གསང་བ་སྙིང་པོའི་རྒྱུད་ཀྱི་སྤྱི་དོན།

གསང་བ་སྙིང་པོའི་རྒྱུད་ཀྱི་སྤྱི་དོན་སྨན་ལུང་མི་བསྐྱོད་རྡོ་རྗེས་མཛད་པ་བཞུགས་སོ། །གང་ཞིག་དངོས་གཉིས་ལམ་གསུམ་མ་ལུས་ཆོས། །ཡོད་སོགས་མཐའ་རྣམས་བྲལ་ཕྱིར་ལྷུན་གྲུབ་པས། །དེ་བཞིན་ཉིད་དུ་མཐར་སོན་འབྲས་མཆོག་ཅན། །བདུན་ལྡན་སྐུ་ལྔའི་བདག་ལ་ཕྱག་འཚལ་ལོ། །དེ་ལྟར་ཕྱོགས་དུས་རྒྱལ་བ་མ་ལུས་པའི། །གསུང་གཅིག་གདུལ་བྱ་བློ་ཡི་བྱེ་བྲག་གིས། །སོ་སོར་འཇལ་བ་རིག་པའི་བྱིན་རླབས་ཡིན། །བརྒྱད་ལྡན་རྒྱུད་རྒྱལ་རྡོ་རྗེའི་ཚིག་ལ་མོས། །དེ་དོན་དགོངས་པ་ཕྱིན་ཅི་མ་ལོག་པར། །སྟོན་མཛད་གསུམ་བརྒྱུད་མཚན་ལྡན་བླ་མ་ཡི། །ཞབས་བཏུད་རྩ་བཤད་རྒྱུད་རྣམས་སྤྱི་དོན་འདི། །དུས་བཞི་ཕྱོགས་བཅུ་ཀུན་ཏུ་རྒྱས་གྱུར་ཅིག །འདིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས་རྩ་བའི་རྒྱུད་གཙོར་བླངས་ཏེ། རྩ་རྒྱུད་བཤད་རྒྱུད་གཉིས་ཀྱི་སྤྱིའི་དོན་རྣམ་པར་བཞག་པ་བསྟན་པ་ལ་གཉིས་ཏེ། བསྟན་པའམ་ཐེག་པ་སྤྱིའི་འབྱུང་ལུགས་ལྟར་གཏན་ལ་དབབ་པ་དང་། བྱེ་བྲག་ཏུ་རྒྱུད་འདི་ཉིད་ཀྱི་གནས་ཚུལ་ལྟར་གཏན་ལ་དབབ་པའོ། །དང་པོ་ནི་གོང་དུ་བསྟན་ནས། འདིར་གཉིས་པ་བྱེ་བྲག་ཏུ་རྒྱུད་འདི་ཉིད་ཀྱི་གནས་ཚུལ་ལྟར་གཏན་ལ་དབབ་པ་འདི་དག་གི་བརྗོད་བྱ་རྣམས་གསལ་བར་སྟོན་པའི་མན་ངག །ཐུགས་ཐིགས་དང་སྤར་ཁབ་ལས་སྣང་བ་བཞིར་བཤད་དེ། ཇི་སྐད་དུ། རང་བཞིན་བདེ་གཤེགས་གདུལ་བྱ་ཡི། །སྣང་བ་གསུམ་གྱི་ངོ་བོ་ལ། །རྒྱུད་ཀྱི་དབྱེ་བ་རྣམ་པར་གཞག །གཅིག་ལ་གསུམ་གྱི་ངོ་བོ་ཡང་། །འཁྲུལ་པའི་སྣང་བས་གསུམ་དུ་འགྱུར། །དེས་ན་སྣང་བ་བཞི་དག་ཏུ་ཞེས་པས་གཞི་རང་བཞིན་གྱི་སྣང་བ་དང་། ཞར་བྱུང་འཁྲུལ་པའི་སྣང་བ་དང་། ལམ་གདུལ་བྱའི་སྣང་བ་དང་། འབྲས་བུ་དེ་བཞིན་གཤེགས་པའི་སྣང་བའོ། །སྤྱན་འགྲེལ་ལས་རིགས་སམ་རྣལ་འབྱོར་གསུམ་དུ་བཤད་དེ། ཚད་མ་གསུམ་གྱི་དངོས་པོ་ཡིས། །རྣལ་འབྱོར་གསུམ་གྱི་ཕུང་པོ་ལ། །རིགས་དང་སྣང་བའི་ཡན་ལག་བཞག །དེ་ཉིད་ཐུར་མའི་མཆོག་ཏུ་བཤད། །ཅེས་པས། མི་འགྱུར་ཞིང་མ་ཆད་པ་ཕྱི་མོའི་རིགས་སམ་རང་བཞིན་གྱི་རྣལ་འབྱོར་དང་། རྒྱུད་དུ་བྱུང་ཞིང་མི་གཏོང་བ་རྩོལ་བའི་རིགས་སམ་ལམ་གྱི་རྣལ་འབྱོར་དང་། རྒྱུད་དུ་བྱུང་ཟིན་པས་མཐར་ཐུག་པ་འབྲས་བུའི་རིགས་སམ་འབྲས་བུའི་རྣལ་འབྱོར་རོ། །རིམ་གསུམ་དང་མངོན་རྟོགས་ལས་རྒྱུད་དམ་གཞི་ལམ་འབྲས་བུ་གསུམ་དུ་བཤད་དེ། གཞི་ལམ་འབྲས་བུའི་ཤེས་བྱ་རྣམས། །འབྲུ་མཐུན་དོན་ཚིག་ཤེས་བྱའི་ཕྱིར། །དངོས་པོ་གསུམ་གྱི་གོ་རིམ་སྡེབ། །ཅེས་པས། གང་རྟོགས་བྱ་གཞིའི་རྒྱུད་དང་། གང་གིས་རྟོགས་ཤིང་བགྲོད་པ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དོ། །དེ་ལྟར་དེ་དག་མིང་གི་རྣམ་གྲངས་ཡིན་ཞིང་། དེ་དག་གི་བྱེ་བྲག་རྣམས་ལྡོག་པ་ཐ་དད་པ་སྟེ། རང་བཞིན་འཁྲུལ་པ་དང་བཅས་པའི་ལྡོག་པ་ནི་རང་བཞིན་གྱི་སྣང་བ་ཡིན་ལ། བསལ་བྱ་འཁྲུལ་པའི་ལྡོག་པ་ནི་གཉིས་པ་ཡིན་ཞིང་། སེལ་བྱེད་ཀྱི་ལྡོག་པ་ནི་གསུམ་པ། དེས་དག་པའི་ལྡོག་པ་ནི་འབྲས་བུ་དེ་པའི་སྣང་བའོ། །དེ་ཡང་། སྣང་བ་གསུམ་གྱི་ངོ་བོ་ལ། །རྒྱུད་ཀྱི་དབྱེ་བ་རྣམ་པར་གཞག །ཅེས་པས། རང་བཞིན་གྱི་སྣང་བ་གཞིའི་རྒྱུད་དང་། གདུལ་བྱའི་སྣང་བ་ལམ་གྱི་རྒྱུད་དང་། དེ་པའི་སྣང་བ་འབྲས་བུའི་རྒྱུད་དང་གསུམ་དུ་བསྡུས་ཏེ་ཤེས་པར་བྱའོ། །དེ་ཡང་གསང་བ་བརྟན་པའི་བརྗོད་བྱ་རྣམས་སྤྱི་ཐེམས་བཞིས་འཆད་པར་བཤད་དེ། མདོའི་ང་གཅིག་པ་ལས། གང་དུ་དགོས་པ་གང་ངེས་པ། །ངོ་བོ་དམིགས་པ་དང་བཅས་པའོ། །ཞེས་པས། གང་གིས་བསྟན་པའི་དགོས་པ་དང་། གང་གིས་བསྟན་བྱའི་ངོ་བོ་དང་། དེ་ལྟར་བསྟན་པའི་སྒྲ་དོན་དང་། ཇི་སྙེད་བསྟན་པའི་རྣམ་གྲངས་དང་། དེ་དག་གི་དོན་ཉེ་བར་སྦྱར་བའི་དཔྱད་པ་དང་ལྔ་ལྔས་འཆད་དོ། །དེ་ལས་དང་པོ་རང་བཞིན་གྱི་སྣང་བ་ནི། ཡེ་ནས་བཅིང་གྲོལ་མེད་པར་ལྷུན་གྱིས་གྲུབ་པའི་ཆོས་ཉིད་དེ་བཤད་པའི་གཞི་ཡིན་ཏེ། འདིའི་གཉིས་པ་ལས། བཅིངས་མེད་རྣམ་པར་གྲོལ་མེད་པ། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པའི་ཕྱིར་རོ། །དེ་བཤད་ན་གོང་ལྟར་ལྔ་ལས། དང་པོ་ནི། ཡེ་ནས་གནས་པའི་དང་། བསྟན་ཅིང་མཚོན་པའི་དགོས་པའོ། །དང་པོ་ནི། གཞི་དེ་པའི་ངོ་བོ་ཉིད་དུ་གནས་པས་གང་གིས་དེ་བརྟགས་ན་རྟོགས་སུ་རུང་ལ་བསྒྲུབས་ན་འགྲུབ་ཏུ་རུང་བ་སྟེ། ཐ་མ་ལས། ཀྱེ་ཀྱེ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །གཉིས་པ་ནི། འཁོར་གཉིས་ཀྱི་གོང་མའི་རང་བཞིན་རྟོགས་པ་སྟེ། ཁོག་གཞུང་ལས། གདུལ་བྱ་གཉིས་ལ་བརྒྱུད་པ་དང་། །མངོན་སུམ་སྒོ་ནས་བསྟན་པའི་ཕྱིར། །ཞེས་པའོ། །གཉིས་པ་ངོ་བོ་ནི། རིམ་གསུམ་ལས། ངོ་བོ་ཐམས་ཅད་སེམས་ཉིད་དེ། །ཞེས་པ་ཉིད་དོ། །དེ་ལ་གཉིས་ལས། རིགས་མི་མཐུན་སེལ་བའི་ཚུལ་ནི། །སེམས་ཙམ་པས་ཀུན་གཞི་རྣམ་ཤེས་གཟུང་འཛིན་གཉིས་མེད་ཀྱི་ཤེས་པ་དོན་དམ་གྱི་དངོས་པོར་འདོད་པ་སྟེ། དེ་ཡང་ཐུགས་ཐིགས་ལས། དེ་ཡང་འཆིང་གྲོལ་གཉིས་ཀའི་བདག །མེ་ལོང་དྭངས་བའི་གཡའ་བཞིན་དུ། །ཕན་ཚུན་སྤངས་བ་མེད་པ་ལས། །བྱིས་པ་གཞི་དང་རྟེན་ཞེས་སྨྲ། །ཞེས་པ་དང་། རྒྱས་པའི་དོན་ལྔ་པ་ལས། ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་བ། །ཅེས་པའོ། །ངོ་བོ་དངོས་ནི་བསྒྲུབ་པའི་དོན་གསུམ་སྟེ། དོན་གསུམ་པ་ལས། རྣམ་རྟོག་ཀུན་གཞི་མ་ཡིན་པ། །རང་བཞིན་མེད་ལ་དོན་གྱི་གཞི། །ཞེས་པས། ཆོས་ཐམས་ཅད་སེམས་སུ་དང་། དེ་གཉིས་སུ་མེད་པར་དང་། དེ་ལྷུན་གྱིས་གྲུབ་པར་བསྒྲུབ་པའོ། །དང་པོ་ནི་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་རང་རིག་པ་བྱང་ཆུབ་ཀྱི་སེམས་ཡིན་ཏེ། སེམས་ལས་མ་གཏོགས་པའི་ཆོས་གཞན་མེད་པའི་ཕྱིར་རིན་པོ་ཆེ་གསེར་གླིང་དུ་ཕྱིན་པ་བཞིན་ནོ། །དེ་ལྟར་ཡང་། དོན་གཉིས་པ་ལས། འཇིག་རྟེན་པ་དང་འཇིག་རྟེན་འདས། །སོ་སོའི་སྣང་བ་ཐམས་ཅད་ཀུན། །རང་རིག་རྒྱལ་པོར་ཡང་དག་འདུ། །རང་རིག་དེ་ཉིད་ཐམས་ཅད་ཡིན། །ཞེས་པ་དང་། ཉེར་བདུན་པ་ལས། ཐམས་ཅད་རང་རིག་བྱང་ཆུབ་སེམས། དེ་ནི་ལུང་གི་ཚད་མར་གཞག །ཅེས་པ་དང་། ལམ་རིམ་ལས། སེམས་ལས་མ་གཏོགས་ཆོས་མེད་ཕྱིར། །སྒྱུ་མའང་རྡོ་རྗེ་བཙན་པོ་མཆོག །ཅེས་སོ། །གཉིས་པ་ནི། སེམས་ཉིད་དེ་སྣང་སྟོང་དབྱེར་མེད་པ་ཡིན་ཏེ། གང་གིས་ཀྱང་མཐར་མ་ཐུག་པའི་ཕྱིར་ཆུ་ཟླ་བཞིན། དེ་ཡང་དོན་གསུམ་པ་ལས། སྣང་དང་མི་སྣང་གཉིས་ཀ་མེད། །ཡོད་དང་མེད་པའང་དབྱེར་མེད་དོ། །ཡང་བདེན་པ་གཉིས་སུ་མེད་པར་མཉམ་པ་ཞེས་བྱ་བའི་དམ་ཚིག་ནི། འདུས་མ་བྱས་ཉིད་འདུས་བྱས་དང་། །འདུལ་བྱས་སྣང་བའང་རྡོ་རྗེ་ཉིད། །ཡིན་ཕྱིར་ངོ་བོ་ཐ་དད་མེད། །ཅེས་པ་དང་། རེ་གཉིས་པ་ལས། གཉིས་བྲལ་མཉམ་དང་མི་མཉམ་དེ་བཞིན་ཉིད་ཀྱི་དབྱིངས། །ང་མེད་བདག་མེད་མཚན་མ་སྣ་ཚོགས་དབྱེར་མེད་པར། །སྟོང་དང་མི་སྟོང་མི་གནས་དེ་བཞིན་ཉིད་དུ་གཅིག །ཅེས་སོ། །གསུམ་པ་ནི། དབྱེར་མེད་དེ་ཉིད་ཆོས་ཐམས་ཅད་དུ་ལྷུན་གྱིས་གྲུབ་པ་ཡིན་ཏེ། མཐའ་བྲལ་དུ་གནས་པའི་ཕྱིར་རིན་པོ་ཆེའི་དགོངས་འདོད་བཞིན་ནོ། །འདིའི་གཉིས་པ་ལས། ཡེ་ནས་ལྷུན་གྲུབ་སངས་རྒྱས་ཆོས། །ཞེས་པ་དང་། བཞི་པ་ལས། ཨ་ནི་སྟོང་དང་མི་སྟོང་གི། དབུ་མའང་དམིགས་སུ་ཡོད་མ་ཡིན། །ཞེས་པ་དང་། ཐུགས་ཐིགས་ལས། མཁས་པས་ལྷུན་གྲུབ་སྨ་བསམ་འདའ། །ཞེས་པ་དང་། ཁོག་གཞུང་ལས། ལྷུན་གྲུབ་ཡེ་ཤེས་སྒྲོན་མ་ཉིད། །རང་བཞིན་གསལ་བ་སྤྱན་གྱི་མཆོག །ཅེས་སོ། །གསུམ་པ་སྒྲ་དོན་ནི། དེ་ཡང་རང་བཞིན་ཞེས་པ་ཕྱིན་ཅི་ལོག་གི་རྒྱུ་རྐྱེན་དང་ཡང་དག་པའི་ཤེས་རབ་དང་གཏན་ཚིགས་ལ་སོགས་པ་ཁྱད་པར་གང་དུའང་མ་བྱས་པ་སྟེ། ལམ་རིམ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །ཞེས་གསུངས་པའི་ཕྱིར་རོ། །སྣང་བ་ཞེས་པ་རང་སྣང་བ་སྟེ། ཐུགས་ཐིགས་ལས། སྣང་སྟོང་ཀུན་ཏུ་གསལ་བ། རང་བཞིན་ངང་གིས་སྣང་བའོ། །ཞེས་གསུངས་པའི་ཕྱིིར་རོ། །གཞི་ཞེས་པ་ཆོས་ཐམས་ཅད་ཀྱི་གོ་འབྱེད་པ་སྟེ། རིམ་གསུམ་ལས། ཐ་སྙད་གཉིས་ཀྱིས་བསྡུས་པའི་ཆོས། །མ་ལུས་འབྱུང་ཕྱིར་གཞི་ཞེས་བྱ། །ཞེས་གསུངས་པའི་ཕྱིར་རོ། །སྤྱིར་རྒྱུད་ཙམ་གྱི་གོ་བ་ནི་དགོས་པ་ཚང་ཞིང་འབྲེལ་བ་དང་ལྡན་པ་སྟེ། རྔམ་གློག་ལས། འབྲེལ་དང་མ་ཚད་མེད་པ་དང་། །ཕུན་སུམ་ཚོགས་པས་རྒྱུད་ཅེས་བྱ། །ཞེས་སོ། །བྱེ་བྲག་ཏུ་གཞིའི་དགོས་པ་ཚང་ཞིང་འབྲེལ་པ་དང་ལྡན་པ་ནི་གཞིའི་རྒྱུད་ཡིན་ཏེ། ཁོག་གཞུང་ལས། རྒྱུད་གསུམ་ཚང་དང་དེར་འབྲེལ་པས། །རང་བཞིན་རྒྱུད་ཀྱི་མིང་དུ་གྲགས། །ཞེས་སོ། །དེ་ཡང་དགོས་པ་ནི་སྔར་བསྟན་ཟིན་ལ། འབྲེལ་བ་ནི་ལམ་དང་ཤེས་བྱ་ཤེས་བྱེད་དུ་འབྲེལ་ཞིང་འབྲས་བུ་དེ་དང་དེའི་བདག་ཉིད་དུ་འབྲེལ་པ་སྟེ། ཁོག་གཞུང་ལས། བདེ་གཤེགས་འབྲས་བུའི་སྙིང་པོ་ཉིད། །ཡེ་ནས་ཡིན་ཕྱིར་རིགས་རྒྱུད་དེ། །ཞེས་གསུངས་པའི་ཕྱིར་རོ། །རྣམ་གྲངས་ནི། རིམ་གསུམ་ལས། ངོ་བོའི་གཞི་དང་བཏགས་པའི་གཞི། །ཞེས་པས། གནས་ལུགས་ངོ་བོ་ཉིད་ཀྱི་གཞི་དང་། བཏགས་པའི་གཞིའོ། །དང་པོ་ནི། ལམ་རིམ་ལས། དེ་ཡང་རྣམ་གསུམ་གནས་ཚུལ་གཞག །ཅེས་པས་ལྷག་པ་དོན་དམ་དང་། ཀུན་རྫོབ་དང་། བདེན་པ་དབྱེར་མེད་དོ། །དེ་ཡང་མཐའ་ཐམས་ཅད་ཀྱི་གཞི་སྟོང་པའི་ལྡོག་པ་ནི་བདེན་པ་དང་པོ་ཡིན་ཏེ། རྟགས་ནི་ལམ་རིམ་ལས། དངོས་རྣམས་ཉིད་ན་དངོས་མེད་པར། །རྟོགས་པའི་སྨྲ་བསམ་ཡུལ་ལས་འདས། །ཞེས་པའོ། །ཅིར་ཡང་སྣང་བའི་ལྡོག་པ་ནི་བདེན་པ་གཉིས་པ་སྟེ། དེ་ཉིད་ལས། སེམས་ཉིད་ཆུ་ཟླ་ལྟར་ཡིན་པས། ཅིར་ཡང་སྣང་ཞིང་ཅིར་ཡང་འགྲུབ། །ཅེས་པའོ། །དེ་གཉིས་ངོ་བོ་གཅིག་པའི་ལྡོག་པ་ནི་བདེན་པ་ཐ་མ་སྟེ། དེ་ཉིད་ལས། སྣང་ལ་རང་བཞིན་མེད་པའི་ཕྱིར། །སེམས་ཉིད་ཆོས་ཀྱི་སྐུ་རུ་གནས། །ཞེས་པའོ། །དེ་དག་ཐེག་པ་འོག་མ་པ་འགའ་ཞིག་གིས་ངོ་བོ་ཐ་དད་པར་འདོད་པ་ལས་འདིར་དབྱེར་མེད་པའི་ཕྱིར་ལྷག་པ་ཞེས་བྱའོ། །འདིར་ཁ་ཅིག་རང་བཞིན་གྱི་སྣང་བ་གསུམ་དུ་འགྱུར་ཏེ། གནས་ཚུལ་གྱི་ཕྱིར་རོ་ཞེ་ན། དེར་གྲུབ་པའི་ཕྱིར་ཞེ་ན་རྟགས་མ་གྲུབ་ལ། དེར་བཀོད་པའི་ཕྱིར་ཞེ་ན། རང་བཞིན་དེ་རྟོགས་པར་བྱ་བའི་ཕྱིར་བློས་སྒྲོ་བཏགས་ཏེ་གསུམ་དུ་བཀོད་ཀྱང་དེར་མི་འགྱུར་ན་ཁྱབ་པ་མེད་དོ། །དེ་ནི་འདིའི་ལེའུ་གཉིས་པ་ནས་བཅིངས་མེད་ཅེས་པ་དང་། གསུམ་པ་ནས། རང་བཞིན་ཉིད་ལས་ཉམས་པ་མེད། །ཅེས་པ་དང་། བཞི་པ་ནས། ཨ་ནི་སྟོང་དང་མི་སྟོང་གི། །ཞེས་པ་དང་། ལྔ་པ་ནས་གཞི་རྩ་མེད་པའི་སེམས་ཉིད་ཅེས་པ་དང་། དྲུག་པ་ནས་ཡེ་ཤེས་ཕྱོགས་བཞི་ཞེས་པ་དང་། བརྒྱད་པ་ནས་སྒྱུ་འཕྲུལ་དྲྭ་བ་ཞེས་པ་དང་། བཅུ་གཉིས་པ་ནས་དུས་བཞི་ཕྱོགས་བཅུ་ཞེས་པ་དང་། བཅུ་གསུམ་པ་ནས་དཀྱིལ་འཁོར་ལྡན་པའི་ཞེས་པ་དང་། བཅུ་དགུ་པ་ནས་མཉམ་ལ་མཉམ་པར་ཞེས་པ་དང་། ཐ་མ་ནས་ཀྱེ་ཀྱེ་ཕྱོགས་བཅུ་ཞེས་པས་སྟོན་ནོ། །གཉིས་པ་བཏགས་གཞི་ནི། རིམ་གསུམ་ལས། བཏགས་གཞི་གཉིས་སུ་བསྟན་པའི་ཆོས། །འཁོར་དང་མྱ་ངན་འདས་པར་གསུངས། །ཞེས་པས་གཉིས་ལས། འདས་པའི་བཏགས་གཞི་ནི་ཐུན་མོང་གི་ལམ་དང་འབྲས་བུ་བསྡུས་པ་རྣམས་ཡིན་པའི་ཕྱིར་ཤུགས་ལ་ཤེས་པར་བྱའོ། །འཁོར་བའི་བཏགས་གཞི་ནི། དེ་ཉིད་ལས། འཁོར་བའི་རྒྱུ་རྐྱེན་ངོ་བོ་དང་། །དཔེ་དང་མཚན་ཉིད་བྱེད་པོ་དང་། །འཁོར་ཚུལ་ཉེས་པ་དུས་རྣམས་སུ། །ཞེས་པ་དང་། བྱེ་བྲག་བསྟན་པ་ལས། རྒྱུ་རྐྱེན་འབྲས་བུ་འབྱུང་བའི་དུས། །ཚུལ་དང་ཉེས་པ་འགྲུབ་བྱེད་པ། །ཉེ་བར་མཚོན་པས་རྣམ་པར་དབྱེ། །ཞོར་ལ་སྤྱི་ཡིས་དགོས་བཤད་པའོ། །ཞེས་པས་དོན་དགུའོ། །དང་པོ་རྒྱུ་ལ་གཉིས་ལས། སྤྱིའི་རྒྱུ་ནི། འཁོར་བའི་ཆོས་ཐམས་ཅད་བདག་ཏུ་རྟོག་པ་ལས་བྱུང་བ་ཡིན་ཏེ། འདིའི་གསུམ་པ་ལས། སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །ཞེས་གསུངས་པའི་ཕྱིར་རོ། །གཉིས་པ་བྱེ་བྲག་གི་རྒྱུ་ནི། རིམ་གསུམ་ལས། རྒྱུར་མཚུངས་ལྷན་ཅིག་ཉེར་ལེན་པ། །ཞེས་པས་བཞི་ལས། བརྒྱུད་པའི་རྒྱུ་ནི་བདེ་གཤེགས་སྙིང་པོ་ཞེས་པ་གང་གསུངས་པ་ཉིད་དོ། །མཚུངས་ལྡན་གྱི་རྒྱུ་ནི། མ་རིག་པ་དང་ཞེས་པས་གོང་མ་དང་ལྷན་ཅིག་ཏུ་སྐྱེས་པའི་མ་རིགས་སྟེ། སྤར་ཁབ་ལས། སེམས་རང་བཞིན་གྱིས་འོད་གསལ་བ་ཡིན་ཡང་ངེས་པའི་ཤེས་པས་ངེས་པར་མ་བྱས་པ་ནི་ལྷན་ཅིག་སྐྱེས་པའི་མ་རིག་པའོ། །ཞེས་པ་བཞིན་ནོ། །ལྷན་ཅིག་བྱེད་པའི་རྒྱུ་ནི། ཀུན་ཏུ་བརྟགས་པའི་མ་རིག་པས་འཁོར་བ་དང་ལྷན་ཅིག་ཏུ་བྱེད་པ་སྟེ། བདག་དང་ཆོས་དང་དངོས་པོ་རྣམས། །ངོ་བོ་ཡོད་ལ་སོགས་བརྟགས་པས། །ཞེས་པའོ། །ཉེ་བར་ལེན་པའི་རྒྱུ་ནི། དགེ་སྡིག་གི་བག་ཆགས་མཐུ་ཅན་དུ་གྱུར་པས་འབྲས་བུ་འབྱིན་ལ་མ་རག་པ་སྟེ། རྒྱས་པ་ལས། རྟོག་པའི་བག་ཆགས་སྟུག་པོ་ཡིས། །ཞེས་པའོ། །གཉིས་པ་རྐྱེན་ནི། རིམ་གསུམ་ལས། རྐྱེན་གཉིས་བསྟན་པ་ལས་གསུམ་དང་། །ཀུན་བརྟགས་མ་རིག་ཉོན་མོངས་ལྔ། །ཞེས་པས། ལས་གསུམ་དང་། ཉོན་མོངས་པ་ལྔའོ། །དང་པོ་ནི་མི་དགེ་བས་ངན་སོང་དུ་དང་། མི་གཡོ་བས་ཁམས་གོང་མ་གཉིས་སུ་སྟེ་བསམ་གཏན་བཞི་དང་སྙོམས་འཇུག་བཞིའོ། །ཡང་ན་རྒྱུ་འབྲས་ལུང་དུ་མ་བསྟན་པ་ནི་ཤིང་བཟོ་བ་ལྟ་བུའོ། །དགེ་བས་མཐོ་རིས་སུ་སྐྱེ་བའི་རྐྱེན་བྱེད་པ་ནི། འདིའི་གཉིས་པ་ལས། སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །ཞེས་སོ། །གཉིས་པ་ནི་ཞེ་སྡང་གིས་དམྱལ་བར་སྐྱེ་སྟེ། རྒྱལ་པ་ལས། ཐམས་ཅད་ཀུན་ལ་ཞེ་སྡང་ཞིང་། །སྙིང་རྗེ་ཡང་དག་མེད་གྱུར་ན། །འདི་ནི་མི་བཟད་ཆེན་པོའི་ལས། །དམྱལ་ཁམས་བཅོ་བརྒྱད་དག་ཏུ་གནས། །ཞེས་སོ། །འདོད་ཆགས་ཀྱིས་ཡི་དྭགས་སུ་སྐྱེ་སྟེ། དེ་ཉེད་ལས། ཆགས་མེད་དངོས་པོ་མ་ཤེས་ཤིང་། །མ་ལུས་ཀུན་ཏུ་འདོད་ཆགས་པས། །ལུས་ཀྱིས་བསྒྲིབས་དང་ཟས་ཀྱིས་བསྒྲིབས། །ཡི་དྭགས་ཆེན་པོའི་གནས་སུ་སྐྱེ། །ཞེས་སོ། །གཏི་མུག་གིས་བྱོལ་སོང་དུ་སྐྱེ་སྟེ། ཆོས་རྣམས་མ་ལུས་ཐམས་ཅད་ལ། །ཤེས་རབ་གསལ་དོན་མེད་པས་ན། །དགེ་སྡིག་གཉིས་ཀྱི་དོན་མ་རྟོགས། །འདི་ནི་བྱོལ་སོང་གནས་སུ་སྐྱེ། །ཞེས་སོ། །ང་རྒྱལ་གྱིས་ལྷར་སྐྱེད་སྟེ། མཉམ་པའི་དོན་ཉིད་མ་རྟོགས་ཤིང་། །ཚད་མེད་བཞི་དང་བསམ་གཏན་བཞི། །རིམ་པར་སོ་སོར་བདག་འཛིན་ཅིང་། །གཟུགས་སོགས་རྣམས་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །ཞེས་སོ། །ཕྲག་དོག་གིས་ལྷ་མིན་དུ་སྐྱེ་སྟེ། ཕྲག་དོག་དངོས་པོ་མི་ཤེས་ཤིང་། །ང་དང་བདག་ཏུ་འཛིན་གྱུར་ན། །ལྷ་མ་ཡིན་གྱི་གནས་སུ་སྐྱེ། །དེ་ནས་ཡི་དྭགས་གནས་སུ་སྐྱེ། །ཞེས་སོ། །དེ་དག་མཉམ་པ་ལས་མིར་སྐྱེ་སྟེ། དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པས། །ལྷ་དང་མི་ཡི་སྐྱེ་གནས་ཏེ། །འདོད་ཁམས་དག་ཏུ་འཁོར་བའི་ས། །ཞེས་སོ། །གསུམ་པ་ངོ་བོ་ནི། སྣོད་བཅུད་དུ་སྣང་ཞིང་ཞེན་པས་ལས་དང་སྡུག་བསྔལ་དུ་སྨིན་པ་སྟེ། རིམ་གསུམ་ལས། ངོ་བོ་ཕྱི་ནང་འཇིག་རྟེན་གྱི། །སྣང་དང་ཞེན་པའི་ཆོས་རྣམས་སོ། །ཞེས་པའོ། །བཞི་པ་དཔེ་ནི། འཁོར་བ་ཟོ་ཆུན་ཁྱུད་འཁོར་དང་མཆེད་པ་རྩྭ་ཁའི་མེ་ལྟ་བུ་སྟེ། དེ་ཉིད་ལས། ཟོ་ཆུན་རྩྭ་སོགས་མེ་དཔེ་བཞིན། །རྟག་ཏུ་འཁོར་ཞིང་མཆེད་པའོ། །ཞེས་པའོ། །ལྔ་པ་མཚན་ཉིད་ནི། སྐྱེ་ཞིང་འཇིག་པའི་ཆོས་དང་ལྡན་པ་སྟེ། །དེ་ཉིད་ལས། འཇིག་དང་ཆགས་དང་སྟོངས་དང་གནས། །སྐྱེ་རྒས་ན་འཆི་བཞི་ལྡན་པས། །མཚན་ཉིད་ཐེར་ཟུག་མ་ཡིན་པའོ། །ཞེས་པའོ། །དྲུག་པ་བྱེད་པ་པོ་ནི། འཁོར་འདས་གཉིས་ཀའི་བྱེད་པ་པོ་ནི་མ་བཅོས་རྒྱུན་གྱི་སྐད་ཅིག་མ་དང་། བྱེ་བྲག་ཏུ་འཁོར་བའི་བྱེད་པ་པོ་ནི་ལོག་རྟོག་རྒྱུན་གྱི་སྐད་ཅིག་མ་སྟེ། དེ་ཉིད་ལས། རྒྱུན་དང་བཅས་པའི་སྐད་ཅིག་མ། །ལས་ཀྱི་བྱེད་པར་བརྗོད་པ་ཡིན། །ཞེས་པའོ། །བདུན་པ་འཁོར་བའི་ཚུལ་ནི། ཕྱི་རྟེན་ཅིང་འབྲེལ་བ་ནི། ས་བོན་ལ་སོགས་རྒྱུ་དང་འབྲེལ་བའི་ཆོས་དྲུག་དང་། དེ་དག་ཀྱང་ས་ཡིས་རྟེན་པ་སོགས་རྐྱེན་གྱིས་བསྡུས་པ་དྲུག་གོ། །ནང་རྟེན་ཅིང་འབྲེལ་བ་བཅུ་གཉིས་ནི་མ་རིག་པ་ལ་སོགས་ལུགས་འབྱུང་འཁོར་བའི་ཆོས་སོ། །དེ་ཉིད་ལས། རྟེན་འབྲེལ་བཅུ་གཉིས་ཚུལ་དག་ཏུ། །ཕྱི་ནང་གཉིས་ཀ་འཁོར་བའོ། །ཞེས་པའོ། །བརྒྱད་པ་ཉེས་པ་ནི། འཕགས་པའི་ལམ་དང་བྲལ་བ་དང་། །སྡུག་བསྔལ་ཉམས་སུ་མྱོང་བ་སྟེ། །ཉེས་པ་རྣམ་པ་གཉིས་སུ་གསུངས། །འཕགས་ལམ་བྲལ་དང་སྡུག་བསྔལ་མྱོང་། །ཞེས་པའོ། །ཐ་མ་དུས་ནི། ཐོག་མ་དང་ཐ་མ་མེད་པ་ནས་འཁོར་བ་སྟེ། འདིར་ཁ་ཅིག་འཁོར་བ་ལ་ཐོག་ཐ་ཡོད་དམ་མེད་ཅེ་ན། དོན་གྱིའམ་དུས་ཀྱི་ཞེས་སོ། །དང་པོ་བརྒྱུད་པའི་རྒྱུ་དེ་མ་རྟོགས་པ་ནི་ཐོག་མ་ཡིན་ལ། དེ་ནི་རྟོགས་པ་ཐ་མ་ཡིན་པའི་ཕྱིར་རོ། །གཉིས་པ་ནི། འཁོར་བ་སྤྱི་ལའམ་བྱེ་བྲག་ལ་ཞེས་བརྟག་གོ། །དང་པོ་ནི་ཐོག་ཐ་གཉིས་ཀ་མེད་དེ། ཇི་སྐད་དུ། སྲིད་པའི་འཁོར་ལོ་ཐོག་ཐ་མེད། །ཅེས་པ་དང་། གཞུང་ཉིད་ཀྱིས་གྲུབ་བོ། །གཉིས་པ་ལྟར་ན་ཐོག་མ་མེད་ཀྱང་ཐ་མ་ཡོད་དེ། རྒྱལ་བུ་དོན་གྲུབ་བཞིན་ནོ། །འོ་ན་སྤྱི་ལའང་ཡོད་པར་འགྱུར་ཏེ། སྤྱི་བྱེ་བྲག་གི་མཚན་ཉིད་ཅན་ཡིན་པའི་ཕྱིར། འབྲུའི་ཕུང་པོ་རེ་རེ་ནས་བགྲངས་ན་འཛད་པ་བཞིན་ནོ་ཞེ་ན། ཁྱབ་པ་མེད་དོ། །གལ་ཏེ་ཡོད་ན་ཁམས་གསུམ་གྱི་སེམས་ཅན་མི་དམིགས་པར་འགྱུར་ཏེ། རྒྱལ་བུ་དོན་གྲུབ་སངས་རྒྱས་པའི་ཕྱིར་རོ། །དེ་འདོད་པར་མི་ནུས་སོ། །དེ་ཉིད་ལས། ཐོག་མ་ཐ་མ་མེད་དུས་ནས། །ཡང་དག་དོན་ལ་རྟོགས་པས་ཉམས། །ཞེས་པའོ། །དེ་ནི་ལེའུ་གཉིས་པ་ནས། རང་གི་རྣམ་རྟོག་ལས་ཀྱིས་སྤྲུལ། །ཞེས་པ་དང་། གསུམ་པ་ནས། ཇི་སྙེད་འཇིག་རྟེན་ཞེས་པ་དང་། བཅུ་གསུམ་པ་ནས་མ་རྟོགས་པ་དང་ཞེས་པ་དང་། བཅོ་ལྔ་པ་ནས་བདག་ཏུ་རྨོངས་པ་ཞེས་པ་དང་། ཐ་མ་ནས་གཟུང་འཛིན་སྤྲོས་ལས་ཞེས་པས་སྟོན། དེ་དག་གི་དོན་ཉེ་བར་སྦྱར་བ་དཔེས་མཚོན་ཏེ་བཤད་པ་ནི། རིམ་གསུམ་ལས། གསེར་གྱི་དཔེ་བཞིན་གཉིས་སུ་མེད། །ཅེས་པས། གསེར་གྱི་སྐུ་དང་ཆོལ་ཟངས་ཆོས་དུ་མས་ཐ་དད་ཀྱང་གསེར་དུ་གཅིག་པ་ལྟར། བཏགས་གཞི་ཆོས་ཅན་དངོས་པོ་གཉིས་སུ་ལྡོག་པ་ཐ་དད་ཀྱང་རང་བཞིན་གྱི་སྣང་བར་གཅིག་པ་ཡིན་ཏེ། དེ་ཉིད་རྟོགས་པ་དང་མ་རྟོགས་པའི་ལྡོག་པ་ཡིན་པའི་ཕྱིར་རོ། །གལ་ཏེ་ཐ་དད་པ་ཞིག་ན་འཁོར་བ་སྤངས་ནས་འདས་པ་བསྒྲུབ་ཏུ་མེད་པར་འགྱུར་ཏེ། རྒྱ་མཚོ་ལས། གསེར་ལ་བཟོ་ཡི་རྣམ་པར་ལྟར། །སྣང་བ་དང་པོ་རང་རིག་པ། །ཞེས་པ་དང་། རྒྱས་པའི་ང་གསུམ་པ་ལས། རྣམ་པར་བྱང་དང་སྡུག་བསྔལ་དག །ཡེ་ནས་ངོ་བོ་ཡོད་ཡིན་ན། །ཉོན་མོངས་སྤོང་ཞིང་བྱང་བསྒྲུབ་མེད། །ཅེས་སོ། །གཞན་ཡང་ལམ་དང་ཐེག་པ་རྣམས་དོན་མེད་པར་འགྱུར་ཏེ། དུང་སོལ་ཐ་དད་པས་སོལ་བ་ལ་བྱི་དོར་བྱས་ཀྱང་དཀར་པོ་མི་འབྱུང་བ་བཞིན་ཏེ། སོ་སོའི་རང་བཞིན་ངེས་ཤེ་ན། །ཡང་དག་ལམ་གྱིས་བཅོས་སུ་མེད། །ཅེས་པ་བཞིན་ཐ་དད་པ་མ་ཡིན་ཏེ། འདིའི་གསུམ་པ་ལས། རང་བཞིན་ཉིད་ལས་ཉམས་པ་མེད། །ཅེས་སོ། །གཉིས་པ་གདུལ་བྱའི་སྣང་བ་ནི། གདུལ་བྱ་བློ་དང་འཚམས་པར་སྣང་བ་དེ་བཤད་པའི་གཞི་ཡིན་ཏེ། འདིའི་གཉིས་པ་ལས། དེ་བཞིན་ཉིད་ཀྱི་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་གསུངས་པའི་ཕྱིར་རོ། །དེ་ལ་བཤད་ན་ལྔ་ལས། དང་པོ་དགོས་པ་ནི་བྱེད་པ་གཉིས་དང་ལྡན་ཏེ། རང་བཞིན་མངོན་བྱེད་ཅེས་པས་ཤེས་བྱ་གཞིའི་རྒྱུད་ཤེས་པར་བྱེད་པ་སྟེ། བཅུ་གསུམ་པ་ལས། ཁོང་ནས་གབ་སྦས་དོན་འབྱིན་པ། །ཞེས་པས། དེས་ཐོབ་བྱ་འབྲས་བུའི་རྒྱུད་ཤེས་པར་བྱེད་པ་ནི། འདིའི་དགུ་པ་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་སོ། །གཉིས་པ་ངོ་བོ་ལ་གཉིས་ལས། བགྲོད་བྱ་ལམ་གྱི་ནི། རྣལ་འབྱོར་པ་ཞེས་པས་ལམ་པས་འཇུག་ཅིང་བགྲོད་པར་བྱ་བ་སྟེ། དོན་བསྡུས་ལས། བགྲོད་དང་དེ་ཆོས་ལྡན་པ་དང་། །ཞེས་པ་བཞིན་ནོ། །བགྲོད་བྱེད་ལམ་པའི་ངོ་བོ་ནི། སྐྱེད་བྱེད་ཤེས་རབ་གསུམ་གྱིས་བསྐྱེད་བྱ་སེམས་ཐུན་མོང་ཐུན་མིན་ལ་སོགས་བཞི་ལྔ་ཅི་རིགས་པར་སྐྱེ་བ་དང་སྐྱེས་པ་སྟེ། རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་བཞི་སྐྱེ་བར་བསྟན་པ་ཡིན། །ཞེས་པ་དང་། སྤྱན་འགྲེལ་ལས། ལྔ་སེམས་ལྡན་པའི་ཤེས་རབ་ཉིད། །སྐྱེ་བའི་གཞི་དང་སྐྱེ་ངེས་པའོ། །ཞེས་པའོ། །དེ་ལའང་འགྲེལ་བཤད་ལས། སྐྱེ་ས་རྐྱེན་གྱི་སྐྱེ་ཚུལ་དང་། །སྐྱེས་པའི་ངོ་བོ་སེམས་རིམ་ལྔ། །ཞེས་པ་བཞིན་ནོ། །དེ་ཡང་སྐྱེ་ས་ནི། རྒྱ་མཚོ་ལས། གཞི་དང་སྐབས་དང་སྐྱེར་འགྱུར་ས། །ཞེས་པས། གཞི་ནས་དང་། སྐབས་ནས་དང་། འབྲས་བུ་ནས་སྐྱེ་བ་གསུམ་ལས། དང་པོ་ནི། གྲུབ་མཐའ་གང་གི་ཡང་སྒོར་མ་ཞུགས་པར་འདིར་འཇུག་པར་ནུས་པ་སྟེ། ཀུན་ལ་མཐུན་བྱས་འཇམ་པས་འཇུག །ཅེས་སོ། །གཉིས་པ་ནི། འོག་མ་དག་གི་ལམ་ནས་འདིར་འཇུག་པ་སྟེ། རིམ་གསུམ་ལས། ཐུན་མོང་ལམ་ལྔར་བསླབ་པ་དང་། །ཞེས་སོ། ཐ་མ་ནི། འོག་མའི་འབྲས་བུ་མཐར་ཕྱིན་ནས་འདིར་འཇུག་པ་སྟེ། འདིར་ནི་གསང་ཆེན་ངེས་པ་སྟེ། །འབྲས་བུ་ལམ་དུ་གྱུར་པ་ཡིན། །ཞེས་གསུངས་པའི་ཕྱིར་རོ། །སེམས་སྐྱེ་བའི་རྒྱུ་རྐྱེན་རྒྱུ་དང་རྐྱེན་དུ་འབྲེལ་བས་ཁྱད་པར་དུ་བྱས་ནས་སྐྱེ་བ་སྟེ། དང་པོ་རྒྱུ་ལ་གཉིས་ལས། མཚུངས་ལྡན་གྱི་རྒྱུ་ནི། བདེ་བར་གཤེགས་པའི་སྙིང་པོ་ཁྱབ་བྱེད་དུ་ཡོད་པ་ཡིན་ཏེ། ལམ་རིམ་ལས། སྙིང་པོ་རང་བཞིན་མཚུངས་པ་དང་། །ཞེས་པའོ། །ལྷན་ཅིག་བྱེད་པའི་རྒྱུ་ནི། དེ་རྟོགས་རུང་གི་བློ་སོ་སོར་རྟོག་པའི་ཤེས་རབ་དེ་ཡིན་ཏེ། དེ་ཉིད་ལས། ཐོས་བསམ་བསྒོམ་པའི་ཤེས་རབ་ཀྱིས། །རང་བྱུང་ཀུན་ངམ་འགྲུབ་བྱེད་ཕྱིར། །ཞེས་པའོ། །རྐྱེན་ནི་བཞི་ལས། རྒྱུའི་རྐྱེན་ནི་དེ་མ་ཐག་པ་ཉིད་དོ། །བདག་པོའི་རྐྱེན་ནི་ལུང་མན་ངག་དང་ལྡན་པའི་རྡོ་རྗེ་སློབ་དཔོན་ཏེ། དེ་ཉིད་ལས། བཤེས་གཉེན་མགོན་ལ་ལུང་གཉིས་ཐོས། །ཞེས་སོ། །དམིགས་པའི་རྐྱེན་ནི། མཚོན་བྱེད་ཡི་གེའི་རྒྱུད་མན་ངག་དང་བཅས་པ་རྣམས་ཏེ། དེ་ཉིད་ལས། དེ་བདག་གསང་སོགས་དམིགས་པ་སྟེ། །ཞེས་སོ། །དེ་མ་ཐག་པའི་རྐྱེན་ནི། །ཐོས་བསམ་གྱིས་ཤེས་བྱ་ལ་རྟོགས་པ་བོགས་ཕྱུང་བ་སྟེ། དེ་ཉིད་ལས། སྐད་ཅིག་འཕེལ་བའང་དེ་མ་ཐག །ཅེས་སོ། །དེ་དག་འབྲེལ་ཚུལ་ནི། ལྷན་ཅིག་བྱེད་རྒྱུ་དང་བཅས་པའི་ལམ་པ་སྟེ་མཚུངས་པར་ལྡན་པའི་རྒྱུ་དོན་གྱི་བླ་མ་དང་བྱས་པ་དང་མི་རྟག་པ་ལྟར་བདག་གཅིག་ཏུ་འབྲེལ་ཞིང་། བདག་རྐྱེན་རྟགས་ཀྱི་བླ་མ་དང་སྣོད་དང་བཅུད་དུ་སེང་གེའི་འོ་མ་ལྟར་འབྲེལ་ལ། དམིགས་རྐྱེན་མདོ་རྒྱུད་རྣམས་དང་མེ་ལྟར་ཤེས་བྱ་ཤེས་བྱེད་དུ་འབྲེལ་ཞིང་། །དེ་གསུང་བ་པོ་སྟོན་པའི་བདག་ཉིད་ཉི་མ་དང་འཇིག་རྟེན་ལྟར་ལས་དང་ཐུགས་རྗེར་འབྲེལ་བའི་ཕྱིར་རྒྱུ་དང་རྐྱེན་དུ་གྱུར་པའོ། །སེམས་སྐྱེ་ཚུལ་ནི་བརྒྱད་དེ། མོས་པ་ཐ་དད་ཀྱི་སྒོ་ནས་བཞག་པ་ཐབས་གྲོལ་གཉིས་སུ་དང་། བློ་ཆེ་ཆུང་གི་སྒོ་ནས་རིམ་ཅིག་ཅར་གཉིས་སུ་དང་། རིམ་པ་སྤངས་མ་སྤངས་ཀྱི་སྒོ་ནས་མཐར་ཆགས་ཐོད་རྒལ་གཉིས་སུ་དང་། ཞེན་པ་དག་མ་དག་གི་སྒོ་ནས་ཟག་བཅས་ཟག་མེད་གཉིས་སུ་དང་། མཚན་མ་ཆེ་ཆུང་གི་སྒོ་ནས་མི་རྟོག་པ་དང་ལྷ་སྒོམ་པ་དང་གཉིས་སུ་དང་། ཕན་གདགས་པ་དང་གདུལ་དཀའ་འདུལ་བའི་སྒོ་ནས་ཞི་བ་དང་ཁྲོ་བོ་གཉིས་སུ་དང་། ཏིང་ངེ་འཛིན་གསལ་མི་གསལ་གྱི་སྒོ་ནས་མོས་བསྒོམ་དང་ཡོངས་རྫོགས་སུ་བསྒོམ་པ་གཉིས་སུ་དང་། རང་སྟོབས་གཞན་སྟོབས་ཀྱི་སྒོ་ནས་གདམས་ངག་དང་ཤེས་རབ་ཏུ་སེམས་སྐྱེ་བའོ། །སྐྱེས་པ་རང་གི་ངོ་བོ་ནི། ངོ་བོ་སེམས་ལྔ་སྐྱེ་བའོ། །ཞེས་པ་ལ་གཉིས་ཏེ། སྤྱན་འགྲེལ་ལས། ངོ་བོ་རྐྱེན་གྱིས་རྣམ་པར་དབྱེ། །རིགས་དང་རིགས་སུ་ངེས་པ་ཡི། །ཞེས་པས་གྲོལ་ལམ་གྱི་དང་། གཅིག་ཤོས་ཀྱི་ནི། ཁམས་ཉེར་གཅིག་པ་ལས། འཇིག་དང་ལྡང་དང་གནས་པ་དང་། །སྨོན་པ་བྱང་ཆུབ་སེམས་ཡིན་ནོ། །གཡོ་དང་བསྐྱོད་དང་ལྡང་དང་གནས། །ཞེས་པས་སོ། །དང་པོ་ནི། བརྟགས་པ་གཉིས་ཞིག་ནས་གསང་སྔགས་སུ་གཡོ་བའི་དང་། གཞི་དེས་ཁོང་དུ་ཆུད་པར་སྨོན་པའི་དང་། འདིའི་དོན་ཆ་འཇུག་པའི་དང་། དོན་ཉམས་སུ་ལེན་ཅིང་གནས་པའི་དང་། དེ་མཐར་ཕྱིན་པའི་སེམས་ཏེ། ལམ་རིམ་ལས། དེ་ཇི་བཞིན་དུ་གཉིས་དང་བཞི། །མཆོག་གི་གཡོ་བ་སེམས་འབྱུང་འགྱུར། །གཞི་དེ་ཁོང་དུ་སྨོན་པ་དང་། །ལྷག་པ་གཟུགས་བརྙན་འཇུག་པར་བྱེད། །མཆོག་གི་དམ་ཚིག་དེ་རུ་སྦྱིན། །རིགས་ངེས་གྱུར་ལ་ཕན་པ་བཅུ། །ནུས་པ་གཉིས་ཀྱི་བྱིན་རླབས་བཞག །རང་གི་སྤྱན་མཆོག་བྱེད་ལ་བརྩོན། །ཞེས་པའོ། །གཉིས་པ་ནི་ཁོག་གཞུང་ལས། དེ་ཡང་སྐྱེ་བོ་ཆགས་ཅན་དོན། །ཞེས་པས་འོག་སྒོའི་སེམས་ལྔ་སྟེ། གཡོ་ལྡང་དང་། འཇིག་འཇུག་དང་། གནས་པ་དང་། སྨོན་པ་དང་། འགྲོ་འོང་བྱང་སེམས་ཏེ། དཔེ་ཆུང་རང་གནས་ལས། འཇིག་ལྡང་ལ་སོགས་བྱང་སེམས་ལྔ། །ངེས་པར་སྐྱེས་པ་ངོ་བོར་བཤད། །ཅེས་པའོ། །གསུམ་པ་སྒྲ་བཤད་པ་ནི། དེ་ཡང་གདུལ་བྱ་ཞེས་པ་ཐུན་མོང་དང་མཆོག་གི་སེམས་ལྔ་སྐྱེར་རུང་བ་སྟེ། སྤྱན་འགྲེལ་ལས། ཕྱེ་བས་རྒྱུ་འབྲས་ཆེན་པོ་དག །མ་ངེས་འཇུག་དང་འདི་ཉིད་དུ། །ཞེས་སོ། །སྣང་བ་ཞེས་པ་བསྟན་པ་བློ་དང་འཚམས་པ་སྟེ། རིགས་བརྒྱད་དབྱེ་བ་ལས། བླ་མེད་ཐེག་པ་བསམ་ཡས་གསུངས་པ་ཡང་། །སོ་སོ་རང་གི་བློ་ལ་སྣང་བར་ཟད། །ཅེས་སོ། །ལམ་གྱི་རྒྱུད་ཅེས་པ་ནི་ལམ་འདི་གཞི་ཤེས་ཤིང་འབྲས་བུ་ཐོབ་བྱེད་ཡིན་པའི་ཕྱིར། ཤེས་བྱ་དང་ཐོབ་བྱེད་གཉིས་ཀྱི་མིང་གིས་བཏགས་པས་ལམ་གྱི་རྒྱུད་ཡིན་པའི་ཕྱིར་བཏགས་པ་ལས་ཐོབ་པ་ཞེས་བྱ་སྟེ། དེ་ཉིད་ལས། ཤེས་ཐོབ་བཏགས་མིང་ངེས་ཚིག་གཉིས། །ཞེས་སོ། །ཡང་ལམ་གྱི་ཆ་རྐྱེན་གྱི་དགོས་པ་དང་ལྡན་ཞིང་གཞི་ལམ་ཤེས་བྱ་ཤེས་བྱེད་དུ་འབྲེལ་ལ། ལམ་འབྲས་ཐོབ་བྱ་ཐོབ་བྱེད་དུ་འབྲེལ་བའི་ཕྱིར་ལམ་གྱི་རྒྱུད་ཡིན་པའི་ཕྱིར་རང་གི་ངོ་བོས་ཐོབ་པ་ཞེས་བྱ་སྟེ། དེ་ཉིད་ལས། རྒྱུ་རྐྱེན་ཐབས་འབྲེལ་དགོས་རྫོགས་ཕྱིར། །ཞེས་པ་དང་། དེ་ཉིད་ལས། རང་གི་ངེས་ཚིག་བཞི་རུ་འགྱུར། །ཞེས་པའོ། །བཞི་པ་རྣམ་གྲངས་ནི། རིམ་གསུམ་ལས། ཐུན་མོང་ལམ་ལྔར་བསླབ་པ་དང་། །ཁྱད་པར་སོ་སོའི་ལམ་བཞིན་བསླབ། །ཅེས་པས་ཐུན་མོང་གི་དང་། ཐུན་མོང་མ་ཡིན་པའི་ལམ་གཉིས་སོ། །དང་པོ་ལ་བཞི་ལས། དགོས་པ་ནི། དངོས་སུ་འདིའི་གོོལ་ས་ཤེས་ཤིང་བརྒྱུད་ནས་གདུལ་བྱ་དམན་པའང་ཁྱད་པར་གྱི་ལམ་ལ་གཟུད་པ་སྟེ། ཁོག་གཞུང་ལས། ཐུན་མོང་ལམ་སྟེགས་ཙམ་ཉིད་དུ། །ཕ་རོལ་ཕྱིན་བཅུ་རྒྱུ་འབྲས་སྤྱོད། །ཅེས་སོ། ངོ་བོ་ནི་གང་བློ་ཆེ་ཆུང་གི་ཡུལ་དུ་གྱུར་པ་སྟེ། ངེས་འབྱུང་གི་ཐེག་པ་བཞི་དང་ཕྱི་རྒྱུད་སྡེ་གསུམ་མོ། །སྒྲ་དོན་ནི། དེ་དག་གིས་རང་རང་གི་འབྲས་བུ་བསྒྲུབ་པ་དང་འདིའི་ལམ་སྟེགས་སུ་བགྲོད་པ་ཐུན་མོང་དུ་བྱེད་པའི་ཕྱིར་རོ། །རྣམ་གྲངས་ལ་གཉིས་ཏེ། ངོ་བོས་དང་། ལྟོས་པས་ཐུན་མོང་གི་ལམ་མོ། །དང་པོ་ནི། ལྷ་མི་ཉན་རང་སེམས་དཔའ་བཞི་སྟེ། སྤྱན་འགྲེལ་ལས། རིགས་ཀྱི་དབྱེ་བས་ལམ་ཕྱེ་བ། །ལྔ་དང་གཅིག་གིས་རྒྱུ་འབྲས་འགྱུར། །མ་ངེས་སྤྱི་ཡི་དབྱེ་བ་སྟེ། །བཞི་ནི་ངེས་འབྱུང་ཐུན་མོང་ལམ། །ཞེས་སོ། །གཉིས་པ་ནི། ཀྲྀ་ཡ་ཡོ་ག་ཨུ་པ་གསུམ་སྟེ། དེ་བཞིན་རིགས་གཅིག་ཐུན་མོང་མིན། །དེ་ཉིད་ཕྱི་ནང་ཆ་ཕྱེ་བས། །ཕྱི་རོལ་ལྟོས་པས་ཐུན་མོང་ལམ། །ཞེས་པའོ། །དེ་དག་འདིའི་ཉམས་སུ་བླང་བྱ་ཡིན་ནམ་མ་ཡིན་ན། དངོས་སུ་མིན་ཅིང་རིམ་གྱིས་པ་ལྟོས་ནས་ཤུགས་ལ་སྔོན་དུ་རྫོགས་པར་བྱ་བ་སྟེ། དེ་ཉིད་ལས། རང་བཞིན་སྔོན་དུ་སོང་བ་དང་། །ཆེད་དུ་མངོན་དུ་བསྡུར་བས་འགྲོ། །དེས་ན་ཐུན་མོང་མངོན་རྫོགས་ལམ། །ཞེས་པའོ། །དེ་ནི་གསུམ་པ་ནས་ཐམས་ཅད་ཀྱང་འདི་ལྟ་སྟེ། ཞེས་པ་དང་། དྲུག་པ་ནས་དེ་ནས་ས་བཅུ་རིམ་གྱིས་འབྱང་། ཞེས་པ་དང་། བཅུ་གསུམ་པ་ནས་མ་རྟོགས་པ་དང་ཞེས་པ་དང་། ཐ་མ་ལས། ས་རྣམས་ཁྱད་པར་བཀོད་པ་ཡང་། །ཞེས་པས་སྟོན་ནོ། །གཉིས་པ་ཐུན་མོང་མ་ཡིན་པའི་ལམ་ནི། ཁོག་གཞུང་ལས། ཐུན་མོང་མ་ཡིན་རྣམ་གཉིས་ཏེ། །ཞེས་པས་གཉིས་སོ། །དེ་གང་ཞེ་ན། །རྒྱ་མཚོ་ལས། གྲོལ་ལམ་ཐབས་སུ་རྣམ་པར་བཤད། །ཅེས་པས། ཤེས་རབ་གྲོལ་བའི་ལམ་དང་། ཐབས་ཀྱི་ལམ་སྟེ་འོག་ཏུ་སྟོན་ནོ། །ཐ་མ་དེ་དག་གི་དོན་ཉེ་བར་སྦྱར་བའི་བཤད་པ་ནི། ལམ་དེ་མཚོན་པར་བྱེད་པའི་གཞུང་ཚོགས་ཡི་གེའི་རྒྱུད་ཀྱི་བཤད་ཐབས་ཏེ། རིམ་གསུམ་ལས། ཚིག་དང་ཡི་གེའི་རྐྱེན་གཉིས་ལ། །བརྟེན་ནས་རྟོགས་པར་བྱེད་པ་ཡིན། །ཞེས་གསུངས་པའི་ཕྱིར་རོ། །དེ་ལ་གཉིས་ཏེ། གང་བཤད་པར་བྱ་བའི་རྒྱུད་ངོས་གཟུང་བ་དང་། དེ་ཇི་ལྟར་བཤད་པའི་ཐབས་སོ། །དང་པོ་ནི་རྒྱུད་ཐམས་ཅད་ལ། ཐབས་ཀྱི་རྒྱུད་ནི་བརྗོད་བྱའི་གཙོ་བོ་བདེ་སྟོང་གཉིས་ལས་བདེ་བ། བྱམས་སྙིང་གཉིས་ལས་བྱམས་པ། རྩ་ཐིག་གཉིས་ལས་རྩ། དཀྱིལ་འཁོར་གྱི་གཙོ་བོ་ཡང་ཡབ་ཤས་ཆེ་བས་ཐབས་ཀྱི་རྒྱུད་དོ། །བརྗོད་བྱའི་གཙོ་བོ་བདེ་སྟོང་གཉིས་ལས་སྟོང་པ། བྱམས་སྙིང་གཉིས་ལས་སྙིང་རྗེ། རྩ་ཐིག་གཉིས་ལས་ཐིག་ལེ། དཀྱིལ་འཁོར་གྱི་གཙོ་བོ་ཡུམ་ཤས་ཆེ་བས་ཤེས་རབ་ཀྱི་རྒྱུད་དོ། །གཞན་ཡང་གདུལ་བྱ་སྐྱེས་པ་དང་བུད་མེད་ཀྱི་ཆེད་དུ་རྒྱུད་གཉིས་སུ་ངེས་ཏེ། སྐྱེས་པ་རྣམས་ནི་འདུལ་དོན་དུ། །ཐབས་ཀྱི་རྒྱུད་རྣམས་རབ་བཤད་ལ། །བཙུན་མོ་རྣམས་ནི་བསྡུ་བའི་ཕྱིར། །ཤེས་རབ་མ་ཡི་རྒྱུད་རབ་བཤད། །ཅེས་པའོ། །བརྗོད་བྱའོ་གཙོ་བོ་བདེ་སྟོང་དབྱེར་མེད། བྱམས་སྙིང་གཉིས་ཀ །རྩ་ཐིག་གཉིས་ཀ །དཀྱིལ་འཁོར་གྱི་གཙོ་བོ་ཡང་ཡབ་ཡུམ་ཞལ་སྦྱོར་བས་དབྱེར་མེད་དུ་ངེས་པས་ཏེ། དཔེ་ཆུང་ལས། ཐབས་དང་ཤེས་རབ་མ་ནིང་རྒྱུད། །བསྟན་པའི་ཡིག་ལམ་རྐྱེན་དུ་འདོད། །ཅེས་སོ། །འདི་ནི་དབྱེར་མེད་ཀྱི་རྒྱུད་དེ། རྒྱུད་ཐམས་ཅད་ཀྱི་ལུང་གི་སྦྱི། ཞེས་གསུངས་པའི་ཕྱིར་རོ། །འདུལ་བ་མདོ་སྡེ་ཆོས་མངོན་དང་། །དམ་ཚིག་བསྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །ཞེས་པ་ལྟར་གཞུང་གཞན་ལ་མ་བརྟེན་པར་དོན་གཞན་བསྐྱེད་ནུས་པ་རྩ་བའི་རྒྱུད་འདི་དང་། རྒྱུད་ཀྱིས་རྒྱུད་ཀྱི་དོན་འགྲོལ་བ་བཤད་པའི་རྒྱུད་དང་། དེ་དག་གི་མ་ཚང་བ་ཁ་སྐོང་བ་རྒྱུད་ཕྱི་མ་རྣམས་ལ ས། དངོས་སུ་དང་པོ་ཡིན་ལ་ཤུགས་ལ་གང་བཤད་བྱར་ངོས་གཟུང་ངོ་། །གཉིས་པ་དེ་བཤད་ཐབས་ལ་གསུམ་སྟེ། དོར་བྱ་བཤད་ཚུལ་ཉེས་པའི་སྐྱོན་ངོས་གཟུང་བ་ནི་བརྒྱད་དེ། སྔགས་དང་མཚན་ཉིད་བསྲེས་ནས་བཤད་ན་རྡོ་རྗེ་ཐེག་པ་ན་བབས་ཀྱི་སྐྱོན་དང་། ཡོ་ག་ཕྱི་ནང་བསྲེས་ན་ཁྱད་པར་བསྙེན་སྒྲུབ་ཀྱི་དོན་ལས་འབྲོག་འཆོལ་བའི་དང་། རྟོག་གེ་བས་བཏགས་པའི་ཐེ་ཚོམ་གྱི་གེགས་སེལ་མ་ཤེས་ན་མཛངས་པ་ལྕེ་རྡུམ་གྱི་དང་། རྒྱུད་འཁྲུགས་པའི་བདག་ཉིད་སྡེབ་མ་ཤེས་ན་རཏྣ་རྩར་འཆོལ་གྱི་དང་། འབྲེལ་ཚུལ་གཉིས་ཀ་མི་ལྡན་ན་རང་དགའི་ཚིག་དང་། མི་མཐུན་པའི་ཚིག་དོན་སྡེབ་མ་ཤེས་ན་ཤེས་རབ་ལོང་བའི་དང་། མངོན་པར་རྟོགས་པའི་རིམ་པ་སྡེབ་མ་ཤེས་ན་བདུད་རྩི་རོ་ཉམས་ཀྱི་དང་། སྤྱི་དང་ཁྱད་པར་གྱི་དགོས་ཆེད་མེད་ན་དོན་མེད་འཆལ་བའི་སྐྱོན་ནོ། །དང་དུ་བླང་བ་ལེགས་པའི་ཡོན་ཏན་ཤེས་པར་བྱ་བ་ནི་བཅུ་གཅིག་སྟེ། ལྟ་བ་བརྒལ་བརྟག་གིས་བཤད་པ་དང་། སྤྱོད་པ་རྗེས་འཇུག་ཐབས་ཀྱིས་དང་། དཀྱིལ་འཁོར་དོན་རྟགས་ཀྱིས་དང་། དམ་ཚིག་རྣམ་གྲངས་ཀྱིས་དང་། ཕྲིན་ལས་ཆོག་བསྒྲིགས་ཀྱིས་དང་། སྒྲུབ་པ་ཕྱག་བཞེས་ཀྱིས་དང་། ཏིང་འཛིན་བསྐྱེད་རྫོགས་ཀྱིས་དང་། པཱུ་ཛ་ཕྱི་ནང་གིས་དང་། སྔགས་སྒྲ་དང་སྡེབ་ཀྱིས་དང་། ཕྱག་རྒྱ་བསྐྱེད་རིམ་གྱིས་བཤད་པའོ། །དེས་ཇི་ལྟར་རྟོགས་ཚུལ་དཔེའི་སྒོ་ནས་བསྟན་པ་ནི། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མ་འབྲུ་གཉེར་དགྲོལ་བའོ། །ཞེས་པས་གསུམ་སྟེ། དབང་པོ་རབ་ལ་རྒྱུད་ཀྱི་མཚན་བསྟན་པས་རྟོགས་པ་སྨན་པ་འཚོ་བྱེད་ཀྱིས་ལག་གི་རྩ་བལྟས་པས་ལུས་མགོ་མཇུག་གི་ནད་རྟོགས་པ་ལྟ་བུ་དང་། འབྲིང་གི་དོན་རྣམ་པར་ཕྱེ་བས་རྟོགས་པ་སྨན་སྣོད་ཀྱི་ཁ་བྱང་ལྟ་བུ་དང་། ཐ་མ་ལ་འབྲུ་རེ་གཉེར་རེས་རྟོགས་པས་སྨན་གཅིག་གཅིག་ཀྱང་དྲི་དང་ཁ་དོག་ལ་སོགས་པ་ཆོས་དུ་མས་གཏན་ལ་འབེབས་པ་ལྟ་བུའོ། །དང་པོ་ནི། དེ་ཉིད་ལས། རབ་མཚན་ཐ་སྙད་གསུམ་དུ་གྲགས། །ཞེས་པ་དང་། ཐུགས་ཐིགས་ལས། དང་པོར་མཚོན་པ་མཚན་གསུམ་ལྡན། །ཞེས་པས། བསྟན་བྱ་མཚན་གྱི་རྣམ་གྲངས་གསུམ་སྟེ། གང་ཞེ་ན། སྒྱུ་འཕྲུལ་སྙིང་པོ་ལུང་གི་སྤྱི། །ཞེས་པས། རྒྱུད་དང་སྟོན་པའི་མཚན་ཐུན་མོང་དུ་གྲགས་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། འདིའི་གཉིས་པ་ནས། རྒྱུད་ཆེན་སྒྱུ་འཕྲུལ་དྲྭ་བ་ལས། །བདེ་ལྡན་གསུང་གི་དོན་འབྱུང་བ། །ཞེས་སོ། །ལུང་དང་ཆེ་བ་ལས་བཏགས་པ་ལུང་གི་སྤྱི་ཞེས་བྱ་སྟེ། ཁམས་ཉེར་གཅིག་པ་ལས། ལུང་གི་སྤྱི་འདི་ཡང་ཤིན་ཏུ་ཟབ་པའི་ཕྱིར་ཞེས་པ་དང་། འདི་ཉིད་ཀྱི་ཐ་མ་ལས། རྒྱུད་དང་ལུང་གི་སྤྱི་ཞེས་པ་དང་། སྤྱན་འགྲེལ་ལས་ཀྱང་། ལུང་གི་སྤྱི་རུ་གྲགས་པ་འདི་ཞེས་སོ། །མན་ངག་དང་དོན་རང་གི་ངོ་བོ་ལ་བཏགས་པ་གསང་བའི་སྙིང་པོ་སྟེ། འདིའི་གསུམ་པ་ལས། རང་བཞིན་གསང་བའི་སྙིང་པོ་འདི། །ཞེས་པ་དང་། ཐ་མ་ལས། གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་གསུངས་པའི་ཕྱིར་རོ། །དེ་དག་གི་དཔེ་གོང་དུ་སྨོས་པ་ལྟར་དབང་པོ་རབ་ལ་ལྟོས་ནས་རྒྱུད་དབུ་ཞབས་ཀྱི་དོན་རྟོགས་པ་ཡིན་ཏེ། ཁོག་གཞུང་ལས། ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པའོ། །གཉིས་པ་དོན་རྣམ་པར་དབྱེ་བ་ནི། མངོན་རྟོགས་ལས། ལུང་གི་སྤྱི་རུ་གྲགས་པ་འདི། །རྣམ་པར་ཕྱེ་པས་ལྔ་རུ་འགྱུར། །ཞེས་སོ། །དེ་ནི་གང་ཞེ་ན། སྤྱན་འགྲེལ་ལས། རྒྱུད་གཞུང་གཞི་བསླང་ཡོངས་སུ་ཤེས། །དགོས་འབྲེལ་གཏད་དང་རྫོགས་པའོ། །ཞེས་པས། རྒྱུད་འབྱུང་བའི་རྒྱུ་གླིང་གཞི་དང་། རྐྱེན་གླེང་བསླང་བ་དང་། འབྲས་བུ་རྒྱུད་དོན་དང་། དེའི་དགོས་འབྲེལ་དང་། བསྟན་པ་གཏད་པའོ། །དང་པོ་ལ་བཞི་ལས། དགོས་པ་ནི། རྒྱུད་དོན་འབྱུང་བར་ངེས་ཤིང་དེས་མ་འོངས་པའི་གདུལ་བྱ་རྣམས་ཡིད་ཆེས་པའོ། །ངོ་བོ་ནི་ཕུན་སུམ་ཚོགས་པ་ལྔ་སྟེ་འོག་ཏུ་སྟོན། སྒྲ་དོན་ནི། གླེང་བ་ཞེས་པ་རྒྱུད་འཆད་པ་ཡིན། དེའི་རྒྱུའམ་གཞི་ཕུན་སུམ་ཚོགས་པ་ལྔའི་ཕྱིར་རོ། །རྣམ་གྲངས་ནི། ཁོག་གཞུང་ལས། ཐུན་མོང་གླེང་གཞི་རྣམ་གཉིས་དང་། །ཐུན་མོང་མིན་པ་རྣམ་པ་གཉིས། །ཞེས་པས། སྤྱིར་ཐུན་མོང་གི་དང་། ཐུན་མོང་མ་ཡིན་པའི་གླེང་གཞི་གཉིས་སོ། །དང་པོ་ལའང་གཉིས་ཏེ། བསྟན་པ་འབྱུང་བའི་སྤྱིའི་དང་། རྒྱུད་འབྱུང་བ་ཁྱད་པར་ཅན་གྱིའོ། །དང་པོ་ལ་གསུམ་སྟེ། གླེང་གཞིའི་རྒྱུ་དང་། རང་གི་ངོ་བོ་དང་། ཞོར་ལ་དུས་ལུགས་བསྟན་པའོ། །དང་པོ་ནི། ཉིད་ཀྱི་སྐུ་གསུང་ཐུགས་ལས་ཐུབ་པ་དྲུག་སྤྲོས་པ་སྟེ། འདིའི་གསུམ་པ་ལས། དེ་ནས་དེ་བཞིན་གཤེགས་པ་ཐམས་ཅད་ལ་ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བའི་རིག་པའི་སྐྱེས་བུ་ཐུབ་པ་དྲུག་དེ་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །ཞེས་པ་དང་། ཁོག་གཞུང་ལས། ཐུབ་དྲུག་སྟོན་པ་ཞེས་པའོ། །གཉིས་པ་ནི་བཞི་ལས། དེ་ཉིད་ལས། སྟོང་གསུམ་གནས་པ་ཞེས་པ་ཞིང་ཁམས་ཏེ། འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར་ཞེས་སོ། །ཁྱད་པར་ཤཱཀྱ་ཐུབ་པ་ཉིད་ཅེས་པ་སྟོན་པ་སྟེ་ཐུབ་པ་ཆེན་པོ་བཅོམ་ལྡན་འདས་རེ་རེས་ཞེས་སོ། །དེ་ཉིད་ལས། རྒྱུད་དྲུག་འཁོར་དང་རྣམ་བཞི་སོགས། །ཞེས་པ་ནི། དེ་ཉིད་ལས། འགྲོ་བ་ལྔ་ཡི་དོན་མཛད་དེ། །ཞེས་གདུལ་བྱ་དང་། དེ་ཉིད་ལས། རྒྱལ་སྲིད་བཙུན་མོ་འཁོར་སྤངས་ནས། །རབ་ཏུ་བྱུང་སོགས་མཛད་པ་ཡི། །ཞེས་པས་མཛད་པའོ། །དེ་ལའང་བཞི་སྟེ། སྐུའི་མཛད་པ་ནི། འདིའི་གསུམ་པ་ལས། བལྟམས་པ་དང་ཞེས་སོ། །ཐུགས་ཀྱི་ནི་དུས་བཞི་ཀུན་ཏུ་མཁྱེན་པ་ཞེས་སོ། །བསམ་གྱིས་མི་ཁྱབ་པའི་ནི་ཀུན་ཏུ་སྐུ་བསམ་གྱིས་མི་ཁྱབ་ཅེས་སོ། །གསུང་གི་མཛད་པ་ནི་ཐམས་ཅད་ཀྱང་འདི་ལྟ་སྟེ་འདུལ་བའི་དབང་གིས་ཞེས་པས་སོ། །དུས་ནི་སྒྲོན་མ་བཀོད་པའི་དུས་ཏེ། དེ་ཉིད་ལས། ཤིན་ཏུ་དཀོན་པའི་དུས་ནའོ། །ཞེས་པའོ། །དེ་ཡང་ཁོག་གཞུང་ལས། སྐྱེ་བོ་ཆགས་སོགས་སྤོང་འདུལ་བ། །བྱིན་རླབས་ཤར་བའི་ཐུབ་པ་ཉིད། །མི་ཡི་སྐྱེ་བ་བཞེས་སྣང་བས། །བཅུ་གཉིས་ལ་སོགས་རྫོགས་པ་སྟེ། །རྣམ་དག་མཆོད་རྟེན་རྡོ་རྗེའི་གདན། །རབ་བྱུང་མངོན་པར་རྫོགས་ཚུལ་སྣང་། །ཞེས་སོ། །དེ་ནི་ལེའུ་གསུམ་པའི་སྟོད་ནས་སྟོན་ནོ། །གཉིས་པ་རྒྱུད་འབྱུང་བ་ཁྱད་པར་ཅན་གྱི་གླེང་གཞི་ལ་གཉིས་ཏེ། གླེང་གཞི་དངོས་དང་། ཞོར་ལ་གདུལ་བྱ་དགོས་ཆེད་ཀྱི་གླེང་གཞིའོ། །དང་པོ་ནི། དེ་ཉིད་ལས། སྟོན་པ་གནས་དང་སྡུད་པ་འཁོར། །ཞེས་པས་དེ་དག་འཛོམ་པའི་ཚེ་དུས་ཏེ། ཕུན་སུམ་ཚོགས་པ་ལྔ་ལས། སྟོན་པ་ནི། སྟོན་པ་བདག་ཉིད་དང་། འཆད་པའི་སྐྱེས་བུའོ། །དང་པོ་ནི། བཅོམ་ལྡན་འདས་ཀུན་ཏུ་བཟང་པོ་ཡབ་ཡུམ་སྟེ། དེ་ཉིད་ལས། སྟོན་པའི་རང་བཞིན་བདུན་དང་ལྡན། །བདག་ཉིད་བྱེད་པ་ཀུན་ཏུ་བཟང་། །ཞེས་པའོ། །གཉིས་པ་ནི་རིགས་ལྔ་ཡབ་ཡུམ་སྟེ། དེ་ཉིད་ལས། མཚུངས་པ་བཞི་དང་ལྡན་པའི་ཕྱིར། །ལྔས་ཀྱང་སྟོན་པ་གསུང་མི་འགལ། །ཞེས་པ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཞེས་པའོ། །གནས་ནི་འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། དེ་ཉིད་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་པ་དང་། ཡང་འོག་མིན་གྱི་གནས་མཐའ་དང་དབུས་མེད་པ་ན་ཞེས་པ་ནས། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། ཞེས་པ་དང་། ཐུགས་ཐིགས་ལས། ཆོས་དབྱིངས་འོག་མིན་གསང་བ་ན། །ལྷན་ཅིག་འདུས་པའི་རིན་ཆེན་ཁང་། །ཞེས་པས་སོ། །འཁོར་ལ་གཉིས་ཏེ། རྣམ་གྲངས་དངོས་དང་། ཞོར་ལ་དེ་དག་གི་ཚད་དོ། །དང་པོ་ནི། དེ་ཉིད་ལས། ལྷན་ཅིག་འཁོར་དང་གོ་ཕྱེ་བ། །ཞེས་པས་གཉིས་ཏེ། ལྷན་ཅིག་པའི་འཁོར་དང་། གོ་ཕྱེ་བའི་འཁོར་རོ། །དང་པོ་ལ་གསུམ་ལས། རང་བཞིན་གཉིས་སུ་མེད་པ་ནི་གོང་དུ་བསྟན་པ་འཆད་པའི་སྐྱེས་བུ་ལྔ་སྟེ། ཁོག་གཞུང་ལས། ཉིད་ལས་མི་གཞན་རིགས་ལྔ་དང་། །ཞེས་གོང་དུ་བསྟན་ནོ། །རིག་པ་ཁྱད་པར་ཅན་གྱི་ནི་རྒྱལ་སྲས་སེམས་དཔའ་དང་འཇིགས་བྱེད་ཆེན་པོ་རྣམས་ཏེ། དེ་ཉིད་ལས། རིག་པའི་ཡེ་ཤེས་བྱང་ཆུབ་སེམས། །ཞེས་པ་དང་། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། ཞེས་པ་ནས་མཚན་མར་མ་ཡིན་པ་ལ་སོགས་པ་ཞེས་སོ། །ཆོས་ཀྱི་འབྲེལ་བ་དད་པས་གཏམ་ཉན་པའི་འཁོར་ནི། འཇིག་རྟེན་པའི་ལྷ་ཆེན་པོ་ལ་སོགས་པ་རྣམས་ཏེ། དད་པས་ཉན་པའི་ལྷ་ཆེན་རྣམས། །ཞེས་དང་། རྒྱས་པའི་དོན་གཉིས་པ་ལས། གོང་ན་མེད་པའི་ཡེ་ཤེས་མཆོག །ཐམས་ཅད་ལ་ནི་དབང་སྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱི་བསྐོར། །ཞེས་པ་དང་། རྡོ་རྗེ་ལས། གཟུང་འཛིན་བྲལ་བའི་བླ་མེད་རྗེས་མདོང་དང་། །འཇིག་རྟེན་གཙོ་དང་འཁོར་བཀུར་དབང་ཕྱུག་དང་། །ཞེས་སོ། །གཉིས་པ་གོ་ཕྱེ་བའི་འཁོར་ནི། །ཐུན་མོང་བ་རྣམ་པར་འདྲེན་པའི་སྤྲུལ་པ་དྲུག་དང་། རྗེས་སུ་འཇུག་པའི་རྣལ་འབྱོར་པ་སྐལ་པ་ཅན་རྣམས་ཏེ། འགྲོ་བ་འདུལ་བར་སྤྲུལ་སོགས་པ་ཞེས་པས། རྒྱས་པའི་བཅུ་གཅིག་པ་ལས། གཞན་ཡང་ཕྱོགས་བཅུའི་འཇིག་རྟེན་ཁམས་རྣམས་ན། །ཞེས་པ་དང་། འདིའི་བཅུ་གསུམ་པ་ལས། འབྱུང་དང་མ་འོངས་ཐམས་ཅད་དང་། །ཐ་མ་ལས། སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་པ་རྣམས་ནི་གོ་ཕྱེ་བར་མང་མངོན་ནོ། །ཐ་མ་ཚད་ནི། ཀུན་ཏུ་ཁྱབ་ཅིང་མཐའ་ཡས་པར་ཁྱབ་པ་སྟེ། ཆོས་ཀྱི་དབྱིངས་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གང་བུ་བཞིན་དུ་གང་ནས་ཁྱབ་པར་བཞུགས་སོ། །མང་བ་སྟེ། །དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པ་དང་། འཁོར་གྱི་ཚད་ནི་ཁྱབ་དང་མང་། །བརྗོད་འདས་ནམ་མཁའི་མཐའ་ཀླས་གང་། །ཞེས་པའོ། །དུས་ལ་གཉིས་ཏེ། ངོ་བོའི་དང་། གདུལ་བྱ་ལ་སྣང་བའི་དུས་སོ། །དང་པོ་ནི། སྔ་ཕྱི་ཐ་དད་དུ་འཛིན་པ་འཁྲུལ་པ་ཡིན་ལ་དེ་དག་པས་མཉམ་པ་ཉིད་དེ། དེ་ཉིད་ལས། དུས་ཀྱི་ངོ་བོ་མཉམ་གནས་ཀྱང་། །ཞེས་པ་དང་། རྒྱས་པ་ལས། འདས་དང་མ་འོངས་ཐམས་ཅད་ཀུན། །ཡེ་ཤེས་རྟོགས་པའི་ཁྱད་པར་ལས། །དུས་བཞི་སྔ་ཕྱི་མེད་པ་ཡི། །མཉམ་པ་ཉིད་དུ་ལྷན་ནེར་སྦྱོར། །ཞེས་པ་དང་། འདི་ནས་དུས་བཞི་ཀུན་ཏུ་མཁྱེན་པ་དང་ཞེས་སོ། །གཉིས་པ་ནི། རྒྱུད་འབྱུང་བའི་རྒྱུ་ཕུན་སུམ་ཚོགས་པ་ལྔ་པོ་ཚང་བས་གདུལ་བྱའི་ངོ་ལ་རྒྱུད་དོན་བྱུང་བ་དེ་ཡིན་ཏེ། དེ་ཉིད་ལས། སྐལ་པ་ཅན་ལས་དཀོན་པའི་དུས། །ཞེས་པའོ། །སྡུད་པ་པོ་ནི། ཕྱོས་བཅུ་་དུས་བཞིའི་རྒྱལ་བ་རྣམས་ཀྱི་གསང་བའི་མཛོད་འཛིན་པ་གསང་བདག་སྟེ། དེ་ཉིད་ལས། གསང་བདག་ཕྱག་ན་རྡོ་རྗེ་ཡིས། །ཐུན་མོང་མ་ཡིན་ངེས་པའི་རྒྱུད། །དྲིས་ལན་མི་མངོན་དོན་གྱིས་བསྡུས། །བྱིན་རླབས་མི་ཡུལ་གྲགས་པ་ཡིན། །ཞེས་པ་དང་། རྒྱ་མཚོ་ལས། འཁོར་གྱི་ནང་ནས་སྐལ་ལྡན་མཆོག །འདུལ་བའི་དུས་བབ་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་པ་དང་། འདི་ཉིད་ལས། རྡོ་རྗེ་གསང་བའི་ཚིག་ཏུའོ། །ཞེས་སོ། །དེ་ལེའུ་དང་པོས་སྟོན་ནོ། །གཉིས་པ་གདུལ་བྱ་དགོས་ཆེད་ཀྱི་གླེང་གཞི་ལ་ཡང་ལྔ་ལས། སྟོ ན་པ་ནི། གོང་མ་ཉིད་ཁྲོ་བོའི་དཀྱིལ་འཁོར་དུ་མངོན་པར་འདུ་མཛད་པ་སྟེ་ཆེ་མཆོག་བཛྲ་ཧེ་རུ་ཀ་སྟེ། བཅོ་ལྔ་པ་ལས། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོས་སངས་རྒྱས་ཐམས་ཅད་ཀྱི་ངོ་བོའོ། །གནས་ནི་དུར་ཁྲོད་ཆེན་པོའི་དཀྱིལ་འཁོར་ཏེ་བདེ་བའི་གནས་ཞེས་པས། དུར་ཁྲོད་ཆེན་པོར་བཞུགས་པར་དགྱེས་ནས་ཁྲག་གི་རྒྱ་མཚོའི་དཀྱིལ་ཀེང་རུས་ཆེན་པོ་རི་རབ་ཀྱི་སྟེང་འབར་བའི་འཁོར་ལོའི་དཀྱིལ་ན། ཞེས་པས་སོ། །འཁོར་ནི་རིགས་ལྔ་སྟེ། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་ཤར་ཕྱོགས་སུ་བཞུགས་སོ། །གསང་བའི་བུ་མོ་བརྒྱད་ནི། དཀར་མོའི་ཚོགས་དང་ཞེས་པ་ལ་སོགས་སོ། །གུས་པའི་བུ་མོ་བརྒྱད་ནི། སེང་གདོང་ཆེན་མོའི་ཚོགས་ལ་སོགས་སོ། །དུར་ཁྲོད་སའི་སྒོ་སྲུང་བཞི་ནི། སྟག་གདོང་ཆེན་མོའི་ཚོགས་དང་ཞེས་སོ། །སྲིན་མོ་ཉེར་བརྒྱད་ནི། སྲིན་མོ་ཆེན་མོ་མིའི་སྲིན་མོ་ལ་སོགས་སོ། །དུས་ནི། གདུལ་དཀའ་དྲག་པོའི་གདུལ་བྱ་ལས་དྲག་པོའི་ཕྲིན་ལས་སུ་སྣང་བའི་དུས་ཏེ། འདུལ་བའི་ཐབས་སྣ་ཚོགས་བསམ་གྱིས་མི་ཁྱབ་པར་སོ་སོར་སྣང་བས་དུས་གཅིག་ཏུ་བཏུལ་ཏེ། ཞེས་སོ། །སྡུད་པ་པོ་ནི་གོང་མའོ། །བཅོ་ལྔ་པས་སྟོན་ནོ། །གཉིས་པ་ཐུན་མུན་གྱི་གླེང་གཞི་ལ་གཉིས་ཏེ། སྤྱིར་བསྐྱེད་རྫོགས་གཉིས་ལས་རྫོགས་རིམ་གྱི་ཆར་གཏོགས་པས་ན། རྫོགས་པ་བསྐྱེད་རིམ་གྱི་དང་། རྫོགས་པ་རྫོགས་རིམ་གྱི་གླེང་གཞིའོ། །དང་པོ་ནི། སྙིང་ག་ཆོས་ཀྱི་འཁོར་ལོའི་རྩ་འདབ་བཞི་ལས་བཞིའི་དབྱིབས་དང་ཁ་དོག་ཏུ་ཡོད་པ་ནི་གནས་ཞེས་པ། རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞིན་ཨེ་སོགས་དབྱིབས་ཅན་གནས། །ཞེས་སོ། །དེའི་དབུས་ན་སྲོག་མི་ཤིགས་པའི་ཐིག་ལེ་ནི་སྟོན་ནོ། །དེ་ཉིད་ལས། མི་ཤིགས་ཐིག་ལེ་བཾ་དབྱིབས་ཅན། །རང་ལ་བདེ་བ་གསལ་བྱེད་བདག །ཅེས་སོ། །ཡེ་ཤེས་ལ་སོགས་བདེ་བའི་རྣམ་ཤེས་སྐྱེར་རུང་བ་ནི་འཁོར་ཞེས་པས། དེ་ཉིད་ལས། མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བཤད་སྡུད་འདོད། །ཅེས་སོ། །དོན་དམ་བྱང་སེམས་དངོས་སུ་སྐྱེས་པ་ནི་སྡུད་པ་པོ་ཡང་ཡིན་ལ་བསྟན་པར་ཡང་རུང་སྟེ། ཡེ་ཤེས་ནམ་མཁའི་གཟུགས་སྐྱེས་པ། པ་ར་མཱརྠ་དོན་ཟབ་མོ། །ཞེས་སོ། །དེའི་ཚེ་སྔ་ཕྱིར་འཛིན་པ་དག་པས་དུས་ཞེས་པས། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་སོ། །གཉིས་པ་ནི་ཡུམ་གྱི་མཁའ་ལས་བཞིའི་དབྱིབས་སུ་ཡོད་པ་ནི་གནས་ཏེ། ཐལ་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་སུ་གནས། །ཞེས་སོ། །ཡབ་ཀྱི་ཐིག་ལེ་དབུར་རྫོགས་པ་ནི་ཐམས་ཅད་ཀྱི་བྱེད་པ་པོའི་ཕྱིར་སྟོན་པ་སྟེ། དེ་ཉིད་ལས། སྐད་ཅིག་གསལ་བྱེད་ལས་མིང་ཅན། །བཾ་དབྱིབས་ཐིག་ལེར་བཅས་སྟོན་པའོ། །ཞེས་སོ། །ཡེ་ཤེས་ལ་སོགས་གསང་བའི་རྣམ་ཤེས་མྱོང་བྱེད་ནི་འཁོར་ཏེ། དེ་ཉིད་ལས། མ་ད་མ་ནུ་སྡོམ་བྱེད་ཡི། །ལུས་ཅན་རྣམ་ཤེས་དེ་དག་ལ། །ཞེས་སོ། །ཐམས་ཅད་བདེ་བར་བསྡུས་ནས་དངོས་སུ་ཉམས་སུ་མྱོང་བས་སྡུད་པར་ཡང་རུང་ལ། མྱོང་བྱ་དོན་ཟབ་མོ་ནི་བསྟན་པ་སྟེ། པ་སྒྲ་དོན་དམ་ངེས་པའི་རྒྱུད། །ཡ་ན་ཐེག་ཆེན་འདི་ཉིད་དོ། །ཞེས་སོ། །དེ་སྐྱེས་ལ་ངོས་མི་ཟིན་པ་ནི་བསམ་གྱི་མི་ཁྱབ་པའི་ཕྱིར་དུས་ཏེ། དུས་ནི་བསམ་གྱི་མི་ཁྱབ་དུས། །ནཱ་མ་དེ་མིང་ཞེས་བྱ་བ། །ཞེས་དང་། ཁོག་གཞུང་ལས། ཡབ་ཡུམ་རོལ་པའི་དུས་ཉིད་དུ། །གསང་བ་ཕུན་སུམ་ཚོགས་དྲུག་གིས། །ཡིག་བཞིའི་སྒོ་ནས་བྱིན་བརླབས་ཀྱིས། །དབང་བསྐུར་མ་བརྗོད་རྒྱུད་བཤད་པ། །ཀུན་ཡུལ་མིན་པས་སྐལ་མེད་གསང་། །ཞེས་སོ། །ལེའུ་དང་པོ་དང་། བཞི་པ་དང་། བཅུ་གསུམ་པ་རྣམས་ནས་སྟོན་ནོ། །དོན་གཉིས་པ་རྐྱེན་གླིང་བསླང་བ་ལ་བཞི་ལས། དགོས་པ་ནི། མྱུར་དུ་རྒྱུད་དོན་གདུལ་བྱའི་བློ་དང་འཚམས་པར་འབྱུང་བ་སྟེ། ཐུགས་ཐིགས་ལས། བརྗོད་བྱ་རང་བཞིན་གསང་བའི་རྒྱུད། །དེ་ཇི་བཞིན་དུ་རྗོད་བྱེད་དག །སྟོན་པས་རྒྱུད་དོན་ལམ་དང་ཚིག །གླེང་གཞིའི་རྗེས་སུ་ངེས་པར་འགྲོ། །ཞེས་སོ། །ངོ་བོ་ནི། སྟོན་འཁོར་དྲིས་ལན་གཅིག་གི་རྐྱེན་དུ་གཅིག་གྱུར་པས་བསྟན་པ་འབྱུང་ལ་མ་རག་པ་སྟེ། དེ་ཉིད་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རེག་པ། །ཞེས་སོ། །སྒྲ་བཤད་པ་ནི། གོང་ལྟར་གླེང་བ་ནི་རྒྱུད་འཆད་པ་ཡིན་ལ། དེར་བསྐུལ་བས་རྒྱུད་འབྱུང་བའི་རྐྱེན་དུ་གྱུར་པའི་ཕྱིར་ཏེ། ཐུགས་ཐིགས་ལས། ངེས་པའི་ཚིག་གྲུབ་ངོ་བོའང་དེ། །སྐབས་ཀྱི་དྲིས་ལས་སྨོས་ཅི་དགོས། །དྲིས་ལས་མདོ་ཕྱིར་ངེས་པར་འགྲུབ། །ཅེས་སོ། །རྣམ་གྲངས་ནི། ཁོག་གཞུང་ལས། དེ་བཞིན་གླེང་བསླང་རྣམ་པ་གཉིས། །ཞེས་པས། ཐུན་མིན་ལྷན་ཅིག་པའི་ཆེད་དུ་དང་། ཐུན་མོང་གི་ཕྱེ་བའི་ཆེད་དུ་གླེང་བསླང་བ་སྟེ། ཐུགས་ཐིགས་ལས། འཁོར་དང་གཞན་གྱི་དོན་ཕྱིར་དང་། །རྒྱུ་ཚོགས་ཐུགས་རྗེས་ལྡང་པར་འགྱུར། །ཞེས་སོ། །དང་པོ་ལ་གཉིས་ཏེ། གསང་བའི་དབང་བསྐུར་བ་དང་། དབང་ཕྱི་མ་གཉིས་ཀྱི་བྱེད་ལས་ཐུན་མོང་དུ་བསྟན་པའོ། །དང་པོ་ནི། ཁོག་གཞུང་ལས། ཐུན་མོང་མ་ཡིན་སྟོན་པ་གཉིས། །ཡབ་ཡུམ་ཆགས་བསྐུལ་རོལ་པ་དང་། །དགྱེས་བསྟར་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་པས་ཡབ་ཡུམ་སྙོམས་པར་ཞུགས་པ་སྟེ། འདིའི་གཉིས་པ་ལས། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ་ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེ་བཙུན་མོ་བྱ་བ་མོ་ཆོས་སྐུ་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཉམས་སུ་བསྟར་བ་ལས་ཁྱད་པར་གྱི་རྫས་ཀྱི་དབང་བསྐུར་བ་དངོས་ནི། ཕྱོགས་བཅུ་དུས་བཞིའི་དེ་པ་མ་ལུས་པ་ཐམས་ཅད་གཅིག་གི་རང་བཞིན་དུ་དབྱེར་མེད་པའོ། །གླེང་བསླང་ནས་དེའི་རྟོགས་པ་བརྗོད་པ་ནི། ཨེ་མ་ཧོཿ རྡོ་རྗེ་ཕུང་པོའི་ཡན་ལག་ནི། ཞེས་པ་དང་། ཀྱེ་མའོ། ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོ། །དེའི་ངེས་ཚིག་ནི། དེ་པ་ཉིད་ཀྱིས་དེ་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཞེས་བརྗོད་པས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །ཞེས་སོ། །གཉིས་པ་ལ་ཡང་། དེ་ནས་གཉིས་སུ་མེད་པའི་བདག་ཉིད་ཆེན་པོས་ཡེ་ནས་སངས་རྒྱས་པའི་སེམས་ཡེ་ཤེས་སུ་བསྐྱེད་པ་འདི་གསུངས་སོ། །ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཞེས་གཡོ་ལྡང་དང་། འགག་པ་མེད་ལས་ཞེས་འཇིག་འཇུག་དང་། གནས་པ་མེད་ལས་ཞེས་གནས་པ་དང་། དམིགས་པ་མེད་ལས་ཞེས་སྨོན་པ་དང་། འགྲོ་འོང་མེད་ལས་ཞེས་འགྲོ་འོང་བྱང་སེམས་སོ། །གསུངས་པ་ལོ་རྒྱུས་སུ་བརྗོད་དེ་དབང་གི་ངོ་བོ་ཐབས་ལམ་གྱི་སེམས་རིམ་པ་ལྔར་བསྐྱེད་ནས་དེ་ཐོབ་པའི་ཡོན་ཏན་སྟོན་འཁོར་དགོངས་པ་ཐ་མི་དད་དུ་གྱུར་པ་སྟེ། ཞེས་བརྗོད་པས་དེ་པ་ཐམས་ཅད་དང་བཙུན་མོའི་ཚོགས་དང་བཅས་པ་ཐམས་ཅད་མཉེས་པས་ཁྱད་པར་གྱུར་ཏོ། །ཞེས་པ་དང་། འགྲོ་བ་ཆགས་ཅན་སྤོངས་མེད་ལ། །ལོངས་སྤྱོད་རྫོགས་སྐུ་བཙུན་མོ་དང་། །གཉིས་མེད་རོལ་སོགས་བསྟན་པ་སྟེ། །མཐུན་པས་མཐུན་པ་སྒྲོལ་ཕྱིར་རོ། །ཞེས་པའོ། །གཉིས་པ་ནི། ཁོག་གཞུང་ལས། ཐུན་མོང་གླེང་བསླང་སྟོན་དང་འཁོར། །ཐ་དད་སྣང་ནས་དབང་ཐོབ་སྟེ། །ཉིད་ཀྱིས་རྟོགས་ནས་འགྲོ་དོན་དུ། །བཀའ་སྩལ་དོན་གྱིས་ཞུས་དང་ལན། །ཞེས་པས་ལྷན་ཅིག་པ་རྣམས་དབང་ཐོབ་པས་རྒྱུད་རྟོགས་ཀྱང་གོ་ཕྱེ་བ་གསང་བ་བཞིས་བསྒྲགས་པའི་ཆེད་དུ་དེ་བཤད་པར་ཞུས་པ་སྟེ། དེ་ནས་དེ་པ་ཐམས་ཅད་བཙུན་མོའི་ཚོགས་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱི་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་སོ། །ཡང་དེ་ཉིད་ལས། གནང་བར་དོན་གྱི་ཚིག་ཏུ་ཕྱུང་། །སྐུ་གསུང་ཐུགས་ཀྱི་སྤྲོ་བ་མཛད། །ཅེས་པ་དང་། ཅེས་བརྗོད་པས་ཞེས་པ་དང་། ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་ཞེས་པ་ནས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་བར་གྱིས་སྟོན་པ་ཐུགས་རྗེ་སྐྱེས་ནས་རྒྱུད་འཆད་པར་དགྱེས་པ་མཛད་པའོ། །ལེའུ་གཉིས་པས་སྟོན་ནོ། །དོན་གསུམ་པ་ཡོངས་སུ་ཤེས་པར་བྱ་བའི་དངོས་པོ་རྒྱུད་ཀྱི་དོན་ལ་ཡང་བཞི་ལས། དགོས་པ་ནི། དངོས་སུ་ལམ་གྱི་རྒྱུད་རྟོགས་ཤིང་བརྒྱུད་ནས་གནས་སྐབས་དང་མཐར་ཐུག་གི་འབྲས་བུ་གཉིས་མངོན་དུ་བྱེད་པའོ། །ངོ་བོ་ནི་ལམ་དང་དེའི་ཆ་རྐྱེན་རྣམས་ཏེ་འོག་ཏུ་སྟོན་ནོ། །སྒྲ་བཤད་པ་ནི། རྒྱུད་ཅེས་པ་གོང་ལྟར་ལ། དོན་ཞེས་པ་བྱ་བའི་སྒྲ་བྱེད་པ་ལ་ཞུགས་པ་སྟེ་ཤེས་བྱ་དང་ཐོབ་བྱ་ནི་དོན་ཡིན་ལ། དེ་ལམ་འདིས་ཤེས་ཤིང་ཐོབ་པར་བྱེད་པའི་ཕྱིར་ཏེ། ཁོག་གཞུང་ལས། རྒྱུད་དོན་ཚང་དང་དོན་འབྲེལ་བས། །རང་བཞིན་རྒྱུད་ཀྱི་མིང་དུ་གྲགས། །མཚོན་བྱེད་རྒྱུད་ཀྱང་དེ་བཞིན་ནོ། །ཞེས་པའོ། །རྣམ་གྲངས་ནི། དེ་ཉིད་ལས། རྒྱུད་དོན་ལམ་དང་ཡན་ལག་སྟེ། །ཞེས་པས་གཉིས་ཏེ། ལམ་གྱི་ངོ་བོ་དང་། ཡན་ལག་ཆ་རྐྱེན་ནོ། དང་པོ་ལ་བཞི་སྟེ། ཁྱད་པར་ལམ་གྱི་མཚན་ཉིད་དང་། མཚོན་བྱའི་དབྱེ་བ་དང་། ཕྱེ་བའི་ཆོས་འབྲེལ་ལམ་ཐ་དད་བརྟག་པ་དང་། སྔོན་དུ་གང་འགྲོ་དཔྱད་པའོ། །དང་པོ་ནི། ཁྱད་པར་གྱི་ལམ་པས་ཉམས་སུ་བླང་བྱར་གྱུར་པ་སྟེ། ལམ་རིམ་ལས། དེ་ལྟར་བརྟགས་པའི་སྐལ་ལྡན་ཕྱིར། །ཞེས་པ་དང་། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པ། །ཤེས་རབ་མིག་ལྡན་འདིར་འཇུག་ཕྱིར། །ཞེས་པ་དང་། རྒྱས་པ་ལས། དེ་བཞིན་གཤེགས་པའི་སྤྱོད་ཡུལ་འདི། །སྐྱེས་བུ་བློ་རྩལ་རབ་ཀྱིས་རྟོགས། །ཞེས་གསུངས་པའི་ཕྱིར་རོ། །གཉིས་པ་ནི། ཁོག་གཞུང་ལས། དེ་ཡང་གདུལ་བྱའི་བསམ་པ་ཡི། །དབང་གིས་ལམ་ཡང་གཉིས་སུ་བརྗོད། །ཅེས་པས་གཉིས་ཏེ། གང་ཞེ་ན། དེ་ཉིད་ལས། གྲོལ་ལམ་ཐབས་ལམ་བསྟན་པ་ཡིན། །ཞེས་པས་ཤེས་རབ་གྲོལ་བའི་ལམ་དང་། གདམས་ངག་ཐབས་ཀྱི་ལམ་སྟེ། འདིའི་དགུ་པ་ལས། ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཞེས་སོ། །དང་པོ་ལ་གཉིས་ཏེ། གོ་དོན་དང་། དབྱེ་བའོ། །དང་པོ་ནི། ཤེས་འཇུག་གི་འཆིང་བ་ལས་གྲོལ་བས་འབྲས་བུ་གྲུབ་བྱེད་དུ་གྱུར་པ་སྟེ། ལམ་རིམ་ལས། ཐོས་བསམ་བསྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་འགྲུབ་བྱེད་ཕྱིར། །ཞེས་སོ། །གཉིས་པ་ནི། དེ་ཉིད་ལས། རིང་བའང་རིམ་དང་ཅིག་ཅར་བའོ། །ཞེས་པས་རིམ་གྱིས་པ་དང་། ཅིག་ཅར་བ་གཉིས་སོ། །དང་པོ་ལ་བཞི་སྟེ། ལམ་མཚན་ཉིད་གསུམ་དུ་བཅིང་བ་དང་། དེ་ལ་མཐར་ཆགས་ཐོད་རྒལ་དུ་བརྟག་པ་དང་། ལམ་གང་ལ་ཞི་ཁྲོ་གཉིས་སུ་ཡོད་མེད་ཀྱི་བྱེ་བྲག་དང་། དེ་དག་ལ་ཟག་པ་ཡོད་མེད་ཀྱི་ཁྱད་པར་བསམ་པའོ། །དང་པོ་ནི། འདིའི་བཅུ་གཉིས་པ་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །ཞེས་པས། རྒྱུ་ཤེས་པའི་དང་། རྐྱེན་འཇུག་པའི་དང་། འབྲས་བུ་མཐར་ཕྱིན་པའི་མཚན་ཉིད་དོ། །དང་པོ་ནི། ལྟ་བ་རྟོགས་པ་སྟེ། དེ་ལ་གསུམ། གང་གིས་རྟོགས་བྱ་ལྟ་བའི་རང་བཞིན་དང་། གང་གིས་རྟོགས་བྱེད་བློའི་ངོ་བོ་དང་། དེས་ཇི་ལྟར་རྟོགས་པའི་ཚུལ་ལོ། །དང་པོ་ནི། ཐམས་ཅད་ཀྱི་རང་བཞིན་ཇི་ལྟར་གནས་པ་དེ་ཡིན་ཏེ། དོན་གསུམ་པ་ལས། ཆོས་ཀྱི་རང་བཞིན་ཇི་ལྟ་བུ། །བདག་གིས་ཡང་དག་རྟོགས་བྱ་བ། །ཞེས་གསུངས་པའི་ཕྱིར་རོ། །གཉིས་པ་ནི། ཐོས་བསམ་ལས་བྱུང་བའི་ཤེས་རབ་ཀྱི་དབང་པོ་དེ་ཡིན་ཏེ། ལམ་རིམ་ལས། རྒྱུ་ཡི་དཀྱིལ་འཁོར་མཐོང་བྱའི་ཕྱིར། །ཐོས་བསམ་དམ་པ་འཚོལ་བར་བྱེད། །ཅེས་པ་དང་། འདིའི་བཅུ་གསུམ་པ་ལས། ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང ཀུན་ངམ་ལྷུན་གྱིས་གྲུབ། །ཅེས་སོ། །ཐ་མ་ནི། དེ་ཉིད་ལས། དེ་ལྟར་ལྡན་པས་སྤྱན་ཚོལ་ཚེ། །གཏན་ཚིགས་རྣམས་ཀྱིས་སྨལ་བྱས་ཏེ། །ནོར་བའི་ཤེས་རབ་དམིགས་བསལ་ཏེ། །མ་ནོར་དམིགས་ནས་བསླང་བར་བྱ། །ཞེས་པས་གཞལ་བྱ་གཏན་ཚིགས་ཀྱིས་རྟོགས་པར་བྱེད་པའོ། །དེ་ནི་དེ་ཉིད་ལས། གཞི་དང་གཏན་ཚིགས་གྲུབ་པའི་དོན། །ཞེས་པས་གསུམ་སྟེ། གང་གཞལ་བྱ་ཆོས་ཅན་དང་། གང་གིས་འཇལ་བྱེད་གཏན་ཚིགས་དང་། དེ་ལྟར་གཞལ་བའི་གྲུབ་མཐའོ། །དང་པོ་ནི། བློ་ཚད་མས་རྟོགས་པར་བྱེད་པ་སྟེ། དེ་ལ་རིགས་ཀྱི་བྱེ་བྲག་གསུམ་ལས་སྐབས་འདིར་དངོས་པོ་གཉིས་ཀྱིས་བསྡུས་པའི་ཆོས་ཐམས་ཅད་ཡིན་ཏེ། དེ་ཉིད་ལས། དེ་ཡང་དངོས་སུ་བརྟག་གཞི་ནི། །འཁོར་དང་འདས་དངོས་ཞེན་སྣང་བརྟག །ཅེས་གསུངས་པའི་ཕྱིར་རོ། །དེ་ཡང་འདས་པའི་རང་མཚན་ཡུལ་དུ་མ་གྱུར་ཅིང་འཁོར་བའི་རང་མཚན་དེར་བདེན་པར་གཏན་ལ་ཕབ་ཀྱང་དེ་ཉིད་འཁྲུལ་པ་ཡིན་པའི་ཕྱིར་གཞལ་བ་ལ་དགོས་པ་མེད་པར་འགྱུར་རོ་ཞེ་ན། དེ་གཉིས་ཀྱི་རང་མཚན་གཞལ་བྱ་མ་ཡིན་ནོ། །འོ་ན་གང་ཞེ་ན། འདས་པར་སྣང་ཡང་འཁོར་བར་ཞེན་པའི་སྣང་ཞེན་གཉིས་ཀྱི་ཚོགས་པ་དེ་ཡིན་ཏེ། དེ་ཉིད་ལས། ཞེན་སྣང་འཇལ་ལ་སྐྱོན་པ་མེད། །ཅེས་གསུངས་པའི་ཕྱིར་རོ། །གཉིས་པ་གཏན་ཚིགས་ནི། ཚུལ་གསུམ་ཚང་བས་རྩོད་གཞིའི་སྟེང་དུ་དགག་སྒྲུབ་གཉིས་ཀྱི་བྱེད་ལས་དང་ལྡན་པ་སྟེ། དེ་ཉིད་ལས། དེ་ཕྱིར་གཏན་ཚིགས་ལས་ལ་བརྗོད། །ཅེས་གསུངས་པའི་ཕྱིར་རོ། །དེ་ལ་གཉིས་ཏེ། སྒྲ་མཐུན་དོན་སྤགས་ཀྱི་དང་། ཚད་མ་བཀའ་གཞུང་གི་གཏན་ཚིགས་སོ། །དང་པོ་ལ་ལྔ་སྟེ། གཅིག་དང་དུ་བྲལ་གྱི་གཏན་ཚིགས་ནི། དམག་ཚོགས་དང་ནམ་མཁའ་ལྟར་གཅིག་དང་དུ་བྲལ་ཡིན་པའི་ཕྱིར་ཞེན་སྣང་དེར་མ་གྲུབ་པ་སྟེ། འདིའི་དགུ་པ་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །ཅེས་སོ། །རྒྱུའི་ཐེག་པ་པས་དེ་སྤངས་ནས་བྲལ་བར་འདོད་པ་ལས་འདིར་མ་སྤངས་པའི་ཕྱིར་སྤགས་སོ། །བདེན་པ་གཉིས་ཀྱི་ནི། སྣང་ཙམ་ལ་བློ་འཁྲུལ་པའི་དབང་གིས་དེར་ཞེན་པ་ནི་ཀུན་རྫོབ་དང་། དེ་མ་འཁྲུལ་པ་དེ་དང་ལྡན་པ་ནི་དོན་ཏེ། གསུམ་པ་ལས། ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གིར་གཞན་མེད་དེ། །ཞེས་སོ། །དེ་ཡང་ཅིག་ཤོས་ཀྱིས་བདེན་པ་ཐ་དད་དུ་བརྟགས་ཏེ་དགག་སྒྲུབ་བྱེད་པ་ལས་འདིར་དབྱེར་མེད་པའི་ཕྱིར་དེ་དང་བྲལ་བས་སྤགས་སོ། །རྣམ་པར་དབྱེ་བ་ནི། བུམ་པའི་དབྱིབས་དང་ཁ་དོག་ལ་སོགས་པར་བྱུང་བས་ཕྱི་ཡུལ་གྱི་རྣམ་པ་རྣམས་གཅིག་ཏུ་མ་གྲུབ་པའི་ཕྱིར་ཡང་དག་པར་ན་ཆོས་ཀྱི་དབྱིངས་ཡིན་ཏེ། རྒྱས་པའི་ང་གཅིག་པ་ལས། འབྱུང་བ་ཆེན་པོ་ལྔ་རྣམས་ལ། །རང་བཞིན་མེད་པར་གཞིག་བྱའི་ཕྱིར། །གཅིག་ལའང་ལྔ་ལྔར་དབྱེ་བྱ་སྟེ། །ཡུམ་གྱི་དབྱིངས་སུ་ཐིམ་པར་བྱ། །ཞེས་སོ། །དེ་ཡང་ཅིག་ཤོས་འབྱུང་བ་བཞི་ལ་འབྱུང་ཆུང་བཞི་བཞིར་ཕྱེ་ནས་ཐ་དད་དུ་གཏན་ལ་འབེབས་པ་ལས། འདིར་མཚོན་བྱེད་ཡུམ་གྱིས་མཚོན་བྱ་ཆོས་ཀྱི་དབྱིངས་སུ་གཅིག་པར་འབེབས་པས་འཕགས་སོ། །རང་སྤྱི་ནི། སྦྲུལ་སྣང་ལ་དཔྱད་པར་ཐག་ཁྲ་རྟོགས་པ་ལྟར། ཞེན་བྱེད་ཉོན་མོངས་རང་མཚན་ལ་དཔྱད་པས་ཞེན་པ་སྤྱི་མཚན་དེ་བཞིན་ཉིད་རྟོགས་པ་སྟེ། ང་གསུམ་པ་ལས། ཉོན་མོངས་རང་དང་སྤྱིར་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །ཞེས་སོ། །དེ་ཡང་ཅིག་ཤོས་ཞེ་སྡང་བརྣབ་སེམས་སྤུན་དགུ་ལ་སོགས་རྣམས་སྤྱི་མཚན་མི་རྟག་སྡུག་བསྔལ་སྟོང་བདག་མེད་ལ་སོགས་པས་སྤོང་སྦྱོང་བྱེད་ལ། འདིར་རང་མཚན་སྤྲོས་བྲལ་དུ་རྟོགས་པའོ། །མཚོན་པ་དཔེའི་གཏན་ཚིགས་ནི། མེ་ལོང་དང་གཏན་ཚིགས་ལྟར་ཕྱོགས་རིས་མི་འདྲ་བ་མེད་པའི་ཕྱིར་ཇི་ལྟར་སྣང་བ་ཐམས་ཅད་མཐུན་དཔེར་གྲུབ་པ་སྟེ། རྒྱས་པ་ལས། ནམ་མཁའ་བཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །ཞེས་སོ། །དེ་ཡང་ཅིག་ཤོས་དཔེ་དོན་ཐ་དད་དུ་འདོད་པ་ལས། འདིར་ཐམས་ཅད་ཆོས་ཉིད་དུ་གཅིག་པའི་ཕྱིར་དབྱེར་མེད་པའོ། །གཉིས་པ་ལ་ལྔ་སྟེ། རྟོགས་པ་བཞིའི་དང་། དག་པ་གསུམ་གྱི་དང་། མཉམ་པ་བཞིའི་དང་། བདག་ཉིད་ཆེན་པོའི་དང་། རང་བཞིན་གྱི་གཏན་ཚིགས་སོ། །དང་པོ་རྒྱུ་གཅིག་པའི་གཏན་ཚིགས་ནི། དངོས་པོ་གཉིས་ཀའི་རྒྱུ་སེམས་སུ་གཅིག་ཅིང་དེའི་རང་བཞིན་སྟོང་པར་གཅིག་པ་སྟེ། དེ་ལྟར་རྟོགས་པ་དང་མ་རྟོགས་པ་ལས་དངོས་པོ་གཉིས་སུ་སྣང་བའི་ཕྱིར། ག་བུར་ཉིད་ནད་རྐྱེན་གྱིས་སྨན་དུག་གཉིས་སུ་སྣང་བ་བཞིན་ནོ། །དེས་ན་འདི་ནི་རིམ་གྱིས་པ་ལ་ལྟོས་ཏེ་སེམས་སྟོང་པ་ཤེས་བྱེད་ཀྱི་རྟགས་སོ། །ཡིག་འབྲུའི་ཚུལ་ནི། སེམས་ཉིད་དེ་ལྟར་མཚོན་བྱེད་ཡི་གེར་མ་འགགས་པ་ཡིན་ཏེ། དེ་ལྟར་མཚོན་པའི་ཡི་གེ་འདུས་པ་ལས་བྱུང་བའི་ཕྱིར་ཏེ། རི་བོང་ཅན་ལ་ཟླ་བའི་སྒྲས་བརྗོད་པ་བཞིན། དེས་ན་འདི་ནི་སྣང་ལྡོག་གི་རྟགས་སོ། །བྱིན་གྱིས་བརླབ་ཀྱི་ནི། གོང་མ་སྣང་སྟོང་གཉིས་དངོས་སུ་རྟོགས་པ་ལས་བྱུང་བ་ཡིན་ཏེ། དེ་མེད་ན་འདི་མི་འབྱུང་བའི་ཕྱིར། ས་བོན་མེད་ན་མྱུ་གུ་མེད་པ་བཞིན་ནོ། །དེས་ན་དབྱེར་མེད་ཀྱི་རྟགས་སོ། །མངོན་སུམ་པ་ནི་བཞི་ལས། འདིར་རང་རིག་པའི་མངོན་སུམ་དེ་སེམས་དང་སེམས་ལས་བྱུང་བའི་ཆོས་ཐམས་ཅད་ཀྱི་རང་བཞིན་ཇི་ལྟར་ཡིན་པའི་དོན་ཕྱིན་ཅི་མ་ལོག་པར་རྟོགས་པ་ནི་རྟགས་ལ་བརྟེན་པ་མ་ཡིན་ཞིང་དེ་དང་མི་འགལ་བར་ངེས་པ་སྟེ། ཐུགས་ཐིགས་ལས། མངོན་སུམ་རྟོགས་པ་རྟོག་པའི་མཆོག །རང་རིག་ཡེ་ཤེས་ཚོགས་གཅིག་པུ། །ཞེས་པ་བཞིན་ནོ། །གཉིས་པ་ནི། ཕྱི་སྣོད་འབྱུང་བ་ལྔ་ནང་བཅུད་ཕུང་པོ་ལྔ་རྒྱུད་རྣམ་པར་ཤེས་པའི་ཚོགས་བརྒྱད་ཡེ་ཤེས་ལྔར་དག་པར་རྟོགས་ཤིང་གོམས་པས་དེ་དག་ཉིད་དུ་གྱུར་པའི་ཕྱིར་ཟད་པར་གྱི་སྐྱེ་མཆེད་བཞིན་ནོ། །གསུམ་པ་ནི། ཆོས་ཐམས་ཅད་ཀུན་རྫོབ་སྒྱུ་མ་དང་དོན་དམ་སྤྲོས་བྲལ་ཏེ། བཅུ་གཅིག་པ་ལས། མཉམ་གཉིས་ལྷག་པའི་མཉམ་གཉིས་ཀྱིས། །ཞེས་པས་སྣང་བ་སྣ་ཚོགས་པ་ནི་དོན་དམ་སྟོང་པའི་ངོ་བོ་ཉིད་ལས་སྣང་བའི་ཕྱིར་རྒྱུ་གཞན་ལ་ལྟོས་མེད་ཡིན་ཞིང་དེ་ཉིད་ཀྱིས་སྟོང་པ་དང་རང་བཅས་སུ་འབྲེལ་བ་སྣང་བ་ཉིད་ཀྱི་རྒྱུ་ལས་གཞན་ལྟོས་མེད་ཡིན་པའི་ཕྱིིར་རོ། །ལམ་རིམ་ལས། དེ་དག་ངོ་བོ་ཉིད་རྒྱུར་གནས། །ཞེས་སོ། །གཞལ་བྱ་ཞེན་སྣང་ཉིད་ལ་གོང་གི་རྟགས་རྣམས་ཀྱིས་གཞལ་བས་འཁྲུལ་པ་ཡེ་ཤེས་སུ་དབང་སྒྱུར་བ་ནི་ཆོས་ཉིད་ལ་ཆོས་ཉིད་སྤྱོད་པའི་ཕྱིར་རང་གི་ལོངས་སྤྱོད་རང་གིས་སྤྱོད་པ་བཞིན་ནོ། །ཐ་མ་ནི་ལེའུ་ཐ་མ་ལས། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་པ་ནི། ངོ་བོ་ཉིད་དུ་གྲུབ་ཅིང་གནས་པ་ཡིན་ཏེ། དེ་ལྟར་མ་རྟོགས་པའི་ཚེ་དེ་ལྟར་ཡིན་པ་དང་སྐད་ཅིག་ཀྱང་མ་བྲལ་ཞིང་། དེ་ལྟར་ངེས་པའི་ཚེ་དེ་གཉིས་གཞན་དང་གཞན་དུ་མ་གྲུབ་པའི་ཕྱིར་སྦྲུལ་སྣང་དང་ཐག་ཁྲ་བཞིན་ནོ། །ཐ་མ་གྲུབ་པའི་མཐའ་ནི། གཏན་ཚིགས་དེ་དག་གིས་གཞལ་བས་གཞན་སྣང་དེ་བཞིན་ཉིད་དུ་གཏན་ལ་ཕེབས་པ་ནི་བསྒྲུབ་བྱ་ཡིན་ལ། དེས་མཐར་ཐུག་གི་འབྲས་བུ་གྲུབ་མཐའ་ཡིན་པའི་ཕྱིར་ཏེ། བཅུ་གཉིས་པ་ལས། སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག །ཅེས་གསུངས་པའི་ཕྱིར་རོ། །མཚན་ཉིད་བར་པ་ནི། ལམ་གྱི་རྣལ་འབྱོར་ལྔ་སྟེ། སྟོང་པ་ཆེན་པོའི་དང་། སྙིང་རྗེ་ཆེན་པོའི་དང་། ཕྱག་རྒྱ་གཅིག་པའི་དང་། སྤྲོས་བཅས་ཀྱི་དང་། ཚོགས་སྒྲུབ་པའོ། །འདིར་དེ་དག་རེ་རེ་ཡང་ཆོས་ལྔ་ལྔ་དང་ལྡན་པར་སྟོན་ཏེ། གང་ཉམས་སུ་ལེན་པ་ལམ་གྱི་ངོ་བོ་ནི་དམིགས་པ་ཡུལ་དུ་བྱེད་པ་སྟེ། ཁོག་གཞུང་ལས། དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་སུ་སྒོམ། །ཞེས་སོ། །གཉིས་པ་བྱིང་རྒོད་དང་བྲལ་བའི་རང་རིག་སྒྱུ་མ་ལྟར་གསལ་བ་སྟེ། དེ་ཉིད་ལས། ཐམས་ཅད་སྒྱུ་མ་མིག་ཡོར་ཚུལ། །ཞེས་སོ། །གསུམ་པ་ཕྱག་རྒྱ་བཞི་ལྡན་གྱི་སྐུ་སྣང་ལ་རང་བཞིན་མེད་པར་གསལ་བ་སྟེ། སྐུ་གཅིག་རྡོ་རྗེ་དྲིལ་འབར་སྒོམ། །ཞེས་སོ། །བཞི་པ་ནི་རྟོག་པ་མཐའ་དག་ལྷའི་དཀྱིལ་འཁོར་དུ་གསལ་བ་སྟེ། སྤྱོད་ཡུལ་ཀུན་ཏུ་མ་དྷ་ལ། །ཞེས་སོ། །ཐ་མ་ནི་རྣལ་འབྱོར་ཕོ་མོ་ཡོ་བྱད་དུ་མ་ལ་བརྟེན་ནས་ལྷ་དུ་མའི་དངོས་གྲུབ་དོན་དུ་གཉེར་བ་སྟེ། རྣལ་འབྱོར་ཚོགས་པའི་དཀྱིལ་འཁོར་ལ། །ངེས་པར་ལེགས་པའི་དགོངས་པ་གྲུབ། །ཅེས་སོ། །དེར་ངེས་པའི་ཚིག་སྒྲ་བཤད་པ་ནི། མཉམ་བཞག་ལ་སེམས་རྩེ་གཅིག་ཏུ་གནས་པའི་ཕྱིར། གཉིས་པ་སྒྱུ་མ་ལྟར་སྣང་བ་ལ་རྩེ་གཅིག་པའི་ཕྱིར། གསུམ་པ་རྩ་བའི་ལྷ་དང་གཅིག་དུ་གསལ་བའི་ཕྱིར་རོ། །བཞི་པ་རྩ་བའི་ལྷ་རགས་པ་དུ་མར་གསལ་བའི་ཕྱིར། །ཐ་མ་རྣལ་འབྱོར་པ་དང་ལྷ་དང་ཡོ་བྱད་དུ་མ་ཚོགས་དགོས་པའི་ཕྱིར་རོ། །ལམ་དེ་ཉམས་སུ་བླངས་པའི་དགོས་པ་ནི། དང་པོ་དངོས་པོ་ལ་དེར་ཞེན་གྱི་རྟོག་པ་དག་ཅིང་དོན་དམ་རྟོགས་པའོ། །གཉིས་པའི་སྟོང་པ་ཕྱོགས་གཅིག་ལ་ཞེན་པ་གྲོལ་ཞིང་སེམས་ཅན་གྱི་དོན་མི་འགོག་པའོ། །གསུམ་པ་རྟོག་པ་གནས་གྱུར་ཞིང་སྤྲོས་པའི་རྒྱུར་གྱུར་པ། བཞི་པ་ལྷར་ཞེན་པ་ལས་གྲོལ་ཞིང་རྟོག་པ་མཐའ་དག་ལས་ལོག་པ། ཐ་མའི་སི་ཏི་གཉིས་ཀ་ལ་དབང་སྒྱུར་བའོ། །དེ་དག་གི་རྣམ་གྲངས་ནི། དང་པོ་དབུ་མའི་ཕྱོགས་གཅིག །ཀྲྀ་ཡའི་དག་པ། ཡོ་གའི་རྣམ་སྣང་། མ་ཧཱའི་མཆོག་ལྡན་ནོ། །གཉིས་པའི་ལོག་རྟོག །རྟེན་འབྲེལ་དངོས་པོ་སྒྱུ་མ་གསུམ་འཁྲུལ་ལ། ཐབས་ཡེ་ཤེས་ཕྱག་རྒྱ་སྒྱུ་མ་གསུམ་ནི་མ་འཁྲུལ་པའོ། །གསུམ་པའི་ཞི་བ་དང་ཁྲོ་བོ་ཕྱག་རྒྱ་གཅིག་པའོ། །བཞི་པའི་ཞི་ཁྲོ་གཉིས་ཆར་ལ་དཀྱིལ་འཁོར་དང་ཚོམ་བུ་དང་ཞལ་ཕྱག་དང་རྣམ་གྲངས་སྤྲོས་པའོ། །ཐ་མ་ནི་ཞི་ཁྲོ་གཉིས་རེ་རེ་ལ་ཡང་ཚོམ་བུ་གཅིག་པ་གསུམ་པ་ལྔ་པའོ། །རང་རང་གི་འབྲས་བུ་ནི། དང་པོ་དོན་དམ་མངོན་དུ་བྱེད་པས་རྟོག་པ་ལས་གྲོལ། གཉིས་པ་ཀུན་རྫོབ་ཡེ་ཤེས་སུ་གསལ་བས་འཛིན་པ་ལས་གྲོལ། གསུམ་པ་སྐུ་དང་ཡེ་ཤེས་སུ་གསལ་བས་བརྟན་པ་ཐོབ། །བཞི་པ་སྣང་བ་ཕྱག་རྒྱར་གསལ་བ་ལ་བརྟན་པ་རྒྱ་ཆེན་འགྲུབ། ཐ་མ་ཟག་མེད་ལ་དངོས་སུ་སྦྱོར་ནུས་པའོ། །མཚན་ཉིད་ཐ་མ་ནི། ལམ་དུ་གྱུར་པའི་འབྲས་བུ་སྟེ། ཁོག་གཞུང་ལས། ཚེ་ལ་དབང་དང་ཕྱག་རྒྱ་ཆེ། །ལྷུན་གྲུབ་ཏིང་འཛིན་རིམ་པའོ། །ཞེས་པས་བཞི་སྟེ། རྣམ་པར་སྨིན་པ་ནི། རྡོ་རྗེ་ལས། གསང་བའི་ཡོ་བྱད་ལྔ་ལྡན་པས། །བརྩོན་པས་ཚུལ་བཞིན་རབ་བསྒྲུབས་ན། །རྡོ་རྗེའི་ལུས་དང་རྣམ་སྨིན་དུ། །ཞེས་སོ། །ཚེ་ལ་དབང་བའི་དང་། ཕྱག་རྒྱ་ཆེན་པོའི་དང་། ལྷུན་གྱིས་གྲུབ་པའི་རིག་འཛིན་ནོ། །འདི་དག་རེ་རེ་ལ་ཡང་བཞིན་བཞི་དང་ལྡན་ཏེ། གང་གི་རིག་ས་འཛིན་པ་རང་གི་ངོ་བོ་ནི། ལུས་རྒྱས་བསྒྲིབས་ཤིང་ཡིད་ལྷའི་སྐུར་སྨིན་པའོ། །གཉིས་པ་ནི་ལྷག་མའི་ལུས་དང་བཅས་ནས་འབྲས་བུ་ལ་སྦྱོར་བའོ། །དེ་གཉིས་ཆར་སྤྲུལ་བའི་སྐུའོ། །གསུམ་པ་ནི་བསྒོམ་བྱ་མངོན་དུ་གྱུར་པས་ལྷའི་རང་མཚན་འཛིན་པ་ལོངས་སྐུའོ། །བཞི་པ་ནི་ལམ་མཐར་ཕྱིན་པས་སྤྲོས་པ་དང་བྲལ་བའི་ཕྱིར་ཆོས་ཀྱི་སྐུའོ། །དེར་ངེས་པའི་སྒྲ་དོན་ནི། སེམས་ལྷའི་རྣམ་པར་སྨིན་པའི་ཕྱིར་རོ། །གཉིས་པ་ནི་སྐྱེ་འཇིག་མེད་པ་རྡོ་རྗེའི་ལུས་སུ་གནས་པའི་ཕྱིར་རོ། །གསུམ་པ་ནི་མཚན་དཔེ་ཡོངས་སུ་རྫོགས་པའི་ཕྱིར་རོ། །ཐ་མ་ནི་སྐུ་ལྔའི་དགོངས་པ་འགྲུབ་པའི་ཕྱིར་རོ། །དགོངས་པའི་ཁྱད་པར་ནི་ཟག་མེད་ཀྱི་ཤེས་རབ་ཀྱིས་ཕྱག་རྒྱ་སྟོང་གི་དཀྱིལ་འཁོར་གསལ་བའོ། །གཉིས་པ་ཆོས་ཉིད་རང་མཚན་མཐོང་ཞིང་ཉི་ཁྲི་བཞི་སྟོང་དུ་གསལ་བའོ། །གསུམ་པ་མཐོང་བའི་དོན་ལ་མཉམ་པར་བཞག་སྟེ་མི་གཡོ་བའོ། །ཐ་མ་ན་མཉམ་བཞག་གི་ཚེ་སངས་རྒྱས་དང་ཁྱད་པར་མེད་ཅིང་རྗེས་ཐོབ་བག་ལ་ཉལ་དང་བཅས་པའོ། །ཇི་ལྟར་བཞུགས་པའི་ཆ་ལུགས་ནི། གོང་མ་གཉིས་སྔོན་གང་ཡིན་པ་དེ་མི་དང་ལྷ་དང་། ཞེས་སོ། །གསུམ་པ་ལྷའི་སྐུ་རུའོ། །ཐ་མ་གདུལ་བྱའི་དབང་གིས་མ་ངེས་པར་སྟོན་ནོ། །དོན་གཉིས་པ་མཐར་ཆགས་པ་ནི་ལམ་གྱི་རིམ་པ་དགུ་པོ་འདི་དག་ལ་མོ་ཚོད་གང་དང་མཐུན་ཞེས་རྒྱུའི་ཐེག་པ་པ་དང་གུང་སྦྱོར་བ་ནི་མི་འཐད་པར་སེམས་ཏེ། ལམ་ལ་བགྲོད་ཚུལ་ཐ་དད་པ་ཙམ་ལས་ཐུན་མིན་གྱི་ཁྱད་པར་མེད་པར་འགྱུར་ཞིང་གཞན་ཡང་འདིར་སེམས་སྐྱེ་བའི་སྐྱེ་སར་བཤད་པ་དང་འགལ་ལོ། །རྡོ་རྗེ་ཐེག་པ་ན་བབས་སུ་འགྱུར་བའི་ཕྱིར་རོ། །དེས་ན། རྒྱུ་འབྲས་ཁྱད་པར་ལྷུན་གྱིས་གྲུབ། །ཅེས་སོ། །ཐོད་རྒལ་བ་ལ་གསུམ་སྟེ། དེ་འབྱུང་བའི་རྒྱུ་ཁྱད་པར་གྱི་ཆོས་ནི་སྟོང་སྙིང་ལྟར་གཉིས་མེད་བསྒོམ་མི་ནུས་ཤིང་རྣམ་སྨིན་ལྟར་ནང་རིགས་ཀྱི་བློ་ཆུང་ཞིང་ལམ་ངེས་པ་ཅན་ཡིན་པ་དང་། ལྷུན་གྲུབ་ལྟར་དོར་རྒྱུ་མེད་པ་ནས་མི་འབྱུང་སྟེ། གཉིས་མེད་བསྒོམ་ནུས་ཤིང་ལམ་ངེས་པ་ཅན་མིན་ལ། ལམ་དོར་རྒྱུ་ཡོད་ཅིང་ནང་རིགས་ཀྱི་བློ་ཆེ་བའོ། །གང་ནས་འབྱུང་བའི་གནས་ནི། ཟག་བཅས་གཅིག་སྤྲོས་ཚོགས་གསུམ་དང་། །དེ་བྲལ་ཚེ་དབང་རྒྱ་ཆེན་ནས། །ཞེས་སོ། །གང་དུ་འགྲོ་བའི་ས་ནི། ཟག་བཅས་གསུམ་པོ་ཚེ་དབང་ཡན་ཆད་ཅི་རིགས་དང་། ཚེ་དབང་ནི། རྒྱ་དོར་ཅིག་ཅར་མཐར་འགྲོ་བ། །ཞེས་ལྷུན་གྲུབ་དང་། ཡང་། ལུས་མ་བོར་བར་སངས་རྒྱས་ས། །ཞེས་རྒྱ་ཆེན་ནི་ལྷུན་གྲུབ་ལས་དོར་རྒྱུ་མེད་དེ་སངས་རྒྱས་ཀྱི་སའོ། །དོན་གསུམ་པ་ནི། ཕྱག་རྒྱ་གཅིག་པ་ནས་ཕྱག་རྒྱ་གཅིག་པའི་བར་བསྐྱེད་རིམ་ཞི་ཁྲོ་གཉིས་སུ་བསྟན་ལ། དེ་ལས་གཞན་པའི་ལམ་རྣམས་ནི་དེ་གཉིས་ཀྱི་ཆོས་དང་བྲལ་བའོ། །དོན་ཐ་མ་ལ་གསུམ་སྟེ། ཟག་པའི་མཚན་ཉིད་ནི་ཐ་མལ་གྱི་འཛིན་ཤེས་བག་ཆགས་དང་བཅས་པ་སྟེ། སྤར་ཁབ་ལས། དེ་དག་འཇིག་རྟེན་པ་ལ་ཡོད་ན་འཛིན་པའི་ཕྱིར་ཟག་པར་འགྱུར་ལ། ཞེས་སོ། །མཚན་གཞིའི་དབྱེ་བ་ནི། རང་དབང་མེད་པར་འདོར་པ་ལུས་ཀྱི་དང་། བདེ་མི་བདེར་སྣང་བ་ཁམས་ཀྱི་དང་། ལས་ཀྱི་སྟོབས་ཀྱིས་རང་དབང་མེད་པའི་ལུས་ལེན་པ་སྐྱེ་གནས་ཀྱིའོ། །གང་ལ་ཡོད་མེད་ཀྱི་ཁྱད་པར་ནི་གོང་གི་མཚན་ཉིད་དང་མི་ལྡན་ཏེ། ཚོགས་སྒྲུབ་མན་ཆད་ཟག་བཅས་ལ་རྣམ་སྨིན་ཡན་ཆད་ཟག་མེད་དོ། །དེ་ཡང་ཁ་ཅིག་རྣམ་སྨིན་ལ་ཟག་བཅས་ཡིན་ཡང་ཟག་མེད་དུ་འདེབས་ཟེར་བ་དང་། ཁ་ཅིག་གཙོ་བོ་སྐྱེ་གནས་ལེན་པས་ཟག་མེད་ཡིན་ཟེར་བ་ལ། སྔ་མ་ནི། ས་ཕྱོགས་ན་ཤིང་གི་བྱེ་བྲག་ཡོད་པས་ཤིང་ཡོད་དུ་འགྱུར་བ་ལྟར། རྣམ་སྨིན་ལ་ལུས་ཁམས་ཀྱི་ཟག་པ་རྟགས་སུ་བཀོད་ནས་ཟག་བཅས་སུ་བསྒྲུབ་པ་ལའང་གནོད་པ་ཅན་ཏེ། ཁམས་བདེ་མི་བདེ་དང་ལུས་དོར་བ་ཙམ་གྱིས་དེར་གྱུར་ན། སངས་རྒྱས་ཀྱི་སྤྲུལ་པའི་སྐུ་ཡང་དེར་འགྱུར་ཏེ། དེ་གཉིས་ཡོད་པའི་ཕྱིར་རོ། །དེས་ན་རྣམ་སྨིན་ལུས་ལ་རང་དབང་ཡོད་པར་འདོད་པ་ཡོད་པ་གང་ན་མེད་དོ། །གཉིས་པ་ཅིག་ཅར་བ་ནི། ཁོག་གཞུང་ལས། དེ་ཉིད་ཁོ་ན་ཅིག་ཅར་བ། །ཞེས་སོ། །འདི་ཡང་གོང་ལྟར་མཚན་ཉིད་གསུམ་ལས། དང་པོ་ནི། ཆོས་ཐམས་ཅད་ཀྱི་གནས་ལུགས་དབྱེར་མེད་དུ་རྟོགས་པས་གཞལ་བྱ་དང་གཏན་ཚིགས་ལ་སོགས་པའི་ཐ་སྙད་ཀྱིས་སྟོང་པ་སྟེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བར། །འཁོར་འདས་རང་སྤྱི་དབྱེར་མེད་དུ། །མི་ཕྱེད་རྡོ་རྗེ་ཐུགས་མཆོག་གོ། །ཞེས་སོ། །བར་པ་ལ་གཉིས་ཏེ། མི་རྟོག་པ་བསྒོམ་པའི་དང་། ཕྱག་རྒྱ་བསྒོམ་པའི་ཅིག་ཅར་བའོ། །དང་པོ་ནི། ཁོག་གཞུང་ལས། སྒོམ་པའི་རིམ་པ་བསླབ་བྱ་བྲལ། །མ་བཅོས་ཇི་བཞིན་ངང་བཞག་དང་། །ལྷུན་གྲུབ་དཀྱིལ་འཁོར་འབྱུང་བའི་ཕྱིར། །མི་གནས་གནས་ལ་གནས་པར་སྒོམ། །ཞེས་པ་དང་། བཅུ་དགུ་པ་ལས། མཉམ་པའི་དམ་ཚིག་ལ་གནས་ན། །ཞེས་པ་དང་། བྱེ་བྲག་བསྟན་པ་ལས། ལྷུན་གྱིས་བསྒོམས་ཞེས་པ་དང་། བླ་མ་ལས། ཐེག་ལེ་ཆེན་པོ་ཉག་གཅིག་ལ། །སྒོམ་པ་རྣམ་གསུམ་དུས་གཅིག་རྫོགས། །ཞེས་པ་ལྟར་རོ། །གཉིས་པ་ནི། རྒྱས་པ་ལས། ཉི་ཟླ་གཟའ་སྐར་ཇི་བཞིན་དུ། །རྒྱ་མཚོ་དྭངས་པར་གསལ་བ་བཞིན། །སྐད་ཅིག་སྐུར་གསལ་འོད་དུ་འབར། །སྙིང་པོ་བརྗོད་པས་འཁོར་ལོ་རྫོགས། །ཞེས་པའོ། །ཐ་མ་ནི་རིག་འཛིན་བཞིའི་ཆར་གཏོགས་པའི་ཡེ་ཤེས་གཅིག་ལ་གྲུབ་པ་སྟེ། བྱེ་བྲག་བསྟན་པ་ལས། རིམ་བྲལ་དེ་ཉིད་གསལ་འགྱུར་འབྲེལ། །སྐབས་ཀྱིས་རྫོགས་པ་ཆེན་པོར་བརྗོད། །ཅེས་པས་འདིར་ཁ་ཅིག་ཅིག་ཅར་བ་ལ་སེམས་ལྔ་རིམ་པར་སྐྱེའམ་མི་སྐྱེ། དང་པོ་ལྟར་ན་ཅིག་ཅར་བ་མ་ཡིན་པར་འགྱུར་ལ། གཉིས་པ་ལྟར་ན་ཅིག་ཅར་བ་དེ་ལམ་གྱི་ངོ་བོ་མིན་པར་འགྱུར་ཏེ། སེམས་ལྔ་མི་སྐྱེ་བའི་ཕྱིར་རོ་ཞེ་ན། སྐྱེ་བས་སྐྱོན་ཕྱི་མ་མེད་ལ། དུས་མྱུར་བས་སྐྱོན་དང་པོའང་མེད་དེ། ཤོ་མང་ལྔ་བརྩེགས་ལ་ཁབ་བརྡེག་པ་བཞིན་ནོ། །རིམ་གྱིས་པ་ནི་རྡོ་ཤིང་ལྔ་འབུགས་པ་ལྟ་བུའོ། །ལེའུ་གང་ནས་སྟོན་པ་ནི། རང་བཞིན་གྱི་སྣང་བ་སྟོན་པ་རྣམས་དང་མཐུན་ནོ། །དོན་གཉིས་པ་ཐབས་ཀྱི་ལམ་ལའང་གཉིས་ཏེ། གོ་དོན་དང་། དབྱེ་བའོ། །དང་པོ་ནི། གདམས་ངག་གིས་འཆིང་བ་ལ་སྤྱད་པས་མཐར་ཐུག་གི་འབྲས་བུ་འགྲུབ་བྱེད་དུ་གྱུར་པའོ། །གཉིས་པ་ནི། གདམས་ངག་སྟེང་དང་འོག་གི་སྒོ། །ཞེས་པས་གཉིས་ཏེ། རིམ་གྱིས་པ་སྟེང་སྒོ་དང་། ཅིག་ཅར་བ་འོག་སྒོའོ། །དང་པོ་ལ་བཞི་སྟེ། སྔོན་དུ་འགྲོ་བའི་རིམ་པ་ནི་རྒྱུ་མཚན་ཉིད་དང་ལྡན་པ་གཅིག་ལ་ཕྱི་ནང་གསང་བའི་དབང་ཡོངས་སུ་རྫོགས་པར་ཞུས་ནས་འཁོར་གསུམ་ཡོངས་སུ་དག་པ་བྱས་ཏེ་གནས་དབེན་པར་སྟན་བདེ་བ་ལ་འདུག་སྟེ་སྣང་མཛད་ཀྱི་ཆོས་བདུན་བཅའོ། །རང་ལུས་ལ་རྩ་དང་འཁོར་ལོའི་གནས་ཚུལ་ནི། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །ཞེས་པས་དངོས་གཞིའི་འཁོར་ལོ་བཞི་དང་ཆ་རྐྱེན་གྱི་འཁོར་ལོ་གཉིས་སོ། །གསང་ཐིགས་ལས། བཅུ་གསུམ་གཉིས་ཀྱི་དཀྱིལ་འཁོར་དུ། །བདེ་བའི་ཐིག་ལེ་མཉམ་པའི་དབྱིངས། །ཞེས་པས་སྤྱི་གཙུག་བདེ་ཆེན་གྱི་ཙཀྲ་ན་རྩ་སུམ་ཅུ་རྩ་གཉིས་གནས། དེའི་དབུས་ན་བྱང་ཆུབ་སེམས་ཀྱི་ཡི་གེ་ཧཾ་དཀར་པོ་མགོ་ཐུར་དུ་བསྟན་པ་གཅིག་གནས་སོ། །དེ་ཉིད་ལས། ལྔ་གཉིས་དྲུག་གི་དཀྱིལ་འཁོར་དུ། །ཞེས་པས་མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་བཅུ་དྲུག་གནས། དེའི་དབུས་ན་འདོད་ཡོན་གྱི་ཡི་གེ་ༀ་གཅིག་གནས། དེ་ཉིད་ལས། གང་ལ་ཡོད་པ་གནས་པ་བརྒྱད་དུ་ཤེས། །ཞེས་པས། སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་གནས། དེའི་དབུས་ན་ཀུན་གཞི་ཀུན་ཕོའི་ཡི་གེ་ཧཱུཾ་མཐིང་ཁ་གཅིག་གནས་སོ། །ཡང་། བཅུ་དྲུག་བཅུ་བཞིའི་དཀྱིལ་འཁོར་དུ། །ཞེས་པས་ལྟེ་བ་སྤྲུལ་པའི་འཁོར་ལོ་ན་རྩ་འདབ་དྲུག་ཅུ་རྩ་བཞི་གནས། དེའི་དབུས་ན་ཀུན་མོའི་ཡི་གེ་ཨཾ་མཐིང་ཁ་གཅིག་གནས་སོ། །ལྟེ་བའི་འོག་ནས་སོར་བཞི་བཅལ་བའི་ས་ན་དོན་དམ་མེའི་འཁོར་ལོ་ཞེས་བྱ་བ་དབྱིབས་གྲུ་གསུམ་རཾ་གྱིས་མཚན་པ་གཅིག་གནས། སྦ་ཁ་ན་སྒྲོམ་མདོ་རླུང་གི་ཙཀྲ་ཞེས་བྱ་བ་དབྱིབས་ཟླ་གམ་ཡི་གེ་ཡཾ་གིས་མཚན་པ་གཅིག་གནས་སོ། །ཀུན་དར་མ་གདུགས་ཀྱི་ཡུ་བའི་ཚུལ་དུ་དབུས་ན་ཡར་གནས། ཙཀྲ་རྣམས་གདུགས་ཕུབ་པའི་ཚུལ་དུ་གནས། རོ་རྐྱང་གཉིས་གདུགས་རྟེན་པའི་ཚུལ་དུ་གཡས་གཡོན་ན་གནས་སོ། །དེ་ལམ་པས་ཇི་ལྟར་བསྒོམ་པའི་ཐབས་ནི། མེ་རླུང་འགྲོ་བས་ནམ་མཁའི་བ། །བཞོ་བས་ཞེས་གདམས་ངག་ལྟར་རྔུབ་དགང་བསྐྱིལ་དབབ་ལ་སོགས་གཏུམ་མོ་འབར་འཛག་ལ་བརྟེན་ནས་བདེ་བ་རིམ་གྱིས་བསྐྱེད་པའི་ཕྱིར་སྟེང་དུ་རྣམ་པར་གྲགས། །ཞེས་སོ། །དེ་ལྟར་བསྒོམས་པའི་འབྲས་བུ་ནི་དངོས་སུ་རླུང་སེམས་ལ་དབང་ཐོབ་པས་འོག་སྒོ་ཉམས་སུ་བླང་དུ་རུང་ཞིང་བརྒྱུད་ནས་དེའི་འབྲས་བུ་དང་ཐུན་མོང་དུའོ། །གཉིས་པ་ལའང་བཞི་སྟེ། རིགས་དང་མཐུན་པའི་ཡུམ་བརྟག་ཅིང་དབང་དུ་བྱ་བ་ནི། བཅུ་གཉིས་པ་ལས། ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །ཞེས་པ་དང་། ལྔ་པ་ལས། དགུག་དང་ཞེས་པ་ཐབས་ཀྱིས་སོ། །འདོད་པའི་བསྟན་བཅོས་དང་ལྡན་པའི་ལྷར་བསྐྱེད་ཅིང་བརླབ་པ་ནི། དགུ་པ་ལས། གོས་རྒྱན་མཛེས་པ་ཞེས་པ་བཀླུབས་ཤིང་འཕུར་བ་དར་གྱི་གོས་རཏྣའི་སིལ་ཁྲོལ་གྱི་རྒྱན་གྱིས་མཛེས་པར་བྱས་ཏེ། བཅུ་གཅིག་པ་ལས། བསྙེན་པ་དང་ནི་ཞེས་ཕྱི་ནང་གི་ཁྲུས་ཀྱིས་རྒྱུད་དག་པར་བྱས་ནས་དམ་དཔོག་ཅིང་དབང་བསྐུར་རོ། །སྐྱེ་མཆེད་དང་མཁའ་གསང་བརླབ་བོ། །སྒྲུབ་པ་དང་ནི་ཞེས་པས། དངོས་གཞི་ཨཱ་ལི་ཡབ་དང་ཀཱ་ལི་ཡུམ་གྱིས་སྙོམས་པར་ཞུགས་པའི་དགོངས་པ་ཉམས་སུ་བླང་བ་ནི། བཅུ་པ་ལས། བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པདྨོར་འཁྱིལ། །ཞེས་དབབ་གཟུང་དང་། སྒྲུབ་པ་ཆེན་པོ་ཞེས་པ་ནི། བཅུ་གཅིག་པ་ལས། སྒྲུབ་པ་ཉི་ཟླའི་སྙིང་པོ་དེ། །དེ་ལ་རྡོ་རྗེ་ལྕེ་ཡིས་བླང་། །ལྡོག་དང་དགྲམ་སྟེ་དེ་ལྟར་རོ། །དེ་ལྟར་ཉམས་སུ་བླངས་པའི་འབྲས་བུ་ནི། བཅུ་གཅིག་པ་ལས། མཁའ་འགྲོ་གསལ་འབར་ཚེ་ལ་སོགས། །ཞེས་ཐུན་མོང་དང་། ཡིད་བཞིན་སྤྲིན་གྱི་བདག་པོར་འགྱུར། །ཞེས་མཆོག་འགྲུབ་པ་དང་། ཁོག་གཞུང་ལས། ཐབས་ལམ་རྒྱུ་དང་རིམ་པ་ནི། །གདམས་ངག་ཏིང་འཛིན་སྟོབས་འགྱུར་ཞིང་། །རླུང་འགག་ལས་ལ་གོམས་པས་ནི། །ཤིན་ཏུ་བདེ་བ་འབྱུང་བའི་རྒྱུ། །གསང་དབང་པདྨ་ལྟར་གྱུར་ན། །ཆགས་པ་མེད་པའི་ཚུལ་གྱིས་སུ། །བཅུ་དང་གསུམ་གྱི་རྒྱུ་འབྲས་རྣམས། །རྫོགས་ཕྱིར་རིམ་དང་ལྡོག་ཤེས་ན། །བྱིན་རླབས་ཤུགས་ཀྱིས་ཡང་དག་འཐོབ། །གསང་དབང་མཆོག་གི་འཕྲུལ་ཆེན་འཕྲོ། །དཀྱིལ་འཁོར་རྡུལ་སྙེད་གྲངས་མེད་དང་། །ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་འབྱིན་བྱེད་པས། །ཐབས་ཀྱི་ལམ་ལའང་འབད་པར་བྱ། །ཞེས་བསྟན་པའོ། །དེ་ནི། གཉིས་པ། བཞི་པ། ལྔ་པ། དགུ་པ། བཅུ་པ། བཅུ་གཅིག་པ། བཅུ་གསུམ་པ། བཅོ་བརྒྱད་པ་རྣམས་ཀྱིས་སྟོན་ནོ། །གསུམ་པ་ནི། ལམ་རིམ་ལས། ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་འབྱིན་པར་བྱེད། །ཅེས་པས་ཅིག་ཤོས་ཀྱིས་ཀྱང་འབྲས་བུ་ལ་སྦྱོར་ལ། ལམ་རིམ་ལས། ཐོས་བསམ་སྒོམ་པའི་རྣལ་འབྱོར་གྱིས། །རང་བྱུང་ཀུན་ངམ་འགྲུབ་བྱེད་པའོ། །ཞེས་པས་གྲོལ་ལམ་གྱིས་ཀྱང་འབྲས་བུ་ལ་སྦྱོར་བའི་ཕྱིར་ཐ་དད་ཅེས་འདོད་ཀྱང་། འདིར་གྲོལ་ལམ་གྱི་སྔོན་དུ་དབང་འགྲོ་ཞིང་། དབང་གི་སྔོན་དུ་སེམས་བསྐྱེད་པའི་ཕྱིར་འབྲེལ་བ་སྟེ། དེ་ཡང་ཚོགས་སྒྲུབ་པའི་ཚེ་ཏན་གན་ལ་སྤྱོད་པ་ནི་ཐབས་ཡིན་ལ། དེ་ལ་ལྟ་བས་ཟིན་དགོས་པའི་ཕྱིར་དངོས་སུ་འབྲེལ་བའོ། །ཐ་མ་ནི་གྲོལ་ལམ་སྔོན་དུ་འགྲོ་བ་ཡིན་ཏེ། དབང་གི་སྔོན་དུ་སེམས་བསྐྱེད་པར་ངེས་ཤིང་ཅིག་ཤོས་ཀྱི་ལམ་མ་ཡིན་པའི་ཕྱིར་ཏེ། ཐུགས་ཐིགས་ལས། ལམ་གྱི་ཤེས་རབ་སྔོན་འགྲོ་བ། །ཐབས་ལ་དེ་ཉིད་རིམ་པར་བསླབ། །ཅེས་སོ། །ལམ་གྱི་ཆ་རྐྱེན་ནི། ཁོག་གཞུང་ལས། ལམ་གྱི་ཡན་ལག་རྐྱེན་བཞག་པ། །རྗེས་མཐུན་སྤྱོད་དང་ལྷ་དབང་དམ། །སྒྲུབ་དང་མཆོད་དང་ཕྲིན་ལས་དང་། །དཀྱིལ་འཁོར་ལ་སོགས་བརྒྱད་ཀྱིས་རྫོགས། །ཞེས་པ་དང་། ཡང་སྤར་ཁབ་ལས། ལྟ་སྤྱོད་དཀྱིལ་འཁོ་དབང་དམ་དང་། །ཕྲིན་ལས་སྒྲུབ་པའི་ལས་རིམ་གྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པས་བདུན་ཡང་དོན་གྱི་བཅུར་གནས་པ་ལས། འདི་རྣམས་རེ་རེ་ཡང་ཐུགས་ཐིགས་ལས་ཆོས་མ་ངེས་པར་བསྟན་ཀྱང་། འདིར་ཉ་རི་བའི་གསུང་སྒྲོས་ཀྱིས། དེ་དག་གི་དགོས་པ་དང་། ངོ་བོ་དང་། ངེས་པའི་ཚིག་དང་། རྣམ་གྲངས་དང་། དེ་དང་མི་ལྡན་པའམ་མེད་པའི་སྐྱོན་དང་། ཡོན་ཏན་དང་དྲུག་ཏུ་གསུང་ངོ་། །དེ་ལས་དང་པོ་ལྟ་བ་ལ་དྲུག་ལས། དགོས་པ་ནི། ཐུགས་ཐིགས་ལས། གཞན་པའི་ལྟ་དམིགས་བསལ་བ་དང་། །ཞེས་པ་གཞན་སེལ་བ་ནི། བཅུ་གསུམ་པ་ལས། མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །ཞེས་སོ། །མཆོག་གི་སྤྱན་རབ་ཐོབ་བྱའི་ཕྱིར། །ཞེས་པས་དོན་དུ་གཉེར་བའི་དགོས་པའོ། །དེ་ལ་གསུམ་སྟེ། ཆོས་ཉིད་ཡང་དག་རྟོགས་པ་ནི། དོན་གསུམ་པ་ལས། ཆོས་ཀྱི་རང་བཞིན་ཇི་ལྟ་བུ། །བདག་གིས་ཡང་དག་རྟོགས་བྱ་བ། །ཞེས་སོ། །ལས་གང་ལ་སྤྱད་ཀྱང་མི་འཆིང་བ་ནི། ང་གསུམ་པ་ལས། ཐབས་དང་ཤེས་རབ་ལྡན་པ་ཡིས། །དུག་ལྔ་དུག་གསུམ་གནོད་མི་འགྱུར། །ཞེས་སོ། །སངས་རྒྱས་ཉིད་འཐོབ་པའི་དངོས་རྒྱུར་གྱུར་པ་ནི། དོན་གཉིས་པ་ལས། རང་རིག་ཡེ་ཤེས་དོན་རྟོགས་ན། །སྐྱེ་ཤི་མེད་པའི་གཡུང་དྲུང་འཐོབ། །ཅེས་སོ། །ངོ་བོ་ནི། དོན་དམ་དུ་ནི་དཀོར་བདུན་ནོ། །ཞེས་སོ། །རིགས་པ་སྒྱུ་མ་ཉིད་ནི་མེད་པ་སྟེ། ཀུན་རྫོབ་ཏུ་ནི་མཉམ་རྫོགས་སོ། །ཞེས་སོ། །དེ་གཉིས་ཚིག་སྔ་ཕྱི་ཡང་དོན་གཅིག་པ་སྟེ། ཚིག་གིས་སྔ་ཕྱིར་བྱུང་མོད་ཀྱང་། །དོན་གྱིས་ཅིག་ཅར་རྫོགས་པར་སྒོམ། །ཞེས་པ་དང་། དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པ་དང་། དོན་དམ་ཅིར་ཡང་སྣང་བ་ངོ་བོ་ཉིད་དུ་གྲུབ་པ་ལ་ཆོས་ཉིད་དེ་ངེས་ཤིང་ཀུན་རྫོབ་སྟེ། ཁོག་གཞུང་ལས། ལྷུན་གྲུབ་ཡེ་ཤེས་སྒྲོན་མ་ཉིད། །རང་གཞན་གསལ་བ་སྤྱན་གྱི་མཆོག །ངོ་བོ་དེ་བཞིན་ཉིད་དུ་ཤེས། །ཞེས་སོ །ངེས་ཚིག་ནི། དྷི་ཏིའི་སྒྲ་ལས་ལྔ་པ་ཞེས་བྱ་ལ་དེ་ནི་བདེན་དོན་མཐོང་བས་གདེངས་སུ་གྱུར་པ་སྟེ། དེ་ཉིད་ལས། ཡུལ་མེད་གསལ་ཕྱིར་ལྟ་ཞེས་བཤད། །ཅེས་པ་དང་། རྒྱས་པ་ལས། ལྟ་དང་བལྟ་བར་བྱ་མེད་དེ། །ཡེ་ཤེས་སྒྲོན་མ་བསྒྲེང་བས་ནི། །ཕྱོགས་བཅུའི་ཞིང་ཁམས་མ་ལུས་མཐོང་། །ཞེས་སོ། །རྣམ་གྲངས་ལ་གསུམ་སྟེ། གོལ་སྒྲིབ་གདར་ཤ་བཅད་དེ་དང་། གཏན་ཚིགས་ཀྱིས་གཏན་ལ་ཕབ་སྟེ་དང་། རྣམ་གྲངས་རྣམ་པར་ཕྱེ་ནས་དམིགས་གཟུང་བའོ། །དང་པོ་ལ་གཉིས་ཏེ། གཅད་བྱ་གོལ་སྒྲིབ་དང་། གཅོད་བྱེད་གཏན་ཚིགས་སོ། །དང་པོ་ལ་གཉིས་ཏེ། མཚན་ཉིད་དང་། དེའི་དབྱེ་བའོ། །དང་པོ་ལའང་སྒྲིབ་པའི་མཚན་ཉིད་ནི་མཐོང་བར་བྱ་བ་ལས་གེགས་སུ་གྱུར་པ་ཡིན་ཅིང་། དེས་བགྲོད་བྱ་ལས་ཕྱིན་ཅི་ལོག་ཏུ་གྱུར་པ་ནི་གོལ་བའོ། །དབྱེ་བ་ནི། མ་རྟོགས་པ་རྒྱུད་དྲུག་དང་། ལོག་པར་རྟོགས་པ་རྟག་ཆད་དང་། ཕྱོགས་འགའ་ཙམ་རྟོགས་པ་འོག་མ་བ་རྣམས་ཏེ། དེ་དག་གིས་ཡོད་མེད་དུ་སྒྲོ་བཏགས་ཤིང་སྐུར་བ་བཏབ་པ་ནི་གོལ་སྒྲིབ་ཀྱི་ངོ་བོའོ། །གཉིས་པ་གཅོད་བྱེད་ནི། །ཐུགས་ཐིགས་ལས། །གཏན་ཚིགས་ཐུན་མོང་ཡིན་མིན་པ། །རྒྱུད་ལས་གྲགས་པས་རྐྱེན་བྱས་ཏེ། །རི་རྒྱལ་ལྟ་བུ་མཐོང་བ་ཡི། །ཞེས་པས་བར་པ་གཏན་ཚིགས་ཀྱིས་གཏན་ལ་དབབ་པ་དངོས་ཏེ་རྒྱུ་ཤེས་པའི་སྐབས་སུ་བསྟན་ཟིན་ནོ། །ཐ་མ་རྣམ་གྲངས་རྣམ་པར་དབྱེ་བ་ནི་གཉིས་ལས། མིང་གི་རྣམ་གྲངས་ནི་ཚོགས་བརྒྱད་དེ། རུ་ཇོ་མདོ་ནི། ཚོགས་བརྒྱད་པོ་འདི་རྟེན་གཟུགས་ཅན་གྱིས་ཡུལ་ཐ་དད་ལ་སྒྲོ་འདོགས་གཅོད་པའི་ཕྱིར་གྱི་རྣམ་གྲངས་ཡིན་ཟེར་བ་ནི་མ་ཡིན་ཏེ། ཐུགས་ཐིགས་ལས། དབང་པོ་དྲུག་གི་ཆར་སྣང་ཡང་། །སྤྱན་ལ་མཆོག་ཏུ་བརྗོད་པ་ཡིན། །ཤེས་རབ་ཡུལ་དུ་དབྱེར་མེད་པས། །མངོན་སུམ་རྟོགས་པ་རྟོགས་པའི་མཆོག །རང་རིག་ཡེ་ཤེས་ཚོགས་གཅིག་པུ། །ཞེས་པ་དང་། ལམ་རིམ་ལས། མ་འདྲེས་ཡོངས་རྫོགས་གསལ་སྟོང་གཟུགས། །ཁྱབ་གསལ་རང་བཞིན་གོ་བའི་སྒྲ། །དང་བས་ཚིམ་བྱེད་ཆོས་ཀྱི་དྲི། །དོན་བཅུད་ཉམས་སུ་མྱོང་བའི་རོ། །ཡང་དག་དོན་ལ་རེག་པ་ཉིད། །ཆོས་ཁམས་སྣ་ཚོགས་ཀུན་མཁྱེན་པས། །རང་རིག་རྒྱལ་པོར་རང་སྣང་ངོ་། །ཞེས་པའོ། །དོན་གྱི་རྣམ་གྲངས་ལ་ཡང་གཉིས་ལས། །ཉམས་སུ་ལེན་བྱེད་ལམ་གྱི་རིམ་པ་ནི། དེ་ཉིད་ལས། རྣམ་པ་ཀུན་ལྡན་སྟོང་ཆེན་མཐོང་། །རང་རིག་ཡེ་ཤེས་སྙིང་རྗེས་གཟིགས། །ཕྱག་རྒྱ་གཅིག་སྐུ་འབྲས་བུར་ལྟ། །ཐམས་ཅད་གསལ་བའི་ལྟ་བ་དང་། །བར་ཆད་མེད་དང་ཚོགས་ཆེན་མཐོང། །ཐམས་ཅད་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ། །ཞེས་པས་ཁྱབ་བྱ་ལམ་དེ་དག་ལ་ཁྱབ་བྱེད་ལྟ་བས་ཁྱབ་པས་ལམ་གྱི་རིམ་པའི་ལྟ་གྲངས་ཞེས་བྱའོ། །གཉིས་པ་ཉམས་སུ་བླང་བྱ་རྒྱུད་དོན་རྣམས་ལ་ཡང་ཁྱབ་བྱེད་ལྟ་བས་ཁྱབ་ཕྱིར་རྒྱུད་དོན་གྱི་ལྟ་གྲངས་ཞེས་བྱའོ། །ལྟ་བ་མ་རྟོགས་པའི་སྐྱོན་ནི་གཉིས་ཏེ། དགེ་བ་ལ་སྐུར་བ་མིན་ཡང་མ་རྟོགས་ན་གནས་སྐབས་སུ་དགེ་བ་སྤྱད་ཀྱང་འཁོར་བ་ལས་མི་གྲོལ་ཏེ། ང་གསུམ་པ་ལས། ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་རྟག་སྤྱད་ཀྱང་། །མཐོ་རིས་ལྷ་དང་མིར་སྐྱེ་ཡི། །སྐྱེ་ཤི་མེད་པའི་ས་མི་འཐོབ། །ཅེས་སོ། །སངས་རྒྱས་ཀྱི་ཞིང་ཡང་འཁོར་བའི་གནས་སུ་མཐོང་བའི་སྐྱོན་ནོ། །རྟོགས་པའི་ཡོན་ཏན་ལ་གསུམ་སྟེ། ངན་སོང་གི་གནས་ཉིད་འོག་མིན་གྱི་ཞིང་དུ་རྟོགས་པ་ནི། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཉིད་འོག་མིན་དགའ་ལྡན་གནས། །ཞེས་སོ། །ཅི་ལ་སྤྱད་ཀྱང་མི་འཆིང་བ་སྟེ། ཐབས་དང་ཤེས་རབ་ལྡན་པ་ཡིས། །དུག་ལྔ་དུག་གསུམ་གནོད་མི་འགྱུར། །ཞེས་སོ། །སླར་ཡང་མི་འཁྲུལ་ཏེ་སངས་རྒྱས་ཉིད་འཐོབ་པ་ནི། གནས་ལུགས་བདེན་དོན་རྟོགས་པས་འཁོར་བའི་སྐྱོན་སྤངས་པ་མིན་པའི་ཕྱིར་མི་གོས་ལ་སངས་རྒྱས་ཀྱི་ཆེ་བའི་ཡོན་ཏན་ཐོབ་པ་མིན་པའི་ཕྱིར་མི་ཉམས་ཏེ། རྒྱས་པའི་ཉེར་གཅིག་པ་ལས། དངོས་གྲུབ་མཆོག་གི་སྙིང་པོ་འདི། །ཆུ་སྲིན་ཕྱག་རྒྱ་ཇི་བཞིན་དུ། །དང་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཅེས་སོ། །དེ་འདིའི་གསུམ་པ། བཞི་པ། ལྔ་པ། བཅུ་གཅིག་པ། བཅུ་གཉིས་པ། བཅུ་གསུམ་པ། བཅོ་བརྒྱད་པ། བཅུ་དགུ་པ་ནས་སོ། །རྒྱས་པའི་བཅོ་ལྔ་པ། བཅུ་བདུན་པ། རྩ་དྲུག་པ། རྩ་བདུན་པ། བཞི་བཅུ་པ། ང་གསུམ་པ། ང་བཞི་པ། རེ་གསུམ་པ་རྣམས་ནས་སོ། །གཉིས་པ་སྤྱོད་པ་ལ་དྲུག་ལས། དགོས་པ་ནི། ཐུགས་ཐིགས་ལས། བདག་དང་གཞན་གྱི་དོན་གྱི་ཕྱིར། །བྲི་སོགས་མི་གོས་གོམས་པར་བྱེད། །ཅེས་པས་སྒོ་གསུམ་ཐ་མལ་ལས་ལྡོག་ནས་ལྟ་སྒོམ་སྟོབས་སུ་གྱུར་པ་སྟེ། རིམ་གསུམ་ལས། ཏིང་འཛིན་ཁྱད་པར་འགྱུར་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །ཅེས་སོ། །ངོ་བོ་ནི། ལམ་པའི་སྒོ་གསུམ་གྱི་བྱ་བར་གྱུར་བ་སྟེ། འདིའི་དགུ་པ་ལས། ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །ཞེས་སོ། །ངེས་ཚིག་ནི། ཙར་ཞེས་པའི་སྒྲས་སྤྱོད་པ་ཞེས་བྱའོ། །དེ་ནི་སྤྱད་བྱ་ལ་སྤྱོད་པའི་ཕྱིར་ཏེ། ཁོག་གཞུང་ལས། སྒོ་གསུམ་ལས་ཕྱིར་ངེས་ཚིག་འགྲུབ། །ཅེས་སོ། །རྣམ་གྲངས་ལ་གཉིས་ཏེ། དངོས་དང་། ཞོར་ལ་དུས་ནམ་གྱི་ཚེ་སྤྱད་པ་ནི། ཐུགས་ཐིགས་ལས། ཀུན་ཀྱང་མཉམ་ལས་ལངས་ཚེའོ། །ཞེས་སོ། །དང་པོ་ནི། ཁོག་གཞུང་ལས། དེ་ཡང་བདག་གཞན་དོན་དུའོ། །ཞེས་པས་གཉིས་ཏེ། བདག་དོན་གྱི་ནི། ལམ་རིམ་ལས། དཀྱིལ་འཁོར་རོལ་པའི་ཚུལ་སྤྱོད་ལ། །ཚོགས་གཉིས་རྫོགས་པ་བདག་གི་དོན། །ཞེས་པའོ། །གཞན་དོན་གྱི་སྤྱོད་པ་ནི། སྨིན་པས་ཕྲིན་ལས་རྫོགས་བྱེད་པ། །མི་འདོར་འགོད་པ་གཞན་གྱིས་སོ། །ཞེས་སོ། །དང་པོ་ལ་གཉིས་ཏེ། གྲོལ་ལམ་གྱི་དང་། ཐབས་ལམ་བརྟུལ་ཞུགས་ཀྱི་སྤྱོད་པའོ། །དང་པོ་ལ་གཉིས་ཏེ། །རིམ་གྱིས་པའི་དང་། ཅིག་ཅར་བ་བླང་དོར་དང་བྲལ་བ་རྨད་དུ་བྱུང་བའི་སྤྱོད་པའོ། །དང་པོ་ལ་གསུམ་སྟེ། ཟག་བཅས་ཀྱི་ལམ་དུ་དང་། བར་ཆད་མེད་པའི་ལམ་དུ་དང་། ཟག་མེད་ཀྱི་ལམ་དུ་ཇི་ལྟར་སྤྱད་པའོ། །དང་པོ་ལ་ལྔ་ལས། ལམ་རིམ་ལས། ཐོས་བསམ་བཅུ་སྤྱོད་ཆེད་དུ་གཉེར། །ཞེས་པ་དང་། ལམ་ཆུང་ལས། གཞན་ཕྱིར་སོ་སོའི་རྣལ་འབྱོར་གྱིས། །དོན་ནི་ཅི་སྨོས་དང་པོ་བཅུ། །གཞན་ལ་སྟོན་ཅིང་བཀྲི་བར་བྱ། །ཞེས་པས་དད་བརྩོན་གྱི་དང་། ཁོག་གཞུང་ལས། བྱ་བ་མེད་ལས་བྱ་མེད་བྱ། །ཞེས་པས་ཤེས་རབ་དང་མཐུན་པའི་དང་། ཐབས་ཀྱིས་ཕ་རོལ་ཕྱིན་སྤྱོད་ལ། །ཞེས་པས་ཐབས་དང་མཐུན་པའི་དང་། དེ་ཉིད་ལས། ཆོས་སྤྱོད་བཅུ་ཡི་ཆ་གཅིག་ལ་གནས་པ། །ཞེས་པ་དང་། ཕྱོགས་གཅིག་སྤྱོད་ལ་གང་གནས་པ། །ཞེས་པ་དང་། ལམ་རིམ་ལས། རྒྱུ་འབྲས་མཚམས་སྦྱོར་བར་སྐབས་ཀུན། །ཆོས་སྤྱོད་དགུ་ཡི་སྤྲོས་པ་དང་། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡོ་བ་ཡིན་ཕྱིར་རོ། །ཞེས་པས་ཕྱོགས་གཅིག་པའི་དང་། གནས་དང་ལོངས་སྤྱོད་ཅི་བདེ་ལ། །མ་ཉམས་བློ་དང་ལྡན་པ་ཡིས། །མཉམ་ལས་ལངས་ཚེ་སྤྱོད་པ་ནི། །ཞེས་པ་དང་། ཡན་ལག་དབང་པོ་རྣམ་ཤེས་ཀུན། །རྣམ་སྨིན་ཨཱོྂ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་སྒོམ། །ཡང་ན་ཁྲོ་བོའི་དཀྱིལ་འཁོར་སྒོམ། །ཞེས་པས་སྤྲོས་བཅས་ཀྱི་སྤྱོད་པའོ། །བར་ཆད་མེད་པའི་ལམ་དུ་ནི། འདི་ལས། གོས་རྒྱན་བཟའ་བཏུང་གླུ་དང་ཚིག །བྲོ་གར་ཚོགས་ཀྱི་སྤྲིན་ཕུང་ལས། །ཧཱུཾ་དུ་ཤེས་པས་རབ་སྤྱད་ན། །ངོ་མཚར་འབྱུང་བའི་དཀྱིལ་འཁོར་མཉེས། །ཞེས་སོ། །ཐ་མ་ལ་གསུམ་སྟེ། རྣམ་སྨིན་ཚེ་དབང་གི་སྤྱོད་པ་ནི། ལམ་རིམ་ལས། ཀུན་ཏུ་འགྲོ་བ་བདག་པོའི་དོན། །ཞེས་པས་རང་དོན་ཀུན་ཏུ་འགྲོའི་དྲི་མ་སྦྱོང་ཞིང་ལམ་གོང་མ་ལ་སྦྱོར་བའོ། །ཕྱག་རྒྱ་ཆེན་པོའི་ནི་ཤེས་རབ་གསུམ་གྱིས་ལྷན་ཅིག་གནས་པའི་དྲི་མ་སྦྱོང་ཞིང་གོང་མ་ལའོ། །ལྷུན་གྱིས་གྲུབ་པའི་རིག་འཛིན་གྱི་སྤྱོད་པ་ནི། ལམ་རིམ་ལས། ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱིས་བསླབ་རྫོགས་ན། བག་ལ་ཉལ་བའི་སྒྲིབ་པ་དང་། །བཅོམ་ལྡན་འདས་པར་གྱུར་པ་ཡིན། །ཤེས་བྱའི་སྒྲིབ་པ་སྦྱོང་ཞིང་སངས་རྒྱས་པའོ། །ཅིག་ཅར་བ་བླང་དོར་དང་བྲལ་བ་རྨད་དུ་བྱུང་བའི་སྤྱོད་པ་ནི། རྒྱས་པའི་དོན་གསུམ་པ་ལས། རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །ཅེས་པ་དང་། འདི་ཉིད་ལས། སྤྱོད་པ་ཅི་ལའང་ཐོགས་མེད་སྤྱོད། །ཅེས་སོ། །གཉིས་པ་ཐབས་ལམ་བརྟུལ་ཞུགས་ཀྱི་སྤྱོད་པ་ནི། རྒྱས་པའི་གསུམ་པ་ལས། སེམས་ཅན་རྟོག་པ་བཟློག་པའི་ཕྱིར། །གཙོ་རུ་དང་དུ་བླང་བར་བྱ། །ཞེས་པ་དང་། འདིའི་བཅུ་གཉིས་པ་ལས། ལྷ་མོ་ཀླུ་མོ་རིགས་ངན་མོ། །ལ་སོགས་དང་། ཞིང་གྱུར་མཆོག་དང་ཞེས་པ་ལ་སོགས་པའོ། །མེད་པའི་སྐྱོན་ནི། ཐུགས་ཐིགས་ལས། ཁྱད་པར་གྱི་སྤྱོད་པ་དང་མི་ལྡན་ན་མཐར་ཐུག་གི་འབྲས་བུ་མི་ཐོབ་སྟེ། ཁྱད་པར་མེད་ན་མཐར་ཕྱིན་མེད། །ཅེས་གསུངས་པའི་ཕྱིར་རོ། །ཡོད་པའི་ཡོན་ཏན་ནི། ཚོགས་གཉིས་རྫོགས་ཤིང་སྒྲིབ་གཉིས་འབྱང་བར་འགྱུར་བ་སྟེ། དེ་ཉིད་ལས། བསག་སྦྱང་གཉིས་འགྱུར་བྲི་བར་འགྱུར། །ཞེས་པའོ། །དེ་ནི་དགུ་པ་དང་། བཅུ་གཅིག་པ་དང་། བཅུ་གཉིས་པ་དང་། བཅོ་བརྒྱད་པ་དང་། བཅུ་དགུ་པ་རྣམས་ནས་སོ། །གསུམ་པ་བཀོད་པ་དཀྱིལ་འཁོར་ལ་དྲུག་ལས། དགོས་པ་ནི། དེ་ཉིད་ལས། དཀྱིལ་འཁོར་དགོས་པའི་དུས་ལྔ་དང་། །ཞེས་པས་དབང་སྒྲུབ་མཆོད་ཕྲིན་རབ་གནས་རྣམས་གསོན་དོན་ནོ། །རོ་བསྲེག་གནས་སྦྱང་གཉིས་གཤིན་དོན་ནོ། །དེ་དག་གི་མི་མཐུན་པའི་ཕྱོགས་རྣམས་སེལ་ཞིང་དོན་རྣམས་བསྒྲུབ་པའི་ཆེད་དོ། །ངོ་བོ་ནི། ཐུགས་ཐིགས་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་པ་དང་། ཆོས་དོན་ལས། ངོ་བོ་ཆོས་རྣམས་ཐམས་ཅད་དེ། །བདེན་པ་གཉིས་ཀྱི་མཚན་མ་ཅན། །དོན་དམ་སྤྲོས་པ་མེད་པ་ལས། །ཀུན་རྫོབ་གཙོ་འཁོར་དེ་ཉིད་དོ། །ཞེས་པ་བཞིན་ནོ། །ངེས་ཚིག་ནི། མ་དྷ་ལའི་སྒྲས་དཀྱིལ་འཁོར་རོ། །དེ་ནི་གང་གཙོ་བོ་ལ་འཁོར་གྱིས་བསྐོར་བའི་ཕྱིར་ཏེ། ཐུགས་ཐིག་ལས། བདུན་གྱི་གཙོ་སྙིང་གང་གང་ལ། །དེ་ཡི་འཁོར་ལྡན་ངེས་པའི་ཚིག །ཅེས་པ་དང་། ཆོས་དོན་ལས། ངེས་ཚིག་དཀྱིལ་ནི་གཙོ་བོ་སྟེ། །འཁོར་ནི་དེ་ཡི་སྤྲུལ་པ་སྟེ། །ཞེས་གསུངས་པའི་ཕྱིར་རོ། །རྣམ་གྲངས་ནི་དངོས་དང་། ཞོར་ལ་དུས་ནི། ཐུགས་ཐིགས་ལས། དཀྱིལ་འཁོར་དགོས་པའི་དུས་ལྔ་དང་། །ཞེས་སོ། །དང་པོ་ནི། རྒྱས་པའི་དགུ་པ་ལས། འདི་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་པས་བདུན་ཏེ། རང་བཞིན་གྱི་དང་། གཟུགས་བརྙན་གྱི་དང་། ལྷག་པ་གཟུགས་བརྙན་གྱི་དང་། ཏིང་ངེ་འཛིན་གྱི་དང་། ལྷག་པ་ཏིང་ངེ་འཛིན་གྱི་དང་། བྱང་ཆུབ་སེམས་ཀྱི་དང་། ཚོམ་བུ་ཚོགས་ཀྱི་དཀྱིལ་འཁོར་རོ། །དང་པོ་ལ་གཉིས་ཏེ། རང་བཞིན་ཉིད་ཀྱི་དང་། རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་རོ། །དང་པོ་ལ་གསུམ་སྟེ། རང་བཞིན་དོན་དམ་གྱི་དཀྱིལ་འཁོར་ནི། རྒྱས་པའི་དོན་གཉིས་པ་ལས། ཕྱོགས་བཅུ་མཐའ་ཡས་མུ་མེད་པ། །སྣང་གྲགས་བསམ་གྱིས་མི་ཁྱབ་པ། །ཕྱི་དང་ནང་གི་རྣམ་པ་དག །དེ་བཞིན་དབྱིངས་ཀྱི་ངང་དུ་ཐིམ། །ཞེས་སོ། །ཀུན་རྫོོབ་ཀྱི་དཀྱིལ་འཁོར་ནི། ཕྱི་ནང་སྣོད་བཅུད་བདག་རྣམས་ལ་། །རང་བཞིན་དཀྱིལ་འཁོར་ཡེ་ནས་གནས། །ཞེས་སོ། །དབྱེར་མེད་ཀྱི་དཀྱིལ་འཁོར་ནི། །དོན་བཞི་པ་ལས། རང་བཞིན་དཀྱིལ་འཁོར་ཡང་དག་ནི། །ཆོས་དབྱིངས་དག་དང་དབྱེར་མེད་པས། །མཉམ་པར་སྦྱོར་ཞིང་དག་པ་ཡི། །ཞེས་སོ། །གཉིས་པ་ནི། ཆོས་དོན་ལས། སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་རྟོགས་གྱུར་པ། །རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུངས། །ཞེས་པ་དང་། རྒྱས་པ་ལས། འབྲས་བུ་མཐར་ཕྱིན་འོག་མིན་ན། །བཞུགས་པ་གཙོ་དང་འཁོར་གྱི་ཚུལ། །ཞེས་པ་སྟེ། འདི་རྒྱས་པར་འབྲས་བུའི་སྐབས་སུ་སྟོན། འདིར་དཀྱིལ་འཁོར་གྱི་རྣམ་གྲངས་ཙམ་དུ་འཆད་ཀྱི་ལམ་གྱི་ཆ་རྐྱེན་མ་ཡིན་ནོ། །དཀྱིལ་འཁོར་གཉིས་པ་ནི། དོན་དམ་པའི་གཟུགས་བརྙན་རྟོག་པ་ཀུན་རྫོབ་ལྷའི་དཀྱིལ་འཁོར་དུ་བྱུང་བ་དང་། རྣམ་རྟོག་ཕྲ་རགས་ཀྱིས་ལྷ་ཡབ་ཡུམ་དུ་མཚོན་པ་གཟུགས་བརྙན་གྱི་དཀྱིལ་འཁོར་ཏེ། དེ་གཉིས་ཆར་ཡང་འོག་མིན་ན་བཞུགས་པ་དང་འདི་ལྟར་གསལ་བ་གཉིས་འདྲ་བའི་ཕྱིར་ཏེ། རྒྱས་པའི་དོན་བཞི་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །མཚན་ཉིད་འཛིན་པ་ཤེས་རབ་སྟེ། །གཉིས་མེད་འབྲེལ་པས་ཐབས་ཆེན་ཡིན། །ཞེས་སོ། །དཀྱིལ་འཁོར་གསུམ་པ་ནི། དཀྱིལ་འཁོར་གྱི་ལས་ཀྱིས་ལྷག་པ་སྟེ་ས་ལ་སོགས་པ་ལ་ཕྱག་རྒྱར་བཞེངས་པ་སྟེ། འདིའི་དགུ་པ་ལས། ཡང་ན་ས་གཞི་རབ་མཉམ་ལ། །ཞེས་པ་དང་། ཆོས་དོན་ལས། གསེར་དངུལ་ལུགས་དང་དུང་རྡོ་འབུར། རྭ་ཤིང་བཞོག་དང་གྱང་རས་རིས། །ས་མྱག་ལྡེར་དང་རྡུལ་ཚོན་བཅས། །ཞེས་པ་བཞིན་ནོ། །དེ་ལ་ཡང་ངོ་བོ་རྣམ་གྲངས་ནི་སྐུ་གསུང་ཐུགས་གསུམ་སྟེ། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་པས་གོང་གི་དགོས་པ་དང་འབྲེལ་བའི་ཕྱིར་གནས་ཀྱི་རྣམ་གྲངས་ལྔའམ་བདུན་ནོ། །དཀྱིལ་འཁོར་བཞི་པ་ནི། གང་བསྒོམ་བྱའི་དོན་ལ་རྩེ་གཅིག་ཏུ་གནས་པ་སྟེ། འདི་ལ་གཉིས་ལས། མཚན་མེད་ནི། རྒྱས་པ་ལས། དེ་བཞིན་ཏིང་འཛིན་དཀྱིལ་འཁོར་གྱིས། །ཉིད་ཀྱི་ཐུགས་ལ་ཐིམ་བྱས་ཏེ། །ཡང་དག་ཆོས་སྐུའི་ཕྱག་རྒྱ་ཆེ། །ཞེས་སོ། །ཡང་མཚན་བཅས་ནི་ལྷག་པ་ཏིང་དཀྱིལ་ལོ། །དཀྱིལ་འཁོར་ལྔ་པ་ནི། ཏིང་ངེའི་ལས་ལྷག་པ་སྟེ་ཞི་ཁྲོ་གཉིས་སོ། །དེ་རེ་རེ་ཡང་སྐུའི་ནི་འཁོར་ལོ་རྩིབས་བཞི་མུ་ཁྱུད་བཅས་ལ་སོགས་པ། དེ་བཞིན་བ ཅུ་གཅིག་པའི་འབར་བའི་རྒྱལ་པོ་རྩིབས་བཞི་པ་ནོར་ཏེ། འཁོར་ལོ་རྒྱལ་པོ་རྒྱལ་མོ་དང་ལ་སོགས་པ་དབུ་གསུམ་ཕྱག་དྲུག་ཞབས་བཞི་བགྲད་ལ་སོགས་པའོ། །གསུང་གི་ནི་གཅིག་པའི་སྔགས་ནོར་ཏེ་གཅིག་པའི་སྔགས། བཞི་པའི་ཡི་གེ་ནོར་ཏེ་ཧཱུཾ་ཧ་ཧེ་ཕཊ་ལ་སོགས་ས་བོན་ནོ། །ཐུགས་ཀྱི་དཀྱིལ་འཁོར་ཏེ་མཐིང་ཁ་དཀར་པོ་སེར་ལེ་བརྒན་ནོར་ཏེ་སྨུག་ནག་སྔོ་ནག་སེར་ནག་དང་ལ་སོགས་སོ། །རྡོ་རྗེེ་འཁོར་ལོ་ལ་སོགས་ཕྱག་མཚན་ནོར་གསུང་ངོ་། །སྟོང་གི་འཇིག་རྟེན་ལ་སོགས་སོ། །ལྷ་དང་ལྷ་འདྲ་བར་སྒོམ་ཞེས་པའོ། །དཀྱིལ་འཁོར་དྲུག་པ་ནི། ཅིག་ཤོས་འོག་སྒོའི་དུས་ཏེ། དེ་ཡང་བརྟེན་པ་བདེ་བ་ནི་དཀྱིལ་ཡིན་ཏེ། འདིའི་བཅུ་གསུམ་པ་ལས། དཀྱིལ་འཁོར་ལ་ནི་དཀྱིལ་འཁོར་སྒོམ། །ཞེས་པ་དང་། ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་པའོ། །དེའི་རྟེན་ཐིག་ལེ་ནི། གསང་བའི་དབང་པོ་པདྨར་ལྡན་གྱུར་ན། །བྱང་ཆུབ་སེམས་ཀྱི་དཀྱིལ་འཁོར་རྣམ་པ་གཉིས། །ཞེས་སོ། །དེའི་རྟེན་རྩ་རྣམས་འཁོར་ཡིན་པའི་ཕྱིར་ཕྱི་དང་ནང་དང་གསང་བ་སྟེ། བཞི་བརྒྱད་ཤི་ར་མ་དྷ་ལ། །ཞེས་སོ། །ཁོག་གཞུང་ལས། ཟབ་ཕྱིར་བྱང་སེམས་དཀྱིལ་འཁོར་ནི། །རྟེན་དང་བརྟེན་ཅན་ཐ་སྙད་གཉིས། །དབྱེ་བ་ཕྱི་ནང་མཐར་ཐུག་འགྱུར། །ཞེས་སོ། །དཀྱིལ་འཁོར་ཐ་མ་ནི། རིགས་གང་ལ་དེའི་འཁོར་གྱིས་བསྐོར་བ་འདི་དཀྱིལ་འཁོར་དང་གཅིག་པ་དགག་པའི་དབྱེ་བ་སྟེ། དེ་ལའང་ཞི་ཁྲོ་གཉིས་སོ། །དེ་རེ་རེའང་ཚོམ་བུ་གཅིག་པ་ནི། རིགས་ཀྱི་རིགས་ཏེ་ལ་སོགས་བཅོ་བརྒྱད་དང་། དེ་བཞིན་ཁྲོ་བོ་ལ་ཡང་། དང་པོར་ལྔ་བཅུ་བརྒྱད་བསྒོམས་ནས། །ཞེས་པའོ། །གསུམ་པ་ནི། དེ་བཞིན་རིགས་དང་རྡོ་རྗེའི་རིགས། །ཞེས་པ་ལ་སོགས་པ་བཞི་བཅུ་དྲུག་དང་། བདུན་ཅུ་རྩ་བརྒྱད་གསལ་བ་དང་། །ཞེས་སོ། །ལྔ་པ་ནི། ལྔ་ཡི་ལ་སོགས་བདུན་ཅུ་དང་། །དགུ་བཅུ་རྩ་བརྒྱད་དེ་བཞིན་ནོ། །ཞེས་སོ། །དེ་དག་གི་བྱེ་བྲག་གི་ངེས་ཚིག་ནི་བཞི་ལས། རང་དཀྱིལ་འཁོར་གྱི་ནི། རྒྱས་པ་ལས། འདས་པ་རྟག་ཏུ་དཀྱིལ་ཡིན་ཏེ། །འཇིག་རྟེན་སྣ་ཚོགས་འཁོར་དུ་གསུངས། །ཞེས་སོ། །གཟུགས་བརྙན། ལྷག་པ་གཟུགས་བརྙན། ལྷག་པ་ཏིང་དཀྱིལ། ཚོགས་དཀྱིལ་འཁོར། འབྲས་བུ་མཐར་ཕྱིན་པ་དང་ལྔའི་ནི། ཡང་དེ་ཉིད་ལས། རྡོ་རྗེ་སེམས་དཔའ་དཀྱིལ་ཉིད་དེ། །རིགས་བཞིའི་ལྷ་དང་ལྷ་མོ་འཁོར། །ཞེས་སོ། །ཏིང་དཀྱིལ་ནི། རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཞེས་སོ། །བྱང་སེམས་ལ་གཉིས་ལས། ཕྱིའི་ནི་རྩ་སྟེ། རྡོ་རྗེ་ལས་རིམ་ལས། སྙིང་པོ་ཐམས་ཅད་དུས་སུ་དཀྱིལ། །གང་ཡང་ཡན་ལག་འཁོར་དུ་གསུངས། །ཞེས་སོ། །ནང་གི་ནི་ཐིག་ལེ་སྟེ། བཅོ་བརྒྱད་ཁམས་གསུམ་སྙིང་པོ་ཉིད། །དེ་དག་འཁོར་ཏེ་བདེ་བའི་ཁམས། །ཞེས་སོ། །གསང་བ་ནི་བདེ་བ་སྟེ། ཡེ་ཤེས་ཇི་བཞིན་ལྷ་དེ་བཞིན། རྟེན་ཅན་དཀྱིལ་འཁོར་ཡིན་ལ། བརྟེན་པའང་དཀྱིལ་འཁོར་ཞེས་སོ། །མེད་པའི་སྐྱོན་ནི། ཐུགས་ཐིགས་ལས། དེ་ལས་ལྡོག་པའི་སྐྱོན་ཅན་བཞི། །གྲངས་ཀྱི་རྗེས་སུ་མ་ངེས་པར། ཞེས་པས་འོག་གི་ཡོན་ཏན་ལས་ལྡོག་པའོ། །ཡོན་ཏན་ནི། ཐུགས་ཐིགས་ལས། འཕེལ་འགྲིབ་ཕན་ཡོན་ཐབས་འགྲུབ་བཞི། །ཞེས་པ་ཉིད་དོ། །དེ་ནི་རང་བཞིན་གྱི་དཀྱིལ་འཁོར་རང་བཞིན་གྱི་སྣང་བ་བསྟན་པའི་ལེའུ་རྣམས་ཀྱིས་སོ། །གཞན་ཡང་། བཞི་པ། ལྔ་པ་། དྲུག་པ། བརྒྱད་པ། དགུ་པ། བཅུ་པ། བཅུ་གཅིག་པ། བཅུ་གསུམ་པ། བཅོ་ལྔ་པ། བཅུ་དྲུག་པ། བཅུ་བདུན་པ་རྣམས་ནས་སྟོན་ནོ། །བཞི་པ་དབང་ལ་དྲུག་ལས། དགོས་པ་ནི་སྒྲིབ་པ་འཇོམས་ཤིང་ནུས་པ་འཇོག་པའོ། །ངོ་བོ་ནི་གང་ཐབས་ཀྱི་ཡན་ལག་གིས་ཐོབ་པར་བྱ་བ་སྟེ་ལྔ་ལས། ཐོབ་བྱའི་ངོ་བོ་དངོས་ནི། རིམ་གསུམ་ལས། ངོ་བོ་ནུས་ཕན་གསང་བ་དང་། །ཤེས་རབ་ཡེ་ཤེས་བདེ་ཆེན་པོ། །ཞེས་སོ། །འཐོབ་པའི་རྒྱུ་རྐྱེན་ནི། དེ་ཉིད་ལས། ཁྱད་པར་རྒྱུ་རྐྱེན་ལྔར་བཤད་དོ། །ཞེས་སོ། །སྣོད་དང་སྦྱར་ཏེ་བསྐུར་བའི་རིམ་པ་ནི། དེ་ཉིད་ལས། དད་དང་བརྩོན་འགྲུས་གསུམ་ལྡན་པས། །བརྟུལ་ཞུགས་གསུམ་པ་སྤྱོད་པ་ལ། །གོ་རིམ་བཞིན་དུ་འཚམས་པར་སྦྱིན། །ཞེས་པ་དང་། འདིའི་དགུ་པ་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་བསྐུར་བར་བྱ། །ཞེས་སོ། །བསྐུར་བའི་ཐབས་ནི། ལག་ལེན་ལྟར་ལྔ་སྟེ། དབང་རྫས། རབ་གནས། རུའི་དགོངས་པ། གང་དུ་བསྐུར་ཞིང་བསྟིམ་པའི་གནས། བསྐུར་བའི་ཚིག །བསྒྲག་པའི་ཚིག་གོ། །ཐོབ་པའི་ཚད་དམ་དཔེ་ནི། དེ་ཉིད་ལས། རྒྱལ་པོ་ཕྲུག་གུ་དྲུག་འགྱུར་ཞིང་། །ཞེས་སོ། །ངེས་ཚིག་ནི། ཨ་བྷི་ཥིཉྩའམ་ཥེ་ཀའི་སྒྲས་དབང་ཞེས་བྱ་ལ་དེ་ནི་མངོན་པར་གཏོར་བའམ་ཡོན་ཏན་ཐོབ་པའི་ཕྱིར་རོ། །རྣམ་གྲངས་ལ་གཉིས་ཏེ། དངོས་དང་། ཞོར་ལ་དུས་ནི། ཁོག་གཞུང་ལས། དུས་ནི་རྣམ་པ་གསུམ་དུ་སྟེ། ཕྱི་ནང་དཀྱིལ་འཁོར་རྣམ་པ་གསུམ། །བསྐྱེད་པའི་རིམ་ལ་སློབ་པའི་དུས། །རྫོགས་རིམ་གདམས་ངག་སྦྱོར་དུས་སུ། །རོལ་པས་འཇུག་དུས་གསང་བའོ། །ཞེས་སོ། །དང་པོ་ནི། ཐུགས་ཐིགས་ལས། དཀྱིལ་འཁོར་ལས་ཀྱི་རྗེས་ཞུགས་པས། །སྣོད་རིམ་སྦྱར་བའི་ལས་རྫོགས་བྱ། །ཞེས་པས་གསུམ་སྟེ། ལམ་གྱི་རིམ་པའི་སྒོ་ནས་དང་། དཀྱིལ་འཁོར་གྱི་སྒོ་ནས་དང་། མོས་པ་ཐ་དད་པའི་དབྱེ་བའོ། །དང་པོ་ནི། ཟག་བཅས་ཀྱི་ལམ་དུ་དབང་གསུམ་གྱི་ནུས་པ་ཙམ་འཇོག་པ་དང་། བར་ཆད་མེད་པའི་ལམ་དུ་ཕལ་ཆེར་འཇོག །ཟག་མེད་ལམ་དུ་དངོས་སུ་འཇོག་ཅིང་བསྐུར་བའོ། །གཉིས་པ་ནི། ཁོག་གཞུང་ལས། རི་མོ་བཞེངས་གསོལ་ཕན་ནུས་བསྐུར། །ཞེས་པས་ལྷག་པ་གཟུགས་བརྙན་གྱི་དང་། དཀྱིལ་འཁོར་བསྟན་ལ་ཤེས་རབ་སྦྱིན། །ཞེས་ལུས་ཀྱི་དང་། གསང་དབང་བསྐུར་བའི་སོར་བཞི་པ། །ཞེས་པ་མཁའི་དཀྱིལ་འཁོར་ལ་བརྟེན་པའོ། །ཐ་མ་ལ་གཉིས་ཏེ། ཞི་བའི་དང་། ཁྲོ་བོའི་དབང་ངོ་། །དང་པོ་ནི། ཐུགས་ཐིགས་ལས། རྩ་བ་རྣམ་ལྔ་བཅོ་བརྒྱད་དང་། །ཞེས་པས་དད་པ་ཅན་ལ་ཕན་པའི་དབང་བཅུ་དང་། བརྩོན་འགྲུས་ཅན་ལ་ནུས་དབང་ལྔ་དང་། བརྟུལ་ཞུགས་ཅན་ལ་ཟབ་མོའི་དབང་གསུམ་མོ། །གཉིས་པ་ནི། དེ་ཉིད་ལས། བསྒྱུར་བ་ལྔ་ལ་ཞེས་པས། བརྩི་བའི་གྲངས་ལྔར་གསལ་ཏེ། འདི་ལས། ཁྲོ་བོའི་དཀྱིལ་འཁོར་དེ་བཞིན་ཏེ། །ཞེས་སོ། །ཁྲོ་བོ་རྡོ་རྗེ་ལས་རིམ་ལས། ལྷ་དབང་ཕྱག་མཚན་རྒྱན་ཆས་དང་། །སྒྲུབ་རྫས་གསང་བ་རྣམ་གསུམ་མོ། །ཞེས་སོ། །དེའི་བྱེ་བྲག་ནི། སུམ་ཅུ་དྲུག་ཅེས་པས། ཕྱི་དབང་བཅུ་ནི། དབུ་རྒྱན་ཕྱག་མཚན་གཟུངས་མ་བུམ། །བཀྲ་ཤིས་རྫས་བརྒྱད་རཏྣ་བདུན། །གདན་ཁྲི་རྒྱན་ཆས་མིང་འཁོར་ལོ། །ཞེས་སོ། །ནང་དབང་བཅུ་གཅིག་ནི། ཉན་དང་ལས་བཞི་འཆད་པ་དང་། །རྡོ་རྗེ་རྒྱལ་པོ་གདན་ཁྲི་དང་། །རཏྣ་བདུན་དང་ཕྱག་རྒྱ་དང་། །ཡེ་ཤེས་ལྔ་དང་སྐུ་གསུང་ཐུགས། །བཀྲ་ཤིས་རྫས་བརྒྱད་མིང་དབང་ངོ་། །ཞེས་སོ། །སྒྲུབ་པའི་དབང་བཅུ་གསུམ་ནི། ཤེས་རབ་རིག་དབང་ཁམས་གསུམ་སྒྱུར། །འགྲོ་དོན་རྫོགས་བྱེད་ཐོང་གཤོལ་དང་། །དྲུག་གསུམ་གདན་སྤྲུགས་ཐོད་ཚར་གསུམ། །སྲིད་གསུམ་དག་བྱེད་མཚོན་བྱ་དང་། །སྤྱོད་བཞིན་མ་ཆགས་འདོད་ཡོན་ལྔ། །རྣམ་བཞིའི་ལས་རྫོགས་ཏིར་དབྱུག་ཐོ། །དོན་དམ་དབྱེར་མེད་སྦྲུལ་ཆུན་དང་། །གཉིས་མེད་སྦྱོར་རྟགས་ལྷ་མོ་ཡུམ། །བདག་ཉིད་ཆེན་མོ་ལོངས་སྤྱོད་ཚོགས། །མངའ་བདག་ཆེན་པོ་སྒྲུབ་རྫས་དང་། །གྲགས་ཆེན་རྡོ་རྗེ་མིང་དབང་དང་། །སྦས་པ་གསང་བའི་དབང་དག་གོ། །ཞེས་སོ། །ཟབ་མོའི་དབང་གཉིས་ནི་ཤེས་རབ་ཡེ་ཤེས་དང་། བདེ་བ་ཆེན་པོའོ། །མ་ཐོབ་པའི་སྐྱོན་ནི། དབང་མ་ཐོབ་བཞིན་རང་བྱན་དུ་སྤྱད་པས་འབད་པའི་འབྲས་བུ་མེད་ཅིང་ངན་འགྲོར་ལྟུང་བ་སྟེ། ཐུགས་ཐིགས་ལས། གསང་བ་ཉམས་པས་ལྟུང་འཇིགས་པ། །སོ་མ་བཏང་བའི་རྫས་སྤྱོད་ལྟར། །འགྱུར་བ་གསང་བའི་རྒྱུད་ཀུན་ལྟོས། །ཞེས་པ་དང་། འདིའི་བཅུ་པ་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་པ་དང་། ཁོག་གཞུང་ལས། ལས་རྩོམ་འབྲས་མེད་ལྟུང་བས་སྐྱོན། །ཞེས་སོ། །ཐོབ་པའི་ཡོན་ཏན་ནི། གནས་སྐབས་སུ་བདེ་བ་དང་མཐར་ཐུག་བདེ་བ་ཆེན་པོ་ཐོབ་པ་སྟེ། འདི་དང་ཕྱི་མ་ཕན་ཡོན་གྲངས། །རྒྱུད་ལས་གསུངས་པ་ཇི་བཞིན་ནོ། །ཞེས་པ་དང་། ཁོག་གཞུང་ལས། བསྐུར་བས་སྐྱེ་གནས་ལས་ཉོན་མོངས། །ཤེས་སྒྲིབ་ཆ་ཕྲ་རྣམ་དག་ནས། ཡོན་ཏན་སྣང་ཕྱིར་མིང་དུ་བརྗོད། །ཅེས་པ་དང་། ཕྱིར་མི་ལྡོག་པས་ཡོན་ཏན་ནོ། །ཞེས་སོ ། །དེ་ནི་གཉིས་པ་དང་། བཅོ་ལྔ་པ་སྔོན་བྱུང་གིས་སྟོན་ལ། དགུ་པ། བཅུ་པ། བཅུ་གསུམ་པས་རྗེས་འཇུག་གི་དབང་སྟོན་ནོ། །ལྔ་པ་དམ་ཚིག་ལ་དྲུག་ལས། དགོས་པ་ནི། ངན་འགྲོར་མི་ལྟུང་ཞིང་ལམ་དང་འབྲས་བུའི་གཞི་འཛིན་པ་སྟེ། རང་སྤྱི་གདུལ་བྱའི་བསག་སྦྱང་བའི། །ཞེས་པ་དང་། ཁོག་གཞུང་ལས། རྟོག་པ་འདུལ་དང་ལས་དོན་འགྲུབ། །ཅེས་སོ། །ངོ་བོ་ལ་གསུམ་སྟེ། ངོ་བོ་དངོས་དང་། དེ་གཞན་ལས་ཁྱད་པར་དུ་འཕགས་པའི་ཆེ་བ་དང་། དེའི་རང་བཞིན་ནོ། །དང་པོ་ནི། བསྲུང་བྱའི་སེམས་ས་བོན་དང་བཅས་པ་སྟེ། ཐུགས་ཐིགས་ལས། གསང་སྒོར་ཞུགས་པ་ཐམས་ཅད་ཀྱིས། །སྒོ་གསུམ་རང་གི་བསྲུང་བྱ་ལས། །རྒྱལ་པོའི་བཀའ་རྟགས་ཇི་ལྟ་བར། །མི་འབྲལ་སྡོམ་པ་དེ་ངོ་བོ། །ཞེས་སོ། །གཉིས་པ་ནི། ཁོག་གཞུང་ལས། འདུལ་དང་སྡོམ་པ་དམ་ཚིག་ཚོགས། །འདུས་པར་གསུངས་པ་ཆེ་བའི་མཆོག །ཅེས་སོ། །འདིའི་དམ་ཚིག་ཏུ་འོག་མའི་བསྲུང་བྱ་རྣམས་འདུས་པའི་ཕྱིར་ཏེ། སྨོས་པ་བླ་མེད་བསྲུང་ཐུབ་ན། །ཚུལ་ཁྲིམས་སྡོམ་པ་ཐམས་ཅད་རྫོགས། །ཞེས་པ་དང་། འདི་ལས། བླ་མེད་མཆོག་གོ་དམ་ཚིག་ཏུ། །འདུལ་པའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་མཐའ་ཡས་པ། །མ་ལུས་རྣམ་དག་ལྷུན་གྱིས་གྲུབ། །ཅེས་སོ། །ཐ་མ་ནི་ཁོག་གཞུང་ལས། རང་བཞིན་ཡེ་ནས་སངས་རྒྱས་པའོ། །ཞེས་པས་གཉིས་སུ་མེད་པ་སྟེ། དེ་ཉིད་ལས། བྱ་བྱེད་མེད་པར་ཉམས་པ་མེད། །ཅེས་པ་དང་། འདིའི་བཅུ་དགུ་པ་ལས། དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་སོ། །ངེས་ཚིག་ནི། ས་མ་ཡའི་སྒྲས་དམ་ཚིག་སྟེ། དེ་ནི་བསྲུང་བྱ་ལས་འདའ་བར་དཀའ་བའི་ཕྱིར་རོ། །དེ་ཡང་། སྐྱོན་ཡོན་ཆ་ཡིས་ཆེད་ཆེ་བ་། །དེ་དང་དེ་ཡི་ངེས་ཚིག་འགྲུབ། །ཅེས་པས་གཉིས་ལས། ཐུབ་པའི་ཡོན་ཏན་གྱི་དབང་དུ་མ་ཀ་ཡོ་ནའི་རྐྱེན་གྱིས་བསྲུང་བྱ་ལ་རྣམ་པར་གནས་པས་གནས་ངན་པར་མི་འཇུག་པའི་ཕྱིར་དམ་ཞེས་བྱ་ལ། དེ་སྟོན་པའི་ལམ་ནི་མ་ནོར་བདེན་པའི་ཚིག་ཡིན་པས་ན་ཚིག་ཅེས་བྱ་སྟེ། རྒྱས་པ་ལས། གཟུངས་སུ་གྱུར་པས་དམ་ཞེས་བྱ། །རྡོ་རྗེ་མ་ནོར་ལམ་སྟོན་པ། །དེ་ལ་ཡང་ནི་ཚིག་ཅེས་བྱ། །ཞེས་སོ། །ཡང་སྐྱོན་གྱི་དབང་དུ། ཡེ་མ་ཀ་ནའི་རྐྱེན་གྱིས་བསྲུང་བྱ་ལས་འདའ་བར་དཀའ་བས་དམ་ཞེས་བྱ་ལ། ཇི་སྲིད་འདས་ན་རང་གི་རྒྱུད་འཚིག་པའི་ཕྱིར་དམ་ཚིག་ཅེས་བྱ་སྟེ། དེ་ཉིད་ལས། ཡང་ན་དེ་བཞིན་བཀའ་བཅག་ན། །མི་ཁོམ་གནས་སུ་འཚིག་པར་འགྱུར། །ཞེས་སོ། །རྣམ་གྲངས་ནི། དངོས་དང་། ཞོར་ལ་འདུས་སོ། །དང་པོ་ལ་གཉིས་ཏེ། མཉམ་པ་ཅིག་ཅར་བའི་ནི། འདི་ཉིད་ལས། མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་སོ། །དབྱེ་བ་རིམ་གྱིས་པའི་དམ་ཚིག་གོ། །དེ་ལ་གཉིས་ཏེ། དབྱེ་གཞི་དང་། དེ་ལས་ཕྱེ་བའི་རྣམ་གྲངས་སོ། །དང་པོ་ནི། རྩ་བའི་དམ་ཚིག་ལྔ་སྟེ། འདི་ཉིད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་སོ། །ཡན་ལག་གི་དམ་ཚིག་བཅུ་ནི། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་འདོར་རོ། །ཞེས་སོ། །གཉིས་པ་ལ་ཡང་གཉིས་ཏེ། དོན་དང་། རྣམ་གྲངས་སྤྲོས་པའོ། །དང་པོ་ནི། གཞི་ལམ་འབྲས་བུ་གསུམ་ལས་དགུ་བཅུ་རྩ་བདུན་དུ་གསུངས་པ་སྟེ། རྒྱས་པ་ལས། སྤོང་པ་རྡོ་རྗེ་ཞེས་བྱ་བའི་དམ་ཚིག་ཅེས་པ་ལ་སོགས་པའི་རྣམ་གྲངས་སོ། །གཉིས་པ་ལ་ཡང་། སུམ་བརྒྱ་དྲུག་ཅུ་ནི། འདི་ལས། རྩ་བའི་དམ་ཚིག་ལྔ་གཉིས་ལས། །གཅིག་ལའང་བཅུ་ཕྲག་གསུམ་དུ་དབྱེ། །ཡན་ལག་དམ་ཚིག་ལྔ་གཉིས་ལས། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་སོ། །མཐའ་ཡས་པར་སྤྲོ་བ་ནི། དམ་ཚིག་འདི་ནི་རྨད་པོ་ཆེ། །འཇིགས་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པ། །རྟོགས་འདུལ་དམ་ཚིག་དེ་སྙེད་འཕྲོས། །ཞེས་པས་སོ། །ཞོར་ལ་དུས་ནི་ལམ་ཐམས་ཅད་དུའོ། །ཟག་བཅས་དངོས་སུ་བསྲུང་ཞིང་ཟག་མེད་ཤུགས་ལ་ལྡན་པའོ། །ཉམས་པའི་སྐྱོན་ནི། དངོས་དང་། ཞོར་ལ་བསྐང་ཐབས་སོ། །དང་པོ་ལ་གསུམ་སྟེ། རྩ་བ་ཉམས་པའི་སྐྱོན་ནི། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་སོ། །ཡན་ལག་ཉམས་པའི་སྐྱོན་ནི། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་སོ། །ཉམས་པ་དང་འགྲོགས་པའི་སྐྱོན་ནི། །རྩ་བ་ཉམས་པའི་ཕྱལ་བ་དག །གསོ་ལ་ཉེ་བར་མི་བརྩོན་ན། །སྐད་ཅིག་ཡུད་ལ་སྨྲ་མ་བྱེད། །ཉམས་གྱུར་ཉེས་པ་བརྗོད་མི་ལང་། །ཞེས་སོ། །ཞར་ལ་བསྐང་ཐབས་ནི། ཉམས་ན་བསྐང་བས་རྫོགས་པ་དང་། །ངེས་ཚིག་ངེས་པར་གྲུབ་པ་ཡིན། །ཞེས་སོ། །མ་ཉམས་པའི་ཡོན་ཏན་ནི། དེ་ཉིད་ལས། བསྒྲུབ་བྱ་རྒྱུད་ལ་སྨིན་པ་སྟེ། །མ་ནོར་གནས་པའི་ཡོན་ཏན་ནི། །རྣམ་གྲངས་རྗེས་འཇུག་སྤྱིར་རྒྱུད་གྲགས། །ཞེས་པ་དང་། དེ་ཉིད་ལས། གཞན་ཡང་རྒྱལ་མཆོག་ཀུན་བཟང་གི། །ཐམས་ཅད་མ་ལུས་ཕྱག་རྒྱ་ཡིས། །བསྒྲུབ་མེད་དམ་པ་མ་ལུས་འགྲུབ། །ཅེས་པས་སོ། །དེ་ནི་བཅུ་དགུ་པས་སྟོན་ནོ། །དྲུག་པ་ཕྲིན་ལས་ལ་དྲུག་ལས། དགོས་པ་ནི། རྒྱུད་འབྱང་ཞིང་བདག་གཞན་གྱི་དོན་གྲུབ་པ་སྟེ། ཐུགས་ཐིགས་ལས། བདག་དང་གཞན་དང་གཉིས་ཀ་དང་། །དམ་ཆོས་ཕྱིར་ན་རྣམ་ལྔའོ། །ཞེས་སོ། །ངོ་བོ་ནི། དོན་བྱ་བའི་ཡུལ་ལ་བྱེད་པ་གང་ཞིག་ཚད་མེད་དང་བའི་རྒྱུད་ལས་བྱུང་ཞིང་ཐབས་ཀྱིས་ཟིན་པ་སྟེ། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ལྷག་པ་གཟུགས་བརྙན་རྣམ་གཉིས་དང་། །མཆོད་རྟེན་སྒོ་དང་སྦྱིན་སྲེག་སྟེ། །ཞེས་སོ། །ངེས་ཚིག་ནི། ཀརྨའི་སྒྲས་ཕྲིན་ལས་སོ། །དེ་ནི་ལས་བཞིས་རང་གཞན་གྱི་དོན་བྱེད་པའི་ཕྱིར་ཏེ། ཐུགས་ཐིགས་ལས། ཟུག་རྔུ་ཕྱི་ནང་ཞི་ཕྱིར་དང་། །སྤེལ་བྱ་གཉིས་པོ་འཕེལ་ཕྱིར་དང་། །དགུག་དབང་བཞི་པོ་བསྡུ་ཕྱིར་དང་། །གདུག་པ་རྣམ་གཉིས་འཇོམས་ཕྱིར་དང་། །ལྔ་པ་དོན་དུ་བསྟན་བཞིན་ཕྱིར། །ངེས་ཚིག་ངེས་པར་འགྲུབ་པ་ཡིན། །ཞེས་པ་དང་། ཕྲིན་ནི་རྣམ་པ་བཞི་ཡིན་ཏེ། །ལས་ནི་སོ་སོའི་དགོས་པ་སྐོང་། །ཞེས་སོ། །རྣམ་གྲངས་ལ། དངོས་དང་། ཞོར་ལ་དུས་སོ། །དང་པོ་ནི། ཐུགས་ཐིགས་ལས། དོན་གྱིས་དམིགས་སུ་གཟུང་བའི་ཕྱིར། །རང་བཞིན་ལམ་དང་ཐུགས་རྗེ་ཆེ། །ཞེས་པས་སྤྱིར་གཞི་ལམ་འབྲས་བུ་གསུམ་ལས། འདིར་ལམ་གྱི་ཕྲིན་ལས་ལ་བཞི་སྟེ། དོན་བྱ་བའི་ཡུལ་དང་། དོན་བྱེད་པའི་ཕྲིན་ལས་དང་། དོན་བྱ་ཐབས་ཀྱི་རྣམ་གྲངས་དང་། དོན་བྱེད་ཚུལ་གྱི་ཁྱད་པར་རོ། །དང་པོ་ནི། སྣོད་སྡིག་ཅན་དང་། དྲེགས་པ་ཅན་དང་། ལོག་ལྟ་ཅན་དང་། གདུག་པ་ཅན་ཏེ། གདུལ་བྱ་ཕྱི་ནང་ཟུང་བཞི་པོ། །ཞེས་སོ། །གཉིས་པ་ནི། ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྱིས་གྲུབ་པའོ། །གསུམ་པ་ལ་བཞི་སྟེ། རྣམ་གྲངས་དངོས་དང་། གཙོ་བོའི་སེམས་གང་གིས་དང་། གཟུངས་མ་གང་ལ་བརྟེན་ཏེ་དང་། ནམ་གྱི་ཚེ་བྱ་བའི་དུས་སོ། །དང་པོ་ནི། ཁོག་གཞུང་ལས། མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་པས་ལྔ་སྟེ། མཆོད་རྟེན་གྱི་སྒོ་ནས་ནི། རྒྱས་པ་ལས། མཆོད་རྟེན་ནག་པོ་འོད་འབར་བ། །བགེགས་ཀྱི་ལིང་ག་མནན་པར་བྱ། །གཏུམ་པོ་རྔམས་པའང་ལྷན་ནེར་འགྱུར། །མི་མཐུན་ཕྱོགས་རྣམས་རྡུལ་དུ་རློག །ཅེས་སོ། །ཕྱག་རྒྱའི་སྒོ་ནས་བྱ་བ་ལ་གཉིས་ལས། བཅས་པའི་སྒོ་ནས་ནི། སོ་གཉིས་པ་ལས། ཡན་ལག་དབང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོར་རབ་ཏུ་སྒོམས། །ཞེས་པ་དང་། བསྒྱུར་བའི་སྒོ་ནས་ནི། རྒྱས་པའི་བཅུ་གཅིག་པ་ལས། རྡོ་རྗེ་ལན་གསུམ་གསོར་བ་ཡིས། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །ཞེས་སོ། །རྫས་ཀྱི་སྒོ་ནས་བྱ་བ་ནི། འདིའི་ཉི་ཤུ་པ་ལས། བདུད་རྩི་ལྔའམ་ཟས་ལྔ་ལ། །ཞེས་སོ། །ལུ་གུ་རྒྱུད་ཀྱི་བྲོའི་སྒོ་ནས་ནི། ལུག་གུ་རྒྱུད་དུ་སྦྲེལ་བསྡམས་ནས། །ཞེས་སོ། །མེའི་སྒོ་ནས་ཕྲིན་ལས་བྱ་བ་ནི་གསུམ་སྟེ། ཕྱི་ལྷག་པ་གཟུགས་བརྙན་གྱི་དང་། ནང་ཁམས་བཞིའི་ནི་སྙིང་གར་ཞི་བ། ལྐོག་མར་དབང་། ལྟེ་བར་རྒྱས། སྒྲོམ་མདོར་དྲག་པོའོ། །གསང་བ་ཁམས་གསུམ་གྱི་སྦྱིན་སྲེག་ནི་དབང་པོ་དང་ཡུལ་དང་རྣམ་ཤེས་སོ། །གཉིས་པ་གཙོ་བོའི་སེམས་ནི་དོན་གྱི་སེམས་གཉིས་མེད་རྟོགས་པ་ལས་བཞི་ཆར་ལ་ཁྱབ་བྱེད་དུ་དགོས་ལ། སྟོངས་ཀྱི་སེམས་ནི། ཉི་ཤུ་པ་ལས། དང་བས་དགའ་བས་ཆགས་པས་དང་། །ཁྲོས་པས་ཀ་ལི་རབ་ཏུ་བྱ། །ཞེས་སོ། །གསུམ་པ་གཟུངས་མ་གང་ལ་བརྟེན་པ་ནི། ཁོག་གཞུང་ལས། ན་སོ་གཞོན་དང་རིགས་འཕེལ་དང་། །སྐྱེ་བརྒྱུད་མེད་དང་ཟླ་བྲལ་དང་། །ལས་བཞིའི་དུས་སུ་སྦྱར་བ་ཤིས། །ལས་ཀྱི་ནུས་མཐུ་ཆེར་བསྟན་ཕྱིར། །སྔོན་ནས་བཙལ་བ་རབ་ཏུ་གཅེས། །ཞེས་སོ། །བཞི་པ་དུས་ནམ་གྱི་ཚེ་བྱ་བ་ནི། །ཐུགས་ཐིགས་ལས། ངོ་བོ་རྗེས་སུ་ཞི་བ་གཉིས། །ཕྱི་ལ་བགེགས་དགྲ་ཞི་བའོ། །ནང་ལ་ཉོན་མོངས་རྟོག་ཞི་བ། །རྒྱས་པ་གཉིས་པོ་གོས་དང་འཕེལ། །ན་ཤི་ལོ་ཏོག་སྲེའུ་སོགས། །ཚེ་དང་རིགས་བརྒྱད་ལོངས་སྤྱོད་དང་། །བསོད་ནམས་བཞི་ནང་འབྲས་བུའོ། །དབང་ནི་དགུག་དང་བསྡུ་བ་གཉིས། །ཕྱི་རོལ་དྷ་རིའི་རྣམ་པ་དགུག །མི་མཐུན་རྣམ་གཉིས་དབང་པོ་བསྒྱུར། །རང་སེམས་འབྲས་ལྔ་བསྡུ་བར་བྱ། །མངོན་སྤྱོད་བསྐྲད་དང་མནན་པ་དང་། །སྨྱོ་འབོག་བྱད་དང་ཀརྨ་དང་། །རྨོངས་དང་བརྟན་པོ་རྒྱུད་གཞན་ལའོ། །རང་གི་ཕྱི་ནང་དགྲ་བགེགས་འཇོམས། །ཞེས་པས་དེ་དག་གི་དུས་སུའོ། །ཐ་མ་ཁྱད་པར་ནི། ཐུགས་ཐིགས་ལས། ཁྱད་པར་ཟག་བཅས་བར་ཆད་མེད། །མཐར་ཕྱིན་ལམ་གྱི་ཕྱེ་བའམ། །ཤེས་རབ་དབང་པོ་རྣམ་གསུམ་གྱིས། །ནུས་མཐུ་བྱིན་བརླབས་ཡུལ་ངོ་བོ། །ཐབས་དང་གཞི་ལ་ཁྱད་པར་བ། །གན་ཙ་ལྟ་བུ་ཇི་ལྟ་བའོ། །ཞེས་སོ། །དུས་ནི་ཐུགས་ཐིགས་ལས། སྐབས་ནི་དབང་དང་སྒྲུབ་པ་དང་། །མཆོད་བཤགས་ཚེ་དང་དུས་བབ་ཚེ། །ཞེས་སོ། །མེད་པའི་སྐྱོན་ནི། དེ་ཉིད་ལས། མི་སྐོང་མི་རྫོགས་མི་འབྱང་དང་། །དོན་གཉིས་མི་འགྲུབ་དེ་ཡི་སྐྱོན། །ཞེས་སོ། །ཡོན་ཏན་ནི། དེ་ཉིད་ལས། དེ་ལས་ལྡོག་པའི་ཚུལ་བསྟན་པ། །ཡོན་ཏན་ཉིད་དུ་ཤེས་པར་བྱ། །ཞེས་པ་དང་། ཡང་། གཏུམ་པོ་རྔམས་པའང་ལྷན་ནེར་འགྱུར། །ཅེས་པས་ཞི་བ་དང་། ཡོན་ཏན་ནམ་མཁའི་མཐའ་དང་མཉམ། །ཞེས་རྒྱས་པ་དང་། སངས་རྒྱས་གསུང་ཡང་དབང་དུ་འགྱུར། །ཞེས་དབང་དང་། སངས་རྒྱས་བསོད་ནམས་སྐུ་ཡང་འཇིག །ཅེས་དྲག་པོའོ། །དེ་ནི་དགུ་པ་དང་། ཉི་ཤུ་པ་ནས་སྟོན་ནོ ། །བདུན་པ་སྒྲུབ་པ་ལ་དྲུག་ལས། །དགོས་པ་ནི། སྒྲུབ་པའི་ཐབས་ཡལ་བར་མ་དོར་བས་བསྒྲུབ་བྱ་གཉིས་མངོན་དུ་གྱུར་པ་ནིི། ཐུགས་ཐིགས་ལས། ཐུན་མོང་མཆོག་གི་དངོས་གྲུབ་རྣམས། །བདག་གཞན་ཐོབ་ནས་དོན་བཞིའི་ཕྱིར། །ཞེས་སོ། །ངོ་བོ་ནི། གཞི་ཕུན་སུམ་ཚོགས་པ་ལྔ་ཚང་ནས་ཐབས་བསྙེན་སྒྲུབ་བཞིས་བསྒྲུབ་བྱ་དོན་དུ་གཉེར་བཞིན་པ་ཞིག་སྟེ། གང་གིས་གང་ཐོབ་འདོད་པ་སྟེ། །ཡན་ལག་བཅུ་ལྡན་གཉེར་བསྔོ་བའོ། །ཞེས་པ་དང་། འདི་ལས། ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡིས། །རྣལ་འབྱོར་ཚོགས་པའི་དཀྱིལ་འཁོར་ལ། །ངེས་པར་ལེགས་པའི་དགོངས་པ་འགྲུབ། །ཅེས་སོ། །ངེས་ཚིག་ནི། སིདྡྷིའི་སྒྲས་དངོས་འགྲུབ་སྟེ། དེ་ནི་བསྒྲུབ་བྱའོ། །དེ་ཐབས་ཀྱིས་ཉམས་སུ་བླངས་པས་གྲུབ་པའི་ཕྱིར་ཏེ། དོན་དུ་གཉེར་ཕྱིར་སྒྲུབ་མཚན་ངེས། །ཞེས་སོ། །རྣམ་གྲངས་ལ་གཉིས་ཏེ། རྣམ་གྲངས་དངོས་དང་། ཞོར་ལ་དུས་སོ། །དང་པོ་ལ་ཡང་། སྒྲུབ་པ་དང་། དེའི་ཆ་རྐྱེན་ནོ། །དང་པོ་ལ་གསུམ་སྟེ། གང་ཞིག་ལྷ་ཆེན་པོ་ལ་སོགས་འཇིག་རྟེན་འདིའི་འདོད་བྱ་གཙོ་བོར་སྟོན་པ་ཐུན་མོང་གི་དང་། གང་ཞིག་རྡོ་རྗེ་སེམས་དཔའ་ལ་སོགས་པ་མཐར་ཐུག་གི་བསྒྲུབ་བྱ་གཙོ་བོར་སྟོན་པ་མཆོག་དང་། གང་ཞིག་དེ་དག་གི་བསྒྲུབ་པའི་ཚུལ་གཙོ་བོར་སྟོན་པ་ཚོགས་སྒྲུབ་པའོ། །དང་པོ་ནི། འདི་ལས། བདུད་རྩིར་འགྱུར་ཞིང་འབྱུང་བ་དང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིགས་པ་དང་། །ཆུ་རྒྱུན་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོང་ཤིང་ལྟུང་བར་འགྱུར། །དགུག་དང་གཏང་དང་བཅིང་དང་དགྲོལ། །གསོ་དང་གསད་དང་ཕམ་དང་རྒྱལ། །ཞེས་པ་དང་། ཁོག་གཞུང་ལས། འཇིག་རྟེན་པ་ཡང་འདི་ལྟ་སྟེ། །རོ་ལངས་ཚེ་པྲ་སྒྲུབ་པ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །རོ་ལངས་དམ་ཚིག་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དཔོན་དང་ཞང་བློན་སྒྲུབ། །ཚེ་འདི་ཆེད་ཕྱིར་འཇིག་རྟེན་པའོ། །ཞེས་སོ། །གཉིས་པ་ནི། དེ་ཉིད་ལས། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པའི། །ཕྱོགས་བཅུ་དུས་བཞིར་མངོན་རྫོགས་པ། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་པ་དང་། དེ་ཉིད་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དཔའ་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་རླབས་སྒྲུབ་པ་རྣམ་གཉིས་སོ། །ཞེས་པའོ། །ཐ་མ་ནི། ཐུགས་ཐིགས་ལས། རྣལ་འབྱོར་རྟོགས་གོམས་འབྱོར་པ་དང་། །སྔགས་དང་ཕྱག་རྒྱ་བརྟན་པ་དང་། །མི་ལྕོགས་མེད་པ་གང་ཡོད་དང་། །ཆ་རྐྱེན་ཚང་བས་དབང་སྒྱུར་སྔོན། །ཞེས་སོ། །གཉིས་པ་ཆ་རྐྱེན་ནི། ཁོག་གཞུང་ལས། སྐབས་ཀྱིས་གཙོ་དང་གྲོགས་པོས་བསྡུས། །ཞེས་པས་རྒྱུད་དོན་གཞན་དགུ་ཆར་ཡིན་ཏེ། དེ་ལས་དྲུག་སྔོན་དུ་བསྟན་ལ། དྲུག་རྗེས་སུ་སྟོན་ནོ། །ཞོར་ལ་དུས་ནི། ཐུགས་ཐིགས་ལས། ཆ་རྐྱེན་ཚང་བས་དབང་བས་དབང་སྒྱུར་སྔོན། །ཞེས་པས་ཚེ་དབང་གི་སྔོན་དུ་གཅིག་སྤྲོས་མཐར་ཕྱིན་ནས་སྒྲུབ་པ་སྟེ། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་སོ། །སྐྱོན་ནི་ཐུགས་ཐིགས་ལས། ཡལ་བས་མི་འབྱང་མི་ཐོབ་བཅུ། །བྱེ་བྲག་རྒྱས་པ་ཁོང་དུ་ཆུད། །ཅེས་སོ། །ཡོན་ཏན་ནི། དེ་ཉིད་ལས། ཟློག་པ་འདི་ཕྱི་མར། ལྔ་ལྔ་འཐོབ་ལ་དོན་གཉེར་རྫོགས། །ཞེས་པ་དང་། དགུ་པ་ལས། དབང་སྒྱུར་རིགས་ཀྱི་དམ་པ་འགྲུབ། །ཅེས་པའམ། སྐུ་ལྔ་ལྷུན་གྱིས་རྫོགས་པ་ནི། །ཞེས་སོ། །དེ་ནི་བཞི་པ། ལྔ་པ། དགུ་པ། བཅུ་གཅིག་པ། བཅུ་གཉིས་པ། བཅུ་གསུམ་པ་རྣམས་ཀྱིས་སྟོན་ནོ། །བརྒྱད་པ་ཏིང་ངེ་འཛིན་ལ་དྲུག་ལས། དགོས་པ་ནི། རྟོགས་པའི་ངང་ལ་གནས་པས་འཁོར་བ་ལ་དབང་སྒྱུར་བ་སྟེ། ལམ་རིམ་ལས། རྟོག་པ་དབང་སྒྱུར་ཏིང་འཛིན་ཡིན། །ཞེས་སོ། །ངོ་བོ་ནི། སྒོམ་པའི་ཐབས་ཀྱི་བསྒོམ་བྱ་ལས་མི་གཡོ་བར་གནས་པའོ། །ཞེས་པས་འདི་ལས། མཉམ་པར་བཞག་པས་བཏུལ་ནས་སུ། །ཞེས་སོ། །ངེས་ཚིག་ནི། ས་མ་ཏིའི་སྒྲས་ཏིང་ངེ་འཛིན་ནི། དེ་ནི་རྩེ་གཅིག་པར་གནས་པས་བསྒོམ་བྱ་མི་གཏོང་བའི་ཕྱིར་རོ། །རྣམ་གྲངས་ལ་གཉིས་ཏེ། དངོས་དང་། ཞོར་ལ་དུས་སོ། །དང་པོ་ལ་གསུམ་སྟེ། བསྐྱེད་པའི་རིམ་པ་དང་། རྫོགས་པའི་རིམ་པ་དང་། ཐབས་ཀྱི་ཏིང་ངེ་འཛིན་ནོ། །དུས་ནི། མཉམ་པར་བཞག་པས་བཏུལ་ནས་སུ། །ཞེས་པས་མཉམ་བཞག་གི་དུས་སོ། །མེད་པའི་སྐྱོན་ནི། དེ་ཉིད་ལས། གལ་ཏེ་རྣལ་འབྱོར་འདི་མེད་ན། །རྒྱ་མཚོའི་འཇིང་གི་ཕ་བོང་ལྟར། །བསྐལ་པར་ལམ་ལ་བཙལ་བྱས་ཀྱང་། །དོན་མེད་སྙིང་པོ་བསྐམས་པ་ཡིན། །ཞེས་སོ། །ཡོན་ཏན་ནི། བསྒྲུབ་བྱ་འགྲུབ་པ་སྟེ། དེ་ཉིད་ལས། བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །ཞེས་པ་དང་། འདིའི་ལྔ་པ་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་སོ། །དེ་ནི་ལྔ་པ་དང་བཅུ་གསུམ་པ་ལ་སོགས་པས་སྟོན་ནོ། །དགུ་པ་མཆོད་པ་ལ་དྲུག་ལས། དགོས་པ་ནི། རྒྱུད་འབྱང་ཞིང་དམ་སྐོང་བ་དང་ལྷ་མཉེས་ཤིང་དོན་བཞི་རྫོགས་པ་སྟེ། ཐུགས་ཐིགས་ལས། བདག་གཞན་དོན་རྫོགས་མཉེས་སྐོངས་པ། །ཞེས་སོ། །ངོ་བོ་ནི། མཆོད་བྱའི་ཡུལ་གང་ཞིག་མཉེས་པར་བྱེད་པ་སྟེ། དེ་ཉིད་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་འགྱུར་བའི་དངོས་པོ་ཉིད། །ཅེས་སོ། །ངེས་ཚིག་ནི། པཱུ་ཛའི་སྒྲས་མཆོད་པ་སྟེ། དེ་ཡང་པུར་པ་ཛའི་རྐྱེན་གྱིས་སྔོན་དུ་སྔོན་དུ་སྐྱེད་པར་བྱེད་པ་དང་། པུར་ན་པུར་ན་ཏྲི་ཡང་ཛ་ཧའི་རྐྱེན་གྱིས་ཡང་དང་ཡང་དུ་དགྱེས་པ་བསྐྱེད་པ་དང་། པུ་ཛ་ཐ་གོར་ཝ་ཐ་ནའི་རྐྱེན་གྱིས་བཀུར་བའི་ཕྱིར་མཆོད་པའོ། །རྣམ་གྲངས་ལ། དངོས་དང་། དུས་སོ། །དང་པོ་ལ་གསུམ་སྟེ། ཐུན་མོང་ཕྱིའི་དང་ཁྱད་པར་ནང་གི་དང་། གསང་བ་བླ་མེད་རྨད་དུ་བྱུང་བ་སྟེ། དེ་ཉིད་ལས། ཕྱི་ནང་གསང་བའི་རྫས་དགོངས་མཆོད། །སྲོག་དང་ལྡན་པ་རྟེན་གསུམ་ཚུལ། །ཞེས་པ་དང་། ཞར་ལ་འབུལ་ཐབས་ནི་ལྟ་བ་དང་ཏིང་ངེ་འཛིན་གྱི་ཁྱད་པར་གྱིས་རིམ་གྱིས་དང་ཅིག་ཅར་ཏེ། རིམ་གྱིས་ཡང་ན་ཅིར་ཅར་དུ། །ཞེས་སོ། །དུས་ནི་དབང་དང་། ཕྲིན་ལས། ཉམས་སྐོང་། མཆོད། གཙོ་བོར་སྒྲུབ་པ་སྟེ། ལས་སྦྱོང་སྒྲུབ་དབང་མཆོད་ཚེ་ན། །ཞེས་སོ། །དེ་མེད་པའི་སྐྱོན་ནི། དེ་ཉིད་ལས། དེ་ལས་ལྡོག་དང་མི་སྐོང་གཡེལ། །ཉམས་ཆད་མཐུ་བྱིན་བྲལ་བར་འགྱུར། །ཞེས་སོ། །ཡོན་ཏན་ནི། དེ་ཉིད་ལས། དུས་ཀྱི་རྗེས་ཞུགས་ཡོན་ཏན་དག །སྤྱི་དང་ཁྱད་པར་སྐབས་ཀྱིས་ནི་། །འདི་དང་ཕྱི་མར་གང་འཐོབ་པ། །བདག་གཞན་དོན་གྱིས་གཉིས་སུ་འགྱུར། །ཞེས་སོ། །དེ་ནི་དགུ་པ་དང་བཅོ་བརྒྱད་པས་སོ། །ཐ་མ་སྔགས་དང་ཕྱག་རྒྱ་ལ་དྲུག་ལས། །དགོས་པ་ནི། བར་ཆད་སེལ་ཞིང་ནུས་པ་བསྐྱེད་པ་སྟེ། ཐུགས་ཐིགས་ལས། སྦྱང་ཞིང་ཉེ་བར་བསྐྱེད་པ་དང་། ཐོབ་བྱ་ལྔ་པོ་རྫོགས་བྱའི་ཕྱིར། །ཞེས་སོ། །ངོ་བོ་ལ་སྔགས་ཀྱི་ནི། ཨཱ་ལི་ཀཱ་ལིའི་སྟེ་ཡི་གེའི་གོ་རིམ་སྦྱར་བས་ནུས་པ་མཐུ་ཅན་དུ་འགྱུར་བའི་ཕྱིར་། དེ་ཉིད་ལས། ཡི་གེ་འདུས་པས་གྲུབ་པ་བཞི། །མཐུ་ཅན་རེད་པ་གང་ཡིན་པ། །ཞེས་གསུངས་པའི་ཕྱིར་རོ། །ཕྱག་རྒྱའི་ནི། བསྐྱེེད་རིམ་གྱི་ཡན་ལག་རྫོགས་པ་སྟེ། དེ་ཉིད་ལས། བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་སོ། །ངེས་ཚིག་ནི། མནྟྲ་མུ་ཏྲའི་སྒྲས་སྔགས་དང་ཕྱག་རྒྱ་སྟེ། ཡེ་ཤེས་སྙིང་པོའི་ལེའུ་བདུན་པ་ལས། ཨ་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པ་ཉིད་དུ་བཤད། །ཅེས་པས། ཡིད་སྐྱོབ་ཅིང་བྱིན་རླབས་འབྱུང་བ་དང་། མི་འདའ་བའམ་འཆིང་ཞིང་སྡོམ་པའི་ཕྱིར། འདིའི་བརྒྱད་པ་ལས། སྙིང་པོ་ཕྱག་རྒྱ་འདའ་དཀའོ། །ཞེས་སོ། །རྣམ་གྲངས་ལ་དངོས་དང་། ཞོར་ལ་དུས་སོ། །དང་པོ་ལ་སྔགས་དང་། ཕྱག་རྒྱ་གཉིས་སོ། །དང་པོ་ལ་བཞི། རྒྱུ་མ་ནོར་བ་རྩ་བའི་སྔགས་དང་། བསྐྱེད་པ་རྐྱེན་གྱི་དང་། བཟླགས་པ་ལས་ཀྱི། ཞོར་ལ་བཟླས་ཐབས་ནི། ཐུགས་ཐིགས་ལས། སྐྱོན་བརྒྱད་སྤངས་པའི་བརྩོན་པས་སྦྱར། །ཞེས་པས། བརྒྱད་ནི་རྔམ་གློག་ལས། སྒྲ་ཆེར་མ་ཡིན་ཆུང་བར་མིན། །མགྱོགས་པར་མ་ཡིན་བུལ་བར་མིན། །དྲག་པར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པར་མིན། །ཡེངས་དང་ཕྱལ་སོགས་བར་ཆད་པ། །རྒྱུ་བའི་བསམ་པ་སྤངས་པ་དང་། །ཞེས་སོ། །བཞི་པ་བསྐུལ་བ་ཕྲིན་ལས་ཀྱི་སྔགས་སོ། །གཉིས་པ་ལ་ཡང་བཞི་སྟེ། སྐུ་ཕྱག་རྒྱ་ཆེན་པོ་མི་བསྐྱོད་པ་སྟེ། གཡས་པའི་གུང་མོ་ཐུགས་ཀར་བཀན་ཐབས་སུ་བཅའ་བ་བཅའ་བ་དམ་ཚིག་གི་ཕྱག་རྒྱའོ། །ཧཱུཾ་མཐིང་ནག་ཡོངས་སུ་གྱུར་པ་ལས་རྡོ་རྗེ་འོད་འབར་བ་བསམ་པ་ནི་བསམ་པ་དམ་རྒྱའོ། །རྡོ་རྗེའི་རྩེར་ཧཱུཾ་སྒྲ་དང་བཅས་པ་བསམ་པ་ནི་བསམ་པ་ཆོས་ཀྱིའོ། །གཡོན་པ་དྲིལ་བུ་གསིལ་ཞིང་གཡོན་དུ་ཡུམ་བསམ་པ་ནི་བསམ་པ་ལས་ཀྱིའོ། །ཞབས་གཡོན་པ་པདྨའི་རིགས་སུ་བརླབས་ཏེ། ཡུམ་དང་འཁྱིལ་ཐབས་སུ་བཅའ་བ་བཅའ་བ་ལས་ཀྱིའོ། །ངག་ཏུ་ཧཱུཾ་བཛྲ་དྷྲིཀ་བརྗོད་པ་བརྗོད་པ་ཆོས་ཀྱི་ཕྱག་རྒྱའོ། །ཞོར་ལ་དུས་ནི། དབང་། རབ་གནས། མཆོད་ཕྲིན་གཙོ་བོར་བསྒྲུབ་པའོ། །མེད་པའི་སྐྱོན་ནི། གསུང་གི་དམ་ཚིག་ཉམས་ཤིང་འབྲས་བུ་མེད་པར་འགྱུར་བ་སྟེ། དེ་ཉིད་ལས། རལ་གྲིའི་སོ་ལ་བཟུང་ཉེས་ལྟར། །ནན་ཏན་མེད་པའི་གསང་སྔགས་པ། །ཕུང་ཞིང་འབྲས་རྣམས་མེད་པར་འགྱུར། །ཞེས་སོ། །ཡོན་ཏན་ནི། དེ་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེར་འགྱུར་བས། །ཡིད་ལ་བསམ་པ་ཐམས་ཅད་འགྲུབ། །ཅེས་སོ། །དེ་ནི་བདུན་པ། བརྒྱད་པ། བཅུ་དྲུག་པ་རྣམས་ནས་སོ། །རྒྱུད་ཀྱི་དགོས་འབྲེལ་ལ་བཞི་ལས། དགོས་པ་ནི། ཕས་ཀྱི་རྒོལ་བ་ཚར་གཅད་པ་དང་དེས་རྟོགས་ལྡན་བསྟན་པ་ལ་འཇུག་པ་སྟེ། ཁོག་གཞུང་ལས། རྒྱུད་ལ་ལྡན་ཕྱིར་རྒོལ་བ་ཟློག །ཅེས་པ་དང་། རྒོལ་བ་པོ་དག་ཚར་གཅད་ཕྱིར། །ཞེས་པའོ། །ངོ་བོ་ནི། དེ་ཉིད་ལས། རྗོད་དང་འབྲེལ་པ་དགོས་ཡང་དགོས། །ཞེས་པས་ཡན་ལག་བཞི་པ་ཉིད་དོ། །ངེས་ཚིག་ནི། དེ་དག་རྒྱུད་ལ་ཚང་བའི་ཕྱིར་རོ། །རྣམ་གྲངས་ལ་གཉིས་ཏེ། གྲོལ་ལམ་གྱི་དང་། ཐབས་ལམ་གྱི་དགོས་འབྲེལ་ལོ། །དང་པོ་ལ་ཡན་ལག་བཞི་ལས། དང་པོ་བརྗོད་བྱ་ནི། དེ་ཉིད་ལས། བརྗོད་པ་བརྗོད་བྱ་རྗོད་བྱེད་དེ། །ཞེས་པས་གཉིས་ལས། བརྗོད་བྱ་ནི། བརྡ་བཏགས་པ་ལ་བརྟེན་ནས་དོན་གོ་བྱར་གནས་པ་སྟེ་རང་བཞིན་གྱི་རྒྱུད་དེ་ཡིན་ཏེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །ཅེས་སོ། །རྗོད་བྱེད་ནི། སྒྲ་དང་ཚིག་ལ་བརྟེན་ནས་དོན་གོ་བྱེད་དུ་གྱུར་པ་སྟེ་མཚོན་བྱེད་ཡི་གེའི་རྒྱུད་རྣམས་ཏེ། མཚོན་བྱེད་སྒྱུ་འཕྲུལ་དྲྭ་བ་སྟེ། །ཞེས་སོ། །གཉིས་པ་དགོས་པ་ནི། དོན་དུ་གཉེར་བར་བྱ་བ་སྟེ། །དེ་ཉིད་ལས། དོན་དུ་གཉེར་ཕྱིར་དགོས་པའོ། །ཞེས་སོ། །དེ་འདིར་གང་བརྗོད་བྱ་རྟོགས་པ་ཞིག་ཡིན་ཏེ། མཛུབ་མོས་རི་བོང་ཅན་བཞིན་ནོ། །ཞེས་སོ། །གསུམ་པ་ཡང་དགོས་ནི། དོན་དུ་གཉེར་བྱ་མཐར་ཐུག་པ་སྟེ། དེ་ཉིད་ལས། དགོས་པའི་དགོས་པ་འབྲས་བུ་ཉིད། །ཅེས་སོ། །དེ་འདིར་མཐར་ཐུག་གི་འབྲས་བུ་མཐར་ཕྱིན་པ་སྟེ། དེ་ཉིད་ལས། དགོས་པ་འགྲུབ་ཕྱིར་ཡང་དགོས་སོ། །ཞེས་སོ། །ཐ་མ་འབྲེལ་པ་ནི། སྤྲིན་མེད་ན་མི་འབྱུང་བ་སྟེ། གྲུབ་སྒྲོན་ལས། མེད་ན་མི་འབྱུང་ཞེས་སོ། །རག་ལས་འབྲེལ་ཞེས་པས། དེ་ལས་ཕྱེ་བས་བདག་གཅིག་པའི་དང་། དེ་ལས་འབྱུང་བའི་འབྲེལ་བ་གཉིས་སོ། །འདིར་བརྗོད་བྱའི་དོན་རྗོད་བྱེད་ཀྱིས་བརྗོད་པ་ནི་ཐབས་ཡིན་ལ། དོན་རྟོགས་པ་ནི་ཐབས་ལས་བྱུང་བའི་ཕྱིར་དེ་གཉིས་དེ་དང་འབྲེལ་ཞིང་། ཡང་དོན་རྟོགས་པ་ནི་རྒྱུ་ཡིན་ལ་སངས་རྒྱས་པ་ནི་འབྲས་བུ་ཡིན་པའི་ཕྱིར་དེ་གཉིས་རྒྱུ་འབྲས་སུ་འབྲེལ་དགོས་པ་སྟེ། ཁོག་གཞུང་ལས། མཚོན་བྱ་མཚོན་བྱེད་རྒྱུ་འབྲས་ཚུལ། །ཤེས་དང་ཡུལ་དུ་འབྲེལ་བའོ། །དོན་གཉིས་པ་ཡང་གོང་ལྟར་ཡན་ལག་བཞི་ལས། དང་པོ་ལ་གཉིས་ཀྱི་བརྗོད་བྱ་ནི། གསང་བའི་རྣམ་ཤེས་ནི། རང་བཞིན་གསང་བའི་སྙིང་པོ་ནི། །ཞེས་མཐུན་ཟེར་ཀྱང་དོན་ཐ་དད་དེ། འདིར་གསང་བའི་ཡུལ་དང་དབང་པོ་འཕྲད་པའོ། །རྗོད་བྱེད་ནི། ཐིག་ལེ་ཆེན་པོ་ཐབས་དང་བཅས་པའོ་ཞེས་པ་འཁོར་ལོ་སྒྱུར་བ་དྲུག་ལ་སོགས་བྱེད་པ་སྡོམ་པའོ། །དགོས་པ་ནི། དགའ་བ་བཅུ་དྲུག་གིས་ཐིག་ལེ་བཞི་བཅུ་རྩ་གཉིས་ཀྱི་བདེ་བ་ཉམས་སུ་མྱོང་བ་ནི་དགའ་བ་མཆོག་དགའ་དགའ་བྲལ་ལྷན་ཅིག་སྐྱེས་པའི་དགའ་བ་སྟེ་རྩ་བ་བཞི་ལས་བྱེ་བྲག་བཞི་བཞིར་ཕྱེ་བས་བཅུ་དྲུག་གོ། །ཡང་དགོས་ན། དེ་དག་རྒྱལ་བ་བཞི་བཅུ་རྩ་གཉིས་ཀྱི་ཡེ་ཤེས་སུ་མངོན་དུ་བྱས་པའོ། །འབྲེལ་པ་ནི། གོང་ལྟར་རམ་ཡང་ན་ཡང་དགོས་དགོས་པ་ལས་བྱུང་ཞིང་དེ་བརྗོད་བྱ་ལས་བྱུང་བའོ། །དེ་ནི་རྒྱུད་དབུ་ཞབས་ཐམས་ཅད་ནས་སྟོན་ནོ། །བསྟན་པ་གདམས་ཤིང་གཏད་པ་ལ་གསུམ་ལས་དགོས་པ་ནི། བསྟན་པ་ཡལ་བར་མི་འདོར་བས་གཅེས་སྤྲས་སུ་འཛིན་པའོ། །ངེས་ཚིག་ནི་བཀའ་སྩལ་བའི་རྒྱུད་དེ་ཟུངས་ཤིག་པར་གསུངས་པའི་ཕྱིར་རོ། །ངོ་བོ་དང་རྣམ་གྲངས་ཐུན་མོང་པ་ལ་གཉིས་ཏེ། སྤྱིར་རྒྱུད་དབུ་ཞབས་ཀྱི་བརྗོད་བྱ་སྣང་བ་བཞིར་འདུས་ལ། སྣང་བ་བཞི་ཡང་རང་བཞིན་གྱི་སྣང་བ་བཞིིའི་རྒྱུད་དུ་འདུས་ཏེ་ཡེ་ནས་སངས་རྒྱས་པ་ལས་མི་འགྱུར་བས་དེའི་དོན་ལ་རྟོགས་ཤིག་སྒྲུབས་ཤིག་འབོད་ཅིག་པར་གདམས་པ་ཡིན་ཏེ། ཀྱེ་ཀྱེ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །རྒྱུད་གཏད་པ་དངོས་ནི་ཐུགས་ཐིགས་ལས། སྟོན་པ་གང་གིས་གང་ཉིད་ལ། །གཏད་པ་གང་དེ་ཅི་ཡི་ཕྱིར། །ཞེས་པས་བཞི་སྟེ། གང་གིས་དང་། གང་ལ་དང་། གང་གི་ཕྱིར་དང་། ཚུལ་ཇི་ལྟར་གཏད་པའོ། །དང་པོ་ནི། སྟོན་པའི་བདག་ཉིད་དང་། །འཆད་པའི་སྐྱེས་བུས་གཏད་པ་སྟེ། ཐུགས་ཐིགས་ལས། སྟོན་པ་རང་བྱུང་རྡོ་རྗེ་འཛིན། །རྒྱལ་ཚབ་རྒྱུད་ནི་སྐྱེས་བུ་གཉིས། །ཞེས་སོ། །གཉིས་པ་ནི། གཏད་པའི་ཡུལ་གསུམ་སྟེ། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་ལ་སོགས་པའོ། །ཞེས་སོ། །གསུམ་པ་ནི། རྒྱལ་ཚབ་རྒྱུད་ཀྱི་སྟོན་པར་དབྱུང་བ་དང་། བརྟན་ཅིང་བྱིན་ཆེ་བ་དང་། དར་ཞིང་རྒྱས་པའི་ཕྱིར་ཏེ། དེ་ཉིད་ལས། རྟོགས་དང་བསྲུང་དང་གདམས་པ་ཡིས། །ཞེས་པ་དང་། མི་ནུབ་བསྟན་པ་ཡུན་རིང་ཕྱིར། །ཞེས་སོ། །ཐ་མ་ནི་གསུམ་སྟེ། ཐ་མ་ལས། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་པས་སྡུད་པ་པོ་ལ་དང་། གང་ཟག་ཆོས་མིན་ཅན་ལ་དང་། མ་མོ་དང་མཁའ་འགྲོ་ལ་གཏད་ཚུལ་ལོ། །དེ་དག་གི་ཕྱིར་ཐ་སྙད་ཙམ་དུ་གཏད་ཅེས་བྱའོ། །དེ་ནི་ལེའུ་ཐ་མས་སྟོན་ནོ། །དབང་པོ་ཐ་མ་ལ་འབྲུ་རེ་གཉེར་རེས་བཤད་པ་ནི། ཁོག་གཞུང་ལས། ཤེས་རབ་ཐ་མའི་དོན་བསྟན་པ། །བཤད་ཚུལ་སྣོད་དང་སྦྱར་བ་སྟེ། །ཞེས་པས་སྤྱིར་འདི་བློ་རབ་ཀྱི་སྤྱོད་ཡུལ་ཡིན་ལ། དེའི་ཐ་མའི་དོན་དུ་མཚོན་བྱེད་ཀྱི་རྒྱུད་འདི་དག་གི་བཤད་ཐབས་ཀྱི་ཡན་ལག་ནི་བཅུ་སྟེ། མདོ་ཆེན་པོ་ལས། ལྟ་ཉིད་དེ་བཞིན་སྒོ་འབྱེད་དང་། །སྤྱི་སྡུད་པ་དང་སྦྱོར་བར་འབྲེལ། །རང་རྐྱེན་ལྡེམ་དགོངས་གལ་པོའི་ཚིག །མ་བཅོས་དེ་བཞིན་མཚོན་པའི་དཔེ། །ཆོ་རོལ་སྣེལ་གཞི་རྣམ་པ་ཀུན། །མེ་ལོང་བཅུ་དང་མཐུན་པར་སྦྱར། །ཞེས་པས་རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ་ལྟར་བཤད་པ་ནི། ཐུགས་ཐིགས་ལས། ཀ་ལ་པངྐིའི་ཆོས་བཞི་པོས། །རྣལ་འབྱོར་ཅན་གྱིས་ལྟ་འཕང་གཅད། །ཅེས་པས་ཆོས་བཞི་སྟེ། མིག་གོང་དུ་མི་བལྟ་བ་དང་གཅིག །གཤོག་པ་གཡོབ་པའི་རྩོལ་བ་མེད་པ་དང་གཉིས། ངམ་གྲོག་དང་གཡང་ས་ལ་ཉམ་མི་ང་བ་དང་གསུམ། ཁ་འོག་ཏུ་ཆུད་པའི་ཆོས་གསལ་བ་བཞིའོ། །དང་པོ་ནི། འདིའི་གོང་ན་རྟོགས་བྱ་གཞན་མེད་པའོ། །གཉིས་པ་ནི་ལྟུང་གནས་ལ་ཉམ་མི་ང་བའོ། །གསུམ་པ་ནི་ལམ་བགྲོད་པའི་རྩོལ་བ་དང་བྲལ་བའོ། །བཞི་པ་ནི་འོག་མའི་ལྟ་བ་རྣམས་ཁ་འོག་ཏུ་ཆུད་པའི་ཆོས་གསལ་བའོ། །རྣམ་པར་འབྱེད་པའི་ཚིག་སྟག་གིས་མཆོངས་པ་ལྟར་ནི། དེ་ཉིད་ལས། བྱཱ་ཀྲི་མཆོངས་པ་དེ་བཞིན་པས། །རྒྱུད་ཀྱི་ཚིག་དོན་དུམ་བུར་གཅོད། །ཅེས་པས་གཉིས་ཏེ། བགྲོད་པར་བྱ་བའི་ས་ཚིགས་གཅིག་ཡིན་པ་དང་། ས་ཚོམས་སུ་བཅད་ནས་མཆོངས་པའོ། །དང་པོ་ནི་དཀྱུས་དབུ་ཞབས་ཀྱི་དོན་ནོ། །གཉིས་པ་ནི་གཞུང་རྣམས་ཚོམས་སུ་གཅོད་པའོ། །སྤྱི་དོན་སྡུད་པའི་ཚིག་སེང་གེའི་མཆོངས་པ་ལྟར་ནི། དེ་ཉིད་ལས། སེང་ཆེན་མཆོངས་པའི་ཆོས་གཅིག་ལྟར། །རྣམ་གྲངས་ཚིག་ལམ་དོན་གཅིག་སྡུད། །ཅེས་པས་གཉིས་ཏེ། བགྲོད་པར་བྱ་བའི་ས་ཚིགས་གཅིག་ཡིན་པ་དང་། ས་ཁམས་དུ་མ་ཁ་འོག་ཏུ་ཆུད་པའོ། །དང་པོ་ནི་ས་ཚིགས་དང་འདྲ་བར་དཀྱུས་དབུ་ཞབས་ཀྱི་དོན་ནོ། །གཉིས་པ་དབྱེ་བ་མང་པོ་རྣམས་གཅིག་ཏུ་སྡུད་པའོ། །འབྲེལ་པ་སྦྱོར་བའི་ཚིག་བྱ་ངང་མོའི་འགྲོས་ལྟར་ནི། དེ་ཉིད་ལས། ངང་མོའི་འགྲོས་ཆོས་རྣམ་གཉིས་ལྟར། །གཞན་དོན་དབུ་ཞབས་ལེའུ་མཚམས་སྦྱོར། །ཞེས་པས་གཉིས་ཏེ། སྔར་རྗེས་ཕྱི་རྗེས་ཀྱིས་ནོན་པར་འགྲོ་བ་དང་། ཕན་ཚུལ་འབྲེལ་མར་འགྲོ་བའོ། །དང་པོ་སྔར་བཤད་ཟིན་དང་ཕྱིས་འཆད་པ་རྣམས་རྗེས་ཀྱིས་ནོན་པའོ། །གཉིས་པ་ཚིག་དོན་མངོན་རྟོགས་ས་ལམ་ལ་སོགས་འབྲེལ་པའོ། །རང་རྐྱེན་གཉེར་གྱིས་རུས་སྦལ་གྱིས་ནུར་འགྲོས་ལྟར་ནི། དེ་ཉིད་ལས། རུས་སྦལ་འགྲོས་ཀྱི་ཆོས་གསུམ་པོ། །འབྲུ་སྟོང་མི་གཞག་གཟེར་གཉིས་གདབ། །ཅེས་པས་གསུམ་སྟེ། བགྲོད་པར་བྱ་བའི་ས་ཚིགས་དང་། འགྲོར་མི་མངོན་པར་རྗེས་ཀྱིས་འགེངས་པ་དང་། འགྲོར་མི་མངོན་ཡང་དུས་ལན་ཅིག་ཕྱིན་པའོ། །དང་པོ་ནི་དཀྱུས་དབུ་ཞབས་ཀྱི་དོན་ནོ། །གཉིས་པ་ཚིག་རེ་ནས་བཤད་པས་རྫོགས་པར་མི་མངོན། གསུམ་པ་མི་མངོན་ཡང་གཞུང་རྫོགས་པའོ། །ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེག་པ་ལྟར་ནི། དེ་ཉིད་ལས། རྣ་ཕུག་འཛེག་པའི་ཆོས་ཉིད་ལྟར། །ལྡེམ་དགོངས་གསང་བ་བརྒྱད་ཀྱིས་སྦྱར། །ཞེས་པས་གཉིས་ཏེ། རྣ་ཕྲུག་གིས་བྲག་ཉི་མ་འཆར་ཚད་ལ་ཐར་བ་དང་། དེ་རི་དྭགས་གཞན་ལ་མི་འཚམས་ཡང་དེ་ཉིད་ལ་འཚམས་པའོ། །དང་པོ་ནི་ཐབས་དང་ལྡན་པས་འཆིང་བ་གཅོད་པའོ། །གཉིས་པ་དེ་འོག་མའི་ཡུལ་མིན་ཡང་འདིའི་འོ། །གཏར་ཀ་གེགས་སེལ་གྱི་ཚིག་བྱ་གླག་གཟན་ལ་འཇུམས་པ་ལྟར་ནི། དེ་ཉིད་ལས། གླག་གི་གཟན་གྱི་ཆོས་གཉིས་ལྟར། །དོན་གྱི་དམིགས་གཟུང་གེགས་བསལ་ལོ། །ཞེས་པས་གཉིས། ཡིད་ལ་བཏགས་པའི་ཟས། ཁོང་ན་གནས་པའི་བཅུད་དེ་ཟོས་པས་གླག་གི་ཉམས་རྩལ་རྒྱས་པའོ། །དང་པོ་བུས་རྟོག་པའི་ཡུལ་ལོ། །གཉིས་པ་སློབ་དཔོན་གྱི་ཐུགས་ལ་གནས་པའོ། །གསུམ་པ་དྲིས་ཤིང་ལན་གྱིས་ཚིམ་པའོ། །མཚོན་པ་དཔེའི་ཚིག་མེ་ལོང་ལྟ་བུ་ནི། དེ་ཉིད་ལས། མེ་ལོང་ཆོས་ལྟར་མཚོན་པའི་དཔེ། །ཀུན་ལ་དེས་མཚོན་ཐོག་ཏུ་དབབ། །ཅེས་པས་གཉིས། བཞིན་ལྐོག་ཏུ་གྱུར་པ་དང་། མེ་ལོང་གིས་གསལ་བའོ། །དང་པོ་གཞུང་དོན་མི་གསལ་བ་རྣམས་སོ། །གཉིས་པ་དེ་དཔེས་རྣམ་པ་གསལ་བའོ། །ཚད་མ་བཀའ་གཞུང་གི་ཚིག་དུས་ཀྱི་འབྲུག་སྒྲ་ལྟར་ནི། དེ་ཉིད་ལས། དུས་ཀྱི་འབྲུག་ལྟར་ཆོས་གསུམ་པོ། །བཀའ་ཡི་ཚད་གཟུང་སྐབས་སྦྱར་ནས། །ཞེས་པས་གསུམ། འབྲུག་སྒྲ་དུས་མིན་པར་མི་འབྱུང་། དུས་སུ་འབྱུང་། དེས་སྐྱེ་འཁྲུངས་སུ་ཡིད་ཆེས་པའོ། །དང་པོ་དྲང་བའི་ཡུལ་མིན་པར་མི་དྲང་། གཉིས་པ་སྐབས་དང་མཐུན་པར་དྲང་། གསུམ་པ་དེས་རང་གཞུང་ཁེགས་པར་ཡིད་ཆེས་ཏེ། ཇི་སྐད་དུ། ལུང་ནི་ཡིད་ཆེས་གནས་ཡིན་ཏེ། ཉེས་པ་སྤངས་པ་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་སོ། །བསྣོལ་མཚམས་འཕེན་སྡུད་ཀྱི་ཚིག་སེང་ཕྲུག་རྩལ་སྦྱོང་བ་ལྟར་བཤད་པ་ནི། མི་འཇིགས་ཕྲུག་གུ་རྩལ་སྦྱོང་ལྟར། །འབྲུ་ཚིག་དོན་གྱི་གོ་རིམ་སྡེབ། །ཅེས་པས་གཉིས་ཏེ། ཕན་ཚུན་འབྲེལ་བར་འགྲོ་བ། མ་རྗེས་དྲང་པོར་སྲོང་བའོ། །དང་པོ་གོང་འོག་འཁྲུགས་ཀྱིས་བཤད་པའོ། །གཉིས་པ་དོན་གོ་རིམ་མ་ནོར་བའོ། །དེ་དག་ལ་ཡང་དཀྱུས་དབུ་ཞབས་ཐམས་ཅད་དུ་ཁྱབ་བྱེད་དུ་འཇུག་པ་གསུམ་ལ་རྣམ་པར་འབྱེད་པ། འབྲེལ་པར་སྦྱོར་བ། རང་རྐྱེན་གཉེར་གསུམ་མོ། །ཁྱད་པར་དུ་འཇུག་པ་གསུམ་སྟེ། རང་བཞིན། ལྡེམ་དགོངས། སྤྱི་དོན་ནོ། །འཇུག་ཏུ་ཡང་རུང་བ་བཞིན་ནོ། །མཚོན་པ་དཔེ། གཏར་ཀ །ཚད་མ་བཀའ་གཞུང་། བསྣོལ་མཚམས་འཕེན་སྡུད་དོ། །དེ་ཡང་། ཚིག་དོན་མོས་པར་བཤད་པའི་ཕྱིར། །རྣམ་པར་ཕྱེ་བས་མ་འདྲེས་གསལ། །ཞེས་པའོ། །དེ་བཞིན་གཤེགས་པའི་སྣང་བ་འབྲས་བུའི་རྒྱུད་ནི། ཆོས་ཀྱི་དབྱིངས་མངོན་དུ་གྱུར་པས་དག་པ་སྐུ་དང་ཡེ་ཤེས་སུ་སྣང་བ་ནི་བཤད་པའི་གཞི་ཡིན་ཏེ། སྐུ་མཆོག་རྡོ་རྗེ་འོད་སྣང་བ། །མཐུན་པའི་ཡེ་ཤེས་རང་སྣང་བའོ། །ཞེས་སོ། །དེ་ལ་བཤད་ན་ལྔ་ལས། དགོས་པ་ནི། སྐྱོན་ཐམས་ཅད་ལས་གྲོལ་ཞིང་ཡོན་ཏན་མ་ལུས་པ་ལྷུན་གྱིས་རྫོགས་པ་སྟེ། འབྲས་བུ་ཡོན་ཏན་ལྷུན་གྲུབ་པས། །ཡིད་བཞིན་ནོར་ལྟར་སྣང་བའོ། །ཞེས་སོ། །ངོ་བོ་ནི། རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་རྣམས་སོ། །འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་ལ་སོགས་པ། །ཞེས་པས། དེ་ལ་གཉིས་ཏེ། དེ་དག་བདག་དོན་དུ་གྲུབ་པ་དབྱེར་མེད་རྡོ་རྗེ་དང་། དེས་གཞན་དོན་མཛད་པའི་ཚུལ་ལོ། །དང་པོ་ལ་གསུམ་སྟེ། མ་འདྲེས་རྣམ་གྲངས་སུ་སྣང་བ་དང་། དབྱེར་མེད་ལྷུན་གྲུབ་ཀྱི་ངོ་བོ་དང་། མཚན་ཉིད་མཐའ་བྲལ་དུ་བསྟན་པའོ། །དང་པོ་ལ་གསུམ་སྟེ། རྣམ་གྲངས་བསྡུས་པ་དང་། འབྲིང་པོ་དང་། རྒྱས་པའོ། །དང་པོ་ནི། སྐུ་ཡི་ཕྱག་རྒྱ་ཆེ་མཆོག་ནི། །ཞེས་པ་ཆེ་བའི་ཡོན་ཏན་མ་ལུས་པའི་རྟེན་བྱེད་པས་སྐུ་དང་། རྫོགས་པའི་སངས་རྒྱས་ཀུན་གྱི་གསང་། །ཞེས་པས་གདུལ་བྱ་ལ་བརྡ་སྤྲོད་པ་སྟེ་གསུང་དང་། ཐམས་ཅད་མཁྱེན་པའི་ཐུགས་ཡིན་ཏེ། །དེ་ཡིས་མི་མཁྱེན་གང་ཡང་མེད། །ཅེས་སོ། །ཡོན་ཏན་ནི་མངའ་ཐང་རྫོགས་པ་སྟེ། ཡོན་ཏན་དཔག་ཏུ་མེད་པ་རྒྱས་པའི་ཕྱིར། །ཞེས་སོ། །ཕྲིན་ལས་ནི་གདུལ་བྱའི་བྱ་བ་བྱེད་པ་སྟེ། གདུལ་བྱ་ཐམས་ཅད་ཆུད་མ་ཟོས། །ཞེས་སོ། །བར་པ་ནི། ཁོག་གཞུང་ལས། དེ་ཡང་སྐབས་ཀྱི་ལྔ་ལྔ་སྟེ། །ཞེས་པས་རེ་རེར་ཡང་ལྔ་ལྔའོ། །དེ་ལས་སྐུ་ལྔ་ནི། རིག་པ་སྤྲོས་བྲལ་གྱི་དབྱིངས་མངོན་དུ་གྱུར་པ་ཆོས་ཀྱི་སྐུ་སྟེ། འདིའི་དྲུག་པ་ལས། དེ་བཞིན་དབྱིངས་ལས་མ་གཡོས་ཀྱང་། །ཞེས་པ་དང་། སྐྱེ་ཤི་མེད་པའི་གཡུང་དྲུང་སྐུ། །ཞེས་སོ། །སྣ་ཚོགས་ཟག་མེད་ཀྱི་བདེ་བར་ལོངས་སྤྱོད་པ་ལོངས་སྤྱོད་རྫོགས་པའི་སྐུ་སྟེ། ཡང་དག་ཐར་པའི་གཟུགས་སྐུ་དང་། །ཞེས་པ་དང་། དེ་མི་ཤེས་ཀྱི་གཏེར་དུ་འགྱུར། །ཞེས་པའོ། །དེ་ཉིད་འགྲོ་བ་ཇི་ལྟར་མོས་པ་ལྟར་སྐུ་སྣ་ཚོགས་སུ་སྣང་བ་སྤྲུལ་པའི་སྐུ་སྟེ། དེ་ཉིད་ལས། འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཞེས་སོ། །དབྱེར་མེད་ཀྱི་དོན་རིག་པའི་མཚན་ཉིད་འཛིན་པ་རྡོ་རྗེའི་སྐུ་སྟེ། དེ་ཉིད་ལས། སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཅེས་སོ། །དེ་དག་རིག་པའི་ཡེ་ཤེས་ལ་ལྷུན་གྱིས་རྫོགས་པ་མངོན་པར་བྱང་ཆུབ་པའི་སྐུ་སྟེ། དེ་ཉིད་ལས། མ་གཡོས་བཞིན་དུ་སྣ་ཚོགས་པའི། །དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ཡིན། །ཞེས་སོ། །གསུང་ལྔ་ནི། བརྗོད་མེད་དོན་གྱི་གསུང་ནི། བདུན་པ་ལས། སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འགྱུར། །ཞེས་སོ། །དགོངས་པ་བརྡའི་གསུང་ནི། དྲུག་པ་ལས། དེ་བཞིན་གསུང་མཆོག་མི་སྨྲ་ཞིང་། །སྐུ་ཡིས་ཆོས་རྣམས་འཇལ་བར་སྟོན། །ཞེས་སོ། །བརྗོོད་པ་ཚིག་གི་གསུང་ནི། བདུན་པ་ལས། བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་འཇལ། །ཅེས་སོ། །དབྱེར་མེད་རྡོ་རྗེའི་ནི། དེ་ཉིད་ལས། སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །ཅེས་སོ། །རིག་པ་བྱིན་རླབས་ཀྱི་གསུང་ནི། །དེ་ཉིད་ལས། གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཞེས་སོ། །ཐུགས་ལྔ་ནི། སྐྱེ་མེད་ཀྱི་དབྱིངས་མངོན་དུ་གྱུར་པ་རྣམ་པ་ཅིར་ཡང་མི་རྟོག་པ་སྟེ། རྣམ་བཀོད་ལས། སྟོང་ཉིད་ཡེ་ཤེས་དངོས་པོ་མེད། །ཅེས་སོ། །ཐ་དད་དུ་འཛིན་པ་དག་པ་མཉམ་པ་ཆེན་པོ་སྟེ། དེ་ཉིད་ལས། མཉམ་ཉིད་ཡེ་ཤེས་བཟང་ངན་མེད། །ཅེས་སོ། །ཐུགས་རྗེས་འགྲོ་བ་རྣམས་ཡང་དག་པའི་ས་ལ་སྒྲོལ་བ་སྟེ། དེ་ཉིད་ལས། བྱ་བའི་ཡེ་ཤེས་མཐར་ཕྱིན་པ། །ཞེས་སོ། །ཆོས་སྤྱི་དང་རང་མཚན་ཅིར་ཡང་ས་ལེ་མཁྱེན་པའི་ཐུགས་ནི། དེ་ཉིད་ལས། ཀུན་རྟོག་ཡེ་ཤེས་མ་འདྲེས་གསལ། །ཞེས་སོ། །རྒྱས་པའི་དོན་གཉིས་པ་ལས། གཟུང་འཛིན་བྲལ་བའི་ཡེ་ཤེས་ནི། །རྩ་བ་ལྔ་ཞེས་བརྗོད་མེད་ཀྱང་། །བརྗོད་པའི་མཚན་ཉིད་ཡོངས་མེད་དེ། །མཚན་ཉིད་མེད་པར་སྣ་ཚོགས་སྣང་། །དེ་ཉིད་ཐམས་ཅད་མཁྱེན་པ་ཉིད། །ཅེས་སོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས་ནི། །ཞིང་ཁམས་རྣམ་དག་བསམ་ཡས་དང་། །ཞེས་སོ། །རྒྱ་དང་ཡ་བའི་གཞལ་བྱས་ནི། །ཞེས་སོ། །གསལ་ཞིང་དག་པའི་འོད་ཟེར་ནི། །མཐིང་ཁ་དཀར་པོ་སེར་ལེ་བརྒན། །ཞེས་པ་དང་། འོར་ཟེར་འཕྲོ་བའི་ཚོགས་ཆེན་པོ། །ཞེས་སོ། །ཁྱད་པར་འཕགས་པའི་གདན་ཁྲི་ནི། མི་འཇིགས་པ་སེང་གེའི་ཁྲི་དང་ཞེས་པ་ལ་སོགས་དང་། རང་བཞིན་གྱིས་འོད་གསལ་བ་ཉི་ཟླའི་ཞེས་སོ། །དགྱེས་རྒུར་རོལ་པའི་ལོངས་སྤྱོད་ནི། གཟུགས་སྣ་ཚོགས་དང་ལ་སོགས་སོ། །ཕྲིན་ལས་ལྔ་ནི། རྟོག་པ་དང་ཟུག་རྔུ་ཞི་བས་དང་། ཡེ་ཤེས་དང་ཚེ་བསོད་རྒྱས་པས་དང་། རྣམ་རྟོག་གདུལ་བྱ་དབང་གིས་དང་། །མ་རིག་པ་དང་གནོད་སྟུག་དྲག་པོས་དང་། །ལྷུན་གྱིས་གྲུབ་པས་དོན་མཛད་པའོ། །དེ་དག་ཐམས་ཅད་དོན་གཉིས་པ་ལས། ཐུགས་རྗེ་ཆེན་པོའི་བྱིན་རླབས་ཀྱི། །བྱ་བྱེད་མེད་ལས་རྣམ་བཞིར་མཛད། །མཛད་དང་མཛད་པར་བྱ་བ་མེད། །ཅེས་སོ། །ཐ་མ་ནི། དེ་ལྟར་སྐུ་ནི་རེ་བདུན་པ་ལས། བདེ་གཤེགས་སྐུ་ལྔ་མདོ་རུ་བསྡུས། །བཅོམ་ལྡན་འདས་དང་བྱང་ཆུབ་སྐུ། །བླ་མེད་གཟུགས་དང་རྡོ་རྗེའི་སྐུ། །དེ་ལ་སོགས་པ་སྐུ་བསམ་ཡས། །ཞེས་སོ། །གསུང་ནི། གསུང་བརྗོད་བསམ་གྱིས་མི་ཁྱབ་པ། །ཞེས་པ་དང་། ལྷུན་གྱིས་གྲུབ་པའི་ཡེ་ཤེས་ཀྱིས། །ཞེས་སོ། །ཐུགས་ནི། ཐེག་པ་བསམ་ཡས་སྟོན་པ་ཡང་། །དེ་བཞིན་ཉིད་ཀྱི་མ་བརྗོད་ཀྱང་། །སེམས་ཅན་བློ་ཡི་རིམ་པ་བཞིན། །སོ་སོར་འཚམས་པར་ཀུན་ལ་གསལ། །ཞེས་སོ། །ཡོན་ཏན་ནི། རྒྱས་པ་ལས། ཡེ་ཤེས་སྤྱན་གྱིས་སྤྲས་པའི་ཕྱིར། །ཞིང་དང་ཡོན་ཏན་བསམ་མི་ཁྱབ། །ཅེས་སོ། །ཕྲིན་ལས་བསམ་གྱིས་མི་ཁྱབ་པ་ནི། དེ་ཉིད་ལས། འགྲོ་བའི་ཕྲིན་ལས་བསམ་མི་ཁྱབ། །ཅེས་སོ། །གཉིས་པ་ནི། ལྷུན་གྲུབ་ཡོན་ཏན་རང་སྣང་བ། །ཅེས་པས། དེ་དག་ཀྱང་ཆོས་ཉིད་མངོན་བྱས་ཀྱི་ལྡོག་པ་ཐ་དད་པ་ཙམ་ཡིན་གྱི། ཡེ་ཤེས་ཆོས་ཀྱི་དབྱིངས་ལས་མི་གཞན་པའི་ཕྱིར། དཔེར་ན་བུམ་པ་གཅིག་གི་རྫས་དང་ལྡོག་པ་ལྟ་བུ་སྟེ། གཉིས་མེད་སེམས་སུ་མངོན་བྱས་པས། །བདེན་གཉིས་དབྱེར་མེད་རྡོ་རྗེའི་སྐུ། །ཆུ་ཡི་ཟླ་བ་ལྟ་བུ་བ། །རང་བཞིན་དང་བ་ཐ་མི་དད། །ཅེས་སོ། །ཐ་མ་ནི། ཁོག་གཞུང་ལས། མཚན་ཉིད་གཅིག་དང་དུ་མ་མེད། །ཅེས་པས། དེའང་མཐའ་གང་དུའང་མ་གྲུབ་པའི་ཕྱིར་བཞི་ཆར་ཡིན་པའི་ཐམས་ཅད་དུ་ལྷུན་གྱིས་གྲུབ་པ་སྟེ། རིམ་གསུམ་ལས། མཚན་ཉིད་བཞི་དང་ལྡན་པའི་ཕྱིར། །མ་ལུས་གཅིག་མིན་ཐ་དད་མིན། །ཞེས་པ་དང་། མཚན་ཉིད་གཅིག་དང་དུ་མ་མེད། །ཅེས་པ་དང་། འདིའི་དགུ་པ་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་པ་དང་། དུས་གསུམ་རིམ་པར་རྫོགས་སངས་པའི། །ལོག་རྟོག་ཐ་དད་སྣང་བ་ཡང་། །ཡེ་ནས་མཐའ་ལས་གྲོལ་བའི་ཕྱིར། །གཅིག་དང་མི་གཅིག་བརྗོད་བསམ་འདས། །ཞེས་སོ། །ཆོས་གཉིས་པ་ལ་ཡང་དོན་གསུམ་ལས། གདུལ་བྱ་གཟིགས་པར་མཛད་པ་ལ། གཟིགས་པར་འཐད་པ་དང་། གཟིགས་ལུགས་རྒྱས་པར་བསྟན་པ་སྟེ། དེ་ཉིད་ལས། ཉིད་ལས་མི་གཞན་དོན་ཉིད་ཀྱིས། །མེ་ལོང་ལྟ་བུར་གཟིགས་པར་འགྱུར། །ཞེས་སོ། །ཐུགས་རྗེ་ཤར་བར་མཛད་པ་ལ། ཐུགས་རྗེའི་རྒྱུ་རྐྱེན་བསྟན་པ་དང་། སྐྱེ་ཚུལ་རྒྱས་པར་བཤད་པ་སྟེ། དེ་ཉིད་ལས། ཐུགས་རྗེ་ཆེན་པོས་གདུལ་བྱ་ལ། །རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་འབྱུང་བར་སྣང་། །ཞེས་སོ། །ཤར་ནས་འགྲོ་དོན་མཛད་པ་ལ་དོན་མཛད་པའི་བཞེད་གཞུང་ཐ་དད་བསྟན་པ་དང་། མཛད་ཚུལ་རྒྱས་པར་བཤད་པ་སྟེ། དེ་ཉིད་ལས། ཕྲིན་ལས་རྣམ་བཞིའི་མཛད་སྤྱོད་ཀྱིས། །བྱ་བ་མེད་བཞིན་དོན་རྣམས་རྫོགས། །ཞེས་པ་ཉིད་དོ། །སྒྲ་བཤད་པའམ་ཏ་ཐཱ་ག་ཏའི་སྒྲས་དེ་བཞིན་གཤེགས་པ་སྟེ། དེ་ཞེས་པ་ཆོས་ཉིད་དོ། །བཞིན་ཞེས་པ་མ་བསླད་པ་སྟེ། རྒྱས་པ་ལས། དེ་བཞིན་ཉིད་དུ་གཤེགས་པ་ཡང་། །ཞེས་པ་དང་། གཤེགས་པ་ནི་དེ་མངོན་དུ་བྱས་པས་འབྲས་བུ་མཐར་ཕྱིན་པ་སྟེ། སྣ་ཚོགས་ཞེན་ལས་གྲོལ་བར་བཤད། །ཅེས་སོ། །སྣང་བ་ནི་དག་པ་ཡེ་ཤེས་སུ་སྣང་བ་སྟེ། སྐུ་མཆོག་རྡོ་རྗེ་འོད་སྣང་བ། །ཅེས་སོ། །འབྲས་བུ་ནི་ལམ་བགྲོད་པ་དོན་ཡོད་པ་སྟེ། ཁོག་གཞུང་ལས། གྲུབ་པའི་མཐར་ཕྱིན་འབྲས་བུར་བརྗོད། །ཅེས་སོ། །རྒྱུད་ཅེས་པ་འབྲས་བུའི་དགོས་པ་ཚང་ཞིང་འབྲེལ་བ་དང་ལྡན་པའི་ཕྱིར་རོ། །དབྱེ་བ་ནི། ཐེག་པ་ཐུན་མོང་གི་འབྲས་བུ་སྨིན་འབྲས་དང་། འདི་ཉིད་ཀྱི་འབྲས་བུ་བྲལ་འབྲས་སོ། །དང་པོ་ནི་རྟེན་སྐུ་གསུམ་སྟེ། དྲུག་པ་ལས། ཆོས་སྐུ་དཔག་མེད་བརྗོད་དུ་མེད། །ལོངས་སྤྱོད་ཟད་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །ཅེས་སོ། །བརྟེན་པ་ཡེ་ཤེས་བཞི་ནི། མདོ་སྡེ་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །ཞེས་སོ། །མཛད་པ་ཕྲིན་ལས་ནི། གསང་བ་བསམ་གྱིས་མི་ཁྱབ་པའི་མདོ་ལས། ནམ་མཁས་ཇི་ལྟར་ཁྱབ་གྱུར་པ། །མཛད་པས་ཀྱང་ནི་དེ་སྙེད་ཁྱབ། །ཅེས་པས། སྣ་ཚོགས། རྒྱུན་འབྱུང་། ལྷུན་གྲུབ་དང་བཅས་པས་སོ། །གཉིས་པ་ནི། ཁོག་གཞུང་ལས། ལམ་དུ་གྱུར་འབྲས་མཐར་ཐུག་འབྲས། །ཞེས་པས་གཉིས་ལས། ལམ་དུ་གྱུར་པའི་འབྲས་བུ་ནི་གོང་དུ་བསྟན་ཏེ། ཚེ་ལ་དབང་དང་ཕྱག་རྒྱ་ཆེ། །ལྷུན་གྲུབ་ཏིང་འཛིན་ལ་སོགས་པ། །ལམ་དང་འབྲས་བུ་ཐུན་མོང་བརྗོད། །ཅེས་སོ། །མཐར་ཐུག་གི་འབྲས་བུ་ཡང་དེའི་ངོ་བོའི་སྐབས་སུ་ཟབ་ཅིང་རྒྱ་ཆེ་བར་བཤད་ཟིན་ཏོ། །ཞོར་ལ་དེ་དག་གི་དོན་ཉེ་བར་སྦྱར་བའི་བཤད་པ་ནི་འབྲས་བུ་དེ་དག་གི་ཐོབ་ཚུལ་ཏེ། དེ་ལ་གཉིས་ལས། ལམ་ཐུན་མོང་གི་ཐེག་པ་པའི་ལུགས་ཀྱི་སངས་རྒྱས་ནི་སྤངས་རྟོགས་མཐར་ཐུག་པ་ཞེས་བྱ་བར་འདོད་དེ། འཕགས་པའི་ལམ་དུ་ས་བཅུས་སྤང་བྱ་སྒྲིབ་པ་རྣམས་སྤངས་ནས་གོང་གི་ཐོབ་བྱ་རང་གི་འབྲས་བུ་ཐོབ་པར་འདོད་པ་སྟེ། དེ་ནས་ས་བཅུ་རིམ་གྱི་འབྱང་། །བླ་མེད་བྱང་ཆུབ་ཡང་དག་འཐོབ། །ཅེས་སོ། །འདིར་ནི་སྤངས་ཐོབ་དང་བྲལ་ཏེ། འདིའི་གཉིས་པ་ལས། ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་ཞེས་པ་དང་། དགུ་པ་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་པ་དང་། དོན་གཉིས་པ་ལས། སྐུ་གསུང་ཐུགས་དང་ཡོན་ཏན་དང་། །ཕྲིན་ལས་རྨད་བྱུང་ཀུན་གྲགས་པ། །གཞན་ནས་ཡོད་འོང་མ་ཡིན་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་པས ། ཡེ་ནས་ཡིན་པའི་དོན་ཉིད་མངོན་དུ་བྱས་པས་འབྲས་བུ་མཐར་ཕྱིན་པ་སྟེ། མཐར་ཐུག་བསྐྱེད་དུ་བྱ་བ་མེད། །ཅེས་པ་དང་། ལམ་དང་འབྲས་བུར་བཅས་པ་ཡང་། །འཕྲལ་དུ་བྱ་བ་འབྱུང་མེད་དེ། །སེམས་ཅན་དུས་ནས་ལྷུན་རྫོགས་པས། །ཞེས་གསུངས་པའི་ཕྱིར་རོ། །དེ་ནི་དང་པོ་དང་། གཉིས་པ་དང་། གསུམ་པའི་སྟོད། བཞི་པ། ལྔ་པ། དྲུག་པའི་སྨད། བདུན་པའི་སྨད། དགུ་པ། བཅུ་གཉིས་པ། བཅུ་གསུམ་པ། བཅུ་བཞི་པ། བཅོ་ལྔ་པ། ཉེར་གཅིག་པ། ཐ་མ་རྣམས་ནས་སྟོན་ནོ། །རྒྱུད་ཀྱི་དོན་སྤྱིའི་རྣམ་པར་བཞག་པ་རྡོ་རྗེ་དྲྭ་བའི་འོད་ཅེས་བྱ་བ་རྫོགས་སོ། །མངྒ་ལཾ།། །།