སྔ་འགྱུར་བཀའ་མའི་ཆོས་སྡེའི་གླེགས་བམ་དོན་གཉིས་པ།

གླེགས་བམ། ནུ༽

ཨོ་རྒྱན་ཆོས་གྲགས། ཟོམ་ཆོས་བཟང་། རྒྱལ་བའི་སྲས་པོ་གཞན་ཕན་མཐའ་ཡས། རྟོགས་ལྡན་ཤཱཀྱ་བཛྲ། ཆོས་ཀྱི་རྒྱ་མཚོ།

སི་ཁྲོན་མི་རིགས་དཔེ་བསྐྲུན་ཁང་།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

མགོ་བརྗོད།

རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི།  ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།

ཐུགས་རྗེ་ཆེ་ཞུ།

ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།

རྩ་རྒྱུད་གསང་བ་སྙིང་པོའི་དཀའ་གནད་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད་། ཨོ་རྒྱན་ཆོས་གྲགས།

རྩ་རྒྱུད་གསང་བ་སྙིང་པོའི་དཀའ་གནད་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད་ཅེས་བྱ་བ་བཞུགས་སོ། །ༀ་སྭ་སྟི། རྩ་རྒྱུད་གསང་བ་སྙིང་པོའི་དཀའ་གནད་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད་ཅེས་བྱ་བ། བླ་མ་དང་དཔལ་ཀུན་ཏུ་བཟང་པོ་གཉིས་སུ་མེད་པ་ལ་ཕྱག་འཚལ་ལོ། །རྣམ་མང་ཐེག་པའི་འཇུག་སྒོ་ཇི་སྙེད་ཀྱང་། །རྣམ་གྲོལ་ལམ་གྱི་ཡང་གསང་སྙིང་པོའི་རྒྱུད། །ཚིག་ལས་འདས་ཀྱང་ཐ་སྙད་ཚིག་གི་དོན། །ལུང་རིགས་རྡོ་རྗེའི་རོལ་རྩེད་འདི་སྤྲོའོ། །དེ་ལ་འདིར་རང་གི་ཉེ་བར་གནས་པ་གནས་ལྔ་སྨྲ་བའི་དྭགས་པོ་འགྱུར་མེད་བློ་གསལ་གྱི་གསང་བ་སྙིང་པོ་ལ་དོགས་སློང་གི་ལན་ལུང་རིགས་རྡོ་རྗེའི་རོལ་རྩེད་འདི་འཆད་པ་ལ། སློབ་དཔོན་དབྱིག་གཉེན་གྱི་རྣམ་བཤད་རིག་པར། ཚིག་དོན་བཅས་ཤིང་མཚམས་སྦྱར་དང་། བརྒལ་ལན་བཅས་ཏེ་བསྙད་པར་བྱ། །ཞེས་གསུངས་པ་ལྟར་བརྒལ་ལན་གྱི་སྒོ་ནས་སྨྲ་བར་བྱ་སྟེ་དེ་ལ་དྲི་བ་དང་པོ་ནི། ལེའུ་དང་པོ་ནས་བཤད་པའི་ལོངས་སྐུའི་གླེང་གཞི་འདི་རང་སྣང་སངས་རྒྱས་ཀྱི་སྤྱོད་ཡུལ་དང་གཞན་སྣང་གདུལ་བྱའི་མཐོང་སྣང་གང་ཡིན། ཡང་གཉིས་ཀའི་མཐོང་ཡུལ་ཡིན་ནམ། །ཞེས་པ་ལ་དང་པོ་ལྟར་ན་ལེའུ་དང་པོ་ནས་བཤད་པའི་སྟོན་པ་ལོངས་སྤྱོད་རྫོགས་སྐུ་དེ་ཆོས་ཅན། ཁྱོད་ཞལ་ཕྱག་མཚན་མར་སྣང་བའི་གཟུགས་སྐུ་ཡིན་པར་ཐལ། ཁྱོད་རྣམ་ཐར་གསུམ་ཚང་བའི་དབུ་དཀར་དམར་མཐིང་གསུམ་ཡེ་ཤེས་དྲུག་མཚོན་པའི་ཕྱག་དྲུག །ཐབས་ཤེས་གཉིས་མཚོན་པའི་ཞབས་གཉིས་དང་ལྡན་པའི་གཟུགས་སྐུ་ཡིན་པའི་ཕྱིར། འདོད་ན། དེ་ཆོས་ཅན། ཁྱེད་སངས་རྒྱས་རང་སྣང་གི་སྐུ་ཡིན་པ་ཐལ། ཁྱོད་མཚན་མའི་ཕྱག་རྒྱར་བཞུགས་པའི་གཟུགས་སྐུ་ཡིན་པའི་ཕྱིར། འཁོར་གསུམ། མ་ཁྱབ་ན། སངས་རྒྱས་རང་སྣང་ན་མཚན་མ་ཅན་གྱི་སྐུ་ཡོད་པར་ཐལ། སངས་རྒྱས་རང་སྣང་ན་མཚན་མའི་ཕྱག་རྒྱར་བཞུགས་པའི་གཟུགས་སྐུ་ཡོད་པའི་ཕྱིར། འདོད་ན་རང་སྣང་སངས་རྒྱས་ཞིང་ཁམས་ཆོས་ཅན། ཁྱོད་མཚན་མ་ལས་འདས་པའི་ཆོས་མ་ཡིན་པར་ཐལ། ཁྱོད་མཚན་མ་དང་བཅས་པ་ཡིན་པའི་ཕྱིར། འདོད་མི་ནུས་ཏེ། ལྟ་བ་ཡང་དག་སྒྲོན་མར། མཚན་མ་མེད་ཅིང་སྤྲོས་དང་བྲལ་བ་དེ། །ངོ་བོ་ཉིད་ཀྱི་སེམས་ཀྱི་ཡུལ་ལས་འདས། །ཞེས་དང་། རྒྱས་པ་ལས། ཡང་དག་ཤེས་རབ་ཆེན་པོ་ནི། མཚན་མ་འཇོམས་ཕྱིར་ཁྲོ་བོའོ། །ཞེས་སོགས་བཤད་པ་དང་འགལ་བའི་ཕྱིར་ཡང་མཚན་མ་དང་བཅས་པ་ཡིན་གཟུགས་སྐུ་མ་ཡིན་ཞེས་ཚིག་ཟུར་ལ་བསྙད་ན། ལེའུ་དང་པོ་ནས་བཤད་པའི་སྟོན་པ་ལོངས་སྤྱོད་རྫོགས་སྐུ་ཆེན་པོ། ཁྱོད་ཕྱག་ཞབས་འཁོར་ལོ་མཚན་དང་རུས་སྦལ་ཞབས། །ཞེས་སོགས་བཤད་པ་ལྟར་གྱི་མཚན་དཔེ་འབར་བའི་སྐུ་མ་ཡིན་པར་ཐལ། ཁྱོད་གཟུགས་སྐུ་མ་ཡིན་པའི་ཕྱིར། འདོད་ན། ཧ་ཅང་ཐལ་ཏེ། མདོ་སྡེ་རྒྱན་ལས། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་དག་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་བཤད་པ་དང་འགལ་བའི་ཕྱིར་རོ། །གཞན་ཡང་སངས་རྒྱས་རང་སྣང་གི་སྐུ་དེ་གདུལ་བྱའི་མཐོང་ཡུལ་དུ་ཡོད་པར་ཐལ། ལེའུ་དང་པོ་ལོངས་སྐུའི་གླིང་བཞིའི་སྟོན་འཁོར་འདི་རྣམས་ས་མཐའི་སེམས་དཔའ་ལ་སྣང་བའི་ཕྱིར་ཏེ། འདི་ཉིད་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའ་འཁོར་རྣམས་ལ། །དེ་བཞིན་གསུངས་མཆོག་མི་སྨྲ་སྟེ། །སྐུ་ཡི་ཆོས་རྣམས་མཇལ་བར་སྟོན། །ཞེས་གསུངས་སོ། །འདོད་ན་རང་སྣང་སངས་རྒྱས་ཀྱི་སྐུ་དེ་ཆོས་ཅན། གདུལ་བྱའི་མཐོང་ཡུལ་དུ་མེད་པར་ཐལ། སངས་རྒྱས་ཁོ་ནའི་སྤྱོད་ཡུལ་ཡིན་པའི་ཕྱིར་ཏེ། སྡོང་པོ་བཀོད་པ་ལས། ཇི་ལྟར་མཚན་ཉིད་སྣ་ཚོགས་པ། །དེ་དག་བྱིས་པའི་སྤྱོད་ཚུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་གསུངས་པའི་ཕྱིར་རོ། །འོ་ན་རང་སྣང་སངས་རྒྱས་མཚན་ཉིད་པ་དེ་སེམས་ཅན་གྱིས་མི་མཐོང་ན། སངས་རྒྱས་ཀྱིས་སེམས་ཅན་ལ་གཟིགས་པ་མི་འཇུག་པའི་སྐྱོན་དང་། སེམས་ཅན་གྱིས་སངས་རྒྱས་མི་མཐོང་བའི་སྐྱོན་གཉིས་གནས་སོ་ཞེ་ན། སྐྱོན་དང་པོ་མེད་དེ་རྒྱལ་བ་རྣམས་ཀྱིས་ནི་སེམས་ཅན་ལ་འབྲེལ་བ་གསུམ་གྱི་ཡུལ་དུ་བྱས་པས་གཟིགས་ཏེ། ཆོས་དང་ཆོས་ཅན་རང་བཞིན་གྱིས་འབྲེལ། ཡུལ་དང་ཡུལ་ཅན་ཐ་མི་དད་པར་འབྲེལ། ལས་དང་ཐུགས་རྗེས་ཡོངས་སུ་བཟུང་བར་འབྲེལ་བས་ཐུགས་རྗེའི་འབྲེལ་པས་ཡོངས་སུ་བཟུང་བའི་ཕྱིར་ཏེ། འདི་ཉིད་ལས། ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་བཤད་པའི་ཕྱིར། སྐྱོན་གཉིས་པ་མེད་དེ། སེམས་ཅན་རྣམས་ཀྱིས་སངས་རྒྱས་དངོས་གནས་མི་མཐོང་བ་ནི། སེམས་ཅན་རྣམས་ཀྱི་སྒོ་ནས་འབྲེལ་པའི་ཡུལ་དུ་མ་བྱས་པས་དངོས་གནས་ཇི་ལྟ་བ་བཞིན་མི་མཐོང་ཡང་། རང་རང་གི་ལས་ཉོན་དག་ཚབ་ཆེ་ཆུང་ལ་ལྟོས་ནས་རང་རང་གི་ལས་འཕྲོའི་མོས་པ་དང་མཚམས་པ་སོ་སོར་སྣང་སྟེ། འདི་ཉིད་ལས། དེ་བཞིན་ཉིད་ཀྱི་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་དང་། མཐུན་པའི་ཡེ་ཤེས་རང་སྣང་ངོ་། །ཞེས་བཤད་པའི་ཕྱིར་རོ། །འོ་ན་དུད་འགྲོ་དང་ཡི་དྭགས་ཕལ་པ་དག་གིས་དེ་བས་ཆེས་བསོད་ནམས་ཀྱི་འཕགས་པའི་མི་རྣམས་དང་། སྤྱོད་ཡུལ་གཅིག་ཏུ་མ་སྤྱད་ཀྱང་མི་རྣམས་ཀྱི་མཐོང་བ་བཞིན་དུ། རྒྱལ་བ་རྣམས་དང་ཡེ་ཤེས་མི་མཐུན་པར་མ་གྱུར་ཀྱང་མཐོང་དུ་ཅིས་མི་རུང་ཞེ་ན། ལན་དུ། དེ་འདྲའི་དཔེ་དོན་མི་མཚུངས་ཏེ། །འགྲོ་བ་དེ་ཉིད་ཀྱིས་མིའི་གཟུགས་མཐོང་ཡང་མཚན་ཉིད་ཉམས་སུ་མྱོང་བའི་སྒོ་ནས་མི་མཐོང་བའི་ཕྱིར་དང་། སངས་རྒྱས་ཀྱི་ཡེ་ཤེས་ནི་བསམ་གྱིས་མི་ཁྱབ་པའི་གནས་ཡིན་པས་དག་པའི་སེམས་ཅན་རྣམས་ཀྱིས་ཀྱང་སྤྱོད་ཡུལ་དུ་མ་གྱུར་པའི་ཕྱིར་ཏེ། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཕྲིན་ལས་སངས་རྒྱས་ཡེ་ཤེས་ཏེ། །དག་པའི་སེམས་ཅན་རྣམས་ཀྱིས་བསམ་བྱ་མིན། །ཞེས་དང་། འཇུག་པ་ལས། བློ་མིག་དག་པའི་འཕགས་མཆོག་གིས་ཀྱང་ཐམས་ཅད་མཐོང་མ་ལགས། །ཞེས་བཤད་པས་སོ། །དྲི་བ་གཉིས་པ་གདུལ་བྱའི་མཐོང་སྣང་ཡིན་ཟེར་ན། ལེའུ་དང་པོའི་སྟོན་འཁོར་གྱི་རྣམ་པར་སྣང་བ་འདི་རྣམས་ཆོས་ཅན། གང་ཟག་གཅིག་གི་ཕུང་ཁམས་སྐྱེ་མཆེད་རྒྱལ་བ་བཞི་བཅུ་རྩ་གཉིས་སུ་རྣམ་པར་དག་པའི་མཐར་ཐུག་འབྲས་བུ་མ་ཡིན་པར་ཐལ། མཐར་ཐུག་གི་འབྲས་བུ་དེ་བློའི་ཡུལ་དུ་བཟུང་བྱར་མ་གྲུབ་པའི་ཞལ་ཕྱག་མཚན་མའི་སྤྲོས་པ་དང་བྲལ་བ་གཅིག་ཏུ་ཁས་ལེན་དགོས་པའི་ཕྱིར་ཏེ། ཐུན་མོང་གི་ལུང་ལས་ཀྱང་། དོན་དམ་བློ་ཡིས་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་གསུངས་པའི་ཕྱིར། འདོད་ན། དེ་ཆོས་ཅན། མཐར་ཐུག་གི་འབྲས་བུ་ཡིན་པར་ཐལ། སྐབས་འདིར་དེ་ལས་ལྷག་པའི་འབྲས་བུ་བཞག་ཏུ་མེད་པའི་ཕྱིར་ཏེ། འདི་ཉིད་ལས། འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །ཞེས་དང་། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པ་འཁྲུལ་པ་ཡིན། །ཞེས་གསུངས་པའི་ཕྱིར། ཡང་གོང་དུ་མ་ཁྱབ་པའི་ལན། བཞི་བཅུ་རྩ་གཉིས་པོ་དེ་མཐར་ཐུག་གི་འབྲས་བུ་ཡིན་ཟེར་ན། དཔེ་ཆོས་ཅན། གདུལ་བྱའི་མཐོང་ཡུལ་གྱི་སྐུ་ཡིན་པར་ཐལ། ས་མཐའི་སེམས་དཔའ་ལ་སྣང་བའི་སྐུ་ཡིན་པའི་ཕྱིར། འདོད་ན། དེ་ཆོས་ཅན། གདུལ་བྱ་ལ་སྣང་བའི་སྐུ་མིན་པར་ཐལ། སངས་རྒྱས་རང་སྣང་གི་ཡེ་ཤེས་ཀྱི་རྩལ་སྣང་ལས་གྲུབ་པའི་སྐུ་ཡིན་པའི་ཕྱིར་ཏེ། ལེའུའི་བསྡུ་བ་ལས། དེ་བཞིན་ཉིད་ཀྱི་དབྱིངས་ཉིད་དབང་བསྒྱུར་ཡེ་ཤེས་དཀྱིལ་འཁོར་ཐུགས་རྗེའི་དང་། །རང་སྣང་བར་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ཡི། །སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། །མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དུའོ། །ཞེས་བཤད་པའི་ཕྱིར། སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་ཅེས་པ་ནི། གདུལ་བྱའི་བློའི་སེལ་སླད་མེད་པར་སངས་རྒྱས་ཁོ་ནའི་སྤྱོད་ཡུལ་ཡིན་པའི་དོན་ཡིན་པའི་ཕྱིར་རོ། །ཡང་གོང་དུ་མ་ཁྱབ་པའི་ལན་དངོས་འགལ་ལ་སོང་མོད་ཀྱང་། དེ་དག་གི་ཚེ་ན་ཐུབ་པ་དྲུག་ཀྱང་གདུལ་བྱ་ལ་དངོས་སུ་མི་སྣང་བར་ཐལ། ཐུབ་དྲུག་མ་དྲངས་པར་བཞི་བཅུ་རྩ་གཉིས་མི་ཚང་བའི་ཕྱིར། དེ་དག་གི་རྣལ་མའི་ལན་གོ་དོན་ལམ་བཞག་གི་དབང་དུ་བྱས་ན། ལེའུ་དང་པོའི་སྟོན་འཁོར་གྱི་རྣམ་པར་སྣང་བ་འདི་དག་སངས་རྒྱས་དངོས་མ་ཡིན་ཀྱང་། སངས་རྒྱས་ཀྱི་སྤྲུལ་པའམ། གདུལ་བྱ་བློ་དག་པའི་བློའི་མེ་ལོང་ལ་ཤར་བའི་སངས་རྒྱས་ཀྱི་གཟུགས་བརྙན་ཡིན་པར་གོ་སྟེ། རྒྱུ་མཚན་སྒྱུ་འཕྲུལ་རྡོ་རྗེ་ལས། རྡོ་རྗེ་བཙན་པོ་དམ་ཚིག་མཆོག །སྐུ་གསུང་ཐུགས་ཀྱི་དངོས་གྲུབ་ཆེ། །འགྲོ་བ་ཀུན་ལ་རབ་སྣང་བའོ། །ཞེས་དང་། རྒྱུད་བླ་མ་ལས་ཀྱང་། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་བཤད་པའི་ཕྱིར་རོ། །དངོས་ཡིན་པ་ལ་གནོད་བྱེད་ཡོད་དེ། བཻ་ཌཱུརྻའི་ས་གཞི་ལ་སྣང་བའི་བརྒྱ་བྱིན་གཟུགས་བརྙན་བརྒྱ་བྱིན་དངོས་མ་ཡིན་པ་དང་། སངས་རྒྱས་ཀྱི་གཟུགས་བརྙན་སངས་རྒྱས་དངོས་མ་ཡིན་པའི་ཕྱིར་ཏེ། གོང་དུ་ལུང་དྲངས་པ་རྣམས་དང་། འདིར་ཡང་ཤེར་ཕྱིན་སུམ་བརྒྱ་པ་ལས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོགས་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ནི་ཆོས་ཉིད་བལྟ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་དང་། སྡོང་པོ་བཀོད་པ་ལས། ཇི་ལྟར་མཚན་ཉིད་སྣ་ཚོགས་པ། །ཞེས་སོགས་གསུངས་པའི་ཕྱིར་རོ། །བཞི་བཅུ་རྩ་གཉིས་མཐར་ཐུག་གི་འབྲས་བུ་ཡིན་མོད། དེ་མཐོང་དུ་མི་རུང་ན། གཞན་སྣང་གཟུགས་སྐུ་གཉིས་ཀྱང་མཐར་ཐུག་འབྲས་བུ་མ་ཡིན་པར་ཁས་ལེན་དགོས་ཧ་ཅང་ཐལ་ལོ། །གསུམ་པ་དོན་ཡང་ཁེགས། དྲི་བ་གཉིས་པ་མཚན་དཔེའི་དོགས་སློང་ནི། ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་ཏུ་བཅད་པས། ལེའུ་གཉིས་པར། སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཅེས་གསུངས་པས། མ་དག་པའི་དུས་ཀྱི་ཁམས་བཅོ་བརྒྱད་ཀྱང་སྐྱེས་བུ་གཅིག་ལ་རྫོགས་ཡོང་བ་ལྟར། སངས་རྒྱས་པའི་གནས་སྐབས་སུ་ཡང་སྟོན་པའི་ཡོན་ཏན་གྱི་བྱེ་བྲག་འཁོར་གྱི་ཚུལ་དུ་བཤད་པའི་ཕྱིར་ཕྱི་སེམས་ཡབ་ཡུམ་བཞི་དང་། ནང་སེམས་ཡབ་ཡུམ་བཞི་སྟེ་བཅུ་དྲུག་བྱུང་ཞིང་། ལྷག་མ་བཅུ་དྲུག་པོ་བརྩི་ཚུལ་ཇི་ལྟར་ཡིན་དང་། འདིར་ནང་སེམས་ཡབ་བཞི་རྣམ་ཤེས་དང་། ཕྱི་སེམས་ཡབ་བཞི་དབང་པོ་དང་བྲང་སྤྲད་སྟེ་བཤད་པ་དང་། ཞི་བ་གནས་དག་གི་སྐབས་སུ། རྣམ་ཤེས་ཚོགས་བརྒྱད་གནས་དག་པ། །སེམས་དཔའ་བརྒྱད་ཀྱི་ཐུགས་དམ་བསྐང་། །རྣམ་ཤེས་ཡུལ་བརྒྱད་གནས་དག་པ། །སེམས་མ་བརྒྱད་ཀྱི་ཐུགས་དམ་བསྐང་། །ཞེས་པས་ལྷ་རྟོག་སྦྱར་ལུང་མི་འདྲ་བ་ཇི་ལྟར་ལགས། ཞེས་པ་ལ། སྟོན་པའི་ཐུགས་ཡེ་ཤེས་ཆེན་པོའི་བདག་ཉིད་དུ་གནས་པ་དེ་ཆོས་ཅན། ཁྱོད་མེ་ལོང་ལྟ་བུ་སོགས་ཡེ་ཤེས་བཞི་པོ་རེ་རེ་ལའང་བཞི་རེར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག །དེའི་ཡུལ་ཆོས་ཀྱི་དབྱིངས་བཅུ་དྲུག་ལས་སེམས་མ་བཅུ་དྲུག་སྟེ་མཚན་སོ་གཉིས་སུ་བཞག་པ་མ་ཡིན་པར་ཐལ། སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུ་བརྒྱན་པའི་ལྷ་བརྒྱད་ཅུ་ནི་དཔེ་བྱད་བརྒྱད་ཅུར་འཆད་པ་མི་རིགས་པའི་ཕྱིར། འདོད་ན། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུ་སྤྲས་པའི་ཕྱིར། སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་བཤད་པ་དང་འགལ་བའི་ཕྱིར་རོ། །རྣལ་ལན་ཕྱི་ནང་གི་སེམས་མ་བཅུ་དྲུག་ནི། རྒྱུ་སྐལ་བཟང་གི་སེམས་དཔའ་སེམས་མ་དང་སྦྱར་ནས་བཤད་པ་ཡིན་ལ། མཚན་དཔེའི་སྐབས་འདིར་འབྲས་བུ་དཔེ་བྲལ་གྱི་སེམས་དཔའ་ཡབ་བཅུ་དྲུག་དང་ཡུམ་བཅུ་དྲུག་པོ་མཚན་དང་། ཡུམ་བཅུ་དྲུག་པོ་ཆོས་ཀྱི་དབྱིངས་ཀྱི་ཕྱག་རྒྱ་ཡིན་པས་དབུ་བརྒྱན་མེད་ཅིང་། ཡབ་བཅུ་དྲུག་པོར་ཡེ་ཤེས་ལྔའི་རྟགས་ཀྱི་དབུ་བརྒྱན་གྱི་ལྷ་ལྔ་རེ་བསྡོམས་པ་བརྒྱད་ཅུ་དཔེ་བྱད་དུ་བཞེད་པའོ། །གནས་དག་གནས་བསྒྱུར་གྱི་སྐབས་སུ་ནི་སྤྱིར་བཏང་ཡུལ་ཡུལ་ཅན་གཙོ་ཆེ་བ་བྱས་པས་འདྲ་བར་སེམས་ཏེ་དེ་ལྟར་མིན་ན། ཡིད་ཤེས་སྟོན་པ་ཀུན་བཟང་སུ་དག་སྦྱོར་གཅིག་དང་། ཚོགས་བརྒྱད་ཀྱི་སྐབས་སུ་སེམས་དཔའ་བརྒྱད་ཀྱི་ནང་ཚན་དུ་དག་སྦྱོར་བྱུང་བ་ཟློས་སྐྱོན་གནས་ཤིང་། ཤེས་པ་གཅིག་ཕྲ་རགས་ཀྱི་གནས་སྐབས་ཕྱེ་བས་ཚོགས་བརྒྱད་བྱུང་ཞིང་། དེའི་ཆ་རྣམས་དག་སྦྱོར་བྱས་པ་སེམས་དཔའ་བརྒྱད་དང་། ཡིད་ནི་ཆོས་ཐམས་ཅད་ཀྱི་བྱེད་པ་པོ་ཡིན་པས་བྱེད་ལས་སྒོ་ནས་སྟོན་པ་ཀུན་བཟང་དུ་དག་སྦྱོར་འཐད་དེ། མདོ་ལས། ཡིད་གཙོ་ཡིད་ནི་མགྱོགས་པར་འགྲོ་བ་སྟེ། །ཆོས་རྣམས་ཀུན་གྱི་སྣ་ལ་ཡིད་འགྲོའོ། །ཞེས་བཤད་པའོ། །ནང་གི་མཚན་དཔེའི་སྐབས་སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་ནི་མཚན་བཟང་པོ་སུམ་ཅུ་རྩ་གཉིས་དང་། ལྟེ་བའི་རྩ་འདབ་རེ་བཞི་ལས་སྟོང་པའི་རྩ་བཞི་ཕྲི་བའི་དྲུག་ཅུ། མགྲིན་པའི་བཅུ་དྲུག །སྙིང་གའི་རྩ་ཆེན་བཞི་སྟེ་བརྒྱད་ཅུ་ནི་དཔེ་བྱད་བཟང་པོ་བརྒྱད་བཅུར་བཤད་པ། དེ་ཆོས་ཅན། ཁྱོད་ནང་གི་སྟོང་པའི་མཚན་དཔེ་མ་ཡིན་པར་ཐལ། ཁྱོད་རྩ་འཁོར་གྱི་རྣམ་པར་འདུག་པའི་ཕྱིར། འདོད་ན། ཐལ་རྒྱུད་ལས། སྒྲ་དབྱངས་གསུང་གི་གནས་གཞི་ཡི། །དབྱེ་བས་གསུམ་གསུམ་ངེས་གཉིས་དང་། །བཞི་བཅུ་གཉིས་སུ་གྱུར་པ་ཡིན། །ཞེས་གསུངས་པ་འགལ་བའི་ཕྱིར་རོ། །གསང་བའི་མཚན་དཔེ་ཆོས་ཅན། ཁྱོད་སྟོན་པ་ཡབ་ཡུམ་གཉིས་རོལ་བའི་དུས་ཀྱི་དགའ་བ་ལ་འཇོག་པ་མ་ཡིན་པར་ཐལ། ཁྱོད་ཡབ་ཡུམ་གཉིས་ཀྱི་དགའ་བ་བཅུ་དྲུག་བཅུ་དྲུག་ནི་མཚན་སོ་གཉིས་དང་། ཡབ་ཀྱི་དགའ་བ་རེ་རེ་ལའང་ཡེ་ཤེས་ལྔ་ལྔའི་རེ་དང་ལྡན་པ་ནི་དཔེ་བྱད་བརྒྱད་ཅུར་འཇོག་པ་མ་ཡིན་པའི་ཕྱིར། འདོད་ན་རྒྱ་མཚོ་ལས། ཨ་ལི་ཀཱ་ལི་བདེ་བ་ཉིད། །ཕན་ཚུན་མ་འདྲེས་གཅིག་པར་ཤེས། །བཅུ་དྲུག་ངོས་གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུའོ་བཟོད་སོགས་རྒྱུ་ལས་འཕགས། །ཞེས་གསུངས་པ་དང་འགལ་ལོ། །ཁོ་ན་རེ། ནང་དང་གསང་བའི་མཚན་དཔེ་ཆོས་ཅན། ཁྱོད་མཛེས་བྱེད་ཀྱི་རྒྱན་མ་ཡིན་པར་ཐལ། ཁྱོད་རྩ་ཁམས་ཀྱི་རང་བཞིན་དུ་འདུག་པའི་ཕྱིར་ཟེར་ན། རྩ་ཁམས་རྣམ་པར་དག་པའི་ཆོས་ཅན། ཁྱོད་རྒྱན་གྱི་ནང་ནས་མཛེས་བྱེད་མཆོག་ཏུ་གྱུར་པ་ཡིན་པར་ཐལ། ཁྱོད་བདེ་བ་ཆེན་པོའི་རང་བཞིན་དུ་རོ་སྙོམས་པའི་ཡེ་ཤེས་ཆེན་པོའི་རྒྱན་དུ་གནས་པའི་ཕྱིར། སྟོན་པ་ཆོས་ཅན། ཁྱོད་ཡེ་ཤེས་ཀྱི་སྐུ་ཅན་མ་ཡིན་པར་ཐལ། ཁྱོད་རྩ་རླུང་ཐིག་ལེ་ལྡན་པའི་སྐུ་ཡིན་པའི་ཕྱིར། འདོད་ན་དེ་ཆོས་ཅན། དེ་ཡིན་པར་ཐལ། ཁྱོད་འཚང་རྒྱ་བའི་ཚེ་རྩ་རླུང་ཐིག་ལེ་རྣམས་ཆོས་ཉིད་ཀྱི་ཀློང་དུ་གྲོལ་ནས་སངས་རྒྱས་པ་མ་ཡིན་པར་ཐལ། ཁྱེད་རྩ་རླུང་ཐིག་ལེ་དང་ལྡན་པའི་སྐུ་ཡིན་པའི་ཕྱིར། འདོད་ན་དེ་ཆོས་ཅན། དེ་ཡིན་པ་ཐལ། རྩ་དག་པས་སྐུ་རྡོ་རྗེ། རླུང་དག་པས་གསུང་རྡོ་རྗེ། ཐིག་ལེ་སྟེ་རྡུལ་དག་པས་ཐུགས་རྡོ་རྗེ་ཐོབ་པའི་ཕྱིར། ཡང་སྟོན་པ་ཆོས་ཅན། ཁྱོད་ཡེ་ཤེས་ཀྱི་སྐུ་ཅན་ཡིན་པར་ཐལ། ཁྱོད་སྐུ་མདུན་དང་རྒྱབ་མེད་པ་ཐམས་ཅད་ཞལ་གྱི་དཀྱིལ་འཁོར་ཐལ་ལེ་བར་སྣང་བའི་སྐུ་ཡིན་པའི་ཕྱིར་ཏེ། ཡེ་ཤེས་ཉིད་གདུལ་བྱའི་སྣང་ངོར་དབྱིབས་དང་ཁ་དོག་ཏུ་རང་སྣང་བའི་ཕྱིར་ཏེ། འདི་ཉིད་ལས། ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱི་གསོབ། །རྒྱལ་བ་མངོན་བྱུང་བསྐྱབ་པ་དང་། །བྱིན་རླབས་སྟོན་པ་དེ་བཞིན་ནོ། །ཞེས་གསུངས་པའི་ཕྱིར། ཡང་གསང་བའི་མཚན་དཔེའི་སྐབས། ཡུམ་གྱི་དགའ་བ་བཅུ་དྲུག་པོ་དེ་ཆོས་ཅན། ཁྱོད་ཡབ་ལ་ཡོད་པའི་ཆོས་ཡིན་པར་ཐལ། ཁྱོད་ཡབ་ཀྱི་སྐུ་ལ་བརྟན་པའི་མཚན་དུ་དྲངས་འདུག་པའི་ཕྱིར། འདོད་ན། མ་ཡིན་པར་ཐལ། ཡུམ་ལ་ལྡན་པའི་ཆོས་ཡིན་པའི་ཕྱིར། ཡང་། ཐུན་མོང་མ་ཡིན་པའི་མཚན་དཔེ་ཞེས། སྟོན་པ་དང་འཆད་པའི་སྐྱེས་བུ་ལྔ་ཁོ་ན་ལ་ལྡན་པའི་ཁྱད་ཆོས་སུ་བཞག་འདུག་པར། དེ་ལྟར་ན་ཀུན་ཏུ་བཟང་མོ་དང་འཁོར་གཞན་རྣམས་ལའང་མཚན་དཔེ་མི་ལྡན་པར་ཐལ། ཐུན་མིན་གྱི་མཚན་དཔེ་དེ་སྟོན་པ་དང་འཆད་པའི་སྐྱེས་བུ་གཉིས་ཀྱི་ཁྱོད་ཆོས་ཡིན་པའི་ཕྱིར། རྟགས་ཁས། འདོད་ན། བཞི་བཅུ་རྩ་གཉིས་པོ་འདི་རྣམས་གང་ཟག་གཅིག་སངས་རྒྱས་པའི་ཡོན་ཏན་གྱི་རྩལ་སྣང་ལྷར་བཞག་པ་མ་ཡིན་པར་ཐལ། ལྷ་དེ་དག་ལ་མཚན་དཔེའི་ཡོན་ཏན་ཡོད་མོད་ཀྱི། བཟང་ངན་ཅན་དུ་གནས་པའི་ཕྱིར། འདོད་མི་ནུས་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །ཞེས་གསུངས་པའི་ཕྱིར་རོ། །གཞན་ཡང་། གཞི་གནས་ལུགས་འཆད་པའི་སྐབས་འདིར་སེམས་ཅན་ཡིན་ན། མཚན་དཔེ་དང་ལྡན་པས་ཁྱབ་པ་གཅིག་ཁས་ལེན་དགོས་ཏེ། ཐུན་མོང་གི་ལུང་མདོག་མྱང་འདས་ལས་ཀྱང་། སེམས་ཅན་ཐམས་ཅད་ཀྱི་ལུས་ཀྱི་ནང་ན་མཚན་བཟང་པོ་སུམ་ཅུ་རྩ་གཉིས་ཡོད་དེ། དཔེ་བྱད་བཟང་པོ་བརྒྱད་དུ་ཡོད་དོ། །སྟོབས་བཅུ་ཡོད་དོ། །མི་འཇིགས་པ་བཞི་ཡོད་དོ། །ཞེས་སོགས་བཤད་པའི་ཕྱིར་རྣལ་མའི་ལན། སྟོན་པ་ཡབ་ཡུམ་གཉིས་པོ་ཡ་མི་འབྲལ་ཏེ། གཅིག་གི་ཡོན་ཏན་གཅིག་ལ་ཡོད་པར་ཁས་ལེན། བཞི་བཅུ་རྩ་གཉིས་པོ་ཐམས་ཅད་ལ་ངོ་བོའི་སྒོ་ནས་བཟང་ངན་མེད་ཀྱང་། གདུལ་བྱར་སྣང་བའི་ཆ་ནས་ཐུན་མིན་གྱི་མཚན་དཔེ་ལྡན་མི་ལྡན་གནས་སྐབས་ཀྱི་སྣང་ཆ་གཙོ་ཆེ་ཆུང་ལ་ལྟོས་ན་བཞག་པར་མངོན། ཡེ་ཤེས་ཀྱི་སྐུ་གདུལ་བྱས་མི་མཐོང་ན་ཧ་ཅང་ཐལ་ཞིང་། སློབ་དཔོན་པདྨ་སོགས་དང་ས་གནས་ཀྱི་སེམས་དཔའ་ཐ་དག་ཡེ་ཤེས་ཀྱི་སྐུ་ཅན་ཡིན་ཏེ། རང་ལུས་གདོད་ནས་ཕྱག་རྒྱ་ཆེ། །སྒོམ་པས་མངོན་དུ་གྱུར་པའི་ལྷ། །ཞེས་སོགས་རྒྱ་ཆེར་བཤད་པས་སོ། །རྩ་རླུང་ཐིག་ལེ་ལ་སྤུ་རིས་འབྱེད་དེ། གདོད་ནས་གྲུབ་པའི་རྩ་རླུང་ཐིག་ལེ་ཡེ་ཇི་བཞིན་པའི་རིགས་ལྔར་བཤད་པའི་ཕྱིར་རོ། །བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་འདི་སྟོན་པས་གསུངས་སམ། སྡུད་པ་པོས་བརྩམས་པའི་ཚིག་གང་ཡིན་ཞེས་པ་ལ། སྟོན་པས་སྟོན་པ་ལ་ཕྱག་འཚལ་བ་དགོས་མེད་དུ་ཐལ། དེ་ལྟར་བཙལ་བ་ཐུག་མེད་དུ་འགྱུར་བའི་ཕྱིར། གཉིས་པ་ལྟར་ན་གསང་བདག་ལག་ན་རྡོ་རྗེ་དེ་ཆོས་ཅན། ཁྱོད་སྟོན་པ་དང་དགོངས་པ་དབྱེར་མེད་མ་ཡིན་པར་ཐལ། བཤད་ཅེས་པ་དེ་སྟོན་འཁོར་དགོངས་པ་དབྱེར་མེད་ཀྱི་ཕྱོགས་ནས་བཞག་པའི་ཐུགས་ངེས་ཀྱི་གླེང་གཞི་ལས་ཁྱད་པར་འཕགས་པའི་འཕགས་ཆོས་སུ་བཤད་པའི་ཕྱིར་ཏེ། བརྟག་གཉིས་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པའང་ང་། །ཞེས་གསུངས་པའི་ཕྱིར། འདོད་ན། རྒྱུད་འདིས་གླེང་གཞི་མ་ཚང་བར་ཐལ། འདི་སྐད་བཤད་པ་ཞེས་པའི་གླེང་གཞི་དེ་སྟོན་པའི་གསུངས་གང་ཞིག །གླེང་གཞི་སྟོན་པས་དངོས་སུ་མ་གསུངས་པའི་ཕྱིར་ཏེ། ཉི་འོད་སེང་གེའི་རྒྱ་ཆེར་འགྲེལ་པ་ལས། བཀའ་ཐམས་ཅད་མགོ་བོར་གླེང་གཞི་དང་། སྒབ་ཏུ་མངོན་པར་བསྟོད་པ་ཆུག་ལ་བཀའ་ཡང་དག་པའི་དོན་དང་མི་འགལ་བར་སྒྲོགས་ཤིག །ཅེས་བཤད་པའི་ཕྱིར། ཡང་བསམ་གྱིས་མི་ཁྱབ་པ་ཐམས་ཅད་སྐུ་གསུང་ཐུགས་སུ་སྣང་བ་ཞེས་པའི་རྗེས་སུ། ཐབས་ཤེས་རབ་ཀྱི་ཞབས་གཉིས། ཞེས་བཤད་པས། སྐུ་གསུང་ཐུགས་སྣ་ཚོགས་ལ་ཞབས་གཉིས་ལས་མེད་པར་ཐལ། དེ་ལྟར་བཤད་པའི་ཕྱིར། ཡང་སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ་ཞེས་པས་སྐུ་གསུང་ཐུགས་བསམ་གྱིས་མི་ཁྱབ་ལ་དབུ་གསུམ་ལས་མེད་པར་ཐལ། དེ་ལྟར་བཤད་འདུག་པའི་ཕྱིར་ཡང་། རྒྱ་ཕྱོགས་བཅུ་ཡོངས་སུ་མ་ཆད་པ་ཞེས་པ་དང་། གྲུ་བཞིར་གྱུར་པ་ཞེས་པ་འགལ་ཏེ། རྒྱ་མ་ཆད་ན་གྲུ་བཞིར་སྣང་བ་མི་འཐད་དེ། གྲུ་བཞིར་སྣང་བ་སྟེ་ནམ་མཁའ་གོ་ཕྱེ་ནས་གྲུ་བཞིར་སྣང་བ་ཡིན་པའི་ཕྱིར། ཕྱི་དང་ནང་མེད་པ་ཞེས་པ་དང་། ཀུན་ཏུ་ཡང་ནང་དུ་གྱུར་པ་ཞེས་བཤད་པ་འགལ་ཏེ། ཀུན་ཏུ་ནང་དུ་གྱུར་པ་ཡིན་ན་ཕྱི་ནང་ཡོད་པ་ཡིན་པའི་ཕྱིར། ཡང་གདན་གྱི་སྐབས་སུ་དབུས་སུ་སེང་གེ། ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་སྟེ་སྲོག་ཆགས་རེ་རེ་ཡང་བརྒྱད་བརྒྱད་དུ་གནས་ནས་ཁྲི་རྐང་འདོགས་པ་མ་ཡིན་པར་ཐལ། ཁྲི་རེ་རེ་ལ་སྲོག་ཆགས་ལྔ་ཀ་མ་ཚང་བའི་ཕྱིར། དེ་ལྟར་མ་ཚང་དགོས་ཏེ་རྟགས་སྲོག་ཆགས་ལྔ་པོ་ཁྲིར་སྣང་བ་དོན་མི་འཇིགས་པ་བཞི་སྟོབས་བཅུ། རྫུ་འཕྲུལ་རྐང་བཞི་དབང་བཅུ། ཕྲིན་ལས་བཞི་རྣམས་ཐུགས་སུ་ཆུད་པའི་དོན་རྟགས་ཁྲི་རྐང་འདེགས་པའི་རྣམ་པར་ཤར་བས་ཏེ། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །ཞེས་སོགས་གསུངས་པའི་ཕྱིར། ཡང་ཁ་ཅིག་གིས། གདན་གྱི་སྲོག་ཆགས་ལྔ་པོ་འདི་རྒྱུད་མས་སྦྱངས་ཡིན་པ་མི་འགལ་ཏེ། སྨོན་ལམ་གུས་པའི་གདན་བྱང་ཆུབ་སེམས་དཔའ་ལུས་གདན་དུ་ཕུལ་ནས་ཉོན་མོངས་པའི་སྒྲིབ་པ་སྦྱོང་བའི་ཕྱིར། རྣ་བས་ཆོས་ཉན་ནས་ཤེས་བྱའི་སྒྲིབ་པ་སྦྱོང་ཟེར་བ་ཡང་མི་འཐད་དེ། གདན་གྱི་སྲོག་ཆགས་ཀྱི་རྣམ་པར་གནས་པའི་བྱང་ཆུབ་སེམས་དཔའ་དེ་ཆོས་ཅན། ཁྱོད་ཉོན་སྒྲིབ་སྦྱངས་ཟིན་པའི་གང་ཟག་མ་ཡིན་པར་ཐལ། སངས་རྒྱས་ཀྱི་ཞིང་དུ་ཡང་ལུས་གདན་དུ་ཕུལ་ནས་ཉོན་སྒྲིབ་སྦྱོང་བའི་ཕྱིར་འདོད་ན། དེ་འདྲའི་བྱང་སེམས་ཆོས་ཅན། ཁྱོད་ཉོན་སྒྲིབ་ཟད་པར་སྤངས་པའི་གང་ཟག་ཡིན་པར་ཐལ། ཁྱོད་སངས་རྒྱས་ཀྱི་ཞིང་དུ་གནས་པའི་གང་ཟག་ཡིན་པའི་ཕྱིར། དེ་ལྟར་ཡང་གསེར་འོད་དམ་པ་ལས། ཉོན་མོངས་པའི་སྒྲིབ་པ་དག་ནས་སངས་རྒྱས་སྤྲུལ་པའི་སྐུའི་ཞལ་མཐོང་ངོ་། །ཤེས་བྱའི་སྒྲིབ་པ་དག་ནས་ལོངས་སྤྱོད་རྫོགས་པའི་སྐུའི་ཞལ་མཐོང་ངོ་། །སྙོམས་འཇུག་གི་སྒྲིབ་པ་དག་ནས་སངས་རྒྱས་ཆོས་ཀྱི་སྐུའི་ཞལ་མཐོང་ངོ་། །ཞེས་གསུངས་པའི་ཕྱིར་དང་ཐུན་མོང་གི་ཐེག་པའི་སྐབས་སུ་ཡང་། ཉོན་སྒྲིབ་ནི་ས་དང་པོ་ཐོབ་པ་དང་དུས་མཉམ་དུ་སྤང་བར་བཤད་པའི་ཕྱིར་རོ། །ཡང་། རྒྱུད་འདི་སྟོན་པས་བསྡུས་སམ་འཁོར་གྱིས་བསྡུས། དེ་གཉིས་ཀས་བསྡུས་སམ། དང་པོ་ལྟར་ན་འདིའི་སྡུད་པ་པོ་དེ་ཆོས་ཅན། སྟོན་པ་མ་ཡིན་པར་ཐལ། འཁོར་གྱི་ནང་ནས་སྐལ་བ་དང་ལྡན་པའི་གསང་བདག་ལག་ན་རྡོ་རྗེ་དེ་ཡིན་པའི་ཕྱིར་ཏེ། རྒྱ་མཚོ་ལས། འཁོར་གྱི་ནང་ན་སྐལ་ལྡན་མཆོག །འདུལ་བའི་དུས་བབས་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་གསུངས་པའི་ཕྱིར་རོ། །གཉིས་པ་ལྟར་ན། སྟོན་པ་ཆོས་ཅན། ཁྱོད་ཀྱི་རྒྱུད་འདི་མིང་ཚིག་ཏུ་བསྡུས་པར་ཐལ། དེ་ལྟར་བསྡུས་ནས་གཏན་ལ་ཕབས་པའི་ཕྱིར། འདོད་ན། སྟོན་པ་ཆོས་ཅན། ཁྱོད་ཀྱི་མིང་ཚིག་སྒྲར་སྣང་བའི་ཆེས་གསུང་པ་ཡོད་པར་ཐལ་ཆོས་ཕུང་བརྒྱད་ཁྲི་བཞི་སྟོང་མིང་ཚིག་སྒྲར་སྣང་བའི་སྒོ་ནས་གསུངས་པའི་ཕྱིར་ཏེ། འདི་ཉིད་ལས། མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུའི་གཉེན་པོར་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་གསུངས་སོ། །གསུང་ངོ་། །གསུང་བར་འགྱུར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། སྟོན་པས་སྒྲ་དང་མིང་ཚིག་ཏུ་སྣང་བའི་ཆོས་འབྲུ་གཅིག་ཀྱང་གསུངས་པ་མེད་དེ། འདི་ཉིད་ལས། སྒྲ་དང་མིང་ཚིག་ཀུན་ལས་འདས། །ཞེས་དང་། དཔེར་ན་བྲག་ཆའི་སྒྲ་བཞིན་ནོ། །ཞེས་དང་། ཐུན་མོང་གི་ལུང་ལས་ཀྱང་། ང་མངོན་པར་རྫོགས་སངས་རྒྱས་པ་གང་གི་ནུབ་མོ་ནས་མྱ་ངན་ལས་འདའ་བའི་བར་ཚིག་དང་ཡི་གེར་སྣང་བ་འབྲུ་གཅིག་ཀྱང་མ་གསུངས་སོ། །ཞེས་བཤད་པའི་ཕྱིར་རོ། །ཡང་སྟོན་པས་མ་གསུངས་སོ་ཞེ་ན། སྟོན་པ་ཆོས་ཅན། ཁྱོད་ཀྱི་གསུངས་པར་ཐལ། ཁྱེད་ཀྱི་སྐུ་གསུང་ཐུགས་རྡོ་རྗེ་ལས་ཕྱུངས་ནས་གསུངས་པའི་ཕྱིར་ཏེ། དེ་བཞིན་གཤེགས་པ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཞེས་བཤད་པའི་ཕྱིར། རྣལ་མའི་ལན། སྟོན་པས་མིང་ཚིག་ཡི་གེར་སྣང་བའི་ཆོས་མ་གསུངས་ཀྱང་། དཔེར་ན་བྲག་ཆའི་ངོས་ནས་སྒྲ་མ་བརྗོད་ཀྱང་སྐྱེས་བུའི་ཇི་ལྟར་སྨྲས་པའི་བྲག་ཆའི་སྒྲ་ལན་དུ་བྱུང་བ་ལྟར་སངས་རྒྱས་དེ་བཞིན་ཉིད་དུ་གནས་པ་ལས་མ་གཡོས་ཀྱང་། གདུལ་བྱའི་སྣང་ངོར་ཐུགས་རྗེ་གསུང་གི་བྱིན་རླབས་སོ་སོའི་བློ་དང་འཚམས་པར་འབྱུང་བ་ཡིན་ཏེ། འདི་ཉིད་ལས། དེ་བཞིན་ཉིད་ཀྱི་གསུངས་པ་མེད། །ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུངས་ཡང་། །ཐུགས་རྗེ་གསུང་གི་བྱིན་རླབས་ཀྱིས། །འགྲོ་དོན་སྣ་ཚོགས་སོ་སོ་གསལ། །གསལ་ཉིད་གསུང་གི་རྡོ་རྗེའི་མཆོག །དེ་བཞིན་ཉིད་ལས་མ་གཡོས་ཀྱང་། །དཔེར་ན་བྲག་ཆའི་སྒྲ་བཞིན་ནོ། །ཞེས་གསུངས་པས་སོ། །དྲི་བ་གསུམ་པ་ནི། གང་ཟག་ལ་རང་རྒྱུད་དང་སྤྲུལ་པ་བ་གཉིས་ལས། སྤྱིར་སེམས་ཅན་གྱི་དོན་ལ་བསམ་བཞིན་དུ་སྐྱེ་བ་བཞེས་པ་སྤྲུལ་པ་བ་དང་། རང་གི་རང་མ་རིག་པས་འཁྲུལ་ཏེ་དབང་མེད་དུ་འཁོར་བར་སྐྱེས་པ་ནི་རང་རྒྱུད་པ་ཡིན་འདྲ་ཡང་ཞིབ་ཏུ་ཕྱེ་ན་ཁས་ལེན་ལ་ལྟོས་དགོས་འདྲ་བསམ་པ། ལུང་ལས། ང་ཡི་འདི་ཀུན་ཁྱབ་པ་དེ། །འགྲོ་བའི་རང་བཞིན་གཞན་མ་མཐོང་། །ཞེས་དང་། མཁན་ཆེན་བླ་མས། མདོར་ན་གདོད་མའི་སེམས་ལས་འཕྲོས་པའི་ཕྱིར། །སྐྱེ་བ་བཟང་ངན་ཀུན་ཀྱང་དེའི་རྣམ་སྤྲུལ། །རྦ་རླབས་ཆུ་ལས་གཞན་དུ་གཡོས་པ་མེད། །ཞེས་པས། དག་མ་དག་ཐམས་ཅད་ཆོས་ཉིད་ཀྱི་རོལ་རྩལ་ལས་མ་འདས་པའི་ཕྱིར། བླ་མེད་ཀྱི་ཐེག་པ་འདིའི་གྲུབ་མཐར་སེམས་ཅན་ཐམས་ཅད་སྤྲུལ་པ་རབ་ཁས་བླངས་ན་སྐྱོན་ཨེ་ཡོང་ལགས། ཞེས་པ་ལ་གྲུབ་མཐའ་འདིའི་སྐབས་སུ་ཐ་སྙད་སྣང་ལུགས་དང་། དོན་གནས་ལུགས་གཉིས་ལས། དང་པོ་ལྟར་ན། སེམས་ཅན་ཐམས་ཅད་སྤྲུལ་པ་བར་ཁས་བླངས་ན། ཧ་ཅང་ཐལ་ཏེ། སྲིད་པར་སྣང་བའི་སེམས་ཅན་འདི་དག་བདག་འཛིན་གྱི་རྒྱུ་ལས་བྱུང་བའི་ལོག་རྟོག་འཁྲུལ་པར་གནས་པའི་ཕྱིར་ཏེ། འདི་ཉིད་ལས། སྲིད་རྩེའི་ཉེས་དམིགས་བདག་ཏུ་རྟོགས་ལས་འཕྲོས། །ཞེན་དང་ལོག་པར་རྟོག་པ་ཙམ་ཞིག་ལས། །ཕྲ་ཞིང་ཟབ་པའང་ཡོད་མ་ཡིན། །ཞེས་གསུངས། ཐེག་པ་ཆེན་པོའི་བྱང་ཆུབ་ཀྱི་སེམས་རྒྱུད་ལ་སྐྱེས་པ་དང་། རང་གཞན་གྱི་དོན་སྒྲུབ་པའི་ལམ་གྱི་རྒྱུར་འགྲོ་བའི་དགེ་ཚོགས་སྒྲུབ་ནུས་ཕན་ཆད་སངས་རྒྱས་ཀྱི་སྤྲུལ་པ་ཡིན་པར་ཁས་བླངས་པ་ལ་སྐྱོན་མེད་འདྲ་སྟེ། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་ནས་སྐད་ཅིག་གིས། །འཁོར་བའི་བརྩོན་རར་བསྡམས་པའི་ཉམས་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འགྲོ་བ་ལྷ་མིར་བཅས་པས་ཕྱག་བྱར་གྱུར། །ཞེས་དང་། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་གསུངས་པའི་ཕྱིར། དོན་གནས་ལུགས་ཀྱི་དབང་དུ་བྱས་ན། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། བརྟག་གཉིས་ལས། ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་སོགས་གསུངས་པས་མཚོན་ནོ། །སེམས་ཅན་གྱི་ཁམས་ལ་གཟིགས་པ་འཇུག་པའི་ཚུལ་ཡང་། སངས་རྒྱས་རང་གི་ངོ་བོ་ཆོས་ཉིད་དེ་བཞིན་ཉིད་ཀྱི་ཀློང་དུ་གཤེགས་པས། རང་རིག་པ་དེ་ཉིད་ཀྱང་ཤེས་རིགས་ཀྱི་ཆོས་ཀྱི་སྟོང་པས་གདོད་མ་ནས་འོད་གསལ་བའི་ཕྱིར་རང་བྱུང་གི་ཡེ་ཤེས་ཞེས་བྱ་ཞིང་། དེ་ཉིད་ཡོངས་སུ་དག་པའི་ཞིང་ཁམས་ན་སྐུ་དང་ཡེ་ཤེས་ཀྱི་བཀོད་པ་སྣ་ཚོགས་པར་སྣང་སྟེ། འདི་ཉིད་ལས། རང་བྱུང་ཡེ་ཤེས་གནས་མེད་སྣང་། །ཞེས་སོ། །སྣང་ལུགས་སེམས་ཅན་ནས་གཞལ་ན། འགྲོ་བ་རྣམས་ཀྱིས་ལོག་པར་རྟོག་པས་བརྟགས་པའི་སྒྲིབ་པ་དེ་ཡང་སངས་རྒྱས་རྣམས་ཀྱིས་རྣམ་པར་དག་པར་བྱེད་ཅིང་། འགྲེལ་པ་གསུམ་གྱི་འགྲེལ་པས་འགྲོ་བ་དྲུག་གི་དུས་དང་གནས་སྐབས་ཐམས་ཅད་དུ་དེ་བཞིན་གཤེགས་པའི་བྱིན་རླབས་ཞིང་སྣང་བར་འགྱུར་ཏེ། འདི་ཉིད་ལས། ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོའི་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་སོ། །དོན་མཛད་ཚུལ་ཀྱང་། དཔེར་ན་སྒྱུ་མའི་སྐྱེས་བུས་སྒྱུ་མའི་སྐྱེ་བོ་མང་པོ་སྒྱུ་མའི་སྡུག་བསྔལ་གྱི་ནང་ནས་བཏོན་ཏེ། སྒྱུ་མའི་བདེ་བ་ལ་བཀོད་པའི་ཚུལ། སྒྱུ་མའི་མིག་འཕྲུལ་ལ་སྣང་བ་བཞིན་དུ་སྤྲུལ་པ་སྒྱུ་མ་ལྟ་བུས་སེམས་ཅན་སྒྱུ་མ་ལྟ་བུ་རྣམས་སྒྱུ་མ་ལྟ་བུ་འཁོར་བ་ལས་བསྟོན་ནས། བྱང་ཆུབ་སྒྱུ་མ་ལྟ་བུ་ལ་འགོད་པའི་ཚུལ་སེམས་ཅན་འཕྲུལ་པའི་བློ་ལ་སྣང་སྟེ། འདི་ལྟར་སྣང་བ་ཙམ་ལ་ཐུགས་རྗེ་ཆེན་པོས་སེམས་ཅན་བསྒྲལ་ཞེས་བྱ་སྟེ། ཇི་སྐད་དུ། སེམས་ཅན་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། །བྱུང་བའི་ཚོགས་ནི་སྒོས་པའི་སེམས། །སེམས་ཅན་རྣམས་ཀྱི་བསམས་པ་ལ། །བླ་མེད་བྱང་ཆུབ་སྣང་བར་བྱེད། །ཅེས་གསུངས་པ་ལྟ་བུའོ། །དྲི་བ་བཞི་པ་ནི། སྔགས་ཀྱི་ཆུ་རྒྱུན་གྱི་ཐ་མར། །མདོ་སྡེ་རྒྱན་ལས། སྒོམ་པ་ཐ་མ་ཐོབ་ནས་ནི། །འོད་ཟེར་ཆེན་པོའི་དབང་བསྐུར་རོ། །ཞེས་གསུངས་པ་ལྟར། མཐར་ཐུག་འབྲས་བུ་དབང་བསྐུར་བའི་ཚེ། འདོད་ཆགས་བདེ་ཆེན་ལམ་གྱི་ཡས་འབབ་དགའ་བཞིའི་འགྲོས་ལ་ཐུན་མོང་གི་ས་བཅུ་དང་ལམ་ལྔ། མས་བརྟན་དགའ་བཞིའི་འགྲོས་ཀྱི་ཁྱད་པར་གྱི་ས་བཅུ་དང་ལམ་ལྔ་རྫོགས་ནས་འཚང་རྒྱ་ཚུལ་གསུངས་པ། ཐུན་ཁྱད་ཀྱི་ས་ལམ་དེའི་གོང་དུ་རྫོགས་ཚུལ་བྱུང་བ་ཇི་ལྟར་ཡིན་ཞེས་པ་ལ། དེ་ཡང་། སྒྱུ་འཕྲུལ་རྡོ་རྗེ་ལས། ས་དང་ས་ཡི་ཡོན་ཏན་རྣམས། །རྩ་རྣམས་ཀྱི་ནི་སྐྱེ་འབྲི་ལས། །རླུང་དང་ཡེ་ཤེས་ལས་འདོད་དེ། །སྦྱང་གཞི་སྦྱང་བྱེད་འཕེལ་དང་འགྲིབ། །སྲིད་དང་མྱ་ངན་འདས་འཕེལ་འགྲིབ། །རྣམ་བཞིའམ་གསུམ་མམ་ལྔ་འཁོར་ལོ། །གཉིས་གཉིས་ཀྱི་ནི་གཅིག་མ་རྫོགས། །ས་བཅུ་ཐ་མས་ཡེ་ཤེས་པ། །བཞི་པས་སྟེང་དང་འོག་ཏུ་གྲང་། །ཞེས་པའི་དོན་ཀུན་མཁྱེན་ཆོས་རྗེས་ཡིད་བཞིན་མཛོད་དུ། འཁོར་ལོ་བཞི་ཡི་རླུང་སེམས་ལས་རུང་ཚེ། །ལམ་བཞིའི་ཡོན་ཏན་རིམ་གྱི་འཆར་བ་སྟེ། །དབུ་མའི་རྩ་མདུད་གཉིས་གཉིས་གྲོལ་བ་ལས། །ས་བཅུའི་ཡོན་ཏན་ནང་ནས་འཆར་བར་བཞེད། །ཅེས་གསུངས་པ་ལྟར་ལྟེ་སྙིང་མགྲིན་པ་སྤྱི་བོའི་འཁོར་ལོ་ལས་སུ་རུང་བ་ལས་ཚོགས་སྦྱོར་མཐོང་སྒོམ་གྱི་ལམ་བཞིའི་ཡོན་ཏན་འཆར་ཞིང་། དབུ་མ་ལ་རོ་རྐྱང་གི་མདུད་པ་ཉི་ཤུ་གཅིག་ཡོད་པ་ལས། མདུད་པ་གཉིས་གཉིས་གྲོལ་བ་ན་དེར་དངས་མ་ཡེ་ཤེས་ཀྱི་རླུང་རེ་རེ་ཆུད་པས་ཉི་ཤུའི་ས་བཅུའི་ཡོན་ཏན་དུ། ཐ་མ་ཉེར་གཅིག་པས་གྲོལ་བས་སངས་རྒྱས་པའི་ཡོན་ཏན་འཆར་བར་བཤད་ཅིང་། དེ་དག་ཅུང་ཟད་ཕྱེ་སྟེ་བཤད་ན། ལུས་ལྷར་བསྒོམ་པའི་ཏིང་ངེ་འཛིན་ཐོབ་པས་སྔགས་ཀྱི་ཚོགས་ལམ་དུ་ཞུགས་པ་ཡིན་ཅིང་དེར་བརྟན་པ་ཐོབ་པ་ན་ལྟེ་བ་སྤྲུལ་པའི་འཁོར་ལོ་རླུང་སེམས་རིམ་གྱིས་ཚུད་དེ་ལས་སུ་རུང་བ་ལས་ཚོགས་ལམ་ཆེ་འབྲིང་ཆུང་གསུམ་གྱི་ཡོན་ཏན་རྣམས་འཆར་བ་དང་། རྟོགས་ཚོགས་སྣང་སྟོང་གཉིས་ཀྱི་ལྷའི་དཀྱིལ་འཁོར་དུ་གསལ་བ་ལ་བློ་གནས་པའི་ཏིང་ངེ་འཛིན་ནི་མངའ་ཞིང་ཆོས་རྒྱུན་གྱི་ཏིང་ངེ་འཛིན་ཐོབ་པས་སངས་རྒྱས་སྤྲུལ་པའི་སྐུ་ལས་གདམས་ངག་ཉན་ནུས་པ་སྟེ། མདོ་སྡེ་རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམ་ངག་རྒྱ་ཆེར་རྙེད་པར་གྱུར། །འཇིག་རྟེན་ཁམས་ནི་རྣམས་སུ་འགྲོ། །ཞེས་སོ། །དེ་ནས་ཆོས་ཀྱི་འཁོར་ལོའི་རླུང་སེམས་ལས་སུ་རུང་བས་དྲོད་རྩེ་གཅིག་དང་བཟོད་པ་ཆོས་མཆོག་གཉིས་ཏེ་སྦྱོར་ལམ་གྱི་ཡོན་ཏན་རྣམས་འཆར་ཞིང་། སྣང་བ་ཟུང་འཇུག་ལྷའི་དཀྱིལ་འཁོར་ལ་སྔགས་ལས་གསལ་བརྟན་དུ་གྱུར་པ་ཡིན། དེ་ནས་ལོངས་སྤྱོད་འཁོར་ལོའི་རླུང་སེམས་ལས་སུ་རུང་ཚེ་དབུ་མའི་མདུད་པ་དང་པོ་གཉིས་གྲོལ་བས་ཆོས་ཉིད་རང་མཚན་བསྐྱེད་དུ་བྱར་མེད་པ་མཐོང་། དེ་འཕགས་པའི་ས་དང་པོ་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་འཆར་ཞིང་ལོངས་སྤྱོད་རྫོགས་པའི་སྐུ་ལ་ཆོས་ཉན་ནུས། དེ་ནས་སྤྱི་བོའི་བདེ་ཆེན་གྱི་འཁོར་ལོའི་རྩ་མདུད་ལས་སུ་རུང་ཚེ་དབུ་མའི་མདུད་པ་གསུམ་པ་ན་ཉི་ཤུ་པའི་བར་གཉིས་གཉིས་གྲོལ་བས་སྒོམ་ལམ་ས་དགུའི་ཡོན་ཏན་རྣམས་རིམ་གྱིས་འཆར། དེ་ཡང་ས་གཉིས་པ་དྲི་མ་མེད་པ་ནས་ས་དགུ་པ་ལེགས་པའི་བློ་གྲོས་ཀྱི་བར་ས་བརྒྱད་པོ་ཐམས་ཅད་ཡེ་ཤེས་སྒྱུ་མའི་སྐུ་ཅན་སྒོམ་ལམ་ཕྱག་ཆེན་རིག་འཛིན་དང་། ས་བཅུ་པ་ཆོས་ཀྱི་སྤྲིན་ནི་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་བྱད་འཛིན་པ་མཐར་ལམ་ལྷུན་གྲུབ་རིག་འཛིན་ཞེས་བྱའོ། །མཁས་པ་སྔ་མ་མང་པོའི་བཞེད་པར་ཏིང་འཛིན་གྱི་སའི་སྐབས་སུ་དུས་སྦྱོར་བཅུ་གཉིས་འགགས་པའི་དང་པོ་སྦྱོར་ལམ་ཆོས་མཆོག །གཉིས་པ་ནས་རིམ་པར་འཕགས་པའི་སློབ་ལམ་ས་བཅུ་དང་མི་སློབ་པའི་སངས་རྒྱས་ཀྱི་ས་རྣམས་དང་སྦྱར་ནས་བཤད་ནའང་། ཡེ་ཤེས་ཀྱི་སྐུ་ཐོབ་པའི་སྔ་རོལ་དུ་དུས་སྦྱོར་བཅུ་གཉིས་མ་འགགས་ན་ཡེ་ཤེས་ཀྱི་སྐུ་འགྲུབ་པར་མི་འགྱུར་ཏེ་ཚེ་འདིའི་ཕུང་པོ་མ་འགགས་པར་བར་དོའི་སྲིད་པ་སྒྲུབ་མི་ཐུབ་པ་བཞིན་ནོ། །དེར་མ་ཟད་ཡོན་ཏན་གྱི་ཁྱད་པར་ཡང་ཏིང་ངེ་འཛིན་གྱི་ས་དང་པོ་ཐོབ་ནས་ཕྱོགས་བཅུའི་འཇིག་རྟེན་གྱི་ཁམས་གཅིག་གི་དོན་མཐོང་བར་བཤད་པ་དང་། ས་གཉིས་པ་ནས་གཉིས་སོགས་ཕྱི་མ་ཕྱི་མ་ཉིས་འགྱུར་གྱི་གྲངས་ཚད་བཟུང་ནས་དུས་འཁོར་དུ་གསུངས་པ་ལྟར། དེའི་ལུགས་ཀྱི་དོན་མཐོང་བཅུ་པ་ཐོབ་ན་འཇིག་རྟེན་གྱི་ཁམས་ལྔ་བརྒྱ་དང་བཅུ་གཉིས་ཀྱི་དོན་མཐོང་བ་ལས་མ་བྱུང་བས་དེ་ལྟར་ན་མདོའི་ཐེག་པའི་སྐབས་སུ་ཡང་། འཕགས་པ་ས་བཅུ་པའི་ཡོན་ཏན་ནི། འཇུག་པ་ལས། རེ་ཞིག་བཅུ་པ་འདི་ཡི་ཡོན་ཏན་དག །ངག་གི་སྤྱོད་ཡུལ་ལས་ཆེས་འདས་གྱུར་ཅིང་། །ངག་གི་སྤྱོད་ཡུལ་མ་ཡིན་བསྡོམས་རྣམས་ན། །རྡུལ་དག་ཇི་སྙེད་ཡོད་པ་དེ་སྙེད་འགྱུར། །ཞེས་མདོ་སྡེ་ས་བཅུ་པའི་དོན་བསྡུས་ནས་གསུངས་པ་སོགས་མདོ་བསྟན་བཅོས་མང་པོ་དང་འགལ་བའི་སྐྱོན་གནས། དེས་ན་འདིར་གསང་སྔགས་རང་ལམ་གྱི་ས་ལམ་སྦྱོར་ཚུལ་ནི། བསྐྱེད་རིམ་རགས་པ་དང་ཕྲ་བ་ལ་བརྟན་པ་ཐོབ་ན་རིམ་པས་ཡེ་ཤེས་ཕེབས་པ་དང་ཡེ་ཤེས་ཆོས་དབང་བ་ཞེས་དྲན་པ་ཉེར་བཞག་དང་ཡང་དག་སྤོང་བས་བསྡུས་ཚོགས་ལམ་ཆུང་འབྲིང་གི་ཡོན་ཏན་རྫོགས། བསྐྱེད་རིམ་ཀླུངས་སུ་ཕེབས་ནས་རྫོགས་རིམ་གྱི་གསལ་སྣང་རྒྱུད་ལ་སྐྱེས་ཚེ་རྫུ་འཕྲུལ་རྐང་བཞིའི་ཡོན་ཏན་གྱི་བདག་ཉིད་ཚོགས་ལམ་ཆེན་པོ་ཐོབ། རྒྱུའི་རྫོགས་རིམ་ལ་གོམས་པས་དབང་པོ་ལྔའི་ཡོན་ཏན་རང་བཞིན་སྦྱོར་ལམ་དྲོད། དེ་ཉིད་བརྟན་པས་རྩེ་མོ་དང་། བཟོད་པ་རྣམས་ཐོབ་སྟེ་ནང་དུ་ཡས་འབབ་དགའ་བཞིའི་སས་བསྡུས་པའི་ཞུ་བདེ་ལས་བྱུང་བ་སྟེ། ཏིང་ངེ་འཛིན་གྱི་ས་བཅུ་གཅིག་པ་མན་ཆད་ཀྱི་ཡོན་ཏན་རྫོགས་པའོ། །ཏིང་ངེ་འཛིན་གྱི་ས་བཅུ་གཉིས་པའི་སྐད་ཅིག་མ་སྟོང་བདུན་བརྒྱ་གོ་དགུ་ནི། སྦྱོར་ལམ་ཆོས་མཆོག་ཡིན་ཏེ། དེ་ཉིད་མས་བརྟན་དགའ་བཞིས་བསྡུས་པ་སྟོབས་ལྔའི་རང་བཞིན་ཡེ་ཤེས་ཀྱི་སྐུ་ནམ་མཁའ་མཛོད་ཐོབ་པའོ། །ས་བཅུ་གཉིས་པའི་སྐད་ཅིག་ཐ་མ་རྫོགས་པའི་དུས་དེར་ཐམས་ཅད་སྟོང་པའི་ཡེ་ཤེས་ཤིན་ཏུ་རྣམ་པར་དག་པ་དོན་གྱི་རྫོགས་རིམ་གྱི་འོད་གསལ་ཐོབ་པས་བྱང་ཆུབ་ཡན་ལག་མཐོང་བའི་ལམ་སྟེ། རྣམ་པ་དག་པའི་རང་བཞིན་བདེན་པ་བཅུ་དྲུག་གོ། །དེའི་ཚེ་སྔར་ཕྲ་ཡང་གི་ལུས་ཐོབ་མ་ཐོབ་གང་ཡིན་ཡང་རུང་སྟེ། རང་གི་སྣང་ངོར་སྒྱུ་ལུས་རླུང་སེམས་ཙམ་གྱི་ལྷ་སྐུ་སྣང་བའམ་ནུབ་ཅིང་། ཟུང་འཇུག་གི་སྐུ་ཡང་མ་ཐོབ་པས། ཡེ་ཤེས་འོད་གསལ་རྐྱང་པའི་སྐུ་ཞེས་འདོགས་ཏེ། འཕགས་པའི་མཐོང་ལམ་བདེ་སྟོང་དེ་ཁོ་ན་ལ་མཉམ་པར་བཞག་པའི་འོད་གསལ་ཡིན་ལ། དེའི་དུས་སུ་འཁོར་བའི་ལུས་ངག་ཡིད་གསུམ་དང་ཆགས་རྟོག་རྣམས་སྤངས་ཟིན། དེ་རྗེས་འོད་གསལ་དེ་ལས་ལངས་ཚེ་ཆོས་ཉིད་མངོན་སུམ་དུ་རྟོགས་པའི་བདེ་ཆེན་ས་དང་ཡེ་ཤེས་ཀྱི་དཀྱིལ་འཁོར་རབ་འབྱམས་གཉིས་ངོ་བོ་དབྱེར་མེད་དུ་གྲུབ་པའི་ཟུང་འཇུག་དེ་རྒྱུན་མི་ཆད་པར་མཉམ་རྗེས་ཐམས་ཅད་དུ་འབྱུང་བ་ཟུང་འཇུག་རིག་པ་འཛིན་པའི་ཡེ་ཤེས་ཀྱི་སྐུ་གྲུབ་པའི་ཕྱིར། དེ་ནི་འདོད་གཟུགས་ཀྱི་རིག་པ་འཛིན་པ་དང་ལམ་མཆོག་ཡོངས་སུ་རྫོགས་པའི་ཚེ་དབང་སོགས་ལས་ཁྱད་པར་དུ་འཕགས་པས་སློབ་ལམ་གྱི་མཆོག་གམ། གཙོ་བོར་གྱུར་པ་སྐུ་གསུང་ཐུགས་ཡེ་ཤེས་རྡོ་རྗེའི་གྲལ་དུ་ཚུད་པས་རྡོ་རྗེ་བཞི་དབྱེར་མི་ཕྱེད་པའི་ཡེ་ཤེས་ཀྱི་སྐུ་བརྙེས་པ་ཡིན་ཞིང་། འདི་ནི་འཕགས་ལམ་ཡན་ལག་བརྒྱད་ཀྱི་རང་བཞིན་སྒོམ་པའི་ལམ་གྱིས་དགུ་དེ་མན་ཆད་དུ་ལམ་རིགས་མི་འདྲ་བ་ཡོད་ཀྱང་། ས་བཅུ་རྒྱུན་ཐ་ནས་ལམ་འདི་འདྲ་ཁོ་ནས་རྫོགས་པའི་སངས་རྒྱས་ཀྱི་སར་བགྲོད་མཆོག་པའི་ཕྱིར་དང་། རྫོགས་པའི་སངས་རྒྱས་ཉིད་དང་རྣམ་པ་མཚུངས་པའི་ཕྱིར། སངས་རྒྱས་ཉིད་དང་། རྫོགས་པའི་སངས་རྒྱས་དང་། རྫོགས་པའི་བྱང་ཆུབ་དང་། རྡོ་རྗེ་སེམས་དཔའ་སོགས་ཀྱི་མཚན་ཡང་གསོལ་ལོ། །ས་བཅུ་རྒྱུན་ཐ་འདིར་ལུས་ངག་ཡིད་གསུམ་དང་འཛག་བདེའི་གཉིས་སྣང་བསྐྱེད་པའི་ཆོས་རྟེན་ཁུ་རྡུལ་རླུང་གསུམ་དང་། དེ་གསུམ་དང་རོ་གཅིག་ཏུ་འདྲེས་པའི་བརྟན་པ་སེམས་རྣམས་རགས་པ་བེམ་ཆོས་སུ་སྣང་བ་མེད་ཀྱང་། ཕྲ་བ་རྣམ་པར་ཤེས་པས་ཙམ་དུ་རིག་པ་ཡོད་པའི་ཕྱིར་གཉིས་སྣང་ཕྲ་མོའང་མ་འགགས་པས་དེ་སྦྱོང་བྱེད་ས་བཅུ་རྒྱུན་གྱི་མཐའ་མར་འདོད་ཆགས་ཆེན་པོའི་ལམ་གྱི་དབང་སྐུར་བས་ས་ལམ་རྫོགས་ཚུལ་གཅིག་བྱུང་བ་ནི། སྔར་གྱི་ས་ལམ་རྣམས་ཀྱིས་སེམས་ཉིད་ཀྱི་ཡོན་ཏན་རིལ་པོ་ཡོངས་སུ་རྫོགས་མ་ཐུབ་པས། བདེ་ཆེན་གྱི་ཡེ་ཤེས་དེ་ཡང་འགྱུར་བཅས་ཀྱི་ན་འཕར་བ་ཡིན་ལ། འདིར་མི་འགྱུར་བའི་བདེ་ཆེན་གྱི་ཡེ་ཤེས་མཐར་ཕྱིན་པའི་འགྲོས་ལ་ས་ལམ་རྫོགས་ཚུལ་དུ་བཞག་སྟེ། དེ་ཡང་མངོན་པར་བྱང་ཆུབ་པ་ཆེན་པོ་ཁུ་རྡུལ་རླུང་གསུམ་གྱི་བག་ཆགས་ཕྲ་མོ་ལྷག་མེད་དུ་འགགས་པས་འཛག་བདེའི་བག་ཆགས་ཀྱང་གཏན་ནས་སྤངས་ཏེ་སྐུ་གསུང་ཐུགས་ཡེ་ཤེས་རྡོ་རྗེ་དབྱེར་མི་ཕྱེད་པ་སྐུ་བཞིའི་བདག་ཉིད་ཅན་དུ་སངས་རྒྱས་པ་སྟེ། དེ་ཡང་སྙིང་སྟོབས་ཞུ་བ་དག་པས་མཚན་དཔེ་རྫོགས་ཤིང་ཁ་སྦྱོར་གྱི་སྐུ་ཞིང་དང་མཆོད་པར་བཅས་པ་བྱུང་བ་སྐུ་རྡོ་རྗེ། རྡུལ་ཏེ་དམར་ཆ་དག་པས་བདེ་ཆེན་ཉིད་གཞོམ་མེད་ཀྱི་གསུང་རྣམ་པར་ཐམས་ཅད་པར་འཆར་བ་གསུང་རྡོ་རྗེ། མུན་པ་སྟེ་རླུང་དག་པས་བདེ་བ་ཆེན་པོའི་ཡེ་ཤེས་དེ་ཁོ་ན་རྣམ་པར་མི་རྟོག་བཞིན་དུ་ཇི་ལྟ་ཇི་སྙེད་ཀྱི་ཆོས་ཐམས་ཅད་མཁྱེན་པ་ཐུགས་རྡོ་རྗེ། འགྱུར་བདེ་མྱོང་བའི་ཤེས་པའི་རིགས་རྒྱུན་དག་པས་སེམས་ཉིད་མི་འགྱུར་བའི་བདེ་ཆེན་དུ་གྱུར་པ་ནི་བདེ་བ་ཆེན་པོའི་སྐུ་ཡེ་ཤེས་རྡོ་རྗེའོ། །དེའི་ཚེ་སྦྲེལ་གྱི་ཡེ་ཤེས་རང་བཞིན་རྣམ་དག་མངོན་དུ་གྱུར་པའི་ཆ་ཆོས་ཀྱི་སྐུ་རྣམ་པ་ཐམས་ཅད་པ་དང་། དེ་གློ་བུར་རྣམ་དག་མཐར་ཐུག་པས་ཁྱད་པར་དུ་བྱས་པ་རླུང་དབུ་མར་ཐིམ་པའི་སྒྲ་དབྱངས་གསུང་ཆོས་སྒོ་སྣ་ཚོགས་པར་འཆར་བ་ལོངས་སྐུ་དང་། བདེ་ཆེན་གྱི་ཐིག་ལེ་འགྱུར་མེད་ནི་ངོ་བོ་སྐུ་ཡིན་ལ། དེ་སེམས་ཅན་ཐམས་ཅད་ལ་ཁྱབ་ཅིང་སྤྲོས་པའི་ཚུལ་གྱི་གཞན་གྱི་སྡུག་བསྔལ་སེལ་བར་བྱེད་པའི་ཐུགས་རྗེ་ནི་གང་འདུལ་གྱི་སྤྲུལ་སྐུ་མཐའ་མེད་པར་སྟོན་པར་མཛད་ཅིང་། དེ་ཡང་རྡུལ་གྱི་དྭངས་མ་གཙུག་ཏོར་ནས་ནོར་བུ་བར་ཆ་བཅུ་གཉིས་སུ་བརྟན་ནས་བདེན་རྣམ་པ་བཅུ་གཉིས་དང་། དཀར་ཆའི་དྭངས་མ་ནོར་བུ་ནས་སྤྱི་བོའི་བར་དགའ་བ་བཅུ་དྲུག་གི་རིམ་པས་བརྟན་པའི་ཕྱིར་དེ་ཉིད་རྣམ་པ་བཅུ་དྲུག་ཟུང་དུ་འཇུག་པའི་ངོ་བོ་སའི་ཡོན་ཏན། ཐུན་མོང་པ་མདོ་སྡེ་ལས་བྱུང་བ་ཟག་མེད་ཀྱི་ཡོན་ཏན་སྡེ་ཚན་ཉེར་གཅིག་སོགས་དང་། ཐུན་མོང་མ་ཡིན་པ་ཁ་སྦྱོར་ཡན་ལག་བདུན་ལྡན་ལ་སོགས་པ་མངའ་ཞིང་། ཡེ་ཤེས་རྒྱ་མཚོ་ཟད་མི་ཤེས་པ་དང་། ཕྲིན་ལས་ནམ་མཁའ་དང་མཉམ་པ་རྒྱ་ཆེ་རྒྱུན་ཆད་མེད་པར་ལྷུན་གྲུབ་པའི་བདག་ཉིད་མངོན་དུ་གྱུར་པའི་མཐར་ཐུག་པ་ན་མི་སློབ་པའི་ཟུང་འཇུག་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པའོ། །དྲི་བ་ལྔ་པ་དབང་བསྐུར་གྱི་ལྷ་དང་བྱིན་རླབས་ཀྱི་ལྷ་གཉིས་ཀ་རིགས་ལྔ་ཡིན་པར་བཤད་པ་ལས། ད་ལྟ་ཕྱག་ཆེན་དུ། བྱིན་རླབས་སྐུ་གསུང་ཐུགས་གསུམ་གྱི་བརླབས་པ་ལས་ཡོན་ཏན་ཕྲིན་ལས་གཉིས་ཀྱི་རློབས་པ་མི་མཛད་པའི་འདི་ཇི་ལྟར་ཡིན། ཞེས་པ་ལ། ཡོན་ཏན་ཕྲིན་ལས་ཀྱི་ལྷ་དེ་ཆོས་ཅན། ཁྱོད་ལྟེ་བའི་གཡས་གཡོན་དུ་ཟླ་བ་སྭཱ་སྔོན་པོ་དང་ཧཱ་ལྗང་གུའི་རྣམ་པར་རྒྱས་བཏབ་སྟེ་བྱིན་གྱིས་རློབས་མི་དགོས་པར་ཐལ། བྱིན་རླབས་ཀྱི་ལྷ་རྡོ་རྗེ་གསུམ་གྱི་ལྷ་དེ་ཡིན་པའི་ཕྱིར། འདོད་ན། དེ་ཆོས་ཅན། དེ་ལྟར་དགོས་པར་ཐལ། དགོས་པའི་རྒྱུ་མཚན་རྒྱུད་ན་བྱིན་རླབས་ཀྱི་སྔགས་ༀ་མ་ཧཱ་ཀཱ་ཡ་ནས། མ་ཧཱ་པཱུ་ཛ་བཛྲ་ཀྱི་བར་སྔགས་ལྔ་བཤད་པ་དང་། འགྲེལ་བར་སྤྱི་བོར་དུང་ཁང་དུ་ཟླ་བ་ༀ་དཀར་པོ། མགྲིན་པར་པདྨ་ལ་ཨཾ་དམར་པོ། ཐུགས་ཀར་ཙིཏྟའི་མདུན་དུ་ཉི་མ་ལ་ཧཱུྃ་སྔོན་པོ། ལྟེ་བའི་གཡས་གཡོན་དུ་ཟླ་བ་ལ་སྭཱ་སྔོན་པོ་དང་ཧཱ་ལྗང་གུའི་ཡི་གེ་ལྔ་ཡོངས་སུ་གྱུར་པ་ལས་རྡོ་རྗེ་ལྔའི་ལྷ་ལྔས་རྒྱས་བཏབ་པར་བཤད་པའི་ཕྱིར་ཏེ། ཐལ་རྒྱུད་ལས་ཀྱང་། གནས་གསུམ་ཁྱབ་འཇུག་ཡི་གེ་ལས། །འོད་ཟེར་འཕྲོ་བའི་ཚོགས་ཆེན་པོས། །ཁམས་གསུམ་བྱིན་རླབས་གཟི་བྱིན་བསྡུ། །རང་བཞིན་རྡོ་རྗེ་གསུམ་གནས་པ། །རྒྱུ་གཉིས་ཚུལ་གྱི་རང་སྣང་བའོ། །ལྟེ་བ་རྣམ་གཉིས་ཟླ་བ་ལ། །སྔོ་ལྗང་ཡི་གེ་སྭཱ་ཧཱ་གཉིས། །རྗེས་མཐུན་འོད་ཀྱི་ཡོན་ཏན་ལ། །ཡན་ལག་རྫོགས་པའི་གཟི་བྱིན་ལྡན། །ཞེས་གསུངས་པའི་ཕྱིར། ཡང་རིགས་ལྔ་ཀས་བྱིན་གྱིས་རློབས་དགོས་ཟེར། འོ་ན་བྱིན་ལྷ་ལྔ་དང་། དབང་ལྷ་ལྔ་གཅིག་ཏུ་ཁས་ལེན་པར་ཐལ། སྐུ་རྡོ་རྗེ་མི་བསྐྱོད་པ་དང་། མི་བསྐྱོད་པ་གཅིག་པ་གང་ཞིག །ཕྲིན་ལས་རྡོ་རྗེ་དོན་གྲུབ་དང་། དོན་གྲུབ་གཅིག་པའི་ཕྱིར་འདོད་ན། དབང་ལྷ་ལྔ་པོ་དེ་ཆོས་ཅན། ཁྱོད་ཚོགས་བརྒྱད་ཡེ་ཤེས་ལྔར་དག་པའི་རྟགས་ཀྱི་རིགས་ལྔ་དབུ་རྒྱན་བཅིངས་པ་མ་ཡིན་པར་ཐལ། ཁྱོད་ལྷ་ཐམས་ཅད་ལ་རྒྱས་འདེབས་པའི་ཁྱབ་བྱེད་རྡོ་རྗེ་ལྔའི་ལྷ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། དེ་ལྟར་ཡིན་པར་ཐལ། ཕུང་ལྔ་རིགས་ལྔར་དག་པའི་རྟགས་ཀྱི་ཁྱབ་བྱའི་ལྷ་ཡིན་པའི་ཕྱིར། ཡང་། བྱིན་ལྷ་དང་དབང་ལྷ་གཉིས་སྐུའི་ཆ་ལུགས་ཀྱང་གཅིག་ཏུ་ཡོད་པར་ཐལ། གཉིས་ཀ་རིགས་ལྔའི་ལྷ་ཡིན་པ་ལ་མཚུངས་པའི་ཕྱིར། འདོད་ན། མ་ཡིན་པར་ཐལ། བྱིན་ལྷ་ནི་རིགས་ལྔ་ལོངས་སྐུའི་ཆ་ལུགས་འཛིན་པ་ངེས་པར་དགོས་ཏེ། སྤྲུལ་སྐུ་ལས་ལོངས་སྐུ་རྒྱ་ཆེ་བའི་ཕྱིར། སྤྲུལ་སྐུའི་སྤྲུལ་གཞི་ཡང་ལོངས་སྐུ་ཡིན་པའི་ཕྱིར་དང་། དབང་ལྷ་ནི་ཆ་ལུགས་རིགས་ལྔ་སྤྲུལ་སྐུའི་ཆ་ལུགས་སུ་ཡོད་དེ། གཞི་གདོད་མའི་ལྷའི་ཡོན་ཏན་གྱི་ཆ་ཤས་ཡེ་ཤེས་ལྔའི་རྟགས་ཀྱི་ཅོད་པན་རིགས་ལྔས་དབུ་བརྒྱན་པར་བཤད་པའི་ཕྱིར། ཡང་རྩ་ལྷ་མི་བསྐྱོད་པས་བྱས་པའི་དཀྱིལ་འཁོར་གྱི་གཙོ་བོ་མི་བསྐྱོད་པ་དེ་ཆོས་ཅན། ཁྱོད་ཀྱི་སྙིང་ཁར་རང་འདྲའི་མི་བསྐྱོད་པ་གཅིག་དང་། བྱིན་རླབས་ཀྱི་ལྷ་མི་བསྐྱོད་པ་གཉིས། སྒོམ་པ་ཚེ་ཆད་མ་ཡིན་པར་ཐལ། མི་སྐྱོད་པ་ལ་མི་བསྐྱོད་པས་བྱིན་གྱིས་རླབས་པ་ཐུག་མེད་ཡིན་པའི་ཕྱིར། ཡང་སྟོན་པ་ཀུན་བཟང་ཆོས་ཅན། ཁྱེད་རིགས་ཐམས་ཅད་ཀྱི་བདག་པོ་མ་ཡིན་པར་ཐལ། ཁྱོད་ལ་སྐུ་གསུང་ཐུགས་ཀྱི་ལྷ ས་བྱིན་གྱིས་རློབས་དགོས་པའི་ཕྱིར། འདོད་མི་ནུས་ཏེ། འདི་ཉིད་ལས། སྐུ་དང་གསུང་དང་ཐུགས་རྡོ་རྗེའི་བདག་ཉིད། །ཅེས་གསུངས་པའི་ཕྱིར། ཡང་། སྟོན་པ་ཀུན་བཟང་ཆོས་ཅན། ཁྱོད་ལ་རིགས་ལྔས་དབང་བསྐུར་མི་དགོས་པར་ཐལ། ཁྱོད་རིགས་དྲུག་པའི་བདག་ཉིད་ཅན་དུ་གནས་པའི་ཕྱིར། འདོད་ན། ཐལ་རྒྱུད་ལས། མི་བསྐྱོད་བྱེད་པོ་ཡུམ་དང་བཅས། །རྡོ་རྗེ་འཛིན་པའི་ཕྱག་རྒྱར་བསྟན། །བྱམས་པ་ས་སྙིང་དེ་བཞིན་ཏེ། །གཞན་དག་རང་རང་ཕྱག་རྒྱར་ལྡན། །གཤིན་རྗེ་གཤེད་ལ་རྟག་པར་བཤད། །ཐུབ་ཆེན་རྡོ་རྗེ་འཛིན་བཅས་པ། །ཟླ་དང་བྲལ་བའི་དཔའ་བོ་ཆེ། །ཞེས་དང་འགལ་བའི་ཕྱིར་རོ། །ཐུབ་པ་དྲུག་ཆོས་ཅན། ཁྱོད་སྤྲུལ་པ་མ་ཡིན་པར་ཐལ། ཁྱོད་ལ་དབང་བསྐུར་བྱིན་རླབས་དགོས་པའི་ཕྱིར། མ་ཁྱབ་ན། དབང་སྐུར་བྱིན་རླབས་དགོས་པར་ཐལ། འདོད་ན། འོད་རིམ་ལས། ཐུབ་དྲུག་སྤྲུལ་རང་སྤྲུལ་པ་རང་བྱུང་ཕྱིར། བྱིན་རླབས་དབང་བསྐུར་མ་གསུངས་སོ། །ཞེས་བཤད་པ་མི་འཐད་པར་ཐལ། དེ་ལྟར་དགོས་པའི་ཕྱིར་ཡང་རྣལ་ལན་འོད་རིམ་གྱིས་ལུང་དོན་ཟླ་དང་བྲལ་བའི་དཔའ་བོ་ཆེ། །ཞེས་གསུང་པས་འཁྲུལ་གཞི་བྱས་པར་མངོན་ནོ། །དབང་བསྐུར་གྱི་སྐབས་དབང་བསྐུར་བ་པོའི་སློབ་དཔོན་ཡིན་ན། ངེས་པར་བདག་འཇུག་ལེན་དགོས་པའི་ཁྱབ་པར་ཐལ། འཇུག་པའི་ཆོས་དེ་ལ་སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དྲུག་བཤད་པའི་སློབ་དཔོན་འཇུག་པའི་ཆོས་གཉིས་པོ་དེ། དཀྱིལ་འཁོར་བཞེངས་སྒྲུབ་ཀྱི་ལས་རབ་འབྱམས་དང་། རིག་པའི་མེ་ཏོག་དོར་བ་ལ་སོགས་པའི་སྒོ་ནས་རང་ཉིད་དཀྱིལ་འཁོར་དུ་ཞུགས་ནས་སློབ་མ་དཀྱིལ་འཁོར་དུ་བཞུགས་པའི་སྣང་བ་ཆོས་གཉིས་པོ་དེ་ཡིན་པའི་ཕྱིར། འདོད་ན། སྟོན་པ་ཀུན་བཟང་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ་ཧ་ཅང་ཐལ་བའི་ཕྱིར། ཡང་མཚན་ཉིད་དང་ལྡན་པའི་སྔགས་ཀྱི་རྡོ་རྗེ་སློབ་དཔོན་ཚོགས་ལམ་པ་ལྟ་བུ་ཞིག་ཡིན་ན། ངེས་པར་བདག་འཇུག་ལེན་དགོས་པར་ཐལ། དེ་ལྟར་དགོས་པའི་ཕྱིར་ཏེ། འདི་ཉིད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་འཇུག་པར་བྱ། །ཞེས་བཤད་པའི་ཕྱིར། འདོད་ན། གསང་སྔགས་པ་མཚན་ཉིད་དང་ལྡན་པ་དེ་གང་ཞེ་ན། འདི་ལྟར་སྣང་གྲགས་ཀྱི་བསྡུས་པའི་སྣོད་ཀྱི་འཇིག་རྟེན་གཞལ་ཡས་ཁང་དང་། བཅུད་ཀྱི་སེམས་ཅན་ལྷ། གྲགས་པ་སྔགས། དྲན་རྟོག་ཆོས་ཉིད་དུ་ཤེས་པ་དེ་མཚན་ཉིད་དང་ལྡན་པའི་གསང་སྔགས་པ་ཡིན་པས། དེ་འདྲའི་འཕགས་ལམ་མ་ཐོབ་པའི་སྔགས་པ་དེ་ཆོས་ཅན། ཁྱོད་ཀྱི་སློབ་མ་ལ་དབང་བསྐུར་ཚེ། ངེས་པར་བདག་འཇུག་ལེན་དགོས་པར་ཐལ། ཁྱོད་དབང་བསྐུར་བ་པོའི་རྡོ་རྗེ་སློབ་དཔོན་ཡིན་པའི་ཕྱིར། འདོད་ན། དེ་ཆོས་ཅན། ཁྱེད་བསྐྱེད་རྫོགས་ཀྱི་ཏིང་ངེ་འཛིན་གྱི་ཡེ་ཤེས་ཀྱི་སྣང་བ་ལ་གནས་པའི་གང་ཟག་མ་ཡིན་པར་ཐལ། དགོངས་པ་དེ་ལས་ལྷག་པའི་བདག་འཇུག་ལེན་རྒྱུ་ཡོད་པའི་ཕྱིར། འདོད་ན་དེ་ལྟར་ཡིན་པར་ཐལ། སྣང་གྲགས་ལྷ་སྔགས་ཡེ་ཤེས་ཀྱི་དབང་དོན་ལ་གནས་པའི་གང་ཟག་ཡིན་པའི་ཕྱིར་ཏེ། འཇམ་དཔལ་སྒྱུ་དྲྭ་ལས། ཡེ་ཤེས་དབང་བསྐུར་ཅོད་པཎ་ཅན། །རྫོགས་པའི་སངས་རྒྱས་རྒྱན་དུ་ཐོགས། །ཞེས་དང་། ཡེ་ཤེས་རྔམས་པ་གློག་གི་འཁོར་ལོ་ལས། སེམས་ཀྱི་ཆོས་ལ་དབང་ཐོབ་ན། །རྫས་ཚིག་མཚན་མའི་དབང་རྣམས་ཀུན། །མ་བསྐུར་བར་ཡང་ཐོབ་པར་འགྱུར། །ཞེས་བཤད་པའི་ཕྱིར་རོ། །དེང་སང་ཕྱག་ལེན་ལ་བདག་འཇུག་ངེས་པར་ལེན་པ། དབང་བླངས་པས་དབང་གི་ཆུ་བོ་མ་ཉམས་པ་དེ་གོང་འཕེལ་དུ་སོང་ནས་དངོས་གྲུབ་ཐོབ་པའི་རྒྱུ་བྱེད་པ་དང་། དབང་བསྐུར་བའི་སྔོན་དུ་བདག་འཇུག་ལེན་པ་བླ་མ་རང་གི་མ་ཚོར་བའི་དམ་ཚིག་ཉམས་པ་སྲིད་པ་དེ་གསོ་བའི་ཆེད་ཡིན་པའི་ཕྱིར། ཡང་རྡོ་རྗེ་རྒྱལ་ཚབ་པས་དབང་རྫས་ཐོགས་ནས་དབང་བསྐུར་བའི་ཚེ་རྒྱལ་ཚབ་ལས་དབང་ཐོབ་པ་ཡིན་པར་ཐལ། དེས་དབང་བསྐུར་བའི་ཕྱིར། འདོད་ན། རྡོ་རྗེ་རྒྱལ་ཚབ་ཆོས་ཅན། ཁྱོད་དབང་གིས་རྒྱུད་པར་འཇུག་དགོས་པར་ཐལ། ཁྱེད་དབང་བསྐུར་བའི་སློབ་དཔོན་ཡིན་པའི་ཕྱིར། འདོད་ན་རྡོ་རྗེ་རྒྱལ་ཚབ་པ་ཆོས་ཅན། ཁྱེད་ཀྱི་དབང་རྫས་ཀྱི་བྱ་བ་བྱས་ཚེ་རྡོ་རྗེ་སློབ་དཔོན་གྱི་ཏིང་ངེ་འཛིན་གྱི་དགོས་པས་དབང་ཐོབ་པ་མ་ཡིན་པར་ཐལ། ཁྱོད་ལས་དབང་ཐོབ་པའི་ཕྱིར། འདོད་མི་ནུས་ཏེ། དཔེར་ན་ཕོ་ཉས་རྒྱལ་པོའི་ལུང་དང་བཀའ་རྟགས་ཁྱེར་ཏེ་འབངས་ཀྱི་ཚོགས་ལ་བསྒྲགས་པ་ན། ཕོ་ཉའི་ངག་དེ་རྒྱལ་པོའི་ངག་ཏུ་འཛིན་པ་དང་ཆོས་མཚུངས་པའི་ཕྱིར། དེ་ཙམ་གྱི་རྒྱལ་ཚབ་དབང་རྒྱུད་ལ་འཇུག་དགོས་ན། གསང་དབང་དང་ཤེས་དབང་གཉིས་ཀྱི་རིག་ཆ་དེ་ཆོས་ཅན། ཁྱོད་གཉིས་དབང་གི་བརྒྱུད་པར་འཇུག་པར་ཐལ། ཁྱེད་གཉིས་ཀྱི་བྱེད་ལས་ལ་བརྟེན་ནས་གསང་དབང་དང་ཤེར་དབང་གཉིས་ཐོབ་པའི་ཕྱིར་ཏེ། བདེ་བ་མྱུ་གུའི་རྒྱུད་ལས། ཕྱོགས་བཅུའི་རྒྱལ་བ་སྲས་བཅས་ཀྱིས། །མཁའ་མཉམ་ཡེ་ཤེས་བདུད་རྩི་ནི། །རྡོ་རྗེའི་ལམ་ནས་རབ་བསྡུས་ནས། །བདེ་བ་བསྐྱེད་བྱེད་རིགས་ཀྱི་ཡུམ། །སྲས་རྣམས་གསང་བའི་དབང་བསྐུར་བས། །རྡོ་རྗེའི་བླ་མ་གཉིས་པའོ། །ཞེས་དང་། ཡེ་ཤེས་འབྱུང་བ་ལས། ལྷན་ཅིག་སྐྱེས་པ་བདེ་བྲལ་བ། །ནམ་མཁའ་དང་ནི་མཉམ་པར་སྦྱོར། །རིགས་མཉམ་དཔེ་མེད་བདེ་སྟེར་མ། །སྲིང་མོ་དེ་ཉིད་བླ་མར་བསྔགས། །ཞེས་བཤད་པའི་ཕྱིར་རོ། །དྲི་བ་ལྔ་པ་ལེའུ་བཞི་པ་ལ། འཕྲོས་དོན་ཞིག་བཀོད་ནས་དེའི་ཁོངས་ནས་རྟོགས་པར་བྱའོ། །དེ་ལ་ཕྱོགས་བཅུ་དུས་བཞིར་གཤེགས་པ་ཡིས་སོགས་ནས་ཡི་གེ་མགོ་ནས་ཀཱ་ལ་རྫོགས། ཞེས་པའི་བར་གྱི་གཞུང་འདི། ཀུན་འདུས་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་རྣམས་མ་ལུས་འཕྲོ། །ཞེས་བའི་གཞུང་འདི་ལ་འཕྲོས་པར་ཐལ། རྒྱུ་མཚན་ཕྱོགས་བཅུ་དུས་བཞིའི་དེ་རྒྱལ་བ་ཐམས་ཅད་ཀྱི་ཆོས་སྐུའི་རོལ་པ་གཟུགས་སྐུའི་དཀྱིལ་འཁོར་ཇི་སྙེད་པ་ཐམས་ཅད་མཚོན་བྱེད་ཀྱི་རྩ་བ་ཡི་གེ་བཞི་ཅུ་རྩ་ལྔའི་རྣམ་བཞག་དེ་བསྟན་ནས། ཡི་གེ་དེ་ཉིད་ཇི་ལྟར་བྱུང་བའི་ཚུལ་དེ་སྟོན་པར་བྱེད་པ་ལ། དབྱིངས་ལས་ཨ་བྱུང་ཞེས་སོགས་ཀྱི་གཞུང་འདི་བྱུང་བ་གང་ཞིག །དེ་ལྟར་སྐུ་གསུང་ཐུགས་ཀྱི་ཀློང་ལས་ཨ་སྐྱེ་བ་མེད་པ་བྱུང་བའི་ཨ་ཡིག་དེའི་འོད་ཟེར་སྐུའི་གནས་སོ་སོར་འཁྱིལ་བ་དེ་དང་དེ་ལས་ཡི་གེ་གཞན་རྣམས་བྱུང་བ་ཡིན་ནོ། །ཞེས་སྟོན་པར་བྱེད་པ་ལ། འགྲེལ་ཆུང་ལས། ཨ་ལས་འོད་ཟེར་མགུལ་གྱི་བུམ་པར་འཁྱིལ། །འོད་འཕྲོས་ཀ་ལ་སོགས་པ་འབྲུ་ལྔ་ཤར། །ཞེས་པ་འདི་བྱུང་བའི་ཕྱིར་དེ་ལྟར་འཕྲོས་པ་འདོད་ན། ཡི་གེ་བཞི་བཅུ་རྩ་ལྔ་དེ་ཆོས་ཅན། ཁྱོད་སྟོན་པའི་སྐུའི་གནས་དེ་དག་ལས་བྱུང་བ་མ་ཡིན་པར་ཐལ། ཁྱོད་འབྱུང་བའི་གནས་གཞན་ཡོད་པའི་ཕྱིར་མ་གྲུབ་ན། དེ་ལྟར་ཡོད་པར་ཐལ། སྨྲ་སྒོ་ལས། ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །ཞེས་བཤད་པའི་ཕྱིར། ཡང་འབྲུ་ལྔར་ཤར་བའི་ཡི་གེ་དེ་ཆོས་ཅན། ཁྱོད་ངོས་འཛིན་མི་རིག་པར་ཐལ། རེ་རེ་ནས་བགྲང་དུ་མེད་པའི་ཕྱིར། རང་ལུགས་འདྲེན་པ་ཀ་སྡེ་དང་། ཙ་སྡེ་སོགས་སོ། །ཡང་གོང་དུ་སྐུའི་གནས་ལས་མ་བྱུང་ཟེར་ན། སྟོན་པ་ཆོས་ཅན། ཁྱེད་ཀྱི་སྐུའི་གནས་ལས་བྱུང་བར་ཐལ། ཁྱོད་ཀྱི་སྐུའི་གནས་ཉི་ཤུ་ལས་བྱུང་བའི་ཕྱིར་ཏེ། འགྲེལ་ཆུང་ལས། བྱིན་པ་སྟ་ཟུར་སྐུ་སྐབས་དང་། །དཔུང་ལས་ཡ་ར་ཝ་ལ་བྱུང་། །ཕྱག་མཐིལ་ཐུགས་ཀ་མཛོད་སྤུ་དང་། །ཞབས་མཐིལ་གསང་གནས་ལས་རིམ་བཞིན། །ཤ་བྷ་པ་ཧཱ་ཀྵ་རྣམས་འཕྲོས། །སྤྱན་སྙན་ཚེམས་ཤངས་རྣམ་བཞི་ལས། །གཉིས་གཉིས་འཕྲོས་པས་ཨི་ཨཱི་དང་། །ཨུ་ཨཱུ་ཨེ་ཨཻ་ཨོ་ཨཱ། སྤྱི་གཙུག་འཚོག་མ་ལྟེ་བ་ཡིས། །གནས་ལས་མགོ་ཤད་རིག་གསུམ་ཐོན། །ཞེས་བཤད་པའི་ཕྱིར་རོ། །འོ་ན་སྤྱིར་བཏང་ཡི་གེ་ལྔ་བཅུ་ཐམ་པ་ལ་འདིར་བཞི་བཅུ་རྩ་ལྔ་ལས་མ་བྱུང་བས་ཡི་གེ་ཡོངས་རྫོགས་མ་ཚངས་བའི་སྐྱོན་གནས་སོ་ཞེ་ན། སྐྱོན་མེད་དེ། ཨ་རིང་པོ་ཤད་དུ་བསྡུས་ཨཿརྣམ་བཅད་ཚེག་ཏུ་བསྡུས། ཨཾ་སྣ་དང་ལྡན་པ་ཨེ་ལ་སྦྱར་ནས་ༀ་དུ་བསྡུས། མ་ནིང་གི་ཡི་གེ་བཞི་པོ་ར་དང་ལར་བསྡུས་པའོ། །ཡང་འདི་ཉིད་ལས། མགོ་ནི་མ་ནོར་ལམ་ཡིན་པས། །ཞེས་བཤད་པས། ཡི་གེ་ལམ་དེ་ཆོས་ཅན། ཁྱོད་ཡི་གེའི་མགོ་ཡིན་པར་ཐལ། དེ་ལས་གཞན་པའི་སྨྲ་རྒྱུ་གཞན་མེད་པའི་ཕྱིར། འདོད་ན། ཡི་གེའི་མགོ་ཆོས་ཅན། ཁྱོད་བེར་ག་རིས་ལ་བཤད་པ་མི་འཐད་པར་ཐལ། ལམ་ཡིག་དེ་ཡི་གེའི་མགོ་ཡིན་པའི་ཕྱིར། །འདོད་ན། དཔལ་སྦྱིན་གྱིས་ཞུས་པའི་མདོ་ལས། མགོ་ནི་ཐོག་མར་མཚོན་པ་སྟེ། །དངས་ལ་གཟུགས་སུ་གང་གནས་པས། །དེ་ནི་ཡི་གེའི་མགོ་ཡིན་ཏེ། །བེར་ཀ་རིས་ལ་མགོ་ཞེས་བྱ། །ཞེས་བཤད་པས་སོ། །ཡང་བེར་ཀ་རི་དང་ལམ་གཉིས་གཅིག་གོ། །ཞེ་ན། འོ་ན་ཡི་གེ་ལམ་དེ་ཆོས་ཅན། ཁྱོད་གླང་པོ་ཆེའི་སྣ་འདྲ་བར་ཡོད་པར་ཐལ། ཡི་གེའི་དབྱིབས་བརྗོད་སྐབས། མགོ་ནི་ཨི་གླང་པོའི་སྣ་འདྲ་བར། ཤད་དེ་ཨ་རིང་པོ་མདའ་ལྟ་བུ། ཚེས་ཏེ་ཨཿརྣམ་བཅད། དབང་ཕྱུག་ཆེན་པོའི་མིག་ལྟ་བུ་ཞེས་བཤད་པའི་ཕྱིར། གཞན་ཡང་དེ་ལྟར་མ་ཡིན་པར་ཐལ། ཡི་གེའི་ཐིག་དེ་མགོ་ཡིན་པར་ཁས་ལེན་རིགས་པའི་ཕྱིར། མ་གྲུབ་ན་ཐིག་དེ་ཆོས་ཅན་ཁྱོད་ཡི་གེའི་མགོ་ཡིན་པར་ཐལ། དེ་ཡིན་ཚུལ་སྟོན་པར་བྱེད་པ་ནི། གཟུགས་ཅན་སྙིང་པོས་ཞུས་པའི་མདོ་ལས། ཡི་གེའི་མགོ་ནི་ཐིག་ཡིན་པས། །ཡི་གེ་བཞི་བཅུ་རྩ་གཉིས་རྣམས། །མ་ནོར་དམ་པའི་ཐིག་ཡིན་པས། །ལམ་མཁན་ཐིག་ནས་ཡི་གེར་ཞུགས། །ཞེས་བཤད་པའི་ཕྱིར། ཡང་། ཏིག་ནི་ཤེས་རབ་མིང་དུ་སྨྲ། །ཡི་གེ་ཏིག་དེ་ཤེས་རབ་ཀྱི་མིང་ཡིན་པར་ཐལ། དེ་ལྟར་བཤད་པའི་ཕྱིར། འདོད་ན། ཡི་གེ་ཏིག་དེ་ཆོས་ཅན། ཁྱོད་ཤེས་རབ་ཀྱི་མིང་ཡིན་པར་ཐལ། དེ་ལྟར་བཤད་པའི་ཕྱིར། འདོད་ན། ཡི་གེ་ཏིག་དེ་ཆོས་ཅན། ཁྱོད་ཤེས་རབ་ཀྱི་མིང་མ་ཡིན་པར་ཐལ། ཚེག་ལ་ཏིག་ཅེས་བཤད་པའི་ཕྱིར་ཏེ། ཡོ་ག་རྒྱན་དམ་པ་ལས། བསྡུད་པའི་ཕྱིར་ན་ཚེག་ནི་ཏིག །འཐོར་བ་བསྡུས་ནས་མིང་དུ་སྨྲ། །ཞེས་དང་། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས་ཀྱང་། ཏིག་ནི་ཚེག་ཏུ་སྒྲུབ་པ་སྟེ། །ཡི་གེ་བསྡུས་ནས་མིང་དུ་སྨྲ། །དེ་ཕྱིར་ཚེག་ནི་ཏིག་ཅེས་བྱ། །ཞེས་དང་། ཤད་ནི་ཚིགས་སུ་བཅད་པའི་ཡི་གེ་སྟེ། སྤྱི་མདོར། གཅོད་པ་མཚོན་པར་བྱེད་པའི་ཡི་གེ་ལ་ནི་མིང་དབྱུག་པ་ཞེས་བླ་དྭགས་སུ་གཏགས་སོ། །ཞེས་དང་། དཔལ་སྦྱིན་གྱིས་ཞུས་པའི་མདོ་ལས། ཚིགས་སུ་བཅད་པའི་ལས་ཅན་ལ། །དེ་ཕྱིར་བཤད་དུ་གྲགས་སོ་ཞེས། །ཅེས་གསུངས། གཞན་ཡང་སེམས་ཀྱི་རང་བཞིན་ཆོས་ཅན། ཁྱོད་ཡི་གེ་རྣམ་པར་གནས་པར་ཐལ། ཁྱོད་ཡི་གེ་ཨའི་རྣམ་པར་གནས་པའི་ཕྱིར། འདོད་ན། ཡི་གེའི་རྣམ་པར་གནས་པ་མ་ཡིན་པར་ཐལ། མིང་ཚིག་ཡི་གེ་ལ་འདས་པའི་ཆོས་ཡིན་པའི་ཕྱིར། གཞན་ཡང་། ཨ་ཆོས་ཅན། ཁྱོད་སྐྱེ་མེད་མཚོན་བྱེད་ཀྱི་ཡི་གེ་མ་ཡིན་པར་ཐལ། ཁྱོད་མཚོན་བྱ་སྐྱེ་མེད་ཀྱི་ངོ་བོ་ཡིན་པའི་ཕྱིར། མ་གྲུབ་ན། དེ་ཐལ། དེ་ལྟར་ཡིན་ཚུལ། ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཞེས་པ་དང་། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་ཨ་ཞེས་པའི་མིང་བླ་དྭགས་སུ་བཏགས་སོ། །ཞེས་གསུངས་པའི། གཞན་ཡང་བཞི་བཅུ་རྩ་གཉིས་སུ་སྣང་བའི་ཕྱག་རྒྱའི་ལྷ་དེ་དང་། ཡི་གེའི་ཕྱག་རྒྱར་སྣང་བའི་ལྷ་བཞི་བཅུ་རྩ་གཉིས་པོ་གཅིག་ཏུ་ཁས་ལེན་མི་རིགས་པར་ཐལ། འདོད་ན། འདི་ཉིད་ལས། ཐམས་ཅད་མིང་ཙམ་སངས་རྒྱས་ཀུན། །ཡི་གེ་འཕྲེང་བ་ཉིད་ལ་གནས། །ཞེས་པ་དང་འགལ་ལོ། །དེ་དག་གི་རྣལ་ལན་ནི། མགོ་ནི་མ་ནོར་ལམ་ཞེས་པའི་དོན། གཟུགས་དབྱིབས་དོན་མ་ཡིན་ཡི་གེ་ཐམས་ཅད་ཀྱི་མགོ་འདྲེན་ཅིང་འཇུག་པའི་སྒོར་གྱུར་པས་ལམ་དང་འདྲ་བ་ཡིན་པའི་དོན་དང་ཐིག་ཡིན་པའི་དོན་ཡང་། བརྗོད་བྱའི་དོན་ཡང་དག་པ་དྲང་པོར་མཚོན་བྱེད་ཐིག་ཡིན་པར་ཡང་བཤད་པས་ཐིག་དང་ལམ་དོན་གཅིག་པར་བཤད་པ་སྟེ། གཟུགས་ཅན་སྙིང་པོས་ཞུས་པའི་མདོ་ལས། ཡི་གེ་བཞི་བཅུ་རྩ་གཉིས་ལམ། །མ་ནོར་དམ་པ་ཐིག་ཡིན་པས། །རྐང་ལམ་མཐིལ་ནས་ཡི་གེར་ཞུགས། །ཡི་གེ་མགོ་ནི་ཐིག་ཅེས་བྱ། །ཞེས་སོ། །བེ་ཀ་རི་ཞེས་པ། སྐྱེ་མེད་མཚོན་བྱེད་ཨའི་ཡན་ལག་གི་དང་པོ་དབྱིངས་བེར་ཀ་རིས་ལ་བཤད་དོ། །ཡི་གེ་ཐམས་ཅད་མཚོན་བྱེད་ཀྱི་ལྷ་ཡིན་པ་དང་། ཕྱག་རྒྱའི་ལྷ་དེ་ཡང་མཚོན་བྱེད་ཀྱི་ལྷ་ཡིན་ཏེ། ཆོས་ཉིད་དེ་བཞིན་ཉིད་ཀྱི་ལྷ་དེ་ཞལ་ཕྱག་ལས་འདས་མོད་ཀྱང་། ཆོས་ཉིད་ཀྱི་ཡོན་ཏན་ཞལ་ཕྱག་དང་མཚན་མས་མཚོན་ནས་རྟོགས་དགོས་པའི་ཕྱིར་རོ། །ཡི་གེའི་དོན་དཔེར་ན་རྡུལ་འདུས་པ་ནི་གོང་བུ་ཡིན་ལ། དེ་བས་ན་རྡུལ་ཕྲན་ནི་གོང་བུ་འཛིན་པའི་གནས་ཡིན་པ་བཞིན་དུ། མིང་གི་མཐར་ཐུག་གི་ནི་མིང་གི་མཐའི་ཡི་གེ་ཡིན་ལ། མིང་མཐའི་ཡི་གེ་འདུས་པ་ལས་དབྱངས་ཡིག་གཅིག་གིས་བཅིངས་པའི་ཡི་གེ་འགྲུབ་བོ། །དེ་འདུས་པ་ལས་ཀ་བ་དང་བུམ་པ་སོགས་དངོས་པོ་རྣམས་ཀྱི་མིང་འགྲུབ། དེ་གྲུབ་པས་ཚིག་གི་ཚོགས་མ་ལུས་པ་འགྲུབ་པ་སྟེ། དེའི་ཕྱིར་ཡི་གེ་ནི་ཚིག་མ་ལུས་པ་འཛིན་པའི་གནས་སོ། །ཡི་གེ་རང་བཞིན་སེམས་ཉིད་སྤྲོས་པ་དང་བྲལ་བ་ཡིན་མོད་ཀྱང་། འཕྲུལ་པ་ཙམ་དབྱིབས་དང་ཁ་དོག་དང་མིང་གི་སྒོ་ནས་སངས་རྒྱས་ཀྱི་མཛད་པ་སྒྲུབ་པར་བྱེད་དོ། །འདི་ཉིད་ལས། དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ལས། །རོལ་པ་ཅིར་ཡང་སྤྲུལ་ཅིང་སྟོན། །ཞེས་སོ། །དེ་ཡང་ཡི་གེ་ཉིད་ལྷ་ཡིན་པའི་ཚུལ་ནི། འདི་ཉིད་ལས། ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་དང་། འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། ཞེས་པ་དང་། དེ་བཞིན་གཤེགས་པ་ཐམས་ཅད་ཡི་གེའི་འཁོར་ལོར་གྱུར་ཏེ། ཞེས་གསུངས་པའི་ཕྱིར་རོ། །དྲི་བ་དྲུག་པ་ལེའུ་བཅོ་ལྔ་པའི་སྐོར་ལ། འཕྲོས་དོན་ཞིག་སྨོས་ནས་བརྗོད་པར་བྱ་སྟེ། དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲ་བ་ལས། འཇིག་རྟེན་དྲུག་གི་ཕྱོགས་ཆའི་སྲིད་པ་གསུམ་གྱི་བདག་པོ་འདུལ་བའི་ང་རྒྱལ་ཆེན་པོའི་གཟི་བརྗིད་སྟོན་པའི་ཕྱིར། ཞེས་སོགས་ཀྱི་གཞུང་འདི། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ཁྲོ་བོའི་དཀྱིལ་འཁོར་མངོན་པར་འདུ་མཛད་དོ། །ཞེས་པའི་གཞུང་འདི་ལས་འཕྲོས་པར་ཐལ། རྒྱུ་མཚན་རིགས་དྲུག་པ་ཀུན་ཏུ་བཟང་པོ་དེ་ཉིད་གདུལ་བྱ་གདུག་པ་ཅན་རྣམས་ཀྱི་སྣང་ངོར་སྔོན་བྱུང་ཁྲོ་བོའི་གླེང་གཞི་སྟོན་པ་ཕུན་སུམ་ཚོགས་པའི་རྣམ་དག་དེ་བསྟན་ནས། རྨད་དུ་བྱུང་བའི་ཆོས་ཕུན་སུམ་ཚོགས་པ་ཕོ་རྣམས་བསྒྲལ་བའི་ལས་ཀྱི་འདུལ་བ་དང་། མོ་རྣམས་སྦྱོར་བའི་ལས་ཀྱི་འདུལ་བའི་ཕྲིན་ལས་ཕུན་སུམ་ཚོགས་པ་ངེས་པར་སྟོན་པར་བྱེད་པ་ནི། དེ་ནས་དེ་བཞིན་གཤེགས་པ་ཆེ་བའི་ཞེས་སོགས་ཀྱི་གཞུང་དེ་བྱུང་བ་གང་ཞིག །འཁོར་ཕུན་སུམ་ཚོགས་པ་དེ་ལ་གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས་ཡོད་པ་ལས། དང་པོ་དེ་སྟོན་པར་བྱེད་པ་ནི། དེ་ཅིའི་ཕྱིར་ན། བདག་ཏུ་རྨོངས་པའི་རྟོག་པ་དང་། །ཞེས་སོགས་དང་། གཉིས་པ་དེ་སྟོན་པར་བྱེད་པ་ནི་ལ་ལ་ནི་དཔལ་ཁྲག་འཐུང་ཆེན་པོ་རྡོ་རྗེར་གྱུར་ཏེ་ཤར་ཕྱོགས་སུ་བཞུགས་སོ། །ཞེས་སོགས་གཞུང་འདི་བྱུང་བའི་ཕྱིར། དེ་ལྟར་འཕྲོས་པ་འདོད་ན། རུ་ཏྲ་དེ་སྔོན་བསྐལ་པ་ཀུན་བཀོད་ཀྱི་དུས་སུ་དགེ་སློང་ཐུབ་དཀའ་གཞོན་ནུ་བསྟེན་ནས། ཅི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་དུ། །འདི་ནི་རྣལ་འབྱོར་དམ་པའི་ལམ། །ཞེས་པ་སྒྲ་ཅི་བཞིན་པར་སྤྱད་པས་གོལ་ཏེ་ལས་ཀྱི་རུ་ཏྲར་སྐྱེས་པར་ཐལ། ལྟ་བའི་གནས་ལུགས་མ་རྟོགས་པར་དེ་ལྟར་སྤྱད་པས་གོལ་བའི་ཕྱིར་ཏེ། ལུང་ལས། མ་རྟོགས་པ་ཡི་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །རུ་ཏྲ་དེ་ཆོས་ཅན། ཁྱོད་ཀྱི་གབ་པའི་གསང་བ་ལྟ་བ་གནས་ལུགས་དེ་བཞིན་ཉིད་མ་རྟོགས་པར། སྦས་པ་གསང་བ་སྤྱོད་པ་སྦྱོར་སྒྲོལ་བྱོལ་ཉོག་ཏུ་སྤྱད་པའི་རྣམ་སྨིན་གྱི་འབྲས་བུ་དམྱལ་བ་དང་ཡི་དྭགས་སུ་སྐྱེས་ནས་བསྐལ་པ་ཆེན་པོ་སྟོང་ཕྲག་བཅུ་གཉིས་དང་བསྐལ་ཆེན་དྲུག་གི་བར་དུ་དམྱལ་བ་ཚ་གྲང་དང་ཡི་དྭགས་བཀྲེས་སྐོམ་གྱི་སྡུག་བསྔལ་ཉམས་སུ་མྱོང་བར་ཐལ། དེ་ལྟར་གཞུང་ལས་བཤད་པའི་ཕྱིར། དེ་ལྟར་བཤད་པ་ཚུལ་བསྟན་ཡིན་གྱི་དངོས་སུ་མ་མྱོང་ཟེར་ན། འོ་ན་རུ་ཏྲ་ཐར་པ་ནག་པོ་དེ་སྔོན་གྱི་དུས་སུ་གསང་སྔགས་རང་གར་སྤྱད་དེ། ཁྲོ་བོ་དང་ཕྲ་མེན་ལ་སོགས་པའི་ལྷ་རང་རྒྱུད་དུ་བསྒོམས། ར་ལ་ར་ལ་སོགས་པའི་སྔགས་རང་གར་བཟླས། ཕོ་བསྒྲལ་མོ་སྦྱོར་གྱི་ལས་རླང་པོར་སྤྱད་པའི་སྲིད་པས་མཚམས་སྦྱར་ནས། ཡུལ་ལངྐ་པུ་རང་གི་སྨད་ཚོང་མའི་མངལ་དུ་ཆགས་པ་ལས། མངལ་ནས་སྐྱེས་ནས་ཞག་བདུན་ལོན་པ་དང་མ་དེ་ཤི་བས་ཡུལ་མི་རྣམས་ཀྱིས་བུ་དེ་མའི་རོའི་མཆན་དུ་བཅུག་ནས་དུག་ཤིང་ནལ་བའི་རྩར་སྐྱལ་བས། བུ་དེས་མའི་ནུ་ཞོ་དང་ཤ་དང་ཁྲག་དང་རུས་པའི་བར་དུ་ཟོས་པས་ཁོ་ཆེར་བལྟས་ནས་དུར་ཁྲོད་ཀྱི་རོ་རྣམས་ཟས་སུ་ཟ་ཞིང་རོ་གོས་རྣམས་གོས་སུ་གྱོན་པས་ཡི་དྭགས་འགྲོ་བས་བསྡུས་པའི་ལུས་དང་ཡན་ལག་མི་མཚམས་པར་མཚོན་ཆ་སྣ་ཚོགས་འཛིན་པ། གསོད་བྱེད་ཀྱི་འཁོར་དྲེད་མོ་ལག་བསྡེབས་དང་། འཕར་བ་རྐང་བསྡེབས་དང་། བྱ་སྤྱང་གསོད་བྱེད་ལ་སོགས་པའི་འཁོར་དང་ལྡན་ཞིང་བཞི་བརྒྱ་རྩ་བཞིའི་ནད་བཏང་བའི་སྲིན་པོ་བྱའི་གཤོག་པ་ཅན་ཡིན་པར་ཐལ། དེ་ལྟར་ཡིན་ཚུལ་གཞུང་ལས་བཤད་པའི་ཕྱིར། མ་གྲུབ་ན། གཞུང་ལས། དེ་ནས་སྔོན་གྱི་ལས་ཀྱི་སྒྲིབ་པ་རྩུབ་མོད་ཀྱང་དེ་ཁད་ཀྱིས་བསྲབས་པ་དང་། ཞེས་སོགས་དང་འགལ་ལོ། །དེ་དག་ཐམས་ཅད་སྤྲུལ་བཤད་ཡིན་ཟིན་ན། འོ་ན། འདི་དང་ཆ་འདྲ་བའི་རུ་ཏྲ་རང་རྒྱུད་གཅིག་ཁས་ལེན་རིགས་པར་ཐལ། འགྲེལ་པ་ལུང་བསྟན་མ་ལས། དེ་བཞིན་གཤེགས་པ་ཉིད་ཀྱི་ཚུལ་དུ་བསྟན་པ་རིག་པ་བྱ་སྟེ། དེ་ལ་དགོས་པ་དང་དགོངས་པ་ཅི་ཡོད་ཅེ་ན། རང་རྒྱུད་པའི་གོལ་ས་དགག་པ་དང་། ཆེ་བའི་མཐུའི་ཚད་བསྟན་པའི་དགོས་པ་དང་། ཞེས་སོགས་གསུངས་པའི་ཕྱིར། འདོད་ན། རུ་ཏྲ་རང་རྒྱུད་པ་དེ་དམྱལ་བ་དང་ཡི་དྭགས་ཀྱི་ལས་མྱོང་སྟོབས་ཀྱི་ཟད་པར་ཐལ། དེ་ནས་རྣམ་པར་སྨིན་པ་དེ་ཁད་ཀྱིས་སྲབ་པ་དང་ཞེས་བཤད་པའི་ཕྱིར། འདོད་ན། རྣམ་སྨིན་སྤྱད་པས་ཟད་དམ། གཉེན་པོས་ཟད། དང་པོ་ལྟར་ན། ཡང་དག་པའི་ལམ་དགོས་མེད་དུ་ཐལ། རྣམ་སྨིན་སྤྱད་པས་ཟད་པའི་ཕྱིར། འདོད་མི་ནུས་ཏེ། འདི་ཉིད་ལས། ཐོས་བསམ་སྒོམ་པའི་མཉམ་སྦྱོར་གྱི། །རང་བྱུང་ཀུན་བཟང་ལྷུན་གྱི་གྲུབ། །ཞེས་སོ། །གཉེན་པོ་བརྟེན་པས་ཟད་ན། ངན་སོང་གསུམ་མི་ཁོམ་པའི་གནས་མ་ཡིན་པར་ཐལ། གཉེན་པོ་བརྟེན་དུ་འདུག་པའི་ཕྱིར། གཞན་ཡང་དཔལ་ཆེན་པོས་རུ་ཏྲ་དངོས་སུ་བསྒྲལ་བ་ཡིན་པར་ཐལ། འདིར་བཤད་པ་ནི་སྤྲུལ་པ་བ་ཡིན་ཅིང་། གཞན་གང་དུ་རུ་ཏྲ་དངོས་སུ་མ་བཤད་པའི་ཕྱིར། འདོད་མི་ནུས་ཏེ། ལུང་ལས། མ་ཏྲཾ་རུ་ཏྲ་བསྒྲལ་བའི་རྫས་བརྒྱད་ལས། །གསང་སྔགས་འབྱོན་པའི་གནས་བརྒྱད་བྱིན་གྱིས་རློབས། །ཞེས་དང་། བཀའ་བརྒྱད་བདེར་འདུས་ལས། མ་ཏྲཾ་བྱ་བའི་སྡིག་ཅན་ཁྱོད། །སྔོན་ཚེ་དཔལ་ཆེན་ཧེ་རུ་ཀས། །བསྒྲལ་ནས་དུར་ཁྲོད་ཆེན་པོར་བྱས། །ཞེས་སོགས་ལུང་དུ་མ་དང་འགལ་བའི་ཕྱིར། གཞན་ཡང་། དཔལ་ཆེན་པོ་ཆོས་ཅན། ཁྱོད་ཀྱིས་རུ་ཏྲ་དངོས་སུ་བསྒྲལ་བ་ཡིན་པར་ཐལ། ཁྱོད་ཀྱིས་ཡབ་ཡུམ་སྙོམས་པར་སྦྱོར་བའི་སེམས་སྤྲིན་ལས་ཁྲོ་ཚོགས་སྤྲོ་བསྡུའི་སྦྱོར་བས་རུ་ཏྲ་རྣམས་དངོས་སུ་ཞབས་འོག་ཏུ་མནན་པའི་ཕྱིར། མ་གྲུབ་ན། དེ་ཆོས་ཅན། དེ་ལྟར་ཡིན་པར་ཐལ། ཁྱོད་ཀྱི་ཞབས་འོག་ཏུ་མནན་པས་ད་དུང་དགྲ་ཟླར་མཐོང་སྟེ། ཁྲོས་པའི་གཏུམ་ཚིག་སྨྲས་པས། ལུས་ངག་ཡིད་གསུམ་སྐུ་གསུང་ཐུགས་སུ་བསྡུད་པའི་ཧཱུྃ་གསུམ་གྱི་རྔམས་སྒྲ་དང་། དུག་གསུམ་ཞལ་དུ་གསོལ་བའི་སྲོག་དབུགས་ལ་རྔམས་པའི་ཕྱིར་ཧ་གསུམ་གྱི་བཞད་སྒྲ་དང་། ཤ་ཁྲག་རུས་གསུམ་ལྷག་མ་མ་ལུས་པར་ཞལ་དུ་ཁཱ་ཧི་གསུམ་གྱི་དགྱེས་སྒྲ་བཅས་ཏེ། བདག་འཛིན་རྩད་ནས་གཅོད་ཕྱིར་སྙིང་ཕྱུངས། ཡུལ་འཛིན་གྱི་སྒོ་དགག་ཕྱིར་དབང་པོ། །མངོན་ཞེས་དགག་ཕྱིར་ནང་ཁྲོལ་ཀུན་དྲངས། ལས་ངན་གྱི་བག་ཆགས་གཅོད་ཕྱིར་ཡན་ལག་ཀུན་བཅད་གཏུབས་ནས་གཏི་མུག་ཤ་ཀུན་ཟོས། འདོད་ཆགས་ཁྲག་ཀུན་འཐུང་། ཞེ་སྡང་རུས་པ་ཀུན་འཆོས་ནས་ཕུང་པོ་ལྷག་མ་མ་ལུས་པ་ཞལ་དུ་བསྟབ་ནས་བསྒྲལ་བ་ཡིན་པའི་ཕྱིར། ཡང་གོང་དུ་ཐར་པ་ནག་པོ་ལམ་གོལ་ནས་ལས་ཀྱི་རུ་ཏྲར་སྐྱེས་པ་དེ། སྔོན་བསྐལ་པ་ཀུན་བཀོད་ཀྱི་དུས་སུ་དགེ་སློང་ཐུབ་དཀའ་གཞོན་ནུ་བསྟེན་པའི་སྟོབས་ཀྱིས། ཐུབ་དཀའ་གཞོན་ནུ་དེ་རྡོ་རྗེ་སེམས་པར་སངས་རྒྱས་པ་དང་། མཆེད་དན་འཕག་ས་བཅུའི་བྱང་སེམས་གསང་བདག་ཏུ་གྱུར་པའི་ཐུགས་རྗེ་ཡེ་ཤེས་ཀྱི་གཟིགས་ནས་ཡུལ་དང་འཕྲད་པའི་ཐུགས་རྗེས་མངོན་སྤྱོད་དྲག་པོའི་ལས་ཀྱི་བརྟུལ་བ་མ་ཡིན་པར་ཐལ། ལེའུ་བཅོ་ལྔ་པ་འདིའི་སྟོད་དུ་གདུལ་བྱ་རུ་ཏྲ་གང་ཟག་དགོས་ཚན་པ་གཅིག་ལམ་གོལ་ནས་གདུལ་བྱར་གཟིགས་ཚུལ་བཤད་ཀྱང་འདུལ་བྱེད་སྦྱོར་སྒྲོལ་གྱི་ཕྲིན་ལས་ཀྱི་སྐབས་སུ་ཕོ་རྒྱུད་ཉི་ཤུ་རྩ་བརྒྱད་དང་མོ་རྒྱུད་ཉིད་ཤུ་རྩ་བརྒྱད་སྦྱོར་སྒྲོལ་གྱི་སྒོ་ནས་བཏུལ་བར་བཤད་པ་ལས་རུ་ཏྲ་བརྟུལ་བར་མ་བཤད་པའི་ཕྱིར། མ་གྲུབ་ན་རུ་ཏྲ་ཆོས་ཅན། ཁྱོད་སྐབས་འདིར་སྦྱོར་སྒྲོལ་གྱི་ཕྲིན་ལས་ཀྱི་བཏུལ་བ་མ་ཡིན་པར་ཐལ། སྦྱོར་སྒྲོལ་ཕྲིན་ལས་ཀྱི་བཏུལ་བའི་གདུལ་བྱ་ཕོ་རྒྱུད་དང་མོ་རྒྱུད་ཀྱི་ནང་དུ་ཁྱེར་མི་འདུག་པའི་ཕྱིར། དེའི་རྒྱུ་མཚན་སྒྲོལ་བྱེད་དཔལ་ཆེན་པོས་དེ་བཞིན་ཉིད་ཀྱི་དབྱིངས་ནས་གསང་བའི་ཡུམ་སྤྲུལ་ཏེ། མཉམ་པར་སྦྱོར་བའི་སེམས་སྤྲིན་ལས་ཁྲོ་བོ་འཆོལ་པ་མཐའ་ཡས་པར་སྤྲོས། འཇིག་རྟེན་ཁམས་ཐམས་ཅད་ཁྲོ་ཚོགས་ཀྱི་ཁེངས་པའི་ཚ་ངམ་དྲག་ཤུལ་གྱིས་ཕྱོགས་བཅུའི་འཇིག་རྟེན་གཡོས་རབ་ཏུ་གཡོས་པ་ལ་སོགས་པའི་ལྟས་ཆེན་པོ་བཅོ་ལྔ་བསྟན་ནས། འཇིག་རྟེན་ན་དབང་ཆེ་བའི་ལྷ་མ་ཧཱ་དེ་བ་དང་། གཟི་བརྗིད་ཆེ་བའི་ཚངས་པ་དང་། མཐུ་ཆེ་བ་ལྷ་ཁྱབ་མཇུག་དང་དབང་ཕྱུག་ལ་སོགས་པ་ཐམས་ཅད་ཁམས་འཁྲུགས་ནས་དྲན་པ་ཉམས་ཏེ་བརྒྱལ། རབ་ཏུ་བརྒྱལ། ཀུན་ཏུ་བརྒྱལ་བར་གྱུར་པ་བཤད་པའི་ཕྱིར། གོང་དུ་ཕོ་རྒྱུད་ཉི་ཤུ་རྩ་བརྒྱད་ཀྱི་ནང་དུ་རུ་ཏྲ་ཡོད་ཟེར་ན། རུ་ཏྲ་ཆོས་ཅན། ཁྱོད་ཉི་ཤུ་རྩ་བརྒྱད་ཀ་དང་། དེ་གང་རུང་གཅིག་ཏུ་ཞེན་རིགས་པར་ཐལ། དེ་གཉིས་གང་རུང་གཅིག་ཏུ་ཁས་ལེན་རིགས་པའི་ཕྱིར། འདོད་ན་མ་ཡིན་པར་ཐལ། ཉི་ཤུ་རྩ་བརྒྱད་ཀ་མ་ཡིན་པ་གང་ཞིག །ཉི་ཤུ་རྩ་བརྒྱད་པོ་གང་རུང་གཅིག་མ་ཡིན་པའི་ཕྱིར། དང་པོ་མ་གྲུབ་ན། ཕོ་རྒྱུད་ཉི་ཤུ་རྩ་བརྒྱད་པོ་ཆོས་ཅན། ཁྱོད་རྣམས་རྒྱུད་ཐ་དད་མ་ཡིན་པར་ཐལ། ཁྱོད་རྣམས་རུ་ཏྲ་དང་རྒྱུད་གཅིག་པོའི་ཕྱིར། གཉིས་པ་མ་གྲུབ་ན། དེ་ལྟར་མ་ཡིན་པ་ཐལ། སྲིན་པོ་ད་ཤ་གྲཱི་བ་ལྷ་ཚངས་པ། ལྷ་ཆེན་དྲག་པོ། བརྒྱ་བྱིན། ལྷ་ཁྱབ་འཇུག །ལྷ་ཆེན། གདོང་དྲུག །ལྷ་འཇུག་སྲེད། ལྷའི་བུ་ཉི་མ། ལྷའི་བུ་ཟླ་བ། ལྷ་བེ་ཅོན། སྲིན་པོ་ཁྲག་མིག །ལྷ་ཟ་བྱེད། ལྷ་དགའ་བྱེད་དབང་ཕྱུག །ལྷ་སྟོབས་བཟང་། ལྷ་བྷྲིམ་གི་རི་ཏི། འདོད་པའི་ལྷ། ནོར་སྲུང་། རླུང་ལྷ། ལྷ་གསོད་བྱེད། མེ་ལྷ། ས་བདག་ཕག་ཆེན། གཤིན་རྗེ། གན་བྱེད། ཚོགས་བདག་བྱི་ན་ཡ་ག །ཀླུ་ཧང་ཕན། ལྷ་ནག་མོ་ཆེན་མོ། ལྷ་ར་གདོང་ཆེན་མོ། །སྲིན་པོ་བུམ་སྣ། ལྷ་གསུས་པོ་ཆེ་སྟེ་ཉེར་བརྒྱད་པོ་གང་རུང་རེ་རེ་མ་ཡིན་པའི་ཕྱིར། གཞན་ཡང་། དཔལ་ཆེན་པོ་བསྒྲལ་བའི་རུ་ཏྲ་དེ་བདག་འཛིན་གྱི་རྟོག་པ་ཡིན་པར་ཐལ། བདག་ཏུ་རྨོངས་པའི་རྟོག་པ་དེ་ཡིན་པར་ཁས་ལེན་པའི་ཕྱིར། མ་གྲུབ་ན། དེ་ལྟར་ཡིན་པར་ཐལ། དེའི་ཤེས་བྱེད། བདེ་འདུས་ལས། ཁུངས་དང་རྫས་བཅས་གང་ལས་བྱུང་། །ཁུངས་དང་རྫས་བཅས་བདག་ལས་བྱུང་། །བདག་མེད་སྟོང་པའི་ཐོ་བས་གཞོམ། །ཞེས་བཤད་པའི་ཕྱིར་རོ། །གཞན་ཡང་གོང་དུ་འདིར་བཤད་པའི་རུ་ཏྲ་སྤྲུལ་པ་བ་དང་། འདི་དང་ཆ་འདྲ་བའི་རུ་ཏྲ་རང་རྒྱུད་པ་ཞིག་ཁས་བླངས་པས། འདི་དང་ཆ་འདྲ་བའི་རུ་ཏྲ་རང་རྒྱུད་པ་དེ་ཆོས་ཅན། ཁྱོད་ཀྱི་ཚོད་ཀྱི་དཀྱིལ་འཁོར་ཆེན་པོ་འདི་དངོས་སུ་མ་མཐོང་པར་ཐལ། འདི་དང་ཆ་འདྲ་བའི་རུ་ཏྲ་གང་ཞིག་དེས་དེ་ལྟར་མ་མཐོང་བར་བཤད་པའི་ཕྱིར་ཏེ། འདི་ཉིད་ལས། ཁྲོ་བོའི་ཚོགས་ཆེན་པོ་དེ་དག་ཀྱང་དབུ་དགུ་བརྒྱ་ཕྱག་སྟོང་བརྒྱད་བརྒྱ། ཞབས་བརྒྱད་བརྒྱ། སྐུ་འབར་བ་ཆེན་པོའི་ཀློང་ན་བཞུགས་པར་མཐོང་ངོ་ཞེས་བཤད་པའི་ཕྱིར། མ་གྲུབ་ན། དེ་དང་ཆ་འདྲའི་རུ་ཊ་མ་ཡིན་པར་ཐལ་ལོ། །གཞན་ཡང་སྡིག་པ་གང་ཆེ་ཆེ་སངས་རྒྱས་པར་ཐལ། མཚམས་མེད་ཀྱི་ལས་རྔམ་པོ་ཆེ་བྱས་པའི་རུ་ཏྲ་དེ་སངས་རྒྱས་ཀྱི་ཞལ་མཐོང་ནས་སངས་རྒྱས་པའི་ཕྱིར། གཞན་ཡང་འདི་ནས་བཤད་པའི་རུ་ཏྲ་དེ་སྤྲུལ་པ་ཡིན་ཟེར་བ་ཡང་མི་འཐད་དེ། ལུང་རིག་གཉིས་ཀྱི་གྲུབ་པའི་ཕྱིར། དང་པོ་གྲུབ་སྟེ། བདག་ཏུ་རྨོངས་པའི་རྟོག་པ་དང་རྟག་པ་ལ་མངོན་པར་ཞེན་ནས། ཞེས་སོགས་གསུངས་པའི་ཕྱིར། གཉིས་པ་གྲུབ་སྟེ། སངས་རྒྱས་ཀྱི་སྤྲུལ་པའི་རུ་ཏྲ་ཆོས་ཅན། ཁྱོད་ཀྱི་སེམས་ཅན་གྱི་ཁམས་ལ་བཞི་བརྒྱ་རྩ་བཞིའི་ནད་འབེབས་པ་ལ་སོགས་ཐོ་མཚམས་པའི་ལས་ནག་པོ་དེ་ཙམ་བྱེད་པ་མི་སྲིད་པར་ཐལ། ཁྱེད་རྣམ་པ་ཀུན་ཏུ་སེམས་ཅན་མཐའ་དག་ལ་བརྩེ་བ་ལྡན་པའི་ཕྱིར། སངས་རྒྱས་ཆོས་ཅན། ཁྱོད་རུ་ཏྲའི་རྣམ་པར་སྤྲུལ་པ་ལ་དགོས་པ་མེད་པར་ཐལ། ཁྱོད་རུ་ཏྲར་སྤྲུལ་ནས་སེམས་ཅན་ལ་ལས་ངན་གསོག་ཏུ་འཇུག་མི་དགོས་པའི་ཕྱིར། གཞན་ཡང་སྤྲུལ་པ་དང་། རང་རྒྱུད་ཀྱི་མཚན་ཉིད་གང་ལ་བྱེད། སྐྱོན་གྱི་སྣང་ཚུལ་ཅན་ལ་རང་རྒྱུད་པ་དང་། ཡོན་ཏན་གྱི་སྣང་ཚུལ་ཅན་ལ་སྤྲུལ་པར་འཇོག །དང་པོ་ལྟར་ན། སེམས་ཅན་གྱི་དོན་དུ་སངས་རྒྱས་བྱང་སེམས་སྤྲུལ་པ་བསྟན་པ་དང་སྨད་ཚོང་ལ་སོགས་པའི་རྣམ་པར་བསྟན་པ་དེ་དག་ཆོས་ཅན། ཁྱོད་རང་རྒྱུད་པ་ཡིན་པར་ཐལ། འཇིག་རྟེན་ན་རྔོན་པ་སྨད་ཚོང་ལ་སོགས་སྐྱོན་གྱི་སྣང་ཚུལ་ཅན་དུ་བྱེད་པའི་ཕྱིར། འདོད་ན། དེ་ཆོས་ཅན། མ་ཡིན་པར་ཐལ། སྤྲུལ་པ་ཡིན་པའི་ཕྱིར་ཏེ། རྔོན་དང་སྨད་ཚོང་ལ་སོགས་པ། སྤྲུལ་པའི་ལུས་ཀྱི་འདུལ་བར་བྱེད། །ཅེས་གསུངས་པའི་ཕྱིར། གཞན་ཡང་སྟོན་པ་ཤཱཀྱ་ཐུབ་པ་དེ་ཆོས་ཅན། ཁྱོད་རང་རྒྱུད་པར་ཐལ། ཁྱོད་སྨད་ཚོང་པའི་ཆ་བྱད་ཅན་དུ་བྱས་པའི་ཕྱིར། འདོད་ན། གོང་གི་སྒྲུབ་བྱེད་བཞིན། མ་གྲུབ་དེ་འདྲ་མེད་འདྲ་ཟེར་ན། དེ་ལྟར་ཡོད་ཚུལ་མདོ་སྡེ་མྱང་འདས་ལས། རིགས་ཀྱི་བུ། དེའི་ཚེའི་དུས་ན་བདུད་སྡིག་ཏོ་ཅན་ང་ཉིད་ཡིན་ཏེ། གཞན་དུ་མ་རྟོག་ཅིག །ཅེས་གསུངས་ཕྱིར། ཕྱིས་འདི་འདྲའི་རང་རྒྱུད་པ་འབྱུང་བ་ལ་དགོངས་ཟེར་བ་ཡང་མི་འཐད་དེ། སྔར་དངོས་སུ་མ་བྱུང་ན་ཕྱིས་ཀྱང་དངོས་སུ་མི་འབྱུང་བའི་ཕྱིར་ཏེ། རྒྱུ་མཚན་ལ་ཁྱད་པར་མེད་པའི་ཕྱིར། མོ་རྣམས་སྦྱོར་བས་བརྟུལ་བའི་ཚེ། དཔལ་ཆེན་པོ། མོ་རྒྱུད་ཉི་ཤུ་རྩ་བརྒྱད་དང་དངོས་སུ་སྦྱོར་བ་མཛད་པར་ཐལ། མོ་རྣམས་སྦྱོར་བ་མཛད་ནས་བརྟུལ་བའི་ཕྱིར། འདོད་ན་དཔལ་ཆེན་པོ་ཆོས་ཅན། ཁྱོད་ཀྱི་སྐུ་ལ་མོ་རྒྱུད་ཉི་ཤུ་རྩ་བརྒྱད་མ་འཁྲིལ་པར་ཐལ། ཁྱོད་ཀྱི་སྐུ་ལ་ཕྱོགས་ཀྱི་གཙོ་མོ་བཞི་དང་། སྒོ་མ་བཞི་སྟེ་བརྒྱད་ལས་མ་འཁྲིལ་བའི་ཕྱིར་ཏེ། གཞུང་ནས་དེ་ལྟར་གསལ་བའི་ཕྱིར་རོ། །ཕྱོགས་ཀྱི་ལྷག་མ་ལྔ་ལྔ་པོ་དེ་རྣམས་རིགས་བཞི་ཧེ་རུ་ཀ་དང་འཁྲིལ་བའི་ཕྱིར། དེ་ལྟར་ཡང་འདི་ཉིད་ལས་བཅོམ་ལྡན་འདས་དེ་བཞིན་གཤེགས་པའི་སྐུ་ལ་ཚངས་མ་དང་། ཁྲག་འཐུང་མོ་དང་ཞེས་སོགས་གསུངས་པའི་ཕྱིར་རོ། །ཡང་གོང་དུ་ཉི་ཤུ་རྩ་བརྒྱད་དངོས་སུ་སྦྱོར་བ་མ་མཛད། དཔལ་ཆེན་པོའི་སྐུ་ལ་བརྒྱད་དང་། རིགས་བཞི་ཧེ་རུ་ཀའི་སྐུ་ལ་ཕྱོགས་ཀྱི་ལྷག་མ་ལྔ་ལྔ་འཁྲིལ་བ་ཡིན་ཟེར་ན། འོ་ན་དཔལ་ཆེན་པོས་མོ་རྒྱུད་ཐམས་ཅད་དང་སྦྱོར་བ་མཛད་ནས་བརྟུལ་བ་མ་ཡིན་པར་ཐལ། དམ་བཅའ་དེ་འཐད་པའི་ཕྱིར། འོ་ན་དཔལ་ཆེན་པོ་ཆོས་ཅན། ཁྱོད་ཀྱིས་མོ་རྒྱུད་ཡོངས་རྫོགས་དང་སྦྱོར་བ་མཛད་ནས་མ་བཏུལ་བར་ཐལ། ཁྱོད་ཀྱི་ཕྱོགས་ཀྱི་གཙོ་མོ་བཞི་དང་། སྒོ་སྐྱོང་གདོང་མོ་བཞི་མ་གཏོགས་གཞན་རྣམས་དང་སྦྱོར་བ་མཛད་ནས་མ་བཏུལ་བའི་ཕྱིར། རྟགས་ཁས། རིགས་བཞི་ཧེ་རུ་ཀ་ཆོས་ཅན། ཁྱོད་ཀྱི་སྦྱོར་བ་མཛད་ཏེ་བཏུལ་བའི་དྲེགས་པ་མོ་རྒྱུད་ཡོད་པར་ཐལ། མོ་རྒྱུད་ཉི་ཤུ་རྩ་བརྒྱད་ལས་ཕྱོགས་ཀྱི་གཙོ་མོ་མ་གཏོགས་པའི་ལྔ་པོ་ལྔ་པོ་རྣམས་ཁྱོད་ཀྱིས་སྦྱོར་བ་མཛད་ནས་བཏུལ་བ་ཡིན་པའི་ཕྱིར། འདོད་ན། ཕྱོགས་ཀྱི་གཙོ་མོ་རྣམས་མ་གཏོགས་པའི་མ་མོ་ཉི་ཤུ་པོ་ཆོས་ཅན། ཁྱོད་དཔལ་ཆེན་པོས་བཏུལ་བ་མ་ཡིན་པར་ཐལ། ཁྱོད་རིགས་བཞི་ཧེ་རུ་ཀས་བཏུལ་བའི་ཕྱིར། འདོད་ན། དཔལ་ཆེན་པོས་བཏུལ་ནས་མིང་གི་དབང་བསྐུར་ནས་དཀྱིལ་འཁོར་གྱི་ཁྲག་འཁྱམས་ལ་བཀོད་པ་མ་ཡིན་པར་ཐལ། གཞན་ཡང་། དབང་ཕྱུག་མ་དང་སྦྱོར་བ་མཛད་པའི་དབང་ཕྱུག་མ་རེ་རེའི་ཁ་ནས་ཉེར་བརྒྱད་རེ་མ་ཐོན་པར་ཐལ། དེ་ལྟར་མ་ཐོན་པའི་ཕྱིར། འདོད་ན། དེ་ལྟར་ཐོན་པ་གཞུང་ལས་བཤད་པ་དང་འགལ་ལོ། །མ་གྲུབ། དེ་ལྟར་ཐོན་པ་ཡིན་ཟེར་ན། དེ་ལྟར་མ་ཐོན་པར་ཐལ། མ་ཉི་ཤུ་རྩ་བརྒྱད་ལ་སྲས་ཉི་ཤུ་མན་མ་བྱུང་བའི་ཕྱིར་ཏེ། གནས་མ་བརྒྱད་དང་། ཡུལ་མ་བརྒྱད། སྒོ་མ་བཞི་སྟེ་ཉི་ཤུ་ལས་མ་བྱུང་བའི་ཕྱིར། གཞན་ཡང་། སྒོ་མ་བཞི་ཆོས་ཅན། ཁྱོད་སྲས་དང་ཡུམ་གཉིས་ཀ་ཡིན་པར་ཐལ། སྲས་ཡིན་པ་གང་ཞིག །ཡུམ་ཡིན་པའི་ཕྱིར། དང་པོ་མ་གྲུབ་ན། སྒོ་མ་བཞི་ཆོས་ཅན། ཁྱོད་སྲས་མོ་ཉི་ཤུའི་ནང་ཚན་ཡིན་པར་ཐལ། ཁྱོད་མ་དྲངས་པར་སྲས་ཉི་ཤུ་མ་ཚང་བའི་ཕྱིར། གཉིས་པ་མ་གྲུབ་ན། དེ་ཆོས་ཅན། ཁྱོད་དཔལ་ཆེན་པོའི་སྐུ་ལ་འཁྲིལ་བ་མ་ཡིན་པར་ཐལ། གཞན་ཡང་། རུ་ཏྲ་ཕོ་རྒྱུད་དེ་རྣམས་ཆོས་ཅན། ཁྱོད་རྣམས་ལ་དཔལ་ཆེན་པོས་དབང་མ་བསྐུར་བར་ཐལ། ཁྱོད་རྣམས་དཀྱིལ་འཁོར་གྱི་གནས་སུ་མ་བཀོད་པ་གང་ཞིག །དབང་རྟགས་ཀྱང་མ་བཤད་པའི་ཕྱིར་ཏེ། ད་ལྟ་སྒྲུབ་ཐབས་སུ་ཡང་དབང་མོ་རྣམས་ལ་ལྕགས་ཀྱི་རྡོ་རྗེ་རྩེ་ལྔ་པ་རེ་རེས་དབུ་བརྒྱན་པའི་དབང་རྒྱ་ཡང་བཅའ་དགོས་ཤིང་། ཕོ་རྒྱུད་རྣམས་དབང་རྒྱ་བཅའ་བ་ཡང་མ་བཤད་པའི་ཕྱིར། གོང་དུ་མ་ཁྱབ། ཕོ་རྒྱུད་རྣམས་ལ་དབང་ཡང་མ་བསྐུར། དཀྱིལ་འཁོར་གྱི་གནས་སུ་ཡང་མ་བཀོད་ཟེར་ན། སྟོན་པ་ཡབ་ཡུམ་ཆོས་ཅན། ཁྱོད་ཀྱི་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་གསུང་ཐུགས་དབྱེར་མི་ཕྱེད་པའི་རྡོ་རྗེ་ལས་དབང་རྫས་ཕྱི་བདུད་རྩི་དྲི་ཆེན། ནང་ཉི་ཟླ་བྱང་ཆུབ་ཀྱི་སེམས་འདི་ཕྱུངས་ནས་ཕོ་རྒྱུད་རྣམས་ལ་དབང་བསྐུར་བ་ཡིན་པར་ཐལ། ཁྱོད་ཀྱིས་ༀ་བཛྲ་མ་ཧཱ་ཨ་མྲྀ་ཏ་མ་ཧཱ་ཀྲོ་དྷཱ་ཨཾ་ཨཾ་ཨཾ། ཞེས་ལྕེ་སྟེང་དུ་དམ་རྫས་ལན་གསུམ་བཞག་ནས་དབང་བསྐུར་བའི་ཕྱིར། དེ་ལྟར་ཡིན་པར་ཐལ། དབང་བསྐུར་བའི་བྱིན་རླབས་ཀྱིས་ཕོ་རྒྱུད་རྣམས་དྲན་པ་སླར་རྙེད་ནས་རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་གསལ་ཏེ། ཁྲོ་བོ་རང་བཞིན་གྱི་དཀྱིལ་འཁོར་བསམ་ཡས་ལྷུན་གྲུབ་ཀྱི་ཏིང་ངེ་འཛིན་ནི་ཐོབ་པའི་ཕྱིར་རོ། །གཉིས་པ་དཀྱིལ་འཁོར་གྱི་གནས་སུ་མ་བཀོད་ཟེར་ན། དྲེགས་པ་ཕོ་རྒྱུད་དེ་རྣམས་ཆོས་ཅན། ཁྱོད་དཀྱིལ་འཁོར་གྱི་གནས་སུ་བཀོད་པར་ཐལ། ཁྱོད་ཁྲོ་བོ་ཐམས་ཅད་ཀྱི་གདན་དུ་བྱས་པ་དེ་ཁྱོད་སྡོད་པའི་གནས་ཡིན་པའི་ཕྱིར། ད་ནི་དེ་དག་གི་རྣལ་མའི་ལན་མདོ་ཙམ་ཞིག་བརྗོད་ན། སྤྱིར་ལས་འདག་ཚུལ་ལ། རྟོགས་པས་འདག་པ་ལྟ་བ་གནས་ལུགས་རྟོགས་པས་ཆོས་ཐམས་ཅད་རྨི་ལམ་ལྟ་བུ་ཤེས་པའོ། །བཤགས་པས་འདག་པ་སྟོབས་བཞི་ཚང་བའི་གཉེན་པོས་འདག་པ། མི་དགེ་བ་ཆུང་ངུའི་གཉེན་པོར་སྤྱད་པས་སོ། །དེ་གསུམ་དང་མི་ལྡན་ན་མྱོང་འགྱུར་གྱི་ལས་ཡིན་པ་མྱོང་བས་འདག་སྟེ་རུ་ཏྲ་བཞིན་ནོ། །རུ་ཏྲ་མ་བསྒྲལ་བར་ཐལ། འདིར་བསྒྲལ་བ་བདག་འཛིན་རུ་ཏྲ་ཡིན་པའི་ཕྱིར་ལ་མ་ཁྱབ་སྟེ། རུ་ཏྲ་ཐམས་ཅད་ཀྱི་རྩ་བ་བདག་འཛིན་པས་དེ་གཉིས་གཅིག་ཏུ་ཁས་ལེན་དགོས་པའི་ཕྱིར། རུ་ཏྲ་ཞེས་པ་དེ་ལུས་ངག་ཡིད་གསུམ་ཕྱིན་ཅི་ལོག་བདག་ཏུ་བཟུང་བས་ཡིད་ཕྱིན་ཅི་ལོག་ཏུ་བསྒྱུར་བ་ལས་མ་ཏྲཾ་རུ་ཏྲ། ངག་ཕྱིན་ཅི་ལོག་ཏུ་བསྒྱུར་བ་ལ། ཁ་ཏྲཾ་ཀ་རུ་ཏྲ། ལུས་ཕྱིན་ཅི་ལོག་ཏུ་བསྒྱུར་བ་ཨ་ཀཪྴ་རུ་ཏྲ་དེ་རྣམ་པ་གསུམ་ཡིན། དེ་བསྒྲལ་ཚུལ་ནང་དུ་སྣང་གསུམ་བཅོམ་ལྡན་འདས་སངས་རྒྱས་པའི་ཚེ། ནང་གི་རྩ་མདུད་གྲོལ་བའི་རྟགས་སྣང་སྐྱེས་བུ་སངས་རྒྱས་པ་དེའི་སྣང་ངོར་བདུད་བཞི་བཅོམ་པའི་ཉམས་ཀྱི་སྣང་བ་ཡིན་པའི་ཚུལ་ལེའུའི་སྟོད་དུ་གང་ཟག་སྒོས་ཚན་པ་གཅིག་ཡིན་པར་བཤད་པ་དང་། སྦྱོར་སྒྲོལ་གྱི་ཕྲིན་ལས་སྐབས་དེ་དངོས་སུ་མི་འབྱུང་བ་དྲེགས་པ་ཕོ་རྒྱུད་མོ་རྒྱུད་རྣམས་འབྱུང་བ། བདག་འཛིན་གྱི་རུ་ཏྲ་བཅོམ་ན་དེའི་རྩལ་ལས་ཤར་བའི་ཕྱི་རོལ་དྲེགས་པ་རྣམས་བཅོམ་པའི་ཚུལ་བྱུང་བ་ཡིན་པར་མངོན། རུ་ཏྲ་དེ་ཕོ་རྒྱུད་ཉི་ཤུ་རྩ་བརྒྱད་པོ་གང་རུང་གཅིག་ཏུ་ཁས་ཅི་ལ་ལེན། དེའི་རྩལ་ལས་ཤར་བ་དེར་ཁས་ལེན་པ་དང་། དེའི་རྩར་དུ་ཁས་ལེན་པ་གཉིས་ཀ་རྣམ་པ་འགལ་བ་ཅན་ཡིན་པའི་ཕྱིར། རུ་ཏྲ་སྤྲུལ་པ་བ་ཡིན་པར་ཁས་བླངས་པ་ལ་སྐྱོན་མེད་དེ། དེའི་དགོས་པ་རང་རྒྱུད་པའི་གོལ་ས་དགག་པ་དང་། གསང་སྔགས་ཀྱི་མཐུའི་ཆེ་བ་བསྟན་པ་ལ་སོགས་པ་དང་འཇིག་རྟེན་གྱི་ཁམས་གཡོ་འགུལ་བྱེད་པའི་རྫུ་འཕྲུལ་ཅི་ལ་ཡོད་དགོས་ཏེ་མི་འབྱུང་བའི་ཕྱིར་ཏེ། རང་རྒྱུད་པ་ཡིན་པའི་ཕྱིར། འོན་ཀྱང་ཕྱིར་རོལ་དུ་ཡང་འདི་ནས་བཤད་པ་ལྟར་གྱི་རྟགས་སྣང་འབྱུང་ཚུལ་ཆེ་ཆུང་གཉིས་ཁས་ལེན་དགོས་ཏེ་རྩ་མདུད་རགས་པ་སྦྱོར་ལམ་ཚོམ་བུ་ཚོགས་སྒྲུབ་ཐར་གྲོལ་ནས་མཐོང་ལམ་སྦྱོར་བ་གཅིག་དང་། ཕྲ་བ་རྒྱུན་ཐར་གྲོལ་ནས་འཚང་རྒྱ་ཚུལ་གཉིས་བཤད་པས། དེ་བཞིན་ཕྱི་རོལ་དུའང་དེ་གའི་ཆ་འདྲ་འབྱུང་བ་ཁས་ལེན་དགོས་ཏེ། ཕྱི་ནང་འགྲོ་ལྡོག་གཅིག་པའི་ཕྱིར། སངས་རྒྱས་ཀྱི་སྤྲུལ་པས་མཚམས་མེད་པའི་ལས་ངན་བྱས་པ་ལྟར་སྣང་བ་ལ་སྐྱོན་མི་འཇུག་སྟེ། སྔོན་སྟོན་པ་མ་ག་དྷ་རྡོ་རྗེའི་གདན་དུ་བྱོན་པའང་སྤྲུལ་པ་ཡིན་པར་བཤད་པས། ལྷས་བྱིན་ཀྱང་སྤྲུལ་པར་ཁས་ལེན་པ་ངེས་དོན་འདིའི་སྐབས་འཐད་པའི་ཕྱིར་ཏེ། བཅོམ་ལྡན་འདས་ཀྱི་ཐུན་མོང་ཅན་མ་ཡིན་པའི་གསང་བ་ཆེན་པོ་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས། དེ་ནས་གཞན་ཡང་ཐམས་ཅད་མཁྱེན་པའི་འཁོར་གསུམ་ཚོགས་པ་བཤད་པར་བྱ་སྟེ་འཇམ་དཔལ་ནི་རྒྱལ་པོ་ཟས་གཙང་མར་གྱུར་ཏོ། །འཇིག་རྟེན་དབང་ཕྱུག་ནི་ལྷ་མོ་སྒྱུ་འཕྲུལ་དུ་གྱུར་ཏོ། །དཔལ་ལྷ་མོ་ནི་གྲགས་འཛིན་མའོ། །རྡོ་རྗེ་སེམས་དཔའ་ནི་སྒྲ་གཅན་འཛིན་ནོ། །སྒྲིབ་པ་ཐམས་ཅད་རྣམ་པར་སེལ་བ་ནི་ཤ་རིའི་བུའོ། །ཀུན་ཏུ་བཟང་པོ་ནི་གནས་བརྟེན་ཀུན་དགའ་བོར་གྱུར་ཏོ། །ལྷའི་དབང་པོ་བརྒྱ་བྱིན་ནི་གནས་བརྟེན་ལྷས་བྱིན་ནོ། །རྣམ་པར་སྣང་མཛད་ཆེན་པོ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་གྱུར་ཏོ། །ཞེས་གསུངས་པའི་ཕྱིར་རོ། །གཞན་ཡང་། སངས་རྒྱས་ཀྱི་སྤྲུལ་པ་ཚད་གཟུང་དུ་མེད་དོ། །རྡོ་རྗེ་དྲ་བའི་རྒྱུད་ལས། གང་དང་གང་གི་གཟུགས་ཀྱི་ནི། །ལུས་ཅན་རྣམས་ནི་འདུལ་གྱུར་བ། །དེ་དང་དེ་ནི་རྣམ་སྟོན་ཏེ། །སྣ་ཚོགས་ནོར་བུ་ཇི་བཞིན་ནོ། །ཞེས་དང་། མདོ་ལས་ཀྱང་། བདུད་ཀྱི་ལས་རྣམས་ཐུགས་ཆུད་ཀྱང་། །བདུད་ཀྱི་རྗེས་སུ་འཇུག་པར་མཛད། །ཅེས་སོ། །སྦྱོར་བའི་སྐབས་དཔལ་ཆེན་པོས་དབང་ཕྱུག་ཉི་ཤུ་རྩ་བརྒྱད་སྦྱོར་བ་མཛད་པར་ཁས་ལེན་དགོས་ཏེ། དབང་མོ་རྣམས་ཀྱི་སྣང་ངོར་ཡང་དཔལ་ཆེན་པོ་རེ་རེ་དང་སྦྱོར་བའི་སྣང་བ་བྱུང་བར་མ་ཟད། རིགས་བཞི་ཧེ་རུ་ཀ་ཡང་སྟོན་པའི་ཐུགས་མེ་ལོང་ལྟ་བུ་ལ་སོགས་པ་བཞི་པོའི་རྩལ་སྣང་རིགས་བཞིར་སྣང་བ་ཙམ་དུ་མ་ཟད་འདུལ་བྱེད་གཉེན་པོའི་འཁོར་ཐམས་ཅད་སྟོན་པའི་ཐུགས་ཡེ་ཤེས་ཀྱི་རོལ་རྩལ་ཙམ་དུ་ཁས་ལེན་དགོས་པའོ། །སྲས་མོ་ཉི་ཤུ་ལས་མ་བྱུང་བ་ཡང་ཉེར་བརྒྱད་པོ་རེ་རེ་ཁ་ནས་ཉི་ཤུ་པོ་རེ་རེ་ཡང་ཉེར་བརྒྱད་རེ་རེ་ཐོན་སོ་སོ་ཡང་རིགས་གཅིག་ཏུ་བསྡུས་པའི་དོན་ཡིན་པར་བྱོས་ཤིག །གཞན་རྣམས་འགྲོས་ཀྱིས་གོ་སླའོ། །དྲི་བ་བདུན་པ་ནི། འཕྲོས་དོན་ཞིག་སྨྲོས་ཏེ་བརྗོད་ན། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་པ་འོངས་མ་ཡིན། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་པའི་གཞུང་འདི། དཔག་བསམ་ཤིང་དང་ཡིད་བཞིན་གྱི། །རིན་པོ་ཆེ་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་བརྟན་པ་ཡིན། །ཞེས་པའི་གཞུང་འདི་ལ་འཕྲོས་པ་ཐལ། རྒྱུ་མཚན་དཔེར་ན་ལྷ་མ་ཡིན་གྱི་ཡུལ་ན་དཔག་བསམ་གྱི་ཤིང་། མིའི་ཡུལ་ན་ཡིད་བཞིན་གྱི་ནོར་བུ་དང་། ལྷའི་ཡུལ་ན་རིན་པོ་ཆེའི་བུམ་པ་བཟང་པོ་དང་གསུམ་པོ་དེ་ལ་རང་རང་གི་དགོས་འདོད་འབྱུང་བ་ལྟར། རང་སེམས་བསོད་ནམས་དང་ཡེ་ཤེས་ཀྱི་མཐུ་ཏིང་ངེ་འཛིན་ནི་བརྟེན་པ་ལས་དགོས་འདོད་ཀྱི་རེ་བ་ཐམས་ཅད་ཡོངས་སུ་རྫོགས་པའི་སངས་རྒྱས་འབྱུང་ཚུལ་དེ་བསྟན་ནས། ངོ་མཚར་རྨད་དུ་བྱུང་བའི་ཆོ་འཕྲུལ་ཆེན་པོ་ནི་སྐུ་དང་ཡེ་ཤེས་ཀྱི་དཀྱིལ་འཁོར་ཡིན་ལ། དེ་ཉིད་ཐབས་དམིགས་པ་མེད་པའི་ཏིང་ངེ་འཛིན་ལ་བརྟེན་ནས་ཤེས་རབ་སྟོང་པ་ཉིད་ཀྱི་རྩལ་སྣང་ལས་སྐུ་དང་ཡེ་ཤེས་ཀྱི་དཀྱིལ་འཁོར་དེ་ལྟ་བུ་ཆོས་ཀྱི་དབྱིངས་ཀྱི་མཁའ་ཀློང་ཡངས་པ་དེའི་ངང་ལས་བྱུང་བ་ཡིན་ནོ། །ཞེས་སྟོན་པར་བྱེད་པ་ནི། ངོ་མཚར་ཆོ་འཕྲུལ་རྨད་ཀྱི་ཆོས། །ཞེས་སོགས་འབྱུང་བའི་ཕྱིར། འོ་ན། སེམས་ཅན་འཁྲུལ་པའི་རྒྱུ། འཁྲུལ་གཞི་ཡོད་ནས་འཁྲུལ་ལམ་མེད་པ་ལས་འཁྲུལ། དང་པོ་ལྟར་ན། འཁྲུལ་གཞི་མེད་པར་ཐལ། ཐང་ཕྲོམ་ཟོས་པའི་རྒན་མོའི་མིག་ལ་ནམ་མཁའ་ལས་སྐྲ་ཤད་འཛག་པ་མེད་བཞིན་དུ་འཛག་པའི་སྣང་བ་བྱུང་ལྟར་ཡིན་པའི་ཕྱིར་ཏེ། དམ་ཚིག་གསལ་བཀྲ་ལས། ཉི་མའི་དཀྱིལ་ན་མུན་མེད་ལྟར། །ཞེས་གསུངས་པའི་ཕྱིར། གཞི་རང་བཞིན་རྣམ་དག་ཡོད་མེད་དབུ་མའི་མཐའ་ལས་གྲོལ་བ་དེ་རང་ངོ་རང་གི་མ་ཤེས་པས་འཁྲུལ་ཏེ། ཐུགས་ཐིག་ལས། དྲུག་གི་འགྲོ་བ་ཐམས་ཅད་ཀྱི། །སེམས་ཉིད་ནོར་བུ་རིན་པོ་ཆེ། །ཇི་ལྟར་བསམ་པ་སྣང་བ་ལས། །འཁྲུལ་གཞི་ཡོད་མེད་སྒྲོ་སྐུར་མེད། །ཅེས་སོ། །གཉིས་པ་ལྟར་ན། ཨེ་མ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱི་སྤྲུལ། །ཞེས་གསུངས་པས། དཔེར་ན། སྨན་ག་བུར་དེ་ཚད་ནད་ཅན་ལ་སྨན་དང་། རླུང་ནད་ཅན་ལ་དུག་ཏུ་འགྱུར་བ་ལྟར་ཡིན་ཏེ། ཐུགས་ཐིག་ལས། དོན་གཉིས་ཡོད་མེད་རིས་མེད་ལས། །དེ་ཡི་རྒྱུ་རྐྱེན་རང་བཞིན་པས། །སྨན་གྱི་ཕན་གནོད་ཇི་བཞིན་དུ། །ཐམས་ཅད་མ་ལུས་རྒྱུ་གཅིག་པས། །མི་མཐུན་ཁྱད་པར་སོ་སོར་སྣང་། །ཞེས་གསུངས་པ་བཞིན་ནོ། །རྒྱས་པ་ལས། མ་རིག་པ་ཉིད་སྤང་དུ་མེད། །ཅེས་བཤད་པས། ཞེ་སྡང་མེད་ན་རང་བྱུང་གི་ཡེ་ཤེས་གསལ་མི་ཐེབས། འདོད་ཆགས་མེད་ན་བདེ་བའི་ཡེ་ཤེས་རྒྱུད་ལ་མི་སྐྱེ། གཏི་མུག་མེད་ན་རྣམ་པར་མི་རྟོག་པའི་ངང་ལ་བློ་མི་གནས། ང་རྒྱལ་མེད་ན་ཆོས་ཉིད་དུ་ལ་མི་ཟླ། ཕྲག་དོག་མེད་ན་མཉམ་པ་ཉིད་ཁོད་མི་སྙོམས་པའོ། །དེ་ལྟར་ཡང་ལུང་ལས། ལམ་གྱི་ནང་ན་ཉེ་ལམ་ཆེན་པོ་ནི། ཐབས་ཀྱི་ནང་ན་མ་ནོར་དམ་པ་སྟེ། །ཤེས་རབ་ནང་ན་ཤེས་རབ་ཁྱད་པར་ཅན། །ཞེས་དང་། སྔགས་ཀྱི་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །དེ་བཞིན་ཐབས་ཀྱི་ཟིན་པ་ཡིས། །དུག་གསུམ་སྡུག་བསྔལ་གནོད་བྱེད་མི་འགྱུར། །ཞེས་སོ། །ཕྱག་རྒྱའི་སྐབས། གོང་དུ། ཐབས་དང་ཤེས་རབ་ལྡན་འབྱོར་བ། །མ་བསྐྱེད་མ་བསྒུལ་ཐམས་ཅད་ཀྱང་། །ཕྱག་རྒྱ་ཆེན་པོའི་ངང་དུ་གནས། །ཞེས་པ་དང་། འོག་ཏུ། མདོར་ན་བསྒུལ་སྤྱོད་ཐམས་ཅད་ཀྱང་། །ཕྱག་རྒྱ་ཆེན་པོའི་ངང་དུ་གནས། །ཞེས་བཤད་པ་ནང་འགལ་ཞེ་ན་སྐྱོན་མེད་དེ། ལྟ་བའི་ངོས་ནས་གོང་མ་དང་། སྤྱོད་པའི་ངོས་ནས་འོག་མ་བཞག་པ་སྟེ། རྒྱས་པ་ལས། རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །རིགས་ལྔ་བདེ་གཤེགས་ཡབ་ཡུམ་གྱི། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །དེ་ཡང་སྤྱིར་ཕྱག་རྒྱའི་དོན། འདའ་དཀའ་བ་དང་མཛེས་པར་བྱེད་པ་དང་། བརྡ་སྤྲོད་པ་སྟེ། དཔེར་ན་རྒྱལ་བའི་བཀའ་རྟགས་དང་། སྒེགས་མོའི་སོར་གདུབ་དང་། ཉོ་ཚོང་མཁན་གྱི་ཕུ་དུང་བཞིན་ཤེས་པར་བྱའོ། །གཉིས་པའི་ལེའུ་ཞེས་འདུག་པས་རྒྱལ་བ་ལ་མཉེས་མི་མཉེས་མངའ་ན་གཟུང་འཛིན་ཅན་དུ་འགྱུར་རོ། །ཞེ་ན། རྒྱལ་བ་ལ་མཉེས་མི་མཉེས་མི་མངའ་ཡང་། གདུལ་བྱ་རྣམས་ཀྱི་ཚོགས་གཉིས་རྫོགས་པའི་ཆེད་དུ་མཉེས་པ་ལྟར་སྣང་བ་ལ་འགལ་བ་མེད་པའོ། །འདིར་སྐབས་དེ་བཞིན་གཤེགས་པ་དགྱེས་པ་ཆེན་པོ་ཞེས་པ་ཅི་ཟེར་ན། སངས་རྒྱས་ལ་དགྱེས་མི་དགྱེས་ཀྱི་ཐ་སྙད་མི་ཡོང་ཡང་། ལོངས་སྤྱོད་ལ་མཚན་དུ་བཏགས་པ་སྟེ། དགའ་བ་ལ་རྣམ་དབྱེ་བཞི་ལས། ཐུན་མོང་གི་དགའ་བ་ནི་འདོད་ཁམས་འདོད་ཆགས་ཀྱི་བདེ་བ་ལ་སྤྱོད་པ་དང་ཁམས་གོང་མ་གཉིས་བསམ་གཏན་གྱི་དགའ་བ་ལ་སྤྱོད་པ་དང་། ས་དང་པོར་བདེན་པ་མཐོང་བའི་ཟག་མེད་ཀྱི་བདེ་ལ་སྤྱོད་པ་དང་། འདིར་ནི་བསམ་གྱིས་མི་ཁྱབ་པའི་བདེ་བ་སྟེ། བླང་དོར་མེད་པའི་ཆོས་ཉིད་མཉམ་པ་ཉིད་ལ་ལོངས་སྤྱོད་པའི་དགའ་བའོ། །ལེའུ་བཞིར་བསྡུ་བ་འབྱུང་ལ། གཞན་ལ་མི་འབྱུང་བ་ཅི། ཞེས། གཞི་དོན་གྱི་གནས་ལུགས་དེ་རྟོགས་བྱེད་རྒྱུའི་ལྟ་བ་གོམས་བྱེད་རྐྱེན་ཏིང་ངེ་འཛིན། དེ་གཉིས་ཀྱིས་མངོན་དུ་གྱུར་པའི་འབྲས་བུ་སྟེ། དེ་བཞིན་རྒྱུད་འདིའི་དོན་མཐའ་དག་འདུས་པའི་རྒྱུ་མཚན་གྱིས་ཡིན་ཏེ། དང་པོ་ལྷག་པ་ཀུན་རྫོབ་ཀྱིས་གནས་ལུགས་གསུམ་པར་དེ་ཤེས་བྱེད་ཡང་དག་པའི་ལྟ་བ་འཇོག་བྱེད་གྲུབ་མཐའི་ཁྱད་པར། བཞི་པར་དེ་ཡི་གེས་མཚོན་ནས་ཉམས་སུ་ལེན་ཚུལ་ཏིང་ངེ་འཛིན། དྲུག་པར་དེས་མངོན་དུ་བྱས་པའི་འབྲས་བུ་སྐུ་ལྔའི་གྲུབ་ཚུལ་ལོ། །དུག་གསུམ་སྤྱད་སྦྱར་བཤད་པའི་དོན། རྒྱས་པ་ལས། མ་འགགས་སྣང་བ་ཐབས་ཡིན་ཏེ། །རང་བཞིན་མེད་པའི་ཤེས་རབ་ཡིན། །ཞེས་བཤད་པས། ཞེས་པའི་དོན་ལ་བློ་འབྱོར་ན་སྐྱོན་མེད་དོ། །དཔེར་ན། ཕ་མེས་ཐམས་ཅད་མེས་ཚིག་ནས་ཤི་བའི་མི་ཞིག་ན་རེ། མེ་འདི་སྲེག་པ་ཁོ་ནའོ་སྙམ་པ་ལ། ནམ་ཞིག་འབྲོག་དགོན་ཞིག་ན། རི་དྭགས་མེ་བྱི་དཀར་པོ་བྱ་བ་མེ་ལ་གནས་བཅས་ནས་ཟས་སུ་ཡང་མེ་ཟ་སྐོམ་དུ་ཡང་མེ་འཐུང་བ་ཞིག་མཐོང་ནས་དེའི་མངོན་ལྡོག་པ་བཞིན་ནོ། །ཡང་ན་ཐལ་མོ་རབ་བསྣོལ་ནས། །ཞེས་པའི་དོན། ཐལ་རྒྱུད་ལས། ཐལ་མོ་ཞེས་པ་བརྡེག་པའི་སྒྲ། །དབང་པོའི་ཡུལ་དུ་རབ་སྦྱོར་བས། །ཕྱག་རྒྱ་ཆེན་པོ་ནམ་མཁའི་དབྱིངས། །བརྟུལ་ཞུགས་གཉིས་ཀྱིས་ཕང་དུ་བླངས། །རྡོ་རྗེ་མཛུབ་མོའི་རྩེ་དག་ཏུ། །ཏིལ་འབྲུ་ནམ་མཁའི་གཞལ་ཡས་སུ། །རི་རབ་ཙམ་གྱི་ཕྱག་རྒྱ་འགོད། །ཞེས་པའོ། །མདོ་རྒྱུད་རྣམས་ནས་དུས་རིང་ཐུང་མི་མཐུན་པ་བཤད་པ་ཅི། ཞེས་པ། སྤྱི་ཙམ་དུ་འབྲས་བུ་འགྲུབ་པའི་དུས་ལ་ཐེག་པ་ཆེ་ཆུང་སྣ་ཚོགས་ནས་དུས་ཀྱི་ཚད་གཅིག་ཏུ་ངེས་བཟུང་མེད་པར་བཤད་པ་ནི་སོ་སྐྱེའི་གནས་སྐབས་སུ་གྲགས་ཚོད་ཡིན་ཅིང་། ངེས་པའི་དོན་དུ་ནི་ཚད་ངེས་པར་བཟུང་དུ་མི་རུང་སྟེ། གང་གིས་ཕྱིར་ན་དུས་ནི་སེམས་ཀྱི་སྣང་བ་ཡིན་ལ། སེམས་ལ་དབང་མ་ཐོབ་ཀྱི་བར་དུ་ནི་ཡུལ་དང་དུས་རྣམས་ཀྱང་སོ་སོར་བསྟན་པར་ངེས་པར་སྣང་ལ་སེམས་ལ་དབང་ཐོབ་ཕན་ཆད་ནི་ཡུལ་དང་དུས་ལ་ཅི་དགར་སྣང་ངོ་། །དེ་ལྟར་ཡང་དགོངས་པ་ངེས་འགྲེལ་ལས། སྔོན་གྱི་ལས་ཀྱི་སྒྲིབ་པ་སྦྱོང་བའི་ཚད་ངེས་པ་མེད་དེ། ཞེས་དང་། དྲི་མ་མེད་པར་གྲགས་པའི་མདོ་ལས་ཀྱང་། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རླབས་སོ། །ཞེས་གསུངས་པས་སེམས་ལ་དབང་ཐོབ་པས་ཇི་ལྟར་འདོད་པ་བཞིན་སྣང་བར་ཡིན་པར་བཤད་དོ། །ཀོ་རློན་གོས་ནི་སྣ་ཚོགས་གྱོན། །ཞེས་སོགས། དུར་ཁྲོད་ཀྱི་ཆས་དང་དཔལ་གྱི་ཆས་ནི། དཔལ་ཆེན་པོའི་སྐུ་ལ་རང་ཆས་སུ་གནས་པ་ནི་དཔལ་གྱི་ཆས་ཏེ། འཁོར་བའི་རྒྱུ་ལྡོག་པའི་བརྡ་དབུ་སྐྲ་གྱེན་དུ་བརྫེས་པ། ཐབས་ཤེས་ཀྱི་བརྡར་རྡོ་རྗེའི་ཁྱུང་གཤོག་རྟག་ཆད་ཟིལ་གནོན་གྱི་ཆས་སྙན་གོང་དུ་ཅོད་པན། རིག་པ་མི་འགྱུར་བའི་ཆས་སྤྱི་བོར་རྡོ་རྗེ་ཕྱེད་པས་མཚན་པ། བ་སྤུ་རྡོ་རྗེའི་གོ་ཁྲབ་ཀྱིས་གཏོམས་པ་གཟི་འབར་གྱི་ཆས། ཡུམ་ལ་གཉིས་མེད་སྦྱོར་བ་རང་རིག་པའི་ཡེ་ཤེས་ཤེས་རབ་སྟོང་པ་ཉིད་དང་མི་འབྲལ་བའི་ཆས། གནོད་གདུག་ཟློག་བྱེད་དཔའ་བོ་ལྕགས་ཀྱི་ཆས། ཉོན་མོངས་སྲེག་བྱེད་སྐུ་ལས་མེ་འོད་འཕྲོ་བ་རྡོ་རྗེ་མེའི་ཆས་ཏེ་དཔལ་གྱི་ཆས་བརྒྱད་དང་། དེ་དག་གི་སྟེང་དུ་བྱང་སེམས་བརྟན་པའི་བརྡར་སྙན་གོང་གཉིས་སུ་ཉི་ཟླས་བརྒྱན་པ་སྟེ་དཔལ་གྱི་ཆས་དགུའི། ཉི་ཟླ་གཉིས་སོ་སོར་དྲངས་པས་ཆས་བཅུ་ཞེས་ཀྱང་ཟེར་ཏེ། བརྩི་ཚུལ་འདི་ནི་སྒྱུ་འཕྲུལ་བ་སོགས་སྔ་འགྱུར་ཡོངས་གྲགས་ཀྱི་ལུགས་ཡིན། གཞན་དུ་འདུས་པ་མདོའི་རྩ་རྒྱུད་ཀུན་འདུས་རིག་པ་དང་། བཀའ་བརྒྱད་བདེར་འདུས་ཀྱི་རྩ་རྒྱུད་རྣམས་སུ། དཔའ་བོ་ཆེན་པོ་སྟག་གི་ཆས་སོགས་དཔལ་ཆས་བཅུ་འདི་དང་འདྲེན་ཚུལ་མི་གཅིག་ཙམ་ཞིག་འབྱུང་། རྒྱལ་བྱེད་དཔའ་རྟགས་ཀྱི་རྒྱན་ཞེས་དུར་ཁྲོད་ཀྱི་ཆས་བརྒྱད་ནི། སྔོན་དཔལ་ཆེན་པོས་དྲག་པོ་འཇིགས་བྱེད་ཆེན་པོ་བཏུལ་བའི་ཚེ་དེའི་རྒྱན་རྣམས་སྐུ་ལ་མནབས་པ་སྟེ། དེ་ལ་དུར་ཁྲོད་ཀྱི་ཆས་བརྒྱད་ནི། ཐོད་སྐམ་ལྔའི་དབུ་རྒྱན་དང་ཐོད་རློན་ལྔ་བཅུའི་དོ་ཤལ་ཏེ་ཐོད་རྒྱན་དང་། ཀླུ་རིགས་ལྔ་སྦྲུལ་རྣམ་པར་བྱས་པ་སྦྲུལ་རྒྱན་ཏེ་གདགས་པའི་རྒྱན་གཉིས། དཔྲལ་བར་ཐལ་ཆེན་གྱི་ཚོམ་བུ་སྨིན་མཚམས་སམ། འབུར་བཞི་ལ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཏེ་བྱུག་པའི་རྩི་གསུམ། གླང་ཆེན་གྱི་ཀོ་རློན་དང་ཞིང་ཆེན་གྱི་གཡང་གཞིའི་སྟོད་གཡོགས། སྟག་ལྤགས་ཀྱི་ཤམས་ཐབས་ཏེ་བགོ་བའི་གོས་གསུམ་རྣམས་སོ། །ཡང་ལུགས་གཅིག་ལ་དུར་ཁྲོད་ཀྱིས་ཆས་བརྒྱད་ནི། གདགས་པའི་རྒྱན་གཉིས། བྱུག་པའི་རྩི་གསུམ། བགོ་བའི་གོས་གསུམ་སྟེ་བརྒྱད་དོ། །དང་པོ་ལ་ནང་གསེས་སུ་དབྱེ་ན། ཐོད་སྐམ་ལྔ་རིགས་ལྔའི་རྩེ་ཕྲན་ཅན་གྱི་དབུ་བརྒྱན། ཐོད་རློན་ལྔ་བཅུའི་ཚར་གསུམ་ཐོད་པའི་དོ་ཤལ་ཏེ་ཐོད་རྒྱན་གཉིས་སམ། འགའ་ཞིག་ཏུ་ཐོད་ཚལ་གྱི་དཔུང་རྒྱན་བསྣན་ནས་གསུམ་དུ་བཤད། ཀླུ་རྒྱལ་རིགས་དཀར་པོས་སྐྲ་བཅིངས། རྗེ་རིགས་སེར་པོས་སྙན་ཆ་བྲམ་ཟེའི་རིགས་དམར་པོས་སེ་མོ་དོ་དང་མགུལ་ཆུ། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་གདུ་བུ་སྟེ་སྦྲུལ་རྒྱན་ལྔ། བྱུགས་པའི་རྩི་གསུམ་ནི། དཔྲལ་བར་ཐལ་ཆེན་གྱི་ཚོམ་བུ་རྡོ་རྗེ་རྩེ་གསུམ་རིས། སྨིན་མཚམས་སམ་འབུར་བཞི་རུ་རཀྟའི་ཐིག་ལེ་འདབ་བཞིའི་རིས། མགྲིན་པར་ཞག་གི་ཟོ་རིས་ཟླ་གམ་རིས་སོ། །བགོ་བའི་གོས་གསུམ་ནི། གླང་ཆེན་གྱི་ཀོ་རློན། ཞིང་ཆེན་གྱི་གཡང་གཞི། སྟག་ཤམས་རྣམས་སོ། །ཡང་བཤད་ཚུལ་གཅིག་ལ་དཔལ་གྱི་ཆས་བརྒྱད་དང་དུར་ཁྲོད་ཀྱི་ཆས་བརྒྱད་ལས། དང་པོ་ནི། ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །གནོད་གདུག་བཟློག་མཛད་རྒྱ་གྲམ་ལྗགས་ཀྱི་ཆས། །ཏིང་འཛིན་རབ་བརྗིད་དཔའ་བོ་སྟག་གི་ཆས། །དབང་གི་བསེ་ཁྲབ་གཟི་འབར་བཀོད་པའི་ཆས། །དཔའ་བརྗིད་གཉེན་ལྕུག་སྤྲུལ་ནག་འཁྱིལ་བའི་ཆས། །གཟི་མདངས་ཆེ་བ་ཆུ་སྲིན་སྤྲུལ་པའི་ཆས། །རྡོ་རྗེ་རྩེ་ལྔ་རིག་པ་ཀླག་པའི་ཆས། །བསྐལ་མེ་ལྟར་སྲེག་རྡོ་རྗེ་མེ་ཡི་ཆས། །ཞེས་སོ། །གཉིས་པ་ནི། ཐེག་མཆོག་སྟོབས་རྫོགས་གླང་ཆེན་ཀོ་རློན་རྟགས། །བྱང་སེམས་མ་ཉམས་ཞིང་གི་གཡང་གཞིའི་རྟགས། །དཔའ་གཏུམ་དྲག་པོའི་ལས་མཛད་སྟག་ཤམས་རྟགས། །ཡབ་ཡུམ་གཉིས་མེད་འཁྲིལ་བའི་སྦྲུལ་ཆུན་དང་། །དུས་གསུམ་སངས་རྒྱས་བདག་ཉིད་ཐོད་ཕྲེང་གསུམ། །ཕྲིན་ལས་ཕྱི་གཤོལ་མེད་པའི་ཐལ་ཆེན་དང་། །ཐུགས་རྗེ་ཆགས་པའི་རཀྟའི་ཐིག་ལེ་ཆེ། །དོན་དམ་གནས་ལུགས་བཅུད་ལྡན་ཞག་ཟོ་རིས། །བྱང་སེམས་དཀར་དམར་བརྟན་པའི་ཉི་ཟླས་རྒྱན། །བསྣན་པའི་དཔལ་གྱི་ཆས་བཅུར་བཞེད་པའོ། །ཡང་ལུགས་གཅིག་ལ། བགོ་བ་ཀོ་རློན་གྱི་གོས་སྣ་ཚོགས་པ་སྟེ་ཐབས་མཁས་ཕྲིན་ལས་ཀྱི་གོས་ཞིང་གི་གཡང་གཞི། ཁྱབ་པ་ཐུགས་རྗེའི་གོས་གླང་ཆེན་གྱི་ཀོ་རློན། ཕྱི་ནང་གསང་བ་སྡུད་པའི་གོས་སྟག་ལྤགས་ཀྱི་ཤམས་ཐབས་རྣམས་སོ། །གཞན་རྣམས་བཤད་པ་གོང་དང་འདྲ། དཔལ་གྱི་ཆས་བརྒྱད་ནི། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། །གདུག་པ་ཅན་བསྲེག་ཡེ་ཤེས་མེ་ཡི་ཆས། །སྐྱེ་ཤི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་ཀླག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་བཟློག་མཛད་རྒྱ་གྲམ་ལྗགས་ཀྱིས་ཆས། །ཞེས་བཤད་དོ། །རུས་པའི་ཕྱག་རྒྱ་དྲུག་ནི། སྤྱི་བོའི་འཁོར་ལོ་མི་བསྐྱོད་པ། རྣ་ཆ་ཟུང་འོད་དཔག་མེད། མགུལ་རྒྱན་རིན་འབྱུང་། ཕྱག་ཞབས་ཀྱི་གདུ་བུ་བཞི་རྣམ་སྣང་། སྐ་རགས་ཞེས་སྨད་རྒྱན་དོན་གྲུབ། སེ་རལ་ཁའམ་མཆོད་ཐོགས་ཞེས་རྡོར་སེམས་ཀྱི་ཕྱག་རྒྱ་སྟེ་དྲུག་གོ། །ཕྱག་རྒྱ་ལྔ་ནི་སེ་རལ་ཁ་སྤངས་པའི་དང་པོ་ལྔའོ། །ཁྲོ་བོའི་མངའ་གསོལ་ནི། རོལ་པ་ཉི་ཤུ། ཆེ་བ་ཉི་ཤུ། རྔམ་པ་ཉི་ཤུ། བརྗིད་པ་ཉི་ཤུ་སྟེ་བརྒྱད་ཅུས་མངའ་གསོལ་བའོ། །སློབ་མའི་སྐྱོན་བཞི་དང་ཡོན་ཏན་ལྔ་ལས། དང་པོ་ནི། སྣོད་ཁ་སྦུབ། ཞབས་རྡོལ། གཞོགས་རལ་ཅན་བཞིའོ། །གཉིས་པ་ནི། ངང་ཆུ་བོ་ཆེན་པོའི་གཞུང་བཞིན་རིང་བ། ཚུལ་དགེ་སྦྱོར་དག་གསར་བུར་ལྟར་ཞིབ་པ། བསམ་པ་རིན་པོ་ཆེ་གསེར་ལྟར་བཟང་བ། བློ་རི་རབ་ལྟར་བརྟན་ཅིང་མི་འགྱུར་བ། ཤེས་རབ་དང་སྙིང་རྗེ་ནོགས་ཐུབ་པ་སྟེ་ལྔའོ། །ཡང་ན་ཅིས་ཀྱང་སེམས་མི་འཁྲུག་པས་ངང་བཟང་། སྐྱེ་བོ་རྣམས་ཀྱི་སྤྱོད་པ་ལས་ལོག་པས་ཚུལ་ཤེས། བློ་མི་འགྱུར་བ་རབ་ཏུ་བརྟན་ནས། ལུས་དང་ལོངས་སྤྱོད་ཆོས་ཕྱིར་གཏོང་ཕོད་པ། དད་པ་དང་ཤེས་རབ་ཆེ་བའོ། །དྲི་བའི་ལན་བཏབ་ཟིན་ནོ། །སྨྲས་པ། རྟོགས་དཀའི་གནས་ལ་དྲི་ཚིག་བདུན་གྱི་ལན། །ཀུན་ལན་ཐེབས་པ་སངས་འཕགས་ཁོ་ནའི་ཡུལ། །མི་ཤེས་མདུད་པ་སྙིང་རྗེའི་ཚིག་གིས་དཀྲོལ། །རྣམ་དཀར་དགེ་བ་བྱང་ཆེན་རྒྱུ་རུ་བསྔོ། །ཞེས་པ་འདི་ནི་རང་གི་ཉེ་བར་གནས་པ་གནས་ལྔ་སྨྲ་བ་དྭགས་པོ་ཨོ་རྒྱན་བློ་གསལ་གྱི་དྲི་ལེན་དུ་སྨིན་གླིང་གྲྭ་པའི་ཐ་ཤལ་བ་དྷརྨ་ཀིརྟིས་རང་ལོ་རེ་གཅིག་པ་གནས་ཆེན་ཆུ་བོ་རི་ཚེ་ཆུ་བཀོད་པའི་སྒྲུབ་སྡེའི་བླ་བྲང་དུ་མེ་འབྲུག་དབོ་ཟླའི་ཡར་ཚེས་ཀྱི་དུས་དགེ་བར་བྲིས་པ་དགེ་ལེགས་སུ་གྱུར་ཅིག །འདིས་ཀྱང་གསང་ཆེན་བསྟན་པ་རྒྱས་པའི་རྒྱུར་གྱུར་ཅིག །མངྒ་ལམ།། །།

དཔལ་གསང་བ་སྙིང་པོའི་སྤྱི་དོན་གཏན་ལ་འབེབས་པའི་ཐལ་འགྱུར་རིགས་པའི་སྒོ་འབྱེད། ཨོ་རྒྱན་ཆོས་གྲགས།

