འོད་གསལ་ཆེན་པོ་ཡང་དག་པར་མཐོང་བའི་ཤེས་རབ་ཀྱི་ལྷག་མཐོང་གི་ཡེ་ཤེས་མར་མེ་འོད་འབར་ཞིང་གསལ་བའི་བཞིན་དུ་མཆོག་ཏུ་གསལ་ཞིང་དག་པ་ཕྱིན་ཅི་མ་ལོག་པ་ཉིད་སྐྱེ་བར་འགྱུར་ལ། ལྷག་མཐོང་དེ་དང་རྣམ་པ་ཤིན་ཏུ་འགལ་བ་ཡི་ཡོད་མེད་ལ་སོགས་པའི་མཐའ་བཞིའི་སྤྲོས་པ་ལ་འཛིན་ཅིང་ཞེན་པའི་བློ་ངན་མུན་པའི་སྨག་རུམ་འཐུག་པོ་མཐའ་དག་དྲུང་ནས་འབྱིན་ཅིང་སྤོང་བར་བྱེད་པའི་གཉེན་པོ་དངོས་ནི་ལྷག་མཐོང་གི་ཡེ་ཤེས་འདི་ཁོ་ན་ཡིན་པས་ནམ་ཡང་སྒོམ་པ་ངེས་ཤེས་དང་མ་བྲལ་བ་གལ་ཆེ་བས་ངེས་ཤེས་མཆོག་ཏུ་སྐྱེ་བ་ཞིག་ངེས་པར་དགོས་ཀྱི་གཞན་དུ་མཐའ་བཞིའི་སྤྲོས་པ་ཐམས་ཅད་ཀུན་དུས་ཅིག་ཆར་ཉིད་དུ་ཁེག་ནས་མེད་པ་བློ་ལས་འདས་པའི་ཆོས་ཉིད་གཉུག་མའི་ཆོས་དབྱིངས་རིག་སྟོང་དབྱེར་མེད་བསམ་བརྗོད་ལས་འདས་པའི་ཡེ་ཤེས་དེ་ཉིད་འཆིང་བ་ཀུན་ལྡན་གྱི་སོ་སོའི་སྐྱེ་བོའི་ས་ཐ་མལ་བའི་དུས་འདི་ཉིད་ན་ཅིག་ཆར་རམ་ཅར་ཕོག་གི་ཚུལ་གྱིས་ཇི་ལྟ་བ་བཞིན་དུ་མཐོང་བར་དཀའ་བས་ན་དང་པོའི་ལམ་ཅན་རྣམས་ཀྱིས་མཐའ་བཞིའི་སྤྲོས་པ་རྣམས་རིམ་གྱིས་སམ་རེས་འཇོག་ཏུ་འགོག་པར་བྱེད་པ་འདི་ནི་ཐོས་བསམ་གྱི་སྒོ་ནས་གཏན་ལ་ཕབ་པའི་ལྟ་བའི་གནད་དོན་ཚུལ་བཞིན་དུ་སྒོམ་པའི་ལུགས་སྲོལ་རྨད་དུ་བྱུང་བ་ཡིན་པས་དེ་ལ་ཅི་ཙམ་གོམ་པ་དེ་བཞིན་དུ་ཅིར་ཡང་མ་གྲུབ་པས་མཐའ་དང་བྲལ་བའི་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ཀྱི་ལྟ་བ་ལ་ངེས་ཤེས་ཟབ་མོ་ཇེ་བས་ཇེ་གསལ་དང་གོང་ནས་གོང་འཕེལ་དུ་གྱུར་ནས་ཡོད་པ་དང་མེད་པ་ལ་སོགས་པའི་ཕྱིན་ཅི་ལོག་གི་སྒྲོ་འདོགས་བཞིའམ་བརྒྱད་དམ་སོ་གཉིས་པོ་རིམ་པར་བསྣུབ་པར་བྱས་ནས་གནས་ལུགས་རྟོགས་པའི་བློ་གྲོས་ཡར་ངོའི་ཟླ་བ་ལྟ་བུར་འཕེལ་ཏེ་སྤང་རྟོགས་ཀྱི་ཡོན་ཏན་ཕུན་སུམ་ཚོགས་པ་གསར་དུ་རྒྱ་ཆེར་སྐྱེ་བར་འགྱུར་ལ། གཞན་དུ་གནས་ལུགས་ཀྱི་ལྟ་བ་ཇི་བཞིན་མ་རྟོགས་ཤིང་ངེས་ཤེས་མེད་པས་བླུན་པོས་རང་གར་ཅིར་ཡང་མི་འཛིན་པའི་སྟོང་པར་ལྟ་བས་རྒྱུ་འབྲས་དང་ཚོགས་གཉིས་སོགས་ཁྱད་དུ་གསོད་པའི་ལྟ་བ་ངན་པ་ལ་ཇི་ཙམ་གོམས་ཀྱང་ཕྱི་ནང་གི་དངོས་པོ་མཐའ་དག་གདོད་ནས་ཅིར་ཡང་མ་གྲུབ་པའི་གནས་ལུགས་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་སྐྱེ་བ་ག་ལ་ཡོད་དེ་མེད་དོ། །དེ་མེད་པས་ལྷག་མཐོང་གི་ཡེ་ཤེས་འབྱུང་བ་གནས་མེད་ཅིང་སྐབས་མེད་པ་དེས་ན་ཡོད་མེད་ལ་སོགས་པའི་ཕྱིན་ཅི་ལོག་ཏུ་སྒྲོ་འདོགས་པའི་སྒྲིབ་པ་རྣམས་སྤོང་བར་མི་ནུས་པས་སྤང་རྟོགས་ཀྱི་ཡོན་ཏན་གང་ཅུང་ཟད་ཀྱང་སྐྱེ་བར་མི་འགྱུར་རོ། །གཉིས་པ། དེ་ཕྱིར་འདི་གཉིས་སོགས་ཚིགས་བཅད་གསུམ་དང་རྐང་པ་གཉིས་ཀྱི་བསྟན་ཏེ། དེ་ཕྱིར་མཁས་པས་ཡང་དག་པར་རྟོགས་པའི་སྒོམ་པ་དང་བླུན་པོས་ལོག་པར་རྟོག་པའི་སྒོམ་པ་འདི་གཉིས་མི་འདྲ་བའི་ཁྱད་པར་ཡང་དཔེར་ན་དུ་བའི་རྟགས་ཡང་དག་ལས་ལྐོག་གྱུར་གྱི་མེ་ཡོད་པར་དཔོག་པ་ལ་མི་འཁྲུལ་བཞིན་དུ་སྤངས་དང་རྟོགས་པའི་ཡོན་ཏན་གོང་ནས་གོང་དུ་འཕེལ་ཞིང་བོག་སྐྱེད་ཡོད་པའི་ཚུལ་གྱི་ལུས་ངག་གི་འབྲས་བུའི་རྟགས་ལས་མི་འཁྲུལ་བར་ཤེས་ནུས་ཏེ། རྒྱུ་མཚན་གང་གི་ཕྱིར་ན་བླུན་སྒོམ་ལོག་པར་རྟོག་པས་རྣམ་རྟོག་ཐ་མལ་པ་ལ་ཅི་ཙམ་སྒོམ་ཀྱང་སྤངས་དང་རྟོགས་པའི་ཡོན་ཏན་སྐྱེ་བའི་རྒྱུ་མིན་ལ། དེར་མ་ཟད་སྤང་རྟོགས་ཀྱི་ཡོན་ཏན་སྐྱེ་བའི་གེགས་སུའང་ཆེ་བ་ཡིན་པའི་ཕྱིར། དཔེར་ན་རྒྱ་ཇ་ཚགས་ལ་དྲངས་ན་སྙིང་པོ་ཟག་ཅིང་སྙིགས་མ་ལུས་པ་བཞིན་དུ་ལུང་དང་རྟོགས་པའི་ཡོན་ཏན་འགྲིབ་ཅིང་ཆགས་སྡང་ལ་སོགས་པའི་ཉོན་མོངས་པ་རྣམས་ཆེས་ཆེར་འཕེལ་བར་འགྱུར་བ་དང་། ཁྱད་པར་དུ་དགེ་སྡིག་རྒྱུ་འབྲས་བསླུ་མེད་ལ་ཡིད་ཆེས་ཆུང་བར་གྱུར་ནས་དགེ་སྡིག་རྒྱུ་འབྲས་ལ་མི་འཛེམས་པས་དགེ་བ་འགྲིབ་ཅིང་ཉོན་མོངས་པ་འཕེལ་བར་འགྱུར་བ་ཡིན་ལ། དེ་ལྟར་མ་ཡིན་པར་མཁས་པས་ཡང་དག་པར་རྟོགས་པའི་ལྟ་བའི་མིག་མཆོག་དང་ལྡན་ན་རང་རྒྱུད་ལ་སྔར་མེད་པའི་ཐོས་སོགས་ལུང་གི་ཡོན་ཏན་ཉམས་རྟོགས་ཀྱི་ཡོན་ཏན་གོང་འཕེལ་དུ་འབར་ཞིང་སྐྱེ་བར་འགྱུར་བ་དང་། ཁྱད་པར་དུའང་ཟབ་མོ་སྟོང་པ་ཉིད་མཐོང་བ་དེ་ཡི་ཡོན་ཏན་ལས་སྟོང་ཉིད་ཡིན་པའི་གནད་ཀྱིས་རྟེན་འབྱུང་འགགས་པ་མེད་པའི་དགེ་སྡིག་རྒྱུ་འབྲས་རྟེན་ཅིང་འབྲེལ་འབྱུང་བསླུ་བ་མེད་པ་ཉིད་ལ་སུས་ཀྱང་མི་འཕྲོག་པའི་ཡིད་ཆེས་སྐྱེ་བར་གྱུར་ནས་ལས་རྒྱུ་འབྲས་ལ་བླང་དོར་ཤིན་ཏུ་ཕྲ་བ་ནས་བགྱིད་ཅིང་སྟོང་ཉིད་སྙིང་རྗེའི་སྙིང་པོ་ཅན་ཡིན་པས་བྱམས་དང་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་ངམ་ངམ་ཤུགས་ཀྱིས་སྐྱེས་ཏེ་ཚོགས་གཉིས་ཀྱི་དགེ་བ་གོང་དུ་འཕེལ་ཞིང་ཆགས་སྡང་ལ་སོགས་པའི་ཉོན་མོངས་པ་རྣམས་ཆུང་ཞིང་འགྲིབ་པར་འགྱུར་བ་ནི་སྟོང་ཉིད་རྟོགས་པའི་འབྲས་རྟགས་ཡང་དག་པ་ཉིད་དོ། །གསུམ་པ། དཔྱད་པས་ངེས་ཤེས་སོགས་ཚིགས་བཅད་གཉིས་ཀྱིས་བསྟན་ཏེ། དེ་ལྟར་ཟབ་མོའི་ལུང་གི་སྣང་བ་ལ་བརྟེན་ནས་ཡང་དག་པའི་རིགས་པས་དཔྱད་པས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ཐེ་ཚོམ་གྱི་སྨག་དང་བྲལ་བའི་ངེས་ཤེས་བཟང་པོ་མཆོག་ཏུ་དྲངས་པར་བྱས་པའི་ངེས་ཤེས་དེ་ཀའི་ངང་ལ་གཞན་དུ་མི་ཡེངས་བར་རྩེ་གཅིག་ཏུ་མཉམ་པར་བཞག་པའི་ཞི་ལྷག་ཟུང་འཇུག་གི་ཏིང་ངེ་འཛིན་ཟབ་མོ་ལ་གོམས་པར་བྱས་ནས་མཐར་རྟོགས་པ་ཀློང་དུ་གྱུར་ནས་སྤྲོས་པ་གང་ཡང་མ་མཐོང་བས་མཚན་མའི་དམིགས་པ་ཐམས་ཅད་ཞི་ཞིང་དེ་ཉིད་གནས་ལུགས་ཚུལ་བཞིན་དུ་མཐོང་བ་དམ་པའི་དོན་དུ་གསུངས་པ་གང་དེ་ཇི་ལྟ་བར་མངོན་དུ་གྱུར་པས་མཐོང་དོན་དེ་ཡང་སྣང་སྟོང་ལ་སོགས་པ་གང་གི་ཕྱོགས་སུའང་མ་ལྷུང་བ་ཡིན་པས་སྣང་སྟོང་སོགས་ཅིར་ཡང་བློས་བཟུང་བ་མེད་མོད་ཀྱི་དེ་ལྟར་ནའང་ལྐུགས་པས་བུ་རམ་གྱི་རོ་མྱོང་བ་ན་འདི་ཞེས་སྨྲར་མི་བཏུབ་ཀྱང་རང་ལ་ཡིད་ཆེས་ཐོབ་ཏུ་ཡོད་པ་ལྟར་སྣང་སྟོང་ཟུང་འཇུག་སྤྲོས་བྲལ་མཉམ་ཉིད་ཆེན་པོ་མ་མཐོང་མཐོང་བ་དམ་པའི་དོན་ལ་ཡིད་ཆེས་གསལ་བར་འབྱུང་བ་ནི། གནས་ལུགས་ལ་མཉམ་པར་བཞག་པའི་སྒོམས་པའམ་སྒོམ་པའི་རྣལ་འབྱོར་ཡང་དག་པ་ལ་བརྟེན་ནས་སྐྱེ་ཡི་རིགས་པས་དཔྱད་པ་ཁོ་ནས་དེ་ལྟར་སྐྱེ་བ་མིན་པས་ཆོས་ཉིད་ཀྱི་གནས་ལུགས་དངོས་སྒོམ་པའི་སྟོབས་ཀྱིས་རྟོགས་པར་འགྱུར་བས་ན་སྒོམ་པ་ཉིད་ལ་འབད་པར་བྱའོ། །གནས་ལུགས་དོན་ལ་མཉམ་པར་འཇོག་པ་ན། །འཛིན་སྟངས་དགོས་དང་མི་དགོས་ཆེར་སྨྲ་ཡང་། །གང་ལའང་ལེགས་པར་རྟོགས་དང་ཉེས་པར་རྟོག །ཤན་འབྱེད་བློ་གྲོས་དྲི་མེད་མཆོག་གི་དཔྱིད། །ཅེས་ཀྱང་སྨྲས་སོ། །དྲི་ལན་བཞི་པ་བསྒོམ་པ་དཔྱད་འཇོག་གང་འཐད་ཀྱི་ལན་ལ་གསུམ། ཕྱོགས་རེར་སོང་བ་གཞན་གྱི་ལུགས་མི་འཐད་པར་བསྟན་པ། གཉིས་ཀ་དགོས་པ་རང་གི་ལུགས་ལུང་རིགས་མན་ངག་གིས་སྒྲུབ་ཚུལ་བསྟན་པ། དེ་གཉིས་ཀྱི་སྐྱོན་ཡོན་ངོས་བཟུང་བའི་ཚུལ་གྱིས་དོན་བསྡུ་བའོ། །དང་པོ། ཐེག་མཆོག་ལྟ་བ་སོགས་ཚིགས་བཅད་བཞིས་བསྟན་ཏེ། ཐེག་མཆོག་ངེས་དོན་ཟབ་མོའི་ལྟ་བ་ཡང་དག་པར་བསྒོམ་པ་ལ་རིགས་པས་དཔྱད་པ་ཁོ་ནས་སྒོམ་པ་དང་མ་དཔྱད་པར་འཇོག་པའམ་བཞག་སྟེ་སྒོམ་པ་གཉིས་གང་འཐད་ཅེ་ན། ལ་ལས་ཆོས་གང་ལའང་སྟོང་མི་སྟོང་སོགས་རིགས་པས་ཅི་ཡང་མི་དཔྱད་པར་མཉམ་པར་བཞག་སྟེ་བསྒོམ་དགོས་ཀྱི་རྣམ་རྟོག་གི་དཔྱད་པས་གནས་ལུགས་ཟབ་མོའི་དོན་མཐོང་བ་ལ་བསྒྲིབས་པར་འགྱུར་བ་ཡིན་པས་ན་མ་དཔྱད་པར་རང་གར་སྤོམ་པོར་ཞོག་དང་དེ་ཁོ་ན་མན་ངག་གི་གནད་དམ་པ་ཡིན་ནོ་ཞེས་ཟེར་བ་དང་། ཡང་ལ་ལས་ཆོས་གང་ལའང་སྟོང་པ་ཉིད་དུ་རིགས་པས་དཔྱད་པ་ཁོ་ན་ཡང་ཡང་བྱེད་དགོས་ཀྱི་རིགས་པས་དཔྱད་པ་དང་བྲལ་བའི་བསྒོམ་པ་ནི་གཉིད་དུ་སོང་བ་ལྟར་ཅི་ཡིན་འདི་ཡིན་མེད་པར་བསྒོམ་པས་ཅི་ཡང་མི་ཕན་པས་དུས་ནམ་དུ་ཡང་རིགས་པས་དཔྱད་པ་ཁོ་ན་དགོས་ཀྱི་དཔྱད་པ་དང་བྲལ་བས་སྟོང་པ་ཉིད་མི་རྟོགས་སོ། །ཞེས་ཟེར་རོ། །དེ་ལ་བསྒོམ་པ་ཡང་དག་པའི་དོན་ལ་དཔྱད་པ་དང་འཇོག་པ་འདི་ཉིད་གང་རུང་ལ་མཐའ་གཅིག་ཏུ་ཞེན་ནས་ཕྱོགས་རེར་ཁོ་ནར་འཛིན་པར་སྒྲུབ་ཏུ་མི་རུང་སྟེ་སྟོང་པ་ཉིད་རིགས་པ་ཡང་དག་པས་གཏན་ལ་མ་དབབ་ཅིང་མ་དཔྱད་པ་ཡི་སྤོམ་པོར་འཇོག་པའི་བསྒོམ་པ་ཕལ་ཆེར་གྱིས་ལེགས་ན་ཞི་གནས་ཙམ་ཞིག་སྟེ་བསམ་གཏན་དང་གཟུགས་མེད་ཀྱི་ཏིང་ངེ་འཛིན་ཙམ་རེ་འགྲུབ་སྲིད་ཀྱང་། དེ་ལ་འབད་དེ་བསྒོམ་པས་སྟོང་པ་ཉིད་ལ་ངེས་ཤེས་ཅུང་ཟད་ཙམ་ཡང་མི་སྐྱེ་བའམ་སྐྱེ་བར་མི་འགྱུར་བས་ན། ཐར་ལམ་ཡང་དག་པ་ཉིད་མཐོང་བའི་མིག་གཅིག་པུར་གྱུར་པ་ནི་སྟོང་པ་ཉིད་ལ་ངེས་ཤེས་ལེགས་པར་སྐྱེས་པ་ཉིད་ཡིན་ན་དེ་སྤང་ནས་ལྷག་མཐོང་གི་ཡེ་ཤེས་རྒྱུད་ལ་མི་སྐྱེ་བས་ཕྱིན་ཅི་ལོག་གི་སྒྲིབ་པ་གང་ཡང་བསལ་མི་ནུས་པའི་ཕྱིར་ཐར་པ་ཙམ་ཡང་མི་ཐོབ་ལ། དེ་ཡི་ཕྱིར་དང་པོ་དཔྱད་དེ་རྟོགས་དགོས་ཀྱང་མཐར་རྟོགས་པ་ཀློང་དུ་གྱུར་པ་ནའང་དཔྱད་པས་གྲུབ་ཟིན་སྒྲུས་པ་ལ་དགོས་པ་གང་ཡང་མེད་ཅིང་འཇོག་པ་ཉིད་དུ་འཐད་པས་དེ་ལྟར་ཤན་ལེགས་པར་ཕྱེད་དེ་རྟོགས་པར་བྱ་དགོས་ཏེ། དཔེར་ན་མིག་གི་རབ་རིབ་སེལ་བའི་ཆེད་དུ་མིག་སྨན་བསྐུ་དགོས་ཀྱང་རབ་རིབ་སངས་པ་ནའང་བསྐུ་བ་དོན་མེད་པ་བཞིན་ཏེ། དཔལ་ལྡན་ཟླ་བས། སོ་སོའི་སྐྱེ་བོ་རྣམས་ནི་རྟོག་པས་བཅིངས། །མི་རྟོག་རྣལ་འབྱོར་པ་ནི་གྲོལ་འགྱུར་བས། །རྟོག་རྣམས་ལོག་པར་གྱུར་པ་གང་ཡིན་ཏེ། །རྣམ་པར་དཔྱོད་པའི་འབྲས་བུར་མཁས་རྣམས་གསུངས། །ཞེས་སོ། །གཉིས་པ་ལ་གཉིས། སྒོམ་པ་ཡང་དག་ལ་དཔྱད་འཇོག་གཉིས་ཀ་དགོས་ཤིང་གང་ཞིག་བསྒོམ་པ་མདོ་སྔགས་ལམ་གྱི་ཟབ་དོན་མདོར་བསྟན་པ། དེ་ཉིད་གསལ་བར་མཐོང་ཕྱིར་ཐབས་དང་བསྒོམ་དོན་ཟབ་མོའི་ཚད་མའི་ལམ་དང་བརྒྱུད་པའི་བཀའ་སྲོལ་ལྟར་རྒྱས་པར་བཤད་པའོ། །དང་པོ། ཆོས་ཀྱི་རང་བཞིན་སོགས་ཚིགས་བཅད་བཅུ་གཉིས་དང་རྐང་པ་གཉིས་ཀྱིས་བསྟན་ཏེ། ཐེག་མཆོག་ངེས་དོན་ཟབ་མོའི་བསྒོམ་པ་ཡང་དག་པ་ལ་ནི། ཐོག་མར་ཆོས་ཐམས་ཅད་ཀྱི་ནི་གནས་ལུགས་རང་བཞིན་སྟོང་པ་ཉིད་རིགས་པ་རྣམ་པར་དག་པས་ཚུལ་བཞིན་དུ་དཔྱད་ནས་གཏན་ལ་འབེབས་པ་དགོས་ཀྱི། དེ་ལྟར་མ་ཤེས་ན་གནས་ལུགས་སྟོང་ཉིད་ཟབ་མོ་ཅི་ཞིག་བསྒོམ་སྟེ་སྒོམ་དུ་མེད་ལ། སྒྲིབ་པ་སྤོང་བ་དང་རྟོགས་པའི་ཡེ་ཤེས་སྐྱེ་བ་ལ་རང་གར་ཐ་མལ་གྱི་རྣམ་རྟོག་གཅིག་ཉིད་ཡང་ནས་ཡང་དུ་སྒོམ་པར་བྱས་པས་ཅི་ལ་ཕན་ཏེ་ཐར་ལམ་གྱི་སྣང་བ་ཅུང་ཟད་ཀྱང་མི་རྙེད་པས། དཔེར་ན་མིག་གཉིས་མེད་པ་ལམ་དུ་ཞུགས་ན་ལམ་ཡང་དག་པ་མི་རྙེད་པ་བཞིན་ནོ། །དེས་ན་འདི་ལྟར་ཐོག་མ་མེད་པ་ནས་བདག་དང་གཞན་དུ་འཛིན་པས་འཁྲུལ་བའི་བག་ཆགས་ཆེས་ཆེར་གོམས་པའི་སྟོབས་ཀྱིས་ཆོས་ཐམས་ཅད་ཀྱི་རང་བཞིན་སྤྲོས་བྲལ་སྟོང་པ་ཉིད་ལས་གོལ་ཏེ་བདག་ཏུ་ལྟ་བ་དང་མཚན་མར་ལྟ་བ་ལ་སོགས་པའི་སྒོ་ནས་ཕྱིན་ཅི་ལོག་པར་ཞེན་པར་གྱུར་པའི་དབང་གིས་དངོས་པོར་འཛིན་པ་ཨ་འཐས་སུ་སོང་བ་འདི་ལ་ཐབས་ཚུལ་ཡང་དག་པའི་རིག་པ་མི་འདྲ་བའི་སྒོ་བརྒྱ་ཕྲག་དག་གིས་འབད་དེ་དཔྱད་ཅིང་མ་བརྟགས་ན་སྤྲོས་བྲལ་སྟོང་པ་ཉིད་ཀྱི་ངོ་བོ་ཚུལ་བཞིན་དུ་རྟོགས་པར་དཀའ་སྟེ། གང་གི་ཕྱིར་ན་འཁྲུལ་བའི་སྣང་བ་ལ་དངོས་པོར་ཞེན་པ་དང་། འཁྲུལ་སྣང་སྟོང་པར་ཤེས་པས་ཡང་དག་པའི་དོན་མཐོང་བ་དག་ཕན་ཚུན་སྣང་མུན་ལྟར་འགལ་བར་གྱུར་པས་ན་ཐོག་མེད་ནས་ཆེས་ཆེར་གོམས་པའི་སྲིད་པའི་སྨག་རུམ་འཐུག་པོ་འདིར། དེ་ཁོ་ན་ཉིད་སྤྲོས་བྲལ་སྟོང་པ་ཉིད་མཐོང་བའི་སྣང་བ་ཡང་དག་པ་ཞིག་ཤིན་ཏུ་རྙེད་པར་དཀའ་བས་སོ། །འོན་ཀྱང་སྔོན་ནས་ལམ་ཡང་དག་པ་ལེགས་པར་སྤྱད་པའི་ལས་ཀྱི་འཕྲོ་བཟང་པོ་སད་ཅིང་རྒྱུད་ལེགས་པར་སྨིན་ཟིན་པའི་སྐལ་ལྡན་མཆོག་དང་། རྟོགས་ལྡན་བླ་མའི་བྱིན་རླབས་ཟབ་མོ་སྙིང་ལ་འཕོས་པ་ལས་ནི་རང་གི་སེམས་ཀྱི་བྱུང་ས་དང་གནས་ས་དང་འགྲོ་འོང་མེད་པ་ཙམ་ཡང་དག་པར་བརྟགས་ཤིང་དཔྱད་པར་བྱས་པས་ཆོས་ཀུན་གདོད་ནས་སྤྲོས་ཀུན་བྲལ་བས་བདེན་པས་སྟོང་པ་ཉིད་ལ་ངེས་ཤེས་བཟང་པོས་སུས་ཀྱང་མི་འཕྲོག་པ་སྐྱེ་ནས་གནས་ལུགས་ཇི་བཞིན་དུ་གཏན་ལ་ཕེབས་པར་གྱུར་ནས་གྲོལ་བ་ཅིག་ཅར་དུ་ཐོབ་པར་འགྱུར་བའང་སྲིད་མོད་ཀྱི་སྐལ་བ་བཟང་པོའི་གང་ཟག་དེ་འདྲ་བརྒྱ་ལམ་ན་སྲིད་མཐའ་མ་བཀག་པས་རེས་འགའ་ཙམ་སྟེ་གང་ཟག་མཆོག་དམན་མེད་པར་ཀུན་གྱིས་དེ་ལྟར་སྤྲོས་ཀུན་བྲལ་བའི་སྟོང་པ་ཉིད་རྟོགས་པར་མི་ནུས་སོ། །དེས་ན་ཐེག་མཆོག་རྫོགས་པ་ཆེན་པོའི་རང་ལུགས་ཀྱི་འཁོར་འདས་ཀྱི་ཆོས་ཀུན་ཀ་ནས་དག་པའི་སྤྲོས་བྲལ་བློ་འདས་ཆེན་པོར་ཐེ་ཚོམ་ཅུང་ཟད་ཙམ་ཡང་མེད་པར་གདར་ཤ་གཏིང་ནས་ཆོད་པར་བྱེད་པ་ལ། དབུ་མའི་མཐར་ཐུག་ཐལ་འགྱུར་བའི་ལྟ་བ་ཡེ་སྟོང་སྤྲོས་བྲལ་ཆེན་པོར་དཔྱད་པ་མཐར་ཕྱིན་པ་ཞིག་དགོས་ཏེ། ཡུལ་ཆོས་དབྱིངས་རང་གི་ངོ་བོ་སྟོང་པ་ཉིད་སྤྲོས་པ་ཐམས་ཅད་དང་བྲལ་བ་ཡིན་པ་ཙམ་གྱི་ཆ་ནས་བསྐྲུན་ན་ནི་རྫོགས་ཆེན་གྱི་ཀ་དག་དང་ཐལ་འགྱུར་བའི་སྤྲོས་བྲལ་དེ་གཉིས་ལ་ཁྱད་པར་ཅི་ཡང་མེད་དོ་ཞེས་ཡུལ་ཆོས་དབྱིངས་ངོ་བོས་སྟོང་པའི་ཆ་ནས་གསུངས་པའི་ཕྱིར་རོ། །འོན་ཀྱང་ངོ་སྤྲོད་སོགས་ཀྱི་ཐབས་ཟབ་མོའི་གནད་ལས་རྟོགས་པའི་ཡེ་ཤེས་ཡང་དག་པར་སྐྱེ་བ་ལ་ནི་ཁྱད་པར་ཡོད་དེ། ངོ་བོ་སྟོང་པར་རམ་སྟོང་པ་ཕྱང་ཆད་དུ་འཛིན་ཅིང་ཞེན་པ་བཟློག་པའི་ཕྱིར་དུ་གསང་སྔགས་རྡོ་རྗེའི་ཐེག་པ་ལས་ནི་བདེ་བ་ཆེན་པོའི་ཡེ་ཤེས་སམ་འོད་གསལ་བའི་ཡེ་ཤེས་སམ་རིག་པ་རང་བྱུང་གི་ཡེ་ཤེས་འགྱུར་བ་མེད་པ་ཉིད་གསལ་བར་བསྟན་ཏེ། དེ་ལྟར་བདེ་བའི་ཡེ་ཤེས་དང་སྟོང་པའི་དབྱིངས་གཉིས་ཡེ་ནས་གཉིས་སུ་དབྱེར་མེད་པའི་ཆོས་ཀྱི་དབྱིངས་ཟུང་འཇུག་མཉམ་པ་ཆེན་པོ་ཡུལ་དང་ཡུལ་ཅན་གཉིས་སྣང་གི་འཛིན་པ་ཐམས་ཅད་དང་བྲལ་བ་ཡི་ཚུལ་གྱིས་མངོན་སུམ་དུ་ཉམས་སུ་མྱོང་བར་བྱེད་པ་ནི་རྡོ་རྗེའི་ཐེག་པ་སྤྱི་དང་མཐར་ཕྱིན་པར་རྩལ་དུ་བཏོན་པ་ནི་ཨ་ཏི་ཡོ་ག་ཁོ་ནའི་ཁྱད་ཆོས་བླ་ན་མེད་པའོ། །དེ་ཡི་ཕྱིར་དབུ་མ་ཆེན་པོའི་སྐབས་སུ་འགགས་པ་མེད་པའི་སྣང་བ་དང་། ཕྱག་རྒྱ་ཆེན་པོ་ལས་ནི། རང་བཞིན་འོད་གསལ་གྱི་ཡེ་ཤེས་དང་། རྫོགས་པ་ཆེན་པོའི་སྐབས་སུ་རིག་པ་རང་བྱུང་གི་ཡེ་ཤེས་གསུམ་དུ་བསྟན་པ་དེའང་བདེ་བ་ཆེན་པོའི་ཡེ་ཤེས་འདུས་མ་བྱས་པ་དེ་ཡི་མཚན་གྱི་རྣམ་གྲངས་ཙམ་ཡིན་དོན་གྱི་ངོ་བོ་ལ་ཐ་དད་མེད་པ་ཉིད་དོ། །དེས་ན་འགགས་པ་མེད་པའི་སྣང་ཆ་ལོངས་སྤྱོད་རྫོགས་པའི་སྐུ་ལ་སོགས་པ་གཟུགས་ཀྱི་སྐུ་འདིས་ནི་སྲིད་པ་འཁོར་བ་ཇི་སྲིད་མ་སྟོང་པ་དེ་སྲིད་དུ་གནས་སྐབས་ཀྱི་ཕན་པ་དང་མཐར་ཐུག་གི་བདེ་བ་ལ་འགོད་པའི་ཕྲིན་ལས་མཐའ་དང་བྲལ་བ་ཡིས་ཕྱོགས་དང་རིས་མེད་པའི་གདུལ་བྱ་དག་པ་དང་མ་དག་པའི་འགྲོ་བ་ཀུན་དུས་རྟག་པ་རྒྱུན་གྱི་འཁོར་ལོར་རྒུད་པ་མཐའ་དག་ཀུན་ལས་སྐྱོབས་པར་མཛད་པ་ཡིན་པས་ན་མཐར་ཐུག་གི་བདེ་བ་ཆེན་པོ་དེ་ཉིད་ཐུགས་རྗེ་ཆེན་པོའི་བདག་ཉིད་དམ་དམིགས་པ་མེད་པའི་སྙིང་རྗེའི་རང་བཞིན་ཅན་དུ་གྱུར་པ་ཉིད་ཡིན་ནོ། །དེ་ཡི་ཕྱིར་ན་རང་བཞིན་ནམ་ངོ་བོ་ཉིད་ཀྱིས་ཀྱང་སྲིད་ཞིར་ཏེ་སྲིད་ཞིའི་མཐའ་གང་དུའང་མི་གནས་པའི་སྟོང་དང་སྙིང་རྗེ་དབྱེར་མེད་དམ་བདེ་སྟོང་ཟུང་འཇུག་གི་ཡེ་ཤེས་ཆེ་བའམ་ཆེན་པོ་འདུས་མ་བྱས་པ་ཉིད་གཞི་ལ་བྲི་གང་དང་བྲལ་བར་ཇི་ལྟར་བཞུགས་པ་དེ་ལྟར་བདེ་སྟོང་ལམ་གྱི་ངོ་བོ་སྟོང་པའི་དབྱིངས་ཨེ་དང་རང་བཞིན་འོད་གསལ་བདེ་བ་ཆེན་པོ་ཡེ་ཤེས་ཝཾ་གྱིས་ཏེ་བདེ་སྟོང་ཟུང་འཇུག་གམ་དབྱེར་མེད་ཀྱི་ཡེ་ཤེས་ཀྱིས་སྒྲུབས་པས་སྙིགས་དུས་ཀྱི་ཚེ་ཐུང་འདི་ཉིད་ལ་ཡང་ཟུང་འཇུག་རྡོ་རྗེ་འཆང་གི་གོ་འཕར་འབྲས་བུ་བླ་ན་མེད་པ་དེ་ཉིད་མངོན་དུ་འགྱུར་བ་ཡིན་ནོ། །དེ་ལྟར་ན་གཞི་ལམ་འབྲས་བུ་གསུམ་ཆར་ངེས་པའི་དོན་ཉིད་དུ་ན་ཐ་དད་པར་དབྱེར་མི་ཕྱེད་པའི་ཟུང་འཇུག་བསམ་གྱིས་མི་ཁྱབ་པའི་ཡེ་ཤེས་ཐབས་མཆོག་རྡོ་རྗེའི་ལེགས་པ་ཡི་བརྗོད་བྱ་ཟབ་མོ་མཐར་ཐུག་གི་འབྲས་བུ་དབང་བཞི་པའམ་བཞི་པའི་དབང་གི་ལམ་མཆོག་རིག་སྟོང་དབྱེར་མེད་རང་བྱུང་གི་ཡེ་ཤེས་དེ་ཉིད་རྒྱུད་གཞན་ཆེན་པོ་རྣམས་སུའང་གབ་ཅིང་སྦས་པ་ཉིད་དུ་གྱུར་ཀྱང་མ་གབ་མ་སྦས་པར་དེ་ཁོ་ན་ཤིན་ཏུ་གསལ་བར་རྩལ་དུ་བཏོན་ནས་སྟོན་པར་གྱུར་པ་ནི་ཐེག་མཆོག་འོད་གསལ་སྙིང་པོ་ཨ་ཏི་རྡོ་རྗེ་རྩེ་མོའི་རང་ལུགས་སྡེ་གསུམ་རྫོགས་པ་ཆེན་པོ་ཁོ་ནར་ངེས་པའི་ཕྱིར་ན་འདི་ནི་མཐར་ཐུག་ཐེག་པ་མ་ལུས་པའི་སྐྱེལ་སོ་ཕུལ་དང་མཆོག་ཏུ་གྱུར་པ་ཡིན་པས་གཞན་དང་ཐུན་མོང་མ་ཡིན་པའི་འབྲས་བུའི་ཐུས་ཀ་བླ་ན་མེད་པ་ཉིད་དུ་མཐོང་ནས་ཇི་བཞིན་དུ་གཏན་ལ་ཕེབས་པ་ཞིག་དགོས་སོ། །གཉིས་པ་ལ་གཉིས། གང་གིས་སྒོམས་ཤིང་རྟོགས་པ་ཐབས་མཆོག་ལམ་གྱི་ངོ་བོ་སྤྱིར་བསྟན་པ། གང་ཞིག་སྒོམ་ཞིང་རྟོགས་པ་བླ་མེད་ཐེག་མཆོག་རྒྱལ་པོའི་དགོངས་དོན་བྱེ་བྲག་ཏུ་དབྱེ་བའོ། །དང་པོ་ལ་གསུམ། ཐོག་མར་ལམ་མཆོག་ངེས་ཤེས་བཟང་པོ་འདྲེན་ཕྱིར་ཟབ་དོན་རིགས་པས་དཔྱད་དེ་ཇི་ལྟར་སྒོམ་ཚུལ། བར་དུ་ངེས་ཤེས་ཟབ་མོ་གོང་དུ་འཕེལ་ཞིང་སྒྲོ་འདོགས་སེལ་ཕྱིར་དཔྱད་འཇོག་སྤེལ་མར་བྱས་ཏེ་ལེགས་པར་སྒོམ་ཚུལ། ཐ་མར་ངེས་ཤེས་ངང་གིས་གསལ་ཞིང་འཕགས་པའི་རྟོགས་རིགས་ཐོབ་ཚེ་བཞག་ནས་སྒོམ་གྱི་དཔྱད་པ་དོན་མེད་པར་བསྟན་པའོ། །དང་པོ། ཇི་སྲིད་ངེས་ཤེས་སོགས་ཚིགས་བཅད་བདུན་དང་རྐང་པ་གཅིག་གིས་བསྟན་ཏེ། དེ་ལ་ལམ་གྱི་འདྲེན་པ་མཆོག་ཏུ་གྱུར་པ་ནི་ངེས་ཤེས་ཡིན་པས་དང་པོར་ཇི་སྲིད་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་པའི་ཤེས་པ་ཐེ་ཚོམ་དང་བྲལ་བ་མ་སྐྱེས་ཀྱི་བར་དུ་ཐབས་སྣ་ཚོགས་དང་རིགས་པ་མང་པོས་ཚུལ་བཞིན་དུ་དཔྱད་པས་ངེས་ཤེས་བཟང་པོ་དྲངས་དགོས་ལ་ངེས་ཤེས་ཡང་དག་པར་སྐྱེས་བར་གྱུར་ན་ངེས་ཤེས་དེའི་ངང་དུ་གཞན་ལ་མི་ཡེངས་པར་ངེས་ཤེས་དེ་ཉིད་དང་མ་འབྲལ་བའི་ཚུལ་གྱིས་རྩེ་གཅིག་ཏུ་སྒོམ་པ་ལ་བརྩོན་པར་བྱ་ཞིང་། དེ་ལྟར་སྒོམ་པས་ངེས་ཤེས་བཟང་པོ་ཇེ་བས་ཇེ་གསལ་དུ་གྱུར་ནས་མར་མེ་འོད་གསལ་བ་ལྟ་བུའི་སྒོ་ནས་རྒྱུན་ཆད་པ་མེད་པར་གོང་ནས་གོང་དུ་འཕེལ་ན། དེ་ཁོ་ནས་ཡང་དག་པ་མིན་པར་ཕྱིན་ཅི་ལོག་ཏུ་སྒྲོ་འདོགས་པའི་གཉིས་ཆོས་ཀྱི་རྟོག་པ་ཕྲ་རགས་ཐམས་ཅད་བསྣུབ་པར་བྱེད་པ་ཡིན་པས་དེ་ཉིད་ལ་དུས་རྟག་ཏུ་བརྩོན་པ་དྲག་པོས་ནན་ཏན་གྱིས་འབད་པར་བྱ་བ་ཁོ་ན་གལ་ཆེ་ལ། ངེས་ཤེས་དེ་དང་ནམ་བྲལ་ན་ཡང་སླར་ཡང་དཔྱད་པས་དེ་ཉིད་དྲངས་བར་བྱས་ཏེ་སྒོམ་པར་བྱ་དགོས་སོ། །དེས་ན་རིམ་གྱིས་གང་ཟག་གིས་དང་པོར་ཟབ་མོའི་ལུང་གི་སྣང་བ་ལ་བརྟེན་ནས་རིགས་པ་མང་དག་པས་འཁོར་འདས་ཀྱི་ཆོས་ཀུན་སྣང་སྟོང་དབྱེར་མེད་དམ་ཟུང་འཇུག་སྤྲོས་བྲལ་མཉམ་པ་ཉིད་དུ་གཏན་ལ་དབབ་པའི་དཔྱད་པ་ཁོ་ན་གལ་ཆེ་སྟེ། ཇི་ལྟར་ན་རང་རང་གིས་ལུང་རིགས་ཚད་མའི་དཔྱད་པ་བཟང་པོས་ཡང་ཡང་མ་དྲངས་ན་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་རང་གི་རྒྱུད་ལ་ག་ལ་སྐྱེ་སྟེ་སྐྱེ་མི་ནུས་ལ། ངེས་ཤེས་བཟང་པོ་དེ་ཉིད་ལེགས་པར་མ་སྐྱེས་ན་བདག་དང་གཞན་དུ་དངོས་པོར་རྟོག་པ་སོགས་ཀྱི་སྒྲོ་འདོགས་ངན་པ་སྣ་ཚོགས་པ་འདི་དག་ག་ལ་ནུབ་སྟེ་ནུབ་པར་མི་འགྱུར་ལ། སྒྲོ་འདོགས་ངན་པ་དེ་རྣམས་མ་ནུབ་ན་འཁྲུལ་བའི་གཡོ་བསྐྱེད་པས་ལས་རླུང་ངན་པ་སྣ་ཚོགས་པ་འདི་དག་ག་ལ་འགགས་ཏེ་འགགས་མི་ནུས་ལ། ལས་རླུང་ངན་པ་དེ་རྣམས་མ་འགག་ན་འཁོར་བའི་སྣང་བ་ངན་པ་སྣ་ཚོགས་པ་འདི་རྣམས་ག་ལ་སྤོང་སྟེ་སྤང་མི་ནུས་ལ། འཁོར་བའི་སྣང་བ་ངན་པ་ཇི་སྙེད་པ་འདི་རྣམས་མ་སྤང་ན་སྡུག་བསྔལ་གྱི་རྣམ་གྲངས་ངན་པ་འདི་རྣམས་ཅི་ལ་འཛད་དེ་འཛད་པར་མི་ནུས་སོ། །འོ་ན་ངེས་ཤེས་བཟང་པོ་དེ་ཅི་ལྟ་བུ་ཞེ་ན། སྲིད་པ་འཁོར་བ་དང་ཞི་བ་མྱ་ངན་ལས་འདས་པ་གཉིས་ལ་ངེས་པའི་དོན་དུ་ཡེ་ནས་བཟང་ངན་མེད་པར་མཉམ་པ་ཉིད་དུ་གནས་པ་ཡིན་པས་གནས་ལུགས་ཆོས་ཀྱི་དབྱིངས་ལ་ཁྱད་པར་ཅུང་ཟད་ཙམ་ཡང་ཡོད་པ་མ་ཡིན་པས་དེ་བཞིན་དུ་བཟང་ངན་ཅུང་ཟད་ཙམ་ཡང་མེད་པར་འཁོར་འདས་དབྱེར་མེད་སྤྲོས་བྲལ་མཉམ་པ་ཉིད་དུ་ཡང་དག་པར་རྟོགས་པ་ཡི་ངེས་ཤེས་ཐེ་ཚོམ་གྱི་སྨག་ཐམས་ཅད་དང་བྲལ་བ་ནི་བཟང་པོ་ཡིན་ལ། དེ་ལྟ་ན་ངེས་ཤེས་བཟང་པོས་འཁོར་བ་ངན་པ་འདི་ཉིད་སྤངས་ནས་མྱང་འདས་བཟང་པོ་གཞན་ཞིག་མ་སྒྲུབས་པས་སྤང་བླངས་མེད་པར་མཉམ་པ་ཉིད་དུ་རྟོགས་པ་ཡིན་ཅིང་དེ་ཡང་སྣང་ཚུལ་ལ་འཁོར་བ་སྤང་ནས་མྱང་འདས་ཐོབ་བར་སྣང་བས་ན་འཁོར་འདས་གཉིས་ལ་བཟང་ངན་མེད་པར་མཉམ་པ་ཉིད་དུ་བསྟན་པ་འདི་དང་འགལ་བ་ལྟར་སྟོན་པར་སྣང་བའི་ཚིག་གི་དོན་འདི་ཉིད་ལའང་ཅུང་ཟད་ཀྱང་མི་འགལ་བའི་གནད་དོན་ཟབ་མོ་ཡོད་དེ། འདི་ལྟར་སྣང་ཚུལ་ལ་འཁོར་འདས་སུ་སྣང་ཡང་གནས་ཚུལ་ལ་བསལ་བཞག་གམ་སྤང་བླང་མེད་པར་འཁོར་འདས་དབྱེར་མེད་མཉམ་པ་ཉིད་དུ་ལྷུན་གྱི་གྲུབ་པ་ཉིད་ནི་ལམ་གྱི་གནད་དམ་གལ་མདོ་མཆོག་ཏུ་གྱུར་པ་སྟེ། དེས་ན་ལྟ་བ་བསལ་བཞག་མེད་པར་འཁོར་འདས་དབྱེར་མེད་མཉམ་པ་ཉིད་དང་སྤྱོད་པ་བླང་དོར་བྱ་རྩོལ་དང་བྲལ་བར་གསུངས་པས་མན་ངག་གི་གནད་གསང་ཟབ་མོ་འདི་ཉིད་ལེགས་པར་དཔྱད་དེ་དོན་གྱི་རོ་མཆོག་ཟབ་མོ་ཚུལ་བཞིན་དུ་ཉམས་སུ་མྱོང་བར་གྱིས་ཤིག་ཅེས་གདམས་པར་མཛད་དོ། །གཉིས་པ་བར་དུ་དཔྱད་འཇོག་སོགས་ཚིགས་བཅད་གཉིས་དང་རྐང་པ་གཉིས་ཀྱིས་བསྟན་ཏེ། བར་དུ་ཚུལ་བཞིན་ལེགས་པར་དཔྱད་པ་དང་དེས་དྲངས་པའི་ངེས་ཤེས་བཟང་པོའི་ངང་ལ་མཉམ་པར་འཇོག་པ་གཉིས་པོ་སྤེལ་མའི་ཚུལ་དུ་དཔྱད་སྒོམ་དང་འཇོག་སྒོམ་གཉིས་ཀ་དགོས་ཏེ། དཔྱད་ན་གནས་ལུགས་སྤྲོས་བྲལ་མཉམ་པ་ཉིད་ལ་ངེས་ཤེས་བཟང་པོ་སྐྱེ་བར་འགྱུར་ཞིང་། མ་དཔྱད་པས་ཐ་མར་དངོས་པོར་འཛིན་ཅིང་ཞེེན་པར་གྱུར་པའི་ཚེ་ན་སླར་ཡང་ལེགས་པར་དཔྱད་ཅིང་དཔྱད་ཅིང་གནས་ལུགས་ཟབ་མོའི་དོན་ལ་ངེས་ཤེས་ལེགས་པར་དྲངས་ནས་ངེས་ཤེས་བཟང་པོ་ཡང་དག་པར་སྐྱེས་པར་གྱུར་ན་ངེས་ཤེས་དེ་གའི་ངང་དུ་གཞན་དུ་མ་ཡེངས་པར་རྩེ་གཅིག་ཉིད་དུ་མཉམ་པ་བཞག་སྟེ་སྒོམ་དགོས་ཏེ་གནས་ལུགས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ཀྱི་ངེས་ཤེས་དང་ནི་བདག་གཞན་དང་ཡོད་མེད་ལ་སོགས་པར་ཕྱིན་ཅི་ལོག་ཏུ་སྒྲོ་འདོགས་པའི་ཡིད་རྟོག་གཉིས་སྣང་མུན་ལྟར་ཕན་ཚུན་ཤིན་ཏུ་འགལ་བར་གྱུར་པ་ཉིད་ཀྱི་ཕྱིར་ན་ཟབ་མོའི་རིགས་པ་ཡང་དག་པས་དཔྱད་པས་སྒྲོ་འདོགས་ཀྱི་རྟོག་པ་ཐམས་ཅད་སུན་ཕྱུང་བར་བྱེད་པས་སྣང་སྟོང་དབྱེར་མེད་སྤྲོས་བྲལ་མཉམ་པ་ཉིད་རྟོགས་པའི་ངེས་ཤེས་བཟང་པོ་གོང་ནས་གོང་དུ་སྤེལ་བར་བྱེད་དགོས་སོ། །གསུམ་པ་ལ་གཉིས། དངོས་དང་། དེ་ལ་ལོག་རྟོག་བསལ་ཏེ་དཔྱོད་ཤེས་ཀྱི་འཛིན་སྟངས་ཀུན་དང་བྲལ་བའི་མཉམ་བཞག་ཡེ་ཤེས་ཉིད་ཐེག་ཆེན་ལམ་གྱི་དངོས་གཞི་ཐེག་པ་དང་ཆེན་པོའང་ཡིན་པར་བསྟན་པའོ། །དང་པོ། ཐ་མར་དཔྱད་པས་སོགས་ཚིགས་བཅད་གསུམ་གྱིས་བསྟན་ཏེ། ཐ་མར་རིགས་པས་དཔྱད་པས་ཡང་དང་ཡང་དུ་མ་དྲངས་ཀྱང་ངེས་ཤེས་བཟང་པོ་ངང་གིས་སྐྱེ་བར་གྱུར་པ་ན་ངེས་ཤེས་དེ་གའི་ངང་དུ་གཞན་ལ་མི་ཡེངས་པར་རྩེ་གཅིག་ཏུ་མཉམ་པ་འཇོག་ཅིང་སྒོམ་པ་ལས་སླར་ཡང་རིགས་པས་དཔྱད་པས་ལེགས་པར་གྲུབ་ཟིན་པའི་དོན་དེ་ཉིད་ཡང་དང་ཡང་དུ་བསྐྱར་ཏེ་སྒྲུབས་པས་ངལ་བ་ཅི་ཞིག་དགོས་ཏེ། དཔེར་ན་ཐག་པར་སྦྲུལ་མེད་པར་ཇི་ལྟ་བ་བཞིན་དུ་རྟོགས་པ་ན། སྦྲུལ་མེད་པར་ངེས་པའི་ངེས་ཤེས་དེ་གས་སྦྲུལ་འཛིན་ལྷག་མེད་དུ་ལྡོག་པར་གྱུར་ན་ད་དུང་ཡང་སྦྲུལ་ནི་འདིར་མེད་དོ་ཞེས་ཡང་ཡང་རིགས་པས་དཔྱད་དགོས་ཞེས་ཟེར་བ་ནི་བློ་གྲོས་བླུན་མིན་ནམ་སྟེ་བླུན་པའི་འབྲས་རྟགས་སོ། །གཞན་ཡང་འཕགས་ལམ་གྱི་རྟོགས་པ་སྤྲོས་བྲལ་མཉམ་པ་ཉིད་མངོན་སུམ་དུ་གྱུར་པའི་ཚེ་ན་ད་དུང་ཡང་རིགས་པས་དཔྱད་པས་མི་སྒོམ་ཏེ་མངོན་སུམ་དུ་རྟོགས་པ་སོ་སོ་རང་རིག་པའི་ཡེ་ཤེས་ལ་རྒྱུ་མཚན་གྱིའམ་རྟགས་ལ་བརྟེན་པའི་ཡིད་དཔྱོད་ཀྱི་གཏན་ཚིགས་སྦྱོར་བ་ཅི་ཞིག་དགོས་ཏེ་དགོས་པ་ཅི་ཡང་མེད་པས་དཔེར་ན་མངོན་སུམ་མ་འཁྲུལ་བས་མི་ཉིད་མཐོང་བ་ལ་དུ་བའི་རྟགས་སྦྱོར་བྱེད་པ་ཤིན་ཏུ་འཁྲུལ་པ་བཞིན་ནོ། །གཉིས་པ་གལ་ཏེ་དཔྱད་པས་སོགས་ཚིགས་བཅད་བཅུ་གཅིག་གིས་བསྟན་ཏེ། གོང་དུ་རིམ་པས་བསྟན་པ་དེ་ལྟར་མ་ཡིན་པར་གལ་ཏེ་རྣམ་པ་ཀུན་ཏུ་དཔྱད་པ་དང་བྲལ་བའི་ཚེ་གནས་ལུགས་དོན་དམ་བདེན་པ་ཡང་དག་པར་མཐོང་ཞིང་རྟོགས་པ་ཉིད་ནམ་ཡང་མི་འགྲུབ་པ་དེ་ལྟར་ཡིན་ན། འཕགས་པ་རྣམས་ཀྱི་མཉམ་བཞག་གི་ཡེ་ཤེས་དང་རྒྱལ་བའི་ཡེ་ཤེས་རྣམ་པ་ཐམས་ཅད་མཁྱེན་པ་དང་། གཞན་འཇིག་རྟེན་གནོད་མེད་ཀྱི་ཤེས་པ་སྟེ་འཁྲུལ་རྒྱུས་མ་བསླད་པའི་མངོན་སུམ་དེ་དང་དེ་ཡིས་རང་ཡུལ་གཟུང་བ་ཡང་དག་པ་རང་མཚན་རྣམས་ཁྱོད་ལ་ཕྱིན་ཅི་ལོག་གི་བཟུང་བ་ཉིད་དུ་ཐལ་བར་འགྱུར་ཏེ། གང་ཕྱིར་མངོན་སུམ་དེ་དག་ནི་རང་ཡུལ་ཇི་ལྟ་བ་བཞིན་དུ་རྟོགས་ཟིན་པ་ཡིན་པའི་ཕྱིར་ན་དེ་དག་ལ་རང་དུས་དེ་དང་དེ་ཉིད་ན་ཡིད་རྟོག་གིས་དཔྱད་པ་མེད་པའི་ཕྱིར་ཏེ་དཔྱད་པ་དང་བྲལ་ན་དོན་དམ་མི་རྟོགས་པར་ཁས་བླང་པས་སོ། །དེ་ཡི་ཕྱིར་ན་མཐའ་བཞིའི་སྤྲོས་པ་མ་ལུས་པ་ཀུན་དང་བྲལ་བ་ཟུང་འཇུག་མཉམ་པ་ཉིད་ཇི་བཞིན་དུ་རྟོགས་པ་ཡི་ངེས་ཤེས་ཤིན་ཏུ་གསལ་བ་ཁྱད་པར་ཅན་གྱི་ངོར་ནི། འདི་དང་འདིའོ་སོགས་སུ་སྙམ་པ་ཡི་དམིགས་གཏད་ཀྱི་དཔྱོད་པ་ཤིན་ཏུ་ཕྲ་བ་ཡང་གནས་དང་སྐབས་མི་ཐོབ་པས་དམིགས་གཏད་ཐམས་ཅད་དང་བྲལ་བ་ཡིན་ནོ། །གང་གི་ཚེ་ཡིད་རྟོག་གི་དཔྱོད་པས་སྟོང་དང་མི་སྟོང་ལ་སོགས་པར་འཛིན་པའི་མཚན་འཛིན་དེས་དཔེར་ན། དར་གྱི་སྲིན་བུ་རྣམས་ཀྱིས་རང་གིས་རང་ཉིད་བཅིངས་པ་ཇི་ལྟ་བ་བཞིན་དུ་ཡིད་རྟོག་གིས་དཔྱོད་པའི་འཛིན་པ་དེ་ཡིས་གནས་ལུགས་འཛིན་སྟངས་ཐམས་ཅད་དང་བྲལ་བའི་མཉམ་བཞག་ཡེ་ཤེས་དེ་བཅིངས་ཏེ་སྒྲིབ་པར་བྱས་ནས་གནས་ཚུལ་ཡང་དག་པའི་དོན་ཇི་ལྟ་བ་བཞིན་དུ་མི་མཐོང་བར་འགྱུར་རོ། །དེས་ན་སྤྲོས་བྲལ་མཉམ་པ་ཉིད་ཀྱི་ངེས་ཤེས་ཁྱད་པར་ཅན་སྐྱེས་པ་འདིས་ནི་ཡིན་ལུགས་སམ་གནས་ལུགས་ལ་སྒྲིབ་པའི་སྒྲོ་འདོགས་ཀྱི་སྨག་ཐམས་ཅད་བསལ་བའི་ཚེ་ན་ཆོས་ཀྱི་དབྱིངས་རང་བྱུང་གཉུག་མ་དོན་གྱི་ཡེ་ཤེས་འོད་གསལ་བའི་ངང་མདངས་དེ་ཉིད་མ་ནོར་བར་ཇི་ལྟ་བ་བཞིན་དུ་མཐོང་བ་གང་ཡིན་པ་དེ་ནི་གཉིས་སྣང་ཐམས་ཅད་དང་བྲལ་བའི་འཕགས་པའི་མཉམ་བཞག་སོ་སོ་རང་གིའམ་རང་རིག་པའི་ཡེ་ཤེས་ཡིན་ཏེ། དེ་ནི་སེམས་བྱུང་ཤེས་རབ་གཟུང་འཛིན་ཅན་དེ་དག་ག་ལ་ཡིན་ཏེ་མིན་ནོ། །འོ་ན་དེ་གཉིས་ཀྱི་ཁྱད་པར་ཅི་ཞེ་ན་སེམས་བྱུང་ཤེས་རབ་ཀྱིས་རང་ཡུལ་རྣམས