སློབ་དཔོན་སངས་རྒྱས་གསང་བས་མཛད་པའི་ལམ་རིམ་ཆེན་མོ།

སློབ་དཔོན་སངས་རྒྱས་གསང་བས་མཛད་པའི་ལམ་རིམ་ཆེན་མོ་བཞུགས་སོ། །དཔལ་གྱི་དཔལ་གསུམ་ཉིད་ལྡན་རྡོ་རྗེ་ལྟ་བུའི་ཡེ་ཤེས་འདུས་མ་བྱས། མ་བཙལ་ལྔ་རྫོགས་སྐྱོན་བྲལ་མི་ཤིགས་དབྱིངས་ཉིད་ཡེ་ཤེས་འདུ་འབྲལ་མེད། ལྔ་ཡི་རྡོ་རྗེ་གྲུབ་ཉིད་གཉིས་མེད་ངང་གསལ་མི་གཡོ་མི་སེམས་སེམས་ཆེན་པོ། བདུད་སྡེ་བཞི་བཅོམ་དཔའ་བོ་རང་ཉིད་ལྷ་ཡི་ལྷ་ལ་གཉིས་མེད་མོས། གསང་བའི་བདག་པོས་མངོན་ཤེས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ཡི་སྐལ་ལྡན་འདུས་པ་ལ། །དང་པོ་ཇི་ལྟར་ལུང་བསྟན་དུས། །རྒྱལ་བུའི་རིགས་ཅན་ལྟས་ཤར་བ། །འབྲེལ་བས་སྣང་ལ་མངོན་བརྟགས་པ། །ཐུགས་ཀྱི་དགོངས་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བརྟན་པའི་དངོས་གྲུབ་དེ་ནས་འཐོབ། །དོན་དམ་བཅུ་ཀྱང་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི། །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་བུ་རུ། །ཀུ་ཀུ་རཱ་ཛཱནྡྲེ་བྷུ་ཏི། །སིང་ཧ་ཨུ་པ་རཱ་ཛ་དང་། །སྲས་མོ་གོ་མ་ས་ལ་སོགས། །སྒྱུ་འཕྲུལ་དྲྭ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་སྒྲུབ་ཏེ། །རྡོ་རྗེ་འཆང་སར་མངོན་དུ་གཤེགས། །དེ་ཕྱིར་སངས་རྒྱས་མཚན་ཐོབ་ངེས། །དམ་པའི་རིག་ཅན་དྲྭ་མ་དང་། །དེ་རྗེས་མ་འོངས་སྐལ་ལྡན་ཕྱིར། །སྟོང་ཕྲག་བརྒྱ་ཡི་རྒྱུད་དག་ལས། །གཤེགས་ཤུལ་ལམ་མཆོག་འདི་བསྡུས་ཏེ། །སྙིགས་མ་རྒྱུད་དྲག་དུས་ཀྱི་ཚེ། །དུས་ཀྱིས་འདུལ་ཕྱིར་བསྟན་པར་བྱའོ། །སྤྱན་བཟང་འགྲོ་མཐུ་མེད་པ་ཡི། །མིག་བུ་བྲལ་བའི་ཉམས་སྟོར་ནས། །བགྲོད་ཅིང་ཕྱིན་པར་མི་ནུས་བཞིན། །རྩིང་པོར་དམུ་རྒོད་རང་ཉམས་ཀྱིས། །གསང་བའི་སྙིང་པོར་མི་འགྱུར་ཏེ། །བུལ་ཞིང་མེ་ཏོག་འབྲས་བཞིན་འགྱུར། །དེ་བས་བླ་མ་ལུང་བཞིན་བཀུར། །བརྟག་སྤྱོ་ཞེ་གཅོད་བཟོད་བྱས་ཏེ། །མཐོང་བའི་གདུང་བ་ཁུར་མི་ལྟ། །དེ་ཀུན་ཡུན་གྱི་དོན་དུ་བཟོད། །དཀའ་བས་བརྟེན་ནས་རྡོ་རྗེ་རྒྱལ། །ཉམས་ཀྱི་གནང་བ་ཐོབ་འགྱུར་ཏེ། །དེ་ཚེ་རྒྱུད་ཆེན་གཞུང་གི་ཡོན། །ཕུལ་ན་ཐུགས་ཀྱི་ཉིང་ཁུ་སྟེར། །དེ་ཡིས་བཞོན་པ་ཟང་འགྲོ་བཞིན། །གསང་བའི་རྫུ་འཕྲུལ་སྟོབས་ཞོན་པས། །མཐོང་འཇུག་མཐར་ཕྱིན་བཞི་བགྲོད་ནས། །ཡེ་ཤེས་སྙིང་པོའི་གནས་སུ་ཕྱིན། །དེ་བས་རྡོ་རྗེ་གཉེར་ལྡན་མ། །སྤྱང་གྲུང་སེམས་སྲ་མཁའ་འགྲོ་མའི། །གསང་སྔགས་ལྟས་སྟོན་སྤྱོ་བ་ཡིས། །ཅི་ནས་བརྟགས་ཏེ་བཟང་ལྡན་ན། །མི་ལྟོག་བརྟན་བྱས་བརྟས་པ་ཡིས། །ཤི་ཤ་གང་ཡིན་ལག་ཏུ་གཏད། །ངན་པའི་རྟགས་མཐོང་མངོན་ཤེས་པས། །འདོད་པ་ཕྲ་མོ་རྒྱུར་བྱེད་དང་། །ཁེ་དང་གྲགས་པ་ཆེ་བའི་རྒྱུ། །བྱེད་ཅིང་བཅུད་ཆེན་འཛག་དང་དབོ། །མི་ཆགས་མ་རུངས་བྱེད་པ་དང་། །ཟང་ཟིང་མཐའ་གཏོང་དབུས་འཆིང་དང་། །གཡོན་ཅན་ངོ་དགའ་ལྷག་སྤྲད་སྐུར། །ལྐོག་ན་རང་དགར་བྱེད་པ་དང་། །ངག་ལ་རིགས་ངེས་བསམ་མི་ངེས། །བུད་མེད་འདོད་པ་འཆལ་བ་དང་། །མུན་ལྐོག་འཕྲད་པར་འདོད་སྤྱོད་སྙེགས། །ཕོ་མོ་ཏནྟྲ་མ་བསྔགས་ལ། །བསྐལ་པར་གྲིབ་བཞིན་འཁོར་གྱུར་ཡང་། །ཐུགས་ཀྱི་བདེ་བ་སྤྲོ་མི་བྱ། །འཚམས་པར་སྐུ་བརྟན་གཅན་འཕྲང་སྦྱིན། །དེ་མིན་བེའུ་སྦྲེལ་གཡང་སྐྱུར་བཞིན། །འདོད་ཁེངས་ཕྲོགས་ཤིང་བརྩམ་འཕྱར་བས། །མ་རྟོགས་སྤྲོས་ན་དུར་ཁྲོད་གླིང་། །བརྒྱད་ཀྱི་མཁའ་འགྲོ་བཞིན་འདུས་ནས། །ཤ་ཟ་སྲོག་ལ་འབེབས་ཤིང་ལྟུང་། །དེ་ལྟར་བརྟགས་པས་བསྐལ་ལྡན་ཕྱིར། །རང་བཞིན་ཡེ་ཤེས་རང་གནས་དང་། །དེར་མཐོང་དེར་འཇུག་རྣལ་འབྱོར་བཞི། །བར་ཆད་མེད་སྒྲུབ་རྣམ་པར་སྨིན། །དབང་བསྐུར་ཕྱག་རྒྱ་ལྷུན་གྲུབ་ལམ། །མངོན་བྱང་རིམ་པར་བརྗོད་པར་བྱའོ། །དེ་ལ་དང་པོ་ཉིད་སྤྲོས་པས། །དེ་ཉིད་དེ་ཡིས་ཤེས་བྱ་བ། །ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །འཁོར་བ་སེམས་ཕྱིར་བདག་མེད་པས། །དེ་ཕྱིར་དེ་བཞིན་གཤེགས་བསམ་ཡས། །འཁོར་བའི་རང་བཞིན་མི་དམིགས་ཕྱིར། །མྱ་ངན་འདས་པ་ཡོད་མ་ཡིན། །དེ་ལྟར་རིགས་དང་རྒྱུ་མེད་པས། །བྱང་ཆུབ་མཆོག་གི་ངོ་བོ་ལ། །སོ་སོའི་རང་བཞིན་ངེས་ཤེས་ན། །ཡང་དག་ལམ་གྱིས་བཅོས་སུ་མེད། །ཡང་དག་གཤེགས་དང་ལོག་རྟོགས་གཉིས། །ངོ་བོ་ཉིད་ཀྱིས་གནས་འགྱུར་ན། །དེ་ལ་བཅོས་ཤིང་བསྒྱུར་དུ་མེད། །འཆིང་བུ་རིན་ཆེན་བཞི་མི་རིགས། །དེ་བས་དེ་ལྟའང་འདི་བཞིན་བས། །མ་རིག་ལོག་རྟོགས་ཞགས་པའི་རྒྱུ། །ལས་དང་ཉོན་མོངས་བརྒྱད་རྐྱེན་ཀྱིས། །བཅུད་གཉིས་འཁོར་ལོ་གནས་སུ་བསྐྱར། །རྟེན་དང་འདོད་པ་ཐ་དད་པའི། །བདེ་སྡུག་གདུང་བས་ཉམ་ཐག་བྲལ། །རྩོམ་མེད་བཞི་འདུས་ཀུན་ཏུ་ཉམས། །རང་བཞིན་ཉིད་ནི་ཉམས་པ་མེད། །དེ་ལྟའང་རྒྱལ་པོ་ཕྲུ་གུ་འཁྱམས། །དེ་བཞིན་རིགས་ལ་འགྱུར་མེད་པས། །ཤུལ་དོན་རང་ལས་གཞིན་མིན་ཕྱིར། །འཕྲུལ་དགའི་ཚུལ་ཏེ་གཞན་ལས་མིན། །དེའང་རྣམ་གསུམ་གནས་ཚུལ་བཞག །འབྲུ་ལྔར་གནས་པའི་ཐབས་ཆེན་པོ། །འགྲོ་བ་ཀུན་ལས་རང་བཞིན་གནས། །དཀྱིལ་འཁོར་བཞི་དང་སྲོག་ཤིང་གསུམ། །གནས་ནས་ཀ་ལི་སྒྲ་དབྱངས་ལྡན། །ཨེ་ཝཾ་མ་ཡ་མཁའ་ལྡན་དང་། །སྙིང་པོ་རླུང་སྒྲོམ་གནས་ན་ཡོད། །དེ་ཡི་ཏནྟྲ་འབྱིན་པར་བྱེད། །དེ་དོན་དེ་ནི་ཆོས་དེ་དང་། །ཡེ་ཤེས་ཡོན་ཏན་ལས་ཉིད་དེངས། །རྣལ་འབྱོར་ལམ་རིམ་རང་བཞིན་གནས། །སྣོད་ཀྱི་འོད་དབྱིབས་ཕྲིན་ལས་བཞི། །ཐིག་ལེ་བསྙེན་སྒྲུབ་རང་བཞིན་ལྡན། །བཞི་བརྒྱད་ཤི་ར་མ་དྷ་ལ། །རཾ་ཡཾ་གཡས་གཡོན་སྦྱིན་སྲེག་ལྡན། །གནས་བཞིའི་འབྱུང་བའང་ལས་བཞི་སྟེ། །གསང་བའི་མཁའ་ལ་རང་བཞིན་ལྡན། །གནས་རྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །གསང་བ་ནང་གི་འདོད་ཡོན་དང་། །དམ་རྫས་རང་ལྡན་མཆོད་པ་སྟེ། །དེ་དག་རང་གནས་མི་འདའ་བས། །རང་བཞིན་གནས་པའི་ས་མ་ཡ། །རང་བཞིན་ཕྱི་ནང་གསང་བ་ཡི། །འདུ་བྱེད་སྤྱོད་པ་ངང་གིས་གནས། །ཆགས་པས་ཁམས་འགྲུབ་གཅིག་ཤོས་ཀྱིས། །རང་བཞིན་ཡེ་ཤེས་འགྲུབ་བྱེད་པའོ། །རྡོ་རྗེ་ཕུང་པོའི་ཡན་ལག་ཀུན། །རྫོགས་པའི་སངས་རྒྱས་ལྔར་གྲགས་སོགས། །དངོས་ཀུན་ཆགས་དང་སྣང་ཚུལ་གྱིས། །ལས་དང་ངོ་བོ་འབྲས་བུར་གནས། །ཆུ་ཟླ་སྒྱུ་མ་སྤྲུལ་པ་བཞིན། །ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅིར་ཡང་འགྲུབ། །ས་དང་ལམ་དང་འབྲས་བུ་རྣམས། །གང་ཡང་རིགས་རྒྱུད་རྟགས་མིན་པས། །སེམས་ཕྱིར་ཀུན་ཀྱང་དེ་དེ་དང་། །གཟུགས་གཉིས་མཚན་གསུམ་ཡོད་དང་མེད། །གནས་རིགས་སྡེ་ཆ་ཡོད་མེད་རྫོགས། །གཉིས་ཡུལ་བྲལ་བཞིན་དེ་འདིར་འབྲུ་ཆད། ཡེ་ཤེས་དབྱིངས། བདུན་དང་གསུམ་ཕྱིར་དོན་དམ་དང་། །དཔག་བསམ་ཤིང་དང་རིན་ཆེན་དང་། །དེ་ཀུན་ངོ་བོ་ཉིད་རྒྱུད་གནས། །འཇིག་རྟེན་བརྟན་གཡོ་ལ་སོགས་བ། །སྣང་བ་ཉིད་སྐུ་ཆེན་པོ་ཡིན། །རང་བཞིན་ངང་གིས་དེ་ལྟར་གནས། །དེ་ལས་གཞན་པའི་ཐོབ་བྱ་མེད། །ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱི་ངོ་བོ་སྟེ། །འཇུག་གནས་འབྱིན་པས་མཚམས་འདིར་འབྲུ་ཆད་སྙམ། ཕྱོགས་བཅུ་མ་ལུས་ཐམས་ཅད་ལ། །རང་བྱུང་ཆེན་པོ་ཀུན་ཏུ་ཁྱབ། །རང་བྱུང་དེ་ཉིད་དངོས་མེད་པར། །ཀུན་གྱི་ཕྱག་རྒྱ་རྒྱུད་ཡིན་ཕྱིན། །དེ་ལྟ་བུ་ཡི་ངང་དུ་གནས། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །མིང་གྲངས་མེད་པའི་རྒྱུ་ཉིད་དང་། །ཡོངས་སུ་རྫོགས་པ་ཞེས་ཀྱང་བརྗོད། །གསུམ་པ་དངོས་པོ་ཞེན་པ་ཡི། །མྱ་ངན་འདས་དང་འཁོར་བའི་ཆོས། །ཡེ་ནས་རིགས་རྒྱུད་རྟགས་མིན་པས། །སོ་སོའི་གཟུགས་སྒྲ་དྲི་རོ་རེག །ཆོས་ཀྱི་བྱེ་བྲག་ཐ་སྙད་ཀུན། །འཇའ་སྣང་མཁའ་ལྟར་མ་འདྲེས་ཤིག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བ་རྡོ་རྗེ་ཉིད། །རྒྱལ་འགྲོས་མི་མཛད་མ་བཅོས་པ། །རང་བཞིན་ངང་གིས་དབྱེར་མེད་ངང་། །དེ་མིན་ཞེན་པ་དགྲོལ་ཕྱིར་ལས། །ཐ་སྙད་གཉིས་པ་བསམ་བརྗོད་འདས། །ཡུལ་དང་ཤེས་རབ་སྣང་བ་ཡང་། །རང་བྱུང་ཡེ་ཤེས་རང་སྣང་ཟད། །རྒྱུ་འབྲས་སྣང་ཡང་གཉིས་པ་མེད། །ཕྱི་ནང་གསལ་བའང་དེ་ཉིད་ངང་། །དེ་ལྟར་ཡེ་ཤེས་རང་གནས་པ། །ལམ་དང་འབྲས་བུ་ཀུན་དངོས་པོ། །འབྲེལ་པ་བདག་ཕྱིར་ཐབས་ཆེན་པོས། །མངོན་བྱེད་རང་ལས་འབྱུང་བར་ཟད། །ཡེ་ཤེས་རང་ལ་གནས་པའི་ལེའུ་སྟེ་དང་པོའོ།། །།ལྷུན་གྲུབ་ངང་ནས་ཕྱག་འཚལ་ཏེ། །དང་པོ་ལམ་མཆོག་བཤད་པར་བྱ། །ཡང་དག་རང་གནས་མཐོང་འདོད་དགོས། །དུས་སྣོད་རྒྱུ་རྐྱེན་ཐབས་གྲངས་དངོས། །སྤྱོན་ཡོན་དྲོད་རྟགས་ཚད་དང་སྐྱོན། །ཡན་ལག་སྤྲོས་པའི་རྩ་བར་བཞག །བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་ཏེ། །ལོང་བའི་གྲོང་ཁྱེར་ཆེན་པོར་འགྲོ། །དེ་བས་མ་རིག་ལིང་ཏོག་མིག །ལྡོང་པས་རྡོ་རྗེ་ཐུར་མ་མཁན། །མཉེས་ཐོབ་སྔོན་བྱས་གཞུང་ཐོས་ཏེ། །སྤྱན་དབྱེ་དཀྱིལ་འཁོར་མཐོང་བྱས་དགོས། །དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པ་ཉེ་རིང་ཕྱིར། །རིམ་དང་ཅིག་ཆར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིར། །རིང་བའང་རིམ་དང་ཅིག་ཆར་ཏེ། །སྔ་མ་ཏནྟྲ་གཞུང་འདི་ལ། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ལམ་སྟེགས་སྔོན་དུ་རྫོགས་པར་སྦྱོར། །དེ་ཕྱིར་མ་ངེས་རིགས་མཆོག་ནས། །མུན་པའི་ཤེས་པ་ས་དེ་ཉིད། །རང་བཞིན་རྒྱུ་ཡི་མྱོང་བར་བཤད། །ཕལ་པའི་སེམས་བརྒྱད་མཐར་གནས་ཚེ། །སྙིང་པོ་རང་བཞིན་མཚུངས་པ་དང་། །བཤེས་གཉེན་ཀུན་ལ་ལུང་གཉིས་ཐོབ། །ཡོན་ཏན་མཐོང་དང་སྐྱོན་མཐོང་དང་། །དེ་ཡི་སྐྱེ་རྨོངས་བྲོད་པ་དང་། །གཉིས་པའི་རྒྱུ་རུ་གསུངས་པ་ཡིན། །དེ་དག་གསང་སོགས་དམིགས་པ་སྟེ། །སྐད་ཅིག་འཕེལ་བ་དེ་མ་ཐག །དྲུག་ལས་རྩྭ་མེ་བཞིན་གཡོས་ཏེ། །གཞི་ཡི་ཐེག་པ་དང་པོར་ཞོག །དེ་ནས་རིམ་གྱིས་བགྲོད་བྱ་སྟེ། །རྒྱུ་ནས་རྐྱེན་གྱིས་འཕར་བ་སྟེ། །རྣལ་འབྱོར་རྒྱུད་ལ་གནས་པ་ལ། །འདི་སྟོན་མགོན་ལ་ལུང་ཐོས་པས། །དེ་ཇི་བཞིན་དུ་གཉིས་དང་བཞིས། །མཆོག་གི་སྤྱོས་པའི་སེམས་འབྱུང་འགྱུར། །གཞི་དེའི་ཁུང་དུ་ཆུད་སྨོན་པས། །ལྷག་པ་གཟུགས་བརྙན་འཇུག་པ་སྟེ། །མཆོག་གི་དམ་ཚིག་དེ་རུ་ཕྱིན། །རིགས་ངེས་འགྱུར་ལ་ཕན་པ་བཅུ། །ནུས་པ་གཉིས་ཀྱི་བྱིན་རླབས་བཞག །རང་གི་སྤྱན་མཆོག་འབྱེད་ལ་བརྩོན། །རྒྱུ་ཡི་དཀྱིལ་འཁོར་མཐོང་བྱའི་ཕྱིར། །ཐོས་བསམ་དམ་པ་ལེན་པར་བྱེད། །ཁ་ཅིག་དུས་མཐའི་ཅིག་ཆར་བ། །བསྐལ་པ་རྡུལ་སྙེད་སྔོན་པོ་བས། །ཐུན་མོང་དེ་སྙེད་སྦྱངས་པའི་མཐའ། །སྒྱུ་འཕྲུལ་དྲྭ་བའི་དོན་ཞུགས་པས། །སྔར་སྦྱངས་འདི་ཚེ་ངེས་འབྱུང་བས། །རིམ་གྱིས་སྦྱ་ལ་ཅིག་ཆར་རོ། །ལ་ལ་དབང་པོ་རྣོན་པོ་དག །ཐེག་པ་ཆེན་པོ་གཉིས་འཇུག་སྟེ། །མ་སྦྱངས་གྲུབ་པ་གསུམ་ཕྱིར་གྱིས། །མཐའ་རྟེན་མྱུར་རྣོ་རྒྱ་ཆེ་ཡངས། །ཟབ་དོན་རྒྱུ་ཡི་གང་ཟག་སྟེ། །ཉིད་ཀྱང་རྐྱེན་དང་རིམ་པ་བས། །ཕྱེ་བས་རྒྱུ་འབྲས་ཆེན་པོ་རྣམས། །མ་ངེས་འཇུག་དང་འདི་ཉིད་འདུའོ། །དེ་དེའང་རང་སེམས་དམ་པའི་ངོས། །བཤེས་གཉེན་རྣམས་དང་ངོ་བོས་འབྲེལ། །དེ་ལྡན་བྱ་བྱེད་སྣོད་བཅུད་དུ། །ཆེན་པོ་ལུང་དང་འབྲེལ་པ་དང་། །མགོན་དང་བྱ་བྱེད་ཐུགས་རྗེས་འབྲེལ། །དེ་ཕྱིར་མཆོག་ལུང་རྡོ་རྗེ་རྣམས། །དང་མཇལ་བྱེད་ཕྱིར་རྒྱུ་རྐྱེན་དྲུག །ལྡན་པས་མ་ངེས་འཇུག་པ་ནི། །དབང་པོ་ཅི་བཞིན་མོས་རྐྱེན་གྱིས། །རྒྱུའམ་བྱ་བའམ་གཉིས་ཀ་འམ། །རྣལ་འབྱོར་ཐེག་པ་སྦྱོང་བར་བྱེད། །དེ་ནས་དེ་བཞིན་འདིར་འཇུག་པའང་། །སྔོན་བཞིན་གཡོ་སྨོན་འཇུག་སེམས་སྦྱོར། །གནས་བས་མཐར་ཕྱིར་བྱེད་པ་ནི། །ལྟོས་པར་རིང་བས་དུས་ཉིད་དེ། །མ་ངེས་པ་ནས་འབྲེལ་རྒྱུ་རྐྱེན། །ལྡན་པས་རྣལ་འབྱོར་མཆོག་སྦྱོར་བ། །མུན་པའི་ཟེར་ཚུལ་རྩྭ་མེ་ལྟར། །གཡོ་སྨོན་འཇུག་པའང་སྔོན་བཞིན་ཏེ། །བདུན་ལྡན་པའང་ཏནྟྲ་ཡི། །གཞུང་ཉིད་ངང་ཚུལ་རང་བཞིན་སོགས། །སྣོད་ཡོན་ལྡན་པས་བསླབ་པ་ལ། །གནས་པ་དཀྱིལ་འཁོར་ཆེན་པོ་རུ། །འཇུག་པ་བཞི་ཡི་ཡན་ལག་མཆོག །དང་པོ་ཆེད་དུ་གཉེར་བར་བྱེད། །གང་དེ་ཐོས་པས་ཚོལ་བའི་ཚེ། །རྒྱུ་གཉིས་རྐྱེན་གྱིས་བཟོད་ཐོབ་དང་། །རང་བཞིན་ངང་གིས་བཟོད་ཐོབ་པས། །རེ་སྨོན་སེམས་ཀྱིས་ཉན་བརྩོན་སྦྱར། །གང་དག་མཉམ་བསམ་ཤེས་རབ་ཆེ། །ཉན་ཅིང་ཐོས་འཛིན་བསམ་པ་དང་། །བསམ་པའི་ཚེ་ན་རྟོག་དཔྱོད་པ། །གཉིས་པོ་འདི་དག་ཤེས་པའི་རྒྱུ། །མཁན་པོ་ལུང་དག་མན་ངག་བཅས། །ལྷན་ཅིག་བྱེད་པའི་རྐྱེན་དུ་འདོད། །རང་བཞིན་བདུན་དང་མཚུངས་ལྡན་པས། །གཅིག་ཤོས་རྒྱུ་རུ་ངེས་པ་ཡིན། །དེ་ལྟར་ལྡན་པས་སྤྱན་འཚོལ་ཚེ། །གཏན་ཚིགས་རྣམས་ཀྱིས་སྨལ་བྱས་ཏེ། །ནོར་བའི་ཤེས་རབ་མིག་གསལ་ནས། །མ་ནོར་མིག་ལ་བླང་བར་བྱ། །གཞི་དང་གཏན་ཚིགས་འགྲུབ་པའི་དོན། །རྣམ་གསུམ་སྔ་མའི་གཞི་རུ་བཞག །ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པའི་དེ་ཁོ་ན། །གཏན་ལ་འབེབས་ཤིང་འཇལ་བྱེད་བའོ། །དེ་ཉིད་དངོས་ལྔ་ཚུལ་དང་ཚིག །བརྗོད་པ་ལྔས་མཚོན་འབྱུང་བའི་གཞི། །དེ་ལ་གཏན་ཚིགས་དངོས་ལྔ་ཡིས། །བརྡ་སྤྲོད་རྗེས་སུ་འཇུག་བསྟན་པ། །བསྲེག་བཅད་བརྡར་བའི་གསེར་བཞིན་དུ། །དངོས་ལྔས་ལེགས་པར་བརྟགས་ཏེ་དབབ། །དེ་ཡང་ཡོངས་སུ་བརྟག་གཞི་ནི། །དབང་པོ་ཡུལ་དུ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་བ། །འཁོར་དང་འདས་དངོས་ཞེན་སྣང་བརྟག །འཇིག་རྟེན་འདི་ན་ཅི་འདོད་པའི། །མིང་དང་མཚན་མར་འཛིན་པ་ཡི། །ལོག་རྟོག་སོ་སོའི་རང་སྤྱི་མཚན། །ཇི་ལྟར་གནས་པ་སྤྱད་པར་བྱ། །དངོས་གཞིས་ཞེན་དངོས་དུས་གསུམ་ཆོས། །སྐད་ཅིག་མ་ལུས་ལ་རྫོགས་ཕྱིར། །དེ་དངོས་མཐོང་བར་ཡང་དག་པར། །རིག་བཞིན་ཀུན་ཀྱང་དེ་ལྟར་ཤེས། །ཀུན་བརྟགས་ཤེས་པ་བར་མར་འགྱུར། །སྤྱི་ཡུལ་ལུས་མེད་གྲིབ་མ་བཞིན། །མེད་པས་མི་བཏུབ་རང་ཉིད་ལ། །མི་བཏུབ་མཛུབ་མོ་བཞིན་དགོས་པས། །གཉེན་པོ་མེད་པས་དག་མིན་ཞིང་། །བར་མའི་ཡུལ་ཕྱིར་ངེས་ཚིག་འགྲུབ། །དེ་ལྟར་ལྔ་ཡི་དེ་དེ་ལ། །དེ་དེའི་རང་བཞིན་བརྟག་བྱ་བ། །རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་སེམས་གསང་སྔགས། །ངེས་ལུང་ཡིན་ཕྱིར་ཆོས་ཚུར་སྟོན། །བརྗོད་དང་འདྲ་བར་བརྡ་སྤྲོད་པས། །ངོ་བོ་ཉིད་ཀྱི་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཡང་ན་ས་གནས་མིག་ལྡན་པ། །རང་བཞིན་ཤུགས་ཀྱི་སྐྱེ་མེད་དོན། །མ་བཙལ་ངང་གིས་སྣང་བྱེད་པའང་། །བརྗོད་མེད་དོན་གྱི་བརྗོད་དང་འདྲ། །གང་དག་གཟུགས་དང་རྣལ་འབྱོར་གྱིས། །མཐོང་ཐོས་ལ་སོགས་རང་བཞིན་བརྡ། །དཔའ་བོའི་བརྡ་དང་དགོས་པ་དང་། །རང་གི་ཏིང་འཛིན་གྱིས་བརྡ་སྤྲོད། །དཔེར་ན་ས་འོག་གསེར་རླངས་དང་། །མེ་ལོང་ཉི་མ་ངད་བཞིན་དུ། །ཀུན་ཀྱང་རིག་ཕྱིར་རང་བཞིན་སྤྲོད། །རང་བཞིན་ངང་གིས་བརྗོད་འདྲར་སྣང་། །ཀུན་ཀྱང་བྲག་ཆའི་སྒྲ་བཞིན་ཕྱིར། །གྲགས་སྟོང་དབྱེར་མེད་རྡོ་རྗེའི་གསུང་། །སྒྲ་ཐོས་ཉིད་ཀྱིས་དེ་ཉིད་དུ། །སོ་སོར་མ་བརྟག་འཇལ་བར་བྱེད། །སོ་སོའི་སྐད་དུ་བརྡ་སྤྲོད་ལྟར། །ཚིག་དབྱངས་སྙན་པོའི་ངག་ལྟ་བུ། །མོས་སྤྱོད་གྲོལ་བཞིན་བརྗོད་པ་ཡིས། །བརྡ་སྤྲོད་ཡོངས་སུ་གྲོལ་བར་བྱེད། །དང་པོ་རྒྱུད་ལ་ཐ་དད་ཕྱིར། །གང་མོས་གྲོལ་བ་ཡོད་མེད་ཀྱང་། །ཐོས་བསམ་བསྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་འགྲུབ་བྱེད་ཕྱིར། །མི་དམིགས་ངང་ལས་དམིགས་པ་ཡིས། །ཆོ་འཕྲུལ་ཚིག་གིས་མཚོན་བྱར་བྱ། །གསུང་ལྔ་ཐོས་པ་ལྔ་ཚུལ་ཡང་། །རྗེས་སུ་ཚིག་གིས་མཚོན་པར་བྱེད། །ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་རྒྱུད། །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཐམས་ཅད་གསང་སྔགས་ངོ་བོ་ཉིད། །མཐའ་དང་དབུས་མེད་དེ་བཞིན་ཉིད། །དབྱེར་མེད་ངང་དུ་གནས་པ་ལ། །ཡེ་ཤེས་རྟོགས་པའི་དོན་བྱའི་ཕྱིར། །ཕྱོགས་དང་དབུས་སུ་གནས་པར་བྱ། །ཀུན་ལ་དེ་ལྟར་འབྱོར་པར་གྱིས། །ཡི་གེ་ཚིག་དང་སྒྲ་སྤངས་པའི། །བརྗོད་མེད་ངང་དུ་གནས་པ་ནི། །གསུང་ཉིད་རང་བཞིན་མེད་པ་ཡི། །ཆོས་རྣམས་ཐམས་ཅད་ཡེ་ནས་དག །ཐམས་ཅད་ཐུགས་སུ་གྱུར་པས་ན། །སྒྲ་དང་ཚིག་ཏུ་གནས་པ་མིན། །འདས་དང་མ་འདས་ཐམས་ཅད་ཀུན། །ཡང་དག་ཤེས་པས་རབ་བརྟགས་ན། །རང་བཞིན་མེད་ལ་ཅིར་ཡང་སྣང་། །སྣང་བ་ཉིད་ན་དབྱིངས་ཡིན་ཏེ། །དེ་ལྟར་རྟོག་པའི་ཤེས་པ་ནི། །ཀུན་ལ་དབང་བསྒྱུར་རང་དབང་ཅན། །ཐམས་ཅད་ཚིག་གི་སྒྲ་ལྟར་གནས། །འདི་ནི་ཡེ་ཤེས་གསུང་མཆོག་ཡིན། །ཆོས་རྣམས་བསམ་གྱིས་མི་ཁྱབ་སྟེ། །མཐའ་དང་དབུས་མེད་ཀུན་ཏུ་ཁྱབ། །ཁྱབ་དང་ཁྱབ་མེད་རྡོ་རྗེའི་སྐུ། །སྒྲ་སྐད་སྣ་ཚོགས་བསྒྲགས་པ་ཡང་། །དངོས་པོ་མེད་ལ་དངོས་པོའི་སྒྲ། །ཇི་ལྟར་པི་ཝཾ་ལག་ཐོགས་ནས། །སྒྲ་ནི་སྣ་ཚོགས་འབྱུང་འགྱུར་ཡང་། །དངོས་པོ་མེད་དེ་དེ་བཞིན་ཉིད། །བྱང་ཆུབ་སེམས་དཔའ་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བཞིན་དུ་སྐུ་ལ་སྣང་། །ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་ཏུ་བརྟག་ནས་སྟོན། །ཇི་སྙེད་མང་པོ་དོན་བརྗོད་ཀྱང་། །རྡོ་རྗེ་གསུང་ལ་སྤྲོས་པ་མེད། །སྤྲོས་མེད་དེ་ཉིད་སྣ་ཚོགས་པ། །ཀུན་ལ་བརྡ་འཇལ་ཡེ་ཤེས་གསུང་། །སྒྲ་དང་མིང་ཚིག་ཀུན་ལས་འདས། །ཐམས་ཅད་པདྨ་ཆགས་མེད་པའོ། །དབང་པོ་རྣམ་གཉིས་བསྲུབས་པ་ཡིས། །མཁའ་ལ་ཉི་ཟླ་དུས་གཅིག་ཤར་། །མི་འཇིགས་ཚུལ་དུ་ཟིལ་མནན་མཐོང་། །དེ་ཕྱིར་གཏན་ཚིགས་ལས་མ་བརྗོད། །དེ་ལྟ་མོད་ཀྱང་བསྡུ་ན་གཉིས། །བཞི་རྗེས་མི་སྤྱོད་གཅིག་རྗེས་སྤྱོད། །རྣམ་གཉིས་ཚུལ་གྱི་མཐོང་བྱེད་པས། །དབང་པོ་གཉིས་པོ་མཐུན་སྦྱར་བའོ། །དེ་ལ་སྔ་མས་གོ་བྱེད་པའང་། །སེམས་ཅན་མ་ལུས་ཐམས་ཅད་ཀུན། །ཡེ་ནས་བྱང་ཆུབ་སྙིང་པོར་གནས། །དེ་ཕྱིར་སྤྱོད་པའི་བྱ་བྱེད་མེད། །ཚིག་དང་ཡི་གེས་མི་མཚོན་ཏེ། །སངས་རྒྱས་ཀྱིས་ཀྱང་བསྟན་པར་དཀའ། །རྒྱལ་བའི་སྲས་པོ་ཅང་མི་གསུངས། །མ་གསུངས་པ་ནི་རྒྱ་ཆེར་བཤད། །འཆད་དང་མཉན་པ་གཉིས་ཀ་མེད། །དཔྱོད་པ་ཞུགས་ན་རྟོག་པའི་གཞི། །རྟོག་པ་ཞུགས་ན་དམིགས་པའི་རྟེན། །དམིགས་པ་ཞུགས་ན་འཛིན་པའི་གཟུང་། །འཛིན་པས་ཟིན་ཕྱིར་གྲོལ་མི་འགྱུར། །དེ་བས་གསེར་ལྟར་གསེར་བཞིན་དུ། །བདག་ཕྱིར་བྱ་བྱེད་མི་དམིས་པས། །རྟོག་དཔྱོད་དམིགས་འཛིན་མི་འཚོལ་བའི། །དེ་བརྗོད་ཉིད་ཀྱིས་དེ་ཉིད་མཐོང་། །སུས་ཀྱང་མ་བཅིང་བཅིངས་མེད་དེ། །བཅིང་བར་བྱ་བའང་ཡོད་མ་ཡིན། །བཅིངས་མེད་རྣམ་པར་གྲོལ་མེད་པའི། །གྲོལ་བར་མི་འདོད་བཅིངས་དང་བྲལ། །སོ་སོར་གང་ལའང་རྟོག་མེད་པས། །སོ་སོར་སྣང་བ་ཀུན་རྟོག་ཕྱིར། །སོ་སོར་རྟོག་པའི་མཆོག་ཉིད་དེ། །བཏགས་པ་མེད་པའི་བླ་དྭགས་ཡིན། །ཁ་ཅིག་ཕྱི་མས་གྲོལ་བྱེད་པ། །བརྗོད་པའི་དངོས་པོ་སྤྱོད་ཡུལ་ལ། །སོ་སོར་རྟོག་པའི་གཏན་ཚིགས་རྐྱེན། །དོན་དང་མཐུན་དང་མི་མཐུན་པས། །ཕྱི་མ་མི་མཐུན་མཚོན་བྱེད་ལྟར། །ཆོས་ཀུན་མཐའ་ལས་འདས་པ་དང་། །མཐའ་དག་ཡང་དག་དོན་མེད་པས། །འདི་ལྟར་འདི་ཞེས་བསྟན་མེད་པའོ། །རང་གི་ངོ་བོ་བསྟན་པར་དཀའ། །འོན་ཀྱང་ཡིན་མིན་འཛིན་གྲོལ་ཕྱིར། །མདོར་ན་ཇི་ལྟར་བརྟགས་བསམ་བཞིན། །འགྱུར་བ་ཀུན་གྱི་ངོ་བོར་སྟོན། །དེ་མཚོན་ཅི་ཡང་ཡིན་པའི་ཕྱིར། །སེམས་ཆོས་ཅི་ཡང་མ་ཡིན་ནོ། །དེ་ཕྱིར་མ་ཡིན་ཀུན་ཡིན་པས། །ཅི་ཡང་ཡིན་ནོ་ལྷུན་གྱིས་གྲུབ། །མཐའ་ཀུན་ཕྱོགས་སུ་མ་ཆད་ཕྱིར། །མཐའ་དང་བྲལ་ཕྱིར་མ་བྲལ་བའོ། །གང་ཡང་མ་སྤང་མི་ལྡན་པས། །མ་བྲལ་ཕྱིར་ན་བྲལ་ཞེས་བྱ། །ངོ་བོ་ཕེབས་པས་རྒྱས་པར་འགྱུར། །ཅིག་ཤོས་མཐུན་པར་བསྟན་པ་ཡང་། །བྱེ་བྲག་བསྡུས་པས་ཀུན་ཁྱབ་གསུམ། །དེ་ལྡན་རྣམ་པ་བསམ་ཡས་པས། །ཆ་ཙམ་བརྗོད་པ་འདི་ལྟ་མོད། །ཆོས་རྣམས་ཡོངས་ཀྱིས་དག་པ་ཡི། །རྣམ་བཞི་ཚུལ་གྱིས་དོན་རྟོགས་མངོན། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་ཉིད་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་རླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཉིད་ལ་དབང་བསྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །འདས་དང་མ་འདས་ཐམས་ཅད་ཀུན། །ཡང་དག་ཤེས་བས་རབ་བརྟག་ན། །རང་བཞིན་མེད་ལ་ཅིར་ཡང་སྣང་། །སྣང་བ་ཉིད་ན་དབྱིངས་ཉིད་དེ། །གཤེགས་སྐུ་སྒྱུ་མར་སྣང་བ་དང་། །ལོག་རྟོག་སྒྱུ་མར་སྣང་བ་གཉིས། །གཞི་རྩ་མེད་དེ་རང་བཞིན་ཏེ། །རིགས་དང་རྒྱུད་དུ་བརྟག་ཏུ་མེད། །རིགས་དང་ཁ་དོག་དབྱིབས་མེད་ལ། །ཕྱི་ནང་སྣོད་བཅུད་ཐམས་ཅད་སྣང་། །སྣང་བ་ཉིད་ན་ཆོས་ཀྱི་སྐུ། །ཅིར་ཡང་འགྱུར་ཞིང་ཅིར་ཡང་འགྲུབ། །ཉོན་མོངས་རང་དང་སྤྱི་བསྟན་པས། །མཚན་ཉིད་མ་ནོར་རབ་རྟོགས་ན། །རྣམ་པར་བྱང་བའི་ལམ་དུ་འགྱུར། །དེ་ཕྱིར་རང་སྤྱིའི་གཏན་ཚིགས་གཅེས། །མཐའ་དང་དབུས་མེད་དུ་མ་བྲལ། །གང་ཡང་མིན་ཏེ་དེ་བཞིན་ཉིད། །དབྱེར་མེད་པར་ཡི་ཚུལ་རྟོགས་ཕྱིར། །མཐའ་དང་བྲལ་བ་དེ་བཞིན་ནོ། །འབྱུང་བ་ཆེན་པོ་ལྔ་རྣམས་ལ། །རང་བཞིན་མེད་པས་གཞིག་པའི་ཕྱིར། །གཅིག་ལའང་ལྔ་ལྔར་དབྱེ་བྱ་ཞིང་། །མུན་གྱི་དབྱིངས་སུ་ཐིམ་པར་བྱ། །མུས་གཉིས་སྨྲ་བསམ་བརྗོད་ལས་འདས། །ནམ་མཁའ་གཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །རྟེན་པ་གཉེན་འཁྲུས་གཟུགས་མེད་རླུང་། །གསལ་བསྲེག་མེ་ལྟར་ཤེས་པར་བྱ། །དེ་བཞིན་ཕུང་པོ་དབང་ཡུལ་ལྔ། །ཉོན་མོངས་ཁ་དོག་ལ་སོགས་པ། །དོན་དང་ངོ་བོ་གཅིག་མ་འདྲེས། །དེ་ཕྱིར་དེ་ཡི་མཚོན་རྟོགས་བྱེད། །གཏན་ཚིགས་གཏན་ཚིགས་བརྗོད་པ་རྣམས། །བསྒྲུབ་བྱ་གང་ཡིན་ཤེས་དོན་ལ། །ངེས་ཚིག་ངོ་བོ་མཚན་ཉིད་སོགས། །གང་ནས་འབེབས་ཀྱང་རྒྱས་པར་བྱ། །ཐམས་ཅད་འཇིགས་མེད་དམ་ཚིག་དང་། །ཤེས་པའི་དམ་ཚིག་ལྡན་པར་བྱའོ། །ཐམས་ཅད་མ་ལུས་དོན་འབྱུང་བ། །ཚིག་གིས་མཚོན་ལས་གུད་ན་མེད། །སྒྲ་ཉིད་དོན་གྱི་དངོས་པོ་མིན། །དོན་ཉིད་སྒྲ་ལས་གུད་ན་མེད། །མིང་ཚིག་སྒྲ་ལ་མ་བརྟེན་པར་། །བློ་ཡི་གཏིང་དུ་གོ་བར་བྱོས། །གསུམ་བཞི་ལུས་དོན་བརྗོད་བྱ་བ། །སྔགས་མཆོག་བླ་ན་མེད་པ་ཡི། །མཚན་མ་ཀུན་ཏུ་མི་རྟོག་པར། །མཉམ་པའི་ངང་དུ་ཐམས་ཅད་ཤེས། །ཀུན་ཀྱང་མཉམ་པ་ཉིད་ཡིན་པས། །འཇིག་རྟེན་འདས་དང་འཇིག་རྟེན་པའི། །སོ་སོའི་ལྟ་བ་བརྗོད་མི་བྱ། །དག་ཅིང་བླང་བར་བྱ་བ་མིན། །སྤྱིར་ནི་ལོག་རྟོག་བསམ་ཡས་པ། །ཡེ་ནས་ཡོད་པ་མ་ཡིན་ཏེ། །སོ་སོར་འཛིན་རྟོག་བག་ཆགས་ཀྱི། །གཟུང་འཛིན་དྲྭ་བས་སྒྲིབ་འགྱུར་ཏེ། །ཅིར་ཡང་མེད་ལ་ཅིར་ཡང་སྣང་། །བྱང་ཆུབ་སྙིང་པོ་གཞི་ལས་གོལ། །བདེན་མི་མ་གྲོལ་བཅིངས་པ་དང་། །དུས་དགྲས་འཇོམས་བསླུས་མི་རྟག་དང་། །འཕགས་ལམ་བྲལ་དགོས་བཙོན་རར་ཆུད། །སྔག་བསྡུལ་མི་འཇིལ་དགུ་ཕྱིར་འཕྲུལ། །དེ་བས་མཉམ་ཉིད་མ་རྟོགས་པས། །དུག་ལྔ་འཇོལ་སྤྱོད་རྒྱུད་ལྔར་འཁོར། །དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པ། །ལྷ་དང་མི་ཡི་སྐྱེ་གནས་ཏེ། །མཉམ་ཉིད་ལ་རྟོགས་འདོད་ཁམས་འཁོར། །མཉམ་པའི་དོན་ཉིད་མ་རྟོགས་ཤིང་། །ཚད་མེད་བཞི་དང་བསམ་གཏན་བཞི། །རིམ་པར་སོ་སོར་བདག་འཛིན་ཅིང་། །གཟུགས་སོགས་ཀུན་ལ་བདག་ཏུ་རྟོགས། །འདི་ནས་ཚངས་གནས་རིམ་པར་སྐྱེ། །མཉམ་དང་གཟུགས་མེད་མ་རྟོགས་ནས། །མིང་བཞི་མེད་པར་མི་ཤེས་ཏེ། །སྐྱེ་མཆེད་བཞི་ལ་གནས་འགྱུར་བ། །སྲིད་པའི་རྩེ་མོའི་ས་རུ་སྐྱེ། །རྟག་ཆད་གཉིས་ཀར་གང་གིས་བློ་ཞེན་པ། །དོན་གྱི་སྙིང་པོ་ཉིད་ལས་གོལ་བར་གསུངས། །ས་དགུ་དག་པའི་ཡེ་ཤེས་ནི། །ས་དགུ་མི་སྤངས་ངང་དུ་བཅོམ། །གཉིས་མེད་མ་རྟོགས་ཐམས་ཅད་ལ། །བདེན་བཞིའི་དངོས་པོ་ཡོད་ལྟ་ཞིང་། །སྤོང་དང་མི་སྤོང་བྱེད་འགྱུར་ན། །འདི་ནི་ཉན་ཐོས་ས་པ་ཡིན། །ལས་དང་ཉོན་མོངས་ཐམས་ཅད་ལ། །མཉམ་པའི་དོན་ཉིད་མི་ཤེས་ཤིང་། །རྟེན་འབྲེལ་རྒྱུ་འབྲས་ཡོད་འཛིན་ན། །འདི་ནི་རང་སངས་རྒྱས་ཀྱི་ས། །མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་འབྱེད་པ། །ཆོས་དང་གང་ཟག་བདག་མེད་ན། །འདི་ནི་བྱང་ཆུབ་ས་པ་ཡིན། །བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་དོ། །ཀུན་རྫོབ་ཙམ་དུ་ཐམས་ཅད་ལ། དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ནོ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པའི། །ཡང་དག་ཉིད་དུ་རབ་ཏུ་རྟོགས། །མཉམ་ཉིད་ངང་ལས་མ་གཡོས་བཞིན། །ཐབས་ཀྱི་ཕྱག་རྒྱ་ཆེན་པོར་རྟེན། །ཐབས་དང་ཤེས་རབ་རྣམ་པར་དག །ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྤྱོད་ཉིད་ནས་རྣམ་པར་དག །དེ་ཕྱིར་ཀུན་རྫོབ་རྫུན་མི་ལྟ། །གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །རེས་བསྒོམ་བྱ་བ་ལས་ཀྱི་ས། །ལྷུན་གྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་རླབས་རྡོ་རྗེའི་དབྱིངས་སྤྲུལ་པས། །བླང་དོར་བྱེད་པའི་རྣལ་འབྱོར་པའོ། །དེ་ལྟར་དངོས་བརྟག་དམིགས་ཕྱེས་ནས། །མ་ནོར་དོན་གྱི་གྲུབ་མཐའ་ནི། །ཐེག་པ་མཐོ་དམན་ཐམས་ཅད་དང་། །འཇིག་རྟེན་ལྟ་བ་ཐམས་ཅད་ཀུན། །ཡེ་ཤེས་ཆེན་པོས་རབ་བརྟག་ན། །རང་བཞིན་མེད་ལས་ཅིར་ཡང་འགྲུབ། །རང་བཞིན་དབྱིངས་ལས་ཉམས་པ་མེད། །ཉམས་པའི་དོན་ནི་ཇི་ལྟ་བུ། །མཉམ་ཉིད་རང་བཞིན་གང་ཡང་མེད། །ཀུན་ཡིན་ངོ་བོ་འདི་འདྲ་མེད། །ཉམས་དང་རྟོག་པ་གང་ཡང་མེད། །བྱང་ཆུབ་སེམས་ཞེས་བརྗོད་པ་ནི། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ན་ཙམ། །དུས་གསུམ་སངས་རྒྱས་སེམས་ལ་གནས། །བྱང་ཆུབ་སེམས་རྣམས་ཐམས་ཅད་ནི། །ཤིན་ཏུ་བརྟག་དཀའ་གཏིང་ཟབ་པས། །མ་དམིགས་མི་དམིགས་དམིགས་སུ་མེད། །སེམས་ཉིད་དེ་ནི་ཅི་ལྟ་བུ། །བྱང་ཆུབ་དེ་ནི་སེམས་ཡིན་ཏེ། །སེམས་དང་བྱང་ཆུབ་དབྱེར་མེད་པས། །སེམས་ཅན་མ་ལུས་ཐམས་ཅད་དང་། །དུས་གསུམ་ཆོས་རྣམས་ཐམས་ཅད་ཡིན། །ཡོད་ལས་བཙལ་ན་སྒྲོ་བཏགས་ཏེ། །སྒྲོས་བཏགས་བརྒྱད་དུ་ལྟུང་བར་འགྱུར། །མེད་ལས་བཙལ་ན་བསྐུར་བཏབ་སྟེ། །སྐུར་བཏབ་བཅུ་ཡི་གནས་སུ་ལྷུང་། །ཡོད་མེད་གཉིས་ལ་བཙལ་བྱས་ན། །དེ་སྙེད་ལུང་དུ་མ་བསྟན་འགྱུར། །དེ་ཕྱིར་ནམ་མཁའ་ཡོད་མེད་ཅེས། །བླུན་པོ་རྣམས་ནི་རྩོད་པར་འགྱུར། །མཁས་པས་ནམ་མཁའ་རང་བཞིན་ལས། །མེད་པར་མི་འཛིན་ཡོད་མི་འཛིན། །སེམས་ཉིད་ཡོད་མེད་ཀུན་ངོ་བོ། །སྒྲ་ཙམ་བརྗོད་དུ་རུང་མོད་ཀྱི། །ངོ་བོ་འདི་ཞེས་བསྟན་དཀའ་ལ། །ཡོད་དང་མེད་ཅེས་ཅི་བྱར་ཡོད། །སེམས་ཉིད་ཡེ་ནས་སངས་རྒྱས་ལ། །དེ་མིན་ལྟ་བ་བཟློག་པའི་ཕྱིར། །གཉིས་མེད་མཉམ་དང་སངས་རྒྱས་དང་། །བདག་ཉིད་ལྷུན་གྲུབ་ཆོས་དབྱིངས་དག །བྱང་ཆུབ་ཆོས་ཉིད་སྟོོང་བསམ་འདས། །དེ་བཞིན་ཉིད་དང་སྐྱེ་འགགས་མེད། །མཐའ་བྲལ་འདས་དང་གྲོལ་སོགས་སུ། །བླ་དྭགས་ཙམ་དུ་བརྗོད་པ་ཡིན། །ཡེ་ནས་ཚིག་དངོས་ཚིག་ལམ་ཆད། །སེམས་ཉིད་དེ་ཀུན་རང་བཞིན་ལ། །དེ་དག་སྒྲ་བརྗོད་བསྙད་ཅི་ཡོད། །བསྟན་བརྟག་དཀའ་བར་རྒྱལ་བས་གསུངས། །མ་ཆགས་པདྨ་འདྲ་བ་ཡི། །ཡེ་ཤེས་ཅན་གྱི་སྤྱོད་ཡུལ་དེ། །ཀུན་དང་ཐུན་མོང་དེ་མ་ཡིན། །དེ་བཞིན་གཤེགས་པའི་སྤྱོད་ཡུལ་དེ། །སྐྱེ་བུ་བློ་རྩལ་རབ་ཀྱིས་རྟོགས། །དེ་ཕྱིར་བློ་ཅན་རྣམས་ཀྱིས་བརྩོན། །ཤེས་པའི་མཚན་ཉིད་དངོས་མིང་གྲངས། །ངོ་བོ་རིམ་པས་ཕྱེ་བ་ཡིན། །སྔ་མ་ཁ་ཅིག་མངོན་སུམ་ལ། །དྲུག་གམ་བརྒྱད་ཉིད་གནས་འགྱུར་ཕྱིར། །ཤེས་རབ་དབང་དྲུག་ཚུལ་གནས་བརྗོད། །ངེས་པར་མ་ནོར་མཐོང་བ་ཡང་། །ཡེ་ཤེས་ལྔ་རུ་གསལ་བའི་ཕྱིར། །བརྒྱད་ཀྱི་ངོ་བོ་དེ་ཉིད་དེ། །ལྔ་དང་དམིགས་བྱེད་མེད་ཕྱིར་ཏེ། །དེ་བས་ཡུལ་མེད་རང་གསལ་བའོ། །དབྱིངས་དང་རིག་པ་གཉིས་མེད་པར། །དེ་བཞིན་ཉིད་དུ་རྡོ་རྗེའི་རིགས། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་རང་སྣང་བའོ། །ཡངས་ཤིང་རྒྱ་ཆེ་ལྷུན་གྲུབ་ནི། །ཕྱི་ནང་སྣོད་བཅུད་ཡེ་ནས་དག །བདག་རྟོག་ཉིད་ཀྱང་དབྱིངས་ཉིད་ཡིན། །འདི་ནི་རྡོ་རྗེ་མཉམ་ཡིན་ནོ། །ཤེས་དང་སྤྱོད་ཡུལ་གཉིས་མེད་པས། །ཐམས་ཅད་མ་ལུས་གཅིག་པུའི་ངང་། །མ་འདྲེས་ཡོངས་རྫོགས་གསལ་སྟོང་གཟུགས། །ལྟ་དང་ལྟ་བར་བྱར་མེད་པར། །ཕྱོགས་བཅུ་ཞིང་ཁམས་ཐམས་ཅད་མཐོང་། །གང་དུའང་མ་མཐོང་སྤྱན་གྱི་མཆོག །ཁྱབ་གསལ་རང་བཞིན་གོ་བའི་སྒྲ། །ཐོས་པ་མེད་པར་ཐོས་པའི་ཕུལ། །དྭངས་པས་ཚིམ་བྱེད་ཆོས་ཉིད་དྲི། །སྣོམ་བྱེད་མེད་པར་ཚོར་བའི་ཤངས། །དོན་བཅུད་ཉམས་སུ་མྱོང་བའི་རོ། །མྱོང་བའི་བྱ་བྱེད་གཉིས་མེད་མྱོང་། །ཡང་དག་དོན་ལ་རེག་པ་ཉིད། །རེག་པ་ཀུན་དངོས་རེག་དང་བྲལ། །ཆོས་ཁམས་སྣ་ཚོགས་ཀུན་མཁྱེན་པ། །རང་རིག་རྒྱལ་པོ་སྣང་བའོ། །དེ་བས་བདག་འཛིན་རང་གསལ་བའོ། །བདག་བཅས་བདག་དང་བྲལ་བ་ཡི། །དོན་དང་སེམས་ཅན་རྟོག་མེད་གསལ། །རང་བྱུང་ཡེ་ཤེས་ཐམས་ཅད་མཁྱེན། །ཡང་ནི་རིམ་པར་དོན་གྲངས་བརྗོད། །དོན་དམ་ཀུན་རྫོབ་གཉིས་མེད་མཐོང་། །མངོན་བྱས་རིག་པ་རྟོགས་གོམས་རིམ། །རྣམ་བཞི་ལམ་དང་སྒོམ་བཞི་དང་། །བསྙེན་སྒྲུབ་ལམ་གྲངས་ཉམས་གཡོ་ཐོབ། །གོམས་བརྟན་མཐར་ཕྱིན་རིམ་པར་འཕར། །མཉམ་ཉིད་ངང་ལ་མི་སྐྲག་པས། །མངོན་བྱས་ངེས་པའི་ཤེས་རབ་དང་། །རྣམ་པར་ཀུན་ལྡན་སྟོང་ཆེན་མཐོང་། །རང་རིག་སྙིང་པོ་ཡེ་ཤེས་གཟིགས། །ཕྱག་རྒྱ་གཅིག་སྐུ་འབྲས་བུ་ལྟ། །ཐ་ག་རལ་པའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་བསྒྱུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ། །ཐོས་བསམ་སོ་སོར་རྟོག་བསྒོམ་དང་། །རྣལ་འབྱོར་རིམ་པ་རྒྱུ་ལས་སྐྱེས། །དེ་བས་ཤེས་རབ་གསུམ་ལ་འབད། །རྒྱུད་དོན་གཟུངས་ཕྱིར་ཟིན་པ་ནི། །དམ་ཚིག་དམ་ཚིག་ཞེས་བྱ་བ། །རང་གི་ལྟ་བ་དམ་ཚིག་ཡིན། །སྡོམ་པ་རྣམ་པ་བཅུ་གསུམ་དང་། །སྤྱི་ཡི་དམ་ཚིག་མཐའ་ཡས་པ། །ཐིག་ལེ་ཆེན་པོའི་ངང་དུ་གསལ། །ཅི་ལྟར་སྤྱད་ཀྱང་སྡོམ་མི་འདའ། །སྤྱོད་པ་རྣམ་པ་གཉིས་པོ་ཡང་། །ཐིག་ལེ་ཆེན་པོའི་ངང་དུ་ངེས། །ཅི་ལའང་མི་གནས་ཀུན་ལ་སྤྱོད། །སྤྱོད་པར་བྱེད་དང་སྤྱད་མེད་མཐོང་། །བྱ་བྱེད་མེད་པའི་ཚུལ་གྱིས་སུ། །ཀུན་ལ་ཐོགས་པ་མེད་པར་སྤྱད། །བཞི་ཡི་ལས་དང་གཅིག་པོ་ཡང་། །ཐིག་ལེ་ཆེན་པོའི་ངང་དུ་གསལ། །མཆོད་པའི་རྒྱན་དང་ལོངས་སྤྱོད་ཀུན། །རིག་པ་བྱང་ཆུབ་སེམས་ཆེན་པོ། །ཆོ་འཕྲུལ་ཆེན་པོའི་ངང་དུ་འདུས། །ཕུལ་བ་མེད་པར་ཐམས་ཅད་མཉེས། །གཞལ་ཡས་ཁང་དང་དཀྱིལ་འཁོར་དང་། །ཁྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །ཆོས་རྣམས་མ་ལུས་ཐམས་ཅད་ཀུན། །རང་བཞིན་ངང་གིས་བདག་ཉིད་ཕྱིར། །དབང་ལྔ་མ་བཙལ་ལྷུན་གྱིས་རྫོགས། །བཅོ་བརྒྱད་རང་རིག་ཆོ་འཕྲུལ་སྣང་། །ཨེ་མའོ་མ་བསྒྲུབ་གྲུབ་ཆེན་པོ། །གྲུབ་པ་ཆེན་པོ་ཡེ་ཤེས་ཆེ། །དོན་དུ་གཉེར་བའི་རྣམ་གྲངས་ཀུན། །རང་རིག་བྱང་ཆུབ་སེམས་ཆེན་པོ། །ཏིང་འཛིན་ལྟ་བའི་བྱེ་བྲག་ཀུན། །རང་རིག་སྣང་ཕྱིར་ཆུ་བུར་དང་། །ནམ་མཁའ་ལྟ་བུའི་རང་བཞིན་ལས། །རང་རིག་ཡེ་ཤེས་ཉིད་ལས་མིན། །སྔགས་དང་ཕྱག་རྒྱ་སེམས་ཉིད་ཕྱིར། །བྲག་ཆ་ཆུ་ཟླ་འདྲར་ཤེས་ནས། །བཅིངས་བརྗོད་ལས་ཉིད་མྱ་ངན་འདས། །དེ་བས་བྱ་བྱེད་མཉམ་ཉིད་རྟོགས། །ལྟ་བ་ལྟ་བ་གཙོར་བརྗོད་མོད། །དོན་དུ་ཤེས་རབ་ཀུན་མཉམ་ཉིད། །དེད་དཔོན་རིན་ཆེན་ཇི་བཞིན་དུ། །གཏོད་མཐའི་བྱེ་བྲག་འདིར་ཤེས་དགོངས། །ཤེས་རབ་རྟོགས་པས་གཉེར་ཆུབ་ཚེ། །བདག་དང་གཞན་ཕྱིར་བྱ་བ་རྣམས། །ཤེས་པ་ཞི་ལ་ཀུན་ཀྱང་སྤྱོད། །ཐོས་བསམ་བཅུ་སྤྱོད་དོན་དུ་གཉེར། །འདི་ཡང་རྒྱལ་པོའི་ས་ཁམས་ཡང་། །སྟོབས་ཅན་རྩལ་སྐྱེད་དྲག་ཞན་དང་། །མཁའ་ཡུལ་ཆེ་ཆུང་ཇི་ལྟ་བ། །གཞི་གཅིག་སྟོབས་ཀྱིས་ཁྱད་པར་འགྱུར། །ཡེ་ནས་དབྱིངས་སུ་རོ་གཅིག་པས། །དེ་ལའང་ང་དང་བདག་མ་རྟོག །རང་བཞིན་རྣམ་པར་དག་པ་ལ། །གཙང་དང་དམེ་བའི་བློ་མ་བྱེད། །ཐམས་ཅད་བདེ་གཤེགས་སྙིང་པོ་ཅན། །རྐྱེན་གྱི་རྡུལ་གྱིས་ག་ལ་འགོས། །ཤེས་རབ་མཆོག་གིས་དེ་ལྟར་རྟོགས། །མ་ལུས་ཀུན་འདུས་དབྱིངས་སུ་བྱོས། །དེ་བས་ཤེས་པར་བྱ་བ་རྣམས། །དམ་ཚིག་སྡོམ་པའི་ངོ་བོར་བྱེད། །བདག་དང་གཞན་ཕྱིར་གཙོར་བྱེད་ཀྱིས། །དང་པོའི་སྡོམ་པ་ཀུན་ཀྱང་སློབ། །ཤེས་རབ་ཆེན་པོའི་སྦྱིན་སྲེག་གིས། །སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །ཀུན་ཀྱང་ཆོས་ཉིད་ངང་དུ་བསྒྲལ། །གཏོག་མཐར་ལམ་གཉེར་སྤྲོས་གཅོད་ཅིང་། །གྲུབ་པ་བགྲོང་དང་འཇུག་པ་དང་། །བདག་དང་གཞན་ཕྱིར་དམ་འཆའ་བས། །བདག་ཉིད་ལའང་གཞན་དོན་རྫོགས། །དེ་བས་བྱས་པར་མི་མཚུངས་ཏེ། །ལམ་ཀུན་སྐབས་ལ་ཤེས་པར་བྱ། །གང་གིས་འདི་ལྟར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་སྟེ། །ཆུ་སྤྲིན་ཕྱག་རྒྱ་ཅི་ལྟ་བུ། །དང་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཀུན་ནས་ཉོན་མོངས་སྤྱོད་པའང་གྲོལ། །ཐུན་མོང་ལམ་གཉིས་དེ་བཞིན་པས། །རྣམ་སྨིན་གཉིས་མེད་ཚོགས་གཉིས་རྫོགས། །གང་གིས་དེ་ལྟར་རྟོགས་འགྱུར་བ། །སྒྲོ་སྐུར་གསུམ་ལས་རབ་གྲོལ་ཏེ། །འཇུག་པའི་དོན་རྣམས་འབྱིན་པར་བྱེད། །དེ་བས་བདག་གཞན་ཆོས་དོན་རྫོགས། །རྒྱ་ཆེ་ཟབ་ཡངས་ཤེས་རབ་མྱུར། །ཟབ་པའི་དོན་རྟོགས་མི་ལྡོག་བདེ། །དད་དང་བདག་མེད་ཡངས་པ་བདེ། །བརྩོན་པས་རྟོགས་པ་མྱུར་བྱེད་ན། །དབང་ཐོབ་བདེན་མཐོང་མཚན་མཐོང་ཞིང་། །རྩ་བའི་དྲོད་ལས་ཡན་ལག་ཀུན། །ཤུགས་ཀྱིས་འབྱུང་བར་ཐེ་ཚོམ་མེད། །དེ་ལས་མཚན་མ་འབྱུང་བ་ནི། །སྟོབས་ཀྱིས་རྟོགས་པའི་ཀླུངས་ལྡན་པས། །འཕོ་འགྱུར་མཐོང་ཡང་འཇིག་མེད་ཅིང་། །འཁྲུལ་པའི་ཁམས་ལ་སྐྱོ་བ་མེད། །གྲུབ་པའི་གནས་ན་སྨོན་མེད་དེ། །འདོད་པའི་ལོངས་སྤྱོད་མཉམ་པར་སྦྱོར། །སྡུག་བསྔལ་ཉོན་མོངས་བཟོད་ཆེན་དེང་། །ལས་རྣམས་གང་ལ་ཁུར་མི་བལྟ། །ཏནྟྲའི་ལུང་དང་འགལ་མེད་སྤྱོད། །ཐ་མལ་སྤྱོད་ལས་ལྷག་པར་འགྱུར། །སྤྱོད་པ་རྒྱུན་གྱི་ཚོགས་གཉིས་རྫོགས། །མདོ་སྨྲོས་ཐ་དད་བརྗོད་མི་ལོང་། །རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བར། །རང་གསལ་གསུམ་བྲལ་མི་འགུལ་བས། །ངེས་པར་དེང་དུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །འོན་ཀྱང་ས་དང་ས་ཡི་རིམ། །དབང་པོ་དྭངས་མའི་སྤྱོད་ཡུལ་བ། །ཉེ་རིང་དྲུང་ཞིང་སྟོབས་འཕེལ་བས། །རྒྱུ་རྐྱེན་གོང་འོག་འབྲས་བུར་འབྲེལ། །གསལ་བའི་བྱེ་བྲག་རིམ་པར་འགྲོ། །དེ་བས་སྐབས་མི་བརྗོད་དངོས་གཅིག །གོང་གི་དོན་ལྟར་མ་རྟོགས་པའི། །བློ་ངན་མཉམ་པའི་ཁུངས་ཕྱུང་ནས། །མ་རྟོགས་ལེ་ལོ་སྙོམས་ལས་བྱས། །དོན་མ་འགྲུབ་པར་ངན་སོང་འགྲོ། །སེམས་ཀྱིས་མཉམ་པ་མ་རྟོགས་ན། །ཚིག་གིས་མཉམ་པས་སངས་མི་རྒྱ། །དེ་བས་དོན་ཚིག་ལྡན་པར་བྱོས། །འོན་ཏང་ཐེ་ཚོམ་མེད་པས་འགྲུབ། །སྤྱན་བཟང་ལམ་ཞུགས་ཇི་བཞིན་ཕྱིར། །ལམ་ཀུན་ཟག་ཅིང་འཆིང་བར་འགྱུར། །དོན་དུ་མི་འགྱུར་ཕྱིར་ན་བརླག །དེ་བས་དོན་དམ་འགྲུས་པར་བགྱིས། །དེ་ལྟར་དོན་མཐོང་གང་ཞིག་གིས། །གཞན་དུ་མི་བསལ་འདྲིས་བར་བྱ། །སྐྱེས་བུ་དམ་པ་མཆོག་འདོད་པས། །དེ་ལ་རྟག་འགྲུས་གསལ་བར་གྱིས། །ལམ་ཤེས་ལམ་དུ་འཇུག་བཞིན་ཕྱིར། །འཇུག་པ་རྣམས་དང་རྒྱུ་འབྲས་ཚུལ། །རང་གནས་མཐོང་བའི་ལེའུ་སྟེ་གཉིས་པའོ།། །།བདག་ཉིད་ངང་ཆེན་རྟོགས་པས་མོ། །དེ་རྗེས་གོམས་བྱེད་བཤད་པར་བྱ། །སྔ་མ་སྔ་མ་གང་དང་གང་། །ཕྱི་མ་ཕྱི་མ་ཐབས་དང་རྒྱུ། །དེ་བཞིན་ཕྱི་མ་ཕྱི་མ་གང་། །སྔ་མ་སྔ་མ་ལས་བྱུང་འབྲས། །དེ་ལྟར་རྒྱུ་འབྲས་ཐབས་འབྲེལ་བའི། །སྲིད་པའི་འཁོར་ལོ་ཚུལ་བཞིན་དུ། །དབང་པོ་བརྩོན་འགྲུས་བཟང་ངན་ཀྱང་། །རྣམ་པར་དབྱེ་བའི་ལུས་གཉིས་བསྟན། །སྲིད་པར་རྫོགས་པར་སྨིན་ཚུལ་དུ། །ལྷག་པར་གདིང་ལྡན་སྐྱེས་བུ་ཡིས། །བསྒོམ་པ་རྣམ་བཞི་ཟུང་ལྡན་པར། །གདོད་མ་ཉིད་ནས་གོམས་པར་བྱེད། །ཐིག་ལེ་ཆེན་པོའི་རང་བཞིན་ལ། །སྒོམ་པ་རྣམ་གསུམ་དུས་གཅིག་རྫོགས། །དེ་ནི་དེ་བཞིན་ཉིད་ཀྱི་དབྱིངས། །དེ་ནི་ཀུན་ཏུ་སྣང་གི་ངང་། །དེ་ནི་རྒྱུ་ཡི་རིམ་པར་ལྡན། །ཚོགས་བརྒྱད་ཡེ་ཤེས་ལྔར་རྟོགས་པ། །ཏིང་ངེ་འཛིན་གྱིས་དབང་བསྒྱུར་ནས། །ཡེ་ཤེས་ལྔ་རུ་གསལ་བ་ཉིད། །ཐུགས་ཀྱི་ཕྱག་རྒྱ་ཆེན་པོའོ། །མཉམ་ལས་མཉམ་པར་སྦྱར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་འགྲུབ་པར་འགྱུར། །འདས་ན་སངས་རྒྱས་མ་ཡིན་ནོ། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱད་ཀྱང་སྡོམ་མི་འདའ། །བྱེད་སྤྱོད་ཚོགས་ཆེན་གཉིས་སུ་འགྱུར། །འགྲོ་དང་འདུག་དང་མཉམ་པ་ན། །མ་ཉམས་དེ་ཡི་དབྱིངས་སུ་གནས། །ཤེས་རབ་མཆོག་གིས་རྟག་ཏུ་སྤྱད། །དབྱིངས་ཉིད་ལ་ནི་དབྱིངས་སྤྱོད་ཕྱིར། །དབྱིངས་ཉིད་མཆོག་གི་གནས་ལ་སྤྱོད། །དེ་ཉིད་མི་གནས་མྱ་ངན་འདས། །རྟོག་པའི་ཡེ་ཤེས་ཡིད་བཞིན་གཏེར། །ཐམས་ཅད་ལ་ཡང་མེ་ལོང་བཞིན། །བལྟས་ཀྱང་གཟུགས་སྣང་མི་སྣང་ངོ་། །ཤེས་རྒྱུད་ཅི་ཡིན་གང་གིས་ངོ་ཤེས་ཤིང་། །བྱ་བྱེད་ལས་འཕགས་ཅི་འདྲར་འདུག་བྱེད་པ། །གང་ཞིག་བློ་ལ་སྤྱོད་པ་བྱང་ཆུབ་ཐོབ། །རྣམ་པར་དག་པའི་གཡུང་དྲུང་སངས་རྒྱས་ལ། །ཐམས་ཅད་ཡེ་ནས་མཉམ་པར་རྣམ་དག་ཅིང་། །མི་རྟོག་ས་ལེར་གནས་ལ་རྟོགས་པ་མེད། །བསྙད་དུ་མེད་པ་སྣ་ཚོགས་འབྱུང་བ་ཡིན། །བདག་མེད་བདག་ཆེན་ཐམས་ཅད་འབྱུང་བའི་གཏེར། །མ་བཀག་པ་ལ་རྒྱུད་ཅིང་འབྱུང་མེད་པའི། །རྣམ་རྟོག་ཉིད་ན་ཡེ་ཤེས་རང་བཞིན་ཏེ། །རྣམ་པ་གསུམ་དུ་སྣང་ཞིང་སྟོང་ཉིད་པས། །རྣམ་རྟོག་མི་སྐྱེ་ཡེ་ཤེས་བརྗོད་དུ་མེད། །ཐམས་ཅད་སེམས་ཀྱི་ངང་སྟེ་སེམས་ཞེས་གདགས་སུ་མེད། །མ་བཅོས་ལྷུན་གནས་ཡེ་ནས་བྱང་ཆུབ་ཅིང་། །ཐོབ་ཏུ་མེད་པས་ཡེ་ནས་བདེར་གཤེགས་ཡིན། །ནམ་མཁར་གཟུང་བས་སྤྲིན་གྱིས་ཁེབས་པར་འགྱུར། །ནམ་མཁའ་མེད་པར་གང་གིས་ཤེས་པ་ནི། །སྤྲིན་ཞིག་འབྱུང་ཞིང་ཁེབས་པར་མི་སྲིད་བཞིན། །བསྒོམ་པའི་སེམས་ཀྱང་དེ་ལྟར་བལྟ་བར་བྱ། །མ་བཅོས་ལྷུན་གནས་ཅི་བཞིན་ངང་གཞག་དང་། །རྒྱུ་འབྲས་ལྷུན་གྱིས་གྲུབ་པའི་དཀྱིལ་འཁོར་འབྱུང་། །དེ་བཞིན་ཉིད་གནས་ལ་བཅས་ན། །ཉོན་མོངས་སྡུག་བསྔལ་མི་འབྱུང་སྟེ། །རྟག་ཏུ་བདེ་གནས་བྱང་ཆུབ་ཅིང་། །མཚན་དང་དཔེ་བྱད་ཀུན་དང་ལྡན། །སྲིད་པའི་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་གཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེ་བ་རིམ་གསུམ་གཉིས་མེད་དོ། །དང་པོ་ལས་ལ་སྟོན་བྱེད་པ། །དེ་བཞིན་ཉིད་དུ་གོམས་བྱ་བའང་། །སྔོན་དགོས་ཐབས་དང་ངོ་བོར་དང་། །མི་མཐུན་བཅོས་ཉམས་སྤྱོད་དམ་ཚིག །དྲོད་རྟོགས་མཚན་ཡོན་འདའ་ཀ་མ། །རང་རིག་འབྲས་བུས་རྫོགས་པར་འགྱུར། །སྐྱེས་བུ་སེང་གེ་བཞིན་རྒྱུ་བས། །སྔོན་དུ་རི་མོ་རིམ་པར་རྫོགས། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྔ། །ལྷག་པའི་ཡོ་བྱད་ལྔ་རྫོགས་བྱ། །དེ་ནས་མ་ཡི་སེམས་ལྡན་པས། །གནས་དྲུག་ཐར་པར་འགོད་དམ་བཅས། །ཚངས་པའི་གནས་བཞི་སྔོན་སོང་བས། །ཡིད་འོང་སྐྱོན་མེད་ས་བཙལ་བསླང་། །རན་བྱས་བྱི་དོར་ལྡན་བྱས་བསྲུང་། །སི་སར་སྟན་དང་ལྡན་པར་བྱས། །བར་ཆད་སེལ་ཞིང་ལམ་རྫོགས་ཕྱིར། །ཚོགས་དང་སྦྱིན་སྲེག་དཔུང་ཚོགས་འབར། །ཕྱི་ནང་འབྲེལ་ཆགས་ཐམས་ཅད་ཀུན། །གཞན་ཕྱིར་དུར་རྐུན་སེམས་ཀྱིས་དོར། །ཕ་དང་ཏིང་འཛིན་རྐྱེན་བསྡུས་ལ། །བར་ཆད་བསྲུང་བར་སྔོན་རྫོགས་ནས། །ལོངས་སྤྱོད་རིག་མའང་ལྡན་བྱས་ལ། །འཚོ་བཟློག་པའང་ཉེར་རྫོགས་གཞག །ཐུན་མོང་སྤྱི་ཡི་སྔོན་རྫོགས་ནས། །མཆོད་བསྟོད་ཉེ་བའི་གཟུགས་བརྙན་བཞུགས། །ཡན་ལག་བརྒྱད་པའི་ཚུལ་གཟུང་ལ། །ཡོངས་འགྱུར་ཐིམ་བྱས་རྗེས་ལའང་འཇུག །དག་པ་རྣམ་གསུམ་མ་ནོར་ཞིང་། །རང་རིག་རྒྱལ་པོར་གོམས་པ་ཡིས། །བྱང་ཆུབ་མཆོག་ཉིད་རྙེད་པར་འགྱུར། །དེ་ཕྱིར་མཐོང་རྗེས་དེ་བཞིན་ཉིད། །སྙིང་རྗེ་འབྱུང་བའི་གཞི་རུ་གཞག །གོ་རིམ་འབྱུང་བའང་དེ་བཞིན་ནོ། །གང་དག་སྐལ་ལྡན་ཅུང་དམན་པས། །གཞན་སེལ་ཕྱིར་དང་དོན་གཉེར་ཕྱིར། །འཇུག་པའང་སྔ་མ་གཉིས་དོན་དུ། །མ་རིག་འཁྲུལ་བའི་འདམ་བྱིངས་སུ། །ཡེ་ཤེས་སྒྲོན་མའི་མདའ་འཕང་ནས། །གཏི་མུག་མུན་པ་རྣམ་བསལ་ཏེ། །རང་བཞིན་འོད་གསལ་བདེ་བའི་མཆོག །མདོར་ན་སྒྲིབ་ཙོག་མུན་སྣང་ཚུལ། །ཆོས་དབྱིངས་མཁའ་དཀྱིལ་ཡངས་པ་ལ། །ཤེས་རབ་མྱུར་དུ་དོན་གོ་བ། །འགྲོ་མེད་འོང་མེད་མི་གནས་ལ། །བྱང་ཆུབ་སེམས་མཆོག་ཨ་རབ་བདེ། །མུན་སྣང་ཏུག་རྩིའི་ཚུལ་བཞིན་དུ། །རྟོགས་པའི་དབང་བསྒྱུར་ཏིང་འཛིན་ཡིན། །དོན་དུ་གཉེར་བ་གང་དག་ཀུན། །ཏིང་འཛིན་འདི་ཡིས་བྱེད་པར་འགྱུར། །གལ་ཏེ་རྣལ་འབྱོར་འདི་མེད་ན། །རྒྱ་མཚོའི་མཇིང་གི་ཕ་བོང་ལྟར། །བསྐལ་པར་ལམ་ལ་བཙལ་བྱས་ཀྱང་། །དོན་མེད་སྙིང་པོ་སྐམས་པ་ཡིན། །དེ་ཕྱིར་ལྷག་མ་ཆ་བསྙམས་པའི། །བདེ་ལྡན་བྲོད་པ་ཆོས་བདུན་ཚུལ། །ལྡན་བྱ་རྗེ་བཙུན་རྣམ་སྣང་བཞིན། །འཛིན་རྩོལ་མེད་པའི་སེམས་ཀྱིས་འདུག །དེ་ཡང་གདམས་ངག་ཤེས་རབ་ཀྱིས། །སྟོབས་ཀྱིས་བཞག་པ་གོམས་པར་བྱེད། །སྔོན་བརྗོད་བུ་དེ་དབེན་བའི་སར། །རིན་ཆེན་ལྷབ་ལྷུབ་ལོངས་སྤྱོད་ཀྱིས། །མཉེས་བྱ་བུ་དེ་ས་རུ་བཞག །བགེགས་སྐྲོད་སྦུབས་མཆུས་ཞིབ་བུར་བསྟིམ། །དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་སུ་བསྒོམ། །ཕྱི་མའང་སྤྱི་བླུགས་མཐོང་རྗེས་བཞག །བདག་དང་བདག་གིར་གཞན་རྣམས་ནི། །ཤིན་ཏུ་མི་དམིགས་དབྱིངས་སུ་བསྒོམ། །རང་རིག་ཉིད་ལ་གནས་པ་ཡི། །སུས་ཀྱང་མ་བྱས་རང་བྱུང་སྟེ། །ཐམས་ཅད་དེ་བཞིན་ཉིད་དུ་སྦྱོར། །གཉིས་མེད་དབྱིངས་ཀྱི་ངང་དུ་ཐིམ། །རང་བྱུང་ཡེ་ཤེས་དཀྱིལ་འཁོར་གྱིས། །མ་ལུས་དེ་བཞིན་ཉིད་དུ་སྡུད། །སྡུད་དང་མི་སྡུད་གཉིས་ཀ་མིན། །ཡང་དག་ཁོ་ན་ཉིད་དུའོ། །བསྒོམ་བྱ་སྒོམ་བྱེད་མ་སྐྱེས་ནས། །ཆོས་ཉིད་བསྒོམ་པར་བྱ་བའམ་མེད། །དོན་དམ་བསྒོམ་པར་བྱ་མེད་པས། །གང་ལ་མི་འཇུག་ཞུགས་པའི་མཆོག །བསམ་བྱ་བསམ་པར་མི་བྱ་སྟེ། །མི་བསམ་པར་ཡང་མི་བསམ་མོ། །གང་ལ་རྣམ་པར་མི་དམིགས་པ། །དེ་ཉིད་རང་ཉིད་མཉམ་ཉིད་དོ། །བྱང་ཆུབ་སེམས་ཀྱི་དེ་བཞིན་ཉིད། །ཤིན་ཏུ་མི་དམིགས་བརྟག་དཀའ་བས། །ཡངས་ལ་རྒྱ་ཆེ་གཏིང་ཟབ་པས། །ཤེས་རབ་ཟབ་པས་རྟོགས་འགྱུར་ཏེ། །གང་ནས་མ་འོང་གང་དུ་འགྲོ། །འགྲོ་དང་འོང་བར་བྱ་བ་མིན། །ཤིན་ཏུ་བརྟག་དཀའ་མི་དམིགས་པས། །མཐའ་དང་དབུས་ཀྱང་བརྟག་ཏུ་མེད། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །དབྱིངས་དང་དབྱིངས་ཀྱི་ཡེ་ཤེས་ཀྱང་། །རང་རིག་ཁོ་ན་ཙམ་དུ་ཟད། །གང་ཞིག་དམིགས་ནི་འཇུག་པ་ནི། །དེ་སྲིད་འཇིག་རྟེན་རྒྱང་འཕེན་པ། །འཇུག་མེད་སངས་རྒྱས་ཡིན་པར་ནི། །དབང་པོ་ཉིད་དུ་ཀུན་གྱིས་གསུངས། །ངེས་པར་བསམ་ཞིང་དམིགས་ཡོད་ན། །ཕྲ་རབ་འཐེན་ཐག་འཛུད་ལྟ་བུས། །དེ་བཞིན་ཉིད་དེ་མི་མཐོང་སྟེ། །འཐེན་ཐག་འཛུད་པ་མཁའ་བཞིན་ནོ། །རྣལ་འབྱོར་མཉམ་པ་དེ་བཞིན་པས། །ངོ་བོ་བཞིན་དུ་གྲངས་འཛུག་ཅི། །ངེས་ཚིག་རྣ་བར་འབྱུང་བ་ཡིན། །དེ་བས་ཀུན་ལ་འབྱོར་བར་གྱིས། །ཆེན་པོ་དམན་པས་ཐབས་བསལ་བའི། །མ་སྐྱེས་དེ་བཞིན་ཉིད་སྟོང་པ། །གདོད་སྟོང་སྟོང་པའི་ཐ་སྙད་བྲལ། །སྤྲོས་པ་བརྒྱད་བྲལ་འདོད་མ་ཡིན། །གང་གིས་རང་གི་མཐའ་དྲི་མ། །མེད་པས་དེ་བཞིན་དག་པ་ཉིད། །རྣལ་འབྱོར་མཚན་མེད་དེ་བཞིན་ཉིད། །གཉིས་མེད་ལྷུན་མཉམ་དེ་བཞིན་ཉིད། །གྲངས་བཞིའི་ཐ་མ་རིམ་པ་ཉིད། །བྱིན་རླབས་ཡོན་ཏན་ངོ་བོས་བླ། །བླ་མའང་སྐབས་མིང་མཉམ་ཉིད་དང་། །ལྷུན་གྲུབ་མཐའ་བྲལ་ཐ་སྙད་མེད། །སྟོང་ཆེན་མ་སྐྱེད་ཆོས་དབྱིངས་སོགས། །ཡོན་ཏན་ཆ་རེ་ཡོད་བར་ཟད། །དེ་རེའང་སྐབས་ཀྱི་ངོ་བོ་དང་། །མིང་དོན་ངེས་ཚིག་ཡོད་པའང་། །གཏན་ཚིག་ཡན་ལག་ཏུ་ལྡན་པ། །རྣམ་གསུམ་འཁྲུགས་པར་འབྱུང་བ་ཡིན། །ལྷག་པའི་དོན་མཆོག་གང་ཡིན་པ། །དོན་རྣམས་ཉིད་ན་དངོས་མེད་པས། །རྟོགས་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཉིད་རང་གསལ་མི་གཡོ་བ། །ཞི་གནས་ལྷག་མཐོང་ཟུང་དུ་འབྲེལ། །ཐམས་ཅད་ཤེས་རབ་དབྱིངས་ཉིད་དེ། །དབྱིངས་ལ་དབྱིངས་ནི་རྣམ་པར་སྦྱོར། །ཤེས་རབ་དབྱིངས་ཉིད་སྦྱོར་བ་ཡིས། །བྱང་ཆུབ་རྡོ་རྗེ་ཐིག་ལེ་ཡིན། །དེ་ཡང་སོ་སོར་རྟོག་བསྒོམ་དང་། །མི་དམིགས་ཤིན་ཏུ་མི་དམིགས་དང་། །རྗེས་སུ་མི་དམིགས་རིམ་པ་ཡིས། །མི་གནས་མི་རྟོག་རློམ་སེམས་མེད། །རང་བཞིན་ངང་གིས་བདག་མེད་པས། །བྱ་བྱེད་གཉིད་ཀ་མི་དམིགས་ཕྱིར། །མཁའ་ལྟར་འདུ་བྱེད་ཀུན་བྲལ་བ། །བསམ་མེད་འདུག་ལ་བསྒོམ་ཞེས་བརྗོད། །འདུ་ཤེས་གང་དུའང་མ་ཞུགས་ན། །འདོད་ཆགས་མེད་པས་འདུ་འབྲལ་མེད། །དེ་ལྟ་དེ་ལྟར་མཉམ་བཞག་ཚེ། །གནས་དང་སྤྱོད་ལམ་སྒྲིབ་པ་རྣམས། །ནོར་བར་ཟིན་ནས་མི་འཕྲོག་པར། །བྱ་ཕྱིར་མདོ་ཙམ་བརྗོད་པར་བྱ། །དམིགས་པ་བརྗེད་དང་བྱིང་རྒོད་དྲུག །རྩོལ་དང་མི་རྩོལ་བྱེད་པ་དང་། །དགོས་དང་ལོག་པ་བཅུ་གཅིག་དང་། །ཐུན་མོང་བདུན་ཏེ་བཅོ་བརྒྱད་དོ། །དེ་བཞིན་གཡེང་བ་རྣམ་དྲུག་སྟེ། །ངོ་བོས་གཡེང་བ་རྣམ་ཤེས་ལྔ། །ཕྱི་རོལ་ཡུལ་ལྔར་འཕྲོས་པའི་གཡེང་། །བྱིང་རྒོད་རོ་མྱོང་ནང་ཡིན་ཏེ། །གཞན་ཕྱིར་དགེ་སྦྱོར་མཚན་མའོ། །སྙོམས་འཇུག་གཞན་ནམ་ཐེག་པ་གཞན། །དེ་ཡི་ལུགས་ལ་སེམས་འཕྲོ་ཡིད། །ངའོ་སྙམ་པའི་སྙོམས་འཇུག་པ། །གནས་ངན་ལེན་པར་ཐེ་ཚོམ་མེད། །དྲན་འབྱུང་རྗེས་སུ་འབྲང་བ་དང་། །འགོག་དང་ཐེར་ཟུག་ཕྱལ་བ་དང་། །ཆེད་དུ་གསུམ་འཆོས་ཡིད་ལ་བྱེད། །མྱོང་དང་འདུ་ཤེས་གནས་དམིགས་དང་། །སྡུད་དང་མངོན་བྱེད་རེ་བ་མང་། །སྒྲིབ་པ་ལྔ་བཅུ་རྩ་ཡན་ལག །འཇིག་རྟེན་དང་པོ་བསམ་གཏན་བཞི། །སྙོམས་འཇུག་བཞིར་གོལ་ས་དགུ་སྟེ། །ཐེར་ཟུག་ཆད་པ་ཕྱིན་ཅི་ལོག །བྱ་བ་མང་ལ་རྐྱེན་འབྱུང་ཞིང་། །ངང་ཐུང་འཁྲུག་དང་དུང་གཤང་ཐོས། །འཁོར་ཞིང་ཁ་དོག་མཐོང་བ་དང་། །ཁམས་ལས་གྱུར་པའི་ཆ་ཡང་ཤེས། །དེ་ཡིས་འགྲོ་ཉལ་འདུག་སྡོད་དང་། །ལོངས་སྤྱོད་ཚེ་ནའང་རྣལ་འབྱོར་བྲལ། །ཡེའུ་ཙེ་ཏུར་རྐུན་ཉ་གླང་གཉིད། །བསྐམ་ཆགས་ཚོགས་སེམས་སྤྲེའུ་སྤྱོད་སྐྱོན། །དེ་ལྟར་ཤེས་པའི་རྣལ་འབྱོར་པས། །སྤོང་བའི་འདུ་བྱེད་བརྒྱད་བསྟེན་པ། །སོ་སོར་ཅུང་ཟད་བལྟ་བྱས་པའམ། །ཡང་ན་རང་བྱུང་རང་ཞིར་བྱ། །ཇི་ལྟར་བྱིས་པ་ཤེད་མ་བྱེ། །བྱ་བྱེད་མང་པོས་གཡེང་བར་གནས། །བྱ་བྱེད་མང་པོ་བདག་མེད་པར། །ཏིང་ངེ་འཛིན་གྱིས་དབང་བསྒྱུར་ནས། །མཚན་མ་མཉམ་པའི་དབྱིངས་སུ་གནོན། །དགག་དང་སྒྲུབ་པ་ག་ལ་ཡིན། །ཅུང་ཟད་ཁམས་ཀྱི་ཆ་ཉམས་པ། །མི་གསལ་མཐོང་དང་མི་འཇུག་སོགས། །ཟིན་ནས་སྤྱོད་ལམ་དགའ་རྟེན་དང་། །མཐུན་པའི་ཆོ་གས་གསོ་བར་བྱ། །སྤྱོད་ལམ་རྣལ་དུ་མ་འབྱོར་བ། །སོ་འཐས་ཆོད་ནས་དོར་བར་བྱའོ། །དྲན་པའི་ཐག་བས་བསྡམས་བྱས་ཏེ། །རྣམ་པར་ཀུན་ཏུ་ཉམས་མི་བྱའོ། །དེ་ལྟར་ནོགས་བརྩོན་ཡུན་རིང་བར། །གནས་པའི་གདོད་མཐའ་འཕེལ་བའང་། །གཡོ་ཐོབ་གོམས་བརྟན་མཐར་ཕྱིན་པ། །མུ་ལྔས་ཡོངས་སུ་རྫོགས་པར་འགྱུར། །གང་དག་གཟར་སོར་ཆུར་གནས་ཚེ། །ཀུན་བརྟག་གོམས་པའི་རྫ་མཁན་དེ། །མི་སྡོད་སྐྱོ་བས་འགྲོ་བར་བྱེད། །དེ་ཚེ་མགོ་ལ་མེ་འབར་བཞིན། །ཅུང་ཟད་ཡོད་ལ་དེ་དག་ཉུང་། །དེ་ཚེ་དལ་བུས་འབྱུང་འཇུག་སྲིང་། །དེ་གོམས་ཆེད་དུ་བྱེད་སོགས་ན། །བཏང་སྙོམས་་དང་པོ་བླང་བར་བྱ། །རི་བོ་ལྟ་བུར་མི་འགུལ་ལ། །ཐུན་རྐྱང་ནུས་ནས་སུན་མི་བྱ། །རོ་མྱོང་དོར་ནས་དེ་མཐར་ཕྱིན། །ཤུགས་སྣང་མཐོང་ལ་དགའ་བྲོད་མེད། །གཉིས་པར་བར་འགའ་འཆོར་ཐོབ་ལ། །ཁམས་དང་འཆོར་རྒྱུ་བརྟག་གོས་དོར། །ཤིན་ཏུ་ཡུན་རིང་བརྩོན་པ་ཡིས། །གོང་ནས་གོང་དུ་འཕེལ་པར་འགྱུར། །བདག་དང་གཞན་ཕྱིར་བྱ་བ་ཀུན། །སློབ་གཡོན་ནས་བཟུང་ལྔ་ཡི་བར། །རྣམ་པར་རྟོག་མེད་ཚུལ་གྱིས་ནི། །ཐམས་ཅད་ཀུན་ལ་ཆགས་མེད་རོལ། །སྤྱོད་དགུ་དོར་བའི་གཅིག་ཆའང་། །མི་དམིགས་མཐུན་པའི་སྤྱོད་ཅེས་བྱ། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གནས་པ་མེད་ལས་ཐམས་ཅད་གནས། །གནས་པ་ཉིད་ནའང་གནས་པ་མེད། །ལོངས་སྤྱོད་མེད་ལས་ཐམས་ཅད་སྤྱོད། །སྤྱོད་པ་ཉིད་ན་སྤྱོད་མེད་པ། །ཉམས་པ་མེད་སྤྱོད་ཆགས་མི་བྱ། །མི་འགོག་མི་འཛིན་ཚོགས་གཉིས་རྫོགས། །བདག་ཕྱིར་ཀུན་ལ་མི་དམིགས་པ། །རྣལ་འབྱོར་མྱུར་ཐོབ་ཐེ་ཚོམ་མེད། །འགྲོ་ཉལ་འདུག་སྡོད་ལོངས་སྤྱོད་ཚེ། །དེ་ལྟར་སྤྱོད་པས་ཆོས་ཉིད་དུ། །བྱིན་རླབས་སྒྲོལ་བས་གཅིག་ཤོས་ཏེ། །གང་ཡང་གཞན་ཕྱིར་སེམས་དཔས་རྫོགས། །གཞུང་ལས་གྲགས་པའི་སྤྱོད་པ་རྣམས། །སྐྱེ་བོ་ཀུན་གྱིས་སྤྱད་གསུངས་པ། །མོས་སློབ་ཅི་སྨོས་རྐྱེན་མཐོང་ན། །དེ་དག་ཤེས་གོམས་བཞི་ལ་སྤྱོད། །ཤེས་འཇུག་ཀུན་ཀྱང་གཞན་དོན་དུ། །ལས་བཞི་སྤྱོད་ཅིང་བསྒྲུབ་དབང་ཚེ། །ལམ་ཀུན་སྐད་ཅིག་ཆས་བསྒོམ་ན། །སྤྲོས་པའི་འཁོར་ལོ་མོས་བསྒོམས་བྱེད། །རང་བཞིན་ཕབས་རྫོགས་མཆོད་བསྙེན་ནས། །ནུས་པའི་བྱིན་ལྡན་རྫོགས་པར་བྱེད། །དེ་ཚེ་སྡོམ་པ་ཐམས་ཅད་ཀུན། །མོས་སློབ་མི་གཏོང་བསྲུང་མོད་ཀྱང་། །ཁྱད་པར་ཏིང་འཛིན་དམ་ཚིག་ལྡན། །དམ་ཚིག་དམ་ཚིག་ཅེས་བྱ་བ། །ལོགས་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །མི་གཏོང་ཕྱིར་ཡང་དམ་ཞེས་བྱ། །གཟུངས་སུ་གྱུར་པས་དམ་ཞེས་བྱ། །སྔར་ལྡན་དེ་ཡང་འདིར་གོམས་བྱེད། །དེ་བས་རང་སེམས་རྟོགས་བྱས་ཏེ། །ལེ་ལོ་གཡེང་བ་ཡོངས་སྤངས་ལ། །ང་དང་བདག་མེད་མཉམ་པར་བསྲུང་། །དེ་བཞིན་ཉིད་ལས་འདའ་མི་བྱེད། །དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་ཚིག་པར་འགྱུར། །སྔ་མ་སྔ་མ་རྫོགས་བྱས་པ། །གོང་མ་གོང་མ་རྒྱུད་ལྡན་པ། །ཡོངས་སུ་འཕར་གྱི་མངོན་སྤྱོད་མིན། །འཕར་བས་སྤྱོད་ཀུན་མངོན་དུ་རྒྱུ། །དེ་བས་སོ་སོའི་ལྟ་གཞི་ལ། །སྤྱོད་སོགས་ཁྱད་པར་མཁའ་ཡུལ་འདྲ། །ཞིང་ཁམས་དབང་པོས་ས་ཁམས་བཞིན། །སྟོབས་ནི་སྟོབས་ཅན་རྩལ་སྐྱིད་འདྲ། །དེ་ལྟར་བྱ་བྱེད་མེད་བསྲིངས་ནས། །ལུས་ངག་སེམས་ལ་དྲོད་འབྱུང་སྟེ། །བཟོད་པ་ཕྲ་མོ་ཐོབ་པ་དང་། །འགྱུ་བའི་དབུགས་ལ་དབང་ཐོབ་དང་། །དོན་ལ་རྣལ་དུ་ཕེབས་པ་ནི། །ངེས་པར་དྲོད་གསུམ་མྱོང་བའོ། །གཞན་དུ་ཕྱི་རོལ་རྡུལ་ཕྲན་དང་། །ཟླ་ཚེས་ལ་སོགས་མཚན་མ་མཐོང་། །རིག་པ་ཀློང་དུ་ཕེབས་པ་དང་། །འདོད་པའི་ཡུལ་ལ་མི་འགྲོ་ཞིང་། །འཕོ་འགྱུར་དག་པ་མི་ང་བ། །ཕྱི་ནང་ཆགས་བྲལ་ཞེན་པ་ཆུང་། །སྔ་བས་དཔགས་པ་ཉམས་སུ་འབྱུང་། །གཞན་ཡུལ་ཐུགས་རྗེས་སེམས་འཕྲོགས་དང་། །ཆོས་བརྒྱད་མཉམ་སྙོམས་ཕལ་ཆེར་འབྱུང་། །བྲོད་པ་བསུ་ཞིང་ཟང་ཟིང་དག །དོན་དུ་གཉེར་ལ་བརྩོན་པར་བྱེད། །དེ་བཞིན་རྣལ་འབྱོར་བདེ་འཚོལ་བ། །དྲོད་རྟགས་མཐོང་བའི་བྲོད་ཚུལ་གྱིས། །ཤིན་ཏུ་ལམ་ལ་བརྩོན་པར་འགྱུར། །དེ་ཕྱིར་འདི་ཡི་རྗེས་སུ་བསྟན། །དེ་ཡང་གཡོ་ཐོབ་བརྟན་རིམ་གྱིས། །ཀུན་ཏུ་འཁོར་བར་འབྱུང་བ་ཡིན། །ཁྲུ་ལྗོ་སྨིན་པའི་རིགས་དེ་ལ། །ཕ་མས་ཁྱིམ་ཐབས་ལྟས་བསྟན་ན། །ཕྱི་མའང་ལམ་གྱི་སྟོབས་ཆ་ལ། །རྟགས་མངོན་རྫུ་འཕྲུལ་སྣང་བར་འགྱུར། །དེ་ལ་སྔ་མ་ཕྱི་ནང་སྟེ། །ཕྱི་རོལ་ཟད་པར་སྐྱེད་མཆེད་དངོས། །མཐོང་དང་པདྨོ་འོད་སོགས་མཐོང་། །ནང་དུ་བཟོད་ཐོབ་བྱེ་བྲག་དང་། །ཆུ་ལྔ་རྒྱུན་ལ་བགས་ཀྱིས་བཅད། །མི་འཕྲོགས་མྱོས་སྐྲག་དགའ་བྲོད་མེད། །ཤུགས་སྣང་བརྒྱད་པོ་མཐོང་བའང་འབྱུང་། །བཅོ་བརྒྱད་བདུད་ཡུལ་ཆ་ཡང་འབྱུང་། །མངོན་པར་ཤེས་པ་རྣམ་པར་དྲུག །ལམ་གྱི་ཟག་པ་ཡོད་མེད་པའོ། །སྔོན་ལ་དམིགས་པའི་མངོན་ཤེས་དང་། །ཡོངས་སུ་རྫོགས་པའི་མངོན་ཤེས་དང་། །བར་ཆད་མེད་པའི་མངོན་ཤེས་སོ། །དམིགས་པ་དགའ་དང་འཕེལ་པ་དང་། །ཉི་ཤུ་རྩ་སོགས་ཡུལ་ཁམས་མཐོང་། །གླིང་གྲངས་མཐོང་ཐོས་རིམ་པས་ཕྱེ། །ཕྱི་མ་སྟོང་གསུམ་བརྒྱ་ཡུལ་དང་། །སྟོང་གསུམ་སྟོང་སོགས་ཡུལ་འགྱུར་སོགས། །སྟོང་གསུམ་སྟོང་ཕྲག་བཅུ་རྡུལ་སྙེད། །གྲངས་མེད་བརྒྱ་སྟོང་ཕྲག་བཅུའི་རྡུལ། །དེ་ཉིད་ཡུལ་འགྱུར་རྒྱལ་བ་དང་། །མཉམ་བས་ཕྱེ་བས་ལམ་རྫོགས་ཡིན། །དེ་ཡི་རྒྱུ་ཡི་སེམས་དཔའ་དང་། །སྐལ་མཉམ་ཕྱིར་ན་བརྗོད་ཀྱི་ཚུལ། །ཤེས་པའི་ཁྱད་པར་དགོངས་པ་ཡི། །གཞི་ཡིས་ཕྱེ་བས་རྒྱུ་འབྲས་ངེས། །འདི་ཚེ་རྫུ་འཕྲུལ་རྗེས་བསྟན་དང་། །ཆོས་སྣང་ཀུན་བརྗོད་གཅིག་ཆར་ལ། །རྫོགས་ཀྱི་འདི་ཚེ་འབྱུང་བའི་རྒྱུ། །ཉམས་མཐའི་བཞི་ཆ་འབྱུང་སྲིད་དོ། །རྣལ་འབྱོར་གནས་པའི་རྨི་ལམ་ཡང་། །གཅེར་བུར་འབྱུང་ཞིང་དྲི་མ་དག །བྱང་ཆུབ་ཆེན་པོའི་མཆོད་རྟེན་མཐོང་། །དམ་པ་མཆོག་དང་དམ་པ་ཡི། །སྲས་དང་སྤུན་དགོངས་བྱིན་གྱིས་རློབས། །རྨི་ལམ་མཚན་མར་བླ་མ་མགོན། །སྣང་བས་དབང་བསྐུར་བྱིན་རློབས་སོགས། །ལམ་དུ་འཇུག་པ་ལྔ་བྱེད་ཅིང་། །བར་ཆད་ལེགས་ཉེས་བརྩོན་ལུང་སྟོན། །དེ་ཡང་བདུད་དང་ཆས་དབྱེ་སྟེ། །བྱིན་རློབས་ལུང་སྟོན་ལྷར་སྣང་བ། །འབྱུང་བས་ལེགས་བྱེད་བདུད་འབྱུང་ཕྱིར། །བདུད་དང་ཆ་བརྟག་ཀུན་ཏུ་གཅེས། །བར་ཆད་གསལ་ཕྱིར་དེ་དག་ཀུན། །བླ་མ་ཉིད་ལས་གཞན་དུ་མིན། །དེ་བཞིན་ཉིད་དུ་མཐོང་གོམས་ན། །དགེ་དང་མི་དགེ་གཉིས་སུ་མེད། །རྣམ་རྟོག་མཚན་མ་ཡོངས་མི་འཛིན། །རང་བཞིན་ཡེ་ནས་འོད་གསལ་བའི། །དགེ་སྡིག་མེད་པ་ཤིན་ཏུ་བདེ། །བདེ་དང་མི་བདེ་གཉིས་མེད་པས། །ཡེ་ཤེས་ཆགས་མེད་རྣམ་པར་དག །ཐམས་ཅད་དབྱེར་མེད་ཡེ་ཤེས་ཡིན། །སེམས་ཉིད་དང་བས་ཨ་རབ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་འཛིན། །ཐམས་ཅད་ཆོས་ཉིད་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །ཤེས་རབ་ཆེ་ཆུང་ཏིང་འཛིན་གྱིས། །ཐམས་ཅད་མ་ནོར་གཞོང་ལུགས་བཞིན། །འཁོར་བ་མ་སྤངས་སྡུག་བསྔལ་མེད། །གཉིས་མེད་ཚིམ་པས་ཨ་རབ་བདེ། །ཐམས་ཅད་མ་ལུས་གཅིག་པའི་ངང་། །ལྟ་དང་ལྟ་བ་གཉིས་ཀ་མེད། །ཡེ་ཤེས་སྒྲོན་མ་སྦྲེངས་པ་ནི། །ཕྱོགས་བཅུའི་ཞིང་ཁམས་ཐམས་ཅ ད་མཐོང་། །འདི་དང་ཕ་རོལ་གཉིས་མེད་ཕྱིར། །འགྲོ་དང་འོང་བར་བྱ་བ་མིན། །ཡན་ལག་སྟོབས་ཆེན་མ་འཕྱོངས་པར། །ཕྱོགས་བཅུའི་སྟོང་ཁམས་ཐམས་ཅད་མནན། །འདི་ཚེ་སྤྱོད་ཡུལ་འགྱུར་མཐོང་ན། །གཡེང་བསལ་སྟོང་ཉིད་ངང་ལ་འདུག །དྲན་བས་ལས་ཀྱི་རྒྱུད་བཅད་དེ། །འདོད་ཁམས་ལྷ་མི་ཐེག་ཆེན་སྦྱོར། །ཡང་ན་གསང་བའི་གསེར་སྒྲོམ་དུ། །ཚོན་གང་འོད་དང་ཟླ་བའི་ཧཱུྃ། །རིང་པོ་བརྩེགས་ལ་དམིགས་ཐོབ་ནས། །རླུང་གི་འཕྲོ་འདུས་འོད་བརྡལ་འདུག །སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུ་སྦྱོར། །འབྲས་བུ་ཉིད་ལ་ལམ་ཕྱིར་ཏེ། །ཕྱོགས་མཐུན་བརྗོད་ཀྱིས་རིས་མ་ཡིན། །སྟོང་པ་ཆེན་པོའི་རྣལ་འབྱོར་བསྟན་པའི་ལེའུ་སྟེ་གསུམ་པའོ།། །།ཆོས་ཀྱི་སྐུ་ལ་ཕྱག་འཚལ་ཏེ། །སྙིང་རྗེ་ཆེན་པོའི་རྣལ་འབྱོར་བཤད། །རྗེས་སུ་མཐུན་པའི་ལུས་ཉིད་ནི། །ཡན་ལག་སྒོ་ནས་ཤེས་པར་གྱིས། །སྔོན་དུ་སྟོང་གོམས་རྣལ་འབྱོར་བས། །ཁམས་གསུམ་ཐུགས་རྗེས་གཟུང་བའི་ཕྱིར། །ཡན་ལག་བརྒྱད་སྔོན་བཞིན་བྱས་ནས། །ཡེ་ཤེས་སྒྱུ་མའི་སྙིང་རྗེ་བསྒོམ། །བདག་ཉིད་དྲི་མ་བསལ་བ་དང་། །སྟོང་པའི་མདུད་པ་བཤིས་པ་དང་། །གདུལ་བྱ་ས་ལ་དགོད་པ་དང་། །ཕྱག་རྒྱ་གཅིག་པའི་རྒྱུ་བྱ་ཞིང་། །རྣལ་འབྱོར་ཉིད་ནི་གཉེར་བ་དང་། །བདེན་པ་གཉིས་སུ་མི་བཏང་ཕྱིར། །རྣལ་འབྱོར་འདི་ལ་གནས་བྱས་ཏེ། །འཇུག་པའི་ཐུན་མཚམས་དུས་ཀྱིས་བྱའོ། །གང་གིས་ཁམས་གསུམ་འདས་པའི་ཆོས། །ཐུགས་རྗེ་ཆེན་པོའི་ཡེ་ཤེས་སུ། །མཐོང་ཐོས་མྱོང་རེག་ཚོར་བ་དང་། །སོ་སོར་བརྟག་རྒྱུའམ་རྗེས་ལས་ཐོབ། །དེ་ཡས་མ་ལུས་ཆོས་སོ་ཅོག །སྙིང་པོ་ཡོད་པ་མ་ཡིན་ཏེ། །སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླ་བཞིན། །བདག་དང་འགྲོ་བ་ངོ་བོས་གཅིག །བསལ་དང་བརྟགས་པས་ཐ་དད་ཕྱིར། །གཅིག་དང་ཐ་སྙད་གཉིས་མེད་པས། །བྱ་བྱེད་བྱ་བ་འགོག་མེད་པར། །མཐོང་བ་མ་ཤོར་ཙམ་དུ་བྱ། །རྗེས་སམ་རྟོག་དཔྱོད་སྔོན་གོམས་བྱ། །དེ་བས་གཉིས་གོམས་རྒྱུ་གོམས་པས། །དྲན་པ་སྤྱི་བླུགས་ཡེ་ཤེས་གསལ། །སྔོན་དུ་བཏང་བ་གང་ཡང་མེད། །ནམ་མཁས་ནམ་མཁའ་ཇི་བཞིན་ནོ། །ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཐམས་ཅད་ཐབས་ཀྱི་མཚན་ཉིད་དེ། །ཐབས་ལ་ཐབས་ནི་རྣམ་པར་སྦྱོར། །ཐབས་ཆེན་ཐབས་ལས་བྱུང་བ་ཡི། །དེ་ནི་བྱང་ཆུབ་རྡོ་རྗེ་མཆོག །ཐམས་ཅད་དུ་ནི་ཡེ་ཤེས་གསལ། །ཡེ་ཤེས་མ་ཡིན་ཆོས་འགའ་ཡོད་མིན་པས། །གདུང་འདྲ་མ་བསྒྲལ་དུས་གཅིག་བསྒྲལ། །གསོད་ཆེན་སྙིང་རྗེའི་རང་བཞིན་ཏེ། །མི་འབྱེད་ཕན་རྫོགས་བྱམས་ཆེན་པོ། །མི་འབྱེད་འགའ་མཆོག་བྲལ་མེད་སྙོམས། །ཚངས་པའི་རྒྱུ་བཞིན་དུས་གཅིག་རྫོགས། །མངོན་པར་གདུང་བ་དེ་ལ་མེད། །དེ་ཕྱིར་རྒྱུ་རྐྱེན་འབྲས་བུ་དང་། །དུས་དང་རང་བཞིན་འཁྲུལ་པ་དང་། །ཚུལ་གྱིས་ཉམས་དང་ངོ་བོ་དང་། །བཙོན་ར་ལྟ་བུ་བརྒྱད་ལ་དམིགས། །དེ་ཡིས་ཅིག་ཤེས་བཞི་འབྱུང་བ། །ཕ་རོལ་ཕྱིན་དང་མཚུངས་མ་ཡིན། །དེ་དག་ངོ་བོ་ཉིད་བསྟན་པའང་། །རྣམ་གྲངས་བཞིན་དུ་གྲངས་འཇུག་སྟེ། །དོན་དང་རྣལ་འབྱོར་ངོ་བོ་ཡིས། །ཕྱེ་བས་ཟུང་འགྱུར་ངེས་ཚིག་འགྲུབ། །དེ་ལ་ལོག་རྟོགས་སྒྱུ་མ་ནི། །ཆོས་དང་བདག་དང་དངོས་པོ་རྣམས། །ངོ་བོ་ཡོད་ལ་སོགས་བརྟགས་པས། །རྟོག་པ་སྒྱུ་མའི་ཀློང་གྱུར་པ། །སྐྱེས་དང་མི་བདེན་བསླུ་བར་འགྲུབ། །རྟེན་ཅིང་འབྲེལ་བ་ཤིང་རྟ་བཞིན། །འཇིག་རྟེན་རྣམ་རྟོགས་གཟུགས་བརྙན་ཕྱིར། །སྒྱུ་མ་ལྟ་བུ་རྐྱེན་ལས་སྐྱེས། །འཕྲལ་སྣང་བྱ་བ་ཀུན་བྱེད་ཀྱང་། །རྟོག་ཅན་རྣམས་ལ་མཐུན་པར་ཟད། །གཟུགས་བརྙན་འདྲ་ཕྱིར་བརྟག་པས་དབེན། །དེ་ཕྱིར་ཐམས་ཅད་རྫུན་པ་ཙམ། །མིང་ལ་དངོས་མེད་འདོད་པ་མིན། །ཡང་དག་ཉིད་དུ་གྲགས་སོ་ཅོག །གཉིས་སྣང་ཉིད་ན་གང་མིན་པས། །སེམས་ཕྱིར་ཅིར་སྣང་རྒྱུ་མེད་འཆར། །སྣང་ལ་ངོ་བོ་ངེས་མེད་ཅིང་། །ཅི་ལྟར་བལྟས་པས་སྣང་བ་དང་། །སྣང་ཞིང་ཐེར་ཟུག་ཆད་དང་བྲལ། །རྒྱལ་བའི་སྐུ་ཡང་མ་བསྐྱེད་པར། །རིག་པ་ཡེ་ཤེས་སྒྱུ་མར་ཤར། །ཁམས་གསུམ་པའང་དེ་བཞིན་པ། །ཐབས་ཆེན་སྒྱུ་མ་ཀུན་ངོ་བོ། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོག །རྒྱལ་བ་མངོན་འབྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །རྒྱུ་རྐྱེན་རག་ལུས་མེད་པའི་ཕྱིར། །སྒྱུ་མ་རྡོ་རྗེ་བཙན་པོའི་མཆོག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བ་རྡོ་རྗེ་ཉིད། །ཡིན་ཕྱིར་ངོ་བོ་ཐ་དད་མེད། །དམན་པས་སྣང་བ་གོམས་བྱེད་ཙམ། །འགྲོ་ལ་སྐད་ཅིག་གཉིས་མི་ལྡན། །རྒྱུད་ཅིག་མ་སྐྱེས་མ་འགག་པས། །གཟུང་འཛིན་བྲལ་བས་རང་རིག་ཉིད། །ཡེ་ཤེས་སྒྱུ་མར་མི་གཡོ་གསལ། །ཆུ་དང་ཟླ་བ་ཇི་བཞིན་དུ། །མཚུངས་པར་གསལ་བ་ངོ་བོར་བརྗོད། །སེམས་ལས་མ་གཏོགས་ཆོས་མེད་ཕྱིར། །ཡེ་ཤེས་སྒྱུ་མ་གཞན་ན་མེད། །སྒྱུ་མ་ཉིད་ཀྱི་ཆགས་བྲལ་བ། །ཐ་སྙད་ཙམ་དུ་བསྒོམ་ཞེས་བྱ། །མི་མཐུན་སྒྲིབ་པ་དམིགས་བཟུང་བ། །རྒྱུ་དང་ངོ་བོ་ཉེས་པ་ནི། །མ་གོམས་པ་དང་འགྲུས་བྱེད་པ། །མེ་དང་དུ་བའི་ཚུལ་བཞིན་དུ། །བདག་ཏུ་འཛིན་པ་རྣམ་གཉིས་ཀྱིས། །ཏིང་འཛིན་སྒྲིབ་པ་འབྱུང་བར་བྱེད། །སྔོན་དུ་ཇི་བཞིན་ཉིད་བརྟན་མོད། །མཚམས་སྦྱོར་སྙིང་རྗེ་གཡུང་མིན་པས། །བརྗོད་ཀུན་འབྲིང་དང་ཉུང་བར་འབྱུང་། །རྐྱེན་སྤངས་གོམས་པའི་ཐ་མལ་དཀོན། །འོན་ཀྱང་འདི་ཉིད་འཕྲོ་སྡུད་དང་། །མ་ངེས་ས་ཕྱོགས་མཁར་བཅས་མཐོང་། །ཟད་པར་མཐོང་དང་མ་ངེས་མདོག །མེ་ཆུ་རླུང་སའི་ཆ་འཁྲུལ་བས། །མི་གས ལ་མདོག་མཐོང་ཁམས་འཁྲུགས་ལྟ། །ས་གཡོས་མཐོང་བའང་ཆ་དབྱེའོ། །སྤྲིན་དང་ལིང་ཏོག་མུན་པ་བཞིན། །གལ་ཏེ་གཞུང་ལས་གྲགས་པའི་སྐྱོན། །ཕྲ་རགས་ཆ་ཡིས་སྒྱུ་མའི་དོན། །མི་གསལ་ཤིན་ཏུ་བུལ་བར་བྱེད། །སྔོན་བཞིན་རྟོག་པའི་ནད་བཅོས་པ། །ཤེས་བཞིན་སོ་འཐས་ཆོད་པར་བྱ། །དེ་ལྟར་གྱུར་ན་རྐུན་པོའི་ཚུལ། །མ་བསལ་རང་བཞིན་དྭངས་བར་འགྱུར། །རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མ་རང་སྣང་ཕྱིར། །ཆགས་སྡང་རེ་དོགས་མི་འབྱུང་སྟེ། །ཡེ་ཤེས་སྒྱུ་མ་གཞན་དུ་མིན། །དེ་ལྟར་མ་ལྡན་གང་དག་གིས། །ཚོར་ནས་ལོ་རྒྱུས་དཔྱད་པས་ཞི། །ཡང་ན་རྟོག་པའི་གནས་ཡུལ་བལྟ། །དེ་མཐོང་མུན་པ་རྣམ་དག་སངས། །འདོད་མིན་ཁ་དོག་མཐོང་བ་ན། །འབྱུང་བ་བཞི་ཡི་གཉེན་པོས་གཞིལ། །སྔོན་བཞིན་སྔར་འབྲངས་ཕྱིས་སྔོན་བྱེད། །དེ་ལྟར་རང་བཞིན་རྐྱེན་གྱིས་འགྱེས། །ཚོར་ན་ཐོག་མཐའི་ཉེས་བསམས་ཏེ། །སྐྱོ་བ་བསྐྱེད་ལ་དོར་དྲན་ཅིང་། །གང་དུ་ཐིམ་ན་ཁྲུས་བཅག་བསང་། །བྲོད་པས་འཇུག་ཅིང་གཟེངས་བསྟོད་བྱ། །དེ་ལྟར་དེ་ལྟར་བརྩོན་འགྱུར་པའི། །སྐབས་སུ་ཡེ་ཤེས་རྣལ་འབྱོར་ཉིད། །འཕེལ་པའང་གཡོ་ཐོབ་གོམས་པ་དང་། །བརྟན་མཐར་འགྲོ་བའི་ངོ་བོ་ལ། །མེད་ཀྱང་རབ་རིབ་ཆས་བདག་བརྗོད། །འབོ་འགྱེས་ཐིམ་པ་རླུང་དྲག་ཆུ། །ཅུང་ཟད་ཐུན་གྱི་སུམ་ཆར་ཡོད། །བཞི་ཆ་ལྔ་ཆར་དེ་མེད་ཐོབ། །ཐུན་རྐྱང་བུས་ཤིང་གསལ་ལྡན་ན། །ཆུ་རླུང་དལ་འབབ་ཚུལ་བཞིན་ནོ། །སྒོ་རྟེན་རྫས་ལྟར་རྟོག་རླུང་གིས། །མི་འགུལ་བཞི་ལ་གནས་པའོ། །དབང་པོ་མངོན་སུམ་གང་བྱས་པ། །བསྐྱེད་དུ་བྱ་བ་མེད་ཕྱིར་མཐའོ། །སྙིང་རྗེ་ཆེན་པོའི་རྣལ་འབྱོར་པས། །སྲིད་གསུམ་སྒྱུ་མ་འདྲ་བར་ནི། །རྫོགས་པ་བྱང་ཆུབ་མཁས་པས་ཤེས། །འགྲོ་བའི་ཆེད་དུ་གོ་བགོ་སྟེ། །འགྲོ་བ་དེ་ལྟར་སྔ་ནས་ཤེས། །ལོག་པར་རྟོག་བརྟག་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །རྗེས་སུ་འཇུག་པའང་དེ་བཞིན་ཤེས། །དེ་བཞིན་ཉིད་དབྱིངས་སྣ་ཚོགས་མང་པོ་ཐབས་སུ་སྣང་། །ཐབས་ཉིད་སྒྱུ་མ་མིག་ཡོར་ཆུ་ཟླ་གཟུགས་བརྙན་བཞིན། །དེ་ཉིད་རང་རིག་ཡེ་ཤེས་ཆགས་མེད་སྣ་ཚོགས་སྣང་། །ཐབས་དང་ཤེས་རབ་ལྡན་པས་མཆོག་གིས་གནས་གྱུར་བ། །ཅི་ལྟར་སྤྱད་ཀྱང་ཟད་མེད་གཉིས་གཉིས་བསྒྲིབ་མི་འགྱུར། །ཤེས་རབ་ཐབས་ཆེན་མཆོག་ལ་ཡེ་ནས་རོལ་བ་ཡིན། །བྱང་ཆུབ་སེམས་སུ་རྒྱུ་གཅིག་པས། །བརྩེ་བའི་སྙིང་རྗེ་ཆེན་པོ་འབྱུང་། །སངས་རྒྱས་སེམས་ཅན་གཅིག་རྟོགས་ན། །སྙིང་རྗེ་ཆེན་པོ་སྐྱེ་ཞེས་དེ་ལ་བྱ། །བརྡལ་ཆེན་བློ་ནི་ཀུན་ཏུ་སྣང་། །ཐབས་ཆེན་ཀུན་མཛད་འོད་གསལ་བྱམས། །ཐམས་ཅད་དགྱེས་མཛད་དབྱིངས་མ་གདུང་། །སེམས་ཅན་མ་ལུས་ཐམས་ཅད་ལ། །སྙིང་རྗེའི་ཐག་པ་མ་ཆད་པར། །ཉོན་མོངས་ལམ་ལ་གྲོལ་བྱེད་ཅིང་། །བྱམས་པ་དག་གིས་མཉེས་པར་གྱིས། །དེ་བཞིན་འཁོར་བའི་བཙོན་ར་ལ། །སྙིང་རྗེའི་ཞགས་པ་ཆེར་བརྐྱང་ནས། །ཉོན་མོངས་འདམ་ནས་འདྲེན་པར་བྱེད། །སྙིང་རྗེ་ཆེན་པོར་སྐྱོ་མ་བྱེད། །དེ་བཞིན་སྐྱེ་བོ་ཕལ་རྣམས་ལ། །ལས་ཀྱི་སྒྲིབ་པས་མི་གོས་ཤིང་། །ཐམས་ཅད་མངོན་པར་སངས་རྒྱས་པར། །དགའ་བ་དག་ལ་འགྱོད་མ་བྱེད། །སེམས་ཅན་ང་དང་བདག་མེད་ལ། །ཐུགས་རྗེ་གཉིས་རྟོགས་མི་བྱེད་དེ། །བུ་གཅིག་འདྲ་བར་བློ་བཞག་བྱ། །ཐམས་ཅད་དྲི་མ་མེད་པར་བྱ། །སྔོན་རྫོགས་རྐྱེན་འཕྲད་སྔོན་བཞིན་ཏེ། །རྣལ་འབྱོར་ཉིད་ན་གཞན་དོན་རྫོགས། །དམིགས་པ་བདུན་གཉིས་གདུལ་བྱ་ལ། །ངོ་བོ་ལས་དང་ཕན་ཡོན་གྱི། །ཕྱོགས་གཏད་མེད་དེ་ཐུན་མོང་གི། །ཆེན་པོ་དག་ལ་བླར་གྱུར་ཡིན། །བདག་ཕྱིར་སྤྱོད་ཡུལ་ཐམས་ཅད་ཀུན། །ཡེ་ཤེས་སྒྱུ་མ་རང་སྣང་ཕྱིར། །ཕྱི་ནང་སྒྲིབ་མེད་གསལ་བའི་ངང་། །ཡེ་ཤེས་བློ་བརྟན་ཤིན་ཏུ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་འཛིན། །ཐམས་ཅད་ཡེ་ནས་རོ་གཅིག་པས། །གཉིས་སུ་མེད་པར་ཤིན་ཏུ་བདེ། །དེ་བས་སྤྱད་དང་མི་སྤང་ལེན། །འདོད་ཡོན་ལྔ་སོགས་ཡེ་ཤེས་རོལ། །ཐུབ་ཆེན་སྟོན་པའི་སྤྱོད་ཡུལ་ནི། །ཅི་ལྟར་དམིགས་པ་བཞིན་དུ་འགྲུབ། །ཆོས་རྣམས་ཐམས་ཅད་དམིགས་སུ་མེད། །ཡེ་ནས་སྒྱུ་མ་ཅིར་ཡང་འགྲུབ། །ཟག་མེད་ཟབ་པས་དོན་རྟོགས་ནས། །དག་པར་མ་གྱུར་གང་ཡང་མེད། །ཡེ་ཤེས་མ་བཅོས་ཀུན་ཏུ་གསལ། །རང་བཞིན་རྣམ་པར་དག་པའོ། །དེ་ཕྱིར་སྤྱོད་ཡུལ་ཐམས་ཅད་ཀུན། །སྒྱུ་མའི་ཡེ་ཤེས་འདའ་མི་བྱ། །རྩ་བ་ཡན་ལག་ཐམས་ཅད་ཀུན། །སྔ་མ་བཞིན་དེ་ནུས་པ་འཕེལ། །དེ་ལྟར་སྒྱུ་མ་ཐོབ་གོམས་པས། །འཁོར་བའི་ཆོས་ལ་ཚད་མེད་པའི། །བྱང་ཆུབ་སེམས་ཀྱིས་འཕྲོགས་པར་འགྱུར། །མ་འཁྲུལ་འཁྲུལ་པ་ཡ་མཚན་སྐྱེ། །དོན་མེད་འདུག་པའང་དེ་བཞིན་ཏེ། །རྣམ་གསུམ་ལྔ་ལས་འཕེལ་བར་སྣང་། །ཉམས་རིམ་འཕེལ་བའི་སྔ་རྟག་ནི། །ཤིང་བལ་ལྟ་བུར་ཡང་བ་དང་། །ལུས་ཀྱི་བཟོད་པ་ཕྲ་ཐོབ་རིང་། །ཁམས་བདེ་མི་བདེ་སྙོམས་པ་དང་། །ཕལ་ཆེར་ཡོད་ཅིང་ཆོས་བརྒྱད་སྙོམས། །དེ་བས་མང་དང་འབྲེལ་ལ་མཉམ། །ཀུན་ཀྱང་ལྔ་ལས་གྲངས་འཕེལ་ཞིང་། །ངོ་བོ་གསལ་བ་ཡུན་རིང་བའོ། །ལྷན་ཅིག་དྲུང་འདུག་ཕ་རོལ་གྱི། །མངོན་ཤེས་འཕེལ་དང་ཅུང་ཟད་བརྟན། །གཞན་ལའང་ཤེས་པ་ཅུང་ཟད་འབྱུང་། །དེ་བས་རྣལ་འབྱོར་བརྟན་པར་བྱ། །འདི་ཚེ་སྤྱོད་ཡུལ་ཐམས་ཅད་ཀུན། །རྨི་ལམ་དུའང་སྒྱུ་མར་མཐོང་། །སྙིང་རྗེ་གང་བར་མཐོང་བ་དང་། །བྱིན་རླབས་དབང་བསྐུར་མང་མཐོང་དང་། །བདུད་ཀྱི་སྤྱོད་ཡུལ་མཚན་མར་མཐོང་། །དེ་སོགས་སྣང་ཡང་ཆགས་མི་བྱ། །སྙིང་རྗེ་ཆེན་པོ་གོམས་བྱས་ནས། །རྣལ་འབྱོར་དོན་ཆེན་རྟོགས་པ་ཡིས། །དུས་མཐའ་མེད་པར་དེ་ལྟར་བསྒོམ། །ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་གཅིག །སྐུ་སྤྱོད་བསོད་ནམས་ཚོགས་ཆེན་ལྡན། །དེ་མིང་མ་ཆགས་ཡེ་ཤེས་ཆེ། །རྣལ་འབྱོར་ཕྱི་མ་བཙལ་བ་མེད། །ཉིད་འོད་ས་བོན་སྐྱུར་སྒྲ་བཞིན། །འཕོ་བ་མེད་བཞིན་འགྱུར་སྣང་ཚེ། །སྒྱུ་མར་བརྟན་བྱས་ལས་རྒྱུན་གཅོད། །འབྲེལ་པས་ལམ་དང་བསྐོལ་མི་འགྱུར། །ཕྱི་མའི་ལན་གྲངས་གཞན་དག་ལ། །མི་ལྡོག་དབང་བསྒྱུར་རིགས་སུ་ངེས། །ལམ་འདིར་ཆ་རྐྱེན་རྫོགས་བསྒྲུབ་པ། །མཚན་དང་དཔེ་བྱད་ཀུན་ལྡན་པའི། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བར་ཐེ་ཚོམ་མེད། །མ་རྟོགས་ལེ་ལོ་སྙོམས་ལས་བྱས། །དོན་མ་གྲུབ་པར་ངན་སོང་འགྲོ། །སྙིང་རྗེ་ཆེན་པོའི་རྣལ་འབྱོར་བསྟན་པའི་ལེའུ་སྟེ་བཞིན་པའོ།། །།གཉིས་མེད་ངང་ལ་ཕྱག་འཚལ་ནས། །ཕྱག་རྒྱ་གཅིག་པའི་རྣལ་འབྱོར་བཤད། །གང་དག་རྡོ་རྗེ་གསུམ་བསྒོམ་པ། །སྔ་མ་འདས་པའི་ལུས་ཀྱིས་ཤེས། །སྤྱི་ཡུ་ལས་སྔོན་རྫོགས་པ་ཡིས། །འདི་ཉིད་སྒྱུ་མཐར་སྔོན་བྱས་ཤིང་། །ལུགས་སོགས་མཚན་མའི་ཕྱག་རྒྱ་གཞན། །དེ་ལ་ཡན་ལག་བརྒྱད་སྔོན་བཞིན། །འབྲས་བུ་ཡོངས་སུ་རྫོགས་བྱ་ཞིང་། །སྤྲོས་པ་རྒྱུ་ཡི་ཐོབ་བྱ་ཞིང་། །རྒྱུ་སྟོང་རྟོག་ཞེན་དབང་དུ་བྱ། །རྟོག་པའི་ཕུང་སོགས་གནས་འགྱུར་ཞིང་། །གང་དག་སྨིན་པར་བྱ་བའི་ཕྱིར། །ཕྱག་རྒྱ་རྣལ་འབྱོར་ཤིན་ཏུ་གཅེས། །དེ་ལ་འཇུག་ཐབས་རྣམ་གཉིས་ཏེ། །སེམས་སྦྱང་བ་དང་ལྷར་བསྐྱེད་པའོ། །སྔ་མ་གདམས་ངག་ཤེས་རབ་ཀྱིས། །འཇུག་པ་བཞིན་པོ་འདི་ཉིད་དོ། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བ་ཨ་རྣམས་འཕྲོ། །ཕྱོགས་བཅུ་གང་རྣམས་གསལ་འགྱུར་ནས། །བསྡུས་དོན་འཕེལ་འགྲིབ་མེད་པར་བརྟན། །དེ་ལ་འམ་ཡང་ན་ཐུགས་ཡི་གེ། །དེ་བཞིན་ཡང་དང་ཡང་གོམས་ནས། །ཕྱི་ནང་སྣོད་བཅུད་ཧཱུྃ་དུ་བསྡུ། །ཡན་ལག་རྣམ་ཤེས་ཡེ་ཤེས་ཕྱིར། །ཡི་གེ་ཧཱུྃ་དུ་ཤིན་ཏུ་བསྡུ། །ནྲི་ཡི་མིག་གིས་ལྟར་ཡོད་པ། །འདྲིས་ནས་བདག་གཞན་དོན་ཕྱིར་སྤྲོ། །མཆོད་དོན་རྫོགས་ནས་སླར་བསྡུས་ཏེ། །ཧཱུྃ་ཉིད་མི་དམིགས་ངང་ཉིད་ལས། །གོམས་པར་བྱ་བ་ཤིན་ཏུ་གཅེས། །ཕྱི་མ་ཚངས་པ་སྲིན་པོའི་ཚུལ། །རྫོགས་པར་བྱ་བ་ཟུང་དུ་འགྱུར། །ཚངས་པའི་ཆ་ལུགས་རྫོགས་བྱ་བའང་། །གང་བསྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམ་ཀུན་དང་འདྲ། །རྡོ་རྗེ་སེམས་དཔའ་ཉིད་དུ་འདུ། །འདི་ལྟར་དེ་ཉིད་གོམས་བྱ་བ། །སྔོན་དུ་མི་དམིགས་ངང་ཉིད་ལས། །ཨ་དཀར་གསུང་གི་ཕྱག་རྒྱ་འབར། །ཤིན་ཏུ་འཚེར་བ་གསལ་བསྒོམ་ནས། །ཐམས་ཅད་ཨར་ནི་གྱུར་པར་བསྒོམ། །དེ་བཞིན་ཉིད་དུ་འདྲིས་བྱས་ནས། །ཨ་ལས་མ་ཡི་དཀྱིལ་འཁོར་སྤྲོ། །ཨ་མ་གསལ་བར་འབྱོར་གྱུར་ནས། །ཉི་ཟླ་གང་བ་སྒྲིལ་བ་བསྒོམ། །ཧྲཱིཿགསལ་པདྨ་ཆགས་མེད་བསྒོམ། །རིན་ཆེན་འབར་བའི་གཞལ་ཡས་བསྒོམ། །ཉི་ཟླའི་གདན་ལ་གཞལ་ཡས་ཁང་། །ཐམས་ཅད་བསྡུས་ཤིང་འཕྲོ་བར་བསྒོམ། །དེ་དཀྱིལ་ཡི་གེ་ཧཱུྃ་གནས་པར། །མཐིང་ཀ་འཚེར་ལ་གསལ་བ་ཡི། །འོད་ཟེར་འཕྲོ་བ་རྣམ་པར་བསྒོམ། །འོད་འཕྲོས་དབྱིངས་སུ་སླར་འདུས་ནས། །ཤིན་ཏུ་རྡོ་རྗེ་ཕྲ་བར་བསྒོམ། །རྡོ་རྗེ་འོད་འཕྲོས་གསལ་འབར་ནས། །དབྱིངས་སུ་ཡང་ནི་བསྟིམ་པར་བྱ། །དེ་ཉིད་སེམས་དཔའི་སྐུར་གྱུར་ནས། །ཤིན་ཏུ་ཕྲ་ཞིང་འདུས་པར་བསྒོམ། །དེ་བཞིན་གཉིས་མེད་གསལ་གྱུར་ནས། །སྐུ་གཅིག་རྡོ་རྗེ་དྲིལ་འབར་བསྒོམ། །དེ་བཞིན་ཉིད་དུ་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བྷེ། །རྡོ་རྗེ་འཁོར་ལོ་རལ་གྲི་འབར། །རིན་ཆེན་པདྨ་དྲིལ་བུ་འབར། །ཕྲ་བའི་གཞལ་ཡས་གདན་དང་ལྡན། །གནས་གཅིག་ཡེ་ཤེས་སེམས་དཔའ་བསྒོམ། །སྤྱི་མགྲིན་ཙིཏྟ་གནས་གསུམ་དུ། །བྱིན་རླབས་རྡོ་རྗེ་གསུམ་བསྒོོམ་བྱ། །དབུ་ཡི་གནས་ལྔར་ཡི་གེ་ལྔ། །ཡེ་ཤེས་ལྔ་དབང་རྫོགས་པར་བརྒྱན། །བློ་ཡི་ཤེས་རབ་ཆེ་ཆུང་གིས། །ཡང་ན་ཕྱག་རྒྱ་ཆེན་པོ་སྟེ། །ཆུ་ལ་ཉ་ལྡང་ཅི་བཞིན་དུ། །བདག་ཉིད་ཕྱག་རྒྱ་ཆེན་པོ་སྟེ། །ཞལ་གསུམ་ཕྱག་དྲུག་རྟག་ཏུ་བསྒོམ། །གཞལ་ཡས་གདན་སོགས་སྔ་མ་བཞིན། །ཡན་ལག་དགུའང་དེ་བཞིན་བསྒོམ། །དེ་ལ་ཤིན་ཏུ་གོམས་པར་བྱ། །རཀྵའི་ཆ་ལུགས་འཛིན་པ་ཡང་། །རིམ་དང་ཅིག་ཆར་སྔོན་བཞིན་ཏེ། །རྡོ་རྗེ་གོ་ཆ་ཁ་དོག་དང་། །གཞལ་ཡས་ལ་སོགས་བསྒྱུར་དེ་བསྒོམ། །ཐུགས་ཀྱི་རིགས་ལ་གཞན་མོས་པའང་། །འབྲུ་བཞིས་སྦྱངས་ཏེ་གདན་གནས་གཅིག །རྡོ་རྗེ་རྣམ་གསུམ་རིགས་སུ་བསྒྱུར། །སྐུ་དང་ཡན་ལག་དེ་བཞིན་ནོ། །རིམ་པ་ཐོབ་པའམ་ཅིག་ཆར་བ། །བརྒྱད་མཐར་བྱིན་ཕབ་ལྷར་བསྐྱེད་ལ། །མཆོད་པ་བྱིན་རླབས་སྐུ་བསྒོམ་སྟེ། །ཡན་ལག་ལྡན་རྫོགས་མཆོད་བསྟོད་བྱ། །ཡན་ལག་མ་ཉམས་སྔགས་བཟླས་པའང་། །སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །སྤྲོ་བསྡུས་བདག་དང་གཞན་དོན་རྫོགས། །ཕྱི་ནང་གསང་བ་གང་མོས་སུ། །བཟླས་པ་ཚད་དུ་བསྐྱལ་བར་བྱ། །དུབ་ན་ཡེ་ཤེས་ཐིག་ལེས་བལྟ། །ཉལ་བས་ནང་པར་དེ་ཉིད་ལས། །ཧཱུྃ་སོགས་བསྒྱུར་ཏེ་སྐུ་རྫོགས་པ། །སྔོན་བཞིན་བརྩོན་པས་འདྲིས་པར་བྱ། །གཞལ་ཡས་ལྷ་ཡི་དཀྱིལ་འཁོར་ཡང་། །སེམས་ཀྱི་ཆོ་འཕྲུལ་རང་སྣང་ཕྱིར། །ལྷ་ལ་དམིགས་མེད་རིག་པར་ཉིད། །བཞི་རྫོགས་སྐུ་དེ་རང་སྣང་བའོ། །རྒྱལ་བའི་རྒྱལ་བ་རྣམས་ཀྱི་སྐུ། །ཀུན་ཏུ་རིན་ཆེན་ལྟ་བུ་སྟེ། །རྫོགས་པས་རྟོགས་མེད་རེ་བ་སྐོང་། །ཟད་འཕེལ་འགྲོ་འོང་ཉེ་རིང་མེད། །ཕྱག་རྒྱ་ཡོད་མེད་གྲོལ་མ་གྲོལ། །བདག་ཕྱིར་ཕྱོགས་མེད་བླང་དོར་མེད། །བྱིང་རྒོད་སྙོམས་ཙམ་མཉམ་གཞག་པའོ། །མི་མཐུན་འདི་ཚེ་དམིགས་གཟུང་བ། །ཡི་གེ་ནས་བཟུང་རྫོགས་པའི་སར། །ཐུན་མོང་ཀུན་ཏུ་འབྱུང་རགས་ཕྲ། །ཐ་མ་འདི་ལས་སོ་འཐས་གཅད། །ཁྱད་པར་རབ་རིམ་མོག་མོག་གྲིབ། །གང་ཚད་དམིགས་ལ་ཚད་དང་ཚུལ། །གྲངས་དང་ཆ་ལུགས་མདོག་དབྱིབས་དང་། །ཁ་མདོག་འབའ་ཞིག་རིམ་པར་ནུབ། །དེ་ལྟར་འགྱུར་བར་ཚོར་བྱས་ཏེ། །འདུ་བྱེད་རླུང་གིས་བསྐྱོད་མི་བྱ། །དེ་ལྟར་ཟིན་པས་དེ་དག་ཀུན། །ཁྱད་པར་གསུམ་ལ་སྒྱུ་སྟོང་འདུག །རྗེས་ལས་ཐོབ་པ་མ་སུན་འདུག །དྲུག་ལ་རི་ལྟར་ཆེ་གདོས་བྱ། །བདུན་པ་དབྱིབས་དང་བསྲེ་བར་བྱ། །བརྒྱད་པ་སྤྱི་མིན་བྱེ་བྲག་གནས། །བྱ་མིན་ལས་ཀུན་དོར་བྱས་ཏེ། །སྤྱོད་ལམ་སྐྱོན་རྣམས་བཏང་བར་བྱ། །གཉིས་ལ་ཕུག་མདོ་རྒྱག་ཅིག་ལ། །གོམས་པ་འཕེལ་བའང་སྔ་མ་བཞིན། །སྨིག་རྒྱུ་དུ་བ་སྲིན་མེ་ཁྱེར། །མར་མེ་ཉི་མའི་ཚུལ་དང་སྦྱར། །གཏང་སྙོམས་རིམ་དང་བརྩོན་པ་དག །སྐབས་ཀྱིས་བླང་དོར་ཉམས་ལས་ཤེས། །འབྲུ་བཞིས་རྟག་ཏུ་མཚམས་བཅད་དེ། །བདག་ཉིད་ཆེན་པོའི་ཚོགས་མཆོད་བྱ། །ནང་གི་སྦྱིན་སྲེག་བླང་བར་བྱ། །གཟུགས་སོགས་ཐིག་ལེའམ་ལྷ་མོ་དྲུག །དབང་པོ་ཡུལ་དུ་སྦྱོར་བ་བྱ། །ཞི་ཁྲོ་གང་ཡིན་སྐབས་ཀྱིས་བསྒྱུར། །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །འགྲོ་ཉལ་འདུག་སྡོད་ལོངས་སྤྱོད་དང་། །ཉོན་མོངས་སྡུག་བསྔལ་ཚེ་ན་ཡང་། །ཐེག་ཆེན་ཕྱག་རྒྱ་མི་སྤངས་ཏེ། །སྔོན་བཞིན་སྦྱོར་བས་མྱུར་དུ་འགྲུབ། །རྒྱུ་འབྲས་མཚམས་སྦྱོར་བར་སྐབས་ཀུན། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །རྡོ་རྗེ་གསུམ་བསྒོམ་ཕྱག་མི་བྱ། །ཕྱག་རྒྱའི་རྣལ་འབྱོར་སྤྱོད་པ་ལ། །དོན་ལྡན་མ་ཉམས་དག་བྱས་ནས། །བརྩོན་འགྲུས་ཆེར་བསྐྱེད་མྱུར་བར་འགྲུབ། །ལྷ་ལ་ལྷ་རོལ་བསོད་ནམས་ཏེ། །སྤྱོད་ལ་མ་ཆགས་གཉིས་མེད་པའོ། །གཞན་ཕྱིར་འཕྲོ་འདུ་རིམ་པར་རྫོགས། །རྐྱེན་དང་འཕྲད་པའང་མི་དོར་ཏེ། །དུས་མིན་གཞན་ཕྱིར་སྤྲོས་པ་ལེན། །གང་དང་འཚམས་པ་དོན་རྫོགས་བྱེད། །བདག་ཕྱིར་ཐུན་མོང་མཆོག་སྒྲུབ་རྣམས། །འདི་བརྟན་སྦྱོར་བར་ཐེ་ཚོམ་མེད། །གསུང་གི་གཞི་མ་ལྷུར་བྱ་ཞིང་། །ཕྱག་རྒྱ་ཆེན་པོའི་རྣལ་འབྱོར་དུ། །སྤྱོད་ཡུལ་ཐམས་ཅད་མཉམ་པར་བྱ། །ཕྱི་ནང་གསལ་བ་ཤིན་ཏུ་འཕེལ། །ཐོབ་དང་བརྟན་པའི་ཆར་གྱུར་ཏེ། །ལོངས་སྤྱོད་ཞེན་པ་མེད་པ་དང་། །དབང་པོ་ཡུལ་དུས་གོམས་པ་དང་། །རྒྱུ་བ་ཆད་དང་ཐུན་མཚམས་བྲལ། །དྲོད་ཀྱི་བྱེ་བྲག་ཀུན་དང་ལྡན། །རྟགས་ཆེན་གོམས་མཐར་མཚན་མ་ལྔ། །ཡོངས་སུ་མཐོང་དང་རྡོ་རྗེ་གསུམ། །སྐྱེ་མཆེད་མཐོང་དམ་ཚན་མ་སྟེ། །གྲུབ་པ་དང་པོ་རྟགས་ཞེས་བྱ། །དམིགས་མ་རྒྱ་ཆེ་མངོན་ཤེས་དང་། །གྲངས་དང་ཡུལ་གྱི་བླ་ན་མེད། །ཉི་ཤུ་རྩ་ལྔའི་མངོན་ཤེས་ཀྱང་། །གཡོ་ཐོབ་འབྱུང་བར་ཐེ་ཚོམ་མེད། །ལུས་ངག་སེམས་ཀྱི་མཐུ་རྟགས་ཀྱང་། །ཆོ་འཕྲུལ་བཞི་ཚུལ་གཡོ་ཐོབ་བྱེད། །གཞན་ཡང་སྔོན་བས་གསལ་བརྟན་པ། །རྣལ་འབྱོར་ལྷག་པའི་སྟོབས་ཀྱིས་འཐོབ། །སྤྱོད་ལམ་ཀུན་ཏུ་ལེགས་ཉེས་ཀུན། །གསལ་བར་འབྱུང་ཞི་ཤིན་ཏུ་བརྟན། །བསམ་གཏན་འབད་པ་བཟླས་པ་ཡིས། །སྒྲུབ་པ་པོ་ནི་རྟག་ཏུ་མཐོང་། །སངས་རྒྱས་མཐུ་དང་མཚུངས་པར་མཐོང་། །སངས་རྒྱས་ལོངས་སྤྱོད་རྫོགས་པའི་སྐུ། །བདག་མེད་པ་ནི་མྱུར་དུ་མཐོང་། །སེམས་དཔའ་ཆེན་པོ་ཁམས་གསུམ་པས། །མཆོད་པ་བྱས་པར་དེ་མཐོང་ངོ་། །ཡེ་ཤེས་ཆེན་པོའི་འོད་འདྲའི་གཟུགས། །སངས་རྒྱས་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །རྟག་ཏུ་མཆོད་པ་བྱས་པ་མཐོང་། །རྡོ་རྗེ་སེམས་དཔའི་གཟུགས་ཆེན་དང་། །གྲངས་ཆེན་རྡོ་རྗེའི་མཆོག་དག་ཏུ། །རྨི་ལམ་དག་ན་རང་གཟུགས་མཐོང་། །གྲགས་ཆེན་རྡོ་རྗེ་གསང་བ་དང་། །བྱང་ཆུབ་སེམས་དཔའི་འཁོར་ལོ་ཅན། །སངས་རྒྱས་ཆེན་པོ་ཕྱག་བཙལ་བའི། །རྨི་ལམ་འདི་འདྲ་མཐོང་གྱུར་པ། །ལུས་ངག་སེམས་ཀྱི་མཐུ་ལས་སྐྱེས། །རྒྱན་རྣམས་ཐམས་ཅད་ཡོངས་རྫོགས་པའི། །ལྷ་ཡི་བུ་མོ་ཡིད་འོང་དང་། །ཁྱེའུ་དང་བུ་མོ་དག་མཐོང་ན། །དེ་ནི་དངོས་གྲུབ་ཐོབ་པར་འགྱུར། །ཕྱོགས་བཅུའི་སངས་རྒྱས་ཐམས་ཅད་རྣམས། །ཞིང་ན་གནས་པར་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་ལ་སོགས། །ཆོས་ཀྱི་འཁོར་ལོས་སྒྱུར་བའི་སྐུ། །སེམས་ཅན་ཀུན་གྱིས་ཡོངས་བསྐོར་བ། །བསམ་གཏན་རྡོ་རྗེ་ལ་གནས་པའི། །དམ་ཚིག་སྦྱོར་བར་མཐོང་བར་འགྱུར། །སྣ་ཚོགས་ཀུན་དགའ་སྐྱེད་མོས་ཚལ། །ལྷ་ཡི་བུ་ལ་སོགས་པས་བརྒྱན། །སངས་རྒྱས་ཀུན་གྱི་བྱིན་རླབས་ལས། །བསམ་གཏན་དམ་ཚིག་ཅན་གྱིས་མཐོང་། །སངས་རྒྱས་བྱང་ཆུབ་སེམས་དཔའ་ཡིས། །དེ་ནི་མངོན་པར་དབང་བསྐུར་མཐོང་། །རིག་འཛིན་རྒྱལ་པོ་ཆེན་པོ་ཡིས། །བསྐོར་བ་བྱས་པ་དེ་མཐོང་ངོ་། །རྡོ་རྗེ་ལས་བྱུང་སྣ་ཚོགས་པའི། །རྨི་ལམ་དྲི་མེད་དེ་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེ་པ་བླ་ན་མེད་པ་འགྲུབ། །གདོལ་པ་ཁྱི་ཡི་སྦྱོར་ལ་སོགས། །རྡོ་རྗེ་འཛིན་པས་མཐོང་ན་ནི། །བློ་ལྡན་རྡོ་རྗེ་སེམས་དཔའ་ཡི། །སེམས་ཀྱི་གནས་ནི་འགྲུབ་པར་འགྱུར། །ཡི་གེ་ཕྱག་རྒྱ་རྣམ་གཉིས་ཀྱི། །སྐྱེ་མཆེད་མཐོང་བའང་དེ་བཞིན་ནོ། །ལྷ་ཡི་སྐུ་ནི་གསལ་བསྒོམ་ན། །བསོད་ནམས་ཚོགས་ཆེན་རྫོགས་པར་འགྱུར། །དེ་ཉིད་ཆུ་ཟླའི་ཚུལ་ཤེས་ན། །ཡེ་ཤེས་ཚོགས་ཆེན་རྫོགས་པར་འགྱུར། །བདག་ཉིད་ལྷ་དང་མཉམ་སྦྱོར་བས། །ཡོན་ཏན་ཆུང་ཡང་འགྲུབ་པར་འགྱུར། །ཡེ་ནས་མཉམ་ཉིད་སྦྱོར་བས་སུ། །ལྷ་ཉིད་དུ་ནི་རྟག་ཏུ་བསྒོམ། །བདེར་གཤེགས་ཀུན་དང་མཉམ་སྦྱོར་བས། །དཀྱིལ་འཁོར་ཀུན་དང་མཉམ་པར་འགྱུར། །དཀྱིལ་འཁོར་ཀུན་དང་མཉམ་པའི་ཕྱིར། །སྐུ་གསུང་ཡེ་ཤེས་ལྔ་རྫོགས་འགྲུབ། །ཡི་དམ་ལྷ་ཡི་མཚན་ཉིད་ནི། །དེ་བཞིན་གཤེགས་པ་ཐམས་ཅད་ཀྱི། །ལྷ་སྤངས་དགེ་སྤྱད་དོན་མེད་འགྱུར། །དམ་ཚིག་བསྲུངས་དང་སྔགས་བཟླས་དང་། །ཕྱག་རྒྱ་རྒྱུན་མི་གཅོད་པ་བཞི། །བརྩོན་འགྲུས་ཆེ་ཞིང་བརྟན་པར་གཟུང་། །རྣལ་འབྱོར་བརྩོན་འགྲུས་ཆུང་གྱུར་ན། །མི་འགྲུབ་ཉེན་ཡང་ཆེ་བར་གསུངས། །ཅི་ལྟར་རལ་གྲིའི་སོ་ལ་ནན་ཏན་དུ། །ལེགས་པར་མ་གཟུང་ལག་པ་ཆོད་པར་འགྱུར། །དེ་བཞིན་ནན་ཏན་མེད་པའི་གསང་སྔགས་པ། །ཕུང་བའམ་ཡང་ན་འབྲས་བུ་མེད་པར་འགྱུར། །དེ་བས་བར་ཆད་བརྩོན་མེད་ན། །དཔེར་ན་ས་བོན་ཚིག་པ་ལས། །འབྲས་བུ་འདོད་པ་དང་འདྲ་སྟེ། །སྒྲུབ་པའི་འབྲས་བུ་མེད་པར་འགྱུར། །མི་ཁོམ་འཁོར་བར་བརྒྱུད་པར་འགྱུར། །གང་ཞིག་ཞལ་མཐོང་མོས་པ་ཡིས། །བསྙེེན་བཀུར་མཆོད་པའི་བསོད་ནམས་ཀྱིས། །མི་དགེ་མཚམས་མེད་བཅོ་ལྔ་སོགས། །ལས་ངན་སྦྱངས་ཏེ་རིལ་ལ་སྦྱོར། །གང་གིས་མི་རྟག་མཐོང་ན་ཡང་། །ཕྱག་རྒྱ་མ་ཉམས་གསལ་བཟུང་སྟེ། །ལས་ཀྱི་མི་འཕེལ་གང་འདོད་དུ། །ཨ་ཡང་སྟོབས་ཀྱིས་བསྐུལ་བར་བྱ། །རྣམ་སྨིན་རིགས་ལ་ཐེ་ཚོམ་མེད། །འོན་ཏེ་ནའང་རིམ་པ་ཡིས། །དེ་ཉིད་བར་ཕྱིའམ་ལན་གྲངས་གཞན། །ཚེ་ཡང་ཕྱི་མའམ་གཞན་ཐོབ་ངེས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་བའི་ཡིད་གཉིས་མེད་པ་ན། །དཀྱིལ་འཁོར་ཆེན་པོ་འབར་བར་འགྱུར། །འདི་ལྟར་བསྒོམ་ཞིང་བསྒྲུབ་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མི་མཚན་རྫོགས་སྡུག་བསྔལ་སེལ། །བདེར་གཤེགས་འབྱུང་དང་མི་བསྐོལ་ཞིང་། །ཐེག་པ་དམན་པར་འཇུག་མི་འགྱུར། །བྱང་ཆུབ་གཟུངས་ལ་ཞུགས་པ་ཡིན། །དེ་བས་ལམ་འདི་འབྲལ་མི་བྱའོ། །ཕྱག་རྒྱ་གཅིག་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། །།རང་གི་ལྷ་ལ་ཕྱག་འཚལ་ཏེ། །སྤྲོས་པའི་རྣལ་འབྱོར་བཤད་པར་བྱ། །སྤྲོས་པའི་བཞི་པོ་ལྷ་དེ་དབུར། །གཞག་པས་གྲོལ་ཕྱིར་རྒྱས་པར་བཤད། །རྣལ་འབྱོར་རྣམ་གསུམ་སྔོན་རྫོགས་ནས། །ས་ལ་སོགས་པར་ཕྱག་རྒྱར་བཅས། །རི་མོ་རྒྱུ་བཞིའམ་འབུར་བླུགས་དང་། །འཇིམ་པ་ལས་བྱས་དཀྱིལ་འཁོར་ནི། །ལྷག་པའི་གཟུགས་བརྙན་ཁང་བུ་དངོས། །ཡེ་ཤེས་བྱིན་ལྡན་བརྟེན་པར་བྱ། །མ་ཧཱ་བ་ལིང་ཨ་མྲི་ཏ། །དམར་ཆེན་ཕྱི་ནང་མཆོད་པ་བཀྲམ། །རོལ་མོ་མཆོད་སོགས་རྒྱ་ཆེན་རྣམས། །ཅི་ལྟར་འོས་པ་བཞིན་དུ་བྱ། །ཕྱོགས་བཅིང་བརྒྱད་ཀྱིས་རིམ་རྫོགས་ནས། །ལས་ཀྱི་ལྷ་ཡི་རྣལ་འབྱོར་གྱིས། །མཆོད་རྫས་བྱིན་གྱིས་བརླབ་པར་བྱ། །བདུད་རྩིའི་ཆུས་བསང་བགེགས་བསྐྲད་བདུག །བསོད་ནམས་ཡོངས་སུ་རྫོགས་བྱ་ཞིང་། །སྤྱོད་ཡུལ་བྱིན་གྱིས་བརླབས་པ་དང་། །འཁོར་ལོ་ས་མཐར་དབྱུང་བ་དང་། །ཚོགས་ལ་དུས་ཀྱིས་བསྒྲུབ་ཕྱིར་བསྒོམ། །དགུག་བཏང་བཅིང་གྲོལ་གསོ་གསད་དང་། །ཕམ་རྒྱལ་ཏིང་འཛིན་འདིས་བྱེད་ཕྱིར། །གང་དག་གདུལ་བྱ་ཇི་སྙེད་པ། །སྤྲོས་པའི་ལས་ཀྱིས་གདོན་ཕྱིར་རོ། །གཅིག་ནི་སྤྲོས་པའང་རྣམ་གཉིས་ཏེ། །རྗེས་སུ་མཐུན་པར་ཞི་དང་ཁྲོ། །དེ་རེ་རེའང་ཚུལ་གཉིས་ཀྱིས། །བློ་དང་ལྡན་པར་འཚམས་སྟོན་ཡིན། །སྔ་མའང་རིམ་དང་ཅིག་ཆར་བ། །ཕྱེ་བས་ཕྱི་མའང་བཞིན་འཇུག་པ། །ཉི་ཟླ་གཟའ་སྐར་དུས་གཅིག་ཏུ། །ཆུ་དཀྱིལ་དྭངས་པར་གསལ་བ་བཞིན། །སྐུ་གསལ་སྐད་ཅིག་འོད་དུ་འབར། །སྙིང་པོ་བརྗོད་པས་འཁོར་ལོ་ཤར། །དེར་སྔོན་བསྟན་པ་བཞིན་འཇུག་པ། །མཐོང་དང་སྔ་མའི་རྣལ་འབྱོར་སྟོབས། །ཐོབ་པས་ཤེས་བྱ་སློབ་ཚུལ་དུ། །དུ་མ་གཅིག་གསལ་བྱེད་པའང་། །མ་བསྒྱུར་རྣལ་མའི་དཀྱིལ་འཁོར་ལ། །འཁོར་ལོ་ཚོམ་བུ་གྲངས་ཞལ་ཕྱག །དང་པོ་བཅོ་བརྒྱད་བཞི་བཅུ་གཉིས། །རྒྱས་པའི་དཀྱིལ་འཁོར་རིམ་པར་སློབ། །གཉིས་པ་བདག་ཆག་ཡབ་ཡུམ་གཉིས། །གནས་པའི་འཁོར་ལོ་གསལ་བྱས་ཏེ། །གདན་ལྡན་དབུས་ན་བདག་པོ་གནས། །དེ་ལ་སེམས་དཔའ་ཁྲོ་བོས་བསྐོར། །བརྟན་ནས་མདུན་རྒྱབ་སྐུ་གསུང་ཐུགས། །འཁོར་ལོ་རྫོགས་པ་འབྲུ་གསུམ་བརྡ། །མི་ཡི་དབང་དུ་ཚོམ་བུ་གསུམ། །ཤིན་ཏུ་གོམས་པར་བྱ་བ་ཡིན། །བརྟན་ནས་གཡས་དང་གཡོན་ཉིད་དུ། །ཡོན་ཏན་ཕྲིན་ལས་དཀྱིལ་འཁོར་གཞག །རྣལ་འབྱོར་དབང་དུ་ཚོམ་བུ་ལྔ། །ཤིན་ཏུ་འདྲིས་ནས་དུས་ཚོགས་སྦྱར། །གསུམ་པ་རྩ་བའི་སྐུ་ཉིད་དུ། །བརྟན་པས་སྐུ་གསུང་གཙོ་བོར་གསལ། །གསུམ་འཆོར་མེད་ན་ཡོན་ཏན་ལས། །ལྔ་རྫོགས་ཡབ་ཡུམ་ཟུང་བརྟན་ནས། །ལྔ་པའི་དོན་སྤྲོས་བཞི་བཅུ་གཉིས། །མ་བཅོས་ངང་གིས་གནས་པ་ལས། །ཡེ་ཤེས་ལྷག་པའི་དཀྱིལ་འཁོར་བསྒོམ། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོས་འགྱུར། །སྟངས་དཔྱལ་གཉིས་ཀྱི་ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །དཔེ་བྱད་མཚན་གྱིས་རྒྱས་སྤྲས་པའོ། །དེ་ལྟར་གཙོ་མཆོག་ལྡན་བྱས་ནས། །བྱ་བྱེད་རིགས་བཞིའམ་སྟོང་བསྒོམ་བྱ། །བཅུ་གཉིས་དྲུག་གིས་འོད་འཕྲོ་འབར། །ཉི་ཁྲི་བཞི་སྟོང་དུས་གཅིག་གསལ། །ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །བསམ་ཡས་ལྷུན་གྲུབ་ཉིད་ལ་སློབ། །བཞི་པ་ཞལ་གསུམ་ཕྱག་དྲུག་པ། །བརྟན་ནས་གསུམ་ལའང་དེ་བཞིན་ཏེ། །ལྔ་པའང་རྗེས་སུ་མཐུན་བསྒོམ་ནས། །སྤྲོས་པའི་ཞལ་ཕྱག་རྫོགས་གསལ་བའོ། །བསྒྱུར་བའི་འཁོར་ལོའང་དེ་བཞིན་ཏེ། །དང་པོ་ལྔ་བཅུ་བརྒྱད་གོམས་ནས། །དྲུག་ཅུ་རྩ་བརྒྱད་དེ་བཞིན་ཏེ། །དབུས་ཀྱི་ཧེ་རུ་བཞི་པོ་ལ། །སྐུ་གསུམ་མདུན་རྒྱབ་ཁྲག་འཐུང་གསལ། །དེ་བརྟན་འཁོར་དང་བཅས་པ་བསྒོམ། །སྐུ་གསུང་ཐུགས་ལ་བརྟན་བྱས་ནས། །གཡས་གཡོན་ཡོན་ཏན་ལས་ཁྲོ་བོ། །ཡབ་ཡུམ་གསལ་ནས་འཁོར་ལོ་ལྷ། །རྫོགས་པར་བསྒོམ་པའི་རིམ་བཞིན་དུ། །གང་བྱས་མ་སུན་གྱེན་དུ་འཕར། །རྗེས་སུ་མཐུན་པས་འཇིགས་བྱེད་ཀྱང་། །གཅིག་དང་གཉིས་དང་གསུམ་བཞི་ལྔ། །ཡབ་ཡུམ་མཐར་ཕྱིན་འཁོར་ལོའི་ཆས། །ལྔ་བཅུའི་ཚོམ་བུ་གནས་ཡུལ་དང་། །སྒོ་སླས་ཧཱུྃ་ཆེན་བརྒྱ་རྩ་བརྒྱད། །ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞལ་གཅིག་ཕྱག་གཉིས་གསུམ་ཕྱག་དྲུག །དགུ་དང་བཅོ་བརྒྱད་ཀུན་དང་ལྡན། །ཉི་ཤུ་རྩ་གཅིག་བཞི་བཅུ་གཉིས། །དགུ་བརྒྱད་སྟོང་བརྒྱད་བརྒྱ་ཞལ་ཕྱག །གྲངས་མེད་བར་དུ་སློབ་བྱེད་པ། །རིམ་ཐབས་བརྗོད་ཀྱི་སྤྱོད་ཡུལ་ན། །ཉི་ཤུ་གཅིག་དང་དགུ་བརྒྱ་དང་། །གྲངས་མེད་མཐར་ཕྱིན་རིམ་པར་ལྡན། །དེ་ལྟར་ལྡན་པའི་ཏིང་འཛིན་གྱིས། །ཞུགས་སློབ་མཐར་ཕྱིན་པར་སྐབས་སུ། །རང་བཞིན་ཡུལ་ནས་དབབ་བྱ་སྟེ། །གཞུག་བཅིང་བརྟན་སོགས་ལྡན་བྱས་ཏེ། །རྫས་དང་ཏིང་འཛིན་རིམ་བཞིན་མཆོད། །བསྟོད་སྨོན་ལྡན་ནས་བསྙེན་པ་བྱ། །བར་སྐབས་ལྷག་མའི་གནས་བསྐངས་ནས། །དམ་བསྒྲག་བཅོལ་ཞིང་ལས་ལ་དགྱེ། །འཁོར་ལོ་བསྡུ་བསྲུང་སྤྱོད་ལམ་ཀུན། །ཁྲོ་ཞིའི་མན་ངག་གཞུང་བཞིན་བྱ། །ཕུང་སོགས་དཀྱིལ་འཁོར་ལྷར་སྣང་བ། །རྒྱ་མཚོའི་གཟུགས་བརྙན་ཇི་བཞིན་དུ། །ཀུན་དངོས་རང་རིག་ལྷར་གསལ་བ། །གཅིག་དང་དུ་མ་ཡོངས་ཀྱིས་མེད། །གསལ་ལ་ཡུལ་མེད་མི་གཡོ་བ། །རྣལ་འབྱོར་ངོ་བོར་རྒྱལ་བས་གསུངས། །རང་བཞིན་སྤྲོས་པས་རྣལ་འབྱོར་སྤྲོས། ། དེའང་གདུག་འདུལ་ཁྲོ་ཞི་སྤྲོས། །འཁོར་ལོ་སྤྲོས་དང་ཕྱག་རྒྱ་སྤྲོས། །ཚོམ་བུ་སྤྲོས་དང་ཞལ་ཕྱག་སྤྲོས། །ཀུན་ནས་སྤྲོས་ཕྱིར་འབྲས་བུ་སྤྲོས། །སྤྲོས་པས་ཉམས་གསལ་རྣལ་འབྱོར་སྒྲའོ། །འདི་ཚེ་ལེ་ལོ་རྣམ་གཉིས་དང་། །མཚན་མཐའ་ལྔ་དངོས་མཐོང་འཛིན་དང་། །རྣལ་འབྱོར་བདུད་ཀྱི་ཡུལ་མཐོང་བའང་། །སྤྲུལ་པ་གྲངས་མེད་འགྱེད་པ་མཐོང་། །དམ་པར་འདུན་མཐོང་དམ་པར་སྨྲ། །རྒྱལ་བས་གསུང་ཀུན་གསལ་མཐོང་དང་། །དུས་གསུམ་གསལ་ཤེས་མཐོང་བ་དང་། །རྒྱུ་དྲུག་ལམ་གནས་ཀུན་མཐོང་དང་། །དེ་ལ་སྙིང་རྗེས་ཤུགས་འབྱུང་དང་། །ཀུན་ཀྱང་གསལ་བར་མཐོང་བ་དང་། །ཅི་ལའང་ཐོགས་མེད་འགྲོ་བ་དང་། །མཁའ་ལ་ས་བཞིན་འགྲོ་འདུག་དང་། །རྒྱལ་བས་ཕྱག་བརྐྱང་ལུང་སྟོན་དང་། །ཀུན་གྱི་སྐད་དུ་ཆོས་སྨྲ་དང་། །སྣོད་བཅུད་བསྟི་གནས་མཐོང་བ་དང་། །སྟོང་གསུམ་མཉམ་པར་བཀོད་པ་དང་། །དེ་ཉིད་རང་བཞིན་གསལ་སྣང་དང་། །ལས་སུ་རུང་བས་ཐོགས་མེད་དང་། །དམ་པའི་དོན་ལ་བསྒོ་བ་དང་། །འཇིག་རྟེན་གཙོ་བོས་མཆོད་འབྱུང་རྣམས། །རང་བཞིན་རྟོགས་ན་དམ་པའི་རྟགས། །མི་ཤེས་དགའ་བྲོད་བྱེད་པ་བདུད། །ཁེ་དང་གྲགས་པར་དྲེགས་པ་དང་། །བསྔགས་པ་ཐོབ་པས་མཚན་མས་གཡེངས། །རེ་དང་དོགས་པ་ཅུང་ཟད་ཡོད། །ངའམ་ང་ཞེས་ཆེ་བས་རྒྱལ། །ཐ་མལ་པའང་ཉུང་ལ་འཕྲད། །རྒྱུ་བའི་གཟུང་འཛིན་བྱེ་བྲག་ཤེས། །ཤེས་འཇུག་འབྱོར་པར་འགོ་ཐོབ་ཅིང་། །ཟུང་དུ་འབྲེལ་བས་སྐྱེད་མཐར་ཕྱིན། །འབྲས་བུ་ལམ་ཤེས་བརྟན་པ་ཡིན། །བྱ་བ་མེད་པའི་བརྩོན་འགྲུས་བླང་། །མཚན་མ་རང་རིག་ཆོ་འཕྲུལ་བ། །སེམས་ཕྱིར་མཐོང་ན་རེ་དོགས་མེད། །དཔེར་ན་ནམ་མཁའི་རང་བཞིན་ལ། །ཉི་ཟླ་གཟའ་སྐར་གློག་འགྱུ་དང་། །འཇའ་ཚོན་སྤྲིན་མང་འ ཁྲིག་འགྱུར་ཡང་། །ནམ་མཁའི་དབྱིངས་ལས་འགྱུར་ཉམས་མེད། །ཆོས་ཀྱི་དབྱིངས་ནི་མཐའ་ཡས་པར། །སྐུ་གསུང་རྨད་བྱུང་ངོ་མཚར་དང་། །མཚན་མ་སྣ་ཚོགས་འབྱུང་འགྱུར་ཡང་། །དེ་བཞིན་ཉིད་ལ་ཉམ་འགྱུར་མེད། །རྣལ་འབྱོར་སྟོབས་ཡོན་རྫོགས་འགྱུར་ཡང་། །བདག་གཉིས་མེད་ཤེས་ང་རྒྱལ་མེད་། །སྤྱོད་ཡུལ་མཚན་མ་གང་མཐོང་ཡང་། །ཡེ་ཤེས་རང་སྣང་ཉིད་དུ་སྦྱར། །སྣང་བྱེད་སྤྲོས་པ་འཕེལ་བའི་རིམ། །བསླབ་པའི་རིམ་པ་ཇི་བཞིན་ཏེ། །སྔོན་བསྟན་མོད་ཀྱང་འདིར་སློབ་པ། །མ་གོམས་དབང་གིས་རྣམ་པར་ལྔའོ། །གསུམ་ལྔ་ལྷ་གསལ་ཅུང་ཟད་ཡོད། །བར་ཆད་འབྱུང་བ་དང་པོའོ། །དེ་གསལ་ཐུན་བཞིའི་ཆ་གསུམ་དུ། །གསལ་བ་མི་གཡོ་གཉིས་པ་སྟེ། །ཐུན་བརྐྱང་ནུས་པ་གསུམ་པའོ། །དེ་ཉིད་རྐྱེན་དབང་མི་འགྲོ་བའི། །བཞི་པ་ཁྱད་པར་གང་གནས་པ། །ཤིན་ཏུ་མི་འཕྲོགས་ལྔ་པ་སྟེ། །གྲངས་ལ་སྦྱར་ན་མཐར་ཐལ་འགྱུར། །དེ་བས་ཉམས་ཚོད་ཟིན་པ་གཅེས། །རྣལ་འབྱོར་ཆེན་པོའི་ལྟ་སྤྱོད་ནི། །ཅི་ལྟར་སྤྱད་ཀྱང་རང་བཞིན་མེད། །མཁའ་ལ་བྱ་ཆེན་ལྡིང་བ་བཞིན། །ཆུ་ལ་ཉ་ཆེན་འཕྱོ་བ་བཞིན། །རྣལ་འབྱོར་ལྟ་བ་དེ་ལྟར་བལྟ། །རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་གྱུར་ཏེ། །དེ་ལ་སུ་ཞིག་ཆགས་པར་བྱེད། །བདེ་བའི་མཆོག་ཉིད་བསོད་ནམས་ཚོགས། །དེ་ལྟ་བུ་ཡི་ངང་དུ་སྤྱོད། །འདི་ནི་སྤྱོད་པ་རླབས་ཆེན་ཡིན། །ལྟ་སྤྱོད་ཡ་ཆར་མ་གྱུར་པས། །སྔགས་འཆང་རྣམས་ཀྱིས་རྟག་ཏུ་སྤྱད། །ལྔ་བཞི་སྤང་བྱ་དམན་སྤྱོད་ཀུན། །བདག་དང་གཞན་ཕྱིར་འཇོལ་ཉོག་སྟེ། །གང་ཡང་བྱས་ལ་མ་ཐོགས་ཤིང་། །ཚོགས་འགྱུར་འདམ་སྐྱེས་བཞི་སྤྱོད་ཐབས། །ཡན་ལག་དབང་པོ་རྣམ་ཤེས་ཀུན། །རྣམ་སྨིན་ༀ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེ་ལ་སོགས། །རྣམ་སྨིན་མཱུྂ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །སྤྱོད་ཡུལ་ལྷ་དང་ལྷ་མོར་རོལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་དང་ལྷ་མོར་བརྟག །ཐམས་ཅད་ཀུན་ཏུ་བཟང་པོ་ཡིས། །འདོད་པའི་ཡོན་ཏན་ལྔ་རྣམས་ལ། །ཐོགས་པ་མེད་པར་སྤྱད་བྱ་སྟེ། །བསོད་ནམས་ཚོགས་ཆེན་ཡིན་པར་བརྟགས། །དེ་བཞིན་གཤེགས་པ་ལྔར་ཡང་བརྟགས། །གཞན་ཡང་སྟོང་ཁམས་ཐམས་ཅད་ན། །ཤེས་རབ་དབྱིངས་དང་འདོད་ཡོན་རྣམས། །རབ་འབྲིང་ཐ་མ་ཐམས་ཅད་སྤྱད། །དང་དུ་བླང་དང་མི་སྤང་བ། །རྣལ་འབྱོར་པ་ཡིས་རྟག་ཏུ་སྤྱད། །ཆགས་པ་མེད་པར་གྱུར་པ་དང་། །དངོས་གྲུབ་ཡ་མཚན་ཆེན་པོར་ནི། །དམ་ཚིག་མདོ་བཤད་ནང་ནས་བྱུང་། །སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་ལས། །མ་ཉམས་དེ་ཡི་དབྱིངས་ན་གནས། །ཤེས་རབ་མཆོག་གིས་རྟག་ཏུ་སྤྱོད། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱོད་ཀྱང་སྡོམ་མི་འདའ། །ཐམས་ཅད་མ་ལུས་སངས་རྒྱས་ལ། །བསྒྲུབ་ཅིང་བསྲུང་བར་བྱ་བའང་མེད། །དགེ་དང་མི་དགེ་གཉིས་ཀ་མེད། །དེ་ལ་བསྲུང་དུ་རྡུལ་ཙམ་མེད། །གཞན་ཕྱིར་གྲགས་པའི་བསྲུང་བྱ་ཀུན། །གང་ལྟར་འཚམས་པར་འདའ་མི་བྱེད། །རྡོ་རྗེ་སེམས་དཔའི་བཀས་བཤད་པའི། །སྡོམ་པའི་རྩ་བ་ཐམས་ཅད་ཀུན། །དེ་བཞིན་དུ་ནི་མ་བསྲུང་ན། །ཡཀྴ་ཁྲོ་བོའི་མེ་དབལ་གྱིས། །སྙིང་ནས་དྲངས་ཏེ་ཁྲག་འཐུང་ནས། །ངན་སོང་གསུམ་དུ་སྐྱེ་བར་འགྱུར། །དེ་ཡི་སྡུག་བསྔལ་བཟོད་གླགས་ཆད། །དེ་ཕྱིར་ལམ་བཞིར་ལྡོག་ཟག་ཡོད། །ཤིང་བལ་ལྟ་བུ་ཤིན་ཏུ་ཡང་། །དབུགས་ཀྱི་རྒྱུ་བ་ཡུན་རིང་བྲལ། །རྣལ་འབྱོར་མཁའ་ལ་གཟའ་སྐར་བཞིན། །གསལ་ལ་མི་གཡོ་སྤྱོད་ཡུལ་མེད། །ཞོར་ལས་བྱུང་བ་ཀུན་རྫོགས་ཕྱིར། །འདི་ཞེས་གྲངས་ཀྱི་ཆ་ལས་འདས། །ལས་སུ་རུང་བའི་རྟག་རྣམ་ཀྱང་། །སྔོན་བྱུང་སྟོབས་སུ་འཕེལ་བ་དང་། །ཁམས་སྙོམས་རང་ལུས་བདེ་བས་རྒྱས། །འདུ་བ་བཞི་བྲལ་བཟོད་ཐོབ་ཚེ། །མངོན་ཤེས་དྲུག་དང་རྩ་ལྔ་རྫོགས། །རབ་འབྲིང་ཆ་ཡིས་ཡུལ་ཁམས་གླིང་། །ཚུན་ཆད་གསལ་ཞིང་འདུལ་བར་བྱེད། །ཚོགས་དྲུག་དག་པའི་སྟོབས་ལས་གྱུར། །རྫུ་འཕྲུལ་ཉི་ཤུ་ཆ་གཡོ་ཐོབ། །ཐམས་ཅད་སྐད་མཐུན་ཆོས་སྟོན་རྗེས ། །ས་གཡོས་ཆོས་སྣང་བྱེད་པ་དང་། །ཡི་གེ་སྒྲ་བྱེད་ཀུན་བརྗོད་པའོ། །འདི་དག་མཐོང་དང་བཅོ་བརྒྱད་དང་། །ཤུགས་སྣང་བརྒྱད་མཐོང་རེ་དོགས་གཞན། །རྨི་ལམ་ཉིད་དང་ཆོས་མཐུན་པར། །འབྱུང་བ་གསལ་དང་བརྟན་པས་ཕྱེས། །བཟང་བའི་ལྟ་བུ་ལུང་བསྟན་ཀུན། །ལམ་འདི་རྫོགས་པར་འབྱུང་བ་ཡིན། །སྒྲུབ་པའི་རིག་འཛིན་ལམ་འདི་ཉིད། །མཐར་ཕྱིན་རིགས་ཀྱི་རྒྱུ་ཡིན་ཕྱིར། །མཚན་མ་འབྱུང་བའི་ས་ཡིན་ཏེ། །བར་ཆད་མེད་ཚོགས་སྐབས་སུའང་འདིའོ། །ཕུང་པོ་ལྔ་ཉིད་དེ་བཞིན་གཤེགས། །དབང་པོ་རྣམ་ཤེས་བྱང་ཆུབ་སེམས། །ཡུལ་དུས་བྱང་ཆུབ་ཆེན་མོ་ཡིན། །བདག་རྟོག་རྣམ་བཞི་ཁྲོ་བོ་བཞི། །རྟག་ཆད་མུ་བཞི་ཁྲོ་མོ་ཡིན། །དེ་སེམས་རང་རིག་ཉིད་ཅེས་བྱ། །དེ་བཞིན་མཉམ་རྫོགས་ལྷུན་གྲུབ་པའི། །དེ་བཞིན་གཤེགས་དང་ཡེ་ཤེས་ལྔ། །རང་བྱུང་ཆེན་པོའི་དཀྱིལ་འཁོར་བསྒོམ། །རྟོག་གཉིས་བྲལ་བའི་ཐབས་མཁས་ཀྱིས། །ལྷར་གསལ་དངོས་པོ་མེད་བསྒོམ་ན། །མཐོང་ཐོས་ལ་སོགས་མེད་པའི་ཚུལ། །རང་རིག་ཡེ་ཤེས་གསལ་བསྒོམ་ནས། །རང་བཞིན་མེད་པར་ཅིར་ཡང་འགྲུབ། །རྐྱེན་གྱིས་བསྒྱུར་བའི་དུས་འབྱུང་ན། །སྤྲོས་པ་གང་ཡིན་གཟུང་བ་ཡིས། །ལས་ངན་ལམ་ཞེན་རྒྱུན་བཅད་ནས། །བར་མའམ་ཕྱི་མར་གཉིས་སྦྱོར་འཛིན། །གང་ཞིག་ནུས་གཞན་སྐལ་མེད་པའང་། །འཕེལ་པའི་འབྲེལ་བའི་ས་ནོན་གྱིས། །ཚེ་རབས་ཀུན་ཏུ་བདེ་ཐོབ་ནས། །གསུམ་དང་མི་བསྒོམ་སྤྱད་པས་འཐོབ། །སྙོམས་ལས་མེད་པར་བརྩོན་བྱས་ནས། །ལམ་དུ་རིགས་འཛིན་ཐོབ་པ་ཡང་། །ཆོས་ཉིད་དམ་ཚིག་སྨོན་མཐུ་དང་། །ཡན་ལགས་རྫོགས་པའི་རིགས་འཛིན་འགྱུར། །སྤྲོས་པའི་རྣལ་འབྱོར་རྒྱུན་ཆགས་པའི། །བསོད་ནམས་ཡེ་ཤེས་ལོངས་སྤྱོད་ཀྱིས། །མུན་སྣང་སྟུག་འགྱུར་རྩི་བཞིན་དུ། །ཡི་གེ་འཁོར་ལོ་ཚོགས་མཆོག་མཉེས། །སྤྲོས་པའི་རྣལ་འབྱོར་ལ་བསླབ་པའི་ལེའུ་སྟེ་དྲུག་པའོ།། །།དཀྱིལ་འཁོར་གཉིས་ལ་ཕྱག་འཚལ་ལོ། །བར་ཆད་མེད་པར་སྦྱོར་བ་ཡི། །སྒྲུབ་པ་དུས་ཀྱི་ཚོགས་བཤད་བྱ། །བར་ཆད་མེད་པའི་ལམ་སྒྲུབ་པའི། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འཁོར་གྱིས་འགྲུབ་འགྱུར་མི་ལྡན་བརླག །སྡེ་དཔུང་ཆེན་པོས་མི་ཚུགས་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་དང་། །ཡིད་འོང་ས་བཙལ་རྒྱས་པར་བྱ། །རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དུ་འཚམས་པར་བྱ། །འཁོར་ཁང་ཕྱི་ནང་བར་ལྡན་པའི། །རིན་ཆེན་བྱུག་པས་བསྲུངས་པ་དང་། །རིན་ཆེན་སྤྲོས་པའི་གཞལ་ཡས་ཁང་། །ཡིད་འོང་བྱ་བ་ཤིན་ཏུ་གཅེས། །ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པ་བླང་བར་བྱ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་མཆོག་བསྒྲུབ་ཕྱིར། །རྣལ་འབྱོར་བརྩོན་བྱས་རིམ་བཞིན་འགྲུབ། །གོས་རྒྱན་བཟའ་བཏུང་གསང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་རྟེན་དང་བར་ཆད་བཟློག །ཡོ་བྱད་དག་པར་བསྡུ་བྱ་སྟེ། །ཚོ་གསུམ་བཅད་ལ་བྱིན་གྱིས་བརླབ། །སྒྲུབ་ཐབས་ཡན་ལག་བཞི་སྦྱར་བ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོ་དམ་མནོས་བཞིན་དུ་བྱ། །དམ་བཅས་ལྡན་པས་འདུས་ཏེ་བསྒྲུབ། །ཡང་ན་དཔག་ཚད་རྒྱང་གྲགས་སམ། །སོ་སོར་འཚམས་པའི་གཟུགས་བརྙན་བྲི། །རྒྱན་དང་མཆོད་སོགས་འཁོར་བ་དང་། །ཕྱི་རོལ་མཆོད་པའི་ལས་རྫོགས་ཏེ། །ཕྱི་བཅད་བསྲུང་སྒོ་རིམ་པ་བཞིན། །བསྙེན་པའི་དོན་དུ་སྔོན་བྱ་བ། །རྫོགས་པའི་ལས་རྣམས་ཟིན་པར་བྱ། །འདུས་པས་ཕྱོགས་བཅིང་རྫས་བརླབས་ནས། །སྤྱིའམ་ཡང་ན་རེ་རེ་ཞིང་། །ཚོབ་བུ་འཁོར་ལོ་རིམ་བཞིན་བསྒོམ། །རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོའི་རིགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ཏེ་སྐུ་གསུང་ཐུགས། །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གསུམ་པའི་ལྷ་རྣམས་བསྒོམ། །ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་བསྒོམ། །བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོས། །རྫོགས་པའི་སྐབས་འདིར་ཤེས་པར་བྱ། །འདི་ཡང་ལམ་སྒྲུབ་སྦྱོར་བ་ཡི། །ཆ་ཡི་དང་པོ་བསྙེན་པ་ནི། །བྱང་ཆུབ་སེམས་རྟོགས་འགྲུས་པ་ནི། །བསྙེན་པའི་དམ་པ་ཡིན་པའི་ཕྱིར། །སེམས་ཆས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ན་བར་ཆད་མེད། །དུས་ཀྱི་ཚོགས་མཐར་སྒྲུབ་ཆེན་ལེན། །མཐར་ལམ་གང་ཐོབ་འགྲུབ་པའོ། །གསུམ་པ་མཆོད་པའི་སྐབས་སུ་ཤེས། །གཉིས་པ་གཙོ་བོར་འདིར་བསྟན་པ། །གཞི་དང་གཞུང་གིས་རྫོགས་པར་འགྱུར། །ཕུན་སུམ་ཚོགས་པ་ལྔ་གཞི་ལ། །བསྙེན་སྒྲུབ་བཞི་ཡིས་གཞུང་བསྲང་བའང་། །གང་དག་མོས་པ་ཅི་བཞིན་ཕྱིར། །ཞི་དང་ཁྲོ་བོས་བསྒྲུབ་པར་བྱ། །དེ་ལ་སྔ་མ་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །བསྒྲུབ་ཐབས་ཕུན་སུམ་ཚོགས་པ་ཡིས། །བཞི་དང་སྦྱར་བས་གཞུང་རྫོགས་བྱ། །དེ་ལ་སྤྲོས་པ་མཐར་ཕྱིན་པས། །ཆོ་ག་ལྔ་ནི་རྫོགས་བྱ་ཞིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །རྣལ་འབྱོར་འཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོངས་པ་བསྒྲུབ། །སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བརྟེན། །བྱིན་རླབས་དབང་དང་ལྡན་བྱས་ནས། །རང་བཞིན་གནས་ནས་དབབ་བྱ་སྟེ། །གཞུག་ཅིང་བརྟན་བྱས་རིམ་པར་མཆོད། །རྫོགས་ནས་བསྟན་ཏེ་བསྙེན་པ་བྱ། །ཟིན་ནས་བསྡུས་ཏེ་རྣལ་འབྱོར་ཚོགས། །ཚུལ་བཞིན་མཆོད་པའི་ཕྲིན་ལས་བྱ། །ནང་ནུབ་མཁའ་འགྲོའི་ལྷག་མ་སྦྱིན། །བར་ཆད་བཟློག་ཕྱིར་བསྙེན་པ་བྱ། །ཟླ་ཕྱེད་ཕྱེད་ཞག་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུས་བསྣོལ་མར་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །དེ་བཞིན་རྒྱུད་ཀྱི་ཞག་གྲངས་བཞིན། །བར་ཆད་མེད་པར་བསྒྲུབ་པར་བྱ། །སྤྱོད་ལམ་ཡོ་བྱད་ལྔ་སྤྱོད་ཅིང་། །དངོས་སུ་མཆོད་པ་རྣམ་གཉིས་པོ། །གཙོ་རུ་དགོས་པ་གང་ཡིན་པ། །ཕྱི་མ་གདུག་པ་འདུལ་བར་ཤེས། །སྔ་མ་རྒྱས་པར་བཤད་བྱ་བ། །གོས་རྒྱན་བཟའ་བཏུང་གླུ་གར་རྣམས། །ཧཱུྃ་དུ་ཤེས་པར་རབ་སྤྱད་ན། །ངོ་མཚར་དཀྱིལ་འཁོར་མཉེས་པའི་ཕྱིར། །གསང་སོགས་ཡོ་བྱད་ལྔ་པོ་རྣམས། །རིགས་ཕྱིར་མ་སྐྱེས་ཡེ་ཤེས་གསལ། །ཆོས་ཉིད་ཡེ་ཤེས་རོལ་པར་བསྒོམ། །གཅིག་ཤོས་ཆེའང་དེ་བཞིན་ནོ། །ཕྱོགས་བཅུ་མཐའ་ཡས་དུས་བཞི་ཡི། །ཐམས་ཅད་དབྱེར་མེད་མ་དྷ་ལ། །ཉི་ཟླ་ཤར་བའི་གཞལ་ཡས་ལ། །པདྨ་ཆགས་མེད་གདན་བཏིང་ནས། །རིན་ཆེན་ཟད་མེད་ཕོ་བྲང་ས། །ཆེ་ཆུང་ཚད་དཔག་མེད་པ་ཡི། །བྱང་ཆུབ་བདེ་ལྡན་དཀྱིལ་འཁོར་ལ། །བདེ་ལྡན་བྱང་ཆུབ་རབ་བཀོད་ནས། །མ་ལུས་ཐམས་ཅད་དབྱིངས་བསྡུས་ནས། །ལུས་བསྐྱོད་ཡན་ལག་བསྒུལ་ཞིང་བསིགས། །དབང་པོ་ལྔ་ཡི་དཀྱིལ་འཁོར་ཀུན། །ཕྱག་རྒྱ་ཆེན་པོ་ཡིན་པར་བཤད། །ལྷག་པའི་ཏིང་འཛིན་འབའ་ཞིག་གམ། །བྲོ་སོགས་ཚེ་ན་བསྒོམ་པའང་། །བྷྲཱུྃ་དང་ཙཀྲའི་དཀྱིལ་འཁོར་དུ། །ཉི་ཟླ་འཁྲུགས་པའི་ས་གཞི་ལ། །པདྨ་ཆགས་མེད་གདན་བཏིང་ནས། །ཐབས་དང་ཤེས་རབ་ཆགས་མེད་ཚུལ། །ཡན་ལག་ལྔ་པོ་ཐམས་ཅད་ཀུན། །རང་བཞིན་ཡོང་གིས་དག་པ་ལ། །ཏིང་འཛིན་དེ་བཞིན་གཤེགས་པ་ལྔའོ། །ཡེ་ནས་མ་བཅོས་ཡོང་གིས་མེད། །ལྷག་པའི་ཏིང་འཛིན་དཀྱིལ་འཁོར་གྱིས། །དབུ་ལ་དེ་བཞིན་གཤེགས་པའི་འཁོར། །ཡན་ལག་བཞི་ལ་རིགས་བཞིའི་འཁོར། །ཁ་དོག་དབྱིབས་དང་ཕྱག་རྒྱ་དང་། །ཐབས་དང་ཤེས་རབ་གསལ་བསྒོམ་སྟེ། །ཕྱོགས་བཅུར་སྤྲོ་ཞིང་ངན་སོང་སྦྱོང་། །གནས་སུ་བསྡུ་ཞིང་དཀྱིལ་འཁོར་བསྟིམ། །འདས་དང་མ་འདས་ཐམས་ཅད་ཀུན། །བདེ་གཤེགས་ཞིང་དུ་རྣམ་པར་སྦྱོང་། །ཡན་ལག་ཆེན་པོ་ལྔ་བསྐྱོད་ན། །རིགས་ལྔའི་དཀྱིལ་འཁོར་མ་ལུས་གཡོ། །འགྲོ་ལྔ་བྱང་ཆུབ་ལམ་དུ་འཛུད། །སྙིགས་མ་ལྔ་ཡང་རྣམ་པར་དག །བཟང་མཛེས་ལེགས་པའི་གོས་བགོས་ནས། །འོད་ཟེར་སྣ་ཚོགས་འཕྲོ་བར་འགྱུར། །དེ་ནས་མཐར་ཐུག་མེད་ཀྱི་བར། །ཡེ་ཤེས་ལྔ་ཡིས་བརྒྱན་པར་འགྱུར། །རྒྱན་མཆོག་མཛེས་པས་ལུས་བརྒྱན་ནས། །ཏིང་འཛིན་འོད་འབར་གསལ་བསྒོམས་ཏེ། །ཕྱོགས་བཅུ་གང་བར་དཀྱིལ་འཁོར་སྤྲོ། །བདག་ཉིད་ཆེན་པོའི་དཀྱིལ་འཁོར་ལ། །མི་དམིགས་དབྱིངས་ནས་དཀྱིལ་འཁོར་མཆོད། །འདོད་ལྔ་ཐབས་དང་ཤེས་རབ་གནས། །བདེ་མཆོག་རོའང་མྱོང་བར་བྱེད། །མ་ཆགས་ཚོགས་ཆེན་གཉིས་དང་ལྡན། །བྲོ་གར་ཐབས་ཀྱི་ཕྱག་རྒྱ་དང་། །གླུ་དབྱངས་ཚིག་གི་སྒྲ་བསྒྲགས་ན། །ཕྱོགས་བཅུ་སྐྱེ་གནས་མ་ལུས་ཀུན། །ལྷུན་གྲུབ་རྡོ་རྗེའི་སྐུ་མཐོང་ཞིང་། །ཆོས་ཀྱི་དུང་ཆེན་སྒྲ་ཡང་ཐོས། །སྒྲིབ་གཉིས་བྱང་ནས་བྱང་ཆུབ་འགྲུབ། །བདེན་མཐོང་སྙན་བསྒྲགས་ཚོགས་ཆེན་འགྲུབ། །ཆགས་མེད་ཡེ་ཤེས་ཚོགས་དང་ལྡན། །ཐབས་དང་ཤེས་རབ་ཐམས་ཅད་ཀུན། །དབུས་ནས་ཤར་ཕྱོགས་ཁ་བལྟས་ཏེ། །སེང་གེ་སྟབས་ཆེན་མཆོང་བར་བྱ། །དབང་པོ་ལྔ་ལ་ཡི་གེ་ལྔ། །གསལ་བའི་འཕྲོ་འདུས་མངོན་རྫོགས་ཤེས། །འདོད་པ་ལྔ་ལ་ཆགས་མེད་རོལ། །བདག་དང་གཞན་དོན་རྫོགས་པར་བྱེད། །ཚོམ་བུ་གསལ་བའི་ཡབ་ཡུམ་རྣམས། །ཕན་ཚུན་འོད་འཕྲོས་བསྟིམ་བྱ་སྟེ། །དཀྱིལ་འཁོར་འབར་བ་གསལ་གྱུར་ནས། །བདག་དང་ཕྱོགས་བཅུ་གཉིས་མེད་བསྒོམ། །ཕྱོགས་ཕྱོགས་རིམ་བཞིན་ཁ་བལྟས་ཏེ། །ཐུགས་སྐུ་གསུང་ཡོན་ལས་ཀྱི་གླུ། །བྲོ་ཚིག་བརྗོད་དང་ཡེ་ཤེས་རྒྱན། །བྲོ་གླུ་རིགས་ལྔ་སྤྱི་གླུ་བྲོ། །རྣམ་ལྔ་སྟབས་གླུ་ལྡན་པར་བྱ། །སྲོག་ལྡན་བྲོ་གླུས་དོན་གཉིས་རྫོགས། །བཟའ་དང་བཅའ་དང་མུར་བཏུང་རྣམས། །ཐབས་དང་ཤེས་རབ་ཉིད་གནས་ཤིང་། །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་གཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བར་འགྲུབ། །དེ་ལྟར་བཞི་དང་ལྡན་པ་ཡིས། །ཐབས་དང་ཤེས་རབ་ལྡན་འགྱུར་ནས། །བྱིན་རླབས་ཆ་རྣམས་རྫོགས་པར་བྱ། །བསྙེན་བསྒྲུབ་གསང་བའི་བཞི་རིམ་པས། །ཐམས་ཅད་གཉིས་མེད་དབྱིངས་སུ་སྦྱོར། །གཉིས་མེད་དབྱིངས་ནས་བྱང་ཆུབ་འབར། །འོད་འཕྲོས་འབར་བས་ཕྱོགས་བཅུར་གསལ། །དེ་བས་ཐབས་ཆེན་ཐབས་ཀྱི་མཆོག །ཤེས་རབ་བདེ་མཆོག་བརྟན་ལྡན་རྫོགས། །རྡོ་རྗེ་དྲིལ་བུ་ཡང་དག་ལྡན། །ཕྱག་རྒྱ་བཞི་དང་ལྷ་མོ་བརྒྱད། །རྫོགས་རོལ་ཉི་ཟླ་དུས་གཅིག་ལྡན། །གཉིས་མེད་ཟུང་དུ་འབྲེལ་གྱུར་ན། །བདེ་གཤེགས་དཀྱིལ་འཁོར་མ་ལུས་འབྱུང་། །ཐིག་ལེ་རྡོ་རྗེའི་གཟུགས་སུ་ཆགས། །མཆོད་ཆེན་མཁའ་འགྲོ་གསལ་འབར་འགྱུར། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་ནས། །ཕྱོགས་བཅུ་དུས་བཞི་མངོན་རྫོགས་པའི། །དཀྱིལ་འཁོར་ཐམས་ཅད་འགྲུབ་པར་འགྱུར། །སྒྱུ་འཕྲུལ་དྲྭ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་འགྱུར། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁར་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨ་ལི་ཀ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །གདུག་པའི་ཚོགས་རྣམས་བསྒྲུབ་བྱ་བ། །གནས་དང་ཟླ་དང་རྫས་རྣམས་ནི། །ཚོགས་ཀྱི་མཆོག་ཏུ་དམིགས་པས་གཞག །ནགས་ཚལ་ཆེན་པོ་དབེན་པའི་སར། །གཞུང་དང་མཐུན་པ་རྙེད་ནས་ནི། །གནོད་བསྐྲད་ས་མནན་བྱིན་གྱིས་བརླབས། །དར་གཞི་སྙོམས་པ་རྒྱས་པར་བྱ། །སྒྱུ་འཕྲུལ་དྲྭ་བ་རྫོགས་སངས་རྒྱས། །དཀྱིལ་འཁོར་ལྔ་བཅུ་བརྒྱད་བརྟན་པའི། །ཆོ་ག་ཡན་ལག་རྫོགས་པ་ཡི། །རྣལ་འབྱོར་འདུས་པ་ངེས་པར་འགྲུབ། །སྟོན་པ་རྡོ་རྗེ་རྒྱལ་དབང་ཅན། །རྒྱལ་ཐེབ་རྒྱལ་པོར་མཚུངས་པ་དང་། །ཀརྨ་གདངས་ཆེན་ཕྲེང་བར་ལྡན། །ལྗོན་ལྕུག་སྡོང་རེག་མཚན་རྫོགས་དང་། །རྣལ་འབྱོར་མིང་སྲིང་བརྩེ་གདུང་ལྡན། །ཚོམ་བུ་ལྔ་ཡི་ཟུང་གིས་བསྒྲུབ། །དཀར་རྩི་དམར་རྩི་དྲི་ཤ་ཆེན། །རྡོ་རྗེ་གདུང་ཆེན་དམར་གྱིས་བཀང་། །དུང་དང་སྲོག་སྙིང་གསར་རྙིང་དང་། །གཟུགས་དང་ལུགས་ཆེན་དུང་མཆོག་དང་། །རྒྱན་ཆ་བཅུ་དྲུག་ཚང་བ་དང་། །སྒྲུབ་པ་འཚོ་བའི་ཡོ་བྱད་དང་། །སྒྲུབ་པ་རྫས་ཀྱི་ཡོ་བྱད་དག །ཞིང་གྱུར་མཆོག་དང་མཆོག་ཕྲན་དང་། །རྐྱེན་ཟློག་ཉུང་ཕུར་ལྕེ་ཕོག་ནག །སྨན་དང་སྨན་པར་བཅས་པ་དང་། །རྡོ་རྗེ་གོ་མཚོན་བཅས་པ་དང་། །ཇི་སྙེད་པ་ཡི་རྫས་རྣམས་ཀུན། །འཇིགས་བྱེད་ཆེན་པོའི་ཏིང་འཛིན་གྱིས། །ཉམས་པ་མེད་པའི་སེམས་ཀྱིས་སྤྱད། །བསྡུས་ཏེ་ཚོགས་སུ་བྱ་བའི་ཕྱིར། །ཅི་འདོད་སྣང་བར་བདག་གིས་དགོད། །ཞག་ནི་སུམ་ཅུ་ཕྲག་དྲུག་གམ། །དྲུག་ཅུ་དགུ་བཅུ་རྩ་དྲུག་ཏུ། །འཇིགས་བྱེད་ཆེན་པོའི་ཏིང་འཛིན་བསྒོམ། །སྒྱུ་འཕྲུལ་དྲྭ་བའི་དཀྱིལ་འཁོར་ལ། །གདིང་དང་ལྡན་པའི་བསམ་པ་ཡིས། །རེ་བ་མེད་པར་རབ་ཏུ་བསྒྲུབ། །གླུ་དང་གར་དང་ཕྱག་རྒྱ་དང་། །ཤེས་རབ་ཐབས་སུ་ཤེས་པ་དང་། །བྱང་ཆུབ་སེམས་ཀྱི་མཆོད་པ་དང་། །བརྡ་ལ་སོགས་པའི་ཡོན་ཏན་དང་། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ཀུན། །མདོར་ན་ཚོགས་རྣམས་མངོན་དུ་སྒྲུབ། །སྤྱི་ཡི་བསྙེན་སྒྲུབ་སྔོན་བཞིན་ཤེས། །སྒྲུབ་པའི་ཐབས་ཀྱི་བསྙེན་སྒྲུབ་བཞི། །དང་པོ་ཚེ་ན་གནས་ཆེན་དེར། །རྒྱང་གྲགས་དཔག་ཚད་ལ་སོགས་དང་། །ལུས་གང་ལུས་དོ་གསུམ་གྱི་ཚད། །རང་གི་རིག་པས་ཅི་ནུས་པར། །ཕྱག་རྒྱ་གཟུགས་དང་སྙིང་པོ་རྣམས། །ལྔ་ཡི་ཚོན་གྱིས་བྲི་བར་བྱ། །ཡོ་བྱད་སྔོན་བཞིན་བྱིན་བརླབས་ནས། །འཕགས་རྒྱལ་མཆོད་ཅིང་ཕྱི་རོལ་པ། །བཅུ་བཞི་མཉེས་དང་གཉིས་པོ་ཡང་། །སྦྱིན་པས་ཚིམས་བྱས་བསྒོ་བར་བྱ། །འཇིགས་བྱེད་དབང་དུ་བདག་བཞུགས་ནས། །ཁྲོ་བོ་ཁྲོ་མོ་འཁོར་དུ་བྱ། །གདན་དུ་གཟིར་ཞིང་ཕུར་བུས་གདབ། །རང་བཞིན་ཕབ་ལ་མཆོད་བསྟོད་དེ། །བར་ཆད་ཏིང་འཛིན་མཆོག་གིས་བཟློག །ཐུན་མོང་སྲུང་བའི་འཁོར་ལོ་བྱ། །དེ་ནས་གཉིས་པར་རྒྱན་རྣམས་དང་། །སྒྲུབ་རྫས་མཆོད་པ་བཀྲམ་རྫོགས་ནས། །ཕྱི་ནང་གསང་བས་བསྲུང་བྱ་སྟེ། །སྲིན་པོའི་རྒྱལ་པོ་ཚུལ་བཞིན་མནན། །རྟགས་ལྡན་བྱིན་དབབ་ལྡན་པར་བྱ། །དེ་ནས་རྫས་རྣམས་བྱིན་གྱིས་བརླབས། །དེ་ནས་འཁོར་ལོ་གཅིག་པའམ། །གསུམ་དང་ལྔ་རུ་བསྒོམ་པར་བྱ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་འཁོར་ལོ་རིགས་ཀྱི་གཙོ། །བཙུན་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱས། །འཇིགས་པའི་ཚོགས་ཆེན་དེ་དབུས་སུ། །བདག་ཉིད་དྲག་པོའི་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །དེ་བཞིན་རྡོ་རྗེ་པདྨ་དང་། །རིན་ཆེན་རལ་གྲི་ཚོམ་བུ་བསྒོམ། །གཅིག་ལའང་རྡོ་རྗེ་གསུམ་མོས་པ། །སྐུ་གསུང་ཐུགས་ཀྱི་འཇིགས་བྱེད་དོ། །འཇིགས་བྱེད་ལྔ་རྫོགས་དཀྱིལ་འཁོར་ནི། །འདུས་པའི་ཚོམ་བུ་ལྔ་ཡི་རིགས། །ཉི་ཤུ་རྩ་ལྔ་སྐུ་གསུང་ཐུགས། །ཡོན་ཏན་ཕྲིན་ལས་རྫོགས་པར་བསྒོམ། །རྒྱན་དང་ཆ་ལུགས་ལ་སོགས་པ། །འཇིགས་པའི་ཚོགས་ནི་ཅི་བཞིན་བར། །སྤྱིའམ་ཡང་ན་རེ་རེ་རུ། །ཚམ་རྔམས་ཆེན་པོའི་ཆ་ལུགས་བསྒོམ། །ལྷག་པའི་དཀྱིལ་འཁོར་དགུ་དགུར་ལྡན། །བྱིན་དབང་ཐོབ་པའི་བདག་དཀྱིལ་ན། །རང་བཞིན་ཕབ་བཀུག་དགུག་ཅིང་བརྟན། །དགྱེས་ནས་རིམ་བཞིན་མཆོད་པར་བྱ། །ༀ་ཨཱཿཧཱུྃ། སུ་ར་ཏོཿ མ་ཧཱ་པཉྩ་ཨ་མྲྀ་ཏ། ཤྲཱི་ཧེ་རུ་ཀ༔ མནྟྲ་ཛྭ་ལ་མ་ཧཱ། མ་དྷ་ལ། ཀཱ་ཡ་ཝཱ་ཀ་ཙིཏྟ། ༀ་ༀ་ༀ། ཧཱུྃ་ཧཱུྃ་ཧཱུྃ༔ སཾ་སཾ་སཾ། ཨཾ་ཨཾ་ཨཾ། ཧཱཾ་ཧཱཾ་ཧཱཾ། བཛྲ་མ་ཧཱ་ཀ་ལ་ཕར་ཀ་དན་ན་ཛྭ་ལ་སིདྡྷི་མ་ཧཱ་ཤྲཱི་ཧེ་རུ་ཀཿ ཨ་མེ་དུ་མེ། སིདྡྷི་པ་བྷེད་དཿ སཾ་ཧ་ར་ཧཱུྃ་ཧཱུྃ་ཧཱུྃ། མ་ཧཱ་ཡོ་ག་ཨད་ད། མ་ཧཱ་ས་མ་ཡ། རུ་ལུ་རུ་ལུ། ཨ་ལ་ལ་ཧོཿ ༀ་ཨཾཿཧཱུྃ་སུ་ར་ཏོ་ཀ་མ་ལེ། མ་ཧཱ་སུ་ཀ་མ་ལེ། མ་ནུ་ས་མ་ནཿ ཛཙ྅྅྅་ལི་ནི་ནི་དྷ་ན། ཨ་བ་ཡོ་ག་ཁཱ་ཧི་ཨ་ལ་ལ་ཧོཿ མཆོད་བསྟོད་རྫོགས་ནས་བསྙེན་པ་ནི། ཡེ་ཤེས་མདུན་དུ་ལྷག་པ་ལ། །གནས་པ་གསལ་བ་གསུམ་གྱིས་བྱ། །ༀ་བཛྲ་མཧཱ་ཀྲོ་ཏ་ཤྲཱི་ཧེ་རུ་ཀ་བཛྲ་ཀྲོ་དྷི་ཤྭ་རི་སརྦ་དུཥྚན་ཧཱུྃ་ཕཊ། རུ་ལུ་མ་ཧཱ་ས་མ་ཡ་ཧཱུྃ། རུ་ལུ་རུ་ལུ་ཧཱུྃ་བྷྱོ་ཧཱུྃ། དེ་སོགས་བཟླས་བསྙེན་འཕྲོ་འདུ་ཡིས། །བདུན་བར་བསྐུལ་དང་སྣོད་བྱེད་པ། །བསྙེན་པའི་དཀྱིལ་འཁོར་རྫོགས་པའོ། །དེ་བསྙེན་དེ་བཞིན་སྒྲུབ་པ་ཡང་། །འཕྲོ་འདུས་བསྐུལ་དང་དངོས་གྲུབ་སྡུད། །སྐྱོན་བཅུ་སྤང་ཏེ་གྲུབ་པ་ནི། །སྒྲུབ་པའི་དུས་སུ་ཤེས་པར་བྱ། །གཅིག་ལ་རྫས་བསྟར་ཚུར་བསྡུ་བ། །སྒྲུབ་པ་ཆེན་པོར་ཤེས་པར་བྱ། །ཤེལ་དང་བྱི་རུའི་བུང་བ་དང་། །མཐིང་གི་བུང་བ་མང་པོ་དག །རིམ་བཞིན་བུང་བ་མེ་ཏོག་དང་། །མཚོ་ལ་སེར་ཆེན་བབས་བཞིན་ནོ། །འོད་དང་དྲི་དང་སྒྲ་དང་གཟུགས། །འཁོར་དང་འབར་དང་ཁོར་བྱུང་ན། །བར་ཆད་ཆ་རྣམས་བརྟག་བྱ་སྟེ། །བར་ཆད་བསྐྲད་དེ་བདག་བསྲུང་ལ། །ཞག་གྲངས་ཚང་ཞིང་རྟགས་བྱུང་ན། །དཀྱིལ་འཁོར་མཐུན་པ་ཉིད་དུ་སྦྱར། །གནས་སུ་བསྟིམ་ཞིང་བརྟན་པར་བྱ། །དེས་ན་སྔོན་བཞིན་རྣམ་གསུམ་འཐོབ། །གསང་མཆོད་རྒྱས་པར་བཤད་བྱ་བ། །ཞིང་གྱུར་མཆོག་དང་མཆོག་ཕྲན་དང་། །ཉི་ཟླའི་སྟེང་དུ་མཁས་པས་གཞག །ང་རྒྱལ་ལག་གི་འདུ་བྱེད་བསྒོམ། །ཧཱུྃ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །དེ་བཞིན་གཤེགས་པས་བྱིན་བརླབས་ནས། །རྒྱལ་བའི་སྲས་སུ་དབང་ཡང་བསྐུར། །ཤིན་ཏུ་ཁྲོ་བོ་ཆེན་པོ་ཡིས། །ཐབས་ཀྱིས་ལྷ་ཆེན་བསྒྲལ་བ་ལྟར། །ཆོས་ཉིད་རྟོགས་པའི་ཏིང་འཛིན་གྱིས། །གཉིས་སུ་མེད་པར་ཐབས་ཀྱིས་བསྒྲལ། །ཐུགས་རྗེ་ཆེན་པོའི་བྱིན་རླབས་ཀྱིས། །ལམ་ལྔའི་སེམས་ཅན་ཀུན་བཀུག་ནས། །ཐམས་ཅད་མ་ལུས་བསྒྲལ་བར་བྱ། །ཕྱི་ནང་སྣོད་བཅུད་ཇི་སྙེད་ན། །གནས་པའི་སེམས་ཅན་མ་ལུས་ཀུན། །ཐུགས་རྗེ་ཆེན་པོའི་རྟོགས་པ་ཡིས། །དབྱིངས་སུ་ཡང་ནི་བསྒྲལ་བར་བྱ། །རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཐུགས་རྗེ་ཆེན་པོའི་བྱིན་རླབས་ཀྱིས། །ཡེ་ཤེས་མེ་ཆེན་བསྒོམ་བྱ་སྟེ། །ཐམས་ཅད་མ་ལུས་བསྲེག་པར་བྱ། །དབྱིངས་སུ་ཡང་ནི་བསྟིམ་པར་བྱ། །སྲིད་གསུམ་བསྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེད་འབར་རཾ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མ་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །དེ་ལྟར་བསྒྲལ་བ་ཀུན་བྱས་ཀྱང་། །བསྒྲལ་བའི་དངོས་པོ་གང་ཡང་མེད། །ཕུང་པོ་ལྔ་པོ་གཞིག་པར་བྱ། །བཤིག་ན་འབྱུང་བའི་བག་ལ་ཞ། །མ་བཤིག་ན་ཡང་འབྱུང་བ་ཡིན། །རྣམ་ཤེས་མེད་པར་བསད་བྱས་ན། །རྨི་ལམ་སྲོག་བཅད་ཚུལ་བཞིན་དུ། །གནས་པ་ཉིད་ན་ངོ་བོ་མེད། །སེམས་ཀྱི་རང་བཞིན་དེ་ལ་ནི། །དུས་གསུམ་སངས་རྒྱས་དགྲར་ལངས་ཀྱང་། །སུས་ཀྱང་ཟིན་ཅིང་སོད་པ་མེད། །འོ་ན་ཐུགས་རྗེས་གཞན་བསྒྲལ་ན། །རྣམ་རྟོག་མཚན་མ་ཐམས་ཅད་ཀུན། །ཕྱིན་ཅི་ལོག་ལས་བཟློག་བྱ་སྟེ། །ཏིང་འཛིན་སྔགས་དང་ཕྱག་རྒྱ་དང་། །ཤིན་ཏུ་གོམས་པས་དབང་བསྐུར་ཏེ། །བྱང་ཆུབ་ཞིང་ལ་དགོད་པར་བྱ། །དེ་ཙམ་ལ་ནི་བསྒྲལ་ཞེས་གདགས། །བསྒྲལ་བ་ཉིད་ན་སྦྱོར་བ་ཡིན། །ཉོན་མོངས་སྡུག་བསྔལ་རྩད་བཅད་ནས། །བྱང་ཆུབ་ཞིང་དུ་བསྒྲལ་བས་ན། །གཉིས་མེད་དབྱིངས་སུ་སྦྱོར་བ་ཡིན། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་པ། །སྒྲུབ་པ་དང་ནི་སྒྲུབ་ཆེན་པོ། །ཤེས་རབ་དབྱིངས་མ་ཁྲུས་ཆས་ལ། །བདེ་གཤེགས་དཀྱིལ་འཁོར་ཀུན་བཀོད་དེ། །བདག་ཉིད་རིག་པའི་ལྷར་བསྒོམ་ནས། །གཉིས་སུ་མེད་པར་ལྡན་པར་བྱ། །རྡོ་རྗེ་དྲིལ་བུ་ལྡན་བྱས་ནས། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །བྱང་ཆུབ་སེམས་མའི་བདེ་ཐུགས་སྤྲོ། །སེམས་ལྔའི་རིམ་པ་ཟིན་པ་ཡིས། །སངས་རྒྱས་དཀྱིལ་འཁོར་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །ཕྱོགས་དུས་དཀྱིལ་འཁོར་གསུམ་གཉེས་དང་། །འགྲོ་བ་མང་པོ་བདེ་ཐོབ་ནས། །སླར་ཡང་གཉིས་མེད་དབྱིངས་སུ་ཐིམ། །ཐིམ་འགྱུར་དབྱིངས་ནས་ཕྱག་རྒྱར་འབར། །བདེ་གཤེགས་ཐབས་དང་ཤེས་རབ་རྫོགས། །ཕྱག་རྒྱ་དག་དང་ཡང་དག་རྫོགས། །བསོད་ནམས་ཚོགས་ཆེན་གཉིས་ཀྱང་རྫོགས། །སྒྲུབ་པ་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླངས། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱིས་བདག་པོར་འགྱུར། །འགྲོ་དྲུག་དུས་གནས་དེ་དག་སྣང་། །མཆོད་པ་ཆེན་པོ་མཉམ་སྦྱོར་ཞིང་། །ཐམས་ཅད་དབྱིངས་སུ་སྦྱོར་བས་ན། །ངན་འགྲོར་མི་ལྟུང་ཡང་དག་འགྲུབ། །འདི་ནི་བསྒྲལ་བ་ཆེན་པོ་ཡིན། །བསྒྲལ་བ་ཉིད་ན་སྦྱོར་བ་ཡིན། །སྦྱོར་བ་ཉིད་ན་མ་ལུས་བསྒྲལ། །ཡེ་ནས་ལྷ་དང་ལྷ་མོ་ཡི། །དཀྱིལ་འཁོར་ཡང་དག་སྦྱོར་བ་དང་། །དབང་པོ་ཡུལ་དུས་སྦྱོར་བའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ཉིད་ཡུལ་དུ་སྦྱོར། །དུས་བཞི་ལྷ་མོ་ཉིད་དུ་སྦྱོར། །རྟག་ཆད་མུ་བཞི་ཁྲོ་མོ་བཞི། །ཐམས་ཅད་མ་ལུས་འབྱུང་བ་ཀུན། །མཉམ་པའི་དབྱིངས་དང་རིག་པར་སྦྱོར། །ཐབས་ཀྱིས་སྲིན་མོ་རོལ་པ་ལྟར། །སྦྱོར་བ་ཉིད་ན་ཆགས་པ་མེད། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཟིན་ཆགས་མེད། །འདི་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །མཆོད་པའམ་སྤྱོད་ལམ་ཐམས་ཅད་དུ། །ཆས་བརྒྱད་རྒྱན་རྣམས་བགོ་བྱ་སྟེ། །བཟའ་བཏུང་རྗེས་སུ་མཐུན་པས་སྤྱད། །བྲོ་གར་གླུ་ཚིག་ལྡན་པར་བྱ། །དབང་པོ་ཡུལ་དུས་རིག་པ་རྣམས། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བདེ་བ་མཆོག་གི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཁྲོ་བོ་ཁྲོ་མོ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམ་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཐབས་དང་ཤེས་རབ་ལྡན་པའི་ཞབས། །རྟག་ཏུ་རྡོ་རྗེ་འབར་བར་འགྱུར། །ཐབས་ཆེན་རེ་རེ་བསྐྱོད་བྱས་ན། །པདྨ་ཆགས་མེད་རེ་རེ་འབྱུང་། །རྡོ་རྗེ་པདྨོ་དེ་འབྱོར་ན། །སེམས་ཅན་ཐམས་ཅད་བླ་ན་མེད། །བྱང་ཆུབ་ཞིང་དུ་སྐྱེ་བར་འགྱུར། །རང་བཞིན་དཀྱིལ་འཁོར་ལྷ་རྣམས་དང་། །ཁྲོ་བོའི་དཀྱིལ་འཁོར་བསྒོམ་བྱ་སྟེ། །དབུ་ཡི་དཀྱིལ་འཁོར་བསྒུལ་བསྐྱོད་ན། །སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་བསྐྱོད་བྱས་ན། །རིག་འཛིན་ཞིང་ཁམས་ཐམས་ཅད་གཡོ། །རྐང་པའི་སྟབས་ཆེན་མནན་མཆོངས་ན། །སྡུག་བསྔལ་མི་བཟད་ཐམས་ཅད་དང་། །བདུད་དང་ལོག་འདྲེན་ཐམས་ཅད་མནན། །ཡན་ལག་ཐམས་ཅད་བསྒུལ་བསིགས་ན། །བ་སྤུའི་བུ་ག་རེ་རེ་ནས། །ཁྲོ་བོ་རྡུལ་སྙེད་གྲངས་མེད་སྤྲོ། །དེ་ཡི་སྤྲུལ་པ་གྲངས་མེད་ཀྱིས། །ཕྱོགས་བཅུ་ཁམས་རྣམས་རྡུལ་སྙེད་དུ། །ཁྲོ་བོའི་དོན་རྣམས་རྡུལ་ཕྲན་སྙེད། །ཐུགས་རྗེས་བཟུང་ཞིང་དབྱིངས་སུ་བསྟིམ། །བྲོ་གླུ་ཚིག་དང་ལྟ་སྟངས་དང་། །ཏིང་འཛིན་ཡོ་བྱད་ཐམས་ཅད་ཀུན། །ཞི་བའོ་ཚོགས་ཀྱི་དཀྱིལ་འཁོར་ལས། །བྲོ་གར་རྩེ་འཇོ་ལ་སོགས་བསྒྱུར། །འཁོར་གྱི་ཕྲ་མེན་ཚིམས་བྱས་ཏེ། །དབང་དུ་སྡུད་དང་བསྒོ་བ་དང་། །ཕྱག་རྒྱས་བཀྱེ་ལ་བསྡུས་ཏེ་སྤྱད། །དེ་ལྟར་བསྒྲུབ་པས་ཐེ་ཚོམ་མེད། །ཐབས་དང་ཤེས་རབ་ཐམས་ཅད་ཀྱིས། །དེ་ལྟ་བུ་ཡི་ལོངས་སྤྱོད་ན། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །རྟགས་ཆ་སྔོན་བཞིན་འཕེལ་ལ་བརྟན། །གླིང་གྲངས་མཐོང་བ་དྲུག་ཀྱང་འབྱུང་། །སྒྲ་སྙན་རྨི་ལམ་དག་ཏུ་ཡང་། །བདེ་བའི་འཇིག་རྟེན་གནས་རྣམས་དང། །སྐྱེ་བ་གང་དག་འཛིན་པ་དང་། །རིག་འཛིན་ལུང་སྟོན་བརྟག་པར་བྱ། །ཞག་གྲངས་བཅུ་དྲུག་ཚུན་ཆད་ཀྱིས། །ལུས་མ་སྤངས་པར་རིག་འཛིན་ས། །ཡུན་རིང་ཆོས་ཀྱི་བདེ་སྤྱད་པས། །བླ་མེད་རྡོ་རྗེ་སེམས་དཔའི་ས། །དཔེ་བྱད་མཚན་གྱིས་རྒྱན་སྤྲས་པའོ། །མངོན་ཤེས་དྲུག་ལྡན་ཐམས་ཅད་མཁྱེན། །ཚོགས་ཆེན་གཉིས་ཀྱང་རྫོགས་པར་རོལ། །སངས་རྒྱས་ཞིང་ལ་དབང་བསྒྱུར་ཏེ། །སྤྱོད་ཡུལ་ཀུན་ཏུ་མ་དྷ་ལ། །ཅི་ལྟར་དམིགས་པ་བཞིན་དུ་འགྲུབ། །དེ་བས་ལས་དུས་རག་ལུས་སེམས། །དོར་བྱས་བརྩོན་འགྲུས་ཆེན་པོས་སྦྱར། །མཐོང་བའི་ཆོས་ལ་མྱ་ངན་འདས། །རྣལ་འབྱོར་ལས་སུ་རུང་རྣམས་ཀྱིས། །འདི་ལྟ་བུ་ཡི་ལས་བྱས་ན། །འབྲས་བུ་མངོན་དུ་མ་གྱུར་ཡང་། །ལུས་ངག་ཡིད་ལ་དབང་ཐོབ་ནས། །སངས་རྒྱས་འབྱུང་དང་སྐལ་མཉམ་འགྱུར། །ལས་དང་འབྲེལ་མི་བྱིན་རླབས་ཀྱིས། །ཐེག་པ་དམན་པར་ཡོངས་མི་སྐྱེ། །བསོད་ནམས་ཡེ་ཤེས་དཔུང་ཚོགས་ཀྱིས། །ལས་ཀྱི་མུན་པ་སྦྱང་པའི་ཕྱིར། །ངན་སོང་གནས་སུ་ཡོངས་མི་ལྟུང་། །གནས་ངན་ལོངས་སྤྱོད་མི་བདེ་བའི། །ངན་སོང་བརྒྱད་དུ་འགྲོ་མི་འགྱུར། །གཟུགས་མཆོག་དམ་པ་ལྡན་པའི་ཕྱིར། །རྡོ་རྗེ་ཐེག་མཆོག་བརྗེད་མི་འགྱུར། །ཚེ་རིང་བདེ་བ་ཕུན་སུམ་ཚོགས། །ལྷ་མི་གནས་མཆོག་ས་སྐབས་དེར། །ལུས་བྱད་བཟང་ཞིང་ཡན་ལག་རྫོགས། །དབང་པོ་ཚང་ཞིང་ལྷག་ཆད་མེད། །སྐད་གདངས་སྙན་ཞིང་འགྲོ་དོན་བྱེད། །བདག་གི་ལོངས་སྤྱོད་ཐམས་ཅད་ཀུན། །གཞན་ལ་གནས་པ་མེད་པར་འགྲུབ། །ཚན་པོ་ཆེ་ཡི་མཐུ་སྟོབས་དང་། །འགྲོ་བའི་དོན་དུ་ཡང་དག་ལྡན། །གཞན་ལ་གནོད་པ་ཡོངས་མི་བྱེད། །སྙིང་རྗེ་ཆེ་ཞིང་ཤེས་རབ་ལྡན། །མཐུ་སྟོབས་ལྡན་ཞིང་ཐབས་ལྡན་པས། །བདག་དང་གཞན་དོན་རྫོགས་པར་བྱེད། །མཐར་ཕྱིན་སྐྱེ་ཤི་མེད་པའི་ས། །སངས་རྒྱས་ཡོན་ཏན་རིན་པོ་ཆེ། །བཀོད་པའི་གཞལ་ཡས་ཐམས་ཅད་ལ། །འདོད་ལྷ་དྲུག་པ་ཅི་ལྟ་བར། །དབང་བསྒྱུར་སྤྱོད་པའི་དངོས་གྲུབ་ཐོབ། །དེ་ཕྱིར་དབང་བསྒྱུར་ཕྱི་མའི་དུས། །ཉིད་དུ་སྦྱོར་བའང་སྨོས་ཅི་དགོས། །དེ་ལྟར་བརྩོན་འགྲུས་ལྡན་པས་ནི། །མཐོང་དང་ཕྱི་མར་གྱུར་ན་ཡང་། །ལན་གྲངས་གཞན་དུའང་བདུན་ཉིད་ལས། །མི་འདའ་རིགས་ཀྱི་དམ་པར་འགྱུར། །ཆོ་ག་སྔགས་དང་ཡོ་བྱད་དག །བཅོ་ལྔ་རྫོགས་ནས་མ་ཉམས་ལྡན། །ངེས་པར་འཚོགས་ཏེ་ཚོགས་སྤྱད་ན། །འབྲས་བུ་མངོན་དུ་མ་བྱུང་ཡང་། །རྒྱལ་པོ་བྲན་མོ་ངན་བཤོས་ཀྱང་། །འབྱུང་བུར་ཆགས་པའི་རིགས་འཛིན་ཏེ། །མཐོང་ནས་དམངས་ཀྱི་བླར་འགྱུར་ཞིང་། །ཀུན་ལ་དབང་བསྒྱུར་སྟོབས་ལྡན་ལ། །ལྷ་རྣམས་རེ་བའི་མཐུ་སྐྱེ་བས། །བསྲུང་སྦེད་མཆོད་པ་བྱེད་པ་ལྟར། །རྣལ་འབྱོར་སྟོབས་དང་ལྡན་གྱུར་ན། །རྡོ་རྗེ་དམ་ཅན་མ་ལུས་ཀུན། །དེ་ཡི་དབང་གིས་ཁུར་བར་བྱེད། །སྤྱོད་ཡུལ་དོར་ནས་ཕྱག་རྒྱར་རྫོགས། །ལ་ལ་དེ་ལྟར་དེ་ངེས་ན། །དེ་ལྟར་མ་གྱུར་བསོད་ནམས་ས། །ཚེ་རབས་སྐྱེ་བ་ཐམས་ཅད་དུ། །ལས་ངན་ལྔ་བཅུ་བརྒྱད་སྤྱོད་པའི། །ས་གནས་ཀུན་ཏུ་སྐྱེ་མི་འགྱུར། །ངེས་འབྱུང་བཞི་ལའང་སྤྱོད་མི་འགྱུར། །རྡོ་རྗེ་རིགས་མཆོག་འཛིན་འགྱུར་ཏེ། །རྣམ་སྨིན་ཐོབ་ནས་སྔོན་བཞིན་ཏེ། །འདི་ལ་ཐེ་ཚོམ་ལྡན་མིན་པས། ། སྐལ་ལྡན་ཀུན་གྱིས་རྟག་འགྲུས་བྱའོ། །བར་ཆད་མེད་པའི་ལམ་ཚོགས་བསྒྲུབ་པའི་ལེའུ་སྟེ་བདུན་པའོ།། །།དངོས་གྲུབ་ལྷག་པའི་མཆོག་ཉིད་ལ། །བསྙེན་སྒྲུབ་བཞི་ཡིས་མོས་བྱས་ནས། །བདེ་ཆེན་ས་ལ་དགོད་པའི་ཕྱིར། །མཐར་ཕྱིན་འབྲས་བུ་མཚན་ཉིད་བཤད། །དུས་ཚོགས་བར་ཆད་མེད་པ་ནས། །ལྷག་མ་མེད་དང་ཡོད་པ་ཡི། །མྱ་ངན་འདས་པ་མཐར་སྦྱོར་བ། །ཐུན་མོང་ལྟ་བུར་ཟུང་དུ་འགྱུར། །དེ་ལ་ཐོག་མར་བཤད་པ་ནི། །གཅིག་དང་དུ་མའི་རྣལ་འབྱོར་ལ། །བསྟན་བྱས་ཉིད་སའམ་དེ་ཐོབ་ནས། །ཟླ་དྲུག་བཅུ་དྲུག་བསྙེན་བསྒྲུབ་ཚེ། །རྡོ་རྗེའི་ལུས་སུ་མ་གྱུར་པར། །སྟོབས་ཆུང་རྐྱེན་སྨོན་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །རྡོ་རྗེ་འཆང་སར་རིམ་པར་འགྲོ། །ལྷ་ཡི་རྣལ་འབྱོར་གསལ་རྫོགས་སྨིན། །ལུས་ཀྱི་དྲྭ་བས་བསྒྲིབས་འགྱུར་བ། །ཀ་ལ་པིངྐ་མི་འཇིགས་བཞིན། །བྲལ་ནས་སྣང་བྱེད་དེ་རྣམས་སྨིན། །ཡིད་ཀྱིས་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །ལྷ་ཡི་སྐུ་ཉིད་གསལ་འགྱུར་ན། །རྣམ་པར་སྨིན་ཞེས་དེ་ལ་གདགས། །རྒྱ་མིག་རྒྱ་ས་ཅི་ལྟ་བར། །ཕྱག་རྒྱ་ཐོབ་ལ་མ་རག་པའི། །གཟུགས་རྫོགས་སྟོབས་ཆེན་དེ་ཁོ་ན། །དེ་ལའང་དགོངས་སྤྱོད་ཁྱད་པར་གཉིས། །དགོངས་སྤྱོད་རྒྱ་མཚོ་སྔ་ཕྱི་དང་། །རྒྱུད་མཐུན་སྟོབས་ཆས་མིང་གྲགས་པ། །ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའི་སྨིན་ཞེས་བརྗོད། །དཀྱིལ་འཁོར་རོལ་པའི་ཚུལ་སྤྱོད་པས། །ཚོགས་གཉིས་རྫོགས་པ་བདག་གི་དོན། །སྨིན་པའི་ཕྲིན་ལས་རྫོགས་བྱེད་པས། །མི་འདོར་དགོད་པ་གཞན་གྱིའོ། །དེ་དེའང་འདི་དང་ཕྱི་མ་དང་། །ལན་གྲངས་གཞན་དུ་རབ་འབྲིང་གིས། །ཐོབ་ཀྱི་བསྐལ་པར་མི་འགྱང་སྟེ། །དགོངས་སྤྱོད་བརྩོན་པ་གཙོ་ཕྱིར་རོ། །གལ་ཏེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པ། །རྡོ་རྗེ་ལྔ་རྫོགས་རིག་པ་འཛིན། །ཕྱག་རྒྱ་ཆེན་པོའི་རིགས་འབྲས་བུས། །དེ་ཕྱིར་རྒྱ་ཆེའི་བར་ཆད་མེད། །ལམ་མཆོག་དབྱེ་ས་གཅིག་ཡིན་ནོ། །བར་ཆད་མེད་པའང་སྨིན་པ་ཡི། །མངོན་པར་ཤེས་པ་དེ་མིང་ཅན། །མི་འགྱུར་ངེས་པར་འབྱུང་བའང་ཡིན། །དཔག་ཚད་གླིང་ཁམས་ཡུལ་ལ་སྦྱོར། །ཕྱི་མའི་དུས་ཀྱི་ཚོགས་བསྒྲུབ་པས། །དགོངས་སྤྱོད་བརྩོན་པ་སྟོབས་རྫོགས་དང་། །ཡོ་བྱད་ཐབས་ཀྱིས་སྟོབས་ལས་སྐྱེས། །གཞན་པའི་ཡོ་བྱད་རྟགས་ལྡན་པ། །དངོས་གྲུབ་རོལ་པའི་མཐུ་ལས་བྱུང་། །ཐབས་རྒྱུས་ཕྱེ་བས་སོ་སོ་ཡང་། །ལམ་ལས་སྐྱེས་པའི་མཆོག་ཡིན་ཏེ། །དེ་ཡང་རྒྱུ་དུས་ངོ་བོ་གྲངས། །དགོངས་སྤྱོད་མངོན་ཤེས་སྦྱོར་བའི་ཚུལ། །བཞི་གཉིས་ལུས་ཀྱིས་རྫོགས་པར་བཤད། །ཐབས་དང་དྲང་བ་རྒྱུར་བྱ་བ། །ཤེས་རབ་རྣམ་གསུམ་གོམས་བྱས་ནས། །ཏིང་འཛིན་མཉམ་པའི་དོན་རྟོགས་ཏེ། །ཀུན་ཏུ་ཡངས་པ་ཆེན་པོ་བསྒོམ། །ཤེས་འཇུག་ལྔ་རྟོགས་གོམས་པས་ནི། །ཟླ་ཞག་རྒྱུད་བཞིན་འགྲུབ་བྱེད་པས། །རྡོ་རྗེའི་ལུས་སུ་ཐེ་ཚོམ་མེད། །མིང་བཞི་ལུས་ཉིད་དེ་ལྟའོ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །རབ་འབྲིང་ཅི་བཞིན་མི་བསླུ་བར། །དབང་བསྒྱུར་རིགས་ཀྱི་དམ་པ་འགྲུབ། །རྒྱུ་འབྲས་དུས་ཅིག་རྫོགས་པ་ཡི། །རང་རིག་ཉིད་ལ་དབང་ཐོབ་སྟེ། །ཚེ་ནི་བཅུ་དང་དྲུག་པ་ཡིས། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་སའོ། །དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་བསྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེས་གནས་ཟག་པ་ཟད། །རྡོ་རྗེའི་ལུས་འགྱུར་ཚེ་ཡི་རིགས། །མཐོང་བའི་ཆོས་ལས་མྱ་ངན་འདས། །ལུས་མ་བོར་བར་སངས་རྒྱས་ས། །འཇིགས་པ་ཀུན་བྲལ་ཆོ་འཕྲུལ་རྫོགས། །ལྷ་མི་རྒྱལ་པོའི་སྐྱེ་བ་འཛིན། །ལྷ་དང་མི་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །གང་དག་མི་འཇིགས་རྩི་འཆང་ལྟར། །དབང་བསྒྱུར་འཇིགས་པ་ལྔ་སོགས་བྲལ། །དྲུག་བཞི་ཡན་ལག་ཀུན་རྫོགས་ཤིང་། །རང་དབང་བསྒྱུར་བའི་སྐྱེ་བ་ཡིས། །སྟོང་གསུམ་འཇིག་རྟེན་བརྒྱད་འདུལ་བྱེད། ། རྒྱུ་ཡི་དང་པོར་སྐལ་མཉམ་པའོ། །བདག་ཕྱིར་དོན་དུ་གཉེར་བ་ནི། །བརྒྱ་ཕྲག་བཅུ་དྲུག་ཚེ་ཡིས་རྫོགས། །གཞན་དུ་རང་དབང་ཐོབ་པའི་ཕྱིར། །བསྐལ་པ་གྲངས་མེད་གནས་འགྱུར་ཡང་། །སྐུ་ནི་ཤིན་ཏུ་གཞོན་པའི་ཚུལ། །འདུལ་བའི་དུས་ཀྱིས་འཕོ་འདུག་བྱེད། །ངོ་བོ་སྨན་དང་ཐབས་རིག་འཛིན། །རྣལ་འབྱོར་སྒྲོལ་མའི་རིགས་འཛིན་དང་། །ལམ་མཆོག་རྫོགས་པའི་རིམ་པའང་བཞི། །བཅུ་དབང་དང་པོའི་འདྲ་མོད་ཀྱང་། །དེ་ཉིད་མཐུ་ཡིས་ཟག་མི་ཟག །རྒྱུ་དང་ངོ་བོ་རྣམ་པ་གཉིས། །དེ་བས་དགོངས་སྤྱོད་སྨོས་ཅི་དགོས། །གཞན་ལས་འགྲུབ་པས་དེ་རིགས་མིན། །མཆོག་ལའང་ཡོན་ཏན་མཚན་ཆས་བརྗོད། །ལུས་དང་ཕུང་པོར་བཅས་པ་ཡིས། །གནས་པར་དབང་བའི་རིགས་འགྲུབ་ཕྱིར། །ལྷག་རྟོག་འབྱུང་ལ་ལུས་བཅས་འདས། །ཟག་ཀུན་ཟད་པའི་རིགས་ཆེན་འདི། །ཇི་ལྟར་སྤྱད་ཀྱང་ལྡོག་པ་མེད། །རང་དབང་ཐོབ་པས་དབུགས་བྱུང་ཕྱིར། །སྐབས་འདིར་བདེན་པ་བར་མ་མཐོང་། །མཁས་རྟོགས་གོམས་སྤྱོད་རིག་པ་འཛིན། །ལྷ་ལ་སོགས་པ་རྡོ་རྗེ་འཛིན། །མི་གཏོང་གཟུངས་ལས་མི་ཐོབ་པ། །ཡོན་ཏན་གྲངས་ཀྱིས་བསམ་མི་ཁྱབ། །དངོས་སུ་ས་ཁམས་ལུང་སྟོན་པ། །རྡོ་རྗེ་རྡོ་རྗེ་བོས་དབང་བསྐུར། །མཐོང་གོམས་མཐུར་ལྡན་རིག་པ་ཉིད། །སྣང་བ་རིག་པ་འཛིན་པའི་གནས། །རིག་སྣང་གནས་ལ་ངེས་པ་མེད། །སྐྱེ་བ་ཆ་བྱད་དོན་གྱིས་འགྱུར། །ཆོས་རྣམ་བདག་ཕྱིར་དམིགས་མེད་ཕྱིར། །ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སངས་རྒྱས་ཐུགས་མི་མཐོང་། །སྣོད་བཅུད་མི་མཐོང་ག ང་མཐོང་བ། །དེས་ནི་ཡང་དག་བདེན་པ་མཐོང་། །དེ་བས་ཐོས་མྱོང་རིག་སོགས་ལམ། །ཤེས་འཇུག་བར་ཆད་མེད་ལས་སྐྱེས། །དེ་ཕྱིར་མངོན་སུམ་རྟོགས་མཆོག་ནི། །རང་དབང་ཐོབ་ནས་སྔོན་བཞིན་ཏེ། །ཟག་གསུམ་ཟག་པ་འདི་ལ་མེད། །སྔོན་ཆད་ལམ་གྱི་འདུ་བྱེད་མེད། །དེ་ཡི་རེ་དོགས་ཆགས་བྲལ་ལས། །རིམ་པའམ་རིམ་པ་མེད་ཚུལ་གྱིས། །སྟོང་ཁྲི་ལ་སོགས་གྲངས་མང་ལྷ། །འཁོར་ལོ་གསལ་རྫོགས་རྣལ་འབྱོར་གནས། །དཀྱིལ་འཁོར་གཉིས་ཀྱིས་དོན་འགྲུབ་མཛད། །དེ་མིང་དབང་བསྒྱུར་རྣལ་འབྱོར་ཏེ། །བརྒྱ་ཕྲག་ཆ་རྫོགས་དུས་བར་དུ། །གོམས་བྱས་གཉིས་ཐོབ་མཐའ་སྐད་ཅིག །ཆ་ཡིས་རྡོ་རྗེ་དཔའ་བོར་སྦྱོར། །རིགས་མཐུན་མཆོག་བརྒྱ་སྤྲུལ་པ་ལས། །གསང་ཐོས་བསམ་རིག་བསྒོར་སྦྱོར་བས། །དཀྱུས་སར་ཕྱིན་པའི་ཅང་ཤེས་བཞིན། །ཀུན་ཏུ་འགྲོ་བ་བདག་པོའི་དོན། །རྫུ་འཕྲུལ་ཆོས་སྣང་རྗེས་སྟོན་བརྗོད། །དྲུག་ཤེས་དེ་མིན་ལྡན་པ་ཡིས། །དབང་བསྒྱུར་རྩ་བ་རྡོ་རྗེ་སྐུས། །བྱ་བྱེད་རྫོགས་པར་གྲུབ་པ་ཡིན། །བཞི་ཡི་ཐོག་མས་དོན་སྤྱོད་པ། །ནུས་མཐུ་ཅན་དུ་དབང་བསྒྱུར་ནས། །མཁའ་ལ་འཕྱོ་དང་རིག་འཛིན་གནས། །ཆུ་རྒྱུན་བཟློག་དང་རླུང་མི་འགུལ། །རི་བྲག་ལ་སོགས་ཐོགས་མེད་འཛུལ། །ཆུ་ལ་མི་བྱིང་མེས་མི་ཚིག །དུག་དང་མཚོན་གྱིས་འཇིག་མི་འགྱུར། །མི་སྣང་བ་དང་མང་པོར་སྤྲུལ། །གཞན་ཡང་ཅི་ལྟར་འདོད་པ་བཞིན། །ལྷ་སྲིན་རྣམས་ལ་དབང་བསྒྱུར་དང་། །ཚེ་དང་དུས་ལ་བསྲིང་སྡུད་དང་། །སྟོང་གསུམ་ཡུངས་འབྲུར་ཤོང་བ་དང་། །ཡུངས་འབྲུས་སྟོང་གསུམ་གང་བ་དང་། །བ་སྤུ་གང་བསྡུའང་དེ་བཞིན་ནོ། །བསྲེག་པའི་བསྐལ་པ་གཞིལ་བ་དང་། །ཉི་མའི་དཀྱིལ་འཁོར་འབུམ་འགྱེད་དང་། །སྐམས་སར་ཆུ་འབྱུང་བྱེ་མ་གསེར། །སོལ་བ་ལྗོན་ཤིང་འབྱུང་བ་དང་། །ནམ་མཁའ་རྡོ་རྗེ་སྲ་འབྱུང་དང་། །འབར་ནས་མེ་ཡང་ཚིག་པ་དང་། །ཆུ་རྒྱུན་བབ་བའང་དེ་བཞིན་ནོ། །འཇིག་རྟེན་གཏོར་རླུང་བྱ་བའང་འགྲུབ། །དགུག་དང་བཏང་དང་བཅིང་དང་དགྲོལ། །གསོ་དང་གསད་དང་ཕམ་དང་རྒྱལ། །ཅི་ལྟར་དམིགས་པ་བཞིན་དུ་འགྲུབ། །སྦྲུལ་དང་གཅན་གཟན་གདུག་པ་རྣམས། །ཕྱི་བཞིན་ཕྱི་བཞིན་འབྲང་བར་འགྱུར། །བདུད་དང་གདུག་པ་ལ་སོགས་པ། །ཚུགས་པར་མི་འགྱུར་བྲན་བཞིན་འགྱུར། །ལུས་མ་བོར་བར་རིག་འཛིན་ནས། །ཐུགས་རྗེ་སྤྲུལ་པའི་བྱིན་རླབས་ཀྱིས། །སོ་སོའི་སྐད་དང་མཐུན་པ་ཡིས། །སོ་སོར་ཐར་པའི་ལམ་ཡང་སྟོན། །ངན་སོང་སྟོང་ཞིང་བསྐུལ་བ་དང་། །ལམ་སྟེགས་དགོད་ཅིང་དེ་དག་ཉིད། །ཐེག་ཆེན་ལམ་ལ་དགོད་པར་མཛད། །ཐར་པ་བསྐུལ་ཞིང་ཞི་བ་སློང་། །ས་བཅུ་ཤེས་བྱ་སྦྱོང་བྱེད་ཅིང་། །བདེ་གཤེགས་འཁོར་ལའང་ཆོས་སྟོན་མཛད། །སྟོང་གསུམ་བརྒྱ་བཅུའི་འཇིག་རྟེན་རྣམས། །གཡོ་དང་རབ་གཡོ་ཤིན་ཏུ་གཡོ། །མཛད་པ་སྣང་བ་དེ་གནས་རྣམས། །ནང་གཡོས་པ་ཡིས་རིམ་གཡོས་བྱེད། །གསང་བ་སྔགས་ཀྱི་སྒྲ་བསྒྲགས་པས། །ཀུན་ཀྱང་རྨད་བྱུང་སྔགས་ཀྱི་སྒྲར། །གྲགས་པས་བདུད་འདུལ་ངན་སོང་སྦྱོང་། །འགྲོ་བ་མ་ལུས་དོན་ཡང་བྱེད། །ལས་རྣམས་ཐམས་ཅད་ཀུན་བྱས་ནས། །སྐྱེ་ཤི་མེད་པའི་གཡུང་དྲུང་ཐོབ། །མཚན་དང་དཔེ་བྱད་ཀུན་གྱིས་བརྒྱན། །མཐར་ཕྱིན་བྱ་བ་མེད་པར་འགྲུབ། །རྒྱུད་ལས་གསུངས་པ་ལྔ་བཞི་ནི། །སྤྱོད་པ་བཅུ་གཉིས་ཕྲིན་ལས་རྣམས། །དབང་བསྒྱུར་ཉིད་དུ་ཐོགས་མེད་པར། །སྔོན་བཞིན་ཡུལ་ཁྱོན་འདུལ་བར་བྱེད། །སྐྱེ་མཆེད་རང་བྱུང་ཡེ་ཤེས་ཕྱིར། །དེ་ཉིད་གཅིག་དང་དུ་མའི་མཐའ། །གཉིས་སུ་མེད་པར་མངོན་རྟོགས་གོམས། །མཐོང་བས་དྲི་མ་དྲིག་སྦྱང་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔར་ལྡན། །གཅིག་གིས་ཡུལ་ལྔ་གཅོད་པར་བྱེད། །ཚང་དང་མ་ཚང་འཇིགས་དོགས་མེད། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་བར་ཤེས་པ་དང་། །སྔོན་གནས་རྗེས་སུ་དྲན་པ་དང་། །ཕ་རོལ་རྣམས་ཀྱི་སེམས་ཤེས་དང་། །འཆི་འཕོ་སྐྱེ་བ་མཁྱེན་པ་དང་། །རྫུ་འཕྲུལ་ཤེས་པའམ་ཟག་ཟད་ཤེས། །དེ་སྙེད་ཚུན་ཆད་ཡུལ་ཤེས་པས། །གང་དང་གང་རྣམས་འདུལ་བར་མཛད། །དེ་མིང་ལྡོག་ཟག་མེད་པ་དང་། །དབང་བསྒྱུར་རིགས་ཀྱི་མཚན་མ་བརྗོད། །བདག་གམ་གཞན་ཕྱིར་དབང་ཅན་དེས། །སྐུ་ཚེ་ཚད་གྲངས་ཅི་སྙེད་བར། །བཞུགས་མཐའ་རང་གིས་བསྒྲུབ་སྦྱོར་བ། །སྔོན་བཞིན་རིམ་དང་ཅིག་ཆར་བའོ། །དེ་ཡང་སྔ་མ་མཐོང་བའི་ལམ། །རང་གི་ཤེས་རབ་གསུམ་གོམས་པས། །རང་ལུས་རྒྱལ་བའི་ཕྱག་རྒྱ་ཆེ། །གང་གོམས་མངོན་དུ་གྱུར་པའི་ལྷ། །ཕྱག་རྒྱ་ཆེན་པོའི་རིག་འཛིན་དེར། །ཡོངས་གྱུར་ལྷུན་གྲུབ་ཐོབ་ནས་གཤེགས། །ཕྱི་མའི་རིགས་མཆོག་དེ་ཉིད་ནས། །སྔོན་བཞིན་གོམས་པ་གསུམ་བྱས་པས། །རྒྱ་དོར་ཅིག་ཆར་མཐར་འགྲོ་བ། །ཆོས་ཉིད་དམ་ཚིག་སྨོན་མཐུ་ཡིན། །དེ་ཉིད་བར་མ་བཤད་བྱ་བ། །སྔོན་གྱི་ལུས་ཀྱིས་རྫོགས་པར་བྱ། །གཅིག་དང་དུ་མའི་རྣལ་འབྱོར་པས། །འབྱུང་ལུས་སེམས་ཕྱིར་རང་བཞིན་ལྷ། །མཐོང་གོམས་བསགས་པའི་མཐར་བསྒྲུབ་པས། །ཀུན་འགྲོ་སྒྲིབ་དག་ངོ་བོར་རུ། །རྣམ་སྨིན་ཚུལ་གྱིས་འགྲུབ་པ་མེད། །སྔ་ཕྱི་རྒྱུ་འབྲས་འདོད་པ་མིན། །དུས་རིམས་འདོད་མིན་གཅིག་འདོད་ཕྱིར། །གཅིག་པས་དེ་ཉིད་ལམ་བྱས་པས། །ལྷག་མ་བཅས་པར་བསྣུར་བསྒྲུབ་མཐའ། །དེ་ཉིད་གྱུར་པས་ངེས་པ་མེད། །རང་སེམས་ཕྱག་རྒྱ་ཆེན་པོ་སྟེ། །བསྒོམ་པས་གང་ཡིན་མངོན་འགྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲི་རིགས་འཛིན་འགྱུར། །རང་ལུས་གདོད་ནས་ཕྱག་རྒྱ་ཆེར། །བསྒོམ་པས་མངོན་དུ་འགྱུར་པའི་སྐུ། །མཚན་དཔེ་བཞི་མངོན་དྲུག་རྫོགས་པ། །ཕྱག་རྒྱ་ཆེན་པོའི་རིགས་སུ་གྲགས། །ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །དེ་ཕྱིར་སྐུ་ཚེ་ཚད་མེད་དོ། །བསྣུར་ཞིང་མངོན་དུ་བྱ་དང་བྲལ། །དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིགས་འཛིན་པས། །རྣམ་པ་བཞི་རུ་སྔོན་བཞིན་འགྱུར། །མཆོག་གི་མིང་གྲངས་གཉིས་དང་གསུམ། །མཉམ་པ་ཉིད་ལས་མི་གཡོ་ཞིང་། །དབང་བསྒྱུར་འདུ་བྱེད་དང་བྲལ་བས། །ཟག་པ་མེད་པའི་བསྒོམ་པའི་ལམ། །མི་གཡོ་རྣལ་འབྱོར་ཉིད་དུའང་བརྗོད། །རྒྱལ་བས་ལུང་སྟོན་དངོས་འབྱུང་བ། །བརྟག་པའི་བྱེ་བྲག་འདི་ལའང་མེད། །ཡེ་ཤེས་སྐུ་ཡི་རྣལ་འབྱོར་པ། །སངས་རྒྱས་གཉིས་པའི་སྤྱན་དགོངས་ཀྱང་། །རྒྱུ་མཐུན་མོད་ཀྱང་མི་གཡོ་ཐོབ། །ཤིན་ཏུ་བརྟན་པའི་ཀླུང་གནས་པ། །གྲངས་ཅན་འཁོར་ལོ་ཀུན་ཏུ་སྣང་། །འོན་ཀྱང་རྣལ་འབྱོར་རྩོལ་བ་ཅན། །མཉམ་བཞག་ངང་ལ་མ་གཡོས་བཞིན། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དག །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །བཞི་དང་དྲུག་སོགས་དེ་བཞིན་ནོ། །དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་གདུལ་བྱས་དཔགས། །རང་གི་མི་གཡོ་མཐོང་གོམས་དང་། །དོན་དུ་གཉེར་རིམ་རྩོལ་བ་ཡིས། །ལམ་ཀུན་རྫོགས་པའི་བྱིན་སྟོབས་ཀྱིས། །རྣལ་འབྱོར་བྲལ་ནས་ལྷུན་གྱིས་གྲུབ། །ལྷན་ཅིག་གནས་པའི་དྲི་མ་དག །རྩོལ་བ་མེད་པར་ལྷུན་གྲུབ་ཐོབ། །དེ་དེ་མངོན་དུ་བྱས་པ་ཡིས། །ལྷུན་གྱིས་གྲུབ་པའི་རིག་འཛིན་དང་། །རང་རྒྱུད་དག་པའི་སངས་རྒྱས་དེ། །སྔོན་བཞིན་བཞི་བརྒྱད་དགོད་པར་བྱ། །སྔ་མའི་རིགས་ལ་མཐུ་རྫོགས་པས། །བཤད་པ་བཞིན་དུ་དྲི་མ་དག །སངས་རྒྱས་གཉིས་པའི་ཤེས་རབ་གསུམ། །ལྷུན་གྱིས་གྲུབ་པའི་རིགས་སུ་འབྱུང་། །གནས་དེར་སྔོན་བཞིན་གསུམ་རྫོགས་པ། །ལོངས་སྤྱོད་གསང་བའི་ལུང་ཐོས་ཤིང་། །རང་གི་དགོངས་སྤྱོད་ནུས་པ་ཅན། །ས་མཐར་དབྱུང་བའི་དུས་ལ་བབ། །དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལ་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་རགས་ལས་རིགས་འཛིན་མཐའ། །ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིར་ན། །དེ་འདྲ་དེ་ཉིད་རྒྱལ་ཚབ་སྟོན། །དེ་མི་གཏོང་བས་མིང་འགྲུབ་ཕྱིར། །ཉིད་ལ་སྐྱེ་ཤི་མི་མངའ་ཕྱིར། །རྡོ་རྗེའི་སྐུ་ཡང་གདུལ་བྱ་ལ། །སྤྲུལ་པ་རྣམས་ནི་འདའ་ཚུལ་སྟོན། །དོན་འགྲུབ་ལ་སོགས་ཅི་ལྟ་བའོ། །བྱ་བ་ལྷུན་གྲུབ་རྣལ་འབྱོར་ནི། །རིགས་འཛིན་ཆེན་པོ་ནང་རིགས་འཛིན། །མཐའ་མའི་མིང་གྲངས་མཐར་ཕྱིན་ལམ། །རང་རྒྱུད་དག་པའི་སངས་རྒྱས་དང་། །དེ་ཉིད་དང་ནི་མཐར་སྦྱོར་ལམ། །ཡང་དག་རྫོགས་པའི་རྒྱལ་ཚབ་པའོ། །སྔ་མ་གསུམ་དང་དང་པོ་བཞི། །ཆ་ལུགས་རང་གི་རྒྱལ་ཚབ་སྡུད། །བསམ་ཡས་ལྷུན་གྱིས་གྲུབ་པའི་ཕྱིར། །ཐམས་ཅད་མཁྱེན་པའི་སྤྱན་མཆོག་འཆང་། །ཡི་གེ་འཁོར་ལོའང་སྔོན་གཟིགས་པ། །མི་གཡོ་བ་ལ་མི་རྟོག་པ། །ད་དུང་མངོན་པར་མི་རྒྱ་སྟེ། །དུས་མཐའི་སྐད་ཅིག་ཉིད་ཀྱིས་གཤེགས། །དེས་ན་དགོངས་སྤྱོད་རྒྱ་མཚོ་ཀུན། །ཡེ་ཤེས་རྩལ་རྫོགས་བྱ་བྱེད་པའམ། །མཐར་ཕྱིན་བྱ་བྲལ་ལ་སོགས་པའི། །མིང་གྲངས་ཆ་ལ་བརྗོད་པར་ཟད། །ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱི་བསླབ་རྫོགས་ནས། །མཐའ་མའི་བག་ལ་ཉལ་བ་དག །བཅོམ་ལྡན་འདས་པར་གྱུར་པ་ཡིན། །དེ་ཚེ་དེ་སྒྲིབ་ཆ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུ་མཛད་པའང་སྟོན། །སྲིད་གསུམ་འགྲོ་བ་མཐའ་ཡས་སུ། །ཐུགས་རྗེས་རྫུ་འཕྲུལ་བསམ་མི་ཁྱབ། །དོན་དང་མཐུན་པ་འབའ་ཞིག་སྟོན། །མི་མཐུན་ཞགས་པས་འཁོར་བ་གཅོད། །ལ་ལར་ལྷུམས་ཞུགས་བལྟམས་པ་དང་། །ལ་ལར་ཁབ་དང་རྒྱལ་སྲིད་དང་། །ལ་ལར་རབ་བྱུང་དཀའ་ཐུབ་མཛད། །ཆོས་སྤྱོད་མྱ་ངན་འདས་སོགས་སྟོན། །རེ་འགའ་ཞི་ལ་རེ་འགའ་དྲག །གཡེམ་ལ་གཡེམ་སྟོན་སྡང་ལ་སྡང་། །དྲེགས་ལ་རི་དང་མུན་ལ་མུན། །རླུང་ལའང་དེ་བཞིན་མཐུན་མི་མཐུན། །རྒྱ་མཚོ་ལྟ་བུ་ཐབས་སྤྱོད་དང་། །ཕྲིན་ལས་དེ་བཞིན་ས་ཡིས་སྒྲོལ། །གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བའང་མཛད་པ་དང་། །དམན་ལུས་བསོད་ནམས་ལྡན་གནས་སུ། །སྣ་ཚོགས་ལུས་ཅན་རིགས་ལ་བསྐོར། །མངོན་ཤེས་དྲུག་ལྡན་མཚན་བཟང་དཔག །ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་དང་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །མི་མཐུན་མཚན་མ་གཞོམ་པའི་ཕྱིར། །རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོགས་མཚན་མ་ཀུན་བཅོམ་ནས། །རྡོ་རྗེའི་དབྱིངས་སུ་ཐིམ་པར་བྱེད། །བདག་མེད་རང་རིག་ཡེ་ཤེས་ཀྱིས། །དངོས་དང་དངོས་མིན་བག་ཆགས་བསྲེགས། །རང་དང་སྤྱི་ཡི་ཆོས་རྣམས་དང་། །སེམས་ཀྱི་ཕྲག་དོག་ཐམས་ཅད་ཀུན། །དངོས་པོའི་མེད་པར་རྟོགས་བྱས་པ། །དཔའ་བར་འགྲོ་བའི་རྣལ་འབྱོར་དང་། །རྡོ་རྗེ་རྩེ་མོ་མཆོག་ཐོབ་པས། །ཡིད་ཚོད་མེད་དང་བདུད་སྡེ་རྣམས། །ཚར་བཅད་དཔའ་བོས་དེ་རྗེས་ལ། །རྒྱན་གྱི་འཁོར་ལོ་མ་དྷ་ལ། །བསམ་ཡས་ལྷུན་རྫོགས་ཀུན་མཁྱེན་འཇོག །མཉམ་བཞག་ཡེ་ཤེས་དབང་བསྒྱུར་ཞིང་། །དོན་དུ་གཉེར་བའི་སྨོན་ལམ་མཐུས། །ཉི་ཤུ་རྩ་ལྔ་གཞན་ལས་མིན། །སྐུ་དང་གསུང་ཐུགས་ཡོན་ཏན་དང་། །ཕྲིན་ལས་རྨད་བྱུང་ཀུན་གྲགས་པ། །གཞན་ནས་ཡོད་འོང་མ་ཡིན་ཏེ། །རང་བྱུང་ཡེ་ཤེས་གནས་མེད་ཡིན། །དེ་བས་ངོ་མཚར་ཆོ་འཕྲུལ་ཆོས། །གཞན་ལས་ཡོད་ཐོབ་མ་ཡིན་ཕྱིར། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་སྣང་། །མུན་སྣང་འགྱུར་རྩི་མ་གི་ཏ། །ཅི་བཞིན་མ་སྤངས་དེ་ཉིད་འགྱུར། །འཁོར་བ་མ་སྤངས་རྣམ་པར་དག །མྱ་ངན་མི་འདའ་ཡེ་ནས་གནས། །འགྲོ་དང་གནས་པར་བྱ་བ་མིན། །རྟོག་པ་ཐམས་ཅད་ཡེ་ཤེས་ཚོགས། །མཉམ་དང་མི་མཉམ་མཉམ་དང་མཉམ། །བྱ་དང་མི་བྱ་བྱ་མེད་བྱས། །གྲུབ་དང་མ་གྲུབ་ཐམས་ཅད་གྲུབ། །དེ་ཕྱིར་རིགས་འཛིན་ཐ་སྙད་བྲལ། །མཐར་ཕྱིན་པའི་ལམ་རྣམས་བསྟན་པའི་ལེའུ་སྟེ་བརྒྱད་པའོ།། །།རང་བཞིན་ཉིད་དུ་མངོན་རྫོགས་པའི། །རྡོ་རྗེ་འཛིན་པ་ཉིད་ལ་མོས། །སྲིད་པ་རིམ་དང་རྫོགས་ཚུལ་གྱིས། །མངོན་བྱེད་དོན་ཡོད་བཤད་པར་བྱ། །མཚན་ཉིད་ཐ་མའི་ཐ་མ་ནི། །ངོ་བོ་ཚུལ་དང་ཁྱད་པར་གྱིས། །ལུས་གསུམ་མངོན་དུ་སྣང་བ་རྣམས། །ཇི་ལྟ་བ་བཞིན་ཤེས་པར་བྱ། །ལུས་གསུམ་སྔ་མ་བརྗོད་བྱ་བ། །སྐུ་དང་གསུང་དང་ཐུགས་ཉིད་དུ། །ཡོན་ཏན་ཕྲིན་ལས་རྨད་བྱུང་བ། །ལྔ་ལའང་ལྔ་ཉིད་ངོ་བོར་གནས། །ཨེ་མ་ཧོ་ཡང་དག་རྫོགས་སངས་རྒྱས། །རྒྱལ་བའི་རྒྱལ་བ་ལྷ་ཡི་ལྷ། །འཕགས་པའི་འཕགས་པ་ཀུན་ཏུ་བཟང་། །དེ་བཞིན་གཤེགས་ལས་དེ་བཞིན་གཤེགས། །བདེ་གཤེགས་ལས་ཀྱང་བདེ་གཤེགས་པ། །རིན་ཆེན་ནོར་བུ་བཞིན་དུ་བཞུགས། །ཆོས་དྲུག་ནོར་བུས་མཚོན་པ་ནི། །གཅིག་དང་དུ་མ་ཀུན་བྲལ་ལྡན། །དེ་དེ་རིགས་དངོས་རིགས་བྲལ་བ། །ཉི་ཤུ་ལྔ་ལྡན་ཀུན་ངོ་བོར། །མོས་བཞིན་དེ་རིགས་མཐུན་སྣང་ལ། །ཡང་དག་ཉིད་དུ་འདི་ཞེས་མེད། །ལྔ་ཉིད་ལྔ་ལྔར་ལྡན་སྣང་བ། །རིགས་བདག་ཡང་དག་སངས་རྒྱས་པས། །ཐ་མའི་ཐ་མ་ཞེན་བྲལ་བའི། །ཡེ་ཤེས་འགྲོ་འོང་མེད་ཀུན་ཁྱབ། །གཉིས་སུ་མེད་པ་དེ་བཞིན་ཉིད། །ངང་ཉིད་འགྲོ་འོང་མེད་པར་གཤེགས། །དེ་བཞིན་བདེ་ཆེན་ངང་ཉིད་དུ། །ཟུག་རྔུ་ཀུན་བྲལ་གཉིས་ཕྱིར་གཤེགས། །སངས་རྒྱས་སེམས་ཅན་སེམས་ལ་སོན། །དབང་ཕྱུག་ཆེན་པོའི་སྐུར་བཞུགས་པ། །གསང་བའི་དབང་པོ་འདུ་འབྲལ་མེད། །དངོས་པོ་གཉིས་ལ་བདེ་ལོངས་སྤྱོད། །དེ་ཉིད་ཆ་རེ་བརྗོད་པ་ནི། །འཇིག་རྟེན་འདས་དང་མ་འདས་ཀུན། །དུས་གསུམ་ཆོས་ཀུན་གཅིག་པ་ཡི། །རྒྱལ་བ་ཉིད་ཕྱིར་སྣ་ཚོགས་ཆོས། །སྣང་ལ་རང་བཞིན་མེད་པའི་ཕྱིར། །དེ་ཉིད་དྷརྨ་ཀཱ་ཡར་གནས། །ཐམས་ཅད་རང་རིག་མངོན་སུམ་སྣང་། །ཞེན་མཐའ་ཀུན་བྲལ་ཀུན་ཆུབ་པའི། །རང་བྱུང་ཡེ་ཤེས་ཆེན་པོ་ནི། །ཀུན་གཞི་འདུལ་སྣང་ཕྱིར་སྐུ་མཆོག །འདོད་ཁམས་མཐའ་ན་རྫོགས་ཀྱི་བར། །སྡུག་བསྔལ་ཀུན་དང་འདོད་བསམ་སྙོམས། །འགོག་ཞིང་བཏང་སྙོམས་བདེ་ཆེན་སོགས། །ཡུལ་མེད་ཀུན་རོལ་ལོངས་སྤྱོད་ཆེ། །རྟ་བདུན་རི་བོང་ཅན་ཉིད་ཀྱི། །གཞལ་ཡས་ཁང་ལས་མ་གཡོས་བཞིན། །ཀུན་ཏུ་སྣང་བ་ཐ་དད་ལྟར། །འགྲོ་འོང་མེད་འདུལ་ཀུན་སྤྲུལ་མཆོག །ཅི་ལྟར་མཁའ་ལ་འཇིག་མེད་ལྟར། །མི་རྟོག་ཀུན་དངོས་རྟག་ཆེན་པོ། །རྡོ་རྗེའི་སྐུ་མཆོག་སྐྱེ་འཇིག་མེད། །ལྔ་པ་ཉིད་དུ་རབ་ཏུ་གྲགས། །སོ་སོར་འདུལ་བའི་ཡེ་ཤེས་འཁོར། །རྒྱ་མཚོའི་ཚོགས་དང་ཤེས་བྱ་ཡི། །སྒྲིབ་པ་མཐའ་སྤང་སེམས་དཔའ་ཆེའི། །རྒྱལ་པོ་ལྔ་སོགས་རྒྱུད་སྦྱངས་ནས། །མོས་སྤྱོད་དང་པོའམ་དབང་བསྒྱུར་རིག །རྡོ་རྗེའི་ཚོགས་མཐོང་ཕྱིར་མིང་འགྲུབ། །དེ་ལ་དེ་ཡི་དགོངས་བཤད་པ། །བརྗོད་དང་བརྗོད་འདྲའི་ཕྱིར་ངེས་པ། །ཡི་གེ་མེད་པ་འཇལ་བ་བཞི། །ཡི་གེ་དྲུག་ཅུ་དྲུག་གསུམ་རྒྱས། །མཇལ་པ་ལྔ་ཉིད་ཚུལ་གོ་བ། །སོ་སོ་ཉིད་དང་གསང་བདག་གིས། །སྙན་མ་ལྔ་ལྡན་ཕྱིར་ཐོས་པས། །གསང་བའི་རྒྱུད་བཤད་ཐོས་ཞེས་གསུངས། །རང་བཞིན་འབྲེལ་དང་དབང་དང་བས། །དྭངས་པའི་ཆུ་དང་ཉི་ཟླ་བཞིན། །མ་སྐྱེས་དོན་གྱི་གསུང་མཆོག་གིས། །སྨྲ་བརྗོད་མེད་པར་རྣམ་སྣང་མཛད། །རིག་པའི་ཡེ་ཤེས་མིང་ལྔ་པས། །དེ་བཞིན་འབྲེལ་བའི་བྱིན་རླབས་ཀྱིས། །རང་བཞིན་གསང་བའི་རྒྱུད་རྣམས་ཀུན། །ཉི་མ་ལྟ་བུར་གསལ་བར་སྣང་། །མེ་ལོང་ལྟ་བུར་ཆོས་བརྒྱད་ཀྱིས། །མཚན་པའི་དབང་ཕྱུག་སྐུ་མཐོང་བས། །བྱང་ཆུབ་སེམས་དཔའ་སེམས་དཔའ་ཆེ། །རྒྱུད་ལ་རྡོ་རྗེ་དོན་སྣང་བྱེད། །གྲོལ་ཐར་ལམ་དང་འཁོར་བའི་སྒྲ། །དྲུག་གི་རྩ་བ་ཡན་ལག་ཚུལ། །ཚངས་པའི་ངག་ལྟར་ལས་ཅན་ལ། །སྣང་བ་ཤ་ཡི་རྣ་བས་ཐོས། །ཅི་ལྟར་འདུལ་དང་འདུལ་སྣང་བའི། །གསུང་རྣམས་དངོས་ལ་སྒྲས་རྐྱེན་པའི། །སྒྲ་ལྟར་གྲགས་སྟོང་དབྱེར་མེད་པར། །མཐོང་ཐོས་བྱེད་པའང་དེ་ཉིད་མཐུའོ། །དངོས་པོ་གཉིས་ཆོས་ཡན་ལག་བཅས། །སེམས་ཆེན་ཕྱིར་ན་སྟོང་ཆེན་པའི། །ཡེ་ཤེས་ཟུག་རྔུ་ལྡན་བྲལ་བའི། །བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་སེམས་གསལ་སྟོང་། །ཆོས་ཀྱི་རང་མཚན་དབྱེར་མེད་ཀུན། །ཡུལ་མེད་མེ་ལོང་ལྟར་གསལ་བའི། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཆེན་པོ་ལྟ་བུར་ཐམས་ཅད་ལ། །མི་འབྱེད་བླང་དོར་མེད་མཉམ་ཉིད། །མཉམ་པ་ཉིད་ལས་མི་གཡོ་བ། །མཉམ་པ་ཆེན་པོའི་མཆོག་གི་ཐུགས། །ཐུགས་རྗེ་ཆེན་པོས་འབྲེལ་བ་དང་། །ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་སྒྲོལ་བའི་ཐུགས་རྗེ་ཡིན། །ཆོས་དང་ཆོས་ཅན་ཀུན་བྲལ་བས། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ། །ཕྱོགས་དུས་མ་ལུས་མི་ལུས་པ། །རང་རྒྱུད་མེད་པར་རིག་སྣང་བས། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་མ་ལུས་སངས་རྒྱས་ཞིང་། །ལྷུན་རྫོགས་རིག་པ་རང་སྣང་བའི། །གཞལ་ཡས་ཁང་དང་གཟུང་འཛིན་དང་། །བྲལ་བའི་རང་བཞིན་རྟེན་པ་དང་། །བརྟེན་བཅས་མེད་པ་ཀུན་གྱི་གནས། །མ་སྤངས་ལྷུན་གྱིས་རྫོགས་པའི་ཕྱིར། །སྣ་ཚོགས་དཀྱིལ་འཁོར་ཆེན་པོ་རྒྱན། །རང་བཞིན་མ་སྒྲིབ་གསལ་བའི་ཕྱིར། །སྣ་ཚོགས་འོད་ཟེར་ཕྱོགས་བཅུར་གསལ། །སྟོབས་སོགས་འབྲས་བུ་ཀུན་རྫོགས་ཕྱིར། །གདན་ལྔའི་བྱེ་བྲག་རང་སྣང་བའོ། །འདུལ་བའི་བྱ་བ་ཐ་དད་པ། །ཞི་དང་ཁྲོ་དང་མི་མོས་ཉམས། །བཞི་ཕྱིར་རྣམ་བཞི་རོལ་པ་རྣམས། །གང་ལ་འཚམས་པར་འདུལ་བར་མཛད། །རྣམ་བཞིའི་བྱེ་བྲག་ཐ་དད་པ། །རེ་རེའང་ལྔ་ལྔ་ཚུལ་གྱིས་སྣང་། །དེ་རིགས་བཞི་ཡི་ཆ་འཛིན་པ། །ལས་ཀྱི་རིགས་ལ་ལྷུན་གྱིས་གྲུབ། །རྣམ་པ་བཞི་ཡིས་འདུལ་མཛད་པ། །ཕྱོགས་ཀྱིས་འདུལ་བའི་རིགས་མ་ཡིན། །དེ་ལྟར་སྦྱང་མཐའ་སྐྱེས་བུ་ས། །རིགས་ལྔ་ཆ་རེ་འཛིན་བྱེད་ཀྱང་། །གཅིག་ཤོས་སངས་རྒྱས་ཀུན་ངོ་བོ། །ཉིད་དུ་སྔ་ཕྱི་དྲང་བ་ཙམ། །སངས་རྒྱས་སངས་རྒྱས་ཞེས་བརྗོད་པའོ། །ཚུལ་ནི་སྨྲ་བསམ་བརྗོད་ལས་འདས། །དེ་དོན་ཕྱོགས་ཙམ་བརྗོད་བྱ་བ། །དྲང་དོན་སྔ་ཕྱིར་སངས་རྒྱས་པ། །དོན་དམ་གཅིག་པུར་མ་ཡིན་ཕྱིར། །ཆུ་ལ་ཆུ་ལྟར་གཅིག་པ་མེད། །གཅིས་ཤོས་བདེན་པར་མ་ཡིན་པས། །སོ་སོ་ཐ་དད་ཆ་རིགས་མོད། །བདེན་པ་གཉིས་མེད་དབང་འགྱུར་པ། །བདག་དང་གཞན་གྱི་གཉིས་མེད་དེ། །སོ་སོར་མེད་ཕྱིར་དེར་དོན་པ། །མཐའ་རྣམས་ཀུན་བྲལ་ཀུན་ལྡན་པ། །རང་སྣང་ཞེན་བྲལ་མངོན་བྱས་པ། །མི་བརྗོད་འདི་འདྲར་གནས་པར་དཀའ། །ངོ་བོ་གཅིག་ལ་རྒྱུད་འདྲེས་མིན། །ཤིང་གི་མེ་དཔུང་ལྟར་བརྗོད་པ། །དྲང་བ་ཙམ་སྟེ་དེ་ཉིད་མིན། །ཆུ་ལ་ཆུ་ལྟར་འདོད་པའང་དེའོ། །བདེན་པའི་ཚུལ་གྱིས་སྐྱོན་བརྗོད་པས། །དག་པའི་ཡེ་ཤེས་གནས་ཡིན་པར། །ཏནྟྲ་ཉིད་ལས་གྲགས་པ་དང་། །བདེ་གཤེགས་མི་གནས་མཉམ་པ་ཡི། །ངང་དུ་བྱོན་གསུང་བརྗོད་པ་ཡང་། །མཉམ་པ་གསུམ་པ་ཡིན་པའི་ཕྱིར། །ངེས་པར་རྒྱུད་འདྲེས་མ་འདྲེས་པའི། །ཐ་སྙད་བྲལ་བའི་ཚུལ་དུ་གནས། །ཐུན་མོང་མིན་པའི་རྒྱལ་མིང་གྲངས། །བདེ་གཤེགས་དེ་བཞིན་གཤེགས་པ་དང་། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་མཐའ་ཡས་ཀྱང་། །ལུས་གསུམ་གྲངས་མིན་ཁྱད་པར་ཅན། །མདོ་རུ་བརྗོད་པར་ཆུབ་པར་གྱིས། །ལྔ་དང་ལྔ་ལྔར་ལྷུན་གྲུབ་པའི། །རྒྱལ་བ་གསུམ་རྫོགས་སོ་སོ་ཡི། །གྲུབ་མཐའ་ས་ཡི་སངས་རྒྱས་ལ། །གྲངས་རྫོགས་ངོ་བོ་བྱིན་རླབས་ལས། །སྣང་དང་དོན་བྱེད་ཆེ་ཆུང་གིས། །དཔགས་པའི་ངོ་བོ་ཉིད་ཀྱིས་གསལ། །དེ་ཚུལ་ས་བཞི་རྒྱལ་བ་དག །རྒྱུད་གཅིག་འདྲེས་དང་གྲོལ་སྨྲ་བ། །འདི་དྲང་ཙམ་ཡིན་བཤད་ཡིན་ཕྱིར། །རྒྱུད་ཀྱི་ཁྱད་པར་བསམ་ལས་འདས། །མིང་གྲངས་ཐེག་ཆེན་དམན་པ་བས། །ཐུན་མོང་ཚོགས་ཀྱིས་བདེར་གཤེགས་ཤིང་། །དེ་བཞིན་ཉིད་དུ་གཤེགས་པའང་། །དུས་ཀྱི་དབང་ཕྱིར་སྔ་མ་བཞིན། །གཤེགས་པ་ཉིད་དང་གསང་བ་པའང་། །བྱ་བའི་ལུགས་ཀྱིས་ཤེས་རབ་དང་། །ཆོ་གའི་རྣལ་འབྱོར་གྲངས་རྫོགས་པས། །འབྲས་བུ་ལམ་བྱས་བདེར་གཤེགས་པའི། །རྡོ་རྗེ་འཛིན་པར་དེ་བཞིན་གཤེགས། །ཡང་ན་བྱ་རྒོད་འདབ་ལོགས་ཀྱང་། །དགོན་ཕུག་བྱེ་མ་མདའ་སྣ་རུ། །ས་རི་དབང་བསྐུར་ཅི་བཞིན་ནམ། །ཝཱ་ར་ཎཱ་སཱིའི་བསིལ་ཁང་དུ། །དམ་པའི་རིགས་ཅན་དབང་བསྐུར་ནས། །རྡོ་རྗེ་འཛིན་ཐོབ་ཅི་བཞིན་ནོ། །ཐུབ་པའི་དབང་བོ་དེ་ཅི་བཞིན། །གཤེགས་བའི་རྒྱུ་དང་བྱ་བ་དང་། །གཉིས་ཀའི་རྒྱུད་ལས་གྲགས་བཞིན་ནོ། །རྣལ་འབྱོར་གཞུང་གིས་དོན་བསྒྲུབ་ཉིད། །ནཻ་རཉྫ་ནའི་འགྲམ་ལོགས་སུ། །ཕྱོགས་བཅུ་སྤྲུལ་པའི་ལོངས་སྤྱོད་སྐུས། །བྱང་ཆུབ་ལྔ་སྟོབས་དབང་བསྐུར་བས། །འོག་མིན་ཉིད་དུ་དོན་གྲུབ་སྟེ། །སྤྲུལ་པ་དཀའ་ཐུབ་ཁོག་པ་ནས། །ཡེ་ཤེས་སྣང་མཛད་ལུས་སུ་གཤེགས། །རི་རབ་རྩེ་མོར་འཁོར་ལོ་བསྐོར། །དེ་ཡང་རྟོག་པའི་གཟུགས་སྐུ་ཡིན། །ཐབས་དང་ཤེས་རབ་ལམ་ཉིད་ཀྱིས། །འགྲོ་འོང་མེད་པར་བདེར་གཤེགས་ཏེ། །ཅི་བཞིན་ལྷུན་གྲུབ་ངང་སོན་པར། །ཚུལ་དང་ངོ་བོས་ཁྱད་པར་ཆེ། །དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུ་རྒྱལ་བ་སྤྲིན་བཞིན་དུ། །འདུས་པ་གསང་བའི་ལོངས་སྤྱོད་ཀྱིས། །སྲོད་དང་ཐོ་རངས་དུས་ཉིད་དུ། །ཉི་ཟླ་བཟའ་བའི་དབང་བྱིན་ཅིང་། །རོལ་པའི་ཀ་ར་བསྟབ་པ་ཡིས། །ཡེ་ཤེས་མཚན་རྫོགས་དབང་ཐོབ་ནས། །དེ་བཞིན་དེ་བཞིན་གཤེགས་པའོ། །དེ་ཕྱིར་ཐུན་མོང་རྣམ་གསུམ་ལས། །བྱ་བ་བཞི་དང་ཆུབ་པ་བཞི། །བདེན་པར་དེ་བཞིན་གཤེགས་པ་བརྒྱད། །གྲངས་དང་ངོ་བོ་ཙམ་གྱིས་འཕགས། །དེ་ནས་རྒྱལ་བ་བཅོམ་ལྡན་འདས། །ཐུན་མོང་མཆོག་ལུགས་སྔ་མ་བཞིན། །སོ་སོ་ཐབས་དང་ཤེས་རབ་ཀྱིས། །རྡོ་རྗེ་ལྟ་བུ་བཞི་བསྐྱེད་པས། །བདུད་བཞི་ངེས་བཅོམ་མྱ་ངན་བཞི། །འདས་ཤིང་མཐའ་བཞི་འདས་པ་ལ། །མི་མཐུན་གཞུང་གིས་སངས་རྒྱས་པ། །ལྟ་སྤྱོད་ཏིང་འཛིན་ལམ་རིམ་བཞིན། །གྲུབ་པའི་མཐའ་ལས་ཁྱད་པར་བ། །ལྟ་བའི་སྒྲིབ་པས་ཕྱེ་བ་ཡིན། །དེས་ན་དགྱེས་པའི་ལོངས་སྤྱོད་ཀྱང་། །མདོ་དང་བྱ་བ་རྣལ་འབྱོར་གཉིས། །རྒྱུད་ལས་ཅི་ལྟར་གསུངས་པ་བཞིན། །གང་གིས་དགྱེས་ཆེན་ཡིན་ཚོད་མིན། །དེ་ཕྱིར་དགྱེས་པའི་རིམ་ཡོད་པས། །ས་ཡི་སངས་རྒྱས་རིམ་ཡོད་ཕྱིར། །མིང་གྲོང་ཡོན་ཏན་ཆ་ཡིན་ཏེ། །ངོ་བོ་ཉིད་ཀྱིས་རྣམ་པར་འཕགས། །ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཀུན་ཏུ་འོད། །རྡོར་འཛིན་སྟུག་པོ་བཀོད་པར་བསྟན། །མཐར་ཐུགས་ས་གསུམ་ཆ་ལས་བརྗོད། །དེ་ཕྱིར་སྐས་གདངས་ལྟ་བུ་སྟེ། །ཐབས་མཁས་འདི་ཡིས་གཞན་པའི་ཕྱིར། །ཐབས་ལ་བརྟེན་ནས་མོས་བཅུག་ཅིང་། །བསྒྱུར་བས་འདི་འགྲུབ་རང་ཐབས་ཀྱིས། །རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲུལ་པའོ། །མཐར་ཕྱིན་པའི་འབྲས་བུ་བསྟན་པའི་ལེའུ་སྟེ་དགུ་པའོ།། །།འགྲོ་བ་ལམ་ལོག་ལམ་སྟོར་བ། །ལྔ་དང་ལྔ་རྣམས་བཀྲི་བའི་ཕྱིར། མི་གཉིས་ལམ་ཆོག་འདི་བགྱིས་པའི། །ངལ་བའི་དགེ་རྩས་ཀུན་གྲོལ་ཤོག །བྱང་ཆུབ་ཞོར་བྱེད་ཁེ་གྲགས་གཉེར། །བཅུད་ཆེན་འཛག་ཅི་གཞོག་ངོམ་ཅན། །གཙུག་རྒྱལ་སྒེག་མོ་འཇག་སྐྱེལ་དང་། །ནལ་བྱ་ལྟ་བུའི་ལྐོག་གཡེམ་སོགས། །ཚུལ་བསྲུང་དམ་ལ་མི་གནས་དང་། །གསང་བའི་གཞུང་ལ་སྲན་མི་ཚུགས། །གཞུག་མང་བསྒྲུབ་ལ་ཡིད་ཆེས་དཀའ། །བླ་མ་སྤྱི་བོས་མི་ལེན་ཅིང་། །ཞེ་ནས་སྐུར་ཞིང་ཡོད་ལའང་སྐུར། །སྣོད་མེད་རྣམས་ལ་མ་འཕྲད་ཅིག །མང་ཡུལ་ཁྲི་བབས་སུ་གཉགས་ཛྙཱ་ན་ཀུ་མཱ་རས་བསྒྱུར་བའོ། །ལམ་རྣམས་པར་བཀོད་པ་སངས་རྒྱས་གསང་བའི་མན་ངག་རྫོགས་སོ།། །།