དཔལ་གསང་བ་སྙིང་པོའི་སྤྱི་དོན་གཏན་ལ་འབེབས་པའི་ཐལ་འགྱུར་རིགས་པའི་སྒོ་འབྱེད་ཅེས་བྱ་བ་བཞུགས་སོ། །ༀ་སྭ་སྟི། བླ་མ་དང་ལྷག་པའི་ལྷ་དབྱེར་མ་མཆིས་པ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །བླ་མེད་ཐེག་པའི་བཅུད་འདུས་པའི། །གསང་སྔགས་ཀུན་གྱི་རྒྱལ་པོའི་རྒྱུད། །གསང་བའི་སྙིང་པོར་ངེས་པ་ཅན། །སྟོན་མཛད་དྲུག་པ་ཀུན་ཏུ་བཟང་། །འོག་མིན་ཆེན་པོའི་གནས་མཆོག་ཏུ། །སྐུ་ལྔའི་ཚུལ་གྱི་འཁོར་ལྔ་ལ། །གསུང་ལྔ་རང་བྱུང་རིག་པའི་དབྱངས། །སྒྲོག་མཛད་ཀུན་བཟང་རིགས་ལྔར་འདུད། །རྒྱལ་བའི་བཀའ་ཡི་བསྡུ་བ་པོ། །གསང་འཛིན་ལག་ན་རྡོ་རྗེ་ནི། །ཞིང་འདིར་འགྱུར་མེད་རྡོ་རྗེའི་མགོན། །རྣམ་ཀུན་རིགས་ཀྱི་བདག་པོར་མཆོད། །གཏེར་ཆེན་བླ་མའི་ཡེ་ཤེས་གང་། །བཞད་པའི་རྡོ་རྗེར་འཕོས་པ་ཡིས། །སྐལ་ལྡན་ཕོ་ཉའི་རྟེན་འབྲེལ་གྱིས། །མཁའ་སྤྱོད་གནས་སུ་ཁྲིད་དེར་འདུད། །ཌཱ་ཱཀི་གསང་བའི་ལུང་བྱང་གིས། །བསྐུལ་བའི་སྐྱབས་མཆོག་བཞད་པའི་བཀའ། །སྤྱི་བོར་ལྷུང་ལས་འགོང་མ་ནུས། །རྩོམ་ལ་སྤོབས་པའི་སྣང་བ་སྩོལ། །མཐའ་བྲལ་ཆོས་ཉིད་ཟབ་མོའི་དོན། །ཐ་སྙད་ཚིག་གིས་མཚན་མིན་ཡང་། །ཚད་མ་གསུམ་གྱི་གཏན་ཚིགས་ཀྱི། །ཐལ་འགྱུར་རིགས་པའི་སྒོ་འབྱེད་སྤྲོ། །ནང་ན་མ་དང་མཁའ་འགྲོ་ཡིས། །བཟོད་པར་བཞེས་ལ་གྲོགས་མཛོད་ཅིག །དེ་ལ་ཐོག་མར་འཕྲོས་ཚུལ་གྱི་རྣམ་བཞག་དང་བཤད་ཚུལ་གཉིས་ལས། དང་པོ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་ཉིད། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་ལ་འཕྲོས་པ་ཡིན་པར་ཐལ། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ་རྒྱུད་འདིའི་ཆེད་དུ་བྱ་བའི་གདུལ་བྱ་ལ་དབང་པོ་རབ་འབྲིང་ཐ་གསུམ་ཡོད་པའི་ནང་ནས། མཚན་བསྟན་པ་ཙམ་གྱིས་རྒྱུད་དབུ་ཞབས་ཀྱི་དོན་ཁོང་དུ་ཆུད་པར་འགྱུར་བའི་དབང་པོ་ཡང་རབ་མཆོག་ཏུ་གྱུར་པ་རྣམས་ཀྱི་དོན་དུ་སྡུད་པ་པོ་གསང་བདག་གིས་བཀའ་བསྡུ་མཛད་པའི་ཐོག་མར་རྒྱུད་དོན་གྱི་ངོ་བོ་དང་མཐུན་པའི་མཚན་ཀླད་དུ་བཀོད་ཚུལ་གྱིས་རྣམ་བཞག་དག་དེ་ཉིད་བསྟན་ནས། རང་གི་སྟོན་པ་ལ་བསྟོད་ཕྱག་མཛད་ཚུལ་གྱི་རྣམ་བཞག་དེ་སྟོན་པ་ལ། བཅོམ་ལྡན་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་བྱུང་བ་གང་ཞིག །རྒྱུད་ཀྱི་གླེང་གཞི་ཕུན་སུམ་ཚོགས་པ་དེ་ལ་ཐུན་མོང་མ་ཡིན་པའི་ཕྱོགས་བཟུང་ནས་མདོར་བསྟན་པ། རྒྱུད་ཁྱད་པར་གྱི་གླེང་གཞི་ཚོགས་ཚུལ་གྱི་སྒོ་ནས་རྒྱས་པར་བཤད་པ། སྡུད་པ་པོ་གསང་བདག་རང་ཉིད་རིགས་ལྔ་དབྱེར་མི་ཕྱེད་པ་རྒྱལ་བ་དྲུག་པ་ཉིད་དུ་ཁས་བླངས་ན་གླེང་གཞིའི་དོན་བསྡུས་ཏེ་བསྟན་པ་དང་གསུམ་ལས། ཐུན་མོང་མ་ཡིན་པའི་ཕྱོགས་བཟུང་ནས་གླེང་གཞི་མདོར་བསྟན་གྱི་རྣམ་བཞག་དེ་སྟོན་པར་བྱེད་པ་ལ། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། བསྟན་བཤད་བསྡུད་གསུམ་གྱི་སྒོ་ནས་རྒྱུད་འབྱུང་བའི་རྒྱུད་གླེང་གཞི་ཕུན་སུམ་ཚོགས་པ་ལས། རྒྱུད་འབྱུང་བའི་རྐྱེན་གླེང་བསླང་བ་ལ། ཐུན་མོང་མ་ཡིན་པ་དང་། ཐུན་མོང་པ་གཉིས་ལས། ཐུན་མོང་མ་ཡིན་པར་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་ཚུལ་དེ་སྟོན་པ་ལ། ཡབ་ཀྱི་གླེང་བསླང་བ། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། རྫོགས་པའི༴ སྐྱེ་མཆེད༴ བྱང་ཆུབ༴ ས་ཆུ༴ མེ་རླུང་༴ ནམ་མཁའ༴ སྲིད་གསུམ༴ ཐམས་ཅད༴ སངས་རྒྱས༴ སངས་རྒྱས་ཉིད་ལ༴ སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། ཡུམ་གྱིས་གླེང་བསླང་བ། ཀྱེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། སྲིད༴ སྙིགས་མ༴ ཕུང་པོ༴ ཐམས་ཅད་མཆོག་གི༴ གཞན་དུ༴ ཉིད་ལས༴ བཙལ་ཀྱང་རྒྱལ་བས་མི་བརྙེས་སོ། །ཞེས་དང་། ཐུན་མོང་དུ་གླེང་བསླང་པ། ཨེ་མ་ཧོ། ངོ་མཚར་རྨད་ཀྱི་ཆོས། རྫོགས་པའི༴ སྐྱེ་བ༴ སྐྱེས་པ༴ འགག་པ༴ གནས་པ༴ དམིགས་པ༴ འགྲོ་འོང་ཉིད་ན་འགྲོ་འོང་མེད། །ཞེས་པའི་གཞུང་ཚན་གསུམ་པོ་འདི་བྱུང་། ཐུན་མོང་གི་གླེང་བསླང་དེ་ལ་གཉིས་ལས། འཁོར་གྱིས་ཞུས་ཚུལ་ནི། ལྷན་ཅིག་པའི་འཁོར་རྣམས་ཐུན་མོང་མ་ཡིན་པའི་གླེང་བསླང་ལ་བརྟེན་ནས་སངས་རྒྱས་ཏེ། སྟོན་འཁོར་དགོངས་པ་དབྱེར་མེད་དུ་གྱུར་པས་རྒྱུད་ཞུ་མ་དགོས་ཀྱང་། གཞན་དོན་དུ་གོ་ཕྱེ་བའི་འཁོར་རྣམས་རྒྱུ་ལྷན་ཅིག་སྐྱེས་པའི་མ་རིག་པས་ལྷག་པ་དོན་དམ་གྱི་བདེན་པ་མ་རྟོགས་པས་ཡེ་ནས་གསང་། ཀུན་བཏགས་ཀྱི་མ་རིག་པས་ལྷག་པ་ཀུན་རྫོབ་ཀྱི་བདེན་པ་མ་རྟོགས་པས་རང་བཞིན་གྱིས་གསང་། སྣང་སྟོང་ཡ་གྱལ་དུ་བཟུང་བས་ལྷག་པ་བདེན་པ་དབྱེར་མེད་མ་རྟོགས་པས་ངོ་བོ་ཉིད་ཀྱིས་གསང་ཡུལ་དང་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་མ་རྟོགས་པས་ཤིན་ཏུ་གསང་བ་སྟེ། དེ་ལྟར་གསང་བ་བཞིས་ཆོད་པའི་གདུལ་བྱ་རྣམས་ལ་རྒྱུད་བསྟན་པའི་སྒོ་ནས་ཐུགས་རྗེས་བཟུང་བར་རིགས་སོ་ཞེས་ལྷན་ཅིག་པའི་འཁོར་རྣམས་ཀྱིས་སྟོན་པ་ལ་ཞུས་ཚུལ་གྱི་རྣམ་བཞག་དེ་སྟོན་པར་བྱེད་པ་ནི། ཨེ་མ་ཧོ་ཡེ་ནས་གསང་བའི་ཆོས། སྣ་ཚོགས༴ ངོ་བོ༴ གཞན་དུ་མིན་ལས་ཤིན་ཏུ་གསང་། །ཞེས་པའི་གཞུང་འདི་བྱུང་སྟོན་པས་ལན་རྩལ་ཚུལ་ནི། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པ་ལས། དེ་ལྟར་མ་རྟོགས་པའི་དབང་གིས་བཅིངས་གྲོལ་ལྟར་སྣང་ཡང་། འཇམ་དཔལ་ཞལ་ལུང་ལས། འཁོར་བའི་ཆོས་རྣམས་ཐག་ཁྲ་ཡིས། །སྦྲུལ་ལྟར་མེད་པ་ཉིད་དུ་འདོད། །ཅེས་པ་ལྟར་གཤིས་ལ་བཅིངས་གྲོལ་གཉིས་ཀ་མ་གྲུབ་པའི་ཚུལ་མཚོན་དཔེ་དང་བཅས་པའི་རྣམ་བཞག་དེ་ཉིད་སྟོན་པར་བྱེད་པ་ནི། ཨེ་མ་ཧོ། བདེ་གཤེགས་སྙིང་པོ་ལས། རང་གི་རྣམ་རྟོག༴ སྣ་ཚོགས༴ གནས་དང་། བདག་དང་། སུས་ཀྱང་༴ བཅིང་པར༴ རྣམ་རྟོག༴ ནན་གྱིས་མཁའ་ལ་མདུད་པ་བོར། །ཞེས་པའི་གཞུང་འདི་བྱུང་། དེ་ལྟར་སྟོན་པའི་ཐུགས་རྗེ་སྐྱེས་ཏེ། བཅིངས་གྲོལ་མེད་པའི་གཤིས་དེ་ཁོ་ན་ཉིད་ཀྱི་ཆོས་སྟོན་པར་དགྱེས་ནས། རང་ཉིད་སྐུ་དང་ཡེ་ཤེས་སུ་ཡེ་ནས་ལྷུན་གྱིས་རྫོགས་པ་འཁོར་འདས་མཉམ་པ་ཉིད་དུ་གསལ་བའི་དོན་སངས་རྒྱས་ཀུན་གྱིས་ཐུགས་སུ་ཆུད་པའི་ཆོས་དེ་ལྷན་ཅིག་པའི་འཁོར་ལ་དངོས་སུ་བསྟན་ནས། གོ་ཕྱེ་བའི་འཁོར་ལ་བརྒྱུད་ནས་སྟོན་པའི་ཕྱིར། སྤྲུལ་པ་སྤྲོ་བར་ཞལ་གྱིས་བཞེས་ཚུལ་གྱི་རྣམ་བཞག་དེ་སྟོན་པར་བྱེད་པ་ནི། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆེས། །བསྟན་ཕྱིར་སྤྲོ་བ་སྣ་ཚོགས་མཛད། །ཞེས་པའི་གཞུང་འདི་བྱུང་བ་ཡིན་པའི་ཕྱིར། འཕྲོས་ཚུལ་དེ་ཙམ་ཞུས་ནས། གཉིས་པ་བཤད་ཚུལ་ནི། དེ་ལ་ཐོག་མར་མཚན་ཀླད་དུ་སྨོས་པའི་དགོས་པ། དེའི་དོན་བཤད་པ། དེ་ལ་རྩོད་པ་སྤོངས་པ་གསུམ། དང་པོ་ནི། མཚན་ཀླད་དུ་སྨོས་པ་ཆོས་ཅན། དགོས་པ་ཡོད་དེ། བུམ་པ་ཞེས་པའི་མིང་ལས། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་གོ་བ་ལྟར། མཚན་མཐོང་བའམ། ཐོས་པ་ལ་བརྟེན་ནས། དབང་པོ་རབ་ཀྱིས་གཞུང་གི་དོན་གོ་བ་དང་འབྲིང་གིས་དོན་གྱི་རྣམ་གྲངས་ཁོང་དུ་ཆུད་པ་དང་། ཐ་མས་ཀྱང་སྨན་གྱི་ཁ་བྱང་ལྟར་གླེགས་བམ་བཙལ་བདེ་བའི་ཆེད་ཡིན་པའི་ཕྱིར། གཉིས་པ་ནི་འགྲེལ་ཆུང་ལས། འདིས་ནི་རང་བཞིན་ཆེ་བ་དང་། །མཚན་ཉིད་དང་ནི་དོན་བསྟན་ཕྱིར། །སྒྱུ་འཕྲུལ་དྲྭ་བའི་རྒྱུད་ཆེན་ལས། །མདོར་བསྡུས་གཏན་ལ་ཕབ་པ་ཡིན། །རང་བཞིན་གསང་བ་ཞེས་བྱ་སྟེ། །ཆེ་བ་ཞེས་བྱ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །དེ་ལྟར་རྣམ་པ་བཞི་པོ་རུ། །མདོར་བསྡུས་སྤྱི་ཡི་དོན་དུ་བཤད། །ཅེས་གསུངས་པའི་ཕྱིར་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་རྣོན་དེ་ཆོས་ཅན། ཁྱོད་ཀྱིས་མཚན་འདི་ལ་བརྟེན་ནས་གོ་ཚུལ་དང་རྟོག་ཚུལ་ཡོད་དེ། གསང་བ་སོགས་མཚན་བཞིས་རིམ་པ་བཞིན། རྟོགས་དཀའ་བ་དང་། བཅུད་འདུས་པ་དང་། མཚན་ཉིད་གཞན་རྣམ་པར་བཅད་པ་དང་། དྲང་དོན་མ་ཡིན་པར་ངེས་དོན་ཐེ་ཚོམ་དང་བྲལ་བར་གོ་བ་གང་ཞིག །སྟོན་ཚུལ་དེ་དང་རྗེས་སུ་མཐུན་པར་རྒྱུད་ཀྱི་རང་བཞིན་དང་ཆེ་བ་སོགས་ཀྱང་རྟོགས་པ་ཡིན་པའི་ཕྱིར། གསང་བ་ཞེས་པའི་མཚན་དེ་ཆོས་ཅན། ཁྱོད་ལ་དབྱེ་ན་གསུམ་དུ་ཡོད་དེ། རང་བཞིན་དང་གབ་པ་དང་སྦས་པའི་གསང་བ་གསུམ་དུ་ཡོད་པའི་ཕྱིར། རང་བཞིན་གྱི་གསང་བ་ཆོས་ཅན་ཁྱོད་བཤད་དུ་ཡོད་དེ། སེམས་ཉིད་བདེན་པ་དབྱེར་མེད་ལྷག་པའི་ཆོས་སྐུར་ཡེ་ནས་རང་ཆས་སུ་གནས་ཀྱང་བློའི་སྤྱོད་ཡུལ་དང་མ་བྲལ་བར་མ་རྟོགས་པ་དེ་ཡིན་པའི་ཕྱིར། དཔེར་ན་ནམ་མཁའ་ཉིད་མིག་གིས་མཐོང་བྱར་མ་གྱུར་པ་བཞིན་ནོ། །དེ་ལྟར་ཡང་འདི་ཉིད་ལས། ཨེ་མ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པས་གསང་ཚུལ་བཞི་སྟེ། ལྷན་ཅིག་སྐྱེས་པའི་མ་རིག་པས་དོན་དམ་བདེན་པ་མ་རྟོགས་པས་ཡེ་ནས་གསང་བ། ཀུན་རྟགས་ཀྱི་མ་རིག་པས་ཀུན་རྫོབ་བདེན་པ་མ་རྟོགས་པས་རང་བཞིན་གྱིས་གསང་བ། སྣང་སྟོང་སོ་སོར་བཟུང་བས་དབྱེར་མེད་མ་རྟོགས་པས་ངོ་བོ་ཉིད་ཀྱིས་གསང་བ། ཡུལ་ཡུལ་ཅན་དུ་བཟུང་བས་སྤྱོད་ཡུལ་དང་བར་མ་རྟོགས་པས་ཤིན་ཏུ་གསང་བ་སྟེ། གསང་ཚུལ་བཞིས་ཆོད་པའི་ཚུལ་དུ་གསང་བ་ཡིན་པའི་ཕྱིར། གབ་པའི་གསང་བ་ཆོས་ཅན། ཁྱོད་བཤད་དུ་ཡོད་དེ། གདུལ་བྱ་འཁྲུལ་པའི་བློ་ཅན་གྱི་རྟོགས་དཀའ་བ་དང་། རེ་ཆོད་ཅན་གྱི་རྟོགས་སུ་མི་རུང་བས་གབ་པ་ཡིན་པའི་ཕྱིར། དཔེར་ན་མིག་སེར་ཅན་ལ་དུང་གི་ཁ་དོག་བཞིན་ནོ། །དེ་ཡང་རང་བཞིན་གྱི་རྒྱུད་དུ་གབ་པ་དེ་ཆོས་ཅན། ཁྱོད་རང་ལ་རང་ཆས་སུ་གནས་ཀྱང་རྟོག་པས་སྒྲིབ་ནས་གབ་པ་ཡིན་ཏེ། དེ་འབྱིན་བྱེད་ལུང་ཚད་མའི་བདག་པོ་སྟོན་པ་སངས་རྒྱས་ཉིད་ཀྱིས་འབྱིན་པར་མཛད་པའི་ཕྱིར་དཀྱུས་ཡི་གེ་ལ་གབ་པ་དེ་ཆོས་ཅན། ཁྱོད་བཤད་དུ་ཡོད་དེ་རས་ཆོད་ཅན་མགོ་རྨོངས་པར་བྱ་བའི་ཕྱིར། རྒྱུད་དཀྲུགས། ལུང་གཅུས། མན་ངག་གབ་པའི་ཚུལ་དུ་གནས་པ་དེ། །མན་ངག་ཚད་མའི་བདག་པོ་རྡོ་རྗེ་སློབ་དཔོན་གྱིས་འབྱིན་པར་མཛད་པའི་ཕྱིར་ཏེ། དེ་ལྟར་ཡང་འདི་ཉིད་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་གསུངས་པ་ཡིན་པའི་ཕྱིར། སྦས་པའི་གསང་བ་ཆོས་ཅན། ཁྱོད་བཤད་དུ་ཡོད་དེ། རྒྱུད་ཟབ་མོ་འདི་གསང་སྔགས་ཀྱི་མན་ངག་མེད་པ་དང་། སྒྲ་ཇི་བཞིན་པར་སྤྱོད་པ་རྣམས་ལ་སྦས་པའི་ཕྱིར་ཏེ། དེ་དག་གི་སྤྱོད་ཡུལ་མ་ཡིན་པའི་ཕྱིར་དང་། གཅན་གཟན་ཆེན་པོའི་སྒྱུ་རྩལ་སྤྲེའུས་མི་བཟོད་པའོ། །སེང་ཞོ་སྣོད་ངན་དུ་བླུག་བྱ་མ་ཡིན་པ་བཞིན་ནོ། །དེ་ཡང་གང་སྦས་ན། གསང་སྔགས་ཀྱི་མཛད་སྤྱོད་སྦྱོར་སྒྲོལ་ལ་སོགས་པ་ལྟ་སྤྱོད་འབྲེལ་བས་སྤྱད་བྱར་གསུངས་པ་དེ་དག་བརྡའི་ཚུལ་གྱིས་སྦས་པ་ཏེ། གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡའ་དག་སྣ་ཚོགས་གསུངས། །ཞེས་གསུངས་པ་ཡིན་པའི་ཕྱིར། གཉིས་པ། སྙིང་པོ་ཞེས་པའི་མཚན་དེ་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། རྒྱུ་དང་འབྲས་བུ་དང་བཅུད་འདུས་པ་དོན་གྱི་སྙིང་པོ་དང་གསུམ་དུ་ཡོད་པའི་ཕྱིར། དང་པོ། རྒྱུའི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། རྒྱུད་འདི་ཐེག་པ་ཐམས་ཅད་ཀྱི་འཕྲོ་གཞིའམ་འབྱུང་བའི་རྒྱུ་ལྟ་བུར་གྱུར་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་གསུངས་པ་ཡིན་པའི་ཕྱིར། གཉིས་པ་འབྲས་བུའི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། ཐེག་པའི་སྒོ་གང་ནས་བསྒྲུབས་ཀྱང་། མཐར་རང་བཞིན་གསང་བའི་སྙིང་པོ་འདིའི་དོན་མངོན་དུ་བྱེད་དགོས་པའི་ཕྱིར་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ཡིན་པའི་ཕྱིར། གསུམ་པ་བཅུད་འདུས་པའི་དོན་གྱི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། གཏན་ཚིགས་ཀྱི་སྒོ་གང་ནས་གཏན་ལ་ཕབ་ཀྱང་མཐར་ཐུག་སངས་རྒྱས་ཀྱི་དགོངས་པའི་ངོ་ན་རྟོག་ཚོགས་ཐམས་ཅད་སྐུ་དང་ཡེ་ཤེས་བཞི་བཅུ་རྩ་གཉིས་སུ་སངས་རྒྱས་པས་འཁོར་བ་རང་བཞིན་གྱིས་རྣམ་པར་དག་པ་ཡིན་པའི་ཕྱིར་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པའི་འཁྲུལ་པ་ཡིན། །ཞེས་གསུངས་པའི་ཕྱིར། གསུམ་པ། དེ་ཁོ་ན་ཉིད་ཞེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ་མ་བཅོས་པའི་དེ་ཁོ་ན་ཉིད་དང་། མ་ནོར་བའི་དེ་ཁོ་ན་ཉིད་དང་། གཞན་མ་ཡིན་པའི་དེ་ཁོ་ན་ཉིད་དང་གསུམ་དུ་ཡོད་པའི་ཕྱིར། དེའི་དང་པོ། མ་བཅོས་པའི་དེ་ཁོ་ན་ཉིད་ཆོས་ཅན། ཁྱོད་བཤད་དུ་ཡོད་དེ། རྟོག་ཚོགས་ཐམས་ཅད་རང་རིག་ལས་མི་གཞན་པས་སྣང་སྟོང་གཉིས་མེད་རང་བྱུང་གི་ཡེ་ཤེས་ལ་སྒོམ་བྱེད་ཀྱི་བློས་མ་བཅོས་པར་བཞག་པས་ན་དེ་སྐད་དུ་བརྗོད་པའི་ཕྱིར་ཏེ། རྒྱས་པ་ལས། མ་བཅོས་ལྷུན་མཉམ་ཇི་བཞིན་ངང་བཞག་ངང་། །ཞེས་གསུངས་པ་ཡིན་པའི་ཕྱིར། གཉིས་པ། མ་ནོར་བའི་དེ་ཁོ་ན་ཉིད་དེ་ཆོས་ཅན། ཁྱོད་བཤད་དུ་ཡོད་དེ། མ་བཅོས་པའི་དེ་ཁོ་ན་ཉིད་དེ་གོམས་པ་ལས་འབྲས་བུ་སྐུ་དང་ཡེ་ཤེས་ཀྱི་ཕྱག་རྒྱ་མང་པོར་སྣང་བ་ནི། མ་ནོར་བས་དེ་ལྟར་དུ་བརྗོད་པའི་ཕྱིར་ཏེ། རྒྱས་པ་ལས། རྒྱུ་འབྲས་ལྷུན་གྱིས་གྲུབ་པའི་ངང་དུ་གནས། །ཞེས་གསུངས་པ་ཡིན་པའི་ཕྱིར། གསུམ་པ། གཞན་མ་ཡིན་པའི་དེ་ཁོ་ན་ཉིད་དེ་ཆོས་ཅན། ཁྱོད་བཤད་དུ་ཡོད་དེ། འབྲས་བུ་དེའང་སྒྲིབ་བྱེད་ཀྱི་ཞེན་པ་དག་པའི་ཚེ་རང་ལ་ཡོད་པའི་དོན་སྣང་བ་ལས། གཞན་ནས་བྱུང་བ་མ་ཡིན་པའི་ཕྱིར་ཏེ། འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཞེས་དང་། རྒྱས་པ་ལས། ཇི་སྙེད་བརྒྱུད་པའི་ཁ་བརྒྱུད་ཀྱང་། །ཡང་དག་དོན་གྱི་སྙིང་པོ་ནི། །གཞན་ནས་བཙལ་ཀྱང་མི་རྙེད་དེ། །རང་རིག་སྒྲིབ་མེད་དག་པ་ཡིན། །ཞེས་གསུངས་པའི་ཕྱིར། བཞི་པ། ངེས་པའོ། །ཞེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། གཞི་དང་ལམ་དང་འབྲས་བུར་ངེས་པ་གསུམ་དུ་ཡོད་པའི་ཕྱིར། དང་པོ་གཞིར་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། གཞིའི་རྒྱུད་རང་བཞིན་གསང་བའི་སྙིང་པོ་དེ་ཆོས་ཉིད་སྒྲོ་སྐུར་དང་བྲལ་བར་བདེན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། སྒྲོ་དང་བསྐུར་བ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུངས། །ཞེས་གསུངས་པའི་ཕྱིར། གཉིས་པ་ལམ་དུ་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། ཐེག་པ་འདིའི་ལུགས་ཀྱི་ཡེ་ནས་གནས་པའི་འབྲས་བུ་ཉིད་ཤེས་ཐོབ་ཀྱི་བྱེད་པས་ལམ་དུ་བྱེད་པར་ངེས་པའི་ཕྱིར་ཏེ། འདི་ཉིད་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་གསུངས་པའི་ཕྱིར། གསུམ་པ་འབྲས་བུར་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། རྒྱུད་འདི་རང་གི་ངོ་བོས་བརྗོད་བྱ་རྒྱལ་བའི་དགོངས་པ་ངེས་དོན་མངོན་དུ་ཕྱུངས་ནས་སྟོན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། རྒྱལ་བའི་དཀྱིལ་འཁོར་མ་ལུས་པ། །འདི་ལས་གསང་བའི་ངེས་དོན་མེད། །ཞེས་གསུངས་པ་ཡིན་པའི་ཕྱིར། གསུམ་པ་རྩོད་སྤང་ལ། མཚན་རྒྱུད་དོན་ཡིན་མིན་ལ་རྩོད་པ། མཚན་དུ་རྒྱུད་དོན་འདུས་མ་འདུས་ལ་རྩོད་པ། མན་ངག་ཁོ་ནའི་མཚན་ནས་སྨོས་པར་རྩོད་པ། རྒྱ་སྐད་མི་སྨོས་པར་བོད་སྐད་སྨོས་པར་རྩོད་པ་དང་བཞི་ལས། དང་པོ་ནི། མཚན་རྒྱུད་དོན་ཡིན་ནམ་མ་ཡིན་ན་གླེང་གཞི་གླེང་བསླངས་དགོས་མེད་དུ་ཐལ་བ་དང་། མ་ཡིན་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་པོ་ཡང་རབ་དེས་མཚན་མཐོང་བའམ། ཐོས་པས་རྒྱུད་དོན་མི་རྟོགས་པར་ཐལ་ལོ་ཟེར། དེའི་ལན་ལ། མཚན་རྒྱུད་དོན་ཡིན་ཡང་། གླེང་གཞི་གླེང་བསླང་མི་དགོས་པའི་སྐྱོན་མེད་དེ། སྔོན་འབྱུང་འོག་མིན་དུ་གླེང་གཞི་ཚོགས་ཏེ་གླེང་བསླང་ནས་རྒྱུད་དོན་གསུང་པ། མི་ཡུལ་དུ་གསང་བདག་གིས་ཚིག་དང་ཡི་གེར་འགོད་པའི་ཚེ། བློ་རབ་འབྲིང་ཐ་གསུམ་ལ་དགོངས་ནས་མཚན་ཀླད་དུ་སྨོས་པའི་ཕྱིར་ཞེས་སྔ་རབས་པ་དག་གིས་ལན་དེ་ལྟར་གསུང་ཡང་མི་འཐད་དེ། མཚན་དེ་ཆོས་ཅན། ཁྱོད་རྒྱུད་དོན་མ་ཡིན་པར་ཐལ། ཁྱོད་དེ་རྟོགས་བྱེད་ཀྱི་ཐབས་ཡིན་པའི་ཕྱིར་རོ། །ཡང་ཁ་ཅིག་ན་རེ། སྟོན་པས་འོག་མིན་དུ་རྒྱུད་འདི་བརྗོད་བྱེད་ཚིག་ཏུ་མ་གསུངས་པར་ཐལ། དམ་བཅའ་དེ་འཐད་པའི་ཕྱིར་ཟེར་ན། དགོངས་པ་བརྡའི་བཤད་པ་ཉིད་གསང་བདག་གིས་ཚིག་ཏུ་བསྡུས་པའི་ཚེ། རང་ཉིད་སྟོན་པ་དང་དགོངས་པ་མཉམ་པར་ཁས་བླངས་ནས། འདི་སྐད་བཤད་པའི་དུས་ན། ཞེས་བསྡུས་པར་བཞེད་པའི་ཕྱིར་ཏེ། འགྲེལ་པ་ཉི་སེང་མར། ད་ནི་སྡུད་པ་པོས་བཅོམ་ལྡན་འདས་ཀྱི་ལུང་དང་མཐུན་པ་ལྟར་རྒྱུད་ཀྱི་གླེང་གཞི་མཛད་པ་བླའམ་མན་ངག་གིས་བཤད་པར་བྱ་སྟེ། འདི་སྐད ། ཞེས་སོགས་གསུངས་པའི་ཕྱིར་རོ། །གཉིས་པ་ནི། མཚན་དུ་རྒྱུད་དོན་འདུས་སམ་མ་འདུས། འདུས་ན་མཚན་དང་རྒྱུད་ཀྱི་དངོས་པོ་བཅུ་བྲང་སྤྲད་ལ་སྦྱོར་རིགས་པར་ཐལ། མ་འདུས་ན་དབང་རབ་ཀྱིས་མཚན་ལ་བརྟེན་ནས་རྒྱུད་དོན་མི་རྟོགས་པར་ཐལ་བའི་ཕྱིར་ཟེར། དེའི་ལན་ལ། རྒྱུད་ཀྱི་དངོས་པོ་བཅུ་དང་མཚན་དོན་སོ་སོར་སྦྱོར་དུ་མེད་ཀྱང་མཚན་དོན་གཞི་ལམ་འབྲས་གསུམ་དུ་གནས་པས། དེར་རྒྱུད་དོན་མཐའ་དག་འདུས་པའི་ཕྱིར་དང་། མཚན་མཐོང་བས་རྒྱུད་དབུ་ཞབས་ཀྱི་དོན་རྟོགས་པར་གསུངས་པ་དེ་སྔོན་བྱུང་འཁོར་གྱིས་རྟོགས་ཚུལ་ཡིན་ཏེ། དོན་མཐོང་བ་ལ་བརྟེན་ནས་མཚན་དུ་བརྟགས་པའི་ཕྱིར་ཏེ། གསང་བདག་གིས་རང་གི་རྒྱུད་དོན་ཐུགས་སུ་ཆུད་ནས་འཁོར་ལ་འཆད་པའི་ཚེ་གསང་བ་སྙིང་པོ་ཞེས་དོན་མཐོང་བ་ལ་བརྟེན་ནས་མཚན་བཏགས་པའི་ཕྱིར། སྔོན་བྱུང་ངོར་མཚན་དུ་ཚིག་དོན་མཐའ་དག་མ་ལུས་པ་དང་། སྐད་ཅིག་ཙམ་ལ་རྟོགས་པའང་མི་འགལ་ཏེ། རྒྱ་མཚོ་ལས། སྒྲིབ་པ་མཐའ་སྤོང་གདུལ་བྱ་ལ། །སྐད་ཅིག་ཙམ་གྱིས་སྣང་བར་མཛད། །ཅེས་གསུངས་པའི་ཕྱིར། རྗེས་འཇུག་ཏུ་མཚན་ལ་བརྟེན་ནས་དོན་གོ་བ་ནི། དེར་གཞི་ལམ་འབྲས་གསུམ་གྱི་བརྡ་འཕྲད་པ་ཙམ་དུ་གོ་བ་ཡིན་ཏེ། མིང་གིས་དོན་མཚོན་པར་ནུས་པ་ཙམ་གྱིས་མིང་ཡིན་པའི་ཕྱིར་རོ། །དཔེར་ན་བུམ་པ་ཞེས་བརྗོད་པས། ལྟོ་ལྡིར་ཞབས་ཞུམ་ཆུ་སྐྱོར་ཀྱི་དོན་བྱེད་ནུས་པའི་དངོས་པོ་ཙམ་གོ་ཡང་། གསེར་བུམ་སོགས་ཁྱད་ཆོས་རྣམས་གོ་བས་མ་ཁྱབ་པ་བཞིན་ནོ། །གསུམ་པ་ནི་ཐུགས་ཐིག་ལས། དང་པོར་མཚོན་པ་མཚན་གསུམ་ལྡན། །ཞེས་དང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །ཞེས་པས་རྒྱུད་འདི་ལས་རྒྱུད་ལུང་མན་ངག་གི་མཚོན་གསུམ་དུ་གྲགས་པ་ལས། གླེགས་བམ་གྱི་ཀླད་དུ་རྒྱུད་དང་ལུང་གི་མཚན་ནས་མི་སྨོས་པར། མན་ངག་ཁོ་ནའི་མཚན་ནས་སྨོས་པ་ལ་རྒྱུ་མཚན་མེད་དེ་ཟེར། དེའི་ལན་ནི། མ་ཧཱ་ཡོ་ག་ལའང་ནང་གསེས་ཀྱི་རྒྱུད་ལུང་མན་ངག་གསུམ་མམ། ཕ་མ་གཉིས་མེད་ཀྱི་རྒྱུད་གསུམ་དུ་གནས་པ་ལ། རྒྱུད་འདི་ནི་མ་ཧཱའི་ཨ་ཏི་ཐབས་ཤེས་གཉིས་མེད་དུ་སྟོན་པའི་རྒྱུད་ཡིན་པའི་གནད་ཀྱིས་མན་ངག་གི་མཚན་ནས་སྨོས་པའི་ཕྱིར་རོ། །བཞི་པ་ནི། རྒྱུད་འདི་རྒྱ་གར་ནས་བསྒྱུར་བ་མ་ཡིན་པར་ཐལ། ཀླད་དུ་རྒྱ་སྐད་མ་སྨོས་པའི་ཕྱིར་ཟེར། དེའི་ལན་ལ། གཞན་ལན་དགག་པ་དང་། རང་ལན་གདབ་པ་གཉིས་ལས། དང་པོ་ནི། ཁ་ཅིག་ན་རེ་རྒྱ་སྐད་གཏན་མེད་ན་བོད་དུ་བསྒྱུར་བ་མི་རིགས་པས། བོད་སྐད་དུ་ཞེས་པས་རྒྱ་སྐད་དུ་ཡོད་པར་ཤུགས་ཀྱིས་བརྡའ་འཇལ་བར་བྱའོ། །ཞེས་ཟེར་མི་འཐད་དེ། བོད་ཀྱི་སྐད་ལ་རྒྱ་ནག་ལ་སོགས་པའི་སྐད་སྦྱར་དུ་རུང་བས། རྒྱ་གར་མར་མི་འགྲུབ་ཅིང་། བོད་དུ་བརྩམས་པའི་བསྟན་བཅོས་རྣམས་ལའང་རྒྱ་སྐད་ཤུགས་ལ་སྦྱར་དུ་རུང་བའི་ཕྱིར་རྒྱ་གར་མར་ཐལ་བ་སོགས་ཀྱི་སྐྱོན་གནས་སོ། །གཉིས་པ་རང་ལན་གདབ་པ་ནི། འདིར་རྒྱ་སྐད་མེད་པས་བོད་མར་འགྱུར་བའི་ཁྱབ་པ་མེད་དེ། བོད་དུ་བརྩམས་པའི་བསྟན་བཅོས་དུ་མར་ཡང་ཀླད་དུ་རྒྱ་སྐད་བཀོད་པ་ཡོད་མོད། དེས་རྒྱ་གར་མར་མི་འགྱུར་བ་བཞིན་ནོ། །གཞན་ཡང་། ཀླད་དུ་རྒྱ་གར་གྱི་སྐད་གཅིག་པོ་མ་སྨོས་པས་བོད་མར་འགྱུར་རམ། སྐད་གཉིས་ཀ་མ་སྨོས་པས་བོད་མར་འགྱུར། དང་པོ་ལྟར་ན། རྒྱ་ནག་ནས་བསྒྱུར་བའི་ཆོས་དེ་རྣམས་ཆོས་ཅན། བོད་མར་ཐལ། ཀླད་དུ་དེ་མ་སྨོས་པའི་ཕྱིར། གཉིས་པ་ལྟར་རྒྱ་གར་གྱི་དཔེ་དེ་རྣམས་ཆོས་ཅན། བོད་མར་ཐལ། ཀླད་དུ་དེ་གཉིས་ཀ་མ་སྨོས་པའི་ཕྱིར། གཞན་ཡང་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཆོས་ཅན། ཁྱོད་བོད་མར་ཐལ་བའི་སྐྱོན་དང་། བྲལ་བ་ཡིན་ཏེ། ཁྱོད་ཡོངས་སུ་གྲགས་པའི་རྒྱ་གར་གྱི་པན་ཆེན་རྣམས་ཀྱིས་མང་དུ་བཀྲལ་བ་གང་ཞིག །གསང་འདུས་ཀྱི་འགྲེལ་བ་བི་ཤྭ་མི་ཏྲས་མཛད་པར་ཡང་རྒྱུད་འདིའི་ལུང་མང་དུ་དྲངས་པའི་ཕྱིར་དང་། དུས་ཕྱིས་ཀྱང་རྒྱ་དཔེ་རྙེད་པ་ལས། ཐར་ལོ་ཉི་མ་རྒྱལ་མཚན་དང་། འགོས་ལོ་གཞོན་ནུ་དཔལ་བ་སོགས་ཐུབ་བསྟན་ཡོངས་སུ་རྫོགས་པའི་ལོ་ཙཱ་བ་ཆེན་པོ་དག་གིས་འགྱུར་མཛད་པའི་ཕྱིར་རོ། །མཚན་དེ་ལྡན་གྱི་རྒྱུད་དོན་བཤད་པ་ལ། སྟོན་པ་ལ་དབང་མི་ཟ་བའི་ཕྱིར་ཀླད་དོན་ཕྱག་དང་། བཀའི་དོན་བདེ་བླག་ཏུ་རྟོགས་པར་བྱ་བའི་ཕྱིར་གཞུང་དོན་གཏན་ལ་ཕབ་པ་གཉིས་ཡོད་པ་ལས། དང་པོ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་སྟེ། འདི་ལ་གསུམ། ངག་དོན། ཚིག་དོན། རྩོད་པ་སྤོང་བའོ། །དང་པོ་ནི། བྱེད་པའི་མུ་བཞི་དང་སྦྱར་ན་ཕྱག་གང་གིས་བཙལ་ན། སྡུད་པ་པོ་གསང་བདག་གིས། གང་ལ་ན། རྒྱུད་ཀྱི་སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོ་ལ། དུས་གང་གི་ཚེ་ན་སྡུད་པ་པོས་འོག་མིན་དུ་དང་པོར་ཤེས་རྒྱུད་ལ་བཏུས་ཏེ། དེ་ནས་མི་ཡུལ་དུ་ཚིག་ཏུ་བསྡུད་པའི་ཚེ་ནའོ། །ཚུལ་ཇི་ལྟར་བཙལ་ན་རབ་ལྟ་བ་འཇལ་བ། འབྲིང་བསྒོམ་པ་གོམས་པ། ཐ་མ་མོས་གུས་གྱི་ཕྱག་གསུམ་ལས། འདི་ནི་སྡུད་པ་པོའི་ཕྱག་ཡིན་པའི་ཕྱིར་དང་པོའོ། །གཉིས་པ་ཚིག་གི་དོན་དེ་རྒྱས་པར་འཆད་ན། བི་མ་ལས། འགྲེལ་ཆུང་དུ། མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱའི་རང་བཞིན་ཚོགས་གཉིས་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཐམས་ཅད་རང་བཞིན་རྟོགས་དང་ཐུགས་རྗེ་བཟང་། །ཀུན་བཟང་ལྷ་ཡི་ལྷ་ཁྱོད་དབྱེར་མེད་ལ། །རྟོགས་དང་གུས་པས་རབ་ཏུ་ཕྱག་འཚལ་ལོ། །ཞེས་གསུངས་པའི་དོན་སྦྱོར་བ་དག་དོན་ཏུ་དྲིལ་ན། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ཀྱི་མཚན་ལ་བཅོམ་ཞེས་པ་དེ་ཆོས་ཉིད་མཉམ་པ་ཉིད་ཀྱི་དབྱིངས་སུ་བདུད་བཞི་ངང་གིས་དག་པས་ན་བདུད་བཞི་བཅོམ་པའི་མཚན་ཡིན་ཏེ། རྒྱུ་ཉོན་མོངས་པའི་མཚན་མ་རང་སར་གྲོལ་བས་འབྲས་བུ་ཉེར་ལེན་གྱི་ཕུང་པོ་མི་ལེན་ཞིང་། དེ་མ་བླངས་ན་སྐྱེ་ཤི་དང་ལྷ་བུའི་བདུད་ཀྱི་བར་དུ་གཅོད་པས་མི་ཚུགས་པའི་ཕྱིར། དེ་ལྟར་ཡང་། རྒྱས་པ་ལས། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ཀྱི་མཚན་ལ་ལྡན་ཞེས་སྨོས་པ་དེ་ཡོན་ཏན་གྱིས་མཚན་ཡིན་ཏེ། སྤྱིར་བྷ་ག་ཝན་གྱི་སྒྲ་ལས་བྷ་ག་ནི་བཅོམ་པ་ལ་འཇུག་པར་མ་ཟད། རྣམ་པ་གཅིག་ཏུ་ན་སྐལ་བའམ་ལེགས་པ་རྣམ་པ་དྲུག་ལ་འཇུག་པར་ཡང་བཤད་པའི་ཕྱིར་ཏེ། སཾ་བུ་ཊི་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་ལྡན་པ། །དྲུག་པ་དེ་ལ་སྐལ་ཞེས་བྱ། །ཞེས་གསུངས་པའི་ཕྱིར། དེ་ཆོས་ཅན། སྐབས་འདི་ནི་ཚོགས་གཉིས་རྫོགས་པའི་ཡོན་ཏན་དང་ལྡན་པའི་མཚན་ཡིན། ཆོས་སྐུའི་ཕྱག་རྒྱ་ཡེ་ཤེས་ཀྱི་ཚོགས་དང་། གཟུགས་སྐུའི་ཕྱག་རྒྱ་བསོད་ནམས་ཀྱི་ཚོགས་རྫོགས་པས་སྐུ་ལྔ་ལ་སོགས་པའི་ཡོན་ཏན་རང་རིག་པའི་ཡེ་ཤེས་ལ་རང་བཞིན་གྱིས་ལྡན་པའི་ཕྱིར་ཏེ། རྡོ་རྗེ་ལས་རིམ་ལས། སྐུ་ལྔ་ལ་སོགས་ཡོན་ཏན་བརྗོད་ལས་འདས། །ཞེས་གསུངས་པའི་ཕྱིར། འོ་ན་འདས་ཞེས་པའི་དོན་དེ་གང་ཞེ་ན། དེ་ནི་བཀས་བཅད་ལས། འཇིག་རྟེན་པའི་བྷ་ག་ཝཱན་ལས་ཁྱད་པར། འདས་ཞེས་བླ་ཐབས་སུ་བསྣན་ཏེ། ཞེས་གསུངས་ཤིང་། བྷ་གའི་སྒྲ་སྲིད་པ་དང་འཇིགས་པར་འགྲོ་བ་ལ་འཇུག་ཏེ། དེ་ལས་འདས་པ་ན་བྷ་ག་ཝཱན་ནོ། །འདིར་ནི་འདས་པ་ཞེས་པའི་མཚན་དེ་ཆོས་ཅན། མཚན་ཉིད་ཀྱི་མཚན་ཏེ། ཆོས་སྐུ་སྐྱེ་བ་མེད་པས་ཡོད་པའི་མཐའ་དང་། གཟུགས་སྐུ་འགག་པ་མེད་པས་མེད་པའི་མཐའ་སྟེ། སྤྲོས་པའི་མཚན་མ་ཀུན་ལས་འདས་པའི་དོན་ཡིན་པའི་ཕྱིར། དེ་ལྟར་ཡང་། ཕལ་པོ་ཆེ་ལས། སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་དང་། རྡོ་རྗེ་ལས་རིམ་ལས། རང་གི་ངོ་བོ་འདི་ཞེས་བསྟན་དུ་མེད། །ཅེས་གསུངས་པའི་ཕྱིར་ཏེ། ཡང་དེ་ཆོས་ཅན། ཁྱོད་ལ་དཔལ་ཞེས་བརྗོད་པ་དེ་ཆེ་བའི་མཚན་ཉིད་ཡིན་ཏེ། རང་བཞིན་ལྷུན་གྲུབ་ཀྱི་དཔལ་གཞི་ཆོས་དབྱིངས་ཤིན་ཏུ་དྲི་མེད་དེ་ཉིད་མངོན་དུ་གྱུར་པས། འབྲས་ཆོས་སྐུ་རྟོགས་པ་བདག་གི་དཔལ་དང་། གཟུགས་སྐུ་ཐུགས་རྗེ་གཞན་གྱི་དཔལ་མངའ་བ་ཡིན་པའི་ཕྱིར། དེ་ལྟར་ཡང་རྡོ་རྗེ་ལས་རིམ་ལས། རང་བཞིན་མངོན་བྱས་མ་ལུས་རེ་བ་སྐོང་། །ཞེས་གསུངས་པའི་ཕྱིར། སྟོན་པ་རིགས་དྲུག་པ་ཆོས་ཅན། ཁྱོད་ལ་ཀུན་ཏུ་བཟང་པོ་ཞེས་བརྗོད་པ་དེ་རང་གི་ངོ་བོའི་མཚན་ཡིན་ཏེ། འཁོར་འདས་ཀྱི་ཆོས་ཐམས་ཅད་འཆིང་གྲོལ་མེད་པའི་རང་བཞིན་མངོན་དུ་རྟོགས་པས་སྤྱོད་ཡུལ་ཡོངས་སུ་དག་པའི་ཕྱིར་ཏེ། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་གསུངས་པའི་ཕྱིར། ཡང་དེ་ཆོས་ཅན། ཁྱོད་ཀུན་ཏུ་བཟང་པོ་ཡིན་ཏེ། གནས་ལུགས་ཡེ་སངས་རྒྱས་པ་ནི་རང་བཞིན་ཀུན་ཏུ་བཟང་པོ། དེ་ཉིད་རྟོགས་པའི་ཡོན་ཏན་མངོན་དུ་གྱུར་པ་ནི། རྟོགས་པ་ཀུན་ཏུ་བཟང་པོ། དེ་ལས་གཟུགས་ཀྱི་སྐུ་མངོན་དུ་སྣང་བའི་ཐུགས་རྗེ་ཀུན་ཏུ་བཟང་པོ་ཡིན་པའི་ཕྱིར། ཡང་དེ་ཆོས་ཅན། ཀུན་ཏུ་བཟང་པོ་ཡིན་ཏེ། འགྲོ་བ་ལ་ཕྱོགས་དུས་ཀུན་ཏུ་གནས་སྐབས་དང་མཐར་ཐུག་གི་ཕན་བདེ་བཟང་པོ་སྟེར་བར་མཛད་པ་པོ་ཡིན་པའི་ཕྱིར་ཏེ། རྒྱུད་ཕྱི་མ་ལས། ཕྱོགས་བཅུའི་འཇིག་རྟེན་ཐམས་ཅད་དུ། །མངོན་མཐོ་ངེས་ལེགས་རབ་སྟེར་བ། །ཀུན་ཏུ་བཟང་པོར་བརྗོད་པ་ཡིན། །ཞེས་གསུངས་པའི་ཕྱིར། ལ་ཞེས་པ་ནི་ཕྱག་བྱ་བའི་ཡུལ་མཚོན་པར་བྱེད་པའི་རྣམ་དབྱེ་སྟེ། སྡུད་པ་པོ་གསང་བདག་གིས་རང་དང་སྟོན་པའི་ཐུགས་གཉིས་སུ་མེད་པར་རྟོགས་པའི་སྒོ་ནས་ཕྱག་འཚལ་བའི་དོན་ནོ། །དེ་ལྟར་ཡང་འགྲེལ་པ་མངོན་རྟོགས་ལས། དེ་ཡང་ཐུན་མོང་པ་དག་ལུས་ངག་ཡིད་གསུམ་གྱིས་སོ་སོར་བལྟས་ནས་ཕྱག་འཚལ་བ་ནི་ཤིན་ཏུ་འགལ་ཏེ། ཚེ་ཚད་པར་འགྱུར་རོ། །རྨད་དུ་བྱུང་བའི་ཐེག་པ་འདིར་ཀུན་ཏུ་བཟང་པོ་དང་རིག་པ་གཉིས་མེད་དུ་འཇལ་བ་ཕྱག་ཏུ་གསུངས་ཏེ། དཔེ་མར་གྱི་ནང་དུ་མར་བླུག་པ་བཞིན་ནོ། །ཞེས་དང་། རིམ་ལྔ་ལས་ཀྱང་། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་འཚལ། །ཞེས་གསུངས་པའི་ཕྱིར། གསུམ་པ་རྩོད་པ་སྤངས་པ་ནི། རྩོད་པ་འགོད་པ་དང་། དེ་སྤང་བའོ། དང་པོ་ནི། ཁོ་ན་རེ། ཀླད་དུ་སྨོས་པའི་ཕྱག་འདི་ལོ་ཙཱ་བའི་འགྱུར་ཕྱག་ཡིན་གྱི། སྡུད་པ་པོའི་ཕྱག་མ་ཡིན་ཏེ། སྡུད་པ་པོའི་ཚིག་ནི། འདི་སྐབས་བཤད་པའི་དུས་ན། ཞེས་པ་མན་ཆད་ཡིན་པའི་ཕྱིར་ཟེར། གཉིས་པ་དེ་སྤང་བ་ནི། འོ་ན་སྡུད་པ་པོས་བཀའ་བསྡུ་བྱེད་པའི་ཐོག་མར་རང་གི་སྟོན་པ་ལ་བསྟོད་ཕྱག་བྱས་པ་མེད་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཡོད་པར་ཐལ། སོ་ཐར་གྱི་མདོའི་བཀའ་བསྡུ་བའི་ཚེ་སྟོན་པ་ལ་བསྟོད་ཕྱག་བྱས་ནས་བཀའ་བསྡུས་པའི་ཕྱིར་ཏེ། དེ་ལས་འགྲོ་བའི་གཙོ་ལ་སྤྱི་བོས་ཕྱག་འཚལ་ནས། །ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །ཞེས་གསུངས་པའི་ཕྱིར་བྱས་པ་ལས། ཁོ་ན་རེ། འོ་ན་རྒྱུད་འདི་ལ་ལོ་ཙཱ་བའི་འགྱུར་ཕྱག་མེད་པར་ཐལ། ཀླད་དུ་བཀོད་པའི་ཕྱག་འདི་ནི་སྡུད་པ་པོའི་ཕྱག་ཡིན་ལ། དེ་ལས་གཞན་པའི་འགྱུར་ཕྱག་མེད་པའི་ཕྱིར་ཟེར། དེ་ལ་སྐྱོན་མེད་དེ། ལོ་ཙཱ་བས་རྒྱལ་པོའི་བཀའ་བཅད་དང་བསྟུན་ནའང་། སྟོན་པ་ཀུན་བཟང་ལ་ཕྱག་འཚལ་བར་རིགས། །རང་གི་འདོད་པའི་ལྷ་ལ་འཚལ་ནའང་སྟོན་པ་ཀུན་བཟང་ལ་ཕྱག་བྱ་བར་རིགས་པར་མཐོང་ནས། འགྱུར་ཕྱག་ཟུར་དུ་མ་བཀོད་པའི་ཕྱིར་ཏེ། དུས་འཁོར་བསྡུས་རྒྱུད་ཀྱི་ཀླད་དུའང་ཡི་གེ་པའི་ཕྱག་གིས་གོ་བཅད་དེ་འགྱུར་ཕྱག་མ་བཀོད་པ་བཞིན་ནོ། །གཉིས་པ་གཞུང་དོན་གཏན་ལ་དབབ་པ་ལ། འདི་ཉིད་ལས། རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །ཞེས་གསུངས་པ་ལྟར་གྱི་རྒྱུད་འདི་ཉིད་ཀྱི་ཆེད་དུ་བྱ་བའི་གདུལ་བྱ་དབང་པོ་རབ་འབྲིང་ཐ་གསུམ་ལ་ལྟོས་ནས་འཆད་ཚུལ་གསུམ་སྟེ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པའི་ཕྱིར། དེ་ལས་འདིར་བར་མའི་དབང་དུ་བྱས་ན། གཞུང་ཚོགས་ལེའུ་ཉེར་གཉིས་ཀྱང་ཆོས་ལྔར་འདུ་སྟེ། འགྲེལ་པ་སྤར་ཁབ་ལས། སྤྲོས་པ་ལ་དགའ་བ་དབང་པོ་འབྲིང་གི་དོན་དུ་རྒྱུད་ཀྱི་དོན་རྣམ་པར་ཕྱེ་བས་ལྔ་སྟེ། ཞེས་གསུངས། དེ་ལ་ལྔ་པོ་དེ་གང་ཡིན་ཞེ་ན། འགྲེལ་པ་མངོན་རྟོགས་ལས། རྒྱུད་གཞུང་གཞི་བསླང་ཡོངས་སུ་ཤེས། །དགོས་འབྲེལ་གཏད་དང་རྫོགས་པའོ། །ཞེས་གསུངས་པས། ལེའུ་དང་པོ་དང་། གསུམ་པའི་སྟོད། བཅོ་ལྔ་པ་རྣམས་ཀྱིས་རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་དང་། ལེའུ་གཉིས་པས་རྐྱེན་གླེང་བསླང་བ་དང་། ལེའུ་གསུམ་པའི་སྨད་ནས་ཉེར་གཅིག་པ་ཡན་གྱིས་འབྲས་བུས་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས་འབྲེལ་དང་། ལེའུ་ཐ་མས་འཁོར་ལ་གདམས་ཤིང་བསྟན་པ་གཏད་པ་དང་ལྔ་ལས། དང་པོ་ལ། གླེང་གཞི་བསྟན་པའི་དགོས་ཆེད། དེའི་མཚན་ཉིད། སྒྲ་དོན། ཇི་སྙེད་བསྟན་པའི་རྣམ་གྲངས་དང་བཞི་ལས། དང་པོ་ནི། གླེང་གཞི་ཚོགས་པ་དེ་ཆོས་ཅན། དགོས་པ་གཉིས་སུ་ངེས་ཏེ། ཁྱོད་ཀྱིས་རྒྱུད་དོན་འབྱུང་བའི་རྒྱུ་བྱེད་པ་དང་། དེའི་ལོ་རྒྱུས་ལ་བརྟེན་ནས་མ་འོངས་པའི་གདུལ་བྱ་རྣམས་ཡིད་ཆེས་ཤིང་རྒྱུད་ལ་འཇུག་པར་འགྱུར་བའི་ཆེད་ཡིན་པའི་ཕྱིར། གཉིས་པ་ནི་སྟོན་པ་ལ་སོགས་པ་ཕུན་སུམ་ཚོགས་པ་ལྔའི་བདག་ཉིད་རྒྱུད་དོན་འབྱུང་བ་དང་ཡིད་ཆེས་ཀྱི་ངེས་པར་སྟེར་བའི་རིགས་གནས། གསུམ་པ་ནི། གང་གླེང་ན་བསྟན་པ་སྟེ། དེའི་རྒྱུའམ་གཞི་ནི་ཕུན་སུམ་ཚོགས་པ་ལྔ་པོ་དེ་ཡིན་པའི་ཕྱིར་དང་། ཡང་ན། དཱ་ན་ཞེས་པའི་སྒྲ་ལས་དྲངས་ན། ངེས་པ་སྦྱིན་པ་ཞེས་བྱ་བ་ཡིན་ཏེ། བཀའ་མ་ཡིན་པར་རྟོག་པའི་ཐེ་ཚོམ་ཅན་གྱི་བློ་ལ་ཡིད་ཆེས་ཀྱི་ངེས་པ་སྦྱིན་བྱེད་ཡིན་པའི་ཕྱིར། བཞི་པ་ཇི་སྙེད་བསྟན་པའི་རྣམ་གྲངས་དེ་ཆོས་ཅན། ཁྱོད་ལ་རྣམ་པ་གཉིས་སུ་ངེས་ཏེ། ཐུན་མོང་མ་ཡིན་པའི་དང་། ཐུན་མོང་གི་གླེང་གཞི་གཉིས་སུ་ངེས་པའི་ཕྱིར། དེ་ལ་ཐུན་མོང་མ་ཡིན་པའི་གླེང་གཞི་ནི། བཤད་རྒྱུད་རྒྱ་མཚོ་དང་བཤད་རྒྱུད་ཐལ་བ་གཉིས་ཀྱིས་སྟོན་ཅིང་། འདིར་ཐུན་མོང་གི་གླེང་གཞི་དེ་ལ། རྒྱུད་འབྱུང་བ་ཁྱད་པར་གྱི་གླེང་གཞི། ཞར་བྱུང་གདུལ་བྱ་དགོས་བྱེད་དུ་སྟོན་པ་ཁྲོ་བོའི་གླེང་གཞི། སྤྲུལ་སྐུ་འགྲོ་བ་འདུལ་བའི་གླེང་གཞི་དང་གསུམ་ལས། དང་པོ་ནི། འདི་ཉིད་ཀྱི་ལེའུ་དང་པོས་སྟོན་ཏེ། དེ་ལ་ལྔ་ལས། དང་པོ་ཆོས་ཕུན་སུམ་ཚོགས་པ་ནི། འདི་སྐད་བཤད་པ་ཞེས་པ་སྟེ། དེ་ཡང་སྦྱོར་ངག་ཏུ་སྟོན་ན། འདི་སྐད་བཤད་པ་ཞེས་པ་དེ་ཆོས་ཅན། ཁྱོད་རྒྱུད་དབུ་ཞབས་ཀྱི་དོན་ཐམས་ཅད་མཚོན་པའི་ཚིག་འཕྲད་ཡིན་ཏེ། གསང་བདག་རང་ཉིད་སྟོན་པར་ཁས་བླངས་ནས་ངས་སྔར་འོག་མིན་དུ་བཤད་པ་ཉིད་ཡང་འདིར་བཤད་པར་བྱའོ་ཞེས་པའི་ངག་ཚིག་ཡིན་ཏེ། རྒྱུད་ལས། ང་ནི་ཆེ་བའི་རྒྱལ་པོ་སྟེ། འཆད་དང་ཉན་པའང་ང་ཉིད་ཡིན། ཞེས་གསུངས་པའི་ཕྱིར། གཉིས་པ་དུས་ཕུན་སུམ་ཚོགས་པ་ནི། དུས་ན། ཞེས་པ་སྟེ། དུས་ན་ཞེས་པའི་དུས་དེ་ཆོས་ཅན། ཁྱོད་དུས་རེ་འགའ་བ་ལས་འདས་པའི་ཐུན་མོང་མ་ཡིན་པའི་དུས་ཡིན་ཏེ། ལོངས་སྐུ་རྟག་པ་རྒྱུན་གྱི་འཁོར་ལོ་ཆོས་གསུང་བའི་དུས་ཡིན་པའི་ཕྱིར་། འདི་དག་ལ་རྩོད་པ་སྤང་བ་ལས། རྩོད་པ་འགོད་པ་དང་། དེའི་ལན་གཉིས་ལས། དང་པོ་ནི། ཁོ་ན་རེ། མདོ་རྒྱུད་ཐམས་ཅད་དུ། འདི་སྐད་བདག་གི་ཐོས་པ་དུས་གཅིག་ན། །ཞེས་འབྱུང་བ་ལས། འདིར་དེ་ལྟར་མ་སྨོས་པའི་ཕྱིར། །གླེང་གཞི་ལོག་པས་བཀའ་ཡང་དག་པ་མ་ཡིན་ནོ་ཟེར། དེའི་ལན་ལ། གཞན་ལན་ལ་དཔྱད་པ་དང་། རང་ལན་གདབ་པ་གཉིས་ལས། དང་པོ་ནི། ལྷ་རྗེ་གླན་ཤཀ་བཟང་ན་རེ། བཤད་ཐོས་གཉིས་ཚིག་མི་མཐུན་ཀྱང་སྟོན་པས་འཁོར་ལ་བཤད་པ་དང་། འཁོར་གྱིས་སྟོན་པ་ལས་ཐོས་པ་དོན་མཐུན་གསུང་། དེ་ལྟར་ན་ཐོས་པ་ལ་བཤད་པས་ཁྱབ་ཅེས་པའི་སྐྱོན་གནས་སོ། །ཡང་ཁྱེད་བླ་མ་དང་། རྗེ་སྒྲོ་ཕུག་པ་ན་རེ། སྐུ་གཉིས་ཀྱི་བསྟན་པའི་ཁྱད་པར་ཡིན་ཏེ། ལོངས་སྐུ་ཚིག་ཏུ་མི་གསུངས་པས་རྣ་བས་ཐོས་སུ་མེད་པའི་ཕྱིར་བཤད་ཅེས་དང་། སྤྲུལ་སྐུ་ཚིག་ཏུ་གསུང་བའི་ཕྱིར་ཐོས་བྱ་བར་འོང་བ་ཡིན་ཟེར་བ་ཡང་མི་འཐད་དེ། ལོངས་སྐུས་གསུངས་པའི་རྒྱུད་ཡིན་ན། བཤད་ཅེས་འབྱུང་བས་མ་ཁྱབ་པའི་ཕྱིར། གཉིས་པ་རང་ལན་གདབ་པ་ནི། གསང་བདག་གི་བསྡུ་བ་བྱེད་པ་ན་རང་ཉིད་སྟོན་པ་ཉིད་དུ་ཁས་བླངས་ཏེ། སྔར་ངས་འོག་མིན་དུ་བཤད་པ་ཉིད། ཡང་འདིར་བཤད་པར་བྱ། །ཞེས་དང་། ཉི་འོད་སེང་གེའི་རྒྱ་ཆེར་འགྲེལ་ལས་བཤད་ཅེས་པས་ནི་འཁོར་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་སོགས་དང་། སྤར་ཁབ་ལས་ཀྱང་། ཐུན་མོང་མ་ཡིན་པའི་གླེང་གཞི་སྟེ། རྒྱུད་གཞན་ལས་ཁྱད་པར་དུ་གྱུར་པའི་ཕྱིར། ཞེས་གསུངས་པའི་ཕྱིར་རོ། །གསུམ་པ་སྟོན་པ་ཕུན་སུམ་ཚོགས་པ་ལ་གཉིས་ལས། དང་པོ་སྟོན་པའི་རང་བཞིན་ནི། དེ་བཞིན་གཤེགས་པ་ཡང་དག་པ་སོགས་ནས་དབྱེར་མེད་པ་ཞེས་པའི་བར་གྱིས་བསྟན། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ལ་དེ་བཞིན་གཤེགས་པ་ཞེས་བརྗོད་པ་དེ་དེ་བཞིན་ཉིད་དུ་ནར་སོན་པའི་རང་བཞིན་མངའ་བ་ཡིན་ཏེ། ཁྱོད་ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་སོན་ཞིང་། དེའི་ངོ་བོ་མངོན་དུ་གྱུར་པས་ན་གཤེགས་པ་ཞེས་བརྗོད་པའི་ཕྱིར་ཏེ། རྡོ་རྗེ་ལས། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་བཤད། །ཞེས་དང་། རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པར་མངོན་པར་བརྗོད། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ལ་ཡོན་ཏན་མ་བཙལ་བར་ལྷུན་གྱིས་གྲུབ་པའི་ཡོན་ཏན་མངའ་བས་ཡང་དག་པར་རྫོགས་པ་ཞེས་བརྗོད་པ་ཡིན་ཏེ། ཁྱོད་ཀྱི་རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་མ་ནོར། མི་འགྱུར། མི་བསླུ་བས་ཡང་དག་པ་དང་། ཐམས་ཅད་འབྲས་བུ་སྐུ་དང་ཡེ་ཤེས་སུ་རང་སྣང་བས་སྤང་ཐོབ་མེད་པར་ཡེ་རྫོགས་སུ་གནས་པས་དེ་ལྟར་དུ་བརྗོད་པའི་ཕྱིར། དེ་ཆོས་ཅན། ཁྱོད་ལ་ཡེ་ཤེས་མཐའ་དབུས་མེད་པར་བརྡལ་བའི་རང་བཞིན་མངའ་བས་སངས་རྒྱས་ཞེས་བརྗོད་པ་ཡིན་ཏེ། མི་མཐུན་པ་དང་གཉེན་པོ་དབྱེར་མེད་པའི་ཡོན་ཏན་མཐར་ཐུག་པས་ན་དེ་ལྟར་དུ་བརྗོད་པའི་ཕྱིར་ཏེ། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་གསུངས་པའི་ཕྱིར། དེ་ཆོས་ཅན། རང་གི་ངོ་བོ་གཏན་དུ་མེད་པའི་རང་བཞིན་མངའ་བས་བཅོམ་ལྡན་འདས་ཞེས་བརྗོད་པ་ཡིན་ཏེ། བདུད་བཞི་བཅོམ་ཞིང་ཆེ་བའི་ཡོན་ཏན་གྱི་འབྲས་བུ་ལ་མངའ་མཛད་པའི་ཕྱིར་ཏེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདོངས་ཀྱིས་བཅོམས། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ཀྱིས་མཉམ་པ་ཉིད་ཀྱི་དོན་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན་མངའ་བས་ལོངས་སྤྱོད་ཆེན་པོ་ཞེས་བརྗོད་པ་ཡིན་ཏེ། ཁྱོད་འཁོར་འདས་ཀྱི་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱོད་པས་གཞན་ལས་ཆོས་མཆོག་ཏུ་གྱུར་པ་ཡིན་པའི་ཕྱིར་ཏེ། དེ་ལྟར་ཡང་འཆི་མེད་མཛོད་ལས། ཆེན་པོ་མཆོག་དང་ཚད་མེད་དང་། །མཁས་མཚོན་སྤྲོ་བའི་ལས་འདི་ཉིད། །ཤིན་ཏུ་རྨད་བྱུང་བྱེད་པ་ནི། །ཆེན་པོ་ཞེས་ནི་བཤད་པ་ཡིན། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ལ་དེ་བཞིན་གཤེགས་པ་ཀུན་གྱི་བདག་ཉིད་གཅིག་དང་དུ་མ་ལས་གྲོལ་བའི་རང་བཞིན་གྱི་མཚན་སྐུ་གསུང་ཐུགས་རྡོ་རྗེའི་བདག་ཉིད་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཕྱོགས་དུས་བདེ་གཤེགས་ཐམས་ཅད་ཀྱི་རྟེན་བྱེད་པའི་ངོས་ནས་སྐུ་ལྔ། བརྡའ་སྤྲོད་པའི་ངོས་ནས་གསུང་ལྔ། མི་གཡོ་བའི་ཐུགས་ལྔ། དགོས་འདོད་བྱུང་བའི་ཡོན་ཏན་ལྔ། གཞན་དོན་མཛད་པའི་ངོས་ནས་ཕྲིན་ལས་ལྔ་སྟེ། འབྲས་ཆོས་ཉེར་ལྔ་པོ་དེ་དག་གཅིག་དང་དུ་མ་བྲལ་ཞིང་། རང་བཞིན་དབྱེར་མི་ཕྱེད་པ། མཚན་ཉིད་སྐྱེ་འཇིག་བྲལ་བ། ངོ་བོ་འདུས་མ་བྱས་པ་རྡོ་རྗེའི་བདག་ཉིད་དུ་རོ་གཅིག་པས་དེ་ལྟར་བརྗོད་པའི་ཕྱིར། དེ་ཆོས་ཅན། ཁྱོད་ཁམས་གསུམ་དང་དུས་གསུམ་གྱིས་བསྡུས་པའི་འཁོར་བའི་ཆོས་ཐམས་ཅད་དང་སོ་སོ་མ་ཡིན་ཐ་མི་དད་པའི་རང་བཞིན་ཅན་ཡིན་ཏེ། ཁྱོད་དང་དེ་ལྟ་བུའི་འཁོར་བའི་ཆོས་གཉིས་ཀའང་། ཀུན་རྫོབ་ཏུ་རིག་པ་སྒྱུ་མ་ལྟ་བུ་ཡིན་པས་སོ་སོ་མ་ཡིན། དོན་དམ་པར་སེམས་ཉིད་དུ་མ་སྐྱེས་པས་ཐ་མི་དད། བདེན་པ་གཉིས་ཀའི་ཐ་སྙད་ལས་ཀྱང་འདས་པས་ན། དབྱེར་མེད་པའི་རང་བཞིན་ཅན་ཡིན་པའི་ཕྱིར། གཉིས་པ་སྟོན་པའི་ངོ་བོ་ནི། སྐུ་མདུན་དང་། རྒྱབ་མེད་པ་ཐམས་ཅད་དུ་ཞལ་ཐལ་ལེ་བར་གསལ་ཞིང་སོགས་ནས། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་། ཞེས་པ་སྟེ། དེ་ཆོས་ཅན། ཁྱོད་ཆོས་སྐུའི་བདག་ཉིད་དུ་གནས་པ་ཡིན་ཏེ། ཁྱེད་བདེ་གཤེགས་རང་སྣང་ལ་སྐུ་མདུན་དང་། རྒྱབ་མ་གྲུབ་ཅིང་གདུལ་བྱའི་སྣང་བ་ལ་རིས་མེད་པར་ཐམས་ཅད་དུ་ཞལ་ཐལ་ལེ་བར་གསལ་བས་གཟུགས་སྐུའི་ཡོན་ཏན་མི་འགག་པའི་ཕྱིར་ཏེ། སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། །ཕྱོགས་བཅུ་གང་བར་སྤྱན་གྱིས་རྣམ་པར་གཟིགས། །ཞེས་གསུངས་པའི་ཕྱིར། དེ་ཆོས་ཅན། ལོངས་སྐུའི་བདག་ཉིད་དུའང་གནས་པ་ཡིན་ཏེ། ཐུན་མོང་དང་ཁྱད་པར་གྱི་མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུ་སྤྲས་པའི་བདག་ཉིད་དུ་གནས་པའི་ཕྱིར། དེ་ཆོས་ཅན། སྤྲུལ་སྐུའི་བདག་ཉིད་དུ་གནས་པ་ཡིན་ཏེ། ཁྱོད་ཀྱི་མཛད་པའི་སྣང་ཚུལ་ནི། རྣམ་པར་འཕྲུལ་པ་བསམ་གྱིས་མི་ཁྱབ་ཅིང་ཚད་མེད་པར་སྣང་བའི་ཕྱིར་ཏེ། གསང་བ་བསམ་གྱིས་མི་ཁྱབ་པའི་མདོ་ལས་ཞི་བའི་བློ་གྲོས་ནམ་མཁའ་ཇི་ཙམ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ལ་ཐབས་ཤེས་གཉིས་སུ་མེད་པའི་དོན་རྟོགས་ཀྱི་བཞུགས་ཚུལ་བཤད་དུ་ཡོད་དོ། །ཐབས་སྙིང་རྗེ་ཆེན་པོ་དང་། ཤེས་རབ་སྟོང་པ་ཉིད་ཀྱི་བརྡར་ཞབས་གཉིས་ཡབ་ཡུམ་གཉིས་ཀ་བཞེངས་པ་ལྟ་བུ་མ་ཡིན་པར་ཡབ་རྡོ་རྗེའི་སྐྱིལ་དཀྲུང་དང་། ཡུམ་པདྨའི་སྐྱིལ་ཀྲུང་དུ་བཅིངས་ནས་བཞུགས་པ་ཡིན་པའི་ཕྱིར། ཞར་བྱུང་དུ་། འཆད་པའི་སྐྱེས་བུ་རིགས་ལྔ་ཆོས་ཅན། ཁྱོད་རྣམས་ཀྱི་བཞུགས་ཚུལ་ཡོད་དེ། ཡབ་རྣམས་རྫོགས་པའི་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་ཀྲུང་གིས་གཡོན་ཕྱོགས་ནས་འཁྱུད་པའི་ཚུལ་དུ་བཞུགས་པ་ཡིན་པའི་ཕྱིར། སྟོན་པ་ཆོས་ཅན། ཡེ་ཤེས་དྲུག་དང་ལྡན་པའི་དོན་རྟགས་བཤད་དུ་ཡོད་དེ་ཡེ་ཤེས་ལྔ། རང་བྱུང་གི་ཡེ་ཤེས་དང་དྲུག །དེས་འགྲོ་དོན་མཛད་པའི་རྟགས་སུ་ཕྱག་མཚན་དྲུག་འཛིན་པ་ཡིན་པའི་ཕྱིར་ཏེ། སྒྱུ་འཕྲུལ་རོལ་པ་ཆེན་པོའི་རྒྱུད་ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བའི་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་གསུངས་པ་ཡིན་པའི་ཕྱིར། དེ་ཆོས་ཅན། ཁྱོད་ལ་རྣམ་པར་གསུམ་མངའ་བ་ཡིན་ཏེ། དེ་གསུམ་གྱི་མཚན་མར་དབུ་དཀར་དམར་མཐིང་གསུམ་གྱི་ཁ་དོག་ཏུ་བསྟན་པའི་ཕྱིར། བཞི་པ་གནས་ཕུན་སུམ་ཚོགས་པ་ལ། གནས་ཀྱི་རང་བཞིན་དང་། དེའི་ངོ་བོ་གཉིས་ལས། དང་པོ་ནི། འོག་མིན་གྱི་གནས་མཐའ་དང་དབུས་མེད་པ་ན། ཞེས་པ་དང་། གཉིས་པ་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ་སོགས་ནས། གོས་པ་མེད་པ་པདྨ་རིན་པོ་ཆེའི་གདན་ལ་ཞེས་པའི་བར་གྱི་སྟོན་པ་སྟེ། དེའི་དོན་བཤད་པ་ལས། གནས་ཀྱི་མཚན་ཉིད། སྒྲ་དོན་གཏན་ལ་དབབ་པ་དང་གསུམ་ལས། དང་པོ་ནི། དོན་དབྱིངས་དང་ཡེ་ཤེས་དབྱེར་མེད་པ་ལས། དེའི་རྟགས་སྣང་གཞལ་ཡས་ཁང་གི་དབྱིབས་དང་ཁ་དོག་ཏུ་རང་སྣང་བའི་རིགས་གནས་ཏེ། ཁོག་གཞུང་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་སོ། །གཉིས་པ་སྒྲ་དོན་ནི། ཨ་ཀ་ནིཥྛ་ཞེས་པའི་སྒྲ་ལས་དྲངས་ན། འོག་མ་ཡིན་པ་སྟེ། དོན་གདུལ་བྱའི་བློ་ལས་འདས་ཤིང་། རྟགས་དེ་འཇིག་རྟེན་གནས་ཀྱི་འོག་མིན་ལས་ཉིས་འགྱུར་གྱིས་སྤང་བའི་ཕྱིར་ཏེ། སྒྱུ་འཕྲུལ་རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉམས་འགྱུར་ཤིན་ཏུ་སྤང་བ་ན། །ཞེས་སོ། །གསུམ་པ་གཏན་ལ་དབབ་པ་ལ། གནས་དེའི་རང་བཞིན་ཆོས་ཅན། ཁྱོད་མཐའ་དབུས་ལ་སོགས་པའི་སྤྲོས་པ་ཐམས་ཅད་ལས་འདས་པ་ཡིན་ཏེ། ཁྱོད་ཆོས་ཀྱི་དབྱིངས་ཡིན་པའི་ཕྱིར། དེའང་འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཞེས་གསུངས་པའི་ཕྱིར། གནས་ཀྱི་ངོ་བོ་དེ་ཆོས་ཅན། ཁྱོད་དབྱིངས་དང་ཡེ་ཤེས་དབྱེར་མི་ཕྱེད་པའི་རྟགས་སུ་གཞལ་ཡས་ཁང་གི་ཡོན་ཏན་གྱི་རྣམ་པར་རང་སྣང་བ་ཡིན་ཏེ། གཞི་དང་རྒྱུ་དང་རྒྱ་ལ་སོགས་པའི་དོན་བཅུ་གཅིག་གི་རྣལ་འབྱོར་རང་སྣང་བའི་ཕྱིར་ཏེ། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་བུར་རྩེ་མོ་དང་། །རྒྱན་དང་སྒོ་འཁྱུད་རྟ་བབ་དང་། །མཚན་ཉིད་གདན་གྱི་རྣམ་པ་སྟེ། །ཞེས་གསུངས་པའི་ཕྱིར། དེའི་སྤྱིའི་འོག་གཞི་ཆོས་ཅན། ཁྱོད་ཡེ་ཤེས་ལྔ་མཚོན་པའི་རྟགས་སུ་འཁོར་ལོའི་རྣམ་པར་སྣང་བ་ཡིན་ཏེ། ཁྱོད་རྒྱ་ཁྱོན་ཚད་མེད་པའི་འཁོར་ལོ་རྩིབས་བཞི་ལྟེ་བ་དང་བཅས་པའི་རྣམ་པར་སྣང་བའི་ཕྱིར། དེའི་ནང་གི་འོག་གཞི་ཆོས་ཅན། ཁྱོད་ལ་དཔགས་པ་ཞེས་བརྗོད་པའི་རྒྱུ་མཚན་ཡོད་དམ། སྒོ་དང་འཁྱམས་སོགས་ནས་ལྟེ་བའི་བར་རིམ་པ་ལྟར་རྡོ་རྗེ་འགྲེང་བུ་རེས་དཔགས་པ་དེ་ཐེག་པ་འོག་མ་ནས་འདིར་འཕར་བའི་དོན་ཡིན་པའི་ཕྱིར། གཞལ་ཡས་ཁང་དེའི་རྒྱུ་ཆོས་ཅན། ཁྱོད་རིན་པོ་ཆེ་ལས་གྲུབ་པ་ཡིན་ཏེ། ཡེ་ཤེས་ཉིདརིན་པོ་ཆེའི་དབྱིབས་དང་ཁ་དོག་ཏུ་རང་སྣང་བས་རེ་བ་སྐོང་བ་ཡིན་པའི་ཕྱིར། དེའི་རྒྱ་ཆོས་ཅན། ཁྱོད་ཕྱོགས་བཅུ་ཀུན་ཏུ་ཡོངས་སུ་མ་ཆད་པར་སྣང་སྟེ། ཁྱོད་ཆོས་དབྱིངས་མཐའ་ཀླས་པར་ཁྱབ་པ་རང་སྣང་བའི་ཕྱིར། དེའི་དབྱིབས་ཆོས་ཅན། ཁྱོད་གྲུ་བཞི་པ་ཡིན་ཏེ། ཁྱོད་དེ་བཞིན་གཤེགས་པའི་ཡོན་ཏན་གྱིས་ཁྱབ་པ་དང་། མཉམ་པ་དང་། རྒྱས་པའི་དོན་ཡིན་པའི་ཕྱིར་ཏེ། རྒྱ་ཆེར་འགྲེལ་ལས། མཉམ་པའི་ཕྱིར་དང་ཁྱབ་པའི་ཕྱིར། །རྒྱས་པའི་ཕྱིར་ནི་གྲུ་བཞིར་བརྗོད། །ཞེས་སོ། །དེའི་གློ་འབུར་དེ་ཆོས་ཅན། ཁྱོད་གྲུ་ཆད་ལས་ཕྱིར་འཕྱང་བའི་དབྱིབས་མཁར་གྱི་འབུར་ཐབས་ལྟ་བུ་སྣང་བ་ཡིན་ཏེ། ཁྱོད་ཡེ་ཤེས་རེ་རེའང་ལྷག་པའི་ཡེ་ཤེས་བཞི་བཞི་དང་ལྡན་པའི་རྟགས་སུ་ཁ་དོག་རིགས་བཞིའི་མདོག་ཅན་གྱི་རིན་པོ་ཆེའི་གློ་འབུར་གྱིས་མཛེས་པར་སྣང་བའི་ཕྱིར། དེའི་རྩེ་མོའི་ཚད་དབྱིབས་ཆོས་ཅན། ཚད་དཔག་ཏུ་མེད་པ་དང་དབྱིབས་བུམ་པ་ཟླུམ་པོའི་རྣམ་པར་འཁྱིལ་བའི་རང་བཞིན་དུ་སྣང་སྟེ། ཁྱོད་ཆོས་ཀྱི་དབྱིངས་ཀྱི་ཡེ་ཤེས་ལ་མཐར་ཐུག་པ་མེད་ཅིང་སྤྲོས་པ་དང་བྲལ་བའི་རྟགས་སུ་སྣང་བ་ཡིན་པའི་ཕྱིར། དེའི་རྒྱན་ལ་བདུན་ལས། འོག་རྒྱན་གོང་དུ་བཤད་ཟིན། ལོགས་རྒྱན་ལ་གཉིས་ལས། རིན་པོ་ཆེའི་རྒྱན་དེ་ཆོས་ཅན། ཁྱོད་ཀྱི་ཁྱད་ཆོས་བཤད་དུ་ཡོད་དེ། ཁྱོད་གཉིས་སུ་མེད་པའི་ཡེ་ཤེས་ཀྱི་རྩལ་མ་འགགས་པར་རང་སྣང་བའི་རྟགས་སུ་པཉྩ་རེ་ཁའི་རྩིག་པའི་སྟེང་དུ་རིན་པོ་ཆེའི་ཕ་གུ་དང་། ཕྲེང་བ་དང་། ཆུན་འཕྱང་དང་། ཤར་བུ་དང་། མདའ་ཡབ་ལ་སོགས་པའི་རྒྱན་ཁྱད་པར་དུ་འཕགས་པ་དུ་མས་སྤྲས་པར་སྣང་བའི་ཕྱིར། འདོད་ཡོན་གྱི་རྒྱན་ཆོས་ཅན། ཁྱོད་འདོད་པའི་ཡོན་ཏན་ལྔ་མ་སྤངས་རྣམ་དག་རྒྱན་དུ་རྫོགས་པའི་རྟགས་སུ་རང་སྣང་བ་ཡིན་ཏེ། ཁྱོད་གཟུགས་རྡོ་རྗེ་མ་ལ་སོགས་པའི་ལྷ་མོས་ཕྱོགས་ཀུན་ཏུ་འཁྲིགས་པར་རང་སྣང་བའི་ཕྱིར། སྟེང་རྒྱན་ཆོས་ཅན། ཁྱོད་བཤད་དུ་ཡོད་དེ། དབུས་བུམ་པ་ཟླུམ་པོའི་སྟེང་དུ་བྲེ་མཚོན་པའི་འཕྱུར་པོའི་རྩེར། པདྨ་ལ་གནས་པའི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་སྤྲས་པའི་སྟེང་། རྡོ་རྗེ་རིན་པོ་ཆེའི་ཏོག་གིས་མཛེས་པར་སྣང་བ་དེ་ཡིན་པའི་ཕྱིར། གཞན་ཡས་ཁང་དེར་འཇུག་པའི་སྒོ་ཆོས་ཅན། ཁྱོད་བཤད་དུ་ཡོད་དེ་རྣམ་པར་བཞིའི་ཏིང་ངེ་འཛིན་གྱི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་བྱེད་ཕྱོགས་ཀྱི་དབྱེ་བས་སྒོ་བཞིར་སྣང་བ་དེ་ཡིན་པའི་ཕྱིར། གཞལ་ཡས་ཁང་དེའི་རྟ་བབ་ཆོས་ཅན། ཁྱོད་ཀྱི་གྲངས་ངེས་བཤད་དུ་ཡོད་དེ། རྒྱུའི་རྟ་བབ་བརྒྱད་དང་། འབྲས་བུའི་རྟ་བབ་བརྒྱད་དེ་བཅུ་དྲུག་ཏུ་གྲངས་ངེས་པ་ཡིན་པའི་ཕྱིར། རྒྱུའི་རྟ་བབ་ཆོས་ཅན། ཁྱོད་བཤད་དུ་ཡོད་དེ། ཐུན་མོང་གི་རྣམ་ཐར་བརྒྱད་ཀྱི་ཡོན་ཏན་གྱི་རྟགས་སུ་སྒོ་ཕུབས་ཕྱི་ནང་གཉིས་སུ་ཐེམ་སྐས་བཞི་བཞི་དང་ལྡན་པ་དེ་ཡིན་པའི་ཕྱིར། འབྲས་བུའི་རྟ་བབ་ཆོས་ཅན། ཁྱོད་བཤད་དུ་ཡོད་དེ། ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་སྒོ་ལོགས་ཀྱི་ཕྱིར་ཟུར་བཞི་ནས་ཀ་བས་བཏེགས་པའི་སྟེང་དུ་རྒྱན་གྱི་རྟ་བབས་བརྒྱད་དང་ལྡན་པ་དེ་ཡིན་པའི་ཕྱིར། གཞལ་ཡས་ཁང་དེའི་མཚན་ཉིད་ཆོས་ཅན། ཁྱོད་ལ་ཕྱི་དང་ནང་མེད་པར་ཀུན་ཏུ་ནང་དུ་གྱུར་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཆོས་ཀྱི་དབྱིངས་རྡོ་རྗེ་ཀུན་ཏུ་བཟང་མོའི་བྷ་ག་ཉིད་དུ་འདུས་པས་ན། ཐ་སྙད་ཙམ་དུ་ནང་ཞེས་བརྗོད་པའི་ཕྱིར། གཞལ་ཡས་ཁང་དེའི་གདན་ཁྲིའི་དོན་དེ་ཇི་ལྟ་བུ་ཡིན་ཞེ་ན། དེ་ལ་གསུམ་ཡོད་པའི་དང་པོ་འོག་གཞི་ཆོས་ཀྱི་འཁོར་ལོ་བསྐོར་བའི་གདན་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་རིགས་ལྔ་ཡེ་ཤེས་ལྔའི་ཕྱག་རྒྱས་རྟོག་ཚོགས་གཅོད་པའི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་བའི་རྟགས་སུ་རང་ཤར་བ་དེ་ཡིན་པའི་ཕྱིར། གཉིས་པ་སའི་ཁྱད་པར་བགྲོད་པའི་གདན་དེ་ཆོས་ཅན། ཁྱོད་བཤད་དུ་ཡོད་དེ། མི་འཇིགས་པ་བཞི་སོགས་ལྷུན་གྱིས་གྲུབ་པའི་ཡོན་ཏན་གྱི་རྟགས་སུ་སེང་གེ་ལ་སོགས་པ་སེམས་ཅན་ལྔ་པོ་རེ་རེའང་བརྒྱད་བརྒྱད་ཀྱི་གདན་ཁྲི་དང་ལྡན་པ་དེ་ཡིན་པའི་ཕྱིར། གསུམ་པ་ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་དེ་ཆོས་ཅན། ཁྱོད་བཤད་དུ་ཡོད་དེ། རྒྱལ་བའི་ཐུགས་རང་བཞིན་གྱིས་འོད་གསལ་ཞིང་ཐབས་ཤེས་དབྱེར་མེད་པའི་རྟགས་སུ་ཉི་ཟླ་དང་། ཉེས་སྐྱོན་གྱིས་མ་གོས་པས་པདྨ་དང་། རེ་བ་སྐང་ཞིང་དཀོར་བདུན་ལྷུན་གྱིས་གྲུབ་པའི་རྟགས་སུ་རིན་པོ་ཆེའི་ཁྲི་རྐང་མཛོད་མིག་བདུན་ལྡན་རྣམས་སུ་ཤར་བ་དེ་ཡིན་པའི་ཕྱིར། ལྔ་པ་འཁོར་ཕུན་སུམ་ཚོགས་པ་ལ། རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་གཉིས་ལས། དང་པོ་ནི། དེ་བཞིན་གཤེགས་པ་རྣམ་པར་ཤེས་པའི་སོགས་ཏེ། རྣམ་པར་ཤེས་པའི་རྒྱལ་པོ་ལ་སོགས་པ་དེ་བཞིན་གཤེགས་པ་རིགས་ལྔ་པོ་དེ་ཆོས་ཅན། ཁྱོད་རྣམས་ཀྱི་རིགས་དང་ཡེ་ཤེས་ཀྱི་དབྱེ་བ་བཤད་དུ་ཡོད་དེ། མི་བསྐྱོད་པ་ནི་ཐུགས་རྡོ་རྗེའི་རིགས་དང་ཆོས་དབྱིངས་ཡེ་ཤེས། རྣམ་སྣང་ནི་སྐུའི་རིགས་དང་མེ་ལོང་ལྟ་བུའི་ཡེ་ཤེས། རིན་འབྱུང་ནི་རིན་པོ་ཆེའི་རིགས་དང་མཉམ་ཉིད་ཡེ་ཤེས། སྣང་མཐའ་ནི་པདྨའི་རིགས་དང་སོར་རྟོག་ཡེ་ཤེས། དོན་གྲུབ་ནི་ལས་ཀྱི་རིགས་དང་བྱ་གྲུབ་ཡེ་ཤེས་རྣམས་སུ་ངེས་པ་དེ་ཡིན་པའི་ཕྱིར། གཉིས་པ་ནི། རིགས་ཀྱི་ཡུམ་ལྔ་དེ་དེ་ཆོས་ཅན། ཁྱོད་ལ་བཙུན་མོ་ཞེས་བརྗོད་པ་ལ་རྒྱུ་མཚན་ཡོད་དེ། བསྐྱེད་པར་བྱེད་པའི་རྒྱུ་དང་། སྤྱད་པར་བྱ་བའི་ཡུལ་གྱུར་པས་ན་དེ་ལྟར་དུ་བརྗོད་པའི་ཕྱིར། ནང་སེམས་ཆོས་ཅན། ཁྱོད་ལ་དབྱེ་ན་བཞིར་ཡོད་པ་དེ་རྣམས་ལ་མཐོང་བ་ལ་སོགས་པར་སྨོས་པ་ནི་རིམ་པ་ལྟར་མིག་རྣ་བ་སྣ་ལྕེའི་རྣམ་ཤེས་བཞི་ཡིན་པས་རྟོག་པའི་མཚན་ཡིན་ཏེ། ཁྱོད་དབང་པོ་བཞི་ལ་བརྟེན་ནས་ཡུལ་གཟུགས་མཐོང་བ་ལ་སོགས་པ་དབང་ཤེས་བཞིར་འཇོག་པའི་ཕྱིར། མཐོང་བ་ལ་སོགས་པ་བཞི་པོ་ཆོས་ཅན། ཁྱོད་ལྷའི་དུས་ན་ཐུགས་ཀྱི་སེམས་དཔའ་བཞི་ཡིན་ཏེ། མཐོང་བ་ས་སྙིང་། ཐོས་པ་ཕྱག་རྡོར། སྣམ་པ་ནམ་སྙིང་། མྱོང་བ་སྤྱན་རས་གཟིགས་དབང་ཕྱུག་རྣམས་སུ་ངེས་པའི་ཕྱིར། དེ་རྣམས་ལ་ཐུགས་ཀྱི་སེམས་དཔའ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། རྟོག་པའི་དུས་སུ་རྣམ་ཤེས་ཀྱི་ནང་དུ་འདུས་པ་གང་ཞིག །ལྷའི་དུས་སུ་ཐུགས་རྡོ་རྗེའི་རིགས་སུ་ངེས་པའི་ཕྱིར། འདི་ཉིད་ལས། ཀ་ནི་སྤྱན་གྱི་སོགས་ནང་སེམས་བཞི་པོའི་ཡུམ་ཆོས་ཅན། ཁྱོད་རྣམས་ལ་མཐོང་བར་བྱ་བ་ལ་སོགས་པར་སྨོས་པ་ནི་རིམ་པ་ལྟར་ཡུལ་གཟུགས་སྒྲ་དྲི་རོ་བཞི་ཡིན་པས་རྟོག་པའི་མཚན་ཏེ། ཁྱོད་རྣམས་ཀྱི་མཐོང་བྱ་གཟུགས་ལ་སོགས་པའི་ཡུལ་བཞི་པོ་དེ་ཡིན་པའི་ཕྱིར། དེ་དག་ཆོས་ཅན། ལྷའི་དུས་ན་སྐུའི་སེམས་མ་བཞིར་གྲགས་ཏེ། མཐོང་བར་བྱ་བ་ལཱ་སྱེ་མ། གཉན་པར་བྱ་བ་གིརྟི་མ། སྣོམ་པར་བྱ་བ་མཱ་ལེ་མ། མྱོང་བར་བྱ་བ་ནིརྟི་མ་རྣམས་སུ་ངེས་པའི་ཕྱིར། དེ་རྣམས་ལ་སྐུའི་སེམས་མ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། ཡུལ་བཞིས་རྣམ་པར་ཤེས་པ་བཞིའི་རྟེན་བྱེད་པའི་ཕྱིར། འདི་ཉིད་ལས། ཙ་ནི་སྤྱན་གྱི་སྐུ་ཡི་མཆོག་སོགས། ཕྱི་སེམས་ཆོས་ཅན། ཁྱོད་རྣམས་ལ་མཐོང་བྱེད་ལ་སོགས་པར་སྨོས་པ་ནི་རིམ་པ་ལྟར་མིག་རྣ་བ་སྣ་ལྕེའི་དབང་པོ་བཞི་ཡིན་པས་རྟོག་པའི་མཚན་ཡིན་ཏེ། ཁྱེད་རྟོག་པའི་དུས་ཀྱི་རྣམ་ཤེས་བཞིས་ཡུལ་བཞི་མཐོང་བའི་བདག་རྐྱེན་དབང་པོ་བཞི་བྱེད་པའི་ཕྱིར། དེ་དག་ཆོས་ཅན། ཁྱེད་རྣམས་ལྷའི་དུས་ན་གསུང་གི་སེམས་དཔའ་བཞིར་གྲགས་པ་ཡིན་ཏེ། ཁྱེད་རྣམས་རིམ་བཞིན་མཐོང་བྱེད་བྱམས་པ་ཐོས་བྱེད་སྒྲིབ་སེལ། བསྣམས་བྱེད་ཀུན་བཟང་། མྱོང་བྱེད་འཇམ་དཔལ་དབྱངས་རྣམས་སུ་ངེས་པའི་ཕྱིར། དེ་རྣམས་ལ་གསུང་གི་སེམས་དཔའ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། དབང་པོས་ཡུལ་དང་ཤེས་པ་གཉིས་ཀྱི་ཕྱི་ནང་གི་བརྡའ་སྦྱོར་བྱེད་པའི་ཕྱིར། འདི་ཉིད་ལས། ས་ནི་སྤྱན་གྱི་གསུང་གི་མཆོག །ཞེས་སོགས། ཕྱི་སེམས་བཞིའི་ཡུལ་ཆོས་ཅན། དེ་དག་ལ་འདས་པ་ལ་སོགས་པར་སྨོས་པ་ནི་རྟོག་པའི་མཚན་ཡིན་ཏེ། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པའི་ཕྱིར། དེ་དག་ཆོས་ཅན། ལྷའི་དུས་ན་དུས་བཞིའི་ལྷ་མོར་གྲགས་པ་ཡིན་ཏེ། འདས་པའི་དུས་བདུག་པ་མ་ད་ལྟར་བ་མེ་ཏོག་མ། འབྱུང་བ་སྟེ་མ་འོངས་པ་མར་མེ་མ། མ་བྱོན་པ་སྟེ་འབྱུང་བར་མ་ངེས་པའི་དུས་དྲི་ཆབ་མ་རྣམས་སུ་ངེས་པའི་ཕྱིར། འདི་ཉིད་ལས། ཡ་ན་སྐྱེ་བ་རྣམ་པར་དག་སོགས། དུས་བཞི་པོ་དེ་ཆོས་ཅན། བཤད་དུ་ཡོད་དེ། རྒྱུ་འབྲས་གཉིས་ཀ་སྤྱད་ཟིན་པའི་དུས་ནི་འདས་པ། རྒྱུ་སྤྱད་ཅིང་འབྲས་བུ་མ་སྤྱད་པ་ནི་ད་ལྟར་བ། རྒྱུ་འབྲས་ཚོགས་ལ་མ་སྤྱད་པ་ནི་མ་འོངས་པ། རྒྱུ་འབྲས་ཡོད་ལ་ཚོགས་པ་ནི་འདས་མ་འོངས་གང་ལའང་མ་ངེས་པའི་དུས་ཡིན་པའི་ཕྱིར་ཏེ། དཔེར་ན་དབྱར་གྱི་དུས་ལྟ་བུ་ཞིག་གཞིར་བཞག་ནས་རྩི་ན། དཔྱིད་ནི་འདས་པ། དབྱར་ནི་ད་ལྟ་བ། སྟོན་ནི་མ་འོངས་པ། དགུན་ནི་མ་ངེས་པ་སྟེ། དབྱར་གྱི་དུས་འདི་ལས་སྔར་འདས་ཕྱིས་འབྱུང་གཉིས་ནི་འདས་མ་འོངས་པར་ངེས་ལ། དགུན་ནི་འདས་མ་འོངས་གང་རུང་གཅིག་ཏུ་ཁ་ཚོན་མ་ཆོད་པའི་ཕྱིར་ཏེ། དཔྱིད་ཀྱི་སྔ་ལོགས་ཀྱི་དགུན་ནི་འདས་པ་དང་། སྟོན་གྱི་ཕྱི་ལོགས་ཀྱི་དགུན་ནི་མ་འོངས་པ་ལྟར་སྣང་བའི་ཕྱིར། དེ་ལྟར་ཡང་། རྔམ་གློག་ལས། རྒྱུ་འབྲས་ངེས་པ་མ་ཚོགས་པས། །འབྱུང་བར་མ་ངེས་དུས་ཞེས་གྲགས། །ཞེས་སོ། །གཉིས་པ་འཇོམས་བྱེད་ཁྲོ་བོའི་འཁོར་བཤད་པ་དེ་ལ་མཚན་གཉིས་ལས། དང་པོ་སྤྱིའི་མཚན་ནི། འཇིགས་བྱེད་ཡབ་བཞི་པོ་ཆོས་ཅན། ཁྱེད་རྣམས་ལ་འཇོམས་པ་ཆེན་པོ་རྡོ་རྗེ་ཞེས་པའི་རྒྱུ་མཚན་ཡོད་དེ། ཕྱི་ལུས་ཀྱི་ཆོས་བཞི་དང་སྦྱར་ན། རྟོག་པའི་རང་བཞིན་མངོན་དུ་གྱུར་པའི་ཁྲོ་བོ་བཞིའི་སྐུ་གསུང་ཐུགས་ཀྱི་མཛད་པས་བདུད་ལོག་འདྲེན་རྣམས་འཇོམས་པ་དང་། ནང་གསང་བའི་ཁམས་བཞི་དང་སྦྱར་ན། འོག་སྒོ་གསང་བའི་ཁམས་གསུམ་འདུས་པའི་བདེ་བས་རྟོག་པ་དང་ལྷའམ་བདེ་བར་འཛིན་པའི་ཞེན་པ་གཉིས་ཀ་འཇོམས་པ་ལ་ཐོགས་པ་མེད་པས་ན་རྡོ་རྗེ་ཞེས་བརྗོད་པ་གང་ཞིག་དེས་འཇོམས་པའི་ཕྲིན་ལས་གཞན་ལས་ཁྱད་པར་དུ་གྱུར་པས་ན་ཆེན་པོ་ཞེས་བརྗོད་པའི་ཕྱིར། དེ་དག་གི་ཡུམ་བཞི་ཆོས་ཅན། ཁྱེད་རྣམས་ལ་བཙུན་མོ་ཞེས་བརྗོད་པའི་རྒྱུ་མཚན་ཡོད་དེ། དེ་ལྟ་བུའི་འཇོམས་བྱེད་ཀྱི་གཉེན་པོ་དེ་ཡང་རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུམ་གྱིས་ངོ་བོ་དེས་བསྐྱེད་པའི་ཕྱིར། དཔེར་ན་དཀར་པོ་འཇོམས་པ་དེ་དཀར་པོ་མ་ཡིན་པ་གཞན་ཞིག་གིས་བསྐྱེད་པ་བཞིན་ཡིན་པའི་ཕྱིར། གཉིས་པ་བྱེ་བྲག་གི་མཚན་ནི། སྒོ་བ་བཞི་པོ་དེ་རྣམས་ཆོས་ཅན། ཁྱོད་རྣམས་ལ་རེག་པ་ལ་སོགས་པར་སྨོས་པ་ནི། གསང་བའི་མཚན་ཡིན་ཏེ། ཕྱི་ལྟར་ལུས་ཀྱི་འདུས་ཏེ་རེག་པའི་ཚོར་བ་བསྐྱེད་པ་ལ། རེག་བྱེད་ལུས་དབང་རེག་བྱ་ཡུལ། དེ་གཉིས་འདུས་པའི་རེག་ཤེས་རྣམས་སུ་ཡོད་པ་དེ་ཡིན་པའི་ཕྱིར་དང་། ནང་ལྟར་ན། གསང་བའི་ཡུལ་དབང་རྣམ་ཤེས་གསུམ་འདུས་ཀྱི་རེག་པ་བསྐྱེད་པ་ལ། རེག་བྱེད་གསང་དབང་ཐབས་ཀྱི་རྡོ་རྗེ། རེག་བྱ་གསང་ཡུལ་ཤེས་རབ་ཀྱི་པདྨ། གསང་བའི་རིག་ཤེས་དགའ་བ་ཉམས་སུ་མྱོང་བ་རྣམས་སུ་ཡོད་པ་དེ་ཡིན་པའི་ཕྱིར། དེ་དག་ཆོས་ཅན། ལྷའི་དུས་ན་མཐར་བྱེད་སྒོ་བ་བཞིར་རིམ་པར་ལྟར་ཡིན་ཏེ། ཕྱི་ནང་གི་རྟོག་པ་གཉིས་ཀ་གོ་རིམ་བཞིན་དུ། ཁྲོ་བོ་བདུད་རྩི་འཁྱིལ་པ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེ་གཤེད་པོ་རྣམས་སུ་དག་པ་དེ་ཡིན་པའི་ཕྱིར། དེ་དག་གི་ཡུམ་བཞི་པོ་དེ་ཆོས་ཅན། ཁྱེད་རྣམས་ལ་རྟག་པར་མ་ཡིན་པ་ཞེས་སོགས་སྨོས་པ་ནི་རྟོག་པའི་མཚན་ཡིན་ཏེ། རྟག་པར་མ་ཡིན་ཏེ་ཕུང་པོ་མི་རྟག་པར་འཛིན་པ་དང་། ཆད་པར་མ་ཡིན་པ་དེ་སྡུག་བསྔལ་གྱི་རང་བཞིན་ངར་འཛིན་པ་དང་། བདག་ཏུ་མ་ཡིན་པ་སྟེ་བདག་མེད་དུ་འཛིན་པ་དང་། མཚན་མར་མ་ཡིན་པ་དེ་སྟོང་པར་འཛིན་པ་རྣམས་སུ་ཡོད་པ་དེ་དག་ལྷའི་དུས་ན་གོ་རིམ་ཇི་ལྟ་བ་བཞིན་དུ་ཁྲོ་མོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ་དང་བཞིར་ངེས་པ་དེ་ཡིན་པའི་ཕྱིར། ཡང་རྟག་ཆད་བདག་མཚན་དུ་འཛིན་པའི་ཕྱིན་ཅི་ལོག་གི་རྟོག་པ་བཞི་ལྟར་ན། རྟག་པར་འཛིན་པ་ལ་སོགས་པའི་རྟོག་པ་བཞི་པོ་ཆོས་ཅན། ཁྱོད་རང་ག་མར་སྣང་བ་ལྟར་མ་ཡིན་ཏེ། ཁྱོད་རྣམ་པ་མ་སྤངས་པར་སྒོ་མ་བཞིའི་རང་བཞིན་དུ་དག་པ་དེ་ཡིན་པའི་ཕྱིར། ཞར་བྱུང་གོ་ཕྱེ་བའི་འཁོར་ཆོས་ཅན། ཁྱོད་བཤད་དུ་ཡོད་དེ། ཁྱོད་ཐུན་མོང་འགྲོ་བ་འདུལ་བའི་འཁོར། སྤྲུལ་སྐུ་ཐུབ་པ་དྲུག་དང་། རྗེས་འཇུག་ཆོས་ཀྱི་མིག་དང་ལྡན་པའི་གང་ཟག་སྐལ་བ་དང་ལྡན་པ་རྣམས་ལ་འཇོག་པ་དེ་ཡིན་པའི་ཕྱིར། དེ་ལྟར་ཡང་འདི་ཉིད་ལས། སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་གསུངས་པའི་ཕྱིར་རོ། །རྗེས་མཐུན་འཁོར་གྱི་གྲངས་ཚད་བཤད་པ་ཆོས་ཅན། ཁྱོད་ལ་དབྱེ་ན་གཉིས་སུ་ཡོད་དེ། ཁྱབ་པའི་ཚད་དང་། མང་བའི་ཚད་གཉིས་སུ་ཡོད་པའི་ཕྱིར། ཁྱབ་པའི་ཚད་དེ་ཆོས་ཅན། བཤད་དུ་ཡོད་དེ། ཀུན་ཏུ་ཁྱབ་ཅིང་མཐའ་ཡས་པར་ཁྱབ་པའི་ཕྱིར་ཏེ། དཔེར་ན་ཏིལ་གང་དེ་ཏིལ་འབྲས་ཀྱིས་གང་ཞིང་ཁྱབ་པ་བཞིན་དུ་གནས་པ་དེ་ཡིན་པའི་ཕྱིར། མང་བའི་ཚད་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་སྔར་སྨོས་པ་དེ་ལྟ་བུའི་འཁོར་ཚོགས་ཀྱི་གྲངས་ཚད་འདི་ཙམ་ཞེས་བརྗོད་ཀྱིས་མི་ལང་བའི་ཕྱིར། འོ་ན་ཁྱབ་པ་དང་མང་བའི་བདག་ཉིད་ཙམ་གྱི་འཁོར་དེ་དག་དང་གཉིས་སུ་མེད་པར་བཞུགས་ཚུལ་དེ་ལྟ་བུ་ཞེ་ན། དེ་ཆོས་ཅན། རང་བཞིན་གཉིས་སུ་མེད་པར་བཞུགས་པ་ཡིན་ཏེ། དེ་བཞིན་གཤེགས་པ་དང་བྱང་ཆུབ་སེམས་དཔའ་མ་ལུས་པ་ཐམས་ཅད་དཔལ་ཀུན་ཏུ་བཟང་པོའི་རང་བཞིན་དུ་འདུས་པ་གང་ཞིག་འགྲོ་བའི་ཕུང་ཁམས་སྐྱེ་མཆེད་ཇི་སྙེད་པའང་ལྷའི་རང་བཞིན་དུ་གནས་པའི་ཕྱིར་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་གསུངས་པའི་ཕྱིར། ཞར་བྱུང་ལེའུའི་བསྡུ་བ་དེ། ཇི་ལྟ་བུ་ཞེ་ན། དེ་འཆད་པར་བྱེད་པ་ལ། དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་ནས། རྡོ་རྗེ་མཆོག་གི་གནས་ཉིད་དོ། །ཞེས་པ་འདིས་བསྟན་པ་ཡིན་ཏེ། དེ་ཡང་ཚིག་དོན་དུ་སྒྲིལ་ན། དེ་ནས་དེ་བཞིན་གཤེགས་པ་ཞེས་སོགས་གསུངས་པ་ལོ་རྒྱུས་སུ་བརྗོད་པའི་དོན་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་དེ་བཞིན་གཤེགས་པ་ཐམས་ཅད་འདུས་པའི་སྤྱི་གཟུགས་རིགས་ལྔ་དབྱེར་མི་ཕྱེད་པའི་སྟོན་པ་ཉིད་ཀྱི་ཐུགས་ལ་རྒྱུད་དོན་ཇི་ལྟར་ཤར་བའི་དོན་མངོན་སུམ་དུ་སྣང་བས་ན་ཕྱུང་ངོ་ཞེས་ཐ་སྙད་དུ་བཏགས་པའི་ཕྱིར། ཨེ་ཨེ་མ་ཨེ་མའོ་ཞེས་སོགས་ཀྱི་དོན་དེ་ཆོས་ཅན། ཁྱོད་ཀྱི་གང་གསུངས་པའི་བསྟན་པ་དེ་ཉིད་བསྟན་པ་ཡིན་ཏེ། རྒྱུད་དབུ་ཞབས་ཀྱི་བརྗོད་བྱ་གཞི་ལམ་འབྲས་གསུམ་དུ་འདུ་བ་གང་ཞིག །གཞུང་འདིས་རྒྱུད་གསུམ་མདོར་བསྟན་པ་ཡིན་པའི་ཕྱིར། ཇི་ལྟར་ན། དེ་བཞིན་ཉིད་ཀྱི་དབྱིངས་ཉིད་ཞེས་པ་དེ་ཆོས་ཅན། ཁྱོད་ཀྱི་གཞིའི་རྒྱུད་མདོར་བསྟན་པ་ཡིན་ཏེ། གནས་ལུགས་དེ་བཞིན་ཉིད་ཀྱི་དབྱིངས་དེ་ཉིད་འཁོར་འདས་ཀྱི་ཆོས་ཐམས་ཅད་ཀྱི་འབྱུང་གནས་སུ་གྱུར་པ་དེ་ཡིན་པའི་ཕྱིར། དབང་བསྒྱུར་ཞེས་དང་། རང་སྣང་བར་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། ཞེས་པ་དེ་ཆོས་ཅན། ཁྱོད་ཀྱི་ལམ་གྱི་རྒྱུད་མདོར་བསྟན་པ་ཡིན་ཏེ། ལམ་ནི་ཤེས་འཇུག་བྱེད་རྩོལ་དང་བཅས་པའི་གདུལ་བྱའི་སྣང་བ་གང་ཞིག །གཞི་འཆིང་གྲོལ་མེད་པའི་གནས་ལུགས་དེ་ཉིད་རྟོགས་པ་ལ་དབང་བསྒྱུར་བའི་ལྟ་བ་དང་། སེམས་ཉིད་ལྷའི་དཀྱིལ་འཁོར་དུ་རང་གསལ་བར་སྒོམ་པའི་ཏིང་འཛིན་གྱིས་ཐབས་ཡན་ལག་དང་བཅས་པའི་དོན་འཕྲོ་གཞིའི་རྩ་བ་ཡིན་པའི་ཕྱིར། ཡེ་ཤེས་དཀྱིལ་འཁོར་ཐུགས་རྗེའི་ངང་། །ཞེས་དང་། སྐུ་གསུང་ཐུགས་ཡོན་ཏན་ཕྲིན་ལས། ཞེས་པ་མན་ཆད་ཆོས་ཅན། ཁྱོད་ཀྱིས་འབྲས་བུའི་རྒྱུད་དོན་མདོར་བསྟན་པ་ཡིན་ཏེ། ཆོས་ཉིད་མངོན་གྱུར་སྐྱེད་དུ་བྱར་མེད་པར་སོན་པ་ནི་འབྲས་བུ་བདེ་གཤེགས་ཀྱི་སྣང་བ་གང་ཞིག །དེ་ཤེས་འཇུག་གི་རྐྱེན་དེས་རྟོག་བྱའི་ཡུལ་གྱི་གྲུབ་འབྲས་སུ་ངེས་པའི་ཕྱིར། དེ་ལ་ཁོ་ན་རེ། བསྡུ་བའི་ཚིགས་སུ་བཅད་པ་འདི་ཆོས་ཅན། ཁྱོད་ཀྱིས་བསྟན་པ་རྒྱུད་དོན་མདོར་བསྟན་དུ་བཤད་པའི་མི་འཐད་པར་ཐལ། དེ་འཐད་ན་འོག་ཏུ་གླེང་བསླང་བ་དགོས་པ་མེད་པའི་ཕྱིར་ཟེར། འདི་ལ་མགོ་མཚུངས་དང་རྣལ་ལན་གཉིས་ལས། དང་པོ་ནི། གླད་དུ་བཀོད་པའི་གསང་བའི་སྙིང་པོ་ཞེས་སོགས་ཀྱི་མཚན་དེ་ཆོས་ཅན། ཁྱོད་ཀྱིས་རྒྱུད་དོན་ཡོངས་སུ་རྫོགས་པ་བསྟན་པ་མི་འཐད་པར་ཐལ། དེ་འཐད་ན། འོག་ཏུ་གླེང་བསླང་བ་ལ་དགོས་པ་མེད་པའི་ཕྱིར། གཉིས་པ་ནི། སྟོན་པའི་ཐུགས་ལ་རྒྱུད་དོན་ཇི་ལྟར་ཤར་བའི་དོན་གསང་བདག་གི་བསྡུ་བ་བྱེད་པའི་ཚེ། གདུལ་བྱ་དབང་རབ་ཀྱི་ཚུལ་དུ་བསྟན་པ་རྒྱུད་དོན་མདོར་བསྟན་གྱི་ཚུལ་དུ་བསྡུས་པ་ཡིན་པས་སྐྱོན་མེད་ཅིང་འོག་ཏུ་གླེང་བསླང་བ་ལ་དགོས་པ་མེད་པར་ཡང་མི་འགྱུར་ཏེ། གདུལ་བྱ་དབང་རབ་འབྲིང་མན་ཆོད་ལ་རྒྱུད་དོན་འོག་ཏུ་སྟོན་པས་ན་འདི་ཉིད་གླེང་གཞིའི་དོན་བསྡུས་སུ་བཞེད་པའི་ཕྱིར་རོ། །རྡོ་རྗེ་གསང་བའི་ཚིག་ཏུའོ། །ཞེས་པའི་དོན་དེ་ཆོས་ཅན། ཁྱོད་བཤད་དུ་ཡོད་དེ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་གསང་མཛོད་འཛིན་པ་པོ་རྒྱལ་སྲས་ལག་ན་རྡོ་རྗེ་དེ། རྒྱུད་འདི་ཉིད་ཀྱི་སྡུད་པ་པོར་སྟོན་པས་དེ་ལྟར་ལུང་བསྟན་པའི་ཕྱིར་ཏེ། རྒྱ་མཚོ་ལས། འཁོར་གྱི་ནང་ན་སྐལ་ལྡན་མཆོག །འདུལ་བའི་དུས་བབ་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་གསུངས། དེ་ལྟར་རྒྱུད་འདིར་སྡུད་པ་པོས་སྨོས་པ་ཆོས་ཅན། དགོས་པ་ཡོད་དེ། སྡུད་པ་པོ་མེད་ན་སྟོན་པས། བསྟན་ཀྱང་གཏམ་ལྐུགས་པ་ལྟར་ཕྱིས་མི་འབྱུང་བའི་སྐྱོན་དང་། རྒྱུད་འདི་གནས་གང་དུ། སྟོན་པ་གང་གིས་འཁོར་གང་ལ་བསྟན་ཅིང་གཏད། དེ་ནས་སུ་ཞིག་གི་སྤེལ། ཞེས་པའི་སྒྲོ་བཀུར་སྤང་བའི་ཆེད་ཡིན་པའི་ཕྱིར། འཕྲོས་དོན་དུ་ཞར་བྱུང་གདུལ་བྱ་དགོས་ཆེད་དུ་སྟོན་པ་ཁྲོ་བོའི་གླེང་གཞི་དང་། འགྲོ་འདུལ་སྤྲུལ་སྐུའི་གླེང་གཞི་ནི། གདུལ་བྱ་ལ་ལྟོས་པ་སྟེ། གོང་དུ་སྨོས་པའི་གླེང་གཞི་དེ་ཉིད་གདུལ་བྱའི་སྣང་བ་ལ་སོ་སོར་བྱུང་བ་སྟེ། གདུལ་བྱ་གདུག་པ་ཅན་ལ་ཁྲོ་བོའི་གླེང་གཞི་དང་། ཐུན་མོང་གི་གདུལ་བྱ་རྣམས་ལ་སྤྲུལ་སྐུའི་གླེང་གཞིར་སྣང་བ་སྟེ། འཇམ་དཔལ་སྒྱུ་དྲྭའི་བཤད་རྒྱུད་ལས་ཀྱང་། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དང་ལྷ་རྣམས་དང་། །མི་རྣམས་ཀྱི་ནི་དོན་དུ་གསུངས། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོར་བསྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །ཞེས་བཤད་པ་ལྟར་ཡིན་པའི་ཕྱིར། ད་ནི་དེ་དག་ལ་རྩོད་སྤོང་གི་རིག་པ་འ ཆད་དེ། དེ་ལ་རྩོད་པ་འགོད་པ་ནི། ཁ་ཅིག །ལེའུ་དང་པོའི་འཁོར་འདི་རྣམས་རང་སྣང་ཡིན་པར་མི་འཐད་དེ། བཟང་ངན་དུ་སྣང་བའི་ཕྱིར་དང་། རང་སྣང་ཡིན་ན། གདུལ་བྱ་རང་རྒྱུད་པ་མེད་པར་ཐལ། འདུལ་བྱེད་སྤྲུལ་པ་ཚོགས་པ་དོན་མེད་པའི་ཕྱིར་ཟེར་བ་མི་འཐད་ཏེ། འདིར་ཚོགས་པའི་འཁོར་ལ་ཆ་གཉིས་སུ་ཡོད་པར་ལུང་རིག་གཉིས་ཀྱིས་གྲུབ་པའི་ཕྱིར་ཏེ། གནས་ལུགས་ཀྱི་དབང་དུ་བྱས་ན། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོ་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་སོ། །རིག་པས་གནོད་དེ་སྲིད་གསུམ་གྱིས་བསྡུས་པའི་འགྲོ་བ་ཡོད་དོ་ཅོག་ཆོས་ཅན། ཁྱོད་དཔལ་ཀུན་ཏུ་བཟང་པོའི་རང་བཞིན་དུ་ཡོད་པ་མ་ཡིན་པར་ཐལ། ཁྱོད་ལེའུ་དང་པོའི་གཙོ་འཁོར་གྱི་ནང་དུ་མ་འདུས་པའི་ཕྱིར། ཡང་སྣང་ལུགས་ཀྱི་དབང་དུ་བྱས་ན་ཡང་ལུང་རིགས་གཉིས་ཀྱིས་གྲུབ་སྟེ། སྒྱུ་འཕྲུལ་རྒྱ་མཚོ་ལས། དང་པོའི་སངས་རྒྱས་པ་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །བརྗོད་ཀྱི་མི་ལང་ཚད་མེད་དང་། །རྣམ་གཉིས་ཚུལ་དུ་བཞུགས་པའོ། །ཞེས་སོ། །རིག་པ་ནི། །རྟོག་ཚོགས་སྦྱར་བའི་གཙོ་འཁོར་གྱི་རྣམ་པ་ཅན་གྱི་རྒྱལ་བ་བཞི་བཅུ་རྩ་གཉིས་པོ་དེ་ཆོས་ཅན། ཁྱེད་གང་ཟག་གཅིག་གི་རྟོག་པ་རྒྱལ་བ་བཞི་བཅུ་རྩ་གཉིས་སུ་དག་པ་དེ་མ་ཡིན་པར་ཐལ། ཁྱོད་རྣམས་རྒྱུད་ཐམས་ཅད་དད་པའི་བཟང་ངན་ཅན་ཡིན་པའི་ཕྱིར། རྟགས་ཁས། འདོད་ན་དེར་ཆོས་ཅན། དེར་ཐལ། ཁྱོད་རྒྱུད་འདིའི་མཐར་ཐུག་གི་འབྲས་བུ་རྒྱལ་བ་བཞི་བཅུ་རྩ་གཉིས་སུ་གནས་པ་དེ་ཡིན་པའི་ཕྱིར་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པ་འཁྲུལ་པ་ཡིན། །ཞེས་སོ། །འདུལ་བྱེད་ཚོགས་པའང་དོན་མེད་དུ་མི་འགྱུར་ཏེ། རང་སྣང་དུ་གཙོ་འཁོར་གྱི་རྣམ་པར་བསྟན་ནས་རྒྱུད་མི་གསུང་བའི་གསུང་བ་ཆེན་པོ་དེ་གཞན་སྣང་དུ་དེ་དང་ཆ་འདྲ་བའི་གཙོ་འཁོར་གྱི་བཀོད་པ་རང་ཤར་དུ་བྱུང་ནས་དོན་མཛད་པའི་སྣང་བ་འབྱུང་བའི་ཕྱིར། ཡང་ཁ་ཅིག་ན་རེ། སྐབས་འདིར་རྒྱུད་གསུངས་པ་པོའི་སྟོན་པ་ཕུན་སུམ་ཚོགས་པ་དེ་ཡིན་ན། རིགས་དྲུག་པ་ཀུན་ཏུ་བཟང་པོ་ཡིན་པས་ཁྱབ་སྟེ། དེས་མ་གསུངས་པའི་མདོ་རྒྱུད་མེད་པའི་ཕྱིར་ཟེར་ན། འཆད་པའི་སྐྱེས་བུ་རྡོ་རྗེ་མི་བསྐྱོད་པ་ཆོས་ཅན། དེར་ཐལ། དེ་ཡིན་པའི་ཕྱིར། འདོད་ན། དེ་ཆོས་ཅན། དེ་མ་ཡིན་པར་ཐལ། རིགས་ལྔའི་ནང་ཚན་གྱི་ཐུགས་རྡོ་རྗེའི་རིགས་མི་བསྐྱོད་པ་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཐུགས་ཀྱི་སྒྱུ་འཕྲུལ་འཆད་པའི་སྐྱེས་བུ་དེ་ཡིན་པའི་ཕྱིར་ཏེ། རྒྱུད་ལས། ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱེད་སྐྱེད་བུ་མདུན་ན་གནས། །ཞེས་སོ། །ཡང་ཁ་ཅིག་ན་རེ། སྟོན་པ་ཕུན་སུམ་ཚོགས་པ་ཡིན་ན། དྲུག་པ་ཀུན་བཟང་དང་། རིགས་ལྔ་གང་རུང་ཡིན་པས་ཁྱབ་ཟེར་ནའང་། ཀུན་ཏུ་བཟང་མོ་དང་། ཐུབ་དྲུག་སོགས་ཀྱིས་སྒྲུབ་བྱེད་སྔར་ལས་དཔག་སྟེ་ཤེས་པར་བྱའོ། །ཡང་དོགས་སེལ་དུ། མིའི་ཐུབ་པ་ཆོས་ཅན། ཁྱོད་སྟོན་པ་མ་ཡིན་པར་ཐལ། ཁྱོད་འཁོར་ཡིན་པའི་ཕྱིར་ཏེ། གོ་ཕྱེ་བའི་འཁོར་ཡིན་པ་གང་ཞིག་རིག་པའི་སྐྱེས་བུ་ཡིན་པའི་ཕྱིར། ཁ་ཅིག་ན་རེ། རིགས་ལྔ་ནང་ཕན་ཚུན་འགལ་བ་མ་ཡིན་ཏེ། གཞི་གཅིག་གི་སྟེང་དུ་གནས་པའི་ལྷ་ཡིན་པའི་ཕྱིར་ཟེར་ན། འོ་ན་མི་བསྐྱོད་པ་ཆོས་ཅན། རིགས་བཞི་ཀ་ཡིན་པར་ཐལ། གཞི་གཅིག་གི་སྟེང་དུ་གནས་པའི་ལྷ་ཡིན་པའི་ཕྱིར་ཏེ། རྣམ་སྣང་གི་རང་བཞིན་དུ་འདུས་ཤིང་དག་པའི་ལྷ་ཡིན་པའི་ཕྱིར་ཏེ། རྟོག་པའི་དུས་སུ་ཕུང་པོ་གཞན་བཞི་པོ་གཟུགས་ཕུང་ལ་ལྡན་པའི་ཆོས་གང་ཞིག །ལྷའི་དུས་སུའང་རྟོག་པ་དེ་རྣམས་རྣམ་སྣང་གི་གནས་དེ་དང་དེ་རྣམས་སུ་དག་པའི་ལྷ་ཡིན་པའི་ཕྱིར། འདི་དག་གི་རྣལ་ལན་ནི། ངོ་བོའི་སྒོ་ནས་ལྷ་གཅིག་གི་བདག་ཉིད་དུ་ཁས་ལེན་ཏེ། ཏིལ་འབྲུ་དང་སྣུམ་གཉིས་རྫས་གཅིག་གི་ངོ་བོར་ཡོད་བཞིན་ཡིན་པའི་ཕྱིར། རྣམ་པ་སོ་སོ་བར་ཁས་ལེན་ཏེ། སྣུམ་ཁུ་བ་དང་། ཏིལ་གོང་བུའི་རྣམ་པ་གཉིས་འགལ་བ་ལྟར་གྲུབ་པའི་ཕྱིར་དེ་ལྟར་ན་ཐ་དད་མ་ཡིན་པའི་ཐ་དད་དུ་ཁས་ལེན་དགོས་ཏེ། རྒྱུད་འདི་ཉིད་ལས། ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ལྷུན་གྱིས་གྲུབ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་སོ། །དེས་མཚོན་ཏེ་ཐམས་ཅད་ལ་རིགས་འདྲེ་ཤེས་དགོས་སོ། །ཡང་གནས་ཀྱི་སྐབས་སུ་འཇིག་རྟེན་གྱི་ཁམས་དང་། འོག་མིན་ཆེན་པོ་གཉིས་གཅིག་དང་ཐ་དད་གང་ཡིན་ཟེར་ན། ངོ་བོའི་སྒོ་ནས་གཅིག་ཏུ་འདོད་དེ་གོང་དུ་སྨོས་པའི་སྣུམ་དང་ཏིལ་གྱི་དཔེ་བཞིན་དུ་ཁས་བླངས་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་པའི་ཕྱིར། གནོད་བྱེད་མེད་དེ། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། སོགས་ནས། ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །སྒྲུབ་བྱེད་ཡོད་དེ། མ་དག་པའི་འཇིག་རྟེན་འདི་ཆོས་ཅན། ཁྱོད་དག་པའི་ངོ་ན་འོག་མིན་གནས་སུ་ཡོད་དེ། ཁྱོད་སྤངས་པའི་ཕ་རོལ་ན་འོག་མིན་ཆེན་པོའི་གནས་བཙལ་དུ་མེད་པའི་ཕྱིར་ཏེ། འདི་ལྟར་དྲི་མ་མེད་པར་གྲགས་པའི་ཐུན་མོང་གི་མདོའི་ལུང་གི་ཀྱང་གྲུབ་པའི་ཕྱིར། རྣལ་ལན། འདི་ལྟར་རང་ག་མར་སྣང་བ་འདི་ཡང་མིན་ལ། འདི་ལས་གཞན་དུ་བརྗོད་དུའང་མེད་དོ། །ཞེས་བཞེད་དོ། །ཡང་ཁྲོ་བོའི་གླེང་གཞིའི་སྐབས་སུ་ཁ་ཅིག་ན་རེ། རུ་ཏྲ་དེ་སྤྲུལ་པ་བ་ཡིན་ནམ། ཐ་མལ་བ་ཡིན། དང་པོ་ལྟར་ན། ངན་སོང་གི་སྡུག་བསྔལ་མྱོང་བར་བཤད་པས་རིགས་པ་མ་ཡིན་ནོ་ཟེར། གཉིས་པ་ལྟར་ན། ཡི་དྭགས་སྲིན་པོ་ཆེན་པོ་ཟེར་བས་འདོད་ཁམས་པ་ཡིན་པའི་ཕྱིར། དེས་གཟུགས་ཁམས་དབང་དུ་བསྡུས་པ་མི་འཐད་དེ། དེར་འགྲོད་པ་ལ་བསམ་གཏན་གྱི་ཏིང་ངེ་འཛིན་ཐོབ་དགོས་པའི་ཕྱིར་དང་། དཔལ་ཆེན་པོ་སྤྱོད་ཡུལ་གཅིག་ཏུ་མ་སྤྱད་པའི་ཕྱིར། ཞལ་མཐོང་བའི་དངོས་ཀྱི་གདུལ་བྱར་གྱུར་པའང་མི་འཐད་དོ་ཟེར། དེ་དག་དགག་པ་ལ། སེམས་ཅན་གྱི་དོན་དུ་དེ་བཞིན་གཤེགས་པའི་སྤྲུལ་པ་ཐ་མལ་པའི་གཟུགས་སུ་སྣང་བ་རྣམས་ཆོས་ཅན། ཁྱོད་ཐ་མལ་པར་ཐལ། དམ་བཅའ་དེ་འཐད་པའི་ཕྱིར། འདོད་པའི་རྟེན་ཅན་གྱི་འཕགས་པ་ཆོས་ཅན། ཁྱོད་ཀྱིས་གཟུགས་ཁམས་དབང་དུ་བསྡུ་མི་ནུས་པར་ཐལ། ཁྱོད་འདོད་པའི་རྟེན་ཅན་ཡིན་པའི་ཕྱིར། འདོད་ན། དཔའ་བོས། སྐྱེ་བོ་མ་རིག་གིས་ལྡོངས་པ། སྲིད་རྩེའི་བར་དུ་སོང་ནས་ཀྱང་། ཞེས་པའི་ལུང་གིས་གནོད་པའི་ཕྱིར་རོ། །ཤཱཀྱ་ཐུབ་པ་མཐོང་བའི་སེམས་ཅན་རྣམས་ཆོས་ཅན། ཁྱོད་ཀྱིས་ཐུབ་པ་དང་སྤྱོད་ཡུལ་གཅིག་ཏུ་སྤྱད་པར་ཐལ། དེའི་ཕྱིར། རྟགས་ཁས། དེས་རྒྱུད་འབྱུང་བའི་གླེང་གཞི་བཤད་པ་སོང་ནས། གཉིས་པ་རྐྱེན་གླེང་བསླང་བ་ལ། དགོས་ཆེད་ངོ་བོ། སྒྲ་དོན། རྣམ་གྲངས་དང་བཞི་ལས། དང་པོ་གླེང་བསླང་གི་དགོས་པ་ཆོས་ཅན། བཤད་དུ་ཡོད་དེ། རྒྱུད་དོན་གདུལ་བྱའི་བློ་དང་འཚམས་པར་མྱུར་དུ་འབྱུང་བ་དེ་ཁྱོད་ཀྱི་དགོས་པ་ཡིན་པའི་ཕྱིར། གཉིས་པ་གླེང་བསླང་གི་ངོ་བོ་ཆོས་ཅན། བཤད་དུ་ཡོད་དེ། སྟོན་འཁོར་དྲི་ལན་གཅིག་གི་རྐྱེན་དུ་གཅིག་གྱུར་པས། བསྟན་པ་འབྱུང་མ་རག་པ་དེ་ཡིན་པའི་ཕྱིར། གསུམ་པ་གླེང་བསླང་གི་སྒྲ་དོན་དེ་ཆོས་ཅན། བཤད་དུ་ཡོད་དེ། གླེང་བར་བྱ་བ་བསྟན་པ་ཡིན་ལ ། དེ་གླེང་བར་བསྐུལ་བ་ནི་བསྟན་པ་འབྱུང་བའི་རྐྱེན་དུ་གྱུར་པས་ན། བསླང་ཞེས་བརྗོད་པ་དེ་ཡིན་པའི་ཕྱིར། བཞི་པ་གླེང་བསླང་གི་རྣམ་གྲངས་ཆོས་ཅན། ཁྱོད་ལ་དབྱེ་ན་གཉིས་སུ་ཡོད་དེ། ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བ་དང་། ཐུན་མོང་པ་གོ་ཕྱེ་བའི་འཁོར་གྱི་ཆེད་དུ་འཁོར་གྱིས་གུས་པས་དྲིས་ཏེ་གླེང་བ་གཉིས་སུ་ཡོད་པའི་ཕྱིར། དེའི་དང་པོ་ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བའི་གོ་དོན་ནི། སྟོན་པ་ཡབ་ཡུམ་གྱི་ལྷན་ཅིག་པའི་འཁོར་ལ་ཟབ་དབང་གསུམ་བསྐུར་བས་ཞེན་པ་དག་ནས་རང་བཞིན་གསང་བའི་སྙིང་པོའི་དོན་རྟོགས་པ་དེ་ཆོས་ཅན། ཁྱོད་ཐུན་མོང་མ་ཡིན་པའི་གླེང་བསླང་བ་ཡིན་ཏེ། དོན་དམ་ངེས་པའི་ཚིག་གིས་རང་བཞིན་གསང་བའི་སྙིང་པོའི་དོན་དངོས་སུ་སྟོན་པ་ཡིན་པའི་ཕྱིར། དེ་ལྟར་ཡང་ཁོག་གཞུང་ལས། ཐུན་མོང་མ་ཡིན་སྟོན་པ་ཉིད། །ཡབ་ཡུམ་ཆགས་བསྐུལ་རོལ་པ་དང་། །དགྱེས་བསྟར་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་སོ། །དེ་གཏན་ལ་དབབ་པ་ལ་གཉིས་ཏེ། དབང་བསྐུར་བ་དང་། དབང་གཉིས་ཀྱིས་ལས་ཐུན་མོང་དུས་བསྟན་པའོ། །དང་པོ་གསང་དབང་བསྐུར་བ་ལའང་། ཡབ་ཀྱིས་ཐབས་ཀྱི་ཆ་བཟུང་ནས་སྐུ་དང་ཡེ་ཤེས་ཀྱི་དོན་གླེང་བསླང་བ་དང་། ཡུམ་གྱིས་ཤེས་རབ་ཀྱི་ཆ་བཟུང་ནས་དབྱིངས་ཀྱི་དོན་གླེང་བསླང་བ་གཉིས། དེའི་དང་པོ་ཡབ་ཀྱི་གླེང་བསླང་བ་དེ་ཉིད་འཆད་པར་བྱེད་པ་ལ་དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ་ཐམས་ཅད་མ་ལུས་པའི་ནས། ཞེས་བརྗོད་པས་དེ་བཞིན་གཤེགས་པ་ཐམས་ཅད་གཉེས་པར་གྱུར་ཏོ། །ཞེས་པའི་གཞུང་འདིས་བསྟན་པ་ཡིན་ལ། དེའི་དོན་ནི། རྒྱུད་ཀྱི་སྟོན་པ་རིགས་དྲུག་པ་ཡབ་ཡུམ་གཉིས་ཆོས་ཅན། ཁྱོད་ལ་བྱེད་པ་པོ་རྡོ་རྗེ་ཡིད་དང་། བྱ་བ་མོ་ཆོས་ཞེས་སྨོས་པ་ལ་རྒྱུ་མཚན་ཡོད་དེ། མ་རྟོགས་པའི་དུས་ན་ཡིད་ཀྱི་རྟོག་པ་ནི་འཁོར་བའི་བྱེད་པ་པོ་དང་། རྟོགས་པའི་དུས་ན་འདས་པའི་བྱེད་པ་པོ་རང་རིག་པའི་ཡེ་ཤེས་གཉིས་རང་བཞིན་དབྱེར་མི་ཕྱེད་པས་ན་རྡོ་རྗེ་ཡིད་ཀུན་ཏུ་བཟང་པོ་ཞེས་བརྗོད་པ་གང་ཞིག །བྱ་བ་མོ་ནི་དབང་པོ་ལྔའི་ཡུལ་དུ་མ་གྱུར་པའི་འདུས་བྱས་དང་། འདུས་མ་བྱས་ཀྱི་ཆོས་ཀྱི་ཁམས་ཡིན་ལ། དེས་ཡིད་བསྐྱེད་པར་བྱེད་ཅིང་ཡིད་ཀྱི་ཡུལ་དུ་གྱུར་པས་ན་བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ཞེས་བརྗོད་པའི་ཕྱིར། དེ་ལྟ་བུའི་སྟོན་པ་ཡབ་ཡུམ་གཉིས་སྙོམས་པར་ཞུགས་པ་ལ་ཆོས་ཅན། དགོས་པ་ཡོད་དེ། དེ་ལྟར་ཞུགས་པ་ལས་བྱུང་བའི་ཉི་ཟླ་བྱང་ཆུབ་ཀྱི་སེམས་ཀྱིས་རྒྱུ་བྱས་ཤིང་། ཡབ་ཡུམ་གྱིས་ཉམས་སུ་བསྟར་བའི་དོན་ཆེད་དུ་བརྗོད་པས་རྐྱེན་བྱས་ཏེ། དེའི་འབྲས་བུ་རྟོགས་པ་བརྗོད་པས་ལྷན་ཅིག་པའི་འཁོར་རྣམས་ཀྱིས་བདེན་པ་མཐོང་བའི་ཕྱིར། ཨེ་མའོ་རྡོ་རྗེ་ཕུང་པོའི་ཡན་ལག་ནི། ཞེས་སོགས་ཀྱི་དོན་དེ་ཆོས་ཅན། བཤད་དུ་ཡོད་དེ། ཡབ་ཀྱི་ཐབས་ཀྱི་ཆ་བཟུང་ནས་འཁོར་འདས་ཀྱི་ཆོས་ཐམས་ཅད་ཕྱག་རྒྱའི་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པ་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་ཀུན་རྫོབ་ཀྱི་བདེན་པ་མཐོང་ནས་ཕུང་ཁམས་སྐྱེ་མཆེད་ཞིང་ལ་སོགས་པའི་ཆོས་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་རྟོགས་པས་སངས་རྒྱས་ཉིད་ལས་གཞན་པའི་ཆོས་རྡུལ་ཙམ་ཡང་མ་གྲུབ་པར་རྟོགས་པ་ཡིན་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དོ། །དེ་བཞིན་གཤེགས་པ་ཐམས་ཅད་མཉེས་པར་གྱུར་པ་ཡིན་པའི་ཕྱིར། གཉིས་པ་ཡུམ་གྱིས་གླེང་བསླངས་བ་འཆད་པར་བྱེད་པ་ནི། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོས་ནས། ཞེས་བརྗོད་པས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏེ། ཞེས་པའི་གཞུང་འདིས་བསྟན་པ་ཡིན་ལ། དེའི་དོན་ནི། རྒྱུ་སྔར་བཞིན་ལས། རྐྱེན་ཀྱེ་མའོ་ཕྱོགས་བཅུ་སྟོང་ཁམས་ཡེ་ནས་དབེན། ཞེས་སོགས་ཀྱི་དོན་ཆོས་ཅན། བཤད་དུ་ཡོད་དེ། ཡུམ་གྱིས་ཤེས་རབ་ཀྱི་ཆ་བཟུང་ནས་རང་གི་ཉམས་སུ་བསྟར་བའི་དོན་དབྱིངས་ཀྱི་དོན་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་དོན་དམ་པའི་བདེན་པ་མཐོང་ནས། ཕྱོགས་བཅུ་སྟོང་ཁམས་དང་། སྲིད་པ་གསུམ་དང་། སྙིགས་མ་ལྔ་དང་། ཕུང་པོ་ལྔ་སྟེ་ཐ་སྙད་བཞིས་བསྡུས་ཀྱི་ཆོས་ཐམས་ཅད་ཡེ་ནས་ཆོས་ཀྱི་སྐུར་མངོན་པར་སངས་རྒྱས་པས་འབྲས་བུ་གཞན་ནས་བཙལ་དུ་མེད་པར་རྟོགས་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དེ། རྟོག་ཚོགས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་སྟོན་པ་ཉིད་ཀྱིས་མཁྱེན་པའི་ཕྱིར་ཏེ། འཁོར་རྣམས་ཀྱིས་དབང་ཐོབ་པ་ལ་བརྟེན་ནས་དོན་དམ་པའི་བདེན་པ་རྟོག་མེད་ཀྱི་ཡེ་ཤེས་སྐྱེས་ཀྱང་སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་ཉམས་སུ་མ་མྱོང་བའི་ཕྱིར་གསང་བའི་དབང་ཞེས་བརྗོད་པ་ཡང་ཡིན་པའི་ཕྱིར་རོ། །གཉིས་པ་ནི། དེ་ལྟར་གསང་དབང་བསྐུར་ནས། ཤེས་རབ་ཡེ་ཤེས་དང་། དབྱེར་མེད་བདེ་ཆེན་གྱི་དབང་གཉིས་ཀྱི་ལས་ཐུན་མོང་དུ་སྟོན་པར་བཞེད་ནས། དེ་ནས་གཉིས་སུ་མེད་པའི་བདག་ཉིད་ཆེན་པོས་ཞེས་སོགས་གསུངས་པ་ཡིན་ལ། དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། དོན་དགོངས་པ་དང་། རྟགས་ཡབ་ཡུམ་ཉི་ཟླ་གཉིས་སུ་མེད་པའི་ངང་ནས། བདག་དང་མཐའ་ཡས་སེམས་ཅན་རྣམས། །ཞེས་སོགས་ཀྱི་རྟོག་པ་བརྗོད་པའི་རྐྱེན་ལས་འཁོར་གྱིས་སེམས་ལྔ་བསྐྱེད་པ་ཡིན་པའི་ཕྱིར། སེམས་ལྔའི་དངོས་གཞིའི་རྟོག་པ་བརྗོད་པ་ནི། ཨེ་མའོ་ངོ་མཚར་རྨད་གྱི་ཆོས། །སྐྱེ་བ་མེད་ལས༴ ཞེས་སོགས་གསུངས་པ་ཡིན་ལ། དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། ཡས་འབབ་དགའ་བཞིའི་འགྲེས་ལ། གཡོ་ལྡང་། འཇིག་འཇུག །གནས་པ། སྨོན་པ། མཐར་ཕྱིན་པའི་སེམས་ལྔའི་མཐར་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་ནས་ཤེས་རབ་ཡེ་ཤེས་ཀྱི་དབང་ཐོབ་ཅིང་། མས་བརྟན་དགའ་བཞིའི་འགྲོས་ཀྱིས་སེམས་ལྔའི་མཐར་རང་བཞིན་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་ནས་སྟོན་འཁོར་དགོངས་པ་དབྱེར་མེད་དུ་གྱུར་པ་དེ་ཡིན་པའི་ཕྱིར། ཐུན་མོང་གི་གླེང་བསླང་ནི། ཨེ་མའོ་ཡེ་ནས་གསང་བའི་ཆོས། །ཞེས་སོ། །དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། ལྷན་ཅིག་པ་རྣམས་རང་དོན་དུ་རྒྱུད་ཞུ་མ་དགོས་ཀྱང་གཞན་དོན་གོ་ཕྱེ་བའི་འཁོར་གསང་བ་བཞི་ཆོད་པ་རྣམས་ཐུགས་རྗེས་བཟུང་བར་རིགས་ཞེས་བརྗོད་པ་དེ་ཡིན་པའི་ཕྱིར། དེ་ལྟར་ཞལ་གྱིས་བཞེས་ནས་ལན་རྩལ་བ་ནི། ཨེ་མའོ་བདེ་གཤེགས་སྙིང་པོ་ལས། ཞེས་སོགས་གསུངས་པའི་དོན་ནི། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པས་གཤིས་ལ་བཅིངས་གྲོལ་མེད་པའི་དོན་དེ་ཆོས་ཅན། བཤད་དུ་ཡོད་དེ། སེམས་ཅན་ཐམས་ཅད་མ་རྟོགས་པའི་དབང་གིས་བཅིངས་གྲོལ་ལྟར་སྣང་ཀྱང་། སྣང་ཙམ་ཉིད་ནས་གཤིས་ལ་དེ་ལྟར་མ་གྲུབ་པས་འཁོར་འདས་མཉམ་པ་ཉིད་ལྷག་པའི་ཆོས་སྐུ་ཆེན་པོར་ཡེ་ནས་ལྷུན་རྫོགས་སུ་བཞུགས་པ་དེ་ཡིན་པའི་ཕྱིར། དེ་ལྟར་སངས་རྒྱས་ཀྱིས་ཐུགས་སུ་ཆུད་པའི་ལྷུན་གྱིས་གྲུབ་པའི་ཆོས་དེ་ཆོས་ཅན། ཁྱོད་མཚོན་པར་བྱེད་པའི་རྒྱུད་འདི་དངོས་བརྒྱུད་ཀྱི་གདུལ་བྱ་ལ་ཇི་ལྟར་བསྟན་པའི་ཚུལ་ཡོད་དེ་དགྱེས་པའི་ཚུལ་དྲུག་གི་སྒོ་ནས་ལྷན་ཅིག་པའི་འཁོར་ལ་དངོས་སུ་བརྟན་པ་གང་ཞིག །གོ་ཕྱེ་བའི་འཁོར་གདུལ་བྱ་ཐུན་མོང་པ་རྣམས་ལམ་སྟེགས་ཀྱི་ཐེག་པ་ལ་བརྟེན་ནས་རིམ་གྱིས་ལམ་འདིར་དཀྲི་བའི་ཆེད་དུ་སྤྲུལ་པ་ཐུབ་པ་དྲུག་སྤྲོ་བ་སོགས་སྣ་ཚོགས་སུ་སྣང་ནས་བསམ་གྱིས་མི་ཁྱབ་པའི་མཛད་པ་འཁོར་བ་ཇི་སྲིད་ཀྱི་བར་དེ་སྲིད་དུ་རྒྱུན་མི་ཆད་པར་སྟོན་པ་ཡིན་པའི་ཕྱིར་རོ། །དེ་ཡན་ཆད་ཀྱིས་གླེང་གཞི་དང་། གླེང་བསླང་གཞུང་གི་འབྲུ་འབྲེལ་སྦྱོར་ངག་ནས་བཤད་པ་སོང་ནས། ད་ནི་སྤྱིའི་དོན་ལ་འཇུག་སྟེ། རྩ་བའི་ས་བཅད་གསུམ་པ། འབྲས་བུ་ཡོངས་ཤེས་རྒྱུད་དོན་བཤད་པ་ལ་གཉིས་ཏེ། རྒྱུད་གསུམ་གྱི་རྣམ་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། ཐབས་དང་རྒྱུ་ལས་འབྲས་བུའོ། །ཞེས་པས། ཆོས་ཉིད་རང་བཞིན་གྱིས་རྣམ་པར་དག་པ་བཞིའི་རྒྱུའི་རྒྱུད། རང་བཞིན་མངོན་དུ་བྱེད་པ་ཐབས་སམ་ལམ་གྱི་རྒྱུད། རང་བཞིན་མངོན་དུ་བྱས་པ་འབྲས་བུའི་རྒྱུད་དེ་ཤེས་ཐོབ་ཀྱི་བྱ་བྱེད་འབྲེལ་བ་ཅན་ནོ། །དང་པོ་གཞི་ལ་སྤྱིར་མཚན་ཉིད། དབྱེ་བ། ལུང་རིག་གི་སྒོ་ནས་མཐའ་དཔྱད་པ་དང་། དེའི་དོན་བྱེ་བྲག་ཏུ་བཤད་པ་དང་། དང་པོ་ནི། ཆོས་ཐམས་ཅད་ཀྱི་འབྱུང་གནས་སུ་གྱུར་པའི་དྲི་བཅས་དེ་བཞིན་ཉིད་དེ། མཚན་ཉིད་དེས་ནི་ངོ་བོ་དང་། རྟགས་གཞི་གཉིས་ཀ་ལ་ཁྱབ་ཅིང་། ལམ་དང་འབྲས་བུ་གཉིས་རྣམ་པར་བཅད་པའོ། །གཉིས་པ་དབྱེ་བ་ལ། ངོ་བོའི་གཞི་དང་། རྟགས་པའི་གཞི་གཉིས་ལས། དང་པོ་མཚན་ཉིད་ནི། ཆོས་ཉིད་རང་བཞིན་གྱིས་རྣམ་པར་དག་པ། དྲི་མའི་སྦུགས་ན་ཡོད་པའི་གནས་ལུགས་དེ་བཞིན་ཉིད་དེ། དཔེར་ན། འདམ་གྱི་དབུས་ན་ཡོད་པའི་ནོར་བུ་རིན་པོ་ཆེ་ལྟ་བུའོ། །དེ་ལྟར་ཡང་རྒྱུད་ལས། ས་ཡི་ནང་ན་གནས་པའི་ཆུ། །དྲི་མ་མེད་པར་རང་དག་གནས། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་སོ། །གཉིས་པ་མཚན་ཉིད། ལོག་རྟོག་འཁྲུལ་པའི་སྣང་བ་གློ་བུར་བར་གནས་པ་སྟེ། དཔེར་ན། ནོར་བུ་ལ་ཡོད་པའི་འདམ་རྫབ་ལྟ་བུའོ། །དེ་ཡང་མདོ་ལས། གང་ཞིག་ལོག་པར་རྟོག་པས་མེད་མཐོང་བ། །བྱིས་པ་འདི་དག་མེད་པའི་ཆོས་ལ་སྤྱོད། །ཅེས་སོ། །དེ་ཡང་ཡུལ་ཡུལ་ཅན་གཉིས་མེད་ལ་གཉིས་སུ་བཟུང་བས་ལོག་རྟོག །དེ་མ་ཡིན་པ་དེར་བཟུང་བས་འཁྲུལ་པ། ལས་དང་ལོག་རྟོག་གི་བློར་སྣང་བའོ། །གསུམ་པ་ལ། འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། གནས་ལུགས་ངོ་བོ་ཉིད་ཀྱི་གཞི་དེ་ཤེས་བྱ་མ་ཡིན་ཏེ། དེ་ཤེས་བྱའི་ཡུལ་ལས་འདས་པའི་ཕྱིར་ཏེ། ཤེར་ཕྱིན་སུམ་བརྒྱ་པ་ལས། ཆོས་དབྱིངས་ཤེས་བྱ་མ་ཡིན་པས། །དེ་ནི་རྣམ་པར་ཤེས་མི་ནུས། །ཞེས་དང་། གལ་པོ་ལས། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པའི་ཕྱིར་ཟེར་བ་དང་། ཡང་ཡུལ་རྫས་སུ་གྲུབ་པ་འདི་དག་ཤེས་པ་ལས་གཞན་དུ་གྲུབ་པའི་ཕྱིར་མི་འཐད་དོ་ཟེར། གཉིས་པ། དེ་དགག་པ་ལ་ལུང་རིགས་གཉིས་ཀྱིས་གྲུབ་པའི་ཕྱིར་ཏེ། ལུང་གིས་གྲུབ་སྟེ། ཡབ་སྲས་མཇལ་བའི་མདོ་ལས། ཤེས་པར་བྱ་བའང་ཀུན་རྫོབ་དང་དོན་དམ་པའི་བདེན་པ་གཉིས་སུ་ཟད་དོ། །ཞེས་དང་། གལ་པོ་ལས་ཤེས་བྱའི་ནང་ནས་དམ་པར་ནི། གྱུར་ཕྱིར་ངེས་པའི་ཚིག་ཡིན་ནོ། །ཞེས་གསུངས་པའི་ཕྱིར། གཉིས་པ་ནི། གཞིའི་རྒྱུད་དེ་ཆོས་ཅན། ཐ་སྙད་ཙམ་དུ་གཏན་ལ་དབབ་བྱ་མ་ཡིན་པར་ཐལ། ཁྱོད་ཐ་སྙད་ཙམ་དུ་གཞལ་བྱར་མི་རུང་བའི་ཕྱིར། དེར་མ་ཟད་ནམ་མཁའ་ཆོས་ཅན། ཁྱོད་སྐྱེས་བུས་འཇལ་བ་མ་ཡིན་པར་ཐལ། ཁྱོད་སེམས་རྟོག་གི་ཡུལ་ལས་འདས་པའི་ཕྱིར། སྔར་གྱི་ལུང་རྣམས་དང་མི་འགལ་ཏེ། མདོར་ན་གཞི་ལམ་འབྲས་གསུམ་དུ་ཕྱེ་བ་རྨི་ལམ་གྱི་རྒྱུ་འབྲས་སོ་སོ་སྣང་བ་ལྟར། རེ་ཞིག་འཁྲུལ་སྣང་ཀུན་བཏགས་ཀྱི་དབང་གིས་སོ་སོར་སྣང་ཙམ་ལ་བ ཞག་མོད། ཆོས་ཀྱི་ངོ་བོ་ཉིད་ཀྱིས་ཕྱེ་བ་མ་ཡིན་ཏེ། ངོ་བོ་རང་རིག་པའི་བྱང་ཆུབ་སེམས་སུ་གཅིག་པའི་ཕྱིར་དང་། དོ་དམ་བློའི་སྤྱོད་ཡུལ་མ་ཡིན་ཀྱང་། བདེན་གཉིས་འབྱེད་པའི་རྣམ་བཞག་གི་ཚེ། གལ་པོར། ཤེས་བྱ་ཙམ་གྱི་སྣང་བ་ལ། །བདེན་པ་གཉིས་ཀྱི་ཞིང་ས་འགྲུབ། །ཅེས་སོ། །གཉིས་པའི་ལན་ནི། ཤེས་པ་ཆོས་ཅན། ཡུལ་ཤེས་ལ་བདག་གཅིག་གི་འབྲེལ་པ་མེད་པར་ཐལ། ཡུལ་ཤེས་བདག་མི་གཅིག་པའི་ཕྱིར་ཏེ། ཀ་བ་དང་། བུམ་པ་བཞིན་ནོ། །དེ་ལ་དེ་བྱུང་གི་འབྲེལ་པའང་མེད་པར་ཐལ། བསྟན་མེད་ཐོགས་མེད་ཀྱི་རིགས་ཙམ་དེ་ལས་བེམ་པོའི་རྫས་སྐྱེ་མི་སྲིད་པའི་ཕྱིར་ཏེ། ནམ་མཁའ་དང་པདྨོ་བཞིན་ནོ། །དེ་ལྟར་འབྲེལ་པ་མེད་པར་འདོད། ཤེས་པ་ཆོས་ཅན། ཁྱོད་ལས་ཡུལ་རྣམས་སྣང་བ་མི་རིགས་པར་ཐལ། ཡུལ་ཤེས་ལ་འབྲེལ་པ་མ་གྲུབ་པའི་ཕྱིར་ཏེ། མིག་དང་སྒྲ་བཞིན་ནོ། །འདོད་མི་ནུས་ཏེ་མངོན་སུམ་ཚད་མས་གནོད་པའི་ཕྱིར་རོ། །དེ་བས་ན་སེམས་ལས་གཞན་པའི་ཆོས་རྡུལ་ཙམ་ཡང་མ་གྲུབ་སྟེ། འདི་ལྟར་ཡུལ་སོགས་སྣང་བ་ཉམས་སུ་མྱོང་བའི་ཕྱིར། རྨི་ལམ་གྱི་སྣང་བ་བཞིན་དང་། སེམས་ཀྱི་ཇི་ལྟར་དབང་བསྒྱུར་བ་ལྟར་རང་སྣང་བའི་ཕྱིར། ཟད་པར་གོམས་པའི་སྣང་བ་བཞིན་ནོ། །དེ་ལྟར་ཡང་། རྒྱས་པ་ལས། ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ཞེས་དང་། འདི་ལྟར་སྣང་བའི་ཆོས་རྣམས་ཀུན། །གདོས་པ་ཅན་གྱི་ཆོས་མིན་ཏེ། །རྟོག་མེད་རང་རིག་འོད་གསལ་བའི། །ཤེས་པ་འབའ་ཞིག་ཁོ་ནའོ། །ཞེས་དང་། ལམ་རིམ་ལས། སེམས་ལས་མ་གཏོགས་ཆོས་མེད་ཕྱིར། །སྒྱུ་མ་རྡོ་རྗེ་བཙན་པོ་མཆོག །ཅེས་དང་། སློབ་དཔོན་དཔལ་དབྱངས་ཀྱི་མཐའི་མུན་སེལ་སྒྲོན་མ་ལས། ཆོས་རྣམས་སེམས་ཀྱི་འཁྲུལ་པ་སྟེ། །སེམས་ལས་མ་གཏོགས་ཆོས་རྣམས་མེད། །ཞེས་དང་། ཐུན་མོང་གི་ལུང་ལས་ཀྱང་གསུངས་ཏེ། ལང་ཀར་གཤེགས་པ་ལས། ཇི་ལྟར་བྱས་པས་བཏགས་པ་ཡི། །ཕྱི་རོལ་དངོས་པོ་ཡོད་མིན་པར། །བག་ཆགས་ཀྱི་ནི་སྦགས་པའི་སེམས། །དོན་གྱི་དངོས་པོ་རབ་ཏུ་སྐྱེས། །ཞེས་དང་། མདོ་སྡེ་ས་བཅུ་པར་ཡང་། ཀྱེ་རྒྱལ་བའི་སྲས་དག །ཁམས་གསུམ་པོ་འདི་དག་སེམས་ཙམ་མོ། །ཞེས་སོགས་རྒྱ་ཆེར་གསུངས་པའི་ཕྱིར་རོ། །ཡང་ཁ་ཅིག །སོ་སྐྱེའི་ཤེས་པ་སོར་བཞག་འདི་གནས་ལུགས་ངོ་བོ་ཉིད་ཀྱི་གཞིར་འདོད་ན་ནི། ཤེས་བྱ་མ་ནོར་བ་ཡུལ་དུ་བྱེད་པས། འཕགས་པའི་མཁྱེན་པ་དང་ཁྱད་མེད་དུ་འགྱུར་ལ། དེ་ངོ་བོའི་གཞི་མ་ཡིན་ན་ནི། འཁྲུལ་སྣང་འདི་ཆོས་ཉིད་ཀྱི་ཁྱབ་བྱ་མ་ཡིན་པར་ཐལ་བ་སོགས་ཀྱི་སྐྱོན་གནས་སོ་ཟེར་ན། དེའི་ལན་ནི། རང་བཞིན་ཆོས་ཉིད་དུ་ཡོངས་སུ་རྫོགས། རྣམ་པ་འཁྲུལ་ལྡོག་ཏུ་མ་འདྲེས། །ངོ་བོ་ལ་དབྱེར་མེད་ཅེས་བྱ་སྟེ། དགོངས་འདུས་ལས། ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པར་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཞེས་སོ། །འོ་ན་མ་འདྲེས་པ་ཆོས་ཉིད་མ་ཡིན་པ་བཞིན་དུ། ཡོངས་རྫོགས་ཀྱི་ངེས་ནས་ཀྱང་མ་ཡིན་པར་འགྱུར་ཏེ། དེ་ཉིད་ངོ་བོ་དབྱེར་མེད་ཡིན་པས་སོ་ཟེར་ན། སྐྱོན་མེད་དེ། ཏིལ་འབྲུ་དང་སྣུམ་གཉིས་རྫས་དབྱེར་མེད་ནའང་ཏིལ་འབྲུ་ཁུ་བ་དང་། སྣུམ་གོང་བུར་མི་སྣང་བ་བཞིན་ནོ། །བཞི་པ་གཞིའི་དོན་བྱེ་བྲག་ཏུ་བཤད་པ་ནི། ལྷག་པ་ཀུན་རྫོབ་བདེན་པ་དང་། །ལྷག་པ་དོན་དམ་བདེན་པ་གཉིས། །ལྷག་པ་བདེན་པ་དབྱེར་མེད་བཤད་པ་དང་གསུམ་ལས། དང་པོ་ནི། དང་པོའི་མཚན་ཉིད་ནི། ཆུ་ཟླ་ལྟར་བདེན་དངོས་ཀྱིས་སྟོང་པའི་སྣང་བ་རིས་སུ་མ་ཆད་པའི་ཆོས་སོ། །དེ་སྒྲུབ་པ་ལ་ལུང་རིགས་གཉིས་ལས། དང་པོ་ནི། རྒྱས་པ་ལས། ཀུན་རྫོབ་སྒྱུ་མར་མཉམ་པ་ཡང་། །འདུས་བྱས་དངོས་པོ་སྣ་ཚོགས་ནི། །སྒྱུ་མའི་ཚུལ་དུ་ཐམས་ཅད་སྣང་། །འཕྲལ་སྣང་བྱ་བ་ཀུན་བྱེད་ཀྱང་། །རྟོག་པ་ཀུན་གྱི་མཚན་ཆར་སྣང་། །འདི་དག་ཐམས་ཅད་གཟུགས་བརྙན་དེ། །བྱ་བྱེད་མེད་བཞིན་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །ཅེས་སོ། །གཉིས་པ་རིག་པས་སྒྲུབ་པ་ལ། སྣང་ཙམ་དགག་མེད་དུ་སྒྲུབ་པ་དང་། བདེན་པས་སྟོང་པའི་སྣང་བ་རིས་མེད་དུ་སྒྲུབ་པའོ། །དང་པོ་ནི། སྣང་བ་ཆོས་ཅན། ཁྱོད་དགག་མེད་དུ་སྣང་བ་ཡིན་ཏེ། ཁྱོད་ཀྱི་གཤིས་ལ་ཡང་དག་པའི་ཡེ་ཤེས་ཞིག་ཡོད་པའི་རྒྱུས་རང་སྣང་བ་ཡིན་པའི་ཕྱིར། དེ་ཡོད་པར་གཏན་ཚིགས་བཞིས་གྲུབ་པའི་ཕྱིར་ཏེ། བཞི་གང་ཞེ་ན། སྣང་བ་མ་གྲུབ་ན་འཁྲུལ་སྣང་འབྱུང་མི་རིགས་པའི་གཏན་ཚིག་དང་། སྣང་བ་མེད་ན་དོན་དམ་ཤེས་བྱེད་མ་གྲུབ་པའི་གཏན་ཚིགས་དང་། སྣང་ཙམ་པ་འདི་སུས་ཀྱང་དགག་མི་ནུས་པའི་དང་། རང་རིག་པ་ཐམས་ཅད་དུ་རྩལ་མ་འགགས་པར་རང་སྣང་བའི་གཏན་ཚིགས་དང་བཞི་ལས། དང་པོ་ནི། ད་ལྟར་གྱི་འཁྲུལ་སྣང་འདི་ཆོས་ཅན། ཁྱོད་འབྱུང་རིགས་པར་ཐལ། ཁྱོད་སྣང་བ་རིས་སུ་མ་ཆད་པའི་རྒྱུ་ལས་བྱུང་བ་ཡིན་པའི་ཕྱིར། གཉིས་པ་ནི། སྣང་བ་ཆོས་ཅན། ཁྱོད་དོན་དམ་སྟོང་ཉིད་ཀློང་ན་དཀོར་བདུན་དུ་ལྷུན་གྱིས་གྲུབ་པའི་རྩལ་སྣང་ཡིན་པའི་ཕྱིར། གསུམ་པ་ནི། སྣང་བ་འདི་ཆོས་ཅན། ཐམས་ཅད་མཁྱེན་པའི་ཕྱག་གིས་ཀྱང་མི་ཁེགས་པར་བཤད་པ་མི་འཐད་པར་ཐལ། ཁྱོད་ཐམས་ཅད་དུ་རང་སྣང་བ་མ་ཡིན་པའི་ཕྱིར། བཞི་པ་ནི། རང་རིག་པ་ཆོས་ཅན། ཁྱོད་ཐམས་ཅད་དུ་རྩལ་མ་འགགས་པར་རང་སྣང་བ་ཡིན། དེ་མ་ཡིན་ན་ཁྱོད་བེམ་སྟོང་དང་ཁྱད་པར་མེད་པའི་ཕྱིར། གཉིས་པ་སྣང་བ་བདེ་སྟོང་རིས་མེད་དུ་སྒྲུབ་པ་ནི། དེ་ཡང་མཐུན་སྣང་གི་ཆོས་ཅན་གཅིག་ལ་སྒྲུབ་ན། རང་ཅག་མི་རྣམས་ལ་སྣང་དུ་གྱུར་ཐུན་མོང་དུ་དམིགས་པའི་ཆུ་འདི་ཆོས་ཅན། རིག་པ་སྒྱུ་མའི་སྣང་ཡིན་ཏེ། སྣང་བའི་ངོ་བོ་རིས་སུ་མ་ངེས་པའི་ཕྱིར་ཏེ། ཀ་བ་དཔལ་བརྩེགས་ཀྱི་ལྟ་རིམ་ལས། དམྱལ་བ་རང་སེམས་མེ་སོགས་སྣང་། །ཡི་དྭགས་སྡིག་སེམས་མི་གཙང་ཡུལ། །བྱོལ་སོང་གྱེན་ཐུར་ངམ་གྲོག་སྟེ། །མི་ལ་མཐོང་ཡུལ་འདི་ཉིད་སྣང་། །དེ་བཞིན་ལྷ་མིན་གོ་མཚོན་སོགས། །ལྷ་ལ་དགེ་སེམས་རིན་ཆེན་སྣང་། །ཞེས་སོ། །རྒྱུ་མཚན་དེས་རིག་པ་སྒྱུ་མའི་སྣང་བ་ཡིན་པར་གྲུབ་སྟེ། ཏིང་འཛིན་རྒྱལ་པོ་ལས། ཇི་ལྟར་སྒྱུ་མ་མཁན་གྱི་སྤྲུལ་པའི་གཟུགས། རྟ་དང་གླང་པོ་ཤིང་རྟ་སྣ་ཚོགས་བྱས། དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་བྱ། །ཞེས་པ་ལྟར་རོ། །དེ་ཡང་ལམ་རིམ་ལས། སྒྱུ་མ་མིག་གཡོར་སྤྲུལ་པ་དང་། །སྨིག་སྒྱུ་འཇའ་ཚོན་ཆུ་ཟླ་བཞིན། །ཞེས་པའི་དཔེས་སྒྱུ་མའི་དངོས་པོ་དྲུག་ཏུ་དབྱེར་ཏེ། དེ་ལ་ལོག་རྟོག་སྒྱུ་མ་ནི། སྒྱུ་མའི་རྟ་གླང་ལྟར། དེ་མ་ཡིན་པ་ལ་དེར་འཛིན་གྱི་ཞེན་པའི་ལོག་རྟོག །རྟེན་འབྲེལ་སྒྱུ་མ་ནི། དབང་པོ་སླད་པའི་མིག་གཡོར་གྱི་གཟུགས་ལྟར་སྣང་ལ་མ་གྲུབ་པ་དང་། དངོས་པོ་སྒྱུ་མ་ནི། སྣང་ལ་ཚིམ་པ་མེད་པ་སྨིག་རྒྱུའི་དཔེས་བུམ་པ་ལ་བུམ་པར་སྣང་བ་ལྟ་བུའི་སྣང་ཆ་དང་། ཕྱག་རྒྱ་སྒྱུ་མ་ནི། སྣང་ལ་རྟོག་པ་མེད་པ་ཆུ་ཟླའི་དཔེས་བདེན་དངོས་ཀྱིས་སྟོང་པའི་སྣང་བ་ལྷ་སྐུར་གསལ་བའི་ཆ་དང་། ཡེ་ཤེས་སྒྱུ་མ་ནི། མེད་བཞིན་དུ་རྣམ་པར་བཀྲ་བ་འཇའ་ཚོན་གྱི་དཔེས་རིག་པ་ཕྱི་ནང་མེད་པར་གསལ་བའི་ཆ་དང་། ཐབས་སྒྱུ་མ་ནི་གཅིག་ཏུ་མ་ངེས་པ་སྤྲུལ་པའི་དཔེས་དེ་དང་དེར་སྣང་བ་འགག་མེད་དུ་འཆར་བའི་ཆ་ནས་བཞག་པའོ། །དེ་ལྟར་སྒྱུ་མའི་དངོས་པོ་དྲུག་པོ་ཐ་དད་མེད་པར་རིག་པ་ལ་གསལ་བ་ནི་ལྷག་པ་ཀུན་རྫོབ་ཀྱི་བདེན་པའོ། །དེ་ལྟར་ཀུན་རྫོབ་དང་བདེན་པ་དབྱེར་མེད་ལ་ཁྱད་པར་མེད་པར་འགྱུར་རོ་ཞེ་ན། སྣང་ཡང་བདེན་པས་སྟོང་པ་ཙམ་དུ་ངོ་བོ་གཅིག་ཀྱང་། གཏན་ལ་འབེབས་ཚུལ་གྱི་ལྡོག་པ་ཐ་དད་པས་སྐྱོན་མེད་དེ། འཁྱག་པ་དངོས་སུ་མཐོང་བས་ཆུ་ལྐོག་གྱུར་དུ་ཤུགས་ལ་རྟོག་པ་བཞིན་ནོ། །གཉིས་པ་ལྷག་པ་དོན་དམ་བདེན་པ་ལ། མཚན་ཉིད་ནི་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པའི་སྤྲོས་བྲལ་གྱི་ཆོས་ཉིད། དེ་སྒྲུབ་པ་ལ་ལུང་རིགས་གཉིས་ཏེ། ལུང་ནི་འདི་ཉིད་ལས། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་རྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་ཀྱི་ཡེ་ཤེས་དེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་སོ། །གཉིས་པ་རིག་པ་ལ། སྤྲོས་བྲལ་དུ་སྒྲུབ་པ་དང་། དེ་ཉིད་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པར་སྒྲུབ་པ་གཉིས་ལས། དང་པོ་ནི། ཕར་ཕྱིན་ཐེག་པའི་རིག་པ་དང་མཚུངས་ལ། གཉིས་པ་ནི་སྤྲོས་བྲལ་གྱི་ཆོས་ཉིད་དེ་ཆོས་ཅན། ཁྱོད་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པ་ཡིན་ཏེ། ཁྱོད་སྣང་ཙམ་ཉིད་ནས་བརྟགས་ན་ཡང་དག་པར་མ་གྲུབ་ཅིང་། ཁྱོད་སྣང་ཚོད་ཙམ་ཞིག་མ་འགགས་པའི་ཕྱིར་ཏེ། རྒྱས་པ་ལས། མེད་པ་ཉིད་ན་སྣ་ཚོགས་སྣང་། །ཐམས་ཅད་ཤེས་རབ་དབྱིངས་ལས་བྱུང་། །ཞེས་སོ། །གསུམ་པ་ལྷག་པ་བདེན་པ་དབྱེར་མེད་ནི། མཚན་ཉིད་ནི། སྣང་སྟོང་དབྱེར་མེད་པར་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཆོས་ཉིད། དེ་སྒྲུབ་པ་ལ་ལུང་རིགས་གཉིས་ལས། ལུང་ནི། འདི་ཉིད་ལས། བདེན་པ་གཉིས་ཀ་དབྱེར་མེད་པར། །འཕྲུལ་དགའི་ཚུལ་དེ་ཐ་དད་མིན། །ཞེས་དང་། རྒྱས་པ་ལས། དོན་དམ་ཀུན་རྫོབ་དབྱེར་མེད་པར། །འདུས་མ་བྱས་ཉིད་འདུས་བྱས་ཉིད། །འདུས་བྱས་སྣང་བ་རྡོ་རྗེ་ཉིད། །ཅེས་དང་། ལམ་རིམ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་སྟེར། །ཅེས་སོ། །གཉིས་པ་རིག་པ་ནི། བདེན་པ་དབྱེར་མེད་ཆོས་ཅན། ཁྱོད་ཐིག་གུ་དཀར་ནག་སྒྲིལ་བ་ལྟ་བུའོ། །ཐབས་ཤེས་དབྱེར་མེད་མ་ཡིན་ཏེ། ཁྱོད་ཕན་ཚུན་གཅིག་གིས་གཅིག་མི་གཏོང་བའི་ངོ་བོ་བདག་གཅིག་པའི་དབྱེར་མེད་ཡིན་པའི་ཕྱིར་ཏེ། དཔེར་ན། གསེར་དང་གསེར་གྱི་སེར་པོ་དང་། །གཡུ་དང་གཡུའི་སྔོན་པོ་ལྟ་བུའོ། །དེ་ཉིད་མཚན་ཉིད་བློ་བྲལ་དུ་སྒྲུབ་པ་ནི། དེ་ཆོས་ཅན། བློའི་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱི་ཡུལ་མེད་རང་གསལ་དུ་ལ་ཟླ་བའི་ཆོས་ཅན་ཡིན་པའི་ཕྱིར་ཏེ། ལུང་ལས། བཤད་དུ་མེད་གང་བརྗོད་དུ་ཇི་ལྟར་ཡོད། །ཅེས་དང་། སློབ་དཔོན་གཉན་དཔལ་གྱིས། ཇི་ཙམ་ཟབ་པའི་ཚིག་བརྗོད་ཀྱང་། །དོན་དང་མཐུན་པར་མི་འགྱུར་རོ། །ཞེས་སོ། །གཉིས་པ་བརྟགས་བཞི་ལ། མཚན་ཉིད་དང་དེ་གཏན་ལ་དབབ་པ་གཉིས་ལས། དང་པོ་ནི། གནས་ལུགས་ལ་གོ་བར་རྟོག་པའི་ཞེན་སྣང་ངོ་། །དེ་ཡང་ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་སོ། །གཉིས་པ་ལས། འཁོར་བའི་ཆོས་གཏན་ལ་ཕབ་པ་དང་། མྱ་ངན་ལས་འདས་པའི་ཆོས་གཏན་ལ་ཕབ་པ་དང་གཉིས་ལས། དང་པོ་ལ། འཁོར་བར་འཁྲུལ་བའི་གཞི་ཇི་ལྟར་འཁྲུལ་པའི་ཚུལ། འཁྲུལ་པའི་རང་བཞིན་ཆོས་ཉིད་ལས་མ་གཡོས་པར་ལ་ཟླ་བའོ། །དང་པོ་ནི། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་ཡེ་ནས་དྲི་མ་མེད་པ་བདེ་བར་གཤེགས་པའི་སྙིང་པོའི་སྣང་བ་སྟེ། འདི་ཉིད་ལས། ཨེ་མ་བདེ་བཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་སོ། །གཉིས་པ་ནི། རྒྱུ་རྒྱུད་བདེ་གཤེགས་སྙིང་པོའི་སྣང་བ་དེས། འཁྲུལ་གཞི་བྱས་ནས་རྐྱེན་ལྷན་ཅིག་སྐྱེས་པའི་མ་རིག་པས་འཁྲུལ་ཏེ། རྒྱས་པ་ལས། རྟག་ཏུ་རང་བཞིན་སྣང་གྱུར་ཀྱང་། །མིག་གི་མིག་བཞིན་མ་རིག་པའོ། །ཞེས་སོ། །ལྷན་ཅིག་སྐྱེས་པའི་མ་རིག་པ་དེ་གང་ཞེ་ན། སྤར་ཁབ་ལས། ངེས་པའི་ཤེས་པ་མ་སྐྱེས་པ་ནི་ལྷན་ཅིག་སྐྱེས་པའི་མ་རིག་པའོ། །ཞེས་གསུངས། དེའི་གྲོགས་ཀུན་བརྟགས་ཀྱི་མ་རིག་པ་ནི་ཡུལ་ཡུལ་ཅན་དུ་སྣང་བའི་ལོག་རྟོག་ལས་གཟུང་འཛིན་གཉིས་སྣང་ཤེས་པ་སྐྱེས་པས། ལས་དགེ་སྡིག་གི་བག་ཆགས་ཀུན་གཞི་ལ་བཞག་སྟེ་འཁོར་བ་མཐོ་དམན་དུ་ལྷན་ཅིག་པའོ། །དེ་ལྟར་ཡང་འདི་ཉིད་ལས། མ་རིག་རྟོག་པའི་གཟུང་འཛིན་གྱི། །ཤེས་དང་གཟུང་འཛིན་སྤྲོས་ལ་འཆོལ་བ་ཡི། །རྣམ་རྟོག་ཞགས་པས་སོ་སོར་འཛིན། །ཞེས་སོ། །གསུམ་པ་ནི། དེ་ལྟར་བརྟག་གཞི་འཁོར་བའི་ཆོས་དེ་དག་ཏུ་འཁྲུལ་པ་ལྟར་སྣང་ཡང་རང་བཞིན་ཆོས་ཉིད་ལས་གཡོས་པ་མེད་དེ། ཐོ་ཡོར་ལ་མིར་སྣང་ཡང་ཐོ་ཡོར་ལས་མ་ཡོས་པ་བཞིན་ནོ། །དེ་ལྟར་ཡང་འདི་ཉིད་ལས། རང་བཞིན་ཉིད་ལས་ཉམས་པ་མེད། །ཅེས་དང་། ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་རང་དབང་བསྒྱུར། །ངོ་མཚར་སྐུ་གསུམ་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་སོ། །གཉིས་པ་ནི། མྱང་འདས་ཀྱི་ངོ་བོ་འབྲས་བུའི་སྐབས་སུ་འཆད་ཅིང་། འདིར་སྐུ་དང་ཡེ་ཤེས་སུ་ཞེན་པ་སྒྲོ་བཏགས་ཀྱི་བློ་དེ་བརྟགས་གཞི་ཡིན་ཏེ། རྣམ་བཀོད་ལས། བརྟགས་པའི་སྤྱོད་ཡུལ་གཉིས་ལ་གཞལ། །ཞེས་དང་། འཁོར་དང་འདས་དངོས་ཞེན་སྣང་བརྟགས། །ཞེས་གསུང་པའི་ཕྱིར་རོ། །གཉིས་པ་རང་བཞིན་མངོན་དུ་བྱེད་པ་ཐབས་སམ། ལམ་གྱི་རྒྱུད་ནི། དཔེ་ཆུང་རང་གནས་ལས་རང་བཞིན་མངོན་དུ་བྱེད་རྒྱུ་ནི་ངོ་བོ་དང་ནི་རྐྱེན་ཉིད་དོ། །ཞེས་པས་བརྗོད་བྱ་དོན་གྱི་རྒྱུད་ལམ་གྱི་ངོ་བོ་ཉིད་དང་། བརྗོད་བྱེད་ཚིག་གི་རྒྱུད་ལམ་རྐྱེན་དུ་གྱུར་པ་གཉིས་ཏེ། དབྱེ་ན་མདོ་སྔགས་གཉིས་ཀའི་འཇུག་ཡུལ་དུ་གྱུར་པའི་ཐུན་མོང་སྤྱིའི་ལམ་དང་། མ་ཧཱ་ཡོ་ག་ཉིད་ཀྱི་འཇུག་ཡུལ་དུ་གྱུར་པ་ཁྱད་པར་གྱི་ལམ་མོ། །ཐུན་མོང་གི་ལམ་ནི་ངེས་འབྱུང་གི་ཐེག་པ་བཞི་དང་ཕྱི་རྒྱུད་སྡེ་གསུམ་མོ། །ཁ་ཅིག་ན་རེ། ཐུན་མོང་གི་ལམ་དེ་ཁྱད་པར་གྱི་ལམ་དུ་འགྲོའམ་མི་འགྲོ། འགྲོ་ན་ཐུན་ཁྱད་ཁྱད་མེད་དུ་ཐལ་བ་དང་། གལ་ཏེ་མི་འགྲོ་ན་ཐུན་མོང་གི་དམ་བཅའ་ཉམས་སོ་ཞེ་ན། དེའི་ལན་ནི། དངོས་སུ་ཁྱད་པར་གྱི་ལམ་མ་ཡིན་ཏེ། ལམ་ཐབས་གྲོལ་གང་རུང་ལ་སྤྱོད་མི་ནུས་པའི་ཕྱིར་དང་། རིམ་གྱིས་པ་ལ་ལྟོས་ན་ལམ་དེ་ལ་བསླབ་དགོས་པ། རྟག་གཉིས་ལས། དངོས་པོ་གསོ་སྦྱོང་བྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །ཅེས་སོགས་དང་། དེ་ནས་ཀྱཻའི་རྡོ་རྗེ་བསྟན། །ཞེས་གསུངས་པས། སྔགས་ལམ་དོན་གཉེར་གྱི་གང་ཟག་རིམ་གྱི་ས་དེའི་བསླབ་བྱ་ཡིན་པའི་ཕྱིར་དང་། སྔགས་ལམ་ཟབ་མོ་དེ་རྟོགས་པའི་ཐབས་རྨད་དུ་བྱུང་བའང་ཡིན་པའི་ཕྱིར་སྐྱོན་མེད་དོ། །དེ་ལྟར་ཡང་འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱི། །དོན་དུ་མི་འགྱུར་ཡོངས་མ་གསུངས། །ཞེས་སོ། །དེ་བས་ན་ལམ་དེ་དག་གིས་རང་རང་གི་འབྲས་བུ་སྒྲུབ་པ་དང་འདིའི་ལམ་སྟེགས་སུ་བགྲོད་པ་ཐུན་མོང་དུ་བྱེད་པའི་ཕྱིར་ཐུན་མོང་གི་ལམ་ཞེས་བྱའོ། །ལམ་རྒྱུད་ཀྱི་མཚན་ཉིད་ནི། རྒྱུ་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཤེས་འཇུག་གི་བྱེད་རྩོལ་དང་བཅས་པ་དང་། དེ་ཉིད་མཐར་ཕྱིན་པ་གང་རུང་གི་རིགས་གནས། དེ་ཡང་ངོ་བོ་ཤེས་རབ་རྣམ་པ་གསུམ་གྱིས་ཐུན་མོང་དང་མཆོག་གི་སེམས་ལྔ་སྐྱེས་སམ་སྐྱེ་བར་འགྱུར་བ་སྟེ། རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་སོ། །དེ་ཡང་རྒྱས་པ་ལས། སྐྱེ་ས་རྐྱེན་གྱི་སྐྱེ་ཚུལ་དང་། །སྐྱེས་པའི་ངོ་བོ་སེམས་རིམ་པ། །ཞེས་པས་སྐྱེ་ས་ནི་གཞིའི་ས་ནས་དང་། ལམ་དང་། འབྲུའི་ས་ནས་སྐྱེ་བའོ། །དང་པོ་ལ། རིགས་ངེས་པ་དང་། མ་ངེས་པ་དང་། གནས་སྐབས་རིགས་ཆད་པ་དང་གསུམ་ལས། དང་པོ་ནི། ཉན་རང་བྱང་སེམས་ཀྱི་རིགས་ཅན་གསུམ་མོ། །གཉིས་པ་ནི། སྔར་གྲུབ་མཐའ་བློ་མ་བསྒྱུར་བའི་རྐྱེན་གྱིས་དབང་གིས་སེམས་གང་དུའང་སྐྱེར་རུང་བ་སྟེ། རྒྱས་པ་ལས། ཐེག་པ་གང་དུ་བསྟན་པར་མ་ངེས་པའི། །ཞེས་དང་། ཡང་ན་ངེས་མེད་འདི་ཞེས་བརྟག་ཏུ་མེད། །ཅེས་སོ། །གསུམ་པ་ནི། རྒྱས་པ་ལས། ཆོས་ཀྱི་དབྱིངས་ཀྱི་ཀུན་ལ་ཁྱབ་གྱུར་ཀྱང་། །རང་རིག་རྟོགས་པའི་སྐབས་དང་མི་ལྡན་ན། །ཇི་ལྟར་དམུས་ལོང་མདུན་དུ་མདོག་བསྟན་བཞིན། །འདི་ནི་སྐལ་མེད་རིགས་ཆད་ས་པ་ཡིན། །ཞེས་དང་། ཐུན་མོང་གི་ལུང་ལས་ཀྱང་། ལ་ལ་ཐར་པ་ཆ་མཐུན་དགེ་བ་མེད། །ཅེས་དང་། དཀར་པོ་དམན་པ་ཡོད་པ་རྒྱུ་དང་བྲལ། །ཞེས་སོ། །དེ་ལ་ཁ་ཅིག་ན་རེ། རང་བཞིན་གྱི་རིགས་ཆད་ཡོད་དེ། །འདི་ཉིད་ལས། ཡང་དག་པའི་ལམ་དང་བྲལ་བ་དག །ཅེས་དང་། རྩ་བ་ཡིན་ཏེ་རིགས་མེད་གྱུར། །ཞེས་བཤད་པའི་ཕྱིར་ཟེར་ན། དེ་ཆོས་ཅན། ཁྱོད་ལ་སངས་རྒྱས་ཀྱི་རྒྱུ་བདེ་གཤེགས་སྙིང་པོ་མེད་པར་ཐལ། །ཁྱོད་རིགས་ཆད་ཀྱི་སེམས་ཅན་ཡིན་པའི་ཕྱིར། རྟགས་ཁས། འདོད། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་དང་། དགྱེས་རྡོར་གྱི་རྒྱུད་ལས་ཀྱང་། འདི་ཉིད་ཡེ་ཤེས་ཆེན་པོ་སྟེ། །བརྟན་དང་གཡོ་བར་ཁྱབ་ནས་གནས། །ཞེས་སོགས་དང་འགལ་ལོ། །རྩ་བའི་ལུང་དོན་ནི། རེ་ཞིག་ཐར་ཐོབ་ཀྱི་སྐལ་བ་མེད་པ་ལ་རིགས་ཆད་ཞེས་བྱ་སྟེ། སྤྱན་འགྲེལ་ལས། དེ་ནས་ཡུན་རིང་དུ་འགྱང་པ་ཙམ་ལ་བརྗོད་པའོ། །ཞེས་གསུངས། གཉིས་པ་ནི། ལམ་རིགས་བཞི་ནས་སྐྱེ་བ་ཡིན་ཏེ་ལྷ་མི་དང་། ཉན་རང་དང་བྱང་སེམས་དང་། ཕྱི་རྒྱུད་རྣམས་རིམ་གྱིས་བགྲོད་པའམ། གང་རུང་ལ་སྦྱོར་འཕྲོ་ནས་འདིར་འཇུག་པའོ། །དེ་ཡང་ལམ་རིམ་ལས། གཞི་ཡི་ཐེག་པ་དང་པོར་གཞོག །དེ་ནས་རིམ་གྱིས་བགྲོད་བྱ་སྟེ། །ཞེས་དང་། ལམ་ཆུང་ལས། ལ་ལ་ཐུན་མོང་ལམ་རྣམས་ནས་རྐྱེན་རྒྱུས་འདིར་འཇུག་བསླབ་པར་ངེས། །ཞེས་སོ། །གསུམ་པ་ནི། འོག་མའི་འབྲས་བུ་མཐར་ཕྱིན་ནས་འདིར་འཇུག་པ་སྟེ། ལམ་ཆུང་ལས། ཐུན་མོང་ས་མཐར་བྱས་པའི་ཚེ། །ཞེས་སོ། །སེམས་སྐྱེ་བའི་རྐྱེན་ནི། ལམ་རིམ་ལས། གཤིན་རྗེ་མགོན་ལས་ལུང་གཉིས་ཐོས། །ཡོན་ཏན་མཐོང་དང་སྐྱོན་མཐོང་དང་། །དེ་ཡི་སྐྱོ་རྨོངས་བྲོད་དང་བས། །གཉིས་པའི་རྒྱུ་རུ་གསུངས་པ་ཡིན། །ཞེས་སོ། །དེ་ལ་ཁ་ཅིག་ན་རེ། ལམ་རིགས་བཞི་ནས་སེམས་བསྐྱེད་པ་མི་འཐད་དེ། རང་རྒྱལ་སྔགས་ལམ་དུ་མི་འཇུག་པའི་ཕྱིར་ཏེ། དེ་ནས་སྐྱེ་བ་སྔ་མ་སྨོན་ལམ་གསུམ་བཏབ་ནས་སངས་རྒྱས་དང་ཉན་ཐོས་མི་བཞུགས་པའི་དུས་སུ་འབྱུང་བར་བཤད་དོ། ཐུན་མོང་གི་གསུངས་ལས། སངས་རྒྱས་རྣམས་ནི་མི་འབྱོན་ཞིང་། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་རབ་ཏུ་སྐྱེ། །ཞེས་གསུངས་པའི་ཕྱིར་ཟེར། དེ་དགག་པ་ལ་རིགས་པ་དང་ལུང་གཉིས་ཏེ། རིགས་པ་ནི། རང་རྒྱལ་ཆོས་ཅན། ཁྱོད་སངས་རྒྱས་ཀྱི་དངོས་ཀྱི་གདུལ་བྱ་མ་ཡིན་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཆོས་ཅན། དེ་ཐལ་ཏེ། འདི་ཉིད་ལས། རང་རྒྱལ་རྣམས་ལ་བསྭེ་རུའི་ཚུལ། །ཞེས་གསུངས་པའི་ཕྱིར་རོ། །གཉིས་པ་ལུང་གིས་གྲུབ་སྟེ། རྣམ་སྣང་སྒྱུ་དྲ་ལས། རང་རྒྱལ་རྣམས་ལ་གྲོགས་པོའི་གཟུགས། །བསྟན་ནས་ཐེག་ཆེན་དམིགས་ལ་འཛུད། །ཞེས་དང་། རྣམ་པར་འཕྲུལ་པའི་རྒྱལ་པོས་ཞུས་པའི་མདོ་ལས། གང་དག་རང་སངས་རྒྱས་ཀྱི་གཟུགས་ཀྱིས་གདུལ་བར་བྱ་བ་དེ་དག་ལ་ནི་རང་སངས་རྒྱས་ཀྱི་གཟུགས་སུ་འདུག་སྟེ་རྟེན་ཅིང་འབྲེལ་བར་འབྱུང་བ་དང་ལྷག་པའི་ཆོས་བརྡས་ཡང་དག་པར་སྟོན་ཏོ། །ཞེས་སོ། །གསུམ་པ་སྐྱེ་ཚུལ་ནི། དབང་པོ་ལ་ལྟོས་ཏེ་རིམ་དང་ཅིག་ཅར་དུ་འཇུག་པས་སྐྱེ་བ་ཡིན་ཏེ། ལམ་རིམ་ལས། དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པས་ཉེ་རིང་ཕྱིར། །རིམ་དང་ཅིག་ཅར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །ཅེས་སོ། །དབྱེ་ན། རང་རྣོ་དང་། སྦྱངས་རྣོ་གཉིས་ལས། རང་རྣོ་ནི། རང་གནས་རྒྱལ་པོའི་འགྲེལ་པར་ཆོས་ཉིད་ཀྱི་རིགས་པས་མུན་པའི་ས་ནས་སེམས་ཕལ་པ་བརྒྱད་སྐྱེ་སྟེ། །ཞེས་གསུངས་པའི་ཕྱིར་རོ། །སྦྱངས་རྣོ་ནི། ལམ་རིམ་ལས། བསྐལ་པ་ཞིང་གི་རྡུལ་རྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིར། །རིང་བའང་རིམ་དང་ཅིག་ཅར་བའོ། །ཞེས་སོ། ཁ་ཅིག་ན་རེ། དབང་རྣོན་ཡིན་ན་སྦྱངས་རྣོ་ཡིན་པས་ཁྱབ་སྟེ། རང་བཞིན་གྱི་དབང་རྣོན་གཞི་མ་གྲུབ་པའི་ཕྱིར་ཟེར། འོ་ན། ཆོས་ཉིད་ཀྱི་རིགས་པས་དབང་པོ་ཆིག་ཆོད་དུ་གནས་པའི་གང་ཟག་དེ་ཆོས་ཅན། དེར་ཐལ། དེའི་ཕྱིར། མ་གྲུབ་ན། ཀུན་བྱེད་རྒྱལ་པོའི་རྒྱུད་ལས་ལྷ་མིའི་སེམས་ཅན་དབང་པོ་མི་མཐུན་པས། ལ་ལ་དབང་པོ་ཡེ་ནས་ཆིག་ཆོད་ཡོད། ལ་ལ་སྦྱངས་པའི་དབང་པོ་འཕྲོ་ཅན་ཡོད། །ཅེས་དང་། མངོན་པ་མཛོད་ལས་ཀྱང་། ཁ་ཅིག་ཐོག་མ་ནས་དེ་རིང་། ཁ་ཅིག་སྦྱངས་པ་ལས་གྱུར་པའོ། །ཞེས་སོགས་ཀྱིས་གསོལ། རྩ་བར་འདོད་ན། ལམ་རིམ་ལས། མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣོ་རྒྱ་ཆེ་ཡངས། །ཟབ་མོ་རྒྱུ་ཡི་གང་ཟག་དེ། །ཞེས་སོགས་དང་འགལ་ལོ། །བཞི་པ་སྐྱེས་པ་རང་གི་ངོ་བོ་ནི། དཔེ་ཆུང་ལས། འཇིག་ལྡང་ལ་སོགས་བྱང་སེམས་ལྔ། །ངེས་པར་སྐྱེས་པ་ངོ་བོར་འདོད། །ཅེས་སོ། །དེ་ལ་གཉིས་ཏེ། གྲོལ་ལམ་དང་ཐབས་ལམ་གྱི་སེམས་ལྔའོ། །དང་པོ་ནི། སྤྱན་འགྲེལ་ལས། དང་པོ་གཡོ་ལྡང་བྱང་ཆུབ་སེམས། །གཉིས་པ་སྨོན་པ་གསུམ་འཇུག་སེམས། །གནས་པ་མཐར་ཕྱིན་བཞི་ལྔ་པ། །ཞེས་སོ། །གཉིས་པ་ཐབས་ལམ་གྱི་སེམས་ལྔ་ནི། ཁམས་ཉེར་གཅིག་པ་ལས། འཇིག་དང་ལྡང་དང་གནས་པ་དང་། །སྨོན་པ་བྱང་ཆུབ་སེམས་ཡིན་ནོ། །གཡོ་དང་བསྐྱོད་དང་ལྡང་དང་གནས། །ཞེས་སོ། །གྲོལ་ལམ་གྱི་མཚན་ཉིད་ནི། གཙོ་བོར་ཐོས་བསམ་སྒོམ་གསུམ་གྱི་སྒོ་ནས་འཆིང་བ་ཆོས་ཉིད་དུ་གྲོལ་བར་བྱེད་པའི་རིགས་གནས་ཏེ། འདི་ཉིད་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་སོ། །ཐབས་ལམ་གྱི་མཚན་ཉིད་ནི། གཙོ་བོར་ཐབས་དང་གདམས་ངག་གི་སྒོ་ནས། འཆིང་བ་ལ་བརྟུལ་ཞུགས་ཀྱི་སྤྱོད་པས་འབྲས་བུ་མྱུར་དུ་འགྲུབ་པར་བྱེད་པའི་རིགས་ཅན་ཏེ། ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་སོ། །དེ་ལྟར་ལམ་དེ་གཉིས་དཔེས་མཚོན་ནས། བཤད་ན་བདེ་བླག་ཏུ་གོ་བར་འགྱུར་ཏེ། མཀྵི་ཀའི་སྦྱོར་བས་ལྕགས་ཁམས་གསེར་དུ་བསྒྱུར་བ་བཞིན་ཐབས་ལ་མཁས་པའི་མྱུར་ལམ་ཡིན་པས་ཐབས་ལམ་དང་། དེ་ལ་མ་བརྟེན་པར་གསེར་འགྱུར་གྱི་ཐབས་གཞན་མེད་པའང་མ་ཡིན་ཏེ། རིན་པོ་ཆེ་ཀེ་ཏུ་བྷ་དང་ལྷན་ཅིག་བཞག་པའི་རྡོའི་ཁམས་གསེར་དུ་འགྱུར་པ་ཉིད་གྲོལ་ལམ་གྱི་དཔེའོ་ཞེས་བཞེད་དོ། །དེ་ལ་གྲོལ་ལམ་ནི། འདི་ཉིད་ལས། རིམ་གྱིས་ཡང་ན་ཅིག་ཅར་དུ། །ཞེས་པས་རིམ་གྱིས་པ་ནི། འདི་ཉིད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། དང་པོ་རྒྱུ་ཤེས་པའི་མཚན་ཉིད་ལྟ་བ་ནི། ལམ་བསྒོམ་པའི་སྔོན་དུ་འགྲོ་དགོས་ཏེ། མ་རྟོགས་པར་བསྒོམས་ཀྱང་ལྟུང་བར་བཤད་པའི་ཕྱིར་ཏེ། ལམ་རིམ་ལས། བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཁྱེར་ཆེན་པོར་འགྲོ། །ཞེས་གསུངས་པས་དེ་ཁོ་ན་ཉིད་ལྟ་བུའི་རྒྱུད་ཀྱི་སྐབས་སུ་འོག་ཏུ་འཆད་དོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ནི། མོས་བསྒོམ་དང་ངེས་རྫོགས་གཉིས་ལས། དང་པོ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་མོས་པ་ལམ་དུ་བྱེད་པ་སྟེ། ལམ་རིམ་ལས། སྤྲོས་པའི་འཁོར་ལོ་མོས་བསྒོམ་ཞིང་། །ཞེས་སོ། །གཉིས་པ་ངེས་རྫོགས་ནི། ལམ་སོ་སོ་ལ་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔ་མཐར་ཕྱིན་པར་བསླབ་པ་སྟེ། བི་མ་ལའི་ཕྱག་རྒྱ་བསམ་གཏན་ལས། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །ཞེས་གསུངས་པའི་ཕྱིར་རོ། །ངེས་རྫོགས་ཀྱི་ལམ་དེ་ལ་དབྱེ་ན། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །ཅེས་པས་ཚོགས་སྦྱོར་གྱི་ལམ་ལྔ་སྟེ། སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ་ཕྱག་རྒྱ་སྤྲོས་བཅས་ཏེ་ཚོགས་ལམ་གྱི་རྣལ་འབྱོར་བཞི་དང་། སྦྱོར་ལམ་ཚོམ་བུ་ཚོགས་ཀྱི་རྣལ་འབྱོར་རོ། །འདིར་དེ་རེ་རེ་ཡང་ཆོས་བཞིན་བཞེས་སྟོན་པ་ལས། དང་པོ་ཚོགས་ལམ་སྟོང་པ་ཆེན་པོའམ་དེ་བཞིན་ཉིད་ཀྱི་ཏིང་འཛིན་ལ། མཚན་ཉིད་ནི། ཆོས་སྐུའི་རྟོགས་པ་རྒྱུ་མཐུན་དུ་སྒྲུབ་པར་བྱེད་པའི་ཐར་པ་ཆ་མཐུན་གྱི་རིགས་གནས། དེ་ཡང་མི་དམིགས་པ་སྟོང་པ་ཉིད་ལ་བློ་གནས་པར་བྱེད་པའི་ཐབས་ལ་འབད་པ་འགྲུབ་སྟེ། ཁོག་གཞུང་ལས། དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་སུ་བསྒོམ། །ཞེས་སོ། །གཉིས་པ་རྣམ་གྲངས་ནི། སྣང་སྟོང་གཉིས་སུ་མེད་པའི། ལྷུན་གྱིས་གྲུབ་པའི། མཉམ་པ་ཉིད་ཀྱི་དེ་བཞིན་ཉིད་དེ། ལམ་རིམ་ལས། གཉིས་མེད་ལྷུན་མཉམ་དེ་བཞིན་ཉིད། །ཅེས་སོ། །གཉིས་པ་ཚོགས་ལམ་སྙིང་རྗེ་སྒྱུ་མའམ་ཀུན་སྣང་གི་ལམ་ལ་གསུམ་ལས། དང་པོ་མཚན་ཉིད་ནི། སྟོང་འཛིན་གྱི་འཆིང་བ་དགྲོལ་ཞིང་གཟུགས་སྐུའི་རྟོགས་པ་རྒྱུ་མཐུན་དུ་སྒྲུབ་པར་བྱེད་པའི་ཐར་པ་ཆ་མཐུན་ནོ། །དེ་ཡང་རང་རིག་སྒྱུ་མ་ལྟར་གསལ་བའི་སྙིང་རྗེ་བསྐྱེད་པ་སྟེ། ལམ་རིམ་ལས། རང་རིག་ཡེ་ཤེས་སྙིང་རྗེས་གཟིགས། །ཞེས་སོ། །གཉིས་པ་རྣམ་གྲངས་ལ། འཁོར་བའི་ཆོས་ལ་ལྟོས་ནས་ལོག་རྟོག །རྟེན་འབྲེལ། དངོས་པོ། སྒྱུ་མ་དང་གསུམ་འདས་པའི་ཆོས་ལ་ལྟོས་ནས། ཐབས། ཡེ་ཤེས། ཕྱག་རྒྱ་སྒྱུ་མ་གསུམ་དུ་ཕྱེ་བས་དྲུག་གོ། །གསུམ་པ་ཕྱག་རྒྱ་གཅིག་ལ་གསུམ་ལས། དང་པོ་མཚན་ཉིད་ནི། སྣང་སྟོང་ཐ་དད་དུ་ཞེན་པ་དགག་ཅིང་རྟོག་ཚོགས་སྐུ་དང་ཡེ་ཤེས་སུ་གསལ་བའི་ཐར་པ་ཆ་མཐུན་ནོ། །ཕྱག་རྒྱ་བཞི་ལྡན་གྱི་སྐུ་སྣང་སྟོང་དབྱེར་མེད་དུ་གསལ་བ་སྟེ། འདི་ཉིད་ལས། མཁའ་དཀྱིལ་དངས་པའི་དབྱིངས་ཉི་ཟླ་ཡེ་ཤེས་རྒྱལ་པོ་སྟངས་དཔྱལ་བསྒོམ། །ཞེས་སོ། །གསུམ་པ་རྣམ་གྲངས་ལ། དོན་གྱི་རྒྱ་གཅིག་པ་དང་། རྟགས་ཀྱི་རྒྱ་པ་གཅིག་གོ། །དང་པོ་ནི། བདེན་པ་དབྱེར་མེད་རང་གི་མཚན་ཉིད་དུ་རྫོགས་པའོ། །གཉིས་པ་ལ་ཕྲ་རགས་གཉིས་ལས། ཕྲ་བ་ནི། ཡིག་འབྲུ་ལ་བསླབ་པ་སྟེ། རྒྱས་པ་ལས། ཕྱི་ནང་སྣོད་བཅུད་ཧཱུྃ་དུ་བསྡུ། །ཞེས་སོ། །རགས་པ་ནི། ལྷའི་སྐུ་ཕྱག་རྒྱ་གཅིག་པ་བསྒོམ་པ་སྟེ། ཞི་བ་རྒྱན་གཅིག་པ་དང་། ཁྲོ་བོ་རྒྱན་གཅིག་པའོ། །བཞི་པ་ཕྱག་རྒྱ་སྤྲོས་བཅས་གསུམ་ལས། དང་པོ་མཚན་ཉིད་ནི། སྤྲོས་བཅས་ལས་སུ་རུང་བས་ཚོགས་སྒྲུབ་ཀྱི་དངོས་རྒྱུར་འགྱུར་རུང་གི་ཐར་པ་ཆ་མཐུན་ནོ། །དེ་ཡང་རྟོག་ཚོགས་མཐའ་དག་རིག་པ་གཉིས་མེད་ཀྱི་ལྷའི་དཀྱིལ་འཁོར་དུ་གསལ་བར་བསྒོམ་པ་སྟེ། རིམ་དྲུག་ལས། དེ་ཕྱིར་བདེན་གཉིས་དབྱེ་བ་མེད། །ཕྱི་ནང་སྣོད་བཅུད་ཡེ་ནས་དག །ཅེས་སོ། །གསུམ་པ་རྣམ་གྲངས་ལ། རང་བཞིན་འབྲས་བུ། ལམ་ཕྱག་རྒྱ་སྤྲོས་པ་དང་གསུམ་ལས། དང་པོ་ནི། རྟོག་ཚོགས་ཐམས་ཅད་ཡེ་ནས་ལྷའི་དཀྱིལ་འཁོར་དུ་གནས་པའི། གཉིས་པ་ནི། འོག་མིན་ན་འཁོར་ལོ་ཚོགས་ཆེན་གྱི་སངས་རྒྱས་དུ་མ་སྙེད་བཞུགས་པ་དེའོ། །གསུམ་པ་ལ། ཞི་བ་ཁྲོ་བོ་གཉིས། དེ་གཉིས་ཀ་ལ། དཀྱིལ་འཁོར་སྤྲོས་པ། ཚོམ་བུ་སྤྲོས་པ། ཞལ་ཕྱག་སྤྲོས་པ། རྣམ་གྲངས་སྤྲོས་པ་དང་བཞི་ལས། དང་པོ་ལ་རྒྱས་འབྲིང་བསྡུས་གསུམ་མོ། །གཉིས་པ་ལ་གཅིག་གསུམ་ལྔ་པའོ། །གསུམ་པ་ལ་ཞལ་གཅིག་ཕྱག་གཉིས་པ་དང་། ཞལ་གསུམ་ཕྱག་དྲུག་པ། ཁྱད་པར་ཁྲོ་བོ་ལ་དབུ་དགུ་ཕྱག་བཅོ་བརྒྱད་པ་ནས། དབུ་ཕྱག་གྲངས་མེད་པའི་བར་རོ། །བཞི་པ་ནི། ཞི་བ་ལ་སངས་རྒྱས་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་གསུམ། ཁྲོ་བོ་ལ་སྟོང་བཞི་བརྒྱ་ལྔ་བཅུ་དང་། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ། བསམ་ཡས་ལྷུན་གྲུབ་གསུམ་མོ། །ལྔ་པ་སྦྱོར་ལམ་བར་ཆད་མེད་པའི་ལམ། ཚོམ་བུ་ཚོགས་སྒྲུབ་ལ་གཉིས་ལས། དང་པོ་མཚན་ཉིད་ནི། ལམ་གཞན་གྱིས་བར་མ་ཆོད་པར་ཆོས་ཉིད་རང་མཚན་མཐོང་བ་ལ་དངོས་སུ་སྦྱོར་བར་བྱེད་པའི་ངེས་འབྱེད་ཆ་མཐུན་ཏེ། འདི་ཉིད་ལས། རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཞེས་སོ། །དེ་ཡང་རྟོག་ཚོགས་ཐམས་ཅད་སྣང་སྟོང་གཉིས་མེད་ལྷའི་དཀྱིལ་འཁོར་དུ་གསལ་ཞིང་བརྟན་པ་ལ་བློ་གནས་པའོ། །འདི་ཉིད་ལས། སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བསྟན་པའི་ཏིང་ངེ་འཛིན། །ཞེས་གསུངས་པའི་ཕྱིར་རོ། །གསུམ་པ་རྣམ་གྲངས་ལ། ཞི་བ་དང་ཁྲོ་བོའི་ཚོགས་སྒྲུབ་གཉིས། དེ་གཉིས་ཀ་ཉམས་སུ་ལེན་པའི་དུས་སུ། ཕུན་སུམ་ཚོགས་པ་ལྔས་གཞི་བཟུང་། བསྙེན་སྒྲུབ་བཞིས་གཞུང་བསྲང་། རིག་འཛིན་འགྲུབ་པའི་དུས་གསུམ་དུ། བཅིངས་ཏེ་ཉམས་སུ་ལེན་པའོ། །ཞར་བྱུང་ཚོགས་སྦྱོར་གྱི་ལམ་ལྔ་ལ་རྩོད་པ་སྤོང་བ་ནི། འདོད་པ་བརྗོད་པ་དང་ལན་གཉིས་ལས། ཁ་ཅིག་ན་རེ། སྟོང་པ་ཆེན་པོའི་ལམ་དེ། རྒྱུ་ཤེས་པའི་ལྟ་བ་ལས་ངན་དུ་སོང་བར་ཐལ། དོན་དམ་བརྐྱང་པ་བསྒོམ་པའི་ཕྱིར་དང་། སྙིང་རྗེ་སྒྱུ་མའི་སྐབས་སུ་ལམ་གོང་དུ་བགྲོད་པ་དོན་མེད་པར་ཐལ། སྔ་མ་དོན་དམ་ལས་ཕྱི་མ་ཀུན་རྫོབ་ཁ་སྤོས་པས་ངན་དུ་སོང་བའི་ཕྱིར་དང་། སྒྱུ་མའི་ཆོས་དྲུག་ལས། ལོག་རྟོག །རྟེན་འབྲེལ་དངོས་པོ་སྒྱུ་མ་གསུམ་སྒོམ་པས་གྲོལ་ན། སེམས་ཅན་ཐམས་ཅད་འབད་མེད་དུ་གྲོལ་བར་ཐལ། དེ་དག་ལ་གོམས་ཤིང་བར་མེད་དུ་སྤྱོད་པའི་ཕྱིར་ཟེར་ན། གཉིས་པ་དེ་དགག་པ་ལ་ལུང་རིགས་གཉིས་ལས། དང་པོ་ལུང་ནི། རྣམ་བཀོད་ལས། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་ཡངས་ཏེ། །སྒྲ་ཚིག་རྟེན་འབྲེལ་ཞེན་ཙམ་མིན། །ཡུལ་མིན་རང་རིག་བདེན་དབྱེར་མེད། །བློ་ཡི་གཏིང་གོ་མངོན་སུམ་ཡུལ། །ཞེས་སོ། །རིག་པ་ནི། ཚོགས་ལམ་སྟོང་པ་ཆེན་པོ་ལ། གནས་པའི་གང་ཟག་ཆོས་ཅན། ཁྱོད་ཐོས་བསམ་གྱི་ལྟ་བ་དོན་སྤྱི་རྟོགས་པ་དེ་སྔགས་ཀྱི་ཚོགས་ལམ་ཐོབ་ནས་མངོན་སུམ་གྱི་ཉམས་སུ་མྱོང་ནས་གསལ་བརྟེན་དུ་བྱས་པ་མ་ཡིན་པར་ཐལ། དོན་སྤྱི་ལམ་མངོན་སུམ་གྱིས་མྱོང་བ་དེ་སྔར་ལས་ངན་པར་ཁས་བླངས་པའི་ཕྱིར། དེ་རིགས་ཀྱི་སྐབས་ལུང་ནི། སྔ་མ་སྔ་མ་རྒྱུད་ལྡན་པས། །ཕྱི་མ་ཕྱི་མ་གསལ་བར་བྱེད། །ཅེས་པས། དེ་རང་རྒྱུད་ལ་ལྡན་པའི་སྟོང་ཀུན་སྣང་གི་ཡོན་ཏན་ལྡན་པའི་ཕྱིར་རོ། །རིག་པ་ནི། ཚོགས་ལམ་སྙིང་རྗེ་སྒྱུ་མ་ལ་གནས་པ་དེ་ཆོས་ཅན། ཁྱོད་བདེན་གཉིས་རེས་འཇོག་ཏུ་བྱེད་པའི་གང་ཟག་ཏུ་ཐལ། ཁྱོད་སྔ་མ་དོན་དམ་ལས། ཕྱི་མ་ཀུན་རྫོབ་ལ་ཁ་སྤོས་པས་ངན་དུ་སོང་བའི་ཕྱིར། རྟགས་ཁས། འདོད་ན། དེ་ཆོས་ཅན། ཁྱོད་ཀྱི་རྒྱུད་ཀྱི་སྣང་བ་ཀུན་རྫོབ་བདེན་པ་དེ་དག་པ་ལྷར་སྣང་གི་ཀུན་རྫོབ་མ་ཡིན་པར་ཐལ། དོན་དམ་སྒྲིབ་བྱེད་ཀྱི་ཀུན་རྫོབ་ལ་འདོད་པའི་ཕྱིར་ཏེ། འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །ཞེས་བཤད་པ་ལ་འདོད་པའི་ཕྱིར། ཡང་སྒྱུ་མའི་ཆོས་དྲུག་སྒོམ་པའི་ལུང་། ཤེར་ཕྱིན་ལས། འཁོར་བ་ཡང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུ། ཞེས་སོགས་གསུངས་པས། ཆོས་ཐམས་ཅད་རང་བཞིན་མ་གྲུབ་པའི་ཚུལ་དུ་བལྟས་ནས་བསྒོམ་པ་མ་གོ་བའི་ལོག་རྟོག་གོ། །རིག་པ་ནི། སྙིང་རྗེ་སྒྱུ་མ་ལ་གནས་པའི་ཚོགས་ལམ་པ་ཆོས་ཅན། ཁྱོད་ལོག་རྟོག །རྟེན་འབྲེལ། དངོས་པོ་སྒྱུ་མ་རྣམས་བདེན་ཞེན་ཨ་འཐས་སུ་བྱེད་པའི་གང་ཟག་ཡིན་པར་ཐལ། ཁྱོད་ཀྱི་དེ་གསུམ་ལ་སྤྱོད་པ་དེ་སེམས་ཅན་ཐ་མལ་པས་སྤྱོད་པ་དང་ཁྱད་མེད་པའི་ཕྱིར། རྟགས་ཁས། འདོད་ན། དེ་ཆོས་ཅན། མ་ཡིན་པར་ཐལ། ཁྱོད་ཀྱི་དེ་གསུམ་འཛིན་མེད་སྒྱུ་མ་ལྟ་བུར་སྤྱོད་པའི་ཕྱིར། གཞན་ཡང་ཚོགས་སྦྱོར་གྱི་ལམ་ལྔའི་འབྲས་བུ་ལ་ལོག་རྟོག་བསལ་བ་ནི། དེ་ཏིང་གི་སྐབས་སུ། ལམ་རིམ་ལས། སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །ཞེས་པས་ཆོས་སྐུ་དང་། སྙིང་རྗེ་སྒྱུ་མའི་སྐབས་སུ། ལམ་འདིར་ཆ་རྐྱེན་རྫོགས་བསྒྲུབས་ན། །མཚན་དང་དཔེ་བྱད་ཀུན་དང་ལྡན། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བར་ཐེ་ཚོམ་མེད། །ཅེས་པས་ལོངས་སྤྱོད་སྐུ་དང་། ཕྱག་རྒྱ་གཅིག །སྤྲོས་ཚོགས་སྒྲུབ་གསུམ་གྱི་སྐབས་སུ། འདི་ཉིད་ལས། རྣལ་འབྱོར་ལས་སུ་རུང་རྣམས་ཀྱི། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པས་ན། །དཀྱིལ་འཁོར་ཆེན་པོ་འབར་བར་འགྱུར། །ཞེས་པས་སྤྲུལ་སྐུ་སྟེ། ངེས་པར་ཏིང་ངེ་འཛིན་དེ་དང་དེས་སྐུ་གསུམ་སོ་སོར་དངོས་སུ་ཐོབ་ཟེར་བ་མི་འཐད་དེ། དེ་ཏིང་གིས་ཆོས་སྐུ་ཐོབ་ན་སྙིང་རྗེ་སྒྱུ་མ་མན་ཆད་བསྒོམ་པ་དོན་མེད་དུ་འགྱུར་ཞིང་། ལམ་རིམ་ལས། ཕྱོགས་མཐུན་བརྗོད་ཀྱིས་རིགས་མ་ཡིན། །ཞེས་པ་དང་ཡང་འགལ་ལོ། །དེས་ན་འདི་དག་ཆོས་མཐུན་རྩིས་པའི་སྐུ་གསུམ་གྱི་བརྒྱུད་རྒྱུ་ཙམ་དུ་ཁས་བླང་བར་བྱ་བའི་དོན་ནོ། །གསུམ་པ་ལམ་གྱུར་གྱི་འབྲས་བུ་ནི་ཟག་མེད་ཀྱི་ལམ་ལ་དབྱེ་བ་དང་། དེ་གཏན་ལ་དབབ་པ་གཉིས་ལས་དང་པོ་ལ། མཐོང་ལམ། བསྒོམ་ལམ། མཐར་ལམ་རིག་འཛིན་ནོ། །མཐོང་ལམ་ལ་ཡང་། ནང་གསེས་ཀྱིས་དབྱེ་ན་གཉིས་སུ་འགྱུར་ཏེ། ལྷག་མེད་མྱ་འདས་རྣམ་སྨིན་དང་། ལྷག་བཅས་མྱང་འདས་ཚེ་དབང་གཉིས་སུ་ངེས་པའི་ཕྱིར། ལམ་རིམ་ལས། ལྷག་མ་མེད་དང་ཡོད་པ་ཡི། །མྱ་ངན་འདས་པས་མཐའ་སྦྱོར་བ། །ཞེས་པས་རིག་འཛིན་དེ་གཉིས་མཐོང་ལམ་དུ་ཁད་མཉམ་པར་བཤད་དོ། །གཉིས་པ་ལ། རྣམ་སྨིན་རིག་འཛིན། ཚེ་དབང་རིག་འཛིན། །སྒོམ་ལམ་ཕྱག་རྒྱ་ཆེན་པོའི་རིག་འཛིན། མཐར་ལམ་ལྷུན་གྲུབ་རིག་འཛིན་བཤད་པའོ། །དང་པོ་ས་དྲུག་ལས། མཚན་ཉིད་ནི། ཆོས་ཉིད་ཀྱི་བདེན་པ་མཐོང་ཡང་བློ་ཆུང་བའི་སྟོབས་ཀྱིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པའི་ལྷག་མེད་མྱང་འདས་སོ། །གཉིས་པ་ངོ་བོ། །མཚན་ཉིད་གསུམ་ལྡན་ཏེ། ཡིད་ལྷའི་སྐུར་གསལ་ཞིང་རྫོགས་པར་སྨིན་པ། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ། ལུས་རྒྱ་དང་བྲལ་མ་ཐག་ཏུ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བ་སྟེ། ལམ་རིམ་ལས། ཡིད་ཀྱི་ལྷ་ཡི་གཟུགས་གཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །རྒྱལ་བའི་སྐུ་ཉིད་གསལ་གྱུར་པ། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །གསུམ་པ་རྣམ་གྲངས་ནི་རྣམ་སྨིན་གྱི་ལུས་འདི་རྒྱ་ཆེན་གྱི་སར་མི་ཁྱེར་བས་ན་ལྷག་མེད་མྱང་འདས་དང་། འབྱུང་བའི་ལུས་མེད་པ་དང་། ལས་ཀྱི་ལུས་མེད་པ་ཞེས་བྱ། རང་དོན་དུ་སྲིད་པའི་མངལ་ཕྱི་མ་མི་ལེན་པས་ན་སྲིད་པ་ཐ་མ་པ་ཞེས་ཀྱང་བྱ་སྟེ། ཡིད་ལྷའི་སྐུར་སྣང་བར་སྨིན་པའི་རྣམ་སྨིན་གྱིས་ལུས་མ་དོར་བས་རྣམ་སྨིན་རིག་འཛིན་ཞེས་ཀྱང་བྱ་སྟེ། ལམ་རིམ་ལས། ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའང་སྨིན་ཆོས་བརྗོད། །ཅེས་སོ། །བཞི་པ་ཆ་ལུགས་ནི་ལུས་སྔོན་གང་ཡིན་དང་རྩ་བའི་ལྷ་གང་ཡིན་གྱི་ཆ་ལུགས་འཛིན་པ་སྟེ། ཡིད་ཀྱི་ལྷ་ཡི་གཟུགས་གཟུང་ཞིང་། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། ཟག་མེད་ལྷ་ཡི་སྤྱན་རྣམ་པར་དག་པ་ལ་སོགས་པས་གླིང་བཞི་པའི་འཇིག་རྟེན་ཙམ་ཡུལ་དུ་གྱུར་ཅིང་དེ་དག་གི་དོན་བྱེད་ནུས་པ་སྟེ། ལམ་རིམ་ལས། དཔག་ཚད་གླིང་ཁམས་ལུས་ལ་སྦྱོར། །ཞེས་སོ། །དྲུག་པ་འབྲས་བུ་ནི། རྣམ་སྨིན་གྱི་ལུས་རྒྱ་དང་བྲལ་མ་ཐག་ཏུ་ཕྱག་ཆེན་འོད་ཀྱི་ལུས་ལ་སྦྱོར་བ་སྟེ། དེ་ལས། གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པ། །རྡོ་རྗེ་ལྔ་སོགས་རིག་པ་འཛིན། །ཕྱག་རྒྱ་ཆེན་པོའི་རིགས་འབྲས་བུ། །ཞེས་སོ། །ཚེ་དབང་རིག་འཛིན་ལ་ཆོས་དྲུག་ལས། དང་པོ་མཚན་ཉིད་ནི། ཆོས་ཉིད་རང་མཚན་གསལ་བའི་ངོ་བོར་བསྐྱེད་དུ་བྱར་མེད་པར་མཐོང་ཞིང་སྐྱེ་འཇིག་མེད་པ་རྡོ་རྗེའི་ལུས་སུ་གྱུར་པའི་ལྷག་བཅས་མྱང་འདས་སོ། །གཉིས་པ་ངོ་བོ་ནི། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱི། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །ཞེས་སོ། །གསུམ་པ་རྣམ་གྲངས་ནི། དེ་ལས། ངོ་བོ་ཐབས་དང་སྨན་རིག་འཛིན། །རྣལ་འབྱོར་སྒྲོལ་མའི་རིག་འཛིན་དང་། །ལམ་མཆོག་རྫོགས་པའི་རིམ་པ་བཞི། །ཞེས་སོ། །དེ་ཡང་དང་པོ་གསུམ་རྟོགས་གོམས་ཀྱི་མཐུ་མེད་པས་རྫས་དང་ཐབས་བརྐྱང་པ་ལ་བརྟེན་པའི་ཕྱིར་ཚེ་ལ་དབང་བར་འདྲ་ནའང་ཟག་བཅས་དང་། ཕྱི་མ་ནི་ཟག་མེད་དོ། །བཞི་པ་ཆ་ལུགས་ནི། མི་དང་འདོད་གཟུགས་ཀྱི་ལྷའི་གཙོ་བོའི་ཆ་བྱད་དུ་སྟོན་ཏེ། དེ་ལས། ལྷ་མིའི་རྒྱལ་པོའི་སྐྱེ་བ་འཛིན། །ཞེས་སོ། །དེ་ལྟ་ནའང་ལྷ་མི་གཞན་དང་ཁྱད་པར་ཆེ་སྟེ་སྐྱེ་བ་ལ་རང་དབང་ཅན་དུ་གནས་པའི་ཕྱིར་ཏེ། འདི་ཉིད་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཞེས་སོ། །དེ་དག་ཀྱང་སྤྲུལ་པའི་ཆ་ལུགས་ཡིན་ཅིང་། རང་གི་ངོ་བོ་ནི། ད་ལྟའི་ལུས་འདི་རྡོ་རྗེའི་ལུས་ཀྱི་རྣམ་པ་ཅན་ནོ། །ལྔ་པ་མངོན་ཤེས་ཀྱི་ཡུལ་དེ་བཞིན་སྤྱིའི་མངོན་ཤེས་དྲུག་དང་། བྱེ་བྲག་ཏུ་སྒོ་ལྔའི་དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱའི་ཞིང་ཁམས་དང་མཉམ་པ་ཡུལ་དུ་གྱུར་ཅིང་། དེ་སྙེད་ཀྱི་དོན་བྱེད་པ་སྟེ། ལམ་རིམ་ལས། གཉིས་སུ་མེད་པར་མངོན་རྟོགས་གོམས། །མཐོང་བས་དྲི་མ་དྲུག་སྦྱང་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔ་ཤར། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་པར་ཤེས་པ་དང་། །ཕ་རོལ་གནས་ཀྱི་སེམས་ཤེས་དང་། །ཞེས་སོགས་གསུངས་སོ། །དྲུག་པ་འབྲས་བུ་ནི། རིམ་གྱིས་སམ་ཐོད་བརྒལ་བའི་ཚུལ་གྱིས་ལམ་གོང་མར་སྦྱོར་བ་སྟེ། ལམ་རིམ་ལས། སྔོན་བཞིན་རིམ་དང་ཅིག་ཅར་བའོ། །ཞེས་སོ། །གསུམ་པ་ཕྱག་རྒྱ་ཆེན་པོའི་རིག་འཛིན་ལ་དྲུག་ལས། དང་པོ་མཚན་ཉིད་ནི། བསྒོམ་བྱ་མངོན་དུ་གྱུར་པས་སྔོན་གང་བསྒོམས་ཀྱི་ལྷའི་ཆ་ལུགས་རང་མཚན་པ་འཛིན་ཅིང་མི་གཡོ་བའི་ཏིང་ངེ་འཛིན་གྱིས་ལྷན་ཅིག་གནས་པའི་དྲི་མ་སྦྱོང་བ་ལ་ཞུགས་པའི་བསླབ་པའི་རིག་འཛིན་ཏེ། ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་མངོན་དུ་གྱུར་པའི་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །ཞེས་སོ། །གཉིས་པ་ངོ་བོ་ནི། ལམ་རིམ་ལས། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །ཞེས་སོ། །གསུམ་པ་རྣམ་གྲངས་ནི། ཀྲི་ཡའི་རིགས་གསུམ། ཨུ་པ་ཡའི་རིགས་བཞི། ཡོ་གའི་རིགས་ལྔ། མ་ཧཱ་ཡོ་གའི་མཆོག་ལྔ་སྟེ། དེ་ལས། དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིགས་འཛིན་པས། །ཞེས་སོ། །བཞི་པ་ཆ་ལུགས་ནི། ལྷ་སྐུ་ཕྱག་རྒྱ་ཆེན་པོ་ལས་མི་གཡོ་ཞིང་། །ཞེས་དང་། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། རྣམ་ཤེས་དྲུག་གི་བྱེ་བྲག་ཉེར་ལྔ་དང་བཅས་པ་ཚེ་དབང་དང་འདྲ་ནའང་། འདི་གསལ་བརྟན་གྱིས་ཁྱད་པར་དུ་བྱས་ཤིང་། ཡུལ་ལོངས་སྐུའི་ཞིང་དང་མཉམ་པས། དོན་ཡང་དེ་སྙེད་དུ་བྱེད་པར་ནུས་པ་སྟེ། ལམ་རིམ་ལས། དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་འདུལ་བྱས་ཡོངས། །ཞེས་སོ། །དྲུག་པ་འབྲས་བུ་ནི། ལམ་རིམ་ལས། ལྷན་ཅིག་གནས་པའི་དྲི་མ་དག །བརྩོལ་བ་མེད་པར་ལྷུན་གྲུབ་ཐོབ། །ཅེས་སོ། །བཞི་པ་ལྷུན་གྲུབ་རིག་འཛིན་ལ་དྲུག་ལས། དང་པོ་མཚན་ཉིད་ནི། དབྱེར་མེད་ལམ་གྱི་རྟོགས་པ་མཐར་ཕྱིན་པའི་སངས་རྒྱས་ཀྱི་ས་ཐོབ་མ་རག་པའི་རྒྱུན་མཐའ་ལ་གནས་པའི་རིག་འཛིན་ཏེ། ལམ་རིམ་ལས། དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོགས་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་རག་ལས་རིག་འཛིན་མཐའོ། །ཞེས་སོ། །གསུམ་པ་རྣམ་གྲངས་ནི། བྱ་རྒྱུད་ཀྱི་རིགས་གསུམ། རྣལ་འབྱོར་རྒྱུད་ཀྱི་རིགས་གསུམ་ལྔ། རྣལ་འབྱོར་བླ་ན་མེད་པའི་སྐུ་ལྔ་ལྷུན་གྲུབ་ཀྱི་རྒྱལ་མཚན་རྣམ་པར་གསུམ་སྟེ། ལམ་རིམ་ལས། བྱ་བ་ལྷུན་མཉམ་རྣལ་འབྱོར་གྱི། །རིག་འཛིན་ཆེན་པོའང་རིག་འཛིན། །ཞེས་སོ། །བཞི་པ་ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོའི་ཚུལ་འཛིན་པ་སྟེ། ལམ་རིམ་ལས། ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིར་ན། །དེ་འདྲ་དེ་ཉིད་རྒྱལ་ཚབ་སྟོན། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་ཞིང་ནམ་མཁའ་ཁྱབ་ཚད་ཀྱི་དོན་མང་ཅི་རིགས་པར་མཛད་ཏེ། ལམ་རིམ་ལས། ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ནི་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །ཞེས་སོ། །དྲུག་པ་འབྲས་བུ་ནི། མཐར་ལམ་གྱི་སྐད་ཅིག་རྒྱུན་མཐའ་ལ་རྡོ་རྗེ་ལྟ་བུའི་ཏིང་ངེ་འཛིན་གྱིས་བདག་ཏུ་རྟོག་པ་བཟང་ངན་གྱི་མཚན་མ་བག་ལ་ཉལ་ཕྲ་བ་ཡང་བཅོམ་སྟེ་རྫོགས་སངས་རྒྱས་ཀྱི་སར་སྦྱོར་བ་ཉིད་དོ། །དེ་ལྟར་ཡང་སྔ་མ་ལས། རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །རྡོ་རྗེ་དབྱིངས་སུ་ཐིམ་པར་བྱེད། །ཞེས་སོ། །གཉིས་པ་ཐོད་རྒལ་གྱི་ལམ་ལ། གང་ནས་འབྱུང་བའི་ས། གང་ལྟར་འབྱུང་བའི་གོ་བ། དེ་ལྟར་འབྱུང་མི་འབྱུང་གི་རྒྱུ་མཚན། ཇི་ལྟར་འབྱུང་བའི་ཚུལ། ཞར་ལ་ལོག་རྟོགས་གསལ་བའོ། །དང་པོ་ནི། ཟག་བཅས་ཀྱི་ལམ་གྱི་ཕྱག་རྒྱ་གཅིག་སྤྲོས་གཉིས་དང་། ཟག་མེད་ཀྱི་ཚེ་དབང་དང་ཕྱག་ཆེན་གཉིས་ནས་འབྱུང་སྲིད་པའོ། །གཉིས་པ་ནི། ལམ་བར་ནས་བོར་ཏེ་གོང་མ་ལ་འཆོང་ནས་སྦྱོར་བ་ཞིག་གོ། །གསུམ་པ་ནི། ཐོད་བརྒལ་འབྱུང་བ་ལ་ལམ་རིམ་གྱིས་པ་གང་ཞིག །ཆོས་གསུམ་དང་ལྡན་དགོས་ཏེ། གསུམ་གང་ཞེ་ན། ལམ་གཞན་བར་ནས་བོར་དུ་ཡོད་པ། ངང་གིས་བློ་ཆེ་བ། སྟོང་ཉིད་སྙིང་རྗེ་དབྱེར་མེད་དུ་བསྒོམ་ནུས་པ་དང་གསུམ་གཞི་གཅིག་ལ་འཚོགས་པའོ། །བཞི་པ་ནི། རྒྱུ་མཚན་དེའི་ཕྱིར། དེ་བཞིན་ཉིད་དང་ཀུན་སྣང་གཉིས་དབྱེར་མེད་སྒོམ་པའི་ལམ་པ་མ་ཡིན་པའི་ཕྱིར་མི་འབྱུང་ལ། ཟག་བཅས་ཚོགས་སྒྲུབ་དང་། ལྷུན་གྲུབ་རིག་འཛིན་གཉིས་ལམ་བར་ནས་བོར་དུ་མེད་པའི་ཕྱིར་མི་འབྱུང་། རྣམ་སྨིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར་མི་འབྱུང་ངོ་། །ལྔ་པ་ནི། ཁ་ཅིག་ན་རེ། ཚོགས་སྒྲུབ་ནས་ཀྱང་ཐོད་བརྒལ་འབྱུང་སྟེ། རྒྱུད་ལས་གཉིས་མེད་གྱུར་ནས་ཕྱག་རྒྱ་ཆེ། །ཞེས་ཚོམ་བུ་གཅིག་པ་ནས་ཕྱག་ཆེན་ལ་སྦྱོར་བ་དང་། རིག་འཛིན་དངོས་གྲུབ་མཆོག་ཐོབ་འགྱུར། །ཞེས་ཚོམ་བུ་གསུམ་པ་ནས་ལྷུན་གྲུབ་རིག་འཛིན་ལ་སྦྱོར་བ་དང་། དངོས་གྲུབ་མཆོག་གི་སྙིང་པོ་འགྲུབ། །ཅེས་ཚོམ་བུ་ལྔ་པ་ནས་སངས་རྒྱས་པར་སྦྱོར་བར་བཤད་པའི་ཕྱིར་ཟེར་བ་མི་འཐད་དེ། རྒྱུད་ཀྱི་ལུང་ཚན་གསུམ་ནི། ཚོགས་སྒྲུབ་ཀྱིི་དུས་ཚོམ་བུ་གཅིག་གསུམ་ལྔ་པ་བསྒྲུབ་པས་ཐོབ་པའི་ཚེ་དབང་དེ། རིམ་པར་རྒྱ་ཆེན། མཐར་ལམ་སངས་རྒྱས་ལ་སྦྱོར་བའི་ལུང་ཡིན་གྱི། ཚོགས་སྒྲུབ་ནས་ཐོད་བརྒལ་འབྱུང་བའི་ལུང་མ་ཡིན་ཏེ། གལ་ཏེ་ཡིན་ན་ཟག་མེད་ལམ་གྱི་འདུ་བ་དང་དབྱེ་བ་མཐོང་ལམ་མ་ཡིན་པར་ཐལ། ཚོགས་སྒྲུབ་ནས་ཐོད་བརྒལ་འབྱུང་བའི་ཕྱིར། འདོད་མི་ནུས་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་གསུངས་པ་དང་འགལ་བའི་ཕྱིར་རོ། །གསུམ་པ་ལ། ཟག་བཅས་ཟག་མེད་ཀྱི་ཁྱད་པར་སྤྱིར་བཤད། ཟག་ལྡོག་ཡོད་མེད་ཀྱི་ས་མཚམས་བྱེ་བྲག་ཏུ་བཤད་པའོ། །དང་པོ་ནི། ཀུན་ནས་ཉོན་མོངས་པ་དང་བཅས་པའི་ལས་ཀྱི་ཀུན་ནས་བླངས་ཏེ་ཁམས་གསུམ་དུ་ཟག་ཅིག་འཕོ་བའི་ཕྱིར་ཟག་བཅས། དེ་ལས་ལོག་པ་ནི་ཟག་མེད་དོ། །དེ་ཡང་། ཞེན་པ། ཕྱིན་ཅི་ལོག་གི་སྒྲོ་བཏགས་ཉོན་མོངས་པ་དང་། ལུས་རང་དབང་མེད་པར་འདོད་བ་ལུས་ཀྱི་དང་། བདེ་མི་བདེ་རང་དབང་མེད་པར་མྱོང་བ་ཁམས་ཀྱི་དང་། ལས་ཀྱི་སྟོབས་ཀྱིས་རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པའོ། །དེ་ལ་ཉོན་མོངས་པའི་འཛིན་པ་ནི་གཙོ་བོ་སྟེ། དེས་འཁོར་བར་ཟག་པའི་རྒྱུའི་ས་བོན་དྲུང་པ་བྱེད་པའི་ཕྱིར། བྲན་ནི་ཕྱི་མ་གསུམ་སྟེ། དེ་ཙམ་གྱིས་འཁོར་བར་འཆིང་མི་ནུས་པའི་ཕྱིར་རོ། །གཉིས་པ་ལ། སྤྱིར་ཟག་ལྡོག་ཡོད་མེད་ཀྱི་མུ་བཞི་སྟེ། ཟག་པ་མེད་ལ་བཟློག་པ་ཡོད་པའི་ལམ་ནི། ཐེག་པ་ཆུང་ངུའི་མཐར་ཐུག་གི་འབྲས་བུ་དགྲ་བཅོམ་ཐོབ་པ་ཞིག །སྔགས་ཀྱི་ཐེག་པ་ལ་ཞུགས་ནས་ཚོགས་ལམ་གང་རུང་ལ་གནས་པ་དེའོ། །རྒྱུད་རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིགས། །ཞེས་སོ། །གཉིས་པ་ཟག་ལྡོག་གཉིས་ཀ་ཡོད་པའི་ལམ་ནི། ཚོགས་སྦྱོར་གྱི་རྣམ་པར་བཞི་སྟེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །གསུམ་པ་དེ་ཡོད་ཀྱང་ལྡོག་པ་མེད་པའི་ལམ་ནི། སྦྱོར་ལམ་ཚོམ་བུ་ཚོགས་སྒྲུབ་སྟེ་སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར་ཏེ། ལམ་རིམ་ལས། བར་ཆད་མེད་པར་སྦྱོར་བ་ཡིས། །ཞེས་སོ། །བཞི་པ་ཟག་ལྡོག་གཉིས་ཀ་མེད་པའི་ལམ་ནི། རིག་འཛིན་བཞི་སྟེ། ལམ་རིམ་ལས། ཟག་ཀུན་ཟད་པའི་རིགས་ཆེན་ནི། །ཇི་ལྟར་སྤྱད་ཀྱང་ལྡོག་པ་མེད། །ཅེས་སོ། །གཉིས་པ་གྲོལ་ལམ་ཅིག་ཅར་བ་ལ། དགོས་ཆེད། ངོ་བོ། རྣམ་པར་དབྱེ་བས་གཏན་ལ་དབབ་པའོ། །དང་པོ་ནི། །དབང་པོ་ཡང་རབ་ཀྱིས་འབྲས་བུ་མྱུར་དུ་ཐོབ་པའི་ཆེད་དུའོ། །གཉིས་པ་ནི། རྟོགས་གོམས་གཅིག་ཆོད་དུ་མཐར་ཕྱིན་པར་བྱེད་པའོ། །གསུམ་པ་ལ་སྔར་ལྟར་མཚན་ཉིད་གསུམ་ལས། དང་པོ་ལྟ་བ་ནི། ཆོས་ཐམས་ཅད་ཀྱི་གནས་ལུགས་དབྱེར་མེད་ཆིག་ཆོད་དུ་རྟོགས་པས་གཞལ་བྱ་དང་གཏན་ཚིགས་ལ་སོགས་པའི་ཐ་སྙད་ཀྱིས་སྟོང་པ་སྟེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བར། །འཁོར་འདས་རང་སྤྱི་དབྱེར་མེད་དུ། །མི་ཕྱེད་རྡོ་རྗེ་ཐུགས་མཆོག་གོ། །ཞེས་སོ། །གཉིས་པ་ཏིང་ངེ་འཛིན་ལ་མཚན་བཅས་མཚན་མེད་གཉིས་ལས། དང་པོ་ནི། ཆོ་གའི་ཡན་ལག་ལ་མ་ལྟོས་པར་སྐད་ཅིག་དྲན་རྫོགས་སུ་བསྐྱེད་ཅིང་། གསལ་བ་སྟེ། རྒྱས་པ་ལས། སྐད་ཅིག་སྐུ་གསལ་འོད་དུ་འབར། །སྙིང་པོ་བརྗོད་པས་འཁོར་ལོར་ཤར། །ཞེས་སོ། །གཉིས་པ་ནི། བླ་མ་ལས། ཐིག་ལེ་ཆེན་པོའི་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །ཞེས་སོ། །གསུམ་པ་འབྲས་བུ་ནི། རིག་འཛིན་བཞིའི་ཆར་གཏོགས་པའི་ཡེ་ཤེས་གཅིག་ཆོད་དུ་མངོན་དུ་གྱུར་པ་སྟེ། འདི་ཉིད་ལས། མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་གསུངས་སོ། །གཉིས་པ་ཐབས་ལམ་ལ། གདམ་ངག་སྟེང་དང་འོག་གི་སྒོ། །ཞེས་པས་གཉིས་ཏེ། རིམ་གྱིས་པ་སྟེང་སྒོ་དང་། ཅིག་ཅར་བ་འོག་སྒོའོ། །དང་པོ་ནི། འཁོར་ལོ་དྲུག་ལ་བརྟེན་ནས་རྡུབ་དགངས་སྐྱིལ་དབབ་ལ་སོགས་ཏེ། གཏུམ་མོ་ཡེ་ཤེས་ཀྱི་མེ་དང་། ཐིག་ལེ་བྱང་ཆུབ་ཀྱི་སེམས་འབར་འཛག་གི་སྦྱོར་བས་འཁོར་ལོར་བཞིར་བདེ་བའི་ཡེ་ཤེས་རིམ་གྱིས་བསྐྱེད་པའི་ཕྱིར་སྟེང་སྒོ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །ཞེས་སོགས་སོ། །སྒོམས་པའི་འབྲས་བུ་ནི། དངོས་སུ་རླུང་སེམས་ལ་དབང་ཐོབ་པས་འོག་སྒོ་ཉམས་སུ་བླང་དུ་རུང་ཞིང་། །བརྒྱུད་འབྲས་འོག་སྒོ་དང་ཐུན་མོང་དུའོ། །གཉིས་པ་ནི་མཁའ་གསང་གཉིས་ལ་བརྟེན་ནས་དབབ་བཟུང་ལྡོག་བཀྲམ་ལ་སོགས་པའི་མན་ངག་གིས་བདེ་སྟོང་གཉིས་མེད་ཀྱི་ཡེ་ཤེས་ཅིག་ཅར་དུ་ཉམས་སུ་མྱོང་བར་བྱེད་པ་སྟེ། འདི་ཉིད་ལས། ལྷ་མོ་ནས། དལ་རྡོ་རྗེ་ལྕེ་ཡི་བླངས་ཞེས་པའི་བར། འབྲས་བུ་ནི་སྔ་མའི་འཕྲོས་ལས། མཁའ་འགྲོ་གསལ་འབར་སོགས་སོ། །གསུམ་པ་ལ། བདག་དོན་གྲུབ་པ་དང་། གཞན་དོན་མཛད་པའོ། །དང་པོ་ལ། ཐོབ་ཚུལ། གོ་དོན། རྣམ་གྲངས་སོ། །དང་པོ་ལ། ཐེག་པ་ཐུན་མོང་གི་དང་། མཆོག་གི་ཐོབ་ཚུལ་ལོ། །དང་པོ་ནི། འདི་ཉིད་ལས། དེ་ནས་ས་བཅུ་རིམ་གྱིས་འབྱང་། །བླ་མེད་བྱང་ཆུབ་ཡང་དག་ཐོབ། །ཅེས་སོ། །གཉིས་པ་ལ་དངོས་དང་། རྩོད་པ་སྤང་བའོ། །དང་པོ་ནི། འོ་ན་གཞི་ཇི་ལྟ་བ་བཞིན་མངོན་དུ་བྱས་པས་སྤངས་ཐོབ་མེད་པར་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་མཐར་ཐུག་པའི་ཆོས་སོ། །དེ་ལྟར་ཡང་འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ལས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། དོན་དུ་རང་རིག་པ་དེ་བཞིན་ཉིད་དུ་སོན་པ་ཉིད་སངས་རྒྱས་ཀྱི་འབྲས་བུ་ཐོབ། །ཅེས་བྱའོ། །ཞེས་སོགས་སོ། །རྩོད་སྤོང་ནི། ཁ་ཅིག །གསང་སྔགས་ཀྱི་ལམ་བདེ་ཞིང་མྱུར་བའི་ཐབས་ཀྱི་ཁྱད་པར་དུ་བྱས་ཀྱི་མཐར་ཐུག་གི་འབྲས་བུ་ལ་ཁྱད་པར་མེད་ཏེ། ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོའི་རྣོན་པོའི་དབང་བྱས་ནས། །ཐབས་ལ་གསང་སྔགས་ཁྱད་པར་འཕགས། །ཞེས་ཟེར། དེ་དགག་པ་ལ། རིག་པ་དང་ལུང་གཉིས་ལས། དང་པོ་ནི། རྒྱུའི་མཐར་ཐུག་གི་འབྲས་བུ་ཀུན་ཏུ་འོད་ཀྱི་ས་ལ་གནས་པའི་གང་ཟག་དེ་ཆོས་ཅན། སྔགས་ཀྱི་མི་སློབ་ལམ་དུ་འཇུག་མི་དགོས་པར་ཐལ། ཁྱོད་མཐར་ཐུག་གི་འབྲས་བུ་ཐོབ་ཟིན་པའི་གང་ཟག་ཡིན་པའི་ཕྱིར་ཏེ། འདོད་ན། དེ་ཆོས་ཅན། ཁྱོད་དེ་ཡིན་པར་ཐལ། ཁྱོད་ལ་མཐར་ཐུག་འབྲས་བུའི་དབང་བསྐུར་ནས་སངས་རྒྱ་དགོས་ཀྱི་གང་ཟག་ཡིན་པའི་ཕྱིར་ཏེ། མདོ་སྡེ་རྒྱན་ལས། དགོངས་པ་ཐ་མ་ཐོབ་ནས་ནི། །འོད་ཟེར་ཆེན་པོའི་དབང་བསྐུར་རོ། །ཞེས་བཤད་པའི་ཕྱིར། ལུང་གིས་ཀྱང་གནོད་དེ། ཐབས་ཞགས་ལས། ཀུན་ཏུ་འོད་ལས་འདས་ནས་སུ། །པདྨ་ཅན་དུ་གྱུར་པ་ན། །ཞེས་དང་། དབྱིག་གི་སྒྲོན་མ་ལས། ཁྱོད་ཀྱི་མཐར་ཕྱིན་ཀུན་ཏུ་འོད། །ཐབས་ཆེན་ཐེག་པའི་བསྟི་གནས་པ། །ཞེས་སོགས་ཀྱིས་གནད་དོ། །གཞན་ཡང་མདོ་སྔགས་གཉིས་ལ། དབང་དང་ཤེས་འཇུག་རྟོགས་གོམས་ཀྱི་ལམ་ལ་ཁྱད་པར་ཡོད་པ་ལྟར། མཐར་ཐུག་གི་འབྲས་བུ་ལ་ཡང་ཡོད་དགོས་ཏེ། གསང་སྔགས་ཀྱི་དབང་སོགས་ཀྱི་རྒྱུ་མེད་པའི་གསང་སྔགས་ཀྱི་མཐར་ཐུག་གི་འབྲས་བུ་ཐོབ་པ་མི་སྲིད་པའི་ཕྱིར་ཏེ། འབྲས་བུ་ནི་རྒྱུའི་རྗེས་སུ་འགྲོ་བའི་ཕྱིར། ཡང་ཁ་ཅིག་ན་རེ་ལམ་གོམས་པའི་རྒྱུ་རྐྱེན་ལས་བྱུང་བའི་ཕྱིར། འབྲས་བུ་འདུས་བྱས་སུ་འགྱུར་རོ་ཞེ་ན། མ་ཡིན་ཏེ། རང་གི་སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་བཞུགས་པ་ཉིད། ལམ་གྱི་ཞེན་པ་དག་པའི་ངོ་ན་དེར་གསལ་བའི་ཕྱིར། དཔེར་ན་སྤྲིན་དེངས་བའི་ཉི་མའི་དཀྱིལ་འཁོར་སྣང་བ་བཞིན་ནོ། །དེའང་འདི་ཉིད་ལས། ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཞེས་སོ། །དེ་ལྟར་ན་མཚན་མ་ཅན་དུ་འགྱུར་ཏེ། འབྲས་བུ་ཀུན་རྫོབ་སྐུ་དང་ཡེ་ཤེས་སུ་སྣང་བའི་ཕྱིར་ཟེར་ན། མ་གྲུབ་སྟེ། དེ་ལྟར་ཡང་དེའི་ངོ་བོ་ཅིར་ཡང་བཟུང་དུ་མེད་པས་ན་ཡོད་པའི་མཚན་མར་མི་འགྱུར་ཞིང་། དེས་དོན་བྱེད་མི་ནུས་པ་ཡང་མ་ཡིན་ཏེ། གཞན་སྣང་གཟུགས་སྐུ་གཉིས་ཀྱང་རང་སྣང་ཡིན་པའི་ཕྱིར། སྒྱུ་མ་ལྟ་བུའི་འཕྲིན་ལས་ཀྱིས་དོན་མཛད་ལ། དེའི་དུས་ན་ངོ་བོ་ཉིད་གཞན་དུ་འགྱུར་བ་མ་ཡིན་ཏེ། འདུས་མ་བྱས་ཤིང་སྐྱེ་འཇིག་དང་བྲལ་བ། ཆོས་ཀྱི་སྐུ་ལས་མི་གཡོ་བའི་ཕྱིར་རོ། །དེ་ལྟར་ཡང་འདི་ཉིད་ལས། ཡེ་ཤེས་རོལ་པ་ཉིད་ཀྱང་གསོག །རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པ་མཆོག །ཅེས་སོ། །གཉིས་པ་གོ་དོན་ནི། སངས་རྒྱས་རྣམས་ལ་ཆོས་སྐུས་ཁྱབ་པ་གཅིག་ལས་མ་གཡོས་པར་གཟུགས་སྐུ་ཐ་དད་དུ་སྣང་བའི་ཕྱིར་གཅིག་དང་བྲལ་ལ། ཁྱབ་བྱ་གཟུགས་སྐུ་ཐ་དད་ཀྱི་རང་བཞིན་ཆོས་ཀྱི་དབྱིངས་ལས་མ་གཡོས་པས་རྒྱུད་ཐ་དད་མེད་པའི་ཕྱིར་དུ་མ་དང་བྲལ་ལོ། །དེ་ལ་ལྟོས་པའི་གཉིས་ཀ་དང་གཉིས་ཀ་མ་ཡིན་པའི་མུ་ཡང་མེད་དེ། གཅིག་དང་དུ་མ་མ་གྲུབ་པས་དེའི་མུ་ཁེགས་པའི་ཕྱིར། དེ་ལས་གཞན་དུ་སངས་རྒྱས་ཀྱིས་ཀྱང་གཟིགས་པར་མི་འགྱུར་ཏེ། གཟིགས་བྱ་གཟིགས་བྱེད་ཀྱི་ཡུལ་ལས་འདས་པའི་ཕྱིར། དེ་བས་ན་དགོངས་པ་ཡུལ་དང་ཡུལ་ཅན་མེད་པར་རང་གསལ་བའོ། །དེ་ལྟར་ཡང་འདི་ཉིད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གསུམ་པ་རྣམ་གྲངས་ལ། མིང་གི། ངོ་བོའི། སའི་རྣམ་གྲངས་སོ། །དང་པོ་ནི། ལམ་རིམ་ལས། ཐུན་མོང་མིན་པའི་རྒྱལ་མིང་གྲངས། །བདེ་གཤེགས་དེ་བཞིན་གཤེགས་པ་སྟེ། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་བསམ་མི་ཁྱབ། །ཅེས་སོ། །གཉིས་པ་ལ། ཐུན་མོང་དང་། མཆོག་གིའོ། །དང་པོ་ལ། རྟེན་དང་། བརྟེན་པ་གཉིས་ལས། དང་པོ་ནི། སྐུ་གསུམ་སྟེ། འདི་ཉིད་ལས། ཆོས་སྐུ་དཔག་མེད་བརྗོད་དུ་མེད། །ལོངས་སྤྱོད་ཟད་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །ཅེས་སོ། །གཉིས་པ་ནི། ཡེ་ཤེས་བཞི་སྟེ། མདོ་སྡེ་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སོ། །གཉིས་པ་ལ། མ་འདྲེས་རྣམ་གྲངས་སུ་སྣང་བ་དང་། དབྱེར་མེད་ལྷུན་གྲུབ་ཀྱི་ངོ་བོའོ། །དང་པོ་ལ་རྒྱས་འབྲིང་བསྡུས་གསུམ་ལས། དང་པོ་རྒྱས་པ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་བསམ་གྱིས་མི་ཁྱབ་པ་སྟེ། དེ་ལ་སྐུ་ནི། འདི་ཉིད་ལས། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཞེས་སོ། །གསུང་ནི། ཀུན་ཏུ་གསུང་བསམ་གྱིས་མི་ཁྱབ་པ་དང་། ཞེས་སོ། །ཐུགས་ནི། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཞེས་སོ། །ཡོན་ཏན་ནི། རྒྱས་པ་ལས། ཡེ་ཤེས་སྤྱན་གྱིས་སྤྲས་པའི་ཕྱིར། །ཞིང་དང་ཡོན་ཏན་བསམ་མི་ཁྱབ། །ཅེས་སོ། །ཕྲིན་ལས་ནི། འདི་ཉིད་ལས། ཕྱོགས་བཅུའི་འཇིག་རྟེན་རྡུལ་སྙེད་དུ། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་སོ། །གཉིས་པ་འབྲིང་དུ་དབྱེ་ན། ཁོག་གཞུང་ལས། དེ་ཡང་སྐབས་ཀྱི་ལྔ་ལྔ་སྟེ། །ཞེས་པས་རེ་རེ་ཡང་ལྔ་ལྔའོ། །དེ་བས་དང་པོ་སྐུ་ལྔ་ནི། རང་དོན་རྟོགས་པ་མཐར་ཕྱིན་པའི་ངོ་བོ་དབྱིངས་ཐོག་ཏུ་རིག་པའི་ཡེ་ཤེས་གྲོལ་བ་ནི་ཆོས་ཀྱི་སྐུ་སྟེ། འདི་ཉིད་ལས། སྐྱེ་ཤི་མེད་པའི་གཡུང་དྲུང་སྐུ། །ཞེས་སོ། །དེ་ལས་མ་གཡོ་བར་གདུལ་བྱ་ལས་དག་པ་ས་བཅུ་པའི་ངོར་རྟེན་ལུས་ཉིད་ཟག་མེད་དུ་གྱུར་པའི་རྒྱུ་འབྲས་ཐུན་མིན་གྱི་མཚན་དཔེ་དང་ལྡན་པར་སྣང་བ་ལོངས་སྐུ་སྟེ། འདི་ཉིད་ལས། ཡང་དག་ཐར་པའི་གཟུགས་སྐུ་དང་། །ཞེས་སོ། །གདུལ་བྱ་མ་དག་པ་འགྲོ་བ་དྲུག་ལ་མོས་པ་དང་མཐུན་པར་སྣང་ནས་དོན་མཛད་པ་ནི་སྤྲུལ་སྐུ་སྟེ། འདི་ཉིད་ལས། འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཞེས་སོ། །དེ་ལྟར་གཟུགས་སྐུ་གཉིས་སུ་སྣང་ཡང་རང་རྒྱུད་པ་མེད་དེ། ཆོས་ཀྱི་སྐུ་ལས་མ་གཡོས་པའི་ཆོས་སྐུ་དང་། གཟུགས་སྐུ་དབྱེར་མི་ཕྱེད་པ་ནི་རྡོ་རྗེའི་སྐུ་སྟེ། འདི་ཉིད་ལས། སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཅེས་སོ། །དེ་དག་རིག་པའི་ཡེ་ཤེས་ལ། ལྷུན་གྱི་རྫོགས་པས་ཆོས་སྐུ་ལས་མ་གཡོས་བཞིན་དུ་གདུལ་བྱའི་ལས་དང་མཐུན་པར་སྣ་ཚོགས་སུ་སྣང་བ་ནི་མངོན་པར་བྱང་ཆུབ་པའི་སྐུ་སྟེ། འདི་ཉིད་ལས། མ་གཡོས་བཞིན་དུ་སྣ་ཚོགས་པའི། །དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ལས་མ་གཡོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་སོ། །གཉིས་པ་གསུང་ལྔ་ནི། སྟོན་པ་སྐུ་ལྔས་རང་གི་འཁོར་ལ་བརྡའ་སྤྲོད་པའི་བདག་ཉིད་ཅན་དེ། དེའང་ཆོས་ཉིད་སྨྲ་བརྗོད་དང་བྲལ་བ་ཉིད་བརྗོད་བྱ་ཀུན་གྱི་གཞིར་གྱུར་པའི་ཆ་ནས་ཆོས་སྐུ་སྐྱེ་མེད་དོན་གྱི་གསུང་སྟེ། འདི་ཉིད་ལས། སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །ཞེས་སོ། །མེ་ལོང་གིས་བྱད་ཀྱིས་དྲི་མ་ངོས་ཟིན་ནས་སེལ་བར་བྱེད་པ་ལྟར་སྐུའི་བརྡས་འཁོར་གྱི་བློ་ལ་དོན་འཇལ་བར་སྟོན་པ་ནི་ལོངས་སྐུ་དགོངས་པ་བརྡའི་གསུང་སྟེ། འདི་ཉིད་ལས། དེ་བཞིན་གསུང་མཆོག་མི་སྨྲ་སྟེ། །སྐུ་ཡི་ཆོས་རྣམས་འཇལ་བར་སྟོན། །ཞེས་སོ། །གང་ལ་གང་འདུལ་གྱི་སྒྲ་སྐད་དང་མཐུན་པར་དུས་གཅིག་ཏུ་ཆོས་སྟོན་པ་ནི་སྤྲུལ་སྐུ་བརྗོད་པ་ཚིག་གི་གསུང་སྟེ། འདི་ཉིད་ལས། བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་འཇལ། །ཞེས་སོ། །སྒྲ་སྐད་ཐམས་ཅད་གྲགས་སྟོང་གཉིས་སུ་མེད་པས་མཐའ་གཉིས་ལས་གྲོལ་བ་ནི་དབྱེར་མེད་རྡོ་རྗེའི་གསུང་སྟེ། སྒྲ་ཉིད་མ་ཆགས་ངང དུ་གསུངས། །གསུངས་པ་ཉིད་ན་བརྗོད་དུ་མེད། །ཅེས་སོ། །སྒྲ་ཐམས་ཅད་རང་རིགས་པའི་ངང་དུ་ལྷུན་གྱིས་གྲུབ་པས་ཅིར་ཡང་མི་འགག་པ་རིག་པ་བྱིན་རླབས་ཀྱི་གསུང་ནི་མངོན་བྱང་གི་གསུང་སྟེ། འདི་ཉིད་ལས། གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཞེས་སོ། །གསུམ་པ་ཐུགས་ལྔ་ནི། ཡེ་ཤེས་ལྔ་ལ་བྱ་སྟེ། སྟོང་པ་ཉིད་ཀྱི་ཡེ་ཤེས་ནི་ཆོས་སྐུ་རྣམ་པར་མི་རྟོག་པའི་ཐུགས་ཏེ། ལམ་རིམ་ལས། བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་ཡེ་གསལ་སྟོང་། །ཞེས་སོ། །མཉམ་པ་ཉིད་ཀྱི་ཡེ་ཤེས་ནི་ལོངས་སྐུ་མཉམ་པ་ཆེན་པོའི་ཐུགས་ཏེ། ལམ་རིམ་ལས། མཉམ་པ་ཉིད་ལས་མི་གཡོ་བ། །མཉམ་པ་ཆེན་པོ་མཆོག་གི་ཐུགས། །ཞེས་སོ། །བྱ་གྲུབ་ཡེ་ཤེས་ནི་སྤྲུལ་སྐུ་འགྲོ་བ་སྒྲོལ་བའི་ཐུགས་ཏེ། ལམ་རིམ་ལས། ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་ཀུན་སྒྲོལ་ཐུགས་ཆེན་ཡིན། །ཞེས་སོ། །སོ་སོར་རྟོགས་པའི་ཡེ་ཤེས་ནི་མི་འགྱེད་རྡོ་རྗེའི་ཐུགས་ཏེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བ། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ། །ཞེས་སོ། །མེ་ལོང་ལྟ་བུའི་ཡེ་ཤེས་ནི་མངོན་བྱང་གིས་ཅི་ཡང་སལ་ལེ་མཁྱེན་པའི་ཐུགས་ཏེ། ལམ་རིམ་ལས། ཆོས་སྤྱི་རང་མཚན་དབྱེར་མེད་ཀུན། །ཡུལ་མེད་མེ་ལོང་ལྟར་གསལ་བ། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཞེས་སོ། །བཞི་པ་ཡོན་ཏན་ལྔ་ལས། རྣམ་པར་དག་པའི་ཞིང་ཁམས་ནི། །འདི་ཉིད་ལས། ཕྱོགས་བཅུ་ཐམས་ཅད་སངས་རྒྱས་ཞིང་། །ཞེས་དང་། ཞིང་ཁམས་རྣམ་དག་བསམ་ཡས་དང་། །ཞེས་སོ། །རྒྱ་ཚད་དང་བྲལ་བའི་གཞལ་ཡས་ནི། འདི་ཉིད་ལས། རྒྱ་དང་བྲལ་བའི་གཞལ་ཡས་ཁང་། །ཞེས་སོ། །གསལ་ཞིང་དག་པའི་འོད་ཟེར་ནི། །འོད་ཟེར་འཕྲོ་བའི་ཚོགས་ཆེན་པོ། །ཞེས་སོ། །ཁྱད་པར་དུ་འཕགས་པའི་གདན་ཁྲི་ནི། །སེངྒེ་གླང་ཆེན་རྟ་རྨ་བྱ། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་སོ། །དགྱེས་དགུར་སྤྱོད་པའི་ལོངས་སྤྱོད་ནི། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་སོ། །ལྔ་པ་ཕྲིན་ལས་ལྔ་ནི། ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྱིས་གྲུབ་པ་སྟེ་རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །བྱ་བྱེད་མེད་ལས་རྣམ་བཞིར་མཛད། །མཛད་དང་མཛད་པར་བྱ་བ་མེད། །ཅེས་སོ། །གསུམ་པ་ལ། ཅུང་ཟད་བསྡུས་པ་དང་། ཤིན་ཏུ་བསྡུས་པའོ། །དང་པོ་ནི། འདི་ཉིད་ལས། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཞེས་པས་ལྔ་སྟེ། ཆེ་བའི་ཡོན་ཏན་མ་ལུས་པའི་རྟེན་བྱེད་པས་ན་སྐུ། གདུལ་བྱ་ལ་བརྡའ་སྤྲོས་པས་ན་གསུང་། ཤེས་བྱ་ཐམས་ཅད་མཁྱེན་པས་ན་ཐུགས། མངའ་ཐང་རྫོགས་པས་ན་ཡོན་ཏན། གདུལ་བྱ་འདུལ་བས་ན་ཕྲིན་ལས་ཏེ། དགོངས་འདུས་ལས། རྟེན་བྱེད་པས་ན་སྐུ་ཉིད་དོ། །གོ་བརྡའ་སྤྲོད་པས་ན་གསུང་ཉིད་དོ། །རིག་ཅིང་མཁྱེན་པས་ན་ཐུགས་ཉིད་དོ། །འདོད་དགུ་འབྱུང་བས་ན་ཡོན་ཏན་ཉིད་དོ། །བྱ་བ་བྱེད་པས་ན་ཕྲིན་ལས་ཉིད་དོ། །ཞེས་སོ། །གཉིས་པ་ནི། རྟེན་སྐུ་དང་། བརྟེན་པ་ཡེ་ཤེས་སོ། །དང་པོ་ནི། སྒྲིབ་བྲལ་གྱི་དགོངས་པ་དབྱིངས་ཡེ་ཟུང་དུ་འཇུག་པ་ཆོས་སྐུ། དེ་ཉིད་འཁོར་སྨོན་པ་རྒྱ་མཚོ་ལ་ངེས་པ་ལྔ་ལྡན་དུ་སྣང་བ་ལོངས་སྐུ། འཁོར་མོས་པ་རྒྱ་མཚོ་ལ་སྣང་བ་སྤྲུལ་སྐུ། དེ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་། དབྱེར་མི་ཕྱེད་པའི་ཆ་ནས་རྡོ་རྗེ་སྐུ་སྟེ་ལྔའོ། །དེ་གཅིག་གམ་ཐ་དད་ཅེ་ན། སྐུ་ལྔ་ལྷུན་གྲུབ་ཀྱི་བདག་ཉིད་དུ་ངོ་བོ་གཅིག་ལ་དེ་ཉིད་ཡོན་ཏན་གྱི་ལྡོག་ཆ་ནས་སྐུ་ལྔར་སྣང་བ་ཐ་དད་དེ། མཁའ་ཟླ་དང་ཆུ་ཟླ་བཞིན་ནོ། །དེ་ལྟར་ཡང་འདི་ཉིད་ལས། སྐྱེ་ཤི་མེད་པའི་གཡུང་དྲུང་སྐུ། །ཉོན་མོངས་ཀུན་གྱི་ཞིང་དུ་གནས། །ཟད་མི་ཤེས་པའི་གཏེར་དུ་འགྱུར། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་སྐུ། །དེ་ཚེ་སྐུ་ལྔ་ཀུན་ཀྱང་རྫོགས། །ཞེས་སོ། །དེ་ཡང་ཟུར་པ་རྣམས་མངོན་བྱང་དང་རྡོ་རྗེའི་སྐུ་ནི་ཡོན་ཏན་གྱི་ལྡོག་ཆ་ནས་བཏགས་པ་ཙམ་ཡིན་པའི་ཕྱིར་སྐུ་བཏགས་པ་བ་སྟེ། སྐུ་མཚན་ཉིད་པ་ནི་གསུམ་དུ་ངེས་སོ་གསུང་། ཀུན་མཁྱེན་ཀློང་ཆེན་པ་ནི། ཆོས་སྐུ་མངོན་བྱང་རྡོ་རྗེའི་སྐུ་གསུམ་སངས་རྒྱས་རང་སྣང་གིས་བསྡུས་པས་སྐུ་མཚན་ཉིད་པ་དང་། ལོངས་སྤྲུལ་གཉིས་གདུལ་བྱའི་བློས་བསྡུས་པས་བཏགས་པའོ་གསུང་ངོ་། །གཉིས་པ་དབྱེར་མེད་ལྷུན་གྲུབ་ཀྱི་ངོ་བོ་ནི། འབྲས་བུ་ཉེར་ལྔ་པོ་དེ་དག་ཀྱང་སྐུ་ལྔའི་བདག་ཉིད་རྒྱལ་བ་དྲུག་པའི་ཡོན་ཏན་གྱི་ལྡོག་པ་ནས་ཤར་ཞིང་། དེའི་ཡོན་ཏན་དུ་འདུ་བའི་ཕྱིར་གཅིག་དང་དུ་མ་ལས་གྲོལ་བའི་བདག་ཉིད་དོ། །དེ་ལྟར་ཡང་དགོངས་འདུས་ལས། སངས་རྒྱས་མཉམ་དང་དབྱིངས་སུ་གྲོལ། །དེ་ཉིད་ཆེན་པོར་ལྷུན་གྱིས་གྲུབ། །ཅེས་དང་། རིགས་གསུམ་ལས། འབྲས་བུ་ཡོན་ཏན་ལྷུན་གྲུབ་པས། །ཡིད་བཞིན་ནོར་བུ་ལྟར་སྣང་བའོ། །ཞེས་སོ། །གསུམ་པ་སའི་རྣམ་གྲངས་ནི། འདི་ཉིད་ལས། ས་ཡི་ཁྱད་པར་བཅུ་དང་གསུམ། །ཞེས་པའི་སྐབས་ཀྱི་ས་བཅུ་པ་མན་ཆད་ནི་མཚན་ཉིད་པ་སྟེ། སྤང་བྱ་སྤོང་བ་དང་གཉེན་པོ་སྐྱེ་བའི་ས་ཡིན་པའི་ཕྱིར། གསུམ་པོ་ནི་བཏགས་པ་བ་ནི། མཐར་ཐུག་འབྲས་བུ་སངས་རྒྱས་ཀྱི་ས་གཅིག་གི་ངོ་བོ་ལ་སྐུ་གསུམ་གྱི་ཆ་ལས་ས་གསུམ་དུ་མིང་བཏགས་པའི་ཕྱིར། དེའང་ལམ་རིམ་ལས། མཐར་ཐུག་ས་གསུམ་ཆ་ལས་བརྗོད། །ཅེས་དང་། ཧེ་རུ་ཀ་གལ་པོ་ལས། དབྱིངས་ལས་ཡེ་ཤེས་ཤར་བ་ཀུན་ཏུ་འོད། །པདྨའི་སྤྱན་འདྲ་མི་འགག་ལོངས་སྤྱོད་རྫོགས། །ཡི་གེ་འཁོར་ལོ་གདུལ་བྱར་སྤྲུལ་པ་འབྱེད། །དེ་བཞིན་གཤེགས་པའི་ས་ཞེས་བྱ་བའོ། །ཞེས་སོ། །དེས་ན་ངོ་བོ་ལ་ཁྱད་པར་མེད་ཀྱང་མཚོན་ཚུལ་ལ་ཁྱད་པར་ཡོད་དེ། དུས་ཐམས་ཅད་དུ་ཆོས་ཉིད་མཐའ་མ་སྒྲིབས་པར་གསལ་བའི་དོན་མངོན་དུ་བྱས་པས་ཀུན་ཏུ་འོད་དེ་ཡེ་ཤེས་བླ་མའི་ས་ཞེས་ཀྱང་བྱའོ། །དེའི་ཚེ་ཐབས་སྙིང་རྗེ་ཆེན་པོས་གཞན་དོན་མཛད་ཀྱང་དམིགས་པ་མེད་པའི་ཤེས་རབ་ཀྱི་གདེངས་ཀྱིས་ཉེས་སྐྱོན་གྱིས་མ་གོས་པར་མཁྱེན་པས་པདྨ་ཅན། དེའི་ཚེ་སྤྱོད་ཡུལ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་ལ་མ་ཞེན་པས་ཡེ་ཤེས་འཁོར་ལོ་ཚོགས་ཆེན་གྱི་ས་སྟེ། འདི་ཉིད་ལས། ཐབས་དང་ཤེས་རབ་ས་ཡི་མཆོག །ཞེས་པས་པདྨ་ཅན་དང་། མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜལ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཞེས་པས་འཁོར་ལོ་ཚོགས་ཆེན་ཏེ་ཐུན་མོང་དུ་མ་གྲགས་པའི་ས་གཉིས་བསྟན་ནོ། །འོ་ན་བླ་མ་གོང་མ་དག །ཀུན་ཏུ་འོད་ཕར་ཕྱིན་ཐེག་པའི་སངས་རྒྱས་ཀྱིས། པདྨ་ཅན་མ་ཧཱ་ཡོ་གའི་ཡི་གེ་འཁོར་ལོ་ཚོགས་ཆེན་ཨ་ནུ་ཡོ་གའི་ས། ཞེས་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་དག་ནི་སའི་དབྱེ་ཚུལ་འདི་དང་ཐ་དད་པ་གཞན་ཏེ། འདིར་བཤད་པར་བྱ་བ་མ་ཡིན་ནོ། །གལ་ཏེ་ཡིན་ན། མཐར་ཐུག་ས་གསུམ་ཆ་ལས་བརྗོད། ཅེས་པའི་སྐབས་ནས་བསྟན་པའི་ཆོས་སྐུའི་ས་ཡེ་ཤེས་བླ་མའམ་ཀུན་ཏུ་འོད་དང་། ཕར་ཕྱིན་ཐེག་པའི་བཅུ་གཅིག་པ་ཀུན་ཏུ་འོད་གཉིས་གཅིག་པར་འགྱུར་ལ་དེ་ལྟར་ན། ལམ་རིམ་ལས། ལམ་གྱི་རྩོལ་བས་ངལ་བ་རྣམས། །བྲོད་པ་སྐྱེ་ཕྱིར་ཀུན་ཏུ་འོད། །རྡོ་རྗེ་འཛིན་པ་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །ཅེས་པའི་རྒྱུའི་ཐེག་པའི་ཀུན་ཏུ་འོད་དང་། མཐར་ཐུག་གི་ས་གསུམ་གྱི་ནང་ཚན་གྱི་ཀུན་ཏུ་འོད་གཅིག་པར་ཐལ། དམ་བཅའ་དེ་འཐད་པའི་ཕྱིར། འདོད་མི་ནུས་ཏེ། སྔ་མའི་འཕྲོས་ལས། རང་ས་ཐོབ་ལ་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །ཞེས་རྒྱུའི་ཀུན་ཏུ་འོད། ཀྲྀ་ཡའི་རྡོ་རྗེ་འཛིན་པའི་ས། ཡོ་གའི་སྟུག་པོ་བཀོད་པའི་ས། མཐར་ཐུག་མ་ཧཱ་ཡོ་གའི་ས་རྣམས་ཀྱི་འབྲས་བུ་ལ་ཁྱད་ཆེ་བས་གཞན་དག་ཁྱད་མེད་ཅེས་སྨྲ་བ་ནི་མུན་སྤྲུལ་ལོ་ཞེས་བཞེད་པའི་ཕྱིར་རོ། །དེ་བས་ན་རྒྱུའི་ཐེག་པའི་ཀུན་ཏུ་འོད་སྔགས་ལམ་གྱི་ལྷུན་གྲུབ་རིག་འཛིན་གྱི་ས་ཡིན་པས། ལམ་གྱི་ཆོས་སྐུ་ཞེས་ཀྱང་མིིང་དུ་བཏགས་ཏེ། དབུ་མའི་མཁན་པོ་ཨཱརྱ་དེ་བས། རྒྱུ་ཡིས་ཐེག་པའི་ཀུན་ཏུ་འོད། །ཐབས་ཆེན་ལམ་གྱི་ཆོས་སྐུ་སྟེ། །ཡང་དག་རྫོགས་པའི་སངས་རྒྱས་ལ། །རྒྱ་མཚོ་རླབས་བཞིན་ཤུགས་ཀྱིས་འཆར། །ཆུ་ཟླའི་གཟུགས་ལྟར་འགྲོ་འོང་མེད། །སྨོན་ལམ་སྟོབས་ལ་རག་མ་ནུས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། དབུ་མས་བསྐལ་པར་སྦྱངས་པས་གྲུབ་པའི་ཀུན་ཏུ་འོད་སྨོན་ལམ་དང་སྙིང་རྗེའི་སྟོབས་ཀྱིས་གཟུགས་སྐུ་འཆར་བ་དང་། ཐབས་ཆེན་པོ་གཉིས་མེད་ཀྱི་སྐུ་ལྔ་མ་བཙལ་རྫོགས་པ་ནི། འཁོར་བ་དང་མྱ་ངན་ལས་འདས་པའི་ཆོས་རིམ་གྱི་བདག་ཉིད་དུ་བཞུགས་པས་རྒྱ་མཚོ་རླབས་བཞིན་སྤྲུལ་པ་རང་ལ་འཆར་བས་ག་ལ་བརྡོ་སྟེ། ཀུན་ཏུ་འོད་ནི་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །གཉིས་པ་གཞན་དོན་མཛད་པ་ལ། གདུལ་བྱ་ལ་ཐུགས་རྗེས་གཟིགས་ཚུལ། གཟིགས་ནས་ཐུགས་རྗེ་སྐྱེ་ཚུལ། སྐྱེས་ནས་འགྲོ་དོན་མཛད་ཚུལ་ལོ། །དང་པོ་ལ། ཡེ ཤེས་རྒྱུན་ཆད་ནས་མི་གཟིགས་པར་འདོད་པའི་ལུགས་དང་རྒྱུན་དང་བཅས་ཏེ་གཟིགས་པར་འདོད་པའི་ལུགས་དང་མཐའ་གཉིས་དང་བྲལ་བས། ཡུལ་མེད་རང་གསལ་དུ་གཟིགས་པར་འདོད་པའི་ལུགས་སོ། །དང་པོ་ལ། འདོད་པ་བརྗོད་དང་། དེ་དགག་པའོ། །དང་པོ་ནི། སྤྱིར་སངས་རྒྱས་ལ་མཚན་ཉིད་པ་དང་། བཏགས་པ་གཉིས་ལས། མཚན་ཉིད་ལ་ནི་ཆོས་སྐུ་སྟེ། དཔེར་ན་བསྲེག་བྱ་ཟད་པའི་སྲེག་བྱེད་མེའི་རྒྱུན་མི་གནས་པ་ལྟར། སྒྲིབ་པ་ཕྲ་རག་པ་ཐམས་ཅད་སྤངས་པའི་ཤུལ་དུ། སྤོང་བྱེད་གཉེན་པོའི་ཡེ་ཤེས་ཀྱང་དབྱིངས་སུ་ཞི་སྟེ། རྟེན་དང་བརྟེན་པའི་ཡེ་ཤེས་རྒྱུན་ཆད་པའི་ཕྱིར་གཟིགས་བྱ་གཟིགས་བྱེད་ཀྱི་ཐ་སྙད་ལས་གྲོལ་བས་མི་གཟིགས་ལ། བཏགས་པ་བ་གཟུགས་སྐུ་གཉིས་ནི་སྔོན་གྱི་བསོད་ནམས་ཀྱི་ཚོགས་མི་འགག་པའི་འབྲས་བུའམ་སྨོན་ལམ་གྱི་འཕེན་པ་ཙམ་གྱིས་གདུལ་བྱ་ལ་སྣང་བའོ་ཟེར་རོ། །གཉིས་པ་ནི། དེ་ལྟར་ན་ཡེ་ཤེས་དེ་ཉིད་རང་ལྡོག་ནས་ཆད་དམ། གཉེན་པོ་གཞན་ཞིག་གིས་ཆད། དང་པོ་ལྟར་ན། སངས་རྒྱས་ཀྱི་ས་ནས་སེམས་ཅན་གྱི་དོན་ལ་གཟིགས་པ་འཇུག་པའི་ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་མེད་པར་ཐལ། ཡེ་ཤེས་རྒྱུན་ཆད་པའི་ཕྱིར། རྟགས་ཁས། འདོད་མི་ནུས་ཏེ། ཐུན་མོང་གི་ལུང་ལས་ཀྱང་། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་འཇུག་པའི་ཕྱིར། །ཞེས་དང་། སྡུད་པ་ལས། ཡེ་ཤེས་མེད་ན་བྱང་ཆུབ་འཕེལ་མེད་འགྲིབ་པ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་སོགས་ལུང་དུ་མས་གནོད་དོ། །གཉིས་པ་ལྟར་ན། རྡོ་རྗེ་ལྟ་བུའི་ཏིང་ངེ་འཛིན་གྱི་གཉེན་པོ་དེས་རྒྱུན་བཅད་དམ་གཞན་ཞིག་གིས་བཅད་ཧ་ཅང་ཐལ་བས་བག་ཡོད་པར་མཛོད་ཅིག །གཉིས་པ་ལ། འདོད་པ་བརྗོད་པ་དང་། དེ་དགག་པའོ། །དང་པོ་ནི། སངས་རྒྱས་ཀྱི་ས་ན་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་སྤངས་པའི་ལག་རྗེས་སུ་ཡེ་ཤེས་རྒྱུན་དང་བཅས་པ་ཡོད་དེ། དེ་ལས་ཀྱང་ཀུན་རྫོབ་མཁྱེན་པའི་ཡེ་ཤེས་ཀྱིས་ཡུལ་དང་ཡུལ་ཅན་དུ་གཟིགས་ཏེ། སྔར་རྒྱུན་ཆད་པ་བཀག་པའི་ལུང་གིས་གྲུབ་བོ་ཟེར། གཉིས་པ་ནི། དེ་ལྟར་ན། སངས་རྒྱས་པའི་ཡེ་ཤེས་དེ་ཉིད་འཁྲུལ་ཤེས་སུ་ཐལ། ཀུན་རྫོབ་ཡུལ་དུ་བྱེད་པའི་ཕྱིར། སོ་སྐྱེའི་ཤེས་པ་བཞིན་ནོ་བྱས་པ་ལ། ཁོ་ན་རེ་སྣང་ཙམ་ཡུལ་དུ་བྱེད་ཀྱང་ཞེན་ཡུལ་དུ་མི་འཛིན་པས་སོ་ཟེར། འོ་ན་སངས་རྒྱས་པའི་ཡེ་ཤེས་དེ་སྤངས་པ་ཕྱོགས་གཅིག་པ་ཐལ། ཞེན་ཡུལ་ལ་འཁྲུལ་པའི་ལོག་ཤེས་སྤངས་ཀྱང་། སྣང་ཡུལ་ལ་འཁྲུལ་པའི་ལོག་ཤེས་མ་སྤངས་པའི་ཕྱིར། འདོད་ན། མདོ་ལས། ཡེ་ཤེས་དམ་པ་བདག་མེད་པས། །སྣང་བ་མེད་པས་མ་གཟིགས་སོ། །ཞེས་གསུངས་པ་དང་འགལ་ལོ། །གསུམ་པ་ལ། དངོས་དང་རྩོད་པ་སྤང་བའོ། །དང་པོ་ནི། ཡེ་ཤེས་རྒྱུན་ཆད་ཅེས་བཀུར་པ་མི་འདེབས། མ་ཆད་ཅེས་སྒྲོ་མི་འདོགས། དེ་གཉིས་ཆར་གྱི་མཐའ་དང་བྲལ་བའི་ངོ་བོ་ཉིད་ཀྱི་ཚུལ་གྱིས་རྟོག་མེད་རང་གསལ་དུ་གཟིགས་ཏེ། འདི་ཉིད་ལས། སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ཞེས་དང་། ཏིང་འཛིན་རྒྱལ་པོ་ལས། མྱ་ངན་འདས་པའི་ཆོས་ལ་ཆོས་མེད་དེ། །གང་ཕྱིར་དེ་མེད་ནམ་ཡང་མེད་མི་འགྱུར། །རྟོགས་ཅན་དག་ནི་ཡོད་དང་མེད་ཅེས་བྱ། །དེ་ལྟར་བརྟགས་པས་སྡུག་བསྔལ་ཞི་མི་འགྱུར། །ཞེས་སོ། །གཉིས་པ་ནི། ཡུལ་ཡོད་མེད་དབྱེར་མེད་ཀྱི་བརྟགས་པ་གསུམ་ལས། ཡུལ་དུ་བྱས་ནས་གཟིགས་ན། སངས་རྒྱས་ཀྱི་ཡེ་ཤེས་གཟུགས་འཛིན་ཅན་དུ་གྱུར་ཏེ། ཡུལ་དང་ཡུལ་ཅན་འབྱུང་བའི་ཕྱིར། འདོད་ན། རྒྱུད་དག་པ་མ་ཡིན་པར་ཐལ། གཟུགས་འཛིན་ཡོད་པའི་ཕྱིར། སེམས་ཅན་བཞིན་ནོ། །ཡང་ཡུལ་དུ་མ་བྱས་པར་གཟིགས་ན། མིག་གིས་ཀྱང་སྒྲ་ཐོས་པར་ཐལ། དེའི་ཕྱིར། འདོད་ན་གསལ་ལོ། །གཞན་ཡང་སངས་རྒྱས་ཉིད་འཁྲུལ་པར་ཐལ། མེད་པ་གཟིགས་པའི་ཕྱིར། མིག་སེར་ཅན་གྱི་དུང་གི་ཁ་དོག་བཞིན་ནོ། །དབྱེར་མེད་དུ་གཟིགས་ཟེར་བའང་མི་འཐད་དེ། གཟིགས་བྱ་གཟིགས་བྱེད་དུ་འགལ་བའི་ཕྱིར། མིག་གིས་མིག་བཞིན་ནོ་ཟེར། ལན་དུ། རྗེ་སྒྲོ་ཕུག་པའི་ཞལ་ནས། སྐད་དོག་པར་ཁྱེར་ན། ཡུལ་ཡོད་མེད་ཀྱི་སྒྲོ་བསྐུར་སྤངས་ནས་ཆོས་ཐམས་ཅད་མེ་ལོང་ནང་གི་གཟུགས་བརྙན་ལྟར་རྟོག་མེད་རང་གསལ་དུ་གཟིགས་ཏེ། རྒྱས་པ་ལས། རྣམ་རྟོག་མི་མངའ་ཅིར་ཡང་སལ་ལེ་མཁྱེན། །ཞེས་གསུངས་པའི་ཕྱིར། སྐད་ཡངས་པར་ཁྱེར་ན། ཡུལ་དུ་བྱས་ནས་ཀྱང་གཟིགས་ཏེ། དུས་གསུམ་གྱིས་བསྡུས་པའི་ཆོས་དང་སེམས་ལས་བྱུང་བ་ཐམས་ཅད་ལག་མཐིལ་དུ་སྐྱུ་རུ་ར་བཞག་པ་བཞིན་དུ་གསལ་མཁྱེན་མ་འགགས་པར་སྣང་བའི་ཕྱིར། ཡང་ཡུལ་མེད་དུའང་གཟིགས་ཏེ། ཇི་ལྟར་སྣང་ཡང་བདེན་པའི་ངོ་བོས་སྟོངས་པའི་ཕྱིར། དབྱེར་མེད་དུ་གཟིགས་ཏེ། ཤེས་བྱའི་གཤིས་ལ་ཐུགས་རྗེ་སྐྱེ་བའི་ཡུལ་སེམས་ཅན་དང་། སྐྱེ་མཁན་རྣམ་མཁྱེན་གྱི་སངས་རྒྱས་གཉིས་དམིགས་སུ་མེད་པའི་ཕྱིར། དེ་ཐུགས་རྗེར་ཅིར་འགྱུར་ཞེ་ན། དེ་ནི་དམིགས་པ་མེད་པའི་སྙིང་རྗེ་སྟེ། སྡུག་བསྔལ་མཐའ་དག་ལས་སྐྱོབ་པའི་ཕྱིར་གསུངས། འོ་ན་ཐུགས་རྗེས་གང་ལ་གང་ལྟར་གཟུགས་ཏེ། གཟུགས་པའི་ཐ་སྙད་མི་འཐད་དོ་ཟེར་ན། ལན་ནི། འཁྲུལ་པ་ཅན་གྱི་བློ་ངོ་ན་སྣང་བ་ལྟར་མ་འགགས་པར་གཟིགས་པས་སྐྱོན་གཉིས་པ་མེད་ཅིང་། ཇི་ལྟར་སྣང་ཡང་གཤིས་ལ་མ་གྲུབ་པར་མཁྱེན་པས་སྐྱོན་དང་པོ་ལས་གྲོལ་ལོ། །དེ་གཉིས་པོས་རྩོད་པ་གསུམ་པའང་ཞོར་ལ་ཁེགས་ཏེ། གཤིས་ལ་གདུལ་བྱ་འདུལ་བྱེད་དབྱེར་མེད་དུ་གཟིགས་ལ། དེ་ལྟར་མ་རྟོགས་པ་རྣམས་འཁོར་བའི་ཆུ་བོ་བཞིས་རྒྱུན་ཕྱོགས་སུ་ཁྱེར་བས་སྡུག་བསྔལ་བའང་གཟིགས་ཤིང་དེ་ལས་གྲོལ་བའི་ཐབས་ཀྱང་མཁྱེན་ནས་སྟོན་པར་མཛད་པ་ཡིན་ཏེ། དཔེར་ན་སྐྱེས་བུ་མངོན་ཤེས་ཅན་གཅིག་གི་དྲུང་ན། སྐྱེས་བུ་གཞན་ཞིག་གཉིད་དུ་སོང་བའི་རྨི་ལམ་དུ་སྡུག་བསྔལ་ཉམས་སུ་མྱོང་བ་རྨི་བ་ན། མངོན་ཤེས་མཁན་དེས་མཁྱེན་ནའང་རང་རྒྱུད་ལ་བདེན་ཞེན་མི་འབྱུང་ཞིང་། གཉིད་སད་ན་སྡུག་བསྔལ་དེ་ལས་གྲོལ་བ་ཡང་མཁྱེན་པ་བཞིན་ནོ། །འདིར་ཡང་གཟིགས་ལུགས་རྗེ་སྒྲོ་ཕུག་པའི་དགོངས་པས་གསུམ་སྟེ། དབྱིངས་ལས་མི་གཞན་པའམ་ཇི་ལྟ་བ་མཁྱེན་པའི་ཡེ་ཤེས་གཟིགས་ཚུལ་དབྱིངས་ཡེ་ཤེས་དབྱེར་མེད་དམ་ཇི་ལྟ་ཇི་སྙེད་དབྱེར་མེད་དུ་མཁྱེན་པའི་ཡེ་ཤེས་ཀྱིས་གཟིགས་ཚུལ་གསུམ་དུ་བཞེད་དེ། གཉིས་པ་གཟིགས་ནས་ཐུགས་རྗེ་སྐྱེ་ཚུལ་ནི། རིམ་གསུམ་ལས། རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་བྱུང་བར་སྣང་། །ཞེས་པས་བཞི་སྟེ། རྟག་པ་རྒྱུན་གྱི་ཐུགས་རྗེ་ཆུ་བོའི་རྒྱུན་ལྟ་བུ་དང་། རང་བཞིན་ཤུགས་ཀྱི་ཐུགས་རྗེ་ཉི་མ་དང་འོད་ཟེར་ལྟ་བུ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་སྙིང་རྗེ་ཅན་ལ་དབུལ་པོས་སློང་བ་ལྟ་བུ་དང་། ཡུལ་དང་འཕྲད་པའི་ཐུགས་རྗེ་འཛངས་པ་སྤྱོད་ལོག་བྱེད་པ་ལྟ་བུའོ། །གསུམ་པ་སྐྱེས་ནས་འགྲོ་དོན་མཛད་ཚུལ་ལ། རྟེན་ཅན་གྱིས་དོན་བྱེད་པར་འདོད་པ། རྟེན་མེད་ཀྱིས་དོན་བྱེད་པར་འདོད་པ། གནས་ལུགས་ངོ་བོ་ཉིད་ཀྱིས་དོན་བྱེད་པར་འདོད་པའོ། །དང་པོ་ནི། བྲམ་ཟེ་མཆོད་སྡོང་སྒྲུབ་པ་ལྟ་བུ་སྟེ། དཔེར་ན་རིགས་སྔགས་གྲུབ་པའི་བྲམ་ཟེ་ཞིག་གིས་རིན་པོ་ཆེའི་མཆོད་སྡོང་བསྒྲུབས་ནས་བཞག་པས་རང་ཉིད་ཚེའི་དུས་བྱས་ཀྱང་རྗེས་འཇུག་རྣམས་ཀྱི་འདོད་པ་མཆོད་སྡོང་གིས་སྐོང་བར་བྱེད་པ་ལྟར། སྔོན་ལམ་དུ་ཚོགས་བསགས་པའི་འབྲས་བུ་མཐར་ཐུག་སངས་རྒྱས་ཀྱི་དགོངས་པ་ཆོས་སྐུ་སྒྲིབ་བྲལ་གྱི་ཡེ་ཤེས་དེ་ཉིད་ལ་བརྟེན་ནས། གདུལ་བྱ་ལས་དག་པ་ལ་མཛད་པ་གཟུགས་སྐུ་གཉིས་སུ་སྣང་ནས་དོན་མཛད་པར་བཞེད་བ་ནི། རྒྱ་གར་ན་སློབ་དཔོན་སེང་གེ་བཟང་པོ་དང་། བོད་ན་འབྲིང་མཚམས་ཀྱི་ཞང་ཤེས་རབ་བླ་མ་ལ་སོགས་པའི་དགོངས་པའོ། །གཉིས་པ་ནི། དྲང་སྲོང་དམོད་པ་གྲུབ་པ་ལྟ་བུ་སྟེ། དཔེར་ན་དམོད་པ་གྲུབ་པའི་དྲང་སྲོང་གིས་དམོད་པ་བསྒྲུབས་ནས་བཞག་པས་རང་ཚེའི་དུས་བྱས་ཀྱང་གཞན་སྣང་དུ་ཁོའི་དམོད་པ་ཇི་ལྟ་བར་འབྱུང་བ་བཞིན་མཐར་ཐུག་སངས་རྒྱས་ཀྱི་ས་ན་ཆོས་ཀྱི་དབྱིངས་རྣམ་པར་དག་པ་ཙམ་ལས་རང་རྒྱུད་ཀྱིས་བསྡུས་པའི་ཡེ་ཤེས་མ་གྲུབ་ཀྱང་སྔོན་ལམ་དུ་ཚོགས་བསགས་ཞིང་སྨོན་ལམ་བཏབ་པའི་མཐུས་གདུལ་བྱ་རང་གི་བློ་སྣང་དུ་གཟུགས་སྐུ་གཉིས་སུ་སྣང་ནས་དོན་བྱེད་པར་བཞེད་པ་ནི། རྒྱ་གར་ན་སློབ་དཔོན་ཀླུ་སྒྲུབ་དང་། བོད་ན་རོང་ཟོམ་ཆོས་ཀྱི་བཟང་པོའི་དགོངས་པའོ། །གསུམ་པ་ནི། ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་སྟེ། དཔེར་ན་ནོར་བུ་རིན་པོ་ཆེ་བྱས་ཤིང་མཆོད་ན་རང་རང་གི་བསོད་ནམས་དང་མཚམས་པའི་དགོས་འདོད་འབྱུང་མོད་ཀྱི། འོན་ཀྱང་རིན་པོ་ཆེ་ལ་རྩོལ་རྟོག་དང་ཉེ་རིང་མེད་པ་ལྟར། མཐར་ཐུག་རྒྱལ་བའི་དགོངས་པ་ཡོད་མེད་ཀྱི་མཐའ་ལས་གྲོལ་བའི་ཕྱིར། མཐའི་སྒྲོ་བསྐུར་དང་བྲལ་བའི་ངོ་བོ་ཉིད་ཀྱི་སྐུ་དེ་ཉིད་གདུལ་བྱའི་བློ་དང་མཚམས་པར་སྣ་ཚོགས་སུ་སྣང་ནས་དོན་མཛད་པར་བཞེད་པ་ནི་རྒྱའི་མཁས་པ་ཆེན་པོ་ཤྲཱི་སེདྷ་དང་། བོད་ན་ཟུར་ཆུང་ཤེས་རབ་གྲགས་པ་ལ་སོགས་པའི་དགོངས་པའོ། །མདོར་ན་རྒྱས་པ་ལས། ཐུགས་རྗེ་ཆེན་པོའི་བྱིན་བརླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང་། །ལྷུན་གྱིས་གྲུབ་པའི་ཕྲིན་ལས་ཀྱི། །གདུལ་བྱ་རྣམས་ནི་ཆུད་མ་ཟོས། །ངན་སོང་སྦྱོང་ཞིང་བྱང་ཆུབ་ཞིང་། །ཡེ་ཤེས་ཚོགས་རྫོགས་ཀུན་ཏུ་སྟོན། །ཞེས་གསུངས་སོ། །འབྲས་བུའི་དོན་བཤད་ཟིན་ཏོ། ༈ །གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་ནི། ལྟ་བ་སྤྱོད་པ་དཀྱིལ་འཁོར་དབང་། །དམ་ཚིག་ཕྲིན་ལས་སྒྲུབ་པ་དང་། །ཏིང་འཛིན་མཆོད་པ་སྔགས་ཕྱག་རྒྱ། །ཕྱི་མ་གཉིས་སྡོམས་བཅུ་རུ་འགྱུར། །ཞེས་པ་ལྟར་བཅུ་ལས། དང་པོ་དེ་ཁོ་ན་ཉིད་ལྟ་བ་ལ། དགོས་བྱེད། ངོ་བོ། །མཚན་ཉིད། རྣམ་གྲངས་མ་རྟོགས་པའི་སྐྱོན། རྟོགས་པའི་ཡོན་ཏན་དང་དྲུག །དང་པོ་ནི། ཐུགས་ཐིག་ལས། གཞན་པའི་ལྟ་དམིགས་གསལ་བ་དང་། །མཆོག་གི་སྤྱན་རབ་མངོན་བྱའི་ཕྱིར། །ཞེས་པས་གཞན་སེལ་དང་། དོན་དུ་གཉེར་བའི་དགོས་པ་གཉིས། དང་པོ་ནི། འདི་ཉིད་ལས། མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །ཞེས་པས་མ་རྟོགས་པ། མུ་སྟེགས་ཕྱལ་པ་དང་རྒྱང་འཕེན། ལོག་པར་རྟོགས་པ་མུ་སྟེགས་རྟག་ཆད་གཉིས། ཕྱོགས་རྟོགས་ཉན་རང་གཉིས། ཡང་དག་ཉིད་མ་རྟོགས་པ་དབུ་སེམས་གཉིས་ཀྱི་ལྟ་བ་སེལ་ལོ། །གཉིས་པ་ནི། ཆོས་ཉིད་ཡང་དག་པར་རྟོགས་པའི་དགོས་པ། ལས་གང་ལ་སྤྱད་ཀྱང་མི་འཆིང་བའི་དགོས་པ། སངས་རྒྱས་ཉིད་ཐོབ་པའི་དངོས་རྒྱུར་གྱུར་པའི་དགོས་པའོ། །དང་པོ་ནི་རྒྱས་པ་ལས། ཆོས་ཀྱི་རང་བཞིན་ཇི་ལྟ་བུ། །བདག་གིས་ཡང་དག་རྟོགས་པར་བྱ། །ཞེས་སོ། །གཉིས་པ་ནི། དེ་ལས། ཐབས་དང་ཤེས་རབ་རྟོགས་པ་ཡིས། །དུག་གསུམ་དུག་ལྔས་གནོད་མི་འགྱུར། །ཞེས་སོ། །གསུམ་པ་ནི། དེ་ལས་རང་རིག་ཡེ་ཤེས་དོན་རྟོགས་ན། །སྐྱེ་ཤི་མེད་པའི་གཡུང་དྲུང་ཐོབ། །ཅེས་སོ། །དེ་ཡང་དབུ་སེམས་གཉིས་ཀྱིས་ཡང་དག་ཉིད་མ་རྟོགས་པའི་ཚུལ་ཅུང་ཟད་བརྗོད་ན། དེ་ལ་སེམས་ཙམ་པ་དང་དབུ་མ་པའི་ལུགས་གཉིས་ལས། དང་པོ་ལའང་། དཀར་དམར་སྣ་ཚོགས་སུ་སྣང་བ་ཤེས་པ་དང་བཅས་པ་འདི་ཐམས་ཅད་རང་གི་སེམས་ཀྱི་རྣམ་པར་བདེན་པར་འདོད་པ་སེམས་ཙམ་རྣམ་བདེན་པ་དང་། ཤེས་པའི་རྣམ་པར་རྫུན་པར་འདོད་པ་སེམས་ཙམ་རྣམ་བརྫུན་པ་གཉིས་ལས། དང་པོ་ནི། དོན་དུ་སྣང་བ་རང་གི་ཤེས་པའི་རྣམ་པ་ཕྱིར་ཤར་བ་ཙམ་སྟེ། དཔེར་ན། རྫིང་འགྲམ་གྱི་ནོར་བུའི་ཤིང་གི་ཡལ་ག་ལ་བཏག་པའི་ནོར་བུ་ཀེ་ཀེ་རུའི་གཟུགས་བརྙན་ཆུ་ནང་དུ་ཤར་བ་ན་ནོར་བུའི་རྣམ་པ་ཕྱི་རོལ་དུ་ཤར་བ་བཞིན་ནོ་ཞེས་འདོད་དོ། །འདི་ལ་དབྱེ་ན། རྣམ་པའི་གྲངས་དེ་སྙེད་ལ་ཤིས་པའི་གྲངས་ཀྱང་དེ་སྙེད་དུ་འདོད་པ་དང་། རྣམ་པ་དང་ཤེས་པ་སྒོ་ང་བཀས་པ་ལྟར་འདོད་པ་དང་། རྣམ་པ་དང་ཤེས་པ་སྣ་ཚོགས་གཉིས་མེད་དུ་འདོད་པ་གསུམ་ལས། དང་པོ་ནི། སྒྲ་ཐོས་པའི་དུས་ན་སྒྲ་འཛིན་གྱི་ཤེས་པ་གཅིག་ཏུ་སྐྱེ་ཡི། གཟུགས་ལ་སོགས་པ་འཛིན་པའི་ཤེས་པ་མི་སྐྱེ་བར་ལྟར། ཡུལ་གང་ལ་འཇུག་པ་དེའི་ཤེས་པ་སྐྱེ་ཡི་གཞན་མི་སྐྱེ་བས། རྣམ་པའི་གྲངས་ཇི་སྙེད་པའི་ཤེས་པ་འདོད་པའོ། །གཉིས་པ་ནི། ཕྱི་རོལ་སྣ་ཚོགས་སུ་སྣང་བའང་ཤེས་པ་ལས་བྱུང་ལ། དེ་འཛིན་པའི་ཤེས་པའང་སེམས་ལས་བྱུང་བས། སྒོ་ང་བཀས་པ་ལྟར་རྣམ་པ་དང་ཤེས་པ་ཡུལ་ཡུལ་ཅན་སེམས་གཅིག་ལ་ཤར་བ་སྟེ། དེ་ལྟ་ཡུལ་འཛིན་པ་ན་ཕྱི་རྣམ་པའི་ཤེས་པ་གཅིག་པ་ནང་འཛིན་བྱེད་ཀྱི་ཤེས་པ་གཅིག་ཤར་བ་ཡང་། ཐོག་མ་མེད་པའི་བག་ཆགས་ཀྱིས་དེ་ལྟར་གཉིས་སུ་སྣང་ཡང་། རང་རིག་པ་གཅིག་པུ་ལས་གཞན་དུ་གྲུབ་པ་མེད་པས་སྒོ་ང་བཀས་པ་ལྟ་བུའོ། །འོ་ན་ཕྱི་རྣམ་པའི་ཤེས་པ་གཅིག་ལ་དེའི་ཚེ་འཛིན་པའི་ཤེས་པ་གཅིག་བྱུང་དུས་རྟོག་པ་གཉིས་ཅིག་ཆར་འགྱུར་རོ་ཞེ་ན། མི་འགྱུར་ཏེ། རྣམ་པའི་ཤེས་པ་དེ་རྟོག་མེད་ཡིན་པའི་ཕྱིར་རོ་ཞེས་འདོད་དོ། །གསུམ་པ་ནི། ཕྱི་ཡུལ་གྱི་རྣམ་པ་སྣ་ཚོགས་སུ་སྣང་ཡང་། ནང་འཛིན་བྱེད་ཀྱི་ཤེས་པ་གཅིག་གིས་ཤེས་ཏེ། མཁར་གྱི་ནང་དུ་སྤྲེའུ་གཅིག་འཇུག་པ་མྱུར་བས་གློ་སྐར་བཞིར་སྐེ་རིབ་རིབ་བྱུང་ནས་ལྟ་བ་ལྟར། སྒོ་ལྔ་ལ་ཤེས་པ་གཅིག་གིས་ཞུགས་ནས་ཡུལ་རིག་པའོ། །རིག་དུས་ནའང་། རྣམ་པ་དང་། ཤེས་པ་གཉིས་ཀ་སེམས་གཅིག་གི་རང་བཞིན་དུ་ཐ་མི་དད་དེ། རྨི་ལམ་གྱི་སྣང་བ་དང་། འཛིན་བྱེད་རང་དུ་སྣང་བ་གཉིས་ཀ་ཡང་གཉིད་གཅིག་གི་ཤེས་པར་ཐ་མི་དད་པ་བཞིན་ནོ་ཞེས་འདོད་དོ། །གཉིས་པ་རྣམ་རྫུན་པ་ནི། ཕྱི་དོན་གྱི་རྣམ་པར་ཤེས་པ་ལ་འཁྲུལ་པར་སྣང་བའི་བག་ཆགས་རྫུན་པ་བ་ཡིན་གྱི། ཤེས་པར་བདེན་པ་མ་ཡིན་ལ། དེ་འཇལ་བྱེད་ཀྱི་ཤེས་པ་ཡང་རྫུན་པ་བས་གཞལ་གྱི། མྱོང་བ་བདེན་པ་བས་གཞལ་བ་ནི་མེད་དོ། །ཡུལ་ཤེས་གཉིས་ཀ་ཡང་འཁྲུལ་སྣང་རྫུན་པ་བའི་རང་བཞིན་ཙམ་དུ་འདོད་དོ། །འདི་ལ་དབྱེ་ན། དྲི་བཅས་དག་པ་བར་འདོད་པ་དང་། དྲི་མེད་དག་པ་བར་འདོད་པ་གཉིས་ལས། དང་པོ་ནི། ད་ལྟའི་རྣམ་པ་སྣ་ཚོགས་སུ་སྣང་བ་དང་། དེ་འཇལ་བའི་ཤེས་པ་གཉིས་ཀ་བློའི་དྲི་མ་ཉིད་སྣང་ཙམ་ལས། དོན་དམ་པར་གཉིས་སུ་མེད་པའི་ཡེ་ཤེས་ཁམས་ཀྱི་ཡོན་ཏན་དང་བཅས་པ་ཙམ་ཞིག་ཡོད་ཀྱི། རྣམ་ཤེས་སུ་གྲུབ་པ་ནི་ཅི་ཡང་མེད་དོ། །སངས་རྒྱས་ཀྱི་ཆོས་སྐུ་ལྷག་མ་མེད་པ་ནི། གཉིས་སུ་མེད་པའི་ཡེ་ཤེས་ཉིད་དོ། །དྲི་མ་མེད་པའི་དེ་བཞིན་ཉིད་ཡིན་ལ། ལྷག་བཅས་ཀྱི་གནས་སྐབས་ན་བག་ལ་ཉལ་གྱི་དྲི་མ་ཅུང་ཟད་ཡོད་པས། འཁྲུལ་བར་སྣང་བ། གཟིགས་པ་དང་། རོ་རྒྱབ་སྙུང་བ་ལ་སོགས་པ་ཡོད་དོ། །ཞེས་པ་དང་། ད་ལྟ་སེམས་ལ་ཉོན་མོངས་པ་དང་ཡེ་ཤེས་འདྲེས་པར་གནས་པའི་དྲི་མ་ཉོན་མོངས་པའི་ཆ་རྫུན་པ་བསལ་བས། ལྷག་མ་མེད་པའི་ཡེ་ཤེས་དག་པ་མངོན་དུ་བྱེད་པའོ་ཞེས་འདོད་དོ། །དག་པ་ནི་རྣམ་པ་དང་རྣམ་ཤེས་བརྫུན་པ་ཙམ་དུའང་གྲུབ་པ་མེད་དོ། །མངོན་པར་ཆགས་པ་དག་གིས་ན་ཆུང་ཡིད་ལ་བྱེད་པ་གོམས་པ་ལས། ཇི་ཞིག་ན་བསམ་མ་དགོས་པར། དེའི་བྱད་བཞིན་གྱི་སྣང་བ་མེད་པ་གསལ་སྣང་དུ་ཤར་བ་བཞིན་ནོ། །དེས་ན་ཡུལ་གྱི་རྣམ་པ་དཀར་དམར་སྣ་ཚོགས་སུ་སྣང་བ་དང་། འཇལ་བྱེད་ཀྱི་བློ་གཉིས་ཀ་མེད་བཞིན་སྣང་བ་གཟུགས་བརྙན་ལྟ་བུ་སྟེ། དེའི་དོན་ཉམས་སུ་མྱོང་བའི་སོ་སོ་རང་གི་རིག་པའི་ཡེ་ཤེས་ཙམ་ཞིག་དོན་དམ་པར་ཡོད་དོ་ཞེས་འདོད་དོ། །གཉིས་པ་དབུ་མ་པ་ལ། རང་རྒྱུད་པ་དང་། ཐལ་འགྱུར་བ་གཉིས་ལས། དང་པོ་ནི། འདི་ལྟར་སྣ་ཚོགས་སུ་སྣང་བའི་རྣམ་པ་དང་འཇལ་བྱེད་མེད་པ་གསལ་སྣང་ཙམ་དུ་ཟད། དོན་དམ་པར་སོ་སོ་རང་གི་རིག་པའི་ཡེ་ཤེས་དེ་ཡང་རང་བཞིན་གྱིས་ངོ་བོ་ཉིད་མེད་པའོ་ཞེས་འདོད་དོ། །འདི་ལ་དབྱེ་ན། སྒྱུ་མ་དོན་དམ་དུ་འདོད་པ་དང་། རབ་ཏུ་མི་གནས་པ་གཉིས་ལས། དང་པོ་ནི། ཡུལ་ཡུལ་ཅན་དུ་གྲུབ་པ་མེད་ལ། མ་གྲུབ་པ་རིག་པའི་ཡེ་ཤེས་སྨྲ་བསམ་བརྗོད་མེད་ཙམ་ཞིག་དོན་དམ་པར་སྒྱུ་མའི་ཚུལ་དུ་ཡོད་པས། སྒོམས་པའི་ཡོན་ཏན་པ་ལམ་དང་། མཐར་ཕྱིན་པའི་འབྲས་བུ་སངས་རྒྱས་ཀྱི་ཡེ་ཤེས་སྒྱུ་མ་ལྟ་བུ་ཐོབ་ནས་ཆོས་ཀྱི་སྐུའི་ངང་ནས། སྒྱུ་མ་ལྟ་བུས་དོན་མཛད་པ་ཡིན་ཏེ། ཡུམ་བར་མ་ལས། ཆོས་ཐམས་ཅད་རྨི་ལམ་ལྟ་བུ། སྒྱུ་མ་ལྟ་བུ། མྱ་ངན་ལས་འདས་ཀྱང་རྨི་ལམ་ལྟ་བུ་སྒྱུ་མ་ལྟ་བུ། མྱ་ངན་ལས་འདས་པ་བས་ཆོས་ལྷག་མའི་ཆོས་ཤིག་ཡོད་དེ། དེ་ཡང་རྨི་ལམ་ལྟ་བུ་སྒྱུ་མ་ལྟ་བུ། །ཞེས་སོ། །ཆོས་ཐམས་ཅད་ནི་ཡུལ་ཤེས་སྣ་ཚོགས་པ་ཐམས་ཅད་དོ། །མྱ་ངན་ལས་འདས་པ་ནི་གཟུགས་སྐུ་བརྙེས་ནས་དོན་མཛད་པའོ། །དེ་ནས་ལྷག་པའི་ཆོས་ནི་སོ་སོ་རང་གི་རིག་པའི་དེ་བཞིན་ཉིད་དང་། ཆོས་སྐུ་དམ་པའོ་ཞེས་འདོད་དོ། །འདི་ལའང་སྒྱུ་མ་རིགས་དྲུག་དུ་འདོད་པ་དང་། སྒྱུ་མ་ལྟར་སྣང་དུ་འདོད་པ་དང་། སྒྱུ་མ་ཙམ་སོ་སོར་འདོད་པ་ལ་སོགས་པ་རྣམ་གྲངས་རབ་ཏུ་མང་སྟེ། རང་རྒྱུད་འོག་མ་པ་ཞེས་གྲགས་པ་ཡིན་ནོ། །གཉིས་པ་ནི། དོན་དམ་པར་སྒྱུ་མ་ཙམ་དུའང་མི་གནས་ཏེ། ཡུལ་དང་རྣམ་པ་མེད་པས་དེ་མེད་པར་མྱོང་བའི་སོ་སོ་རང་རིག་ཀྱང་མེད་པ་ནི། མོ་ཤམ་གྱི་བུ་མེད་པས་དེ་འཇལ་བྱེད་ཀྱི་ཤེས་པ་མེད་པ་བཞིན་ནོ། །ཀུན་རྫོབ་ལ་བདེན་པར་མེད་པས། དོན་དམ་ལ་གང་ཡང་མི་གནས་ཏེ། རྨི་ལམ་སད་པའི་དུས་ན། རྟ་གླང་གི་རྣམ་པ་འགགས་ཀྱང་། དང་པོ་ནས་མེད་པས་དོན་ལ་འགགས་རྒྱུར་མ་གྲུབ་པ་བཞིན་ནོ། །ཡུམ་བར་མ་ལས། དོན་དམ་པར་ནི་འཁོར་བ་ཡང་མེད། མྱ་ངན་ལས་འདས་པ་ཡང་མེད། སྟོང་པ་ཉིད་ཀྱང་མེད་དེ། ཚིག་གི་བླ་དྭགས་ཙམ་དུ་བས་ལགས་སོ། །ཞེས་གསུངས་པ་ལྟ་བུའོ་ཞེས་འདོད་དོ། །འདི་ལ་ཀུན་རྫོབ་རབ་ཏུ་མི་གནས་པ་དང་། རྒྱུ་མཚན་མི་གནས་པ་དང་། ལྡོག་ཆ་མི་གནས་པ་དང་། ལྡོག་བྱེད་མི་གནས་པ་དང་། གཅིག་མི་གནས་པ་དང་། དུ་མ་མི་གནས་པ་དང་། གཅིག་དང་དུ་མ་དང་བྲལ་བ་མི་གནས་པ་དང་། སྣང་ཙམ་རབ་ཏུ་མི་གནས་པ་ལ་སོགས་པ་རྣམ་གྲངས་དཔག་ཏུ་མེད་པ་ཡོད་དེ། དབུ་མ་རང་རྒྱུད་གོང་མ་པ་ཞེས་གྲགས་སོ། །དབུ་མ་ཐལ་འགྱུར་བ་ནི། དེ་ལྟར་དོན་དམ་པར་མ་གྲུབ་པ་དང་། ཀུན་རྫོབ་ཏུ་སྣང་ཙམ་སྒྱུ་མར་གྲུབ་པ་ལ་སོགས་པ་ཐམས་ཅད་བཀག་ནས། ཡོད་མེད་ཀྱི་མཐའ་ལས་འདས་པའི་རང་བཞིན་ཁས་ལེན་ཐམས་ཅད་དང་བྲལ་བར་འདོད་དེ། འཕགས་པ་ཏིང་ངེ་འཛིན་གྱི་རྒྱལ་པོ་ལས། རྟག་དང་མི་རྟག་འདི་ཡང་མཐའ་ཡིན་ཏེ། །ཡོད་དང་མེད་ཅེས་བྱ་བ་གཉིས་ཀ་མཐའ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་མི་བྱེད་དོ། །ཞེས་པ་དང། དཀོན་ཅོག་ཏ་ལའི་མདོ་ལས། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པས་ན། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་པ་དང་། རྩ་བ་ཤེས་རབ་ལས། གང་གིས་རྟེན་ཅིང་འབྲེལ་པར་འབྱུང་། །འགག་པ་མེད་པས་སྐྱེ་མེད་པ། །ཆད་པ་མེད་པས་རྟག་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞིར་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱིས། །དམ་པ་དེ་ལ་ཕྱག་འཚལ་ལོ། །ཞེས་པ་དང་། རྩོད་བཟློག་ལས། གལ་ཏེ་ངས་དམ་བཅའ་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་སོགས་ཀྱིས་བློས་བཀོད་པའི་གྲུབ་མཐའ་གང་ཡང་མེད་དེ་སྤྲོས་པ་ཞི་བའི་ཕྱིར་རོ། །ཞེས་འདོད་ཅིང་། སྣ་ཚོགས་སུ་སྣང་ཙམ་འཇིག་རྟེན་པ་ཇི་ལྟར་འཇོག་པ་ལྟར་བརྡའ་ཤེས་པའི་ཡན་ལག་ཏུ་བཞག་ཀྱང་། དེ་ཡང་ཁས་ལེན་མེད་པས་ཆོས་སུ་སྣང་བ་བདེན་རྫུན་ལས་འདས་པ་ཡོད་མེད་ཀྱི་མཐའ་དང་ད་ལྟའི་དུས་ནས་བྲལ་བར་འདོད་དོ། །འདི་ནི་དབུ་མའི་ལྟ་བ་མཐར་ཐུག་ཡིན་པ་ཀླུ་སྒྲུབ་ཞབས་ཀྱི་དགོངས་པ་ཐུན་མོང་མ་ཡིན་པའང་འདི་ཡིན་ཏེ་འདིའི་དོན་གཏན་ལ་འབེབས་བྱའི་གཞུང་ཆེན་པོ་དབུ་མའི་རིགས་པའི་ཚོགས་དྲུག་སྟེ། རྩ་བ་ཤེས་རབ། རིག་པ་དྲུག་ཅུ་པ། སྟོང་ཉིད་བདུན་ཅུ་པ། ཞིབ་མོ་རྣམ་འཐག །རྩོད་པ་ཟློག་པ། ཐ་སྙད་བསྒྲུབ་པ་རྣམས་སོ། །གཞན་རང་སྟོང་དང་། གཞན་སྟོང་གི་ཚུལ་འཛིན་པའི་དབུ་མ་པ་མང་དག་བྱུང་སྟེ། དེ་གཉིས་ཀྱི་འཇོག་གཞི་ནི། རྒྱུད་བླ་མ་ལས། འདི་ལ་བསལ་བྱ་ཅི་ཡང་མེད། །བསྣན་པར་བྱ་བའང་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །བློ་བུར་དག་གི་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང་། དེའི་འགྲེལ་པར། འདིས་ཅི་བསྟན་ཞེ་ན། གང་གི་ཕྱིར་རང་བཞིན་གྱིས་ཡོངས་སུ་དག་པ་དེ་བཞིན་གཤེགས་པའི་ཁམས་འདི་ལ་བསལ་བར་བྱ་བ་ཀུན་ནས་ཉོན་མོངས་པའི་རྒྱུ་མཚན་ནི་འགའ་ཡང་མེད་དེ། གློ་བུར་གྱི་དྲི་མ་དང་བྲལ་བ་ནི་འདིའི་རང་བཞིན་ཡིན་པའི་ཕྱིར་རོ། འདི་ལ་རྣམ་པར་བྱང་བའི་རྒྱུ་མཚན་གྱིས་བསྣན་པར་བྱ་བའང་ཅུང་ཟད་ཡོད་པ་མ་ཡིན་ཏེ། རྣམ་པར་དབྱེ་བ་མེད་པའི་ཆོས་དག་པའི་ཆོས་ཉིད་ནི་རང་བཞིན་ཡིན་པའི་ཕྱིར་རོ། །དེས་ན་དེ་བཞིན་གཤེགས་པའི་སྙིང་པོ་ནི་རྣམ་པར་དབྱེ་བ་ཡོད་པ་དང་བྲལ་བ། ཤེས་པ་ཉོན་མོངས་པའི་སྦུབ་ཐམས་ཅད་ཀྱིས་ནི་སྟོང་པ་ཡིན་ལ། རྣམ་པར་དབྱེ་བ་མེད་པ་བྲལ་མི་ཤེས་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒའི་ཀླུང་གི་བྱེ་མ་སྙེད་ལས་འདས་པ་ནི་མི་སྟོང་ངོ་། །ཞེས་གསུངས་སོ། །དེ་ལ་རང་སྟོང་ནི། ཆོས་ཅན་ཇི་ལྟར་སྣང་བ་འདི་དག་སྣང་ཙམ་ཉིད་ནས་རང་རང་གི་ངོ་བོས་སྟོང་བས་མེད་དགག་གི་སྟོང་ཉིད་དོན་དམ་པར་བཞེད་ཅིང་། ངོ་བོ་ཉིད་མེད་པར་སྨྲ་བའི་དབུ་མ་པ་ལ་དོན་དམ་དུ་ཐ་དད་མེད་ཀྱང་། ཀུན་རྫོབ་ཏུ་གྲུབ་པ་སྒྱུ་མ་ལྟ་བུ་ཞེས་རང་རྒྱུད་ཀྱི་དམ་བཅའ་འགོད་པ་དང་། ཐལ་འགྱུར་ཁོ་ན་འཕེན་པས་ཁས་ལེན་པའི་ཀུན་རྫོབ་ཙམ་ཡང་འགོག་པའི་སྲོལ་གཉིས་སྣང་ངོ་། །གཞན་སྟོང་དུ་གཏན་ལ་འབེབས་པའི་དབུ་མ་པ་རྣམས་ལ། ཤེས་བྱ་ཐམས་ཅད་མཚན་ཉིད་གསུམ་དུ་འདོད་པ་དང་། ཀུན་བཏགས་དང་ཡོངས་གྲུབ་གཉིས་སུ་བསྡུ་བའི་ཁྱད་པར་ལས། ཆོས་ཅན་དངོས་འཛིན་ཚུལ་མི་འདྲ་བ་གཉིས་བྱུང་སྟེ། རྣལ་འབྱོར་སྤྱོད་པའི་གཞུང་དུ། སྟོང་གཞི་གཞན་དབང་དགག་བྱ་ཀུན་བཏགས་ཀྱིས་སྟོང་པའི་ཡོངས་གྲུབ་ཏུ་བཤད་པ་དང་། རྒྱུད་བླ་མ་སོགས་ལས་ཆོས་ཉིད་ཡོངས་གྲུབ་དགག་བྱ་ཀུན་བཏགས་ཀྱིས་སྟོང་པར་གསུངས་སོ། །དེས་ན་ཡོངས་གྲུབ་སེམས་ཀྱི་ཆོས་ཉིད་དོན་དམ་པའི་དབྱིངས་འདིའི་ངོ་བོ་ལ་དོར་བྱའི་དྲི་མ་དང་སྔར་མེད་ཀྱིས་ཡོན་ཏན་གསར་དུ་སྒྲུབ་ཏུ་མེད་དེ། ཡེ་ནས་རང་བཞིན་གྱིས་རྣམ་པར་དག་ཅིང་ཡོན་ཏན་ལྷུན་གྲུབ་ཡིན་པའི་ཕྱིར། སྐྱོན་ཡོན་གྲུབ་བསལ་ལས་འདས་པས་དོན་དམ་གྱི་དབྱིངས་དེ་ཁོ་རང་གི་ངོ་བོས་སྟོང་པ་ཡིན། བློ་བུར་འཁྲུལ་སྣང་གི་ཆོས་བཟུང་འཛིན་སྤྲོས་པའི་ཆ་རྣམས་གཤིས་ལ་མ་གྲུབ་པས་ཀུན་རྫོབ་རང་གིས་ངོ་བོས་སྟོང་པ་ཡིན་ལ། དེ་འདྲ་དེ་དོན་དམ་ཆོས་ཉིད་ལས་གཞན་ཡིན་པས། དོན་དམ་གཞན་གྱི་ངོ་བོས་སྟོང་པ་ཞེས་པའི་དོན་ནོ། །མདོར་ན་ཀུན་རྫོབ་ཀྱི་ཕྱོགས་ནས་གཞལ་ན་མེད་དགག་དང་མ་ཡིན་དགག་གི་སྟོང་ཉིད། དོན་དམ་དབྱིངས་ཀྱི་ཕྱོགས་ནས་གཞལ་ན་རང་ལས་གཞན་རྟོག་པའི་ཡུལ་གྱི་སྟོང་པའོ། །འོ་ན་དོན་དམ་རང་གི་ངོ་བོས་སྟོང་པ་ལྟར་གསུངས་པའི་དགོས་པ་གང་སྙམ་ན། དོན་དམ་ལ་དམིགས་ནས་བློས་བཟུང་བ་ལྟར་མ་གྲུབ་པ་ལ་དགོངས་པ་ཡིན་ནོ། །དེ་ལྟར་ཐོས་བསམ་གྱིས་གཏན་ལ་ཕབ་ནས་སྒོམ་པས་ཉམས་སུ་མྱོང་བའི་ལྟ་བ་ལ། འཁོར་ལོར་བར་པའི་དངོས་བསྟན་རིགས་ཚོགས་སུ་བཀྲལ་བ་ལྟར་ན། ངེས་དོན་མེད་དགག་ལ་བཞེད་པས། ཅི་ཡང་མི་སྒོམ་པ་ལ་སྟོང་ཉིད་སྒོམ་པ་དང་། ཅི་ཡང་མ་མཐོང་བ་ལ་དེ་ཁོ་ན་ཉིད་རྟོགས་པར་འཆད། འཁོར་ལོ་ཐ་མའི་དགོངས་པ་བྱམས་ཆོས་ཀྱི་གཞུང་ཐོགས་མེད་སྐུ་མཆེད་ཀྱིས་བཀྲལ་བ་དང་ཀླུ་སྒྲུབ་ཞབས་ཀྱིས་བསྟོད་ཚོགས་སུ། གཟུང་འཛིན་གཉིས་མེད་ཀྱི་ཡེ་ཤེས་ཉིད་སྒོམས་པས་ཉམས་སུ་མྱོང་བར་བྱེད་ཅིང་། དེ་ཉིད་གསང་སྔགས་ཀྱི་རྒྱུད་སྡེ་ཟབ་མོ་རྣམས་དང་ཡང་དགོངས་པ་མཐུན་པ་ཡིན་ནོ། །དེ་ཡང་སྔོན་གྱི་མཁས་གྲུབ་རྣམས་ཀྱིས་ཟུང་འབྲེལ་དུ་ཉམས་སུ་བཞེས་པ་ནི། སོ་སྐྱེའི་བར་ལྟ་བ་ཐོས་བསམ་གྱི་གཏན་ལ་འབེབས་པའི་ཚེ་བློའི་མཚན་འཛིན་གཞིག་དཀའ་བས། དེ་ཐོས་བསམ་ལས་བྱུང་བའི་ཤེས་རབ་ཀྱིས་འགོག་པར་བྱེད་པ་ལ་སྒྲོ་འདོགས་གཅོད་བྱེད་ཀྱི་རིག་པ་ཐལ་འགྱུར་པ་རྣོ་བའི་ཕྱིར་དང་། ཡང་སྒོམ་བྱུང་ཉམས་མྱོང་གིས་གཏན་ལ་འབེབ་པའི་སྐབས་སུ་འཁོར་ལོ་ཐ་མར་གསུངས་པའི་དབུ་མའི་ལྟ་བ་དེ་ཉིད་ཟབ་ཅིང་ཆེས་བཟང་བ་ཡིན་ཏེ། དབྱིིངས་རང་བཞིན་གྱིས་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ཉིད་ཆོས་ཐམས་ཅད་ཀྱི་གདོད་མའི་གནས་ལུགས་ཡིན་པ་གང་ཞིག །གསང་སྔགས་ཀྱི་རྒྱུད་སྡེ་ཟབ་མོ་རྣམས་ནས་བཤད་པའི་ལྟ་བའི་ཉམས་ལེན་དང་ཡང་མཐུན་པའི་ཕྱིར་སྙམ་དུ་དགོངས་སོ། །དེས་ན་ཤིང་རྟའི་སྲོལ་འབྱེད་པ་པོ་ནི། བྱམས་མགོན་དང་སློབ་དཔོན་ཀླུ་སྒྲུབ་གཉིས་ཡིན་ཏེ། དགོངས་འགྲེལ་མཛད་པ་པོ་གཞན་དག་འདི་གཉིས་ཀྱི་བསྟན་བཅོས་ལ་བརྟེན་ནས་འཇུག་པའི་ཕྱིར། དེ་ཡང་ཀླུ་སྒྲུབ་ཞབས་ཀྱིས་འཁོར་ལོ་བར་པའི་དགོངས་འགྲེལ་དུ་ཆོས་ཐམས་ཅད་རང་སྟོང་གཏན་ལ་འབེབས་བྱེད་དབུ་མ་རིག་ཚོགས་སོགས་དང་། འཁོར་ལོ་ཐ་མའི་དགོངས་འགྲེལ་གཞན་སྟོང་གཏན་ལ་འབེབས་བྱེད་བསྟོད་ཚོགས་སོགས་ཀྱིས་བཀའི་དགོངས་པ་ལེགས་པར་བཀྲལ་ཞིང་དེ་དང་དེའི་སྲོལ་འཛིན་རིམ་བཞིན་ངོ་བོ་ཉིད་མེད་པར་སྨྲ་བའི་ཐལ་རང་གི་སློབ་དཔོན་རྣམས་དང་། འཇིགས་མེད་ཆོས་སྐྱོང་ཞབས་ཡིན་ལ། རྒྱལ་ཚབ་མི་ཕམ་མགོན་གྱིས་གཞན་སྟོང་དུ་གཏན་ལ་འབེབས་པའི་བསྟན་བཅོས་བྱམས་ཆོས་སྡེ་ལྔ་མཛད་དེ་འཕགས་པ་ཐོགས་མེད་ལ་བསྟན་པ་སྐུ་མཆེད་གཉིས་ཀྱིས་ལེགས་པར་བཀྲལ་བའི་སྲོལ་དེ་ཉིད་ཕྱོགས་གླང་ཆོས་གྲགས་དང་ཙནྡྲ་གོ་མི་ལ་སོགས་པས་བཟུང་ཞིང་། སྲོལ་འབྱེད་ཀྱི་སློབ་དཔོན་དེ་གཉིས་ཀའང་དབུ་མ་པ་ཆེན་པོ་ངེས་དོན་འཆད་པ་ལ་འཁྲུལ་མེད་ཉིད་དུ་རྒྱལ་བས་ལུང་བསྟན་པ་ཡིན་ཏེ། ཇི་སྐད་དུ། དགེ་སློང་དཔལ་ལྡན་ཞེས་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་བྱེད། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་པར་རབ་བསྒྲུབས་ནས། །ཞེས་དང་། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ཡི་དོན་ལ་མཁས། །མདོ་སྡེ་དྲངས་དོན་ངེས་པའི་དོན། །རྣམ་པ་མང་པོ་རབ་ཏུ་འབྱེད། །ཅེས་གསུངས་ཤིང་། རིན་ཆེན་འབྱུང་གནས་ཞི་བའི་ཞབས་ཀྱིས་ཀྱང་། །ཀླུ་སྒྲུབ་དང་ཐོགས་མེད་རྣམ་གཉིས་གྲུབ་མཐའ་གཅིག་ཏུ་བཀྲལ་ཏེ། དེས་མཛད་པའི་དབུ་མ་རྒྱན་ལས། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་སྒྲུབ་ཀྱང་ནི་བཞེད་པ་ཡིན། །ཚད་མ་ལུང་དང་ལྡན་གྱུར་པའི། །བདེན་པ་གཉིས་པོ་འདིར་བཤད་བྱ། །ཞེས་འབྱུང་ཞིང་། ཞི་བ་འཚོ་ལ་སོགས་པ་རྣམས་ཀྱང་དགོངས་པ་ཕྱོགས་མཐུན་པར་སྣང་ངོ་། །སློབ་དཔོན་དེ་ཉིད་དགོངས་པ་མི་གཅིག་པར་བཀྲལ་བ་སོགས་ཀྱི་ལོ་རྒྱུས་སྔོན་གྱི་ཡིག་རྙིང་དག་དང་གཏེར་ཆེན་བླ་མ་ཡབ་སྲས་ཀྱི་གསུང་གི་བདུད་རྩི་ལས་ཐོས་པ་ཅུད་ཟད་བརྗོད་ན། སློབ་དཔོན་སངས་རྒྱས་བསྐྱངས་དང་། སློབ་དཔོན་ལེགས་ལྡན་པ་གཉིས་བྱུང་བ་དེ་གཉིས་ཀྱིས། ཀླུ་སྒྲུབ་ཀྱི་སློབ་མ་སློབ་དཔོན་ཀླུའི་བཤེས་གཉེན་དང་། དེའི་སློབ་མ་སློབ་དཔོན་དགེ་འདུན་བསྲུང་བ་ལ་ཀླུ་སྒྲུབ་ཀྱི་གཞུང་ལུགས་རྣམས་ཐོབ་པར་བྱས་ནས་བསྒོམས་པས་ཡེ་ཤེས་མཆོག་བརྙེས། སྔ་མས་འཇམ་དཔལ་དང་། ཕྱི་མས་ཕྱག་རྡོར་གྱི་ཞལ་གཟིགས་ཆོས་མང་དུ་བསྟན། དབུ་མ་རྩ་བའི་གཞུང་ལ་སློབ་དཔོན་སྔ་མའི་བཞེད་པ་རྣམས་སུན་ཕྱུངས་ཏེ་འགྲེལ་བ་མཛད་ཅིང་། ཀླུ་སྒྲུབ་ཀྱི་མན་ངག་ལ་རྟེན་པར་ཞལ་གྱིས་བཞེས་ནས་མདོ་སྡེ་འགའ་ཞིག་ལ་འགྲེལ་པ་མཛད་ནས། དབུ་མ་ངོ་བོ་ཉིད་མེད་པར་སྨྲ་བའི་གཞུང་གཙུགས་ཤིང་སངས་རྒྱས་བ སྐྱངས་སློབ་མ་ཧ་ཅང་མང་བ་མ་ཡིན་ཀྱང་། ལེགས་ལྡན་པ་སློབ་མ་ཤིན་ཏུ་མང་བས་དགེ་སློང་སྟོང་ཕྲག་མང་པོ་རྗེས་སུ་འབྲང་བ་ཡིན་པས་ཤིན་ཏུ་དར་བར་གྱུར་རོ། །སློབ་དཔོན་འདི་གཉིས་མ་བྱོན་གོང་དུ་ཐེག་ཆེན་མཐའ་དག་བསྟན་པ་ཡུག་གཅིག་ཏུ་གནས་ཤིང་། སློབ་དཔོན་འདི་ཉིད་ཀྱིས་ཀླུ་སྒྲུབ་དང་ཐོགས་མེད་གཉིས་ཤིན་ཏུ་ཐ་དད་དེ། ཐོགས་མེད་ཀྱིས་ནི་དབུ་མའི་ལམ་མི་སྟོན་སེམས་ཙམ་ཁོ་ན་ཡིན་པས། ཁོ་བོ་ཅག་གི་འདི་ལས་གཞན་དུ་མེད། །ཅེས་མཐའ་གཞན་འགོག་པར་མཛད་པས། སློབ་དཔོན་དེ་གཉིས་སྐུ་འདས་པའི་འོག་ཏུ་ཐེག་ཆེན་ལའང་ནང་དུ་སྡེ་གཉིས་སུ་གྱེས་ཏེ་རྩོད་པ་ཆེན་པོ་བྱུང་བར་གྲགས། བོད་རྣམས་སངས་རྒྱས་བསྐྱངས་ཀླུ་སྒྲུབ་ཀྱི་སྐུ་ཚེའི་སྟོད་ཀྱི་སློབ་མ་དང་། ལེགས་ལྡན་པ་སྐུ་ཚེའི་སྨད་ཀྱི་སློབ་མ་ཡིན་པ་དང་། རྩོད་པ་བྱས་པ་སྐད་དང་། སངས་རྒྱས་བསྐྱངས་ཟླ་གྲགས་སུ་སྐྱེ་བ་བཞེས་ཟེར་བ་སོགས་རིག་པས་གྲས་པའི་བཅོལ་གཏམ་དུ་ཟད་དོ། །དེའི་རྗེས་སུ་དཔལ་ལྡན་ཟླ་བ་གྲགས་པ་བྱོན་ནས་ལེགས་ལྡན་གྱི་སློབ་མ་མང་པོ་དང་། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྡྷི་ལ། ཀླུ་སྒྲུབ་ཀྱི་གཞུང་ལུགས་དང་མན་ངག་ཐམས་ཅད་ནོས། མཁས་པ་ཆེན་པོར་གྱུར་ནས་དཔལ་ན་ལནྜའི་མཁན་པོ་མཛད། རྩ་འཇུག་གཞི་གསུམ་དང་རིག་པ་དྲུག་ཅུ་པ་ལ་སོགས་པའི་འགྲེལ་པ་མཛད། སངས་རྒྱས་བསྐྱངས་ཀྱི་ལུགས་དེ་ཉིད་ཆེར་དར་བར་མཛད། རི་མོར་བྲིས་པའི་བ་ལས་འོ་མ་དང་རྩིག་པ་སོགས་ལ་ཐོགས་མེད་དུ་བཞུད་པ་སོགས་ངོ་མཚར་བའི་མཛད་པ་དུ་མ་སྟོན་ཅིང་། མུ་སྟེགས་ཀྱི་རྒོལ་བ་ངན་པ་རྣམས་ཚར་བཅད། བྲམ་ཟེ་དང་ཁྱིམ་བདག་མང་པོ་བསྟན་པ་ལ་བཅུག་ནས་ཆོས་གཞི་ཆེན་པོ་མང་དུ་བཏབ་པར་གྲགས་སོ། །དེ་དང་དུས་མཉམ་སློབ་དཔོན་ཙནྜ་གོ་མ་བྱུང་སྟེ། སྤྱན་རས་གཟིགས་ཀྱི་ཞལ་མཐོང་བའི་མུ་སྟེགས་ཀྱི་པཎྜི་ཏ་རྒྱང་འཕེན་པའི་སྟོན་པ་ཞིག་དང་རྩོད་པར་གྱུར་ཏེ། དེའི་རིང་ལུགས་སུན་ཕྱུངས་ཡང་རིག་པ་ནི་བློས་རྣམ་པར་བཏགས་པ་ཡིན་པས་གང་བློ་བསྒྲིན་པ་དེ་རྒྱལ་བ་ཡིན་གྱི། སྐྱེ་བ་སྔ་ཕྱི་ཡོད་པའི རྟགས་མངོན་སུམ་མེད་པས་ཁོ་བོ་ཅག་མི་འདོད་ཟེར་བ་ན། དེར་ཡུལ་གྱི་རྒྱལ་པོ་ལ་སོགས་པ་དཔང་པོར་བཞག་སྟེ། ང་ཉིད་སྐྱེ་བ་ལེན་པ་ཡིན་པས་དཔྲལ་བར་རྟགས་ཐོབ་གཅིག་བྱས་ནས། དེས་དཔྲལ་བར་མཚལ་གྱིས་ཐིག་ལེ་ཤ་ལ་ཐིམ་པ་གཅིག་བྱས། ཁ་ནང་དུ་མུ་ཏིག་གཅིག་བཅུག་ནས་དེ་ཉིད་དུ་འདས་ཏེ། དེའི་ལུས་ཟངས་ཁ་སྦྱོར་གྱི་ནང་དུ་བཅུག་ནས་རྒྱལ་པོས་རྒྱས་བཏབ་བོ། །དེ་རྒྱལ་རིགས་ཀྱི་པཎྜི་ཏ་བི་ཤྭ་ས་ག་ཞེས་པའི་བུར་སྐྱེ་བར་ཁས་བླངས་པ་བཞིན། དེ་ལ་ཁྱེའུ་མཚན་དང་ལྡན་པ་ཞིག་བཙས་མ་ཐག་ཏུ་མཚལ་གྱི་རི་མོ་དཔྲལ་བར་ཡོད་པ་ཁ་ནང་དུ་མུ་ཏིག་ཡོད་པ་དེ་བྱུང་། རྒྱལ་པོ་སོགས་ཀྱིས་སྔར་གྱི་ཕུང་པོ་དེ་བལྟས་པས་དཔྲལ་བའི་མཚལ་གྱི་རི་མོ་ཡང་བྱི། མུ་ཏིག་གི་ཤུལ་ཧར་རེ་འདུག །དེར་མུ་སྟེགས་དེ་ཡང་སྐྱེ་བ་ལྔ་ཕྱི་ཡོད་པའི་ཡིད་ཆེས་སྐད། ཁྱེའུ་དེ་བཙས་མ་ཐག་ཏུ་མ་ལ་ཕྱག་བྱས་ཏེ་ཟླ་བ་བཅུར་འོ་མ་བརྒྱལ་ལམ་བྱས་པས་བཙས་མ་ཐག་སྨྲ་བ་ལྟས་ངན་ནོ་སྙམ་ནས་ཁ་རོག་འདུག་བྱས་པས་ལོ་བདུན་བར་ཅང་མ་སྨྲས་པས་ལྐུག་པའོ་སྙམ་མོ། །སྐབས་དེར་མུ་སྟེགས་ཀྱི་རྒོལ་བ་ཤིན་ཏུ་གོ་དཀའ་བ་སྙན་དངགས་ཀྱི་ཚིགས་བཅད་སངས་རྒྱས་པ་རྣམས་ཀྱི་གྲུབ་མཐའ་འགོག་པར་བྱེད་པ་གཅིག་བརྩམས་ནས་རྒྱལ་པོ་དང་མཁས་པའི་ཚོགས་ཐམས་ཅད་ལ་གྲིམས་སོ། །དེར་བི་ཤྭ་ས་གའི་ཁྱིམ་དུ་བྱུང་བ་ན། དོན་དེ་ཡུན་རིང་བརྟག་པས་མ་གོ་བས་ལན་གདབ་པར་ག་ལ་ནུས། ལན་གཅིག་བྱ་བ་གཅིག་གི་ཕྱིར་ཁྱིམ་གྱི་ཕྱི་རོལ་དུ་སོང་བ་ན། དེར་ཙནྡྲ་གོ་མི་ལོ་བདུན་འགྲོ་བ་དེས་བལྟས་པ་ན། དོན་དེ་ཤེས་པར་དཀའ་བ་མེད། དོན་འགྲེལ་གྱི་ཡིག་ཆུང་བཏབ། ལན་གྱི་ཚིགས་བཅད་ཀྱང་བྲིས་སོ། །ཕས་ནང་དུ་འོངས་པ་ན་དེ་ལྟར་བྲིས་པ་མཐོང་ནས། ཁྱིམ་དུ་སུ་བྱུང་ཞེས་ཙནྡྲ་གོ་མིའི་མ་ལ་དྲིས་སོ། །གཞན་དུ་སུ་ཡང་མ་འོངས་བུ་ལྐུགས་པས་བལྟ་ཞིང་བྲིས་སོ། །དེར་ཕས་བུ་ལ་དྲིས་པ་ན་མའི་གདོང་ལ་བལྟ་ཞིང་འདུག །མས་སྨྲོས་ཤིག་བྱས་པས། འདི་ནི་བདག་གིས་བྲིས་ཏེ་རྒོལ་བ་འདི་ཟློག་པ་ནི་དཀའ་བ་མ་ཡིན་ནོ་ཞེས་ཟེར། དེ་ནས་ནང་པར་ཙནྡྲ་གོ་མི་དང་མུ་སྟེགས་ཀྱི་སྟོན་པ་དེ་གཉིས་བརྩོད་པས་ཙནྡྲ་གོ་མི་རྒྱལ་ཏེ་བྱ་དགའ་ཆེན་པོ་ཐོབ། ཕྱོགས་ཐམས་ཅད་དུ་མཁས་པའི་གྲགས་པས་ཁྱབ་བོ། །དེ་ནས་ནམ་ཞིག་གི་ཚེ་དཔལ་ན་ལནྡྲར་བྱོན་པས། དེའི་ཚེ་མཁན་པོར་གྱུར་པ་ཟླ་བ་གྲགས་པ་ཡིན་པ་དང་འཇལ་ནས། ཁྱེད་གང་ནས་འོངས་བྱས་པས། ལྷོ་ཕྱོགས་ནས་འོངས། ཆོས་གང་ཤེས་དྲིས་པས། སྒྲ་པ་ཎི་པ་དང་། བསྟོད་པ་བརྒྱ་ལྔ་བཅུ་པ་དང་། མཚན་ཡང་དག་པ་རྗོད་པ་གསུམ་ཤེས་བྱས་པས། འདི་གཞུང་གསུམ་ལས་མི་ཤེས་ཞེས་ཚིག་ཁེངས་སྐྱུང་ཡང་། དོན་ལ་ཐམས་ཅད་ཤེས་པར་ཁས་བླངས་པ་ཡིན་པས་ཙནྡྲ་གོ་མི་ཡིན་ནམ་སྙམ་དྲིས་པས། འཇིག་རྟེན་དེ་ལྟར་གྲགས་གསུངས། དེ་ནས་ཙནྡྲ་གོ་མིས་ཐོགས་མེད་ཀྱི་སྲོལ་ལ་བརྟེན་ཏེ་རྣམ་རིག་གི་ཕྱོགས་བཟུང་ཟླ་གྲགས་ཀྱིས་ཀླུ་སྒྲུབ་ཀྱི་གཞུང་སངས་རྒྱས་བསྐྱངས་ཀྱིས་བཀྲལ་བ་ལ་བརྟེན་ཏེ་ངོ་བོ་ཉིད་མེད་པར་སྨྲ་བའི་ཕྱོགས་བཟུང་། ལོ་བདུན་གྱི་བར་དུ་བགྲོ་གླེང་གི་བརྒལ་བརྟག་མཛད་དེ། རྩོད་པ་དེ་བལྟ་བའི་ཕྱིར། སྐྱེ་བོ་མང་པོ་རྟག་ཏུ་འདུས་པ་ལས། གྲོང་པའི་ཁྱེའུ་དང་བུ་མོ་ཚུན་ཆད་ཀྱིས་ཀྱང་ཕྱོགས་ཙམ་རིག་ནས། ཀྱེ་མ་འཕགས་པ་ཀླུ་སྒྲུབ་གཞུང་། །ལ་ལའི་སྨན་ལ་ལ་ལའི་དུག །མི་ཕམ་འཕགས་པ་ཐོགས་མེད་གཞུང་། །སྐྱེ་བོ་ཀུན་ལ་བདུད་རྩིར་གྱུར། །ཅེས་གླུར་ལེན་པ་བྱུང་ངོ་། །ཟླ་གྲགས་ཀྱི་དགོངས་པར། འདི་ལ་རྩོད་པ་སློབ་མི་ཞིག་ཡོད་དམ་བསམ་ནས། །ཙནྡྲ་གོ་མའི་ཕྱི་བཞིན་བྱོན་པ་ན་སྤྱན་རས་གཟིགས་ཀྱི་ལྷ་ཁང་ཞིག་ཡོད་པར་བཞུད། སྒོའི་ཕྱི་ནས་ཉོན་པས། སྤྱན་རས་གཟིགས་ཀྱི་རྡོ་སྐུ་དེས་སློབ་དཔོན་གྱི་སློབ་མ་ལ་སྟོན་པ་བཞིན་ཆོས་གསུང་གཟིགས་པས། འཕགས་པ་ལ་ཉེ་རིང་མི་མངའམ། ཞེས་སྒོ་ཕྱེ་བས་དེ་ཉིད་དུ་རྡོ་སྐུར་གྱུར་ཏེ། ཆོས་སློབ་བཞིན་པའི་ཕྱག་རྡོར་སོར་ཀེ་རེ་ལུས་པས་སྤྱན་རས་གཟིགས་མཛུབ་ཀེར་མར་གྲགས། དེ་སྐབས་ནས་རྩོད་པ་རང་ཞིའོ་ཞེས་བྱུང་ངོ་། །དེ་ལྟར་རང་སྟོང་དང་གཞན་སྟོང་གིས་གྲུབ་པའི་མཐའ་མི་གཅིག་པ་དུ་མ་བྱུང་བ་དེ་དག་ཕྱོགས་གཅིག་དག་ལ་ཕྱོགས་གཅིག་མ་དག་ཅེས་བསྐུར་པ་གདབ་ཏུ་མི་རུང་སྟེ། འགྲོ་བ་བློ་མཐོ་དམན་ལ་ལྟོས་ནས་དེ་དང་དེ་འདུལ་བའི་ཐབས་སུ་སྟོན་པ་ཡིན་པ་དང་། སློབ་དཔོན་དེ་དག་ཀྱང་འཕགས་པ་ཁོ་ནར་ཟད་པས། བྱིས་པས་འཕགས་པའི་སྤྱོད་ཡུལ་ལ་སྒྲོ་སྐུར་བཏབ་པར་མི་བྱ་སྟེ་འགྲོ་བ་འདུལ་བའི་སངས་རྒྱས་ཀྱི་ཕྲིན་ལས་པ་ཡིན་པའི་ཕྱིར་ཏེ། དེའང་ནམ་མཁའ་དྲི་མ་མེད་པའི་མདོ་ལས། དེ་བཞིན་གཤེགས་པ་ནི་འགྲོ་བ་ཐམས་ཅད་ལ་དངོས་སུ་སྣང་བའང་མ་ཡིན་གྱི། དགེ་བའི་གཤེས་གཉེན་ནི་ཡོངས་སུ་སྣང་བས་དེ་བཞིན་གཤེགས་པ་བས་དགེ་བའི་བཤེས་གཉེན་ལྷག་པར་ཡང་ཟུངས་ཤིག །ཅེས་དང་། ཡོན་ཏན་རིན་ཆེན་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་ཅིང་། འཆད་དང་རིག་པ་དག་དང་ལྡན་པར་བརྗོད་པ་དང་། མཆོག་འཕགས་བདེ་བ་བསྐྱེད་དང་དེ་ཡིན་འབྲས་ཐོབ་པ། དེ་དག་ཀུན་ཀྱང་དེ་བཞིན་པ་ཡི་སྐྱེས་བུའི་མཐུ། །ཞེས་གསུངས་པའི་ཕྱིར་རོ། །དེ་ཡང་ངེས་པའི་དོན་དུ་ནི་འདི་ལྟར་ཡིན་ཏེ། བཀའ་འཁོར་ལོ་དང་པོར་ནི་ལས་དང་པོ་པ་དང་། དབང་པོ་དམན་པ་རྣམས་ལ་དགོངས་ནས་བདེན་བཞི་སྤང་གཉེན་དུ་བྱ་བས་འཁོར་བ་ལས་བཟློག་པའི་ཕྱིར་སྤངས་བྱ་ལས་རྣམ་པར་གྲོལ་བའི་ཐབས་སོ། །བར་པར་ཡོངས་སུ་སྦྱོང་བ་བྱས་པ་དང་། དབང་པོ་འབྲིང་པོ་ལ་དགོངས་ནས་གཉེན་པོར་འཛིན་པའི་འཆི་བ་ལས་གྲོལ་བའི་ཐབས་སུ་སྒྱུ་མའི་དཔེ་བརྒྱད་དང་ནམ་མཁའ་ལྟ་བུའི་སྟོང་པ་ཉིད་བསྟན་ཏོ། །ཐ་མར་མཐར་ཕྱིན་པ་དང་དབང་པོ་རྣོན་པོའི་ངོར་ཤེས་བྱའི་གཤིས་ཇི་ལྟར་གནས་པ་དེ་ལྟར་གསུངས་པ་ཡིན་ནོ། །དེ་ལ་འདིར་བཀའ་ཐ་མ་ངེས་པ་དོན་གྱི་མདོ་སྡེ་སངས་རྒྱས་ཐམས་ཅད་ཀྱི་གསང་བ་ཆེན་པོ་ཇི་ལྟ་བ་བཞིན་མངོན་དུ་སྟོན་པ་ནི། འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང་། དཔལ་ཕྲེང་སེངྒེའི་ང་རོ་སྒྲས་ཞུས་པའི་མདོ་དང་། བུ་མོ་རིན་ཆེན་གྱིས་ཞུས་པའི་མདོ་དང་། ལྷ་མོ་དྲི་མ་མེད་པས་ཞུས་པའི་མདོ་དང་། མིའུ་ཐུང་སོར་ཕྲེང་ཅན་གྱི་མདོ་དང་། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། བྱམས་པས་ཞུས་པའི་མདོ་དང་། དེ་བཞིན་གཤེགས་པའི་སྙིང་པོའི་མདོ་ལས་སོགས་པ་རྣམས་ཡིན་ཏེ། དེ་དག་ལས་སེམས་ཅན་ཐམས་ཅད་ཡེ་ནས་གནས་པའི་ཆོས་ཀྱི་དབྱིངས་རང་བཞིན་གྱིས་དག་པའི་དེ་བཞིན་གཤེགས་པའི་སྙིང་པོ་སྟེ། ཡེ་ནས་གནས་པ། འགྱུར་བ་མེད་པ། དེའི་སྣང་ཆ་ལས་གཟུགས་སྐུ་མཚན་དང་དཔེ་བྱད་ཀྱི་འབྱུང་ཁུངས་དང་། སྟོང་ཆ་ལས་ཆོས་ཀྱི་སྐུ་སྤྲོས་པའི་མཐའ་ཐམས་ཅད་དང་བྲལ་བ་ཡེ་ནས་ལྷུན་གྲུབ་ཏུ་གནས་པ་ཉིད། ཡོན་ཏན་ལྷུན་གྱིས་པས་ནོར་བུ་དང་། གཞན་དུ་མི་འགྱུར་བས་ནམ་མཁའ་དང་། སེམས་ཅན་ཐམས་ཅད་རླན་ཞིང་ཁྱབ་པས་ཆུ་དག་པའི་དཔེས་བསྟན་ཏེ། རྒྱུད་བླ་མ་ལས། རིན་ཆེན་ནམ་མཁའ་ཆུ་དག་བཞིན། །རྟག་ཏུ་རང་བཞིན་ཉོན་མོངས་མེད། །ཅེས་སོ། །དེ་ཉིད་སེམས་ཅན་ཐམས་ཅད་ལ་ཡོད་པར་རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་སེམས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། རྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་སོ། །དེའང་སྔར་སེམས་ཅན་པའི་དུས་ན་མེད་པའི་ཡོན་ཏན་ཕྱིས་གསར་དུ་བསྐྱེད་པར་འདོད་པ་ནི་མ་ཡིན་ཏེ། འཕོ་འགྱུར་མེད་པའི་ཕྱིར་ཏེ། སྙིང་པོ་རབ་ཏུ་བསྟན་པའི་མདོ་ལས། ཐོག་མ་མེད་པ་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་ལས་འདས་ཐོབ་པ་ཡིན། །ཇི་ལྟར་སྔོན་དེ་ཕྱིས་དེ་བཞིན། །འགྱུར་བ་མེད་པའི་དེ་བཞིན་ཉིད། །ཅེས་སོ། །དེ་ཡང་དཔེ་དགུས་ཉོན་མོངས་པའི་སྦུགས་ན་གནས་པར་བསྟན་པ་ནི། རྒྱུད་བླ་མ་ལས། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུ་དང་། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ངན་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་སོ། །གཞན་ཡང་འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཀྱི་རྣམ་གྲངས་ལས་ཀྱང་། བཅོམ་ལྡན་འདས་ཀྱི་འོད་སྲུངས་ལ་བཀའ་རྩལ་པ། རིགས་ཀྱི་བུ་འདི་ལྟ་སྟེ། དཔེར་ན་རྒྱལ་པོ་ལ་གྱད་གཅིག་ཡོད་པའི་དཔྲལ་བ་ན་རྡོ་རྗེའི་ནོར་བུ་ཞིག་ཡོད་པ། གྱད་གཞན་དང་སྟོབས་བཀྱེ་བ་ལས། གྱད་ཕ་རོལ་པོའི་མགོས་རེག་སྟེ། དཔྲལ་བའི་ནོར་བུ་ཤའི་ནང་དུ་ནུབ་ཀྱང་ནོར་བུ་གར་སོང་མི་ཤེས་སོ། །རྨ་བྱུང་བའི་ཕྱིར་སྨན་པ་བོས་ནས་གསོས་ཤིག་ཅེས་བསྒོ་བ་ལས། སྨན་པ་ཤིན་ཏུ་མཁས་པས་ནི། ནོར་བུ་ཤའི་ནང་དུ་སོང་བའི་ཕྱིར་རྨ་བྱུང་བ་དེ་ལ་སྨན་མི་བྱེད་དེ། འདི་སྐད་དུ། ཀྱེ་སྟོབས་པོ་ཆེ་ཁྱོད་ཀྱི་དཔྲལ་བའི་ནོར་བུ་ག་རེ་ཞེས་ཟེར་རོ། །གྱད་དེ་སྔ་ས་ནས་སྨན་པ་འདི་སྐད་དུ། འདག་གི་དཔྲལ་བའི་ནོར་བུ་གར་ཡང་མ་སོང་བའི་རིགས་ཏེ། དེ་མེད་ན་སྒྱུ་མ་ཡིན་ནམ་སྙམ་དུ་སེམས་ཏེ་ཤིན་ཏུ་མྱ་ངན་བྱེད་དེ། དེ་ནས་སྨན་པ་དེས། གྱད་དེའི་སྤྲོ་བ་བསྐྱེད་ནས། དེ་ལྟར་མྱ་ངན་མ་བྱེད་ཅིག །ཁྱོད་ཀྱི་སྟོབས་བཀྱེ་བ་ན་ནོར་བུ་ཤའི་ནང་དུ་ནུབ་སྟེ། གཟུགས་བརྙན་ཙམ་ཕྱི་རོལ་དུ་སྣང་ངོ་། །ཁྱོད་སྟོབས་བཀྱེ་བ་ན་ཞེ་སྡང་སྐྱེས་ཏེ། ནོར་བུའི་མཐུས་ཤའི་ནང་དུ་ནུབ་ཀྱང་མ་ཚོར་བ་ཡིན་ནོ། །དེ་སྐད་སྨྲས་ཀྱང་ཡིད་མ་ཆེས་ནས། འདི་སྐད་དུ་སྨན་པ་ཁྱོད་རྫུན་མ་ཟེར་གཅིག །ཅི་སྟེ་ཤའི་ནང་དུ་ནུབ་ན་ནི་རྣག་དང་། ཁྲག་ཤིན་ཏུ་བརྩོགས་པ་ཡིན་པས་གཟུགས་བརྙན་ཕྱིར་སྣང་བ་ནི་མི་རིགས་སོ། །དེ་ནས་སྨན་པས་མེ་ལོང་ལྟར་བཅུག་ནས་མེ་ལོང་གི་ནང་དུ་ནོར་བུ་ཡང་གསལ་བར་གྱུར་ཏེ། གྱད་དེས་དེ་ལྟར་གྱུར་པ་མཐོང་ནས་ངོ་མཚར་རྨད་ཀྱི་འདུ་ཤེས་སྐྱེས་སོ། །རིགས་ཀྱི་བུ་སེམས་ཅན་ཐམས་ཅད་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བསྐུར་མ་བྱས་པས་སངས་རྒྱས་ཀྱི་རང་བཞིན་ཡོད་ཀྱང་མཐོང་བར་མི་ནུས་སོ། །འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་ཏེ་ཟིལ་གྱིས་གནོན་པ་འགྲོ་བ་ཐ་དད་པ་མང་པོར་འཁོར་ཞིང་སྡུག་བསྔལ་བར་གྱུར་ཏོ། །ཞེས་པ་ནས། རིགས་ཀྱི་བུ། སེམས་ཅན་ཐམས་ཅད་ཀྱི་ལུས་ཀྱི་ནང་ན་སྟོབས་བཅུ་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡང་ཡོད་དོ། །ཞེས་པའི་བར་ཚུལ་དུ་མས་གསུངས་སོ། །དེ་ལྟར་རང་གནས་ཀྱི་ཡེ་ཤེས་དེ་ཉིད་རྟོགས་པའི་ཐབས་ལ་རྒྱལ་བས་འཁོར་ལོ་རིམ་པ་གསུམ་བསྐོར་བའི་ཚུལ་དཔེ་དོན་སྒོ་ནས་སྟོན་པ་ནི། ཡོངས་སུ་མྱ་ངན་ལས་འདས་པའི་མདོ་ལས། རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་བུད་མེད་བུ་ཆུང་ངུ་ཁ་མྱགས་གོས་པ་ཞིག་ནད་ཀྱིས་བཏབ་ན། བུད་མེད་དེ་མྱ་ངན་གྱིས་གདུངས་ཏེ་སྨན་པ་འཚོལ་ལོ། །དེ་ལ་སྨན་པས་སྨན་མར་དང་འོ་མ་དང་། ཤ་ཁ་ར་གསུམ་དུ་སྦྱོར་ཏེ་བུ་ལ་བླུད་ནས། བུད་མེད་དེ་ལ་འདི་སྐད་ཅེས་བསྒོའོ། །བུ་འདིར་སྨན་བཏང་གིས་རེ་ཞིག་མ་ཞུའི་བར་དུ་ནུ་ཞོ་བླུད་དུ་མི་རུང་ངོ་ཞེས་བསྒོའོ། །དེ་ནས་བུད་མེད་དེས་ནུ་ཞོ་མི་སྣུན་པའི་ཕྱིར་ནུ་མ་ལ་མཁྲིས་པ་བྱུགས་ནས། བུ་ལ་ཁོ་མོའི་ནུ་མ་ལ་དུག་གིས་བསྐུས་ཏེ་ནུར་མི་རུང་ངོ་ཞེས་ཟེར་རོ། །དེའི་བུ་དེ་སྐོམ་པས་གདུངས་ཏེ། ནུ་མ་ནུ་འདོད་ཀྱང་ཁ་བའི་རོ་བྲོ་བ་ཚོར་མ་ཐག་ཏུ་ནུར་མི་བཏུབ་བོ། །སྨན་ཞུ་ནས་བུད་མེད་ཀྱིས་ནུ་མ་དག་པར་བཀྲུས་ཏེ། འདི་སྐད་དུ་ཚུར་ཤོག །ད་ནུ་མ་ནུར་གཞུག་གོ། །ཞེས་སྨྲས་ན། ཁྱེའུ་དེ་སྐོམ་པས་གདུངས་ཀྱང་། སྔར་ཁ་བའི་རོ་མྱོང་བས་བོས་ཀྱང་འོང་དུ་མི་གཏུབ་བོ། །དེ་ལ་ཡང་མས་འདི་སྐད་དུ་བསྒོའོ། །ཁྱེད་ད་ཅི་སྔར་སྨན་འཐུངས་ཏེ་སྨན་མ་ཞུ་བའི་བར་དུ་ནུ་མ་བླུད་དུ་མི་རུང་བས། ཁོ་མོས་མཁྲིས་པ་བསྐུས་པ་ཡིན་གྱི། ད་ཁྱོད་ཀྱི་སྨན་ཡང་ཞུ་ལ། ཁ་བ་ཡང་བཀྲུས་ཀྱི་ད་ནི་ཁ་བའི་རོ་མེད་དོ། །ཞེས་སྨྲས་ནས། གདོད་བག་ཀྱི་ཉེ་སྟེ་འཐུང་དུ་གཏུབ་བོ། །རིགས་ཀྱི་བུ། དེ་བཞིན་གཤེགས་པ་ཡང་སེམས་ཅན་བསྒྲལ་བའི་ཕྱིར། སེམས་ཅན་ཐམས་ཅད་ལ་བདག་མེད་པའི་ནན་ཏན་སྟོན་ཏེ། དེ་ལ་ནན་ཏན་བྱས་པས་བདག་ཅེས་བྱ་བའི་སེམས་མེད་དེ། ཡོངས་སུ་མྱ་ངན་ལས་བཟླའོ། །དེ་ལས་འཇིག་རྟེན་རྒྱང་འཕེན་པའི་ངན་པར་ལྟ་བ་བསལ་བའི་ཕྱིར། བདག་མེད་པའི་ཆོས་བསྒོམས་པས་ཡོངས་སུ་དག་པའི་ལུས་སུ་འགྱུར་བའི་ཕྱིར། ཇི་ལྟར་བུད་མེད་དེས་བུའི་མཁྲིས་པས་ནུ་མ་བསྐུས་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམ་པའི་ཕྱིར་ཆོས་ཐམས་ཅད་ལ་བདག་མེད་ཅེས་གསུངས་སོ། །ཇི་ལྟ་བུད་མེད་དེས་ནུ་མ་ཕྱིས་བཀྲུས་ནས་བུ་བོས་ཏེ། ནུ་ཞོ་བླུད་དེ་ཞེས་བྱ་བ་བཞིན་དུ། ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་ཀྱང་མ་སྐྲག་པར། ཇི་ལྟ་བུ་ལ་མས་བོས་ཏེ། ནུ་ཞོ་བགས་ཀྱིས་འཐུངས་པ་བཞིན་དུ། དགེ་སློང་ཁྱོད་ཀྱང་བྱེ་བྲག་ཕྱེད་པར་གྱིས་ཤིག །དེ་བཞིན་གཤེགས་པའི་སྙིང་པོ་ནི་མེད་པར་བྱ་བ་མ་ཡིན་ནོ། །ངས་སྔོན་ཕ་རོལ་ཏུ་ཕྱིན་པའི་མདོ་བརྗོད་པ་དག་ལས། སྟོང་པ་ཉིད་དུ་བསྟན་པ་དེ་ཡང་། རང་བཞིན་མེད་པ་ཙམ་ལ་དགོངས་ཏེ་གསུངས་པར་རིག་པ་གྱིས་ཤིག །གཞན་དུ་ན་ཅི་ཡང་མེད་པའི་སྟོང་པ་ཉིད་བསྒོམས་པ་ལས་ནི། སངས་རྒྱས་ཀྱི་སྐུ་དང་ཡེ་ཤེས་ཀྱང་འབྱུང་བར་མི་འགྱུར་ཏེ། འབྲས་བུ་ནི་རྒྱུའི་རྗེས་སུ་བྱེད་པ་བཞིན་ནོ། །ཞེས་སོ། །འདི་ཉིད་ངེས་དོན་མཐར་ཐུག་ཡིན་པ་ཅིས་ཤེས་ཤེ་ན། སྟོན་པ་མྱང་ངན་ལས་འདས་པའི་ཁར་སོ་སོའི་སྐད་དང་མཐུན་པར་གསུང་གཅིག་གིས་ད་མྱ་ངན་ལས་འདའ་ཡི་སུ་དག་ཐེ་ཚོམ་དང་སོམ་ཉི་ཡོད་ན་ནང་གི་ཐ་མ་འདིར་ཞུས་ཤིག་ཅེས་པའི་སྒྲ་ཆེན་པོས་སྲིད་རྩེའི་བར་དུ་ཁྱབ་པར་མཛད་ཅིང་ཞལ་གྱི་སྒོ་ལས་འོད་ཟེར་གྱིས་ཕྱོགས་བཅུའི་སེམས་ཅན་ཀུན་ལ་རིག་པས་སྡུག་བསྔལ་ཞི་བ་སོགས་མཛད་ཚེ། ཀུན་དགའ་བོ་ལ་སོགས་པ་རྣམས་ཀྱིས་ཞུས་པར་སངས་རྒྱས་ཀྱི་རང་བཞིན་ལམ་དབུ་མ་སྟོན་པ་མདོ་སྡེ་མྱང་འདས་གསུངས་ནས། དེང་ཕན་ཆད་མདོ་སྡེའི་མཐའ་ལ་འཇུག་པར་བྱ་ཡི། གང་ཟག་ལ་འཇུག་པ་མ་ཡིན་ནོ། །མདོ་དང་མཐུན། འདུལ་བ་ལ་གནས་ཤིང་། ཆོས་ཉིད་དང་མི་འགལ་ན་དེ་ལ་གུས་པར་བཟུང་ཞིག །དེ་ལས་ལྡོག་ན་དེ་ནི་ཆོས་མ་ཡིན་པར་བཟུང་ཞིག་ཅེས་ཞལ་གདམས་སུ་བརྩལ་བ་ཡིན་ནོ། །མདོ་སྡེ་དགོངས་པ་ངེས་འགྲེལ་ལས་ཀྱང་། འཁོར་ལོ་དང་པོ་གཉིས་ཀྱི་སྐབས་སུ། འཁོར་ལོ་བསྐོར་བ་འདི་ཡང་བླ་ན་མཆིས་པ་སྐབས་མཆིས་པ། དྲང་བའི་དོན། རྩོད་པའི་གཞིའི་གནས་སུ་གྱུར་པ་ལགས་སོ། །ཞེས་དང་། གསུམ་པའི་སྐབས་སུ། ཆོས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་བསྐོར་བ་འདི་ནི། བླ་ན་མ་མཆིས་པ། སྐབས་མ་མཆིས་པ། ངེས་པའི་དོན། རྩོད་པའི་གཞིའི་གནས་སུ་གྱུར་ལགས་པའོ་ཞེས་གསུངས་སོ། །དེ་ལ་ཁ་ཅིག་ན་རེ། དེ་ལྟར་ན་གོང་དུ་དབུ་མ་ཡང་དག་ཉིད་མ་རྟོགས་པར་བཤད་པ་དང་འགལ་ཞིང་། མདོ་སྔགས་གཉིས་མཐར་ཐུག་གི་ལྟ་བའང་ཁྱད་པར་མེད་པར་འགྱུར་རོ་ཞེ་ན། དེའི་ལན་ནི། མདོའི་ཐེག་པར་སྒྲིབ་པ་ཤིན་ཏུ་ཕྲ་བ་ནང་དུ་དཀར་དམར་རླུང་གསུམ་འགྲོགས་པས་ཤེས་པ་གཉིས་སྣང་འཁོར་བའི་ཆོས་སུ་ཤར་བར་བྱེད་པ་དོན་ལ་དག་བྱེད་གཉེན་པོ་ལ་ཞེན་པའི་སྙོམས་འཇུག་གི་སྒྲིབ་པ་ཤིན་ཏུ་ཕྲ་བ་དེ་སྔགས་ཀྱི་ཐེག་པ་ཁོ་ནས་སྦྱོངས་དགོས་ཤིང་། དེ་སྦྱོང་བྱེད་ཀྱི་སྙིང་པོ་རྡོ་རྗེ་ལྟ་བུའི་ཏིང་ངེ་འཛིན་ཡིན་མོད་ཀྱང་། དེ་ནི་ནང་གི་མངོན་བྱང་ལྔ་ལ་བརྟེན་ནས་དཀར་ཆ་དག་པ་སྐུ་རྡོ་རྗེ། དམར་ཆ་དག་པ་གསུང་རྡོ་རྗེ། ཤེས་རིག་དག་པ་ཐུགས་རྡོ་རྗེ་སྟེ་རྡོ་རྗེ་གསུམ་གྱི་ངོ་བོར་བྱང་ཆུབ་པར་བྱེད་པའི་ལམ་དེ་ཡིན་ཀྱང་། མདོ་ལམ་དུ་རྡོ་རྗེ་ལྟ་བུའི་ཏིང་འཛིན་ཞེས་པ་ལས་དེ་ཇི་ལྟར་ཡིན་མ་བཤད་པ་དང་། གོང་གི་ལྟ་བའི་སྟེང་དུ་ལྷན་ཅིག་སྐྱེས་པའི་མི་འགྱུར་བའི་བདེ་ཆེན་གྱི་ཡེ་ཤེས་དེ་སྔགས་ཀྱི་ཐུན་མོང་མ་ཡིན་པའི་ལྟ་བ་ཡིན་པར་དེ་གཉིས་མ་བཤད་པས་ཁྱད་པར་བྱས་པ་སྟེ། རྡོ་རྗེ་མེ་ལོང་ལས། རང་བྱུང་ཟག་མེད་ཡེ་ཤེས་གཟུགས། །མི་ཤིག་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་སྔགས་ཀྱི་ཐེག་པར་བསྟན་ཞེས་གསུངས་པའི་ཕྱིར་རོ། །གཉིས་པ་སྔགས་ཀྱི་ལྟ་བའི་ངོ་བོའམ། མཚན་ཉིད་ནི། མཐའ་གང་དུ་ཡང་མ་རེག་པའི་སེམས་ཉིད་ཡེ་ནས་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པ་ནི་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་ཤར་བའི་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་སྟེ། རྣམ་བཀོད་ལས། ལྷག་པའི་རྣམ་གཉིས་དབྱེར་མེད་དོན། །མིང་གྲངས་ཅིར་ཡང་བསྟན་མོད་ཀྱང་། །དོན་དུ་སྨྲ་བསམ་ཡུལ་ལས་འདས། །ཞེས་སོ། །གསུམ་པ་སྒྲ་དོན་ནོ། །དྲྀཥྚའི་སྒྲ་ལས་ལྟ་བ་སྟེ། གནས་ལུགས་དང་རྗེས་སུ་མཐུན་པའི་བདེན་དོན། མཐོང་བས་གདེངས་སུ་གྱུར་པའི་ཤེས་རབ་བོ། །རྒྱས་པ་ལས། ལྟ་དང་ལྟ་བ་བྱར་མེད་དེ། །ཡེ་ཤེས་སྒྲོན་མ་སྒྲེང་བས་ནི། །ཕྱོགས་བཅུའི་ཞིང་ཁམས་མ་ལུས་མཐོང་། །ཞེས་སོ། །བཞི་པ་རྣམ་གྲངས་ལ། གཏན་ཚིགས་ཀྱིས་གཏན་ལ་ཕབ་པ་དང་། རྣམ་གྲངས་རྣམ་པར་ཕྱེ་སྟེ་དོན་གྱི་དམིགས་བཟུང་བ་གཉིས་ལས། དང་པོ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས་ཆོས་གསུམ་གྱི་སྒོ་ནས་རྟོགས་པར་བྱ་སྟེ། གང་གཞལ་བྱ་ཆོས་ཅན་གང་གིས་འཇལ་བྱེད་གཏན་ཚིག །དེ་ལྟར་གཞལ་བའི་གྲུབ་མཐའོ། །དང་པོ་ལ་གཞལ་བྱ་དངོས། ཞར་ལ་དོགས་པ་བསལ་བ་དང་། །རྩོད་པ་སྤང་བའོ། །དང་པོ་ནི། འདི་ཉིད་ལས། ཇི་སྙེད་འཇིག་རྟེན་འཁྲུལ་བའི་ཆོས། །ཞེས་སོགས་དང་། ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་དང་། རྣམ་བཀོད་ལས། བརྟགས་པའི་སྤྱོད་ཡུལ་གཉིས་ལ་གཞལ། །ཞེས་སོ། །གཉིས་པ་ལ། གཞལ་བྱ་མེད་པའི་ངང་། གཞལ་གྱིས་མི་ལོང་བའི་དོགས་པ་གཉིས་ལས། དང་པོ་ནི། དངོས་པོ་གཉིས་ཀྱི་བསྡུས་པའི་ཆོས་གཞལ་བྱར་བྱས་ནས་འཇལ་བ་དེ། མྱང་འདས་འཇལ་ལམ། འཁོར་བ་འཇལ་དང་པོ་ལྟར་ན། འདས་པའི་རང་མཚན་ནི། ལས་དང་པོ་དང་། མོས་སྤྱོད་ཀྱི་རིག་ཤེས་ལ་ལྐོག་ཏུ་གྱུར་པའི་ཕྱིར། འོ་སྐོལ་རྣམས་ཀྱི་སྤྱོད་ཡུལ་མ་ཡིན་པའི་གཞལ་བྱར་མི་རུང་སྟེ། རྣམ་བཀོད་ལས། འདས་པའི་སྤྱོད་ཡུལ་མ་གྱུར་ཕྱིར། །གཞལ་བྱའི་ཡུལ་དུ་ཇི་ལྟར་རིགས། །ཞེས་དང་། གལ་ཏེ་འདས་པའི་སྣང་བ་ལ། །འཇལ་ན་དང་པོའི་ལྐོག་ཏུ་གྱུར། །ཞེས་སོ། །དེར་ཞེན་པའི་སེམས་དེ་ལ་འཇལ་ལོ་ཞེ་ནའང་། མི་རིགས་ཏེ་མྱང་འདས་འཁྲུལ་ཤེས་ཀྱི་ཡུལ་དུ་གྱུར་པའི་ཕྱིར། ཞེན་ཏུ་མི་རུང་ཞིང་། གལ་ཏེ་ཞེན་ན་སྒྲོ་བཏགས་འཁོར་བའི་ཆོས་སུ་འགྱུར་བས་འདས་པ་མ་ཡིན་ཏེ་སྔ་མ་ལས། སེམས་ལ་མྱ་ངན་འདས་ཞེན་པ། །དེ་ཉིད་འདས་པར་རུང་མ་ཡིན། །ཞེས་སོ། །གཉིས་པ་ལྟར་ན། འཁོར་བའི་རང་མཚན་སྣང་ཙམ་ཉིད་ལ་འཇལ་ལམ། ཞེས་པ་སྒྲོ་བཏགས་ཀྱི་ཤེས་པ་ལ་འཇལ། དང་པོ་མི་རིགས་ཏེ། ཨརྱ་དེ་བས། ཇི་ལྟར་སྣང་ཉིད་དགག་མིན་ཏེ། །རྟེན་ཅིང་འབྲེལ་བར་འབྱུང་བའི་ཕྱིར། །འདིར་ནི་སྡུག་བསྔལ་རྒྱུར་འགྱུར་བའི། །བདེན་པར་རྟོག་པ་བཟློག་བྱ་ཡིན། །ཞེས་པས་རིག་པས་དགག་པར་མི་ནུས་ཤིང་། བཀག་ན་སྐྱོན་དུ་འགྱུར་བའི་ཕྱིར་ཏེ། ལམ་བསོད་ནམས་ཀྱི་ཚོགས་བཀག་པ་དང་། འབྲས་བུ་ཇི་སྙེད་མཁྱེན་པའི་ཡེ་ཤེས་རྒྱུན་ཆད་པར་འགྱུར་བའི་ཕྱིར་རོ། །འོ་ན་གང་གཞལ་སྙམ་ན། ད་ལྟར་གྱི་ཤེས་པ་སྐད་ཅིག་མ་རང་ཐད་རང་ཐད་ཀྱི་ཞེན་སྣང་ལ་འཇལ་ཏེ། རྣམ་བཀོད་ལས། དེ་ཤེས་ཤེས་པ་སྐད་ཅིག་མ། །དེ་ཡང་རང་ཐད་རང་ཐད་དཔྱད། །ཅེས་སོ། །དེ་ལྟར་ན་ཡིད་སོ་སོར་རྟོག་པའི་ཤེས་རབ་ཏུ་གནས་འགྱུར་བས་གཞལ་བྱ་མེད་དོ་ཞེ་ན། ཡིད་རྟོག་བཅས་བསམ་ཤེས་སུ་རེ་ཞིག་གནས་འགྱུར་ཀྱང་ཞེན་པའི་ངོ་བོ་མ་དག་པས་ཀུན་བཏགས་སྐྱེ་རུང་དང་། ཞེན་སྣང་འབྱུང་རུང་དུ་ཡོད་པའི་ཕྱིར། དེའི་སྐྱོན་མེད་དེ། ཡིད་རྟོག་བཅས་ཀྱི་ཤེས་པ་རྩ་བ་ནས་འདག་པར་བྱེད་པའི་གཉེན་པོ་ཤེས་རབ་ཡིན་ལ། དེ་ད་དུང་རྒྱུད་ལ་མ་བརྟེན་པའི་ཕྱིར་ཏེ། རྣམ་བཀོད་ལས། གལ་ཏེ་ཡིད་འགྱུར་ཞེན་པ་ཡང་། །སྐད་ཅིག་མཉམ་པར་འགག་པས་མེད། །དེ་ཚེ་བརྟགས་གཞི་ཡོད་མི་རུང་། །དོགས་ན་ཞེན་པའི་ཡུལ་རྣམས་ནི། །གཏན་དུ་དག་པ་མ་ཡིན་ཕྱིར། །སོ་སོར་སྤྱོད་ཀྱང་ཞེན་ཡུལ་མཐོང་། །ཞེས་སོ། །དེ་ཡང་ཤེས་རྒྱུད་སྐད་ཅིག་གི་སྟེང་དུ་མངོན་འགྱུར་དུས་གཅིག་ཏུ་ཚོགས་ནས་འཇལ་བ་མ་ཡིན་གྱི་གཅིག་མངོན་འགྱུར་གྱི་ཚེ་གཅིག་བག་ལ་ཉལ་དུ་གནས་པའི་ཕྱིར། སྔ་མ་དང་ད་ལྟར། ད་ལྟ་དང་། ཕྱི་མ་འཕྲད་པའི་ཚུལ་གྱིས་འཇལ་ཏེ། ད་ལྟར་གྱི་སྐད་ཅིག་མ་དང་པོ་ལ་འཕྲད་ཙམ། གཉིས་པ་ལ་མགོ་ནོན། གསུམ་པ་ལ་བསམ་ཤེས་རྫོགས་པར་སྐྱེས་པའི་ཚེ། སྔ་མའི་ཀུན་བཏགས་མངོན་འགྱུར་ཅི་རིས་སུ་འགག་ཅིང་། རྐྱེན་གཞན་གྱིས་དེའི་རྒྱུན་བརྗོད་པའི་སྐད་ཅིག་ཕྱི་མ་ལ་ཀུན་བཏགས་སྐྱེ་བཞིན་པ་སྟེ། ཡུལ་ཤེས་མ་འདྲེས་པའི་ཕྱིར་གཞལ་བྱ་མེད་པའི་སྐྱོན་མེད་དེ། རྣམ་བཀོད་ལས། གཞལ་བྱ་མེད་པར་དོགས་པ་ཡང་། །ཞེན་པ་ཤེས་པའི་ཕྱི་ཡུལ་ཡིན། །སྐད་ཅིག་གནས་འགྱུར་ཤེས་ཉིད་དོ། །དེ་བས་ཡུལ་སེམས་མ་འདྲེས་ཕྱིར། །ཞེན་སྣང་འཇལ་ལ་སྐྱོན་པ་མེད། །ཅེས་གསུངས་པའི་ཕྱིར་རོ། །མདོར་ན། འཁོར་འདས་གཉིས་ཀྱི་རང་མཚན་ལ་མི་འཇལ་གྱི། འཁོར་བ་ཕྱི་ནང་སྣོད་བཅུད་དུ་ཞེན་པ་དང་། མྱ་ངན་འདས་སྐུ་དང་ཡེ་ཤེས་སུ་ཞེན་པའི་ཞེན་བྱེད་ཀྱི་བླ྄ོ་ཉིད་གཞལ་བྱ་སྟེ། རྣམ་བཀོད་ལས། ངེས་པར་བཞག་པའི་གཞལ་བྱ་ནི། །འཁོར་དང་མྱ་ངན་འདས་པ་ཡི། །རང་གི་མཚན་ཉིད་མི་འདོད་དེ། །དེ་ལྟར་ནང་ན་ཞན་པ་ཡི། །ཕྱི་རོལ་མེད་ལ་ཡོད་པར་སྣང་། །ཞན་དང་སྣང་བ་གཉིས་ལ་བརྟེན། །ཞེས་སོ། །བཞི་པ་རྩོད་སྤང་ནི། འོ་ན་སོ་སོར་རྟོག་པའི་བསམ་པའི་ཤེས་རབ་དེ་འཁྲུལ་ཤེས་སུ་ཐལ། འཁོར་བ་པའི་ཤེས་པ་ཡིན་པའི་ཕྱིར་ཞེ་ན། ལན་ནི། སོ་སོར་རྟོག་པའི་ཤེས་རབ་ཆོས་ཅན། ཁྱོད་ཀྱིས་དོན་གཏན་ལ་མི་ཕེབ་པར་ཐལ། འཁྲུལ་ཤེས་ཡིན་པའི་ཕྱིར། རྟགས་ཁས། འདོད་ན། བསམ་ཤེས་སྐྱེས་པ་དོན་མེད་དུ་ཐལ་ལོ། །དེ་ལ་ཁོ་ན་རེ། མ་འཁྲུལ་པའི་ཕྱིར་འབད་མེད་དུ་གྲོལ་བར་ཐལ་ཟེར་ན། འཁྲུལ་མ་འཁྲུལ་གནས་སྐབས་ལ་འཇོག་སྟེ་དབང་པོའི་མངོན་སུམ་བཞིན་ནོ། །གཉིས་པ་འཇལ་བྱེད་གཏན་ཚིགས་ལ། གོ་དོན་དང་། གཏན་ལ་དབབ་པའོ། །དང་པོ་ནི། བསྒྲུབ་བྱའི་དོན་ཤེས་པར་བྱེད་པའི་ཐབས་རྩོད་གཞི་ལ་བཀོད་ནས་དགག་སྒྲུབ་གཉིས་སུ་བྱེད་པའི་ལས་ཅན་ཏེ། ལམ་རིམ་ལས། དེ་ཕྱིར་གཏན་ཚིགས་ལས་ལ་བརྗོད། །ཅེས་སོ། །གཉིས་པ་ནི། དེ་ཉིད་ལས། དེ་ཉིད་དངོས་ལྔ་ཚུལ་དང་ཚིགས། །ཞེས་པས་གསུམ་སྟེ། སྔོན་བྱུང་དངོས་ལྔའི་གཏན་ཚིགས། རྗེས་འཇུག་ཚུལ་ལྔ་དང་། ཚིག་ལྔའི་གཏན་ཚིགས་སོ། །དང་པོ་ནི། སྔོན་བྱུང་དུ་སྟོན་པ་སྐུ་ལྔས་རང་རང་གི་འཁོར་ལྔ་ལ་གསུང་ལྔའི་སྒོ་ནས་ཆོས་ཉིད་ཀྱི་དོན་དངོས་སུ་གཏན་ལ་ཕབ་པ་ནི་དངོས་ལྔའི་གཏན་ཚིགས་ཏེ། དེ་ཉིད་ལས། ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པ་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་སོ། །གཏན་ཚིགས་འདི་ནི་རྗེས་འཇུག་ལ་ལྟོས་པ་སྟེ། སྔོན་བྱུང་ལ་ལྟོས་ན་གཏན་ཚིགས་དངོས་མ་ཡིན་པར་ཤེས་དགོས་སོ། །གཉིས་པ་ནི། དབང་པོ་ཡང་རབ་མཆོག་ཏུ་གྱུར་པ་རྣམས་ལ་སྣང་གྲགས་འདི་དག་གིས་མཚོན་ནས། སྔོན་བྱུང་དུ་དངོས་ལྔས་གཏན་ལ་ཕབ་པའི་སྐུ་ལྔའི་གསུང་གི་ཚུལ་དུ་རྟོགས་པར་བྱེད་པ་ནི་ཚུལ་ལྔའི་གཏན་ཚིགས་ཏེ། དེ་ཉིད་ལས། རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་སེམས་གསང་སྔགས། །ངེས་ལུང་ཡིན་ཕྱིར་ཆོས་ཚུལ་སྟོན། །བརྗོད་དང་འདྲ་བར་བརྡའ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་སོ། །གསུམ་པ་ནི། སྔར་གྱི་ཚུལ་ལྔ་པོ་ཉིད་ཚིག་ཏུ་དངོས་སུ་བརྗོད་པ་ནི་ཚིགས་ལྔའི་གཏན་ཚིགས་སོ། །དེ་ཡང་། ཆོས་སྐུའི་ཚིག་ནི་སྐྱེ་མེད་རང་སྣང་དུ་སྟོན་པའི་ཚིག་དང་ཡི་གེ་རྣམས་སོ། །དེ་བཞིན་དུ་ལོངས་སྐུའི་ལྡེམ་དགོངས་བརྡའི། སྤྲུལ་སྐུའི་བཀྲི་དྲང་བརྒྱུད་པའི། རྡོ་རྗེའི་སྐུའི་དབྱེར་མེད་རྡོ་རྗེའི། མངོན་བྱང་གི་ཡེ་ཤེས་རང་སྣང་དུ་སྟོན་པའི་ཚིག་དང་ཡི་གེ་རྣམས་ཏེ། ལམ་རིམ་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཞེས་སོ། །དེ་ཡང་བསྡུ་ན། དཔྱད་དུ་མེད་པ་གོ་བ་དང་། ཡོད་པས་གོ་བའོ། །དང་པོ་ནི། སྐུ་བཞིའི་གཏན་ཚིགས་ཏེ། བརྟག་དཔྱད་ལ་མ་ལྟོས་པར་དོན་གོ་བའི་ཕྱིར་རོ། །གཉིས་པ་ནི། སྤྲུལ་སྐུའི་གཏན་ཚིགས་ཏེ་བརྟག་དཔྱད་ལ་བརྟེན་ནས་དོན་གོ་བའི་ཕྱིར་རོ། །དེ་ལ་དབྱེ་ན། ཚད་མ་བཀའ་གཞུང་དང་། སྒྲ་མཐུན་དོན་སྤགས་ཀྱི་གཏན་ཚིགས་གཉིས། དང་པོ་ལའང་རྟོགས་པ་བཞིའི། དག་པ་གསུམ་གྱི། མཉམ་པ་བཞིའི། བདག་ཉིད་ཆེན་པོའི་གཏན་ཚིགས་དང་བཞི། དང་པོ་ནི། འདི་ཉིད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡི། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་རྟོགས་པ་བཞི་ལས། རྒྱུ་གཅིག་པ་ནི་འཁོར་འདས་གཉིས་ཆོས་ཅན། རྒྱུ་གཅིག་པ་ཡིན་ཏེ། སེམས་ཉིད་སྐྱེ་བ་མེད་པའི་དབྱིངས་སུ་རྒྱུ་གཅིག་པའི་ཕྱིར། དཔེར་ན་རྒྱལ་བུ་དྭའུ་དམངས་སུ་འཛིན་པའི་སྒྲོ་འདོགས་དང་རྒྱལ་པོར་ངེས་པའི་ཚད་མ་གཉིས་ངོ་བོ་རྒྱལ་བུར་གཅིག་པ་བཞིན་ནོ། །དེའང་རྒྱ་མཚོ་ལས། ཆོས་ཉིད་དབྱིངས་སུ་ཚུལ་གཅིག་པས། །མ་ལུས་རང་སྣང་ཆོས་ཐམས་ཅད། །མ་ལུས་བྱང་ཆུབ་སེམས་སུ་རྟོགས། །ཞེས་སོ། །གཉིས་པ་ཡིག་འབྲུའི་ཚུལ་ནི། སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་ལྷའི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་བྱེད་ཡེ་ཤེས་མཚོན་ནས་རྟོགས་པའི་ཕྱིར། དཔེར་ན་མཛུབ་མོས་རི་བོང་ཅན་བཞིན་ནོ། །དེ་ཡང་རྒྱ་མཚོ་ལས། སྐུ་གསུང་ཐུགས་སུ་སྣང་བ་ཡི། །མ་ལུས་གསུང་གི་རྒྱན་དུ་རྟོགས། །ཐམས་ཅད་གསུང་གི་ཡི་གེ་སྟེ། །ཐབས་དང་ལྡན་པས་རྒྱས་གདབ་བོ། །ཞེས་སོ། །གསུམ་པ་བྱིན་གྱིས་རླབས་པའི་ཚུལ་ནི། སྣང་སྟོང་གཉིས་ཆོས་ཅན། དབྱེར་མེད་པ་ཡིན་ཏེ། དེ་གཉིས་དངོས་སུ་རྟོགས་པའི་མཐུས་བདེན་པ་དབྱེར་མེད་དུ་ཡེ་ནས་སངས་རྒྱས་པར་རྟོགས་པའི་བྱིན་རླབས་ཤུགས་ལ་འབྱུང་བའི་ཕྱིར། དཔེར་ན་རས་དཀར་པོ་དམར་པོར་བསྒྱུར་བའི་ནུས་པ་བཙོད་ལ་ཡོད་པ་བཞིན་ནོ། །དེ་ཡང་རྒྱ་མཚོ་ལས། དེ་ཉིད་དབྱེར་མེད་བྱིན་རླབས་ལས། །དེ་ཉིད་དེ་ཡི་བྱིན་རླབས་ཏེ། །གཉིས་མེད་ཚུལ་གྱིས་རང་སྣང་བ། །བྱིན་རླབས་ངོ་མཚར་བསམ་མི་ཁྱབ། །ཞེས་སོ། །མངོན་སུམ་པ་ནི། བདེན་པ་དབྱེར་མེད་ཆོས་ཅན། བློའི་སྤྱོད་ལས་འདས་པ་ཡིན་ཏེ། རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པའི་ཕྱིར། དཔེར་ན་མིག་སྐྱོན་མེད་པས་དུང་དཀར་པོ་མངོན་སུམ་དུ་མཐོང་བ་དེ་དེའི་གནས་ལུགས་ཡིན་པ་བཞིན་ནོ། །དེ་ཡང་རྒྱ་མཚོ་ལས། རང་སྣང་རང་བྱུང་ཆོས་འདི་དག །གཉིས་མེད་རང་རིག་མ་སྐྱེས་པར། །གསལ་བར་མངོན་སུམ་ཐེ་ཚོམ་མེད། །རྟོགས་པ་ཀུན་གྱི་མཆོག་ཏུ་བཤད། །ཅེས་དང་། རྔམ་གློག་ལས། གཞན་ལ་མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་པ་ལ་སློབ་པ་ཡིན། །ཞེས་སོ། །དེའང་སྤྱིར་མངོན་སུམ་ལ་བཞི་ཡོད་ཀྱང་། འདི་རང་རིག་མངོན་སུམ་མོ། །གཉིས་པ་དག་པ་གསུམ་གྱི་གཏན་ཚིགས་ནི། འདི་ལྟར་སྣང་བ་ཕྱི་ནང་གི་ཆོས་ཐམས་ཅད་ཆོས་ཅན། ཡེ་ནས་སྐུ་དང་ཡེ་ཤེས་ཀྱི་ངོ་བོར་སངས་རྒྱས་པ་ཡིན་ཏེ། དག་པ་གསུམ་དང་ལྡན་པའི་ཕྱིར་ཏེ། སྣོད་འབྱུང་བ་ལྔ་ཡུམ་ལྔར། བཅུད་ཕུང་པོ་ལྔ་ཡབ་ལྔར། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་དག་པའི་ཕྱིར། དེའང་འདི་ཉིད་ལས། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་སོ། །གསུམ་པ་མཉམ་པ་བཞིའི་གཏན་ཚིགས་ནི། འདི་ལྟར་སྣང་བའི་ཆོས་རྣམས་ཆོས་ཅན། ལྷག་པའི་ཆོས་ཀྱི་སྐུར། ཡེ་ནས་སངས་རྒྱས་པ་ཡིན་ཏེ། མཉམ་པ་བཞི་དང་ལྡན་པའི་ཕྱིར། བཞི་ནི། རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་ཀ་སྐྱེ་མེད་དང་། ཡང་ལོག་གི་ཀུན་རྫོབ་གཉིས་ཀ་སྒྱུ་མར་མཉམ་པ་ནི། ཐུན་མོང་གི་མཉམ་པ་གཉིས་སོ། །ལྷག་པའི་མཉམ་པ་གཉིས་ནི། མེད་དགག་དང་མ་ཡིན་དགག་གི་སྟོང་པ་ཉིད་གཉིས་ཀ་དོན་དམ་དཀོར་བདུན་ཆོས་ཀྱི་སྐུ་དང་། མ་དག་པ་ལས་སྣང་དང་དག་པ་ལྷར་སྣང་གི་ཀུན་རྫོབ་གཉིས་ཀའང་གཟུགས་སྐུ་ལྷའི་དཀྱིལ་འཁོར་དུ་མཉམ་པས་ལྷག་པ་སྟེ། འདི་ཉིད་ལས། མཉམ་གཉིས་ལྷག་པའི་མཉམ་གཉིས་ཀྱི། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་སོ། །བཞི་པ་བདག་ཉིད་ཆེན་པོའི་གཏན་ཚིགས་ནི། འཁོར་འདས་ཀྱི་ཆོས་རྣམས་ཆོས་ཅན། སྣང་ལུགས་ནས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མ་ཡིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པའི་ཕྱིར། དཔེར་ན་ཕ་མེས་ཀྱི་ལོ་རྒྱུས་བརྗོད་པས་སོ་སོའི་རིགས་བརྒྱུད་ཤེས་པ་བཞིན་ནོ། །དེའང་རྣམ་བཀོད་ལས། སྣང་བ་འདི་ཀུན་རང་རང་གི། །རང་བཞིན་མེད་པའི་རྣམ་ཤེས་ཉིད། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གཉིས་པ་སྒྲ་མཐུན་དོན་སྤགས་ཀྱི་གཏན་ཚིགས་ནི། ཚིག་མདོ་སྔགས་ཐུན་མོང་དུ་གྲགས་ཤིང་། དོན་འདི་ཉིད་ལྟར་གཏན་ལ་འབེབས་པའོ། །གསུམ་པ་གྲུབ་མཐའ་ལ། རྟོགས་པའི་ཚད་དང་། སྐབས་འཕྲོས་ཀྱི་རྩོད་པ་སྤོང་བའོ། །དང་པོ་ནི། དྲི་མ་མེད་པའི་ཤེས་རབ་གསུམ་གྱིས་ཡོད་མེད་ལ་སོགས་པའི་སྒྲོ་སྐུར་གྱི་མཐར་མ་རེག་པར་བཙལ་བ་ལས་རྟོགས་པ་སྟེ། ལམ་རིམ་ལས། ཡོད་ལས་བཙལ་ན་སྒྲོ་བཏགས་ཏེ། །སྒྲོ་འདོགས་བརྒྱད་དུ་ལྷུང་བར་འགྱུར། །མེད་ལས་བཙལ་ན་བསྐུར་བཏབ་སྟེ། །བསྐུར་པ་བཅུ་ཡི་གནས་སུ་ལྷུང་། །ཡོད་མེད་གཉིས་ལས་བཙལ་བྱས་ན། །འདི་ཉིད་ལུང་དུ་མ་བསྟན་འགྱུར། །ཞེས་སོ། །གཉིས་པ་ནི། གྲུབ་པའི་མཐའི་ངོ་བོ་གནས་ལུགས་ཉིད་རང་གི་མཚན་ཉིད་དུ་རྟོགས་ནས་རིག་པ་ཡུལ་མེད་དུ་གསལ་བ་སྟེ། ལམ་རིམ་ལས། རྒྱ་མཚོ་དང་ནི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་སོ། །བཞི་པ་རྩོད་སྤོང་ནི། ལམ་ལ་ཞུགས་སུ་ཆོས་ཉིད་མངོན་སུམ་དུ་རྟོགས་པར་ཡོད་པར་ཐལ། དེར་ལྟ་བུའི་རང་མཚན་མཐོང་བའི་ཕྱིར་ཏེ། སྒྲ་བརྟེན་ཡིད་ལ་བྱེད་མིན་པར། །ཞེས་དང་། དེ་མ་རྟོགས་ན་མངོན་སུམ་པའི་གཏན་ཚིགས་ཀྱང་དོན་མེད་པར་འགྱུར་རོ་ཞེ་ན། དེ་ལ་མགོ་མཚུངས་དང་། རྒལ་ལན་གཉིས་ལས། ཐོས་བསམ་གྱི་ལྟ་བ་མཐར་ཕྱིན་པའི་ཚོགས་ལམ་དུ་འཇུག་ཁ་མའི་གང་ཟག་དེ་ཆོས་ཅན། ལམ་སྟོང་པ་ཆེན་པོ་མངོན་སུམ་དུ་རྟོགས་པར་ཐལ། ལྟ་བ་འཁོར་འདས་དབྱེར་མེད་དུ་ཐོས་བསམ་གྱིས་གཏན་ལ་ཕེབས་པའི་གང་ཟག་ཡིན་པའི་ཕྱིར། འདོད་མི་ནུས་ཏེ་ལམ་སྟོང་པ་ཆེན་པོའི་ཚོགས་ལམ་དུ་འཇུག་མ་རག་པ་ཡིན་པའི་ཕྱིར་རོ། །བརྒལ་ལན་ནི། ཆོས་ཉིད་སྤྱིའི་རྣམ་པ་དོན་སྤྱིར་མཐོང་བ་ལ་འཇོག་གོ། །ཡང་ཁ་ཅིག་ཆོས་ཉིད་རང་མཚན་དེ་ཟག་བཅས་སུ་རང་རིག་མངོན་སུམ་དང་། ཟག་མེད་དུ་རྣལ་འབྱོར་མངོན་སུམ་གྱིས་མཐོང་ངོ་ཞེས་ཟེར་བའང་སྔར་གྱི་སྐྱོན་དབབ་བོ། །གསུམ་པ་རྣམ་གྲངས་རྣམ་པར་ཕྱེ་བ་ལ། ཉམས་སུ་ལེན་བྱེད་ལམ་གྱི་རིམ་པའི་ལྟ་གྲངས་དང་། བླང་བྱ་རྒྱུད་དོན་གྱི་ལྟ་གྲངས་སོ། །དང་པོ་ནི། ཁྱབ་བྱ་ལམ་ཀུན་ལ་ཁྱབ་བྱེད་ལྟ་བས་ཁྱབ་པའི་ཕྱིར་ལམ་གྱི་ལྟ་གྲངས་དགུ་སྟེ། ལམ་རིམ་ལས། མཉམ་ཉིད་ངང་ལས་མི་སྐྲག་པས། །མངོན་བྱས་ངེས་པའི་ཤེས་རབ་དང་། །རྣམ་པ་ཀུན་ལྡན་སྟོང་ཆེན་མཐོང་། །རང་རིག་ཡེ་ཤེས་སྙིང་རྗེས་གཟིགས། །ཕྱག་རྒྱ་གཅིག་སྐུ་འབྲས་བུར་ལྟ། །ཐམས་ཅད་གསལ་བའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་བསྐུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ །ཞེས་སོ། །གཉིས་པ་ནི། རྒྱུད་ཀྱི་དངོས་པོ་རྣམས་ལ། ཁྱབ་བྱེད་ལྟ་བས་ཁྱབ་པའི་ཕྱིར། རྒྱུད་དོན་གྱི་ལྟ་གྲངས་དགུ་སྟེ། དེ་ཉིད་ལས། རྒྱུད་དོན་གཟུངས་ཀྱི་ཟིན་པ་ནི། །དམ་ཚིག་དམ་ཚིག་ཅེས་བྱ་བ། །རང་གི་ལྟ་བ་དམ་ཚིག་ཡིན། །ཞེས་པ་ལ་སོགས་པའོ། །ལྔ་པ་མ་རྟོགས་པའི་སྐྱོན་ལ། སངས་རྒྱས་ཀྱི་ཞིང་འཁོར་བའི་གནས་སུ་མཐོང་བའི་དང་། དགེ་བའི་ལས་མ་སྤྱད་ཀྱང་འཁོར་བ་ལས་མི་གྲོལ་བའི་སྐྱོན་ནོ། །དང་པོ་ནི། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཞེས་སོ། །གཉིས་པ་ནི། དེ་ཉིད་ལས། ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་རྟག་སྤྱད་ཀྱང་། །མཐོ་རིས་ལྷ་དང་མིར་སྐྱེ་ཡི། །སྐྱེ་ཤི་མེད་པའི་ས་མི་ཐོབ། །ཅེས་སོ། །དྲུག་པ་རྟོགས་པའི་ཡོན་ཏན་ལ། ངན་སོང་གི་གནས་སངས་རྒྱས་ཀྱི་ཞིང་དུ་མཐོང་བའི་དང་། ལས་ཅི་ལ་སྤྱད་ཀྱང་མི་འཆིང་བའི་དང་། འཁོར་བར་མི་ལྡོག་ཅིང་འཚང་རྒྱ་བའི་ཡོན་ཏན་ནོ། །དང་པོ་ནི། རྒྱས་པ་ལས། ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །གཉིས་པ་ནི། འདི་ཉིད་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོབ་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །གསུམ་པ་ནི། ལམ་རིམ་ལས། གང་ཞིག་འདི་ལྟར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་དེ། །ཆུ་སྲིན་ཕྱག་རྒྱ་ཇི་བཞིན་དུ། །དངོས་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཅེས་གསུངས་སོ། །གཉིས་པ་ཟིན་ཆགས་མེད་པ་སྤྱོད་པ་ལ་དྲུག་ལས། དང་པོ་དགོས་ཆེད་ནི། གཞན་སེལ་སྒྲིབ་པ་འབྱང་ཞིང་བག་ཆགས་འདག །དོན་གཉེར་ཚོགས་རྫོགས་ཤིང་ལྟ་སྒོམ་གྱི་བོགས་འབྱིན་པར་བྱེད་པ་སྟེ། ཁོག་གཞུང་ལས། དེ་ཡང་བདག་གཞན་དོན་ཕྱིར་དུ། །ལམ་རྗེས་མཐུན་པའི་སྤྱོད་པ་ཡང་། །སྐབས་ཀྱི་ཏིང་འཛིན་སྟོངས་ཕྱིར་སྤྱད། །ཅེས་སོ། །གཉིས་པ་ངོ་བོའི་མཚན་ཉིད་ནི། ལམ་སའི་སྒོ་གསུམ་ཡོངས་སུ་དག་པར་བྱེད་པའི་ལུས་ངག་ཡིད་གསུམ་གྱི་བྱ་བར་གྱུར་པ་སྟེ། འདི་ཉིད་ལས། ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །ཞེས་སོ། །གསུམ་པ་སྒྲ་དོན་ནི། ཙརྻའི་སྒྲ་ལས་སྤྱོད་པ་སྟེ། སྒོ་གསུམ་དོན་ཡོད་པར་བྱ་བའི་ཕྱིར་སྔགས་ཀྱི་སྤྱད་པ་ལ་སྤྱོད་པའི་ལས་ཅན་ནོ། །དེའང་ཁོག་གཞུང་ལས། སྒོ་གསུམ་ལས་ཕྱིར་ངེས་ཚིག་འགྲུབ། །ཅེས་སོ། །བཞི་པ་རྣམ་གྲངས་ལ། གང་གི་ཚེ་སྤྱོད་པའི་དུས་དང་། གང་སྤྱད་བྱ་དངོས་པོ། །དང་པོ་ནི། མཉམ་བཞག་ལས་ལངས་ནས་རྗེས་ཐོབ་ཏུ་སྤྱོད་པ་ཅི་ལ་མ་ཆགས་པར་སྤྱོད་པ་སྟེ། དེ་ཉིད་ལས། ཀུན་ཀྱང་མཉམ་ལས་ལངས་ཆེའོ། །ཞེས་སོ། །གཉིས་པ་ལ། སྤྱི་དང་ཁྱད་པར་གཉིས་ལས། དང་པོ་ནི། སྤྱིར་ལུས་ངག་ཡིད་གསུམ་དག་པའོ། །དེའང་ཅུང་ཟད་བཤད་ན། ལས་དང་པོ་པའི་དུས་སུ་བག་དང་ལྡན་པའི་སྤྱོད་པ་སྟེ་དབྱེ་ན། མི་མཐུན་པའི་རྐྱེན་ལས་བྱོལ་བའི་དང་། མཐུན་རྐྱེན་བརྟེན་པའི་སྤྱོད་པ་གཉིས་ལས། དང་པོ་ནི། འཇིག་རྟེན་གྱི་ཆོས་བརྒྱད་སོགས་ཁ་ན་མ་ཐོ་བ་ཐམས་ཅད་ལས་བྱོལ་ནས་གཞན་གྱིས་དགེ་བ་སྤེལ་བའི་ཕྱིར་མཐུན་འཇུག་མཚམས་པའི་སྤྱོད་པ་ལ་འཇུག་སྟེ། རྡོ་རྗེ་རྩེ་མོ་ལས། བརྟན་པ་མ་ཐོབ་བར་དུའང་། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་སོ། །གཉིས་པ་ནི། མཉམ་བཞག་གི་རྟོགས་པ་བག་ལྡན་དུ་བསྲིང་ཞིང་། ཐུན་མཚམས་ཀྱི་བྱ་བའི་ཆ་གཙོ་བོར་བརྟེན་པ་སྟེ། དབུས་མཐའ་རྣམ་འབྱེད་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་དེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་པས་ཆོས་སྤྱོད་བཅུ་དང་དེ་ནས་ཅུང་ཟད་གོམས་ཏེ་དབེན་པར་མཉམ་རྗེས་ཁྱད་མེད་དུ་གྱུར་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། ཤིན་ཏུ་གོམས་ནས་རྟོགས་པ་ལ་བྲི་གང་མེད་པར་གྱུར་པ་ན་བཅོས་སླད་མེད་པར་གཞན་ཕན་བྱེད་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱིར་བཤད་པའོ། །གཉིས་པ་ཁྱད་པར་གྱི་སྤྱོད་པ་ལ་གྲོལ་ལམ་བག་ཡོད་ཀྱི་དང་། ཐབས་ལམ་བརྟུལ་ཞུགས་ཀྱི་སྤྱོད་པའོ། །དང་པོ་ལ། རིམ་ཅིག་ཅར་གཉིས་ལས། དང་པོ་ལ་ཟག་བཅས་ཀྱི་ལམ་དུ་དང་། ཟག་མེད་ཀྱི་ལམ་དུ་ཇི་ལྟར་སྤྱོད་པའོ། །དང་པོ་ལ། དད་བརྩོན་གྱི་སྤྱོད་པ་ཤེས་རབ་དང་མཐུན་པ། ཐབས་དང་མཐུན་པ། ཕྱོགས་གཅིག་པ་སྤྲོས་བཅས་ཀྱི། ཚོགས་ཀྱི་སྤྱོད་པ་དང་དྲུག་སྟེ་གོ་སླའོ། །གཉིས་པ་ནི། རྫུ་འཕྲུལ་གྱི་སྤྱོད་པ་སྟེ། རིག་འཛིན་བཞིའི་སྤྱོད་པའོ། །གཉིས་པ་གྲོལ་ལམ་ཅིག་ཅར་བའི་སྤྱོད་པ་ནི། རྗེས་ཤེས་སུ་ལྟར་ཇི་སྤྱོད་ཀྱང་། མི་དམིགས། མ་ཆགས། བྱ་རྩོལ་འཛིན་རྟོག་དང་བྲལ་བ་རྨད་དུ་བྱུང་བའི་སྤྱོད་པ་སྟེ། ཀུན་འདུས་ལས། མི་དམིགས་པ་ལས་རྣམ་པར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་དེ་སྤྱོད་མཆོག་ཡིན། །ཞེས་སོ། །གཉིས་པ་ཐབས་ལམ་བརྟུལ་ཞུགས་ཀྱི་སྤྱོད་པ་ནི། ཐབས་མཁས་ཀྱི་རྩིས་ཟིན་པའི་གདེངས་དང་ལྡན་པས་འཁོར་བའི་ཆོས་ཅི་ལའང་སྤྱོད་པ་སྟེ། འདི་ཉིད་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །ལྔ་པ་སྐྱོན་ནི། ཁྱད་པར་གྱི་སྤྱོད་པ་དང་མི་ལྡན་ན་མཐར་ཐུག་གི་འབྲས་བུ་མི་ཐོབ་སྟེ། ཐུགས་ཐིག་ལས། ཁྱད་པར་དོར་ན་མཐར་ཕྱིན་མེད། །ཅེས་སོ། །དྲུག་པ་ཡོན་ཏན་ནི། སྤྱོད་པ་དེ་དག་གིས་བོགས་ཕྱིན་ནས་དངོས་གྲུབ་རྣམ་པ་གཉིས་མྱུར་དུ་ཐོབ་པར་འགྱུར་ཏེ། རྒྱས་པ་ལས། བྱ་བྱེད་མེད་པའི་བརྩོན་འགྲུས་ཀྱིས། །དེས་ནི་བྱང་ཆུབ་སྙིང་པོ་ལེན། །ཞེས་གསུངས་སོ། །གསུམ་པ་བཀོད་པའི་དཀྱིལ་འཁོར་ལའང་དྲུག་ལས། དང་པོ་དགོས་ཁྱེད་ནི། དབང་སྒྲུབ་མཆོད་ཕྲིན་ལ་སོགས་པའི་དུས་སུ་བདག་གཞན་གྱི་དོན་བྱེད་པའི་རྟེན་དུ་གྱུར་པ་ནི་སྤྱིའི་དགོས་ཆེད་དང་བྱེ་བྲག་དངོས་གྲུབ་ཀྱི་ཐབས་དང་རྟེན་ནི་དཀྱིལ་འཁོར་ཡིན་པའི་ཕྱིར་རོ། །གཉིས་པ་ངོ་བོའི་མཚན་ཉིད་ནི། བཀོད་པ་ལྷའི་འཁོར་ལོར་རྫོགས་པར་སྣང་བའི་རིགས་སུ་གནས་པའོ། །དེའང་ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་སོ། །གསུམ་པ་སྒྲ་དོན་ནི། མཎྜ་ལ་ཞེས་པའི་སྒྲ་ལས། སྙིང་པོའི་གཞི་འཛིན་པའམ། སྙིང་པོ་ལེན་པའི་དོན་ཏེ། འགྲེལ་ཆུང་ལས། མཎྜ་ཞེས་བྱ་སྙིང་པོའི་དོན། །ལ་ཞེས་པ་ནི་ལེན་པ་སྟེ། །ཞེས་སོ། །བཞི་པ་རྣམ་གྲངས་ལ། གསུམ་དུ་དབྱེ་བ། བདུན་དུ་དབྱེ་བ། བཅུ་གཉིས་སུ་དབྱེ་བའོ། །དང་པོ་ནི། །ཆོས་དོན་ལས། དབྱེ་བ་རང་བཞིན་ཏིང་འཛིན་དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་སོ། །གཉིས་པ་ནི། རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་སོ། །གསུམ་པ་ནི། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་སོ། །འདིར་སྐབས་བབ་ཀྱིས་དབྱེ་ན། རྒྱུད་ཚོད་དང་སྦྱར་བའི་དཀྱིལ་འཁོར་བཞི་དང་། དེ་ལས་སྐབས་དོན་དེང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་གཉིས་སོ། །དང་པོ་ལ། རང་བཞིན་ཡེ་ཤེས་དཀྱིལ་འཁོར་དང་། ལྷག་པའི་ཏིང་ངེ་འཛིན་གྱི་གཟུགས་བརྙན་ནི་སྤྲུལ་པའི་དཀྱིལ་འཁོར་དང་རིག་པ་ཉམས་ཀྱི་དཀྱིལ་འཁོར་དང་། ལྷག་པ་གཟུགས་བརྙན་གྱི་དཀྱིལ་འཁོར་དང་བཞི་ལས་དང་པོ་གསུམ་ནི་རིམ་པར་སློབ་དཔོན་རྫོགས་པའི་སངས་རྒྱས་དང་མཐའ་ལམ་དང་མཐོང་སྒོམ་ལ་གནས་པས། སློབ་མ་ས་མཐའི་བྱང་སེམས་དང་། མཐོང་སྒོམ་དང་ཚོགས་སྦྱོར་གྱི་ཡོན་ཏན་མཐར་ཕྱིན་པ་རྣམས་ལ་དབང་བསྐུར་བའི་དཀྱིལ་འཁོར་ཡིན་པར་སྒྱུ་འཕྲུལ་རྡོ་རྗེ་ལས་བཤད་པས་འཕགས་པ་རྣམས་ཀྱི་སྤྱོད་ཡུལ་ཡིན་ཞིང་དེ་ལས་འདིར་སྤྲུལ་པའི་དཀྱིལ་འཁོར་ལ་ལྷག་པ་ཏིང་ངེ་འཛིན་གྱི་གཟུགས་བརྙན་ཞེས་པ་ནི་འདིར་སྐབས་སྒྱུ་འཕྲུལ་བའི་སྐད་དོ། །བཞི་པ་ནི། ཏིང་ངེ་འཛིན་ལ་བརྟེན་པ་རྗེས་མཐུན་ཙམ་ཐོབ་པ་ཡན་ཆད་ཀྱི་སློབ་དཔོན་མཚན་ཉིད་དང་ལྡན་པས། སྐལ་ལྡན་གྱི་སློབ་མ་ལྷག་པ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བ་ཡིན་ལ། དེ་ལའང་གདུལ་བྱའི་དབྱེ་བས། སྐལ་དམན་འཇུག་པ་ལ་རྡུལ་ཚོན་འབྲིང་རས་བྲིས། རབ་ཚོམ་བུ་ལྟ་བུ་དམིགས་རྟེན་རྒྱུད་དག་ནུས་ཅུང་ཟད་ཙམ་ལ་བརྟེན་ནས་བསྐུར་བ་ཡོད་དེ། བཀའ་བརྒྱད་བདེ་འདུས་ཀྱི་དབང་ཆོག་རྩ་བར། དཀྱིལ་འཁོར་གང་དུ་དབང་བསྐུར་ན། །རབ་འབྲིང་ཐ་མར་གསུངས་པ་ཡི། །མེ་ཏོག་བྲིས་སྐུ་རྡུལ་ཚོན་གསུམ། །དཀྱིལ་འཁོར་གསུམ་དུ་དབང་བསྐུར་རོ། །ཞེས་སོ། །དེ་ལས་ཀྱང་བློ་ཆེ་བའི་སྐལ་ལྡན་ཁ་ཅིག་ཐོག་མ་ནས་སློབ་དཔོན་གྱི་ལུས་དཀྱིལ་དུ་འཇུག་རུང་བའང་ཡོད་དེ། ལུས་དཀྱིལ་ལ་དཀྱིལ་འཁོར་དུ་འདུ་ཤེས་པའི་གང་ཟག་མཁས་པ་དེས་ཕྱི་དཀྱིལ་བརྟེན་དགོས་པའི་ངེས་པ་མེད་པའི་ཕྱིར་ཏེ། སློབ་དཔོན་དྲིལ་བུ་པས། བཅོས་མ་གཉིས་ཀྱི་ངོ་བོ་གང་། །དེ་ནི་གདུལ་བྱའི་དབང་ལས་འདོད། །མཁས་པའི་བསྒྲུབ་བྱ་དེ་མ་ཡིན། །ཞེས་གསུངས་ཤིང་། དོང་སྤྲུགས་ཀྱི་འཇུག་པའི་མེ་ཏོག་དོར་སྐབས་སུའང་། སློབ་དཔོན་སྐུ་ཡི་དཀྱིལ་འཁོར་དུ། །ཞེས་གསུངས་སོ། །དེ་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་སུ་རྡུལ་ཚོན་དང་རས་བྲིས་ཀྱི་དཀྱིལ་འཁོར་གང་རུང་དུ་དབང་བསྐུར་བར་བཞེད་དེ། །དེ་ལ་རས་བྲིས་སུ་སྨིན་བྱེད་ཀྱི་དབང་བསྐུར་རུང་བའི་ཁུངས་ནི། མི་གཡོ་བླ་མེད་ཀྱི་རྒྱུད་ལས། ཡང་ན་དཀྱིལ་འཁོར་བྲི་བྱ་བ། །རས་བྲིས་ཚུལ་དུ་བྲི་བར་བྱ། །དཀྱིལ་འཁོར་སྔར་བཞིན་བྲིས་བྱས་ནས། །དབུས་སུ་མི་གཡོ་མཐིང་ནག་བྲི། །ཞེས་སོགས་རས་བྲིས་ཀྱི་དཀྱིལ་འཁོར་བཤད་ཅིང་། སློབ་དཔོན་ཛ་ཡ་སེ་ནས་ཀྱང་། རྡུལ་ཚོན་བྲི་བར་མ་ནུས་ན། །ངེས་པར་བཅོམ་ལྡན་ཧེ་རུ་ཀ །ཕྱག་རྒྱའི་གཟུགས་དང་བཅས་པར་བྲི། །ཞེས་སོ། སྐབས་དོན་དིང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་ནི། དབང་བཞི་ལ་ལྟོས་ནས་རྒྱུ་རྟེན་གྱི་དཀྱིལ་འཁོར་བཞི་སྟེ། བུམ་དབང་ལ་ཕྱི་ལྷག་པ་གཟུགས་བརྙན་གྱི་དཀྱིལ་འཁོར་རྡུལ་ཚོན་ནི། དཔེ་བཟླས་དྲངས་པའི་ཆུ་ཚོན་རས་བྲིས་ཀྱི་དཀྱིལ་འཁོར། མཆོག་དབང་གསུམ་ལ་སྤྱིར་བདག་གི་དེ་ཁོ་ན་ཉིད་ནང་ལུས་ཀྱི་དཀྱིལ་འཁོར་དང་། ཁྱད་པར་གསང་དབང་ལ་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དཀྱིལ་འཁོར། ཤེར་དབང་ལ་ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར། དབང་བཞི་པ་ལ་ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་ཀྱི་སེམས་སྙིང་པོ་ཡེ་ཤེས་རླུང་གི་དཀྱིལ་འཁོར་རོ། །དེའང་གསང་འདུས་ལས། བྷ་ག་དཀྱིལ་འཁོར་ཞེས་བྱར་བཤད། །བྱང་ཆུབ་སེམས་ཀྱང་དཀྱིལ་འཁོར་ཉིད། །ལུས་ནི་དཀྱིལ་འཁོར་ཉིད་དུ་བརྗོད། །དཀྱིལ་འཁོར་གསུམ་དུ་གསུངས་པ་ཡིན། །ཞེས་སོ། །ལྔ་པ་སྐྱོན་ནི། འཆད་འགྱུར་གྱི་ཡོན་ཏན་ལས་བཟློག་པ་སྟེ། ཐུགས་ཐིག་ལས། དེ་ལས་ཟློག་པའི་སྐྱོན་ཅན་བཞི། །ཞེས་སོ། །དྲུག་པ་ཡོན་ཏན་ནི། དཀྱིལ་འཁོར་ལ་བརྟེན་པས་རྟོགས་པའི་ཡེ་ཤེས་འཕེལ་བ་དང་སྡིག་སྒྲིབ་འབྱང་ཞིང་མཚན་རྟོག་འགྲིབ་པ་དང་། ཚོགས་གཉིས་རྫོགས་པའི་ཕན་ཡོན་ཁྱད་པར་ཅན་གྱི་ཐབས་སུ་གྱུར་པ་དང་མཐར་ཐུག་འགྲུབ་པའི་རྟེན་དུ་འགྱུར་བའི་ཕྱིར་ཏེ། དེ་ལས། འཕེལ་འགྲིབ་ཕན་ཡོན་ཐབས་འགྲུབ་བཞི། །ཞེས་གསུངས་པའི་ཕྱིར་རོ། །བཞི་པ་རིམ་པར་བགྲོད་པ་དབང་ལ་དྲུག་ལས། དང་པོ་དགོས་ཆེད་ནི། ཆོས་ཀྱི་རྒྱལ་པོའི་གོ་འཕང་རྒྱུད་ལ་འཇོག་པའི་ཆེད་དུ་སྟེ། དེ་ཐོབ་པ་ལ་སྒྲིབ་པ་འཇོམས་ཤིང་ནུས་པ་འཇོག་པའི་ཐབས་འདིས་རིམ་པར་བསྒྲོད་དགོས་པའི་ཕྱིར། དེ་ལྟར་ཡང་ཐུགས་ཐིག་ལས། བདག་གཞན་དོན་ནུས་ཚོགས་ལས་འགྲུབ། །དེ་ལ་དེ་ཡོད་ཕྱིར་ནོད་བྱ། །ཞེས་སོ། །གཉིས་པ་ངོ་བོའི་མཚན་ཉིད་ནི། རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་ཐོབ་བྱ་གོ་འཕང་གི་འབྲས་བུ་རྒྱུད་ལ་འཇོག་པའི་ལས་ཀྱི་ཐར་པའི་མྱུ་གུ་མངོན་དུ་བསྐྱེད་པ་དང་། སྐྱེ་ངེས་གང་རུང་གི་རིགས་གནས། དེའང་སྔ་མ་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་པ་གནས་པའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། །ཅེས་སོ། །གསུམ་པ་སྒྲ་དོན་ནི། ཨ་བྷི་ཥིཉྩའི་སྒྲ་ལས་མངོན་པར་གཏོར་བ་ཞེས་བྱ་སྟེ། དངོས་སུ་དྲི་མ་འཁྲུད་པ་ཙམ་ལ་འཇུག་ཅིང་། བརྒྱུད་ནས་དེས་འབྲས་བུ་ཡེ་ཤེས་ཀྱི་ནུས་ཁྱད་པར་ཅན་འཇོག་པས་ན་དབང་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། འདིར་མ་དཔེ་ལ་ཚིག་ཆད་ཡོད་སྙམ། པ་ཐོབ་ཕྱིར་དབང་། །ཞེས་སོ། །བཞི་པ་རྣམ་གྲངས་ལ་དབྱེ་བ་དང་། ལས་ཀྱི་རིམ་པའོ། །དང་པོ་ལ། རྟེན་གྱི་དཀྱིལ་འཁོར་གྱི་སྒོ་ནས་དང་། བསྐུར་བ་དུས་ཀྱི་སྒོ་ནས་དབྱེ་བ་དང་། མོས་པ་ཐ་དད་པའི་སྒོ་ནས་དབྱེ་བའོ། །དང་པོ་ནི། རྒྱུད་ཚོད་དང་སྦྱར་བའི་དཀྱིལ་འཁོར་བཞིར་འགྱུར་ཏེ། སྔར་བཤད་གྲུབ་པ་ལས་ཤེས་པར་བྱའོ། །གཉིས་པ་ནི། ཐོག་མཐའ་བར་གསུམ་སྟེ། འདི་ལྟར་རྒྱུ་དུས་ཀྱི་དབང་ཐོག་མར་བསྐུར་ཏེ། མ་སྨིན་པ་སྨིན་བྱེད་ཀྱི་དབང་ཡིན་པས་ལམ་གྱི་སྔོན་དུ་འགྲོ་དགོས་པའི་ཕྱིར། ལམ་དུས་ཀྱི་དབང་ནི་དུས་ལ་ནམ་བབས་པའི་བསྐུར་ཏེ། ལམ་གྱི་བོགས་འདོན་ཡིན་པའི་ཕྱིར་རོ། །འབྲས་དུས་ཀྱི་དབང་ནི་ཐ་མར་བསྐུར་ཏེ། ལམ་མཐར་ཕྱིན་ནས་མཐར་ཐུག་སངས་རྒྱས་ཀྱི་ས་ལ་སྦྱོར་བྱེད་ཡིན་པའི་ཕྱིར་རོ། །དེས་ན་ཕྱི་མ་གཉིས་ནི་གྲོལ་བྱེད་ལམ་གྱི་དབང་ཡིན་ནོ། །གསུམ་པ་ལ། ཞི་ཁྲོ་གཉིས་ལས། ཞི་བ་ལ་ནི། ཐུགས་ཐིག་ལས། རྩ་བ་རྣམ་ལྔ་བཅོ་བརྒྱད་དང་། །ཞེས་པའི་རྩ་བ་ལྔ་ནི། རྡོ་རྗེ་ལས། དང་པོ་ས་བོན་འཇོག་པ་སྟེ། །གཉིས་པ་ནུས་པ་བསྐྱེད་པ་ཡིན། །གསུམ་པས་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པས་བརྟན་པ་ཉམས་བླངས་པས། །མཆོག་གི་དངོས་གྲུབ་ཚེ་འདིར་འགྲུབ། །ཅེས་པས་ཕན་ནུས་གཉིས་རེ་རེ་དང་། ཟབ་དབང་གསུམ་སོ་སོར་བ གྲངས་པའོ། །ཡན་ལག་བཅོ་བརྒྱད་ནི། ཕན་དབང་ལ་བཅུ་དང་། ནུས་དབང་ལ་ལྔར་ཕྱེ་ཞིང་། ཟབ་དབང་གསུམ་དང་བཅས་པའོ། །གཉིས་པ་ནི། ཐུགས་ཐིག་ལས། བསྒྱུར་བ་ལྔ་ལ་སུམ་ཅུ་དྲུག །ཅེས་པས། རྩ་བའི་གྲངས་ཞི་བ་དང་མཚུངས་ལ། དེའི་ཡན་ལག་སོ་དྲུག་ནི། ཁྲོ་བོ་ལས་རིམ་ལས། ལྷ་དབང་ཕྱག་མཚན་རྒྱན་ཆས་དང་། །ནུས་དབང་ལྔ་དང་གདན་གྱི་དབང་། །སྒྲུབ་རྫས་གསང་བ་རྣམ་གསུམ་མོ། །ཞེས་པའི་ནང་གསེས་ཀྱི་གྲངས་སོ་དྲུག་སྟེ། དེ་འདྲེན་ཚུལ་ནི། ཕྱག་རྒྱ་ལྷའི་དང་། བསྣམས་པ་ཕྱག་མཚན་གྱི་དང་། དྲེགས་པ་གདན་གྱི་དབང་གསུམ་ནི་རེ་རེ་དང་། དེ་ལས་གཞན་རྣམས་ཀྱི་བྱེ་བྲག་བགྲང་བའི་སྡོམ་ནི། རྒྱན་ཆས་རྟགས་ལ་བཅུ་ཡིན་ཏེ། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་རྒྱན། །ཐོད་ཕྲེང་རྟགས་གསུམ་མེ་དཔུང་ངོ་། །ནུས་པའི་དབང་ནི་ལྔར་ངེས་ཏེ། །ཉན་སྒོམ་འཆད་ལས་རབ་འབྱམས་དབང་། །སྒྲུབ་པའི་དབང་ལ་བཅོ་ལྔ་སྟེ། །བདུད་རྩི་ལྔ་དང་ཤ་ལྔ་དང་། །རཀྟ་རྒྱལ་མཚན་གདུགས་ཁ་ཊྭཾ། །ཕུར་པ་རྡོར་དྲིལ་རྔེའུ་ཆུང་། །ཡུངས་དཀར་གཟུངས་མ་ཕྲེང་བ་དང་། །ཚེ་དང་བཟའ་བཏུང་མིང་དབང་ངོ་། །ཟབ་དབང་གསུམ་སྟེ་གསང་བ་དང་། །ཤེས་རབ་ཡེ་ཤེས་བདེ་ཆེན་པོ། །ཞེས་སོ། །དེའང་དབང་བཞིར་བསྡུ་བའི་ལས་ཁྲིགས་ཀྱི་སྡོམ། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔ་སྟེ། །ཕྱི་དབང་ཉེར་བརྒྱད་ཕན་པའི་དབང་། །ནང་ནི་ནུས་པའི་དབང་ལྔ་སྟེ། །གསང་བ་ཟབ་དབང་རྣམ་གསུམ་མོ། །ཞེས་སོ། །གཉིས་པ་ལ། དཀྱིལ་འཁོར་དུ་འཇུག་པ་དང་། དབང་བསྐུར་བའོ། །དང་པོ་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །སྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་པས་རིགས་བསྡུ་ན་སློབ་དཔོན་འཇུག་པའི་ཆོས་གཉིས་དང་སློབ་མ་འཇུག་པའི་ཆོས་བཅུ་དྲུག་གོ། །གསུམ་པ་དབང་བསྐུར་བ་ལ། བསྐུར་བ་དངོས་དང་། རྗེས་ཀྱི་རིམ་པའོ། །དང་པོ་ལ། སྣོད་རིམ་དང་སྦྱར་བ། དབང་གྲངས་དང་རིམ་པ་ལ་དཔྱད་པ་དེ་དབང་བཞིར་བསྡུ་ཚུལ་ལོ། །དང་པོ་ནི། འདི་ཉིད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་སོ། །དེ་ཡང་ཇི་ལྟར་བསྐུར་བའི་ཚུལ་ལ། དབང་ཐམས་ཅད་ལ་མཚུངས་ལྡན་དབང་རྫས། བསྐུར་ཐབས་ལ་སོགས་པ་དོན་བརྒྱད་བརྒྱད་དེ། རྡོ་རྗེ་ལས་རིམ་ལས། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་སོ། །གཉིས་པ་ལ། གྲངས་ལ་དཔྱད་པ་དང་། རིམ་པ་ལ་དཔྱད་པའོ། །དང་པོ་ནི། ཁ་ཅིག །ཟབ་དབང་ནི། ནུས་པ་དངོས་སུ་འཇོག་བྱེད་ཡིན་པའི་ཕྱིར། ནུས་དབང་དུ་འདུ་བས་གྲངས་བཅོ་ལྔ་ཁོ་ནར་འདོད་པ་དང་། ཁ་ཅིག་ཟབ་དབང་གསུམ་གཅིག་ཏུ་བྱས་ཏེ་བཅུ་དྲུག་ཏུ་འདོད་པ་དང་། ཁ་ཅིག་བུམ་དབང་དང་གསང་དབང་གཉིས་སུ་འདུ་བར་འདོད་པ་ལས། དེ་དག་དགག་པ་ལ་ལུང་རིགས་མན་ངག་གསུམ་སྟེ། དང་པོ་ལུང་ནི། དད་བརྩོན་བརྟུལ་ཞུགས་རབ་རྟོགས་ན། །ཞེས་དང་། དབང་གི་གལ་པོ་ལས། ནུས་དང་ཕན་པའི་དབང་ཐོབ་ནས། །བརྟུལ་ཞུགས་ལྡན་པའི་བུ་མཆོག་ལ། །ཞེས་སོགས་ཀྱིས་གནོད་པའི་ཕྱིར། རིག་པ་ནི་ཕན་དབང་ཆོས་ཅན། ཁྱོད་ལས་གཞན་པའི་དབང་གྲངས་བརྗོད་པ་དགོས་མེད་དུ་ཐལ། དབང་ཐམས་ཅད་ཁྱོད་ཀྱི་ནང་དུ་འདུ་བ་གང་ཞིག །ཁྱོད་བདག་གཞན་གྱི་དོན་ལ་ཕན་བྱེད་ཀྱི་དབང་ཡིན་པའི་ཕྱིར། ཟབ་དབང་གསུམ་པོ་དེ་ཆོས་ཅན། ཁྱོད་ངོ་བོ་གཅིག་མ་ཡིན་པར་ཐལ། ཁྱོད་ལ་གོ་འཕང་གི་ཐོབ་བྱ་སོ་སོར་ཡོད་པའི་ཕྱིར། གསུམ་པ་ཡང་དེས་ཁེགས་སོ། །མན་ངག་གིས་ཀྱང་གནོད་དེ། རྡོ་རྗེ་ལས་རིམ་ལས། ངོ་བོ་སྣོད་ཀྱི་མཚན་ཉིད་ལས། །དབྱེ་བ་རྣམ་པ་ལྔ་རུ་འགྱུར། །ཞེས་སོགས་གསུངས་པའི་ཕྱིར། གཉིས་པ་ནི། དབང་བཅོ་བརྒྱད་པོ་དེ་དབང་བཞིར་འདུས་མ་འདུས་ཀྱི་བཞེད་པ་སྣ་ཚོགས་ཡོད་ཀྱང་། དབང་བཞིར་བསྡུ་བ་འཐད་དེ། རྒྱུད་ཕྱི་མའི་དྲི་བ་བཅུ་གསུམ་པར། དབང་བསྐུར་བ་ཡི་དོན་ཡོད་ཅི། །ཞེས་པའི་ལན་དུ། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་གསུངས་པའི་ཕྱིར། བསྡུད་ཚུལ་ཡང་། ཕན་ནུས་ཀྱི་དབང་ལྔ་པོ་ནི་བུམ་པའི་དབང་དུ་བསྡུ་སྟེ། དེ་ཐོབ་པས་ལམ་བསྐྱེད་རིམ་བསྒོམ་པའི་སྣོད་རུང་དུ་བྱས་པའི་ཕྱིར་རོ། །དེ་ཡང་ཕན་དབང་ཐོབ་པས་ཕྱི་དཀྱིལ་དྲང་དོན་གྱི་སྣོད་རུང་དུ་བྱས་པ་དང་། དེའི་སྟེང་དུ་ཉན་སྒོམ་གྱི་དབང་གཉིས་ཀྱིས་ནང་རང་བཞིན་གྱིས་གྲུབ་པའི་ལུས་དཀྱིལ་ལ་བརྟེན་པའི་ངེས་དོན་གྱི་བསྐྱེད་རིམ་སྒོམ་ནུས་པ་དང་། ལྷག་མ་གསུམ་ལས། རྡོ་རྗེ་རྒྱལ་པོ་ནི་རྡོ་རྗེ་སློབ་དཔོན་གྱི་དབང་དངོས་དང་། འཆད་འཕྲིན་གཉིས་དེའི་བྱེད་ལས་ཡིན་པས། དེ་ལྟར་ན་རྡོ་རྗེ་སློབ་དཔོན་གྱི་དབང་ཐོབ་ནས་བུམ་དབང་དང་རྗེས་སུ་འབྲེལ་བའི་ལམ་ཐམས་ཅད་ལ་སྤྱོད་པའི་བདག་པོར་གྱུར་པའོ། །ཟབ་དབང་གསུམ་ནི། རིམ་པ་ལྟར་གསང་དབང་དང་། ཤེས་རབ་ཡེ་ཤེས་དང་། ཚིག་དབང་རྣམས་སུ་འདུས་པར་ཟད་ལ་དེ་གསུམ་ཐོབ་པས། རྫོགས་རིམ་སྟེང་འོག་གི་སྒོ་དང་བདེ་བ་ཆེན་པོ་དེ་ཁོ་ན་ཉིད་སྒོམ་པའི་སྣོད་རུང་དུ་བྱས་པའོ། །གསུམ་པ་རྗེས་ཀྱི་རིམ་པ་ནི། དབང་རྟགས་རྡོར་དྲིལ་སྦྱིན་པ་སོགས་ནས་ཤིས་པ་བརྗོད་པས་མཐའ་བརྒྱན་པ་རྣམས་སོ། །ལྔ་པ་དབང་མ་ཐོབ་པའི་སྐྱོན་ནི། འདི་ཉིད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་སོ། དྲུག་པ་ཡོན་ཏན་ནི། འདི་ཉིད་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དང་། ཧེ་རུ་ཀ་མངོན་འབྱུང་ལས། དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་ཐོབ་པར་འགྱུར། །ཞེས་གསུངས་སོ། །ལྔ་པ་མི་འདའ་བ་དམ་ཚིག་ལ་དྲུག་ལས། དང་པོ་དགོས་ཆེད་ནི། གཞན་སེལ་ངན་སོང་དང་ཐེག་དམན་དུ་མི་ལྟུང་ཞིང་། དོན་གཉེར་ཞིང་ས་གཉེན་པོ་ལ་ས་བོན་བཏབ་ན་འབྲས་བུ་སྨིན་པར་འགྱུར་བ་ལྟར་ལམ་དང་། འབྲས་བུའི་གཞི་དམ་ཚིག་གིས་བཟུང་སྟེ་ལམ་གྱི་འབད་པ་དོན་ཅན་དུ་བྱེད་པའོ། །དེ་ལྟར་ཡང་སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །ཞེས་སོ། །གཉིས་པ་ངོ་བོའམ་མཚན་ཉིད་ནི། བསྲུང་བྱའི་དོན་ཁྱད་པར་ཅན་ལས་མི་འདའ་བར་སྡོམ་པའི་སེམས་དཔའ་ས་བོན་དང་བཅས་པ་སྟེ། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་དཔའ་བ་ནི་སྡོམ་པར་འདོད། །ཅེས་སོ། །གསུམ་པ་སྒྲ་དོན་ནི། ས་མ་ཡའི་སྒྲ་ལས་དོན་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་དམ་ཚིག་སྟེ། ཀུན་འདུས་ལས། འདའ་ཀ་རྡོ་རྗེ་དམ་ཚིག་གཏན་གྱི་གཉེར། །ཞེས་སོ། །བཞི་པ་རྣམ་གྲངས་ལ། ཐོབ་བྱེད་ཀྱི་ཆོ་ག་དང་། ཐོས་པའི་ས་མཚམས། ཐོབ་བྱའི་ངོ་བོ། ཉམས་ན་བསྐང་བའི་ཐབས་སོ། །དང་པོ་ནི། དེ་བཞིན་གཤེགས་པས་གསུངས་པའི་ཆོ་ག་ཁོ་ན་ལས་ཐོབ་ཀྱི། གཞན་ལས་ནི་དམ་ཚིག་དང་སྡོམ་པ་མེད་དེ། བརྟུལ་ཞུགས་ཙམ་དུ་ཟད་དོ། །དེ་བས་ན་རྒྱུད་སྡེ་སོ་སོའི་དབང་ཆོག་ལས་སོ། །གཉིས་པ་ནི། ཁས་བླངས་ཀྱི་སྔགས་སྡོམ་སྦྱོར་བའི་དུས་རིགས་ལྔའི་སྡོམ་བཟུང་ལན་གསུམ་བཟླས་པའི་བརྗོད་པ་གསུམ་པའི་ཆ་ཐ་ལ་གང་བཟུང་བའི་སྡོམ་པ་དེ་ཉིད་ཐོབ་པ་ཡིན་ཏེ། རྡོ་རྗེ་རྩེ་མོ་ལས། སྡོམ་པ་གསུམ་ལ་ལེགས་བཀོད་ནས། །དེ་ལ་དཀྱིལ་འཁོར་བསྟན་པར་བྱ། །ཞེས་དང་། ཐུན་མོང་གི་ལུང་ལས་ཀྱང་། སྡོམ་པ་ཇི་ལྟར་ཁས་བླངས་ཤིང་། །ཐོབ་ཀྱི་རྒྱུད་ལས་མ་ཡིན་ནོ། །ཞེས་སོ། །འོན་ཀྱང་དེ་ཉིད་སྔགས་སྡོམ་བཏགས་པ་བ་ཡིན་ཏེ། སླར་དབང་བསྐུར་བས་ཡེ་ཤེས་ཁོང་ཆུད་ཀྱིས་ཐོབ་པར་བཤད་པའི་ཕྱིར་རོ། །གལ་ཏེ་དབང་དུས་སུ་ཡེ་ཤེས་དངོས་སུ་མ་སྐྱེས་ཀྱང་སྐྱེ་རུང་གི་ནུས་པ་བཞག་པ་དེས་དྲི་མ་སྦྱོང་བ་དང་། ཡོན་ཏན་སྐྱེ་བའི་མགོ་རྩོམ་པ་ཡིན་པས་རྒྱུད་འགྱུར་བའི་ཁྱད་པར་སྟེ། དེ་ལ་རྒྱུད་སྨིན་པ། དབང་ཐོབ་པ། དམ་ཚིག་དང་སྡོམ་པ་ཐོབ་པ་ཞེས་པའི་ཐ་སྙད་ཐོབ་ཅིང་། ཆོ་གས་སེམས་རྒྱུད་ཀྱི་ཡོན་ཏན་དགེ་བའི་ས་བོན་གསོས་བཏབ་པའི་ཆ་དེ་སངས་རྒྱས་ཀུན་གྱི་གསང་བའི་རྡོ་རྗེ་གསུམ་འཛིན་པའི་ཆ་ནས་དམ་ཚིག་ཀྱང་ཡིན་ལ། རང་རྒྱུད་སྡོམ་པའི་ཆ་ནས་སྡོམ་པའང་ཡིན་པའི་ཕྱིར་ཏེ། ཕྲ་རྒྱས་ལས། དེ་ལྟར་སུམ་བརྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་གཏོང་སྡོམ་པའི་དངོས། །ས་བཞི་ལྟ་བུར་གསུངས་པ་ཡིན། །ཞེས་སོ། །དམ་ཚིག་དང་སྡོམ་པ་གཉིས་ངོ་བོ་གཅིག་ལ་ལྡོག་པ་ཐ་དད་པ་ལྟ་བུ་ཡིན་ཀྱང་། དམ་ཚིག་ཡིན་ན། དེ་ཡིན་པས་མ་ཁྱབ་སྟེ། གསང་བ་བཅུའི་སྐབས་ཀྱི་སྒྲུབ་པའི་གནས་དུས་གྲོགས་དང་རྫས། བར་དུ་གསང་ལ་སྒྲུབ་པར་བྱ། །ཞེས་པའི་སྐབས་ཀྱི་དམ་ཚིག་དེ་སྡོམ་པ་མ་ཡིན་པའི་ཕྱིར་རོ། །གསུམ་པ་ངོ་བོ་ལ་སྔགས་སྡོམ་གྱི་མཚན་ཉིད། དབྱེ་བ། དམ་ཚིག་གི་ཆེ་བ། དེའི་རྣམ་གྲངས་བཤད་པ་དང་བཞི་ལས། དང་པོ་ནི། སྡོམ་བྱེད་ཐབས་ཤེས་ཁྱད་པར་ཅན་གྱིས་ཟིན་པའི་བདེ་བ་ཆེན་པོའི་ཡེ་ཤེས་ཀྱིས་བསྡོམ་བྱ་སྒོ་གསུམ་ཕྲ་བའི་བག་ཆགས་དང་མཚན་འཛིན་གྱི་རྟོག་པ་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག །རང་རྒྱུད་དབང་བསྐུར་བ་ལས་གསར་དུ་ཐོབ་པའི་ཚུལ་ཁྲིམས། གཉིས་པ་དབྱེ་བ་ལ། བྱ་བ། སྤྱོད་པ། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་སྔགས་སྡོམ་དང་བཞིའི་མཚན་ཉིད་རིམ་བཞིན། བལྟས་པའི་བདེ་བ། དགོད་པའི་བདེ་བ། ལག་བཅངས་ཀྱི་བདེ་བ་གོ་རིམ་བཞིན་དུ་ལམ་དུ་བྱས་པའི་སྒོ་ནས་ཆགས་པ་དེ་དང་དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཐབས་ཤེས་ཀྱིས་སྒོ་གསུམ་གྱི་བག་ཆགས་དང་མཚན་རྟོག་སྡོམ་པར་བྱས་པའི་སེམས་པ་ས་བོན་དང་བཅས་པ་གང་ཞིག །རང་རྒྱུ་རྒྱུད་སྡེ་རང་རང་ལ་ལྟོས་པའི་དབང་ལས་ཐོབ་པའི་ཚུལ་ཁྲིམས། བླ་མེད་ཀྱི་སྔགས་སྡོམ་གྱི་མཚན་ཉིད་ནི། དབང་པོ་གཉིས་སྦྱོར་བདེ་བ་ལམ་དུ་བྱས་པའི་སྒོ་ནས་ཆགས་པ་དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཐབས་ཤེས་ཁྱད་པར་ཅན་གྱིས་སྒོ་གསུམ་གྱི་བག་ཆགས་དང་མཚན་རྟོག་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག །རང་རྒྱུད་བླ་མེད་ཀྱི་དབང་ལས་ཐོབ་པའི་ཚུལ་ཁྲིམས། དབྱེ་ན་གཉིས་ཏེ། བུམ་དབང་ལས་ཐོབ་པ་དང་། དབང་གོང་མ་ལས་ཐོབ་པའི་སྡོམ་པའོ། །དང་པོའི་མཚན་ཉིད་སྦྱོར་བའི་དུས་སུ་རིགས་ལྔ་སྤྱི་དང་བྱེ་བྲག་གི་དམ་ཚིག་ཁས་བླངས་ཤིང་། དངོས་གཞིའི་དུས་སུ་བུམ་དབང་འཁོར་བཅས་བསྐུར་བ་ལས་གསར་ཐོབ་ཀྱི་ཚུལ་ཁྲིམས་གང་ཞིག །ཐབས་ཤེས་ཁྱད་པར་ཅན་བསྐྱེད་རིམ་གྱིས་ཐ་མལ་སྣང་ཞེན་གྱི་མཚན་རྟོག་སྡོམ་པར་བྱེད་པའི་སེམས་པ་ས་བོན་དང་བཅས་པ། གཉིས་པའི་མཚན་ཉིད། རང་ཐོབ་བྱེད་ཀྱི་རྒྱུ་དབང་གོང་མ་གང་རུང་། བསྐུར་བ་ལ་བརྟེན་ནས་གྱ་ནོམ་ལྷར་ཞེན་གྱི་མཚན་རྟོག་ལས་སྐྱོབ་པའི་ཚུལ་ཁྲིམས་གང་ཞིག །ཐབས་ཤེས་ཁྱད་པར་ཅན་རང་བྱིན་རླབས་པས་སེམས་གསལ་སྟོང་གི་ངོ་བོར་སྡོམ་པའི་སེམས་པ་ས་བོན་དང་བཅས་པ་གསང་དབང་གི་དང་། དེ་གང་ཞིག །ཐབས་ཤེས་ཁྱད་པར་ཅན་ཀུན་རྫོབ་ཞུ་བདེས་མཚོན་བྱེད་དཔེའི་ཡེ་ཤེས་བདེ་སྟོང་གི་ངོ་བོར་སྡོམ་པའི་སེམས་པ་ས་བོན་དང་བཅས་པ་ཤེར་དབང་གི་དང་དེ་དག་གང་ཞིག །ཐབས་ཤེས་ཁྱད་པར་ཅན་འཕོ་མེད་བདེ་ཆེན་གྱི་ཟུང་འཇུག་ལྷན་སྐྱེས་ཀྱི་ཡེ་ཤེས་མཚོན་བྱ་དོན་དམ་པའི་ངོ་བོར་སྡོམ་པའི་སེམས་པ་ས་བོན་དང་བཅས་པ་དབང་བཞི་པའི་སྔགས་སྡོམ་གྱི་མཚན་ཉིད་དེ། དགྱེས་རྡོར་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཨེ་ཝཾ་རྣམ་པས་བདེ་ཆེན་པོ། །དབང་ལས་ཡང་དག་ཤེས་པར་བྱ། །ཞེས་གསུངས་པའི་ཕྱིར་རོ། །གཉིས་པ་དམ་ཚིག་གི་ཆེ་བ་ལ་སྤྱོད་སྒོ་ཡངས་པའི་དང་འདུལ་སྡོམ་ཐམས་ཅད་འདུས་པའི་ཆེ་བའོ། །དང་པོ་ནི། གནས་ལུགས་ལ་རྟོགས་གོམས་ཀྱི་གདེངས་དང་ལྡན་ན་མཉམ་པ་ཆེན་པོའི་དམ་ཚིག་ལ་གནས་པའམ། བླ་ན་མེད་པའི་ཐེག་པར་ངེས་པ་ཞེས་བྱ་སྟེ། སྒོ་གསུམ་གྱི་སྤྱོད་པ་ཇི་ལྟར་སྤྱད་ཀྱང་ཕྱོགས་འཛིན་གྱི་བློ་མི་སྐྱེ་བའི་ཕྱིར། དེ་འདྲ་བའི་གདེངས་ཀྱིས་ཟིན་པའི་གང་ཟག་དེས། ལས་དང་ཉོན་མོངས་པ་གང་ལ་སྤྱད་ཀྱང་སྒྱུ་མའི་སྤྲུལ་པ་ལ་སྤྱོད་པ་ལྟར་མ་ཞེན་པའི་ཕྱིར། དེའི་སྒྲིབ་པ་དང་བག་ཆགས་མི་གསོག་པའི་སྟེང་དུ་ཚོགས་གཉིས་རྫོགས་པར་འགྱུར་བ་དང་། སོ་བྱང་ཕྱི་རྒྱུད་ཀྱི་ཚུལ་ཁྲིམས་དང་སྡོམ་པ་ཐམས་ཅད་ཀྱང་དག་པར་འགྱུར་བ་ཉིད་དོ། །བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །གཉིས་པ་ནི། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གི་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་གསུངས་པ་ལྟར། དེ་གསུམ་ཡང་རྣམ་པ་འགལ་བ་དང་། ངོ་བོ་ཚང་བ་དང་གནས་གྱུར་པ་གཉིས་ལས། དང་པོ་ནི། ལེན་དུས་ཀྱི་རྣམ་པ་སོ་ཐར་ཇི་སྲིད་འཚོའི་བར་དང་། བྱང་སྡོམ་སྙིང་པོ་བྱང་ཆུབ་ལ་ཐུག་གི་བར་དང་། སྔགས་སྡོམ་འཁོར་བ་མ་སྟོངས་ཀྱི་བར་དུ་ཁས་ལེན་པའི་ཁྱད་པར་དང་། བསླབ་ཚུལ་ཀྱང་སོ་ཐར་ཕྱི་ལུས་ངག་གི་སྤང་བ་བདུན་ལ་བསླབ་པ་དང་། ནང་ཡིད་ཀྱི་ལས་གསུམ་གཙོ་བོར་སྤོང་བའི་སྙིང་རྗེ་ལ་བསླབ་པ་དང་། རྟོགས་གོམས་ཀྱི་གདེངས་ཀྱིས་མཉམ་པའི་དོན་ལས་མི་འདའ་བར་བསླབ་པའོ། །གཉིས་པ་ངོ་བོ་ལ། ཚང་བ་དང་། གནས་འགྱུར་གཉིས་ལས། དང་པོ་ནི། སོ་ཐར་ནི་གཞན་ལ་གནོད་པ་གཞི་བཅས་ལས་ལོག་པ་དང་། བྱང་སྡོམ་ནི་དེའི་སྟེང་དུ་ཕན་འདོགས་པའི་སྦྱོར་བ་ལ་ཞུགས་པ་དང་། སྔགས་སྡོམ་ནི། དེ་གཉིས་ཀ་ལ་ཞུགས་པའི་སངས་རྒྱས་ཀྱི་མཛད་པ་ཉམས་སུ་བླངས་ཏེ་མཉམ་པ་ཆེན་པོ་ངང་ནས་གཞན་དོན་རྩོལ་མེད་དུ་མཛད་པའི་ཐབས་ལ་མཁས་པས་ཐམས་ཅད་པའི་ཕྱིར། བྲེ་གསུམ་ཡོད་པའི་ནང་དུ་དོ་ཚང་བའི་དགོས་པ་མེད་པ་ལྟར། ཡོན་ཏན་ཡར་ལྡན་དུ་འདུས་པའི་ཕྱིར། དེ་ལྟར་ཡང་གསལ་བཀྲ་ལས། ཐེག་ཆེན་དམ་ཚིག་ལ་གནས་ན། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། །གཉིས་པ་གནས་འགྱུར་པས་རྣམ་པར་དག་པ་ནི། སོ་ཐར་གྱི་གཞན་གནོད་གཞི་བཅས་སྤོང་བ་དང་བྱང་སྡོམ་གྱི་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ་རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་ངོ་བོ་གནས་འགྱུར་ཞིང་། མཉམ་པ་ཆེན་པོའི་ཐབས་ཀྱིས་མི་ཟིན་པའི་ཐ་མ ལ་སྣང་ཞེན་གྱི་ལྡོག་ཆ་རེ་ཡོད་པ་དེ་རྩ་བ་ནས་བཏང་ནས་མཉམ་པ་ཆེན་པོའི་དམ་ཚིག་ཏུ་སོ་བྱང་གི་སྡོམ་པའི་ངོ་བོ་དེ་ཉིད་གནས་གྱུར་ཏེ་རྣམ་པར་དག་པ་ཡིན་ནོ། །དེ་ཡང་བྱེ་བྲག་ཏུ་བཤད་ན། དེ་ལ་སོ་ཐར་གྱི་སྡོམ་པ་ནི། ཕས་ཕམ་བཞི་བྱུང་ན་ཞིག་པར་གསུངས་པ་ལས། འདིར་གནས་ལུགས་རྟོགས་པའི་གདེངས་ཀྱིས་ཟིན་ན་ཇི་ལྟར་སྤྱད་ཀྱང་མི་གོས་པས་ངོ་བོ་ཡར་ལྡན་དང་། སླར་ཚོགས་སུ་འགྱུར་བའི་ཕྱིར་ཡོན་ཏན་ཡར་ལྡན་ཏེ། འདི་ཉིད་ལས། བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་དང་། སྡུད་པ་ལས། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཀྱང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་སོ། །གཉིས་པ་བྱང་སྡོམ་དང་མི་འགལ་བར་འདུས་ཚུལ་ནི། ཉེས་སྤྱོད་སྡོམ་པའི་ཚུལ་ཁྲིམས་ཀྱིས་རྒྱུད་སྡོམ་གཉེན་པོ་ལེགས་སྤྱོད་དགེ་བའི་ཚོགས་སྒྲུབ་པ་དགེ་བ་ཆོས་སྡུད་ཀྱིས་རྟོགས་པ་དང་ཡོན་ཏན་ཁྱད་པར་ཅན་སྒྲུབ། སེམས་ཅན་དོན་བྱེད་ཀྱི་སྒོ་ནས་གཞན་ལ་ཕན་འདོགས་པ་གསུམ་དུ་འདུ་བ་ལས། འདིར་ཡང་ལས་དང་ཉོན་མོངས་པ་ལ་སྤྱོད་པ་ལྟར་ཡང་མ་ཞེན་པའི་ཕྱིར་དོན་གྱི་ངོ་བོ་ལ་ཅི་ཡང་བྱས་པ་མེད་པ་ནི་སྡོམ་པའི་ཚུལ་ཁྲིམས། གང་ལྟར་སྤྱོད་ཀྱང་སྒོ་གསུམ་རྡོ་རྗེ་གསུམ་གྱི་ཕྱག་རྒྱས་བཏབ་སྟེ་མི་འདའ་བ་ནི་དགེ་བ་ཆོས་སྡུད། གཞན་དོན་དུ་འགྱུར་ན་འཁོར་བའི་ཆོས་གང་ཡང་མི་འདོར་བར་སྤྱོད་པ་ནི་སེམས་ཅན་དོན་བྱེད་དེ། ཕལ་པོ་ཆེ་ལས། གང་དག་སེམས་ཅན་དོན་འགྱུར་བའི། །ཐབས་དེ་རྒྱལ་སྲས་བསླབ་པའི་མཆོག །སྤྲིན་ལས་ཆར་ཆེན་བབ་པ་ཡིས། །ལོ་ཏོག་ཕུན་སུམ་ཚོགས་པར་བྱེད། །ཅེས་གསུངས་པ་ལྟར་རོ། །དེ་དག་ལ་རྩོད་པ་སྤོང་བ་ལ། འདོད་པ་རྗོད་པ་དང་། དེ་དགག་པ་གཉིས་ལས། དང་པོ་ནི། ཁ་ཅིག །བུམ་དབང་རྫོགས་པར་ཐོབ་པའི་ཚེ། སྔགས་སྡོམ་རྫོགས་པར་ཐོབ་པ་ཡིན་ཏེ། མཆོག་དབང་གོང་མ་གསུམ་ལ་སྔགས་སྡོམ་གསར་ཐོབ་མེད་པའི་ཕྱིར་ཟེར་བ་དང་། ཁ་ཅིག །སྨིན་བྱེད་གཞིའི་དབང་བཞི་བསྐུར་བས་སྔགས་སྡོམ་ཐོབ་ཀྱང་། སླར་སྡོམ་ལྡན་རང་ཉིད་ཀྱིས་དབང་བླངས་པའམ། བླ་མས་བསྐུར་བ་གང་རིགས་ལ་བརྟེན་ནས་སྔར་མ་ཐོབ་པའི་སྡོམ་པ་གསར་ཐོབ་ཡོད་དེ། དབང་བསྐུར་རེ་རེ་ཐོབ་པའི་ཚེ་གོང་འཕེལ་དུ་འགྲོ་བས། ཇི་ཙམ་འཕེལ་བའི་ཆ་དེ་གསར་ཐོབ་ཡིན་པའི་ཕྱིར་ཟེར་བ་དང་། ཡང་། ཁ་ཅིག །གནས་འགྱུར་གྱི་སྐབས། སྡོམ་པ་འོག་མ་གཉིས་གོང་མར་གནས་གྱུར་པ་མི་འཐད་དེ། ཅིའི་ཕྱིར་ཞེ་ན། སོ་ཐར་གྱི་ཕམ་པ་བཞི་འཆབ་བཅས་སྤང་བ་དང་། བྱང་སྡོམ་གྱི་སེམས་ཅན་ལ་འཚེ་བ་ཆ་བཅས་ལས་ལྡོག་ནས་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ། འདིར་སྔགས་སྡོམ་གྱི་སྤྱད་པར་བྱ་བའི་དམ་ཚིག་ལྔ་དང་དངོས་སུ་འགལ་བའི་ཕྱིར་ཟེར་རོ། །གཉིས་པ་དེ་དག་དགག་པ་ལ་ལུང་རིགས་གཉིས་ལས། ལུང་དང་པོ་ལ། ལུང་ནི་རབ་དབྱེ་ལས། བླ་མ་བཙལ་ལ་དབང་བཞི་བླངས། །དེ་ཡི་སྡོམ་པ་གསུམ་ལྡན་འགྱུར། །ཞེས་པ་ལ་སོགས་ཀྱིས་གནོད་དོ། །རིགས་པ་ནི། མཆོག་དབང་གོང་མ་མ་ཐོབ་ལ། བུམ་དབང་རྫོགས་པར་ཐོབ་པའི་གང་ཟག་དེ་ཆོས་ཅན། ཁྱོད་རྫོགས་རིམ་གྱི་སྔགས་སྡོམ་པའི་གང་ཟག་དུ་ཐལ། ཁྱོད་སྔགས་སྡོམ་རྫོགས་པར་ཐོབ་པའི་ཕྱིར་ཏེ། བུམ་དབང་རྫོགས་པར་ཐོབ་པའི་ཕྱིར། རྟགས་ཁས། འདོད་མི་ནུས་ཏེ། དེ་ཐོབ་བྱེད་ཀྱི་མཆོག་དབང་གོང་མ་མ་ཐོབ་པའི་ཕྱིར་རོ། །ལུང་གཉིས་པ་ལ། སྨིན་བྱེད་གཞིའི་དབང་བཞི་ཐོབ་པའི་གང་ཟག་དེ་ཆོས་ཅན། ཁྱོད་རིམ་གཉིས་སྒོམ་པ་ལ་དབང་བའི་གང་ཟག་མ་ཡིན་པར་ཐལ། ཁྱོད་ལ་སྔར་མ་ཐོབ་པའི་སྔགས་སྡོམ་རིགས་མི་འདྲ་བ་གསར་དུ་ཐོབ་རྒྱུ་ཡོད་པའི་ཕྱིར། དབང་གི་གོ་མ་ཕྱེ་བར་ལམ་ལ་བསླབ་པར་མ་གསུངས་པའི་ཕྱིར། འདོད་ན། དེ་ཆོས་ཅན། དེར་ཐལ། ཁྱོད་རྒྱུད་སྨིན་ཟིན་པའི་གང་ཟག་ཡིན་པའི་ཕྱིར། མ་གྲུབ་ན། དེ་ཡིན་ཏེ། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་སྤྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པ་བསྟན། །ཞེས་ཕར་ཕྱིན་ཐེག་པར་སྦྱོར་ལམ་ཐོབ་ནས་རྟེན་དེ་ཉིད་ལ་མཐོང་སྤངས་སྤང་རུང་དང་། །མཐོང་ལམ་སྐྱེ་རུང་ལ་སྨིན་པའི་ཚད་དུ་འཇོག་པ་ལྟར། འདིར་ཡང་བླ་མེད་ཀྱི་ཐེག་པ་འདིར་ཞུགས་ནས་ཚེ་འདི་ཉིད་ལ་སྤངས་བྱ་སྤང་རུང་དང་། ཐོབ་བྱ་མཆོག་གི་དངོས་གྲུབ་ཐོབ་རུང་གི་ནུས་པ་ཐོབ་པའི་ཕྱིར། དེས་ན་དབང་ཐོབ་པ་ཉིད་རྒྱུད་སྨིན་པའི་ཚད་དེ། ཆུ་ལུད་དྲོད་གཤེར་འཛོམ་དུས་ཞིང་ལ་ས་བོན་ཐོབ་པ་བཞིན་ནོ། །དེ་ལ་དངོས་ལན་ནི། སྔར་རྒྱུད་ལ་ཡོད་པའི་སྔགས་སྡོམ་གྱི་རྒྱུན་དེ་ཉིད་ཕྱིས་ལམ་དབང་བསྐུར་བ་རེ་རེ་ཐོབ་པའི་ཚེ་གོང་འཕེལ་དུ་འགྲོ་བས་ན། ཇི་ཙམ་འཕེལ་བའི་ཆ་དེ་གསར་ཐོབ་ཡིན་མོད། འོན་ཀྱང་ཐོབ་བྱ་དབང་གི་ངོ་བོ་རིགས་མཐུན་ཕྱིན་ཆད་སྡོམ་པ་རིགས་མི་འདྲ་བ་དང་ངོ་བོ་ཐ་དད་དུ་འཇུག་པའང་མེད་པས་དངོས་གཞི་གསར་ཐོབ་མེད་པའི་ཕྱིར། དབང་བཞི་དང་པོ་དེ་ལ་སྨིན་བྱེད་ཀྱི་དབང་ཞེས་སྔགས་སྡོམ་གསར་དུ་ཐོབ་བྱེད་ཀྱི་དབང་ཡིན་ཞིང་། ཕྱི་མ་རྣམས་ལའང་རང་སྐལ་གྱིས་སྨིན་པར་བྱས་པའི་ཆ་རེ་ཡོད་ཀྱང་སྨིན་བྱེད་དང་སྡོམ་པ་གསར་ཐོབ་ཀྱི་ཐ་སྙད་མི་སྦྱོར་ཏེ། སྨིན་ཚུལ་དེ་ཙམ་ཞིག་སངས་རྒྱས་མ་ཐོབ་ཀྱི་བར་དུ་འབྱུང་བའི་ཕྱིར་རོ། །ལུགས་གསུམ་པ་ལ་ལུང་དང་རྣལ་ལན་གཉིས་ལས། དང་པོ་ནི། རྒྱུད་འབུམ་པའི་ལུང་ལས། རྡོ་ཡི་རིགས་ཀྱི་བྱེ་བྲག་ཞིག །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་བསྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་སོགས་དང་འགལ་ལོ། །རྣལ་ལན་ནི། དེ་ལྟར་འོག་མ་རྣམས་དང་རྣམ་པ་འགལ་བ་ལྟར་སྣང་ཡང་ལྟ་བ་རྟོགས་ཤིང་ཏིང་ངེ་འཛིན་གོམས་པ་དང་། ཐབས་མཁས་ཀྱི་སྤྱོད་པས་ཟིན་པའི་གནད་ཀྱིས་མི་འགལ་བར་འོག་མའི་སྡོམ་པ་ཡར་ལྡན་དུ་རྫོགས་པ་ཡིན་ཏེ། རྒྱུ་མཚན་ཉན་ཐོས་ཀྱི་དགེ་སློང་ལ། ཕམ་བཞི་འཆབ་བཅས་བྱུང་ན་སོ་ཐར་གྱི་སྡོམ་པ་ཞིག་པར་གསུངས་པ་ལས། འདིར་མི་ཚངས་སྤྱོད་ལ་བདག་དང་ཡུལ་ལྷ་ཡབ་ཡུམ་དུ་གསལ་བ་ལྷའི་འདུ་ཤེས། མཁའ་གསང་རྡོ་རྗེ་པདྨར་ཤེས་པ་སྔགས་ཀྱི་འདུས་ཤེས་ཀྱིས་གཞིའི་ཡན་ལག་མ་ཚང་ཐབས་འདིས་བདེ་བ་ཆེན་པོའི་ཡེ་ཤེས་བསྒྲུབ་པར་བྱའོ། །རྣམ་པ་ཆོས་ཀྱི་འདུ་ཤེས་ཀྱིས་བསམ་པའི་ཡན་ལག་མ་ཚང་། བྱེད་པ་སྡོམ་པའི་ཐབས་མཁས་ཀྱི་སྤྱོད་པས་ཟིན་ཅིང་ཆགས་པའི་རོ་ཡེ་ཤེས་སུ་གསལ་བས་མཐར་ཐུག་གི་ཡན་ལག་མ་ཚང་བའི་ཕྱིར་དང་། ཆོས་ཐམས་ཅད་སེམས་ཉིད་ཀྱི་རང་སྣང་དུ་ཤེས་པས་རྨི་ལམ་དུ་སྤྱད་པ་ལྟར་ཉེས་པས་མི་གོས་ཤིང་། འཛག་མེད་ཀྱི་ཡེ་ཤེས་འགྲུབ་སོགས་ཀྱི་དོན་དུ་འགྱུར་བས་དགག་དགོས་གནད་གཅིག་པའི་ཕྱིར་མི་འགལ་ཏེ། འདི་ཉིད་ལས་མ་ཆགས་པ་ལ་ཆགས་པ་དང་། ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་དང་། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་དང་། ཡེ་ཤེས་རྒྱས་པའི་མདོ་ལས་ཀྱང་། ཇི་ལྟར་སྒྱུ་མའི་མཁན་པོ་དག །རང་གི་སྤྲུལ་པའི་སྒྱུ་མ་ལ། །དགེ་དང་མི་དགེ་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་སོ། །ཡང་ཁ་ཅིག་སྡོམ་གསུམ་གནས་གྱུར་ངོ་བོ་གཅིག་ཏུ་ཡོད་པ་མི་འཐད་ཟེར་བ་ལུང་རིགས་གཉིས་ཀྱིས་དགག་སྟེ། ལུང་ནི་འདི་ཉིདལས། ཇི་བཞིན་ཉིད་དང་འདུལ་བའི་ཐབས། །ཇི་སྙེད་སྡོམ་པ་བསམ་ཡས་པ། །མ་ལུས་རྣམ་དག་ལྷུན་གྱིས་གྲུབ། །ཅེས་སོགས་ཀྱིས་གནོད་ལ། རིགས་པ་ནི། གསུམ་ལྡན་རྡོ་རྗེ་འཛིན་པའི་རྒྱུད་ཀྱི་གཞན་ལ་ཕན་པ་སྒྲུབ་པའི་སེམས་དཔའ་དེ་ཆོས་ཅན། ཁྱོད་གཞན་ལ་གནོད་པ་སྤོང་བའི་དེ་དང་། སྔགས་ཀྱི་དམ་ཚིག་ལ་བསླབ་པའི་སེམས་དཔའ་གཉིས་ཀ་ཡིན་ཏེ། ཁྱོད་དེ་གཉིས་དང་ངོ་བོ་བདག་གཅིག་ཏུ་གནས་པའི་ཕྱིར། སྡོམ་པ་གསུམ་གྱི་ལྡོག་པ་འགལ་བ་ཡིན་ཏེ། དཔེར་ན་བསམ་པ་སེམས་བསྐྱེད་ཀྱིས་ཟིན་པས་ཆོ་ག་ཉན་ཐོས་ཀྱི་ལུགས་ལྟར་བླངས་པའི་ཐེག་ཆེན་སོ་ཐར་རམ་ཉན་ཐོས་ཀྱི་དགེ་སློང་གི་སྡོམ་པ་ཉིད་སླར་སེམས་བསྐྱེད་བླངས་པས་དེར་གནས་གྱུར་པའི་རྒྱུད་ཀྱི་སྡོམ་པ་གང་ཡིན་ཀྱང་རུང་སྟེ། དེ་ཀུན་སློང་བྱང་ཆུབ་སེམས་ཀྱི་ལྡོག་པ་དང་། སྡོམ་པའི་ལྡོག་པ་གཉིས་ཡོད་པ་ལས། སྔ་མ་ཚེ་འཕོས་པའི་དུས་དུ་མི་གཏོང་སྟེ། དེ་བྱང་སེམས་ཀྱི་སྡོམ་པའི་གཏོང་རྒྱུ་མ་ཡིན་པའི་ཕྱིར། ཕྱི་མ་སྡོམ་པ་ཁས་བླངས་པའི་དུས་ཀྱི་ལྡོག་ཆ་ནི་ཚེ་འཕོས་པའི་དབང་གིས་གཏོང་སྟེ་དགེ་སློང་གི་སྡོམ་པ་དེ་ཇི་སྲིད་འཚོའི་མཐའ་ཅན་གྱི་སྡོམ་པ་ཡིན་པའི་ཕྱིར། རབ་དབྱེ་ལས། ཐེག་ཆེན་སོ་སོར་ཐར་ཡིན་ཡང་། །དགེ་སློང་ལ་སོགས་སྡོམ་པ་ཡི། །ལྡོག་པ་ཤི་བའི་ཚེ་ན་གཏོང་། །བྱང་ཆུབ་སེམས་ཀྱི་ལྡོག་པ་དང་། །དེ་ཡི་འབྲས་བུ་ཤི་ཡང་འབྱུང་། །ཞེས་སོ། །སྡོམ་པ་གསུམ་གྱི་སེམས་དཔའ་ལྡོག་པ་ཐ་དད་པ་གསུམ་པོ་དེ་རྣམས་སྐྱེ་འཇིག་གནས་གསུམ་དུས་གཅིག་པ་མ་ཡིན་ཏེ། ཇི་ལྟར་ཁས་བླངས་པ་ལྟར་གནས་འཇིག་བྱེད་པའི་རང་ལྡོག་མ་འདྲེས་པའི་ཕྱིར་དང་། གསུམ་ལྡན་གྱི་རྒྱུད་ཀྱི་སྡོམ་པ་སྔ་མ་རྣམས་ཕྱི་མ་དང་ངོ་བོ་གཅིག་ཕྱི་མ་སྔ་མ་དང་། གནས་འགྱུར་ངོ་བོ་གཅིག་པ་མ་ཡིན་ཏེ། སྔ་མ་སྔ་མ་ལས་ཕྱི་མ་ཕྱི་མ་རྒྱ་ཆེ་བའི་ཕྱིར་དང་། ཕྱི་མ་བླངས་ཚེ་སྔར་གྱི་སྡོམ་པའི་རྫས་རྒྱུན་མ་ཡིན་པའི་སྡོམ་རྫས་གསར་པ་དུ་མ་ཞིག་སྐྱེ་བ་ཡོད་དགོས་པའི་ཕྱིར་རོ། །དེ་ལ་ཁ་ཅིག་གསུམ་ལྡན་རྡོ་རྗེ་འཛིན་པའི་རྒྱུད་ཀྱི་དགེ་སློང་གི་སྡོམ་པ་ཆོས་ཅན། དེའི་རྒྱུད་ཀྱི་བྱང་སྡོམ་དང་སྔགས་སྡོམ་དུ་ཐལ། དེ་དང་དེར་གནས་གྱུར་པའི་ཕྱིར་རོ་ཟེར་ན། ལུང་རིགས་གཉིས་ཀྱིས་གནོད་བྱེད། ལུང་ནི་གསང་བ་སྤྱོད་པའི་རྒྱུད་ལས། དཔེར་ན་རྡོ་ལས་ཟངས་སུ་འགྱུར། །ཟངས་ལས་གསེར་གྱི་རྣམ་པ་སྟེ། །ཟངས་ཀྱི་དུས་ན་རྡོ་མེད་ལ། །གསེར་དུ་གྱུར་པས་ཟངས་མི་སྣང་། །རིག་འཛིན་ནང་གི་དགེ་སློང་ལ། །གཉིས་པོ་གནས་པ་ཉིད་དུ་ནི། །སངས་རྒྱས་ཉིད་ཀྱིས་མ་གསུངས་སོ། །ཞེས་པས་གནོད་ལ་རིགས་པ་ནི། ཀུན་གཞིའི་རྣམ་ཤེས་ཆོས་ཅན། སངས་རྒྱས་ཀྱི་ཡེ་ཤེས་སུ་ཐལ། དེ་དེར་གནས་གྱུར་པའི་ཕྱིར་རོ། །བཞི་པ་རྣམ་གྲངས་ལ། རྩ་བའི་དམ་ཚིག་ལྔ་དང་། ཡན་ལག་ལྔ་ཚན་གཉིས་ཏེ་བཅོ་ལྔ་དང་། དེ་ལས་སྤྲོས་ན་སུམ་བརྒྱ་དྲུག་ཅུར་དབྱེ་བ་དང་། མཐའ་ཡས་པར་སྤྲོ་བ་ལ་སོགས་པ་རྣམས་སོ། །བཞི་པ་ཉམས་ན་བསྐང་བའི་ཐབས་ནི། དགོངས་འདུས་ལས། ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་བཟླས་ཉམས་ཞར་ཉམས་ལྔ། །ཞེས་པ་ལྟར་ཉམས་ན། དེ་ཉིད་བསྐང་བས་རྫོགས་པར་འགྱུར་བའི་ཕྱིར་འོག་མ་དག་ལས་འཕགས་སོ། །དེའང་ཉན་ཐོས་པ་ནི་ཕམ་པ་འཆབ་བཅས་བྱུང་ན་གསོར་མི་རུང་བས་རྫ་བེའུ་ཆགས་པ་དང་འདྲ་ལ། བྱང་སེམས་ནི་གསེར་དངུལ་གྱི་སྣོད་ཆག་པ་མགར་བས་བྱར་རུང་བ་ལྟར་དགེ་བའི་བཤེས་གཉེན་ལ་བརྟེན་ནས་ཉམས་པ་གསོར་རུང་བར་བཞེད་དོ། །འདིར་ནི་གསེར་གྱི་སྣོད་གཞོམ་པ་རང་གིས་རྩོལ་བས་སྲོང་ཐུབ་པ་ལྟར་གཞན་ལ་མ་བརྟེན་པར་རང་སྟོབས་ཀྱིས་གསོར་རུང་བ་སྟེ། དགོང་འདུས་ལས། གང་དེ་བསྐང་བར་བྱ་བ་ཡང་། །ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་གསུངས་པ་བཞིན་ནོ། །ལྔ་པ་ཉམས་པའི་སྐྱོན་ནི། འདི་ཉིད་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཞེས་སོགས་དང་། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་སོ། །དྲུག་པ་ཡོན་ཏན་ནི། འདི་ཉིད་ལས། རྒྱལ་བའི་རིག་པ་འཛིན་པ་སྟེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རླབས། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་གསུངས་པའི་ཕྱིར་རོ། །དྲུག་པ་རོལ་པ་ཕྲིན་ལས་ལ་དྲུག་ལས། དང་པོ་དགོས་བྱེད་ནི། ཕན་གདགས་པ་དང་། ཚར་བཅད་པའི་སྒོ་ནས་བདག་གཞན་གྱི་དོན་སྒྲུབ་པའི་བྱ་བ་སྟེ། ཁོག་གཞུང་ལས། བདག་གཞན་དོན་སྒྲུབ་ཕྲིན་ལས་ཏེ། །དེའང་ཞི་བས་ཕྱི་རུ་ནད་གདོན་དང་། །ནང་དུ་མཚན་རྟོག་ཞི་བར་བྱེད། །རྒྱས་པས་ཕྱི་རུ་འཁོར་དང་ལོངས་སྤྱོད། ནང་དུ་ཚེ་བསོད་ཉམས་རྟོགས་འཕེལ་ཞིང་རྒྱས་པར་བྱེད། དབང་གིས་ཕྱི་རུ་གང་དབང་དུ་སྡུད་པར་འདོད་པ་དང་། ནང་དུ་རང་སེམས་ལ་དབང་ཐོབ་པར་བྱེད། མངོན་སྤྱོད་ཀྱིས་ཕྱི་རུ་དགྲ་བགེགས་དང་ནང་ཉོན་མོངས་པ་ཕྲ་རགས་འཇོམས་པའི་ཕྱིར་ཏེ། ཐུགས་ཐིག་ལས། ཟུག་རྔུ་ཕྱི་ནང་གི་ཕྱིར་དང་། །སྤེལ་བྱ་གཉིས་པོ་འཕེལ་ཕྱིར་དང་། །དགུག་དབང་བཞི་པོ་བསྡུ་ཕྱིར་དང་། །གདུག་པ་རྣམ་གཉིས་འཇོམས་ཕྱིར་དང་། །ཞེས་སོ། །གཉིས་པ་ངོ་བོའི་མཚན་ཉིད་ནི་ཚད་མེད་པ་གཞིའི་རྒྱུ་ལས་བྱུང་ཞིང་ཐབས་ཤེས་ཁྱད་པར་ཅན་གྱིས་ཟིན་པའི་སྒོ་ནས་གཙོ་བོར་གཞན་དོན་སྒྲུབ་པའི་ཐབས་མཁས་ཀྱི་མཛད་སྤྱོད་དོ། །དེའང་ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཞེས་སོ། །བཞི་པ་རྣམ་གྲངས་ལ། གཞི་ལམ་འབྲས་བུའི་ཕྲིན་ལས་གསུམ་ལས། འདིར་ལམ་གྱི་ཕྲིན་ལས་ལ། དོན་བྱ་བའི་ཡུལ་བྱེད་པའི་ཕྲིན་ལས། བྱ་ཐབས་ཀྱི་རྣམ་གྲངས་སོ། །དང་པོ་ནི། ཁམས་གསུམ་གྱི་སེམས་ཅན་ཐམས་ཅད་ཡིན་ལ། དེ་ཡང་དམིགས་བསལ་གུད་དུ་ཕྱེ་ན། གནོད་སྡིག་ཅན་དང་། དབུལ་འཕོངས་ཅན་དང་། ལོག་ལྟ་ཅན་དང་། གདུག་པ་ཅན་རྣམས་སོ། །གཉིས་པ་ནི། ཞི་རྒྱས་དབང་དྲག་ལྷུན་གྱིས་གྲུབ་པ་དང་ལྔའོ། །གསུམ་པ་ནི། ཁོག་གཞུང་ལས། མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱི་བྱ། །ཞེས་པའོ། །ལྔ་པ་སྐྱོན་ནི། དོན་གཉིས་མི་འགྲུབ་པ་ལ་སོགས་པ་སྟེ། །རྡོ་རྗེ་ལས། དོན་གཉིས་མི་འགྲུབ་དེ་ཡི་སྐྱོན། །ཞེས་སོ། །དྲུག་པ་ཡོན་ཏན་ནི། དེ་ལས་བཟློག་པས་རང་གཞན་གྱི་དོན་འགྲུབ་པ་སྟེ། རྡོ་རྗེ་ལས། དེ་ལས་བཟློག་པའི་ཚུལ་ལྡན་པ། །ཡོན་ཏན་ཉིད་དུ་ཤེས་པར་བྱ། །ཞེས་གསུངས་སོ། །བདུན་པ་དོན་དུ་གཉེར་བ་སྒྲུབ་པ་ལ་དྲུག་ལས། དང་པོ་དགོས་བྱེད་ནི། གང་དོན་དུ་གཉེར་བའི་བསྒྲུབ་བྱ་གཉིས་མངོན་དུ་འགྱུར་བའི་ཆད་དུ་སྟེ། ཐུགས་ཐིག་ལས། ཐུན་མོང་མཆོག་གི་དངོས་གྲུབ་རྣམས། །བདག་གཞན་དོན་ཐོབ་བཞི་ཡི་ཕྱིར། །ཞེས་སོ། །གཉིས་པ་ངོ་བོའམ་མཚན་ཉིད་ནི། མཆོག་ཐུན་གྱི་དངོས་གྲུབ་རྣམ་གཉིས་གང་རུང་སྒྲུབ་པའི་ཐབས་ཁྱད་པར་ཅན་ནོ། །གསུམ་པ་སྒྲ་དོན་ནི། སིདྡྷིའི་སྒྲ་ལས་དངོས་གྲུབ་སྟེ་བསྒྲུབ་བྱའོ། །ས་དྷ་ནཱའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་སྟེ། ཧེ་རུ་ཀ་འདུས་པ་ལས། རིག་འཛིན་ལམ་དང་འབྲས་བུ་དང་། །ཚེ་དང་པྲ་དང་རོ་ལངས་དང་། །རྐང་མགྱོགས་མཁའ་འགྲོ་ལ་སོགས་པ། །སྒྲུབ་པས་སྒྲུབ་པ་ཉིད་དུ་བཤད། །ཅེས་སོ། །བཞི་པ་རྣམ་གྲངས་ལ། མཆོག་ཐུན་གྱི་སྒྲུབ་པ་གཉིས་ལས། དང་པོ་ནི། འདི་ཉིད་ལས། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །བཤད་རྒྱུད་ལས་གསུངས་པ་ལྟར་ན་ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་སོ། གཉིས་པ་ལ། ཡོན་ཏན་འབྱུང་བའི་དངོས་གྲུབ་ལྔ་ལས་ཕྲན་ཚེགས་ཀྱི་དངོས་གྲུབ་བརྒྱད་སྒྲུབ་པའོ། །བཤད་རྒྱུད་ལས་གསུངས་པ་ནི་ཁོག་གཞུང་ལས། རོ་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདི་ཆད་ཕྱིར་འཇིག་རྟེན་པའོ། །ཞེས་སོ། །ལྔ་པ་སྐྱོན་ནི། སྒྲུབ་པའི་ཐབས་ཡལ་བར་དོར་ན་བསྒྲུབ་བྱའི་དོན་མི་འགྲུབ་པ་སྟེ། ཐུགས་ཐིག་ལས། ཡལ་བས་མི་འགྱངས་མི་ཐོབ་བཅུ། །ཞེས་སོ། །དྲུག་པ་ཡོན་ཏན་ནི། འདི་ཉིད་ལས། སྔགས་དང་ཕྱག་རྒྱ་རབ་བརྟེན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་དང་། དབང་སྒྱུར་རིགས་ཀྱི་དམ་པ་འགྲུབ། །ཅེས་གསུངས་སོ། །བརྒྱད་པ་མི་གཡོ་བ་ཏིང་ངེ་འཛིན་ལ་དྲུག་ལས། དང་པོ་དགོས་ཆེད་ནི། རྟོགས་པའི་དོན་ལ་མི་ཡེངས་པར་དབང་བསྒྱུར་བས་སེམས་ལས་སུ་རུང་བར་བྱེད་པ་སྟེ། འདི་ཉིད་ལས། དངོས་རྣམས་ཉིད་ན་དངོས་མེད་པ། །རྟོགས་པའི་དབང་བསྒྱུར་ཏིང་འཛིན་ཡིན། །ཞེས་སོ། །གཉིས་པ་ངོ་བོའམ་མཚན་ཉིད་ནི། བསྒོམ་བྱའི་དོན་ལ་མི་གཡོ་བར་གནས་པའི་སེམས་རྩེ་གཅིག་པའི་ཏིང་ངེ་འཛིན་ཏེ། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། །ཞེས་སོ། །བཞི་པ་རྣམ་གྲངས་ལ། བསྒོམ་བྱ་ངོས་བཟུང་བ་དང་། ཇི་ལྟར་བསྒོམ་པའི་ཐབས་སོ། །དང་པོ་ལ་རིམ་པ་གཉིས་ལས། དེ་གཉིས་ཀྱི་གོ་དོན་ནི། སྣོད་བཅུད་ཐ་མལ་དུ་འཛིན་པ་སྤང་ཞིང་ལམ་མ་དག་པ་བདུན་དང་འབྲས་བུ་གཟུགས་སྐུའི་རྟེན་འབྲེལ་སྒྲིག་པ། ཁྱད་པར་རང་གི་དངོས་འབྲས་ཐུན་མོང་གི་དངོས་གྲུབ་འགྲུབ་པར་བྱེད་པ་ནི་བསྐྱེད་རིམ་དང་། འཕོ་བའི་བག་ཆགས་ཀྱི་དྲི་མ་སྦྱོང་ཞིང་ལམ་དག་པ་ས་གསུམ་དང་འབྲས་བུ་ལྷན་ཅིག་སྐྱེས། སྐུའི་རྟེན་འབྲེལ་སྒྲིབ་པ། ཁྱད་པར་རང་གི་དངོས་འབྲས་མཆོག་གི་དངོས་གྲུབ་འགྲུབ་པར་བྱེད་པ་ནི། རྫོགས་རིམ་གྱི་དགོས་པ་སྟེ། སྙིང་པོའི་རྒྱུད་ཕྱི་མ་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་སོ། །སྦྱངས་བྱ་འཁྲུལ་པ་གློ་བུར་བ་ཀུན་བརྟགས་དང་། ས་བོན་གྱི་ཆ་གཉིས་ལ་ལྟོས་ནས་ཀྱང་སྦྱོང་བྱེད་བསྐྱེད་རྫོགས་གཉིས་གསུངས་ཏེ། བསྐྱེད་རིམ་ནི། ཨུཏྤརྟི་ཀྲ་མའི་སྒྲ་ལས་དྲངས་ན། ཨུཏྤརྟི་ཞེས་པ་བཅོས་པའམ་བརྟགས་པ་ལ་འཇུག་ལ། གང་ལས་བཅོས་ཤིང་གདགས་པའི་གཞི་ནི་རྫོགས་རིམ་སྟེ། དེའི་སྐད་དོད་ནི། ནིཥྤནྣ་ཀྲ་མ་ཞེས་པའི་ནིཥྤནྣ་ནི་མ་བཅོས་པའི་གྲུབ་པ་དང་རྫོགས་པ་ལ་འཇུག་ཅིང་། གཉིས་ཀའི་ཀྲ་མ་ནི་རིམ་པ་སྟེ་ཐབས་སམ་ལམ་གྱི་གོ་རིམ་དུ་འགྱུར་བས་བཅོས་ཤིང་བརྟགས་པ་རྗེས་དཔག་གི་ལྷའི་རྣལ་འབྱོར་འཁོར་བཅས་ལ་བསྐྱེད་རིམ་དང་། བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་གྱི་ལམ་འཁོར་བཅས་ལ་རྫོགས་རིམ་ཞེས་བྱ་སྟེ། ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་སོ། །དེ་ལ་སྐྱེ་འཕགས་གཉིས་ཀྱི་ལམ་གྱི་གནས་སྐབས་ལ། སོ་སྐྱེའི་དུས་སུ་བསྐྱེད་རིམ་གྱི་མཚན་ཉིད་ནི། ཞུ་བདེ་དང་མཚུངས་ལྡན་དུ་གྱུར་པ་བཅོས་ཤིང་བརྟགས་པ་ལས་བྱུང་བའི་ཁྱད་པར་བཞི་ལྡན་གྱི་ལྷ་སྐུ་སྣང་སྟོང་ངོ་། །ཁྱད་པར་བཞི་ནི། ཆོ་གའི་ཁྱད་པར་རྒྱུད་ནས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བའོ། །རྫོགས་རིམ་གྱི་མཚན་ཉིད། ཞུ་བདེ་དང་མཚུངས་ལྡན་དུ་གྱུར་པ་ཁྱད་པར་གསུམ་ལྡན་བཅོས་མིན་གྱི་ལྷ་སྐུ་སྣང་སྟོང་མི་བརྟན་པར་གྱུར་པ་རྒྱུའི་རྫོགས་རིམ་གྱི་དང་། དེ་བརྟན་པར་གྱུར་པ་འབྲས་བུའི་རྫོགས་རིམ་གྱི་མཚན་ཉིད་དོ། །རྫོགས་རིམ་རྒྱུད་ལ་སྐྱེས་ཟིན་ནས་བསྐྱེད་རིམ་ལ་བསླབ་མི་དགོས་པའི་ཕྱིར་རོ། །འཕགས་ལམ་གྱི་དུས་ཀྱི་བསྐྱེད་རིམ་མི་འབྱུང་ལ། རྫོགས་རིམ་ལ་སློབ་པ་དང་མི་སློབ་པའི་ཡེ་ཤེས་གཉིས་ལས། དང་པོའི་མཚན་ཉིད། འཕགས་རྒྱུད་ཀྱི་ཡེ་ཤེས་གང་ཞིག །ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་ཁ་སྦྱོར། གཉིས་པ་ནི། དག་པ་གཉིས་ལྡན་གྱི་ཡེ་ཤེས་མཐར་ཐུག་གང་ཞིག །ཁ་སྦྱོར་ལ་སོགས་པའི་ཡན་ལག་བདུན་ལྡན་ཏེ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། ཅེས་པའི་དོན་དེ་བ་ཙནྡྲས་ལོངས་སྤྱོད་རྫོགས་པ་ནི་རྣམ་པ་ཐམས་ཅད་པའོ། །ཁ་སྦྱོར་ནི་སྟོང་ཉིད་སྙིང་རྗེ་ཟུང་འཇུག་གོ། །བདེ་ཆེན་ནི་གཟུང་འཛིན་གྱི་རྟོག་པ་མེད་པའོ། །རང་བཞིན་མེད་པ་ནི་སྐྱེ་བ་མེད་པའོ། །སྙིང་རྗེས་ཡོངས་གང་ནི་མི་འགྱུར་བདེ་བའོ། །རྒྱུན་མི་ཆད་པ་ནི་རྒྱུན་གྱིས་རྟག་པའོ། །འགོག་པ་མེད་པ་ནི་ཆད་པ་མེད་པའོ། །ཞེས་བཤད་དོ། །དེ་ཡང་འབྲས་བུའི་རྫོགས་རིམ་ཡིན་ན། གཞི་ལམ་འབྲས་གསུམ་གྱི་ཟླས་ཕྱེ་བའི་འབྲས་བུ་ཡིན་པས་མ་ཁྱབ་སྟེ། འཕགས་པ་སློབ་པ་རྣམས་དང་། ཡེ་ཤེས་ཀྱི་སྐུ་འགྲུབ་པའི་སོ་སྐྱེའི་ལམ་གྱི་རྫོགས་རིམ་དེ་འབྲས་བུའི་རྫོགས་རིམ་ཡིན་པའི་ཕྱིར་རོ། །གཉིས་པ་ནི། དེ་ལ་བསྐྱེད་རིམ་ནི། སྦྱང་བྱ་འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བ་བླངས་པ་ལ་བརྟེན་ནས་འཆར་བས་འཁོར་བའི་ཆོས་ཀྱི་གཙོ་བོ་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ནས། བསྐྱེད་རིམ་སྒོམ་ཚུལ་བཞི་སྟེ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའི་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་སོ། །རྫོགས་རིམ་ནི་ཐབས་ལམ་སྟེང་འོག་གི་སྒོ་ལ་བརྟེན་པ་ལ་སོགས་པ་རྣམས། ལྔ་པ་སྐྱོན་ནི། ཏིང་འཛིན་མེད་ན་ལྟ་བའི་གོ་ཡུལ་བཟང་ཀྱང་འགྲུབ་པར་མི་འགྱུར་ཏེ། ལམ་རིམ་ལས། གལ་ཏེ་ཏིང་འཛིན་འདི་མེད་ན། །རྒྱ་མཚོ་འཇིངས་ཀྱི་ཕ་བོང་ལྟར། །བསྐལ་པར་ལམ་ལ་འབུངས་བྱས་ཀྱང་། །དོན་མེད་སྙིང་པོ་བསྐམ་པ་ཡིན། །ཞེས་སོ། །དྲུག་པ་ཡོན་ཏན་ནི། བསྒྲུབ་བྱ་གང་ཡང་ཏིང་ངེ་འཛིན་གྱིས་འགྲུབ་པའི་ཕྱིར་ཏེ། རིན་ཆེན་དྲྭ་བ་ལས། བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་ཕྱེད་པར་འགྱུར། །ཞེས་གསུངས་པའི་ཕྱིར་རོ། །དགུ་པ་གནས་སུ་སྟོབ་པ་མཆོད་པ་དྲུག་ལས། དང་པོ་དགོས་ཆེད་ནི། གཞན་སེལ་སྒྲིབ་པ་འབྱངས་ཞིང་ཉམས་ཆག་སྐོང་། དོན་གཉེར་ལྷ་མཉེས་པས་ཚོགས་རྫོགས་ཤིང་ལས་དང་དངོས་གྲུབ་སོགས་བདག་གཞན་གྱི་དོན་འགྲུབ་པའི་ཕྱིར་ཏེ། ཐུགས་ཐིག་ལས། བདག་གཞན་དོན་རྗོགས་མཉེས་སྐོང་བ། །ཞེས་དང་། ཁོག་གཞུང་ལས། ཚོགས་གཉིས་རྫོགས་ཕྱིར་མཆོད་པ་སྟེ། །ཞེས་སོ། །གཉིས་པ་ངོ་བོའི་མཚན་ཉིད་ནི། བཀུར་བྱའི་ཡུལ་དུ་གྱུར་པ་རྣམས་སྒོ་གསུམ་གྱིས་བཀུར་ཞིང་། ཡོ་བྱད་སྟོབས་པའི་སྒོ་ནས་ཀྱང་མཉེས་བྱེད་པའི་རིགས་གནས་ཏེ། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་འགྱུར་བའི་དངོས་པོ་ཉིད། །ཅེས་སོ། །གསུམ་པ་སྒྲ་དོན་ནི། པཱུ་ཛའི་སྒྲ་ལས་མཆོད་པ་སྟེ། དགེ་ལས་ཐམས་ཅད་ཀྱི་སྔོན་དུ་འགྲོ་བའི་ཕྱིར་བསྐྱེད་པར་བྱེད་པའི་དོན་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱི་གནས་སུ་སྟོབ་པའི་ཕྱིར་མཆོད་པའོ། །དེའང་ཁོག་གཞུང་ལས། གནས་སུ་སྟོབ་ཕྱིར་མཆོད་པ་སྟེ། །ཞེས་སོ། །བཞི་པ་རྣམ་གྲངས་ལ། དམིགས་ཡུལ་ཞིང་གི་དང་། ཡོངས་སུ་བསྔོ་བའི་དང་འབྲས་བུ་ལ་དམིགས་པའི་དང་། དངོས་པོའི་བྱེ་བྲག་གོ། །དང་པོ་གསུམ་ནི་རིམ་པར་འཕགས་པ་མཆོད་པ་དང་། ཐར་པའི་རྒྱུར་འགྱུར་བའི་མཆོད་པ་རྣམས་ནི་འཇིག་རྟེན་ལས་འདས་པ་སྟེ། དེ་ལས་གཞན་པ་རྣམས་ནི་འཇིག་རྟེན་པའོ། །བཞི་པ་དངོས་པོའི་བྱེ་བྲག་ནི་བསམ་གྱིས་མི་ཁྱབ་ཀྱང་། མདོར་བསྡུས་ཞི་ཁྲོའི་མཆོད་པ་བཅུ་བཞི་སྡོམས་སུ་སྟོན་ན། གུས་པས་ཕྱག་དང་ཕྱག་རྒྱ་གར། །ཀུན་མཚན་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །ཞེས་གསུངས་ཤིང་། དེ་རྣམས་ཇི་ལྟར་འབུད་ཚུལ་ཀྱང་། །ཧེ་རུ་ཀ་འདུས་པ་ལས། རྡོ་རྗེ་ལྷ་མོ་རབ་མཛེས་མ། །སོ་སོའི་ཡོ་བྱད་རབ་ཐོགས་ནས། །ནམ་མཁའ་ཁྱབ་པར་རབ་སྤྲུལ་ཞིང་། །ཡོ་བྱད་རང་ལུས་ཐིམ་པ་མཆོད། །ཅེས་སོ། །ལྔ་པ་སྐྱོན་ནི། འཆད་འགྱུར་གྱི་ཡོན་ཏན་ལས་ལྡོག་པ་སྟེ། ཐུགས་ཐིག་ལས། དེ་ལས་བཟློག་དང་མི་སྐོངས་གཡེལ། །ཉམས་ཆག་མཐུ་བྱིན་བྲལ་བར་འགྱུར། །ཞེས་སོ། །དྲུག་པ་ཡོན་ཏན་ནི། དགོས་ཆེད་དུ་བསྟན་པའི་རྗེས་སུ་འགྲོ་བ་སྟེ། ཁོག་གཞུང་ལ། ཐུན་མོང་ཁྱད་པར་ཡོན་ཏན་ལྡན། །ཞེས་གསུངས་པའི་ཕྱིར་རོ། །བཅུ་པ་འཆིང་བཟློག་སྔགས་དང་ཕྱག་རྒྱ་ལ་དྲུག་ལས། དང་པོ་དགོས་ཆེད་ནི། སྒྲིབ་གཉིས་སྦྱོངས་ཤིང་། ཏིང་ངེ་འཛིན་གྱི་སྟོངས་སུ་གྱུར་པ་ལས་དང་དངོས་གྲུབ་ཐོབ་པར་བྱེད་པའི་ནུས་པ་བསྐྱེད་པ་སྟེ། ཐུགས་ཐིག་ལས། སྦྱང་ཞིང་ཉེ་བར་བསྐྱེད་པ་དང། །ཐོབ་བྱ་ལྔ་པོ་རྫོགས་བྱའི་ཕྱིར། །ཞེས་སོ། །གཉིས་པ་ངོ་བོ་ལ་གཉིས་ལས། དང་པོ་སྔགས་ཀྱི་ངོ་བོའམ་མཚན་ཉིད་ནི། ཐབས་ཤེས་ཀྱི་ཡི་གེ་འདུས་ཤིང་གྲུབ་པ་བཞིས་བྱིན་གྱིས་བརློབས་པས་མཐུ་ཅན་དུ་གྱུར་པའི་རིགས་གནས་ཏེ། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །ཞེས་སོ། །ཕྱག་རྒྱའི་མཚན་ཉིད་ནི། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་བསལ་བ་ལས་མི་འདའ་བའི་རིགས་གནས། དེའང་ཐུགས་ཐིག་ལས། བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་སོ། །གསུམ་པ་སྒྲ་དོན་ལ། སྔགས་ནི་མཏྟྲའི་སྒྲ་ལས། མ་ན་ནི་ཡིད་དམ་ཤེས་པ། །ཏྲ་ཡ་ནི་སྐྱོབ་པའི་དཔུང་གཉེན་ལ་འཇུག་པས། ཡིད་ཤེས་བདེ་མྱུར་དུ་སྐྱོབ་ཅིང་བྱིན་རླབས་འབྱུང་བའི་ཕྱིར་སྔགས་ཏེ། ཡེ་ཤེས་སྙིང་པོ་ལས། མན་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པ་ཉིད་དུ་བཤད། །ཅེས་སོ། །ཕྱག་རྒྱ་ནི། མུ་ཏྲའི་སྒྲ་ལས་མཚན་མའི་དོན་ཏེ། འདོགས་ཤིང་མཚོན་པར་བྱེད་པའམ། །རྒྱས་བཏབ་པ་ལས་འདའ་བར་དཀའ་བའི་ཕྱིར་ཕྱག་རྒྱ་ཞེས་བྱའོ། །དེའང་འདི་ཉིད་ལས། སྙིང་པོའི་ཕྱག་རྒྱ་འདའ་དཀའོ། །ཞེས་དང་། རྒྱས་པ་ལས། འདའ་དཀའ་ཇི་བཞིན་མི་ཤིགས་པའི། །རྒྱལ་པོའི་ཕྱག་རྒྱ་མཆོག་གི་གནས། །བདག་ཉིད་ཆེན་པོའི་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཞེས་སོ། །བཞི་པ་རྣམ་གྲངས་ལ། སྔགས་དང་། ཕྱག་རྒྱ་གཉིས་ལས། དང་པོ་ལ། སྤྱི་དང་བྱེ་བྲག་གོ། །དང་པོ་སྤྱིར་སྔགས་ལ་གསང་སྔགས། རིགས་སྔགས། གཟུངས་སྔགས་དང་གསུམ། དེ་ཡང་ཐབས་ཤེས་ཀྱི་བདག་ཉིད། དེའི་སྒོ་ཡིག་འབྲུར་སྣང་བས་གསང་སྔགས་ཏེ་ངག་ཏུ་བརྗོད་པར་བྱེད་པ་དང་བཅས་ཤིང་ཤེས་སྐྱོབ་ཀྱིས་ལོག་རྟོག་གི་གཉེན་པོར་གྱུར་པ་ནི་གསང་སྔགས། ཤེས་རབ་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱི་མ་རྟོགས་པའི་གཉེན་པོར་གྱུར་པ་ནི་རིག་སྔགས། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པ་ནི། གཟུགས་སྔགས་ཏེ། འདི་གསུམ་གྱི་རྟགས་ཀྱང་། དང་པོ་ལྷ་ཕོའི་དབྱིབས་དང་། ཕྱི་མ་གཉིས་ལྷ་མོའི་གཟུགས་སུ་བཞུགས་ཞེས་འབྱུང་ངོ་། །གཉིས་པ་བྱེ་བྲག་ཏུ་གསང་སྔགས་ཀྱི་སྒོར་གྱུར་པའི་སྔགས་ལ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །ཞེས་སོ། །གཉིས་པ་ཕྱག་རྒྱ་ལའང་། རང་བཞིན་གྱི། ལྟ་བའི། ལྷག་པ་ཏིང་ངེ་འཛིན་གྱི་ཕྱག་རྒྱ་དང་གསུམ་ལས། དང་པོ་ནི། རྟོག་ཚོགས་ཐམས་ཅད་སྒྱུ་དྲའི་དཀྱིལ་འཁོར་དུ་ཡེ་ནས་རྫོགས་པ་སྟེ། འདི་ཉིད་ལས། སྒྱུ་འཕྲུལ་དྲྭ་བས་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །ཞེས་སོ། །གཉིས་པ་ནི། ལྟ་བ་ཕྱག་རྒྱ་ཆེན་པོས་ཐ་མལ་གྱི་རྟོག་པ་ལ་རྒྱས་འདེབས་པར་བྱེད་པ་སྟེ། འདི་ཉིད་ལས། ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱེད་མ་བསྒུལ་ཐམས་ཅད་ཀྱང་། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །གསུམ་པ་ནི། ཞི་ཁྲོའི་ལྷ་ཚོགས་གང་བསྒོམ་ཡང་། །ཕྱག་རྒྱ་བཞི་ལྡན་ནི། བདུན་ལྡན་དུ་བསྒོམ་པ་སྟེ། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །ལྔ་པ་སྐྱོན་ནི། སྔགས་དང་ཕྱག་རྒྱ་སྤངས་ན་གསུང་གི་དམ་ཚིག་ཉམས་པས་ཕུང་ཞིང་འབྲས་བུ་མེད་པར་འགྱུར་ཏེ། ཐུགས་ཐིག་ལས། རལ་གྲིའི་སོ་ལ་བཟུང་ཉེས་ལྟར། །ནན་ཏན་མེད་པའི་གསང་སྔགས་པ། །ཕུང་ཞིང་འབྲས་བུ་མེད་པར་འགྱུར། །ཞེས་སོ། །དྲུག་པ་ཡོན་ཏན་ནི། དེ་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཡིད་ལ་བསམ་པ་ཐམས་ཅད་འགྲུབ། །ཅེས་གསུངས་སོ། །ལམ་གྱི་ཆ་རྐྱེན་དངོས་བཅུ་བཤད་ཟིན་ཏོ། །བཞི་པ་རྒྱུད་ཀྱི་དགོས་འབྲེལ་ནི་གོ་སླའོ། །ལྔ་པ་གདམས་གཏད་ནི། འཁོར་རྣམས་ལ་ཟབ་མོའི་རྒྱུད་གཅེས་སྤྲས་ཀྱི་སྒོ་ནས་གདམས་ཤིང་བསྟན་པའི་སྙིང་པོ་དེ་དར་ཞིང་མི་ནུབ་པར་བྱ་བའི་ཕྱིར་གཏད་པ་སྟེ། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་དཀའ་ཡིས་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་གསུངས་པའི་ཕྱིར་རོ། །རེ་ཞིག་དེ་ཙམ་ཞུས་ནས། སྔོན་གྱི་མཁས་པ་རྣམས་ཀྱི་འགྲེལ་བཤད་རྣམས་སུ་བརྒལ་བརྟགས་ཀྱི་རིག་པ་ཕྲ་མོའི་བཤད་པ་མཛད་པ་མི་སྣང་བས་མཚན་ཉིད་ཀྱིས་མཚོན་བྱ་ལ་ཁྱབ་མ་ཁྱབ་ཀྱི་མཐའ་མ་ཆོད་ཅིང་། འགལ་བ་དང་མ་འབྲེལ་བ་དང་མ་རྟོགས་ལོག་རྟོག་སོགས་ཀྱི་སྐྱོན་མཁས་པའི་དབང་པོ་རྣམས་ཀྱིས་བཟོད་པར་བཞེས་ནས་ཉེས་སྐྱོན་དག་ལེགས་པར་འཆོས་འཚལ་ལོ། །ཤིན་ཏུ་རྙེད་དཀའ་གསང་ཆེན་རྡོ་རྗེའི་ཚིག །དང་པོའི་འགྲོ་ལ་རྟོག་གེ་རིག་པའི་ལུགས། །རྣམ་པར་ཕྱེ་འདི་དཔལ་ལྡན་རྒྱུད་རྒྱལ་གྱི། །གསང་ཆེན་ལམ་འདིར་འཇུག་ལ་ཕན་ཕྱིར་དང་། །ཁྱད་པར་སྐྱབས་མཆོག་བླ་ན་མེད་པ་གང་། །ཁྱབ་བདག་རྗེ་དྲུང་བཞད་པ་རྡོ་རྗེ་ལ། །མཁའ་འགྲོའི་གསང་ལུང་ཉིད་ཀྱིས་ལེགས་བསྐུལ་བའི། །བཀའ་ལུང་སྤྱི་བོར་ཕེབས་ཕྲལ་གུས་བཏུད་དེ། །སྔོན་རབས་མཁས་པའི་རྣམ་བཤད་དཔག་མེད་ལས། །བདག་ལྟས་དོན་གཞན་བརྗོད་པར་ནུས་མིན་ཀྱང་། །རྒྱུད་དོན་ཇི་བཞིན་འཆད་ལ་ཟླ་བྲལ་བ། །དཔལ་ལྡན་བླ་མ་གཏེར་བདག་གླིང་པ་དང་། །ངག་གི་དབང་ཕྱུག་ཆོས་དཔལ་རྒྱ་མཚོ་ཡི། །ཐུགས་མཚོར་འཁྱིལ་བའི་རྒྱུད་དོན་བདུད་རྩིའི་རྒྱུན། །དད་བརྩོན་རྔ་ཡབ་རྩེ་མོས་བཅུད་དུ་བླངས། །ཅུང་ཟད་མྱོང་འདི་བསྐལ་བ་བཟང་པོར་བྱས། །གསང་ཆེན་ཟབ་མོ་བྱིས་པའི་སྤྱོད་ཡུལ་མིན། །འོན་ཀྱང་དམ་པའི་གསུང་གི་བསྐུལ་བར་བརྟེན། །བླུན་པོས་ཚུལ་འདི་གྲོང་ཚིག་བརྗོད་པའི་གཏམ། །ཡི་གེར་སྤེལ་ལ་ནོངས་པ་གང་མཆིས་བཤགས། །འདི་ལས་རྣམ་དཀར་དགེ་བ་གང་ཐོབ་པ། །དེ་ཡིས་མཁའ་མཉམ་ལུས་ཅན་མ་ལུས་ཀུན། །རྨད་བྱུང་ལམ་གྱིས་དྲི་མ་སྤངས་སྦྱངས་ནས། །རང་བྱུང་ཡེ་ཤེས་མངོན་དུ་རྟོགས་པར་ཤོག །ཅེས་པ་འདི་ནི་སྐྱབས་ཀུན་འདུས་པའི་བདག་ཉིད་རྗེ་བླ་མ་བློ་བཟང་ཕྲིན་ལས་དབང་པོའི་མཚན། གཞན་ཁྱབ་བདག་རྗེ་དྲུང་བཞད་པ་རྡོ་རྗེ་ཞེས་སྙིགས་དུས་འགྲོ་བ་ཀུན་གྱི་འདྲེན་མཆོག་དམ་པར་གྱུར་པ་ལ། མཁའ་འགྲོའི་གསང་ལུང་དུ་འདི་ལྟར་བྱུང་སྟེ། ཧྲཱིཿ རྒྱུད་ཐམས་ཅད་ཀྱི་རྒྱལ་པོ་གསང་བ་སྙིང་པོ་ནི་དུས་གསུམ་གྱི་རྒྱལ་བའི་དགོངས་ཉམས་གཅིག་ཏུ་དྲིལ་བ་ཡིན་པས། དེ་ཉིད་འཆད་པ་དང་། བརྒལ་བརྟགས་ཀྱིས་གཏན་ལ་འབེབས་པ་སྨོན་ལམ་གྱི་མཐུ་གྲུབ་པ་ནི་ཆོས་ཀྱི་མཛོད་འཛིན་སྨིན་གྲོལ་གླིང་དུའོ། །དེ་བས་ན་དེར་དེ་བསྐུལ་བར་བྱའོ། །ཡང་ནས་ཡང་དུ་ཡིན་ནོ། །ཞེས་ལུང་བསྟན་པའི་དོན་བཞིན། འདི་ཉིད་ལ་རིགས་ལམ་ནས་དྲངས་པའི་བརྒལ་བརྟགས་ཀྱི་ཟིན་བྲིས་ཞིག་རྩོམ་པར་བགྱིས་ཤིག་ཅེས་པའི་བཀའ་ལུང་གནང་སྐྱེས་བཟང་པོ་དང་བཅས་སྤྱི་བོར་ཕེབས་ཕྲལ་དང་དུ་བླངས་ཏེ། མདོ་སྔགས་གཞུང་ལུགས་ཀྱི་ཚིག་དོན་ཅི་རིགས་བློ་ཡུལ་དུ་ལོངས་པའི་སྨིན་གླིང་གྲྭ་པའི་ཐ་ཤལ་བ་དགེ་སློང་དྷརྨ་ཀིརྟིས་རང་ལོ་ང་བདུན་པ་བསམ་གཏན་གྱི་ཐུན་བར་རྣམས་སུ་བརྩམ་པའི་བྱ་བ་ཞུགས་ཏེ། ཆུ་བྱི་ཧོར་ཟླ་གཉིས་པ་དབོ་ཟླ་བའི་དཀར་ཕྱོགས་ཀྱི་བཟང་པོའི་ཚེས་གཉིས་གཟའ་ཚེས་ཕུན་སུམ་ཚོགས་པ་རྗེ་བླ་མའི་དུས་དྲན་གྱི་མཆོད་པའི་ཉིན་རང་གི་གྲྭ་ཁང་དུ་གྲུབ་པར་བགྱིས་པ་དགེ་ལེགས་སུ་གྱུར་ཅིག །འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་པའི་རྒྱུར་གྱུར་ཤོག །དགེའོ། །སརྦ་དཱ་ཀ་ལྱཾ་བྷ་ཝནྟུ།། །།