་ལ་འདི་ནི་འདིའོ་ཞེས་སོགས་སོ་སོར་རྣམ་པར་འགྱེད་ཅིང་དེ་དང་དེ་ལ་དམིགས་ཤིང་རྟོགས་པ་ཡིན་ལ། གང་ཕྱིར་གཟུགས་ལ་སོགས་པའི་ཡུལ་དང་དེ་དང་དེར་འཛིན་པའི་ཡུལ་ཅན་དང་སྣང་བ་དང་སྟོང་པ་རེ་རེ་གང་དུ་ཡང་མི་དམིགས་པའམ་མི་རྟོག་པར་ཟུང་འཇུག་སྤྲོས་བྲལ་མཉམ་པ་ཉིད་དུ་རྟོགས་པས་འཕགས་པའི་མཉམ་བཞག་གི་ཡེ་ཤེས་འདི་ནི་སེམས་དང་སེམས་ལས་བྱུང་བ་ཡི་མཚན་ཉིད་གཟུང་འཛིན་ཅན་དུ་རྣམ་པ་ཀུན་ཏུ་གནས་པ་མ་ཡིན་ཏེ་ཞེས་མདོར་ན་འཛིན་སྟངས་ཡོད་མེད་ཀྱི་ཁྱད་པར་ཅན་དུ་རྟོགས་པར་བྱའོ། །དེ་ཕྱིར་ཡང་དག་པའི་དཔྱད་པས་ལེགས་པར་དྲངས་པ་ཡི་སྤྲོས་ཀུན་བྲལ་བའི་མཉམ་པ་ཉིད་ལ་ངེས་ཤེས་མཆོག་ཏུ་གྱུར་པ་འདྲོངས་ནས། དེ་ལ་མཉམ་པར་བཞག་པའི་ཤེས་རབ་རྣམ་པར་དག་པ་དྲི་མ་མེད་པའི་རྒྱུས་སམ་རྒྱུ་དེས་འབྲས་བུ་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་རྟོགས་པའི་ཡེ་ཤེས་དངོས་ཉིད་ཐོབ་པར་འགྱུར་རོ། །དེས་ན་གནས་ཚུལ་ལམ་གནས་ལུགས་ཀྱི་ལྟ་བ་ཇི་བཞིན་དུ་གཏན་ལ་ཕབ་པར་བྱེད་པ་དང་། ངེས་པའི་གྲུབ་མཐའ་ཕྱིན་ཅི་མ་ལོག་པ་སྒྲུབ་པར་བྱེད་པ་ནི་ཆོས་རྣམས་ལ་རང་མཚན་དང་སྤྱི་མཚན་ངོ་བོ་དང་རང་བཞིན་སྣང་བ་དང་སྟོང་པ་ཡོད་པ་དང་མེད་པ་ལ་སོགས་པར་གཏན་ལ་འབེབས་ཤིང་ཤན་འབྱེད་པར་བྱེད་པའི་སོ་སོར་ཡང་དག་པར་རྟོགས་པ་ཡི་ཤེས་རབ་འཁྲུལ་བའི་དྲི་མ་མེད་པའི་ཚད་མ་ཉིད་ཡིན་ལ། གནས་ལུགས་མཉམ་པ་ཉིད་ཀྱི་དོན་ལ་ཤེས་རབ་དྲི་མ་མེད་པ་དེས་ལེགས་པར་དྲངས་པའི་ངེས་ཤེས་ཁྱད་པར་ཅན་གྱི་ལམ་ཡང་དག་པར་སྒོམ་པ་ལ་བརྟེན་ནས་ཆོས་ཐམས་ཅད་ཀྱི་ཡིན་ལུགས་སམ་གནས་ལུགས་ཆོས་ཀྱི་དབྱིངས་གཉུག་མ་དོན་གྱི་འོད་གསལ་བའི་གཤིས་སུ་ཕེབས་པའམ་སོན་པའི་འཕགས་པའི་མཉམ་བཞག་གཉིས་སྣང་ཐམས་ཅད་ནུབ་པའི་ཡེ་ཤེས་གང་ཡིན་པ་དེ་ནི་ངེས་དོན་ཐེག་པ་ཆེན་པོའི་ལམ་གྱི་དངོས་གཞི་ཡང་དག་པ་ཉིད་དོ། །འདི་དང་ཡང་དག་པར་ལྡན་ན་མི་སློབ་པའི་ཟུང་འཇུག་རྡོ་རྗེ་འཆང་གི་གོ་འཕང་སྙིགས་དུས་ཀྱི་ཚེ་ལུས་འདིར་བདེ་མྱུར་དུ་སྟེར་བའི་ཕྱིར་ན་འདི་ཉིད་ཐེག་པའི་ནང་ནས་ཐེག་པ་བླ་ན་མེད་པ་ཡིན་ལ། དེ་དང་མཉམ་པ་གཞན་མེད་པས་མཆོག་དང་ཆེན་པོའང་ཡིན་ནོ། །གཉིས་པ་ལ་གསུམ། ཐེག་མཆོག་རྫོགས་པ་ཆེན་པོའི་ལུགས་ཀྱི་ཟབ་ཅིང་རྒྱ་ཆེ་བའི་རང་བྱུང་རིག་པའི་ཡེ་ཤེས་གསལ་བར་བསྟན་པ། དེ་ཉིད་ཀུན་གྱི་འབྱུང་གནས་སུ་གྱུར་པས་སྒྲུབ་བརྒྱུད་གཞན་གྱི་བསྟན་དོན་མཐར་ཐུག་ཐམས་ཅད་རྫོགས་ཆེན་སེམས་སྡེའི་མན་ངག་ཏུ་མཉམ་ཞིང་དབྱེ་བ་མེད་ཚུལ། ཡེ་ཤེས་དེ་ཉིད་སོ་སོའི་སྐྱེ་བོའི་ས་ནས་ཀྱང་རྗེས་མཐུན་པར་སྒོམ་དུ་ཡོད་པར་བསྟན་པའོ། །དང་པོ་ལ་གཉིས། གཉིས་མེད་རྒྱུད་སྡེའི་དགོངས་དོན་རྒྱ་ཆེ་བ་བཀའ་མའི་ལུགས་ཀྱི་དབང་བཞི་པའི་ཡེ་ཤེས་འཁྲུལ་མེད་ཚད་མའི་ལམ་ནས་སྤྱིར་སྒྲུབས་པ། མན་ངག་ཐིག་ལེ་གསང་སྐོར་གྱི་དགོངས་དོན་ཟབ་མོ་གཏེར་མའི་ལུགས་ཀྱི་ཐུན་མོང་མིན་པའི་ཡེ་ཤེས་ཇི་ལྟར་སྒྲུབས་ཚུལ་ཁྱད་པར་དུ་བསྟན་པའོ། །དང་པོ། རྒྱུད་སྡེ་བཞི་ཡི་སོགས་ཚིགས་བཅད་ལྔ་དང་རྐང་པ་གཉིས་ཀྱིས་བསྟན་ཏེ། ཚུལ་དེ་ལྟར་ན་གསང་སྔགས་ཀྱི་རྒྱུད་སྡེ་དེ་ལ་བྱ་སྤྱོད་རྣལ་འབྱོར། རྣལ་འབྱོར་བླ་མེད་དང་བཞི་རུ་དབྱེ་བ་ཡི་ལུགས་ལྟར་ན་ཡང་བླ་ན་མེད་པའི་རྒྱུད་རྣམས་ཀྱི་ཚིག་དབང་སྟེ་དབང་བཞི་པའི་ལམ་གྱི་དངོས་གཞི་འདི་ནི་དོན་གྱི་འོད་གསལ་ཟུང་འཇུག་གི་ཡེ་ཤེས་མཐར་ཐུག་པ་ཡིན་མོད་རྒྱུད་གང་ལས་དེ་ཉིད་རྩལ་དུ་བཏོན་ནས་བསྟན་པ་ཙམ་གྱི་སྒོ་ནས་རྒྱུད་དེ་ལོགས་སུ་ཐེག་པའི་རྩེ་མོ་གཞན་ཞིག་ཡིན་པར་མ་བཞག་ཀྱང་དོན་ལ་གནས་པས་བཞག་དགོས་ཏེ་དཔེར་ན་འཁོར་འདས་ཀྱི་ཆོས་ཀུན་མཉམ་ཉིད་ཀྱི་ཡེ་ཤེས་འགྱུར་མེད་བདེ་བ་ཆེན་པོའི་སྐུ་ཉིད་རྩལ་དུ་བཏོན་ནས་གསལ་བར་འཆད་པ་ཡི་གཉིས་མེད་ཀྱི་རྒྱུད་མཆོག་དཔལ་ལྡན་དུས་ཀྱི་འཁོར་ལོ་ཉིད་ལ་རྒྱུད་ཐམས་ཅད་ཀྱི་རྒྱལ་པོའམ་མཐར་ཐུག་ཡིན་པར་བཞེད་ཅིང་བཞག་པ་བཞིན་དུ་རྒྱུད་ཀྱི་མཐར་ཐུག་དང་ཐེག་པའི་རྩེ་མོར་ལོགས་སུ་འཇོག་དགོས་སོ། །དེས་ན་གསང་སྔགས་བླ་ན་མེད་པའི་ནང་གི་རྒྱུད་སྡེའི་མ་ཧཱ་ཨ་ནུ་ཨ་ཏི་སྟེ་གསང་མཆོག་ཡོ་ག་གསུམ་གྱི་ནང་ནས་ཀྱང་དབང་བཞིའི་ཞེས་དབང་བཞི་པ་ཚིག་དབང་རིན་པོ་ཆེའི་ལམ་གྱི་ཡེ་ཤེས་རིག་སྟོང་རང་བྱུང་ཡེ་ཤེས་ཟུང་འཇུག་འདུས་མ་བྱས་གང་ཉིད་མ་གབ་མ་སྦས་པར་རྩལ་དུ་བཏོན་ནས་ཤིན་ཏུ་གསལ་བར་བསྟན་ཅིང་འཆད་པ་ཐེག་མཆོག་ཨ་ཏི་ཡོ་གའི་སེམས་ཕྱོགས་ཀྱི་རྒྱུད་སྡེ་ཆེན་པོ་འདི་རྣམས་ནི། རྒྱུད་སྡེ་བླ་ན་མེད་པ་ཀུན་གྱི་མཐར་ཐུག་གི་དགོངས་པའི་མཐིལ་དང་སྐྱེལ་སོ་དམ་པ་ཡིན་ཏེ། དཔེར་ན་ལན་གྲངས་བཅུ་དྲུག་གི་བར་དུ་བཞུས་པའི་གསེར་བཙོ་མ་ཤིན་ཏུ་རྣམ་པར་དག་པ་དེ་བཞིན་དུ་འོག་མའི་ཐེག་པ་གཞན་ཀུན་གྱི་གྲུབ་མཐའ་ལུང་རིགས་མན་ངག་གིས་དཔྱད་པ་ཡིས་ཇེ་བས་ཇེ་དག་གམ་ཇེ་གསལ་དུ་བསྟན་པས་རིག་སྟོང་དབྱེར་མེད་རང་བྱུང་གི་ཡེ་ཤེས་ཇི་བཞིན་པ་ཉིད་ཨ་ཏི་ཡོ་གའི་རྒྱུད་འདིར་ཡང་དག་པར་མཐར་ཕྱིན་པ་ཁོ་ན་ཡིན་པས་འདི་ནི་རྒྱུད་ཐམས་ཅད་ཀྱི་མཐར་ཐུག་དང་ཐེག་པ་ཐམས་ཅད་ཀྱི་རྩེ་མོར་ལེགས་པ་གྲུབ་པ་ཡིན་ནོ། །དེ་ཕྱིར་ཟབ་མོའི་ཤེས་རབ་དྲི་མེད་ཀྱི་ཚད་མས་རིག་སྟོང་ཟུང་འཇུག་རང་བྱུང་གི་ཡེ་ཤེས་འོད་གསལ་འདུས་མ་བྱས་པ་འདི་ཡི་དོན་ཉིད་ཡང་དག་པ་གྲུབ་པའི་ཚུལ་ནི། བཀྲ་ཤིས་དུས་ཚོད་འཛིན་པ་ཁུ་བྱུག་གི་རྒྱུད་དང་། ཡོན་ཏན་རྩལ་ཆེན་རྫོགས་པའི་རྒྱུད་ལ་སོགས་པ་བཟླ་བ་རྒྱལ་པོའི་སྐར་དང་། ནམ་མཁའ་ཀློང་ཡངས་ཡེ་ཤེས་གཏིང་རྫོགས། རང་བྱུང་བདེ་བ་འཁོར་ལོའི་རྒྱུད་སོགས་ཤན་འབྱེད་པ་བྲམ་ཟེའི་སྐོར་དང་། གབ་པ་འཁོར་ལོའི་སྐོར། རིག་པ་གནད་ལ་འབེབས་པ་སྒོམ་པའི་སྐོར། ཆོས་ཉིད་མ་བུ་སྤྲད་པ་རྫོང་ཕྲེང་གི་སྐོར། ལྟ་བ་མཐའ་དབུས་མེད་པར་སྟོན་པ་ཀུན་བྱེད་རྒྱལ་པོ་ལ་སོགས་པ་རྒྱུད་ཐ་མའི་སྐོར་སོགས་རང་གྲོལ་མངོན་སུམ་སྟོན་པ་མན་ངག་གི་སྐོར་གྱི་རྒྱུད་སྡེ་རྣམས་དང་། དེ་དག་གི་དགོངས་པ་འགྲེལ་པའང་འཕགས་ཡུལ་དུ་ཡང་སྤྲུལ་དགའ་རབ་རྡོ་རྗེས་ལ་ཤན་ལྟ་བའི་མེ་ལོང་། པྲ་ཁྲིད་ཉམས་རིམ་བཞི་པ། བསམ་གཏན་ཉམས་ཀྱི་སྒྲོན་མ། ཀློང་རབ་འབྱམས་རྒྱལ་པོའི་རྒྱུད་འགྲེལ་སོགས་ནས་རྒྱ་གར་མཁས་པ་ཉེར་གཅིག་གིས་གསུངས་པ་རྣམས་དང་། བོད་འདིར་ཡང་། རྒྱལ་དབང་པདྨ་ཀཱ་རས། ལ་བཟླ་བའི་རྒྱུད་སྡེ་རྣམས་དང་རྩ་རྒྱུད་གསང་བ་སྙིང་པོའི་མན་ངག་གི་ལེའུ་སོགས་ལ་བརྟེན་ནས་མན་ངག་ལྟ་བའི་ཕྲེང་བ་སོགས་རྒྱལ་པོ་ཁྲི་སྲོང་འབངས་རིགས་ཉེར་བཞི། ཡེར་པའི་གྲུབ་ཐོབ། ཆུ་བོ་རིའི་སྒོམ་གྲྭ་པ་སོགས་ལ་གདམས་པའི་བོད་ཡུལ་སྤྱི་གྲགས་ཀྱི་སྐོར་དང་། རྒྱལ་བ་ཀཿཐོག་པ་ཆེན་པོས། ཐེག་པའི་སྤྱི་མཛོད་ཆེན་པོ། རྟོགས་ལྡན་ཤཱཀྱ་རྡོ་རྗེས་ཀུན་འདུས་རིག་པའི་སྒྲོན་མེ་སོགས་རྒྱུད་ཀྱི་དགོངས་འགྲེལ་ངོ་མཚར་བ་རྣམས་དང་། བྲམ་ཟེ་དང་མན་ངག་སྐོར་གྱི་ཆོས་སྡེ་གཉིས་ལའང་། ལོ་ཆེན་བཻ་རོ་ཙ་ན་དང་། རྒྱལ་མོ་གཡུ་སྒྲ་སྙིང་པོའི་བཀའ་དྲིན་ལས་རིམ་བཞིན་བརྒྱུད་དེ། ཨ་དོན་བཅོ་བརྒྱད་འགྲེལ་བ་བཅོ་བརྒྱད་ཀྱིས་གཏན་ལ་དབབ་པ་སོགས་དང་གསང་བདག་སྒྲོ་ཕུག་པས་ཀུན་བྱེད་རྒྱལ་པོའི་འགྲེལ་བ། རོག་ཤེས་རབ་འབྱུང་གནས་ཀྱིས་ཁོག་དོན་སྣང་བའི་འོད་ཟེར། ཀུན་མཁྱེན་དམ་པ་རིན་པོ་ཆེས། རྫོགས་པ་ཆེན་པོ་བསམ་གཏན་སྤྱི་འགྲེལ། གཞི་ལམ་འབྲས་བུའི་སྤྱི་བཅིངས་ཆེན་མོ། ཡིག་ཆུང་གནད་ཀྱི་མན་ངག་ཚན་བུ་སྣ་ཚོགས། འདྲ་མཐུན་ཁྱད་པར་ངང་པའི་རྒྱལ་པོ་སོགས་ཚིག་ཉུང་ལ་དོན་ཟམ་ཅིང་རྒྱ་ཆེ་བ་རྣམས་དང་། ཆོས་རྗེ་གཙང་བ་ཆེན་པོ་ནས། ལྟ་སྒོམ་སྤྱོད་པའི་དོན་གསལ། བྱ་བྲལ་ནམ་མཁའ་རྡོ་རྗེས་ཁམས་ལུགས་རྫོགས་པ་ཆེན་པོའི་ཁྲིད་ཡིག་སོགས་བཀའ་སྲོལ་རྨད་དུ་བྱུང་བ་མང་ཞིག་བཞུགས་ཤིང་། དེ་ལས་བརྒྱུད་པའི་བཀའ་བབ་ལའང་། བླ་ཆེན་དགེ་བ་རབ་གསལ་ནས་བརྒྱུད་པའི་ཁམས་ལུགས། ཨ་རོ་ཡེ་ཤེས་འབྱུང་གནས་ནས་བརྒྱུད་པའི་ཨ་རོ་ལུགས། ཉང་བན་ནས་ཟུར་ལ་བརྒྱུད་པའི་ཉང་ལུགས། རོང་བན་ནས་རོང་ཟོམ་ལ་བརྒྱུད་པའི་རོང་ལུགས་སོགས་རིག་འཛིན་བརྒྱུད་པའི་ལུགས་ཟབ་མོའི་མན་ངག་གིས་འཆད་ཚུལ་གཞན་དང་མ་འདྲེས་པ་ཀུན་དང་། ཁྱད་པར་དུ་པཎྜི་ཏ་ཆེན་པོ་ཀུན་མཁྱེན་རོང་ཟོམ་ཆོས་བཟང་གིས་ཚད་མ་ཡང་དག་པའི་རིགས་པ་སུས་ཀྱང་མི་འཕྲོག་པའི་རྣམ་པར་དཔྱོད་པའི་ལུང་རིགས་མན་ངག་ཟབ་མོའི་བསྟན་དོན་རྣམས་ལ་ཚུལ་བཞིན་དུ་བསམ་པར་བྱས་ན་བདུད་དང་ཕས་ཀྱི་རྒོལ་བའི་ཡུལ་ལས་འདའ་ཞིང་སུས་ཀྱང་གླགས་ཕྲ་བ་ཙམ་ཡང་མི་རྙེད་པར་གང་གིས་ཀྱང་མི་འཕྲོག་པའི་ཤེས་རབ་ཟབ་མོ་ཡོངས་སུ་སྨིན་པར་བྱེད་པའི་མཚན་ཉིད་དང་ཡང་དག་པར་ལྡན་པ་ཡིན་པས་དེ་ལ་གོམས་པར་བྱའོ། །རྒྱལ་ཚབ་བྱམས་པས་མདོ་སྡེ་རྒྱན་ལས་ཀྱང་། ཆོས་བཟང་རིགས་པས་རྣམ་དཔྱད་བསམ་པ་ཅན། །རྟག་ཏུ་བདུད་ཀྱི་བར་ཆད་བྱེད་པ་མེད། །ཁྱད་པར་རྙེད་དང་གཞན་གྱི་ཕྱོགས་སུན་འབྱིན། །མི་འཕྲོག་ཡོངས་སུ་སྨིན་པའི་མཚན་ཉིད་དོ། །ཞེས་ཡོངས་སྨིན་གྱི་མཚན་ཉིད་ཇི་སྐད་བསྟན་པ་འདིས་པཎྜི་ཏ་འདི་ཉིད་ཤིན་ཏུ་གསལ་བར་ལུང་བསྟན་པར་ཡང་རིག་པར་བྱའོ། །གོང་དུ་བཤད་པའི་སེམས་ཕྱོགས་རྫོགས་པ་ཆེན་པོ་འདི་ལ་ཡོངས་སུ་གྲགས་པའི་སེམས་ཀློང་གཉིས་ཀའང་འདུ་སྟེ། ལ་བཟླ་བའི་རྒྱུད་ལ་ཀློང་རབ་འབྱམས་རྒྱལ་པོའི་རྒྱུད་སོགས་ཡོད་ཅིང་། བྲམ་ཟེ་ལའང་རྩ་བའི་རྒྱུད་དང་མན་ངག་གི་རྒྱུད་གཉིས་ལས་ཡེ་ཤེས་གསང་སྒྲོན་ལ་སོགས་མན་ངག་གི་རྒྱུད་དུ་བཞུགས་པ་དང་། མན་ངག་གི་སྐོར་ལའང་བརྒྱུད་པ་ཐ་མལ། རྒྱུད་སྡེའི་སྐོར་དང་། སེམས་སྡེ། ཀློང་སྡེ། དབང་སྡེ། བསམ་བསྟན་གྱི་སྡེའི་སྐོར་དང་ལྔར་གསུངས་པས་གསལ་ལོ། །སྙན་རྒྱུད་རྡོ་རྗེ་ཟམ་པའང་ཡེ་ཤེས་གསང་བ་ལ་བརྟེན་པས་ཀློང་སྡེའི་མན་ངག་གི་འཆད་ཚུལ་ཟུར་བ་ཞིག་ཡིན་ནོ། །དོན་འདི་དག་ལ་ཀུན་མཁྱེན་ཆོས་རྗེས་བསྐྱེད་རྫོགས་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པ་ཞེས་བཞེད་དོ། །གཉིས་པ། འོན་ཀྱང་ལྟ་བའི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། དེ་ལྟར་གནས་ལུགས་མཐར་ཐུག་ལྟ་བའི་དངོས་གཞི་རིག་སྟོང་ཟུང་འཇུག་རང་བྱུང་གི་ཡེ་ཤེས་བསལ་བཞག་དང་བྲལ་བ་མདོ་རྒྱུད་ངེས་དོན་ཟབ་མོ་རྣམས་ལས་ཡང་དག་པར་བསྟན་མོད་ཀྱི། འོན་ཀྱང་དེ་ལྟར་ཚུལ་བཞིན་དུ་རྟོགས་ནས་མངོན་དུ་གྱུར་པའི་གནས་ལུགས་ལྟ་བའི་དངོས་གཞི་མཐར་ཐུག་པ་ནི་རིག་སྟོང་དབྱེར་མེད་བློ་འདས་སྨྲ་བསམ་བརྗོད་མེད་ཀྱི་ཡེ་ཤེས་མཆོག་ཉིད་ཡིན་པས་དེ་ཉིད་སྣང་བ་དང་སྟོང་པ་ཕྱོགས་རེར་འཛིན་པ་སོགས་གཟུང་འཛིན་ཅན་གྱི་སེམས་དང་སེམས་ལས་བྱུང་བའི་གཉིས་སྣང་གི་སྤྱོད་ཡུལ་ཅན་དུ་ལྟ་བའི་དངོས་གཞི་འདི་ཡི་དོན་ཉིད་ལུང་རིགས་ཀྱིས་བཀྲལ་ཞིང་སྟོན་པར་བྱེད་པ་རྣམས་ཀྱིས་ནི་སེམས་ལས་འདས་པའི་བརྗོད་པར་བྱ་བ་མིན་པ་ཉིད་བརྗོད་བྱར་བྱས་པ་ཡིན་པའི་ཕྱིར་རྒྱུད་དོན་ཚུལ་བཞིན་དུ་གཟིགས་པས་ཟབ་མོའི་མན་ངག་ལ་མཁས་ཤིང་དོན་ལ་མངའ་དབང་འབྱོར་པའི་གྲུབ་པའི་དབང་པོ་རྣམས་ཀྱི་དགོངས་པ་ཡང་དག་པ་ཉིད་དང་ཤིན་ཏུ་འགལ་བར་གྱུར་པ་ཡིན་ཏེ། གང་ཕྱིར་རྫོགས་པ་ཆེན་པོ་ཨ་ཏི་ཡོ་ག་ཡི་ལྟ་བ་འདི་ནི་སྣང་བ་དང་སྟོང་པ་ཡོད་པ་དང་མེད་པ་ལ་སོགས་གང་དུའང་བསམ་གྱིས་མི་ཁྱབ་པའི་རིག་སྟོང་དབྱེར་མེད་རང་བྱུང་གི་ཡེ་ཤེས་མཆོག་ཉིད་ཡིན་སླད། ཐ་མལ་མ་དག་པའི་གཟུང་འཛིན་ཅན་གྱི་སེམས་དང་སེམས་ལས་བྱུང་བ་ཀུན་ལས་འདས་པ་ཁོ་ནའི་སྟེ་ཁོ་ན་ཡིན་པའི་ཕྱིར་རོ། །དེས་ན་གནས་ལུགས་མཐར་ཐུག་རང་བྱུང་གི་ཡེ་ཤེས་དེ་ཉིད་གསལ་བར་སྟོན་པའི་མན་ངག་གི་རྒྱུད་སྡེའི་ཡང་ཟབ་ཐིག་ལེ་གསང་སྐོར་གྱི་དགོངས་དོན་ཟབ་མོ་འདི་ཉིད་ལའང་ངོ་བོ་ཡེ་ནས་དག་པ་ཀ་དག་སྟོང་པའི་ཆ་ཉིད་ཇི་བཞིན་པར་གཏན་ལ་འབེབས་པར་བྱེད་པ་ལ་བཟླ་བ་ཁྲེགས་ཆོད་ཀྱི་ལྟ་བ་དང་། རང་གསལ་ལྷུན་གྱིས་གྲུབ་པའི་སྐུ་དང་ཡེ་ཤེས་ཀྱི་རང་བཞིན་ཡང་དག་པར་གཏན་ལ་འབེབས་པ་ལས་དབྱིངས་ནང་གསལ་སྒྲིབ་བྲལ་འདུས་མ་བྱས་པ་གཞོན་ནུ་བུམ་པའི་སྐུར་སུས་ཀྱང་ལྡོག་ཏུ་མེད་པར་ཡིད་ཆེས་མངོན་སུམ་དུ་མཐོང་བའི་རྒྱ་ཆེ་བ་འོད་གསལ་ཐོད་རྒལ་གྱི་ལྟ་བ་དང་གཉིས་ཡིན་ལ། དེ་གཉིས་ཀའང་ཐ་དད་མེད་པས་སོ་སོར་དབྱེར་མེད་དེ་ངོ་བོ་ཀ་དག་གི་དབྱིངས་དང་རང་བཞིན་ལྷུན་གྲུབ་ཀྱི་འོད་གསལ་ཟུང་དུ་འཇུག་པའི་ཐུགས་རྗེ་ཀུན་ཁྱབ་རང་བྱུང་གི་ཡེ་ཤེས་ཤིན་ཏུ་རྣམ་པར་དག་པས་འདུས་མ་བྱས་པ་ཆེན་པོ་ཉིད་དེ་འདི་ནི་མན་ངག་གསང་བ་སྙིང་ཏིག་གི་མཐའ་གྲོལ་ཡོངས་རྫོགས་ཀྱི་ལྟ་བ་མཐར་ཕྱིན་པ་ཁོ་ན་ཡིན་ནོ། །དེར་མ་ཟད་རྒྱུད་སྡེ་ཆེན་པོ་གཞན་ལས་ཀྱང་མི་ཤིག་པའི་ཡེ་ཤེས་ཏི་ལ་ཀ་ཞེས་པ་ལ་སོགས་པར་མཚོན་ཙམ་དུ་གསུངས་པ་ཡང་ལྷུན་གྲུབ་གཞོན་ནུ་བུམ་སྐུ་འདི་དང་མིང་གི་རྣམ་གྲངས་ཙམ་ལས་དོན་ལ་ཐ་དད་མ་མཆིས་མོད་ཀྱི། འོན་ཀྱང་ཡང་གསང་བླ་ན་མེད་པའི་མན་ངག་སྡེའི་རྒྱུད་སྡེ་ཟབ་མོ་འདིར་ནི་གབ་སྦས་མེད་པར་ཆེས་ཤིན་ཏུ་གསལ་བོར་བསྟན་ཅིང་གཏན་ལ་ཕེབ་པར་མཛད་པས་ན་འདི་ནི་རྒྱུད་དང་ཐེག་པ་གཞན་ཐམས་ཅད་ལས་མཆོག་དང་ཕུལ་དང་རབ་དང་རྩེ་མོར་གྱུར་པ་ཉིད་དོ། །དེ་ཡང་སྙིང་ཏིག་མ་བུའི་ཆོས་ཡོངས་སུ་རྫོགས་པ་རྣམས་ནི་པཎྜི་ཏ་ཆེན་པོ་བི་མ་མི་ཏྲའི་བཀའ་དྲིན་ལས་གངས་ལྗོངས་དཔལ་གྱི་རི་ལ་བསོད་ནམས་ཀྱིས་མགྲོན་དུ་བོས་པ་ཡིན་ཞིང་། འདི་ལའང་ནང་གསེང་དུ་དབྱེ་ན། ཕྱི་འཁྲུལ་གཞི་རྩིས་ཀྱི་སྐོར་དང་། ནང་བཤད་ཏིག་སྤྲོས་པའི་སྐོར་དང་། སྣ་ཚོགས་ཐབས་ཀྱི་སྐོར་སོགས་བདུན་དུ་གསུངས་ལ། དེའང་ནང་བཤད་ཏིག་སྤྲོས་པའི་སྐོར་ནི། རྒྱུད་བཅུ་བདུན་བསྟན་པ་སྲུང་བའི་རྒྱུད་དང་བཅོ་བརྒྱད། རྒྱ་ཆེ་བ་མན་ངག་བརྒྱ་བཅུ་དགུ་སོགས་ལྡང་མས་གཏེར་ནས་བྱོན་པ་རྣམས་ཡིན་ལ། དེ་དག་གི་དོན་འགྲེལ་ཀུན་མཁྱེན་ཆེན་པོས་གསུངས་རབ་མཛོད་ཆེན་བདུན་དང་། ངལ་བསོ་སྐོར་གསུམ་སོགས་དང་། ཀུན་མཁྱེན་འཇིགས་བྲལ་གླིང་པས་ཡོན་ཏན་རིན་པོ་ཆེའི་མཛོད་ལ་སོགས་པ་དགོངས་གཏེར་བསྟན་བཅོས་ཀྱི་ཚུལ་དུ་བསྟན་པ་མཐའ་དག་ཡིན་ནོ། །མངོན་སུམ་འོད་གསལ་གྱི་སྐོར་སོགས་བྱེ་བྲག་ཏུ་བསྟན་པ་ནི་གུ་རུ་མཚོ་སྐྱེས་རྡོ་རྗེས་མཁའ་འགྲོ་ཡེ་ཤེས་མཚོ་རྒྱལ་དང་ལྷ་ལྕམ་པདྨ་གསལ་ལ་གདམས་པ་ལས་འབྲེལ་གྱི་གཏེར་ནས་བྱོན་པ་མཁའ་འགྲོ་སྙིང་ཏིག་དང་། གོང་དུ་བཤད་པའི་མན་ངག་བརྒྱ་བཅུ་དགུ་བི་མ་ལའི་ཟབ་པ་པོད་བཞི་དང་བཅས་པ་ལྕེ་བཙུན་ཆེན་པོས་གཏེར་ནས་བྱོན་པ་བི་མ་སྙིང་ཏིག་དང་། དེ་དག་ལ། ཀུན་མཁྱེན་སྔ་མས་ཡང་ཏིག་རྣམ་གསུམ་དང་ཀུན་མཁྱེན་ཕྱི་མས་སྙིང་ཏིག་གི་ཁྲིད་ཡིག་ཆེན་མོ་སོགས་བཞུགས་པའོ། །འདི་ཉིད་ལ་ཀུན་མཁྱེན་ཆོས་རྗེས་ཡེ་ཤེས་རང་སྣང་བའི་ངོ་བོར་སངས་རྒྱས་པའི་རང་བཞིན་དུ་བསྟན་པ་ཞེས་ཕྱོགས་བཅུའི་མུན་པ་སེལ་བར་གསུངས་སོ། །འདི་ལ་གདམས་སྐོར་གཞན་ཡང་། གཏེར་ཆེན་གུ་རུ་ཆོས་དབང་གིས་ཡང་ཏི་སངས་རྒྱས་མཉམ་སྦྱོར། མཉམ་མེད་རྡོ་རྗེ་གླིང་པས་ལྟ་བ་ཀློང་ཡངས། ལྷ་བཙུན་མཁའ་འགྲོ་དབང་ཕྱུག་གིས། རིག་འཛིན་སྲོག་སྒྲུབ། འགྲོ་མགོན་དུང་མཚོ་རས་པས་ཡང་ཏི་གསེར་གྱི་འབྲུ་གཅིག །བྱང་བ་རིག་འཛིན་ཆེན་པོས་རྫོགས་ཆེན་དགོངས་པ་ཟང་ཐལ། འདྲེན་མཆོག་ཀརྨ་གླིང་པས་ཞི་ཁྲོ་དགོངས་པ་རང་གྲོལ། མཆོག་སྤྲུལ་མི་འགྱུར་རྡོ་རྗེས་གནམ་ཆོས་ཐུགས་ཀྱི་གཏེར་ཁ། ཆོས་རྒྱལ་གཏེར་བདག་གླིང་པས་ཨ་ཏི་ཟབ་དོན་སྙིང་པོ། རིག་འཛིན་འཇིགས་མེད་གླིང་པས་ཀློང་ཆེན་སྙིང་གི་ཐིག་ལེ། འཇམ་དབྱངས་མཁྱེན་རྩེའི་དབང་པོས་ལྕེ་བཙུན་སྙིང་ཐིག་ལ་སོགས་པ་ཆོས་སྡེ་མང་ཞིག་བྱོན་པ་ཡིན་ནོ། །དེ་ལས་ཀློང་ཆེན་སྙིང་ཏིག་གི་བསྟན་པ་འདིས་ནི་གངས་ལྗོངས་འཛིན་མའི་ཐ་གྲུ་མཐའ་དག་ཟླུམ་པོར་བཅིངས་ཏེ་འཇིག་རྟེན་ཡོངས་ཀྱི་སྒྲོན་མ་དམ་པར་བཞུགས་ཤིང་མན་ངག་ཡང་གསང་བླ་མེད་སྙིང་ཏིག་རྡོ་རྗེ་སྙིང་པོའི་བསྟན་པ་གཞིར་བཞེངས་སུ་བྱས་པས་བཀའ་དྲིན་གཞལ་ལས་འདས་པའོ། །འདིར་བཀའ་གཏེར་རྫོགས་པ་ཆེན་པོའི་རྣམ་བཞག་ཉུང་ངུ་ཞིག་བསྟན་པ་འདི་ནི། བདག་ཅག་གི་བླ་མ་དམ་པ། བྱམས་ཆེན་ཐུགས་རྗེའི་གཏེར་མཛོད་རྒྱལ་བསྟན་ཡོངས་རྫོགས་ཀྱི་མངའ་བདག་ཀུན་གཟིགས་མ་ཧཱ་པཎྜི་ཏ། དོན་གྱི་སླད་དུ་མཚན་ནས་སྨོས་ཏེ། ཐུབ་བསྟན་ཆོས་ཀྱི་རྒྱ་མཚོ་བཤད་སྒྲུབ་བསྟན་པའི་ཉི་མ་དཔལ་བཟང་པོ་གང་གི་ཞལ་ལུང་བདུད་རྩིའི་ཆ་ཤས་བློ་ཡི་དབུལ་བ་སེལ་བའི་ནོར་བུ་ལགས་སོ། །གཉིས་པ་རྫོགས་ཆེན་སེམས་སྡེའི་སོགས་ཚིགས་བཅད་དྲུག་གིས་བསྟན་ཏེ། དེ་ལ་འོད་གསལ་རྫོགས་པ་ཆེན་པོ་ལ་ཕྱི་སེམས་སྡེ། ནང་ཀློང་སྡེ། གསང་བ་མན་ངག་སྡེ་གསུམ་ལས་སེམས་སྡེའི་ཟབ་གསལ་གཉིས་སུ་མེད་པའི་ཡེ་ཤེས་སྒྲུབ་པའི་མན་ངག་ཐོར་བུའི་ཉམས་ལེན་གྱི་གནད་རེ་རེར་མཁས་ཤིང་གྲུབ་པའི་དབང་ཕྱུག་སོ་སོའི་རྩལ་དུ་བཏོན་ནས་ཐུགས་ཉམས་སུ་བཞེས་པ་རྣམས་ལས། བཀའ་རྒྱུད་པ་སོགས་ཀྱི་ཕྱག་རྒྱ་ཆེན་པོ་དང་། ཆོས་རྗེས་ས་སྐྱ་པས་ལམ་འབྲས་བུ་དང་བཅས་པ། མཉམ་མེད་དམ་པ་སངས་རྒྱས་ཀྱིས། དམ་ཆོས་སྡུག་བསྔལ་ཞི་བྱེད་དང་མ་ཅིག་ཡེ་ཤེས་མཁའ་འགྲོས་ཟབ་དོན་གཅོད་ཀྱི་གདམས་སྐོར། ཇོ་བོ་བཀའ་གདམས་པ་རྣམས་ཟུང་འཇུག་དབུ་མ་ཆེན་པོ་སོགས་མཚན་གྱི་རྣམ་གྲངས་མི་འདྲ་བ་སོ་སོར་གྲགས་མོད་ཀྱང་དོན་ལ་དེ་ལྟར་ཕྱིན་ཅི་མ་ལོག་པར་རྟོགས་པར་གྱུར་ན་ལམ་གང་ནས་སྒྲུབས་ཀྱང་སེམས་དང་སེམས་ལས་བྱུང་བ་ལས་འདས་པ་ཡི་རང་བྱུང་འོད་གསལ་བའི་ཡེ་ཤེས་ཉིད་དུ་རྣམ་དབྱེར་མེད་པ་ཡིན་པའི་ཕྱིར་ན་ཀུན་ཀྱང་མཉམ་པ་ཉིད་དེ་བཟང་ངན་གང་ཡང་མེད་དོ། །དེས་ན་སངས་རྒྱས་རྣམས་དང་། གྲུབ་ཐོབ་ཐམས་ཅད་དགོངས་པ་ནི་གཅིག་ཡིན་ནོ་ཞེས་མཁས་གྲུབ་ཀུན་གྱིས་མགྲིན་གཅིག་ཏུ་སྨྲ་ཞིང་གསུང་པར་མཛད་པ་ཡང་ཚུལ་དེ་ལྟ་བུ་ལ་དགོངས་པར་གྲུབ་བོ། །གཞན་ལ་ལས་རང་ལུགས་འོད་གསལ་རྫོགས་པ་ཆེན་པོ་ནི་གཞན་ཕྱག་རྒྱ་ཆེན་པོ་ལ་སོགས་པ་ལས་ཁྱད་པར་དུ་འཕགས་སོ་ཞེས་ཟེར་ནའང་། དེ་ལྟར་སེམས་ལས་འདས་པའི་ཡེ་ཤེས་དེ་ཉིད་ཇི་ལྟ་བ་བཞིན་དུ་མ་རྟོགས་ན་ནི་གནས་ལུགས་ཆོས་ཀྱི་དབྱིངས་ཟུང་འཇུག་སྤྲོས་པ་དང་བྲལ་བའི་ཡེ་ཤེས་མཉམ་པ་ཉིད་དངོས་སུ་མཐོང་བའི་ལམ་གྱི་ཐ་སྙད་ཡང་དག་པ་ཉིད་མེད་ལ་དེ་ཉིད་ཇི་བཞིན་དུ་རྟོགས་པར་གྱུར་ན་སེམས་ལས་འདས་པའི་ཡེ་ཤེས་སུ་དགོངས་པ་གཅིག་ཏུ་གྱུར་པ་ལ་རིགས་པ་ཡང་དག་པས་འཐད་པ་དང་བཅས་པའི་ཕྱིར་ན་དབྱེ་བ་བཟང་ངན་མི་འདྲ་བ་འདི་དང་འདིའོ་ཞེས་བརྗོད་དུ་མེད་དོ། །དེ་བཞིན་དུ་སྔགས་བླ་མེད་ཀྱི་རྒྱུད་སྡེ་ཐམས་ཅད་ཀུན་གྱི་བཞི་པའི་དབང་གིའམ་དབང་བཞི་པའི་ཡེ་ཤེས་དོན་གྱི་འོད་གསལ་ཡང་དག་པ་ཀུན་ཀྱང་རིག་སྟོང་ཟུང་འཇུག་འོད་གསལ་རྫོགས་པ་ཆེན་པོར་འདུ་བས་དབྱེ་བ་གང་ཡང་མེད་དོ། །འོན་ཀྱང་ཕྱག་རྒྱ་ཆེན་པོ་ལ་སོགས་པའི་ཡེ་ཤེས་དེ་དག་ཐམས་ཅད་ཀྱི་འབྱུང་གནས་ཡེ་ཤེས་ཐམས་ཅད་ཀྱི་སྤྱི་གཟུགས་ཟུང་འཇུག་རང་བྱུང་གི་ཡེ་ཤེས་ཁོ་ན་གབ་སྦས་མེད་པར་རྩལ་དུ་བཏོན་པར་མཛད་པའི་རྫོགས་པ་ཆེན་པོའི་རྒྱུད་སྡེ་ལ་ཡང་ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེས་ཕྱེ་བའི་ཟབ་རྒྱས་ཀྱི་ཁྱད་པར་དུ་མས་འཕགས་པའི་གནད་དོན་ཞལ་ནས་སྙན་དུ་བརྒྱུད་པའི་མན་ངག་ཟབ་མོ་ཐོར་བུས་ཉམས་སུ་ལེན་པ་ཡི་ཚུལ་ཤིན་ཏུ་གསལ་བ་གཞན་པ་སུ་ལའང་མིང་ཙམ་མ་གྲགས་པ་མང་པོ་ཡོད་པས་ན་འདི་ནི་ཁྱད་ཆོས་ཡིན་ཞེས་གསང་ཐོན་དུ་སྨྲ་བར་ཅི་ཞིག་དགོས་ཞེས་མི་དགོས་ཏེ། གསེར་རིའི་དབུས་ན་ལྷུན་པོ་བཞིན་ནོ། །གསུམ་པ། དེ་ལ་རྫོགས་ཆེན་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། དེ་ལ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོ་རང་བྱུང་གི་ཡེ་ཤེས་མཐར་ཐུབ་པ་ཟབ་ཞི་སྤྲོས་པ་དང་བྲལ་བའི་འོད་གསལ་འདུས་མ་བྱས་པ་ཉིད་ནི་སངས་རྒྱས་ཀྱི་ཡེ་ཤེས་དངོས་ཉིད་ཡིན་ན་ཡང་ཐེག་མཆོག་རྫོགས་པ་ཆེན་པོའི་རང་ལམ་འདིར་ནི། མཚན་ལྡན་གྱི་བླ་མས་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་ངག་ཟབ་མོ་ལ་བརྟེན་ནས་མོས་གུས་ཕུན་སུམ་ཚོགས་པའི་སྐལ་ལྡན་སློབ་མས་འཆིང་བ་ཀུན་ལྡན་སོ་སོའི་སྐྱེ་བོའི་གནས་སྐབས་སུ་ཡང་རྫོགས་པ་ཆེན་པོའི་མན་ངག་གི་ལམ་གནད་དག་ལ་ཚུལ་བཞིན་དུ་ཞུགས་ནས་སངས་རྒྱས་ཀྱི་ཡེ་ཤེས་དངོས་དེ་དང་རྗེས་སུ་མཐུན་པར་དང་པོ་མན་ངག་ཟབ་མོའི་ངོ་སྤྲོད་ལ་བརྟེན་ནས་དཔེ་ཡི་ཡེ་ཤེས་དང་། དེ་ལ་གོམས་པས་དོན་གྱི་ཡེ་ཤེས་དང་མཐར་ཕྱིན་ནས་ཟུང་འཇུག་གི་ཡེ་ཤེས་གསུམ་པོ་རྣམས་ལ་དཔེར་ན་རི་མོར་བྲིས་པའི་ཟླ་བ་དང་ཆུ་ནང་གི་ཟླ་བ་དང་ནམ་མཁའི་ཟླ་བ་དངོས་བཞིན་དུ་ཡེ་ཤེས་དེ་དག་རིམ་པས་གཅིག་གིས་གཅིག་འདྲེན་ཅིང་མངོན་དུ་གྱུར་པ་ཡིན་པས་ན་རྒྱུ་རྐྱེན་རྩོལ་སྒྲུབ་ལས་འདས་པའི་རང་བྱུང་ཟག་པ་མེད་པའི་ཡེ་ཤེས་གང་དེ་རང་གི་བློ་སྟོབས་ཀྱི་ནུས་པ་དང་བསྟུན་ཏེ་ཚུལ་ཇི་ལྟ་བ་བཞིན་དུ་ཉམས་སུ་ལེན་པ་ཡང་དག་པར་ཡོད་པ་ཉིད་ཡིན་པའི་ཕྱིར་ཏེ། དཔེར་ན་མདོ་ལམ་དུའང་སྤྲོས་པ་དང་བྲལ་བའི་འཕགས་པའི་ཡེ་ཤེས་གང་ཉིད་ཐོབ་པར་བྱ་བའི་ཕྱིར་དུ་དེ་ཉིད་རིགས་པས་གཏན་ལ་དབབ་སྟེ་རྗེས་སུ་མཐུན་པ་སོ་སོའི་སྐྱེ་བོའི་ས་ཉིད་ནས་ཀྱང་སྒོམ་དུ་ཡོད་པ་བཞིན་ནོ། །དེས་ན་སྤྲོས་ཀུན་བྲལ་བར་ཆོས་ཉིད་སྣང་སྟོང་ཟུང་འཇུག་གི་ཡེ་ཤེས་ཆེ་བའམ་ཆེན་པོ་མངོན་སུམ་དུ་ཡང་དག་པར་གཏན་ལ་ཕེབ་ཅིང་སྒོམ་པར་བྱས་པ་ན། སྟོང་དང་མི་སྟོང་ལ་སོགས་པའི་ཡིད་དཔྱོད་ཀྱི་འཛིན་པའི་གཉིས་ཆོས་ཀྱི་ལྟ་བ་རགས་པ་ཐམས་ཅད་ཀུན་རིམ་པས་ངེས་པར་ནུབ་ནས་སྤྲོས་པ་དང་བྲལ་བའི་རང་བྱུང་གི་ཡེ་ཤེས་ཉིད་རྗེན་པར་མཐོང་བར་འགྱུར་བ་ཡིན་ནོ། །གསུམ་པ། དེ་ཕྱིར་སྐབས་ཤན་སོགས་ཚིགས་བཅད་གཅིག་དང་རྐང་པ་གཉིས་ཀྱིས་བསྟན་ཏེ། དེ་ཡི་ཕྱིར་ན་གོང་དུ་ཇི་སྐད་བཤད་པ་ལྟར་སྐབས་ཀྱི་ཤན་སོ་སོར་མ་ཕྱེད་པར་སྒོམ་པ་ལ་འཛིན་སྟངས་དང་བཅས་པའི་དཔྱད་པ་ཡོད་པ་ཞིག་ངེས་པར་དགོས་ཟེར་བ་དང་། དཔྱོད་པའི་འཛིན་སྟངས་མེད་པར་འཇོག་སྒོམ་ཁོ་ན་དགོས་ཞེས་ཕྱོགས་སམ་མཐའ་གཅིག་ཏུ་འདོད་ཅིང་སྨྲ་བ་ལ་སྐྱོན་གྱི་ཆ་རེ་དང་ལེགས་པའི་ཆ་རེ་ཡོད་པ་དཔེར་ན་ཟླ་བའི་འཕེལ་འགྲིབ་ཀྱི་སྐྱོན་ཡོན་བཞིན་དུ་གནས་པ་ཡིན་པས་མི་འཐད་ཅིང་། རང་ལུགས་སོ་སོར་ཕྱེ་སྟེ་བཤད་པ་འདི་ནི་མདོ་རྒྱུད་ཀྱི་ངེས་པའི་ལུང་གི་བསྟན་དོན་ཇི་ལྟ་བ་བཞིན་དུ་འཁྲུལ་བའི་དྲི་མ་མེད་པར་རིག་པའི་ཚུལ་གྱིས་ཡང་དག་པར་གྲུབ་པ་ཉིད་ཡིན་ནོ། །ཐེག་མཆོག་ལྟ་བ་སྒོམ་པ་དཔྱད་འཇོག་ཏུ། །ཕྱོགས་རེར་འཛིན་ལ་སྐྱོན་དང་ལེགས་ཆ་རེ། །ཉེས་པའི་སྐྱོན་བྲལ་ཇི་བཞིན་ཤན་འབྱེད་པའི། །ལུང་རིགས་ཉི་མ་ཐེག་མཆོག་ལྟ་བའི་མིག །ཅེས་ཀྱང་སྨྲས་སོ། །དྲི་ལན་ལྔ་པ་བདེན་པ་གཉིས་ལས་གང་ཞིག་གཙོ་བའི་ལན་ལ་གཉིས། ཕྱོགས་སུ་ལྷུང་བ་གཞན་གྱི་ལུགས་ལ་ལུང་རིགས་ཟབ་མོས་གནོད་པ་ཇི་ལྟར་འབྱུང་ཚུལ། བདེན་གཉིས་ཟུང་དུ་འཇུག་པ་རང་གི་ལུགས་ལ་འཁྲུལ་མེད་ཚད་མའི་ལམ་སྲོལ་ཇི་ལྟར་འཐད་པའི་ཚུལ་ལོ། །དང་པོ། བདེན་པ་གཉིས་ལ་སོགས་ཚིགས་བཅད་བཅུ་གཅིག་དང་རྐང་པ་གཉིས་ཀྱིས་བསྟན་ཏེ། དེ་ལ་བདེན་པ་གཉིས་ལ་གང་ཞིག་གཙོ་ཆེ་བར་སྨྲ་བ་ལ་ལུང་རིགས་ཀྱིས་སྒྲུབ་ཚུལ་ཇི་ལྟར་ཡོད་ཅེ་ན། སྣང་སྟོང་དབྱེར་མེད་མཉམ་པ་ཆེན་པོ་ཐུགས་སུ་མ་ཆུད་པར་སྟོང་པར་ཐུགས་ཞེན་ཆེ་བ་ཁ་ཅིག་སྟོང་པ་ཉིད་དོན་དམ་པ་ཉིད་གཙོ་ཆེར་འདོད་པ་ཡིན་ཏེ། འདི་ལྟར་སྣང་བ་ཀུན་རྫོབ་རྣམས་ནི་འཁྲུལ་བའི་སྣང་བ་ཁོ་ན་ཡིན་ནོ་ཞེས་སྤང་བྱར་རྟོགས་ཤིང་འཛིན་ལ་སྟོང་ཉིད་དོན་དམ་པ་ནི་མ་འཁྲུལ་པ་ཡང་དག་པ་ཉིད་ཡིན་པས་དོན་དམ་པ་དེར་ལྟ་བ་ནི་རྣམ་པར་དག་པ་ཡིན་ནོ་ཞེས་ཟེར་བ་མི་འཐད་དེ། ཇི་ལྟར་ན་སྣང་བ་ཀུན་རྫོབ་རྣམས་མ་འཁྲུལ་བར་སྣང་བ་ལྟར་བདེན་པར་གྲུབ་པར་གྱུར་ན་དེ་དོན་དམ་པ་སྟོང་པ་ཉིད་ཡིན་པར་ཡང་མི་རུང་བའི་ཕྱིར་ན་ཀུན་རྫོབ་འཁྲུལ་བའི་སྣང་བའོ། །ཞེས་དེ་སྐད་དུ་ནི་གསུངས་པ་ཡིན་མོད་ཀྱི། འོན་ཀྱང་སྣང་བ་ཀུན་རྫོབ་འདི་སྤང་བའི་ཕ་རོལ་ཏེ་སྣང་བ་དེ་ལས་གཞན་ན་དེའི་སྟོང་པ་དོན་དམ་ཞེས་པ་ཡན་གར་དུ་འགའ་ཅུང་ཟད་ཙམ་ཡང་མི་འགྲུབ་སྟེ་དེ་གཉིས་ལས་ཀུན་རྫོབ་ཐབས་དང་དོན་དམ་ཐབས་ལས་བྱུང་བ་ཉིད་ཡིན་པས་ན། གང་བརྟགས་བྱའི་དངོས་པོ་ཀ་བ་ལ་སོགས་པའི་སྣང་བ་ཀུན་རྫོབ་ཉིད་ལ་མ་བརྟེན་པར་དེ་ཡི་དངོས་མེད་དམ་སྟོང་ཉིད་དོན་དམ་པར་ཡན་གར་དུ་ཡོད་པ་མིན་ཏེ། དེས་ན་དངོས་པོ་དང་དངོས་པོ་མེད་པ་དེ་གཉིས་ཀ་ཡང་རྟེན་འབྲེལ་ཙམ་དུ་མཚུངས་པས་རྟེན་འབྲེལ་ཉིད་ཡིན་ཏེ། དངོས་པོ་རྣམས་བརྟེན་ནས་སྐྱེས་པ་དང་། དངོས་མེད་རྣམས་བརྟན་ནས་བཏགས་པ་ཡིན་པས་སོ། །གལ་ཏེ་སྣང་བ་ཉིད་ལས་སྟོང་པ་སོགས་སུ་མེད་པ་དེ་ལྟ་མ་ཡིན་པར་སྟོང་ཉིད་དོན་དམ་པ་གཙོ་ཆེ་ཞེས་སྟོང་པར་ཞེན་ཅིང་འཛིན་པ་དེས་སྣང་བ་རྣམ་པར་བཅད་པའམ་སྤང་བར་གྱུར་པ་ཞིག་ཡིན་ན། ངོ་བོ་སྐྱེ་བ་མེད་པའི་སྟོང་པ་ཉིད་ཡིན་པའི་གནད་ཀྱིས་སྣང་བ་འགགས་པ་མེད་པའི་རྟེན་འབྱུང་དུ་རང་ཤར་བས་སྣང་སྟོང་དབྱེར་མེད་རྟག་ཆད་ཐམས་ཅད་དང་བྲལ་བའི་ཟབ་མོ་དབུ་མའི་ལྟ་བ་དཔལ་ལྡན་ཀླུ་སྒྲུབ་ཀྱི་ལུགས་བཟང་སྣང་སྟོང་ཡ་མ་བྲལ་བ་ཉིད་ཕྱིན་ཅི་ལོག་གི་རྟོག་པས་དཀྲུགས་ཤིང་རྙོགས་མར་བྱས་པ་ཡིན་ལ། དེ་ལྟའི་སྣང་བ་ལས་གཞན་པའི་དོན་དམ་སྟོང་པར་མཐོང་བ་དེ་ཡིས་ལམ་དེ་ལ་ནན་ཏན་དུ་གོམས་པར་བྱས་ནས་མཐར་ཆོས་ཐམས་ཅད་སྟོང་པའི་དབྱིངས་ཕྱང་ཆད་འབའ་ཞིག་ཉིད་དུ་རྟོགས་ཏེ་དེའི་ངང་དུ་ཡུལ་དང་ཡུལ་ཅན་གྱི་གཉིས་སྣང་ཐམས་ཅད་ནུབ་པའི་ཚེ་ན་ནི་འཕགས་པའི་མཉམ་བཞག་གཉིས་སྣང་ཐམས་ཅད་ནུབ་པའི་སྟོང་པ་ཉིད་ནི་སྣང་བ་དངོས་པོའི་སྟེ་དངོས་པོ་རྣམས་ཀྱི་འཇིག་རྒྱུར་ཁྱོད་ལའང་ཐལ་བར་འགྱུར་ཏེ་དཔེར་ན་བུམ་པའི་འཇིག་རྒྱུ་ཐོ་བ་བཞིན་ནོ། །གཞན་ཡང་དེ་འདྲའི་གཞན་སེལ་གྱི་སྟོང་པ་ཕྱང་ཆད་ཁོ་ན་ལ་གཉིས་སྣང་ནུབ་པར་མི་སྲིད་ཅིང་སྲིད་ནའང་ཆད་སྟོང་དུ་འགྱུར་བའི་སྐྱོན་ལ་སོགས་པའང་གསུངས་སོ། །དེ་ཡི་ཕྱིར་ན་ཆོས་ཀུན་ཡེ་གདོད་མ་ནས་རང་རང་ངོ་བོས་སྟོང་པ་ཉིད་ཡིན་ན་ཡང་སྣང་བ་རྟེན་འབྱུང་འགགས་པ་མེད་པར་རང་ཤར་བས་སྟོང་རྟེན་འབྱུང་འབྲལ་མི་ཤེས་པས་དབྱེར་མེད་དམ་ཟུང་འཇུག་ཉིད་ཡིན་པའི་གནད་ཀྱིས་གང་སྣང་བ་དེ་ཉིད་སྟོང་པ་དང་གང་སྟོང་པ་དེ་ཉིད་སྣང་བ་སྟེ་སྣང་བ་དང་སྟོང་པ་སོ་སོར་རིས་སུ་མ་ཆད་པ་མེ་དང་ཚ་བ་བཞིན་དུ་རྣམ་དབྱེར་མེད་པར་ཡེ་ནས་གནས་པ་ཉིད་ཡིན་པས་ན། སྟོང་པ་ཉིད་དོན་དམ་པ་ཁོ་ན་གཙོ་ཆེའོ་ཞེས་འཛིན་པ་དེ་དག་ནི་གནས་ལུགས་མཐར་ཐུག་སྣང་སྟོང་དབྱེར་མེད་ཀྱི་དོན་ལ་མི་མཁས་པར་གསལ་བ་ཡིན་ནོ། །ཡང་སྣང་སྟོང་དབྱེར་མེད་ཀྱི་གནད་དམ་པ་འདི་མ་རྟོགས་པ་ལ་ལས་དོན་དམ་སྟོང་པའི་དབྱིངས་ཕར་བཅད་ནས་ཏེ་དེ་ལ་མི་ལྟོས་པར་སྣང་བ་ཡན་གར་པ་ལྷར་སྒོམས་པ་སོགས་ཐབས་ཀུན་རྫོབ་ཁོ་ན་ཙམ་གྱི་ངོས་ནས་ནི། མདོ་སྔགས་ཀྱི་ལྟ་བ་དང་། སྔགས་ཕྱི་ནང་གི་རྒྱུད་སྡེའི་ལྟ་བ་རྣམས་མཐོ་དམན་དུ་བྱེད་པར་འདོད་པ་འདི་ཡང་མི་འཐད་དེ། འདི་ལྟར་དོན་དམ་པ་སྟོང་པས་མ་ཟིན་པས་ཐབས་ཀུན་རྫོབ་པ་རང་ཉིད་ཁོ་ནས་མདོ་སྔགས་རྒྱུད་སྡེ་གོང་འོག་གི་ལྟ་བ་ཡི་མཐོ་དམན་གྱི་ཁྱད་པར་བྱེད་ཆས་སུ་མི་འཐད་པའི་ཕྱིར་ཏེ། ཇི་ལྟར་ན། སྟོང་པའི་དབྱིངས་དང་སྣང་བའི་ཡེ་ཤེས་ཡེ་ནས་འདུ་འབྲལ་མེད་པའི་གནད་ཀྱིས་སྣང་བ་ལྷར་ཡེ་ནས་དག་པར་གནས་པའི་ལྷ་སྒོམ་པ་དོན་དང་ལྡན་པ་ཡིན་གྱི་གཞན་དུ་དོན་དམ་སྟོང་པའི་དབྱིངས་ཀྱི་གདེངས་དང་མི་ལྡན་པའམ་དེས་མ་ཟིན་པར་སྣང་བ་ཀུན་རྫོབ་འཁྲུལ་བ་རང་གི་ངོ་བོ་མ་དག་པར་ལྟ་བཞིན་དུ་རྣམ་པ་ལྷ་རུ་སྒོམ་པ་ཙམ་ནི་ལྷ་མིན་པ་ལ་ཡིན་པར་མོས་པ་ཙམ་ཡིན་གྱི་གནས་ལུགས་དང་མཐུན་པའི་ལྟ་བ་ཡང་དག་པ་ཉིད་མིན་པས་ན། དཔེར་ན་མུ་སྟེགས་བྱེད་ཀྱི་རིགས་སྔགས་འཛིན་པ་འགའ་ཞིག་ཀྱང་སྔགས་བཟླ་བའི་ཚེ་རང་ཉིད་རང་མིན་པ་གཞན་དུ་མོས་ནས་བཟླ་དགོས་པར་འདོད་པ་བཞིན་ནོ། །ཡང་ལ་ལས་རྟེན་འབྲེལ་གྱི་སྣང་བ་ཀུན་རྫོབ་ཉིད་གལ་ཆེ་བ་སྟེ། དེ་ཅིའི་ཕྱིར་ཞེ་ན། གནས་ལུགས་སྣང་སྟོང་བདེན་གཉིས་ཟུང་དུ་འཇུག་པ་ཞིག་དགོས་སོ་ཞེས་ཟེར་ནས་ཡང་ནས་ཡང་དུ་ཀུན་རྫོབ་རྟེན་འབྲེལ་སྣང་བའི་ཕྱོགས་ལ་ཐུགས་ཞེན་གྱིས་ཧ་ཅང་ཐལ་ཆེས་ཏེ་དོན་དམ་དཔྱོད་པའི་རིགས་པ་གང་གིས་ཀྱང་སྣང་བ་འགོག་མི་རུང་སྟེ། འགོག་ན་ཐ་སྙད་ལ་སྐུར་པ་བཏབ་ཅིང་ཆད་པའི་ལྟ་བར་འགྱུར་བ་སོགས་སྐྱོན་ཆེ་ཞིང་འགོག་ཀྱང་མི་ནུས་ཞེས་བསྔགས་ཤིང་སྒྲུབ་ནས་དང་པོ་ལྟ་བ་གཏན་ལ་ཕབ་པར་མཛད་ནའང་། ཉམས་ལེན་དངོས་གཞི་སྣང་སྟོང་ཟུང་འཇུག་གམ་དབྱེར་མེད་ཀྱི་ལྟ་བ་སྐྱོང་ཞིང་སྒོམ་པའི་དུས་ན་ཟུང་འཇུག་གི་ཉམས་ལེན་དོར་བའམ་སྤང་ནས་མེད་རྐྱང་ངམ་མེད་འཛིན་ལ་ཐུགས་རྩེ་གཏོད་ཅིང་ཉམས་ལེན་གྱི་གནད་དུ་མཛད་པ་འདི་ཡང་དང་པོ་སྣང་སྟོང་བདེན་གཉིས་དབྱེར་མེད་དམ་ཟུང་འཇུག་ཏུ་གཏན་ལ་འབེབས་དགོས་ཞེས་པའི་བཤད་པ་བཟང་པོ་གནས་ལུགས་མཐུན་པའི་མ་ལྟ་བུ་དེ་ཡི་རྗེས་སུ་དངོས་གཞིའི་ཉམས་ལེན་སྣང་སྟོང་དབྱེར་མེད་ཀྱི་བུ་ཆུང་གིས་སླེབ་པར་མ་ནུས་པས་སྣང་སྟོང་ཡ་བྲལ་གྱི་སྒོམ་པ་འདི་ཡང་གནས་ལུགས་མཐར་ཐུག་གི་ཉམས་ལེན་མ་ཡིན་པས་ཕྱོགས་ལྷུང་ཅན་དུ་འགྱུར་རོ། །གཉིས་པ་ལ་གསུམ། ཐེག་མཆོག་དབུ་མ་ཆེན་པོའི་སྐབས་སུ་བདེན་པ་གཉིས་ལ་གཙོ་ཕལ་མེད་པར་ཟུང་འཇུག་རྒྱ་ཆད་ཕྱོགས་ལྷུང་དང་བྲལ་བའི་ལྟ་བ་སྒྲུབ་ཚུལ་སྤྱིར་བསྟན་པ། ཐབས་མཆོག་སྔགས་ཀྱི་ཐེག་པའི་སྐབས་སུ་དག་མཉམ་གཉིས་ལ་མཆོག་དམན་མེད་པར་ཟུང་འཇུག་རྡོ་རྗེའི་ལམ་གྱི་ལྟ་བར་སྒྲུབས་ཚུལ་བྱེ་བྲག་ཏུ་བཤད་པ། ལྟ་བའི་ཁྱད་པར་གྱི་དབང་གིས་ཐེག་དགུར་འཇོག་པའི་རྒྱུ་མཚན་བསྟན་ཏེ་སྐབས་ཀྱི་དོན་བསྡུ་བའོ། །དང་པོ། དེས་ན་སྔ་འགྱུར་སོགས་ཚིགས་བཅད་བཅུ་གཉིས་ཀྱིས་བསྟན་ཏེ། བདེན་པ་གཉིས་ཀྱི་རང་བཞིན་གཞི་ལམ་འབྲས་བུའི་ཆོས་ཀུན་ལ་སྣང་སྟོང་ངམ་སྟོང་རྟེན་འབྱུང་གཉིས་ལ་གཙོ་ཆེ་ཆུང་རྒྱུ་བཟང་ངན་དབྱེ་ནས་དགག་སྒྲུབ་བླང་དོར་གྱི་སྣང་སྟོང་ཡ་བྲལ་དུ་སོང་ན་གནས་ལུགས་དང་འགལ་བར་གྱུར་པ་དེས་ན་སྔ་འགྱུར་གྱི་རང་ལུགས་གྲུབ་མཐའ་རྣམ་པར་དག་པ་འདིར་ནི། ཕུང་ཁམས་སྐྱེ་མཆེད་སོགས་གཞི་དང་། བྱང་ཕྱོགས་སོ་བདུན་དང་ཕྱིན་དྲུག་སོགས་ལམ་དང་། བྲལ་སྨིན་གྱི་ཡོན་ཏན་འབྲས་བུའི་ཆོས་སྐད་དམ་ཐ་སྙད་གང་ལ་ཡང་རྟག་དང་མི་རྟག་སྣང་སྟོང་བདེན་གཉིས་སོགས་རྒྱ་གང་དུ་ཡང་ཆད་པ་དང་ཕྱོགས་གང་དུ་ཡང་ལྷུང་བ་བྲལ་བ་སྟེ་རྒྱ་ཆད་ཕྱོགས་ལྷུང་མེད་པ་ཡི་སྣང་སྟོང་བདེན་གཉིས་དབྱེར་མེད་དམ་ཟུང་འཇུག་ཁོ་ནའི་རང་གི་གྲུབ་མཐའ་བསྐྱངས་ཏེ་འཇོག་པ་ཡིན་པས་འདི་ལས་གཞན་དུ་སྣང་བ་ཀུན་རྫོབ་དང་ནི་སྟོང་པ་དོན་དམ་པ་ཡ་བྲལ་རེ་རེའི་སྟེང་དུ་ནི། གཞི་དང་ལམ་དང་འབྲས་བུ་ཡི་རྣམ་པར་བཞག་པ་གང་ཡང་སྐྱོན་མེད་ཅིག་འཇོག་མི་ནུས་པའི་ཕྱིར་ན་གཞི་ལམ་འབྲས་བུ་གསུམ་ཆར་གང་དང་གང་དུའང་བདེན་པ་གཉིས་ལ་རྩིས་ཆེ་ཆུང་བྱས་ནས་འདི་ནི་སྤང་བྱ་དང་འདི་ནི་བླང་བྱའོ་ཞེས། བཟང་ངན་གྱི་དབྱེ་བ་ཅུང་ཟད་ཀྱང་མེད་པར་མགོ་མཉམ་དུ་ཡེ་ནས་གནས་པས་ན་བླང་དོར་དུ་ལྟ་བ་མི་འཐད་དེ། སྣང་བ་ཀུན་རྫོབ་འདི་ཉིད་སྤངས་པའི་ཕ་རོལ་ལམ་གཞན་ཞིག་ན་སྟོང་པ་དོན་དམ་པ་གང་ཡང་མེད་པས་མི་རྙེད་ལ། སྟོང་པ་དོན་དམ་པ་སྤངས་པའི་ཕ་རོལ་ན་ཀུན་རྫོབ་གཞན་ཞིག་རྣམ་པ་ཀུན་ཏུ་མེད་པ་ཉིད་ཡིན་པས་དཔེར་ན་མེ་ཉིད་སྤང་བའི་ཚ་བ་དང་ཚ་བ་སྤང་བའི་མེ་ཉིད་མེད་པ་བཞིན་ནོ། །དེས་ན་གཞི་ལམ་འབྲས་བུས་བསྡུས་པའི་ཆོས་གང་ཡང་སྣང་བ་དེ་ལ་སྟོང་པས་ཁྱབ་པ་དང་གང་སྟོང་པ་དེ་ལ་སྣང་བས་ཁྱབ་པ་ཡང་དག་པར་གྲུབ་སྟེ། སྟོང་པ་ཉིད་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །ཞེས་རྒྱལ་བའི་ཡུམ་ལས་གསུངས་པས་མེ་དང་ཚ་བ་བཞིན་ནོ། །དེ་གང་གི་ཕྱིར་ན། མཆོག་གི་དོན་གཟིགས་པའི་དམ་པ་རྣམས་ཀྱིས། སྣང་དེ་ཅིའི་ཕྱིར་སྟོང་པའི་ཕྱིར། སྟོང་དེ་ཅིའི་ཕྱིར་སྣང་བའི་ཕྱིར། ཞེས་གསུངས་པ་བཞིན་ཆོས་གང་སྣང་ན་དེ་ཉིད་རང་གི་ངོ་བོས་མི་སྟོང་པ་ཞིག་མི་སྲིད་ཅིང་གལ་ཏེ་སྲིད་ན་དེ་འབའ་ཞིག་མ་གཏོགས་པ་གཞན་ཕྱོགས་དུས་ཀྱིས་བསྡུས་པའི་ཤེས་བྱ་གཅིག་ཀྱང་མི་སྲིད་དེ། འདི་ལྟར་བརྟགས་མཐའ་བཟུང་སྟེ་ཤེས་བྱའི་ཁོང་ན་གཅིག་བདེན་ཞིག་སྲིད་ན་ཆ་མེད་གཅིག་ཡིན་དགོས་ལ། གལ་ཏེ་རྡུལ་ཕྲ་རབ་ལྟ་བུ་ཆ་མེད་གཅིག་བདེན་པར་གྲུབ་པ་ཡོད་ན་ཕྱོགས་དུས་ཀྱི་ཤེས་པ་གང་ཇི་སྙེད་པས་དེ་འབའ་ཞིག་དམིགས་དགོས་པ་དང་། ཕྱོགས་དུས་ཀྱིས་བསྡུས་པའི་འཁོར་འདས་ཀྱི་ཆོས་གཅིག་ཀྱང་མི་སྣང་བར་དེ་འབའ་ཞིག་སྣང་དགོས་པ་དང་། མཐར་དེ་ཡུལ་དུ་བྱེད་པའི་ཡུལ་ཅན་གྱི་ཤེས་པའང་མི་སྲིད་ཅིང་དེ་རང་གི་ངོ་བོ་ལའང་སྣང་མི་སྣང་དང་ཕྲ་རྡུལ་ཡིན་མིན་གྱི་ཆ་ཡང་མི་སྲིད་པ་ཞིག་དགོས་པས་ཕྱང་ཆད་ནམ་མཁའ་ལྟ་བུ་འབའ་ཞིག་མ་གཏོགས་འཁོར་འདས་ཀྱི་སྣང་རྟོག་ཐ་སྙད་ཐམས་ཅད་ཤེས་བྱ་ལ་མི་སྲིད་པར་ངེས་པར་རྒྱུན་ཆད་དེ་གཏན་མེད་དུ་འགྱུར་དགོས་ནའང་དེ་ལྟར་མ་ཡིན་པར་འཁོར་འདས་ཀྱི་སྣང་རྟོག་བསླུ་མེད་ཀྱི་ཐ་སྙད་འགོག་ཏུ་མེད་པར་ཆེས་བཀྲ་བ་འདི་ཉིད་ཆོས་ཐམས་ཅད་རང་རང་གི་ངོ་བོས་སྟོང་པའི་གནད་ཀྱིས་རང་སྣང་བ་ཡིན་པར་ཤེས་པར་བྱའོ། །སྟོང་པ་ཉིད་དེའང་མི་སྣང་བའམ་སྣང་བ་མེད་པ་ཞིག་མི་གྲུབ་པ་ཡིན་པའི་ཕྱིར་ན་ཀུན་མཁྱེན་ཆོས་རྗེས། སྣང་བ་མ་ཡིན་པའི་སྟོང་པ་བདེན་པ་གཉིས་ཆར་མི་སྲིད་པ་དང་རྟོགས་བྱར་མི་རུང་བ་ལ་སོགས་པར་གསུངས་ཤིང་། མགོན་པོ་ཀླུས་ཀྱང་། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མི་འགྱུར། །ཞེས་དང་། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་དང་། གང་ཞིག་སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །ཞེས་སོགས་གསུངས་པ་ཡིན་ནོ། །དེའི་ཕྱིར་དངོས་དང་དངོས་མེད་གཉིས་པོ་ཡང་ཆོས་ཅན་ནམ་སྟོང་གཞིར་བྱས་ནས་རང་རང་ངོ་བོས་སྟོང་དགོས་པའི་ཕྱིར་ན། གང་སྣང་བའི་དངོས་པོ་འདི་དག་བརྟེན་ནས་སྐྱེ་ཞིང་སྣང་བ་རྨི་ལམ་གྱི་བུ་སྣང་ལྟར་དེ་དང་དེར་བཏགས་པ་ཙམ་ཞིག་ལས་དོན་ལ་གྲུབ་པ་མེད་ལ། དངོས་མེད་སྟོང་པའང་བརྟེན་ནས་བཏགས་པ་རྨི་ལམ་གྱི་བུ་ཤི་བ་ལྟར་བློ་ཡིས་བཏགས་པ་ཙམ་ལས་གྲུབ་པ་མེད་པས་དེ་ལྟར་སྣང་བ་དང་སྟོང་པ་དངོས་དང་དངོས་མེད་སྣང་བཏགས་ཀྱི་རྟེན་འབྲེལ་འདི་ལ་གནས་ལུགས་དཔྱོད་པའི་རིགས་པ་ཡང་དག་པས་དཔྱད་པ་ཟབ་མོས་དྲངས་པའི་སྣང་སྟོང་དབྱེར་མེད་པའི་ངེས་ཤེས་ཟབ་མོ་ལ་སྣང་བ་ཐ་སྙད་བདེན་པ་དང་། སྟོང་པ་དོན་དམ་བདེན་པ་འདི་གཉིས་སྣང་བ་ཐབས་དང་སྟོང་པ་ཐབས་བྱུང་ཉིད་དུ་འཆར་ཞིང་མཐོང་སྟེ། དེའི་ཕྱིར་དེ་གཉིས་ལས་གང་གཅིག་ཤོས་ཡོད་པར་གྱུར་ན་ནི་གཅིག་ཤོས་དེའང་མེད་པ་ཉིད་དུ་མི་སྲིད་པས་ཆུ་དང་རླན་ལྟར་ཡེ་ནས་འདུ་འབྲལ་མེད་པར་གནས་པ་ཡིན་པས་སོ་སོར་བྱར་མེད་པ་དེ་ཡི་ཕྱིར་ན་གཞི་ལམ་འབྲས་གསུམ་གང་ལའང་སྣང་བ་དང་དེའི་སྟོང་པ་དག་སོ་སོའི་ཆར་ནི་གཉིས་འཛིན་ཅན་གྱིས་ཤེས་ཤིང་རྟོགས་ན་ཡང་གནས་ལུགས་ཀྱི་དོན་དུ་ནམ་ཡང་སོ་སོར་དབྱེ་བ་ཡེ་ནས་མེད་པ་དེ་ཡི་ཕྱིར་ན་སྣང་སྟོང་འདི་གཉིས་སྲད་བུ་དཀར་ནག་བསྒྲིལ་བ་དང་གཅིག་རྗེས་སུ་གཅིག་བྱུང་བ་ལྟ་བུ་མ་ཡིན་པར་མེ་དང་ཚ་བ་ལྟར་དབྱེར་མེད་པ་ཡིན་ལ། དེ་མཚོན་པའི་བརྡར་ཐ་སྙད་དུ་མདོ་དང་རྒྱུད་སྡེར་སྟོང་རྟེན་འབྱུང་ངམ་ཐབས་ཤེས་སམ་སྣང་སྟོང་ཟུང་འཇུག་ཅེས་བརྗོད་དེ། ལྷ་ཡི་བུ་རབ་རྩལ་སེམས་ཀྱིས་ཞུས་པའི་མདོ་ལས། ཤེས་རབ་དང་ནི་ཐབས་ཤེས་པ། །དེ་གཉིས་ཀུན་ཏུ་འདྲེས་གྱུར་ཅིང་། །གཉིས་ཀ་ཟུང་དུ་འཇུག་གྱུར་ན། །དེས་ནི་དམ་པ་རྟོགས་པར་འགྱུར། །ཞེས་དང་། བཤད་རྒྱུད་རྡོ་རྗེ་ཕྲེང་བ་ལས། ཀུན་རྫོབ་དང་ནི་དོན་དམ་དག །རྟོག་པ་གཉིས་པ་རྣམ་པར་བྲལ། །གང་དུ་ཡང་དག་འདྲེས་གྱུར་པ། །དེ་ནི་ཟུང་དུ་འཇུག་པར་བཤད། །ཞེས་གསུངས་སོ། །དེ་ལྟར་སྣང་སྟོང་དབྱེར་མེད་པའི་གནས་ལུགས་ཡང་དག་པར་མཐོང་བའི་ངེས་ཤེས་ཟབ་མོ་ནི། སྣང་སྟོང་གང་གིའང་མཐར་ལྷུང་བ་མེད་པའི་ཕྱིར་སྣང་སྟོང་ཕྱོགས་རེར་ལྷུང་བའི་ངེས་ཤེས་ནི་གནས་ལུགས་མཐར་ཐུག་དང་མཐུན་པའི་ངེས་ཤེས་སུ་མི་འགྱུར་རོ། །དེས་ན་གནས་ལུགས་ཡང་དག་པར་དཔྱོད་པའི་ཤེས་རབ་ཟབ་མོའི་ངོར་གང་སྣང་བ་དང་དེའི་སྟོང་པ་ཉིད་འདི་གཉིས་པོ་ཡོད་ན་ཡོད་མཉམ་དང་མེད་ན་མེད་མཉམ་ཡིན་པས་ངོ་བོ་གཅིག་ལ་ལྡོག་པ་ཐ་དད་ཙམ་གྱིས་དབྱེ་བར་འདོད་ཅིང་། དེ་ཡང་དང་པོའི་ལས་ཅན་གྱི་གང་ཟག་རྣམས་ལ་སྣང་སྟོང་འདི་གཉིས་དགག་བྱ་དང་འགོག་བྱེད་ལྟ་བུར་སོ་སོར་སྣང་བར་འགྱུར་ལ། དེ་ཚེ་སྣང་སྟོང་གཉིས་པོ་གཅིག་ཏུ་འདྲེས་པ་མེད་པས་ད་དུང་ཟུང་འཇུག་ཇི་བཞིན་པར་མཐོང་བ་མ་ཡིན་པས་འདི་ལྟར་སྣང་བའི་ཆོས་ཀུན་གདོད་ནས་སྟོང་ཞིང་སྟོང་པའི་གནད་ཀྱིས་རྟེན་འབྱུང་དུ་རང་འཆར་བར་ངེས་ཤེས་ཡང་དག་པར་བསྐྱེད་པ་དང་། དེ་ནས་སྣང་སྟོང་དབྱེར་མེད་ཟུང་འཇུག་དང་། དེ་ནས་སྤྲོས་བྲལ་དང་། མཉམ་པ་ཉིད་དེ་དབུ་མའི་ལྟ་རིམ་བཞི་པོ་རང་རྒྱུད་ལ་རིམ་གྱིས་བསྐྱེད་ཅིང་འབྱུང་དགོས་པ་ཡིན་ལ། དེའི་ཕྱིར་ནམ་ཞིག་ན་ཆོས་ཀུན་ཡེ་ནས་སྟོང་པའི་རང་བཞིན་ཉིད་ནི་རང་གསལ་བའམ་སྣང་བར་འཆར་བ་ལ་ཡིད་ཆེས་ཐོབ་སྟེ་སུས་ཀྱང་མི་འཕྲོག་པའི་ངེས་ཤེས་ཟབ་མོ་ཐོབ་ལ། དེ་ཡང་འཁོར་འདས་ཀྱིས་བསྡུས་པའི་ཆོས་ཐམས་ཅད་གདོད་ནས་ཏེ་ཡེ་ནས་སྟོང་པ་ཉིད་ཡིན་པའི་གནད་ཀྱིས་རྟེན་འབྱུང་འགགས་པ་མེད་པར་རང་སྣང་བ་དང་། གང་སྣང་བ་འདི་དག་ཐམས་ཅད་རྟེན་ཅིང་འབྲེལ་འབྱུང་ཡིན་པའི་གནད་ཀྱིས་སྟོང་པ་ཉིད་དུ་ཡེ་ནས་གནས་པ་ཡིས་ན་གཞི་དང་རྩ་བ་བྲལ་བའི་རང་བཞིན་ཡིན་པས་སྟོང་བཞིན་དུ་སྣང་ལ་སྣང་བཞིན་དུ་སྟོང་པར་མཐོང་བས་སྣང་སྟོང་ཟུང་འཇུག་གི་ངེས་ཤེས་གང་གིས་ཀྱང་མི་འཕྲོག་པར་སྐྱེ་བར་གྱུར་ན་ཟབ་མོ་དབུ་མའི་ལྟ་བ་མཐར་ཕྱིན་པ་ཉིད་ཡིན་ལ། དེ་ལྟར་གནས་ལུགས་སྣང་སྟོང་ཟུང་འཇུག་ཏུ་སྣང་བ་འདི་ནི་ངེས་པ་དོན་གྱི་མདོ་དང་རྒྱུད་སྡེ་མན་ངག་གི་ལམ་ཟབ་མོ་ཀུན་གྱི་རྩ་བའམ་སྙིང་པོར་གྱུར་པ་སྟེ་ཐོས་བསམ་ཡང་དག་པའི་ལམ་གྱིས་གནས་ལུགས་ལ་སྒྲོ་འདོགས་ཐམས་ཅད་ལེགས་པར་ཆོད་པའི་དོན་ཡང་དག་པའི་ལྟ་བ་འཁྲུལ་བའི་དྲི་མ་མེད་པ་ཉིད་ཡིན་ནོ། །གཉིས་པ་ལ་གཉིས། དངོས་དང་། དེ་ལས་གཞན་དུ་འདོད་ཅིང་རྒྱུད་སྡེ་ལ་ལྟ་བའི་མཐོ་དམན་མེད་ན་དངོས་སྟོབས་རིགས་པས་ཇི་ལྟར་གནོད་ཚུལ་བསྟན་པའོ། །དང་པོ། གནད་དེ་ཇེ་བས་སོགས་ཚིགས་བཅད་དགུ་དང་རྐང་པ་གཉིས་ཀྱིས་བསྟན་ཏེ། གོང་དུ་ཇི་སྐད་བཤད་པའི་བདེན་གཉིས་ཟུང་འཇུག་མཉམ་པ་ཆེན་པོར་མཐོང་བའི་ལམ་གྱི་འདྲེན་པ་ལྟ་བ་རྣམ་པར་དག་པའི་གནད་དེ་ཉིད་གོང་ནས་གོང་དུ་ཇེ་བས་ཇེ་ཟབ་ཏུ་རྟོགས་ཤིང་གོམས་པས་རང་བཞིན་གྱིས་རྣམ་པར་དག་པའི་དབྱིངས་དང་གཉིས་སུ་མེད་པའི་ཀུན་རྫོབ་ཀྱི་སྣང་བ་གང་ཇི་སྙེད་པ་རྣམས་ལ་ཡང་ཐ་མལ་རང་མཚན་གྱི་ཞེན་པ་རིམ་གྱིས་སྤོང་ཞིང་དབྱིངས་སྣང་ལྷ་དང་ཡེ་ཤེས་སུ་དག་པས་གནས་སྣང་མཐུན་པའི་སྣང་བ་གོང་འཕེལ་དུ་གྱུར་པའི་རྗེས་ཀྱི་ངེས་ཤེས་ཀྱི་སྟོབས་ལས་རྒྱུད་སྡེའི་ཐེག་པའི་ལྟ་རིམ་གྱི་ཁྱད་པར་དེ་ལྟར་སྣང་བ་ཡིན་པས་སྣང་སྟོང་ཟུང་དུ་ཆུབ་པའི་གནད་ལ་མཐོང་གོམས་ཀྱི་ཁྱད་པར་ལས། དབྱིངས་དང་གཉིས་སུ་མེད་པའི་སྣོད་བཅུད་ཡེ་ནས་ལྷར་དག་པའི་དག་མཉམ་གྱི་ལྟ་བ་གོང་ནས་གོང་དུ་འཕགས་རིམ་གྱིས་རྒྱུད་སྡེ་ཕྱི་ནང་མཐོ་དམན་གྱི་དབྱེ་བ་འཇོག་པ་ཡིན་གྱི། གཞན་དུ་སྣོད་བཅུད་ཀྱི་སྣང་བ་ལྷ་དང་ཡེ་ཤེས་སུ་གནས་པ་མིན་ཀྱང་ལྷར་མོས་པའི་ཁྱད་པར་ཙམ་ལས་རྒྱུད་སྡེའི་ཁྱད་པར་མཐོ་དམན་དུ་འབྱེད་མི་ནུས་པའི་ཕྱིར་ན། སྣོད་བཅུད་ཀྱི་སྣང་བ་ཡེ་ནས་ལྷ་མ་ཡིན་པ་ལ་ཡིད་ཀྱིས་ལྷ་དང་དཀྱིལ་འཁོར་དུ་མོས་པས་བསྒོམ་པ་ཙམ་ཞིག་དང་། ཡེ་ནས་སྣོད་བཅུད་ད ག་པའི་ལྷར་སྣང་བའི་ངེས་ཤེས་ཀྱི་ལྟ་བ་མཐོང་གོམས་ཀྱི་གདེང་དུ་གྱུར་པ་གཉིས་ཁྱད་པར་གནམ་ས་མཆིས་པས་མཚུངས་པའི་གོ་སྐབས་རྣམ་པ་ཀུན་ཏུ་མི་སྲིད་པ་ཉིད་དེ་དཔེར་ན་དབུ་མས་ཆོས་རྣམས་ཡེ་ནས་བདེན་པས་སྟོང་པའི་སྟོང་ཉིད་དུ་ངེས་ཤེས་སྐྱེས་པ་གང་ཡིན་པ་དེ་ནི་དབུ་མའི་ལྟ་བ་ཡིན་ལ། སྔགས་མཁན་བྲམ་ཟེས་ནད་པ་རྣམས་ལ་སྔགས་འདེབས་པའི་ཚེ་ན་ནད་མེད་པར་ཡིད་ཀྱིས་མོས་པ་དབུ་མའི་ལྟ་བ་མིན་པ་བཞིན་ནོ། །དེས་ན་ཚུར་མཐོང་གི་སྤྱོད་ཡུལ་ལས་འདས་པའི་སྣང་སྟོང་ངམ་དབྱིངས་ཡེ་གཉིས་སུ་མེད་པའི་དོན་དམ་ཟབ་མོའི་གནས་ལུགས་ཇི་བཞིན་དུ་རྟོགས་པ་ཡིས་ཀུན་རྫོབ་ཀྱི་སྣང་བ་གང་ཇི་སྙེད་པ་ཡེ་ནས་དག་པའི་ལྷ་རུ་སུས་ཀྱང་མི་འཕྲོག་པའི་ཡིད་ཆེས་མཆོག་ཏུ་གྱུར་པ་ཐོབ་ཀྱི། དེ་ལས་གཞན་དུ་ཚུར་མཐོང་འཁྲུལ་བའི་ཀུན་རྫོབ་ཀྱི་སྣང་ཚུལ་འདི་ཁོ་ན་ལ་གནས་ནས་སྣོད་བཅུད་ལྷ་རུ་ཇི་ལྟར་འགྲུབ་སྟེ་འགྲུབ་མི་སྲིད་དོ། །དེའི་ཕྱིར་གཟུང་འཛིན་འཁྲུལ་བའི་སྣང་བ་འདི་ཉིད་མིན་པའི་འཁོར་བ་ཞེས་བྱ་བ་ངན་པ་ཞིག་གཞན་དུ་གྲུབ་པ་མེད་ལ། འཁོར་བ་དེ་ཉིད་སྤོང་བར་བྱེད་པའི་ལམ་མཐོ་དམན་གྱི་དབྱེ་བ་ཇི་སྙེད་པ་རྣམས་ཀྱང་དོན་དམ་སྟོང་ཉིད་ཁོ་ནའི་ངོས་ནས་འཇོག་པར་ནུས་པ་མིན་ཏེ། དོན་དམ་སྟོང་པའི་དབྱིངས་དེ་ཚུལ་གཅིག་ཉིད་ཡིན་པའི་ཕྱིར་ན་དེ་ལ་མཐོ་དམན་གྱི་དབྱེ་བ་མེད་དོ། །དེས་ན་ཆོས་ཅན་ཀུན་རྫོབ་ཀྱི་སྣང་བ་གསལ་བའི་ཆ་ཇི་སྙེད་པ་འདི་ཀུན་ཆོས་ཉིད་དོན་དམ་པའི་དབྱིངས་རྣམ་པར་དག་པའི་གཤིས་སུ་སོན་པའི་སྣང་སྟོང་ངམ་དབྱིངས་ཡེ་ཟུང་དུ་འཇུག་པའི་གནད་ལ་མཐོང་སྒོམ་གྱི་བློ་གྲོས་ཇེ་གསལ་དུ་སོང་ཞིང་ནུས་པ་གོང་འཕེལ་དུ་གྱུར་པས་ཁྱད་པར་དམན་མཆོག་ལ་བརྟེན་ནས་བྱ་བ་ཡི་རྒྱུད་དང་ཆ་མཉམ་སྤྱོད་རྒྱུད་དང་རྣལ་འབྱོར་ཕྱི་པའི་རྒྱུད་དང་ནང་པ་བླ་ན་མེད་པའི་རྒྱུད་དེ་རྒྱུད་སྡེ་རིན་པོ་ཆེའི་དབྱེ་བ་བཞིའམ་དྲུག་ཏུ་བསྟན་པ་ཡིན་ནོ། །དེས་ན་སྣང་སྟོང་བདེན་པ་གཉིས་པོ་སོ་སོ་བའམ་རེ་རེ་རྐྱང་པ་ཡི་རྒྱུད་སྡེའི་ཐེག་རིམ་གྱི་མཐོ་དམན་མི་འབྱེད་པའམ་འབྱེད་མི་ནུས་ཀྱང་། དབྱིངས་ཡེ་དབྱེར་མེད་དམ་བདེན་གཉིས་ཟུང་དུ་འཇུག་པ་ཡི་གནས་ལུགས་ཟབ་མོའི་དེ་བཞིན་ཉིད་ལ་ཅི་ཙམ་མཐོང་གོམས་ཀྱི་ཡིད་ཆེས་ཐོབ་པས་ལྟ་བའི་ངེས་ཤེས་གོང་དུ་འཕེལ་བ་དང་གདེང་དུ་གྱུར་པའི་ཁྱད་པར་བཞིན་དུ་ལམ་ཉམས་ལེན་གྱི་སྒོམ་པ་དང་དེའི་གྲོགས་སྤྱོད་པའི་གནད་ཀྱི་ཁྱད་པར་རྣམས་ཀྱང་ལྟ་བ་དེ་ཡི་རྗེས་སུ་འབྲང་བ་ཁོ་ན་ཡིན་པས་རྒྱུད་སྡེའི་ཁྱད་པར་ཐམས་ཅད་འཁྲུལ་བ་མེད་པར་ངེས་པར་གྲུབ་པ་ཡིན་ནོ། །དེ་ཡི་ཕྱིར་ན་སངས་རྒྱས་ལས་ཀྱང་འཕྲད་པར་དཀའ་བའི་གསང་སྔགས་བླ་ན་མེད་པའི་རྡོ་རྗེའི་ཐེག་པ་རིན་པོ་ཆེ་སྙིགས་དུས་ཀྱི་ཚེ་ལུས་གཅིག་གིས་གྲོལ་བ་ཟུང་འཇུག་རྡོ་རྗེ་འཆང་གི་གོ་འཕང་བདེ་མྱུར་དུ་སྟེར་བའི་ལམ་ཟབ་མོ་མ་ནོར་བ་ཇི་བཞིན་དུ་ཉམས་སུ་ལེན་པར་བཞེད་ན་སེམས་ཅན་གྱི་རྒྱུད་ཀྱི་ཁྱད་པར་ལས་བལྟ་བྱ་ཐུན་མོང་བ་ཆུ་ལྟ་བུ་གཅིག་ལ་མཐོང་བ་མི་གཅིག་པ་རིགས་དྲུག་གི་འགྲོ་བས་ཁྲོ་ཆུ་དང་རྣག་དང་། གནས་ཁང་དང་ཆུ་དང་། བདུད་རྩི་དང་རྣལ་འབྱོར་པས་མ་མཱ་ཀཱི་ལ་སོགས་པ་མི་འདྲ་བ་ཐ་དད་པར་མཐོང་བའི་ཆུ་ཡི་དཔེ་ཇི་ལྟ་བ་བཞིན་དུ་རྒྱུད་དག་པའི་འཕགས་པ་ཆེན་པོའི་ཇི་ལྟར་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མའི་སྒོ་ནས་སྣོད་བཅུད་ཀྱི་སྣང་བ་ཡེ་ནས་དག་པར་རབ་འབྱམས་སྣང་སྲིད་གཞིར་བཞེངས་ལྷ་སྔགས་ཡེ་ཤེས་ཀྱི་དཀྱིལ་འཁོར་དུ་གྲུབ་ཅིང་བསྒྲུབས་པ་ལ་སྐལ་བ་དང་ལྡན་པ་སུ་ཞིག་ཡིད་ཆེས་པར་མི་འགྱུར་ཏེ་ཤིན་ཏུ་ཡིད་ཆེས་སུས་ཀྱང་བཟློག་ཏུ་མེད་པ་སྐྱེ་བར་འགྱུར་རོ། །གཉིས་པ་ལ་གཉིས། ཚུལ་དེ་ངེས་པར་མ་ཤེས་ན་རྨད་བྱུང་རྡོ་རྗེ་ཐེག་པའི་ལམ་མཆོག་གཟུགས་བརྙན་ཙམ་དུ་འགྱུར་ཚུལ་བསྟན་པ། རྒྱུད་སྡེ་ལ་ལྟ་བའི་མཐོ་དམན་མེད་ན་སྔགས་ཕྱི་ནང་གི་རིམ་པ་གོང་འོག་དངོས་འགལ་དུ་འགྱུར་བར་བསྟན་པའོ། །དང་པོ། གལ་ཏེ་དེ་ལྟར་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། གལ་ཏེ་སྣོད་བཅུད་སྣང་གྲགས་རིགས་གསུམ་ཡེ་ནས་དག་པ་ལྷ་སྔགས་ཡེ་ཤེས་སུ་གྲུབ་པར་གོང་དུ་བསྟན་པ་དེ་ལྟར་མ་ཤེས་ནས་སྡུག་བདེན་འཁོར་བའི་རང་བཞིན་ལས་ཉོན་ཀུན་འབྱུང་གི་འབྲས་བུ་ཕུང་ཁམས་སྐྱེ་མཆེད་ཀྱིས་བསྡུས་པའི་སྣོད་བཅུད་སྣང་ཚུལ་མ་དག་པར་སྣང་བ་དེ་ལྟར་དོན་ལའང་མ་དག་པར་འདོད་ཅིང་ལྟ་བཞིན་དུ་སྣང་བ་ཐམས་ཅད་དག་པའི་རྟེན་དང་བརྟེན་པའི་ལྷ་རུ་སྒོམས་པས་ལྷ་དང་དཀྱིལ་འཁོར་དུ་གྲོལ་བར་འདོད་ཀྱང་འདོད་པའི་གྲུབ་འབྲས་མངོན་སུམ་མི་འབྱིན་ཏེ་དཔེར་ན་རང་ལུས་ངན་སྐྱུག་གི་བུམ་པར་འདྲ་བ་ཡི་དམ་བདེ་དགྱེས་འཇིགས་གསང་སོགས་སུ་སྒོམ་པ་དྲི་བཟང་གིས་ལེགས་པར་བྱུགས་པ་དང་འདྲར་ཏེ་འདྲ་བར་སྣོད་བཅུད་ལྷ་དང་དཀྱིལ་འཁོར་མིན་པ་ལ་ལྷ་དང་དཀྱིལ་འཁོར་དུ་ཡིན་ནོ་སྙམ་དུ་སྒོམ་པ་རྡོ་རྗེ་ཐེག་པའི་ཁྱད་ཆོས་སུ་སེམས་ཤིང་འདོད་པ་དེས་ན་ཀྱེ་མ་འཁོར་འདས་དབྱེར་མེད་མཉམ་པ་ཉིད་མི་ཕྱེད་པའི་རྡོ་རྗེའི་ཐེག་པའི་ལྟ་བ་དང་བསྐྱེད་རྫོགས་ཀྱི་སྒོམ་པ་ཐམས་ཅད་རི་མོའི་མར་མེ་བཞིན་དུ་གཟུགས་བརྙན་ཙམ་དུ་བས་པར་འགྱུར་རོ། །དེས་ན་སྣོད་བཅུད་ཀྱི་ཆོས་གང་ཇི་སྙེད་པ་གནས་ཚུལ་ཡང་དག་པའི་དོན་ལ་ལྷ་དང་དཀྱིལ་འཁོར་དུ་ཡེ་ནས་གནས་སུ་ཟིན་ཀྱང་དེ་ལྟར་མ་རྟོགས་པའི་ཚུར་མཐོང་བྱིས་པས་ཀུན་ཏུ་ཐ་སྙད་པའི་ངོར་གནས་སྣང་མི་མཐུན་པར་སྣང་ཚུལ་ལ་མ་དག་པར་སྣང་ན་ཡང་སྣང་དུས་ཉིད་ནས་ཡེ་ནས་དག་པ་ཆེན་པོར་གནས་པ་མ་མཐོང་བ་དེ་ནི་ཚུར་མཐོང་མ་དག་པ་འཁྲུལ་བས་གྲུབ་པའི་མཐའ་ཉིད་ཡིན་ལ། འཕགས་པའི་གཟིགས་པ་ལ་བརྟེན་པའི་ཀུན་དུ་ཐ་སྙད་པའི་ཚད་མའི་ངོར་ནི་སྣོད་བཅུད་ཀྱི་གནས་ཚུལ་སྟོང་པའི་དབྱིངས་དང་གཉིས་སུ་མེད་པའི་ཡེ་ཤེས་ལྷ་དང་དཀྱིལ་འཁོར་དུ་སྣང་བ་གནས་སྣང་མཐུན་པ་ཇི་ལྟ་བ་བཞིན་དུ་འཕགས་ཆེན་རྣམས་ཀྱིས་ཡང་དག་པར་གཟིགས་པའི་དོན་ཉིད་གང་གིས་ཀྱང་མི་ཕྱེད་པའི་རྡོ་རྗེའི་ཐེག་པའི་གྲུབ་པའི་མཐར་སྨྲ་ཞིང་མཆོག་ཏུ་འདོད་པ་འདི་ནི་ལུང་རིགས་ཚད་མས་གྲུབ་པ་ཡིན་པས་དེ་ལྟ་བུ་ཞིག་ངེས་པར་དགོས་སོ། །དེའི་ཕྱིར་སྣོད་བཅུད་ཐམས་ཅད་ཡེ་ནས་ལྷའི་དཀྱིལ་འཁོར་དུ་དག་པའི་རྟེན་དང་བརྟེན་པར་མིན་ནོ་སྙམ་དུ་མ་དག་པར་ལྟ་བཞིན་དུ་དག་པ་ལྷའི་རྟེན་དང་བརྟེན་པའི་དཀྱིལ་འཁོར་ཡིན་ནོ་སྙམ་པའི་སྒོམ་པ་གང་ཡིན་པ་དེ་གཉིས་སྣང་མུན་ལྟར་འགལ་འདུའི་རང་རྟགས་ངོམས་པའི་ལྟ་སྒོམ་རིག་པ་དང་རྐང་པར་ཤིན་ཏུ་མ་འབྲེལ་བ་ཡི་ལམ་དེ་ནི། རྡོ་རྗེ་ཐེག་པའི་ལམ་གྱི་གཟུགས་བརྙན་ལས་ཀྱང་གཟུགས་བརྙན་ཉིད་ཡིན་ཏེ་དེ་ལྟར་ཅི་ཙམ་འབད་པས་སྒོམ་པར་བྱས་ཀྱང་མཐར་འབྲས་སྣོད་བཅུད་ལྷ་དང་དཀྱིལ་འཁོར་དུ་དག་པའམ་གྲོལ་བ་ཉིད་མི་ཐོབ་སྟེ། དཔེར་ན་སོལ་བ་ནག་པོ་འབད་པས་ཅི་ཙམ་བཀྲུས་པས་ཀྱང་མི་དཀར་བའམ་དཀར་བར་མི་འགྱུར་བ་བཞིན་ནོ། །གལ་ཏེ་སྣོད་བཅུད་ཡེ་ནས་ལྷར་དག་པ་ཉིད་མིན་ཀྱང་ལྷ་ཡིན་ནོ་སྙམ་དུ་བཅོས་མའི་སྒོམ་པ་དེ་ཙམ་གྱིས་འབྲས་བུ་སྣོད་བཅུད་ལྷར་དག་པའམ་གྲོལ་བ་ཐོབ་པར་འགྱུར་ན་ནི་དོན་དམ་དཔྱོད་པའི་རིགས་ལམ་གྱིས་ངོ་བོས་སམ་བདེན་པས་སྟོང་པ་ཉིད་ལ་ངེས་ཤེས་ཅི་ཡང་མེད་བཞིན་དུ་ཕྱི་རོལ་མུ་སྟེགས་ཉི་མ་པ་རྣམས་ཀྱིས་སྣང་བ་སྤངས་པའམ་མེད་པས་སྟོང་པ་སོགས་ལ་སྒོམ་པས་ཀྱང་རང་བཞིན་མེད་པ་ཡང་དག་པར་མཐོང་སྟེ་ཉོན་མོོངས་པ་སྤོང་བར་འགྱུར་དགོས་པས་རིགས་པས་ཤིན་ཏུ་མི་འཐད་པ་ཞིག་གོ། །གཉིས་པ། བྱ་སྤྱོད་བླ་མེད་སོགས་ཚིགས་བཅད་གསུམ་དང་རྐང་པ་གཉིས་ཀྱིས་བསྟན་ཏེ། དེ་ལ་རྡོ་རྗེ་ཐེག་པ་བྱ་བ་སྤྱོད་པ་རྣལ་འབྱོར་རྣལ་འབྱོར་ཆེན་པོ་བླ་ན་མེད་པའི་རྒྱུད་སྡེ་བཞིའམ་དྲུག་ལ་གནས་ལུགས་མཐོང་བའི་ལྟ་བའི་མཐོ་དམན་ཅི་ཡང་མེད་པར་གྱུར་ན་ཤིན་ཏུ་མི་འཐད་པའི་སྐྱོན་གཉིས་ཏེ། ཇི་ལྟར་ན་སྣང་སྲིད་ཐམས་ཅད་ཡེ་ནས་བཟང་ངན་གཉིས་ཆོས་དང་བྲལ་བའི་དག་མཉམ་ཆེན་པོར་རྟོགས་པ་ཡི་ལྟ་བ་ལ་གོམས་པ་གདེང་དུ་གྱུར་པའི་རྣལ་འབྱོར་མཆོག་ལ་གནས་བཞིན་དུ་བདག་དམ་ཚིག་པ་དང་ལྷ་ཡེ་ཤེས་པ་ལ་བཟང་ངན་དང་གཙང་བ་དང་མི་གཙང་བ་སོགས་འདོད་ཡོན་ལ་བླང་དོར་སོ་སོར་འབྱེད་པ་ནི་གནས་ལུགས་ལ་མ་མཐོང་བཞིན་དུ་དབྱེ་བ་སྣ་ཚོགས་པས་ངལ་བ་དང་དུ་ལེན་པ་ཡིན་ན་རང་གིས་རང་ལ་ཤེས་བཞིན་དུ་དོན་མེད་པར་སྡུག་བསྔལ་གྱི་གནོད་པ་བྱེད་པར་ཟད་དོ། །ཡང་ན་བྱ་སྤྱོད་སོགས་རྒྱུད་སྟེ་འོག་མ་བཞིན་དུ་བདག་དང་ལྷ་ལ་བཟང་ངན་དང་གཙང་སྨེ་སོགས་བླང་དོར་ཡོད་པ་ཉིད་དུ་ཞེན་ཅིང་ཆགས་བཞིན་དུ་བླ་ན་མེད་པའི་རྒྱུད་ཀྱི་དག་མཉམ་གྱི་དགོངས་སྤྱོད་ཟབ་མོ་སྦྱོར་སྒྲོལ་དང་ཤ་ཆང་སོགས་བླང་དོར་མེད་པར་མཉམ་པ་ཉིད་དུ་འདོད་ཡོན་ལ་རང་གར་སྤྱོད་པར་བྱེད་ན། དག་མཉམ་དབྱེར་མེད་ཀྱི་དགོངས་སྤྱོད་ཟང་མོ་ཉམས་འོག་ཏུ་མ་ཆུད་བཞིན་དུ་དེ་ལྟར་སྤྱོད་པས་ན་མ་རྟོགས་ཐོ་ཅོའི་སྤྱོད་པ་ཞེས་མདོ་རྒྱུད་ཀུན་ནས་རྒྱལ་བས་ཡང་ཡང་སྨན་པར་གྱུར་པ་དེ་ཉིད་མིན་ནམ་སྟེ་ཡིན་ནོ། །གསུམ་པ། ཇི་ལྟ་ཇི་ལྟར་སོགས་ཚིགས་བཅད་ལྔས་བསྟན་ཏེ། དེ་ལ་ཇི་ལྟ་ཇི་ལྟར་གནས་ལུགས་སྣང་སྟོང་ངམ་དག་མ ཉམ་དབྱེར་མེད་ཟུང་འཇུག་གི་དོན་ཉིད་ཇེ་བས་ཇེ་ཟབ་གོང་འཕེལ་དུ་མཐོང་བའི་བློ་ཡི་རིམ་པའི་རྗེས་ཀྱི་ངེས་ཤེས་ཀྱི་ཁྱད་པར་ལ་ནི་ལྟ་བར་བརྗོད་ཅིང་བཞག་པ་ཡིན་ལ། ལྟ་བས་ཇི་ལྟ་ཇི་ལྟར་ཐག་བཅད་ཅིང་གཏན་ལ་ཕབ་པ་དེ་དང་དེ་བཞིན་བསྒོམས་པས་ཉམས་སུ་བླང་བ་དང་སྤྱོད་པས་ལ་དོར་ཞིང་སྐྱོང་དགོས་པ་ཡིན་པས་ཐེག་པའི་ཁྱད་པར་ནི་གཙོ་བོར་ལྟ་བས་འབྱེད་པ་ཁོ་ན་ཡིན་ནོ། །འོ་ན་ཐེག་པ་གོང་འོག་གི་རིམ་པ་ནི་ལྟ་བའི་མཐོ་དམན་གྱི་འབྱེད་དགོས་པ་ཡིན་པའི་ཕྱིར་ཐེག་རིམ་དགུར་མ་ངེས་སོ་ཞེ་ན། དེ་ནི་ཤིན་ཏུ་ངེས་ཏེ། ཇི་ལྟར་ན་ནང་པའི་གྲུབ་མཐའ་ཀུན་ལས་དམའ་ཤོས་ཉན་ཐོས་ཀྱི་ཐེག་པ་ནས་མཐར་ཕྱིན་རྡོ་རྗེ་རྩེ་མོའི་ཨ་ཏི་ཡོ་གའི་བར་ཐེག་པའི་སྡེ་ཚན་དགུ་ཡི་གྲངས་སུ་ནི་འཇོག་པའི་རྒྱུ་མཚན་ཡང་དག་པ་དབང་པོ་རབ་འབྲིང་ཐ་གསུམ་རེ་རེ་ལའང་དབང་པོ་ཐ་མའི་ཐ་མ་སོགས་གསུམ་གསུམ་དུ་དབྱེ་བ་ལ་སོགས་པ་ཡོད་པའི་ཕྱིར་ན་ཤིན་ཏུ་ངེས་ཏེ། དཔེར་ན་ཐེག་པ་མཐོ་དམན་དང་དབྱེ་བསྡུ་མང་དུ་ཡོད་ཀྱང་ཐེག་པ་གསུམ་ལ་སོགས་པར་གདུལ་བྱའི་ཁམས་དབང་མོས་པ་སོགས་ལ་ལྟོས་ཏེ་དགོས་པས་བཞག་པ་ཇི་ལྟ་བ་དེ་བཞིན་དུ་ཡིན་ནོ། །དེས་ན་བདེན་གཉིས་ཟུང་འཇུག་གི་གནས་ལུགས་དག་མཉམ་ཆེན་པོ་མཐོང་བའི་ནང་གི་ཡེ་ཤེས་ཀྱི་སྟོབས་ཇི་ལྟ་ཇི་ལྟར་སྟོབས་ཤུགས་འཕེལ་བར་གྱུར་པ་དེ་ལྟ་དེ་ལྟར་སྣོད་བཅུད་རྣམས་གནས་སྣང་མཐུན་པར་དག་པ་མཐོང་བ་དང་། ནང་གི་ཡེ་ཤེས་ཀྱི་སྟོབས་ཞན་པ་དེ་ལྟར་མ་དག་པར་མཐོང་བ་སྟེ་དག་པ་དང་མ་དག་པར་སོ་སོར་མཐོང་བས་བློ་རིགས་ཀྱི་མཆོག་དམན་ལ་ལྟོས་ནས་ངེས་ལེགས་ཀྱི་ཐེག་པའི་ཁྱད་པར་ཡང་དེ་ལྟར་རིམ་པ་དགུར་སྣང་བས། གསང་བ་སྒྲ་རྒྱུད་ལས། དབང་པོ་གསུམ་ནི་རབ་འབྲིང་ཐ། །དེས་ནི་ཐེག་གསུམ་འདུ་ཤེས་བྲལ། །དེ་ལས་གསུམ་གསུམ་རབ་དབྱེ་བས། །དགུ་སྟེ་ཐེག་དགུ་དབང་པོའི་གནད། །ཞེས་གསུངས་པ་ཡིན་ལ། དེ་ཡི་ཕྱིར་ན་སྣང་སྟོང་ཡེ་ནས་འདུ་འབྲལ་སྤང་བས་དབྱེར་མེད་དམ་ཟུང་འཇུག་ཏུ་གནས་པ་གཞི་ཡིན་ལ། གཞི་དེ་བདེན་གཉིས་ཟུང་འཇུག་དབྱེར་མེད་པའི་ཚུལ་གྱིས་ཇི་ལྟ་བ་བཞིན་དུ་རྟོགས་པ་ལམ་ཡིན་ལ། ལམ་དེ་ཇི་བཞིན་དུ་གོམས་པ་མཐར་ཕྱིན་པ་ལས་ཆོས་གཟུགས་ཀྱི་སྐུ་གཉིས་ཟུང་འཇུག་མཐར་ཐུག་གི་ཡེ་ཤེས་མཆོག་ཉིད་ཐོབ་པར་གྱུར་པ་ནི་འབྲས་བུ་ཡང་དག་པའོ། །སྟོང་དེ་ཅིའི་ཕྱིར་རང་བཞིན་སྣང་བའི་ཕྱིར། སྣང་དེ་ཅིའི་ཕྱིར་ངོ་བོས་སྟོང་པའི་ཕྱིར། སྣང་སྟོང་ཡེ་ནས་འདུ་འབྲལ་སྤང་བའི་ཕྱིར། ཟུང་འཇུག་འདི་ལས་གཞན་གང་གཙོ་ཞེས་བྱ། ཞེས་ཀྱང་སྨྲས་སོ། །དྲི་ལན་དྲུག་པ་མི་གཅིག་ཐུན་མོང་བ་ལྟ་བྱ་གང་ལྟར་འཐད་ཀྱི་ལན་ལ་གཉིས། མི་འཐད་པ་གཞན་ལུགས་དངོས་སྟོབས་རིགས་པ་ཚད་མས་གསལ་བར་དགག་པ། འཐད་ལྡན་རང་ལུགས་ལུང་རིགས་མན་ངག་ཟབ་མོས་ལེགས་པར་སྒྲུབ་པའོ། །དང་པོ། ཆུ་གཅིག་འགྲོ་བ་སོགས་ཚིགས་བཅད་བཅུ་བཞིས་བསྟན་ཏེ། འདི་ལྟར་སྣང་བའི་ཆུ་གཅིག་ལ་རིགས་དྲུག་གི་འགྲོ་བ་ལས་སྣང་མི་གཅིག་པ་སོ་སོ་ལ། ཐེག་བསྡུས་ལས། ཡི་དྭགས་དུད་འགྲོ་མི་རྣམས་དང་། །ལྷ་རྣམས་ཇི་ལྟར་རིགས་རིགས་སུ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཞེས་གསུངས་པ་ལྟར། ཁྲོ་ཆུ་དང་རྣག་ལ་སོགས་པ་མི་གཅིག་པའི་དངོས་པོར་སྣང་བའི་ཚེ་ན་དེ་ལ་ལ་ལས་ཐུན་མོང་གི་བལྟ་བྱ་ཡོད་དེ། གང་ཞེ་ན་ཆུ་གཙང་མ་ཉིད་ཡིན་ལ་ཆུ་དེ་མཐོང་བའི་ཡུལ་ཅན་རྣམས་ཀུན་ཀྱང་ཚད་མ་ཡིན་ནོ་ཞེས་ཟེར་ནི་མི་འཐད་དེ། མི་ལ་སྣང་བའི་ཆུ་འདི་ལ་རང་བཞིན་གྱིས་གྲུབ་པའི་བལྟ་བྱ་རིགས་དྲུག་པོ་ལ་ཐུན་མོང་དུ་གྱུར་པ་འགའ་ཞིག་ཚད་མས་གྲུབ་པ་ཡོད་ཅིང་རིགས་དྲུག་གི་འགྲོ་བས་ཀྱང་དེ་དང་དེ་ཉིད་མཐོང་བ་ཡིན་ལ་ཡུལ་ཅན་རྣམས་ཀྱང་ཚད་མ་ཡིན་ན་ཆུ་གཙང་མ་ལ་རྟག་ཏུ་མཐོང་བ་ལ་སོགས་པའི་རིགས་དྲུག་གིས་མཐོང་བ་སོ་སོ་བ་ལ་ཚད་མ་དང་ཚད་མིན་གྱི་དབྱེ་བ་མེད་པར་འགྱུར་བས་འཁྲུལ་བའི་སྣང་བ་ཞིག་གཏན་ནས་མི་སྲིད་ཅིང་། གལ་ཏེ་སོ་སོའི་ཡུལ་སྣང་རྣག་དང་ཆུ་སོགས་རང་རང་ལ་གང་སྣང་བ་དེ་གཞན་དང་ཐུན་མོང་མིན་པར་གྱུར་ན་ཀ་བ་དང་བུམ་པ་གཉིས་མཐོང་བའི་བློ་ལ་ཐུན་མོང་གི་བལྟ་བྱ་མེད་པ་བཞིན་དུ་ཐུན་མོང་གི་བལྟ་བྱ་མི་སྲིད་པར་འགྱུར་བས་བལྟ་བྱ་ཐུན་མོང་བ་མི་འགྲུབ་བོ། །ཡང་ལ་ལས་ཐུན་མོང་གི་བལྟ་བྱ་རླན་གཤེར་ཙམ་ཞིག་ཡིན་ནོ་ཞེས་ཟེར་བའང་མི་འཐད་དེ། རིགས་དྲུག་གི་འགྲོ་བ་ལ་ཐུན་མོང་དུ་རང་རང་སོ་སོར་རླན་གཤེར་ཙམ་ཞིག་མ་ལོག་པར་བལྟ་བྱར་ཡོད་ཅིང་དེ་མཐོང་བ་ཡིན་ན། དེ་འདྲའི་ཐུན་མོང་གི་རླན་གཤེར་ཙམ་དེ་ལ་རིགས་དྲུག་གི་འགྲོ་བས་ཆུ་རྣག་སོགས་མི་གཅིག་པའི་མཐོང་སྣང་མི་འདྲ་བ་མང་དུ་འབྱུང་ཞིང་ཕན་ཚུན་གཅིག་གི་མཐོང་བ་དེ་ཉིད་གཅིག་ཤོས་ལ་སྣང་ཞིང་མཐོང་བ་མེད་པ་ཡི་ཆུ་དང་རྣག་ལ་སོགས་པར་སྣང་བ་དེ་ལས་གཞན་པའི་སྣང་གཞི་རླན་གཤེར་དེ་གང་ཞིག་ཡིན་ཏེ་དེ་འདྲ་བ་ཞིག་མི་སྲིད་དོ། །གཞན་ཡང་གཟུགས་མེད་ནམ་མཁའ་མཐའ་ཡས་པར་རླན་གཤེར་ཙམ་དེ་ཉིད་གང་སྣང་བ་ཐམས་ཅད་ནམ་མཁའ་འབའ་ཞིག་ཏུ་སྣང་བའི་གཞི་རུ་ག་ལ་འགྱུར་ཏེ་མི་འགྱུར་རོ། །གཅིག་དང་ཐ་དད་དུ་བརྟགས་ན་ཡང་ཐུན་མོང་གི་བལྟ་བྱ་རླན་གཤེར་ཙམ་དེ་ཆུ་ཉིད་དང་གཅིག་ཡིན་ན། དེ་ཉིད་ཆུ་ཁོ་ནར་སྣང་བ་ལས་རྣག་ལ་སོགས་པ་གཞན་པ་ཉིད་དུ་རྣམ་པ་ཀུན་ཏུ་སྣང་མི་རུང་སྟེ་ཆུ་ཉིད་ལས་གཞན་དུ་མེད་པས་སོ། །གལ་ཏེ་རླན་གཤེར་དེ་ཆུ་ལ་སོགས་པ་ལས་གཞན་ཐ་དད་དུ་གྱུར་པ་ཡིན་ན་ཚད་མས་དམིགས་དགོས་པ་ལ་རླན་གཤེར་ཞེས་ཆུ་ལས་ཡན་གར་བ་ཞིག་ཅི་ཡང་དམིགས་པ་མིན་པས་ནམ་ཡང་མི་སྲིད་དེ། སྣང་རུང་ཚད་མས་མ་དམིགས་པས་སོ། །དེ་ཕྱིར་ཆུ་དང་རྣག་སོགས་མི་གཅིག་པའི་མཐོང་སྣང་མི་འདྲ་བ་སོ་སོ་བ་ལ་ཐུན་མོང་གི་བལྟ་བྱ་འདིའོ་ཞེས་མཐའ་གཅིག་ཏུ་རང་དབང་གིས་གྲུབ་པ་ཞིག་མི་སྲིད་ཅིང་། ཐ་སྙད་དུའང་ཐུན་མོང་དུ་མཐུན་པར་སྣང་བའི་དངོས་པོ་གཅིག་ཉིད་ལ་མི་འདྲ་བ་སོ་སོར་སྣང་བ་སྣ་ཚོགས་པ་ཡང་མི་སྲིད་པར་འགྱུར་བའི་ཕྱིར་ན་ཕན་ཚུན་ལྟོས་ནས་ཆུ་དང་རྣག་ལ་སོགས་པ་མཐོང་བ་མི་གཅིག་པར་རྣམ་པར་བཞག་པ་ཡིན་ཀྱང་སྣང་ཙམ་ཞིག་མཐུན་པར་སྣང་བ་དང་མི་སྣང་བའི་གཞི་རུ་ཁས་བླང་བ་ལ་འགལ་བ་མེད་ཀྱི། དེ་ལས་གཞན་དུ་རིགས་པས་དཔྱད་པའི་ཆུ་དང་རླན་གཤེར་སོགས་ཐུན་མོང་གི་བལྟ་གཞིའམ་བལྟ་བྱ་ཞིག་ཁས་ལེན་པར་བྱེད་ན་དེ་གནས་ལུགས་དོན་དམ་པ་ཡིན་པར་གྲུབ་དགོས་ཤིང་དེ་ལྟར་ན་རིགས་པས་དཔྱད་བཟོད་ལ་སོགས་པའི་སྐྱོན་དུ་འགྱུར་བས་གང་ལྟར་བརྟགས་པའམ་ཁས་བླང་ཀྱང་མི་འཐད་པ་ཉིད་དུ་འགྱུར་རོ། །ཡང་གལ་ཏེ་མཐུན་པར་སྣང་བའི་ཐུན་མོང་གི་བལྟ་བྱ་ཞིག་གཏན་ནས་མེད་པར་གྱུར་ན་སེམས་ཙམ་པའི་འདོད་པ་བཞིན་དུ་གཟུགས་ལ་སོགས་པའི་ཡུལ་ཕྱི་དོན་དུ་གྲུབ་པ་མེད་པར་ནང་ཤེས་པ་ཉིད་བག་ཆགས་ཀྱི་དབང་གིས་གཟུགས་ལ་སོགས་པའི་ཡུལ་གཟུང་རྣམ་དུ་སྣང་བར་ཁས་ལེན་དགོས་ན་ཡང་། དེ་ནི་ཡང་དག་པར་འཐད་པ་མ་ཡིན་ཏེ། ཡུལ་གཟུང་བ་བེམས་པོ་ཉིད་དོན་ལ་གྲུབ་པ་མེད་པ་དེ་བཞིན་དུ་ནང་འཛིན་པ་སེམས་དེ་ཡང་དོན་ལ་གྲུབ་པ་མེད་པར་འདྲ་བའམ་མཉམ་པ་ཡིན་ལ། གཟུང་འཛིན་གཉིས་པོའང་ཐ་སྙད་ཀུན་རྫོབ་ཙམ་དུ་སྣང་བར་ཡང་མཉམ་པ་ཡིན་པའི་ཕྱིར་ན་གང་སྣང་བ་ཀུན་རྫོབ་དེ་ལ་དོན་དམ་དཔྱོད་པའི་རིགས་པས་བརྟགས་ནས་གཟུང་འཛིན་གཉིས་ལས་འཛིན་པ་ཡོད་ལ་གཟུང་བ་མེད་དོ་ཞེས་དོན་ལ་སོ་སོར་ཕྱེ་བ་འདི་ནི་མི་འཐད་པ་ཉིད་དེ། གཟུགས་ལ་སོགས་པ་ཡུལ་སྣང་གཟུང་བར་སྣང་བ་ཡོད་ཀྱང་དོན་དུ་གྲུབ་པ་མེད་པས་རྫུན་པ་ཡིན་པ་ལྟར་འཛིན་པར་སྣང་བའི་ཤེས་པ་རང་རིག་རང་གསལ་འདི་ཡང་དཔྱད་ན་མ་གྲུབ་པས་རྫུན་པ་ཡིན་པའི་ཕྱིར་རོ། །དེས་ན་འཇུག་པ་ལས། དེ་དག་ཤེས་རབ་ཚུལ་མདོར་སངས་རྒྱས་ཀྱིས། །མཚུངས་པར་སྤང་ཞིང་མངོན་པའི་ཆོས་ལས་གསུངས། །ཞེས་སོ། །གོང་དུ་ཇི་སྐད་བསྟན་པ་དེ་ཕྱིར་སྣང་སྟོང་རིས་སུ་མ་ཆད་པས་རྒྱ་ཆད་ཕྱོགས་ལྷུང་དང་བྲལ་བའི་མི་སྣང་བ་ལས་ལོག་པའི་སྣང་བ་ཙམ་གྱི་ཐུན་མོང་གི་བལྟ་བྱ་ནི་མི་དང་ལྷ་ལ་སོགས་པར་ཆུ་དང་བདུད་རྩི་ལ་སོགས་པ་མཐུན་པར་སྣང་བ་དང་མི་སྣང་བའི་གཞིར་བསྙོན་མེད་དུ་ཡོད་པར་གྲུབ་པའི་ཕྱིར་ཁས་བླང་དགོས་ཀྱི་དེ་མེད་པར་འདོད་དུ་མི་རུང་སྟེ། དཔེར་ན་མ་བརྟགས་མ་དཔྱད་པའི་སྣང་ཙམ་གྱི་ཟློས་གར་མཁན་ཐ་སྙད་ཡོད་ན་ལྷ་ལ་སོགས་པའི་ཟློས་གར་གྱི་རྣམ་འགྱུར་མི་འདྲ་བ་སྣ་ཚོགས་པ་མཐོང་བར་རུང་བ་དང་མེད་ན་མི་རུང་བ་ལ་སོགས་པ་བཞིན་ནོ། །དེ་ཡང་སྣང་སྟོང་རིས་སུ་མ་ཆད་པའི་ཡོད་ཙམ་འདི་ཁོ་ན་ལས་མ་གཏོགས་པའི་ཡོད་པ་གཞན་ཞིག་གང་ནས་ཀྱང་གྲུབ་པ་མི་སྲིད་པས་སྣང་སྟོང་རིས་སུ་མ་ཆད་པའི་སྣང་ཙམ་འདི་ཉིད་གལ་ཏེ་མེད་པར་གྱུར་ན་ནི་ཐ་སྙད་ཀྱི་སྣང་བ་འདི་ཀུན་གཏན་ནས་མི་སྣང་བར་ཐམས་ཅད་སྟོང་ཆད་ནམ་མཁའ་ལྟ་བུར་ཅི་ཡང་མེད་པ་འབའ་ཞིག་ཏུ་འགྱུར་དགོས་ན་དེ་ལྟར་མ་ཡིན་པར་སྣང་བ་སྣ་ཚོགས་ཤིན་ཏུ་བཀྲ་བས་སོ། །འོན་ཀྱང་ཕྱི་དང་ནང་གི་འཁྲུལ་བའི་རྐྱེན་སྣ་ཚོགས་ཀྱིས་རང་སྣང་སྒྲིབ་ནས་འཁྲུལ་སྣང་གི་བག་ཆགས་སད་པའི་མཐུ་ལས་ནི་དོན་དམ་ཟུང་འཇུག་གི་གནས་ཚུལ་དངོས་སུ་ཇི་ལྟ་བ་བཞིན་དུ་མི་མཐོང་བར་རྣམ་པ་གཞན་དང་གཞན་དུ་ཕྱིན་ཅི་ལོག་ཏུ་མཐོང་བར་འགྱུར་བ། དཔེར་ན་སྒྱུ་མའི་སྔགས་བཏབ་པའི་སྟོབས་ཀྱིས་ཤིང་བུ་སོགས་ལ་དེ་དང་དེར་མི་མཐོང་བར་རྟ་དང་གླང་པོ་ཆེ་ལ་སོགས་པར་སྣང་ཞིང་མཐོང་བ་བཞིན་ནོ། །དེ་ཕྱིར་མཐུན་པར་སྣང་བའི་ཐུན་མོང་གི་བལྟ་བྱ་ནི་འདི་ཁོ་ནའོ་ཞེས་དཔྱད་པའི་གཞི་ཞིག་ངེས་པར་བཞག་ཏུ་མི་རུང་ངོ་། །གཉིས་པ་ལ་གསུམ། གཞལ་བྱེད་བསླུ་མེད་ཚད་མའི་ལམ་གྱི་འཇུག་རིམ་ངེས་པ་ཟབ་མོ་རིགས་པའི་ལྡེའུ་མིག་སྤྱིར་བསྟན་པ། གཞལ་བྱ་ཐུན་མོང་བལྟ་བྱའི་སྐབས་དོན་གསལ་བར་སྟོན་པ་རང་ལུགས་གྲུབ་མཐའི་མཛོད་ཁང་བྱེ་བྲག་ཏུ་དབྱེ་བ། དེ་ཉིད་ཚུལ་བཞིན་སྟོན་པ་སྔ་འགྱུར་མདོ་རྒྱུད་ཆོས་ཀྱི་ཆེ་བར་ཆེད་དུ་བརྗོད་དེ་དོན་བསྡུ་བའོ། །དང་པོ་ལ་གཉིས། བརྗོད་བྱའི་དོན་གྱི་ངོ་བོ་ཟུང་འཇུག་མཉམ་པ་ཉིད་ཀྱི་རང་བཞིན་ངོས་བཟུང་བ། དེ་ལ་ཚད་མ་ཚད་མིན་མི་འཐད་པའི་རྩོད་པ་སྤང་སྟེ་ཚད་མ་གསལ་བར་སྒྲུབ་པའོ། །དང་པོ། དེས་ན་རང་གི་སོགས་ཚིགས་བཅད་གཉིས་དང་རྐང་པ་གཅིག་གིས་བསྟན་ཏེ། ཇི་སྐད་བསྟན་པ་དེས་ན་འཐད་ལྡན་རང་གི་ལུགས་ལ་ནི་རྒྱ་ཆད་ཕྱོགས་ལྷུང་དང་བྲལ་བའི་སྣང་སྟོང་རིས་སུ་མ་ཆད་པའི་གཞི་ཡི་གནས་ལུགས་ཟུང་འཇུག་མཉམ་པ་ཉིད་ཀྱི་ཆོས་དབྱིངས་རང་གི་ངོ་བོ་སྟོང་དང་མི་སྟོང་ལ་སོགས་པའི་སྤྲོས་པ་ཅིར་ཡང་མ་གྲུབ་པ་དེ་ཉིད་གང་ཅིར་སྣང་བ་ཐམས་ཅད་ཀུན་ལ་མཉམ་པར་གནས་པ་རྣམ་ཀུན་མཆོག་ལྡན་གྱི་སྟོང་པ་ཉིད་ཡིན་པའི་ཕྱིར་ན་དངོས་པོ་གཅིག་ཉིད་དངོས་པོ་སྣ་ཚོགས་པར་ཡང་སྣང་བར་ཤིན་ཏུ་རུང་ཞིང་འཐད་པར་གྲུབ་པ་ཉིད་དེ། དེས་ན་གང་ལ་སྣང་སྟོང་མི་འགལ་བར་རིས་སུ་མ་ཆད་པས་ཟུང་འཇུག་མཉམ་པ་ཉིད་འདི་ལུང་རིགས་ཚད་མ་དང་བཅས་པས་རུང་བའམ་འཐད་པར་གྱུར་པའི་གྲུབ་མཐའ་ཡིན་ན། དེ་ལ་སྣང་དང་མི་སྣང་ཚད་མ་དང་ཚད་མིན་ཐུན་མོང་གི་བལྟ་བྱ་ལ་སོགས་པའི་ཐ་སྙད་ཐམས་ཅད་ཇི་ལྟ་བར་ཁས་ལེན་དུ་རུང་བར་ཆེས་ཤིན་ཏུ་འཐད་པར་འགྱུར་ལ། གང་ལ་སྣང་སྟོང་ཟུང་འཇུག་མི་རུང་བར་སྣང་སྟོང་གཉིས་པོ་འགལ་བར་རྟོག་པ་དེ་ལ་སྣང་དང་མི་སྣང་སོགས་ཐ་སྙད་ཐམས་ཅད་རུང་བར་མི་འགྱུར་ཏེ་ཐ་སྙད་ཡང་དག་པ་ཐམས་ཅད་ནུབ་པར་འགྱུར་རོ། །གཉིས་པ་ལ་གསུམ། རང་ལུགས་ལ་མངོན་རྗེས་ཀྱི་ཚད་མ་གྲུབ་ཅིང་དོན་མེད་མིན་ཚུལ། དེ་ལས་གཞན་དུ་འདོད་ན་ཚད་མའི་རྣམ་བཞག་མེད་ཚུལ། ཚད་མས་ཇི་ལྟར་སྒྲུབ་ཚུལ་ཟབ་དོན་ཐུན་མོང་མིན་པ་ཁྱད་པར་དུ་བསྟན་པའོ། །དང་པོ། འོ་ན་ཚད་མ་སོགས་ཚིགས་བཅད་དྲུག་དང་རྐང་པ་གཉིས་ཀྱིས་བསྟན་ཏེ། འོ་ན་སྣང་སྟོང་ཟུང་འཇུག་ཡིན་ན་གང་སྣང་ཀུན་ལ་མཉམ་པ་ཉིད་ཡིན་པའི་ཕྱིར་ན་ཚད་མ་དང་ཚད་མིན་གྱིས་རྣམ་པར་དབྱེ་བའང་འཐད་པ་མེད་པར་འགྱུར་རོ་ཞེ་ན། ཚུར་མཐོང་གི་ཤེས་པ་འཕྲལ་གྱི་འཁྲུལ་རྒྱུས་མ་བསླད་པའི་ངོར་ཆུ་ལ་སོགས་པའི་གང་སྣང་བ་དེ་ཉིད་རྣག་ལ་སོགས་པ་གཞན་པ་ཉིད་དུ་མ་སྣང་བའམ་མི་སྣང་བ་དེ་ཡི་ཕྱིར་ན་ཚུར་མཐོང་གི་ཤེས་པ་འཁྲུལ་རྒྱུས་མ་བསླད་པ་དེས་གཞལ་བྱ་རང་མཚན་མི་འགྲུབ་པ་མ་ཡིན་པས་ཤིན་ཏུ་འགྲུབ་པར་འགྱུར་ཏེ། གང་གི་ཕྱིར་ཆུ་ལ་སོགས་པའི་དངོས་པོར་གང་སྣང་བ་ཀུན་ཀྱང་རང་བཞིན་གྱིས་རང་མིན་གཞན་ཐམས་ཅད་ལས་ལོག་པའི་སྲ་གཤེར་དྲོ་སོགས་རང་རང་གི་ངོ་བོ་ཐུན་མོང་མ་ཡིན་པ་ལ་གནས་པ་ཉིད་ཡིན་པས་དེ་ལ་ལྡོག་པའི་སྒོ་ནས་གཅིག་དང་ཐ་དད་ལ་སོགས་པའི་རྣམ་དབྱེ་བྱར་རུང་བའི་གཞལ་བྱ་རང་མཚན་དང་དེ་ཡང་དག་དག་པར་འཇལ་བའི་ཚད་མ་བསླུ་མེད་དུ་གྲུབ་པ་ཉིད་ཀྱི་ཕྱིར་རོ། །དེ་ཡི་ཕྱིར་ན་གཞལ་བྱ་གཞལ་བྱེད་ཚད་མས་གྲུབ་པ་དེ་ཡང་གོང་འོག་ལ་ལྟོས་ཏེ་གཞལ་བྱ་གཞལ་བའི་ཚད་མ་ཉིད་དུ་གྲུབ་ཀྱི་ལྟོས་པ་མེད་པར་རང་དབང་ཁོ་ནས་ཆོས་རྣམས་ལ་ནི་གཞལ་བྱ་དང་འཇལ་བྱེད་ཚད་མས་གྲུབ་པར་འཇོག་པ་ཉིད་མ་ཡིན་ཏེ། རང་དབང་གིས་གྲུབ་པ་ཡིན་ན་གནས་ལུགས་དང་དཔྱད་བཟོད་ཉིད་དུ་ཐལ་བར་འགྱུར་བའི་ཕྱིར་རོ། །དེས་ན་མི་ལ་སྣང་བའི་ཆུ་གཅིག་པོ་དེ་ཡང་རང་འཛིན་འཁྲུལ་རྒྱུས་མ་བསླད་པ་རྣམས་ཀྱིས་ཚད་མས་བསླུ་མེད་དུ་གྲུབ་པ་ཡིན་ཀྱང་གཞན་ལ་ལྟོས་མེད་དུ་རང་དབང་ཁོ་ནས་གྲུབ་པ་ཉིད་ནི་མིན་ཏེ། འདི་ལྟར་དོན་དམ་དཔྱོད་པས་དཔྱད་བཟོད་མེད་པས་ཆུ་ཉིད་ཚད་མས་མི་འགྲུབ་ཅིང་། ཡི་དྭགས་ཀྱི་ཤེས་ངོར་ཡང་ཆུ་དེ་ཚད་མས་གྲུབ་པར་མི་འགྱུར་བའི་ཕྱིར་རོ། །དེའི་ཕྱིར་ལྟོས་ཏེ་ཆུ་སོགས་རང་འཛིན་གྱི་ཡུལ་གཞལ་བྱ་རྣམས་ལ་འཁྲུལ་རྒྱུས་མ་བསླད་པས་མངོན་སུམ་ཚད་མ་དང་། རྟགས་ཡང་དག་གིས་རྗེས་དཔག་ཚད་མས་དྲངས་པའི་ངེས་པ་གཞལ་བྱ་ལ་མི་འཁྲུལ་བ་ཡོད་ན་དེ་ཡི་ཡུལ་རྣམས་ལ་ཚད་མས་ཇི་ལྟར་བཅད་པ་དེ་ལྟར་བླང་དོར་འཇུག་ལྡོག་གང་ལ་ཡང་མི་བསླུ་བའམ་བསླུ་བ་མེད་པ་ཡིན་པའི་ཕྱིར་ན་གནས་སྐབས་ལྟོས་ཏེ་ཚད་མ་ལེགས་པར་གྲུབ་ཅིང་དཔེ་བཅད་པ་ལྟར་དོན་ལའང་བསླུ་བ་མེད་པས་དེ་ལྟར་བསྟན་པ་དོན་མེད་དུ་གྱུར་པ་མ་ཡིན་ནོ། །དེའི་ཤུགས་ཀྱིས་ལྡོག་ཕྱོགས་ཚད་མིན་འཁྲུལ་བ་ཉིད་དུའང་བསྟན་ནོ། །དེས་ན་ཆུ་གཅིག་ལ་ཞེས་པ་དེ་ཡང་རང་འཛིན་མི་ཡི་མཐོང་བ་འཁྲུལ་རྒྱུས་མ་བསླད་པའི་ཚད་མ་ཁོ་ན་ལ་ལྟོས་ནས་ཚད་མས་གྲུབ་པའི་ཆུ་དེ་བལྟ་གཞིར་བཞག་སྟེ་མཐོང་བ་འོག་མ་ལ་ལྟོས་ན་ཚད་མ་དང་། གོང་མ་ལ་ལྟོས་ན་ཚད་མིན་དུ་འཐད་པ་ཡིན་གྱི། དེ་ལས་གཞན་ལྷ་ཡི་འགྲོ་བ་ལ་ལྟོས་ན་ནི་རང་འཛིན་གྱིས་ཆད་མས་གྲུབ་པའི་བདུད་རྩི་གཅིག་ཉིད་ལ་བལྟ་གཞིར་འཛིན་དགོས་ཀྱི་ཆུ་སོགས་གཞན་ལ་བལྟ་གཞིར་མི་འཛིན་པ་སོགས་ཐམས་ཅད་ལ་ཤེས་པར་བྱའོ། །གཉིས་པ། ཆུ་ལ་རྣག་ཆུ་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ལྟར་ལྟོས་ཏེ་ཚད་མར་འཇོག་ན་ཚད་མའི་རྣམ་བཞག་འཐད་པ་ཡིན་གྱི། དེ་ལས་གཞན་དུ་འདོད་ན་ཆུ་ཕོར་བ་གང་ལྟ་བུ་ལ་ཡི་དྭགས་ཀྱིས་རྣག་དང་མིས་ཆུ་དང་ལྷས་བདུད་རྩི་རུ་མཐོང་བར་གྱུར་པའི་ཚེ་ན་དེ་གསུམ་ཀ་གཞི་གཅིག་པོ་དེ་ལ་ལྟོས་མེད་དུ་ཚང་ཞིང་རང་དབང་གིས་ཚོགས་ནས་ཚད་མས་གྲུབ་པ་ནི་སྲིད་པ་མིན་ལ། དེ་གསུམ་པོ་ལས་གཅིག་ཀྱང་ཚད་མས་གྲུབ་པའི་བལྟ་གཞི་མིན་ན་དེ་གསུམ་མ་ཡིན་པར་དེ་ལས་དངོས་པོ་གཞན་ཞིག་ཏུ་མཐོང་བ་འདི་ནི་ཆུ་ལ་སོགས་པའོ་ཞེས་རྣམ་པ་ཀུན་ཏུ་ཚད་མས་སྒྲུབས་པར་མི་ནུས་པའི་ཕྱིར་ན་མཐོང་དོན་རྣག་ལ་སོགས་པ་གསུམ་ཀ་གཏན་མེད་དུ་ཐལ་བར་འགྱུར་པས། མིས་མཐོང་བའི་ཆུ་འདི་ཡང་ཆུ་ཉིད་མིན་པ་དེ་ལྟར་གྱུར་ན་དེ་ལས་དངོས་པོ་གཞན་ཞིག་ཆུ་རུ་མཐོང་བ་དང་སྒྲུབ་པ་མི་འཐད་པ་ཁོ་ན་ཡིན་པས་ཆུ་ཞེས་བྱ་བ་གཏན་མེད་དུ་ཐལ་བར་འགྱུར་ལ། དེ་ལྟའི་ལུགས་ལའང་ཐ་སྙད་པའི་ཚད་མ་ཡི་རྣམ་པར་བཞག་པ་ཀུན་ཀྱང་གཏན་ནས་འཐད་པར་མི་འགྱུར་བ་དང་དེའི་ལྡོག་ཕྱོགས་ཚད་མིན་ཀྱང་མི་རུང་ཞིང་མཐར་བླང་དོར་འཇུག་ལྡོག་ཐམས་ཅད་དོན་མེད་པར་འགྱུར་རོ། །གསུམ་པ་ལ་གཉིས། འཇལ་བྱེད་ཚད་མའི་ངོ་བོ་ཇི་ལྟར་གཞལ་བའི་གཏན་ཚིགས་དང་བཅས་པ། དེ་ཉིད་སྔ་འགྱུར་རང་ལུགས་ཁོ་ན་ཡིན་གྱི་གཞན་ལ་མེད་པའི་ཁྱད་ཆོས་སུ་བསྟན་པའོ། །དང་པོ་ལ་གཉིས། གནས་སྐབས་གནས་སྣང་གཉིས་ལ་གཞལ་བའི་ཚད་མའི་རིགས་པ་གཉིས་སུ་བསྟན་པ། མཐར་ཐུག་ཟུང་འཇུག་གཟིགས་པའི་ཚད་མ་མཆོག་ཉིད་རང་བྱུང་ཡེ་ཤེས་གཅིག་ཏུ་སྒྲུབ་པའོ། །དང་པོ་ལ་གཉིས། མ་དག་ཚུར་རོལ་མཐོང་བའི་ཀུན་ཏུ་ཐ་སྙད་པའི་ཚད་མ། དག་པའི་གཟིགས་པ་ལ་བརྟེན་པའི་གནས་ཡོངས་སུ་གྱུར་པའི་ཚད་མའོ། །དང་པོ། དེ་ཕྱིར་འཕྲལ་གྱི་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ཕྱིར་ཕྱི་ནང་གི་འཕྲལ་གྱི་འཁྲུལ་རྒྱུ་ཡིས་མ་བསླད་པའི་དབང་པོའི་ཡུལ་དུ་སྣང་བའི་དངོས་པོ་དེ་ཉིད་ཚད་གྲུབ་བམ་རང་མཚན་ཡིན་པར་རེ་ཞིག་ཚུར་མཐོང་དེའི་ངོར་བསྒྲུབ་དགོས་ཏེ། དཔེར་ན་དབང་ཤེས་ལ་ཆུ་ཉིད་ཆུ་རུ་སྣང་བ་དང་སྨིག་རྒྱུ་ལ་ཆུར་སྣང་བ་གཉིས་ལས་ཆུ་ལ་ཆུར་སྣང་བའི་ཤེས་པ་འཕྲལ་གྱི་འཁྲུལ་རྒྱུས་མ་བསླད་པས་མ་འཁྲུལ་བའི་ཤེས་པ་ཚད་མ་དང་། སྨིག་རྒྱུར་ཆུར་སྣང་བའི་ཤེས་པ་འཁྲུལ་རྒྱུས་བསླད་པས་འཁྲུལ་པའི་ཤེས་པ་ཚད་མིན་དང་། དེ་གཉིས་ཀྱི་ཡུལ་ཡང་ཐ་སྙད་དུ་ཆུ་ལ་རང་མཚན་ཡོད་པ་དང་སྨིག་རྒྱུ་ལ་རང་མཚན་མེད་པའི་ཁྱད་པར་བཞིན་དུ་ཤེས་པར་བྱའོ། །དེས་ན་གནས་སྐབས་ཡི་དྭགས་ཉིད་ལ་སྔོན་ལས་ཀྱི་སྒྲིབ་པ་ངན་པས་མི་རྣམས་ཀྱིས་མཐོང་བའི་ཆུ་གཙང་མ་ཉིད་ལ་རྣག་ཏུ་སྣང་ཡང་སྔོན་ལས་ངན་པའི་སྐྱོན་ནམ་སྒྲིབ་པ་དེ་ཉིད་བྲལ་བའམ་སེལ་བར་གྱུར་ན་ད་གདོད་དམ་ད་གཟོད་མི་རྣམས་བཞིན་དུ་ཆུ་རུ་སྣང་ཞིང་མཐོང་བའི་ཕྱིར་དེ་ལ་ལྟོས་ནས་རེ་ཞིག་མིས་ཆུར་མཐོང་བ་དེ་ཉིད་ཚད་མ་དང་། གཞན་པ་ཡི་དྭགས་ལ་ལས་ཀྱི་སྒྲིབ་པ་ངན་པའི་སྐྱེེན་གྱིས་བསྒྱུར་བས་རྣག་ཏུ་མཐོང་བའི་ཕྱིར་རེ་ཞིག་ཚད་མིན་དུ་བཞག་སྟེ་དེ་ལྟར་ཚུང་མཐོང་བའི་ངོར་ཆུ་ཉིད་ནི་ཚད་མར་སྒྲུབ་པ་ཡིན་ནོ། །དེ་བཞིན་དུ་བདུད་རྩི་ལ་སོགས་པ་ལའང་འདྲའོ། །གཉིས་པ། མཐར་ཐུག་རིགས་པས་སོགས་ཚིགས་བཅད་གཉིས་དང་རྐང་པ་གཉིས་ཀྱིས་བསྟན་ཏེ། གནས་ཡོངས་སུ་གྱུར་བས་ཐ་སྙད་ཀྱི་གནས་ཚུལ་མཐར་ཐུག་པ་ཇི་བཞི་མཐོང་བའི་དག་པའི་གཟིགས་པ་ལ་བརྟེན་པའི་ཚད་མའི་རིགས་པས་དཔྱད་པ་ན་མ་དག་ཚུར་རོལ་མཐོང་བའི་སྣང་བ་ཆུ་དང་རྣག་ལ་སོགས་པ་དེ་དག་ཀུན་ཀྱང་བག་ཆགས་འཁྲུལ་བའི་དབང་གིས་སྣང་བ་སྟེ། དེ་ལས་གཞན་དུ་བག་ཆགས་འཁྲུལ་སྣང་སྤངས་པས་གནས་ཡོངས་སུ་གྱུར་པའི་འཕགས་མཆོག་རྣམས་ལ་མི་རྣམས་ཀྱི་མཐོང་བའི་ཆུ་འདི་ཉིད་དག་པ་ཡི་སངས་རྒྱས་ཀྱི་ཞིང་ཁམས་དང་ཡུམ་ཆེན་མཱ་མ་ཀཱིའི་སྐུར་ཡང་སྣང་ཞིང་མཐོང་བའི་ཕྱིར་ན་མི་ཡིས་མཐོང་བ་ཡི་ཆུ་དེ་ཁོ་ན་གཞན་ལ་ལྟོས་པ་མེད་པར་མཐའ་གཅིག་ཏུ་ཚད་མར་མི་འགྲུབ་པས་བསྒྲུབ་ཏུ་རུང་བ་མ་ཡིན་ལ། དེས་ན་སྔོན་ལས་ངན་པའི་བག་ཆགས་འཁྲུལ་བའི་སྒྲིབ་སྐྱེན་མ་དག་པ་རྣམས་ཇེ་བས་ཇེ་དག་ཏུ་གྱུར་པའི་རིམ་པ་བཞིན་དུ་མཐོང་བ་ཇེ་བཟང་ཇེ་བཟང་དུ་འགྱུར་བ་ཡིན་པས་མཐོང་བ་འོག་མ་འོག་མ་ལ་ལྟོས་ནས་མཐོང་བ་གོང་མ་གོང་མ་ཚད་མ་རུ་ཁས་བླང་བ་འདི་ཉིད་ནི་ཐ་སྙད་དཔྱོད་པའི་རིགས་པས་གྲུབ་ཅིང་གནོད་པ་མེད་པས་ཤིན་ཏུ་འཐད་པ་ཡང་དག་པ་ཉིད་ཡིན་ནོ། །གཉིས་པ། མཐར་ཐུག་དེ་ཁོ་སོགས་ཚིགས་བཅད་གཉིས་ཀྱིས་བསྟན་ཏེ། གནས་ལུགས་མཐར་ཐུག་ཆོས་ཀྱི་དབྱིངས་དེ་ཁོ་ན་ཉིད་ནི་བདེན་གཉིས་དབྱེར་མེད་དམ་ཟུང་འཇུག་གཅིག་ལས་གཉིས་སུ་མེད་པའི་ཕྱིར་དེ་ཁོ་ན་ཉིད་ཇི་བཞིན་མཐོང་བའི་ཚད་མའང་མཐར་ཐུག་པ་གཉིས་སུ་མེད་པས་གཅིག་ཉིད་ཡིན་ཏེ་ཚད་མ་མཐར་ཐུག་གཉིས་པ་ཞིག་རྣམ་པ་ཀུན་ཏུ་མི་སྲིད་དོ། །དེ་ཕྱིར་གནས་ལུགས་མཐར་ཐུག་བདེན་པ་དམ་པ་གཅིག་པུ་ཟུང་འཇུག་དག་མཉམ་དབྱེར་མེད་སྤྲོས་བྲལ་མཉམ་ཉིད་ཆེན་པོ་སྟེ། དེ་ཉིད་ཇི་ལྟ་བ་བཞིན་དུ་གཟིགས་པའི་ཚད་མ་མཐར་ཐུག་པའང་རང་བྱུང་གི་ཡེ་ཤེས་རྣམ་པ་ཐམས་ཅད་མཁྱེན་པ་གཅིག་པུ་ཉིད་ལས་གཞན་དུ་མེད་ལ་གནས་ལུགས་དེ་ཉིད་མཐོང་བ་ལ་སྒྲིབ་པའི་སྤང་བྱ་གང་ཇི་སྙེད་པ་ཡང་མ་རིག་པ་སྟེ་རྨོང་པའི་རང་བཞིན་གཅིག་པུ་ལས་མེད་པའམ་མ་འདས་པའི་ཕྱིར་ན་སངས་རྒྱས་དང་སེམས་ཅན་ནི་རིག་པ་དང་མ་རིག་པ་གཉིས་ཀྱི་ཁྱད་པར་ཙམ་དུ་སྔ་འགྱུར་གྱི་རྒྱུད་དང་མན་ངག་རྣམས་སུ་བསྟན་པ་ཉིད་ཤིན་ཏུ་ཟབ་མོའི་དོན་ངེས་པའི་སྙིང་པོ་མཐར་ཐུག་ཡང་དག་པའོ། །གཉིས་པ། དེ་ཕྱིར་ཚད་མའི་སོགས་ཚིགས་བཅད་གཉིས་ཀྱིས་བསྟན་ཏེ། ཇི་སྐད་བསྟན་པ་དེ་ཕྱིར་དག་པའི་གཟིགས་པ་ལ་བརྟེན་པའི་ཐ་སྙད་ཚད་མའི་འདི་ཡིས་ཕྱི་ནང་གི་སྣང་བ་འདི་ཐམས་ཅད་ཀུན་གདོད་ནས་རང་བཞིན་གྱིས་རྣམ་པར་དག་པའི་ཞིང་དང་ལྷར་བསྒྲུབ་པ་འདི་ནི་སྔ་འགྱུར་རྡོ་རྗེ་ཐེག་པའི་རང་ལུགས་ཟབ་མོ་ཁོ་ན་སྟེ། དེ་ཉིད་ཇི་ལྟ་བ་བཞིན་དུ་གཟིགས་ཤིང་ལེགས་པར་སྟོན་པར་མཛད་པའི་ཀུན་མཁྱེན་རོང་ཟོམ་མ་ཧཱ་པཎྜི་ཏའི་ཞལ་སྔ་ནས་བརྩལ་བའི་སྣང་བ་ལྷར་སྒྲུབ་རིགས་པ་ཚད་མའི་སྒོ་ནས་གསལ་བར་བསྟན་པ་ལ་སོགས་པའི་ལེགས་པར་བཤད་པ་སེང་གེའི་ང་རོ་ལྟ་བུ་རྣམས་ཀྱིས་མཚོན་ཏེ། ཀུན་མཁྱེན་ཀློང་ཆེན་པ་ལ་སོགས་པའི་སྔ་འགྱུར་བ་རྣམས་ཀྱིས་ཀུན་རྫོབ་ཏུ་དག་པ་ཆེན་པོར་བསྒྲུབ་པ་དང་མཐར་ཐུག་ཏུ་དབྱེར་མེད་ཆེན་པོར་བསྒྲུབ་པའི་ལུང་རིགས་མན་ངག་རྣམས་ནི་འགྲན་ཟླ་ཀུན་དང་བྲལ་བས་གཞན་དང་ཐུན་མོང་མ་ཡིན་པ་ཁོ་ན་ཡིན་ལ་དེ་ལས་གཞན་ན་ཀུན་རྫོབ་ཏུ་དག་པ་ཆེན་པོར་སྒྲུབ་པ་དང་མཐར་ཐུག་ཟུང་འཇུག་འོད་གསལ་ཆེན་པོར་སྒྲུབས་པའི་ཚུལ་ལུགས་བཟང་པོ་འདི་ཉིད་ཚུལ་བཞིན་དུ་སྨྲ་བ་གཅིག་ཀྱང་མེད་པས་དག་པ་དང་དབྱེར་མེད་ཆེན་པོར་སྒྲུབ་ཚུལ་འདི་ཡི་ཐད་ནས་གང་ལྟར་ཁས་བླང་ནས་སྒྲུབ་པར་བྱས་ཀྱང་ལུང་རིགས་མན་ངག་ཟབ་མོ་དང་འགལ་བར་གྱུར་པ་ཁོ་ནར་མཐོང་བས་ན་རྒྱུད་དོན་ཟབ་མོ་ཇི་བཞིན་དུ་རྟོགས་པས་དབེན་པ་ཉིད་དོ། །གཉིས་པ་ལ་གཉིས། ཐུན་མོང་གི་བལྟ་བྱ་སྣང་སྟོང་ཕྱོགས་རེར་གྱུར་ན་དངོས་སྟོབས་རིགས་པ་ཚད་མས་ཇི་ལྟར་གནོད་ཚུལ། ཟུང་འཇུག་གཞི་འབྲས་དབྱེར་མེད་དག་མཉམ་སྤྲོས་པ་དང་བྲལ་བར་ལུང་རིགས་མན་ངག་ཚད་མས་གསལ་བར་གྲུབ་པའི་ཚུལ་ལོ། །དང་པོ། དེ་ལ་ཐུན་མོང་སོགས་ཚིགས་བཅད་བཅུ་གཅིག་དང་རྐང་པ་གསུམ་གྱིས་བསྟན་ཏེ། དེ་ལ་ཐུན་མོང་གི་བལྟ་བྱ་ཞེས་པ་དེ་ཉིད་སྣང་བ་དང་སྟོང་པ་སོ་སོ་བ་རེ་རེས་མི་རུང་སྟེ་སོ་སོ་ལ་རྒྱུ་མཚན་རྒྱས་པར་བསྟན་པ་འདི་དག་གིས་གནོད་པའི་ཕྱིར་རོ། །གལ་ཏེ་ཐུན་མོང་གི་བལྟ་བྱ་ཞེས་པ་ཅི་ཡང་མེད་པས་སྟོང་པ་རྐྱང་པ་ཙམ་ཡིན་ན་འགྲོ་བ་མི་ལ་སོགས་པ་སུ་ཡང་རུང་ལ་ཡང་ཅི་ཡང་མེད་པའི་ནམ་མཁའ་བེམས་སྟོང་ཕྱང་ཆད་པ་ཡང་དོན་བྱེད་ནུས་པའི་དངོས་པོ་བུམ་པ་ལ་སོགས་པར་སྣང་བར་འགྱུར་ཞིང་བུམ་པ་ལ་སོགས་པ་དོན་བྱེད་ནུས་པའི་དངོས་པོ་རྣམས་ཀྱང་དངོས་མེད་ནམ་མཁའ་ལྟར་ཅི་ཡང་མེད་པར་མི་སྣང་བར་འགྱུར་དགོས་ལ། དེའི་ཕྱིར་སྣང་བ་དང་བྲལ་བའི་ཅི་ཡང་མེད་པས་སྟོང་པ་ཙམ་ཐུན་མོང་གི་བལྟ་བྱར་རུང་ཞིང་ཆུ་ལ་སོགས་པར་སྣང་ན། མོ་གཤམ་གྱི་བུ་དང་ནམ་མཁའི་མེ་ཏོག་ལ་སོགས་པ་ཐུན་མོང་གི་བལྟ་བྱར་རུང་ཞིང་ཆུ་ལ་སོགས་པ་ཐམས་ཅད་དུ་ཅི་ཡི་ཕྱིར་མི་སྣང་སྟེ་སྣང་དགོས་ལ། དེ་ལྟར་ན་དངོས་པོ་རྣམས་ཕྱོགས་དུས་གཅིག་ན་ཡོད་པ་ལྟར་ཕྱོགས་དུས་ཐམས་ཅད་ན་རྟག་ཏུ་ཡོད་པའམ། ཡང་ན་ཕྱོགས་དུས་གཅིག་ན་མེད་པ་ལྟར་ཕྱོགས་དུས་ཐམས་ཅད་ན་མེད་པར་ཐལ་བར་འགྱུར་ཏེ་དངོས་པོ་རྣམས་རྒྱུ་མེད་དུ་འདོད་པ་ལ་ཇི་སྐད་བརྗོད་པའི་སྐྱོན་ཀུན་འདི་ལའང་མཚུངས་པར་འཇུག་པས་སོ། །གཞན་ཡང་ཅི་ཡང་མེད་པའི་སྟོང་པའི་གནས་སྐབས་དངོས་མེད་དེ་ཉིད་ཡིན་བཞིན་དུ་ཆུ་ལ་སོགས་པ་སྣང་བའི་དངོས་པོ་ཡིན་པའང་རྣམ་པ་ཀུན་ཏུ་མེད་དེ་ཅིའི་ཕྱིར་ན་དེ་གཉིས་ཕན་ཚུན་འགལ་བའི་ཕྱིར་རོ། །གལ་ཏེ་ངོ་བོས་མ་སྟོང་པ་ཡི་སྣང་བ་ཐུན་མོང་གི་བལྟ་བྱ་ཞིག་ཡོད་པར་གྱུར་ན་ནི་ཅི་ཡང་མེད་པས་སྟོང་ཉིད་ཙམ་ཐུན་མོང་གི་བལྟ་བྱའམ་སྣང་གཞིར་བཞག་པའི་རང་ཚིག་དང་འགལ་བ་ཡིན་པས་མི་འཐད་པ་ཁོ་ནའོ། །འོ་ན་ཁྱོད་ཀྱི་གོང་དུ་རང་ལུགས་ལ་ནི་སྟོང་པ་ཉིད་དང་རྟེན་འབྱུང་གི་སྣང་བ་གཉིས་མི་འགལ་བར་ཟུང་འཇུག་གམ་དབྱེར་མེད་བསྟན་པ་དེ་ཅི་ཞེ་ན། འདིར་ནི་གཉིས་ཆོས་ཀྱི་སྣང་བ་ཚུར་རོལ་མཐོང་བའི་དོན་ལ་དཔྱད་པའི་ཀུན་ཏུ་ཐ་སྙད་པའི་ཚད་མའི་རྣམ་བཞག་འཇོག་པའི་སྐབས་ཡིན་པས་ན། དེའི་ངོར་དངོས་པོ་གཅིག་ཉིད་ཡོད་པ་དང་མེད་པ་གཉིས་འགལ་བ་སྟེ་ཕན་ཚུན་སྤང་བས་གཉིས་ཀ་ཡིན་པ་མི་སྲིད་དོ། །གོང་དུ་ཇི་ལྟར་བསྟན་པའི་དངོས་པོ་གཅིག་གི་སྟེང་གི་སྣང་སྟོང་བདེན་པ་གཉིས་མེ་དང་ཚ་བ་བཞིན་དུ་མི་འགལ་བར་བསྟན་པ་ནི་འཕགས་པའི་ཡེ་ཤེས་གཉིས་སྣང་མེད་པའི་ཡུལ་ཡིན་པའི་ཕྱིར་དེ་གཉིས་ཀྱི་ཤན་ལེགས་པར་ཕྱེད་པ་གཅེས་སོ། །ཡང་གལ་ཏེ་རང་གི་ངོ་བོས་སྟོང་པ་དང་བྲལ་བའི་མི་སྟོང་པའི་སྣང་བ་རིས་སུ་ཆད་པ་ཙམ་ཞིག་ཁོ་ན་ཐུན་མོང་གི་བལྟ་བྱའི་སྣང་གཞིར་མི་རུང་སྟེ། ཇི་ལྟར་ན་མི་སྟོང་པ་ཐུན་མོང་གི་སྣང་གཞི་དེ་ཉིད་ཆུ་རྣག་བདུད་རྩི་ལ་སོགས་པའི་སྣང་བ་རྣམས་ལས་གང་ལྟར་སྣང་བ་ཡིན་ཞེས་བརྟགས་ན་འདི་ལྟར་སྣང་བ་ཡིན་ནོ་ཞེས་སོ་སོར་རིས་སུ་མ་ཆད་པའི་སྣང་བ་ཞིག་སུས་ཀྱང་བསམ་པར་མི་ནུས་པའི་ཕྱིར་བསམ་བརྗོད་ལས་འདས་པས་ཤིན་ཏུ་མི་འཐད་དོ། །དེའི་ཕྱིར་ཐུན་མོང་གི་བལྟ་བྱའམ་སྣང་གཞིར་ནི་མི་སྟོང་པའི་སྣང་བ་ཙམ་ཞིག་ཡོད་ཅེས་པ་འདི་ཉིད་གྲུབ་པ་མ་ཡིན་ཏེ། ཅིའི་ཕྱིར་ན་ཤེས་བྱེད་ཚད་མས་ཏེ་ཚད་མ་གང་གིས་མ་མཐོང་བཞིན་དུ་དེ་འདྲའི་སྣང་གཞི་ཡོད་ཅེས་སྒྲུབ་བྱེད་མེད་པའི་དམ་བཅའ་ཙམ་དུ་ཟད་པས་རྣམ་པ་ཀུན་ཏུ་མི་འགྲུབ་པ་ཁོ་ནའོ། །སྐྱོན་གཞན་ཡང་ཆུ་རྣག་སོགས་གང་སྣང་བ་དེ་ཉིད་མི་སྟོང་བར་རིས་སུ་ཆད་པར་གྱུར་ན་ནི་ཆུ་སོགས་གང་ལྟར་སྣང་བ་དེ་ལས་རྣག་སོགས་གཞན་དུ་རྣམ་པ་ཀུན་ཏུ་སྣང་མི་རུང་ཞིང་། དེ་ཉིད་མི་སྟོང་བ་བདེན་གྲུབ་ཀྱི་སྣང་བ་ཡིན་པའི་ཕྱིར་ན་ཡང་སྣང་བ་དེ་ཉིད་དོན་དམ་དཔྱོད་པའི་རིགས་པས་དཔྱད་བཟོད་དུ་འགྱུར་བ་ལ་སོགས་པ་དང་། གཞན་ཡང་ཆུ་དང་རྣག་དང་བདུད་རྩི་སོགས་ཀྱི་ཐུན་མོང་གི་སྣང་གཞི་ཉིད་ནི་ཆུ་ལ་སོགས་པ་དེ་གསུམ་སོ་སོ་བ་གང་ཡིན་ཀྱང་འགལ་བ་ཡིན་ཏེ་འདི་ལྟར་གལ་ཏེ་ཆུ་རུ་སྣང་བ་དེ་ཡི་སྣང་གཞི་རྣག་ཉིད་དུ་གྲུབ་པ་ཡིན་ན་དེ་ཉིད་ཆུ་རུ་སྣང་བར་ཇི་ལྟར་འགྱུར་ཏེ། སྣང་གཞི་རྣམ་ཡིན་པའི་ཕྱིར། མེ་ཉིད་ཆུར་སྣང་བར་མི་འགྱུར་བ་བཞིན་ནོ། །གལ་ཏེ་ཆུ་ཡི་སྣང་གཞི་དེ་ཉིད་རྣག་ཉིད་མིན་པར་ཆུ་རང་ཉིད་ཡིན་པར་གྲུབ་ན་ནི། རྣག་ལ་སོགས་པ་གཞན་དུ་ཅི་ལ་སྣང་སྟེ། སྣང་གཞི་ཆུ་ཡིན་པའི་ཕྱིར། ཆུ་ཉིད་མེ་ལ་སོགས་པར་སྣང་དུ་མི་རུང་བ་བཞིན་ནོ། །གལ་ཏེ་ཡི་དྭགས་ཀྱི་མཐོང་བའི་ཡུལ་དུ་གང་སྣང་བ་དེ་ཡང་ཆུ་འདི་ཉིད་ཡིན་ནོ་ཞེ་ན། དེ་ལྟར་ན་ཡི་དྭགས་ལ་རྣག་སྣང་དེ་ཡང་མེད་པར་ཁས་བླང་བ་ཉིད་དུ་ཐལ་བར་འགྱུར་བས་མི་འཐད་པར་གསལ་ལོ། །མདོར་ན། གང་ཕྱིར་རིགས་དྲུག་གི་འགྲོ་བ་རང་རང་སོ་སོ་ལ་ཆུ་ལ་སོགས་པ་ཐུན་མིན་གྱི་སྣང་བ་དེ་དང་དེ་ལས་སྣང་གཞི་ལོགས་སུ་ཐ་དད་པ་ཅི་ཡང་ཡོད་པ་མིན་ཏེ་གལ་ཏེ་ཡོད་པར་གྱུར་ན་གང་སྣང་བ་དེ་དང་དེའི་སྣང་གཞི་ཐ་དད་དུ་འགྱུར་བའི་ཕྱིར་ཐུན་མོང་གི་བལྟ་བྱའི་དོན་མེད་དེ། དཔེར་ན་ཀ་བ་དང་བུམ་པ་གཉིས་ཕན་ཚུན་གཅིག་གི་སྣང་གཞིར་གཅིག་ཤོས་འཇོག་ཏུ་རུང་བ་མིན་པ་བཞིན་ནོ། །དེས་ན་གང་སྣང་བ་དེ་ལས་གཞན་དུ་སྣང་གཞི་ལོགས་སུ་ཐ་དད་པ་ཉིད་མེད་པར་རིག་པར་བྱའོ། །གཉིས་པ་ལ་གསུམ། གཞི་ཡི་གནས་ཚུལ་མཐར་ཐུག་པ་གནས་སྣང་རྣམ་ཀུན་མཐུན་པའི་དག་མཉམ་དབྱེར་མེད་ཆེན་པོར་རིགས་པས་སྒྲུབ་པ། ལམ་ལ་གོམས་པས་གནས་སྣང་མི་མཐུན་པའི་བག་ཆགས་རིམ་གྱིས་སྦྱངས་ཏེ་དུས་མེད་གཉུག་མའི་ཀློང་དུ་བཙན་ས་འཛིན་ཚུལ། མཐར་འབྲས་བསམ་མི་ཁྱབ་པའི་ཆོས་ཉིད་ལ་བཟོད་པ་སྐྱེས་ཏེ་རྒྱལ་བའི་སྐྱོད་ཡུལ་ཐོབ་ཀྱང་གཞན་གྱིས་རྟོགས་པར་དཀའ་བའི་ཚུལ་ལོ། །དང་པོ་ལ་གསུམ། དོན་དམ་དུ་ཟུང་འཇུག་རོ་མཉམ་ཆེན་པོར་སྒྲུབ་པ། ཀུན་རྫོབ་ཏུ་སྣང་སྲིད་རྣམ་དག་ཆེན་པོར་སྒྲུབ་པ། མཐར་ཐུག་ཏུ་དབྱེར་མེད་བློ་བྲལ་ཆེན་པོར་སྒྲུབ་པའོ། །དང་པོ། དེས་ན་སྣང་སྟོང་སོགས་ཚིགས་བཅད་གཅིག་དང་རྐང་པ་གསུམ་གྱིས་བསྟན་ཏེ། གོང་དུ་ཇི་སྐད་བསྟན་པ་དེས་ན་ཆོས་ཀུན་གདོད་ནས་སྣང་སྟོང་རིས་སུ་མ་ཆད་པའི་ཟུང་འཇུག་གམ་རང་གི་ངོ་བོས་བདེན་པར་གྲུབ་པ་མེད་པའི་སྟོང་པའི་དབྱིངས་དང་འདུ་འབྲལ་མེད་པའི་སྣང་བ་ཙམ་ཞིག་དེ་རྒྱ་ཆད་དང་ཕྱོགས་ལྷུང་བྲལ་བ་སྟེ་རྒྱ་གང་དུའང་མ་ཆད་ཕྱོགས་གང་དུའང་མ་ལྷུང་བ་ཡི་སྣང་སྟོང་ཟུང་འཇུག་སྤྲོས་བྲལ་རོ་མཉམ་ཆེན་པོ་རུ་འཁོར་འདས་ཀྱི་ཆོས་ཀུན་ཡེ་གདོད་མ་ནས་མཉམ་ཉིད་ཆེན་པོར་གནས་པའི་ཕྱིར་ན་དེ་ལྟར་མཉམ་པ་ཉིད་རང་བྱུང་གི་ཡེ་ཤེས་འོད་གསལ་རྫོགས་པ་ཆེན་པོ་རུ་གདོད་ནས་གྲུབ་པའི་དོན་དེ་ཉིད་རྟོག་གེའི་རིགས་པས་མ་དཀྲུགས་པར་ངེས་པའི་མདོ་རྒྱུད་ཟབ་མོའི་ལུང་རིགས་ཀྱིས་གཏན་ལ་ཕབ་པར་བྱས་ནས་གནས་ལུགས་བསལ་བཞག་མེད་པར་མཉམ་པར་འཇོག་པ་ནི་མཉམ་ཉིད་རྫོགས་པ་ཆེན་པོ་སྟེ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྤྲོས་བྲལ་དབུ་མ་ཆེན་པོའང་ཡིན་ནོ། །གཉིས་པ། ཚུལ་དེ་གོམས་པའི་སོགས་ཚིགས་བཅད་བརྒྱད་དང་རྐང་པ་གཅིག་གིས་བསྟན་ཏེ། གོང་དུ་ཇི་སྐད་བཤད་པའི་ཚུལ་དེ་ལ་ཇི་བཞིན་དུ་གོམས་པར་བྱེད་པའི་ལམ་གྱི་གནས་སྐབས་སུ་ཡང་དང་པོར་དག་པའི་གཟིགས་པ་ལ་བརྟེན་པའི་རིགས་པ་ཚད་མའི་ལམ་ནས་ཕྱི་དང་ནང་གི་དངོས་པོ་མ་དག་པའི་སྣང་བ་འདི་ཐམས་ཅད་ཡེ་ནས་དག་པའི་ཡེ་ཤེས་ཆེན་པོར་རང་སར་གྲོལ་བའི་སྣང་སྲིད་རྣམ་པར་དག་པའི་ཆོས་ཀྱི་སྐུ་ཉིད་ཡིན་ནོ་ཞེས་ཡིན་པ་ལ་ཡིན་པར་ངེས་པའི་ཡིད་ཆེས་པ་ནི་བསླུ་བ་མེད་པའི་རྡོ་རྗེའི་རྒྱུད་ཀྱི་ལུང་གི་དགོངས་དོན་ལ་ཡང་དག་པར་འབྱོར་ཞིང་གྲུབ་པ་ཡིན་པས་རྒྱུད་དོན་ཇི་བཞིན་དུ་རྟོགས་པ་ཡིན་ལ། དེས་ན་གསང་བ་སྒྱུ་འཕྲུལ་དྲྭ་བ་གཉིས་སུ་མེད་པའི་རྒྱུད་ཀྱི་རྒྱལ་པོ་ལས་ཕུང་པོ་ལྔ་སྣང་ལ་རང་བཞིན་མེད་པའི་སྒྱུ་མ་ལྟ་བུ་ཡི་སྣང་བ་ཕྱོགས་དང་རིས་སུ་མ་ཆད་པ་དེ་ཉིད་ཡེ་ནས་རྣམ་པར་དག་པའི་སངས་རྒྱས་ཀྱི་ཞིང་དང་ལྷར་སྣང་བ་ཡིན་ནོ་ཞེས་གང་གསུང་བའི་དགོངས་པའི་དོན་ཟབ་མོ་ལ་ཡིད་ཆེས་ཕྱིར་མི་ལྡོག་པ་ཉིད་ཡང་དག་པར་སྐྱེ་བར་འགྱུར་ཏེ། འདི་ལྟར་ཡི་དྭགས་ཀྱི་འགྲོ་བ་རྣམས་ལ་ཆུ་གཙང་མ་འདི་ཡང་རྣག་ཏུ་མཐོང་བའི་རྣག་ཉིད་ཡིན་པར་འཛིན་མོད། འགའ་ཞིག་གིས་བདག་ཅག་ལ་སྣང་བའི་རྣག་འདི་ལས་ངན་གྱིས་སྒྲིབ་པའི་སྣང་བ་ཡིན་གྱི་གཞན་མི་སོགས་ལས་དག་པ་ལ་ཆུ་ཉིད་དུ་སྣང་ངོ་ཞེས་སྒྲུབ་པ་རྗེས་སུ་ཐོས་ཏེ་རྣག་འཛིན་ལས་བཟློག་ཚེ། རྣག་སྣང་མ་ལོག་ཀྱང་འཁྲུལ་བའི་སྣང་བ་ཡིན་པར་རྟོགས་ཤིང་དེ་ནས་ལས་སྒྲིབ་སྦྱོང་བ་ལ་འབད་ཅིང་གོམས་པར་བྱས་པས་རྣག་སྣང་གི་སྒྲིབ་པ་དག་པའི་ཚུར་མཐོང་དེ་ལ་ཆུ་རུ་སྣང་བ་ཡིན་ལ། དེ་བཞིན་དུ་གནས་སྣང་མི་མཐུན་པའི་དབང་གིས་སྣང་ཚུལ་མ་དག་པར་གང་མཐོང་བ་དེ་དག་འཁྲུལ་བར་རྟོགས་ཤིང་གནས་ཚུལ་ཡེ་ནས་དག་པ་ཆེན་པོ་ལྷའི་དཀྱིལ་འཁོར་དུ་ཤེས་ཤིང་གནས་སྣང་མི་མཐུན་པར་སྣང་བའི་ལས་ཀྱི་བག་ཆགས་སྦྱང་བའི་ལམ་ལ་འབད་ཅིང་གོམས་པར་བྱས་པས་ཆུ་རུ་སྣང་བ་འདི་ཉིད་ཀྱང་། ལས་སྒྲིབ་རབ་ཏུ་དག་པའི་རྒྱལ་སྲས་བྱང་ཆུབ་སེམས་དཔའ་ཆེན་པོ་ཡིས་ནི་ཆུ་དེ་ཡི་རྡུལ་ཕྲ་རབ་རེར་ཡང་གྲངས་མེད་པའི་སངས་རྒྱས་ཀྱི་དག་པའི་ཞིང་ཁམས་སུ་མཐོང་ཞིང་ཆུ་དེ་ཉིད་ཀྱང་ཡུམ་ཆེན་མཱ་མ་ཀཱིར་མངོན་སུམ་དུ་མཐོང་ཞིང་སྣང་ནས་རོལ་བའི་བྱ་བ་བྱེད་ཅིང་བདེ་སྟོང་གི་ཡེ་ཤེས་ཆེན་པོའི་གྲོགས་ཉིད་དུ་འགྱུར་བ་ཡིན་ལ། མཐར་ཐུག་སྒྲིབ་པ་གཉིས་པོ་བག་ཆགས་ཕྲ་བ་དང་བཅས་མ་ལུས་པ་ཤིན་ཏུ་དག་པའམ་རྣམ་པར་སྤངས་པའི་འབྲས་བུ་སངས་རྒྱས་ཀྱི་སར་དག་མཉམ་ཟུང་འཇུག་རོ་མཉམ་ཆེན་པོར་གཟིགས་པ་ཡིན་པས་དེ་ཉིད་ནི་བྲི་གང་དང་བྲལ་བའི་གནས་སྣང་རྣམ་ཀུན་མཐུན་པའི་གཟིགས་པ་ཤིན་ཏུ་ཚད་མའོ། །དེ་ཡི་ཕྱིར་ན་ཤིན་ཏུ་རྣམ་པར་དག་པའི་སངས་རྒྱས་ཀྱི་གཟིགས་པ་ནི་སྒྲིབ་གཉིས་བག་ཆགས་དང་བཅས་པ་མ་ལུས་པ་ཟད་པར་སྤངས་པའི་ཡེ་ཤེས་ཀྱིས་གཟིགས་པ་ཡིན་པའི་ཕྱིར་དངོས་པོའི་གནས་ཚུལ་ཡང་དག་པ་མཐར་ཐུག་ཇི་བཞིན་མ་ནོར་བ་ཉིད་ནི་སངས་རྒྱས་དེ་ཡིས་མཐོང་བ་ཁོ་ན་ཉིད་ལས་གཞན་དུ་ཅུང་ཟད་ཙམ་ཡང་ཡོད་པ་མ་ཡིན་པར་ཚད་མ་མཐར་ཐུག་གིས་གྲུབ་པ་ཡིན་ན། དེ་ཉིད་ཁོ་ན་མཐར་ཐུག་གི་ཚད་མ་རུ་ངེས་པར་བཟུང་སྟེ་ཕྱི་ནང་གི་སྣང་བ་མ་དག་པ་འདི་ཐམས་ཅད་ཀུན་ཡེ་གདོད་མ་ནས་ཀྱང་ཤིན་ཏུ་དག་པའི་གནས་ལུགས་ཡེ་ཤེས་ཆོས་ཀྱི་སྐུར་བྲི་གང་དང་བྲལ་བར་གནས་སོ་ཞེས་དམ་བཅའ་བ་གང་ཞིག་ཡང་དག་པར་གྲུབ་པའི་རྩེ་མོ་མཐར་ཕྱིན་པར་རུ་ཟབ་མོའི་ལུང་དང་རིགས་པའི་བློ་གྲོས་ཀྱི་མིག་མཆོག་དང་ལྡན་པ་རྣམས་ལ་ཤིན་ཏུ་གྲུབ་ཅིང་གསལ་བ་ཡིན་གྱི་རྟོག་གེ་གཞན་གྱི་སྤྱོད་ཡུལ་མ་ཡིན་ནོ། །དེ་ལྟ་ན་ཡང་ཐུན་མོང་མིན་པའི་ཟབ་མོའི་རྒྱུད་ཀྱི་ཐེག་པ་གསང་མཆོག་སྒྱུ་འཕྲུལ་དྲྭ་བ་ལ་སོགས་པ་དེ་ནི། ཐེག་པ་ཀུན་གྱི་རྩེ་མོ་ངོ་མཚར་རྨད་དུ་བྱུང་བའི་ཆེ་བ་བརྒྱད་ལ་སོགས་པ་འོད་ཟེར་འབུམ་ཕྲག་སྟོང་དུ་མངའ་བས་གཟི་ལྡན་ཉི་མའི་དཀྱིལ་འཁོར་འོད་གསལ་བ་ལྟ་བུ་འདི་ལ་དམན་པའི་ཡིད་ཅན་ལུང་རིགས་ཟབ་མོའི་བློ་གྲོས་ཀྱི་མིག་དང་བྲལ་བའི་འབྱུང་པོའི་བྱ་ལྟ་བུ་ཕལ་ཆེར་རྒྱུད་ཀྱི་ཟབ་དོན་མཐོང་བ་ལ་ལོང་བ་ལྟ་བུར་གྱུར་པ་ཡིན་པས་རྒྱུད་ཀྱི་དགོངས་དོན་ཟབ་མོ་ཇི་བཞིན་དུ་མ་ལྷོངས་ནས་གཞན་དང་གཞན་དུ་འཆད་པ་དེ་བྱུང་བ་ཡིན་ནོ། །གསུམ་པ། དེ་ལ་མཐར་ཐུག་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ལ་ཤིན་ཏུ་མཐར་ཐུག་པ་གཉིས་སུ་མེད་པའི་མཉམ་པ་ཉིད་ཀྱི་དབྱིངས་དེ་ཉིད་གཞན་གང་དུའང་མི་སྣང་བར་དག་པ་ལྷ་ཡི་སྣང་ཆ་ཁོ་ནར་སྣང་ངོ་ཞེས་ཕྱོགས་གཅིག་གམ་མཐའ་གཅིག་ཏུ་བསྒྲུབ་པར་མི་ནུས་མོད་ཀྱང་དོན་ལ་མ་དག་པའི་སྣང་བ་གང་ཇི་སྙེད་པ་ཐམས་ཅད་ཡེ་ནས་གྲོལ་བའི་རང་བཞིན་གདོད་མ་ཉིད་ནས་ཤིན་ཏུ་རྣམ་པར་དག་པ་ཡི་དབྱིངས་ཀ་དག་མཐའ་བྲལ་ཆེན་པོ་དང་རང་བཞིན་འོད་གསལ་བའི་སྣང་ཆ་ཡེ་ཤེས་ཆོས་ཀྱི་སྐུ་གཉིས་ཡེ་ནས་ཟུང་འཇུག་འདུ་འབྲལ་མེད་པ་དབྱེ་གཞི་ཟད་པའི་དབྱེར་མེད་ཆེན་པོར་གནས་པའི་ཕྱིར་ན་དེ་ཡི་སྣང་བའི་རྒྱུ་རྣམས་གསེར་དང་གསེར་གྱི་ཁ་དོག་བཞིན་དུ་གདོད་ནས་ཡེ་ཤེས་ཀྱི་ལྷ་རུ་དག་པ་ལ་གནས་ལུགས་དཔྱད་པའི་རིགས་པས་ཀྱང་མི་གནོད་དེ། གང་གི་ཕྱིར་ན་སྒྲིབ་གཉིས་བག་ཆགས་དང་བཅས་པ་མ་ལུས་པ་ཤིན་ཏུ་སྤངས་པའམ་ཤིན་ཏུ་དག་པ་ཡི་སྣང་སྟོང་ཟུང་འཇུག་དབྱིངས་དང་ཡེ་ཤེས་དབྱེར་མེད་པ་བློ་ཡི་སྤྱོད་ཡུལ་དང་བྲལ་བ་དེ་ནི་མཐར་ཐུག་གི་དེ་ཁོ་ན་ཉིད་མངོན་དུ་གྱུར་པ་ཡིན་པའི་ཕྱིར་རོ། །གཉིས་པ། དེ་ལས་གཞན་དུ་སོགས་ཚིགས་བཅད་བདུན་དང་རྐང་པ་གསུམ་གྱིས་བསྟན་ཏེ། གཟིགས་པ་ཤིན་ཏུ་དག་པའི་སངས་རྒྱས་ཀྱི་གཟིགས་པ་དེ་ཁོ་ན་ལས་གཞན་དུ་སེམས་ཅན་དང་ལམ་པ་དག་གིས་གང་ལྟར་དུ་བརྟགས་ཀྱང་དེ་ནི་དབྱིངས་ཡེ་གཉིས་སུ་མེད་པའི་མཐར་ཐུག་གི་དོན་ཡང་དག་པ་ཉིད་མིན་ཏེ་སྒྲིབ་གཉིས་བག་ཆགས་དང་བཅས་པ་ཟད་པར་མ་སྤངས་པས་གནས་ཚུལ་དང་སྣང་ཚུལ་རྣམ་པ་ཀུན་ཏུ་མི་མཐུན་པ་ཡིན་པའི་ཕྱིར་རོ། །དེས་ན་གནས་སྐབས་སུ་རྣལ་འབྱོར་པའི་ལམ་གྱི་སྣང་བ་ལའང་། དཔེར་ན་མིག་གི་སྐྱོན་ཅི་ཙམ་དག་པའི་རིམ་པས་རབ་རིབ་ཀྱི་སྣང་བ་དེ་ཙམ་ཉིད་དུ་དག་པར་འགྱུར་བ་བཞིན་དུ་ཡུལ་ཅན་སྒྲིབ་པའི་དྲི་མས་ཅི་ཙམ་ཅི་ཙམ་དག་པ་སྟོབས་སུ་གྱུར་པ་ལས་དེ་ཙམ་དེ་ཙམ་ཉིད་དུ་ཡུལ་ཀྱང་དེ་བཞིན་དུ་དག་པ་ཉིད་དུ་མཐོང་བར་འགྱུར་བ་ཡིན་ཏེ་ཡུལ་ཅན་དྲི་མས་དག་ཀྱང་ད་དུང་དེ་ལས་ལོགས་ཤིག་ན་ཡུལ་དེ་ལ་མ་དག་པར་ལུས་པ་ཞིག་རྣམ་པ་ཀུན་ཏུ་མེད་པའི་ཕྱིར་ན་དག་པ་ཁོ་ན་ཡིན་ནོ། །དེས་ན་ཡུལ་དང་ཡུལ་ཅན་གྱི་དག་པ་གཉིས་སུ་མེད་ཅིང་ཐ་དད་མེད་པའོ། །དེ་ལྟ་ན་ཡང་གང་ཟག་གཅིག་གིས་མ་དག་འཁྲུལ་བའི་སྣང་བ་མ་ལུས་པ་དག་ནས་འཚང་རྒྱ་བའམ་སངས་རྒྱས་པར་གྱུར་པ་དེ་ཡི་ཚེ་ན་གཞན་སུ་ལ་ཡང་མ་དག་པའི་དངོས་པོ་གཅིག་ཀྱང་མི་སྣང་བར་འགྱུར་དགོས་སམ་སྙམ་ན། རང་ངོར་ཡུལ་ཅན་དག་པས་ཡུལ་ཀུན་ཀྱང་དག་པ་ཁོ་ནར་མཐོང་ཡང་དེ་ལས་གཞན་པ་དག་ལ་མ་དག་པའི་དངོས་པོ་མི་སྣང་བར་རྣམ་པ་ཀུན་ཏུ་མི་འགྱུར་ཏེ་སེམས་ཅན་རང་རང་གི་སྣང་བ་མ་དག་པའི་སྒྲིབ་པས་རང་རང་ལ་སྒྲིབས་པའི་ཕྱིར་ན་མ་དག་པར་སྣང་ཞིང་མཐོང་བར་འགྱུར་རོ། །དེས་ན་གནས་ཚུལ་ཡང་དག་པ་ལ་ཡུལ་དང་ཡུལ་ཅན་རྣམས་ཀྱི་རང་བཞིན་ཡེ་གདོད་མ་ནས་སྒྲིབ་པས་གོས་མ་མྱོང་བས་ཤིན་ཏུ་རྣམ་པར་དག་ན་ཡང་རང་སྣང་འཁྲུལ་བའི་གློ་བུར་གྱི་དྲི་མས་རང་རང་ལ་སྒྲིབ་པའི་ཕྱིར་ན་མཁྲིས་ནད་ཅན་གྱིས་དུང་སེར་བཞིན་དུ་དག་པར་མི་མཐོང་བས་དྲི་མ་དེ་སྦྱང་བའི་ཐབས་ལ་འབད་པར་བྱ་དགོས་ལ། སྦྱང་བྱའི་དྲི་མ་གློ་བུར་བ་དེ་རྣམས་ཀྱང་ནི་ཡེ་ནས་རང་རང་གི་ངོ་བོས་རྣམ་པར་དག་པ་ལས་ལོགས་ཤིག་ན་སྦྱང་བྱའི་དྲི་མ་མ་དག་པ་ཞིག་གྲུབ་པ་མིན་པས་གདོད་ནས་རང་བཞིན་གྱིས་རྣམ་པར་དག་པའི་འོད་གསལ་མཉམ་པ་ཉིད་དུ་གནས་པ་ཡིན་ནོ། །དེ་ལྟར་སྣང་ཚུལ་གནས་དོན་ལུས་ལ་སོགས་པ་ཡུལ་དང་ཡུལ་ཅན་མི་འདྲ་བ་སྣ་ཚོགས་པ་ཉིད་རང་བཞིན་མཉམ་པ་ཆེན་པོར་མ་རྟོགས་པའི་དུས་ན་གནས་དོན་ལུས་སོགས་སྣ་ཚོགས་པ་སོ་སོར་སྣང་ཞིང་འཛིན་པ་ཡིན་པས་བྱིས་པ་སོ་སོའི་སྐྱེ་བོ་རྣམས་ཡུལ་སྣང་གང་ལ་སེམས་ཆགས་ཤིང་ཞེན་པ་དེ་ནི་བྱིས་པ་རྣམས་རང་སྣང་ལ་གཞན་དུ་འཁྲུལ་བའི་རྨོངས་པ་མ་རིག་པ་སྟེ་རྨོངས་བ་དེ་ཡིས་དར་གྱི་སྲིན་བུ་ལྟར་རང་གིས་རང་ཉིད་འཆིང་བར་བྱེད་དོ། །གལ་ཏེ་སྣང་ཚུལ་སྣ་ཚོགས་པ་དེ་དག་གི་རང་བཞིན་རང་སྣང་མཉམ་པ་ཆེན་པོར་རྟོགས་ཤིང་གོམས་པར་གྱུར་ན་འཁོར་འདས་ཀྱི་ཆོས་ཀུན་ཀྱང་ཟུང་འཇུག་རོ་མཉམ་གྱི་ངང་དུ་མཐར་ཐུག་གི་འབྲས་བུའི་བཙན་ས་ཟིན་ཏེ་དུས་གསུམ་གྱི་འཛིན་པ་དང་བྲལ་བས་དུས་བཞི་མཉམ་པ་ཉིད་དུས་གསུམ་དུས་མེད་འོད་གསལ་གཉུག་མའི་ཀློང་ཆེན་པོར་རྒྱུ་ལས་མ་བསྐྱེད་རྐྱེན་ལས་མ་བྱུང་བས་རང་བྱུང་གི་ཡེ་ཤེས་ཐམས་ཅད་མཁྱེན་པའི་རྒྱལ་བར་ཏེ་ཡེ་ཤེས་ཆོས་ཀྱི་སྐུ་ཉིད་བརྙེས་པར་འགྱུར་རོ། །གསུམ་པ། དག་མཉམ་ཆེན་པོར་སོགས་ཚིགས་བཅད་བདུན་གྱིས་བསྟན་ཏེ། དེ་ལྟར་ཆོས་ཀུན་དག་མཉམ་ཆེན་པོར་ཡེ་ནས་གནས་པར་ཁས་ལེན་པའི་ཟབ་མོའི་ཚུལ་འདི་ཉིད་མཐར་ཐུག་གཟིགས་པས་ལེགས་པར་རྟོགས་ཤིང་ཚད་མ་མཆོག་གིས་གྲུབ་པར་གྱུར་པ་སྟེ་འདི་ལྟར་དག་པའི་སྣང་བ་དང་ཆོས་ཉིད་སྟོན་པ་ཉིད་དུའང་ཅིར་ཡང་མ་གྲུབ་པས་རང་རང་གི་ངོ་བོས་སྟོང་པ་ཡིན་པའི་གནད་ཀྱིས་འཁོར་བ་དང་མྱང་འདས་དག་དང་མ་དག་སོགས་ཅིར་ཡང་ཁས་ལེན་དུ་རུང་ཞིང་ཤིན་ཏུ་འཐད་དེ་ཆོས་ཉིད་ཅིར་ཡང་མ་གྲུབ་པ་ལས་ཅིར་ཡང་འཆར་བ་ཡིན་ལ་དེ་ལྟར་འཁོར་བ་དང་མྱང་འདས་གནས་ཚུལ་དང་སྣང་ཚུལ་ལ་སོགས་པ་རྟེན་འབྱུང་འགགས་པ་མེད་པས་རོལ་པ་ཅིར་ཡང་སྣང་དུ་རུང་ཞིང་མི་བསླུ་བ་དང་ཕན་ཚུན་མི་འཆོལ་བར་གྲུབ་ཀྱི། དེ་ལས་གཞན་དུ་རང་གི་ངོ་བོས་མི་སྟོང་པའི་རྟག་པ་དང་སྣང་བ་མེད་པའི་སྟོང་པ་ཕྱང་ཆད་ཀྱི་མཐའ་བྲལ་སོགས་གང་དང་གང་བརྟགས་པ་དེ་ལ་སྟོང་པ་དང་རྟེན་འབྱུང་དག་དང་མ་དག་སོགས་ཅིར་ཡང་མི་རུང་བར་འགྱུར་ཞིང་འཁོར་འདས་ཀྱི་སྣང་བ་རབ་འབྱམས་འགགས་མེད་རྟེན་ཅིང་འབྲེལ་འབྱུང་འདི་དག་ཅིར་ཡང་མི་སྣང་བས་གཏན་མེད་དུ་འགྱུར་བར་ངེས་ལ། དེ་ལྟར་ན་སྟོང་དང་རྟེན་འབྱུང་གཉིས་སུ་མེད་པར་ལེགས་པར་གསུངས་པའི་བཀའ་དང་དགོངས་འགྲེལ་ཀུན་དང་འགལ་བར་འགྱུར་རོ། །དེའི་ཕྱིར་ཟུང་འཇུག་དག་མཉམ་ཆེན་པོར་བསྒྲུབ་པའི་ཚུལ་ཟབ་མོ་འདིའི་ཡིད་ཆེས་ཕྱིར་མི་ལྡོག་པ་སྙིང་ལ་རྙེད་པའི་སྒོ་གཅིག་པུ་པར་གྱུར་པ་ནི་སྟོང་དང་རྟེན་འབྱུང་འགལ་བ་མེད་པར་རྟོགས་པའི་ལམ་མཆོག་འདི་ཉིད་ཁོ་ན་ཡིན་ཏེ་དེས་ན་སྣང་སྟོང་དབྱེར་མེད་དམ་ཟུང་འཇུག་འདི་ལ་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་སྐྱེས་ཤིང་གོམས་པར་གྱུར་ན། ཆོས་ཀུན་གདོད་ནས་མཉམ་པ་ཆེན་པོར་བྲི་གང་དང་བྲལ་བའི་རྒྱལ་བའི་དཀྱིལ་འཁོར་ཉིད་དུ་རང་གྲོལ་བ་ཡིན་པས་དེ་ལྟར་སྲིད་པ་འཁོར་བ་སྟོང་པ་དང་མི་སྟོང་དག་པ་དང་མ་དག་ལ་སོགས་པའི་ཐ་སྙད་ཀྱི་གཉིས་ཆོས་ཀུན་གྱི་མཐའ་དང་བྲལ་བའི་ཆོས་ཉིད་དག་མཉམ་ཟུང་འཇུག་ཆེན་པོ་ཕལ་བའི་བློས་བསམ་གྱིས་མི་ཁྱབ་པའི་དོན་དམ་ཉིད་ལ་ཟབ་མོའི་བཟོད་པ་མཆོག་ཏུ་གྱུར་པ་ཁོང་ནས་སྐྱེ་བར་འགྱུར་རོ། །དེའི་ཚེ་རྡུལ་ཕྲ་རབ་གཅིག་གི་ཁྱོན་ལའང་རྡུལ་རྙེད་ཀྱི་སངས་རྒྱས་ཀྱི་ཞིང་ཁམས་རྟེན་དང་བརྟེན་པར་བཅས་པ་ཐམས་ཅད་མཐོང་ཞིང་དུས་མཐའི་སྐད་ཅིག་གཅིག་གི་ཡུན་ལ་ཡང་གྲངས་མེད་ཀྱི་བསྐལ་པར་སྣང་ཞིང་མཐོང་བ་ལ་སོགས་པ་སྟེ་སྣང་བའི་དངོས་པོ་རྣམས་ནི་གདོད་ནས་བདེན་པས་སྟོང་པ་ཡིན་པས་སྣང་ལ་རང་བཞིན་མེད་པའི་སྒྱུ་མའི་ངེས་ཤེས་ཀྱིས་རྫོགས་པའི་སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པའི་ཟབ་མོ་ཉིད་ལ་ལེགས་པར་འཇུག་པར་འགྱུར་རོ། །དེ་ལྟ་བུའི་ཕྱིར་ན་ཆོས་ཀུན་ཡེ་ནས་སྣང་སྟོང་དག་མཉམ་བདེན་པ་དབྱེར་མེད་དམ་ཟུང་འཇུག་ཏུ་གནས་པའི་དོན་དེ་མཚོན་པའི་བརྡར་ངེས་པ་དོན་གྱི་མདོ་རྒྱུད་ཐུན་མོང་མིན་པ་རྣམས་ལས་རང་སྣང་རིས་སུ་མ་ཆད་པས་རིས་མེད་ཀྱི་དགོངས་པ་ཞེས་དང་། རྒྱ་ཆད་ཕྱོགས་ལྷུང་ཀུན་དང་བྲལ་བ་ཞེས་དང་། གཞི་དབྱིངས་བསམ་གྱིས་མི་ཁྱབ་པ་དང་། ཆོས་ཉིད་སྤྲོས་པ་ཅིར་ཡང་མ་གྲུབ་པ་དང་། སྣང་སྟོང་དབྱེར་མེད་ཟུང་དུ་འཇུག་པ་ཞེས་པ་ལ་སོགས་པ་རང་ལུགས་གྲུབ་མཐའི་ཆོས་སྐད་ཟབ་མོའི་བརྗོད་ཚུལ་ཙམ་འདིའི་དོན་ཡང་ལོ་བརྒྱར་བསྒྲིམས་ཏེ་ཡང་ཡང་བསམ་པར་བྱས་ཀྱང་རང་རྒྱུད་ཟབ་མོའི་དོན་ལ་སྔོན་ནས་གོམས་པ་ཆེས་ཆེར་བྱས་པའི་ལས་འཕྲོ་བཟང་པོ་དུས་སུ་སྨིན་པའི་དངོས་རྒྱུ་སད་པ་མེད་ན་ད་ལྟ་ཤེས་རབ་ཀྱི་བློ་གྲོས་ཆེན་པོ་དང་བརྩོན་པས་སྦྱངས་པ་ལའང་མི་དམན་པ་རབ་ཏུ་བཟང་པོ་ཡོད་མོད་ཀྱང་ཇི་བཞིན་དུ་ཐུགས་སུ་ཆུད་པ་མ་ཡིན་པས་ཡང་དག་པར་དགོངས་པར་མི་འགྱུར་ཏེ། འདི་ནི་གསན་རྒྱ་ཆེ་ཡང་གཞན་གྱི་ཐུགས་སུ་ཆུད་མི་འགྱུར། ཞེས་གསུངས་པ་བཞིན་ནོ། །གསུམ་པ། དེ་ཕྱིར་གྲུབ་མཐའ་སོགས་ཚིགས་བཅད་གཉིས་ཀྱིས་བསྟན་ཏེ། དེ་ཕྱིར་མདོ་རྒྱུད་ཀྱི་གྲུབ་མཐའ་ཟབ་མོ་གང་ཇི་སྙེད་པ་མཐའ་དག་གི་དགོངས་པའི་གཏིང་ཕུག་གང་དུ་འབབ་ཅིང་གཞོལ་བ་ཡི་བརྒྱ་ཕྲག་དམ་པའི་ཆོས་ཀྱི་ལེགས་བཤད་མང་པོའི་ཆུ་ཀླུང་དལ་གྱིས་འབབ་པའི་རྒྱུན་ཐམས་ཅད་འཁྱིལ་ཞིང་རྫོགས་པའི་ཕ་མཐའ་དང་བྲལ་བའི་རྒྱ་མཚོ་ཆེན་པོའི་ཆུ་གཏེར་ལྟ་བུའི་སྔ་འགྱུར་བསྟན་པའི་ཕྱི་མོ་ལྟ་སྤྱོད་རྣམ་པར་དག་པ་འདི་ནི་ངོ་མཚར་བས་ཀྱང་ཆེས་ངོ་མཚར་རྨད་དུ་བྱུང་བ་ཁོ་ན་ཡིན་ནོ། །དེ་ལྟར་གནས་ལུགས་མཐར་ཐུག་གནས་སྣང་རྣམ་ཀུན་མཐུན་པ་དེ་ལས་སྣང་ཚུལ་གཞན་པ་དག་དང་མ་དག་ལ་སོགས་པ་ཕྱོགས་རེར་སོང་བ་ཀུན་དང་དེ་དག་སྒྲུབ་པའི་ཚུལ་དང་བཅས་པ་རྣམས་ནི་ཚད་མའི་ལམ་ནས་ཡིད་ཆེས་སྐྱེད་དུ་མེད་པས་མ་ངེས་ཤིང་རིགས་པས་གནོད་པ་མཐོང་ན་མི་བརྟན་པས་འགྱུར་བ་དག་དང་བཅས་ཏེ་ས་ཟིན་མེད་པའི་སྣང་ཚུལ་ཙམ་གྱི་ཁས་ལེན་ཡིན་ལ། སྒྲིབ་པ་མཐའ་དག་སྤང་བའི་གནས་ལུགས་ཇི་ལྟ་བ་བཞིན་དུ་མཐར་ཕྱིན་ཅིང་མངོན་དུ་གྱུར་པའི་དག་མཉམ་བདེན་པ་དབྱེར་མེད་ཟུང་འཇུག་རང་བྱུང་གི་ཡེ་ཤེས་ནི་འགྱུར་མེད་འདུས་མ་བྱས་པའི་རང་བཞིན་བསླུ་མེད་ཚད་མས་གྲུབ་པའི་དོན་དམ་གཉུག་མའི་ཆོས་ཉིད་ཚུལ་བཞིན་དུ་གཟིགས་པའི་ཡུལ་དང་ཡུལ་ཅན་གྱི་སྤྲོས་པ་ཀུན་དང་བྲལ་བའི་གནས་སྣང་རྣམ་ཀུན་མཐུན་པས་འབྲས་བུའི་ཚད་མ་ཡིན་ཞིང་དེ་ལྟར་སྒྲུབ་པ་ཀུན་ཀྱང་མཐར་ཐུག་དཔྱོད་པའི་རིགས་པས་འགྲུབ་པས་འགྱུར་བ་མེད་པར་ཡང་དག་པའི་ཁས་ལེན་ཡིན་ནོ། །ཨེ་མ་འདི་ལས་གཞན་དུ་གང་བརྟགས་པའི་དམ་བཅའི་འབྲས་བུ་མངོན་དུ་འབྱིན་མིན་ལ། རྒྱ་ཆད་ཕྱོགས་བྲལ་ཟུང་འཇུག་གང་རུང་བར། ཐམས་ཅད་རུང་བར་གཅིག་ཤེས་ཀུན་གྲོལ་ལགས། ཞེས་ཀྱང་སྨྲས་སོ། །དྲི་ལན་བདུན་པ་སྤྲོས་བྲལ་དབུ་མ་ཆེན་པོར་ཁས་ལེན་ཡོད་མེད་གང་འཐད་ཀྱི་ལན་ལ་བཞི། ཁས་ལེན་མེད་པར་འདོད་པ་རང་གཞུང་རྣམས་དང་དངོས་སུ་འགལ་ཚུལ། ཁས་ལེན་ཡོད་མེད་སོ་སོར་ཕྱེ་བ་ཀུན་མཁྱེན་ཆེན་པོའི་བཞེད་པ་འགོད་པ། དེར་བརྟེན་ཁས་ལེན་ཡོད་པར་ཆེས་ཆེར་སྒྲུབ་པ་དངོས་སྟོབས་རིགས་པའི་སྒོ་ནས་གསལ་བར་འགོག་ཚུལ། ཀུན་མཁྱེན་ཆོས་རྗེའི་རྗེས་སུ་འབྲང་སྟེ་དབུ་མའི་རང་ལུགས་རྒྱས་པར་བཤད་པའོ། །དང་པོ། སྤྲོས་བྲལ་དབུ་མ་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། ཟུང་འཇུག་རབ་ཏུ་མི་གནས་པའི་སྤྲོས་བྲལ་དབུ་མ་ཆེན་པོ་ཐལ་འགྱུར་བ་ལ་རང་ལུགས་ཀྱི་ཁས་ལེན་ཡོད་དམ་མེད་ཅེས་དཔྱད་པའི་ཚེ། བོད་སྔ་རབས་ཀྱི་མཁས་པ་ཕལ་ཆེ་བ་རྣམས་མགྲིན་གཅིག་ཏུ་དབུ་མ་ཐལ་འགྱུར་བའི་རང་ལུགས་ལ་འདི་ཡིན་དང་འདི་མིན་དང་། ཡོད་མེད་ལ་སོགས་པའི་སྤྲོས་པ་གང་ཅིར་ཡང་ནི་མེད་པའི་ཕྱིར་རྣམ་པ་ཀུན་ཏུ་ཅིར་ཡང་ཁས་ལེན་མེད་པར་འདོད་པ་མི་འཐད་དེ། འདི་ལྟར་དཔལ་ལྡན་ཟླ་བའི་རང་གཞུང་དབུ་མ་འཇུག་པ་རྩ་འགྲེལ་ལ་སོགས་པ་རྣམས་ལས་གཞི་ཕུང་ཁམས་སྐྱེ་མཆེད་ཀྱི་རྟེན་འབྲེལ་དང་ལམ་སོ་སོའི་སྐྱེ་བོའི་ཆོས་གསུམ་འཕགས་པའི་ས་བཅུ་དང་འབྲས་བུ་སྐུ་གསུམ་དང་སྟོབས་བཅུ་ལ་སོགས་པ་ཡོན་ཏན་དང་བཅས་པ་སྣང་ཙམ་བསླུ་མེད་ཀྱི་རྟེན་ཅིང་འབྲེལ་བར་འབྱུང་བའི་གྲུབ་མཐའི་རྣམ་པར་བཞག་པ་ཀུན་ལ་ཁས་བླང་བའི་རང་ལུགས་གསལ་པོར་ཡོད་བཞིན་དུ་ཁས་ལེན་རྣམ་ཀུན་མེད་ཅེས་མངོན་སུམ་དུ་བསྙོན་ནས་གཞི་དང་ལམ་དང་འབྲས་བུ་ལ་སོགས་པའི་ཐ་སྙད་ཀྱི་རྣམ་བཞག་ཐམས་ཅད་གཞན་ངོ་ཁོ་ན་ལ་འཇོག་ཅིང་སྐྱེལ་བ་དེ་ནི་དཔལ་ལྡན་ཟླ་བའི་རང་གཞུང་གི་རྗོད་བྱེད་ཀྱི་ཚིག་བརྗོད་བྱའི་དོན་གཉིས་གར་འགལ་བ་འདུ་བའི་ཕྱིར་དེ་ལྟར་འདོད་དུ་རུང་བ་མ་ཡིན་ནོ། །གཉིས་པ། ཀློང་ཆེན་རབ་འབྱམས་སོགས་ཚིགས་བཅད་བཞིས་བསྟན་ཏེ། རྒྱལ་བ་གཉིས་པ་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་བཟང་པོའི་ཞལ་སྔ་ནས་འདི་སྐད་དུ་དཔལ་ལྡན་ཟླ་བའི་རང་ལུགས་ཀྱི་དབུ་མར་ཏེ་དབུ་མ་ཐལ་འགྱུར་བ་ལ་ཐ་སྙད་ཀྱི་རྣམ་བཞག་ཁས་ལེན་ཡོད་དམ་མེད་པ་གང་ཡིན་དཔྱད་པ་ལ། གངས་ཅན་སྔ་རབས་ཀྱི་མཁས་པ་ཕལ་ཆེར་རྣམས་ཡོད་མེད་ཕྱོགས་རེར་འཛིན་ཏེ་འདི་ལྟར་བ་ཚབ་བུ་བཞིའི་ཡ་གྱལ་ཚིག་དོན་གཉིས་གར་མཁས་པ་རྨ་བྱ་ཕྱང་བརྩོན་གྱིས་ཁས་ལེན་ཡོད་པར་འདོད་པ་དང་། མཁས་མཆོག་གཙང་བ་ནི་ཁས་ལེན་མེད་པར་འདོད་པ་ལའང་དཔྱད་ན་ལུགས་གཉིས་པོ་དེ་རེ་རེར་ཡང་སྐྱོན་དང་ཡོན་ཏན་གྱི་ཆ་གཉིས་རེ་གནས་ཤིང་ཡོད་པས་ལེགས་པར་མ་ཕྱེད་པའོ། །དེས་ན་སྐྱོན་ཐམས་ཅད་དང་བྲལ་བའི་རང་གི་བཞེད་པ་ལ་ནི་འཕགས་པའི་མཉམ་བཞག་ཡེ་ཤེས་དང་རྗེས་སུ་མཐུན་པར་དོན་དམ་པའི་གནས་ལུགས་ཇི་བཞིན་དུ་གཞལ་བ་མཉམ་བཞག་ལ་ཟློ་བའི་ཚེ་གཤིས་ལུགས་ཆོས་ཀྱི་དབྱིངས་ལ་ཡིན་མིན་ཡོད་མེད་ལ་སོགས་པའི་སྤྲོས་པ་ཅིར་ཡང་མ་གྲུབ་པ་དེ་ལྟར་ཁས་ཀྱང་ཡོད་མེད་ལ་སོགས་ལ་ཅི་ཞིག་ལེན་པར་བྱེད་དེ་ཁས་ལེན་ཅི་ཡང་མེད་པ་ཉིད་དོ། །དེ་ཕྱིར་རང་གི་གྲུབ་མཐའ་ཞེས་པ་གནས་ལུགས་མཐར་ཐུག་གི་དོན་ཉིད་རང་གིས་རིགས་པས་ཇི་ལྟར་གཞལ་ནས་གནོད་མེད་དུ་གྲུབ་པ་དེ་ཉིད་རང་ལུགས་ཀྱི་ཁས་ལེན་ཡིན་པར་འཇོག་དགོས་པ་ཡིན་པའི་ཕྱིར་མཉམ་བཞག་ཡེ་ཤེས་ཡུལ་དུ་བྱེད་པ་དང་གཞན་དང་རྩོད་པ་ལ་སོགས་པའི་ཚེ་གཤིས་སམ་གནས་ལུགས་ཡོད་མེད་ལ་སོགས་པའི་སྤྲོས་མཚན་ཤིན་ཏུ་ཕྲ་བའང་མེད་པའི་ཆོས་ཀྱི་དབྱིངས་ཇི་ལྟ་བ་བཞིན་དུ་ཡོད་དང་མེད། སྟོང་དང་མི་སྟོང་སོགས་ཀྱི་ཁས་ལེན་ཅི་ཡང་མེད་པ་ཉིད་དོ། །ལམ་རྗེས་ཐོབ་ཐ་སྙད་པ་ཡུལ་དུ་བྱེད་པའི་ཚེ་གཞི་ལམ་འབྲས་བུར་བཅས་པའི་གྲུབ་པའི་མཐའ་ཇི་ལྟ་ཇི་སྙེད་ཀྱི་རྣམ་པར་བཞག་པ་ཡང་དག་པའི་ལུང་ལས་ཇི་སྐད་བསྟན་པ་རྣམས་མ་འཁྲུགས་ཤིང་མ་འདྲེས་པར་སོ་སོར་ཁས་ལེན་དགོས་པར་ཁོ་བོས་འདོད་ལ། ཕྱིན་ཆད་ཁས་ལེན་མི་ལེན་གྱི་ཚུལ་འདི་ལྟར་དམ་བཅའ་ཞིང་སྨྲ་ཤེས་པ་བྱུང་ན་ཁོ་བོས་ལེགས་པར་བཤད་པ་འགྲེལ་ཆེན་པདྨ་དཀར་པོའི་མཐུ་ཡིན་པར་བལྟའོ་ཞེས་གསུངས་སོ། །གསུམ་པ། དེར་བརྟེན་གངས་ཅན་སོགས་ཚིགས་བཅད་བཅུ་གཉིས་ཀྱིས་བསྟན་ཏེ། དེ་ལྟར་རྗེས་ཐོབ་ཤན་འབྱེད་ཀྱི་འཇོག་ཚུལ་དེ་དང་གཞན་ཡང་ཁས་ལེན་ཡོད་པར་གསུངས་པའི་ཕྱོགས་དེ་དང་དེར་བརྟེན་པའི་གངས་ཅན་གྱི་མཁས་པ་འགའ་དང་འགས། དབུ་མ་ཐལ་འགྱུར་བའི་རང་ལུགས་ལ་དཔྱད་ན་བདེན་གྲུབ་མེད་པས་བདེན་གྲུབ་ཀྱི་ཁས་ལེན་མེད་ཀྱང་མ་དཔྱད་མ་བརྟགས་པའི་འཇིག་རྟེན་གྲགས་པའི་ཐ་སྙད་ཀྱི་ཁས་ལེན་ཡོད་པའི་ཕྱོགས་ཁོ་ན་ལུང་དང་རིགས་པས་ཡང་དང་ཡང་དུ་རྩལ་དུ་བཏོན་ནས་ཆེས་ཆེར་བསྒྲུབ་པར་མཛད་པའང་ལེགས་པར་མ་ཕྱེད་པ་སྟེ། ཇི་ལྟར་ན་དེ་ཡང་མཉམ་རྗེས་ཀྱི་དབུ་མ་ཕྲ་བ་དང་རགས་པ་ལ་སོགས་པའི་སྐབས་ཤན་སོ་སོར་ལེགས་པར་མ་ཕྱེས་པར་རྣམ་ཀུན་ཁས་ལེན་ཡོད་པར་སྒྲུབ་ན་གཤིས་དོན་གནས་ལུགས་ཆོས་ཀྱི་དབྱིངས་ལ་ཡོད་མེད་ལ་སོགས་པའི་སྤྲོས་པ་ཅིར་ཡང་མ་གྲུབ་པའི་ཕྱིར་ན་དབུ་མ་ཐལ་འགྱུར་བའི་རང་ལུགས་ལ་མ་བརྟགས་འཇིག་རྟེན་གྲགས་པའི་ཐ་སྙད་ཐམས་ཅད་མཐའ་གཅིག་ཏུ་ཁས་ལེན་ཡོད་པའང་འགྲུབ་པ་ཤིན་ཏུ་དཀའ་སྟེ། འདི་ལྟར་དབུ་མ་ཐལ་འགྱུར་བ་རང་གི་ལུགས་ཞེས་པ་དབུ་མའི་གྲུབ་པའི་མཐའ་གནས་ལུགས་མཐར་ཐུག་གི་དོན་རིགས་པས་ཇི་ལྟར་གཞལ་བ་གནོད་པ་མེད་པ་ཉིད་ཡིན་དགོས་ཏེ། དེ་ལས་གཞན་པ་ཐ་སྙད་ཀྱི་ཁས་ལེན་རྣམས་ནི་རིགས་པས་གནོད་པ་ཡོད་པས་རང་ལུགས་མིན་ཏེ། ཅི་ཡི་སླད་དུ་ཞེ་ན། དབུ་མ་ཐལ་འགྱུར་བ་རང་གིས་ནི་དོན་དམ་དཔྱོད་བྱེད་ཀྱི་རིགས་པས་གཞལ་ན་ཐ་སྙད་ཀྱི་ཁས་ལེན་དེ་དག་དེ་ལྟར་མ་གྲུབ་པའི་ཕྱིར་རོ། །དེས་ན་ཐལ་འགྱུར་བ་དེས་རང་ལུགས་ཀྱི་ཁས་བླང་ཡིན་ན་དེ་ཉིད་དོན་དམ་དུ་གྲུབ་པས་རང་དབང་ཅན་དོན་དམ་དཔྱོད་རིགས་ཀྱིས་དཔྱད་ནས་ཀྱང་གནོད་མེད་དུ་མཐོང་བའི་ཁས་བླང་ཡིན་པར་རིགས་པ་ཡང་དག་པས་འཕུལ་ནུས་པ་དེ་ཉིད་ཀྱི་ཕྱིར་ན་དེས་ཁས་བླངས་པ་ཡི་མ་བརྟགས་གྲགས་པའི་ཐ་སྙད་དེ་ཡང་རང་ལུགས་ཀྱི་ཁས་ལེན་ཡིན་པས་དོན་དམ་པར་བདེན་པར་གྲུབ་ཅིང་དོན་དམ་དཔྱོད་པའི་རིགས་པས་དཔྱད་བཟོད་ཉིད་དུ་འགྱུར་ཏེ། དེས་ན་རང་རྒྱུད་པ་ལ་བརྗོད་པ་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ། དོན་དམ་པའི་སྐྱེ་བ་མི་ཁེགས་པར་ཐལ་བ། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བའི་སྐྱོན་གསུམ་པོ་རང་ལ་ཡང་མཚུངས་པར་འབབ་སོ། །གལ་ཏེ་མ་བརྟགས་གྲགས་པའི་ཁས་ལེན་དེ་ཐལ་འགྱུར་བ་རང་ལུགས་ཀྱི་ཁས་ལེན་མ་ཡིན་ནོ་ཞེ་ན། རང་ལུགས་ལ་འཇིག་རྟེན་རྒན་པོའི་ཇི་ལྟར་བཞག་པ་ལྟར་ཁས་ལེན་ཡོད་པ་ཡིན་ཞེས་པའི་རང་ཚིག་དང་དངོས་འགལ་དུ་འགྱུར་བས་མི་འཐད་དོ། །གཞན་ཡང་གལ་ཏེ་རང་ལ་དོན་དམ་དཔྱོད་པའི་རིགས་པས་དཔྱད་ནས་བདེན་གྲུབ་མེད་པ་དང་མ་དཔྱད་འཇིག་རྟེན་གྲགས་པའི་ཐ་སྙད་ཐམས་ཅད་གནོད་མེད་དུ་ཡོད་པའི་ཁས་ལེན་གཉིས་ནི་ཡོད་པར་གྱུར་ཅིང་དེ་གཉིས་ཀ་ངེས་པར་བདེན་པའམ་ཡང་དག་པར་གྱུར་ན་དབུ་མའི་རང་ལུགས་ཞེས་པ་དེ་གཉིས་པོ་ལས་རེ་རེ་ཡིན་ནམ་འོན་ཏེ་གཉིས་ཀ་ཡིན། གལ་ཏེ་གང་རུང་རེ་རེ་ནས་རང་ལུགས་ཡིན་ནོ་ཞེ་ན་གཅིག་ཤོས་རང་ལུགས་སུ་མི་འཐད་དེ་དངོས་འགལ་ཡིན་པའི་ཕྱིར་རོ། །གལ་ཏེ་ཡོད་ཅེས་པ་རང་ལུགས་ཀྱི་ཁས་བླང་མ་ཡིན་ལ། མེད་པར་ཁས་ནི་བླང་བར་གྱུར་པ་དེ་ཉིད་རང་ལུགས་ཡིན་ནོ་ཞེ་ན། དེ་ལྟར་ན་ཡོད་ཅེས་བྱ་བའི་ཁས་ལེན་ནི་རང་གི་ལུགས་ལ་མ་བརྟགས་འཇིག་རྟེན་གྲགས་པའི་ཀུན་རྫོབ་ཙམ་དུ་ཡང་མི་རུང་སྟེ་མེད་པ་ཁོ་ན་རང་ལུགས་སུ་ཁས་བླང་བའི་ཕྱིར་རོ། །གལ་ཏེ་རེ་རེ་མ་ཡིན་པར་ཡོད་མེད་གཉིས་ཀ་རང་གི་ལུགས་ཀྱི་ཁས་བླང་བ་ཡིན་ནོ་ཞེ་ན། ཆོས་གང་ཡང་རིགས་པས་དཔྱད་མི་བཟོད་པ་དེ་ཁས་མི་ལེན་པའམ་བསལ་ནས་སུ་རིགས་པས་གནོད་པ་མེད་པར་དཔྱད་བཟོད་པས་སྐྱོན་མེད་ཅིག་ཁས་ལེན་པ་ཡིན་པའི་ཕྱིར་ཡོད་མེད་གཉིས་ཀ་རིགས་པས་དཔྱད་བཟོད་དུ་ཐལ་བར་འགྱུར་རོ། །དེ་ལྟ་ན་ཡང་རིགས་པས་དཔྱད་པའི་སྟོང་པ་དང་མ་དཔྱད་པའི་སྣང་བ་དེ་གཉིས་པོ་ལྷན་ཅིག་ཏུ་དངོས་པོ་གཅིག་ལ་འདུ་ཞིང་ཚོགས་པ་འཇིག་རྟེན་ན་སྲིད་པ་མ་ཡིན་ཏེ། གལ་ཏེ་ཚོགས་ན་དོན་དམ་དཔྱོད་བྱེད་ཀྱིས་དཔྱད་པས་མེད་པའམ་སྟོང་པར་རྟོགས་པའི་ཚེ་ན་ཡང་མ་དཔྱད་འཇིག་རྟེན་རྒན་པོའི་དུས་བཞིན་དུ་དངོས་པོ་དེ་ཉིད་ཡོད་པ་ཉིད་ཀྱང་ཡིན་པས་དེར་འཛིན་གྱི་ཡོད་རྟོག་ཉིད་ཀྱང་བཟློག་མི་ཐུབ་པར་ཡོད་དགོས་པའི་ཕྱིར་ན་དོན་དཔྱོད་ཀྱི་རིགས་པའི་དཔྱད་པས་ཅི་ཞིག་ཕན་ཏེ་འཁྲུལ་རྟོག་སྤོང་བ་ལ་ཅི་ཡང་མི་ཕན་པའི་དཔྱད་པ་དོན་མེད་དུ་འགྱུར་བའི་ཕྱིར་རོ། །དེར་མ་ཟད་ཐལ་འགྱུར་བ་རང་གི་ལུགས་ལ་བདེན་པ་གཉིས་ཀྱི་ཁས་ལེན་དེ་ཡང་གྲུབ་པ་མིན་ཏེ། འདི་ལྟར་ཀུན་རྫོབ་མ་བརྟགས་འཇིག་རྟེན་གྲགས་པའི་ཡོད་པ་དེ་ཡང་རང་ལུགས་ཡིན་ན་དེ་དོན་དམ་དཔྱོད་པའི་རིགས་པས་དཔྱད་བཟོད་དུ་གྲུབ་པ་ཞིག་དགོས་ཀྱང་དེ་ལྟར་རིགས་ཤིང་འཐད་པ་མ་ཡིན་པའི་ཕྱིར་ཏེ་ཤེས་བྱའི་ཁོང་ན་དོན་དམ་དཔྱོད་པའི་རིགས་པས་དཔྱད་བཟོད་ཀྱི་ཆོས་གང་ཡང་མི་སྲིད་པའི་ཕྱིར་རོ། །དེ་བཞིན་དུ་དོན་དམ་པ་དགག་བྱ་བདེན་གྲུབ་བཅད་པའི་མེད་དགག་སྟོང་རྐྱང་དེ་ལས་ལྷག་པའི་གནས་ལུགས་མཐར་ཐུག་པ་ཞིག་མེད་པར་གྱུར་ན་དེ་ཉིད་མངོན་དུ་བྱེད་པའི་ལམ་ལ་ཞུགས་ཚེ་མེད་དགག་སྟོང་རྐྱང་ཁོ་ན་འཛིན་པའི་འཛིན་སྟངས་དེ་ལ་གང་སྣང་བའི་ཆ་ཞིག་གནས་ལུགས་ལ་ཡོད་མ་མྱོང་བའི་སྣང་ཕྱོགས་ཀྱི་འཛིན་སྟངས་འཇུག་པ་སྐབས་མི་ཐོབ་ཅིང་མི་སྲིད་པའི་ཕྱིར་ན་སྣང་ཆ་ཐམས་ཅད་སྟོང་རྐྱང་མེད་དགག་གི་དབྱིངས་སུ་རྒྱས་གདབ་པས་མཐའ་གཅིག་ཏུ་ལྟ་བ་དང་སྒོམ་པ་དང་སྤྱོད་པའི་གནས་སྐབས་ཀུན་ཀྱང་མེད་པར་ཏེ་མེད་པ་ཁོ་ནར་ལྟ་བའི་ཡིད་ཅན་དུ་ཅི་ཡི་ཕྱིར་མི་འགྱུར་ཏེ། འདི་ལྟར་གནས་ལུགས་དང་རྗེས་སུ་མཐུན་པར་ལྟ་བས་གཏན་ལ་དབབ་ཅིང་སྒོམས་པས་དུས་ནམ་སྒོམ་ཡང་ལྟ་བ་དང་མཐུན་པར་བསྒོམས་དགོས་པ་དང་སྤྱོད་པའང་ལྟ་སྒོམ་གྱི་རྗེས་སུ་འབྲང་བར་ངེས་པའི་ཕྱིར་རོ། །བཞི་པ་ལ་བཞི། གནས་སྐབས་དབུ་མའི་གྲུབ་མཐའ་གཏན་ལ་དབབ་ཚེ་ཁས་ལེན་ཡོད་མེད་གཉིས་སུ་རིགས་པས་སྒྲུབ་པ། མཐར་ཐུག་རྟོགས་པའི་དངོས་གཞི་ཐོབ་ཚེ་ཁས་ལེན་ཡོད་མེད་ལ་སོགས་པའི་སྤྲོས་མཐའ་ཀུན་དང་བྲལ་བར་བསྟན་པ། དེ་ཉིད་རྟོགས་པར་བྱེད་པའི་ཐེག་རིམ་ངེས་པ་མདོ་སྔགས་ལྟ་བའི་ལམ་ཁྱད་སྒྲུབ་པ། དབུ་མ་ལ་ཇི་སྐད་བཤད་པའི་ཚུལ་དེས་གནས་ལུགས་སོགས་གཞན་ཡང་མཚོན་པར་བསྟན་པའོ། །དང་པོ་ལ་གཉིས། མཉམ་བཞག་འཕགས་པའི་ཡེ་ཤེས་གཞལ་ཞིང་གཞན་དང་རྩོད་པའི་སྐབས་སུ་གཤིས་ཀྱི་གནས་ལུགས་བཞིན་དུ་ཁས་ལེན་ཅི་ཡང་མེད་ཚུལ། རྗེས་ཐོབ་ལམ་འབྲས་གྲུབ་མཐའ་འཇོག་ཅིང་བདེན་གཉིས་གཞལ་བའི་སྐབས་སུ་ཐ་སྙད་སྣང་ཚུལ་བཞིན་དུ་ཁས་ལེན་ཡོད་པར་སྒྲུབ་པའོ། །དང་པོ་ལ་གཉིས། སྤྲོས་བྲལ་འབྲས་བུའི་དབུ་མ་གཏན་ལ་དབབ་ཚེ་གཞལ་བྱ་ཁས་ལེན་ཀུན་དང་བྲལ་བའི་ཆོས་ཉིད་གཤིས་ཀྱི་རང་བཞིན་ངོས་བཟུང་བ། དེ་ཉིད་དངོས་དང་མཐུན་པར་གཞལ་བས་ཁས་ལེན་མེད་པར་གྲུབ་པའི་རྒྱུ་མཚན་རིགས་པས་བསྟན་པའོ། །དང་པོ། དེས་ན་ཀུན་མཁྱེན་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེས་ན་ཀུན་མཁྱེན་རྒྱལ་བ་གཉིས་པ་ཀློང་ཆེན་རབ་འབྱམས་བཟང་པོའི་ཇི་ལྟར་བཞེད་པ་བཞིན་དུ་སྔ་འགྱུར་གྱི་རང་ལུགས་རྙོགས་པའི་དྲི་མ་མེད་པ་ནི་འདི་ལྟར་ཤེས་པར་བྱ་སྟེ། ཟུང་འཇུག་རབ་ཏུ་མི་གནས་པའི་དབུ་མ་ཐལ་འགྱུར་མཚན་ཉིད་པ་རྟོག་གེས་རྙོགས་དང་བྲལ་བ་ཞིག་ཡིན་ན་སྣང་སྟོང་ཟུང་དུ་འཇུག་པའི་དབུ་མ་ཆེན་པོའམ་སྤྲོས་པ་ཐམས་ཅད་དང་བྲལ་བའི་དབུ་མ་ཆེན་པོ་ཉིད་ངེས་པར་ཡིན་དགོས་ཏེ་དེ་ནི་འདི་ལྟར་ཐེག་ཆེན་འཕགས་པའི་མཉམ་བཞག་གཉིས་སྣང་མེད་པའི་ཡེ་ཤེས་དང་རྗེས་སུ་མཐུན་པར་དོན་དམ་མཐར་ཐུག་དཔྱོད་པའི་རིགས་པ་ཡང་དག་གིས་གཏན་ལ་ཕབ་ནས་ཡོད་མེད་རྟག་ཆད་ལ་སོགས་པའི་མཐའ་རགས་པ་དང་ཕྲ་བ་ཤིན་ཏུ་ཕྲ་བ་རྣམས་མ་ལུས་པ་ཀུན་ཉེ་བར་ཞི་བའམ་ཉེར་ཞིའི་རང་བཞིན་བདེན་གཉིས་ཟུང་འཇུག་གི་གནས་ལུགས་ཡིན་པའི་ཕྱིར་རོ། །དེ་ལས་གཞན་དུ་དགག་བྱ་བདེན་གྲུབ་བཅད་པའི་སྟོང་པ་མེད་དགག་འབའ་ཞིག་ཡུལ་དུ་བྱེད་པའི་ལམ་དེ་ཉིད་སྣང་སྟོང་བདེན་གཉིས་ཟུང་འཇུག་གཤིས་ཀྱི་གནས་ཚུལ་མ་ཡིན