གསང་སྔགས་རྡོ་རྗེ་ཐེག་པའི་ཚུལ་ལས་སྣང་བ་ལྷར་བསྒྲུབ་པ། རོང་ཟོམ་ཆོས་བཟང་།

གསང་སྔགས་རྡོ་རྗེ་ཐེག་པའི་ཚུལ་ལས་སྣང་བ་ལྷར་བསྒྲུབ་པ་རོང་ཟོམ་ཆོས་བཟང་གིས་མཛད་པ་བཞུགས། གསང་སྔགས་རྡོ་རྗེ་ཐེག་པའི་ཚུལ་ལས་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་དབྱེར་མེད་པར་སྐུ་གསུང་ཐུགས་རྡོ་རྗེ་ལྟ་བུའི་དཀྱིལ་འཁོར་དུ། ཡེ་ནས་སངས་རྒྱས་པ་ཡིན་པས་ད་ལམ་གྱིས་སྒྲུབས་པ་ལྟ་བུ་ནི་མ་ཡིན་ནོ། །ཞེས་འབྱུང་བ་ལ། འདིར་བརྒལ་བ། ད་ལྟར་འགྲོ་བ་རྣམས་ཀྱི་སྤྱོད་ཡུལ་དུ་སྣ ང་བའི་ཆོས་འདི་དག་ནི། ཇི་ལྟར་སྣང་བ་དེ་ལྟར་མ་ཡིན་ཏེ། འཁྲུལ་པ་ཡིན་པས། ཡེ་ནས་སངས་རྒྱས་པ་ནི་ཡིན་དུ་མི་རུང་ངོ་ཞེ་ན། འཁྲུལ་བ་ཡིན་དུ་ཟད་དེ། སེམས་ཅན་གྱི་འཁྲུལ་པ་ལས་མ་གཏོག་པའི་ཆོས་གཞན་ཅི་ཡང་བཞག་ཅིང་བསྟན་དུ་མེད་དེ། འཁྲུལ་སྣང་དུ་གྲགས་པའི་ཆོས་འདི་ཙམ་ཞེས་བྱ་བ་ཡིན་ནོ། །དེ་བས་ན་མུ་སྟེགས་ཅན་གྱིས་གང་ཟག་གི་བདག་རྟག་པར་ཡོད་པར་བརྟགས་པ་དང་། བྱེ་བྲག་ཏུ་སྨྲ་བ་ཁ་ཅིག་གིས་གང་ཟག་དེ་མི་རྟག་པའི་མཚན་ཉིད་དུ་ཡོད་པར་འདོད་པ་དང་། བྱེ་བྲག་ཏུ་སྨྲ་བ་ཁ་ཅིག་དང་མདོ་སྡེ་པས་གང་ཟག་བཀག་སྟེ། དེས་སྟོང་པའི་ཕུང་པོ་ལ་སོགས་པའི་ཆོས་ཀྱི་མཚན་ཉིད་ཡོད་པར་འདོད་པ་དང་། རྣལ་འབྱོར་སྤྱོད་པ་བས་གཞན་གྱི་དབང་གི་མཚན་ཉིད་ལ་ཀུན་བཏགས་པས་སྟོང་པའི། སྟོང་པ་ཉིད་དང་བཅས་པའི་གཞན་དབང་ཡོད་པར་འདོད་པ་དང་། དབུ་མ་པས་དོན་དམ་པར་ཆོས་ཐམས་ཅད་ལ་ཡོད་པ་དང་མེད་པ་ལ་སོགས་ཏེ་མཐའ་ཐམས་ཅད་དང་བྲལ་ཏེ། སྤྲོས་པ་ཡོངས་སུ་བཅད་པའོ། །ཞེས་འདོད་པ་དང་། གསང་སྔགས་ཀྱི་ཚུལ་ལས་བདེན་པ་རྣམ་པ་གཉིས་དབྱེར་མེད་པ་དང་། གདོད་མ་ནས་སངས་རྒྱས་པ་ལ་སོགས་པ་རྣམས་འགྲོ་བ་རྣམས་ཀྱིས་མཐུན་པར་སྣང་བའི་མཚན་ཉིད་ལ་ལྟ་བ་སོ་སོར་འཇོག་ཅིང་རྩོད་པ་ཡིན་ཏེ། དེའི་ཕྱིར་ཆོས་ཅན་གཞན་ཞིག་ཡོད་པ་ནི་མ་ཡིན་ནོ། །དེ་བས་ན་སྣང་བའི་ཆོས་འདི་དག་ཐམས་ཅད་འཁྲུལ་པ་ཡིན་དུ་ཟད་དེ། དེ་ཡང་འཁྲུལ་བ་བསལ་ནས་མ་འཁྲུལ་བ་ཞིག་བསྒྲུབ་ཏུ་མེད་དེ། འཁྲུལ་པ་ངོ་བོ་ཉིད་ཀྱིས་རྣམ་པར་དག་པས་སངས་རྒྱས་པ་ཡིན་ཏེ། དེ་བས་ན་ཆོས་ཐམས་ཅད་ཡེ་ནས་མངོན་པར་རྫོགས་པར་སངས་རྒྱས་པའོ། །དེ་བས་ན་མཚན་མ་སྣ་ཚོགས་སུ་སྣང་བའི་ཆོས་རྣམས་སྐུ་གསུང་ཐུགས་རྡོ་རྗེའི་དཀྱིལ་འཁོར་ཉིད་ཡིན་ཏེ། རྣམ་པར་དག་པའི་ངོ་བོ་ཉིད་ལས་མ་འདས་པ་དུས་གསུམ་གྱི་སངས་རྒྱས་ཉིད་དང་འདྲ་བའོ། །སེམས་ཅན་དང་སངས་རྒྱས་ཀྱི་ཁྱད་པར་ནི་ཆོས་ཀྱི་ངོ་བོ་ཉིད་ཀྱིས་ཕྱེ་བ་མ་ཡིན་ཏེ། རྨི་ལམ་གྱི་རྒྱུ་འབྲས་བུ་སོ་སོར་སྣང་བ་བཞིན་དུ། ཀུན་ཏུ་བཏགས་པའི་དབང་གིས་བློ་སོ་སོར་སྣང་བ་ཙམ་ལ་བཞག་པར་ཟད་དོ། །འདིར་དྲིས་པ། ལུང་ལས་དེ་ལྟར་གསུངས་ཀྱང་གཟུགས་པོར་གསུངས་སམ། དགོངས་པ་དང་བཅས་པར་གསུངས་པ་ངེས་པ་མེད་པས་ཆོས་ངོ་བོ་ཉིད་ཀྱིས་དག་པ་ནི་གྲུབ་ཏུ་རུང་ན། ཆོས་ཅན་མཚན་མར་སྣང་བ་འདི་ཉིད་ཀྱི་རང་བཞིན་ཡེ་ནས་སངས་རྒྱས་པ་ཡིན་པར་ནི་རིགས་པ་མ་ཡིན་ཏེ། དེ་ལྟ་ན་ནི་ཀུན་ནས་ཉོན་མོངས་པ་དང་འཁོར་བ་ཡང་གཏན་མེད་པར་འགྱུར་རོ། །དེ་ལྟ་བུའི་གྲུབ་མཐའ་འགྲུབ་པར་འགྱུར་བའི་རིགས་པའང་མེད་དོ་ཞེ་ན། སེམས་ཅན་གྱི་སྤྱོད་ཡུལ་དུ་སྣང་བའི་དོན་ཚད་མར་བྱས་ནས་ཐོག་མ་མེད་པའི་དུས་ནས་རྟོག་པའི་བློ་འཁྲུལ་བས་ཇི་ལྟར་སྣང་བ་དེ་ལྟར་སྒྲུབ་པ་དང་། དགག་པ་བྱས་པའི་རྟོག་གེ་ནི་ཟབ་ཅིང་རྒྱ་ཆེ་བའི་དོན་ལ་བསྒྲུབ་པར་ནུས་པ་མ་ཡིན་མོད་ཀྱི་འོན་ཀྱང་ཆོས་ཉིད་བསམ་གྱིས་མི་ཁྱབ་པ་ཡིན་པས། སོ་སོར་རྟོག་པའི་ཤེས་རབ་ཀྱིས་རྟོགས་པའི་ཐབས་མེད་པ་ཡང་མ་ཡིན་ཏེ། དེ་བས་ན་དད་པ་ཙམ་གྱིས་འཇུག་པར་སྤྲོ་བ་རྣམས་ལུང་དང་མན་ངག་ཉིད་ཚད་མར་བྱས་ཏེ། ཡིད་ཆེས་པའི་བློས་ཞུགས་ན་ཉེས་པ་འགའ་ཡང་མེད་དོ། །གང་ཞིག་རིགས་པས་མ་གྲུབ་ན་འཇུག་པར་མི་འགྱུར་རོ་ཞེ་ན། དེ་དག་ལ་ཡང་མཐུན་པར་སྒྲུབ་པར་བྱའོ། །དེ་ལ་ཆོས་དེ་དག་སྐུ་གསུང་ཐུགས་རྡོ་རྗེའི་དཀྱིལ་འཁོར་དུ་སངས་རྒྱས་པ་ལ། ཆོས་ཉིད་ཀྱི་རིགས་པས་སྒྲུབ་སྟེ། ཇི་ལྟར་མདོ་ལས། གཟུགས་རང་བཞིན་གྱིས་སྟོང་པ་སྟེ། །ཅིའི་ཕྱིར་ཞེ་ན། དེའི་རང་བཞིན་དེ་ཡིན་པའི་ཕྱིར་རོ། །ཞེས་གསུངས་ཏེ། ཆོས་ཐམས་ཅད་ཆོས་ཉིད་ཀྱིས་དག་པས། མ་དག་པའི་ཆོས་ཅུང་ཟད་ཀྱང་མེད་པ་ཆོས་རྣམས་ཀྱི་ཆོས་ཉིད་ཡིན་པས། ལུས་ངག་ཡིད་གསུམ་ཡང་རྣམ་པར་དག་པ་རང་གི་ཆོས་ཉིད་ཡིན་ཏེ། རྣམ་པར་དག་པ་ནི་སངས་རྒྱས་པའོ། །དེས་ན་རྣམ་པར་དག་པས་ཕྱེ་བའི་ལུས་ངག་ཡིད་ནི་དབྱེར་མེད་ཅིང་སྤྲོས་པ་མེད་པ་དང་། རྫོགས་པར་ཁྱབ་པའི་ཕྱིར་སྐུ་གསུང་ཐུགས་རྡོ་རྗེའི་དཀྱིལ་འཁོར་ཉིད་ཡིན་པར་རིག་པར་བྱའོ། །དེ་ལྟར་ཆོས་ཉིད་ཀྱི་རིགས་པས་གྲུབ་ན་རིགས་པ་ལྷག་མ་གསུམ་བསྒྲུབ་མི་དགོས་ཏེ། རིགས་པ་གསུམ་པོའི་རྟེན་དེ་ཡིན་པའི་ཕྱིར་དང་དེ་གཙོ་བོ་ཡིན་པའི་ཕྱིར་རོ། །ཡང་དྲིས་པ། ཆོས་ཉིད་དེ་ནི་བདག་ཅག་ལ་མ་གུས་པ་ལ། རིགས་པ་གཞན་གྱིས་སྒྲུབ་དགོས་སོ་ཞེ་ན། དེ་ཡང་བསྒྲུབ་པར་བྱ་སྟེ། དེ་ལ་བྱ་བ་བྱེད་པའི་རིགས་པ་ནི། དངོས་པོ་རྣམས་འབྲས་བུའི་སྒོ་ནས་རྒྱུ་ཤེས་པར་བྱེད་པ་སྟེ། ཇི་ལྟར་སྨན་དང་དུག་གིས་འཚོ་བ་དང་འཆི་བའི་བྱ་བ་བྱེད་པ་དམིགས་པས། བྱ་བའི་སྒོ་ནས་བྱེད་པ་ཤེས་པ་ཡིན་པ་བཞིན། གང་གི་སྐུ་གསུང་ཐུགས་རྡོ་རྗེའི་དཀྱིལ་འཁོར་དུ་བསྒོམས་པས། ལུས་དང་ངག་དང་ཡིད་དག་པའི་དངོས་གྲུབ་ཐོབ་པར་དམིགས་པའི་ཕྱིར། སྣང་བའི་ཆོས་རྣམས་སྐུ་གསུང་ཐུགས་རྡོ་རྗེའི་ངོ་བོ་ཉིད་དང་མཐུ་ཅན་དུ་བྱ་བ་བྱེད་པའི་རིགས་པས་གྲུབ་པ་ཡིན་ནོ། །དངོས་པོའི་ནུས་པ་ལ་མ་ལྟོས་པར་བསྒྲུབ་པ་ཙམ་གྱིས་འགྲུབ་པ་ཡང་མ་ཡིན་ཏེ། ཇི་ལྟར་ནོར་བུ་རིན་པོ་ཆེ་སྔར་ལོངས་སྤྱོད་ཀྱི་རྐྱེན་དུ་མ་སྤྱད་པ་ཞིག་གང་ཞིག་གིས་རྙེད་པ་ལས། དེས་རིན་པོ་ཆེ་ངོ་མ་ཤེས་ཏེ། ནོར་བུ་ཕལ་བར་བཞག་ནས་ཡོན་ཏན་མཐོང་བ་ཡང་མེད་པ་ལས། ཕྱིས་ནོར་བུའི་རིགས་ཤེས་པས་བསྟན་ཏེ། དེས་བྱི་དོར་བྱས་ཤིང་མཆོད་པ་ལས། གདོད་ནོར་བུ་དེ་ལས་ཡོན་ཏན་ཁྱད་པར་ཅན་འབྱུང་སྟེ། བྱ་བ་ཁྱད་པར་ཅན་དམིགས་པས་རིན་པོ་ཆེ་ཉིད་དུ་ངེས་པ་ལྟར། ཐ་མལ་པའི་ལུས་དང་ངག་དང་ཡིད་ཀྱང་ལྷར་མ་ཤེས་ཤིང་མ་བཀུར་ན། ཡོན་ཏན་མི་དམིགས་ཏེ། ཤེས་ཤིང་བཀུར་བས་གཞི་དེ་ཉིད་ལས་ཡོན་ཏན་དམིགས་པའི་ཕྱིར་རོ། །ལྟོས་པའི་རིགས་པས་ཀྱང་གྲུབ་སྟེ། དེ་ལ་ལྟོས་པའི་རིགས་པ་ནི། དངོས་པོ་རྣམས་རྒྱུས་འབྲས་བུ་རྟོགས་པར་བྱེད་པ་སྟེ། དེ་ལ་སྐྱེ་བ་གྲུབ་པར་བྱེད་པ། ས་བོན་ལ་ལྟོས་ནས་མྱུ་གུ་གྲུབ་པར་བྱེད་པའམ། ཐ་སྙད་སྒྲུབ་པར་བྱེད་པ། ངན་པ་ལ་ལྟོས་ནས་བཟང་པོའི་ཐ་སྙད་གྲུབ་པར་བྱེད་པ་བཞིན། སྣང་བའི་ཆོས་ཐམས་ཅད་ནི་སེམས་ཉིད་ཀྱི་རྣམ་པར་སྣང་བ་སྟེ། དེ་བས་ན་སེམས་ཀྱི་རྒྱུ་ལ་ལྟོས་ནས་འབྲས་བུ་དག་པ་དང་མ་དག་པ་ཐམས་ཅད་སྐྱེ་བ་འགྲུབ་པར་བྱེད་པ་ཡིན་པས། དེའི་ཕྱིར་དག་པའི་སྤྱོད་ཡུལ་དང་མ་དག་པའི་སྤྱོད་ཡུལ་ཐམས་ཅད་བག་ཆགས་ཀྱིས་བསྐྱེད་པའི་སེམས་ཀྱི་འབྲས་བུ་ཡིན་པས་གཉི་ག་ཡང་མཚན་ཉིད་པར་གྲུབ་པ་ཡིན་ནོ། །དེ་གཉིས་ལ་གང་ཞིག་འཁྲུལ་པའམ་མ་འཁྲུལ་པར་བཞག་པ་ནི། ལྟོས་པའི་རིག་པས་གྲུབ་སྟེ། དེའི་ཕྱིར་དག་པའི་སྤྱོད་ཡུལ་ནི་སྣང་བའི་མཚན་ཉིད་ཡིན་པར་ངེས་པར་རྟོགས་པར་བྱའོ། །དེ་ལྟར་རིགས་པ་རྣམ་པ་གསུམ་གྱིས་གྲུབ་ན། འཐད་པ་བསྒྲུབ་པའི་རིགས་པས་སྒྲུབ་མི་དགོས་ཏེ། ཇི་ལྟར་ཆོས་ཉིད་དང་རྒྱུ་དང་འབྲས་བུ་མ་གཏོགས་པའི་གཏན་ཚིགས་མངོན་སུམ་དང་རྗེས་སུ་དཔག་པ་ལ་ཡང་མེད་པའི་ཕྱིར་རོ། །འོ་ན་འཐད་པ་སྒྲུབ་པ་ཅི་ལ་དགོས་ཤེ་ན། དེ་ནི་དབང་པོ་དམན་པ་རྣམས་ལ་རིགས་པ་ཉིད་སྔོན་ལ་བསྒྲུབས་ཏེ། དེས་དོན་ལ་འཇལ་བར་བྱེད་དགོས་པའི་ཕྱིར། ཆོས་ཅན་དང་བསྒྲུབ་བྱ་དང་དཔེ་སྦྱར་བ་དང་། ཁྱབ་པ་ལྡོག་པ་ངེས་པས། བསྒྲུབ་དགོས་པ་རྣམས་ཀྱི་ཕྱིར་ཡིན་ནོ། །ཡང་དྲིས་པ། གང་ཟག་ཁ་ཅིག་ནི་དེ་ཙམ་གྱིས་འགྲུབ་པར་འགྱུར་ན། ཁ་ཅིག་ལ་འཐད་པ་སྒྲུབ་པའི་རིགས་པ་ཉིད་ཀྱིས་མ་གྲུབ་ན། ཡིད་ཆེས་པར་མི་འགྱུར་བས། དེ་བསྒྲུབ་པར་གྱིས་ཤིག །སྨྲས་པ། དང་པོར་གཉིས་ག་ལ་གྲུབ་པའི་ལུང་གིས་བསྒྲུབ་པར་བྱ་སྟེ། ཡེ་ཤེས་སྣང་བ་བརྒྱན་གྱི་མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་གསུངས་ཏེ། དེ་ལ་རྟག་ཏུ་སྐྱེ་མེད་ཆོས་ནི་དེ་བཞིན་གཤེགས་ཞེས་བྱ་བ་ནི་གཏན་ཚིགས་སོ། །ཆོས་རྣམས་ཐམས་ཅད་ཅེས་བྱ་བ་ནི་ཆོས་ཅན་ནོ། །བདེ་བར་གཤེགས་པ་དང་འདྲ་ཞེས་བྱ་བ་ནི་དཔེའོ། །བསྒྲུབ་བྱ་ནི་ཆོས་ཐམས་ཅད་དེ་བཞིན་གཤེགས་པ་ཡིན་པར་བསྒྲུབ་པར་བྱ་བ་ཡིན་པའོ། །འོ་ན་མངོན་སུམ་གྱི་ཚད་མས་ཅི་གནོད་ཅེ་ན་བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་གསུངས་ཏེ། ཇི་ལྟར་བརྡའ་ལ་མ་བྱང་བའི་བྱིས་པ་དག་རབ་རིབ་ཀྱི་སྐྲ་ཤད་ལ་འཛིན་པ་དང་། མགལ་མེའི་འཁོར་ལོ་ལ་ལོངས་སྤྱོད་ཅིང་དགའ་བ་སྐྱེ་བ་ལྟར་བྱིས་པ་སོ་སོའི་སྐྱེ་བོ་རྣམས་འཁྲུལ་པའི་ཤེས་པས་བརྟགས་པའི་སྤྱོད་ཡུལ་མཚན་མར་འཛིན་པའི་ལོངས་སྤྱོད་པ་ནི་མེད་པའི་ཆོས་ལ་ལོངས་སྤྱོད་པར་ཟད་དོ། །དེ་བས་ན་འདི་ལྟར་བསྒྲུབ་པ་ཡིན་ཏེ། ཆོས་ཐམས་ཅད་ནི་དེ་བཞིན་གཤེགས་པ་ཡིན་ཏེ། རྟག་ཏུ་སྐྱེ་བ་མེད་པའི་ཆོས་དེ་དེ་བཞིན་གཤེགས་པ་ཡིན་པའི་ཕྱིར། དཔེར་ན་དུས་གསུམ་གྱི་བདེ་བར་གཤེགས་པ་དང་འདྲའོ། །ཇི་ལྟར་འདྲ་ཞེ་ན་བདེ་བར་གཤེགས་པ་ནི་ལུས་དང་ངག་དང་ཡིད་ཀྱིས་ཕྱེ་བ་མ་ཡིན་ཏེ། ཆོས་ཉིད་ཀྱིས་ཕྱེ་བ་ཡིན་ཏེ། འདི་ལྟར་འདུས་མ་བྱས་ཀྱིས་ཕྱེ་བ་ནི་འཕགས་པའི་གང་ཟག་གོ། །ཞེས་བརྗོད་པ་ཡིན་ནོ། །དེ་བཞིན་འཕགས་པ་རྣམས་འདུས་མ་བྱས་ཐོབ་པས་འཕགས་པ་ཉིད་ཐོབ་པ་བཞིན། ཆོས་ཐམས་ཅད་འདུས་མ་བྱས་པའི་རང་བཞིན་ཐོབ་པས་དེ་བཞིན་གཤེགས་པ་ཡིན་ནོ། །མཚན་མའི་སྤྱོད་ཡུལ་ནི་དེ་ལྟ་མ་ཡིན་ཏེ། དེ་ལྟར་མེད་བཞིན་དུ་སྤྱོད་པར་འདོད་པ་རྣམས་མེད་པའི་ཆོས་ལ་སྤྱོད་དུ་ཟད་དོ། །འོ་ན་ངོ་བོ་ཉིད་ཀྱིས་སངས་རྒྱས་པའི་བདག་ཉིད་དུ་གྲུབ་ན། སྣང་བ་ཙམ་གྱི་ངོར་སྐུ་གསུང་ཐུགས་རྡོ་རྗེའི་དཀྱིལ་འཁོར་དུ་གྲུབ་པའི་རིགས་པ་ཅི་ཡོད་ཅེ་ན། དེ་ཡང་བསྒྲུབ་པར་བྱ་སྟེ་དེ་ལ་ཡང་ཅིག་ཅར་བསྒྲུབ་པར་བྱ་བའམ། འོན་ཏེ་རིམ་གྱིས་ཀྱང་བསྒྲུབ་པར་བྱ་སྟེ། དེ་ལྟར་རང་གི་སྣང་བ་ལ་ཞེན་པ་ཆུང་བ་རྣམས་ནི་ཅིག་ཆར་བསྒྲུབ་པས་ཁོང་དུ་ཆུད་པར་འགྱུར་ཏེ། དེ་ལ་དང་པོ་ཉིད་དུ་དཔེ་བསྒྲུབ་པར་བྱའོ། །ཇི་ལྟར་ཡི་དྭགས་རྣམས་ཀྱིས་ཆུ་ཀླུང་ལ་རྣག་ཏུ་མཐོང་བ་ལས། ཁ་ཅིག་གིས་མི་རྣམས་ཀྱིས་ཆུར་མཐོང་བ་ཡང་ཐོས་ཏེ། དེ་ལ་ལ་ལ་ནི། རྣག་ནི་དངོས་པོའི་མཚན་ཉིད་ཡིན་ཏེ། ཆུ་ནི་ཀུན་བརྟགས་པའི་གཟུགས་སུ་འདོད་ལ། ཁ་ཅིག་གིས་ནི་རྣག་ནི་སྣང་བ་མ་དག་པ་ཡིན་པས་མི་རྣམས་ཀྱིས་མཐོང་བ་བཞིན་དུ་ཆུ་ཉིད་མཚན་ཉིད་པར་འདོད་པ་ལས། དེས་སྨྲས་པ། གྲོགས་པོ་དག་བདག་ཅག་ལྟ་བུའི་ཡི་དྭགས་རྣམས་ལ་མཐུན་པར་སྣང་བའི་རྣག་གིས་གང་བའི་ཀླུང་འདི་ནི། མི་རྣམས་ཀྱི་མཐོང་བ་བཞིན་དུ་ཆུ་ཀླུང་ཉིད་ཡིན་ཏེ། ཆུ་ལ་སྤྱོད་པར་དབང་བ་རྣམས་ཀྱིས་བསྔོས་ཏེ་བྱིན་ན་ཡི་དྭགས་རྣམས་ལ་ཡང་ཆུ་ཉིད་དུ་སྣང་ཞིང་ལོངས་སྤྱོད་དུ་ཡོད་པའི་ཕྱི་བདག་ཅག་ཉིད་ཀྱིས་སྔོན་ཆད་སྐབས་སྐབས་སུ་ཐོབ་པའི་ཆུ་བཞིན་ནོ། །ཞེས་འབྲེལ་བ་བསྒྲུབ་ན་འདི་ནི་སྐྱོན་མེད་པར་འབྲེལ་བ་འགྲུབ་བོ། །ཡང་གང་ཆུ་ལ་དབང་བ་རྣམས་ཀྱིས་བསྔོས་ཏེ་བྱིན་ན། ཆུ་ཉིད་ལོངས་སྤྱད་དུ་ཡོད་པ་དེ་ཐམས་ཅད་ནི་ཆུ་ཉིད་ཡིན་ཏེ། བདག་ཅག་གིས་ཐོས་ཐོས་པའི་ཆུ་ལྟ་བུའོ། །འདི་ཡང་ཆུ་ལ་སྤྱོད་པར་དབང་བ་རྣམས་ཀྱིས་བསྔོས་ཏེ་བྱིན་ན་ཆུ་ཉིད་ལ་ལོངས་སྤྱོད་དུ་ཡོད་པའོ། །ཞེས་ཁྱབ་པ་ངེས་པར་གྲུབ་པ་བཞིན་མི་རྣམས་ལ་མཐུན་པར་སྣང་བའི་ལུས་དང་ལོངས་སྤྱོད་དུ་སྣང་བ་འདི་དག་ལ། ཁ་ཅིག་གིས་ཡོངས་སུ་དག་པའི་གང་ཟག་རྣམས་ཀྱིས་ལྷའི་དཀྱིལ་འཁོར་དུ་མཐོང་བ་དང་། གསང་སྔགས་ཀྱི་ཚུལ་ལས་ལྷའི་དཀྱིལ་འཁོར་ཉིད་ཡིན་པར་སྟོན་པའང་ཐོས་ཏེ། དེ་ལས་ལ་ལ་ནི་ཐ་མལ་པའི་ལུས་དང་ལོངས་སྤྱོད་དུ་སྣང་བ་ནི་དངོས་པོའི་མཚན་ཉིད་དེ། ལྷར་མཐོང་བ་ནི་ཀུན་བརྟགས་པ་ལ་སོགས་པར་འདོད་པ་ལ། ཁ་ཅིག་ནི་ཐ་མལ་པའི་ལུས་དང་ལོངས་སྤྱོད་ནི་སྣང་བ་མ་དག་པ་ཡིན་པས། གང་ཟག་དག་པ་རྣམས་ཀྱིས་མཐོང་བ་དང་། གསང་སྔགས་ཀྱི་ཚུལ་ལས་གྲགས་པ་བཞིན་དུ། ལྷ་ཉིད་དངོས་པོ་རྣམས་ཀྱི་མཚན་ཉིད་ཡིན་པར་འདོད་པ་ལས། དེས་སྨྲས་པ། གྲོགས་པོ་དག་བདག་ཅག་ལྟ་བུ་མི་རྣམས་ལ་མཐུན་པར་སྣང་བའི་ཐ་མལ་པའི་ལུས་དང་ལོངས་སྤྱོད་ཡུལ་དུ་སྣང་བ་འདི་ནི། གང་ཟག་དག་པ་རྣམས་ཀྱིས་མཐོང་བ་བཞིན་དུ་ལྷའི་དཀྱིལ་འཁོར་ཉིད་ཡིན་ཏེ། དག་པའི་སྤྱོད་ཡུལ་ལ་སྤྱོད་པར་དབང་བ་རྣམས་ཀྱིས་དངོས་གྲུབ་བྱིན་ན་མི་རྣམས་ལ་ཡང་སྤྱོད་ཡུལ་འདི་དག་ལྷ་ཉིད་དུ་སྣང་ཞིང་ལོངས་སྤྱོད་དུ་ཡོད་པའི་ཕྱིར་བདག་ཅག་ལྟ་བུའི་མི་ལས་སྔོན་ཅད་སྐབས་སྐབས་སུ་དངོས་གྲུབ་ཐོབ་པ་བྱུང་བ་རྣམས་ཀྱིས་ལྷའི་དཔྱོད་ཡུལ་ཐོབ་པ་བཞིན་ནོ། །ཞེས་འབྲེལ་བ་བསྒྲུབས་ན་འདི་ནི་སྐྱོན་མེད་པར་གྲུབ་པའོ། །ཡང་གང་དག་པའི་སྤྱོད་ཡུལ་ལ་དབང་བ་རྣམས་ཀྱིས་དངོས་གྲུབ་བྱིན་ན་ལྷ་ཉིད་ཀྱི་སྤྱོད་ཡུལ་ལ་ལོངས་སྤྱོད་དུ་ཡོད་པ་དེ་ཐམས་ཅད་ལྷ་ཉིད་ཡིན་ཏེ། དངོས་གྲུབ་ཅན་གྱིས་ཐོབ་པའི་ལྷའི་སྤྱོད་ཡུལ་ལྟ་བུའོ། །ཐ་མལ་པའི་སྤྱོད་ཡུལ་འདི་ཡང་། ཡོངས་སུ་དག་པའི་སྤྱོད་ཡུལ་ལ་སྤྱོད་པར་དབང་བ་རྣམས་ཀྱིས་དངོས་གྲུབ་བྱིན་ན་ལྷའི་སྤྱོད་ཡུལ་ལ་ལོངས་སྤྱོད་དུ་ཡོད་པའོ། །ཞེས་སྒྲུབ་པ་འདི་ནི་ཁྱབ་པ་ངེས་པར་གྲུབ་པའོ། །མངོན་སུམ་གྱིས་ཀྱང་གནོད་པ་མ་ཡིན་ཏེ། ལས་ཀྱི་སྒྲིབ་པས་བསྒྲིབས་པ་ཡིན་པའི་ཕྱིར། །དཔེར་ན་སྔོན་འཛམ་བུའི་གླིང་གི་བུད་མེད་དབུལ་མོ་ཞིག་ལ་ལྷ་རྣམས་ཀྱི་ཉིང་རྗེ་སྐྱེས་ནས་གསེར་བྱིན་པ་ལས་སོལ་བར་སོང་བ་བཞིན་ནོ། །ལས་དང་སྙིང་རྗེའི་འབྲེལ་པ་ཡོད་པ་རྣམས་ལ་ནི། རིམ་པ་བཞིན་སྣང་བ་འབྱུང་སྟེ། འདི་ལྟར་དབུལ་མོ་དེ་ཉིད་ལ་མེ་ལྷས་བྱིན་པའི་གསེར་ཅུང་ཟད་ཙམ་སྣང་བར་ནུས་ནས་ལོངས་སྤྱོད་ཅུང་ཟད་ཙམ་སྦྱར་བ་བཞིན་ནོ། །གང་དག་རང་གི་སྣང་བ་ལ་ཤིན་ཏུ་མངོན་པར་ཞེན་པ་རྣམས་ནི་དང་པོ་རང་གི་སྣང་བ་བདེན་པར་མ་བསྒྲུབ་ན། གཞི་ཉིད་ལ་འཇུག་པར་མི་འགྱུར་བས། དེ་ལྟ་བུ་ལ་ཐོག་མར་རང་གི་སྣང་བ་ཡང་བསྒྲུབས་ནས། དེ་ནས་གྲུབ་མཐའ་ཁྱད་པར་ཅན་ལ་རིམ་གྱིས་གཞུགས་པར་བྱའོ། །དེ་ལྟ་བུའི་ཚུལ་ནི་འདི་ཡིན་ཏེ། དཔེར་ན་ཡི་དྭགས་གཉིས་སྔ་མ་བཞིན་དུ་གྲུབ་མཐའ་མི་མཐུན་པ་ལས་གཅིག་གིས་སྨྲས་པ། བདག་ཅག་ལྟ་བུ་ལ་མཐུན་པར་སྣང་བའི་རྣག་གི་ཀླུང་འདི་ནི་རྣག་གི་མཚན་ཉིད་འབའ་ཞིག་ཏུ་མ་ཟད་ཀྱི་ཆུའི་མཚན་ཉིད་ཀྱང་ཡིན་ཏེ། སེམས་ཀྱི་རྣམ་པ་སྣང་བའི་ཕྱིར། བསྔོས་ནས་ཐོབ་པའི་ཆུ་དང་རྣག་ཏུ་སྣང་བ་འདི་ཉིད་བཞིན་ནོ། །ཞེས་བྱ་བ་དང་། ཡང་གང་སེམས་ཀྱི་རྣམ་པ་ཡིན་པ་དེ་ནི། མཚན་ཉིད་ཐམས་ཅད་དུ་སྣང་བ་ཡིན་ཏེ། བསྔོས་ནས་ཐོབ་པའི་ཆུ་དང་ཐ་མལ་པས་རྣག་ཏུ་སྣང་བ་འགའ་ཞིག་བཞིན་ནོ། །རྣག་གིས་གང་བའི་ཀླུང་ཆེན་པོ་འདི་ཡང་སེམས་ཀྱི་རྣམ་པ་སྣང་བའོ། །རྣམ་པ་ཡང་ཐ་དད་པ་མ་ཡིན་ཏེ། གཤེར་པ་མཐུན་སྣང་བར་མཐུན་པའི་ཕྱིར་རྣག་ཏུ་སྣང་བ་ཉིད་བཞིན་ནོ། །ཞེས་བསྒྲུབས་ན། སེམས་སྣང་བར་འདོད་པའི་གང་ཟག་རྣམས་ལ་རིགས་པ་འདི་གྲུབ་པ་ཡིན་ནོ། །དེ་ལྟར་དང་པོ་མཚུངས་པར་བསྒྲུབས་ནས། དེ་ནས་རྣག་གི་མཚན་ཉིད་དགག་པར་བྱ་སྟེ། འདི་ལྟར་སྣང་བ་འདི་གཉིས་ཀ་ཡང་སེམས་ཀྱི་རྣམ་པ་སྣང་བ་ཡིན་པར་མཚུངས་མོད་ཀྱི་རྣག་ནི་སྣང་བ་མ་དག་པ་ཡིན་པའི་ཕྱིར། འཁྲུལ་པ་ཡིན་ལ། ཆུ་ནི་སྣང་བ་དག་པ་ཡིན་པའི་ཕྱིར་མ་འཁྲུལ་པའོ། །འདི་ལྟར་གང་འཁྲུལ་པ་དེ་ནི་མ་དག་པ་ཡིན་ལ། མ་དག་པ་དེ་ནི་འཁྲུལ་བ་སྟེ། འདི་ནི་ཁྱབ་པ་མཚུངས་པའོ། །དེ་བཞིན་དུ་དག་པ་དང་མ་འཁྲུལ་པ་ལ་ཡང་བལྟ་བར་བྱ་སྟེ། དེ་བས་ན་ཁྱད་པར་ངེས་པའི་གཏན་ཚིགས་འདི་ཉིད་ཀྱིས། རྣག་ནི་སྣང་བ་འཁྲུལ་བའོ། །འཁྲུལ་བའི་སྣང་བའོ། །ཆུ་ནི་མ་འཁྲུལ་པའོ། །མ་འཁྲུལ་པའི་སྣང་བའོ། །དེ་བཞིན་དུ་ཆོས་ཐམས་ཅད་སྒྱུ་མ་ཙམ་དུ་སྣང་བའི་ངོར་ཡང་འགྲོ་བ་ཕལ་པ་ལ་སྣང་བ་ལྟར། ལུས་དང་ངག་དང་ཡིད་ཀྱིས་བསྡུས་པའི་ལུས་དང་སྤྱོད་ཡུལ་དུ་སྣང་བ་འདི་དག་སྡུག་བསྔལ་གྱི་རང་བཞིན། ཉོན་མོངས་པ་སྐྱེ་བའི་གནས་ཀྱི་མཚན་ཉིད་ཁོ་ན་མ་ཡིན་ཏེ། གང་ཟག་དག་པ་རྣམས་ལ་སྣང་བ་བཞིན་དུ། སྐུ་གསུང་ཐུགས་རྡོ་རྗེས་བསྡུས་པ་ཞིང་དང་སྤྱོད་ཡུལ་ཡོངས་སུ་དག་པའི་བདག་ཉིད་དུ་སངས་རྒྱས་པའི་མཚན་ཉིད་ཀྱང་ཡིན་ཏེ། སེམས་ཀྱི་རྣམ་པ་སྣང་བ་ཡིན་པའི་ཕྱིར། དངོས་གྲུབ་དམ་པ་ཐོབ་པ་རྣམས་ལ་ལྷར་སྣང་བ་དང་། ཐ་མལ་པ་ལ་བུམ་པ་དང་ཀ་བ་ལ་སོགས་པར་སྣང་བ་བཞིན་ནོ། །ཞེས་བྱ་བ་དང་། ཡང་གང་དང་གང་སེམས་ཀྱི་རྣམ་པ་ཡིན་པ་དེ་དང་དེ་ཐམས་ཅད་ནི་མཚན་ཉིད་ཐམས་ཅད་དུ་སྣང་བ་ཡིན་ཏེ། ཁ་ཅིག་ལ་ལྷར་སྣང་བ་དང་ཁ་ཅིག་ལ་ཀ་བ་ལ་སོགས་པར་སྣང་བ་བཞིན་ནོ། །ཐ་མལ་པ་ལ་སྣང་བའི་ལུས་དང་གནས་དང་ལོངས་སྤྱོད་ཡུལ་དུ་སྣང་བ་འདི་ཡང་སེམས་ཀྱི་རྣམ་པ་སྣང་བའོ། རྣམ་པ་ཡང་ཐ་དད་པ་མ་ཡིན་ཏེ། ལུས་དང་ངག་དང་ཡིད་ཀྱིས་བསྡུས་པའི་ལུས་དང་གནས་དང་སྤྱོད་ཡུལ་སྣང་བ་མཐུན་པའི་ཕྱིར་རོ། །ཀ་བ་ལ་སོགས་པར་སྣང་བ་ཉིད་བཞིན་ནོ་ཞེས་བསྒྲུབས་ན། སེམས་སྣང་བར་འདོད་པའི་གང་ཟག་རྣམས་ལ་རིགས་པ་འདི་གྲུབ་པ་ཡིན་ནོ། །དེ་ལྟར་དང་པོ་མཚུངས་པར་གྲུབ་ནས། དེ་ནས་སྡུག་བསྔལ་གྱི་མཚན་ཉིད་དགག་པར་བྱ་སྟེ། སྣང་བ་འདི་གཉིས་ག་ཡང་སེམས་ཀྱི་རྣམ་པ་སྣང་བ་ཡིན་པར་མཚུངས་མོད་ཀྱི། སྡུག་བསྔལ་དང་སྡུག་བསྔལ་གྱི་གནས་སུ་སྣང་བ་ནི། སྣང་མ་དག་པ་ཡིན་པའི་ཕྱིར་འཁྲུལ་པ་ཡིན་ལ། ཐར་པ་དང་ཐར་པའི་གནས་སུ་སྣང་བ་ནི་དག་པའི་ཕྱིར་མ་འཁྲུལ་པ་སྟེ། གང་འཁྲུལ་པ་དེ་ནི་མ་དག་པ་ཡིན་ལ། མ་དག་པ་དེ་ནི་འཁྲུལ་པ་སྟེ། འདི་ནི་ཁྱབ་པ་མཚུངས་པའོ། །དེ་བཞིན་དུ་དག་པ་དང་མ་འཁྲུལ་པ་ལ་ཡང་བལྟ་བར་བྱའོ། །དེ་བས་ན་ཁྱབ་པ་ངེས་པའི་གཏན་ཚིགས་འདི་ཉིད་ཀྱིས་ཐ་མལ་པར་སྣང་བ་ནི་སྣང་བ་འཁྲུལ་པའོ། །འཁྲུལ་བའི་སྣང་བའོ། །ལྷ་ནི་སྣང་བ་མ་འཁྲུལ་བའོ། །མ་འཁྲུལ་པའི་སྣང་བའོ། །ཞེས་ངེས་པར་རྟོགས་པར་བྱའོ། །དེ་ལ་རྣམ་པ་ཡང་ཐ་དད་མ་ཡིན་ཞེས་བྱ་བ་འདི་ཡང་ཅུང་ཟད་བཤད་པར་བྱ་སྟེ། གང་ཟག་ཁ་ཅིག་གིས་བཏགས་པ་བུམ་པ་དང་ཀ་བ་ལ་སོགས་པ་ལ་ལྷར་བསྒོམས་ན་སྐུ་གསུང་ཐུགས་དང་ལྡན་པའི་ལྷ་ཉིད་དུ་སྣང་དུ་རུང་མོད་ཀྱི། དེ་ནི་ཀ་བ་ལ་སོགས་པའི་མཚན་ཉིད་མ་ཡིན་ཏེ་ཇི་ལྟར་མི་སྡུག་པ་བསྒོམས་པས་ས་ཕྱོགས་རུས་པ་ལ་སོགས་པས་གང་བ་བཞིན་ནོ། །དེ་བཞིན་དུ་ཟད་པར་གྱི་སྐྱེ་མཆེད་ལ་སོགས་པ་བསྒོམ་པའི་སྣང་བ་ཡང་དབང་འབྱོར་བའི་གཟུགས་ཏེ། ཆོས་ཀྱི་སྐྱེ་མཆེད་ཀྱི་གཟུགས་ཀྱི་བྱེ་བྲག་ཞིག་ཡིན་པས། དངོས་པོའི་མཚན་ཉིད་མ་ཡིན་ནོ་ཞེས་ཟེར་བ་དང་། ཁ་ཅིག་ན་རེ་ལྷར་སྣང་བའི་ཚེ་རང་གི་སྣང་བ་འགྱུར་བ་ཡིན་པས་མཐུན་པར་སྣང་བའི་མཚན་ཉིད་མ་ཡིན་ནོ། །ཞེས་རྒོལ་བ་ལ། རྣམ་པ་ཡང་ཐ་དད་པ་མ་ཡིན་ཏེ། མཐུན་པར་སྣང་བའི་ཕྱིར་ཞེས་བྱ་བ་བསྟན་པ་ཡིན་ཏེ། ཇི་ལྟར་ཡི་དྭགས་ལ་རྣག་ཏུ་སྣང་བ་ཡང་ལས་མཐུན་རང་གི་སྣང་བ་ཡིན་ལ། ཆུར་སྣང་བ་ཡང་ལས་མཐུན་རང་གི་སྣང་བ་ཡིན་པས་གཞི་ཐ་དད་དོ་ཞེས་བྱ་བར་མི་རུང་སྟེ་གཤེར་བར་མཐུན་པར་སྣང་བ་གཉིས་ག་ལ་མ་ལོག་པས། དེ་བས་ན་ཀླུང་ཆོས་ཅན་དུ་བྱ་བར་རུང་བ་ཡིན་ཏེ། གལ་ཏེ་དེ་ཡང་དགག་ན། རྣག་ཏུ་སྣང་བ་ཉིད་ཀྱང་རང་རང་གི་སྣང་བ་ཡིན་པས་ཆོས་ཅན་རྒོལ་བ་དང་ཕྱིར་རྒོལ་བ་གཉིས་ག་ལ་གྲུབ་པ་གང་ཡང་རྙེད་པར་མི་འགྱུར་རོ། །དེ་བཞིན་དུ་ཐུན་མོང་གི་སྣང་བ་ལུས་དང་ངག་དང་ཡིད་ཀྱི་རྣམ་མ་དག་པར་སྣང་བ་དང་། ལྷའི་སྐུ་གསུང་ཐུགས་རྡོ་རྗེའི་སྣང་བ་དག་པ་གཉིས་ག་ཡང་ལུས་ངག་ཡིད་གསུམ་གྱི་རྣམ་པ་དང་བཅས་པའི་ཞིང་དང་སྤྱོད་ཡུལ་དུ་སྣང་བ་གཉིས་ག་ལ་མ་ལོག་པར་མཐུན་པར་སྣང་བས། དེ་བས་ན་འདི་ལྟར་སྣང་བ་ཆོས་ཅན་དུ་བཞག་ཏུ་རུང་བ་ཡིན་ཏེ། གལ་ཏེ་རང་རང་གི་སྣང་བ་ཡིན་པས་ཀུན་ཀྱང་ཐ་དད་དོ་ཞེས་མཐུན་སྣང་བཀག་ན་ཀ་བ་ལ་སོགས་པ་རང་རང་གི་སྣང་བ་ཡིན་པས་ཆོས་ཅན་རྒོལ་བ་དང་ཕྱིར་རྒོལ་བ་གཉིས་ག་ལ་གྲུབ་པ་གང་ཡང་རྙེད་པར་མི་འགྱུར་རོ། །དེ་བས་ན་སྣང་བ་ལྷར་བསྒྲུབ་པ་འདི་ཡང་ཆོས་ཅན་ཐ་དད་པའི་ཉེས་པ་མེད་དོ། །ཡང་དྲིས་པ། ཡོངས་སུ་དག་པའི་ལྷ་ནི་ཆོས་ཉིད་དང་ཡེ་ཤེས་ཀྱིས་ཕྱེ་སྟེ་རྣམ་པར་བཞག་པ་མ་ཡིན་ནམ། ཇི་ལྟར་ན་སེམས་ཀྱི་རྣམ་པར་སྣང་བར་འགྱུར་ཞེ་ན། ཡོངས་སུ་དག་པའི་ལྷ་ཡང་རྣམ་པ་གཉིས་ཀྱི་ཚུལ་གྱིས་བཞག་སྟེ། ཇི་ལྟར་མེ་ལོང་གི་གཟུགས་བརྙན་ནི་མེ་ལོང་གི་ཡོན་ཏན་ཡིན་པས། མེ་ལོང་དུ་གཞག་པ་དང་། བྱད་ཀྱི་གཟུགས་བརྙན་ཡིན་པས། བྱད་ཀྱི་རྣམ་པར་བཞག་གོ། །དེ་བཞིན་དུ་ལྷའི་སྐུ་གསུང་ཐུགས་སུ་སྣང་བ་ཡང་། ཡེ་ཤེས་ཀྱི་ཆོས་ཉིད་རྟོགས་པའི་དབང་དང་། ཐུགས་རྗེས་སྨོན་ལམ་བསྒྲུབ་པའི་ཤུགས་ཀྱིས་སྣང་བ་ཡིན་པས། ཡེ་ཤེས་དང་ཆོས་ཉིད་ཀྱིས་ཕྱེ་བའོ། །ཞེས་བཞག་པ་དང་། ལྷར་སྣང་བ་དེ་དག་ཀྱང་བག་ཆགས་དང་བཅས་པའི་སེམས་ཀྱི་རྣམ་པ་སྣང་བ་ཡིན་པས་སེམས་ཉིད་དུ་བསྡུས་པའོ། །དེ་ལ་བག་ཆགས་ཀྱི་རྒྱུས་ཇི་ལྟར་སྣང་ཞེ་ན། དེ་ལ་འཛིན་པ་གཉིས་ཀྱི་བག་ཆགས་ནི། དེ་ཡང་ཡུལ་དང་ཡུལ་ཅན་དུ་སྣང་བར་འགྱུར་རོ། །དཀར་པོ་ལས་ཀྱི་བག་ཆགས་ཀྱི་ནི་མཚན་དང་དཔེ་བྱེད་ལ་སོགས་པས་བརྒྱན་པ་ཁྱད་པར་ཅན་དུ་སྣང་བར་འགྱུར། གཞན་ཡང་བདག་ཏུ་ལྟ་བའི་བག་ཆགས་ཀྱིས་ནི་བདག་དང་ལྷ་རྒྱུད་སོ་སོར་སྣང་བ་དང་ཡུལ་བེ་ལིང་དུ་ཆད་པར་སྣང་བར་འགྱུར་རོ། །མངོན་པར་བརྗོད་པའི་བག་ཆགས་ཀྱིས་ནི་མཚན་མ་ཐ་དད་དུ་སྣང་བར་འགྱུར་རོ། །སྲིད་པ་ཡན་ལག་གི་བག་ཆགས་ལས་ནི་སྐྱེ་བའི་རང་བཞིན་དུ་སྣང་སྟེ། བག་ཆགས་ཐམས་ཅད་མ་ལུས་པར་ཟད་པ་ལ་ནི་ཡོངས་སུ་དག་པའི་སྤྱོད་ཡུལ་ཡང་སྣང་བ་མ་ཡིན་ནོ། །སངས་རྒྱས་པའི་དག་པ་འཇིག་རྟེན་པའི་ཡེ་ཤེས་ནི། དེ་བཞིན་དུ་ཡོད་དམ་མེད་པ་ནི་བརྟག་པར་བྱ་བ་སྟེ། བསམ་གྱིས་མི་ཁྱབ་པའི་ཆོས་ཡིན་ནོ། །ཡང་དྲིས་པ། ཡོངས་སུ་དག་པའི་ལྷ་ཡུལ་གྱི་བདག་ཉིད་དུ་བཞག་པའི་ཚེ། ཡེ་ཤེས་དང་ཆོས་ཉིད་ཀྱིས་ཕྱེ་བར་བཞག་པ་གང་ཡིན་པ་སྟེ། ཐ་མལ་པའི་སེམས་འཁྲུལ་བར་སྣང་བའི་བདག་ཉིད་ལ་ཡོད་པ་མ་ཡིན་ནོ་ཞེ་ན། དེ་ཡང་དེ་ལྟར་མ་ཡིན་ཏེ། སོ་སོ་སྐྱེ་བོའི་ཤེས་པའང་རང་བཞིན་གྱིས་རྣམ་པར་བྱང་བའི་མཚན་ཉིད་ཡིན་པ་དང་། ཡེ་ཤེས་ཀྱང་བྱང་ཆུབ་ཀྱི་སེམས་བསྐྱེད་པ་འབའ་ཞིག་ལ་ལྟོས་པ་མ་ཡིན་ཏེ། རང་བྱུང་གི་ཡེ་ཤེས་ཡོད་པར་བདག་ཅག་ལྟ་བུ་གཉི་ག་ལ་མཐུན་པར་གྲུབ་པའི་མདོ་སྡེ་ལས་གསུངས་ཏེ། འདི་ལྟར་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས། སོ་སོ་སྐྱེ་བོའི་ཤེས་པའང་། རང་བཞིན་གྱིས་ནི་རྣམ་བྱད་ཅན། །ཞེས་གསུངས་པ་དང་། འཕགས་པ་སྡོང་པོ་བཀོད་པ་ལས། ལྷའི་བུ་རབ་མཚེ་མའི་གནས་སུ་ཆོས་ཀྱི་འཁོར་ལོ་བསྐོར་བའི་སྐབས་སུ། འཇིག་རྟེན་ཁམས་མང་ལ་ལ་དག །བསམ་གྱིས་མི་ཁྱབ་འཚིག་འགྱུར་ཡང་། ནམ་མཁའི་འཚིག་པར་མི་འགྱུར་བཞིན། རང་བྱུང་ཡེ་ཤེས་དེ་བཞིན་ནོ། །ཞེས་གསུངས་ཏེ། གསང་སྔགས་ཀྱི་ཚུལ་ལས་གྲགས་པ་ནི་ལྷག་པར་སྨོས་ཀྱང་མི་དགོས་ཏེ། དེ་བས་ན་སྒྲིབ་པ་ཀུན་ནས་རགས་པ་དག་པས་ན། ཐུན་མོང་གི་སྣང་བ་ཕལ་ཆེར་མ་ལོག་ཀྱང་ཞིང་དང་སྤྱོད་ཡུལ་ཡོངས་སུ་དག་པ་སྣང་བར་འགྱུར་རོ། །དེ་བས་ན་ཆོས་ཅན་ཐ་དད་མ་ཡིན་ནོ། །མདོར་བསྡུས་ཏེ་བསྒྲུབ་པར་བྱ་ན་ཇི་སྲིད་དུ་ཡོངས་སུ་དག་པ་དང་མ་དག་པའི་ལུས་དང་སྤྱོད་ཡུལ་དུ་སྣང་བ་ཡུལ་དང་དུས་ལ་སོགས་པ་རྣམ་པས་རབ་ཏུ་ཕྱེ་བ་ཐམས་ཅད་ནི་ཀུན་གཞི་རྣམ་པར་ཤེས་པའི་སྐད་ཅིག་མ་གཅིག་གི་སྣང་བ་ཡིན་པའི་ཕྱིར་གདོང་མ་ཐོབ་པར་བྱ་བའི་ཆོས་ནི་གང་ཡང་མེད་དེ། དཔེར་ན་ནམ་མཁས་ནམ་མཁའི་མཚན་ཉིད་སྒྲུབ་ཏུ་མེད་པ་བཞིན་ནོ། །ཞེས་བྱ་བ་འདི་ཡང་སྐྱོན་མེད་པར་གྲུབ་པ་ཡིན་ནོ། །རྣམ་པར་ཤེས་པའི་ཚོགས་བརྒྱད་ཀྱང་ལས་ཀྱིས་ཕྱེ་བར་ཟད་ཀྱི་རིགས་ནི་ཀུན་གཞི་རྣམ་པར་ཤེས་པའི་རིགས་ཉིད་ཡིན་པས་ཐ་དད་པ་མེད་དོ། །བདག་དང་གཞན་གྱི་རྒྱུད་ཀྱང་གང་ཟག་གིས་ཕྱེ་བར་ཟད་ཀྱི་ཆོས་ཀྱིས་ཕྱེ་བ་མ་ཡིན་ནོ། །རིགས་པའང་ཆེ་ཆུང་གི་བྱེ་བྲག་ཡོད་དོ། །འཁྲུལ་སྣང་དེ་བཞིན་དུ་ཚད་མར་གྲུབ་པ་ལ་སྣང་བ་ཉིད་ཀྱི་དབང་དུ་སྐྱོན་མེད་པར་ཡང་མ་ཡིན་ནོ། །ཚུལ་དེ་ཉིད་ལ་བློ་དང་ལྡན་པས་བསྒྲུབ་ན། བསྒྲུབ་བྱ་སྒྲུབ་ཏུ་མི་རུང་བ་ཡང་ཡིན་ནོ། །སྣང་བ་ལྷར་བསྒྲུབ་ཆེན་པོ་ཞེས་བྱ་བ་དྷརྨཱ་བྷ་དྲས་མཛད་པའོ། །དགེའོ།། །།

སྒྱུ་འཕྲུལ་གྱི་དཀའ་བའི་གནས་སྣང་བ་ལྷར་བསྒྲུབ་པ་དོགས་པ་གཅོད་པ་ལུང་རིགས་མུ་ཏིག་ཕྲེང་མཛེས། ཆོས་ཀྱི་རྒྱ་མཚོ།

སྒྱུ་འཕྲུལ་གྱི་དཀའ་བའི་གནས་སྣང་བ་ལྷར་བསྒྲུབ་པ་དོགས་པ་གཅོད་པ་ལུང་རིགས་མུ་ཏིག་ཕྲེང་མཛེས་བཞུགས་སོ། །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ལ་རྩ་རྒྱུད་གསང་བ་སྙིང་པོའི་སྐབས་སུ་རྒྱུ་ཤེས་པའི་མཚན་ཉིད་ལྟ་བ་དང་སྦྱར་ནས་དཔྱད་པར་བྱ་འདི་ལྟར་ཡོད་དེ། དེ་ལ་ཐོག་མར་ཆོས་ཀྱི་དབྱིངས་དོན་དམ་བདེན་གཉིས་དབྱེར་མེད་ཀྱི་ལྟ་བ་རྟོགས་པ་ལ་སྔོན་དུ་འགྲོ་བ་དབྱེར་མེད་ཆིག་ཆོད་དུ་གཅོད་པ་དང་། རིམ་གྱིས་རྟོགས་པ་གཉིས་ཀྱི་དབང་དུ་བྱས་ནས་ཚུལ་ལྔ་ཚིག་ལྔའི་གཏན་ཚིགས་རིམ་བཞིན་དུ་བྱུང་བ་ཡིན་ཅིང་། དེའི་རྗེས་སུ་སྤྲུལ་སྐུའི་དགོངས་པ་མཚན་པ་གཏན་ཚིགས་རྒྱས་པར་སེམས་ཕྱོགས་རྒྱ་མཚོའི་ཤིང་རྟ་པ་སྒྱུ་འཕྲུལ་མཁན་པོ་སྔ་མ་དག་གི་དགོངས་བཞེད་གཙོ་བོར་བྱས་ཏེ་དག་པ་དབྱེར་མེད་དོན་དམ་བདེན་པ་སྣོད་བཅུད་ཐམས་ཅད་སྐུ་གསུང་ཐུགས་རྡོ་རྗེར་བསྒྲུབ་པའི་ཚུལ་འདི་དང་པོ་སྣང་བ་ཆོས་ཉིད་ཡིན་པར་གྲུབ་ན་གཞན་དག་ལ་ངེས་པ་རིམ་གྱིས་རྙེད་པར་འགྱུར་བས་དེ་བཤད་པར་བྱའོ། །སྣང་བ་འདི་རང་བྱུང་གི་ཡེ་ཤེས་ཡེས་དང་། ལྷུན་གྲུབ་གསུམ་དང་། ཆོས་ཉིད་ཡིན་ནམ་མིན་ལ་སོགས་པའི་གནད་གཅིག་ཏུ་ཤེས་པར་བྱ་ཞིང་། དེ་ཡང་སྣང་བ་འདི་ཆོས་ཉིད་མིན་པར་འདོད་པ་དང་། ཕྱོགས་གཞན་དུ་དང་ཡིན་པར་འདོད་པ་གསུམ་ཡོད། དང་པོ་ལའང་། རང་ལུགས་བཞག་པ་དང་། གཞན་ལ་སྐྱོན་སྨྲ་བའོ། །དང་པོ་ནི། གཤིས་ཆོས་ཉིད་སྟོང་པའམ་དབྱིངས་ཡེ་ཤེས་གཉིས་སུ་མེད་ཅིང་ཆོས་ཉིད་རང་བཞིན་གྱིས་འོད་གསལ་བའི་ཡེ་ཤེས་དེ་རྣམ་པར་དག་ཅིང་དོན་དམ་ཡིན་ལ། དེ་འགྲོ་དྲུག་རང་ག་མའི་སྣང་བ་ལ་མི་འཆར་བས་བདེན་ཞེན་རང་རྒྱུད་དུ་དམིགས་པའི་ཐ་མལ་གྱི་སྣང་བ་འདི་ཆོས་ཉིད་མིན་ཏེ། ཀུན་རྫོབ་བམ་ལོག་ཤེས་ཚད་མིན་གྱིས་བསླད་པའི་འཁྲུལ་ངོ་ལ་ཡོད་པའི་འཁྲུལ་སྣང་ངན་པ་ཡིན་ནོ། །ཞེས་ཐེག་པ་འོག་མ་རྣམས་དང་། གསང་སྔགས་ཀྱི་དག་མཉམ་ཆེན་པོའི་ལྟ་དོན་མངོན་དུ་མཐོང་བའི་སྤྱོད་ཡུལ་དུ་མ་གྱུར་པ་རྣམས་ཀྱིས་བདེན་པ་རིས་ཆད་དང་མཚན་ཞེན་དུ་བལྟ་བ་ཡོད་པའི་ཕྱིར། རྒྱུད་ཀྱི་རྒྱལ་པོ་འདི་ལས་བླ་མེད་ཀྱི་རྒྱུད་ཕ་དང་མ་རྣམས་སུའང་གསལ་པོར་མ་བསྟན་ཅིང་སྦས་ལ་མ་རྟོགས་པ་རྒྱུ་མཚན་དུ་བྱས་ཏེ་རང་རང་གི་ཞེ་འདོད་ཕྱོགས་རེ་ལ་དམ་པར་བལྟ་ཞིང་། སྣང་བ་ཆོས་ཉིད་ཡིན་ན་བློར་མི་ཆུད་པའི་སྐྱོན་བརྗོད་རྒོལ་བ་རང་གྲུབ་ཀྱི་གཏན་ཚིགས་དུ་མ་དག་སྔ་བྱས་སོ། །གཉིས་པ་དེ་མི་སྒྲུབས་འགོག་གི་སྦྱོར་བ་འགོད་པ་ནི། དེ་ཡིན་ན་ཀུན་ཁྱབ་ཀྱི་ཚད་མ་ལུང་རིགས་མན་ངག་གསུམ་གྱིས་འགལ་བ་འདུ་བར་འདོད་དེ། དང་པོ་ཐེག་པ་རང་རང་གི་སྐབས་སུ་ངེས་པ་རྙེད་པའི་དྲང་དོན་གྱི་ལུང་ངམ་འཁྲུལ་སྣང་དང་ཆོས་ཉིད་འགལ་བའི་མདོ་ཚིག་སོགས་དང་། ཕྱི་རྒོལ་ལ་གྲུབ་འདོད་ཀྱིས་གསང་སྔགས། དགོངས་པ་འདུས་པའི་མདོ་ལས། ཀྱཻ་ལངྐའི་བདག་པོ་ཐམས་ཅད་སྣང་བ་དེ་གསང་སྔགས་མ་ཡིན། གལ་ཏེ་གསང་སྔགས་ཡིན་ན་གསང་སྔགས་ཞེས་བརྗོད་པ་ཉིད་དང་འགལ་ལ། སེམས་ཅན་གྱི་འདུ་ཤེས་དང་སངས་རྒྱས་ཀྱི་དགོངས་པ་ཁྱད་མེད་པར་འགྱུར་རོ། །ཞེས་དང་། མན་ངག་ནི། ལམ་རིམ་ལས། སྤྱིར་ནི་ལོག་རྟོག་བསམ་ཡས་པ། །ཡོད་ན་ཡོད་པ་མ་ཡིན་ཏེ། །སོ་སོར་འཛིན་རྟོག་བག་ཆགས་ཀྱིས། །གཟུང་འཛིན་དྲ་བས་སྒྲིབ་འགྱུར་ཏེ། །ཅི་ཡང་མེད་ལ་ཅིར་ཡང་སྣང་། །དོན་གྱི་སྙིང་པོ་ཉིད་ལས་གོལ། །ཞེས་དང་། ལ་ཤན་ལས། དངོས་ཀུན་ལོག་རྟོག་ཙམ་ཉིད་ལས། །ཕྲ་ཙམ་སྐད་ཅིག་ཡོད་མིན་པས། །འཁྲུལ་པའི་སྣང་བ་ཞེས་སུ་གསུངས། །ཞེས་སོགས་ཀྱི་གསལ། རིགས་པས་མི་འཐད་དེ། སྐྱོན་བཞིའི་དང་པོ་ནི། སྣང་བ་འདི་ཆོས་ཅན། ཁྱོད་ཆོས་ཉིད་ཡིན་ན་འགྲོ་དྲུག་གི་བདེན་པ་མཐོང་བར་ཐལ་ཏེ། འགྲོ་བ་ལ་སྣང་བ་འདི་ཆོས་ཉིད་ཡིན་ཅིང་ལོག་རྟོག་ཆོས་ཉིད་དེ་ཡོད་པའི་ཕྱིར། འདོད་ན་ཐམས་ཅད་མཐོང་ལམ་པ་ཡིན་ཅིང་འབད་མེད་དུ་གྲོལ་བར་ཐལ་ལོ། །གཉིས་པ་ནི། ད་ལྟ་གྱི་སྣང་བ་ཆོས་ཅན། ཁྱོད་ཆོས་ཉིད་ཡིན་ན་འཁྲུལ་པའི་སྣང་བ་རྒྱུན་ཆད་པར་ཐལ། སྣང་བ་འདི་ཆོས་ཉིད་ཡིན་པའི་ཕྱིར་རོ། །འདོད་ན་འཁོར་བ་དོང་སྤྲུགས་པར་ཐལ་ལོ། །གསུམ་པ་ནི། ཆོས་ཉིད་ཆོས་ཅན། ཁྱོད་བེམ་པོ་རྫས་ཅན་དུ་ཐལ། སྣང་བ་འདི་ཆོས་ཉིད་ཡིན་པའི་ཕྱིར། འདོད་ན་འགྲོ་དྲུག་གི་སྣང་བ་འདི་ཁོ་ན་ལྟར་བདེན་པ་དང་། སྟོང་ཉིད་རྟོགས་པ་ལ་སོགས་པ་འཁྲུལ་བར་ཐལ་བའི་སྐྱོན་ཡོང་ངོ་། །བཞི་པ་ནི། ཆོས་ཉིད་ཆོས་ཅན། སྐྱེ་འཇིག་ཅན་དུ་ཐལ། སྐྱེ་འཇིག་ཅན་གྱི་སྣང་བ་འདི་ཆོས་ཉིད་ཡིན་པའི་ཕྱིར་རོ། །འདོད་ན་ཆོས་ཉིད་རྟོགས་རུང་སྐྱེ་འཇིག་གི་སྡུག་བསྔལ་ལས་མི་གྲོལ་བའི་སྐྱོན་ཡོང་ངོ་། །ཞེས་ཇི་ལྟར་སྣང་བ་ཡེ་ནས་སངས་རྒྱས་པ་ལྟ་བུ་ཡིན་དུ་མི་རུང་ངོ་ཞེས་སྨྲ་བ་བྱེད་ཅིང་སྣང་སྟོང་གཉིས་མེད་ཀྱི་མཐའ་ལ་ངེས་ཤེས་ཀྱི་ཐག་མ་ཆོད་པས་སྟོང་པའི་རྩལ་སྣང་བ། སྣང་བའི་རང་བཞིན་དེ་ཡིན་པར་མ་རྟོག་པས་རིགས་པ་ལྟར་སྣང་བ་དུ་མ་ཞིག་འཕེན་པར་བྱེད་དོ། །གཉིས་པ་ཕྱོགས་གཞན་དུ་འདོད་པ་ནི། མ་རྟོག་འཁྲུལ་བའི་དུས་ན་ཆོས་ཉིད་མིན་པར་རྟོགས་པའི་དུས་ན་ཡིན་པར་འདོད་པ་དང་། མ་འདྲེས་པར་ཡོད་པའི་ངོས་ནས་མིན་ལ་ཡོངས་རྫོགས་ཀྱི་ངོས་ནས་ཡིན་པར་འདོད་པ་དང་། ངོ་བོའམ་བདག་ཉིད་གཅིག་པུའི་ངོས་ནས་ཡིན་པ་མཚོན་ཚུལ་ལམ་ལྡོག་པ་ཐ་དད་པའི་ངོས་ནས་མིན་པར་འདོད་པའོ། །གསུམ་པ་ཆོས་ཉིད་ཡིན་པར་འདོད་པས་རང་ལུགས་ནི། སྐྱོན་བསལ་བ་དང་། མིན་པར་དགག་པ་དང་། རང་ལུགས་བསྒྲུབ་པའོ། །དང་པོ་ནི། ཕྱོགས་དུ་མས་མིན་པར་འདོད་པའི་སྐྱོན་འགེལ་བའི་ལུང་རིགས་མན་ངག་གསུམ་གྱིས་གནོད་པ་མ་གྲུབ་སྟེ། མིན་པར་གསུངས་པ་ནི། སྣང་བ་ཆོས་ཉིད་ཡིན་ཀྱང་མ་རྟོག་སྟེ་འཁྲུལ་པའི་སྣང་ངོ་ལ་དགོངས་ཏེ་གསུངས་པའོ། །དེ་ཡང་མདོ་ལས། གལ་ཏེ་སྣང་བ་གསང་སྔགས་མ་ཡིན་པའི་རྗེས་སུ་དེ་ལས་གཞན་ཡང་གསང་སྔགས་ཡོད་པ་མ་ཡིན། གལ་ཏེ་དེ་ལས་གཞན་པ་ཞིག་གསང་སྔགས་ཡིན་ན་ནི་ཐམས་ཅད་ཆོས་ཉིད་དུ་མ་འདུས་པར་འགྱུར་རོ། །ཐམས་ཅད་ཀྱི་རང་བཞིན་མི་སྣང་བ་དེ་གསང་སྔགས་མ་ཡིན་པར། གལ་ཏེ་མི་སྣང་བ་དེ་གསང་སྔགས་ཡིན་ན་ནི་གཞན་མུ་ཆད་པ་ཡང་། ཡང་དག་པར་རྫོགས་པའི་སངས་རྒྱས་ཉིད་དུ་འགྱུར་རོ། །ཞེས་དང་། ལམ་གྱི་རིམ་པ་ལས། ཡུལ་དང་ཤེས་པར་སྣང་བ་ཡང་། །རང་བྱུང་ཡེ་ཤེས་རང་སྣང་ཟད། །ཅེས་པ་དང་། ལ་ཤན་ལས། ཐ་སྙད་གཉིས་ཀྱི་ཆོས་རྣམས་རིལ། །མཉམ་རྫོགས་བདག་ཉིད་ཆེན་པོའི་རྒྱན། །ཅེས་གསུངས་སོ། །གསུམ་པ་རིགས་པའི་སྐྱོན་མེད་དེ། དང་པོ་འགྲོ་དྲུག་གི་བདེན་པ་མཐོང་བ་ཐལ། ཞེས་པ་དེ་གཤིས་ཡིན་ཚུལ་ནས་མཐོང་བར་ཐལ་ཟེར་རམ། ངེས་པའི་ཤེས་པ་དང་བཅས་ཏེ་མཐོང་བར་ཐལ་ཟེར། སྔ་མ་ལྟར་ན་འདོད་དེ། ཡེ་ཤེས་གསང་བ་ལས། སྣང་བ་མ་བཅོས་ཆོས་ཀྱི་སྐུ། །རིག་པ་མ་སྦྱངས་ལོངས་སྤྱོད་རྫོགས། །ཐུགས་རྗེ་སྤྲུལ་པའི་སྐུ་རུ་ཤར། །ཞེས་དང་། ཀློང་ཆེན་ལས། དབང་པོ་ཅེར་མཐོང་ཆོས་ཉིད་གསལ། །སྣང་བ་རྒྱ་ཡན་རིག་པའི་ཀློང་། །ཞེས་དང་། ལ་ཤན་ལས། ཅིར་ཡང་མ་སྒྲིབ་ཡེ་ཤེས་མཆོག །ཐམས་ཅད་མ་འདྲེས་ཡོངས་རྫོགས་གསལ། །ཞེས་སོགས་གསུངས་སོ། །དེ་བས་ན། ཅི་སྣང་ཆོས་ཉིད་ཡིན་པས་གཤིས་ཡིན་ཚུལ་ནས་སྣང་ཚད་ཆོས་ཉིད་དུ་སྣང་ཞིང་། སྣང་ཚད་ཆོས་ཉིད་མཐོང་བ་ཡིན་ནོ། །མཐོང་ན་འཁོར་བ་དོང་སྤྲུགས་པར་ཐལ་ལོ་ཞེ་ན། མཐོང་ཡང་རང་ངོ་རང་གིས་མ་ཤེས་པས་འཁོར་བར་འཁྱམས་པ་ཡིན་ཏེ། འཁོར་བ་དོང་སྤྲུགས་པས་སྐྱོན་མེད་དོ་ཕྱི་མ་ལྟར་ན། གཏན་ཚིགས་ལ་ངེས་པས་མི་ཁྱབ་སྟེ། ཆོས་ཉིད་མཐོང་ཡང་ངེས་པའི་ཤེས་པ་མ་སྐྱེས་པ་ནི། རྒྱལ་བུ་དམངས་འཁྱམས་རྒྱལ་པོ་ལས་མི་འགྱུར་ཡང་། རང་གཞན་གྱིས་དེར་ངོ་མི་འཚལ་བ་བཞིན་ནོ། །འདི་ལྟར་སེམས་ཕྱོགས་སུ། ཡེ་ཤེས་རྫོགས་པ་ལས། མངོན་སུམ་སྣང་བའི་ཡེ་ཤེས་ལ། །སངས་རྒྱས་སེམས་ཅན་ཁྱད་མེད་ཀྱང་། །རང་དབང་ལམ་ལས་མི་གནས་ན། །སེམས་ཉིད་བདེ་བར་སྤྱོད་མི་ནུས། །ཞེས་དང་། མདོ་ཡི་ལམ་རིམ་ལས་ཀྱང་། གྲོང་ཁྱེར་གསུམ་གྱི་སེམས་ཅན་རྣམས། །ཐབས་དང་ལྷན་ཅིག་མི་གནས་པས། །བདེན་པ་མཐོང་ཡང་ངེས་མ་གནས། །མཐོང་ཡང་མ་མཐོང་འདྲ་བར་འགྱུར། །ཞེས་དང་། སྤྱན་འགྲེལ་ལས། ཀུན་གཞི་སྣང་བ་གཉིས་བྲལ་བ། །རྟག་ཏུ་རང་མཚན་མཐོང་གྱུར་ཡང་། །ཞེན་ལ་སྣང་བར་མ་གྱུར་པས། །མིག་གི་མིག་བཞིན་མ་རིག་པའོ། །ཞེས་གསུངས་པའི་ཕྱིར། མཐོང་བ་རང་གི་ངེས་ཤེས་སྐྱེ་དགོས་སོ་ཞེ་ན། མཐོང་བའི་ཡུལ་ལ་ལོག་ཤེས་འཁྲུལ་པ་རྒྱུན་ཆད་པར་ཐལ་བའི་སྐྱོན་ཡོང་ངོ་། །གཉིས་པ་འཁྲུལ་སྣང་རྒྱུན་ཆད་པར་ཐལ། ཞེས་པ་དེ་འགྲོ་དྲུག་གིས་ཆོས་ཉིད་ཡིན་པར་ངོ་ཤེས་ནས་འདུག་པའི་ཕྱིར་མ་འཁྲུལ་བར་ཐལ་ཟེར་རམ། ངོ་མ་ཤེས་ཀྱང་མ་འཁྲུལ་བར་ཐལ་ཟེར། སྔ་མ་ལྟར་ན་གཏན་ཚིགས་མ་གྲུབ་པ་ཉིད་ཀྱིས་གོང་དུ་བརྗོད་པ་བཞིན་ནོ། །འདི་ལྟར་མ་དག་པ་འཁྲུལ་སྣང་སྤངས་པའི་ཕ་རོལ་དུ་དག་པ་མ་འཁྲུལ་བ་ཞིག་གསར་དུ་སྒྲུབས་པར་མི་ནུས་ཏེ། འཁྲུལ་པ་ངོ་བོ་ཉིད་ཀྱིས་དག་པ་ཡེ་ཤེས་ཡིན་པའི་ཕྱིར། དེ་ཡིན་ཏེ་སེམས་ཅན་དང་སངས་རྒྱས་ཀྱི་ཁྱད་པར་ཆོས་ཉིད་ཀྱི་ཕྱེ་བ་ཞིག་མ་ཡིན་པར་རྨི་ལམ་གྱི་རྒྱུ་འབྲས་སོ་སོར་སྣང་བ་བཞིན་དུ། ཀུན་བཏགས་ཀྱི་དབང་གིས་བློ་སོ་སོར་སྣང་བ་ཙམ་ལ་འཇོག་པ་གང་ཞིག །མཚན་མ་སྣ་ཚོགས་པའི་རང་བཞིན་གྱིས་དག་པའི་ཕྱིར། དེ་གཉིས་དངོས་སུ་བསྒྲུབ་མི་ནུས་ཏེ་དངོས་འགལ་ཡིན་པའི་ཕྱིར། ཐག་ཁྲ་དང་སྦྲུལ་བཞིན་ནོ་ཞེ་ན། དེའང་སྦྲུལ་མ་དམིགས་པ་ཉིད་ཐག་ཁྲ་ལ་བརྟེན་ནས་སྣང་བ་བཞིན་དུ་ཆོས་ལ་བརྟེན་པའི་ཆོས་ཅན་ཡིན་པས་ཆབ་བྲམ་དང་ཆུ་ངོ་བོ་གཅིག་པ་བཞིན་ནོ། །དེའང་ཕྱི་མ་ལྟར་ན། ངོ་མ་ཤེས་པ་དེ་ཀས་འཁྲུལ་པ་ཡིན་ཏེ། འཁྲུལ་བའི་སྣང་བ་རྒྱུན་ཆད་པའི་སྐྱོན་མི་འོང་ངོ་། །གསུམ་པ་དང་བཞི་པ་བེམ་པོ་རྫས་ཅན་དང་སྐྱེ་འཇིག་ཅན་དུ་ཐལ་བ་ལ་སོགས་པ་དེ་གཤིས་ཡིན་ཚུལ་ནས་ཐལ་ཟེར་རམ། མ་རྟོགས་འཁྲུལ་པའི་སྣང་ངོ་ལ་ཐལ་ཟེར། སྔ་མ་ལྟར་ན། གཏན་ཚིག་མ་གྲུབ་ཅིང་མངོན་སུམ་གྱིས་གསལ་ལོ་ཞེ་ན། མངོན་སུམ་འཁྲུལ་མ་འཁྲུལ་གྱི་བརྟག་པ་དྲིས་ཤིག་དང་། ཕྱི་མ་ལྟར་འཁྲུལ་པར་སྣང་ཡང་དེ་དོན་ལ་མེད་དེ། འཁྲུལ་པ་རྩིས་སུ་མི་ཆེ་བ་ཉིད་དོ། །སྤྱི་དོན་གཉིས་པ། ཆོས་ཉིད་མིན་ན་ལུང་མན་ངག་རིགས་པ་གསུམ་དང་འགལ་ཏེ། ལུང་མན་ངག་དང་པོས་ཆོས་ཉིད་ཡིན་པར་བསྟན་པ་རྣམས་སོ། །རིག་པར་ལུང་སྟེ། དང་པོ་ཁྱོད་ཆོས་ཅན། སྣང་བ་ཆོས་ཉིད་མིན་ན་ཆོས་ཉིད་ཆད་པར་ཐལ། འདོད་ན་མུ་སྟེགས་ཆད་པ་བདེན་པར་ཐལ། སྣང་བ་ཆོས་ཉིད་མིན་པའི་ཕྱིར་རོ། །གཉིས་པ། སྣང་བ་ཆོས་ཉིད་མིན་ན་སྟོང་པའང་ཆོས་ཉིད་མིན་པར་ཐལ། འདོད་ན་ཆོས་ཉིད་གཏན་ནས་མི་སྲིད་པ་ཐལ་བའི་སྐྱོན་ཡོང་ངོ་། །ཅིའི་ཕྱིར་ན་སྣང་སྟོང་ངོ་བོ་གཅིག་པ་ཡིན་པའི་ཕྱིར་རོ། །གསུམ་པ། སྣང་བ་ཆོས་ཉིད་མིན་ན་འགྲོ་དྲུག་གིས་ལམ་ཉམས་སུ་བླངས་ཀྱང་གྲོལ་ཐར་གཏན་ནས་མི་འབྱུང་བར་ཐལ། འདོད་ན་ལམ་ཉམས་སུ་བླངས་པ་དོན་མེད་དུ་ཐལ། འགྲོ་དྲུག་གི་སྣང་བ་ཆོས་ཉིད་མིན་པའི་ཕྱིར་རོ། །སྣང་སྟོང་ལ་འབྲེལ་བ་མེད་པར་ཐལ་བས་སྣང་བ་བདེན་ཅིང་རྟག་པར་ཐལ་བའམ། མིན་ཀྱང་འབྱུང་ན་གཤགས་མ་ལས་ཀྱང་མྱུ་གུ་འབྱུང་བར་ཐལ་བ་དང་། གྲོལ་ཐལ་དེ་འདུས་བྱས་སུ་ཐལ་བ་ལ་སོགས་པའི་སྐྱོན་འབྱུང་ངོ་། །བཞི་པ། སྣང་བ་ཆོས་ཉིད་མིན་ན་ཆོས་ཉིད་མངོན་སུམ་དུ་རྟོགས་ཤིང་བདེན་པ་མཐོང་བ་རྒྱན་ཆད་པར་ཐལ། འདོད་ན་ཆོས་བྱེད་པ་དོན་མེད་པར་ཐལ། སྣང་བ་ཆོས་ཉིད་མིན་པའི་ཕྱིར། སྣང་བ་མིན་ཀྱང་སྟོང་པས་མཐོང་ངོ་ཞེ་ན། སྟོང་པ་ཡིན་པའི་ཕྱིར། སྟོང་མཁན་ཀྱང་མེད་པའི་སྐྱོན་ཡོང་ངོ་། །ལྔ་པ། སྣང་བ་ཆོས་ཉིད་མིན་ཞིང་འཁྲུལ་པ་ཡིན་ན་ཐམས་ཅད་མཁྱེན་པའི་ཡེ་ཤེས་ཀྱང་འཁྲུལ་པར་ཐལ། འདོད་ན་སངས་རྒྱས་ཀྱང་དོན་མེད་པར་ཐལ། སྣང་ཚད་འཁྲུལ་པ་ཡིན་པའི་ཕྱིར་རོ། །དེས་ན་སྣང་བ་ཆོས་ཉིད་དུ་མི་འདོད་པ་ནི། རང་སྣང་ལ་ཡུལ་དུ་མཐོང་། ཕྱོགས་མེད་ལ་ཕྱོགས་སུ་བཟུང་ནས་གནས་ལུགས་ཀྱི་དོན་མ་གོ་བར། ནམ་མཁའ་མཐའ་མཉམ་ལས། ཡེ་ཤེས་བསམ་ཡས་རང་བཞིན་ལས། །རྣམ་རྟོག་དྲྭ་བས་སོ་སོར་བཅིང་། །དེ་ཉིད་རང་གསལ་མ་རྟོགས་པས། །ལོང་བའི་གྲོང་ཁྱེར་ཆེན་པོར་འགྲོ། །ཞེས་དང་། ཀློང་ཆེན་ལས། ཕྱོགས་མེད་ལྷུན་གྲུབ་མ་གཏོགས་པས། །ལྟ་བའི་འདོད་ལུགས་དུ་མ་བྱུང་། །བློ་དང་ཆོས་སུ་མ་འདྲེས་པས། །མཉམ་ཉིད་ལྟ་ལ་ཕྱོགས་སུ་ཞེན། །ཀུན་ཤེས་རིག་པ་མི་སྐྱེས་པས། །ཡུལ་མེད་གཅིག་པ་རིས་སུ་གཅོད། །རང་བྱུང་ཡེ་ཤེས་མ་ཤར་བས། །མུན་པའི་ཀློང་ན་ཚོད་ཀྱིས་མཇལ། །ཞེས་གསུངས་པའི་ཕྱིར་རོ། །ཕྱོགས་གཞན་དུ་འདོད་པ་ཡང་མི་འཐད་དེ། མ་རྟོགས་པའི་དུས་ཀྱི་ཆོས་ཉིད་མིན་པ་དང་། རྟོགས་པའི་དུས་ཀྱི་ཡིན་པ་གཉིས་གང་བདེན། སྔ་མ་བདེན་ན་ཕྱི་མ་འགལ་ལ། །ཕྱི་མ་བདེན་ན་སྔ་མ་འགལ་ལོ། །དེ་གཉིས་མཉམ་པ་ཡིན་པའང་མི་འཐད་དེ། གཞི་གཅིག་ལ་ཡིན་མིན་གཉིས་འགལ་བས་མི་རིགས་སོ། །ཡང་མ་རྟོགས་དུས་མིན་ན། རྟོགས་པའི་དུས་ཡིན་པའང་འགལ་ཏེ། དེ་རྟོགས་པ་མ་ཡིན་ཞིང་ལོག་ཤེས་སུ་ཐལ་བའི་སྐྱོན་འོང་ངོ་། །གཉིས་པ་མ་འདྲེས་པ་དེ་ཡོངས་རྫོགས་ཡིན་ནམ་མིན། མིན་ན་ཡོངས་རྫོགས་ཀྱི་ངེས་ཚིགས་མིན་ལ། ཡིན་ན་ཡོངས་རྫོགས་ཀྱི་ངེས་ནས་ཆོས་ཉིད་ཡིན་པ་ལྟར། མ་འདྲེས་པའི་ངོས་ནས་ཀྱང་ཡིན་པར་ཐལ་ལོ། །འདོད་ན་མ་འདྲེས་པའི་ངོས་ནས་ཆོས་ཉིད་མིན་པའི་དམ་བཅའ་དེར་ཐལ། མ་འདྲེས་པ་ཉིད་ཡོངས་སུ་རྫོགས་པའི་ཕྱིར་རོ། །དེ་བཞིན་མ་འདྲེས་པའི་ངོས་ནས་བརྗོད་པར་བྱའོ། །གསུམ་པ། མཚོན་ཚུལ་དེ་ངོ་བོ་ཡིན་ནམ་མིན། མིན་ན་ངོ་བོ་གཅིག་པའི་དམ་བཅའ་བུད། ཡིན་ན་ངོ་བོ་ཆོས་ཉིད་ཡིན་པ་ལྟར། མཚོན་ཚུལ་ཀྱང་ཆོས་ཉིད་ཡིན་པར་ཐལ། འདོད་ན་མིན་པའི་དམ་བཅའ་ཐལ། ངོ་བོའི་མཚོན་ཚུལ་ཡིན་པའི་ཕྱིར། ཁྱབ་པ་མ་གྲུབ་ཅེ་ན། གསེར་ལས་བྱེད་པའི་གཟུགས་སྣ་ཚོགས་ལ་གསེར་གྱིས་མ་ཁྱབ་ཅེས་མགོ་བསྒྲེའོ། །སྤྱི་དོན་གསུམ་པ་ཆོས་ཉིད་ཡིན་པར་གཏན་ལ་དབབ་ན། ལྷ་རྗེ་རྔོད་ཕུ་བས། འགྲོ་དྲུག་གི་སྣང་བ་འདི་མ་སྤངས་པའི་ངོས་ནས་ཆོས་ཉིད་ཡིན་ལ། མི་ལྡན་པའི་ངོས་ནས་མིན་པར་གསུངས་ཏེ། བརྡ་དོན་སྤྲད་པའི་ངོས་ནས་ཡིན། བླ་མ་ཟུར་པོ་ཆེ་དཔལ་ཧེ་རུ་ཀས་ཆོས་ཀུན་ཇི་ལྟར་སྣང་ཡང་རང་བྱུང་གི་ཡེ་ཤེས་རང་སྣང་བས། ཆོས་ཉིད་དུ་མ་གྱུར་པའི་ཆོས་གཅིག་ཀྱང་མེད་དེ་སྣང་བ་ཆོས་ཉིད་ཡིན་གསུངས། ཤར་ཀཿཐོག་པ་ཡབ་སྲས་གསུམ་གྱིས་བཞེད་པ། ཆོས་སྣང་བ་ཐམས་ཅད་འཁྲུལ་སྣང་བསལ་དུ་མེད་པ་ངོ་བོ་ཉིད་ཀྱིས་ཡེ་ཤེས་རྡོ་རྗེའི་དཀྱིལ་འཁོར་ནི། རང་བཞིན་ལྷུན་གྱིས་གྲུབ་པའི་བཏགས་གཞི་ཙམ་དུ་རྒྱ་ཆེར་གསུངས་ཤིང་། རྒྱལ་བ་རོང་ཀློང་དག་གིས་ཀྱང་དེ་ལྟར་བཞེད་པར་མངོན་ནོ། །དེ་ལྟ་བུའི་ལུང་ནི། ནང་རྒྱུད་སྡེ་གསུམ་དུ་བཞུགས་པ་དུ་མ་ཉིད་ལས། རིགས་པ་ནི། འགྲོ་དྲུག་གི་སྣང་བ་འདི་ཆོས་ཅན། ཆོས་ཉིད་རང་སྣང་ཡིན་ཏེ། ཡུལ་དུ་འཛིན་པ་འཁྲུལ་བའི་སྣང་བ་ཡིན་པའི་ཕྱིར་རོ། །ཡང་སྣང་བ་རང་སྣང་ཕྱོགས་མེད་ཡིན་ཏེ། ཕྱོགས་སུ་འཛིན་པ་འཁྲུལ་པ་ཡིན་པའི་ཕྱིར་རོ། །གཏན་ཚིགས་ནི། ཡུལ་འཛིན་དང་ཕྱོགས་འཛིན་འཁྲུལ་པ་ཡིན་པས། འཁྲུལ་པ་ཡིན་པའི་ཕྱིར་གཤིས་ཆོས་ཉིད་ཡིན་ནོ། །དེས་ན་སྣང་བ་ཆོས་ཉིད་ཡིན་པ་དེས་མ་རྟོགས་འཁྲུལ་པ་ཡིན་པ་དེ་ཀས་གཤིས་ཆོས་ཉིད་ཡིན་ནོ། །དེ་ལྟར་ཡིན་པ་དེ་ཀས་གཤིས་ཕྱོགས་མེད་ཡིན། གཤིས་ཕྱོགས་མེད་ཡིན་པས་ཕྱོགས་འཛིན་འཁྲུལ་པ་ཡིན་ནོ། །དེ་བས་ན་སྣང་བ་རང་སྣང་ཕྱོགས་མེད་རང་གྲོལ་ཆོས་ཉིད་ཆེན་པོར་གྲོལ་བ་ནི། གསང་སྔགས་ཀྱི་དགོངས་པའི་ཕུག་ལོངས་པས་སྣང་བ་ལྷར་བསྒྲུབ་པ་ལ་ཐོག་མར་འདི་ལ་ངེས་པ་རྙེད་པའི་ཚེ་ན་ཆོས་ཉིད་ཀྱི་རིགས་པ་གྲུབ་སྟེ། གཞན་རིགས་པ་གསུམ་པོ་ཤུགས་ཀྱིས་གྲུབ་འོང་བས་དེ་དག་ནི། དཔལ་ལྡན་ཟུར་བའི་བཤད་སྲོལ་དང་། རྒྱལ་བ་རོང་ཀློང་གཉིས་ཀྱི་གཞུང་ལས་ལེགས་པར་ཤེས་དགོས་ཤིང་། འདི་རྟོགས་ལྡན་ཆོས་རྗེ་ཀཿཐོག་པ་མཁས་གྲུབ་ཤཱཀྱ་རྡོ་རྗེའི་བཞེད་པའི་ཚུལ་བསྙད་པ་ཡིན་ནོ། །གང་ཞིག་བསྟན་པས་དཔལ་ལྡན་སྙིང་པོའི་གནད། །ཚུལ་བཞིན་སེམས་པའི་སྐལ་བཟང་ཐོབ་བྱེད་པ། །ཡོངས་འཛིན་དམ་པའི་ཚོགས་ཀྱི་ཞབས་པད་མོར། །གུས་པས་འདུད་དོ་མཆོག་ཐུན་དངོས་གྲུབ་སྩོལ། །རྟོག་གེས་ཆོས་ཉིད་མཇལ་བའི་བྱིས་པ་དང་། །མཚོན་ཐབས་གཏན་ཚིགས་མི་དགོས་སྟོན་པ་ལ། །དཔྱོད་བྲལ་ཐོས་ལྡན་ཁེངས་པའི་མཁས་རློབས་རྣམས། །རྡོ་རྗེ་ཐེག་པའི་ལམ་ལས་ཕྱི་རོལ་སོགས། །ཟུང་འཇུག་སྒྱུ་འཕྲུལ་དྲྭ་བ་རྒྱུད་ཀྱི་རྒྱལ། །ལེགས་བཤད་གཞུང་བརྒྱ་བླ་མའི་དྲིན་དག་ལས། །མཐོང་བའི་ཟབ་གནད་དཔྱོད་ཅིང་བསྡུས་འདིས་ཀྱང་། །སྐལ་བཟང་མཚར་སྡུག་བྱེད་པའི་རྒྱན་གྱུར་ཅིག །ཆོས་གྲལ་ཆེན་མོ་ཀཿཐོག་ཏུ་རིས་མེད་པའི་བསྟན་པ་རིན་པོ་ཆེ་ལ་དག་པའི་འཛུམ་དཀར་འབུལ་བ་སྤྲུལ་མིང་ཆོས་ཀྱི་རྒྱ་མཚོ་བས་བློ་གསར་བུ་དག་ལ་རྒྱུད་འཆད་པའི་སྐབས་སུ་སྦྱར་བའོ། ༈ །རྒྱུད་ཀྱི་རྒྱལ་པོ་གསང་བ་སྙིང་པོའི་དོན། །རྒྱུད་རྣམ་ཀུན་གྱི་རྒྱལ་པོའི་སྙིང་ཁུ་རུ། །ངེས་པར་རྙེད་ནས་སྐལ་པ་བཟང་པོ་རུ། །འདི་འདྲ་མཇལ་བ་ཙམ་གྱིས་ཡིན་པར་རྟོགས། །འོན་ཀྱང་སྙིགས་མ་ལས་ཀྱང་སྙིགས་མའི་དུས། །འདི་འདྲར་གཏན་བདེ་ཚེ་འདི་ལ་རེག་པའི། །ཐབས་མཆོག་དོར་ནས་མི་འདོད་སྡུག་བསྔལ་རྒྱུར། །འཇུག་པའི་ཡིད་ནི་བདུད་ཀྱི་ལྕགས་ཀྱུ་དེས། །དྲངས་པ་ཁོ་ནར་མཐོང་བས་ཚུལ་འདི་ལ། །སྙིང་ནས་བསྒོམ་དང་སྒྲུབ་པ་བྱ་བར་རྟོགས། །དེ་སླད་དུའང་འདི་ན་ཅུང་ཟད་དུ། །སྨྲས་པས་ཕན་པ་རང་ལས་དབེན་པ་རུ། །ཤེས་ཀྱི་གཅིག་པུར་ཡིད་ཀྱིས་འདུ་བྱེད་པས། །སྤངས་ནས་འདི་དག་སྒྲོལ་བའི་ལམ་བཟང་པོར། །རྩེ་གཅིག་ཏུ་ཡང་འཇུག་པར་བྱ་སྙམས་མོད། །དེ་འདྲ་དེ་ཡང་བསྟན་པའི་སྙིང་པོ་ཉིད། །ཤིན་ཏུ་ཉམས་པར་གྱུར་པ་མ་བཟོད་ནས། །བདག་གི་ཁ་ནས་གང་བྱུང་འདི་ན་ཐལ། །ཅེས་པའང་སི་ཏུ་པས་སོ།། །།

དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་། རྒྱལ་བའི་སྲས་པོ་གཞན་ཕན་མཐའ་ཡས།

དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་འཁོར་འདས་བར་གྱི་ལོ་ཙཱ་ཞེས་བྱ་བ་བཞུགས།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །པདྨའི་སྐྱེ་གནས་ལས་འབྱུང་ཕན་བདེ་ཡི། །འབྱུང་གནས་དྲི་མེད་ཐུགས་རྗེའི་འོད་ཟེར་ཅན། །སྐྱེ་རྒུའི་ཉི་མ་གྲུབ་དབང་རྫོགས་ཆེན་པ། །ཡབ་སྲས་དབྱེར་མེད་བདག་བློའི་པད་མོར་རོལ། །ཞེས་མཆོད་པར་བརྗོད་པས་མདུན་བསུས་ཏེ་རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་དྲྭ་བ་རྩ་བའི་རྒྱུད་འཕགས་པ་རྟོག་པའི་རྒྱལ་པོ་ལུང་གི་སྤྱི་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་ས་བཅད་ཅུང་ཟད་ཅིག་འགོད་པར་བྱ་བ་ལ། ཐོག་མར་ཇི་ལྟར་བྱུང་བའི་ལོ་རྒྱུས་དང་། རྒྱུད་དོན་དངོས་གཉིས་ལས། དང་པོ་ལའང་སྒྱུ་འཕྲུལ་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །གང་ལ་ཐུག་གི་བར་དུའོ། །ཞེས་པ་ལྟར། རྒྱལ་བ་དགོངས་བརྡའི་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་རྣ་བར་བརྒྱུད་པ་སྡེ་གསུམ་ལས། དང་པོ་ལའང་དགོངས་བརྒྱུད་དང་བརྡ་བརྒྱུད་གཉིས། གཉིས་པ་ལ་རིག་འཛིན་མི་མ་ཡིན་གྱི་བརྒྱུད་པ་དང་། མི་དང་མི་མ་ཡིན་གཉིས་ཀའི་བརྒྱུད་པ་སྟེ་གཉིས། གསུམ་པ་ལ་རྒྱ་གར་པ་དང་། བོད་ནས་བརྒྱུད་ཚུལ་གཉིས་རྣམས་ཡོད། གཉིས་པ་རྒྱུད་དོན་དངོས་བཤད་པ་ལ། བཤད་བྱའི་ཡན་ལག་བསྟན་པ་དང་། བཤད་བྱ་དངོས་བཤད་པ་གཉིས་ལས། དང་པོ་ལ་བཤད་བྱ་དམ་པའི་ཆོས་ངོས་བཟུང་བ་དང་། འཆད་བྱེད་ཀྱི་ཆོས་ངོས་བཟུང་བ་དང་། ཇི་ལྟར་འཆད་པའི་ཚུལ་ཏེ་གསུམ་དུ་ཡོད་པ་ལས། དང་པོ་ནི། སྤྱིར་སྔགས་ལ་རྒྱུད་སྡེ་དྲུག་ཏུ་ཡོད་པ་ལ། འདིར་གང་བཤད་པར་བྱ་བ་ནི་མ་ཧཱ་ཡོ་ག །དེ་ལའང་ཏནྟྲ་སྡེ་བཅོ་བརྒྱད་ཡོད་པ་ལས། སྤྱི་རྒྱུད་སྒྱུ་འཕྲུལ་དྲྭ་བ། དེ་ལའང་ནང་གསེས་སྒྱུ་འཕྲུལ་སྡེ་བརྒྱད་དང་བཤད་རྒྱུད་སྡེ་བཞི་སྟེ་བཅུ་གཉིས་ཡོད་པའི་ནང་ནས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཉིད་དེ་བཤད་བྱ་ངོས་བཟུང་བའོ། །གཉིས་པ་འཆད་བྱེད་ནི། བཤད་རྒྱུད་མེ་ལོང་ལས། ལུང་དང་རིག་པ་མན་ངག་གི། །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་པ་ལྟར་ལུང་རིག་མན་ངག་གསུམ་གྱིས་འཆད་དགོས་པའི་དང་པོ་ནི་རྒྱལ་བའི་བཀའ་ལུང་སྤྱི་དང་བྱེ་བྲག་བཤད་རྒྱུད་སྡེ་བཞིའི་ལུང་ཚད་མའོ། །གཉིས་པ་མན་ངག་ཚད་མ་ནི་རྒྱ་བོད་ཀྱི་མཁས་གྲུབ་རྣམས་ཀྱིས་མཛད་པའི་འགྲེལ་པ་རྣམས་དང་། བླ་མ་དམ་པའི་ཞལ་གྱི་གདམས་པ་རྣམས་སོ། །གསུམ་པ་རིག་པ་ཚད་མ་ནི། དེ་གཉིས་ཀ་དང་རྗེས་སུ་མཐུན་པར་རང་གི་བློས་དཔག་པའོ། །གསུམ་པ་ཇི་ལྟར་འཆད་པའི་ཚུལ་ལ་མ་ཧཱ་ཡོ་ག་སྤྱིའི་འཆད་ཚུལ་རྒྱན་བདུན་གྱི་སྒོ་ནས་འཆད་པ་དང་། ཟུར་པོ་ཆེའི་ཕྱག་བཞེས་མདའ་ལྟར་རྩེ་མོ་ནས་བཟུང་སྟེ་འཆད་པ་སོགས་གསུམ་དང་། སྒྲོ་ཕུག་པའི་ཕྱག་བཞེས་ཆོས་ལྔའི་སྒོ་ནས་འཆད་པ་རྣམས་ཡིན་མོད་དེ། འདིར་ནི་བི་མ་ལའི་ཁོག་གཞུང་གསལ་སྒྲོན་གྱི་དགོངས་པ་ལྟར་འཆད་པ་ཡིན་ནོ། །གཉིས་པ་བཤད་བྱ་དངོས་བཤད་པ་ལ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། ཐ་མ་འབྲུ་གཉེར་དཀྲོལ་བའོ། །ཞེས་པ་ལྟར་གསུམ་ལས། དང་པོ་དབང་པོ་རབ་ལ་རྒྱུད་ཀྱི་མཚན་བསྟན་པ་ལའང་། རབ་མཚན་ཐ་སྙད་གསུམ་དུ་གྲགས། །ཞེས་པ་ལྟར་རྒྱུད་དང་མཐུན་པའི་མཚན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་བཤད་པ་དང་། ལུང་དང་མཐུན་པའི་མཚན་འཕགས་པ་རྟོག་པའི་རྒྱལ་པོ་ལུང་གི་སྤྱི་བཤད་པ་དང་། མན་ངག་དང་མཐུན་པའི་མཚན་གསང་བའི་སྙིང་པོ་དེ་ཁོ་ན་ཉིད་ངེས་པར་བཤད་པ་སྟེ་གསུམ་མོ། །དེ་དག་ལ་ནང་གསེས་ཀྱི་དབྱེ་བའང་མང་དུ་ཡོད་དོ། ༈ །གཉིས་པ་དབང་པོ་འབྲིང་ལ་རྒྱུད་དོན་རྣམ་པར་དབྱེ་བ་ལའང་དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བ་གཉིས་ལས། དང་པོ་ལའང་རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་སློང་། འབྲས་བུ་ཡོངས་ཤེས་རྒྱུད་དོན། རྒྱུད་ཀྱི་དགོངས་འགྲེལ། འཁོར་ལ་གདམས་ཤིང་བསྟན་པ་གཏད་པ་སྟེ་ལྔ་ལས། དང་པོ་ལའང་ཐུན་མོང་མ་ཡིན་པའི་དང་། ཐུན་མོང་གི་གླེང་གཞི་གཉིས་ལས། དང་པོ་ལ་ཡང་། ཕྱི་གྲོལ་ལམ་ལྟར་རྒྱུད་འབྱུང་བ་ཁྱད་པར་གྱི་གླེང་གཞི་དང་སྦྱར་ཏེ་བཤད་པ་དང་། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་ཐབས་ལམ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་སྟེ་གསུམ་ཡོད། གཉིས་པ་ཐུན་མོང་ལའང་། རྒྱུད་འབྱུང་བ་ཁྱད་པར་གྱི་གླེང་གཞིའམ་ལོངས་སྐུའི་གླེང་གཞི་དང་གཅིག །གདུལ་བྱ་དགོས་ཆེད་ཀྱི་གླེང་གཞིའམ་ཁྲོ་བོའི་གླེང་གཞི་དང་གཉིས། འགྲོ་བ་འདུལ་བའི་གླེང་གཞིའམ་སྤྲུལ་སྐུའི་གླེང་གཞི་སྟེ་གསུམ་ཡོད། དེ་དག་རེ་རེ་བཞིན་ཕུན་སུམ་ཚོགས་པ་ལྔ་ལྔའི་བདག་ཉིད་ཅན་ཏེ། དེ་ལྟར་ཐུན་མིན་དང་ཐུན་མོང་བསྡོམས་པས་དྲུག་གོ། ༈ །གཉིས་པ་རྒྱུད་འབྱུང་བའི་རྐྱེན་གླེང་སློང་ལའང་། ཐུན་མོང་མ་ཡིན་པའི་གླེང་སློང་དང་། ཐུན་མོང་གི་གླེང་སློང་གཉིས་ལས། དང་པོ་ལའང་ཡབ་ཀྱིས་ཐབས་ཀྱི་ཆ་བཟུང་སྟེ་གླེང་སློང་བ་དང་། ཡུམ་གྱིས་ཤེས་རབ་ཀྱི་ཆ་བཟུང་སྟེ་གླེང་སློང་བ་དང་། ཡབ་ཡུམ་གཉིས་མེད་ཀྱིས་ཐབས་ཤེས་དབྱེར་མེད་ཀྱི་ཆ་བཟུང་སྟེ་གླེང་སློང་དང་། གསུམ་ཡོད་པ། དེ་ལས་ཕྱི་མ་ལའང་གཞི་རང་བཞིན་གྱི་སེམས་བསྐྱེད། བསྒྲོད་པ་ལམ་གྱི་སེམས་བསྐྱེད། མཐར་ཕྱིན་འབྲས་བུའི་སེམས་བསྐྱེད་དང་གསུམ་དུ་སྦྱར་ཚུལ་ཡོད། དེ་དག་ལ་བརྟེན་ནས་འཁོར་རྣམས་ཀྱིས་རིམ་བཞིན་ལྷག་པ་ཀུན་རྫོབ་ཀྱི་བདེན་པ་དང་། ལྷག་པ་དོན་དམ་གྱི་བདེན་པ་དང་། ལྷག་པའི་བདེན་པ་དབྱེར་མེད་རྣམས་རྟོགས་ནས་སྟོན་འཁོར་དགོངས་པ་དབྱེར་མེད་དུ་གྱུར་ཏེ་རང་དོན་དུ་རྒྱུད་ཞུ་མ་དགོས་པའོ། །གཉིས་པ་ཐུན་མོང་གི་གླེང་སློང་ལའང་གཞན་དོན་དུ་རྒྱུད་གསུངས་པར་འཁོར་གྱིས་ཞུས་པ་དང་། སྟོན་པས་ལན་སྩལ་བ་གཉིས་ཏེ། བསྡོམས་པས་ལྔའོ། ༈ །གསུམ་པ་འབྲས་བུ་ཡོངས་སུ་ཤེས་པར་བྱ་བ་རྒྱུད་དོན་དངོས་ལའང་རྒྱུད་གསུམ་གྱི་རྣམས་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ལའང་། གཞི་རྒྱུད་བཤད་པ་དང་། ལམ་རྒྱུད་བཤད་པ་དང་། འབྲས་རྒྱུད་བཤད་པ་དེ་གསུམ་ཡོད་པའི་དང་པོ་ལའང་། ངོ་བོའི་གཞི་དང་བརྟགས་པའི་གཞི་གཉིས་ཡོད། གཉིས་པ་ལམ་ལའང་། ཐབས་ཀྱིས་ངེས་པའི་ལམ་དང་། ཤེས་རབ་ཀྱིས་རྣམ་པར་གྲོལ་བའི་ལམ་གཉིས་ཡོད། དང་པོ་ཐབས་ལམ་ལའང་། ངོ་བོ། ངེས་ཚིག །དབྱེ་བ་གསུམ་གྱི་ངོ་བོ་ལ་སེམས་ལྔ་ཡོད། ངེས་ཚིག་ལ་དཔེ་དཔེ་ཅན་གཉིས་ཡོད། དབྱེ་ན་ཐབས་ལམ་གཅིག་ཅར་བ་སྟེ་འོག་སྒོའི་ལམ་དང་། རིམ་གྱིས་པ་སྟེང་སྒོའི་ལམ་གཉིས་ཡོད། ༈ གཉིས་པ་གྲོལ་ལམ་པ་ལའང་། ངོ་བོ་ངེས་ཚིག་དབྱེ་བ་གསུམ་ཡོད། ངོ་བོ་ནི་སེམས་ལྔ་ཡིན་ཀྱང་ཐབས་ལམ་དང་ཅུང་ཟད་མི་འདྲ་བའི་གོང་འོག་འཁྲུགས་སྡེབས་ཡོད། ངེས་ཚིག་ནི་འདྲ། དབྱེ་ན་གྲོལ་ལམ་གཅིག་ཅར་བ་དང་། རིམ་གྱིས་པ་གཉིས་ཡོད། དེ་གཉིས་ཀའི་ལམ་གྱི་ཁོག་མཚན་ཉིད་གསུམ་གྱིས་འབུ་བ་དགོས་ཏེ། དེ་ཡང་རྩ་རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པ་ལྟར། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུའི་མཚན་ཉིད་རིག་འཛིན་བཞི་སྟེ་གསུམ་ལས། དང་པོ་ལའང་གཞལ་བྱ། འཇལ་བྱེད། གྲུབ་མཐའ་དང་གསུམ་ལས། དང་པོ་ནི། འཁོར་འདས་གཉིས་སུ་ཞེན་པ་སྒྲོ་བཏགས་དང་བཅས་པའོ། །གཉིས་པ་ལ་དབྱེ་ན། རྒྱུ་གཅིག་པའི། ཡིག་འབྲུའི་ཚུལ་གྱིས། བྱིན་གྱིས་བརླབས་པའི། མངོན་སུམ་པའི་གཏན་ཚིགས་ཏེ་རྟོགས་པ་བཞིའི་གཏན་ཚིགས། སྣོད་བཅུད་རྒྱུད་གསུམ་དག་པ་སྟེ་དག་པ་གསུམ་གྱི་གཏན་ཚིགས། ཐུན་མོང་གི་མཉམ་པ་གཉིས་དང་ལྷག་པའི་མཉམ་པ་གཉིས་ཏེ་མཉམ་པ་བཞིའི་གཏན་ཚིགས། བདག་ཉིད་ཆེན་པོའི་གཏན་ཚིགས་ཏེ་གཏན་ཚིགས་བཞི་ཡོད། གསུམ་པ་ནི། གཏན་ཚིགས་དེ་དག་གི་རིམ་པ་ལྟར་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བར་གཏན་ལ་ཕེབས་པ་ནི་སྔགས་བླ་མེད་ཀྱི་ལྟ་བའི་གྲུབ་མཐའ་འོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལའང་། བསྐྱེད་པའི་རིམ་པའི་ཏིང་ངེ་འཛིན་དང་། རྫོགས་པའི་རིམ་པའི་ཏིང་ངེ་འཛིན་གཉིས་ཡོད། དེ་གཉིས་ཀའི་ལམ་གྱི་གཞུང་ཤིང་། སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཉིས་པ། ཕྱག་རྒྱ་སྤྲོས་བཅས་ཏེ་ཟག་ལྡོག་གཉིས་ལྡན་ཚོགས་ལམ་གྱི་རྣལ་འབྱོར་བཞི་དང་། བྲག་བཅས་ལྡོག་པ་མེད་པ་སྦྱོར་ལམ་གྱི་རྣལ་འབྱོར་ཚོམ་བུ་ཚོགས་བསྒྲུབ་སྟེ་ལྔ་རེར་ངེས་པ་ལས། དང་པོ་ལ་རིག་པ་སྤྱི་བླུགས་སུ་འཇོག་པ་དང་། མཐོང་བའི་རྗེས་ལ་འཇོག་པ་སྟེ་འཇོག་ཐབས་གཉིས་ཡོད། གཉིས་པ་ལ་དམིགས་བཅས་དང་དམིགས་མེད་གཉིས་ཡོད། གསུམ་པ་ལ་ཕྲ་བ་ཡིག་འབྲུ་ལ་བསླབ་པ་དང་། རིག་པ་ལྷ་སྐུ་ལ་བསླབ་པ་གཉིས་ཡོད། བཞི་པ་ལ་དཀྱིལ་འཁོར་སྤྲོས་པ། ཚོམ་བུ་སྤྲོས་པ། གྲངས་སྤྲོས་པ། ཞལ་ཕྱག་སྤྲོས་པ་དང་བཞི་ཡོད། དེ་དག་ལའང་ནང་གསེས་རྒྱས་འབྲིང་བསྡུས་པའི་དབྱེ་བ་འགའ་ཞིག་ཀྱང་ཡོད་དོ། ༈ །ལྔ་པ་ཚོམ་བུ་ཚོགས་སྒྲུབ་ལའང་ཕུན་སུམ་ཚོགས་པ་ལྔས་གཞི་བཟུང་བ་དང་། བསྙེན་བསྒྲུབ་ཡན་ལག་བཞིས་གཞུངས་བསྲངས་བ། འབྲས་བུ་རིག་འཛིན་འགྲུབ་པའི་དུས་བསྟན་པ་སྟེ་གསུམ་ཡོད། ༈ གསུམ་པ་ལམ་གྱུར་གྱི་འབྲས་བུའི་མཚན་ཉིད་ལའང་། མཐོང་སྒོམ་མཐར་ལམ་གསུམ་གྱིས་བསྡུས་པའི་རིག་འཛིན་རྣམ་པ་བཞི་ལས། དང་པོ་རྣམ་སྨིན་རྡོས་བཅས་ཀྱི་ཕུང་པོའི་སྦུབ་ནས་སེམས་ལྷའི་སྐུར་ཡོངས་སུ་སྨིན་པ་རྣམ་སྨིན་རིག་འཛིན་དང་། རྣམ་སྨིན་སྙིགས་མའི་ལུས་ཀྱང་དྭངས་མའི་ལུས་སུ་ཚེ་འདིར་བསྒྱུར་ནུས་པ་ཚེ་དབང་རིག་འཛིན་ཏེ། འདི་གཉིས་བློའི་ནུས་སྟོབས་ཆེ་ཆུང་གི་ཁྱད་མ་གཏོགས་སྔགས་ཀྱི་མཐོང་ལམ་པའོ། །ཕྱག་ཆེན་རིག་འཛིན་ནི་སྒོམ་ལམ་པ་སྟེ། དེའང་དབྱེ་ན། རྡོ་རྗེའི་རིག་འཛིན་དང་། འཁོར་ལོའི་རིག་འཛིན་དང་། རིན་པོ་ཆེའི་རིག་འཛིན་དང་། པདྨ་རིག་འཛིན་དང་། རལ་གྲིའི་རིག་འཛིན་ཏེ། ལྔ་ཡོད། ལྷུན་གྲུབ་རིག་འཛིན་ནི་མི་སློབ་པའི་ལམ་པ་སྟེ། རྒྱུའི་ཐེག་པའི་ཀུན་ཏུ་འོད་དུ་བཏགས་པ་དེ་དང་ཚུལ་གཅིག་པའོ། ༈ །གསུམ་པ་འབྲས་རྒྱུད་ལའང་སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། འཕྲིན་ལས་ལྔ་སྟེ་འབྲས་ཆོས་ཉི་ཤུ་རྩ་ལྔ་ཡོད། ༈ དོན་གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་ཡང་། ལུང་ལས། ལྟ་༡སྤྱོད་༢དཀྱིལ་༣འཁོར་དབང་༤དམ་ཚིག༥ །མཆོད་༦སྔགས་༧ཏིང་༨འཛིན་འཕྲིན་༩སྒྲུབ་༡༠ཀྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ་བཀོད་པ་དཀྱིལ་འཁོར། རིམ་པ་བསྒྲོད་པ་དབང་། མི་འདའ་བ་དམ་ཚིག །གནས་སུ་སྟོབས་པ་མཆོད་པ། འཆིང་ཟློས་སྔགས་དང་ཕྱག་རྒྱ། མི་གཡོ་བ་ཏིང་ངེ་འཛིན། རོལ་བ་འཕྲིན་ལས། དོན་དུ་གཉེར་བ་བསྒྲུབ་པ་སྟེ་བཅུ་ཡོད་པ་ལ། དེ་དག་རེ་རེ་བཞིན་ངོ་བོ་སོགས་བཅུ་གཅིག་རེར་དབྱེ་བའི་ཚུལ་ཡོད་ཀྱང་། འདིར་ངོ་བོ་ངེས་ཚིག །དབྱེ་བ་གསུམ་རེར་དབྱེ་བ་ལས། ངོ་བོ་དང་ངེས་ཚིག་རྣམས་ནི་འགྲེལ་བ་ལས་རྟོགས་པར་བྱ། དབྱེ་བ་ནི། དང་པོ་ལྟ་བ་ལ་ལམ་གྱི་རིམ་པའི་ལྟ་གྲངས་དགུ་དང་། ཉམས་སུ་བླང་བྱ་རྒྱུད་ཀྱི་ལྟ་གྲངས་དགུ་སྟེ་བསྡོམས་པ་བཅོ་བརྒྱད་དང་། ཤེས་རབ་ཀྱི་ཚོགས་བརྒྱད་ལ་སོགས་པ་དང་། གཞན་ཡང་དབང་རབས་ཀྱིས་གོང་དུ་སྨོས་པའི་གཏན་ཚིགས་རྣམས་ལ་བརྟེན་ནས་རྟོག་པར་བྱ་བ་དང་། དབང་འབྲིང་གིས་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་དང་། དབང་པོ་ཐ་མས་ཐབས་ཉེ་རིང་གཉིས་ལ་བརྟེན་ནས་རྟོགས་པར་བྱ་བ་སོགས་རྟོགས་བྱ་རྟོགས་བྱེད་སོ་སོའི་སྒོ་ནས་དབྱེ་བ་དུ་མ་ཡོད་དོ། ༈ །གཉིས་པ་སྤྱོད་པ་ལའང་ཐབས་གྲོལ་ཐུན་མོང་གི་སྤྱོད་པ་དང་། བྱེ་བྲག་སོ་སོའི་སྤྱོད་པ་གཉིས་ལས། དང་པོ་ལའང་གསུམ་སྟེ། ལས་དང་པོ་པའི་དུས་སུ་དགེ་སྤྱོོང་གཞོན་ནུ་ལྟ་བུའི་སྤྱོད་པ་དང་། ཅུང་ཟད་གོམས་ཚེ་རྟོགས་པ་རྐྱེན་ཐུབ་ཀྱི་སྤྱོད་པ་སྨྱོན་པ་ལྟ་བུ་དང་། ཤིན་ཏུ་གོམས་ཚེ་རྒྱལ་པོ་ས་འཛིན་གྱི་སྤྱོད་པ་དང་གསུམ་མོ། །གཉིས་པ་བྱེ་བྲག་གི་སྤྱོད་པ་ལ། ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་ཡོད། ཕྱི་མ་ལ་ཡང་ཅིག་ཅར་མཉམ་པའི་སྤྱོད་པ་དང་། དད་བརྩོན་གྱི་སྤྱོད་པ་སོགས་རིམ་གྱིས་པའི་སྤྱོད་པའི་དུས་གྲངས་བདུན་ཡོད། ༈ གསུམ་པ་དཀྱིལ་འཁོར་ལའང་བཅུ་གཅིག་དང་བརྒྱད་སོགས་སུ་དབྱེ་ཚུལ་ཡོད་ཀྱང་། འདིར་བཤད་རྒྱུད་ཀྱི་རྗེས་སུ་འབྲང་ནས་འཆད་པ་ལ། རང་བཞིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་དང་། ལྷག་པ་གཟུགས་བརྙན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་དང་། བྱང་ཆུབ་སེམས་ཀྱི་དཀྱིལ་འཁོར་དང་། ཚོམ་བུ་ཚོགས་ཀྱི་དཀྱིལ་འཁོར་ཏེ་བདུན་ཡོད། ༈ བཞི་པ་དབང་ལའང་། ཞི་བ་ལ་ཕན་དབང་བཅུ། ཁྲོ་བོ་ལ་ཕན་དབང་བཅོ་བརྒྱད། གཉིས་ཀ་ལ་ནུས་དབང་ལྔ་དང་། ཟབ་དབང་གསུམ་འདྲ། དེ་དག་ཀྱང་བསྡུ་ན། ཕྱི་ཕན་པའི་དབང་། ནང་ནུས་པའི་དབང་། གསང་བ་ཟབ་མོའི་དབང་སྟེ་གསུམ་དུ་འདུ། དེ་ལས་ཟབ་དབང་གསུམ་སོ་སོར་དབྱེ་ན་ལྔར་འགྱུར། དེ་ལས་ཀྱང་ཕན་ནུས་གཉིས་བུམ་དབང་དུ་བསྡུས་ནས་གཅིག་ཏུ་བགྲང་ཚེ་དབང་བཞིར་འདུ་བ་ཡིན་ནོ། ༈ །ལྔ་པ་དམ་ཚིག་ལའང་བླ་ན་མེད་པའི་བྱང་ཆུབ་ཀྱི་སེམས་མི་སྤངས་བ་སོགས་རྩ་བའི་དམ་ཚིག་ལྔ། དུག་ལྔ་མི་སྤང་བར་ལམ་དུ་འཁྱེར་བ་དང་། བདུད་རྩི་ལྔ་མི་འདོར་བསྟེན་པ་སྟེ་ཡན་ལག་གི་དམ་ཚིག་བཅུ། དེ་ལས་དབྱེ་བའི་སུམ་བརྒྱ་དྲུག་ཅུ་ལ་སོགས་པའོ། ༈ །དྲུག་པ་མཆོད་པ་ལའང་འཇིག་རྟེན་དང་འཇིག་རྟེན་ལས་འདས་པས་མཆོད་པ་གཉིས་སམ། བྱེ་བྲག་གི་མཆོད་པ་བཅུ་བཞི་ལ་སོགས་པའོ། །དེ་དག་ཀྱང་བསྡུ་ན། ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོའི་མཆོད་པ་སྟེ་གསུམ་དུ་འདུའོ། ༈ །བདུན་པ་འཆིང་ཟློས་སྔགས་དང་ཕྱག་རྒྱ་ལ་འཆིང་བ་ཕྱག་རྒྱ་དང་། ཟློས་པ་སྔགས་གཉིས་ལས། དང་པོ་ལའང་། དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་སྟེ་བཞིའོ། །ཡང་ན་དེ་ལ་དབྱེ་བའི་ཕྱག་རྒྱ་བདུན་ནོ། །དེ་ཡང་བསྡུ་ན། རང་བཞིན་གྱི་ཕྱག་རྒྱ་དང་། ལྟ་བའི་ཕྱག་རྒྱ་དང་། ཏིང་ངེ་འཛིན་གྱི་ཕྱག་རྒྱ་སྟེ་གསུམ་གྱི་ཁོངས་སུ་འདུའོ། ༈ །གཉིས་པ་སྔགས་ལའང་བཟླ་བྱ་སྔགས་ཀྱི་སྒོ་ནས་དབྱེ་བ་དང་། བཟླས་པ་སྒོའི་སྒོ་ནས་དབྱེ་བ་གཉིས་ལས། དང་པོ་ལ་གསང་སྔགས། རིགས་སྔགས། གཟུངས་སྔགས་གསུམ་མོ། །དེ་དག་ལ་ངོ་བོ་དང་། བྱེད་ལས་དང་། རྟགས་ཀྱི་སྒོ་ནས་དབྱེ་བ་སོ་སོར་ཡོད་དོ། །གཉིས་པ་ལ་རྒྱུ་མ་ནོར་བ་རྩ་བའི་སྔགས་ཐུགས་སྲོག་གི་ས་བོན་ཧཱུཾ་ལྟ་བུ་དང་། བསྐྱེད་པ་རྐྱེན་གྱི་སྔགས་ལྷ་རང་རང་གི་མཚན་སྔགས་དང་། དེ་གཉིས་སྦྲེལ་བ་བཟླས་པ་ལས་ཀྱི་སྔགས་ཏེ་གསུམ་མོ། ༈ །བརྒྱད་པ་ཏིང་ངེ་འཛིན་ལ་བསྐྱེད་རྫོགས་གཉིས་ཀ་དང་རྗེས་སུ་མཐུན་པའི་ཏིང་ངེ་འཛིན་གཉིས་སོ། ༈ །དགུ་པ་ཕྲིན་ལས་ལ་ཞི་རྒྱས་དབང་དྲག་སྟེ་ལས་བཞིའི་སྟེང་མཆོག་གི་ལས་བསྣན་པས་ལྔའམ། མཆོག་གི་ལས་ལ་ནང་གསེས་བཞིར་དབྱེ་བས་བརྒྱད་དུ་འགྱུར་བ་རྣམས་སོ། །དེ་དག་ཐབས་གང་གི་སྒོ་ནས་བྱེད་པ་ཡང་། ཧོ་མ་སྟེ་སྦྱིན་སྲེག་གི་སྒོ་ནས་ལས་བྱེད་པ་དང་། རྫས་ཀྱི་སྒོ་ནས་ལས་བྱེད་པ་དང་། ལུ་གུ་རྒྱུད་དེ་བྲོའི་སྒོ་ནས་ལས་བྱེད་པ་དང་། མཆོད་རྟེན་ཏེ་མནན་པའི་སྒོ་ནས་ལས་བྱེད་པ་རྣམས་སོ། ༈ །བཅུ་པ་བསྒྲུབ་པ་ལའང་ཐུན་མོང་གི་སྒྲུབ་པ་དང་། མཆོག་གི་སྒྲུབ་པ་གཉིས་ལས། དང་པོ་ལའང་མང་དུ་ཡོད་ཀྱང་འདིར་རྩ་རྒྱུད་དངོས་ཀྱིས་བསྟན་པ། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྔའི་དངོས་གྲུབ་ལྔ། ལས་ཕྲན་ཚེག་བརྒྱད་ལ་སོགས་པའོ། །མཆོག་གི་སྒྲུབ་པ་ནི་རིག་འཛིན་གྱི་གོ་འཕང་གང་ཞིག་དོན་དུ་གཉེར་བའོ། །དེ་དག་ཀྱང་རང་རང་གི་སྒྲུབ་ཐབས་རྣམས་དང་ཁྱད་པར་རྒྱུད་འདིའི་དགོངས་པ་ཚོམ་བུ་ཚོགས་སྒྲུབ་ལ་བརྟེན་ནས་བསྒྲུབ་པའོ། །དེ་དག་གི་འབྲས་བུ་ཡོང་ཤེས་རྒྱུད་དོན་རྫོགས་ནས། གཞུང་གི་ས་བཅད་བཞི་པ་རྒྱུད་ཀྱི་དགོས་འགྲེལ་ནི། གཞི་རྒྱུད་ཀྱི་དོན་ལྟ་བུ་བརྗོད་བྱ། ལམ་རྐྱེན་ཡི་གེའི་རྒྱུད་ལྟ་བུ་རྗོད་བྱེད། དེ་ལ་བརྟེན་ནས་ལམ་རྒྱུད་དངོས་བསྐྱེད་རྫོགས་རིམ་གཉིས་ཀྱི་དོན་རྟོགས་པ་ལྟ་བུ་དགོས་པ། དེ་བསྒོམས་པའི་མཐུས་མཐར་ཐུག་སངས་རྒྱས་ཐོབ་པ་ལྟ་བུ་ཉིད་དགོས་ཏེ། དེས་ན་བརྗོད་བྱ་དང་རྗོད་བྱེད་ཤེས་བྱ་དང་ཤེས་བྱེད་དུ་འབྲེལ། རྗོད་བྱེད་དང་དགོས་པ་ཐབས་ལས་ཐབས་བྱུང་དུ་འབྲེལ། དགོས་པ་དང་ཉིང་དགོས་དེ་ལས་དེ་བྱུང་དུ་འབྲེལ། ཉིང་དགོས་དང་བརྗོད་བྱ་ངོ་བོ་བདག་གཅིག་གིས་འབྲེལ་བ་སྟེ། དགོས་འབྲེལ་ཡན་ལག་བཞིའོ། ༈ །ས་བཅད་ལྔ་པ་འཁོར་ལ་གདམས་ཤིང་བསྟན་པ་གཏད་པ་ལའང་གདམས་པ་དང་གཏད་པ་གཉིས་ལས། དང་པོ་ལའང་གཞི་རང་བཞིན་གྱི་སྣང་བ་རྟོགས་བྱར་གདམས་པ། གདུལ་བྱ་ལམ་གྱི་སྣང་བ་བགྲོད་བྱར་གདམས་པ། ལོག་རྟོགས་འཁྲུལ་བའི་སྣང་བ་དག་བྱར་གདམས་པ། འབྲས་བུ་བདེ་བར་གཤེགས་པའི་སྣང་བ་ཐོབ་བྱར་གདམས་པ་སྟེ་བཞི་ཡོད། གཉིས་པ་གཏད་པ་ལའང་། དང་པོ་བཀའི་བསྡུ་བ་པོ་གསང་བདག་ཕྱག་ན་རྡོ་རྗེ་ལ་གཏད་པ། བར་དུ་མ་མོ་དང་མཁའ་འགྲོ་ལ་གཏད་པ། ཐ་མ་མ་འོངས་པའི་གང་ཟག་ཆོས་མིག་ཅན་རྣམས་ལ་གཏན་པ་སྟེ་གསུམ་མོ། །འདི་དག་ཀྱང་གཞུང་ཚིག་གང་དང་གང་གིས་སྟོན་པ་དང་། ཁོག་འབུབ་ཚུལ་གྱི་ལུང་སོགས་ཀྱང་ཡི་གེ་མང་དུ་དོགས་ནས་མ་བཀོད་པ་ཉིད་ལས་རང་བཟོ་བྱས་པ་ནི་མ་ཡིན་ཏེ། བཀའ་སྡེ་ཟུར་བའི་བཤད་སྲོལ་གཙོ་བོར་བཟུངས་ནས་བི་མ་ལའི་མན་ངག་གིས་ཀྱང་ཟུར་བརྒྱན་ཏེ་བཤད་རྒྱུད་ཀྱི་དགོངས་པ་འཁྲུལ་མེད་བཀོད་པ་ཡིན་ནོ། ༈ །སྤྱི་དོན་གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ནི། ལམ་རྐྱེན་ཡི་གེའི་རྒྱུད་ཇི་ལྟར་གྲུབ་ཚུལ་སྨྲོས་པ་སྟེ། དེ་ཡང་དཀར་ལྟ་བུ་ཡི་གེ། ཡི་གེ་དུ་མ་ཚོགས་པས་དོན་གྱི་ངོ་བོ་ཙམ་སྟོན་པ་དཀར་པོ་ལྟ་བུ་མིང་། མིང་དུ་མ་འདུས་པར་ས་དཀར་པོ་ཞེས་པ་ལྟ་བུ་དོན་གྱི་ཁྱད་པར་སྟོན་པ་དག་ནི་ཚིག །ཚིག་དེས་དོན་དངོས་སུ་སྟོན་པ་རས་དཀར་པོའི་ལྭ་བ་གྱོན་ན་ཤིན་ཏུ་མཛེས་ལྟ་བུ་སྟེ། དེས་ན་ཡི་གེ་འདུས་པ་ལས་མིང་། མིང་འདུས་པ་ལས་ཚིག །ཚིག་འདུས་པ་ལས་དོན་གྱི་རྣམ་གྲངས་སྟོན་པའི་ཚིགས་བཅད་ལྷུག་དང་ལེའུ་དང་གླེགས་བམ་གྱི་བར་གྲུབ་པ་ཡིན་ནོ། ༈ །གསུམ་པ་དབང་པོ་མ་ཐར་འབྲུ་གཉེར་བཀྲོལ་བ་ལའང་རྩ་རྒྱུད་ལེའུ་ཉེར་གཉིས་ཀྱི་དོན་གྱི་མ་ལུས་པ་མཐར་ཆགས་སུ་འབྲུ་འགྲེལ་བྱས་ནས་འཆད་པ་སྟེ་འགྲེལ་གཞུང་བཞིན་ཤེས་པར་བྱའོ། །དེ་ལྟ་བུའི་འབྲེལ་ཞིང་རྒྱུན་མ་ཆད་པའི་རྒྱུད་གང་ལ་དབྱེ་ན་ཚིག་དང་དོན་གྱི་སྒོ་ནས་དབྱེ་བ་དྲུག་སྟེ། ཚིག་གི་སྒོ་ནས་དབྱེ་བ་སྒྲར་སྣང་བའི་རྒྱུ། སྒྲར་གྲགས་པའི་རྒྱུད། བརྡར་གྱུར་པའི་རྒྱུད་དང་གསུམ། དོན་གྱི་སྒོ་ནས་དབྱེ་བ་གཞི་ལམ་འབྲས་བུའི་རྒྱུད་གསུམ་སྟེ་དྲུག་གོ། །ལྟ་བ་དང་སྤྱོད་པའི་སྒོ་ནས་དབྱེ་ན། ལྟ་བ་གཙོ་བོར་སྟོན་པ་རྣལ་འབྱོར་རྒྱུད་དང་། སྤྱོད་པ་གཙོ་བོར་སྟོན་པ་བྱ་བའི་རྒྱུད་གཉིས། སྔ་མ་ལ་དངོས་དང་རྣལ་འབྱོར་བླ་མེད་ཀྱི་རྒྱུད་གཉིས། ཕྱི་མ་ལའང་དངོས་དང་ཆ་མཐུན་གྱི་རྒྱུད་དམ་སྤྱོད་རྒྱུད་གཉིས་ཏེ་བཞི། དེ་ལ་བླ་མེད་ལ་ཕ་རྒྱུད་མ་རྒྱུད་གཉིས་མེད་ཀྱི་རྒྱུད་སྡེ་གསུམ་དུ་དབྱེ་བས་དྲུག་གོ། །རྩ་བ་དང་ཡན་ལག་གི་སྒོ་ནས་དབྱེ་ན། རྩ་བའི་རྒྱུད་དང་། བཤད་པའི་རྒྱུད་དང་། ཕྱི་མའི་རྒྱུད་དང་། རྟོགས་པའི་རྒྱུད་དེ་བཞིར་འགྱུར་རོ། །དེས་ན་ཐམས་ཅད་བསྡོམས་པས་རྒྱུད་ཀྱི་དབྱེ་བ་བཅུ་དྲུག་གོ། །དེ་ལས་ཀྱང་རྒྱུད་ཀྱི་དབྱེ་བ་དངོས་ནི་གཞི་ལམ་འབྲས་གསུམ་ཡིན་ལ་གཞན་རྣམས་ནི་ལམ་རྐྱེན་ཡི་གེའི་རྒྱུད་ཀྱི་དབྱེ་བའོ། །སླར་ཡང་སྨྲས་པ། སྣ་ཚོགས་བཤད་པའི་རྒྱུ་སྐར་ནི། །ཤེས་བྱའི་མཁའ་ལ་ཆས་པའི་ཚེ། །ཕྱོགས་ལྷུང་སེམས་ཀྱིས་རང་རང་གཞུང་། །མུན་སེལ་སྒྲོན་མ་ཡིན་པར་རློམ། །དེ་ཚེ་ལེགས་བཤད་འོད་བརྒྱ་པ། །རྙིང་བསྟན་ཤར་རིའི་རྩེར་སླེབས་པས། །ཕར་ཆེར་བག་ཉལ་གྱུར་ཏོ་ཞེས། །གཏམ་འདི་ཁོ་བོས་མ་བསྒྲགས་སམ། །བྱིས་པ་གང་ཞིག་བུམ་མཁའ་མཐོང་ནས་དེ་ལས་ནམ་མཁའ་གཞན་མེད་ཅེས། རྟོགས་འདི་བསལ་ཕྱིར་སྐྱེ་བོ་མཁས་པས་ནམ་མཁའི་མཚན་ཉིད་རབ་བརྗོད་པས། དེ་ཡི་དེ་ཚུལ་རྟོགས་དེས་རང་ཉིད་གྱི་ནར་གྱུར་ཞེས་བརྗོད་པ་ལྟར། ཐེག་པ་དམན་མཆོག་ཉིད་དང་དེ་འཛིན་སྐྱེས་བུའང་དེ་བཞིན་མཁྱེན་འཚལ་ལོ། །འདི་བརྩམ་དགེ་བ་བླ་མེད་ནི། །ལམ་རྒྱུད་བླང་དོར་བྱེད་ཕྱིར་མིན། །གཞི་རྒྱུད་གང་ཞིག་མངོན་གྱུར་པའི། །རྒྱུད་དེ་ཁོ་ནར་བསྔོ་བར་བགྱི། །དེ་མཐུས་གཞི་ལ་གནས་པའི་ཡེ་ཤེས་ནི། །ལོག་རྟོག་འཁྲུལ་པའི་སེམས་དང་དགྲར་གྱུར་ནས། །འགྲོ་ཀུན་གཞོན་ནུ་བུམ་སྐུའི་ཁང་བཟང་དུ། །བཙན་ས་ཟིན་པའི་དབུགས་འབྱིན་འཐོབ་པར་ཤོག །ཅེས་དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་འདི་ཡང་། ༈ སྐྱབས་མགོན་ཐམས་ཅད་མཁྱེན་པའི་ཐུགས་སྲས་བུ་ཆེན། རང་ཉིད་ཀྱི་རྡོ་རྗེའི་མཆེད་པོ་རིག་པ་འཛིན་པ་བུདྡྷ་ཕ་ལ་ནས་འདི་ལྟ་བུ་ཞིག་དགོས་ཞེས་བསྐུལ་ངོར། ༈ གྲུབ་དབང་རྫོགས་ཆེན་པ་ཡབ་སྲས་ཀྱི་བཀའ་འབང་གི་གྲལ་མཐར་སྡོད་པ་པོ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པས་བློ་ཐོག་ནས་ཇ་བར་ཞིག་ལ་བྲིས་པའོ། །མངྒ་ལཾ།། །།

གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་འབྲུ་དཀའི་དོན་བཀྲོལ་གསལ་བྱེད་མེ་ལོང། རྟོགས་ལྡན་ཤཱཀྱ་བཛྲ།

གུ ཧྱ མ ནྟྲ བ ཛྲ ཡཱ ནོ པ དེ ཤ པ ཐཿ ཀྲ མ ར ཏྣ བྱཱུ ཧ ནཱ མ བི ཧ ར ཏི སྨ། །
གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་ཞེས་བྱ་བ་བཞུགས་སོ།
འབྲུ་དཀའི་དོན་བཀྲོལ་གསལ་བྱེད་མེ་ལོང་རྟོགས་ལྡན་ཤཱཀྱ་བཛྲ་གསུངས། ཐུན་མོང་གི་དཔལ་གྱི་སྒྲས་འབྲེལ་བ་སྦྱར་བ་ཏེ་དཔལ་གྱི་ཡང་། དཔལ་གསུམ་རང་བཞིན་ལྷུན་གྱིས་གྲུབ་པའི་དཔལ་རྟོགས་པ་མངོན་དུ་གྱུར་པའི་དཔལ་མཁྱེན་བརྩེ་ཞར་ལ་བྱུང་བའི་ད པལ་སྟེ་ཐུན་མོང་མ་ཡིན་པའི་དཔལ་གསུམ་རྡོ་རྗེ་སེམས་དཔའ་ཉིད་ལ་ལྡན་རྫས་ཀྱི་རྡོ་རྗེ་ཕ་ལམ་ལྟ་བུ་ཕྲིན་ལས་འཇོམས་པར་བྱེད་པ་ཡེ་ཤེས་རང་བཞིན་འདུས་པས་བྱས་རྡོ་རྗེ། རྒྱུ་རྐྱེན་གྱིས་མ་བྱས། །པས་རང་བཞིན་འདུས་མ་བྱས་པའི་རྡོ་རྗེ། ཆེད་དུ་མ་བརྩལ་བར་སྐུ་གསུང་ཐུགས་ཡོན་ཏན་ཕྲིན་ལས་ལྔ་རྡོ་རྗེ་སེམས་དཔའ་ལ་རྫོགས་པས་ཡོན་ཏན་བརྩལ་བ་མེད་པ་རྒྱུ་རྐྱེན་དང་བྲལ་ཏེ་གཉེན་པོས་མི་ཤིགས་པས་མཚན་ཉིད་སྐྱེ་འཇིག་མེད་པའི་རྡོ་རྗེ་ཆོས་དབྱིངས་ཉིད་དང་ཡེ་ཤེས་འདུ་འབྲལ་མེད། །པ་ངོ་བོ་དབྱེར་མི་ཕྱེད་པའི་རྡོ་རྗེ་སྟེ། དེ་ལྟར་ལྔ་ཡིས་རྡོ་རྗེར་གྲུབ་དེ་དེ་ཉིད་གཉིས་སུ་མེད་པའི་ཕྱིར་སེམས་བྱེད་པ་པོ་མེད་པར། ངང་གིས་དྭངས་བའི་ཕྱིར། གསལ་གཞན་དུ་ཡུལ་ཡུལ་ཅན་མི་གཡོ་བའི་ཕྱིར་སེམས། མི་སེམས་དེ་ཀ་གསལ་བའི་དགོངས་པ་ཡིན་པས། སེམས་ཆེན་པོ། །རྣམས་བྱའོ། །ཕྲིན་ལས་ཀྱིས་བདུད་བཞི་བཅོམ་པས་དཔའ་བོ་ཞེས་བྱའོ། །རང་ཉིད་སངས་རྒྱས་གསང་བས། ལྷ་ཡི་ལྷ་འཇམ་དཔལ་རྡོ་རྗེ་སེམས་དཔའ་གཉིས་སུ་མེད་པར་འཇལ་བའོ། །འཚལ་ལུགས་གསུམ་ལས། གཉིས་སུ་མེད་པར་མོས། །པའོ། །རང་ཉིད་ཅེས་པ་ནི་ཕྱག་འཚལ་བའི་མཁན་པོ་སྟེ་སྔོན་བྱུང་དུ་སངས་རྒྱས་གསང་བའོ། །རྗེས་འཇུག་ཏུ་སྐབས་དང་སྦྱར་རོ། །སྟོན་པ་ཁ༽གསང་བའི་བདག་པོས་དྲག་ཤུལ་ཅན་གྱི་རི་མ་ལ་ཡར། མངོན་པར་གཤེགས་ནས། །འཁོར་ལྷ་བརྒྱ་བྱིན་ཀླུ་འཇོག་པོ། གནོད་སྦྱིན་སྐར་མདའ་གདོང་དང་། སྲིན་པོ་བློ་གྲོས་ཐབས་ལྡན་དང་། །མི་ལས་སྐལ་ལྡན་དགེ་སློང་ལི་ཙ་བྱི་སོགས་རིགས་ཅན་རྣམས་འདུས་པ་ལ། །གསང་སྔགས་གསུངས་སོ། །ཐུབ་པའི་ཀ༽དབང་པོས་མྱ་ངན་ལས་འདའ་བར་ཇི་ལྟར་བཞིན་ཅེས་ལུང་བསྟན་པའི་དུས། །སུ་ལོ་ཉེར་བརྒྱད་དོ། །གཞན་ཡང་རྒྱལ་ག༽བུ་སྟེ་རྒྱལ་པོ་ཛཿ རིགས་ཅན་ནི་ཛཿསྟེ་གསང་སྔགས་ཀྱི་ལྟས་སུ་རྨི་ལམ་བདུན་ཤར་ནས། །པོ་ཏིའི་ཆར་བབ་པ་ལ་སོགས་པ་ལས་དང་། འབྲེལ་བས་པོ་ཏི་གླེགས་བམ་ཐུགས་རྗེས་སྣང་བ་ལ་མངོན་སུམ་དུ་བརྟགས་པས། །རྒྱལ་པོས་མ་གོ་ཀུ་ཀུ་རཱ་ཙས་པོ་ཏི་ལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་མངོན་དུ་རྟོགས་ཏེ། །ཐུགས་སྒྲུབ་དེ་ཉིད་ཀྱི་ཞལ་མཐོང་ལེའུ་སྒོ་ནས་ཟླ་བ་དྲུག་གི་བར་སྒྲུབ་ནས་དེ་ཉིད་གྲུབ། །གཞན་ཡང་གསང་སྟེ་ཤེས་པའི་བཀའ་ལུང་བསྟན་པའི་དངོས་གྲུབ་དེ་ནས་ཐོབ། །སྣོད་ལྡན་རྒྱལ་པོ་ཛཿལ་དོན་དམ་ངེས་པའི་ཐེག་པའི་བཅུད་ཏནྟྲ་སྡེ་བཅོ་བརྒྱད་ཀྱིས་དོན་མ་ལུས་དེ་ཙམ་ནས་བློ་གྲོས་རྒྱས། །འདོད་པའི་དོན་གོ་ནས་པོ་ཏི་གླེགས་བམ་གྱི་དོན་རྟོགས་བསམ་པ་དེ་རུ་འགྲུབ། །ཏེ་རྟོགས་སོ། །ཚེ་རབས་ཀུན་ཏུ་སྨོན་པའི་ལམ་བཏབ་ལྷ་བཛྲ་པཱ་ཎི་དང་དེ་རུ་མཇལ། །དེ་ནས་ཆོས་རྒྱལ་རཱ་ཙས་གླེགས་བམ་གྱི་དོན་རྟོགས་ཤིང་གྲུབ་པས་རྡོ་རྗེ་གདན་སྟེང་གི། །འཛམ་བུ་གླིང་གི་ས་ཡི་ཆར་ཤར་གྱི་ཕྱོགས་མཚམས་སུ། །ལྷོ་ཡི་རི་མ་ལ་ཡ་ཡོད་པ་དེའི་མཚམས་ན་ཨ་སུ་ར་གསང་བའི་བྲག་ཕུག་ཕྱག་ན་རྡོ་རྗེའི། ཕོ་བྲང་དམ་པ་རིན་ཆེན་ཟུར་བརྒྱད་དུ་ཡོད་པ་སྒོ་རང་བྱུང་ཟླ་གམ་ཡོད་པ་དེའི་ནང་། །བཀྲ་ཤིས་པའི་རྫས་བརྒྱད་ཉི་ཟླས་མཚན་དམ་པའི་ཁང་བུ་གྲུབ་པ་ཐོབ་པ་རྣམས་ཀྱིས་བྱིན་གྱིས་བརླབས་པ་དང་དེ་བཞིན་གཤེགས་པས་ཞབས་ཀྱིས་བཅགས་པའི་གནས་ཁང་རུ། །ཀུ་ཀུ་རཱ་ཛས་གཙོ་བྱས་པའི་ཚོམ་བུ་འབུམ་ཛེནྡྲ་བྷུ་ཏི། །སོགས་ཚོམ་བུ་ཁྲི། ཡུལ་གྱི་དགེ་སློང་སིང་ཧ་མ་གཙོ་བྱས་པའི་ཚོམ་བུ་སྟོང་ཨུ་པ་རཱ་ཛ་ཤཱཀྱ་སུ་ཏྲི་དང་། །སྲས་མོ་གོ་མ་པ་ལ་སོགས། །གཙོ་བྱས་པའི་ཚོམ་བུ་བརྒྱ། སྒྱུ་འཕྲུལ་དྲ་བའི་ཕྱི་ནང་གསང་བའི་དབང་བཅོ་བརྒྱད་ཐོབ་ནས། །ཐོས་བསམ་གྱི་ལྟ་བ་རྟོགས་ཚོགས་སྦྱོར་གྱི་ལམ་ཞི་ཁྲོའི་ཚོམ་བུ་ཚོགས་ཀྱི་དཀྱིལ་འཁོར་མངོན་སུམ་དུ་བསྒྲུབས་ཏེ། །གནས་སྐབས་རིག་འཛིན་བཞི་དང་མཐར་ཐུག་རྡོ་རྗེ་འཆང་གི་སར་འོག་མིན་དུ་མངོན་དུ་གཤེགས་སོ། །དེ་ལྟར་གསང་སྔགས་འབྱུང་ཞིང་སྲས་མོ་གོ་མ་དེ་ཝཱིས་རྗེས་སུ་གཟུང་བ་དེ་ཕྱིར་བདག་སངས་རྒྱས་གསང་བ་ཞེས་མཚན་ཐོབ་པས། །དམ་པའི་ཆོས་གསང་སྔགས་ཀྱི་རིགས་ཅན་དྲྭ་མ་ཡ་རབས་དང་། །དེ་དང་རྗེས་སུ་མཐུན་པའི་མ་འོང་པའི་རྣལ་འབྱོར་པ་སྐལ་བ་དང་ལྡན་པའི་དོན་བྱ་བའི་ཕྱིར། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་ལེའུ་སྟོང་ཕྲག་བརྒྱ་པའི་རྒྱུད་དག་ལས། །དུས་གསུམ་གྱི་བུདྡྷ་རྣམས་ཀྱི་གཤེགས་ཤུལ་ད་ལྟ་དང་མ་འོངས་པའི་རྣལ་འབྱོར་པ་རྣམས་ཀྱི་ལམ་མཆོག་འདི་ཉེ་བ་བདེ་བ་རྫོགས་པ་བསྡུས་ཏེ། །ཚེ་དུས་ཟས་ཉོན་མོངས་པ་ལྟ་བ་སྙིགས་མ་ལྔ་ལ་ཉེ་བའི་ལྔ་བརྒྱ་ཕྲག་བཅུའི་ཐ་མ་རྒྱུད་དྲག་པོའི་དུས་ཀྱི་ཚེ། །འགོག་སྦྱང་བསྒྱུར་གསུམ་གྱིས་འདུལ་བའི་དུས་མིན་ཏེ་གསང་སྔགས་ཀྱིས་འདུལ་བའི་དུས་ལ་བབ་པའི་ཕྱིར་བསྟན་པར་བྱའོ། །ལོང་བ་ཞ་བ་འདུ་ཤེས་ཆུང་བ་ཨུ་ལུ་ཏྲི་ཤ་ཀ་ཀ་ཟེར་བའི་སྤྱན་བཟང་སྟེ་ལོང་མི་གསལ་བས་འགྲོ་མཐུ་མེད་པ་ཡི། །དམིགས་བུ་མེད་པ་ལོང་ཁྲིད་བྲལ་བའི་དབང་གི་ལམ་ལ་གོམས་པའི་རྣལ་འབྱོར་པས་ཉམས་མེད་ལམ་སྟོར་བས། །ལམ་ལ་བགྲོད་ཅིང་ཕྱིན་པར་མི་ནུས་པ་དེ་བཞིན་དུ། །ཚིག་ཕྱིར་འབྲང་བའི་བློ་རྩིང་པོ་རྒྱུད་མ་སྤྱང་ཤིང་དམུ་རྒོད་མ་དུལ་བ་དེ་ལྟ་བུས་རང་ཉམས་ཀྱིས། །སྣོད་ངན་པས་གསང་བའི་སྙིང་པོར་སོ་སོའི་དོན་རྟོག་པའི་འབྲས་བུ་མཐར་ཕྱིན་པ་མི་འགྱུར་ཏེ། །འདི་ལྟར་བུལ་ཤིང་སྟེ་ཐང་སྨུག་པོ་ལ་མེ་ཏོག་བྱུང་ཡང་འབྲས་བུ་མི་འབྱུང་བ་བཞིན་འགྱུར་རོ། །རྒྱུ་མཚན་དེ་བས་ལུས་ངག་ཡིད་གསུམ་གྱི་བླ་མ་ལ་བསྙེན་བསྐུར་ལུང་གི་རྒྱུད་ནས་བཤད་པ་བཞིན་དུ་བསྐུར་ཏེ། །བརྟག་སྤྱོ་བ་དང་ཞེ་གཅོད་པའི་ཚིག་ལོག་པ་ཅི་བྱུང་ཡང་བཟོད་པར་བྱས་ཏེ། །མཐོང་བའི་ཚེ་འདིའི་སྡུག་བསྔལ་གྱི་གདུང་བ་ཅི་བྱུང་ཡང་ཁུར་དུ་མི་ལྟ་བའོ། །དེ་ཅིའི་ཕྱིར་ཞེ་ན་སྡུག་བསྔལ་ཀུན་ཡུན་རིང་པོ་དུས་གཏན་གྱི་དོན་དུ་བཟོད་པར་བྱ་བ་ཡིན་ནོ། །དཀའ་ཁ༽བས་སློབ་དཔོན་བརྟེན་ན་བླ་མ་རྡོ་རྗེ་རྒྱལ་པོ། །ཐུགས་མཉེས་ནས་ཉམས་ཀྱི་མན་ངག་གནང་བ་ཐོབ་པར་འགྱུར་ཏེ། །གནང་བ་ཐོབ་པ་དེའི་ཚེ་རྩ་རྒྱུད་ཆེན་པོ་གསང་སྙིང་གི་གཞུང་གི་གདམས་ངག་ཟབ་མོ་གནང་བའི་ཡོན་རྒྱལ་སྲིད་དང་ནི་རང་གི་ལུས། ཕུལ་ན་ཐུགས་ཀྱི་ཉིང་ཁུ་མན་ངག་སྟེར་རོ། །མན་ངག་དེ་ཡིས་དཔེར་ན་རྟའམ་གླང་པོ་བཞོན་པ་བཟང་པོ་ཞོན་ནས་འགྲོ་བས་མྱུར་དུ་ཕྱིན་པ་བཞིན། །དོན་གསང་བའི་ཐེག་པ་ལྟ་བུ་སྟེ་ཤུག་རིང་ལ་མགྱོག་པ་རྫུ་འཕྲུལ་རྟ་དང་སྟོབས་གླང་ཆེན་ལྟ་བུ་སྟེ་ཐེག་པ་ལ་ཞེན་པས། །རྒྱུ་ཤེས་པའི་མཚན་ཉིད་ལྟ་བ་མཐོང་བ་དང་རྐྱེན་འཇུག་པའི་མཚན་ཉིད། དེ་ཏིང་ཀུན་ཏིང་ཕྱག་རྒྱ་གཅིག་སྤྲོས་མཐར་ཕྱིན་པ་རིག་འཛིན་བཞི་བགྲོད་ནས། །ཐ་མའི་ཐ་མར་སྐུ་དང་ཡེ་ཤེས་རང་གནས་དོན་གྱི་སྙིང་པོའི་འབྲས་བུ་སངས་རྒྱས་ཀྱི་གནས་སུ་ཕྱིན་ནོ། །དེ་བས་བླ་མ་དེ་ལྟར་ཡོན་ཏན་གྱི་འབྲེལ་བ་བརྩི་སྟེ་རྡོ་རྗེ་སློབ་དཔོན་གཞན་འཛིན་པའི་གཉེར་དང་ལྡན་པས། །རྒྱང་ནས་རིགས་སོགས་དང་དྲུང་བྱ་སྤྱོད་བཟང་ངན་སེམས་པྲ་ཕབ་སྟེ་བརྟག་པ་བརྟག་མཁའ་འགྲོ་ལ་གཏོར་མ་བྱིན་པ་ཡིས། །གསང་སྔགས་བསྟན་དུ་རུང་མི་རུང་གི་རྨི་ལྟས་སྟོན་པས་མཚངས་འབྲུ་བ་སོགས་སྤྱོ་བ་ཡིས་བརྟག་པ་དང་། གཞན་ཡང་ཐབས་སྣ་ཚོགས་ཀྱིས་ཅི་ནས་སྣོད་བརྟགས་ཏེ་སྣོད་བཟང་བའི་རྟགས་དང་ལྡན་ན། །རང་བཞིན་གྱི་རིགས་ངེས་པ་ཡིན་པས་མི་ལྡོག་ཅིང་བརྟན་པར་བྱས་པའི་ཆེད་དམ་ཚིག་སྡོམ་པས་ལྟས་ཤིང་རྒྱུད་སྨིན་པ་ཡིས། །སློབ་བུ་གང་ཡིན་པ་དེའི་ལག་ཏུ་མན་ངག་ལམ་གྱིས་གདམ་ངག་འདི་གཏད་དོ། །ངན་ཁ༽པའི་སྐྱོན་རྟགས་མཐོང་བའམ་དབང་པོའི་མངོན་སུམ་དུ་ཤེས་པས་སྣོད་བརྟགས་ཏེ། །ཚེ་འདིའི་འདོད་པ་སྒྲུབ་ཕྲ་མོའི་རྒྱུར་བྱེད་དང་། །ཚེ་འདིའི་ཕྱིར་ཁེ་དང་འཇིག་རྟེན་གྱི་གྲགས་པ་ཆེ་འདོད་པ་ཆེ་བའི་རྒྱུ་རུ་ཆོས། བྱེད་ཅིང་གསང་སྔགས་ཀྱི་བཅུད་ཆེན་འཛག་དང་དབོ་བ་སྟེ་ཞབས་རྡོལ་བ་ཁ་རལ། མི་ཆགས་བ་ཁ་སྤུབས་མ་རུང་བྱེད་པ་དུག་ཅན་དང་། །ཟང་ཟིང་ལོངས་སྤྱོད་མཐའ་ནས་བླ་མ་ལ་གཏོང་ཞིང་དམར་པའི་དབུས་འཆིང་སྟེ་མི་གཏོང་བ་རང་གིས་ཉལ་བ་དང་། །སེམས་གཡོ་ཅན་ངོ་དགའ་ཆེ་ལ་ལྟག་པ་སྤྲད་པ་དང་ལྐོགས་སུ་སྐུར་པ་འདེབས་པ་དང་། བླ་མའི་ལྐོག་ན་སྤྱོད་པ་རང་དགར་བྱེད་ཅིང་སྤྱོད་པ་དང་། །ཁ་སྙིང་སོ་སོར་བྱེད་དེ་ངག་ལ་རིགས་ངེས་པ་བཟང་པོ་བཟློ་བ་བསམ་པ་ལ་མི་ངེས་ཏེ་ངན་པ་སེམས་པ་དང་། བུད་མེད་ཡིན་ན་ཡང་སེམས་འདོད་པས་ཆགས་དབང་དུ་སོང་སྟེ་འདོད་ཕྱག་བ་དང་། །སྐྱེས་པ་དང་མུན་པ་དང་ལྐོག་དུ་ཕྲད་པར་འདོད་ཆགས་སྤྱོད་པ་ལ་སྙེགས་པ་སྟེ། ཕོ་མོ་གང་ཡིན་ཀྱང་ཏན་ཏྲར་སྣོད་དུ་མ་བསྔགས་པ་ལ། །ཡུན་སྐལ་པར་ལུས་སྟོང་བར་གྲིབས་མ་བཞིན་དུ་འཁོར་བར་འགྱུར་ཡང་། །ཐུགས་ཀྱི་བདེ་བ་སྟེ་མན་ངག་སྤྲོ་བར་མི་བྱའོ། །ཐུགས་རྗེ་ཡེ་མེད་དམ། གདམ་ངག་མི་སྦྱིན་ནམ་སྙམས་ན་བློ་དང་། འཚམ་པར་ལྷའི་སྐུ་བསྒོམས་ཐབས་བསྟན་དམ་ཚིག་གི་ཉེས་དམིགས་གཅན་འཕྲང་སྦྱིན། །དེ་ལྟར་མིན་ཏེ་སྣོད་ངན་ལ་སྦྱིན་ན། བེའུ་སྦྲེལ་གཡང་དུ་བསྒྱུར་བ་བཞིན་དཔོན་གཡོགས་གཉིས་ཀ་ལྷུང་སྟེ། སློབ་དཔོན་འདོད་པ་དང་ཁེངས་སེམས་ཕྲོགས་སྤྱོ་བས་ཤིང་གཅམ་བསོ་འཕྱར་ཏེ་གདམ་ངག་འཆོལ་བར་བཏང་བས། །མ་རྟོགས་པ་ལ་མན་ངག་སྤྲོས་ན་དུར་ཁྲོད་སོ་སོའི་གླིང་། །དུར་ཁྲོད་བརྒྱད་ཀྱི་མཁའ་འགྲོ་མ་འདུ་བ་བཞིན་དུ་འདུས་ནས། །དེ་ལ་མཁའ་འགྲོ་མས་ཚེ་འདི་ལ་དེའི་ཤ་ཟ་སྲོག་ལ་འབེབས་ཤིང་ལྟུང་། །གོང་དུ་སྣོད་ཀྱི་སྐྱོན་ཡོན་ཤེས་ཤིང་དེ་ལྟར་བརྟགས་པའི་སྐལ་ལྡན་གྱི་དོན་བྱ་བའི་ཕྱིར། །ལེའུ་དང་པོ་རང་བཞིན་ཡེ་ཤེས་རང་ལ་གནས་པ་གཞི་དང་དང་། །ལེའུ་གཉིས་པ་ལ་དེ་མཐོང་བ་ལྟ་བ་དང་དེར་འཇུག་པའི་རྣལ་འབྱོར་ནི་ལེའུ་གསུམ་པ་དེ་ཏིང་དང་། བཞི་པ་རྒྱུད་ལྔ་པ་ཕྱག་རྒྱ་གཅིག་དྲུག་པ་སྤྲོས་པ་སྟེ་བཞི་དང་། །ལེའུ་བདུན་པ་བར་ཆད་མེད་སྒྲུབ་པ་དང་ལེའུ་བརྒྱད་པ་མཐོང་ངམ་རྣམ་པར་སྨིན་པ་ཡིད་ལྷ་སྐུར། དབང་སྒྱུར་ནས་ཚེ་དབང་དང་ཕྱག་རྒྱ་ཆེན་པོའི་རིག་འཛིན་དང་ལྷུན་གྱིས་གྲུབ་པའི་རིག་འཛིན་གྱི་ལམ། མངོན་དུ་བྱས་ནས་མཐར་ཐུག་གི་འབྲས་བུ་རིམ་པར་བརྗོད་པར་བྱའོ། །དེ་ལ་དང་པོ་ཡེ་ཤེས་རང་གནས་ལ་ཉིད་ཀྱི་གཞུང་རྒྱས་པར་སྤྲོས་པས། གཞི་རང་གནས་དེ་ཉིད་སྐལ་ལྡན་དེ་ཡིས་རྒྱས་པར་དོན་སྤྲོས་ནས་ཕྱེ་བས་ཤེས་པར་བྱ་བ་ལ། འཁོར་འདས་གཉིས་སུ་མེད་པ་ཕྱོགས་བཅུ་དུས་བཞིའི་རང་བཞིན་འདི་ཆོས་ཅན། དེ་བཞིན་གཤེགས་པའི་ཐ་མའི་ཐ་མ་སྟེ་འབྲས་བུ་རྣམས་ཀྱི་ངོ་བོ་ཉིད་ཡིན་པར་དམ་བཅས། གཏན་ཚིག་འཁོར་བ་སེམས་ཉིད་རང་སྣང་བའི་ཕྱིར་བདག་དང་སེམས་ཉིད་ལ་གཉིས་སུ་རྡུལ་ཙམ་ཡང་གྲུབ་པ་མེད་པས་སོ། །དེའི་ཕྱིར་དེ་བཞིན་གཤེགས་པའི་ངོ་བོ་ཉིད་དེ་དེ་བཞིན་གཤེགས་པའི་ངོ་བོ་དང་རྣམ་གྲངས་བསམ་ཡས་སུ་སྣང་བའོ། །འཁོར་བའི་རང་བཞིན་ཕྱོགས་གཅིག་ཏུ་མི་དམིགས་པའི་ཕྱིར། །དེ་ལ་ལྟོས་པའི་འབྲས་བུ་མྱ་ངན་འདས་པ་ཕྱོགས་གཅིག་ཏུ་ཡོད་པ་ཡང་མ་ཡིན་ཏེ་མྱ་ངན་འདས་པའི་མཐར་ལྷུང་ངོ་། །འཁོར་འདས་ལ་དེ་ལྟར་རིགས་བཟང་ངན་དང་རྒྱུ་ཕྱོགས་གཅིག་ཏུ་རྒྱ་ཆད་པ་མེད་པས། །འཁོར་འདས་ཐམས་ཅད་ཀྱི་སྙིང་པོ་བྱང་ཆུབ་མཆོག་གི་ངོ་བོ་ལ་དོན་དམ་ཀུན་རྫོབ་དབྱེར་མེད་དོ། །འཁོར་འདས་སོ་སོའི་རང་བཞིན་ཐ་དད་རང་རྒྱུད་དུ་ངེས་སོ་ཞེ་ན། །འཁོར་བ་དེ་ལ་ཡང་དག་ལམ་གྱིས་འབྲེལ་བ་མེད་པས་འཁོར་བ་ལས་མྱ་ངན་ལས་འདས་པར་བསྒྱུར་ཅིང་བཅོས་སུ་མེད་དེ་ཐ་དད་པའི་ཕྱིར་རོ། །འདས་པ་ཡང་དག་པར་རྫོགས་པའི་སངས་རྒྱས་དེ་བཞིན་གཤེགས་པ་དང་ལོག་རྟོག་འཁོར་བ་གཉིས། །ངོ་བོ་ཉིད་ཀྱིས་ཐ་དད་དུ་གནས་པར་གྱུར་རོ་ཞེ་ན། །འཁོར་པ་དེ་ལ་མྱ་ངན་ལས་འདས་པ་བཅོས་ཤིང་བསྒྱུར་དུ་མེད་དེ་དཔེར་ན་ནོར་བུ། འཆིང་བུ་ལ་ཕྱག་དང་མཆོད་པ་བྱས་ཀྱང་ནོར་བུ་རིན་པོ་ཆེའི་ཡོན་ཏན་མི་འབྱུང་བཞིན་ཐ་དད་ནས་འཁོར་བ་ལས་མྱ་ངན་འདས་པ་འབྱུང་མི་རིགས་ཏེ་ཐ་དད་པའི་ཕྱིར་རོ། །ཐ་དད་པ་སྐྱོན་ཡོད་པ་འོག་ནས་འབྱུང་བ་དེ་བས་དེ་ལྟའང་གོང་བཞིན་དབྱེར་མེད་པ་འདི་བཞིན་པས་དེ་མ་རྟོགས་ཏེ་འཁྲུལ་ཚུལ་ནི། རྒྱུ་ལྷན་ཅིག་བྱེད་པའི་མ་རིག་པས་ངོ་མ་ཤེས་ཀུན་ཏུ་བཏགས་པའི་མ་རིག་པས་ལོག་པར་རྟོག་པ་སྣ་ཚོགས་པ་ཞགས་པ་ལྟ་བུས་འཁོར་བའི་རྒྱུ་བྱས། ལས་དགེ་སྡིག་བར་མ་གསུམ་དང་ཉོན་མོངས་ལྔ་སྟེ་བརྒྱད་ཀྱི་རྐྱེན་གྱིས། །འཁོར་ཚུལ་རྟེན་འབྲེལ་བཅུ་གཉིས་འཁོར་ལོས་ལྟ་བུའི་ཚུལ་གྱིས་འཁོར་བའི་གནས་སུ་བསྐྱར། །འབྲས་བུའི་རྟེན་གནས་ཐ་དད་དང་ལུས་དང་ལོངས་སྤྱོད་སོགས་འདོད་པ་ཐ་དད་པའི་དབང་གིས། བདེ་བ་འདོད་པའི་ཞེན་པ་དང་སྡུག་བསྔལ་དོགས་གདུང་བས་ཉམ་ཐག་ལ་ཐར་བའི་ལམ་དང་བྲལ་བས། དུས་ལ་ཐོག་མ་མེད་པ་ནས་བརྩམ་དཔག་ཏུ་མེད་པའི་དུས་བཞི་མཉམ་པ་ཉིད་ལ་དུས་ཀུན་ཏུ་ཉམས་ཀྱང་། ལ་བཟླ་རང་བཞིན་ཡེཤེས་རང་གནས་ཉིད་ལས་ཉམས་པ་མེད་དོ། །དེའང་དཔེར་ན་དེ་ལྟའང་རྒྱལ་པོའི་ཕྲུག་གུ་འབངས་སུ་འཁྱམས་པ་ལ་རྒྱལ་པོའི་ཤ་ཁྲག་ལ་འགྱུར་བ་མེད་དེ། དེ་བཞིན་དུ་འཁྲུལ་ཀྱང་ཆོས་ཉིད་ཀྱི་རིགས་ལ་འགྱུར་བ་མེད་པས། །ཤུལ་དོན་ཏེ་ལམ་དང་འབྲས་བུ་དང་རང་ལས་གཞན་མིན་ཕྱིར། །དཔེར་ན་ལྷ་ལོངས་སྤྱོད་རང་ལ་སྤྲུལ་ནས་རང་ལ་ལོངས་སྤྱོད་པས་འཕྲུལ་དགའི་ཚུལ་བཞིན་འབྲས་བུ་ཏེ་གཞན་ལས་མིན་ཏེ་རང་ལ་གནས་པའོ། །དེ་ཡང་ཀུན་རྫོབ་དང་། དོན་དམ་དབྱེར་མེད་དམ་པ་རྣམ་པ་གསུམ་དུ་གནས་པའི་ཚུལ་བཞག་པར་བྱ། ཡི་གེ་འབྲུ་ལྔར་རང་བཞིན་གྱི་མ་འགགས་པར་གནས་པའི་ཐབས་ཆེན་པོ། །ཡིན་ཏེ། འབྲུ་ལྔ་ནི་འགྲོ་དྲུག་ས་བོན་དྲུག་ལ་གཉེན་པོའི་ཡི་གེ་ལྔ་གནས་པའོ། །དེ་ལ་འགྲོ་དྲུག་གི་ཡི་གེ་དྲུག་ནི་སྤྱི་བོར་ཨ་སུ་གཉིས། མགྲིན་པར་ཏྲི། སྙིང་ཁར་ཎི། ལྟེ་བར་པྲེ། རྐང་མཐིང་དུ་དུཿགནས་ཏེ། འགྲོ་དྲུག་རྒྱུད་ལྔ་བསྐྱེད་པའི་ས་བོན་ནོ། །དེའི་གཉེན་པོར་ཡི་གེ་ལྔ་ནི་རིགས་ལྔ་ཡེ་ཤེས་ལྔའི་ངོ་བོ་ཡིན་ཏེ། སྤྱི་བོར་སྐུའི་ཡི་གེ་ༀ། མགྲིན་པར་གསུང་གི་ཡི་གེ་ཨཱཿ སྙིང་གར་ཐུགས་ཀྱི་ཡི་གེ་ཧཱུྃ། ལྟེ་བར་ཡོན་ཏན་ཡི་གེ་སྭཱ། རྐང་མཐིལ་དུ་ལས་ཀྱི་ཡི་གེ་ཧཱ་གནས་སོ། །ཡང་སྙིང་གར་ཆོས་ཀྱི་འཁོར་ལོ་ལ་འབྲུ་ལྔ་གནས་ཏེ། སྙིང་གི་དབུས་སུ་ཧཱུྃ། ཤར་ༀ། ལྷོར་སྭཱ། ནུབ་ཏུ་ཨཾ། བྱང་དུ་ཧཱ་གནས་པའོ། །དེ་ལས་སྦྱངས་བྱ་ཡུལ་དྲུག་གི་ས་བོན་ཀྱང་གནས་པར་གསུངས་ཨ་ཎི་སུཾ་ཏྲི་པྲེ་དུའི་སྟེང་དུའོ། །དེ་གཉེན་པོའི་ཡི་གེ་ལྔས་འཇོམས་པར་བྱེད་པའོ། །འགྲོ་བ་ཀུན་ལ་རང་བཞིན་ནམ་ངང་གིས་གནས་པ་ཡིན་ཏེ། དཀྱིལ་འཁོར་བཞི་ནི་ཀླད་པ་བདེ་ཆེན་གྱི་དལ་དང་། མགྲིན་པ་ལོངས་སྤྱོད་ཀྱི་དལ་དང་། སྙིང་ག་ཆོས་ཀྱི་དཀྱིལ་འཁོར་དང་། ལྟེ་བ་སྤྲུལ་པའོ། །བཞི་དང་སྲོག་ཤིང་གསུམ་རྩ་རོ་མ་རྐྱང་མ་ཀུན་འདར་མའོ། །ཀུན་འདར་མ་ནི་འཁོར་ལོ་བཞིའི་དབུས་སྲོག་ཤིང་གི་ཚུལ་དུ་ཡོད་ཅིང་། སྤྱི་གཙུག་ནས་ལྟེ་བའི་འོག་རིན་པོ་ཆེའི་རྫིང་ལ་ཐུག་པའོ། །རྩ་དེ་ནི་ཁ་དོག་དར་དཀར་གྱི་སྐུད་པ་ལྟ་བུ་སྟེ། རླུང་དང་ཐིག་ལེ་གང་གིས་ཀྱང་སྟོང་པའོ། །རོ་རྐྱང་གཉིས་ནི་ཙཀྲ་རྩིབས་བཞིའི་གཡས་གཡོན་ནས་རླུང་ནོན་གྱི་ཚུལ་དུ་གནས་ཏེ་སྣ་སྒོ་ནས་ཡར་བདེ་ཆེན་གྱི་དལ་དུ་མར་རིན་པོ་ཆེའི་རྫིང་གི་དལ་དུ་འདུས་པའོ། །འཁོར་ལོ་བཞིའི་གནས་ན་ཀཱ་ལི་སྟེ་སྒྲ་ཡི་ཡི་གེ་སོ་གཉིས་དང་དབྱངས་གི་ཡི་གེ་བཅུ་དྲུག་ལྡན་པའོ། །དེ་ཡང་ཀླད་པ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས་ཡོད་པ་ལ། དབྱངས་ཡིག་བཅུ་དྲུག་གཡས་བསྐོར་དང་གཡོན་བསྐོར་དུ་གནས་པའོ། །མགྲིན་པ་ལོངས་སྤྱོད་ཀྱི་དལ་ལ་རྩ་འདབ་བཅུ་དྲུག་ཡོད་པ་ལ་དབྱངས་ཡིག་བཅུ་དྲུག་གཡོན་བསྐོར་དུ་གནས་པའོ། །ལྟེ་བ་སྤྲུལ་པའི་འཁོར་ལོ་ལ་རྩ་འདབ་དྲུག་ཅུ་རྩ་བཞི་ཡོད་པ་ལ་སྒྲ་ཡིག་སུམ་ཅུ་རྩ་གཉིས་གཡས་སྐོར་གཡོན་སྐོར་དུ་གནས་པའོ། །གནས་ཨེ་ཝཾ་སྟོན་པ་འཁོར་མ་ཡ་བསྟན་པ། དེ་ལ་ཨེ་གནས་ནི་སྙིང་ཁ་ཆོས་ཀྱི་འཁོར་ལོ་ན་རྩ་འདབ་རིན་པོ་ཆེ་ཟུར་བརྒྱད་གུར་ཕུབ་པ་ལྟ་བུའི་རྩེ་མོ་ཨེ་ལྟ་བུར་གནས་པས་གནས་ཕུན་སུམ་ཚོགས་པའོ། །ཝཾ་སྟོན་པ་ནི་ཟུར་བརྒྱད་ཨེའི་དཀྱིལ་འཁོར་ན་སྲོག་མི་ཤིག་པའི་ཐིག་ལེ་ཏིལ་འབྲུ་ཙམ་ཡི་གེ་ཝཾ་གི་དབྱིབས་སུ་ཡོད་པ་ནི་དབང་པོའི་སྒོ་དང་འབྲེལ་ནས་རྣམ་ཤེས་གསལ་བར་བྱེད་པའོ། །མ་འཁོར་ནི་རྩ་བའི་རྩ་འདབ་བཞི་ལ་ཡི་གེ་མའི་དབྱིབས་སུ་གནས་པས་དེ་ལ་རྩ་འདབ་བརྒྱད་དེ། འཁོར་འདས་ཀྱིས་ས་བོན་ཡི་གེ་མས་བསྐོར་བའི་འཁོར་ཕུན་སུམ་ཚོགས་པའོ། །ཡ་བསྟན་པ་ནི་ཝཾ་ལས་འོད་ཟེར་ཡའི་ཚུལ་དུ་གནས་པ་ནི་ཕྱི་ནང་གི་སྒོ་འབྱེད་ཅིང་རྣམ་ཤེས་གསལ་བར་བྱེད་པ་ནི་བསྟན་པ་ཕུན་སུམ་ཚོགས་པའོ། །མཁས་ལྡན་ཅེས་པ་ནི་གསང་བའི་མཁའ་ལ་ཡང་ཡི་གེ་བཞི་གནས་པ་ཡིན་ཏེ། ཨེ་ནི་གནས་ཏེ་ཕྱི་ཁྱམ་ཟུར་གསུམ་དུ་གནས་པའོ། །བཾ་ནི་པདྨའི་ཟེའུ་འབྲུ་ལ་ཡི་གེ་བཾ་གྱི་ཚུལ་དུ་གནས་པ་སྟོན་པའོ། །མ་ནི་བར་ཁྱམས་གྲུ་བཞི་ལ་ཡི་གེ་མ་གནས་པ་འཁོར་རོ། །ཡ་ནི་ཟ་མ་ཏོག་ཟླ་གམ་ལ་ཡི་གེ་ཡ་གནས་པས་བསྟན་པ་ཕུན་སུམ་ཚོགས་པའོ། །ཡུམ་གྱི་གསང་བ་ལ་ཡང་རང་བཞིན་གྱི་མཁའ་ལྡན་དང་། པར་གནས་པ། སྙིང་པོ་རླུང་གི་སྒྲོམ་བུའི་གནས་ན་སྟོན་འཁོར་རྣམས་ཡོད་པས་དོན་བསྟན་པ་རང་ལ་འབྱུང་བས། དེ་ཡི་ཏན་ཏྲ་འབྱིན་པར་བྱེད་པའོ། །རྒྱུད་འབྱུང་བར་བྱེད་པ་དེའི་དོན་སྙིང་ཆོས་ཀྱི་ཙཀྲའི་གནས་དེ་ན་གཡས་ཆོས་ཉིད་ཀྱི་རྩ་དེ་ཏིང་དང་། །མདུན་ཡེ་ཤེས་ཀྱི་རྩ་ཀུན་ཏིང་དང་གཡོན་ཡོན་ཏན་གྱི་རྩ་རྒྱུ་གཅིག་པ་དང་། རྒྱབ་ལས་ཀྱི་རྩ་རྒྱ་སྤྲོས་ཏེ་རང་རྒྱུད་ཀྱི་རྩ་སྣང་བྱེད་དོ། །དེ་ལྟར་རྩ་འདབ་ཉིད་དངོས། །ཆོས་ཀྱི་འཁོར་ལོ་སྲོག་མི་ཤིགས་པའི་ཐིག་ལེ། རྣལ་འབྱོར་ལམ་གྱི་རིམ་པ་རྣམས་རང་བཞིན་ལྡན་ཏེ། སྣོད་ཀྱི་རྩ་སྙིང་ག་ཆོས་གྱི་འཁོར་ལོའི་རྩའི་ཁ་དོག་དང་གནས་ཚུལ་འོད་དབྱིབས་ལས་གཡས་ཆོས་ཉིད་ཀྱི་ཁ་དོག་དཀར་པོ་དབྱིབས་ཟླུམ་པོར་གནས་པས་ཞི་བའི་ཕྲིན་ལས་ཀྱི་རང་བཞིན་གྲུབ་པའོ། །མདུན་ཡེ་ཤེས་ཀྱི་རྩ་ཁ་དོག་སེར་པོ་གྲུ་བཞིར་གནས་པ་རྒྱས་པའོ། །གཡོན་ཡོན་ཏན་གྱི་རྩ་ཁ་དོག་དམར་པོ། ཟླ་གམ་དུ་གནས་པ་དབང་གིའོ། །རྒྱབ་རང་རྒྱུད་ཀྱི་རྩ་ཁ་དོག་དམར་ནག་དབྱིབས་གྲུ་གསུམ་གནས་པ་དྲག་པོའི་ཕྲིན་ལས་ཏེ་དེ་ལྟར་ཕྲིན་ལས་བཞི་ཡི། རྩ་དང་ཐིག་ཁ༽ལེ་ལས་བསྙེན་བསྒྲུབ་རང་ལ་རང་བཞིན་གྱི་ལྡན་ཏེ་གཡས་ཆོས་ཉིད་ཀྱི་རྩ་ཐིག་ལེས་གང་བ་བསྙེན་པ། མདུན་ཡེ་ཤེས་ཀྱི་རྩ་ཉེ་བསྙེན། གཡོན་ཡོན་ཏན་གྱི་རྩ་སྒྲུབ་པ། རྒྱབ་རང་རྒྱུད་ཀྱི་རྩ་ཐིག་ལེས་གང་བ་ནི་བསྒྲུབ་པ་ཆེན་པོ་དེ་ལ་བསྙེན་པ་ཡོངས་སུ་རྫོགས་ཚུལ་ནི། རྩ་གནས་ཐིག་ལེས་གང་བ་བསྙེན་པ། དེ་ལ་རང་བཞིན་གྱི་བདེ་བ་འབྱུང་བ་ཉེ་བསྙེན། དེ་ལྟར་ངོས་ཟིན་ནས་ཉམས་སུ་ལེན་པར་བསྒྲུབ་པ། བདེ་བ་རྒྱས་ཏེ་མངོན་སུམ་ཉམས་སུ་མྱོང་བ་ནི་བསྒྲུབ་པ་ཆེན་པོའོ། །དེ་ལྟར་ཡིན་པས་རྩ་འདབ་བཞི་ལ་ཡན་ལག་བཞི་བཞི་བརྒྱད་སྟེ་ཤི་ར་མ་དྷ་ལ་དལ། དེ་ཡང་གཡས་ཆོས་ཉིད་ཀྱི་རྩ་ལ་རྩ་འདབ་གསུམ། མདུན་ཡེ་ཤེས་ཀྱི་རྩ་འདབ་གསུམ། རྒྱབ་རང་རྒྱུད་རེ་རེ་སྟེ་བརྒྱད་དོ། །དེ་ཡང་ཡེ་ཤེས་གསང་བ་དང་སྤྲུལ་སྐུ་དགའ་རབ་རྡོ་རྗེས་ནི་རྩའི་གནས་ཚུལ་སྙིང་ག་ཆོས་ཀྱི་འཁོར་ལོ་ལ་འདིར་ཡོད་པར་བཤད། གཡས་ཆོས་ཉིད་ཀྱི་རྩ། གཡོན་རང་རྒྱུད་ཀྱི་རྩ། རྒྱབ་ཡེ་ཤེས་ཀྱི་རྩ་མདུན་ཡོན་ཏན་གྱིའོ། །གཡས་ཆོས་ཉིད་ཀྱི་རྩ་ལ་རྩ་འདབ་གསུམ་ཁ་དོག་དཀར་སེར་དབྱིབས་ཟླུམ་པོ་རྩའི་མདུན་སྒོ་ན་འགྲོ་དྲུག་གི་ས་བོན་སུ་ཏྲི་དང་གཉེན་པོ་ༀ་ཡཾ་གནས་པའོ། །གཡོན་རང་རྒྱུད་ཀྱི་རྩ་ལ་རྩ་འདབ་གསུམ་ཁ་དོག་དམར་པོ་དབྱིབས་ཟླ་གམ་ཡི་གེ་དུ་དང་པྲེ་གཉེན་པོ་ཧཱུྃ་གནས་སོ། །རྒྱབ་ཡེ་ཤེས་ཀྱི་རྩ་འདབ་གཅིག་ཁ་དོག་སེར་པོ། དབྱིབས་གྲུ་བཞི་ཡི་གེ་ཨ་དང་ཎི་གཉེན་པོ་ཨཱཿགནས་སོ། །མདུན་ཡོན་ཏན་གྱི་རྩ་ལ་རྩ་འདབ་གཅིག་ཁ་དོག་དམར་ནག་དབྱིབས་གྲུ་གསུམ་ཡི་གེ་མེད་དོ། །བློ་རྨུག་ཅིང་བག་ཆགས་ཀྱི་རྟེན་བྱེད་པའོ། །རྩའི་གནས་ཚུལ་དེ་ལྟར་ལ་ཕྲིན་ལས་ལ་སོགས་ཚང་ཚུལ་གོང་ལྟར་རོ། །ཨེ་འདྲ་གྲུ་གསུམ་མེའི་ས་བོན་རཾ་སྒྲོམ་མདོར་རླུང་གི་ས་བོན་ཡཾ་གཡས་གཡོན་དུ་རོ་མ་དགོངས་གཟར་རྐྱང་མ་བླུག་གཟར་དབུ་མ་ཨ་ཝ་དྷུ་ཏི་མེ་ལྷའི་ཚུལ་དུ་གནས་པའོ། །དེ་ལྟར་སྦྱིན་སྲེག་གི་ཚུལ་དུ་རང་ལ་ཡེ་ནས་ལྡན་དེ་ཡཾ་ལས་རླུང་རཾ་ལ་ཕོགས་པས་རཾ་ལས་མེ་བྱུང་མེས་ཐིག་ལེ་རྩ་གནས་མར་དང་ཚིལ་འཁྱག་པའི་ཚུལ་དུ་ཡོད་པ་བཞུས་ནས་རྩ་གཡས་གཡོན་གཉིས་ནས་ཐིག་ལེ་འབབ་སྟེ་ཀུན་རྡར་དང་འཁོར་ལོ་བཞི་མར་རིམ་པར་ཁེངས་པ་དང་བླ་མ་ཡི་དམ་མཆོད་བླ་མ་ཡི་དམ་རྣམས་ལས་བྱང་སེམས་བབ་པས་འཁོར་ལོ་རིམ་པར་ཁེངས་པའོ། །འོག་སྒོ་ཕྱག་རྒྱ་བརྟེན་ནས་དབང་གསུམ་པ་ཡེ་ཤེས་རང་གནས་སུ་ངོ་སྤྲད་པ་ཞལ་ལས་ཤེས་བཔར་བྱའོ། །ཕྱི་ཁྱམས་གྲུ་གསུམ་གནས་པ་དྲག་པོའི་ཕྲིན་ལས། བར་འཁྱམས་གྲུ་བཞི་རྒྱས་པའི་ཕྲིན་ལས། སྣ་ཚོགས་མདུད་པ་ཟླུམ་པོ་ཞི་བའི་ཕྲིན་ལས། ཟ་མ་ཏོག་ཟླ་གམ་དབང་གི་ཕྲིན་ལས་སོ། །དེའི་དོན་གནས་བཞིའི་འབྱུང་བའང་ལས་བཞི་ཡི་དབྱིབས་རང་བཞིན་གྱི་ལྡན་པ་ཡིན་སྟེ་འཁོར་ལོ་བཞིའི་གནས། ལྟེ་བ་ས། སྙིང་ཁ་ཆུ། མགྲིན་པ་མེ། སྤྱི་བོར་རླུང་སྟེ་རྩ་གནས་བཞི་ལ་འབྱུང་བ་བཞིས་ཕྲིན་ལས་རང་གྲུབ་པའོ། །དེ་བཞིན་གསང་བའི་ཁམས་ཡུམ་གྱི་མཁའ་ལ་ལས་བཞི་རང་བཞིན་གྱིས་ལྡན་པ་ནི། གནས་རྟེན་རྩ་དང་བརྟེན་པ་ཐིག་ལེ་ལ། །ཕན་དབང་བཅུ་ནུས་དབང་ལྔ་ཟབ་དབང་གསུམ་ལ་སོགས་དབང་རྣམས་ལྡན་ཅིང་རྫོགས་པའོ། །དེ་ཡང་ཕན་པའི་དབང་བཅུ་རང་ལ་གནས་པ་ནི། རྣམ་ཤེས་ཚོགས་བརྒྱད་ཡེ་ཤེས་ལྔར་གནས་པས་དབུ་རྒྱན་གྱི་དབང་དང་། རྩ་རོ་རྐྱང་གཡས་གཡོན་ན་མར་ཅོད་པཎ་གྱི་ཚུལ་དུ་གནས་པ་ཅོད་པཎ་གྱི་དབང་དང་འཁོར་ལོའི་གནས་སྒྲ་ཡིག་དང་དབྱངས་ཡིག་ཕྲེང་བའི་ཚུལ་དུ་གནས་པ་ནི་ཕྲེང་བའི་དབང་དང་། སྤྱི་བོར་ཧཾ་ལ་ལུས་མགོ་མཇུག་ཏུ་རྩས་ཁྱབ་ཅིང་འབྲེལ་པས་གོ་ཆའི་དབང་དང་། རྣམ་ཤེས་དང་དབང་པོ་མི་བསྒྲིབ་པར་རང་གསལ་བ་རྒྱལ་མཚན་གྱི་དང་། རྟོག་ཚོགས་ལྷའི་དཀྱིལ་འཁོར་དུ་གནས་པ་ཕྱག་རྒྱའི་དང་། གླད་པ་བདེ་ཆེན་གྱི་འཁོར་ལོ་གདུགས་ལ་ཧཾ་གི་ཚུལ་དུ་གནས་པ་གདུགས་གི་དབང་དང་། རྩ་གནས་འཁོར་ལོ་བཞི་ཐིག་ལེས་གང་བ་བུམ་པའི་དབང་དང་། དམ་རྫས་ལྔ་རང་བཞིན་གྱི་གནས་ཤིང་བཟའ་བཏུང་ལ་ལོངས་སྤྱོད་པས་བཟའ་བཏུང་གི་དབང་དང་ཡིག་འབྲུ་ལྔ་རང་བཞིན་གྱི་གནས་པས་སྙིང་པོ་ལྔ་རང་ལ་གནས་པའོ། །ནུས་པའི་དབང་ལྔ་རང་ལ་གནས་པ་ནི། རྣ་བའི་འདམ་རྩ་ན་སྒྲ་ཐོས་པའི་ཐིག་ལེ་དངས་མའི་རྩ་ཡོད་པས་ཉན་པའི་དབང་དང་། མགྲིན་པ་དང་ལྕེ་ལ་སྒྲ་འབྱུང་བས་ཐིག་ལེ་དབྱངས་ཡིག་དང་བཅས་གནས་པས་འཆད་པའི་དབང་དང་། ཀུན་རྡར་དང་སྲོག་མི་ཤིགས་པའི་ཐིག་ལེ་རྣམ་པར་མི་རྟོག་པས་བསྒོམ་པའི་དབང་དང་། སྙིང་ཁ་ཆོས་ཀྱི་འཁོར་ལོའི་རྩ་འདབ་ལ་ལས་བཞི་ལྷུན་གྱིས་གནས་ཤིང་། ཡན་ལག་བཞིས་བྱ་བ་བྱེད་པས་ཕྲིན་ལས་ཀྱི་དབང་དང་། རྩ་དང་ཐིག་ལེས་བྱ་བ་ཐམས་ཅད་བྱེད་ཅིང་ཡན་ལག་ལྔ་རིགས་ལྔ་དང་ཆོས་ཀུན་རང་ལ་རྫོགས་པས། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་རང་ལ་གནས་པའོ། །ཟབ་མོའི་དབང་གསུམ་ནི། རྩ་ལ་ཐིག་ལེ་ཁ་བ་ལྟར་རང་བཞིན་གནས་པས་གསང་བའི་དབང་དང་། རྩ་དང་ཐིག་ལེའི་བདེ་བ་ལས་ལྷན་ཅིག་བྱས་པའི་དགའ་བ་རང་བཞིན་གྱིས་གནས་པས་ཤེས་རབ་ཡེ་ཤེས་ཀྱི་དབང་དང་། དེ་གཉིས་སུ་མེད་ཅིང་ཡེ་ཤེས་རང་གནས་སུ་ཡེ་ནས་གནས་པས་བདེ་བ་ཆེན་པོའི་དབང་ངོ་། །དེ་ལྟར་གནས་པ་ངོ་སྤྲད་ལ་ཉམས་སུ་བླངས་བ་ཞལ་ལས་ཤེས་པར་བྱའོ། ༈ །མཆོད་པ་ལ་གསང་བ་ཡབ་ཡུམ་ནང་གི་དུག་གསུམ་ཕྱི་འདོད་ཡོན་ལྔ་མིག་གཟུགས་རྣ་བ་སྒྲ་སྣ་དྲི་ལྕེ་རོ་ལུས་རེག་ཡིད་ཆོས་དང་། །རྩ་རོ་མ་རྐྱང་མ་ཀུན་རྡར་མ་ལ་ཁའི་རྩ་ཤ་ཆེན་རྣམས་ལ་ཚེ་ལ་སོགས་པ་བདུད་རྩིར་རང་བཞིན་གྱིས་གནས་པ་ནི་མཆོད་པ་སྟེ་དམ་རྫས་ལྔ་རང་ལ་ཡེ་ལྡན་གནས་པ་མཆོད་པ་སྟེ། །རྒྱས་པ་ལས། དགུག་དང་འཛིན་དང་དེ་བཞིན་དུ། །འདུ་དང་འཁྲིགས་པས་དོན་གྲུབ་ཕྱིར། །སྟོམ་དང་མི་གཏོང་དབང་གྱུར་ཏེ། །བདེ་བའི་སྒྲ་སྙན་ཕྱོགས་བཅུ་སྒྲོགས། །ཤིན་ཏུ་སྒེག་པའི་གཟི་བརྗིད་འབར། །ཡིད་བཞིན་རིན་ཆེན་ཕྲེང་བ་འབར། །དབྱངས་སྙན་ཡིད་འཕྲོག་གཟི་བརྗིད་འབར། །གཟུགས་མཛེས་སྤྱོད་པའི་ཕྱོགས་བཅུར་གཡོ། །ཀུན་ཏུ་ཚིམ་བྱེད་བྲོ་བསྲུང་ཐིམ། །ལྟ་བ་རིན་ཆེན་ཕུང་པོར་འབར། །བདུད་རྩི་གསལ་འགྲོ་འཇམ་དཔའི་དབྱངས། །ཞེས་སོ། །གང་གི་དེ་དག་རང་ལ་གནས་ཤིང་དེ་ལ་མི་འདའ་བས། །རང་བཞིན་གྱིས་གནས་པའི་ཕྱིར་ས་མ་ཡ། །སྟེ་དམ་ཚིག་གོ། །སྒོ་གསུམ་གྱི་རང་བཞིན་ལུས་ངག་ཡིད་ཕྱི་ནང་རྩ་རླུང་ཐིག་ལེ་གསང་བ་མཁའ་གསང་ལ་ཡི། །འདུ་བྱེད་སྤྱོད་ཡུལ་ཐམས་ཅད་ཡེ་ནས་དག་པའི་མཛད་པ་ངང་གིས་གནས་སོ། །གཞན་ལུས་ལ་བརྟེན་པའི་ཆགས་པས་ཡང་ཐབས་ཀྱིས་མ་ཟིན་པས་ཁམས་གསུམ་འགྲུབ་པར་བྱེད་ཅིག་ཤོས་ཀྱིས་ཐབས་ཀྱིས་ཟིན་པའི། རང་བཞིན་ལྷན་ཅིག་སྐྱེས་པའི་ཡེ་ཤེས་འགྲུབ་པར་བྱེད་པའོ། །ཆོས་ཀུན་རང་བྱུང་གི་ཡེ་ཤེས་འདུས་མ་བྱས་ཤིང་དབྱེར་མེད་པས་རྡོ་རྗེ་ཕུང་པོའི་ལྔ་དང་འབྱུང་བ་ལྔ་ཡན་ལག་དབང་པོ་རྣམ་ཤེས་ཡུལ་དུས་ཚོགས་པ་ཀུན། །རྫོགས་པའི་སངས་རྒྱས་ཡབ་ལྔ་དང་ཡུམ་ལྔར་གྲགས་སོགས། །སོགས་ཁུང་ནས་སེམས་དཔའ་དང་སེམས་མ་སོགས་གནས་སོ། །དེས་ན་ཕྱི་ནང་གི་དངོས་ཀུན་ཕྱི་ཡུལ་ལ་ཆགས་རྣམས་ཡུམ་དུ་སངས་རྒྱས་པ་དང་ནང་ཕུང་པོ་ལྔ་ལ་སོགས་པ་ཡབ་ཏུ་སངས་རྒྱས་པ་ཚུལ་གྱིས་འབྲས་བུར་གནས་པ་ཡིན་ཏེ། དེ་ལ་བསྒོམ་པའི་ལས་དང་རང་གི་ངོ་བོ་རྟོག་ཚོགས་ལྷའི་དལ་དུ་སངས་རྒྱས་པས་འབྲས་བུར་རང་ལ་གནས་པས་སོ། །ཀུན་རྫོབ་ཀྱི་སྣང་བ་རྣམས་དཔེར་ན་ཀ་ཆུ་ཟླ་ཁ་སྒྱུ་མར་ག་སྤྲུལ་པ་བཞིན། །ཀ་ཕུང་པོ་ལྔ་ཁམས་བཅོ་བརྒྱད་དང་སྐྱེ་མཆེད་བཅུ་གཉིས་རྣམས་སྣང་ལ་རང་བཞིན་མེད་པ་ལྷའི་དལ་དུ་གནས་པས། གཞི་ཡེ་ནས་རྫོགས་པའི་དལ་ཕྱག་༡རྒྱ་༢མ་༣འདྲེས་པ་ཡོངས་སུ་རྫོགས་པར་རིག་པའི་ངོར་རང་གསལ་བ། བསམ་པ་བཞིན་དུ་ཅིར་ག་ཡང་འབྱུང་ལ་འགྱུར་བས་སྤྲུལ་པ་དང་འདྲ་ཞིང་ཅིར་ཡང་འགྲུབ་པའོ། །ཕུང་པོ་ཁམས་སྐྱེ་མཆེད་རྣམས་ཆུ་ཟླ་སྒྱུ་མ་སྤྲུལ་པ་སྣང་ལ་རང་བཞིན་མེད་པ་ལྷའི་དལ་དུ་གནས་པའོ། །གྲངས་ཀྱི་བར་ལ་དོན་དམ་པའི་ལམ་དང་འབྲས་བུའི་ཆོས་རྣམས་རང་ལ་གནས་ཏེ་ཞེས་དམ་བཅའ། གང་ཡང་རིགས་རྒྱུད་རྟག་ཐ་དད་དངོས་པོའི་ཕྱོགས་གཅིག་ཏུ་མིན་པར་འགྲུབ་པས་དང་། ཆོས་ཀུན་སེམས་༢ཉིད་རང་སྣང་བའི་ཕྱིར་དེ་བཞིན་དུ་འཁོར་འདས་ཀྱི་ཆོས་ཀུན་༡ཀྱང་༡དེའི་ངང་དུ་མཚུངས་ཏེ། དེ་ཡང་འཁོར་བའི་ཆོས་འདོད་ཁམས་གྱི་ཕོ་མོ་གཟུགས་གཉིས་མ་ནིང་གི་མཚན་དང་གསུམ་ཁ་ཡོད་པ་གཟུགས་ཁམས་དང་གཟུགས་མེད་ལ་སོགས་པ། མཐོ་དམན་དང་གནས་རིས་སོ་སོར་ཕྱོགས་དང་རིས་སུ་སྡེ་ཆ་ཡོད་མིན་ཏེ་ཐམས་ཅད་ཡུལ་མེད་དུ་རྫོགས་པའོ། །ཆོས་ཀུན་གཉིས་སུ་མེད་པ་ཡུལ་ཡུལ་ཅན་དང་བྲལ་བཞིན་གང་དུ་ཡང་མ་འགགས་པ་དེ་ལྡན་པའི། །དོན་གྱི་སྙིང་པོ་དམ་པའི་མཆོག་དེ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔ་འབྲས་བུའི་དོན་དམ་དང་རང་བཞིན་ཡེ་ཤེས་དོན་དམ་དང་ངོ་བོ་དབྱིངས་དོན་དམ་སྟེ། བདུན་དང་ཡང་ན་དབྱིངས་ཡེ་འབྲས་བུ་གསུམ་ལ་རྫོགས་ཕྱིར་དོན་དམ་ལ། །པའི་བདེན་པ་ཡིན། དཔེར་ན་དཔག་བསམ་གྱི་ཤིང་དང་རིན་ཆེན་དབང་གི་ནོར་བུ་རིན་པོ་ཆེ་ལ་དགོས་འདོད་འབྱུང་བ་ལྟར། །བདུན་ནམ་གསུམ་པོ་དེ་ཀུན་ངོ་བོ་ཉིད་ཀྱི་རྒྱུར་གནས་པའོ། །འཇིག་རྟེན་བརྟན་སྣོད་དང་གཡོ་བ་ནང་བཅུད་ལ་སོགས་པ་དེ་འཁོར་འདས་ཀྱི་ཆོས་ཀུན། རང་བྱུང་གི་ཡེ་ཤེས་རང་སྣང་བས་སྣང་བ་ཉིད་ན་ངོ་བོ་ལ་དངོས་པོར་གྲུབ་པར་མེད་པ་སྟེ། དེ་ཡང་དེ་ཉིད་ལྷག་པའི་ཆོས་སྐུ་ཆེན་པོ་ཡིན། །དེ་ཡང་རང་བཞིན་ནམ་ངང་གིས་དེ་ལྟར་གནས་པའོ། །ལས་གཞན་པའི་འབྲས་བུས་ཐོབ་བྱ་རྡུལ་ཙམ་ཡང་མེད་དོ། །དེ་ཅིའི་ཕྱིར་ཞེ་ན་ཆོས་ཀུན་ཀྱང་འབྲས་བུའི་ངོར་སྨིན་ཟིན་ཕྱིར་དང་དེ་ལས་གཞན་དུ་བགྲོད་པར་བྱ་བའི་ཡུལ་མེད་པའོ། །དེ་ལྟར་ན་དོན་དམ་དེ་ཉིད་ལམ་གྱི་ཡང་ངོ་བོ་ཡིན་སྟེ། དེ་ལ་འཇུག་ཅིང་རྫོགས་པའི་བར་དུ་གནས་ཤིང་གོམས་པར་བྱེད་པ་ལ་ཐ་མ་འབྲས་བུ་མངོན་དུ་འབྱིན་པས་ལམ་གྱི་གཞི་ལམ་འབྲས་བུ་གསུམ་དུ་ཕྱེ་བ་ཡིན་ནོ། །དོན་དམ་དེ་ཉིད་འཁོར་འདས་ཀུན་གྱི་འབྱུང་གནས་ཡིན་ཏེ་ཁྱབ་བྱ་ཁྱབ་བྱེད་མེད་པས་ཕྱོགས་བཅུ་མ་ལུས་འཁོར་འདས་ཐམས་ཅད་ལ། །རང་བྱུང་གི་ཡེ་ཤེས་ཆེན་པོས་ཏིལ་མར་བཞིན་ཀུན་ཏུ་ཁྱབ། །རང་བྱུང་ཡེ་ཤེས་དེ་ཉིད་དངོས་པོ་དང་མཚན་མ་མེད་པར། །ཕྱོགས་མེད་ཀུན་ཏུ་སྣང་བས་ཀུན་གྱི་ཕྱག་རྒྱའི་ངོ་བོ་ཉིད་ཀྱི་རྒྱུ་ཡིན་པའི་ཕྱིར། ཆོས་ཀུན་དེ་ལྟ་བུ་ཡི་ངང་དུ་གནས་ངེས་སོ། །དེ་བཞིན་དོན་དམ་ལ་འཁོར་འདས་ཀྱི་ཆོས་ཀུན་ལྷག་མ་མེད། དོན་དམ་བཅོས་སླད་མེད་པར་གནས་པ་ཉིད་མཐའ་ཐུག་པ་མེད་པ་དབྱིངས་སྒྲིབ་གཡོགས་མེད་པར་རང་གསལ་ཡེ་ཤེས་ཏེ། །དེ་ཉིད་མ་འགགས་པ་ཐབས་ཀྱི་ཕྱག་རྒྱ་སྣ་ཚོགས་སུ་སྣང་བའི་འཁོར་འདས་ཀུན་གྱི་ངོ་བོ་ཉིད་ཀྱི་རྒྱུའོ། །དེ་ཡང་རྒྱུ་རྐྱེན་བཞི་ལ་སོགས་པ་བསྐྱེད་པར་བྱེད་པའི་མིང་གི་རྣམ་གྲངས་སུ་མཚན་པ་མེད་པའི་ངོ་བོ་ཉིད་ཀྱི་རྒྱུ་ཉིད་དང་མ་འདྲེས་པ། ཡོངས་སུ་རྫོགས་པས་རྫོགས་པ་ཞེས་ཀྱང་བརྗོད། །གྲངས་གསུམ་པ་བདེན་པ་དབྱེར་མེད་ཀྱི་ཐ་དད་དངོས་པོར་ཞེན་པ་ཡི། །མྱ་ངན་ལས་འདས་པ་དང་འཁོར་བའི་ཆོས་ཀུན་ཆོས་ཅན་གཉིས་སུ་མེད་དེ། གཏན་ཚིག་ཡེ་ནས་འཁོར་འདས་རིགས་རྒྱུད་རྟག་པ་མིན་པས། །བྱེ་བྲག་སོ་སོའི་གཟུགས་དང་སྒྲ་དང་དྲི་དང་རོ་དང་རེག །ཆོས་ལ་སོགས་པ་འཁོར་འདས་ཀྱི་བྱེ་བྲག་སོ་སོའི་ཐ་སྙད་མིང་དུ་བརྟགས་པ་ཀུན། །དཔེར་ན་འཇའ་ཚོན་སྣང་བ་ལྟར་ཤར་ཡང་དོན་དམ་མཁའ་ལྟར་ཁ་དོག་ལྔ་སོ་སོར་མ་འདྲེས་རང་གསལ་སེམས་ཉིད་གཅིག་གི་ངང་སྣང་ཡང་། རང་བྱུང་ཡེ་ཤེས་འདུས་མ་བྱས་ཉིད་ཀུན་རྫོབ་འདུས་བྱས་སྣང་། །འདུས་བྱས་སུ་སྣང་བ་སྣང་བའི་དུས་ཉིད་ན་ཡང་ངོ་བོ་རང་བྱུང་གི་ཡེ་ཤེས་དབྱེར་མི་ཕྱེད་པ་རྡོ་རྗེ་ཉིད། །དེ་ལ་རྒྱལ་འགྲོས་ཏེ་སངས་རྒྱས་སྒམ་པོས་མ་མཛད་སེམས་ཅན་སྒྲེན་པོས་ཁ་མ་བཅོས་པར། །རང་བཞིན་ངང་གིས་བདེན་པ་དབྱེར་མེད་པའང་། །དེ་ལྟར་མིན་ཏེ་ཐ་དད་དུ་འཛིན་པའི་ཞེན་པ་གྲོལ་བའི་ཕྱིར་དབྱེར་མེད་དུ་བསྟན་པ་ལས་ངོ་བོ་གཉིས་ཅན་དང་གཉིས་མེད་ལ་སོགས་པ། ཐ་སྙད་གཉིས་པར་ཡིད་ཀྱི་བསམ་པ་དང་ངག་གིས་བརྗོད་པའི་མཐའ་ལས་འདས། །དེས་ན་ཡུལ་དང་ཤེས་པར་སྣང་བ་ཡང་། །རང་བྱུང་གི་ཡེ་ཤེས་ཉིད་རང་སྣང་བར་ཟད་དོ། །དེ་ལྟར་རྒྱུ་འབྲས་ལྟ་བུར་སྣང་ཡང་ངོ་བོ་རྒྱུ་འབྲས་གཉིས་པ་མེད་དེ་རང་བྱུང་ཡེ་ཤེས་སུ་དབྱེར་མེད་པའོ། །ཕྱི་སྣོད་དང་ནང་བཅུད་གཉིས་གསང་བའང་སེམས་ཀྱི་དེ་ཉིད་དང་། །དེ་ལྟར་ཆོས་ཀུན་ཡེ་ཤེས་རང་ལ་གནས་པ་དེ། ལམ་དང་འབྲས་བུ་ཀུན་གྱི་དངོས་གཞི་ཡིན་པས། །དོན་དང་འབྲེལ་པ་ངོ་བོ་ཀ་བདག་གཅིག་གི་ཕྱིར་འབྲས་བུ་འཐོབ་བྱེད་ཐབས་ག་ཆེན་པོས། འབྲས་བུ་མངོན་དུ་བྱེད་པའི་ཕྱིར་དེ་ལས་གནས་གཞན་ན་མེད་དེ་རང་ལས་འབྱུང་བར་ཟད་དོ། །རང་བྱུང་ཡེ་ཤེས་རང་ལ་ཡེ་ནས་གནས་པའི་དོན་སྔོན་དུ་འགྲོ་བའི་ལམ་ཞེས་བྱ་བ་ལེའུ་སྟེ་དང་པོའོ། ༈ །རང་བྱུང་ཡེ་ཤེས་བདེན་པ་དབྱེར་མེད་ལྷུན་གྲུབ་ངང་ལ་ལྟ་བ་མཇལ་བའི་ཕྱག་འཚལ་ནས། །དང་པོའི་རྒྱུ་མཚན་ཉིད་ལས་ལམ་ཉེ་བ་དང་བདེ་བ་རྫོགས་པས་ལམ་མཆོག་ཡིན་ཏེ་ཡིན་པའི་དོན་ལྟ་བ་ཉིད་བཤད་པར་བྱའོ། །ཞེས་བཤད་པ་དམ་བཅའོ། །འོ་ན་ཤེས་རབ་སྤྱན་འབྱེད་ལས། དམན་ལ་རྒྱལ་གསུམ་གོམས་པ་ཡི། །བརྟན་ནས་བརྟག་དཔྱད་ཀླུང་ཞུགས་མཐོང་། །ཞེས་སྔོན་ལ་སྒོམ་པ་བྱས་ནས་ལྟ་བ་ཕྱི་ནས་བཤད་པ་དང་འགལ་ལོ་ཞེ་ན། ལྟ་བ་མ་རྟོགས་ཀྱི་གོང་དུ་ལམ་ཚོལ་བ་ཡིན་གྱིས། ལམ་ནི་ལྟ་བ་རྟོགས་ནས་ལམ་དུ་འགྲོ་བས་སྐྱོན་མེད། དེ་ནས་ལམ་གྱི་སྔོན་དུ་ལྟ་བ་རྟོགས་དགོས་པས། དང་པོ་ལེའུ་གཉིས་པ་ལྟ་བ་གཏན་ལ་འབེབ་པ་ཀྱང་དང་པོའི་ལེའུ་ཞེས་བྱའོ། །གང་དག་བློ་དང་ལྡན་པ་ཡེ་ཤེས་རང་གནས་ལྟ་བ་མངོན་དུ་མཐོང་འདོད་པས་དོན་བཅུ་བཞི་སྟེ་དགོས་ཆེད་དང་། ལྟ་བ་རྟོགས་པའི་དུས་སྣོད་རྒྱུ་རྐྱེན་ཐབས་གྲངས་དངོས། །སྤྱོད་དྲུག་པོ་ཐོབ་པ་ཡོན་དྲོད་རྟགས་གསུམ་པ་ངོ་བོ་ཚད་དང་སྐྱོན། །ཡན་ལག་སྤྲོས་པའི་རྩ་བར་བཞག་གོ །ཆོས་ཉིད་བསམ་གྱིས་མི་ཁྱབ་པའི་དོན་མ་རྟོགས་ཤིང་མ་མཐོང་བར། །བསྒོམ་པ་བསམ་མེད་ཀྱི་རང་བཞིན་དཀྱིལ་འཁོར་དུ་འཇུག་པར་བྱེད་པ་དེ། ཡང་དག་པའི་སྣང་བ་མེད་པ་བླུན་པོ་མ་ངེས་པའི་མུན་སྤྲུལ་ཆོས་ཀྱི་དོན་མི་ཤེས་པའི་བློ་ཅན་དེ། །ཤེས་རབ་ཀྱི་མིག་མེད་པས་ལོང་བའི་གྲོང་ཁྱེར་ཆེན་པོར་འགྲོ་སྟེ་འཁོར་བའི་གནས་སུ་འཁྱམས། ལྟ་བ་མ་རྟོགས་ན་སྒོམ་ཀྱང་ལམ་མི་རྙེད་པ་དེ་བས་ན་མ་རིག་ལིང་ཏོག་དང་འདྲ་བས་པྲཛྙཱའི་མིག །ལྡོང་པས་དེ་ལ་སློབ་དཔོན་རྡོ་རྗེ་ཐུར་མ་མཁན་དང་འདྲ་བ་དེ། ཟང་ཟིང་དང་སྲིད་ཞུས་མཉེས་པར་བྱས་་ཏེ དབང་ཐོབ་པ་ལ་སོགས་པ་སྔོན་དུ་བྱས་ནས་གཟོད་མ་ཧཱའི་གཞུང་ཐོས་ཏེ། ཤེས་རབ་ཀྱི་སྤྱན་དབྱེ་རང་བཞིན་གྱི་དཀྱིལ་འཁོར་མཐོང་བར་བྱ་དགོས་པའོ། །དེ་ལྟར་རྟོགས་ཤིང་མཐོང་བར་བྱེད་པ་དེ་ཡང་ཁ་རང་བཞིན་གྱི་སྦྱངས་པ་ཡིས། སྣོད་དུ་གྱུར་པ་ལ་དུས་ཉེ་བ་དང་རིང་བ་གཉིས་སུ་ཡོད་པའི་ཕྱིར། དེ་ལའང་རིམ་དང་ཅིག་ཆར་བ་སྟེ་བཞི་ཆ་རང་གནས་པ་ཡིས། །ཕྱེ་བས་རྣལ་འབྱོར་ཆེན་པོར་མ་ཧཱ་ཡོ་ག་འདིར་འཇུག་ཅིང་རྟོགས་པར་བྱེད་དོ། །དུས་རིང་པ་བསྐལ་པ་སྤྲུལ་སྐུའི་ཞིང་གི་རྡུལ་སྙེད་དུ། དང་གྲངས་མཉམ་པའོ། །ངེས་འབྱུང་གི་ཐེག་པ་ལ་སོགས་པ་ལ་བློ་ཤིན་ཏུ་སྦྱངས་པ་ལ་རབ་ཏུ་གནས་པའི་སྦྱངས་པ་ཡུན་རིང་བ་ཡང་ན་མང་བར་ཆད་ཡོད་དེ། ཤེས་རབ་ཀྱི་མིག་དང་ལྡན་པས་མ་ཧཱ་འདིར་འཇུག་པའི་ཕྱིར། །དུས་རིང་བའང་རིམ་གྱི་དང་ཅིག་ཆར་བའོ། །སྔ་མའང་དུས་རིང་བ་རིམ་གྱི་སས་ཏན་ཏྲ་རྒྱུད་གཞུང་ཉིད་ལས། ས་རྣམས་ཀྱི་ཁྱད་པར་དང་རིམ་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ་སྟེགས་ཙམ་ཡིན་ནོ། །ཡང་ངན་སོང་གསུམ་ལ་ལྷ་མིའི། འཁོར་བ་ལ་ཉན་རང་། མཐའ་གཉིས་ལ་བྱང་སེམས། ཀྲི་ཡོ་སོགས་ཕྱི་རྒྱུད་ལས་མ་ཧཱ་སྟེ་ཐེག་པ་བཞི་ཡིས་ངེས་འབྱུང་ལ། །གསང་སྔགས་ཐེག་པ་གཅིག་གིས་འབྲས་བུ་གནས། །དེ་ལྟར། ལམ་འོག་མའི་སྟེགས་སྔོན་དུ་རྫོགས་པར་བྱས་ནས་མ་ཧཱ་ལ་སྦྱོར། །ལུང་ནས་བཤད་པ་དེ་ཕྱིར་རིགས་མ་ངེས་ཏེ་སོ་སོའི་སྐྱེ་བོ་ནས་ཆོས་ལ་སྐྱེ་བའི་རིགས་མཆོག་གཞི་ནས། །སོ་སོ་སྐྱེ་བོ་མུན་པ་ཤེས་པའི་བློ་སྐྱེ་བ་ཡིན་པ་དེ་ཉིད། །བདེ་བར་གཤེགས་པའི་སྙིང་པོ་རང་བཞིན་གྱི་གནས་པའི་རྒྱུ་ཡིས་འཁོར་བ་ལ་སྐྱོ་བ་བག་ཙམ་སྐྱེ་སྟེ་སྨྱུང་བར་གནས་པ་ནི་རྒྱུའི་རྐྱེན། འཇིག་རྟེན་ཕལ་པའི་ཐེག་པ་ལ་འཇུག །སེམས་བརྒྱད་སྐྱེ་སྟེ་དེ་ལ་སེམས་བརྒྱད་ནི། ས་བོན་ལྟ་བུའི་སེམས་དང་། མྱུ་གུ། སྡོང་བུ། ཡལ་ག །ལོ་མ། མེ་ཏོག །འབྲས་བུ། གསོས་སུ་གྱུར་པའོ། །དང་པོ་མུན་པའི་ཤེས་པ། སྐྱེ་བའི་ས་ནས་འཁོར་བ་ལ་སྐྱོ་ཞིང་། ཆོས་བྱ་བའི་བསམ་པ་འབྱུང་བ་ནི་ས་བོན་ལྟ་བུའོ། །རང་གི་ཕ་མ་དང་མཛའ་བཤེས་ལ་སྦྱིན་པ་གཏོང་བ་ནི་མྱུ་གུ་ལྟ་བུའོ། །ཕྱོགས་མི་འབྱེད་པར་གཏོང་བ་ནི་སྡོང་བུ་ལྟ་བུའོ། །དགེ་སྦྱོང་ལ་སོགས་པ་ནི་དམིགས་བདེ་བ་ཡལ་ག་ལྟ་བུའོ། །དེ་ལ་ཡན་ལག་བརྐྱངས་ནས་གཏོང་ཞིང་སྤྲོ་བ་བསྐྱེད་པ་ནི་ལོ་མ་ལྟ་བུའོ། །ལྷུག་པར་གཏོང་ནས་ཆེར་སྤྲོ་བ་བསྐྱེད་པ་ནི་མེ་ཏོག་ལྟ་བུའོ། །བསྙེན་གནས་ལ་སོགས་པ་སྡོམ་པ་སྣ་རེ་བསྲུང་བ་ནི་འབྲས་བུ་ལྟ་བུའོ། །མོས་པས་ལྷ་དཀོན་མཆོག་གསུམ་ལ་མཆོད་པ་ནི་གསོས་སུ་གྱུར་པའི་སེམས་སོ། །མཐར་ཕྱིན་པར་གནས་པའི་ཚེ། །བདེ་གཤེགས་སྙིང་པོ་རང་བཞིན་གྱིས་གནས་པ་མཚུངས་པ་དང་ལྡན་པའི་རྒྱུ། བླ་མ་དགེ་བའི་བཤེས་གཉེན་འགྲོ་བའི་མགོན་པོ་ལས་ལུང་གོང་གི་སྐྱོན་ཡོན་གཉིས་ཐོས་པས་གོང་མའི། ཡོན་ཏན་མཐོང་ཀ་དང་འོག་མའི་སྐྱོན་མཐོང་བ་དང་། །དེ་ཡི་སྟོབས་ཀྱིས་འཁོར་བ་ལ་སྐྱོ་ཞིང་རྨོངས་ཡོན་ཏན་ལ བྲོད་ཁ་དྭང་བ་དང་། རྒྱུ་གཉིས་མཚུངས་པའི་ལྷན་བྱེད་པའི་རྒྱུ་རུ་གསུངས་པ་ཡིན། །གོང་གི་བླ་མ་དེ་བདག་པོའི་རྐྱེན་གསང་སྔགས་ལ་སོགས་ཐེག་པའི་དམིགས་པ་རྐྱེན་སློབ་མ་སྣོད་ལྡན་རྒྱུ་རྐྱེན་སྟེ། །དེ་གསུམ་འཛོམ་པའི་སྐད་ཅིག་ལ་བློ་འཕེལ་བ་མཚུངས་པ་དེ་མ་ཐག་པའི་རྐྱེན་ནོ། །གསུང་སྒྲོས་གཅིག་ལ། བདག་པོའི་རྐྱེན་དགེ་བའི་བཤེས་གཉེན་རྒྱུ་དང་ཐུན་མོང་བ། འཇུག་པའི་རྐྱེན་སྔ་མ་ཕྱི་མ། དམིགས་པའི་རྐྱེན་གསང་སྔགས་འཇུག་པའི་རྐྱེན་དེ་མ་ཐག་པ་སྟེ་མཐུན་རྐྱེན་བཞི་སྟེང་ཡིད་དྲུག་དྭང་བ་སྐྱོན་མེད་པ་དམིགས་པའི་རྐྱེན་གསང་སྔགས་སོགས་ཀྱི་ཡུལ་དྲུག་འཛོམ་པ་འཇུག་པའི་རྐྱེན་ཚོགས་དྲུག་ཤེས་པ་གསལ་བ་དེ་མ་ཐག་སྐད་ཅིག་བར་མ་ཆོད་པ་འཕེལ་ཞེས་གསུངས། དེལྟར་རྒྱུ་གཉིས་རྐྱེན་བཞི་དང་དྲུག་ལས་རྩ་ལས་མེ་མཆེད་པ་བཞིན་དུ་སེམས་གཡོས་ཤིང་སྐྱེ་ཏེ། །ངེས་འབྱུང་གི་ཐེག་པ་བཞི་ཡི་ཐོག་མ་ལྷ་མིའི་ཐེག་པ་དང་པོར་ཞོག །དེ་ནས་ཉན་རང་བྱང་སེམས་ལ་སོགས་པ་ནས་རིམ་གྱིས་བགྲོད་པར་བྱས་ཏེ། །ཐེག་པ་སྔ་མ་རྒྱུ་གཉིས་རྐྱེན་བཞིའི་སྟོབས་གྱིས་ཐེག་པ་གོང་མར་འཕར་བ་སྟེ། ཡོ་གའི་རྣལ་འབྱོར་རྒྱུད་ཀྱི་དོན་ལ་གནས་པ་ལས། །མ་ཧཱའི་འདི་སྟོན་པའི་སློབ་དཔོན་བཤེས་གཉེན་མགོན་ལ་ལུང་ཐོས་པས། །གོང་དུ་བསྟན་པ་དེ་ཅི་བཞིན་དུ་རྒྱུ་གཉིས་དང་རྐྱེན་བཞིས། །བླ་མེད་ཐེག་པ་མཆོག་གི་དོན་ལ་འཇུག་སྙམ་པའི་གཡོ་བའི་སེམས་འབྱུང་བར་འགྱུར་རོ། །མ་ཧཱའི་གཞི་དེས་གནས་ལུགས་དོན་ཏེ་ཁོང་དུ་ཆུད་ན་སྙམ་པའི་སྨོན་པས། །ལྷག་པའི་གཟུགས་བརྙན་གྱི་དལ་དུ་རྡོ་རྗེ་ལས་རིམ་ནས་འབྱུང་བཞིན་འཇུག་པར་བྱེད། །བླ་མེད་མཆོག་གི་དམ་ཚིག་ནན་ཆགས་ཀྱི་སྒོ་ནས་དེ་རུ་བྱིན། །དོན་མ་ཧཱ་ལ་རིགས་ངེས་པར་གྱུར་པའི་སློབ་བུ་ལ་ཕན་པའི་དབང་བཅུ་དང་། ནུས་པའི་དབང་ལ་གཉིས་ཀྱི་ཉན་པའི་དབང་དང་བསྒོམ་པའི་དབང་གཉིས་བྱིན་རླབས་རྒྱུད་ལ་བཞག །དེ་ནས་ཤེས་རབ་ཀྱི་རང་གི་སྤྱན་མཆོག་འབྱེད་པའི་ཐབས་ཐོས་བསམ་ལ་བརྩོན་པས། རང་བཞིན་གྱི་རྒྱུ་ཡིས་དཀྱིལ་འཁོར་མཐོང་བར་བྱ་བའི་ཕྱིར། །མ་ཧཱའི་གཞུང་ལ་ཐོས་བསམ་ཤེས་རབ་དམ་པ་ལེན་པར་བྱེད་པས། སྦྱོངས་པའི་སྣོད་དུ་གྱུར་པའོ་ཁ་ཅིག་དུས་མཐའ་ཅིག་ཆར་བ་ལས་རིམ་གྱིས་པ་དང་ཅིག་ཆར་བ་གཉིས་ལས་ཅིག་ཆར་པ་ལ་མཐའ་དྲུག་ཡོད་པ་སྟེ་དེ་ལ་འདིར་མཐའ་དྲུག་ནི་དུས་མཐའི་ཅིག་ཆར་པ། རང་བཞིན་ཅིག་ཆར་བ་དང་། གཞི་གནས་ཀྱི་དང་། གནས་སྐབས་ཀྱི་དང་། བྱ་བ་རྫོགས་པའི་དང་། ནམ་ངག་གི་ཅིག་ཆར་བའོ། །སྔ་མ་ནི། སྔར་ངེས་འབྱུང་གི་ཐེག་པ་ལ་སྦྱངས་ནས། ཀྲི་ཡོག་སྡེ་གསུམ་བོར་ཏེ་མ་ཧཱ་ལ་ཅིག་ཆར་དུ་འཇུག་པ་ལ་སོགས་པའོ། །གཉིས་པ་ནི་རང་བཞིན་གྱིས་དབང་པོ་རྣོན་པོ་རྟོགས་གྲོལ་དུས་མཉམ་པའོ། །གསུམ་པ་ནི་སྔགས་གང་ལ་མ་སྦྱངས་པར་སོ་སོ་སྐྱེ་བོ་ནས་ཐེག་པ་མཆོག་ལ་འཇུག་པའོ། །བཞི་པ་ནི་ཐོད་རྒལ་བ་གནས་སྐབས་ལམ་བོར་ནས་ཅིག་ཅར་དུ་བགྲོད་པའོ། །ལྔ་པ་ལམ་མཐར་ཕྱིན་ཏེ་སངས་རྒྱས་ཀྱི་ས་ལ་སྐད་ཅིག་གིས་འགྲོ་བའོ། །དྲུག་པ་ནི་སྙན་རྒྱུད་ཞལ་ཀྱི་མན་ངག་གིས་སྐད་ཅིག་ལ་རང་སྣང་མངོན་དུ་འཕྲོད་པའོ། །བསྐལ་པ་རྡུལ་སྙེད་དུས་སྦྱངས་བ་སྔོན་དུ་སོང་བས། །ཐུན་མོང་གི་ཐེག་པ་ལ་ཡུན་དེ་སྙེད་སྦྱངས་པའི་མཐའ་ཕྱི་པ་ལ་མ་ཞུགས་པར། དོན་དམ་དང་ཀུན་རྫོབ་མ་འགགས་མ་དམིགས་དབྱེར་མེད་པ་སྒྱུ་འཕྲུལ་དྲྭ་བའི་དོན་མ་ཧཱ་ལ་ཞུགས་པས། བསྐལ་པ་ཞིང་གི་རྡུལ་སྙེད་དུ་སྔར་དུ་སྦྱངས་ནས་མ་ཧཱ་ལ་འཇུག་པའང་འདི་ཚེ་ངེས་འབྱུང་གི་ཐེག་པ་བཞི་ལ། རིམ་གྱིས་སྔར་སྦྱངས་ལ་ཚེ་འདི་མ་ཧཱ་ལ་ཅིག་ཆར་དུ་འཇུག་པར་བྱེད་དེ་བགྲོད། །སྦྱངས་པ་ལ་ལ་གཞན་པའི་དབང་པོ་རང་བཞིན་གྱིས་རྣོན་པོ་དག །རྒྱུ་འབྲས་ཐེག་པ་ཆེན་པོ་འོག་མ་ལྟར་ལ་མཚན་ཉིད་དང་གསང་སྔགས་གཉིས་ལ་འཇུག་སྟེ། །སྔར་ཐེག་པ་ཆེ་ཆུང་གང་ལ་ཡང་མ་སྦྱངས་བར་ཐེག་པ་ཆེན་པོར་འཇུག་པ་ནི་མཐུ་བྱིན་གྱི་རླབས་ཀྱིས་གྲུབ་པ་གསུམ་སྟེ་དེ་ནི་ཆོས་རང་བཞིན་ནམ་ངོ་བོ་ཉིད་ཀྱིས་གྲུབ་པ། མཐུས་གྲུབ་པ་བྱིན་གྱིས་བརླབས་པའི་གྲུབ་པ། དེ་ལྟར་གྲུབ་པ་གསུམ་གྱི་ཕྱིར་རང་བཞིན་གྱི་དབང་པོ་རྣོན་པོར་གྲུབ་པའོ། །དེ་ལ་དང་པོ་རང་བཞིན་ནམ་ངོ་བོ་ཉིད་ཀྱིས་གྲུབ་པ་ནི། བྱང་ཆུབ་ཀྱི་སྙིང་པོ་རང་བྱུང་གི་ཡེ་ཤེས་ནས་སངས་རྒྱས་པའི་ངོ་བོར་གནས་པས་རང་བཞིན་ངོ་བོ་ཉིད་ཀྱིས་གྲུབ་པ་ཞེས་བྱའོ། །གཉིས་པ་ནི་ཐེག་པ་ཆེན་པོའི་རིགས་ཅན་གོ་ནུས་རྟོགས་ནུས་ཀྱི་བློའི་རང་བཞིན་ལྔ་དང་ལྡན་པའོ། །གསུམ་པ་ནི་དེ་དང་ཚུལ་མཐུན་པར་བྷུདྡྷ་ལ་སོགས་པས་བྱིན་གྱིས་བརླབ་པའི་རང་བཞིན་གྱིས་བྱིན་བརླབས་འབྱུང་བའོ། །དེའི་ཕྱིར་གྱིས། །མཐོ་བ་ནམ་མཁའ་བརྟན་པ་རི་རབ་མྱུར་བ་གློག་རྣོ་བ་རལ་གྲི་རྒྱ་ཆེ་བ་ས་གཞི་ཡངས་པ་བར་སྣང་། ཟབ་པ་རྒྱ་མཚོ་ལྟ་བུ་ཡོད་ཅིང་རྒྱུ་བློ་དང་ལྡན་པ་དེ་ལྟ་བུ་ཡི་གང་ཟག་དེ། །ཉིད་ཀྱང་གཞན་རྐྱེན་དགེ་བའི་བཤེས་གཉེན་དང་དེ་བློ་དང་གཞན་རྐྱེན་གྱི་རིམ་པས། །ཕྱེ་བས་རྒྱུའི་ཐེག་པ་ཆེན་པོ་དང་འབྲས་བུའི་ཐེག་པ་ཆེན་པོ་རྣམས། །མ་ངེས་པར་འཇུག་པ་དང་མ་ཧཱའི་སྟོན་པ་དང་འཕྲད་ན་འདི་ཉིད་དུ་འཇུག་པའོ། །དེ་དེའང་རང་བཞིན་དང་སྦྱངས་པའི་སྣོད་དུ་གྱུར་པ་རང་སེམས་བརྟན་པའི་སྣོད་ཀྱི་རང་བཞིན་བདུན་དང་ལྡན་ཏེ་དངོས་ཐམས་ཅད་ཀྱི་གཞི་པོ་དེ་དང་། ཡང་དག་དོན་གྱི་བཤེས་གཉེན་རྣམས་དང་ངོ་བོས་གཉིས་གཅིག་པའམ་བདག་གཅིག་པའི་རང་སེམས་བསྟན་པའི་དངོས་གཞི་པོ་དེ་དང་འབྲེལ་པ་ཡོད། དེ་ལྡན་ཤེས་བྱ་ཤེས་བྱེད་ཀྱི་འབྲེལ་པ་ཡོད་སྣོད་བཅུད་དུ་ཐེག་པ། ཆེན་པོའི་ལུང་དང་བཅུད་འབྲེལ་བ་ཡོད་པ་དང་། །བླ་མ་དགེ་བའི་བཤེས་གཉེན་མགོན་དང་ཤེས་བྱ་ཤེས་བྱེད་སློབ་བུ་གཉིས་ལས་དང་ཐུགས་རྗེས་འབྲེལ། །རྒྱུ་རྐྱེན་དང་འབྲེལ་ཡོད་པ་དེའི་ཕྱིར་ཐེག་མཆོག་མ་ཧཱ་ཡོ་གའི་ལུང་རྡོ་རྗེ་སློབ་དཔོན་རྣམས་སློབ་དཔོན། དང་མཇལ་བར་བྱེད་ཅིང་རྟོགས་པའི་ཕྱིར་རྒྱུ་གཉིས་རྐྱེན་བཞི་སྟེ་དྲུག་དང་། ལྡན་པས་མ་ངེས་ཏེ་ཐེག་པ་ཆེན་པོ་རྒྱུ་དང་ཕྱི་པ་གང་རུང་གཅིག་འཇུག་པ་ནི། །ཤེས་རབ་དབང་པོ་ལ་ཇི་ལྟར་མོས་པ་བཞིན་དང་མོས་པའི་རྐྱེན་དགེ་བའི་བཤེས་གཉེན་གྱིས། །དབུ་སེམས་མཚན་ཉིད་ཐེག་པ་ཆེན་པོ་རྒྱུའམ་བྱ་བ་ཀྲི་ཡའི་ཨུ་པ་ཡ་གཉིས་གའམ། །རྣལ་འབྱོར་ཅེས་ཡོ་གའི་ཐེག་པར་ལ་སོགས་ཏེ་གང་མོས་ལ་སྦྱོར་བར་བྱེད། །དེ་ནས་དེ་བཞིན་དུ་འདིར་མ་ཧཱ་ལ་འཇུག་པའང་། །རིམ་གྱིས་པ་སྔོན་བཞིན་གཡོ་བའི་སྨོན་པའི་འཇུག་སེམས་ཀྱིས་འདིར་མ་ཧཱ་ལ་སྦྱོར། །འདི་ཉིད་ལ་གནས་པས་སེམས་ཅན་དོན་མཐར་ཕྱིན་པར་བྱེད་པའི་སེམས་པ་ནི། །ཐོག་མའི་ཅིག་ཆར་ལ་ལྟོས་པས་རིང་བའི་དུས་ཉིད་དོ། །རིགས་མ་ངེས་པ་སོ་སོ་སྐྱེ་བོ་ནས་འབྲེལ་རྒྱུ་རྐྱེན་བཞི་དང་། ལྡན་པས་སྟེ་མཚུངས་ལྡན་གྱི་རྒྱུ་བཞི་སྟེ་བདེ་བར་གཤེགས་པའི་སྙིང་པོ་རང་ཆས་སུ་གནས་པ་དང་ལྷན་ཅིག་བྱེད་པའི་རྒྱུ་འཁོར་བའི་སྐྱོན་དང་མ་ཧཱའི་ཡོན་ཏན་ཐོབ་པས་འོག་མ་ལ་སྐྱོ་ཞིང་གོང་མ་ལ་འཇུག་པའོ། །རྒྱུའི་རྐྱེན་རང་བཞིན་སྦྱོང་བར་གནས་པ་སྟེ། འཁོར་བ་ལ་བློ་ལོག་པའོ། །བདག་པོའི་རྐྱེན་ཐེག་མཆོག་འདི་ཉིད་ཀྱི་དགེ་བའི་བཤེས་གཉེན། དམིགས་པའི་རྐྱེན་གསང་སྔགས་མ་ཧཱ་ཡོ་ག །དེ་མ་ཐག་པའི་རྐྱེན་སྔ་མ་སྔ་མ་ཕྱི་མའི་གོ་འབྱེད་པའོ། །དེ་ལྟར་གོང་མ་རྣམས་ལའང་དམིགས་པར་བྱའོ། །རྣལ་འབྱོར་མཆོག་དམན་ལ་སྦྱོར་བ་ནི། དཔེར་ན་མུན་པ་ལ་ཉི་མའི་འོད་ཟེར་འབྱུང་བའི་ཚུལ་རྩ་ལ་མེ་མཆེད་པ་ལྟར། །ལྷག་པའི་སེམས་སྐྱེ་བ་དེའང་གཡོ་བ་དང་སྨོན་པ་དང་འཇུག་པ་ལ་སོགས་པའང་སྔོན་རིམ་གྱིས་བཞིན་ཏེ་རིམ་པར་སྐྱེའོ། །འོ་ན་འཇུག་ཚུལ་ཁྱད་པར་སྣོད་ཀྱི་བློའི་རང་བཞིན་བདུན་དང་ལྡན་པའང་ཏན་ཏྲ་སྟེ་རྒྱུད་གསང་བ་སྙིང་པོ་ཡི། །གཞུང་གི་སྣོད་ལྡན་ངང་རིང་བ་ཚུལ་བཟང་བ་རང་བཞིན་སྙིང་རྗེ་དང་ལྡན་པའི་ཤེས་པ་སོགས། །སྣོད་ཡོན་ཏན་དང་ལྡན་པས་དེས་ཤེས་རབ་གསུམ་གྱི་བསླབ་པ་ལ། །རང་བཞིན་གྱི་གནས་པ་རང་བྱུང་གི་དཀྱིལ་འཁོར་ཆེན་པོ་རུ། །གཞུང་ཐོས་པས་དམིགས་ཕྱེ་བ་དང་འདྲ། ལྟ་བ་རྟོགས་པ་དལ་མཐོང་བ་དང་། སྒོམ་པར་བྱེད་པས་དལ་དུ་ཆུད། མངོན་དུ་གྱུར་པའི་དབང་ཐོབ་པ་དང་འདྲའོ། །དེ་ལྟར་འཇུག་པ་བཞི་ཡི་ཡན་ལག་གི་དོན་མཆོག་རྟོགས་པར་བྱེད་པའང་། དང་པོ་ཐོས་བསམ་ཆེད་དུ་གཉེར་བར་བྱེད་པའོ། །སྣོད་དང་ལྡན་པ་གང་ཟག་དེ་ཐོས་པའི་ཤེས་རབ་ཀྱི་སྦྱོངས་པའི་སྣོད་དུ་གྱུར་པ། ཚོལ་བའི་ཚེ། །པ་རྒྱུ་གཉིས་དང་རྐྱེན་བཞིས་རིམ་གྱིས་སྦྱངས་ནས་མ་ཧཱ་ལ་བཟོད་པ་ཐོབ་པ་དང་། །རང་བཞིན་གྱིས་སྣོད་དུ་གྱུར་པ་རང་གིས་མ་ཧཱ་ལ་མི་སྐྲག་ཅིང་བཟོད་པ་ཐོབ་པས། །མ་ཧཱའི་གཞུང་དེ་ཁོང་དུ་ཆུད་པར་བྱ་བ་ལ་རེ་བ་དང་སྨོན་པའི་སེམས་ཀྱིས་ཉན་པ་དང་། སྒོམ་པ་ལ་བརྩོན་འགྲུས་བྱེད་ཅིང་ཀ་སྦྱོར་ཀ་བའོ། །སྣོད་ལྡན་གང་དག་མཉན་པ་དང་བསམ་པའི་ཤེས་རབ་བྱེད་པའི་ཚེ། །གཞུང་ཉན་ཅིང་ཐོས་པའི་དོན་འཛིན་པས་བསམ་པ་དང་། །བསམ་པའི་ཚེ་ན་རྟོག་དཔྱོད་བྱེད་པ་སྟེ། གཉིས་པོ་འདི་དག་ལྟ་བ་རྟོགས་ཤིང་ཤེས་པར་བྱེད་པའི་རྒྱུའི། ག་མཁན་པོ་དགེ་བའི་བཤེས་གཉེན་ལ་ལུང་དང་མན་ངག་བཅས་པ་ནི། དོན་ལ་མི་འབད་ཅིང་ལྷན་ཅིག་ལྟ་བ་རྟོགས་པར་བྱེད་པའི་རྐྱེན་དུ་འདོད། །བློའི་ཁ་རང་བཞིན་མཐོ་བརྟན་མྱུར་རྣོ་ཆེ་ཡངས་ཟབ་པའི་མཚན་ཉིད་བདུན་དང་མཚུངས་པར་ལྡན་པ་དེའི། རང་བཞིན་དབང་རྣོན་ཅིག་ཤོས་མཚུངས་ལྡན་གྱི་རྒྱུ་རུ་ངེས་པ་ཡིན། །དེ་ལྟར་དུས་སྣོད་འབྲེལ་བ་རྒྱུ་རྐྱེན་ལྡན་པས་ཤེས་རབ་ཀྱི་སྤྱན་གྱིས་ལྟ་བ་འཚོལ་བའི་ཚེ། །གཏན་ཚིགས་རྣམས་ཀྱིས་རྨལ་བར་བྱས་ཏེ་རྟོགས་པར་བྱ་བ་དང་། བློ་ཡི་ནོར་བའི་གོ་སྒྲིབ་ཀྱི་ལྟ་བ་རྣམས་ཤེས་རབ་ཀྱི་དམིགས་བསལ་ནས། །དོན་མ་ནོར་བ་མ་ཧཱའི་གྲུབ་མཐའ་ལ་དམིགས་ནས་བླང་བར་བྱ། །གྲུབ་མཐའི་གཞི་དང་གཞལ་བྱེད་གཏན་ཚིགས་ཀྱིས་གཏན་ལ་དབབ་པ་གྲུབ་པའི་དོན་ལྟ་བ་ཡིན། རྣམ་པ་དེ་གསུམ་གཏན་ཚིགས་ཀྱིས་གཞལ་བ་སྡ་མའི་ཡོད་མེད་གཞི་རུ་མདོ་ཙམ་བཞག །ཡང་དག་པར་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་ལྷུན་གྱི་གྲུབ་པའི་རིག་འཛིན་རྣམས་ལ། །སྐྱེ་མེད་དོན། དགོངས་པ་བརྡ། བརྗོད་པ་ཚིག དབྱེར་མེད་རྡོ་རྗེ། རིགས་པ་བྱིན་རླབས་པ་སྟེ་གསུང་ལྔ་པ་བསྟན་པས་གཞལ་བྱ་དེ་ཁོ་ན་ཉིད། །དངོས་སུ་གཏན་ལ་འབེབས་ཤིང་འཇལ་བར་བྱེད་ཀ་པའོ། །དོན་དེ་ཉིད་རྟོགས་པར་བྱེད་པའང་དངོས་ལྔའི་དང་ཚུལ་ལྔའི་དང་ཚིག་ལྔས་སོ། །གཏན་ལ་འབེབ་དངོས་བརྗོད་པས་ལྔའི་མཚོན་པའི་གཏན་ཚིག་འབྱུང་བའི་གཞི་འདི་གསུངས་སོ། །དེ་ལས་གཏན་ཚིགས་དངོས་ལྔ་ཡིས། །འཁོར་ལྔ་ལ་དངོས་སུ་དེ་ཁོ་ན་ཉིད་བརྡའ་སྤྲོད་ཅིང་དེའི་ཕྱི་རབས་རྗེས་སུ་འཇུག་ཅིང་བློ་དང་ལྡན་པ་བྱེད་པ་འབྱུང་བའང་། བསྲེག་བཅད་བརྡར་པའི་གསེར་བཞིན་དུ། །དངོས་ལྔས་ཚུལ་དང་ཚིག་གི་ལེགས་པར་བརྟགས་ཏེ་གཏན་ལ་དབབ། །དེ་དངོས་ལྔས་གཏན་ལ་འབེབ་པར་བྱེད་པ་ཡང་ཁ་ཡོངས་སུ་བརྟག་གཞིའི་གཞལ་བྱ་ནི། །དབང་པོ་ལྔའི་ཡུལ་ལྔ་མངོན་སུམ་དུ་སྣང་བ་ཀུན་ཆོས་ཅན། ཡུལ་རྣམས་ཡོད་པ་མ་ཡིན་ཏེ། །ཞེས་དམ་བཅའ། གཏན་ཚིགས་རང་བྱུང་གི་ཡེ་ཤེས་ཀུན་གཞི་རྣམ་པར་ཤེས་པ་ཉིད། །ཕྱི་ནང་གི་དངོས་པོ་སྣ་ཚོགས་རང་སྣང་བ་བའོ། །དེའི་ཕྱིར་འཁོར་བ་དང་མྱང་འདས་ལ་དངོས་ཞེན་པའི་སྣང་བ་ལ་བརྟག་ཅིང་དཔྱད། འཇིག་རྟེན་འདི་ན་ཇི་ཡོད་པའི་དངོས་པོ། །མིང་ཐ་དང་དང་མཚན་མར་ཡུལ་དུ་འཛིན་པ་ལ་སོགས་པ་ཡིས། །དེ་མ་ཡིན་པ་ལ་དེར་འཛིན་པས་ལོག་རྟོག་སོ་སོའི་རང་དང་སྤྱི་བའི་མཚན་ཉིད་རྣམས་རང་ཉིད་ཀྱིས་གཞལ་ལོ་ཞེ་ན། རང་ལ་རང་གིས་གཞལ་དུ། ཇི་ལྟར་གནས་པ་དཔྱད་པར་བྱ། །དངོས་པོ་འཁོར་འདས་གཉིས་ཀྱི་ཞེན་པའི་དངོས་པོ་དུས་གསུམ་གྱིས་བསྡུས་པའི་ཆོས་རྣམས། ད་ལྟར་གྱི་སྐད་ཅིག་གཅིག་ལ་འཁོར་འདས་ཀུན་རྫོགས་པའི་ཕྱིར། །ཕྱི་ནང་གི་དེ་དངོས་པོའི་གནས་ལུགས་ཀུན་གཞི་རང་སྣང་དུ་མཐོང་བ་ཡང་དག་པའི་དོན་ཕྱིན་ཅི་མ་ལོག་པར། །ཡུལ་དུ་རིག་པའི་རང་སྣང་བའི་རང་བཞིན་དུ་འཁོར་འདས་གཉིས་ཀྱིས་བསྡུས་པའི་ཆོས་ཀུན་ཀྱང་དེ་ལྟར་ཤེས་ཅིང་གཞལ་བྱ་ཁོང་དུ་ཆུད་པར་བྱའོ། །དེ་ལྟར་ན་ཀུན་བརྟགས་ཀྱི་ཤེས་པ་རག་པ་གྲོལ་ཞིང་བར་མར་བསམ་བྱུང་ཤེས་རབ་ཀྱི་དཔྱད་ན་མེད་པར་འགྱུར་བས་གཞལ་བྱ་གཏན་ལ་དབབ་ཏུ་མེད། སྤྱི་ཡུལ་དུ་མེད་པས་དཔེར་ན་ལུས་མེད་ན་གྲིབ་མ་མི་འབྱུང་བཞིན། །གཞལ་བྱ་ཡུལ་མེད་པས་མཇལ་དུ་མི་བཏུབ་པོ་འོ་ན་ཞེ ན་པའི་ཡིད་རང་ཉིད་ལ་གཞལ་ནའང་། མི་བཏུབ་སྟེ་དཔེར་ན་འཛུབ་མོས་མཛུབ་མོར་རང་ལ་རེག་མི་བཏུབ་པ་བཞིན་ནོ། །ཡུལ་ཡུལ་ཅན་གཉིས་ཀ་གཞལ་མི་རུང་བར་དོགས་པས་འཇིགས་པ་ལ་གཞལ་བྱ་ཀུན་གྱི་བརྟེན་པ་ཤེས་པ་ཟེར་ཞེན་པ་འགག་པ། གཉེན་པོ་ལུང་མན་ངག་རིགས་པ་མེད་པས་ཀུན་བརྟགས་ཀྱི་ཞེན་པ་དག་པ་མིན་ཞིང་། །གཞལ་བྱ་གཏན་ཚིག་གྲུབ་མཐའ་གསུམ་ལས་བར་མའི་གཏན་ཚིགས་ཀྱིས་གཏན་ལ་དབབ་པའི་ཡུལ་ཡིན་པའི་ཕྱིར་འདོར་གཞལ་བྱའི་ངེས་ཚིག་འགྲུབ་པའོ། །དེ་ལྟར་དངོས་ལྔ་ཡིས་འཁོར་འདས་ཀྱི་དངོས་པོ་དེ་དེ་ལ། །འཁོར་འདས་གཉིས་པོ་དེ་དེའི་རང་བཞིན་ཅི་ལྟར་ཡིན་པ་བརྟག་པར་བྱ་བའང་ཆོས་ཉིད་ཀྱི་དོན། རྟོགས་ནུས་དང་ལྡན་པའི་བློ་མཆོག་རྣམས་འཁོར་གྱིས་ཚུལ་ལ། །དོན་ལ་ཕྱི་ནང་གི་དངོས་པོ་སྣ་ཚོགས་སེམས་ཉིད་རང་སྣང་བ་གསང་སྔགས་ཀྱི་དགོངས་པ། ངེས་པ་དོན་གྱི་ལུང་ཡིན་པའི་ཕྱིར་དངོས་པོ་རྣམས་ཀྱིས་ཆོས་ཚུར་སྟོན་པ་སྟེ། དེ་ཡང་ཚིག་ཏུ་བརྗོད་པ་མེད་ཀྱང་བརྗོད་པ་དང་འདྲ་བར་ཡུལ་མེད་རང་གསལ་དུ་བརྡའ་སྤྲོས་པས་གོ་ཞིང་། དེ་རང་གསལ་ངོ་བོ་ཉིད་ཀྱིས་བཤད་པའི་ཕྱིར། །དེ་དང་མཐུན་པར་མ་འོངས་པའི་གདུལ་བྱའི་དོན་དུ་གཏན་ལ་འབེབ་པའི་ཚུལ་གྱི་གཏན་ཚིགས་སུ་ངེས་པའོ། །ཡང་ནི་ས་ལ་གནས་པའི་བྱང་ཆུབ་སེམས་དཔའ་དེ་དང་འདྲ་བའི་ཤེས་རབ་ཀྱི་མིག་དང་ལྡན་པ་ལ་ནི་འཁོར་གྱི་ཚུལ། སྟོན་པ་རང་བཞིན་ཤུགས་ཀྱིས་སྐྱེ་བ་མེད་པའི་དོན་མངོན་སུམ་དུ། ཆེད་དུ་མ་བརྩལ་བར་རང་བཞིན་ངང་གི་མངོན་སུམ་དུ་སྣང་བར་བྱེད་པའང་། །ཚིག་ཏུ་བརྗོད་པ་མེད་པར་དེ་ཉིད་དོན་སྐྱེ་མེད་རང་སྣང་དུ་མཚོན་པས་བརྗོད་པའི་བརྡ་དང་འདྲ་བར་སྤྲོད་པའོ། །གང་དག་གཟུགས་ཀ་བརྡའ་མཐོང་བ་དང་ཐོས་པ་སྟེ་དབྱིབས་ཁ་དོག་ལ་བརྟགས་པས་ཟླུམ་པོས་སྤྲོས་བྲལ་གོ་བའམ་དཀར་བས་དྲི་མ་དག་པ་ལ་སོགས་པའི་གོ་བའོ། །སྒྲ་གོ་བ་ནི་དཀར་པོ་བྱ་བའི་དྲི་མ་མེད་པར་གོ་ལ་ནག་པོ་མི་འགྱུར་བའོ། །དང་ཆོས་སྟོན་ཚུལ་ལ་སོགས་པར་བརྡར་རྣལ་འབྱོར་ཁ་གྱིས་བརྡའི་མཚོན་པ་སྟེ་མིག་གིས་མཐོང་སྒྲ་ཐོས་པ་ལས་ཡུལ་དྲུག་ལས་བརྡའ་མ་དོན་གོ་བ་སོགས་པ་རང་བཞིན་གྱི་བརྡའ་སྟེ་ནག་པོ་མི་འགྱུར་བ་ལོང་བའོ། །བླ་མས་ཕྱག་བརྐྱང་བ་ལ་སོགས་པ་དཔའ་བོས་བརྡའའི་ངོ་འཕྲོད་པ་དང་དགོངས་པ་ལ་མཉམ་པར་བཞག་པའི་བར་གྱིས་ངོ་འཕྲོད་པ་དང་། །རང་གི་ཏིང་ངེ་འཛིན་གྱི་འཆར་ལུགས་གྱིས་བརྡའ་སྤྲོད་ཅིང་རྟོགས་པར་བྱེད་པའོ། །ཆོས་སྟོན་ཚུལ་དཔེར་ན་ས་འོག་ན་གསེར་ཡོད་པས་རླངས་པ་ནམ་མཁའ་ལ་འཆར་བ་དང་། མེ་ལོང་ཉི་མ་འོད་ལ་བཞག་པའི་ངད་ཀྱི་མེ་ཐོན་པ་བཞིན་དུ། །འཁོར་འདས་ཀྱི་ཆོས་ཀུན་ཀྱང་རང་བྱུང་གི་རིགས་ཕྱིར་རང་རིག་པའི་རང་བཞིན་དུ་འབྱུང་ཞིང་ཆེད་དུ་མ་བརྩལ་པར། རང་བཞིན་ངང་གིས་རྟོགས་ཤིང་བརྗོད་པ་དང་འདྲར་བར་སྣང་སྟེ་བརྡའ་སྤྲོས་པའོ། །འཁོར་འདས་ཀྱི་ཆོས་ཀུན་ཀྱང་སྣང་སྟོང་དང་གྲགས་སྟོང་དབྱེར་མེད་པ་བྲག་ཆའི་སྒྲ་བཞིན་ཕྱིར། །ཆོས་སྟོན་ཚུལ་དབང་པོ་རབ་ཀྱིས་སྒྲ་ཐམས་ཅད་གྲགས་སྟོང་དུ་གོ་བས་དོན་ཉིད་སྣང་བས་དབྱེར་མེད་དུ་རྟོགས་པའོ། །གྲགས་སྟོང་དབྱེར་མེད་རྡོ་རྗེའི་གསུང་། །དང་ཚུལ་མཐུན་པར། སྒྲ་ཐོས་པ་ཙམ་ཉིད་ཀྱིས་གྲགས་སྟོང་དབྱེར་མེད་དེ་ཉིད་དུ། །ཚིག་དོན་སོ་སོར་མ་བརྟགས་དོན་འཇལ་ཞིང་གོ་བར་བྱེད། །སྤྲུལ་སྐུས་རྔ་བོས་དཔེར་བླང་ལྷ་ཀླུ་མི་ལ་སོགས་པ་འགྲོ་བ་སོ་སོའི་སྐད་དུ་བརྡའ་སྤྲོད་ལྟར། །ཆོས་སྟོན་ཚུལ་སྤྲུལ་སྐུའི་ཚིགས་དབྱངས་ལོ་ཀའི་མེས་པོའི་ཚངས་པའི་ངག་ལྟ་བུས། །མོས་པ་སྤྱོད་པའི་ས་ལ་གནས་པ་གྲོལ་བཞིན་བརྗོད་པ་ཡིས། །དེ་ཁོ་ན་ཉིད་ཀྱི་བརྡའ་སྤྲོད་ཡོངས་སུ་གྲོལ་བར་བྱེད་པའོ། །ལས་དང་པོའི་རྒྱུད་ལ་བློ་རིགས་ཐ་དད་ཕྱིར་ཐབས་ལམ་དང་། གྲོལ་ལམ་གང་མོས་ཀྱི་སྒོ་ནས་གྲོལ་བ་ཡོད་མོད་ཀྱང་། །འདིར་གྲོལ་ལམ་ཐོས་བསམ་དུས་ཚིག་གི་སྒྲ་སྒོམ་པའི་ཤེས་རབ་མཉམ་པ་ཉིད་ལ་སྦྱོར་ཞིང་རྟོགས་པའི་ཐབས་གྱིས། །འབྲས་བུས་རང་ལ་བྱུང་བར་ཀུན་ངམ་ཞིང་སྔོན་དུ་ངོ་མཚར་བ་འགྲུབ་པར་བྱེད་པའི་ཕྱིར། །སེམས་ཉིད་མི་དམིགས་ངང་ལས་གཏན་ཚིག་དམིགས་པ་ཡིས། །རིག་པ་ཆོ་འཕྲུལ་བརྗོད་པ་ཚིག་གིས་སྒོ་ནས་མཚོན་ཅིང་རྟོགས་པར་པར་བྱའོ། །སྐུ་ལྔ་ལས་གསུང་ལྔ་དངོས་སུ་ཐོས་པ་དངོས་ལྔ་དང་ཚུལ་མཐུན་པ་ཡང་མཐུན་པར་གོ་བས་ཚུལ་ལྔ་འབྱུང་སྲེད་ཅན་གྱི་གདུལ་བྱ་ལ་ཀྲི་དྲང་བརྒྱུད་པའི་དང་། ཞེན་ཆགས་ཅན་གྱི་གདུལ་བྱ་ལ་འདོད་པ་རང་རྐྱེན་གྱི་ཚིག་ཏུ་བཀའ་སྩལ་པའོ། །དེ་གཉིས་ཀྱི་རྗེས་སུ་ཚིག་གིས་མཚོན་པར་བྱེད་པ་ནི་བློ་གྲོས་ཅན་གྱི་གདུལ་བྱ་ལ་དོན་དམ་ངེས་པའི་ཚིག་ཏུ་དང་། རིགས་རྒྱུད་ཅན་གྱི་གདུལ་བྱ་ལ་ལྡེམ་དགོངས་མན་ངག་གི་དང་། ངོ་བོ་ཉིད་སྣང་བ་ནི་ངོ་བོ་ཉིད་གསུང་གསལ་སྟོང་ངོ་བོ་ཉིད་ཀྱིས་མཚོན་པའི་ཚིག་རང་སྣང་བའི་ཚིག་ལ་ཆོས་སྐུའི་གསུང་སྐྱེ་མེད་དོན་གྱི་གསུང་མཚོན་ནོ། །ལྡེམ་དགོངས་ཀྱི་ཚིག་དང་གི་ལོངས་སྤྱོད་རྫོགས་པའི་སྐུའི་གསུང་དགོངས་པ་བརྡའི་སྒོ་ནས་མཚོན་པ་སྟེ། རིག་རྒྱུད་ཅན་གྱི་གདུལ་བྱ་ལ་ལྡེམ་དགོངས་ཀྱི་ཚིག་ཏུ་བཀའ་སྩལ་པའོ། །གསུམ་པ་བཀྲི་དྲང་ཚིག་སྤྲུལ་སྐུའི་གསུང་ཚངས་པ་དབྱངས་ཀྱི་ཚིག་ཏུ་གསུང་བ་སྟེ་ལོག་སྲེད་ཅན་གྱི་གདུལ་བྱ་ལ་བཀྲི་དྲང་རྒྱུད་པའི་ཚིག་ཏུ་བཀའ་རྩལ་དུ་སྩལ་བའོ། །འདོད་རྐྱེན་ཚིག་གསང་བའི་སྐུའི་གསུང་བདེ་ཆེན་ཐབས་ཀྱི་གསུང་སྒོ་ནས་མཚོན་པ་སྟེ་ཞེན་ཆགས་ཅན་གྱི་གདུལ་བྱ་ལ་འདོད་པ་རང་རྐྱེན་གྱི་ཚིག་ཏུ་བཀའ་སྩལ་བའོ། །དང་རྡོརྗེའི་སྐུ་གསུང་གྲག་སྟོང་དབྱེར་མེད་དུ་བསྟན་པའི་ཚིིག་དང་། རང་རིག་མངོན་སུམ་རིག་པ་བྱིན་རླབས་ཀྱི་གསུང་མངོན་གསལ་ལོངས་སྤྱོད་རྫོགས་པའི་སྐུའི་གསུང་དགོངས་པ་བརྡའི་སྒོ་ནས་མཚོན་པ་སྟེ་ཚིག་གིས་མཚོན་པའོ། །བཞི་པོ་ནི་བློ་གྲོས་ཅན་གྱི་གདུལ་བྱ་ལ་དོན་དམ་ངེས་པའི་ཚིག་ཏུ་བཀའ་སྩལ་པའོ། །དེ་བཞི་ནི་ཚིག་གིས་མ་གསུངས་ཤིང་དོན་གྱི་སྒོ་ནས་གོ་ཞིང་མཇལ་བར་གསུངས་པའོ། །འཁོར་འདས་ཐམས་ཅད་གསང་སྔགས་ཀྱི་ངོ་བོ་ཉིད་རང་སྣང་བའི་ཕྱིར། །ངོ་བོ་ཉིད་ལ་མཐའ་དང་དབུས་མེད་ཆོས་ཉིད་དེ་བཞིན་ཉིད་དུ། དབྱེར་མེད་པའི་ངང་དུ་ཡེ་ནས་གནས་པ་ལ། །རང་བྱུང་གི་ཡེ་ཤེས་ལྔར་རྟོགས་པར་འདོད་པའི་དོན་བྱ་བའི་ཕྱིར། །ཕྱོགས་བཞི་དང་དབུས་སུ་དང་ལྔས་མཚོན་པ་ཡེ་ཤེས་ལྔ་གནས་པར་བྱོས། །དེ་བཞིན་དུ་ཁ་དོག་ལྔ་ལ་སོགས་པ་ཀུན་ལའང་དེ་ལྟར་ཡེ་ཤེས་ལྔར་སྦྱོར་བར་གྱིས། །ཡི་གེ་དང་ཚིག་དང་སྒྲའི་ཐ་སྙད་སྤངས་པས། །ཚིག་གིས་བརྗོད་མེད་ངང་དུ་གནས་པ་ནི་ཆོས་སྐུའི། གསུང་ཉིད་རང་བཞིན་སྐྱེ་བ་མེད་པ་ཡིས་དང་། ཆོས་རྣམས་ཐམས་ཅད་ཡེ་ནས་གཉིས་མེད་རང་སྣང་དུ་དག་པ། དེའི་ཕྱིར་ཆོས་རྣམས་ཐམས་ཅད་དབྱེར་མེད་དེ་ཐུགས་སུ་གྱུར་པས་ན། །སྒྲ་དང་ཚིག་ཏུ་གནས་པ་མིན། །མྱ་ངན་ལས་འདས་དང་མ་འདས་ཐམས་ཅད་ཀུན། །ཡང་དག་ཤེས་པས་རབ་ཏུ་བརྟགས་ན་སྒྲ་མཐུན་ཅེས་པ་གཏན་ཚིག །དོན་དཔག་ཅེས་པ་གྲུབ་མཐའ་དཔག་པར་འདོད་པ་སྟེ་དེ་ནི་དོན་མ་གོ་བའོ། །བདག་གིས་ནི་སྒྲ་མཐུན་ཅེས་པ་གཏན་ཚིགས་ཀྱིས་མི་མཐུན་པའི་དོན་དཔག་ནི་གྲུབ་མཐའ་ཨ་ཅང་ཞེས་གཏན་ཚིག་རང་གི་དོན་ལ་དཔག་པའོ། །དེ་ཅི་སྟེ་གཏན་ཚིག་དང་ངོ་བོ་གྲུབ་མཐའ་གཅིག་པའི་ཕྱིར་རོ། །རྣམ་བཀོད་ལས། དེས་ན་དོན་དང་གཏན་ཚིག་ཀྱང་། །ངོ་བོ་གཅིག་ལས་ཐབས་ཀྱི་དབྱེ། །ཞེས་སོ། །རང་བཞིན་ཕྱོགས་གཅིག་པ་གང་ཡང་མེད་པ་ལས་ཕྱོགས་མེད་ཅིར་ཡང་སྣང་། །སྣང་བའི་ཉིད་ན་མུ་མཐའ་མེད་པའི་ཆོས་ཀྱི་དབྱིངས་ཡིན་ཏེ། །དེ་ལྟར་རིག་ཅིང་རྟོགས་པའི་ཤེས་པ་ནི། །ཆོས་ཀུན་ལ་ཡེ་ཤེས་ངེས་དབང་སྒྱུར་ཞིང་རིག་པ་ལ་རང་དབང་ཐོབ་པ་འཁོར་བའི་ཆོས་ཀྱིས་བསྡུས་པ་དུས་གསུམ་གྱི་ཆོས་རྣམས་རང་དབང་ཅན། །འཁོར་འདས་ཀྱི་ཆོས་ཐམས་ཅད་ཚིག་གི་མཚོན་པ་སྒྲ་ལྟར་དོན་རྟོགས་ཤིང་དེའི་ངང་ལ་གནས། །འདི་ནི་ཡེ་ཤེས་གསུང་མཆོག་ཡིན ། །འཁོར་འདས་ཆོས་རྣམས་བསམ་གྱིས་མི་ཁྱབ་སྟེ། །མཐའ་དང་དབུས་མེད་ཀུན་ཏུ་ཁྱབ་འོ་ན་ཁྱབ་བྱ་ཁྱབ་བྱེད་མེད་ལ་ཞེ་ན། ཁྱབ་བྱ་དང་ཁྱབ་བྱེད་གཉིས་སུ་མེད་པར་རྡོ་རྗེའི་སྐུ། །འབྱུང་བ་དང་སྐྱེ་འགྲོ་ལ་སོགས་པའི་སྒྲ་སྐད་སྣ་ཚོགས་གྲགས་པ་ཡང་། །དངོས་པོ་གྲུབ་པ་མེད་ལས་དངོས་པོ་སྣ་ཚོགས་པའི་སྒྲ་སྐད་འབྱུང་སྟེ། ཅི་ལྟར་དཔེར་ན་པི་ཝཾ་ལག་ཏུ་ཐོགས་པས་ན། །སྒྲ་ནི་སྣ་ཚོགས་པ་འབྱུང་བར་འགྱུར་ཡང་། །འདི་ལས་བྱུང་བའི་དངོས་པོ་མེད་དེ་དེ་བཞིན་དུ་རང་བཞིན་ཉིད་ལས་སྒྲ་རྣམས་མ་འགགས་འབྱུང་བའོ། །སྨིན་པ་རྒྱ་མཚོ་དང་བྱང་ཆུབ་སེམས་དཔའི་འཁོར་རྣམས་ལ་གསུང་གོང་མ། དེ་བཞིན་འདིར་ཡང་གསུང་མཆོག་ཚིག་ཏུ་མི་སྨྲ་སྟེ། །སྐུ་ཡི་བརྡའ་ཆོས་རྣམས་འཇལ་བར་སྟོན། །དཔེར་ན་མེ་ལོང་ཉིད་ཆོས་ཀུན་ལ་གསལ་བཞིན་དུ་སྐུ་ལ་སྣང་བར་སྟོན་པའོ། །ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་ཏུ་བཏགས་ནས་སྟོན། །འཁོར་འདས་རྣམ་གྲངས་ཇི་སྙེད་མང་པོའི་དོན་དང་ཚིག་བརྗོད་ཀྱང་། །རྡོ་རྗེའི་གྲགས་སྟོང་དབྱེར་མེད་གསུང་ལས་སྤྲོས་པ་མེད། །སྤྲོས་མེད་དེ་ཉིད་མིང་དང་ཚིག་སྣ་ཚོགས་པ་རང་སྣང་ནས། འགྲོ་ཀུན་ལ་བརྡའ་འཇལ་བར་བྱེད་པས་ཡེ་ཤེས་ཀྱི་གསུང་། །ཡིན་ནོ། །དེ་ནི་དོན་སྒྲ་དང་མིང་ཚིག་ཀུན་ལས་འདས། །ཆོས་ཐམས་ཅད་པདྨ་ལྟར་གོས་པ་མེད་ཅིང་གང་ལའང་མེད་པའོ། །ཡབ་ཡུམ་ཀྱི་དབང་པོ་རྣམ་གཉིས་བསྲུབས་པ་ཡིས། །ཡབ་ཡུམ་གྱི་མཁའ་ལ་ཐིག་ལེ་དཀར་དམར་ཉི་ཟླ་དུས་གཅིག་ཏུ་བདེ་བར་ཤར། །དཔེར་ན་མི་འཇིགས་པའི་སེང་གེའི་ཚུལ་དུ་ཆགས་པ་ཟིལ་གྱིས་གནོན་ཅིང་ལྷན་ཅིག་སྐྱེས་པའི་ཡེ་ཤེས་མཐོང་བར་བྱེད་པའོ། །དེའི་ཕྱིར་གཏན་ཚིགས་ཞེས་བྱ་སྟེ་དོན་རྟོགས་པར་བྱེད་པའི་ལས་ལ་ལས་ཞེས་མིང་དུ་བརྗོད་པའོ། །དེ་ལྟར་དབྱེ་ན་བདུན་ཡོད་མོད་ཀྱང་བསྡུ་ན་འོག་ནས་འབྱུང་བ་སྟེ་གཉིས། །སྐུ་བཞིའི་རྗེས་སུ་མི་དཔྱོད་གཅིག་སྤྲུལ་སྐུའི་གསུང་གི་རྗེས་སུ་དཔྱོད། །དེ་ཡང་དཔྱད་དུ་ཡོད་མེད་རྣམ་པ་གཉིས་ཀྱི་ཚུལ་གྱི་དོན་རྟོགས་ཤིང་མཐོང་བར་བྱེད་པའང་། ཤེས་རབ་ཀྱི་དབང་པོ་ཆེ་ཆུང་གཉིས་དང་མཐུན་པར་སྦྱར་བའོ། །དེ་ལ་སྔ་མས་དཔྱད་དུ་མེད་པར་གོ་བ་བྱ་བའང་། །འགྲོ་དྲུག་གི་སེམས་ཅན་མ་ལུས་ཐམས་ཅད་ཀྱིས་བསྡུས་པའི་ཆོས་རྣམས་ཀུན། །ཡེ་གདོད་མ་ནས་བྱང་ཆུབ་སྙིང་པོར་ལྷག་པའི་ཆོས་སྐུ་ཆེན་པོར་གནས། །དེའི་ཕྱིར་དཔྱད་པའི་དཔྱད་པར་བྱ་བའི་ཡུལ་དང་བྱེད་པའི་མཁན་པོ་གཉིས་མེད། །སྐུ་བཞིའི་གསུང་ལྟར་འདིར་ཡང་ཚིག་དང་ཡི་གེས་མི་མཚོན་ཏེ། །ཡང་དག་པར་རྫོགས་པའི་སངས་རྒྱས་ཀྱིས་ཀྱང་ཚིག་དང་ཡི་གེས་བསྟན་པར་དཀའ། །རྒྱལ་བའི་སྲས་པོས་འཁོར་ལྔ་ལ་སྐུ་བཞིའི་ཚིག་ཏུ་ཅང་མི་གསུང་། །ཚིག་ཏུ་མ་གསུང་པ་ཉིད་ཀྱང་དོན་འཇལ་ཞིང་རྟོགས་ནས་རྒྱ་ཆེར་བཤད། །སྟོན་པས་ཚིག་ཏུ་འཆད་པ་དང་འཁོར་གྱི་ཉན་པ་གཉིས་ཀ་མེད། །ཡིན་མིན་གྱི་དཔྱོད་པ་ཞུགས་ན་རང་ལ་གཞན་དུ་རྟོག་པའི་གཞི། །དེ་ལྟར་རྟོག་པ་ཞུགས་ན་ཡུལ་དུ་དམིགས་པའི་རྟེན་དང་། ཡུལ་དུ་དམིགས་པ་ཞུགས་ན་བདག་ཏུ་འཛིན་པའི་གཟུངས་དུ་གྱུར། བདག་ཏུ་འཛིན་པས་ཟིན་ཕྱིར་གྲོལ་མི་འགྱུར། །དེ་བས་དཔེར་ན་གསེར་ལྟ་བ་ལ་གསེར་རང་སྟོན་དགོས་པ་བཞིན་དུ། །ཆོས་ཀུན་རིག་པ་བདག་ཉིད་ཆེན་པོའི་ཕྱིར་དཔྱད་པར་བྱ་བ་དང་དཔྱོད་པ་བྱེད་པ་གཉིས་མི་དམིགས་པས། །རྟོག་པ་དང་དཔྱོད་པ་དང་དམིགས་འཛིན་གྱི་ལྟ་བ་མི་འཚོལ་བར། །གདམ་ངག་དེ་བརྗོད་པ་ཉིད་ཀྱིས་དེ་ཁོ་ན་ཉིད་མངོན་སུམ་དུ་མཐོང་བར་བྱེད་པའོ། །འཆིང་བྱེད་སུས་ཀྱང་མ་བཅིངས་ངོ་སྤྲོད་པ་ཙམ་གྱིས་གོ་བའི་རྒྱུ་མཚན་དོན་ལ་བཅིང་གྲོལ་མེད་པ་ཡིན་ཏེ་བཅིངས་པའི་དངོས་པོ་མེད་དེ། །ཡེ་ནས་བཅིང་བར་བྱ་བའང་ཡོད་མ་ཡིན། །ཡེ་ནས་བཅིངས་བ་མེད་པས་གྲོལ་བའི་རྣམ་པར་གྲོལ་བའང་མེད་པའི་ཕྱིར། དེ་ལས་གྲོལ་བར་མི་འདོད་པར་རང་གྲོལ་དུ་རྟོགས་ནས་བཅིངས་དང་བྲལ་བའོ། །ཡུལ་སོ་སོར་འཛིན་པའི་ངེས་ཚིག་ཉིད་གང་ལའང་རྟོག་པ་དང་དཔྱོད་པ་མེད་པས། །ཡུལ་ལ་སོགས་པ་སོ་སོར་སྣང་བ་ཀུན་གཉིས་མེད་རང་སྣང་དུ་རྟོགས་པའི་ཕྱིར། །སོ་སོར་རྟོག་པའི་ཤེས་རབ་ཀྱི་མཆོག་སྟེ། །རྟོགས་དཔྱོད་ཀྱི་མིང་དུ་བརྟགས་པ་མེད་སོ་སོར་སྣང་བ་ཀུན་རྟོགས་པས་སོ་སོར་རྟོགས་པའི་བླ་དྭགས་ཡིན། །ཁ་ཅིག་ཕྱི་མས་སྤྱད་དུ་ཡོད་པའི་གཏན་ཚིགས་གིས་གྲོལ་སྟེ་གོ་བར་བྱེད་པ། །ཚིག་ཏུ་བརྗོད་པའི་གཞི་ཡུལ་དང་དངོས་པོའི་ཞེན་པ་སྤྱོད་ཡུལ་ལ། །སོ་སོར་རྟོག་པའི་ཤེས་རབ་དང་གཏན་ཚིགས་རྐྱེན་ཀྱིས་རྟོགས་པར་བྱེད་པའོ། །ཚིག་དོན་དང་མཐུན་པ་དང་ཚིག་དོན་མི་མཐུན་ལས་རྟོགས་པར་བྱེད་པའོ། །ཕྱི་མ་མི་མཐུན་མཚོན་པར་བྱེད་པ་ལྟར་ནམ་མཁའ་ལ་ཕྱོགས་རིས་མེད་དེ་ལུང་པའི་དབྱིབས་ཇི་ལྟར་ཡོད་པ་ལྟར་ནམ་མཁའ་སྣང་ལ་ཇི་ལྟར་སྣང་ཡང་ནམ་མཁའ་དེའི་ཕྱོགས་ལས་གྲོལ་བ་ལྟ་བུ་ལ་སོགས་པའོ། །འཁོར་འདས་ཀྱི་ཆོས་ཀུན་ཕྱོགས་གཅིག་པ་གང་ཡང་མཐའ་ལས་འདས་པ་ཡིན་ལས། །མཐའ་སྣང་སྟོང་ལ་སོགས་པར་རྣམས་གང་ཡང་དོར་བ་མེད་པས། །དཔེ་འདི་ལྟར་དོན་འདི་ཞེས་ཕྱོགས་གཅིག་ཏུ་བསྟན་དུ་མེད་པའོ། །ཆོས་ཉིད་རང་གི་ངོ་བོ་ཚིག་ཏུ་བསྟན་པ་དང་བློས་བརྟག་པར་དཀའ་བའོ། །འོན་ཀྱང་དེའི་དོན་རྒྱས་པར་མཚན་པ་ཅིར་ཡང་ཡིན་པས་མིན་པའི་འཛིན་པ་དང་མིན་པས་ཡིན་པའི་འཛིན་པ་དགྲོལ་བའི་ཕྱིར། །དེ་ཡང་མདོར་བསྡུ་ན་ཇི་ལྟར་མིང་བཏགས་པ་དང་བསམ་པ་བཞིན་དུ་སྣང་ཞིང་འགྱུར་བས་ཀུན་གྱི་ངོ་བོར་སྟོན། །དེ་མཚོན་པར་བྱེད་པའི་ཧེ་དུ་ཕྱོགས་རེ་ནས་གང་ཡང་མི་འགལ་ཞིང་ཅི་ཡང་ཡིན་པའི་ཕྱིར། །དོན་དམ་སེམས་ཀྱི་ཆོས་ཉིད་ཀྱི་ཕྱོགས་དག་ཅི་ཡང་མ་ཡིན་ནོ། །དེའི་ཕྱིར་ཕྱོགས་གཅིག་པ་མ་ཡིན་ཅིང་ཀུན་ཡིན་པས། །དོན་གང་ཡང་དོར་བ་མེད་པའི་ཆོས་ཉིད་ཅི་ཡང་ཡིན་ནོ་དེས་ནི་ཕྱོགས་བྲལ་ལྷུན་གྱིས་གྲུབ་པའོ། །མཐའ་ཀུན་ཆོས་ཉིད་རང་བྱུང་གི་ཡེ་ཤེས་ཕྱོགས་དང་རིས་སུ་སུ་མ་ཆད་པའི་ཕྱིར། །མཐའ་དང་བྲལ་བའོ། །དེའི་ཕྱིར་ཕྱོགས་རེ་བའི་མཐའ་དང་བྲལ་བའོ། །དེས་ན་གང་ཡང་མ་སྤངས་མི་ལྡན་པས། །མ་བྲལ་བའི་ཕྱིར་ན་བྲལ་ཞེས་བྱ། །གང་ནས་ཕེབས་པ་རང་གི་ངོ་བོ་གཏན་ལ་ཕེབས་པར་གཏན་ཚིགས་ཀྱི་དོན་རྒྱས་པར་འགྱུར་རོ། །ཅིག་ཤོས་ཚིག་དོན་མཐུན་པར་བསྟན་པ་ཡང་། །བྱེ་བྲག་ཕྱེ་ན་བསམ་གྱིས་མི་ཁྱབ་ཀྱང་བསྡུས་པས་ཀུན་ཁྱབ་ཀྱི་གཏན་ཚིགས་ལུང་རིགས་མན་ངག་གསུམ་པོ། དེ་དང་ལྡན་པའི་གཏན་ཚིག་གི་རྣམ་གྲངས་བརྗོད་པ་བསམ་ཡས་པ་ཡོད་ནའང་། བསྡུས་ཏེ་ཆ་ཙམ་འོག་ན་འབྱུང་བ་བརྗོད་པ་འདི་ལྟ་བུ་མདོ། །ཙམ་སྨྲོས་ན། འཁོར་འདས་གཉིས་ཀྱིས་བསྡུས་པའི་ཆོས་རྣམས་ཐམས་ཅད་རང་བཞིན་ཡོང་གིས་དག་པའི་ཡིད་དོན་ཏེ་དག་པ་རྣམ་པ་བཞིའི་ཚུལ་གྱིས་དོན་གཉིས་མེད་རྟོགས་མངོན་སུམ་དུ། སྣོད་བཅུད་རྒྱུད་རྣམས་ཞེས་ཕུང་པོ་ལྔ་ཡབ་ལྔར་དག་པ་དང་འབྱུང་ལྔ་ཡུམ་ལྔ་རྣམ་ཤེས་དང་དབང་པོ་སེམས་དཔའ་དང་ཡུལ་དུས་སེམས་མ་དག་རྟོགས་ཤིང་། །མཉམ་གཉིས་ལས་འདིར་ལྷག་པའི་མཉམ་གཉིས་ཀྱིས། །སྤྱོད་ཡུལ་ཡོངས་སུ་དག་པ་དཀྱིལ་འཁོར་ཀུན་ཏུ་བཟང་པོའི་ཞིང་ཞེས་བྱའོ། །དེ་ཡང་ལྷག་པའི་མཉམ་གཉིས་དཔག་ལ་ཡིན་ཏེ་ཐུན་མོང་བའི་དབུ་མ་པ་བདེན་པ་གཉིས་ལས་ཀུན་རྫོབ་ཏུ་ཆོས་ཀུན་སྒྱུ་མ་ལྟ་བུར་མཉམ། དོན་དམ་དུ་ཆོས་ཀུན་སྤྲོས་བྲལ་སྟོང་པ་ཉིད་དུ་མཉམ་པའོ། །དེ་ལྟར་ཐུན་མོང་གི་མཉམ་གཉིས་ལས་དཔག་པ་ཡིན་ཏེ། འདི་གོང་ལྟར་ཀུན་རྫོབ་ཏུ་སྣོད་བཅུད་རྒྱལ་བའི་དཀྱིལ་འཁོར་དུ་གསལ་བས་འཁོར་འདས་མཉམ་པའོ། །དོན་དམ་དུ་ཆོས་ཀུན་རང་བྱུང་ཡེ་ཤེས་གཅིག་ཅིང་རྟོགས་པས་འཁོར་འདས་མཉམ་པའོ། །དེ་ལྟར་ལྷག་པའི་མཉམ་པ་གཉིས་ཀྱི་ཆོས་ཀུན་རང་བཞིན་གྱིས་གྲོལ་བའོ་དེ་བཞིན་དུ་ཡིད་ཆོས་གཉིས་ཀུན་བཟང་ཡབ་ཡུམ་དང་། ལུས་ཀྱི་རེག་ཤེས་བཞི་དང་རྟག་ཆད་མུ་བཞི་སྒོ་མར་དག་པ་དང་། ཉོན་མོངས་པ་དྲུག་ཐུབ་པ་དྲུག་དག་པར་རྟོགས་ཤིང་གྲོལ་བའོ། །དེ་ལྟར་ཀུན་རྫོབ་ཏུ་སྣོད་བཅུད་རྒྱུད་ཡུལ་རྣམས་ཀྱིས་བསྡུས་པ་ཐམས་ཅད་ལྷའི་དལ་དུ་ཡེ་ནས་སངས་རྒྱས་པར་དག་པར་རྟོགས་ཤིང་དོན་དམ་དུ་ཆོས་ཉིད་རང་བྱུང་གི་ཡེ་ཤེས་སྤྲོས་བྲལ་སྐྱེ་བ་མེད་ཅིང་དག་པར་རྟོགས་པ་ཐུན་མོང་གི་རིག་པ་བདག་ཉིད་ཆེན་པོའི་ངང་དུ་མཉམ་གཉིས་དོན་དམ་དུ་འཁོར་འདས་ཀྱིས་བསྡུས་པའི་ཆོས་རྣམས་རང་བྱུང་གི་ཡེ་ཤེས་སུ་རྒྱུ་གཅིག་པ་དང་ཀུན་རྫོབ་ཏུ་ཡིག་འབྲུའི་ཚུལ་གྱིས་མཚོན་ནས་མ་འགག་པའི་ཐབས་ཀྱི་ཕྱག་རྒྱ་རིག་པ་སྒྱུ་མའི་ངོ་བོར་ཅིར་ཡང་སྣང་བ་དང་། དབྱེར་མེད་དམ་བྱིན་གྱིས་བརླབས་པས་རབ་སྣང་གཉིས་མེད་དུ་དང་མངོན་སུམ་དུ་རྟོགས་པའོ། །རབ་ཏུ་རྟོགས་པ་དེ་ལྟར་གཏན་ཚིགས་རྣམ་བཞི་ཡིས། །ཆོས་རྣམས་ཐམས་ཅད་རང་རིག་པའི་མངོན་སུམ་དུ་ལྷག་མ་མེད་པ་རྫོགས་པས་རྒྱལ་པོ་ཆེ་བའོ། །ཆོས་ཀུན་རང་བྱུང་གི་ཡེ་ཤེས་ཉིད་ལ་དབང་སྒྱུར་ཞིང་རིག་པ་བདག་ཉིད་ཆེན་པོ་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་པར་དག་པས་བླ་ན་མེད་པའི་བྱང་ཆུབ་ཐེག་པའི་མཆོག་གི་དགོངས་པའོ། །རྣམ་པར་བྱང་བ་མྱ་ངན་ལས་འདས་པ་དང་མ་འདས་འཁོར་བའི་ཆོས་ཀྱིས་བསྡུས་པ་ཐམས་ཅད་ཀུན། །དང་པོའི་གནས་ལུགས་ཡང་དག་ཤེས་པའི་ཤེས་རབ་ཀྱིས་རབ་ཏུ་བརྟགས་ན། །དངོས་པོ་ཕྱོགས་གཅིག་པའི་རང་བཞིན་མེད་པས་འཆར་ལུགས་ཅིར་ཡང་སྣང་ཞིང་ཅིར་ཡང་འགྲུབ། སྣང་བའི་དུས་ཉིད་ན་ཆོས་ཀྱི་དབྱིངས་ཉིད་དེ་ཡིན། དེ་ཡང་དེ་བཞིན་གཤེགས་པའི་སྐུ་སྒྱུ་མར་ལྟ་བུར་སྣང་བ་དང་། །སེམས་ཀྱི་ལོག་པར་རྟོག་པ་སྒྱུ་མར་སྣང་བ་གཉིས། །རིག་པ་ཡིན་པའི་ཕྱིར་གཞི་རྩ་མེད་དེ་རང་བཞིན་རྣམ་པ་མཆོག་ལྡན་གྱི་སྟོང་པ་ཆེན་པོས་སྟོང་། །དེ་ལ་འཁོར་འདས་རིགས་དང་ཕྱོགས་གཅིག་ཏུ་རྒྱུད་དུ་བརྟག་ཏུ་མེད། །རང་བྱུང་ཡེ་ཤེས་ལ་རིགས་སོ་སོ་དང་ཁ་དོག་དང་དབྱིབས་ལ་སོགས་པ་ཕྱོགས་གཅིག་ཏུ་གྲུབ་པ་མེད་པ་ལས། །ཕྱོགས་གཅིག་ཏུ་ཕྱི་ནང་སྣོད་བཅུད་ཐམས་ཅད་སྣང་། །སྣང་བ་ཉིད་ན་རང་བཞིན་ཆོས་ཀྱི་སྐུ་དེ་ཉིད་སྣང་ཚུལ། ཐམས་ཅད་དེ་ཉིད་དུ་ཅིར་ཡང་འགྱུར་ཞིང་ཅིར་ཡང་འགྲུབ། །ཉོན་མོངས་རང་གི་མཚན་ཉིད་དང་སྤྱི་བསྟན་པ་འདོད་ཆགས་རང་གི་མཚན་ཉིད་ནི་ཞེན་ཅིང་གདུང་བ། ཞེ་སྡང་རང་གི་མཚན་ཉིད་ཁྲོ་ཞིང་གཏུམ་པ། གཏི་མུག་གི་མཚན་ཉིད་ནི་ཀུན་ནས་རྨོངས་པ། ང་རྒྱལ་གྱི་མཚན་ཉིད་ནི་མ་ཞི་ཞིང་ཁེངས་པ། ཕྲག་དོག་གི་མཚན་ཉིད་ནི་བློའི་ཕྲག་ཏུ་གཞན་གྱི་ཡོན་ཏན་མི་ཤོང་བའོ། །སྤྱིར་བསྟན་པའི་སྡུག་བསྔལ་གྱི་ཉམ་ཐག་པའི་སེམས་མ་ཞི་ཞིང་ང་རྒྱལ་བར་བྱེད་པའོ། །ཉོན་མོངས་པ་རང་གི་མཚན་ཉིད་རང་བྱུང་གི་ཡེ་ཤེས་སྒྲིབ་གཡོག་མེད་པར་རང་གསལ་བ་མ་ནོར་བར་དོན་རྟོགས་ན། །ཡེ་ཤེས་ལྔ་དང་སྤྱིའི་མཚན་ཉིད་རང་སྣང་མཐའ་དབུས་མེད་དེ་དེ་ཉིད་མ་ནོར་དོན་རྟོགས་རྣམ་པར་བྱང་བའི་ལམ་དུ་འགྱུར། །དེ་ཕྱིར་སྤྱིའི་གཏན་ཚིགས་བརྟགས་པ་འདིར་གཅེས། །ཆོས་ཉིད་ལ་མཐའ་དང་དབུས་མེད་ཅིང་གཅིག་དང་དུ་མར་བྲལ། །མཐའ་ཕྱོགས་གཅིག་ཏུ་གང་ཡང་མིན་ཏེ་གནས་ལུགས་དེ་བཞིན་ཉིད་དུ་གཉིས་སུ་མེད་ཅིང་། དབྱེར་མེད་པ་ཡི་ཚུལ་དུ་རྟོགས་པའི་ཕྱིར། །དེས་ན་མཐའ་དང་བྲལ་བའི་དགོངས་པ་ཆོས་ཉིད་འང་དེ་བཞིན་ནོ། །གཞལ་བྱ་འབྱུང་བ་ཆེན་པོ་ལྔ་རྣམས་ལ། །དགོས་ཆེད་རང་བཞིན་མེད་པར་གཞིག་པའི་ཕྱིར། །གཏན་ཚིགས་འབྱུང་བ། གཅིག་ལའང་འབྱུང་ཆུང་ལྔ་ལྔར་དབྱེ་བ་བྱ་ཞིང་། །ཡི་གེ་མུཾ་གི་ས་མཚོན་ན་ཆོས་ཀྱི་དབྱིངས་སུ་གཉིས་སུ་མེད་པར་བསྟིམ་པར་བྱ། །ཆོས་ཀྱི་དབྱིངས་མུཾ་ཉིད་ངག་ཏུ་སྨྲ་སེམས་ཀྱི་བསམ་པའི་བརྗོད་ལས་འདས་ཏེ་གཉིས་མེད་རང་གྲོལ་བའོ། །དཔེར་ན་ནམ་མཁའ་བཟུང་དུ་མེད་པ་ལྟར། །སྣང་སྲིད་ཐམས་ཅད་ཀྱང་སེམས་ཉིད་རང་སྣང་བའི་ཕྱིར་དེ་དང་འདྲ། །དོན་སེམས་ཉིད་དེ་ཉིད་ཐམས་ཅད་ཀྱི་རྟེན་བྱེད་པ་ས་དང་འདྲ་གཉེན་འཁྲུ་བར་བྱེད་པ་ཆུ་དང་གཟུང་དུ་མེད་པས་ཡང་ཞིང་གཡོ་བ་རླུང་དང་། གསལ་ཞིང་མཚན་མ་སྲེགས་པས་མེ་ལྟར་ཤེས་པར་བྱ། །དེ་བཞིན་ཕུང་པོ་ལྔ་ཡབ་ལྔ་དང་དབང་ཡུལ་སེམས་དཔའ་དང་ཡུམ་ལྔ། །ཉོན་མོངས་པ་ལྔ་དང་ཁ་དོག་ལྔ་དང་དེ་བཞིན་ཕྱོགས་ལ་སོགས་པ་རིགས་ལྔ་ཡེ་ཤེས་ལྔ་ཤེས་པར་བྱ་སྟེ། བསྒྲུབ་བྱའི་དོན་དང་ངོ་བོ་རང་བྱུང་ཡེ་ཤེས་གཅིག་ལ་མཚོན་ཚུལ་མ་འདྲེས་པར་གཏན་ལ་འབེབས་པ། ཧེ་དུ་དེའི་ཕྱིར་དཔེ་དེ་ཡི་དོན་དེ་མཚོན་ཅིང་རྟོགས་པར་བྱེད་པའོ། །བསྒྲུབ་བྱ་གཏན་ལ་འབེབས་པ་སྔོན་བྱུང་གི་གཏན་ཚིགས་དང་རྗེས་འཇུག་གི་གཏན་ཚིགས་བརྗོད་ཅིང་གཏན་ལ་འབེབས་པ་རྣམས། །བསྒྲུབ་བྱ་གྲུབ་མཐའི་ངོ་བོ་གང་ཡིན་ཤེས་པའི་དོན་ལ། །གཏན་ཚིགས་ངེས་ཚིག་གི་སྒོ་ནས་ངོ་བོའི་སྒོ་ནས་དང་མཚན་ཉིད་ལ་སོགས་པའི་སྒོ་ནས། གཏན་ལ་གང་ནས་འབེབས་ཀྱང་དོན་རྒྱས་པར་རྟོགས་ཤིང་ཁོང་དུ་ཆུད་པར་བྱའོ། །ཕྱོགས་མཚན་གྱི་ཞེན་པ་ཐམས་ཅད་འཇིག་པར་བྱེད་ཕྱོགས་མེད་སྣང་ལ་མི་འདའ་བའི་དམ་ཚིག་དང་། །རྒྱུ་ཤེས་པའི་མཚན་ཉིད་ལྟ་བ་ལས་མི་འདའ་བའི་དམ་ཚིག་ལྡན་པར་བྱོས་པའོ། །འཁོར་འདས་ཐམས་ཅད་གཏན་ཚིག་གི་མ་ལུས་པར་གཏན་ལ་འབེབས་ཤིང་གྲུབ་དོན་འབྱུང་བ། །ཚིག་གིས་མཚོན་དོན་ལས་གུད་ན་མེད། །སྒྲ་ཉིད་དོན་གྱི་དངོས་པོ་མིན། །དོན་ཉིད་ཚིག་སྒྲ་ལས་མཚོན་པ་གུད་ན་མེད་དོ། །དེས་ན་མིང་དང་ཚིག་ཏུའང་སྒྲ་ལ་མི་བརྟེན་པར་ཅི་བཞིན་ཡང་མི་རྟོགས་སྒྲ་ཙམ་མ་ཞེན་པའང་མ་ཡིན། དབྱེར་མེད་བློ་ཡི་གཏིང་དུ་དོན་གོ་བར་བྱོས་པ་གྲུབ་མཐའ་དང་། གསུམ་བཞིས་ནི་གོལ་སྒྲིབ་པ་བསྟན་པ་སྟེ་ལུས་རྣམ་བཞག་གི་དོན་བརྗོད་པར་བྱ་བ་ལ། གསང་སྔགས་མཆོག་བླ་ན་མེད་པ་ཡི་མ་ཧཱའི་དོན། མཚན་མ་ཕྱོགས་རེ་བ་ཀུན་དུ་མི་བརྟག་པ། །ཆོས་ཉིད་མཉམ་པའི་ཉིད་ཀྱི་ངང་དུ་ཐམས་ཅད་ཆོས་ཀུན་ཤེས་པས། འཁོར་འདས་ཀུན་ཀྱང་མཉམ་པ་ཉིད་ཡིན་པས། །འཇིག་རྟེན་འདས་དང་འཇིག་རྟེན་པའི། །སོ་སོའི་ལྟ་བའང་རྣམ་པ་ཐ་དད་དུ་གཟུང་ཞིང་བརྗོད་པར་མི་བྱ། དེ་རྣམས་མི་ཉམས་པ་དགག་ཅིང་བླ་མར་བྱ་བ་མཉམ་པའི་ལྟ་བ་གཞན་ན་མིན། །སྤྱིར་ནི་དེ་མ་ཡིན་པ་ལྟ་དེར་འཛིན་པའི་ལོག་རྟོག་བསམ་ཡས་པ་ཡོད་ཀྱང་། གཞི་ཡེ་ནས་གནས་ལུགས་ལ་ཡོད་པ་གདོད་མ་ཉིད་ནས་ཡོད་ལ་རང་རྒྱུད་པ་གང་ཡང་མ་ཡིན་ཏེ། །སེམས་ཅན་སོ་སོའི་གཟུང་འཛིན་ལོག་པར་རྟོག་པའི་བག་ཆགས་ཀྱི། །ཕྱི་གཟུང་ནང་འཛིན་གྱི་དྲ་བས་བསྒྲིབས་པར་གྱུར་ཏེ། །སེམས་ཉིད་ལ་ཕྱོགས་རིས་ཅིར་ཡང་མིན་པ་ལས་ལོག་རྟོག་ལ་ཕྱོགས་རིས་ཅིར་ཡང་སྣང་སྟེ། བྱང་ཆུབ་སྙིང་པོའི་གཞི་ལས་གོལ་བ་སྟེ་གོལ་བཞིན། འཁྲུལ་པ་འདི་ཁོ་ན་ལྟར་བདེན་མིན་གཟུང་འཛིན་གྱིས་དེ་རྣམས་མི་ཉམས་པས་མ་གྲོལ་ཏེ་དམ་བཅའ་འཁོར་བ་ལ་བཅིངས་པའི་ཕྱིར་དང་། །སྐྱེ་རྒ་ན་འཆི་དུས་དགྲས་འཇོམས་པའི་ཕྱིར་དང་མི་བདེན་པ་བསླུས་པའི་ཕྱིར་དང་མི་རྟག་ཅིང་འགྱུར་བའི་ཕྱིར་དང་། །འཕགས་པའི་ལམ་དང་བྲལ་བའི་ཕྱིར་དང་ཐར་བཀའ་བ་འཁོར་བའི་བཙོན་རར་ཆུད་པའི་ཕྱིར། སྡུག་བསྔལ་མི་འཇིལ་ཏེ་སྡུག་བསྔལ་གྱི་དབའ་ལ་གཡེང་བ་དང་དགུ་ཡིས་ཕྱིར་འཁྲུལ་ལོ། །དེ་ལྟར་འཁྲུལ་པ་དེ་བས་ན་མཉམ་པ་ཉིད་མ་རྟོགས་པས། །དུག་ལྔ་ལ་འཇོལ་ཉོག་ཏུ་སྤྱོད་པས་འགྲོ་བ་རིགས་དྲུག་ལམ་རྒྱུད་ལྔར་འཁོར་བའོ། །མི་དགེ་བ་སྤོང་སྟེ་དགེ་བཅུ་དག་ལ་གཙོར་ལེན་ཅིང་། །དགེ་བས་མཐོ་རིས་དང་མི་དགེ་བས་ངན་འགྲོར་འགྲོ་བས་དགེ་སྡིག་རྒྱུ་འབྲས་མི་མཉམ་པས། །འདོད་ཁམས་ལྷ་དང་མི་ཡི་སྐྱེ་གནས་ཏེ། །གཉིས་མེད་མཉམ་ཉིད་ཀྱི་དོན་མ་རྟོགས་པས་འདོད་ཁམས་སུ་འཁོར་བའོ། །ཆོས་ཐམས་ཅད་རང་སྣང་བ་མཉམ་པའི་དོན་ཉིད་དང་བདག་མེད་མ་རྟོགས་ཤིང་། །བདག་གི་ཡུལ་དུ་བཟུང་ནས་སྙིང་རྗེ་སྐྱེ་བའོ། །དེ་ལ་སྙིང་རྗེའི་ཡུལ་དུ་དམིགས་ཤིང་། སྙིང་རྗེ་ཚད་མེད་པ་དང་། བྱམས་པ་དང་། དགའ་བ་དང་། བཏང་སྙོམས་དེ་ཚད་མེད་བཞི་སྐྱེ་ཞིང་བདེ་གསལ་མི་རྟོག་པ་ལ་གནས་པ་དང་བསམ་གཏན་དང་པོ་ན་རྟོག་དཔྱོད་མེ་ལྟ་བུ་གཉིས་པ་ན་དགའ་བདེ་ཆུ་ལྟ་བུ། གསུམ་པ་ན་དབུགས་རླུང་དང་འདྲ་བ་བཞི་པ་ན་རྟོག་དཔྱོད་མེད། མི་གཡོ་ངང་ལ་བདག་ཏུ་འཛིན་ཅིང་ཞེན་པ་བཞི། །བསམ་གཏན་དང་པོ་ན་བདེ་གསལ་གྱི་ངང་ལ་རྟོགས་པ་དང་བཅས་དཔྱོད་པ་དང་བཅས་པའི་ཏིང་ངེ་འཛིན་དང་གཉིས་པ་ན་སྤྱོད་པ་ཡོད་ལ། རྟོགས་པ་མེད་པ་དང་། གསུམ་པ་རྟོག་པ་མེད་ལ་དཔྱོད་པ་དང་བཅས་པ་དང་། བཞི་པར་རྟོག་དཔྱོད་གཉིས་ཀ་མེད་པར་མི་གཡོ་བར་གནས་པའོ། །དེ་ལྟར་རིམ་པར་བསམ་གཏན་བཞིའི་རིམ་པར་སོ་སོར་བདག་ཏུ་འཛིན་ཅིང་། །གཟུགས་སོགས་ཀུན་ལ་བདག་ཏུ་ཞེན་ཅིང་བདག་གིར་རྟོག །འདི་ནི་ཚངས་གནས་ཚངས་རིས་ལ་སོགས་པའི་བསམ་གཏན་བཞི་རིམ་པར་སྐྱེ། །དེ་ལ་བསམ་གཏན་དང་པོ་ན་ཚང་རིས་ཚང་༡རིས་ཚང་༢པ་འདུན་ན་འདོན་ཚངས་༣ཆེན་གསུམ། གཉིས་པ་ན་འོད་ཆུང་ཚད་མེད་འོད་འོད་གསལ་གསུམ། གསུམ་པ་ན་དགེ་ཆུང་ཚད་མེད་དགེ་དགེ་རྒྱས་གསུམ། བཞི་པ་ན་སོ་སོ་སྐྱེ་བོའི་གནས་གསུམ། འཕགས་པའི་གནས་ལྔའོ། །དང་པོ་ནི་སྤྲིན་མེད་འོད་བསོད་ནམས་སྐྱེ་འབྲས་བུ་ཆེ། གཉིས་པ་ནི་མི་ཆེ་བ་མི་གདུང་བ་ཤིན་ཏུ་མཐོང་བ་གྱ་ནོམ་སྣང་བ་འོག་མིན་ནོ། །ཆོས་ཉིད་མཉམ་པ་ཉིད་ཀྱི་དོན་དང་གཟུགས་མེད་འཁོར་བའི་ཆོས་ཡིན་པར་མ་རྟོགས་ནས། །མིང་བཞི་ཚོར་བ་འདུ་ཤེས་འདུ་བྱེད་རྣམ་པར་ཤེས་པ་སྟེ་ཕུང་པོ་ལ་རང་བཞིན་མེད་པར་མ་ཤེས་ཏེ། །སྐྱེ་མཆེད་ནམ་མཁའ་མཐའ་ཡས་སྐྱེ་མཆེད་རྣམ་ཤེས་མཐའ་ཡས། ཡོད་མིན་མེད་མིན་ཅི་ཡང་མེད་པའི་གནས། བཞི་ལ་གནས་པར་གྱུར་པ། །མཐོ་སྲིད་པའི་རྩེ་མོའི་ས་རུ་སྐྱེ་བར་འགྱུར། མུ་སྟེགས་ཀྱི་ལྟ་བ་རྟག་ཆད་གཉིས་ཀར་གང་ཟག་གི་བློ་ཞེན་པ། །དེ་གནས་ལུགས་དོན་གྱི་སྙིང་པོ་བླ་ན་མེད་པའི་བྱང་ཆུབ་ཉིད་ལས་གོལ་ཞིང་ལོག་བར་རྒྱལ་བའི་བཀའ་ལས་གསུངས་པ་དེ་མུ་སྟེགས་རྟག་པའི་ལྟ་བ་ནི་མེད་པ་ལ་སྒྲོ་འདོགས་པ་སྟེ། སྙིང་གི་སྐྱིལ་ན་བདག་རྟག་པ་པའི་ངོ་བོ་དཀར་ལ་འཚེར་བ། སྣུབ་ལ་འདྲིལ་བ་སྟེ། སེམས་ཅན་གྱི་ལུས་དང་སྦྱར་བ་སྲན་མ་ཡུང་འབྲུ་ལ་སོགས་པ་སྟེ་ལུས་ཀྱི་ཚོད་སྦྱར་བར་ཡོད་པར་འདོད་པ་དང་། ཡང་བརྗོད་དུ་མེད་པའི་བདག་རྟག་པ་ཡོད་པར་འདོད་པ་དང་། རང་བཞིན་རྟག་པར་དང་། ངོ་བོ་ཉིད་རྒྱུར་སྨྲ་བ་དང་། བྱེད་པ་པོ་རྟག་པ་ལ་སོགས་བདག་ཏུ་ལྟ་ཞིང་དངོས་པོར་འཛིན་པའོ། །ཆད་པ་ནི་ཡོད་པ་ལ་སྐུར་བ་འདེབ་པ་སྟེ། འབྱུང་བཞིས་འདུས་པ་འཇིག་ཅིང་ལུས་ཞིག་པ་དང་སེམས་ཀྱང་སྟོང་ནས་མེད་པར་ལྟ་བ་དང་གནས་སྐབས་ལ་རྒྱུ་འབྲས་བདེན་ལ། མཐར་ཐུག་རྣམ་པ་ཐམས་ཅད་མཁྱེན་པའི་སངས་རྒྱས་མེད་པར་ལྟ་བ་སྟེ། མཐར་ཐུག་ཅི་ཡང་མེད་པའི་སྟོང་པ་ཆད་པར་ལྟ་བའོ། །འདོད་ཁམས་གཟུགས་ཁམས་བཞི་གཟུགས་མེད་སྐྱེ་མཆེད་མུ་བཞི་སྟེ་ས་དགུ་དག་པའི་ཡེ་ཤེས་ནི། །ཆོས་ཉིད་མཉམ་པ་ཉིད་ཀྱི། ས་དགུ་མ་སྤངས་ཆོས་ཉིད་མཉམ་པ་ཉིད་ཀྱི་ངང་དུ་བཅོམ་ཞེས་བྱའོ། །བདེན་པ་གཉིས་མེད་རང་སྣང་གི་དོན་མ་རྟོགས་པ་ཐམས་ཅད་ལ། །བདེན་བཞིའི་དངོས་པོ་ཡོད་པར་ལྟ་ཞིང་། །དེ་ནི་སྡུག་བསྔལ་གྱི་བདེན་པ་དང་ཀུན་འབྱུང་གི་དང་། ལམ་གྱི་དང་། འགོག་པའོ། །སྡུག་བསྔལ་གྱི་བདེན་པ་ནི་འཁོར་བའི་གཤིས་སམ་རང་བཞིན་གཏན་ལ་འབེབ་པ་ཡིན་ཏེ། དེ་ལ་བཞི། མི་རྟག་པ། སྡུག་བསྔལ་བ། སྟོང་བ། བདག་མེད་པའོ། །མི་རྟག་པ་ནི། དུས་སྐད་ཅིག་མ་གཉིས་པར་མི་སྡོད་ཅིང་མི་རྟག་སྐྱེ་འཇིག་དང་བཅས་པའོ། །སྡུག་བསྔལ་བ་ནི། གསུམ་མམ་བརྒྱད་ཀྱིས་ཉམས་ཐག་པའོ། །སྟོང་པ་ནི་གཟུང་འཛིན་རག་པའི་སྣང་བ་སྟོང་པའོ། །ཀུན་འབྱུང་གི་བདེན་པས་འཁོར་བའི་རྒྱུ་འབྲས་སྟོན་པའོ། །རྒྱུ་ཀུན་འབྱུང་། རྐྱེན་གྱི་རྣམ་པ། རབ་ཏུ་སྐྱེ་བའོ། །རྒྱུ་ནི་མ་རིག་ཉོན་མོངས་ཏེ་འཁོར་བ་བསྐྱེད་པའི་རྒྱུའོ། །ཀུན་འབྱུང་ནི་རྒྱུ་རྐྱེན་རྟེན་འབྲེལ་ནས་འབྲས་བུ་འབྱུང་བར་བྱེད་པའོ། །རྐྱེན་ནི་ལས་དང་བག་ཆགས་ཀྱི་མཐུ་བརྟས་པ་འཁོར་བ་བསྐྱེད་པའི་རྐྱེན་ནོ། །རབ་ཏུ་སྐྱེ་བ་ནི་འཁྲུལ་བའི་འབྲས་བུ་སྨིན་ཏེ། སྔ་མའི་འབྲས་བུ་ལ་སྤྱོད་ཅིང་ཕྱི་མ་སྐྱེ་བར་བྱེད་པའོ། །ལམ་ནི་འཁོར་བ་སྤང་ཞིང་བསྒྲུབ་པར་བྱེད་པ་སྟེ། དེ་ལ་བཞི་སྟེ་ལམ་རིག་པ་བསྒྲུབ་པ་ངེས་པར་འབྱིན་པའོ། །ལམ་ནི་སོ་སོ་སྐྱེ་བོ་ལས་འཕགས་ཏེ་མྱ་ངན་ལས་འདས་པའི་སར་འགྲོ་བར་བྱེད་པའོ། །རིག་པ་ནི་འཁྲུལ་པའི་གཉེན་པོར་ཚད་མར་གྲུབ་པའམ། བསྒྲུབ་པ་ནི་ཡང་དག་པའི་དོན་ཉམས་སུ་ལེན་ཅིང་སྒྲུབ་པའོ། །ངེས་པར་འབྱིན་པ་ནི་ཕྱིན་ཅི་ལོག་སྤངས་ཏེ་རང་བདེ་འབྲས་བུ་ངེས་པར་འབྱིན་པའོ། །འགོགས་པ་ནི་ལམ་གྱིས་མཐོང་སྤང་སྒོམ་སྤང་ལ་སོགས་པ་འགོག་པ་དང་འབྲས་བུ་མངོན་དུ་བྱས་པའོ། །དེ་ལ་བཞི་སྟེ། འགོག་པ་ཞི་བ། གྱ་ནོམ་པ། ངེས་པར་འབྱིན་པའོ། །འགོག་པ་ནི་ལམ་ཉམས་སུ་བླངས་པས་ཀུན་བརྟགས་ཀྱི་ཞེན་པ་འགོག་པའོ། །ཞི་བ་ནི་ཉོན་མོངས་པའི་མེ་ཞི་བའོ། །གྱ་ནོམ་པ་ནི་ཡོན་ཏན་མངོན་དུ་གྱུར་པའོ། །ངེས་པར་འབྱིན་པ་ནི་འབྲས་བུ་ངེས་པར་མཐར་ཕྱིན་པ་དང་དགྲ་བཅོམ་པའོ། །དེ་བཞིན་ལམ་གྱི་མཐོང་སྤངས་དང་སྒོམ་སྤངས་དམིགས་ཤེས་པར་བྱའོ། །འཁོར་བའི་རྒྱུ་སྤོང་བ་དང་འདས་པའི་རྒྱུ་མི་སྤོང་བར་བྱེད་པར་གྱུར་ན། །འདི་ནི་ཉན་ཐོས་ས་པ་ཡིན། །ཆོས་ཐམས་ཅད་རྒྱུ་འབྲས་ལ་སོགས་པ་ལས་དང་ཉོན་མོངས་ཐམས་ཅད་ལ། །མཉམ་པའི་དོན་དུ་མི་ཤེས་ཤིང་། །རང་རྒྱལ་བའི་ལུགས་ཀྱི་རྟེན་འབྲེལ་དང་རྒྱུ་འབྲས་བུ་ཡོད་པར་འཛིན་ན། །འདི་ནི་རང་སངས་རྒྱས་ཀྱི་ས། །ཐོབ་བོ། །དེ་ཕྱིའི་རྟེན་ཅིང་འབྲེལ་བ་བཅུ་གཉིས། ནང་རྟེན་ཅིང་འབྲེལ་ན་བཅུ་གཉིས་སོ། །ཕྱི་ནི་རྒྱུ་དང་འབྲེལ་བ་དྲུག་འབྲས་བུ་དང་འབྲེལ་པ་དྲུག །སྔ་མ་ནི་སས་བརྟེན་ཆུས་བསྡུས་མེས་སྨིན་རླུང་གིས་གཡོས། ནམ་མཁས་གོ་འབྱེད་དུས་ཀྱི་འགྱུར་བའོ། །གཉིས་པ་ནི་ས་བོན་སྡོང་བུ་ཡལ་ག་མེ་ཏོག་དེ་ལ་འབྲས་བུའོ། །དེ་ལ་རྟེན་འབྲེལ་ལུགས་ནས་བཟློག་པ་དང་ལུགས་ནས་འབྱུང་བ་མ་གྲུབ་པར་རྟོགས་པའོ། །ནང་གི་རོ་དུར་ཁྲོད་ཀྱི་ཀེང་རུས་ལ་བརྟེན་ནས་རྟོགས་པ་ཡིན་ཏེ་མ་རིག་པ་དང་འདུ་བྱེད་དང་རྣམ་པར་ཤེས་པ་དང་། གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་དང་། དེ་ཡང་རྟེན་འབྲེལ་ལུགས་ནས་བཟློག་པ་དང་ལུགས་ནས་འབྱུང་བ་འཛིན་པ་རང་བཞིན་མེད་པར་རྟོགས་ཤིང་སྐད་ཅིག་རང་གསལ་ཉན་ཐོས་དང་མཐུན་པའོ། །རྒྱུ་འབྲས་ལ་སོགས་པའི་ཆོས་ཐམས་ཅད་མཉམ་པ་ཉིད་ཀྱིའི་དོན་ཉིད་མི་ཤེས་ཤིང་། །ཀུན་རྫོབ་ཀྱི་བདེན་པ་དང་དོན་དམ་གཉིས་ཐ་དད་དུ་འབྱེད་པ་དང་། ཆོས་ཀྱི་བདག་ཏུ་གཟུང་ཞིང་ཆོས་དང་གང་ཟག་གཟུང་འཛིན་རགས་པ་སྣང་བ་དོན་དམ་པའི་བདེན་པའོ། །བདག་མེད་པར་དེ་ལྟར་རྟོགས་པས་ལམ་དྲངས་པར་བགྲོད་ན། །འདི་ནི་བྱང་ཆུབ་ས་སེམས་དཔའ་སྟེ་འབྲས་བུ་བཅུ་གཅིག་ཀུན་ཏུ་འོད་ཀྱི་ས་ཐོབ་པ་ཡིན་ནོ། །གསང་སྔགས་བླ་མེད་ཐེག་པའི་ནང་ནས་ནི་ཕྱི་པ་ཀྲི་ཡོག །དོན་དམ་དུ་དབྱིངས་ཡེ་ཤེས་ནི་དབྱེར་མེད་ཅིང་དག་པ་མཐའ་བཞིའི་དྲི་མ་དང་བྲལ་བར་འདོད་དེ། །ཀུན་རྫོབ་ཏུ་ནི་ཆོས་ཐམས་ཅད་ལ། །དག་པ་སྐུ་དང་ཡེ་ཤེས་ངང་མ་དག་པ་ཕུང་པོ་ཁམས་དང་སྐྱེ་མཆེད་གཉིས་ཀར་འཛིན་ནས་ཡང་། གསང་སྔགས་ཐབས་མཁས་ཀྱི་ཐེག་པ་ཡང་ཆེན་པོ་མ་ཧཱ་ནི། །རྣམ་པར་བྱང་མྱ་ངན་ལས་འདས་པ་དང་སྡུག་བསྔལ་འཁོར་བ་དག །ཀུན་རྫོབ་ཏུའང་དབྱེར་མེད་དེ། །འོག་མ་དང་ལྟ་བ་མཐོ་དམན་གྱི་ཁྱད་པར་དེ་ཙམ་མོ། །ནང་པ་ཐབས་ཀྱི་ལྟ་བ་དང་སྤྱོད་པ་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ནོ་ངོ་བོ་ཉིད་ཀྱི་རྒྱུར་གནས་པས་འཕགས། ཀུན་རྫོབ་ཏུ་ནི་ཆོས་སྐུ་རིག་པ་སྒྱུ་མའི་ངོ་བོ་ལྷ་དང་ལྷ་མོར་མཉམ་ཞིང་རྫོགས་སོ། །དབྱེར་མེད་ཡང་དག་པའི་དོན་རྟོགས་པའི་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་པ་ཉིད་དུ་དབྱེར་མེད་བློའི་གཏིང་དུ་རབ་ཏུ་རྟོགས། །དགོངས་པ་མཉམ་ཉིད་རྟོགས་པའི་ངང་ལས་མ་གཡོས་བཞིན་སྟོངས་པ་དང་། སྤྱོད་པ་མ་འགག་པ་ཐབས་ཀྱི་ཕྱག་རྒྱ་ཆེན་པོ་སྟོན། །སྤྱོད་པ་ཐབས་དང་ལྟ་བ་ཤེས་རབ་གཉིས་སུ་མེད་ཅིང་རྣམ་པར་དག་འོ་ན་འདས་པ་ཕྱོགས་གཅིག་ཏུ་སོང་ངོ་ཞེ་ན། ཐམས་ཅད་དག་ཅེས་བྱ་བ་ཡང་། །མ་དག་པའི་དངོས་པོ་གཅིག་བསལ་ནས་དག་པར་བྱས་ནས་མ་ཡིན་ཏེ། །དེ་སྣང་བ་དང་སྤྱོད་པའི་དུས་ཉིད་ན་རྣམ་པར་དག་པའོ། །དེ་ཕྱིར་ཀུན་རྫོབ་ཏུ་ཡང་ཆོས་ཀུན་བྱང་ཆུབ་ཀྱི་སྙིང་པོ་གཉིས་སྣང་བས་རྫུན་པར་མི་བལྟ། །དོན་དམ་ཀུན་རྫོབ་གཉིས་མེད་ཅིང་བྱང་ཆུབ་མཉམ་པར་མ་ཤེས་པས། །དོན་དམ་དུ་དབྱིངས་ཡེ་ཤེས་གཉིས་སུ་མེད་པ་དག་པ་ཆོས་ཉིད་ཙམ་དེ་ཉིད་སུ་སིདྡྷི་ཀ་ར་ལས། ཀུན་རྫོབ་རིགས་གསུམ་ས་ལ་ནི། །རང་བཞིན་ཉིད་དུ་བརྟག་བྱ་སྟེ། །དོན་དམ་དག་པའི་ཆོས་ཉིད་ཡང་། །མཚན་མ་མེད་པའི་ཆོས་ཉིད་དོ། །ཞེས་སྒོམ་མོ། །དེ་རྟོགས་པའི་ཡེ་ཤེས་རྐྱེན་གྱིས་བསྐྱེད་ནས་བཞི་ཡོན་ཀུན་རྫོབ་རིགས་གསུམ་ལྷའི་དལ་དུ་བསྒོམ་པ་ནི། མཚན་བཅས་དང་མཚན་མེད་རེས་མོས་སུ་བསྒོམ་ཞིང་ཡན་ལག་བཅུ་གཅིག་གི་བྱ་བ་ལས་ཀྱི་ས་ཀྲི་ཡོག་ཏུ་གོལ། དངོས་གྲུབ་རང་ལ་ལྷུན་གྲུབ་མཉམ་པ་མ་མཐོང་བས། །དོན་དམ་དུ་ཆོས་ཀུན་རྣམ་པར་དག་པའི་ཡེ་ཤེས་ཀྱི། །ཡོ་གའི་བྱིན་བརླབས་རྡོ་རྗེ་དབྱིངས་སྤྲུལ་ཅིང་ལྷའི་དལ་ཡིན་ཏེ། ཐམས་ཅད་གསང་བའི་རྒྱུད་ལས། ཤེས་རབ་གསང་བ་དམ་པ་ནི། །བུདྡྷ་ཡེ་ཤེས་བླ་མེད་ཡིན། །ཁམས་གསུམ་མ་ལུས་འདི་དག་ཀུན། །དཀྱིལ་འཁོར་ཆེན་པོའི་ངོ་བོ་ཡིན། །ཅེས་སོ། །པས། །སྤྱོད་པ་བླང་དོར་དང་ལྷ་ཡེ་ཤེས་སེམས་དཔའ་ལ་དངོས་གྲུབ་ཉེ་བར་བྱེད་པའི་རྣལ་འབྱོར་གྱི་ས་ལ་གོལ་པའོ། །ཆོས་རྣམས་མ་ལུས་ཐམས་ཅད་ལ། །ལྟ་བ་བྱ་ལམ་ནམ་མཁའ་གཅོད་བཞིན་གྱིས། །ཉོན་མོངས་འཛིན་ཆགས་མ་ལུས་ཐམས་ཅད་ཀུན། །ཐོགས་མེད་མཁའ་ལ་རླུང་ཆེན་འཕྱོ་བ་བཞིན། །བསྒོམ་པས་ཡིད་ཀྱི་རྟོག་ཆགས་མ་ལུས་པ། །ཉམས་ང་མེད་པ་ཆུ་བོ་ཉ་ཆེན་འཕྱོ་བ་ལྟར། །རྣལ་འབྱོར་ལྟ་བ་སྒོམ་པ་སྤྱོད་པ་དེ་ལྟར་ལྟོས། །ཧེ་རུ་ལ་སོགས་པ་དེ་ལྟར་དངོས་པོའི་གནས་ལུགས་བརྟགས་ཤིང་གཏན་ལ་ཕབ་གོལ་སྒྲིབ་ཀྱི་དམིགས་ཕྱེ་ནས། །མ་ནོར་དོན་གྱི་གྲུབ་མཐའ་ནི། །གོང་དུ་བསྟན་པའི་འདས་པའི་ཐེག་པ་མཐོ་དམན་ཐམས་ཅད་དང་། །འཇིག་རྟེན་པའི་ལྟ་བ་ནོར་བ་ཐམས་ཅད་ཀུན། །རང་བྱུང་གི་ཡེ་ཤེས་ཆེན་པོར་རབ་ཏུ་བརྟགས་ན། །རང་བཞིན་ཕྱོགས་གཅིག་པ་ཅིར་ཡང་མེད་ལས་ཅིར་ཡང་མ་འགགས་པ་སྣང་ཡང་། རང་བཞིན་མཉམ་པ་དབྱིངས་ཉིད་ལས་ཉམས་པ་མེད་དོ། །འོ་ན་མཉམ་པའི་ཉིད་ཀྱི་དོན་ཉིད་རང་ཇི་ལྟ་བུ། །ཞེ་ན། མཉམ་ཉིད་རང་བཞིན་གང་ཡང་མིན་པས། ཆོས་ཀུན་མཉམ་པ་ཉིད་ཡིན་ངོ་བོ་ཕྱོགས་གཅིག་ཏུ་འདི་འདྲར་མཚོན་དུ་མེད། །མཉམ་པ་ཉིད་དུ་འཛིན་པ་ཕྱོགས་འཛིན་དང་རྟོགས་པ་གང་ཡང་མེད་དོ། །བྱང་ཆུབ་སེམས་དཔའ་ཞེས་ཐ་སྙད་བརྗོད་པ་ནི། །དང་པོ་གང་ནས་ཀྱང་མ་འོངས་ཐ་མ་གར་ཡང་མི་འགྲོ། །ད་ལྟར་གང་ནས་ཀྱང་མི་གནས་ཏེ། ཡུལ་ཅན་གྱི་རྟོགས་པ་གང་ཡང་མེད་པས་རང་རིག་པ་ཁོ་ན་ཙམ། །དུས་གསུམ་གྱི་སངས་རྒྱས་དང་ཁམས་གསུམ་གྱི་སེམས་ཅན་ཐམས་ཅད་བྱང་ཆུབ་སེམས་ལ་གནས་པས་ཆུབ་པའོ། །བྱང་ཆུབ་སེམས་རྣམས་ཐམས་ཅད་ནི། །བློས་ཤིན་ཏུ་བརྟག་པར་དཀའ་ཞིང་གཏིང་ཟབ་པས། །ཡུལ་དང་ཡུལ་ཅན་དུ་འདས་པས་མ་དམིགས་ད་ལྟར་མི་དམིགས་མ་འོངས་པ་དམིགས་སུ་མེད། །པ་རྣམ་པར་དག་སྟེ་བྱང་བའོ། །སེམས་ཉིད་དེའི་དོན་ནི་ཇི་ལྟ་བུ། །ཞེ་ན། བྱང་ཆུབ་དེ་ནི་སེམས་ཡིན་ནོ། །དེ་ན་སེམས་དང་བྱང་ཆུབ་གཉིས་སུ་མེད་དབྱེར་མེད་པས། །ཁམས་གསུམ་གྱི་སེམས་ཅན་མ་ལུས་ལུས་པ་མེད་པ་ཐམས་ཅད་དང་། །དུས་གསུམ་གྱིས་བསྡུས་པའི་ཆོས་རྣམས་ཐམས་ཅད་རང་བྱུང་ཡེ་ཤེས་སེམས་ཉིད་རང་སྣང་བ་ཡིན་ནོ། །ཡོད་པ་ལས་བཙལ་ན་དངོས་པོར་སྒྲོ་བཏགས་པ་ཡིན་ཏེ། །སྒྲོ་འདོགས་བརྒྱད་དུ་ལྟུང་ཞིང་གོལ་བར་འགྱུར། །དེ་ལ་སྒྲོ་འདོགས་བརྒྱད་ནི། ཡུལ་ཤེས་སེམས་རིག་ཐ་དད་དུ་ཡོད་པར་འདོད་པ་ནི་སོ་སོ་སྐྱེ་བོ་ལྟར་སྒྲོས་བཏགས། བདག་རྟག་པའི་ངོ་བོར་འདོད་ན་མུ་སྟེགས་པ་དུས་གསུམ་རྫས་ཡོད་དུ་འདོད་ན་གཟུང་འཛིན་ཕྲ་བ་དོན་དམ་པའི་བདེན་པ་ཉན་ཐོས། གཟུང་བ་དོན་དམ་པ་དང་རྟེན་འབྲེལ་རྒྱུ་འབྲས་སུ་འདོད་པ་རང་རྒྱལ། གཟུང་འཛིན་ཕྲ་བའི་རང་རིག་སྐད་ཅིག་སྐྱེ་འགགས་ཅན་དུ་འདོད་ན་སེམས་ཙམ། སྣང་བ་སྒྱུ་མ་ལྟ་བུར་བདེན་པར་འདོད་ན་དབུ་མ། སྒྱུ་མ་ལྟ་བུར་ཀུན་རྫོབ་ལྷ་དང་ལྷ་མོར་བདེན་ཅིང་དོན་དམ་དབྱིངས་ཡེ་ཤེས་གཉིས་སུ་མེད་པའི་རིག་པ་བདེན་པར་འདོད་པ་ཀྲི་ཡ། ཀུན་རྫོབ་བྱིན་རླབས་ལྷའི་དལ་དུ་འདོད་པ་དོན་དམ་དབྱིངས་ཡེ་ཤེས་གཉིས་སུ་མེད་པ་མཐའ་བྲལ་དུ་བདེན་པར་འདོད་ན་ཡོ་གར་སྒྲོ་བཏགས་པའོ། །དེ་རྣམས་གཉིས་མེད་ལ་གཉིས་སུ་འདོད་ཅིང་ཕྱོགས་འཛིན་དངོས་པོའི་མཐའ་དང་བྲལ་བས་ཡོད་པར་སྒྲོས་འདོགས་པའོ། །དོན་དམ་པའམ་ཡང་དག་པར་ན་ཅི་ཡང་མེད་པ་ལས་བཙལ་ན་སྐུར་པ་བཏབ་སྟེ། །བདེན་པ་ལ་བསྐུར། ཡང་དག་པ་ལ། ངེས་པ་ལ། སྤྱོད་ཡུལ་མེད་པ་ལ། ཕྱི་ནང་མེད་པ་ལ་ངོ་བོ་ཉིད་ལ་བླང་དོར་མེད་པ་ལ་ཡེ་ཤེས་ཆེན་པོ་ལ་བདག་ཉིད་ཆེན་པོ་ལ་བསྐུར་སྐུར་བཏབ་བཅུ་ཡི་གནས་སུ་གོལ་ཞིང་ལྷུང་། །བར་འགྱུར་རོ་དེ་ལ་བསྐུར་བ་བཅུ་ནི། ཆོས་ཉིད་སྟོང་པ་ཉིད་ལ་ཡུལ་ཤེས་དང་འཁོར་བའི་རྒྱུ་འབྲས་གཏན་མ་གྲུབ་སྟེ། ཅི་ཡང་མེད་པར་འདོད་པས་འགྲོ་དྲུག་གི་སྣང་བ་རྒྱུ་འབྲས་ལ་བསྐུར་པ་བཏབ། བདག་གཏན་མེད་པར་འདོད་པ་དང་། མུ་སྟེགས་རྟག་པའི་ལྟ་བ་དང་། གཟུང་འཛིན་ལ་ཕྲ་བའང་མེད་པས་ཉན་ཐོས་ཀྱི་ལྟ་བ་དང་། འབྲས་བུ་ལ། རྟེན་འབྲེལ་གྱི་སྣང་བ་དང་ནང་སྐད་ཅིག་ཙམ་ཡང་གཏན་མེད་པས་རང་རྒྱལ་བ་ལ། སེམས་ཀྱི་སྣང་བ་ཙམ་དང་གཟུང་འཛིན་བྲལ་བའི་རང་རིག་ཙམ་ཡང་མེད་པ་སེམས་ཙམ་པ་དང་། ཀུན་རྫོབ་ཏུ་སྣང་བ་སེམས་ཡིན་པ་དང་། དོན་དམ་རང་བཞིན་སྐྱེ་བ་མེད་པའི་སྣང་བ་སྒྱུ་མ་ལྟ་བུའང་གཏན་མེད་པས་རྣལ་འབྱོར་སྤྱོད་པའི་དབུ་མ་ལ། སྣང་བ་རང་ག་རྡུལ་ཕྲན་དུ་ལུས་པས་སྣང་བ་དང་ངོ་བོ་མཐའ་དང་བྲལ་བའི་རིག་པ་གཏན་མེད་པས། མདོ་སྡེའི་སྤྱོད་པའི་དབུ་མ་ལ། ལྷ་དང་ལྷ་མོའི་དལ་དང་དབྱིངས་ཡེ་ཤེས་གཉིས་སུ་མེད་པའི་རིག་པ་ཙམ་ཡང་གཏན་མེད་པས་ཨུ་པ་ཡ་ལ། སྣང་བ་ལྷའི་དལ་དུ་མཐའ་བྲལ་གྱི་ཡེ་ཤེས་སུ་གཉིས་སུ་མེད་པ་ཙམ་ཡང་གཏན་ནས་མེད་པར་འདོད་པས་ཡོ་ག་ལ་བསྐུར་པས་བཏབ་བོ། །དེ་ནི་གཤིས་ཅི་ཡང་མ་གྲུབ་པའི་གཏན་མེད་ཆད་སྟོང་དུ་འདོད་པ་སོ་སོའི་རྒྱུ་འབྲས་དང་། བདེ་བར་གཤེགས་པའི་སྙིང་པོ་ལ་སོགས་ཏེ་ཤེས་བྱའི་དལ་སྣང་ཚད་ལ་བསྐུར་བས་བཏབ་པས་བསྐུར་འདེབས་ཀྱི་ལོག་ལྟས་དམྱལ་བའི་གནས་སུ་ལྷུང་བར་གསུངས་སོ། །དེ་ལྟར་མ་ཡིན་ཏེ་ཡོད་མེད་གཉིས་ལས་བཙལ་བར་བྱས་ན་སྒྲོ་སྐུར་དེ་སྙེད་དུ་གྱུར་ཏེ་མུ་ཐུག་ཁས་མི་ལེན་དུས། མུན་པའི་ལུང་དུ་མ་བསྟན་ཕྱིན་ཅི་ལོག །རིལ་པོའི་བྱིའི་སྦའི་ཕྱོགས་ལྟོས་གཅོད་པའི་རིག་པའི་མཐའ་སེལ་བའི་རྣམ་པར་སེམས་དཔའི་བྱ་བ་ལས་ཀྱི་རྣལ་འབྱོར་གྱི་ལུང་བསྟན་པའོ། །དེ་སྙེད་ལུང་དུ་མ་བསྟན་པར་འགྱུར་དེ་ལྟར་གཞན་དུ་བཙལ་ན་སྐྱོན་ཡོད་པས། དེ་ཕྱིར་ནམ་མཁའ་ཡོད་མེད་ཅེས། །བླུན་པོ་རྣམས་ནི་རྩོད་པར་འགྱུར། །གང་ཟག་མཁས་པས་ནམ་མཁའི་རང་བཞིན་ལ། །ཀུན་གྱི་གོ་སྐབས་འབྱེད་པས་མེད་པར་མི་འཛིན་དངོས་པོའི་རྫས་སུ་མ་གྲུབ་པར་ཡོད་པར་མི་འཛིན་ནོ། །དོན་སེམས་ཉིད་རང་སྣང་ཕྱོགས་མེད་ཀུན་ཏུ་འཆར་བས་ཡོད་པ་ཀུན་གྱི་ངོ་བོ་ཡིན་སེམས་ཉིད་ལ་དངོས་པོ་རྫས་སུ་མ་གྲུབ་པས་ཡོད་མེད་ཀུན་ཀྱི་ངོ་བོ། །དེས་ན་སེམས་ཉིད་སྒྲ་ཙམ་དུ་བརྗོད་དུ་རུང་གི་མོད་ཀྱིས། །ངོ་བོ་འདི་ཡིན་དཔེ་འདི་འདྲ་ཞེས་ཚིག་ཏུ་བསྟན་ཅིང་བློས་དཔག་དཀའ་ལ། །ཕྱོགས་སུ་འཛིན་པའི་ཡོད་དང་མེད་ཅེས་མཚོན་བྱའི་མིང་གྲངས་རྣམས་དང་འགལ་ལོ་ཞེ་ན་ཅི་བྱར་ཡོད་དེ་ཕྱོགས་མེད་ཅིང་མཉམ་པའོ། །སེམས་ཉིད་ཡེ་ནས་སངས་རྒྱས་ལ། །དེ་མིན་པར་འཛིན་པའི་བཟང་ངན་ལྟ་བ་ངན་པ་ལས་བཟློག་པའི་ཕྱིར། །ཆོས་ཀུན་བཟང་ངན་གཉིས་མེད་མཉམ་པ་ཉིད་དང་ཡེ་ནས་སངས་རྒྱས་དང་། །བདག་ཉིད་ཆེན་པོ་ལྷུན་གྱིས་གྲུབ་པ་དང་ཆོས་ཀྱི་དབྱིངས་རྣམ་པར་དག་པ་དང་། བླ་ན་མེད་པའི་བྱང་ཆུབ་དང་ཆོས་ཉིད་སྟོང་པ་ཉིད་བསམ་ལས་འདས་པས། དེ་བཞིན་ཉིད་དང་སྐྱེ་བ་དང་འགག་པ་མེད་པ་དང་། །མཐའ་དང་བྲལ་བ་རང་མྱ་ངན་ལས་འདས་པ་དང་རང་གྲོལ་ཆེན་པོ་དང་རང་བྱུང་ཡེ་ཤེས་དང་ཕྱོགས་མེད་པ་སོགས་སུ་རྒྱུ་མཚན་ཕྱོགས་རེ་ནས་གང་ཡང་མི་འགལ་བས། བླ་དགས་ཙམ་དུ་བརྗོད་པ་ཡིན་པའོ། །དེ་ལྟར་བྱང་ཆུབ་དེ་ཡང་ཡེ་ནས་ཚིག་ཐམས་ཅད་ཀྱི་དངོས་གཞི་མ་ཡིན་པ་ཚིག་གི་ལམ་ཆད་ཅེས་བྱ། དེའི་ཕྱིར་སེམས་ཉིད་ཚིག་གི་མཐའ་ལ་མི་གནས་པའི་ཚིག་ནི་དེ་ཀུན་ཆོས་ཀྱི་ངོ་བོ་འམ་རང་བཞིན་ལ། །དེ་དག་ལ་སོགས་པ་སྒྲ་ཙམ་དུ་བརྗོད་དུ་རུང་གི་ཡོད་མེད་ལ་སོགས་པའི་ཐ་སྙད་གདགས་སུ་ཅི་ཡོད། །དེས་ན་བསྟན་ཅིང་བརྟག་པར་དཀའ་བར་རྒྱལ་བས་གསུངས་སོ། །དེ་གང་ཟག་གང་གི་བློ་ཡུལ་ཞེན་གྱི་མཐའ་ལ་མ་ཆགས་པདྨ་འདྲ་བ་ཡིས། །རང་བྱུང་གི་ཡེ་ཤེས་མངོན་སུམ་དུ་རྟོགས་པ་ཅན་གྱི་སྤྱོད་ཡུལ་ཏེ། །ཐེག་འོག་ཀུན་དང་ཐུན་མོང་དེ་མ་ཡིན། །དེ་བཞིན་གཤེགས་པའི་སྤྱོད་ཡུལ་ཏེ། །སྐྱེས་བུ་བློ་རྩལ་དང་ལྡན་པ་ཤེས་རབ་ཅན་ཀྱིས་རྟོགས་པའོ། །དེ་ཕྱིར་ཤེས་རབ་བློ་རྩལ་ཅན་རྣམས་ཀྱིས་བརྩོན་པར་གྱིས་ཤིག་རྒྱུ་ཤེས་པའི་མཚན་ཉིད་དངོས་མིང་གི་རྣམ་གྲངས། །ལྟ་བའི་ངོ་བོ་རིམ་པས་ཕྱེ་བ་ཡིན། །གང་ཟག་རྟོག་པ་ཅན་སྔ་མ་ཁ་ཅིག་དབང་པོའི་མངོན་སུམ་དུ་སྣང་བ་ལ། །རྣམ་ཤེས་ཚོགས་དྲུག་གམ་ཚོགས་བརྒྱད་ཉིད་ཡེ་ཤེས་ལྔར་གནས་འགྱུར་བའི་ཕྱིར། །འོག་ནས་སྟོན་པའི་ཤེས་རབ་ཀྱིས་མིག་ནས་གཟུགས་སྒྱུ་མ་ཙམ་དུ་མཐོང་འགྲེ་ཡང་ན་དད་པ་དང་ཏིང་ངེ་འཛིན་དང་བརྩོན་འགྲུས་དང་ཤེས་རབ་དང་མོས་པའི་ངང་དབང་པོ་དྲུག་གི་ཚུལ་ནས་ལྟ་བའི་ངོ་བོ་བརྗོད། །དོན་རང་གི་མཚན་ཉིད་ངེས་པར་མ་ནོར་ཅིང་ཡང་དག་པའི་ལྟ་བ་མཐོང་བ་ཡང་། །ཚོགས་བརྒྱད་ཡེ་ཤེས་ལྔ་རུ་གསལ་བའི་ཕྱིར། །ཚོགས་བརྒྱད་ཀྱི་ངོ་བོ་ཡང་རང་བྱུང་ཡེ་ཤེས་ལྔ་དེ་ཉིད་དེ་ཡིན། དབང་པོ་ལྔ་དང་ཡུལ་ལྔ་དམིགས་བྱ་དམིགས་བྱེད་མེད་པའི་ཕྱིར་ཏེ། །གཏན་ཚིགས་དེ་བས་སྒོ་ལྔ་ཡུལ་མེད་རང་གསལ་བར་རྟོགས་པ་ལྟ་བའི་ངོ་བོའོ། །ཤེས་བྱ་ཆོས་ཉིད་དབྱིངས་དང་ཤེས་བྱེད་རིག་པ་གཉིས་སུ་མེད་པར། །ཆོས་ཉིད་དེ་བཞིན་ཉིད་དུ་དབྱེར་མེད་ཅིང་འདུ་འབྲལ་མེད་པ་རྡོ་རྗེས་རིགས། །ཕྱི་གཟུང་བའི་ཡུལ་དང་ནི་ནང་འཛིན་པའི་སེམས་བྲལ་བའི་དེས་ན་རང་བྱུང་ཡེ་ཤེས་ཚོགས་གཅིག་པ་ཞེས་བྱ་རང་རིག་པའི་ཡེ་ཤེས་བྱང་ཆུབ་ཉིད་ཀྱི་སེམས། དམིགས་བྱ་དམིགས་བྱེད་མེད་པར་རང་སྣང་ཚུལ་དུ་དེར་རང་སྣང་བ་ལྟ་བའི་ངོ་བོའོ། །ཆོས་ཉིད་ལ་ཕྱོགས་རིས་མེད་པས་ཡངས་ཤིང་རྒྱ་མཐའ་དབུས་མེད་པ་ཆེ་རྩོལ་བ་མེད་པ་ལྷུན་ཀྱི་གྲུབ་པའི་ནི། །ཕྱི་ནང་སྣོད་དང་བཅུད་གཉིས་སུ་མེད་པར་ཡེ་ནས་ཀུན་གཞི་རང་སྣང་དུ་དག་པས་ལྟ་བའི་ངོ་བོ། །དེ་ལྟར་དག་པར་རྟོགས་པའི་རིག་པ་ཉིད་ཀྱང་ཆོས་ཀྱི་དབྱིངས་ཉིད་ཡིན། །འདི་ནི་དབྱེར་མེད་པ་རྡོ་རྗེ་བཟང་ངན་མེད་པར་མཉམ་པ་ཉིད་ཡིན་ནོ། །རྣམ་ཤེས་ཚོགས་དང་དེའི་སྤྱོད་ཡུལ་གཉིས་སུ་མེད་པས། །འཁོར་འདས་ཐམས་ཅད་མ་ལུས་རང་སྣང་དུ་གཅིག་པའི་ངང་ལུས་པ་མེད་པར་ཀུན་གཞི་ལ་རྫོགས་པ་ལྟ་བའི་ངོ་བོ། །ཆོས་ཀུན་མ་འདྲེས་ལ་ཡོངས་སུ་རྫོགས་པར་གསལ་སྟོང་གཉིས་སུ་མེད་པའི་གཟུགས། །རང་སྣང་བ། ལྟ་བྱ་ཡུལ་དང་ལྟ་བར་བྱ་བྱེད་མཁན་པོ་གཉིས་སུ་མེད་པར། །ཕྱོགས་བཅུའི་ཞིང་ཁམས་ཐམས་ཅད་སྐྱེ་མེད་རང་སྣང་དུ་མཐོང་། །དེ་ནི་ཡུལ་ཡུལ་ཅན་གང་དུའང་མ་མཐོང་གཉིས་མེད་རང་གསལ་དུ་མཐོང་བས་སྤྱན་གྱི་མཆོག་གོ། །ཁྱབ་བྱ་ཁྱབ་བྱེད་མེད་པར་རང་བྱུང་གི་ཡེ་ཤེས་ཀྱིས་ཁྱབ་ཅིང་རིག་པ་རང་གསལ་རང་བཞིན་གོ་བའི་སྒྲ། །ཐོས་པར་བྱ་བ་དང་ཐོས་པར་བྱེད་པ་གཉིས་མེད་པར་ཐོས་པའི་ཕུལ། །གཟུང་འཛིན་གྱི་དྲི་མ་མེད་ཅིང་དང་བས་ཤེས་རབ་ཀྱི་དབང་པོས་ཚིམ་པར་བྱེད་པས་ཆོས་ཉིད་ཀྱི་དྲི། །སྣོམ་བྱེད་མེད་པར་ཚོར་བའི་ཤངས། །རང་བྱུང་གི་ཡེ་ཤེས་དོན་བཅུད་གཉིས་སུ་མེད་པར་ཉམས་སུ་མྱོང་བའི་རོ། །མྱོང་བའི་བྱ་བ་དང་མྱོང་པའི་བྱེད་པ་གཉིས་སུ་མེད་པར་མྱོང་བའི་ཕྱིར་རོ། །ཡང་དག་པའི་དོན་ལ་རེག་པ་ཉིད་དེ། དེའི་རིག་པ་ཀུན་གྱི་དངོས་གཞི་སྟེ་རེག་དང་བྲལ་བར་བྱེད་པའོ། །འདུས་བྱས་འདུས་མ་བྱས་ཀྱི་ཆོས་ཁམས་སྣ་ཚོགས་ཀུན་མཁྱེན་པ། །རང་རིག་པའི་ཡེ་ཤེས་ལ་དབང་བསྒྱུར་བའི་རྒྱལ་པོ་ཡུལ་མེད་རང་སྣང་བའོ། །དེ་བས་ན་བདག་ཏུ་འཛིན་པས་མ་བསྒྲིབ་པ་རང་གསལ་བའོ། །རིག་པ་བདག་ཉིད་ཆེན་པོ་བདག་བཅས་རིག་པ་གཞི་རྩ་མེད་པ་བདག་དང་བྲལ་བའི་ཡིད། །དངོས་པོ་གནས་ལུགས་དོན་དང་སེམས་ཅན་རྟོག་པ་མེད་ཅིང་ཡུལ་མེད་རང་གསལ་བས། རང་བྱུང་ཡེ་ཤེས་ཀྱི་ངང་དུ་ཐམས་ཅད་མ་འདྲེས་ལ་ཡོངས་སུ་རྫོགས་མཁྱེན་པའོ། །ཡང་ནི་ལྟ་བའི་རིམ་པས་དོན་གྱི་རྣམ་གྲངས་བརྗོད་པ་ནི། དོན་དམ་དང་ཀུན་རྫོབ་གཉིས་སུ་མེད་པར་མཐོང་། །དེ་ལྟར་རྟོགས་པའི་རང་རིག་པའི་མངོན་སུམ་དུ་བྱས་ནས་རིམ་པས་ཕྱེ་བས་ནི་རྟོགས་དང་གོ་བའི་རིམ་པས། ཏིང་ངེ་འཛིན་ནི་ཚོགས་ཀྱི་རྣལ་འབྱོར་ཏེ་རྣམ་པ་བཞི་དེ་ཏིང་དོན་དམ་ཀུན་ཏུ་སྣང་ཀུན་རྫོབ་ཕྱག་རྒྱ་གཅིག་པ་དབྱེར་མེད་སྣང་འབྱེད་བདེན་པ་དབྱེར་མེད་དམ་སྤྱོད་ཡུལ་དང་བྲལ་བའོ། །ལམ་དང་སྒོ་བཞི་དང་རིམ་པ་བཞི་སྟེ། སྟོང་པ་ཉིད་རྣམ་པར་ཐར་པའི་སྒོ་དང་། མཚན་མ་མེད་པ། སྨོན་པ་མེད་པ་རང་བཞིན་གྱིས་འོད་གསལ་བ་རྣམ་པར་ཐར་པའི་སྒོའོ། །སྦྱོར་ལམ་བར་ཆད་མེད་པ་སྟེ་བསྙེན་སྒྲུབ་རྣམ་པ་བཞིས་ཟག་མེད་ལམ་གྲངས་སུ་ཕྱེ་ན་ཉམས་གཡོ་བའི་དང་ཐོབ་པའི་དང་། གོམས་པའི་དང་བརྟན་པའི་དང་མཐར་ཕྱིན་པའི་ཉམས་དང་ལྔ་ལྔས་རིམ་པར་གོང་དུ་འཕེན་ཞིང་འཕར། །ཆོས་ཉིད་མཉམ་ཉིད་ངང་ལས་མི་སྐྲག་པས། །མངོན་བྱས་ངེས་པའི་ཤེས་རབ་ལྟ་བ་དང་། །རྣམ་པ་ཀུན་ལྡན་སྟོང་པ་ཆེན་པོ་མཐོང་བའི་ངང་ལ་གནས་པ་དེ་བཞིན་ཉིད་དང་། རང་རིག་པའི་སྙིང་རྗེ་ཀུན་ལ་ཡེ་ཤེས་ཀྱིས་སྒྱུ་མ་ལྟ་བུ། ཀུན་ཏུ་སྣང་བའི་དང་ཕྱག་རྒྱ་གཅིག་དབྱེར་མེད་རང་གི་རིག་པའི་མངོན་སུམ་དུ་གསལ་ལ། སྐུ་འབྲས་བུར་ལྟ་བ་དང་། སྣང་བྱེད་རྟོག་ཚོགས་ཐམས་ཅད་ལྷ་དང་གཉིས་མེད་རང་གསལ་བའི་ལྟ་བ་དང་ལྔ། བར་ཆད་མེད་པའི་ཚོགས་ཆེན་གྲུབ་པའི་ལྟ་བ་མཐོང་བ་དང་། ཚེ་ལ་དབང་བསྒྱུར་མཐོང་ལམ་གྱི་ལྟ་བ་དང་་མཉམ་པ་ཉིད་ལ་མི་གཡོ་བ་སྒོམ་ལམ་མུ་ཏྲ་མ་ཧཱའི་ལྟ་བ་དང་། མཐར་ལམ་ལྷུན་གྲུབ་པ་ཡེ་ཤེས་ཀུན་མཁྱེན་ལྟ་བ་དགུ་དང་པོ་ལྟ་བ་ནི། ལྟ་བ་དེའི་རྒྱུ་གང་ལས་བྱུང་ཞེ་ན་ཐོས་བསམ་གྱི་སོ་སོར་རྟོགས་པའི་ཤེས་རབ་ལས་བྱུང་གོམས་པའི་ཨ་ཏི་དང་། །དེ་ཏིང་མན་ཆད་རྣལ་འབྱོར་རིམ་པའི་རྒྱུ་ལས་སྐྱེས། །དེ་བས་ཤེས་རབ་གསུམ་ལ་འབོད། །རྒྱུད་དོན་ཀྱི་དོན་རྣམས་ལྟ་བའི་གཟུངས་ཀྱིས་ཟིན་པ་ནི། །དམ་ཚིག་དམ་ཚིག་ཅེས་བྱ་བ་གུད་ན་ཡོད་པ་མ་ཡིན་ཏེ། རང་གི་ལྟ་བ་ལས་མི་འདའ་བ་དམ་ཚིག་ཡིན། །སྡོམ་པ་རྣམ་པ་བཅུ་གསུམ་ནི་རྩ་བའི་དམ་ཚིག་ལྔ་ཡན་ལག་གི་ཉེར་ལྔ་སྟེ་གསུམ་དང་། །ཐུན་མོང་སྤྱི་ཡི་དམ་ཚིག་མཐའ་ཡས་པ་ཡོད་ཀྱང་། ཆོས་ཉིད་ཐིག་ལེ་ཆེན་པོ་རྟོགས་པའི་ངང་དུ་ཐམས་ཅད་འདུས་ཤིང་གསལ། །དེ་ལས་མ་གཡོས་ནས་ཇི་ལྟར་སྤྱོད་ཀྱང་དམ་ཚིག་སྡོམ་པ་ལས་མི་འདའ། །སྤྱོད་པ་བདག་དོན་གཞན་དོན་རྣམ་པ་གཉིས་པོ་ཡང་། །ཐིག་ལེ་ཆེན་པོ་ལྟ་བ་རྟོགས་པའི་ངང་དུ་ངེས་པར་སྤྱོད་ན། མཐའ་ཅི་ལའང་མི་གནས་སྤྱོད་པ་ཀུན་ལ་སྤྱོད། །སྤྱོད་པའི་མཁན་པོ་དང་སྤྱད་པར་བྱ་བ་གཉིས་སུ་མེད་པར་མཐོང་བའོ། །ཕྲིན་ལས་བྱ་བྱེད་མེད་པའི་ཚུལ་གྱིས་སུ། །ལས་རྣམས་ཀུན་ལ་ཐོགས་པ་མེད་པའི་སྤྱོད། །ཕྲིན་ལས་བཞི་ཡི་ལས་རིགས་དང་ལྷུན་གྱིས་གྲུབ་པའི་གཅིག་པོ་ཡང་། །ཐིག་ལེ་ཆེན་པོ་ལྟ་བའི་ངང་དུ་གསལ་བས་བྱ་བྱེད་མེད་པར་གྲུབ་བོ། །འདོད་ཡོན་ལ་སོགས་པའི་མཆོད་པའི་རྒྱན་དང་ལོངས་སྤྱོད་ཀུན། །གཞན་ན་མེད་པ་རིག་པ་བྱང་ཆུབ་སེམས་ཆེན་པོའི། ཆོ་འཕྲུལ་ཆེན་པོའི་ངང་དུ་འདུས། །གཞན་དུ་ཕུལ་བ་མེད་པར་ཐམས་ཅད་མཆོད་པའི་ངང་དུ་མཆོད་པས་དེ་བཞིན་གཤེགས་པ་མཉེས། །གཞལ་ཡས་ཁང་དང་དཀྱིལ་འཁོར་དང་། །ཁྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །དུ་འདུས་ཤིང་ངང་རྫོགས་པའོ། །དེ་ལ་དཀྱིལ་འཁོར་བདུན་ནི་རྒྱས་པ་ལས། འདིར་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་པ་རང་བཞིན་གྱི་དཀྱིལ་འཁོར་དང་། གཟུགས་བརྙན་གྱི་དང་། ལྷག་པ་གཟུགས་བརྙན་གྱི་དང་ཏིང་ངེ་འཛིན་དང་། ལྷག་པ་ཏིང་ངེ་འཛིན་དང་། བྱང་ཆུབ་ཀྱི་སེམས་ཀྱི་དང་། ཚོགས་ཀྱི་དཀྱིལ་འཁོར་དང་བདུན་ནོ། །འཁོར་འདས་གཉིས་ཀྱིས་བསྡུས་པའི་ཆོས་རྣམས་མ་ལུས་ཐམས་ཅད་ཀུན། །རང་བཞིན་ནམ་ངང་གིས་རིག་པ་བདག་ཉིད་ཆེན་པོ་ཡིན་པའི་ཕྱིར། །ཕན་ནུས་གསང་ཡེ་ཤེས་བདེ་བ་ཆེན་པོའི་དབང་ལྔ་མ་བཙལ་བར་སེམས་ཀྱི་ངང་དུ་ལྷུན་གྱིས་གྲུབ་ཅིང་རྫོགས། །དེ་ནས་དབང་བཅོ་བརྒྱད་རང་རིག་པའི་ཆོ་འཕྲུལ་སུ་སྣང་ང་ོ། །འབྲས་བུ་རང་ལ་ཡོད་པ་ལ་ངོ་མཚར་ཞིང་ངམ་པ་ཨེ་མ་འོ་རྒྱུ་རྐྱེན་གྱིས་མ་བསྒྲུབས་པར་རང་བཞིན་ལྷུན་གྱིས་གྲུབ་ཆེན་པོའོ། །དེ་ལྟར་གྲུབ་པ་ཆེན་པོ་རང་བྱུང་ཡེ་ཤེས་ཆེ། །བསྒྲུབ་པའི་འབྲས་བུ་དོན་དུ་གཉེར་བའི་ཐུན་མོང་དང་མཆོག་གི་དངོས་གྲུབ་རྣམ་གྲངས་ཀུན། །རང་རིག་བྱང་ཆུབ་ཀྱི་སེམས་ཆེན་པོ་ཡིན་ནོ། །ཏིང་ངེ་འཛིན་གྱིས་ལྟ་བའི་ངང་ལ་གནས་པ་བྱེ་བྲག་ཀུན་མཚན་བཅས་དང་མཚན་མེད་ཀྱི་ཏིང་ངེ་འཛིན། རང་རིག་སྣང་ཕྱིར་ཆུ་བུར་དང་། །མཚོན་མེད་ནམ་མཁའ་ལྟ་བུའི་རང་བཞིན་པས། །རང་རིག་པའི་ཡེ་ཤེས་ཉིད་ལས་གཞན་དུ་བསམ་ཞིང་བསྒོམ་པ་མིན། །སྔགས་དང་ཕྱག་རྒྱ་སྣང་བའང་སེམས་ཉིད་རང་སྣང་བ་ཡིན་པའི་ཕྱིར། །བྲག་ཆ་ལྟ་བུ་དང་ཆུ་ཟླ་འདྲ་བར་དབྱེར་མེད་དམ་ཤེས་ན། །ཕྱག་རྒྱ་བཅིང་བ་དང་སྔགས་བརྗོད་པའི་ལས་དང་ཉིད་གང་ལྟར་ཡང་མྱ་ངན་འདས་པའི་ངང་དུ་མཉམ། དེ་བས་ན་བྱ་བྱེད་གཉིས་སུ་མེད་པར་མཉམ་པ་ཉིད་ཀྱི་དོན་རྟོགས་པར་གྱིས་ཤིག་པའོ། །དེ་ལྟར་ཐམས་ཅད་ལྟ་བ་ལ་འདུས་པས་ལྟ་བ་ལྟ་བ་གཙོ་བརྗོད་མོད། །ངེས་པའི་དོན་དུ་ཤེས་རབ་ཀྱི་ཆོས་ཀུན་མཉམ་ཉིད་དུ་རྟོགས་པས་ལྟ་བ་ཞེས་བྱ། དེ་ནི་དཔེར་ན་དེད་དཔོན་རིན་པོ་ཆེ་རཏྣའི་གླིང་ནས་ལེན་པ་ཅི་བཞིན་དུ། །ལམ་དུ་ཞུགས་པ་ནས་གདོད་མཐའི་བར་གྱི་བྱེ་བྲག་རྣམ་པར་ལྟ་བའི་སྐབས་འདིར་ཤེས་དགོས། །ཐོས་བསམ་བསྒོམ་གསུམ་ཤེས་རབ་རྟོགས་པའི་གཉེར་ཆུབ་ཚེ། །པར་བྱེད་པའི། བདག་དོན་དང་གཞན་གྱི་དོན་བྱ་བའི་ཕྱིར་བྱ་བ་རྣམས། །རྒྱུ་ཤེས་པས་ལྟ་བའི་གཞི་ལ་སྤྱོད་པ་ཀུན་ཀྱང་སྤྱོད། །དོན་དུ་ཐོས་བསམ་བཅུ་སྤྱོད་ནོར་དུ་གཉེར་བའོ། །སྤྱོད་པ་འདི་ཡང་དཔེའི་དབང་བསྒྱུར་གྱི་རྒྱལ་པོའི་སྤྱོད་པ་འཁོར་ལོས་བསྒྱུར་བའི་ཤེས་རབ་ས་ཁམས་འདུལ་ཞིང་ཆེ་ཆུང་དང་། །ཐབས་ཀྱི་སྤྱོད་པ་སྟོབས་ཅན་གླང་པོ་ཆུར་འཇུག་པའི་རྩལ་སྒྱིད་དྲག་ཞན་དང་། །བྱིན་རླབས་ཀྱི་སྤྱོད་པ་མཁའ་ཡུལ་ཆེ་ཆུང་ཇི་ལྟར་བར། །སྤྱོད་པའི་གཞི་གཅིག་ཀྱང་སྟོབས་ཀྱིས་ཁྱད་པར་ཡོད་པར་འགྱུར་རོ། །ཆོས་ཀུན་ཡེ་ནས་ཆོས་ཀྱི་དབྱིངས་སུ་རོ་གཅིག་པས། །ཆོས་དབྱིངས་དེ་ལའང་ང་དང་བདག་མ་རྟོག །རང་བཞིན་རྣམ་པར་དག་ཅིང་གཉིས་སུ་མེད་པ་ལ། །གཙང་དང་དམེ་བའི་བློ་མ་བྱེད། །ཆོས་རྣམས་ཐམས་ཅད་ཡེ་ནས་བདེ་བར་གཤེགས་པའི་སྙིང་པོ་བས། །གློ་བུར་རྣམ་རྟོག་རྐྱེན་གྱིས་རྡུལ་གྱིས་གང་ལ་འགོ། །ཤེས་རབ་མཆོག་གི་ས་དེ་ལྟར་གོ་ཞིང་རྟོགས་པར་གྱིས། རྟོགས་པའི་ཆོས་རྣམས་མ་ལུས་ཀུན་འདུས་པས་ཆོས་ཀྱི་དབྱིངས་སུ་ཤེས་པར་བྱོས། །དེ་ལྟར་ཤེས་པ་ལ་ཡོན་ཏན་ཡོད་པ་བས་ན་རྒྱུ་ཤེས་པར་བྱ་བ་ལྟ་བ་རྟོགས་པའི་ཐབས་རྣམས། །དམ་ཚིག་སྡོམ་པའི་ངོ་བོར་བྱེད། །བདག་གི་དོན་དང་གཞན་གྱི་དོན་བྱ་བའི་ཕྱིར་སྤྱོད་པ་གཙོར་བྱེད་པའི་རྣལ་འབྱོར་ཀྱི། །དང་པོ་ཕོགས་པའི་སྡོམ་པའི་ཀུན་ཀྱང་སློབ། །ཤེས་རབ་ཆེན་པོ་ས་ལྟ་བ་རྟོགས་པའི་སྦྱིན་སྲེག་གི་གང་ལའང་ཞེན་པ་མེད་པས། །བསྲེག་རྫས་སྲིད་གསུམ་གྱི་མཚན་མ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་ཉོན་མོངས་སྲེགས་པའི་མེ་རུ་འབར་བས། ཡེ་ཤེས་ཀྱི་མེ་འབར་བས་འགྲོ་བ་ཀུན་ཀྱང་ཆོས་ཉིད་དབྱིངས་ཀྱི་ངང་དུ་བསྒྲལ། །མ་སེམས་སྐྱེ་བ་ནས་འབྲས་བུ་ཐོབ་བྱའི་བར་དུ་གདོད་མཐར་ལམ་དོན་དུ་གཉེར་ཐེ་ཚོམ་གྱིས་སྤྲོས་པ་གཅོད་ཅིང་། །འབྲས་བུ་རང་ལ་གྲུབ་པ་བགྲོད་པ་དང་གཞན་དོན་ལ་འཇུག་པ་ཡང་། །བདག་དང་གཞན་ཕྱིར་དམ་བཅའ་བས། །བདག་ཉིད་ཀྱི་དོན་ལ་བླ་མེད་ཡང་གཞན་དོན་ཤུགས་ཀྱིས་ཡོངས་སུ་རྫོགས་པའོ། །དེ་བས་ན་བྱིས་པ་ཉན་རང་པར་མི་མཚུངས་ཏེ། །ཀུན་ལམ་སྐབས་ལས་ཤེས་པར་བྱ། །རྣལ་འབྱོར་གང་གིས་སྐྱེ་མེད་ཀྱི་དོན་འདི་ལྟར་མཐོང་ཞིང་ལྟ་བ་རྟོགས་པས། །མཆོག་ཐུན་མོང་གི་དངོས་གྲུབ་བླ་མེད་མཆོག་གི་སྙིང་པོ་སྟེ། །ཆུ་སྲིན་ཕྱག་རྒྱ་ནི་ཆུ་སྲིན་གྱི་གྲེ་བར་རཏྣ་ཆུད་ན་མི་གཏོང་བ་ཅི་བཞིན་དུ། །དང་པོའི་ལྟ་བ་དོན་མངོན་དུ་རྟོགས་ནས་ལྟ་བའི་གཟུངས་ཀྱི་མཐར་འཁོར་བ་མི་གཏོང་ཞིང་བྱང་ཆུབ་ཐོབ་པའོ། །སྤྱོད་ཡུལ་མི་ཉམས་ཤིང་ལྟ་བ་རྟོགས་པའི་ཡོན་ཏན་ཀུན་ཏུ་ཚད་དང་དཔག་ཏུ་མེད། །ལྟ་བ་རྟོགས་ན་ཀུན་ནས་ཉོན་མོངས་པའི་སྤྱོད་པའང་གྲོལ། །ཐུན་མོང་གི་ལམ་མཚན་ཉིད་དང་སྔགས་ཕྱི་པ་གཉིས་ཏེ་དེ་བཞིན་དུ་ཐེག་དམན་པ་ལས་ཀྱང་གྲོལ་པས། །དགེ་སྡིག་རྣམ་སྨིན་གྱིས་མི་གོས་ཤིང་གཉིས་སུ་མེད་པའི་ཚོགས་གཉིས་ལ་རང་བཞིན་མེད་ཡེ་ཤེས་རྫོགས་པའོ། །རྣལ་འབྱོར་གང་གིས་དོན་དེ་ལྟར་ལྟ་བ་རྟོགས་པར་གྱུར་པ་ནི། སྒྲོ་དང་སྐུར་པ་དང་མཐའ་ལུང་མ་བསྟན་པ་གསུམ་ལས་གྲོལ་ཏེ། །འཇུག་པའི་དོན་ལམ་གྱི་གནས་སྐབས་རྣམས་མཐར་ཐུག་འབྲས་བུ་མངོན་དུ་འབྱིན་པར་བྱེད་དོན། དེ་བས་ན་ལྟ་བ་ལ་བདག་དོན་གཞན་དོན་ཆོས་དོན་རྣམས་ཡོངས་སུ་རྫོགས་པའོ། །དེའང་རྒྱ་ཆེ་བ་ས་གཞི་ལྟ་བུ་དང་ཟབ་པ་རྒྱ་མཚོ་ཡངས་ལ་བར་སྣང་ཤེས་རབ་རལ་གྲི་མྱུར་བ་གློག་ལྟ་བུའི། ཆོས་ཉིད་ཟབ་པའི་དོན་མངོན་སུམ་དུ་རྟོགས་འཁོར་བ་མི་ལྡོག་པ་ལ་དགོངས་པ་བདེ་བ་ལ་གནས་པ་སྟེའང་། །ང་དང་བདག་ཏུ་འཛིན་པ་མེད་པར་བློ་གྲོས་ཡངས་པ་བདེ་བའི་དོན་དང་ལྡན་པའོ། །རྣལ་འབྱོར་བརྩོན་འགྲུས་ཀྱི་ལྟ་བའི་དོན་པས་རྟོགས་པ་ལྷ྄ུར་བྱེད་ན། །དབང་ཐོབ་ཆོས་ལ་དབང་བྱེད་པའི་ལྟས་ཏེ་རིན་པོ་ཆེའི་གླིང་དུ་ཕྱིན་པ་དང་མེ་ཏོག་དང་བདུད་རྩིའི་ཆར་འབབ་པ་དང་། རིན་པོ་ཆེའི་གླེགས་བམ་དང་གསེར་གྱི་འཁོར་ལོ་ལ་སོགས་པ་ལག་ཏུ་གཏད་ནས་ཆོས་ཀྱི་འཁོར་ལོ་བསྐོར་ཅིག་པ་དང་། དུང་དང་རྔ་བོ་ཆེ་ལ་སོགས་པ་སྟོང་གསུམ་གང་བར་བསྒྲགས་པ་དང་། ཉི་ཟླ་ལག་ཏུ་ཐོགས་ཏེ་འཇིག་རྟེན་གྱི་མུན་པ་བསལ་བ་དང་དེ་ལ་སོགས་པ་རྨི་བ་ནི་ཆོས་ལ་དབང་ཐོབ་པའི་ལྟས་སོ། །བདེན་མཐོང་དང་བདེན་པ་མཐོང་བའི་ལྟས་ཏེ་སྔར་མ་མཐོང་བའི་ཡུལ་ཁམས་ཆེན་པོ་མཐོང་བ་དང་། བྱང་ཆུབ་ཆེན་པོའི་མཆོད་རྟེན་ལ་འཛེག་ཅིང་ཐམས་ཅད་མཐོང་བ་དང་། རི་བོའི་རྩེ་ནས་ཕྱོགས་ཐམས་ཅད་དུ་བལྟས་ཤིང་མཐོང་བ་དང་ནམ་མཁའི་ཁམས་ཀུན་མཐོང་བ་དང་། རང་ལས་འོད་བྱུང་ནས་སྣང་སྲིད་ཀུན་གསལ་བ་དེ་ལྟ་བུས་མཚན་མ་རྨི་ལམ་དུ་མཐོང་ཞིང་འབྱུང་ལ་གཞན་ཡང་སྒྲིབ་པ་དག་པ་ལ་སོགས་པ་འབྱུང་བར་གསུངས་ཏེ། སྒྲེན་མོར་བུད་ནས་ལུས་ཀྱི་དྲི་མ་ཐམས་ཅད་དག་པ་དང་། ཆུ་བོ་ཆེ་ལ་བརྐྱལ་ཞིང་ཁྲུས་བྱེད་པ་དང་རྣག་ཁྲག་དང་ནང་ཁྲོལ་ལ་སོགས་པ་ཐམས་ཅད་ཕྱིར་ལ་སངས་ཀྱིས་ཐོན་པ་དང་། ལུས་མེས་བསྲེགས་ཏེ་མི་སྣང་བ་ལ་སོགས་པའོ། །རྩ་བའི་དྲོད་ལས་དགོངས་པ་ཕྱོགས་རིས་མེད་པར་རང་བཞིན་གྱིས་བདེ་བ་དང་ཡན་ལག་ཀུན་གྱི་དྲོད་ནི་ཕྱིའི་དྲོད་ལུས་གྱི་བཟོད་པ་ཕྲ་མོ་ཐོབ་པ་དང་། ནང་གི་དྲོད་དབུགས་དལ་ཞིང་དབང་པོ་གསལ་བ་དང་། གསང་བའི་དྲོད་སེམས་རྣལ་དུ་ཕེབ་པ་ལ་སོགས་པའོ། །ངང་ངམ་ཤུགས་ཀྱིས་འབྱུང་བར་ཐེ་ཚོམ་མེད། །རྟགས་རྟོགས་པས་དེ་ལ་མཚན་མ་འབྱུང་བ་ནི། །ཤེས་རབ་ཀྱི་སྟོབས་ཀྱིས་རྟོགས་པའི་ངང་ངམ་རིག་པ་ཀླུང་དུ་འབེབས་ཤིང་རྟོགས་པའི་ལྡན་པས། །སྐྱེ་འཆི་མེད་པར་རྟོགས་པས་ན་གཞན་དོན་འཕོ་འགྱུར་མཐོང་ཡང་འཇིགས་མེད་ཅིང་ཉམ་ང་བ་མེད་པ་དང་། སྣང་སྲིད་ཆོས་སྐུར་ཤེས་པས་འཁྲུལ་པའི་ཁམས་ལ་སྐྱོ་བ་མེད། །སངས་རྒྱས་རང་ལ་ཡོད་པར་རྟོགས་པས་གྲུབ་པའི་མཐའ་དང་གནས་གཞན་ལ་སྨོན་པ་མེད་དེ། །འདོད་པའི་ལོངས་སྤྱོད་ལྔ་ལ་སྤྱོད་ཀྱང་ཆོས་ཉིད་མཉམ་པར་སྦྱོར། །ལུས་ལ་སྡུག་བསྔལ་དྲག་པོ་དང་ཉོན་མོངས་ཅི་སྐྱེས་ཀྱང་རང་ཤུགས་ཀྱིས་བཟོད་ཆེན་པོ་ཐོབ་ཏེ། །གཞན་དོན་ལས་རྣམས་ཀུན་ལ་ཁུར་དུ་མི་ལྟ། །ཏན་ཏྲའི་ལས་ཇི་ལྟར་འབྱུང་ཡང་ལུང་དང་འགལ་བ་མེད་པར་སྤྱོད། །ཐ་མལ་གཉིས་འཛིན་གྱི་སྤྱོད་པ་ལས་ཤིན་ཏུ་ཡང་ལྷག་པར་འགྱུར་ཏེ། སྒོ་གསུམ་གྱི་སྤྱོད་པ་རྒྱུན་གྱི་ཚོགས་གཉིས་རྫོགས། །མདོ་ཙམ་སྨོས་ཀྱི་ལྟ་བ་རྟོགས་པའི་རྟགས་ཀྱི་རྣམ་གྲངས་ཐ་དད་བརྗོད་ཀྱི་མི་ལང་ངོ་། །དཔེར་ན་རྒྱ་མཚོ་དྭངས་བའི་ནང་དུ་ཉི་ཟླ་གཟའ་སྐར་གྱི་གཟུགས་བརྙན་འཆར་བ། ལྟར། །ཚིག་གི་སྒྲ་བརྟེན་ལ་དོན་སྤྱིའི་རྣམ་པ་ཡིད་ལ་བྱེད་མིན་པར། །དོན་རང་གི་མཚན་ཉིད་རང་རིག་པ་མངོན་སུམ་རྟོགས་པས་དམིགས་པའི་ཡུལ་དང་བྲལ་བར། །ཡུལ་མེད་པར་རང་གསལ་སྒྲོ་སྐུར་ལུང་མ་བསྟན་གསུམ་དང་བྲལ་གྲུབ་མཐའ་གཞན་གྱི་རྐྱེན་གྱིས་མི་བརྒུལ་བར། །ངེས་པར་བློའི་གདེང་དུ་རྟོགས་ཅིང་ཆུད་པར་གང་བྱས་པ། །ཐོས་བསམ་ལ་བརྟེན་པའི་ལྟ་བ་བལྟ་བྱ་ཡུལ་དང་ལྟ་བྱེད་མཁན་པོ་གཉིས་སུ་མེད་པར་ལྟ་བའི་དངོས་པོ་མཐར་ཕྱིན་པའོ། །འོན་ཀྱང་ཐོས་བསམ་གྱི་ལྟ་བ་ཁུང་དུ་ཆུད་པ་གོམ་པ་ལྟ་བ་འཕེལ་པ་དང་ས་ཡི་རིམ། །དཔེར་ན་མིག་གི་དབང་པོ་དང་མའི་སྤྱོད་ཡུལ་ལ། །ཉེ་རིང་དྲུང་བཞིན་ཇེ་གསལ་ཇེ་གསལ་ལ་འགྲོ་བ་སྒོམ་པའི་ཤེས་རབ་སྟོབས་འཕེལ་བས། །སྔ་མ་སྔ་མ་རྒྱུ་ཕྱི་མ་ཕྱི་མ་རྒྱུ་རྐྱེན་གོང་འོག་འབྲས་བུར་འབྲེལ། །བ་སྟེ། རྟོགས་པ་གསལ་བའི་བྱེ་བྲག་གི་ལམ་ནས་གོང་དུ་གསལ་རིམ་པར་གྱིས་ཆོས་ཐམས་ཅད་ཇེ་གསལ་ཇེ་གསལ་ལ་འགྲོ་བས། ཡང་གོང་གི་རིམ་པ་དེ་བས་སྐབས་ལ་གསལ་བའི་མིང་བརྗོད་ཀྱི་དངོས་པོ་གཅིག །ལྟ་བས་གོང་གི་དོན་ལྟར་མ་རྟོགས་པའི། །བློ་ངན་མཉམ་པར་ཁུངས་ཕྱུང་ནས། །དོན་མ་རྟོགས་པར་དམན་པ་ལ་གྱུར་པའི་དང་ལེ་ལོ་སྙོམ་ལས་བྱས་པས། དོན་ཐར་པ་མ་གྲུབ་པར་སླར་ངན་སོང་དུ་འགྲོ་བས། དེས་ན་སེམས་ཀྱི་མཉམ་པ་མ་རྟོགས་ན། །ཁ་རྟོགས་ཚིག་གི་མཉམ་པས་སངས་མི་རྒྱའོ། །དེ་བས་དོན་ཚིག་ལྡན་པར་བྱོས། །ལྟ་བ་མངོན་དུ་མ་རྟོགས་འོན་ཏང་མོས་ཤིང་དོན་དུ་གཉེར་ན་ཐེ་ཚོམ་མེད་པར་འགྲུབ། །དཔེར་ན་སྤྱན་བཟང་དང་ལོང་བ་ལམ་ཞུགས་ཅི་བཞིན་དུ། །དོན་ལྟ་བ་མེད་ན། ལམ་ཀུན་ཟག་ཅིང་འཆིང་བར་འགྱུར། །བདག་གཞན་གྱི་དོན་དུ་མི་འགྱུར་ཕྱིར་ན་བརླག་སྟེ་འགྲོར། ལྟ་བ་མེད་ན་སྐྱོན་ཡོད་པ་དེ་བས་དོན་ལ་འགྲུབ་པར་གྱིས། །གོང་དུ་བསྟན་པ་དེ་ལྟར་ལྟ་བའི་དོན་མཐོང་བའི་མི་གང་ཞིག་གིས། །གཞན་དུ་ཅི་ལའང་མི་བསམ་ལྟ་བའི་དོན་དེ་ལ་ཡང་ནས་ཡང་དུ་འདྲིས་པར་གྱིས། །རྫོགས་པའི་སངས་རྒྱས་སྐྱེས་བུ་དམ་པ་མཆོག་འདོད་པས། །ལྟ་བ་དེ་ལ་དུས་རྟག་ཏུ་བརྩོན་འགྲུས་གསལ་བར་མཐར་ཕྱིན་གྱིས། །དཔེར་ན་ལམ་ཤེས་ནས་ལམ་དུ་འཇུག་པ་བཞིན་ཕྱིར། །འཇུག་པ་ཨ་ཏི་རྣམས་དང་ལྟ་བ་ནི་སྔ་ཕྱི་རྒྱུ་འབྲས་ཀྱི་ཚུལ་དུ་འཕེལ་བའོ། །རང་གནས་མཐོང་བའི་ལེའུ་གཉིས་པའོ།། ༈ །།ལེའུ་གཉིས་པ་ཆོས་ཀུན་རིག་པ་བདག་ཉིད་ངང་ཆེན་རྟོགས་པས་མོས། །དེ་ལྟར་རྟོགས་པའི་རྗེས་སུ་གོམས་པར་བྱེད་པའི་ས་མ་ཏི་བཤད་པར་བྱའོ། །ལམ་སྔ་མ་སྔ་མ་གང་དང་གང་། །ལམ་ཕྱི་མ་ཕྱི་མའི་ཐབས་དང་རྒྱུ། །དེ་བཞིན་ལམ་ཕྱི་མ་ཕྱི་མ་གང་། །ལམ་སྔ་མ་སྔ་མ་ལས་འབྱུང་འབྲས། །དེ་ལྟར་ན་རྒྱུ་དང་འབྲས་བུའི་འབྲེལ་བ་དང་ཐབས་དང་ཐབས་བྱུང་འབྲེལ་པ་ལམ་བགྲོད་པའི། །སྲིད་པ་རིམ་གྱིས་པའི་འཁོར་ལོའི་ཚུལ་བཞིན་དུ། །ཤེས་རབ་དབང་པོ་ཆེ་ཆུང་དང་དོན་དུ་གཉེར་བའི་བརྩོན་འགྲུས་བཟང་ངན་གྱིས། །རྣམ་པར་དབྱེ་བའི་ལུས་ཅིག་ཆར་རིམ་གྱིས་གཉིས་གཉིས་སུ་བསྟན། །སྲིད་པ་ཅིར་ཆར་བ་རྫོགས་པར་སྨིན་ཚུལ་ཏེ་བརྫུས་སྐྱེས་ཀྱི་ཚུལ་དུ་བསྒྲོད་པ་ནི། ལྟ་བ་ལྷག་པར་རྟོགས་ཤིང་གདེང་ལྡན་སྐྱེས་བུ་ཡིས། །དེ་ཏིང་ཀུན་ཏིང་གཅིག་པ་སྤྲོས་བཅས་གོམས་པ་རྣམ་བཞི་དོན་དམ་ཀུན་རྫོབ་དབྱེར་མེད་ཟུངས་ལྡན་པར། །དེ་བཞིན་ཉིད་དང་ཀུན་ཏུ་སྣང་དང་། ཕྱག་རྒྱ་གཅིག་དང་སྤྲོས་བཅས་ལ་སོགས་པའོ། །དེ་ལ་དེ་བཞིན་ཉིད་ཀྱི་ཏིང་ངེ་འཛིན་ནི། ཆོས་ཀུན་རང་བྱུང་གི་ཡེ་ཤེས། སྤྲོས་བྲལ་སྐྱེ་བ་མེད་པར་རྟོགས་ཤིང་བཅོས་བསླད་སྤྱོད་ཡུལ་མེད་པའི་ངང་ལ་གནས་པའོ། །ཀུན་ཏིང་ནི། ཆོས་ཀུན་རང་རིག་པའི་ཡེ་ཤེས་ཉིད་མ་འགག་པ་ཅིར་ཡང་སྣང་ཞིང་གཉིས་སུ་མེད་པར་ངང་གིས་གནས་པའོ། །ཕྱག་རྒྱ་གཅིག་པ་ནི། ཅིར་སྣང་རང་བྱུང་གི་སྐུ་དང་རིག་པའི་ཡེ་ཤེས་ལ་གཡོས་པ་མེད་པའོ། །སྤྲོས་བཅས་ནི་སྣོད་བཅུད་དག་པའི་ཡེ་ཤེས་རྒྱལ་བའི་དལ་དུ་མ་འདྲེས་པར་གསལ་བའོ། །དེ་ལྟར་སྒོམ་པ་རྣམ་བཞི་ཡང་། དུས་གཅིག་རྫོགས་པ་ཡིན་ཏེ། གདོད་མ་ཉིད་ནས་གོམས་པར་བྱེད། །རང་བྱུང་གི་ཡེ་ཤེས་མཐའ་དབུས་མེད་པ་ཐིག་ལེ་ཆེན་པོའི་རང་བཞིན་ལ། །སྒོམ་པ་རྣམ་དེ་ཏིང་ཀུན་ཏིང་རྒྱུ་ཏིང་གསུམ་དུས་གཅིག་རྫོགས། །ཐིག་ལེ་ཆེན་པོ་དེ་ནི་སྤྲོས་བྲལ་མཐའ་དབུས་མེད་པ་དེ་བཞིན་ཉིད་ཀྱི་དབྱིངས། །དེ་ནི་ཅིར་ཡང་སྣང་བས་ཀུན་ཏུ་སྣང་གི་ངང་། །དེ་ནི་དབྱེར་མེད་ཅིང་ཡེ་ཤེས་ཆེན་པོའི་དལ་དུ་རང་གསལ་བ་རྒྱུ་ཡི་རིམ་པར་ལྡན། །རྣམས་ཤེས་ཚོགས་བརྒྱད་ཡེ་ཤེས་ལྔར་རྟོགས་པ་ཡིན་ཏེ་དེ་ཡང་བློ་ཆུང་བ་ལ་བྱེ་བྲག་སོ་སོར་ངོ་སྤྲོད་པ་ཡིན་ཏེ་བློ་ཆེ་བ་ལ་མཉམ་ཉིད་རང་གྲོལ་དུ་སྤྲོད་པའོ། །དང་པོ་ནི་སྒོ་ལྔ་བྱ་བ་གྲུབ་པའི་ཡེ་ཤེས། ཡིད་སོ་སོར་རྟོགས་པའི་ཡེ་ཤེས། ཉོན་མོངས་པ་མཉམ་ཉིད་ཀྱི་ཡེ་ཤེས་ཀུན་གཞི་ལ་གཉིས་ལས་གཞི་དོན་གྱི་ཀུན་གཞི་སྟོང་པ་ཉིད་ཀྱི་ཡེ་ཤེས། སྦྱོར་བ་དོན་གྱི་ཀུན་གཞི་མེ་ལོང་ཡེ་ཤེས་སུ་རྟོགས་པའོ། །བློ་ཆེ་བའམ་དོན་གྱི་ངོ་བོ་ནི། ཚོགས་བརྒྱད་རང་སྣང་ཡུལ་མེད་རང་བྱུང་གི་ཡེ་ཤེས་སུ་རྟོགས་པས་ཡེ་ཤེས་ལྔའི་ངོ་བོ་གསལ་བས་ཡིན་ནོ། །ཚོགས་བརྒྱད་མ་བསྒྲིབས་རང་གསལ་དུ་རྟོགས་པས་མེ་ལོང་ལྟ་བུའི་ཡེ་ཤེས། ཡུལ་དང་ཡུལ་ཅན་མེད་པར་ཕྱོགས་མེད་རང་གྲོལ་དུ་རྟོགས་པས་སྟོང་པ་ཉིད་ཀྱི་ཡེ་ཤེས། དེ་ཉིད་གཉིས་སུ་མེད་ཅིང་མཉམ་ཉིད་རང་གསལ་དུ་རྟོགས་པས་མཉམ་པ་ཉིད་ཀྱི་ཡེ་ཤེས། དེ་ཉིད་མ་འདྲེས་ཤིང་ཡང་གསལ་བས་སོ་སོར་རྟོགས་པའི་ཡེ་ཤེས། དེ་ལ་བླང་དོར་རེ་དོགས་མེད་དེ་བརྩོལ་མེད་ལྷུན་གྲུབ་ཏུ་རྟོགས་པའི་བྱ་བ་གྲུབ་པའི་ཡེ་ཤེས་སོ། །ཏིང་ངེ་འཛིན་གྱིས་དབང་བསྒྱུར་ནས། །ཡེ་ཤེས་ལྔ་རུ་གསལ་བ་ཉིད། །ཐུགས་ཀྱི་ཕྱག་རྒྱ་ཆེན་པོ་ལས་མི་འདའ་བའོ། །ཆོས་ཉིད་མཉམ་པ་ལ་མཉམ་པར་སྦྱོར་བ་ཡིས། །འབྲས་བུ་མཉམ་པའི་དམ་ཚིག་ལ་གནས་ན། །འབྲས་བུ་མཉམ་རྫོགས་ཆེན་པོ་མངོན་དུ་འགྲུབ་པ་འགྱུར། །བས། མཉམ་པ་ཉིད་ལས་འདས་ནས་སངས་རྒྱས་ཐོབ་པ་མ་ཡིན་ནོ། །ཡང་ན་དེ་ལ་དམ་ཚིག་འདི་ལྟ་བུ། །ཆོས་ཀུན་མཉམ་པ་ཉིད་ལས་གཞན་པ་མེད་ཅིང་དེ་ཉིད་རྟོགས་པས་ཇི་ལྟར་སྤྱོད་ཀྱང་སྡོམ་མི་འདའ། །བྱེད་སྤྱོད་ཚོགས་ཆེན་གཉིས་སུ་འགྱུར། །སྤྱོད་ལམ་འགྲོ་དང་འདུག་དང་ཉལ་བ་ན། །རྟོགས་པའི་དོན་ལ་མ་ཉམས་པར་ཆོས་ཉིད་དེ་ཡི་དབྱིངས་སུ་གནས། །ཤེས་རབ་མཆོག་གིས་དང་ལྡན་པས་སྤྱད་བྱ་སྤྱོད་བྱེད་མེད་པར་རྟག་ཏུ་སྤྱོད། །དེ་ལྟར་རང་བྱུང་ཆོས་ཀྱི་དབྱིངས་ཉིད་ལ་ནི་ཡེ་ཤེས་དབྱིངས་ཉིད་སྤྱོད་ཕྱིར། །ཆོས་ཀྱི་དབྱིངས་ཉིད་ལ་ཤེས་རབ་མཆོག་གི་གནས་ལུགས་དོན་ལ་སྤྱོད། །དེ་ཉིད་མི་གནས་པའི་མྱ་ངན་ལས་འདས། །ལྟ་བ་རྟོགས་པའི་རང་བྱུང་གི་ཡེ་ཤེས་ཉིད་ཡོན་ཏན་རང་ལ་འབྱུང་བ་དེས་ཡིད་བཞིན་གྱི་ནོར་བུ་ལྟར་མི་ཟད་པའི་གཏེར། །ཆོས་ཐམས་ཅད་ལ་ཡང་དོན་མེ་ལོང་བཞིན། །བལྟས་ཀྱང་སེམས་ཀྱི་ཡོན་ཏན་གྱི་གཟུགས་བརྙན་གཞན་ནས་མི་སྣང་ངོ་། །རྒྱུ་རྐྱེན་ཅི་ཡིན་གང་གིས་ངོ་ཤེས་ཤིང་། །བསྒོམ་བྱ་བྱེད་ལས་འཕགས་རྩོལ་མེད་དུ་གྱིན་འདར་འདུ་བྱེད་པ། །གང་ཞིག་བློ་ལ་ཉམས་སུ་ལེན་ཅིང་སྤྱོད་པ་འབྲས་བུ་བྱང་ཆུབ་ཐོབ་པའོ། །རང་བྱུང་ཡེ་ཤེས་སེལ་མེད་པར་རྣམ་པར་དག་པའི་ལྟ་བ་འགྱུར་བ་མེད་པའི་གཡུང་དྲུང་ལྟར་ཡེ་ནས་སངས་རྒྱས་ལ། །ཐམས་ཅད་ཡེ་ནས་མཉམ་པར་གནས་པས་སྒོམ་བྱ་སྒོམ་བྱེད། རྣམ་པར་དག་ཅིང་། །ཡུལ་ཡུལ་ཅན་དུ་མི་རྟོག་ས་ལེར་གནས་པ་ལ་རྟོག་པར་མཛད་དོ། །ངོ་བོ་ཕྱོགས་གཅིག་ཏུ་བསྙད་དུ་མེད་པས་སྣ་ཚོགས་སུ་འབྱུང་བ་ཡིན། །བདག་ཏུ་རྟོག་པ་མེད་ལ་རང་བྱུང་ཡེ་ཤེས་ལས་མི་འདའ་བས་བདག་ཆེན་ཐམས་ཅད་དེའི་ཡོན་ཏན་འབྱུང་བའི་མིང་དག་གཏེར་མཛོད་ཆེན་པོའོ། །ཚོགས་དྲུག་མ་བཀག་པ་ལས་རྣམ་རྟོག་སྣ་ཚོགས་རྒྱུ་ཞིང་འབྱུང་མེད་པས། །རྣམ་རྟོག་སྐྱེས་པའི་དུས་ཉིད་ནི་རང་བྱུང་ཡེ་ཤེས་རང་བཞིན་ཏེ། །རྣམ་གསུམ་ནི་རྣམ་རྟོག་ཡེ་ཤེས་རང་གྲོལ་སྒོམ་གྱི་ངོ་བོ་གསུམ་གྱིས་སྣང་ཞིང་ངོ་བོ་རྣམ་པ་མཆོག་ལྡན་གྱི་སྟོང་ཉིད་ཡིན་པ་ལས། །རྣམ་རྟོག་ངང་མི་སྐྱེ་ཡེ་ཤེས་བརྗོད་དུ་མེད་དེ་གཉིས་མེད་རང་གྲོལ་བའོ། །ཆོས་རྣམས་ཐམས་ཅད་སེམས་ཀྱི་ངང་སྟེ་སེམས་ཞེས་ཕྱོགས་གཅིག་ཏུ་གདགས་སུ་མེད། །བྱེད་པ་པོས་མ་བཅོས་རྩོལ་མེད་ལྷུན་གྱིས་གནས་པ་འབྲས་བུ་ཡེ་ནས་བྱང་ཆུབ་སྙིང་པོ་ཡིན་ཅིང་། །དེ་ལ་འབྲས་བུ་གཞན་ནས་ཐོབ་རྒྱུ་མེད་པས་ཡེ་ནས་བདེར་གཤེགས་སྙི་པོ་ཡིན། །ནམ་མཁར་ལ་ཕྱོགས་སུ་བཟུང་བས་སྒྲིབ་བྱེད་སྤྲིན་གྱིས་ཁེབས་པར་འགྱུར། །ནམ་མཁའ་ལ་ཕྱོགས་བཟུང་དུ་མེད་པར་མཁས་པ་གང་གིས་ཤེས་པ་ནི། །ནམ་མཁའ་ལས་གཞན་སྤྲིན་ཞིག་འབྱུང་ཞིང་ཁེབས་པར་མི་སྲིད་བཞིན། །སྒོམ་པའི་སེམས་ཀྱང་སྒོམ་ལ་ཕྱོགས་སུ་བཟུང་བས་སྐྱོན་དག་འབྱུང་བར་འགྱུར་གྱིས་སྒོམ་པ་འཛིན་པ་མེད་ཅིང་ཐམས་ཅད་རང་བྱུང་དུ་ཤེས་པས་ཐམས་ཅད་སྐྱོན་དག་འབྱུང་བར་མི་འགྱུར་ཏེ་དེ་ལྟར་རྟོགས་ཤིང་ལྟ་བ་བྱ། །རྟོགས་པའི་དོན་ལ་མ་བཅོས་ལྷུན་མཉམ་ཇི་བཞིན་ཉིད་ཀྱི་ངང་བཞག་པ་དང་། །འབྲས་བུ་རྒྱུ་འབྲས་དབྱེར་མེད་ཡིན་ནོ་ལྷུན་གྱིས་གྲུབ་པའི་རང་ཆས་སུ་དཀྱིལ་འཁོར་འབྱུང་བའོ། །ཆོས་ཉིད་དེ་བཞིན་ཉིད་ཀྱི་ངང་ལ་ཏིང་ངེ་འཛིན་གྱིས་གནས་པར་བཅས་ཤིང་སྒོམ་པ་ན་ཡོན་ཏན། ཉོན་མོངས་པ་དང་སྡུག་བསྔལ་མི་འབྱུང་སྟེ། །འབྲས་བུ་དུས་རྟག་ཏུ་ཆོས་ཉིད་བདེ་བ་ཆེན་པོའི་ངང་ལ་གནས་ཤིང་བླ་ན་མེད་པའི་བྱང་ཆུབ་ཅིང་། །ཆོས་སྐུ། ལོངས་སྐུ་དང་སྤྲུལ་སྐུ་མཚན་དང་དཔེ་བྱད་ཀུན་དང་ལྡན་པ་ཐོབ་པའོ། །སྲིད་པ་རིམ་གྱིས་མངལ་སྐྱེ་པར་སྨིན་ཚུལ་གྱིས། །རྐྱེན་ནི་དེ་ཏིང་འཇུག་པའི་ཡན་ལག་སྣང་འབྱེད་ཚོགས་སྒྲུབ་ལྔ་རུ་བཞག །གང་ཟག་ལམ་པ་གང་དག་དངོས་འཁོར་འདས་ཀྱི་ཆོས་ཀུན་རང་རིག་པ་ཡིན་པའི་ཕྱིར། །གང་ཤི་བའི་ཚེ་སྣང་བྱེད་སྟོང་པ་ལུས་ཀྱི་འབྲེལ་ཐག་ཆོད་པས་རིག་པ་བརྒྱལ་བ་ལྟར་ཕྱད་ཀྱིས་སོང་སྟེ་ཕྱི་ཡུལ་གྱི་སྣང་བ་དང་། ནང་སེམས་ཀྱི་འཛིན་པ་གཉིས་སུ་མེད་པར་རིག་པ་སྤྲོས་མེད་ནམ་མཁའ་ལྟ་བུར་གསལ་བ་ལ་རྟོག་པ་མེད་པ་ནི། དོན་དམ་པའི་བདེན་པ་ཞེས་བྱ་སྟེ། །དེ་ལ་ཕྱོགས་འདྲ་མཚོན་པ་ཡིན་གྱིས་དེ་ནི་སྣང་བྱེད་སྟོང་པ་ཡིན་གྱིས་དོན་དམ་ནི་རྣམ་པ་མཆོག་ལྡན་གྱི་སྟོང་པ་ཆེན་པོ་ཡིན་ནོ། །ཀུན་རྫོབ་ཀུན་ཏིང་དེས་སྐྱེ་བ་དེའི་ཚེ་གསང་བའི་མཁའ་ལྔ་ཞིག་ཏེ་བར་མའི་དུས་སུ་དེ་དེའི་དུས་གདོས་པ་ཅན་གྱི་ལུས་མེད་དེ་དྭངས་མ་ལས་བྱུང་བ་བག་ཆགས་ཀྱི་ལུས་རྫུ་འཕྲུལ་སྣ་ཚོགས་ཅིར་ཡང་སྟོན་ནུས་པས་ཀུན་རྫོབ་ཡིན། །སྐྱེས་པའི་རིམ་གསུམ་ནི་བུ་ཆུང་སྐྱེས་མ་ཐག་པ་ཕྱག་རྒྱ་གཅིག་པའི་དཔེས་མཚོན་པའོ། །བྱིས་སྦ་ནི་སྣང་བྱེད་ཀྱི་དཔེ་དར་མ་ནི་ཚོགས་བསྒྲུབ་ཀྱི་དཔེ་དེའང་ཕྱོགས་རེ་ནས་དཔེར་མཚོན་གྱིས། གཉིས་སུ་མེད་ཅིང་ཐ་མི་དད་དོ། །དང་པོ་དོན་དམ་ཆོས་ཉིད་ལམ་ལ་རྟེན་བྱེད་པས། །དོན་དམ་ཆོས་ཉིད་དེ་བཞིན་ཉིད་དུ་གོམས་པར་བྱ་བའང་བཅོ་ལྔ་སྟེ། སྒོམ་གྱི་སྔོན་དུ་བྱ་བ་དང་དགོས་ཆེད་དང་བློ་བཞག་ཐབས་དང་ངོ་བོ་དང་སྒོམ་པའི། མི་མཐུན་པའི་སྐྱོན་དང་བཅོས་ཐབས་སྒོམ་པའི་ཉམས་དང་གཉིས་པ་ངོ་བོ་སྤྱོད་པ་དང་དམ་ཚིག་དང་། དྲོད་དང་རྟགས་དང་མཚན་མ་རྨི་ལྟས་དང་ཡོན་ཏན་དང་འདའ་ཀ་མ་དང་དགུའོ། །རང་གི་འབྲས་བུས་དང་དགོས་པ་རྫོགས་པར་འགྱུར་རོ། །སྐྱེས་བུ་དཔེ་སེང་གེ་བཞིན་རྒྱུ་བས་གཅིག་པུར་གནས་པ་འཇིགས་པ་བྲལ་བ་གཞན་ཟིལ་གྱིས་གནོན་པ་དེ་བཞིན་དུ་རྣལ་འབྱོར་པ་སྒོམ་པའང་། གཅིག་པུར་དང་བར་ཆད་ལ་སོགས་པའི་འཇིགས་པ་དང་བྲལ་བ་དང་ལྟ་བ་དམན་པ་དང་ཉོན་མོངས་ཟིལ་གྱིས་གནོན་པའོ། །སྔོན་དུ་རི་མོ་དལ་ལ་བརྟེན་ནས་དབང་རིམ་པར་རྫོགས། །སྟོན་པ་སློབ་དཔོན་ཡི་དམ་མཆོད་པ་དང་བརྩོན་ལེའུ་གཉིས་པ་ལྟ་བ་རྟོགས་པའི་དོན་གསལ། །དམ་ཚིག་མ་ཉམས་པ་དང་ཏིང་འཛིན་སྒོམ་པ་ཤེས་རབ་གསལ་བ་དང་། །བྱང་ཆུབ་སེམས་དང་སྙིང་རྗེ་ཆེ་བ་དང་ལྔ་བསྟན་རྣམས། ལྷག་པའི་ཡོ་བྱད་གོང་མ་ལྔ་རྫོགས་བྱ། །དེ་ནས་སེམས་ཅན་ཐམས་ཅད་ལ་མ་ཡི་སེམས་དང་འདྲ་བའི་བྱམས་སྙིང་རྗེའི་ལྡན་པས། །འགྲོ་བ་གནས་དྲུག་ཐར་པར་མྱ་ངན་ལས་དས་པ་དགོད་དམ་བཅའ། །ཚངས་པའི་གནས་བཞི་སྔོན་དུ་སོང་བས། །རང་ཡིད་དུ་འོང་ཞིང་ངན་པའི་སྐྱོན་མེད་པའི་ས་བཙལ་ལ་བསླང་སྟེ་ཆོ་ག་བྱ། གནས་ཆེ་ཆུང་རན་བྱས་བྱི་དོར་ཞལ་བྱུག་པ་ལ་སོགས་པ་ལྡན་བྱས་ལ་དུག་སྦྲུལ་ལ་སོགས་པ་སྲུང་ཚེ། པི་ནང་ཚང་ཅན་པར་བསྟན་དང་ལྡན་པར་བྱས། །ཕྱི་ནང་གི་བར་ཆད་བསལ་ཞིང་ལམ་གྱི་ཡན་ལག་རྫོགས་པར་བྱ་བའི་ཕྱིར། །ཚོགས་འཁོར་དང་སྦྱིན་སྲེག་བསོད་ནམས་ཀྱི་དཔུང་ཚོགས་ཚ་ཚ་ཉེའུ་འདོན་འབད། །ཕྱི་ནང་འབྲེལ་ཆགས་ངག་གི་གྲུབ་མཐའ་གཞན་གྱི་གཡེང་བ་ལ་སོགས་ཐམས་ཅད་ཀུན། །གཞན་ཕྱིར་དུར་རྐུན་ཝ་དང་འདྲ་བར་སྡར་ཏེ་བུ་ལོན་དང་འབྲེལ་པ་ལ་འཛེམ་ཞིང་བག་ཡོད་སེམས་ཀྱིས་དོགས། །ཁམས་བརྟན་པའི་སྨན་སོགས་ཁ་ཟས་དང་ཏིང་འཛིན་གྲོགས་ཉམས་ཅན་དང་གདམ་ངག་ལ་སོགས་པས་རྐྱེན་བསྡུས་ལ། །ཕྱི་ནང་གི་བགེགས་ལ་སོགས་པ་བར་ཆད་བསྲུང་བ་སྔོན་དུ་རྫོགས་པར་བྱ་ནས། །གསང་བའི་ལོངས་སྤྱོད་གོང་གི་སེང་གེ་ལྟ་བུ་དང་འགལ་ལོ་ཞེ་ན་ལྟ་སྤྱོད་མཐུན་པ་མ་ཡེངས་ཤིག་ཅེས་པས་ལྟ་སྤྱོད་ཀྱི་གྲོགས་སུ་གྱུར་པས་མི་འགལ་ལོ། །རིག་མའང་ལྡན་བྱས་ལ། །དགྲ་བགེགས་ནད་གསུམ་གྱི་འཚེ་བཟློག་པའང་ཉེར་རྫོགས་སུ་བཞག །དེ་ལྟར་ཐུན་མོང་སྤྱི་ཡི་སྔོན་དུ་བྱ་བ་རྫོགས་ནས། །མཆོད་པའི་རྟེན་དངོས་གྲུབ་ཉེ་བའི་ཡི་དམ་ལྷའི་གཟུགས་བརྙན་ལུང་འབུར་རི་མོ་བཞུགས་ཏེ། ཡན་ལག་བརྒྱད་པའི་ཚུལ་བཟུང་ལ། །དཔང་པོའི་ལྷ་ཡོངས་སུ་གྱུར་ཏེ་འོད་དུ་ཞུ་ནས་རང་ལ་ཐིམ་པར་བྱར་ཏེ་དེའི་རྗེས་སུ་ཏིང་ངེ་འཛིན་ལ་འཇུག །ལྔ་པ་དག་པ་བདེན་པ་རྣམ་གསུམ་མ་ནོར་ཞིང་། །རང་རིག་རྒྱལ་པོར་ཏིང་ངེ་འཛིན་ཉམས་སུ་བླངས་ཤིང་གོམས་པ་ཡིས། །བླ་ན་མེད་པ་བྱང་ཆུབ་རྣམ་ཀུན་མཆོག་ལྡན་གྱི་ཆོས་སྐུ་འདི་རྙེད་པར་འགྱུར། །དེ་ཕྱིར་ལྟ་བ་མཐོང་བའི་རྗེས་སུ་དེ་བཞིན་ཉིད་ཀྱི་ས་མ་ཏི་གོམས་པས། རང་བཞིན་ཡེ་ཤེས་སྒྱུ་མའི་ཨ་ཏི་འཆར་བས་དེ་ཏིང་སྙིང་རྗེ་འབྱུང་བའི་གཞི་རུ་བཞག །དེ་ནས་གོ་རིམ་འབྱུང་བའང་དེ་བཞིན་ངེས་སོ། །གང་དག་རྟོགས་པའི་སྐལ་ལྡན་ཅུང་དམན་པ་རིམ་གྱི་ས་པས། གཞན་སེལ་བའི་ཕྱིར་དང་དོན་དུ་གཉེར་བའི་ཕྱིར་བསྒོམས་པས། འཇུག་པའང་སྔ་མའང་བདག་གཞན་གཉིས་ཀྱི་དོན་དུ་སེམས་ཅན་མ་རིག་འཁྲུལ་པའི་འདོམ་དབྱིངས་སུ། །སེམས་རྟོགས་པའི་ཡེ་ཤེས་སྒྲོན་མའི་མ་དང་འདྲ་བ་མདའ་འཕངས་པས། །མ་རིག་གཏི་མུག་གི་མུན་པ་རྣམ་བསལ་ཏེ། །སེམས་རང་བཞིན་གྱིས་འོད་གསལ་བདེ་ཞིང་དགོངས་པ་བའི་མཆོག །དེ་ཡང་མདོར་ན་སྒྲིབ་ཚོགས་མུན་པའི་ནང་དུ་སྣང་བ་ཉི་མ ཤར་བའི་ཚུལ་བཞིན་དུ་མ་རིག་པའི་མུན་པ་སངས་ཞིང་ཡེ་ཤེས་གསལ་བའོ། །ཆོས་ཀྱི་དབྱིངས་ནམ་མཁའ་དཀྱིལ་ལྟར་མཐའ་དབུས་ཕྱོགས་རིས་མེད་ཅིང་ཡངས་པ་ལ། །ཤེས་རབ་ཀྱི་མྱུར་དུ་དོན་སངས་རྒྱས་ཀྱི་ས་ལ་འགྲོ་བ། །དོན་ལ་འགྲོ་བ་མེད་ཅིང་འོང་བ་མེད་དེ་འཁོར་འདས་ཀྱི་མཐའ་མི་གནས་ལ། །བདེན་གཉིས་དབྱེར་མེད་བྱང་ཆུབ་སེམས་མཆོག་ཨ་སྐྱེ་བ་མེད་པའི་རབ་བདེ། །དཔེར་ན་མུན་པ་ལ་སྣང་བ་འབྱུང་བ་དང་དུག་ཉིད་བདུད་རྩིའི་གྱུར་པ་ཚུལ་བཞིན་དུ། །རྟོགས་པས་དབང་ལ་བསྒྱུར་བར་བྱེད་པ་ཏིང་ངེ་འཛིན་ཡིན། །མཆོག་དང་ཐུན་མོང་གི་དངོས་གྲུབ་དོན་དུ་གཉེར་བ་གང་དག་ཀུན། །དེ་བཞིན་ཉིད་ཀྱི་ཏིང་ངེ་འཛིན་འདི་ཡིས་བྱེད་པར་འགྱུར་རོ། །གལ་ཏེ་སྟོང་པ་ཆེན་པོའི་རྣལ་འབྱོར་འདི་མེད་ན། །ཕྱི་གཤེར་གཏིང་རྐམ་རྒྱ་མཚོའི་ཇིང་གི་ཕ་བོང་ལྟར་ལ། བསྐལ་པ་དཔག་ཏུ་མེད་པར་དཀའ་བས་ལམ་ལ་བརྩོན་བྱས་ཀྱང་། །གནས་ལུགས་ཀྱི་དོན་མེད་པར་བླ་ན་མེད་པའི་བྱང་ཆུབ་ཀྱི་སྙིང་པོ་སྐམ་པ་སྟེ་འབྲས་བུ་སངས་རྒྱས་མི་འབྱུང་ངོ་། །ཡིན། །དེ་ཕྱིར་ལྷག་མའི་ལུས་འདི་འབྱུང་བ་གཅིག་པ་གཅིག་ལྗིད་མི་འབོར་ཆ་སྙོམས་པས། །ལུས་བདེ་བ་དང་ལྡན་ཞིང་ཐར་པ་ལ་བྲོད་པས་བསམ་གཏན་གྱི་ཆོས་བདུན་རྐང་བ་མཉམ། ལག་པ་མཉམ། རྐེད་པ་བསྲང་། མགྲིན་པ་ཡིད་ཙམ་དགུ། མིག་སྣ་རྩེ། ལྕེ་རྐན་ལ། མཆུ་དང་སོ་ཐ་མལ་པ་ཚུལ། །ལྡན་པར་བྱས་རྗེ་བཙུན་རྣམ་པར་སྣང་མཛད་བཞིན། །ལུས་སེམས་གཉིས་འཛིན་རྩོལ་མེད་པའི་སེམས་ཀྱིས་འཇུག །དེ་ཡང་བླ་མའི་གདམས་ངག་དང་རང་གི་ཤེས་རབ་ཀྱི། །སྟོབས་ཀྱིས་བཞག་པས་གོམས་པར་བྱེད། །དང་པོ་སྔོན་དུ་བརྗོད་པ་ནི་སློབ་མ་བུ་དེ་དབེན་པའི་སར། །བླ་མ་ལ་རིན་པོ་ཆེ་ཁ་གསེར་དང་ཁ་ཤེས་ཤེས་ཙམ་ལྷབ་དར་ཟབ་ལྷུབ་དང་འདོད་ཡོན་གྱི་ལོངས་སྤྱོད་ཀྱིས། །མཉེས་པར་བྱས་ནས་སློབ་བུ་དེ་པང་གཡས་སུ་དུ་བཞག་ལ། བུའི་དེའི་བར་ཆད་ཀྱི་བགེགས་བསྐྲད་ལ་སྦུབས་པས་གཟུག་ལ་མཆུས་མན་ངག་རྣ་བ་གཡོན་པར་སློབ་དཔོན་ལ་ཤུབ་བུར་བསྟིམ། །དངོས་གྲུབ་མྱུར་དུ་འགྲུབ་འདོད་ན། །སྒོམ་བྱ་སྒོམ་བྱེད་ཤིན་ཏུ་མི་དམིགས་ཆོས་ཀྱི་དབྱིངས་སུ་བསྒོམ། །ནམ་མཁའ་ལ་ཉི་མ་མི་འདུག་པ་ཕྱི་མའང་སྤྱི་བླུགས་སུ་ལྟ་མཐོང་བའི་རྗེས་སུ་སྒོམ་པ་བཞག་སྟེ། བདག་དང་བདག་གི་ལ་སོགས་པ་གཞན་ཡུལ་ཡུལ་ཅན་རྣམས་ནི། །ཤིན་ཏུའང་མི་དམིགས་དབྱིངས་སུ་བསྒོམ། །རང་རིག་ངང་ཉིད་ལ་གནས་པ་ཡིས། །ཏིང་ངེ་འཛིན་ཅེས་བྱ་སྟེ་དེ། སུས་ཀྱང་མ་བྱས་རང་བྱུང་གི་ཡེ་ཤེས་རང་ལ་གནས་པ་ཡིན་ཏེ། །ཆོས་ཐམས་ཅད་དེ་བཞིན་ཆོས་ཉིད་དུ་སྦྱོར། །རྣམ་པ་མཆོག་ལྡན་གྱི་སྟོང་པ་གཉིས་མེད་ཆོས་ཀྱི་དབྱིངས་བདེན་པ་དབྱེར་མེད་ཀྱི་ངང་དུ་ཐིམ། །རང་བྱུང་ཡེ་ཤེས་རང་བཞིན་གྱི་དཀྱིལ་འཁོར་གྱིས། །ཆོས་རྣམས་མ་ལུས་ཆོས་ཉིད་དེ་བཞིན་ཉིད་དུ་དལ་དབྱིངས་སུ་སྡུད། །སྡུད་ཁྱད་དང་མི་སྡུད་པ་གཉིས་ཀ་མིན། །རྟོགས་པའི་དོན་ཡང་དག་ཁོ་ན་ཉིད་སྒོམ་པ་དུའོ། །བསྒོམ་པར་བྱ་བའི་ཡུལ་དང་སྒོམ་པར་བྱེད་པའི་མཁན་པོ་གཉིས་མ་སྐྱེས་ན། །ཆོས་ཉིད་སུ་བསྒོམ་པར་བྱ་བའི་ཡུལ་འང་མེད། །དེ་ལྟར་དོན་དམ་ལ་བསྒོམ་པར་བྱ་བ་མེད་པས། །ཡུལ་གང་ལའང་མི་འཇུག་པས་དེ་ཁོ་ན་ཉིད་ཞུགས་པའི་མཆོག །ཆོས་ཉིད་བསྒོམ་བྱ་བསམ་པར་བྱ་བའི་ཡུལ་གཅིག་ལ་བསམ་པར་མི་བྱ་སྟེ། །འོ་ན་མི་བསམ་གཅིག་ཀྱང་དམིགས་སུ་མེད་པར་ཡང་མི་བསམ་མོ། །བློས་ཕྱོགས་གཅིག་གང་ལའང་རྣམ་པར་མི་སེམས་པ་སྟེ། རིག་པའི་ཡེ་ཤེས་དེ་ཉིད་རང་རིག་མཉམ་པ་ཉིད་ཀྱི་དོན་ལ་གནས་པའི་ཏིང་ངེ་འཛིན་ཉིད་དོ། །བདེན་པ་གཉིས་དབྱེར་མེད་བྱང་ཆུབ་སེམས་ཀྱི་དེ་བཞིན་ཉིད་ནི། །ཤིན་ཏུ་མི་དམིགས་བློ་བརྟག་པར་དཀའ་བ་དེ་ཉིད་བློས། །ཀུན་ཤོངས་པ་ཡངས་ལ་ཁྱབ་པ་རྒྱ་ཆེ་གཏིང་ཟབ་པས། །ཤེས་རབ་ཟབ་པས་རྣམས་ཀྱི་སྐྱེས་བུས་རྟོགས་འགྱུར་ཏེ། །སེམས་དང་པོ་གང་ནས་ཀྱང་མ་འོང་ཐ་མ་གར་ཡང་མི་འགྲོ། །དེས་ན་འགྲོ་དང་འོང་བར་བྱ་བ་མིན། །རང་གི་ངོ་བོར་ཤིན་ཏུ་བརྟག་དཀའ་ཞིང་ཡུལ་དང་ཡུལ་ཅན་མི་དམིགས་པས། །མཐའ་དང་དབུས་ཕྱོགས་ཀྱང་རིས་སུ་འདི་ཞེས་བརྟག་ཏུ་མེད། །འོ་ན་ཅི་ལྟར་ཡིན་གཟུང་ཡུལ་འཛིན་སེམས་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །སྤྲོས་བྲལ་དབྱིངས་དང་དབྱིངས་ཀྱི་ཡེ་ཤེས་ཀྱང་། །རང་རིག་ཁོ་ན་ཙམ་དུ་ཟད། །གང་ཟག་བློ་ཆུང་བ་གང་ཞིག་དམིགས་ནས་འཇུག་པ་ནི། །སྲིད་པ་ཡོད་པ་དེ་སྲིད་འཇིག་རྟེན་རྒྱང་འཕེན་པ་དང་འདྲ་ལ། འཇུག་མེད་མདོ་སྡེ་ལས། གང་གི་དམིགས་མེད་མི་ཤེས་པ། །དེ་ཡི་ཆོས་ཀྱི་དབྱིངས་མི་ཤེས། །ཞེས་པ་དང་། དགོངས་འདུས་ལས། རང་བྱུང་ཡེ་ཤེས་ནམ་མཁའ་ཆེ། །ཡོད་མེད་གཉིས་སུ་དམིགས་སུ་མེད། །ཅེས་དམིགས་མེད་རང་སྣང་བསྒོམ་པ་སངས་རྒྱས་ཡིན་པར་ནི། །ཐུབ་པའི་དབང་པོ་ཉིད་དང་ཀུན་ཏུ་བཟང་པོ་ཉིད་གྱིས་གསུངས་སོ། །ཡིད་ཀྱི་ངེས་དོན་དམ་པར་བསམ་ཞིང་དམིགས་སུ་ཡོད་ན། །དཔེར་ན་ཕྲ་རབ་ཁབ་མིག་དུ་འཐོན་ཐག་རྐུད་པ་འཛུད་པ་ལྟ་བུས། །དོན་དེ་བཞིན་ཉིད་དམིགས་པ་དེ་མི་མཐོང་སྟེ། །འཐེན་ཐག་འཛུད་པས་ནམ་མཁའ་བཞིན་མི་མཐོང་བ་ནོ། །སྟོང་པ་ཆེན་པོའི་ཨ་ཏི་རྣལ་འབྱོར་མཉམ་པ་དེ་བཞིན་ཡིན། །ངོ་བོ་བཞིན་དུ་གྲངས་འཇུག་ཅིང་། །ངེས་ཚིག་རྣམ་པར་འབྱུང་བ་ཡིན། །དེ་བས་ན་ཀུན་སྣང་ལ་སོགས་པ་ཀུན་ལའང་ངོ་བོ་ངེས་ཚིག་རྣམ་གྲངས་འབྱོར་བར་གྱིས། །དབུ་མ་ལ་ལྟོས་ན་ཆེན་པོ་ཉན་རང་དམན་པས་སྤྲོས་པའི་མཐའ་བསལ་བའི། །མ་སྐྱེས་དེ་བཞིན་ཉིད་ངང་གི་སྟོང་པ། །གདོད་མ་ནས་སྟོང་པས་སྟོང་པའི་ཐ་སྙད་དང་བྲལ། །སྤྲོས་པའི་མཐའ་བརྒྱད་ནི་ཡོད་མེད་གཉིས་རྟག་ཆད་གཉིས་གཅིག་དུ་མ་སྐྱེ་འགགས་གཉིས་སོ། །བྲལ་འདོད་ལ་བྲལ་བ་ཙམ་དུའང་འཛིན་པ་མ་ཡིན་ནོ། །རང་གི་སེམས་ཉིད་དག་པ་མཐའ་བཞིའི་དྲི་མ་ཏེ། མེད་པ་དང་དེ་བཞིན་ཉིད་དག་པ་སྟེ་ཆོས་ཉིད་དང་། རྣལ་འབྱོར་ཡོ་ག་མཚན་མ་མེད་པའི་དེ་བཞིན་ཉིད་དང་། མ་ཧཱ་ཡོ་ག་སྣང་སྟོང་གཉིས་སུ་མེད་ཅིང་ཆོས་ཀུན་ལྷུན་གྱིས་གྲུབ་ཅིང་མཉམ་པ་དེ་བཞིན་ཉིད་དོ། །གྲངས་བཞིའི་ཐ་མ་རིམ་པ་ཉིད། །སྔ་མ་གསུམ་ལ་བྱིན་རླབས་ཀྱི་ཁྱད་པར་འཕགས་པ་ཡོན་ཏན་གྱི་ཁྱད་པར་དང་ངོ་བོའི་སྒོ་ནས་མེད་པའོ། །བླངས། །བླ་འང་ན་མེད་པའི་དེ་བཞིན་ཉིད་སྐབས་ཀྱིས་མིང་གི་རྣམ་གྲངས་ནི་ཆོས་ཀུན་རང་བྱུང་ཡེ་ཤེས་སུ་གཅིག་པས་མཉམ་པ་ཉིད་དང་། །ལྷུན་གྱིས་གྲུབ་པ་དང་མཐའ་དང་བྲལ་ཐ་སྙད་མེད་པ་དང་། མ་ཧཱའི་དེ་བཞིན་སྟོང་པ་ཆེན་པོ་དང་མ་སྐྱེས་ཆོས་ཀྱི་དབྱིངས་ལ་སོགས་པ། ཡོན་ཏན་ཆ་རེ་ནས་མིང་དུ་བརྗོད་པར་ཟད་དོ། །མཉམ་པ་ཉིད་ལ་སོགས་པ་དེ་རེ་རེ་ལའང་མིང་གི་རྣམ་གྲངས་སྐབས་ཀྱིས་རང་གི་ངོ་བོ་དང་། །མཉམ་པ་ཉིད་ཀྱི་ངོ་བོ་ནི་མཉམ་པ་སྤངས་པའི་མཉམ་པ་ལ་སོགས་པའོ། །ངེས་ཚིག་ནི་བཟང་ངན་ཆེ་ཆུང་མེད་པར་མཉམ་པའོ། །གཏན་ཚིག་ལ་ལུང་མན་ངག་རིག་པ་གསུམ་མོ། །ལུང་ནི་རྒྱས་པ་ལས། མཉམ་པ་ལྔའི་དམ་ཚིག་ཅེས་པ་ལ་སོགས་པའོ། །རྩ་བའི་རྒྱུད་ལས། མཉམ་གཉིས་ལྷག་པའི་མཉམ་གཉིས་ཞེས་སོ། །མན་ངག་རྣམ་བཀོད་ལས། ཐམས་ཅད་མཉམ་པའི་ད་ལ་ལ། །རང་བྱུང་ཡེ་ཤེས་སྤྲོས་པ་ནི། །དབྱིངས་དང་ཡེ་ཤེས་གཉིས་མེད་པས། །དེ་བཞིན་ཉིད་དུ་རྡོ་རྗེ་རིགས། །ཞེས་སོ། །ཡང་། དོན་དུ་ཡེ་ནས་མཉམ་ཉིད་ལ། །མཉམ་བཞག་ཞེས་ནི་འདོད་བརྗོད་བྲལ། །ཅེས་སོ། །རིགས་པ་ནི་ལུང་མན་ངག་དང་མི་འགལ་བར་ངེས་ཤེས་སྐྱེ་བའོ། །མིང་དོན་གྱི་སྒོ་ནས་ངེས་ཚིག་བརྗོད་པ་ཡང་། །དེ་མཚོན་པའི་གཏན་ཚིགས་ཡན་ལག་ནི་ལུང་དང་མན་ངག་རིག་པ་གསུམ་དུ་ལྡན་པ། །དེ་ལྟར་དོན་རེ་རེ་ལ་རྣམ་གསུམ་ཕྲུག་པར་འབྱུང་བ་ཡིན། །ལྷག་པའི་མ་ཧཱའི་དེ་བཞིན་ཉིད་དོན་མཆོག་གང་ཡིན་པ། །དངོས་རྣམས་སྣ་ཚོགས་སུ་སྣང་བ་ཉིད་ན་དངོས་པོར་གྲུབ་པ་མེད་པས། །རྣལ་འབྱོར་རྟོག་པའི་སྨྲ་བསམ་གྱི་ཡུལ་ལས་འདས། །དེ་ཉིད་མ་ནོར་མི་འགྱུར་བས་དེ་བཞིན་ཉིད་དེ་ཉིད་མཐའ་དབུས་མེད་པར་ཆོས་ཀྱི་དབྱིངས་རང་གསལ་བའི་ཡེ་ཤེས་ཏེ། །དེ་ཉིད་རང་གསལ་བས་ལྷག་མཐོང་མི་གཡོ་བས་ཞི་གནས་ཏེ། ཞི་གནས་དང་ལྷག་མཐོང་ཟུང་དུ་འབྲེལ། །ཆོས་རྣམས་ཐམས་ཅད་རྟོགས་པའི་ཤེས་རབ་དང་མུ་མཐའ་མེད་པ་དབྱིངས་ཉིད་དེ། །ཤེས་བྱ་ཆོས་ཀྱི་དབྱིངས་ལ་ཤེས་རབ་ཆོས་དབྱིངས་རྟོགས་པ་ནི་རྣམ་པར་སྦྱོར། །དེ་ལྟར་ཤེས་རབ་དང་དབྱིངས་ཉིད་གཉིས་སུ་མེད་པར་སྦྱོར་བ་ཡིས། །བླ་ན་མེད་པའི་བྱང་ཆུབ་དབྱེར་མེད་པ་སྤྲོས་དང་བྲལ་བས་རྡོ་རྗེ་ཐིག་ལེ་ཆེན་པོ་ཀུན་ལ་ཁྱབ་པ་ཡིན་ནོ། །ལྷར་བསྒོམ་པ་དེ་ཡང་སོ་སོར་རྟོགས་པར་ལྟའི་རྟོག་པའི་རྗེས་སུ་སྒོམ་པ་དང་། །དེ་ལ་གོམས་པ་ཡུལ་དུ་མི་དམིགས་པས་ཤིན་ཏུ་ཆོས་ཀྱི་དབྱིངས་ཙམ་དུའང་མི་དམིགས་པ་དང་། །རྗེས་སུ་སྒོམ་པ་རང་དུའང་མི་དམིགས་པའིརིམ་པ་ཡིས། །ཡུལ་ཡུལ་ཅན་དུ་མི་གནས་ཆོས་ཀྱི་དབྱིངས་ཙམ་དུའང་མི་རྟོག་ཨ་ཏི་དབྱེར་མེད་པ་བདག་རློམ་སེམས་མེད་པའི། རང་བཞིན་ངང་གིས་མ་སྐྱེས་མ་འགགས་པ་གཉིས་བདག་དང་བདག་གི་མེད་པས་སྒོམ་པ་ནི། །སྒོམ་བྱ་སྒོམ་བྱེད་གཉིས་ཀ་མི་དམིགས་པའི་ཕྱིར། །དཔེར་ན་ཤར་གྱི་ནམ་མཁའ་ནུབ་ཀྱི་ནམ་མཁའ་ཡུལ་གྱི་བྱ་བ་དང་བྲལ་བ་ལྟར་འདུ་བྱེད་སྒོམ་བྱ་སྒོམ་བྱེད་ཀུན་དང་བྲལ་བ་སྟེ། །བློ་ཡུལ་དུ་བསམ་དུ་མེད་དེ་རྟོགས་པའི་ངང་ལ་འདུག་པ་ལ་སྒོམ་ཞེས་བརྗོད་དོ། །སྒོམ་བྱ་སྒོམ་བྱེད་ཀྱི་འདུ་ཤེས་གང་དུའང་མ་བཞུགས་ན། །སྒོམ་དུ་འཛིན་པའི་འདོད་ཆགས་རང་ལ་གནས་པ་མེད་པས་རང་ལ་གནས་པ་སྒོམ་ལ་ཟེར་འདུ་འབྲལ་མེད་དེ་སྒོམ་ཞེས་བྱའོ། །དེ་ལྟར་གདམ་ངག་གི་སྟོབས་དང་དེ་ལྟར་ཤེས་རབ་ཀྱིས་སྟོབས་ཀྱིས་མཉམ་པར་བཞག་པའི་ཚེ། །ཏིང་ངེ་འཛིན་པའི་ངོ་བོ་ལ་གནས་པའི་སྐྱོན་དང་སྤྱོད་ལམ་གྱི་ཏིང་ངེ་འཛིན་ལ་སྒྲིབ་པའི་སྐྱོན་དང་ཁམས་ཀྱི་སྐྱོན་ལ་སོགས་པ་རྣམས། །མ་ནོར་བས་སྐྱོན་ངོས་ཟིན་ནས་ཏིང་ངེ་འཛིན་མི་འཕྲོག་པར། །བྱ་བའི་ཕྱིར་སྐྱོན་གྱི་རྣམ་གྲངས་མདོ་ཙམ་བརྗོད་པ་བྱ་སྟེ། ལྟ་བ་མ་རྟོགས་པར་སྒོམ་བྱ་ཡུལ་དུ་དམིགས་པ་བསྒོམ་བྱའི་དོན་ངོས་མ་ཟིན་ཏེ་བརྗེད་དང་བྱིང་བ་ནི་བྱིང་བ་དང་རྨུགས་པ་དང་འཐིབ་པའོ། །དེ་རེ་རེ་ལ་ཡང་རང་བཞིན་གྱི་བྱིང་བ་དང་རྐྱེན་གྱིས་བྱིང་བ་དང་། སྤྱོད་ལམ་གྱི་བྱིང་བའོ། །རྒོད་པ་ལ་ཡང་གསུམ་སྟེ། འཕྲོ་བ་དང། རྒོད་པ་དང་། གཡེང་བའོ། །དེ་རེ་རེ་ལ་ཡང་རང་བཞིན་དང་། རྐྱེན་དང་སྤྱོད་ལམ་གྱིས་རྒོད་པའོ། །དྲུག་ཅེས་རྩོལ་འདོད་ཀྱི་ཚུལ་དུ་དང་མི་རྩོལ་ཏེ་ལེ་ལོས་སྒོམ་ལ་མི་འཇུག་པ་དང་ལུས་ངག་ཡིག་གསུམ་ཆེད་དུ་འཆོས་པར་བྱེད་པ་དང་། །དོགས་འདོད་པའི་ཁམས་དང་གཟུགས་ཁམས་ཀྱི་བསམ་གཏན་བཞི་དང་གཟུགས་མེད་ཀྱི་སྙམས་འཇུག་བཞིའོ། །དང་ལོག་པ་གཉིས་ནི་མུ་སྟེགས་རྟག་ཆད་དོ། །བཅུ་གཅིག་དང་། །ཐུན་མོང་བདུན་ནི་ཉན་རང་སེམས་ཙམ། དབུ་མ་ཀྲི་ཡ། ཡོ་ག །ཨུ་པ་ཡ་དང་གོང་གི་བྱིང་རྒོད་ལ་སོགས་པའི་སྐྱོན་བདུན་ཏེ་ཉི་ཤུ་རྩ་གཅིག་གོ། །ཏེ་བཅོ་བརྒྱད་དོ། །དེ་བཞིན་དུ་གཡེང་བ་རྣམ་དྲུག་སྟེ་གང་ཞེ་ན། ངོ་བོས་འམ་རང་བཞིན་གྱི་གཡེང་བ་ནང་གི་རྣམ་ཤེས་ལྔ། །ཕྱི་རོལ་རྐྱེན་གྱིས་གཡེང་བ་ཡུལ་ལྔའི་རྗེས་སུ་ཡིད་ལྔར་འཕྲོས་པས་གཡེང་། །ཆེད་དུ་བྱ་བའི་བྱིང་རྒོད་དང་ཨ་ཏི་རོ་མྱོང་ནས་ནང་གི་གཡེང་བ་ཡིན་ཏེ། །གཞན་གྱི་དོན་བྱ་བའི་ཕྱིར་དགེ་སྦྱོར་བྱེད་པའི་མཚན་མ་ནི་གཡེང་བའོ། །ཏིང་ངེ་འཛིན་གྱི་སྙོམས་འཇུག་གཞན་ནམ་ཐེག་པ་གཞན་གྱི། དེ་ཡི་ལུགས་ལ་སེམས་འཕྲོ་བ་ནི་ལས་བྱེད་པའི་གཡེང་བ་ཡིན། །འཇིག་རྟེན་གྱི་དྲེགས་པ་ངའོ་སྙམ་པས་སྙོམས་པར་འཇུག་པ་ནི། གནས་ངན་ལེན་པར་མི་གཡེང་བའི་ཐེ་ཚོམ་མེད། །རྒྱན་འབྱུང་བྱུང་ཚོར་དབང་གིས་མར་མེ་རླུང་གིས་བསྐྱོད་པ་ལྟ་བུ་ནི་རྗེས་སུ་འབྲང་བ་དང་། །འཛིན་ཆགས་དབང་གི་འགོག་པ་ཉོན་མོངས་པས་ཞོ་ཆགས་པ་ལྟ་བུ་དང་ཐེར་ཟུག་དབང་གིས་འཐབ་པ་མི་འཇུར་བུ་ལྟ་བུ་དབང་ཆེམ་པ་ལྟ་བུ་དང་ཕྱལ་བའི་དབང་གི་བདེ་བ་འདྲའོ་ཁྱི་ལྟ་བུ་དང་། །ཆེད་དུ་ལུས་ངག་ཡིད་གསུམ་འཆོས་པ་དང་སྒོམ་བྱ་ཡིད་ལ་བྱེད་པ་དང་ཏིང་ངེ་འཛིན་གྱི། རོ་མྱོང་རེ་བ་དང་བདག་འདུ་ཤེས་པས་སྒོམ་ལ་གནས་ཤིང་ཡུལ་ལྔ་དམིགས་པ་དང་བཅས་པའི་ངང་། །ཤེས་པ་ནང་དུ་སྡུད་པ་དང་སྒོམ་བྱ་མངོན་བྱེད་ཏིང་ངེ་འཛིན་གྱི་ཡོན་ཏན་དང་འབྲས་བུ་ལ་རེ་བ་མང་བའོ། །ཏིང་ངེ་འཛིན་ལ་སྒྲིབ་པའི་སྐྱོན་ལ་ལྔ་བཅུ་ནི་རྩ་བའི་རྟོག་པ་ལྔ་ནི་རྟོག་པ་དང་། མཚན་མ་དང་། འགྱུ་བ་དང་། ཚོར་བ་དང་། བྱུང་ཚོར་རོ། །རྟོག་པ་བཅུ་ནི་རྟོག་པ་རགས་པ་ཚོར་བའི་རྟོག་པ་ལྟ་བུ་ཕྲ་བ་བུ་ཆུང་ལྟ་བུའོ། །མཚན་མ་ཆེ་བ་ལྟད་མོ་བའི་ཡི་གེ་ལ་སོགས་པ་དང་། ཆུང་བ་ལྟད་མོ་བའི་མི་ཕལ་བ་ལྟ་བུའོ། །འགྱུ་ཐུང་བ་ཞེ་སྡང་གི་འགྱུ་བ་རིང་བ་འདོད་ཆགས་ཀྱི་འགྱུ་བ་ལྟ་བུའོ། ཚོར་བ་རགས་པ་ངར་གདོང་ལ་རྡོ་བརྒྱབ་པ་ལྟ་བུ་དང་། མི་རགས་པ་རོ་སྟོད་དུ་ཁུ་ཚུར་བརྒྱབ་པ་ལྟ་བུའོ། །བྱུང་ཚོར་མྱུར་བ་འདོད་པ་སྐྱེ་བ་ལྟ་བུ་དང་། བུལ་བ་མ་བྱུང་བ་ལྟ་བུའོ། །དེ་ལ་རྩ་བའི་རྟོག་པ་དང་ཡན་ལག་གི་རྟོག་པ་རྟོག་པ་རགས་པ་སྐྱེ་བོ་ཕལ་པ་ལྟ་བུ་ཕྲ་བ་སྒོམ་ཆེན་པོའི་རྟོག་པ་ལྟ་བུ་མཚན་མ་ཆེ་བ་ལྟད་མོ་བའི་རོལ་ཆ་ལྟ་བུ་ཆུང་བ་ལྟད་མོ་ཕལ་བ་ལྟ་བུ་དྲན་པ་རིང་བ་འདོད་ཆགས་ལྟ་བུ་ཐུང་ངུ་ཞེ་སྡང་མཐའ་བྲལ། ཚོར་བ། གསལ་བ་ངར་གདོང་ལྟ་བུ་མི་གསལ་བ་མགོ། །བྱུང་ཚོར་མྱོང་གསལ་འདོད་པ་སྐྱེ་བ་ལྟ་བུ། མི་གསལ་བ་འདོད་པ་བུལ་བ་ལྟ་བུ། སེམས་སྒྱུ་མར་ཤེས་པས་འཕྲུལ་དགའ་དང་གཞན་འཕྲུལ་ལྟ་བུའོ། །འཇིག་རྟེན་འདོད་པ་དང་གཟུགས་ཁམས་ཀྱི་དང་པོའི་བསམ་གཏན་བཞི་དང་། གཟུགས་མེད་ཀྱི་སྙོམས་འཇུག་བཞིར་གོལ་བ་ནི་ཁམས་གསུམ་ས་དགུ་ཡིན་སྟེ། །མུ་སྟེགས་པ་ཐེར་ཟུག་རྟག་པ་དང་ཆད་པའི་ལྟ་བར་ཕྱིན་ཅི་ལོག་ཏུ་གོལ་བའོ། །ཡིད་བྱ་བ་མང་ལ་ཏིང་ངེ་འཛིན་འབྱུང་རྐྱེན་ཞིང་། །སྒོམ་པ་ངང་ཐུང་བ་དང་ཤེས་པ་འཁྲུག་པ་དང་ངུ་བ་དང་གཤང་གི་སྒྲ་ཐོས་དང་། མགོ་འཁོར་ཞིང་སྔོ་སྐྱ་རླུང་། སེར་སྐྱ་མཁྲིས་པ། དམར་སྨུག་བད་ཀན་ཁ་དོག་མཐོང་བ་ན། །ཁམས་ལོག་པ་ལས་གྱུར་པའི་ཆ་ཡང་བརྟགས་ཤིང་ཤེས་པར་བྱ། དེ་ཡིས་བསམ་གཏན་ལས། མཚན་མ་ཚིག་གི་རྣལ་འབྱོར་པ། །ཚིག་ལ་ཞིབ་ཅིང་དོན་ལ་བརྩི། །ཡང་དག་དོན་ལ་མ་འབྱོར་པ། །འདུག་ན་མཚན་མའི་བྱ་ར་བྱེད། །འགྲོ་ཚེ་མ་རབ་འཕྱོ་ཞིང་འགྲོ། །འགྲོ་ཉལ་འདུག་སྡོད་དང་། །ལོངས་སྤྱོད་ཚེ་ནའང་རྣལ་འབྱོར་བྲལ། །ཁྱི་བྱ་ར་ཡེང་ཚེ་ཝའི་དུར་རྐུན་འཁྱོན་མ་ཉ་ཐ་ཡེར་གླང་གཉིས་བྱེད། བརྐམ་ཆགས་ཚོང་སེམས་སྤྲེལ་སྤྱོད་སྐྱོན། །དེ་ལྟར་སྐྱོན་ཡོན་ཤེས་པའི་རྣལ་འབྱོར་པས། །སྤོང་བའི་འདུ་བྱེད་བརྒྱད་བསྟེན་པ། །ས་སྐྱོན་དེ་དག་གྲོལ་བར་བྱེད་པའམ། ཡང་ན་མི་མཐུན་གཉེན་པོ་མེད་པར་རང་བྱུང་རང་ཞི་ཉམས་སུ་བླང་བའོ། །དེ་ལ་སྤོང་བའི་འདུ་བྱེད་བརྒྱད་ནི། དད་པ་དང་འདུན་པ་དང་། བརྩོན་འགྲུས་དང་། ཤིནཏུ་སྦྱངས་པ་དང་། དྲན་པ་དང་། ཤེས་བཞིན་དང་། སེམས་གཟེངས་བསྟོད་པ་དང་། བཏང་སྙོམས་སོ། །དེ་ལ་དད་པ་དང་། འདུན་པ་དང་། བརྩོན་འགྲུས་དང་། ཤིན་ཏུ་སྦྱངས་པ་དང་བཞིས་ལེ་ལོ་དང་གཡེང་བ་དྲུག་ལ་སོགས་པའི་སྐྱོན་སེལ་ལོ། །དྲན་པས་དམིགས་པ་བརྗོད་པ་ལ་སོགས་པ་སེལ། ཤེས་བཞིན་གནས་པས་བྱིང་རྒོད་དང་དོགས་པ་ལ་སོགས་པ་བཅོ་བརྒྱད་དང་། བྱུང་ཚོར་དབང་གིས་གཡེང་བ་ལ་སོགས་པ་དང་སྒོམ་ཆེན་གྱི་སྐྱོན་དྲུག་ལ་སོགས་པ་སེལ་ལོ། །སེམས་གཟེངས་བསྟོད་པས་མི་རྩོལ་བ་དང་། བྱིང་རྨུགས་ལ་སོགས་པ་སེལ་ལོ། །བཏང་སྙོམས་ཀྱི་རྩོལ་བ་དང་ཡིད་ལ་བྱེད་པ་ལ་སོགས་པ་སེལ་ལོ། །དམིགས་པ་བརྗོད་པ་ལ་དྲན་པ་བརྟེན། བློས་མ་ཟིན་རྟགས་པ་བརྟེན། རྒོད་ན་འཁོར་བ་ལ་སྐྱོ་བ་བསྐྱེད། དྲན་པའི་ཐག་པས་སྟོང་པར་གདགས། བྱིང་ན་ཤེས་བཞིན་གྱི་བྱ་ར་བ་བརྟེན་འཐས་ན་དམིགས་པ་གཏད་ལེ་ལོ་ན་དད་པ་དང་འདུན་པ་དང་བརྩོན་འགྲུས་བརྟེན། ལེ་ལོ་ན་བཏང་སྙོམས། མི་རྩོལ་ན་བརྩོན་འགྲུས་བརྟེན། ཡང་ན་སྤོང་བའི་སོ་སོར་ཅུང་ཟད་བལྟ་བྱས་པ་སྐྱོན་ངོས་བཟུང་སྟེ་རང་རང་གི་སྐབས་བཞིན་སྤང་བའམ། །ཡང་ན་སྐྱོན་ཅི་བྱུང་ཡང་རང་བྱུང་རང་ཞིར་བྱ། །དཔེར་ན་ཇི་ལྟར་བྱིས་པ་དོན་ལ་ཤེད་མ་བྱེད། །བྱ་བྱེད་ཀྱི་གཡེང་བ་ལྟར་བྱ་བྱེད་མང་པོས་གཡེང་བར་གནས། །བྱ་བྱེད་མང་པོས་བདག་མེད་པར་སྣ་ཚོགས་པས། ཏིང་ངེ་འཛིན་གྱིས་རིག་པ་རང་དབང་བསྒྱུར་ནས། །མཚན་མ་ཅི་བྱུང་ཡང་མཉམ་པའི་ངང་དུ་འགྲོ་ཞིང་དབྱིངས་སུ་མནན་པར་བྱ། དེས་ན་སྐྱོན་དགག་དང་ཡོན་ཏན་སྒྲུབ་པ་ག་ལ་ཡིན། །ཁམས་ཀྱི་སྐྱོན་ངོས་ཟིན་ནས་ཅུང་ཟད་ཁས་ཀྱི་ཆ་མཉམ་པས། །སྒོམ་བྱ་མི་གསལ་བ་དང་ཁ་དོག་མཐོང་བ་དང་ཏིང་ངེ་འཛིན་ལ་མི་འཇུག་པ་སོགས། །གང་གི་སྐྱོན་ངེས་ཟིན་ནས་སྤྱོད་ལམ་དགའ་བ་བརྟེན་པར་བྱ་བ་དང་། །ལོངས་སྤྱོད་གང་རང་གི་ཁམས་དང་མཐུན་པའི་ཟས་སྤྱོད་པ་དང་ཆོ་གས་གོས་བར་བྱ། །ལུས་ངག་གི་སྤྱོད་ལམ་ཏིང་ངེ་འཛིན་རྣལ་དུ་མ་འབྱོར་པ། །དེ་ཤེས་བཞིན་གྱི་བྱ་ར་བའི་སོ་མཐས་ཆོད་ནས་དོར་བར་བྱ། །རྟོགས་པའི་དྲན་པའི་ཐག་པས་བསྡམས་བྱས་ཏེ། །སྤྱོད་ལམ་རྣམ་པ་ཀུན་ཏུ་སྒོམ་པ་ལས་ཉམས་མི་བྱ། །དེ་ལྟར་རྐྱེན་བཅོས་ཤིང་ལྟ་སྒོམ་གྱི་དོན་ལས་མི་འདའ་བས་ནོགས་ཐུབ་པ་དང་བརྩོན་འགྲུས་ཆེ་བས་སྒོམ་པའི་དོན་ལ་ཡུན་རིང་པར། །གནས་པའི་ཉམས་གདོད་མཐར་རིམ་འཕེལ་བ་ཡང་། །གཡོ་བའི་ཉམས་དང་ཐོབ་པའི་ཉམས་དང་གོམས་པ་དང་བརྟན་པའི་དང་མཐར་ཕྱིན་པས་ཉམས་དང་། མུ་ལྔས་ཡོངས་སུ་འགྱུར་རོ། །གང་དག་ཨ་ཏི་ལ་གཟར་པོའི་ཆུར་འབབ་པ་ལྟ་བུ་དང་གནས་ཚེ། །ཀུན་བརྟགས་ཀྱིས་ཞེན་པ་ལ་གོམས་པའི་རྣལ་འབྱོར་པ་རྫ་མཁན་དེ་རྫའི་འཁོར་ལོ་བསྲུབ་པ་ལྟ་བུ་ཏིང་ངེ་འཛིན་གྱི་ངང ལ་རྣམ་རྟོག་གི་དབང་དུ། མི་སྡོད་སྐྱོ་བར་འགྲོ་བར་བྱེད། །དེ་ཚེ་དེས་མགོ་ལ་མེ་འབར་བ་གསོད་པ་ལ་བརྩོན་པ་བཞིན་བརྩོན་འགྲུས་ཀྱི་ཉམས་སུ་བླང་། ཏིང་འཛིན་ཅུང་ཟད་ཡོད་ལ་དེ་དག་ཉུང་། །དེ་ཚེ་དལ་བུས་སྒོམ་ཞིང་འབྱུང་འཇུག་ཐུན་ཡུན་བསྲིང་། །ཏིང་ངེ་འཛིན་དེ་གོམས་ཆེད་དུ་བྱེད་པའི་སྐྱོན་འབྱུང་སོགས་ན། །རྩོལ་བ་དང་བཅས་པའི་རྩོལ་བ་དོར་བའི་འདུ་བྱེད་བཏང་སྙོམས་དང་པོ་བླང་བར་བྱ། །ས་མ་ཏི་ལ་རི་བོ་ལྟ་བུར་ལ་རྣམ་རྟོག་རྐྱེན་གྱིས་མི་འགུལ་བ། །ཐུན་རྐྱང་ནས་སྒོམ་ནུས་ནས་ཏིང་ངེ་འཛིན་ལ་སུན་མི་བྱ་ཞིང་ཉམས་ཚོད་བཟུང་ཞིང་སྒོམ། ཏིང་ངེ་འཛིན་སྒོམ་རོ་མྱོང་དོར་བས་དེ་ཉིད་མཐར་ཕྱིན་པར་བྱ་སྟེ། ཤུགས་སྣང་བརྒྱད་ལ་སོགས་པ་མཐོང་བ་ལ་དགའ་བྲོད་མེད་པར་བཞག་གོ། །གཉིས་པར་གཡོ་བའི་ཉམས་ལ་བར་འགའ་སྐྱོན་དབང་དུ་འཆོར་ཐོབ་པ་སྟེ་ས་མ་ཏི་འོང་ལ། །ཁམས་དང་སྤྱོད་ལམ་ལ་སོགས་པའི་འཆོར་པའི་ས་ཏིའི་རྒྱུ་བརྟག་སྟེ་གོས་དོར། །སྒོམ་གྱི་ངང་ལ་ཤིན་ཏུ་ཡུན་རིང་ཞིང་བརྩོན་པ་ཡིས། །ཉམས་གོང་ནས་གོང་དུ་རིམ་བཞིན་དུ་འཕེལ་བར་འགྱུར་རོ། །བདག་དང་གཞན་གྱི་དོན་བྱ་བའི་ཕྱིར་བྱ་བ་སྤྱོད་པ་ཀུན། །དང་པོ་སློབ་པ་ན་གཡོ་ནས་བཟུང་སྟེ་ཉམས་མུ་ནས་མཐར་ཕྱིན་གྱི་ལྔ་ཡི་བར་དུ། རྣམ་པར་རྟོག་པ་མེད་པའི་ཚུལ་གྱིས་ནི། །སྤྱོད་ལ་སྤྱོད་ལམ་ཀུན་ལ་ཆགས་མེད་རོལ། །དེ་བཞིན་ཉིད་ཉམས་སུ་ལེན་པའི་ཚེ་སྤྱོད་དགུའི་སྤྲོས་པ་དོར་བའི་གཅིག་ཆ་ཡང་ཏིང་ངེ་འཛིན་དང་མཐུན་པའི་སྤྱོད་པ་ཞེས་བྱ་སྟེ། སྒོམ་པ་གཅིག་པུ་དོན་དུ་གཉེར་བའོ། །དེ་ལ་ཆོས་སྤྱོད་བཅུ་ནི། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་ནི། །ཆོས་སྤྱོད་བཅུའི་བདག་ཉིད་ཅེས་སོ། །དེ་ལ་འདིར་མཚན་མ་མེད་པའི་དེ་བཞིན་ཉིད་སྒོམ་པའི་སྐབས་སུ་ཆོས་སྤྱོད་དགུའི་འཚན་མའི་གཡེང་བ་ཡིན་པའི་ཕྱིར་དོར་སྟེ་མི་བྱའོ། །ཅིག་ཆར་སྒོམ་པ་ལའང་གཉིས་ལས་འདིར་མཚན་མ་མེད་པ་དེ་བཞིན་ཉིད་ཀྱི་ཏིང་ངེ་འཛིན་གྱི་སྒོམ་ཞིང་ཉམས་སུ་བླང་བའོ། །མི་དམིགས་ཤིང་ཏིང་ངེ་འཛིན་དང་མཐུན་པར་བྱེད་པའི་སྤྱོད་པ་ཅེས་བྱ། །ཆོས་ཉིད་འགྲོ་བ་དང་འོང་བ་དང་མེད་པ་ལས་སྤྱོད་པ་འགྲོ་བ་དང་འོང་བའི་སྣང་བ་དང་ཡང་མི་འགག །འགྲོ་འོང་ཉིད་ན་འགྲོ་འོང་མེད། །ཏིང་ངེ་འཛིན་གྱི་ངོ་བོ་གནས་པ་མེད་པའི་ངང་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ལོངས་སྤྱོད་བྱེད་པ་མེད་པ་ལས་ཐམས་ཅད་སྤྱོད། །སྤྱོད་པ་ཉིད་ན་སྤྱོད་པ་མེད་པའི་ངང་ལས། ས་ཏིའི་དོན་ལ་ཉམས་པ་མེད་པར་སྤྱོད་ཅིང་དེ་ཉིད་ལ་ཡང་ཆགས་པར་མི་བྱའོ། །མ་འགགས་པ་ཐབས་ཀྱི་སྤྱོད་པ་གང་ཡང་མི་འགོག་པས་སེམས་ཉིད་གྱི་དོན་ལ་མི་འཛིན་ཏེ་ཞེན་ཆགས་མེད་པ་ཡེ་ཤེས་ཀྱི་ཚོགས་གཉིས་རྫོགས་ཏེ། བདག་གི་དོན་ས་ཏི་ལ་གནས་པར་བྱ་བའི་ཕྱིར་ཀུན་སྤྱོད་ལ་གཉིས་སུ་མི་དམིགས་པའི་གོམ་པར་བྱས་ན། རྣལ་འབྱོར་པས་བྱང་ཆུབ་མྱུར་དུ་ཐོབ་པར་ཐེ་ཚོམ་མེད་པའི་མཚན་ཉིད། འགྲོ་ཉལ་འདུག་སྡོད་ལོངས་སྤྱོད་ཚེ། །དེ་ལྟར་མི་དམིགས་པའི་ངང་དུ་སྤྱོད་པས་ཅི་སྤྱོད་ཐམས་ཅད་ཆོས་ཉིད་དུ་དེའི་ཚེ། བྱིན་གྱིས་རླབས་ཀྱིས་འགྲོ་བ་སྒྲོལ་བས་ཅིག་ཤོས་གཞན་དོན་ཡིན་ཏེ། །དེའི་རྒྱུ་མཚན་གང་ཡང་གཞན་གྱི་དོན་དུ་འགྱུར་བའི་ཕྱིར་སེམས་དཔས་བདག་དོན་ལ་གཞན་དོན་རྫོགས་པའོ། །རྒྱུད་གཞུང་ལས་གྲངས་པའི་སྤྱོད་པ་རྨད་དུ་བྱུང་བ་དང་ཕྲིན་ལས་གཞན་དོན་ལ་སོགས་པ་རྣམས། །དེ་རུ་རྟོགས་ཀྱང་སྐྱེ་བ་ལ་རང་དབང་མ་ཐོབ་པའི་སྐྱེ་བོ་ཀུན་གྱིས་སྤྱོད་གསུངས་པས། །མོས་པས་སློབ་པ་རྣམས་ལ་ཅི་སྨོས་རྐྱེན་མཐོང་ན་གཞན་དོན་བྱ་སྟེ། དེ་དག་ཏུ་ཤེས་སྒོམ་གཞི་ལ་སྤྱོད་པས་སློབ་ཤིང་། རྒྱུ་ཤེས་པའི་ལྟ་བ་དང་རྐྱེན་འཇུག་པའི་མཚན་ཉིད་ཏིང་ངེ་འཛིན་ཀུན་ཀྱང་གཞན་དོན་དུ་འགྱུར་ན། ཕྲིན་ལས་བཞི་སྤྱོད་ཅིང་སྒྲུབ་པ་བྱེད་པ་དང་དབང་བསྐུར་བའི་ཚེ། །ལྟ་དང་ཏིང་འཛིན་ལ་སོགས་པ་ལམ་ཀུན་སྐད་ཅིག་ཆས་བསྒོམས་ནས། །སྣང་བྱེད་སྤྲོས་པའི་འཁོར་ལོ་མོས་པས་བསྒོམ་བྱེད་ཅིང་ཟེར། དེ་ནས་ནམ་རང་བཞིན་ཆོས་ཀྱི་དབྱིངས་ན་སྙན་གསན་ཕབ་སྤྱན་དྲངས་བསྟིམ་བརྟན་པར་བཞུགས་སུ་གསོལ་རྫོགས་ནས་ཕྱི་ནང་གསང་བའི་མཆོད་པ་རིམ་བཞིན་དུ་འབུལ་བསྙེན་པར་བྱ་ནས་ཚོགས་དང་ལྷག་མ་ཡན་ཆད་བྱའོ། །ནུས་པའི་ཡེ་ཤེས་ལྔའི་དབང་བསྐུར་སྐུ་གསུང་ཐུགས་བྱིན་གྱིས་བརླབས་པ་དང་ལྡན་པར་རྫོགས་པར་བྱེད། །ས་ཏིའི་སྒོམ་པ་དེ་ཚེ་དམ་ཚིག་དང་སྡོམ་པ་ཐམས་ཅད་ཀུན། །མོས་པའི་སྒོ་ནས་སློབ་ཅིང་མི་གཏོང་བར་བསྲུང་མོད་ཀྱང་། །ཁྱད་པར་ཏིང་ངེ་འཛིན་གྱི་དམ་ཚིག་ལས་མི་འདའ་བར་བསྲུང་ཞིང་ལྡན་པར་བྱ། རྩ་བ་དམ་ཚིག་དང་ལྟ་བ་དམ་ཚིག་ཡན་ལག་ཅེས་བྱ་བ། །རང་རིག་ལས་ལོགས་ན་ཡོད་པ་མ་ཡིན་ཏེ། །རང་གི་ལྟ་བ་ལས་མི་འདའ་བར་དམ་ཚིག་ཡིན། །ཟིན་ནས་འཁོར་བས་མི་གཏོང་བའི་ཕྱིར་ཡང་དམ་ཚིག་ཅེས་བྱ། །བླ་ན་མེད་པའི་བྱང་ཆུབ་ཀྱི་གཟུངས་སུ་གྱུར་པས་ཀྱང་དམ་ཚིག་ཅེས་བྱ། །ལྟ་བ་རྟོགས་པའི་དོན་སྔར་ལྡན་དེ་ཡང་འདིར་གོམས་པར་བྱེད་པའོ། །ལྟ་བ་དམ་ཚིག་མཆོག་ཡིན་པ་དེ་བས་རང་སེམས་ལྟ་བ་རྟོགས་བྱས་ཏེ། །དམན་པ་ལས་གྱུར་པའི་གཡེངས་བ་ལས་གྱུར་བའི་ལེ་ལོ་གཡེངས་བ་དྲུག་པོ་ལ་སོགས་པ་སྐྱོན་ཀུན་ཡོངས་སྤངས་ལ། །ང་དང་བདག་ཏུ་འཛིན་པ་མེད་ཅིང་མཉམ་ཉིད་ཀྱི་ངང་ལས་མི་འདའ་པར་བསྲུང་། །ཆོས་ཉིད་དེ་བཞིན་ཉིད་ཀྱིས་ཏི་ལས་འདའ་བར་མི་བྱེད་ཅིང་རྣལ་འབྱོར་པ། དེ་བཞིན་ཉིད་དང་ལྡན་པས་དམ་པའི་སྟེ། །དེ་བཞིན་ཉིད་ལས་འདའ་ན་རང་གི་རྒྱུད་ཚིག་པར་འགྱུར་རོ། །དེ་དང་སྔ་མ་སྔ་མ་རྫོགས་པར་བྱས་པས། །ལམ་གོང་མ་གོང་མའི་རྒྱུད་ལ་ལྡན་པས། །དེ་བཞིན་ཉིད་ལ་སོགས་པ་སྔ་མ་སྔ་མའི་དུས་ན་སྐད་ཅིག་སྤྲོས་པ་ལ་སོགས་ཕྱི་མ་ཕྱི་མ་ཡོངས་སུ་འཕར་གྱི་མངོན་སྤྱོད་མིན། །དེ་ཡང་ལམ་རིམ་པ་གོང་དུ་འཕར་བས་འོག་མ་འོག་མའི་སྒོམ་སྤྱོད་གོང་མ་གོང་མའི་ཀུན་མངོན་དུ་འགྲོ་བའི་རྒྱུ་ཡིན་ནོ། །ལྟ་སྤྱོད་ལ་རིམ་པ་ཡོད་པ་དེ་བས་ལམ་གོང་འོག་སོ་སོའི་ལྟ་བའི་གཞི་ལས། །ལྟ་བ་སྤྱོད་པ་ལ་སོགས་པ་ཀུན་ཁྱད་པར་ལུང་པ་ཆེ་ན་ནམ་མཁའ་ཆེ་མཁའ་ཡུལ་རྒྱ་ཆེ་ཆུང་བྱེད་པ་དང་འདྲ། །སྐུ་གསུམ་ཞིང་ཁམས་རྒྱ་ཆེ་ཆུང་བཤད་པ་དང་དབང་བསྒྱུར་གྱི་རྒྱལ་པོའི་འདུལ་ཞིང་ས་ཁམས་བཞིན། །ལྟ་སྒོམ་གྱི་སྟོབས་ཀྱིས་སྤྱོད་པ་ནི་སྟོབས་ཅན་གླང་པོ་རྩལ་སྒྱིད་འདྲའོ། །དེ་ལྟར་བ་སྒོམ་བྱ་སྒོམ་བྱེད་མེད་པར་ཡུན་བསྲིངས་ནས་དེ་སྒོམ་ན། ལུས་ངག་སེམས་ལ་དྲོད་འབྱུང་སྟེ། །ཕྱིའི་དྲོད་ལུས་ཀྱི་ན་ཚ་ཕྲ་མོ་མི་འཚོར་བ་ཏེ་བཟོད་པ་ཕྲ་མོ་ཐོབ་པ་དང་། །ནང་གི་དྲོད་འགྱུ་བའི་དབུགས་མི་ཚོར་བ་ལ་སོགས་ཏེ་དབང་ཐོབ་དང་། །གསང་བའི་དྲོད་ལ་སྒོམ་པར་དོན་ལ་སེམས་རྣལ་དུ་ཕེབས་པ་ནི། །ངེས་པར་ལུས་ངག་ཡིད་ཀྱི་དྲོད་གསུམ་མྱོང་བའོ། །དྲོད་ལས་གཞན་དུ་འབྱུང་ཚུལ་ནི་ཕྱི་རོལ་གྱི་སྣང་བ་རྡུལ་ཕྲན་གྱི་ཁེངས་པ་མཐོང་བ་དང་ཟླ་ཚེས་ལ་སྣང་བ་ཐམས་ཅད་སྐྱ་ལམ་མེ་བ་དང་སོགས་ཁུ་དུ་བུདྡྷའི་ཞིང་ཁམས་སོགས་མཚན་མ་མཐོང་བ་དང་། རིག་པ་ལ་སྒོམ་པར་ཏིང་ངེ་འཛིན་ཀློང་དུ་ཕེབས་པ་དང་། །འདོད་པའི་ཡུལ་འདོད་ཡོན་ལྔ་ལ་སེམས་མི་འགྲོ་ཞིང་། །སྐྱེ་འཆི་དང་འཕོ་འགྱུར་དག་ལ་ཉམ་མི་ང་བས་དང་། ཕྱི་དང་ནང་གི་ཆགས་ཡུལ་རྣམ་ཤེས་ལ་ཆགས་པ་དང་ཞེན་པ་ཆུང་། །སྔར་ལྟ་བའི་དུས་བས་དྲོད་ཁྱད་པར་དུ་དཔགས་པ་ཉམས་སུ་མྱོང་བ། སེམས་ཅན་གཞལ་ཡུལ་ཉམས་ཐག་མཐོང་ན་ཐུགས་རྗེས་སེམས་འཕྲོག་དང་། །ཆོས་བརྒྱད་རྣལ་འབྱོར་པ་གྲགས་དང་མ་གྲགས་བསྟོད་སྨད་བདེ་དང་སྡུག་མ་རྙེད་པ་དང་མ་རྙེད་འཇིགས་རྟེན་ཆོས་བརྒྱད་པོ། མཉམ་ཞིང་སྙོམས་པ་ལ་སོགས་ཕལ་ཆེར་འབྱུང་། །དེ་ཡང་ཉམས་དང་སྦྱར་ན་གཡོ་ཐོབ་བརྟན་རིམ་གྱིས། །རྣམས་ཀུན་ཏུ་དྲོད་འཁོར་བར་འབྱུང་བ་ཡིན། །བུ་ཁུ་རྗོ་སྨིན་པའི་རིགས་དེ་ལ། །ཕ་མས་ཁྱིམ་ཐབ་ལྟས་བསྟན་ན། །བྱིས་སྦ་དེ་བྲོད་པས་བསུ་ཞིང་རང་གི་ཟང་ཟིང་ནོར་ཟས་དག །དོན་དུ་གཉེར་བ་ལ་བརྩོན་པར་བྱེད། །དཔེ་དེ་བཞིན་དོན་རྣལ་འབྱོར་གཏན་གྱི་བདེ་བ་འཚོལ་བ། །དྲོད་རྟགས་མངོན་དུ་མཐོང་བའི་དགའ་ཞིང་བྲོད་པའི་ཚུལ་གྱིས། །ཤིན་ཏུ་ལམ་ཉམས་སུ་ལེན་པ་ལ་བརྩོན་པར་འགྱུར། །དེ་ཕྱིར་འདི་དག་ཡིས་རྗེས་སུ་བསྟན། །ཕྱི་མའང་ལམ་གྱི་ལྟ་སྒོམ་གྱི་སྟོབས་ཆ་ལས། །རྟགས་མངོན་རྫུ་འཕྲུལ་དང་སྣང་བར་འགྱུར། །དེ་ལ་སྔ་མའང་ཕྱིའི་རྟགས་དང་ནང་གི་རྟགས་སྟེ། །ཕྱི་རོལ་དུ་ཟད་པར་མེའི་སྐྱེ་མཆེད་དང་ཆུའི་སྐྱེ་མཆེད་དངོས་སུ། མེ་ཏོག་མཐོང་དང་པད་མོ་འོད་ཀུན་རྟའི་ཞིང་ཁམས་ལ་སོགས་པ་མངོན་དུ་མཐོང་བའོ། །ལུས་ངག་གི་ན་ཚ་ནང་དུ་བཟོད་པ་ཐོབ་པའི་ཏིང་ངེ་འཛིན་གྱི་བྱེ་བྲག་ཤེས་པ་དང་། །ཁོར་བའི་ཆུ་ཉོན་མོངས་པ་ལྔ་རྒྱུན་ལམ་བག་ཀྱིས་བཅད་དེ་ཤས་ཆུང་ངུ་འགྲོ་བ་དང་། ཡེ་ཤེས་ལྷ་མོས་ཙནྡ་གྱི་ལྡེ་གུས་བྱུགས་པ་དང་དེ་ལ་སོགས་པ་བྱུང་ཡང་དེས་སེམས་ཀ༽ ང༽དེ་ལ་ཤུགས་སྣང་བརྒྱད་ནི་གྲུར་ཞུགས་ནས་འགྲོ་བ་དང་། ནམ་མཁའ་ལ་འཕུར་བ་དང་། མུན་པ་ལ་སྣང་བར་གྱུར་ཅིང་སྣང་བ་ལ་མུན་པ་དང་། ནམ་མཁའ་རྡུལ་གྱིས་གང་ཡང་། ནམ་མཁའ་འོད་དུ་འབར་བ་དང་། དངོས་པོའི་ནམ་མཁར་མེད་པར་སེམས་ཉིད་སྟོང་པ་ནམ་མཁའ་ལྟ་བུ་དང་། མེ་ལོང་སྐར་མདས་བརྒྱན་པ་དང་། བུདྡྷ་སྟེ་སངས་རྒྱས་ཀྱི་ཞིང་མཐོང་ཅ༽བའོ། །ཁ༽མི་འཕྲོག་མོས་པ་མེད་སྲིན་པོའི་རྒྱལ་པོ་སྟ་རེ་ཐོགས་པ་ལ་སོགས་པ་བྱུང་ཡང་སྐྲག་མེད་དགའ་མེད་ཏིང་ངེ་འཛིན་ཉམས་སུ་མྱོང་ཡང་བྲོད་པ་མེད། །སྒོམ་པའི་འདིའི་ངང་ལ་རང་བཞིན་གྱིས་ཤུགས་ལ་ཉམས་སྣང་བརྒྱད་པོ་མཐོང་བའང་འབྱུང་བར་གསུངས་སོ།ག༽ ཆ༽།བཅོ་བརྒྱད་ཀྱི་བདུད་ཀྱི་སྤྱོད་ཡུལ་ཆས་ཡང་འབྱུང་། །མངོན་པར་ཤེས་པ་རྣམ་པ་དྲུག །རང་བཞིན་གྱིས་འབྱུང་སྟེ། དྲུག་ནི་སྤྱན་གྱི་མངོན་ཤེས་དང་། རྣ་བ་དང་། ཕ་རོལ་གཞན་གྱི་སེམས་ཤེས་པ་དང་། འཆི་འཕོ་དང་། སྐྱེ་བ་ཤེས་པ་དང་། སྔོན་གྱི་གནས་ཤེས་པ་དང་། གདུལ་བྱ་དུས་ལ་བབ་མ་བབ་ཤེས་པའི་མངོན་ཤེས་སོ། །དེ་ལྟར་རྟོགས་ཤིང་ཉམས་སུ་མྱོང་བས་ལམ་གྱི་ཟག་པ་ཡོད་པ་དང་མེད་པའི་མངོན་ཤེས་འོ། །སྔོན་ལ་དེ་ཏིང་ཀུན་ཏིང་སྐབས་སུ་དམིགས་པའི་འགལ་འཕེལ་བ་མངོན་ཤེས་དང་། །གཅིག་པ་སྤྲོས་པའི་སྐབས་སུ་གྲངས་ཉེར་ལྔ་ཡོངས་སུ་རྫོགས་པའི་མངོན་ཤེས་དང་། །བར་ཆད་མེད་པར་ཚོགས་བསྒྲུབ་པའི་མངོན་ཤེས་སོ། །དེ་བཞིན་ཉིད་ཀྱི་སྐབས་སུ་དམིགས་པ་འགའ་བའི་མངོན་ཤེས་དང་ཀུན་ཏུ་སྣང་གི་སྐབས་སུ་འཕེལ་བའི་དང་། །ཕྱག་རྒྱ་གཅིག་པའི་སྐབས་སུ་ཉི་ཤུ་རྩ་ལྔ་རྫོགས་སོགས་པར་ཐོས་ཙམ་དུ་བྱུང་བ་དང་སྣང་བྱེད་ཀྱི་སྐབས་སུ་ཡུལ་ཁམས་མཐོང་། །བ་དང་། དེ་ནས་གླིང་གཅིག་ཚུར་ཆད་མཁྱེན་ནོ། །གྲངས་གཉིས་དང་གསུམ་བཞི་ཚུན་ཆད་མཐོང་ཐོས་ལ་སོགས་རིམ་པས་ཕྱེ། །ཕྱི་མ་ཚེ་དབང་སྟོང་གསུམ་གྱི་སྟོང་ཚུན་ཆད་མངོན་པར་ཤེས་བརྒྱ་ཡུལ་དུ་གྱུར་པ་དང་། །རྒྱ་ཆེན་ནི་སྟོང་གསུམ་སྟོང་ཆེན་པོ་སོགས་མཁྱེན་པའི་ཡུལ་འགྱུར་བ་ལ་སོགས་པ་སྟེ། སྟོང་གསུམ་སྟོང་ཕྲག་གསུམ་གྱི་སྟོང་ཆེན་པོ་བཅུ་རྡུལ་ཕྲན་དུ་གྱུར་པ་དེ་སྙེད་ཀྱི་གྲངས་དང་མཉམ་པ་དེ་ལྟ་བུ། གྲངས་མེད་པ་བཞི་རུ་བཞག་པའི་བརྒྱ་སྟོང་བཅུ་ཡི་རྡུལ་ཕྲན་དུ་གྱུར་པ། དེ་སྙེད་ཀྱི་གྲངས་དང་མཉམ་པའི་ཞིང་ཁམས་ཚུལ་ཆད་མངོན་ཤེས་ཀྱི་དང་པོ་ཐ་མ་ཡུལ་དུ་འགྱུར་བའི་ལྷུན་གྲུབ་རིག་འཛིན་ནི་རྒྱལ་བ་སངས་རྒྱས་དང་། །མངོན་ཤེས་ཀྱི་རྒྱ་མཉམ་པས་ལ་ཁོ་ན་ཁྱད་ཡོད་དམ་མེད་ཞེ་ན་བག་ལ་ཉལ་གྱི་དྲི་མ་ཡོད་པ་ལས་མེད་ཕྱེ་བས་ལྷུན་གྲུབ་མཐར་ལམ་རྫོགས་པའི་སངས་རྒྱས་ཀྱི་ཁྱད་ཡིན་ནོ། །དེ་བས་ནི་རྒྱུ་ཡི་བྱང་ཆུབ་སེམས་དཔའ་དང་། །དང་པོ་དང་མཉམ་ཕྱག་རྒྱ་ཆེན་པོ་དང་རྒྱུའི་ས་བརྒྱད་ལྷུན་གྲུབ་དང་རྒྱུའི་ས་བཅུ་བར་སྐལ་བ་མཉམ་ཕྱིར་ན་བརྗོད་ཀྱི་འོ་ན་ཚུལ་འདྲའམ་ཞེ་ན། ཁྱད་ཡོད་དེ་མངོན་པར་ཤེས་པའི་ཁྱད་པར་དང་དགོངས་པ་ཡི། །གཞི་ལྟ་བ་ཡིས་དབྱེ་བས་ལམ་དང་རྒྱུ་འབྲས་བུ་ལམ་དུ་བྱེད་པའི་ཁྱད་ཡོད་ངེས་སོ། །དེ་བཞིན་ཉིད་འདི་ཚེ་རྫུ་འཕྲུལ་གྱི་ཆོ་འཕྲུལ་དང་རྗེས་སུ་བསྟན་པའི་དང་། །ཆོས་སྣང་བའི་དང་ཀུན་བརྗོད་པའི་ཆོ་འཕྲུལ་ཅིག་ཆར་ལ་ཡོངས་སུ། རྫོགས་པར་འབྱུང་གི་ཀྱི་རིམ་གྱིས་ས་འདི་ཚེ་ཆོ་འཕྲུལ་འབྱུང་བའི་རྒྱུ་ཙམ་ཡིན་གྱིས། ལ་སོགས་བསམ་གྱིས་མི་ཁྱབ་སྟེ་ཉམས་མཐར་ཕྱིན་པ་ལ་བཞི་ཆ་ཙམ་འབྱུང་བའང་སྲིད་དོ། །རྣལ་འབྱོར་པ་དེ་བཞིན་ཉིད་ལ་གནས་པའི་རྨི་ལམ་ཡང་། །སྒྲིབ་པ་དག་པའི་ལྟས་ལུས་གཅེར་བུར་བྱུང་ཞིང་ལུས་ཀྱི་དྲི་མ་དག་པ་དང་། །བདེན་པ་མཐོང་བའི་ལྟས་བྱང་ཆུབ་ཆེན་པོའི་མཆོད་རྟེན་མཐོང་བ་ལ་སོགས་པ། དམ་པ་སངས་རྒྱས་མཆོག་དང་བྱང་ཆུབ་སེམས་དཔའ་དམ་པ་ཡི། །སྲས་དང་སྤུན་དགོངས་ནས་བྱིན་གྱིས་རློབ། །གཞན་ཡང་རྨི་ལམ་དང་མཚན་མར་ཉམས་སྣང་དུ་བླ་མ་དང་མགོན་གཅིག་བྱོན་ནས་མངོན་སུམ་དུ་སྣང་བས་དབང་བསྐུར་དང་བྱིན་གྱིས་རློབས་པ་དང་སོགས་ཁོངས་སུ་ལུང་སྟོན་ཁྲི་ལ་འཇོག་ཅིང་ཁམས་སྟོན། བྱིན་གྱིས་རློབས་ཆགས་ཤིང་གཏད་ནས་ཆོས་ཤོད་གཅིག་དང་། ལམ་དུ་འཇུག་པ་ལྔ་བྱེད་ཅིང་། །བར་ཆད་འབྱུང་མི་འབྱུང་དང་ལེགས་པའི་ཡོན་ཏན་དང་ཉེས་པའི་སྐྱོན་འབྱུང་བས་བརྩོན་ལུང་སྟོན་པའོ། །དེ་ཡང་བདུད་དང་ཆས་དབྱེ་དགོས་སྟེ། །བྱིན་རློབས་ལུང་སྟོན་ལྟར་སྣང་བ། །འབྱུང་བས་ཉེས་བྱེད་པར་བདུད་སངས་རྒྱས་དང་སློབ་དཔོན་ལོག་པར་སྤྲུལ་ནས་འབྱུང་ཕྱིར། །བདུད་དང་ཆ་བརྟག་པར་ཀུན་ཤིན་ཏུ་གཅེས་པས་བརྟགས་པར་བྱའོ། །དེའི་བར་ཆད་བསལ་དགོས་ཕྱིར་རྟགས་དེ་དག་ཀུན། །བླ་མ་ཉིད་ལ་ཞུས་པ་ལས་གཞན་དུ་མིན་ནོ། །ཆོས་ཉིད་དེ་བཞིན་ཉིད་དུ་ལྟ་བ་མཐོང་ནས་ཏིང་ངེ་འཛིན་གོམས་ན། །དགེ་སྡིག་ལས་ཀྱིས་མི་གོས་དགེ་དང་མི་དགེ་བ་གཉིས་སུ་མེད་པར་རང་གྲོལ། བདེ་སྡུག་ལ་སོགས་པ་གང་ལ་ཡང་རྣམ་རྟོག་མཚན་མར་ཡོང་མ་འཛིན། །ཆོས་རྣམས་ཐམས་ཅད་རང་བཞིན་ངང་གིས་ཡེ་ནས་སེམས་ཉིད་འོད་གསལ་བའི་ངང་དུ་རྟོགས་ཤིང་གོམས་པས། དགེ་སྡིག་གི་རྣམ་སྨིན་མེད་པས་ཤིན་ཏུ་འང་བདེ་བའོ། །དེས་ན་བདེ་དང་མི་བདེ་བའང་གཉིས་སུ་མེད་པས། །རང་བྱུང་གི་ཡེ་ཤེས་ལ་བདེ་སྡུག་གཉིས་འཛིན་གྱི་ཆགས་པ་མེད་པར་རྣམ་པར་དག །ཆོས་རྣམས་ཐམས་ཅད་དབྱེར་མེད་རང་བྱུང་གི་ཡེ་ཤེས་ཡིན་ནོ། །སེམས་ཉིད་ལ་ཕྱོགས་འཛིན་གྱི་དྲི་མས་མ་གོས་ཤིང་དྭངས་ལ་ཕྱོགས་འཛིན་གྱི་དྲི་མས་མ་གོས་བས་ཨ་རབ་བདེ། །འདོད་པའི་ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་འཛིན། །དེའི་གཏན་ཚིག་ཐམས་ཅད་མཉམ་ཞིང་ཆོས་ཉིད་མ་རིག་མུན་པ་སེལ་བའི་རོ་གཅིག་པས། །གཙང་རྨེ་གཉིས་སུ་མེད་པས་ཤིན་ཏུའང་བདེ། །བློའི་ཤེས་རབ་ཆེ་ཆུང་དང་ཏིང་འཛིན་གྱིས། །ཐམས་ཅད་མ་ནོར་བར་རྒྱུད་གཞུང་ལུགས་བཞིན་དུ་རྟོགས་ཤིང་སྒོམ་ན། འཁོར་བ་མ་སྤངས་པར་རང་གྲོལ་བས་སྡུག་བསྔལ་མེད། །འཁོར་འདས་གཉིས་སུ་མེད་པར་རྟོགས་ཤིང་ཡིད་ཚིམ་ནས་སྐྱེ་བ་མེད་པའི་དོན་རྟོགས་པས་ཨ་རབ་ཏུ་བདེའོ། །འཁོར་འདས་ཐམས་ཅད་མ་ལུས་ཆོས་ཉིད་དེ་བཞིན་ཉིད་དུ་གཅིག་པའི་ངང་། །ལྟ་བར་བྱ་བའི་ཡུལ་དང་བལྟ་བར་བྱེད་བའི་མཁན་པོ་གཉིས་ཀ་མཚན་མ་མེད། །རྟོགས་པའི་ཡེ་ཤེས་སྒྲོན་མ་སྒྲེང་བས་ནི། །ཕྱོགས་བཅུའི་ཞིང་ཁམས་ཐམས་ཅད་མཐོང་། །ཚེ་འདི་དང་ཕྱི་མ་ཕ་རོལ་དེ་བཞིན་ཉིད་ལ་གཉིས་སུ་མེད་ཕྱིར། །འགྲོ་དང་འོང་བར་བྱ་བ་མིན། །ཡན་ལག་པའི་སྟོབས་ཆེན་གར་ཡང་མ་མཆོང་བར། །རིག་པ་མཐའ་དབུས་མེད་པས་ཕྱོགས་བཅུའི་སྟོང་ཁམས་ཐམས་ཅད་གཉིས་སུ་མེད་པར་མནན། །དེ་བཞིན་ཉིད་འདི་སྒོམ་པའི་ཚེ་སྤྱོད་ཡུལ་འགྱུར་ཏེ་འཆི་བར་མཐོང་ན། །གཡེང་བའི་བསལ་པས་སྟོང་ཉིད་རྟོགས་ཤིང་གོམས་པའི་ངང་ལ་འདུག །བར་དོ་དྲན་པ་ལས་ལས་ངན་ཀྱི་རྒྱུན་བཅད་དེ། །གདོད་འབྲས་བུ་འདོད་ཁམས་ལྷ་མིའི་ཁྱད་པར་ཅན་དུ་སྐྱེས་ནས་ཐེག་པ་ཆེན་པོའི་ཆོས་དང་འཕྲོད་ཅིང་ཏིང་ངེ་འཛིན་ལ་སྦྱོར། །ཡང་མཚན་མ་མེད་པའི་འཕོ་བ་ལས་མཚན་བཅས་ཀྱི་འཕོ་བ་སྙིང་གི་དབུས་ན་གསང་བའི་གསེར་སྒྲོམ་དུ། །ཀུན་གཞི་ཚོན་གང་བ་འོད་དང་བཅས་པ་ཟླ་གཅིག་བསམ་ལ་ཟླ་བའི་དལ་དུ་ཧཱུྃ་སྔོ་སྐྱ། དབུགས་རིང་པོར་དང་ཟླ་བ་ཧཱུྃ་བརྩེགས་པའི་དམིགས་པ་ཐོབ་པར་སྒོམ་ནས། །རྒྱུ་བའི་དུས་ལྟ་བ་སྟེ། སྙིང་གི་དབུགས་ཡར་རྒྱུ་ཙམ་ན་ཧཱུྃ་ལས་ཡར་ནར་གྱིས་བྱས་ནས་སྤྱི་བོར་རྒྱངས་ཀྱིས་བྱུང་བར་བསམ། དབུགས་ཚུར་འདུས་ཙམ་ན་སྤྱི་བོ་ནས་སྙིང་གར་ལྷན་ཅིག་འདུས་པར་བསམ་མོ། །དེ་ཡང་སྟོབས་ཆུང་མི་གསལ་ནས་དབུགས་ཕྱིར་རྒྱུ་ཙམ་ན་ཧཱུྃ་ཡང་སྙིང་ཁ་ནས་ཡར་ལ་སྣ་བུག་གཡོན་པ་ནས་ཐོན་ཏེ། གྲུ་གང་ཙམ་དུ་དམིགས་པ་གཏོད་ལ་སྒོམ་མོ། །ཡང་ཚུར་རྒྱུ་ཙམ་ན་ཧཱུྃ་ཡང་སྙིང་གར་ལྷན་གྱིས་བྱུང་བར་སྒོམ་ཡང་མ་ཡེངས་པར་སྒོམ་ཞིང་དམིགས་པ་བརྟེན་ནས་འདྲིས་པར་བྱ། དེ་ནས་དབུགས་རྩེན་པ་ལ་ལིང་གིས་སོང་སྟེ་དབུགས་དང་བྲལ་ཁར་བར་དེ་བླ་མ་ཡི་དམ་གྱི་ཐུགས་ཀར་འཕང་པའམ་འོག་མའི་འབྲས་བུ་ནི་གོང་མ་ཡིན་པས་དེ་ཉིད་ལམ་དུ་འགྱུར། རླུང་གི་འཕྲོ་འདུས་རླུང་ཐུབ་ཚད་ཀྱིས་ནང་དུ་བཟུང་ལ། དེས་ན་མི་ཐུབ་ཙ་ན་རླུང་གི་སྟོབས་ཀྱིས་ཧཱུྃ་ཕྱིར་ལ་རྒྱངས་ཀྱིས་འཕང་། དེ་ཡང་སྔར་གང་འདྲིས་པ་སྟེ་སྟོབས་ཆེན་སྤྱི་བོ་ནས་འཕང་སྟོབས་ཆུང་ན་སྣ་བུག་གཡོན་ནས་རིག་པ་ཧཱུྃ་དུ་གནས་པ་དེ་འོད་དུ་ལམ་གྱིས་སོང་སྟེ་སྣང་སྲིད་ཐམས་ཅད་འོད་ཀྱི་ངོ་བོར་ཁྱབ་པར་ཝལ་གྱིས་དྲན་པར་བྱའོ་དེ་ཡང་ཞལ་གྱི་གདམས་པ་ངོ་སྤྲོད། དེས་གནས་སྐབས་དང་མཐར་ཐུག་གི་འབྲས་བུ་འབྱུང་ངོ་། །བརྡལ་འདུག །གནས་སྐབས་འབྲས་བུ་སྣང་སྟོང་དབྱེར་མེད་རྣལ་འབྱོར་མཐའ། །མཐར་ཐུག་འབྲས་བུ་མངོན་བྱས་ལྷག་པའི་ཆོས་སྐུར་སྦྱོར། །དེ་ཅིའི་ཕྱིར་ཞེ་ན་རྒྱུ་འབྲས་གཉིས་སུ་མེད་པའི་ཕྱིར་འབྲས་བུ་ཉིད་ལ་ལམ་དུ་བྱེད་པའི་ཕྱིར་ཏེ། །དེ་བཞིན་ཉིད་དང་སྐུ་གཉིས་རྣམ་པ་མཆོག་ལྡན་གྱི་སྟོང་པ་ཆེན་པོར་ཕྱོགས་མཐུན་བརྗོད་ཀྱི་རིས་སུ་ཆད་པའི་འབྲས་བུ་མ་ཡིན། །སྟོང་པ་ཆེན་པོའི་རྣལ་འབྱོར་བསྟན་པའི་ལེའུ་སྟེ་གསུམ་པའོ།། ༈ །།དེ་ཏིང་ཆོས་ཀྱི་སྐུ་ལ་རྟོགས་གོམས་ཀྱིས་བརྡའ་འཇལ་བའི་ཕྱག་འཚལ་ཏེ། །དེའི་རྗེས་སུ་སྙིང་རྗེ་ཆེན་པོའི་རྣལ་འབྱོར་ཡེ་ཤེས་སྒྱུ་མའི་ཏིང་ངེ་འཛིན་བཤད། །ཀུན་སྣང་ཡང་དེ་བཞིན་ཉིད་དང་རྗེས་སུ་མཐུན་པའི་ལུས་དོན་བཅོ་ལྔ་ཉིད་ཀྱི་མདོར་བསྟན་པ། ཡན་ལག་རྒྱས་བཤད་ཀྱི་སྒོ་ནས་ཤེས་པར་གྱིས། །སྟོང་པ་ཆེན་པོའི་ས་ཏི་སྔོན་དུ་སྟོང་གོམས་རྣལ་འབྱོར་པས། །ཁམས་གསུམ་གྱི་སེམས་ཅན་ཐམས་ཅད་ཐུགས་རྗེས་གཟུང་བའི་ཕྱིར། །ཡན་ལག་བརྒྱད་པ་སྔོན་དེ་ཏིང་བཞིན་དུ་བྱས་ནས། །དེའི་རྗེས་ལ་ཡེ་ཤེས་སྒྱུ་མའི་སྟེ་ཏིང་ངེ་འཛིན་གྱིས་སྙིང་རྗེ་བསྒོམ་པར་བྱའོ། །ཆོས་དང་གང་ཟག་བདག་གཉིས་ཀྱི་གཟུང་འཛིན་དྲི་མ་བསལ་བ་དང་། །དེ་བཞིན་ཉིད་སྟོང་པ་ལ་ཞེན་པའི་མདུད་པ་བཤིག་པ་དང་། །གདུལ་བྱ་རྣམ་ཤེས་ཚད་མེད་བཞི་ཡང་དག་པའི་ས་ལ་དགོད་པ་དང་། །ཕྱག་རྒྱ་གཅིག་པའི་རྒྱུར་སྔོན་དུ་ཐོབ་པ་བྱ་ཞིང་ཡེ་ཤེས་སྒྱུ་མའི་རྣལ་འབྱོར་ས་ཏི་ཉིད་ནི་གཉེར་བ་དང་། །བདེན་པ་གཉིས་སུ་ཕྱོགས་དང་རིས་སུ་མི་བཏང་ཕྱིར། །ཡེ་ཤེས་སྒྱུ་མའི་རྣལ་འབྱོར་འདི་ལ་གནས་པར་བྱས་ཏེ། །ཡེ་ཤེས་སྒྱུ་མ་ལ་འཇུག་པའི་གཡོ་བས་ཉིན་ཞག་དྲུག་གཅིག་གིས་དྲུག་ཅུ་རྩ་བཞིའི་ཆ་ཐུན་མོང་ཐོན་པ་བས་སོ་གཉིས་གོམས་པས་བཅུ་དྲུག་བརྟན་པ་བས་བརྒྱད་མཐར་ཕྱིན་པ་རབ་བཞི་ཆའམ་ཉིན་མོའམ་མཚན་མོའི་ཐུན་རྐྱང་ནུས་པའོ། །ཐུན་མཚམས་དུས་ཀྱི་བྱའོ། །རྣལ་འབྱོར་གང་གིས་ཁམས་གསུམ་འཁོར་བ་དང་མྱ་ངན་ལས་འདས་པའི་ཆོས། །ཀུན་སྣང་ཐུགས་རྗེ་ཆེན་པོའི་ཡེ་ཤེས་སྒྱུ་མའི་ངང་དུ་མིག་གིས་གཟུགས་སུ། །མཐོང་བ་དང་རྣ་བས་སྒྲ་ཐོས་ལྕེས་རོ་མྱོང་ལུས་ཀྱི་རེག་བྱ་ཚོར་བའང་། །སོ་སོར་རྟོག་པའི་ཤེས་རབ་ཀྱིས་བརྟག་པའི་རྒྱུས་སྒོམ་པའི་འམ་རྗེས་ལ་ཐོབ་ཅིང་སྒོམ་པའོ། །ཡེ་ཤེས་སྒྱུ་མ་དེ་ཡིས་ཐམས་ཅད་མ་ལུས་ཆོས་སོ་ཅོག །རགས་པ་ཐེར་ཟུག་པའི་སྙིང་པོ་ཡོད་པ་མ་ཡིན་ཏེ། །ལོག་རྟོག་སྣང་བ་ཡིད་ཚིམ་པས་སྒྱུ་མ་སྣང་བ་ངོ་བོ་མེད་པ་ཡང་དག་པ་མིག་ཡོར་སྤྲུལ་པ་དང་། །སྣང་ལ་མེད་པ་སྨིག་སྒྱུ་སྣང་ལ་རང་བཞིན་མེད་པས་འཇའ་ཚོན་གསལ་ལ་རང་བཞིན་མེད་པ་ཆུ་ཟླ་བཞིན་དུ། རྣལ་འབྱོར་བདག་དང་འགྲོ་བ་ཀུན་ཡེ་ཤེས་སྒྱུ་མར་ངོ་བོས་གཅིག །རྒྱུ་གཅིག་ཁོ་ནར་ཡང་མི་གནས་ཏེ་བདེ་སྡུག་ལ་སོགས་པ་ཐ་དད་བསལ་བའི་ཕྱིར་དང་བློས་བརྟགས་པའི་སྣང་བས་ཐ་དད་པའི་ཕྱིར་རོ། །དེས་ན་གཅིག་པ་དང་ཐ་དད་དངོས་པོ་གཉིས་མེད་ཅིང་ཐ་དད་ལས་གྲོལ་པས། །གཉིས་སུ་བྱ་མེད་ཅིང་གཉིས་སུ་བྱ་བའི་སྣང་བའང་འགོག་མེད་པར་པའང་། ལྟ་བའི་དོན་མཐོང་བའི་ངང་ལ་མ་ཤོར་ཙམ་དུ་བྱ། །ལྟ་བ་རྟོགས་པའི་རྗེས་སམ་རྟོག་དཔྱོད་ཀྱི་སྔོན་འགྲོ་གོམས་པར་བྱ། །དེ་བས་ན་ལྟ་བ་དེ་ཏིང་གཉིས་སྔོན་དུ་གོམས་ནས་ཡེ་ཤེས་སྒྱུ་མའི་ཏིང་ངེ་འཛིན་རྒྱུ་གོམས་པས། །རིགས་པ་མཐའ་དབུས་མེད་པས་དྲན་པ་སྤྱི་བླུགས་ཡེ་ཤེས་སྒྱུ་མའི་ཏིང་འཛིན་ཕྱོགས་སུ་གསལ། །བློ་སྔོན་དུ་བཏང་བ་གང་ཡང་མེད། །དཔེར་ན་ནམ་མཁའ་ནམ་མཁའ་ལ་ཡུལ་དུ་དབྱེར་མེད་པ་རང་བཞིན་ཅི་བཞིན་ནོ། །ལུས་ངག་སེམས་དང་ཕྱི་ནང་ཆོས་ཐམས་ཅད། །ཕྱོགས་སུ་གང་ནའང་དངོས་པོར་ཡུལ་ཡུལ་ཅན་མི་གནས་ཡུལ་དུ་མི་དམིགས་པ། །ཡེ་ཤེས་སྒྱུ་མའི་ངོ་བོ་སྣང་ལ་རང་བཞིན་མེད་པ་མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་ལྟ་བུའི་བསམ་པ་བསྒོམ་སྟེ་སྒོམ་བྱ་སྒོམ་བྱེད་མེད་པའོ། །ཆོས་རྣམས་ཐམས་ཅད་མ་འགགས་པར་རང་སྣང་བ་ཐབས་ཀྱི་མཚན་ཉིད་དེ་ཡིན། ཐབས་མ་འགགས་པ། ལ་ཐབས་ཀྱི་ཡེ་ཤེས་སྒྱུ་མའི་ཏིང་ངེ་འཛིན་གཉིས་སུ་མེད་པར་རྣམ་པར་སྦྱོར། །ཡེ ཤེས་སྒྱུ་མར་ཐབས་ཆེན་སྒོམ་པས་ཐབས་ལས་ཡེ་ཤེས་སྒྱུ་མ་མངོན་དུ་བྱུང་བ་ཡིན། །དེ་ནི་བླ་ན་མེད་པའི་བྱང་ཆུབ་ཡེ་ཤེས་སྒྱུ་མའི་ངོ་བོ་དབྱེར་མེད་པ་རྡོ་རྗེའི་ཐེག་པ་མཆོག་གི་དོན་ནོ། །ཕྱི་ནང་ཐམས་ཅད་དུ་ནི་ཡེ་ཤེས་གསལ། །ཡེ་ཤེས་མ་ཡིན་ཆོས་འགའ་ཡོད་མིན་པས། །མ་བུ་ལ་གདུང་བ་དང་འདྲ་བར་མ་བསྒྲལ་ཐམས་ཅད་ཡེ་ཤེས་སྒྱུ་མའི་ངོར་གཅིག་ཅིང་གཉིས་སུ་མེད་པར་རྟོགས་པས། དུས་གཅིག་བསྒྲལ། །ཞེས་བྱའོ། །དེ་གཉིས་སུ་མེད་པར་བསྒྲལ་བས་གསོད་ཆེན་སྙིང་རྗེ་ཆེན་པོའི་རང་བཞིན་ཏེ། །བདག་གཞན་དུ་མི་འབྱེད་ཕན་རྫོགས་བྱམས་ཆེན་པོ། །འགྲོ་བའི་དོན་ལ་མི་འགྱོད་དགའ་བ་མཆོག་ཏུ་སྐྱེ་བ་དགའ་བས་འབྲལ་བ་མེད་ཅིང་འགྲོ་བ་ཀུན་ལ་སྙོམས་པས་བཏང་སྙོམས། དེ་ལྟར་ཚངས་པའི་རྒྱུ་ཚེ་ཆད་བཞི་དུས་གཅིག་རྫོགས། །ཐེག་པ་འོག་མ་པ་ལྟར་ཡུལ་ཡུལ་ཅན་གྱིས་མངོན་པར་གདུང་བ་དེ་ལ་མེད། །སྙིང་རྗེ་བ་དེ་ཕྱིར་རྒྱུ་འཁོར་བའི་རྐྱེན་ལས་དང་ཉོན་མོངས་པ་སྟེ་འབྲས་བུ་སྡུག་བསྔལ་ཞིང་ཉམས་ཐག་པ་དང་། །ཐོག་མཐའ་མེད་པ་དུས་དང་རང་བཞིན་མི་རྟག་སྐྱེ་འཇིག་འཁྲུལ་པ་དང་། །ཚུལ་གྱིས་ཉེས་པ་ནི་འཕགས་ལམ་དང་སྡུག་བསྔལ་མྱོང་བའི་ངོ་བོ་ཕྱི་ནང་སྣོད་བཅུད་དུ་སྣང་བ་དང་། །སྤྱི་བཙོན་ར་དང་འདྲ་བ་ཡུལ་ཡུལ་ཅན་ལྟ་བུ་དང་བརྒྱད་ལ་དམིགས་ནས་ཐུགས་རྗེ་སྐྱེ། དེ་ཡིས་ཡུལ་ཡུལ་ཅན་མེད་པར་ཀུན་གཅིག་པར་ཤེས་བཞིན་འབྱུང་བས། ཕ་རོལ་དུ་ཕྱིན་པ་ཀུན་རྫོབ་ཏུ་ཡུལ་ཡུལ་དུ་སྐྱེས་པ་དང་མཚུངས་པ་མ་ཡིན། །ཡེ་ཤེས་སྒྱུ་མའི་ཏིང་ངེ་འཛིན་དེ་དག་གི་ངོ་བོ་ཉིད་བསྟན་པའང་། །ངོ་བོའི་རྣམ་གྲངས་འདིར་ཡང་མིང་གི་རྣམ་གྲངས་བཞིན་དུ་གྲངས་ཀྱང་འཇུག་སྟེ། །སྒོམ་བྱ་དོན་གྱི་ངོ་བོ་དང་རྣལ་འབྱོར་ཏིང་ངེ་འཛིན་གྱི་ངོ་བོ་ཡིས། །ཕྱེ་བས་ཟུང་དུ་འགྱུར་ཞིང་ངེས་ཚིག་ཀྱང་འགྲུབ་པའོ། །དེ་མ་ཡིན་པ་ལ་ལོག་རྟོག་དེར་འཛིན་པ་སྒྱུ་མ་ནི། །ཕྲ་བ་ཆོས་ཀྱི་བདག་དང་གང་ཟག་བདག་དང་རག་པས་ཀུན་བརྟག་ཀྱི་དངོས་པོ་རྣམས། །ངོ་བོ་ཡོད་པ་ནི་བདག་དང་སྲོག་དང་བྱེད་པ་ལས་སོགས་བརྟགས་པས། །གཉིས་འཛིན་གྱི་རྟོག་པ་སྒྱུ་མའི་འཁྲུལ་པ་ཀླུང་དུ་གྱུར པ། །ལོག་རྟོག་གི་བློ་ངོ་ལ་སྐྱེས་དང་མི་བདེན་ཅིང་བདེན་པ་ལྟར་འཇུག་པ་ལ་བསླུ་བས་འགྲུབ་པའོ། །དཔེར་ན་རྟེན་ཅིང་འབྲེལ་པའང་ཤིང་རྟ་བཞིན་ཏེ། འཇིག་རྟེན་པའི་རྣམ་རྟོག་མི་བདེན་པར་གཟུགས་བརྙན་ཕྱིར། །སྒྱུ་མའི་གླང་ལ་སོགས་པ་ལྟ་བུར་འཁྲུལ་པའི་རྒྱུ་རྐྱེན་ལས་སྐྱེས། །མེས་བཙོ་བསྲེག་བྱ་སོགས་འཕྲལ་སྣང་བྱ་བ་ཀུན་བྱེད་པས་དོན་བྱེད་ནུས་འདི་རྣམས་ཀྱང་། །རྟོག་ཅན་རྣམས་ལ་ནི་ལས་དང་རྟོག་པ་མཐུན་པར་ཟད་པའི། གཟུགས་བརྙན་འདྲ་བའི་ཕྱིར་རིགས་པས་བརྟག་པས་དབེན་ཏེ་ངོ་བོ་གྲུབ་པ་མེད་པ། དེའི་ཕྱིར་ཐམས་ཅད་གཏན་ཚིག་འདུས་བྱས་རྫུན་པ་ཙམ་དང་། མིང་ཙམ་ལས་དངོས་མེད་འདོད་པ་མིན་ནོ། །ཡང་དག་ཉིད་དུ་བདེན་པར་གྲགས་སོ་ཅོག །གཉིས་སུ་སྣང་བའི་དུས་ཉིད་ན་ཕྱོགས་གཅིག་པ་གང་ཡང་མིན་པས། །སེམས་ཉིད་རང་སྣང་བའི་ཕྱིར་ཅི་ལྟར་སྣང་ཡང་རྒྱུ་རྐྱེན་མེད་པར་རང་འཆར་བས། རིག་པ་ཉིད་སྣ་ཚོགས་སུ་སྣང་ལ་རང་རིག་གི་ངོ་བོ་ཕྱོགས་གཅིག་གང་དུའང་ངེས་མེད་ཅིང་། །ཇི་ལྟར་བལྟས་པར་ལྟར་སྣང་བ་དང་། །སྣང་ཞིང་ཐེར་ཟུག་གང་ཡང་མེད་པ་རང་སྣང་བས་རྟག་པ་དང་ཆད་པ་དང་ཡང་བྲལ་བའོ། །རྒྱལ་བའི་སྐུ་ཡང་རྒྱུ་རྐྱེན་གཞན་གྱིས་མ་བསྐྱེད་པར། །རིག་པའི་ཡེ་ཤེས་སྒྱུ་མར་ཤར། །ཁམས་གསུམ་པའང་དེ་བཞིན་པས། །ཐབས་ཆེན་མ་འགགས་པ་སྒྱུ་མ་ཀུན་གྱིས་ངོ་བོའོ། །ཆོས་ཀུན་ཡེ་ཤེས་སྒྱུ་མ་ལ་ནི་ཡེ་ཤེས་ཉིད་རོལ། །ཡེ་ཤེས་རོལ་པ་ཉིད་ཀྱང་ཐེར་ཟུག་གང་ཡང་མེད་པས་གསོག །རྒྱལ་བའི་སྐུ་མངོན་སུམ་དུ་བྱུང་ནས་འགྲོ་བ་སྐྱོབ་ཅིང་ཕན་འདོགས་པ་དང་། །བྱིན་གྱིས་རླབས་པ་དང་ཆོས་སྟོན་པ་ལའང་གོང་གི་དེ་བཞིན་ཏེ། དེ་རྣམས་ཀྱང་རང་བྱུང་ཡེ་ཤེས་རང་སྣང་བས་རྒྱུ་རྐྱེན་གཞན་ལ་རག་ལུས་མེད་པའི་ཕྱིར། །སྒྱུ་མ་རང་སྣང་ཉིད་ངོ་བོ་ལ་འཇིགས་འདྲལ་མེད་པ་སྣང་བ་རྡོ་རྗེ་མཆོག །དེ་ན་དོན་ནི་འདུས་མ་བྱས་ཉིད་ཀུན་རྫོབ་ཏུ་འདུས་བྱས་ལྟར་སྣང་། །འདུས་བྱས་སུ་སྣང་བའི་དུས་ཉིད་ན་དབྱེར་མེད་རྡོ་རྗེ་ཉིད། །ཡིན་པའི་ཕྱིར་རང་གི་ངོ་བོས་བདེན་གཉིས་ཐ་དད་མེད། །འོ་ན་བདེན་གཉིས་རེས་མོས་སུ་སྒོམ་པའམ་ཞེ་ན་བློ་དམན་པ་ལ་རིམ་པར་ལྟར་སྣང་བ་དེས་ས་ཏི་གོམས་པའི་ཐབས་བྱེད་ཙམ་དུ་སྨོས་པ་ཡིན་ནོ། །འགྲོ་ལ་སེམས་རྒྱུད་གཉིས་མི་ལྡན་ཅིང་སྐད་ཅིག་མ་གཅིག་ལ་རྟོག་པ་གཉིས་མི་འཇུག་པ། རྒྱུད་གཅིག་ལ་རྟོག་པ་སྔ་མ་འགགས་ཕྱི་མ་མ་སྐྱེས་ད་ལྟ་མ་འགགས་པས། །གཟུང་འཛིན་གཉིས་དང་བྲལ་བའི་རང་རིག་པ་ཉིད། །ཡེ་ཤེས་སྒྱུ་མ་མི་གཡོ་བས་ཞི་གནས་ལ་སྒྲིབས་པར་གསལ། །ཆུ་དང་ཟླ་བ་ཇི་བཞིན་དུ། །ཞི་གནས་ལྷག་མཐོང་མཚུངས་པར་གསལ་བ་ཡེ་ཤེས་སྒྱུ་མའི་ངོ་བོར་བརྗོད། །ཇི་ལྟར་སེམས་ལས་མ་གཏོགས་པའི་ཆོས་མེད་ཕྱིར། །ཡེ་ཤེས་སྒྱུ་མ་གཞན་ན་སྒོམ་དུ་མེད། །ཡེ་ཤེས་སྒྱུ་མ་ཉིད་ཀྱི་གཉིས་སུ་མེད་ཅིང་ཞེན་ཆགས་པ་བྲལ་བའི་ངང་ལ་གནས་པས། ཐ་སྙད་ཙམ་དུ་བསྒོམ་ཞེས་བྱའོ། །ཏིང་ངེ་འཛིན་དང་མི་མཐུན་པའི་སྐྱོན་སྒྲིབ་པའི་དམིགས་གཟུགས་བའི། སྐྱོན་གྱི་རྒྱུ་དང་ངོ་བོ་དང་ཉེས་པ་ནི། །ཡེ་ཤེས་སྒྱུ་མའི་ངང་ལ་མ་གོམས་པ་དང་ཆེད་དུ་བཅོས་ནས་བརྩོན་འགྲུས་བྱེད་པས་སྐྱོན་འབྱུང་བ་སྟེ། མེ་ཡོད་ན་དང་དུ་བ་ཡོད་པའི་ཚུལ་བཞིན་དུ། །མ་གོམས་པ་དང་འགྲུབ་བྱེད་ཀྱི་ཤུགས་ལ་སྒོམ་བྱ་སྒོམ་བྱེད་ཀྱི་བདག་ཏུ་འཛིན་པ་རྣམ་པ་གཉིས་ཀྱིས། །ཏིང་ངེ་འཛིན་ལ་སྒྲིབ་པའི་སྐྱོན་འབྱུང་བར་ངེས། །དེ་ལ་སྔོན་དུ་ཇི་བཞིན་ཉིད་བསྟན་མོད་ཀྱང་། རྒྱུ་གཅིག་དང་དེ་ཏིང་མཚམས་སྦྱོར་བའི་སྙིང་རྗེས་གཡུང་བའམ་སྔོན་དུ་གོམས་པ་མིན་པས། །ཀུན་སྣང་གི་སྐབས་སུ་ཡང་ཐུན་མོང་གི་བརྗོད་པ་ཀུན་འབྲིང་དང་ཉུང་བར་འབྱུང་། །སྐྱོན་གྱི་རྐྱེན་རྣམས་སྔར་སྤངས་ཤིང་དེ་བཞིན་ཉིད་གོམས་པས་ཐ་མལ་པའི་སྐྱོན་ཉུང་ཞིང་དཀོན་པའོ། །འོན་ཀྱང་འདི་ཉིད་ཀྱི་སྐབས་སུ་ཡང་འཕྲོ་བ་དང་རྒོད་པ་དང་སྡུད་པ་དང་བྱིང་བ། ཡུལ་མ་ངེས་པའི་ས་ཕྱོགས་ནི་མཁར་རྩེགས་བཅས་པ་ལ་སོགས་པ་མཐོང་བ་དང་། ཟད་པར་གྱི་སྐྱེ་མཆེད་མཐོང་བ་དང་མི་རྟགས་པས་མ་ངེས་པའི་ཁ་དོག་མཐོང་། །མཁྲིས་མེ་ཁྲག་ཆུ་རླུང་སའི་ཆ་བད་ཀན་འབྱུང་བ་བཞི་འཁྲུལ་བས། །ཏིང་འཛིན་མི་གསལ་མདོག་མཐོང་པ་ནི་ཁམས་འཁྲུག་པ་གང་ཡིན་ལྟར། །ས་གཡོས་མཐོང་བའང་བདུད་དང་ཆ་དབྱེའོ། །དེ་ཡང་ནམ་མཁའ་ལ་སྤྲིན་གྱིས་སྒྲིབ་པ་དང་མིག་ལ་ལིང་ཏོག་གིས་མུན་པ་འགྱུར་བ་བཞིན། །དོན་གང་དེ་གཞུང་ལས་གྲགས་པའི་སྐྱོན་རྣམས། ཐུན་མོང་གི་ཕྲ་རག་སྐྱོན་ཆ་ཡིས་ཁྱད་པར་གྱི་སྐྱོན་སྒྱུ་མའི་དོན། །ངོ་བོ་མི་གསལ་ཞིང་རྣམ་པ་སྐྱེ་བ་ཤིན་ཏུ་བུལ་བར་བྱེད། །དེ་ཏིང་ལྟར་སྔོན་བཞིན་རྟོག་པའི་ནད་སྐྱོན་བཅོས་པ་ནི། རབ་ལ་ཤེས་བཞིན་གྱི་བྱ་ར་བའི་སོ་མཐས་སྐྱོན་ཚོར་ལ་ཆོད་པར་བྱ། །དེ་ལྟར་ཚོར་བར་གྱུར་ན་རྐུན་པོ་མཐོང་བ་དང་བྲོས་པའི་ཚུལ་བཞིན་དུ། སྐྱོན་དེ་རྣམས་ཆེད་དུ་མ་བསལ་རང་བཞིན་གྱིས་ཤེས་པ་དང་སྟེ་མེད་པ་བར་གྱུར། །དེ་ལྟར་རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མ་རང་སྣང་བའི་ཕྱིར། །ས་ཏི་ལ་ཆགས་པ་དང་སྐྱོན་ལ་སྡང་བ་ཡོན་ཏན་ལ་རེ་བ་དང་སྐྱོན་ལ་དོགས་པ་མི་འབྱུང་སྟེ། །ཡེ་ཤེས་སྒྱུ་མ་གཞན་དུ་མིན་ནོ། །གང་དེ་ལྟར་མ་ལྡན་ན་བར་པ་གང་དག་གིས། །ཚོར་ན་སྐྱོན་དེ་གང་དུ་བྱུང་གང་བྱུང་ལོ་རྒྱུས་དཔྱད་པས་ཞི། །ཡང་ན་རྟོག་པའི་གནས་ཡུལ་བལྟ། །སྟེ་རྟོག་པ་དེ་རང་གང་ཡིན་ལྟས་པས་དེ་ཡི་རང་བཞིན་མཐོང་བས་སྐྱོན་མུན་པ་རྣམ་དག་སྟེ་སངས་བས་སོ། །འདོད་མིན་འབྱུང་བའི་ཁ་དོག་མཐོང་བ་ན། །འབྱུང་བ་བཞི་ཡི་གཉེན་པོས་གཞིལ། །དེ་བཞིན་ཉིད་སྔོན་བཞིན་སྔར་འདས་པའི་རྗེས་འབྲངས་ཕྱིས་མ་འོང་བའི་སྔོན་བསུ་བར་བྱེད། །དེ་ལྟར་གོང་གི་རང་བཞིན་གྱིས་རྐྱེན་གྱིས་འགྱེས་ཤིང་རྒོད་ན། ཤེས་བཞིན་གྱི་བྱ་ར་བས་ཚོར་ན་འཁོར་བ་ཐོག་མཐའི་ཉེས་པ་ལ་བསམ་སྟེ། །འཁོར་བ་སྐྱོ་བ་བསྐྱེད་ལ་སྐྱོན་རྣམས་དེར་དྲན་པའི་ཐག་པས་བཅིང་སྟེ་སྐྱོན་དབང་མི་གཏོང་། གོང་དུ་ཐིམ་ཞིང་བྱིང་ན་ཁྲུས་བཅག་པར་བྱ་ཁམས་བསང་། །སྒོམ་པའི་དྲོད་རྟགས་བྲོད་པས་ས་ཏི་ལ་འཇུག་ཅིང་སེམས་གཟེངས་བསྟོད་པར་བྱའོ། །དེ་ལྟར་སྒོམ་ཞིང་དེ་ལྟར་སྐྱོན་ངོས་བཟུང་བཅོས་པ་ལ་བརྩོན་གྱུར་པའི། །སྐབས་སུ་ཡེ་ཤེས་སྒྱུ་མ་རྣལ་འབྱོར་ཉིད། །སོགས་འཕེལ་བའང་གཡོ་བ་དང་ཐོབ་པ་དང་གོམས་པ་དང་། །བརྟན་པ་དང་མཐར་ཕྱིན་ཏེ་གོང་དུ་འགྲོ་བའི་ངོ་བོ་ཡེ་ཤེས་སྒྱུ་མ་ལ། །མེད་ཀྱང་རབ་རིབ་རིམ་པ་ཆས་དག་བརྗོད་པའོ། །སེམས་རྒོད་པ་འབོད་བྱིང་བ་དགྱེས་ཐིམ་པ་གོམ་པའི་ཉམས་ཀྱི་དཔེ་རླུང་དྲག་པོས་ཆུ་ལྟར་སྐྱོན་དུ་འགྲོ་ལ། ཅུང་ཟད་ཐུན་གྱི་སུམ་ཆར་སྒོམ་ཡོད་ལ། བཞི་ཆ་ལྔ་ཆར་རྟོགས་པ་དེ་མེད་ཅིང་ཏིང་ངེ་འཛིན་གྱི་ངོ་བོ་ལ་གནས་ཐོབ། །ཐུན་རྐྱང་ནུས་ཤིང་གསལ་བར་སྒོམ་པའི་དོན་དང་ལྡན་པ། །ཆུ་ཀླུང་དཔེར་ན་དལ་འབབ་ཚུལ་བཞིན་དུ་གནས་པ་ཡིན་ནོ། །དཔེར་ན་སྒོ་རྟེན་རྫས་རྐྱང་འདོན་གྱིས་གཏམ་པ་ལྟར་རྟོག་པ་རླུང་གིས། །མི་བ སྒུལ་བར་ས་ཏི་གཞི་ལ་གནས་པ་ནི་བརྟན་པའོ། །ཤེས་རབ་ཀྱི་དབང་པོའི་མངོན་སུམ་དུ་གང་ས་ཏི་བྱས་པ། །སྐྱེད་དུ་བྱ་བ་མེད་པའི་ཕྱིར་མཐར་ཕྱིན་པའོ། །སྙིང་རྗེ་ཆེན་པོ་ཡེ་ཤེས་སྒྱུ་མའི་རྣལ་འབྱོར་པས། །སྲིད་གསུམ་ཡེ་ཤེས་སྒྱུ་མའི་ངོ་བོ་འདྲ་བར་ནི། །རྫོགས་པའི་བྱང་ཆུབ་ཏུ་ཐུགས་རྗེ་ཆེ་ཞིང་ཐབས་ལ་མཁས་པས་ཤེས། །འགྲོ་བ་དོན་བྱའི་ཆེད་དུ་གོ་བགོས་ཏེ། །འགྲོ་བ་དྲུག་པོ་དེ་ལྟར་སྔ་མ་སྟེ་གདོད་མ་ནས་དེ་ལྟར་གནས་པ་ཤེས། །གཟུང་འཛིན་ལོག་པར་རྟོག་པའི་བློས་བརྟགས་པ་རྣམས་རང་བཞིན་གྱིས་རྣམ་པར་རྟོགས་པས་དག་ཅིང་། །ཡེ་ཤེས་ཆོས་དབྱིངས་ལས་མི་གཞན་པའི་ཕྱིར། །སེམས་ཅན་གྱི་ལས་དང་སངས་རྒྱས་ཀྱི་ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །སྔོན་བྱུང་རྒྱལ་པའི་རྗེས་སུ་འཇུག་པའང་དེ་བཞིན་དུ་ཤེས་པར་བྱའོ། །གནས་ལུགས་དེ་བཞིན་ཉིད་དབྱིངས་སྣ་ཚོགས་མང་པོ་མ་འགགས་པའི་ཐབས་སུ་ཅི་ཡང་སྣང་། །མ་འགགས་པའི་ཐབས་ཉིད་རང་རྒྱུད་པ་གང་ཡང་མེད་དེ་སྒྱུ་མ་དང་མིག་ཡོར་དང་ཆུའི་ཟླ་བའི་གཟུགས་བརྙན་གྱི་ཚུལ་བཞིན་དུ་རང་བཞིན་མེད་པའོ། །སྣང་བ་དེ་ཉིད་རང་རིག་ཡེ་ཤེས་སྒྱུ་མའི་རྣལ་འབྱོར་གྱི་ངོ་བོར་སྣང་བས་གང་ལ་ཡང་ཆགས་པ་མེད་ཅིང་སྣ་ཚོགས་ཀུན་ཏུ་སྣང་བའོ། །ཐབས་དང་རང་བཞིན་མེད་པ་ཤེས་རབ་གཉིས་སུ་ལྡན་པ་དེ་ཉིད་ཆོས་ཀྱི་དབྱིངས་ཡོན་ཏན་མཆོག་གི་གནས་སུ་གྱུར་པས། །ཇི་ལྟར་སྤྱོད་ཀྱང་ཟག་མེད་འབྱུང་ཞིང་ཚོགས་གཉིས་གྱིས་བདག་གཞན་གྱི་དོན་གཉིས་འགྲུབ་སྒྲིབ་གཉིས་ཀྱི་གོས་པར་མི་འགྱུར་རོ། །ཤེས་རབ་དང་ཐབས་ཆེན་པོའི་ཐེག་པ་མཆོག་གི་དོན་ཡེ་ཤེས་སྒྱུ་མའི་ངང་ལ་ཡེ་ནས་རོལ་པ་ཡིན། །བྱང་ཆུབ་སེམས་སུ་རྒྱུ་གཅིག་པས། །བདག་དང་འགྲོ་ཀུན་གཉིས་སུ་མེད་པར་གཟུངས་ཀྱི་ཟིན་པའི་རྩ་བ་སྙིང་རྗེ་ཆེན་པོ་འབྱུང་། །སངས་རྒྱས་སེམས་ཅན་ཀུན་ཡེ་ཤེས་སྒྱུ་མའི་ངོ་བོར་གཅིག་པར་རྟོགས་ན། །རྩ་བའི་སྙིང་རྗེ་ཆེན་པོ་སྐྱེས་ཞེས་དེ་ལ་བྱ། །ཆོས་ཉིད་ལ་མཐའ་དབུས་མེད་པ་བརྡལ་ཆེན་བློ་ནི་ཡེ་ཤེས་སྒྱུ་མའི་ངོ་བོར་ཀུན་ཏུ་སྣང་། གདུལ་བྱ་འདུལ་བའི་ཐབས་མ་འགགས་པ་ཆེན་པོས་འགྲོ་བ་ཀུན་གྱི་དོན་མཛད་པའི་རིགས་འོད་གསལ་བྱམས། །འགྲོ་བ་ཐམས་ཅད་དགྱེས་པར་མཛད་ཅིང་ཕྱོགས་རིས་མེད་པས་དབྱིངས་མ་བུ་ལ་གདུང་བ་ལྟར་བརྩེ་བ་ཆེན་པོ་ནི། འགྲོ་དྲུག་གི་སེམས་ཅན་མ་ལུས་ཐམས་ཅད་ལ། །བརྩེ་བའི་སྙིང་རྗེ་ཐག་པ་དང་འདྲ་བ་མ་ཆད་པར། །འགྲོ་བ་ཉོན་མོངས་འཁོར་བའི་ལམ་ལས་མྱ་ངན་ལས་འདས་པའི་ལམ་དུ་གྲོལ་བར་བྱེད་ཅིང་། །བྱམས་པ་དག་གིས་ཕན་གདོགས་ཤིང་འགྲོ་ཀུན་སྐྱོབ་པའི་སྒོ་ནས་མཉེས་པར་གྱིས། །དེ་བཞིན་དུ་འཁོར་བའི་བཙོན་ར་དང་འདྲ་བའི་སེམས་ཅན་ལ། །བརྩེ་བའི་སྙིང་རྗེའི་ཞགས་པ་ཆེར་བརྐྱངས་ནས། །འགྲོ་བ་ཉོན་མོངས་འདམ་དང་འདྲ་བའི་ནང་ནས་ཐར་པའི་སྐམ་སར་འདྲེན་པར་བྱེད་པ་ལ། སྙིང་རྗེ་ཆེན་པོས་སྐྱོ་བར་མ་བྱེད་ཅིག །སྙིང་རྗེ་མི་སྐྱེ་དེ་བཞིན་དུ་སྐྱེ་བོ་ཕལ་རྣམས་ཐམས་ཅད་ལ། །ངན་སོང་ལས་ཀྱི་སྒྲིབ་པས་མི་གོས་ཤིང་། །སེམས་ཅན་ཐམས་ཅད་མངོན་པར་སངས་རྒྱས་པར་བྱེད་པའི་དོན་ལ་དགའ་པས། །དགའ་བ་དག་ལ་འགྱོད་པར་མ་བྱེད་ཅིག །ཁམས་གསུམ་གྱི་སེམས་ཅན་ཀུན་གཞི་ཆོས་ཉིད་ང་དང་བདག་མེད་ལ། །རྣལ་འབྱོར་པས་ཐུགས་དུ་དང་རྗེ་བདག་གཉིས་སུ་རྟོགས་པར་མི་བྱེད་དེ། །བུ་གཅིག་པ་ལ་མ་བྱམས་པ་དང་འདྲ་བར་སེམས་ཅན་ཐམས་ཅད་ལ་མ་བུའི་བློ་བཞག་པར་བྱའོ། །སེམས་ཅན་ཐམས་ཅད་ལ་ཕྱོགས་རིས་དྲི་མ་མེད་པར་སྙིང་རྗེ་སྙམས་པར་བྱ། །སྔོན་དེ་ཏིང་གི་སྐབས་སུ་ཡོད་པ་དེ་འདིར་རྫོགས་པར་བྱེད་པ་སྟེ་རྐྱེན་འཕྲད་ནས་སྔོན་དེ་ཏིང་བཞིན་ཏེ། །ཡེ་ཤེས་སྒྱུ་མའི་རྣལ་འབྱོར་ཉིད་ལ་གཞན་དོན་རྫོགས། །དམིགས་པའི་ཡུལ་ནི་གོང་གི་འཁྲུལ་བའི་རྒྱུ་རྐྱེན་འབྲས་བུ་གསུམ་གཅིག་ཏུ་དྲིལ་བས་བདུན་དང་། ངེས་འབྱུང་གི་ཐེག་པ་བཞིའི་སྟེང་དུ་ཀྲི་ཡོག་སྡེ་གསུམ་བསྣན་པས་བདུན་ཏེ་བདུན་གཉིས་གདུལ་བྱ་དང་། །འདིར་ངོ་བོ་རང་བྱུང་ཡེ་ཤེས་ཡེ་ནས་སངས་རྒྱས་པའི་ངང་དུ་ཡུལ་དང་ཡུལ་ཅན་མེད་པས་དམིགས་པ་མེད་པའི་སྙིང་རྗེ་དང་ལས་ནི་ཕྲིན་ལས་རྣམ་པ་བཞིས་གདུལ་བྱ་གང་ཡང་དོར་བ་མེད་པར་གང་ལ་གང་འདུལ་གྱི་མཛད་པ་དང་ཕན་ཡོན་རང་བྱུང་ཐུགས་ཀྱི་མཛད་པས་བདག་གཞན་གྱི་དོན་ཡོངས་སུ་རྫོགས་པར་བྱེད་པའོ། །ཕྱོགས་གཏད་མེད་དེ་ཐུན་མོང་གི། །ཐེག་པ་ཆེན་པོ་བྱང་སེམས་དང་ཀྲི་ཡོ་དག་ལས་བླར་འགྱུར་པ་ཡིན་ནོ། །བདག་དོན་བྱ་བའི་ཕྱིར་ཕྱི་ནང་སྤྱོད་ཡུལ་ཐམས་ཅད་ཀུན། །ཡེ་ཤེས་སྒྱུ་མ་རང་སྣང་བའི་ཕྱིར། །ཕྱི་ནང་གཉིས་སུ་འཛིན་པའི་སྒྲིབ་པ་མེད་པར་རིག་པ་རང་གསལ་བའི་ངང་། །ཡེ་ཤེས་སྒྱུ་མའི་ཏིང་ངེ་འཛིན་ལ་བློ་བརྟན་ཤིན་ཏུ་བདེ། །འདོད་པའི་ཡོན་ཏན་ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་འཛིན། །དེ་རྒྱུ་མཚན་ཐམས་ཅད་ཡེ་ཤེས་སྒྱུ་མའི་ངོ་བོར་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །དེ་བས་ན་སྤྱོད་པར་བྱ་ལྔ་དང་མི་སྤོང་བ་ལྔ་བ་དང་དུ་ལེན་པ་ལྔ་དང་། འདོད་ཡོན་ལྔ་སོགས་ཐམས་ཅད་ནི་ཡེ་ཤེས་ལ་ཡེ་ཤེས་རོལ་པའི་ཚུལ་དུ་ལོངས་སྤྱོད་པའོ། །ཐུབ་པ་ཆེན་པོ་སྟོན་པའི་པུ་ཏ་སྤྱོད་ཡུལ་ནི། །ཇི་ལྟར་དམིགས་པ་བཞིན་དུ་འགྲུབ། །དེ་བཞིན་དུ་ཆོས་རྣམས་ཐམས་ཅད་ཡུལ་ཡུལ་ཅན་དུ་དམིགས་སུ་མེད་པར། ཡེ་ཤེས་སྒྱུ་མའི་ཏིང་ངེ་འཛིན་ཅིར་ཡང་སྣང་ཞིང་ཅིར་ཡང་འགྲུབ། །ཆོས་ཉིད་ཟག་མེད་ཟབ་པོའི་པས་དོན་རྟོགས་ན། །ཐམས་ཅད་དག་པར་མ་གྱུར་པ་གང་ཡང་མེད། །ཡེ་ཤེས་སྒྱུ་མའི་ཏིང་ངེ་འཛིན་མ་བཅོས་པར་ཕྱོགས་མེད་ཀུན་ཏུ་གསལ། །རང་བཞིན་ངང་གིས་རྣམ་པར་དག་པའོ། །དེའི་ཕྱིར་སྤྱོད་ལམ་རྣམ་བཞི་ལ་སོགས་དུས་རྣམས་ཐམས་ཅད་ཀུན་ཏུ། སྒྱུ་མའི་ཏིང་ངེ་འཛིན་ཡེ་ཤེས་ལས་འདའ་བར་མི་བྱའོ། །རྩ་བའི་དམ་ཚིག་ཡན་ལག་གི་དམ་ཚིག་ཐམས་ཅད་ཀུན། །སྤྱིར་སྔ་མ་དེ་ཏིང་སྟོང་པ་ཆེན་པོའི་སྐབས་བཞིན་ཏེ་ཁྱད་པར་དུ་སྟོབས་དང་ནུས་པ་འཕེལ་བར་བསྲུང་བའོ། །དེ་ལྟར་སེམས་སྒྱུ་མའི་ས་ཏི་རྟོགས་ཤིང་གོམས་པས། །འཁོར་བའི་ཆོས་སྡུག་བསྔལ་གྱི་ཕུང་པོ་ལ་ཚད་མེད་པའི་སྙིང་རྗེ། རང་དབང་མེད་པར་སྐྱེ་བའི་བྱང་ཆུབ་སེམས་ཀྱིས་སེམས་ཕྲོག་པར་འགྱུར། །སེམས་ཉིད་རང་སྣང་ལས་གཞན་མེད་པས་མ་འཁྲུལ་ངོ་མ་ཤེས་འཁྲུལ་པ་དེ་ལ་ངོ་མཚར་ཞིང་ཡ་མཚན་སྐྱེ་བའོ། །དོན་མེད་པར་ལོག་ལམ་དུ་འདུག་ལའང་དེ་བཞིན་དུ་སྙིང་རྗེ་ཏེ། །ཕྱི་ནང་གསང་བའི་རྣམ་གསུམ་སྔ་ལས་བརྟན་ཞིང་འཕེལ་བར་སྣང་། །དེ་ལྟར་ཉམས་རིམ་པར་འཕེལ་བའི་མཐའ་རྟགས་ནི། །ལུས་ཤིང་བལ་གྱི་འདབ་མ་ལྟ་བུར་ཤིན་ཏུ་ཡང་བ་དང་། །ལུས་ཀྱི་ན་ཚ་ལ་སོགས་པ་བཟོད་པ་ཕྲ་མོ་ཐོབ་ཅིང་ཏིང་ངེ་འཛིན་ལ་ཡུན་རིང་། །ཁམས་བདེ་མི་བདེ་སྙོམས་པ་དང་། །ཆོས་བརྒྱད་ཕལ་ཆེར་ཡོད་ཅིང་ཆོས་བརྒྱད་མགོ་སྙོམས་པའོ། །དེ་བས་ན་ལྟ་བའི་སྐབས་སུ་རིལ་མང་བ་དེ་ཏིང་དང་འབྲིང་ལ་འདིར་ཀུན་སྣང་བ་ལ་མགོ་སྙམས་མཉམ། །རྟགས་ཀུན་ཀྱང་སྔ་ལས་གྲངས་འཕེལ་ཞིང་། །ངོ་བོ་གསལ་ལ་ཡུན་རིང་བའོ། །ལྷན་ཅིག་དྲུང་ན་འདུག་པའི་ཕ་རོལ་གྱི་སེམས་ཤེས་པ་དང་དེ་ལ་སོགས་པ། མངོན་ཤེས་ཀྱི་གྲངས་འཕེལ་བ་དང་ངོ་བོ་ཅུང་ཟད་བརྟན། །དེ་བས་གཞན་ལའང་དམིགས་པ་འགའི་མངོན་པར་ཤེས་པ་ཅུང་ཟད་འབྱུང་། །དེ་བས་ན་ཡེ་ཤེས་སྒྱུ་མའི་རྣལ་འབྱོར་ལ་བརྟན་པར་བྱ། །ཀུན་ཏུ་སྣང་གི་སྐབས་སུ་འདི་ཚེ་ཕྱི་ནང་སྤྱོད་ཡུལ་ཐམས་ཅད་ཀུན། །རྨི་ལམ་དུ་ཡང་ཡེ་ཤེས་སྒྱུ་མརའི་ངང་དུ་མཐོང་བ་དང་། རྒྱུད་སྙིང་རྗེས་གང་བར་རྨི་ལམ་དུའང་སྙིང་རྗེ་འབའ་ཞིག་མཐོང་བ་དང་། །རྨི་ལམ་དུའང་བླ་མ་དང་སངས་རྒྱས་ཀྱི་བྱིན་གྱིས་བརླབ་ཅིང་དབང་བསྐུར་བ་ལ་སོགས་པ་མང་དུ་མཐོང་བ་དང་། །བདུད་ཀྱི་སྤྱོད་ཡུལ་བཅོ་བརྒྱད་མཚན་མར་མཐོང་བ་འབྱུང་ངོ་། །རྨི་ལམ་བཟང་པོ་དེ་སོགས་སྣང་བ་ཅི་བྱུང་ཡང་ཡེ་ཤེས་སྒྱུ་མའི་ངང་དུ་རྟོགས་པས་ཆགས་ཤིང་ཞེན་པ་མི་བྱ། །སྙིང་རྗེ་ཆེན་པོའི་རྣལ་འབྱོར་གོམས་པ་བྱས་ནས། །རྣལ་འབྱོར་པ་དོན་ཆེན་རང་སྣང་གཉིས་མེད་རྟོགས་པ་ཡིས། །འཕོ་བའི་དུས་མཐའ་མེད་པར་ཡེ་ཤེས་སྒྱུ་མའི་ཏིང་ངེ་འཛིན་དེ་ལྟར་བསྒོམ། །དེའི་ཡོན་ཏན་ལ་ཚད་མེད་པ་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་ཡེ་ཤེས་སྒྱུ་མའི་ངོ་བོར་གཅིག །ཡེ་ཤེས་སྒྱུ་མའི་སྤྱོད་པ་བསོད་ནམས་ཀྱི་ཚོགས་ཆེན་ལྡན། །དེའི་མིང་དོན་ལའང་མ་ཆགས་པས་ཡེ་ཤེས་ཀྱི་ཚོགས་ཆེ་ལྡན། ཕྱག་རྒྱ་གཅིག་པའི་རྣལ་འབྱོར་ཕྱི་མ་བཙལ་བ་མེད། །ཉི་འོད་ལས་གཡོས་པ་མེད་པར་ས་གཞི་ལ་སོགས་པ་ས་བོན་ལས་གཡོས་པ་མེད་པར་མྱུ་གུ་འབྱུང་བ་བཞིན་དང་སྐྱུར་སྒྲ་སྦྲང་རྩི་དང་ཆུ་ཉིད་ལ་འཕྲོས་པ་མེད་པར་སྤྲེལ་དང་བྱིས་སྦ་ལ་ཁ་སྐྱུར་འོང་བ་བཞིན། །ཆོས་ཉིད་རང་བྱུང་གི་ཡེ་ཤེས་དུས་གསུམ་དུ་འགྲོ་འོང་པ་གཞན་དུ་འཕོ་བ་མེད་ཀྱང་གོང་གི་དཔེ་བཞིན་འཁྲུལ་བའི་ངོ་ལ་འགྱུར་བ་ལྟར་སྣང་སྟེ་འཆི་བའི་ཚེ། །ཡེ་ཤེས་སྒྱུ་མར་བའི་ཏིང་ངེ་འཛིན་ལ་བརྟན་པར་བྱས་པའི་ངང་ལ་འདས་ན་ལས་རྒྱུན་གཅོད་དེ་ལྟར་མི་ཐོབ་ནས། འབྲེལ་བས་ཡང་དག་པའི་ལམ་དང་གསང་སྔགས་བཀོལ་མི་འགྱུར་ཏེ་འཕྲད་ན་གྲོལ་བར་འགྱུར་རོ། །སྐྱེ་བ་ཕྱི་མའམ་ལན་གྲངས་གཞན་དག་ལ། །འཁོར་བར་མི་ལྡོག་པར་ཚེ་ལ་དབང་བསྒྱུར་བའི་རིགས་སུ་ངེས་ཏེ་ཐོབ་བོ། །ལམ་འདིར་ཆ་རྐྱེན་ཚོགས་ཤིང་བསྒྲུབ་ན། །སྐུ་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ཀུན་ལྡན་པའི། །དབང་ཕྱུག་ཆེན་པོའི་ལོངས་སྐུ་གནས་འོག་མིན་ཉིད་དུ། །མངོན་དུ་འབྱུང་བར་ཐེ་ཚོམ་མེད། །དེ་ལྟར་མ་རྟོག་ཏེ་མིན་པ་ལས་གྱུར་པས་ལེ་ལོ་སྙོམ་ལས་བྱས་ནས། དོན་བླ་མེད་འབྲས་བུ་བྱང་ཆུབ་མ་གྲུབ་པར་སླར་ཡང་ངན་སོང་གསུམ་དུ་འགྲོ་བའོ། །སྙིང་རྗེ་ཆེན་པོའི་རྣལ་འབྱོར་བསྟན་པའི་ལེའུ་སྟེ་བཞི་པའོ།། ༈ །།སྙིང་རྗེ་དང་སྟོང་པ་གཉིས་སུ་མེད་པ་ཡེ་ཤེས་སྒྱུ་མའི་ངང་ལ་ཕྱག་འཚལ་ནས། །ཞི་ཁྲོ་ཕྱག་རྒྱ་གཅིག་པའི་རྣལ་འབྱོར་བཤད་པར་བྱའོ། །རྣལ་འབྱོར་པ་གང་དག་རྡོ་རྗེ་ཀ་ཝ་ཙ་གསུམ་སྒོམ་པས། །དེ་ཏིང་སྟོང་པ་ཆེན་པོ་དང་ཀུན་ཏིང་སྔ་མ་འདས་པའི་ལུས་ཀྱིས་ཏེ་དོན་བཅོ་ལྔ་ཤེས། །ཐུན་མོང་སྤྱི་ཡི་ལམ་སྔོན་དུ་འགྲོ་བ་ཐམས་ཅད་སྔར་བཞིན་རྫོགས་པ་ཡིས། །ཕྱག་རྒྱ་གཅིག་པ་འདི་ཉིད་སྒོམ་པའི་ཚེ་ཡེ་ཤེས་སྒྱུ་མའི་ཏིང་ངེ་འཛིན་མཐར་ཕྱིན་པ་མངོན་དུ་བྱས་ཤིང་། །དེ་ནས་ལུགས་སྐུ་འབུར་མ་སོགས་མཚན་མ་ལྷའི་ཕྱག་རྒྱ་མདུན་དུ་བཞག །དེ་ལ་ཡན་ལག་བརྒྱད་པ་སྔོན་དེ་ཏིང་བཞིན་དུ་བྱས། དབྱེར་མེད་འབྲས་བུའི་ངོ་བོ་ཡིན་པས་དེ་ཡོངས་སུ་རྫོགས་པར་བྱ་ཞིང་བསླབ་པ་དང་། སྤྲོས་པའི་རྒྱུ་ཡིས་ཕྱག་རྒྱ་གཅིག་པ་ཐོབ་པར་བྱ་བའི་དང་། །སྙིང་རྗེ་སྒྱུ་མ་སྟོང་པ་དེ་བཞིན་ཉིད་ཀྱིས་རྟོག་ཞེན་དབྱེར་མེད་ཀྱི་དབང་དུ་བྱ་བའི་ཕྱིར་དང་། རྟོག་པའི་ཕུང་ལྔ་འབྱུང་ལྔ་ལ་སོགས་པ་ལྟར་གནས་སྒྱུར་བའི་ཕྱིར་དང་ཞིང་། །གདུལ་བྱ་གཞན་དག་སྨིན་པར་བྱ་བའི་ཕྱིར། །ལྷའི་སྐུ་ཕྱག་རྒྱ་གཅིག་པའི་རྣལ་འབྱོར་སྒོམ་པ་ཤིན་ཏུ་གཅེས་པའོ། །ཕྱག་རྒྱ་གཅིག་པའི་ས་ཏི་དེ་ལ་འཇུག་ཐབས་ལ་རྣམ་པ་གཉིས་ཏེ། །ཨ་ཧཱུྃ་ལ་སེམས་སྦྱངས་བ་དང་ལྷར་བསྐྱེད་པའོ། །སྔ་མ་གདམས་ངག་གི་སྟོབས་ཀྱིས་སེམས་སྦྱང་བ་དང་ཤེས་རབ་ཀྱི་སྟོབས་དང་ཀྱིས་སེམས་སྦྱངས་བ། འཇུག་པའི་གཞི་བོ་ཡི་གེ་འདི་ཉིད་དོ། །སྙིང་གར་ཨ་དཀར་པོ་གཅིག་རབ་ཏུ་བརྟན་པར་གྱུར་ཨ་དཀར་གསལ་བའི་ཚད་བཞི་ལས། །ཤིན་ཏུ་ཕྲ་བའི་ཨ་༼དོན་རྟགས་༽ རྣམས་སྤྲོ། །འཇིག་རྟེན་གྱི་ཁམས་ཕྱོགས་བཅུ་གང་བར་གསལ་གྱུར་ནས། །སླར་ཚུར་སཾ་ཧ་ར་བསྡུས་ཀྱང་འཕེལ་བ་མེད་ལ་སྤྲོས་ཀྱང་གཞི་མ་ཨ་དེ་འགྲིབ་པ་མེད་པར་བརྟན་པའོ། །ཨ་དེ་ལའམ་ཡང་ན་ཐུགས་ཀྱི་ཡི་གེ་ཧཱུྃ་གཅིག །ཨ་སྒོམ་པ་དེ་བཞིན་དུ་ཧཱུྃ་ལ་ཡང་དང་ཡང་དུ་གོམས་པར་བྱས་ནས་ནི། ཕྱི་ནང་སྣོད་བཅུད་ཐམས་ཅད་ཡི་གེ་ཧཱུྃ་༼དོན་རྟགས་༽དུ་བསྡུད། ཡན་ལག་ལྔ་དང་རྣམ་ཤེས་བརྒྱད་ཡེ་ཤེས་ཡིན་པའི་ཕྱིར། །རྟགས་ཡི་གེ་ཧཱུཾ་དུ་ཤིན་ཏུ་བསྡུ། །གསལ་བའི་ཚད་ནྲྀ་ཡི་མིག་གིས་བལྟར་ཡོད་ལྟར་སྒོམ་པར། །ཧཱུྃ་དེ་ལ་འདྲིས་ཞིང་སྒོམ་པར་ནས་བདག་དང་གཞན་གྱི་དོན་བྱ་བའི་ཕྱིར་སྤྲོ་བ་ལ། འཕགས་པ་མཆོད་ཅིང་སེམས་ཅན་གྱི་དོན་རྫོགས་ནས་སླར་ཧཱུྃ་ཚུར་བཞི་པོ་ལ་བསྡུ་སྟེ། ཧཱུྃ་ཉིད་མི་དམིགས་ཆོས་ཀྱི་དབྱིངས་སུ་གསལ། །དེ་ལྟར་གོམས་པར་བྱ་བ་ཤིན་ཏུ་གཅེས་སོ། །ཕྱི་མ་ཚངས་པ་སྲིན་པོ་ཁྲོ་བོའི་ཚུལ་དུ། །སྐུ་རྫོགས་པར་བྱ་བས་ཐབས་ཤེས་རབ་ཟུང་དུ་འགྱུར། །ཞི་བའི་ལྷ་ཚངས་པའི་ཆ་ལུགས་རྫོགས་པར་བྱ་ཞིང་སྒོམ་བའང་། །ད་ལྟ་ལྷ་གང་བསྒྲུབ་རང་རང་གི་ཡི་གེ་ཧཱུྃ་ལ་སོགས་པ་ལྷ་སོ་སོ་སྟེ། །སྤྱིར་ནི་བདེ་གཤེགས་ཅིག་སྒོམ་རྒྱལ་བ་ཀུན་གྱི་ངང་ཡིན་པས་གང་བསྒོམས་ཀུན་ཏུ་འདྲ། །འདིར་ཐུགས་ཀྱི་སྒྱུ་འཕྲུལ་གྱི་སྐབས་ཡིན་པས་རྡོ་རྗེ་སེམས་དཔའ་ཉིད་དུ་འདུ། །འོག་ནི་འདི་ལྟར་དེ་ཉིད་རྡོ་རྗེ་སེམས་དཔའ་གོམས་བྱ་བའང་། སྔོན་དུ་ཆོས་ཉིད་མི་དམིགས་པའི་ངང་ཉིད་ལས། །སྙིང་གི་ཐད་ཙམ་དུ་ཨ་དཀར་པོ་གསུང་གི་ཕྱག་རྒྱ་འབར། །ཤིན་ཏུ་ཁ་དོག་འཚེར་ཞིང་བརྟན་བས་གསལ་བསྒོམས་ནས། །ཕྱོགས་བཅུ་ཐམས་ཅད་ཨར་ནི་གྱུར་པར་བསྒོམ། །དེ་བཞིན་ཉིད་དུ་འདྲིས་ཤིང་གོམས་པར་གྱུར་ནས། །ཡི་གེ་ཨ་ལས་མ་ཡི་དཀྱིལ་འཁོར་སྤྲོ། །ཨ་དཀར་པོ་མ་དམར་པོ་གསལ་བར་འབྱོར་འགྱུར་ནས། །མ་ལས་ཉི་མ་ཨ་ལས་ཟླ་བ་གང་བ་སྒྲིལ་མ་བརྩེགས་པར་བསྒོམ། །ཡི་གེ་ཧྲཱིཿགསལ་མལ་གདན་པདྨ་ཆགས་མེད་བསྒོམ། །བྷྲཱུཾ་ལས་རིན་ཆེན་འབར་བའི་གཞལ་ཡས་བསྒོམ། །དེ་ལྟར་ཉི་ཟླའི་གདན་སྤྲ་དང་གུར་བུམ་པ་ལྟ་བུའི་ཚུལ་དང་གཞལ་ཡས་ཁང་སྒོམ་པ་སྟེ། ཤིན་ཏུ་ཐམས་ཅད་བསྡུས་ཤིང་ཕྲ་བར་བསྒོམ། །གཞལ་ཡས་ཁང་གི་ནང་གདན་དེ་འི་དཀྱིལ་ཡི་གེ་ཧཱུྃ་གནས་པ་སྒོམ་སྟེ། ཁ་དོག་མཐིང་ག་འོད་ཟེར་འཚེར་ལ་རྣམ་པར་གསལ་བ་ཡི། །ཧཱུྃ་ལས་འོད་ཟེར་འཕྲོ་བ་མཆོད་བྱའི་རྣལ་འབྱོར་བསྒོམ། །ཧཱུྃ་ལས་འོད་འཕྲོས་དབྱིངས་སུ་སླར་ཧཱུྃ་ལ་ཚུར་བསྡུས་ནས། །ཤིན་ཏུ་ཐུགས་ཕྱག་མཚན་རྡོ་རྗེ་ཕྲ་བར་བསྒོམ། །རྡོ་རྗེའི་འོད་འཕྲོ་གསལ་བར་འབར་ནས། །ཚུར་དབྱིངས་སུ་སླར་ཡང་བསྡུ་ནས། ནི་རྡོ་རྗེ་ལ་བསྟིམ་པར་བྱ་རྡོ་རྗེ་འོད་དུ་ཞུ་བ་ལས། དེ་ཉིད་རྡོ་རྗེ་སེམས་དཔའི་སྐུར་གྱུར་པས། །སྐུ་ཤིན་ཏུ་ཕྲ་ཞིང་རྒྱན་དང་འདུས་པར་བསྒོམ། །དེ་བཞིན་སྐུ་ཕྲ་མོ་དེ་འཕྲོ་འདུས་པ་ལས་གཉིས་མེད་གསལ་གྱུར་ནས། །སྐུ་ཞལ་གཅིག་རྩ་བའི་ཕྱག་གཉིས་གཡས་རྡོ་རྗེ་གཡོན་དྲིལ་བུ་འོད་འབར་བསྒོམ། །དེ་བཞིན་ཉིད་དུ་གསལ་ཞིང་བརྟན་པར་འདྲིས་པར་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བསྒོམ་སྟེ་གཡས་དང་པོ། རྡོ་རྗེ་འཁོར་ལོ་རལ་གྲི་འབར། །གཡོན་བར་མ་རིན་ཆེན་པདྨ་ཐ་མ་དྲིལ་བུ་འབར། །ཡན་ལག་གི་ལྷ་ཕྲ་བའི་གཞལ་ཡས་གདན་དང་ལྡན་དང་བཅས་པར་སྒོམ་སྟེ། སྙིང་གར་གནས་གཅིག་ཡེ་ཤེས་སེམས་དཔའ་བསྒོམ། །སྤྱི་བོར་སྐུའི་ལྷ་དཀར་པོ་མགྲིན་པར་གསུང་དམར་པོ་ཙིཏྟ་ཐུགས་ཀྱི་ལྷ་མཐིང་ཀ་གནས་གསུམ་དུ། །དེ་ལྟར་བྱིན་རླབས་ཀ་ཝ་ཙ་རྡོ་རྗེ་གསུམ་བསྒོམ་པར་བྱ། །དབུ་ཡི་གནས་སུ་རིན་པོ་ཆེའི་ཁང་བུ་ལྔར་ཡི་གེ་ལྔ་རིགས་ལྔ ། ཡེ་ཤེས་ལྔའི་དབང་རྫོགས་པར་བསྐུར་བས་བརྒྱན་དབང་རྟགས་རིགས་ལྔའོ། །རྣལ་འབྱོར་པ་བློ་ཡི་ཤེས་རབ་ཆེ་ཆུང་གིས། །རིམ་གྱིས་པ་ལས་ཡང་ན་བློ་ཆེ་ན་ཕྱག་རྒྱ་ཆེན་པོའི་སྐུར་བསྒོམས་སྟེ། །སྙིང་པོ་བརྗོད་པ་ཙམ་གྱིས་ཆུ་ལས་ཉ་ལྡང་ཇི་བཞིན་དུ། །རྣལ་འབྱོར་པ་བདག་ཉིད་ཕྱག་རྒྱ་ཆེན་པོ་སྟེ། །ཞལ་གསུམ་ཕྱག་དྲུག་ཕྱག་མཚན་གོང་དུ་མཐུན་པར་རྟག་ཏུ་བསྒོམ། །གཞལ་ཡས་གདན་སོགས་སྔ་མ་བཞིན་ཏེ་འདིར་ཙིཏྟ་དུ་སྒོམ། ཡན་ལག་ལྷག་པའི་ལྷ་དགུ་ཡང་གོང་གི་དེ་བཞིན་ལ་འདི་ཅི་ལྟར་དུ་བསྒོམ་པ་ཡིན། དེ་ལ་ཤིན་ཏུ་འདྲིས་ཤིང་བསྒོམས་པར་བྱ། །སྲིན་པོ་རཀྴའི་ཁྲོ་བོ་ཆ་ལུགས་འཛིན་པ་དང་། །རིམ་གྱིས་སྒོམ་པ་དང་ཅིག་ཆར་དུ་སྒོམ་པ་ཞི་བ་སྔོན་བཞིན་དུ་སྒོམ་ཏེ། །རྡོ་རྗེའི་ཆོ་ག་གསུམ་གྱི་བསྐྱེད་པ་ཁ་དོག་དང་། །གཞལ་ཡས་དང་སྟན་ལ་སོགས་ཞི་བ་ལ་ཁྲོ་བོར་བསྒྱུར་ཏེ་བསྒོམ། །དེ་ཡང་ཐུགས་ཀྱི་རིགས་བཛྲ་ཧེ་རུ་ཀ་ལས་གཞན་རིགས་བཞི་ལ་མོས་པའང་། །རིགས་བཞིའི་ཡི་གེ་འབྲུ་བཞིས་སྦྱངས་ཏེ་རིགས་བཞིར་སྒོམ་གདན་དང་གནས་གཞལ་ཡས་ཁང་གཅིག་བྱེ་བྲག་སོ་སོའི། རྡོ་རྗེ་སྟེ་ཆོ་ག་རྣམ་གསུམ་རང་རང་གི་རིགས་སུ་བསྒྱུར་ཅིང་། ཁྲོ་བོར་སྐུ་དང་ཡན་ལག་གི་ལྷ་བསྐྱེད་པའང་བསྒྱུར་བ་གོང་གི་དེ་བཞིན་ནོ། །རིམ་པས་བློ་ཆུང་བ་ཐོབ་པའམ་བློ་ཆེ་བས་ཅིག་ཆར་བ། །དེ་ལ་དང་པོ་ཡན་ལག་བརྒྱད་པ་བྱའི་མཐར་མཚམས་བཅད་བཤགས་པ་བྱ་དམ་བཅའ་བྱིན་ཕབ་དེ་ལྷར་བསྐྱེད་ལ། །ཕྱི་ནང་གི་མཆོད་པ་བྱིན་གྱིས་རླབས་དེ་ནས་ལྷའི་སྐུར་རིམ་པར་བསྒོམས་ཏེ། །ཡན་ལག་གི་ལྷ་དང་ལྡན་པར་ལྷའི་སྐུ་རྫོགས་པར་བསྒོམ་དེ་ནས་སྙན་གསན་དབབ་སྤྱན་དྲངས་བསྟིམ་བརྟན་པར་བཞུགས་སུ་གསོལ་བར་རིམ་པར་བཞིན་མཆོད་བསྟོད་བྱ། །སྔགས་ཀྱི་ཡན་ལག་མ་ཉམས་པར་སྔགས་བཟླས་པའང་། །སྐྱོན་བཅུ་སྒྲ་ཆེ་བར་མ་ཡིན། ཆུང་བར་མ་ཡིན། མགྱོགས་པར་མ་ཡིན། བུལ་བར་མ་ཡིན། ཞན་པར་མ་ཡིན། དྲག་པར་མ་ཡིན། ཡན་ལག་ཉམས་པར་མ་ཡིན། གླལ་བར་སོགས་པས་བར་དུ་ཆོད་པ་མ་ཡིན། གདུག་པའི་སེམས་རྣམ་པར་སྤང་བའོ། །ཡང་ན་ཡིག་འབྲུ་མ་ཉམས་པ་མིང་ཚིག་གིས་བར་མ་ཆོད་པས། དབུགས་ཀྱི་མ་འདེབ་པ་སེམས་གཞན་དུ་མ་ཡེངས་པའོ། །སྤངས་ཏེ་རྣམ་གསུམ་ཕྱི་ནང་གསང་བ་སྟེ་འོག་ཚོགས་སྒྲུབ་ན་སྟོན་གྱིས། །བཟླས་པ་གྲངས་དམ་བཅས་པ་བཞིན་རྫོགས་པར་བྱ། །ཏིང་ངེ་འཛིན་གྱི་སྤྲོ་བསྡུས་བདག་དང་གཞན་གྱི་དོན་རྫོགས་པར་བྱའོ། །ཕྱི་ལྟར་དང་ནང་ལྟར་གསང་བ་ལྟར་གང་མོས་སུ་ལྷ་དང་བདག་དབྱེར་མེད་རྡོ་རྗེ་སེམས་དཔའ་ལ་བསྒྱུར་རོ། །བཟླས་པའི་ཚད་རྟགས་དང་གྲངས་ཀྱི་ཚད་དུ་ཕྱིན་སྐྱོལ་བར་བྱ། །ལྷ་སྒོམ་དུབ་ན་ཐུགས་རིན་ཆེན་ཟུར་བརྒྱད་ཀྱི་ནང་དུ་རྣམ་པར་མི་རྟོག་པའི་ཡེ་ཤེས་ཐུགས་ཀྱི་ས་བོན་ཐིག་ལེ་ལ་བལྟ། །རིག་པ་གཏད་ལ་བཞག །ནུབ་མོ་དེའི་ངང་ལ་ཉལ་བས་ནང་པར་ལངས་པ་དང་དེ་ཉིད་ལས། །ཡེ་ཤེས་ཐིག་ལེ་ཡི་གེ་འབྲུ་ཧཱུྃ་སོགས་ཆོ་ག་གསུམ་གྱི་བསྒྱུར་ཏེ་ལྷའི་སྐུར་རྫོགས་པར་བསྒོམ་པས་ནི། སྔོན་གོང་དུ་བརྟེན་པ་བཞིན་བརྩོན་འགྲུས་བྱས་ཤིང་བསྒོམ་པས་འདྲིས་པར་བྱའོ། །གཞལ་ཡས་ཁང་དང་ལྷ་ཡི་དཀྱིལ་འཁོར་སྒོམ་པ་ཡང་། །རང་སེམས་ཀྱི་ཆོ་འཕྲུལ་རིག་པ་རང་སྣང་ཡིན་པའི་ཕྱིར། །ལྷ་ཡང་ཡུལ་དུ་དམིགས་ནས་མེད་དེ་རང་རིག་པར་ཉིད། །ཕྱག་རྒྱ་གཞི་རྫོགས་པའི་རྒྱལ་བའི་སྐུ་དེར་རིག་པ་རང་སྣང་བའོ། །ཐུན་མོང་གི་རྒྱལ་བའི་ཐུན་མོང་མ་ཡིན་པ་རྒྱལ་བ་རྣམས་ཀྱི་སྐུ། །དུས་དང་གནས་སྐབས་ཀུན་ཏུ་ནོར་བུ་རིན་ཆེན་ལྟ་བུ་སྟེ། །ཡོན་ཏན་ཐམས་ཅད་ལྷུན་གྱིས་རྫོགས་སུ་ཡོད་པ་འདི་ལ་ཕན་གདགས་འདི་ལ་ཕན་མི་གདགས་ཅེས་རྟོག་པ་མེད་པར་གདུལ་བྱའི་རེ་བ་སྐོང་། །ཡོན་ཏན་ཟད་པ་དང་འཕེལ་བ་མེད་དེ་འགྲོ་འོང་མེད་པ་དང་ཐུགས་རྗེ་ལ་ཉེ་རིང་མེད་པའོ། །ལྷའི་སྐུ་ཕྱག་རྒྱ་བསྒོམ་པའི་ཚེ་རེས་འགའ་གསལ་བར་ཡོད་རེས་མེད་རེས་སྐྱོན་ལས་གྲོལ་རེས་མ་གྲོལ། །ཅི་ལྟར་རིག་པ་བདག་ཉིད་ཆེན་པོ་ཡིན་པའི་ཕྱིར་དགོངས་པ་ལ་ཕྱོགས་རིས་མེད་ཅིང་སྤྱོད་པ་ལ་བླང་དོར་མེད་དོ། །བྱིང་བ་དང་རྒོད་པའི་དབང་དུ་མ་སོང་བར་སྙོམས་ཙམ་སྟེ་དགོངས་པའི་ངང ལ་མཉམ་པར་བཞག་པ་སྟེ་དོན་དམ་ངེས་པའི་ཚིག་ཏུའོ། །མི་མཐུན་པའི་སྐྱོན་གཅིག་པ་འདི་བསྒོམ་པའི་ཚེ་དམིགས་གཟུང་བ། །དང་པོ་ཡི་གེ་ལ་སེམས་སྦྱང་བ་ནས་བཟུང་སྟེ་ལྷའི་སྐུ་རྫོགས་པར་བསྒོམ་པའི་བར་དུ། །ཐུན་མོང་གི་སྐྱོན་རྣམས་ཀུན་ཏུ་འབྱུང་ཡང་འདི་ན་མི་འབྱུང་སྟེ་རགས་ཕྲ་ཙམ་འབྱུང་། ཐ་མ་ཕྱག་རྒྱ་གཅིག་པ་འདི་ལ་ཤེས་བཞིན་གྱི་བྱ་ར་བ་དང་སོ་མཐས་བཅད་པའོ། །ཁྱད་པར་རབ་རིབ་མོག་མོག་གྲིབ་ཁ་དོག་མ་གསལ་བ་ལྟ་བུ་སྟེ་མི་གསལ་ནག་ཐམ་མེ་བ་དང་། གང་དུ་ཆེད་དུ་དམིགས་ལ་ཆེ་ཆུང་གི་ཚད་འགྱུར་བ་དང་བཞུགས་ཚུལ་འགྱུར་བ་དང་། ལྷ་གྲངས་འགྱུར་བ་དང་ཞི་ཁྲོ་ལ་སོགས་ཆ་ལུགས་མདོག་དབྱིབས་འགྱུར་བ་དང་། །དང་པོ་ལམ་གྱི་གསལ་ནས་ཁ་དོག་འབའ་ཞིག་ཏུ་རིམ་པར་ནུབ་སྟེ་མི་གསལ་བའོ། །དེ་ལྟར་འགྱུར་བ་ཐུན་མོང་གི་སྐྱོན་དབང་དུ་སོང་བ་རྣམ་ཤེས་བཞིན་བྱ་ར་བ་དང་ཚོར་བར་བྱས་ཏེ། །འདུ་བྱེད་རྣམ་རྟོག་གི་རླུང་གིས་བསྐྱོད་པར་མི་བྱའོ། །དེ་ལྟར་ཁྱད་པར་གྱི་སྐྱོན་ངོས་ཟིན་པས་དེ་དག་ཀུན་ནི། ཁྱད་པར་གྱི་སྐྱོན་གསུམ་ལའང་ཡེ་ཤེས་སྒྱུ་མ་དང་དེ་ཉིད་སྟོང་པའི་ངང་ལ་འདུག་གོ །དེའི་རྗེས་ལས་བསྒོམ་ཐོབ་པར་བྱ་སྟེ། མ་སུན་པར་འདུག་ཚར་ཚུལ་གྲངས་མདོག་དབྱིབས་ཆ་ལུགས་དྲུག་ལ་རི་ལྟར་གཏོས་ཆེ་གདོས་ཆེར་བྱ་སྟེ་དངོས་པོའམ་བེམ་པོ་ལྟར་བསྒོམ་པས་སེལ་ལོ། །བདུན་པ་ཁ་དོག་མ་གསལ་ན་དབྱིབས་ནི་རང་གི་ལུས་དང་བསྲེ་བར་བྱའོ། །རིམ་ཀྱང་བརྒྱད་པ་ནུབ་ལ་སྤྱི་མིན་བྱེ་བྲག་གསལ་བ་ལ། གནས། །ཕྱག་རྒྱ་གཅིག་པའི་སྐབས་འདིར་བྱ་བ་མིན་པའི་ལས་ཀུན་དོར་བར་བྱས་ཏེ་སྤངས་ལ། སྤྱོད་ལམ་གྱི་སྐྱོན་རྣམས་ངོས་ཟིན་པར་བྱས་ལ་གཏང་བར་བྱ། །དེ་ཏིང་སྟོང་པ་དང་ཡེ་ཤེས་སྒྱུ་མ་གཉིས་ལ་སེམས་ཞུགས་ཤིང་ཉམས་སུ་མྱོངས་མེད་ཀྱི་ཕྱག་རྒྱ་གཅིག་པ་ལ་ཡང་། གོམས་པས་འཕེལ་བའང་སྔ་མ་བཞིན། །གཡོ་བ་ལ་ནང་རྟགས་སྨིག་སྒྱུ་ལྟ་བུ་ཐོབ་པ་ལ་དུ་བ་ལྟ་བུ་སྒོམ་པ་ལ་སྲིན་བུ་མེ་ཁྱེར་ལྟ་བུ། བརྟན་པ་ལ་མར་མེ་རླུང་གིས་མ་བསྐྱོད་པ་ལྟ་བུར་མཐར་ཕྱིན་པ་ལ་མཁའ་ལ་ཉི་མའི་ཚུལ་དང་སྦྱར། །གཡོ་ཐོབ་ལ་བརྩོན་པ་དང་བཅས་པའི་གོམས་པ་བརྟན་ལ་རྩོལ་པ་དོར་བའི་མཐར་ཕྱིན་པའི་བཏང་སྙམས་སྟེ་བཏང་སྙོམས་རིམ་དང་བརྩོན་པ་དག །སྐབས་ཀྱིས་བླང་དོར་གོང་ལྟར་ཉམས་ལས་ཤེས་པར་བྱའོ། །ཡི་གེ་འབྲུ་ཧཱུྃ་ལས་ཁྲོ་བོ་བཞིར་བསྐྱེད་ལ་དུས་བཞི་རྟག་ཏུ་མཚམས་ལྟེ་བར་ཧཱུྃ་ལས་གཤིན་རྗེ་གཤེད་སྨུག་ནག་ཞལ་གཅིག་ཕྱག་གཡས་བེ་ཅོན་ཎི་མགོས་མཚན་པ་གཡོན་དགྲ་སྟྭ་སྙིང་གར་ཧཱུྃ་ལས་སྟོབས་ཆེན་དུད་ཁ་རྡོ་རྗེ་ཐོ་གཏུན་མགྲིན་པར་ཧཱུྃ་ལ་རྟ་མགྲིན་དམར་ནག་སྤུ་གྲི་ཞགས་པ་སྤྱི་བོར་ཧཱུཾ་ལས་བདུད་རྩི་ལྗང་ནག་རྒྱ་གྲམ་མོ། །བཅད་དེ། །ཆོས་ཀུན་རང་བྱུང་ཡེ་ཤེས་ལ། བདག་ཉིད་ཆེན་པོའི་ལོངས་སྤྱོད་ཚོགས་མཆོད་བྱ་རང་ལུས་ལྷའི་དལ་དུ་ཆོས་ཉིད་ལ་ཆོས་ཉིད་རོལ། ནང་གི་སྦྱིན་སྲེག་ལ་སོགས་ཚོགས་ལུང་གི་གཞུང་ནི་བླང་བར་བྱ། །གཟུགས་སྒྲ་དྲི་རོ་རེག་བྱ་ཆོས་སོགས་གཉིས་མེད་ཐིག་ལེའམ་ཡང་ན་འདོད་ཡོན་གྱི་ལྷ་མོ་དྲུག་རོལ། དབང་པོ་རྣམས་བཞི་སེམས་དཔའ་དང་ཡུལ་དུས་སེམས་མ་དང་ཐབས་ཤེས་གཉིས་སུ་མེད་པའི་སྦྱོར་བ་བྱ། །ཞི་ཁྲོ་གང་ཡིན་གནས་སྐབས་ཀྱིས་བསྒྱུར། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །སྤྱོད་ལམ་འགྲོ་བ་དང་འདུག་པ་དང་ཉལ་བ་དང་སྡོད་པ་དང་ལོངས་སྤྱོད་དང་། །ཉོན་མོངས་ལ་སོགས་པའི་སྤྱོད་ལམ་ལ་ཆགས་པ་སྡུག་བསྔལ་བྱུང་བའི་ཚེ་ན་ཡང་། །ཐེག་ཆེན་ལྷའི་སྐུ་ཕྱག་རྒྱ་མི་སྤངས་ཏེ། །སྔོན་བཞིན་ལྷ་བསྒོམས་ཞིང་དབང་པོ་ཡུལ་དུས་ཀྱི་སྦྱོར་བས་ལྷ་མྱུར་དུ་འགྲུབ། །དེ་ཏིང་ཀུན་ཏིང་གཉིས་རྒྱུ་འབྲས་མཚམས་སུ་བརྟགས་ཀྱི་སྦྱོར་བར་བྱེད་པའི་བར་སྐབས་ཀུན་ཏུ་ཕྱག་རྒྱ་གཅིག་པའི་སྐབས་སུ། སྒོམ་པ་མིན་པ་ཆོས་སྤྱོད་ལ་སོགས་པའི་སྤྱོད་ལམ་དགུ་ཡི་སྤྲོས་པ་དོར་བར་འགྲོ་བས། ཤེས་ཤིང་རྒྱུད་ལ་ལྡན་ཡང་བླང་བྱ་མིན་དེ་ཅིའི་ཕྱིར་ཞེ་ན། མཚན་མའི་གཡེང་བ་ཡིན་ཕྱིར་རོ། །སྐུ་གསུང་ཐུགས་རྡོ་རྗེ་གསུམ་བསྒོམ་པ་དེས་དམན་པ་རྣམས་ལ། ཕྱག་མི་བྱ་གལ་ཏེ་འཚལ་དགོས་ན་བླ་མ་ཡི་དམ་མདུན་དུ་བསྒོམ་མོ། །གཅིག་པ་ཕྱག་བྱའི་རྣལ་འབྱོར་སྤྱོད་པ་ལ། །ལྟ་བ་དང་ཏིང་འཛིན་དོན་དང་ལྡན་ཞིང་དམ་ཚིག་མ་ཉམས་དག་བྱས་ནས། །བརྩོན་འགྲུས་ཆེར་བསྐྱེད་དེ་བསྒོམ་ན་འབྲས་བུ་མྱུར་བར་འགྲུབ། །སྤྱོད་ལམ་ཐམས་ཅད་ལྷ་ལ་ལྷ་རོལ་བས་བསོད་ནམས་ཀྱི་ཚོགས་ཏེ། །སྤྱོད་ལམ་ཆགས་ཤིང་གཉིས་སུ་མེད་པ་ནི་ཡེ་ཤེས་ཀྱི་ཚོགས་རྫོགས་པའོ། །གཞན་གྱི་དོན་བྱ་བའི་ཕྱིར་འཕྲོ་འདུ་རིམ་པར་རྫོགས་པར་བྱ་ཞིང་། གདུལ་བྱ་རྐྱེན་དང་འཕྲད་པས་ཐུགས་རྗེས་ཡལ་བར་མི་འདོར་ཏེ། །སྤྲོས་པ་བསྒོམ་པའི་དུས་མིན་ཀྱང་གཞན་དོན་བྱ་བའི་ཕྱིར་སྤྲོས་པའང་མོས་པའི་སྒོ་ནས་ལེན། །གདུལ་བྱ་གང་དང་མཚམས་པར་དེའི་དོན་རྫོགས་པར་བྱེད་པའོ། །བདག་གི་དོན་བྱ་བའི་ཕྱིར་ཐུན་མོང་གི་དངོས་གྲུབ་དང་མཆོག་གི་དངོས་གྲུབ་རྣམས། །འདི་རྒྱ་གཅིག་ལ་བརྟེན་ནས་དངོས་གྲུབ་ལ་སྦྱོར་བས་ཐེ་ཚོམ་མེད། །ཕྱག་རྒྱ་གཅིག་པ་འདིའི་ཚེ་ལ་ས་གཞི་དང་འདྲ་བའི་དམ་ཚིག་ཀུན་རྒྱུད་ལ་ལྡན་མོད་ཀྱང་། ཁྱད་པར་གསུང་གི་སྒོ་ལ་ལྷག་པར་སྔགས་གསུམ་ཕྱག་རྒྱ་བཞི། ལྷུར་བྱ་ཞིང་། །ཕྱག་རྒྱ་ཆེན་པོའི་རྣལ་འབྱོར་དུ། །སྤྱོད་ཡུལ་ཐམས་ཅད་དུ་ཕྱག་རྒྱའི་ངང་ལས་མི་འདའ་བར་བསྡམ་པར་བྱ། །ཕྱིའི་དྲོད་དང་ནང་གི་དྲོད་དང་གསང་བའི་དྲོད་ཤིན་ཏུ་འཕེལ་བ་སྟེ། དེ་ཏིང་དང་ཀུན་ཏིང་ལ་ཐོབ་པ་དང་གོམ་པ་འདིར་བརྟན་པའི་ཆར་འགྱུར་པ་ཏེ། །ཕྱི་འདོད་ཡོན་ལོངས་སྤྱོད་ལ་ཞེན་པ་མེད་པ་དང་། །དབང་པོ་ཡུལ་དུས་ཀྱི་སྦྱོར་བ་ལ་སོགས་པ་ལྷ་རུ་གོམས་པ་དང་། །དབུགས་ཀྱི་རྒྱུ་བ་ཆད་དང་གསང་བ་བསྒོམ་གྱི་ཐུན་མཚམས་བྲལ། །དྲོད་ཀྱི་བྱེ་བྲག་ཀུན་དང་ལྡན། །རྟགས་ཆེན་གོམས་མཐར་མཚན་མ་སྨིག་རྒྱུ་དུ་བ་སྲིན་བུ་མར་མེ་ཉི་མ་ལྔ། །དངོས་སུ་མཐོང་བ་དང་རྡོ་རྗེ་ཀ་བ་ཙ་གསུམ་མཐོང་བ་དང་། ཟད་པར་གྱི། སྐྱེ་མཆེད་མཐོང་བ་མཚན་མ་སྟེ། །དངོས་གྲུབ་ཐོབ་པ་ནི་དང་པོའི་རྟགས་ཞེས་བྱ། །དམིགས་པ་རྒྱ་ཆེ་བའོ་མངོན་ཤེས་ཀྱང་། །གཡོ་ཐོབ་འབྱུང་བར་ཐེ་ཚོམ་མེད། །ལུས་དང་ངག་དང་སེམས་ཀྱི་མཐུ་སྟོབས་སུ་གྱུར་པའི་རྟགས་རྣམས་ཀྱང་། །འབྱུང་སྟེ། སྣང་ཀུན་བརྗོད་མེད་ཆོ་འཕྲུལ་བཞི་བྱུང་བའི་ཚུལ་གཡོ་བ་དང་ཐོབ་པར་བྱེད་པའོ། །གཞན་ཡང་སྔོན་བས་ཏིང་ངེ་གཉིས་གསལ་ལ་ངོ་བོ་བརྟན་པ་ནི། རྣལ་འབྱོར་ལྷག་པའི་དབྱེར་མེད་བསྒོམ་པ་སྟོབས་ཀྱིས་འཐོབ། །རྨི་ལམ་སྤྱོད་ལམ་ཉིད་དུ་དགེ་བ་དང་མི་དགེ་བ་ལེགས་ཉེས་ཀུན། །སྔོན་ནས་གསལ་བར་ཐེ་ཚོམ་མེད་པར་འབྱུང་ཞིང་ཤིན་ཏུ་བརྟན་པ་སྟེ། ལྷའི་བསམ་གཏན་ལ་བརྩོན་འགྲུས་ཀྱིས་འབད་པས་དང་བཟླས་པ་ཡིས། །སྒྲུབ་པ་པོས་ནི་རྟག་ཏུ་མཐོང་བ་སྟེ། རྣལ་འབྱོར་བདག་སངས་རྒྱས་ཀྱི་སར་མཐུ་དང་མཚུངས་པར་མཐོང་བ་དང་གཅིག །ཡང་དག་པར། སངས་རྒྱས་ལོངས་སྤྱོད་རྫོགས་པའི་སྐུ། །བདག་ཏུ་འཛིན་པ་མེད་པར་ནི་མྱུར་དུ་མཐོང་བ་དང་གཉིས། སེམས་དཔའ་ཆེན་པོ་ཁམས་གསུམ་ན་གནས་པས། །བདག་ལ་མཆོད་པ་བྱེད་པར་དེས་མཐོང་ངོ་། །ཡེ་ཤེས་ཆེན་པོའི་འོད་དང་འདྲ་བའི་གཟུགས། །སངས་རྒྱས་དང་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །བདག་ལ་དུས་རྟག་ཏུ་མཆོད་པ་བྱེད་པར་མཐོང་བ་དང་བཞི། དཔལ་རྡོ་རྗེ་སེམས་དཔའ་གཟུགས་ཆེན་དང་། །སྲིད་པ་གསུམ་དུ་གྲགས་པ་ཆེན་པོར་གྱུར་པ་གསང་བདག་ཕྱག་ན་རྡོ་རྗེ་མཆོག་གི་གཟུགས་དག་ཏུ། །རྨི་ལམ་དག་ན་རང་གཟུགས་ཀྱང་དེ་དང་མཚུངས་པ་མཐོང་། །སངས་རྒྱས་ཀྱི་ཞིང་དུ་གྲགས་ཆེན་ཕྱག་ན་རྡོ་རྗེ་གསང་བ་དང་ལྷུན་གྱིས་གྲུབ་པའི་རིག་འཛིན། ས་བཅུའི་བྱང་ཆུབ་སེམས་དཔའ་ཆོས་ཀྱི་འཁོར་ལོ་བསྐོར་བ་ཅན། །སངས་རྒྱས་ཆེན་པོ་རྣམས་ཀྱིས་བདག་ལ་ཕྱག་བཙལ་བའི། །རྨི་ལམ་འདི་འདྲ་མཐོང་བར་གྱུར་པ་དང་ལྔ་ལུས་ངག་སེམས་ཀྱི་མཐུ་ལས་སྐྱེས་པ་དྲུག །དབུ་རྒྱན་ལ་སོགས་པ་རྣམས་ཐམས་ཅད་ཡོངས་སུ་རྫོགས་པའི། །ལྷ་ཡི་བུ་མོ་ཡིད་འོང་དང་། །ཁྱེའུ་དང་བུ་མོ་མཛེས་པ་དག་མཐོང་ན། །དེ་ནི་དངོས་གྲུབ་པར་འགྱུར་བའི་རྟགས་ཏེ་བདུན། ཕྱོགས་བཅུ་ན་བཞུགས་པའི་སངས་རྒྱས་ཐམས་ཅད་རྣམས། །རང་གི་ཞིང་ཁམས་ན་གནས་པ་ངེས་པར་མཐོང་བ་དང་། ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཅིག་ཅེས་པ་དང་ཡིད་དུ་འོང་བའི་གདམས་པ་མཐོང་བ་དང་བརྒྱད་ལས་སོགས། །སངས་རྒྱས་ཀྱིས་ཆོས་ཀྱི་འཁོར་ལོ་སྒྱུར་བའི་སྤྲུལ་པའི་སྐུ། །སེམས་ཅན་ཀུན་གྱིས་ཀྱང་ཆོས་ཀྱི་འཁོར་ལོ་ཡོངས་སུ་བསྐོར་བ། །སྒྲུབ་པ་པོ་བསམ་གཏན་རྡོ་རྗེ་ལ་གནས་པའི། །དམ་ཚིག་སྦྱོར་བས་མཐོང་བར་འགྱུར་བས་དགུ། སྣ་ཚོགས་ནོར་བུ་ཀུན་གྱི་དགའ་བའི་སྐྱེད་མོས་ཚལ་དང་། ལྷ་ཡི་བུ་ལ་སོགས་པས་བརྒྱན་དང་། དུས་གསུམ་གྱི་སངས་རྒྱས་ཀུན་གྱི་ས་བདག་ལ་བྱིན་གྱིས་རླབས་ལས། །བསམ་གཏན་ཏིང་ངེ་འཛིན་དམ་ཚིག་ཅན་གྱིས་མཐོང་བ་དང་བཅུ། སངས་རྒྱས་དང་བྱང་ཆུབ་སེམས་དཔའ་ཡིས། །དེ་ནི་བདག་ལ་མངོན་པར་དབང་བསྐུར་རོ། །རིག་འཛིན་བཞི་དང་རྒྱལ་པོ་ཆེན་པོ་བཞི་ཡིས། །བདག་ལ་མཆོད་པ་བྱེད་པར་དེས་མཐོང་ངོ་བཅུ་གཉིས། རྡོ་རྗེ་ཀ་བ་ཙ་ལས་བྱུང་བའི་མཐོང་སྣང་སྣ་ཚོགས་པའི། །རྨི་ལམ་དྲི་མེད་དག་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལ། །སྐྱེས་པ་བླ་ན་མེད་པའི་དངོས་གྲུབ་འགྲུབ་བཅུ་གསུམ། གདོལ་པ་ཁྱི་ཡི་ཟོས་པའམ་སྦྱོར་བ་བྱེད་པ་ནང་ན་འདུག་པ་ཞེན་པ་བརྩེ་བ་ལྷན་ཅིག་ཟ་བ་ལས་སོགས། །རྣལ་འབྱོར་པ་རྡོ་རྗེ་འཛིན་པས་མཐོང་ན་ནི། །བློ་ལྡན་རྡོ་རྗེ་སེམས་དཔའ་ཡི། །སེམས་ཀྱི་གནས་ནི་འགྲུབ་བར་འགྱུར། །རྨི་ལམ་དུ་བདག་གི་ལུས་ཡི་གེ་དང་ལྷའི་སྐུ་ཕྱག་རྒྱ་རྣམ་གཉིས་ཀྱིས། །སྐྱེ་མཆེད་ཐམས་ཅད་གང་བར་མཐོང་བའང་དེ་བཞིན་ནོ། །ཏེ་དོན་འགྲུབ་པར་འགྱུར་བ་དང་བཅུ་བཞི། ལྷ་ཡི་སྐུ་ནི་གསལ་བསྒོམ་ན། །བསོད་ནམས་ཚོགས་ཆེན་རྫོགས་པར་འགྱུར། །དེ་ཉིད་ཆུ་ཟླའི་ཚུལ་ཤེས་ན། །ཡེ་ཤེས་ཚོགས་ཆེན་རྫོགས་པར་འགྱུར། །བདག་ཉིད་ངོ་བོ་ཡེ་ནས་ལྷ་དང་མཉམ་པའི་དོན་ལ་བསྒོམ་ཞིང་སྦྱོར་བས། །ཐུན་མོང་གི་ཡོན་ཏན་སྐྱེ་ཆུང་ཡང་ཐུན་མོང་གི་དངོས་གྲུབ་འགྲུབ་པར་འགྱུར། །དེ་ཡང་ཡེ་ནས་བདག་དང་ལྷར་མཉམ་པ་དེ་ཉིད་བསྒོམ་ན་དངོས་སུ་སྦྱོར་བས་སུ། །ལྷ་ཉིད་དུ་ནི་རྟག་ཏུ་བསྒོམ། །ལྷ་གཅིག་བསྒོམ་ན་བདེ་གཤེགས་ཀུན་དང་མཉམ་སྦྱོར་བས། །ཉེ་བའི་དཀྱིལ་འཁོར་ཀུན་དང་མཉམ་པར་འགྱུར། །ཉེ་བའི་དཀྱིལ་འཁོར་ཀུན་དང་མཉམ་པའི་ཕྱིར། །འབྲས་བུའི་རྒྱལ་བའི་སྐུ་ལྔ་དང་གསུང་ལྔ་དང་ཡེ་ཤེས་ཐུགས་ལྔ་རྫོགས་ཤིང་འགྲུབ་པར་འགྱུར་རོ། །ཡི་དམ་ལྷ་ཡི་མཚན་ཉིད་ནི། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་རྡོ་རྗེའི་བདག་པོའི་ཕྱིར། །ཡི་དམ་ལྷ་སྤངས་དགེ་སྤྱོད་དོན་མེད་འགྱུར། །དམ་ཚིག་བསྲུང་དང་སྔགས་བཟླས་དང་། །ཕྱག་རྒྱ་རྒྱུན་མི་གཅོད་པ་དམ་ཚིག་ལས་དང་ཆོས་དང་ཕྱག་རྒྱ་ཆེན་པོ་བཞི། །དེ་ལྟར་དམ་ཚིག་པ་བསྲུང་ཞིང་ལྷ་བསྒོམ་པ་ལ་བརྩོན་འགྲུས་ཆེ་ཞིང་བརྟན་པར་བྱས་ལ་བཟུང་བའོ། །དེ་ལྟར་མ་ཡིན་ཏེ་རྣལ་འབྱོར་བརྩོན་འགྲུས་ཆུང་བ་ན། །འབྲས་བུ་མི་འགྲུབ་སྟེ་སླར་ངན་སོང་དུ་འགྲོ་བའི་ཉེན་ཡང་ཆེ་བར་གསུངས། །ཇི་ལྟར་རལ་གྲིའི་སོ་ལ་འཇུས་པའི་ཚེ་ནན་ཏན་དུ། །ཡུ་བ་ནས་ལེགས་པར་མ་བཟུང་ན་ལག་པ་གཅོད་པར་འགྱུར་བ། དེ་བཞིན་ནན་ཏན་མེད་པའི་གསང་སྔགས་པ། །འདི་ལ་ཕུང་སྟེ་ངན་སོང་དུ་འགྲོ་བའམ་ཡང་ན་ཕྱི་མ་བསྒྲུབ་པའི་འབྲས་བུ་མེད་པར། །སྐྱོན་དེ་བས་ན་ལྷ་བསྒོམ་པ་དང་སྔགས་ལ་བར་ཆད་དེ་བརྩོན་མེད་ན། །དཔེ་ན་ས་བོན་ཚིག་པ་ལས། །འབྲས་བུ་འདོད་པ་དང་འདྲ་སྟེ། །བསྒྲུབས་པའི་འབྲས་བུ་མཆོག་དང་ཐུན་མོང་ཡང་མེད་པར་འགྱུར་བ་དང་། མི་ཁོམས་པའི་གནས་བརྒྱད་ལ་སོགས་པ་འཁོར་བར་བརྒྱུད་པར་འགྱུར་རོ། །རྣལ་འབྱོར་པ་གང་ཞིག་ཡི་དམ་ལྷའི་ཞལ་མཐོང་བའི་ལྷ་ལ་མོས་པ་བྱས་པ་ཡིས། །ལྷ་ལ་བསྙེན་བསྐུར་བྱས་པ་དང་མཆོད་པ་བྱས་པའི་བསོད་ནམས་ཀྱིས། །མི་དགེ་བ་བཅུ་དང་མཚམས་མེད་པ་ལྔ་ལྔ་སྟེ་བཅོ་ལྔ་སོགས། །ལས་ངན་ཐམས་ཅད་རྩད་ནས་སྦྱངས་ཏེ་རིག་འཛིན་ལ་སྦྱོར་རོ། །རྣལ་འབྱོར་པ་ཕྱག་རྒྱ་གཅིག་བ སྒོམ་པ་གང་གིས་རང་མི་རྟག་སྟེ་འཆི་བར་མཐོང་ན་ཡང་། །ལྷའི་སྐུ་ཕྱག་རྒྱ་བསྒོམ་པའི་སྒོམ་པའི་ངང་ལས་མ་ཉམས་པར་ལྟ་བར་དང་ཏིང་ངེ་འཛིན་གསལ་བར་བཟུང་སྟེ་འདའ་བ་ནི། སྐུ་སྒོམ་པས་ལས་ཀྱིས་ངན་སོང་ལ་སོགས་སུ་མི་འཁེལ་བར་ཞིང་ཁམས་གང་འདོད་པའི་ཞིང་དུ་སྐྱེའོ། །སྙིང་ག་གསང་བའི་གསེར་སྒྲོམ་དུ་ཨ་ལས་རླུང་གི་ཡང་སྟོབས་ཀྱིས་བསྐུལ་བར་བྱ་སྟེ་སྤྱི་བོ་ནས་འོག་མིན་གྱི་གནས་སུ་རྡོ་རྗེ་སེམས་དཔའ་ཉིད་བཞུགས་པར་བསམ་ལ་ཐུགས་ཀར་འཕང་ངོ་། །ཐོད་རྒལ་བ་རྣམ་སྨིན་གྱི་རིག་འཛིན་ཐོབ་པ་ལ་ཐེ་ཚོམ་མེད། །འབྲས་བུ་འོན་ཏེ་ནའམ་འདི་ལ་མ་ཐོབ་ན་རིམ་པ་ཡིས། །རྣལ་འབྱོར་པ་དེ་ཉིད་ཀྱི་རྣམ་སྨིན་བར་དོ་ཕྱི་མའི་ལན་གྲངས་གཞན་ལ་ཐོབ་པར་ངེས་སོ། །ཚེ་ལ་དབང་བོ་ཡང་ཚེ་ཕྱི་མའི་དུས་ལ་ཐོབ་པའམ་ལན་གྲངས་གཞན་ལ་ཐོབ་པར་ངེས་སོ། །རྣལ་འབྱོར་ཞི་ཁྲོ་ཕྱག་རྒྱ་གཅིག་པའི་ཏིང་ངེ་འཛིན་ལས་སུ་རུང་རྣམས་ཀྱིས། །ལྷའི་སྐུ་ཕྱག་རྒྱ་ཆེན་པོ་རྫོགས་པར་འགྱུར་ཞིང་། །ཏིང་ངེ་འཛིན་གསལ་བའི་ཡིད་གཉིས་ཐེ་ཚམ་མེད་པར་འགྱུར་ན། །དཀྱིལ་འཁོར་ཆེན་པོ་འབར་བ་ཡི་གེ་འཁོར་ལོའི་ས་ཐོབ་པར་འགྱུར། །འདི་ལྟར་བཤད་པ་བཞིན་དུ་བསྒོམས་ཤིང་བསྒྲུབས་བྱས་ན། །འབྲས་བུ་ཚེ་འདི་ལ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མི་མཚན་བཟང་པོ་ཁྱད་པར་ཅན་རྫོགས་ཤིང་འཁོར་བའི་སྡུག་བསྔལ་སེལ་བར་བྱེད། སྤྲུལ་སྐུ་བདེ་གཤེགས་འཇིག་རྟེན་དུ་འབྱུང་བ་དང་མི་བཀོལ་བར་འགྱུར་ཞིང་འཕྲད་ལ། ཐེག་པ་དམན་པར་འཇུག་པར་མི་འགྱུར། །ཐེག་པ་མཆོག་གསང་སྔགས་བླ་ན་མེད་པ་བྱང་ཆུབ་གཟུངས་ལ་ཞུགས་པ་ཡིན། །དེ་བས་ལམ་འདི་འབྲལ་བར་མི་བྱའོ། །ཕྱག་རྒྱ་གཅིག་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། ༈ །།རང་གི་ཡིད་དམ་གྱི་ལྷ་ལ་ཕྱག་འཚལ་ཏེ། །ཕྱག་རྒྱ་གཅིག་པ་སྤྲོས་པའི་རྣལ་འབྱོར་ལྷ་དུ་མ་བཤད་པར་བྱ་སྟེ། ཕྱག་རྒྱ་གཅིག་སྤྲོས་པའི་གཞི་བོ་རང་ལུས་མདོ་བཅོ་ལྔར་བསྡུས་དེ་ལྟ་བུར། །བཞག་པས་དེ་རྒྱས་པར་དགྲོལ་བའི་ཕྱིར་ཡན་ལག་རྒྱས་པར་བཤད་པ་ལ། རྣལ་འབྱོར་པ་དེ་ཏིང་ཀུན་ཏིང་རྒྱ་གཅིག་པ་རྣམ་གསུམ་སྔོན་རྫོགས་ནས། །ས་ལས་སོགས་པ་ལ་ཕྱག་རྒྱར་བཅས་སྟེ། །དེ་ཡང་རི་མོ་དང་རུས་པ་ཤིང་ས་རཏྣ་སྟེ་རྒྱུ་བཞིའམ་རས་ཁང་ངོས་ཤོག་བུ་ཤིང་ལེབ་སོགས་ལ་འབུར་རམ་དངུལ་ཟང་ལྕགས་རཏྣས་བླུགས་པ་དང་། །འཇིམ་པ་ལས་བྱས་པ་ལ་སོགས་པའི་དཀྱིལ་འཁོར་ནི། །མཆོད་རྫས་ཕྱི་ནང་གསང་བ་ལྷག་པའི་གཟུགས་བརྙན་ཁང་བུ་དངོས་དལ་དང་བདུད་རྩི་བྷ་ལིང་རཀྟ་ལ་སོགས་པ། ཡེ་ཤེས་ཀྱི་བྱིན་རབ་གནས་ལྡན་པ་རྟེན་པར་བྱས། །མ་ཧཱ་ཆེན་པོ་བ་ལིང་གཏོར་མ་ཨ་མྲྀ་ཏ་བདུད་བརྩི། དམར་ཆེན་རཀྟ་ཕྱི་ནང་དུག་གསུམ་གསང་བའི་མཆོད་པ་རྣམས་དགྲམ། །རྔ་དུང་པི་ཝཾ་དྲིལ་བུ་རོལ་མོ་མཆོད་རྫས་འདོད་ཡོན་སོགས་རྒྱ་ཆེན་གཞལ་ཡས་ཀྱི་རྒྱན་དང་རྣལ་འབྱོར་ཡོ་བྱད་རྣམས། །ཇི་ལྟར་འོས་པ་བཞིན་བསྡུ་བར་བྱའོ། །ཐམས་ཅད་ཀྱི་སྔོན་དུ་མཚམས་བཅད་ཕྱི་མཚམས་ནི་རྒྱལ་པོ་ཆེན་པོ་བཞི་ཕྱོགས་བཅིང་བརྒྱད་ཀྱི་རིམ་པའི་ཆ་རྣམས་རྫོགས་པར་བྱས་ནས། །རང་ཉིད་ལས་ཀྱི་ལྷ་ཡི་མོས་པ་ཙམ་རྣལ་འབྱོར་གྱིས། །མཆོད་རྫས་བྱིན་གྱིས་བརླབ་པར་བྱ། །བདུད་བརྩི་ཆུས་བསངས་གཏོར་བྱ་ཞིང་བགེགས་བསྐྲད་སྟན་ལ་འདུག །རྒྱུ་བསོད་ནམས་ཀྱི་ཚོགས་དང་འབྲས་བུ་ཡེ་ཤེས་ཀྱི་ཚོགས་ནི་ཕུང་ཁམས་ལྷར་ཡོངས་སུ་རྫོགས་པར་བྱ་ཞིང་། །སྤྱོད་ཡུལ་ལྷའི་དལ་དུ་བྱིན་གྱིས་བརླབ་པ་དང་། །ཡི་གེ་འཁོར་ལོའི་ཚོགས་ཆེན་གྱི་ས་མཐར་དབྱུང་བ་དང་། །ཚོམ་བུ་ཚོགས་སྒྲུབ་ལ་སྤྲོས་པ་མཐར་ཕྱིན་པའི་དུས་ཀྱིས་ཚོགས་བསྒྲུབ་དགོས་པའི་ཕྱིར་བསྒོམ་པ་དང་། དགུག་པ་ནི་དབང་དུ་བསྡུ་བ་སྟེ་དགྲ་བགེགས་དགུག་པ་དང་ཡུལ་ཁམས་དབང་དུ་བསྡུ་བ་དང་གཟུགས་ལ་སོགས་པ་དགུག་པ་དང་བཏང་བ་ནི་དགྲ་ལ་ལྟས་བཏང་བ་དང་བགེགས་ལ་སོགས་པ་གཞན་དུ་མི་མཐུན་པའི་སྐྱོན་ལ་སོགས་པ་ཐམས་ཅད་ཕྱིར་བཏང་བའོ། །བཅིང་བ་ནི་གཅན་ཟན་གྱི་ཁ་གཅིང་བ་མ་མོའི་འཇིགས་པ་སོགས་པའོ། །དགྲོལ་བྱད་དུ་བཅུད་པ་དགྲོལ་བ་སྟེ་ཕྱི་རོལ་གྱི་གདུག་པའི་མཐུ་ཐམས་ཅད་དགྲོལ་བའོ། །གསོ་བ་ནི་ཕ་རོལ་གྱི་ནད་དང་རྨ་དང་རིམས་དང་མཛེ་ལ་སོགས་པའོ། །གསད་བ་ནི་དགྲ་བགེགས་ལ་སོགས་པ་གསད་པའོ། །དང་། །ཕ་རོལ་གྱི་གཡུལ་དང་བདུད་ཀྱི་དཔུང་ཕམ་པར་བྱེད་པའོ། །ཕམ་རྒྱལ་བ་ནི་རང་གི་ལུས་དང་དགོས་པ་ཐམས་ཅད་རྒྱལ་བར་བྱེད་པ་སྟེ་སྣང་བྱེད་ཀྱི་ཏིང་འཛིན་འདིས་བྱེད་ཕྱིར། །རྣལ་འབྱོར་པ་གང་དག་གདུལ་བྱ་ཇི་སྙེད་པ་རྣམས། སྤྲོས་པ་སོ་སོའི་ཕྲིན་ལས་ཀྱིས་གདུལ་བྱ་འཁོར་བ་ནས་འདོན་དགོས་པའི་ཕྱིར་རོ། །ཕྱག་རྒྱ་གཅིག་པ་བརྟེན་ནས་སྤྲོས་བཅས་ལ་བསླབ་པའང་རྣམ་པ་གཉིས་ཏེ། །རྗེས་སུ་མཐུན་པར་ཞི་བ་དང་ཁྲོ་བོར་སྤྲོས། དེ་གཉིས་རེ་རེ་ཡང་རིམ་ཅིག་ཆར་ཚུལ་གཉིས་ཀྱིས། །བློ་ཆེ་བ་ཅིག་ཆར་ཆུང་བ་རིམ་གྱིས་དང་ལྡན་པར་མཚམ་པར་སྟོན་པ་ཡིན། །སྔ་མ་རིམ་དང་ཅིག་ཆར་བར། །ཕྱེ་བས་ཕྱི་མ་བཞིན་འཇུག་པ་ནི། ནམ་མཁའ་ཉི་ཟླ་གཟའ་སྐར་དུས་གཅིག་ཏུ་གསལ་བ་དེ། ཆུ་དཀྱིལ་རྒྱ་མཚོ་དྭང་བར་གཟའ་སྐར་གསལ་བ་བཞིན་གྱིས། སྐུ་ཕྱག་རྒྱ་གསལ་བ་དེ་ཡང་སྐད་ཅིག་གིས་འོད་བཅས་པར་ལྷག་པར་གསལ་ཞིང་འོད་དུ་འབར། །དེ་ཡང་སྙིང་པོ་བརྗོད་པ་ཙམ་གྱིས་ལྷ་ཞི་བ་དྲན་རྫོགས་སུ་འཁོར་ལོར་ཤར། །དེ་སྔོན་བསྟན་པ་བཞིན་དུ་སྤྲོས་བཅས་ལ་རིམ་གྱིས་འཇུག་པ། །ལྟ་བ་མཐོང་བ་དང་སྔ་མའི་རྣལ་འབྱོར་སྟོབས་ཀྱིས། ཏིང་ངེ་འཛིན་སྔོན་དུ་ཐོབ་པས་ཤེས་བྱ་བཟོའི་རྣམ་པ་ལ་སློབ་པའི་ཚུལ་དུ། །ལྷ་དུ་མ་གཅིག་གིས་གོམ་པས་གསལ་བར་བྱེད་པའང་། །ཁྲོ་བོ་མ་བསྒྱུར་རྣལ་མ་ཞི་བའི་དཀྱིལ་འཁོར་ལ། །འཁོར་ལོ་སྤྲོས་པ་དང་ཚོམ་བུ་སྤྲོས་པ་དང་རྣམས་གྲངས་སྤྲོས་པ་དང་ཞལ་ཕྱག་སྤྲོས་པའོ། །དང་པོ་དལ་བསྡུས་པ་ལྷ་བཅོ་བརྒྱད་ནི་རིགས་ལྔ་ཡབ་ཡུམ་བཅུ་སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །འབྲིང་པོ་ལ་བཞི་བཅུ་གཉིས། །རྒྱས་པའི་དཀྱིལ་འཁོར་ལྷ་བརྒྱ་བཅུ་རྩ་གཉིས་ཀྱི་རིམ་པར་སློབ། །རིགས་ལྔ་རེ་རེ་ལ་རིགས་ཀྱི་གཙོ་བོ་བྱས་པས་ཡབ་ཡུམ་བཅུ་སྟེ་ལྔ་བཅུ་ཐམ་པའོ། །སེམས་དཔའ་སེམས་མ་བཅུ་དྲུག་སྟེ་དྲུག་ཅུ་རེ་དྲུག་དང་སྒོ་བ་ཡབ་ཡུམ་བརྒྱད་དེ་དོན་བཞི་ཀུན་བཟང་ཡབ་ཡུམ་ཐུབ་པ་དྲུག་སྟེ་བརྒྱད་ཅུ་རྩ་གཉིས་སོ། །གཉིས་པ་ཚོམ་བུ་ལ་བསླབ་པ་ནི་བདག་ཅག་རིགས་ཀུན་གྱི་བདག་པོ་རྡོ་རྗེ་སེམས་དཔའ་ཡུབ་ཡུམ་གཉིས་བསྒོམ་ལ། གནས་པའི་འཁོར་ལོ་གཞལ་ཡས་ཁང་གསལ་བར་བྱས་ཏེ། །དེའི་དཀྱིལ་དུ་གདན་སེངྒེའི་ཁྲི་དང་པདྨ་ཉི་ཟླ་གདན་གསུམ་བརྩེགས་གདན་དང་ལྡན་པར་བསམ་པ་དབུས་ན་རིགས་ཀྱི་བདག་པོ་རྡོ་རྗེ་སེམས་དཔའ་ཡབ་ཡུམ་གནས་པའོ། །དེ་ལ་སེམས་དཔའ་ཡབ་ཡུམ་བཞི་སྒོམ་སྒོ་བ་ཡབ་ཡུམ་བཞི་སྟེ་ལྷ་བཅོ་བརྒྱད་དེ་ཐུགས་ཀྱི་རིགས་རྡོ་རྗེ་སེམས་དཔའ་ལ་ཐུགས་རིགས་ཀྱི་སེམས་དཔའ་བསྐོར་ཏེ་ཤར་དུ་རྡོ་རྗེ་སེམས་དཔའ་དང་སེམས་མ། ལྷོར་རིན་ཆེན་དང་རིན་ཆེན་འབར་མ། ནུབ་ཏུ་རྡོ་རྗེ་ཆོས་རྡོ་རྗེ་སྡུད་མ། བྱང་དུ་རྡོ་རྗེ་ལས་དང་བསྐྱོད་མ་རྡོ་རྗེ་དང་ཁྲོ་བོ་སྒོ་བ་ཡབ་ཡུམ་བརྒྱད་ཀྱིས་བསྐོར། །ཚོམ་བུ་གཅིག་པ་བརྟན་ནས་གསུམ་པ་ནི་མདུན་དུ་སྐུའི་རིགས་རྣམ་སྣང་ཡབ་ཡུམ་ལ། ཤར་དུ་རྡོ་རྗེ་སེམས་དཔའ་དང་རྡོ་རྗེ་སྒེག་མོ། ལྷོར་རྡོ་རྗེ་རྒྱལ་པོ་དང་བཛྲ་པུཥྤེ་མ། ནུབ་ཏུ་རྡོ་རྗེ་ཆགས་པ་དང་ལྕགས་ཀྱུ་མ། བྱང་དུ་རྡོ་རྗེ་ལེགས་པ་དང་རྡོ་རྗེ་ཕྲེང་བ་མའོ། །ངོ་ནུབ་ཕྱོགས་རྒྱབ་སྐུ་གསུང་གི་རིགས་སྣང་མཐའ་ཡབ་ཡུམ་ལ། ཤར་དུ་རྡོ་རྗེ་ཆོས་དང་གིརྟི། ལྷོར་རྡོ་རྗེ་རྣོན་པོ་དང་བཛྲ་ཨ་ལོ་ཀེ། ནུབ་ཏུ་རྡོ་རྗེ་འཁོར་ལོ་དང་ལྕགས་སྒྲོག་མའོ། །བྱང་དུ་རྡོ་རྗེ་སྨྲ་བ་དང་རྡོ་རྗེ་གསལ་བཀྲ་མའོ། །དེའི་ཁ་ལ་ཐུབ་དྲུག་།ཀུན་བཟང་ཡབ་ཡུམ། སྒོ་བ་བཞི། ཕྱོགས་མཚམས་ཀྱི་ཁྲོ་བོ་ཡབ་ཡུམ་བཅུ་དྲུག་སྟེ་ལྔ་བཅུ་རྩ་བརྒྱད་དོ། །ཐུགས་ཀྱི་རིགས་རྡོ་རྗེ་སེམས་དཔའ་དབུས་ནས་ཞལ་ཤར་དུ་གཟིགས་པའོ། །དེ་ལྟར་གྲངས་འཁོར་ལོ་རྫོགས་པ་ནི་སྐུ་གསུང་ཐུགས་ཀྱི་དཀྱིལ་འཁོར་འབྲུ་གསུམ་གྱི་ༀ་ཨཱཿཧཱུྃ་བརྡའ་ལས་སྐྱེད་པའོ། །མི་ཡི་དབང་དུ་ལུས་ངག་ཡིད་གསུམ་གྱི་ཚོམ་བུ་གསུམ། །ཤིན་ཏུ་གོམས་ཤིང་འདྲེས་པར་བྱ་བ་ཡིན། །ཚོམ་བུ་གསུམ་པ་ལ་བརྟན་ནས་རྡོ་རྗེ་སེམས་དཔའ་ཡབ་ཤར་དུ་གཟིགས་པའོ། །གཡས་དང་གཡོན་ཉིད་དུ། །ཡོན་ཏན་ཀྱི་རིགས་རིན་འབྱུང་ཡབ་ཡུམ་ལ་ཤར་དུ་རྡོ་རྗེ་རིན་ཆེན་དང་རྡོ་རྗེ་ཕྲེང་བ་གཉིས། ལྷོར་རིན་ཆེན་གཟི་བརྗིད་དང་རྡོ་རྗེ་མེ་ཏོག་མ། ནུབ་ཏུ་རྡོ་རྗེ་རྒྱལ་མཚན་དང་རྡོ་རྗེ་ཞགས་པ་གཉིས། བྱང་དུ་རྡོ་རྗེ་བཞད་པ་དང་རྡོ་རྗེ་བདེ་བ་མའོ། །ཕྲིན་ལས་ཀྱི་རིགས་དོན་ཡོད་གྲུབ་པ་ཡབ་ཡུམ་ལ་ཤར་དུ་རྡོ་རྗེ་ལས་དང་རྡོ་རྗེ་གར་མ། ལྷོར་རྡོ་རྗེ་བསྲུང་བ་དང་རྡོ་རྗེ་དབྱུག་པ་མ། ནུབ་ཏུ་རྡོ་རྗེ་གནོད་སྦྱིན་དང་དྲིལ་བུ་མ། བྱང་དུ་རྡོ་རྗེ་ཁུ་ཚུར་དང་རྡོ་རྗེ་འབེབ་མའོ། །དེ་ལྟར་ལྔ་བཅུ་ཐམ་པ་དེའི་སྡེང་དུ་ཐུབ་པ་དྲུག་ཀུན་བཟང་ཡབ་ཡུམ་གཉིས་སྒོ་བ་ཡབ་ཡུམ་བཞི་ཁྲོ་བོ་ཡབ་ཡུམ་ཉི་ཤུ་སྟེ་བརྒྱད་ཅུ་རྩ་གཉིས་པོ་དེ་ལྟར་དཀྱིལ་འཁོར་བཞག །རྣལ་འབྱོར་དབང་དུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་བསྒྲུབ་པའི་ཚོམ་བུ་ལྔ། །ཤིན་ཏུ་གཡོས་ཤིང་འདྲིས་ནས་དུས་ཚོད་སྦྱར། །གསུམ་པ་རྣམ་གྲངས་སྤྲོས་པ་ནི་རྩ་བའི་སྐུ་རྡོ་རྗེ་སེམས་དཔའ་ཡབ་ཡུམ་ཉིད་དུ། །བརྟན་པས་སྐུའི་རིགས་རྣམ་སྣང་གསུང་གི་རིགས་སྣང་མཐའ་འཁོར་མེད་པའི་གཙོ་བོར་གསལ་བར་འབྱུང་། ལྷ་གསུམ་གསལ་ཞིང་ཏིང་ངེ་འཆོར་བ་མེད་ན་ཡོན་ཏན་གྱི་རིགས་རིན་འབྱུང་ལས་ཀྱི་རིགས་དོན་གྲུབ། ལྷ་ལྔ་རྫོགས་པར་ཡབ་ཡུམ་ཟུང་ལྡན་དུ་བསྒོམ་ལ་བརྟན་ནས། །རིགས་ལྔ་པའི་དོན་ཡན་ལག་སྤྲོས་པ་བཞི་བཅུ་རྩ་གཉིས་བསྒོམ། དེ་ཡང་ཡེ་ནས་རྟོགས་ཚོགས་ལྷའི་ངོ་བོ་ཡིན་པས་དེ་སུས་ཀྱང་མ་བཅོས་རང་བཞིན་ངང་གིས་གནས་པ་ལ། །ཏིང་ངེ་འཛིན་གྱི་ཡེ་ཤེས་ལྷག་པའི་དཀྱིལ་འཁོར་བསྒོམ། །གོང་རྩ་བའི་ལྷ་རྡོ་རྗེ་སེམས་དཔའ་ལ་ཡན་ལག་བཞི་བཅུ་རྩ་གཉིས་ལྡན་པར་བསྒོམ་སྟེ་མི་བསྐྱོད་པ་ཡབ་ཡུམ་གྱི་རྟོག་པའི་གནས་སུ་ཡབ་ལྔ་སེམས་དཔའ་བརྒྱད་སྒོ་བ་ཡབ་བཞི་ཐུབ་པ་དྲུག་སྟེ་རྩ་གསུམ་དང་ཡུམ་གྱི་བཅུ་བདུན་དུ་བསྒོམ་བྱེ་བྲག་ཏུ་ཡན་ལག་གི་ལྷ་བཞི་བཅུ་ལ་སྐུ་གསུང་ཐུགས་ཀྱི་ལྷ་གསུམ་གསུམ་སྟེ་བརྒྱ་ཉི་ཤུ་ཡེ་ཤེས་སེམས་དཔའ་རེ་རེ་སྟེ་བཞི་བཅུ་ཐམ་པ་བསྣན་པས་བརྒྱ་དྲུག་ཅུ། དེ་ཉིད་ཡན་ལག་སྤྲོས་པའི་རྩ་བའམ་བདག་པོ་ཡིན་སྟེ། །བཞི་བཅུ་རྩ་གཉིས་གཞི་མ་ཐབས་ཀྱི་ལྷ་བཞི་བཅུ་སྟེ་གཉིས་བརྒྱའོ། །གསུམ་ཀྱི་ཡན་ལག་གི་ལྷ་བཞི་བཅུ་ལ་སྐུ་གསུང་ཐུགས་ཀྱི་ལྷ་གསུམ་གསུམ་ལ་སྐུ་གསུང་ཐུགས་ལྷ་འཕྲོ་བར་འགྱུར། །དེ་ལྟར་སྟངས་དཔྱལ་གཉིས་ཀྱི་མི་ཟད་པའི་རྒྱན་གྱི་ལྷ་ནི་ཐུགས་ཡེ་ཤེས་ཀྱི་ལྷ་མ་ཡིན་པ་ལ་དབུ་རྒྱན་གྱི་ལྷ་ལྔ་ལྔ་བརྩིས་པས་སངས་རྒྱས་སྟོང་གི་དལ་དུ་འགྱུར་རོ། །དེ་ཡང་ཐུགས་ཡེ་ཤེས་སེམས་དཔའ་བཞི་བཅུ་ལ་དབུ་རྒྱན་མེད་བརྒྱ་དྲུག་ཅུ་ལ་དབུ་རྒྱན་རིགས་ཀྱི་ལྷ་ལྔ་ལྔ་བརྩིས་པས་བརྒྱད་བརྒྱའོ། །གཞིའི་གཉིས་བརྒྱ་སྟེ་ཡན་ལག་གི་ལྷ་སྟོང་ངོ་། །ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཐམས་ཅད་ཀྱི་ཆོ་འཕྲུལ་ཡིན་པས་གཞལ་ཡས་ཁང་ཏིལ་འབྲུའི་ཚུལ་བཞིན་དུ་རྩ་བའི་ལྷ་ཆེར་མ་སོང་ཡན་ལག་གི་ལྷ་ཆུང་དུ་མ་སོང་། དཔེ་བྱད་མཚན་གྱིས་རྒྱན་པར་སྤྲས་ཏེ་བཞུགས་པའོ། །དེ་ལྟར་གཙོ་མཆོག་ལ་སྟོང་དང་ལྡན་པར་བྱས་ནས། །དེ་བཞིན་བྱ་བྱེད་དང་རིགས་བཞི་སྟོང་སྒོམ་སྟེ་ཀུན་བཟང་ཡབ་ཡུམ་དང་རིགས་བཞི་ལ་སྟོང་སྟེ་སྟོང་དྲུག་བསྒོམ་པར་བྱ། །སེམས་དཔའ་ཡབ་ཡུམ་ཟུང་བརྒྱད་སྒོ་བ་ཡབ་ཡུམ་ཟུང་བཞི་དང་བཅུ་གཉིས་ལ་སྟོང་ཚོ་བཅུ་གཉིས་ཐུབ་པ་དྲུག་གི་སྟོང་དྲུག་འོད་འཕྲོ་འབར། །དེ་ལྟར་བརྩིས་པའི་ཉི་ཁྲི་བཞི་སྟོང་དུས་གཅིག་ལ་གསལ་བའོ། །ཕྱོགས་བཅུ་མ་ལུས་པ་རྣམས་གཞལ་ཡས་ཁང་དུ་གསལ། ཉི་ཟླ་གཟའ་སྐར་གདན་དང་བརྒྱན། །བདེར་གཤེགས་དཀྱིལ་འཁོར་མ་ལུས་བསྒོམ། །བསམ་ཡས་ལྷུན་གྲུབ་ཉིད་ལ་སློབ། །བཞི་པ་ཞལ་ཕྱག་ལ་བསླབ་པ་ནི་དང་པོ་ཚོམ་བུ་གཅིག་ཞལ་གསུམ་ཕྱག་དྲུག་བསྒོམ། གཅིག་པ་ལ་བརྟན་ནས་ཚོམ་བུ་གསུམ་པའང་དེ་བཞིན་ཏེ་ཞལ་གསུམ་ཕྱག་དྲུག་ཏུ་བསྒོམ། དེ་ལ་བརྟེན་ནས་ཚོམ་བུ་ལྔ་པའི་རྗེས་སུ་མཐུན་པར་ཞལ་གསུམ་ཕྱག་དྲུག་དེ་ལ་གོམས་ཤིང་བརྟན་ནས། །རྣམ་གྲངས་སྤྲོས་པའི་ལྷ་རྣམས་ཀྱང་རིམ་པ་བཞིན་ཞལ་གསུམ་ཕྱག་དྲུག་རྫོགས་པར་གསལ་བར་བསྒོམ་པའོ། །ཞི་བ་ལ་ཁྲོ་བོར་དོན་བཞི་བཞི་ཞི་བ་བཞིན་བསྒྱུར་བའི་འཁོར་ལོའང་དཀྱིལ་འཁོར་ཚོམ་བུ་རྣམས་གྲངས་ཞལ་ཕྱག་སྤྲོས་པ་དེ་བཞིན་ཏེ། དང་པོ་ཁྲོ་བོ་བསྡུས་པ་ལྔ་བཅུ་རྩ་བརྒྱད་བསྒོམ་སྟེ་གོམས་ཤིང་བརྟན་ནས། །དེ་ལ་ཁྲོ་བོ་བཅུ་བསྣན་ཏེ་དྲུག་ཅུ་རྩ་བརྒྱད་དེ་བཞིན་ཏེ། །ཞི་བ་ལྟར་དཀྱིལ་འཁོར་རྒྱས་པ་ལ་བརྒྱ་རྩ་བརྒྱད་སྒོམ་སྟེ་རེ་རེ་ལ་རིགས་ཀྱི་གཙོ་བྱས་པའི་བཅུ་བཅུ་བསྒོམ་པའི་ལྔ་བཅུ་གནས་ཡུལ་སྒོ་བ་ཉི་ཤུ་བསྣན་པས་བདུན་ཅུ་ཁྲོ་བོ་བཅུ་སྟེ་བརྒྱད་ཅུ་དབང་མོ་ཉེར་བརྒྱད་དེ་བརྒྱ་རྩ་བརྒྱད་དོ། །དེ་ནས་དང་པོ་ཚོམ་བུ་གཅིག་པ་ལ་དབུས་ཀྱི་ཧེ་རུ་ཀ་བཞི་པོ་ལ། །རིགས་ཀྱི་ཁྲོ་བོ་ཡབ་ཡུམ་བརྒྱད་ཀྱིས་བསྐོར་བ་བཅུ་དང་། དབང་མོ་ཉེར་བརྒྱད་ཡན་ཆད་བསྣན་པས་ལྔ་བཅུ་རྩ་བརྒྱད་དེ་དེ་ལ་བརྟན་ནས་ཚོམ་བུ་གསུམ་པ་ལ། སྐུའི་རིགས་བྷུདྡྷ་ཧེ་རུ་ཀ་ཡབ་ཡུམ་གྱི་གཙོ་བྱས་པའི་ཁྲོ་བོ་ཡབ་ཡུམ་བཅུ་གསུང་གི་རིགས་པདྨ་ཧེ་རུ་ཀ་ཡབ་ཡུམ་གྱིས་གཙོ་བྱས་པའི་ཁྲོ་བོ་ཡབ་ཡུམ་བཅུ་སྟེ་སུམ་ཅུ་ཐམ་པའོ། །དེ་ལྟར་མདུན་དུ་རྒྱབ་ཁྲག་འཐུང་གསལ་བར་བསྒོམ། དེ་ལ་བརྟེན་ནས་འཁོར་དབང་མོ་ཡན་ཆད་དང་བཅས་པར་བཛྲ་ཧེ་རུ་ཀས་ཤར་དུ་གཟིགས་པ་བསྒོམ། །དེལྟར་ཚོམ་བུ་གསུམ་པ་སྐུ་གསུང་ཐུགས་ལ་བརྟན་བྱས་ནས། །གཡས་སུ་དང་གཡོན་དུ་ཡོན་ཏན་ཀྱི་རིགས་ཁྲོ་བོ་རཏྣ་ཧེ་རུ་ཀས་གཙོ་བྱས་པའི་ཁྲོ་བོ་ཡབ་ཡུམ་བཅུ་ལས་རིགས་ཀརྨ་ཧེ་རུ་ཀས་གཙོ་བྱས་པའི་ཁྲོ་བོ་ཡབ་ཡུམ་བཅུས། དེ་ལྟར་ཡབ་ཡུམ་རྣམས་གསལ་ནས་འཁོར་ལོའི་ལྷ་ཚོགས་རྣམས་བསྒོམ་སྟེ་གནས་ཡུལ་སྒོ་མ་དབང་མོ་ཉེར་བརྒྱད་དེ། རྫོགས་པར་བསྒོམ་པ་རིམ་བཞིན་དུ་དགུ་ཅུ་གོ་བརྒྱད་ཁྲོ་བོ་བཅུ་སྟེ་བརྒྱ་རྩ་བརྒྱད་དེ་ལྟར། གསལ་བྱས་མ་སུན་པར་ཇེ་གསལ་ཇེ་གསལ་དུ་གྱེན་དུ་འཕར་བར་བརྟེན་པར་བསྒོམ་པར་བྱའོ། །ཞི་བ་དང་རྗེས་སུ་མཐུན་པར་འཇིགས་བྱེད་ཁྲོ་བོའི་རྣམ་གྲངས་ཀྱང་། །བཛྲ་གཅིག་ནི་རྡོ་རྗེ་རིགས་དང་གཉིས་བྷུདྡྷ་དང་གསུམ་གསུང་པདྨ་བཞི་རཏྣ་ཡོན་ཏན་ལྔ་ཀརྨ་ལས་ཀྱི་རིགས། ཡབ་ཡུམ་གསལ་བ་མཐར་ཕྱིན་འཁོར་ལོའི་ཆས་ཕྱེ་བས། ཕོ་བྲང་གི་ལྷ་ལྔ་བཅུ་ཚོམ་བུ་དང་གནས་ཡུལ་ཀོ་རི་བརྒྱད་སིདྷ་བརྒྱད་དང་། །སྒོ་མ་དང་སླས་དབང་མོ་དང་ཧཱུྃ་ཆེན་ཁྲོ་བོའི་དཀྱིལ་འཁོར་རྒྱས་པ་བཅུ་སྟེ་བརྒྱ་རྩ་བརྒྱད་དོ། །ཡན་ལག་གི་ལྷ་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱད་དང་། །དགུ་བཅུ་ལྷ་རྣམས་ཡན་ལག་ལྡན། །ཞེས་པས་དེ་ལས་འཕྲོས་པས་སྟོང་བཞི་བརྒྱ་ལྔ་བཅུ། དེ་ལ་གཉིས་བརྒྱ་དགུ་བཅུ་ནི། རྩ་བའི་ལྷ་ལྔ་བཅུ་རྩ་བརྒྱད་ལ་སྐུ་གསུང་ཐུགས་ཀྱི་ལྷ་སོ་གསུམ་བརྩིས་པས་མི་ཟད་རྒྱན་གྱིས་འཁོར་ལོའི་བརྒྱ་དང་བདུན་ཅུ་དོན་བཞི་ཐབས་ཀྱི་ལྷ་ལྔ་བཅུ་རྩ་བརྒྱད་ལ་ཐུགས་ཡེ་ཤེས་སེམས་དཔའ་རེ་རེ་སྟེ་ལྔ་བཅུ་རྩ་བརྒྱད་དེ་གཉིས་བསྡམ་པ་ལ་བརྒྱ་དང་བཅུ་དྲུག་གོ། །དེ་ལྟར་བརྒྱ་ཕྲག་གཉིས་པོ་ཡར་བཞག་སྟེ། ལྔ་བཅུ་རྩ་བཞི་དང་། བཅུ་དྲུག་ལ་དགུ་བཅུའོ། །དེ་ལ་སྟོང་བཞི་བརྒྱ་ལྔ་བཅུ་ནི། ལྷ་གཉིས་བརྒྱ་དགུ་བཅུ་ལ་ཡེ་ཤེས་སེམས་དཔའ་མ་གཏོགས་པ་གཉིས་བརྒྱ་སུམ་ཅུ་རྩ་གཉིས་ལ་དབུ་རྒྱན་གྱི་ལྔ་ལྔ་བྱས་པས་གཉིས་བརྒྱ་ལ་དབུ་རྒྱན་གྱི་ལྷ་གཅིག་སྟོང་། སུམ་ཅུ་སོ་གཉིས་ལ་དབུ་རྒྱན་གྱི་ལྷ་གཅིག་བརྒྱ་དྲུག་ཅུ་དེ་ལ་གོང་གི་ལྷ་གཉིས་བརྒྱ་དགུ་བཅུ་བསྣན་པས་བཞི་བརྒྱ་ལྔ་བཅུ་སྟེ་གཅིག་སྟོང་བཞི་བརྒྱ་ལྔ་བཅུའོ། །དེ་བཞིན་དུ་རིགས་ལྔ་གནས་ཡུལ་སྒོ་མ་ཉི་ཤུའོ། །དབང་མོ་ཉེར་བརྒྱད་དེ་ལྔ་བཅུ་རྩ་གསུམ་ལ་སྟོང་བཞི་བརྒྱ་ལྔ་བཅུར་བརྩིས་པས་བདུན་ཁྲི་དང་དྲུག་སྟོང་བརྒྱད་བརྒྱ་ལྔ་བཅུ་ཐམ་པ་ཡོད་དོ། །ཞལ་ཕྱག་སྤྲོས་པ་ནི་དང་པོ་ཞལ་གཅིག་ཕྱག་གཉིས་དེ་ལ་ཞལ་གསུམ་ཕྱག་དྲུག་དང་། །དེ་ནས་དབུ་དགུ་དང་ཕྱག་བཅོ་བརྒྱད་ཀུན་དང་ཕྱག་མཚན་ལྡན། །དེ་ནས་དབུ་ཉི་ཤུ་རྩ་གཅིག་ཕྱག་བཞི་བཅུ་རྩ་གཉིས། །དབུ་དགུ་ཕྱག་བརྒྱ་སྟོང་བརྒྱད་བརྒྱ་དེ་ལྟར་ཞབས་ཕྱག །གྲངས་མེད་པའི་བར་དུ་སློབ་པར་བྱེད་པ་ནི། བློའི་རིམ་པའི་ཐབས་སུ་བརྗོད་ཀྱི་སྤྲོས་བཅས་དང་པོ་སྤྱོད་ཡུལ་དུ་སློབ་པ་ནི། །དབུ་ཉི་ཤུ་རྩ་གཅིག་ཚེ་དབང་དང་། དགུ་བརྒྱ་ཕྱག་ཆེན་དང་། །གྲངས་མེད་ལྷུན་གྲུབ་མཐར་ཕྱིན་ཟག་མེད་རིམ་པར་ལྡན། །དེ་ལྟར་གསལ་བའི་ཏིང་འཛིན་རིམ་གྱིས་བསྒོམ་པ་ནི། དངོས་པོ་ཞུགས་བར་དུ་སློབ་པ་མཐར་ཕྱིན་པའི་སྐབས་སུ། ཡེ་ཤེས་ལྷ་རྣམས་རང་བཞིན་ཡུལ་ནས་སྙན་གསན་དབབ་སྤྱན་དྲང་པར་བྱ་སྟེ། །གཉིས་སུ་མེད་པར་གཞུག་བཅིང་བརྟན་པར་བཞུགས་སུ་གསོལ་བ་སོགས་ལྡན་པར་བྱས་ཏེ། །དེ་ནས་ཕྱག་ལ་སོགས་པའི་མཆོད་པ་དང་རྫས་དང་ཏིང་ངེ་འཛིན་གྱིས་རིམ་བཞིན་དུ་མཆོད་པར་བྱས་ནས། བསྟོད་པ་བྱ་སྨོན་ལམ་གདབ་པ་དང་ལྡན་ནས་འཛབ་བསྙེན་པ་དང་ཚོགས་བྱ་བའོ། །བར་སྐབས་སུ་ལྷག་མ་ལ་དབང་བའི་གནས་རེ་བ་བསྐང་ནས། །དང་པོའི་དམ་བསྒྲགས་ཕྲིན་ལས་བཅོལ་ཞིང་རང་བཞིན་གྱི་གནས་སུ་སོ་སོའི་ལས་ལ་དགྱེ། །འདི་ལ་འཁོར་ལོ་བསྡུ་ཞིང་ལུས་བསྲུང་གོ་བགོ་སྤྱོད་ལམ་རྒྱུན་གྱི་ཏིང་ངེ་འཛིན་ཀུན། །ཁྲོ་ཞིའི་མན་ངག་གི་གཞུང་བཞིན་དུ་བྱ། །ཕུང་ལྔ་ལ་སོགས་པ་ས་ཏིའི་དཀྱིལ་འཁོར་རིག་པ་ལྷར་སྣང་བ་ལ། རྒྱ་མཚོའི་ནང་ན་ཉི་ཟླའི་གཟུགས་བརྙན་སྣང་བ་ཇི་བཞིན་དུ། །ཀུན་ཕྱི་ནང་གི་དངོས་རང་རིག་པའི་ལྷར་གསལ་བ། །གཅིག་དང་དུ་མ་ཡོད་ཀྱིས་མེད། །རྟོགས་ཚོགས་ལྷའི་དལ་དུ་གསལ་བས་ལྷག་མཐོང་ལ་ཡུལ་དང་ཡུལ་ཅན་གཉིས་མེད་མི་གཡོ་བ། །རྣལ་འབྱོར་བསྒོམ་པའི་ཏིང་ངེ་འཛིན་གྱིས་ངོ་བོར་རྒྱལ་བས་སངས་རྒྱས་ཀྱིས་གསུངས་བའོ། །རང་བཞིན་གྱིས་སྤྲོས་པས་རང་བཞིན་གྱི་སྣང་བྱེད་དང་རྣལ་འབྱོར་སྤྲོས་པས་སྣང་བྱེད་ཏིང་ངེ་འཛིན་གྱི་སྣང་བྱེད། དེ་ཡང་གདུག་འདུལ་ཁྲོ་བོ་སྤྲོས་པ་དང་ཞི་བ་གཉིས་སྤྲོས་པ་སྟེ་རེ་རེ་ལའང་། འཁོར་ལོ་སྤྲོས་དང་ཕྱག་རྒྱ་སྤྲོས། །ཚོམ་བུ་སྤྲོས་དང་ཞལ་ཕྱག་སྤྲོས་པའོ། །ཀུན་ནས་སྤྲོས་པའི་ཕྱིར་དང་འབྲས་བུའང་དབྱེར་མེད་པ་སྤྲོས་པའོ། །དེ་ལྟར་སྤྲོས་པས་ཉམས་སུ་མྱོང་ཞིང་གསལ་བ་ནི་རྣལ་འབྱོར་ཏིང་ངེ་འཛིན་གྱི་སྒྲའོ། །དོན་ཏེ་ངོས་འཛིན། སྤྲོས་པའི་བསྒོམ་པ་འདི་ཚེ་དམན་པའི་དང་ཉན་ཐོས་ལས་ཀྱི་ལེ་ལོ་རྣམ་པ་གཉིས་དང་། །དུ་བ་སོགས་མཚན་མ་ལྔ་དངོས་སུ་མཐོང་བ་ལ་བདེན་པར་འཛིན་པ་དང་། །རྣལ་འབྱོར་བདུད་ཀྱི་སྤྱོད་ཡུལ་བཅོ་བརྒྱད་མཐོང་བའང་འབྱུང་སྟེ། སངས་རྒྱས་ཀྱི་སྤྲུལ་པ་གྲངས་མེད་པའི་འཇིག་རྟེན་དུ་འགྱེད་པ་མཐོང་བ་དང་གཅིག །བདག་གཞན་གྱི་ནང་ནས་དམ་པར་འདུན་པར་མཐོང་བ་དང་གཉིས། བདག་ལ་བྷུདྡྷ་བྷོ་དྷི་སཏྭ་ཐམས་ཅད་ཀྱིས་དམ་པར་བསྟོད་ཅིང་སྨྲ་བར་མཐོང་བ་དང་གསུམ། རྒྱལ་བས་གསུངས་པའི་ཆོས་ཀུན་མངོན་དུ་གསལ་བར་མཐོང་བ་དང་བཞི། དུས་གསུམ་གྱི་ཆོས་ཀུན་སྐད་ཅིག་མ་ལ་གསལ་བ་ཤེས་ཤིང་མཐོང་བ་དང་ལྔ། རྒྱུད་དྲུག་གི་ལམ་དང་གནས་ཀུན་མཐོང་བ་དང་དྲུག །དེ་ལ་སྙིང་རྗེ་ཤུགས་འབྱུང་དང་བདུན། སྣོད་བཅུད་ཀུན་ཀྱང་ཉིན་མཚན་མེད་པ་གསལ་བར་མཐོང་བ་དང་བརྒྱད། རི་བྲག་ལ་སོགས་པ་ཅི་ལའང་ཐོགས་པ་མེད་པར་འགྲོ་བ་དང་དགུ །ནམ་མཁའ་ལ་བྱ་བཞིན་དུ་འགྲོ་བ་དང་འདུག་པ་དང་བཅུ། རྒྱལ་བས་ཕྱག་བརྐྱངས་ནས་བདག་གི་མགོ་ལ་བྱུགས་ཏེ་ལུང་སྟོན་པ་དང་བཅུ་གཅིག། འགྲོ་བ་ཀུན་གྱི་སྐད་དུ་ཆོས་སྨྲ་བ་དང་བཅུ་གཉིས། ཕྱི་སྣོད་ནང་བཅུད་བསྟི་གནས་སུ་མཐོང་བ་དང་བཅུ་གསུམ། སྟོང་གསུམ་ལག་མཐིལ་ལྟར་མཉམ་པར་བཀོད་པ་དང་བཅུ་བཞི། དེ་ཉིད་རང་བཞིན་སེམས་ཉིད་དུ་གསལ་བར་སྣང་བ་དང་བཅོ་ལྔ། ས་ཏི་ལས་སུ་རུང་བའི་སེམས་ཅན་གྱི་དོན་ཐོགས་པ་མེད་པ་དང་བཅུ་དྲུག །དམ་པའི་དོན་ཐར་པའི་ལམ་ལ་བསྒོ་བ་བྱེད་པ་དང་བཅུ་བདུན། འཇིག་རྟེན་གྱི་གཙོ་བོ་ལྷ་སྲིན་སྡེ་བརྒྱད་ཀྱིས་བདག་ལ་མཆོད་པ་འབྱུང་བ་རྣམས་ཏེ་བཅོ་བརྒྱད་དོ། །སེམས་ཉིད་རང་སྣང་དུ་རང་བཞིན་རྟོགས་ན་དམ་པའི་རྟགས། །དེ་ལྟར་མི་ཤེས་པར་སེམས་དགའ་བྲོད་ཕྱོགས་འཛིན་བྱེད་པ་བདུད། །འཇིག་རྟེན་གྱི་ཁེ་དང་གྲགས་པས་སེམས་ཕྲོགས་པ་དང་། །འཇིག་རྟེན་པས་བསྔགས་པ་ཐོབ་པས་ན་དེའི་རྗེས་སུ་འདུ་འཛི་དང་མཚན་མས་སེམས་གཡེང་བ་དང་། འབྲས་བུ་ཐོབ་ཏུ་རེ་བ་དང་མ་ཐོབ་ཀྱི་དོགས་པ་ཅུང་ཟད་ཡོད་པ་དང་། ང་ལྟ་བུ་མེད་སྙམ་པའམ་ང་ཆེ་བ་ཞེས་ཆེ་བས་ང་རྒྱལ་འཕེལ་བ། ཐ་མལ་པ་ཡང་གྲངས་ཉུང་ལ་ངོ་བོ་ཕྲ་བ་ལས་མི་འབྱུང་། དབུགས་རྒྱུ་བའི་དང་གཟུང་འཛིན་གྱི་དབང་དུ་སོང་མ་སོང་དང་ཏིང་ངེ་འཛིན་བྱེ་བྲག་ཤེས་པར་བྱའོ། །རྒྱུ་ཤེས་པ་ལྟ་བ་དང་འཇུག་པ་རྐྱེན་ཏིང་ངེ་འཛིན་ལ་འབྱོར་པས་ས་ཏི་འགོ་སྤྲོས་བཅས་སྣང་བ་རྣམ་འབྱེད་ཀྱི་ཏིང་ངེ་འཛིན་ཐོབ་ཅིང་། །ཟུང་དུ་འབྲེལ་པས་ཉམས་ལེན་བསྐྱེད་མཐར་ཕྱིན། །འབྲས་བུ་ལམ་དུ་ཤེས་ཤིང་ཏིང་ངེ་འཛིན་བརྟན་པ་ཡིན། །ཆེད་དུ་བྱ་བ་མེད་པའི་བརྩོན་འགྲུས་བླངས། །མཚན་མ་ལྔ་ལ་སོགས་བཅོ་བརྒྱད་རང་རིག་པའི་ཆོ་འཕྲུལ་ལས་བྱུང་བ། །སེམས་ཉིད་ཡིན་པའི་ཕྱིར་ཡོན་ཏན་མཐོང་ལ་རེ་དོགས་མེད་དོ། །དཔེར་ན་ནམ་མཁའི་དྭངས་བ་རང་བཞིན་ལ། །ཉི་ཟླ་གཟའ་སྐར་གློག་འགྱུ་དང་། །འཇའ་ཚོན་སྤྲིན་མང་འཁྲུག་འགྱུར་ཡང་། །ནམ་མཁའ་དབྱིངས་ལ་གཞན་དུ་འགྱུར་ཞིང་སྙམ་པ་མེད་པ་དེ་བཞིན་དུ། ཆོས་ཀྱི་དབྱིངས་ཉིད་བསམ་ཡས་པར། །སྐུ་དང་གསུང་དང་ཡོན་ཏན་ཕྲིན་ལསོགས་པ་རྨད་དུ་བྱུང་བའི་ལྟས་ངོ་མཚར་དང་། །བདུད་ཀྱི་སྤྱོད་ཡུལ་མཚན་མ་སྣ་ཚོགས་པ་ཇི་ལྟར་སྣང་བར་གྱུར་ཡང་། །ཆོས་ཉིད་དེ་བཞིན་ཉིད་ལ་ཉམས་པ་དང་གཞན་དུ་འགྱུར་བ་མེད། །རྣལ་འབྱོར་པའི་ཏིང་ངེ་འཛིན་སྟོབས་ཡོན་རྫོགས་འགྱུར་ཡང་། །བདག་གཉིས་མེད་པར་ཞེས་ཤིང་རྟོགས་པ་ང་རྒྱལ་མེད། །མདོར་ན་བདུད་ཀྱི་སྤྱོད་ཡུལ་དང་མཚན་མ་སྣ་ཚོགས་གང་མཐོང་ཡང་། །རང་བྱུང་གི་ཡེ་ཤེས་རང་སྣང་ཉིད་དུ་རྟོགས་ཤིང་སྦྱར་བར་བྱའོ། །སྣང་བྱེད་སྤྲོས་པའི་ཉམས་འཕེལ་བའི་རིམ་པ་ནི། སྤྲོས་པ་བསླབ་པའི་ཚོམ་བུ་ལ་སོགས་རིམ་པ་ཇི་བཞིན་ཏེ། །རྒྱ་གཅིག་ལ་སྔོན་བརྟན་མོད་ཀྱང་འདིར་སྣང་བྱེད་སློབ་པས། །མ་གོམས་པའི་དབང་གིས་ཉམས་རྣམ་པ་ལྔའོ། །དལ་ལ་ཚོམ་བུ་གསུམ་པ་དང་ལྔ་པའི་ལྷ་གསལ་བར་ཅུང་ཟད་ཙམ་ཡོད་པ་གཡོ་བའི་ཉམས་ཏེ། དེ་ལ་རྐྱེན་གྱི་བར་ཆད་འབྱུང་བའང་དང་པོའོ། །དེ་ལྟར་ལྷ་གསལ་ཐུན་གཅིག་ལ་བཞིའི་རེ་བཅད་པ་ཆ་གསུམ་ཏིང་ངེ་འཛིན་གསུམ་དུ། །གསལ་བ་མི་གཡོ་བ་གཉིས་པ་སྟེ་ཐོབ་པའི་ཉམས། ཐུན་བརྐྱང་ན་ཐུན་དུ་བསྒོམ་ནུས་ཤིང་གསལ་བར་གྱུར་པ་གསུམ་པའོ། །དེ་ཉིད་མི་མཐུན་པའི་རྐྱེན་དབང་དུ་མི་འགྲོ་བར་གསལ་བ་ནི། བཞི་པའོ་བསྟན་པའི་དུས་ཁྱད་པར་བསྒོམ་པའི་ངང་ལ་གང་གནས་པ། །ཤིན་ཏུ་གསལ་ཞིང་མི་འཕྲོག་པ་ནི་ལྔ་པ་མཐར་ཕྱིན་པའི་ཉམས་སྟེ། །དེ་ཡང་གྲངས་ལ་ཉམས་ཀྱིས་དངོས་སུ་སྦྱར་ན་མཐར་ལམ་པར་ཐལ་བར་གྱུར་ཏེ། སྐྱོན་དེ་བས་ན་རྣམ་གྲངས་ལ་སོགས་པའི་ཉམས་ཚོད་ཟིན་པ་གཅེས་ཏེ་ཚོམ་བུ་ལྔ་པ་མན་ཆད་བསྒོམ་ནུས་པའོ། །རྣལ་འབྱོར་ཆེན་པོའི་སྤྲོས་བཅས་བསྒོམ་པའི་ལྟ་སྤྱོད་ནི། །ཇི་ལྟར་སྤྱད་ཀྱང་སྤྱོད་པའི་དུས་ཉིད་ན་རང་བཞིན་མེད། །དཔེར་ན་མཁའ་ལ་བྱ་ཆེན་ལྡིང་བ་གཡང་མི་ཟ་བ་བཞིན། །ཆུ་ལ་རྐྱལ་ཆེན་འཕྱོ་བ་ཉམ་མི་ང་བ་བཞིན། །རྣལ་འབྱོར་སྣང་བྱེད་ཀྱི་ལྟ་བ་དེ་ལྟར་ལྟ་བ་དང་སྤྱོད་པ་ཉམ་ང་བ་མེད་པར་ལྟ། །རྣལ་འབྱོར་ཆེན་པོའི་སྤྱོད་པ་ནི། །ཆོས་རྣམས་ཐམས་ཅད་ཀུན་ལ་སྤྱོད་བྱ་སྤྱོད་བྱེད་དབྱེར་མེད་པ་དེ་ལྟར་སྤྱོད། །ཏིང་ངེ་འཛིན་བདེ་བའི་རོ་མཆོག་མྱོང་བར་འགྱུར་ཏེ། །མྱོང་བ་དེ་ལ་སུ་ཞིག་ཆགས་པར་བྱེད། །སྤྱོད་བཞིན་མ་ཆགས་པས་ཡེ་ཤེས་ཀྱི་ཚོགས་ཆེན་རྫོགས་པ་ཡིན། །ཏིང་ངེ་འཛིན་གྱི་བདེ་བའི་མཆོག་མ་འགགས་པ་ཉིད་བསོད་ནམས་ཀྱི་ཚོགས་ཆེན་ཡིན། སྤྱོད་པ་ཅི་སྤྱོད་དེ་ལྟ་བུ་ཡི་ངང་དུ་སྤྱོད། །འདི་ནི་སྤྱོད་པ་རླབས་ཆེན་ཡིན། །ལྟ་བ་དང་སྤྱོད་པ་ཡ་ཆར་ཏེ་ལྟ་སྤྱོད་འབྲེལ་མ་གྱུར་པར། །སྔགས་འཆང་རྣམས་གྱིས་དུས་རྟག་ཏུ་སྤྱོད། །མི་སྤང་ལྔ་དང་དུ་བླང་བ་ལྔ་ཁྱད་པར་བྱ་བ་ལྔ་འདོད་ཡོན་ལྔ་ཏེ་ལྔ་ཚན་བཞི་འོག་མ་སྤང་བྱ་དང་སྨད་སྤྱོད་པ་ཀུན། །ལྟ་བ་དང་ཐབས་ཀྱིས་ཟིན་པའི་རྣལ་འབྱོར་པ་བདག་དང་གཞན་གྱི་དོན་ཡོངས་སུ་རྫོགས་པར་བྱེད་པའི་ཕྱིར་འཇོལ་ཉོག་སྤྱོད་སྟེ། །སྤྱོད་པ་ཡན་གང་ཡང་བྱས་ལ་སྐྱོན་གྱིས་མ་ཐོགས་ཤིང་སླར་ལ། ཚོགས་གཉིས་རྫོགས་པར་འགྱུར་ཞིང་དཔེར་ན་འདམ་སྐྱེས་བཞིན་སྤྱོད་པའི་དུས་ཉིད་ན་གང་གིས་ཀྱང་མ་གོས་པ་ཐབས། །ལག་ལྔ་དབང་པོ་བཞི་དང་རྣམ་ཤེས་བཞི་པ་དང་ཀུན། །རྣམ་སྨིན་གྱི་རྟོག་པ་ཡི་གེ་ༀ་དུ་ཤེས་པར་བྱ་སྟེ། ཞི་བ་རྫོགས་པའི་དཀྱིལ་འཁོར་རྣམས་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་མཛེས་པ་སྒྲ་དྲི་རོ་རེག་ལས་མཆོད་པའི་ཡུམ་སོགས། །རྣམ་སྨིན་ལས་སོགས་པ་མུཾ་དུ་ཤེས་པར་བྱ། །ཞི་བ་ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་རྣམས་བསྒོམ། །ཕྱི་ནང་གིས་སྤྱོད་ཡུལ་ཀུན་ལྷ་དང་ལྷ་མོ་རོལ་ཅིང་སྤྱོད། འདོད་པའི་ཡོན་ཏན་རྣམས་ལྔ་པོ་ཐམས་ཅད་དང་། །ཕྱི་ནང་གི་སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་ཡང་ན་རྡོ་རྗེ་སེམས་དཔའ་དཀྱིལ་འཁོར་དང་། །གཟུགས་ལ་སོགས་མཛེས་མཆོད་པའི་ཡབ་ལྷ་དང་ཡུམ་ལྷ་མོར་བརྟག་ཤེས་པར་བྱེད། སྣང་བ་སྤྱོད་ཡུལ་ཐམས་ཅད་ཀུན་ཏུ་བཟང་པོ་ཡི་ངང་ལས་མ་གཡོས་པར། འདོད་པའི་ཡོན་ཏན་ལྔ་རྣམས་ལ། །ཐོགས་པ་མེད་པར་རང་སྣང་དུ་སྤྱད་པར་བྱ་སྟེ། །དེ་ཉིད་བསོད་ནམས་དང་ཡེ་ཤེས་ཀྱི་ཚོགས་ཆེན་རྫོགས་པའི་ལམ་ཡིན་པར་བརྟག །དེ་བཞིན་གཤེགས་པའི་ངོ་བོ་རང་བཞིན་ལྔར་ཡང་བརྟག་ཅིང་ཤེས་པར་བྱ། གཞན་ཡང་སྟོང་གསུམ་འཇིག་རྟེན་ཁམས་ཐམས་ཅད་ན་སྲིད་ཚད། རང་གསལ་བས་ཤེས་རབ་ཡེ་ཤེས་མཐའ་དབུས་མེད་པ་དབྱིངས་དང་འདོད་པའི་ཡོན་ཏན་ལྔ་རྣམས་ལ། སྣང་བྱེད་བློ་རབ་འབྲིང་ཐ་མ་ཐམས་ཅད་ཆོས་ཉིད་དང་ལྷ་ལ་རོལ་ཞིང་སྤྱད། །དང་དུ་བླང་བ་ལྔ་དང་མི་སྤངས་བ། །རྣལ་འབྱོར་པ་ཡིས་རྟག་ཏུ་སྤྱོད། །འདོད་ཡོན་ལྔ་ལ་སྤྱོད་པའི་དུས་ཉིད་ན་ཆགས་པ་མེད་པར་གྱུར་པ་དང་། །དངོས་གྲུབ་ཡ་མཚན་ཐུན་མོང་མཆོག་ཆེན་པོ་ནི། །དམ་ཚིག་མདོ་རྩ་བ་བཅོ་ལྔ་བཤད་ནང་ནས་འབྱུང་། །ཕྱི་ནང་གི་སྤྱོད་ཡུམ་མཐོང་བ་དང་ཐོས་པ་ཐམས་ཅད་ཀུན། །དང་། འགྲོ་བ་དང་འཇུག་པ་དང་ཉལ་བ་ན། །ལྷའི་དཀྱིལ་འཁོར་ཞི་ཁྲོ་གཉིས་ཀྱི་རྣལ་འབྱོར་ལས་ལྟ་བ་དང་ཏིང་ངེ་འཛིན་ལས། མ་ཉམས་པར་ཆོས་ཉིད་དེ་ཡི་དབྱིངས་ན་གནས། །ཤེས་རབ་མཆོག་གིས་རྟག་ཏུ་སྤྱོད། །ཡང་ན་ཅིག་ཆར་བའི་དམ་ཚིག་བསྲུང་བ་ལས་འདི་ལྟ་བུ། །སྣང་བྱེད་གོལ་པའི་རྣལ་འབྱོར་པས་ཇི་ལྟར་སྤྱད་ཀྱང་སྡོམ་པ་ལས་མི་འདའ། །ཆོས་ཐམས་ཅད་མ་ལུས་ཡེ་ནས་སངས་རྒྱས་ལ། །བསྒྲུབ་ཅིང་བསྲུང་བར་བྱ་བའང་མེད། །དགེ་དང་མི་དགེ་གཉིས་སུའང་མེད། །དེ་ལ་བསྲུང་དུ་རྡུལ་ཙམ་མེད། །གཞན་གྱི་དོན་བྱ་བའི་ཕྱིར་གྲགས་པའི་བསྲུང་བྱ་ཀུན། །གདུལ་བྱ་གང་ལྟར་མཚམ་པར་བསྲུང་སྟེ་འདའ་བར་མི་བྱེད་པའོ། །སྟོན་པ་རྡོ་རྗེ་སེམས་དཔའི་བཀས་བཤད་པའི། །སྡོམ་པའི་རྩ་བ་དང་ཡན་ལག་དམ་ཚིག་ཐམས་ཅད་ཀུན། །ཇི་ལྟར་གསུངས་པ་དེ་བཞིན་དུ་ནི་མ་བསྲུངས་པ་ན། །སྐྱོན་ནི། དབང་བསྐུར་བའི་དུས་མནའ་བོར་བ་བཞིན་ཡཀྴ་ཁྲོ་བོ་མེ་དབལ་བྱེད། །སྙིང་ནས་དྲངས་ཏེ་ཁྲག་འཐུངས་ནས། །ཚེ་ཕྱི་མ་ལ་ངན་སོང་གསུམ་དུ་སྐྱེ་བར་འགྱུར། །སྐྱེས་ནས་དེ་ཡི་སྡུག་བསྔལ་བཟོད་བླགས་མེད། །དེ་ཕྱིར་ལམ་སྟོང་པ་སྒྱུ་མ་ཕྱག་རྒྱ་གཅིག་པ་སྣང་བྱེད་བཞིར་ལྡོག་པ་དང་ཟག་པ་ཡོད། །ཕྱིའི་དྲོད་ལུས་ཤིང་བལ་ལྟ་བུར་ཤིན་ཏུ་ཡང་བ་དང་། ནང་གི་དྲོད་དབུགས་ཀྱི་རྒྱུ་བ་ཡུན་རིང་བྲལ། །གསང་བའི་དྲོད་རྣལ་འབྱོར་དཔེར་ན་མཁའ་ལ་གཟའ་སྐར་བཞིན་དུ། ཏིང་ངེ་འཛིན་གསལ་ལ་མི་གཡོ་སྤྱོད་ཡུལ་བྱེད། །ཞར་ལས་བྱུང་བའི་ཕྱི་ནང་གི་དྲོད་རྟགས་ཀུན་རྫོབ་ཡིན་པའི་ཕྱིར། །དྲོད་དང་ཡོན་ཏན་འདི་ཞེས་གྲངས་ཀྱི་ཆ་ལས་འདས་ཏེ་དཔག་མེད་པའོ། །སྣང་བྱེད་ཀྱི་ས་ཏི་ལས་སུ་རུང་བའི་རྟགས་རྣམས་ཀྱང་། །རྒྱ་གཅིག་སྐབས་སུ་སྔོན་བྱུང་བས་འདི་རུ་སྟོབས་སུ་འཕེལ་བ་དང་། །ཁམས་བདེ་མི་བདེ་སྙོམས་ཞིང་རང་རང་གི་ལུས་ཏིང་ངེ་འཛིན་གྱི་བདེ་བ་རྒྱས་པ་དང་། ནད་འདུ་བ་བཞི་དང་བྲལ་ཡུལ་གྱི་བཟོད་པ་རེ་ཐོབ་པའི་ཚེ། །མངོན་པར་ཤེས་པ་དྲུག་དང་ཉི་ཤུ་རྩ་ལྔ་རྫོགས། །ཏིང་ངེ་འཛིན་རབ་འབྲིང་གི་ཆ་ཡིས་ཡུལ་ཁམས་རབ་ཀྱིས་གླིང་། །ཚུན་ཆད་མངོན་ཤེས་ཀྱིས་གསལ་ཞིང་དགོངས་པས་འདུལ་བར་བྱེད། །རྣམ་པར་ཤེས་པའི་ཚོགས་དྲུག་དག་པའི་སྟོབས་ལས་གྱུར་པའོ། །རྫུ་འཕྲུལ་ཉི་ཤུའི་ཆ་རེ་ཙམ་དུ་གཡོ་བ་དང་ཐོབ་པ་ཙམ་དུ་འབྱུང་བ་དང་། འགྲོ་བ་ལྷ་དང་ཀླུ་ལ་སོགས་པ་ཐམས་ཅད་ཀྱི་སྐད་དང་མཐུན་པར་ཆོས་སྟོན་པར་རྗེས་སུ་བསྟན་པའི་ཆོ་འཕྲུལ་དང་། གླིང་གཅིག་ཚུན་ཆ ད་ས་གཡོས་ཤིང་ལྟས་འབྱུང་བས་ཆོས་སྣང་བར་བྱེད་པའི་ཆོ་འཕྲུལ་དང་། །དངོས་ཀུན་ཡི་གེ་སྒྲར་བརྗོད་པར་བྱེད་པས་ཀུན་བརྗོད་པའོ། །ཆོ་འཕྲུལ་ལོ། །ཆོ་འཕྲུལ་འདི་དག་མཐོང་དང་བདུད་ཀྱི་སྤྱོད་ཡུལ་བཅོ་བརྒྱད་དང་། །གྲུར་ཞུགས་པ་ལ་སོགས་པ་ཤུགས་སྣང་གོང་དུ་བསྟན་པ་བརྒྱད་ཀྱང་དངོས་གྲུབ་མཐོང་ན་འབྱུང་ངོ་གང་མཐོང་ཡང་འབྲས་བུ་ཐོབ་ཏུ་རེ་བ་དང་བདུད་འབྱུང་གི་དོགས་པ་ལ་སོགས་པ་བཞག་གོ། །རྨི་ལམ་དུ་ཡང་ཕྱག་རྒྱ་གཅིག་པ་དང་ཆོས་མཐུན་པར། །འབྱུང་བའང་རྣམས་པ་གསལ་བ་དང་ངོ་བོ་བརྟན་པའི་ཁྱད་པར་གྱིས་ཕྱེ། །རྨི་ལམ་བཟང་པོའི་ལྟས་སུ་ལུང་བསྟན་ཀུན་སྣང་བྱེད་ཀྱི། ལམ་འདིར་ཟག་བཅས་ཀྱི་ལམ་ཡང་རྫོགས་པར་འབྱུང་བ་ཡིན་ནོ། །སྒྲུབ་པའི་རིག་འཛིན་སྤྲོས་བཅས་ཀྱི་ལམ་འདི་ཉིད། །མཐར་ཕྱིན་རིག་འཛིན་ཐོབ་པའི་གི་རྒྱུ་ཡིན་ཕྱིར། །རྨི་ལམ་གྱི་ལྟས་བཟང་པོའི་མཚན་མ་འབྱུང་བའི་ས་ཡིན་ཏེ། །བར་ཆད་མེད་པར་ཚོགས་སྐབས་རྨི་ལམ་སུའང་འདིའོ་འབྱུང་བ། ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ནི་རིགས་ཀྱི་ཡུམ། །དབང་པོ་བཞི་དང་རྣམ་ཤེས་བཞི་བྱང་ཆུབ་སེམས་དཔའ། ཡུལ་བཞི་དང་དུས་བཞི་བྱང་ཆུབ་སེམས་དཔའ་མ་ཆེན་མོ་ཡིན། །བདག་རྟོག་རྣམ་བཞི་ཁྲོ་བོ་སྒོ་བ་བཞི་ཡིན། རྟག་ཆད་མུ་བཞི་སྒོ་མ་ཁྲོ་མོ་བཞི་ཡིན། མཆོག་ལ་བྱང་ཆུབ་དེ་སེམས་རང་རིག་ཉིད་ཡིན་ཅེས་བྱའོ། །དེ་བཞིན་དུ་ཐམས་ཅད་མཉམ་ཉིད་རྫོགས་པའི་དཔལ་ལྷུན་གྱིས་གྲུབ་པའི་ངང་སྟེ། དེ་བཞིན་གཤེགས་པ་ལྔ་དང་ཡེ་ཤེས་ལྔ་ལ་སོགས་པ། རང་བྱུང་ཆེན་པོའི་དཀྱིལ་འཁོར་བསྒོམ་པས། བཟང་ངན་གྱི་རྟོག་པ་གཉིས་དང་བྲལ་བའི་ཤེས་རབ་དང་མི་འགག་པའི་ཐབས་མཁས་ཀྱིས། །རྟོགས་ཚོགས་ལྷ་གསལ་དངོས་པོའི་རང་བཞིན་མེད་པར་བསྒོམས་ན། །མིག་གི་གཟུགས་མཐོང་བ་དང་རྣ་བས་སྒྲ་ཐོས་པ་ལ་སོགས་ལ་ཡུལ་དང་ཡུལ་ཅན། མེད་པའི་ཚུལ་གྱིས། རང་རིག་པའི་ཡེ་ཤེས་ལྷར་གསལ་བའི་ངང་ལ་བསྒོམས་ན། ཕྱོགས་རིས་དང་རང་བཞིན་མེད་ལས་ཕྱོགས་མེད་ཅིར་ཡང་འགྲུབ་པའོ། །རྐྱེན་གྱིས་འགྱུར་བའི་དུས་ཅི་ལྟ་བ་བྱུང་ན། །སྤྲོས་པ་ས་ཏི་གང་ཡིན་དྲན་པས་བཟུང་བའི་ཕྱིར། །དེའི་ངང་ལས་འདས་ན་ལས་ངན་གྱི་རྣམ་སྨིན་ལམ་གྱི་ཞེན་པ་རྒྱུན་བཅད་ནས། །སྲིད་པ་བར་མའམ་སྐྱེ་བ་ཕྱི་མར་ཚེ་དབང་རྣམ་སྨིན་གཉིས་ལ་སྦྱོར་ནས་རིག་པ་འཛིན་པ་ཐོབ་པའོ། །གང་ཞིག་སྣང་བྱེད་མ་གོམས་པ་ས་ཏི་ནུས་པས་འདའ་ཀ་མ་བསྒོམ་སྟབས་ཞན་སྐབས་མེད་པའང་། །ཏིང་ངེ་འཛིན་གྱི་འཕེན་པའི་སྔོན་གྱི་འབྲེལ་བ་དང་སྤྲོས་བའི་ས་བོན་གྱིས། །ཚེ་རབས་ཀུན་དུ་མཐོ་རིས་ལྷ་མའི བདེ་བ་ཁྱད་པར་ཅན་ཐོབ་ནས། །རཏྣ་གསུམ་དང་མི་བཀོལ་བར་ཆོས་སྔར་གྱི་མུ་སྤྱོད་པས་རིག་འཛིན་འབྲས་བུ་ཐོབ་པའོ། །སྙོམས་ལས་སུ་གྱུར་པའི་ལེ་ལོ་མེད་པར་བརྩོན་པར་བྱས་ནས། །ལམ་དུ་འབྲས་བུ་རིག་འཛིན་ཐོབ་པ་ཡང་། །ཆོས་ཉིད་རྫོགས་པའི་དམ་ཚིག་མ་ཉམས་པར་བསྲུངས་བའི་སྨོན་ལམ་བཏབ་པའི་མཐུ་དང་། །སྒྲུབ་པའི་ཡན་ལག་རྫོགས་པས་རིག་འཛིན་ཐོབ་པར་འགྱུར། །ཕྱག་རྒྱ་སྤྲོས་པའི་རྣལ་འབྱོར་རྒྱུན་ཆགས་པའི། །བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་ལ་ལོངས་སྤྱོད་ཀྱིས། །མུན་པ་ལས་སྣང་བ་དུག་ལས་བདུད་རྩིར་འགྱུར་བ་ཇི་བཞིན་དུ། །འབྲས་བུ་ནི་ཡི་གེ་འཁོར་ལོ་ཚོགས་ཆེན་མཆོག་གིས་བརྙེས་པའོ། །སྤྲོས་པའི་རྣལ་འབྱོར་ལ་བསླབ་པའི་ལེའུ་སྟེ་དྲུག་པའོ།། ༈ །།ཞི་ཁྲོ་དཀྱིལ་འཁོར་གཉིས་ལ་ཕྱག་འཚལ་ནས། །སྐྱོན་གྱི་བར་ཆད་མེད་པར་འབྲས་བུ་རིག་འཛིན་སྦྱོར་བ་ཡི། །སྤྲོས་པ་མཐར་ཕྱིན་སྒྲུབ་པ་དུས་ཀྱི་ཚོགས་བཤད་པར་བྱ། །བར་ཆད་མེད་པའི་ལམ་ཚོམ་བུ་ཚོགས་སྒྲུབ་པའང་། །བསྙེན་པ་དང་ནི་ཉེ་བའི་བསྙེན་པ་དང་། །སྒྲུབ་པ་དང་ནི་སྒྲུབ་པ་ཆེན་པོས། །ཚོགས་རྫོགས་པའང་བར་ཆད་མེད་པར་ཚོགས་བསྒྲུབ་པའི་སྐབས་འདིར་ཤེས་པར་བྱ། །འདིར་ཡང་ལམ་གྱི་བསྙེན་སྒྲུབ་བཞི་སྒྲུབ་པའི་བསྙེན་སྒྲུབ་བཞི་དང་སྦྱོར་བ་ཡི་བསྙེན་སྒྲུབ་བཞི་དང་། གསུམ་གྱི་ཆ་ཡི་དང་པོ་ལམ་རིམ་གྱི་བསྙེན་པ་ནི། །བྱང་ཆུབ་སེམས་ལྟ་བས་རྟོགས་ནས་བརྩོན་འགྲུས་བྱེད་པ་ནི། །ལམ་གྱི་བསྙེན་པའི་དམ་པ་ཡིན་པའི་ཕྱིར། །བྱང་ཆུབ་ཀྱི་སེམས་རྟོགས་ཤིང་ཏིང་ངེ་འཛིན་ཆས་ཕྱེ་བས་ལྟ་བ་དེ་ཏིང་ཀུན་ཏིང་སྟེ་སྙིང་རྗེ་མན་ཆད་དོ། །ཉེ་བསྙེན་ནི་ཕྱག་རྒྱ་གསལ་བ་ཉེ་བར་བསྙེན་པ་ཡིན་ཏེ། དེའི་ཕྱིར་ཕྱག་རྒྱ་གཅིག་པ་དང་ཕྱག་རྒྱ་སྤྲོས་པའོ། །སྒྲུབ་པ་ཉིད་ནི་བར་ཆད་མེད་པར་ཚོགས་བསྒྲུབ་པའོ། །དུས་ཀྱི་ཚོགས་མཐས་གནས་སྐབས་ཀྱི་འབྲས་བུ་རིག་འཛིན་སྒྲུབ་པ་ཆེན་པོས་ལེན། །རྣམ་སྨིན་དང་ཚེ་དབང་དང་ཕྱག་རྒྱ་ཆེན་པོ་དང་མཐར་ལམ་གང་ཐོབ་གྲུབ་པའོ། །གསུམ་པ་སྦྱོར་བའི་བསྙེན་སྒྲུབ་བཞིའམ་གསང་བའི་བསྙེན་སྒྲུབ་བཞི་མཆོད་པའི་ཁྲོ་བོའི་སྐབས་སུ་ཤེས་སོ། །གཉིས་པ་བསྒྲུབ་པའི་བསྙེན་བསྒྲུབ་བཞི་གཙོ་བོར་འདིར་བསྟན་པ་ནི། ཕུན་སུམ་ཚོགས་པ་ལྔས་གཞི་བཟུང་བ་དང་བསྙེན་སྒྲུབ་བཞིས་གཞུང་གིས་རྫོགས་པར་འགྱུར་ཏེ། ཕུན་སུམ་ཚོགས་པ་ལྔས་བསྒྲུབ་པའི་གཞི་བཟུང་ལ། །བསྙེན་སྒྲུབ་བཞི་ཡིས་བསྒྲུབ་པའི་ལས་ཀྱི་གཞུང་བསྲང་བའང་། གདུལ་བྱ་གང་དག་མོས་པ་ཇི་བཞིན་ཕྱིར། །ཞི་བའི་ཚོགས་དང་ཁྲོ་བོའི་ར་ཚོགས་བསྒྲུབ་པར་བྱའོ། །དེ་ལའང་སྔ་མ་ནི་གནས་ཕུན་སུམ་ཚོགས་པ་དང་དུས་དང་། ཡོ་བྱད་དང་སྟོན་འཁོར་སྒྲུབ་པ་པོ་ཕུན་སུམ་ཚོགས་པ་དང་། སྒྲུབ་པའི་ཐབས་ཕུན་སུམ་ཚོགས་པ་ལྔ་ཡིས་གཞི་བཟུང་སྟེ། བསྙེན་བསྒྲུབ་བཞི་དང་སྦྱར་བས་སྒྲུབ་པའི་གཞུང་རྫོགས་པར་བྱའོ། །དེ་ལ་དེ་ལྟར་ཚོགས་སྒྲུབ་པ་ནི་སྤྲོས་པའི་ས་ཏི་སྣང་བྱེད་མཐར་ཕྱིན་པས་སྒྲུབ་པ་སྟེ། ཆོ་ག་ལྔ་ནི་དེ་བཞིན་ཉིད་ཀྱི་སྐབས་སུ་ཤེས་རབ་དང་མཐུན་པའི་སྤྱོད་པ་ཀུན་ཏུ་སྣང་བའི་སྐབས་སུ་ཐབས་དང་མཐུན་པའི་སྤྱོད་པ་སྟེ་དེ་ལྟར་སྔོན་དུ་རྫོགས་པར་བྱས་ཤིང་། །གཞན་ཡང་ཡོ་བྱད་ལྔ་ནི་བགོ་བ་རྒྱན་གྱི་ཡོ་བྱད་གླུ་ཚིག་སྒྲའི་ཡོ་བྱད་བྲོ་གར་འདུ་འཕྲོའི་ཡོ་བྱད་ཨཱ་ལི་ཀ་ལིའི་ཡོ་བྱད་སྒྲུབ་རྫས་ཀྱི་ཡོ་བྱད་དོ། །དེ་རྣམས་གོང་ནས་གསལ་ཏེ་དེ་ལྟར་ཆ་རྐྱེན་རྫོགས་པར་ལྡན་པ་དང་། གཞན་ཡང་ཡིད་སྐྱོ་བ་དང་བྱིན་རླབ་ཆེན་པོ་འབྱུང་བའི་ཕྱིར་སྔགས་ཞེས་བྱ་སྟེ་དབུ་རྒྱན་ཀ་པ་ཙ་ཡེ་ཤེས་སེམས་དཔའ་སྟེ་ཐུགས་ཡེ་ཤེས་སེམས་དཔའ། སྐུ་གསུང་ཐུགས་ཀྱི་ལྷ་གསུམ་དབུ་བརྒྱན་གྱི་ལྷ་གཅིག་ཏུ་དྲིལ་བས་ལྔ་པོ་དེ་ཚོམ་བུ་གང་བསྒོམ་གྱི་ལྷ་ལ་རྫོགས་པ་སྟེ་རིག་པ་ལ་མངོན་སུམ་དུ་གསལ་བས་སྔགས་ཀྱི་ཡན་ལག་ལྔ་རྫོགས་པའི། །རྣལ་འབྱོར་འཚོགས་པའི་དཀྱིལ་འཁོར་གྱིས་བསྒྲུབ། ངེས་པར་ལེགས་པའི་དགོས་པ་ཟག་མེད་ཀྱི་རིག་འཛིན་འགྲུབ། །སྟོན་པ་ལྟ་སྤྱོད་དམ་པའི་མཛོད་གསུམ་ལྡན་པ་དབང་གི་ཆུ་བོ་རྫོགས་པ་སྟེ་མཛོད་གསུམ་ནི་ལྟ་བ་ཏིང་ངེ་འཛིན་དམ་ཚིག་སྟེ་ལྟ་བ་ནི་བདེན་པ་དབྱེར་མེད་སྤྱོད་ཡུལ་དང་བྲལ་བར་རང་རིག་པའི་མངོན་སུམ་རྫོགས་པའོ། །ཏིང་ངེ་འཛིན་ནི་སྤྲོས་བཅས་མཐར་ཕྱིན་པའོ། །དམ་ཚིག་ནི་སྤྱིར་དམ་ཚིག་དང་ལྡན་ཞིང་ཁྱད་པར་དུ་བསྒྲུབ་པ་ལས་མི་འདའ་བའི་དམ་ཚིག །ཆུ་བོ་ནི་དབང་དང་བྱིན་རླབ་ཀྱི་ཆུ་བོ་དང་ལྡན་ཞིང་རྫོགས་པ་སྟེ་ཡི་དམ་ལྷའི་དབང་ཐོབ་པ་ཀུ་ཀུ་རཱ་ཙ་ལྟ་བུ་དང་། པོ་ཏི་དང་གླེགས་བམ་གྱི་དབང་ཐོབ་པ་རྒྱལ་པོ་ཛ་ལྟ་བུ་དང་། རིག་པ་རྩལ་གྱི་དབང་ཐོབ་པ་པདྨ་འབྱུང་གནས་ལྟ་བུ་དང་། ཐམས་ཅད་ཀྱི་དབང་ཐོབ་པ་བི་མ་ལ་ལྟ་བུ་དང་ཅེས་སོ། །གཞན་འཇིག་རྟེན་པའི་གཉེར་དང་ལྡན་པའི་རྒྱུད་ཀྱི་དོན་ཁྲོལ་བ་དང་སྙན་ནས་སྙན་དུ་བརྒྱུད་པའོ། །དང་སྒྲུབ་པའི་ལས་ལ་མཁས་ཤིང་། །མན་ངག་གི་དྲོད་དང་ཉམས་མྱོང་དང་བཅས་པའི་མི་འབྲལ་ཞིང་སློབ་དཔོན་མཉེས་པ་དམ་མ་ཉམས་པ་ཡི་དམ་བསྒྲུབ་པ་ལ་བཙོན་པ། སྒྲུབ་པ་ལ་ལུང་ནོས་ཏེ་མན་ངག་དང་ལྡན་པ་ཕོག་པ་བརྟུལ་ཞུགས་ཆེ་བ་བསྒྲུབ་ལ་བརྩོན་པ་བརྒྱད་པ་དེ་ཡང་གོང་གི་མཛོད་གསུམ་ཕྱེ་བས་འཆང་བའོ། །སྤྲོས་བཅས་རྣལ་འབྱོར་མཐར་ཕྱིན་ཅིང་དགོངས་པ་དང་ལྡན་ཤིན་ཏུ་ཡང་གཅེས་པར་བསྟན་པའོ། །སྟོན་པ་མཆོད་པ་ལ་བརྩོན་པ་ལྟ་བ་རྟོགས་པ་ལྡན་ཞིང་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །དེ་ལྟ་བུའི་འཁོར་གྱིས་འགྲུབ་པར་འགྱུར་དོན་དེ་དང་མི་ལྡན་ན་མི་འགྲུབ་སྟེ་བརླག །དགྲ་བགེགས་སྡེ་དཔུང་ཆེན་པོས་མི་ཚུགས་ཤིང་། །རྡོ་རྗེ་ལས་རིམ་ནས་འབྱུང་བ་བཞིན་ཕྱོགས་མཚམས་ཀྱི་དགྲ་བཅིང་ས་དང་བར་སྣང་ཤེས་པ་དང་། །ཆོས་དང་གཙུག་ལག་གི་ལོ་རྒྱུས་རྣམ་གཉིས་མཐུན་པར་སྐྱོན་མེད་ཅིང་ཡོན་ཏན་དང་ལྡན་པ་དང་། །གནས་རྣལ་འབྱོར་པའི་ཡིད་དུ་འོང་བའི་ས་ལེགས་པར་བཙལ་བསླང་བརྟགས་ལ་སོགས་པ་རྒྱས་པར་བྱ། །གནས་ཆོས་མཐུན་རྙེད་ནས་ཚོམ་བུ་རྒྱས་འབྲིང་གསུམ་མམ་ལྔའི་གྲངས་བཞིན་དུ། །གནས་ཁང་ཆེ་ཆུང་རྣལ་འབྱོར་པ་རྐྱེན་དུ་འཚམ་པར་བྱ། །འཁོར་ཁང་ཕྱི་ནང་གསང་མཆོད་བར་བསྒྲུབ་པ་བྱེད་པའི་ཡོ་བྱད་དང་ལྡན་པ། །གནས་བརྩེགས་ཏེ་རིན་པོ་ཆེན་ལ་སོགས་པ་ལེགས་པར་བྱུག་པས་བདུད་རྩི་ལྔ་སོགས་དང་ཙནྡ་གླ་རྩི་དང་གུ་གུལ་ལ་སོགས་པ་བསྲུང་བ་དང་། །རིན་པོ་ཆེའི་རྒྱན་སྤྲས་པས་སྒྲུབ་གནས་གཞལ་ཡས་ཁང་། །རྣལ་འབྱོར་པའི་ཡིད་འོང་བྱ་བ་ཤིན་ཏུ་གཅེས། །ཚེས་གྲངས་ཡར་གྱི་བརྒྱད་ལ་བརྩམ། །དེ་ཡང་ཤིན་ཏུ་སྐར་མ་བཟང་པོ་རྒྱལ་ལ་སོགས་པ་རྣམས་ལ་འཇུག་སྟེ་དེ་ལ་དགོས་པ་ཅི་ཡོད་ཅེ་ན། བྱང་ཆུབ་སྤྱོད་པ་ཆེར་སྤྱོད་པའོ། །གསང་སྔགས་མཆོག་དངོས་གྲུབ་མྱུར་བའི་ཕྱིར། །ཚེས་གཟའ་དང་སྐར་མ་བཀྲ་ཤིས་པ་སྟེ་བླང་བར་བྱའོ། །རབ་ཀྱིས་ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་རབ་འོག་གི་ཏེ་ལོ་གཅིག་དང་ཟླ་བ་གཉིས་སྟེ་བཅུ་བཞི་ཐ་མ་ཡང་ཟླ་བ་བཅུ་དྲུག་གིས། །ཚེ་ལ་དབང་བསྒྱུར་བའི་རིགས་འཛིན་ཀྱི་མཆོག་བསྒྲུབ་པའི་ཕྱིར། །རྣལ་འབྱོར་ཤེས་རབ་དང་བརྩོན་འགྲུས་ཆེ་ཆུང་གི་ཆས་ཕྱེ་བས་རིམ་བཞིན་འགྲུབ། །བགོ་བ་གོས་ཀྱི་རྒྱན་གྱི་དང་བཟའ་བཏུང་གིས་དང་གསང་བ་ཨཱ་ལི་ཀཱ་ལིའི་དང་། །སྒྲུབ་པའི་ཡོ་བྱད་སྟོད་གཡོགས་སྨད་གཡོགས་ཕྱག་རྒྱ་ཕུ་དུང་གསང་བ་བོ་གསང་ནན་ལྔ་རྣམས་དང་། །ཆགས་པ་རལ་གྲི་ལ་སོགས་པ་དཀྱིལ་འཁོར་རྒྱན་གྱི་ཡོ་བྱད་དང་ཕྱི་ནང་གསང་བའི་མཆོད་པའི་རྫས་དང་། བྲིས་སྐུ་ཐོད་སྐུ་རྡོ་རྗེ་དྲིལ་བུ་ལ་སོགས་དངོས་གྲུབ་རྟེན་དང་དགྲ་བགེགས་དང་ནད་ཀྱི་བར་ཆད་བཟློག །པའི་རྫས་དང་། ཡོ་བྱད་ཉམ་པ་ཅན་དང་མ་འདྲེས་པར་དག་པ་བསྡུ་བར་བྱ་སྟེ། །ཚོ་གཅིག་པུ་ཙར། ཚོ་གཅིག་རྣལ་འབྱོར། ཚོ་གཅིག་མཆེད་མགྲོན་དང་པོ་དཀོན་མཆོག་རྫས་གཉིས་པ་རྣལ་འབྱོར་པའི་ལོངས་སྤྱོད། ཐ་མ་ལྷག་མའི་མགྲོན་རྫས་དང་ཚོ་གསུམ་བཅད་ལ་བྱིན་གྱིས་བརླབས། །སྒྲུབ་ཐབས་ཕུན་སུམ་ཚོགས་པ་ནི་བསྙེན་བསྒྲུབ་ཡན་ལག་བཞི་དང་སྦྱར་བ། །དགྲ་བོའི་རྒྱུ་སྲང་མེད་བགེགས་ཀྱི་འགྲིམ་སྲང་། མིས་དབང་མ་བྱས་པར་བར་ཆད་མེད་པའི་གནས་དང་ལོངས་སྤྱོད་ཅི་བདེ་དང་དེ་ལྟར། དམ་ཚིག་མ་ཉམས་ལྟ་བའི་ཏིང་ངེ་འཛིན་བློ་ནི་རབ་ཏུ་ལྡན་པས། །དང་པོ་ཚོམ་བུ་གཅིག་གསུམ་ལྔ་པ་དམ་མནོས་བཞིན་དུ་བྱ། །འབྲས་བུ་ཐོབ་པར་དམ་བཅའ་དུས་བསྒྲུབ་པ་དང་ལྡན་པས་རྣལ་འབྱོར་ཕོ་མོ་འདུས་ཏེ་བསྒྲུབ། །བསྒྲུབ་པའི་དལ་དུ་ཁྱད་པར་དུ་ལྷག་པ་ས་ཏིའི་དལ་ནི་ཡང་ན་དཔག་ཚད་རྒྱང་གྲགས་ཙམ་དུ་སམ། །ཚོམ་བུ་སོ་སོ་གང་བྱེད་དང་འཚམ་པའི་གཟུགས་བརྙན་བྲི། །དཀྱིལ་འཁོར་གྱི་རྒྱན་དང་ཕྱི་ནང་གསང་བའི་མཆོད་པ་ལ་སོགས་པ་དལ་གྱི་མཐའ་འཁོར་བ་དང་། །ཕྱི་རོལ་དུ་ཆ་གསུམ་བཏང་ལ་མཆོད་པའི་ལས་རྫོགས་པར་བྱ་ཏེ། །རྒྱལ་ཆེན་ཕྱོགས་སྐྱོང་གིས་ཕྱི་མཚམ་བཅད་དམ་སྲི་མནན་བསྲུང་བའི་སྒོ་བྱང་གདག་ཅིང་མཚམས་ཐོ་རིམ་པ་བཞིན་བྱའོ། །གྲངས་ཀྱི་རྟགས་དུས་བྱ་བ་ལས་ཀྱི་དང་བཞི་ལས་འདིར་བྱ་བ་ལས་ཀྱི་བསྙེན་པའི་དོན་དུ་སྔོན་དུ་བྱ་བ། །རྫོགས་པའི་ཚོགས་བསགས་སྒྲིབ་པ་སྦྱངས་བའི་ལས་རྣམས་ཟིན་པར་བྱ། །གང་དུ་རྣལ་འབྱོར་པ་གྲལ་ཕྱག་ཚུལ་ཕྱག་འདུས་པས་ཕྱོགས་བསྲུང་འཁོར་གྱིས་བཅིང་ཕྱི་ནང་གི་མཆོད་རྫས་བྱིན་གྱིས་བརླབས་ནས། །རྣལ་འབྱོར་པ་སྤྱིའམ་ཡང་ན་རེ་རེ་ཞིང་བསྒོམ་པ། ཚོམ་བུའི་འཁོར་ལོ་གཅིག་གམ་གསུམ་མམ་རིམ་བཞིན་བསྒོམ། །རྣལ་འབྱོར་ཐབས་ཡབ་དང་ཤེས་རབ་ཡུམ་ཀྱིས། །དེ་བཞིན་གཤེགས་དང་ཡུམ་དུ་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོའི་རིགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ་བར་བསྒོམ་ལ། རིགས་ཀྱི་རིགས་ཏེ་ཐུགས་སྒྱུ་འཕྲུལ་ནི་དབུས་སུ་རིགས་ཀྱི་གཙོ། །ཐུགས་ཀྱི་ཐུགས་ཏེ་སྟོང་ཉིད་ཡེ་ཤེས་ཐུགས་ཀྱི་མཆོག་ལ་རྡོ་རྗེ་རིགས་ཀྱི། རྡོ་རྗེ་སེམས་དཔའ་ཡབ་ཡུམ་བརྒྱད་ཁྲོ་བོའི་ཚོགས་ཡབ་ཡུམ་བརྒྱད་དང་ལྡན་པ་ཡི། །ཚོམ་བུ་གཅིག་པའི་སྟེ་ལྷ་བཅོ་བརྒྱད་རྣམས་བསྒོམ། །མདུན་དུ་དེ་བཞིན་རིགས་དང་དབུས་རྡོ་རྗེ་རིགས། །རྒྱབ་པདྨའི་རིགས་ཏེ་སྐུ་གསུང་ཐུགས་ཀྱི་ཚོམ་བུ་གསུམ་ལ། ཕྱོགས་མཚམས་ཀྱི་ཁྲོ་བོའི་ཡབ་ཡུམ་བཅུ་དྲུག་ཚོགས་དང་ལྡན་པ་ཡི། །ཚོམ་བུ་གསུམ་གྱི་ལྷ་ཞེ་དྲུག་རྣམས་བསྒོམས། །རིགས་ལྔ་དང་རིགས་ལྔ་ཡེ་ཤེས་རེ་རེ་ལ་རིགས་ཆུང་གི་འཁོར་གྱི་ལྔ་ཡི་སྦྱོར་བ་ཡི། །ཚོམ་བུ་ལྔ་ཡི་ཕོ་བྲང་གི་ལྷ་ལྔ་བཅུ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ་སྟེ། ལྷ་བདུན་ཅུ་འཁོར་ལོའི་ཚུལ་དུ་རྣམ་པར་བསྒོམ། །ཀ་བ་ཙ་བྱིན་གྱི་རླབས་པ་དང་ཡེ་ཤེས་ལྔ་དབང་བསྐུར་དང་ལྡན་བྱས་ནས། །རང་བཞིན་འོག་མིན་གནས་ནས་སྙན་གསན་དབབ་སྤྱན་དྲངས་བར་བྱ་སྟེ། །གཉིས་སུ་མེད་པར་གཞུགས་བཅིང་བརྟན་པར་བཞུགས་སུ་གསོལ་བར་བྱས་ཕྱག་ཞབས་ལ་སྟེ་ཕྱི་ནང་གསང་བའི་པུ་ཙ་རིམ་པར་མཆོད། །མཆོད་པ་རྫོགས་ནས་གླུ་ཡེ་ཤེས་ཀྱི་བསྟོད་དེ་རོལ་མོ་ཡེ་ཤེས་ཀྱི་ཡུལ་སྨོན་ལམ་བཏབ་ནས། བསྙེན་པ་བྱ། །བཟླས་པ་ཟིན་ནས་དལ་བསྡུས་ཏེ་རྣལ་འབྱོར་པས་ཚོགས། །ཚུལ་བཞིན་དུ་མཆོད་པའི་ཕྲིན་ལས་བྱ། །དེ་ནས་ནང་ནུབ་མཁའ་འགྲོར་རྣམས་མཆོད་ཕྱིར་ལྷག་མ་གཞུང་བཞིན་སྦྱིན། །ཉུལ་ལེ་མའི་བར་ཆད་བཟློག་ཅིང་བསྙེན་པར་བྱ། །ཟླ་བ་ཕྱེད་ཀྱི་ཕྱེད་ཞག་བདུན་དུ་ཉེ་བའི་བསྙེན་པ། །ལྷ་གསལ་ཁ་དོག་དཀར་པོ་ཕར་འཕྲོ་མཆོད་ཚུར་འདུས་ནས་དངོས་གྲུབ་ཀྱི་སྣོད་དུ་རུང་བར་བྱས། ཞག་བཅོ་ལྔ་མར་ཕྱེད་སྒྲུབ་པ་བྱ་སྟེ། །ཁ་དོག་དམར་པོ་ཕར་འཕྲོས་ཐུགས་དམ་བསྐུལ་ཚུར་འདུས་ཏེ་དངོས་གྲུབ་ཐོབ་པའི་བསྣོལ་མས་བསྒྲུབ་པར་བྱ། །སྒྲུབ་པའི་ཞག་གྲངས་ཚང་ནས་དངོས་གྲུབ་ཀྱི་རྟགས་བྱུང་ན། །ལྷ་ཡེ་ཤེས་སེམས་དཔའ་བདག་དམ་ཚིག་པ་ལས་དངོས་གྲུབ་གྱི་བཟླས་པ་དང་དངོས་སྒྲུབ་བླང་སྒྲུབ་པ་ཆེན་པོ། །དེ་བཞིན་ཟླ་ཕྱེད་ལ་སོགས་པས་ཆོག་གམ་ཞེ་ན་མི་ཆོག་སྟེ་བསྙེན་བསྒྲུབ་ཀྱི་ཡུན་ཆ་བརྩིས་ལ་རྒྱུན་གྱི་ཞག་གྲངས་སུམ་ཅུ་ཕྲག་དྲུག་ལ་སོགས་བཞིན། །བར་ཆད་མེད་པར་ཚོགས་བསྒྲུབ་པར་བྱའོ། །སྤྱོད་ལམ་དུ་ཡོ་བྱད་ལྔ་སྤྱོད་ཅིང་། །དངོས་སུ་མཆོད་པ་སྦྱོར་སྒྲོལ་རྣམ་གཉིས་སོ། །གཙོ་རུ་དགོངས་པ་སྦྱོར་སྒྲོལ་གང་ཡིན་པ་ནི། ཁྲོ་བོའི་སྐབས་སུ་ཕྱི་མ་གདུག་པ་འདུལ་བར་ཤེས་པར་བྱའོ། །སྔ་མ་སྤྱོད་ལམ་དུ་སྤྱོད་ལ་སྤྱད་ཐབས་རྒྱས་པར་བཤད་བྱ་བ། །གོས་རྒྱན་གྱི་དང་བཟའ་བཏུང་གི་དང་གླུ་གར་རྣམས། །ཧཱུྃ་གི་མཚོན་པའི་ཡེ་ཤེས་ལྔའི་རང་བཞིན་དུ་ཤེས་པས་རབ་སྤྱོད་ན། །དངོས་གྲུབ་ངོ་མཚར་ཅན་འབྱུང་བའི་ཚོམ་བུའི་དཀྱིལ་འཁོར་མཉེས་པར་བྱའི་ཕྱིར། །གསང་བ་ཨ་ལི་ཀ་ལི་ལ་སོགས་པ་ཡོ་བྱད་ལྔ་པོ་རྣམས། །རིག་པ་རང་སྣང་ཡེ་ཤེས་ཀྱི་ཆོ་འཕྲུལ་ཡིན་པའི་ཕྱིར་རྒྱུ་ལས་མ་སྐྱེས་རང་བྱུང་ཡེ་ཤེས་རང་གསལ་བའི་ངང་དུ་རྒྱལ་བའི། ཆོས་ཉིད་ཆོས་ཉིད་ལ་ཡེ་ཤེས་རོལ་པའི་ཚུལ་དུར་བསྒོམ་སྟེ། ཅིག་ཤོས་ཁྲོ་བའི་ཚེ་ནའང་དེ་བཞིན་དུ་བསྒོམ་པ་ཡིན་ནོ། །ལྷག་པ་ཏིང་ངེ་འཛིན་ཕྱོགས་བཅུ་མཐའ་ཡས་དུས་བཞིས་བསྡུས་པ་ཡི། །ཆོས་རྣམས་ཐམས་ཅད་རང་བཞིན་པའི་ངང་དུ་དབྱེར་མེད་པའི་མ་དྷ་ལ་རྒྱན་དང་གདན་དུ། ཉི་ཟླ་ཤར་བའི་གཞལ་ཡས་ལ། །པདྨ་ཆགས་མེད་གདན་བཏིང་ནས། །དགོས་འདོད་རིན་ཆེན་ཟད་མེད་རང་ལས་བྱུང་བའི་ཕོ་བྲང་ས། །ཆེ་ཆུང་གི་ཚད་འདི་ཙམ་དཔག་ཏུ་མེད་པ་ཡི། །བླ་ན་མེད་པའི་བྱང་ཆུབ་ཀྱི་སེམས་སྤྲོས་པའི་ཟུག་རྔུ་མེད་པའི་བདེ་ལྡན་རྒྱལ་བའི་དཀྱིལ་འཁོར་ལ། །བདེ་ལྡན་བྱང་ཆུབ་ས་ཏིའི་ལྷ་རབ་ཏུ་བཀོད་ནས། །སྣོད་མ་ལུས་ཐམས་ཅད་ཆོས་ཀྱི་དབྱིངས་སུ་བསྡུས་ནས། །ལུས་བསྐྱོད་ཡན་ལག་བསྒུལ་གསིགས་རྐྱང་ནས། །དབང་པོ་སྒོ་ལྔ་ལ་སོགས་ལྔ་ཡི་དཀྱིལ་འཁོར་ཐམས་ཅད་ཀུན། །འདིའི་སྐུ་ཕྱག་རྒྱ་ཆེན་པོ་ཡིན་པར་བཤད། །ལྷག་པའི་ཏིང་འཛིན་གྱི་དཀྱིལ་འཁོར་འབའ་ཞིག་བསྒོམ་པའམ་གམ། །བྲོ་གར་ལ་སོགས་པའི་ཚེ་ན་བསྒོམ་པ་ཡི། །བྷྲཱུཾ་ལས་གཞལ་ཡས་ཁང་དང་ཙཀྲའི་དཀྱིལ་འཁོར་དུ། །ཉི་འོག་ཟླ་ཁ་ཕྲུགས་པའི་ས་གཞི་ལ། །པདྨ་ཆགས་མེད་གདན་བཏིང་ནས། །ཡབ་ཐབས་དང་ཡུམ་ཤེས་རབ་དབྱེར་མེད་ཆགས་མེད་ཚུལ་དུ་བསྒོམ་པའོ། །མགོ་ལ་སོགས་པ་ཡན་ལག་དབང་པོ་ཐམས་ཅད་ཀུན། །རང་བཞིན་སྣང་ཡོང་གིས་རིགས་ལྔའི་དལ་དུ་དག་པ་དང་། །ཏིང་འཛིན་གྱིས་ཀྱང་དེ་བཞིན་གཤེགས་པ་ལྔ་བསྒོམ་པའོ། །དེ་ལྟར་ཡེ་ནས་གནས་པ་མ་བཅོས་པ་དེ་ལ་རང་བཞིན་ཡོང་གིས་དག་པ་ཡིན་ཏེ། །ལྷག་པའི་ཏིང་འཛིན་དཀྱིལ་འཁོར་གྱིས་བསྒོམ་པ་ནི། དབུ་ལ་དེ་བཞིན་གཤེགས་པའི་རིགས་རྣམ་པར་སྣང་མཛད་ཀྱིས་གཙོ་བྱས་པའི་ལག་པ་གཡས་པ་རྡོ་རྗེའི་རིགས་གཡོན་རིན་ཆེན། རྐང་པ་གཡོན་པདྨ་གཡས་ལས་ཀྱི་རིགས་འཁོར་དང་བཅས་པ་བསྒོམ་པ་སྟེ། ཡན་ལག་བཞི་ལ་རིགས་བཞིའི་འཁོར། །ཁ་དོག་རིགས་ལྔ་དབྱིབས་སོ་སོ་དང་ཕྱག་རྒྱ་སོ་སོ་དང་། །ཐབས་ཡབ་དང་ཤེས་རབ་ཡུམ་གཉིས་སུ་མེད་པར་གསལ་བར་བསྒོམས་ཏེ། ལྷ་ལས་འོད་ཟེར་ཕྱོགས་བཅུར་སྤྲོ་ཞིང་ངན་སོང་གསུམ་ལ་སོགས་སྒྲིབ་པ་སྦྱོང་། །དེ་ནས་སླར་རང་གི་གནས་སུ་བསྡུ་ཞིང་དཀྱིལ་འཁོར་ལ་གཉིས་སུ་མེད་པར་བསྟིམ། །འདས་པ་སངས་རྒྱས་དང་མ་འདས་འཁོར་བ་ཐམས་ཅད་ཀུན། །བདེ་བར་གཤེགས་པ་རྒྱལ་བའི་དལ་ལ་ཞིང་ལྷག་པ་ཏིང་ངེ་འཛིན་གྱི་དལ་དུ་རྣམ་པར་སྦྱོང་། །རྣལ་འབྱོར་ཡན་ལག་ཆེན་པོ་ལྔ་བསྐྱོད་ན། །རིགས་ལྔའི་དཀྱིལ་འཁོར་མ་ལུས་གཡོ། །ཞིང་བཀོད། འགྲོ་བ་ལྔ་བྱང་ཆུབ་ཀྱི་ལམ་དུ་འདྲེན་ཅིང་འཛུད་ལས་ཉོན་ཚེ་དུས་སེམས་ཅན་གྱི་སྙིགས་མ་ལྔ་ཡང་རང་བཞིན་རྣམ་པར་དག་པའི་ཞིང་དུ་སྦྱོར་བའོ། །རྒྱུ་བཟང་ཞིང་དབྱིབས་ཁ་དོག་མཛེས་ལེགས་པའི་གོས་བགོས་ན། །ཏིང་ངེ་འཛིན་གྱི་ཡེ་ཤེས་ལྔས་འོད་ཟེར་སྣ་ཚོགས་འཕྲོ་བར་འགྱུར་རོ། །དུས་དེ་ནས་མཐར་ཐུག་མེད་ཀྱི་བར། །ཡེ་ཤེས་ལྔ་ཡིས་རྒྱན་གྱིས་རྒྱན་པར་འགྱུར་རོ། །དབུ་རྒྱན་མཆོག་མགུལ་ཆུན་ལ་སོགས་པ་བརྒྱན་མཛེས་པས་ལུས་བརྒྱན་ནས། །ཏིང་འཛིན་གྱི་ཚོམ་བུའི་ལྷ་ཚོགས་འོད་ཟེར་འབར་ཞིང་གསལ་བར་བསྒོམས་ཏེ། །དེ་ལས་ཕྱོགས་བཅུ་གང་བར་དཀྱིལ་འཁོར་ལ་འོད་ཟེར་སྤྲོ། །སྤྱོད་ཡུལ་ཐམས་ཅད་རང་རིག་པ་བདག་ཉིད་ཆེན་པོའི་ངང་ལས་མ་གཡོས་པའི་དཀྱིལ་འཁོར་ལ། །མི་དམིགས་དབྱིངས་ནས་དཀྱིལ་འཁོར་ཐམས་ཅད་རང་བཞིན་ཏིང་ངེ་འཛིན་གྱིས་མཆོད། །འདོད་པའི་ཡོན་ཏན་ལོངས་སྤྱོད་ལྔ་མ་འགགས་པ་ཐབས་དང་མི་དམིགས་ཤེས་རབ་གནས། །དགོངས་པ་ཟག་མེད་བདེ་བ་མཆོག་གི་རོ་ཡང་མྱོང་བར་བྱེད་པས་བསོད་ནམས་ཀྱི་ཚོགས། བདེ་བ་ལ་མ་ཆགས་པས་ཡེ་ཤེས་ཀྱི་ཚོགས་ཆེན་ཏེ་ཚོགས་གཉིས་དང་ལྡན་པའོ། །རྐང་པའི་བྲོ་གར་ཐབས་ཀྱི་ལག་པའི་ཕྱག་རྒྱ་དང་། །ངག་གི་གླུ་དབྱངས་ཚིག་གི་སྒྲ་བསྒྲགས་ནས། །ཕྱོགས་བཅུའི་སྐྱེ་གནས་བཞི་མ་ལུས་ཀུན། །ལྷུན་གྱིས་གྲུབ་པའི་རིག་འཛིན་རྡོ་རྗེའི་སྐུར་མཐོང་ཞིང་། །ཐེག་པ་ཆེན་པོའི་ཆོས་ཀྱི་དུང་ཆེན་སྒྲ་ཡང་ཐོས། །ཉོན་མོངས་ཤེས་བྱའི་སྒྲིབ་པ་གཉིས་བྱང་ནས་འབྲས་བུ་བླ་ན་མེད་པའི་བྱང་ཆུབ་འགྲུབ། །བྲོས་བདེན་པ་མཐོང་གླུའི་སྐད་སྙན་པའི་གྲགས་ཐོབ་སྟེ་མ་འགགས་པ་བསོད་ནམས་ཀྱི་ཚོགས་ཆེན་པོ་འགྲུབ། །བདེན་པ་མཐོང་བས་ཆགས་པ་མེད་པ་ཡེ་ཤེས་ཀྱི་ཚོགས་དང་ལྡན་པའོ། །ཐབས་ཡབ་དང་ཤེས་རབ་ཡུམ་ཐམས་ཅད་ཀུན། །དབུས་ནས་ཤར་ཕྱོགས་སུ་ཁ་བལྟས་ཏེ། །སེང་གེའི་སྟབས་ཆེན་གྱིས་མཆོང་བར་བྱ། །མིག་ལ་ༀ། རྣ་བ་ཧཱུྃ། སྣ་ལ་ཏྲཱཾ། ལྕེ་ལ་ཧྲཱིཿ ལུས་ལ་ཨ་སྟེ་མིག་སོགས་དབང་པོ་ལྔ་ལ་ཡི་གེ་ༀ་སོགས་ལྔ། །གསལ་བའི་ཡི་གེ་འཕྲོ་འདུས་མངོན་རྫོགས་ཤེས། །འདོད་པའི་ཡན་ཏན་ལྔ་ལ་ཆགས་པ་མེད་པར་རོལ་པའི་ཡོན་ཏན། དེས་བདག་གི་དོན་དང་གཞན་གྱི་དོན་ཡོངས་སུ་རྫོགས་པར་བྱེད། །ཚོམ་བུ་གཅིག་པ་གསུམ་པ་ལྔ་པའི་རྒྱས་འབྲིང་བསྡུས་པ་གསལ་བའི་ཡབ་ཡུམ་རྣམས། །ཕན་ཚུན་འོད་ཟེར་འཕྲོས་འདུས་ཤིང་བདག་ལ་བསྟིམ་བསྒོམ་བྱས་ཏེ། །ལྷག་པ་ཏིང་ངེ་འཛིན་གྱི་དཀྱིལ་འཁོར་འོད་འབར་བ་དང་ཁ་དོག་གསལ་བར་བསྒོམ་པ་གྱུར་ནས། །རྣལ་འབྱོར་པ་བདག་དང་ཕྱོགས་བཅུའི་བྷུདྡྷ་རྣམས་དགོངས་པ་གཉིས་སུ་མེད་པར་བསྒོམ། །རིགས་བཞི་རང་རང་གི་ཕྱོགས་ཕྱོགས་སུ་རིམ་བཞིན་ཁ་བལྟས་ཏེ། །ཐུགས་རྡོ་རྗེ་རིགས་ཀྱི་སྐུ་དེ་བཞིན་རིགས་གསུང་པདྨའི་དང་ཡོན་རིན་ཆེན་གྱི་རིགས་ལས་ཀྱི་རིགས་དོན་གྲུབ་པའོ་གླུ་བྲོ་ཚིག་བརྗོད་པ་དང་ཡེ་ཤེས་ཀྱི་རྒྱན་གྱིས་བརྒྱན་པ་ནི་པའི་བྲོ་དང་ངག་གི་གླུ་རིགས་ལྔའི་སྤྱིའི་གླུ་བྲོ་ཏེ། རྣམ་པ་ལྔ་སེང་གེ་གླང་རྟ་ཁྱུང་རྨ་བྱ་ཤང་ཤང་གི་སྟབས་རིགས་ལྔའི་གླུ་ཚིག་ལྡན་པར་བྱས། །ཏིང་ངེ་འཛིན་སྲོག་དང་ལྡན་པའི་བྲོ་གླུས་བདག་གཞན་གྱི་དོན་གཉིས་རྫོགས་པར་བྱེད་པའོ། །བཟའ་དང་བཅའ་བ་དང་མུར་བ་བཏུང་བ་རྣམས། །མ་འགགས་པ་ཐབས་དང་རང་བཞིན་མེད་པ་ཤེས་རབ་ཉིད་གྱི་ངང་ལ་གནས་ཤིང་། །བདག་ཉིད་ཆེན་པོའི་མཆོད་པ་བྱས་པ་ཡིས། །ཡོན་ཏན་སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །རང་བཞིན་གྱི་དགའ་བ་ཆེན་པོས་ཁྱད་པར་འགྲུབ། །ཟས་ཉིད་བདུད་རྩིར་བཅུད་དུ་འགྱུར་ཞིང་ཐུན་མོང་གི་ཡོན་ཏན་འབྱུང་བ་དང་། །ནད་བཞི་བརྒྱ་རྩ་བཞིའི་ལ་སོགས་པ་ནད་རྣམས་སེལ་ཞིང་། །འདོད་པའི་ལོངས་སྤྱོད་འབྱུང་ཞིང་ངན་སོང་རྣམས་སྦྱོང་བ་དང་། ཅི་ཡང་བདག་དང་གཞན་གྱི་དོན་དུ་འགྱུར་བའི་འབྲས་བུ་འགྲུབ་བོ། །གོང་གི་དེ་ལྟར་སྤྱོད་བཞི་དང་ལྡན་པ་ཡིས། །ཐབས་ཡབ་དང་ཤེས་རབ་ཡུམ་དང་ལྡན་འགྱུར་ནས་ཕུང་པོ་ཁམས་དང་སྐྱེ་མཆེད་ཐམས་ཅད་ལྷར་བྱིན་གྱིས་བརླབས་པ་དང་རྒྱན་ཆ་རྣམས་རྫོགས་པར་བྱ་བ་སྟེ། བསྙེན་སྒྲུབ་གསང་བའི་ཕྱག་རྒྱ་བཞི་ལ་རོལ་ཞིང་བདེ་བ་མྱོང་བའི་རིམ་པས། །རྟོགས་པ་ཐམས་ཅད་ལྷན་སྐྱེས་གཉིས་མེད་དབྱིངས་སུ་སྦྱོར་བར་བྱེད། ཡབ་ཡུམ་གཉིས་མེད་དབྱིངས་ནས་བྱང་ཆུབ་སེམས་ཀྱི་འོད་ཟེར་འབར། །ལུས་ལས་འོད་ཟེར་འཕྲོ་ཞིང་བདེ་བར་འབར་བས་ཏིང་ངེ་འཛིན་གྱི་ཕྱོགས་བཅུར་གསལ། །ཆགས་པའི་ཐིག་ལེ་བདེ་བས་ལྷན་ཅིག་སྐྱེས་པའི་ཡེ་ཤེས་མཚོན་ཆས་ཐབས་ཆེན་པོ་ཐབས་ཀུན་ཀྱི་མཆོག་གོ། །ཤེས་རབ་ཡེ་ཤེས་ཀྱི་དབང་དང་བདེ་མཆོག་ཤིན་ཏུ་བདེ་བ་ཆེན་པོའི་དབང་དང་བརྟན་པའི་དབང་རྣམས་དང་ལྡན་ཞིང་རྫོགས་པའོ། །ཡབ་ཀྱི་རྡོ་རྗེ་དང་ཡུམ་གྱི་དྲིལ་བུ་སྟེ་པདྨ་ཡང་དག་དོན་དང་ལྡན། །ཕྱག་རྒྱ་བཞི་ལྷ་མོ་བཞི་ཛཿཧཱུྃ་བཾ་ཧོ་བཟུང་བ་ནི་ལྕགས་ཀྱུ་མ་འཁྱུད་པ་ཞགས་པ་མ་སྡོམ་པ་ལྕགས་སྒྲོག་མ་འབེབས་པ་དྲིལ་བུ་མ་དང་ཕྱི་ནང་གི་མཆོད་པའི་ལྷ་མོ་བརྒྱད་ནི་ཆས་ཀྱིས་སྒེག་པ་བཛྲ་ལ་སྱ་མ། །བྱང་སེམས་སྤྲིང་པ་མ་ལྱ་མ། །བདེ་བའི་སྒྲ་སྒྲོགས་གིརྟི་མ། །སྦྱོར་བའི་གར་བྱེད་ནིརྟི་མ། །བདེ་བའི་དྲིས་ཚིམ་དྷུཔྤེ་མ། །བྱང་སེམས་འཐོར་བ་པུཥྤེ་མ། །བདེ་བ་གསལ་བྱེད་མར་མེ་མ། །བདེ་བ་ཁྱབ་བྱེད་གནྡྷེ་མའོ། །རྫོགས་པར་གཉིས་སུ་མེད་པར་རོལ་ཞིང་མཁའ་ལ་ཉི་ཟླ་དུས་གཅིག་ལྡན། །ཐབས་ཤེས་རབ་གཉིས་མེད་ཟུང་དུ་འབྲེལ་གྱུར་ན། །འབྲས་བུ་བདེ་བར་གཤེགས་པའི་དཀྱིལ་འཁོར་མ་ལུས་མངོན་དུ་འབྱུང་ཞིང་འཆར་བའོ། །ཐིག་ལེ་བྱང་ཆུབ་སེམས་དཔའི་འཇིགས་མེད་པ་རྡོ་རྗེའི་གཟུགས་སུ་ཆགས། །བྱང་ཆུབ་སེམས་ཀྱིས་མཆོད་ཚེ་ཐམས་ཅད་མཉེས་ཤིང་ཐུན་མོང་གི་དངོས་གྲུབ་མཁའ་འགྲོ་འདུ་བ་དང་ཁ་དོག་ས་ཏི་གསལ་བར་འགྱུར་ཚེ་ལ་དབང་བའི་རིག་འཛིན་ཐོབ་པས། སྒྱུ་འཕྲུལ་གྱི་དཀྱིལ་འཁོར་པར་བཞི་བཅུ་རྩ་གཉིས། །ལྷ་ཡུམ་དྲ་བའི་དཀྱིལ་འཁོར་རང་རིག་པའི་ངང་དུ་མངོན་སུམ་རྫོགས་པས། །ཕྱོགས་བཅུ་དུས་བཞི་མངོན་རྫོགས་པའི། །དཀྱིལ་འཁོར་ཐམས་ཅད་དེ་ཡི་གེ་འཁོར་ལོ་ཚོགས་ཆེན་གྱི་ས་འགྲུབ་པར་འགྱུར། །སྒྱུ་འཕྲུལ་དྲྭ་བའི་ཏིང་ངེ་འཛིན་བརྟན་པ་ཡིས། །ཕྱོགས་བཅུ་དུས་བཞིར་དེ་བཞིན་གཤེགས་པ་ཐམས་ཅད་ཀྱི་ཡིས། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་རང་རིག་པའི་མངོན་སུམ་དུ་འགྱུར་ཏེ་ཡེ་ཤེས་བླ་མའི་ས་ཐོབ། སྒྱུ་འཕྲུལ་དྲྭ་བས་མངོན་དུ་རྫོགས་པའི། །དཀྱིལ་འཁོར་ཚོམ་བུ་ལ་གོམས་ཤིང་བརྟན་པའི་ཏིང་ངེ་འཛིན་གྱིས། རྐང་པ་བྲོ་གར་ཕྱག་རྒྱ་བཞིའི་ས་ཏི་འདུ་འཕྲོ་ཡིས། །རི་བྲག་ལ་འཛུལ་ལམ་ནམ་མཁར་ལ་འགྲོ་བར་སྟེ་རྫུ་འཕྲུལ་ཐོབ་པ་འགྱུར་རོ། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་འབྱུང་སྟེ་ཆོས་ལ་དབང་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །མཚན་དང་དཔེ་བྱད་འབར་བའི་སྐུ་རྒྱལ་པོ་བདུད་ཀྱི་དཔུང་བཞིའི་མི་ཚུགས་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཐུན་མོང་གི་དངོས་གྲུབ་ཡིད་བཞིན་རཏྣ་ལྟ་བུ་དང་སྐུ་སངས་རྒྱས་པ་དང་ཟག་པ་མེད་པའི་བདུད་རྩི་འགྲུབ་པའོ། །ཡུམ་ཨ་ལི་ཡབ་ཀ་ལའི་ཕྱག་རྒྱ་ཡིས། ། ཐུན་མོང་གི་དངོས་གྲུབ་ཐམས་ཅད་དང་མཆོག་གི་དངོས་ཐམས་ཅད་འགྲུབ་པར་འགྱུར་རོ། །གདུག་པའི་འདུལ་བའི་ཚོགས་ཁྲོ་བོའི་དལ་རྣམས་བསྒྲུབ་པར་བྱ་བའང་། བསྒྲུབ་པའི་གནས་དང་ཟླ་ཡུམ་རྫས་དང་དུས་དང་བསྒྲུབ་པའི་ཆ་རྐྱེན་རྣམས་ནི། ཚོགས་ཀྱི་བསྒྲུབ་པའི་ཆ་རྐྱེན་མཆོག་ཏུ་དམིགས་པས་བཞག་གོ། །གནས་ནགས་ཚལ་དང་དུ་ཁྲོད་ཆེན་པོ་ལ་སོགས་པ་མི་དང་བགེགས་ལ་སོགས་པར་བར་ཆད་ཀྱིས་དབེན་པའི་སར་ཁྲོ་བོ་བསྒྲུབ་པའི་གནས་རྒྱུད། གཞུང་དང་མཐུན་པ་ཡི་དགོངས་པ་ལྟར་རྙེད་ནས་ནི། །ཕྱི་ནང་གི་གནོད་བྱེད་བགེགས་རྣམས་བསྐྲད་པ་དང་ཁྲོ་བོ་རྡོ་རྗེ་ལས་རིམ་ནས་འབྱུང་བ་ལྟར་ས་འོག་ཏུ་མནན་པ་དང་བྱིན་གྱིས་བརླབས་པ་ལ་སོགས་བྱ། ལས་རིམ་ལྟར་ས་གཞི་བསྙམས་པའི་གནས་སུ་བརྩིགས་པ་ལ་སོགས་རྒྱས་པར་བྱ། །སྒྲུ་འཕྲུལ་དྲྭ་བས་མངོན་རྫོགས་པས་སངས་རྒྱས་པའི། ཁྲོ་བོའི་དཀྱིལ་འཁོར་ལྷ་ཚོགས་ལྔ་བཅུ་རྩ་བརྒྱད་བསྒོམ་པ་ས་ཏི། བརྟན་པའི། །ཆོ་ག་ལྔ་སྔགས་ཀྱི་ཡན་ལག་རྫོགས་པ་ལོངས་སྤྱོད་ལྔ་ཡི་འབྱུང་བ་བཞིན་དུ་སྦྱང་སྦྱིན་ལ་སོགས་པ་དང་། རྣལ་འབྱོར་འཁོར་འདུས་པ་ངེས་པར་ཚོགས་འགྲུབ་པའོ། །སྟོན་པ་རྡོ་རྗེ་རྒྱལ་པོ་དམ་པའི་མཛོད་གསུམ་དང་ལྡན་པ་དབང་གི་ཆུ་བོ་ཅན། །རྒྱལ་ཐེབ་རྡོ་རྗེ་རྒྱལ་པོར་དང་དགོངས་པ་མཉམ་པ་མཚུངས་པ་དང་། །ལས་མཁན་ཀར་མ་སྐད་ཀྱི་གདངས་ཆེན་ཞིང་ལས་ཀྱི་རིམ་པའི་ཕྲིན་ལས་ཕྲེང་བར་ལྡན་པ་དང་། ལྗོན་ཤིང་མ་ནི་ཁ་དོག་དཀར་ཞིང་མཚན་དང་ལྡན་ཅིང་སྲིན་ལག་གི་རྩ་བ་ལ་སོགས་ཏེ་རི་མོ་འཁོར་ལོའི་ཚུལ་དུ་ཡོད་པ་སྟེ་ཞི་བ་དང་། ལྕུག་ཕྲན་མ་ནི་ཁ་དོག་དཀར་སེར་མཚན་དང་ལྡན་པ་ལ་རི་མོ་རིན་པོ་ཆེའི་གཟུགས་སུ་ཡོད་པ་སྟེ་རྒྱས་པའིའོ། །སྡོང་གཅིག་མ་ནི་ཤ་མདོག་དཀར་ལ་དམར་བ་རི་མོ་པདྨའི་དབྱིབས་སམ་གཟུགས་སུ་ཡོད་པ་སྟེ་དབང་གིའོ། །རེག་མ་ནི་ཁ་དོག་ནག་གམ་སྔོ་ལ་རི་མོ་རལ་གྲི་གཟུགས་སུ་ཡོད་པ་སྟེ་དྲག་པོའི་འོ། །དེ་ལྟར་མཚན་དང་ལྡན་ཞིང་ཡོན་ཏན་རྫོགས་པའི་གཟུངས་མ་དང་། །གཞན་ཡང་རྡོ་རྗེ་བྱ་རོག་དང་གིང་དང་རྡོ་རྗེ་བྱན་པོ་དང་རྡུལ་ཕྱགས་སྐྱེས་བུའི་འཁོར་ལ་སོགས་པ་རྣལ་འབྱོར་མི་སྲིང་བརྩེ་གདུང་ཆེ་ཞིང་དམ་ཚིག་དང་ལྡན་པ། ཚོམ་བུ་ལྔའམ་ཟུང་གིས་བསྒྲུབ་པར་བྱའོ། །དཀར་རྩི་བྱང་སེམས་དམར་རྩི་རཀྟ་དྲི་ཆེན་དྲི་ཆུ་ཤ་ཆེན་དང་། རྡོ་རྗེ་དུང་ཆེན་ཐོད་པ་རཀྟ་དམར་གྱིས་དགང་པ་དང་། མི་རྐང་ལ་སོགས་དུང་དང་སྲོག་སྒལ་ཚིག་སྙིང་ཤིང་གསར་རྙིང་དང་། །ལྷའི་རྟེན་སྐུ་གཟུགས་བྲིས་སྐུ་དང་ལུགས་ཆེན་ཐོད་སྐུ་དུང་མཆོག་ཚལ་བུའི་སྐུ་དང་། །དུར་ཁྲོད་ཀྱི་རྒྱན་བརྒྱད་དང་དཔལ་གྱི་ཆས་བརྒྱད་དེ་བཅུ་དྲུག་ཚང་བ་དང་། །སྒྲུབ་པ་པོ་འཚོ་བའི་ཡོ་བྱད་དང་། །ཐོད་སྐུ་དང་མར་མེ་ལ་སོགས་སྒྲུབ་པའི་རྫས་དང་དངོས་གྲུབ་ཀྱི་ཡོ་བྱད་དང་སྐྱེ་བ་བདུན་པའི་བམ་མཚན་ལྡན་ནི། ཞིང་གྱུར་མཆོག་དང་མཆོག་ཕྲན་ཞིང་བཅུ་དང་། །བགེགས་ཀྱི་རྐྱེན་བཟློག་པའི་རྫས་ནི་ཉུང་ཀར་ཕུར་བུ་ལྕེ་གུལ་གུལ་བོག་གནག་ལ་སོགས་པ། ནད་ཀྱི་རྐྱེན་བཟློག་པ་སྨན་དང་སྨན་པར་བཅས་པ་དང་། །དགྲ་བཟློག་པ་རྡོ་རྗེ་གོ་མཚོན་མཁར་ལེན་དང་བཅས་པ་དང་། །གཞན་ཡང་ཁྲོ་བོ་བསྒྲུབ་པ་ལ་དགོས་པའི་ཇི་སྙེད་པ་ཡི་རྫས་རྣམས་ཀུན། །འཇིགས་བྱེད་ཁྲོ་བོ་དཔལ་ཆེན་པོའི་ཏིང་འཛིན་དང་། །ཉམས་ང་བ་དང་ཐེ་ཚོམ་པ་མེད་པའི་སེམས་ཀྱིས་སྤྱོད། །རྫས་དེ་དག་བསྡུས་ཏེ་དགོས་ཆེད་ཚོགས་སུ་བྱ་བའི་ཕྱིར། །རང་དངོས་གྲུབ་ཅི་འདོད་པའི་བསྒྲུབ་རྫས་སྣང་བར་བདག་གིས་དགོད། །ཐ་མས་ཞག་ནི་སུམ་ཅུ་ཕྲག་དྲུག་གམ། །རབ་ཞག་དྲུག་ཅུ་འབྲིང་གིས་ཞག་དགུ་བཅུ་རྩ་དྲུག་ཏུ། །འཇིགས་བྱེད་ཆེན་པོའི་ཏིང་འཛིན་བསྒོམ། །སྒྱུ་འཕྲུལ་དྲྭ་བའི་དཀྱིལ་འཁོར་ལ། །ལྟ་བ་བསྒོམ་པ་གདེང་དང་བཅས་པའི་བསམ་པ་ཡིས། །འབྲས་བུ་གཞན་ནས་རེ་བ་དང་མི་ཐོབ་དོགས་མེད་པར་རབ་ཏུ་བསྒྲུབ། །གླུ་དང་གར་དང་ལག་གི་ཕྱག་རྒྱ་དང་། །གང་ཡང་ལྟ་བ་ལ་དམིགས་པའི་ཤེས་རབ་སྤྱོད་པ་མ་འགགས་པ་ཐབས་སུ་ཤེས་པ་དང་། །ཡབ་ཡུམ་རོལ་པའི་གསང་བ་བྱང་ཆུབ་སེམས་ཀྱི་མཆོད་པ་དང་། །ལུས་ངག་གི་བརྡའ་ལ་སོགས་པས་བྱས་པའི་ཡོན་ཏན་དངོས་གྲུབ་ཐོབ་པ་དང་། །བཟའ་བ་དང་བཅའ་བ་དང་བཏུང་བ་དང་བགོད་པ་ལ་སོགས་པ། འདོད་པའི་ལོངས་སྤྱོད་ལྔ་ལྡན་ཡབ་ཡུམ་གྱིས། །མདོར་ན་ཁྲོ་བོའི་ཚོགས་རྣམས་མངོན་དུ་བསྒྲུབ་པར་བྱའོ། །སྤྱིར་ལམ་རིམ་གྱིས་ཡི་བསྙེན་སྒྲུབ་སྔོན་ཞི་བའི་སྐབས་བཞིན་དུ་ཤེས་པ་དང་། སྒྲུབ་པའི་ཐབས་ཀྱི་བསྙེན་སྒྲུབ་བཞི། །དང་པོའི་ཚེ་ན་གནས་ཆེན་དེར། །བློ་རབ་འབྲིང་གི་ལྷག་པའི་ཏིང་ངེ་འཛིན་གྱི་དལ་རྒྱང་གྲགས་དཔག་ཚད་ལས་སོགས་དང་། །གཟུགས་བརྙན་གྱི་ཚོམ་བུ་གཅིག་པ་ལ། ལུས་གང་ལུས་དེ་གསུམ་གྱི་ཚད་ཚོམ་བུ་གསུམ་པ་བཞི་པ་ལྔ་པ། རང་གི་རིགས་པས་ཅི་ཙམ་བསྒོམ་ནུས་པ་བྱ། །རྣལ་འབྱོར་པ་ཕྱག་རྒྱ་ལྷའི་གཟུངས་དང་སྙིང་པོ་རྣམས། །ཐལ་ཆེན་ལ་སོགས་པ་ཁ་དོག་ལྔ་ཡི་ཚོན་གྱི་ཁ་བསྒྱུར་ཏེ་བྲི་བར་བྱ། །བསྒྲུབ་པའི་ཡོ་བྱད་རྣམས་སྔོན་ཞི་བ་བཞིན་བྱིན་གྱིས་རླབས་ནས། །རྡོ་རྗེ་སེམས་དཔའ་ལ་ལྷ་མོ་བཅུ་དྲུག་གི་བསྐོར་བ་འཕགས་རྒྱལ་མཆོད་ཅིང་ཕྱི་རོལ་པ། །ཕྱོགས་བཅུ་རྒྱལ་ཆེན་བཞི་མཉེས་པ་དང་གཉིས་པོ་ལན་ཆགས་སྙིང་རྗེ་མགྲོན་ལ་ཡང་། །སྦྱིན་པས་འགྲོ་དྲུག་ཚིམས་པར་བྱས་ལས་རྣམས་བཀའ་བསྒོ་བར་བྱ། །ཞེ་སྡང་རྡོ་རྗེ་འཇིགས་བྱེད་དབང་དུ་བདག་ཞུགས་ནས། །ཁྲོ་བོ་བཅུ་ངང་ཁྲོ་མོ་བཅུ་འཁོར་མོ་བྱ། །གདན་དུ་ཕྱོགས་སྐྱོང་བ་བཅུ་གཟིར་ཞིང་ཕྱོགས་མཚམས་སུ་ཕུར་བས་གདབ། །རང་བཞིན་གྱིས་གནས་ནས་སྙན་གསན་ཕབ་ལ་སྤྱན་དྲངས་གཉིས་སུ་མེད་པར་བསྟིམ་མཆོད་བསྟོད་དེ། །བགེགས་ཀྱི་བར་ཆད་ཏིང་འཛིན་མཆོག་གིས་བཟློག་སྟེ་དམ་སྲི་མནན། ཕྱི་མཚམས་ནང་མཚམས་ཐུན་མོང་བསྲུང་བའི་འཁོར་ལོ་བྱ། །དེ་ནས་གཉིས་པར་ཉེ་བསྙེན་ནི་རྒྱན་རྣམས་དགོད་པ་དང་། །བསྒྲུབ་རྫས་དང་མཆོད་པའི་རྫས་རྣམས་དགྲམ་པ་རྫོགས་ནས། །ཕྱི་མཚམས་བདུད་རྩི་འ ཁྱིལ་པ་དང་ནང་མཚམས་ཁྲོ་བོ་བཅུ་གསང་བའི་མཚམས་བཅད་བར་ཆད་བསྲུང་བར་བྱ་སྟེ། །མ་ཏྲང་སྲིན་པོའི་རྒྱལ་པོ་ཚུལ་བཞིན་གནན། །དེ་ནས་རྟགས་ལྡན་པར་བྱ་སྡིག་སྒྲིབ་བཤགས་སྦྱོང་དང་བྱིན་དབབ་ལྡན་པར་བྱ། །དེ་ནས་ཕྱི་ནང་གི་མཆོད་རྫས་རྣམས་བྱིན་གྱིས་བརླབས། །སྔོན་འགྲོ་རྫོགས་པ་དེ་ནས་འཁོར་ལོ་ཚོམ་བུ་གཅིག་པའམ། །ཚོམ་བུ་གསུམ་པ་དང་ཚོམ་བུ་ལྔ་རུ་བློའི་རིམ་པ་གོང་ལྟར་བསྒོམ་པར་བྱ། །ཕོ་བྲང་གི་འཁོར་ལོ་བར་འཁྱམས་དུའང་སྒོ་རྣམས་སུ། །འཇིགས་བྱེད་བཛྲ་ཧེ་རུ་ཀ་འཁོར་ལོའི་རིགས་ཀྱི་གཙོ་མཛད་པའི། བཙུན་མོའི་ཚོགས་དང་ལྡན་པར་བསྒོམ། །སྟེ་བྷུདྡྷ་ཧེ་རུ་ཀ་ཞི་དང་དྲག་པོ་བྱང་དུ་ཀརྨ་དབང་ནུབ་ཏུ་པདྨ་དང་རྒྱས་ལྷོ་རུ་རཏྣ་ཧེ་རུ་ཀའོ། །འཇིགས་པར་བྱེད་པའི་རིགས་བཞི་ཚོགས་ཆེན་བསྒོམ་པའི་དེ་དབུས་སུ། །ཞི་བ་ལ་བདག་ཉིད་དྲག་པོ་བཛྲ་ཧེ་རུ་ཀས་བཅོས་ཚུལ་དུ། །ཡོངས་སུ་རྫོགས་པ་སྐུ་གསུང་ཡིག་འབྲུ་ཐུགས་ཕྱག་མཚན་ཀྱི་དཀྱིལ་འཁོར་བསྒོམ། །ཆོ་ག་གསུམ་གྱིས་བསྐྱེད་པ་ནི་དེ་བཞིན་རིགས་དང་རྡོ་རྗེའི་དང་པདྨའི་རིགས་དང་། །རིན་ཆེན་རིགས་དང་རལ་གྲི་ཀརྨ་ཧེ་རུ་ཀ་སྟེ་རིགས་ལྔའི་ཚོམ་བུ་བསྒོམ། །ལྷ་གཅིག་པའི་ཚོམས་བུ་ལའང་རྡོ་རྗེ་གསུམ་པོ་མོས་སོ། །སྐུ་བྷུདྡྷ་གཙོ་བྱས་ལྔ་གསུང་པདྨས་གཙོས་བྱས་ལྔ་ཐུགས་ཀྱི་རྡོ་རྗེ་ཧེ་རུ་ཀས་གཙོས་བྱས་པ་སྟེ་འཇིགས་བྱེད་དོ་དཀྱིལ་འཁོར་འཁོར་དང་བཅས་པ་བསྒོམ། དེའི་སྟེང་དུ་རཏྣ་ཧེ་རུ་ཀ་དང་ཀརྨ་བསྣན་པས་འཇིགས་བྱེད་ལྔ་རྫོགས་དཀྱིལ་འཁོར་ནི། །འདུས་པའི་ཚོམ་བུ་ལྷ་ཡི་རིགས། །ཡབ་ཡུམ་བསྡོམ་པས་ཉི་ཤུ་རྩ་ལྔ་སྐུའི་གསུང་གི་ཐུགས་ཀྱི། ཡོན་ཏན་གྱི་ཕྲིན་ལས་ཀྱི་རིགས་ལྔ་འཁོར་དང་བཅས་པ་རྫོགས་པར་བསྒོམ། །དུར་ཁྲོད་ཀྱི་རྒྱན་དང་དཔལ་གྱི་ཆ་ལུགས་དང་འབར་བའི་གར་དགུ་ལ་སོགས་པ། །འཇིགས་པའི་ཚོགས་ནི་རུ་ཏྲའི་ཁྲོ་བོའི་དཀྱིལ་འཁོར་ཇི་བཞིན་པར། །སྤྱིའམ་ཡང་ན་མི་རེ་རེ་ལྷ་རུ། །ཚམ་རྔམ་ཆེན་པོ་འཇིགས་བྱེད་གཏུམ་པ་ཁྲོ་བོའི་ཆ་ལུགས་བསྒོམ། །ལྷག་པའི་དཀྱིལ་འཁོར་དགུ་ཡན་ལག་གི་ལྷ་དགུར་ལྡན། །སྐུ་གསུང་ཐུགས་བྱིན་གྱིས་བརླབས་དབུ་རྒྱན་རིགས་གྱི་ལྷ་ལྔས་དབང་བསྐུར་ཐོབ་པའི་ཐུགས་ཡེ་ཤེས་སེམས་དཔའ་དང་དགུའི་འཁོར་ལོ་བདག་དཀྱིལ་ལ་བསྒོམ། རང་བཞིན་གྱི་གནས་ནས་སྙན་གསན་ཕབ་སྤྱན་དྲངས་བཀུག་གཉིས་མེད་དུ་རྒྱ་བཞིས་དགུག་ཅིང་བརྟན་པར་གཞུག་ཅིང་། དགྱེས་ནས་ཕྱག་གི་པུ་ཙ་ན་མར་རིམ་བཞིན་མཆོད་པ་བྱ། །ༀ་ཨཱཿཧཱུྃ་ཀ་བ་ཙ་སུ་ར་ཏོ་བདེ་བ། མ་ཧཱ་ཆེན་པོ་པཉྩ་ལྔ་ཨ་མྲྀ་ཏ་བདུད་རྩི་ཤྲཱི་དཔལ་ཧེ་རུ་ཀ་དགྱེས་སུ་ཆགས་པ་མན་སྔགས་ཏྲ་ཛྭ་ལ་འབར་མ་མ་ཧཱ་ཆེན་པོ་མ་དྷ་ལ་དལ་ཀ་ཡ་བཀྐ་ཙིཏྟ་སྐུ་གསུང་ཐུགས། ༀ་ༀ་ༀ། སྐུའི་ཀ་བ་ཙ། ཧཱུྃ་ཧཱུྃ་ཧཱུྃ་ཐུགས་ཀྱི་ཀ་བ་ཙ། ཡོན་ཏན་གྱི་སྐུ་གསུང་ཐུགས་སྭཱཾ་སྭཱཾ་སྭཱཾ། གསུང་གི་ཀ་བ་ཙ་ཨཱཾ་ཨཱཾ་ཨཱཾ། ལས་ཀྱི་སྐུ་གསུང་ཐུགས་ཧཱཾ་ཧཱཾ་ཧཱཾ། བཛྲ་རྡོ་རྗེ། མ་ཧཱ་ཆེན་པོ་ཀ་པ་ལ་ཐོད་པ་ཁརྐ་སྙིང་པོ་དྷ་ན་སྦྱིན་པ་ཛྭ་ལ་འབར་མ། སིདྡྷི་དངོས་གྲུབ། མ་ཧཱ་ཆེན་པོ། དཔལ་ཤྲཱི་ཧེ་རུ་ཀ་ཁྲག་འཐུང་། ཨ་མེ་མེ་ཏོག་དྷུ་མེ་སྤོས། སིདྡྷོ་གྲུབ་པར་བྷ་བ་ཏུ་གྱུར་ཅིག །སཾ་ཧ་ར་ཎ་སྲུང་གཅིག་ཧཱུྃ་ཧཱུྃ་ཧཱུྃ་སྡུང་པ། མ་ཧཱ་ཆེན་པོ་ཡོ་ག་རྣལ་འབྱོར་ཨནྟ་ར་ནང་པ་མ་ཧཱ་ས་མ་ཡ་དམ་ཚིག་ཆེན་པོ། རུ་ལུ་རུ་ལུ་ཧུབ་གསུམ་བཏུང་ངོ་། །ཨ་ལ་ལ་ངོ་མཚར་ཧོ་དགྱེས་པའོ། །གཏོར་མ་ༀ་ཨཱཾཿཧཱུཾ་ཀ་བ་ཙ་སུ་ར་ཏཿ བདེ་བ་འབུལ་བ། ཀ་མ་ལ་འདོད་པ། མ་ཧཱ་ཆེན་པོ། སུ་ཀ་བདེ་བ། མཱ་ལེ་ཕྲེང་བ། མ་ནུ་ཡིད་སེམས། ས་མ་ན་དམ་ཚིག །གསང་ནན་འབུལ་བ་ཛྭ་ལི་ནི་འབར་བ་དྷ་དྷ་ཎ་སྦྱིན་པ། ཨ་ཝ་མཆོད་སྦྱིན་ཡོ་ག་རྣལ་འབྱོར་ཁཱ་ཧི་གསོལ་ཅིག །ཨ་ལ་ལ་རྟོགས་པ་ཧོཿ དེ་ཤེས་པ། དེ་ལྟར་མཆོད་པའི་རིམ་པ་དང་བསྟོད་པ་དང་སྨོན་ལམ་བཏབ་རྫོགས་ནས་བསྙེན་པའི་ས་ཏི་ནི། །ལྷ་ཡེ་ཤེས་སེམས་དཔའ་འཛབ་ཁང་མདུན་དུ་ལྷགས་པ་ལ། །ལྟ་བ་དོན་ལ་གནས་པ་བཟླས་ལ་བདག་དམ་ཚིག་པ་ཕར་འཕྲོས་པ་གསལ་ལྷ་ཡེ་ཤེས་སེམས་དཔའ་མདུན་དུ་གསལ་བ་གསུམ་གྱིས་བྱ། །གང་བསྙེན་གྱི་ༀ་ཡབ་ཀྱི་ཁྲོ་བོ་བཛྲ་མ་ཧཱ་ཀྲོ་ཏ་ཤྲཱི་ཧེ་རུ་ཀ །ཡུམ་གྱི་ཁྲོ་མོ་བཛྲ་ཀྲོ་ཏཱི་ཤྭ་རི། དབྱིངས་ཕྱུག་མ་སརྦ་ཐམས་ཅད་དུཥྚཱ ན་སྟོང་པ་ཧཱུྃ་ཕཊ་སྒྲོལ། རུ་ལུ་མ་ཧཱ་ས་མ་ཡ་ཧཱུྃ༔ ཐུགས་དམ་གནད་ལ་དབབ་པ་རུ་ལུ་རུ་ལུ་ཧཱུྃ་བྷྱོ་ཧཱུྃ། དེ་ལྟར་འཛབ་རྫོགས་པའི་བཟླས་པ་ནི་རིགས་བཞི་བསྙེན་དང་འཕྲོ་འདུ་ཡིས། །ཞག་བདུན་གྱི་པར་ཕར་འཕྲོས་པས་ཐམས་ཅད་བསྐུལ་བ་དང་སྣོད་དུ་རུང་བ་བྱེད་པའོ། །བསྒྲུབ་པའི་དུས་སུ་འདི་བཟླ་ན་བསྙེན་པའི་དཀྱིལ་འཁོར་རྫོགས་པའོ། །དེ་བསྙེན་པའོ་དེ་བཞིན་དུ་བསྒྲུབ་པའང་། །ཡར་འཕྲོ་བས་བྱིན་རླབས་ཚུར་འདུས་དངོས་གྲུབ་བསྐུལ་དང་དངོས་གྲུབ་རྩོལ་བ་སྡུད་པའོ། །གོང་ལྟར་བཟླས་པའི་སྐྱོན་བཅུ་སྤང་སྟེ་བསྒྲུབ་པ་ནི། །བསྒྲུབ་པ་བྱེད་པའི་དུས་སུ་ཤེས་པར་བྱ། །བསྙེན་སྔགས་གཅིག་ནི་བསྒྲུབ་པ་ཆེན་པོ་ལ་རྫས་དང་པུ་ཙ་ལྟར་བཤམ་པར་མི་སྤྲོ་བར་ཚུར་བདག་ལ་བསྡུ་བ། །བསྒྲུབ་པ་ཆེན་པོ་ཡིན་པར་ཤེས་པར་བྱ། །བསྒྲུབ་པས་ཤེལ་ལྟར་ཁ་དོག་དཀར་པོ་དང་བྱི་རུའི་བུང་བ་ལྡིང་བ་ལྟར་ཁ་དོག་དམར་པོ་དང་། །མཐིང་ནག་གི་བུང་བ་མང་པོ་ལྟར་བསྒྲུབ་པ་ཆེན་པོ་དག་ཚུར་འདུ་བའོ། །བསྙེན་བསྒྲུབ་ཏུ་བསྙེན་པ་དང་སྒྲུབ་པ་ལ་བཅུད་སྡུད་པ་རིམ་བཞིན་བུང་བ་མེ་ཏོག་འཇིབ་ཅིང་ཚང་དུ་གསོགས་པའི་ཚུལ་དང་། །བསྒྲུབ་ཆེན་མཚོ་ལ་སེར་ཆེན་འབབ་པ་བཞིན་ཕར་སྤྲོ་ཚུར་ཐིམ་པ་ཡིན་ནི། །འདོད་མི་བརྟེན་ཞིང་མི་ལེགས་པ་བར་ཆད་ཀྱི་རྟགས་དང་། འོད་དྭངས་ཤིང་གསལ་བ་བརྟན་པ་དངོས་གྲུབ་ཀྱི་རྟགས་སོ། །དང་དྲི་དྲི་མི་ཞིམ་པ་བསེའི་དྲི་ལ་སོགས་པ་བར་ཆད་ཀྱི་རྟགས་ལ་དྲི་ཞིམ་ཞིང་ལྡང་བ་དངོས་གྲུབ་ཀྱིའོ། །དང་སྒྲ་སྒྲ་ལ་ཡང་དེ་བཞིན་དུ་ཤེས་པར་བྱའོ། །དང་གཟུགས་ལྷའི་གཟུགས་ལ་སོགས་པ་རྣམ་པ་འགྱུར་ཞིང་མི་བརྟན་ཞིང་ཤེས་པ་མཐོ་དམན་ཆེ་བ་བདུད་ཀྱི་དང་། གཟུགས་བརྟན་ཞིང་ཤེས་པ་རང་བཞིན་གྱིས་གནས་པ་དངོས་གྲུབ་ཀྱིའོ། །འོད་ལ་སོགས་པ་སྒྲུབ་པ་པོ་ལ་འཁོར་བ་དང་མར་མེ་རྟ་མགོ་ཙམ་དུ་འབར་དང་རཀྟ་བདུད་རྩི་སྨན་ཁོལ་བ་ལ་སོགས་པ་རྟགས་བྱུང་ན་ལྟ་དགོངས་དང་ལྡན་པ་ནི་སྔགས་དང་མུ་དྲས། བར་ཆད་ཡིན་ནམ་དངོས་གྲུབ་ཡིན་གྱི་ཆ་རྣམས་དངོས་པོ་དུས་མཚན་མ་བརྟག་པར་བྱ་སྟེ། །བར་ཆོད་ཡིན་ན་བསྐྲད་དེ་བདག་སྲུང་བར་བྱ་ལ་སྒྲུབ་པའི་ཞག་གྲང་ཚང་ཞིང་དངོས་གྲུབ་ཀྱི་རྟགས་བྱུང་ནས་ཡིན་པར་འདུག་ན། དཀྱིལ་འཁོར་དང་མཐུན་པ་ཉིད་དུ་སྦྱར་ཏེ་སྐུ་གསུང་ཐུགས། ཡིན་ན་དངོས་གྲུབ་གནས་སུ་བསྟིམ་ཞིང་བརྟན་པར་བྱ་བ་ཉིད། དེས་ན་སྔོན་ཞི་བ་བཞིན་ཀ་བ་ཙའི་སིདྡྷི་རྣམ་གསུམ་ཐོབ་པའོ། །བསྙེན་སྒྲུབ་གསང་མཆོག་རྒྱས་པར་བཤད་པར་བྱ་བ་ནི། གདུལ་བྱའི་ཞིང་གྱུར་ནི་བཀྲ་ཤིས་མཚན་ལྡན་མ་སྐྱེ་བ་བདུན་པ་ལ་མཆོག་དང་ཐུགས་རྗེ་འབྱུང་བའི་ཞིང་ངན་སོང་རྒྱུ་མཆོག་ཕྲན་བསྒྲལ་བའི་ཞིང་དུ་གྱུར་པའི་མི་དང་། །ཡུམ་ཉི་ཡབ་ཟླའི་སྟེང་དུ་བསྒྲལ་བའི་ཐབས་ལ་མཁས་པས་བཞག །དེ་ལྟ་བུའི་མཁས་པ་རང་དཔལ་ཆེན་པོའི་ང་རྒྱལ་དང་ལྡན་པས་ལག་གི་ཌཀི་ར་ཙའི་ང་རྒྱལ་བར་བྱ་སྟེ་འདུ་བྱེད་བསྒོམ་པ་ནི་ལག་པ་གཡས་པའི་སོར་མོ་ལ་དཔའ་བོ་འབྲུ་ལྔ། གྲི་འཇམ་དཔལ་བསྒྲལ་བྱ་རུ་ཏྲར་བསམས་ལ། གང་གི་བསྒྲལ་བྱའི་བག་ཆགས་ས་བོན་ཨ་ཎི་སུ་ཏྲི་པྲེ་དུའི་ཡིག་འབྲུ་རྣམས་དང་བསྒྲལ་བྱའི་ཤེས་པ་ཉིད། ཧཱུྃ་དུ་གྱུར་ཏེ་གསལ་བར་བྱ་པས་རྣམ་པར་དག་ཉི་ཟླའི་སྟེ ང་དུ་མཁས་པས་བཞག་པ་ནི་དེ་ནས་ཧཱུཾ་དེ་ཡུམ་གྱི་མཁའ་གསང་ཉི་ཟླའི་སྟེང་དུ་མཁས་པས་བཞག་པའོ། །འོད་དུ་ཞུ་སྟེ་ཆོས་ཀྱི་དབྱིངས་སུ་ཐིམ་ནས་ཕྱག་རྒྱར་རྟགས་རྡོ་རྗེ་རྩེ་ལྔ་འབར། །དེ་ལ་རྡོ་རྗེ་སེམས་དཔའི་སྐུར་གྱུར་ཏེ་འོད་ཟེར་སྣ་ཚོགས་འཕྲོ་བས་བརྗིད་དང་ལྡན་པར་བསྒོམ། དེ་ནས་འོག་མིན་དུ་འཕང་སྟེ་སྤྱི་བོའི་གཙུག་ཏུ་རྣམ་པར་རྒྱལ་བ་སྟེ་རྣམ་སྣང་བསྒོམ། །དེ་ནས་ཕུང་པོ་ཁམས་དང་སྐྱེ་མཆེད་ཐམས་ཅད་དེ་བཞིན་གཤེགས་པར་བྱིན་གྱི་བརླབས་ནས། །རྒྱལ་བའི་སྲས་སུ་ཟབ་མོའི་དབང་ཡང་བསྐུར། །ཤིན་ཏུ་ཁྲོ་བོ་ཆེན་པོ་ཡིས། །ཐབས་ཀྱིས་སྔོན་བྱུང་དུ་ལྷ་ཆེན་རུ་ཏྲ་བསྒྲལ་བ་ལྟར། །ཆོས་ཉིད་མངོན་སུམ་དུ་རྟོགས་པའི་ལྟ་བ་དང་སྒོམ་པ་དང་ཏིང་ངེ་འཛིན་གྱིས། །བསྒྲལ་བྱ་སྒྲོལ་བྱེད་གཉིས་སུ་མེད་པར་ཐབས་ཀྱིས་བསྒྲལ། །ཚོགས་སྒྲུབ་ཀྱི་ཐུགས་རྗེ་ཆེན་པོའི་བྱིན་རླབས་ཀྱིས། །བསྒྲལ་བྱ་ལམ་ལྔའི་སེམས་ཅན་ཀུན་བཀུག་ནས། །ཐམས་ཅད་མ་ལུས་བསྒྲལ་བར་བྱ། །གནས་ཕྱི་ནང་སྣོད་བཅུད་ཇི་སྙེད་བསྒྲལ་བྱ་ན། །གནས་པའི་སེམས་ཅན་མ་ལུས་ཀུན། །སྒྲོལ་མཁན་བདག་ཉིད་ཆེན་པོ་རྟོགས་པ་རྟོགས་ཞིང་གོམས་པའི་ཏིང་ངེ་འཛིན་དང་ལྡན་ཡིས། །བསྒྲལ་བྱ་ཐམས་ཅད་གཉིས་མེད་དབྱིངས་སུ་ཡང་ནི་བསྒྲལ་བར་བྱ། །གནས་རི་རབ་ཆེན་པོའི་གླིང་བཞི་ལ། །གནས་པའི་བསྒྲལ་བྱ་དེའི་སེམས་ཅན་མ་ལུས་ཀུན། །སྒྲོལ་མཁན་རྣལ་འབྱོར་པ་དེ་ཐུགས་རྗེ་ཆེན་པོའི་བྱིན་རླབས་ཀྱིས། །བསྒྲལ་ཐབས་ཏིང་ངེ་འཛིན་གྱིས་ཡེ་ཤེས་མེ་ཆེན་བསྒོམ་བྱས་ཏེ། །སྣང་གྲགས་ཐམས་ཅད་མ་ལུས་ཡེ་ཤེས་ཀྱི་མེས་སྲེག་པར་བྱ། །གཉིས་མེད་ཆོས་ཀྱི་དབྱིངས་སུ་ཡང་ནི་བསྟིམ་པར་བྱ། །སྲིད་གསུམ་བསྲེག་པའི་རྟོགས་པའི་ཡེ་ཤེས་མེ་ཡིན་ཏེ། །རང་བྱུང་ཡིད་ཀྱི་ཡེ་ཤེས་མེ་རུ་འབར། །རཾ་མེའི་སྙིང་པོ། ཁོ་རང་གིས་བསོད་ནམས་བསགས་པ་མེད་པས་གཞན་གྱིས་བསྒྲལ་བ་ལ་ངོ་མཚར་ངན་སོང་དུ་འགྲོ་བ་ཐར་བའི་ལམ་ལ་དགོད་པའི་ཐབས་མཆོག་སྟེ། དེ་ཡང་དོན་དམ་དུ་ཡེ་ནས་ཆོས་ཉིད་སྐྱེ་མེད་དེ་བཞིན་ཉིད། །བསྒྲལ་བྱ་ཀུན་རྫོབ་སྒྱུ་མར་སྣང་བ་མིག་ཡོར་རྟོགས་པ་མེད་པའི་ཚུལ། །དེ་ལྟར་ཡིན་ཅིང་རྟོགས་པས་སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །དེ་ལྟར་རྟོགས་པས་བསྒྲལ་བ་ཀུན་བྱས་ཀྱང་། །བསྒྲལ་བའི་དངོས་པོ་གང་ཡང་མེད། །ཕུང་པོ་ལྔ་པོ་ཉིད་གཞིག་པར་བྱ། །བཤིག་ན་ཡང་འབྱུང་བ་ལྔའི་བག་ལ་ཞ་སྟེ་འབྱུང་བ་རང་སར་གྲོལ། མ་བཤིག་ན་ཡང་འབྱུང་བ་འདུས་པའི་ཕུང་པོ་ཡིན་ཏེ་རང་སར་དག །རྣམ་ཤེས་གསོད་ཚེ་ན་རྣམ་ཤེས་བསྒྲལ་ལོ་ཞེ་ན་དངོས་པོ་མེད་པས་བསད་པར་བྱས་ནས། །རྨི་ལམ་སྲོག་བཅད་པས་བཅད་དུ་མེད་པའི་ཚུལ་བཞིན་དུ། །གནས་པ་ཉིད་ན་ངོ་བོ་མེད། །སེམས་ཀྱི་རང་བཞིན་སྐྱེ་བ་མེད་དེ་ལ་ནི། །ཕྱོགས་བཅུ་དུས་གསུམ་གྱི་སངས་རྒྱས་མ་ལུས་དགྲ་ལངས་ཀྱང་། །བསད་དུ་མེད་པའི་སེམས་དེ་བཞིན་སུས་ཀྱང་ཟིན་ཅིང་སོད་པ་མེད་དོ། །འོ་ན་དེ་ལྟར་བསྒྲལ་བྱ་སྒྲོལ་བྱེད་མེད་པ་ལ་ཐུགས་རྗེས་གང་བསྒྲལ་ན། །རྣམ་རྟོག་དང་ཏིང་ངེ་འཛིན་གྱི་མཚན་མ་ཐམས་ཅད་ཀུན། །ཕྱིན་ཅི་ལོག་ཏུ་འཛིན་པ་ལས་སླར་བཟློག་པར་བྱ་སྟེ། །སྒྲོལ་བའི་ལྟ་དགོངས་ཏིང་ངེ་འཛིན་དང་སྔགས་དང་ཕྱག་རྒྱ་དང་། །ཤིན་ཏུ་ལྟ་བ་རྟོགས་ཤིང་ཏིང་ངེ་འཛིན་གོམས་པས་སྒྲིབ་པ་སྦྱང་དབང་བསྐུར་ཏེ། །བླ་ན་མེད་པའི་བྱང་ཆུབ་ཀྱིས་ཞིང་ལ་དགོད་པར་བྱ། །དེ་ཙམ་ལ་ནི་ཐ་སྙད་དུ་བསྒྲལ་བ་ཞེས་གདགས། །བསྒྲལ་བ་ཡང་དག་པའི་དོན་ཆོས་སེམས་ཆོས་ཉིད་ན་སྦྱོར་བ་ཡིན། །དེ་ཡང་ཉོན་མོངས་སྡུག་བསྔལ་ཐམས་ཅད་རྩད་བཅད་ནས། །བྱང་ཆུབ་ཆོས་སྐུའི་ཞིང་དུ་བསྒྲལ་ནས་ཀྱང་། །གཉིས་མེད་ཆོས་ཀྱི་དབྱིངས་སུ་སྦྱོར་བ་ཡིན། །ལྷ་མོ་ནི་ལྕུག་ཕྲན་མ་ལ་སོགས་ཏེ་རིགས་དང་མཚན་དུ་ལྡན་པ་དང་ཀླུ་མོ་ནི་རིགས་མཚན་དུ་ལྡན་པ་རིགས་འབྲིང་ལ་རིགས་ངན་མོ་མཚན་ཕྱོགས་ཙམ་དང་ལྡན་པའོ། །དེ་ལྟར་དབྱེའམ་ཡང་ན་དགོངས་པ་དང་མི་ལྡན་ན་མཁས་པས་མི་དབྱེ་བར། །ཆས་སུ་གཞུགས་པ་བསྙེན་པ་དང་ནི་བྱིན་གྱིས་བརླབས་ཉེ་བར་བསྙེན་པ་དང་། །ཕྱག་རྒྱ་བཞིས་རོལ་པ་བསྒྲུབ་པ་དང་ནི་བསྒྲུབ་ཆེན་པོ། །ཤེས་རབ་དབྱིངས་མ་ཁྲུས་བྱ་ཞིང་རྒྱན་ཆས་སུ་གཞུག་ལ། །ལྷ་ཡབ་ཡུམ་དུ་བསྐྱེད་ལ་སྐྱེ་མཆེད་བྱིན་གྱི་རླབས་བདེར་གཤེགས་དཀྱིལ་འཁོར་ཀུན་བཀོད་དེ། །རྣལ་འབྱོར་བདག་ཉིད་རིགས་པའི་ལྷར་རྡོ་རྗེ་སེམས་དཔའ་བསྒོམ་ནས། །ཕྱག་རྒྱ་བཞིས་གཉིས་སུ་མེད་པར་རོལ་ཞིང་བདེ་བའི་ཐབས་དང་ལྡན་པར་བྱ། །ཡབ་ཀྱི་རྡོ་རྗེ་ཡུམ་ཀྱི་དྲིལ་བུ་པདྨ་གཉིས་སུ་མེད་པར་ལྡན་བྱས་ནས། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །བྱང་ཆུབ་སེམས་དཔའ་ཡབ་ཀྱི་བྱང་སེམས་བདེ་ཐུགས་སྤྲོ། །དགའ་བ་བཅུ་དྲུག་ལ་སོགས་པ་གཡོ་ལྡང་སོགས་སེམས་ལྔའི་རིམ་པའི་ཐབས་ཀྱིས་ཟིན་པ་ཡིས། །བྱང་ཆུབ་སེམས་འཕྲོས་པའི་པུ་ཙ་སངས་རྒྱས་དཀྱིལ་འཁོར་མ་ལུས་ལ། །བདེ་བས་དགྱེས་ཤིང་དགོད་པ་མཉམ་ཉིད་མཆོག་གི་སྦྱིན་པས་གཏིམ་པས། ཕྱོགས་བཅུ་དུས་བཞིའི་དཀྱིལ་འཁོར་གྱི་སྐུ་གསུང་ཐུགས་གསུམ་མཉེས་དང་། །འགྲོ་བ་མང་པོ་ལ་སྦྱིན་པས་ཚིམ་ཞིང་བདེ་ཐོབ་ནས། །སླར་ཡང་ཚུར་བསྡུས་ཏེ་བཟློག་པས་གཉིས་སུ་མེད་པར་དབྱིངས་སུ་ལུས་མགོ་མཇུག་ཏུ་ཐིམ། །དེ་ལྟར་ཐིམ་པར་འགྱུར་ནས་ཡུམ་གྱི་དབྱིངས་ནས་ལྷ་སྐུའི་ཕྱག་རྒྱ་འབར། །བདེ་བར་གཤེགས་པའི་དགོངས་པ་ཐབས་དང་ཤེས་རབ་རྫོགས། །ཕྱག་རྒྱ་དཀྱིལ་འཁོར་རིགས་ལྔ་ཀུན་བཟང་དང་དྲུག་དང་ངང་གི་ཡང་དག་རྫོགས་པའོ། །མ་བསགས་པ་བདེ་བས་བསོད་ནམས་ཚོགས་ཆེན་དང་མ་དམིགས་པ་ཡེ་ཤེས་ཀྱི་ཚོགས་ཏེ་དེ་ལྟར་གཉིས་ཀྱང་རྫོགས། །ཡུམ་གྱི་བསྒྲུབ་པ་ཐིག་ལེ་ཉི་ཟླའི་དམར་ཆ་དང་དཀར་ཆ་སྙིང་པོ་དེ། །ཡུམ་གྱི་དཀྱིལ་འཁོར་ནས་དངོས་གྲུབ་ཐིག་ལེ་རྡོ་རྗེ་ལྕེ་ཡིས་བསྒོམ་ལ་བླངས་དེའང་། དེའི་ཡོན་ཏན་ནི་མཁའ་འགྲོ་འདུ་བ་དང་ཁ་དོག་གསལ་ཞིང་འོད་འབར་ཚེའི་རིག་འཛིན་ཀྱི་དངོས་གྲུབ་ལ་སོགས་པ། མཆོག་ཐུན་མོང་གི་དངོས་གྲུབ་ཐམས་ཅད་འབྱུང་བས་ཡིད་བཞིན་ཆོས་ཀྱི་སྤྲིན་ཐམས་ཅད་གྱི་བདག་པོར་འགྱུར་རོ། །སྦྱོར་བ་ལས་བྱུང་བའི་མངོན་ཤེས་འགྲོ་དྲུག་དུས་གནས་དེ་དག་ཐམས་ཅད་སྣང་། །ཞིང་མཁྱེན་པ་དང་། ཐབས་ཤེས་ཀྱི་གཉིས་སུ་མེད་པའི་མཆོད་པ་ཆེན་པོ་ཐམས་ཅད་མཉམ་པར་སྦྱོར་ཞིང་། །རྟོགས་པ་ཐམས་ཅད་གཉིས་སུ་མེད་པར་ཆོས་དབྱིངས་སུ་སྦྱོར་བས་ན། །ངན་འགྲོར་རྣམས་སུ་མི་ལྟུང་ཞིང་འབྲས་བུ་ཡང་དག་པའི་བུདྡྷ་འགྲུབ་པའོ། །གསང་བའི་བསྙེན་བསྒྲུབ་ཐབས་མཁས་པའི་སྦྱོར་བ་འདི་ནི་ཉོན་མོངས་པ་འཁོར་བའི་འདམ་ནས་ཐོན་པས་བསྒྲལ་བ་ཆེན་པོ་ཡིན། །དེ་ལྟར་བསྒྲལ་བ་ཉིད་ན་བདུད་རྩི་ཡང་དག་པར་དོན་ཆོས་ཉིད་སྦྱོར་བ་ཡིན། །དེ་ལྟར་སྦྱོར་བའི་དུས་ཉིད་ན་མ་ལུས་པར་བསྒྲལ་བའོ། །སྐྱེ་འགྲོ་ཐམས་ཅད་ཡེ་ནས་ལྷ་དང་ལྷ་མོ་ཡི། །དཀྱིལ་འཁོར་དུ་རྟོགས་ཤིང་ཡང་དག་དོན་ལ་གཉིས་སུ་མེད་པར་སྦྱོར་བ་དང་། །དབང་པོ་རྣམ་ཤེས་ཡབ་སེམས་དཔའ་དང་ཡུལ་དུས་ཡུམ་སེམས་མ་གཉིས་སུ་མེད་པར་སྦྱོར་བའོ། །ཕུང་པོ་ལྔ་ཉིད་དེ་བཞིན་གཤེགས་པ་ལྔ་དང་། འབྱུང་བ་ལྔ་ཉིད་ཡུམ་གཉིས་སུ་མེད་པར་དུ་སྦྱོར་བ་དང་། དུས་བཞི་ལྷ་མོ་ཉིད་དུ་སྦྱོར། །རྟག་ཆད་མུ་བཞི་སྒོ་བ་ཁྲོ་མོ་བཞི། །ཆོས་རྣམས་ཐམས་ཅད་མ་ལུས་ཀུན་འབྱུང་བ། །ཆོས་ཉིད་མཉམ་པའི་ངང་དུ་དབྱིངས་དང་རིག་པ་གཉིས་སུ་མེད་པར་རང་སྣང་བར་སྦྱོར། །སྔོན་དུ་དཔལ་ཆེན་པོས་ཐབས་ཀྱིས་སྲིན་མོ་རོལ་པ་ལྟར། །དེ་ལྟར་སྦྱོར་བ་ཉིད་ཀྱིས་དུས་ན་ཆགས་ཤིང་ཞེ ན་པ་གང་ཡང་མེད། །དེ་ལྟར་མ་ཆགས་པ་ལ་ཐབས་མཁས་པའི་སྦྱོར་བས་ཆགས་པ་དང་། །དེ་ལྟར་ཆགས་པ་ཉིད་ན་ཆགས་ཟིན་གྱི་མ་གོས་པས་ཆགས་པའི་སྐྱོན་གྱིས་གོས་པ་མེད། །དེས་ན་འདི་ནི་ཚངས་མཆོག་རྒྱལ་པོ་སྟེ། །གཉིས་མེད་དབྱིངས་ཡེ་ཤེས་གཉིས་སུ་མེད་ཅིང་ཡང་དག་པའི་དོན་ལ་སྦྱོར་བས་ཤིན་ཏུ་ཆགས་པ་ཆེན་པོ་ཡིན་ནོ། །དེ་ལྟར་མ་རྟོགས་པ་ཡིས་དངོས་སུ་སྤྱད་པར་གྱུར་ན། །སྦྱོར་བས་ཡིད་བཏགས་དང་སྒྲོལ་བས་སྲིན་པོའི་གནས་སུ་སྐྱེས། །མཆོད་པའི་སྤྱོད་ལམ་ཐམས་ཅད་དུ། །དཔལ་གྱི་ཆས་བརྒྱད་དུར་ཁྲོད་ཀྱིས་རྒྱན་རྣམས་བགོས་བྱས་ཏེ། །དཔལ་གྱི་ཆས་བརྒྱད་ནི་ཟིལ་གནོན་གཤོགས་པའི་ཆས་རྡོ་རྗེ་ཁྱུང་གི་གཤོགས་པ་དང་ཀླུ་རིགས་ལྔས་བརྒྱན་པ་དང་། རྒྱལ་བྱེད་དཔའ་རྟགས་ཀྱི་ཆས་ཕྱག་མཚན་དང་ཉོན་མོངས་སྲེག་བྱེད་ཡེ་ཤེས་མེ་དཔུང་ཆས་འབར་འཕྲོས་རལ་བའི་ཆས་བདུད་རྣམས་འདུལ་བྱེད་འཚམ་རྔམ་གདན་གྱི་ཆས། དཔལ་གཏུམ་སྟག་གི་ཆས། ཐེག་པ་མཆོག་ལྡན་གླང་ཆེན་ཀོ་རློན་ཆས། ཞིང་ཆེན་ཡང་མཐུན། དུར་ཁྲོད་ཆས་བརྒྱད་ནི། དེ་ལ་གདགས་པའི་རྒྱན་གསུམ་ནི། ཐོད་སྐམ་གྱི་དབུ་བརྒྱན། རྙིང་པའི་མགུར་ཆུ། རློན་པའི་དོ་ཤལ། བྱུག་པའི་རྒྱན་གསུམ་ནི། ཞག་གི་ཟོ་རིས། རཀྟའི་ཐིག་ལེ། ཐལ་ཆེན་གྱི་ཚོམ་བུ། བགོ་བའི་རྒྱན་གསུམ་ནི། རྐེད་པར་ཞིང་ཆེན་གཡང་གཞི་ཞིང་གི་ཅོད་པན་དང་བརྒྱད་དོ། །ལ་ལ་ནི་སྲོག་རྩ་ཨ་ཛ་ལ་ནང་། མིའི་རྒྱུ་ནས་བདུད་རྩི་ལྔའི་ཚོམ་བུ་བརྒྱད་པ་སྐེ་རག་ཏུ་འདོད་པའང་འདུག་གོ། །བཟའ་བཏུང་ལ་སོགས་སྤྱིར་ཞི་བའི་རྗེས་སུ་མཐུན་པས་སྤྱད། །ཁྱད་པར་བྲོ་གར་གླུ་ཚིག་ལྡན་པར་བྱས། །དབང་པོ་དང་རྣམ་ཤེས་ཡུལ་དུས་དང་རིག་པ་རྣམས། །ཡབ་ཐབས་དང་ཡུམ་ཤེས་རབ་གཉིས་སུ་མེད་པར་ལྡན་གྱུར་ཞིང་། །ཆོས་ཉིད་མཉམ་པའི་ངང་ཉིད་ལྟ་བ་རྟོགས་ཤིང་ཏིང་ངེ་འཛིན་གསལ་ན། །འཁོར་འདས་སྣོད་བཅུད་ཐམས་ཅད་དགོངས་པ་བདེ་བ་ཆེན་པོའི་ཡེ ཤེས་ཀྱི་ཕྱག་རྒྱའི་དཀྱིལ་འཁོར། ཡན་ལག་བསྐྱོད་ཆེན་ལུས་ཀྱི་འཁོར་ལོའི་གཞལ་ཡས་སུ། །ལྷ་ཁྲོ་བོ་ཁྲོ་མོ་ཐམས་ཅད་ཀུན། །སྐུ་མདོག་གསལ་ཞིང་ཏིང་ངེ་འཛིན་གྱི་འོད་ཟེར་འཕྲོ་བར་བསྒོམས་ན། །ལུས་ཀྱི་ཡན་ལག་བསྒུལ་བསྐྱོད་ཐམས་ཅད་ཕྱག་རྒྱ་ཡིན་ནོ། །གཡས་ཐབས་དང་གཡོན་ཤེས་རབ་ལྡན་པའི་ཞབས། །རྟག་ཏུ་ཞབས་ལ་རྡོ་རྗེ་འབར་བར་འགྱུར་ཏེ། ཐབས་ཆེན་གོམས་པ་རེ་རེ་སྤྱོད་པས་ན། །རྐང་བའི་ཤུལ་དུ་པདྨ་ཆགས་མེད་རེ་རེ་འབྱུང་། །རྐང་པ་རྡོ་རྗེ་ས་གཞི་པདྨོར་ཏིང་ངེ་འཛིན་གྱིས་དེ་འབྱོར་བ་འགྱུར་ན། །རབ་ཏུ་ཤི་བའི་སེམས་ཅན་ཐམས་ཅད་སངས་རྒྱས་ཤིང་བླ་ན་མེད་པའི་ཆོས་སྐུ། བྱང་ཆུབ་ཞིང་དུ་སྐྱེ་བ་འགྱུར། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་བསྒོམ་བྱ་སྟེ། །དེ་ཡང་དབུ་ཡི་དཀྱིལ་འཁོར་ལ་བུདྡྷ་ཧེ་རུ་ཀ་ལ་དེ་བཞིན་རིགས་ཀྱི་ཁྲོ་བོ་ཡབ་ཡུམ་བསྒོམ་སྟེ་བསྒུལ་ཞིང་བསྐོར་བར་བསྐྱོད་ན། །ཕྱོགས་དུས་ཀྱི་སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་ཕྱག་རྒྱ་གཡས་བཛྲ་ཧེ་རུ་ཀ་འཁོར་བཅས། གཡོན་རཏྣ་ཧེ་རུ་འཁོར་དང་བཅས་པ་བསྒོམ་སྟེ་བསྐྱོད་བྱས་ན། །རིག་འཛིན་གྱི་ཞིང་ཁམས་ཐམས་ཅད་གཡོ། །རྐང་གཡས་ཀརྨ་ཧེ་རུ་ལ་གཡོན་པདྨ་ཧེ་རུ་འཁོར་དང་བཅས་པ་བསྒོམ་སྟེ་པའི་སྟབས་ཆེན་གྱིས་མནན་སྟེ་མཆོངས་ན། །འགྲོ་དྲུག་གི་སྡུག་བསྔལ་མི་བཟད་ཐམས་ཅད་སྒྲོལ་བ་དང་། །བདུད་དང་ལོག་འདྲེན་ཐམས་ཅད་མནན། །དེ་ལྟར་ན་རིགས་ལྔ་ལ་མཐུ་སྟོབས་ཆེ་ཆུང་ཡོད་དམ་ཞེ་ན་ངོ་བོ་ལ་མེད་དེ་གདུལ་བྱའི་ངོ་ལ་གནས་མཐོ་དམན་གྱི་རིམ་པ་ལ་དགོངས་པའོ། །སྤྱིར་ཡན་ལག་ཐམས་ཅད་བསྒུལ་བསིག་ནས། །བ་སྤུའི་བུ་ག་རེ་རེ་ནས་ཀྱང་། ཁྲོ་བོ་རྡུལ་སྙེད་ཀྱི་གྲངས་མེད་པ་སྤྲོ་བས། ཁྲོ་བོ་དེ་ཡི་སྤྲུལ་པ་གྲངས་མེད་ཀྱིས། །ཕྱོགས་བཅུ་ཁམས་རྣམས་རྡུལ་སྙེད་དུ། །ཁྲོ་བོའི་དོན་རྣམས་ཕྲིན་ལས་གྱིས་བསྒྲུབ་པའི་ཕྱིར་སྤྲུལ་པ་རྡུལ་ཕྲན་རྙེད་དང་། ཐུགས་རྗེས་གདུལ་བྱ་དུལ་ཞིང་ཆོས་ཀྱི་དབྱིངས་སུ་གཉིས་སུ་མེད་པར་བསྟིམ། །རྐང་བའི་བྲོ་གར་དང་ཞལ་གྱི་གླུས་ཚིག་དང་སྤྱན་གྱི་སྟངས་སྟབས་དང་། །ཏིང་ངེ་འཛིན་གྱི་ཡོ་བྱད་ལ་སྤྱད་ཐབས་ཐམས་ཅད་ཀུན། །སྔར་ཞི་བ་ཚོགས་ཀྱི་དཀྱིལ་འཁོར་ལས། །འདིར་བྲོ་གར་རྩེ་འཇོ་ལས་སོགས་བསྒྱུར། །ལྷག་མའི་ཆོ་གས་འཁོར་གྱི་ཕྲ་མེན་ཚིམ་པར་བྱས་ཏེ། །ཕྲ་མེན་རྣམས་དབང་དུ་བསྡུ་དང་སོ་སོའི་ལས་བསྒོ་བ་དང་། །ལུས་ཀྱི་ཕྱག་རྒྱས་གཞུང་ལྟར་རྒྱས་པར་བཀྱེ་ལ་གཏོར་མ་བཏང་དེ་ནས་དལ་བསྡུས་ཏེ་སྤྱད་སྤྱོད་ལམ་རྒྱུན་གྱི་ས་ཏི་ལས་མི་འདའ་བར། དེ་ལྟར་བསྒྲུབ་པས་འབྲས་བུ་འགྲུབ་པ་ལ་ཐེ་ཚོམ་མེད་པར་འགྲུབ། རྣལ་འབྱོར་པ་ཐབས་ཡབ་དང་ཤེས་རབ་ཡུམ་ཐམས་ཅད་ཀྱིས། །དེ་ལྟ་བུ་ཡི་ཡོ་བྱད་ལོངས་སྤྱོད་ན། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །རྟགས་ཀྱི་ཆ་རྣམས་སྔོན་སྣང་བྱེད་མན་ཆད་བཞིན་འབྱུང་བ་འདིར་གྲངས་བཞིན་འཕེལ་ལ་ངོ་བོ་བརྟན་ནས་འབྱུང་ལ། མངོན་ཤེས་ནི་ཐ་མས་གླིང་གྲངས་གོང་ནས་གོང་དུ་འཕེལ་བ་དྲུག་གསལ་ཞིང་བརྟན་པར་ཀྱང་འབྱུང་། །སྒྲ་བརྙན་རྣམ་རྨི་ལམ་དག་ཏུ་ཡང་། །བདེ་བ་ཅན་སོགས་པའི་འཇིག་རྟེན་གནས་རྣམས་དང་། །ལྷ་མིའི་སྐྱེ་བ་ཁྱད་པར་ཅན་གང་དག་འཛིན་པ་དང་། །རིག་འཛིན་གྱི་ས་ལ་ལུང་སྟོན་པ་ལ་སོགས་པ་འབྱུང་སྟེ་བདུད་བརྟག་པར་བྱའོ། །ཐ་མས་ཀྱང་ཞག་གྲངས་བཅུ་དྲུག་ཚུན་ཆད་ཀྱིས། །འབྱུང་བའི་ལུས་ཉིད་མ་སྤངས་པར་རིག་འཛིན་གྱི་ས་ཚེ་དབང་ཐོབ་སྟེ། དེར་ཡུན་རིང་ཆོས་ཉིད་ཀྱི་བདེ་བ་ལ་ལོངས་སྤྱད་ནས། །ཐེག་མཆོག་བླ་ན་མེད་པ་རྡོ་རྗེ་སེམས་དཔའི་ས་ཐོབ་སྟེ། དཔེ་བྱད་བཟང་པོ་བརྒྱད་བཅུ་དང་མཚན་བཟང་པོ་སུམ་ཅུ་རྩ་གཉིས་གྱིས་བརྒྱན་སྤྲས་པའོ། །མངོན་ཤེས་དྲུག་ལྡན་ཐམས་ཅད་མཁྱེན་ཅིང་སྤྱན་དང་། ཡེ་ཤེས་མཐར་ཕྱིན་ཚོགས་ཆེན་བསོད་ནམས་ཡེ་ཤེས་གཉིས་ཀྱང་གཉིས་སུ་མེད་པར་རྫོགས་པར་འགྱུར། །སངས་རྒྱས་ལོངས་སྐུའི་ཞིང་ལ་དབང་བསྒྱུར་ཏེ། །སྤྱོད་ཡུལ་ཀུན་ཏུ་སྐུ་དང་ཡེ་ཤེས་ཀྱི་མ་དྷ་ལ། །ཇི་ལྟར་དམིགས་པ་བཞིན་ཏུ་ལྷུན་གྱིས་འགྲུབ། །གོང་གི་དེ་བས་ན་སྔར་གྱི་བརྟག་དུས་ལ་འབྲས་བུ་རག་ལུས་མེད་པ་སྟེ་སེམས་ཀྱི། རེ་དོགས་དོར་བར་བྱས་ནས་དོན་དང་ལྡན་པའི་བརྩོན་འགྲུས་ཆེན་པོས་དོན་ལ་སྦྱར་ནས། མཐོང་བའི་ཆོས་ཚེ་འདི་ལ་མྱ་ངན་འདས་ཏེ་སངས་རྒྱས་པའོ། །རྣལ་འབྱོར་ལྟ་བ་དང་ཏིང་ངེ་འཛིན་ལས་སུ་རུང་བ་རྣམས་ཀྱིས། །འདི་ལྟ་བུ་ཡི་སྦྱོར་ལམ་ཚོགས་ཀྱི་སྒྲུབས་པའི་ལས་ལ་འབད་པར་བྱས་ན། །ཤེས་རབ་དང་བརྩོན་འགྲུས་ཞན་པས་ཚེ་དབང་འབྲས་བུ་མངོན་དུ་ཚེ་འདི་ལ་མ་ཐོབ་པར་མ་གྱུར་ཡང་། །རང་གི་ལུས་ངག་ཡིད་གསུམ་སྐྱེ་བ་ལ་རང་སེམས་ཀྱི་ལྷའི་སྐུ་བསྒོམ་པ་ལ་དབང་ཐོབ་ནས། །སངས་རྒྱས་སྤྲུལ་སྐུ་འཇིག་རྟེན་འབྱུང་བ་དང་དུས་མཚུངས་པར་སྐལ་མཉམ་པར་འགྱུར་བའི་ལྷ་མིའི་སྐྱེ་བ་བླངས། ལས་དང་ཐུགས་རྗེའི་འབྲེལ་བའི་བྱིན་རླབས་ཀྱིས། །ཐེག་པ་བྱང་སེམས་མན་ཆད་གསུམ་དུ་འཇུག་པའི་དམན་པར་ཡོང་མི་སྐྱེ། །བསོད་ནམས་བསགས་པ་དང་མི་དམིགས་པའི་ཡེ་ཤེས་དཔུང་ཚོགས་ཀྱིས། །སྔ་མའི་ལས་ངན་གྱི་སྒྲིབ་པ་མ་རིག་པའི་མུན་པ་སྦྱང་པའི་ཕྱིར། །ངན་སོང་གསུམ་ལ་སོགས་པ་གནས་སུ་ཡང་མི་ལྟུང་། །མཐོ་རིས་སུ་སྐྱེས་ནའང་གནས་ངན་དང་ལོངས་སྤྱོད་ཆུང་བ་མི་བདེ་བ། །ངན་སོང་གསུམ་ལ་སོགས་མི་ཁོམས་པའི་གནས་བརྒྱད་དུ་འགྲོ་ཞིང་སྐྱེ་བར་མི་འགྱུར་རོ། །མི་བརྗེད་པའི་གཟུངས་མཆོག་ཐོབ་པ་དང་ལྟ་བ་དམ་པ་དང་ལྡན་པའི་ཕྱིར། །སྐྱེ་བ་བར་ཆད་ཀྱང་གསང་སྔགས་རྡོ་རྗེ་ཐེག་པའི་ལམ་མཆོག་བརྗེད་པར་མི་འགྱུར་བ་དང་། དེར་ཡང་ཚེ་རིང་ཞིང་བདེ་བ་དང་འབྱོར་པ་ཕུན་སུམ་ཚོགས་པའོ། །ལྷ་དང་མི་ཡི་སྐྱེ་གནས་མཆོག་ཐོབ་པའི་སྐབས་དེར་ཡང་། །ཤིན་ཏུ་ལུས་བྱད་བཟང་ཞིང་ཡན་ལག་ཐམས་ཅད་ཆད་ལྷག་མེད་པར་རྫོགས། །དབང་པོ་ཚངས་ཞིང་ལྷག་ཆད་མེད། །སྐད་གདང་ཤིན་ཏུ་ཡང་སྙན་ཅིང་ཆོས་ཀྱི་འགྲོ་དོན་བྱེད་ནུས་པ་དང་། བདག་གི་དགོས་འདོད་ཅི་བསམ་པའི་ལོངས་སྤྱོད་ཐམས་ཅད་ཀུན། །ལོག་འཚོ་ལ་སོགས་པའི་གཞན་ལ་གནོད་པ་མེད་པར་རང་བཞིན་གྱི་གྱིས་རྩོལ་མེད་དུ་འགྲུབ། །གཞན་གྱི་མི་ཐུབ་པའི་ཚན་པོ་ཆེ་ཡི་མཐུ་སྟོབས་ཕྱག་ན་རྡོ་རྗེ་ལྟ་བུ་དང་། །དེ་ཡང་འགྲོ་བའི་དོན་དུ་གྱུར་པའི་མཐུ་ཡང་དག་དང་ལྡན། །སྟོབས་དང་ལྡན་ཡང་སེམས་ཅན་གཞན་ལ་གནོད་པ་ཡོང་མི་བྱེད། །ཐོག་མ་ནས་སྙིང་རྗེ་ཆེ་ཞིང་ཤེས་རབ་དང་ལྡན་པ། ཚོགས་སྒྲུབ་པའི་མཐུ་སྟོབས་ཆེ་ཞིང་ཐབས་མཁས་པ་དང་ལྡན་པས། །བདག་དང་གདུལ་བྱ་གཞན་གཉིས་ཀའི་དོན་ཡོངས་སུ་རྫོགས་པར་བྱེད་དོ། །ཚེ་འདི་ཉིད་ལ་ཟག་བཅས་ཀྱི་ལམ་མཐར་ཕྱིན་པའི་འབྲས་བུ་སྐྱེ་ཤི་མེད་པའི་ས་ཚེ་དབང་ཐོབ་ནས། སངས་རྒྱས་ཀྱི་ཡོན་ཏན་དགོས་འདོད་འབྱུང་བའི་རིན་པོ་ཆེ། །ལྟ་བུ་ཞིང་། བཀོད་པའི་གཞལ་ཡས་ཁང་ཐམས་ཅད་ལ། །དཔེར་ན་འདོད་ཁམས་ཀྱི་ལྷ་རིགས་དྲུག་པའི་གཞན་འཕྲུལ་དབང་བྱེད་ཅི་ལྟ་བུར། །ཡོ་བྱད་ལ་དབང་བསྒྱུར་ཟག་པ་མེད་པར་ལོངས་སྤྱོད་པས་འབྲས་བུ་མཆོག་གི་དངོས་གྲུབ་མཐོང་ལམ་ཡོན་ཏན་ཐོབ་པའོ། །འབྲིང་གིས་དེ་ཕྱིར་ཚེ་ལ་དབང་བསྒྱུར་བ་སྐྱེ་བ་ཕྱི་མའི་དུས་ཀྱི། ཚེ་འདིའི་ཉིད་དུ་སྦྱོར་བའང་སྨོས་ཅི་དགོས་ངེས་པའོ། །དེ་ལྟར་ཚོགས་སྒྲུབ་པ་ལ་བརྩོན་འགྲུས་རབ་དང་ལྡན་པས་ནི། །མཐོང་བའི་ཚེ་འདི་ཉིད་ལ་ཚེ་དབང་ཐོབ་པ་དང་འབྲིང་གིས་སྐྱེ་བ་དེའི་ཕྱི་མར་གྱུར་ན་ཡང་། །སྐྱེ་བ་ལན་གྲངས་གཞན་དུའང་ཚེ་དབང་ཐོབ་སྟེ་རིང་པ་སྐྱེ་བ་བདུན་ཉིད་ལས། །མི་འདའ་བར་རིགས་ཀྱི་དམ་པ་ཚེ་དབང་ཐོབ་པར་འགྲུབ་པར་འགྱུར་རོ། །གང་ལྟར་ཆོ་ག་ལྔ་དང་སྔགས་ཀྱི་ཡན་ལག་ལྔ་དང་ཡོ་བྱད་ལྔ་དག་སྟེ་བཅོ་ལྔ་རྫོགས་ནས་དམ་ཚིག་མ་ཉམས་ཤིང་ལྟ་དགོངས་ཏིང་ངེ་འཛིན་དང་ལྡན་པའི། རྣལ་འབྱོར་པ་རྣམས་ངེས་པར་འཚོགས་ཏེ་ཚོགས་བསྒྲུབ་ཞིང་ཡོ་བྱད་ལྔ་སྤྱད་ན། །ཚེ་འདིར་འབྲས་བུ་ཚེ་དབང་མངོན་དུ་མ་བྱུང་ཡང་རྣམ་སྨིན་ཐོབ་སྟེ། དཔེར་ན་རྒྱལ་པོ་ཞིག་གིས་བྲན་མོ་ངན་བཤོས་ལ་སྦྱོར་བས་ཀྱང་། །བྲན་མོ་ལ་སྲས་འབྱུང་བའི་ས་བོན་ནུར་ནུར་པོ་སོགས་རིམ་པར་ཆགས་པའི་རྒྱལ་བུས་རྒྱལ་པོའི་སྲས་ཀྱི་རིགས་འཛིན་ཏེ། །གཞན་གྱི་མཐོང་ནས་འབངས་ཀྱི་བླར་གྱུར་ཞིང་། །འཁོར་ཀུན་ལ་དབང་བསྒྱུར་ཞིང་རྒྱལ་བུ་སྟོབས་དང་ལྡན་པ་དེ་ལ། །དཀར་བའི་ཕྱོགས་ཀྱི་ལྷ་རྣམས་སྟོན་པར་རེ་བའི་མཐུའམ་བསམ་པ་སྐྱེ་བས། །རྒྱལ་བུ་དེ་བསྲུང་ཞིང་སྦེད་པ་དང་མཆོད་པ་བྱེད་པའི་དཔེ་ལྟར་དུ། དོན་རྣལ་འབྱོར་ལྟ་སྒོམ་གྱིས་ཚེ་དབང་དུ་མ་གྱུར་ཡང་དགོངས་པའི་སྟོབས་དང་ལྡན་པ་སྟེ་དེ་རྣམ་སྨིན་རིག་འཛིན་དུ་གྱུར་པ་ན། །གསང་སྔགས་རྡོ་རྗེ་ཐེག་པའི་ཆོས་ཀྱི་སྲུང་མ་དམ་ཅན་མ་ལུས་པ་ཀུན་གྱིས། སེམས་ལྷར་སྨིན་པ་དེའི་དབང་གིས་སྤྱི་གཙུག་དུ་ཁུར་བར་བྱེད་ལ། སྤྱོད་ཡུལ་རྣམ་སྨིན་གྱི་ལུས་འབྱུང་ལུས་དོར་ནས་འཕོས་མ་ཐག་ཕྱག་རྒྱར་ཆེན་པོའི་རིག་འཛིན་མངོན་དུ་རྫོགས་པའོ། །ཚོགས་བསྒྲུབ་ཀྱི་རྣལ་འབྱོར་པ་ལ་ལ་དེ་ལྟར་ཚོགས་བསྒྲུབ་པའི་རྣལ་འབྱོར་པ་དེ་རྣམ་སྨིན་འདི་ལ་ཐོབ་པར་ངེས་ན་ཡང་། གལ་ཏེ་དེ་ལྟར་ལ་ལ་བློ་ཆུང་བས་མ་གྱུར་ན་བསོད་ནམས་ཀྱི་ས་ལ་གནས་པར་གྱུར། དེ་ཡང་ཚེ་རབས་སྐྱེ་བ་ཐམས་ཅད་ཀུན། །ལས་ངན་ལྔ་བཅུ་བརྒྱད་མཚམས་མེད་ལྔ་མི་དགེ་བཅུ་རྩ་བ་བཞི་ལྕི་བ་བཞི་ལོག་པ་བརྒྱད་སྤྱོད་པའི། །ས་གནས་ཀུན་ཏུ་སྐྱེ་བར་མི་འགྱུར་ཏེ་མཚམས་མེད་ལྔ་ནི། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་དབྱུང་བ་དང་། དགེ་འདུན་གྱི་དབྱེན་བྱས་པའོ། །ལོག་བརྒྱད་བརྩི་ཚུལ་གཞན་གཅིག་ལ། དམྱལ་བ་ཡི་དགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །སངས་རྒྱས་འབྱུང་མིན་ལོག་ལྟ་དང་། །ལྐུགས་པ་འདི་དག་མི་ཁོམ་བརྒྱད། །ཅེས་མི་ཁོམ་བརྒྱད་དལ་བ་ལས་ལོག་པ་ལ་འདོད་དོ། །ངེས་འབྱུང་གི་ཐེག་པ་བཞི་ཡི་ཆོས་ལའང་སྤྱོད་པར་མི་འགྱུར་རོ། །རྡོ་རྗེ་རིགས་མཆོག་འཛིན་གྱུར་ཏེ། །ཕྱི་མ་ལ་རྣམ་སྨིན་ཐོབ་ནས་ཕྱག་ཆེན་ལ་སྦྱོར་བ་སྔོན་བཞིན་ཏེ། །འདི་ལ་ཐེ་ཚོམ་ལྡན་མིན་པས། །རྣལ་འབྱོར་པ་སྐལ་པ་དང་ལྡན་པ་ཀུན་གྱིས་དུས་རྟག་ཏུ་བརྩོན་འགྲུས་བྱའོ། །བར་ཆད་མེད་པའི་ལམ་ཚོགས་བསྒྲུབ་པའི་ལེའུ་སྟེ་བདུན་པའོ།། ༈ །།ཐུན་མོང་གི་དངོས་གྲུབ་ཁྱད་པར་དུ་གྱུར་པ་ལྷག་པའི་མཆོག་ཉིད་ཀྱི་དངོས་གྲུབ་ལ། །བསྙེན་བསྒྲུབ་བཞི་ཡིས་སྒོ་ནས་མོས་པར་བྱས་ནས། །གདུལ་བྱ་རྣམས་བདེ་ཆེན་ས་ལ་དགོད་པའི་ཕྱིར། །ཟག་བཅས་ཚོགས་སྦྱོར་བ་ཉི་མཐར་ཕྱིན་པའི་གནས་སྐབས་ཀྱི་འབྲས་བུའི་མཚན་ཉིད་ཟག་མེད་མཐོང་བསྒོམ་མཐར་གྱི་རིག་འཛིན་བཞི་པོ་བཤད་པ་ལ། རབ་འབྲིང་ཐ་མའི་དུས་ཀྱི་ཚོམ་བུ་ཚོགས་བསྒྲུབ་ཏེ་བར་ཆད་མེད་པའི་ས་ན། །ལྷག་མ་མེད་པ་རྣམ་སྨིན་གྱི་དང་ཡོད་པ་ཚེ་དབང་ཡི་ས་ལ། མྱ་ངན་ལས་འདས་པ་ཟག་བཅས་མཐར་ཕྱིན་ནས་ཟག་མེད་ལ་སྦྱོར་བ། །ཐུན་མོང་ཉན་ཐོས་ཀྱི་སྐབས་སུ་ལྷག་བཅས་དང་ལྷག་མེད་དུ་ལྟ་བ་ལྟ་བུར་སྐབས་འདིར་ཡང་ལྷག་བཅས་ལྷག་མེད་གཉིས་ཟུང་དུ་འགྱུར་བའོ། །དེ་ལ་ཐོག་མ་རྣམ་སྨིན་བཤད་པ་ནི། །རབ་ཕྱག་རྒྱ་གཅིག་པ་དང་འབྲིང་སྤྲོས་པ་དུ་མའི་རྣལ་འབྱོར་ལ། །བརྟེན་པར་བྱས་པ་དག་ཐོད་རྒལ་བ་ཉིད་གཅིག་སྤྲོས་པའམ་ཐར་ཆགས་རྣམ་སྨིན་དེ་ཐོབ་ནས། །རབ་ཟླ་དྲུག་ཐ་མ་ཟླ་བ་བཅུ་དྲུག་ཚུན་ཆད་བསྙེན་བསྒྲུབ་བྱས་པའི་ཚེ། །སྐྱེ་ཤི་མེད་པར་རྡོ་རྗེའི་ལུས་སུ་མ་གྱུར་པར། །ལྟ་བསྒོམ་གྱི་སྟོབས་ཆུང་ཐབས་ཀྱིས་རྐྱེན་དང་སྨོན་ལམ་གྱི་མཐུ་ཞན་པའི་ཕྱིར། །རྣམ་རྟོག་གི་ལུས་དང་འབྱུང་བའི་ལྷག་མའི་ལུས་རྣམས་བཞག་ནས། དབྱེར་མེད་རྡོ་རྗེ་འཆང་སར་རིམ་པར་འགྲོ་བའོ། །ལྷ་སྐུ་ཡི་རྣམ་པར་གསལ་ཞིང་རྫོགས་པར་སྨིན་ལ། ལུས་ཀྱི་དྲྭ་བས་བསྒྲིབ་པར་གྱུར་པ་སྟེ། དཔེར་ན་ཀ་ལ་པིང་ཀ་མི་འཇིགས་ཁྱུང་ཕྲུག་སྒོ་ངའི་རྒྱས་བསྒྲིབ་པ་དང་སེངྒེ་མངལ་གྱི་རྒྱས་བསྒྲིབ་བཞིན། །འབྱུང་ལུས་རྒྱ་དང་བྲལ་ནས་ལྷའི་སྐུ་མངོན་དུ་སྣང་བར་བྱེད་པ་དེ་རྣམ་པར་སྨིན་པའི་རིག་འཛིན། ཡིད་ཀྱི་ལྷ་ཡི་གཟུགས་བཟུང་ཞིང་། །མ་ཉམས་པ་ལུས་ཀྱི་བཅིང་བའི་རྒྱ་མདུད་དང་འདྲ་བ་གྲོལ་བར་གྱུར་ནས། །ལྷ་ཡི་སྐུ་ཉིད་མངོན་དུ་གསལ་བར་གྱུར་ན། །རྣམ་པར་སྨིན་པའི་རིག་འཛིན་ཞེས་དེ་ལ་གདགས་སོ། །དཔེར་ན་རྒྱ་མིག་རྒྱ་ས་སྐོར་ཕོར་འདམ་པ་བཏབ་པས་ཚ་ཚ་ཇི་ལྟ་བར། །ལུས་རྒྱས་སྒྲིབ་པ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ཐོབ་པ་ལ་ཐོབ་མ་རག་པའི། །ཡི་དམ་གཟུགས་སུ་རྫོགས་ཤིང་དགོངས་པའི་སྟོབས་ཆེན་དུ་གྱུར་པ་དེ་ཁོ་ན་དེ་རྣམ་སྨིན་རིག་འཛིན་ཡིན་ནོ། །དེ་ཡང་དགོངས་པ་དང་སྤྱོད་པའི་ཁྱད་པར་གཉིས་ཡོད་དེ། རྒྱ་གཅིག་སྤྲོས་ནས་ཐོབ་པའི་དགོངས་སྤྱོད་དེ་དམའ་ཚོགས་སྒྲུབ་ནས་ཐོབ་པའི་དགོངས་སྤྱོད་དེ་བཟང་བར་འདོད་དེས་ན་དགོངས་སྤྱོད་དེ་བཟང་བར་འདོད་དེས་ན་དགོངས་སྤྱོད་རྒྱ་མཚོ་སྔ་མ་གཅིག་སྤྲོས་དང་ཕྱི་མ་ཚོགས་སྒྲུབ་དང་། །རྒྱུད་མཐུན་འོ་ན་གོང་འོག་དང་ཁྱད་པར་མེད་དམ་ཞེ་ན་ སྟོབས་ཀྱིས་ཆས་མིང་དེ་ལྟར་གྲགས་པའོ། །ལྷག་མའི་ལུས་མེད་པས་འབྱུང་ལུས་མེད་ལས་ཀྱི་ལུས་མེད་པར་དགོངས་པ། མྱ་ངན་ལས་འདས་པའང་ཡི་དམ་ལྷ་རུ་སྨིན་པའི་ཆ་ནས་ཆས་བརྗོད་པའོ། །དགོངས་པའི་རྒྱུད་ཕྱག་རྒྱ་ཆེན་པོ་དང་དཀྱིལ་འཁོར་ཐམས་ཅད་ལྷ་དང་ལྷ་མོར་སྤྱོད་པ་ཚོགས་སྒྲུབ་པ་སྟེ་ཆེ་ལ་དགོངས་པ་ཕྱག་རྒྱ་ཆེན་པོ་ལས་སེམས་སྟོབས་ཆུང་བའི་རོལ་པའི་ཚུལ་དུ་སྤྱོད་པས་ཚོགས་སྒྲུབ་རྒྱུད་མཐུན་ཏེ། ཚོགས་གཉིས་རྫོགས་ལ་བདག་གི་དོན། །རྣམ་སྨིན་གྱི་དགོངས་པས་ཕྲིན་ལས་བཞི་རྫོགས་པར་བྱེད་པ། །གདུལ་བྱ་ཡར་བར་མི་དོར་ཞིང་ཡང་དག་པའི་དོན་ལ་དགོད་པ་གཞན་གྱི་དོན་དུའོ། །གཅིག་སྤྲོས་ཀྱི་ཐོབ་པ་དེ་དང་ཚོགས་སྒྲུབ་ཀྱི་ཐོབ་པ་དེའང་རབ་ཀྱི་འདི་དང་འབྲིང་གི་ཕྱི་མ་དང་། །ཐ་མས་ལན་གྲངས་གཞན་དུ་ཤེས་རབ་དང་བརྩོན་པ་རབ་འབྲིང་གིས། །རྣམ་སྨིན་ཐོབ་ཀྱི་མཚན་ཉིད་ལྟར་སྐལ་པར་མི་འགྱང་སྟེ། །དགོངས་པ་མཐོ་བ་དང་སྤྱོད་པ་རྨད་བྱུང་ཐབས་ཀྱིས་བརྩོན་པ་གཙོ་ཕྱིར་རོ། །རྣམ་སྨིན་རིག་འཛིན་གང་རྣམ་སྨིན་དེ་བྲལ་མ་ཐག་པ་རུ། །ལྷའི་ཕྱག་རྒྱ་བཞི་དམ་ཚིག་ལས་དང་ཆོས་སྐུ་རྫོགས་པར་ལྷའི་སྐུ་ཕྱག་རྒྱ་ཆེན་པོ་རྣམ་སྨིན་གྱི་སྐུ་བདག་ཉིད་མངོན་དུ་གྱུར་པས། །རྡོ་རྗེ་བྷུདྡྷ་རཏྣ་པདྨ་ལས་ཀྱི་རྩལ་ལྔ་སོགས་རིགས་གང་རུང་གཅིག་རིག་པ་འཛིན་པ་ནི། ཕྱག་རྒྱ་ཆེན་པོའི་རིག་འཛིན་རྣམ་སྨིན་གྱི་འབྲས་བུའོ། །དེ་ཕྱིར་ཐར་ཆགས་པ་དང་རྣམ་སྨིན་དང་ཚེ་དབང་གཉིས་འཚོགས་པའི་རྒྱ་ཆེན་དང་སྦྱོར་ལམ་བར་ཆད་མེད་པ་གཉིས། རྣམ་སྨིན་ཚེ་དབང་ལམ་མཆོག་གཉིས་ཀྱི་དབྱེ་ས་ཅིག་ཡིན་ནོ། །རྒྱུའི་སྒོ་ནས་བར་ཆད་མེད་པའང་ཚོགས་བསྒྲུབ་པའི་འབྲས་བུ་རྣམ་སྨིན་པའི། །མངོན་པར་ཤེས་པ་ཚོགས་སྒྲུབ་དང་རྣམ་སྨིན་དེ་ཉིད་ཀྱི་མིང་ཅན། །མིང་གྲངས་འགྱུར་ཀྱང་ཟག་མེད་ཐོབ་པའི་ནུས་པས་ཡུལ་ངེས་པའང་འབྱུང་བར་འགྱུར་བ་ཡིན། །ཕྱག་རྒྱ་གཅིག་པ་ལ་དཔག་ཚད་སྣང་བྱེད་གླིང་བཞི་གཅིག་ཚོགས་སྒྲུབ་པ་ལ་གླིང་ཁམས་ཡུལ་གཅིག་ཚུན་ཆད་རྣམ་སྨིན་གྱི་ཕྱག་རྒྱ་ཆེ་ཆུང་གི་གདུལ་བྱའི་ལ་སྦྱོར་བའོ། །ལྷག་བཅས་ཕྱི་མའི་དུས་ཀྱི་ཚོགས་བསྒྲུབ་པས། །ལྟ་དགོངས་དང་སྤྱོད་པ་དང་བསྒོམ་པ་བརྩོན་འགྲུས་བསྐྱེད་པ་སྟོབས་ཀྱིས་ལམ་མཆོག་རྫོགས་པ་ཚེ་དབང་དང་། །ཨ་ལི་ཀ་ལིའི་སྤྱད་པའི་ཡོ་བྱད་ཐབས་ཀྱི་སྟོབས་ལས་སྐྱེས། །མཆོག་གི་གཞན་པའི་ཡོ་བྱད་མར་མེ་བདུད་རྩི་ཐོད་སྐུ་སོགས་གྲུབ་པའི་རྟགས་དང་ལྡན་པས་དང་། མཆོག་གི་དངོས་གྲུབ་བླངས་པ་དང་རོལ་པའི་ཨ་ལི་ཀ་ལིའི་ནུས་མཐུ་ལས་བྱུང་བའི་ཚེ་དབང་དང་། ཐབས་སྨན་རླུང་སྦྱོར་ལམ་ལ་སོགས་ལམ་མཆོག་རྫོགས་པའི་རྒྱུས་ཕྱེ་བས་ཚེ་དབང་སོ་སོ་བྱུང་བའང་། །གྲོལ་ལམ་སྦྱངས་པའི་སྟོབས་ལས་སྐྱེས་པའི་ཚེ་དབང་མཆོག་ཡིན་ཏེ། །ཟག་པ་མེད་པའི་རིག་འཛིན་ཡིན་ནོ། །དེའང་རྒྱུ་དང་དུས་དང་ངོ་བོ་དང་རྣམ་གྲངས་དང་། དགོངས་པ་དང་སྤྱོད་པ་དང་མངོན་པར་ཤེས་པ་དག་ལམ་གོང་མ་ལ་སྦྱོར་བའི་ཚུལ་སྟེ། བཞི་གཉིས་བརྒྱད་ཀྱི་ཚེ་དབང་གི་ལུས་ཀྱི་རྣམ་གྲངས་རྫོགས་པར་བཤད། །འབྲས་བུ་ཐོབ་པའི་ཐབས་དང་འབྲས་བུ་ལ་དྲང་བའི་དོན་རྒྱུར་བྱ་བ་དང་། ངེས་དོན་དུ་ཐོས་བསམ་བསྒོམ་པའི་ཤེས་རབ་རྣམ་གསུམ་རིམ་ཇི་ལྟར་གྱི་གོམས་བྱས་ནས། །ཅིག་ཆར་བ་ཏིང་འཛིན་ལྟ་བ་ཆོས་ཀུན་མཉམ་པ་ཉིད་ཀྱིའི་དོན་རྟོགས་ཏེ། །ཀུན་ཏུ་འཛིན་པའི་མཐའ་བྲལ་ཡངས་པ་ཆེན་པོ་བསྒོམ་རིམ་གྱི། རྒྱུ་ཤེས་པ་ལྟ་བ་རྐྱེན་འཇུག་པ་ཏིང་ངེ་བཞི་དང་ལྔ་དེ་ཀུན་རྒྱ་སྤྲོས་ཚོགས་སྒྲུབ་སྟེ་ལམ་ཚོགས་སྦྱོར་གྱི་རྣལ་འབྱོར་ལྔ་རྟོགས་གོམས་པས་ནི། །ཟླ་ཞག་གི་གྲངས་རྒྱུད་ལེའུ་དགུ་པ་ནས་འབྱུང་བ་བཞིན་འགྲུབ་པར་བྱེད་པས། །རྡོ་རྗེའི་ལུས་སུ་ཚེ་དབང་འགྲུབ་པ་ཐེ་ཙམ་མེད། །ཡང་ན་འབྱུང་བཞི་ལས་གྲུབ་པ་མིང་བཞི་རྣམ་པར་རྟོག་པའི་ལུས་འབྱུང་བཞི་ལུས་ལས་ཀྱི་ལུས་ལྷག་མའི་ལུས་ཉིད་མ་སྤངས་སྐྱེ་ཤི་མེད་པ་དེ་ལྟར་རྡོ་རྗེའི་ལུས་སུ་གྱུར་བས། །འགྲུབ་པའི་ཞག་ནི་སུམ་རབ་ཀྱིས་བཅུ་ཕྲག་དྲུག་སྟེ་ཟླ་བ་དྲུག་གམ། །འབྲིང་ཟླ་བ་བཅུ་གཉིས་ཡང་ན་ཟླ་བ་བཅུ་བཞི་ཐ་མས་ཟླ་བ་བཅུ་དྲུག་གིས། །དབང་པོ་རབ་འབྲིང་ཐ་མ་གསུམ་གྱིས་ཅི་བཞིན་མི་བསླུ་བར་ངེས་པར། དབང་བསྒྱུར་རིགས་ཀྱི་དམ་པ་ཚེ་དབང་འགྲུབ་བོ། །རྒྱུ་རྟོགས་པའི་ལྟ་བ་དང་འབྲས་ལྷའི་སངས་རྒྱས་གཉིས་དུས་གཅིག་རྫོགས་པ་ཡི། །རང་རིག་ཉིད་ལ་དབང་ཐོབ་སྟེ། ཚེ་ནི་བརྒྱ་ཕྲག་བཅུ་དང་དྲུག་བརྒྱ་གནས་པ་ཡིས། །བརྒྱ་བརྒྱ་ནས་བཅུ་དྲུག་གམ་ལོ་བརྒྱད་ཀྱི་བར་དག་ཏུ་བསྣུར་ཞིང་འཇིག་རྟེན་དུ་གནས། །ལུས་དེ་ཉིད་མ་བོར་བར་སངས་རྒྱས་ཀྱི་ས་རུ་འགྲོ། རྒྱུ་ཤེས་པའི་མཚན་ཉིད་བདེན་པ་དབྱེར་མེད་ཀྱི་དོན་ལྟ་བ་མཐོང་རྐྱེན་འཇུག་པའི་ཏིང་ངེ་འཛིན་རྣམས་མཐར་ཕྱིན་པའི་རྗེས་ལ། ཚོགས་སྤྱོད་ཡོ་བྱད་ལྔ་དང་ཚོགས་བསྒྲུབ་པའི་དངོས་གྲུབ་ཁྱད་པར་ཅན་ཀྱིས། །ལུས་ཀྱི་ཟག་པ་མེད་པ་ནི་ལུས་འབྱུང་བ་རྡོ་རྗེའི་ལུས་སུ་གྱུར་པས་རྒས་རྒུད་དང་འཆི་བ་མེད་པའོ། །ཁམས་ཀྱི་ཟག་པ་ཁམས་ལས་འབྱུང་བ་གཤང་ལྕི་ལ་སོགས་པ་མི་འབྱུང་ཞིང་ཁམས་ཀྱི་དཔེ་དོན་ལ་གཏད་ནས་མེད་པའོ། །སྐྱེ་གནས་ཟག་པ་ཟད་ཏེ་མེད་པ་ན་སྐྱེ་བ་ལ་རང་དབང་ཐོབ་པས་ལས་ཀྱི་དབང་གིས་ཁམས་གསུམ་སྲིད་པ་གསུམ་དུ་གཏན་མི་སྐྱེ་བའོ། །ལུས་ཉིད་སྐྱེ་འཇིག་མེད་པས་འབྱུང་བ་རྡོ་རྗེའི་ལུས་སུ་འགྱུར་བ་ཚེ་ལ་དབང་བའི་རིག་འཛིན་ནི། མཐོང་བའི་ཆོས་ཚེ་འདི་ལས་མྱ་ངན་ལས་འདས། །ལུས་མ་བོར་བར་སངས་རྒྱས་པ་ལ་འགྲོ། འཁོར་བའི་འཇིག་པ་བརྒྱད་དང་ཉོན་མོངས་པ་ལྔའི་འཇིགས་པ་ཀུན་བྲལ་ཞིང་ཆོ་འཕྲུལ་བཞི་མངོན་ཤེས་དྲུག་རྫོགས་པའོ། །སྤྲུལ་པ་ལྷ་མི་འཁོར་ལོས་སྒྱུར་བ་ལ་སོགས་པ་རྒྱལ་པོའི་སྐྱེ་བ་འཛིན། །ལྷ་དང་མི་དང་ཚངས་པ་ལ་སོགས་པ་ཡི། །སྐྱེ་བ་རྣམ་དག་འཛིན་པས་འོ་ན་ཁྱད་མེད་དོ་བྱས་པ་ལ་འཛིན་མོད་ཀྱང་། །ཟག་མེད་ཁྱད་པར་ས་ལ་གནས་པར་གྱུར་པས་ཡིན་སྟེ། ལྷ་མིའི་ཆ་བྱད་དེ་ཉིད་ཀྱིས་གང་ལ་གང་འདུལ་དུ་ལྷ་མི་ལ་ཆོས་སྟོན། །དཔེར་ན་གང་དག་དུག་སྤྲུལ་གྱི་མི་འཇིགས་པའི་རྩི་མ་ཀི་ཏ་འཆང་བ་ལྟར། །ཚེ་ལ་དབང་བསྒྱུར་བའི་རིག་འཛིན་དེས་འཇིགས་པ་མེད་པ་ལྔ་སོགས་བྲལ་བ་སྟེ་འཚོ་བ་མེད་དང་མི་བསྔགས་འཁོར་བ་དང་། འཁོར་གྱི་འཇིགས་བྲལ་འཆི་བའི་བག་ཆགས་སྤངས། །ཞེས་པས། འཕོ་བ་མེད་པས་འཇིགས་པ་དང་། མི་བསྔགས་པའི་འཇིགས་པ་དང་། འཁོར་བའི་སྡུག་བསྔལ་གྱི་འཇིགས་པ་དང་། འཁོར་གྱི་དྲི་བས་འཇིགས་པ་དང་། འཆི་བས་འཇིགས་པ་མེད་པའོ། །དང་པོ་ནི་ཁམས་ཀྱི་ཟག་པ་དང་བྲལ་ཞིང་ཟག་པ་མེད་པའི་བདེ་བས་རྒྱས་ལ། ནམ་མཁའ་མཛོད་ལ་མངའ་བརྙེད་པའི་འཇིགས་པ་དང་བྲལ་བ། གཉིས་པ་ནི། ང་བདག་འཛིན་པ་མེད་ཅིང་ཆོས་ཀུན་མཉམ་པ་ཉིད་དུ་རྟོགས་པས། གཞན་གྱིས་ཉེས་སྐྱོན་ལ་སོགས་པ་རྨད་པའི་ཚིག་ཇི་བརྗོད་ཀྱང་ཉེས་པ་མེད་པ་དང་། གསུམ་པ་ནི་ཉོན་མོངས་པ་གཏན་ནས་གྲོལ་ཞིང་འཁོར་བ་ལས་དབུགས་དབྱུང་བས་འཁོར་བར་འཁྱམས་ཀྱིས་དོགས་པའི་འཇིགས་པ་མེད་པ་དང་། བཞི་པ་ནི། ཤེས་རབ་སྟོབས་ཆེ་ཆུང་དུ་གྱུར་ཏེ། ཤཱ་རིའི་བུ་ལ་སོགས་པས་དུས་གཅིག་ལ་དྲིས་ཀྱང་། ཐེ་ཚོམ་གྱི་ལེན་དུས་གཅིག་ལ་ཐེབ་པའོ། །ལྔ་པ་ནི་་རིག་པ་ལ་དབང་ཐོབ་ཅིང་རྡོ་རྗེའི་ལུས་སུ་གྱུར་པས་འཆི་བའི་འཇིགས་པ་མེད་པའོ། །དེ་ཡང་སོགས་ཁོང་དུ་འཁོར་བའི་ཉེས་སྐྱོན་ཐམས་ཅད་དང་བྲལ་བའོ། །མངོན་ཤེས་དྲུག་ཆོ་འཕྲུལ་བཞི་ཡན་ལག་དང་བཅས་པ་ཀུན་རྫོགས་ཤིང་སྟོང་གསུམ་བརྒྱ་གཟིགས། རང་དབང་བསྒྱུར་བའི་སྐྱེ་བ་ལྷ་མིའི་རྒྱལ་པོ་བླང་པ་ཡིས། །གཞན་དོན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྒྱ་ཚུན་ཆད་འདུལ་བར་བྱེད་དོ། །རྒྱུ་ཡི་ས་དང་པོར་རབ་ཏུ་དགའ་བའི་བྷོ་དྷི་དང་ཚེ་དབང་གཉིས་སྐལ་མཉམ་པའོ། །བདག་གི་སྤྱོད་པ་ཕྱིར་དོན་དུ་གཉེར་བ་ནི། །ལོ་བརྒྱ་ཕྲག་བཅུ་དྲུག་སྟོང་དྲུག་བརྒྱ་ཚེ་ཡིས་རང་དོན་རྫོགས། །གདུལ་བྱ་གཞན་དོན་དུ་དུ་ཚེ་ལ་རང་དབང་ཐོབ་པའི་ཕྱིར། །བཞེད་ན་བསྐལ་པ་གྲངས་མེད་ཀྱི་བར་དུ་གནས་པར་གྱུར་ཡང་། །ཚེ་དབང་གི་སྐུ་ནི་བགྲེས་རྒུད་མེད་པ་ཤིན་ཏུ་གཞོན་པའི་ཚུལ། །དུ་སྣང་ནས་གདུལ་བྱའི་ངོ་ལ་འདུལ་བའི་དུས་ཀྱི་རྟག་འཛིན་ངོར་འཕོ་བ་དང་འདུལ་སྐལ་ལྡན་ན་འདུག་པར་བྱེད། །ཚེ་ལ་དབང་བའི་རིག་འཛིན་གྱི་ངོ་བོ་རྣམ་གྲངས་ལ་ར་མོ་ཤག་ལ་སོགས་པའི་ཕྱིའི་བདུད་རྩི་ལྔ་དང་། དམ་རྫས་ནང་གི་བདུད་རྩི་ལྔ་ལ་སོགས་པ། བཅུད་ལེན་གྱིས་ཚེ་ལ་དབང་བའི་རིག་འཛིན་ཐོབ་པ་སྨན་དང་འོག་སྒོ་སྦྱོར་བའི་ཐབས་འོག་སྒོ་ཕྱག་རྒྱ་ལ་བརྟེན་ནས་ཚེ་ལ་དབང་བའི་རིག་འཛིན་ཐོབ་པ་དང་། རྣལ་འབྱོར་སྒྲོལ་མའི་ནི་སྟེང་སྒོ་འཁོར་ལོ་དང་སྒྲོལ་མ་རླུང་ལ་བརྟེན་ཏེ་ཚེ་དབང་གི་རིག་འཛིན་དང་། །མ་ཧཱའི་ཚོགས་སྦྱོར་གྱི་ལམ་མཆོག་རྫོགས་པའི་ནི་ལྟ་བ་རྟོགས་ཏེ་རྟོགས་པའི་དོན་ལ་རིམ་པ་ཇི་ལྟར་གྱིས་ཟག་མེད་མངོན་དུ་མཐོང་བ་དང་དེ་ལྟར་ཚེ་དབང་ལ་རིམ་པ་བཞི་པོ་དེའོ། །བཅུ་དབང་ཐོབ་སྟེ། ཚེ་ལ་དབང་བས་འཕོ་བཞུགས་ལ་རང་དབང་ཐོབ། སྐྱེ་བ་ལ་དབང་བས་རིགས་ཀྱི་སྤྲུལ་སྐུར་སྟོན། ཡོ་བྱད་དབང་བས་འདོད་ཡོན་ལྔ་ལ་རོལ། མོ་ལ་དབང་བས་བདག་གཞན་མོས་བཞིན་སྣང་། རྫུ་འཕྲུལ་དབང་བས་རྫུ་འཕྲུལ་ཆོ་འཕྲུལ་སྟོན། །ཆོས་ལ་དབང་བས་ཆོས་སྐད་སོ་སོར་སྒྲོགས། །ཡེ་ཤེས་དབང་བས་ཤེས་བྱ་ཀུན་མ་རྨོངས། །སེམས་ལ་དབང་བས་ཏིང་ངེ་འཛིན་འབུམ་ཕྲག་རོལ། །ལས་ལ་དབང་བས་འབྱོར་བ་འབུམ་ཕྲག་རོལ། །སྨོན་ལམ་དབང་བས་ཅི་ལྟར་བཏབ་པ་སྟོན། །ཅེས་གསུངས་སོ། །ཚེ་དབང་ཐོབ་པར་འདྲ་མོད་ཀྱང་འདི་ཉིད་ཀྱི་ཁྱད་པར་ཡོད་དེ་གཞུང་དང་སྦྱར་ཏེ་དབང་བཅུའི་རྣམ་གྲངས་ནི། དབང་རྒྱུད་ལས། ཚེ་ལ་དབང་བས་འཁོར་བར་ཇི་སྲིད་བཞུགས། །ཞེས། དེ་ཉིད་ནུས་པའི་མཐུ་ཡིས་ཆེ་ཆུང་གི་ཁྱད་པར་ཟག་པ་ཡོད་པ་དང་མི་ཟག་སྟེ་ཟག་པ་མེད་པའི་ཁྱད་པར། རྒྱུ་དང་ངོ་བོས་རྣམ་པ་ཟག་བཅས་ཟག་མེད་གཉིས། །དེ་བས་ན་དགོངས་པ་དང་སྤྱོད་ལ་སོགས་པ་སྨོས་ཅི་དགོས་སྟེ་ཁྱད་པར་བསམ་གྱིས་མི་ཁྱབ་སོ། །རྒྱུ་གཞན་སྨན་ཐབས་རླུང་སོགས་ལས་གྲུབ་པས་དེ་ལམ་མཆོག་རྫོགས་པའི་རིག་འཛིན་མིན་ནོ། །ལམ་མཆོག་ལའང་ཡོན་ཏན་གྱི་མཚན་གྱི་རྣམ་གྲངས་མི་འདྲ་བའི་ཆས་བརྗོད་པ་ནི། ལྷག་པའི་ལུས་དང་གཟུགས་དང་མིང་བཞིའི་ཕུང་པོར་བཅས་པ་ཡིས་རིག་པ་རང་དབང་། བས་བསྐལ་པ་གྲངས་མེད་ལ་སོགས་གནས་པར་དབང་བའི་རིག་འཛིན་འགྲུབ་ཕྱིར། །ལྷག་མའི་རྟོག་པའི་འབྱུང་བའི་ལས་ཀྱི་ལུས་བཅས་པ་མ་སྤངས་པར་མྱ་ངན་ལས་འདས་པར་གནས་པ་དང་། ཟག་པ་གསུམ་ལ་སོགས་པ་ཀུན་ཟད་པའི་རིག་འཛིན་ཆེན་པོ་འདི། །སྤྱོད་པ་ཇི་ལྟར་སྤྱད་ཀྱང་འཁོར་བར་ལྡོག་པ་མེད་སྟེ་ཁྱེད་ཀྱི་ཡུལ་ཁམས་འདི་མིན་ནོ་ཞེས། ཚེ་ལ་རང་དབང་ཐོབ་པས་འཁོར་བ་ལས་དབུགས་ཕྱུང་བའི་ཕྱིར་དབུགས་ཆེན་འབྱིན་པ་དང་། ལམ་ལ་སྐྱེས་པའི་ཚེ་དབང་གི་སྐབས་འདིར་བདེན་པ་འགྲིབ་པ་མེད་ལ་འཕེལ་བ་ཡོད་པས་བར་མ་མཐོང་ལམ་ཞེས་བྱ། ཆོས་སྤྱི་དང་རང་གི་མཚན་ཉིད་ལ་མཁས་པས་ལྟ་བ་རྟོགས་པ་རྐྱེན་ཏིང་ངེ་འཛིན་གོམས་སྤྱོད་པ་རྨད་དུ་བྱུང་བས་ཚེ་ལ་དབང་བའི་རིག་པ་འཛིན་པ་ཞེས་བྱ། ཡི་དམ་གྱི་ལྷ་དང་མི་ལ་སོགས་པའི་རིག་འཛིན་ལ་རྡོ་རྗེའི་རིགས་སོགས་ཀྱི་རྒྱུད་འཛིན་པས། དེ་ནས་རང་གི་རིགས་མི་གཏོང་བར་རིག་འཛིན་གྱི་ལྟ་དགོངས་གཟུངས་བ་ལས་རིག་པ་དབང་ཐོབ་པས་རིག་འཛིན་གྱི་མིང་ཐོབ་པའོ། །གཞན་ཡང་ཡོན་ཏན་གྱི་ཆ་ནས་མཚན་གྱི་རྣམ་གྲངས་ཀྱི་བསམ་མི་ཁྱབ་སྟེ། རྒྱས་པ་དངོས་སུ་ས་ཁམས་ཏེ་ཞིང་ཁམས་ལུང་སྟོན་པ་དང་། གསང་མཚན་རྡོ་རྗེ་ཞེས་རྡོ་རྗེ་འཆང་གིས་མིང་བོས་ནས་དབང་བསྐུར་བའོ། །ལྟ་བ་མཐོང་ཞིང་ཏིང་ངེ་འཛིན་གོམས་པའི་མཐར་དང་ལྡན་བས་རང་བྱུང་གི་རིག་པ་ཉིད། །ཕྱི་ནང་མེད་པའི་སྣང་བ་རིག་པ་འཛིན་པའི་གནས། །དེ་གདུལ་བྱའི་རིག་དང་མཐུན་པར་སྣང་ཚུལ་གནས་ལ་ཕྱོགས་གཅིག་ངེས་པ་མེད། །སྐྱེ་བ་དང་ཆ་བྱེད་གདུལ་བྱའི་དོན་གྱིས་འགྱུར་ཞིང་ཅིར་ཡང་སྟོན་པའོ། །འཁོར་འདས་ཀྱི་ཆོས་ཀུན་བདག་ཉིད་ཆེན་པོ་རང་སྣང་བས་དག་ཕྱིར་དམིགས་བྱ་དམིགས་བྱེད་མེད་པ་དེའི་ཕྱིར། །ཆོས་ཅན་ཡུལ་ཡུལ་ཅན་ཀུན་མི་མཐོང་ཆོས་ཉིད་ཀྱང་ཡུལ་ཡུལ་ཅན་དུ། མི་མཐོང་སངས་རྒྱས་ཐུགས་ཉིད་ཀྱང་ཡུལ་དུ་དངོས་པོ་མི་མཐོང་། །ཕྱི་སྣོད་ནང་བཅུད་ཀྱང་ཡུལ་ཡུལ་ཅན་མི་མཐོང་དེ་ལྟར་དམིགས་མེད་ཡུལ་ཅན་ཡུལ་མེད་རང་གསལ་གང་གི་མཐོང་བ། །དེས་ནི་ཡང་དག་ཆོས་ཉིད་ཀྱི་བདེན་པ་མཐོང་བ་ཞེས་བྱའོ། །དེ་ནས་རྣ་བས་སྒྲ་ཐོས་པ་དང་ལྕེས་རོ་མྱོང་བ་དང་ལུས་ཀྱི་རེག་པ་ལ་སོགས་པ་ཀུན་ཐོས་བྱ་ཐོས་བྱེད་མེད་པ་དམིགས་མེད་ཡུལ་བྲལ་དུ་ཤེས་པ་མཐོང་ལམ། །རྒྱུ་ཤེས་པ་ལྟ་བ་རྐྱེན་འཇུག་པའི་ས་ཏི་བཞི་བར་ཆད་མེད་པར་ཚོགས་བསྒྲུབ་པ་ལས་སྐྱེས། །དེའི་ཕྱིར་བདེན་པ་དབྱེར་མེད་མངོན་སུམ་དུ་ལྟ་བ་རྟོགས་པའི་ས་ལམ་མཆོག་ཚེ་དབང་ནི། །རིག་པ་ལ་རང་དབང་ཐོབ་ནས་སྔོན་ངོ་བོའི་སྐབས་བཞིན་ཏེ། །ལུས་ཁམས་སྐྱེ་གནས་ཞེས་པ་ཚེ་དབང་གཞན་ལ་ཟུར་ཟོས་པའོ། །ཟག་ལུས་མ་བོར་བར་སངས་རྒྱས་པ་གསུམ་ཟག་པ་ལམ་མཆོག་གི་ཚེ་དབང་འདི་ལ་མེད། །ཟག་བཅས་བཞིན་སྔོན་ཆད་ས་ཏི་ལ་ལམ་གྱི་རྩོལ་བའི་འདུ་བྱེད་མེད་དེ་འབྲས་བུ་འགྲུབ། དེ་ཡི་གོང་གི་ལམ་ལ་འབྲས་བུ་ཐོབ་པའི་རེ་དོགས་ཀྱི་ཆགས་པ་བྲལ་ལས། །ཏིང་ངེ་འཛིན་རིམ་པའམ་བསྐྱེད་པའི་རིམ་པ་མེད་པའི་ཚུལ་གྱིས། །སྟོང་ཁྲི་ལ་སོགས་གྲངས་མང་ལྷའི་ཕྱག་རྒྱའི། འཁོར་ལོ་མངོན་སུམ་གསལ་བར་རྫོགས་ཤིང་རྣལ་འབྱོར་ཏིང་ངེ་འཛིན་ལ་གནས། །ཞི་ཁྲོ་དཀྱིལ་འཁོར་གཉིས་ཀྱི་བདག་གཞན་དོན་བསྒྲུབ་པར་མཛད་པའོ། །དེའི་མིང་ཚེ་ལ་དབང་བསྒྱུར་བའི་རྣལ་འབྱོར་ཏེ། །ལོ་སྟོང་དྲུག་བརྒྱ་ཕྲག་བཅུ་དྲུག་གི་ཆ་མ་རྫོགས་ཀྱི་དུས་བར་དུ་རང་གི་ཤེས་རབ་གསུམ་གོམས་པར་བྱས་ནས་མཐར་ཆགས་པ་ཕྱག་རྒྱ་ཐོད་རྒལ་དང་ལྷུན་གྲུབ་གཉིས་ཐོབ་པའི་མཐའ་ལམ་སྐད་ཅིག་གིས། ཆ་ཡིས་རྡོ་རྗེ་ལྟ་བུའི་ཏིང་འཛིན་གྱིས་མཐར་འབྲས་དཔའ་བོར་སྦྱོར། །ཚེ་དབང་བ་དང་རིགས་མཐུན་པ་སྟེ་ལམ་མཆོག་སྦྱངས་པའི་ཚེ་དབང་གི་ཕྱག་རྒྱ་ཆེན་པོའི་རིག་འཛིན་དང་སྤྲུལ་པའི་སྐུ་ལས། །ཆོས་ཀུན་ཉན་ཅིང་ཐོས་བསམ་བསྒོམ་གསུམ་བྱེད་པ་ཡིན་ནོ། །གསང་སྔགས་ཀྱི་ཆོས་རྒྱ་ཆེན་པོ་ཐོས་པའི་ཤེས་རབ་དང་བསམ་པའི་ཤེས་རབ་དང་རིག་ཅིང་རྟོགས་ནས་བསྒོམ་པའི་ཤེས་རབ་ལ་སྦྱོར་བས་ནི། དཔེར་ན་དཀྱུས་སར་ཕྱིན་པའི་ཅང་ཤེས་དཀྱུས་འགོ་མཐོང་བས་མཇུག་ཤེས་པ་བཞིན། །ཀུན་ཏུ་འགྲོ་བའི་སྒྲིབ་པ་དག་པར་བྱེད་ཅིང་ལམ་གོང་མ་རྣམས་ཁོང་འོག་ཏུ་ཆུད་པ་ནི་བདག་པོའི་དོན་ནོ། །རྫུ་འཕྲུལ་གྱི་ཆོ་འཕྲུལ་དང་ཆོས་སྣང་བའི་དང་རྗེས་སུ་སྟོན་པ་ཀུན་བརྗོད་པའི་ཆོ་འཕྲུལ་ལོ། །མངོན་ཤེས་དྲུག་ཤེས་ཤིང་དེ་མིང་ཚེ་ལ་དབང་བསྒྱུར་ལྡན་པ་ཡིས། །ཚེ་ལ་དབང་བསྒྱུར་རྩ་བའི་ལུས་འཇིག་འབྲལ་མེད་པའི་རྡོ་རྗེ་སྐུས། །གཞན་དོན་བྱ་བ་བྱེད་ཅིང་འགྲོ་དོན་རྫོགས་པ་འགྱུར་བ་ཡིན། །ཆོ་འཕྲུལ་བཞི་ཡི་ཐོག་མས་རྫུ་འཕྲུལ་གྱི་ཆོ་འཕྲུལ་གྱི་དོན་སྤྱོད་པ། །ལྟ་བ་སྤྱོད་པ་ཏིང་ངེ་འཛིན་ནུས་མཐུ་ཅན་དུ་རང་རིག་རང་སྣང་བར་ཚེ་ལ་དབང་བསྒྱུར་ནས། །ནམ་མཁའ་ལ་བྱ་བཞིན་དུ་འཕྱོ་དང་རིག་འཛིན་གྱི་གནས་ཞིང་ཁམས་བགྲོད་པ་དང་། ཆུ་རྒྱུན་གྱེན་ལ་བཟློག་པ་དང་རླུང་གིས་མི་འགུལ་ཞིང་མི་བསྐྱོད་པ་དང་། རི་བྲག་ལ་སོགས་ཐོགས་པ་མེད་པར་འགྲོ་ཞིང་འཛུལ་བ་དང་། ཆུ་ལ་མི་བྱིང་བ་དང་མེས་མི་ཚིག་པ་དང་། འདུ་བའི་ནད་དང་བྲལ་བས་དུག་གིས་མི་ཚུགས་པ་དང་མཚོན་གྱིས་འཇིགས་ཅིང་ཚུགས་པར་མི་འགྱུར་བ་དང་། རང་གི་ལུས་མི་སྣང་བ་དང་ལུས་མང་པོར་སྤྲུལ་པ་དང་། གཞན་ཡང་རིག་པ་ལ་དབང་ཐོབ་པས་ཇི་ལྟར་འདོད་པ་བཞིན་དུ་འབྱུང་སྟེ། ལྷ་སྲིན་སྡེ་བརྒྱད་སོགས་ལ་དབང་བསྒྱུར་ཞིང་བྲན་དུ་འཁོལ་བ་དང་། །ཚེ་དང་དུས་ལ་བསྲིང་བསྟུང་ནུས་པ་དང་། །སྟོང་གསུམ་ཆུང་དུ་མ་སོང་ཡུངས་འབྲུར་ཆེར་མ་སོང་ཤོང་བ་དང་། །དེ་བཞིན་དུ་ཡུངས་འབྲུས་སྟོང་གསུམ་གང་བ་དང་། །བ་སྤུའི་བུ་ག་ན་སྟོང་སྟོང་གསུམ་དག་བསྡུའང་དེ་བཞིན་ནོ། །འཇིག་རྟེན་སྲེག་པ་མེའི་སྐལ་པ་གཞིལ་བ་དང་། །ཐུགས་ཀ་ནས་ཉི་མའི་དཀྱིལ་འཁོར་འབུམ་དུས་གཅིག་ལ་འགྱེད་པ་དང་། །སྐམ་སར་ནས་ཆུ་དབྱུང་བ་དང་བྱེ་མ་ལས་གསེར་དུ་འགྱུར་བ་དང་། སོལ་བ་ལ་ལྗོན་ཤིང་དུ་འབྱུང་བ་དང་། །ནམ་མཁའ་ལ་རྡོ་རྗེའི་བྲག་ལྟ་བུ་སྲ་ཞིང་འཁྲེག་པ་འབྱུང་བ་དང་། །ཡེ་ཤེས་ཀྱི་མེ་འབར་ནས་མཚན་མའི་མེ་ཡང་ཚིག་པ་དང་། །ཡེ་ཤེས་ཀྱི་བམ་ལས་ཆུར་བསྒྱུར་མཚན་མའི་འབབ་པའང་གཅོད་པར་བྱེད་པ་དེ་བཞིན་ནོ། །ཡེ་ཤེས་ཀྱི་རླུང་གིས་འཇིག་རྟེན་གྱི་ཁམས་གཏོར་བ་དང་རླུང་གི་བྱ་བའང་འགྲུབ། །དགྲ་བགེགས་གཟུངས་མ་དགུག་པ་དང་མི་མཐུན་པ་གཞན་བཏང་བ་དང་བཅིང་དང་དགྲོལ་བ་དང་། སྲིའུ་ལོ་ཐོག་གསོ་དང་དགྲ་བགེགས་གསད་དང་གཞན་ཕམ་དང་བདག་རྒྱལ། །དེའི་ཇི་ལྟར་དམིགས་པ་བཞིན་དུ་བསྒྲུབ། །དུག་སྦྲུལ་དང་སྟག་ལ་སོགས་པ་གཅན་གཟན་གདུག་པ་རྣམས། །ཁྱི་བཞིན་དུ་བདག་གི་ཕྱི་བཞིན་འབྲང་བར་འགྱུར། །རུ་ཏྲ་ལ་སོགས་བར་དུ་གཅོད་པའི་བདུད་དང་གདུག་པའི་ལྷ་འདྲེ་ལ་སོགས་པས། །ཚུག་པར་མི་འགྱུར་བྲན་བཞིན་དུ་བྱ་བ་བྱེད་པར་འགྱུར། །ལྷག་མའི་ལུས་མ་བོར་བར་ཚེ་ལ་དབང་བའི་རིག་འཛིན་གྱི་སར་འགྱུར་ནས། དེའི་ཐུགས་རྗེ་སྤྲུལ་པ་འབྱུང་བའི་བྱིན་རླབས་ཀྱིས། །འགྲོ་བ་ལྷ་ཀླུ་ལ་སོགས་པ་སོ་སོའི་སྐད་དང་མཐུན་པ་ཡིས། །འགྲོ་བ་སོ་སོར་ཐར་བའི་ལམ་ཡང་སྟོན། །ངན་སོང་གསུམ་ལ་སོགས་སྟོང་ཞིང་དགེ་བའི་ལས་ལ་བསྐུལ་བ་དང་། །དེ་ཉིད་ལམ་སྟེགས་ཀྱི་ཐེག་པ་ལ་དགོད་ཅིང་དེ་དག་ལམ་སྟེགས་ཉིད། །ཐེག་པ་ཆེན་པོ་གསང་སྔགས་ཀྱི་ལམ་ལ་དགོད་པར་མཛད། །ཉན་ཐོས་ཐར་པ་ཐམས་ཅད་མཁྱེན་པའི་དོན་ལ་བསྐུལ་ཞིང་ཞི་བ་འགོགས་པའི་ས་ལས་སློང་། །ས་བཅུ་པ་ལ་གནས་པའི་བྷོ་དྷིའི་སྟོན་པ་བྱེད་ནུས་ཤིང་གསང་སྔགས་ཀྱི་དོན་བསྟན་ནས་ཤེས་བྱའི་སྒྲིབ་པ་སྦྱོང་བར་བྱེད་ཅིང་སྤྱོད་པ་མཛད་པ། ས་བཅུ་རབ་དགའ་ལ་སོགས་པ་བདེ་གཤེགས་སྤྲུལ་པའི་སྐུའི་འཁོར་ལའང་ཆོས་སྟོན་ཅིང་སྤྲུལ་སྐུའི་མཛད་པའོ། །སྟོང་གསུམ་བརྒྱད་ཕྲག་བཅུའི་འཇིག་རྟེན་རྣམས། །གཡོ་བ་དང་རབ་ཏུ་གཡོ་བ་དང་ཤིན་ཏུ་གཡོ་བས་ཆོས་སྣང་བའི། མཛད་པ་སྣང་བར་བྱེད་ལ་དེར་གནས་པའི་ལམ་པ་རྣམས། །ནང་གི་ཏིང་ངེ་འཛིན་གོང་ནས་གོང་དུ་གཡོས་བས་ས་ཡི་རིམ་པར་སྦྱོང་བར་བྱེད། །ཐེག་མཆོག་གསང་བ་སྔགས་ཀྱི་སྒྲ་བསྒྲགས་པས། །སྣོད་བཅུད་ཀུན་ཀྱང་རྡོ་རྗེ་རྣལ་འབྱོར་ཅེས་པ་ལ་སོགས་རྨད་བྱུང་སྔགས་ཀྱི་སྒྲ། །གྲགས་པས་ཕྱི་ནང་གི་བདུད་འདུལ་ངན་སོང་གསུམ་གྱི་སྒྲིབ་པ་སྦྱོང་། །འགྲོ་བ་མ་ལུས་པའི་དོན་ཡང་གང་ལ་གང་མཚམས་སུ་བྱེད། །བདག་གཞན་གྱི་ལས་རྣམས་ཐམས་ཅད་ཀུན་བྱས་ནས། །འབྲས་བུ་སྐྱེ་ཤི་མེད་པའི་གཡུང་དྲུང་ཐོབ། །མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ཀུན་གྱིས་བརྒྱན་པའོ། །ལམ་མཐར་ཕྱིན་པ་ལྷུན་གྱིས་གྲུབ་པའི་རིག་འཛིན་ཐོབ་སྟེ་བྱ་བ་མེད་པ་སངས་རྒྱས་ཀྱིས་འགྲུབ་པའོ། །རྒྱུད་ལས་གསུངས་པ་འདོད་ཡོན་ལྔ་སྤྱད་བྱ་ལྔ་མི་སྤང་ལྔ་དང་དུ་བླང་བ་ལྔ་སྟེ་ལྔ་ཚན་བཞི་ནི། །སྤྱོད་པ་བཅུ་ཕྲག་གཉིས་ཉི་ཤུ་དང་ཕྲིན་ལས་བཞི་ལ་སོགས་པ་རྣམས་ལ་ཇི་ལྟར་ཡང་། རིག་པ་ལ་དབང་བསྒྱུར་བས་གཞན་དོན་ཉིད་དུ་ཐོགས་པ་མེད་པར་སྤྱོད་དོ། །སྔོན་གྱི་གོང་དུ་སྟོང་གསུམ་བརྒྱ་ཚུན་ཆད་འདུལ་བར་གསུངས་པ་བཞིན་ཡུལ་ཁྱོན་སྟོང་གསུམ་སྟོང་འདུལ་བར་བྱེད། །ཕུང་པོ་ཁམས་སྐྱེ་མཆེད་དང་དབང་པོ་རྣམས་ནི་རང་བྱུང་ཡེ་ཤེས་ཡིན་པའི་ཕྱིར། །དེ་ཉིད་བྱེ་བྲག་ལ་འདྲེས་པ་གཅིག་དང་དུ་མའི་མཐའ་བྲལ་སྟེ་རང་བྱུང་ཡེ་ཤེས་སུ་གཅིག་པས། གཅིག་དུ་མ་གཉིས་སུ་མེད་པར་མངོན་རྟོགས་ཏིང་ངེ་འཛིན་གོམས་དེ། ཟག་མེད་མངོན་དུ་མཐོང་བས་ཚོགས་དྲུག་གི་དྲི་མ་དྲུག་སྦྱང་བའི་ཕྱིར། །དེ་སྙེད་སྟོང་གསུམ་གྱི་སྟོང་ཆེན་པོ་བརྒྱ་ཚུན་ཆད་སྤྱན་གྱིས་གཟུགས་མཐོང་བ་རྣ་བས་སྒྲ་ཐོས་པ་སྣའི་དྲི་ཚོར་ལྕེས་རོ་མྱོང་ལུས་ཀྱི་རེག་སྟེ་རེ་རེ་ལ་ལྔ་ཚང་བས། ཤེས་པའི་བྱེ་བྲག་རེ་རེ་ལ་ལྔ་ལྔ་སྟེ་རྩ་ལྔར་ཤར། །དེས་ན་སྒོ་ལྔ་གཅིག་གིས་ཀྱང་ཡུལ་ལྔ་གཅོད་པར་བྱེད། །དབང་པོ་ཚང་དང་མ་ཚང་བའི་འཇིགས་པ་དང་མ་ཚང་གི་དོགས་པ་མེད་དོ། །མངོན་ཤེས་དེ་ལས་གཞན་དུ་སྟོང་གསུམ་ཚུན་ཆད་ལྷ་ཡི་རྣ་བའི་མངོན་ཤེས་དང་། །སྤྱན་གྱི་མངོན་པར་ཤེས་པ་དང་། །སྔོན་གནས་བརྒྱ་སྟོང་ལ་སོགས་པ་རྗེས་སུ་དྲན་པ་དང་། །ཕ་རོལ་རྣམས་ཀྱི་སེམས་ཤེས་དང་། །འཆི་འཕོ་དང་སྐྱེ་བ་མཁྱེན་པ་དང་། །རྫུ་འཕྲུལ་ཉི་ཤུ་ལ་སོགས་པའི་བྱ་བ་ཤེས་པའི་ཟག་པ་ཟད་བའི་མངོན་ཤེས་ཀྱིས་གདུལ་བྱ་དུས་ལ་བབ་མ་བབ་ཤེས་པས། དེ་ཉིད་སྟོང་གསུམ་བརྒྱ་ཚུན་ཆད་ཡུལ་ཤེས་པས། །གདུལ་བྱ་གང་དང་ཐབས་གང་དང་གང་རྣམས་ཀྱིས་ཅི་འཚམས་པ་ལྟར་འདུལ་བར་མཛད། །མངོན་ཤེས་དེའི་མིང་ནི་ཕྱིར་འཁོར་བར་མི་ལྡོག་པའི་མངོན་ཤེས་ཟག་པ་མེད་པའི་མངོན་ཤེས་དང་། །དབང་བསྒྱུར་རིགས་ཀྱི་མངོན་ཤེས་ཞེས་མཚན་གྱི་རྣམ་གྲངས་ཡོན་ཏན་གྱི་ཆ་ལ་བརྗོད་པའོ། །བདག་གམ་གཞན་གྱི་དོན་དུ་ལོ་སྟོང་དྲུག་བརྒྱ་དོན་བྱ་བའི་ཕྱིར་ཚེ་ལ་དབང་བའི་རིག་འཛིན་ཅན་དེས། །རང་དོན་དུ་སྐུ་ཚེ་ལོ་སྟོང་དྲུག་བརྒྱའི་ཚད་གྲངས་གཞན་དོན་དུ་ཇི་སྙེད་པར། །བཞུགས་པའི་མཐའ་རང་གི་དོན་བསྒྲུབ་པའི་འབྲས་བུ་ལ་སྦྱོར་བས། །སྔོན་རྣམ་སྨིན་ཟག་བཅས་ཀྱི་སྐབས་སུ་བསྟན་པ་བཞིན་འདི་ཡང་གཅིག་ལས་དག་རིམ་གྱིས་སྦྱོར་བ་དང་ཅིག་ཆར་ཐོད་རྒལ་ལ་སྦྱོར་བ་གཉིས་འོ། །དེ་ཡང་སྔ་མ་མཐར་ཆགས་རིམ་གྱིས་ཟག་མེད་མཐོང་བའི་ལམ་ཉིད་དུ། །ལོངས་སྐུ་ལ་བརྟེན་ནས་ཚེ་དབང་རང་གི་ཤེས་རབ་གསུམ་གོམས་པ་ལས། ཚེ་དབང་རང་གི་རྩ་བའི་ལུས་སྐྱེ་འཆི་མེད་པ་རྒྱལ་བའི་སྐུ་ཕྱག་རྒྱ་ཆེ། །དེ་རིགས་གང་གོམས་མངོན་དུ་གྱུར་པའི་ལྷ། །ཕྱག་རྒྱ་ཆེན་པོའི་རིག་འཛིན་ཐོབ་དེར། །ཡོངས་སུ་གྲུབ་པར་གྱུར་ཏེ་དེ་ནས་ལྷུན་གྲུབ་༼ངང་༽རིག་འཛིན་ཐོབ་ནས་སངས་རྒྱས་པར་གཤེགས་པའོ། །ཕྱི་མ་༢༽ཅིག་ཆར་ཐོད་རྒལ་བ་རིགས་མཆོག་ཚེ་དབང་དེ་ཉིད་མཐོང་ལམ་ནས། །སྔོན་རིམ་འཇུག་བཞིན་གོམས་པ་ཤེས་རབ་གསུམ་བྱས་ནས། །ཕྱག་རྒྱ་ཆེན་པོའི་རིག་འཛིན་དོར་ཏེ་ཅིག་ཆར་དུ་མཐར་ལམ་ལྷུན་གྱིས་གྲུབ་པའི་རིག་འཛིན་ལ། འགྲོ་བ་ནི། ལྟ་བ་ཆོས་ཉིད་ཤེས་རབ་ཀྱི་སྟོབས་དང་རྐྱེན་དམ་ཚིག་གི་སྟོབས་དང་སྨོན་ལམ་དང་བརྩོན་འགྲུས་མཐུ་ཐོབ་པ་ཡིན། །ཟག་མེད་ལམ་ལ་གསུམ་པོ་དེ་ཉིད་ཀྱི་བར་མ་བསྒོམ་ལམ་ཕྱག་རྒྱ་ཆེན་པོའི་རིག་འཛིན་བཤད་པར་བྱ་བ་བ་ལ། སྔོན་གྱི་ཚེ་དབང་གི་ལུས་བཞི་བརྒྱད་ཀྱིས་ལུས་རྫོགས་པར་བྱ། །ཕྱག་རྒྱ་ཅིག་དང་དུ་མའི་སྤྲོས་པ་རྣལ་འབྱོར་པས། །རང་གི་འབྱུང་བའི་ལུས་ཉིད་ངོ་བོ་སེམས་ཡིན་པའི་ཕྱིར་སེམས་ཀྱི་རང་བཞིན་ལྷ་ཡིན་ཏེ། ལྟ་བ་མཐོང་ཏིང་ངེ་འཛིན་གོམས་ཏེ་ཚོགས་བསགས་པའི་མཐར་སྦྱོར་ལམ་ཚོགས་བསྒྲུབ་པས། །མཐོང་ལམ་དུ་རྣམ་སྨིན་ཚེ་དབང་གཉིས་ཐོབ་ལྟ་བ་ཆེད་འཛིན་ཀུན་འགྲོའི་སྒྲིབ་པ་དག་པ་དེ་ནི་སྒོམ་ལམ་རིམ་བཞིན་དུ་ངོ་བོའི་རྒྱུའོ། །རྒྱུ་སྤྱོད་པས་འབྲས་བུ་རྣམ་སྨིན་གྱི་ཚུལ་གྱིས་འབྲས་བུ་བསྐྱེད་བྱ་སྐྱེད་བྱེད་འགྲུབ་པ་མེད་པར་འདོད་དོ། །ངོ་བོ་ལ་སྔ་ཕྱི་རྒྱུ་འབྲས་ཐ་དད་དུ་འདོད་པ་མིན། །རྒྱུ་འབྲས་གཉིས་དུས་རིམ་གྱིས་བསྒྲུབ་ནས་ཐོབ་པར་འདོད་པ་མིན་རྒྱུ་འབྲས་དབྱེར་མེད་ངོ་བོ་ཅིག་ཏུ་འདོད་པའི་ཕྱིར། །རྒྱུ་འབྲས་གཉིས་ངོ་བོ་རང་བྱུང་ཡེ་ཤེས་སུ་གཅིག་པས་གཅིག་པ་དེ་ཉིད་ལམ་དུ་བྱས་པས་ཚེ་དབང་ཐོབ་སྟེ། ལྷག་མ་དང་བཅས་པའི་ལུས་དེ་ཉིད་ལོ་བརྒྱ་བརྒྱར་བསྣུར་ཞིང་སྒྲུབ་པའི་མཐའ། །ཕྱག་རྒྱ་ཆེན་པོ་དེ་ཉིད་གྱུར་པས་རང་དོན་ལོ་སྟོང་དྲུག་བརྒྱ་གཞན་དོན་དུ་ངེས་པ་མེད། །རང་གི་སེམས་ཉིད་ཡེ་ནས་ཕྱག་རྒྱ་ཆེན་པོ་ཡིན་སྟེ། །རྒྱ་གཅིག་སྤྲོས་པ་གཉིས་སུ་ལྷ་བསྒོམས་པས་ཞི་ཁྲོ་གང་ཡིན་པ་དེ་མངོན་དུ་གྱུར་པའི་སྐུ། །ཐུན་མོང་དང་མཆོག་གི་མཚན་སུམ་ཅུ་རྩ་གཉིས་དཔེར་བྱད་བརྒྱད་ཅུ་དང་ལྡན། །ལོངས་སྤྱོད་གཉིས་ཞེས་བྱའོ་པ་ཕྱག་རྒྱའི་རིག་འཛིན་ནི་ལོངས་སྤྱོད་རྫོགས་པའི་སྐུ་དང་ཆ་ལུགས་མཐུན་ལ་ཟག་མེད་པ་ལ་གསུམ་ཡོད་པའི་གཉིས་པ་བསྒོམ་པ་ཡིན་ལ། གཉིས་པ་ཞེས་བྱ་བ་ཡང་ན་ལོངས་སྐུ་གཉིས་ལ་ལོངས་སྤྱོད་རྫོགས་པའི་སྐུ་དངོས་དང་དེའི་རྒྱལ་ཚབ་བྱེད་པའི་སྐུ་གཉིས་ལས། འདིར་ཕྱག་རྒྱ་ཆེན་པོའི་རིག་འཛིན་ལོངས་སྐུའི་རྒྱལ་ཚབ་བྱེད་པས་ཀྱང་གཉིས་པའོ། །བྱེ་བྲག་རྡོ་རྗེའི་རིགས་འཁོར་ལོའི་རིགས་རིན་ཆེན་རིགས་དང་། །པདྨའི་རིགས་དང་རལ་གྲི་ལས་ཀྱི་རིག་འཛིན་ལྔའང་འགྱུར། །རང་ལུས་གདོད་ནས་ཕྱག་རྒྱ་ཆེན་མོ་ཡིན་པ་དེར། །བསྒོམ་པས་རིགས་གང་ཡིན་པ་མངོན་དུ་གྱུར་པའི་སྐུ། །མཚན་དང་དཔེ་བྱད་ཆོ་འཕྲུལ་བཞི་མངོན་ཤེས་དྲུག་རྫོགས་པ་ནི། ཕྱག་རྒྱ་ཆེན་པོའི་རིགས་སུ་གྲགས། །ལོངས་སྐུ་ཡེ་ཤེས་སྒྱུ་མའི་སྐུ་ཡི་ཆ་ལུགས་ཅན། །ཚེ་དབང་གི་དུས་འབྱུང་བ་རྡོ་རྗེའི་ལུས་བགྲེས་རྒུད་ལས་གྲོལ་བར་འགྱུར་རོ། །དེའི་ཕྱིར་རྒྱ་ཆེན་རིག་འཛིན་ལ་སྐུ་ཚེ་དཔག་ཏུ་ཚད་མེད་དེ། །བསྣུར་ཞིང་མངོན་དུ་བྱ་བ་དང་བྲལ། །ཕྱག་རྒྱ་ཆེན་པོའི་རིག་འཛིན་ནང་ན་ཡང་དེ་ཉིད་ཀྱི་རྣམ་གྲངས་གྱི་ཀྲི་ཡ་རིགས་གསུམ་དང་ཨུ་པ་ལ་རིགས་བཞི་དང་། །ཡོ་ག་རིགས་ལྔ་དང་མ་ཧཱའི་རིགས་མཆོག་ལྔའི་ཕྱག་རྒྱ་སྟེ་དེ་རྣམས་ཀྱི་རིགས་དང་ཆ་བྱད་འཛིན་པས། །རྣམ་གྲངས་ཀྱང་རིམ་པ་བཞི་རུ་སྔོན་ཚེ་དབང་སྐབས་སུ་བསྟན་པ་བཞིན་གྲངས་མཐུན་པར་འགྱུར། །མ་ཧཱ་མཆོག་གི་རིག་འཛིན་ལ་མིང་གྲངས་ནི་གསུམ་ཡོད་གཉིས་པ་བསྒོམ་ལམ་དང་རྒྱ་ཆེན་ཚེ་དབང་ལྷུན་གྲུབ་གསུམ་སྟེ། དགོངས་པ་མཉམ་པ་ཉིད་ཀྱི་ངང་ལས་མི་གཡོ་ཞིང་། །ཚེ་ལ་དབང་བསྒྱུར་བའི་སྐབས་རྩོལ་བའི་འདུ་བྱེད་དང་བྲལ་བས། །ཟག་པ་གསུམ་མེད་པའི་བསྒོམ་པའི་ལམ་ཞེས་ཀྱང་བྱ། མི་གཡོ་བའི་རྣལ་འབྱོར་ཕྱག་རྒྱ་ཆེན་པོ་ཉིད་དུའང་བརྗོད། །རྒྱལ་བས་སངས་རྒྱས་ཀྱི་ལུང་སྟོན་དངོས་སུ་འབྱུང་བས་ལུང་ཆེན་ཐོབ་པ་ཞེས་ཀྱང་བརྗོད། རྨི་ལམ་ལ་སོགས་པ་བདུད་དང་ཆ་བྱེ་ཞིང་བརྟག་པའི་བྱེ་བྲག་ཕྱག་རྒྱ་རིན་འཛིན་འདི་ལའང་མེད། །ལོངས་སྤྱོད་རྫོགས་པའི་ཡེ་ཤེས་སྐུ་ཡི་ཆ་ལུགས་སྣང་སྟོང་དབྱེར་མེད་རྣལ་འབྱོར་པ། །སྐུ་གསུམ་གྱི་སངས་རྒྱས་གཉིས་པ་ལོངས་སྤྱོད་རྫོགས་པའི་ཕྱག་རྒྱ་ཆེན་པོ་ལྟ་བའི་སྤྱན་དགོངས་པའི་ཏིང་ངེ་འཛིན་ཀྱང་། །ཚེ་དབང་དང་དགོངས་པ་ཟག་མེད་དུ་རྒྱུད་མཐུན་མོད་ཀྱང་འདིར་ཁྱད་པར་དུ་ཕྱག་རྒྱ་ཆེན་པོའི་རིག་འཛིན་མི་གཡོ་བའི་ངང་ལ་མི་རྟོག་པར་བཞུགས་སྟེ་ཐོབ་པས། དགོངས་པ་ཤིན་ཏུ་བརྟན་པའི་ཀློང་དུ་གནས་པའོ། །དེའི་ངང་ལས་མ་གཡོས་པར་ལྷ་གྲངས་ཚད་ཅན་འཁོར་ལོའི་ལྷ་ཚོགས་མངོན་སུམ་དུ་སྣང་། །འོ་ན་ལོངས་སྐུ་དང་དབྱེར་མེད་དམ་ཞེ་ན་འོན་ཀྱང་རྣལ་འབྱོར་ཉམས་ཀྱི་རྩོལ་བ་ཅན། །དགོངས་པ་མཉམ་པའི་བཞག་པའི་ངང་ལས་གཞན་དུ་མ་གཡོས་བཞིན་དུ། སྟོང་གསུམ་གི་སྟོང་ཆེན་པོ་འཇིག་རྟེན་གྱི་ཁམས་བརྒྱ་སྟོང་ཕྲག །གཅིག་བཞིར་གཞག་པའི་གཅིག་ནས་གཉིས་སུ་བགྲང་བའི་བཅུ་ཡི་རྡུལ་གྱི་གྲངས་དེ་སྙེད་འཇིག་རྟེན་ཁམས་ཀྱི་གདུལ་བྱ་དང་། །སངས་རྒྱས་སྤྲུལ་པའི་ཞིང་གྲངས་མེད་པ་བརྒྱ་ཕྲག་གཅིག་དེ་གཞིར་བཞག་པས་སྟོང་ཕྲག །བཅུ་ཡི་རྡུལ་སྙེད་ཀྱི་གྲངས་དང་མཉམ་པ་དེ་ཞིང་ཁམས་རྣམས་སུ། །རྔོན་པ་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཆོ་འཕྲུལ་བཞི་དང་མངོན་ཤེས་དྲུག་སོགས་ཀྱི་འགྲོ་དོན་གང་དེ་བཞིན་ནོ། །རྩ་བ་ལོངས་སྐུ་ལས་མ་གཡོས་པར་སྐུའི་བཀོད་པ་ཐུབ་དྲུག་ལྟ་བུས་མངོན་ཤེས་དྲུག་དང་དབང་པོ་ལྔ་ཡི་རེ་རེ་ལ་ཡན་ལག་ལྔ་ལྔ་སྟེ་ཉེར་ལྔ་བཅས། །མངོན་ཤེས་པའང་ཚེ་དབང་དང་ཟག་མེད་དུ་འདྲ་བ་མོད་ཀྱང་ཆོ་འཕྲུལ་བཞི་ལ་སོགས་པ་ཀུན་གྱིས། རྒྱ་གོང་གི་དེ་སྙེད་ཀྱིས་ཚེ་དབང་སྟོང་གི་འཇིག་རྟེན་བརྒྱ་སྟོང་ཕྲག་བཅུའི་རྡུལ་སྙེད་ཡུལ་གྱི་ཁྱད་པར་དང་། །གདུལ་བྱའི་དོན་རྫོགས་མ་རྫོགས་ཀྱི་ཁྱད་པར་དང་བྱིན་རླབས་མཐུ་དང་གདུལ་བྱས་ནི་ཡུལ་རྒྱ་ཆེ་ཆུང་གི་ཚད་ཀྱི་ཁྱད་པར་དཔག་པའོ། །ཕྱག་རྒྱ་ཆེན་པོ་རང་གི་ས་ཏེ་མི་གཡོ་བ་ལྟ་བས་མཐོང་བ་དང་ཏིང་ངེ་འཛིན་དེ་གོམས་པ་དང་དང་། །སྤྱོད་པ་གཞན་དོན་དུ་འབྲས་བུ་གཉེར་བ་དང་རིམ་པར་བསྒོམ་པའི་བརྩམ་བ་ཡིས། །སྔོན་དུ་བསྒོམ་ལམ་མན་ཆད་ཀུན་རྫོགས་པའི་བྱིན་རླབས་དང་སྟོབས་ཀྱིས། །རྒྱ་ཆེན་རྣལ་འབྱོར་མཉམ་རྗེས་ཀྱི་བྲལ་ནས་མཐར་ལམ་ལྷུན་གྱིས་གྲུབ་པའི་རིག་འཛིན་ཐོབ། དེ་ཡང་ལྷན་ཅིག་གནས་པའི་དྲི་མ་དག་པ་དང་། གཞན་བརྩལ་བ་མེད་པར་ལྷུན་གྱིས་གྲུབ་པའི་རིག་འཛིན་ཐོབ་པ་དུས་མཉམ་མོད། །ཐོད་རྒལ་དེས་ཚེ་དབང་དང་རྒྱ་ཆེན་དེ་མངོན་དུ་བྱས་པ་ཡིས། །འབྲས་བུ། སྐུ་ལྔ་ལྷུན་གྱིས་གྲུབ་པའི་རིག་འཛིན་དང་། །ལྷག་ཅིག་གནས་པའི་དྲིི་རང་རྒྱུད་པའི་དྲི་མ་དག་ཅིང་ཀུན་མཁྱེན་པའི་སངས་རྒྱས་དེ། །སྔོན་ཚེ་དབང་བཞིན་དུ་བཞི་ཚན་གཉིས་ཏེ་བརྒྱད་དགོད་པར་བྱ། །ཐོད་རྒལ་བ་ཚེ་དབང་དང་མཐར་ཕྱག་རྒྱ་ཆེན་པོ་སྔ་མའི་རིགས་ལ་ཤེས་རབ་གསུམ་ལྟ་སྤྱོད་ཏིང་ངེ་འཛིན་མཐུ་རྫོགས་པས། །གོང་དུ་བཤད་པ་བཞིན་དུ་ལྷན་ཅིག་གནས་པའི་དྲི་མ་དག་ནས། ལོངས་སྐུ་དང་ཕྱག་རྒྱ་ཆེན་པོའི་རིག་འཛིན་སངས་རྒྱས་གཉིས་པ་ལོངས་སྐུའི་ཆ་བྱད་ཅན་པའི་ཤེས་རབ་ཐོས་བསམ་སྒོམ་གསུམ་ཀྱི། འབྲས་བུ་ལྷུན་གྱིས་གྲུབ་པའི་རིག་འཛིན་དངོས་སུ་འབྱུང་བའི་སྐུ་ཡིན་ཏེ། ཕྱག་རྒྱ་ཆེན་པོའི་རིག་འཛིན་གནས་སྐབས་དེར་སྔོན་བཞིན་ཤེས་རབ་གསུམ་རྫོགས་པའི། ལོངས་སྤྱོད་རྫོགས་པའི་སྐུ་ལ་དགོངས་པ་བརྡའི་གསང་བའི་ལུང་ཐོས་ཤིང་། །ཕྱག་རྒྱ་ཆེན་པོའི་རང་གི་དགོངས་པ་དང་སྤྱོད་པ་ནུས་པ་ཅན་དེས། ས་དང་ལམ་མཐར་ཕྱིན་པ་སྐད་ཅིག་ལྷུན་གྲུབ་རིག་འཛིན་འབྱུང་བའི་དུས་ལ་བབ། །ལྷན་གཅིག་གནས་པའི་དྲི་མ་དེ་ལྟར་དག་པའི་ཤེས་པ་ཉིད། །ངོ་བོ་སྐུ་ལྔ་ལྷུན་གྱི་གྲུབ་པའི་རིག་འཛིན་མི་གཏོང་ཞིང་འཛིན་པས་རྡོ་རྗེ་འཛིན་པ་ཞེས་བྱ་སྟེ། ལྷུན་གྱིས་གྲུབ་པ་དགོངས་པ་མཉམ་པ་ཉིད་ཀྱི་ངང་ལས་མི་གཡོ་ཞིང་། །མི་རྟོག་པ་ཉིད་དུ་བཞུགས་པའང་། །བག་ལ་ཉལ་བའི་སྒྲིབ་པ་སྟེ་མཉམ་པ་ལས་ལྡང་བས་འཇོམས་པར་བྱེད་ཅིང་། །གཡེང་བ་སྐད་ཅིག་མ་གཅིག་ལ་རག་ལས་ནས་རིག་འཛིན་མཐར་ལམ་པའོ། །སྐུའི་ཆ་བྱད་རྒྱལ་བ་དྲུག་པ་ཉིད་དུ་སྟེ། །སྐུ་ལྔ་པོ་ལྷུན་གྱིས་གྲུབ་པའི་ཕྱིར་ནའོ། །རྒྱལ་བ་སྐུ་ལྔ་དེ་འདྲ་དེ་ཉིད་ཀྱི་རྒྱལ་ཚབ་བྱེད་ཅིང་ཆོས་སྟོན་པའི་ལྷུན་གྲུབ་རིག་འཛིན་དེ་ཉིད་ཀྱི་རྒྱུད། དེ་མི་གཏོང་བས་མིང་དོན་འགྲུབ་པར་ཡིན། །རྩ་བའི་ལུས་སྐྱེ་འཇིགས་མེད་པ་ཉིད་ལ་སྐྱེ་ཤི་མི་མངའ་ཕྱིར། །སྐྱེ་འཇིགས་མེད་པས་རྡོ་རྗེའི་སྐུ་ཡང་གདུལ་བྱའི་ངོ་ལ། །ཉིད་ཀྱི་སྤྲུལ་པའི་སྐུ་རྣམས་ནི་མྱ་ངན་འདས་འདའ་ཚུལ་དུ་སྟོན་པར་བྱེད་དེ། དེ་ཡང་རྒྱལ་བུ་དོན་གྲུབ་མཛད་པ་མཐར་འདོན་ལ་སོགས་ཇི་ལྟ་བའོ། །ཀྲི་ཡ་བྱ་བ་ལྷུན་གྱིས་གྲུབ་པ་རིག་འཛིན་དང་ཡོ་གའི་རྣལ་འབྱོར་གྱི། །ལྷུན་གྲུབ་རིག་འཛིན་དང་རྣལ་འབྱོར་ཆེན་པོ་ནང་མ་ཧཱའི་ལྷུན་གྱིས་གྲུབ་པའི་རིག་འཛིན། །དེ་ལྟར་གསུམ་གྱི་ཐ་མ་མ་ཧཱའི་མིང་གི་རྣམ་གྲངས་མཐར་ཕྱིན་པའི་ལམ་ཅེས་བྱའོ། །རང་རྒྱུད་དག་པའི་སངས་རྒྱས་ཞེས་ཀྱང་བྱ་དང་། །ལྷུན་གྲུབ་རིག་འཛིན་ཞེས་བྱ་དེ་ཉིད་དང་ནི་མཐར་སངས་རྒྱས་ལ་སྦྱོར་བའི་ལམ་ཐ་མ་ཞེས་ཀྱང་བྱ། ཡང་དག་པར་རྫོགས་པའི་རྒྱལ་བ་སྐུ་ལྔའི་རྒྱལ་ཚབ་བྱེད་པོའི་ཕྱིར་རྒྱལ་ཚབ་སྐྱེས་བུས་ཞེས་ཀྱང་བྱ། སྔ་མ་ཀྲི་ཡའི་རིགས་གསུམ་དང་ཡོ་གའི་སེམས་དཔའ་དང་པོ་རིགས་བཞི་དང་། ཀུན་རིགས་རྣམ་པར་སྣང་མཛད་ཀྱི་ཆ་ལུགས་འཛིན་ཅིང་རང་གི་རྒྱལ་ཚབ་དང་སྡུས་པའང་མཛད། དགོངས་པ་བསམ་ཡས་ལྷུན་གྱིས་གྲུབ་པའི་ཕྱིར། །ཇི་ལྟར་ཇི་སྙེད་སངས་རྒྱས་ཐམས་ཅད་མཁྱེན་པའི་ཡེ་ཤེས་སྤྱན་མཆོག་འཆང་། །དགོངས་པ་ཡི་གེ་འཁོར་ལོ་ཚོགས་ཆེན་གྱི་འང་རང་རིག་པའི་མངོན་སུམ་དུ་གཟིགས་པ། །དགོངས་པ་ཆོས་ཉིད་འགྲོ་འོང་མེད་པའི་ངང་དུ་མི་གཡོ་བ་ལ་མི་རྟོག་པར་བཞུགས། ཤུགས་ལ་བྱུང་བའི་རྗེས་སྟེ་བག་ལ་ཉལ་གྱི་སྒྲིབ་པ་ཡོད་པས་ད་དུང་མངོན་པར་རྫོགས་པར་སངས་མི་རྒྱ་སྟེ། །དུས་མཐའ་སྐད་ཅིག་ཉིད་ཀྱིས་དེ་ལྟ་བུའི་སྒྲིབ་པ་བཅོམ་ནས་བྷུདྡྷའི་ས་ལ་གཤེགས་སོ། །དེས་ན་དགོངས་པ་དང་སྤྱོད་པ་རྒྱ་མཚོ་དང་འདྲ་བ་ཀུན། །རང་བྱུང་གི་ཡེ་ཤེས་རྩལ་མངོན་དུ་རྫོགས་པ་ཞེས་ཀྱང་བྱ་རྩོལ་བའི་བྱ་བ་མེད་པའང་ཞེས་ཀྱང་བྱ། མཐར་ཕྱིན་པའི་དགོངས་པ་ཞེས་ཀྱང་བྱ་རྩོལ་བ་དང་བྲལ་བ་རྫོགས་པ་ཞེས་བྱ་ལ་སོགས་པའི། །མིང་གི་རྣམ་གྲངས་ཡོན་ཏན་གྱི་ཆ་ལ་བརྗོད་པར་ཟད། །བདག་ཉིད་ཀྱི་དོན་བྱའི་ཕྱིར་རྡོ་རྗེ་འཛིན་པ་ཆེན་པོ་སྐུ་ལྔ་ལྷུན་གྲུབ་ཡང་དག་རྫོགས་པའི་སངས་རྒྱས་ལ། །ཆོས་ཉན་ཅིང་དུས་མཐའི་སྐད་ཅིག་དུས་ཀྱིས་བསླབ་པའི་མཐའ་བཅུ་ཀུན་རྫོགས་ནས། །ཐ་མའི་ལྷུན་གྲུབ་ཀྱི་རྒྱུད་ལ་ཡོད་པའི་བག་ལ་ཉལ་བའི་སྒྲིབ་པ་དག །རྡོ་རྗེ་ལྟ་བུའི་བཅོམ་ལྡན་འདས་སུ་སངས་རྒྱས་པར་གྱུར་པ་ཡིན། །ལྷུན་གྲུབ་རིག་འཛིན་དེའི་ཚེ་དེ་སྒྲིབ་པའི་ཆ་ཕྲ་མོ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །གདུལ་བྱའི་ཡུལ་ཞིང་ཁམས་ཐུག་པ་མེད་པ་དག་ཏུ། འདུལ་བྱ་འདུལ་བའི་ཕྱིར་སྤྲུལ་སྐུའི་མཛད་པའང་སྣ་ཚོགས་སུ་སྟོན་ཏེ། སྲིད་གསུམ་གྱིས་བསྡུས་པའི་འགྲོ་བ་བསམ་ཡས་སུ། །ཐུགས་རྗེས་སྟོན་པ་བསམ་གྱི་མི་ཁྱབ་པས། གདུལ་བྱའི་དོན་དང་མཐུན་པ་འབའ་ཞིག་སྟོན། །གདུལ་བྱ་དྲག་པོ་ལ་གནས་སྐབས་བློ་དང་མི་མཐུན་པ་དྲག་པོས་ཚར་བཅད་པ་ལ་སོགས་པའི་སྒོ་ནས་ཐུགས་རྗེ་ཞགས་པས་འཁོར་བའི་རྒྱུན་ལམ་གཅོད། །ལ་ལར་ཡུམ་སྒྱུ་མའི་ལྷུམས་སུ་ཞུགས་པ་དང་བལྟམས་པ་དང་། །ལ་ལར་རབ་ཏུ་བྱུང་བ་དང་བཀའ་ཐུབ་མཛད་པ་དང་། ལ་ལར་ཁབ་དང་རྒྱལ་སྲིད་དང་། །བདུད་བཏུལ་བ་དང་སངས་རྒྱ་བ་དང་ཆོས་སྟོན་མྱ་ངན་ལས་འདས་པ་སོགས་སྟོན་པའོ། །གནས་རེས་འགའ་ཞི་བས་འདུལ་བ་ལ་ཞི་བ་སྟོན་ལ་རེས་འགའ་དྲག་པོས་འདུལ་བ་ལ་དྲག་པོ་དང་། འདོད་ཆགས་ཅན་གཡེམ་པ་ལ་གཡེམ་པར་སྟོན་ཞིང་སྡང་ཅན་ལ་སྡང་བ་དང་། དྲེགས་པས་ང་རྒྱལ་བ་ལ་རིགས་ལྟར་ང་རྒྱལ་བ་དང་མུན་པ་གཏི་མུག་ཅན་ལ་མུན་པ་དང་། ཕྲག་དོག་རླུང་ལྟར་གཡོ་བ་ལའང་ཕྲག་དོག་ལྟར་དང་དེ་བཞིན་དུ་རང་དང་མཐུན་མི་མཐུན་པ་སྣ་ཚོགས་ཀྱིས་དོན་བྱེད་པ་དང་། རྒྱ་མཚོ་ལྟ་བུ་བསམ་གྱིས་མི་ཁྱབ་པའི་དོན་ཐབས་དང་སྤྱོད་པ་དང་། །ཕྲིན་ལས་ཞི་རྒྱས་དབང་དྲག་དེ་བཞིན་གང་ལ་གང་འདུལ་གྱི་མཛད་པ་ཡིས་འགྲོ་བ་སྒྲོལ། །ལྷ་གནས་གསུམ་དུ་གསང་བའི་ཏན་ཏྲ་རྒྱུད་སྡེ་རྣམ་མངོན་དུ་སྟོན་པ་དང་། །དེ་བཞིན་གསང་བའི་ཆོས་ཀྱི་བསྡུ་བའང་མཛད་པ་དང་། །ངན་སོང་གསུམ་ལ་སོགས་པ་དམན་པས་དོན་བྱེད་པ་དང་ལུས་དང་བསོད་ནམས་ལྡན་གནས་སུ། །སྣ་ཚོགས་པའི་ལུས་ཅན་དང་རིས་ཅན་རྣམས་ལ་སྣ་ཚོགས་པའི་ལུས་དང་རིགས་སུ་སྤྲུལ་ནས་སྣ་ཚོགས་པའི་ཆོས་ཀྱི་འཁོར་ལོ་བསྐོར། །མངོན་ཤེས་དྲུག་ལྡན་མཚན་བཟང་སོགས་སྔ་མ་ལས་ཁྱད་པར་དཔག །ཀུན་མཁྱེན་ཡེ་ཤེས་མངའ་བའི་ཕྱིར། །མངོན་ཤེས་ཀྱི་ཡུལ་དང་མཁྱེན་པ་ལ་ཚད་མེད་རྒྱལ་བ་ཉིད་དང་མཚུངས་སོ། །དེ་ཡང་ཇི་ལྟར་མཁྱེན་ཚུལ་གསལ་ལ་རྟོག་པ་མེད་པ་མེ་ལོང་ལྟ་བུའི་ཚུལ་མཁྱེན་ནོ། །བག་ལ་ཉལ་གྱི་སྒྲིབ་པ་མི་མཐུན་མཚན་མ་གཞོམ་པའི་ཕྱིར། །གཉེན་པོ་འཇིགས་འདྲལ་མེད་པ་རྡོ་རྗེའི་ལྟ་བུའི་ཏིང་ངེ་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །དབྱེར་མེད་རྡོ་རྗེའི་ཆོས་ཀྱི་དབྱིངས་སུ་ཐིམ་པར་བྱེད། །བདག་མེད་རང་རིག་གཉིས་སུ་མེད་པའི་ཡེ་ཤེས་ཀྱིས། །དངོས་པོར་འཛིན་པ་དང་དངོས་མིན་པ་བག་ཆགས་ཕྲ་ཞིང་ཕྲ་བ་བསྲེགས། །རང་དང་སྤྱི་ཡི་ཆོས་རྣམས་དང་། །སེམས་ཀྱི་འཛིན་པ་ཕྲ་རྟོག་བག་ཉལ་ཐམས་ཅད་ཀུན། །དངོས་པོར་མེད་པར་རང་བྱུང་ཡེ་ཤེས་སུ་རྟོགས་པར་བྱས་ནས། །ཕར་སྒྲིབ་པ་འཇོམས་ནས་ཚུར་གཉེན་པོ་གང་གིས་ཀྱང་མི་ཚུགས་པ་དཔའ་བར་འགྲོ་བའི་རྣལ་འབྱོར་དང་། །འདུས་མ་བྱས་ཀྱི་རྡོ་རྗེ་ཡེ་ཤེས་མཐར་ཐུག་པའི་རྩེ་མོ་མཆོག་ཐོབ་པས། །ཐེག་པ་དམན་དང་ལམ་འོག་མ་རྣམས་ཀྱི་ཡིད་ཚོད་ཙམ་མིན་པར་སྒྲིབ་པ་བཅོམ་པ་དང་བདུད་ཀྱི་སྡེ་རྣམས་བཅོམ་ནས་བཏུལ་ཞིང་། ལོག་ལྟ་ཐམས་ཅད་ཚར་བཅད་པས་དཔའ་བོ་ཞེས་བྱ་དེ་རྗེས་ལ། །འབྲས་བུ་མི་ཟད་པའི་རྒྱན་སྐུ་གསུང་ཐུགས་གྱི་འཁོར་ལོ་མ་དྷ་ལ་འཁོར་ལོ་ཚོགས་ཆེན་ཀྱི། དགོངས་པ་བསམ་ཡས་ལྷུན་རྫོགས་ཀུན་མཁྱེན་ལྟ་བ་ལ་མཉམ་པར་འཇོག་སྟེ་ཐོབ་པོ། །ལྷུན་གྱི་གྲུབ་པའི་མཉམ་བཞག་ཆེན་པོའི་ངང་ལས་མ་གཡོས་པར་རང་རིག་པའི་ཡེ་ཤེས་ཀྱི་ཀུན་ལ་དབང་བསྐུར་ཞིང་། །དོན་དུ་གཉེར་བའི་སྨོན་ལམ་དང་ཤེས་རབ་ཀྱི་མཐུས། །འབྲས་བུའི་ཆོས་ཉི་ཤུ་རྩ་ལྔ་གཞན་ལས་མིན་ཏེ་རང་ལས་ཐོབ་པའོ། །སྐུ་དང་གསུང་དང་ཐུགས་དང་ཡོན་ཏན་དང་། །ཕྲིན་ལས་ལ་སོགས་པ་རྨད་དུ་བྱུང་བའི་འབྲས་བུ་ཀུན་ཏུ་གྲགས་པ་སྟེ། སེམས་ལས་གཞན་ནས་ཡོད་པ་ཞིག་འདིར་འོང་མ་ཡིན་ཏེ། །རང་བྱུང་ཡེ་ཤེས་གནས་བྱ་གནས་བྱེད་མེད་པ་ཉིད་རང་སྣང་བ་ཡིན། །དེ་བས་ངོ་མཚར་རྨད་དུ་བྱུང་བའི་ཆོ་འཕྲུལ་འབྲས་བུའི་ཆོས་རྣམས། གཞན་ནས་ཡོད་པ་ཐོབ་པ་ལྟ་བུ་མ་ཡིན་པའི་ཕྱིར། །ཐབས་ཁྱད་པར་ཅན་ལ་བརྟེན་པའི་ཤེས་རབ་གསུམ་ཉིད་ཀྱི། འབྲས་བུ་གོང་གི་དེ་ལྟ་བུ་ཡི་ངང་དུ་སྣང་། །དེ་ཡང་དཔེར་ན་མུན་སྣང་བར་འགྱུར་བ་དང་རྩི་མ་ཀི་ཏས་དུག་སྨན་དུ་བསྒྱུར་བ་ལྟར། གནས་ལུགས་ཇི་བཞིན་པ་ཉིད་མངོན་དུ་གྱུར་པས་འཁོར་བ་མ་སྤངས་པས་འབྲས་བུ་དེ་ཉིད་མངོན་དུ་འགྱུར་བའོ། །དེས་ན་འཁོར་བ་མ་སྤངས་པར་རང་གྲོལ་བས་རྣམ་པར་དག །འཁོར་བ་མ་གྲུབ་པས་མྱ་ངན་འདས་རྒྱུ་མེད་དེ་མི་འདའ་ཡེ་ནས་རང་དེ་ལྟར་གནས་པ་ཉིད་མངོན་དུ་གྱུར། དེ་ལ་འགྲོ་བ་དང་གནས་པར་བྱ་བ་མིན། །རྟོགས་པ་ཐམས་ཅད་ཡེ་ཤེས་ཆེན་པོའི་ཚོགས་སུ་མངོན་དུ་ཤར་བའོ། །ཆོས་ཀུན་དེ་བཞིན་ཉིད་དུ་གཅིག་པ་མཉམ་དང་ཕྱོགས་སུ་འཛིན་པའི་མི་མཉམ་ཆོས་ཀུན་བཟང་ངན་བླང་དོར་མེད་པར་རྟོགས་པས་མཉམ་དང་དེ་ཉིད་སྒྲིབ་གཡོགས་མེད་པར་མངོན་དུ་གྱུར་པས་མཉམ། །དེ་བཞིན་ཉིད་དུ་བདག་གཞན་གྱི་དོན་བྱ་བ་དང་ཡུལ་དང་ཡུལ་ཅན་དུ་མི་བྱ་རྩོལ་བའི་བྱ་བ་མེད་མ་རྩལ་ལྷུན་གྱིས་གྲུབ་ལས་བྱས་པའོ། །འབྲས་བུ་ཡེ་ནས་ཡོད་པས་གྲུབ་དང་ཕྱོགས་རིས་སུ་ཡོད་པས་མི་འགྲུབ་འབྲས་བུ་རང་གནས་མངོན་སུམ་དུ་གྱུར་པས་ཐམས་ཅད་གྲུབ་པའོ། །དེ་ཕྱིར་རིག་འཛིན་གྱི་ཐ་སྙད་བྲལ་ཏེ་སངས་རྒྱས་པའོ། །མཐར་ཕྱིན་པའི་ལམ་རྣམས་བསྟན་པའི་ལེའུ་སྟེ་བརྒྱད་པའོ།། ༈ །།རང་བཞིན་སྐུ་དང་ཡེ་ཤེས་རང་གནས་ཉིད་དུ་ཇི་ལྟ་བ་བཞིན་མངོན་སུམ་དུ་རྫོགས་པར་བྱས་པའི། །དབྱེར་མེད་རྡོ་རྗེ་འཛིན་པ་ཉིད་ལ་མོས་ཤིང་འདུད། སྲིད་པ་གྱི་ས་ལ་མངལ་སྐྱེས་ཀྱི་ཚུལ་རིམ་དང་རྫོགས་པ་བརྫུས་སྐྱེས་ཀྱི་ཚུལ་ཇི་ལྟ་བ་སྟེ་རིམ་དང་ཅིག་ཆར་གྱིས། །ལམ་གྱི་མངོན་དུ་བྱེད་པ་དོན་ཡོད་པར་བྱ་བའི་ཕྱིར་མཐར་ཕྱིན་པའི་འབྲས་བུ་སངས་རྒྱས་ཀྱི་དགོངས་པ་བཤད་པར་བྱའོ། །མཐར་ཕྱིན་འབྲས་བུ་མཚན་ཉིད་ནི་རིག་འཛིན་ཐ་མའི་གནས་སྐབས་ཀྱི་འབྲས་བུ་ཐ་མ་ནི་སངས་རྒྱས། འབྲས་བུའི་ངོ་བོ་དང་དགོངས་པ་བཞུགས་ཚུལ་དང་འབྲས་བུ་གོང་འོག་གི་ཁྱད་པར་གསུམ་གྱི། །ལུས་རྣམ་བཞག་གསུམ་རང་བཞིན་གྱི་མངོན་སུམ་དུ་འབྲས་བུའི་རྣམ་བཞག་སྣང་བ་རྣམས། །གནས་ལུགས་ཇི་ལྟ་བ་བཞིན་ཤེས་པར་བྱའོ། །ལུས་གསུམ་སྔ་མ་འབྲས་བུའི་ངོ་བོ་བརྗོད་པར་བྱ་བ་ནི། སྐུ་དང་གསུང་དང་ཐུགས་ཉིད་དང་། །ཡོན་ཏན་དང་ཕྲིན་ལས་ལྔ་ངོ་མཚར་རྨད་དུ་བྱུང་བ། །དེ་ལྔ་རེ་རེ་ལའང་ལྔ་ཉིད་དུ་ཕྱེ་བས་འབྲས་བུའི་ངོ་བོར་ཉེར་ལྔ་གནས་སོ། །ཨེ་མའོ་ཞེས་པ་ནི་གཞན་ནས་ཡོད་འོང་མ་ཡིན་ཏེ་འབྲས་བུ་རང་གནས་མངོན་དུ་གྱུར་པ་ལ་ངོ་མཚར་ཞིང་མངོན་དུ་གྱུར་པའོ། །ཡང་དག་པའི་དོན་ཤེས་བྱའི་གནས་ལུགས་ཇི་བཞིན་མངོན་དུ་གྱུར་པ་རྫོགས་ལ་ཞེན་མཐའ་མ་ལུས་པར་གྲོལ་བས་སྐུ་ལྔ་ལྷུན་གྱིས་གྲུབ་པ་ལ་སོགས་ཏེ་ཡོན་ཏན་མ་ལུས་པར་རྫོགས་པས་སངས་རྒྱས་པའོ། །དེ་ལ་རྒྱལ་བའི་ནི་འཁོར་བའི་གཡུལ་ལས་རྒྱལ་བ་སྟེ་བཅུ་གཅིག་ཀུན་ཏུ་འོད་ཀྱི་སངས་རྒྱས་དང་ཡོ་ག་རིགས་ལྔའི་སངས་རྒྱས་ཏེ་འོག་མའི་རྒྱལ་བ་རྣམས་སོ། །རྒྱལ་བ་ནི་འཁོར་བའི་གཡུལ་ལས་ཀྱང་རྒྱལ་བ་སོགས་མའི་རྒྱལ་བ་ཕྱོགས་འཛིན་ཅན་ལས་ཀྱང་རྒྱལ་བ་སྟེ་འཁོར་འདས་གཉིས་ཀྱི་མཐའ་ལས་རྒྱལ་བས་སྐུ་ལྔ་ལྷུན་གྱིས་འགྲུབ་པའི་སངས་རྒྱས་སོ། །ལྷའི་ནི་རྒྱུད་རང་བཞིན་གྱིས་ཞི་ཞིང་བདག་གཞན་གྱི་དཔལ་དུ་གྱུར་པ་ཡིན་ཏེ། ཡོན་ཏན་ཕྱོགས་རེ་རྫོགས་པ་ཐུན་མོང་གི་ཐེག་པ་ཡོ་ག་མན་ཆད་ཀྱི། ལྷ། །ནི་དགོངས་པ་ཕྱོགས་བྲལ་ཞི་བ་ཆེན་པོའི་ངང་ལས་བདག་གཞན་གྱི་དཔལ་དུ་གྱུར་ཏེ་ཡོན་ཏན་ཕྱོགས་མེད་རྫོགས་པས་མ་ཧཱ་ལྷ་སྟེ་སངས་རྒྱས་སོ། །འཕགས་པའི་ནི་འཁོར་བའི་སྡུག་བསྔལ་ལས་ཀྱང་ཆེས་འཕགས་ཤིང་གྲོལ་ལ། རྣམ་བྱང་མྱ་ངན་ལས་འདས་པའི་འབྲས་བུ་ཐོབ་ལ་ཡོ་ག་མན་ཆད་ཀྱི་སངས་རྒྱས་ཡིན་པ་འཕགས་སོ། །འཕགས་པ་ས་ནི་འཁོར་བའི་སྡུག་བསྔལ་ལས་ཀྱང་ཆེས་འཕགས་པ་ཐེག་པ་འོག་མའི་ཕྱོགས་འཛིན་གྱི་སངས་རྒྱས་ལས་ཀྱང་ཆེས་འཕགས་འདིར་དགོངས་པ་མཉམ་ཉིད་དུ་རྫོགས་པའི་དཔལ་ལོ། །ཀུན་ཏུ་བཟང་པོའོ། །དེ་བཞིན་གཤེགས་པ་ནི་གནས་ལུགས་དེ་བཞིན་ཉིད་རྟོགས་པ་ཡིན་དབུ་མ་དུ་སྟོང་པ་ཉིད། ཀྲི་ཡ་བ་བདེན་པ་གཉིས་ལས་དོན་དམ་དབྱིངས་ཡེ་ཤེས་གཉིས་སུ་མེད་པ་དང་། ཀུན་རྫོབ་ལྷ་དང་ལྷ་མོའི་དལ་དུ་རྟོགས་ནས། དེ་བཞིན་དུ་གཤེགས་ཏེ་དགོངས་པ་ཕྱོགས་བྲལ་བདེ་བ་ཆེན་པོའི་སངས་རྒྱས་རྣམས་སོ། །ལས་དེ་བཞིན་གཤེགས་པ་ནི་འཁོར་འདས་གཉིས་སུ་མེད་ཅིང་བདེན་པ་དབྱེར་མེད་སྤྱོད་ཡུལ་དང་བྲལ་བར་རྟོགས་པ་ནི་དེ་བཞིན་ཉིད་དུ་འགྲོ་འོང་མེད་པར་གཤེགས་པ་མ་ཧཱ་མ་ཆགས་པདྨ་སྤྱན་གྱིས་སངས་རྒྱས་སོ། །བདེར་ནི་སྡུག་བསྔལ་གྱི་ཟུག་རྔུ་མེད་པས་བདེ་བ་སྤོང་འགེག་སྦྱང་བསྒྱུར་གྱི་སྒོ་ནས་ཟུག་རྔུ་བྲལ་ཏེ་ངང་གི་འབྲས་བུ་བདེ་བ་ཐོབ་ཅིང་གཤེགས་པ་འོག་མ་མན་ཆད་ཀྱི་གཤེགས་པ་རྣམས་སོ། །གཤེགས་ལས་ཀྱང་ནི་ཉོན་མོངས་ཤེས་བྱའི་སྒྲིབ་པ་ལ་སོགས་ཏེ་ཞེན་མཐའ་མ་ལུས་པ་ལས་གྲོལ་ནས་བདེ་བ་ཆེན་པོའི་ངང་དུ་གཤེགས་ཏེ་དགོངས་པ་ཕྱོགས་བྲལ་བདེ་བ་ཆེན་པོའི་ངང་ལས། འགྲོ་འོང་གསལ་འགྲིབ་མེད་པར་བཞུགས་པས་མ་ཧཱའི་བདེ་བར་གཤེགས་སོ། །བདེར་གཤེགས་པ། །རིན་ཆེན་ནོར་བུ་ལ་ཡོན་ཏན་ལྷུན་གྲུབ་ཏུ་ཡོད་པ་བཞིན་ཏུ་འདིར་མ་ཧཱ་སྐུ་ལྔ་ལྷུན་གྱིས་གྲུབ་པའི་བྷུདྡྷ་ལ་ཡོན་ཏན་ཐམས་ཅད་ལྷུན་གྲུབ་ཏུ་ཡོད་པ་བཞུགས། །ཆོས་དྲུག་ལྡན་ཏེ་དགོངས་པ་ཚང་བ། རེ་བ་སྐོང་བ། ཟད་མི་ཤེས་པ། རྒྱུན་མི་ཆད་པ། རྟོག་པ་མེད་པ། བདེ་བ་ལ་དགོད་པའོ། །ནོར་བུའི་དཔེ་ཡིན་ཏེ། དེ་བཞིན་དུ་འདིར་ཡང་ཡོན་ཏན་མ་ལུས་པ་རྫོགས་པས་ཚང་བ་གདུལ་བྱའི་རེ་བ་སྐོང་བ། རྒྱུན་མི་ཆད་པ། མི་ཟད་པ། བདག་གཞན་དུ་རྟོག་པ་མེད་པ་བདེ་བ་ལ་དགོད་པའོ། །དེ་ལྟར་ཆོས་དྲུག་ནོར་བུའི་དཔེས་མཚོན་པ་ནི་འབྲས་བུ་ཆོས་ཉི་ཤུ་རྩ་ལྔ་རྫོགས་པའོ། །མཚོན་པ་ནི། །འབྲས་ཆོས་དུ་མར་སྣང་བས་གཅིག་དང་ཡོངས་རྫོགས་ངེས་ནས་མཐའ་དུ་མ་ཀུན་དང་བྲལ་བའོ། །དེ་ནས་གཅིག་དུ་མ་གཉིས་ཀའི་བདག་ཉིད་ཡིན་པས་ལྡན་ཆོས་ཀུན་རང་བྱུང་ཡེ་ཤེས་ལས་གཡོས་པ་མེད་དོ། །རྒྱལ་བའི་རྒྱལ་བའང་ཐམས་ཅད་ཀྱི་ངོ་བོར་གནས་པས་དེ་ཉིད་ཡི་རིགས་ཀུན་གྱི་དངོས་ཡིན་པས་རིགས་ཕྱོགས་གཅིག་ཏུ་མ་གྲུབ་པས་བྲལ་བ་སྟེ། འབྲས་བུའི་ཆོས་ཉི་ཤུ་རྩ་ལྔར་ལྡན་པས་རིགས་ཀུན་གྱི་ངོ་བོ་ཡིན་ལ། དེ་ཉིད་གདུལ་བྱའི་མོས་པ་བཞིན་དུ་དེའི་རིགས་ལྔ་གདུལ་བྱ་དང་མཐུན་པར་སྣང་བ་ལ། །ཡང་དག་ཉིད་དུ་ནི་རིགས་འདི་ཁོ་ནའོ། །ཞེས་ཕྱོགས་གཅིག་ཏུ་ངེས་པ་མེད། །རིགས་ལྔ་ཉིད་རེ་རེའང་རིགས་ལྔ་ལྔར་ལྡན་ཅིང་ཉེར་ལྔར་སྣང་བས། །རིགས་ཐམས་ཅད་ཀྱི་བདག་པོ་ཞེས་བྱ་ཡང་དག་པར་རྫོགས་པའི་སངས་རྒྱས་པ་ནི། ཐ་མའི་ཡང་ཐ་མ་བག་ལ་ཉལ་གྱི་དྲི་མ་ཞེན་པ་ཕྲ་མོ་བྲལ་བའི་ཕྱིར་སངས་བ་ཞེས་བྱ། མཁྱེན་པའི་ཡེ་ཤེས་འགྲོ་འོང་མེད་པར་ཕྱོགས་མེད་ཀུན་ཏུ་ཁྱབ་པས་རྒྱས་པ་ཞེས་བྱ། གནས་ལུགས་གཉིས་སུ་མེད་པ་དེ་བཞིན་ཉིད་ཀྱི། མཉམ་པའི་ངང་ཉིད་དུ་དགོངས་པ་འགྲོ་འོང་མེད་པར་གཤེགས་པ་ཆོས་སྐུ། པས་དེ་བཞིན་གཤེགས་པ་ཞེས་བྱའོ། །དེ་བཞིན་དུ་ཡེ་ཤེས་རང་གནས་ཀྱི་དགོངས་པ་བདེ་ཆེན་ངང་ཉིད་དུ། །སྤྲོས་པའི་ཟུང་ངུ་ལས་དང་ཉོན་མོངས་པ་དང་ཤེས་བྱའི་སྒྲིབ་པ་ལ་སོགས་པ། ཀུན་བྲལ་བདག་གཞན་གཉིས་ཀྱི་དོན་གྱི་ཕྱིར་གཤེགས་པས་བདེ་བར་གཤེག་པ་ཞེས་བྱའོ། །སངས་རྒྱས་དང་སེམས་ཅན་ཐམས་ཅད་གཉིས་སུ་མེད་པར་སེམས་ལ་འདུས་ཤིང་སོན་པས་འཁོར་འདས་ཐམས་ཅད་ལ་དབང་བསྒྱུར་བས། དབང་ཕྱུག་ཆེན་པོའི་ཐབས་ཤེས་རབ་དབྱེར་མེད་དང་འཁོར་འདས་དབྱེར་མེད་ལོངས་སྤྱོད་སྐུར་བཞུགས་པས་དབང་ཕྱུག་ཆེན་པོ་ཞེས་ཀྱང་བྱ། ཡབ་ཡུམ་གསང་བའི་དབང་པོ་ཐབས་ཤེས་རབ་དབྱེར་མེད་འདུ་འབྲལ་མེད་པས་གསང་བའི་སྐུ་ཞེས་བྱ། དངོས་པོ་འཁོར་འདས་གཉིས་ཀྱིས་བསྡུས་པ་ཐམས་ཅད་ལ་བདེ་ལོངས་སྤྱོད་པས་ལོངས་སྤྱོད་པའི་སྐུ་ཞེས་བྱའོ། །སྐུ་དེ་ཉིད་ཆ་རེ་བརྗོད་པ་ནི། །འཇིག་རྟེན་འདས་པ་སངས་རྒྱས་དང་མ་འདས་པ་འཁོར་བ་ཀུན་གྱིས་བསྡུས་པའི། དུས་གསུམ་ཆོས་ཀུན་ཆོས་ཉིད་དེ་བཞིན་ཉིད་དུ་གཅིག་པ་ངོ་བོ་རང་བྱུང་གི་ཡེ་ཤེས་མཐའ་ཡས་པ་ཡི། །རྒྱལ་བ་ཉིད་ཡིན་པའི་ཕྱིར་འཁོར་འདས་སྣ་ཚོགས་པའི་ཆོས་ཀུན། སྣང་ལ་རང་བཞིན་མེད་པའི་རྣམ་པ་མཆོག་ལྡན་གྱི་སྟོང་པ་ཆེན་པོ་ཡིན་ཕྱིར། །རྟོགས་པ་མངོན་དུ་གྱུར་པ་དེ་ཉིད་དྷརྨཱ་ནི་ཆོས་ཀ་ཡར་སྐུ་སྟེ་སྣང་སྟོང་གཉིས་སུ་མེད་པའི་ཆོས་སྐུར་གནས་པའོ། །འཁོར་འདས་གཉིས་ཀྱི་བསྡུས་པའི་ཆོས་ཐམས་ཅད་རང་རིག་པའི་མངོན་སུམ་དུ་སྣང་བས་མངོན་ཞེས་བྱ། ཕྱོགས་འཛིན་གྱི་ཞེན་མཐའ་ཀུན་ཀུན་དང་བྲལ་བས་ཀྱང་འཁོར་འདས་ཀྱི་ཆོས་ཀུན་འདུས་ཤིང་ཀུན་ཆུབ་པའི་པས་ན་ཆུབ། བསྒྲིབ་གཡོག་མེད་པར་རང་གསལ་བའི་རང་བྱུང་ཡེ་ཤེས་ཆེན་པོ་ཉིད། །འཁོར་འདས་ཀུན་གྱི་ངོ་བོ་གཞི་བྱེད་ཅིང་གདུལ་བྱ་གང་ལྟར་འདུལ་བ་ལྟར་སྣང་བའི་ཕྱིར་སྐུའི་མཆོག་ཡིན་ནོ། །འདོད་ཁམས་ཀྱི་གནས་མཐའ་མ་དམྱལ་བ་ནས་རྫོགས་པའི་སངས་རྒྱས་ཀྱི་བར། །ངན་སོང་གསུམ་གྱི་སྡུག་བསྔལ་ཀུན་དང་འདོད་ཁམས་ལྷ་མི་དང་བསམ་གཏན་བཞི་དང་གཟུགས་མེད་པའི་སྙོམས་འཇུག་བཞི། ཉན་ཐོས་འགོག་སྙོམས་འཇུག་དང་རང་རྒྱལ་གྱི་ཞི་བ་ཕྱོགས་གཅིག་པ་བྱང་སེམས་ཀྱི་བཏང་སྙོམས་གསང་སྔགས་ཀྱི་བདེ་ཆེན་སོགས། །འཁོར་འདས་ཀྱི་ཆོས་ཐམས་ཅད་ཡུལ་དང་ཡུལ་ཅན་གྱི་རྟོག་པ་མེད་པར་ཀུན་ལ་རོལ་ཅིང་ལོངས་སྤྱོད་ཆེ་བས་ལོངས་སྤྱོད་རྫོགས་པའི་སྐུའོ། །རྟ་བདུན་ནི་ཉི་མ་སྟེ་སྔོན་གླིང་བཞི་ལ་མངའ་མཛད་པའི་འཁོར་ལོས་སྒྱུར་བའི་ཤིང་རྟའི་བང་འགྲོས་བདུན་དང་མཉམ་པས་རྟ་བདུན་ཞེས་བྱའོ། །ཡང་ན་རླུང་གི་རྟ་བདུན་གྱིས་འདེགས་པས་བསྐྱོད་པར་བྱེད་པས་ཀྱང་རྟ་བདུན་ཞེས་བྱའོ། །རི་བང་ཅན་ནི་ཟླ་བ་སྟེ་བྱང་ཆུབ་སེམས་དཔའི་རི་བོང་ཉིད་ཀྱི་གཟུགས་ལྷའི་དབང་པོས་ཟླ་བ་ལ་བྲིས་ནས་ཡོད་པས་རི་བོང་ཅན་ཞེས་བྱ་ཉིད་ཀྱིས། །གཞལ་ཡས་ཁང་ལས་མ་གཡོས་བཞིན། །ཆུ་དང་ཀུན་ཏུ་ཉི་ཟླའི་གཟུགས་བསྙན་ཐ་དད་སྣང་བ་ལྟར། །སྐུའི་ངོ་བོ་དགོངས་པ་ལ་འགྲོ་འོང་མེད་པར་གདུལ་བྱ་འདུལ་བའི་ཕྱོགས་མེད་ཀུན་ཏུ་སྤྲུལ་ནས་མཛད་པ་སྤྲུལ་སྐུ་མཆོག་ཡིན་ནོ། །དཔེར་ན་ཇི་ལྟར་ནམ་མཁའ་ལ་སྐྱེ་འཇིག་མེད་པ་ལྟར། །སྤྲུལ་སྐུ་ཅིར་ཡང་འགྱུ་ཞིང་ཅིར་ཡང་སྣང་བས་མི་རྟག་ཀུན་དངོས་ལྟར་སྣང་ཡང་རྟག་པ་ཆེན་པོ་ངོ་བོ་ལ་དེ་བཞིན་ཉིད་དུ་གཞན་དུ་འགྱུར་བ་མེད་པ། གཉིས་མེད་རྡོ་རྗེའི་སྐུ་མཆོག་སྐྱེ་འཇིག་མེད་པ་ལ། རྡོ་རྗེའི་སྐུ་ལྔ་པ་དབྱེར་མེད་རྡོ་རྗེའི་སྐུ་ཉིད་དུ་རབ་ཏུ་གྲགས། །སྐུ་ལྔས་སོ་སོར་འདུལ་བ་ལ་ཆོས་སྐུའི་འཁོར་ཡེ་ཤེས་ཀྱི་འཁོར་སྟེ་ངོ་བོ་མངོན་པར་བྱང་ཆུབ་པའི་སྐུའི་འཁོར་རྒྱལ་བ་རྒྱ་མཚོའི་ཚོགས་དང་ལོངས་སྐུའི་སྨིན་པ་རྒྱ་མཚོའི་འཁོར་ཤེས་བྱ་ཡི། །སྒྲིབ་པ་མཐའ་མ་ཤེས་སྒྲིབ་སྤོང་བའི་སེམས་དཔའ་ཆེའི་སྟེ་ལོངས་སྤྱོད་རྫོགས་པའི་འཁོར་སྨིན་པ་རྒྱ་མཚོ་དང་ས་བཅུའི་བྱང་ཆུབ་སེམས་དཔའམ། དེ་རྣམས་སྟོན་པའི་ཞལ་མཐོང་། གསུང་ཐོས་དགོངས་པ་ལོངས་སྤྱོད་ཕྱིར་འཁོར་ཞིང་མིང་མ་གྲུབ་པའོ། །མངོན་པར་བྱང་ཆུབ་པའི་འཁོར། རྒྱལ་པོ་ལྔ་སོགས་རྒྱུད་སྤྱངས་ནས་ནི་གསང་སྙིང་ལས། དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཚོར་བའི་དང་། འདུ་ཤེས་ཀྱི་དང་། འདུ་བྱེད་ཀྱི་རྒྱལ་པོ་ལྔའོ། །དེ་ལའང་ལས་སྦྱོང་གྱི་སེམས་དཔའ་ཆེན་པོ་ནི་བསྒོམ་ལམ་ཕྱག་རྒྱ་ཆེན་པོའི་རིག་འཛིན་པའོ། །དེའང་རྒྱལ་པོ་ལྔ་ནི་བསྒོམ་ལམ་དང་མཐར་ལམ་དང་སངས་རྒྱས་ཀྱི་ས་སྟེ་ཁྱད་པར་རིམ་གྱིས་ཤེས་པར་བྱའོ། །སྤྲུལ་སྐུའི་འཁོར་རྒྱུའི་མོས་པས་སྤྱོད་པའི་འཁོར་དང་པོ་ཚེ་ལ་དབང་བསྒྱུར་བའི་རིག་འཛིན་དང་། མི་འགྱུར་རྡོ་རྗེའི་འཁོར་རྡོ་རྗེའི་ཚོགས་ལ་སོགས་པ་སྟོན་པའི་ཞལ་མཐོང་ཕྱིར་རྡོ་རྗེའི་འཁོར་གྱི་མིང་འགྲུབ་བོ། །འཁོར་ལྔ་པོ་དེ་ལ་དེའི་དགོངས་པ་གསུང་ལྔ་བཤད་པ་ནི་སྤྲུལ་སྐུས་ཚིག་ཏུ། བརྗོད་པ་དང་སྐུ་བཞིས་ཚིག་ཏུ་མ་གསུང་ཀྱང་ཚིག་ཏུ་བརྗོད་པ་དང་འདྲའི་བར་གོ་བར་བྱེད་པའི་ཕྱིར་དོན་ལ་ངེས་པ་ནི་གསུང་གི་ཚིག་དང་ལྡན་པས། ཡི་གེ་མེད་པར་འཇལ་བར་བྱེད་པ་རྒྱལ་བའི་སྐུ་བཞིའི་གསུང་བཞིའོ། །སྤྲུལ་སྐུའི་གསུང་ཡི་གེ་དྲུག་བཅུ་ནི་སྤྲུལ་སྐུའི་རྩ་བའི་གསུང་དབྱངས་ཏེ་དྲུག་བཅུའམ་དེ་ལ་ཡི་གེའི་གསུང་རྩ་བ་དྲུག་ནི་བྲིང་ངེ་བ་དང་། དུང་ངེ་བ་དང་། ཤ་ཏཱ་བ་དང་། གར་ཙ་བ་དང་། ཅང་ཀུ་དེའུ་དང་། པང་ཀང་དེའུའོ། །དེ་ལ་དྲུག་བཅུ་སྟེ་དེ་རེ་རེ་ལ་བཅུ་སྟེ་མདོ་ལས་གསུངས་པ་ཆེ་བ་དང་། ཡོངས་སུ་ཁྱབ་པ་དང་། གོ་བར་མྱུར་བ་དང་། ཐེ་ཚོམ་གཅོད་པ་དང་། ཅི་ལ་ཡང་སྙེལ་དང་། ཉེ་ཚེར་སྟོན་པ་དང་། ཀུན་ནས་འཇུག་པ་དང་། འདུན་པ་བསྐྱེད་པ་དང་། ཁྱད་པར་དུ་རླང་པ་དང་། ཐམས་ཅད་འདུ་བའོ། །དེ་ལྟར་གསུང་གི་ཡན་ལག་དྲུག་ཅུའི་དེ་ལ་སུམ་བརྒྱ་དྲུག་ཅུ་ནི། དེ་ལ་འགྲོ་བ་རིགས་དྲུག་གི་སྐད་དུ་རེ་རེ་ལ་ཡང་དྲུག་ཅུར་ཕྱེ་བས་སུམ་བརྒྱ་དྲུག་ཅུའོ། །དེ་ལྟར་གསུང་དབྱངས་དྲུག་ལ་བཅུ་རེ་ཕྱེ་བས་དྲུག་བཅུ་དང་དེ་ལ་དྲུག་ཅུ་རེ་ཕྱེ་བས་དྲུག་ཅུ་ཐམ་པ་དང་སུམ་བརྒྱས། །དོན་གོ་ཞིང་བརྡ་འཇལ་བ་བྱེད་པས་སྤྲུལ་སྐུའི་གསུང་དང་ལྔ་ཉིད་ཚུལ་དེ་གོ་བ། །འཁོར་ལྔ་སོ་སོ་ཉིད་དང་ཁྱད་པར་གསང་བདག་གིས་གསུང་ལྔ་གོ་བར་ནུས་པའི། གསུང་ལྔ་ལྷུན་གྲུབ་གྱི་སྙན་ཆ་ལྔ་དང་ལྡན་པའི་ཕྱིར་གསུང་ལྔ་ཐོས་པས་གསང་བདག་ཉིད་ཀྱིས། གསང་བའི་རྒྱུད་བཤད་པ་རྣམས་ཐོས་ཞེས་གསུངས་པའོ། །ཆོས་ཀུན་གཉིས་སུ་མེད་ཅིང་རང་བཞིན་གྱིས་འབྲེལ་པ་ཡོད་པ་དང་འཁོར་གྱི་སྒྲིབ་པ་དག་སྟེ་ཤེས་རབ་ཀྱི་དབང་པོ་དྭངས་བས་སོ། །དཔེར་ན་དྭངས་བའི་ཆུ་ལ་ཉི་ཟླའི་གཟུགས་བརྙན་བཞིན། །ཆོས་ཐམས་ཅད་མ་སྐྱེས་སྐྱེ་མེད་ཆོས་སྐུ་དོན་གྱི་གསུང་མཆོག་གིས། །ཚིག་ཏུ་སྨྲ་བརྗོད་མེད་པར་རྣམ་པར་སྣང་བར་མཛད་དོ། །མངོན་བྱང་བྱིན་རླབས་ཀྱི་གསུང་རང་རིག་པའི་ཡེ་ཤེས་ལ་མིང་ཡེ་ཤེས་ལྔ་པ་མཚོན་པ་གོང་གི་དེ་བཞིན་དུ་འཁོར་འདས་ཀྱི་ཤེས་རབ་དབང་པོ་དང་རང་བཞིན་གྱིས་འབྲེལ་བཡོད་པའི་བྱིན་རླབས་ཀྱིས། །ཤེས་བྱ་རང་བཞིན་གསང་བའི་སྙིང་པོའི་རྒྱུད་རྣམས་ལ། །ནམ་མཁའ་ལ་ཉི་མ་ཤར་བ་ལས་དྲོད་བྱུང་བ་ལྟ་བུར་འཁོར་གྱི་ངོ་ལ་གསལ་བར་སྣང་བའོ། །ལོངས་སྐུའི་དགོངས་པ་དཔེར་ན་མེ་ལོང་ལྟ་བུར་སྐྱོན་སེལ༡། ལེགས་པ་སྐྱེད༢། གསལ་བར་བྱེད༣། རྐྱེན་སྣང་བྱེ་བྲག་ཕྱེད༤། རྩོལ་བ་མེད༥། འདུ་བྱེད་པ༦། ལྡན་པ་མ་ཡིན༧། མི་ལྡན་པ་མ་ཡིན་༨པ་སྟེ། ཆོས་བརྒྱད་ཀྱིས། །མཚོན་པའི་དབང་ཕྱུག་ཆེན་པོ་ལོངས་སྤྱོད་རྫོགས་པའི་སྐུ་མདུན་དང་རྒྱབ་མེད་པས་ཞལ་ཕྱོགས་བཅུར་ཐལ་ལེ་བ་ཐུགས་མཉམ་པར་འཇོག་མི་འཇོག་མེད་པ་གསལ་འགྲིབ་མེད་པར་སྣང་དེ་འཁོར་གྱིས་མཐོང་བས་རང་གི་ལྷན་གཅིག་གནས་པའི་སྒྲིབ་པ་ངོས་ཟིན་པས་གྲོལ་བ། བྱང་ཆུབ་སེམས་དཔའ་སེམས་དཔའ་ཆེ་ཞེས་རིག་པ་འཛིན་པའི་གསང་སྔགས་ཀྱི་རྣལ་འབྱོར་པའི་རྒྱུད་སྨིན་པ་རྒྱ་མཚོ་ལ་རྡོ་རྗེ་ཐེག་པའི་དོན་སྣང་བར་བྱེད་དོ། །སྤྲུལ་པའི་སྐུས་འཁོར་བ་ལས་གྲོལ་ཐར་པའི་གནས་སུ་བགྲོད་པའི་ལམ་དང་ཆོས་སྟོན་པས་འཁོར་གྱི་སྒྲ་སྐད་གྲགས་པ་རྣམས་སྤྲུལ་སྐུ་གསུང་དབྱངས་དྲུག་གི་ཆོས་སྟོན་པ་དེ་རྩ་བ་ཚང་པའི་དབྱངས་ལ་ཡན་ལག་སུམ་བརྒྱ་དྲུག་ཅུའི་ཚུལ་གྱིས། ལྷ་ཚངས་པའི་ངག་ལྟར་གདུལ་བྱ་ལས་ཅན་ལ་མངོན་དུ། སྣང་བ་དེ་ཤ་ཡི་རྣ་བ་དང་ལྡན་པས་ཐོས་སོ། །རྡོ་རྗེའི་གསུང་གིས་གདུལ་བྱ་རྣམས་ཇི་ལྟར་འདུལ་བ་དང་འདུལ་བར་སྣང་བའི་འཁོར་ལ། རྡོ་རྗེའི་སྐུའི་གསུང་རྣམས་ནི་དཔེར་ན་བྲག་གི་ངོས་ལ་སྒྲས་རྐྱེན་པའི། །བྲག་ཆ་སྒྲ་ལྟར་དུ་གྲགས་པ་དང་སྟོང་པ་དབྱེར་མེད་པས། །འཁོར་གྱིས་མཐོང་བ་དང་ཐོས་པར་བྱེད་པའང་རྡོ་རྗེའི་སྐུ་དེ་ཉིད་ཀྱི་མཐུའོ། །ཐུགས་སྟོང་ཉིད་བདེ་བ་ཆེན་པོའི་ཡེ་ཤེས་ནི་དངོས་པོ་འཁོར་འདས་གཉིས་ཀྱིས་བསྡུས་པའི་ཆོས་རྩ་བ་དང་ཡན་ལག་ཕྲ་བ་དང་བཅས་པ། ཐམས་ཅད་སེམས་ཆེན་པོ་ཡིན་པའི་ཕྱིར་ན རྣམ་པ་མཆོག་ལྡན་གྱི་སྟོང་པ་ཆེན་པོའི། །ཡེ་ཤེས་དེ་ཉིད་སྤྲོས་པའི་ཟུག་རྔུ་གང་ཡང་མ་འགགས་པ་ལྡན་གོང་གི་མཐར་མ་ལྟུང་བ་བྲལ་བའི། །དགོངས་པ་བདེ་བ་ཆེན་པོ་མཆོག་གི་ཐུགས། །དཔེར་ན་ནམ་མཁའ་ལྟ་བུར་སེམས་ཡེ་ནས་གསལ་ཞིང་སྟོང་པས་སྟོང་པ་ཉིད་ཀྱི་ཡེ་ཤེས་སོ། །ཆོས་སྤྱི་དང་རང་གི་མཚན་ཉིད་ཐམས་ཅད་དབྱེར་མེད་པ་ཆོས་ཀུན་དེ་བཞིན་རྟོགས་པས། ཡུལ་དང་ཡུལ་ཅན་མེད་པར་མེ་ལོང་ལྟ་བུར་གསལ་བའི་ཕྱིར། རང་རིག་པའི་མངོན་སུམ་ནི་མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས་མེ་ལོང་ལྟ་བུའི་ཡེ་ཤེས་སོ། །དཔེར་ན་འབྱུང་བ་ཆེན་པོར་ལྔ་ལྟ་བུར་ཆོས་རྣམས་འཁོར་འདས་ཀྱི་ཆོས་ཐམས་ཅད་ལ། །བཟང་ངན་དུ་མི་འབྱེད་བླང་དོར་གཉིས་སུ་མེད་པར་མཉམ་ཉིད་མཁྱེན་ཞིང་། དགོངས་པ་ཆོས་ཉིད་མཉམ་པ་ཉིད་ལས་མི་གཡོ་བའི། མཉམ་པ་ཆེན་པོ་མཆོག་གི་ཐུགས་ཏེ་མཉམ་ཉིད་ཀྱི་ཡེ་ཤེས་སོ། །ཐུགས་རྗེ་ཆེན་པོས་ལས་དང་ཐུགས་རྗེའི་འབྲེལ་བ་དང་། །ཆོས་ཀུན་དེ་བཞིན་ཉིད་ཀྱི་དབྱིངས་ལས་མི་གཞན་པ་མཁྱེན་པའི་ཕྱིར། །ལམ་པ་ལྟར་དོན་བྱ་བ་དང་བྱེད་པ་དེ་གཉིས་སུ་མེད་པར་ཕྲིན་ལས་རྣམ་བཞི་ཡིས། །འགྲོ་བ་འཁོར་བ་ལས་སྒྲོལ་བའི་ཐུགས་རྗེ་ཆེན་པོ་ཡིན་པས་བྱ་བ་གྲུབ་པའི་ཡེ་ཤེས་སོ། །ཆོས་ཉིད་དང་ཆོས་ཅན་ལ་སོགས་ཕྱོགས་རིས་ཀུན་དང་བྲལ་བས། ཆོས་རང་དང་སྤྱིའི་མཚན་ཉིད་དབྱེར་མེད་པར་ཆོས་ཀུན་དུས་གཅིག་ཏུ། །དཔེར་ན་མཁའ་ལ་འཇའ་ཆེན་པོ་སྣང་བ་སོ་སོར་སྣང་ཡང་མ་འདྲེས་པ་ལྟར་སོ་སོར་གསལ་བ་ནི། །སོ་སོར་གསལ་ལ་དབྱེར་མི་ཕྱེད་པས་རྡོ་རྗེའི་ཐུགས་མཆོག་གོ་སོ་སོར་རྟོགས་པའི་ཡེ་ཤེས་སོ། །ཞིང་ཁམས་ཀྱི་ཡོན་ཏན་ཕྱོགས་བཅུ་དུས་བཞིས་བསྡུས་པའི་ཤེས་བྱའི་དལ་མ་ལུས་མི་ལུས་ལུས་པ་མེད་པ་རྣམས། རང་རྒྱུད་པ་མེད་པར་རིག་པ་རང་སྣང་བ། །སེམས་ཉིད་ཀྱི་ངོ་བོ་ཡིད་བཞིན་ནོར་བུ་ཡོན་ཏན་བསམ་གྱིས་མི་ཁྱབ་པའི་སྤྲིན་ཚོགས་ཀྱིས་བརྒྱན་པ། ཕྱོགས་བཅུ་མ་ལུས་པ་ཐམས་ཅད་སངས་རྒྱས་ཀྱི་ཞིང་ཁམས་ཡོན་ཏན་ནོ། །འབྲས་བུའི་ཆོས་གྱིས་ཆེ་བའི་ཡོན་ཏན་འབད་མེད་ལྷུན་རྫོགས་ཀུན་རིག་པ་རང་སྣང་བའི། །རྟེན་གཞལ་ཡས་ཁང་དང་གཟུང་བ་ཡུལ་དག་འཛིན་པ་སེམས་གཉིས་དང་། །བྲལ་བའི་རང་རིག་པ་ཉིད་མ་བརྟེན་པ་ལྷ་དང་། །རྟེན་ཅན་གཞལ་ཡས་ཁང་གཉིས་སུ་མེད་པ་ཉིད་རྒྱལ་བ་ཀུན་གྱི་གནས་ཡིན་ནོ། །ཆོས་ཀུན་མ་སྤངས་རང་རིག་པའི་ཡེ་ཤེས་སུ་ལྷུན་གྱིས་རྫོགས་པའི་ཕྱིར། །སྐུ་ལ་རཏྣ་སྣ་ཚོགས་ཀྱི་རྒྱན་གྱིས་བརྒྱན་པ་དང་དཀྱིལ་འཁོར་ཆེན་པོ་རྒྱན་རིན་པོ་ཆེ་སྣ་ཚོགས་ཀྱིས་བརྒྱན་པའོ། །རང་བཞིན་གྱིས་སེམས་ཉིད་མ་བསྒྲིབས་པར་ཡེ་ཤེས་རང་སྣང་གསལ་བའི་ཕྱིར་དེའི་རྟགས། ཁ་དོག་སྣ་ཚོགས་པ་ཡེ་ཤེས་ཀྱི་འོད་ཟེར་ཕྱོགས་བཅུར་རང་གསལ་བའོ། །གདན་ཁྲིའི་ཡོན་ཏན་སྟོབས་སོགས་འབྲས་བུ་ཀུན་རྫོགས་ཕྱིར། །གདན་སྟོབས་བཅུ་རྫོགས་པར་གླང་པོའི་ཁྲི་དང་དེ་བཞིན་དུ་སེང་གེ་མི་འཇིགས་དང་། རྨ་བྱ་དབང་བཅུ་རྟ་མཆོག་རྫུ་འཕྲུལ་གྱི་རྐང་པ་བཞི་ཕྲིན་ལས་བཞི་རྫོགས་པས་ཤང་ཤང་གི་ཁྲི། ལྔའི་བྱེ་བྲག་རང་སྣང་བའོ། །ཕྲིན་ལས་ལ་གདུལ་བྱའི་དོན་བྱ་བའི་ཕྱིར་ཕྲིན་ལས་ཐ་དད་པ་བསྡུ་ན་བཞི་སྟེ། མ་ཞི་བ་དང་ཁྲོ་བ་དང་མི་མོས་པ་དང་ཚེ་བསོད་ཉམས་པ་དང་། བཞིའི་ཕྱིར་འདུལ་ཐབས་ཞི་རྒྱས་དབང་དྲག་ཕྲིན་ལས་རྣམ་བཞིའི་རོལ་པ་རྣམས་གདུག་སེམས་ཞི་བ་མ་རུང་བ་བསྒྲལ་བ། མོས་ཤིང་དབང་དུ་བྱ་བ། ཚེ་བསོད་རྒྱས་པར་བྱའོ། །དེ་ལྟར་གང་ལ་འཚམས་པའི་མོས་པ་དང་མཐུན་པར་འདུལ་བར་མཛད་དོ། །ལས་རྣམ་པ་བཞིའི་བྱེ་བྲག་འདུལ་ཐབས་ཐ་དད་པ་ལ། ཕྲིན་ལས་རེ་རེའང་རིགས་ལྔ་ལྷུན་གྲུབ་ཀྱི་དང་། རྡོར་སེམས་དྲག །རྣམ་སྣང་ཞི། རིན་འབྱུང་རྒྱས། མཐའ་ཡས་དབང་ལྔ་ལྔ་ཚུལ་གྱིས་ཕྱེ་བས་གདུལ་བྱའི་ངོ་སྣང་ངོ་། །ཕྲིན་ལས་བཞི་པོ་དེ་ཞི་རྒྱས་དབང་དྲག་རིགས་བཞིའི་ཆ་འཛིན་པར་བྱེད་པ་དང་། ལྔ་པ་ལས་ཀྱི་རིགས་ལ་ཕྲིན་ལས་ལྔ་ཀ་ལྷུན་གྱིས་གྲུབ་པའོ། །རིགས་རྣམ་པ་བཞི་ཡིས་འདུལ་བར་མཛད་པ་དེ་ཡང་། ཕྱོགས་མཐུན་པའི་ཆ་ནས་ཡིན་ཀྱི་གདུལ་བྱ་འདུལ་བའི་རིགས་ཕྱོགས་སུ་ཆད་པ་མ་ཡིན་ནོ། །གང་གི་དེ་ལྟར་སྦྱངས་བའི་མཐའ་མའི་རྒྱལ་ཚབ་དུ་གྱུར་པའི་སྐྱེས་བུ་དེའང་སངས་རྒྱས་པ་ལ། །གདུལ་བྱའི་སྣང་ངོར་རིགས་ལྔ་སོ་སོའི་ཆ་རེ་འཛིན་པར་བྱེད་ཀྱང་། །རིགས་ལྔ་དེ་དག་ལས་ཅིག་ཤེས་སྐུ་ལྔ་ལྷུན་གྲུབ་ཀྱི་སངས་རྒྱས་རྒྱལ་བ་དྲུག་པ་ནི་ཀུན་གྱི་ངོ་བོ། །ཉིད་དུ་བཞུགས་པའོ། །སྔ་ཕྱི་བྱོན་པའི་འདས་མ་འོང་གི་སངས་རྒྱས་རྣམས་ནི་དྲང་བ་ཙམ་དུ་སྨྲོས་པའོ། །དེ་ཡང་སངས་རྒྱས་སངས་རྒྱས་ཞེས་བརྗོད་པ། །རྒྱལ་བ་དྲུག་པའི་དགོངས་པའི་བཞུགས་ཚུལ་ནི་ཚིག་ཏུ་སྨྲ་བ་དང་བློས་བསམ་པ་དང་ངག་གི་བརྗོད་པའི་མཐའ་ལས་འདས་པའོ། །སངས་རྒྱས་དེའི་དོན་ཕྱོགས་རེ་ཙམ་དུ་བརྗོད་པར་བྱ་བ་ནི། དྲང་བའི་དོན་དུ་སྔ་མ་བྱང་སེམས་དང་ཕྱི་མ་སྔགས་ཕྱི་བའི་སངས་རྒྱས་པ་ནི། དོན་དམ་བདེན་པ་སྟོང་པ་སྤྲོས་བྲལ་གཅིག་པུར་མཐར་ཕྱིན་ནས་ཆོས་སྐུ་ཐོབ་པར་འདོད་ཀྱང་མཐར་ཐུག་གི་འབྲས་བུ་མ་ཡིན་པའི་ཕྱིར་ན། དབུ་མ་བཞིན་ཆུ་ལ་ཆུ་ཐིམ་པ་ལྟར་སངས་རྒྱས་རྣམ་རྒྱུད་གཅིག་ལྟ་བུའི་བདེན་པ་མེད་དོ། །དབུ་མ་ལས་ཅིག་ཤོས་ཀུན་རྫོབ་བདེན་པར་མཐར་ཕྱིན་པའི་འབྲས་བུ་འདོད་ནའང་དེ་མཐར་ཐུག་མ་ཡིན་པས། །སེམས་ཙམ་དུ་ཀྲི་ཡོག་ལྟར་རྒྱུད་སོ་སོ་ཐ་དད་སྤྱི་ཆ་དང་རིགས་སུ་ཆད་པའང་མེད་དོ། །འོ་ན་ཇི་ལྟར་ཡིན་ན་འདིར་མ་ཧཱ་ཡོ་གའི་བདེན་པ་གཉིས་དབྱེར་མེད་རྟོགས་པའི་དོན་ལ་དབང་བསྒྱུར་བ་ན། བདག་དོན་ཆོས་སྐུ་དང་དང་གཞན་དོན་གཟུགས་སྐུ་གཉིས་གྱི་དོན་བྱ་བ་ལ་གཉིས་སུ་མེད་དེ། །སོ་སོར་དབྱེར་མེད་པའི་ཕྱིར་དང་དེར་སོན་ཏེ་མཐར་ཕྱིན་པས། །ཡོད་མེད་ལ་སོགས་པའི་མཐའ་རྣམས་ཀུན་གྱི་ཕྱོགས་སུ་མ་རུང་བས་མཐའ་བྲལ་གང་དུ་ཡང་མ་འགགས་པས་མཐའ་ཀུན་ལྡན་པར་ཡེ་ཤེས་རང་སྣང་ཉིད་ཞེན་པའི་མཐའ་ཀུན་བྲལ་བར་རང་རིག་པའི་མངོན་སུམ་དུ་བྱས་པ་ལ། འབྲས་བུ་སངས་རྒྱས་ཞེས་པ་འདི་ཡིན་ཞེས་ཚིག་ཏུ་མིང་གིས་བརྗོད་པའི་ངོ་བོ་གཅིག་ཐ་དད་འདི་འདྲར་གནས་སོ་ཞེས་སྨྲ་ཞིང་རྟོགས་པ་དཀའ་འོ། །སེམས་ཙམ་དང་ཕྱི་རྒྱུད་དགོངས་པ་ངོ་བོ་གཅིག་ལ་སྦྱངས་པའི་ཡེ་ཤེས་རྒྱུད་གཅིག་ཏུ་འདྲེས་པ་མིན་ཏེ། དཔེར་ན་ཤིང་གི་མེ་དཔུང་གཅིག་ལ་ཤིང་སོ་སོའི་མེ་མ་འདྲེས་པར་ལྟར་བརྗོད་པ་ནི། དྲང་བའི་དོན་ཙམ་དུ་བསྟན་པ་སྟེ་དེ་ཉིད་ནི་ངེས་དོན་མིན། །དབུ་མ་ལྟར་ཆུ་ལ་ཆུ་ཐིམ་པ་ལྟར་དགོངས་རྒྱུད་གཅིག་ཏུ་འདོད་པའང་དེའི་དོན་གང་བཞིན་འོ། །ངེས་པའོ་དོན་ལ་བདེན་པ་དབྱེར་མེད་པའི་ཚུལ་གྱིས་དོན་དམ་དང་ཀུན་རྫོབ་ཕྱོགས་རེར་འདོད་པ་ལ་སྐྱོན་བརྗོད་པས། །ཕྱོགས་དང་རིས་ཀྱི་དྲི་མ་དག་པའི་ཡེ་ཤེས་ཉིད་ཕྱོགས་གཅིག་ཏུ་གནས་པ་མ་ཡིན་པས་ནི། ཏན་ཏྲ་སྟེ་རྒྱུད་རྒྱས་པ་ཉིད་ལ་གྲགས་པ་དང་། །བདེ་བར་དེ་བཞིན་ཉིད་དུ་གཤེགས་པ་དང་དགོངས་པ་མཐའ་གཉིས་ལ་མི་གནས་པའི་མྱ་ངན་ལས་འདས་པ་དང་མཉམ་པ་ཆེན་པོ་ཡི། །ངང་དུ་བྱོན་ཞེས་རྒྱུད་ལས་གསུངས་ཏེ་མཐར་ཕྱིན་པའི་རྒྱུད་ལ་སོགས་པ་ལས་རྒྱས་པར་བརྗོད་པ་ཡང་། །ཆོས་ཀུན་ཀུན་རྫོབ་དོན་དམ་མཉམ་པ་ཉིད་ཀྱི་བདེན་པ་གསུམ་དབྱེར་མེད་པ་ཡིན་པའི་ཕྱིར་ན། ངེས་པར་འི་དོན་དུ་རྒྱུད་འདྲེས་ཏེ་གཅིག་པ་དང་མ་འདྲེས་ཏེ་ཐ་དད་པའི་རང་རྒྱུད་ཕྱོག་གཅིག་པའི། །ཐ་སྙད་ཐམས་ཅད་དང་བྲལ་བའི་ཚུལ་དུ་གནས་སོ། །གསང་བའི་ཐེག་པ་ཐུན་མོང་མིན་པའི་ཐེག་པ་ཆེན་པོ་རྒྱལ་བ་དྲུག་པ་དེའི་མིང་གི་གྲངས་ནི། བདེ་བར་གཤེགས་པ་དང་དེ་བཞིན་གཤེགས་པ་དང་། །བཅོམ་ལྡན་འདས་དང་སངས་རྒྱས་དང་། །དགྱེས་པ་ལོངས་སྤྱོད་ཆེན་པོ་ཞེས་བརྗོད་པ་ལ་སོགས་མིང་གི་རྣམ་གྲངས་མཐའ་ཡས་ཀྱང་། །ལུས་མདོར་བསྟན་པ་ལ་ངོ་བོའི་ཁྱད་པར། ཚུལ་གྱི་ཁྱད་པར། མིང་གི་རྣམ་གྲངས་ཀྱི་ཁྱད་པར་གསུམ་གྲངས་ཀྱི་ཁྱད་པར་ཙམ་བརྗོད་ན། མདོ་རུ་བརྗོད་པའི་འབྲས་བུའི་ཁྱད་པར་ཁོང་དུ་ཆུབ་པར་གྱིས། །མ་ཧཱའི་འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་དེ་རེ་རེ་ལའང་ལྔ་ལྔར་ལྷུན་གྱིས་གྲུབ་པའི་སངས་རྒྱས་དང་། དབུ་མ་ཀྲི་ཡོག་གི་རྒྱལ་བ་གསུམ་སྟེ་རྫོགས་པའི་སངས་རྒྱས་ཐེག་པ་སོ་སོ་ཡི་གཞུང་གི། གྲུབ་པའི་མཐའ་རང་ས་མཐར་ཕྱིན་པ་ཡི་སངས་རྒྱས་དང་མ་ཧཱའི་ཁྱད་པར་ཡོད་དེ་འཕགས་ལ། །གྲངས་རྫོགས་མ་རྫོགས་ཀྱི་ཁྱད་པར་ནི་དབུ་མ་པས་བཅུ་གཅིག་ཀུན་ཏུ་འོད་གཅིག་པུ་འདོད་པ་དང་། ཀྲི་ཡ་རིགས་གསུམ་རྡོ་རྗེ་འཛིན་དང་། ཨུ་པ་རིགས་བཞི་རྡོ་རྗེ་འཆང་དང་། ཡོ་ག་རིགས་ལྔ་ལོངས་སྤྱོད་རྫོགས་སྐུ་མ་ཧཱས་ཉེར་ལྔ་ལྷུན་གྱིས་གྲུབ་པའོ། །ངོ་བོ་འདུས་བྱས་མ་བྱས་ཀྱི་ཁྱད་པར་གཟུགས་སྐུ་སྟེ་དབུ་མ་དང་ཕྱི་རྒྱུད་རྣམས་ཀྱི་གདུལ་བྱའི་ངོར་སྣང་ཙམ་འདུས་བྱས་སུ་འདོད་ལ་མ་ཧཱས་དྲུག་པའི་སྤྱི་གཟུགས་འདུས་མ་བྱས་ཀྱི་གཟུགས་སྐུའོ། །བྱིན་བརླབས་ལས་མངོན་དུ་སྣང་མི་སྣང་ཁྱད་པར་གསུམ་པོས་རང་སའི་འབྲས་བུ་ལ་དྲངས་མ་ཧཱས་ཡི་གེ་འཁོར་ལོའི་སར་དྲངས་བ་དང་དོན་བྱེད་རྒྱ་ཆེ་ཆུང་གིས་ཁྱད་པར་གསུམ་གྱི་རང་སའི་འོག་མ་ལ་མ་ཧཱས་རིས་མེད་ཀྱི་གདུལ་བྱ་ལ། དེ་ལྟར་ཁྱད་པར་བཞི་ལས་དཔགས་པའི་ངོ་བོ་ཉིད་ཀྱིས་འབྲས་བུའི་ཁྱད་པར་གསལ་ལོ། །དེ་ནས་དགོངས་པའི་བཞུགས་ཚུལ་ནི་བྷོ་དྷི་ལ་སོགས་ས་བཞིའི་རྒྱལ་བ་དག །དབུ་མས་རྒྱུད་གཅིག་ཏུ་འདོད་པ་འདྲེས་པར་སྟོང་པ་ཉིད་དུ་ཐིམ་ནས་འགྲོ་བར་འདོད་པ་དང་སེམས་ཙམ་དུ་ཀྲི་ཡོག་པ་ནི་ངོ་བོ་གཅིག་ཀྱང་སྦྱངས་པའི་ཡེ་ཤེས་མ་འདྲེས་ཏེ་ཐ་དད་ལས་གྲོལ་བར་འདོད་དེ་སྦྱངས་པའི་མ་འདྲེས་པར་ཡོད་པར་སྨྲ་བ་རྣམས། འདིར་མ་ཧཱ་ལ་ལྟོས་ན་དྲངས་དོན་ཕྱོགས་རེ་ཙམ་ཡིན་ཏེ་ཁྱད་པར་གོང་དུ་བཤད་པ་བཞིན་ཡིན་པའི་ཕྱིར་རོ་དགོངས་རྒྱུད་ཀྱི་བཞུགས་ཚུལ་མ་ཧཱ་ཡོ་ག་རྒྱུད་ཐ་དད་ལས་གྲོལ་ཞིང་མ་འདྲེས་ལ་ཡོངས་སུ་རྫོགས་པའོ། །དེས་ན་དགོངས་པའི་ཁྱད་པར་བསམ་ལས་འདས་ཏེ་གོང་གི་རྣམ་གྲངས་དང་ངོ་བོ་དང་བྱིན་རླབས་དང་དོན་བྱེད་རྒྱ་ཆེ་ཆུང་ལ་སོགས་པའི་ཁྱད་པར་བཞིན་ནོ། །མིང་གྲངས་ཀྱི་ཁྱད་པར་ནི་ཉན་རང་ལ་སོགས་པ་ལ་ལྟོས་ན་ཐེག་ཆེན་དང་སྔགས་ལ་ལྟོས་ན་ལྟ་སྤྱོད་དམན་པ་བྱང་ཆུབ་སེམས་དཔའི་ཐེག་པ་བས། །ལམ་ཐུན་མོང་ཚོགས་གཉིས་ཀྱིས་འབྲས་བུ་བཅུ་གཅིག་ཀུན་ཏུ་འོད་ཀྱི་ས་རུ་བདེ་བར་གཤེགས་ཤིང་། །ཆོས་ཉིད་ཀྱི་སྟོབས་ཀྱིས་དེ་བཞིན་ཉིད་དུ་སྟོང་ཞིང་བདག་མེད་མངོན་དུ་གཤེགས་པ་ཡང་། །དུས་གྲངས་མེད་གསུམ་ཀྱི་དབང་བཙན་པའི་ཕྱིར་སྔ་མ་རང་དོན་བཞིན་དུ་རྗེས་འཇུག་ཀྱང་། བདེ་བར་གཤེགས་པ་དེ་བཞིན་ཉིད་དང་གསང་སྔགས་ཕྱི་རྒྱུད་བ་ལའང་། །ཀྲི་ཡ་པ་བྱ་བའི་དང་ཨུ་པ་ཡའི་ལུགས་ཀྱི་ཤེས་རབ་ཀྱི་ལྟ་བ་དང་ཡེ་ཤེས་གཉིས་སུ་མེད་པར་རྟོགས་པ་ནི། ཆོ་གའི་ཡན་ལག་ཀུན་རྫོགས་པའི་རྣམ་པར་གྲངས་བཅུ་གཅིག་རྫོགས་པར་བྱས་པས། །འབྲས་བུ་རིགས་གསུམ་དཀྱིལ་འཁོར་ལམ་དུ་བྱས་པས་དགོངས་པ་བདེ་བར་གཤེགས་པའམ། །འབྲས་བུ་ཀྲི་ཡ་རྡོ་རྗེ་འཛིན་གྱི་པར་གནས་ལུགས་དེ་བཞིན་ཉིད་ལྟར་མངོན་དུ་གཤེགས་པའོ། །ཡང་ན་གྲོལ་ལམ་མ་ལྟོས་ན་ཐབས་ལམ་སྤྱིའི་གནས་བྱ་རྒོད་ཕུང་པོའི་རི་འདབ་ལོག་ཏུ། །དགོན་པའི་ཕུག་པ་བྱེ་མ་འདབ་སྣ་རུ། །བྷ་ག་ཝན་གྱི་ཞལ་མཐོང་འཁོར་དགེ་སློང་ས་རི་ཞེས་བྱ་བ་ལ་སློབ་དཔོན་དགྲ་བཅོམ་པ་ལྔ་བརྒྱའི་རྒྱལ་ཚབ་ཏུ་དབྱུང་བའི་ཕྱིར་ཚིག་དང་ཡི་གེས་དབང་བསྐུར་བས་དགྲ་བཅོམ་ཐོབ་པ་ཅི་བཞིན་དུ་ནམ། །ཀྲི་ཡ་བའི་གནས་བ་ར་ན་སིའི་སྨེ་ཁྲོད་མི་གཙང་བ་མེད་པའི་བསིལ་ཁང་དུ། །དམ་པའི་རིགས་ཅན་ཁྱིམ་བདག་སིདྷུ་པྲ་ཏ་པ་དང་བྲམ་ཟེའི་ཁྱིམ་བདག་ཀུ་ཀུ་ར་ཙ་གསུམ་ལ་ཕྱག་རྡོར་གྱིས་རིགས་གསུམ་གྱི་དབང་རྫས་རྡོ་རྗེ་རྒྱ་གྲམ་གྱིས། དབང་བསྐུར་ནས། །རྡོ་རྗེ་འབྲས་བུ་རིགས་གསུམ་འཛིན་གྱི་ས་ཐོབ་པའི་ཚུལ་ཏེ་བདེ་བར་གཤེགས་ཏེ་ཇི་བཞིན་དུ་རྗེས་འཇུག་རྗེས་འཇུག་ལ་མཐུན་ནོ། །སྔོན་བྱུང་རྒྱལ་བ་ཐུབ་པའི་དབང་པོ་ཡང་གང་གི་གཤེགས་ཚུལ་དེ་ཇི་བཞིན་དུ། གཤེགས་པའམ་མཚན་ཉིད་པ་དང་པོ་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་པ་གྲངས་མེད་གསུམ་ལ་ཚོགས་བསགས། ཐ་མ་མཛད་པ་བཅུ་གཉིས་ཀྱི་ཚུལ་དུ་སངས་རྒྱས་པ་རྒྱུ་ཡི་ཐེག་པ་དང་དང་བྱ་བ་ཀྲི་ཡའི་རྒྱུད་དང་། །གཉིས་ཀའི་སྤྱོད་པ་ཨུ་པ་ཡའི་རྒྱུད་ལ་སོགས་པ་ལྟ་སྤྱོད་གོང་འོག་སོ་སོའི་གཞུང་ལས་གྲགས་པ་བཞིན་ནོ། །རྣལ་འབྱོར་ཡོ་གའི་གཞུང་གིས་དབང་རྒྱལ་བུ་དོན་གྲུབ་ཉིད། །ཆུ་བོ་ན་ཛ་རའི་འགྲམ་ལོགས་སུ། །དཀའ་ཐུབ་མཛད་པའི་དཀའ་བ་སྤྱོད་པའི་ཚེ། །ཕྱོགས་བཅུའི་སངས་རྒྱས་སྤྲུལ་པའི་སྐུའི་རྣམ་པ་དང་ལོངས་སྤྱོད་རྫོགས་པའི་སྐུ་རིགས་ལྔས་ཆོས་ཉིད་སྟོང་པ་ལ། གདན་ཟླ་བ་ལ། གསུང་ཡིག་འབྲུ་ལ། ཐུགས་ཕྱག་མཚན། སྐུ་ཕྱག་རྒྱ་སྟེ་མངོན་པར་བྱང་ཆུབ་པ་ལྔ་ཡི་སྟོབས་ཀྱིས་དབང་བསྐུར་བས། །གནས་འོག་མིན་སྟུག་པོ་བཀོད་པ་ཉིད་དུ་བདག་གཞན་གྱི་དོན་གྲུབ་སྟེ། །དོན་གྲུབ་སྤྲུལ་པའི་སྐུའི་དཀའ་ཐུབ་ཀྱི་ཁོག་པ་ནས། །སེམས་ཉིད་ཡེ་ཤེས་ཀྱི་སྐུ་རྣམ་པར་སྣང་མཛད་ཀྱི་ལུས་སུ་བདེ་བར་གཤེགས་ཏེ། དབུས་ཀྱི་རི་བོ་མཆོག་རབ་ཀྱི་རིའི་རྩེ་མོར་ཡོ་གའི་ཆོས་ཀྱི་གཞུང་དུམ་བུ་བཞིའི་འཁོར་ལོ་ས་བཅུའི་བྱང་ཆུབ་སེམས་དཔའ་རྣམས་ལ་བསྐོར་རོ། །དེ་ཡང་མ་ཧཱ་ལ་ལྟོས་ན་རྟོག་པའི་གཟུགས་སྐུ་ཡིན་ནོ། །མ་ཧཱ་རང་གི་མན་ངག་ཐབས་ཀྱིས་ལམ་དང་ཤེས་རབ་གྲོལ་བའི་ལམ་ཉིད་ཀྱིས། །དགོངས་པ་ལ་འགྲོ་འོང་མེད་པར་བདེར་གཤེགས་ཏེ། །ཆོས་ཉིད་ཇི་བཞིན་པ་ལྷུན་གྱིས་གྲུབ་པའི་ངང་དུ་མཐར་སོན་པ་ནི་དེ་བཞིན་གཤེགས་པའོ། །དེའང་དགོངས་པའི་བཞུགས་ཚུལ་དང་ངོ་བོས་དང་ཁྱད་པར་དང་གསུམ་གྱི་ཆེ་བའོ། །རྒྱལ་བུ་དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་རྣམས་སྤྲིན་བཞིན་དུ། །འདུས་པ་དེ་རྣམས་ཀྱི་གསང་བ་བྱང་ཆུབ་ཀྱི་སེམས་ཀྱི་ལོངས་སྤྱོད་ཀྱིས། །སྲོད་ལ་རྟོགས་པ་སྐྱེ་བའི་དུས་དང་ཐོ་རངས་ཡེ་ཤེས་སྐྱེ་བའི་དུས་ཉིད་དུ། །ཡབ་ཡུམ་གྱི་ཉི་ཟླ་བྱང་སེམས་ལྕེ་ཐོག་ཏུ་བཟའ་བ་གསང་བའི་དབང་བྱིན་ཅིང་། །ཐབས་ཀྱི་རོལ་པའི་ཀ་ར་སྟེ་སྦྱོར་ཐབས་དགའ་བ་བཅུ་དྲུག་བསྟན་པ་ཡིས། །ཡས་བབ་དགའ་བ་བཞིའི་ཡེ་ཤེས་མས་བརྟན་རང་གནས་ཀྱི་ཡེ་ཤེས་བདེ་བ་ཆེན་པོ་ཤིན་ཏུ་བརྟན་པའི་རྫོགས་དབང་ཐོབ་པ་ས་གཞིའི་གནས་ལུགས་དེ་བཞིན་དུ་འབྲས་བུ་མངོན་དུ་གྱུར་པའི་དེ་བཞིན་གཤེགས་པའོ། །དེ་ལྟར་ཐེག་པ་སོ་སོའི་འབྲས་བུ་ལ་ཁྱད་ཡོད་པ་དེའི་ཕྱིར་ཐུན་མོང་གི་ཐེག་པ་བྱང་ཆུབ་སེམས་དཔའི་དང་ཀྲི་ཡ་ཡོ་གའི་ཐེག་པ་ རྣམ་གསུམ་ལས། །མ་ཧཱ་ཡོ་ག་དང་ཁྱད་པར་ཡོད་པ་ཡིན་ཏེ་བྱང་བ་བཞི་དང་ཆུབ་པ་བཞི་པ་ཁྱད་པར་ཡོད་དོ། །དེ་ལ་བྱང་ཆུབ་སེམས་དཔའ་ནི་ཉོན་མོངས་དང་ཤེས་བྱའི་སྦྱངས་ཏེ་གྲོལ་བས་བྱང་ལ། བཅུ་གཅིག་ཀུན་ཏུ་འོད་ཀྱི་ས་ཐོབ་པས་ཆུབ་པའོ། །ཀྲི་ཡ་ནི་ཉོན་མོངས་པའི་ཟུག་རྔུ་བསྒྱུར་ཏེ་བྲལ་བས་བྱང་ལ། རིགས་གསུམ་རྡོ་རྗེ་འཛིན་གྱི་ས་ཐོབ་པས་ཆུབ་པའོ། །ཡོ་ག་ནི་ཉོན་མོངས་པ་ལ་སོགས་སྦྱང་བསྒྱུར་དག་པས་བྱང་ལ་རིགས་ལྔ་སྟུག་པོ་བཀོད་པའི་ས་ཐོབ་པས་ཆུབ་པའོ། །མ་ཧཱ་ནི་ཉོན་མོངས་དང་ཤེས་སྒྲིབ་ལ་སོགས་པ་དབང་དུ་བསྡུས་ཏེ་རང་བྱུང་ཡེ་ཤེས་སུ་གྲོལ་བས་བྱང་ལ་སྐུ་ལྔ་ལྷུན་གྱི་གྲུབ་པ་མ་ཆགས་པདྨའི་སྤྱན་གྱིས་ས་ཐོབ་པས་ཆུབ་པའོ། །དེ་བཞིན་དུ་བདེ་བར་གཤེགས་པ་བཞི་དང་དེ་བཞིན་གཤེགས་པ་བཞི་སྟེ་བརྒྱད་ཀྱིས་ཁྱད་པར་ཡོད་དེ། དང་པོ་བདེ་བར་གཤེགས་པ་བཞི་ནི། བྱང་ཆུབ་སེམས་དཔའ་ཉོན་མོངས་པ་སྦྱངས་ཏེ་བྲལ་ནས་དགོངས་པ་བདེ་བར་གཤེགས་ཐམས་ཅད་ཀྱི་སར་གཤེགས་པ་དང་། ཀྲི་ལ་ཉོན་མོངས་པའི་ཟུག་རྔུ་བསྒྱུར་ཏེ་བྲལ་ནས་དགོངས་པ་བདེ་བར་རྡོར་འཛིན་གྱི་དང་། ཡོ་ག་པ་ཉོན་མོངས་པའི་ཟུག་རྔུ་བསྒྱུར་ཞིང་བྲལ་ནས་བྱིན་རླབས་དགོངས་པ་བདེ་བར་སྟུག་པོ་བཀོད་པའི་སར་གཤེགས་པ་དང་། མ་ཧཱས་སྤྲོས་པའི་ཟུག་རྔུ་ཐམས་ཅད་དབང་དུ་བསྡུས་ཏེ་རང་གྲོལ་ནས། དགོངས་པ་བདེ་ཆེན་གསལ་འགྲིབ་མེད་པར་པདྨ་སྤྱན་གྱི་ས་ལ་གཤེགས་པའོ། །དེ་བཞིན་གཤེགས་པ་བཞི་ནི། བྱང་ཆུབ་སེམས་དཔའ་སྤྲོས་བྲལ་སྟོང་ཉིད་རྟོགས་ནས་དེ་བཞིན་ཉིད་དུ་གཤེགས་པ་དང་། ཀྲི་ཡ་པ་དབྱིངས་ཡེ་ཤེས་གཉིས་མེད་དང་། ཀུན་རྫོབ་ལྷའི་དལ་དུ་རྟོགས་ནས་དེ་བཞིན་ཉིད་དུ་གཤེགས་པ་དང་། ཡོ་ག་པ་རང་སེམས་མཐའ་གཉིས་དང་། ཀུན་རྫོབ་སྣོད་བཅུད་ལྷའི་དལ་དུ་རྟོགས་ནས་དེ་བཞིན་ཉིད་དུ་གཤེགས་པ་དང་། མ་ཧཱ་འཁོར་འདས་གཉིས་སུ་མེད་ཅིང་བདེན་པ་དབྱེར་མེད་སྤྱོད་ཡུལ་དང་བྲལ་བར་རྟོགས་ནས་དེ་བཞིན་ཉིད་དུ་འགྲོ་འོང་མེད་པར་གཤེགས་པའོ། །གྲངས་ནི་སྐུ་གསུམ་དང་། རིགས་གསུམ། རིགས་ལྔ། ཡི་གེ། འཁོར་ལོ། ཚོགས་ཆེན། སྐུ་གསུང་ཐུགས་ཡོན་ཏན་ཕྲིན་ལས་ཉེར་ལྔའི་གྲངས་རྫོགས་མ་རྫོགས་དང་གནས་སྐབས་དང་མཐར་ཐུག་གི་འབྲས་བུའི་ངོ་བོ་བྱིན་རླབས་དང་རྩལ་ལ་སོགས་གྱིས་ཁྱད་པར་འཕགས་པའོ། །ད་དུང་འདུས་བྱས་མ་བྱས་པ་དང་འདི་སྣང་བ་དང་དོན་བྱེད། རྒྱ་ཆེ་ཆུང་ལ་སོགས་པ་ཁྱད་པར་འདུག་གོ། ༈ །དེ་ནས་རྒྱལ་བ་དང་བཅོམ་ལྡན་འདས། །ཀྱི་ཁྱད་པར་ཡང་འོག་མ་གསུམ་ཐུན་མོང་མཆོག་མ་ཧཱས་དཔགས་ལུང་སྔ་མ་དེ་བཞིན་གཤེགས་པ་བཞིན་ཡོད་པ་ཡིན་སྟེ། ཐེག་པ་སོ་སོའི་ཐབས་ལམ་དང་ཤེས་རབ་གྲོལ་བའི་ལམ་ཀྱིས། །ཐེག་པ་རང་རང་གི་རྡོ་རྗེ་ལྟ་བུ་ཏིང་ངེ་འཛིན་བཞི་བསྐྱེད་པས། །སོ་སོའི་བདུད་བཞི་ངེས་པར་བཅོམ་ནས་མྱ་ངན་བཞི་ལས། འདས་ཤིང་ཡོད་མེད་བརྟག་ཆད་མཐའ་བཞི་ལས་འདས་པ་དང་། །འདོད་ལུགས་མི་མཐུན་པ་ཐེག་པ་སོ་སོའི་གཞུང་གིས་རང་རང་གི་སངས་རྒྱས་པའི་ཁྱད་པར་ཐེག་པ་རང་གི་ལྟ་སྤྱོད་ཏིང་འཛིན་གོང་འོག་གི་ལམ་རིམ་བཞིན། །མཐར་ཐུག་གྲུབ་པའི་མཐའ་འབྲས་སངས་རྒྱས་ལ་ཡང་ཁྱད་པར་ཡོད་པ་ནི། ལྟ་བ་འོག་མའི་མཐར་ཕྱིན་པས་གོང་མ་ལ་སྒྲིབ་པས་ཁྱད་པར་ཕྱེ་བ་ཡིན། །ཁྱད་པར་དེས་ན་དགྱེས་པ་ཆེན་པའི་ལོངས་སྤྱོད་ཀྱི་ཁྱད་པར་གྱིས་ཀྱང་། །མདོ་སྡེ་དང་བྱ་བ་ཀྲི་ཡ་དང་རྣལ་འབྱོར་ཡོ་ག་གཉིས་ཀྱི། རྒྱུད་གཞུང་སོ་སོ་ལས་ཇི་ལྟར་གསུང་པ་བཞིན་དགྱེས་པར་ལོངས་སྤྱོད་པས། གོང་གི་མ་ཧཱའི་དགྱེས་ཆེན་པོ་ནི་འོག་གི་ཡིད་ཚོད་དུ་གྱུར་པ་མིན་ནོ། །ཁྱད་པར་དེ་ཕྱིར་དགྱེས་པའི་ལོངས་སྤྱོད་ལ་ཐེག་པ་རིམ་པ་ཆེ་ཆུང་ཡོད་པས། །ཐེག་པ་རང་སའི་འབྲས་བུ་སངས་རྒྱས་ལ་རིམ་པ་ཁྱད་པར་ཡོད་པའི་ཕྱིར། །སངས་རྒྱས་ཀྱི་སའི་མིང་གྲངས་ཡོན་ཏན་གྱི་ཆ་ཤས་ཙམ་གྱིས་ཁྱད་པར་ཕྱེ་བ་མིན་ཏེ། །ངོ་བོ་ཉིད་ཀྱིས་དོན་ལ་གོང་འོག་གི་འབྲས་བུ་ལ་ཁྱད་པར་ཡོད་པས་མ་ཧཱ་རྣམ་པར་འཕགས་པའོ། །ཐེག་པ་འོག་མའི་ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་པའི་ཕྱིར་བྱང་སེམས་བཅུ་གཅིག་ཀུན་ཏུ་འོད་ཀྱི་ས་དང་། ཀྲི་ཡ་རྡོར་འཛིན་དང་ཡོ་ག་སྟུག་པོ་བཀོད་པར་བསྟན་པ་ཡིན་ལ། མཐར་ཐུག་མ་ཧཱའི་འབྲས་བུ་པདྨ་སྤྱན་དང་ཡི་གེ་འཁོར་ལོ་ཚོགས་ཆེན་དང་ཡེ་ཤེས་བླ་མའི་ས་གསུམ་ལ་ཡོན་ཏན་གྱི་ཆ་ལས་བརྗོད་པ་ལས་མཐོ་དམན་མེད་དོ། །དེ་ཕྱིར་ཐེག་པ་གོང་འོག་གི་འབྲས་བུའི་ཁྱད་པར་སྐས་གདོང་མཐོ་དམན་ཡོད་པ་ལྟ་བུ་སྟེ། །རྨད་བྱུང་ཐབས་མཁས་མ་ཧཱའི་ཐེག་པ་འདི་ཡིས་མ་ཧཱ་ལས་ས་གཞན་ཐེག་པ་འོག་མ་པའི་ལམ་སྟེགས་ཀྱི་ཐེག་པའི་ཐབས་ལ་བརྟེན་ནས་གང་མོས་སུ་འཇུག་བཅུག་ཅིང་དེ་ནས་རིམ་གྱིས་ཐེག་པ་འོག་མ་ནས་གོང་མར་འདུ་ཤེས་བསྒྱུར་བས་མ་ཧཱའི་འབྲས་བུ་འདིར་འགྲུབ་པར་བྱ་བའི་ཕྱིར་ཐེག་པ་འོག་མ་རྣམས་རང་རང་གི་ཐབས་ཀྱིས། །ཐེག་པ་རང་སའི་འབྲས་བུ་ཐོབ་པ་ཙམ་ལས་ཐེག་པ་རང་རང་གི་འབྲས་བུ་ངོ་བོ་ཉིད་ལ་ཁྱད་མེད་ཅིང་། གཅིག་པར་སྨྲ་བ་ནི་བླུན་པོར་མུན་སྤྲུལ་གྱི་བློ་ཅན་ཡིན་པའོ། །ལམ་མཐར་ཕྱིན་པའི་འབྲས་བུ་བསྟན་པའི་ལེའུ་སྟེ་དགུ་པའོ།། ༈ །།འགྲོ་བ་ལམ་ལོག་པ་ནི་མུ་སྟེགས་ཆད་པ་ཅི་ཡང་མེད་པར་ལྟ་བ་དང་རྟག་པ་དངོས་པོར་ལྟ་བ་དང་། བྱེད་པ་པོ་རྟག་པར་འདོད་པ་དང་། མུར་ཐུག་པ་དང་རྒྱང་འཕེན་ཏེ་འདི་ལ་རྟག་ལྟ། གྲངས་ཅན། ཚངས་པ། དབང་ཕྱུག་པ་བྱེ་བྲག་པ་བཞི་དང་། ཆད་ལྟ་རྒྱང་འཕེན་དང་ལྔ་ཞེས་ཟེར། ལམ་སྟོར་བ། །ནི་འགྲོ་བ་རིགས་དྲུག་གི་སེམས་ཅན་ལམ་རྒྱུད་ལྔ་དང་དེ་ལྟར་ལྔ་ཚན་གཉིས་ཀྱི་སེམས་ཅན་རྣམས་བཀྲི་བའི་དྲང་དོན་ཕྱིར་གསུངས་པའོ། །འཁོར་འདས་ཐ་དད་མི་གཉིས་པ་གཉིས་སུ་མེད་པའི་ལམ་མཆོག་འབྲས་བུ་ལམ་དུ་བྱེད་འདི་བགྱིས་པའི། །ངལ་བའི་དགེ་རྩས་འགྲོ་བ་ཀུན་སངས་རྒྱས་ཀྱི་སར་གྲོལ་ཤོག །བྱང་ཆུབ་ཀྱི་དོན་ཞོར་ལ་བྱེད་ཅིང་འཇིག་རྟེན་གྱི་ཁེ་དང་གྲགས་པའི་དོན་དུ་གཉེར་བར་བྱེད་པ་དང་། གསང་སྔགས་ཀྱི་མན་ངག་གཉེར་མི་ཐུབ་པར་མན་ངག་ཡོད་པ་སྐད་ཀྱིས་གཞན་སྣོད་མེད་ལ་བཅུད་ཆེན་འཛག་ཅིང་མན་ངག་ཟབ་མོ་གཞན་ལ་གཞོག་ངོམ་ཅན། །དཔེར་ན། རཱ་ཙ་སྟོབས་བཟང་གི་བཙུན་མོ་གཙུག་རྒྱལ་སྒེག་མོ་ཞེས་བྱ་བ་རྒྱལ་པོ་སྟོབས་བཟང་གི་བཙུན་མོ་གཙུག་རྒྱལ་སྒེག་མོ་ཞེས་བྱ་བ། རྒྱལ་པོ་སྟོབས་བཟང་གིས་རིན་པོ་ཆེའི་སོར་གདུབ་ཆུང་ངུ་གཅིག་བརྒྱབ་པས་མོའི་མིག་ཆུར་སོང་ནས་མོ་ཨ་ན་ཟེར་ཞིང་ངུའོ། །གཞན་གྱིས་མེ་ཏོག་འཐོར་བས་ཀྱང་ཨ་ན་ཟེར་ཞིང་ངུའོ། །ཕྱིས་གཡོག་པོ་གཅིག་དང་ཕག་ཏུ་འདོད་པ་སྤྱོད་པ་ལ། ཐེབ་གཅིག་མོ་ཕྱིས་པ་ལ། གཡོག་པོ་ཚིག་པ་ལོག་སྟེ་དབྱུག་པ་བརྒྱབ་པས་མི་ངུ་བར་ཧེ་ཧེ་ཟེར་ཞིང་འདུག་པས་ཁྲེལ་ཞིང་ཡ་མཚན་སྐྱེས་སོ། །འཇག་སྐྱིལ་དང་། །ནི་བྲམ་ཟེ་མེ་ཆེན་སྦུར་སྐྱེས་ཞེས་བྱ་བའི་དྲང་སྲོང་གཅིག་ཡོད་པས་མ་བྱིན་པ་ལེན་པ་སྤངས་པ་ཡིན་ཟེར་ཞིང་གཞན་ལ་མེ་བསླང་ཙམ་ན་ཆོས་གོས་ལ་རྡུལ་འབྱར་ཙ་ན་སྐྱེལ་དུ་འོང་བ་ལ་ཕག་ཏུ་ཐོབ་ཚད་རྐུ་བ་གཅིག་ཡོད་པས་མགར་བའི་ཁྱིམ་ན་གསེར་གྱི་སྒྲོམ་བུ་ཡོད་པ་མཐོང་ནས་མཁར་སིལ་གྱི་གཤམ་ན། གར་སྤྱིན་བརྐུས་ནས་མགར་བའི་སྤྱིན་གྱི་གསེར་གྱི་སྒྲོམ་བུ་ལ་མཁར་སིལ་མིས་མི་ཚོར་བར་བཙུགས་ཏེ་སྒ་སྒུར་མེད་པར་བརྐུས་སོ། །དེ་ཡང་རྒྱལ་བུ་མུ་ཏིག་སྐྱུག་འབེབས་ཞེས་བྱ་བ་གད་མོ་བགད་པ་དང་མུ་ཏིག་སྐྱུག་པ་གཅིག་ཡོད་པ་ལ་རྒྱལ་པོ་སྟོབས་བཟང་གིས་མུ་ཏིག་འདོད་པ་ལ་རྒྱལ་བུ་བསྡུགས་ཏེ་རྒྱལ་བུ་གཞན་གྱིས་མི་མཐོང་བ་ལ་རྒྱལ་པོས་གཞན་མཐོང་སར་བཞག་ནས་ངོ་མཚར་ཅན་གྱི་མཐོང་སྣང་ལ་གད་མོ་ཡོང་དུ་རེ་ནས་བཞག་གོ། །དེ་ལ་རྒྱལ་བུས་གོང་གི་དེ་ཚོ་མཐོང་ངོ་། །རྒྱལ་པོས་རྒྱལ་བུ་ལ། རྒོད་བྲོ་འདྲ་བ། མཐོང་ངམ་བྱས་པ་ལ། རྒྱལ་བུས་རྒོད་བྲོ་བ་འདྲ་བ་མ་མཐོང་ཡིད་མུག་པ་བྱུང་བྱས་པས། རྒྱལ་པོ་ན་རེ་ད་ཤོད་བྱས་པ་ལ་རྒྱལ་བུས་ཚིགས་སུ་བཅད་དེ་སྨྲས་པ། རྒྱལ་པོ་མེ་ཏོག་འཐོར་བཤུམ་དང་། །ཀུ་མཱ་རའི་ཨ་མ་དང་། །ནེ་ཙོ་ཁ་ནས་གཤོག་ཐོགས་དང་། །དྲང་སྲོང་མེ་ལེན་སྤུར་སྐྱལ་དག །མི་དགེ་བཞི་ལ་འཇོལ་ཉོག་སྤྱོད། །མུ་ཏིག་འབེབས་པ་མ་གཏོགས་པ། །བདེན་པར་སྨྲ་བ་ངས་མ་མཐོང་། །ང་ནི་ཧ་ཧ་རྒོད་རེ་བྲོ། །ཞེས་བཤད་པས་མུ་ཏིག་སྐྱུགས་སོ། །ནེ་བྱ་ནེ་ཙོ་ཁ་ན་གཤོག་ཚང་ཡིན་ཏེ། ནེ་ཙོ་གཅིག་གིས་ཁ་ན་གཤོག་པའི་སྒྲོ་བཅུག་སྟེ་ཆུ་འཐུང་ཞིང་འདུག་པ་ལ་དེས་ཅི་བྱེད་བྱས་པ་ལ་ཆུ་ལ་སྲོག་ཆགས་འདུག་པ་ཤི་ཡི་དོགས་པ་ཡིན་ཟེར་རོ། །མིས་མི་མཐོང་བ་དང་ཆུ་ནང་གི་སྲོག་ཆགས་བཏུང་ཞིང་ཟ་བ་མཐོང་ངོ་། །ལྟ་བུའི་ལྐོག་གཡེམ་སོགས་ཀུ་མ་རི་ཨ་མ་ཡིན་ཏེ་གཡོ་རྒྱུས་བཟང་སར་འདོད་ཅིང་། མོ་ཁྱོ་ལ་མ་དགའ་ནས་བུ་གཅིག་སྐྱེ་ནས་ཡོད་པ་ལ། ང་སྐྱེས་པ་ཕོ་དང་རེག་པ་སྤང་བ་ཡིན་ཟེར་ནས་བུ་ལ་ནུ་མ་བླུད་ཙམ་ན་གོས་ལ་བུག་པ་ཕུག་ནས་བླུད། ཕག་ཏུ་སྐྱེས་པ་དང་འཁྲིག་པ་སྤྱད་པ་མཐོང་ངོ་། །ཚུལ་བསྲུང་ཞིང་དམ་ཚིག་ལ་མི་གནས་དང་། །གསང་སྔགས་བདེན་བའི་གཞུང་ལ་སྲན་མི་ཚུགས་ཏེ་བརྩོན་འགྲུས་མི་འབྱུང་བ་དང་། གཞུང་མང་སྒྲུབ་ལ་ཡིད་ཆེས་དཀའ་བ་དང་། བླ་མ་སྤྱི་བོས་གུས་པར་མི་ལེན་མི་ཁུར་ཅིང་། །ཞེ་བའི་བླ་མ་ལ་སྐུར་པ་འདེབས་ཞིང་གཞན་མཁས་པ་དང་ཆོས་ཡོངས་ལའང་བསྐུར་པ་འདེབས་པ་ལ་སོགས་པའི་སྣོད་མེད་རྣམས་དང་མན་ངག་འདི་མ་འཕྲད་ཅིག །སྣོད་ལྡན་རྣམས་དང་འཕྲད་པར་ཤོག་ཅིག་པར་སྨོན་ལམ་བཏབ་བོ། ༈ །རྒྱལ་བའི་བསྟན་པ་དམ་ཆོས་བདུད་རྩི་ཡི། །ནང་ནས་ཐེག་མཆོག་སྙིང་པོའི་བསྟན་པ་སྟེ། །རྨད་བྱུང་གསང་སྔགས་སྒྱུ་འཕྲུལ་དྲྭ་བའི་དོན། །སྟོང་ཕྲག་བརྒྱ་བའི་རྒྱུད་ལས་བཅུད་བསྡུས་པ། །སངས་རྒྱས་གསང་བའི་མན་ངག་ལམ་གྱི་རིམ། །འབྲུ་དཀའི་དོན་བཀྲོལ་གསལ་བྱེད་མེ་ལོང་འདི། །བསྐུལ་བའི་དོན་ཕྱིར་སེམས་བསྐྱེད་ཡི་གེར་བཀོད། །དགེ་བས་འགྲོ་ཀུན་ཡང་དག་ལམ་རྙེད་ཤོག །ལམ་གྱི་རིམ་པའི་འབྲུ་དཀའ་བ་རྣམ་གསལ་བར་བྱེད་པའི་མེ་ལོང་ཞེས་བྱ་བ་ཤཱཀྱའི་དགེ་སློང་ཤཱཀྱ་བཛྲས་སྦྱར་བའོ། །མང་ཡུལ་ཁྲི་བབས་སུ་གཉག་ཛྙཱ་ན་ཀུ་མ་རས་བསྒྱུར་བ་ལམ་རྣམ་པར་བཀོད་པ། སངས་རྒྱས་གསང་བའི་མན་ངག་རྫོགས་སོ།། །།སརྦ་མངྒ་ལམ།། །།