་པར་ཕྱོགས་གཅིག་སྟོང་པའི་མཐའ་ལ་ལྷུང་བའི་ཕྱིར་ལྟ་བ་ཉེ་ཚེ་བའམ་ཉེ་ཚེའི་ལྟ་བ་ཡིན་པས་དེ་ནི་སྣང་སྟོང་ཟུང་འཇུག་དང་ནི་སྤྲོས་ཀུན་བྲལ་བའི་ལྟ་བ་མཐར་ཐུག་རྣམ་པ་ཀུན་ཏུ་མིན་ཏེ། འདི་ལྟར་སྣང་སྟོང་ཟུང་དུ་འཇུག་པའི་ལྟ་བ་སྤྲོས་པ་ཀུན་དང་བྲལ་བ་ནི་ཡོད་པ་དང་མེད་པའམ་སྣང་བ་དང་སྟོང་པ་དབྱེར་མེད་པའི་ཆོས་ཀྱི་དབྱིངས་མཉམ་ཉིད་ཡིན་དགོས་ཀྱང་ཉི་ཚེའི་ལྟ་བ་འདི་ནི་དོན་དམ་མེད་དགག་སྟོང་པའི་དབྱིངས་འབའ་ཞིག་གམ་ཁོ་ནའི་ཡུལ་ཅན་ཡིན་པས་སྤྲོས་པ་ཐམས་ཅད་དང་མ་བྲལ་བའི་ཕྱིར་རོ། །དེ་ལྟར་གྲུབ་སྟེ་སྤྲོས་པ་ཞེས་བྱ་བ་ནི་ཡོད་པ་དང་མེད་པ་སྟོང་པ་དང་སྣང་བ་ལ་སོགས་པའི་མཚན་མར་དམིགས་པའི་རྣམ་པ་གཟུང་འཛིན་ཅན་གང་ཇི་སྙེད་པ་ཐམས་ཅད་ཡིན་པས་དེ་ཐམས་ཅད་དང་མ་བྲལ་ན་ཟུང་འཇུག་རབ་ཏུ་མི་གནས་པའི་སྤྲོས་བྲལ་དབུ་མ་ཆེན་པོ་མིན་པས་འདི་ནི་སྟོང་པའམ་མེད་པའི་སྤྲོས་པ་དང་མ་བྲལ་བར་མེད་དགག་དེ་ལ་དམིགས་པའི་ཕྱིར་ན་རྣམ་པར་རྟོག་པའི་གཞན་སེལ་གྱི་སྤྱོད་ཡུལ་ལྟ་བ་ཉི་ཚེ་བར་གྲུབ་བོ། །གཉིས་པ། དེས་ན་དབུ་མ་སོགས་ཚིགས་བཅད་གཉིས་ཀྱིས་བསྟན་ཏེ། དེས་ན་གནས་ལུགས་ཟུང་འཇུག་སྤྲོས་བྲལ་དབུ་མ་ཆེན་པོའི་ངོར་བྱས་ན་དགག་དང་སྒྲུབ་པའི་ཁས་ལེན་གྱི་སྤྲོས་པ་ཅི་ཡང་རྣམ་པ་ཀུན་ཏུ་ཡོད་པ་མིན་ཏེ། དབུ་མ་ཆེན་པོར་གནས་པའི་རྣལ་འབྱོར་པ་དེ་ཡིས་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་སྟོང་ཟུང་དུ་འཇུག་པའི་སྤྲོས་བྲལ་མཉམ་པ་ཉིད་དུ་རྟོགས་པའི་སླད་དེ་དོན་གྱིས་ཆོས་ཐམས་ཅད་ཀྱི་གནས་ལུགས་ཟུང་འཇུག་ཆོས་ཀྱི་དབྱིངས་ཡོད་མེད་ཡིན་མིན་ལ་སོགས་པའི་དགག་སྒྲུབ་ཀྱི་སྤྲོས་པ་ཐམས་ཅད་ཀུན་དང་བྲལ་བས་སམ་བྲལ་བ་ཡིན་པས་ན་གནས་ལུགས་ཟུང་འཇུག་སྤྲོས་པ་མཐའ་དག་དང་བྲལ་བའི་དོན་ཉིད་ཇི་ལྟ་བ་བཞིན་དུ་འཁོར་འདས་ཀྱི་ཆོས་ཀུན་ཀྱང་ཟུང་འཇུག་སྤྲོས་པ་དང་བྲལ་བར་གནས་པས་ཡོད་མེད་སོགས་གང་དང་གང་དུ་ཁས་བླང་བ་དེ་དང་དེ་ཉིད་གནས་ལུགས་མཐར་ཐུག་དཔྱོད་པའི་རིགས་པས་དེ་དང་དེ་ལྟར་མི་འགྲུབ་པའི་ཕྱིར་ཡོད་པ་དང་མེད་པ་སྟོང་པ་དང་མི་སྟོང་བ་སྣང་བ་དང་མི་སྣང་བ་སོགས་གང་དུ་ཡང་ཁས་ནི་ལེན་པར་མི་བྱེད་དོ། །དེས་ན་དབུ་མ་ཐལ་འགྱུར་བའི་རང་ལུགས་ལ་མཉམ་བཞག་ལ་ཟློ་བའི་ཚེ་ཁས་ལེན་མེད་པར་ཤེས་པར་བྱའོ། །གཉིས་པ་ལ་གཉིས། ཤན་འབྱེད་རྒྱུ་ཡི་དབུ་མ་གཏན་ལ་འབེབས་ཚེ་ཁས་ལེན་ཡོད་པར་སྒྲུབ་པའི་ཚད་མའི་བློ་དང་གཞལ་བྱ་གཉིས་ཀྱི་རང་བཞིན་ངོས་བཟུང་བ། དེ་ལ་མི་འཐད་པའི་རྩོད་པ་སྤོང་ཞིང་ལན་གྱི་ཚུལ་དུ་དངོས་སྟོབས་རིགས་པའི་ལམ་གྱིས་གསལ་བར་སྒྲུབ་པའོ། །དང་པོ། དེ་ལྟར་གནས་ལུགས་སོགས་ཚིགས་བཅད་བཞི་དང་རྐང་པ་གསུམ་གྱིས་བསྟན་ཏེ། དེ་ལྟར་མཉམ་བཞག་ལ་ཟློ་བའི་ཚེ་ཆོས་ཐམས་ཅད་ཀྱི་གནས་ལུགས་ཟུང་འཇུག་ཆོས་ཀྱི་དབྱིངས་ཉིད་གཏན་ལ་ཕབ་པའི་མཐར་ཐུག་གི་དོན་ལ་གཤིས་ལ་གཉིས་ཆོས་ཀྱི་སྤྲོས་པ་ཅིར་ཡང་མེད་པས་ཁས་ལེན་མེད་པར་གྲུབ་ཀྱང་། རྗེས་ཐོབ་ཤན་འབྱེད་པའི་ཚེ་གནས་སྐབས་སྣང་ཚུལ་ལ་ཐ་སྙད་ཙམ་དུ་བདེན་པ་གཉིས་ཀ་སོ་སོར་ཡང་ཀུན་རྫོབ་ཏུ་ཡོད་ལ་དོན་དམ་དུ་མེད་ཅེས་པའི་ཁས་བླང་ཡོད་དེ་འོན་ཀྱང་དེ་འདྲའི་ཁས་ལེན་ཅན་གྱི་བདེན་པ་གཉིས་ཀྱང་བདེན་གཉིས་དབྱེར་མེད་ཟུང་འཇུག་གི་གནས་ལུགས་ལ་ལྟོས་ན་བདེན་གཉིས་སོ་སོའི་སྣང་ཚུལ་གནས་སྣང་གི་རྣམ་པ་མི་འགོག་པས་ཐ་སྙད་ཀྱི་གཞལ་བྱ་ཙམ་ཞིག་ཡིན་གྱི། གཤིས་ཀྱི་གནས་ལུགས་མ་ཡིན་ལ། བདེན་གཉིས་དབྱེར་མེད་ཆོས་ཉིད་དོན་དམ་པ་ཇི་ལྟ་བར་མཐོང་བའི་ཚད་མའི་ཡེ་ཤེས་མཐར་ཐུག་པ་ལ་ལྟོས་ན་བདེན་གཉིས་དཔྱོད་པའི་ཚད་མ་གཉིས་པོ་དེ་ཡང་ཉི་ཚེ་བའི་ཚད་མའམ་ཉི་ཚེའི་གནས་ཀྱི་འཇལ་བྱེད་ཙམ་ཡིན་ཏེ་ཚད་མ་དེ་གང་རུང་གཅིག་གིས་བདེན་གཉིས་ཅིག་ཆར་འཛིན་པ་མི་སྲིད་པའི་ཕྱིར་རོ། །དེས་ན་ཐ་སྙད་དཔྱོད་བྱེད་དང་དོན་དམ་དཔྱོད་བྱེད་ཀྱི་ཚད་མ་གཉིས་པོ་སེམས་བྱུང་ཤེས་རབ་སྟེ་བུམ་པ་ལ་སོགས་པའི་དངོས་པོ་ཀུན་ཚད་མ་དེ་གཉིས་ཀྱིས་སོ་སོར་དཔྱད་ཅིང་གཞལ་བ་ན། ཇི་སྐད་དུ། དབུ་མ་འཇུག་པ་ལས། དངོས་ཀུན་ཡང་དག་རྫུན་པར་མཐོང་བ་ཡི། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཞེས་གསུངས་པ་ལྟར། རྫུན་པ་དང་ཡང་དག་པའི་ངོ་བོ་སྣང་བ་དང་སྟོང་པ་གཉིས་ནི་རྙེད་ཅིང་རྟོགས་པར་གྱུར་ན་ཡང་ཚད་མ་དེ་གཉིས་ཡུལ་སོ་སོ་བ་ཡིན་པས་གང་རུང་གཅིག་གིས་རང་ཡུལ་དེ་གཞལ་ཞིང་རྟོགས་པའི་ཚེ་གཅིག་ཤོས་ཀྱང་གཞལ་ཞིང་རྟོགས་པ་ནི་ཡོད་པ་མིན་པས་ཚད་མ་དེ་གཉིས་གང་ཡིན་ཀྱང་རུང་བདེན་གཉིས་ཅིག་ཆར་མི་གཞལ་ཞིང་མི་རྟོགས་པས་སོ་སྐྱེའི་བློ་གཉིས་སྣང་ཅན་ལ་བདེན་པ་དེ་གཉིས་རེས་འཇོག་གི་ཚུལ་དུ་སོ་སོར་སྣང་བ་ལས་ཅིག་ཆར་དུ་མི་སྣང་བའི་ཕྱིར་ན་ཚད་མ་གཉིས་སོ་སོས་ཇི་ལྟར་གཞལ་བའི་རྙེད་དོན་ཡོད་མེད་ཀྱི་ཁས་ལེན་གཉིས་ཀྱང་ཡོད་པ་ཉིད་དུ་གྲུབ་པ་ཡིན་པར་ཤེས་པར་བྱའོ། །གཉིས་པ་ལ་གཉིས། ཁས་ལེན་ཡོད་མེད་དང་བདེན་གཉིས་ནང་འགལ་གྱི་སྐྱོན་རང་ལ་མཚུངས་པར་ཐལ་བའི་རྩོད་སྤང་། གཉིས་ཀ་སྟོབས་མཚུངས་སུ་གྱུར་ན་དངོས་ཀུན་མི་སྟོང་བར་ཐལ་བའི་རྩོད་པ་སྤང་བའོ། །དང་པོ་ལ་གཉིས། རྩོད་པ་དགོད་པ། དེ་སྤང་བའོ། །དང་པོ། འོ་ན་ཁས་ལེན་སོགས་ཚིགས་བཅད་གཅིག་གིས་བསྟན་ཏེ། འོ་ན་དེ་ལྟར་ཁས་ལེན་ཡོད་མེད་དང་བདེན་གཉིས་ཀྱི་ཁས་ལེན་ནང་འགལ་བའི་ཚུལ་གྱིས་སྐྱོན་གོང་དུ་རང་གིས་གཞན་ལ་ཇི་སྙེད་བརྗོད་པ་དེ་དག་ཐམས་ཅད་རང་ལའང་མཚུངས་པར་ཐལ་ལོ་ཞེ་ན་ཞེས་རྩོད་པའོ། །གཉིས་པ་ལ་གཉིས། ཁས་ལེན་ཡོད་མེད་ནང་འགལ་གྱི་རྩོད་པ་ཇི་ལྟར་སྤོང་ཚུལ་གྱི་ལན་དང་། བདེན་པ་གཉིས་པོ་ནང་འགལ་གྱི་རྩོད་པ་ཇི་ལྟར་སྤོང་བའི་ལན་ནོ། །དང་པོ་ལ་གསུམ། སྐབས་ཀྱི་ལ་ཤན་ཕྱེས་པས་ཁས་ལེན་ཡོད་མེད་ནང་འགལ་དང་དཔྱད་བཟོད་ཀྱི་སྐྱོན་རང་ལ་མེད་ཚུལ། ཁས་ལེན་ཅན་གྱི་བདེན་གཉིས་ལྟོས་ཏེ་འཇོག་ཅིང་གནས་སྣང་ཡིན་པས་གཅིག་དང་ཐ་དད་བྲལ་ཚུལ་ལུང་གིས་སྒྲུབ་པ། ཚུལ་དེས་གྲོལ་འཁྲུལ་གཉིས་ཀྱང་གནས་སྣང་དུ་འདོད་པས་རིགས་པས་གནོད་པ་མེད་པར་ཚད་མར་གྲུབ་པའི་ཚུལ་ལོ། །དང་པོ། ངེད་ཀྱི་ཁྱད་པར་སོགས་ཚིགས་བཅད་བདུན་དང་རྐང་པ་གཅིག་གིས་བསྟན་ཏེ། དེ་ལ་ངེད་ཀྱིས་འདི་ལྟར་སྐབས་ཀྱི་ཁྱད་པར་ཕྱེས་ནས་སུ་རྗེས་ཐོབ་ཤན་འབྱེད་ལམ་གྱི་དབུ་མ་དང་དངོས་གཞི་འཕགས་པའི་མཉམ་བཞག་ཟུང་འཇུག་ཡེ་ཤེས་ཀྱི་དབུ་མ་གཉིས་རིམ་པར་རགས་པ་བརྡའི་དབུ་མ་དང་། ཕྲ་བ་ཆོས་ཉིད་ཀྱི་དབུ་མ་འམ་རྒྱུ་དང་འབྲས་བུའི་སམ་རྣམ་ཤེས་ཀྱི་སྤྱོད་ཡུལ་དང་ཡེ་ཤེས་ཀྱི་སྤྱོད་ཡུལ་གྱི་གནས་སྐབས་ཀྱི་དབུ་མ་ཆེ་ཆུང་གི་ཁྱད་ལེགས་པར་ཕྱེས་ནས་ཕྲ་བ་ཆོས་ཉིད་ཀྱི་དབུ་མའམ། ཟུང་འཇུག་འབྲས་བུའི་དབུ་མའམ། མཉམ་བཞག་ཡེ་ཤེས་ཀྱི་དབུ་མ་ཆེན་པོར་ཁས་ལེན་མེད་པར་བསྟན་པ་དང་། རགས་པ་བརྡ་ཡི་དབུ་མའམ། ཤན་འབྱེད་ལམ་གྱི་དབུ་མའམ། རྗེས་ཐོབ་ཤེས་རབ་རྒྱུ་ཡི་དབུ་མར་ཁས་ལེན་ཡོད་པར་བཤད་པའི་ཕྱིར་ན་གོང་དུ་གཞན་ལ་ཁས་ལེན་ནང་འགལ་དང་རིགས་པས་དཔྱད་བཟོད་དང་རེ་རེ་བའམ་གཉིས་ཚོགས་ལ་འགལ་སྐྱོན་ཇི་ལྟར་བརྗོད་པ་དེ་དག་ག་ལ་འཇུག་སྟེ་སྐབས་སོ་སོར་ཕྱེད་པ་ལ་འཇུག་ཐབས་མེད་པ་དེས་ན་འདི་ལྟར་མཉམ་བཞག་ཡེ་ཤེས་ཟུང་འཇུག་འབྲས་བུའི་དབུ་མ་ཆེན་པོ་ལ་ཡོད་མེད་སོགས་གཉིས་ཆོས་ཀྱི་ཁས་ལེན་ཅི་ཡང་མེད་པར་ཇི་སྐད་བསྟན་པ་དེ་ཉིད་རང་གི་ལུགས་ཀྱི་གྲུབ་མཐའ་ཡིན་པས་མཐར་ཐུག་དེ་ལྟར་འདོད་པ་ཡིན་ཀྱང་། ལམ་རྗེས་ཐོབ་རྒྱུ་ཡི་དབུ་མ་གཉིས་སྣང་ཅན་གྱི་ཤེས་རབ་ལ་སྣང་སྟོང་བདེན་པ་གཉིས་པོའི་རང་ལྡོག་སོ་སོར་སྣང་བའི་ཚེ་སྣང་བ་ལྟར་དུ་བདེན་གཉིས་དཔྱོད་པའི་རིགས་པ་སོ་སོའི་ཚད་མ་ཡིས་གཞལ་བའི་དགག་པའི་རྣམ་པ་མེད་དང་མ་ཡིན་པར་དགག་པ་དང་སྒྲུབ་པའི་རྣམ་པ་ཡོད་དང་ཡིན་པར་སྒྲུབ་པ་ཇི་སྙེད་པ་ཐམས་ཅད་ཀྱང་སྒྲོ་འདོགས་དང་སྐུར་འདེབས་ཀྱི་ལོག་རྟོག་རེ་རེ་དགག་པའི་ཆེད་དུ་བསྟན་པ་ཡིན་པས་ཁས་ལེན་གཉིས་པོ་ཡོད་པ་ཡིན་གྱི་གཤིས་ཀྱི་གནས་ལུགས་བདེན་གཉིས་ཟུང་འཇུག་དགག་སྒྲུབ་བསལ་བཞག་ལས་འདས་པ་ལ་དགག་སྒྲུབ་ཏུ་ཁས་བླང་བའི་སྤྲོས་པ་གང་ཡང་མེད་པའི་ཕྱིར་ན་གཤིས་ཀྱི་གནས་ལུགས་མཉམ་པ་ཉིད་ལ་སྣང་སྟོང་བདེན་པ་གཉིས་པོ་ཡང་སོ་སོར་རིས་སུ་ཆད་པ་ཡོང་ཡེ་མེད་པར་གནས་པས་དགག་སྒྲུབ་ཀྱི་ཁས་ལེན་གཉིས་པོ་གང་ལྟར་ཡང་རང་གི་ངོ་བོས་བདེན་པར་གྲུབ་པ་ཅུང་ཟད་ཀྱང་མེད་པའི་ཕྱིར་ན་དགག་སྒྲུབ་ཀྱི་ཁས་ལེན་ཅི་ཡང་མེད་པར་ཤེས་པར་བྱའོ། །དེ་ལྟ་ནའང་རྗེས་ཐོབ་ཐ་སྙད་ཡུལ་དུ་བྱེད་པའི་ཚེ་བདེན་པ་གཉིས་ལ་ལྟོས་པའི་དགག་སྒྲུབ་གཉིས་གར་ཡང་གང་དང་གང་ནི་ཁས་བླང་བར་གྱུར་ཀྱང་ཐ་སྙད་སྣང་ཚུལ་ཀུན་རྫོབ་ཙམ་གྱི་དབང་དུ་བྱས་ཏེ་ཁས་ལེན་ཡིན་པའི་ཕྱིར་དང་། གནས་སྐབས་སུ་བདེན་གཉིས་སོ་སོར་དཔྱོད་པའི་ཚད་མ་སོ་སོས་རྙེད་དོན་དགག་སྒྲུབ་གཉིས་ཀ་སོ་སོ་ན་ཇི་ལྟར་བཅད་པ་དེ་ལྟར་རེ་ཞིག་བདེན་དེ་སྣང་ཚུལ་ཙམ་ལ་འགལ་བ་མེད་ཅིང་ཚད་གྲུབ་ཡིན་པའི་ཕྱིར་དང་། དེ་ཡང་རང་ལུགས་མཐར་ཐུག་པ་ཉིད་མ་ཡིན་པས་ན་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པའི་སྐྱོན་གསུམ་པོ་གང་ཡང་རྣམ་པ་ཀུན་ཏུ་མི་འབབ་སྟེ་འདུས་བྱས་སྣང་བའི་དངོས་པོའང་བརྟེན་ནས་སྐྱེས་པའི་རྟེན་འབྲེལ་ཡིན་ཞིང་གཅིག་དང་དུ་མ་བྲལ་བའི་ཕྱིར་དོན་དམ་དཔྱོད་པའི་རིགས་པས་དཔྱད་པར་མི་བཟོད་དེ། ཇི་སྐད་དུ། རྟེན་ཅིང་འབྲེལ་འབྱུང་མ་གཏོགས་པར། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པར། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར་རོ། །སྟོང་པ་དངོས་མེད་ཀྱང་ནི་བརྟེན་ནས་བཏགས་པའི་འདུས་བྱས་རྟེན་འབྲེལ་ཡིན་པའི་ཕྱིར་རིགས་པས་དཔྱད་པར་མི་བཟོད་དེ། དངོས་དང་དངོས་མེད་འདུས་བྱས་ཡིན། །ཞེས་སོ། །དེའི་ཕྱིར་མཐར་ཐུག་གི་དོན་ལ། དགག་སྒྲུབ་བམ་སྟོང་སྣང་གཉིས་ཀ་དཔེར་ན་རྨི་ལམ་གྱི་བུ་དང་དེ་ཤི་བ་ཇི་ལྟ་བ་བཞིན་དུ་ཐ་སྙད་གཞིར་མ་གྲུབ་པར་མཚུངས་པ་ལ་གནས་སྐབས་དགག་སྒྲུབ་གཉིས་བདེན་གཉིས་སོ་སོ་ལ་ལྟོས་ཏེ་ཐ་སྙད་དུ་སྣང་ཚུལ་མི་འགོག་པས་བཏགས་པ་ཙམ་ཞིག་ཡིན་ཏེ། དབུ་མ་ཤེས་རབ་ལ་འཇུག་པར། དགག་སྒྲུབ་གཉིས་ཀ་དགག་འབའ་ཞིག །དངོས་ལ་དགག་སྒྲུབ་གང་ཡང་མེད། །ཅེས་སོ། །གཉིས་པ། མ་བརྟགས་གྲགས་པའི་སོགས་ཚིགས་བཅད་གཉིས་དང་རྐང་པ་གསུམ་གྱིས་བསྟན་ཏེ། དེ་ཡང་མ་བརྟགས་འཇིག་རྟེན་གྲགས་པའི་ཡོད་ཙམ་དེ་ཡང་སྣང་ཚུལ་ཐ་སྙད་དུ་ཡོད་པ་ཡིན་གྱི་གནས་ཚུལ་དོན་དམ་དུ་ཡོད་པ་མིན་ལ། བདེན་མེད་དོན་དམ་དཔྱོད་པའི་རིགས་ཤེས་ཀྱིས་མཐོང་བའི་སྟོང་པ་གནས་ཚུལ་དོན་དམ་དུ་འདོད་པ་དེ་ཡང་སྣང་ཚུལ་ཀུན་རྫོབ་ཀྱི་ཟླ་ལ་ལྟོས་པའི་དོན་དམ་ཡིན་གྱི་གནས་ལུགས་མཐར་ཐུག་བདེན་པ་དབྱེར་མེད་ལ་ལྟོས་ན་དོན་དམ་རྣམ་གྲངས་པ་ཙམ་མམ་མཐུན་པའི་དོན་དམ་ཞེས་དོན་དམ་མཐར་ཐུག་པ་ཉིད་མ་ཡིན་པས་དེ་ཡང་ཐ་སྙད་ཀྱི་ཁོངས་སུ་གཏོགས་སོ། །གལ་ཏེ་དེ་འདྲའི་བདེན་པ་གཉིས་པོ་དེ་ཡང་གནས་ཚུལ་དང་སྣང་ཚུལ་ཐ་དད་པས་ཕན་ཚུན་འགལ་བ་ཉིད་ཡིན་ན་བདེན་གཉིས་ཐ་དད་དུ་འདོད་པ་ལ་སྐྱོན་བཞི་ཡོད་པར་མདོ་སྡེ་དགོངས་པ་ངེས་འགྲེལ་ལས་གསུངས་པ་རྣམས་འབབ་པར་འགྱུར་ཏེ། དོན་དམ་མངོན་སུམ་དུ་རྟོགས་ཀྱང་ཀུན་རྫོབ་ལོགས་སུ་དམིགས་པའི་ཕྱིར་དོན་དམ་རྟོགས་ནས་མྱང་འདས་མི་ཐོབ་པར་ཐལ་བ་དང་། ཀུན་རྫོབ་ལས་ཐ་དད་པའི་དོན་དམ་ཡིན་པའི་ཕྱིར་དེ་སྣང་བའི་ཆོས་ཉིད་མ་ཡིན་པར་ཐལ་བ་དང་། བདེན་གཉིས་ངོ་བོ་ཐ་དད་པའི་ཕྱིར་ཀུན་རྫོབ་རབ་ཏུ་མ་གྲུབ་པ་ཙམ་དོན་དམ་མ་ཡིན་པར་ཐལ་བ་དང་། མྱང་འདས་ཐོབ་པའི་དུས་ནའང་ཀུན་རྫོབ་ལོགས་སུ་དམིགས་པའི་ཕྱིར་གང་ཟག་གཅིག་གི་རྒྱུད་ལ་ཀུན་ཉོན་དང་རྣམ་བྱང་གཉིས་དུས་གཅིག་ལ་འཇུག་པར་ཐལ་བའི་སྐྱོན་དང་བཞིའོ། །ཡང་གལ་ཏེ་དེ་འདྲའི་བདེན་པ་གཉིས་པོ་གནས་སྣང་ཕན་ཚུན་གཞན་མིན་པར་གཅིག་པ་ཉིད་ཡིན་ན་ཡང་བདེན་གཉིས་གཅིག་པའི་སྐྱོན་བཞིས་གནོད་པར་ཡང་དེ་ལས་གསུངས་ཏེ། སོ་སོའི་སྐྱེ་བོ་ཐམས་ཅད་ཀྱིས་ཀུན་རྫོབ་མཐོང་བ་ལྟར་དོན་དམ་ཡང་མཐོང་བར་ཐལ་བ་དང་། ཀུན་རྫོབ་ལ་བརྟེན་ནས་ཟག་པ་འཕེལ་བ་ལྟར་དོན་དམ་ལ་བརྟེན་ནས་ཀྱང་ཟག་པ་འཕེལ་བར་ཐལ་བ་དང་། དོན་དམ་ལ་དབྱེ་བ་མེད་པ་ལྟར་ཀུན་རྫོབ་ལའང་དབྱེ་བ་མེད་པར་ཐལ་བ་དང་། ཀུན་རྫོབ་ཇི་ལྟར་མཐོང་ཐོས་ལས་གཞན་དུ་བཙལ་མི་དགོས་པ་ལྟར་དོན་དམ་ཡང་དེ་ལྟར་འགྱུར་བར་ཐལ་བ་དང་བཞིའོ། །དེས་ན་གནས་སྣང་གཅིག་དང་ཐ་དད་དུ་ཁས་བླང་བར་མི་བྱ་སྟེ། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་སེམས་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས་སོ། །གསུམ་པ། ཚུལ་དེས་སངས་རྒྱས་སོགས་ཚིགས་བཅད་གསུམ་དང་རྐང་པ་གཉིས་ཀྱིས་བསྟན་ཏེ། གོང་དུ་གནས་སྣང་གཅིག་ཐ་དད་གང་དུའང་ཁས་མི་ལེན་པའི་ཚུལ་དེས་སངས་རྒྱས་དང་སེམས་ཅན་གཉིས་ཀྱང་གནས་ཚུལ་དང་སྣང་ཚུལ་ཙམ་ལ་གསུངས་པ་ཡིན་གྱི་སེམས་ཅན་རྒྱུ་དང་སངས་རྒྱས་འབྲས་བུ་ཉིད་དུ་འདོད་པ་ནི་ཐེག་པ་དམན་པ་ཆུང་ངུར་གྲགས་པའི་འདོད་ཚུལ་ཡིན་པས་རང་ལུགས་མིན་པར་ཤེས་པར་བྱ་དགོས་སོ། །དེས་ན་རང་ལུགས་ལ་གནས་སྣང་གཉིས་གཅིག་དང་ཐ་དང་གང་དུ་ཡང་ཁས་བླང་བ་མེད་པའི་ཕྱིར་ན་སེམས་ཅན་རྣམས་ནི་སངས་རྒྱས་ཡིན་ན་མཚན་དཔེས་བརྒྱན་པའི་སངས་རྒྱས་ཉིད་དུ་སྣང་རུང་ཡོད་པར་འགྱུར་བ་དང་། ལམ་སྒོམ་པ་དང་སྒྲུབ་པ་ཐམས་ཅད་དོན་མེད་འབའ་ཞིག་ཏུ་འགྱུར་བ་དང་། རྒྱུ་ལ་འབྲས་བུ་གནས་པ་ཡིན་པས་ཟན་ཟ་མི་གཙང་ཟ་བར་ཁས་ལེན་དགོས་པ་ལ་སོགས་པའི་རིགས་པས་གནོད་པ་རྣམ་པ་ཀུན་ཏུ་མེད་དེ། སེམས་ཅན་གྱི་གནས་ཚུལ་སངས་རྒྱས་གང་ཡིན་པ་དེ་ཡང་སེམས་ཅན་རྣམས་རང་སྣང་གློ་བུར་གྱི་སྒྲིབ་པ་ཡིས་རང་སྒྲིབ་པའི་ཕྱིར་ན་སངས་རྒྱས་ཉིད་དུ་སྣང་རུང་མ་ཡིན་པས་སངས་རྒྱས་སུ་ཉེ་བར་མི་སྣང་བ་ཡིན་པས་གློ་བུར་གྱི་སྒྲིབ་པ་དེ་དང་བྲལ་བའི་དོན་ལམ་སྒོམ་པ་དང་སྒྲུབ་པ་ལ་འབད་པར་བྱེད་དགོས་པ་ནི། རང་གཞན་གཉིས་ཀས་འདོད་དགོས་པ་ཉིད་དེ་ཁྱོད་རང་གིས་ཀྱང་སེམས་ཅན་རྣམས་རང་བཞིན་གྱིས་རྣམ་པར་དག་པས་ཁས་བླངས་ཀྱང་ལམ་ལ་འབད་རྩོལ་བྱེད་དགོས་པར་འདོད་པ་མ་ཡིན་ནམ་དེ་འདྲའི་སྨྲ་བ་འབྲེལ་མེད་ཀྱིས་ཅི་ཞིག་བྱ་སྟེ་དགོས་འབྲས་མེད་དོ། །གཉིས་པ་ལ་གཉིས། རེས་འཇོག་ཚད་མ་གཉིས་ཀྱིས་རྙེད་དོན་བདེན་པ་གཉིས་སུ་ནང་འགལ་མེད་པར་སྒྲུབ་ཚུལ་རིགས་པས་བསྟན་པ། ལུང་ལས་དགག་སྒྲུབ་ཇི་སྙེད་བསྟན་པ་ཀུན་ཀྱང་བདེན་གཉིས་ཀྱི་གཞལ་ཚུལ་ཡིན་པས་ཕན་ཚུན་མི་འགལ་བར་ཁྱབ་མཉམ་དུ་གྲུབ་པའི་ཚུལ་ལོ། །དང་པོ། བདེན་གཉིས་འགལ་བ་སོགས་ཚིགས་བཅད་དྲུག་གིས་བསྟན་ཏེ། རང་ལུགས་ལ་མེ་དང་ཚ་བ་བཞིན་དུ་སྣང་སྟོང་བདེན་པ་གཉིས་ལ་ཕྱོགས་སུ་ལྷུང་བའི་འགལ་བ་ཅུང་ཟད་ཀྱང་མེད་པའི་ཕྱིར་ན་ཐ་སྙད་དུ་ཡོད་ཅེས་པ་དང་དོན་དམ་དུ་མེད་ཅེས་ལྟ་བ་ཡི་ཁས་ལེན་དེ་གཉིས་པོའང་ཇི་ལྟར་འགལ་ཏེ་མི་འགལ་བ་ཁོ་ནའོ། །དེར་མ་ཟད་སྣང་སྟོང་བདེན་པ་གཉིས་པོ་ཕན་ཚུན་གཅིག་པའང་མིན་པའི་ཕྱིར་ན་ཀུན་རྫོབ་ཏུ་ཡོད་དོན་དམ་དུ་མེད་ཅེས་པའི་ཁས་བླང་གཉིས་སུ་ཐ་སྙད་ཀྱི་རྣམ་པར་བཞག་པའང་ཤིན་ཏུ་འཐད་པ་ཉིད་ཡིན་ནོ། །དེ་ཡི་ཕྱིར་ཇི་སྲིད་སྣང་སྟོང་བདེན་པ་འདི་གཉིས་སྣང་སྟོང་སོ་སོར་སྣང་བ་དང་བཅས་པའི་སེམས་ཀྱི་འཇུག་པ་ཐམས་ཅད་དབྱིངས་སུ་མ་ནུབ་པར་མི་སྲིད་ཡོད་ཀྱི་བར་དེ་སྲིད་དུ་སྣང་སྟོང་བདེན་པ་དེ་གཉིས་ཕན་ཚུན་ལྟོས་ཏེ་བཞག་པ་ཙམ་ཡིན་པའི་ཕྱིར་ན་གཅིག་ཡོད་གཅིག་མེད་མི་སྲིད་པར་ཡོད་མཉམ་མེད་མཉམ་ཡིན་པས་རྣམ་པ་ཀུན་དུ་སྟོབས་མཚུངས་སུ་སྣང་བ་ཡིན་པས་གཅིག་ཡོད་ན་གཅིག་མེད་ཅེས་མཐའ་གཅིག་ཁོ་ནར་ཁས་ལེན་ཡོད་པ་མིན་ཏེ། གཅིག་དུ་བྲལ་ལ་སོགས་པའི་རིགས་པས་དངོས་ཀུན་བདེན་པར་གྲུབ་པ་མེད་ཅེས་བདེན་སྟོང་གདར་ཤ་ཆོད་པས་ངེས་པ་དང་། ཀུན་ཏུ་ཐ་སྙད་པའི་རིགས་པས་མ་བརྟགས་འཇིག་རྟེན་གྲགས་པའི་ཐ་སྙད་ལས་རྒྱུ་འབྲས་ཚེ་སྔ་ཕྱི་སོགས་བསླུ་མེད་དུ་ཡོད་ཅེས་རྟེན་ཅིང་འབྲེལ་འབྱུང་གི་སྣང་ཆ་ངེས་པ་གཉིས་རེས་འཇོག་གམ་རིམ་གྱིས་བདེན་གཉིས་དཔྱོད་པའི་ཚད་མ་གཉིས་ཀྱིས་ནི་ཕྱི་ནང་གི་དངོས་པོ་ཀུན་གཞལ་བའི་ཚེ་ན་ཚད་མ་གཉིས་པོ་རང་རང་སོ་སོའི་རྙེད་དོན་ནམ་མཐོང་དོན་དེ་ལ་སྣང་སྟོང་ངམ་ཀུན་རྫོབ་དང་དོན་དམ་སྟེ་བདེན་པ་གཉིས་ཞེས་ཐ་སྙད་ཙམ་དུ་བརྗོད་དོ། །བདེན་པ་དེ་གཉིས་ངོ་བོ་གཅིག་པ་དང་ཐ་དད་པ་ཡང་མིན་པའི་ཕྱིར་ན་སྣང་སྟོང་བདེན་པ་དེ་གཉིས་ཕན་ཚུན་མི་ལྟོས་པར་མཐའ་གཅིག་ཏུ་གང་རུང་གཅིག་སྤང་ནས་གཅིག་ཤོས་ཉིད་ནི་བཟུང་དུ་མི་རུང་སྟེ་དཔེར་ན་མེ་ལ་མི་ལྟོས་པའི་ཚ་བ་ཚ་བ་ལ་མི་ལྟོས་པའི་མེ་གཟུང་དུ་མི་རུང་བ་བཞིན་ནོ། །དེས་ན་བདེན་པ་དེ་གཉིས་ལ་སོ་སོར་དཔྱོད་པའི་ཚད་མ་སེམས་བྱུང་ཤེས་རབ་ཀྱིས་སྣང་སྟོང་ཡོད་མེད་སོགས་གཞལ་བའི་སྐབས་སུ་ཁས་ལེན་གཉིས་པོ་སོ་སོར་ཕྱེ་སྟེ་སྨྲ་བའི་དཔེར་བརྗོད་ན། འབྲས་བུའི་མཐར་ཐུག་སྐྱེ་འགག་མེད་པའི་ཆོས་ཉིད་མངོན་དུ་བྱས་ཏེ་གཉིས་སྣང་མཐའ་དག་འགག་པའི་ཡེ་ཤེས་ཆོས་ཀྱི་སྐུ་ཐོབ་པར་གྱུར་པའི་ཚེ་ན་སེམས་དང་སེམས་བྱུང་གི་གཉིས་སྣང་མ་ལུས་པ་ཐམས་ཅད་ཐ་སྙད་ཀུན་རྫོབ་ཀྱི་དབང་དུ་འགག་ཅེས་ཁས་ལེན་བྱ་དགོས་པ་དང་། གནས་ལུགས་དོན་དམ་པའི་དོན་ཉིད་དུ་གདོད་ནས་དག་པས་འགག་པའང་མེད་དོ་ཞེས་ཁས་ལེན་བྱ་དགོས་པ་བཞིན་ནོ། །གཉིས་པ། མདོ་དང་བསྟན་བཅོས་སོགས་ཚིགས་བཅད་ལྔས་བསྟན་ཏེ། རྒྱལ་བའི་བཀའ་ཡུམ་ཤེར་ཕྱིན་དང་བདེན་པ་གཉིས་སོགས་དང་སྙིང་པོ་བསྟན་པའི་མདོ་ལ་སོགས་པ་དང་བསྟན་བཅོས་ཆེན་པོ་རིགས་པའི་ཚོགས་དང་བསྟོད་པའི་ཚོགས། མངོན་རྟོགས་རྒྱན་དང་རྒྱུད་བླ་མ་ལ་སོགས་པའི་གཞུང་ཀུན་ན་དགག་པ་དང་སྒྲུབ་པའི་རྣམ་པ་ཇི་སྙེད་ཅིག་བསྟན་པ་དེ་དག་རྣམས་ཀྱང་ལ་ལ་གནས་ལུགས་དོན་དམ་པའི་དབང་དུ་བྱས་ནས་གཞི་ལམ་འབྲས་བུའི་ཆོས་ཐམས་ཅད་སྟོང་པའམ་མེད་པར་ཁས་ལེན་པར་གསུངས་པ་ཡིན་ཏེ། ལ་ལ་ནི་ཐ་སྙད་སྣང་ཚུལ་ཀུན་རྫོབ་ཀྱི་དབང་དུ་བྱས་ནས་གཞི་ལམ་འབྲས་བུའི་ཆོས་ཐམས་ཅད་ཡོད་པར་གསུངས་པ་སྟེ། དེ་ཡང་འདི་ལྟར་གནས་ལུགས་དོན་དམ་པ་ཁོ་ནའི་དབང་དུ་བྱས་ན་ལམ་ལྔ་ས་བཅུ་དང་སངས་རྒྱས་དང་སེམས་ཅན་ལ་སོགས་པ་མདོར་ན་གཞི་ལམ་འབྲས་བུས་བསྡུས་པའི་འཁོར་འདས་ཀྱི་ཆོས་ཐམས་ཅད་གདོད་ནས་དག་པས་སྟོང་པའམ་མེད་ཅེས་སོམ་ཉི་མི་དགོས་པར་སྨྲ་བར་རུང་མོད་ཀྱི། འོན་ཀྱང་ཐ་སྙད་སྣང་ཚུལ་ཀུན་རྫོབ་ཉིད་ལ་ལྟོས་པ་མེད་པར་རྣམ་པ་ཀུན་ཏུ་མེད་པའམ་སྟོང་པ་དེ་གཅིག་ཁོ་ནར་མི་འགྱུར་ཏེ་དོན་ལ་བདེན་པ་གཉིས་ཆར་མ་སྐྱེས་པས་མེད་པ་ཡིན་ཀྱང་སྣང་ཚུལ་རྟེན་འབྱུང་འགགས་པ་མེད་པའི་འཁོར་འདས་ཀྱི་སྣང་བའི་ཆ་འདི་ཀུན་གསལ་བར་རང་རང་ལ་སྣང་བར་མངོན་སུམ་བསླུ་མེད་ཀྱིས་གྲུབ་ཅིང་ཡོད་པའི་ཕྱིར་རོ། །ཡང་སྣང་ཚུལ་ཐ་སྙད་ཚད་མའི་དབང་དུ་བྱས་ནས་ས་ལམ་དང་སངས་རྒྱས་དང་སེམས་ཅན་ལ་སོགས་པ་གཞི་ལམ་འབྲས་བུའི་སྣང་བ་རབ་འབྱམས་ཐམས་ཅད་མངོན་སུམ་བསྙོན་མེད་དུ་ཡོད་ཅེས་ཐེ་ཚོམ་མེད་པར་བརྗོད་པར་རིགས་མོད་ཀྱི། འོན་ཀྱང་གནས་ལུགས་སྟོང་པ་དོན་དམ་པ་ཉིད་ལ་ལྟོས་པ་མེད་པར་རྣམ་པ་ཀུན་ཏུ་ཡོད་པའམ་སྣང་བ་དེ་གཅིག་ཁོ་ནར་མི་འགྱུར་ཏེ་སྣང་ཚུལ་རྟེན་འབྱུང་གི་སྣང་ཆ་འགགས་མེད་དུ་དོན་བྱེད་ནུས་པར་སྣང་བའི་ཡོད་པ་ཡིན་ཀྱང་དོན་ལ་དེ་ལྟར་མ་གྲུབ་པས་སྟོང་པ་ཉིད་ཡིན་པར་དོན་དམ་དཔྱོད་པའི་ཚད་མས་ཡང་དག་པར་ངེས་ནུས་པའི་ཕྱིར་རོ། །དེས་ན་སྣང་སྟོང་བདེན་པ་དེ་གཉིས་དུས་ནམ་དུ་ཡང་ཆུ་དང་རླན་བཞིན་དུ་གཅིག་མེད་ན་གཅིག་ཤོས་ཡོད་པ་ཉིད་དང་རྣམ་པ་ཀུན་ཏུ་སྲིད་པ་མ་ཡིན་ཞིང་གཅིག་ཡོད་ན་གཅིག་ཤོས་ཀྱང་མེད་པ་མི་སྲིད་པར་འགལ་མེད་གནད་གཅིག་ཏུ་ཤེས་པ་ནི་ཤེས་བྱའི་ཁོང་ན་གལ་ཆེ་བར་ཤེས་དགོས་པ་ཞིག་ཡིན་ནོ། །གཉིས་པ་ལ་གཉིས། རྩོད་པ་དགོད་པ་དང་། དེ་སྤང་བའོ། །དང་པོ། གཉིས་ཀ་སྟོབས་མཚུངས་སོགས་རྐང་པ་གཉིས་ཀྱིས་བསྟན་ཏེ། འོ་ན་བདེན་གཉིས་དཔྱོད་པའི་ཚད་མ་སོ་སོས་རྙེད་དོན་སྣང་སྟོང་བདེན་པ་གཉིས་ཀ་སྟོབས་མཚུངས་པའམ་མགོ་མཉམ་པར་བདེན་པར་གྱུར་པ་དེ་ལྟར་ཡིན་པའི་ཚེ་ན་ཀུན་རྫོབ་སྣང་བའི་དངོས་པོ་ཐམས་ཅད་མི་སྟོང་པར་དོན་དམ་དུ་གྲུབ་པར་འགྱུར་རོ་ཞེ་ན་ཞེས་རྩོད་པའོ། །གཉིས་པ་དེ་སྤང་བའི་ལན་ལ་གསུམ། དེ་གཉིས་ཡེ་ཤེས་རྟོགས་པའི་བློ་ཡི་འཇུག་རིམ་ཡིན་པས་བདེན་དངོས་མེད་ཅིང་སྣང་སྟོང་ཐབས་ཤེས་ཟུང་འབྲེལ་དུ་གྲུབ་ཚུལ། དེ་ལྟར་བཞག་པའི་དགོས་འབྲས་བསྟན་ཅིང་ཚུལ་དེ་མདོ་རྒྱུད་ལམ་གྱི་ཟབ་གནད་ཡིན་པས་རྒྱལ་བའི་བཀའ་ཡང་དེ་ལྟར་ངེས་ཚུལ། ལམ་གྱི་དབུ་མའི་ཁས་ལེན་གཉིས་ཀ་རང་ལུགས་ཡིན་གྱི་དོན་དམ་རང་ལུགས་སུ་བྱས་ནས་ཀུན་རྫོབ་གཞན་ངོར་སྐྱེལ་ན་ལུང་རིགས་ཚད་མས་གནོད་ཚུལ་བསྟན་པའོ། །དང་པོ། གཉིས་ཀའང་རང་བཞིན་སོགས་ཚིགས་བཅད་དགུ་དང་རྐང་པ་གཉིས་ཀྱིས་བསྟན་ཏེ། དེ་ཡང་ཀུན་རྫོབ་དང་དོན་དམ་པའི་བདེན་པ་གཉིས་ཀའང་ཡེ་གདོད་མ་ནས་རང་བཞིན་གྱིས་མ་གྲུབ་པས་སྟོང་པ་ཉིད་དུ་མཉམ་པའམ་མཚུངས་པ་ཡིན་པ་དང་། གཞལ་བྱའི་ཡུལ་སྣང་བ་དང་སྟོང་པ་གཉིས་པོ་རང་བཞིན་གྱིས་སམ་དོན་གྱིས་ཐ་དད་པར་གྲུབ་པ་ཉིད་ཀྱང་མ་ཡིན་པར་གང་སྣང་བ་དེའི་ངོ་བོ་ཡེ་ནས་སྟོང་པ་ཉིད་དུ་ཆུ་དང་རླན་ལྟར་འབྲལ་མེད་དུ་གནས་པར་གྲུབ་པའི་ཕྱིར་ན་དངོས་པོ་རྣམས་མི་སྟོང་པར་བདེན་གྲུབ་ཏུ་འགྱུར་བ་ག་ལ་ཡིན་ཏེ་མ་ཡིན་ལ། བདེན་པ་གཉིས་ཀ་མཚུངས་པར་སྣང་བ་དེའི་ཕྱིར་ན་ཡང་སྣང་བའི་ངོ་བོ་སྟོང་པར་གྲུབ་སྟེ་སྣང་བ་དེ་ཉིད་མེད་ན་ངོ་བོས་སྟོང་པའང་ཅི་ཡིས་ཤེས་པར་འགྱུར་ཏེ་ཤེས་བྱེད་མེད་པའི་ཕྱིར་རོ། །དེས་ན་སྣང་སྟོང་གཉིས་ཀ་ཕན་ཚུན་མི་འགལ་བར་མ་ཟད་ཕན་ཚུན་རྒྱུ་འབྲས་སུ་སྟེ་སྟོང་པ་རྟེན་འབྱུང་དང་རྟེན་འབྱུང་སྟོང་པར་འཆར་ཞིང་། སྣང་སྟོང་གང་རུང་གཅིག་ཡོད་ཚེ་གཅིག་ཤོས་ཀྱང་མེ་དང་ཚ་བ་བཞིན་དུ་འབྲལ་མི་ཤེས་པར་ཡོད་པ་ལ་གཏིང་ནས་ངེས་པའི་ཤེས་པ་སྐྱེས་པར་གྱུར་ན་སྣང་སྟོང་གཉིས་པོ་དུས་ནམ་ཡང་འདུ་འབྲལ་མེད་པར་ཡེ་ནས་ཟུང་དུ་འཇུག་པའི་དོན་ལ་ཐེ་ཚོམ་གྱི་དྲྭ་བ་མ་ལུས་པ་མཐའ་དག་ཆད་དེ་ཡང་དག་པར་རྟོགས་པའོ། །དེའི་ཕྱིར་སྣང་སྟོང་གཉིས་པོ་གང་ལ་ཡང་གང་གིས་མ་ཁྱབ་པ་མེད་པའི་ཕྱིར་གང་སྣང་བ་དེ་སྟོང་པ་ཉིད་ཡིན་པས་ཁྱབ་ལ་གང་སྟོང་པ་དེ་ཡང་སྣང་བ་ཡིན་པས་ཁྱབ་པས་སྣང་སྟོང་གང་ལྟར་གཞལ་ཀྱང་འགལ་བ་མེད་པར་བདེན་ཏེ་སྣང་བ་དེ་ཉིད་སྟོང་པ་དང་སྟོང་པ་དེ་ཉིད་སྣང་བར་གྲུབ་པའི་ཕྱིར། གཟུགས་སྟོང་པའོ། །སྟོང་པ་ཉིད་གཟུགས་སོ། །ཞེས་གསུངས་པ་ལྟར་རོ། །དེ་ཡང་གཟུགས་ལ་སོགས་པའི་སྣང་བ་འདི་ཉིད་རང་སྟོང་ཡིན་པར་ཤེས་པ་ཡིས་སྣང་བ་དེ་ཉིད་བདེན་པར་གྲུབ་པ་མེད་པར་སྟོང་ཉིད་དུ་རྟོགས་པར་འགྱུར་ལ། སྟོང་པ་ཉིད་དེ་ཡང་གཟུགས་སོགས་སུ་སྣང་བ་ཡིན་པར་ཤེས་ན་ཡང་སྟོང་པ་ཉིད་བདེན་པར་གྲུབ་པའི་ཡོད་པ་ཡིན་པར་མི་རྟོག་སྟེ་སྟོང་པ་ཉིད་དུ་མ་བདེན་པའི་གནད་ཀྱིས་སྣང་བ་ཡིན་པར་མཐོང་ལ། དེ་ཡི་ཕྱིར་སྣང་སྟོང་ཡེ་ནས་འདུ་འབྲལ་མེད་པའི་ཟུང་འཇུག་མཐོང་བའི་ཚེ་ན་སྣང་སྟོང་གཉིས་བདེན་དངོས་སུ་གྲུབ་བར་དུས་ནམ་ཡང་སླར་མི་ལྡོག་སྟེ་གང་སྣང་བ་དེ་ཡི་གནས་ལུགས་ནི་ཡེ་ནས་སྟོང་པ་ཉིད་ཡིན་ཞིང་གང་སྟོང་པ་དེ་ཡི་རང་བཞིན་རང་སྣང་བར་གྲུབ་པའི་ཕྱིར་ན་འདུ་འབྲལ་མེད་པར་མཐོང་གི་ཐ་དད་དུ་དམིགས་པ་མི་སྲིད་པའི་ཕྱིར་དང་། གཟུགས་ལ་སོགས་པ་གང་སྣང་བ་དེ་སྤང་བའི་ཕ་རོལ་ལམ་གཞན་དུ་སྟོང་པ་ཉིད་འདིའོ་ཞེས་ཡན་གར་དུ་ཅུང་ཟད་ཙམ་ཡང་མི་འགྲུབ་ཅིང་མེད་པའི་ཕྱིར་རོ། །སྣང་སྟོང་བདེན་པ་གཉིས་པོ་འདུ་འབྲལ་མེད་པར་མགོ་མཉམ་པར་མཚུངས་པ་དེས་ན་ཇི་སྲིད་བདེན་གཉིས་སོ་སོར་དཔྱོད་པའི་ཚད་མ་གཉིས་པོ་རེས་འཇོག་གིས་རྙེད་དོན་བདེན་པ་གཉིས་སོ་སོར་སྒོམ་པ་ནི་སེམས་བྱུང་ཤེས་རབ་སྟེ་གཟུང་འཛིན་ཅན་གྱི་སྒོམ་ཚུལ་ཡིན་ལ། དེ་ཡང་འདི་ལྟར་གཉིས་སྣང་ཅན་གྱི་འཁོར་བའི་གནས་སྐབས་འདི་ན་སེམས་དང་སེམས་བྱུང་གི་གཡོ་བ་གཟུང་འཛིན་གྱི་རྣམ་པར་རྟོག་པའི་སྒྲིབ་པ་ཡིས་གཟུང་འཛིན་གཉིས་སྣང་གི་སྤྲོས་པ་དང་བྲལ་བའི་གཉིས་སུ་མེད་པའི་ཡེ་ཤེས་རང་བཞིན་འོད་གསལ་བ་ཉིད་ཉེ་བར་མི་སྣང་ཞིང་རྟོགས་པར་མི་ནུས་པའི་ཕྱིར་ན་ཇི་སྐད་བསྟན་པའི་བདེན་པ་གཉིས་ལ་སོ་སོར་དཔྱད་པའི་ཤེས་རབ་འཁྲུལ་བའི་དྲི་མ་མེད་པའི་ཚད་མ་གཉིས་ལ་གཅིག་སྤང་གཅིག་བླང་མེད་པར་མགོ་མཉམ་དུ་བཟུང་བར་བྱ་དགོས་ཏེ། དེ་ཡི་རྒྱུ་མཚན་དེ་ལྟར་སྒོམ་པ་གང་གི་ཚེ་ན་ཚད་མ་གཉིས་ལས་གང་རུང་གཅིག་མ་ཚང་བའམ་མེད་པར་གྱུར་ན་རྒྱུ་བདེན་གཉིས་དཔྱོད་པའི་ཚད་མ་དེ་གཉིས་ལས་ལེགས་པར་བྱུང་བའི་འབྲས་བུ་གཉིས་སུ་མེད་པའི་ཟུང་འཇུག་གི་ཡེ་ཤེས་ཉིད་ངེས་པར་མི་སྐྱེ་ཞིང་མི་འབྱུང་སྟེ་རྒྱུ་མ་ཚང་བའི་ཕྱིར་ན། དཔེར་ན་གཙུབས་ཤིང་གཙུབས་རྟེན་གྱི་ཤིང་གཉིས་ལས་གང་རུང་དང་བྲལ་བའི་མེ་ནི་ཡང་དག་པར་འབྱུང་བ་མིན་པ་བཞིན་ནོ། །དེས་ན་ཐབས་སྣང་བའི་ཆ་དང་ཤེས་རབ་སྟོང་པ་ཉིད་ཀྱི་ཆ་གཉིས་ཡ་བྲལ་ཏེ་ཕྱོགས་སུ་ལྷུང་བར་གྱུར་ན་ཐབས་ཤེས་ཟུང་འཇུག་གི་ཡང་དག་པའི་ལམ་ཉིད་མིན་ནོ་ཞེས་རྒྱལ་བ་མཆོག་གིས་མདོ་རྒྱུད་དང་བརྒྱུད་འཛིན་མཁས་གྲུབ་ཀུན་གྱིས་བསྟན་བཅོས་རྣམས་ལས་ཡང་དང་ཡང་དུ་གསུངས་པར་མཛད་པ་ཡིན་ནོ། །གཉིས་པ། རྒྱུ་གཉིས་འདི་སྤང་སོགས་ཚིགས་བཅད་བརྒྱད་དང་རྐང་པ་གཉིས་ཀྱིས་བསྟན་ཏེ། དེས་ན་རྒྱུ་བདེན་གཉིས་དཔྱོད་པའི་ཚད་མ་འདི་གཉིས་མ་ཚོགས་པར་གང་རུང་སྤངས་པའམ་བྲལ་ན་འབྲས་བུ་ཟུང་འཇུག་གི་ཡེ་ཤེས་ཆེ་སྟེ་ཆེན་པོ་རང་རྒྱུད་ལ་སྐྱེ་ཞིང་འབྱུང་བའི་རྒྱུའམ་ཐབས་གཞན་ཅི་ཡང་མི་སྲིད་པས་རྒྱུ་དེ་ལ་བརྟེན་དགོས་པ་ཡིན་ཏེ། འདི་ལྟར་ཟབ་ཞི་སྤྲོས་པ་དང་བྲལ་བའི་ཟུང་འཇུག་གི་ཡེ་ཤེས་རང་གི་ངོ་བོ་ནི་གཉིས་སྣང་གི་བློ་གང་གིས་བསམ་པ་དང་ངག་གི་བརྗོད་པའི་ཡུལ་ལས་འདས་པའི་ཕྱིར་ན་གནས་ལུགས་ངོ་སྤྲོད་ཀྱི་བརྡ་ཐབས་སྣ་ཚོགས་དང་ཚིག་ཙམ་དག་གིས་མཚོན་པར་བྱས་ཏེ་མཛུབ་མོས་ཟླ་བ་བཞིན་དུ་སྟོན་པར་བྱེད་པ་ལས་ཡེ་ཤེས་རང་གི་ངོ་བོ་དངོས་སུ་རྗེན་ཅེར་དུ་སུས་ཀྱང་བསྟན་པར་མི་ནུས་པས་ན་གསང་སྔགས་ཐེག་པའི་སྐབས་སུ་ངོ་སྤྲོད་ཀྱི་བརྡ་ཐབས་དང་རྡོ་རྗེའི་ཚིག་གིས་མཚོན་པ་དེ་ལ་དབང་བཞི་པའམ་ཚིག་དབང་རིན་པོ་ཆེ་ཞེས་པའི་ཐ་སྙད་ཀྱིས་གསུངས་ཏེ། འོད་གསལ་རྡོ་རྗེ་སྙིང་པོའི་རྒྱུད་ལ་སོགས་པ་ཐིག་ལེ་གསང་སྐོར་གྱི་རྒྱུད་སྡེ་ཟབ་མོ་རྣམས་སུ་ཚིག་དང་བརྡ་ཐབས་ཀྱི་སྒོ་སྣ་ཚོགས་ནས་མཚོན་ཏེ་དབྱིངས་དང་རིག་པ་ཟུང་འཇུག་གི་ངོ་སྤྲོད་ཀྱི་ངེས་གསང་མང་པོས་བསྟན་པར་མཛད་པ་ཡིན་ནོ། །དེའི་ཕྱིར་འཇིག་རྟེན་ལས་འདས་པའི་ཡེ་ཤེས་ཟབ་ཞི་སྤྲོས་པ་དང་བྲལ་བའི་ཟུང་འཇུག་འོད་གསལ་བ་དེ་ཉིད་དེ་ལྟར་ཚིག་དང་བརྡ་ཐབས་གཞན་ལ་མ་ལྟོས་པར་རང་གི་ངོ་བོ་འདིའི་ཞེས་རྗེན་ཅེར་དུ་གཉིས་སྣང་ཅན་གྱི་བློ་གང་གིས་ཀྱང་དངོས་སུ་གཟུང་བར་ནུས་པ་མ་ཡིན་པས་ན་བདེན་གཉིས་དཔྱོད་པའི་ཚད་མ་ལམ་གྱི་དབུ་མ་ཉིད་བསྟན་པ་ཡིན་ལ། དེ་ལྟར་ལམ་གྱི་དབུ་མ་བདེན་གཉིས་རེས་འཇོག་གི་ཚུལ་གྱིས་དཔྱད་ཅིང་སྒོམ་པའི་འབྲས་བུ་དངོས་གཞི་མཉམ་བཞག་གི་དབུ་མ་བདེན་གཉིས་དབྱེར་མེད་ཟུང་འཇུག་གི་ཡེ་ཤེས་མངོན་སུམ་ཉིད་དུ་གྲུབ་ཅིང་མཐོང་བར་ནུས་པ་དེས་ན་བདེན་པ་གཉིས་ཀྱི་གནས་ལུགས་སམ་ཡིན་ལུགས་ཚད་མ་གཉིས་ཀྱིས་གཏན་ལ་འབེབས་པའི་ཚེ་ན་སྣང་སྟོང་བདེན་པ་གཉིས་ལས་སྣང་བ་ཀུན་རྫོབ་དགག་བྱ་དང་སྟོང་པ་དོན་དམ་འགོག་བྱེད་ཀྱི་ཚུལ་དུ་བདེན་པ་གཉིས་པོ་རེས་འཇོག་ལྟ་བུར་བསྟན་པར་མཛད་པ་ཡིན་ལ། དེ་ཡི་འབྲས་བུ་བདེན་གཉིས་དབྱེར་མེད་བསལ་བཞག་དང་བྲལ་བའི་ཟུང་འཇུག་གི་ཡེ་ཤེས་དེ་ཉིད་རྡོ་རྗེ་ཐེག་པའི་རྒྱུད་སྡེར་བདེ་བ་ཆེན་པོ། ཕྱག་རྒྱ་ཆེན་པོ། རྫོགས་པ་ཆེན་པོ་ལ་སོགས་པ་མཚན་གྱི་རྣམ་གྲངས་དང་མཚོན་ཚུལ་དུ་མས་བསྟན་པར་མཛད་དེ་དོན་ལ་ཁྱད་པར་མེད་དོ། །དེས་ན་གནས་ལུགས་གཏན་ལ་དབབ་པས་དབུ་མའི་གཞུང་ལུགས་བཀའ་དང་བསྟན་བཅོས་ཇི་སྙེད་པ་ཐམས་ཅད་དུ་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀུན་རྫོབ་དང་དོན་དམ་པའི་བདེན་པ་གཉིས་ཀྱི་ཚུལ་གྱིས་གཏན་ལ་ཕབ་ཅིང་རྣམ་པར་བཞག་པ་ཡིན་ཏེ། འདི་ལྟར་བདེན་པ་གཉིས་དཔྱོད་པའི་ཚད་མ་གཉིས་ལ་ཡང་དག་པར་མ་བརྟེན་པར་བདེན་གཉིས་དབྱེར་མེད་ཟུང་དུ་འཇུག་པའི་ཡེ་ཤེས་ཉིད་ཇི་ལྟ་བ་བཞིན་དུ་ཁོང་དུ་ཆུད་པར་མི་འགྱུར་བས་ན། ཀུན་མཁྱེན་རྒྱལ་བས་ཆོས་སྒོ་གང་ཇི་སྙེད་ཅིག་གསུངས་པ་མ་ལུས་པ་ཡང་། ཀུན་རྫོབ་དང་དོན་དམ་པའི་བདེན་པ་གཉིས་པོ་དེ་ལ་ཡང་དག་པར་བརྟེན་པ་ཁོ་ན་ཡིན་ནོ། །དེ་ཡི་ཕྱིར་ན་བདེན་པ་གཉིས་པོ་སོ་སོ་རུ་དཔྱད་པ་ཡི་ཚད་མ་ཡོད་མེད་ཀྱི་ཁས་ལེན་དང་བཅས་པ་དེ་ལ་ལམ་གྱི་དབུ་མ་ཞེས་བརྗོད་དེ། འབྲས་བུའི་དབུ་མ་མཉམ་བཞག་ཡེ་ཤེས་ཀྱི་དངོས་མིང་རྒྱུ་ལ་བཏགས་པ་ཡི་སྒོ་ནས་བདེན་གཉིས་རེས་འཇོག་རྒྱུའམ་ལམ་གྱི་དབུ་མ་ཆུང་ངུ་ཞེས་བརྗོད་པ་ཡིན་ནོ། །དེ་ལ་ཐ་སྙད་ཀུན་རྫོབ་ཏུ་ཡོད་ཅེས་པའི་ཁས་ལེན་ཡོད་པར་མ་ཟད་དོན་དམ་དུའང་ཕུང་པོ་དང་ཁམས་དང་སྐྱེ་མཆེད་ལ་སོགས་པ་དོན་དམ་དཔྱོད་བྱེད་ཀྱིས་རྣམ་པར་དཔྱད་པའི་སྟོང་པ་ཉིད་དགག་བྱ་བདེན་གྲུབ་སེལ་བའམ་བཅད་པའི་མེད་པར་དགག་པ་རྐྱང་པ་ཙམ་ཉིད་ཡིན་པས་དགག་བྱ་དེ་ལ་ལྟོས་ནས་བདེན་གྲུབ་བམ་དོན་དམ་པར་མེད་ཅེས་པའི་ཁས་ལེན་ཀྱང་ནི་ངེས་པར་ཡོད་པ་ཡིན་ནོ། །གསུམ་པ། རྒྱུའམ་ལམ་གྱི་སོགས་ཚིགས་བཅད་དྲུག་གིས་བསྟན་ཏེ། དེ་ལྟར་རྒྱུའམ་ལམ་གྱི་དབུ་མ་དེས་བདེན་གཉིས་སོ་སོར་དཔྱད་པའི་ཚད་མས་དངོས་པོ་རྣམས་དོན་དམ་པར་སྟོང་པའམ་མེད་དོ་ཞེས་པ་དང་ཐ་སྙད་ཀུན་རྫོབ་ཙམ་དུ་སྣང་བའམ་ཡོད་དོ་ཞེས་བདེན་པ་གཉིས་སོ་སོ་ལ་ལྟོས་ཏེ་ཇི་ལྟར་ཁས་བླང་བ་དེ་གཉིས་ཀ་ཡང་དབུ་མ་པ་དེ་ཡི་རང་གི་ལུགས་ཉིད་ཡིན་གྱི། གཞན་དུ་དོན་དམ་པར་མེད་པའམ་སྟོང་པ་ཉིད་དུ་ཁས་ལེན་པ་རང་ལུགས་སུ་བྱས་ནས་སུ་ཀུན་རྫོབ་ཏུ་ཡོད་ཅེས་པའི་ཁས་ལེན་རྣམས་གཞན་འཇིག་རྟེན་རྒན་པོའི་ངོར་འཇོག་པའམ་སྐྱེལ་བ་འདི་ཉིད་འཐད་ཅིང་རིགས་པ་མིན་ཏེ། གལ་ཏེ་ཡིན་ན་དེ་འདྲའི་དབུ་མ་པ་དེ་ཡི་རང་ལུགས་ནི་དོན་དམ་པ་སྟོང་པ་ཕྱང་ཆད་རྐྱང་རྐྱང་པོ་ཁོ་ན་རུ་གྱུར་ནས་ཀྱང་གཞི་ལམ་འབྲས་བུའི་སྣང་བ་ཀུན་རྫོབ་ཐམས་ཅད་ཀུན་མེད་པ་ལ་ཡོད་པར་འཛིན་པས་འཁྲུལ་བའི་སྣང་བ་སྤང་བྱ་ཁོ་ན་ཡིན་པས་ཅི་ཡང་མེད་དོ་ཞེས་གཞི་ལམ་འབྲས་བུའི་སྣང་བ་ཐམས་ཅད་ལ་སྐུར་པ་མི་བཟད་པ་འདེབས་ཤིང་དེ་འདྲའི་ལམ་དེ་མཐར་ཕྱིན་ཏེ་སངས་རྒྱས་པའི་ཚེ་སྒྲིབ་པ་ཐམས་ཅད་དང་བྲལ་བའི་དབྱངས་དེ་ཡང་སྣང་སྟོང་ཡ་བྲལ་བས་སྟོང་པ་ཕྱང་ཆད་འབའ་ཞིག་ཙམ་ལྷག་མར་ལུས་པའམ་ཆད་སྟོང་ནམ་མཁའ་ལྟ་བུར་གྱུར་ནས་འབྲས་ཆོས་ཀྱི་ཡོན་ཏན་མཁྱེན་པ་གཉིས་སོགས་ཅི་ཡང་མེད་པར་འདོད་པ་དེ་ནི་ཐེག་དམན་པས་ཉན་རང་རང་ལམ་གྱི་འབྲས་བུ་ཕུང་པོ་ལྷག་མ་མེད་པར་བུད་ཤིང་ཟད་པའི་མེ་བཞིན་དུ་མྱང་འདས་སམ་མྱ་ངན་ལས་འདས་པར་འདོད་པ་ཇི་ལྟ་བ་བཞིན་དུ་དེ་འདྲའི་དབུ་མའི་རང་ལུགས་འདོད་པ་འདིར་ཡང་ཐེག་ཆེན་གྱི་མྱང་འདས་མངོན་པར་རྫོགས་པར་སངས་རྒྱས་པ་ཡང་འབྲས་ཆོས་ཀྱི་ཡོན་ཏན་ཐམས་ཅད་སྣུམ་ཟད་པས་མར་མེ་རྒྱུན་ཆད་པ་ལྟར་ཅི་ཡང་མེད་པར་གྱུར་ནས་ཐེག་དམན་པས་ལྷག་མེད་མྱང་འདས་དང་དོན་ལ་ཁྱད་པར་རྡུལ་ཙམ་ཡང་མེད་པའི་ཕྱིར་ན་སྣང་སྟོང་ཟུང་དུ་འཇུག་པའི་དབྱིངས་མངོན་དུ་གྱུར་པའི་མཁྱེན་གཉིས་སོགས་འབྲས་ཆོས་ཀྱི་ཡོན་ཏན་ཅི་ཡང་མེད་པར་སྐུར་པ་ཤིན་ཏུ་མི་བཟད་པ་འདེབས་པས་ཆད་སྟོང་ནམ་མཁའ་དང་འདྲ་བའི་ཡིད་ཅན་དེ་ནི་མཉམ་མེད་ཤཱཀྱ་སེང་གེ་ཡི་བསྟན་པའི་སྙིང་པོ་སྣང་སྟོང་ཟུང་འཇུག་གི་རྐུན་པོ་ངེས་དོན་ཟབ་མོའི་དམ་པའི་ཆོས་འཇིག་པར་བྱེད་པའི་སྐྱེས་བུར་ཀུན་མཁྱེན་རྒྱལ་བས་མདོ་རྒྱུད་དུ་མ་ནས་གསལ་བར་གསུངས་པའི་ལུང་རྣམས་ཀྱིས་ཤིན་ཏུ་ཕམ་པར་བྱས་ཤིང་ཡང་དག་པའི་རིགས་པས་ཀྱང་ནི་སྣང་སྟོང་བདེན་གཉིས་འགལ་བར་རྟོག་པས་སྣང་སྟོང་ཡ་བྲལ་བའི་སྟོང་པ་ཕྱང་ཆད་དེ་འདྲའི་རང་ལུགས་འདོད་པ་དག་ཐ་སྙད་ཡང་དག་པའི་ཚད་མས་རྙེད་དོན་ཡོད་པ་ལ་མེད་པར་ཤིན་ཏུ་སྐུར་བའི་ཚུལ་ཅན་ཡིན་པར་བདེན་གཉིས་དཔྱོད་པའི་ཚད་མ་ཡང་དག་པའི་ལམ་གྱིས་ངེས་ཤེས་མི་ཤིག་པའི་རྡོ་རྗེའི་མེས་སྣང་སྟོང་ཡ་བྲལ་ཞིང་སྐུར་བ་འདེབས་པའི་ཕྱང་ཆད་སྟོང་པའི་ལྟ་ངན་གྱི་རི་བོ་རྩ་སྦུར་བཞིན་དུ་བསྲེག་ནས་ལྷག་མེད་དུ་བརླག་པར་ནུས་པས་ན་རིགས་པས་གནོད་པ་བཟློག་མེད་དུ་འབབ་པར་ཤེས་པར་བྱའོ། །གཉིས་པ་ལ་གསུམ། ཐབས་བྱུང་འཕགས་ལམ་རྟོགས་པའི་ཡེ་ཤེས་ཟུང་འཇུག་དབུ་མ་ཆེན་པོའི་རང་བཞིན་ངོས་བཟུང་བ། དེ་ཉིད་རྣམ་ཀུན་མཆོག་ལྡན་གྱི་ཡེ་ཤེས་བློ་འདས་སྨྲ་བསམ་བརྗོད་མེད་ཡིན་པར་ལུང་རིགས་ཀྱིས་སྒྲུབ་པ། དེ་ཡང་སོ་སོ་རང་གི་རིག་པར་གསལ་སྣང་ཐོབ་ནས་རྗེས་ཀྱི་ངེས་པ་མཆོག་ཏུ་འདྲེན་པས་བསམ་མིན་གྱི་བྱེད་པོ་ལྟར་མིན་པར་བསྟན་པའོ། །དང་པོ། དེས་ན་དབུ་མའི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། དེས་ན་གནས་ལུགས་གཏན་ལ་དབབ་པའི་དབུ་མའི་གཞུང་བཀའ་དང་བསྟན་བཅོས་ཀུན་ཏུ་སྣང་སྟོང་བདེན་པ་གཉིས་ལ་སོ་སོར་དཔྱོད་པའི་ཚད་མས་དྲངས་པའི་ཤེས་རབ་རྒྱུ་ཡི་དབུ་མ་ཉིད་རིགས་པས་ཚུལ་བཞིན་དུ་དཔྱད་ཅིང་ཡང་དག་པར་མ་གྲུབ་པར་གྱུར་པ་དེ་སྲིད་དུ་ཟུང་འཇུག་འབྲས་བུའི་དབུ་མའམ་འབྲས་བུ་ཟུང་འཇུག་གི་ཡེ་ཤེས་དངོས་ཉིད་མི་འགྲུབ་པའི་ཕྱིར་ན་རེ་ཞིག་དངོས་པོའི་ཆོས་ཐམས་ཅད་སྣང་སྟོང་བདེན་པ་གཉིས་ཀྱི་ཚུལ་དུ་ནི་བདེན་གཉིས་དཔྱོད་པའི་རིགས་པ་ཡང་དག་པས་གཏན་ལ་ཕབ་པར་མཛད་ན་ཡང་འབྲས་བུ་གནས་ལུགས་བདེན་པ་དབྱེར་མེད་དམ་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་དུ་གྲུབ་ཅིང་རྟོགས་པ་ནི་རྒྱུ་དང་འབྲས་བུ་མདོ་སྔགས་ཀྱི་ཐེག་པའི་དགོངས་བཅུད་ཟབ་མོ་མཐར་ཐུག་གི་གནད་དམ་པ་ཡིན་པར་ཤེས་པར་བྱའོ། །དེ་ཡི་ཕྱིར་ན་འཕགས་པའི་མཉམ་བཞག་ཟུང་འཇུག་གི་ཡེ་ཤེས་རྡུལ་དང་བྲལ་བ་དེ་དག་གི་ངོ་བོ་དངོས་ནི་ལམ་གྱི་དབུ་མའི་སྐབས་སུ་རེས་འཇོག་ཏུ་དཔྱོད་ཅིང་སྒོམ་པའི་ཚུལ་གྱིས་མཐའ་གཉིས་རིམ་པར་སྤང་བ་ལྟ་བུར་མ་ཡིན་པར་མཐའ་གཉིས་སམ་བཞིའམ་བརྒྱད་དམ་སོ་གཉིས་པོ་མཐའ་དག་ཅིག་ཆར་དུ་སྤང་ནས་དགག་སྒྲུབ་གང་ལ་ཡང་མི་གནས་པས་བློ་ལས་འདས་པའི་ཟུང་འཇུག་གི་ཡེ་ཤེས་ཉིད་དུ་ལ་ཟློ་བའི་ཕྱིར་ན་དབུ་མ་ཡིན་ལ་ཆེན་པོའང་ཡིན་ནོ། །དེ་ལྟར་ན་ཇི་སྲིད་རེས་འཇོག་གི་བདེན་གཉིས་སྒོམ་པའི་ཚུལ་གྱིས་ནི་ནམ་ཞིག་རེས་འཇོག་དང་བྲལ་བའི་ཟུང་འཇུག་གི་ཡེ་ཤེས་དེ་ལ་དངོས་སུ་མ་རེག་པར་དེ་སྲིད་དུ་རྒྱལ་བ་ཀུན་གྱི་དགོངས་པའི་བཅུད་དམ་མཐིལ་དུ་གྱུར་པ་མཐར་ཐུག་གི་དབུ་མ་ཟུང་འཇུག་ཡེ་ཤེས་ཆེན་པོ་དངོས་ཉིད་མིན་ཏེ། དཔེར་ན་གཙུབས་ཤིང་གཙུབས་རྟེན་གྱི་ཤིང་གཉིས་ཡ་མ་བྲལ་བར་མྱུར་དུ་གཙུབས་པའི་སྟོབས་ལས་བྱུང་བའི་མེ་ཡིས་རང་གང་ལས་བྱུང་བའི་ཤིང་གཉིས་ཀྱང་ལྷག་མེད་དུ་བསྲེགས་པ་བཞིན་དུ་སྣང་སྟོང་བདེན་གཉིས་སོ་སོར་དཔྱོད་པའི་ཚད་མ་གཉིས་ཀྱི་ཤེས་རབ་དྲི་མ་མེད་པ་ཟུང་དུ་ཚོགས་པ་ལ་གོམ་པའི་སྟོབས་ཀྱིས་བྱུང་བའམ་དྲངས་པ་ཡི་བདེན་གཉིས་སམ་སྣང་སྟོང་གཉིས་སུ་མེད་པར་ཟུང་དུ་འཇུག་པའི་ཡེ་ཤེས་ཀྱི་མེས་ཡོད་པ་དང་མེད་པ་ཡིན་པ་དང་མིན་པ་ལ་སོགས་པའི་མཐའ་བཞིའི་སྤྲོས་པ་གཉིས་སྣང་གི་རྒྱུ་བ་མ་ལུས་པ་མཐའ་དག་ཀུན་ཉེ་བར་ཞི་བའི་འཕགས་པའི་མཉམ་བཞག་ཡུལ་དང་ཡུལ་ཅན་གཉིས་སུ་མེད་པའི་ཡེ་ཤེས་ཉིད་ལ་བདེན་གཉིས་ཟུང་འཇུག་མཐར་ཐུག་འབྲས་བུའི་དབུ་མར་ཐ་སྙད་དུ་བརྗོད་དེ་བཞག་པར་མཛད་པ་ཡིན་པའི་ཕྱིར་རོ། །གཉིས་པ། བདེན་གཉིས་ཕྱོགས་སུ་སོགས་ཚིགས་བཅད་བཅུ་དང་རྐང་པ་གཉིས་ཀྱིས་བསྟན་ཏེ། དེ་ལྟར་སྣང་སྟོང་བདེན་པ་གཉིས་པོ་སོ་སོའི་ཕྱོགས་སུ་མ་ལྷུང་བར་འགལ་མེད་ཟུང་དུ་འཇུག་པ་དེ་ལ་རྗེས་ཐོབ་ཤན་འབྱེད་པའི་ཤེས་རབ་ཀྱིས་གཞལ་ནས་སྣང་བ་ཀུན་རྫོབ་བདེན་པ་དང་སྟོང་པ་དོན་དམ་བདེན་པ་དང་། བདེན་གཉིས་ཟུང་དུ་འཇུག་པ་མཐའ་བྲལ་དབུ་མ་ཆེན་པོ་ཞེས་མིང་ངམ་བརྡ་ཙམ་གྱི་སྒོ་ནས་རྣམ་པར་བཞག་ཅིང་བསྟན་མོད་ཀྱི་དངོས་སུ་ན་སྒྲ་རྟོག་གི་ཡུལ་ལས་འདས་པས་འཕགས་པའི་མཉམ་བཞག་གཉིས་སུ་མེད་པའི་ཟུང་འཇུག་ཡེ་ཤེས་ཆེན་པོའི་ངོར་སྣང་བ་དང་སྟོང་པ་དང་ཟུང་འཇུག་གི་ངོ་བོ་ནི་འདི་དང་འདི་ཞེས་སོ་སོར་ཅི་ཡང་དམིགས་སུ་ཡོད་པ་མ་ཡིན་ཏེ། སྣང་བ་ཀུན་རྫོབ་ནི་ཐ་སྙད་དཔྱོད་པའི་ཚད་མའི་ཡུལ་ལམ་རྙེད་དོན་དང་། སྟོང་པ་རང་བཞིན་མེད་པ་ནི་དོན་དམ་དཔྱོད་པའི་ཚད་མའི་ཡུལ་ལམ་རྙེད་དོན་དང་། ཟུང་འཇུག་གཉིས་སུ་མེད་པ་ནི་དེ་གཉིས་རྣམ་དབྱེར་མེད་པར་འདྲེས་པའི་ཆ་ལ་བཞག་པ་ཡིན་པས། དེ་རྣམས་ནི་གཞན་སེལ་གྱི་སྒྲ་དང་རྟོག་པའི་ཡུལ་ཉིད་ཡིན་པའི་ཕྱིར་རོ། །དེ་ཡི་ཕྱིར་ན་སྒྲ་རྟོག་གི་ཐ་སྙད་དེ་དག་ལས་འདས་པའི་འཕགས་པའི་མཉམ་བཞག་དངོས་ནི་སོ་སོ་རང་གི་རིག་པ་གཉིས་སུ་མེད་པའི་ཡེ་ཤེས་ཙམ་དུ་བཞག་སྟེ་སྤྲོས་པ་ཐམས་ཅད་དང་བྲལ་བར་གྱུར་པས་མཉམ་བཞག་སྣང་བཅས་དང་སྣང་མེད་ལ་སོགས་པའི་ཐ་སྙད་ཐམས་ཅད་ཀྱང་སྣང་སྟོང་སོ་སོའི་ཕྱོགས་སུ་ཆད་ཅིང་སྒྲ་རྟོག་གི་ཡུལ་ཡིན་པའི་ཕྱིར་ན་གོང་དུ་ཇི་སྐད་བསྟན་པ་དེ་བཞིན་དུ་འཕགས་པའི་མཉམ་བཞག་གི་ཡེ་ཤེས་ཆེན་པོའི་ངོར་རིགས་པས་ཡང་དག་པར་མི་འགྲུབ་བོ་སྟེ་འགྲུབ་པར་མི་འགྱུར་རོ། །དེས་ན་ཇི་སྲིད་སྣང་སྟོང་སོ་སོར་སྣང་བ་དང་བཅས་པའི་རེས་འཇོག་གི་བདེན་པ་གཉིས་པོ་ཡང་དག་པར་སྒོམ་པ་ནི་གཉིས་སྣང་ཅན་སེམས་བྱུང་ཤེས་རབ་སྟེ་ནམ་ཞིག་ན་རེས་འཇོག་གིས་བདེན་པ་གཉིས་སྒོམ་པ་མེད་པར་ཡང་འཕགས་པའི་མཉམ་བཞག་ཟུང་འཇུག་གཉིས་སུ་མེད་པའི་ཡེ་ཤེས་མངོན་སུམ་དུ་མཐོང་བའམ་ཐོབ་པའི་ཚེ་ན་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་དགག་བྱ་རྣམས་དོན་དམ་རྣམ་པར་དཔྱད་པའི་ཚད་མ་རྣམས་ཀྱིས་རང་བཞིན་མེད་པར་བཅད་པའམ་གཏན་ལ་དབབ་པའི་མེད་དགག་སྣང་བ་སྤང་བའི་སྟོང་རྐྱང་ཆུ་ཤིང་ལྟ་བུ་སྙིང་པོ་མེད་པ་ལས་ཡང་དག་པར་འདས་ཏེ་སྟོང་པ་འགོག་བྱེད་དང་སྣང་བ་དགག་བྱ་ཡི་ཚུལ་དུ་སྣང་སྟོང་རིས་ཆད་དུ་སོ་སོར་མི་སྣང་བར་གཉིས་སྣང་ཐམས་ཅད་ནུབ་ན་ཡང་སྣང་ཆ་འགགས་པ་མེད་པའི་ཐབས་ཀྱི་རྣམ་པ་ཀུན་དང་ལྡན་པ་ཡི་རྣམ་པ་ཀུན་གྱི་མཆོག་ལྡན་གྱི་ཡེ་ཤེས་སྟོང་ཉིད་སྤྲོས་བྲལ་ཆེན་པོ་དངོས་ཉིད་མངོན་དུ་གྱུར་པ་ཡིན་པས་རིགས་ལྡན་འཇམ་དཔལ་གྲགས་པས། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པས། །སྟོང་ཉིད་དེ་དང་འདྲ་མ་ཡིན། །ཞེས་གསུངས་པ་དང་། ཟུང་འཇུག་དབུ་མ་ཆེན་པོ། ལྷན་སྐྱེས་ཕྱག་རྒྱ་ཆེན་པོ། འོད་གསལ་རྫོགས་པ་ཆེན་པོ་སོགས་མཚོན་བྱེད་ཀྱི་བརྡའམ་མཚན་གྱི་རྣམ་གྲངས་མང་པོ་མངའ་བ་ཡི་བདག་ཉིད་སེམས་དང་སེམས་བྱུང་མཐའ་དག་ལས་འདས་པའི་གཉིས་སུ་མེད་པའི་ཡེ་ཤེས་ཆོས་ཉིད་ཀུན་ཁྱབ་ཆེན་པོ་ཡིན་པའི་ཕྱིར་ན་གཟུང་འཛིན་གཉིས་སྣང་ཅན་གྱི་སེམས་སམ་ཀུན་ཏུ་རྟོག་པ་གཞན་གྱིས་ཏེ་རྟོག་པ་གང་གིས་ཀྱང་བསམ་གྱིས་མི་ཁྱབ་པ་སྟེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་གསུངས་པ་ལྟ་བུའོ། །དེ་ལྟར་བསམ་གྱིས་མི་ཁྱབ་པའི་ཡེ་ཤེས་དེ་ནི་སྒྲ་དང་རྟོག་པ་གང་གིའང་ཡུལ་མིན་པའི་ཕྱིར་ན་མེད་དགག་སྣང་བ་སྤང་བའི་སྟོང་པ་ཕྱང་ཆད་དང་མ་ཡིན་དགག་རང་གི་ངོ་བོས་མི་སྟོང་པར་དགག་བྱ་གཞན་གྱིས་སྟོང་པ་དང་བདེན་པའི་གཉིས་སྣང་མེད་ཀྱང་ཡུལ་དང་ཡུལ་ཅན་དུ་རྣམ་པར་བཞག་པ་སོགས་དང་། བདེན་པ་གཉིས་ངོ་བོ་ཐ་དད་དང་ནི་སྣང་སྟོང་འདྲེས་པའི་ཟུང་དུ་འཇུག་སོགས་སྤྲོས་པའི་མཚན་མ་ཀུན་དང་བྲལ་ཞིང་གང་གི་ཕྱོགས་སུ་ལྷུང་བའམ་རིས་སུ་ཆད་པ་མེད་པ་སྟེ་རྒྱ་གང་དུ་མ་ཆད་ཕྱོགས་གང་དུའང་མ་ལྷུང་བས་ཤེས་བརྗོད་འཇུག་པའི་ཐ་སྙད་ཐམས་ཅད་དང་བྲལ་བ་གཉིས་སུ་མེད་པའི་ཡེ་ཤེས་རང་བཞིན་གྱིས་འོད་གསལ་བས་ན། མ་སྐྱེས་མི་འགག་ནམ་མཁའི་ངོ་བོ་ཉིད། ཅེས་གསུངས་པ་ལྟ་བུའོ། །དེ་ནི་སྣང་དང་སྟོང་པ་ཁས་ལེན་ཡོད་མེད་ལ་སོགས་པའི་སྤྲོས་མཚན་ཀུན་ལས་འདས་ཀྱང་ཅི་ཡང་དྲན་མེད་ཐོམ་མེ་བ་གཉིད་འཐུག་དང་བརྒྱལ་བ་ལ་སོགས་པ་ལྟ་བུ་མ་ཡིན་པར་མཐར་འཛིན་གྱི་ལྟ་བ་ངན་པའི་སྨག་ཐམས་ཅད་སེལ་བར་ནུས་པའི་ཆོས་ཀྱི་དབྱིངས་ཨེ་ཝཾ་སྟེ་སྟོང་པའི་ཡེ་ཤེས་དབྱིངས་དང་གསལ་བའི་ཡེ་ཤེས་བདེ་བ་ཆེན་པོ་འདུ་འབྲལ་མེད་པས་དབྱེར་མེད་དམ་ཟུང་དུ་ཞུགས་པ་ཡི་རང་བྱུང་གི་ཡེ་ཤེས་གང་དེ་རྣལ་འབྱོར་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱིས་མཐོང་བ་མེད་པའི་ཚུལ་གྱིས་མཐོང་ཞིང་གནས་པ་མེད་པའི་ཚུལ་གྱིས་གནས་པ་དང་སྣང་བ་མེད་པའི་ཚུལ་གྱིས་རང་སྣང་བ་སྟེ། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་གསུངས་པ་ལྟ་བུའོ། །དེ་ལྟར་ཡོད་མེད་ཡིན་མིན་སྟོང་དང་མི་སྟོང་ལ་སོགས་པའི་ཁས་ལེན་ཐམས་ཅད་ལས་འདས་པའི་གནས་ལུགས་སྣང་སྟོང་གཉིས་སུ་མེད་པའི་ཆོས་ཀྱི་དབྱིངས་ཉིད་རང་གི་ངོ་བོས་མི་སྟོང་པར་སྒྲོ་འདོགས་པ་དང་དབྱིངས་དང་གཉིས་སུ་མེད་པའི་འོད་གསལ་བའི་ཡེ་ཤེས་ཀྱི་སྣང་བ་ཉིད་མེད་པར་སྐུར་བ་འདེབས་པ་ཐམས་ཅད་དང་བྲལ་བའི་གནས་ལུགས་དམ་པའི་དོན་ཟུང་འཇུག་སྐྱེ་འགག་མེད་པའི་ཡེ་ཤེས་དབྱིངས་དང་རིག་པ་ཡེ་ནས་འདུ་འབྲལ་མེད་པའི་གནས་ཚུལ་ཟབ་མོ་དེ་ཁོ་ན་ཉིད་རང་གི་ངོ་བོ་ལ་ནི་རྗེན་ཅེར་དུ་འདི་ཞེས་རྟགས་དང་གཏན་ཚིགས་དཔེ་དང་སྒྲ་རྟོག་གང་གིས་ཀྱང་མཚོན་ཞིང་བརྗོད་དུ་མེད་པས་ཤིན་ཏུ་སྨྲ་བསམ་བརྗོད་པ་ལས་ལས་འདས་པར་འདོད་པ་ཡིན་ནོ། །གསུམ་པ། འོན་ཀྱང་བསམ་མིན་སོགས་ཚིགས་བཅད་གཉིས་ཀྱིས་བསྟན་ཏེ། དེ་ལྟར་སྤྲོས་པ་ཀུན་ལས་འདས་པ་ཡིན་མོད་ཀྱི་འོན་ཀྱང་ཕྱི་རོལ་པའི་འདོད་པའི་བསམ་མིན་གྱི་བྱེད་པོ་ལྟར་གང་ཟག་སུ་ཡིས་ཀྱང་རྟོགས་སུ་མེད་པ་ཉིད་ནི་མ་ཡིན་ཏེ། འདི་ལྟར་དྲི་མ་མེད་པའི་ལུང་གི་སྣང་བ་ལ་བརྟེན་ཏེ་ཚད་མར་གྱུར་པའི་རིགས་པ་ཡང་དག་པས་དཔྱད་པ་ཡིས་རབ་ཏུ་དྲངས་པའི་འཕགས་པའི་མཉམ་བཞག་ཟུང་འཇུག་གཉིས་སུ་མེད་པའི་ངོ་བོ་རྣལ་འབྱོར་བ་རྣམས་ཀྱིས་སོ་སོ་རང་རིག་པའི་ཡེ་ཤེས་ཀྱི་རྗེས་ལས་ཐོབ་པའི་དག་པ་འཇིག་རྟེན་པའི་ཡེ་ཤེས་ཀྱིས་ངེས་པའི་ཤེས་པ་ཆོས་ཀྱི་དབྱིངས་སྣང་སྟོང་ཟུང་འཇུག་བསལ་བཞག་མེད་པའི་གནས་ལུགས་ཉིད་ཇི་ལྟ་བར་གསལ་བར་བྱེད་པའི་མར་མེ་འོད་འབར་བའི་སྣང་བ་ནི་ཐེ་ཚོམ་གྱི་སྨག་ཐམས་ཅད་དང་བྲལ་བ་དག་རྣལ་འབྱོར་པ་རྣམས་ལ་མངོན་སུམ་དུ་སྣང་བ་ཡོད་པ་ཉིད་ཀྱི་ཕྱིར་རོ། །གསུམ་པ། མདོ་ལམ་ཐབས་དང་སོགས་ཚིགས་བཅད་དྲུག་དང་རྐང་པ་གཉིས་ཀྱིས་བསྟན་ཏེ། དེ་ཡང་མདོ་མཚན་ཉིད་རྒྱུ་ཡི་ཐེག་པའི་ལམ་གྱི་སྐབས་སུ་ཐབས་སྣང་བའི་ཆ་དང་ཤེས་རབ་སྟོང་པའི་ཆ་གཉིས་ཕན་ཚུན་གཅིག་ལ་གཅིག་གིས་རྩིས་ཟིན་པའི་རྒྱས་གདབ་རེས་འཇོག་གི་ཚུལ་གྱིས་འདུ་འབྲལ་མེད་པར་བྱེད་ཀྱི་རྡོ་རྗེའི་ཐེག་པའི་ལམ་མཆོག་འབྲས་བུ་སྔགས་ཀྱི་རང་ལུགས་འདིར་ནི་ཐབས་སྣང་བ་དང་ཤེས་རབ་སྟོང་པ་ཉིད་གཉིས་ཡེ་ནས་འདུ་འབྲལ་མེད་པར་དག་མཉམ་ཟུང་འཇུག་གི་ཚུལ་གྱིས་མངོན་སུམ་དུ་རྟོགས་ཤིང་གོམས་པར་བྱེད་པའི་ཁྱད་པར་ཉིད་ལས་རྟོགས་པ་རང་གི་ངོ་བོ་ལ་སྣང་སྟོང་ཟུང་དུ་འཇུག་པའི་སྤྲོས་བྲལ་དབུ་མ་ཆེན་པོ་དང་། དབྱིངས་རིག་གཉིས་མེད་འོད་གསལ་རྫོགས་པ་ཆེན་པོ་གཉིས་ཟུང་འཇུག་གཉིས་སུ་མེད་པའི་ཡེ་ཤེས་སུ་དོན་ལ་རྣམ་དབྱེར་མེད་པས་གཅིག་པ་ཡིན་ཞིང་དེ་ཉིད་མཚོན་བྱེད་ཀྱི་མཚན་ནམ་མིང་གི་རྣམ་གྲངས་ཐ་དད་པ་ཙམ་ཡིན་ཏེ། དེ་ལས་ལྷག་པའམ་མཆོག་ཏུ་འཕགས་པའི་ལྟ་བ་གཞན་མེད་དེ་གང་གི་ཕྱིར་ན་སྣང་སྟོང་བདེན་གཉིས་རེས་འཇོག་ཏུ་ཡོད་པ་དང་མེད་པ་དང་གཉིས་ཀ་དང་གཉིས་མིན་ལ་སོགས་པའི་འཛིན་སྟངས་ཅི་ཡང་མེད་པས་མཐའ་བཞིའི་སྤྲོས་པ་ཀུན་དང་བྲལ་བའི་ཕྱིར་ཏེ་འཛིན་སྟངས་ཀུན་དང་བྲལ་བ་དེ་ལས་གཞན་དུ་གྱུར་པའི་ལྟ་བ་ཞིག་གལ་ཏེ་ཡོད་པར་གྱུར་ན་དེ་ཉིད་འཛིན་སྟངས་ཀྱི་སྤྲོས་དང་བཅས་པ་ཉིད་དུ་འགྱུར་བའི་ཕྱིར་རོ། །འོན་ཀྱང་མདོ་ལས་བདེན་གཉིས་སམ་སྣང་སྟོང་ངམ་ཐབས་ཤེས་ཟུང་དུ་འཇུག་པའི་ཡེ་ཤེས་ཀྱི་དོན་གང་དེ་བདེན་གཉིས་དཔྱོད་པའི་གཏན་ཚིགས་ཀྱིས་དཔྱད་པས་རྗེས་དཔག་གིས་གཏན་ལ་ཕབ་ཅིང་སྒོམ་པ་ཉིད་ཡིན་ལ། རྡོ་རྗེའི་ཐེག་པ་གསང་སྔགས་ནང་གི་རྒྱུད་སྡེའི་ལུགས་སུ་རྣལ་འབྱོར་པ་རྣམས་ཀྱིས་སོ་སོ་རང་གི་རིག་པའི་ཡེ་ཤེས་ཀྱི་དབྱིངས་སུ་འདུ་འབྲལ་མེད་པའི་ཟུང་འཇུག་གི་ཡེ་ཤེས་ཉིད་ཐད་ཀར་སྐད་ཅིག་གིས་བཙན་ཐབས་སུ་ཉམས་སུ་མྱོང་བས་མངོན་སུམ་གྱིས་གྲུབ་པ་ཡིན་པས་ལྟ་བ་ལ་ཁྱད་པར་ཤིན་ཏུ་ཡོད་པ་ཡིན་ནོ། །དོན་དེ་ཡི་ཕྱིར་ན་མཐའ་ལ་མི་གནས་པས་དབུ་མ་ཞེས་བརྗོད་པ་འདི་ལ་ཡང་བདེན་གཉིས་སོ་སོར་དཔྱོད་པ་ཡི་ཚད་མ་སེམས་བྱུང་ཤེས་རབ་རྒྱུའམ་ལམ་གྱི་དབུ་མ་རེས་འཇོག་གི་ཚུལ་དུ་མཐའ་ལ་མི་གནས་པ་དང་། ཚད་མ་གཉིས་པོ་དེས་དྲངས་པའི་སྣང་སྟོང་བདེན་པ་གཉིས་པོ་རྣམ་དབྱེར་མེད་པར་རོ་གཅིག་ཏུ་གྱུར་པའི་དངོས་གཞི་འཕགས་པའི་མཉམ་བཞག་རང་རིག་པའི་ཡེ་ཤེས་ཟུང་འཇུག་འབྲས་བུའི་དབུ་མ་ཅིག་ཆར་དུ་མཐའ་བཞིའི་སྤྲོས་པ་ཁེགས་ནས་མཐའ་དབུས་གང་ལའང་མི་གནས་པ་གཉིས་པོ་རིམ་པར་རྒྱུ་དང་འབྲས་བུའམ་རྣམ་ཤེས་དང་ཡེ་ཤེས་ཀྱི་གནས་སྐབས་ཡིན་ལ། དེ་བཞིན་དུ་མདོ་དང་སྔགས་ཀྱི་ལྟ་བ་ལའང་ཁྱད་པར་དེ་ལྟར་དུ་རྣམ་པར་བཞག་སྟེ། སྔ་མ་རྒྱུ་ཡི་དབུ་མའམ་མདོ་ལམ་གྱི་ལྟ་བ་ནི་རྗེས་དཔག་གི་ངེས་ཤེས་གཉིས་སྣང་ཅན་སེམས་བྱུང་ཤེས་རབ་ཀྱི་ཆ་ཡིན་ལ། ཕྱི་མ་འབྲས་བུའི་དབུ་མ་མཉམ་བཞག་རྣམ་པར་མི་རྟོག་པའི་ཡེ་ཤེས་སམ་གསང་སྔགས་ཀྱི་ལྟ་བ་ནི་སེམས་ལས་འདས་པའི་ཟུང་འཇུག་གཉིས་སུ་མེད་པར་མངོན་སུམ་དུ་གསལ་སྣང་ཐོབ་པའི་ཡེ་ཤེས་ཀྱི་རྗེས་ཀྱི་ངེས་པ་ཁོ་ན་ཡིན་པའི་ཁྱད་པར་ཡོད་དོ། །དེ་ཡི་ཕྱིར་ཕྱི་མ་འདི་ལ་ནི་སྟོང་ཉིད་སྤྲོས་བྲལ་ཆེན་པོ། ལྷན་སྐྱེས་ཕྱག་རྒྱ་ཆེན་པོ། འོད་གསལ་རྫོགས་པ་ཆེན་པོ་སོགས་ཆེན་པོའི་སྒྲ་ཡིས་སྔ་མ་ལས་ཁྱད་པར་དུ་འཕགས་པར་བསྔགས་ཤིང་བསྟན་པར་མཛད་པ་ཡིན་ནོ། །བཞི་པ། གནས་ལུགས་ལ་ཡང་སོགས་ཚིགས་བཅད་གསུམ་གྱིས་བསྟན་ཏེ། དེ་ཕྱིར་མདོ་རྒྱུད་བསྟན་བཅོས་རྣམས་ལས་གནས་ལུགས་ཞེས་གང་ཇི་སྙེད་ཅིག་གསུངས་པ་ཡང་གོང་དུ་དབུ་མ་ལ་གཉིས་སུ་དབྱེ་བར་བྱས་པ་དེ་བཞིན་དུ་ཕུང་ཁམས་སྐྱེ་མཆེད་ཀྱིས་བསྡུས་པའི་སྣང་བའི་དངོས་པོ་ཀུན་སྟོང་པའི་གནས་ལུགས་མེད་དགག་དང་། སྣང་སྟོང་བདེན་གཉིས་དབྱེར་མེད་པའི་གནས་ལུགས་ཟུང་འཇུག་གི་ཡེ་ཤེས་གཉིས་ལ་གནས་ལུགས་ཞེས་རྗོད་བྱེད་ཀྱི་མིང་གཅིག་ཡིན་ན་ཡང་བརྗོད་བྱའི་དོན་ལ་ནི་ངོ་བོ་སྟོང་པའི་དབྱིངས་དང་ཡེ་ནས་འདུ་འབྲལ་མེད་པའི་རང་བཞིན་གསལ་བའི་སྣང་བ་ཉིད་སྤང་བའི་སྟོང་པ་ཕྱང་ཆད་དང་། མ་སྤང་བའི་སྣང་སྟོང་ཟུང་འཇུག་གི་ཁྱད་པར་གནམ་དང་ས་ཡི་མཐོ་དམན་བཞིན་དུ་མཆིས་ཤིང་ཡོད་པ་ཉིད་ཡིན་ནོ། །དེ་བཞིན་དུ་ཆོས་ཉིད་དེ་བཞིན་ཉིད་ཅེས་པ་ལའང་དངོས་པོ་སྟོང་པའི་ཆོས་ཉིད་མེད་དགག་དང་། བདེན་གཉིས་དབྱེར་མེད་པའི་ཆོས་ཉིད་ཟུང་འཇུག་གི་ཡེ་ཤེས་གཉིས་དང་། ཆོས་ཀྱི་དབྱིངས་ཞེས་པ་ལའང་དངོས་པོ་སྟོང་པ་མེད་དགག་དང་། ཟུང་འཇུག་གི་ཆོས་དབྱིངས་གཉིས་དང་། སྟོང་ཉིད་ལའང་སྟོང་ཉིད་མེད་དགག་དང་། སྟོང་ཉིད་ཟུང་འཇུག་གཉིས་དང་། སྤྲོས་བྲལ་ལའང་སྟོང་རྐྱང་མེད་དགག་གི་སྤྲོས་བྲལ་དང་། དབྱེར་མེད་ཟུང་འཇུག་གི་སྤྲོས་བྲལ་གཉིས་དང་། འགོག་པ་ཡང་དག་པའི་མཐའ་ལའང་མེད་དགག་སྟོང་རྐྱང་དང་། སྣང་སྟོང་ཟུང་འཇུག་གི་འགོག་པ་གཉིས་དང་། དོན་དམ་ལའང་མེད་དགག་རྣམ་གྲངས་པ་དང་། ཟུང་འཇུག་རྣམ་གྲངས་མ་ཡིན་པའི་དོན་དམ་གཉིས་དང་། སོགས་པའི་སྒྲས་མྱང་འདས་དང་། འདུས་མ་བྱས་དང་། ངོ་བོ་ཉིད་སྐུ་དང་། ཆོས་དབྱིངས་ཡེ་ཤེས་སོགས་ལའང་མེད་དགག་སྟོང་རྐྱང་གི་ཆ་དང་། སྣང་སྟོང་ཟུང་འཇུག་གི་ཆ་གཉིས་རེ་གཉིས་རེ་ཡོད་པས་རྗོད་བྱེད་ཀྱི་མིང་ངམ་སྒྲ་གཅིག་ཉིད་མཚུངས་པར་འཇུག་པ་ཡིན་ཀྱང་བརྗོད་བྱའི་དོན་ལ་སྣང་སྟོང་ཟུང་འཇུག་དང་སྟོང་རྐྱང་མེད་དགག་གི་དབྱེ་བ་མཐར་ཐུག་པ་དང་ནི་ཉི་ཚེ་བའི་ཁྱད་པར་ལྷུན་པོ་དང་རི་ཕྲན་བཞིན་དུ་ཤིན་ཏུ་ཆེ་བའི་ཕྱིར་ན་རྒྱུ་དང་འབྲས་བུའམ། རགས་པ་དང་ཕྲ་བའམ། རྗེས་ཐོབ་དང་མཉམ་བཞག་གམ། རྣམ་ཤེས་དང་ཡེ་ཤེས་ཀྱི་སྤྱོད་ཡུལ་དུ་གྱུར་པའི་སྐབས་དོན་གང་ཞིག་ཡིན་པ་མ་འདྲེས་སོ་སོར་ཕྱེ་ནས་ལུང་རིགས་དྲི་མ་མེད་པའི་སྒོ་ནས་མ་ནོར་མ་འཁྲུལ་བར་ལེགས་པར་བཤད་པར་བྱ་སྟེ། དཔེར་ན་སེནྡྷུ་པ་འོན་ཅིག་ཅེས་བརྗོད་པ་ཡི་སྒྲ་དེ་ཉིད་དམག་ལ་འགྲོ་བའི་ཚེ་ཤིང་རྟ་དང་། ཆུ་བརྒལ་བའི་ཚེ་གྲུ་དང་། ཟས་བྱེད་པའི་ཚེ་ལན་ཚྭ་ལ་འཇུག་པ་ལ་སོགས་པ་ཡིན་པས་གནས་སྐབས་སོ་སོ་ལ་ལྟོས་ནས་སྐབས་དོན་གང་ལ་བབ་པའི་རྗོད་བྱེད་དུ་གོ་ནས་དོན་ལ་ཕན་ཚུན་མ་འཆོལ་བར་ཤེས་དགོས་པ་ཇི་ལྟ་བ་བཞིན་དུ་ཡིན་ནོ། །མཉམ་རྗེས་ཤན་མ་འབྱེད་པའི་ཁས་ལེན་གྱི། །སོམ་ཉིའི་དྲྭ་བར་འཕྱན་པའི་རྨོངས་པའི་སྨག །དཔྱིས་འབྱིན་ཡེ་ཤེས་ཉི་མ་ལམ་མེ་པ། །རྡོ་རྗེའི་རིག་སྔགས་མཆོག་འདི་ཨེ་མ་ཧོ། །ཞེས་བར་སྐབས་ཀྱི་ཚིགས་སུ་བཅད་པའོ། །གསུམ་པ་དྲི་བ་པོ་གུས་པའི་ཚུལ་གྱིས་བསྟན་པ་མཆོག་ལ་བསྔགས་ཤིང་ངོ་མཚར་ཆོས་ཀྱི་སྒྲོན་མེ་གཞན་ལ་གསལ་བར་བསྐུལ་བ་ནི། དེ་ལྟར་ཟབ་མོའི་སོགས་ཚིགས་བཅད་བཅུས་བསྟན་ཏེ། དེ་ལྟར་ཤིན་ཏུ་རྟོགས་པར་དཀའ་བའི་དོན་ཟབ་མོའི་གནས་ལས་བརྩམ་པའི་དྲི་བ་བདུན་པོ་རྣམས་ཟབ་རྒྱས་སམ་ཟབ་པ་དང་རྒྱ་ཆེ་བའི་དོན་ཅན་ཤིན་ཏུ་གསལ་བར་ལུང་རིགས་དྲི་མ་མེད་པས་ལེགས་པར་བཤད་པའི་ཚིག་གི་རྗོད་བྱེད་རྣམས་ཀྱིས་ཡང་དག་པར་བཀྲོལ་བའི་ཚེ་ན་དྲི་བ་པོ་ཐོལ་བྱུང་ལྡོམ་བུ་པ་དེ་ཡང་ཟབ་མོ་ཤིན་ཏུ་རྟོགས་པར་དཀའ་བའི་གནས་བདུན་པོའི་དོན་ལ་ངེས་པའི་ཤེས་པ་ཐེ་ཚོམ་གྱི་སྨག་དང་བྲལ་བར་གྱུར་ཏེ་དགའ་མགུ་ཡི་རང་ནས་ལུས་གུས་པ་དང་བཅས་ཏེ་ངག་གིས་འདི་སྐད་དུ། ཀྱེ་མ་ཞེས་སྐྱོ་བའི་ཉམས་ཀྱིས་དཔེར་ན་ཁྲོན་པའི་ཆུ་མིག་ཆུང་ངུ་ལ་གནས་པའི་རུས་སྦལ་གྱིས་ཆུ་མིག་ཆུང་ངུ་དེ་རྒྱ་མཚོ་ཆེན་པོར་རློམ་པས་མཆོག་ཏུ་སྟེམས་ཤིང་ཁེངས་པར་གྱུར་པ་ཡང་གཟོད་རྒྱ་མཚོ་ཆེན་པོ་མཐོང་བས་བསྙིལ་ཞིང་བརྒྱལ་ཏེ་ཤི་བར་གྱུར་པ་བཞིན་དུ་རང་ལ་མ་གྲགས་པའི་གཞན་གཞུང་མདོ་རྒྱུད་ཟབ་མོའི་ཆོས་ཀྱིས་ཚུལ་ཟབ་ཅིང་རྒྱ་ཆེ་བ་རྒྱ་མཚོ་ཆེན་པོའི་འཇིངས་ལྟ་བུ་རྣམས་ཇི་བཞིན་དུ་མ་མཐོང་ཞིང་མ་རྟོགས་པར་རང་གཞུང་ཚུར་མཐོང་གི་བཞེད་པ་ཁྲོན་པའི་ཆུ་མིག་ལྟ་བུར་མཆོག་ཏུ་རློམ་པས་སྙེམས་ཤིང་དྲེགས་པའི་རོ་ལ་མྱོང་ཞེན་དང་ལྡན་པ་བདག་ཅག་རྣམས་ཀྱིས་རློམས་སེམས་ཀྱི་ཁེངས་པ་ཆ་དང་བཅས་པ་ཁྱེད་གསུང་ངོ་མཚར་ཟབ་མོའི་གཏམ་འདིས་རྨང་མེད་དུ་བསྙིལ་བར་མཛད་པས་ན་འདི་ནི་ཤིན་ཏུ་ཡི་རང་ཞིང་གུས་པའི་གནས་མཆོག་ཏུ་གྱུར་པར་མཐོང་ངོ་། །དེ་ཕྱིར་ཤིན་ཏུ་ཟབ་པ་དང་རྒྱ་ཆེ་བའི་ངོ་མཚར་གཏམ་གྱི་འབྱུང་གནས་ཀུན་མཁྱེན་གཉིས་པ་རོང་ཟོམ་མ་ཧཱ་པཎྜི་ཏ་ཆོས་ཀྱི་བཟང་པོ་དང་རྒྱལ་བའི་དབང་པོ་ཀུན་གཟིགས་ཀློང་ཆེན་རབ་འབྱམས་ཞེས་མཚན་སྙན་གྱི་གདུགས་དཀར་པོ་ས་གསུམ་ན་མངོན་པར་མཐོ་ཞིང་གྲགས་པ་རྗེ་བཙུན་ངག་གི་དབང་པོ་ངུར་སྨྲིག་གར་གྱིས་རོལ་པར་བསྟན་པའི་འཇམ་དཔལ་དགྱེས་པའི་ཟློས་གར་འཕགས་མཆོག་རྣམ་པ་གཉིས་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྒྱ་མཚོ་ཆེན་པོ་ཡི་ཀློང་ན་ལུང་རིག་མན་ངག་ཟབ་མོའི་ཐུན་མོང་མ་ཡིན་པའི་དཔལ་ལ་རོལ་ཞིང་འཁྱིལ་བའི་རྩལ་ལས་ལེགས་པར་འཁྲུངས་པའི་ཆོས་ཚུལ་ཟབ་མོའི་དགོངས་འགྲེལ་ངེས་དོན་མདོ་རྒྱུད་སྣ་ཚོགས་པའི་ཟབ་ཅིང་རྒྱ་ཆེ་བའི་ངེས་གསང་ཐམས་ཅད་དངོས་སྟོབས་ཚད་མའི་ལམ་ནས་གསལ་བར་སྟོན་ཅིང་འདོད་རྒུའི་སྣང་བ་ཡིད་བཞིན་དུ་འཇོ་བའི་རྨད་བྱུང་ལྷ་ཡི་ནོར་བུ་རིན་པོ་ཆེ་དབང་གི་རྒྱལ་པོ་ལྟ་བུའི་ཆོས་མཛོད་དམ་པ་རབ་ཏུ་མང་པོ་བསམ་གྱིས་མི་ཁྱབ་པ་ལ་མངའ་དབང་བསྒྱུར་བ་རྣམས་ཀྱིས་མཚོན་ཏེ་སྔ་འགྱུར་ལུང་རྟོགས་ཀྱི་བསྟན་པ་བླ་ན་མེད་པ་ད་ལྟར་མངོན་སུམ་དུ་བཞུགས་པ་དེ་དག་སྤང་ནས་དེ་དག་ལ་བསྐྲུན་ན་གཞན་གྱི་གཞུང་ལུགས་ནོར་བུ་འཆིང་བུར་རེ་ཞིང་མཆོད་པར་རློམ་པ་རྣམས་ནི་འཁྲུལ་བའི་གཞན་དབང་གིས་ཟིན་ནས་ཐུན་མོང་མ་ཡིན་པའི་ངེས་དོན་ཟབ་མོའི་ནོར་བུ་རིན་པོ་ཆེ་མཆོག་གི་བགོ་སྐལ་ལས་རེ་ཞིག་རང་རང་ཕྱི་བཤོལ་དུ་གྱུར་པ་ནི་ཀྱེ་མ་འོ་དམན་པའི་གནས་ལ་ཕྱིན་པའོ། །དེས་ན་བདེན་པ་གཉིས་ཀྱི་ཆོས་ཚུལ་ཤིན་ཏུ་བཟང་པོར་བདེན་གཉིས་དཔྱོད་པའི་ཚད་མ་ཡང་དག་པའི་རིགས་པས་རྣམ་པར་དཔྱད་པས་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་མཆོག་ཏུ་རྙེད་པའི་བསམ་པ་ཅན་ནམ་བློ་གྲོས་ཅན་ལུང་དང་རིགས་པ་ཟབ་མོ་ལ་དབང་འབྱོར་བ་རྣམས་ནི། དུས་རྟག་ཏུ་མདོ་རྒྱུད་ངེས་དོན་ཟབ་མོ་ལས་བློ་ཕྱིར་བཟློག་པའི་བདུད་དང་ཕལ་གྱི་རྒོལ་བ་གང་གིས་ཀྱང་མི་ཚུགས་ཤིང་བར་ཆད་བྱེད་པ་མེད་པས་གཡུལ་ལས་མཆོག་ཏུ་རྣམ་པར་རྒྱལ་ཏེ་ལོག་སྨྲ་ཚར་གཅོད་པ་དང་། སྐལ་ལྡན་རྗེས་སུ་འཛིན་པ་ལ་གཞན་ལས་མཆོག་ཏུ་འཕགས་ཤིང་འགྲན་ཟླ་ཀུན་དང་བྲལ་བ་ཁོ་ན་ཡིན་ནོ། །དེ་ཡི་ཕྱིར་ན་ཚུར་མཐོང་བྱིས་པའི་རི་དྭགས་སུས་ཀྱང་བཟོད་པར་དཀའ་བའི་མདོ་རྒྱུད་ཟབ་མོའི་ངེས་གསང་བདེན་གཉིས་དཔྱོད་པའི་རིགས་ལམ་སེང་གེའི་སྒྲ་བོ་ཆེ་ཇི་སྐད་བསྟན་པ་རབ་ཏུ་བསྒྲགས་པས་དཔལ་ལྡན་སངས་རྒྱས་པདྨ་སྐྱེས་སམ་ཨོ་རྒྱན་མཚོ་སྐྱེས་རྡོ་རྗེའི་བསྟན་པའི་རང་ལུགས་སྔ་འགྱུར་གྱི་མདོ་རྒྱུད་ཟབ་མོ་ཁྱད་པར་འཕགས་པས་ཐུན་མོང་མིན་པར་མཆོག་ཏུ་གྱུར་པ་རྣམས་ལ་གཞན་དྲིང་མི་འཇོག་པར་ཡིད་ཆེས་ཟབ་མོ་རྙེད་པར་གྱུར་ཅིང་། རང་མཐོང་གིས་མདོ་རྒྱུད་དགོངས་འགྲེལ་ཕྱོགས་རེས་ཁེངས་ཤིང་དྲེགས་པས་མཆོག་ཏུ་སྙེམས་ནས་འཛིན་པའི་གཞན་ཕྱོགས་ཀྱི་གྲུབ་མཐའ་སྨྲ་བ་མཐའ་དག་རིགས་པ་ཚད་མས་སུན་འབྱིན་པར་བྱེད་པ་སུས་ཀྱང་མི་བཟློག་པའམ་མི་འཕྲོག་པའི་ཚད་མ་བདེན་གཉིས་དཔྱོད་པའི་ཤེས་རབ་ཀྱི་རལ་གྲིའི་ཡུ་བ་མཆོག་ལ་ཡང་དག་པར་བརྟེན་པའི་སྐལ་བ་བཟང་པོའི་གོ་སྐབས་འདི་ཉིད་གཞན་དོན་གཉེར་གཟུ་བོར་གནས་པའི་བློ་ལྡན་རྣམས་ལ་གནང་ཞིང་སྦྱིན་པར་མཛོད་ཅིག་དང་། ཟབ་མོའི་ཆོས་ཀྱི་ཕོངས་རྒུད་དང་བྲལ་ཞིང་མདོ་རྒྱུད་ངེས་དོན་མཆོག་ལ་ངེས་པ་རྙེད་པའི་སྐལ་བཟང་དམ་པར་འགྱུར་རོ། །དེས་ན་མདོ་སྔགས་ཀྱི་ཆོས་ཚུལ་ཐུན་མོང་དུ་གྱུར་པ་རྣམས་ནི་ཐོས་བསམ་སྒོམ་པ་གསུམ་གྱིས་རོ་བཅུད་ཞིམ་མངར་དང་ལྡན་པ་བདུད་རྩིའི་རྒྱ་མཚོ་ཆེན་པོ་དང་འདྲ་བ་ཡིན་པས་དེ་རྣམས་ལ་ཞུགས་ཤིང་མྱོང་བར་གྱུར་ཀྱང་ཐུན་མོང་མ་ཡིན་པའི་མདོ་རྒྱུད་ཟབ་མོའི་དགོངས་དོན་ཕུན་སུམ་ཚོགས་པ་གང་ཡིན་པ་དེ་ནི་བདུད་རྩིའི་རྒྱ་མཚོ་དེ་ཡི་ཡང་སྙིང་པོར་གྱུར་པ་ཡིད་བཞིན་གྱི་ནོར་བུ་དབང་གི་རྒྱལ་པོ་བཞིན་དུ་གནས་པ་ཡིན་པས་དེ་དག་རང་དང་གཞན་གྱི་གང་ཟག་གང་གི་སྙིང་ན་ངེས་པར་གནས་ཤིང་བཞུགས་པར་མཐོང་ན་དེ་ཉིད་ལྟར་སྣང་ལ་མཆོག་དམན་བཟང་ངན་ཅི་འདྲར་སྣང་ཡང་རུང་སྟེ་རང་མཐོང་གིས་སྙེམས་པ་མེད་པར་འབད་རྩོལ་བརྒྱ་ཕྲག་དག་གི་སྒོ་ནས་གུས་པ་མཆོག་གིས་བླང་བར་བྱ་སྟེ། ཟབ་མོའི་དོན་གྱིས་དབུལ་ན་གང་ཟག་སུ་ཡང་ལྟར་སྣང་ཅི་ཙམ་དུ་བཟང་ཡང་ཕན་པར་མི་འགྱུར་བས་གང་ཟག་ལ་མི་རྟོན་ཆོས་ལ་རྟོན་དགོས་པར་གསུང་པའི་ཕྱིར་གྲགས་སྙན་ཙམ་གྱིས་རྗེས་སུ་འབྲང་བར་མི་བྱ་བར་ངེས་དོན་ཟབ་མོའི་དོན་ལ་རྟོན་པས་བརྩོན་ཞིང་འབད་པ་རྣལ་འབྱོར་དུ་བྱ་དགོས་པ་ཡིན་ནོ། །དེ་ཡི་ཕྱིར་ན་ཐུན་མོང་མ་ཡིན་པའི་མདོ་རྒྱུད་ངེས་དོན་ཟབ་མོའི་དགོངས་དོན་ཟབ་ཅིང་རྒྱ་ཆེ་བ་རྣམས་ནི་ཐུན་མོང་གི་མདོ་སྔགས་རིགས་གནས་དང་བཅས་པ་མང་དུ་ཐོས་ཤིང་ལུང་རིགས་ལྡན་པས་གྲུབ་མཐའ་མང་དུ་སྨྲ་བས་ཀྱང་ཚུལ་བཞིན་དུ་རྟོགས་པ་མིན་ལ། དེར་ཡང་མ་ཟད་སྔོན་བསགས་སྐྱེས་ཐོབ་ཀྱི་ཤེས་རབ་ཆེ་ཞིང་ད་ལྟར་སྦྱང་བརྩོན་མི་དམན་པས་བློ་གྲོས་ཟབ་ཅིང་ཟབ་པ་ལྟར་སྣང་བ་རྣམས་ཀྱིས་གཏན་ཚིགས་རིགས་པའི་ཚོགས་ཀྱིས་དཔྱད་པར་བྱས་པས་ཀྱང་མི་ཕིགས་པའམ་མི་རྟོགས་པས་ཚུར་མཐོང་གི་སྤྱོད་ཡུལ་ལས་འདས་པའི་ཟབ་དོན་ས་འོག་གནས་པའི་ཡིད་བཞིན་དགོས་འདོད་ཀུན་འབྱུང་གི་གཏེར་མཛོད་འཛད་མེད་ནོར་བུའི་བང་ཁྱིམ་དང་འདྲ་བར་ཀུན་གྱི་མཐུན་སྣང་དུ་གྲུབ་པ་ཡིན་སླད། ལྟར་སྣང་ཅི་འདྲར་སྣང་ཡང་གང་ཟག་གང་གིས་འདི་ཉིད་ཡང་དག་པར་རྟོགས་དེ་རང་གིས་འཛིན་ཅིང་གཞན་ལ་སྤེལ་བ་དེ་ནི་ཚོགས་བསགས་སྒྲིབ་པ་དག་པའི་བློ་གྲོས་མཆོག་དང་ལྡན་པ་གཞན་ལས་ཁྱད་པར་དུ་འཕགས་པས་སྐྱེས་བུ་དམ་པ་ཉིད་དུ་འབྲས་བུའི་རྟགས་ཀྱིས་འཁྲུལ་བ་མེད་པར་ཤེས་ཤིང་རྟོགས་ནུས་པའི་ཕྱིར་ན་དུས་རྟག་ཏུ་དེ་ལ་གུས་པ་མཆོག་གིས་བརྟེན་ཅིང་མཉེས་པར་བྱས་ཏེ་གདམས་པའི་བདུད་རྩི་མྱོང་བར་བྱ་དགོས་སོ། །དེས་ན་མདོ་རྒྱུད་སྙིང་པོའི་དགོངས་དོན་ཟབ་མོ་ཇི་བཞིན་རྟོགས་པའི་བློ་གྲོས་ཀྱི་གཏེར་ཟབ་མོ་འབུམ་ཕྲག་ནོར་བུའི་སྣོད་མཆོག་ཉིད་དུ་ཕྱོགས་རེར་ཞེན་པའི་བདག་གི་བློ་འདི་ཡང་ཟབ་ཅིང་ཡངས་པ་རྒྱ་མཚོ་ཆེན་པོའམ་ཆེར་སྒྲུབས་པའི་ཟབ་མོའི་གདམས་པའི་ལེགས་བྱས་རྨད་དུ་བྱུང་བ་སློང་བའི་དུས་ལ་བབ་པར་རིག་ནས་ཀླུ་ཡི་དབང་པོ་བློ་གྲོས་ཕུལ་དུ་གྱུར་པའི་དཔལ་གྱི་རྩལ་ལས་བྱུང་བའི་ཟབ་རྒྱས་གདམས་པའི་རྒྱ་མཚོར་གུས་པ་ཆེན་པོས་དགའ་མགུ་ཡི་རང་བཞིན་དུ་ལེགས་པར་འཐུང་ཞིང་རོལ་བར་བྱའོ། །གང་གི་ཐུགས་གཉིས་སུ་མེད་པའི་བློ་གྲོས་ཟབ་མོའི་མཐུ་ལས་བབས་པའི་ལེགས་པར་བཤད་པའི་ཟབ་རྒྱས་ཀྱི་གདམ་པ་ཆུ་ཀླུང་བཟང་པོ་དག་གིས། དེ་ཉིད་གང་ལས་བྱུང་བའི་རྣམ་པར་དཔྱོད་པའི་བློ་གྲོས་ཟབ་ཅིང་རྒྱ་ཆེ་བ་ཡི་རྒྱ་མཚོ་ཆེན་པོའི་རྒྱ་ཁྱོན་ཟབ་ཡངས་ཕ་མཐའ་དང་བྲལ་བར་ངེས་པར་རྟོགས་ཤིང་། དེ་འདྲའི་བློ་མཆོག་རྒྱ་མཚོ་ལྟ་བུ་དེ་ཡི་འབྱུང་གནས་ཀླུ་ཡི་དབང་པོའམ་རྒྱལ་པོ་ལྟ་བུ་ནི་སྔ་འགྱུར་རིག་འཛིན་བརྒྱུད་པའི་ཞལ་ལུང་མདོ་རྒྱུད་མན་ངག་ཟབ་མོ་ཉིད་དུ་ངེས་པར་རྟོགས་པར་གྱུར་ཏོ། །དེས་ན་ཐུན་མིན་མདོ་རྒྱུད་མན་ངག་ཟབ་མོའི་དགོངས་དོན་ནམ་མཁའ་ལྟར་ཕ་མཐའ་དང་བྲལ་བ་གང་ཉིད་བློ་གྲོས་ཆེན་པོའི་ཧུབ་ཀྱིས་ཏེ་ཧུབ་གཅིག་གིས་སྐད་ཅིག་ཉིད་དུ་འདྲེན་ཅིང་ཟོས་པའི་དགོངས་བཅུད་ཟབ་མོ་སྙིང་ལ་ཀུན་ཏུ་ཕན་པའི་བདུད་རྩིའི་རྒྱ་མཚོའི་དཔྱིད་དཔལ་ཉིད་དུ་ལེན་པའི་མཐུ་རྩལ་ཆེན་པོ་ཚུལ་འདིར་སྦྱང་བརྩོན་གྱིས་ཞུགས་པའི་བློ་ལ་ངེས་པར་མྱུར་དུ་ཐོབ་པར་མཛད་པའི་ཕྱིར་ན་ངོ་མཚར་རྨད་དུ་བྱུང་བ་ཐུན་མིན་མདོ་རྒྱུད་མན་ངག་ཟབ་མོའི་ཆོས་ཀྱི་མར་མེ་བཟང་པོ་མཆོག་ཏུ་འབར་བ་འདི་ཉིད་སྐལ་བཟང་དམ་པ་རྣམས་ལ་གསལ་ཞིང་སྣང་བར་མཛོད་ཅིག་ཅེས་བསྐུལ་ཞིང་གསོལ་བཏབ་པའོ། །གསུམ་པ། དེ་སྐད་ཟེར་ཞིང་སོགས་ཚིགས་བཅད་བདུན་དང་རྐང་པ་གཅིག་གིས་བསྟན་ཏེ། གོང་དུ་ཇི་སྐད་བསྟན་པ་དེ་སྐད་ཟེར་ཞིང་གུས་པ་མཆོག་གིས་བཏུད་དེ་གནས་པའི་ཚེ། གཟུ་བོར་གནས་པའི་དྲང་སྲོང་མཆོག་དེ་ཡིས་དེ་ལ་ཡང་བློ་གྲོས་ཆུང་ཞིང་ཟབ་པ་མིན་པ་ཉིད་བློ་གྲོས་ཆེ་ཞིང་ཟབ་རྒྱས་སུ་སྒྲུབ་པ་བྱེད་པ་གོང་དུ་ཇི་སྐད་བསྟན་པ་དག་གི་དོན་རྣམས་བསྡུས་ཏེ་འདི་ལྟར་གདམས་ཏེ། དེ་ལ་དང་པོ་ཆོས་མཆོག་མདོ་རྒྱུད་ཟབ་མོ་སེང་གེའི་འོ་མ་ལྟ་བུ་འདི་ནི་བློ་གྲོས་ཟབ་མོའི་སྣོད་བཟང་པོ་རིན་ཆེན་གསེར་སྣོད་ལྟ་བུ་ཁོ་ནས་འཛིན་ཅིང་སྣོད་གཞན་ཕལ་བ་གང་དུ་ཇི་ལྟར་འབད་ཀྱང་མི་གནས་པར་སྣོད་ཀྱང་ཆག་ལ་བཅུད་ཀྱང་ཟག་ནས་ཆུད་ཟ་བ་ལྟར་བློ་གྲོས་དམན་པ་དག་གིས་ཇི་ལྟར་འབད་ཀྱང་མདོ་རྒྱུད་མན་ངག་ཟབ་མོའི་དགོངས་དོན་བློ་ལ་མི་ཤོང་ཞིང་མི་རྟོགས་པས་འཛིན་པར་མི་ནུས་པར་ཆུད་གཟན་པར་འགྱུར་ལ། ཆོས་མཆོག་མདོ་རྒྱུད་མན་ངག་ཟབ་མོའི་དོན་འདི་ཤོང་ཞིང་འཛིན་པའི་སྣོད་ནི་བློ་གྲོས་བཟང་པོ་ཟབ་ཅིང་རྒྱ་ཆེ་བ་འདི་ཁོ་ན་ཡིན་ནོ། །འོ་ན་དེ་ལྟ་བུའི་བློ་གྲོས་བཟང་པོ་གང་གིས་སྒྲུབ་ན། གོང་གི་དོན་རྣམས་བསྡུས་ཏེ་གཟུངས་སྤོབས་ཟབ་མོ་སྒྲུབ་པའི་སྒོ་ལ་འཇུག་པའི་ཐབས་ཀྱི་གདམས་ངག་གནད་དུ་དྲིལ་ནས་ཉམས་སུ་ལེན་པ་ནི་མན་ངག་གི་ཡང་ཟབ་དམ་པ་ཡིན་ཏེ། འདི་ལྟར་ཨ་ཞེས་པའི་ཡི་གེ་འདི་ནི་སྐྱེ་བ་མེད་པས་མེད་དགག་ཡིན་བཞིན་དུ་རང་སྣང་བ་སྟེ། དེས་ན་བདེན་པ་གཉིས་ཆར་མི་སྐྱེ་བར་བསྟན་པས་སྐྱེ་བ་མེད་པའི་སྒོ་མཚོན་བྱེད་ཡིན་པས་མ་སྐྱེས་པའི་ཆོས་ཀྱི་སྒོ་ཞེས་བྱའོ། །དེ་བཞིན་དུ་ར་ཞེས་པ་འདི་ནི་རྡུལ་མེད་པས་མཉམ་པ་ཉིད་དུ་རྟོགས་པ་ལ་རང་དོན་དུ་སྲིད་པ་དང་ཞི་བ་ལ་དགའ་བའི་ཡིད་ཀྱི་ཆགས་རྡུལ་མེད་པར་འཇུག་དགོས་པའི་སྒོ་མཚོན་བྱེད་ཡིན་པས་རྡུལ་དང་བྲལ་བའི་སྒོ་ཞེས་བྱའོ། །པ་ཞེས་པ་འདི་ནི་མཉམ་བཞག་ཡང་དག་པ་ལ་འཛིན་སྟངས་ཅི་ཡང་མེད་ཀྱང་དྲན་མེད་མུན་པ་འཐུམས་པོ་ལྟ་བུ་ལྷག་མཐོང་གི་སྣང་བ་དང་བྲལ་བའང་མིན་པས་དོན་དམ་མཐར་ཐུག་མཐོང་བའི་སྒོ་མཚོན་བྱེད་ཡིན་པས་དོན་དམ་སྣང་བའི་སྒོ་ཞེས་བྱའོ། །ཙ་ཞེས་པ་འདི་ནི་དཔྱད་པ་ཡང་དག་པས་མཐའ་བཞིའི་སྤྲོས་པ་ཉེ་བར་ཞི་བའི་ངེས་ཤེས་ཟབ་མོས་དྲངས་པའི་མཉམ་པར་འཇོག་ཚུལ་ཁྱད་པར་ཅན་ཡིན་པས་རྣམ་པར་རྟོག་པའི་འགྱུར་བའམ་བློས་བྱས་ཀྱི་འཆི་འཕོ་མེད་པར་མཉམ་པ་ཉིད་ཆོས་ཀྱི་སྐུར་གནས་པའི་སྒོ་མཚོན་བྱེད་ཡིན་པས་འཆི་འཕོ་སྐྱེ་བ་མེད་པའི་སྒོ་ཞེས་བྱའོ། །ན་ཞེས་པ་འདི་ནི་བདེན་པ་གཉིས་ལ་གཙོ་ཆེ་ཆུང་རྣམ་པ་ཀུན་ཏུ་མེད་དེ་སྣང་སྟོང་གཉིས་འབྲལ་མི་ཤེས་པའི་ཕྱིར་མདང་ཆ་བ་བཞིན་ནོ། །དེ་གཉིས་ཐ་སྙད་དུ་ནི་མགོ་མཉམ་སྟེ་ཐ་སྙད་སྒྲ་རྟོག་གི་ཡུལ་ཡིན་པས་སོ། །དོན་དམ་པར་དེ་གཉིས་དབྱེར་མེད་པའི་གནས་ལུགས་ནི་སྒྲ་རྟོག་གི་ལམ་ལས་འདས་པས་ན་མིང་དང་བྲལ་ཏེ་བསམ་གྱིས་མི་ཁྱབ་པར་སྟོན་པའི་སྒོ་མཚོན་བྱེད་ཡིན་པས་མིང་དང་བྲལ་བ་ཉིད་ཀྱི་སྒོ་ཞེས་བྱའོ། །དྷཱི་ཞེས་པ་འདི་ནི་དེ་འདྲའི་སྣང་སྟོང་བདེན་པ་དབྱེར་མེད་པའི་དོན་ཟབ་མོ་ཉིད་ཆོས་ཅན་རྡུལ་ཕྲན་ལྟ་བུ་གཅིག་གི་སྟེང་དུ་ད་ལྟ་ནས་གཏན་ལ་ཕབ་སྟེ་ཆོས་ཐམས་ཅད་མཉམ་པ་ཉིད་ཚུར་མཐོང་ལས་འདས་པའི་དོན་ཟབ་མོ་ཤེས་ཤིང་རྟོགས་ན་ཡང་། མཐུན་སྣང་གི་བལྟ་བྱའི་སྣང་བ་ལ་དཔྱད་དེ། དེ་དཔེར་བཟུང་ནས། སྣང་བ་དེ་ལ་དོན་དམ་སྤྲོས་བྲལ་གྱི་དབང་དུ་ཁས་ལེན་མེད་པའི་ཚུལ་དང་། ཐ་སྙད་སྣང་ཚུལ་ཙམ་དུ་བདུད་རྩི་དང་ཆུ་སོགས་ལ་ཁས་ལེན་ཡོད་པའི་ཚུལ་དང་དེ་གཉིས་མི་འགལ་བར་སྦྱར་ནས་ཐ་སྙད་ཀྱི་ཁས་ལེན་ཚུར་མཐོང་གི་རྣམ་བཞག་ཕར་ཕྱིན་ཐེག་པ་ནས་རྡོ་རྗེ་ཐེག་པའི་བར་དུ་ཤེས་པའི་སྒོ་མཚོན་བྱེད་ཡིན་པས་བློ་གྲོས་ཟབ་མོའི་སྒོ་ཞེས་བྱའོ། །དེ་ལྟར་ན་རྒྱལ་བས་གསུང་པའི་རྒྱུ་འབྲས་ཐེག་པའི་མདོ་འགགས་ཐམས་ཅད་དེར་འདུས་པ་ཡིན་པས་འདིའི་གནད་དོན་ཚུལ་བཞིན་དུ་ཤེས་པར་གྱུར་ན་མདོ་སྔགས་རྒྱ་མཚོའི་འགགས་མདུད་ཁྲོལ་བ་ཡིན་པས་རང་གིས་རྟོགས་པ་དང་གཞན་ལ་འདོམས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་འབྱེད་པ་ཡིན་ནོ། །དེས་ན་ཡི་གེའི་སྒོ་རེ་རེ་ལས་ཕྱོགས་དུས་ཀྱིས་བསྡུས་པའི་ཆོས་ཚུལ་ཚད་མེད་པ་གོ་ཞིང་རྟོགས་པར་བྱེད་པ་ནི་བརྡ་མི་ཟད་པ་ཞེས་བྱ་བ་ཡིན་ལ། དོན་གཅིག་ལས་བརྩམས་ཏེ་དོན་བསྐལ་བ་ནས་བསྐལ་བར་བརྗོད་ཀྱང་མཐར་ཕྱིན་པར་མི་འགྱུར་བས་དོན་མི་ཟད་པའང་ཡིན་ལ། ཡི་གེ་གཅིག་གི་ནང་དུའང་ཡི་གེ་ཀུན་འདུ་ཞིང་ཆོས་སྒོ་ཚད་མེད་པར་སྟོན་ནུས་པ་དང་། དོན་གཅིག་གི་ནང་དུའང་ཆོས་ཀུན་འདུ་ཞིང་དོན་གཅིག་གིས་ཀྱང་ཆོས་ཀུན་སྟོན་པར་ནུས་པ་ནི་བརྡ་དོན་གཉིས་ཀ་མི་ཟད་པ་ཡིན་ལ། དེ་དག་ཀུན་ཀྱང་ཐ་སྙད་དུ་འགགས་པ་མེད་ཅིང་རྟེན་འབྲེལ་ཟབ་མོ་རྟག་ཆད་དང་བྲལ་བར་རྟོགས་ཤིང་། ཐམས་ཅད་བསྡོམས་ནས་མཉམ་པ་ཉིད་ཟུང་འཇུག་གི་ཡེ་ཤེས་གཅིག་ཉིད་གཏན་ལ་ཕབ་ཅིང་རྟོགས་པ་ཡིན་པས་བློ་གྲོས་མི་ཟད་པའང་ཡིན་ནོ། །ཚུལ་འདི་ནི་ཆོས་ཀྱི་གཏེར་འདོན་པའི་མན་ངག་ཟབ་མོ་ཡང་ཡིན་ཏེ་ཡི་གེའི་སྒོ་ཨ་ལ་སོགས་པ་དྲུག་པོ་དེ་དག་རེ་རེར་ཡང་བདེན་པ་གཉིས་གཉིས་ཀྱི་ཚུལ་གྱིས་སྣང་སྟོང་བདེན་གཉིས་དབྱེར་མེད་ཟུང་འཇུག་སྐྱེ་འགག་དང་བྲལ་བར་དམིགས་ནས་སུ་སྟེ། འདི་ལྟར་ཡི་གེ་ཨ་ལྟ་བུ་རྗོད་བྱེད་དང་མ་སྐྱེས་པ་ལྟ་བུ་བརྗོད་བྱའི་དོན་དག་ཀྱང་གདོད་མ་ནས་སྐྱེ་བ་མེད་པས་མཉམ་པ་ཉིད་ཡིན་ལ་མཉམ་པ་ཉིད་ཀྱིས་མཉམ་པ་ཉིད་ལ་བརྗོད་དུ་མེད་དེ་ནམ་མཁའ་ལ་ནམ་མཁས་རི་མོ་བྲིས་པ་བཞིན་ཏེ། དེ་ལྟ་ནའང་བརྗོད་མེད་བརྗོད་ཀུན་གྱི་རྒྱུ་མཆོག་ཡིན་པས་བསྐལ་པ་ནས་བསྐལ་བར་བརྗོད་ཀྱང་ཆོས་ཀྱི་དབྱིངས་ལ་བྲི་གང་ངམ་ཟད་འཕེལ་ཡོང་ཡེ་མེད་ཅིང་ཆོས་ཐམས་ཅད་བརྗོད་པ་ཙམ་དུ་ཤེས་པ་དེ་ནི་དོན་དམ་པར་དམིགས་པའི་སྒོ་དང་། དེ་བཞིན་དུ་རྗོད་བྱེད་ར་དང་བརྗོད་བྱ་རྡུལ་དང་བྲལ་བ། རྗོད་བྱེད་པ་དང་བརྗོད་བྱ་དོན་དམ་འོད་གསལ། རྗོད་བྱེད་ཙ་དང་བརྗོད་བྱ་འཆི་འཕོ་མེད་པ། རྗོད་བྱེད་ན་དང་བརྗོད་བྱ་མིང་དང་བྲལ་བ། རྗོད་བྱེད་དྷཱིཿདང་བརྗོད་བྱ་ཟུང་འཇུག་གཉིས་སུ་མེད་པའི་ཡེ་ཤེས་ཉིད་དེ་ཚིག་དོན་དེ་དག་རེ་རེ་བཞིན་དུ་ཡང་རྗོད་བྱེད་དང་བརྗོད་བྱ་གཉིས་སྐྱེ་བ་མེད་པས་མཉམ་པ་ཉིད་ཡིན་པས་གང་གིས་གང་ཞིག་བརྗོད་དེ་བརྗོད་དུ་མེད་པར་ཡེ་ནས་གནས་པའི་གནད་ཀྱིས་བསྐལ་བར་བརྗོད་ཀྱང་བྲི་གང་བྲལ་བའི་ཆོས་ཀྱི་དབྱིངས་ལ་ཟད་འཕེལ་མེད་ཅིང་། ཆོས་ཐམས་ཅད་མིང་ངམ་བརྗོད་པ་ཙམ་དུ་ཤེས་པ་ནི་དོན་དམ་པར་དམིགས་པའི་སྒོའོ། །དེ་ལྟར་མཉམ་པ་ཉིད་ལས་མ་གཡོས་མི་གཡོ་གཡོ་བར་མི་འགྱུར་བཞིན་དུ་ཨ་ལས་གྱུར་པའི་ཡི་གེ་སྐྱེ་ཨ་ཉིད་མགྲིན་རྐན་སྤྱི་བོ་སོ་མཆུའི་གནས་ལྔར་བྱེད་རྩོལ་གྱིས་བསྒྱུར་བའི་ངོར་སྣང་བ་ཡིན། མཆན། གནས་ལྔ་པ་ཅན་ཨ་ར་པ་ཙ་སོགས་འདི་དག་དང་ཡི་གེ་གཞན་རྣམས་ཀྱིས་ཀྱང་། ཀུན་བྱང་གིས་བསྡུས་པའི་ཆོས་ཀུན་ཤེས་ཤིང་གོ་བོར་བྱེད་པ་ནི་རྟེན་འབྱུང་བསླུ་མེད་ཙམ་སྟེ། ཤིན་ཏུ་ངོ་མཚར་རྨད་དུ་བྱུང་བའི་ཆོ་འཕྲུལ་ཆེན་པོ་ཀུན་ཏུ་ཉེ་བར་སྟོན་པའོ་ཞེས་ཤེས་པ་ན་ཀུན་རྫོབ་ལ་དམིགས་པའི་སྒོ་སྟེ། དེ་གཉིས་དབྱེར་མེད་ཟུང་དུ་ཆུད་པའི་ངང་ནས་བློ་གྲོས་ཀྱི་གཏེར་ལ་སོགས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་མྱུར་དུ་འབྱེད་པའི་རྒྱུ་སྒྱུ་མའི་སྟེ་སྒྱུ་མ་ལྟ་བུའི་ཏིང་ངེ་འཛིན་མཆོག་ཏུ་གྱུར་པ་བསྒྲུབ་པར་བྱས་ནས་མདོ་རྒྱུད་མན་ངག་ཟབ་ཅིང་རྒྱ་ཆེ་བ་ཕ་མཐའ་མེད་པའི་རྒྱ་མཚོ་ཆེན་པོའི་ཆུ་ཉིད་བློ་གྲོས་ཟབ་མྱུར་གྱི་ཧུབ་ཀྱིས་ཏེ་ཧུབ་གཅིག་གིས་ལྟོ་བར་འདྲེན་ཅིང་ཆུབ་པར་ནུས་པའི་སྙིང་གའི་ནོར་བུ་གཉིས་སུ་མེད་པའི་ཡེ་ཤེས་དྲི་མ་མེད་པ་ལ་གཟུངས་དང་སྤོབས་པའི་བློ་ཡི་དཔལ་ཕུན་སུམ་ཚོགས་པ་ཉིད་དུ་རབ་ཏུ་འབར་བར་འགྱུར་རོ། །དེ་ལྟར་སྣང་སྟོང་ཟུང་འཇུག་ཟབ་མོའི་དོན་ལ་རང་བྱན་ཆུད་པའི་སྒོ་ནས་མཐའ་བཞིའི་སྤྲོས་པ་ཐམས་ཅད་ཁེགས་པའི་ཟབ་མོའི་ངེས་ཤེས་ཀྱི་ལམ་ནས་ཆོས་ཐམས་ཅད་ཀྱི་ཡིན་ལུགས་ཇི་ལྟ་བ་བཞིན་དུ་གཤིས་སུ་སོན་པ་ཡི་གནས་ལུགས་སེམས་དང་སེམས་བྱུང་གི་བློ་ལས་རབ་ཏུ་འདས་པ་ཡི་དབྱིངས་ཡེ་གཉིས་སུ་མེད་པའི་འོད་གསལ་གཉུག་མའི་དབྱིངས་ངེས་པ་དོན་གྱི་འཇམ་དཔལ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོའི་ངང་དུ་མ་བཅོས་པར་མཉམ་པར་ཞོག་ཅིག་དང་མཐའ་བྲལ་ལྟ་བའི་རྒྱལ་པོ་རིག་སྟོང་དབྱེར་མེད་བློ་བྲལ་རྫོགས་པ་ཆེན་པོ་ཀུན་མཉམ་ཡངས་པའི་ཀློང་ཆེན་པོར་ཇི་བཞིན་མཉམ་པར་བཞག་པའི་བདེན་དོན་མཐར་ཐུག་ཡིད་དཔྱོད་ལས་འདས་པའི་ཆོས་ཉིད་མངོན་སུམ་དུ་མཐོང་བ་ལས་ཡོད་མེད་ལ་སོགས་པའི་མཐའ་བཞིའི་འཛིན་སྟངས་ཀྱི་བློ་ངན་མུན་པའི་སྣང་བ་ཐམས་ཅད་ཀུན་དང་གིས་དྭངས་ཤིང་འགགས་པའི་འོད་གསལ་བའི་མཁྱེན་གཉིས་ཡེ་ཤེས་ཀྱི་ཉི་མ་ཁོང་ནས་འཆར་བར་འགྱུར་ཞིང་ཇི་ལྟ་ཇི་སྙེད་ཀྱི་དགོངས་པའི་ཡེ་ཤེས་ཀློང་རྡོལ་རེ་མགྲིན་པའི་རྩ་འཁོར་གསུང་ཡི་གེ་འཁོར་ལོའི་སྤྲིན་དུ་དེངས་ནས་འཆད་རྩོད་རྩོམ་པ་གང་ལའང་ཐོགས་པ་མེད་པར་སུས་ཀྱང་མི་འཕྲོག་པའི་རྣམ་དཔྱོད་འགྲན་ཟླ་ཐམས་ཅད་དང་བྲལ་བ་ལ་དབང་འབྱོར་བར་གདོན་མི་ཟ་བ་ཁོ་ན་ཡིན་ནོ། །གསུམ་པ་ཐ་མར་དགེ་བ་མཇུག་གི་དོན་བསྟན་བཅོས་རྫོགས་པའི་བྱ་བ་ལ་གསུམ། བསྟན་བཅོས་ཇི་ལྟར་བྱུང་བའི་གླེང་གཞིའི་མངོན་བརྗོད་བརྩམས་པའི་དགོས་པ་དང་བཅས་པ། ལྷག་བསམ་ཤེས་རབ་ཀྱིས་གོ་ཕྱེས་ཤིང་གཞན་ཕན་སྙིང་རྗེས་ཇི་ལྟར་བརྩམ་པའི་མཛད་བྱང་། ཚུལ་འདིར་བརྟེན་ན་ཐེག་པ་མཆོག་གི་ལམ་བཟང་རྙེད་པར་ངེས་པས་བརྟེན་པར་གདམས་པའོ། །དང་པོ། གཟུར་གནས་དཔྱོད་པ་སོགས་ཚིགས་བཅད་གཉིས་ཀྱིས་བསྟན་ཏེ། གང་ལ་དྲི་བའི་གནས་རྩོམ་པ་པོ་རང་གི་བློ་གྲོས་ཕྱོགས་སུ་མ་ལྷུང་བའི་གཟུར་གནས་ཏེ་གཟུ་བོར་གནས་པའི་རྣམ་པར་དཔྱོད་པ་དྲང་པོ་ཉིད་མཁས་པའི་དྲང་སྲོང་ཆེན་པོ་ཉིད་དུ་བཀོད་པ་སྟེ། གང་གིས་དྲི་བ་པོ་ཡང་རང་གི་བློ་ཟབ་མོའི་གནས་ལ་འགལ་འདུའི་དོགས་པ་ཐོལ་བྱུང་དུ་ཤར་བས་རྣམ་པར་རྟོག་པའི་ཉིད་ལྡོམ་བུ་པ་རྟོག་གེའི་བརྒལ་བརྟགས་བྱེད་པ་པོར་བཀོད་དེ་བརྗོད་ནས་དྲང་སྲོང་དེ་ལ་ལྡོམ་བུ་པ་དེས་དྲིས་ཤིང་བརྒལ་ལན་གྱི་ཚུལ་གྱིས་ནི་ཤིན་ཏུ་རྟོགས་པར་དཀའ་བའི་གནད་ཟབ་མོ་རྒྱལ་སྲིད་རིན་པོ་ཆེ་སྣ་བདུན་གྱི་གྲངས་དང་ལྡན་པ་རབ་ཏུ་གསལ་བར་ལེགས་པར་བཤད་པ་ཡིན་ནོ། །དེ་ཡང་བློ་གྲོས་ན་ཚོད་མ་སྨིན་པས་ཆུང་བ་རྟོག་གེ་བ་བདག་འདྲ་ཡིས་སྐྱེས་སྦྱང་བློ་མཆོག་མངའ་བར་གྲགས་པའི་ཆེན་པོ་རྣམས་ཀྱང་སོམ་ཉིའི་དྲྭ་བར་འཕྱན་པའི་གནས་ཤིན་ཏུ་ཟབ་ཅིང་རྟོགས་པར་དཀའ་བ་རྟོག་གེའི་རིགས་མདུང་འབུམ་གྱིས་མི་ཕིགས་པའི་རབ་ཏུ་བརླིང་བའི་དོན་དེ་རྣམས་བློ་གྲོས་ཆེན་པོ་མངའ་བའི་འཕགས་པའི་གང་ཟག་མཆོག་རྣམས་ཀྱིས་ཐུགས་གཉིས་སུ་མེད་པའི་ཡེ་ཤེས་ཟབ་པ་དང་རྒྱ་ཆེ་བའི་མཁྱེན་པའི་གཏེར་མཛོད་དམ་པ་ཉིད་ནས་ཀྱང་ཡང་དག་པར་བླང་བ་ཇི་ལྟ་བ་བཞིན་དུ་གཟུར་གནས་དམ་པ་ཡོངས་ཀྱི་དཔྱིད་དཔལ་དུ་འདི་ན་ལེགས་པར་བཀོད་པར་བྱས་པ་ཡིན་ནོ། །གཉིས་པ། དེ་སྐད་སྨྲས་པའི་སོགས་ཚིགས་བཅད་གཉིས་ཀྱིས་བསྟན་ཏེ། དེ་སྐད་ཟབ་དོན་ཡང་དག་པར་སྨྲས་པའི་ལེགས་པར་བཤད་པའི་འབྲུག་སྒྲ་སྙན་པར་སྒྲོགས་པ་དང་བཅས་པའི་ཆོས་ཀྱི་ཆར་རབ་ཏུ་བཟང་པོ་འབབ་པ་འདི་ཡང་རྒྱལ་བའི་སྲས་པོ་མཁས་མཆོག་གྲངས་མེད་བྱེ་བས་རྟོགས་ཤིང་རོལ་བར་བྱ་བའི་ཟབ་མོའི་དགོངས་བཅུད་དམ་པ་བགྲོད་པ་གཅིག་པའི་ལམ་གནད་སྙིང་པོར་གྱུར་པ་ཡིན་ཅིང་དེ་འདྲའི་ཟབ་རྒྱས་ཆོས་ཀྱི་ཚུལ་ལ་ཡིད་ཆེས་ཀྱི་དད་པས་དགའ་བཞིན་གྱིས་མཉན་པར་བྱས་པས་གནས་སྐབས་མཐར་ཐུག་གི་དོན་གཉིས་ཕུན་སུམ་ཚོགས་པའི་ལམ་དང་འབྲས་བུའི་ཡོན་ཏན་རྒྱ་ཆེན་པོ་ཐོབ་པར་སེམས་པའི་ལྷག་པའི་བསམ་པ་རྨ་མེད་པ་ཡིས་ཀུན་ནས་བསླང་སྟེ། གང་ཞིག་དྲིས་པ་རྣམས་ལ་དགའ་སྤྲོ་ཡི་རངས་བའི་ཚུལ་གྱིས་ལན་གྱི་ཁྱད་པར་ཟབ་དོན་ཆོས་ཀྱི་བདུད་རྩིའི་སྨན་ཆར་ཡངས་པའི་གོ་སྐབས་འདི་ཉིད་གསལ་ཞིང་ལེགས་པར་དབྱེ་བར་བྱས་པ་ཡིན་ནོ། །གང་མདོ་རྒྱུད་ཟབ་མོའི་དགོངས་དོན་ཇི་བཞིན་རྙེད་པའི་ལམ་དངོས་ཡང་དག་པར་མཐོང་བའི་མིག་ཏུ་གྱུར་པ་བདེན་པ་གཉིས་ཀྱི་དེ་ཁོ་ན་ཉིད་དཔྱོད་པའི་ཚད་མའི་ལམ་ནས་ངེས་པའི་ཤེས་པ་ཟབ་མོ་ཐེ་ཚོམ་གྱི་སྨག་ཐམས་ཅད་དང་བྲལ་བ་ཉིད་དགོས་པ་དེ་ཡི་ཕྱིར་ན་ཚད་མ་དང་བྲལ་ན་ངེས་ཤེས་ཟབ་མོ་མི་རྙེད་པས་ལམ་གྱི་གཟུགས་བརྙན་དུ་འགྱུར་བ་དེ་ལྟ་བས་ན། དཔལ་ཆོས་ཀྱི་གྲགས་པ་དང་དཔལ་ལྡན་ཟླ་བའི་རང་ལུགས་བཞིན་བདེན་གཉིས་སོ་སོར་དཔྱོད་པའི་ཚད་མ་དང་མཐར་ཐུག་བདེན་གཉིས་དབྱེར་མེད་ཟུང་འཇུག་ངེས་པའི་ཚད་མའི་མིག་བཟང་པོ་དཔྱད་གསུམ་གྱིས་སྦྱངས་ཤིང་བགྲད་དེ་མདོ་རྒྱུད་ཟབ་མོའི་གནས་ལ་གཞན་དྲིང་མི་འཇོག་པར་ཡང་དག་པར་འཇུག་དགོས་པ འི་ཚུལ་དེ་ལྟར་ཡང་དང་ཡང་དུ་མདོ་རྒྱུད་ཟབ་རྒྱས་ཀྱི་དོན་མཆོག་རྟོགས་པར་འདོད་ཅིང་དོན་དུ་གཉེར་བར་སེམས་པའི་བློ་ལྡན་གཟུ་བོར་གནས་པའི་སྐལ་བཟང་དུ་མའི་དོན་དུ་ཡང་དག་པར་དམིགས་ཏེ་ཟབ་རྒྱའི་ཆོས་ཀྱི་གཟུགས་བརྙན་ཀུན་གསལ་ཡིད་ཀྱི་མེ་ལོང་དྲི་མ་མེད་པའི་ངོས་ལ་ཇི་ལྟར་ཤར་བ་བཞིན་དུ་རྣམ་དཔྱོད་བློ་ཡི་རྩེད་འཇོའི་རོལ་པས་དྷཱིཿམིང་ཅན་གྱིས་ཏེ་བློ་གྲོས་དྲི་མེད་ཀྱིས་ལེགས་པར་སྤེལ་ཞིང་བྲིས་པར་མཛད་པ་ཡིན་ནོ། །གསུམ་པ། བདེ་གཤེགས་ཆོས་ཚུལ་སོགས་ཚིགས་བཅད་གཅིག་གིས་བསྟན་ཏེ། བདེ་བར་གཤེགས་པ་སངས་རྒྱས་བཅོམ་ལྡན་འདས་རྣམས་ཀྱི་བཀའ་མདོ་རྒྱུད་ཀྱི་ཆོས་ཚུལ་ཟབ་མོ་ནམ་མཁའི་མཐའ་དང་མཉམ་པ་ཇི་སྙེད་པ་ཐམས་ཅད་རྣམ་པ་ཀུན་ཏུ་སྒྲ་དང་རྟོག་པས་བརྗོད་པར་མི་ནུས་ཤིང་ཟད་པར་ཡང་མི་འགྱུར་མོད་ཀྱང་ཟབ་མོའི་གནད་ལ་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བའི་སྣང་བ་མཆོག་ཏུ་གསལ་བར་བྱེད་པ་རིན་པོ་ཆེ་ཡི་སྒྲོན་མེ་འདིར། ཡང་དག་པར་བརྟེན་པར་བྱས་ན་མདོ་རྒྱུད་ཐེག་མཆོག་ཟབ་མོའི་ལམ་བཟང་པོ་རང་གིས་ཇི་བཞིན་དུ་བདེ་བླག་ཏུ་རྙེད་ཅིང་རྟོགས་ནས་གཞན་ལ་ནོར་འཁྲུལ་མེད་པར་སྟོན་པར་ནུས་པས་ན་གཟུ་བོར་གནས་པའི་བློ་ཅན་ཆོས་ཀྱི་སྤྱན་ལྡན་སྐལ་བཟང་མཁས་པའི་ཚོགས་ཀྱིས་ལེགས་པར་བརྟེན་པར་མཛོད་ཅིག་ཅེས་ཡང་དག་པར་གདམས་པར་མཛད་པའོ། །སླར་རྗེ་ཉིད་ཀྱིས་གཟིགས་གནང་མཛད་པའི་ཞལ་བྱང་ནི། ངེས་ཤེས་རིན་པོ་ཆེའི་སྒྲོན་མེ་འདི་རང་ལོ་ཤིན་ཏུ་གཞོན་ཞིང་སློབ་གཉེར་གསར་བུ་པའི་དུས་ཞིག་ན་འཕྲལ་དུ་ཡིད་ལ་ཤར་རྩོམ་སྟན་གཅིག་པར་བྲིས་པ་ཡིན་མོད་དོན་ལ་འགལ་བ་མེད་ཅིང་གོ་རྒྱུ་གནད་ཅན་འདུག་པས་མ་བཅོས་པར་དེ་ཀར་བཞག་པ་ཡིན་ནོ་ཞེས་མི་ཕམ་པས་རང་ལོ་ང་བདུན་པར་སྨྲས་པ་དགེའོ། །ཞེས་པས་ཚིག་གི་སྡེབ་སྦྱོར་ལྷུར་མ་བླང་བར་དོན་ལ་རྟོན་པར་བྱས་པ་ཡིན་ནོ་ཞེས་ཚིག་ལ་མི་རྟོན་དོན་ལ་རྟོན་པར་གདམས་པའི་ཤུགས་ཀྱིས་གང་ཟག་ལ་མི་རྟོན་ཆོས་ལ་རྟོན་པ་དང་། དོན་ལའང་དྲང་དོན་ལ་མི་རྟོན་ངེས་དོན་ལ་རྟོན་པ་དང་། ངེས་དོན་ལའང་རྣམ་ཤེས་ཀྱི་སྤྱོད་ཡུལ་ལ་མི་རྟོན་པར་ཡེ་ཤེས་ཀྱི་སྤྱོད་ཡུལ་ལ་རྟོན་པར་གདམ་པར་མཛད་པ་འདི་ནི་མཁས་པ་ཡོངས་ཀྱི་ཐུགས་ཀྱིས་བརྣག་བྱ་གཡར་དམ་དུ་བྱ་བའི་གདམས་པ་ཕུན་སུམ་ཚོགས་པ་ཞིག་ལགས་སོ། །སླར་སྨྲས་པ། རྨད་བྱུང་ངེས་དོན་ཟབ་མོའི་འཕྲུལ་གྱི་སྒོ། །འཁྲུལ་མེད་ལུང་རིགས་ཚད་མའི་ལེགས་འདྲེན་པས། །ཐབས་མཆོག་ངེས་ཤེས་ནོར་བུའི་འོད་སྣང་འདི། །བློ་ལྡན་བློ་ཡི་དཔལ་དུ་ཤར་བ་བཞིན། །མདོ་རྒྱུད་གྲུབ་མཐའི་ལུང་རིགས་མན་ངག་གནད། །ཐེ་ཚོམ་དྲྭ་བར་ཆུད་པའི་རྩོད་རིགས་བརྒྱ། །སྔོན་མེད་ལེགས་བཤད་མཐོན་མཐིང་རལ་གྲི་ཡིས། །གཅོད་འདི་འཇམ་དཔལ་རྡོ་རྗེའི་ཕྲིན་ལས་གར། །དེ་སླད་སྐྱེས་སྦྱང་བློ་གྲོས་དམན་ན་ཡང་། །ཟབ་དོན་ངེས་གསང་མཆོག་གི་དགོངས་པའི་བཅུད། །ཡིད་ཀྱི་དཔྱིད་དུ་འགུགས་པའི་སྐལ་བཟང་ལ། །སེམས་ནས་དང་བའི་ཚུལ་གྱིས་འཇུག་ཁུལ་བྱས། །དེ་འདྲ་ན་ཡང་བློ་གྲོས་སྣང་བའི་སྒོ། །ངེས་འབྱེད་དོན་གཟིགས་འཕགས་པའི་དགོངས་གནད་དང་། །སོ་སྐྱེས་ཡིད་དཔྱོད་ཚིག་གི་རི་མོ་གཉིས། །གསེར་དང་ར་གན་མཉམ་པར་སུ་ཞིག་ལེན། །འོན་ཀྱང་དམ་པའི་ཞལ་སྐྱེམས་ཚད་མའི་ལུང་། །རྗེས་འབྲེལ་གཟུ་བོའི་བློ་ཡིས་ལེགས་དཔྱད་ནས། །སྨྲས་ཕྱིར་རི་དྭགས་རོ་ལས་གླ་རྩི་བཞིན། །བློ་སྐྱོན་རྙོག་མས་སྦག་པ་མེད་དམ་སྙམ། །འདི་ན་དལ་འབྱོར་དཔལ་གྱིས་ཉེར་འཁྱུད་པའི། །དྲི་མེད་རྒྱལ་བསྟན་མཇལ་བའི་དཔྱོད་ལྡན་རྣམས། །གཏན་གྱི་འདུན་མ་མ་ནོར་དམ་པའི་ལམ། །གང་འདིར་ཐོས་བསམ་སྒོམ་པས་འཇུག་མཛོད་ཀྱེ། །ཚུལ་འདི་མཁན་ཆེན་མཆོག་གི་ལེགས་གསུངས་ལ། །བརྟེན་ནས་དགོངས་དོན་སོར་བཞག་བྱས་ན་ཡང་། །མ་རྟོགས་བྱིས་བློས་འཁྲུལ་ཆ་གང་མཆིས་ཀུན། །རྩ་གསུམ་ལྷ་དང་ཆོས་སྤྱན་ལྡན་ལ་འཆགས། །འདིས་མཚོན་དུས་གསུམ་བསགས་པའི་ལེགས་ཚོགས་རྣམས། །ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །བཤད་སྒྲུབ་འཁོར་ལོ་གསུམ་གྱི་མངའ་ཐང་གིས། །ཕྱོགས་མཐར་ཁྱབ་ཅིང་རྒྱས་པའི་རྒྱུ་རུ་བསྔོ། །དེ་ཡི་མཐུ་ལས་མཁའ་ཁྱབ་ཡིད་ཅན་ཀུན། །ཟབ་མོའི་ལམ་འདིར་ངེས་པ་མཆོག་རྙེད་ནས། །ཐེག་གསུམ་བདུད་རྩིའི་སྨན་ཆར་ལ་རོལ་ཏེ། །དོན་གཉིས་འབྱོར་བས་མངོནཔར་མཛེས་གྱུར་ཅིག །བདག་ཀྱང་དེངས་ནས་བྱང་ཆུབ་མཆོག་གི་བར། །ལེགས་བཤད་འདི་དང་ནམ་ཡང་མི་འབྲལ་ཞིང་། །ཟབ་རྒྱས་མདོ་སྔགས་ཆོས་ཚུལ་མ་ལུས་པར། །འཇུག་པའི་ཞི་ལྷག་ཟུང་འབྲེལ་ཐོབས་པར་ཤོག །འདི་དང་གང་འབྲེལ་འཇམ་པའི་དབྱངས་ཉིད་ཀྱིས། །བྱིན་བརླབས་རྗེས་བཟུང་ཚེ་རིང་ནད་མེད་ཅིང་། །ངེས་དོན་སྙིང་པོའི་ལམ་བཟང་མཐོང་གྱུར་ཏེ། །ཕྱོགས་དུས་ཀུན་ཏུ་འཛིན་སྐྱོང་སྤེལ་གྱུར་ཅིག །མཁའ་ཁྱབ་ཞིང་གི་རྒྱལ་བ་སྲས་བཅས་དང་། །རབ་འབྱམས་རྩ་གསུམ་རྒྱ་མཚོའི་བདེན་མཐུ་ཡིས། །ཇི་ལྟར་སྨོན་པ་འགྲུབ་པའི་མཐུན་འགྱུར་དང་། །ཕྱོགས་དུས་ཀུན་ཏུ་དགེ་བའི་བཀྲ་ཤིས་རྩོལ། །ཅེས་པ་འདི་ཡང་སྐུ་སྐྱེས་ཐུབ་བསྟན་མཁས་བཙུན་བློས་གྲོས་གང་གིས་གཞུང་འདི་ཉིད་ཐུགས་ལ་འཛིན་ཅིང་ནན་ཏན་སྙིང་པོར་བྱེད་པ། ཟླ་བ་བཅུ་གཉིས་སུ་སྒྲུབ་པའི་རྣལ་འབྱོར་ལ་དམ་བཅའ་མཛད་ཅིང་། འཆི་ངེས་ཀྱི་སྲོག་བསླུ་བདུན་སོགས་ལེགས་བྱས་དགེ་བའི་སྐྱེས་དང་། གཞན་ཡང་བཀྲ་ཤིས་པའི་ལྷ་རེག །རིན་ཆེན་གཉིས་པའི་མེ་ཏོག་ངོ་མཚར་བའི་རྟགས་ཅན། རང་ལ་དུས་སུ་མཁོ་བའི་ཤར་རྒྱལ་མོ་རོང་གི་ཆུ་ཤོག་ཡུག་གྲངས་སོགས་དངོས་པོའི་རྫས་དང་བཅས་ཏེ་དོན་གཉེར་སྤྲོ་བའི་གསུང་གིས་ལན་མང་དུ་སྙིང་ནས་བསྐུལ་བ་ལྡོག་ཏུ་མ་ནུས་ནས། སྐྱབས་གཅིག་འཁོར་ལོའི་མགོན་པོ། རིས་མེད་བསྟན་པའི་མངའ་བདག །མཁས་བཙུན་གྲུབ་པའི་གོ་འཕང་མཐོན་པོར་གཤེགས་པའི་ཀཱཿཐོག་མ་ཧཱ་པཎྜི་ཏ། ༧བྱམས་ཆེན་ཏཱ་ཡི་སི་ཏུ་རིན་པོ་ཆེ་དང་། རྩོད་བྲལ་རིག་སྔགས་འཆང་བ། མཁྱེན་བརྩེ་ནུས་པའི་གཏེར་ཆེན། སྐྱབས་མགོན་འབྲེལ་ཚད་དོན་ལྡན། སྟོབས་བཅུའི་རྒྱལ་ཐབས་ལ་མངའ་དབང་བརྙེས་པའི། ༧གྲུབ་དབང་བྱམས་པ་ཆོས་འཛིན་རིན་པོ་ཆེ་ཟུང་གི་ཞབས་རྡུལ་ལ་སྤྱི་བོས་རེག་པའི་སྐལ་བཟང་ཐོབ་ཅིང་། གཞན་ཡང་སྤོབས་པའི་གཏེར་བརྒྱད་གྲོལ་བའི་ཀུན་མཁྱེན་པདྨ་བི་ཛ། སྔ་འགྱུར་བསྟན་པའི་སྲོག་ཤིང་ཀུན་བཟང་ཆོས་ཀྱི་གྲགས་པ། འོད་གསལ་རིག་པའི་གཏེར་མཛོད་ངག་དབང་རྡོ་རྗེ་གཟི་བརྗིད། མདོ་རྒྱུད་ལེགས་བཤད་ཀྱི་འབྱུང་གནས་ཐུབ་བསྟན་དུལ་བའི་སྡེ། འཇམ་དབྱངས་སྤྲུལ་པའི་ཟློས་གར་མཆོག་སྤྲུལ་བློ་གྲོས་རྒྱ་མཚོ་སོགས་དམ་པ་དུ་མའི་བཀའ་དྲིན་གྱིས་འཚོ་བའི་རྨོངས་རྟུལ་བཙུན་གཟུགས་ཐུབ་བསྟན་མཁྱེན་བརྩེའི་བློ་གྲོས་ཞེས་བྱ་བའི་གདོལ་སྤྱོད་སྙོམ་ལས་མཁན་དེས། གསེར་སྨད་དབང་ཤར་ཆོས་སྡེའི་གཡས་ལུང་། སྐྱེ་མེད་རང་ཤར་སློང་གི་ཡང་དབེན། བཀྲ་ཤིས་ཉིན་མོར་བྱེད་པའི་སྤང་ལྗོངས། ལྷུན་གྲུབ་པདྨ་ཆོས་སྡིངས་ཀྱི་རི་མགུལ། །མཐིང་མདོག་མིག་སྨན་ཐིག་ལེའི་ལྡིང་ཁང་། གཙུག་ལག་ནོར་བུ་རྒྱས་པའི་དགའ་བའི་ཚལ་དུ་དུས་ཚེས་དགེ་བར་བྲིས་པ་འདིས་ཀྱང་སྔ་འགྱུར་རྡོ་རྗེ་སྙིང་པོའི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལམ།། །།